Kale ku tshibangidilu Nzambi wakafuka diulu ne buloba. Buloba kabuakadi busunguluka, buakadi butuhu, midima yakadihu, Nyuma wa Nzambi wakadi unyunguluka ha mutu ha mai. Nzambi wakamba ne, Munya wikale, ne munya wakikala. Nzambi wakamona munya ne Mmuimpe Nzambi wakatahulula munya ne midima. Nzambi wakidika munya ne, Munya, wakidika mîdima ne Butuku Dinda ne dilolo biakadi dituku dia kumudilu. Nzambi wakamba ne, Mulu muikale hankatshi ha mai a ha buloba ne mai a mu diulu. Nzambi wakafuka mulu, wakatahulula mai a ha buloba ne mai a mulu Bualu buakenjibua Nzambi wa kuhita mulu ne, Diulu, dilolo ne dinda biakadi dituku dibidi. Nzambi wakamba ne Mai adi muinshi mua diulu asangile kaba kamue, buloba bume bumueneke, bualu ebu buakenjibua: Nzambi wakidika buloba bûme ne, Buloba Mai masangile nunku yeye wakidika ne, Mai manene Nzambi wakabi mona ne, Mbimpe. Nzambi wakamba ne, Buloba bumeneshe bimenyi bionso, midioko idi yela ntete ne mitshi idi ikuama mamuma adi ne ntete yai, bu mudi mushindu wai. Bualu buakenjibua Buloba buakamenesha bimenyi, midioko idi yela ntete, bu mudi mishindu yai, ne mitshi idi ikuama mamuma adi ne ntete yai, bu mudi mushindu wai. Nzambi wakabimona ne, Mbimpe. Dilolo ne dinda biakadi dituku disatu. Nzambi wakamba ne, Bintu bidi bikenka bikale mulu mua diulu bua kutahulula munya kudi butuku, bikale bua bimanyinu ne bua bikondo ne bua matuku ne bua bidimu, bikale bu minda mulu mua diulu bua kutokeshayi ha buloba, bualu buakenjibua. Nzambi Wakenza munda minene ibidi, muinda mutambe bunene bua kukokesha mu munya ne muinda mukese bua kukokesha butuku, yeye Wakenza mitoto kabidi. Nzambi wakabiteka mulu mua diulu bua kutokeshayi buloba, ne bua kukokeshayi mu munya ne butuku, ne bua kutahululayi munya kudi midima, Nzambi wakabimona ne, Mbimpe. Dilolo ne dinda biakadi dituku dinai. Nzambi wakamba ne, Mai avudishe bifukibua bia bungi bidi ne muoyo, ne nyunyu myunge mulu Nzambi wakafuka bintu binene bia mu mai ne bintu bionso bidi ne muoyo bia mu mai bu mudi mishindu yabi, ne nyunyu yonso bu mudi mushindu wai Nzambi wakabimona ne, Mbimpe Nzambi wakabisankisha ne, Nulelangane, nulue bia bungi, nûshe mai manene tente, nyunyu ikumbane ha buloba Dilolo ne dinda biakadi dituku ditanu. Nzambi wakamba ne, Buloba buvuishe bifukibua bidi ne muoyo bu mudi mishindu yabi, ya bimuna ne bintu bidi bidikoka hanshi, ne nyama yonso ya ha buloba bu mudi mishindu yai, bualu buakenjibua. Nzambi Wakenza nyama ya ha buloba bu mudi mishindu yai, ne bimuna bu mudi mishindu yabi, ne tshintu tshionso tshidi tshidikoka hanshi bu mudi mushindu watshi. Nzambi wakabimona ne, Mbimpe. Nzambi wakamba ne, Tuenze muntu ne tshifuanyikishi tshietu mufuanangane nʼetu, balue bakokeshi ba minyinyi ya mu mai manene ne ba nyunyu ya mulu, ne ba bimuna, ne ba buloba buonso, ne ba tshintu tshionso tshidi tshidikoka hanshi. Nzambi wakafuka muntu ne tshifuanyikishi tshiandi, wakamufuka ne tshifuanyikishi tshia Nzambi, wakabafuka balume ne bakashi. Nzambi wakabisankisha, wakabambila ne, Nulelangane, nukumbane ba bungi, nûshe buloba tente, nubukokeshe, nuikale ne bukokeshi ku mutu kua minyinyi ya mu mai, ne nyunyu ya mulu, ne tshintu tshionso tshidi ne muoyo tshidi tshiendakana ha buloba. Nzambi wakamba ne, Monai, nakanuha midioko yonso ya ha buloba idi yela ntete, ne mitshi yonso idi ikuama mamuma adi ne ntete munda, bua kuikalabi bia kudia bienu. Nakufila midioko yonso bu bia kudia kudi nyama yonso ya ha buloba ne nyunyu ya mulu ne tshintu tshionso tshidi tshidikoka hanshi, tshionso tshidi ne muoyo; bualu buakenjibua. Nzambi wakamona bintu bionso biakenzeye ne biakadi bimpe be! Dilolo ne dinda biakadi dituku disambombo. Diulu ne buloba ne bintu bionso biakashikishibua, buonso buabi. Mu dituku dia muanda mutekete Nzambi wakadi mumane kushikisha mudimu wandi wakenzeye, yeye wakikisha dituku dia muanda mutekete ku mudimu wonso wakenzeye Nzambi wakavudishila dituku dia muanda mutekete disanka, wakadijidila, bualu bua yeye wakikisha dituku diadia ku mudimu wandi wonso wa kufuka ne kuenza. Eku nkulondolola kua malu a diulu ne a buloba hakafukibuabi Mu dituku diakenza Yehowa Nzambi buloba ne diulu, midioko ya mu madimi kayakanza kudiunda ha buloba ne mashinde kâkanza kutoloka, bualu bua Yehowa Nzambi kakanza kulokesha nvula ha buloba, ne kakuakadi muntu bua kuihileye buloba, kadi dibungi diakabanda ha buloba, ne tshitelele tshiakadi ha buloba buonso. Yehowa Nzambi wakafuka mulume ne dinfuenkenya dia buloba, wakela muhuya wa muoyo mu diulu diandi, ne mulume wakalua ne muoyo. Yehowa Nzambi wakakuma bintu mu budimi ku esete, mu Edene, wakatekamu mulume wakafukeye. Yehowa Nzambi wakamenesha mitshi yonso idi buimpe ku mesu ne idi mimpe bua kudia mu buloba, mutshi wa muoyo kabidi wakadi munkatshi mua budimi, ne mutshi wa lungenyi lua kujingulula malu mimpe ne malu mabi. Musulu wa mai wakaluhuka mu Edene bua kumiamina midioko mai, wakahanduluka maboko anai. Dina dia diboko dia kumudilu didi Pishona, didi dinyunguluka buloba buonso bua Hawila, kudi or, or wa mu buloba abu udi muimpe, ne mabue a mushinga mukole a bdelhum ne a onyx adiku. Dina dia diboko dibidi didi Gihona, didi dinyunguluka buloba buonso bua Atiopa. Dina dia diboko disatu didi Hidekela, didi dinyunguluka ku esete kua buloba bua Ashû. Dina dia diboko dinai didi Pelata. Yehowa Nzambi wakangata mulume, wakamuteka mu budimi bua Edene bua kubuihileye ne bua kubulama. Yehowa Nzambi wakamuelela mukenji ne, Udi mua kudia mamuma a mitshi yonso ya mu budimi, bu mûdi musue, kadi mamuma a mutshi wa lungenyi lua kujingulula malu mimpe ne malu mabi kuadi nansha, bualu bua mu dituku diudi wadia wewe neufue bulelela. Yehowa Nzambi wakamba ne, Kambimpe bua mulume ashale nkayandi nansha, nemmufukile mukuatshishi bu mudiye. Yehowa Nzambi wakafuka nyama yonso ya mu madimi ne nyunyu yonso ya mulu ne buloba, wakalua nʼai kudi mulume bua kutangila bu muakadiye mua kuyidika, dina dionso diakidikeye tshifukibue tshionso diakadi dina dia tshi. Mulume wakidika bimuna bionso ne nyunyu yonso ya mu diulu ne bimuna bionso bia mu madimi mena abi, kadi mulume kakadi ne mukuatshishi wa bu muakadiye nansha. Yehowa Nzambi wakaladika mulume tulu tukole, ne yeye wakalala tulu, wakangata lubale luandi lumue, Wakabikila musunyi kabidi, ne lubale luakangata Yehowa Nzambi kudi mulume, yeye Wakenza nʼalu mukashi, wakalua nʼandi kudi mulume. Mulume wakamba ne, Eu udi mufuba wa mifuba yanyi ne musunyi wa misunyi yanyi, nebamuedike ne, Mukashi, bualu bua bakamuangata kudi mulume. Bua bualu ebu mulume neashiye tatuʼandi ne mamu andi, nealamate mukashi wandi, bubidi buabo nebikale mubidi umue. Bubidi buabo, mulume ne mukashi, bakadi butaka, kabakadi ne bundu. Nyoka wakatamba nyama yonso yakafuka Yehowa Nzambi bidimu. Nyoka wakakonka mukashi ne, Nzambi wakamba ne, Kanudi mamuma a nu tshi yonso idi mu budimi, anyi? Mukashi wakambila nyoka ne, Tudi mua kudia mamuma a mitshi yonso idi mu budimi, kadi mamuma a mutshi udi munkatshi mua budimi, Nzambi wakamba ne, Kanuadi, kanualengi, bua kanufu. Nyoka wakambila mukashi ne, Kanuena nufua bulelela, bualu bua Nzambi udi mu manye ne, Hanuadia mamuma au, mesu enu neabuluke, nenuikale bu Nzambi, nenumanye malu mimpe ne malu mabi. Hakamona mukashi ne, Mutshi au udi muimpe wa kudia ne udi muimpe ku mesu ne udi mua kuha muntu lungenyi, yeye wakangata dimuma, wakadia, wakahesha mulume wandi kabidi, ne yeye wakadia. Mesu a bubidi buabo akabuluka, bakamanya ne, Tudi butaka, bakatela mabeshi a nfigi, bakadienzela mbondia. Bakunvua di dia Yehowa Nzambi wendakana mu budimi dilolo, mulume ne mukashi bakasokoma munkatshi mua mitshi ya mu budimi ku mesu kua Yehowa Nzambi. Yehowa Nzambi Wakabikila mulume, wakamukonka ne, Wewe udi kudi kunyi? Yeye wakamba ne, Nakunvua di diebe mu budimi, nakutshina, bualu bua nakadi butaka, nakusokoma. Yeye wakamuambila ne, Wakakuambila ne, Udi butaka nganyi? Wakudia mamuma a mutshi unakukuambila ne, Kudi, anyi? Mulume wakamba ne, Mukashi uwakumpa bua kuikala nʼanyi wakumpa dimuma dia mutshi, nakudia. Yehowa Nzambi wakambila mukashi ne, Bualu ebu buwakuenza budi tshinyi? Mukashi wakamba ne, Nyoka wakundinga, nakudia. Yehowa Nzambi wakambila nyoka ne, Bualu bua wewe wakuenza nunku, ndi nkuela mulau, mulau webe neutambe wa nyama yonso ya mu madimi, wewe neukoke difu diebe hanshi, neudie dinfuenkenya dia buloba matuku ebe onso. Nenteke lukuna hankatshi hebe ne mukashi, ne hankatshi ha bana bebe ne bana bandi, muana wa mukashi neakukume ku mutu kuebe, ne wewe neumusume ku tshikankanyi-tshiandi. Yeye wakambila mukashi ne, Nentambe kuvudisha didinyenga diebe ne kuimitshishibua kuebe neulele bana ne didinyenga, mutshima webe newikale kudi mulume webe, yeye neikale ne bukokeshi ku mutu kuebe. Wakambila Adama ne, Bualu bua wewe wakuteleja di dia mukashi webe, wakudia mamuma a mutshi unakukuambila ne, Kuadi nansha, buloba buakedibua mulau bualu buebe, wewe neudie bidia biabu ne kanyinganyinga matuku ebe onso, buloba nebukumeneshile meba ne tusokola, neudie midioko ya mu budimi, neudie bidia ne luanga ha mpala hebe to ne hawahingana mu buloba kabidi, wewe wakumushibua mu buloba, wewe udi dinfuenkenya dia buloba, neuhingane mu dinfuenkenya dia buloba kabidi. Mulume wakidika mukashi wandi dina ne, Eva, bualu bua yeye udi muledi wa bonso badi ne muoyo. Yehowa Nzambi wakatelela Adama ne mukashi wandi bivualu bia biseba, wakabaluatshishabi. Yehowa Nzambi wakamba ne, Monai, mulume wakulua bu umue wetu, udi mumanye malu mimpe ne malu mabi, bua yeye kolodi tshianza tshiandi bua kuangateye mamuma a mutshi wa muoyo, wadia, wikala ne muoyo tshiendelele, Yehowa Nzambi wakamuihata mu budimi bua Edene, bua kuihileye buloba buakafumeye. Nunku, yeye wakihata mulume, wakateka bakeluba ku esete kua budimi bua Edene ne muele wa nvita wa kalua wakadi utshinguluka ku nseke yonso, bua kulamabo nshila wa ku mutshi wa muoyo. Adama wakamanyangana ne Eva, mukashi wandi, ne yeye wakimita difu, wakalela Kana, wakamba ne, Nakuangata muntu kudi Yehowa. Yeye wakalela muakunyʼandi Ebele kabidi Ebele wakadi mulami wa mikoko, kadi Kana wakadi tshidime. Dituku dikuabo Kana wakalua ne bintu biakamena mu buloba bu mulambu kudi Yehowa. Ebele kabidi wakalua ne ban a bute ba mikoko ne dianyi diai Yehowa wakitabusha Ebele ne mulambu wandi, kadi yeye wakahidia Kana ne mulambu wandi Kana wakadi ne tshiji, wakabungama Yehowa wakakonka Kana ne, Udi ne tshiji bua tshinyi? Udi ubungamina tshinyi? Biwenza bimpe, kuena ubanduluka, anyi? Kadi biwokala kuyi wenza bimpe, bualu bubi budi bualamina ku mbelu kuebe, mutshima wa bubi newikale kudi, kadi wewe ubukokeshe. Kana wakambila Ebele muakunyʼandi bualu ebu Hashishe hakadibo mu budimi, Kana wakabika ku mpala kua Ebele muakunyʼandi, wakamushiha. Yehowa wakakonka Kana ne, Muakunyʼebe Ebele udi kudi kunyi? Yeye wakamba ne, Tshiena mumanye, ndi mulami wa muakunyʼanyi, anyi? Yeye wakamukonka ne, Wewe wakuenza tshinyi? Muadi wa mashi a muakunyʼebe udi wela di kundi difume ha buloba. Katataka wewe wakuedibua mulau mufume ha buloba buakubulula mukana muabu bua kumina mashi a muakunyʼebe ku tshianza tshiebe, hawadima buloba, kabuena bukumeneshila bintu bimpe, wewe newikale munyemi ne muena tshiendenda ha buloba. Kana wakambila Yehowa ne, Dikenga dianyi didi dintamba bukole Mona, wewe wakungihata lelu ha buloba, nengikale musokome ku mesu kuebe, nengikale munyemi ne muena tshiendenda ha buloba, ne hashishe yonso wansangana neanshihe. Yehowa wakamuambila ne, Muntu yonso udi ushiha Kana, nebamusombuele misangu muanda mutekete Yehowa wakalekela Kana tshimanyinu bua wamusangana kamushihi. Kana wakumuka ku mesu kua Yehowa, wakashikama mu buloba bua Nodo, ku esete kua Edene. Kana wakamanyangana ne mukashi wandi, yeye wakimita difu, wakalela Hanoka, yeye wakasa musoko, wakidika musoko dina dia muanʼandi Hanoka. Hanoka wakalela Ilada ne Ilada wakalela Mehuyaela ne Mehuyaela Wakalela Metushaele ne Metushaele wakalela Lemeke. Lemeke wakabaka bakashi babidi, dina dia muadi diakadi Ada, ne dina dia tshilondi ne, Sila. Ada wakalela Yabala, yeye wakadi nkambua wa badi bashikama mu nsubu ya ntenta ne badi ne bimuna. Dina dia muakunyʼandi diakadi Yubala, yeye wakadi nkambua wa badi bimba bisanji ne nshiba. Sila wakalela Tubalakana, yeye wakadi mutudi wa tshiamu tshia mitaku ne tshiamu tshifike, muakunyʼandi mukashi wakadi Nama. Lemeke wakambila bakashi bandi ne, Ada ne Sila, telejai matshu, bakashi ba Lemeke, unvuai di dianyi, nakashiha muntu bualu bua yeye wakantaha mputa, nakashiha nsongalume bualu bua yeye wakantuta, biasombuelabo Kana nusangu muanda mutekete, bulelela, nebasombuele Lemeke misangu makumi muanda mutekete ne muanda mutekete. Adama wakamanyangana ne mukashi wandi kabidi, Wakalela muana mulume, wakamuidika dina ne, Sheta Wakamba ne, Nzambi wakumpa muana mukuabo mu muaba wa Ebele, bualu bua Kana wakamushiha. Sheta wakalela muana mulume kabidi, wakamuidika dina ne, Enosha Etshi ntshibangidilu tshiakabikilabo dina dia Yehowa. Eu udi mukanda wa ndelanganyi ya Adama Mu dituku diakafuka Nzambi bantu mu tshifuanyikishi tshiandi, wakabafuka mulume ne mukashi, wakabasankisha, wakabidika ne, Adama, mu dituku diakabafukeye. Adama wakikala ne muoyo bidimu lukama ne makumi asatu, wakalela muana mulume ne tshifuanyikishi tshiandi, mufuanangane nʼandi, wakamuidika dina ne, Sheta. Ku nyima kua kulela kua Sheta Adama wakikala ne muoyo bidimu nkama muanda mukulu, wakalela bana balume ne bana bakashi. Matuku onso a Adama akadi nkama tshitema ne makumi asatu, yeye wakafua biandi. Sheta wakikala ne muoyo bidimu lukama ne bitanu, wakalela Enosha Ku nyima kua kulela kua Enosha, Sheta wakikala ne muoyo bidimu nkama muanda mukulu ne muanda mutekete, wakalela bana balume ne bana bakashi Matuku onso a Sheta akadi bidimu nkama tshitema ne dikumi ne bibidi, yeye wakafua biandi. Enosha wakikala ne muoyo bidimu makumi tshitema, wakalela Kenana. Ku nyima kua kulela kua Kenana Enosha wakikala ne muoyo bidimu nkama muanda mukulu ne dikumi ne bitanu, wakalela bana balume ne bana bakashi. Matuku onso a Enosha akadi bidimu nkama tshitema ne bitanu, yeye wakafua biandi. Kenana wakikala ne muoyo bidimu makumi muanda mutekete, wakalela Mahalelela. Ku nyima kua kulela kua Mahalelela, Kenana wakikala ne muoyo bidimu nkama muanda mukulu ne makumi anai, wakalela bana balume ne bana bakashi. Matuku onso a Kenana akadi bidimu nkama tshitema ne dikumi, yeye wakafua biandi. Mahalelela wakikala ne muoyo bidimu makumi asambombo ne bitanu, wakalela Yalede. Ku nyima kua kulela kua Yalede, Mahalelela wakikala ne muoyo bidimu nkama muanda mukulu ne makumi asatu, wakalela bana balume ne bana bakashi. Matuku onso a Mahalelela akadi bidimu nkama muanda mukulu ne makumi tshitema ne bitanu, yeye wakafua biandi. Yalede wakikala ne muoyo bidimu lukama ne makumi asambombo ne bibidi, wakalela Hanoka. Ku nyima kua kulela kua Hanoka, Yalede wakikala ne muoyo bi dimu nkama muanda mukulu, wa kalela bana balume ne bana bakashi Matuku onso a Yalede akadi bidimu nkama tshitema ne makumi asambombo ne bibidi, yeye wakafua biandi. Hanoka wakikala ne muoyo bidimu makumi asambombo ne bitanu, wakalela Metushela Ku nyima kua kulela kua Metushela, Hanoka wakendakana ne Nzambi bidimu nkama isatu, wakalela bana balume ne bana bakashi. Matuku onso a Hanoka akadi bidimu nkama isatu ne makumi asambombo ne bitanu. Hanoka wakendakana ne Nzambi, ne yeye kakikalaku bualu bua Nzambi wakamuangata. Metushela wakikala ne muoyo bidimu lukama ne makumi muanda mukulu ne muanda mutekete, wakale la Lemeke. Ku nyima kua kulela kua Lemeke, Metushela wakikala ne muoyo bidimu nkama muanda mutekete ne makumi muanda mukulu ne bibidi, wakalela bana balume ne bana bakashi. Matuku onso a muoyo a Metushela akadi bidimu nkama tshitema ne makumi asambombo ne tshitema, yeye wakafua biandi. Lemeke wakikala ne muoyo bidimu lukama ne makumi muanda mukulu ne bibidi, wakalela muana mulume, wakamuidika dina ne, Noa, wakamba ne, Yeye neatusambe mu mudimu wa bianza bietu, bualu bua buloba buakedibua mulau kudi Yehowa. Ku nyima kua kulela kua Noa, Lemeke wakikala ne muoyo bidimu nkama itanu ne makumi tshitema ne bitanu, wakalela bana balume ne bana bakashi. Matuku onso a Lemeke akadi bidimu nkama muanda mutekete ne makumi muanda mutekete ne mua nda mutekete, yeye wakafua biandi. Hakadi Noa ne bidimu nkama itanu, Noa wakalela Shema, Hama ne Yafete. Hakabanga bantu kusangana ba bungi ha buloba ne hakalelabo bana bakashi, bansongalume ba bantu ba Nzambi bakamona bana bakashi ba bantu ba tshianana ne, Mbalengele, bakasungula bonso bakasuabo bu bakashi babo Yehowa wakamba ne, Nyuma wanyi kena utendekena bantu tshiendelele, bualu bua badi anu ba ha buloba, ne matuku abo neikale bidimu lukama ne makumi abidi. Mu matuku au bantu banene ba nfiondo bakadi ha buloba, ne hakaya bansongalume ba bantu ba Nzambi kudi bansongakashi ba bantu ba tshianana, bakalela nʼabo bana Bobo bakadi bantu banene ba kale ne ba butumbi. Yehowa wakamona ne, Mibi ya bantu idi idiundadiunda munkatshi mua ba ha buloba ne meji adibo bela mu mitshima yabo adi mabi matuku onso. Mutshima wa Yehowa wakanyingalala bualu bua yeye wakafuka bantu ha buloba, kanyinganyinga kakadi mu mutshima wandi. Yehowa wakamba ne, Nenjimishe bantu banakafuka ha buloba, ne bantu ne nyama ne bintu bidi bidikoka hanshi ne nyunyu ya mulu, bualu bua mutshima wanyi udi munyingalale bua nakabifuka. Kadi Noa wakasangana luse ku mesu kua Yehowa. Eku nkulondolola kua malu a Noa. Noa wakadi muntu muimpe, wakadi muakane tshishiki mu tshikondo tshiandi, Noa wakendakana ne Nzambi. Noa wakalela bana balume basatu, Shema, Hama ne Yafete. Bantu bakadi babi ku mesu kua Nzambi ne buloba buakadi bûle tente ne malu mabi. Nzambi wakatangila buloba ne monai, buakadi bunyanguka, bualu bua bantu bonso bakanyanguka mu bienzedi biabo bia ha buloba. Nzambi wakambila Noa ne, Kunshikidilu kua bantu bonso kuakufika ku mpala kuanyi bualu bua buloba budi bûle tente ne mayoyo bualu buabo, mona, nembajimishe ne buloba hamue. Enza biebe buatu ne mutshi wa gopher, enza nsubu mikese munda mua buatu ne laba kamonyi munda mua buatu ne ku nyima kuabu kabidi. Enza buatu nunku buludi buabu nebuikale coudées nkama isatu ne butshiama bua buatu nebuikale coudées makumi atanu ne bule buabu bua mulu nebikale coudées makumi asatu. Enza mutu wa buatu, ushiye muaba wa coudée umue hankatshi ha mutu ne buatu buashi ku nseke yonso, ushiye mushiku ku luseke lukuabo lua buatu, lungakasha nsubu isatu, nsubu wa kumudilu ne nsubu muibidi ha mutu ne nsubu muisatu ha mutu. Tangila, meme nkayanyi, nendokeshe mai mangi ha buloba bua kujimisha bintu bionso bidi ne muhuya wa muoyo munda muabi muinshi mua diulu, tshintu tshionso tshidi ne muoyo ha buloba netshifue. Kadi nenjadike tshihungidi tshianyi nʼebe, wewe neubuele mu buatu ne bana bebe balume ne mukashi webe ne bakashi ba bana bebe. Buela mu buatu ne bintu bibidi bia tshintu tshionso tshidi ne muoyo, bua kusungila mioyo ya bintu, buela ne mulume ne mukashi ba bintu bionso, ba nyunyu ne ba bimuna ne ba tshintu tshionso tshidi tshidikoka hanshi, bu mudi mishindu yabi, buela ne bintu bibidi bia bintu bionso bua kusungila mioyo yabi. Sangisha bintu bia ku diabi bionso, nebikale bu bintu bia kudia biebe ne biabi kabidi. Noa wakenza nunku, wakenza muanda yonso yakamuambila Nzambi. Yehowa wakambila Noa ne, Buela biebe mu buatu ne bantu bonso ba mu nsubu muebe, bualu bua meme nakakumona muimpe ku mesu kuanyi munkatshi mua tshikondo etshi. Buela biebe ne nyama yonso idi mimpe, balume muanda mutekete ne bakashi muanda mutekete, ne nyama idi kayiyi mimpe, buela ne balume babidi ne bakashi babidi. Buela biebe ne balume ba nyunyu muanda mutekete ne bakashi ba nyunyu muanda mutekete, bua kusungila mioyo ya bintu. Haleha matuku muanda mutekete nendokeshe nvula ha buloba munya ne bufuku to matuku makumi anai, nenjimishe bintu bionso binakafuka ha buloba. Noa wakenza muanda yonso yakamuambila Yehowa. Noa wakadi ne bidimu nkama isambombo hakaloka nvula ha buloba. Noa wakabuela mu buatu ne mukashi wandi ne bana bandi balume ne bakashi ba bana bandi, bualu bua mai akavulangana. Ne nyama idi mimpe ne nyama idi kayiyi mimpe ne nyunvu ne tshintu tshionso tshidi tshidikoka hanshi, bintu bibidi bintu bibidi, bilume ne bikashi, biakabuela ne Noa mu buatu, bu muakambila Nzambi Noa. Hakashika matuku muanda mutekete mai akavulangana ha buloba. Hakadi Noa mu tshidimu tshia nkama isambombo tshia muoyo wandi, mu ngondo muibidi ne dituku dia dikumi ne muanda mutekete dia ngondo, mu dituku adi mene, mishimi yonso ya mu mai manene yakahongoloka ne bibi bionso bia mu diulu biakunzuludibua. Nvula yakaloka ha buloba munya ne bufuku tô matuku makumi anai. Mu ditu ku adi diodimue Noa ne bana bandi, Sheme ne Hama ne Yafete, bana ba Noa, ne mukashi wa Noa, ne bakashi basatu ba bana bandi bakabuela mu buatu, bobo ne nyama yonso ya mushindu ne mushindu ne bimuna bionso bia mushindu ne mushindu, ne bintu bionso budi bidikoka hanshi bia mushindu ne mushindu, ne nyunyu yonso ya mushindu ne mushindu, tshionso tshidi ne mahuahua. Biakabuela ne Noa mu buatu, bintu bibidi bintu bibidi bia bintu bionso bidi ne muhuya wa muoyo. Biakabuela mulume ne mukashi ba bintu bionso, bu muakamuambila Nzambi, ne Yehowa wakamuinshidila tshibi. Nvula yakaloka tô matuku makumi anai, mai akavulangana, akabandisha buatu ha mutu, buakabandishibua ku buloba. Mai akatamba, akavulangana a bungi ha buloba, ne buatu buakabanda ha mutu ha mai. Mai akatamba kuvulangana ha buloba, ne mikuna mile yonso idi muinshi mua diulu yakabuikidibua. Mai akabanda to coudées díkumi ne itanu ha mikuna mile. Bintu bionso biakadi ha buloba biakafua, ne nyunyu ne bimuna ne nyama ne bintu bionso budi bidikoka hanshi ne muntu yonso, bintu bionso biakadi ne muhuya wa muoyo munda muabi bia ha buloba bume biakafua. Wakajimisha tshintu tshionso tshiakadi ne muoyo ha buloba, ne bantu ne bimuna ne bintu bidi bidikoka hanshi ne nyunyu ya mulu, bintu bionso biakajimina ha buloba, anu Noa ne bantu ne bintu biakadiye nʼabi mu buatu biakashala. Mai akavulangana ha buloba matuku lukama ne makumi atanu. Nzambi wakavuluka Noa ne nyama yonso ne bimuna bionso biakadi nʼandi mu buatu, Nzambi wakahehesha luhehele ha buloba ne mai akahueka. Mishimi ya mu mai manene ne bibi bia mu diulu kabidi biakadi bikandibua, ne nvula ya mu diulu yakalekeshibua. Mai akahuekahueka ha buloba, hakakumbana matuku lukama ne makumi atanu, mai akadi ahueka. Mu ngondo wa muanda mutekete ne dituku dia dikumi ne muanda mutekete dia ngondo buatu buakatua ha mikuna ya Alalata. Mai akadi ahuekahueka tô ne ku ngondo wa dikumi, ku dituku dia kumudilu dia ngondo wa dikumi, mitu ya mikuna yakamueneka. Hakakumbana matuku makumi anai Noa wakunzulula ha disoso dia buatu diakenzeye. Yeye waka tuma nyunyu wa tshikololo, tshiakalembelela tô ne hakûma mai ha buloba. Yeye waka tuma nyunyu wa nkutshi bua kumanyeye ne mai akahueka ha buloba. Kadi nyunyu wa nkutshi kakamona muaba wa kuikala, nunku wakahingana kudiye mu buatu, bualu bua mai akatshidi ha buloba buonso, yeye wakolola tshianza tshiandi, wakamukuata, wakamuteka mu buatu muakadiye. Noa wakindila matuku muanda mutekete makuabo, wakatuma nyunyu wa nkutshi kabidi, nyunyu wakahingana kudiye dilolo, ne monai, wakadi ne katamba ka mutshi wa olive kabishi ku muinu, nunku Noa wakamanya ne mai akadi makehe ha buloba. Wakindila matuku muanda mute kete makuabo, waka tuma nyunyu wa nkutshi kabidi, ne nyunyu kakahingana kudiye kabidi tshiendelele. Hakalua tshidimu tshia Noa tshia nkama isambombo ne tshimue, mu ngondo wa kumudilu ne dituku dia kumudilu dia ngondo, mai onso akûma ha buloba, ne Noa wakumusha tshibuikilu tshia buatu, wakatangila ne monai, buloba buonso buakûma. Hakalua ngondo muibidi ne dituku dia makumi abidi ne muanda mutekete, buloba buakuma Nzambi wakambila Noa ne, Hatuka mu buatu, wewe ne mukashi webe ne bana bebe balume ne bakashi babo. Luhuka mu buatu ne bintu bionso bidi ne muoyo biakadi nʼebe ne nyunyu ne bimuna ne tshintu tshionso tshidi tshidikoka hanshi, bilelangane, bivulangane bia bungi ha buloba. Noa wakaluhuka ne bana bandi balume ne mukashiʼandi ne bakashi ba bana bandi, ne nyama yonso ne tshintu tshionso tshidi tshidikoka hanshi ne nyunyu yonso ne tshintu tshionso tshidi tshiendakana ha buloba, bu mudi mishindu yabi, biakaluhuka mu buatu. Noa wakashila Yehowa tshioshelu, wakangata wa nyama yonso idi miakane ne wa nyunyu yonso idi miakane, wakabika bu mulambu wa kuosha ha kalua ha tshioshelu. Yehowa wakanunkila dihembu dimpe: Yehowa wakamba mu mutshima wandi ne, Tshiena ngela buloba mulau kabidi bualu bua bantu badi ne meji mabi mu mitshima yabo hatshidibo bitende tô ne hakulumpabo, tshiena njimisha bifukibua bionso bidi ne muoyo kabidi bu munakenza diambedi. Hashala buloba, tshidimu tshia kukuna bintu ne tshidimu tshia kunowa bintu ne tshidimu tshia mashika ne tshidimu tshia luya ne munya ne mîdima kabiena bihanga tshiendelele nansha. Nzambi wakasankisha Noa ne bana bandi, wakabambila ne, Nulelangane, nukumbane ba bungi, nuikale ha buloba buonso. Ditshina ne buowa nebikale kudi nyama yonso ne kudi nyunyu yonso ya mulu ne kudi tshintu tshionso tshidi tshidikoka hanshi ne kudi minyinyi ya mu mai manene bua bualu buenu, nakafila bintu bionso mu bianza bienu. Bintu bionso bidi ne muoyo mbia kudia bienu, bu munakanuha midioko, mbu mundi nnuha bintu bionso. Kadi kanudi muoyo wa munyinyi wonso, mmashi mene mene. Numanye kabidi ne, Nendombe bulami bua mashi enu, nembulombe kudi nyama yonso ne kudi muntu yonso, nendombe bulami bua muoyo wa muntu hankatshi ha muntu ne muntu Muntu yonso udi umatshisha mashi a munga muntu hanshi, nebamatshishe mashi andi hanshi, bualu bua Nzambi wakafuka bantu mu tshifuanyikishi tshiandi. Nuenu kabidi nulelangane, nukumbane, nuvulangane ba bungi ha buloba, nukumbanehu. Nzambi wakambila Noa ne bana bandi balume ne, Meme bianyi ndi njadika tshihungidi tshianyi nʼenu ne bana benu badi banulonda. Ndi ntshijadika ne bintu bionso bidi ne muoyo ne nyunyu ne bimuna ne nyama yonso bidi nʼenu bintu bionso bia ha buloba biakaluhuka mu buatu. Nenjadike nʼenu tshihungidi tshianyi ne, Tshiena njimisha bintu bionso ne mai kabidi nansha, mai kaena awilangana kabidi bua kujimishau buloba. Nzambi wakamba ne, Etshi tshidi tshimanymu tshia tshihungidi tshindi nteka hankatshi hetu ne bintu bionso bidi nʼenu to ne tshiendelele. Ndi muteke muanzankongolo wanyi mulu, newikale bu tshimanymu tshia tshihungidi hankatshi hetu ne buloba. Hashishe hanatuma matutu mulu, muanzankongolo neumueneke mu matutu, nenvuluke tshihungidi tshianyi tshidi hankatshi hetu ne bintu bionso bidi ne muoyo, ne mai kaena avulangana kabidi bua kujimishau bintu bionso Muanzankongolo wanyi newikale mu matutu, hanaumona, nenvuluke tshihungidi tshia kashidi tshidi hankatshi ha Nzambi ne bintu bionso bidi ne muoyo ha buloba. Nzambi wakambila Noa ne, Etshi ntshimanyinu tshia tshihungidi tshinakujadika hankatshi hetu ne bintu bionso bidi ne muoyo ha buloba. Bana balume ba Noa bakaluhuka nʼandi mu buatu bakadi Sheme, Hama ne Yafete Hama wakadi nkambua wa Kanâna. Basatu aba bakadi bana balume ba Noa ne tunkanuniuna tuabo tuakamuangalaka ha buloba buonso. Noa wakabanga kuikala tshidime ne yeye wakakuna mitshi ya tumuma tukese. Noa wakanua nvinyo, wakakuatshika nvinyo, wakalala mu ntenta wandi butaka. Hama, tatu wa Kanana, wakamona butaka bua tatu wandi, wakamanyisha bana babo babidi bakadi ha bule. Sheme ne Yafete bakangata tshilulu, bakatshiteka ha makaya abo, bakaya tshianyima, bakabuikila butaka bua tatu abo, mpala yabo yakadi mitangile kukuabo, kabakatangila butaka bua tatuʼabo nansha. Noa wakatabala ku muoyo wandi, wakamanya bu muakenza muanʼandi wa mukala. Yeye wakamba ne, Kanana udi muedibue mulau, yeye neikale muhika wa bahika kudi bana babo. Yeye wakamba kabidi ne, Yehowa, Nzambi wa Sheme, atumbishibue, Kanana neikale muhika wandi. Nzambi akumbashe Yafete, yeye ashikame biandi mu ntenta ya Sheme, Kanana ikale muhika wandi kabidi. Noa wakashala ne muoyo bidimu nkama isatu ne makumi atanu ku nyima kua nvula munene. Matuku onso a Noa akadi bidimu nkama tshitema ne makumi atanu, yeye wakafua. Ei idi ndelanganyi ya bana balumeba Noa Sheme ne Hama ne Yafete, bobo bakalela bana balume ku nyima kua nvula munene. Bana balume ba Yafete badi nunku Gome ne Magoga ne Madai ne Yawana ne Tubala ne Mesheka ne Tilasa. Bana balume ba Gomê badi nunku Ashakenaza ne Lifata ne Togama. Bana balume ba Yawana badi nunku Elisha ne Tâshishi ne Kitima ne Dodamma. Bobo bakabanyangana maloba a bisamba bia bantu akadi kukala kua mai manene, muntu ne muaku wandi, muntu ne muaku wandi, bu mudi meku abo ne bisamba biabo. Bana balume ba Hama badi nunku Kusha ne Miselayima ne Puta ne Kanana. Bana balume ba Kusha badi nunku Seba ne Hawila ne Sabeta ne Lâma ne Sabeteka Bana balume ba Lama badi Sheba ne Dedana. Kusha wakalela Nimeloda, yeye wakabanga kuikala muntu mukole. Wakadi tshilembi tshikole ku mesu kua Yehowa, bantu bakadi bamba bu lusumuinu ne, Bu Nimeloda, tshilembi tshikole ku mesu kua Yehowa. Tshibangidilu tshia bukelenge buandi tshiakadi Babela ne Eleke ne Akada ne Kalene mu buloba bua Shinâ. Yeye wakumuka mu buloba abu, wakaya mu Ashû, wakasa Ninewe ne Lehobote-Ila ne Kala ne Lesene, hankatshi ha Ninewe ne Kala (eu udi musoko munene). Miselayima wakalela Ludima ne Anamima ne Lehabima ne Nafetuhima ne Patalusima ne Bena Kasaluha (nkambua wa Bena Peleshete) ne Bena Kafetô. Kanana wakalela Sidona muaba buta wandi ne Hete ne Bena Yebuse ne Bena Amole ne Bena Gîgashi ne Bena Hiwi ne Bena Aka ne Bena Sina ne Bena Âwada ne Bena Semâ ne Bena Hamata Ku nyima kua malu au, Bena Kanana bakamuangalaka. Mukalu wa Bena Kanana wakadi ku Sidona (mu nshila wa ku Gela) to ne ku Gaza mu nshila wa ku Sodoma ne Amola ne Adema ne Seboima to ne ku Lasha. Aba mbana balume ba Hama ku meku abo ne ku nuaku yabo ne ku maloba abo ne ku bisamba biabo. Sheme, nkambua wa Bena Ebê, muanʼabo ne Yafete, yeye mene wakalela bana. Bana balume ba Sheme badi nunku Elama ne Ashû ne Âpakashada ne Luda ne Alama. Bana balume ba Alama badi Usa ne Hula ne Gete ne Masha. Âpakashada wakalela Shela ne Shela wakalela Ebe. Ebe wakalela bana balume babidi dina dia mukuabo diakadi Pelege, mu matuku andi bakabanyangana buloba, dina dia muanʼabo diakadi Yoketana. Yoketana wakalela Alamodada ne Shelefe ne Hasamaweta ne Yela ne Hadolama ne Uzala ne Dikela ne Obala ne Abimaele ne Shiba ne Ofi ne Hawila ne Yobaba bantu aba bonso bakadi bana balume ba Yoketana Mukalu wabo wakadi ku Mesha mu nshila wa ku Sefa, to ne ku mikuna mile ya ku esete. Aba mbana balume ba Sheme ku meku abo ne ku miaku yabo ne ku maloba abo ne ku bisamba biabo. Ebi mbiota bia bana balume ba Noa ku milongo yabo, bisamba bia bantu biakamuangalaka ha buloba ku nyima kua nvula munene biakafuma kudibo. Bantu bonso ba ha buloba bakadi ne muaku umue ne mei amue. Hashishe hakamuangalakabo ku esete, bakasangana mpata munene mu buloba bua Shinâ, bakashikamaku. Bakambilangana ne, Tuyai bietu, tuenzai tushola, tutuoshe mu kalua Bakadi ne tushola bu mabue, ne bitume bu tshimama. Bakambilangana ne, Tuyai kuasa musoko ne tshibumba tshile, musonga watshi neufike mulu mu matutu tuikale ne dina dia butumbi, bua katutangadiki ha buloba buonso. Yehowa wakahuka hanshi bua kumona musoko ne tshibumba biakasa bana ba bantu. Yehowa wakamba ne, Tangilai, bantu bonso badi bantu bamue, bonso badi ne muaku umue, au mmalu akabangabo kuenza, ne katataka kakuena bualu budibo basue kuenza budi mua kubakolela. Tuyai bietu hanshi, tutompakashe muaku wabo, nunku kabena mua kunvuangana muaku wabo kabidi. Nunku Yehowa wakabamuangalasha ha buloba buonso, bakalekela kuasa musoko. Ka dina dia musoko diakadi Babela, bualu bua Yehowa wakatompakashaku muaku wa ba ha buloba bonso, ne Yehowa wakabamuangalashaku ha buloba buonso. Ei idi ndelanganyi ya tunkanunuina tua Sheme Hakadi Shema ne bidimu lukama, wakalela Âpakashada, bidimu bibidi ku nyima kua nvula munene. Hakalela Sheme Âpakashada, yeye wakashala ne muoyo bidimu nkama itanu, wakalela bana balume ne bana bakashi. Âpakashada wakashala ne muoyo bidimu makumi asatu ne bitanu, wakalela Shela Hakalela Âpakashada Shela, yeye wakashala ne muoyo bidimu nkama mai ne bidimu bisatu, wakalela bana balume ne bana bakashi. Shela wakashala ne muoyo bidimu makumi asatu, wakalela Ebê. Hakalela Shela Ebê, yeye wakashala ne muoyo bidimu nkama mai ne bisatu, wakalela bana balume ne bana bakashi. Ebê wakashala ne muoyo bidimu makumi asatu ne binai, wakalela Pelege. Hakalela Ebê Pelege, yeye wakashala ne muoyo bidimu nkama mai ne makumi asatu, wakalela bana balume ne bana bakashi. Pelege wakashala ne muoyo bidimu makumi asatu, wakalela Leu. Hakalela Pelege Leu, yeye wakashala ne muoyo bidimu nkama ibidi ne tshitema, wakalela bana balume ne bana bakashi. Leu wakashala ne muoyo bidimu makumi asatu ne bibidi, wakalela Seluga. Hakalela Leu Seluga, yeye wakashala ne muoyo bidimu nkama ibidi ne muanda mutekete, wakalela bana balume ne bana bakashi. Seluga wakashala ne muoyo bidimu makumi asatu, wakalela Nahô. Hakalela Seluga Nahô, yeye wakashala ne muoyo bidimu nkama ibidi, wakalela bana balume ne bana bakashi. Nahô wakashala ne muoyo bidimu makumi abidi ne tshitema, wakalela Tela. Hakalela Nahô Tela, yeye wakashala ne muoyo bidimu lukama ne dikumi ne tshitema, wakalela bana balume ne bana bakashi. Tela wakashala ne muoyo bidimu makumi muanda mutekete, wakalela Abalama ne Nahô ne Halana. Ei idi ndelanganyi ya tunkanunuina tua Tela. Tela wakalela Abalama ne Nahô ne Halana, Halana wakalela Lota. Halana wakafua hakadi tatu wandi Tela ne muoyo mu buloba buakakulelabo bua Ula wa Bena Kasada. Abalama ne Nahô bakabaka bakashi, dina dia mukashi wa Abalama diakadi Salai, ne dina dia mukashi wa Nahô diakadi Mileka, muana wa Halana, tatu wa Mileka ne tatu wa Yiseka. Salai wakadi nkumba, kakadi ne muana nansha. Tela wakangata Abalama, muanʼandi mulume ne Lota, muana wa Halana, muikulu wandi, ne Salai, ma muenʼandi, mukashi wa muanʼandi mulume Abalama, bakamuangala mu buloba bua Ula wa Kasada bua kuya ku buloba bua Kanâna, bakafika ku Halana, bakashikamaku. Matuku a Tela akadi bidimu nkama ibidi ne bitanu, Tela wakafua mu Halana. Yehowa wakambila Abalama ne, Umuka mu musoko webe ne kudi bana benu ne ku nsubu wa tatuʼebe, ya biebe mu muaba undualua kukulesha. Nenkuvuishe tshisamba tshinene, nenkusankishe, nenvuishe dina diebe dinene, ne wewe neuvudishile bakuabo disanka. Nensankishe bantu badi bakuvudishila wewe disanka, nengele muntu mulau udi ukuela wewe mulau Bisamba bionso bia ha buloba nebisanke bua bualu buebe. Nunku Abalama wakaya bu muakamba Yehowa, ne Lota wakaya nʼandi Abalama wakadi ne bidimu makumi muanda mutekete ne bitanu hakumukeye mu Halana. Abalama wakangata mukashi wandi Salai, ne Lota, muana wa muanʼabo, ne bintu biabo bionso, ne bantu bonso bakahetabo mu Halana, bakaya mu nshila wa ku buloba bua Kanâna, bakafika mu buloba bua Kanâna Abalama wakalala mu buloba, wakalua ku Shekeme, kuakadi mutshi wa telebinta wa mu Mole Bena Kanana bakadi mu buloba tshikondo atshi. Yehowa wakamueneka kudi Abalama, wakamba ne, Nempe tunkanunuina biebe buloba ebu Abalama wakenzela Yehowa, wakamueneka kudiye, tshioshelu. Yeye wakumukaku, wakaya ku mukuna wakadi ku esete wa Betele, wakashimikaku ntenta wandi, Betele wakadi ku wesete ne Ai wakadi ku esete. Wakenzelaku Yehowa tshioshelu, Wakabikila dina dia Yehowa. Abalama wakatshidi uya ku Sude. Tshiole tshiakadi mu buloba abu, ne Abalama wakaya mu Ejipitu bua kushikamamu bualu bua tshiole tshiakadi tshikole mu buloba abu. Hakambabo kubuela mu Ejipitu, Abalama wakambila mukashiʼandi Salai ne, Tangila ndi mumanye ne wewe udi mukashi muimpe kumona, ne hakumona Bena Ejipitu, bobo nebambe ne, Eu udi mukashi wandi! Bobo nebanshihe meme, nebakushiye wewe ne muoyo. Ndi nkutendekena ne, Wamba biebe ne, Meme ndi muanʼabo wa bakashi, bua meme mpete diakalengele bua bualu buebe, ne mutshima wanyi wikale ne muoyo bua bualu buebe Hashishe hakalua Abalama mu Ejipitu, Bena Ejipitu bakatangila ne mukashi wakadi mulengele be. Bakelenge bana ba Palo bakamumona, bakamuanyishila Palo, bakaya nʼandi mu nsubu wa Palo. Yeye wakenzela Abalama bimpe bua bualu buandi, wakamuha mikoko ne ngombe, ne balume ba nyama ya mpunda, ne bahika balume ne bahika bakashi, ne mashina a nyama ya mpunda ne tumelo. Yehowa wakakengesha Palo ne ba mu nsubu wandi ne bihuhu bikole bualu bua Salai, mukashi wa Abalama. Palô Wakabikila Abalama, wakamukonka ne, Bualu ebu buwakungenzela budi tshinyi? Kuakungambila ne, Eu udi mukashi wanyi bualu kai? Wakungambila ne, Yeye udi muanʼetu wa bakashi, bua meme kumuangata bu mukashi wanyi bualu kai? Ka, tangila mukashi webe, umuangate, uye biebe mu nshila webe Palô wakadimusha bantu bandi bua bualu buandi, ne bakaya nʼandi ne mukashi wandi ne bintu biandi bionso mu nshila. Abalama wakumuka mu Ejipitu ne mukashiʼandi ne bintu biandi bionso ne Lota, wakaya mu luseke lua ku Sude. Abalama wakadi ne bubanji be bua bimuna ne argent ne or. Wakatshidi uya ku Sude to ne ku Betele kuakashimikeye ntenta wandi diambedi, hankatshi ha Betele ne Ai. Wakaya kuakenzeye tshioshelu diambedi, ne Abalama wakahitaku dina dia Yehowa. Lota wakaya ne Abalama, ne yeye wakadi ne mikoko ne bimuna ne ntenta. Muaba wakadi mukese bua bobo kushikama hohamue, bualu bua bintu biabo biakadi bia bungi, kabakamanya mua kushikama hohamue. Balami ba bimuna bia Abalama ne balami ba bimuna bia Lota bakatandangana. Bena Kanâna ne Bena Pelese bakadi mu buloba tshikondo atshi. Abalama wakambila Lota ne, Ndi nkutendekena ne, Katutandanganyi, balami ba bintu bietu kabatandanganyi, bualu bua tudi bana ba muntu umue. Buloba buonso kabuena ku mpala kuebe, anyi? Ndi nkutendekena ne, Tahuluka kundi bi waya ku tshianza tshia bakashi, nenye bianyi ku tshianza tshia balume ne biwaya ku tshianza tshia balume, nenye bianyi ku tshianza tshia bakashi. Lota wakabanduluka, wakamona mpata ne bibanda bia musulu wa Yadene, ne tusulu tuakadi kuonso diambedi Yehowa kayi muanze kushiha Sodoma ne Amola, mpata au wakadi bu tshibundu tshia Yehowa, wakadi bu buloba bua Ejipitu, hawaya mu nshila wa ku Soa. Nunku Lota wakasungula mpata wonso wa Yadene, wakaya biandi ku esete, bakaha ndulukangana nunku. Abalama wakikala mu buloba bua Kanana, Lota wakashikama mu misoko ya mu mpata, wakashimika ntenta yandi tô ne ku Sodoma. Bantu ba mu Sodoma bakadi babi, bakatamba kuhidia Yehowa. Hakahanduluka Lota, Yehowa wakambila Abalama ne, Bandisha mesu ebe ha muaba ûdi muimane, utangile ku nôde ne ku sude ne ku esete ne ku wesete, buloba buonso bûdi umona nenkuhebu ne tunkanunuina tuebe tshiendelele. Nenkuvudishile tunkanunuina tuebe, netuikale bu dinfuenkenya dia buloba, nunku biamanya muntu mua kubala dinfuenkenya dia buloba, hashishe, tunkanunuina tuebe netubadibue kabidi. Bika biebe, wendakana mu buloba buonso, mu bule buabu ne mu butshiama buabu, bualu bua nenkuhebu. Abalama wakatula ntenta yandi, wakamuangala, wakaya kushikama hehi ne nu tshi ya telebinta ya Mamale idi mu Hebelone, wakenzelaku Yehowa tshioshelu. Mu matuku a Amalafele, mukelenge wa Shinâ, ne Ayoka, mukelenge wa Elasa, ne Kedôlaome, mukelenge wa Elama, ne Tidala, mukelenge wa Goyima, bakaluangana nvita ne Bela, mukelenge wa Sodoma, ne Bisha, mukelenge wa Amola, ne Shinaba, mukelenge wa Adema, ne Shemebê, mukelenge wa Bena Seboi, ne mukelenge wa Belê (eu udi Soâ). Bantu aba bonso bakadisangisha mu tshibanda tshia Sidima (etshi ntshibanda tshia Dishiba dia Mai a Luehu). Bakalamata Kedolaomê to bidimu dikumi ne bibidi, ne mu tshidimu tshia dikumi ne bisatu, bakatomboka Mu tshidimu tshia dikumi ne binai Kedôlaome wakalua ne bakelenge bakadi nʼandi, bakahita Bena Lefa ba mu Ashelota kânayima bukole, ne Bena Zusa ba mu Hama, ne Bena Eme ba mu Shawe kiyatayima, ne Bena Holi ba ku mikuna ya Sei to ne ku Ele-palana, hehi ne tshihela. Bakahingana, bakalua ku Ene-mishapata (eu udi Kadesha), bakahaula buloba buonso bua Bena Amaleka ne Bena Amole bakadi bashikama mu Hasasona-tamâ. Mukelenge wa Sodoma ne mukelenge wa Amole ne mukelenge wa Adema ne mukelenge wa Bena Seboi ne mukelenge wa Bela (eu udi Soa) bakaluhuka, bakaluangana nʼabo mu tshibanda tshia Sidima. Bakaluangana ne Kedolaomê, mukelenge wa Elama, ne Tidala, mukelenge wa Goyima, ne Amalafele, mukelenge wa Shinâ, ne Aliyoka, mukelenge wa Elasa, ku luseke lukuabo bakelenge banai, ku luseke lukuabo batanu. Tshibanda tshia Sidima tshiakadi tshiule tente ne bina bia bitume ne bakelenge ba Sodoma ne Amola bakanyema, bakahonamu, bakuabo bakashala bakanyemena ku mukuna. Bakahaula biuma bionso bia mu Sodoma ne Amola ne bintu bia kudia, bakaya mu nshila. Bakakuata Lota, muana wa muanʼabo ne Abalama, wakadi ushikama mu Sodoma, ne bintu biandi bionso, bakaya nʼabi. Muntu wakadi muhanduke mu bianza biabo wakaya, wakamanyisha Abalama, Muena Ebelu, wakadi ushikama hehi ne mitshi ya telebinta ya Mamale, muena Amole, muanʼabo ne Eshekola, muanʼabo ne Ane, bobo bakalamatangana ne Abalama. Hakunvua Abalama lumu ne, Bakaya ne muanʼetu, yeye wakaya ne bahika bandi bakadiye mueyemene bakadi baledibue mu nsubu muandi, nkama isatu ne dikumi ne muanda mukulu, wakabihata to ne ku Dana. Abalama wakatahulula bantu bandi, wakatuangana nʼabo butuku, yeye ne bahika bandi bakabatamba bukole, wakabihata to ne ku Hoba, udi ku tshianza tshia bakashi tshia Damaseke. Wakahingana ne biuma biabo bionso ne muanʼabo Lota, ne bintu biandi ne bakashi ne bantu. Mukelenge wa Sodoma wakaluhuka bua kumuakidila hakahinganeye ku dishiha dia Kedolaome ne bakelenge bakadi nʼandi, mu tshibanda tshia Shawe (etshi ntshibanda tshia Bakelenge). Melekisedeke, mukelenge wa Salema, wakalua ne mampa ne nvinyo. Yeye wakadi muakuidi wa Nzambi Mutambe Bunene wa mu Diulu. Yeye wakamuvudishila disanka, wakamba ne, Nzambi Mutambe Bunene wa mu Diulu, mufuki wa diulu ne buloba asankishe Abalama, ne Nzambi Mutambe Bunene wa mu Diulu, wakafua bena lukuna bebe mu tshianza tshiebe, atumbishibue Abalama wakamuha tshia dikumi tshia bintu bionso. Mukelenge wa Sodoma wakambila Abalama ne, Umpe bantu, wewe wangate biuma. Abalama wakambila mukelenge wa Sodoma ne, Nakamana kubisha tshianza tshianyi bua kuditshiha kudi Yehowa, Nzambi Mutambe Bunene wa mu Diulu, mufuki wa diulu ne buloba, ne, Tshiena ngangata nansha nshinga nansha muonshi wa bisabata nansha kantu kebe kamue, bua wewe kuambi ne, Nakavuisha Abalama bubanji. Anu bintu bia kudia bia bansongalume ne bia bantu bakaya nʼanyi, Anê ne Eshekola ne Mamale, bobo bangate tshituha tshiabo. Hakashika malu a, dî dia Yehowa diakalua kudi Abalama mu tshilota ne, Abalama kutshinyi, meme ndi ngabu webe ne difutu diebe ditambe bunene. Abalama wakamba ne, Mukelenge Yehowa, wewe neumpe tshintu kai, bualu bua meme tshiena ne muana, ne muhianyi wa bintu bianyi udi Elieze, muena Damaseke? Abalama wakamba ne, Tangila, wewe kuena muanze kumpa muana, ne muntu muledibue mu nsubu wanyi, yeye udi muhianyi wa bintu bianyi. Monai, di dia Yehowa diakalua kudiye ne, Muntu eu kena wikala muhianyi wa bintu biebe nansha, kadi yeye uwalela nkayebe neikale muhianyi wa bintu biebe. Yehowa wakaluhuka nʼandi mu nsubu, wakamba ne, Tangila mutu bala mitoto, biwamanya mua kuyibala Yeye wakamuambila ne, Tunkanunuina biebe netuikale bungi nunku. Yeye wakitabusha Yehowa, ne Yehowa wakabala kuitabusha kuandi ne, Mbuakane buandi. Yeye wakamuambila ne, Meme ndi Yehowa wakakumusha mu Ula wa Bena Kasada, bua kukuha buloba ebu bua kubuhiana. Yeye wakamba ne, Mukelenge Yehowa, ndi mumanye ne, Nembuhiane munyi? Yeye wakamuambila ne, Wangate lukungulu lua ngombe lua bidimu bisatu, ne dishina dia mbushi dia bidimu bisatu, ne tshimpanga tshia mukoko tshia bidimu bisatu, ne nyunyu wa nkutshi ne mputu nyunyu Yeye wakangata bintu ebi bionso, wakabihanda nseke, wakateka luseke eku luseke eku, kadi yeye kakahanda nyunyu nseke. Hakikila nyunyu ya bikololo ha bitalu ebi, Abalama wakayihata. Hakamba diba kubuela, tulu tukole tuakakuata Abalama monai, buowa bua midima buakamukuata. Yehowa wakambila Abalama ne, Umanye biebe bimpe ne, Tunkanu nuina biebe nebikale bendakanyi mu buloba budi kabuyi buabo, netukuatshile bena buloba mudimu, nebatukengeshe to bidimu nkama mai, meme nendumbuluishe tshisamba tshia bantu baditu tukuatshila mudimu, hashishe, netuhatuke ne biuma bia bungi. Kadi wewe neuye kudi bankambua bebe hola, neujikibue muntu mununu. Mu tshikondo tshinai tunkanunuina tuebe netulue kunoko kabidi, bualu bua bubi bua Bena Amole kabuena buanji kukumbana. Hashishe, hakabuela diba ne midima yakadiku, tshikutu tshiakadi ne muishi wa kahia ne tshimunyi tshia kalua kakole biakahita hankatshi ha nseke ya minyinyi. Mu dituku adi mene Yehowa wakahunga ne Abalama tshihungidi ne, Ndi mpa tunkanunuina biebe buloba abu ku musulu wa mu Ejipitu to ne ku musulu munene wa Pelata, buloba bua Bena Kene ne bua Bena Keneze ne bua Bena Kadamona ne bua Bena Hiti ne bua Bena Pelese ne bua Bena Lefa, ne bua Bena Amole ne bua Bena Kanâna ne bua Bena Gîgashi ne bua Bena Yebuse. Salai, mukashi wa Abalama, kakamulelela bana nansha, wakadi ne mukashi muena mudimu, Muena Ejipitu, dina diandi Haga. Salai wakambila Abalama ne, Mona, Yehowa wakumpidisha bua kulela, ndi nkutendekena ne, Uye biebe kudi mukashi, muena mudimu wanyi, binamanya mua kuheta bana kudiye Abalama wakitabusha di dia Salai. Hakashikama Abalama mu buloba bua Kanâna to bidimu dikumi, Salai, mukashi wa Abalama, wakangata Hagâ, Muena Ejipitu, muena mudimu wandi, wakamuha kudi Abalama, mulume wandi, amubake bu mukashi wandi. Wakaya kudi Haga ne yeye wakimita difu, hakatangileye ne, Nakuimita difu, yeye wakalengulula mukelenge wandi mukashi. Salai wakambila Abalama ne, Bubi buanyi buikale kûdi wewe nakafila mukashi muena mudimu wanyi mu tshiadi tshiebe, ne hakamoneye ne, Nakuimita difu, yeye wakundengulula, Yehowa alumbuluile tshilumbu tshidi hankatshi hetu nʼebe. Kadi Abalama wakambila Salai ne, Mona, muena mudimu webe udi mu tshianza tshiebe, umuenzele bu mûdi musue Salai wakamuenzela bibi ne yeye wakanyema ku mesu kuandi. Muanjelo wa Yehowa wakamusangana hehi ne mushimi wa mai wa mu tshihela, mushimi eu udi mu nshila wa ku Shû. Yeye wakebesha Hagâ, mukashi muena mudimu wa Salai, ne, Wakufuma kudi kunyi? Uyaya kudi kunyi? Yeye wakamuandamuna dî ne, Ndi munyeme ku mesu kua mukelenge wanyi mukashi Salai. Muanjelo wa Yehowa wakamuambila ne, Hingana kudi mukelenge webe mukashi, udikokeshe mu tshianza tshiandi. Muanjelo wa Yehowa wakamuambila ne, Nenkumbashile tunkanunuina biebe, tuikale bia bungi, kabena mua kutubala bua bungi bualu. Muanjelo wa Yehowa wakamuambila ne, Tangila, wewe udi ne difu, neulele muana mulume, neumuidike dina ne, Yishemaele, bualu bua Yehowa wakunvua dikenga diebe. Yeye neikale bu nyama wa mpunda udi ne luonji munkatshi mua bantu, tshianza tshiandi netshiluishe muntu yonso, ne tshianza tshia muntu yonso netshimuluishe kabidi, yeye neikale mutangilangane ne bana babo bonso Yeye wakidika Yehowa wakamuambila malu au ne, Wewe udi Nzambi udi utangila, bualu bua yeye wakamba ne, Nakamana kumona Nzambi, munyi mundi nshala ne muoyo? Nunku yeye wakidika mushimi wa mai ne, Bê-laha-loi (kukudimuna kua muaku ne, Mushimi wa Nzambi wa muoyo utu wantangila) udi hankatshi ha Kadesha ne Belede. Hagâ wakalelela Abalama muana mulume Abalama wakidika dina dia muana wakamulelela Hagâ ne, Yishemaele. Abalama wakadi muikale ne bidimu makumi muanda mukulu ne bisambombo, hakamulelela Haga Yishemaele. Hakadi Abalama ne bidimu makumi tshitema ne tshitema, Yehowa wakamueneka kudi Abalama, wakamuambila ne, Ndi Nzambi wa Bukole Buonso, wenda ku mpala kuanyi, wikale muakane. Nenja dike tshihungidi tshianyi hankatshi hetu nʼebe, nenkukumbashe ba bu ngi. Abalama wakadia mpala hanshi, ne Nzambi wakayikila nʼandi ne, Mona, tshihungidi tshianyi tshidi nʼebe, wewe newikale nkambua wa bisamba bia bungi. Kabena babikila kabidi dina diebe ne, Abalama, kadi nebakuidike dina diebe ne, Abalahama, bualu bua nakakuvuisha nkambua wa bisamba bia bungi. Nenkuvudishangane ba bungi, nenkuvuishe bisamba bia bungi, bakelenge nebaledibue munda muebe. Nenjadike tshihungidi tshianyi hankatshi hetu hebe ne tunkanunuina tuebe to ne bikondo biatu bionso bu tshihungidi tshia tshiendelele, bua meme kuikala Nzambi webe ne wa tunkanunuina tuebe. Nenkuhe wewe ne tunkanunuina tuebe buloba buonso bua Kanana bûdi wendakanamu, bu buhianyi buenu bua tshiendelele, nengikale Nzambi wabo. Nzambi wakambila Abalahama ne, Wewe ne tunkanunuina tuebe mu bikondo biatu bionso, nenutumikile tshihungidi tshianyi. Etshi ntshihungidi tshidi hankatshi hetu nʼebe ne tunkanunuina tuebe tshinudi nʼatshi bua kutumikila ne, Muana mulume yonso wa munkatshi muenu atengudibue. Nebanutengule, ne bualu ebu nebuikale bu tshimanyinu tshia tshihungidi tshidi hankatshi hetu nʼebe. Muana mulume wa munkatshi muenu, hafikeye matuku muanda mukulu, neatengudibue, muana mulume yonso wa ku bikondo bienu bionso, yeye udi muledibue mu nsubu wenu, anyi yeye udibo basumba kudi ba bende ku argent, udi kayi kankanunuina kebe. Yeye udi muledibue mu nsubu webe ne yeye udibo basumba ku argent webe udi ne bua kutengudibua, tshi hungidi tshianyi netshikale munda muenu bu tshihungidi tshia tshiendelele. Muntu mulume udi kayi mutengula nebamumushe munkatshi mua bana babo, bualu bua yeye wakashiha tshihungidi tshianyi. Nzambi wakambila Abalahama ne, Kabena babikila mukashi webe, Salai kabidi, nebamubikile ne, Sala, nemmuvudishile di sanka, yeye neakulelele muana mulume, nemmusankishe bulelela, yeye neikale nkambua wa bisamba bia bungi, ne bakelenge ba bantu nebaluhuke munda muandi. Hashishe, Abalahama wakadishinda hanshi, wakaseka, wakamba mu mu tshima wandi ne, Nebalelele muntu udi ne bidimu lukama muana, anyi? Sala udi ne bidimu makumi tshitema nealele, anyi? Abalahama wakambila Nzambi ne, Mbimpe Yishemaele ikale ne muoyo ku mesu kuebe Nzambi wakamba ne, Nansha, Sala mukashi webe neakulelele muana wewe neumuidike dina ne, Isaka, nenjadike nʼandi yeye ne tunkanunuma tuandi tshihungidi tshianyi bu tshihungidi tshia tshiendelele. Nakukunvuila bualu bua Yishemaele kabidi, mona, nakumusankisha, nemmukumbashe, nemmuvuishe bisamba bia bungi, yeye nealele baminyampala dikumi ne babidi, nemmuvuishe tshisamba tshinene. Kadi nenjadike tshihungidi tshiandi ne Isaka, wakulelela Sala tshidimu tshialua hakumbana ngondo yandi. Nzambi wakalekela kuyikila ne Abalahama, wakamushiya, wakaya mu diulu. Abalahama wakangata Yishemaele, muanʼandi mulume, ne bana bonso bakaledibua mu nsubu wandi, ne bantu bonso bakasumbibua ku argent yandi, bantu balume bonso ba mu nsubu wa Abalahama bakatengudibua dituku adi mene bu muakamuambila Nzambi. Abalahama wakadi ne bidimu makumi tshitema ne tshitema hakamutengulabo. Yishemaele, muanʼandi mulume, wakadi ne bidimu dikumi ne bisatu hakamutengulabo. Abalahama ne Yishemaele, muanʼandi mulume, bakatengudibua dituku dimue. Balume bonso ba mu nsubu wandi, baledibue mu nsubu wandi, ne basumbibue ku argent kudi ba bende, bakatengudibua nʼandi. Yehowa wakamueneka kudi Abalahama hehi ne mitshi ya telebinta ya Mamale hakadiye ushikama ku mbelu kua ntenta wandi munda munya. Yeye wakabandisha mesu andi, wakatangila balume basatu bimane ku mpala kuandi, hakabatangileye, wakabika ku mbelu kuandi, wakaya lubilu bua kubakidila, wakabakukuila, wakamba ne, Mukelenge wanyi, biwikala ne luse kundi, ndi nkutendekena ne, Kuhitshi muntu webe. Nuitabushe balue ne mai, nuvuwe makasa enu, nuikishe bienu mu diledi dia mutshi, nendue ne bintu bia kudia bikese, nukoleshe mitshima yenu hashishe nudi mua kuhita, bualu bua nuenu nuakulua kudi muntu wenu Bakamuambila ne, Enza biebe bu muwakuamba. Abalahama wakabuela mu ntenta lubilu kudi Sala wakamuambila ne Wangate bihiminu bisatu bia bukula lubilu, usangakashe, ulambe mikata. Abalahama wakaya lubilu ku tshisumbu tshia ngombe, wakangata lukungulu lua ngombe luakadi lutekete ne luimpe, wakalufila kudi muntu wandi, ne yeye wakaluhandulula lubilu. Yeye wakangata manteke ne mabele ne lukungulu lua ngombe luakalambabo, wakabiteka ku mpala kuabo. Yeye wakimana ha buihi nʼabo muinshi mua mutshi hakadibo badia. Bakamukonka ne, Sala, mukashi webe, wehi? Yeye wakamba ne, Udi mu ntenta. Yeye wakamba ne, Bulelela, hakumbana ngondo, nempingane kûdi, ne mona, Sala, mukashi webe, neakulelele muana mulume Sala wakunvua dî diandi hakadiye mu ntenta ku mpenge kua tshibi, wakadi ku nyima kua muanjelo. Abalahama ne Sala bakadi ne bidimu bia bungi, bakadi bakoke, miloû ya bakashi yakashika kudi Sala. Sala wakadi useka munda munda, wamba ne, Meme nakulua mukoke ne mukelenge wanyi muikale mununu kabidi, nengikale ne disanka, anyi? Yehowa wakakonka Abalahama ne, Sala wakaseka bua tshinyi, wamba ne, Meme nendele muana, hankadi mukoke aha, anyi? Tshintu tshidi mua kuhita Yehowa bukole, anyi? Ku dituku dinakasungula nempingane kûdi, hakumbana ngondo yandi, Sala nealele muana mulume. Sala wakadia ne, Tshiakaseka, bualu bua yeye wakadi utshina. Kadi muanjelo wakamuambila ne, Bulelela, wewe wakaseka. Bantu aba bakabika, bakatangila ku Sodoma, ne Abalahama wakaya kubashindikila mu nshila. Yehowa wakamba ne, Nensokoke Abalahama bualu bundi ngenza, anyi? Bualu bua yeye nealue tshisamba tshinene, ne bisamba bionso bia ha buloba nebisanke bua bualu buandi. Nakamumanya bua yeye ayishe bana bandi ne ba mu nsubu wandi bimpe, bua bobo baye mu nshila wa Yehowa bua kuenza malu makane ne malulame, nunku Yehowa neamanye mua kuenzela Abalahama malu onso akamuambileye. Yehowa wakamba ne, Bualu bua muadi wa Sodoma ne wa Amola udi munene, ne bualu bua malu mabi abo adi matambe bukole, nyaya katataka bua kubamona ne badi benza bu mudi muadi wabo wakufika kundi, ne bikalabo kabayi benze nunku, nemmanye bianyi. Balume aba bakumuka, bakaya mu nshila wa ku Sodoma, kadi Abalahama wakatshidi muimane ku mpala kua Yehowa. Abalahama wakasemena ha buihi, wakamukonka ne, Neushihe bantu bakane ne bantu babi hohamue, anyi? Bikala bantu bakane makumi atanu mu musoko, wewe neûshihe, kuena usungila musoko bualu bua bantu bakane makumi atanu badimu, anyi? Bualu ebu kabuikadi kudi bua wewe kuenza nunku bua kushiha bantu bakane ne bantu babi hohamue, biwenza nunku bantu bakane nebikale muomumue ne bantu babi, bualu ebu kabuikadi kûdi, Mulumbuluishi wa buloba buonso katu wenza bimpe, anyi? Yehowa wakamba ne, Binasangana bantu bakane makumi atanu mu musoko wa Sodoma, nensungile musoko wonso bua bualu buabo. Abalahama wakamba ne, Tangila, nakukuata bualu bua kusomba ne Yehowa, meme ndi bu luhuishi ne butue. Bikalamu bantu bakane makumi atanu kakuiyi bantu batanu, neushihe musoko wonso bualu bua bantu batanu kabayiku, anyi? Wakamba ne, Tshiena nshiha musoko binasangana bantu bakane makumi anai ne batanu. Yeye wakamba kabidi ne, Biwamona bantu bakane makumi anai? Yeye wakamba ne, Tshiena nshiha musoko bualu bua bantu makumi anai. Yeye wakamba ne, Mukelenge, kukuatshi tshiji, nengakule bianyi, bikalamu bantu bakane makumi asatu Yeye wakamba ne, Tshiena nshiha musoko bualu bua bantu makumi asatu. Yeye wakamba ne, Nakukuata bualu bua kusomba ne Mukelenge, bikalamu bantu makumi abidi Yeye wakamba ne, Tshiena nshiha musoko bualu bua bantu makumi abidi. Yeye wakamba ne, Mukelenge, kukuatshi tshiji, nengakule musangu eu, bikalamu bantu bakane dikumi Yeye wakamba ne, Tshiena nshiha musoko bualu bua bantu dikumi. Hakashikisha Yehowa kusangana ne Abalahama yeye wakaya biandi ne Abalahama wakahingana kuandi. Banjelo aba babidi bakafikaku Sodoma dilolo Lota wakadi ushikama ku tshibi tshia ku Sodoma. Lota wakabamona, wakabika bua kubakidila, wakabakukiula hanshi. Yeye wakamba ne, Tangilai, ba kelenge banyi ndi nnusengelela ne Luai kunu, nubuele mu nsubu wa muntu wenu, nulalemu butuku ebu, nuvuwe makasa enu, hashishe, ne nubike dinda dionso, nenuye mu nshila wenu Bobo bakamba ne, Nansha, netuikale mu misesu butuku ebu buonso. Yeye wakabatendekena bikole, bobo bakaya nʼandi bakabuela mu nsubu wandi, yeye wakabalambishila bintu bia bungi ne bidia bidi kabiyi ne luevene ne bobo bakabidia. Kadi dia mbedi bobo kabayi banze kulala bena musoko wa Sodoma, ne banso ngalume ne bantu banunu ba nseke yonso bakanyunguluka nsubu, ba kabikila Lota, bakamukonka ne Balume aba bakulua kudi butuku ebu badi hanyi? Uluhuke nʼabo, bua tuetu tubamanye. Lota waka luhuka kudibo wakinshila tshibi ku nyima kuandi. Yeye wakamba ne, Bakuetu, ndi nnusengelela ne kanuenji bualu bubi nunku. Tangilai, ndi ne bana bakashi babidi badi kabayi banze kumanya balume, binuitabusha, nendue nʼabo kunudi, nubenzele bu munudi basue, kadi kanuenji balume aba bualu, bualu bua bobo bakulua mu diledi dia nsubu wanyi. Bobo bakamba ne, Umuke Bobo bakamba ne, Mulumiana eu, wakahatula bua kushikameye kunoko, ne katataka yeye udi musue kuikala bu mulumbuluishi, nenkuenzele bualu bubi budi butamba bualu butudi tubenzela bobo. Bobo bakamunguila ba bungi, Lota mene mene bakasemena ha buihi bua kuhandabo tshibi. Kadi bantu bakolola bianza biabo, bakakoka Lota mu nsubu kudibo, ba-kinshila tshibi. Bobo bakafofomesha mesu a balume bakadi bimane ku tshibi tshia nsubu, bakese ne banene, bakateketa, kabakamona tshibi. Bantu bakakonka Lota ne, Bantu bakuabo badi nʼebe anyi? Baku ne bana bebe balume ne bana bebe bakashi ne bonso baudi nʼabo mu musoko eu, umuke nʼabo mu muaba eu. Bualu bua netubutule musoko eu, bualu bua muadi wabo wakulua munene ku mesu kua Yehowa, ne Yehowa wakatutuma bua kûshiha. Lota wakaluhuka, wakambila baku bakadi babangila bana bandi bakashi ne, Jukai, numuke mu musoko eu, bualu bua Yehowa neashihe musoko Kadi yeye wakadi bu muntu udi wakula biakulakula kudi baku bandi. Hakatshia butuku banjelo bakenzesha Lota ne, Bika biebe, wangate mukashi webe ne bana bebe bakashi babidi badiku diambedi kanuyi banze kufua mu dikenga dia musoko eu. Kadi yeye wakajanguluka bantu bakamukuata ku tshianza tshiandi, ne tshianza tshia mukashi wandi, ne bianza bia bana bandi bakashi babidi bualu bua Yehowa wakamufuila luse, bobo bakalua nʼandi, bakamuteka ku butshika bua musoko. Hakayabo nʼabo ha bule umue wabo wakamba ne Nyema lubilu, bua kuhandisha muoyo webe kutangidi ku nyima kuebe, kushadi ha mpata nyema ku mikuna kufu biebe. Lota wakabambila ne, Mukelenge wanyi, kuenji nunku, tangila, muntu webe wakamana kusangana luse ku mesu kuebe, ne wewe wakavudisha luse luebe kundi hawakasungila muoyo wanyi, tshiena mua kunyemena ku mikuna, bua bualu bubi nebunkuate, nenfue bianyi. Tangila musoko eu udi ha buihi bua kunyemenamu, udi mukese, witabushe bua mpandilemu (musoko eu udi mukese nansha?) ne mutshima wanyi newikale ne muoyo. Yeye wakamuambila ne, Nakuitabusha bualu ebu kabidi, tshiena nshiha musoko eu uwakulombela. Nyemenamu lubilu, bualu bua tshiena mua kuenza bualu wewe kuyi muanze kufikaku. Nunku bakabikila dina dia musoko au ne, Soâ. Diba diakadi dimane kubanda mulu hakabuela Lota mu Soa. Hashishe, Yehowa wakamatshisha mu Sodoma ne Amola soufre ne kalua bia mu diulu kudi Yehowa. Yeye wakabutula misoko ai ne mpata yonso, ne bantu bonso ba mu misoko, ne bintu biakadi bidiunda mu buloba. Kadi mukashi wa Lota wakatangila ku nyima kuandi, wakakudimuka dibue dia luehu. Abalahama wakabika ne dinda dionso, wakaya ku muaba wakimaneye ku mpala kua Yehowa; wakatangila ku luseke lua Sodoma ne Amola ne Mpata yonso, ne tangilai, muishi wakadi ubanda bu muishi wa tshikutu. Hakabutula Nzambi misoko ya mu Mpala, yeye wakavuluka Abalahama, wakumusha Lota munkatshi mua dikenga hakabutuleye misoko kuakadi Lota mushikame. Lota wakumuka ku Soâ, wakaya kushikama ku mikuna, yeye ne bana bandi bakashi babidi, wakatshina bua kushikama ku Soâ, wakikala biandi ne bana bandi bakashi babidi mu lubuebue. Muanʼa bute wakambila muanʼa mukala ne, Tatu wetu udi mununu, ne kakuena mulume mukuabo udi mua kulua kutudi bu mudi tshilele tshia bonso ba ha buloba. Lua, tunuishe tatu wetu nvinyo, netulale nʼandi, bua tuetu tulelele tatu wetu bana. Bakanuisha tatu wabo nvinyo butuku abu, ne muaba bute wakabuela, wakalala ne tatu wandi, tatu wandi kakamanya hakalaleye ne hakabikeye. Hakatshiabu muanʼa bute wakambila muanʼa mukala ne, Butuku bua lelu nakulala ne tatu wanyi, tumunuishe nvinyo butuku ebu kabidi, wewe ubuele, ulale bandi, bua tuetu tulelele tatu wetu bana. Bakanuisha tatu wabo nvinyo butuku abu kabidi, ne muanʼa mukala wakabika, wakalala nʼandi, ne tatu wandi kakamanya hakalaleye ne hakabikeye. Nunku bana bakashi ba Lota babidi bakimita mafu kudi tatu wabo. Muanʼa bute wakalela muana mulume, wakamulelela dina ne, Moaba, yeye wakadi nkambua wa Bena Moaba to ne lelu. Muanʼa mukala wakalela muana mulume kabidi, wakamuidika dina ne, Beneami, yeye wakadi nkambua wa Bena Amona tô ne lelu. Abalahama wakumuka ku muaba au, wakaya ku Sude, wakashikama hankatshi ha Kadesha ne Shû, wakashikama ku Gelâ. Abalahama wakamba bua Sala, mukashi wandi, ne, Yeye udi muanʼetu mukashi, ne Abimeleke, mukelenge wa Gelâ, wakatuma bantu, bakangata Sala. Kadi Nzambi wakamueneka kudi Abimeleke mu tshilota butuku, wakamuambila ne, Wewe udi anu muntu mufue, bualu bua mukashi uwakuangata udi mukashi wa munga muntu. Abimeleke kakadi muanze kulua kudiye, ne yeye wakakonka ne, Mukelenge, wewe neushihe tshisamba tshiakane, anyi? Yeye kakungambila ne, Yeye udi muanʼetu mukashi, anyi? Mukashi mene wakamba ne, Yeye udi muanʼetu mulume Nakuenza bualu ebu mu buakane bua mu mutshima ne kutoka kua bianza bianyi. Nzambi wakamuambila mu tshiota ne, Bulelela, ndi mumanye ne wewe wakuenza bualu ebu mu buakane bua mu mutshima webe, nakakuhidisha kabidi bua kuenza bualu bubi ku mesu kuanyi, nunku tshiakuitabusha bua wewe kumulenga tshianza. Nunku uhingashe mukashi kudi mulume wandi, bualu bua yeye udi muprofete, neakulombele Nzambi bua wewe wikale ne muoyo, kadi biwahidia kumuhingasha, umanye biebe ne wewe ne bantu bonso baudi nʼabo nenufue bulelela. Abimeleke wakabika ne dinda dionso, Wakabikila bantu bandi bonso, wakabambila malu au onso ku matshu abo; ne bantu bandi bakatamba kutshina. Hashishe Abimeleke Wakabikila Abalahama, wakamukonka ne, Bualu ebu buwakungenzela budi tshinyi? Nakukuenzela bualu bubi kai, bua wewe wakunvuisha ne bantu banyi mu bualu bubi bunene nunku? Wewe wakungenzela bualu bubi, budi kabuyi buimpe bua kuenza. Abimeleke wakakonka Abalahama ne, Meji kai akadi munda muebe a kukuenzesha bualu ebu? Abalahama wakamuambila ne, Bualu bua nakuelangana meji ne, Bushuwa, ditshina dia Nzambi kadiena mu muaba eu, ne bobo nebanshihe bualu bua mukashi wanyi. Bulelela, yeye udi muakunyi wanyi, udi muana wa tatu wanyi, kadi kena muana wa mamu wanyi, ne yeye wakalua mukashi wanyi. Hashishe hakambikila Nzambi, wakangumusha ku nsubu wa tatu wanyi, meme nakamuambila ne, Elu nduse lundi musue wewe kundesha, ku miaba yonso itudi tuya nʼebe ubambile bua bualu buanyi ne, Yeye udi mukulu wanyi wa balume. Abimeleke wakangata mikoko ne ngombe ne bahika balume ne bahika bakashi, wakabifila kudi Abalahama, wakahingasha Sala mukashi wandi kudiye kabidi. Abimeleke wakamuambila ne, Mona, buloba buanyi budi ku mpala kuebe, ushikame kudi musue. Yeye wakambila Sala ne, Mona, nakuha mukulu webe bituha bia argent tshinunu, ntshintu tshiebe tshia kutokesha nʼatshi munda ne bantu bonso badi nʼebe, wewe wakubingishibua ku mesu kua bantu bonso. Abalahama wakalomba Nzambi, ne yeye wakakolesha Abimeleke ne mukashi wandi ne bena mudimu bandi ba bakashi, ne bobo bakalela bana. Bualu bua Yehowa wakakumbamisha bantu bonso ba mu nsubu wa Abimeleke, bualu bua Sala, mukashi wa Abalahama. Yehowa wakahingana kudi Sala bu muakambeye, ne wakenzela Sala bu muakambeye. Sala wakimita difu, wakalelela Abalahama muana mulume mu bununu buandi mu tshikondo tshiakamuambila Nzambi. Abalahama wakabika muana wandi mulume wakamulelela Sala ne, Isaka Abalahama wakatengula muana wandi mulume Isaka hakahita matuku muanda mukulu, bu muakamuambila Nzambi. Abalahama wakadi ne bidimu lukama hakamulelabo muana wandi mulume Isaka. Sala wakamba ne, Nzambi wakansekesha ne bantu bonso badi bunvua lumu elu nebaseke nʼanyi. Yeye wakamba ne, Muntu kai wakadi kuambila Abalahama ne, Sala neamushe bana mabele? Bualu bua meme nakamulelela muana mu bununu buandi. Muana wakadiunda, wakalekela mabele, mu dituku diakalekeleye mabele Abalahama wakalambishila Isaka bidia bia bungi. Sala wakamona muana mulume wa Haga, muena Ejipitu, wakadi muledibue kudi Abalahama, wakadi useka biandi. Nunku yeye wakambila Abalahama ne, Wihate muhika eu ne muana wandi mulume bualu bua muana wa muhika eu kena mua kuhiana buhianyi muomumue ne muana wanyi Isaka mene. Bualu ebu buakadi bujitu bukole kudi Abalahama bualu bua muana wandi mulume. Nzambi wakambila Abalahama ne, Bualu ebu kabuikadi bujitu ku mesu kuebe, bualu bua nsongalume ne bua muhika webe, witabusha mei onso akukuambila Sala, unvua dî diandi, bualu bua tunkanunuina tuebe netubikidibue mu Isaka. Nenvuishe muana wa muhika webe tshisabata tshinene bualu bua yeye udi muana webe. Abalahama wakabika ne dinda dionso, wakangata bidia ne mulondo wa mai, wakabika kudi Haga, wakabiteka ha diaha diandi, wakamuha muana, wakabatuma ha bule, wakaya biandi, wakendakana mu tshihela tshia Bê-sheba. Mai akadi mu mulondo akashika, ne yeye wakaladika muana muinshi mua katshi kasase. Yeye wakaya ha bule buludiludi buakadi muana bu mudi muntu wamba kuela mikete, bualu bua wakamba ne, Tshitangidi lufu lua muana Yeye wakashikama buludiludi buakadi muana, wakaula muadi, wakadila. Nzambi wakunvua di dia nsongalume, ne muanjelo wa Nzambi wakela dî kudi Hagâ difume mu diulu, wakamukonka ne, Hagâ, bualu kai budi bukutonda? Kutshinyi, bualu bua Nzambi wakamana kunvua di dia nsongalume mudiye mulale. Bika biebe, ubishe nsongalume, umukuate ku tshianza, bualu bua meme nemmuvuishe tshisamba tshinene. Nzambi wakatabasha mesu andi, yeye wakamona mushimi wa mai, yeye wakaya, wakasuna mai mulondo tente, wakanuisha nsongalume mai. Nzambi wakadi ne nsongalume, yeye wakadiunda, yeye wakashikama mu tshihela wakalua tshilembi tshidi ne ndudi. Wakashikama mu tshihela tshia Palana, mamu wandi wakamuangatshila mukashi wa mu buloba bua Ejipitu. Mu tshikondo atshi Abimeleke ne Pikola, kamanda ka masalayi andi, bakambila Abalahama ne, Nzambi udi nʼebe mu malu onso audi wenza. Nunku uditshihe nʼanyi kudi Nzambi bua wewe kundingi, nansha muanʼanyi mulume, nansha muana wa muanʼanyi, kadi ungenzele malu ne luse bu munakakuenzela wewe ne buloba bûdi mushikame. Abalahama wakamba ne, Nenditshihe nunku. Abalahama wakabela Abimeleke bualu bua dina dia mai diakanyengabo kudi bahika ba Abimeleke ku bukole. Abimeleke wakamba ne, Tshiena mumanye bantu bakuenza bualu ebu, wewe kuakungambila diambedi, tshiakunvua lumu lua bualu ebu, anu lelu. Abalahama wakangata mikoko ne ngombe, wakabika kudi Abimeleke, bubidi buabo bakafua ndondo. Abalahama wakateka bana ba mikoko ba mashina muanda mutekete ha buabo. Abimeleke wakebesha Abalahama ne, Wakuteka bana aba ba mikoko muanda mutekete ha buabo bua tshinyi? Yeye wakamba ne, Bana aba ba mikoko muanda mutekete, wewe neubangate ku tshianza tshinyi, nebikale bu bamanyi ba bualu buanyi ne, Meme nakumbula dina edi dia mai. Nunku bakabikila muaba au ne, Besheba bualu bua bubidi buabo bakaditshihilaku. Nunku bakahungakasha tshihungidi ku Bê-sheba, ne Abimeleke ne Pikola, kamanda ka masalayi andi, bakabika, bakahingana ku buloba bua Bena Peleshete. Abalahama wakakuna mutshi ku Be-sheba, wakabikilaku dina dia Yehowa, Nzambi wa Kashidi. Abalahama wakashikama mu buloba bua Bena Peleshete matuku a bungi. Hakahita malu au Nzambi wakateta Abalahama, wakamuambila ne, Abalahama yeye wakitaba ne, Ndiku. Yeye wakamba ne, Wangate muan ebe mulume, muana umuehele, ûdi munange, Isaka mene, uye biebe mu buloba bua Moliya, umufileku bu mulambu wa kuosha ha kalua, ha mutu ha mukuna undualua kukulesha. Abalahama wakabika ne dinda dionso, wakasuika tshiseba ha nyima ha nyama wandi wa mpunda, wakangata bansongalume bandi babidi ne Isaka muanʼandi, wakahanda nkunyi ya kalua ka ha tshioshelu, wakabika, wakaya ku muaba wakamuambila Nzambi. Hakahita matuku asatu Abalahama wakabandisha mesu andi, wakamona muaba kule kuakua Abalahama wakambila bansongalume bandi babidi ne, Nuenu nushale kimoko ne nyama wa mpunda, tuetu netuye ne nsongalume, netutendelele, netuhingane kunudi. Abalahama wakangata nkunyi ya kalua ka ha tshioshelu, wakayiteka ha diaha dia muanʼandi Isaka, yeye wakangata kalua ne kele mu tshianza tshiandi, bubidi buabo bakaya hohamue. Isaka wakambila Abalahama, tatuʼandi ne, Tatu wanyi, yeye wakitaba ne, Ndiku, muanʼanyi Isaka wakamba ne, Tangila kalua ne nkunyi bidiku, kadi muana wa mukoko wa kuosha ha kalua weba? Abalahama wakamba ne, Muanʼanyi, Nzambi nkayandi neatuhe muana wa mukoko wa kuosha ha kalua, nunku bubidi buabo bakaya hohamue. Bakafika ku muaba wakamua mbila Nzambi, ne Abalahama wake nza tshioshelu, wakalongolola nkunyi, wakasuika muanʼandi Isaka, wakamuladika ha tshioshelu ha mutu ha nkunyi. Abahalama wakolola tshianza tshiandi, wakangata kele bua kushiheye nʼaku muanʼandi. Muanjelo wa Yehowa wakamuela di difume mu diulu ne, Abalahama, Abalahama, yeye wakitaba ne, Ndiku. Yeye wakamba ne, Kulengi nsongalume tshianza nansha, kumuenzedi bualu, bualu bua katataka ndi mumanye ne wewe udi utshina Nzambi, bualu bua wewe kuakumpidia muanʼebe, muana umuehele mene. Abalahama wakabandisha mesu andi, wakamona ku nyima kuandi tshi-mpanga tshiakadi ne nsengu yatshi mile mikuata ku mutshi Abalahama wakaya, wakangata tshimpanga, wakatshishihela Nzambi mu muaba wa muanʼandi. Abalahama Wakabikila dina dia muaba au ne, Yehowa-yile; nunku badi bamba tô ne ku dituku edi ne, Mu mukuna wa Yehowa nebatuhe bintu. Muanjelo wa Yehowa wakela di diandi kudi Abalahama difume mu diulu tshiakabidi, wakamba ne, Nakaditshiha ku dina dianyi, muakuamba Yehowa, bualu bua wewe wakuenza bualu ebu, kuakumpidisha muanʼebe, muana umue hele mene, ne hanasankisha bakuabo nenkuyudíshile disanka, ne hanakumbasha bakuabo nenkumbashe tunkanunuma tuebe bu mitoto ya mu diulu ne bu nsenga ya kukala kua mai manene tunkanunuma tuebe netuhiane bibi bia bantu badi nʼatu lukuna, bisamba bionso bia ha buloba nebisanke bualu bua tunkanunuma tuebe, bualu bua wewe wakatumikila di dianyi. Hashishe Abalahama wakahingana kudi bansongalume bandi, bakabika, bakaya bonso hohamue ku Be-sheba, Abalahama wakashikama mu Be-sheba. Ku nyima kua malu au bakambila Abalahama ne, Mona, Mileka wakalelela muanʼenu Naho bana, dina dia muanʼa bute ne, Uza, ne dina dia muakunyʼandi ne Buza, ne Kemuele, tatu wa Alama ne Kesede ne Hazo ne Piledasha ne Yidilafa ne Betuele. Betuele wakalela Lebeka: Mileka wakalelela Naho muanʼabo ne Abalahama, bana aba muanda mukulu. Muhika wandi mukashi, dina diandi Leuma, wakamulelela Teba ne Gahama ne Tahasha ne Maka. Sala wakadi ne bidimu lukama ne makumi abidi ne muanda mutekete, ebi mbidimu bionso bia muoyo wa Sala. Sala wakafua mu Kiyata-aba (eu udi Hebelone) mu buloba bua Kanana, Abalahama wakaya bua kuaula muadi wa Sala ne bua kumujinga. Abalahama wakabika ku mpala kua tshitalu tshiandi, wakambila bana ba Hete ne, Ndi bianyi muenyi ne muikadi munkatshi muenu, numpe muaba wa majambu bua meme kujikarnu tshitalu etshi ku mesu. Bana ba Hete bakambila Abalahama ne, Mukelenge, utunvuile, wewe udi bu muntu wa Nzambi munene munkatshi muetu, usungule muaba wa majambu nkayebe udi musue kujikarnu tshitalu etshi, kakuena muntu udi mua kukukanda bua wewe kuangata muaba wa kujikamu tshi tatu etshi. Abalahama waka bika, wakakukuila bana ba Hete, bena buloba. Yeye wakayikila nʼabo, wakabambila ne, Binuitabusha bua meme kujika tshitalu etshi ku mesu kuanji, nungunvuile, nungakuile kudi Efelona, muana wa Sohâ bua yeye ampe lubuebue lua ku Makepela, ludiye nʼalu ku mpenge kua budimi buandi, yeye alumpe ku mesu kua buonso buenu ku mushinga udiye musue wa muaba wa kujikamu tshitalu. Efelona wakadi ushikama munkatshi mua bana ba Hete, ne Efelona, Muena Hiti wakambila Abalahama ku mpala kua bana ba Hete bonso mene bakadi babuela mu musoko wandi ne, Nansha, mukelenge, ungunvuile nenkuhe budimi ne lubuebue bidimu, nenkuhebi ku mpala kua bana ba bantu banyi, ujikemu tshitalu etshi. Abalahama wakakukuila ku mpala kua bena buloba. Yeye wakambila Efelona ku mpala kua bena buloba ne, Biwitabusha, ndi nkutendekena ne, Ungunvuile, nenkuhe mushinga wa budimi uwangate ne meme nenjikemu tshitalu etshi. Efelona wakakudimuna Abalahama di ne, Mukelenge wanyi, ungunvuile budimi bua nkama mai ya nshekele ya argent budi mushinga kai munkatshi muetu? Nunku ujikemu tshitalu. Abalahama wakitabusha dî dia Efelona Abalahama wakamuidikishila bungi bua argent buakalombeye ku mpala kua bana ba Hete, nshekele ya argent nkama mai bu muakitabusha bahanyi ba bintu. Nunku budimi bua Efelona, buakadi mu Makepela ku mpala kua Mamale, budimi ne lubuebue luakadimu ne mitshi yonso yakadi mu budimi ne ku mpenge kuabu, bintu ebi bionso biakalua kudi Abalahama, bu buhianyi buandi ku mpala kua bana ba Hete ne kua bonso bakadi babuela mu musoko wandi. Ku nyima kua malu au Abalahama wakajika Sala, mukashi wandi, mu lubuebue biakadi mu budimi bua Makepela ku mpala kua Mamale (eu udi Hebelone) mu buloba bua Kanâna. Budimi ne lubuebue luakadimu biakaya mu bianza bia Abalahama tshiendelele ku mpala kua bana ba Hete bu muaba wa kujikabo bantu bafue. Abalahama wakadi muntu mununu mukoke, ne Yehowa wakasankisha Abalahama mu malu andi onso. Abalahama wakambila muhika wandi mukulu, wakadi mulami wa bintu biandi bionso ne, Ndi nkutendekena ne, Uteke tshianza tshiebe muinshi mua tshibelu tshianyi, nenkutshihishe kudi Yehowa, Nzambi wa diulu ne wa buloba, ne wewe kuangatshidi muanʼanyi mulume mukashi wa bana bakashi ba Bena Kanâna babidi bashikame nʼabo, kadi uye biebe kuanyi, kudi bana betu, wangatshile muanʼanyi Isaka mukashi. Muhika wandi wakamukudimuna di ne, Abu biahidia mukashi kundonda ku buloba ebu, netuhingane ne muan ebe mulume ku buloba buwakumuka, anyi? Abalahama wakamuambila ne, Udimuke, kuyi ne muanʼanyi kabidi kuakua. Yehowa, Nzambi wa mulu, wakangumusha ku nsubu wa tatu wanyi ne ku buloba buakandelabo, wakabambila, wakandaya ne, Nempe tunkanunuina biebe buloba ebu yeye mene neatume muanjelo wandi ku mpala kuebe, ne wewe newangatshile muanʼanyi mukashi kuakua. Biahidia mukashi kukulonda, hashishe, munda muebe nemu ikale mutoke ku kuditshiha eku. Muhi ka wakateka tshianza tshiandi muinshi mua tshibelu tshia Abalahama, mukelenge wandi, wakaditshiha bua bualu ebu. Muhika wandi wakangata nyama ya tumelo dikumi mu tshisumbu tshia tumelo bia mukelenge wandi, wakaya ne biuma bia mukelenge wandi bia mishindu yonso mu tshianza tshiandi, wakabika, wakaya ku buloba bua Mesopotamia, ku musoko wa Naho. Yeye Wakabikila tumelo binu hanshi ku butshika bua musoko hehi ne mushimi wa mai dilolo ha diba diyaya bakashi bua kusunabo mai. Yeye wakamba ne, Yehowa, Nzambi wa mukelenge wanyi Abalahama, ndi nkulomba ne, Ungendeshe dikasa dimpe lelu, ufuile mukelenge wanyi Abalahama luse. Tangila, hantshidi muimane hehi ne mushimi wa mai, ne bana bakashi ba bena musoko bakadi balua bua kusunabo mai, witabushe ne nsongakashi undi ngambila ne, Ndi nkutendekena ne, Utule mulondo webe wa mai, umpe mai a kunua, yeye angandamune di ne, Nua biebe, nennuishe tumelo biebe kabidi, nunku yeye mene ikale mukashi uwakasunguila muntu webe Isaka, nunku nemmanye ne wewe wakufuila mukelenge wanyi luse. Hashishe, hakadiye wakula, tangilai, Lebeka wakadi mulela kudi Betuele, muana mulume wa Mileka, mukashi wa Naho, muanʼabo ne Abalahama, wakaluhuka ne mulondo wa mai ha diaha diandi. Nsongakashi eu wakadi ne mpala muimpe be, wakatshidi kamama, kayi muanze kumanyibua kudi mulume, yeye wakahueka ku mushimi wa mai, wakasuna mulondo wandi tente, wakabanda kabidi. Muhika wakaya lubilu kudiye, wakamuakidila, wakamuambila ne, Ndi nkutendekena ne, Umpeku tuima tukese bia meme kunua. Yeye wakamba ne, Nue biebe, mukelenge wanyi, yeye wakatula mulondo wandi lubilu mu tshianza tshiandi, wakamunuisha. Hakashikisheye kumunuisha mai, yeye wakamba ne, Nensunyine tumelo biebe mai kabidi to ne hukutatu. Yeye wakaya lubilu, wakahongoluela mai mu luvu lunene, wakaya lubilu ku mushimi kabidi, wakasunyina tumelo biandi tuonso mai. Mulume eu wakamutangila talalâ, wakadi welangana meji munda bua kumanyeye ne, Yehowa wakungendesha dikasa bimpe, anyi? Hakashikisha tumelo kunua mai, mulume eu wakahatula kakanu ka or ka bujitu bua tshituha tshia nshekele, ne nkanu ibidi ya ku maboko ya bujitu bua nshekele dikumi kabidi. Wakamukonka ne, Wewe udi muana wa nganyi? Ndi nkusengelela ne, Ungambile Udi ne muaba mu nsubu wa tatu webe bua tuetu kulalamu, anyi? Yeye wakamukudimuna di ne, Ndi muana wa Betuele, muana mulume wa Mileka, wakaleleleye Naho. Wakamuambila kabidi ne, Tudi ne mashinde ne manvua a bungi, ne miaba ya kulala. Mulume eu wakinyika mutu wandi, wakatendelela Yehowa. Yeye wakamba ne, Yehowa, Nzambi wa mukelenge wanyi Abalahama, atumbishibue, yeye kakumushila mukelenge wanyi luse luandi ne bulelela buandi, hanakadi mu nshila Yehowa wakandombola ku nsubu wa bana babo ne mukelenge wanyi. Nsongakashi wakaya lubilu, wakambila ba mu nsubu wa mamu andi malu au. Lebeka wakadi ne muanʼabo wa balume dina diandi Labana, Labana wakaya lubilu kudi mulume wakadi ku mushimi wa mai. Hakatangileye kakanu ka ku diulu ne nkanu ya ku maboko a muanʼabo mukashi, ne hakunvueye mei a Lebeka muanʼabo mukashi ne, Mulume au wakungambila nunku, yeye wakaya kudi mulume wakadi muimane ne tumelo hehi ne mushimi wa mai. Yeye wakamba ne, Ubuele, wewe udi musankishibue kudi Yehowa, udi muimane ha bule bualu kai? Bualu bua nakumana kukulongoluela nsubu ne muaba wa tumelo tuebe. Mulume wakabuela mu nsubu, wakumusha biseba ha nyima ha tumelo, wakalua ne mashinde ne manvua bia tumelo, ne mai a kuvuwa nʼau makasa andi ne makasa a bantu bakadi nʼandi. Bakateka bintu bia kudia ku mpala kuandi, kadi yeye wakamba ne, Tshiena ndia diambedi tshiyi muanze kunuambila bualu bunakuluila Labana wakamuambila ne, Ambaku. Yeye wakamba ne, Ndi bianyi muhika wa Abalahama. Yehowa wakatamba kusankisha mukelenge wanyi, yeye wakulua muntu munene, wakumuka bisumbu bia mikoko ne bia ngombe, ne argent ne or, ne bahika balume ne bahika bakashi, ne tumelo ne nyama ya mpunda. Sala, mukashi wa mukelenge wanyi, wakamulelela muana mulume hakadiye muntu mununu, yeye wakadia muana eu bintu bionso bidiye nʼabi. Mukelenge wanyi wakuntshihisha ne, Kuangatshidi muanʼanyi mulume mukashi wa bana bakashi ba Bena Kanâna badi mu buloba bundi mushikame, kadi uye biebe ku nsubu wa tatuʼanyi ne kudi bana betu, wangatshileku muanʼanyi mulume mukashi bakambila mukelenge wanyi ne, Ahu, biahidia mukashi kundonda. Yeye wakungambila ne, Yehowa, undi ngendakana ku mpala kuandi, neatume muanjelo wandi nʼebe, neakuendeshe dikasa dimpe, ne wewe newangatshile muanʼanyi mulume mukashi kudi bana betu ne kudi ba mu nsubu wa tatu wanyi Hashishe, munda muebe nemuikale mutoke ku kuditshiha eku, hawaya kudi bana betu, biahidiabo kukuha mukashi, munda muebe nemuikale mutoke ku kuditshiha eku. Hanakufika lelu ku mushimi wa mai, nakuamba ne, Yehowa, Nzambi wa mukelenge wanyi Abalahama, biwasua kungendesha dikasa dimpe mu nshila unaya, tangila, hantshidi muimane hehi ne mushimi wa mai, witabushe ne nsongakashi ulualua bua kusuneye mai undi ngambila ne, Ndi nkusengelela ne Umpeku tuima tua kunua mu mulondo webe, yeye neangandamune dî ne, Nua biebe, nennuishe tumelo biebe kabidi, ka yeye mene ikale mukashi wakasunguila Yehowa muana mulume wa mukelenge wanyi. Diambedi tshiyi muanze kushikisha kuamba mei au mu mutshima wanyi, Lebeka wakaluhuka ne mulondo wa mai ha diaha diandi, wakaya ku mushimi wa mai, wakasuna mai, meme nakamuambila ne, Umpeku mai a kunua. Yeye wakatula mulondo wandi lubilu ha diaha diandi, wakamba ne, Nua biebe, nensunyine tumelo biebe mai kabidi, nunku nakunua ne yeye wakumusha tumelo mai kabidi. Nakumuebesha ne, Wewe udi muana wa nganyi? Yeye wakungambila ne, Ndi muana wa Betuele, muana wa Naho, wakamulelela Mileka, nunku nakumuluatshisha kakanu ka ku diulu diandi ne nkanu ya ku maboko. Nakuinyika mutu wanyi, nakutendelela Yehowa, nakutumbisha Yehowa, Nzambi wa mukelenge wanyi Abalahama, wakandombola mua kuya mu nshila muakane bua kuangatshila muana mulume wa mukelenge wanyi mukashi kudi muana wa muanʼabo. Katataka binuasua kulesha mukelenge wanyi luse ne bulelela, nungambile, ne binuahidia, nungambile kabidi: nunku meme ndi mua kuya ku tshianza tshia balume anyi ku tshianza tshia bakashi. Labana ne Betuele bakamba ne, Bualu ebu buakufuma kudi Yehowa, tuetu katuena mua kukuambila dî dibi anyi dî dimpe. Tangila, Lebeka udi ku mpala kuebe, umuangate, uye nʼandi, yeye neikale mukashi wa muana mulume wa mukelenge webe bu muakamba Yehowa. Hakunvua muhika wa Abalahama mei abo, yeye wakakukuila mpala wandi hanshi ku mpala kua Yehowa. Muhika wa Abalahama wakahatula bilenga bia argent ne bia or ne bilulu, Wakabikila kudi Lebeka, yeye wakaha muanʼabo mulume ne mamu wandi kabidi bintu bia mushinga mukole. Yeye ne balume bakadi nʼandi bakadia, bakanua, bakalala butuku abu, bakabika ne dinda, yeye wakabambila ne, Nuntume kudi mukelenge wanyi. Muanʼabo mulume ne mamu wa Lebeka bakamba ne, Nsongakashi anji kushala matuku makese, nansha dikumi, hashishe yeye neaye. Yeye wakabambila ne, Kanumpumbishi, bualu bua Yehowa wakungendesha dikasa dimpe, nuntume kudi mukelenge wanyi. Bobo bakamba ne, Netubikile nsongakashi, netumuebeshe yeye. Bakabikila Lebeka, bakamuebesha ne, Udi musue kuya ne muntu eu, anyi? Yeye wakabakudimuna ne, Nyaya Nunku bakatuma muanʼabo Lebeka ne muena mudimu wandi wa bakashi ne muhika wa Abalahama ne bantu bandi. Bakavudishila Lebeka disanka, bakamuambila ne, Wewe muanʼetu mukashi, wikale nkambua mukashi wa binunu bia mbombo ya bantu, ne tunkanunuina tuebe tuhiane buloba bua bantu badi nʼatu lukuna. Lebeka wakabika ne bena mudimu bandi ba bakashi, bakabanda ha nyima ha tumelo, bakalonda muntu wa Abalahama, yeye wakangata Lebeka, wakaya mu nshila wandi. Isaka wakalua mu nshila wa ku Bê-laha-loi, bualu bua yeye wakadi ushikama ku buloba bua ku Sude. Isaka wakaya mu budimi dilolo bua kutendelela, wakabandisha mesu andi, ne monai, tumelo tuakadi tulua. Lebeka wakabandisha mesu andi kabidi ne hakatangileye Isaka, yeye wakatuluka ha nyima ha kamelo. Yeye wakakonka muhika ne, Eu mulume kai udi wendakana mu budimi bua kusambakana nʼetu? Muhika wakamukudimuna dî ne, Nyeye mukelenge wanyi Lebeka wakangata tshilulu tshikudika, wakatshiteka ku mishiku yandi. Muhika wakambila Isaka malu onso akenzeye. Isaka wakalua nʼandi mu ntenta wa mamu wandi, Sala, yeye wakangata Lebeka, wakalua mukashi wandi Isaka wakamunanga, ne mutshima wandi wakasambibua bua lufu lua mamu wandi. Abalahama wakabaka mukashi mukuabo dina diandi Ketula. Yeye wakamulelela Zimelana ne Yokeshana ne Medana ne Midiyana ne Yishebaka ne Shua. Yokeshana wakalela Sheba ne Dedana, bana balume ba Dedana bakadi Ashulima ne Letushima ne Leumima. Bana ba Midiyana bakadi Eha ne Ehê ne Hanoka ne Abida ne Eleda Bana aba bonso bakadi bana ba Ketula. Abalahama wakafua bintu bionso biakadiye nʼabi kudi Isaka. Abalahama wakaha bana ba bakashi bandi bakuabo matabisha, wakabumusha kudi Isaka hakadiye ne muoyo, wakabatuma ku luseke lua ku esete. Â adi matuku a bidimu bia Abalahama, biakadi lukama ne makumi muanda mutekete ne bitanu. Abalahama wakahuola muoyo wandi, wakafua mununu, bidimu biandi biakakumbana bia bungi, ne yeye wakadisangisha ne bankambua bandi. Bana bandi balume, Isaka ne Yishemaele, bakamujika mu lubuebue lua Makepela mu budimi bua Efelona, muana wa Soha, Muena Hiti, ku mpala kua Mamale, budimi buakasumba Abalahama kudi bana ba Hete, bakajikamu Abalahama ne Sala, mukashi wandi. Ku nyima kua lufu lua Abalahama Nzambi wakasankisha Isaka muanʼandi, ne Isaka wakashikama mu Be-laha-loi. Ei idi ndelanganyi ya bana ba Yishemaele, muana wa Abalahama wakamulelela Haga, Muena Ejipitu, muena mudimu wa bakashi wa Sala: au mmena a bana ba Yishemaele ku bikondo biabo muaba bute wa Yishemaele Nebayota, ne Kedâ ne Adebele ne Mibesama, Mishema ne Duma ne Masa, Hadada ne Tema ne Yetû ne Nafisha ne Kedema. Abambana balume ba Yishemaele ku mena abo ne misoko yabo ne ku meku abo, baminyampala dikumi ne babidi ku bisamba biabo. Ebi mbidimu bia muoyo wa Yishemaele, biakadi lukama ne makumi asatu ne muanda mutekete, yeye waka huola muoyo wandi, wakafua, wakadisangisha ne bankambua bandi. Bana bandi bakadi ne mukalu wabo ku Hawila to ne ku Shû, ku mpala kua Ejipitu mu nshila wa ku Ashû, bakashikama batangilangane ne bana babo bonso. Ei idi ndelanganyi ya Isaka, muana wa Abalahama, Abalahama wakalela Isaka, hakadi Isaka ne bidimu makumi anai, yeye wakabaka Lebeka, muana mukashi wa Betuele, muena Alama wa ku Padana-alama, muanʼabo ne Labana. Isaka wakalombela mukashi wa ndi Yehowa, bualu bua yeye wakadi nkumba, Yehowa wakamunvuila ne Lebeka wakimita difu. Bana bakadi baluangana munda muandi, yeye wakamba ne, Bikala bualu nunku, ndi mushale ne muoyo bua tshinyi? Yeye wakaya bua kuebesha Yehowa. Yehowa wakamuambila ne, Bisamba bibidi bidi munda muebe, bisamba bibidi bia bantu nebiluhuke munda muebe tshisamba tshimue netshitambe tshisamba tshikuabo bukole, ne mukulu neakuatshile muakunyʼandi mudimu. Hakakumbana matuku andi, monai, bana ba makasa bakadi munda muandi. Wa kumudilu wakahatuka wakadi mukunze-kunzû, wakadi ne miosa ya bungi hamʼbidi handi, bakamuidika dina ne, Esau. Ku nyima muakunyʼandi wakahatuka ne tshianza tshiandi tshikuata ku tshikankanyi tshia Esau Bakamuidika dina ne, Yakoba Isaka wakadi ne bidimu makumi asambombo hakamuleleleye bana. Bana aba bakadiunda, Esau wakadi tshilembi tshidi ne budimu bua bungi, Yakoba wakadi biandi munda mukole, wakashikama mu ntenta. Isaka wakasua Esau bualu bua yeye wakamudisha munyinyi wa ntole, Lebeka wakasua Yakoba. Yakoba wakalamba bintu bia kudia, Esau wakahingana mu tshisuku, wakadi muhungila. Esau wakambila Yakoba ne, Ndi nkutendekena ne, Undisheku bintu bikunze biudi mulambe bualu bua meme ndi muhungila. Bua bualu ebu bakamuidika dina ne, Edome. Yakoba wakamba ne, Anji kunsumbisha bintu bia buanʼa bute diambedi. Esau wakamba ne, Abu akadi ha kufua, ne bintu bia buanʼa bute nebinsankishe kudi kunyi? Yakoba wakamba ne, Anji kuditshiha kundi diambedi. Yeye wakaditshiha kudiye, wakahana bintu bia buanʼa bute kudi Yakoba. Nunku Yakoba wakaha Esau bidia ne tshiteku, yeye wakadia, wakanua, wakabika, wakaya, nunku Esau wakahatula bintu bia buanʼa bute. Tshiole tshiakadi mu buloba ku nyima kua tshiole tshia diambedi tshiakadiku mu matuku a Abalahama Isaka wakaya kudi Abimeleke, mukelenge wa Bena Peleshete, mu Gelâ. Yehowa wakamueneka kudiye, wakamba ne, Kuyi mu Ejipitu, ushikame mu buloba bundi nkuambila. Ushale mu buloba ebu, nengikale bebe, nenkusankishe, bualu bua nenkuhe wewe ne tunkanunuma diebe buloba ebu buonso, nenjadike nʼebe tshihungidi tshinakahunga ne Abalahama, tatuʼebe. Nenvudishangane tunkanunuina tuebe bungi bu mitoto ya mulu, nempe tunkanunui na tuebe buloba ebu buonso bisamba bionso bia ha buloba nebisankishibue bua tunkanunuina tuebe. Bualu bua Abalahama wakitabusha dî dianyi, wakanemekela kudimusha kuanyi, ne mikenji ne mikandu yanyi ne mei anyi. Isaka wakashikama mu Gelâ. Bena musoko bakamukonka bua mukashi wandi, ne yeye wakabambila ne, Yeye udi muanʼetu wa bakashi Bualu bua yeye wakatshina mua kuamba ne, Yeye udi mukashi wanyi, bua bena musoko kabamushihi bua Lebeka, bualu bua yeye wakadi miumpe kumona. Hakashikameye mu musoko au musangu mule, dituku dikuabo Abimeleke, mukelenge wa Bena Peleshete, wakatangila ha disoso dia mu nsubu wandi, wakamona ne, Isaka wakadi usaba ne Lebeka, mukashi wandi. Abimeleke Wakabikila Isaka, wakamuambila ne, Bulelela, yeye udi mukashi webe, bualu kai wewe wakuamba ne, Yeye udi muanʼetu wa bakashi? Isaka wakamuambila ne, Nakatshina ne, Nebanshihe bua bualu buandi. Abimeleke wakamuebesha ne, Bualu buwakutuenzela budi tshinyi? Bikala muena musoko mulale ne mukashi webe, wewe wakadi kutuvuisha mu mulau. Abimeleke wakadimusha bantu bandi bonso ne, Bialenga muntu mulume eu anyi mukashi wandi tshianza, nebamushihe. Isaka wakakuna bintu mu buloba abu, ne tshidimu atshi wakahuola lukama lukama, Yehowa wakamusankisha. Yeye wakalua muntu munene be, wakatamba kudiunda bunene, wakadi ne bisumbu bia mikoko ne bia ngombe ne bantu ba bungi ku nyima kuandi. Bena Peleshete bakadi nʼandi mukau. Mena onso a mai akimbabo kudi bahika ba Abalahama, tatu wandi, Bena Peleshete bakajibikila, bakelamu buloba. Abimeleke wakambila Isaka ne, Umuka kutudi, bualu bua wewe udi ututamba bukole. Isaka wakumukaku, wakashimika ntenta yandi mu tshibanda tshia Gelâ, wakashikamamu. Isaka wakumbula kabidi mena a mai akimbabo mu matuku a tatu wandi Abalahama, bualu bua Bena Peleshete bakelamu buloba bakafua Abalahama, Isaka wakayidika mena akidika Abalahama. Bantu ba Isaka bakimba dina mu tshibanda, bakasanganamu mushimi wa mai. Balami ba bimuna bia Bena Gelâ bakatandangana ne balami ba bimuna bia Isaka, bakamba ne, Dina dia mai edi ndietu. Wakidika dina dia mai ne, Eseke; bualu bua bobo bakatandangana nʼandi. Bakimba dina dia mai dikuabo, bakaditandila kabidi. Wakadidika ne, Sitena. Wakumukaku, wakimba dina dia mai dikuabo, kabakaditandila, yeye wakadidika ne, Lehobota. Yeye wakamba ne, Katataka Yehowa wakutuenzela muaba, netukumbane mu buloba. Wakumukaku, wakaya ku Bê-sheba Yehowa wakamueneka kudiye butuku abu mene, wakamba ne, Ndi Nzambi wa tatu webe Abalahama, kutshinyi, bualu bua meme ndi nʼebe, nenkusankishe, nenkumbashile tunkanunuina tuebe bualu bua muntu wanyi Abalahama. Yeye wakenzaku tshitendelelu, Wakabikila dina dia Yehowa, waka shimikaku ntenta yandi, ne bahika ba Isaka bakimbaku dina dia mai. Abimeleke ne Ahuzata, muanda wandi, ne Pikola, kamanda ka masalayi andi, bakumuka ku Gelâ, bakaya kudiye. Isaka wakabambila ne, Nudi nʼanyi lukuna, nuakungihata munkatshi muenu, nunku nuakuluila kundi bua tshinyi? Bobo bakamba ne, Bulelela, tuakutangila ne Yehowa udi nʼebe, nunku tuakuambilangana ne, Tutshihangane nʼebe, tuhunge nʼebe tshihungidi, bua wewe kutuenzedi bualu bubi, bu mutuakadi katuyi tukulenga tshianza, tuakukuenzela anu malu mimpe; tua-kukumusha talalâ, ne katataka wewe udi musankishibue kudi Yehowa. Yeye wakabalambishila bidia bia disanka, bakadia, bakanua. Bakabika ne dinda, bakahingana, Isaka wakabatuma kuabo, bakaya talala. Ku dituku adi mene bahika ba Isaka bakalua kudiye, bakamuambila bua dina dia mai diakimbabo ne, Tuakusangana mai. Yeye wakadidika ne, Shiba, nunku badi babikila dina dia musoko au ne, Be-sheba to ne ku dituku edi. Hakadi Esau ne bidimu makumi anai, wakangata Yudita, muana mukashi wa Bêli, Muena Hiti, ne Basemata, muana mukashi wa Elone, Muena Hiti, bu bakashi bandi. Bobo bakanyingalasha mutshima wa Isaka ne wa Lebeka. Dituku dikuabo hakadi Isaka muntu mununu ne mesu andi akadi bileshileshi, kakamanya mua kutangila bimpe, yeye Wakabikila Esau muanʼandi, muanʼa bute, wa kamuambila ne, Muan anyi Yeye wakitaba ne, Ndiku. Yeye wa kamba ne, Tangila, ndi muntu mununu, tshiena mumanye dituku dia lufu luanyi. Ndi nkutendekena ne, Wangata bintu biebe bia bule mbi, mukulu wa mikete ne buta buebe, uye mu tshisuku, unkebele ntole undambile munyinyi wa dihembu undi musue Ulue nʼau kundi, nengudie, bua mutshima wanyi ukuvudishile disanka diambedi tshiyi muanze kufua. Lebeka wakunvua bakambila Isaka Esau muanʼandi mei au Esau wakaya mu budimi bua kukebeye ntole, ne bua kuhinganeye nʼandi. Lebeka wakambila Ya koba muanʼandi ne, Tangila, nakunvua tatuʼebe wambila Esau, mukuluʼebe ne, Ulue kundi ne munyinyi wa ntole, undambile munyinyi muimpe wa dihembu, bua meme ngudie, nkuvudishile disanka ku mpala kua Yehowa diambedi tshiyi muanze kufua. Nunku muanʼanyi, utumikile dî dindi nkua mbila. Ya biebe ku tshisumbu tshia mbushi, Ulue kundi ne nku ngulu ya mbushi ibidi idi mimpe, nendambile tatu webe munyinyi muimpe wa dihembu udiye musue. Wewe neulue nʼau kudi tatu webe, yeye audie, akuvudishile disanka diambedi yeye kayi muanze kufua. Yakoba wakambila Lebeka mamuʼandi ne, Tangila, Esau, mukuluʼanyi udi ne miosa ya bungi hamʼbidi bandi kadi meme ndi ne mubidi mutuhu. Bumue tatuʼanyi neandengele tshianza, ne meme nengikale bu muena mashimi ku mesu kuandi nendieleshe mulau, tshidivuishi disanka. Mamuʼa ndi wakamuambila ne, Mulau webe wikale ha mutu hanyi, muanʼanyi, anji kutumikila di dianyi, Ulue ne nkungulu ya mbushi. Yeye wakaya, wakalua nʼai kudi mamuʼandi, ne mamuʼandi wakalamba munyinyi muimpe wa dihembu bu muakasua tatuʼandi. Lebeka wakangata bilulu bimpe bia Esau, muanʼandi muanʼa bute, biakadiye nʼabi mu nsubu, wakabiluatshisha Yakoba, muanʼandi muanʼa mukala, wakamuluatshisha biseba bia nkungulu ya mbushi ha bianza ne ha dikoshi. Yeye wakateka munyinyi muimpe ne bidia biakalambeye mu bianza bia Yakoba muan andi. Yeye wakaya kudi tatu andi, wakamba ne, Tatu anyi, ne yeye wakamukudimuna ne, Ndiku wewe udi nganyi, muan anyi? Yakoba wakambila tatuʼandi ne, Ndi bianyi Esau, muan ebe muanʼa bute, nakuenza bu mu dî diebe, ndi nkutendekena ne, Bika biebe, ushikame, udie munyinyi wanyi wa ntole, bua mutshima webe unvudishile disanka. Isaka wakebesha muanʼandi ne, Muanʼanyi, wakamona ntole lubilu nunku munyi? Yeye wakamuambila ne, Bualu bua Yehowa Nzambi webe wakungendesha dikasa dimpe. Isaka wakambila Yakoba ne, Ndi nkutendekena ne, Lua ha buihi, nenkulengele tshianza tshianyi, muanʼanyi, nemmanye ne, Wewe udi muanʼanyi Esau bulelela. Yakoba wakasemena ha buihi ne Isaka tatuʼandi, yeye wakamulengela tshianza tshiandi, wakamba ne, Dî ndia Yakoba kadi bianza mbia Esau. Yeye kakamujingulula bimpe bualu bua bianza biandi biakadi ne miosa bu bianza bia muanʼabo Esau, nunku yeye waka-muvudishila disanka. Isaka wakamuebesha ne, Wewe udi muanʼanyi Esau bulelela, anyi? Yeye wakamba ne, E. Yeye wakamba ne Lua nʼau kundi nendie munyinyi wa ntole wa muanʼanyi bua mutshima wanyi ukuvudishile disanka. Yeye wakalua nʼau kudiye, yeye wakadia, wakalua kudiye ne nvinyo, yeye wakanua. Tatu wandi Isaka wakamuambila ne, Semena ha buihi, muanʼanyi, utuangane nʼanyi mishiku. Yeye wakasemena ha buihi, wakatuangana nʼandi mishiku, yeye wakanunkila muhuya wa bilulu biandi, wakamuvudishila disanka ne, Tangila, muhuya wa muanʼanyi udi bu muhuya wa budimi buakasankishibua kudi Yehowa, nunku Nzambi akumatshishile dibungi dia mu diulu akuhe buloba butu bukuatshike bintu bia bungi, ne manvua ne nvinyo muhiamuhia bia bungi, bantu bakukuatshile mudimu, ne bisamba bia bantu bitue mpala hanshi ku mesu kuebe wikale mukelenge wa bana benu, bana ba mamu webe batue mpala hanshi ku mesu kuebe, muntu yonso udi ukuela mulau neadiele mulau muntu yonso udi ukuvudishila disanka, adivudishile disa nka. Hakashikisha Isaka kusankisha Yakoba ne Yakoba mumuke anu tshituha ku mesu kua tatu wandi Isaka, Esau mukulu andi wakahingana kuakadiye muye bua kumukebela nyama. Yeye wakalamba munyinyi muimpe wa dihembu kabidi, wakalua nʼau kudi tatuʼandi, yeye wakambila tatuʼandi ne Tatu anyi abike biandi adie munyinyi wa ntole wa muanʼandi, bua mutshi ma webe unvudishile disanka. Isaka tatu andi wakamukonka ne, Wewe udi nganyi? Yeye wakamukudimuna ne, Ndi muan ebe, muan a bute Esau. Isaka wakatamba kuhampakana, wakamba ne, Muntu kai wakangata munyinyi wa ntole, wakulua nʼau kundi, ne nakudia diambedi wewe kuyi muanji kulua, ne nakamuvudishila disanka? Yeye neikale ne disanka bulelela Ha kunvua Esau mei a tatu andi waka dila muadi bikole ne mutshima wandi munyingalala, wakambila tatu andi ne, Unsankishe meme kabidi, tatuʼanyi. Yeye wakamuambila ne, Muakunyʼebe wakulua ne bu dimu wakumana kuangata disanka diebe. Yeye wakamba ne, Dina dia Yakoba kadiena dimukumbane, anyi? Bualu bua yeye wakandinga misangu ibidi wakamana kuangata bintu bianyi bia buanʼa bute, ne lelu wakangata disanka dianyi kabidi. Yeye wakebesha Isaka ne, Wewe kuakunshilaku disanka, anyi? Isaka wakambila Esau ne, Mona, nakumana kumuvuisha mukelenge, webe nakufila bana benu bonso kudiye bu bahika bandi nakumujadika ne manvua ne nvinyo muhiamuhia nenkuenzele wewe tshinyi, muan anyi? Esau wakambila tatu andi ne, Wewe udi ne disanka anu dimue, anyi? Unvudishile meme kabidi disanka tatuʼanyi Esau wa kabandisha di diandi wakadila Isaka tatu andi wakamuambila ne, Wewe neushikame mu buloba budi bukuatshika bintu bimpe, ne dibungi dia mu diulu nedikumatshile, wewe newikale ne muoyo bualu bua muele webe wa nvita wewe neukuatshile muakunyʼebe mudimu hawahanduka wewe neumushe mutshi wandi wa tshikokedi ku nshingu kuebe. Esau wakadi ne Yakoba lukuna bualu bua disanka diakamusankisha nʼadi tatu andi Esau wakamba mu mutshima wandi ne, Hashika matuku a madilu a tatu anyi, hashishe, nenshihe muakunyʼanyi Yakoba. Bakambila Lebeka mei a Esau, muanʼandi muan a bute yeye Wakabikila Yakoba muanʼandi muan a mukala, wakamuambila ne Esau mukulu ebe udi welangana meji a kukushiha bua kutokesheye munda muandi. Nunku muanʼanyi witabusha di dianyi, bika biebe, unyemene kudi Labana muan etu wa balume, udi mu Halana, ushale nʼandi matuku makese to ne hashika lukuna lua mukuluʼebe ludiye nʼalu kudi. To ne hashika tshiji tshia muan enu kudi, ne hahueye bualu buwakamuenzela muoyo, hashishe nenkutumine di nenkubikile, nennujimishile bubidi buenu dituku dimue bualu kai? Lebeka wakambila Isaka ne, Bana bakashi ba Bena Hete badi batondesha muoyo wanyi, biabaka Yakoba mukashi wa bana bakashi ba Bena Hete bu bana bakashi badi mu buloba ebu, muoyo wanyi newikale ne mushinga kai kundi? Isaka Wakabikila Yakoba wakamuvudishila disanka wakamudimusha ne, Kubaki mukashi wa bana bakashi ba Bena Kanana. Bika biebe, va ku Padana-alama ku nsubu wa Betuele tatu wa ma mu ebe wangataku mukashi wa bana bakashi ba Labana, muan abo wa balume ne mamuʼebe. Nzambi wa Bukole Buonso akusankishe akukumbashe, akuvuishe bana ba bungi bua wewe ulue tshisumbu tshinene tshia bantu, akuhe wewe ne tunkanunuina tuebe disanka dia Abalahama, bua wewe kuhiana buloba buakalaya Nzambi Abalahama. Isaka wakatuma Yakoba yeye wakaya ku Padana-alama kudi Labana muana wa Betuele, Muena Alama muanʼabo wa balume ne Lebeka, mamu wa Yakoba ne Esau. Esau wakamona hakasankisha Isaka Yakoba ne hakamutumeye ku Padana-alama bua kuangateye mu kashi kuakua, ne bu muakamuvudishila Isaka disanka ne muakamudimusheye ne, Kudiangatshidi mu kashi wa bana ba bakashi ba Bena Kanana ne bu muakatumikila Yakoba di dia tatu wandi ne mamu wandi ne bû muakayeye ku Padana-alama. Hakatangila Esau ne bana bakashi ba Bena Kanana kabakasankisha mutshima wa Isaka tatu andi, Esau wakaya kudi Yishemaele, wakangata Mahalata muana mukashi wa Yishemaele muana wa Abalahama, wakadi muanʼabo wa bakashi ne Nebayota bu mukashi wandi, ha mutu ha bakashi bakadiye nʼabo. Yakoba wakabika ku Be-sheba wakaya mu nshila wa ku Halana Hakafikeye ku muaba mukuabo yeye wakalalaku butuku abu, bualu bua diba diakamana kubuela, yeye wakangata dibue diakadi ku muaba au, wakasamahu mutu wandi, waka lala tulu. Yeye wakalota tshiota, wakamona tshibandilu tshi shimika hanshi ne mutu watshi wakateka to ne mu diulu ne mona banjelo ba Nzambi bakadi babandahu, bahuekahu: Wakamona ne Yehowa wakadi muimane ku mutu watshi, wamba ne Ndi bianyi Yehowa, Nzambi wa Abalahama, kaku webe ne Nzambi wa Isaka buloba budi ulalahu nenkuhebu wewe ne tunkanunuina tuebe. Tunkanunuina tuebe netuikale bu dinfuenkenya dia buloba netumuangalale ku wesete ne ku esete ne ku nôde ne ku sude bisamba bionso bia ha buloba nebisanke bualu buebe ne bua tunkanunuina tuebe. Mona, meme ndi nʼebe, nenkulame kuonso kuwaya nenkuhingashe ku buloba ebu kabidi, tshiena nkulekela tô ne hanashikisha kukuenzela malu onso anakukuambila. Yakoba wakatabala ku tulu tuandi, wakamba ne Bulelela, Yehowa udi kunoko ne meme tshiakamanva bualu ebu. Yeye wakatshina, wakamba ne Muaba eu ngua bualu bukole udi nsubu wa Nzambi ne bu mushiku wa diulu. Yakoba wakabika ne dinda dionso, wakangata dibue diakadive musamehu mutu, wakadimanyika bu tshibumba wakela manyi ha mutu hadi. Wakidika dina dia muaba eu ne Betele kadi diambedi dina dia musoko diakadi Luze. Yakoba wakaditshiha ne Bikala Nzambi nʼanyi, biandameye bimpe mu nshila mundi nya ne biampeye bintu bia kudia ne bia kuluata, bua meme kuhingana kabidi ku nsubu wa tatu wanyi talala, hashishe Yehowa neikale Nzambi wanyi, ne dibue edi dinakuimanyika nebikale bu nsubu wa Nzambi ne bintu bionso biwampa nempingashe tshia dikumi kudi bulelela. Yakoba wakaya ku luendu luandi wakateka ku buloba bua bantu ba ku esete. Wakabandisha mesu andi, wakamona dina dia mai mu budimi ne bisumbu bia mikoko bisatu biakadi bilalaku, bualu bua bakadi banuishaku mikoko, ne dibue dinene diakadi ku mushiku wa dina dia mai. Bakadi basangisha bisumbu bia mikoko bionso kunoko, bakumusha dibue diakadi ku mushiku wa dina, bakanuisha mikoko mai, bakahingasha dibue dia ku mushiku wa ku muaba wadi. Yakoba wakabebesha ne Bakuetu, nuakufuma kudi kunyi? Bakamukudimuna di ne, Tudi ba ku Halana. Yeye wakabebesha kabidi ne, Nudi bamanye Labana, muana wa Naho, anyi? Bakamukudimuna ne, Tudi bamumanye. Yeye wakabebesha ne, Yeye udi ne bukole, anyi? Bobo bakamuitaba ne, E, yeye udi ne bukole, ne tangila, muanʼandi wa bakashi, Lakele, ulualua ne mikoko. Yeye wakamba ne Monai, diba ditshidi mulu, kandiba dia kusangisha bimuna nansha, nuishai mikoko mai, yai bienu nuyidishe. Bakamukudi muna di ne, Nansha, katuena bamanye mua kuenza nunku, anu hatuasangisha mikoko yonso ne humushabo dibue ku mushiku wa dina, hashishe netunuishe mikoko mai. Hakadiye uyikila nʼabo, Lakele wakalua ne mikoko ya tatu andi, bualu bua yeye wakadi muyilame. Hakatangila Yakoba Lakele, muana wa Labana, muanʼabo wa balume ne mamu andi, ne mikoko ya Labana muanʼabo wa balume ne mamu andi, Yakoba wakasemena ha buihi, wakumusha dibue diakadi ku mushiku wa dina, wakanuisha mikoko ya Labana, muan abo wa balume ne mamuʼandi. Yakoba wakatuangana ne Lakele mishiku wakabandisha di diandi, wakadia. Yakoba wakambila Lakele ne, Ndi muan abo ne tatu ebe, ndi muana wa Lebeka, Lakele wakaya lubilu, wakamanyisha tatu andi. Hakunvua Labana lumu lua Yakoba muana wa muan abo mukashi, yeye wakaya lubilu bua kumuakidila, wakamuhukila, wakatuangana nʼandi mishiku, wakalua nʼandi ku nsubu wandi Yeye wakambila Labana malu onso Labana wakamuambila ne Bulelela, wewe udi mufuba wanyi ne musunyi wanyi Yeye wakashala nʼandi to ngondo mujima. Labana wakambila Yakoba ne, Bualu bua wewe udi muanʼetu wa balume, bidi bimpe wewe unkuatshile mudimu tshianana, anyi? Ungambile, difutu diebe nedikale tshinyi? Labana wakadi ne bana bakashi babidi dina dia muan a bute diakadi Lea, ne dina dia mukunyʼandi diakadi Lakele. Lea wakadi ne mesu a bulengu, kadi Lakele wakadi muimpe mubidi ne mpala wandi. Yakoba wakananga Lakele, yeye wakambila Labana ne, Nenkukuatshile mudimu bidimu muanda mutekete bualu bua muanʼebe muana wa bakashi muanʼa mukala Labana wakamuambila ne, Bualu bua meme kumufila kudi budi butamba bua meme kumufila kudi mulume mukuabo ushale nʼanyi. Yakoba wakamukuatshila mudimu to bidimu muanda mutekete bualu bua Lakele, ne bidimu ebi biakadi bu anu matuku makese bualu bua dinanga diakamunangeye nʼadi. Yakoba wakambila Labana ne, Umpe mukashi wanyi, bualu bua matuku anyi akukumbana bua meme kuikala nʼandi. Labana wakasangisha bantu bonso bakadiye nʼabo, wakabalambishila bidia bia dibanji. Hakila butuku yeye wakangata Lea, muanʼandi wa bakashi, wakamufila kudiye, ne yeye wakabuela nʼandi mu nsubu. Labana wakafua Zilepa, muena mudimu wandi wa bakashi, kudi Lea muanʼandi wa bakashi bu muena mudimu wandi wa bakashi. Hakatshia butuku Yakoba wakamona ne Lea wakambila Labana ne, Bualu ebu buwakungenzela budi munyi? Tshiakukukuatshila mudimu bualu bua Lakele, anyi? Wakundinga nunku bua tshinyi? Labana wakamuambila ne, Kabena benza nunku mu buloba buetu, katuena tufila muanʼa mukala ku dibaka diambedi mukuluʼandi kayi muanze kuya. Ushikishe lumingu lua muana eu, hashishe, netukuhe muana mukuabo kabidi biwankuatshila mudimu bidimu muanda mutekete bikuabo. Yakoba Wakenza nunku, wakashikisha lumingu luandi, ne yeye wakamuha Lakele bu mukashi wandi Labana wakafua Bileha, muena mudimu wandi wa bakashi, kudi Lakele bu muena mudimu wandi wa bakashi. Yeye wakaya kudi Lakele kabidi, wakatamba kunanga Lakele ku mpala kua Lea, yeye wakakuatshila Labana mudimu bidimu muanda mutekete bakuabo. Hakatangila Yehowa ne Lea wakadi mubengibue, yeye wakamulelesha bana, kadi Lakele wakadi nkumba. Lea wakimita difu, wakalela muana wa balume, wakamuidika dina ne, Lubena, bualu bua yeye wakamba ne, Yehowa wakatangila dikenga dianyi, ne katataka bayanyi neansue. Wakimita difu dikuabo, wakalela muana wa balume, yeye wakamba ne Bualu bua Yehowa wakumpa ne meme ndi mubengibue, nunku yeye wakumpa muana eu mukuabo, wakamuidika dina ne, Shimeona. Wakimita difu dikuabo, wakalela muana wa balume, wakamba ne, Katataka bayanyi neandamate bualu bua nakumulelela bana ba balume basatu, nunku wakadika dina diandi ne, Lewi. Wakimita difu dikuabo, wakalela muana wa balume, wakamba ne, Katataka nentumbishe Yehowa, nunku wakidika dina diandi ne, Yuda, ne yeye wakalekela kulela. Hakatangila Lakele ne, Tshiena ndelela Yakoba bana, hashishe Lakele wakadi ne mukuluʼandi mukau, wakambila Yakoba ne, Umpe bana, anyi meme nenfue. Yakoba wakadi ne Lakele tshiji, wakakonka ne, Meme ndi bu Nzambi udi mujidike munda muebe ne, Kuledi, anyi? Yeye wakamuambila ne Mona, Bileha, muena mudimu wanyi wa bakashi udiku, uye kudiye bua yeye andelele bana ha binu bianyi, ne bua meme ngikale ne bana kudiye. Yeye wakamuha Bileha, muena mudimu wandi wa bakashi, bu mukashi wandi, ne Yakoba wakaya kudiye. Bileha wakimita difu, wakalelela Yakoba muana wa balume. Lakele wakamba ne, Nzambi wakundumbuluila, wakunvua dî dianyi kabidi, wakumpa muana wa balume; nunku yeye wakamuidika dina ne, Dana. Bileha, muena mudimu wa Lakele, wakimita difu kabidi, wakalelela Yakoba muana wa balume mukuabo. Lakele wakamba ne, Nakasangana bibula bikole ne mukulu wanyi wa bakashi, nakumutamba bukole, wakamuidika dina ne, Nafatale. Hakatangila Lea ne, Tshiena ndela bana kabidi, yeye wakangata Zilepa, muena mudimu wandi wa bakashi, wakamufila kudi Yakoba bu mukashi wandi. Zilepa, muena mudimu wa Lea, wakalelela Yakoba muana wa balume. Lea wakamba ne, Dikasa dimpe! Nunku yeye wakamuidika dana ne, Gada. Zilepa, muena mudimu wa Lea, wakalelela Yakoba muana wa balume mukuabo Lea wakamba ne, Ndi ne disanka, ne bakashi nebambikile ne, Muena disanka Wakamuidika dina ne, Ashe. Mu tshidimu tshia kuhuola blê, Lubena wakaya mu budimi, wakangula tumuma, wakalua nʼatu kudi mamuʼandi Lea Lakele wakambila Lea ne, Ndi nkutendekena ne, Umpeku tumuma tukuabo tua muanʼebe. Yeye wakamukudimuna dî ne, Bualu budi bukese bua wakuangata bayanyi, anyi? Udi musue kuangata tumuma tua muanʼanyi kabidi, anyi? Lakele wakamba ne, Biwampa tumuma tua muanʼebe, Yakoba nealale nʼebe butuku ebu. Yakoba wakahi ngana ku budimi dilolo ne Lea wakaya kumualamina, wakamua mbila ne, Bûdi nʼabu mbua kulua kundi, bualu bua nakakusumba ku tumuma tua muan anyi. Yeye wakalala nʼandi butuku abu. Nzambi wakunvua kulomba kua Lea, yeye wakimita difu, wakalelela Yakoba muana wa balume muitanu. Lea wakamba ne, Nzambi wakumpa difutu dianyi bualu bua meme nakafila muena mudimu wanyi wa bakashi kudi bayanyi, wakamuidika dina ne, Yisakâ. Lea wakimita difu kabidi, wakalelela Yakoba muana muisambombo. Lea wakamba ne, Nzambi wakumpa bintu bia bungi, katataka bayanyi neashale nʼanyi bualu bua meme nakamulelela bana ba balume basambombo, wakamuidika dina ne, Zebuluna. Ku nyima Lea wakalela muana wa bakashi wakamuidika dina ne, Dina. Nzambi wakavuluka Lakele, Nzambi wakamunvuala, wakajilula munda muandi. Yeye wakamita difu, wakalela muana wa balume, yeye wakamba ne, Nzambi wakungumushila bundu buanyi, wakamuidika dina ne, Yosefe, wamba ne, Yehowa ampe muana mukuabo. Hakalela Lakele Yosefe, Yakoba wakambila Labana ne, Untume ha bule, nye bianyi kuanyi, ku buloba buanyi. Umpe bakashi banyi ne bana banyi, banakakukuatshila mudimu, undekele, nenye, bualu bua wewe udi mumanye mudimu unakukuenzela. Labana wakamuambila ne Bingikala ne diakalengele ku mesu kuebe ushale biebe, bualu bua meme nakumana kujingulula ne, Yehowa wakunsankisha bua bualu buebe. Yeye wakamba ne, Ungambila difutu diebe, nenkufutedi. Yakoba wakamuambila ne, Wewe udi mumanye bu munakakukuatshila mudimu ne bu muakavulangana bimuna biebe binakadi nʼabi. Bualu bua wakadi ne anu bintu bikese tshiyi muanze kulua kunoko mpindiu biakuvulangana tshisumbu tshinene, Yehowa wakukusankisha wewe bua malu onso anakukuenzela, ne katataka meme nengenze mudimu tshikondo kai bua kukumbasha bia ba mu nsubu wanyi kabidi? Yeye wakamukonka ne, Nenkuhe tshinyi? Yakoba wakamukudimuna ne, Kambualu bua kumpa tshintu nansha, biwitabusha bualu ebu, meme nendishe bimuna biebe, nembilame kabidi. Nengendakane munkatshi mua bimuna biebe lelu, nengumushe bionso bidi ne matoba, ne mikoko yonso idi mifike, ne mbushi yonso idi ne matoba, bintu ebi nebikale difutu dianyi. Mu matuku adi ku mpala, buimpe buanyi nebumbingishe hawalua bua kunkonka bua difutu dianyi didi kûdi, biwasangana mbushi udi kayi ne matoba, anyi mukoko udi kauyi mufike munkatshi mua bintu bianyi, nebikale bu tshintu tshiakuibabo. Labana wakamba ne, Bualu ebu nebuikale bu mu di diebe. Mu dituku adi Yakoba wakumusha mbushi ya bimpanga yakadi ne matoba, ne mashina a mbushi akadi ne matoba, ne mikoko yonso yakadi mifike, wakabika mu bianza bia bana bandi balume. Wakabituma luendu lua matuku asatu hankatshi ha Labana ne Yakoba, Yakoba wakadisha bimuna bikuabo bia Labana biakashala ku nyima. Yakoba wakangata mitshi mibishi ya peuplier ne ya amande ne ya platane, wakubula bihusu bibaka bitoke, wakamuenesha bibaka bitoke bia mitshi. Yeye wakateka mitshi yakubuleye bibaka bitoke mu luvu lua mai biakadi bimuna binuinamu mai, biakadi bimita mafu hakanuabi. Bimuna biakadi bimita mafu ku mpala kua mitshi ei biakalela bana bakadi ne matoba. Yakoba wakumusha bana ba mikoko, wakateka mesu abo kudi bimuna bia Labana biakadi ne matoba ne biakadi bifike, wakateka bimuna biandi ha buabi, kakabiteka hamue ne bimuna bia Labana. Hakimita bimuna bikole mafu, Yakoba wakateka mitshi ei ku mpala kuabi mu mai, bua bimuna bimite mafu ku mpala kua mitshi, kadi hakatshidi bimuna bitekete, yeye kakateka mitshi, nunku bimuna bitekete biakadi bia Labana ne bimuna bikole biakadi bia Yakoba. Yeye wakatamba kulua mubanji wakadi ne bisumbu bia bimuna ne bena mudimu ba bakashi ne bena mudimu ba balume, ne tumelo ne tubalu. Yakoba wakunvua mei a bana ba balume ba Labana bamba ne, Yakoba wakakongolola bintu bionso bia tatu wetu wakadiangatshila bubanji buakadi bua tatu wetu. Yakoba wakatangila mpala wa Labana, kakadi bu muvueye dia mbedi. Yehowa wakambila Yakoba ne, Uhingane ku buloba bua batatuʼebe, ne bua bana benu, nengikale nʼebe. Yakoba wakatuma di wakabikila Lakele ne Lea mu budimi buakadi bimuna biandi, wakabambila ne, Ndi ntangila ne mpala wa tatuʼenu kena bu muvueye diambedi kadi Nzambi wa tatu wanyi wakadi nʼanyi. Nudi bamanye ne nakukuatshila tatuʼenu mudimu ne bukole buanyi buonso Tatu wenu wakundinga, wakakudimuna difutu dianyi misangu dikumi, kadi Nzambi kakitabusha bua yeye kunkengesha. Hakambeve ne, Bimuna bionso bia matoba ndifutu diebe, hashishe, bimuna bionso biakalela bana bakadi ne matoba, hakambeye ne, Bimuna bionso bia mihola ndifutu diebe, hashishe, bimuna bionso biakalela bana bakadi ne mihola. Nunku Nzambi wakumusha bimuna bia tatu enu, wakubimpa. Hakalua tshikondo tshidi bimuna bimita mafu, nakabandisha mesu anyi mu tshiota, nakatangila ne mbushi ya bimpanga yakadi ne matoba yakaya kudi mashina a mbushi akadi ne mihola mihola ne matoba matoba. Muanjelo wa Nzambi wakungambila mu tshiota tshianyi ne, Yakoba, nakuitaba ne, Ndiku. Yeye wakungambila ne, Ubanduluke, utangile ne mbushi ya bimpanga yonso idi iya kudi mashina a mbushi idi ne mihola mihola ne matoba matoba bualu bua nakutangila malu onso akukuenzela Labana. Ndi Nzambi wa ku Betele kuwakela manyi ha mutu ha dibue, ne kuwakaditshihila kundi, bika biebe, umuka ku buloba ebu, uhingane ku buloba buakakulelabo. Lakele ne Lea bakamukonka ne, Tuetu tudi ne tshituha tshietu anyi buhianyi buetu mu nsubu wa tatuʼetu, anyi? Tuetu tudi bu benyi ku mesu kua tatuʼetu nansha? Bualu bua yeye wakatuhana, wakatudila bintu bietu bionso. Bualu bua bintu bionso biakumusha Nzambi kudi tatuʼetu mbietu ne bia bana betu, nunku wenza malu onso akukuambila Nzambi. Hashishe Yakoba wakabika, wakateka bakashi bandi ne bana bandi ha nyima ha tumelo. Yeye wakasangisha bimuna biandi bionso ne bintu bionso biakangateye mu Padana-alama bua kuyeye kudi tatuʼandi Isaka mu buloba bua Kanana. Hakaya Labana bua kukoseye mikoko miosa, Lakele wakiba mpingu ya mu nsubu wa tatuʼandi. Yakoba wakanyema mu musokoko, Labana, Muena Alama, kakadi mumanye bualu, yeye kakamuambila ne, Nyaya. Yeye wakanyema ne bintu bionso biaka diye nʼabi, wakabika, wakasabuka musulu wa Pelata, wakabisha luendu bua kuya ku mukuna wa Gilada. Hakahita matuku asatu bakambila Labana ne, Yakoba wakunyema. Yeye wakangata bantu bandi, bakamulonda to luendu lua matuku muanda mutekete, bakamuhetela ku mukuna wa Gilada. Nzambi wakamueneka kudi La bana, Muena Alama, mu tshiota butuku, wakamuambila ne, Udimuke, kuambidi Yakoba nansha di dimpe nansha di dibi. Hakaheta Labana Yakoba, wakamusangana mumane kushimika ntenta yandi ku mukuna, Labana ne bantu bandi bakalala ku mukuna wa Gilada. Labana wakebesha Yakoba ne, Bualu ebu buwakungenzela budi tshinyi, wakunyema kundi mu musokoko, wakuya ne bana banyi bakashi bu bahika bakuata mu nvita, anyi? Bualu kai wewe wakunyema mu musokoko kuakungambila, bua meme kukutuma ne disanka ne misambu ne biombelu? Kuakuitabusha bua meme kusangana mishiku ne bana banyi ba balume ne bana banyi ba bakashi munyi? Wewe wakuenza bualu buhote. Meme ndi ne bukole bua kukukengesha nʼabu, kadi Nzambi wa tatuʼebe wakungambila butuku bua lelu ne, Udimuke, kuambidi Yakoba nansha dî dimpe nansha di dibi. Wewe wakusua kuhingana bualu bua mutshima webe wakadi ujinga ku nsubu wa tatu ebe, kadi wewe wakuiba mpingu yanyi bua tshinyi? Yakoba wakambila Labana ne, Bualu bua nakatshina, nakelangana meji ne wewe neunyenge bana bebe ba bakashi ku bukole. Biwasangana mpingu yebe mu bianza bia muntu wanyi afue biandi, usungule bintu biebe bionso ku mpala kua bana betu, uye nʼabi Bualu bua Yakoba hakadi mumanye ne, Lakele wakayiba. Labana wakabuela mu ntenta wa Yakoba ne mu ntenta wa Lea ne mu ntenta ya bena mudimu babo ba bakashi, kakasangana mpingu. Wakaluhuka mu ntenta wa Lea, wakabuela mu ntenta wa Lakele Kadi Lakele wakamana kumusha mpingu, wakayiteka muinshi mua biseba bia tumelo, wakashikama ha mutu hai Labana wakakeba ne bianza, kakayisangana. Lakele wakambila tatuʼandi ne, Mukelenge kanfuidi tshiji, bualu bua meme tshiena mbika ku mpala kuebe, bualu bua ndi mujingakana tshilele tshia bakashi tshidi nʼanyi. Yeye wakakebulula kakasangana mpingu. Yakoba wakadi ne tshiji, wakatanda ne Labana, wakebesha Labana ne, Dihanga bianyi didi hanyi, anyi bubi buanyi budi hanyi bua wakundonda lukasa nunku? Wewe wakasasula bintu bianyi bionso, wakasanganamu tshintu tshiebe tshimue, anyi? Utshiteke ku mpala kua bantu banyi ne kua bantu bebe, bobo balumbulule tshilumbu tshietu. Nakuikala nʼebe to bidimu ebi makumi abidi, mashina a mikoko ne mashina a mbushi kakatula mafu nansha, ne meme tshiakudia mbushi yebe ya bimpanga. Wakahandibua kudi nyama mibi tshiakalua nʼau kûdi, meme nkayanyi nakaujimisha wakibabo nansha munya nansha butuku, wewe wakateka difutu edi hamʼbidi hanyi. Nakadi ne dikenga nunku, munya wakangosha, mashika akankuata butuku, tshitabala tshiakankuata. Nakadi mu nsubu webe nunku to bidimu makumi abidi, nakakukuatshila mudimu bidimu dikumi ne binai bua bana bebe ba bakashi babidi, ne bidimu bisambombo bua bimuna biebe, ne wewe wakakudimuna difutu dianyi misangu dikumi. Bu Nzambi wa tatuʼanyi, Nzambi wa Abalahama, ne ditshina dia Isaka kabiyi bikale nʼanyi, wewe wakadi kuntuma ne bianza bituhu bulelela Nzambi wakutangila dikenga dianyi ne mudimu wa bianza bianyi, ne yeye wakukubela butuku bua lelu. Labana wakambila Yakoba ne, Bana aba bakashi mbana banyi, bana bakalelabo mbana banyi, ne bimuna mbianyi, ne bintu bionso biudi nʼabi mbianyi, ne lelu ndi mua kuenzela bana banyi ba bakashi ne bana bakalelabo tshinyi? Tuye nʼebe, tuhunge tshihungidi, wewe ne meme, tshihungidi etshi tshikale bu kuditshiha kua bualu munkatshi muetu. Yakoba wakangata dibue, wakadimanyika bu tshibumba. Yakoba wakambila bantu bandi ne, Sangishai mabue, bobo bakangata mabue, bakunguisha mushiki wa mabue, bakadia bidia kukala kua mushiki. Labana Wakabikila dina dia muaba au ne, Yegâsahaduta, kadi Yakoba wakaubikila ne, Galede. Labana wakamba ne Mushiki eu udi bu mutshihu wa bualu hankatshi hetu lelu Nunku bakabikila muaba au ne, Galede ne, Misepa, bualu bua yeye wakamba ne, Yehowa atulame meme ne wewe, hatuamuangalaka muntu ne muntu. Biwakengesha bana banyi ba bakashi, anyi biwabaka bakashi bakuabo, kakuena mumanyi mukuabo hankatshi hetu, anu Nzambi udi mumanyi wa bualu buetu, meme ne wewe. Labana wakambila Yakoba ne, Tangila mushiki eu ne dibue edi binakuimanyika hankatshi hetu. Mushiki eu wikale mumanyi wa bualu ne dibue edi dikale mumanyi wa bualu, ne, Meme tshiena nsambuka mushiki eu bua kukuenzela bibi, ne wewe kuena usambuka mushiki eu ne dibue bua kungenzela bibi. Nzambi wa Abalahama, Nzambi wa Naho ne Nzambi wa tatu wabo ikale mulumbuluishi hankatshi hetu Yakoba wakaditshiha ku ditshina dia tatu wandi Isaka. Yakoba wakafua mulambu wa kuosha ba kalua ku mukuna, Wakabikila bantu bandi bua kudiabo bidia, bakadia bidia, bakalala ku mukuna butuku abu Labana wakabika hatshiatshia, wakatuangana mishiku ne bana bandi ba balume ne bana bandi ba bakashi, wakabavudishila disanka Labana wakahingana ku muaba wandi. Yakoba wakaya mu nshila wandi ne banjelo ba Nzambi bakasambakena nʼandi. Hakabamona Yakoba, yeye wakamba ne, Ebi mbisumbu bia banjelo ba Nzambi, Wakabikila muaba au ne, Mahanayima. Yakoba wakatuma miloho ku mpala kuandi kudi Esau mukuluʼandi mu buloba bua Seî, buloba bua Edome. Yeye wakayambila ne, Nuambile mukelenge wanyi Esau nunku ne, Muntu webe Yakoba udi wamba ne, Nakashikama ne Labana, nakushalaku to ne katataka. Ndi ne ngombe ne tubalu ne mikoko ne bahika ba balume ne bahika ba bakashi, nakutuma di kudi mukelenge wanyi binamanya mua kusangana luse ku mesu kuandi. Miloho yakahingana kudi Yakoba, yakamuambila ne, Tuakuya kudi mukuluʼebe Esau, ne yeye ulualua kusangakena nʼebe mu nshila, udi ne balume nkama mai ku nyima kuandi. Hashishe Yakoba wakatshina bikole, mutshima wandi wakazakala wakatahulula bintu biandi bisumbu bibidi, ne bantu ne mikoko ne bimuna ne tumelo. Wakamba ne, Bialua Esau ku tshisumbu tshimue bua kutshishiha, tshisumbu tshikuabo netshihanduke. Yakoba wakamba ne, Yehowa Nzambi wa kaku wanyi Abalahama, ne Nzambi wa tatuʼanyi Isaka, wewe wakungambila ne, Uhingane kuebe, ne kudi bana benu, nenkuenzele bimpe. Tshiena ne buimpe bua kudiangatshila tshituha tshia luse ne bulelela biwakalesha muntu webe, nakasabuka musulu eu wa Yadene anu ne tshibangu, katataka nakulua bisumbu bibidi bia bintu. Ndi nkutendekena ne, Unsungile mu bianza bia mukuluʼanyi Esau, ndi mmutshina ne yeye nealue kunshiha ne bamamu ne bana. Wewe wakungambila ne, Bulelela, nenkue nzele bimpe, nenkukumbashile tunkanunuina tuebe bungi bua nsenga ya kukala kua mai manene, idibo kabayi mua kubala. Yeye wakalalahu butuku abu wakasungula bintu biakadiye nʼabi bua kuambika mukulu andi Esau matabisha mashina a mbushi nkama ibidi ne mpumbu ya mbushi makumi abidi, mashina a mikoko nkama ibidi ne mikoko ya bimpanga makumi abidi, ne tumelo tudibo bakama mabele makumi asatu ne bana batu, ne ngombe idibo bakama mabele makumi anai, ne balume ba ngombe dikumi mashina a mpunda makumi abidi ne nkungulu yai dikumi. Wa kabifila mu bianza bia bahika bandi, tshisumbu ha buatshi tshisumbu ha buatshi, wakabambila ne Sabukai ku mpala kuanyi, nushilangane muaba hankatshi ha tshisumbu ne tshisumbu. Wakela di diandi kudi muhika wandi wa ku mpala ne, Hawasambakena ne Esau, mukuluʼanyi, ne hakukonkeye ne, Wewe udi wa nganyi? Uyaya kudi kunyi? Bintu ebi bidi ku mpala kuebe mbia nganyi? Hashishe, wewe umuambile ne, Mbintu bia muntu webe Yakoba. Bidi matabisha akatumineye Esau mukelenge wandi, ne mona, yeye udi kabidi ku nyima kuetu. Yeye wakela di diandi nunku kudi muntu muibidi ne muisatu ne kudi bonso bakadi balonda ne bisumbu bia bintu ne, Nuambile Esau nunku hanuasangakena nʼandi. Numuambile ne, Mona, muntu webe Yakoba udi kabidi ku nyima kuetu Bualu bua yeye wakabambila munda ne, Nemmutokeshe munda ne matabisha akaya ku mpala kuanyi, ne hatuatangilangana nʼandi ku mesu, bumue yeye neangitabushe. Nunku wakatuma matabisha ku mpala kuandi, yeye wakalala butuku abu munkatshi mua tshitudilu. Butuku abu wakabika biandi wakangata bakashi bandi babidi ne bakashi babidi benji ba mudimu ne bana bandi dikumi ne umue, bakasabuka ku dilobo dia Yaboka. Wakabangata, wakabasabula ne bintu biandi bionso. Yakoba wakashala ku nyima nkayandi muntu wakaluangana nʼandi bibula to ne hakatshia butuku. Hakamanya muntu ne, Tshiena mumuhite bukole wakalenga tshianza ha tshikundukundu tshiandi ne tshikundukundu tshia Yakoba tshiakakoyoboka hakadiye uluangana nʼandi bibula. Yeye wakambila Yakoba ne, Undekele butuku bukadi ha kutshia. Yeye wakamba ne, Tshiena nkulekela biwikala kuyi munsankishe. Yeye wakakonka Yakoba ne, Dina diebe nganyi? Yeye wakamuitaba ne Ndi Yakoba. Yeye wakamuambila ne, Kababikidi dina diebe ne Yakoba kabidi bakubikile dina ne Isalele bualu bua wewe wakuluangana ne Nzambi ne bantu, wakahatula bukole. Yakoba wakamukonka ne, Ungambile dina diebe Muntu wakamuebesha ne, Udi unkonkela dina dianyi tshinyi? Yeye wakamuvudishilaku disanka Yakoba wakidika muaba au ne, Peniele bualu bua yeye wakamba ne, Nakumonangana ne Nzambi mpala ha mpala ne muoyo wanyi wakuhanduka. Hakalueye Penuele, diba diakabanda, ne Yakoba wakadi utebuka bualu bua tshikundukundu tshiandi. Nunku Bena Isalele kabatu badia munyinyi wa ku tshikundukundu to ne katataka, bualu bua yeye wakalenga tshianza ha tshikundukundu tshia Yakoba. Yakoba wakabanduluka, wakamona Esau ulua ne bantu nkama mai. Yeye wakatahulula bana ba Lea ne ba Lakele ne ba bakashi babidi benji ba mudimu. Wakateka bakashi benji ba mudimu ne bana babo ku mpala, ne Lea ne bana bandi ku nyima kuabo, ne Lakele ne Yosefe ku nyima kuabo. Yeye nkayandi wakahita ku mpala kuabo, wakakukuila hanshi misangu muanda mutekete to ne hakasemeneye ha buihi ne mukuluʼandi. Esau wakaya lubilu bua kumuakidila, wakamuela tshituha ku nshingu, wakatuangana nʼandi mishiku, bakadila. Yeye wakabisha mesu andi wakamona bakashi ne bana, wakamukonka ne, Bantu aba badi nʼebe mbanganyi? Wakamukudimuna ne, Aba mbana bakuha Nzambi muntu webe mu luse. Hashishe, bakashi benji ba mudimu bakasemena ha buihi, bobo ne bana babo, bakafua mpala yabo hanshi. Lea wakalua ne bana bandi bakafua mpala yabo hanshi kabidi, Yosefe ne Lakele bakalua ku nyima, bakatua mpala yabo hanshi. Esau wakamuebesha ne, Tshisumbu atshi tshinene tshmakusangakena nʼatshi mu nshila ntshia bualu kai? Wakamukudimuna ne, Tshia kuheta nʼatshi luse kudi mukelenge wanyi Esau wakamuambila ne, Ndi ne bintu bikumbane, muakunyiʼanyi ushale ne bintu biudi nʼabi. Yakoba wakamba ne, Nansha, ndi nkutendekena ne, Biwikala nʼanyi luse, witabushe matabisha a ku tshianza tshinyi, bualu bua nakumona mpala webe bu muntu udi umona mpala wa Nzambi, ne wewe wakusanka bua bualu buanyi. Ndi nkutendekena ne, Witabushe matabisha anakulua nʼau kudi, bualu bua Nzambi wakungenzela bimpe ne meme ndi ne bintu bikumbane kabidi. Wakananukila kumusengelela ne yeye wakângata. Esau wakamuambila ne, Tuyai bietu, meme nenye ku mpala kuebe. Yakoba wakamukudimuna ne, Mukelenge wanyi udi mumanye ne bana batshidi batekete ne mikoko ne ngombe bidi ne bana, ne biabenzeshabo lukasa lukasa anu dituku dimue, bimuna bionso nenfue. Ndi ntendekena mukelenge wanyi adianjile ku mpala kuanyi, nenkulonde bitekete bitekete, bu mudi luendu lua bimuna ne lua bana bindi nʼabi, to ne hanafika kudi mukelenge wanyi ku Seî. Esau wakamba ne, Witabushe bua bantu banyi bakuabo bashale nʼebe Yakoba wakamukonka ne, Bua tshinyi? Mpete diakalengele ku mesu kua mukelenge wanyi Nunku Esau wakaya mu nshila wandi wa ku Sei dituku adi. Yakoba wakaya ku Sukota, wakasaku nsubu, wakenzelaku bimuna biandi bitanda, nunku bakidika muaba au ne Sukota. Yakoba wakalua ku musoko wa Shekeme, mu buloba bua Kanâ-na, talalâ, hakafumeye ku Padanaalama, wakashimika ntenta yandi ku mpala kua musoko. Wakasumba tshituha tshia buloba kuakashimikeye ntenta yandi kudi bana ba Hamo tatu wa Shekeme, ku lukama lua kesita. Wakenzaku tshioshelu, wakatshidika dina ne, El-Elohe Isalele. Dina, muana mukashi wa Lea wakaleleleye Yakoba, wakaya bua kumoneye bana ba bakashi ba mu buloba abu. Shekeme muana mulume wa Hamo, Muena Hiwi, mukelenge muana wa buloba, wakamutangila wakamukuata, wakalala nʼandi, wakamufuisha bundu. Mutshima wandi wakalamata Dina, muana mukashi wa Yakoba, yeye wakananga nsongakashi eu, wakamuambila mei a kalolo. Shekeme wakambila tatu wandi Hamo ne, Ungangatshile nsongakashi eu bu mukashi wanyi. Yakoba wakunvua lumu ne, Yeye wakamana kunyanga muanʼandi mukashi Dina. Bana bandi ba balume bakadi ne bimuna biandi mu tshisuku Yakoba wakahuwa biandi to ne hakaluabo Hamo, tatu wa Shekeme, wakaya kudi Yakoba, wakayikila nʼandi. Bana ba balume ba Yakoba bakahingana ku tshisuku hakunvuabo lumu elu, mutshima yabo yakanyingalala, bakadi ne tshiji tshikole bualu bua yeye wakafuisha bana ba Isalele bundu hakalaleye ne muana mukashi wa Yakoba bualu ebu kabuena buimpe bua kuenza. Hamo wakayikila nʼabo wakamba ne, Mutshima wa muanʼanyi Shekeme udi musue mua nʼebe wa bakashi, ndi nkusengelela ne umufile kudiye bu mukashi wandi. Tubakilangane nʼenu, nuenu nufîle bana benu ba bakashi kutudi ne nuangate bana betu ba bakashi kunudi. Nenushikame munkatshi muetu, buloba nebuikale ku mpala kuenu, nuikalemu, nuendulukemu mushinga, nuangatemu bintu. Shekeme wakambila tatu wa mukashi ne bana babo ne, Ndi musue kuikala ne diakalengele ku mesu kuenu, nennufute bintu bionso binudi nuamba. Binuandomba bintu bia dibaka bidi bitamba bungi, nennuhebi, anjai kumpa nsongaka shi bu mukashi wanyi. Bana ba Yakoba bakakudimuna Shekeme ne tatu andi Hamo mei a budimu, bualu bua yeye wakanyanga muanʼabo wa bakashi, Dina. Bakabambila ne, Katuena mua kuenza bualu ebu bua kufila muanʼetu wa bakashi kudi muntu udi kayi mute ngula, bualu ebu budi butufuisha bundu. Netuitabushe anu bua bualu ebu, bua buonso buenu nulue bu tuetu, ne balume bonso ba munkatshi muenu batengudibue, hashishe, netufile bana betu ba bakashi kunudi, ne tuetu netuangate bana benu ba bakashi, netuikale nʼenu netuikale bu bantu bamue. Binuahidia kutunvuila bua kutengu dibua, hashishe, netuangate muanʼetu wa bakashi, netuye. Mei abo akasankisha Hamo ne Shekeme, muanʼandi wa balume. Nsongalume kakahidia bualu ebu bualu bua mutshima wandi wakadi muele kudi muana wa bakashi wa Yakoba, butumbi buandi buakatamba bua bantu bonso ba mu nsubu wa tatuʼandi. Hamo ne muanʼandi Shekeme bakalua ku tshibi tshia ku musoko wabo, bakayilala ne bena musoko, bakamba ne, Balume aba badi bashikama nʼetu talala nunku tuitabushe bua bobo bashale mu buloba buetu bendeshangane nʼetu mushinga buloba budi bunene bua bobo bikalemu tuangate bana babo ba bakashi bu bakashi betu, tufile bana hetu ba bakashi budibo. Anu bua bualu ebu bumue balume aba nebitabushe bua kushikama nʼetu tulue bantu bamue bua mulume yonso wa munkatshi muetu atengudibue bu mudibo batengula. Bimuna biabo bionso ne bintu biabo bionso ne nyama yabo yonso kabiena bikale bu bietu, anyi? Tuanji kuitabusha bualu ebu, ne bobo nebashikame nʼetu Bena musoko bonso ba mu musoko wandi bakitabusha mei a Hamô ne a muanʼandi Shekeme, balume bonso ba mu musoko wandi bakätengudibua. Hakahita matuku asatu, ne bobo bakadi ne kusama, bana ba balume ba Yakoba babidi, Shimeona ne Lewi, bana babo ne Dina, bakangata muntu muele Wandi wa nvita muntu muele wandi wa nvita, bakalua ku musoko ne mitshima ya dikima, bakashiha balume bonso. Bakashiha Hamo ne muanʼandi Shekeme ne muele wa nvita, bakangata Dina mu nsubu wa Shekeme, bakaluhuka nʼandi. Bana ba balume ba Yakoba bakalua munkatshi mua bantu bafue bakahaula musoko, bualu bua bobo bakanyanga muanʼabo wa bakashi Bakangata mikoko yabo ne ngombe yabo ne mpunda yabo, ne bintu biakadi mu musoko, ne bintu biakadi mu madimi, ne biuma biabo bionso ne bana babo ne bakashi babo, bakabangata bu bahika babo ba mu nvita bionso mene biakadi mu nsubu. Yakoba wakambila Shimeona ne Lewi ne, Nuenu nuakuntatshisha, nuakunvuisha bu tshintu tshibi munkatshi mua bena buloba munkatshi mua Bena Kanana ne Bena Pelese, tuetu tudi bakehe ne bobo nebunguile kundi, nebanshihe, nebahaule nsubu wanyi ne meme nenjimishibue. Bobo bakamukudimuna ne Yeye wakadi ne bualu bua kuenzela muan etu wa bakashi bu mukashi wa masandi, anyi? Nzambi wakambila Yakoba ne, Bika biebe uye ku Betele, ushikameku, wenzeleku Nzambi, wakamueneka kûdi bawakadi unyema ku mesu kua Esau, mukulu ebe, tshioshelu. Yakoba wakambila bantu bonso ba mu nsubu wandi ne bonso bakadi nʼandi ne, Umushai nzambi ya bende idi munkatshi muenu, nudilongolole, nuluate bilulu bikuabo, tubike tumuke, tuye ku Betele, nengenzeleku Nzambi, waka-ngunvuila mu dituku dia dikenga dianyi, wakadi nʼanyi mu nshila kunakaya, tshioshelu. Bobo bakaha Yakoba nzambi yonso ya bende yakadibo nʼai ne nkanu yakadi ku matshu abo, Yakoba wakabijika muinshi mua mutshi munene wakadi hehi ne Shekeme. Bakaya ku luendu luabo, ditshina dia Nzambi diakadi ku misoko yakadi ha buihi nʼabo, ne bena musoko kabakalonda bana ba balume ba Yakoba. Yakoba wakalua ku Luze (eu udi Betele) mu buloba bua Kanana, yeye ne bantu bonso bakadiye nʼabo. Wakenzaku tshioshelu wakabikila mua ba au ne, Ele-betele bualu bua mu muaba eu Nzambi wakamueneka kudiye hakadiye unyema ku mesu kua mukuluʼandi. Debola, muena mudimu wa bakashi wa Lebeka, wakafua, bakamujika muinshi mua mutshi munene wa mu Betele, bakabikila muaba au ne, Alonobakuta. Nzambi wakamueneka kudi Yakoba tshiakabidi hakafumeye ku Padana-alama, wakamusankisha. Nzambi wakamuambila ne, Dina diebe nYakoba, kabakubikidi ne Yakoba kabidi, nebakubikile ne, Isalele. Nzambi wakamuambila kabidi ne, Ndi Nzambi wa Bukole Buonso, uvulangane ukumbane ba bungi, bisamba bia bungi nebifume kudi, bakelenge nebaluhuke munda muebe Buloba bunakalaya Abalahama ne Isaka, nenkuhebu ne tunkanunuma tuebe tualonda ku nyima kuebe. Nzambi wakabanda kulu ku muaba wakadiye uyikila nʼandi. Yakoba wakimanyika dibue dinene bu tshibumba ha muaba wakayikidileye nʼandi, wakahongolola mai a kutendelela nʼau ha mutu hadi wakelahu manyi kabidi. Yakoba wakabikila muaba wakayikidileye ne Nzambi ne Betele. Bakumuka ku Betele, ne diambedi bobo kabayi banze kufika ku Efelata, kanyinganyinga kakakuata Lakele, wakatantamana bikole. Hakatantamaneye bikole nunku, muleleshi wakamuambila ne, Kutshinyi, bualu bua wewe neulele muana wa balume mukuabo. Hakambeye kuhuola muoyo wandi (bualu bua yeye wakafua), yeye wakamuidika diba ne, Benoni kadi tatu wandi wakamuidika ne, Benyamina. Lakele wakafua, bakamujika mu nshila wa ku Efelata (eu udi Beteleheme). Yakoba wakimanyika dibue dia ha lukita luandi, dibue edi didi ha lukita lua Lakele to ne ku dituku edi. Isalele wakabisha luendu luandi, wakashimika ntenta yandi ku nyima kua tshibumba tshinene tshia Ede. Hakadi Isalele ushikama mu muaba eu, Lubena wakalala ne Bileha, mukashi mukuabo wa tatu wandi, Isalele wakunvua lumu elu. Bana balume ba Yakoba bakadi dikumi ne babidi. Bana ba balume ba Lea bakadi Lubena, muanʼa bute wa Yakoba, ne Shimeona ne Lewi ne Yuda ne Yisaka ne Zebuluna. Bana ba balume ba Lakele bakadi Yosefe ne Benyamina. Bana ba balume ba Bileha, muena mudimu wa bakashi wa Lakele, bakadi Dana ne Nafatale. Bana ba balume ba Zilepa muena mudimu wa bakashi wa Lea, bakadi Gada ne Ashe Aba mbana ba balume ba Yakoba bakamulelelabo mu Padana-alama. Yakoba wakalua kudi Isaka tatu andi mu Mamale, musoko wa Kiyata-aba (eu udi Hebelona) Wakadi Abalahama ne Isaka bashikame. Matuku onso a Isaka akadi bidimu lukama ne makumi muanda mukulu. Isaka wakahuola muoyo Wandi, wakafua, wakaya kudi bankambua bandi, wakadi muntu mununu wa bidimu bia bungi Esau ne Yakoba, bana bandi ba balume, bakamujika. Ei idi ndelanganyi ya Esau (dina diandi dikuabo Edome). Esau wakabaka bakashi ba bana bakashi ba Bena Kanana: Adamuana wa bakashi wa Elona, Muena Hiti, ne Oholibama, muana wa bakashi wa Ana, muana wa bakashi wa Sibiona, Muena Hiwi, ne Basemata, muana wa bakashi wa Yishemaele, ne muan abo wa bakashi wa Nebayota. Ada wakalelela Esau Elifasa ne Basemata wakalela Luele, Oholibama wakalela Yeusha ne Yalama ne Kola. Aba mbana ba Esau bakamulelelabo mu buloba bua Kanana Esau wakangata bakashi bandi ne bana bandi ba balume ne bana bandi ba bakashi ne bantu bonso ba mu nsubu wandi, ne bimuna biandi, ne nyama yandi yonso, ne bintu bionso biakamueneye mu buloba bua Kanana, wakumuka kudi muakunyiʼandi Yakoba, wakaya ku buloba bukuabo. Bualu bua bintu biabo biakatamba bia bungi kabakamanya mua kushikama kaba kamue, ne buloba buakadibo bashikame buakadi bukese bualu bua bungi bua bimuna biabo. Esau wakashikama mu mukuna wa Sei Esau udi Edome. Ei idi ndelanganyi ya Esau, nkambua wa Bena Edome ba mu mukuna wa Sei. Au mmena a bana balume ba Esau Elifasa, muana wa balume wa Ada, mukashi wa Esau, ne Luele muana wa Basemata, mukashi wa Esau. Bana ba balume ba Elifasa bakadi Temana ne Omâ ne Sefo ne Gatama ne Kenaza. Timena wakadi mue na mudimu wa bakashi wa Elifasa, muana wa Esau, ne yeye wakalelela Elifasa Amaleka, aba mbana ba balume ba Ada, mukashi wa Esau. Aba mbana ba balume ba Luele Nahata ne Zela ne Shama ne Miza, aba mbana ba balume ba Basemata, mukashi wa Esau Aba mbana ba balume ba Oholibama, muana wa bakashi wa Ana muana wa bakashi wa Sibiona mukashi wa Esau, yeye wakalelela Esau Yeusha ne Yalama ne Kola. Aba mbakelenge ba bana ba balume ba Esau bana ba balume ba Elifasa, muanʼa bute wa Esau, bakadi mukelenge Temana, ne mu kelenge Oma ne mukelenge Sefo ne mukelenge Kanaza ne mukelenge Kola ne mukelenge Gatama ne mukelenge Amaleka, aba mbakelenge bakaluhuka kudi Elifasa mu buloba bua Edome, aba mbana ba balume ba Ada. Aba mbana ba balume ba Luele, muana wa Esau: mukelenge Nahata ne mukelenge Zela ne mukelenge Shama ne mukelenge Miza, aba mbakelenge bakaluhuka kudi Luele mu buloba bua Edome, aba mbana ba balume ba Basemata, mukashi wa Esau. Aba mbana ba balume ba Oholibama, mukashi Wa Esau mukelenge Yeusha ne mukelenge Yalama ne mukelenge Kola, aba mbakelenge bakaluhuka kudi Oholibama, muana wa Ana, mukashi wa Esau. Aba mbana ba balume ba Esau, aba mbakelenge babo, eu udi Edome. Aba mbana ba balume ba Seî, Muena Holi, bena buloba Lotana ne Shobala ne Sibiona ne Ana, ne Dishona ne Eze ne Dishana, aba mbakelenge ba Bena Holi, bana ba Sei, mu buloba bua Edome. Bana ba Lotana bakadi Holi ne Hemana; Timena wakadi muanʼabo wa bakashi ne Lotana. Aba mbana ba Shobala Aluwana ne Manahata ne Ebala ne Shofo ne Onama. Aba mbana ba Sibiona Aya ne Ana muntu eu Ana wakasangana mishimi yakadi ihatuka mai a kahia mu tshihela, hakadiye udisha nyama ya mpunda ya tatuʼandi Sibiona. Aba mbana ba Ana Dishona ne Oholibama, muana mukashi wa Ana Aba mbana ba Dishona Hemedana ne Eshebane ne Yitelana ne Kelana. Aba mbana ba Eze Bilehana, ne Zâwana ne Akana. Aba mbana ba Dishana: Usa ne Alana. Aba mbakelenge bakaluhuka kudi Bena Holi, mukelenge Lotana ne mukelenge Shobala ne mukelenge Sibiona ne mukelenge Ana ne mukelenge Dishona ne mukelenge Eze ne mukelenge Dishana, aba mbakelenge ba Bena Holi mu buloba bua Sei. Aba mbakelenge bakakokesha ba mu buloba bua Edome, diambedi mukelenge kayi muanze kukokesha Bena Isalele. Bela, muana wa Beô, wakakokesha mu Edome, dina dia musoko wandi ne, Dinehaba. Bela wakafua, ne Yobaba, muana wa Zela, muana wa Bosela, wakadia bukelenge buandi. Yobaba wakafua, ne Hushama, wa mu buloba bua Bena Temana, wakadia bukelenge buandi Hushama wakafua, ne Hadada, muana wa Bedada, wakahita Bena Midiyana bukole mu buloba bua Moaba, wakadia bukelenge buandi, dina dia musoko wandi ne, Awita. Hadada wa kafua, ne Samala wa ku Maseleka, wakadia bukelenge buandi. Samala wakafua, ne Shaula wa ku Lehobota, hehi ne musulu wa Pelata, wakadia bukelenge buandi. Shaula wakafua ne, Balahanana, muana wa Akabo, wakadia bukelenge bua ndi. Balahanana, muana wa Akabô, wakafua ne Hada wakadia bukelenge buandi, dina dia musoko wandi ne, Pau, dina dia mukashi wandi diakadi Mahetabela, muana wa bakashi wa Mateledi, muana wa bakashi wa Mezehaba. Â mmena a bakelenge bakaluhuka kudi Esau ku meku abo ne mu miaba yabo ne ku mena abo mukelenge Timena ne mukelenge Alawa ne mukelenge Yatete ne mukelenge Oholibama ne mukelenge Ela ne mukelenge Pinona, mukelenge Kenaza ne mukelenge Temana ne mukelenge Mibesâ, mukelenge Magadiele ne mukelenge Ilama aba mbakelenge ba Edome, ku miaba yabo mu buloba bua buhianyi buabo Eu udi Esau, nkambua wa Bena Edome. Yakoba wakashikama mu buloba buakadi tatuʼandi mushikame mu buloba bua Kanâna. Eku nkulondolola kua malu a Yakoba Hakadi Yosefe ne bidimu dikumi ne muanda mutekete, yeye wakadi udisha bimuna ne bana babo Yeye wakadi nsongalume wakadi ne bana ba balume ba Bileha ne Zilepa, bakashi ba tatuʼandi, Yosefe wakalua ne lumu luabo lubi kudi tatu abo. Dinanga dia Isalele kudi Yosefe diakatamba dinanga diandi kudi bana bandi bonso, bualu bua yeye wakadi muana wakaleleye ku bununu buandi, wakamulelela tshikowelu tshia maboko male. Bana babo bakamona ne dinanga dia tatu wabo kudiye diakatamba dia kudi buonso buabo, bobo bakadi nʼandi lukuna, kabakamanya mua kuyikila nʼandi talala. Yosefe wakalota tshilota, wakatshiawila bana babo, bobo bakatamba kuikala nʼandi lukuna. Yeye wakabambila ne, Unvuai, ndi nnusengelela, tshiota tshinakulota, bualu bua monai, biakadi basuika bisumbu bia blé mu budimi, ne monai, tshisumbu tshianyi tshiakabika, tshiakimana, ne bisumbu bienu biakela tshianza munkatshi, biakatshikukuila. Bana babo bakamuambila ne, Wewe newikale mukelenge wetu, anyi? Neutukokeshe, anyi? Bakatamba kuikala nʼandi lukuna bualu bua bilota biandi ne bua mei andi. Yeye wakalota tshilota tshikuabo, wakatshiawila bana babo, wakabambila ne, Monai, nakulota tshilota tshikuabo, nakumona diba ne ngondo ne mitoto dikumi ne umue, biakunkukuila. Wakatshiawila tatu wandi ne bana babo, tatu wandi wakamukuhulula ku di diandi ne, Etshi ntshilota kai tshiwakulota? Meme ne mamuʼebe ne bana benu netulue bua kukukukuila hanshi, anyi? Bana babo bakadi nʼandi mukau, kadi tatu wandi wakateka mei au mu mutshima wandi. Bana babo bakaya ku Shekeme bua kudishabo bimuna bia tatu abo Isalele wakebesha Yosefe ne, Bana benu kabena badisha bimuna ku Shekeme, anyi? Lua biebe, nenkutume kudibo Yeye wakamuambila ne, Ndiku. Yeye wakamuambila ne Ya biebe, umone ne bana benu badi bakole ne bimuna bidi bimpe, anyi, walukila ungambile. Wakamutuma ku tshibanda tshia Hebelone, ne yeye wakalua ku Shekeme Mulumiana wakamusangana ne, mona, wakadi wendakana mu tshisuku, wakamuebesha ne, Udi ukeba tshinyi? Yeye wakamuitaba ne Ndi nkeba bana betu, ndi nkusengelela ne, undeshe kudibo badisha mikoko. Muntu wakamuambila ne, Bakumuka kunoko, nakabunvua bamba ne Tuyai ku Dotana Yosefe wakalonda bana babo, wakabasangana mu Dotana. Bobo bakamumona kule kuakua, ne diambedi yeye kayi muanze kufika ha buihi nʼabo, bakamuelela tshifufu bua kumushiha. Bakambilangana ne, Monai, muena bilota njowa ulua. Tuye kumushiha, tumuele mu mukela mukuabo, netuambe ne, Nyama mubi wakamudia, netumone tshiavuisha bilota biandi. Lubena wakunvua tshifufu tshiabo, wakamusungila mu bianza biabo, wakamba ne, Kabamushihi. Lubena wakabambila ne, Kanumatshishi mashi andi hanshi, tumuele mu mukela eu udi mu tshihela, kadi kanumulengi tshianza nansha, yeye wakamba nunku bua kumusungileye mu bianza biabo ne bua kumuhingasheye kudi tatu wandi. Hakalua Yosefe kudi bana babo, bakamukohola tshikowelu tshiandi, tshikowelu tshiandi tshia maboko male tshiakadiye muluate, bakamukuata, bakamuela mu mukela, mukela wakadi mûme, kamuakadi mai. Bakashikama bua kudiabo bidia, bakabanduluka, bakamona Bena Yishemaele bafume ku Gilada, ne tumelo tuabo tutuala manananshi ne bintu bia muhuya muimpe ne mula, bakadi bahueka mu Ejipitu. Yuda wakambila bana babo ne, Hatuashiha muanʼetu, ne hatuasokoka mashi andi, netushale ne tshintu kai? Tuye kumuhana kudi Bena Yishemaele, katumulengi tshianza, bualu bua yeye udi muanʼetu, udi musunyi wetu Bana babo bakamunvuila. Bena Midiyana, bendi ba mushinga bakahita, ba kahatula Yosefe mu mukela, bakamuhanyisha Bena Yishemaele ku bituha bia argent makumi abidi. Bakaya ne Yosefe mu Ejipitu. Lubena wakahingana ku mukela, ne Yosefe kakadimu, yeye wakahanda tshivualu tshiandi. Wakahingana kudi bana babo, wakamba ne, Nsongalume kenaku, ne meme nenye kudi kunyi? Bakangata tshikowelu tshia Yosefe, bakashiha mbushi, bakina tshikowelu mu mashi, bakatuma tshikowelu tshia maboko male kudi tatu wabo, bakamba ne, Tuakutshisangana hanshi, umanye ne ntshikowelu tshia muanʼebe, anyi? Yeye wakatshimanya wakamba ne, Etshi ntshikowelu tshia muanʼanyi, nyama mubi wakamudia, bulelela, Yosefe udi muhandibue bihese bihese kudi nyama. Yakoba wakahanda bivualu biandi, wakaluata tshilulu tshikayabala mu tshimono, wakajinga muanʼandi matuku a bungi. Bana bandi ba balume bonso ne bana bandi ba bakashi bonso bakabika bua kumusamba, kadi yeye wakahidia bamusambe, wakamba ne, Nenye bianyi mu Muaba wa Lufu, njinga muanʼanyi. Tatu wandi wakamudila. Bena Midiyana bakahana Yosefe mu Ejipitu kudi Potifâ, kamanda ka masalayi a Palô. Mu matuku au Yuda wakumuka kudi bana babo, wakaya ku di Muena Adulama dina diandi Hila. Yuda wakamonaku muana wa bakashi wa muena Kanana, dina diandi Shua, yeye wakamuangata, wakalala nʼandi. Yeye wakimita difu, wakalela muana wa balume, wakamuidika dina ne, Ele. Wakukuta difu dikuabo, wakalela muana wa balume, wakamuidika dina ne, Onana. Wakimita difu dikuabo, wakalela muana wa balume, wakamuidika dina ne, Shela, hakamuleleleye wakadi mu musoko wa Keziba. Yuda wakangatshila Ele muanʼandi, muan a bute, mukashi dina diandi Tama Ele, muanʼa bute wa Yuda wakadi muntu mubi ku mesu kua Yehowa, Yehowa wakamushiha. Yuda wakambila Onana ne, Uye kudi mukashi wa mukulu ebe, umuangate bu mukashi webe, yeye nealelele mukuluʼebe bana. Onana wakamanya ne bana aba kabena bikala bu bana banyi ne hakayeye kudi mukashi wa mukulu andi, wakalela hanshi, bua yeye kaleledi mukuluʼandi bana. Bualu buakenzeye buakadi bubi ku mesu kua Yehowa, ne yeye wakamushiha kabidi. Hashishe Yuda wakambila Tama maʼmue nʼandi ne, Ushale bu mukashi wa mu lufuila mu nsubu wa tatuʼebe to ne hadiunda muanʼanyi Shela. Yeye wakatshina ne, Yeye neafue bu muakafua bana babo. Tama wakaya, wakashikama mu nsubu wa tatu andi. Dituku dikuabo, muana wa bakashi wa Shua, mukashi wa Yuda, wakafua, Yuda wakasambibua, wakaya kudi bakoshi ba miosa ya mikoko yandi ku Timena, kudi mulunda wandi Hila, Muena Adulama. Bakambila Tamâ ne, Tatuʼebe-muenu uyaya ku Timena bua kukoseye mikoko yandi miosa. Yeye wakavula bilulu bia mu lufuila, wakaluata bilulu bikuabo, wakadibuikila ne tshilulu tshikudika, wakashikama ku tshibi tshia ku Enayima, hehi ne nshila wa ku Timena, bualu bua yeye wakamona ne, Shela wakamana kudiunda ne kabena banze kumbakisha kudiye. Hakamutangila Yuda, yeye wa kelangana meji ne, Yeye udi mukashi wa masandi, bualu bua yeye wakabuikila mpala wandi ne tshilulu. Yeye wakahuka kudiye hakadiye mu nshila, wakamuambila ne, Ndi nkusengelela ne, Lua biebe, ndi musue kulala nʼebe, yeye kakamanya ne yeye udi maʼmuenʼandi Mukashi wakamukonka ne, Neumpe tshinyi hawalua kundi? Yeye wakamuambila ne, Nenkutumine muanʼa mbushi wa mu tshisumbu tshinyi. Mukashi wakamuebesha ne, Wewe neungeyeke tshieya to ne hawamutuma, anyi? Yeye wakamuebesha ne, Nenkueyeke tshieya kai? Mukashi wakamukudimuna ne, Umpe kakanu ka ku munu webe ne mionshi misuika ku maboko ebe ne tshibangu tshiebe tshiudi nʼatshi mu tshianza tshiebe. Yeye wakamuhabi, wakaya kudiye, ne mukashi wakimita difu kudiye. Mukashi wakabika, wakaya mu nshila wandi, wakavula tshilulu tshiandi tshikudika, wakaluata bilulu bia mu lufuila kabidi. Yuda wakatuma muana wa mbushi mu tshianza tshia mulunda wandi, Muena Adulama, bua kuangateye tshieya tshia keyekeye mu tshianza tshia mukashi, kadi yeye kakamusangana. Hashishe, yeye wakebesha balume ba mu musoko ne, Mukashi au wa masandi wakadi ku Enayima udi kudi kunyi? Bobo bakamukudimuna di ne, Kakuakadi mukashi wa nasandi kunoko. Yeye wakalukila kudi Yuda, wakamuambila ne, Tshiakumusangana, ne balume ba musoko bakungambila ne, Mukashi wa masandi kakadiku. Yuda wakamba ne, Yeye ashale nʼatshi, bua bundu kabutukuatshi, mona, nakamutumina muana wa mbushi eu, ne wewe kuakamusangana. Hakahita ngondo isatu, bakambila Yuda ne, Tamâ ma muenʼebe wakandamuka bu mukashi wa masandi, ne yeye wakimita difu kabidi ku masandi. Yuda wakamba ne, Balue nʼandi kunoko, bamuoshe mu kalua. Hakaluabo nʼandi, yeye wakatumina tatuʼandi-muenu dî ne, Nakimita difu kudi muena bintu ebi, ujingulule nfumu wa bintu ebi, kakanu ka ku munu, ne mionshi ya ku maboko ne tshibangu. Yuda wakabimanya, wakamba ne, Yeye udi muntambe meme buakane, bualu bua meme tshiakamubakisha kudi muanʼanyi mulume Shela. Yeye kakamumanya kabidi tshiendelele. Hakakumbana ngondo yandi, mona, bana ba mahasa bakadi munda muandi. Hakatantamaneye, muana umue wakahatula tshianza, ne muleleshi wakasuika muonshi mukunze ku tshianza tshiandi, wakamba ne, Yeye wakaluhuka diambedi. Kadi yeye wakahingasha tshianza tshiandi, ne mona, muana mukuabo wakaluhuka. Muleleshi wakamba ne, Mona tshihatukidi tshiwakuhatuka! Nunku bakamuidika dina ne Pelese Ne ku nyima muanʼabo wakadi ne muonshi mukunze musuika ku tshianza tshiandi wakahatuka, bakamuidika dina ne, Zela. Bakaya ne Yosefe mu Ejipitu, ne Potifa, kamanda ka masalayi a Palo, Muena Ejipitu, wakamusumba ku bianza bia Bena Yishemaele, bakalua nʼandi. Yehowa wakadi ne Yosefe, wakamuendesha diakalengele, wakadi mu nsubu wa mukelenge wandi, Muena Ejipitu. Mukelenge wandi wakamona ne, Yehowa udi nʼandi, ne Yehowa wakadi mumuendeshe diakalengele mu tshianza tshiandi mu malu onso akenzeye. Yosefe wakasangana luse ku mesu kuandi, wakamuenzela mudimu, wakamuteka mulami wa nsubu wandi yonso, wakafila bintu bionso biakadiye nʼabi mu tshianza tshiandi. Mu dituku diakamutekeye mulami wa nsubu wandi ne wa bintu biandi bionso biaka diye nʼabi, Yehowa wakavudishila bonso bakadi mu nsubu wa Muena Ejipitu masanka, bualu bua Yosefe Disanka dia Yehowa diakadi ku bintu bionso biakadiye nʼabi mu nsubu muandi ne bia mu madimi andi kabidi. Yeye wakashiya bintu bionso biakadiye nʼabi mu tshianza tshia Yosefe, yeye kakamanya bungi bua bintu biakadiye nʼabi, anu bidia biakadiye udia. Yosefe wakadi muntu muimpe mubidi ne mpala Ku nyima kua malu au mukashi wa mukelenge wandi wakananga mesu andi kudi Yosefe, wakamuambila ne, Ulale nʼanyi. Kadi yeye wakahidia, wakambila mukashi wa mukelenge wandi ne, Mona, mukelenge wanyi kena mumanye bintu bindi nʼabi mu nsubu muandi, yeye wakashiya bintu bionso bidiye nʼabi mu tshianza tshianza. Yeye kena muntambe meme bunene mu nsubu eu, yeye kakumpidisha tshintu tshimue tshidiye nʼatshi anu wewe nkayebe, bualu bua wewe udi mukashi wandi: ndi mua kuenza bualu ebu bubi bunene ne mua kuenzela Nzambi bibi munyi? Yeye wakadi wambila Yosefe bualu ebu ku dituku ku dituku, kadi yeye kakamunvuila bua kulaleye nʼandi, anyi bua kushala nʼandi. Dituku dikuabo hakayeye mu nsubu bua kuenzeye mudimu wandi, ne mu nsubu kamuakadi muntu mukuabo, yeye wakamukuata ku tshivualu tshiandi, wakamuambila ne, Ulale nʼanyi, ne yeye wakashiya tshivualu tshiandi mu tshianza tshiandi, wakanyema, wakahatuka. Hakatangila mukashi ne Yosefe wakashiya tshivualu mu tshianza tshiandi, wakanyema, wakahatuka, mukashi wakela dî kudi balume ba mu nsubu wandi, wakabambila ne, Tangilai, mulume wanyi wakulua ne Muena Ebelu mu nsubu bualu bua kutufiusha bundu, wakabuela mu nsubu bua kulaleye banyi, ne meme nakuela di dianyi dikole. Hakunvueye di dianyi, yeye wakashiya tshivualu tshiandi kundi, wakanyema, wakahatuka. Yeye wakateka tshivualu tshia Yosefe hanshi to ne hakahingana mukelenge wandi ku nsubu wandi. Yeye wakambila mulume wandi mei onso ne, Muhika webe, Muena Ebelu, uwakulua nʼandi mu nsubu, wakabuela kundi bua kunfuisha bundu, ne hanakela di dianyi, yeye wakashiya tshivualu tshiandi kundi, wakanyema. Hakunvua mukelenge wa Yosefe mei akamuambila mukashi wandi ne, Muntu webe wakungenzela nunku, tshiji tshikole tshiakamukuata. Mukelenge wa Yosefe wakamukuata, wakamubuesha mu nsubu wa lukanu muakadi bena buloko ba mukelenge basuikila, yeye wakadi mu nsubu wa lukanu nunku. Kadi Yehowa wakadi ne Yosefe, waka mulesha luse, wakamuendesha diakelengele kudi mulami wa nsubu wa lukanu. Mulami wa nsubu wa lukanu wakafua bonso bakadi mu nsubu wa lukanu mu tshianza tshia Yosefe, malu onso akenzabomu, yeye wakadi bu muenzeshi wau. Mulami wa nsubu wa lukanu kakalama bintu biakadi mu bianza bia Yosefe, bualu bua Yehowa wakadi nʼandi, Yehowa wakamuendesha diakalengele mu malu onso akenzeye. Hakashika malu au, mutuadi wa maluvu wa mukelenge wa Ejipitu ne mulambi wa bidia biandi bakafikisha mukelenge wabo wa Ejipitu munda. Mukelenge Palô wakadi ne tuhita tuandi tubidi tshiji, kahita ka bena maluvu ne kuhita ka bena bidia. Yeye wakatubuesha mu lukanu, mu nsubu wa kapitene ka masalayi malami, mu muaba muakadi Yosefe musuikila. Kapitene ka masalayi kakatufila mu bianza bia Yosefe, yeye wakatukuatshisha, tuakashala mu nsubu wa lukanu musangu. Tuakalota bilota bubidi bualu, muntu tshiandi tshiota muntu tshiandi tshilota butuku bumue, mutuadi wa maluvu ne mulambi wa bidia bia mukelenge wa Ejipitu, bakadi basuikila mu nsubu wa lukanu. Yosefe wakabuela kudibo ne dinda, wakamona ne bakadi babungame. Yeye wakakonka tuhita tua Palô diakadi nʼandi mu nsubu wa lukanu mu nsubu wa mukelenge wandi ne, Nudi nubungamina lelu nunku tshinyi? Tuakamuandamuna di ne, Tuakulota bilota, ne kakuena muntu udi mua kutujinguluilabi. Yosefe wakatuebesha ne, Kujingulula kua malu kakuena kudi Nzambi, anyi? Ndi nnusengelela ne, Nubingambile. Kuhita ka bena maluvu kakambila Yosefe tshilota tshiandi ne, Mu tshilota tshianyi, nakumona muonshi wa tumuma tua nvinyo ku mpala kuanyi, mudishi eu wakadi ne matamba asatu akasampila ntonga, ne bilongo biakabaluluka, biakakuama tumuma tuhia. Luhanza lua Palô luakadi mu tshianza tshianza, nakahuola tumuma atu, nakatukamina mu luhanza lua Palô, nakateka luhanza mu tshianza tshia Palo. Yosefe wakamuambila ne, Eku nkujingulula kua tshilota tshiebe, matamba asatu adi bu matuku asatu. Hahita matuku asatu, Palô neabishe mutu webe, neakuhingashe mu mudimu webe kabidi, wewe neuhe luhanza lua Palô mu tshianza tshiandi, bu muwakenza diambedi bawakadi mutuadi wandi wa maluvu. Halua bualu ebu buimpe kûdi, wewe unvuluke, ndi nkusengelela ne, Unfuile luse, wambileku Palô bualu buanyi, angumushe mu nsubu eu Bulelela, bakungiba mu buloba bua Bena Ebelu, ne kunoko kabidi tshiakuenza bualu bubi bua kungelelabo mu nsubu wa mîdima. Hakatangila kahita ka bena bidia ne, Kujingulula eku kudi kuimpe, yeye wakambila Yosefe ne, Mu tshilota tshianyi, mona, nakadi ne bisaka bisatu bia bidia ha mutu hanyi, mu tshisaka tshiakadi ku mutu mene mene muakadi bidia bia Palô bilamba, ne nyunyu ya mulu yakalua, yakabizokola mu tshisaka tshiakadi ha mutu hanyi. Yosefe wakamuambila ne, Eku nkujingulula kua tshilota tshiebe bisaka bisatu bidi bu matuku asatu, hahita matuku asatu, Palô neakukose mutu, neakuowe ku mutshi, ne nyunyu ya mulu neyizokole munyinyi wa mubidi webe. Hakahita matuku asatu, dituku adi diakadi dituku dia kuledibua kua Palo, yeye wakalambishila bantu bandi bidia bia disanka, ne yeye Wakabikila kahita ka bana maluvu ne kahita ka bena bidia ku mesu kua bantu bandi. Yeye wakahingasha kahita ka bena maluvu mu mudimu wandi kabidi, ne yeye wakaha Palo luhanza luandi mu tshianza tshiandi kabidi. Kadi yeye wakowa kahita ka bena bidia bu muakamba Yosefe. Kadi kahita ka bena maluvu wakahua Yosefe muoyo, yeye kakamuvuluka. Hakahita bidimu bibidi bijima, Palô wakalota tshiota, yeye wakadi muimane hehi ne musulu. Wakamona ngombe muanda mutekete yakadi ne manyi a bungi, yakabanda mu mai, yakadi idia mashinde malehe. Wakamona kabidi ngombe mikuabo muanda mutekete minyane, kayakadi ne manyi nansha, yakabanda mu mai, yakimana ne ngombe mikuabo kukala kua mai. Ngombe minyane yakadia ngombe muanda mutekete yakadi midiunde ne ya manyi. Hashishe Palô wakatabala Wakalala tulu kabidi, wakalota tshiota tshikuabo, wakamona miehu ya mponda muanda mutekete minene, miakane idiundile ku lubalabala lumue. Wakamona miehu mikuabo muanda mutekete yakadi mikese, yakafubidila ku luhehele luakafuma ku esete, yakadiunda kuinshi kua mikuabo. Miehu mikese yakamina miehu yakadi miakane. Palô wakatabala, wakamanya ne, Ntshilota. Dinda adi mutshima wandi wakabanga kubungama, wakatuma dî, Wakabikila bena majimbu ne bena meji bonso ba mu Ejipitu, Palô wakabamanyisha bilota biandi, kadi nansha umue wabo wakamanya mua kujinguluila Palô bilota biandi. Hashishe, kahita ka bena maluvu wakambila Palo ne, Ndi muvuluke dihanga dianyi lelu. Hakadi Palô ne bantu bandi tshiji, yeye wakatubuesha ne kahita ka bena bidia mu nsubu wa lukanu, bubidi buetu tuakalota bilota dituku dimue, bu mudi dijingulula dia tshilota tshiandi. Nsongalume Muena Ebelu, mukuatshishi wa kapitene ka masalayi, wakadi nʼetu mu nsubu wa lukanu, bakamuambila bilota bietu, ne yeye wakatujinguluila muntu tshilota tshiandi muntu tshiota tshiandi. Malu onso akalua bu muakambeye, bakampingasha mu mudimu wanyi, kadi bakowa muntu mukuabo. Hashishe Palô wakatuma di, Wakabikila Yosefe, bakamuhatula mu nsubu wa midima lubilu, yeye wakadibeya muedi wandi, wakaluata bilulu bikuabo, wakaya kudi Palô. Palô wakambila Yosefe ne, Nakalota tshiota ne kakuena muntu udi mua kutshinjinguluila, kadi nakunvua lumu hebe ne, Wewe haunvua tshiota tshia muntu, udi mua kumujinguluilatshi. Yosefe wakambila Palô ne, Kammeme to, kadi Nzambi neahe Palô kujingulula kudi ne ditalala. Palo wakambila Yosefe ne, Mu tshiota tshanyi nakamona meme muimane kukala kuamusulu, nakamona ngombe muanda mutekete yakadi ne manyi a bungi, yakabanda mu mai, yakadia mashinde malehe. Ngombe muanda mutekete mikuabo, minyane, kayakadi ne manyi yakayilonda, tshakatangila ngombe minyane nunku mu buloba bua Ejipitu diambedi nansha. Ngombe minyane yakadia ngombe muanda mutekete yakadi midiunde, ne hakayidia ngombe mikuabo nunku, kabakama nya ne yakayidia, yakadi anu minyane bu diambedi Nunku nakatabala. Mu tshiota tshikuabo nakatangila miehu muanda mutekete minene miakane midiunde ku lubalabala lumue. Miehu muanda mutekete mikese yakadi mifubidile ku luhehele luakafuma ku esete, yakadiundila kuinshi kua mikuabo, ne miehu nukese yakadia miehu muanda mutekete miakane, meme nakatshiawila benu majimbu, kadi nansha umue wabo wakamanya mua kutshinjinguluila. Yosefe wakambila Palô ne, Bilota bia Palo bidi tshilota tshimue, Nzambi wakamanyisha Palô malu akadiye ha kuenza. Ngombe midiunde muanda mutekete idi bu bidimu muanda mutekete, ne miehu miakane muanda mutekete idi bu bidimu muanda mutekete, tshilota tshidi anu tshimue. Ngombe minyane muanda mutekete yakalonda ku nyima kuai idi bu bidimu muanda mutekete, ne miehu yakafubidila ku luhehele luakafuma ku esete, idi bu bidimu muanda mutekete bia tshiole. Au mmalu anakuambila Palô, Nzambi wakulesha Palô malu akadiye ha kuenza Monai, bidimu muanda mutekete bilualua bidi buloba bua Ejipitu buonso bulua ne bintu bia bungi, ne ku nyima bidimu muanda mutekete bia tshiole bilualua bidi bantu bahua muoyo bua bintu bia bungi biakadibo nʼabi, tshiole netshidie bintu bionso biakadi mu buloba, kabena bamanye bintu bia bungi mu buloba bualu bua tshiole tshilualua, netshitambe bukole. Bua bualu ebu mbuakalotela Palo bilota bibidi, bualu ebu nebujadikibue kudi Nzambi, Nzambi neabushikishe tshituha tshibi. Nunku Palo asungule muntu udi ne budimu ne lungenyi, amuteke ku mutu kua buloba bua Ejipitu. Palo enze biandi bualu ebu kabidi, asungule tuhita tua mu buloba, tusangishe tshintu tshitanu tshia bintu bionso bidi bidiunda mu buloba bua Ejipitu mu bidimu ebi muanda mutekete bidi buloba bulua ne bintu bia bungi. Tusangishe bintu bia kudia mu bidimu ebi bimpe, tubiteke mu bianza bia Palo bua bantu kudiabo mu bimenga, tubilame bimpe. Bintu ebi nebikale bilamibue mu diyeba bua bidimu muanda mutekete bia tshiole tshilualua mu buloba bua Ejipitu, bua bena buloba kabafu ne tshiole. Bualu ebu buakadi buimpe ku mesu kua Palô ne ku mesu kua bantu bandi bonso. Palô wakambila bantu bandi ne, Tudi mua kumona muntu mukuabo udi ne mutshima wa Nzambi nunku kudi kunyi? Palô wakambila Yosefe ne, Bualu bua Nzambi wakakulesha bualu ebu buonso, kakuena muntu udi mua kukutamba budimu ne lungenyi, wewe newikale mulami wa nsubu wanyi, ne bantu banyi bonso nebakokeshibue anu ku dî diebe, anu bua nkuasa wa bukelenge nenkutambe. Palô wakambila Yosefe ne, Tangila, nakukuteka ha mutu ha buloba bua Ejipitu buonso. Palô wakakohola kakanu ka tshimanyinu tshiandi tshifundahu ku munu wandi, wakakela ku munu wa Yosefe, wakamuluatshisha bilulu bia lin, wakamuela lukanu lua or mu nshingu muandi, wakamuendesha mu dikalu dibidi dia bukelenge, wakela mbila ku mpala kuandi ne, Tuai binu hanshi, wakamuteka mu bukelenge bua buloba bua Ejipitu buonso Palo wakambila Yosefe ne, Meme ndi Palo, ne biwikala kuyi muambe di diebe, muntu kena mua kubisha tshianza tshiandi anyi dikasa diandi mu buloba bua Ejipitu buonso. Palo wakidika Yosefe dina dikuabo ne, Sefenata-panea, wakamuha Asenata, muana mukashi wa Poti-fela, mubuki wa mu Ono, bu mukashi wandi Yosefe wakendakana mu misoko yonso ya mu buloba bua Ejipitu. Yosefe wakadi ne bidimu makumi asatu hakimaneye ku mpala kua Palo, mukelenge wa Ejipitu. Yosefe wakumuka ku mpala kua Palô, wakendakana mu buloba bua Ejipitu buonso. Mu bidimu bimpe muanda mutekete buloba buakalua ne bintu bia bungi, mafuka mafuka Yeye wakasangisha bintu bia kudia bionso bia mu bidimu abi muanda mutekete bia mu Ejipitu, wakabiteka mu bimenga, bintu bia kudia biakadiunda mu madimi a ha matshika a musoko, wakabiteka mu musoko au. Yosefe wakasangisha matete bu bungi bua nsenga ya kukala kua mai manene, akatamba bungi, yeye wakalekela kua-bala, kabakamanya mua kuabala. Asenata, muana mukashi wa Poti-fela, mubuki wa mu Ono, wakalelela Yosefe bana ba balume babidi, diambedi tshiole katshiyi tshianze kulua. Yosefe wakidika muanʼa bute dina ne, Manashe; bualu bua yeye wakamba ne, Nzambi wakumpuisha muoyo bua mudimu wanyi mukole ne bua bonso ba mu nsubu wa tatuʼanyi. Wakidika muana mukuabo dina ne, Efelayima, bualu bua wakamba ne, Nzambi wakunkumbasha mu buloba bua dikenga dianyi. Bidimu bimpe muanda mutekete biakadi buloba bua Ejipitu bulua ne bintu bia bungi biakashika. Bidimu bia tshiole muanda mutekete biakabanga kulua bu muakamba Yosefe, biole biakadi mu maloba onso, kadi mu Ejipitu muakadi mushale bintu bia kudia. Hakamueneka nzala mu buloba bua Ejipitu, bantu bakadidila Palô ne, Utuhe bia kudia Palo wakambila Bena Ejipitu bonso ne, Yai bienu kudi Yosefe, nuenze malu adiye wamba. Tshiole tshiakadi ku nseke yonso ya buloba, ne Yosefe wakunzulula bibi bia mayeba onso, wakamanyisha Bena Ejipitu, tshiole tshiakatamba bukole mu buloba bua Ejipitu. Bantu ba mu maloba onso bakalua mu Ejipitu kudi Yosefe bua kusumbabo bia kudia, bualu bua tshiole tshiakadi tshikole mu maloba onso. Hakamanya Yakoba ne, Bintu bia kudia biakashala mu Ejipitu, yeye wakambila bana bandi balume ne, Nudi batangilangana muaku bua tshinyi? Yeye wakamba kabidi ne, Monai, nakunvua lumu ne, Bintu bia kudia biakashala mu Ejipitu, yai bienu kuakua, nutusumbileku bia kudia, bua tuetu tuhanduke, katufu. Bana babo ne Yosefe dikumi bakaya mu Ejipitu bua kusumbabo bia kudia. Kadi Yakoba kakatuma Benyamina, muakunyi wa Yosefe, ne bana babo, wakamba ne, Bumue bualu bubi nebumukuate. Bana balume ba Isalele bakalua mu tshisumbu tshia bantu bua kusumbabo bia kudia, bualu bua tshiole tshiakadi mu buloba bua Kanana. Yosefe wakadi mukokeshi wa mu buloba, nyeye mene wakadi uhanyisha bantu bonso bintu, bana babo ne Yosefe bakalua, bakamukukuila hanshi. Yosefe wakamona bana babo, wakabamanya, kadi yeye wakadivuisha bu muntu mukuabo kudibo, wakabambila mei makole, wakabakonka ne, Nuakufuma kudi kunyi? Bakamukudimuna di ne, Mu buloba bua Kanana, tuakuluila bua kusumba bia kudia. Yosefe wakamana bana babo, kadi bobo kabakamumanya. Yosefe wakavuluka bua bilota biandi biakabaloteleye, yeye wakabambila ne, Nudi batentekedi, nuakuluila bua kutangila ne buloba budi butuhu. Bobo bakamuambila ne, Nansha, mukelenge wetu, bantu bebe bakuluila anu bua kusumbabo bia kudia. Buonso buetu tudi bana ba muntu umue, tudi bambe mei a bushuwa, katuena batentekedi. Kadi yeye wakabambila ne, Nansha, nuakuluila anu bua kutangila ne buloba budi hatuhu. Bobo bakamuku dimuna ne, Tuetu, bantu bebe, tudi bana dikumi ne babidi ba muntu umue wa mu buloba bua Kanana, ne mona, muana wa mukala udi mushale ne tatu wetu katataka, ne mukuabo kenaku. Yosefe wakabambila ne, Adi ndi dinakunuambila ne, Nudi batentekedi, nennutete ku bualu ebu, ndi nditshiha ku muoyo wa Palô ne, Kanuena numuka kunoko anu hanualua ne muanʼenu, muanʼa mukala kunoko. Nutume umue wa munkatshi muenu, alue biandi ne muanʼenu, muanʼa mukala kunoko, netunusuike mionshi buonso buenu, netutete mei enu, bua kumanya ne, Nudi nuamba mei malelela, anyi bualu bunakuditshiha ku muoyo wa Palo ne, Nudi batentekedi, nebuikale bulelela. Yeye wakababuesha buonso buabo mu nsubu wa lukanu to matuku asatu. Hakahita matuku asatu, Yosefe wakabambila ne, Enzai nunku nushale ne muoyo, bualu bua meme ndi ntshina Nzambi. Binuamba mei malelela, nuitabushe bua: umue wenu ashale musuikibue mu nsubi wa lukanu, kadi bakuabo benu baye kuenu ne bia kudia bualu bua tshiole tshidi mu nsubu yenu. Nu hingane ne muanʼenu, muanʼa mukala kundi, nunku mei enu neajalame, kanuena nufue. Bobo bakitabusha. Bakambilangana ne, Tuetu tuakudihisha bulelela mu bualu bubi butuakenzela muanʼetu hatuakatangila kanyinganyinga ka mutshima wandi hakadiye utusengelela, kadi tuetu katuakamunvuila, bua bualu ebu dikenga diakatukuata. Lubena wakabambila ne Tshiakanuambila ne, Kanuenzedi muana bualu bubi, kadi nuenu kanuakangunvuila, anyi? Nunku mashi andi adi ashala ha bilamba bienu. Bobo kabakamanya ne, Yosefe wakadi ujingulula mei akadibo bambilangana, bualu bua muandamunyi wa miaku wakadiku. Yeye wakabakoma nyima, wakadia, ne yeye wakatshinguluka kudibo, wakayikila nʼabo, wakakuata Shimeona, wakamusuika ku mesu kuabo. Hashishe Yosefe wakambila ba ntu bandi ne, Nubushile bibombi biabo tente ne bia kudia, nuhingashe argent wa muntu ne muntu mu tshibombi tshiandi, nubahe bintu bia kudiabo mu nshila, bakenza nunku. Bakateka bintu bia kudia ha nyima ha mpunda yabo bakaya. Hakafikabo ku nsubu wa tshilala benyi, umue wabo wakasulula tshi bombi tshiandi bua kudisheye mpunda wandi, wakatangila argent yandi ba mutu ha tshibombi tshiandi. Yeye wakambila bana babo ne Bakumpingashila argent yanyi, idi mu tshibombi, mitshima yabo ya kahandika, bakazakala, bakambila ngana ne, Bualu ebu buakutuenzela Nzambi budi tshinyi? Bakalua kudi Yakoba, tatuʼabo, mu buloba bua Kanana, bakamuambila malu onso akabakuata ne, Muntu au mukelenge wa mu buloba, wakatua mbila mei makole, wakatuenzela bu batentekedi ba buloba. Tuetu tuakamuambila ne, Tudi bambe mei malelela, katuena batentekedi, tudi bana dikumi ne babidi ba tatu umue, umue wetu kenaku, ne mua nʼetu, muanʼa mukala udi mushale ne tatu wetu mu buloba bua Kanâna. Muntu au, mukelenge wa buloba, wakabambila ne, Ku bualu ebu nemmanye ne, Nudi nuamba mei malelela, nushiye umue wenu kundi, bakuabo benu bangate bia kudia bia kumana nʼabi tshiole tshidi mu nsubu yenu, yai bienu. Nuhingane kundi ne muanʼenu, muan a mukala, hashishe nemmanye ne, Kanuena batentekedi nudi bantu ba mei a bushuwa nunku nempingashe muan enu mu bianza bienu, nenumanye mua kuendulula mushinga mu buloba. Hakahongololabo bintu biakadi mu bibombi biabo, bakasangana argent ya muntu ne muntu mu tshibombi tshiandi, hakamonabo, bobo ne tatu wabo argent yabo bakatshina. Yakoba, tatu wabo, wakabambila ne, Nuenu nuakunjimishila bana banyi Yosefe kenaku, ne Shimeona kenaku, ne nudi nuamba kuya ne Benyamina, malu au onso adi mantonde. Lubena wakambila tatu wandi ne, Udi mua kushiha bana banyi balume babidi, binahanga kumuhingasha kudi umufile mu tshianza tshianyi, ne meme nemmuhingashe kûdi kabidi. Yakoba wakamba ne Muan anyi kena uya nʼenu, mukuluʼandi udi mufue ne anu yeye umuehele udi mushale, biamukuata bualu bubi mu nshila unuaya, hashishe, nenuvuishe nsuki yanyi mitoke to ne kanyinganyinga mu Muaba wa Bafue. Tshiole tshiakatamba bukole mu buloba. Hakashikishabo kudia bintu bionso biakaluabo nʼabi ku Ejipitu, tatu wabo wakabambila ne, Yai bienu tshiakabidi nutusumbileku ba kudia tukese. Yuda wakamuambila ne, Mulume au wakabambila bikole ne, Kanuena nu ntangila ku mesu, binuikala kanuyi nulua ne muakunyʼenu kundi. Biwatutuma ne muanʼetu, netuye, ne tukusumbile bia kudia, kadi biwahidia kututuma nʼandi, katuena tuyaku, bualu bua mulume au waka tuambila ne, Kanuena nuntangila ku mesu, binuikala kanuyi nulua ne muakunyiʼenu kundi. Isalele wakamba ne, Nuakungenzela bibi nunku, hanuakuambila mulume au ne, Tudi ne muakunyʼetu, munyi? Bakamba ne, Mulume au wakatukonka bua malu etu mene, ne bua bana betu ne, Tatu wenu utshidi ne muoyo, anyi? Nudi ne muanʼenu mukuabo wa balume, anyi? Tuetu bakamukudimuna anu bu muakatukonkeye, tuakadianjila kumanya ne, Yeye wakadi mua kutuambila ne, Luai ne muanʼenu wa balume kunoko, anyi? Yuda wakambila Isalele tatuʼandi ne, Utume nsongalume nʼanyi, netubike, netuye, bua betu ne wewe ne bana hetu bakese bikale ne muoyo, katufu Meme nendieyeke kudiye bu tshieya mu muaba wandi, udi mua kumusombuela ku tshianza tshianyi binahanga kuhingana nʼandi kudi ne kumuteka ku mpala kuebe hashishe nendibadile bujitu ebu tshiendelele; bu tuetu katuyi bajanguluke nunku, tuakadi mua kuhingana kunoko tshiakabidi. Tatu wabo Isalele wakabambila ne, Bikala bualu butukuate, enzai bienu nunku nuangate bintu biakakuamibua mu buloba buetu, nubiteke mu bisaka bienu, nuye nʼabi bu matabisha kudi mulume au Nuangate bintu bia muhuya muimpe, baume ne buitshi ne mula ne pistaches ne amandes, nuye ne argent muhite misangu ibidi mu bianza bienu, argent yakahingashabo munda mua bibombi bienu, nuye nʼai mu bianza bienu kabidi, bumue bakenza bualu abu ku mpukahuka nuangate muakunyiʼenu kabidi, bikai bienu, nuye kudi mulume au. Nzambi wa Bukole Buonso anufue luse ku mesu kua mulume au, bua yeye ahingashe muanʼenu mukuabo ne Benyamina kabidi mu bianza bienu Bianjimishilabo bana banyi, nembajimishe Bobo bakangata matabisha au, ne argent misangisha misangu ibidi, ne Benyamina mu bianza biabo, bakabika, bakaya mu Ejipitu, bakimana ku mpala kua Yosefe. Hakatangila Yosefe Benyamina nʼabo, wakambila mulami wa nsubu wandi ne, Ulue ne balume aba mu nsubu, ubashihele nyama, ulongolole bintu bia kudia, bualu bua bantu aba nebadie nʼanyi bidia diba hankatshi. Mulami Wakenza bu muakamba Yosefe, wakalua nʼabo mu nsubu wa Yosefe. Bobo bakatshina hakaluabo nʼabo mu nsubu wa Yosefe, bakambilangana ne, Bakatubuesha mu nsubu nunku bualu bua argent yakahingashabo mu bibombi bietu diambedi badi basue kutubanda ne bubi, nebatukuate ne mpunda yetu, nebatubueshe mu buhika. Bakasemena ha buihi ne mulami wa nsubu wa Yosefe, bakayikila nʼandi ku tshibi tshia nsubu, bakamba ne, Mukelenge wetu, tuakalua kunoko diambedi bua kusumba bia kudia, ne hatuakafika ku nsubu wa tshilala benyi, tuakasulula bibombi bietu, tuakamona argent yetu yonso munda mua tshibombi tshia muntu ne muntu, tuakulua nʼai kabidi mu tshianza tshietu. Tuakulua kabidi ne argent mikuabo bua kusumba bia kudia, katuena bamanye muntu wakahingasha argent ei mu bibombi bietu. Yeye wakabambila ne, Nuikale talala, kanutshinyi Nzambi, Nzambi wa tatu wenu, wakanuha bintu mu bibombi bienu, meme nakadi ne argent yenu. Yeye wakalua ne Shimeona kudibo. Muntu eu wakalua nʼabo mu nsubu wa Yosefe, wakabaha mai, ne bobo bakuvuwa makasa abo, ne yeye wakadisha mpunda yabo kabidi. Bobo bakalongolola matabisha diambedi Yosefe kayi muanze kulua diba hankatshi, bualu bua bakunvua lumu ne, Netudieku nʼandi bidia. Hakalua Yosefe ku nsubu kuandi, bakalua ne matabisha mu bianza biabo, bakamukukuila hanshi. Yeye wakabakonka bua malu abo ne, Tatu wenu, muntu au mununu unuakungambila, udi mukole, anyi? Utshidi ne muoyo, anyi? Bobo bakamukudimuna ne, Muntu webe tatu wetu, udi mukole, utshidi ne muoyo Bobo bakatua mpala yabo hanshi, bakamukukuila. Yeye wakakenzakana, wakamona Benyamina, muakunyʼandi, muana wa mamu wandi, wakabakonka ne, Eu udi muakunyʼenu unuakungambila, anyi? Yeye wakamuambila ne, Nzambi akufute luse, muanʼanyi. Yosefe wakumuka lubilu, bualu bua mutshima wandi wakajinga bua muakunyiʼandi, wakakeba muaba wa kudidileye, wakabuela mu nsubu wandi wa bulalu, wakadidilamu. Yeye wakuvuwa mai ku mpala kuandi, wakahingana kudibo, wakadikanda, wakamba ne, Lua ne bidia. Bakamuha bidia ha buandi, bakabaka bidia ha buabo, ne bakaha Bena Ejipitu bakadi badia nʼandi ha buabo, bualu bua Bena Ejipitu kabatu badia bidia ne Bena Ebelu, bualu ebu budi bufuisha Bena Ejipitu bundu. Bakashikama ku mpala kuandi, muntu ku mulongo wandi muntu ku mulongo wandi, wakatuadishila ku muanʼa bute to ne ku muanʼa mukala, balume aba bakakemangana. Yeye wakababanyina bidia biakadi ku mpala kuandi, kadi tshituha tshia Benyamina tshiakahita tshituha tshiabo misangu itanu. Bakanua, bakasanka nʼandi. Yosefe wakambila mulami wa nsubu wandi ne, Ûshe bibombi bia balume ne bia kudia tente, bungi bua bujitu budibo mua kutuala, teka argent ya muntu ne muntu munda mua tshîbombi tshiandi. Teka luhanza luanyi lua argent mu tshibombi tshia muana muakunyi ne argent yandi kabidi Yeye Wakenza bu dî dia Yosefe. Hakatshia butuku bakatuma balume aba ne mpunda yabo kuabo. Hakumukabo mu musoko, kabayi banze kuya kule, Yosefe wakambila mulami wandi ne, Bika biebe, ulonde balume aba ne hawabaheta, ubakonke ne, Bualu kai nuakashintakasha malu mabi ku malu mimpe? Luhanza alu kaluena luhanza lua mukelenge wanyi ludiye unua nʼalu ne ludiye utempa nʼalu matempu anyi? Nuakuenza bibi mu bualu ebu. Yeye wakabaheta, wakabambila mei au. Bobo bakamuambila ne, Mukelenge wetu udi wamba mei au munyi? Bantu bebe kabena mua kuenza bualu bubi nunku. Monai argent ituakasangana mu bibombi bietu, tuakulua nʼai kûdi kabidi hatuakafuma ku buloba bua Kanana. Tuetu tuakadi tuiba argent anyi or mu nsubu wa mukelenge webe munyi? Biwasangana luhanza alu kudi muntu kai wa munkatshi muetu udi nʼalu, afue biandi, ne tuetu kabidi netuikale bahika ba mukelenge webe. Yeye wakamba ne, Bualu ebu nebuenjibue bu mu mei enu, muntu utuasangana nʼalu, yeye neikale muhika wanyi, ne bakuabo benu nebahanduke. Bakadila bibombi biabo hanshi lubilu, ne muntu ne muntu bakasulula bibombi biabo. Bakabangila kukeba ku muanʼa bute to ne ku muanʼa mukala, bakasangana luhanza mu tshibombi tshia Benyamina. Hashishe bakahanda bilulu biabo, bakahingasha majitu ha nyima ha mpunda yabo, bakahingana mu musoko. Yuda ne bana babo bakalua ku nsubu wa Yosefe, yeye wakadiku, bakadikuma hanshi ku mpala kua ndi. Yosefe wakabakonka ne, Bualu ebu bunuakuenza budi munyi? Kanuena bamanye ne muntu bu meme udi mua kutempa matempu, anyi? Yuda wakamba ne, Netuandamune mukelenge wetu dî manyi? Netuambe tshinyi? Netudibingishe munyi? Nzambi wakasokolola bubi bua bantu bebe, tangila, buonso buetu tudi bahika bebe, ne tuetu ne muntu wakasanganabo ne luhanza. Yosefe wakabambila ne Tshiena mua kuenza nunku anu muntu wakasanganabo ne luhanza mu tshianza tshiandi neikale muhika wanyi kadi bakuabo benu nuhingane kudi tatu wenu talala. Hashishe Yuda wakalua ha buihi nʼandi, wakamba ne, Mukelenge wanyi, witabushe, ndi nkutendekena, bua muntu webe ambile di ku matshu a mukelenge wanyi kunakadi ne tshiji kudi muntu webe, bualu bua wewe udi bu Palo mene. Mukelenge wanyi wakakonka bantu bebe ne Nudi ne tatu, anyi muanʼenu mukuabo, anyi? Tuetu tuakakudimuna mukelenge wetu di ne, Tudi ne tatu muntu mununu, ne muan etu mukuabo wakamulelabo ku bununu buandi utshidi mukese, muan abo mukuabo wa difu dimue wakafua, ne anu yeye muana umuehele kua mamu wandi udi mushale ne tatu wandi udi umunanga. Wewe wakambila bantu bebe ne, Luai nʼandi kundi, bua meme kumonangana nʼandi ku mesu. Tuetu tuakambila mukelenge wetu ne, Nsongalume eu kena mua kushiya tatu Wandi, biamushiyeye, tatu wandi neafue. Wewe wakambila bantu bebe ne, Binuikala kanuyi balue ne muakunyʼenu, kanuena numonangana nʼanyi ku mesu. Nunku hatuakahingana kudi muntu webe, tatu wetu, bakamuambila mei a mukelenge wanyi. Tatu wetu wakatuambila ne, Yai bienu kabidi, nutusumbile tuntu tua kudia tukese. Tuetu bakamba ne, Kabena mua kuyaku, bikala muakunyʼetu kayi muye nʼetu, bualu bua katuena mua kumonangana ne muntu au ku mesu bikala muakunyʼetu kayi nʼetu. Muntu webe, tatu wetu wakabambila ne, Nudi bamanye ne mukashi wanyi wakundelela bana balume babidi, umue wabo wakumuka kundi, nakamba ne, Nyama mubi wakamuhandulula, ne ku dituku adi tshiakamutangila kabidi, binumusha muana eu mukuabo kundi, ne biakuatshishibueye bualu bubi, nennubueshe nsuki yanyi mitoke to mu Muaba wa Bafue ne kanyinganyinga kakole Nunku hanaya kudi muntu webe, tatu wanyi, ne nsongalume eu kayi nʼetu, bualu bua muoyo wandi udi musuikakana ne muoyo wa nsongalume eu, hashishe, hatangileye ne nsongalume kena nʼetu, yeye neafue, ne tuetu, bantu bebe, netubueshe nsuki ya muntu webe, tatu wetu, mu Muaba wa Bafue ne kanyinganyinga kakole. Bualu bukuabo kabidi, meme, muntu webe nakadieyeka bu tshieya tshia nsongalume eu kudi tatu wanyi. Nakamuambila ne, Binahanga kuhingana nʼandi kûdi, hashishe nendituadile bujitu bua bualu ebu tshiendelele. Nunku ndi nkutendekena ne, Witabushe bua muntu webe ashale kunoko bu muhika webe mu muaba wa nsongalume, ne nsongalume ahingane ne bana babo. Ndi mua kuya kudi tatu wanyi bikala nsongalume kayi nʼanyi munyi? Bua tshitangidi bualu ebu bubi budi bulue kudi tatu wanyi. Hashishe, Yosefe kakamanya mua kudikanda kudishikunka ku mesu kua bantu bakimana ha buihi nʼandi, wakamba ne, Numushe bantu bonso kundi Nansha muntu mukuabo wakashala nʼandi hakadimanyisha Yosefe kudi bana babo. Yeye wakadia bikole, Bena Ejipitu ne bantu ba mu nsubu wa Palô bakunvua muadi wandi. Yosefe wakambila bana babo ne, Ndi Yosefe mene; tatu wanyi utshidi ne muoyo, anyi? Bana babo kabakamanya mua kumuitaba, bakadi batshina ku mesu kuandi. Yosefe wakambila bana babo ne, Ndi nnutendekena ne, Semenai ha buihi nʼanyi. Bakasemena ha buihi Yeye wakamba ne, Ndi bianyi Yosefe, muakunyʼenu unuakahana mu Ejipitu. Mitshima yenu kayinyingaladi, kanukuatshiki tshiji bualu bua nuenu nuakumpana kunoko; bualu bua Nzambi wakantumina ku mpala kuenu bua kusungila mioyo ya bantu. Tshiole tshiakashala mu buloba bidimu bibidi, ne bidimu bitanu bidi bishala bidibo kabayi badima, kabayi bahuola bintu. Nzambi wakantuma ku mpala kuenu bua kunusangasha difuka dikese dia bantu ne bua kusungila mioyo yenu ku luhandu lunene. Nunku nuenu kanuakantuma kunoko, kadi Nzambi wakantuma; nyeye wakanvuisha bu tatu wa Palô ne mukelenge wa nsubu wandi wonso, ne mukokeshi wa buloba bua Ejipitu buonso. Yai bienu lubilu kudi tatu wanyi, numuambile ne, Muanʼebe Yosefe wakamba ne, Nzambi wakanvuisha mukelenge wa buloba bua Ejipitu buonso, Ulue biebe kundi, kujanguluki. Wewe neushikame mu buloba bua Goshene, newikale ha buihi nʼanyi, wewe ne bana bebe ne bana ba bana bebe, ne mikoko yebe ne ngombe yebe ne bintu bionso biudi nʼabi, nenkudishileku bualu bua bidimu bia tshiole bidi bishale bitanu; kanulu bu bahele, wewe ne bonso badi mu nsubu webe ne bintu biudi nʼabi. Nunku tangildi, mesu enu adi amona bu mudi mesu a muakunyʼanyi Benyamina amona ne, Mukana muanyi mudi munuambila malu au. Nuenu nuambile tatu wanyi bua butumbi buonso bundi nʼabu mu Ejipitu, ne bua malu onso anuakumona, nuhingane ne tatu wanyi kunoko lubilu. Yeye wakela Benyamina tshituha ku nshingu, wakadila, ne Benyamina wakadia ku nshingu wandi kabidi. Wakatuangana mishiku ne bana babo bonso, wakadidila ku nshingu yabo, hashishe bana babo bakayikila nʼandi. Bakunvua lumu elu mu nsubu wa Palô ne, Bana babo ne Yosefe bakalua; lumu elu luakasankisha mitshima ya Palô ne ya bantu bandi. Palô wakambila Yosefe ne, Wambile bana benu ne, Enzai nunku, tekai majitu ha nyima ha mpunda yenu, yai bienu ku buloba bua Kanâna; nuangate tatuʼenu ne bantu badi mu nsubu yenu, nuhingane kundi nennuheshe bintu bimpe bia mu buloba bua Ejipitu, nenudie bintu bidi bitamba buimpe bia mu buloba. Nakumana kunuambila dî dianyi, enzai nunku, nuangate makalu a tubalu tua mu buloba buetu bua kutuadilamu bana benu bakese ne bakashi benu, nuangate tatu wenu, nuhingane. Kanuedianganyi meji a bintu bienu, bualu bua bintu bimpe bionso bia mu buloba bua Ejipitu mbienu. Bana balume ba Isalele bakenza nunku, Yosefe wakabahesha makalu bu muakamba Palô, wakabaha bintu bia kudiabo mu nshila. Wakabaha muntu ne muntu bilulu bihia-bihia, kadi wakaha Benyamina bituha bia argent nkama isatu ne bilulu bihia-bihia bitanu. Wakatumma tatu wandi bintu nunku, nyama ya mpunda dikumi yakadi ne bujitu bua bintu bimpe bia mu buloba bua Ejipitu ha nyima hai ne nyama ya mpunda mikashi dikumi yakadi ne bujitu bua bintu bia kudia ne bintu bia kukuatshisha nʼabi tatuʼandi mu nshila. Yosefe wakatuma bana babo nunku, bakaya yeye wakabambila ne, Nudimuke, kanutandanganyi mu nshila. Bakumuka mu Ejipitu, bakalua ku buloba bua Kanana kudi Yakoba tatu abo. Bakamuambila ne, Yosefe utshidi ne muoyo, ne yeye udi mukelenge wa buloba bua Ejipitu Mutshima wandi wakahandika yeye kakitabusha di diabo. Bakamuambila mei onso akabambila Yosefe ne hakatangileye makalu akamutumina Yosefe, mutshima wa Yakoba tatuʼabo wakasangala. Isalele wakamba ne Bualu budi bulelela Yosefe muan anyi utshidi ne muoyo nenye kumumona diambedi tshiyi muanze kufua. Isalele wakabisha luendu luandi wakangata bintu bionso biakadiye nʼabi, wakalua ku Be-sheba wakashihela Nzambi wa tatuʼandi Isaka nyama. Nzambi wakambila Isalele mu bikena kumona mu butuku ne, Yakoba, Yakoba Yeye wakitaba ne, Ndiku. Yeye wa kamba ne, Ndi Nzambi wa tatuʼebe, kutshinyi bua kuya mu Ejipitu, bualu bua nenkuvuisheku tshisamba tshmene nenye nʼebe mu Ejipitu, nennumusheku kabidi bulelela, Yosefe neateke bianza biandi ha mesu ebe Yakoba Wakabika ku Be-sheba, bana balume ba Isalele bakatuala Yakoba tatuʼabo ne bana babo ne bakashi babo mu makalu akabatumma Palo. Bakangata bimuna biabo ne bintu bionso biakangatabo mu buloba bua Kanana, bakalua mu Ejipitu, Yakoba ne tunkanunuina tuandi bionso bana bandi ba balume bakaleleye, ne bana ba balume ba bana bandi, ne bana bandi ba bakashi bakaleleye, ne bana ba bakashi ba bana bandi, wakalua ne buonso buabo mu Ejipitu. Â mmena a bana ba Isalele bakalueye nʼabo mu Ejipitu Lubena, muanʼa bute wa Yakoba. Bana ba balume ba Lubena, Hanoka ne Palu ne Heselona ne Kâmi. Bana ba balume ba Shimeona, Yemuele ne Yamina ne Ohada ne Yakina ne Sofa ne Shaula, muana wa mukashi wa Bena Kanana. Bana ba balume ba Lewi, Geshona ne Kohata ne Melah. Bana ba balume ba Yuda Ele ne Onana ne Shela, ne Pelese ne Zela kadi Ele ne Onana bakafuila mu buloba bua Kanana Bana ba balume ba Pelese, Helelona ne Hamula. Bana ba balume ba Yisakâ, Tola ne Puwa ne Yoba ne Shimelona. Bana ba balume ba Zebuluna, Selede ne Elona ne Yalele. Aba mbana ba balume ba Lea bakaleleleye Yakoba mu Padana-alama, ne muanʼandi wa bakashi Dina, bana bandi ba balume ne bana bandi ba bakashi makumi asatu ne basatu. Bana ba balume ba Gada, Sifiona ne Haga ne Shuni ne Esebone ne Eli ne Alodi ne Aleli. Bana ba balume ba Ashe, Yimena ne Yishewa ne Yishewi ne Belia ne muanʼabo wa bakashi, Sela, ne bana ba balume ba Belia, Hebê ne Malekiele. Aba mbana ba Zilepa, wakaha Labana muanʼandi mukashi Lea, yeye wakalelela Yakoba bana aba dikumi ne basambombo. Bana balume ba Lakele, mukashi wa Yakoba, ba kadi Yosefe ne Benyamina. Asenata, muana mukashi wa Poti-fela, mubuki wa mu Ono, mukashi wa Yosefe, wakamulelela Manashe ne Efelayima mu buloba bua Ejipitu. Bana ba balume ba Benyamina, Bela ne Bekê ne Ashebele ne Gela ne Nâmana ne Ehi ne Losha ne Mupima ne Hupima ne Ada. Aba mbana ba balume ba Lakele bakaleleleye Yakoba buonso buabo dikumi ne banai. Bana ba Dana, Hushima. Bana ba Nafatale, Yasele ne Guni ne Yese ne Shilema. Aba mbana ba Bileha, wakaha Labana Lakele muanʼandi mukashi yeye wakalelela Yakoba bana aba buonso buabo bakadi muanda mutekete Bantu aba bonso bakalua ne Yakoba mu Ejipitu bonso bakahatuka munda mua Yakoba, kababadi bakashi ba bana bandi bakadi makumi asambombo ne basambombo, ne bana ba balume ba Yosefe bakamulelelabo mu Ejipitu bakadi babidi, bantu bonso ba mu nsubu bakalueye nʼabo mu Ejipitu bakadi makumi muanda mutekete. Yeye wakatuma Yuda ku mpala kuandi kudi Yosefe bua kumulesheye nshila wa ku Goshene, bakalua mu buloba bua Goshene. Yosefe wakalongolola dikalu diandi wakaya kusangakena ne Isalele, tatuʼandi, mu Goshene Wakafika kudiye, wakamuela tshituha ku nshingu, wakadila to musangu mule. Isalele wakambila Yosefe ne, Ndi mua kufua katataka, bualu bua nakumana kukumona ku mesu ne wewe utshidi ne muoyo. Yosefe wakambila bana babo ne bonso ba mu nsubu wa tatuʼandi ne, Nendianjile kudi Palô, nemmuambile ne, Bana betu bonso ba mu nsubu wa tatu wanyi bakadi mu buloba bua Kanâna bakulua kundi. Bantu aba badi balami ba mikoko, bualu bua bakadi balami ba bimuna, bakalua ne mikoko yabo ne bimuna biabo ne bintu bionso bidibo nʼabi. Hanubikilabo kudi Palo, yeye neanukonke ne, Nudi benji ba mudimu kai? Nuenu nenukudimune di ne, Bantu bebe bakadi balami ba bimuna hatuakadi bitende tô ne katataka, ne tuetu ne batatuʼetu, bua nuenu nushikame mu buloba bua Goshene Bualu bua mulami yonso wa mikoko udi mulenguludibue kudi Bena Ejipitu. Hashishe Yosefe wakaya, wakambila Palo ne, Tatu wanyi ne bana betu bakulua ku buloba bua Kanâna ne mikoko yabo ne bimuna biabo ne bintu bionso bidibo nʼabi, mona, badi mu buloba bua Goshene. Yeye wakasungula bantu batanu ba munkatshi mua bana babo, wakabafila kudi Palô. Palo wakabakonka ne, Nudi benji ba mudimu kai? Bakakudimuna Palo ne, Bantu bebe badi balami ba mikoko, ne tuetu ne batatuʼetu. Bakambila Palo ne, Tuakuluila bua kushikama mu buloba ebu, katuena ne muaba wa kudisha bimuna bietu bualu bua tshiole tshidi tshikole mu buloba bua Kanana, nunku tudi tukusengelela ne, Witabushe bua bantu bebe bashikama mu buloba bua Goshene Palô wakambila Yosefe ne, Tatuʼebe ne bana benu bakulua kudi, buloba bua Ejipitu buonso budi ku mpala kuebe, ushikike tatuʼebe ne bana benu mu buloba budi butamba buimpe bashikame mu buloba bua Goshene, ne biwamanya bantu ba lungenyi luimpe munkatshi muabo, ubateke balami ba bimuna bianyi. Yosefe wakalua ne Yakoba, tatuʼandi, wakamuteka ku mpala kua Palô, ne Yakoba wakavudishila Palo disanka. Palo wakakonka Yakoba ne, Bidimu bia muoyo webe bidi bungi munyi? Yakoba wakamukudimuna ne Bidimu bia luendu lua bukole buanyi bidi lukama ne makumi asatu, matuku anyi adi makese, akadi mule tente ne malu mabi, kaena manze kufika ku bungi bua bidimu bia bankambua banyi mu luendu lua bukole buabo. Yakoba wakavudishila Palo disanka, wakumuka ku mesu kua Palo. Yosefe wakalesha tatuʼandi ne bana babo muaba bua kushikamabo mu buloba bua Ejipitu, mu buloba buakatamba buimpe, mu buloba bua Lamesese, bu muakamba Palô. Yosefe wakadisha tatuʼandi ne bana babo ne bantu bonso bakadi mu nsubu wa tatuʼandi, ku meku abo. Bintu bia kudia kabiakadi mu buloba, bualu bua tshiole tshiakatamba bukole, nunku bantu bonso ba mu Ejipitu ne ba mu buloba bua Kanana bakamba kufua ne nzala. Yosefe wakasangisha argent yonso yakadi mu buloba bua Ejipitu ne ya mu buloba bua Kanâna ku bintu bia kudia biakasumbabo, Yosefe wakalua ne argent yonso mu nsubu wa Palo. Hakashika argent yonso ya mu buloba bua Ejipitu ne ya mu buloba bua Kanana, hashishe Bena Ejipitu bonso bakalua kudi Yosefe, bakamuambila ne, Utuhe bia kudia, netufuile ku mesu kuebe bualu kai? Argent yetu yakushika. Yosefe wakamba ne, Numpe bimuna bienu, nennuhe bia kudia ku bimuna bienu bikale argent yenu mishike. Bakalua ne bimuna biabo kudi Yosefe, ne Yosefe wakashintakasha nʼabo bia kudia ku tubalu tuabo ne ngombe yabo ne mikoko yabo ne nyama ya mpunda, yeye wakabadisha tshidimu tshijima ne bintu bia kudia biakashintakasheye ku bimuna biabo, Hakashika tshidimu atshi, bakalua kudiye tshidimu tshibidi, bakamuambila ne, Katuena tusokoka mukelenge wetu bualu tuakashiki sha argent yetu yonso, ne bimuna bietu mbia mukelenge wetu kabidi kakuena tshintu tshidi tshishala ku mesu kua mukelenge wanyi, anu mibidi yetu ne maloba etu. Kadi netufuile ku mesu kuebe, netujimishe buloba buetu kabidi bualu kai? Utusumbe bietu ne buloba buetu kabidi ku bia kudia ne tuetu ne buloba buetu netuikale bahika ba Palo, utuhe bia kudia, tuikale ne muoyo, katufu, ne buloba kabushadi hatuhu. Nunku Yosefe wakasumbila Palo buloba bua Ejipitu buonso bualu bua Muena Ejipitu yonso wakahana madimi andi bualu bua tshiole tshiakabatamba bukole, buloba buakalua bua Palô. Bualu bua bantu aba, yeye wakabateka ku musoko ne ku musoko ku matshika a buloba bua Ejipitu to ne kunfudilu kuabu. Yeye kakasumba buloba bua babuki, bualu bua babuki bakadi ne tshituha tshiabo kudi Palo, ne bakadila bintu biakabaha Palo nunku bobo kabakahana buloba buabo. Hashishe Yosefe wakambila bantu ne, Monai, nakunusumbila Palo lelu, nuenu ne buloba buenu ka maminu adi aha bua bualu buenu, nuakune mu buloba. Nunku hanuahuola bintu, nenufile tshi tuha tshitanu kudi Palô ne nuenu nenushale ne bituha binai bua kukunaku kabidi ne bua kudidisha ne bonso banudi nʼabo mu nsubu yenu, ne bana benu bakese. Bobo bakamuambila ne, Wewe wakusungi la mioyo yetu, utuendeshe diakalengele ku mesu kua mukelenge wetu, nebikale bahika ba Palo. Yosefe wakafunda mukanda bua lu bua buloba bua Ejipitu, udiku to ne katataka, ne, Tshituha tshitanu tshia bintu bionso ntshia Palo, anu buloba bua babuki nkayabo kabuakalua bua Palô. Isalele wakashikama mu buloba bua Ejipitu, mu buloba bua Goshene bakangata bintu mu buloba abu, bakavulangana bakakumbana ba bungi. Yakoba wakashala mu buloba bua Ejipitu bidimu dikumi ne muanda mutekete, nunku bidimu bionso bia muoyo wa Yakoba biakadi lukama ne makumi anai ne muanda mutekete. Dituku dia lufu lua Isalele diakalua ha buihi, Wakabikila muanʼandi Yosefe, wakamuambila ne, Bingikala ne luse ku mesu kuebe, ulenge tshianza tshiebe muinshi mua tshibelu tshinyi, uditshihe bua kungenzela malu mimpe ne a bushuwa, ndi nkutendekena ne, Kabanjiki mu Ejipitu. Kadi hanalala tulu mu lufu ne bankambua banyi, hashishe umuka nʼanyi mu Ejipitu, uye kunjika mu muaba wakabajikabo Yeye wakamba ne, Nengenze bu muwakuamba. Yeye wakamba ne, Udi tshihe kundi yeye wakaditshiha Isalele wakashindamina mutu ku mutu wa bulalu. Hakashika malu a bakambila Yosefe ne, Mona tatu webe udi usama; yeye wakaya kudiye ne bana bandi ba balume babidi, Manashe ne Efelayima. Bakambila Yakoba ne, Mona muan ebe Yosefe ulua lua kûdi Isalele wakadikolesha, wa kashikama ha bulalu. Yakoba wakambila Yosefe ne, Nzambi wa Bukole Buonso wakamueneka kundi ku Luze mu buloba bua Kanâna wakansankisha, wakangambila ne, Mona, nenkuvuishe tshisamba tshinene, nenkukumbashe, neulue tshisumbu tshinene tshia bantu, nempe tunkanunuina tuebe buloba ebu tshiendelele. Bana babidi bakakulelelabo mu Ejipitu diambedi tshiyi muanze kulua mu Ejipitu mbana banyi, Efelayima ne Manashe badi banyi bu Lubena ne Shimeona. Biwalela bana bakuabo ku nyima kuabo, nebikale bana bebe kabidi nebabidike dina dia bana babo mu buhianyi buabo. Hanakadi nfuma ku Padana, Lakele wakafua mu nshila wa ku buloba bua Kanâna diambedi katuyi banze kufika ku Efelata, nakamujika kuakua mu njila wa ku Efelata (eu udi Beteleheme). Isalele wakamona bana babidi ba Yosefe, wakamukonka ne, Aba mbanganyi? Yosefe wakambila tatu wandi ne, Aba mbana bakumpa Nzambi kunoko Yeye wakamba ne, Ulue nʼabo kundi, nembavudishile disanka. Mesu a Isalele akadi bileshileshi bualu bua bununu buandi, yeye kakamanya mua kumona bimpe Yeye wakalua nʼabo ha buihi nʼandi, yeye wakatuangana nʼabo mishiku, wakabuhukila. Isalele wakambila Yosefe ne Tshiakuelangana meji kua kumona mpala webe, kadi mona, Nzambi wakundesha bana bebe kabidi. Yosefe wakabumusha hankatshi ha binu biandi, wakatua mpala wandi hanshi. Yosefe wakabangata bubidi buabo, Efelayima ku tshianza tshiandi tshia balume ne mpala wandi mutangile ku tshianza tshia bakashi tshia Isalele, ne Manashe ku tshianza tshiandi tshia bakashi mutangile ku tshianza tshia balume tshia Isalele, wakabasemesha ha buihi nʼandi. Isalele wakolola tshianza tshiandi tshia balume, wakatshitentekasha ha mutu ha Efelayima, wakadi muanʼa mukala wakatentekasha tshianza tshiandi tshia bakashi ha mutu ha Manashe wakashintakasha bianza biandi bu muakasueye, bualu bua Manashe wakadi muanʼa bute Yeye wakavudishila Yosefe disanka, wakamba ne, Nzambi wakadi batatuʼanyi Abalahama ne Isaka bendakena ku mesu kuandi, Nzambi wakandisha matuku anyi onso tô ne ku dituku edi, muanjelo wakampikula ku malu mabi onso, avudishile bansongalume aba disanka, dina dianyi ne dina dia batatuʼanyi, Abalahama ne Isaka, ashale kudibo, bakumbane ba bungi mu buloba. Hakatangila Yosefe ne tatu wandi wakatentekasha tshianza tshiandi tshia balume ha mutu ha Efelayima, bualu ebu kabuakamusankisha, ne yeye wakabisha tshianza tshia tatu wandi, wakamba kutshiumusha ku mutu wa Efelayima, wakamba kutshiteka ku mutu wa Manashe. Yosefe wakambila tatuʼandi ne, Nansha, tatuʼanyi, kuenji nunku, bualu bua eu udi muanʼa bute, utentekashe tshianza tshiebe tshia balume ha mutu handi. Kadi tatu wandi wakabenga ne, Ndi mumanye bualu ebu, muanʼanyi, yeye nealue bantu ba bungi, nealue muntu munene kabidi, kadî muakunyʼandi neamutambe bunene, ne tunkanunuina tuandi netuikale tshisamba tshinene. Yeye wakabavudishila disanka dituku adi, wamba ne, Isalele neavudishile bakuabo disanka bualu buenu, neambe ne, Nzambi anuvuishe disanka dia Efelayima ne dia Manashe, yeye wakateka Efelayima ku mpala kua Manashe. Isalele wakambila Yosefe ne, Nfuafua, kadi Nzambi neikale nʼenu neanuhingashe mu buloba bua batatuʼetu. Nakukuha wewe tshituha tshikuabo tshia buloba ku mutu kua bana benu, tshinakanyenga mu bianza bia Bena Amole ne muele wanyi wa nvita ne buta buanyi. Yakoba Wakabikila bana bandi bonso, wakamba ne, Nudisangishe hamue bua meme kunuambila bua malu alualua kunudi mu matuku adi kayi manze kulua, Nuenu bana balume ba Yakoba, nudisangishe hamue, unvuai di telejai matshu kudi Isalele tatuʼenu. Lubena, wewe udi muanʼa bute wanyi, ntshibangidilu tshia bukole buanyi, udi wa kumudilu wa kanemu, ne wa kumudilu wa bukokeshi. Wewe udi bu mai adi asaba ha kalua, atutukila muiku, wewe kuena wikala ne bukokeshi ku mutu kua bantu, bualu bua wewe wakabanda ha bulalu bua tatuʼebe, wakenzahu bualu bubi wakabanda ha bulalu buanyi. Shimeona ne Lewi badi bana babo mene, miele yabo ya nvita idi mikole. Mutshima wanyi kaubuedi mu tshifufu tshiabo, ne butumbi buanyi kabubuelakanyi nʼabo mu disangisha diabo. Bualu bua bobo bakashiha bantu mu tshiji tshiabo, ne mu tshishiku tshiabo bakakosa ngombe mijilu ya bikono biai. Tshiji tshiabo tshidi tshiedibue mulau, bualu bua tshiakatamba bukole ne bualu bua lukina luabo kaluakadi ne luse, nembatahulule mu Yakoba, nembamuangalashe mu Isalele. Yuda, bana benu nebakutumbishe, tshianza tshiebe netshifiekele mu nshingu ya bantu badi nʼebe lukuna, bana ba tatu ebe nebakukukuile. Yuda udi bu muana wa nyama wa ntambue, wakalekela tshintu tshiandi tshia kudia, wakalamina ne binu biandi bu nyama wa ntambue udi bu mukashi wa nyama wa ntambue, mundi kai wamubisha ku tulu? Dikombo dia bukelenge kadiena diumuka kudi Yuda, tshibangu tshia bukokeshi katshiena tshiumuka hankatshi ha makasa andi to ne halua Shilo, ne bantu bonso nebakukukuile. Udi usuika nyama wandi wa mpunda ku muonshi wa tumuma tukese, udi usuika lukungulu lua nyama wa mpunda ku muonshi udi utamba buimpe, wakuvuwa bilulu biandi mu nvinyo, wakuvuwa kazaku kandi mu mashi a tumuma tukese. Mesu andi neikale makunzekunzû ne manye, ne menu andi neikale matoke to ne mabele. Zebuluna neashikame kukala kua mai manene muaba wandi newikale muaba wa mabi manene, mukalu wandi neufike tô ne ku Sidona. Yisakâ udi bu nyama wa mpunda mukole, udi ulala hankatshi ha mpangu ya mikoko, wakatangila muaba wa kulala ne, Mmuimpe wakatangila buloba ne, Mbuimpe, wakahuekesha diaha diandi bua kumema bujitu, wakalua bu muhika wa mudimu mukole. Dana nealumbuluile bantu bilumbu biabo, bu tshimue tshia mu bisamba bia Bena Isalele. Dana neikale bu nyoka mu nshila, ne bu ntoka mu nshila udi usuma kabalu ku mijilu ya bikono, ne muntu udi ubanda ha nyima udi uhona hanshi bualame. Yehowa, nakuindila luhandu luebe. Gada, tshisumbu tshia bantu netshimunguile, kadi yeye neabakume ku bikankanyi biabo. Ashe neikale ne bintu bia kudia bia bungi, neavudishe bintu bia kudia bidi bitambe bilengele. Nafatale udi bu ntole musulula, udi Wamba mei malengele. Yosefe udi bu ditamba dia mutshi diakakuama mamuma a bungi, udi bu mutshi hehi ne mushimi wa mai, matamba andi adi asambuka ha mutu ha lumbu. Bilembi bia m ta biakumunyingalasha bikole, biakumuela mikete, biakumutatshisha, kadi buta buandi buakuikala bukole, maboko andi ne bianza biandi biakakoleshibua kudi bianza bia Nzambi wa Bukole wa Yakoba. (Mulami wa mikoko wakafumaku, ku dibue dia Isalele). Nzambi wa tatuʼebe udi ukukuatshisha, Nzambi wa Bukole Buonso udi ukusankisha ne masanka adi afuma mu diulu, ne masanka adi afuma muinshi mua buloba, ne masanka adi afuma ku mabele ne mafu. Masanka a tatu webe akuhita masanka a batatuʼanyi bunene tô ne ku mukalu wa mikuna minene idiku tshiendelele, masanka au neikale ha mutu ha Yosefe ne ha lubombo lua mutu wa yeye wakadi muhandulula kudi bana babo. Benyamina udi bu nkashama udi ne luonji, udi udia bintu dinda, ne dilolo udi ubiabanya. Bonso aba badi bisamba bia Bena Isalele dikumi ne bibidi, a mmei akabambila tatu wabo, hakabavudishileye disanka, muntu ne muntu wakadi ne disanka diakamuvudishileye nʼadi. Yeye wakabadimusha, wakabambila ne, Nkadi ha kudisangisha ne bankambua banyi, nunjike mu muaba wakajikabo batatuʼanyi mu lubuebue ludi mu budimi bua Efelona, Muena Hiti, mu lubuebue ludi mu budimi bua Makepela, ku mpala kua Mamale mu buloba bua Kanana, buakasumba Abalahama kudi Efelona, Muena Hiti, bu muaba wa kujikabo bantu bafue. Bakajikamu Abalahama ne Sala, mukashi wandi, ne Isaka ne Lebeka, mukashi wandi, nakajikamu Lea kabidi, bakasumba budimi ne lubuebue ludimu kudi bana ba Hete. Hakashikisha Yakoba kubadimusha nunku, wakateka makasa andi ha bulalu, wakahuola muoyo wandi, wakasangishibua kudi bankambua bandi. Yosefe wakadiela ha mpala wa tatu wandi, wakadila, wakatuangana nʼandi mishiku. Yosefe wakela bantu bandi mukenji bua kulongololabo tshitalu tshia tatu wandi, banganga buka bakalongolola tshitalu tshia Isalele. Matuku makumi anai akashika, matuku adibo balongolola tshitalu akakumbana, Bena Ejipitu bakamujinga matuku makumi muanda mutekete. Hakashika matuku a madilu, Yosefe wakambila ba mu nsubu wa Palo ne, Bingikala ne luse ku mesu kuenu, ndi nnusengelela ne, Nuambile Palô ku matshu andi ne, Tatu wanyi wakuntshihisha ne, Hanafua unjike mu muaba unakasumba mu buloba bua Kanâna. Nunku witabushe bua meme kuya bua kujika tatu wanyi, nempingane kûdi kabidi. Palô wakamba ne, Ya, ujike tatu webe, bu muakukutshihisheye. Yosefe wakaya kujika tatu wandi, ne bena mudimu bonso ba mu nsubu wa Palô, ne bakulu ba mu nsubu wandi, ne bakulu bonso ba mu buloba bua Ejipitu, ne bantu bonso ba mu nsubu wa Yosefe ne bana babo bonso, ne bonso ba mu nsubu wa tatu wandi, bakaya nʼandi, anu bana bakese ne mikoko ne bimuna biakashala mu buloba bua Goshene. Bantu bakadi benda mu makalu ne ha nyima ha tubalu bakaya nʼandi, tshisumbu tshinene be. Hakafikabo ku tshituilu tshia Atada, tshidi dishiya dia Yadene, bakadila muadi mukole, baka jinga tatu wandi to matuku muanda mutekete. Hakatangila bena buloba, Bena Kanana mene, madilu makole a ku tshituilu tshia Atada, bakambilangana ne, Â mmadilu makole a Bena Ejipitu, nunku bakidika muaba au ne, Abele-miselayima, udi dishiya dia Yadene. Bana ba Yakoba bakamuenzela bu muakabambileye, bualu bua bobo bakamutuala mu buloba bua Kanana, bakamujika mu lubuebue lua mu budimi bua Makepela, luakasumba Abalahama hamue ne budimi, kudi Efelona, Muena Hiti, bu muaba wa kujikamu bafue, ku mpala kua Mamale. Hakamanabo kumujika, Yosefe ne bana babo ne bantu bakaya nʼandi bua kujika tatu wandi bakahingana mu Ejipitu. Hakatangila bana babo ne Yosefe ne, Tatu wetu wakafua bakambilangana ne, Hashishe Yosefe neikale nʼetu lukuna, neatusombuele bua malu mabi onso atua kamuenzela. Bakatuma dî kudi Yosefe ne, Tatu webe wakamba diambedi yeye kayi muanze kufua ne, Nuenu nuambile Yosefe ne, Ulekelele bana benu mibi yabo ne malu mabi akakuenzelabo Hashishe tuetu tudi tukusengelela ne, Utubuikidile matomboka a bena mudimu ba Nzambi wa tatu webe Yosefe wdkadila hakamuambilabo mei a. Bana babo bakaya kudiye kabidi bakafua mpala yabo hanshi ku mesu kuandi, bakamba ne, Mona, Buonso buetu tudi bahika bebe. Yosefe wakabambila ne, Kanutshinyi, bua meme ndi mu muaba wa Nzambi, anyi? Bua bualu buenu nuenu nuakasua kungenzela bibi, kadi Nzambi wakasua kuenza bimpe, wakakudimuna malu bua kusungileye bantu bu muakuenzeleye lelu. Nunku kanutshinyi, nennudishe ne bana benu bakese Yeye wakabasamba, wakabambila mei a kalolo. Yosefe wakashikama mu buloba bua Ejipitu ne bantu bonso ba mu nsubu wa tatu wandi, Yosefe wakikala ne muoyo bidimu lukama ne dikumi. Yosefe wakamona bana ba Efelayima to ne ku bikondo bisatu, bakalela bana ba Mala, muana wa Manashe, ha binu bia Yosefe kabidi. Yosefe wakambila bana babo ne, Nfuafua, kadi Nzambi neikale nʼenu, neanumushe mu buloba ebu, neanuhingashe ku buloba buakalayeye Abalahama ne Isaka ne Yakoba Yosefe wakatshihisha bana ba Isalele wakabambila ne, Nzambi neikale nʼenu, ne nuenu nenuye ne mifuba yanyi. Nunku Yosefe wakafua, wakadi ne bidimu lukama ne dikumi bakalongolola tshitalu tshiandi, bakatshiteka mu mushete mu Ejipitu. Â mmena a bana balume ba Isalele bakalua mu Ejipitu, muntu ne muntu ne ba mu nsubu wandi bakalua ne Yakoba. Lubena, Shimeona, Lewi ne Yuda, Yisakâ, Zebuluna ne Benyamina, Dana ne Nafatale, Gada ne Ashe Bantu bonso ba munda mua Yakoba bakadi makumi muanda mutekete, Yosefe wakadi mu Ejipitu diambedi Yosefe wakafua ne bana babo bonso, ne bantu bonso ba mulongo au Bena Isalele bakakumbana ba bungi, bakavulangana, bakalua bakole be, bakula mu buloba tente. Mukelenge muhia muhia wakahingana mu bukelenge bua Ejipitu, wakadi kayi mumanye Yosefe. Yeye wakambila bantu bandi ne, Tangilai, Bena Isalele badi batuhita bungi ne bukole. Tuye kuenza budimuke, kabalu ba bungi, halua nvita, kabayi kudi bantu badi nʼetu lukuna bua kuhingana nʼetu nvita, kabumuki mu buloba buetu. Bakabatekela tuhita, bakabakengesha ne mudimu. Bakashala Palô misoko ya kutekelamu bintu biandi, mena ai Pitoma ne Lamesese. Hakabakengeshabo nunku, Bena Isalele bakakumbana ba bungi, bakatangadika Mitshima ya Bena Ejipitu yakanyingalala bualu bua Bena Isalele. Bena Ejipitu bakenzesha Bena Isalele mudimu bikole. Bakabakengesha ne mudimu mukole, mudimu wa tushola ne buloba busoha ne midimu yonso ya mu madimi. Bakabenzesha mudimu mukole. Mukelenge wa Ejipitu wakambila baleleshi ba bakashi ba Bena Ebelu, dina dia umue wabo ne, Shifela, ne dina dia mukuabo ne, Pua ne, Hanuaya kuenzela bakashi ba Bena Ebelu mudimu wa baleleshi, ne hanuabatangila mu buledi, bialelabo muana wa balume, nuenu nenumushihe, kadi bialelabo muana wa bakashi, numushiye ne muoyo. Kadi baleleshi bakatshina Nzambi, kabakenza muakabambila mukelenge wa Ejipitu, kadi bakasungila bana balume. Mukelenge wa Ejipitu Wakabikila baleleshi, wakabambila ne, Bualu kai nuakuenza nunku, nuakusungila bana ba balume? Baleleshi bakambila Palo ne, Bualu bua bakashi ba Bena Ebelu kabena bu bakashi ba Bena Ejipitu bobo badi ne bukole bua kudilelela, ne bakamana kulela diambedi baleleshi kabayi banze kulua kudibo. Nzambi wakenzela baleleshi bimpe, bantu bakakumbana ba bungi, bakalua bakole be, Bualu bua baleleshi bakatshina Nzambi, yeye wakabaha bana. Palo wakelela bantu bandi bonso mukenji ne, Bialelabo muana mulume, nenumuele mu musulu, kadi nensungile bana bakashi. Muntu wa tshisamba tshia Lewi wakabaka mukashi, muana wa Lewi. Mukashi wakimita difu, wakalela muana wa balume, hakamumoneye ne muana muimpe, wakamusokoka ngondo isatu. Hakadiye kayi mua kumusokoka kabidi, wakamuangatshila tshisaka tshia ntuhu, wakatshilaba bitume ne kamonyi, wakatekamu muana, wakatshiteka mu malenge akadi kukala kua musulu. Muanʼabo mukashi wakimana kule, bualu bua kumanya muenzelabo muakunyʼandi. Muana wa bakashi wa Palô wakalua kuowa mai mu musulu au, bantu bandi bakashi bakendakana ku muelelu wa mai, yeye wakamona tshisaka mu malenge, wakatuma muntu wandi ne, Ya utshiangate. Yeye wakatshisulula, wakamona muana, ne muana wakadila Yeye wakafuka muana luse, wakamba ne, Yeye udi muana wa Bena Ebelu. Mukuluʼandi, muana wa bakashi, wakambila muana wa bakashi wa Palô ne, Nye kukubikidila muamushi wa muana wa mu bakashi ba Bena Ebelu, alue kukuamushila muana mabele, anyi? Muana wa bakashi wa Palo wakamuambila ne, Ya biebe Nsongakashi wakaya, Wakabikila mamu wa muana. Muana wa bakashi wa Palô wakamuambila ne, Wangate muana eu, umungamushile mabele, nenkufute Mukashi wakangata muana, wakamuamusha mabele. Muana wakakola, mamuʼandi wakalua nʼandi kudi muana wa bakashi wa Palo, yeye wakalua bu muana wandi mene. Yeye wakamuidika dina ne, Mose, wakamba ne, Bualu bua nakamukoka mu mai. Mu matuku au, hakakola Mose, yeye wakaya kudi bana babo, wakamona mudimu wabo mukole, wakamona Muena Ejipitu ukuma Muena Ebelu, muanʼabo. Wakakenzakana, kakamona muntu, wa kashiha Muena Ejipitu, wakamusokoka mu lusenga. Wakaya biandi dituku dibidi, wakamona balume babidi ba Bena Ebelu baluangana, yeye wakakonka muntu. Wakenza bualu bubi ne, Udi ukumina mukuenu tshinyi? Yeye wakamba ne, Wakukuteka mukelenge wetu ne mulumbuluishi wetu nganyi? Udi ukeba kunshiha bu muwakushiha Muena Ejipitu, anyi? Mose wakatshina, wakamba ne, Bulelela, bualu ebu buakumanyibua. Kakamanya Palô bualu ebu, wakakeba kushiha Mose. Kadi Mose wakanyema ku mesu kua Palo, wakikala mu buloba bua Midiyana, wakashikama hehi ne dina dia mai. Mubuki wa Midiyana wakadi ne bana ba bakashi muanda mute kete bobo bakaha kusuna mai, bakûsha luvu lua mai tente bua kunuisha mikoko ya tatuʼabo mai. Balami ba mikoko bakalua, bakabihata, kadi Mose wakabika, wakabasankisha, wakanuisha mikoko yabo mai. Hakaluabo kudi Luele, tatuʼabo, yeye wakamba ne, Nuakuhingana lubilu lelu bualu kai? Bakamba ne, Muena Ejipitu wakatusungila mu tshianza tshia balami, wakatukokela mai kabidi, wakanuisha mikoko. Wakakonka bana bandi ba bakashi ne, Yeye udi kudi kunyi? Bualu kai nuakushiya mulume ku nyima? Numubikile, alue biandi kudia bidia. Mose wakasua kushikama ne mulume au, ne yeye wakaha Mose Sipola, muanʼandi wa bakashi. Yeye wakalela muana wa balume, wakamuidika dina ne, Geshoma, wakamba ne, Nakadi mushikame mu buloba bua benyi. Hakalela matuku a bungi, mukelenge wa Ejipitu wakafua Bena Isalele bakafua mikemu bualu bua buhika, bakadila, muadi wabo wakafika kudi Nzambi bualu bua buhika buabo. Nzambi wakumpa mikemu yabo, ne Nzambi wakafuka mulayi wandi kudi Abalahama ne kudi Isaka ne kudi Yakoba. Nzambi wakamona Bena Isalele Nzambi wakamanya dikenga diabo. Mose wakadi ulama mikoko ya Yetelo tatu andi-muenu, mubuki wa mu Midiyana, wakaya ne mikoko ku nyima kua tshihela, wakalua ku mukuna wa Nzambi, dina diau Holeba. Muanjelo wa Yehowa wakamueneka kudiye mu ludimi lua kahia, luakadi luluhuka mu katshi, wakamona talala, kahia kakadi kosha katshi, katshi kakakahia. Mose wakamba ne, Nenye kutangila bualu ebu bua kukema ne, Munyi katshi kakena kahia. Bakamumona Yehowa uya kutangila bualu ebu. Nzambi wakamubikila mu katshi, wakamba ne, Mose, Mose Yeye wakitaba ne, Ndiku. Nzambi wakamba ne, Kulu ha buihi, umushe bisabata biebe ku makasa, bualu bua muaba udi muimane udi buloba bua tshijila. Wakamba kabidi ne, Ndi bianyi Nzambi wa tatuʼebe, Nzambi wa Abalahama, Nzambi wa Isaka, Nzambi wa Yakoba Mose wakayikila mesu andi, wakatshina kutangila Nzambi. Yehowa wakamba ne, Nakutangila dikenga dia bantu banyi badi mu Ejipitu bulelela, nakunvua muadi wabo bualu bua tuhita tuabo, bualu bua ndi mumanye kanyinganyinga kabo. Nakulua hanshi bua kubasungila mu bianza bia Bena Ejipitu, ne bua kubaluhula mu buloba abu, ne bua kulua nʼabo mu buloba buimpe ne bunene, mu buloba budi ne mabele ne buitshi bia bungi, mu muaba wa Bena Kanana ne wa Bena Hiti ne wa Bena Amole ne wa Bena Pelese ne wa Bena Hiwi ne wa Bena Yebuse. Katataka, tangila, muadi wa Bena Isalele Wakafika kundi, Hakatangila kabidi dikenga diabo didi Bena Ejipitu babakengesha nʼadi. Lua biebe, nenkutume kudi Palo, Ulue biebe ne bantu banyi, bana ba Isalele, badi mu Ejipitu. Mose wakambila Nzambi ne, Meme ndi nganyi bua kuya kudi Palo ne bua buhatula Bena Isalele mu Ejipitu? Nzambi wakamba ne, Bulelela, nengikale nʼebe, nenkuhe tshimanyinu etshi tshidi tshilesha ne nakukutuma hawahatula bantu badi mu Ejipitu, nenutendelele Nzambi ha mukuna eu. Mose wakambila Nzambi ne, Hanaya bianyi kudi Bena Isalele, hanabambila ne, Nzambi wa batatuʼenu wakantuma kunudi, nebankonke ne, Dina diandi nganyi, nembambile tshinyi? Nzambi wakambila Mose ne, MEME NDI MUNDI. Nzambi wakamba kabidi ne, Ambila Bena Isalele ne, NDI MUNDI wakuntuma. Nzambi wakambila Mose kabidi ne, Wewe newambile Bena Isalele ne, Yehowa, Nzambi wa bankambua benu, Nzambi wa Abalahama, Nzambi wa Isaka ne Nzambi wa Yakoba wakuntuma kunudi edi ndina dianyi tshiendelele, etshi ntshivulukidi tshianyi kudi bantu bonso. Ya usangishe bakulu ba Bena Isalele, ubambile ne, Yehowa, Nzambi wa bankambua benu, Nzambi wa Abalahama, Nzambi wa Isaka ne Nzambi wa Yakoba wakamueneka kundi, wakungambila ne, Nakulua kunudi, Hakatangila mudibo banuenzela mu Ejipitu. Nakumana kuamba ne, Nennuhatule mu dikenga dia Ejipitu, nendue nʼenu mu buloba bua Bena Kanana ne bua Bena Hiti ne bua Bena Amole ne bua Bena Pelese ne bua Bena Hiwi ne bua Bena Yebuse, mu buloba budi ne mabele ne buitshi bia bungi. Bobo nebunvue dî diebe, wewe ne bakulu ba Bena Isalele nenufile kudi mukelenge wa Ejipitu, nenumuambile ne, Yehowa, Nzambi wa Bena Ebelu, wakusangakena nʼetu Tudi tukutendekena ne, Witabushe bua tuetu kuya luendu lua matuku asatu mu tshihela bua kushihela Yehowa Nzambi wetu nyama. Ndi mumanye ne, Mukelenge wa Ejipitu kena witabusha bua nuenu kuya, neitabushe anu ne tshianza tshikole. Nengolole tshianza tshianyi, nembakengeshe ne malu a kukema; ne ku nyima kua malu â yeye neanulekele. Nempe bantu aba dikasa dimpe kudi Bena Ejipitu, ne hayabo, kabena baye ne bianza bituhu. Kadi mukashi ne mukashi nealombe mukashi udi ushikama ha buihi nʼandi, ne mukashi udi ushikama mu nsubu wandi, bintu bia argent ne bia or ne bilulu, nuenu nenubiluatshishe bana benu ba balume ne bana benu ba bakashi, nunku nenuhaule Bena Ejipitu. Mose wakandamuna ne, Kadi bobo kabena bangitabusha, kabena bunvua di dianyi, bobo nebambe ne, Yehowa kakamueneka kûdi nansha. Yehowa wakamuambila ne, Udi ne tshintu kai mu tshianza tshiebe? Yeye wakamba ne, Mulangala. Yehowa wakamba ne, Wele hanshi Nunku wakawela hanshi ne wowo wakakudimuka nyoka, Mose wakamunyema. Yehowa wakambila Mose ne, Olola tshianza tshiebe, umukuate ku mukila, yeye wakolola tshianza tshiandi, wakamukuata ne nyoka wakakudimuka mulangala kabidi. Yehowa wakamba ne, Bualu ebu nebubitabushishe ne, Yehowa, Nzambi wa bankambua babo, Nzambi wa Abalahama, Nzambi wa Isaka ne Nzambi wa Yakoba wakamueneka kudi. Yehowa wakamuambila kabidi ne, Teka tshianza mu tshiadi tshiebe. Yeye wakateka tshianza tshiandi mu tshiadi, ne hakatshiumusheye, monai, tshianza tshiandi tshiakadi ne nsudi mutoke bu neige. Yehowa wakamba ne, Teka tshianza tshiebe mu tshiadi kabidi. Yeye wakateka tshianza mu tshiadi kabidi, hakatshiumusheye mu tshiadi, tshianza tshiandi tshiakakudimuka bu muakadi mubidi wandi. Bikalabo kabayi bakuitabusha, kabayi bunvue di dia tshimanymu tshia kumudilu, bobo nebitabushe dî dia tshimanymu tshia kunshikidilu. Bikalabo kabayi bitabusha bimanyinu ebi bibidi, kabayi bunvue dî diebe, wewe newangate mai a mu musulu, wele ha buloba bûme, ne mai awakangata mu musulu neakudimuke mashi ha buloba bûme. Mose wakambila Yehowa ne, Yehowa, meme tshiena mua kuakula bimpe, nansha diambedi, nansha katshia wabanga kuakula ne muntu webe, bualu bua meme ndi muena tshikukumina. Yehowa wakamukonka ne, Mufuki wa mukana mua bantu nganyi? Udi ufuka bena kamama ne bena mahaha ne bantu badi mua kumona ne bantu badi bafofo nganyi? Meme Yehowa, tshiena ngenza malu â, anyi? Nunku, ya biebe, meme nengikale ne mukana muebe, meme nenkuyishe mei andi musue wewe kuamba. Mose wakamba ne, Yehowa, nda nkusengelela ne, Utume muntu ûdi musue kutuma. Tshiji tshia Yehowa tshiakalua kudi Mose, wakamuambila ne, Alona, muanʼenu mulume, muena Lewi, kenaku, anyi? Ndi mumanye ne, Yeye udi mua kuakula bimpe. Yeye ulualua mu nshila bua kusangakena hebe, ne hakatangileye, yeye neasanke mu mutshima wandi. Wewe neuyikile handi, neuteke mei mukana muandi, meme nengikale ne mukana muebe ne mukana muandi, nenkuyishe malu anudi mua kuenza. Yeye neikale muakuidi webe kudi bantu, yeye neikale bu mukana muebe ne wewe newikale bu Nzambi kudiye. Wangate mulangala eu mu tshianza tshiebe, ûdi wenza nʼau bimanyinu ebi. Mose wakahingana kudi Yetelo tatuʼandi-muenu, wakamuambila ne, Ndi musue kuhingana kudi bana betu badi mu Ejipitu, bua kubamona ne bobo batshidi ne muoyo Yetelo wakambila Mose ne, Ya biebe talala. Yehowa wakambila Mose mu Midiyana ne, Ya biebe, uhingane mu Ejipitu bualu bua bantu bonso bakasua kukushiha bakafua. Mose wakangata mukashi wandi ne bana bandi balume, wakabateka ha nyima ha mpunda, wakahingana mu buloba bua Ejipitu. Mose wakaya ne mulangala wa Nzambi mu tshianza tshiandi. Yehowa wakambila Mose ne, Hawahingana mu Ejipitu, wenza ku mesu kua Palô malu a kukema onso anakuteka mu tshianza tshiebe, kadi meme nenkoleshe mutshima wa Palô, ne yeye kena ulekela bantu. Wewe newambile Palô ne, Yehowa udi Wamba ne, Isalele udi muanʼanyi wa balume, muanʼa bute wanyi, ne meme nakamana kukuambila ne, Ulekela muanʼanyi wa balume, bualu bua kunkuatshila mudimu, kadi wewe wakahidia kulu ulekela, nunku meme nenshihe muana webe, muanʼa bute webe. Hakadibo baya mu nshila wa ku nsubu wa tshilala benyi, Yehowa wakasangakena nʼandi, wakamba kumushiha. Sipola wakangata dibue ditue, wakatengula muan andi mulume, wakateka dikoba ku makasa a Mose, wakambila Mose ne, Bulelela, wewe udi bayanyi wa mashi. Yeye wakalekela Mose. Mukashi wakamba ne, Wewe udi bayanyi wa mashi bualu bua ku tengula. Yehowa wakambila Alona ne, Ya biebe mu tshihela bua kusangakena ne Mose Yeye wakaya, wakasangakena handi mu mukuna wa Nzambi, wakatuangana nʼandi mishiku. Mose wakambila Alona mei onso akamuambila Yehowa ne bimanyinu bionso biakamuheye. Mose ne Alona bakaya, bakasangisha bakulu bonso ba Bena Isalele. Alona wakabambila mei onso akadi Yehowa wambila Mose, ne yeye wakenza bimanyinu ku mesu kua bantu. Bantu bakitabusha ne hakunvuabo ne, Yehowa wakulua kudi Bena Isalele, wakumona dikenga diabo, bakinama mitu yabo, bakatendelela. Ku nyima kua malu â Mose ne Alona bakalua kudi Palô, bakamuambila ne, Yehowa, Nzambi wa Isalele, udi Wamba ne, Ulekele bantu banyi, baye mu tshihela bua kudia bidia ku mesu kuanyi. Palo wakamba ne, Yehowa nganyi? Tshiena ngitabusha di diandi bua kulekela Bena Isalele. Meme tshiena mumanye Yehowa ne tshiena ndekela Bena Isalele. Bakamba ne, Nzambi wa Bena Ebelu wakasangakena hetu, witabushe ne tuetu tuye luendu lua matuku asatu mu tshihela bua kushihela. Yehowa Nzambi wetu nyama, bua yeye katukengeshi ne masama anyi muele wa mata. Mukelenge wa Ejipitu wakabambila ne, Bualu kai, nuenu Mose ne Alona, nudi nulekesha bantu midimu yabo, yai bienu ku midimu yenu. Palô wakamba ne, Monai, bantu bakukumbana ba bungi mu buloba, ne nuenu nudi nulekesha midimu yabo. Mu dituku adi mene Palo wakela di kudi tuhita tua bantu ne tupitene tuabo ne, Kanulu bantu bisonsa bia kuenza nʼabi tushola bu munuakenza diambedi, bobo badikebele bisonsa. Bobo nebenze bungi bua tushola buakenzabo diambedi, kanuena nuhuekesha mudimu, nansha kakese, bualu bua bobo badi bafuba, badi bamba ne, Tudi basue kuya kushihela Nzambi wetu nyama. Nudiundishe mudimu wabo, bawenze, nunku kabitabushi mei a mashimi. Tuhita tua bantu ne tupitene tuakaya kudi bantu, tuakabambila ne, Palo wakamba ne, Tshiena nnuha bisonsa. Yai bienu, nudikebele bisonsa kunudi mua kubisangana, kadi kabena bahuekesha mudimu wenu. Nunku bantu bakadi bamuangalaka buloba bua Ejipitu buonso bua kukeba bisonsa. Tuhita tuakabenzesha ne, Nushikishai mudimu wenu wa buatshia-buatshia bu munuakenza hanuakadi ne bisonsa. Tuhita tua Palô tuakakuma bantu bakadi ku mutu kua Bena Isalele, tuakamba ne, Bualu kai kanuena nushikisha mudimu wenu ne makelela ne lelu bu munuakenza diambedi? Bantu bakadi ku mutu kua Bena Isalele bakalua, bakadila kudi Palo ne, Udi wenzela bantu bebe nunku bualu kai? Kabena bakesha bantu bebe bisonsa, ne badi bamba ne Enzai tushola, mona, badi bakulua bantu bebe, kadi dihila didi kudi Bena Ejipitu bebe. Kadi yeye wakabambila ne, Nudi bafuba, nudi bafuba, ne bua bualu ebu nudi nuamba ne, Witabushe bua tuye kushihela Yehowa nyama! Yai bienu, enzai mudimu, katuena tunuha bisonsa, kadi nuenu nenulue ne bungi bua tushola bu mutuakuamba. Bantu bakadi ku mutu kua Bena Isalele bakamona ne, Tudi ne tshilumbu tshikole Hakambabo ne, Katuena tuhuekesha bungi bua tushola butudi tulomba buatshia-buatshia. Bakasangakena ne Mose ne Alona mu nshila hakaluhukabo kudi Palô, bobo bakabambila ne, Yehowa anutangile, anulumbuluishe, bualu bua nuakutuvuisha bu tshintu tshidi tshi tua tshibi ku mesu kua Palô ne ku mesu kua bantu bandi, nuakuteka muele wa nvita mu bianza biabo wa kutushiha nʼau. Mose wakahingana kudi Yehowa, wakamba ne, Yehowa, wewe wakenzela bantu aba bibi nunku bualu kai? Wakantuma bualu kai? Hanakalua kudi Palô mu dina diebe, yeye wakenzela bantu aba bibi, ne wewe kuena muanze kusungila bantu bebe nansha kakese. Yehowa wakambila Mose ne, Katataka wewe mutangile bu mundi ngenzela Palô, bualu bua yeye neabalekele ku tshianza tshikole, neabihate mu buloba buandi ne tshianza tshikole. Nzambi wakambila Mose ne, Meme ndi Yehowa. Nakamueneka kudi Abalahama ne kudi Isaka ne kudi Yakoba bu Nzambi wa Bukole Buonso, kadi bobo kabakamanya dina dianyi Yehowa nansha Meme kabidi nakajadika nʼabo tshihungidi tshianyi bua kubaha buloba bua Kanana, buloba buakadibo bashikamamu bu benyi. Bualu bukuabo, nakunvua mikemu ya Bena Isalele badi mu butaka kudi Bena Ejipitu, ndi muvuluke tshihungidi tshianyi. Nunku wambile Bena Isalele ne, Ndi Yehowa, ne meme nennuhatule muinshi mua majitu a Bena Ejipitu, nennusungile ku buhika buabo, nennuhikule ne diboko diolola ne dilumbulula dikole. Nennuangate bu bantu banyi ne meme nengikale Nzambi wenu, nuenu nenumanye ne, Meme udi Yehowa, Nzambi wenu, udi unuhatula muinshi mua majitu a Bena Ejipitu. Meme nendue nʼenu mu buloba bunakalaya Abalahama ne Isaka ne Yakoba, nennuhebu bu buhianyi ndi Yehowa. Mose wakambila Bena Isalele nunku kadi bobo kabakatumikila dî dia Mose bualu bua kanyinganyinga ka mutshima, ne bua dikenga dia buhika. Yehowa wakambila Mose ne, Ya biebe kudi Palô, mukelenge wa Ejipitu, umuambile ne, Lekela Bena Isalele bahatuke mu buloba buebe. Mose wakamba ku mesu kua Yehowa ne, Mona, Bena Isalele kabena banze kutumikila dî dianyi, Palô neunvuile muena tshikukumina kudi kunyi? Yehowa wakambila Mose ne Alona mei a kuya nʼau kudi Bena Isalele ne kudi Palo, mukelenge wa Ejipitu, bualu bua kuhatula Bena Isalele mu buloba bua Ejipitu. Aba mbantu badi ku mutu kua nsubu ya batatuʼabo. Bana ba balume ba Lubena, muanʼa bute wa Isalele Hanoka ne Palu, Heselona ne Kâmi, â mmeku a Lubena. Bana ba balume ba Shimeona Yemuele ne Yamina ne Obada ne Yakina ne Soha ne Shaula, muana wa balume wa mukashi wa Bena Kanana, â mmeku a Shimeona. Mena a bana ba balume ba Lewi ku bikondo biabo adi nunku Geshona ne Kohata ne Melah, bidimu bia Lewi biakadi lukama makumi asatu ne muanda mutekete. Bana ba balume ba Geshona: Libini ne Shimei, ku meku abo. Bana ba balume ba Kohata: Amalama ne Yisehâ ne Hebelone ne Uziele, bidimu bia Kohata biakadi lukama ne makumi asatu ne bisatu. Bana ba balume ba Melali: Mali ne Mushi. Â mmeku a, Bena Lewi ku bikondo biabo. Amalama wakabaka Yokebede, muanʼabo wa bakashi ne tatu wandi, ne yeye wakamulelela Alona ne Mose, bidimu bia Amalama biakadi lukama ne makumi asatu ne muanda mutekete. Bana ba balume ba Yisehâ: Kola ne Nefege ne Zikeli. Bana ba balume ba Uziele Mishaele ne Ehsafana ne Siteli. Alona wakabaka Elisheba, muana wa bakashi wa Aminadaba, muanʼabo wa bakashi ne Nashona ne yeye wakamulelela Nadaba ne Abihu, Eleazâ ne Itamâ. Bana ba balume ba Kola: Asi ne Elekana ne Abiasafa, â mmeku a Bena Kola. Eleazâ, muana wa balume wa Alona, wakabaka umue wa bana ba bakashi ba Putiele, yeye wakamulelela Pinehasa. Bantu aba badi ku mutu kua nsubu ya batatuʼabo, Bena Lewi, ku meku abo. Bantu aba Mose ne Alona mbantu bakambila Yehowa ne, Hatulai Bena Isalele mu buloba bua Ejipitu ku misumba yabo. Bantu aba Mose ne Alona tuakambila Palo, mukelenge wa Ejipitu, ne, Lekela Bena Isalele mu Ejipitu Ka Mose ne Alona aba. Mu dituku diakadi Yehowa uyikila ne Mose mu buloba bua Ejipitu, Yehowa wakambila Mose ne, Meme ndi Yehowa, Wambile Palô, mukelenge wa Ejipitu, mei onso anakuambila. Mose wakamba ku mesu kua Yehowa ne, Mona, meme ndi muena tshikukumina, Palo neangunvuile munyi? Yehowa wakambila Mose ne, Nakukuvuisha bu Nzambi ku mesu kua Palô, ne Alona mukuluʼebe neikale muakuidi webe. Wewe newambe mei onso andi nkuambila, ne Alona mukuluʼebe neambile Palo ne, Ulekele Bena Isalele mu buloba buebe. Nenkoleshe mutshima wa Palô, nennudishe bimanyinu bianyi ne malu anyi a kukema mu buloba bua Ejipitu. Kadi Palô kena ukunyuila, ne meme nenteke tshianza tshianyi ha Ejipitu, nempatule bantu banyi Bena Isalele mu buloba bua Bena Ejipitu ku dilumbulula dikole. Bena Ejipitu nebamanye ne meme ndi Yehowa, hangolola tshianza tshianyi ha Ejipitu ne hanahatula Bena Isalele munkatshi muabo. Mose ne Alona bakenza bu muakamba Yehowa, bakenza nunku. Mose wakadi ne bidimu makumi muanda mukulu, ne Alona wakadi ne bidimu makumi muanda mukulu ne bisatu, hakadibo bakula ne Palô. Yehowa wakambila Mose ne Alona ne, Hanuambila Palo ne, Nundeshe bualu bua kukema, hashishe, wewe wambile Alona ne, Angata mulangala webe, uwele hanshi ku mesu kua Palô ne mulangala neukudimuke nyoka. Mose ne Alona bakaya kudi Palô, bakenza bu muakamba Yehowa: Alona wakela mulangala wandi hanshi ku mesu kua Palô ne bantu bandi, ne mulangala wakakudimuka nyoka. Palô wakabikila bena meji ne bena muhongo ne bena bilengulengu ba mu Ejipitu, bakenza muomumue ne manga abo. Muntu ne mundi wakela mulangala wandi hanshi, wakakudimuka nyoka, kadi mulangala wa Alona wakatuma milangala yabo. Mutshima wa Palo wakakoleshibua, yeye kakabunvuila, bu muakamba Yehowa. Yehowa wakambila Mose ne, Mutshima wa Palô udi ne tshitshu, yeye udi uhidia kulekela bantu. Ya biebe kudi Palô ne dinda, hayeye ku mai, wimane kukala kua musulu bua kusangakena nʼandi, uye ne mulangala wakakudimuka nyoka au mu tshianza tshiebe. Umuambile ne, Yehowa, Nzambi wa Bena Ebelu, wakuntuma kudi ne, Ulekele bantu banyi, baye bua kuntendelela mu tshihela, ku diambedi to ne mpindiu wewe kuena muanze kunvua. Yehowa udi wamba ne, Mu bualu ebu wewe neumanye ne, Meme ndi Yehowa tangila, nenkume mai adi mu musulu ne mulangala udi mu tshianza tshianyi, ne mai onso neakudimuke mashi. Minyinyi ya mu mai idi mu musulu neyifue, mai neanunke muhuya mubi, mai a mu musulu neatonde Bena Ejipitu. Yehowa wakela dî kudi Mose ne, Wambile Alona ne, Angata mulangala webe, olola tshianza tshiebe ha mutu ha mai a mu Ejipitu, ku mutu kua misulu yabo ne tusulu tuabo ne mashiba abo, mai onso akudimuke mashi, mashi neikale mu buloba bua Ejipitu buonso ne mu milondo ya mitshi ne mu milondo ya mabue. Mose ne Alona bakenza bu muakamba Yehowa, Alona wakabisha mulangala, wakakuma mai akadi mu musulu, ku mesu kua Palô ne ku mesu kua bantu bandi, mai onso akadi mu musulu akakudimuka mashi. Minyinyi ya mu mai yakadi mu musulu bakafua, musulu wakamuha muhuya mubi, ne Bena Ejipitu kabakamanya mua kunua mai a mu musulu, mashi akadi mu buloba bua Ejipitu buonso, Bena bilengulengu ba mu Ejipitu bakenza muomumue ne manga abo, mutshima wa Palô wakakoleshibua, yeye kakabunvuila, bu muakamba Yehowa. Palô wakanyunguluka, wakaya mu nsubu wandi, kakateka bualu ebu mu mutshima wandi. Bena Ejipitu bonso bakumbula mena hehi ne musulu, bakakeba mai a kunua, bualu bua kabakamanya mua kunua mai a mu musulu. Matuku akakumbana muanda mutekete ku nyima kua dituta dia mai a mu musulu kudi Yehowa. Yehowa wakambila Mose ne, Ya biebe kudi Palô, umuambile ne, Yehowa udi Wamba ne, Lekela bantu banyi baye kuntendelela. Biwahidia kubalekela, nentume biula mu buloba buebe. Musulu newikale tente ne biula, neubuele mu nsubu webe ne mu nsubu webe wa bulalu ne ha bulalu buebe, ne mu nsubu ya bahika bebê ne kudi bantu bebe, ne mu nfulu yenu ne mu binu bienu. Biula nebilue hamʼbidi hebe ne hamʼbidi ha bantu bebe ne hamʼbidi ha bahika bebe bonso. Yehowa wakela dî kudi Mose ne, Wambile Alona ne, Olola tshianza tshiebe ne mulangala webe ha mutu ha misulu ne ha mutu ha tusulu ne mashiba bualu bua kutuma biula mu buloba bua Ejipitu. Alona wakolola tshianza tshiandi ku mutu kua mai a mu Ejipitu, biula biakabaha, biakûsha buloba bua Ejipitu tente. Bena bilengulengu bakenza muomumue ne manga abo, bakatuma biula mu buloba bua Ejipitu. Palo Wakabikila Mose ne Alona, wakamba ne, Nundombele Yehowa, yeye umushe biula kundi ne kudi bantu banyi, nendekele bantu baye kushihela Yehowa nyama. Mose wakambila Palô ne, Wikale ne butumbi ebu kundi, ndituku kai diudi musue meme nkulombele bua kumusha biula kûdi ne kudi bantu bebe ne kudi bahika bebe ne mu nsubu yenu, bishale anu mu musulu nkayau? Yeye wakamba ne, Makelela Mose wakamba ne, Bualu buikale bu mu dî diebe, bua kukumanyisha ne, Kakuena nzambi mukuabo bu Yehowa Nzambi wetu. Biula nebiumuke kûdi ne ku nsubu yebe, ne kudi bahika bebe ne kudi bantu bebe, nebishale anu mu musulu nkayau. Mose ne Alona bakaluhuka kudi Palô. Mose wakalomba Yehowa bua buila biakatumeye kudi Palô. Yehowa wakenza bu mu dî dia Mose, biula biakafua mu nsubu ne mu mbanza ne mu madimi. Bakabisangisha mu bisumbu, ne buloba buakanunka muhuya mubi. Kadi bakatangila Palô ne, Bualu buakushika, wakakolesha mutshima wandi, kakabinvuila, bu muakamba Yehowa. Yehowa wakela dî kudi Mose ne, Wambile Alona ne, Olola mulangala webe, ukume dinfuenkenya dia buloba, dinfuenkenya nedikudunuke nkusu ya mu mitu mu buloba buonso bua Ejipitu. Bakenza nunku, Alona wakolola tshianza tshiandi ne mulangala wandi, wakakuma dinfuenkenya dia buloba ne nkusu yakadi kudi bantu ne kudi nyama, dinfuenkenya dionso dia ha buloba diakakudimuka nkusu mu buloba bua Ejipitu buonso. Bena bilengulengu bakenza nunku ne manga abo bua kutuma nkusu, kadi kabakamanya mua kuenza, nkusu yakadi kudi bantu ne kudi nyama. Bena bilengulengu bakambila Palo ne, Bualu ebu budi bu munu wa Yehowa, kadi mutshima wa Palô wakakoleshibua, yeye kakabunvuila, bu muakamba Yehowa. Yehowa wakambila Mose ne, Ubike ne dinda dionso, uye kudi Palô hayeye ku mai, umuambile ne, Yehowa udi Wamba ne, Ulekele bantu banyi, baye kuntendelela. Biwahidia kulekela bantu banyi, nentumine bisumbu bia tuishi kûdi ne kudi bahika bebe ne kudi bantu bebe ne mu nsubu yenu, nsubu ya Bena Ejipitu neyikale ne bisumbu bia tuishi tente, ne hanshi ha buloba kabidi. Mu dituku adi nendame buloba bua Goshene budi bantu banyi bashikame, bisumbu bia tuishi kabiena bifikaku, bualu bua kukumanyisha ne, Meme ndi Yehowa hanshi ha buloba. Nenteke ditahulula hankatshi ha bantu banyi ne bantu bebe, nengenze tshimanyinu etshi makelela. Yehowa Wakenza nunku, ne bisumbu binene bia tuishi biakabuela mu nsubu wa Palô ne mu nsubu ya bena mudimu bandi, tuishi tuakahaula buloba bua Ejipitu buonso. Palô Wakabikila Mose ne Alona, wakamba ne, Yai bienu, nushihele Nzambi wenu nyama mu buloba bua Ejipitu. Mose wakamba ne, Katuena mua kuenza nunku, bituashihela Yehowa Nzambi wetu nyama, netuenze bualu budi bufuisha Bena Ejipitu bundu, bituenza bualu budi bufuisha Bena Ejipitu bundu ku mesu, bobo kabena batukuma ne mabue, anyi? Netuye luendu lua matuku asatu mu tshihela, netushihele Yehowa Nzambi wetu nyama bu muatuambileye. Palô wakamba ne, Nennulekele, nuye mu tshihela bua kushihela Yehowa Nzambi wenu nyama, kadi kanuyi kule, nundombele Nzambi. Mose wakamba ne, Mona, nengumuke kûdi, nendombe Yehowa ne yeye neamushe bisumbu bia tuishi kudi Palô ne kudi bena mudimu bandi ne kudi bantu bandi makelela, kadi Palô katu dingi kabidi bua kulekela bantu baye kushihela Yehowa nyama. Mose wakaluhuka kudi Palô, wakalomba Yehowa. Yehowa wakenza bu mu dî dia Mose yeye wakumusha bisumbu bia tuishi kudi Palô ne kudi bena mudimu bandi ne kudi bantu bandi, nansha kishi kamue kakashala. Palô wakakolesha mutshima wandi musangu eu kabidi, yeye bakalekela bantu bua kuyabo. Yehowa wakambila Mose ne, Ya biebe kudi Palô, umuambile ne, Yehowa, Nzambi wa Bena Ebelu, udi Wamba ne, Ulekele bantu banyi, baye kuntendelela. Biwahidia kubalekela, ne biwabakanda, Yehowa neateke tshianza tshiandi ha bimuna bidi mu budimi, ha tubalu ne nyama ya mpunda ne nyama ya tumelo ne ngombe ne mikoko, dishina dikole nedibikuate. Yehowa neatahulule bimuna bia Bena Isalele ne bimuna bia Bena Ejipitu, nansha tshintu tshikese tshia Bena Isalele netshifue. Yehowa wakamana ku sungula dituku, makelela Yehowa nênze bualu ebu mu buloba. Hakatshiabu Yehowa Wakenza bualu ebu; bimuna bionso bia mu Ejipitu biakafua, kadi bimuna bia Bena Isalele kabiakafua nansha tshimue. Palô wakatuma mundi, wakamona ne, Nansha tshintu tshimue tshia bimuna bia Bena Isalele tshiakafua. Mutshima wa Palô wakakoleshibua, yeye bakalekela bantu. Yehowa wakambila Mose ne Alona ne, Nuangate manza a butue bua mu tshikutu, Mose abumiamine mulu ku mesu kua Palô. Butue nebulue bu dinfuenkenya dikese mu buloba bua Ejipitu buonso, butue nebuenzeshe mputa ya mbalanga hamʼbidi ha bantu ne hamʼbidi ha nyama mu buloba bua Ejipitu buonso. Bakangata butue bua mu tshikutu, bakimana ku mpala kua Palô, Mose wakabumiamina mulu, buakenzesha bantu ne nyama mputa ya mbalanga hamʼbidi. Bena bilengulengu kabakamanya mua kuimana ku mpala kua Mose bualu bua mputa ya mbalanga, mputa yakadi hamʼbidi ha bena bilengulengu ne hamʼbidi ha Bena Ejipitu bonso. Yehowa wakakolesha mutshima wa Palô, yeye kakabunvuila, bu muakambila Yehowa Mose. Yehowa wakambila Mose ne, Bika ne dinda dionso, wimane ku mpala kua Palô, umuambile ne, Yehowa, Nzambi wa Bena Ebelu udi wamba ne, Ulekele bantu banyi, baye kuntendelela. Musangu eu nentume milau yanyi yonso ku mutshima webe ne kudi bena mudimu bebe ne kudi bantu bebe, bua kukumanyisha ne, Kakuena nzambi mukuabo bu meme mu buloba buonso. Bu meme muolole tshianza tshianyi, mufume disama dikole kudi bantu bebe, wewe wakadi kujimina ha buloba. Kadi bulelela, nakukubisha bua kukulesha bukole buanyi ne bua dina dianyi dimanyishibue ha buloba buonso. Wewe utshidi udibandisha kudi bantu banyi, udi uhidia kubalekela munyi? Tangila, makelela ha diba edi mene nemmatshishe mabue a nvula a bungi be, kabena banze kutangila mabue a nvula nunku ku tshibangidilu tshia bukelenge bua Ejipitu tô ne katataka, Nunku utumine bantu lubilu, basangishe bimuna biebe ne bintu bionso biudi nʼabi mu budimi, muntu yonso ne nyama yonso bidi bishala mu budimi bidi kabiyi bihingana mu nsubu, mabue a nvula neahone hamʼbidi babi, nebifue. Muntu yonso wakatshina di dia Yehowa munkatshi mua bena mudimu ba Palô wakatuma bantu bandi, bakasangisha bimuna biandi mu nsubu. Yeye wakadi kayi muitabushe di dia Yehowa wakashiya bantu bandi ne bimuna biandi mu mpata. Yehowa wakambila Mose ne, Olola tshianza tshiebe mulu, bua mabue a nvula ikale mu buloba bua Ejipitu buonso, ne ha muntu ne ha nyama ne ha midioko yonso ya mu budimi, mu buloba bua Ejipitu buonso. Mose wakolola mulangala wandi mulu ne Yehowa wakatuma makubakuba ne mabue a nvula, miele ya nvula yakakuma ha buloba, Yehowa wakama tshisha mabue a nvula ha buloba bua Ejipitu. Mabue a nvula ne miele ya nvula biakabuelakana, biakatamba bikole, kabakatangila bualu abu mu buloba bua Ejipitu katshia bualua tshisamba tshia bantu. Mabue a nvula akashika bintu bionso bia mu buloba bua Ejipitu biakadi mu budimi, ne bantu ne nyama, mabue a nvula akashika midioko yonso ya mu budimi ne mitshi yonso. Anu mu buloba bua Goshene muakadi Bena Isalele, mabue a nvula kakadiku. Palô wakatuma di, wakabikila Mose ne Alona, wakabambila ne, Nakuenza bualu bubi musangu eu, Yehowa udi muakane ne meme ne bantu banyi tudi bantu babi. Nundombele Yehowa, bualu bua makubakuba ne mabue a nvula biakututonda, nennulekele, kanuena nushala kabidi. Mose wakamuambila ne, Hanaluhuka mu musoko eu, nengolole bianza bianyi kudi Yehowa, makubakuba neashike, mabue a nvula neashike kabidi, bualu bua kukumanyisha ne buloba budi bua Yehowa. Kadi ndi muma nye ne wewe ne bantu bebe kanuena banze kuikala ne ditshina dia Yehowa Nzambi. Mitshi ya lin ne ya orge yakashihibua, bualu bua orge yakadi mu miehu ne lin yakadi ne bilongo. Kadi blê ne bintu bikuabo kabiakadi bifue, kabiakanza kukola nansha. Mose wakaluhuka mu musoko kudi Palô, wakolola bianza biandi kudi Yehowa, ne makubakuba ne mabue a nvula biakashika, nvula kakamata ha buloba kabidi. Hakatangila Palô nvula ne mabue a nvula ne makubakuba biakashika, yeye wakatamba kuenza bibi, wakakolesha mutshima wandi ne yeye ne bantu bandi. Mutshi ma wa Palô wakakoleshibua, yeye kakunvuila Bena Isalele, bu muakambila Yehowa Mose. Yehowa wakambila Mose ne, Ya biebe kudi Palô, bualu bua nakakolesha mutshima wandi ne mitshima ya bantu bandi bua kulesha bimanyinu bianyi munkatshi muabo. Wewe newambile muan ebe wa balume mu matshu, ne muana wa muanʼebe wa balume, malu anakuenza mu buloba bua Ejipitu, ne bimanyinu bianyi binakuenza munkatshi muabo, bua nuenu numanye ne, Meme ndi Yehowa. Mose ne Alona bakaya kudi Palô, bakamuambila ne, Yehowa, Nzambi wa Bena Ebelu, udi Wamba ne. Wewe neuhidie kudihuekesha ku mesu kuanyi musangu bule munyi? Ulekele bantu banyi baye kuntendelela. Biwahidia kulekela bantu hanyi, makelela nentumine mikumbi mu buloba buebe, neyikale ha mutu ha buloba buonso, kabena mua kutangila buloba, yoyo neyidie bintu biakushala ku mabue a nvula, nenudie mitshi yenu yonso idi idiunda mu budimi. Neyule nsubu yebe tente ne nsubu ya bantu bebe ne nsubu ya Bena Ejipitu bonso, nansha batatu benu nansha bankambua benu kabakatangila bualu ebu katshia babuela mu buloba ebu to ne katataka Mose wakanyunguluka, wakaluhuka kudi Palô. Bantu ba Palô bakamukonka ne, Muntu eu neikale buteyi kutudi musangu bule munyi? Ulekele bantu baye kutendelela Yehowa Nzambi wabo, wewe kuena mumanye ne, Buloba bua Ejipitu buakushihibua, anyi? Bakalua ne Mose ne Alona kudi Palo, ne yeye wakabambila ne, Yai bienu nutendelele Yehowa Nzambi wenu kadi badi bamba kuya mbanganyi? Mose wakamba ne, Netuye ne bana bakese ne bantu banunu, ne bana betu ba balume ne bana betu ba bakashi, netuye ne mikoko yetu ne ngombe yetu, bualu bua tudi ne bualu bua kudia bidia ku mesu kua Yehowa. Yeye wakabambila ne, Yehowa ashale nʼenu binanulekela ne bana benu bakese, bualu bua bualu bubi budi munda muenu. Nansha, nuenu bantu balume nudi mua kuya kutendelela Yehowa, bualu bua nudi basue kuenza nunku. Bakabihata ku mesu kua Palô. Yehowa wakambila Mose ne, Olola tshianza tshiebe ha buloba bua Ejipitu, bua kutuala mikumbi mu buloba bua Ejipitu, neyidie bintu bionso biakashala ku mabue a nvula. Mose wakolola mula ngala wandi ha buloba bua Ejipitu, ne Yehowa wakatuma luhehele luaku esete dituku adi to ne hakatshia butuku, ne dinda luhehele lua ku esete luakatuma mikumbi. Mikumbi yakamuangalaka buloba bua Ejipitu buonso, yakatamba bungi, kakuakadi mikumbi bu ei diambedi, ne mikuabo bu ei kayena ilua kabidi. Yakabuikila buloba buonso, to ne hakalua buloba midima, yakadia midioko yonso ya mu madimi ne mamuma onso a ku mitshi, biakashala ku mabue a nvula, nansha tshintu tshikese nansha midioko nansha mutshi biakashala mu buloba bua Ejipitu buonso. Hashishe Palô wakabikila Mose ne Alona lubilu, wakamba ne, Nakuenzela Yehowa Nzambi wenu bualu bubi ne nuenu kabidi. Nundekelele bubi buanyi anu musangu eu, nundombele Yehowa Nzambi wenu, yeye angumushile bualu ebu bua lufu. Yeye wakaluhuka kudi Palo, wakalomba Yehowa. Yehowa wakatuma luhehele lukole lua ku wesete, bakabandisha mikumbi, luakayihata mu Dishiba Dikunze, nansha mukumbi umue wakashala mu buloba bua Ejipitu. Kadi Yehowa wakakolesha mutshima wa Palô, yeye kakalekela Bena Isalele. Yehowa wakambila Mose ne, Olola tshianza tshiebe mulu, midima ikale mu buloba bua Ejipitu, bantu babubute mu midima. Mose wakolola tshianza tshiandi mulu ne midima mikole be yakadi mu buloba bua Ejipitu to matuku asatu. Ka bakamanya mua kutangilangana, nansha muntu wakumuka mu muaba wandi tô matuku asatu, kadi munya wakadi mu nsubu ya Bena Isalele bonso. Palô wakabikila Mose, wakamuambila ne, Yai bienu nutendelele Yehowa, shiyai anu mikoko ne ngombe, bana benu bakese baye nʼenu. Mose wakamba ne, Bualu buakukukuata bua kufila nyama mu bianza bietu ya kuoshila Nzambi, tudi basue kuyishihela Yehowa Nzambi wetu. Netuye ne bimuna bietu kabidi, katuena dishiya nansha mukoko umue ku nyima, bualu bua didi ne bualu bua kutendelela Yehowa Nzambi wetu ne nyama ei; katuena bamanye bintu bidi Yehowa musue anu bakafikaku. Kadi Yehowa wa kakolesha mutshima wa Palo, yeye kakabalekela. Palô wakambila Mose ne, Umuka kundi, udimuke biebe, kuntangidi kabidi, mu dituku diudi utangila mpala wanyi wewe neufue. Mose wakamba ne, Wewe wakuamba bimpe, tshiena utangila mpala webe kabidi. Yehowa wakambila Mose ne, Nentume mulau umue mukuabo kudi Palo ne ha buloba bua Ejipitu; ne ku nyima yeye neanulekele, hanulekeleye, yeye neanuihate tshiendelele. Wambile bantu mu matshu abo ne, Mulume yonso alombe muena mutumba nʼandi, ne mukashi yonso alombe mukashi muena mutumba nʼandi bilenga bia argent ne bilenga bia or. Yehowa wakaha bantu dikasa dimpe kudi Bena Ejipitu Muntu eu Mose wakadi muntu munene be mu buloba bua Ejipitu ne ku mesu kua bena mudimu ba Palô ne ku mesu kua bantu bandi. Mose wakamba ne, Yehowa udi wamba ne, Mundankulu meme nenye munkatshi mua Ejipitu; banʼa bute bonso ba mu buloba bua Ejipitu nebafue, ku muanʼa bute wa Palô udi ushikama ha nkuasa wandi wa bukelenge tô ne kudi muanʼa bute wa mukashi udi uhela manvua andi, banʼa bute ba bimuna bionso nebafue kabidi. Muadi mukole newikale mu buloba bua Ejipitu buonso; kakuena kuanze kuikala muadi bu eu, ne kawena wikalaku kabidi. Kadi nansha mbua kena mua kubululala umue wa Bena Isalele, nansha muntu nansha nyama, bua nuenu mumanye ne, Yehowa udi utahulula Bena Ejipitu ne Bena Isalele. Bantu bebe bonso nebalue kundi, nebankukuile, nebambe ne, Ya biebe ne bantu bonso badi balonda ku nyima kuebe, ne ku nyima kua bualu ebu nempatuke. Wakaluhuka kudi Palô ne tshiji tshikole. Yehowa wakambila Mose ne, Palô kena ukunvuila nansha, bualu bua kuvudisha malu anyi a kukema mu buloba bua Ejipitu. Mose ne Alona bakenza malu â onso a kukema ku mesu kua Palô, Yehowa wakakolesha mutshima wa Palô, yeye bakalekela Bena Isalele mu buloba buandi. Yehowa wakambila Mose ne Alona mu buloba bua Ejipitu ne, Ngondo eu neikale tshibangidilu tshia ngondo kunudi, neikale ngondo wa kumudilu kua tshidimu kunudi. Nuambile bantu bonso ba mu Isalele ne, Mu dituku dia dikumi dia ngondo eu muntu ne muntu asungule muana wa mukoko ku nsubu ya batatuʼabo, muana wa mukoko ku nsubu muana wa mukoko ku nsubu. Bikala bantu ba mu nsubu banya-banya, muena nsubu neatahulule muana wa mukoko ne muena nsubu udi hehi nʼandi ku bungi bua bantu badi mu nsubu, bobo babale bungi bua bantu badi mua kudia muana wa mukoko umue. Muana mulume wenu wa mukoko neikale muakane ne wa tshidimu tshimue nebamuangate munkatshi mua mikoko anyi mua mbushi. Nenumulame tô ne ku dituku dia dikumi ne anai dia ngondo eu, bantu bonso ba mu Isalele nebamushihe dilolo. Bobo nebangate mashi, nebâmiamine ku mutshi wa ha mutu ha mushiku wa mbelu ne ku biluwa bibidi bia mushiku wa mbelu wa nsubu mudibo bamudîla. Neboshe munyinyi ku kahia butuku abu, nebaudie ne mampa adi kâyi ne luevene, nebaudie ne matamba adi ne bululu. Kanudi munyinyi mubishe, anyi mulamba mu mai a kahia, kadi nuoshe munyinyi mu kahia, mutu wandi ne bibelu biandi ne bia munda biandi. Kanushiyi tshintu tshikese tô ne ku dinda, kadi biashala bintu dinda nenubioshe mu kahia. Nenudie munyinyi nunku ne bilulu bienu biela mikaya, ne bisabata ku makasa ne mulangala ku bianza bienu nenudie munyinyi lubilu, bualu ebu budi kuhita kua Yehowa. Bualu bua meme nempite buloba bua Ejipitu butuku abu, nenshihe banʼa bute bonso ba mu buloba bua Ejipitu ne ba bantu ne ba nyama; nendumbuluishe nzambi yonso ya Ejipitu, meme ndi Yehowa. Mashi neikale bu tshimanymu tshia mu nsubu munudi, ne hanamona mashi, nempite ha mutu henu, ne mulau kawena unukuata hanashiha bantu ba mu buloba bua Ejipitu. Dituku edi nedikale kunudi bu tshmilukidi, nenudilame bu disanka dia Yehowa, nuenu nenuvuluke dituku edi ne tshivulukidi etshi tshiendelele. Nenudie mampa adi kayi ne luevene to matuku muanda mutekete, dituku dia kumudilu nenumushe luevene mu nsubu yenu, muntu yonso udi udia mampa adi neluevene ku dituku dia kumudilu to matuku muanda mutekete, nebamumushe munkatshi mua Bena Isalele. Dituku dia kumudilu nedikale dituku dia disangisha dia tshijila, ne dituku dia muanda mutekete nedikale dituku dia disangisha dia tshijila, kabenji mudimu mu matuku â, anu mudimu wa kudikebela bia kudia. Nuenu nenudie mampa adi kayi ne luevene dituku adi bualu bua nakahatula bisumbu bienu mu buloba bua Ejipitu, nunku nenujidile dituku edi bu tshivulukidi tshienu tshiendelele. Mu ngondo wa kumudilu ne ku dituku dia dikumi ne anai dilolo nenudie mampa adi kâyi ne luevene to ne ku dituku dia makumi abidi ne dimue dilolo. Kanuikadi ne luevene mu nsubu yenu to matuku muanda mutekete, ne muntu yonso udi udia bintu bia luevene, nebamumushe munkatshi mua tshisumbu tshia Bena Isalele; nansha bikaleye muenyi anyi muntu muledibue mu buloba. Kanudi nansha tshintu tshikese tshia luevene, mu nsubu yenu yonso nenudie anu bintu bidi kabiyi ne luevene. Mose Wakabikila bakulu bonso ba Bena Isalele, wakabambila ne, Nusungule bana ba mikoko bungi buai buikale bungi bua meku enu, nuyishihe bua kuhita kua Yehowa. Nuangate mabeshi a hisopa, nutue mu mashi adi mu dilonga, numianune mashi ku mutshi wa ha mutu ha mushiku wa mbelu ne ku biluwa bibidi bia mushiku wa mbelu, muntu kaluhuki mu nsubu wandi tô ne ha tshia butuku. Yehowa neahite bua kushiha Bena Ejipitu, hamoneye mashi ku mutshi wa ha mushiku wa mbelu ne ku biluwa bia mushiku wa nsubu, neaye biandi ha mutu ha tshibi, neahite, Yehowa neahidishe mushiku ne, Kayi mu nsubu yenu bua kunushiha. Nuenu nuenze bualu ebu bu tshilele tshienu ne tshia bana benu tshiendelele. Hanuafika mu buloba bulualua Yehowa kunuha, bu muakalayeye, nuenze tshilele etshi. Hanukonka bana benu ne, Nudi nuenzela tshilele etshi tshinyi? nenubambile ne, Tshidi tshintu tshituha tshia kuhita kua Yehowa, yeye wakahita ha mutu ha nsubu ya Bena Isalele mu Ejipitu, hakashiheye Bena Ejipitu, ne wakasungila nsubu yetu Bantu bakinama mitu yabo, bakatendelela Yehowa. Bena Isalele bakaya, bakenza nunku, bu muakambila Yehowa Mose ne Alona, mbu muakenzabo. Hakalua mundankulu Yehowa wakashiha banʼa bute bonso ba mu buloba bua Ejipitu, muanʼa bute wa Palô wakadi ushikama ha nkuasa wandi wa bukelenge tô ne ku muanʼa bute wa muntu wa mu nsubu wa lukanu, ne bana bonso ba bute ba bimuna. Palô wakabika mu butuku, yeye ne bantu bandi bonso, ne Bena Ejipitu bonso, muadi munene wakadi mu Ejipitu, kamuakadi nsubu wakadi kayi ne mufue. Palô wakabikila Mose ne Alona mu butuku, wakamba ne, Bikai, yai bienu munkatshi mua bantu banyi, ne nuenu ne Bena Isalele, yai bienu nutendelele Yehowa bu munuakamba. Angatai bisumbu bia mikoko ne bia ngombe, bu munuakamba, yai bienu, nunvudishe disanka kabidi. Bena Ejipitu bakenzesha bantu bualu bua kubihata mu buloba lubilu, bakamba ne, Tudi bantu bafue bonso. Bantu bakangata bidia bia mampa diambedi luevene kaluyi luanze kubuelamu, ne binu bidibo benza nʼabi mampa bakabikuta mu bilulu biabo, bakabiteka ha mahaʼabo. Bena Isalele bakenza bu mu dî dia Mose, bakatamba Bena Ejipitu bilenga bia argent ne bia or ne bilulu. Yehowa wakaha bantu dikasa dimpe ku mesu kua Bena Ejipitu, bakabaka bintu biakabalombabo Bakahaula Bena Ejipitu. Bena Isalele bakaya ku Lamesese tô ne ku Sukota, balume bakenda hanshi bakadi bu bununu nkama isambombo, ne bana kabidi. Tshisumbu tshinene tshia bantu bakuabo tshiakaya nʼabo, ne mikoko ne ngombe ne bimuna bia bungi. Bakatamba mikata ya bidia biakadi kabiyi ne luevene biakaluabo nʼabi, kabakadi ne luevene bualu bua bakahitata mu Ejipitu, kabakamanya mua kushala, ne kabakadianjila kudilongoluela bia kudia. Bena Isalele bakashala mu Ejipitu bidimu nkama mai ne makumi asatu. Hakaleha bidimu nkama mai ne makumi asatu, mu dituku adi mene mene, bisumbu bionso bia bantu ba Yehowa bakaluhuka mu buloba bua Ejipitu. Butuku abu budi butuku budibo basue kuyidika Yehowa, bualu bua yeye wakabahatula mu buloba bua Ejipitu ebu mbutuku bua Yehowa budi Bena Isalele bavuluka ku bikondo biabo bionso. Yehowa wakambila Mose ne Alona ne, Etshi ntshilele tshia kuhita kua Yehowa muenyi kena mua kutshidia. Kadi biasumba muntu muhika wandi ku argent, ne hakamutengulabo, yeye udi mua kutshidia. Muenyi ne muena mudimu wa difutu kabena mua kutshidia. Nebadie munyinyi mu nsubu umue, kanuhatuki ne munyinyi ku nsubu, kanutshibudi nansha mufuba umue. Tshisumbu tshionso tshia Bena Isalele netshienze tshilele etshi. Bikala muenyi mushikame nʼenu, udi musue kuenza tshilele tshia kuhita kua Yehowa, nebatengule bana bandi ba balume bonso, nunku yeye udi mua kutshienza, yeye neikale bu muntu muledibue mu buloba buenu, kadi muntu udi kayi mutengula kena mua kutshidia. Mukenji umue newikale kûdi ne kudi muntu muledibue mu buloba buenu ne muenyi udi ushikama munkatshi muenu. Bena Isalele bonso bakenza bu muakambila Yehowa Mose ne Alona. Mu dituku adi mene mene Yehowa wakumuka ne Bena Isalele mu Ejipitu ne bisumbu biabo. Yehowa wakambila Mose ne, Unjidile banʼa bute bonso ba Bena Isalele, bonso badianjile kuledibua, ne ba bantu ne ba nyama, bobo mbanyi. Mose wakambila bantu ne, Vulukai dituku edi dinuakuhatuka mu Ejipitu, mu nsubu wa lukanu, bualu bua Yehowa wakanuhatula mu muaba eu ne bukole bua tshianza tshiandi, kanudi bidia bidi ne luevene. Nenuhatuke dituku edi mu ngondo wa Abiba. Halua Yehowa nʼenu mu buloba bua Bena Kanana ne Bena Hiti ne Bena Amole ne Bena Hiwi ne Bena Yebuse buakalayeye batatuʼenu ne, Nennuhebu, buloba budi ne mabele ne buitshi bia bungi, nuenu nuvuluke tshilele etshi mu ngondo eu. Nudie mampa adi kayi ne luevene to matuku muanda mutekete, ne dituku dia muanda mutekete nudie bidia ku mesu kua Yehowa. Nudie anu mampa adi kâyi ne luevene to matuku muanda mutekete, kanuikadi ne mampa a luevene, kabatangidi luevene mu nseke yenu yonso. Mu dituku adi nenuambile muanʼebe wa balume ne, Ebu mbualu buwakungenzela Yehowa hanakaluhuka mu buloba bua Ejipitu. Bualu ebu nebuikale bu tshimanyinu ku tshianza tshiebe ne bu tshivulukidi hankatshi ha mesu ebe, bua dî dia Yehowa dikale mukana muenu, bualu bua Yehowa wakanuhatula mu Ejipitu ne tshianza tshikole. Nunku nuenze bualu, ebu bu tshilele tshienu mu ngondo watshi ku tshidimu ku tshidimu. Halua Yehowa nʼenu mu buloba bua Bena Kanâna buakanulayeye ne batatuʼenu ne hanuheye buloba abu, nuenu nenujidile Yehowa banʼa bute bonso ba bantu ne ba nyama kabidi, bana ba balume mbana ba Yehowa. Nuenu nenuhikule muanʼa bute wa nyama wa mpunda ku muana wa mukoko, ne binuahanga kumuhikulai nenutshibule nshingu wandi, nenuhikule banʼa bute bonso ba bantu kabidi. Hanukonka muanʼenu wa balume ne, Bualu ebu ntshinyi? nemmuambile ne, Yehowa wakatuhatula mu buloba bua Ejipitu ne mu nsubu wa lukanu ku bukole bua tshianza tshiandi. Hakamba Palo kuhidia kundekelu, Yehowa wakashiha banʼa bute bonso ba mu buloba bua Ejipitu ne ba bantu ne ba nyama kabidi, nunku ndi mushihele Yehowa banʼa bute ba balume ba nyama, kadi ndi muhikule banʼa bute ba balume banyi. Bualu ebu nebuikale bu tshimanymu ku tshianza tshiebe ne bu tshmilukidi hankatshi ha mesu ebe bualu bua Yehowa wakabihanda mu Ejipitu ku bukole bua tshianza tshiandi. Bakalekela Palô bantu, Nzambi kakabalombola mu nshila wa ku buloba bua Bena Peleshete, nshila au wakatamba buihi, Nzambi wakamba ne, Bamue bantu nebakudimune mitshima yabo hatangilabo nvita, nebahingane mu Ejipitu. Kadi Nzambi wakabalombola mu nshila wa ku tshihela hehi ne Dishiba Dikunze Bena Isalele bakahatuka mu buloba bua Ejipitu ne bintu bia nvita. Mose wakaya ne mifuba ya Yosefe, bualu bua yeye wakatshihisha Bena Isalele ne, Nzambi nealue kunudi bulelela, nuenu nenuye ne mifuba yanyi. Bakabisha luendu luabo ku Sukota, bakashikama mu Etama, ku butshika bua tshihela. Yehowa wakaya ku mpala kuabo mu ditutu, kubalesha nshila, ne butuku mu difutu diakadi ne dinkenke bua kubatemena mu nshila, bua bobo bamanye mua kuya ne munya ne butuku. Ditutu dia mu munya diakadi ne dinkenke butuku kadiakumuka ku mpala kua bantu. Yehowa wakambila Mose ne, Wambile Bena Isalele ne, Nuhingane, Shikamai ku mpala kua Pi-hahilota, hankatshi ha Migedola ne mai manene, ku mpala kua Bâla-sefona, Shikamai bienu ku mpala kua muaba eu hehi ne mai manene. Palô neambe bua Bena Isalele ne, Bakuhambuka mu nshila, tshihela tshiakubahumbisha. Meme nenkoleshe mutshima wa Palô, yeye neabalonde, nempete butumbi kudi Palô ne kudi bisumbu biandi bionso, Bena Ejipitu nebamanye ne, Meme ndi Yehowa Bakenza nunku. Lumu bakafika kudi mukelenge wa Ejipitu ne, Bantu bakanyema Palô ne bantu bandi bakakudimuna mitshima yabo, bakamba ne, Tuakenza tshinyi hatuakalekela Bena Isalele ku mudimu wetu? Yeye wakalongolola dikalu diandi, wakaya ne bantu bandi. Wakangata makalu nkama isambombo masungula, ne makalu onso makuabo a mu Ejipitu ne tuhita tua makalu onso. Yehowa wakakolesha mutshima wa Palô, mukelenge wa Ejipitu, yeye wakalonda Bena Isalele, bualu bua Bena Isalele bakahatuka ne tshianza tshikole. Bena Ejipitu bakabalonda ne tubalu dionso ne makalu onso bia Palô Masalayi andi ne bantu ba ha nyima ha tubalu bakabaheta hakadibo bashikama hehi ne mai manene, hehi ne Pi-hahilota ku mpala kua Bâla-sefona. Hakalua Palo ha buihi, Bena Isalele bakabandisha mesu abo, bakamona Bena Ejipitu babalonda ku nyima, bakatamba kutshina, Bena Isalele bakadila kudi Yehowa. Bakambila Mose ne, Bualu bua kakuakadi nkita mu Ejipitu, wewe wakulua nʼetu bua tuetu kubala mu tshihela, anyi? Wakutuenzela nunku tshinyi, bua kutuhatula mu Ejipitu? Edi kadiena di dituakukuambila mu Ejipitu ne, Utulekele bua tukuatshile Bena Ejipitu mudimu, anyi? Bua kukuatshila Bena Ejipitu mudimu budi butamba bua kufua mu tshihela buimpe. Mose wakambila bantu ne, Kanutshinyi, imanai, numone luhandu lua Yehowa lualueye kunuha lelu, bua Bena Ejipitu banuakumona lelu kanuena nubamona kabidi tshiendelele. Yehowa neanuluile nvita yenu, nenuikale holâ. Yehowa wakambila Mose ne, Udi udidila kundi tshinyi? Ambila Bena Isalele ne, Baye ku mpala. Wewe ubishe mujangala webe, wolola tshianza tshiebe ha mai, wahandulule, Bena Isalele nebaye munkatshi mua mai ha buloba bûme. Ne tangila, meme nenkoleshe mitshima ya Bena Ejipitu, nebayemu ku nyima kua Bena Isalele, nengangate butumbi bualu bua Palô ne bisumbu biandi bionso ne makalu andi ne masalayi andi adi enda ha tubalu. Bena Ejipitu nebamanye ne, Meme ndi Yehowa, hanakuangata butumbi buanyi bualu bua Palô ne makalu andi ne masalayi andi adi enda ha tubalu. Muanjelo wa Nzambi, wakadi wenda ku mpala kua Bena Isalele, wakumukaku, wakaya ku nyima kuabo, ne difutu diakumuka ku mpala kuabo kabidi, diakimana ku nyima kuabo. Difutu diakadi hankatshi ha Bena Ejipitu ne Bena Isalele, difutu ne midima biakadiku kadi diakadi ne dinkenke butuku Kabikadianganyi ha buihi to butuku buonso. Mose wakolola tshianza tshiandi ha mai, ne Yehowa wakatuma luhehele lukole lua ku esete, wakahingasha mai butuku abu buonso, buloba bûme buakamueneka kuakadi mai, mai akahanduluka. Bena Isalele bakaya mu bunene bua mai ha buloba bûme, mai akadi bu tshinunu kudibo ku tshianza tshia balume ne ku tshianza tshia bakashi. Bena Ejipitu bakamba kubihata, bakabalonda ku nyima kuabo mu bunene bua mai, tubalu tua Palô bionso ne makalu andi onso ne masalayi andi onso akadi enda ha tubalu. Hakatshia butuku, Yehowa wakatangila bisumbu bia Bena Ejipitu mu ditutu diakadi ne dinkenke dia kahia, wakabatshinyisha. Wakakanga nkata ya makalu, kabakamanya mua kuya bimpe, Bena Ejipitu bakamba ne, Tunyeme bietu ku mesu kua Bena Isalele, bualu bua Yehowa udi ubaluila nvita yabo, udi uluangana ne Bena Ejipitu. Yehowa wakambila Mose ne, Olola tshianza tshiebe ha mai, mai ahingane kabidi ha mutu ha Bena Ejipitu ne ha makalu abo ne ha masalayi abo adi enda ha tubalu. Mose wakolola tshianza tshiandi ha mai, ne hakatshia butuku mai akahingana kabidi ne bukole buau, Bena Ejipitu bakanyema ne Yehowa wakahita Bena Ejipitu bukole mu bunene bua mai. Mai akahingana, akabanda ha mutu ha makalu ne ha mutu ha masalayi akadi enda ha tubalu, ha mutu ha bisumbu bionso bia Palô, biakabalonda mu bunene bua mai, nansha umue wabo wakahandika. Kadi Bena Isalele bakenda mu buloba bûme munkatshi mua mai, mai akadi bu tshimanu kudibo ku tshianza tshia balume ne ku tshianza tshia bakashi. Nunku Yehowa wakasungila Bena Isalele mu bianza bia Bena Ejipitu dituku adi Bena Isalele bakatangila Bena Ejipitu bafue kukala kua mai manene. Bena Isalele bakatangila bualu bukole buakenzela Yehowa Bena Ejipitu, ne bantu bonso bakatshina Yehowa, bakeyemena Yehowa ne muntu wandi Mose. Mose ne Bena Isalele balambila Yehowa musambu eu, bakamba ne, Nengimbile Yehowa musambu, bualu bua yeye wakatamba bukole ne butumbi buandi. Yeye wakela kabalu ne muntu wakadi wenda ha nyima haku mu bunene bua mai manene. Yehowa udi bukole buanyi ne musambu wanyi, yeye wakulua luhandu luanyi, Yeye udi Nzambi wanyi, nemmutumbishe, udi Nzambi wa tatuʼanyi, nemmunemeke. Yehowa udi muena nvita, Yehowa ndina diandi. Wakela makalu a Palô ne bisumbu biandi bionso mu mai manene, wakashiha tuhita tuakasunguleye mu Dishiba Dikunze. Mai adi ha mutu habo, bakadina mu mai a dijimba bu dibue. Yehowa, tshianza tshiebe tshia balume tshidi ne butumbi ne bukole, Yehowa, tshianza tshiebe tshia balume tshidi tshisunsula bantu badi nʼetu lukuna. Mu bunene bua buakane buebe, wewe utu wahita bantu bukole badi badilesha ku mesu kuebe, wewe udi ubatumina tshiji tshiebe, tshidi tshibosha bu bilu. Muhuya webe wakabandisha mai, akimana bu tshimama, mai akimana dibula. Mai manene akakuatakana mu ndondo wa mai. Muena lukuna wakamba ne, Nembalonde, nembahete, nentahulule bintu bionso bidi bishala, mutshima wanyi neusanke bualu buabo, nempatule muele wanyi wa nvita, nembashihe ne tshianza tshianyi. Wewe wakatuma luhehele luebe, ne mai manene akababuikila, bakadma bu mabue mu mai manene. Nganyi udi bu wewe Yehowa, munkatshi mua nzambi mikuabo? Nganyi udi bu wewe, udi ne butumbi bua tshijila, udi utshinyisha bantu ne bienzedi bia butumbi, udi wenza malu a kukema? Wewe wakolola tshianza tshiebe ne buloba buakabanda. Mu luse luebe wewe wakalombela bantu bawakuhikula, wewe wakabenzesha mu bukole buebe to ne ku muaba webe wa tshijila. Bantu bakunvua lumu, bakutshina, mikemu yakukuata Bena Peleshete. Bakelenge ba Edome bakukema, balume bakole ba Moaba badi bazakala, bantu bonso ba mu buloba bua Kanana bakujimina. Buowa ne ditshina biakubakuata, bualu bua bukole bua diboko diebe bobo badi bashikama holâ bu mabue, to ne hasabuka bantu bebe, Yehowa, tô ne hasabuka bantu bawakahikula. Wewe neulue nʼabo, neubateke mu mukuna wa buhianyi buebe, muaba uwakusungula, Yehowa, ne, Nenshikamemu, muaba wa tshijila, uwakajadika ne bianza biebe. Yehowa neakokeshe bantu tshiendelele. Bualu bua tubalu tua Palo ne makalu andi ne masalayi akadi enda ha nyima ha tubalu biakaya mu mai manene ne Yehowa wakahingasha mai ha mutu habo, kadi Bena Isalele bakenda ha buloba bûme munkatshi mua mai manene. Mîyama, muprofete mukashi, muanʼabo mukashi ne Alona, wakangata tshisanji mu tshianza tshiandi, ne bakashi bonso bakamulonda ne bisanji, benda batuhika. Mîyama wakabambila ne, Nuimbile Yehowa musambu, bualu bua yeye wakatamba bukole ne butumbi buandi, wakela kabalu ne muntu wakadi wenda ha nyima haku mu bunene bua mai manene. Mose wakalombela bantu bua kuyabo ku mpala bumuke ku Dishiba Dikunze, bakaya mu tshihela tshia Shû bakaya mu tshihela matuku asatu, kabakasangana mai. Hakaluabo ku Mala kabakamanya mua kunua mai a Mala, mai akadi ne bululu, nunku balodiha muaba au ne, Mala. Bantu baka tontolola Mose ne, Netunue tshinyi? Yeye wakadila kudi Yehowa, ne Yehowa wakamulesha mu tshi, wakawela mu mai, mai akalua mimpe. Yehowa wakela nʼabo tshifufu, wakabateta, wakabambila ne, Binuatumikila di dia Yehowa Nzambi wenu, binuenza malu adi mimpe ku mesu kuandi, ne binuateleja matshu kudi mikenji yandi, binuenza mei andi onso, tshiena nnutumina nansha disama dimue dinakatumina Bena Ejipitu, bualu bua meme ndi Yehowa udi unuondaha. Bakalua ku Elima kuakadi mpokolo ya mai dikumi ne ibidi, ne mabue makumi muanda mutekete bakashikamaku hehi ne mai. Bakabika mu Elima ne Bena Isalele bonso, bakalua mu tshihela, dina diatshi Sina, hankatshi ha Elima ne Sinai. Bakafika nunku dituku dia dikumi ne ditanu dia ngondo muibidi hakumukabo mu buloba bua Ejipitu. Bena Isalele buonso buabo bakajiana Mose ne Alona mu tshihela. Bena Isalele bakabambila ne, Biakadi bimpe bua tuetu kufua mu Ejipitu ku tshianza tshia Yehowa hatuakashikama hadi bivuadi bia munyinyi ne hatuakukutshika mafu ne bidia, kadi nuenu nuakuluila nʼetu mu tshihela etshi bualu bua kushiha tshisumbu etshi tshionso ne nzala. Yehowa wakambila Mose ne, Mona, nennulokeshile bidia bia mu diulu, bantu nebaye, nebabisangishe ku dituku bikumbane ku dituku bikumbane. Nembatete ne badi benda mu di dianyi, anyi? Mu dituku disambombo nebalongolole bidibo bangate, bikale tshituha ha mutu ha tshituha tshidibo basangisha ku dituku ku dituku. Mose ne Alona bakambila Bena Isalele bonso ne, Dilolo nenumanye ne, Yehowa wakunuluhula mu buloba bua Ejipitu, ne dinda nenumone butumbi bua Yehowa, bualu bua Yehowa udi munvue munudi numujiana, tuetu tudi banganga bua nudi nutujiana? Mose wakamba ne, Halua Yehowa kunuha munyinyi dilolo ne kunukutshisha bidia ne dinda, bualu bua Yehowa udi munvue bu munudi numujiana, tuetu tudi banganyi? Kanuena nutujiana, nudi nujiana Yehowa. Mose wakambila Alona ne, Ambila tshisumbu tshionso tshia Bena Isalele ne, Luai ha buihi ku mpala kua Yehowa, bualu bua yeye wakunvua tshitanu tshienu. Hakadi Alona wambila tshisumbu tshionso tshia Bena Isalele nunku, bakatangila ku tshihela, ne monai, butumbi bua Yehowa buakamueneka mu ditutu. Yehowa wakambila Mose ne, Nakunvua tshitanu tshia Bena Isalele, ubambile ne, Dilolo nenudie munyinyi, dinda nenukute bidia, nuenu nenumanye ne, Meme ndi bianyi Yehowa, Nzambi wenu. Hakalua dilolo nkuadi yakalua, yakabuikila tshitudilu, dinda dime diakadi dinyunguluka tshitudilu. Kakahanda dime diakadi hanshi, monai, tshintu tshikese tshibulunge tshiakadi ha tshihela, tshiakadi tshikese bu dime dikuatakane ha buloba. Hakatshimonabo, Bena Isalele bakakemangana ne, Etshi ntshinyi? bua bobo kabakatshumanya Mose wakabambila ne, Tshidi bidia biakunuha Yehowa bua kudia. Tshidi tshintu tshiakunuambila Yehowa ne, Muntu ne muntu adisangishilebi mudiye mua kudia, tshihiminu ku muntu ne muntu, muntu ne muntu adisangishilebi bu bungi bua bantu ba mu ntenta wandi. Bena Isalele bakenza nunku, bakuabo bakasangisha bia bungi, bakuabo bakasangisha bikese. Hakabidikishabo ne tshihiminu, muntu wakadi usangisha bia bungi bintu kabiakashala kudiye, ne muntu wakadi usangisha bikese kakadi ne nzala, muntu ne muntu wakadisangishilabi bu muakamanyeye mudiadieye. Mose wakabambila ne, Muntu kabishiyi tô ne dinda. Kadi bobo kabakitabusha dî dia Mose, bakuabo bakabishiya tô ne ku dinda, bishi biakabuelamu, bidia biakanunka muhuya mubi, Mose wakadi nʼabo tshiji. Bakabisangisha buatshia-buatshia, muntu ne muntu bu muakamanyeye mudiadieye, ne hakatema munya, bidia biakenguluka. Hakalua dituku disambombo, bakasangisha bituha bibidi, bihiminu bibidi ku muntu ne ku muntu, ne bakulu ba munkatshi muabo Bakalua, bakamanyisha Mose. Yeye wakabambila ne, Edi ndî diakuamba Yehowa ne, Makelela udi dituku dia kuikisha dia tshijila, dituku diakadijidila Yehowa nulambe bidia ne munyinyi binudi basue, ne bintu bionso bidi bishala, nubitekele bua kudia makelela. Bakalekela bidia tô ne ku dinda bu muakamba Mose, ne bidia kabiakabola, ne bishi kabiakabuelamu. Mose wakamba ne, Nudie bintu ebi lelu, bualu bua edi ndituku diakadijidila Yehowa, kanuena nubisangana mu mpata lelu. Nudisangishe matuku asambombo, kadi dituku dia muanda mutekete didi dijidila, kabiena bikalaku dituku adi. Hakalua dituku dia muanda mutekete, bakuabo bakaya kusangisha bidia, kadi kabakabisangana. Yehowa wakambila Mose ne, Nenuhidie kutumikila mikenji ne mei anyi musangu bule munyi? Monai, Yehowa wakunuha dituku dijidila, nunku yeye wakunuha bidia bia matuku abidi ku dituku disambombo, muntu ne muntu ashale mu muaba wandi, kaluhuki mu muaba wandi dituku dia muanda mutekete. Nunku bantu bakikisha dituku dia muanda mutekete. Bena Isalele bakabikila bidia abi ne, Mana Tshiakadi tshintu tshitoke tô bu ntete ya conandre, tshiakadi tshintu tshia kutua kuimpe bu mikata mienza ne bintshi. Mose wakamba ne, Etshi ntshintu tshiakuamba Yehowa ne, Nushale ne tshihiminu tshia bintu ebi tô ne ku bikondo bienu bionso, bua nuenu numone bidia binakanudisha nʼabi mu tshihela, hanakanuhatula mu buloba bua Ejipitu. Mose wakambila Alona ne, Angata tshivuadi, tekamu tshihiminu tshia bidia abi tente, ubiteke ku mesu kua Yehowa, nushale nʼabi tô ne ku bikondo bienu bionso. Alona wakabiteka ku mpala kua Mushete wa Yehowa bu muakambila Yehowa Mose. Bena Isalele bakadia bidia abi tô bidimu makumi anai, tô ne hakaluabo mu buloba muakadi bantu, baka dia bidia abi tô ne hakaluabo ku matshika a buloba bua Kanâna. Tshihiminu etshi tshidi bu tshia dikumi tshia épha. Bena Isalele bakabisha luendu luabo mu tshihela tshia Sinai, bakashikama mu Lefidima bu muakamba Yehowa, kabakasanganamu mai a kunua. Nunku bantu bakatandangana ne Mose, bakamba ne, Utuhe mai a kunua Mose wakabambila ne, Nudi nutandangana nʼanyi bualu kai? Nudi nuteta Yehowa munyi? Bantu bakadi ne nyota, bakatontolola Mose, bakamba ne, Wakuluila nʼetu ku Ejipitu bua kutushiha ne bana betu ne bimuna bietu ne nyota munyi? Mose wakadila kudi Yehowa, wakamba ne, Nengenzele bantu aba tshinyi? Bobo badi bamba kunkuma ne mabue. Yehowa wakambila Mose ne, Uye biebe ku mpala kua bantu, ne bakulu ba Bena Isalele baye nʼebe, angata mulangala webe mu tshianza, uwakakuma nʼau musulu, ya biebe. Mona, meme nengimane ku mpala kuebe ha mutu ha dibue dia Holeba, wewe neukume dibue ne mai neahatuke, bantu banue mai Mose wakenza nunku ku mesu kua bakulu ba Bena Isalele. Bakidika dina dia muaba au ne, Masa ne Meliba, bualu bua kutontolola kua Bena Isalele ne bualu bua bakatela Yehowa ne, Yehowa udi munkatshi muetu, anyi? Amaleka wakalua, wakaluangana ne Bena Isalele mu Lefidima. Mose wakambila Yoshua ne, Utusunguile bantu baye kuluangana ne Bena Amaleka. Makelela nengimane ha mutu ha mukuna ne mulangala wa Nzambi mu tshianza tshianyi. Yoshua Wakenza bu muakamuambila Mose, wakasangana ne Bena Amaleka Mose ne Alona ne Hû bakaya ha mutu ha mukuna. Hakabandisha Mose tshianza tshiandi Bena Isalele bakatamba bukole, ne hakahuekesheye tshianza tshiandi, Bena Amaleka bakatamba. Kadi bianza bia Mose biakanema bujitu; bakangata dibue, bakaditeka ku nyima ne yeye wakashikama ha mutu hadi, ne Alona ne Hû bakabandisha bianza biandi, umue ku luseke lukuabo, umue ku luseke lukuabo, ne bianza biandi biakakoleshibua to ne hakabuela diba. Yoshua wakahita Amaleka ne bantu bandi bukole ne muele wa nvita. Yehowa wakambila Mose ne, Ufunde bualu ebu mu mukauda bu tshivulukidi, ububadile mu matshu a Yoshua ne, Meme nenjimishe tshivulukidi tshia Amaleka muinshi mua diulu. Mose wakashila tshioshelu, wakidika dina dia tshi ne, Yehowa-nisi, wakamba ne, Yehowa wakaditshiha, Yehowa neuhingane ne Bena Amaleka nvita ku tshikondo ku tshikondo. Yetelo, mubuki wa Midiyana, tatu-muenu wa Mose, wakunvua malu onso akenzela Nzambi Mose ne Bena Isalele, bantu bandi, ne muakalua Yehowa ne Bena Isalele mu Ejipitu. Yetelo, tatu-muenu wa Mose, wakangata Sipola, mukashi wa Mose, hakadiye mumutume, ne bana bandi balume babidi, dina dia mukuabo ne, Geshoma, bualu bua Mose wakamba ne, Nakadi muenyi mu buloba bua bende. Dina dia mukuabo ne, Eliezê, bualu bua Mose wakamba ne, Nzambi wa tatuʼanyi wakadi mukuatshishi wanyi, wakansungila ku muele wa nvita wa Palô. Yetelo, tatu-muenu wa Mose, wakalua ne bana bandi balume ne mukashi wandi kudi Mose mu tshihela hakadiye ushikama ku mukuna wa Nzambi. Yeye wakambila Mose ne, Meme tatuʼebe-muenu, Yetelo, nakukuluila ne mukashi webe ne bana bandi ba balume babidi. Mose wakaya kusangakena ne tatuʼandi-muenu, wakamukukuila, wakatuangana nʼandi mishiku, bakakonkangana bua malu abo, bakabuela mu ntenta. Mose wakambila tatuʼandi-muenu malu onso akenzela Yehowa Palô ne Bena Ejipitu bualu bua Bena Isalele, ne bua makenga akabakuata mu nshila, ne muakabasungila Yehowa. Yetelo wakasanka bua malu mimpe onso akenzela Yehowa Bena Isalele, bualu bua yeye wakabasungila mu bianza bia Bena Ejipitu. Yetelo wakamba ne, Yehowa avudishibue disanka, wakanusungila mu bianza bia Bena Ejipitu ne mu bianza bia Palô, wakahatula bantu mu bianza bia Bena Ejipitu. Katataka ndi mumanye ne, Yehowa udi utamba nzambi yonso buene, bualu bua wakahatula bantu mu bianza bia Bena Ejipitu hakabaleshabo dikamakama. Yetelo, tatu-muenu wa Mose, wakoshila Nzambi nyama ya mulambu, ne Alona ne bakulu ba Bena Isalele bakalua kudia bidia ne tatu-muenu wa Mose ku mesu kua Nzambi. Hakatshiabu, bakashikama Mose bua kulumbuluila bantu bilumbu, bantu bakimana ku mpala kua Mose dinda tô ne ku dilolo. Hakatangila tatu-muenu wa Mose malu onso akenzeleye bantu, yeye wakamba ne, Wewe udi wenzela bantu tshinyi? Udi ushikama nkayebe ne bantu bimana ku mpala kuebe dinda tô ne ku dilolo munyi? Mose wakambila tatuʼandi-muenu ne, Bualu bua bantu badi balue kundi bua kuebesha Nzambi malu. Bikalabo ne tshilumbu, badi balue kundi, ne meme ndi ndumbulula hankatshi ha muntu ne mmena mutumba nʼandi, ndi mbamanyisha mei a Nzambi ne mikenji yandi. Tatu-muenu wa Mose wakamuambila ne, Bualu ebu bûdi wenza kambuimpe. Wewe neuhange bulelela, ne wewe ne bantu badi nʼebe bujitu bua bualu ebu budi bukutamba bukôle, wewe nkayebe kuena mua kubuenza. Unvua dî dianyi, nenkuhe lungenyi, ne Nzambi neikale nʼebe, wewe wikale muakuidi wa bantu kudi Nzambi, Ulue biebe ne malu onso kudi Nzambi. Neubamanyishe mei a Nzambi ne mikenji, neubaleshe nshila udibo ne bua kuendamu, ne mudimu udibo ne bua kuenza. Bualu bukuabo, usungule munkatshi mua bantu bonso balume badi ne lungenyi lule, badi batshina Nzambi, bena bulelela, badi bakina mbueshilu, ubateke ku mutu kua bantu bu bakokeshi ba bantu tshinunu ne ba bantu lukama ne ba bantu makumi atanu ne ba bantu dikumi. Bobo nebalumbuluile bantu bilumbu matuku onso bobo nebalue kûdi ne bilumbu binene, kadi bobo nebakose bilumbu bikese; nunku badi mua kukumatshisha. Biwenza nunku, ne Bikala Nzambi numuambile dî diandi nunku, wewe neumanye mua kuikala ne bukole ne bantu nebaye ku miaba yabo talalâ. Mose wakitabusha di dia tatuʼandi-muenu, wakenza mei onso akambeye. Mose wakasungula balume ba lungenyi lule ba munkatshi mua Bena Isalele, wakabateka bakokeshi ha mutu ha bantu, bakokeshi ba bantu tshinunu ne ba bantu lukama ne ba bantu makumi atanu ne ba bantu dikumi. Bobo bakalumbuluila bantu bilumbu matuku onso, bakalua ne bilumbu bikole kudi Mose, ne bobo bakakosa bilumbu bikese. Mose wakitabusha bua tatuʼandi-muenu ahingane, yeye wakaya mu nshila wa ku buloba buandi. Hakadi Bena Isalele bamane kuluhuka mu buloba bua Ejipitu ngondo isatu, mu dituku adi mene bakafika mu tshihela tshia Sinai. Hakumukabo ku Lefidima ne hakafikabo ku tshihela tshia Sinai, bakashikama mu tshihela, Bena Isalele bakashimika ntenta ku mpala kua mukuna. Mose wakabanda ha mukuna kudi Nzambi, ne Yehowa wakamubikila mu mukuna, wakamba ne, Wewe newambile ba mu nsubu wa Yakoba nunku, neumanyishe Bena Isalele ne, Yehowa udi wamba ne, Nuenu nuakutangila malu anakenzela Bena Ejipitu, ne bu munakanutuala ha mahuahua a nyunyu wa mukanku, bu munakalua nʼenu kundi meme. Binuatumikila dî dianyi, ne binuanemeka tshihungidi tshianyi, nuenu nenuikale bantu banyi ba munkatshi mua bantu bonso, bualu bua buloba buonso mbuanyi. Nuenu nenuikale kundi bu bukelenge bua bakuidi, bu tshisamba tshia tshijila. Â mei audi mua kuambila Bena Isalele. Mose wakalua, wakabikila bakulu ba bantu, wakabamanyisha mei onso akamuambila Yehowa. Bantu bonso bakamba hohamue ne, Netuenze mei onso akutuambila Yehowa Mose wakambila Yehowa mei akamba bantu. Yehowa wakambila Mose ne, Mona, ndi mulue kudi mu ditutu difike, bua bantu bunvue hanayikila nʼebe, bobo bitabushe di diebe tshiendelele. Mose wakamanyisha Yehowa mei a bantu. Yehowa wakambila Mose ne, Ya biebe kudi bantu, ubajidike lelu ne makelela, bobo bauvu-we bilulu biabo, badilongolole ku dituku disatu, bualu bua Yehowa neahueke ha mukuna wa Sinai ku mesu kua bantu dituku disatu. Wewe ujidike nshila ya ku mukuna, wambile bantu ne, Nudimuke, kanuyi ku mukuna, kanûlengi tshianza, muntu udi ulenga mukuna tshianza nebamushihe. Muntu kamulengi tshianza nansha, kadi nebamushihe ne mabue anyi nebamutahe ne difuma, bikaleye nyama anyi muntu, yeye kena wikala ne muoyo Helabo mpungi musangu mule, bantu nebalue ku mukuna. Mose wakumuka ku mukuna, wakahueka kudi bantu, wakabidika bantu ne bobo bakuvuwa bilulu biabo. Yeye wakambila bantu ne, Nudilongolole ku dituku disatu, kanuyi ha buihi ne bakashi nansha. Hakalua dituku disatu ne dinda, makubakuba ne miele ya nvula ne difutu difike biakadi ha mukuna, ne di dia mpungi diakatamba bukole, bantu bonso bakadi mu tshitudilu bakazakala. Mose wakaluhuka mu tshitudilu ne bantu bua kusangakena ne Nzambi, bobo bakimana kuinshi kua mukuna. Mukuna wa Sinai wonso wakadi ne muishi, bualu bua Yehowa wakahueka ha mutu hau mu kahia, muishi wakabanda bu muishi wa tshikutu, mukuna wonso wakakanka bikole. Hakakola dî dia mpungi bikole bikole, Mose wakela dî ne Nzambi wakitaba kudiye ne dî diandi. Yehowa wakahueka mu diulu, wakalua ha mutu ha mukuna wa Sinai. Yehowa wakabikila Mose ku mutu kua mukuna, ne Mose wakabanda. Yehowa wakambila Mose ne, Uhueke biebe, udimushe bantu, kabalu ha buihi bua kumona Yehowa, bungi buabo nebafue. Bakuidi bonso badi balue hehi ne Yehowa badijidile, bua Yehowa kabashihi. Mose wakambila Yehowa ne, Bantu kabena mua kulua ku mukuna wa Sinai bualu bua wewe wakamba ne, Ujidike mukuna, ûjidile Yehowa wakamuambila ne, Ya, hueka biebe, wewe neuhingane, wewe ne Alona kadi bakuidi ne bantu kabalu ha buihi nansha, bua Yehowa kabashihi. Nunku Mose wakahueka kudi bantu, wakabamanyisha. Nzambi wakamba mei â onso ne, Ndi bianyi Yehowa, Nzambi webe, wakakuhatula mu buloba bua Ejipitu, mu nsubu wa buhika. Kuikadi ne nzambi mikuabo ne meme hohamue. Kudisongedi luhingu anyi tshifuanyikishi tshia tshintu tshia mu diulu anyi tshia tshintu tshia hanshi ha buloba anyi tshia tshintu tshia mu mai adi muinshi mua buloba. Kubinaminyi, kubitendeledi, bua meme Yehowa, Nzambi webe, ndi bianyi Nzambi wa mukau, ntu ngatumina bana ba tshihungu tshisatu anyi tshinai badi hanyi lukuna mibi ya batatuʼabo. Ntu ngalesha bihungu tshinunu badi bansue ne badi benza mikenji yanyi luse lujalame. Kutedi dina dia Yehowa, Nzambi webe, tshitelatela, bua Yehowa kena ubingisha muntu udi utela dina diandi tshitelatela. Uvuluke dituku dia Lumingu, udijidile. Ukuate mudimu webe matuku asambombo, wenza midimu yebe yonso, kadi dituku dia muanda mutekete didi Lumingu lua Yehowa, Nzambi webe Dituku adi kuenji mudimu, nansha wewe nansha muanʼebe wa balume nansha muanʼebe wa bakashi nansha muhika webe mulume nansha muhika webe mukashi nansha bimuna biebe nansha muenyi udi ku mbelu kuebe, bualu bua Yehowa wakafuka diulu ne buloba ne mai manene ne bintu bionso bidimu matuku asambombo, wakikisha biandi dituku dia muanda mutekete, nunku Yehowa wakalengesha dituku dia muanda mutekete, wakadijidila. Unemeke tatuʼebe ne mamuʼebe, bua matuku ebe ikale a bungi mu buloba budi Yehowa, Nzambi webe, ukuha. Kushihianganyi. Kuendi masandi. Kuibi. Kudingidi mukuenu. Kukuna mutshima webe ku nsubu wa mukuenu, kukumi mutshima webe ku mukashi wa mukuenu anyi ku muntu wandi mulume anyi ku muntu wandi mukashi anyi ku ngombe wandi anyi ku mpunda wandi anyi ku tshintu tshionso tshia mukuenu. Bantu bonso bakatangila makubakuba ne miele ya nvula ne di dia mpungi ne muishi ha mukuna, hakamonabo malu â, bakatshina, bakimana ha bule. Bakambila Mose ne, Wakula biebe nʼetu, netunvue, kadi biakula Nzambi nʼetu, netufue. Mose wakambila bantu ne, Kanutshinyi, bualu bua Nzambi wakulua bua kunuteta, ditshina diandi dikale ku mpala kuenu, bua nuenu kanuenji malu mabi. Bantu bakimana kule, ne Mose wakalua hehi ne difutu difike hakadi Nzambi. Yehowa wakambila Mose ne, Wewe wambila Bena Isalele ne, Nuenu nkayenu nuakumona bu munakusomba nʼenu mufume mu diulu. Kanuenji nzambi mikuabo bua kuikala hehi nʼanyi nzambi ya tshiamu tshia argent anyi nzambi ya tshiamu tshia or, kanuyenji. Nungashile tshishihelu tshia buloba, nufile ha mutu hatshi milambu ya kuosha, ne milambu ya kuvuisha nʼai ditalala, ne mikoko yenu ne ngombe yenu, ku miaba yonso kundi nnuvuluisha dina dianyi, nendue kunudi, nennusankishe. Binuangashila tshioshelu tshia mabue, kanusongi mabue ne biamu, bualu bua binuâheya ne tshiamu, nuenu nuakuona mabue au. Kanubandi ku tshioshelu tshianyi ha tshibanda, bantu kabatangidi butaka buebe. Ei idi mikenji ludi mua kuteka ku mpala kuabo. Biwasumba muhika, Muena Ebelu, yeye neakukuatshile mudimu bidimu bisambombo, ne tshidimu tshia muanda mutekete yeye neahete budishikaminyi hatuhu. Bialueye nkayandi, neaye biandi nkayandi, bikaleye mubake, nunku mukashi wandi neaye nʼandi. Biamuha mukelenge wandi mukashi ne biamulelela mukashi nansha bana ba balume nansha bana ba bakashi, mukashi ne bana bandi nebikale ba mukelenge wandi, yeye muhika neaye nkayandi. Biamba muhika ne, Ndi musue mukelenge wanyi ne mukashi wanyi ne bana banyi, tshiena musue kuheta budishikaminyi, nunku mukelenge wandi nealue handi kudi balumbuluishi, nealue handi ku tshibi anyi ku tshibanda tshia tshibi ne mukelenge wandi neatubuishe ditshu diandi ne tshiamu ne yeye neamukuatshile mudimu tshiendelele. Biahana muntu muahandi mukashi bu muhika, yeye kena uluhuka bu bahika balume. Bikaleye kayi musankishe mukelenge wakamubaka, nunku yeye neitabushe ne bamuhikule, kadi yeye kena mua kumuhana kudi ba bende bualu bua yeye wakamudinga. Biamubakisheye kudi muanʼandi wa balume, yeye neamuenzele bu mu tshilele tshia bana ba bakashi. Biangateye mukashi mukuabo, yeye kena mua kuhuekesha bidia biandi ne bilulu biandi ne bilele bia bantu bia kubakangana. Bikaleye kayi mumuenzele malu â asatu, nunku mukashi udi mua kuya tshianana, kakuyi bua argent. Muntu udi ukuma mukuabo, udi umushiha, nebamushihe yeye bulelela. Bikala muntu kayi mumualamme mu musokoka, kadi Nzambi wakamuha mu tshianza tshiandi (wakamushiha ku mpukahuka), nunku nenkulongoluele muaba wa yeye kunyemenamu. Bialua muntu ne luonji lua kushiha mukuandi mu budimu, wewe neumumushe ku tshioshelu tshianyi, bua kumushiha. Muntu udi ukuma tatuʼandi anyi mamuʼandi, nebamushihe bulelela. Muntu udi wiba muntu mukuabo, udi umuhana anyi bamusangana mu bianza biandi, nebamushihe bulelela. Muntu udi uhenda tatuʼandi anyi mamuʼandi, nebamushihe bulelela. Bialuangana balume ne biakuma umue mukuabo ne dibue anyi biamututeye tshisusu, kena umushiha kadi yeye udi ulala ha bulalu, biabikeye kabidi ne udi wenda ne mulangala wandi, muntu wakamukuma neabinge, kadi yeye neamufute bua matuku akalaleye hanshi, ne mushinga wa kuondahibua kua ndi. Biakuma muntu muhika wandi mulume anyi muhika wandi mukashi ne mulangala, ne biafueye mu tshianza tshiandi, nebamukengeshe bulelela. Kadi biashaleye ne muoyo nansha dituku dimue nansha matuku abidi, kabena bamukengesha bualu bua yeye udi biuma biandi. Bialuangana balume ne badi bakulua mukashi udi ne difu, ne yeye udi utula difu, kadi dikenga dikuabo kadiena dilonda ku nyima, yeye wakamukuma neafutie mulume wandi bintu bidiye musue, yeye neamufute bintu bidi balumbuluishi bamba. Kadi bikala dikenga dikuabo dilonda ku nyima, wewe neufue muoyo ku muoyo, disu ku disu, dinu ku dinu, tshianza ku tshianza, dikasa ku dikasa, udi muoshe mukuabo kahia nebamuoshe kabidi, udi utaha mukuabo mputa nebamutahe biandi, udi ukuma mukuabo mibundabunda nebamukume biandi. Biatuta muntu muhika wandi mulume anyi muhika wandi mukashi ku disu, ne biafuadi, yeye neamumushe ku butaka buandi bualu bua disu diandi. Biahuoleye dinu dia muhika wandi mulume anyi muhika wandi mukashi, yeye neamumushe ku buhika buandi bualu bua dinu diandi. Biakuma ngombe mulume anyi mukashi ne nsengu yandi ne biafueye, nebakume ngombe mabue, kabadi munyinyi wandi nansha, kadi muena ngombe neabinge. Kadi bikala ngombe muikale ne tshilele tshia kukuma bantu nsengu, ne bakamanyisha mukelenge wandi, ne yeye wakahidia kumukanda, biashiheye nansha mulume nansha mukashi, nebakume ngombe ne mabue, nebashihe mukelenge wandi kabidi. Kadi biatekabo biuma bia kudihikula kudiye, yeye neafile biuma bionso bidibo balomba bua kuhikula muoyo wandi. Bikaleye mushihe nansha muana wa balume nansha muana wa bakashi, nebamuenzele nunku bu mudi dilumbulula edi. Biakuma ngombe muhika mulume anyi muhika mukashi ne nsengu, nebafute mukelenge wabo nshekele makumi asatu ya argent, nebakume ngombe ne mabue. Biumusha muntu tshibuikidi tshia ha mutu ha dina, anyi biumbuleye dina kayi uteka tshibuikidi ha mutu, ne biahonamu ngombe anyi kabalu, muena dina neashikishe bualu bimpe, neahe muenʼabi biuma, ne nyama mufue neikale wandi. Biakuma ngombe wa muntu ngombe wa muntu mukuabo, biamushiheye, bobo nebahane ngombe udi ne muoyo, nebabanyangane mushinga wandi, nebabanyangane ngombe mufue, kabidi. Anyi bikala ngombe muikale ne tshilele tshia kukuma ne nsengu diambedi, ne bikala mukelenge wandi kayi mumulame, yeye neafute ngombe ku ngombe, ne ngombe mufue neikale wandi. Biba muntu ngombe anyi mukoko, biamushiheye anyi biamuhaneye, yeye neahingashe ngombe itanu ku ngombe umue, ne nukoko mai ku mukoko umue. Biasanganabo muibi mubuele mu nsubu ne biamukumabo ne biafueye, kabena benze mushiku bualu. Biamukuatabo mu munya, nebamusombuele, yeye neahingashe bintu, ne bikaleye kayi ne bintu, nebamuhane bua buibi buandi. Biasanganabo bintu bidi ne muoyo mu tshianza tshiandi, nansha ngombe nansha mpunda nansha mukoko, yeye neahingashe bintu misangu ibidi. Bialekela muntu ngombe wandi mu budimi bua muntu mukuabo, ne biadieye mitshi yandi ya tumuma tukese, yeye neamuhingashile bintu bidi bitamba buimpe bia mu budimi buandi ne bia mu budimi buandi bua nvinyo. Biosha kahia bisumbu bia luosa anyi luosa lua mu budimi, muntu wakatemesha kahia neafute. Biafila muntu argent anyi biuma mu bianza bia mukuandi bua kubilama, ne biabibabo mu nsubu muandi, biasanganabo muibi, yeye neabafute bintu misangu ibidi. Kadi bikalabo kabayi basangana muibi, nunku muena nsubu nealue biandi kudi balumbuluishi, bua bobo bajingulule ne yeye wakalenga biuma bia mukuandi tshianza, anyi. Biafuilanganabo bua tshintu tshionso, nansha ngombe nansha mpunda nansha mukoko nansha bilulu nansha bintu bikuabo bidi bantu bamba ne, Ebu mbualu bua bantu baye kudi balumbuluishi, muntu udi balumbuluishi bahishe yeye neafute mukuandi bintu misangu ibidi. Biafila muntu nansha nyama wa mpunda nansha ngombe nansha mukoko nansha nyama mukuabo kudi mukuandi bua kumiamina, ne biafua nyama, anyi biamutahabo mputa, anyi biamuihatabo ne muntu kayi mumutangile, ditshiha dia Yehowa nedikale hankatshi ha bubidi buabo bua kujingulula ne, Yeye kakalenga bintu bia mukuandi tshianza, ne bitabusha mukelenge wa nyama au nunku, mukuandi kena ne bualu bua kumufuta. Kadi bibabo nyama mu tshianza tshiandi, yeye neafute mukelenge wandi. Bikala nyama muhandibue bihese, yeye nealue ne munyinyi wandi bu tshimanymu tshia bualu, ne yeye kena ufuta bua nyama muhandibue. Biasombesha muntu nansha nyama kai kudi mukuandi, ne biamutahabo mputa anyi biafueye ne muenʼandi kayiku, yeye nealamate bulelela. Kadi bikalaku muenʼandi, yeye kena ne bualu bua kumufuta. Bikaleye mufutshile nyama au bua kuenza nʼandi mudimu, mushinga wakumufutshileye neukumbane. Biateya mulume mukashi utshidi kamama, udi kayi muanze kutangila kudi mulume, ne bialaleye nʼandi, yeye neafile biuma bia dibaka bulelela bua yeye kuikaleye mukashi wandi. Biahidia tatu wa mukashi kumufila kudiye, yeye neafute biuma bu bia dibaka dia bakashi batshidi kamama. Kuitabushi bua muena milongo mukashi ashale ne muoyo. Muntu yonso udi ulala ne nyama nebanshihe bulelela. Muntu udi ushihela nzambi mikuabo nyama, kayi uyishihela Yehowa nkayandi, nebamushihe yeye. Kuenzedi muenyi bualu bubi, kumukengeshi, bualu bua nuenu nuakadi benyi mu buloba bua Ejipitu. Kanukengeshi bakashi ba mu lufuila anyi bana ba nshiya. Biwabakengesha ne biadilabo kundi, meme nengunvuile muadi wabo, ne tshiji tshianyi netshitambe bukole, nennushihe ne muele wa nvita, ne bakashi benu nebikale bakashi ba mu lufuila ne bana benu nebikale bana ba nshiya. Biwasombesha mukuabo muhele wa munkatshi mua bantu banyi argent, kumubadi bu muena dibanza, kumulombi tshia kasombelu. Biwangata tshilulu tshia mukuenu bu tshieya, wewe neutshihingashe kudiye diambedi diba kadiyi dianzekubuela, bualu bua tshiotshi tshidi anu tshiandi tshia kudibuikila nʼatshi, yeye nealale tulu munyi? Hadileye kundi, nemmunvuile, bualu bua meme ndi ne luse. Kutedi dina dia Nzambi tshitelatela, kuhendi mukokeshi wa bantu bebe. Kunengi bua kufila bintu bia kunowa kudi Nzambi, ne nvinyo ûdi ukama. Nufile banʼa bute ba balume kundi. Enzai nunku ne ngombe yenu ne mikoko yenu kabidi, muana neikale ne mamu wandi matuku muanda mutekete, kadi numufile kundi dituku dia muanda mukulu. Nuenu nenuikale bu bantu bajidila kundi kanudi munyinyi wakahandabo kudi nyama ya mu mpata, nuwele kudi mbua. Kumanyishi bakuabo lumu ludi kaluyi lululela. Kubuelakanyi ne bantu babi bualu bua kuikala bu mumanyi wa malu adi kayi malelela. Kulondi ku nyima kua tshisumbu tshia bantu tshinene bua kuenza malu mabi, kuikadi bu mu manyi wa bualu munkatshi mua bantu badi basangisha dî diabo bua kudibingisha mu tshilumbu tshidi ka tshiyi tshilelela. Kueyemenyi buhele bua muntu muhele mu dikosa dia tshilumbu tshiandi. Biwasangana nansha ngombe nansha mpunda bia muntu udi nʼebe lukuna biya ha bule, uhingashe nyama wandi kudiye kabidi. Biwatangila mpunda wa muntu udi nʼebe lukuna muhone muinshi mua bujitu buandi, kushiya mpunda nunku, kadi umukuatshishe ne bujitu buandi. Kuhidi kubingisha muntu muhele mu tshilumbu tshiakane tshidiye nʼatshi bualu bua buhele buandi. Shila malu a mushimi kaba, kanushihi muntu muimpe udi kayi ne bualu meme tshiena mbingisha muntu mubi. Kanuitabushi tshintu tshia mbueshilu, bualu bua tshintu tshia mbueshilu tshidi tshifofomesha muntu udi ne mesu matabale, tshidi tshikudimuna mei a muntu muakane. Kanukengeshi muenyi wa munkatshi muenu, bualu bua nuenu nudi bamanye mutshima wa muenyi, nuenu nuakadi benyi mu buloba bua Ejipitu. Mu bidimu bisambombo nukune bintu mu buloba, nuhuole bintu bidi bikumbana, kadi tshidimu tshia muanda mutekete nushiye buloba bua kututuka ne bualu bua bantu bahele ba munkatshi muenu badie bintu, ne bintu bidibo bashiye, nyama ya mu mpata neyibidie. Nuenze mitshi yenu ya tumuma tukese nunku ne mitshi ya olive kabidi. Nuenze mudimu wenu matuku asambombo kadi nuikishe mu dituku dia muanda mutekete, bua ngombe webe ne mpunda webe bikishe ne muana wa balume wa muhika webe mukashi, ne muenyi basangale. Nudimuke mu malu onso anakanuambila, kanuambilanganyi dina dia nzambi mikuabo, bantu bakuabo kabunvu dina adi mukana muebe. Nuenu nenudie bidia bia disanka ku mesu kuanyi misangu isatu ku tshidimu ku tshidimu. Nenudie bidia bidi kabiyi ne luevene matuku muanda mutekete, mu tshikondo tshinakasungula mu ngondo wa Abiba (bualu bua nuakaluhuka mu Ejipitu mu ngondo au) muntu kalu ku mesu kuanyi ne bianza bituhu, nenudie bidia bia disanka hanuahuola bintu bia kumudilu binuakakuna mu madimi, nudie bidia bia disanka kabidi kunshikidilu kua tshidimu hanuashikisha kusangisha bintu bionso bia mu madimi. Balume bonso nebalue ku mesu kua Mukelenge Nzambi misangu isatu ku tshidimu ku tshidimu. Kanuntendeledi ne mashi a nyama mishiha ne bidia bidi ne luevene hohamue kanushiyi manyi a nyama ya milambu yanyi to ne ku dinda Bintu bia kumudilu binudi nu huola mu madimi, nulue nʼabi mu nsubu wa Yehowa, Nzambi wenu. Kulambi muana wa mukoko ne mabele a mamu wandi. Mona, ndi nfuma muanjelo ku mpala kuebe, bua kukulama mu nshila ne bua kulua nʼebe mu muaba unakakulongoluela. Udimuke ku mpala kuandi, unvue di diandi, kumufuishishi tshiji, yeye kena ukubuikidila bubi buebe bualu bua dina dianyi didi munda muandi. Kadi biwunvua di diandi ne biwenza mei onso andi nkuambila, nunku meme nengikale bu muena lukuna kudi bantu badi nʼebe lukuna, ne bu muena nvita kudi bantu badi basue kusangana nʼebe. Bualu bua muanjelo wanyi neaye ku mpala kuebe, nealue nʼebe kudi Bena Amole ne kudi Bena Pelizi ne kudi Bena Hiti ne kudi Bena Kanana ne kudi Bena Hiwi ne kudi Bena Yebuse, ne meme nembashihe. Kuinaminyi nzambi yabo, kuyitendeledi, kuenji mudibo benza, kadi ubiele hanshi, ushihe bibumba biabo. Nuenu nenutendelele Yehowa, Nzambi wenu, yeye neayudishe disanka ku bidia bienu ne ku mai enu, nennumushile disama munkatshi muenu. Kakuena mukashi udi utula difu, kakuena mukashi udi wikala nkumba mu buloba buenu, nenkumbashe bungi bua matuku enu. Nentume dishina dianyi ku mpala kuebe, nentshinyishe bantu bonso baudi ufika kudibo, nenkobamishe bantu bonso badi nʼebe lukuna nyima yabo. Nentume tuishi ku mpala kuebe bualu bua kukuihatshila Bena Hiwi ne Bena Kanâna ne Bena Hiti. Tshiena mbihata mu tshidimu tshimue bua buloba kabulu tshianana, ne nyama ya mu mpata kayikumbanyi ku mesu kuebe. Nembihate bilulu bitulu tô ne hakakumbana ba bungi ne hanuahiana buloba. Nenteke mikalu yenu ku Dishiba Dikunze tô ne ku mai manene a Bena Peleshete, ne ku tshihela tô ne ku musulu wa Pelata, bualu bua meme nenfile bena buloba mu bianza bienu, nuenu nenubihate ku mpala kuenu. Kuhungi nʼabo tshihungidi anyi ne nzambi yabo. Bobo kabena bikala mu buloba buebe bualu bua bobo nebakuenzeshe bua kungenzela malu mabi, biwatendelela nzambi yabo, bualu ebu nebuikale buteyi kûdi. Yehowa wakambila Mose ne, Ulue biebe kudi Yehowa ne wewe ne Alona ne Nadaba ne Abihu ne bakulu ba Bena Isalele makumi muanda mutekete, nuntendelele ha bule. Mose nealue nkayandi hehi ne Yehowa, kadi bobo kabalu hehi nansha, bantu kabayi nʼandi. Mose wakalua, wakamanyisha bantu mei onso akamba Yehowa, ne mikenji yandi yonso, ne bantu bonso bakitaba dî dimue ne, Mei onso akutuambila Yehowa netuênze. Mose wakafunda mei onso a Yehowa mu mukanda, wakabika ne dinda dionso, wakasa tshioshelu kuinshi kua mukuna, ne mabue manene dikumi ne abidi bu bungi bua bisamba bia Bena Isalele. Yeye wakatuma bansongalume ba Bena Isalele, bakoshila Yehowa nyama, bakamushihela ngombe ya milambu ya kuvuisha nʼai ditalala. Mose wakangata tshituha tshibidi tshia mashi, wakateka mu malonga, wakamiamina tshituha tshikuabo tshibidi ha tshioshelu. Wakangata mukanda wa dihungila, wakaubala ku mpala kua bantu, bobo bakamba ne, Mei onso akuamba Yehowa netuênze, netuatumikile. Mose wakangata mashi, wakâmiamma hamʼbidi ha bantu, wakamba ne, Tangilai mashi a dihungila, diakuhunga nʼenu Yehowa bua mei au onso. Hashishe, Mose wakabanda ne Alona ne Nadaba ne Abihu ne bakulu ba Bena Isalele makumi muanda mutekete. Bakamona Nzambi wa Isalele, muinshi mua makasa andi muakadi mabue a saphir, akadi matoke tô bu mubidi wa diulu. Yeye kakalenga tshianza tshiandi ha bantu banene ba Bena Isalele, bakamona Nzambi, bakadia bidia, bakanua. Yehowa wakambila Mose ne, Ulue biebe kundi ha mukuna, wikaleku, nenkuhe mabue adi ne mikenji inakufunda, bua wewe kuyiyisha bantu. Mose wakabika ne Yoshua mukuatshishi wandi, Mose wakabanda mu mukuna wa Nzambi. Yeye wakambila bakulu ne, Nutuindile bienu kunoko tô ne ha bialua kunudi kabidi, ne monai, Alona ne Hû badi nʼenu, muntu udi ne tshilumbu aye biandi kudibo. Mose wakabanda mu mukuna ne difutu diakabuikila mukuna. Butumbi bua Yehowa buakikala ha mukuna wa Sinai, ne difutu diakaubuikila matuku asambombo Dituku dia muanda mutekete yeye wakabikila Mose munkatshi mua ditutu. Dimueneka dia butumbi bua Yehowa diakadi bu kahia kakole ha mutu ha mukuna ku mesu kua Bena Isalele. Mose wakabuela munkatshi mua difutu, wakabanda mu mukuna Mose wakashala mu mukuna munya ne butuku mafuku makumi anai. Yehowa wakambila Mose ne, Wambile Bena Isalele bua kumpeshabo bintu bia kuntendelela nʼabi, nenuangate kudi muntu ne muntu bintu bidi mutshima wandi musue bua kuntendelela nʼabi. Ebi mbintu binudi mua kuangata kudibo or ne argent ne tshiamu tshia mitaku, ne bilulu bia bleu ne bilulu bifikuluke ne bilulu bikunze-kunzû ne bilulu bia lin ne miosa ya mbushi, ne biseba bia bimpanga bina mu mai makunze, ne biseba bia nkonge ne mutshi wa acacia, ne manyi a muinda, manananshi adibo bela mu manyi a kulaba hamʼbidi, ne manyi adi atua dihembu, mabue a mushinga mukole adibo bateka mu efoda ne mu tshiamu tshidibo baluata ha tshiadi. Bobo bangashile tshitendelelu, bua meme kuikala munkatshi muabo. Nutshiase bu bintu binakakulesha ne bu tshidikishilu tshia tshitendelelu ne bu tshidikishilu tshia bintu bia kutekamu. Bobo nebenze mushete wa mutshi wa acacia buludi bua mushete nebuikale coudées ibidi ne tshituha, ne butshiama buau nebuikale coudée umue ne tshituha, ne bule buau bua mulu nebuikale coudée umue ne tshituha. Wewe neulamike tshiamu tshia or mutambe buimpe ha nyima honso ne munda mua mushete kabidi, neuteke tshiamu tshia or ku mibangu ya mushete. Enza biebe nkanu ya or mai, witeka kû mikolo ya mushete, ibidi ku luseke lumue, ibidi ku luseke lukuabo. Enza biebe mitshi ya acacia, lamika tshiamu tshia or ku nseke yai yonso. Neubueshe mitshi ai mu nkanu idi ku nseke ya mushete, bua kutuala nʼai mushete. Mitshi ai neyikale mu nkanu ya mushete, kayumuki nansha. Wewe neuteke mu mushete mabue a dihungila andi nkuha. Wewe newenze tshibuikilu ne tshiamu tshia or mutambe buimpe, buludi buatshi nebuikale coudées ibidi ne tshituha ne butshiama buatshi nebuikale coudée umue ne tshituha. Enza biebe bakeluba babidi ne or mutudibue, ubateke ku matshika a tshibuikilu tshia mushete. Enza mukeluba umue ku butshika bumue ne mukeluba mukuabo ku butshika bukuabo enza bakeluba ne tshibuikilu tshia mushete ne tshituha tshijima tshia or. Bakeluba nebolole mahuahua abo kulu, nebabuikile tshibuikilu tshia mushete ne mahuahua abo, bobo batangilangana mpala, mpala yabo neyikale mitangile ha tshibuikilu tshia mushete. Wewe neuteke tshibuikilu ha mutu ha mushete neubueshe mabue a dihungila andi nkuha mu mushete. Meme ne nsangakene nʼebe aha, nensombe nʼebe ha mutu ha tshibuikilu tshia mushete, hankatshi ha bakeluba badi ha mutu ha mushete, nenkumanyishe malu onso andi nkuhesha bu mikenji kudi Bena Isalele. Wewe newenze mesa a mutshi wa acacia buludi buau nebuikale coudées ibidi, ne butshiama buau nebuikale coudée umue, ne bule buau bua mulu nebuikale coudée umue ne tshituha. Wewe neulamike tshiamu tshia or mutambe buimpe mu nseke yonso, ne ku mpenge kabidi. Enza mushonyi wa or bunene bua butshiama bua tshianza ku matshika onso, enza tshintu tshia or ku matengu onso. Enza nkanu ya or mai, ne teka nkanu ku mikolo mai ya mesa. Teka nkanu hehi ne mpenge ya mesa bualu bua kutuala nʼai mesa Enza biebe mitshi ya acacia, ulamike or ku nseke yai yonso, bua kutuala nʼai mesa. Wewe newenze malonga ne nkuta ne mpanza ne bihanza bia or mutambe buimpe. Teka bidia bilesha ha mesa au matuku onso ku mpala kuanyi. Wewe newenze tshitekelu tshia minda tshia or mutambe buimpe, nebenze tshitekelu etshi ne or muhite, ne tshishikaminu tshiatshi ne mukolo watshi, tukoho tuatshi ne mahu atshi ne bilongo biatshi nebenze ne tshituha tshimue tshia or mene tshiakenzabo nʼatshi tshitekelu. Enza mahu asambombo ha tshitekelu, mahu asatu ku luseke lumue, mahu asatu ku luseke lukuabo. Uzole tukoho tusatu bu bilongo bia amande mu ditamba dimue, dihu ne tshilongo dihu ne tshilongo, uzole tukoho tusatu bu bilongo bia amande mu ditamba dikuabo, dihu ne tshilongo dihu ne tshilongo, uzole nunku ku matamba asambombo adi masa ku tshitekelu. Enza tukoho binai tua ha tshitekelu bu bilongo bia amande ne mahu atshi ne bilongo bia tshi. Enza dihu ne tshituha tshimue tshia or hankatshi ha mahu abidi, hankatshi ha mahu abidi ku mahu asambombo a ha tshitekelu tshia minda. Bintu ebi bionso ubienze ne tshituha tshimue tshia or, tshintu tshijima tshienza ne tshituha tshimue tshia or muedibue mutambe buimpe. Enza minda muanda mutekete, bualu bua kutemenayi muaba udi ku mpala kua tshitekelu. Enza mpandu ne tulonga tukese bia tsiutekelu ne or mutambe buimpe. Enza tshitekelu ne bintu ebi bionso ne ntalanta umue wa or mutambe buimpe. Udimuke biebe bua kuenza bintu bionso bu tshidikishilu tshinakukulesha mu mukuna. Wewe newase tshitendelelu ne bilulu binene dikumi bia lin mutambe buimpe, bilulu bia bleu ne bilulu bikunzubile ne bilulu bikunze-kunzû, ubienze ne bakeluba benjibue ne lungenyi lule. Bule bua tshilulu ne tshilulu nebuikale coudées makumi abidi ne muanda mukulu, ne butshiama buatshi coudées mai, bilulu bionso nebikale ne luidi lumue. Bilulu bitanu nebikale bituangane ne bilulu bitanu bikuabo, binga bilulu bitanu nebikale bituangane ne bilulu bitanu bikuabo. Enza makoha ne muonshi wa bleu ku mibangu ya bilulu idi ituangana, ku tshisumbu ne ku tshisumbu tshia bilulu. Enza makoha makumi atanu ku mibangu ya tshilulu ne makoha makumi atanu ku mibangu ya tshilulu tshikuabo tshidi tshituangana nʼatshi, makoha ikale makanangane. Enza mbote ya or makumi atanu ku mubangu wa tshilulu tshimue, ne mesu a mbote makumi atanu ku mubangu wa tshilulu tshikuabo, bua kutuangasha bilulu, tshitendelelu netshikale bu tshilulu tshimue. Enza biebe bilulu bia miosa ya mbushi dikumi ne tshimue bualu bua kuteka ha mutu ha tshitendelelu. Bule bua tshilulu tshimue nebuikale coudées makumi asatu, ne butshiama bua tshi coudées mai, idikisha bilulu dikumi ne tshimue ne luidi lumue. Utuangashe bilulu bitanu ha buabi, ne utuangashe bilulu bisambombo ha buabi, tshilulu tshisambombo netshikale tshihitakane ku mushiku wa tshitendelelu. Enza makoha makumi atanu ku mibangu ya tshilulu, ne makoha makumi atanu ku mibangu ya tshilulu tshikuabo tshidi tshituangane katshi. Enza mbote makumi atanu ya tshiamu tshia mitaku, ne mesu a mbote ku mibangu ya tshilulu tshikuabo bualu bua kutuangasha bilulu, bua ntenta ikale bu tshilulu tshimue. Tshituha tshia tshilulu tshidi tshibita tshisonga netshilembelele hanshi ku nyima kua tshitendelelu. Tshituha tshidi bule bua coudée ku luseke lumue ne tshituha tshidi bule bua coudée tshiota tshisonga netshikale ku luseke lua tshitendelelu bua kutshibuikila. Enza biebe tshintu tshia biseba bia bimpanga biaka tuabo mu mai makunze-kunzû ne tshia biseba bia mbushi tshia kuteka ha musonga wa tshitendelelu. Uhande mabaya a mitshi ya acacia bua kuimanyika kulu mu tshitendelelu. Bule bua dibaya dimue nebuikale coudées dikumi ne butshiama buadi nebuikale coudée umue ne tshituha. Mabaya abidi neikale ne mpoko ibidi bua kutuângasha, enza mabaya onso a tshitendelelu nunku. Enza mabaya makumi abidi bua kuteka ku luseke lua ku Sude lua tshitendelelu. Enza biamu bidi ne mahoka ne tshiamu tshia argent makumi anai ku mabaya makumi abidi, mahoka abidi ku dibaya ne ku dibaya, bualu bua kuelamu tutshi tua tutuhu. Enza mabaya makumi abidi a kutoka ku luseke lua tshitendelelu lua ku nôde, ne biamu bia mahoka ne tshiamu tshia argent makumi anai, mahoka abidi ku dibaya dimue, bualu bua kuelamu tutshi tua bituhu. Enza mabaya asambombo a kutoka ku wesete ku luseke lua ku nyima. Enza mabaya abidi a kutoka ku matumba a tshitendelelu adi ku nyima. Mabaya ikale mashilangane kuinshi ne matuangane kulu, ku dikoha dia kumudilu, bubidi buau neikale nunku, teka mabaya au ku matumba a tshitendelelu. Enza mabaya muanda mukulu nunku, ne biamu bia mahoka bia argent, mabaya dikumi ne asambombo, biamu bibidi ku dibaya ne ku dibaya. Enza biebe mitshi ya acacia ya kuela ku mabaya atanu adi ku luseke lumue lua tshitendelelu, mitshi itanu ya kuela ku mabaya adi ku luseke lumue ne mitshi itanu ya kuela ku mabaya adi ku luseke lukuabo, ne mitshi itanu ya kuela ku mabaya adi ku nyima. Mutshi udi hankatshi ha mabaya neuhite ku ditumba dimue tô ne ku ditumba dikuabo. Lamika tshiamu tshia or ku nseke yonso ya mabaya ne enza nkanu ya or ya kuelamu mitshi, lamika or ku nseke yonso ya mitshi ei. Wewe neushimike tshitendelelu bu mudi tshileshilu tshinakukulesha mu mukuna. Enza biebe tshilulu tshinene tshia buanda bua bleu ne bukunzubile ne bukunze-kunzu ne bua lin udi mutambe buimpe utshienzeshe kudi bantu badi ne lungenyi lule badi bamanye mua kuenza tshifuanyikishi tshia bakeluba mu tshilulu atshi. Utshilembeleshe ha makunshi a acacia anai adi ne or ku nseke yonso, teka nkanu ya or ku tshilulu, ku bitubuidi binai bia argent bia ha makunshi. Ulembeleshe tshilulu ha bitubuidi, Ulue ne mushete wa Nzambi ku nyima kua tshilulu, tshilulu atshi netshikale hankatshi ha muaba wa tshijila ne muaba mutambe wa tshijila. Wewe neuteke tshibuikilu ha mutu ha mushete wa Nzambi mu muaba mutambe wa tshijila. Teka mesa ku mpala kua tshilulu, ne teka muinda ku luseke lua tshitendelelu ludi ku Sude, neuteke mesa ku luseke lua ku nôde. Enza biebe tshilulu tshia kuteka ku mbelu kua tshitendelelu tshia buanda bua bleu ne bukunzubile ne bukunze-kunzû ne bua lin mutambe buimpe, utshienzeshe kudi muntu udi ne lungenyi lule lua kulengesha. Enza biebe makunshi atanu a acacia adi ne or ku nseke yonso enza bitubuidi biau ne or, ne enza nkanu ya tshiamu tshia mitaku itanu ya kuelaku. Enza biebe tshioshelu tshia mabaya a acacia, buludi bua tshi nebuikale coudées itanu, butshiama buatshi coudées itanu ne bule buatshi bua mulu coudées isatu. Enza bintu bu nsengu ya ngombe ku matumba anai, enza nsengu ne dibaya dimue, lamika tshiamu tshia mitaku ku nseke yonso. Enza bivuadi bia tshiamu bia kumusha nʼabi butue bua tshioshelu, ne bikasu biatshi ne malonga atshi ne bitubuidi bia kukuata nʼabi munyinyi, ne bihanza biatshi, enza bintu ebi bionso ne tshiamu tshia mitaku. Enza tshiamu tshilukibue bu munyingu ne nkanu mai ya tshiamu tshia mitaku ku matumba atshi anai. Teka tshiamu etshi munda mua nseke mai ya tshioshelu ne hankatshi, mu bule buatshi. Enza mitshi ya acacia ya kuela ku tshioshelu, lamika tshiamu tshia mitaku ku nseke yonso ya mitshi. Buesha mitshi ei mu nkanu idi ku nseke ibidi ya tshioshelu bua kutshituala. Utshienze ne mabaya, ushiye munda muatshi mutuhu, utshienze bu munakukulesha ku mukuna. Wewe neulongolole luhangu lua tshitendelelu, ku luseke lua sude enza bilulu bidi bituangane tô ne ku coudées lukama, makunshi makumi abidi ne nkanu ya tshiamu tshia mitaku makumi abidi, bitubuidi bia ku makunshi nebikale bia argent. Ku luseke lua ku nôde kabidi, enza bilulu bidi bituangane to ne ku coudées lukama, ne makunshi makumi abidi ne nkanu ya tshiamu tshia mitaku makumi abidi; bitubuidi bia ku makunshi nebikale bia argent. Ku butshiama bua luhangu ku luseke lua ku wesete, enza bilulu bidi bituangane tô ne ku coudées makumi atanu, ne makunshi dikumi ne nkanu dikumi. Butshiama bua luhangu lua ku esete nebuikale coudées makumi atanu. Bilulu bia ku luseke lua tshibi nebikale coudées dikumi ne itanu, ne makunshi abi asatu ne nkanu isatu. Ku luseke lukuabo lua tshibi bilulu nebikale coudées dikumi ne itanu, ne makunshi asatu ne nkanu isatu. Ku mbelu kua luhangu tshilulu netshikaleku tshia buanda bua bleu ne bukunzubile ne bukunze-kunzû ne bua lin mutambe buimpe, tshienjibue kudi mundi wa lungenyi lule, enza makunshi anai ne nkanu mai. Lengesha makunshi onso ne tshiamu tshia argent, ne bitubuidi bia argent ne nkanu ya tshiamu tshia mitaku. Buludi bua muaba wa luhangu nebuikale coudées lukama ne butshiama bualu nebuikale coudées makumi atanu, ne bule bualu bua mulu coudées itanu, ne bilulu bia lin ne nkanu yabi ya tshiamu tshia mitaku. Bintu bionso bidibo bakuata nʼabi mudimu mu tshiendelele ne milonda yonso yatshi, ne milonda yonso ya luhangu luatshi, nebikale bia tshiamu tshia mitaku. Wewe newele dî kudi Bena Isalele bua kuluabo ne manyi a olive a kuela mu muinda, muinda uteme matuku onso. Mu tshitendelelu ku mpala kua tshilulu tshidi ku mpala kua mushete wa Nzambi Alona ne bana bandi balume nebalame muinda dilolo tô ne dinda ku mesu kua Yehowa, bualu ebu nebuikale bu mukenji ku bikondo bienu tshiendelele kudi bana ba Isalele. Ubikile Alona mukuluʼebe kûdi, ne bana bandi balume balue nʼandi ba munkatshi mua Bena Isalele, yeye ankuatshile mudimu wa buakuidi, Alona mene ne Nadaba ne Abihu, Eleazâ ne Itamâ, bana balume ba Alona. Wewe neutelele Alona, mukuluʼebe, bilulu bia tshijila, bidi bitambe buimpe. Wewe neubikile bantu bonso badi ne mitshima ya lungenyi, bantu banakûsha ne lungenyi tente, bua bobo batelele Alona bilulu bia kumujidila, bua yeye ankuatshile mudimu wa buakuidi. Ebi mbilulu bidibo ne bua kutela tshintu tshia kuteka ha tshiadi, ne efoda, ne tshikowelu, ne kazaku ka bibaka bibaka, ne tshilulu ne mukaba, bobo nebatelele Alona ne bana bandi bilulu bia tshijila, bua yeye ankuatshile mudimu wa buakuidi. Bobo bangate or ne bilulu bia bleu ne bikunzubile ne bikunze-kunzû ne bia lin mutambe buimpe. Bobo nebatele efoda ne bintu bia or ne bilulu bia bleu ne bukunzubile ne bikunze-kunzû ne bia lin mutambe buimpe, bintu bidibo benzesha kudi bantu badi ne lungenyi lule. Batele bilulu bikese ha maha bua kutuangasha bituha bia efoda bibidi. Bobo nebenze mukaba wa efoda bu mudibo benza efoda, newikale tshituha tshimue tshia ku efoda, ne bintu bia or ne bilulu bia bleu ne bikunzubile ne bikunze-kunzû ne bia lin mutambe buimpe. Wewe newangate mabue abidi a onyx, ufundehu mena a Bena Isalele, mena asambombo ha dibue dimue ne mena asambombo adi ashala ha dibue dikuabo, balondangane bu mudi kuledibua kuabo. Wenzeshe mabue â kudi muntu udi ne lungenyi lule lua kufunda mateta bimpe, yeye neafundehu mena a Bena Isalele, babueshe mabue mu masoso a mu bintu bia or. Wewe neuteke mabue abidi ha bilulu bia ha maha ha efoda; mabue au neikale bu tshivulukidi tshia Bena Isalele, Alona neatuale mena abo ku mesu kua Yehowa ha maha andi abidi bu tshivulukidi. Wewe newenze bitubuidi bia or, ne tukanu tua or tubidi, tudi tuhindakasha bu muonshi, uteke tukanu ku bitubuidi. Wewe newenzeshe tshilulu tshia dilumbulula tshia ha tshiadi kudi bantu badi ne lungenyi lule, bobo nebenze tshilulu etshi bu muakenzabo efoda, ne bintu bia or ne bilulu bia bleu ne bikunzubile ne bilulu bikunze-kunzû ne bia lin mutambe buimpe. Utshidikishe nseke mai mikosolola hankatshi bua kuikala nseke ibidi ya bunene bumue, buludi buatshi nebuikale bu ntanta wa tshianza, ne butshiama buatshi bu ntanta wa tshianza. Uteke milongo ya masoso mai a kubueshamu mabue, mulongo wa kumudilu wa mabue a sardoine ne topaze ne émeraude, mulongo muibidi wa mabue a escarboucle ne saphir ne calcédoine, mulongo muisatu wa mabue a opale ne agate ne améthyste, ne mulongo muinai wa mabue a chrysolithe ne onyx ne jaspe ubueshe mabue a mu masoso. Mabue neikale dikumi ne abidi bu bungi bua mena a Bena Isalele, nebafunde dina dia tshisamba ne tshisamba tshia Bena Isalele ha dibue ne ha dibue. Newenze tukanu tua or mutambe buimpe tudi tuhindakasha bu mionshi. Wewe newenze nkanu ya or ibidi, uteke nkanu ei ku nseke ibidi ya tshilulu tshia ha tshiadi. Uteke tukanu tua or tuhindakasha ku nkanu idi ku nseke ya tshilulu. Uteke nsonga ibidi ya tukanu tuhindakasha ku bilulu bia efoda bidi ha maha, ku mpala kuabi. Enza biebe nkanu ya or ibidi, uyiteke ku luseke lua tshilulu tshia ha tshiadi tshituangane ne efoda. Enza biebe nkanu ya or ibidi, uyiteke muinshi mua bilulu bia efoda bia ha maha, ku mpala kuabi ne ku mutu kua mukaba wa efoda. Nebasuike tshilulu tshia ha tshiadi ku nkanu yatshi ku nkanu ya efoda ne muonshi wa bleu muhindakasha, tshilulu tshia ha tshiadi netshikale hamʼbidi ha mukaba muluka bilengele wa efoda, kabasulule tshilulu tshia ha tshiadi ku efoda. Alona neatuale mena a Bena Isalele ha tshilulu tshia dilumbulula tshidi ha mutshima wandi, hayeye ku muaba wa tshijila, bu tshivulukidi tshia tshiendelele ku mesu kua Yehowa. Ubueshe mabue a Ulima ne Tumima mu masoso a mu tshilulu tshia dilumbulula tshia ha tshiadi, a neikale ha mutshima wa Alona hayeye ku mpala kua Yehowa, Alona neatuale kulumbulula kua malu a Bena Isalele ku mpala kua Yehowa matuku onso. Wewe neutele tshikowelu tshia efoda ne bilulu bia bleu. Ushiye disoso ku mutu kua tshikowelu bua kubueshamu mutu, nyungulula disoso ne muonshi muhindakasha, bu mudibo benza tshikowelu tshia nvita tshikowelu katshihandiki nansha. Neufunde bifuanyikishi bia tumuma tua grenade ne buanda bua bleu ne bukunzubile ne bukunzekunzû kuinshi kua tshikowelu tshionso, neuteke ndibu ya or hankatshi ha tumuma, neuteke kadibu ka or ne kamuma, ne kadibu ka or ne kamuma to ne kuinshi kua tshikowelu tshionso. Alona nealuate tshikowelu henzeye mudimu, nebunvue tshiona tshia ndibu hayeye mu muaba wa tshijila ku mesu kua Yehowa, ne haluhukeye kabidi, bua yeye kafu nansha. Wewe newenze tshikololo tshia tshiamu tshia or, neufundehu ne, TSHIA TSHIHE A KUDI YEHOWA. Neutshiteke ha muonshi wa bleu muhindakasha, utshisuike ku mpala kua tshilulu. Netshikale ha mpala ha Alona, ne Alona neatuale mahambuka a Bena Isalele mu muaba wa tshijila hayeye bua kubajidila ne bintu bidibo bafila kudi Nzambi, netshikale ha mpala handi matuku onso bua Yehowa abitabushe. Wewe newenze tshikowelu bikeshe bikeshe ne buanda bua lin muimpe, ne wewe newenze tshilulu tshia lin muimpe ne mukaba muimpe mutambe. Wewe neutelele bana balume ba Alona bikowelu ne mikaba ne bifulu bia butumbi ne buimpe. Wewe neubiluatshishe Alona muanʼenu ne bana bandi balume badi nʼandi, wewe neubele manyi ha mutu, ubalengeshe, ubajidile, bua bobo bankuatshile mudimu wa buakuidi. Ubatelele mihanu ya lin ya kubuikila butaka buabo, mihanu neyikale ku tshimono mifike to ne ku bibelu. Alona ne bana bandi balume nebaluate mihanu ei hayabo mu tshitendelelu anyi hayabo hehi ne tshioshelu bua kuenza mudimu wabo mu muaba wa tshijila, bobo kabatuadi mahambuka, kabafu. Mukenji eu newikale kudiye ne kudi bana bandi badi banulonda ku nyima tô ne tshiendelele. Wewe newenze bualu ebu bua kubajidila bankuatshile mudimu wa buakuidi. Angata muana mulume wa ngombe ne bimpanga bibidi bidi biakane, ne mampa adi kâyi ne luevene, ne mikata idi kayiyi ne luevene misangisha ne manyi, ne tukata luhehele ludi katuyi ne luevene tudi ne manyi mela ha mutu, ubilambe ne bukula buakane bua blé. Ubiteke mu tshisaka tshimue, ulue nʼabi mu tshisaka ne muana wa ngombe ne bimpanga bibidi. Ulue ne Alona ne bana bandi balume ku tshibi tshia ntenta wa kusangakena, uboweshe mai. Wewe newangate bilulu, uluatshishe Alona tshikowelu ne tshilulu tshia ha mutu ha efoda ne efoda ne tshilulu tshia ha tshiadi ne umuele mukaba muluka bilengele wa efoda ku tshimono. Teka tshifulu ha mutu handi ne tshitotolo tshia tshijila ha tshifulu. Hashishe angata manyi adibo bela ha mutu, ne ela manyi au ha mutu handi. Wewe neulue ne bana bandi balume, ubaluatshishe bikowelu. Ubele mikaba ku bimono, Alona ne bana bandi balume, teka bifulu ha mitu habo, bobo nebikale ne mudimu wa buakuidi tshiendelele, wewe neujidile Alona ne bana bandi balume. Wewe neulue ne muana wa ngombe ku tshibi tshia ntenta wa kusambakena, Alona ne bana bandi balume nebatentekashe bianza biabo ha mutu ha muana wa ngombe. Wewe neushihe muana wa ngombe ku mesu kua Yehowa ku tshibi tshia ntenta wa kusambakena. Wewe newangate mashi a muana mulume wa ngombe, ulabe mashi ha nsengu ya ha tshioshelu ne munu webe, hongolola mashi onso ku tshitaku tshia tshioshelu. Angata dianyi dionso didi ku mala ne lukutu lua ku mutshima ne tumuma tubidi ne, dianyi diabi, ubioshile ha tshioshelu. Kadi wewe newoshe munyinyi wa muana mulume wa ngombe, ne tshiseba ne tunvi ne kahia ku butshika bua tshitudilu ebu mbualu bua kubuikidila bubi bua bantu. Angata tshimpanga tshimue, ne Alona ne bana bandi balume nebatentekashe bianza biabo ha mutu hatshi. Wewe neushihe tshimpanga, newangate mashi atshi wamiamine ha tshioshelu tshionso. Wewe neusaye tshimpanga, uvuwa mala atshi ne mikolo, uteke bituha biatshi hamue ne mutu watshi. Wewe newoshe tshimpanga tshijima ha tshioshelu, tshidi mulambu wa kuoshila Yehowa, udi utua dihembu, udibo boshila Yehowa ha kahia. Wewe newangate tshimpanga tshikuabo, Alona ne bana bandi balume nebatentekashe bianza biabo ha mutu ha tshimpanga. Wewe neashihe tshimpanga, angata mashi atshi, wateke ku lusongo lua ditshu didi ku tshianza tshia balume tshia Alona, ne ku lusongo lua ditshu ku tshianza tshia balume tshia bana bandi balume, ne ku tshiala tshia ku tshianza tshiabo tshia bukole, ne ku muanʼa dikasa munene dia ku tshianza tshia balume, umiamine mashi ha tshioshelu tshionso. Wewe newangate mashi adi ha tshioshelu, ne manyi adibo bela ha mutu, ubimiamine Alona, ha bilulu biandi ne ha bana bandi balume ne ha bilulu biabo, yeye ne bilulu biandi ne bana bandi balume ne bilulu biabo nebikale bijidibue. Wewe newangate dianyi dia tshimpanga, ne mukila udi ne dianyi ne dianyi didi ku mala ne lukutu lua ku mutshima, ne tumuma tubidi ne dianyi diabi ne tshibelu tshia ku tshianza tshia balume, bualu bua tshimpanga etshi ntshia kujidila nʼatshi bakuidi. Angata mutanda wa mampa, ne mukala mulamba ne manyi, ne kakata kahehele bia mu tshisaka tshia bidia bidi kabiyi ne luevene bidi ku mpala kua Yehowa. Uteke bintu ebi bionso mu bianza bia Alona ne mu bianza bia bana bandi balume, bobo nebabinyukule bu mulambu udibo banyukula ku mpala kua Yehowa. Wewe newangate bintu ebi ku bianza biabo, ubioshile ha tshioshelu bu mulambu udi utua dihembu dimpe ku mesu kua Yehowa, udi mulambu udibo boshila Yehowa ha kahia. Wewe newangate tshiadi tshia tshimpanga tshia kujidila kua Alona, utshinyukule bu mulambu udibo banyukula ku mpala kua Yehowa, netshikale tshituha tshiebe. Wewe neujidile tshiadi tshidibo banyukula, ne tshihela tshidibo babisha mulu tshia tshimpanga tshia kujidila kua Alona ne tshia bana bandi balume. Tshintu etshi netshikale tshituha tshia Alona ne tshia bana bandi balume kudi Bena Isalele tshiendelele, bualu bua tshidi tshituha tshia bakuidi tshia mu mulambu ya kuvuisha nʼai ditalala ya Bena Isalele, tshidi mulambu udibo babisha mulu kudi Yehowa. Bilulu bia tshijila bia Alona nebikale kudi bana bandi balume badi banulonda ku nyima bua kubela manyi ne kubajidila. Muana mulume udi biandi muakuidi mu muaba wandi neabiluate matuku muanda mutekete hayeye mu ntenta wa disangisha bua kuenza mudimu mu muaba wa tshijila. Wewe newangate tshimpanga tshia tshijila, ulambe munyinyi watshi ne mai a kahia mu muaba wa tshijila. Alona ne bana bandi balume nebadie munyinyi wa tshimpanga ne bidia bidi mu tshisaka ku tshibi tshia ntenta wa kusangakena. Bobo nebadie bintu abi bidibo babuikidila nʼabi bantu mibi yabo, bua kubajidila ne kubalengesha kudi Yehowa, kadi muenyi kena mua kudia bintu ebi, bualu bua bidi bia tshijila. Bikala tshintu tshikese tshia munyinyi wa tshijila anyi tshia bidia bishale tô ne ku dinda, wewe neutshioshe mu kahia, kabatshidi, bualu bua tshidi tshia tshijila. Wewe newenzele Alona ne bana bandi balume bu mudi mei onso anakukuambila, ubajidile matuku muanda mutekete. Wewe newoshe muana wa ngombe ku dituku ku dituku bua kubuikidila bantu mibi yabo, wewe neutokeshe tshioshelu hawoshila bintu bia kubuikidila nʼabi bantu mibi yabo, wele manyi ha tshioshelu bua kutshijidila. Wewe neubuikile mibi idi ha tshioshelu matuku muanda mutekete, utshijidile, tshioshelu netshikale bu tshintu tshitambe tshia tshijila, muntu yonso udi ulenga tshioshelu neikale wa tshijila. Ei mmilambu ludi mua kuoshila ha tshioshelu bana ba mikoko babidi ba tshidimu tshimue ku dituku ku dituku misangu yonso Wewe newoshile umue wa mikoko ne dinda ne mukuabo dilolo Woshe muana umue wa mukoko ne tshia dikumi tshia tshihiminu tshia bukula busangisha ne tshia tshinai tshia tshihiminu tshia manyi, ne tshia tshinai tshia tshihiminu tshia nvinyo bu mulambu wa kunua. Neufile muana wa mukoko mukuabo dilolo, neumufile ne mulambu wa bukula ne mulambu wa kunua, bu muwakenza dinda, bu mulambu wa dihembu dimpe, mulambu udibo boshila Yehowa ha kahia. Neboshile bintu ebi ku dituku ku dituku ku bikondo bienu bionso ku tshibi tshia ntenta wa kusangakena ku mesu kua Yehowa, kundi nsangakena nʼenu bua kuyikila nʼebe. Meme nensangakeneku ne Bena Isalele, ne tshitendelelu netshikale tshiedibue ku butumbi buanyi. Meme nenjidile ntenta wa kusangakena ne tshioshelu, nenjidile Alona ne bana bandi balume kabidi bua kunkuatshilabo mudimu wa buakuidi. Meme nengikale munkatshi mua Bena Isalele, nengikale Nzambi wabo. Bobo nebamanye ne, Meme ndi Yehowa, Nzambi wabo, wakabahatula mu buloba bua Ejipitu bua meme kuikala munkatshi muabo, ndi bianyi Yehowa, Nzambi wabo. Wewe newenze tshioshelu tshia musenga wa manananshi ne mutshi wa acacia. Buludi buatshi nebuikale coudée umue, ne butshiama buatshi nebuikale coudée umue, utshidikishe ne luidi lumue, bule buatshi bua mulu nebuikale coudées ibidi; wenze nsengu yatshi ne mutshi au umue. Ulamike tshiamu tshia or mutambe buimpe ha mutu hatshi ne ku nseke yatshi ne ku nsengu yatshi, nyungulula mubangu watshi ne or ku nseke yonso. Enza biebe nkanu ya or ibidi, uyiteke ku nseke ibidi kuinshi kua mutu watshi; neyikale bu miaba ya kubueshamu mitshi ya kutshituadila. Enza mitshi ya acacia ibidi, ulamike or ku nseke yonso. Utshiteke hehi ne tshilulu tshidi ku mushete wa Nzambi, ku mpala kua tshibuikilu tshidi ha mutu ha mushete, kundi nsangakena nʼebe. Alona neoshileku musenga wa manananshi dinda ne dinda hayeye kulongolola minda. Hatemesha Alona minda dilolo, yeye neoshe musenga wa manananshi bu tshintu tshidi tshitua dihembu kudi Yehowa ku bikondo bienu bionso. Kuoshi musenga wa manananshi udi kauyi mujidila ha tshioshelu, nansha mulambu wa nyama idiho bosha, nansha mulambu wa bukula, nansha mulambu wa nvinyo idiho banua. Alona neamiamine mashi a nyama mishiha ha nsengu ya tshioshelu etshi bua kubuikidila bantu mibi yabo, yeye nênze bualu ebu musangu umue ku tshidimu ku tshidimu bikondo bienu bionso, tshidi tshia tshijila tshitambe kudi Yehowa. Yehowa wakambila Mose ne, Hawabala bungi bua Bena Isalele, muntu ne muntu afile bintu bia kuhikula nʼabi muoyo wandi kudi Yehowa; bua makenga makole kâbakuatshi hawababala. Muntu ne muntu udibo babala neafile tshituha tshia nshekele bu mudibo bafila mu nsubu wa tshiendelele tshituha tshia nshekele bu kuha kuabo kudi Yehowa. Muntu ne muntu udibo babala wakabita bidimu makumi abidi neafile kuha kua Yehowa. Muntu mubanji kena ne bualu bua kufila tshintu tshidi tshilamba tshituha tshia nshekele bunene, ne muntu muhele kena ne bualu bua kufila tshintu tshidi tshilamba tshituha tshia nshekele bukese, hanuafila kuha kua Yehowa bua kuhikula mioyo yenu. Wewe newangate argent ya dihikula dia Bena Isalele, uyiteke bua kukuatshisha mudimu wa mu ntenta wa kusangakena, neyikale bu tshiyulukidi tshia Bena Isalele ku mesu kua Yehowa bua kuhikula kua mioyo yenu. Yehowa wakambila Mose ne, Wewe newenze tshiowelu tshia tshiamu tshia mitaku ne tshitaku tshiatshi tshia tshiamu tshia mitaku kudibo bowa mai. Neutshiteke hankatshi ha tshitendelelu ne tshioshe lu, newelemu mai. Alona ne bana bandi balume neboweshe bianza biabo ne makasa abo ne mai mu tshiowelu, hayabo mu ntenta wa kusangakena, nebowe mai bua bobo kabafu nansha, anyi hayabo ku tshioshelu bua kuosha nyama ha kahia kudi Yehowa. Nunku bobo neboweshe bianza biabo ne makasa abo ne mai, bua bobo kabafu, etshi ntshilele tshiabo tshiendelele kudiye ne bana bandi badi banulonda ku nyima ku bikondo biabo bionso. Yehowa wakambila Mose kabidi ne, Angata bintu bia manananshi bidi bitambe buimpe myrrhe bujitu bua nshekele nkama itanu, ne cinnamone bujitu bua nshekele nkama ibidi ne makumi atanu, ne canne aromatique bujitu bua nshekele nkama ibidi ne makumi atanu, ne nkashia bujitu bua nshekele nkama itanu bu idiho bafila mu tshitendelelu ne tshihiminu tshia manyi a olive. Wewe newenze manyi a tshijila adibo bela ha mutu ne bintu ebi, manyi adi atua dihembu bu mudibo benza kudi benyi ba manananshi, manyi au neikale manyi a tshijila adibo bela ha mutu. Wewe newamiamine ntenta wa kusangakena ne mushete wa Nzambi, ne mesa ne malonga onso a mesa, ne muinda ne malonga onso a muinda, ne tshioshelu tshia musenga wa manananshi, ne tshioshelu tshia kahia ne malonga onso a tshioshelu, ne tshiowelu ne tshitaku tshia tshiowelu. Wewe neubilengeshe, neubijidile, muntu yonso udi ubilenga tshianza neikale wa tshijila. Wewe newele Alona ne bana bandi balume manyi ha mutu, neubajidile, bua bobo bankuatshile mudimu wa buakuidi. Wewe newambile Bena Isalele ne, Manyi au neikale ku mesu kuanyi bu manyi a tshijila adibo bela ha mutu ku bikondo bienu bionso. Kuedi manyi au hamʼbidi ha bantu, kabena manyi mafuanangane nʼau, wowo adi a tshijima, neikale a tshijila kunudi. Muntu yonso udi usangisha manyi bu au, anyi udi waela muenyi, nebamumushe munkatshi mua bana babo. Yehowa wakambila Mose ne, Angata bintu bia manananshi a mushinga mukole bia stacte ne onyx ne gabanum, bintu bia manananshi matambe buimpe, widikishe bintu bionso ne tshihiminu tshimue. Ubisangishe bu manananshi adi atua dihembu kudi benyi ba manananshi, ubisangishe ne luehu lutambe buimpe ne lua tshijila. Wewe neuboteshe tshituha, utshiteke ku mpala kua mushete wa Nzambi mu ntenta wa kusangakena kundi nsangakena nʼebe, netshikale tshilamba tshia tshima kunudi. Kanudisangishidi manananshi adi atua dihembu nunku ne bintu ebi, manananshi au neikale a tshijila kudi Yehowa. Muntu yonso udi usangisha bintu ebi bua kudienzela manananshi, nebamumushe munkatshi mua bana babo. Yehowa wakambila Mose ne, Nakubikila Besalele, muana mulume wa Uli, muana mulume wa Hu wa mu tshisamba tshia Yuda. Nakumûsha tente ne Nyuma wa Nzambi ne lungenyi ne dijingulula ne meji mu kuenza kua midimu yonso ya bianza, bua kulongololeye bintu bia or ne bia argent ne bia tshiamu tshia mitaku, ne bintu bidibo basonga nʼabi mabue, ne bidibo basonga nʼabi mitshi, ne midimu yonso ya bantu badi ne lungenyi lule. Mona, meme nakusungula Oholiaba, muana mulume wa Ahisamaka, wa mu tshisamba tshia Dana bua kumumatshisha, nakabuesha lungenyi lule mu mitshima ya bantu bonso badi ne meji bua bobo benze bintu bionso binakukuambila. Nebenze ntenta wa kusangakena, ne mushete wa tshihungidi tshia mei a Nzambi, ne tshibuikilu tshia ha mutu ha mushete, ne bintu bionso bidi mu ntenta wa kusambakena, ne mesa ne malonga a mesa, ne muinda muimpe ne malonga a muinda, ne tshioshelu tshia musenga wa manananshi, ne tshioshelu tshia kahia ne malonga a tshioshelu, ne tshiowelu ne tshitaku tshia tshiowelu. Nebenze bilulu bitambe buimpe, ne bilulu bia tshijila bia Alona muakuidi, ne bilulu bia bana bandi balume, bua kunkuatshilabo mudimu wa buakuidi, ne manyi adibo bela ha mutu, ne bintu bia manananshi bidi bidia dihembu bia mu muaba wa tshijila bobo nebenze malu onso anakukuambila. Yehowa wakambila Mose ne, Wambile Bena Isalele kabidi ne, Nuenu nuvuluke matuku anyi a Lumingu dituku edi didi bu tshivulukidi hankatshi hetu ku bikondo bienu bionso bualu bua kunumanyisha ne, Meme ndi Yehowa wakunujidila. Nuvuluke dituku dia Lumingu, didi dituku dia tshijila kunudi, mundi yonso udi wona dituku adi nebamushihe, mundi yonso udi wenza mudimu dituku adi, nebamumushe munkatshi mua bana babo. Enzai mudimu wenu matuku asambombo; kadi dituku dia muanda mutekete ndituku dia dikisha dia kuela meji, dituku dia kujidila Yehowa, mundi yonso udi wenza mudimu dituku dia Lumingu nebamushihe bulelela. Nunku Bena Isalele nebajidile dituku dia Lumingu ku bikondo biabo bionso bu tshihungidi tshia tshiendelele. Etshi ntshimanyinu tshia tshiendelele hankatshi hanyi ne Bena Isalele, bualu bua Yehowa wakafuka diulu ne buloba matuku asambombo, wakikisha dituku dia muanda mutekete, wakadikankamika. Hakashikisha Yehowa kusomba ne Mose ha mukuna wa Sinai, yeye wakamuha mabue abidi akadi ne mikenji mifundahu ne munu wa Nzambi. Kakamanya bantu ne, Mose wakashala ku mukuna musangu mule, bakadisangisha kudi Alona, bakamuambila ne, Bika biebe, utuenzele nzambi idi mua kuya ku mpala kuetu, bua muntu au Mose, wakalua nʼetu mu Ejipitu, katuena bamanye bualu buakumukuata. Alona wakabambila ne, Nukuohole nkanu ya or idi ku matshu a bakashi benu ne a bana benu ba balume ne a bana benu ba bakashi, nulue nʼai kundi. Bantu bonso bakakuohola nkanu ya or yakadi ku matshu abo, bakalua nʼai kudi Alona. Yeye wakayangata ku bianza biabo, wakayilamba mu kahia, wakayiteka ne mulolo bu kana ka ngombe, bakamba ne, Bena Isalele, ke nzambi wenu, wakanuluhula mu buloba bua Ejipitu. Hakamona Alona bualu ebu, Wakenza tshioshelu ku mpala kua luhingu, Alona wakela dî, wakamba ne, Makelela disanka dia Yehowa nedikaleku. Hakatshiabu bakabika ne dinda dionso, bakafua milambu ya kuosha, bakalua ne milambu ya kuvuisha nʼai ditalala, bantu bakashikama bua kudia ne bua kunua, bakabika bua kunaya. Yehowa wakambila Mose ne, Hueka mu tshibanda, bualu bua bantu bebe bawakaluhula mu buloba bua Ejipitu bakudiona. Bakusesuka lubilu mu nshila unakubambila, bakulamba nkanu ya or, bakutula kana ka ngombe, bakukatendelela, bakukashihela milambu, bakuamba ne, Bena Isalele, nzambi wenu nyeu wakanuluhula mu buloba bua Ejipitu. Yehowa wakambila Mose ne, Nakutangila bantu aba, mona, badi ne buhidia bukole, nunku kumpumbishi nansha, tshiji tshianyi tshikale tshikole kudibo, neashihe, kadi nenkuvuishe wewe tshisamba tshinene. Mose wakatendekena Yehowa, Nzambi wandi, wakamba ne, Yehowa, bualu kai tshiji tshiebe tshidi tshitambe bukole kudi bantu bebe bawakaluhula mu buloba bu Ejipitu ne bukole bunene ne tshianza tshia bukole? Munyi mudi Bena Ejipitu mua kuamba ne, Yeye wakabaluhula bua kubenzela bibi, ne bua kubashiha ku mikuna, ne bua kubajimisha ha buloba? Lekela tshiji tshiebe tshikole, ukudimune mutshima bua malu audi musue kuenzela bantu bebe. Uvuluke Abalahama ne Isaka ne Isalele, bantu bebe, bawakaditshiha kudibo, wakabambila ne, Nenvudishe bana benu bu bungi bua mitoto ya mulu, ne buloba ebu buonso bunakanuambila nempe bana benu, bobo nebabuhiane tshiendelele. Yehowa wakakudimuna mutshima wandi bua malu akeleye meji bua kuenzela bantu bandi. Mose wakatshunguluka, wakahueka mu tshibanda ne mabue abidi akadi ne mikenji mifundahu mu bianza biandi, mabue akadi mafu nda nseke yau ibidi, ha luseke lumue ne ha luseke lukuabo. Mabue au akadi menza kudi Nzambi, ne mei akadi mafunda kudi Nzambi, mafunda ha mabue au. Hakunvua Yoshua diyoyo dia bantu hakadibo bela mbila, yeye wakambila Mose ne, Au mmutoyi wa bantu badi baluangana nvita mu tshitudilu. Mose wakamba ne, Adi kadiena dî dia bantu badi bahita bakuabo bukole, ne kadiena dî dia bantu bakutambibua bukole, ndi munvue mutoyi wa bantu badi bimba misambu. Hakalueye hehi ne tshitudilu, wakatangila kana ka ngombe ne bantu baja maja Mose wakadi ne tshiji tshikole, wakela mabue hanshi akadi mu bianza biandi, wakatshibula kuinshi kua mukuna. Mose wakangata kana ka ngombe kakenzabo, wakakosha mu kahia, wakakabotesha, wakakela mu mai, wakanuisha Bena Isalele mai au. Mose wakakonka Alona ne, Bantu bakakuenzela tshinyi bua wewe wakubavuishila bualu bubi? Alona wakamba ne, Mukelenge wanyi, kuikadi ne tshiji tshikole, wewe udi mumanye bantu aba, badi ne mitshima yabo ku malu mabi. Bualu bua bobo bakungambila ne, Utuenzele nzambi idi mua kuya ku mpala kuetu, bua muntu eu Mose wakatumikila mu buloba bua Ejipitu, katuena bamanye bualu buakumukuata. Meme nakabambila ne, Muntu yonso udi ne or akuohole, ne bobo bakafua or kundi, nakuela mu kahia ne kana aka ka ngombe ka or kakahatuka mu kahia. Hakatangila Mose ne bantu bakadi batomboka (Alona wakabanda bua kudifuishishabo bundu kudi bena lukuna babo), Mose wakimana ku mbelu kua tshitudilu, wakamba ne, Udi ku luseke lua Yehowa alue biandi kundi Bana balume bonso ba Lewi bakadisangisha kudiye. Yeye wakabambila ne, Yehowa, Nzambi wa Isalele, udi Wamba ne, Muntu yonso aluate muele wandi wa nvita, endakane ku tshibi ne ku tshibi mu tshitudilu tshionso, ashihe muanʼabo mulume ne mulunda wandi ne muena mutumba nʼandi. Bana balume ba Lewi bakenza bu mu di dia Mose, bantu bakafua dituku adi bu binunu bisatu. Mose wakamba ne, Muntu yonso wakudifila kudi Yehowa lelu ku mushinga wa muanʼandi mulume ne muanʼabo mulume, Yehowa anuvudishile disanka lelu. Hakatshiabu Mose wakambila bantu ne, Nuenu nuakuenza bualu bubi bunene Katataka nembande kudi Yehowa, binamanya mua kunubuikidila bubi buenu. Mose wakahingana kudi Yehowa, wakamba ne, Bantu aba bakuenza bualu bubi bunene, bakudienzela nzambi wa or. Kadi katataka biwasua kubabuikidila bubi buabo, kadi biwikala kuyi musue, ndi nkusengelela ne, Unjimishe mu mukanda webe uwakufunda. Yehowa wakambila Mose ne, Muntu yonso wakungenzela bibi, nemmujimishe yeye mu mukanda wanyi. Katataka ya biebe, uye ne bantu ku muaba unakukuambila, tangila, muanjelo wanyi neaye ku mpala kuebe, kadi dituku dinalua kudibo, nembenzele kabidi bu mudi bubi buabo. Yehowa wakakengesha bantu bualu bua bobo bakenza kana ka ngombe kakadi Alona muenze. Yehowa wakambila Mose ne, Bikai, yai bienu, ne wewe ne bantu bawakaluhula mu buloba bua Ejipitu, ku buloba bunakalaya Abalahama ne Isaka ne Yakoba ne, Nembuhe bana benu. Nentume muanjelo ku mpala kuebe, nengihate Bena Kanana ne Bena Amole ne Bena Hiti ne Bena Pelizi ne Bena Hiwi ne Bena Yebuse, ku bu loba budi ne mabele ne buitshi bia bungi; bualu bua meme tshiena nya munkatshi muenu bualu bua nudi bantu ba buhidia bukole, bua tshinushihi mu nshila. Hakunvua bantu lumu alu lubi, bakadila nansha mundi umue wa kaluata bintu bia kudilengesha nʼabi. Yehowa wakambila Mose ne, Wambile Bena Isalele ne, Nudi bantu ba buhidia bukole, binaya bianyi munkatshi muenu anu tshituha tshikese, nennushihe, nunku nuvule bintu bia kudilengesha nʼabi, bua meme mmanye tshindi mua kunuenzela. Bena Isalele bakavula bintu bia kudilengesha nʼabi ku mukuna wa Holeba tô ne ku mpala kuakadibo baya. Mose wakadi ushimika ntenta ku butshika bua tshitudilu, wakamubikila ne, Ntenta wa kusambakena Muntu yonso wakasua kukeba Yehowa wakaluhuka mu tshitudilu bua kuya ku ntenta wa kusambakena, wakadi ku butshika bua tshitudilu. Hakaya Mose ku tshitendelelu, bantu bonso bakabika, bakimana muntu ne muntu ku ntenta wandi, bakatangila Mose tô ne hakabueleye mu Ntenta. Hakabuela Mose mu tshitendelelu, difutu diakahueka, diakimana ku mbelu kua Ntenta ne Yehowa wakayikila ne Mose. Hakatangila bantu difutu dimana ku mbelu kua Ntenta, bantu bonso bakabika, bakatendelela muntu ne mu ntu ku ntenta wandi. Yehowa wakayikila ne Mose mpala ha mpala bu mudi muntu uyikila ne mulunda wandi. Mose wakahingana ku tshidi dilu kabidi, kadi mukuatshishi wandi Yoshua, nsongalume, muana wa balume wa Nuna, kakaluhuka mu Ntenta. Mose wakambila Yehowa ne, Mona, wewe udi ungambila ne, Uye ne bantu aba, ne wewe kuena muanze kummanyisha muntu udi musue kutuma nʼanyi. Kadi wewe wakamba ne, Ndi mumanye dina diebe, ne wewe wakasangana luse ku mesu kuanyi. Katataka, bingikala ne luse ku mesu kuebe, undeshe bienzedi biebe, bua meme kukumanya wewe, ne bua kusangana luse ku mesu kuebe, uvuluke ne tshisamba etshi tshidi bantu bebe. Yehowa wakamba ne, Mpala wanyi neaye nʼebe, ne meme nenkuhe dikisha. Mose wakamba ne, Bikala mpala webe kayi uya nʼanyi, kudimusha kunoko. Nemmanye ne, Nakasangana luse ku mesu kuebe, ne meme ne bantu bebe, kudi kunyi? Kabuena nunku ne, Wewe uyaya nʼetu, ne tuetu, meme ne bantu bebe, netuikale bu bantu badi bahanduluka kudi bisamba bionso bia bantu badi hanshi ha buloba, anyi? Yehowa wakambila Mose ne, Nengenze bualu ebu buwakuamba bualu bua wewe wakasangana luse ku mesu kuanyi, meme ndi mumanye Hina diebe. Mose wakamba ne, Ndi nkusengelela ne, Undeshe butumbi buebe. Yehowa wakamba ne, Nengendeshe buimpe buanyi buonso ku mesu kuebe, nemmanyishe dina dianyi dia Yehowa ku mpala kuebe; nengikale ne dinanga kudi bantu bandi musue kuikala ne dinanga, nendeshe luse kudi bantu bandi musue kulesha luse. Yeye wakamba ne, Wewe kuena mua kumona mpala wanyi; bualu bua muntu kena mua kumona mpala wanyi ne kuikala ne muoyo. Yehowa wakamba ne, Tangila, muaba udiku, udi hehi nʼanyi; wewe newimane ha dibue. Hahita butumbi buanyi, nenkuteke mu dina didi mu dibue, nenkubuikile ne tshianza tshianyi to ne hanamana kuhita ku mesu kuebe. Hashishe nengumushe tshianza tshianyi, ne wewe neumone nyima wanyi; kadi kuena mua kumona mpala wanyi. Yehowa wakambila Mose ne, Songa biebe mabue abidi bu mabue a diambedi: neufundehu mei onso anakafunda ha mabue a diambedi awakatshibula. Udilongolole dinda, Ulue biebe ne dinda ku mukuna wa Sinai; Ulue biebe kundi ku mutu kua mukuna. Kulu ne muntu mukuabo nansha: muntu kamueneki ku mukuna nansha: bisumbu bia mikoko ne bia ngombe kabidi bintu ku mukuna. Nunku Mose wakasonga mabue abidi bu mabue a diambedi; wakabika ne dinda dionso, wakabanda ku mukuna wa Sinai, bu muakamuambila Yehowa; wakaya ne mabue abidi mu bianza biandi. Yehowa wakahueka mu ditutu, wakimanahu nʼandi. Wakamumanyisha dina dia Yehowa. Yehowa wakahita ku mpala kuandi, wakela dî ne, Yehowa, Yehowa, Nzambi wa luse ne dinanga, kena ukuata tshiji lubilu, udi mûle tente ne luse lujalame ne bushuwa, udi ulesha binunu bia bantu luse lujalame, udi ubuikidila bantu malonga abo ne kusambuka kuabo kua mikenji ne malu mabi abo; kadi kena ubingisha muntu udi uhila; udi utumina bana ba tshikondo tshisatu anyi tshinai mibi ya batatuʼabo. Mose wakinama mutu wandi lubilu, wakatendelela. Yeye wakamba ne, Bingikala muhete dianyisha ku mesu kuebe, Yehowa, witabushe bua Yehowa aye biandi munkatshi muetu; nansha bantu aba bikale ne buhidia bukole; utubuikidile kuhanga kuetu ne mibi yetu, utuitabushe bu buhianyi buebe. Yeye wakamba ne, Nempunge nʼenu tshihungidi; nengenze malu a kukema ku mesu kua bantu bebe bonso, malu adi kâyi manze kumueneka ha buloba buonso anyi kudi tshisamba tshikuabo; bantu bonso badi nʼebe nebamone bienzedi bia Yehowa; bualu bua meme nengenze nʼebe bualu bukole. Enza bu mundi nkuambila dituku edi. Mona, nengihate Bena Amole ne Bena Kanâna ne Bena Hiti ne Bena Pelizi ne Bena Hiwi ne Bena Yebuse ku mpala kuebe. Udimuke, kuhungi tshihungidi ne bantu ba mu buloba bûdi uya; bualu ebu kabulu buteyi munkatshi muenu. Ushimbule bioshelu biabo, utshibule bibumba biabo, ukose mpingu yabo ya Bashela. Kutendeledi nzambi mukuabo nansha; bualu bua Yehowa udi ne dina diandi dia Mukau, udi Nzambi wa mukau. Kuhungi tshihungidi ne bena buloba; hendabo masandi ne mpingu yabo, ne hashihelabo nzambi yabo nyama, hakubikilabo bua kudia nʼabo munyinyi wa nyama mishiha; bua nuenu kanubikidi bana babo ba bakashi kudi bana benu ba balume; ne bana babo ba bakashi badi benda masandi ku mpingu yabo ka-benzeshi bana benu ba balume masandi kudi mpingu yabo. Kudisongidi mpingu. Nuenu nenudie bidia bidi kabiyi ne luevene ku mesu kua Yehowa. Nenudie bidia bidi kabiyi ne luevene matuku muanda mutekete, bu munakanuambila mu ngondo wa Abiba unakasungula; bualu bua nuakahatuka mu Ejipitu mu ngondo wa Abiba. Bana bonso banudi batela mbanyi; banʼa bute ba balume ba bimuna mbanyi, banʼa bute ba ngombe ne ba mikoko. Nenuhikule banʼa bute benu ba mpunda ku muanʼa mukoko; binuikala kanuyi nubahikula, nutshibule nshingu yabo. Nenuhikule banʼa bute benu ba balume bonso. Kanulu ku mesu kuanyi ne bianza bituhu. Nuenze mudimu wenu matuku asambombo, kadi nuikishe dituku dia muanda mutekete: nuikishe mu tshidimu tshia kukuna bintu ne mu tshidimu tshia kuhuola bintu. Nenudie bidia bia disanka dia mbingu ku mesu kua Yehowa hanuahuola bintu, ne hanuasangisha bintu kunshikidilu kua tshidimu. Bana benu ba balume bonso nebamueneke kudi Yehowa, Nzambi wa Isalele, misangu isatu ku tshidimu ku tshidimu. Bualu bua meme nengihate bisamba bia bantu ku mesu kuenu, nendeheshe matshika enu: bantu bakuabo kabena bikale ne lukuka lua buloba buenu, hanuamueneka kudi Yehowa Nzambi wenu misangu isatu ku tshidimu ku tshidimu. Kanulu ne mashi a nyama mishiha ne mampa adi ne luevene hohamue; kanushihi nansha tshintu tshikese tshia mulambu wa disanka dia kuhita kua Yehowa tô ne ku dinda. Bintu bia kumudilu binudi nuhuola biai nʼabi mu nsubu wa Yehowa, Nzambi wenu. Kanulambi muana wa mukoko ne mabele a mamu wandi. Yehowa wakambila Mose ne, Ufunde mei â, bualu bua nakuhunga nʼebe ne Bena Isalele tshihungidi bu mudi mei â. Yeye wakashala ne Yehowa minya makumi anai ne mafuku makumi anai; wakajila bia kudia ne mai a kunua. Wakafunda mei a dihungila, mikenji dikumi, ha mabue. Hakumuka Mose ku mukuna wa Sinai ne mabue abidi a mei a dihungila mu bianza biandi, hakahuekeye nunku, Mose kakamanya ne musunyi wa ha mpala handi wakakonka bualu bua yeye wakadi usomba ne Yehowa. Hakamona Alona ne Bena Isalele bonso Mose, monai, musunyi wa ha mpala handi wakakonka, bobo bakatshina bua kulua nʼandi ha buihi. Mose wakababikila; Alona ne bakokeshi bonso ba munkatshi muabo ba-kahingana kudiye; Mose wakasomba nʼabo. Ku nyima Bena Isalele bonso bakafua ha buihi ne yeye wakabamanyisha mikenji yonso yakamuambila Yehowa ha mukuna wa Sinai. Hakashikisha Mose kusomba nʼabo, yeye wakateka tshilulu tshikudika ha mpala handi. Kadi hakabuela Mose kudi Yehowa bua kusomba nʼandi, yeye wakumusha tshilulu tshikudika tô ne hakaluhukeye; wakaluhuka, wakambila Bena Isalele mikenji yakamuambila Yehowa. Bena Isalele bakamona mpala wa Mose ne musunyi wa ha mpala ha Mose wakakonka: Mose wakateka tshilulu tshikudika ha mpala handi kabidi tô ne hakayeye kusomba ne Yehowa. Mose Wakabikila tshisumbu tshionso tshia Bena Isalele, wakabambila ne, Â mmalu adi Yehowa musue nuenu nuenze. Enzai mudimu matuku asambombo; kadi dituku dia muanda mutekete nedikale dituku dia tshijila, dituku dia kuikisha ku mesu kua Yehowa; muntu yonso udi wenza mudimu dituku adi nebamushihe. Kanutemeshi kahia mu matshika enu onso dituku dia Lumingu. Mose wakambila Bena Isalele bonso ne, Ebu mbualu buakamba Yehowa ne, Usangishe kuha kua Yehowa munkatshi muenu; muntu yonso udi witabusha mu mutshima wandi, alue biandi ne kuha kua Yehowa: ne or ne argent ne tshiamu tshia mitaku, ne bilulu bia bleu ne bikunzubile ne bikunze-kunzû ne bia lin ne miosa ya mbushi ne biseba bia bimpanga bitua mu mai makunze-kunzû, ne biseba bia nkonge wa mu mai, ne mitshi ya acacia, ne manyi a mu muinda ne manananshi a kulengesha nʼau manyi adibo bela ha mutu, ne manananshu adi atua dihembu dimpe, ne mabue a onyx, ne mabue makuabo adibo bateka mu efoda ne mu tshilulu tshia ha tshiadi. Muntu yonso udi ne lungenyi lule alue biandi bua kuenza bi ntu bionso biakunuambila Yehowa ne nsubu wa tshitendelelu ne tshilulu tshia ha mutu, ne nkanu yatshi ne mabaya atshi, ne mitshi yatshi ne makurishi atshi ne nkanu ya ku makunshi, ne mushete ne mitshi ya mushete, ne tshibuikilu tshia mushete, ne tshilulu tshia munkatshi mua tshitendelelu, ne mesa ne mitshi ya mesa ne malonga a mesa ne bidia bia ha mesa, ne tshitekelu tshia minda ne malonga atshi ne minda yatshi, ne manyi a muinda, ne tshioshelu tshia musenga wa manananshi, ne mitshi yatshi, ne manyi adibo bela ha mutu ne manananshi adi atua dihembu dimpe, ne tshilulu tshia ha mbelu ha tshitendelelu, ne tshioshelu tshia kahia ne bintu bia tshiamu tshia mitaku, ne mitshi yatshi ne malonga atshi, ne tshiowelu ne mesa atshi, ne bilulu bia ku luhangu ne makunshi a luhangu, ne nkanu ya ku makunshi ne tshilulu tshia ha mbelu ha luhangu, ne milondo ya mu tshitendelelu ne ya mu luhangu ne nshinga yai, ne bilulu bia mushinga mukole bia kuenza nʼabi mudimu mu muaba wa tshijila, bilulu bia tshijila bia muakuidi. Alona ne bia bana bandi balume bua kuenza nʼabi mudimu wa buakuidi. Hashishe, tshisumbu tshia Bena Isalele tshionso tshiakumuka ku mesu kua Mose. Muntu yonso wakadi mutshima wandi umuenzesha ne wakadi tshihahai wakalua ne kuha kua Yehowa bualu bua mudimu wa nsubu wa tshitendelelu ne bintu bionso biakadi mu tshitendelelu ne bilulu bia tshijila. Balume ne bakashi bakalua bungi buabo bakadi bitabusha mu mitshima yabo, bakalua ne tukanu tua ku matshu ne tukanu tua ku minu ne nkanu ya ku maboko ne bintu bionso bia or, muntu ne muntu wakalua ne kuha kua or kudi Yehowa. Muntu ne muntu wakadi ne bilulu bia bleu ne bikunzubile ne bikunze-kunzu ne bia lin, ne bia miosa ya mbushi ne biseba bia bimpanga bitua mu mai makunze-kunzû, ne biseba bia nkonge ya mu mai, wakalua nʼabi. Muntu ne muntu wakadi ne tshiamu tshia argent ne tshia mitaku wakalua nʼabi bu kuha kua Yehowa, muntu yonso wakadi ne mitshi ya acacia yakadibo mua kuenza nʼai mudimu wakalua nʼai. Bakashi bonso bakadi ne lungenyi lule bakakuma bilulu ne bianza biabo, bakalua ne bilulu biakakumabo ne bia bleu ne bikunzubile ne bikunze-kunzû ne bia lin muimpe. Bakashi bonso bakadi ne lungenyi lule mu mitshima yabo bakakuma bilulu ne miosa ya mbushi. Bakokeshi bakalua ne mabue a onyx ne mabue makuabo a kuteka mu efoda ne mu tshilulu tshia ha tshiadi, ne manyi ne bintu bia dihembu dimpe bia kuela mu manyi, ne manyi a muinda ne manyi adibo bela ha mutu, ne manyi adi atua dihembu. Bena Isalele bonso, balume ne bakashi, ba mitshima miololoke bakitabusha kufila bintu ku mudimu wakadi Yehowa Wambila Mose bua kuenjibua, bakabika kudi Yehowa bu kuha kuabo kua disanka. Mose wakambila Bena Isalele ne, Yehowa wakamana kuhikula Besalele, muana mulume wa Uli, muana mulume wa Hû wa mu tshisamba tshia Yuda, wakamûsha tente ne Nyuma wa Nzambi ne lungenyi lule lua kuenza nʼalu midimu yonso, ne lua kulongolola nʼalu mudimu muimpe wa bintu bia or ne bia argent ne bia tshiamu tshia mitaku, ne mudimu wa kusonga mabue ne wa kusonga mabaya ne midimu yonso ya bantu badi ne lungenyi lule. Wakabuesha lungenyi lua kuyisheye nʼalu bantu mu mutshima wandi, ne yeye ne Oholiaba, muana mulume wa Ahisamaka wa mu tshisamba tshia Dana. Yeye wakabûsha mitshima tente ne lungenyi bua kuenza nʼalu midima yonso ya bantu badi basonga bintu ne badi bakuma bilulu bia bleu ne bikunzubile ne bikunze-kunzû ne bia lin, ne ya bantu bonso badi balongolola midimu ya lungenyi. Besalele ne Oholiaba nebenze mudimu wa mu tshitendelelu, ne bantu bonso badi ne lungenyi mu mitshima yabo tente nebenze mudimu eu bu muakuamba Yehowa, bobo bakadi Yehowa uhesha lungenyi ne meji bua kumanyabo mua kuenza midimu yonso ya mu tshitendelelu. Mose Wakabikila Besalele ne Oholiaba ne muntu yonso wakadi ne mutshima mûsha tente ne lungenyi kudi Yehowa, ne muntu yonso wakadi ne mutshima bua kulua kuenza mudimu. Bobo bakangata ku bianza bia Mose bintu bionso biakafua Bena Isalele ne disanka bua kuenza nʼabi bintu bionso bia mu nsubu wa tshitendelelu. Bakatshidi halua kudiye ne bintu biakadi mitshima yabo misue ku dinda ku dinda. Bantu ba lungenyi lule bakadi benza midimu ya mishindu yonso mu tshitendelelu bakaha kudi Mose, bakamuambila ne, Bantu badi balue ne bintu bitamba bungi bia kuenza nʼabi mudimu wakuamba Yehowa. Nu nku Mose wakela di, bakamanyi-shangana mu tshitudilu ne, Nansha mulume nansha mukashi kalu ne bintu bikuabo bia tshitendelelu. Bakakanda bantu nunku. Bualu bua bobo bakadi ne bungi bua bintu bia kuenza nʼabi mudimu wonso, ne bintu bikuabo ha mutu. Balume bonso bakadi ne lungenyi lule munkatshi mua bena mudimu bakenza nsubu wa tshitendelelu ne bilulu dikumi bia lin muimpe ne bilulu bia bleu ne bikunzubile ne bikunze-kunzû, bakenza bakeluba kudi bena mudimu bakadi ne lungenyi lule. Bule bua tshilulu tshimue buakadi coudées makumi abidi ne muanda mukulu, ne butshiama buatshi buakadi coudées mai, bilulu bionso biakadi ne budi lumue. Wakatuangana bilulu bitanu ha buabi, bilulu bitanu ha buabi. Wakenza mesu a mbote ne bilulu bia bleu ku luseke lua tshilulu tshiakadi ha bule, Wakenza nunku kabidi ne tshilulu tshikuabo tshiakadi ha bule. Wakenza mesu a mbote makumi atanu mu tshilulu tshimue, ne mesu a mbote makumi atanu mu tshilulu tshikuabo mesu a mbote akadi atuangana. Wakenza mbote ya or makumi atanu, wakatuangasha bilulu ne mbote ai, nunku nsubu wa tshitendelelu wakadi bu nsubu umue. Wakenza bilulu bia miosa ya mbushi dikumi ne tshilulu tshimue bua kuteka ha mutu ha nsubu. Bule bua tshilulu tshimue buakadi coudées makumi asatu, ne butshiama buatshi buakadi coudées anai bilulu dikumi ne tshimue biakadi ne luidi lumue. Wakatuangasha bilulu bitanu ha buabi, ne bilulu bisambombo ha buabi. Wakenza mesu a mbote makumi atanu ku luseke lua tshilulu tshiakadi ha bule, ne mesu a mbote makumi atanu ku luseke lua tshilulu tshikuabo tshiakadi ha bule. Wakenza mbote ya tshiamu tshia mitaku makumi atanu bua kutuangasha bilulu bia nsubu bu nsubu umue. Wakenza tshintu tshia kuteka ha mutu ha nsubu ne biseba bia bimpanga bitua mu mai makunze-kunzû ne biseba bia nyama ya nkonge bia kuteka ha mutu hatshi. Wakenza mabaya mimanyike kulu a nsubu wa tshitendelelu a mitshi ya acacia. Bule bua dibaya dimue buakadi coudées dikumi, ne butshiama buadi buakadi coudée umue ne tshituha. Dibaya dimue diakadi ne tutshi tua bituha tutshiamakasha hankatshi ha dibaya, bakenza mabaya onso a mu nsubu nunku. Wakenza mabaya a mu nsubu makumi abidi a kuteka ku luseke lua ku sude, Wakenza masoso makumi anai a tshiamu tshia argent mu mabaya makumi abidi, masoso abidi mu dibaya dimue a kuteka mu tutshi tua tutuha, ne masoso abidi mu dibaya dikuabo a kutekamu tutshi tua tutuha. Wakenza kabidi mabaya makumi abidi a kuteka ku luseke lua ku nôde, ne masoso a tshiamu tshia argent makumi anai, masoso abidi mu dibaya dimue masoso abidi mu dibaya dikuabo. Wakenza mabaya asambombo a kuteka ku nyima ku luseke lua ku wesete. Wakenza mabaya abidi a kuteka ku matumba a nsubu a ku nyima. Mabaya au akadi bu mabaya abidi hanshi, kadi akadi matuangasha ku mutu ne biamu bia masoso, Wakenza bubidi buau ku matumba abidi. Mabaya muanda mukulu akadiku ne masoso a tshiamu tshia argent dikumi ne asambombo, masoso abidi ku dibaya ku dibaya. Wakenza mitshi ya acacia itanu ya kubuesha mu mabaya akadi ku luseke lumue lua nsubu wa tshitendelelu, ne mitshi itanu ya kubuesha mu mabaya a ku luseke lukuabo lua nsubu, ne mitshi itanu ya kubuesha mu mabaya adi ku nyima kua nsubu ku luseke lua ku wesete. Wakabisha mitshi hankatshi ha mabaya ku mutu tô ne ku tshitaku tshia mabaya. Wakalamika tshiamu tshia or ha mutu ha mabaya, wakenza nkanu ya or ya kubueshamu mitshi, wakalamika tshiamu tshia or ha mutu ha mitshi. Wakenza tshilulu tshia buanda bua bleu ne bukunzubile ne bukunze-kunzû ne bua lin, bakenza tshifuanyikishi tshia bakeluba mu tshilulu kudi bantu bakadi ne lungenyi lule. Wakenza makunshi a acacia anai, wakalamika tshiamu tshia or ku makunshi, akadi ne bitubuidi bia or, wakenza nkanu yau mai ya tshiamu tshia argent. Wakenza tshilulu tshikuabo tshia buanda bua bleu ne bukunzubile ne bukunze-kunzû ne bua lin tshia kuteka ku mbelu kua tshitendelelu, wakatshienzesha kudi bena lungenyi lule, wakenza makunshi atanu ne bitubuilu biau, wakalamata tshiamu tshia or ha mutu, ne nkanu ya tshilulu ya tshiamu tshia mitaku. Besalele Wakenza mushete wa acacia Buludi bua mushete buakadi coudées ibidi ne tshituha, ne butshiama buau buakadi coudée umue ne tshituha, ne bule buau bua mulu coudée umue ne tshituha. Wakalamika tshiamu tshia or ku nyima ne munda mua mushete, wakateka tshiamu tshia or ku mibangu ya mushete. Wakenza nkanu ya or mai ya kuteka ku matumba anai, ibidi ku luseke lumue, ibidi ku luseke lukuabo. Wakenza mitshi ya acacia mai, wakalamika tshiamu tshia or ku nseke yonso. Wakabuesha mitshi mu nkanu ya ku nseke ya mushete bua kutuala nʼai mushete. Wakenza tshibuikilu tshia tshiamu tshia or nkayandi, buludi buatshi buakadi coudées ibidi ne tshituha, ne butshiama buatshi buakadi coudée umue ne tshituha. Wakenza bakeluba babidi ne tshiamu tshia or tshituha tshimue tshijima, ku matengu abidi a tshibuikilu, mukeluba umue ku ditengu dimue, ne mukeluba mukuabo ku ditengu dikuabo, wakenza bakeluba ne tshibuikilu tshia mushete ne tshituha tshijima tshia or. Bakeluba bakolola mahuahua abo kulu, bakabuikila tshibuikilu tshia mushete ne mahuahua abo, bakadi belangana mpala, mpala yabo yakadi ku tshibuikilu tshia mushete. Wakenza mesa a acacia, buludi buau buakadi coudées ibidi, ne butshiama buau buakadi coudée umue, ne bule buau bua mulu coudée umue ne tshituha. Wakaladika tshiamu tshia or ha mutu ha mesa ne ku matengu onso kabidi. Wakenza tshintu tshia or bunene bua butshiama bua tshianza ku matengu onso. Wakenza nkanu ya or mai, wakateka nkanu ei ku matumba anai ku mikolo ya mesa mai. Bakateka nkanu ku nseke ya mesa bua kutuala nʼai mesa. Wakenza mitshi ya acacia, wakaladika tshiamu tshia or ku nseke yonso bua kutuala nʼai mesa. Wakenza malonga a mesa, ne nkuta ne bihanza ne bibuikilu bia bintu ebi ne tshiamu tshia or nkayandi. Wakenza tshitekelu tshia minda ne or nkayandi, bakahita tshitaku tshia kahanza, ne tshintu tshia tshiamu tshiakadi hankatshi, ne luhanza tukese, ne bihunga, ne bilongo ne tshituha tshia tshiamu tshia or tshijima. Wakenza mahu asambombo, mahu asatu ku luseke lumue lua tshitekelu ne mahu asatu ku luseke lukuabo. Wakazola bilongo bia amande ne tuhanza tusatu tuakadi ku mutu kua mahu a tshitekelu, ne tshihunga tshia or ne tshilongo, wakazola bilongo bia amande ha tuhanza tuakadi ku luseke lukuabo, ne tshihunga ne tshilongo, wakenza matu asambombo nunku. Tuhanza tunai tuakadi tuzola ne bilongo bia amande ne tshihunga tshia or ne tshilongo, tshihunga tshia or tshiakadi hankatshi ha mahu abidi, hankatshi ha mahu abidi, hankatshi ha mahu abidi, ku mahu asambombo. Bihanga ne mahu a tshitekelu biakadi bia tshituha tshia or tshimue, bakatula bintu bionso ne tshiamu tshia or nkayandi. Wakenza minda muanda mutekete ne biamu bia kujimisha nʼabi minda ne malonga ai ne or nkayandi. Bakenza bintu ebi bionso ne ntalanta wa or nkayandi. Wakenza tshioshelu tshia musonga wa manananshi ne mabaya a acacia, buludi bua tshi buakadi coudée umue, ne butshiama buatshi buakadi coudée umue, bakidikisha nseke yonso ne luidi lumue, bule buatshi bua mulu buakadi coudées ibidi, wakenza nsengu yatshi ne tshituha tshijima. Wakalamika tshiamu tshia or ha mutu hatshi ne ku nseke yatshi ne ku nsengu yatshi, wakenza tshintu tshia or ku matengu onso. Wakenza nkanu ya or ibidi kuinshi kua mutu watshi, ku matumba abidi adi ku nseke yatshi, bualu bua kutshituala. Wakenza mitshi ya acacia ibidi, wakalamina or ku nseke yai yonso. Wakenza manyi adibo bela ha mutu ne musenga wa manananshi kudi bantu bakadi ne lungenyi lule. Wakenza tshioshelu tshia kuosha nyama ne mabaya a acacia. Buludi buatshi buakadi coudées itanu ne butshiama buatshi buakadi coudées itanu, ne bule buatshi bua mulu buakadi coudées isatu. Wakenza nsengu ku matumba anai, wakenza nsengu ne tshituha tshijima, wakalamata tshiamu tshia mitaku ku nseke yonso. Wakenza malonga onso a tshioshelu ne bivuadi ne nkasu ne malonga ne bitubuidi bia kukuata nʼabi munyinyi ne bihanza bia kahia ne bintu biatshi bionso ne tshiamu tshia mitaku. Wakenzela tshioshelu munyingu wa tshiamu tshia mitaku, wakatekeye munda mua mibangu ya ku mutu kua tshioshelu hankatshi, mu bule buatshi. Wakatula nkanu mai ya kuteka ku matumba a tshintu atshi bua kubueshamu mitshi. Wakenza mitshi ya acacia, wakalamata tshiamu tshia mitaku ku nseke yonso. Wakabuesha mitshi ei mu nkanu ya ku nseke ya tshioshelu, bua kutshituala nʼai, wakashiya munda muatshi mutuhu. Wakenza tshiowelu tshia mai ne tshiamu tshia mitaku, ne mesa atshi ne tshiamu tshia mitaku, wakatshienza ne ndimuenu ya ba kashi bakadi benza mudimu ku mbelu kua nsubu wa tshitendelelu. Wakalongolola luhangu lua muaba wa kutendelela ku luseke lua ku sude wakenza bilulu bia lin muimpe tô ne ku coudées lukama, ne makunshi makumi abidi, ne nkanu ya tshiamu tshia mitaku makumi abidi, kadi bitubuidi bia ku makunshi biakadi bia argent. Ku luseke lua ku nôde wakenza bilulu tô ne ku coudées lukama, ne makunshi makumi abidi, ne nkanu makumi abidi, kadi bitubuidi biakadi bia argent. Ku luseke lua ku wesete wakenza bilulu to ne ku coudées makumi atanu, ne makunshi dikumi, ne nkanu dikumi ne bitubuidi bia argent dikumi. Ku luseke lua ku esete wakenza bilulu tô ne ku coudées makumi atanu. Bilulu bia ku luseke lumue lua tshibi biakadi coudées dikumi ne itanu, ne makunshi asatu ne nkanu isatu, luseke lukuabo luakadi nunku kabidi, bilulu tô ne ku coudées dikumi ne itanu ne makunshi asatu ne nkanu isatu. Bakenza bilulu ebi bionso ne buanda bua lin muimpe. Bakenza nkanu yonso ya makunshi ne tshiamu tshia mitaku, kadi bitubuidi bia makunshi biakadi bia tshiamu tshia argent, wakalengesha mitu ya makunshi onso ne tshiamu tshia argent, ne makunshi onso a luhangu akadi malengesha ne tshiamu tshia argent. Bakenza tshilulu tshia ku mbelu kua luhangu ne buanda bua bleu ne bukunzubile ne bukunze-kunzû ne bua lin muimpe kudi bantu bakadi ne lungenyi lule bule buatshi buakadi coudées ma kunu abidi ne butshiama buatshi buakadi coudées itanu, muomumue ne bilulu bia luhangu. Makunshi a tshibi akadi anai, ne nkanu ya tshiamu tshia mitaku mai, ne bitubuidi bia argent, bakalengesha makunshi ne tshiamu tshia argent. Milonda yonso ya mu nsubu wa tshitendelelu ne mu luhangu lua muaba wa kutendelela yakadi ya tshiamu tshia mitaku. Ebu mbungi bua bintu bia mu nsubu wa tshitendelelu biakabalabo bu muakamba Mose biakakuatshila Bena Lewi mu mudimu wabo, mu bukokeshi bua Itama, muana mulume wa Alona, muakuidi. Besalele, muana mulume wa Uli, muana mulume wa Hû wa mu tshisamba tshia Yuda wakenza bintu bionso bakambila Yehowa Mose. Oholiaba, muana mulume wa Ahisamaka, wa mu tshisamba tshia Dana wakadi nʼandi, mundi wa lungenyi lule wakenza bilulu bia bleu ne bikunzubile ne bikunze-kunzû. Bakasangisha or wa kuenza nʼai mudimu wa mu nsubu wa tshitendelelu ntalanta makumi abidi ne tshitema, ne nshekele nkama muanda mutekete ne makumi asatu, bu muakadi nshekele wa mu nsubu wa Nzambi. Bakabala tshiamu tshia argent bu bungi bua bantu, ntalanta lukama ne nshekele tshinunu tshimue, nkama muanda mutekete ne makumi muanda mutekete ne itanu bu muakadi nshekele wa mu nsubu wa Nzambi. Muntu ne mundi wakela beka umue udi tshituha tshia nshekele wa mu nsubu wa Nzambi, muntu ne muntu wakadibo babala, waka mana kuhita bidimu makumi abidi, bakadi balume binunu nkama isambombo, binunu bisatu, nkama itanu ne makumi atanu. Bakenza nkanu ya mu nsubu ne ya mu bilulu ne ntalanta ya argent lukama, ntalanta ku lukanu, ntalanta ku lukanu. Wakenza bitubuidi bia makunshi ne bintu bia kulengesha nʼabi makunshi ne nshekele ya argent tshinunu tshimue, nkama muanda mutekete ne makumi muanda mutekete ne itanu. Bakasangisha tshiamu tshia mitaku bu ntalanta makumi muanda mutekete, ne nshekele binunu bibidi ne nkama mai. Bakenza nʼatshi nkanu ya ku tshibi tshia nsubu, ne tshioshelu tshia nyama ne biamu bitshiamakane, ne malonga onso a tshioshelu, ne nkanu ya ku luhangu, ne nkanu ya ku tshibi tshia luhangu, ne milonda yonso ya mu nsubu, ne milonda yonso ya mu luhangu lua ku muaba wa tshitendelelu. Bakenza bilulu bia bleu ne bikunzubile ne bikunze-kunzu bia kuenza nʼabi mudimu mu muaba wa tshima, bakenzela Alona bilulu bia tshijila bu muakambila Yehowa Mose. Wakenza efoda ne or ne bilulu bia bleu ne bikunzubile ne bikunze-kunzu ne bia lin muimpe. Bakatula tshiamu tshia or to ku muhimbu mukese, bakenza nshinga ya or, bakatshikuma ne buanda bua bleu ne bukunzubile ne bukunze-kunzu ne bua lin kudi bantu ba lungenyi lule. Bakenza bintu bia kuteka ha maha bua kutuishangana bituha bia efoda bibidi. Bakenza mukaba wa efoda bu muakadibo benza efoda ne bintu bia or ne bilulu bia bleu ne bikunzubile ne bikunze-kunzû ne bia lin, bu muakambila Yehowa Mose. Bakenza mabue a onyx, bakabuesha mu masoso a or, bakafundahu mena a bisamba bia bana ba balume ba Isalele. Wakâteka ha bilulu bia ha maha bia efoda, mabue â akadi bu tshivulukidi kudi bana ba balume ba Isalele bu muakambila Yehowa Mose. Wakenza tshilulu tshia ha tshiadi kudi bantu ba lungenyi lule, bu muakenzabo efoda ne bintu bia or ne bilulu bia bleu ne bikunzubile ne bikunze-kunzu ne bia lin muimpe. Bakidikisha nseke yonso ne luidi lumue, bakatshibula tshilulu, buludi buatshi buakadi bunene bua ntanta wa tshianza ne butshiama buatshi buakadi bunene bua ntanta wa tshianza. Bakatshitekahu milongo ya masoso a mabue mai mu mulongo wa kumudilu bakateka mabue a sardoine ne topaze ne émeraude, mu mulongo muibidi mabue a rubis ne saphir ne calcédoine, mu mulongo muisatu mabue a opale ne agate ne améthyste, mu mulongo muinai mabue a chrysohthe ne onyx ne jaspe. Bakabuesha mabue au mu masoso a tshiamu tshia or. Mabue akadi bungi bua mena a bisamba bia Bena Isalele, dikumi ne bibidi, bakafundahu mena a bisamba bia Bena Isalele dikumi ne bibidi ku mulongo wa tshisamba ne tshisamba. Bakenza tukanu tua or tuakadi tuhindakana bu muonshi. Bakenza masoso a or abidi ne nkanu ibidi, bakateka nkanu ei ibidi ku nseke ibidi ya tshilulu tshia ha tshiadi. Bakabuesha tukanu tua or tuhindakana mu nkanu ibidi yakadi ku nseke ya tshilulu tshia ha tshiadi. Baketeka nsonga ibidi mikuabo ya tukanu tuhindakana mu masoso abidi, nunku bakatuteka ha bilulu bia efoda bia ha maha ku mpala kua tshilulu. Bakenza nkanu ya or ibidi bakayiteka ku luseke lua tshilulu tshia ha tshiadi luakadi lutuangane ne efoda. Bakenza nkanu ya or ibidi, bakayiteka muinshi mua bilulu bia ha maha, ku mpala kuabi ne ku mutu kua mukaba muimpe wa efoda Bakasanka tshilulu tshia ha tshiadi ne nkanu yatshi ku nkanu ya efoda ne muonshi wa bleu muhindakana tshilulu etshi tshiakashala hehi ne mukaba wa efoda, kabakatshisulula, bu muakambila Yehowa Mose. Wakenza tshikowelu tshia efoda ne buanda bua bleu, bakashiya disoso bua kubueshamu mutu, bakanyunguluka disoso ne muonshi muhindakana bu mudibo benza tshikowelu tshia nvita, bua tshikowelu katshihandiki nansha. Bakafunda bifuanyikishi bia tumuma tukese tua grenade ne buanda bua bleu ne bukunzubile ne bukunze-kunzû kuinshi kua tshikowelu tshionso. Bakenza ndibu ya or nkayandi, bakateka ndibu hankatshi ha tumuma tuakadi kuinshi kua tshikowelu, kadibu ne kamuma kadibu ne kamuma kuinshi kua tshikowelu tshia kuenza nʼatshi mudimu, bu muakambila Yehowa Mose. Bakenzela Alona ne bana bandi balume bikowelu bia lin, ne bifulu bia lin, ne bilulu bikuabo bia ha mutu, ne mihanu ya lin, ne mukaba wa lin ne bilulu bia bleu ne bikunzubile ne bikunze-kunzû, mudimu wa bantu ba lungenyi lule, bu muakambila Yehowa Mose. Bakenza tshitotolo tshia tshijila tshia tshiamu tshia or, bakafundahu bu muakafundabo ha mabue ne, TSHINTU TSHIJIDILA KUDI YEHOWA. Bakatekahu muonshi wa bleu muhindakana, bakatshisuika ha tshilulu, bu muakambila Yehowa Mose. Nunku bakashikisha mudimu wonso wa tshitendelelu, ntenta wa kusangakena, Bena Isalele bakenza malu onso akambila Yehowa Mose. Bakatuala nsubu wa tshitendelelu, Ntenta mene, kudi Mose, ne bintu bionso biakenzabo, ne nkanu ne mabaya, ne mitshi ne makunshi ne masoso a tshiamu, ne tshintu tshia biseba bia bimpanga tshima mu mai makunze-kunzû tshia kuteka ha mutu ha nsubu, ne tshintu tshia biseba bia nkonge tshia kuteka ha mutu hatshi, ne tshilulu tshia hankatshi ha nsubu, ne mushete wa tshihungidi tshia mei a Nzambi, ne mitshi ya mushete, ne tshibuikilu tshia mushete, ne mesa, ne malonga onso a mesa, ne bidia bilesha, ne bitekelu bia minda, ne minda ne malonga au onso, ne manyi a minda, ne tshioshelu tshia tshiamu tshia or, ne manyi adibo bela ha mutu, ne musenga wa manananshi, ne tshilulu tshia kuteka ku mbelu kua nsubu, ne tshioshelu tshia tshiamu tshia mitaku, ne biamu bitshiamakane, ne mitshi yatshi, ne malonga atshi onso, ne tshiowelu ne mesa atshi, ne bilulu bia luhangu lua muaba wa kutendelela, ne makunshi a luhangu ne nkanu, ne tshilulu tshia tshibi tshia luhangu, ne mionshi yonso ne milonda ne bintu bionso bia kuenza nʼabi mudimu mu nsubu wa tshitendelelu, mbia ntenta wa kusangakena, ne bilulu bitedibue bimpe bia kuenza nʼabi mudimu wa mu nsubu wa tshijila, ne bilulu bia tshijila bia Alona muakuidi, ne bilulu bia bana bandi balume bia kuenza nʼabi mudimu wa buakuidi. Bena Isalele bakenza mudimu wonso wakambila Yehowa Mose. Mose wakamona mudimu wonso wakenzabo, ne mona, baka wenza bu muakamba Yehowa Mose wakabandisha disanka. Yehowa wakambila Mose ne, Halua dituku dia kumudilu dia ngondo wa kumudilu, ushimike ntenta wa kusambakena. Ubueshemu mushete wa tshihungidi tshia mei a Nzambi, ubuikile mushete ne tshilulu tshia mu nsubu. Uluemu ne mesa, ulongolole bintu bidihu, uluemu ne bitekelu bia minda, utekemu minda. Uteke tshioshelu tshia or tshia musenga wa manananshi ku mpala kua mushete, ukudike tshilulu ku mbelu kua nsubu wa tshitendelelu. Uteke tshioshelu tshia mulambu wa kuosha ku mbelu kua nsubu wa tshitendelelu. Uteke tshiowelu hankatshi ha ntenta wa kusambakena ne tshioshelu tshia milambu, welemu mai. Ushimike luhangu lua tshilulu lunyunguluke, ukudike tshilulu tshia ku mbelu kua luhangu. Wangate manyi adibo bela ha mutu, wamiamine ha nsubu wa tshitendelelu ne ha bintu bionso bidimu, ujidile nsubu ne bintu biandi bionso, neikale mujidila. Umuamine manyi ha tshioshelu tshia mulambu wa kuosha, ne ha bintu biatshi bionso, ujidile tshioshelu tshioshelu netshikale tshijidila. Umiamine manyi ha tshiowelu ne ha mesa atshi, utshijidile. Ulue ne Alona ne bana bandi balume ku mbelu kua ntenta wa kusambakena, uboweshe mai. Uluatshishe Alona bilulu bijidila, umuele manyi, umujidike, bua angenzele biandi mudimu wa buakuidi. Ulue ne bana bandi balume kabidi, ubaluatshishe bikowelu, ubele manyi bu muwakela tatuʼabo bua kukuatshilabo mudimu wa buakuidibualu ebu nebubajidile mu mudimu wa buakuidi bua tshiendelele mu bikondo biabo bionso. Mose wakenza nunku, wakenza malu onso akamuambila Yehowa. Bakashimika nsubu wa tshitendelelu mu dituku dia kumudilu dia ngondo wa kumudilu mu tshidimu tshibidi. Mose wakashimika nsubu, wakalongolola nkanu ne mabaya, wakabueshamu mitshi, wakajadika makunshi a nsubu. Wakabikila nsubu ne tshilulu tshia ha mutu ha nsubu, wakateka tshilulu tshikuabo ha mutu hatshi, bu muakambila Yehowa Mose. Wakabuesha mabue a mikenji mu mushete, wakateka mitshi ya kutuala nʼai mushete, wakateka tshibuikilu ha mutu ha mushete. Wakalua ne mushete mu nsubu wa tshitendelelu, wakakudika tshilulu, wakajibikila mushete bu muakambila Yehowa Mose. Wakateka mesa mu nsubu wa tshitendelelu ku luseke lua ku nôde, ku mpala kua tshilulu. Wakalongolola mampa ha mesa ku mpala kua Yehowa, bu muakambila Yehowa Mose. Wakateka bitekelu bia minda mu nsubu wa tshitendelelu ku mpala kua mesa ku luseke lua nsubu lua ku sude. Wakatemesha minda ku mpala kua Yehowa bu muakambila Yehowa Mose. Wakateka tshioshelu tshia or mu nsubu wa tshitendelelu ku mpala kua tshilulu, wakoshahu musenga wa manananshi, bu muakambila Yehowa Mose. Wakakudika tshilulu ku mbelu kua nsubu. Wakateka tshioshelu tshia mulambu wa kuosha ku mbelu kua nsubu wa tshiendelele wakoshahu mulambu wa bukula bua manvua bu muakambila Yehowa Mose. Wakateka tshiowelu hankatshi ha ntenta wa kusambakena ne tshioshelu tshia mulambu ya kuosha, wakelamu mai a kuowa, akadi Mose ne Alona ne bana bandi balume bowesha nʼau bianza ne makasa. Hakadibo babuela mu nsubu wa tshiendelele ne hakaluabo hehi ne tshioshelu, bakowa mai, bu muakambila Yehowa Mose. Wakashimika luhangu ludi lunyunguluka nsubu wa tshitendelelu ne tshioshelu tshia milambu ya kuosha, wakakudika tshilulu ku mbelu kua luhangu. Mose wakashikisha mudimu wonso nunku. Hashishe ditutu diakabuikila ntenta wa kusangakena, ne butumbi bua Yehowa buakûla nsubu tente. Mose kakamanya mua kubuela mu ntenta bualu bua difutu diakimana ha mutu ha nsubu, ne butumbi bua Yehowa buakula nsubu tente. Mu ngendu yabo yonso, hakabandishibua difutu ha mutu ha nsubu, Bena Isalele bakadi babanga luendu. Kadi hakadi difutu kadiyi dibandishibua, kabakaya mu luendu tô ne ku dituku diakabandishibua difutu. Bualu bua difutu dia Yehowa diakadi ha mutu ha nsubu mu munya, ne mu butuku kahia kakadihu, ku mesu kua Bena Isalele bonso mu ngendu yabo yonso. Yehowa Wakabikila Mose, wakamuambila mu ntenta wa kusangakena ne, Wambile Bena Isalele ne, Halua muntu ne bintu bidiye musue kuoshila Nzambi, alue biandi ne mulambu wa muana wa ngombe anyi muana wa mukoko. Bikala mulambu wandi wa kuosha wa muana wa ngombe, neafile mulume udi kayi ne tshilema, neamushihele ku mbelu kua ntenta wa kusangakena, ne Yehowa neamuitabushe. Yeye neatenteke tshianza tshiandi ha mutu ha ngombe wa mulambu ne Yehowa neawitabushe bua kubuikidila nʼau bubi buandi. Yeye neashihe muana wa ngombe ku mesu kua Yehowa, ne bana balume ba Alona bakuidi nebaye ne mashi, nebamiamine mashi ku tshioshelu tshidi ku mbelu kua ntenta wa kusangakena. Neubule tshiseba tshia ngombe, neamukose bituha. Bana balume ba Alona bakuidi nebateke kahia ha tshioshelu, balonge nkunyi mu kahia, ne bana balume ba Alona bakuidi nebalonge bituha ne mutu ne dianyi ha nkunyi mu kahia kadi ha tshioshelu, kadi nebuvuwe bintu bia munda ne bioku ne mai; ne muakuidi neoshile bintu bionso ha tshioshelu, bu mulambu udibo bosha ha kahia bu tshintu tshidi tshi tua dihembu kudi Yehowa. Bikala mulambu wandi wa kuosha muana wa mukoko anyi muana wa mbushi, yeye neafile mulume udi kayi ne tshilema. Yeye neamushihe ku luseke lua tshioshelu lua ku nôde, ku mesu kua Yehowa; ne bana balume ba Alona bakuidi nebamiamine mashi ku tshioshelu. Yeye neamukose bituha ne mutu ne dianyi, ne muakuidi neabilonge ha nkunyi idi mu kahia kadi ha mutu ha tshioshelu, kadi neuvuwe bintu bia munda ne bioku ne mai, ne muakuidi neoshile bintu bionso ha tshioshelu bu mulambu wa kuosha ha kahia bu tshintu tshidi tshitua dihembu kudi Yehowa. Bikala mulambu wandi wa kuosha wa nyunyu, yeye neafile nansha nyunyu wa nkutshi nansha mputu nyunyu. Muakuidi nealue handi ku tshioshelu, neanyengabashe nshingu wandi, neamuoshile ha tshioshelu, mashi andi neamate hanshi ku luseke lua tshioshelu, yeye neumushe dibodi ne masala, nealele ku luseke lua tshioshelu ludi ku esete, mu muaba wa butue. Yeye neamukuate ku mahuahua andi, neamuhande hankatshi, kadi kahanduludi bituha bibidi nansha, ne muakuidi neamuoshile ha tshioshelu, ha nkunyi idi mu kahia bu mulambu wa kuosha ha kahia bu tshintu tshidi tshitua dihembu kudi Yehowa. Halua muntu ne mulambu wa bukula kudi Yehowa, neafile bukula bubotesha, newelehu manyi ne musenga wa manananshi, nealue nʼabu kudi bana balume ba Alona bakuidi, neambulule dianza tente ne bukula ne manyi abu ne manananshi abu onso, ne muakuidi neabuoshile ha tshioshelu, bu tshivilukidi, bu tshintu tshidi tshi tua dihembu kudi Yehowa, ne tshituha tshia bukula tshidi tshishale netshikale tshia Alona ne bana bandi balume ntshintu tshidi tshitambe tshia tshijila tshia mulambu wa kuoshila Yehowa ha kahia. Hawalua ne mulambu wa bukula budibo balamba mu nfulu, nebuikale mikata ya bukula budi kabuyi ne luevene busangisha ne manyi, anyi mikata ya bukula budi kabuyi ne luevene idi ne manyi mela ha mutu. Bikala mulambu webe wa bukula budibo balamba mu dilonga, newikale wa bukula budi kabuyi ne luevene busangisha ne manyi. Wewe neusunsulule mukata eu, neuwelehu manyi tshintu etshi ntshintu tshia mulambu wa bukula. Bikala mulambu webe wa bukula budibo balamba mu dilonga, neusangishe bukula bubotesha ne manyi. Wewe neulue ne mulambu wa bukula budi busangisha ne bintu ebi kudi Yehowa, ulue nʼabi kudi muakuidi ne yeye nealue nʼabi ku tshioshelu. Muakuidi neameme tshituha tshia mulambu wa bukula bu tshivulukidi, neatshioshile ha tshioshelu ne kahia bu tshintu tshidi tshi tua dihembu kudi Yehowa. Tshituha tshidi tshishale netshikale tshia Alona ne bana bandi balume ntshintu tshidi tshitambe tshia tshijila tshia mulambu wa kuoshila Yehowa ha kahia. Kanulu kudi Yehowa ne mulambu wa bukula budi busangisha ne luevene, kanuoshi luevene anyi buitshi bu mulambu wa kuoshila Yehowa. Nudi mua kulua ne bintu bia kumudilu binudi nuhuola kudi Yehowa, kadi bintu ebi kabiena bu bintu bidi bitua dihembu ha tshioshelu. Neutuishe milambu yonso ya bukula ne luehu, kanulekedi luehu lua tshihungidi tshia Nzambi mu milambu yenu ya bukula, tuishai milambu yonso ne luehu. Biwalua ne mulambu wa bintu bia kumudilu binudi nuhuola kudi Yehowa, nufile bintu bidi mu miehu biosha mu kahia, miehu mihia-mihia idibo ba tua diambedi. Wewe neuwelehu manyi ne musenga wa manananshi tshintu etshi ntshintu tshia mulambu wa bukula. Muakuidi neabuoshe bu tshivulukidi, tshituha tshia miehu nu tua ne tshia manyi ne musenga wonso wa manananshi tshintu etshi ntshintu tshia mulambu wa kuoshila Yehowa ha kahia. Bikala mulambu wa mundi wa kumuvuisha nʼau ditalala, yeye neafile muana wa ngombe, nansha mulume nansha mukashi, udi kayi ne tshitema, ku mesu kua Yehowa. Yeye neatenteke tshianza tshiandi ha mutu ha muana wa ngombe wa mulambu wandi, neamushihe ku mbelu kua ntenta wa kusangakena, ne bana balume ba Alona bakuidi nebamiamme mashi ku tshioshelu. Yeye neoshe mulambu wa kuvuisha nʼau ditalala bu mulambu wa kuoshila Yehowa ha kahia, dianyi didi dibuikila bintu bia munda ne dianyi dionso dia ha mutu ha bintu bia munda, tumuma tubidi ne dianyi didi ha mutu hatu hehi ne bituntuku bia bibelu ne lukutu lua mutshima ne tumuma tubidi yeye neanumushe. Bana balume ba Alona nebabioshile ha tshioshelu, ha nkunyi idi mu kahia tshintu etshi ntshintu tshia mulambu wa kuosha ha kahia, bu tshintu tshidi tshitua dihembu kudi Yehowa. Bikala mulambu wa mundi wa kumuvuisha nʼau ditalala wa munkatshi mua mikoko wa kudia kudi Yehowa, neafue mulume nansha mukashi udi kayi ne tshilema. Biafileye muana wa mukoko bu mulambu wandi, nealue handi ku mesu kua Yehowa, neatenteke tshianza tshiandi ha mutu ha muana wa mukoko wa mulambu wandi, neamushihe ku mbelu kua ntenta wa kusangakena, bana balume ba Alona nebamiamine mashi ku tshioshelu. Yeye neoshe mulambu wa kuvuisha nʼau ditalala bu mulambu wa kuoshila Yehowa ha kahia, yeye neumushe dianyi dionso ne dianyi dia mukila didi hehi ne muongo ne dianyi didi ha mutu ha bintu bia munda, tumuma tubidi ne dianyi didi ha mutu hatu hehi ne bituntuku bia bibelu ne lukutu lua mutshima ne lua tumuma kabidi yeye neabiumushe. Muakuidi neabioshe ha tshioshelu etshi ntshintu tshia kudia tshidibo bafila bu mulambu wa kuoshila Yehowa ha kahia. Bikala mulambu wa mundi mbushi, nealue handi ku mesu kua Yehowa, neatenteke tshianza tshiandi ha mutu handi, neamushihe ku mbelu kua ntenta wa kusangakena, ne bana balume ba Alona nebamiamine mashi ku tshioshelu. Neafue mulambu wandi bu mulambu wa kuoshila Yehowa ha kahia, neumushe dianyi didi dibuikila bintu bia munda ne dianyi dionso didi ha mutu ha bintu bia munda, tumuma tubidi ne dianyi didi ha mutu hatu hehi ne bituntuku bia bibelu ne lukutu lua mutshima ne lua tumuma kabidi neabiumushe. Muakuidi neabioshe ha tshioshelu etshi ntshintu tshia kudia tshidibo bafila bu mulambu wa kuoshila Yehowa ha kahia, bu tshintu tshidi tshitua dihembu, dianyi dionso ndia Yehowa. Bualu ebu nebuikale bu mukenji wa tshiendelele mu nsubu yenu yonso mu bikondo bienu bionso kanudi nansha dianyi nansha mashi. Yehowa wakambila Mose ne, Wambile Bena Isalele ne, Bienza muntu bualu bubi ku mpukahuka budi Yehowa uhidia, bienza muakuidi muela manyi ha mutu bualu bubi budi buhisha bantu, yeye nealele mulambu wa muana wa ngombe udi kayi ne tshitema kudi Yehowa, bu mulambu wa kubuikidila nʼau bubi buandi. Nealue ne muana wa ngombe ku mbelu kua ntenta wa kusangakena ku mesu kua Yehowa, neatenteke tshianza tshiandi ha mutu ha muana wa ngombe, neashihe muana wa ngombe ku mesu kua Yehowa. Muakuidi muela manyi ha mutu neangate mashi makuabo a muana wa ngombe, nealue nʼau mu ntenta wa kusangakena, muakuidi neafue munu wandi mu mashi, neamiamine mashi misangu muanda mutekete ku mpala kua tshilulu tshikudika tshidi hankatshi ha nsubu wa tshitendelelu ku mesu kua Yehowa. Muakuidi nealabe mashi ku nsengu ya ku tshioshelu tshia musenga wa manananshi tshidi mu ntenta wa kusangakena ku mesu kua Yehowa, neahongolole mashi onso a muana wa ngombe ku tshitaka tshia tshioshelu tshia kahia tshidi ku mbelu kua ntenta wa kusangakena. Yeye neamushe dianyi dionso dia muana wa ngombe wa mulambu wa kubuikila nʼau bubi ne dianyi didi ha mutu ha bintu bia munda, tumuma tubidi ne dianyi didi ha mutu hatu hehi ne bituntuku bia bibelu ne lukutu lua mutshima ne lua tumuma neanumushe, bu mudibo bumusha dianyi dia muana wa ngombe wa mulambu wa kuikisha nʼau ditalala, muakuidi neabioshe ha tshioshelu tshia kahia. Tshiseba tshia muana wa ngombe ne munyinyi wandi wonso ne mutu wandi ne bioku biandi ne bintu bia munda ne tuma tuandi ne mubidi wandi mujima, neabituale ku butshika bua tshitudilu ku muaba muteke kudibo bela butue, neabioshe ha nkunyi ne kahia, yeye neabioshile kudibo bela butue. Bienza Bena Isalele bonso bualu bubi, ne bikala bualu ebu busokome ku mesu kuabo, bienzabo bualu budi Yehowa uhidia ne biahilabo, ne hamanyabo bualu bubi buakenzabo, bantu bonso ba mu tshisumbu tshia Bena Isalele nebafile muana mulume wa ngombe bu mulambu wa kubuikila nʼau bubi, balue nʼandi ku mbelu kua ntenta wa kusangakena. Bakulu ba mu tshisumbu tshia Bena Isalele nebatentekashe bianza biabo ha mutu ha muana mulume wa ngombe ku mesu kua Yehowa, nebashihe muana mulume wa ngombe ku mesu kua Yehowa. Muakuidi nealue ne mashi makuabo a muana mulume wa ngombe ku nsubu wa tshitendelelu, muakuidi nealue munu wandi mu mashi, neamiamine misangu muanda mutekete ku mpala kua tshilulu tshikudika ku mesu kua Yehowa. Nealabe mashi ku nsengu ya ku tshioshelu tshidi mu ntenta wa kusangakena ku mesu kua Yehowa, yeye neahongolole mashi onso ku tshitaku tshia tshioshelu tshia kahia tshidi ku mbelu kua ntenta wa kusangakena. Neumushe dianyi dionso, neadioshe ha tshioshelu. Yeye nênze nunku ne muana mulume wa ngombe, bu muakenzeye ne muana mulume wa ngombe wa mulambu wa kubuikila nʼau bubi bua bantu, muakuidi neafile mulambu wa kubuikila nʼau bubi buabo nunku, ne bubi buabo nebuikale bubuikidibue. Yeye neatuale muana mulume wa ngombe ku butshika bua tshitudilu, neamuoshe ha kahia bu muakenzeye ne muana mulume wa ngombe wa kumudilu eu udi mulambu wa kubuikila nʼau bubi bua bantu bonso. Bienza mukokeshi wa bantu bualu bubi ku mpukahuka budi Yehowa uhidia ne biahilabo, ne hamanyeye bualu bubi buakenzeye, neafue mpumbu wa mbushi udi kayi ne tshilema bu mulambu wandi, neatenteke tshianza tshiandi ha mutu ha mbushi, neamushihe kudibo bashihela mulambu wa kuosha ha kahia ku mesu kua Yehowa, eu udi mulambu wa kubuikila nʼau bubi. Muakuidi nealue munu wandi mu mashi makuabo a mulambu, nealabe ku nsengu ya ku tshioshelu tshia kahia, neahongolole mashi makuabo ku tshitaku tshia tshioshelu tshia kahia. Neoshe dianyi dionso ha tshioshelu, bu muakenzeye ne dianyi dia mulambu wa kuikisha nʼau ditalala, muakuidi neafue mulambu wa ku buikila nʼau bubi buandi ne bubi buandi nebuikale bubuikidibue. Bienza Muena Isalele bualu bubi ku mpukahuka budi Yehowa uhidia ne biahileye, ne hamanyeye bualu bubi buakenzeye, yeye neafile mukashi wa mbushi udi kayi ne tshilema bu mulambu wa bubi buakenzeye. Yeye neatenteke tshianza tshiandi ha mutu ha mbushi wa mulambu wandi, neamushihe kudibo bashihela mulambu wa kuosha ha kahia. Muakuidi neafue munu wandi mu mashi makuabo, nealabe ku nsengu ya ku tshioshelu tshia kahia, neahongolole mashi makuabo ku tshiaku tshia tshioshelu. Neumushe dianyi dionso bu muakenzeye ne mulambu wa kuvuisha nʼau ditalala, muakuidi neadioshe ha tshioshelu bu tshintu tshidi tshitue dihembu kudi Yehowa, muakuidi neafile mulambu wa kubuikila nʼau bubi buandi, ne bubi buandi nebuikale bubuikidibue. Bialueye ne muana wa mukoko bu mulambu wa kubindila nʼau bubi, nealue biandi ne mukashi wa mukoko udi kauyi ne tshilema. Yeye neatenteke tshianza tshiandi ha mutu ha mukoko wa mulambu wandi, neanshihe kudibo bashihela mulambu wa kuosha ha kahia. Muakuidi neafue munu wandi mu mashi makuabo, neâlabe ku nsengu ya ku tshioshelu tshia kahia, neahongolole mashi onso makuabo ku tshitaku tshia tshioshelu. Neumushe dianyi dionso bu muakenzeye ne mulambu wa kuvuisha nʼau ditalala, muakuidi neadioshe ha tshioshelu bu muakenzeye ne milambu ya kuosha ha kahia, muakuidi neafile mulambu wa kubuikila nʼau bubi buandi, ne bubi buandi nebuikale bubuikidibue. Bienza muntu bualu bubi, yeye mumane kuditshiha ne muikale mumanyi wa bualu, mubumone ne mesu andi, mubumanye mu mutshima wandi kadi yeye muhidie kumanyisha bantu, yeye neadituadile dihila dia bubi buandi. Bialenga muntu tshianza tshiandi ha tshintu tshibi, nansha mifuba ya nyama udi kayi muakane, nansha mifuba ya ngombe udi kayi muakane, nansha mifuba ya tshintu tshidi tshidikoka hanshi tshidi katshiyi tshiakane, ne bikala bualu ebu busokoka ku mesu kuandi, yeye udi muntu wa bukoya, neahile. Anyi bialengeye tshianza ha manyanu a muntu ne bikala bualu ebu busokoka ku mesu kuandi, hamanyeye bualu ebu, yeye neahile. Anyi biaditshiha muntu lubilu ne mishiku yandi bua kuenza bualu bubi anyi bualu buimpe, biaditshiha muntu lubilu nunku ne bikala bualu ebu busokoka ku mesu kuandi, hamanyeye bualu, yeye neahile. Hahileye bua bualu bubi, yeye neatonde bualu bubi buakenzeye yeye neafile mulambu kudi Yehowa wa disambuka dia mikenji, nansha muana mukashi wa mukoko nansha muana mukashi wa mbushi, bu mulambu wa disambuka dia mikenji, ne muakuidi neafile mulambu bua kumubuikidila nʼau bubi buandi. Bikaleye kayi ne mushinga wa muana wa mukoko, yeye neafile mulambu wa disambuka dia mikenji kudi Yehowa, nansha nyunyu ya nkutshi ibidi nansha mputu nyunyu ibidi, nyunyu umue bu mulambu wa kubuikila nʼau bubi ne mukuabo bu mulambu wa kuosha ha kahia. Yeye nealue nʼai kudi muakuidi, neafile mulambu wa kubindila nʼau bubi diambedi, neanyengabashe nshingu wandi kadi kena umuhandulula nansha, neamiamine mashi makuabo a mulambu wa kubuikala nʼau bubi ku luseke lua tshioshelu, ne mashi makuabo yeye neahongolole ku tshitaku tshia tshioshelu, tshintu etshi mmulambu wa kubuikila nʼau bubi. Neafile nyunyu muibidi bu mulambu wa kuosha ha kahia, bu muakadi mikenji, muakuidi neafile mulambu wa kumubuikidila nʼau bubi buandi ne bubi buandi nebuikale bubuikidibue. Bikaleye kayi ne mushinga wa nyunyu ya nkutshi ibidi anyi mputu nyunyu ibidi, yeye neafile tshituha tshia dikumi tshia épha wa bukula bu mulambu wa kubuikila nʼau bubi bua bantu, kedihu nansha manyi nansha musenga wa manananshi, eu mmulambu wa kubuikila nʼau bubi bua bantu. Yeye nealue nʼabu kudi muakuidi, ne muakuidi neabuambule dianza tente bu tshivulukidi, neabuoshe ha tshioshelu bu mulambu wa kuoshila Yehowa ha kahia eu udi mulambu wa kubuikila nʼau bubi bua bantu. Muakuidi neafile mulambu wa kumubuikidila nʼau bubi buakenzeye, ne bubi buandi nebuikale bubuikidibue, tshituha tshia bukula tshidi tshishale netshikale tshia muakuidi, bu mudibo benza ne mulambu wa bukula. Yehowa wakambila Mose ne, Biasambuka muntu ku mikenji bua kuenza bualu bubi ku mpukahuka mu malu a tshijila a Yehowa, yeye neafile mulambu wa disambuka dia mikenji kudi Yehowa, tshimpanga tshidi katshiyi ne tshitema mushinga wa nshekele wa mu nsubu wa Nzambi bu mulambu wa disambuka dia mikenji. Yeye neahingishe mushinga wa tshintu tshia tshijila ne tshituha tshitanu ha mutu, neabifile mu bianza bia muakuidi, ne muakuidi neafile tshimpanga bu mulambu wa disambuka dia mikenji, ne bubi buandi nebuikale bubuikidibue. Bienza muntu bualu bubi budi Yehowa uhidia, kayi mumanye bualu, yeye neahile, neadituadile dihila dia bubi buandi. Neafile tshimpanga tshidi katshiyi ne tshilema kudi muakuidi tshia mushinga ûdi witabusha bu mulambu wa disambuka dia mikenji, ne muakuidi neafile mulambu wa disambuka dia mikenji buakenzeye ku mpukahuka, kayi mubumanye, ne bubi buandi nebuikale bubuikidibue. Eu udi mulambu wa disambuka dia mikenji, yeye udi ne dihila dilelela ku mesu kua Yehowa. Yehowa wakambila Mose ne, Biasambuka muntu ku mikenji bua kuenzela Yehowa bualu bubi, ne bienzeleye muena mutumba nʼandi bualu bubi ne bintu biakafileye mu bianza biandi anyi hendululeye nʼabi mushinga anyi bibeye bintu biandi, anyi biakengesheye muena mutumba nʼandi, anyi bianguleye tshintu tshiakajimishabo kudi mukuabo mumudinge bua bualu ebu ne muditshiheye ne mashimi, bienzeye malu mabi â onso, bienzeye bibi, bikaleye muhile, yeye neahingishe bintu biakibeye anyi tshintu tshiakanyengeye ku bukole anyi bintu biakufileye mu bianza biandi anyi bintu biakadi bijimina biakuanguleye anyi tshintu tshiakaditshiheye nʼatshi ne mashimi, neahingishe tshintu atshi ne tshituha tshitanu ha mutu katshi, neatshihingishe kudi muenʼatshi mu dituku didibo bamuhisha. Yeye neafile mulambu wa disambuka dia mikenji kudi Yehowa, tshimpanga tshidi katshiyi ne tshialua tshia mushinga ûdi witabusha kudi muakuidi bu mulambu wa disambuka dia mikenji, muakuidi neafile mulambu wa kumubuikidila nʼau bubi kudi Yehowa ne bubi buakenzeye nebuikale bubuikidibue. Yehowa wakambila Mose ne, Elela Alona ne bana bandi balume mukenji ne, Eu udi mukenji wa mulambu wa kuosha ha kahia, mulambu wa kuosha newikale ha nkunyi ha tshioshelu butuku buonso tô ne dinda, kahia nekikalehu butuku buonso, kakajimi nansha. Muakuidi nealuate bilulu biandi bia lin ne mihanu ya lin, neangate butue bua kahia kakosha mulambu wa ha tshioshelu, neabuteke hehi ne tshioshelu. Neavule bilulu ebi, nealuate bilulu bikuabo, neatuale butue ku butshika bua tshitudilu ku muaba mutoke. Kahia ka ha tshioshelu kakajimi nansha, muakuidi neatekehu nkunyi dinda ne dinda, nealonge mulambu wa kuosha ha tshioshelu, neoshe dianyi dia mulambu wa kuvuisha nʼau ditalala. Kahia katemene ha tshioshelu ku dituku ne ku dituku, kakajimi nansha. Eu udi mukenji wa mulambu wa bukula bana balume ba Alona nebaufile ku mesu kua Yehowa ku mpala kua tshioshelu. Yeye neambule dianza dia bukula bubotesha tente budi busangisha ne manyi ne musenga wa manananshi, neabuoshe ha tshioshelu bu tshintu tshidi tshima dihembu, bu tshivulukidi kudi Yehowa. Tshituha tshidi tshishale netshikale kudi Alona ne bana bandi balume bu tshintu tshia kudia, bobo nebadie tshituha tshidi katshiyi ne luevene mu muaba wa tshijila, mu luhangu lua ntenta wa kusambakena. Kabalambi tshituha atshi ne luevene. Nakabaha tshituha tshia mulambu wanyi wa kuosha ha kahia, tshintu tshidi tshitambe tshijila bu mulambu wa kubuikila nʼau bubi bua bantu ne mulambu wa disambuka dia mikenji. Bana balume ba Alona bonso nebatshidie, bu tshituha tshiabo mu bikondo biabo bionso munkatshi mua mulambu ya kuoshila Yehowa ha kahia, muntu yonso udi ulenga bintu ebi tshianza neikale muntu wa tshijila. Yehowa wakambila Mose ne, Eu udi mulambu wa Alona ne bana bandi balume udibo bafila kudi Yehowa mu dituku didibo bela manyi ha mutu tshia dikumi tshia épha wa bukula bubotesha bu mulambu wa bukula, neafile tshituha dinda ne tshituha tshikuabo dilolo. Nebabusangishe ne manyi mu dilonga, ne hashikishabo kubulamba, nebafile bituha bidi bilamba kudi Yehowa bu tshintu tshidi tshitua dihembu. Muakuidi wa munkatshi mua bana balume ba Alona, udibo bela manyi ha mutu bua kuhianeye mudimu wandi, neaufile kudi Yehowa bu muakelabo mukenji tshiendelele, neboshe mulambu eu mujima. Mulambu wonso udi muakuidi ufila nebawoshe ne kahia, kabadi mulambu eu. Yehowa wakambila Mose ne, Wambile Alona ne bana bandi balume ne, Eu udi mukenji wa mulambu wa kubuikila nʼau bubi bua bantu mu muaba udibo bashihela mulambu wa kuosha ha kahia nebashihe mulambu wa kubuikila nʼau bubi bua bantu ku mesu kua Yehowa, eu udi mulambu mutambe wa tshijila. Muakuidi udi ufila mulambu wa kubuikila nʼau bubi, yeye neaudie, neaudie mu muaba wa tshijila mu luhangu lua ntenta wa kusangakena. Tshintu tshionso tshidi tshituangane ne munyinyi au netshikale tshia tshijila, hamiaminabo mashi a mulambu, biamatshilau ha tshmialu, wewe neutshisukule mu muaba wa tshijila. Kadi tshivuadi tshia dima tshidibo baulambila nebatshishihe, biaulambilabo mu tshivuadi tshia tshiamu tshia mitaku, nebatshisukule bimpe ne mai. Bana balume bonso ba bakuidi nebaudie, etshi ntshintu tshitambe tshijila. Kabadi mulambu wa kubuikila nʼau bubi udibo balue nʼau ne mashi mu ntenta wa kusangakena bua kubuikila nʼau bubi bua bantu mu muaba wa tshijila, nebawoshe ne kahia. Eu udi mukenji wa mulambu wa disambuka dia mikenji, etshi ntshintu tshidi tshitambe tshijila. Nebashihele mulambu wa disambuka dia mikenji kudibo bashihela mulambu wa kuosha ha kahia, muakuidi neamiamine mashi ku nseke yonso ya tshioshelu. Neafile dianyi dionso ne mukala udi ne dianyi ne dianyi didi dibuikila bintu bia munda, tumuma tubidi ne dianyi diatu didi hehi ne bituntuku bia bibelu ne lukutu lua mutshima ne lua tumuma yeye neanumushe, neabioshe ha tshioshelu bu mulambu wa kuoshila Yehowa ha kahia eu udi mulambu wa disambuka dia mikenji. Bana balume bonso ba bakuidi nebaudie mu muaba wa tshijila, etshi ntshintu tshitambe tshijila. Mulambu wa disambuka dia mikenji udi bu mulambu wa kubuikila nʼau bubi bua bantu, mukenji umue udi wisuika, muakindi udi ufila mulambu wa kubuikila nʼau bubi bua bantu neangate tshituha tshia munyinyi tshidi tshishale. Muakuidi udi ufila mulambu wa kuosha ha kahia wa muntu mukuabo, yeye mene neangate tshiseba tshia mulambu wa kuosha udiye ufila. Muakuidi udi ufila mulambu wa bukula budibo balamba mu nfulu ne mu tshivuadi ne mu dilonga, yeye mene neangate bintu ebi bionso. Mulambu wonso wa bukula budi busangisha ne manyi, anyi mulambu wa bukula nkayabu, newikale wa bana balume ba Alona, muntu tshituha tshiandi muntu tshituha tshiandi. Eu udi mukenji wa mulambu wa kuvuisha nʼau ditalala udibo bafila kudi Yehowa. Biafila muntu mulambu eu bua kubakidila Nzambi, yeye nealue kabidi ne mikata ya bukula budi kabuyi ne luevene busangisha ne manyi, ne mikata ya bukula budi kabuyi ne luevene miela manyi ha mutu, ne mikata ya bukula bubotesha budi busangisha ne manyi. Yeye neafile mulambu wandi wa mikata ya bukula budi ne luevene ne mulambu wa kuvuisha nʼau ditalala bua kusakidileye nʼai Nzambi. Neafile tshituha tshia mulambu ne mulambu bu mulambu udibo bakuha ku mesu kua Yehowa, netshikale kudi muakuidi udi umiamine mashi a mulambu wa kuvuisha nʼau ditalala. Yeye neadie munyinyi wa mulambu wandi wa kubisha nʼau ditalala bua kusakidileye nʼau Nzambi mu dituku didiye ufila mulambu wandi, kashiyi nansha katuha kakese tô ne dinda. Kadi bikala mulambu wandi wa kuditshiha nʼau anyi mulambu udiye ufila ku disua diandi, yeye neaudie mu dituku didiye ûfila ne tshituha tshidi tshishale yeye neatshidie makelela, kadi bikala tshituha tshia munyinyi wa mulambu tshishale tô ne ku dituku disatu, nebatshioshe mu kahia. Biadieye tshituha tshia munyinyi wa mulambu wa kuvuisha nʼau ditalala tshidi tshishale tô ne ku dituku disatu, kabena bitabusha mulambu wandi, kabena baubala, netshikale bu tshintu tshibole, ne mundi udi udia munyinyi neadituadile bubi buandi. Munyinyi udi utuanganaa ne tshintu tshibi, kabena mua kûdia, nebawoshe mu kahia. Muntu yonso udi mudijidile udi mua kudia munyinyi eu, kadi mundi udi kayi mudijidile udi udia munyinyi wa mulambu wa kuvuisha nʼau ditalala udibo bafila kudi Yehowa, nebumushe mundi eu munkatshi mua bana babo. Bialenga mundi tshianza tshiandi ha tshintu tshidi ne bukoya, nansha bukoya bua mundi nansha bukoya bua nyama nansha tshintu tshikuabo tshidi ne bukoya, ne biadieye munyinyi wa mulambu wa kuvuisha nʼau ditalala udibo bafila kudi Yehowa, nebamumushe munkatshi mua bana babo. Yehowa wakambila Mose ne, Wambile Bena Isalele ne, Kanudi dianyi dia ngombe anyi dia mukoko anyi dia mbushi. Dianyi dia tshintu tshidifuile ne dianyi dia tshintu tshihandibue kudi nyama nudi mua kuenza nʼadi mudimu mukuabo, kadi kanudi dianyi adi. Muntu yonso udi udia dianyi dia nyama udibo bafila bu mulambu wa kuoshila Yehowa ha kahia, nebamumushe munkatshi mua bana babo. Kanudi mashi, nansha a nyunyu nansha a nyama mu nsubu yenu. Muntu yonso udi udia mashi nebamumushe munkatshi mua bana babo. Yehowa wakambila Mose ne, Wambile Bena Isalele ne, Muntu udi ufila mulambu wa kuvuisha nʼau ditalala kudi Yehowa nealue ne tshituha tshia mulambu wa kuvuisha nʼau ditalala, yeye nealue ne mulambu wa kuoshila Yehowa ha kahia mu bianza biandi, nealue ne dianyi ne tshiadi, nebatshinyukule bu mulambu udibo banyukula ku mesu kua Yehowa. Muakuidi neoshe dianyi ha tshioshelu, kadi tshiadi netshikale tshia Alona ne bana bandi balume. Nenuhe muakuidi diboko dia balume dia nyama wa mulambu wa kuikisha nʼau ditalala udibo banyukula ku mesu kua Yehowa. Muntu wa munkatshi mua bana balume ba Alona udi ufila mashi ne dianyi bia mulambu wa kuvuisha nʼau ditalala neikale ne diboko dia balume bu tshintu tshiandi. Bualu bua meme nakangata tshiadi tshidibo banyukula ne diboko didibo bakuha munkatshi mua milambu ya Bena Isalele, nakabifila kudi Alona muakuidi ne bana bandi balume bu bituha biabo tshiendelele. Etshi ntshintu tshia tshijila tshia Alona ne tshia bana bandi balume munkatshi mua milambu ya Yehowa idibo bosha ha kahia mu dituku diakabasunguleye bua kuenzelabo Yehowa mudimu wa buakuidi, Yehowa wakela mukenji wandi kudi Bena Isalele bua kubahabo tshintu etshi mu dituku diakabasunguleye. Etshi ntshintu tshiabo tshiendelele mu bikondo biabo bionso. Eu udi mukenji wa mulambu wa kuosha ha kahia ne wa mulambu wa bukula ne wa mulambu wa kubuikila nʼau bubi ne wa mulambu wa kusambuka kua mikenji, ne wa tshijila tshia bakuidi, ne wa mulambu wa kuvuisha nʼau ditalala, wakambila Yehowa Mose mu mukuna wa Sinai mu dituku diakeleye mukenji wandi kudi Bena Isalele bua kufilabo milambu yabo kudi Yehowa mu tshihela tshia Sinai. Yehowa wakambila Mose ne, Angata Alona ne bana bandi balume badi nʼandi ne bilulu ne manyi adibo bela ha mutu ne mulume wa ngombe wa mulambu wa kubuikila nʼau bubi ne bimpanga bibidi ne tshisaka tshia mampa adi kâyi ne luevene, ubikile bantu bonso ku mbelu kua ntenta wa kusangakena. Mose Wakenza bu muakamuambila Yehowa; bantu bonso bakasangakena ku mbelu kua ntenta wa kusangakena. Mose wakambila bantu ne, Ebu mbualu buakamba Yehowa bua tuetu tuenze. Mose wakalua ne Alona ne bana bandi balume, wakabowesha ne mai. Wakaluatshisha Alona kazaku, wakamuela mukaba, wakamuluatshisha tshikowelu ne efoda, wakamuela mukaba wa efoda, wakamusuika hamʼbidi handi. Wakamuluatshisha tshilulu tshia ha tshiadi, wakateka Ulima ne Tumima mu tshilulu tshia ha tshiadi, wakasa tshifulu ku mutu kuandi, wakasuika tshitotolo tshia tshiamu tshia or, tshintu tshia tshijila, ku mpala kua tshifulu, bu muakambila Yehowa Mose. Mose wakangata manyi adibo bela ha mutu, wakantumina manyi ku nsubu wa tshitendelelu ne ku bintu bionso biakadimu, wakadidila. Wakantumina manyi ku tshioshelu misangu muanda mutekete ne ku malonga atshi onso ne ku tshiowelu ne ku tshitaku tshiatshi bua kubijidila. Wakela Alona manyi ha mutu handi, wakamujidila. Mose wakalua ne bana balume ba Alona, wakabaluatshisha tuzaku, wakabasuika ne mikaba, wakabasa bifulu ku mitu yabo, bu muakambila Yehowa Mose. Wakalua ne mulume wa ngombe wa mulambu wa kubuikila nʼau bubi; ne Alona ne bana bandi balume bakatentekasha bianza biabo ha mutu ha ngombe wa mulambu wa kubuikila nʼau bubi. Mose wakamushiha, wakangata mashi, wakitaba ku nsengu ya ku tshioshelu ne munu wandi, wakajidila tshioshelu, wakela mashi ku tshitaku tshia tshioshelu bua kutshijidila, bua kubuikila bubi bua bantu. Wakangata dianyi dionso diakadi ha bintu bia munda ne lukutu lua mutshima ne tumuma tubidi ne dianyi diatu, Mose wakabisha ha tshioshelu. Kadi ngombe ne tshiseba tshiandi ne munyinyi wandi ne tunvi tuandi yeye wakabioshila ku butshika bua tshitudilu, bu muakambila Yehowa Mose. Wakalua ne tshimpanga tshia kuosha ha kahia, Alona ne bana bandi bakatentekasha bianza biabo ha mutu ha tshimpanga. Mose wakatshishiha, wakantumina mashi ku tshioshelu. Mose wakasaya tshimpanga, wakosha mutu ne bituha bia munyinyi ne dianyi. Wakuvuwa bintu bia munda ne bioku ne mai, Mose wakosha tshimpanga tshijima ha tshioshelu, eu udi mulambu udi utua dihembu, mulambu wa kuoshila Yehowa ha kahia, bu muakambila Yehowa Mose. Wakalua ne tshimpanga tshikuabo, tshimpanga tshia kujidila kua bakuidi; Alona ne bana bandi balume bakatentekasha bianza biabo ha mutu ha tshimpanga. Mose wakatshiawila, wakangata mashi atshi, wakâlaba ku lusongo lua ditshu dia ku tshianza tshia balume dia Alona ne ku tshiala tshia ku tshianza tshia balume ne ku munu munene wa dikasa diandi dia balume. Bakalua ne bana balume ba Alona; Mose wakateka mashi ku nsongo ya matshu abo ya ku tshianza tshia balume ne ku biala biabo bia ku tshianza tshia balume ne ku bana banene babo ba ku makasa a balume, Mose wakantumina mashi ku tshioshelu. Wakangata dianyi ne mukala wakadi ne dianyi ne dianyi dionso dia ha mutu ha bintu bia munda ne lukutu lua mutshima ne tumuma tubidi ne dianyi diabi ne tshibelu tshia ku tshianza tshia balume, wakangata mukala umue wakadi kauyi ne luevene ne mukata wakadi ne manyi mela ha mutu ne mukata mukuabo mu tshisaka tshiakadi ne mampa adi kâyi ne luevene ku mesu kua Yehowa, wakayiteka ha mutu ha dianyi ne ha tshibelu; wakateka bintu bionso mu bianza bia Alona ne mu bianza bia bana bandi balume, bakabinyukula bu mulambu udibo banyukula ku mesu kua Yehowa. Mose wakangata bintu mu bianza biabo, wakabisha ha tshioshelu tshia mulambu wa kahia, ebi mbintu bia kujidila nʼabi bakuidi bu tshintu tshidi tshitua dihembu kudi Yehowa eu udi mulambu wa kuoshila Yehowa ha kahia. Mose wakangata tshiadi, wakatshinyukula ku mesu kua Yehowa: etshi ntshintu tshia Mose tshia ku tshimpanga tshia kujidila nʼatshi bakuidi, bu muakambila Yehowa Mose. Mose wakangata manyi adibo bela ha mutu, ne mashi akadi ha tshioshelu wakabimiamina ha Alona ne ha bilulu biandi ne ha bana bandi balume ne ha bilulu biabo, wakajidila Alona ne bilulu biandi ne bana bandi balume ne bilulu bia bana bandi balume bakadi nʼandi. Mose wakambila Alona ne bana bandi balume ne, Nulambe munyinyi mu mai a kahia ku mbelu kua ntenta wa kusangakena, nûdie ne mampa adi mu tshisaka tshidi ne bintu bia tshijila bu munakamba ne, Alona ne bana bandi balume nebaudie. Munyinyi udi mushale ne mampa adi mashale nubioshe mu kahia. Kanuluhuki ku tshibi tshia ntenta wa kusangakena matuku muanda mutekete tô ne hanuashikisha matuku a kujidila kuenu, bualu bua Yehowa neanujidile matuku muanda mutekete. Tuakuenza lelu bu muakamba Yehowa bua kunubuikidila bubi. Nenuikale ku mbelu kua ntenta wa kusambakena munya ne butuku tô matuku muanda mutekete, nutumikile dî dia Yehowa bua kanufu bienu, bualu bua Yehowa wakangambila nunku. Alona ne bana bandi balume bakenza mei onso akamba Yehowa mukana mua Mose. Hakahita matuku muanda mukulu, Mose wakabikila Alona ne bana bandi balume ne bakulu ba Bena Isalele, wakambila Alona ne, Angata kana ka ngombe bu mulambu wa kubuikila nʼau bubi ne tshimpanga, bidi kabiyi ne tshitema, bu mulambu wa kuosha ha kahia, ubifile ku mesu kua Yehowa. Wambile Bena Isalele ne, Nuangate mpumbu wa mbushi bu mulambu wa kubuikila nʼau bubi, nusungulule kana ka ngombe ne kana ka mukoko bia tshidimu tshimue, bidi kabiyi ne tshitema, bu mulambu wa kuosha ha kahia, angata kabidi mulume wa ngombe ne tshimpanga bu mulambu wa kuvuisha nʼau ditalala bua kubishiha ku mesu kua Yehowa ne mulambu wa bukula busangisha ne manyi, bualu bua Yehowa neamueneke kunudi lelu. Bobo bakalua ne bintu biakamba Mose ku mpala kua ntenta wa kusambakena, bantu bonso bakalua ha buihi, bakimana ku mpala kua Yehowa. Mose wakamba ne, Ebu mbualu buakamba Yehowa bua nuenu nuenze, ne butumbi bua Yehowa nebumueneke kunudi. Mose wakambila Alona ne, Semena ha buihi ne tshioshelu, ufile mulambu webe wa kubuikila nʼau bubi ne mulambu webe wa kuosha ha kahia, udibuikidile bubi buebe ne bubi bua bantu, ufile mulambu wa bantu kabidi bua kubabuikidila nʼau bubi buabo bu muakamba Yehowa. Nunku Alona wakalua ha buihi ne tshioshelu, wakashihela kana ka ngombe ka mulambu wa kubuikila nʼau bubi buandi. Bana balume ba Alona bakamulesha mashi, yeye wakatua munu wandi mu mashi, wakâlaba ku nsengu ya ku tshioshelu, wakalongolola mashi ku tshitaku tshia tshioshelu, kadi yeye wakosha dianyi ne tumuma ne lukutu lua mutshima bia mulambu wa kubuikila nʼau bubi ha tshioshelu, bu muakambila Yehowa Mose. Wakosha munyinyi ne tshiseba ku butshika bua tshitudilu. Wakashiha mulambu wa kuosha ha kahia, ne bana balume ba Alona bakamulesha mashi ne yeye wakâmiamina ku tshioshelu. Bakamulesha mulambu wa kuosha, tshituha ne tshituha ne mutu, yeye wakabisha ha tshioshelu. Wakuvuwa bintu bia munda ne bioku, wakabisha ha tshioshelu ha mutu ha mulambu wa kuosha. Wakalua ne mulambu wa bantu, wakangata mbushi wa mulambu wa kubuikila bubi bua bantu, wakamushiha, wakamufila bu mulambu wa kubuikila nʼau bubi, bu muakenzeye mulambu wa diambedi. Wakalua ne mulambu wa kuosha ha kahia, waka ufila bu muakadi mukenji. Wakalua ne mulambu wa bukula, wakabuambula dianza tente, wakabuosha ha tshioshelu hehi ne mulambu udibo bosha ne dinda. Wakashiha mulume wa ngombe ne tshimpanga kabidi, bu mulambu wa kuvuisha nʼau ditalala kudi bantu, bana balume ba Alona bakamulesha mashi akamiamineye ku tshioshelu, ne dianyi dia mulume wa ngombe ne dia tshimpanga ne mukila udi ne dianyi ne dianyi didi ha mutu ha bintu bia munda ne tumuma ne lukutu lua mutshima, bakateka dianyi ha biadi, ne yeye wakosha dianyi ha tshioshelu, kadi Alona wakanyukula biadi ne tshibelu tshia ku tshianza tshia balume bu mulambu wa kunyukula ku mesu kua Yehowa, bu muakamba Mose. Alona wakolola bianza biandi kudi bantu, wakabandisha disanka, yeye wakahueka kuakadiye ufila mulambu wa kubuikila nʼau bubi ne wa kuosha ha kahia ne ya kuvuisha nʼai ditalala. Mose ne Alona bakabuela mu ntenta wa kusangakena, bakaluhuka, bakavudishila bantu disanka, butumbi bua Yehowa buakamueneka kudi bantu bonso. Kahia bakahatuka kudi Yehowa, kakosha mulambu ne dianyi biakadi ha tshioshelu, hakakatangila bantu bonso, bakela mbila, bakatua mpala hanshi. Nadaba ne Abihu, bana balume ba Alona, bakangata malonga a kahia, muntu dilonga diandi muntu dilonga diandi, bakatekamu kahia, bakelahu musenga wa manananshi, bakalua ne kahia kakadi kakayi tshijila ku mpala kua Yehowa, hakadiye kayi mubambile. Kahia bakahatuka kudi Yehowa, kakabosha, bakafua ku mpala kua Yehowa. Nunku Mose wakambila Alona ne, Ebu mbualu bakamba Yehowa ne, Nenjidibue kudi bantu balualua ha buihi nʼanyi, nentumbishibue ku mesu kua bantu bonso Alona wakahuwa talalâ. Mose wakabikila Mishaele ne Elesafana, bana balume ba Uziele, tatu mukuabo wa Alona, wakabambila ne, Luai ha buihi, numushe bana benu ku mpala kua muaba wa tshijila, yai nʼabo ku nyima kua tshitudilu. Nunku bakalua ha buihi, bakabatuala mu bikowelu biabo ku nyima kua tshitudilu, bu muakamba Mose. Mose wakambila Alona ne Eleazâ ne Itama ne, Kanutudi bifulu ku mitu yenu, kanuhandi bilulu bienu, bua kanufu bienu, ne bua tshiji tshia Yehowa katshilu kudi bantu bonso, kadi bana benu, tshisamba tshionso tshia Bena Isalele, badile bualu bua kahia kakatemesha Yehowa. Nuenu kanumuki ku mbelu kua ntenta wa kusambakena bua kanufu nansha, bualu bua manyi akela Yehowa adi hamʼbidi henu Bakenza bu muakamba Mose. Yehowa wakambila Alona ne, Wewe ne bana bebe balume, kanunu nvinyo ne bintu bikole bia kunua hanuahuola mu ntenta wa kusambakena bua kanufu bienu. Mukenji eu newikale kunudi bikondo bienu bionso tshiendelele. Nuenu nenujingulule bidi tshijila ne bidi kabiyi tshijila, ne bidi binyanguke ne bidi biakane. Nuenu nuyishe Bena Isalele mikenji yonso yakabamanyisha Yehowa mukana mua Mose. Mose wakambila Alona ne Eleaza ne Itama, bana bandi balume bakadi bashala, ne, Nuangate mulambu wa bukula udi ushala munkatshi mua milambu idibo boshila Yehowa ha kahia, nûdie ne bintu bidi kabiyi ne luevene hehi ne tshioshelu, bualu bua tshintu etshi ntshintu tshia tshijila, nenudie mu muaba wa tshijila, bualu bua etshi ntshintu tshiebe ne tshia bana bebe balume munkatshi mua milambu idibo boshila Yehowa ha kahia, bualu bua Yehowa wakangambila nunku. Kadi wewe ne bana bebe balume ne bana bebe bakashi nenudie tshiadi tshia kunyukulabo ne tshibelu tshia kukuhabo ebi mbintu biebe ne bia bana bebe balume munkatshi mua milambu ya kuvuisha nʼai ditalala ya Bena Isalele. Nebalue ne tshibelu tshidibo bakuha ne tshiadi tshidibo banyukula hohamue ne dianyi dia milambu ya kuosha ha kahia ku mesu kua Yehowa etshi ntshintu tshiebe ne tshia bana bebe balume tshiendelele, bu muakamba Yehowa. Mose wakakebakeba mbushi wa mulambu wa kubuikila nʼau bubi, ne monai, bakamana kuwosha! Yeye wakadi ne Eleazâ ne Itamâ, bana balume ba Alona bakadi bashala, tshiji, wakamba ne, Bualu kai nuenu kanuena banze kudia mulambu wa kubuikila nʼau bubi mu nsubu wa tshitendelelu, ntshintu tshia tshijila, tshiakanuha Yehowa bua kumusha nʼatshi bubi bua bantu ne bua kubabuikidila nʼatshi bubi buabo ku mesu kua Yehowa? Tangilai, kabena balue ne mashi a mulambu mu nsubu munda mua tshitendelelu; nuakadi kûdia mu nsubu wa tshitendelelu, bu munakamba. Alona wakambila Mose ne, Tangila, bakulua lelu ne mulambu wa kubuikila nʼau bubi buabo, ne mulambu wabo wa kuosha ha kahia ku mesu kua Yehowa, malu au onso akunkuata! Bu meme muebe mulambu wa kubuikila nʼqu bubi bua bantu lelu, bualu ebu buakadi kuikala buimpe ku mesu kua Yehowa, anyi? Hakunvua Mose mei au, bualu ebu buakadi buimpe ku mesu kuandi. Yehowa wakambila Mose ne Alona ne, Nuambile Bena Isalele ne, Ebi mbintu bidi ne muoyo binudi mua kudia munkatshi mua nyama yonso idi ha buloba. Nyama yonso idi ne mikono mihanduluke ne idi ihingishilula bintu mukana ibidia kabidi, nudi mua kudia nyama ei. Kadi kanudi nyama mikuabo idi ihingishilula bintu mukana, anyi idi ne mikono mihanduluke kamelo, bualu bua kadi kahingishilula bintu mukana, kabidia, kadi kakena ne mikono mihanduluke, kakena kakane kunudi. Kabundi ka mputu kakena kakane kunudi, bualu bua kadi kahingishilula bintu mukana, kadi kakena ne mikono mihanduluke. Nsenji kena muakane kunudi bualu bua udi uhingishilula bintu mukana, kadi kena ne mikono mihanduluke. Ngulube kena muakane kunudi, bualu bua udi ne mikono mihanduluke, kadi kena uhingishilula bintu mukana. Kanudi munyinyi wa nyama ei, kanulengi tshianza hamʼbidi hai, kayena miakane kunudi. Nudi mua kudia bintu ebi bia mu mai bintu bidi ne mialala ne mabamba bidi mu mai manene ne mu misulu. Kadi bintu bionso bia mu mai budi kabiyi ne mialala ne mabamba, bidi mu mai manene anyi mu misulu, bidi bibi kunudi, nebikale bibi kunudi, kanudi munyinyi wa bintu ebi, ne mibidi mifue yabi neyikale bu bintu bibi kunudi. Bintu bionso bia mu mai bidi kabiyi ne mialala ne mabamba nebikale bintu bibi kunudi. Nyunyu ei idi mibi kunudi, kanudi nyunyu ei nyunyu wa mukanku ne nyunyu wa gypaête ne nyunyu wa orfraie, ne nyunyu wa milan mufike ne wa milan mukunze ne mushindu wonso wa tshikololo ne nyunyu wa autriche ne nyunyu wa chat-huant ne nyunyu wa mouette ne wa nkumbikumbi ne nyunyu wa tshihungulu ne nyunyu wa choutte ne nyunyu wa ibis, ne nyunyu wa pélican ne nyunyu mutoke utu wadia bintu bibole ne nyunyu wa cormoran ne nyunyu wa cigogne ne nyunyu wa ya héron ne nyunyu wa huppe ne nyunyu wa mudima. Bintu bionso bidi ne mahuahua bidi bienda ne mikolo mai bidi bibi kunudi. Kadi nudi mua kudia bintu bionso bidi ne mahuahua bidi bienda ne mikolo mai bituhike ha buloba, nudi mua kudia mikumbi ne nsua ne bintunte ne mintuntu. Kadi bintu bikuabo bidi ne mahuahua ne bidi ne mikolo mai bidi bibi kunudi. Muntu yonso udi ulenga tshianza hamʼbidi ha bintu ebi neikale ne bukoya tô ne dilolo; muntu yonso udi utuala tshituha tshia mubidi mufue wa bintu ebi, neuvuwe bilulu biandi, neikale ne bukoya tô ne dilolo. Nyama yonso idi ne mikono mihanduluke ne idi kayiyi mihingishilula bintu mukana udi mubi kunudi, muntu yonso udi ulenga tshianza hamʼbidi hai neikale ne bukoya. Nyama yonso udi wenda ne makama udi mubi kunudi, muntu yonso udi ulenga tshianza hamʼbidi hai neikale ne bukoya tô ne dilolo. Muntu yonso udi utuala mubidi mufue wa nyama ei, neuvuwe bilulu biandi, neikale ne bu koya tô ne dilolo, nyama ei idi mibi kunudi. Bintu ebi bidi bibi munkatshi mua bintu bidi bidikoka hanshi ha buloba bibulebule ne mpuka ne dibemba ne musodi ne tshiula ne lungonyonyi. Bintu ebi bidi bibi kunudi munkatshi mua bintu bidi bidikoka hanshi, muntu yonso udi ubilenga tshianza hadibi bifue yeye neikale ne bukoya tô ne dilolo Bikala bintu ebi bifue ne biahonabi ha tshintu, tshintu atshi netshikale ne bukoya, nansha dilonga nansha bilulu nansha biseba nansha tshibombi nansha tshintu tshikuabo tshidibo benza nʼatshi mudimu, nebatshiteke mu mai, netshikale ne bukoya tô ne dilolo, nunku netshikale tshitoke tô. Biahona bintu ebi mu tshivuadi tshia dima, netshikale ne bukoya, nebatshishihe. Bintu bionso bia kudia bidi bituangana ne mai akadi mu bintu ebi nebikale ne bukoya, ne mai a kunua onso akadi mu bintu ebi neikale ne bukoya. Biahona tshituha tshia mibidi mufue ya bintu ebi ha tshintu, tshintu atshi netshikale ne bukoya, nansha nfulu nansha bivuadi, nebanshihe, bidi ne bukoya, nebikale bibi kunudi. Kadi mpokolo wa mai anyi dina dia mai diakumbulabo didi ne mai a bungi, mai au neikale malengele, kudi bintu bionso bidi bituangana ne mibidi yabi mufue nebikale ne bukoya. Biahona tshituha tshia mubidi yabi mufue ha bintu bidibo bakuna mu buloba, bintu ebi nebikale bilengele. Bielabo mai ha bintu ebi bia kukuna ne biahona tshituha tshia mubidi yabi mufue ha mutu habi, bintu ebi nebikale ne bukoya kunudi. Biafua nyama wa munkatshi mua nyama mudi mua kudia, mundi yonso udi ulenga tshianza tshiandi hamʼbidi handi neikale ne bukoya tô ne dilolo. Muntu udi udia munyinyi wandi neuvuwe bilulu, neikale ne bukoya tô ne dilolo, ne mundi udi utuala mubidi wandi mufue neuvuwe bilulu biandi, neikale ne bukoya tô ne dilolo. Bintu bionso bidi bidikoka hanshi ha buloba bidi bibi, kanudi bintu ebi. Bintu bionso bidi bidikoka hanshi ne mafu, anyi bintu bidi bienda ne mikolo mai, kanudi bintu ebi bionso bidi bidikoka hanshi ha buloba, bualu bua bintu ebi bidi bibi. Kanudionyi ne bintu bidi bidikoka hanshi ha buloba, kanudienzedi bibi ne bintu bidi ne bukoya, kanudinyangi ne bintu ebi. Bualu bua meme ndi Yehowa, Nzambi wenu; nunku nudilengeshe, nuikale bantu ba tshijila bualu bua meme ndi wa tshijila, kanudinyangi ne bintu bidi bidikoka hanshi ha buloba Bualu bua meme ndi Yehowa wakanuhatula mu buloba bua Ejipitu bua kuikala Nzambi wenu; nuenu nuikale bantu ba tshijila bualu bua meme ndi wa tshijila. Eu udi mukenji wa nyama ne wa nyunyu ne wa bintu bidi bienda mu mai ne bintu bionso bidi bidikoka hanshi ha buloba, bua kutahulula bintu bibi ne bintu bimpe, ne bintu bidi ne muoyo binudi mua kudia ne bintu bidi ne muoyo binudi kanuyi mua kudia. Yehowa wakambila Mose ne, Wambile Bena Isalele ne, Bimita mukashi difu, bialeleye muana wa balume, yeye neikale mundi udi kayi muakane tô matuku muanda mutekete, bu muakadiye mu matuku a tshijila a disama dia lulelu luandi, yeye neikale bu mundi udi kayi muakane. Halua dituku dia muanda mukulu, nebatengule muana wa balume. Yeye neikale ne mashi a kudilengesha kuandi tô matuku makumi asatu ne asatu, kalengi tshianza tshiandi ha tshintu tshia tshijila, kabuedi mu nsubu wa tshitendelelu tô ne hashikisheye matuku a kudilengesha kuandi. Kadi bialeleye muana wa bakashi, yeye neikale mundi udi kayi muakane tô mbingu ibidi, bu matuku a tshijila tshiandi, neikale ne mashi a kudilengesha kuandi tô matuku makumi asambombo ne asambombo. Hashika matuku a kudilengesha kuandi, nansha matuku a muana wa balume nansha a muana wa bakashi, yeye nealue ne muana wa mukoko wa tshidimu tshimue bu mulambu wa kuosha ha kahia, ne mputu nyunyu anyi nyunyu wa nkutshi bu mulambu wa kubuikila nʼau bubi, ku mbelu kua ntenta wa kusangakena, kudi muakuidi, ne yeye neayifile ku mpala kua Yehowa, bua kumubuikidila nʼau bubi; yeye neikale mulengeshibue kudi mashi andi. Eu udi mukenji wa mukashi udi ulela nansha muana wa balume nansha muana wa bakashi. Bikaleye kayi ne mushinga wa muana wa mukoko, alue biandi ne nyunyu ya nkutshi ibidi anyi mputu nyunyu ibidi, umue bu mulambu wa kuosha ha kahia ne mukuabo bu mulambu wa kubuikila nʼau bubi, muakuidi munene neayifile bua kumubuikidila nʼau bubi, ne yeye neikale mulengeshibue. Yehowa wakambila Mose ne Alona ne, Bikala muntu ne tshiuja tshikese mu dikoba diandi anyi tshilamulamu anyi ditoba ditoke tô, bikala bintu ebi bu disama dia nsudi, nebalue nʼandi kudi Alona muakuidi anyi kudi umue wa bana bandi balume bakuidi. Muakuidi neatangile ha disama didi mu dikoba diandi, bikala miosa ya mu muaba wa disama miandamuke mitoke tô, ne bikala disama dimane kubuela mu munyinyi wandi mene mene, edi ndisama dia nsudi, muakuidi neamutangile, neambile bantu ne, Muntu eu kena muakane. Biamueneka ditoba ditoke tô mu dikoba diandi, ne bikaladi kadiyi dibuela mu munyinyi wandi mene, ne bikala miosa kayiyi mianze kuandamuka mitoke tô, nunku muakuidi neabueshe muntu udi ne disama ha nkayandi mu nsubu tô matuku muanda mutekete. Halua dituku dia muanda mutekete, muakuidi neamutangile kabidi, bielanganeye meji ne disama didi diamba kushika, kadiena ditampakana, nunku muakuidi neamubueshe mu nsubu ha nkayandi matuku muanda mutekete makuabo. Halua dituku dia muanda mutekete, muakuidi neamutangile kabidi, ne biamba disama kushika, bikaladi kadiyi ditampakana mu dikoba diandi, nunku muakuidi neambile bantu ne, Muntu eu udi muakane, disama edi didi bu tshilamulamu, muntu eu neuvuwe bilulu biandi, neikale mua kane. Kadi bikala tshilamulamu tshitampakane mu dikoba, hakashikisheye kudilesha kudi muakuidi bualu bua kudilengesha, nunku yeye neadileshe kudi muakuidi kabidi, muakuidi neatangile ne bikala tshilamulamu tshitampakane mu dikoba, nunku muakuidi neambile bantu ne, Muntu eu kena muakane disama edi didi dia nsudi. Bikala muntu ne disama dia nsudi, nebalue nʼandi kudi muakuidi, muakuidi neatangile, ne bikala tshima tshitoke tô mu dikoba, ne bikala miosa miandamuke mitoke tô, ne bikala munyinyi mubishe mu tshima, edi didi disama dia nsudi diakadi kudiye diambedi mu dikoba diandi, ne muakuidi neambile bantu ne, Muntu eu kena muakane, yeye kena umubuesha mu nsubu, bualu bua yeye kena muakane. Kadi bikala disama dia nsudi ditampakane mu dikoba ne biabuikiladi dikoba dionso dia muena nsudi, ku mutu tô ne ku makasa andi, ku miaba yonso idi muakuidi utangila, nunku muakuidi neatangile ne bikala disama dia nsudi dimane kubuikila dikoba diandi dionso, yeye neambile bantu ne, Muntu eu wakadi ne nsudi udi muakane, wakandamuka muteke tô, yeye udi muakane. Kadi biamueneka munyinyi wa mubidi mubishe, yeye kena muakane. Muakuidi neatangile ha munyinyi wa mubidi mubishe, neambile bantu ne, Muntu eu kena muakane, munyinyi eu mubishe kawena muakane edi ndisama dia nsudi. Anyi bikala munyinyi eu mubishe muandamuke muteke tô kabidi nunku yeye nealue kudi muakuidi, muakuidi neamutangile, ne biandamukeye mutoke tô, nunku muakuidi neambile bantu ne, Muntu eu wakadi ne nsudi udi muakane, ne yeye neikale muakane. Bikala muntu ne tshima mu dikoba, ne bikala tshima tshiondahibue, ne bikala muaba watshi mutoke tô, anyi ditoba ditoke, nunku yeye neadileshe kudi muakuidi, muakuidi neatangile, ne bielanganeye meji ne disama diakabuela mu munyinyi wa mubidi, ne miosa idi miandamuke mitoke tô, nunku muakuidi neambile bantu ne, Muntu eu kena muakane edi ndisama dia nsudi diakamueneka mu tshima. Kadi biatangila muakuidi ne miosa mitoke tô kayenaku, ne disama kadiena dibuela mu munyinyi wa mubidi, nunku muakuidi neamubueshe ha nkayandi mu nsubu matuku muanda mutekete, bikala disama ditampakane mu dikoba, nunku muakuidi neambile bantu ne, Muntu eu kena muakane edi ndisama dia nsudi. Kadi bikala ditoba ditoke tô dishale mu muaba wadi, kadiyi ditampakane, etshi ntshibangu tshia tshima, ne muakuidi neambile bantu ne, Muntu eu udi muakane. Bikala muntu mudioshe ne kahia, ne bikala munyinyi wa mu muaba muandamuke mutoke anyi mukunze, muakuidi neatangile ha muaba au, ne bikala miosa ya mu muaba au miandamuke mitoke tô, ne bikala disama dimane kubuela mu munyinyi wa mubidi, edi ndisama dia nsudi diakumueneka mu muaba wakadiosheye muakuidi neambile bantu ne, Muntu eu kena muakane edi ndisama dia nsudi. Biatangila muakuidi ne miosa mitoke tô kayena mu muaba au mutoke, ne disama kadiena dibuela mu munyinyi wa mubidi, muakuidi neamubueshe ha nkayandi mu nsubu matuku muanda mutekete. Halua dituku dia muanda mutekete, muakuidi neamutangile ne bikala disama ditampakane mu dikoba muakuidi neambile bantu ne, Muntu eu kena muakane edi ndisama dia nsudi. Bishala ditoba ditoke mu muaba umue, kadiyi ditampakane mu dikoba, etshi ntshiuja tshiakadiosheye ne kahia, ne muakuidi neambile bantu ne, Muntu eu udi muakane, etshi ntshibangu tshia kahia. Bikala mulume anyi mukashi ne mputa ku mutu anyi ku muedi, muakuidi neatangile ha muaba au, bielanganeye meji ne mputa udi ubuela mu munyinyi wa mubidi, ne nsuki yakuandamuka mitoke tô, muakuidi neambile bantu ne, Muntu eu kena muakane edi ndisama dia nsudi didi ku mutu anyi ku muedi. Biatangila muakuidi ha mputa ne bielanganeye meji ne disama kadiena dibuela mu munyinyi wa mubidi, ne nsuki mifike kayenaku, muakuidi neamubueshe ha nkayandi mu nsubu matuku muanda mutekete. Halua dituku dia muanda mutekete, muakuidi neatangile mu mputa, ne bikala mputa kayi mutampakane, ne nsuki mitoke kabayiku, bielanganeye meji ne mputa kena ubuela mu munyinyi wa mubidi, nebamubeye, kadi nebashiye muaba wa mputa, ne muakuidi neamubueshe mu nsubu matuku muanda mutekete makuabo. Halua dituku dia muanda mute kete, muakuidi neatangile mu mputa, ne bikala mputa kayi mutampakane mu dikoba, ne kayi ubuela mu munyinyi wa mubidi, muakuidi neambile bantu ne, Muntu eu udi muakane, yeye neuvuwe bilulu biandi, neikale muakane. Kadi bikala mputa mutampakane hakashikisheye kudilengesha, muakuidi neamutangile, ne bikala mputa mutampakane mu dikoba, muakuidi kena ne bua kukeba nsuki mitoke tô, muntu eu kena muakane. Kadi bielanganeye meji ne mputa wakuamba kushika, ne nsuki mifike yakamueneka mu muaba eu, mputa wakuondahibua, ne muntu eu udi muakane, muakuidi neambile bantu ne, Muntu eu udi muakane. Bikala mulume anyi mukashi ne matoba matoke mu dikoba, muakuidi neamutangile, ne bi kala matoba au kâyi matambe kutoka tô, ei idi bu mpusu yakumueneka mu dikoba, muntu eu udi muakane. Bikala nsuki ya muntu mituke, ne bikaleye muena dibala, yeye udi muakane. Bikala nsuki ya muntu ya ku mpala nubike, ne bikala mpala wandi ne dibala, yeye udi muakane. Kadi biamueneka mputa mutoke tô ku mutu kua muena dibala, anyi ha mpala hadi dibala, edi ndisama dia nsudi diakumueneka ku mutu kua muena dibala anyi ha mpala hadi dibala. Muakuidi neamutangile, ne bikala tshiuja etshi tshitoke tô ku mutu kua muena dibala, anyi ha mpala hadi dibala, bu nsudi udi umueneka mu dikoba diandi, yeye udi muena nsudi, kena muakane, muakuidi neambile bantu ne, Muntu eu kena muakane, udi ne disama dia nsudi ku mutu kuandi. Muena nsudi eu neahande bilulu biandi, neashiye nsuki ya ku mutu kuandi tshianana, neabuikile mushiku wandi wa ha mutu, nêle mbila ne, Tshiena muakane, tshiena muakane. Neikale bu muntu udi kayi muakane tô matuku onso a disama diandi, yeye kena muakane, neashikame ha nkayandi ku butshika bua tshitudilu. Bilulu biakadiye nʼabi, nansha tshilulu tshiakenzabo ne miosa ya mikoko nansha tshilulu tshia lin, nansha mu milongo ya buludi nansha mu milongo ya butshiama ya miosa ya mikoko anyi ya lin, nansha mu tshiseba anyi mu tshintu tshiakenzabo ne tshiseba, bikala bintu bifike anyi bikunze mu tshilulu anyi mu tshiseba anyi mu milongo ya buludi anyi mu milongo ya butshiama anyi mu tshintu tshiakenzabo ne tshiseba, edi ndisama dia nsudi, nebaleshe disama edi kudi muakuidi. Muakuidi neatangile ha disama, neateke tshintu tshidi ne disama edi ha buatshi tô matuku muanda mutekete, halua dituku dia muanda mutekete, yeye neatangile ha disama, bikala disama ditampakane mu tshilulu, nansha mu milongo ya buludi nansha mu milongo ya butshiama, nansha mu tshiseba tshidibo benza nʼatshi mudimu edi ndisama dia nsudi; tshintu etshi katshiena tshiakane. Yeye neoshe tshilulu mu kahia, bikala disama mu milongo ya buludi anyi mu milongo ya butshiama ya bintu biakenzabo ne miosa ya mikoko anyi bia lin anyi tshintu tshia tshiseba, edi ndisama dia nsudi, neboshe tshintu atshi mu kahia. Biatangila muakuidi ne disama kadiena ditampakane mu tshilulu, nansha mu milongo ya buludi nansha mu milongo ya butshiama nansha mu tshintu tshia tshiseba, muakuidi neambile bantu ne, Nuvuwe tshintu tshidi ne disama, ne yeye neatshiteke ha buatshi matuku muanda mutekete makuabo. Hashikishabo kuvuwa tshintu atshi, muakuidi neatangile ne ditoba dia disama kadiyi diandamuke mekala, nansha bikaladi kadiyi ditampakane, tshintu atshi katshiena tshiakane, nebatshioshe mu kahia edi ndisama dia nsudi, bikala disama ku mutu kua muena dibala anyi ku mpala hadi dibala. Biatangila muakuidi ne disama diakuamba kushika hashikishabo kuvuwa tshintu atshi, yeye neahande tshituha tshia tshilulu anyi tshia tshiseba anyi tshia milongo ya buludi anyi tshia milongo ya butshiama tshidi ne disama. Bikala disama dishale mu tshilulu nansha mu milongo ya buludi nansha mu milongo ya butshiama anyi mu tshintu tshia tshiseba, disama edi didi ditampakana, neboshe tshintu atshi mu kahia. Biuvuwabo tshilulu nansha milongo ya buludi nansha milongo ya butshiama anyi tshintu tshia tshiseba, ne biajimina disama, nebatshiuvuwe musangu muibidi ne tshintu etshi netshikale tshiakane. Eu udi mukenji wa disama dia nsudi didi mu tshilulu tshiakenzabo ne miosa ya mikoko anyi ne bintu bia lin, nansha mu milongo ya buludi nansha mu milongo ya butshiama anyi tshintu tshia tshiseba, bua kutahulula tshintu tshidi tshiakane ne tshintu tshidi ka tshiyi tshiakane. Yehowa wakambila Mose ne, Eu udi mukenji wa muena nsudi mu dituku didibo bamulengesha, nebalue handi kudi muakuidi, ne muakuidi neaye biandi ku butshika bua tshitudilu, ne muakuidi neatangile, ne bikala disama dia muena nsudi dishike, neambile bantu bua bamuangatshile nyunyu ibidi idi miakane ne mitshi ya cèdre ne bintu bikunze-kunzû, ne mabeshi a hisopa; muakuidi neambile bantu bua bashihele nyunyu umue mu tshivuadi tshia dima ha mutu ha mai adi ahueka. Yeye neangate nyunyu utshidi ne muoyo ne mitshi ya cèdre ne bintu bikunze-kunzû ne mabeshi a hisopa, nealue bintu ebi ne nyunyu utshidi ne muoyo mu mashi a nyunyu wakashihabo ha mutu ha mai adi ahueka, yeye neamiamine mashi hamʼbidi ha muena nsudi udiye musue kulengesha misangu muanda mutekete, neambile bantu ne, Muntu eu udi muakane, nealekele nyunyu utshidi ne muoyo mu tshisuku. Muntu udi musue kudilengesha neuvuwe bilulu biandi, neabeye nsuki yandi yonso, neadioweshe ne mai, yeye neikale muakane; ku nyima nealue biandi mu tshitudilu, kadi neashikame ku mbelu kua ntenta wandi matuku muanda mutekete. Halua dituku dia muanda mutekete, yeye neabeye nsuki yandi yonso idi ku mutu wandi ne muedi wandi ne makiki andi ne miosa yandi yonso, neuvuwe bilulu biandi, neoweshe mubidi wandi ne mai, neikale muakane. Halua dituku dia muanda mutekete, yeye neangate bana balume ba mikoko babidi badi kabayi ne tshilema ne muana mukashi wa mukoko wa tshidimu tshimue udi kayi ne tshilema ne bituha bisatu bia dikumi bia épha bia bukula bubotesha bu mulambu wa bukula busangisha ne manyi ne dikoho dia manyi. Muakuidi udi ulengesha muntu neashikike muntu udiye musue kulengesha ne bintu ebi ku mpala kua Yehowa ku mbelu kua ntenta wa kusangakena. Muakuidi neangate umue wa bana balume ba mikoko, neamufile bu mulambu wa disambuka dia mikenji, ne dikoho dia manyi, neabinyukule bu mulambu udibo banyukula ku mpala kua Yehowa; yeye neashihe muana mulume wa mukoko kudibo bashihela milambu ya kubindila nʼai bubi ne mulambu ya kuosha ha kahia mu nsubu wa tshitendelelu, mulambu wa disatu buka dia mikenji udi mulambu wa muakuidi bu mudi mulambu wa kubuikila nʼau bubi bua bantu, etshi ntshintu tshia tshijila. Muakuidi neangate mashi a mulambu wa disambuka dia mikenji, nealabe mashi ku lusongo lua ditshu dia ku tshianza tshia balume dia muntu udiye musue kulengesha, ne ku tshiala tshia ku tshianza tshiandi tshia balume, ne ku muanʼa dikasa munene wa ku tshianza tshia balume. Muakuidi neangate dikoho dia manyi, nele munda mua tshianza tshiandi tshia bakashi, neafue munu wandi wa ku tshianza tshia balume mu manyi adi mu tshianza tshiandi tshia bakashi, neamiamine manyi ne munu wandi misangu muanda mutekete ku mpala kua Yehowa. Muakuidi nealabe manyi adi ashala mu tshianza tshiandi ku lusongo lua ditshu dia ku tshianza tshia balume dia muntu udiye musue kulengesha ne ku tshiala tshiandi tshia ku tshianza tshia balume ne ku muanʼa dikasa munene wa ku tshianza tshia balume ha mutu ha mashi a mulambu wa disambuka dia mikenji, manyi adi ashala mu tshianza tshia muakuidi, nêle ha mutu ha muntu udiye musue kulengesha, muakuidi neafile mulambu wa kubuikila nʼau bubi buandi ku mpala kua Yehowa. Muakuidi neafile mulambu wa kubuikila nʼau bubi, neabuikile bubi bua muntu udiye musue kulengesha ku bubi buandi ku nyima yeye neashihe mulambu wa kuosha ha kahia, muakuidi neafile mulambu wa kuosha ha kahia ne mulambu wa bukula ha tshioshelu, muakuidi neamubuikidile bubi buandi, ne yeye neikale muakane. Bikaleye muntu muhele udi kayi mua kusangisha bintu ebi bionso, neangate muana mulume wa mukoko umue bu mulambu wa disambuka dia mikenji bua kunyukula kudi Yehowa bua kumubuikidila nʼau bubi buandi, ne tshituha tshimue tshia dikumi tshia épha tshia bukula bubotesha busangisha ne manyi ne dikoho dia manyi ne nyunyu ya nkutshi ibidi anyi mputu nyunyu ibidi, bu bintu bidiye mua kuangata, nyunyu umue neikale bu mulambu wa kubuikila nʼau bubi ne mukuabo bu mulambu wa kuosha ha kahia. Halua dituku dia muanda mukulu, nealue ne bintu bia kudilengesha nʼabi kudi muakuidi ku mbelu kua ntenta wa kusangakena ku mpala kua Yehowa, muakuidi neangate muana wa mukoko wa mulambu wa disambuka dia mikenji ne dikoho dia manyi, ne muakuidi neabinyukule bu mulambu udibo banyukula ku mpala kua Yehowa. Yeye neashihe muana wa mukoko wa mulambu wa disambuka dia mikenji, ne muakuidi neangate mashi makuabo a mulambu wa disambuka dia mikenji, nealabe ku lusongo lua ditshu dia ku tshianza tshia balume dia muntu udiye musue kulengesha ne ku tshiala tshia ku tshianza tshia balume ne ku muanʼa dikasa munene wa ku tshianza tshia balume. Muakuidi nêle manyi munda mua tshianza tshiandi tshia bakashi, muakuidi neamiamine ne munu wandi wa ku tshianza tshia balume manyi adi mu tshianza tshiandi tshia bakashi misangu muanda mutekete ku mpala kua Yehowa, muakuidi nealabe manyi adi mu tshianza tshiandi tshia bakashi ku lusongo lua ditshu dia ku tshianza tshia balume dia muntu udiye musue kulengesha ne ku tshiala tshiandi tshia ku tshianza tshia balume ne ku muanʼa dikasa munene wa ku tshia nza tshia balume, ha mutu ha mashi a mulambu wa disambuka dia mikenji, manyi adi ashala mu tshianza tshia muakuidi, yeye neaele ha mutu ha muntu udiye musue kulengesha, bua kumubuikidila disambuka diandi ku mpala kua Yehowa. Neafile umue wa nyunyu wa nkutshi anyi wa mputu nyunyu udiye mua kuangata umue wa mulambu wa kubuikila nʼau bubi ne mukuabo wa mulambu wa kuosha ha kahia ne mulambu wa bukula, muakuidi neafile mulambu wa kubuikila nʼau bubi bua muntu udiye musue kulengesha ku mpala kua Yehowa. Eu udi mukenji wa muena nsudi udi kayi mua kusangisha bintu bia mushinga mukole bia kudilengesha nʼabi. Yehowa wakambila Mose ne Alona ne, Hanualua mu buloba bundi musue kunuha bu buhianyi buenu ne hanateka disama dia nsudi mu nsubu wa mu buloba bua buhianyi buenu, nunku muena nsubu nealue biandi, neambile muakuidi ne, Ndi ngelangana meji ne ditoba dia disama didi mu nsubu muanyi. Muakuidi nele dî diandi bua kumusha bintu bionso bia mu nsubu diambedi muakuidi kayi muanze kubuela bua kutangila disama, bua bintu bionso bia mu nsubu kabilu bu bintu bidi kabiyi biakane, ku nyima muakuidi neabuele bua kutangila mu nsubu. Yeye neatangile hadi disama, ne biamueneka disama mu bimanu bia nsubu milongo mifike ne milongo mikunze, ne bielanganeye meji ne bintu ebi biakubuela munda mua tshimanu mene mene, muakuidi neahatuke ku mushiku wa mbelu wa nsubu, neinshile bibi bia nsubu matuku muanda mutekete. Muakuidi neahingane dituku dia muanda mutekete, neatangile kabidi, ne bikala disama ditampakane mu bimanu bia nsubu, muakuidi nêle di bua kumusha mabue akadi ne disama, nebêle mu muaba udi kauyi muakane ku butshika bua musoko, nebakuone munda mua nsubu, nebêle bintu bidibo bakuona ku butshika bua musoko mu muaba udi kauyi muakane, nebangate mabue makuabo, nebâbueshe mu miaba ya makuabo, nebajinguile makuabo mu miaba yakadi makuabo. Biamueneka disama mu nsubu kabidi hashikisheye kumusha mabue ne kukuona munda mua nsubu ne hajinguileye makuabo, muakuidi nealue bua kutangila, ne bikala disama ditampakane mu nsubu, edi ndisama dia nsudi didi mu nsubu, nsubu kena muakane. Yeye neuhule nsubu ne mabue a nsubu ne mabaya ne bionso biakajinguileye nʼabi nsubu, nebabituale ku butshika bua musoko ku muaba udi kauyi muakane. Biabuela muntu mu nsubu mu matuku akinshileye bibi, yeye neikale bu muntu udi kayi muakane tô ne dilolo. Muntu udi ulala mu nsubu neuvuwe bilulu biandi, ne muntu udi udia bidia mu nsubu neuvuwe bilulu biandi. Bialua muakuidi ne hatangileye ne disama kadiena ditampakana mu nsubu hashikishabo kumujinguila, muakuidi neambile bantu ne, Nsubu eu udi muakane bualu bua disama diakashika. Yeye neangate bintu bia kulengesha nʼabi nsubu nyunyu ibidi ne mitshi ya cêdre ne bintu bikunze ne mabeshi a hisopa, neashihele umue wa nyunyu mu tshivuadi tshia dima ha mutu ha mai adi ahueka, neangate mitshi ya cêdre ne mabeshi a hisopa ne bintu bikunze ne nyunyu utshidi ne muoyo, neafue bintu ebi mu mashi a nyunyu wakashiheye ne mu mai adi ahueka, neâmiamine ku nsubu misangu muanda mutekete. Yeye nealengeshe nsubu ne mashi a nyunyu ne mai adi ahueka ne nyunyu utshidi ne muoyo ne mitshi ya cêdre ne mabeshi a hisopa ne bintu bikunze, kadi yeye nealekele nyunyu utshidi ne muoyo mu tshisuku ku butshika bua musoko, nealengeshe nsubu nunku, ne nsubu neikale muakane. Eu udi mukenji wa disama dia nsudi dia mu tshilulu anyi dia mu nsubu, ne wa tshiuja kabidi anyi wa tshilamulamu anyi wa ditoba ditoke, bua kubalesha hadi bintu kabiyi biakane ne hadibi biakane eu udi mukenji wa disama dia nsudi. Yehowa wakambila Mose ne Alona ne, Nuambile Bena Isalele ne, Hahatuka tufina mu mubidi wa muntu, tufina atu tudi tubi. Eu mmukenji wa bukoya buandi nansha hahatuka tufina mu mubidi wandi nansha hashalatu mu mubidi tudi anu tubi. Bulalu buonso budiye ulalahu hahatuka tufina budi ne bukoya, ne bintu bionso bidiye ushikamahu bidi ne bukoya. Muntu yonso udi ulenga bulalu buandi tshianza neuvuwe bilulu biandi, neadioweshe ne mai, neikale mukoya tô ne dilolo. Muntu yonso udi ushikama ha tshintu tshiashikameye neuvuwe bilulu biandi, neadioweshe ne mai, neikale ne bukoya tô ne dilolo. Muntu yonso udi umulenga tshianza hamʼbidi handi neuvuwe bilulu biandi, neadioweshe ne mai, neikale ne bukoya tô ne dilolo. Biahatuka tufina mu mubidi wa muntu, biatuidileye muntu udi muakane lute, yeye neuvuwe bilulu biandi, neadioweshe ne mai, neikale ne bukoya tô ne dilolo. Biashikameye ha tshiseba tshia ha nyima ha kabalu, netshikale ne bukoya. Muntu yonso udi ulenga tshintu tshiakashalameye tshianza neikale ne bukoya tô ne dilolo, muntu udi utuala bintu ebi neuvuwe bilulu biandi, neadioweshe ne mai, neikale ne bukoya tô ne dilolo. Bialenga muntu udi tufina tuhatuka mu mubidi wandi munga muntu tshianza diambedi yeye kayi muanze kuowa bianza biandi, yeye neuvuwe bilulu biandi, neadioweshe ne mai, neikale ne bukoya tô ne dilolo. Bialenga muntu udi tufina tuhatuka mu mubidi wandi tshivuadi tshia dima tshianza, nebatshishihe, ne nguvu yonso yakasongabo ya mabaya nebayuvuwe ne mai. Hashika disama dia muntu udi tufina tuhatuka mu mubidi wandi, nebamubadile matuku muanda mutekete bua kumulengesha, ne yeye neuvuwe bilulu biandi, neadioweshe mu mai a mueji, neikale muakane. Halua dituku dia muanda mukulu, yeye neadiangatshile nansha nyunyu ya nkutshi ibidi nansha mputu nyunyu ibidi, nealue nʼai ku mpala kua Yehowa ku mbelu kua ntenta wa kusangakena, neayifile mu bianza bia muakuidi, ne muakuidi neayifile bu mulambu wa kubuikila nʼau bubi ne mukuabo bu mulambu wa kuosha ha kahia, muakuidi neafue milambu ya kumubuikidila nʼai bubi ku mpala kua Yehowa bualu bua tufina tuandi. Hela muntu bilumi, yeye neadioweshe mubidi wandi wonso ne mai, neikale ne bukoya tô ne dilolo. Biamatshila bilumi tshilulu anyi tshiseba nebatshiuvuwe ne mai, netshikale ne bukoya tô ne dilolo. Bialala mulume ne mukashi, biamueleye bilumi, bubidi buabo nebadioweshe ne mai, nebikale ne bukoya tô ne dilolo. Hamona mukashi katshetshi, yeye neikale ne bukoya tô matuku muanda mutekete, ne muntu yonso udi umulenga tshianza neikale ne bukoya tô ne dilolo. Tshintu tshionso tshidiye ulala hadiye ku katshetshi netshikale ne bukoya, ne tshintu tshionso tshidiye ushikama netshikale ne bukoya. Muntu yonso udi ulenga bulalu buandi tshianza neuvuwe bilulu biandi, neadioweshe ne mai, neikale ne bukoya tô ne dilolo. Muntu yonso udi ulenga tshintu tshiakashikameye neuvuwe bilulu biandi, neadioweshe ne mai, neikale ne bukoya tô ne dilolo. Bikala tshintu atshi ha bulalu buakadiye anyi ha tshintu tshiakashikameye hakatshilengeye, yeye neikale ne bukoya tô ne dilolo. Bialala handi mulume ne biamumatshila katshetshi, yeye neikale ne bukoya tô matuku muanda mutekete, bulalu buonso budiye ulala nebuikale ne bukoya. Biamona mukashi katshetshi mu matuku a bungi adi kâyi a tshikondo tshiandi, matuku au onso neikale bu matuku a tshikondo tshia ndi, yeye udi ne bukoya. Bulalu buonso budiye ulala hatshidiye ne disama, nebuikale bu bulalu bua mu tshikondo tshiandi tshia katshetshi, tshintu tshionso tshi diye ushikama netshikale ne bukoya bu muditshi mu tshikondo tshiandi. Muntu yonso udi ulenga bintu ebi bianza neikale ne bukoya, neuvuwe bilulu biandi, neadioweshe ne mai, neikale ne bukoya tô ne dilolo. Hashika disama diandi, nebamubadile matuku muanda mutekete, ku nyima neikale mulengele. Halua dituku dia muanda mukulu, yeye neangatshile nansha nyunyu ya nkutshi ibidi nansha mputu nyunyu ibidi, nealue nʼai kudi muakuidi ku mbelu kua ntenta wa kusangakena. Muakuidi neafile umue bu mulambu wa kubuikila nʼau bubi ne mukuabo bu mulambu wa kuosha ha kahia Muakuidi neafile milambu ei bua kumubuikidila nʼai bubi ku mpala kua Yehowa bualu bua bukoya bua katshetshi kandi. Nunku nenutahulule Bena Isalele ku bukoya buabo, bua bobo kabafu mu bukoya buabo honabo nsubu wanyi wa tshitendelelu tshidi munkatshi muabo. Eu mmukenji kudi muntu udi tufina tuhatuka mu mubidi wandi ne wa bintu bidi bilumi bimatshila bua kumuvuisha mukoya, ne kudi mukashi hamoneye katshetshi, ne kudi muntu udi tufina tuhatuka mu mubidi wandi, ne kudi muntu udi ulala ne mukashi hatshidiye ha katshetshi. Yehowa wakayikila ne Mose ku nyima kua lufu lua bana balume ba Alona hakaluabo ku mpala kua Yehowa ne hakafuabo. Yehowa wakambila Mose ne, Wambile Alona, mukulu webe, ne, Kulu nusangu yonso mu muaba wa tshijila udi ku nyima kua tshilulu tshikudika ku mpala kua tshibuikilu tshia mushete wa Nzambi, kufu biebe, bualu bua meme nemmueneke mu difutu ku mutu kua tshibuikilu tshia mushete wa Nzambi. Alona nealue ne bintu ebi mu muaba wa tshijila ne muana mulume wa ngombe wa mulambu wa kubuikila nʼau bubi ne tshimpanga tshia mulambu wa kuosha ha kahia. Nealuate tshikowelu tshia ku ne mihanu ya lin, nêle mukaba wa lin ku tshimono tshiandi, nease tshifufu tshia lin ku mutu ebi mbilulu bia tshijila, yeye neowe mai, neabiluate. Yeye neangate kudi Bena Isalele mpumbu ya mbushi ibidi bu mulambu wa kubuikila nʼau bubi ne tshimpanga tshimue tshia mulambu wa kuosha ha kahia. Alona neafile muana mulume wa ngombe wa mulambu wa kubuikila nʼau bubi buandi ne bubi bua bantu ba mu nsubu muandi. Neangate mbushi ibidi, neayiteke ku mpala kua Yehowa ku mbelu kua ntenta wa kusangakena. Alona nêle mbushi ei ibidi nshobo, biakuata nshobo umue, ngua Yehowa, ne biakuata nshobo mukuabo, ngua Azazele. Alona neafile mbushi wakakuatabo kudi nshobo wa Yehowa bu mulambu wa kubuikila nʼau bubi. Kadi mbushi wakakuatabo kudi nshobo wa Azazele neamuteke ne muoyo ku mpala kua Yehowa bua kubuikila nʼandi bubi bua bantu, ne bua kumuihatshilabo bua Azazele mu tshihela. Alona neafile muana mulume wa ngombe wa mulambu wa kubuikila nʼau bubi buandi, neadibuikidile bubi ne bua bantu ba mu nsubu muandi, neashihe muana mulume wa ngombe wa mulambu wa kubuikila nʼau bubi buandi. Neangate dilonga tente ne makala a kahia ku tshioshelu tshidi ku mpala kua Yehowa, ne bianza biandi tente ne musenga wa manananshi, nealue nʼabi ku nyima kua tshilulu tshikudika, neateke musenga wa manananshi ha kahia ku mpala kua Yehowa bua ditutu dia muishi wa musenga wa manananshi dibuikile tshibuikilu tshia mushete wa Nzambi, bua yeye katu nansha. Neangate mashi a muana mulume wa ngombe, neamiamine mashi ne munu wandi ku tshibuikilu tshia mushete ku luseke lua ku esete, neamiamine mashi ku mpala kua tshibuikilu tshia mushete ne munu wandi kabidi misangu muanda mutekete. Nunku yeye neashihe mbushi wa mulambu wa kubuikila nʼau bubi bua bantu, nealue ne mashi andi ku nyima kua tshilulu tshikudika, nênze bu muakenzeye ne mashi a muana mulume wa ngombe, neamiamine mashi ku tshibuikilu tshia mushete wa Nzambi ne ku mpala kua tshi kabidi. Yeye neafile mulambu eu bua muaba wa tshijila, bualu bua Bena Isalele kabena bakane, ne bualu bua disambuka diabo dia mikenji, ne bualu bua malu mabi abo onso, nênze nunku bua kulengesha ntenta wa kusangakena udi munkatshi muabo, munkatshi mua bubi buabo. Muntu mukuabo kikadi mu ntenta wa kusangakena hayeye kufila mulambu wa kubuikila nʼau bubi buandi mu muaba wa tshijila ne bubi bua ba mu nsubu muandi ne bubi bua Bena Isalele, tô ne hahatukeye mu nsubu. Neahatuke bua kuya ku tshioshelu tshidi ku mpala kua Yehowa bua kutshilengesha neangate mashi a muana mulume wa ngombe ne mashi a mbushi, nealabe ku nsengu ya ku tshioshelu. Neamiamine mashi ne munu wandi ha mutu hatshi misangu muanda mutekete, neatshilengeshe, neatshijidile bua bubi bua Bena Isalele. Hashikisheye kulengesha muaba wa tshijila ne ntenta wa kusambakena ne tshioshelu, nealue ne mbushi udi ne muoyo. Alona neatentekashe bianza biandi bibidi ha mutu ha mbushi udi ne muoyo, neatondele Bena Isalele mabi yabo ne disambuka diabo dionso dia mikenji ne malu mabi abo onso, neatentekashe malu mabi onso ha mutu ha mbushi, nebamuihate mu tshihela ku tshianza tshia muntu wakasunguleye diambedi, mbushi neatuale bujitu bua mibi yabo mu muaba wa hatuhu, neihate mbushi mu tshihela. Alona nealue biandi mu ntenta wa kusangakena, neavule bilulu biandi bia lin biakadiye muluate hakayeye mu muaba wa tshijila, neabishiyemu, yeye neowe mai mu muaba wa tshijila, nealuate bilulu biandi, neahatuke neafile mulambu wandi wa kuosha ha kahia ne mulambu wa bantu wa kuosha ha ka hia, neabuikile bubi buandi ne bubi bua bantu. Neoshe dianyi dia mulambu wa kubuikila nʼau bubi ha tshioshelu. Muntu wakihata mbushi wa Azazele neuvuwe bilulu biandi, neowe mai, ne ku nyima yeye neuhingane mu tshitudilu. Muana mulume wa ngombe wa mulambu wa kubuikila nʼau bubi ne mbushi wa mulambu wa kubuikila nʼau bubi miena mashi akaluabo nʼau bua ku buikila bubi mu muaba wa tshijila nebaye nʼai ku butshika bua tshibi dilu, neboshe biseba biai ne munyinyi wai ne tuma tuai mu kahia. Muntu wakuosha bintu ebi neuvuwe bilulu biandi ne mubidi wandi ne ku nyima neuhingane mu tshitudilu. Bualu ebu nebuikale mukenji kunudi tshiendelele mu dituku dia dikumi mu ngondo wa muanda mutekete nenujinge mu mitshima yenu, kanuenji mudimu, nansha bantu baledibue mu nsubu yenu nansha benyi badi munkatshi muenu, bualu bua edi ndituku didibo banubuikidila bubi buenu bua kunulengesha nunku nenuikale balengeshibue ku mibi yenu yonso ku mpala kua Yehowa. Edi ndituku dia lumingu dia dikisha dienu, nujinge mu mitshima yenu, eu mmukenji kunudi tshiendelele. Muakuidi wakelabo manyi ha mutu ne wakajidilabo bua kubuela mu mudimu wa tatuʼandi yeye neafile mulambu wa kubuikila nʼau bubi, nealuate bilulu bia lin bilulu bia tshijila, neafile mulambu bua kujidila nsubu wa tshitendelelu ne bua ntenta wa kusangakena ne bua tshioshelu ne bua kubuikila nʼau bubi bua bakuidi ne bua bantu bonso. Eu newikale mukenji kunudi tshiendelele bua kubuikila bubi bua Bena Isalele musangu umue ku tshidimu ku tshidimu. Bakenza bu muakambila Yehowa Mose. Yehowa wakambila Mose ne, Wambile Alona ne bana bandi balume ne Bena Isalele bonso ne, Ebu mbualu buakuamba Yehowa ne, Muntu yonso wa munkatshi mua Bena Isalele udi ushiha nansha ngombe nansha mukoko nansha mbushi mu tshitudilu anyi ku butshika bua tshitudilu, kayi nulue n andi ku mbelu kua ntenta wa kusangakena bua kumufila bu mulambu wa Yehowa ku mpala kua nsubu wa Yehowa, nebamubale bu muhite bua mashi akamatshisheye hanshi, yeye wakamatshisha mashi hanshi, nebumushe mundi au munkatshi mua bana babo. Bualu bua ndi musue Bena Isalele bangate milambu idibo basue kushihela mu tshisuku, balue nʼai kudi Yehowa, ku mbelu kua ntenta wa kusangakena kudi muakuidi, bayifile bu mulambu ya kuvuisha nʼai ditalala kudi Yehowa. Muakuidi neamiamine mashi ku tshioshelu tshia Yehowa, neoshe dianyi bu mulambu udi ulua dihembu kudi Yehowa. Nunku kabena bashihela ba-demon milambu yabo hadibo benda nʼabo masandi. Eu newikale mukenji kudibo bikondo biabo bionso. Wewe ubambile ne, Muntu yonso wa mu bisamba bia Bena Isalele anyi wa benyi badi munkatshi muabo udi ufila mulambu wa kuosha ha kahia anyi mulambu mukuabo ne udi uhidia kulua ne mulambu ku mbelu kua ntenta wa kusangakena bua kûshihela Yehowa nebumushe muntu au munkatshi mua bana babo. Muntu yonso wa mu bisamba bia Bena Isalele anyi wa benyi ba munkatshi muabo udi udia mashi, meme nengumushe mesu anyi kudi muntu au udi udia mashi nemmumushe munkatshi mua bana babo. Bualu bua mashi adi bu muoyo wa tshintu nakanuha mashi ha tshioshelu bualu bua kunubuikidila nʼau bubi buenu mashi adi anubuikidila bubi bualu bua muoyo wau. Bua bualu ebu nakambila Bena Isalele ne, Muntu wa munkatshi muenu kadi mashi nansha muenyi udi munkatshi muenu kadi mashi. Muntu yonso wa munkatshi mua Bena Isalele anyi wa benyi badi munkatshi muabo udi ulemba nyama anyi nyunyu bua kudia neahongolole mashi andi hanshi, neajibikile ne dinfuenkenya dia buloba. Bualu bua mashi adi bu muoyo wa bintu bionso, mashi a tshintu ne muoyo watshi bidi muomumue nunku nakambila Bena Isalele ne, Kanudi mashi a mu munyinyi, bualu bua muoyo wa bintu bionso udi mu mashi, muntu yonso udi udia mashi nebamumushe munkatshi mua bana babo. Muntu yonso udi udia tshintu tshidifuile anyi tshidi tshihandulule kudi nyama, bikaleye muledibue mu nsubu yenu anyi muenyi, yeye neuvuwe bilulu biandi ne mubidi wandi ne mai, neikale bu muntu udi kayi muakane tô ne dilolo, hashishe yeye neikale muakane. Kadi biahidieye kuvuwa bilulu biandi anyi mubidi wandi, yeye neadituadile bubi buandi. Yehowa wakambila Mose ne, Wambile Bena Isalele ne, Meme ndi Yehowa, Nzambi wenu. Kanuenji bilele bia mu buloba bua Ejipitu bunuakadi bashikame, kanuenji bilele bia mu buloba bua Kanâna bundualua kunuha, kanulondi mikenji yabo. Nuenu nuenze mei anyi ne mikenji yanyi, nubilonde meme ndi Yehowa, Nzambi wenu. Nuenu nutumikile mei anyi ne mikenji yanyi, bienza muntu nunku, neikale ne muoyo. Meme ndi Yehowa. Kuyi ha buihi ne muanʼenu bua kumuvula bilulu biandi, meme ndi Yehowa. Kuvudi tatuʼebe anyi mamuʼebe bilulu, yeye udi mamu webe, kumuvudi bilulu. Kuvudi mukashi wa tatuʼebe bilulu, yeye udi bu tatu mene. Kuvudi muanʼenu mukashi bilulu, bikaleye muana wa tatuʼebe anyi muana wa mamuʼebe udi muledibue mu nsubu muenu, anyi muaba mukuabo. Kuvudi muana mukashi wa muana webe mulume, anyi muana mukashi wa muana webe mukashi bilulu, bobo badi bu wewe mene. Kuvudi muana mukashi wa mukashi wa tatuʼebe bilulu, yeye udi muanʼenu mukashi. Kuvudi tatuʼebe mukashi bilulu, yeye udi muanʼabo ne tatuʼebe. Kuvudi mamuʼebe mukuabo bilulu, yeye udi muanʼabo ne mamuʼebe. Kuvudi muanʼabo ne tatuʼebe mulume bilulu, kuyi ha buihi ne mukashi wandi, yeye udi mukashi wa tatuʼebe mukuabo. Kuvudi mukashi wa muanʼebe bilulu, yeye udi mukashi wa muana webe, kuvudi bilulu biandi. Kuvudi mukashi wa muanʼenu mulume bilulu, yeye udi mukashi wa mua nʼenu mulume. Kuvudi mukashi ne muanʼandi mukashi bilulu, kuvudi muana mukashi wa muanʼandi mulume, anyi muana mukashi wa muanʼandi mukashi bilulu, badi bana benu, bualu ebu budi bubi. Kubala muan abo ne mukashi ebe, bua kumutatshisha hatshidiye ne muoyo ne kumuvula bilulu. Kuvudi mukashi bilulu hatshidiye ne tshijila tshia kulela kuandi. Kuladi ne mukashi wa mukuenu bua kudionena bualu buandi. Kanuadi bana bebe bua kubahitshisha mu kahia ka Moleke, kutedi dina dia Nzambi wenu tshitelatela meme ndi Yehowa. Kuladi ne mulume bu mudibo balala ne mukashi, bualu ebu budi bubi. Kuladi ne nyama bua kudionena mutshima webe, ne mukashi kimanyi biandi ku mpala kua nyama bua kulala handi, bualu ebu budi butamba bubi. Kanudionenyi mitshima yenu ne malu au Ebi mbilele bia bisamba bindi ngihata ku mesu kuenu, buloba buabo buakoneka, nempingishe bubi ha mutu habu, buloba nkayabu budi buluka bena buloba. Nuenu nutumikile mei anyi ne mikenji yanyi, kanuenji bilele ebi bidi bitambe bubi, nansha bana baledibue mu nsubu yenu nansha benyi badi munkatshi muenu (bualu bua bena buloba bakadi ku mpala kuenu bakenza malu mabi â onso, ne buloba buakoneka), buloba kabunuluki kabidi hanuabuona, bu muakadi buloba buluka tshisamba tshiakadi ku mpala. Bantu bonso batu benza malu mabi au nebumushibue munkatshi mua bana babo. Nunku nutumikile dî dianyi, kanuenji bilele ebi bibi biakenzabo ku mpala, kanudionyi mu malu au meme ndi Yehowa, Nzambi wenu. Yehowa wakambila Mose ne, Wambile Bena Isalele ne, Nuikale bantu ba tshijila bualu bua meme Yehowa, Nzambi wenu, ndi wa tshijila. Muntu yonso atshine tatuʼandi ne mamuʼandi, nuvuluke matuku a lumingu ndi Yehowa, Nzambi wenu. Kanukudimunyi mitshima yenu kudi mpingu, kanudienzedi mpingu ne tshiamu tshiakengululabo mu kahia ndi Yehowa, Nzambi wenu. Hanualua ne mulambu wa kubisha nʼau ditalala kudi Yehowa, nûfile ne mutshima udiye mua kuitabusha. Nenudie mulambu dituku dinudi nûfila ne makelela kabidi, biashala tshintu tô ne dituku disatu nebatshioshe mu kahia. Biatshidiabo dituku disatu, bualu ebu budi bubi, tshiena ngitabusha mulambu, muntu yonso udi ûdia neadituadile bubi buandi, bualu bua yeye wakuona tshintu tshijila tshia Yehowa, nebumushe muntu au munkatshi mua bana babo. Hanuahuola bintu binuakakuna mu buloba, kanuhuodi ku matengu a madimi, kanusangishi bintu bionso binudi nuhuola. Kanusangishi tumuma tuonso ludi mu madimi enu, kanuambudi tumuma tuakahona hanshi mu madimi enu, nushiye bintu ebi bia kukuatshisha nʼabi bahele ne benyi meme ndi Yehowa, Nzambi wenu. Kanuibi, kanudingidianganyi, kanushimianganyi. Kanuditshihi ne mashina ne dina dianyi, kanutedi dina dianyi tshitelatela, meme ndi Yehowa. Kanukengeshi mukuenu, kanuibi bintu biandi, kanushadi ne difutu dia muena mudimu butuku tô ne dinda. Kanuhendi muena mahaha, kanuteki tshintu tshia ku lenduisha nʼatshi muntu mufofo, kadi nuenu nutshine Nzambi wenu meme ndi Yehowa. Kanuenji bibi hanualumbulula tshilumbu, kanunemekedi muntu muhele, kanutumbishi muntu munene, kadi nulumbulule bilumbu bia muena mutumba nʼenu ne buakane mu mutshima. Kanuendakanyi bu bena mukoso munkatshi mua bantu benu, kanuhuwi bikala muena mutumba nʼenu mikuata kudi tshilumbu meme ndi Yehowa. Kuikadi ne lukuna mu mutshima kudi muanʼenu, kadi ubele muena mutumba nʼebe, bua wewe kutuadi bubi bua bualu buandi. Kudisombuedi, kuikadi ne lukuna kudi bana ba bana benu, kadi sua mukuenu bu mûdi mudisue, meme ndi Yehowa. Nutumikile mei anyi. Kanubueshakanyi bimuna bienu, kanukunyi ntete ya mishindu ibidi mu budimi bumue, kanuluatshi bilulu bikuma ne munda mashilangane. Muntu yonso udi ulala ne mukashi muhika, udi mubangila kudi mulume, udi kayi muanze kuhikudibua, nebabakengeshe bubidi buabo, kabena babashiha bualu bua yeye kakadi muhikudibue. Mulume eu nealue ne mulambu wa kubuikila nʼau disambuka diandi dia mikenji kudi Yehowa, ku mushiku wa mbelu wa ntenta wa kusangakena, neafile tshimpanga tshia mulambu wa kubuikila nʼau disambuka diandi dia mikenji. Muakuidi neafile mulambu wa kumubuikidila nʼau bubi buakenzeye ku mpala kua Yehowa, ne bubi buandi buakenzeye nebuikale bubuikidibue. Hanuahuola mu buloba ne hanuakuna mitshi ya mamuma, kunudi mamuma a mitshi tô bidimu bisatu. Kadi halua tshidimu tshinai, nujidile mamuma onso a mu tshidimu atshi bua kutendelela nʼau Yehowa. Halua tshidimu tshitanu, nudi mua kudia mamuma ne kuendulula nʼau mushinga meme ndi Yehowa, Nzambi wenu. Kanudi tshintu ne mashi atshi, kanutempi mbuku, kanuenji bilengulengu. Kanubeyi nsuki yenu biketu, kanuhungi miedi yenu ku bihanga. Kanutahi mputu hamʼbidi henu bua kujinga nʼai bantu bafue, kanutahi nsalu hamʼbidi henu meme ndi Yehowa. Kuendeshi muanʼebe mukashi masandi, malu a masandi neikale mu buloba, ne buloba nebukale ne malu mabi tente. Uvuluke matuku a lumingu, wakale ne ditshina mu nsubu wanyi meme ndi Yehowa. Kanubuelakanyi ne bena mulongo anyi batempi ba mbuku, kanubakebi, kunudionyi kudibo meme ndi Yehowa, Nzambi wenu. Uleshe kanemu kudi muntu udi ne nsuki yandi mitoke tô, unemeke muntu mununu, utshine Nzambi webe meme ndi Yehowa. Biashikama muenyi mu buloba buenu, kanumuenzedi bibi. Muenyi udi ushikama munkatshi muenu ikale bu muntu udi muledibue mu nsubu yenu, numusue bu munudi badisue, bualu bua nuenu nuakadi benyi mu buloba bua Ejipitu meme ndi Yehowa, Nzambi wenu. Kanuenji bubi hanualumbulula bilumbu, anyi hanuidikisha bule bua bintu anyi bujitu buabi anyi bungi buabi. Nuikale ne bihimu bimpe ne bihiminu bimpe, nuikale ne épha muimpe ne hin muimpe meme ndi Yehowa, Nzambi wenu, wakantaha tula mu buloba bua Ejipitu. Nutumikile mei anyi onso ne mikenji yanyi yonso, nubienze, meme ndi Yehowa. Yehowa wakambila Mose ne, Wambile Bena Isalele kabidi ne, Muntu yonso wa Bena Isalele anyi wa benyi ba munkatshi mua Bena Isalele udi ufila muana wandi kudi Moleke neashihibue bulelela, bena buloba nebamukume ne mabue. Meme kabidi nengumushe mesu anyi kudi muntu au, nemmumushe munkatshi mua bana babo, bualu bua yeye wakafua muana wandi kudi Moleke bua kuona nsubu wanyi ne kunyangisha dina dianyi dia tshijila. Biabuikila bena buloba mesu abo kudi muntu au hafileye bana bandi kudi Moleke, kabayi bamushihe, meme nengumushe mesu anyi kudi muntu au ne bantu bonso ba mu nsubu muandi, nemmumushe ne bantu bandi bonso badi benza handi malu a masandi ne Moleke, munkatshi mua bana babo. Muntu yonso udi ubuelakana ne bena muhongo ne batempi ba mbuku bua kulonda malu abo a masandi, nengumushe mesu anyi kudi muntu au, nemmumushe munkatshi mua bana babo. Nudilengeshe nunku, nuikale bantu ba tshijila bualu bua meme ndi Yehowa, Nzambi wenu. Nutumikile mikenji yanyi, nuyenze meme ndi Yehowa udi unulengesha. Muntu yonso udi wela tatuʼandi anyi mamuʼandi mulau nebamushihe bulelela, wakela tatuʼandi anyi mamuʼandi mulau mashi andi neikale hamʼbidi handi. Mulume udi wenda masandi ne mukashi wa mulume mukuabo, nebashihe mulume ne mukashi wake ndeye nʼandi masandi. Mulume udi ulala ne mukashi wa tatuʼandi udi bu muntu wakavula bilulu bia tatuʼandi nebabashihe bubidi buabo, ne mashi abo neikale hamʼbidi habo. Bialala mulume ne mukashi wa muanʼandi, nebabashihe bubidi buabo, bobo bakenza bualu bubi, ne mashi abo neikale hamʼbidi habo. Bialala mulume ne mulume mu kuabo bu mudiye ulala ne mukashi, bubidi buabo bakenza bualu bubi nebabashihe, ne mashi abo neikale hamʼbidi habo. Biabaka mulume mukashi ne mamuʼandi, bualu ebu budi bubi, nebaboshe mu kahia, busatu buabo, bualu bubi kabuikadi munkatshi muenu. Bialala mulume ne nyama, nebanshihe yeye ne nyama kabidi. Bialala mukashi ne nyama, nebashihe mukashi ne nyama kabidi, mashi abi neikale hamʼbidi habi. Biangata mulume muanʼabo mukashi, muana wa tatuʼandi anyi muana wa mamuʼandi, biavuleye bilulu biandi, ne biamuvula mukashi bilulu, ebu mbualu bua bundu, nebumushibue munkatshi mua bana babo, yeye wakavula muanʼabo mukashi bilulu, yeye nendituadile bubi buandi. Bialala mulume ne mukashi hatshidiye ku katshetshi, bia muvuleye bilulu, yeye wakamuela bilulu ne mukashi wakitabusha hakadiye ku katshetshi kandi, nebumushibue bubidi buabo munkatshi mua bana babo. Kuvudi mamu webe mukuabo anyi tatu webe mukashi bilulu, bualu bua yeye wakavula bana babo bilulu, bobo nebadituadile bubi buabo. Bialala mulume ne mukashi wa mansebʼandi, udi bu muntu wakavula mansebʼandi bilulu, bobo nebadituadile bubi buabo, kabena balela bana tshiendelele. Biangata mulume mukashi wa muanʼabo mulume, ebu mbualu bubi, yeye wakavula muanʼabo mulume bilulu, bobo kabena balela bana tshiendelele. Nuenu nutumikile mei anyi ne mikenji yanyi, nubienze, buloba bundi musue kunuha bua kushikamamu kabunuluki. Kanuendi mu bilele bia tshisamba tshindi ngihata ku mesu kuenu, bualu bua bobo bakenza malu au onso, nunku nakabalengulula. Kadi meme nakanuambila ne, Nenuhiane buloba buabo, nennuhebu, buloba budi bûle tente ne mabele ne buitshi meme ndi Yehowa, Nzambi wenu, nakanujidila munkatshi mua bantu bakuabo. Nunku nuenu nenutahulule nyama udi muimpe ne nyama udi kayi muimpe ne nyunyu udi muimpe ne udi kayi muimpe, kanuonyi mitshima yenu kudi nyama anyi nyunyu anyi kudi tshintu tshidi tshidikoka hanshi binakunuhidisha bu tshintu tshidi ka tshiyi tshimpe. Nuikale bantu ba tshijila kundi, bualu bua meme Yehowa ndi wa tshijila, nakanusungula munkatshi mua bantu bua nuenu nuikale bantu banyi. Mulume anyi mukashi udi ne muhongo anyi udi mutempi wa mbuku neashihibue, nebakumibue ne mabue, mashi abo neikale hamʼbidi habo. Yehowa wakambila Mose ne, Wambile bakuidi, bana balume ba Alona, ne, Nansha umue wabo kadinyangi bua bantu bafue badi munkatshi muabo, anu bua bana babo, nansha mamuʼandi nansha tatuʼandi, nansha muanʼandi mulume, nansha muanʼandi mukashi, nansha muanʼabo wa balume, nansha muanʼandi mukashi utshidi kamama, udi kayi ne mulume, yeye udi mua kudinyanga bua bualu buandi. Yeye kena udinyanga nansha, bualu bua yeye udi muntu munene munkatshi mua bana babo. Kababeyi muaba wa dibala ha mutu habo, kabahungi miedi yabo, kabatahi nsalu hamʼbidi habo. Bobo nebikale ba tshijila kudi Nzambi wabo, kabanyangishi dina dia Nzambi wabo, bualu bua bobo badi bafila milambu ya kuoshila Yehowa ha kahia nunku bobo nebikale ba tshijila. Kababaki mukashi wa masandi ne munya nguke anyi mukashi wakahidiabo kudi mulume wandi yeye udi wa tshijila kudi Nzambi wandi. Nunku wewe neumujidile bualu bua yeye udi ufila milambu kudi Nzambi webe, bualu bua meme Yehowa wakamuidika, ndi wa tshijila. Bienda muana mukashi wa muakuidi masandi, yeye wakadinyanga wakasangisha tatuʼandi kabidi, nebamuoshe mu kahia. Muakuidi udi ku mutu kua bakuabo udi ne manyi mele ha mutu ne udi mujidila bua kuluata bilulu bia tshijila, kalekedi nsuki yandi tshianana, kahandi bilulu biandi nansha, kabuedi kudi muntu mufue nansha, kadinyangi bua tatuʼandi anyi mamuʼandi, kahatula ku nsubu wa tshitendelelu, kanyangishi nsubu wa Nzambi wandi nansha, bualu bua manyi a tshijila a Nzambi wandi adi ha mutu handi, meme ndi Yehowa. Yeye neabake mukashi utshidi kamama. Kabaki mukashi wa mu lufuila anyi mukashi wakahidiabo kudi mulume wandi anyi mukashi udi munyanga anyi mukashi wa masandi, yeye neabake mukashi utshidi kamama wa munkatshi mua bana babo. Kanyangishi bana bandi munkatshi mua bana babo nansha, bualu bua meme ndi Yehowa wakamujidila. Yehowa wakambila Mose ne, Wambile Alona ne, Muntu yonso wa munkatshi mua bana bebe tô mu bikondo biabo bionso udi ne tshilema kena mua kulua ha buihi bua kufileye milambu kudi Nzambi wandi. Bualu bua muntu udi ne tshilema kena mua kulua ha buihi muntu mufofo anyi tshibombo anyi muntu udi ne diulu dibatama anyi tshioka tshitambe bule, anyi muntu udi ne dikasa ditshibuka anyi udi ne tshianza tshitshibuka anyi muntu udi ne nyima mutuntamana anyi muntu mushunguke anyi udi ne disu disama anyi udi ne mpusu anyi udi ne bilamulamu anyi udi ne mihesa yandi mitshibuke, muntu wa munkatshi mua bana ba Alona muakuidi udi ne bintu ebi hamʼbidi handi kena mua kulua ha buihi bua kulaleye mulambu ya kuoshila Yehowa ha kahia, yeye udi ne tshitema, kena mua kudia mulambu kudi Yehowa. Yeye udi mua kudia bidia bia Nzambi wandi ne bidia bidi bitambe tshijila ne bia tshijila, kadi yeye kena mua kubuela mu muaba wa tshijila anyi mua kulua ha buihi ne tshioshelu, bualu bua yeye udi ne tshilema, kanyangishi nsubu wanyi nansha, bualu bua meme ndi Yehowa wakabajidila. Mose wakambila Alona ne bana bandi balume ne Bena Isalele bonso nunku. Yehowa wakambila Mose ne, Wambile Alona ne bana bandi balume ne, Nuenu nudijidile ku bintu bia tshijila bia Bena Isalele bidibo banjidila, kanunyangishi dina dianyi dia tshijila meme ndi Yehowa. Ubambile kabidi ne, Muntu yonso wa munkatshi mua bana benu ku bikondo biabo bionso udi ulua ha buihi ne bintu bidi Bena Isalele bajidile Yehowa ne mubidi wandi kauyi muakane, nebamumushe ku mesu kuanyi meme ndi Yehowa. Muntu yonso wa munkatshi mua bana ba Alona udi muena nsudi anyi udi tufina tuhatuka mu mubidi wandi kena mua kudia bintu bia tshijila tô ne hashika disama diandi Muntu yonso udi ulenga mukuabo udi munyanguke bualu bua wakadi mulenge tshitalu anyi wakadi muele bilunu, anyi udi ulenga tshianza tshiandi ha tshintu tshidi tshidikoka hanshi tshidi mua kumunyanga, anyi hamʼbidi ha mundi udi munyanguke mu mushindu wonso, muntu udi ulenga bianza hamʼbidi ha bintu ebi neikale munyanguke tô ne dilolo, kena mua kudia bintu bia tshijila diambedi yeye kayi muanze kuowa mai ha mubidi. Habuela diba yeye neikale muakane, ku nyima yeye udi mua kudia bintu bia tshijila bualu bua ebi mbidia biandi. Tshintu tshi difume anyi tshidi tshihandulula kudi nyama yeye kena mua kutshidia, yeye neadinyange nʼatshi meme ndi Yehowa. Bobo nebatumikile dî dianyi, bua biahidiabo, nebadituadile bubi buabo, nebafue meme ndi Yehowa wakabajidila. Muenyi kena mua kudia tshintu tshia tshijila, nansha muenyi wa muakuidi nansha muena mudimu kabena mua kudia tshintu tshia tshijila. Kadi biasumba muakuidi muntu, muntu eu udi mua kutshidia, ne bana baledibue mu nsubu muandi nebadie bidia biandi. Bikala muana mukashi wa muakuidi mubaka kudi muenyi, yeye kena mua kudia tshintu tshia tshijila tshifila kudi Yehowa. Kadi bikala muana mukashi wa muakuidi mukashi wa mu lufuila, anyi mukashi wakahidiabo kudi mulume wandi, ne bikaleye kayi ne muana, bikaleye nuhingane ku nsubu wa tatuʼandi muakadiye diambedi, yeye neadie bidia bia tatuʼandi, kadi muenyi kena mua kudia bintu ebi. Biadia muntu tshintu tshia tshijila ku mpukahuka, yeye neasangishe tshintu tshitanu ha mutu hatshi, neahe muakuidi tshintu tshia tshijila. Bobo kabanyangishi bintu bia tshijila Nakafila Bena Isalele kudi Yehowa, bua kabatekedi bantu bujitu bua bubi bua bakuidi hadia bakuidi bintu bia tshijila bia bantu meme ndi Yehowa wakabajidila. Yehowa wakambila Mose ne, Wambile Alona ne bana bandi balume ne Bena Isalele bonso ne, Muntu yonso wa mu nsubu ya Bena Isalele anyi wa benyi ba munkatshi mua Bena Isalele udi ufila mulambu wa kuditshiha, anyi mulambu udi mutshima wandi musue kufila, anyi mulambu mukuabo udibo boshila Yehowa ha kahia, biasueye kufila mulambu udi Yehowa muitabushe, afile mulume udi kayi ne tshialua wa munkatshi mua ngombe anyi mikoko anyi mbushi. Kadi kanufidi tshintu tshidi ne tshilema bualu bua tshiena ngitabusha tshintu etshi. Hafila muntu mulambu wa kuvuisha nʼau ditalala kudi Yehowa bua kushikisha kuditshiha kuandi anyi mulambu udi mutshima wandi musue kufila wa munkatshi mua ngombe anyi mikoko, nengitabushe anu tshintu tshidi tshiakane, katshiena mua kuikala ne tshitema. Nyama udi mufofo, anyi ne mifuba mitshibuke, anyi udi ujeka, anyi udi ne mputa, anyi udi ne tshikutu, anyi udi ne bilamulamu, kanufidi nyama ei kudi Yehowa bu mulambu wa kuosha ha kahia ha tshioshelu tshia Yehowa. Nudi mua kufila mulume wa ngombe anyi muana wa mukoko udi ne tshidimba tshiandi tshihita bule anyi buihi bu mulambu udi mitshima yenu misue kufila, kadi kanuena mua kufila nyama ei bu mulambu wa kuditshiha nʼau. Nyama udi ne mihesa yandi mihandike anyi mitahe mputa kanumufidi bu mulambu kudi Yehowa mu buloba buenu. Kanuitabushi mulambu ei ku bianza bia benyi bua kuyifila kudi Nzambi wenu, mulambu ei idi ne bilema, tshiena nyitabusha bualu bua idi munyanguke. Yehowa wakambila Mose ne, Halelabo muana kudi ngombe anyi kudi mukoko anyi kudi mbushi, yeye neikale ne mamuʼandi matuku muanda mutekete, ku dituku dia muanda mukulu ne matuku adi ku mpala badi mua kumufila bu mulambu wa kuoshila Yehowa ha kahia. Biwikala ne mukashi wa ngombe anyi wa mukoko, kumushihi ne muana wandi dituku dimue. Binualua ne mulambu wa kusakidila n au Yehowa, nufile bua nuikale bitabushibue. Nenudie dituku adi mene mene, kanushiyi tshintu tô ne dinda meme ndi Yehowa. Nuenu nenutumikile mikenji yanyi, nengenze meme ndi Yehowa. Kanunyangishi dina dianyi dia tshijila, kadi nengikale mujidibue munkatshi mua Bena Isalele meme ndi Yehowa udi unujidila, wakanuhatula mu buloba bua Ejipitu bua kuikala Nzambi wenu meme ndi Yehowa. Yehowa wakambila Mose ne, Wambile Bena Isalele ne, Nakasungula matuku andi musue bantu badie bidia bia Yehowa anudi mua kumanyisha bantu, matuku au neikale matuku a tshijila. Nukuate mudimu matuku asambombo kadi dituku dia muanda mutekete ndituku dia lumingu dia kuikisha, dituku dia disangisha dia tshijila, kanuenji mudimu, edi ndituku dia lumingu dia Yehowa mu nsubu yenu yonso. Au mmatuku a kudia bidia bia Yehowa, matuku a tshijila andi musue wewe ubamanyishe ku bikondo biau. Ngondo wa kumudilu, mu matuku dikumi ne anai, diba dia dilolo, ndituku dia kuhita kua Yehowa. Dituku dia matuku dikumi ne atanu a ngondo eu mene ndituku dia kudila Yehowa bidia bidi kabiyi ne luevene, nenudie bidia bidi kabiyi ne Iuevene matuku muanda mutekete. Dituku dia kumudilu nedikale dituku dia tshijila, kanuenji mudimu. Kadi nenufile milambu ya kuoshila Yehowa ha kahia tô matuku muanda mutekete, dituku dia muanda mutekete ndituku dia tshijila, kanuenji mudimu. Yehowa wakambila Mose ne, Wambile Bena Isalele ne, Hanuabuela mu buloba bundi nnuha, ne hanuahuola bintu bia mu buloba, nulue bienu ne bintu binudi nuhuola diambedi kudi muakuidi, yeye neanyukule tshisumbu tshia bintu ku mpala kua Yehowa, bualu bua kunuitabushisha kudi Yehowa, muakuidi neatshinyukule dituku didi dilonda dia lumingu. Mu dituku dinudi nunyukula bintu, nenufile muana mulume wa mukoko wa tshidimu tshimue udi kayi ne tshilema bu mulambu wa kuoshila Yehowa ha kahia. Nenufile diatshimue ne mulambu wa bukula wa bituha bibidi bia dikumi bia épha busangisha ne manyi, mulambu wa kutua dihembu dimpe muoshile Yehowa, nenufile mulambu wa nvinyo wa kunua wa tshituha tshinai tshia hin. Kanudi mampa anyi manvua akoshabo mu kahia, anyi manvua mabishi dituku edi diambedi kanuyi banze kufila milambu yenu kudi Nzambi eu udi mukenji wa tshiendelele mu bikondo bienu bionso mu nsubu yenu yonso. Nenubange ku dituku didi dilonda dia lumingu, dituku dinuakalua ne tshisumbu tshia bintu bidibo banyukula, nenubale matuku a lumingu muanda mutekete, tô ne ku dituku didi dilonda dituku dia lumingu dia muanda mutekete bu matuku makumi atanu nenufile mulambu wa bukula buhia-buhia kudi Yehowa. Nenufume ku nsubu yenu ne mitanda ya mampa ibidi ya kunyukula, milamba ne bituha bibidi bia dikumi bia épha ya bukula bubotesha busangisha ne luevene, ebi mbintu bihuola bia diambedi bifila kudi Yehowa. Nulue ne mampa au ne bana ba mikoko muanda mutekete ba tshidimu tshimue badi kabayi ne bilema ne muana mulume wa ngombe ne bimpanga bibidi, bintu ebi nebikale bu mulambu wa kuoshila Yehowa ha kahia, udibo bafila ne mulambu wa bukula ne mulambu wa bintu bia kunua, bu mulambu wa kuosha ha kahia udi utua dihembu kudi Yehowa. Nenufile mpumbu wa mbushi umue bu mulambu wa kubuikila nʼau bubi ne bana balume ba mikoko babidi ba tshidimu tshimue bu mulambu wa kuvuisha nʼau ditalala. Muakuidi neanyukule bintu ebi ne mampa a bintu biakahuolabo diambedi ne bana ba mikoko babidi bu mulambu udibo banyukula ku mesu kua Yehowa, nebikale bintu bia tshijila kudi Yehowa bualu bua muakuidi. Wewe newambile bantu dituku adi bua dituku adi dikale dituku dia disangisha dia tshijila kunudi, kanuenji mudimu eu udi mukenji wa tshiendelele mu nsubu yenu yonso tô ne mu bikondo bienu bionso. Hanuahuola bintu binuakakuna mu buloba, kanuhuodi ku matengu a madimi, kanusangishi bintu bionso, nenushiye bintu ebi bua kukuatshisha nʼabi bahele ne benyi meme ndi Yehowa, Nzambi wenu. Yehowa wakambila Mose ne, Wambile Bena Isalele ne, Dituku dia kumudilu dia ngondo wa muanda mutekete nedikale dituku dia kuikisha kunudi, dituku dia tshivulukidi didibo bela mpungi, dituku dia disangisha dia tshijila. Ka nuenji mudimu, nenufile mulambu wa kuoshila Yehowa ha kahia. Yehowa wakambila Mose ne, Dituku dia matuku dikumi a ngondo eu wa muanda mutekete ndituku dia kubuikila bubi bua bantu, nebikale dituku dia disangisha dia tshijila, nenujinge mu mitshima yenu, nenufile mulambu wa kuoshila Yehowa ha kahia. Kanuenji mudimu dituku adi, edi ndituku dia kubuikila bubi buenu ku mesu kua Yehowa. Muntu yonso udi uhidia kujinga mu mutshima wandi dituku adi nebamumushe munkatshi mua bana babo. Muntu yonso udi wenza mudimu dituku adi nebamumushe munkatshi mua bana babo. Kanuenji mudimu nansha mukese dituku adi eu udi mukenji wa tshiendelele mu bikondo bienu bionso mu nsubu yenu yonso. Dituku edi nedikale dituku dia lumingu dia kuikisha, ne nuenu nenujinge mu mitshima yenu, nuikishe bienu ku dilolo dia matuku tshitema a ngondo eu tô ne ku dilolo dia matuku dikumi. Yehowa wakambila Mose ne, Wambile Bena Isalele ne, Dituku dia matuku dikumi ne atanu a ngondo eu wa muanda mutekete nebikale dituku didibo badia bidia bia mu bitandatanda tô matuku muanda mutekete. Dituku dia kumudilu nedikale dituku dia disangisha dia tshijila, kanuenji mudimu. Matuku muanda mutekete nenufile milambu ya kuoshila Yehowa ha kahia, dituku dia muanda mukulu nedikale dituku dia disangisha dia tshijila kunudi, nenufile mulambu wa kuoshila Yehowa ha kahia, edi ndisangisha dia tshijila, kanuenji mudimu. Â mmatuku anakasungula bua nuenu nuambile bantu bua bikondo bia masangisha a tshijila bia kufila milambu ya kuoshila Yehowa ha kahia, mulambu wa kuosha ha kahia ne mulambu wa bukula ne mulambu wa bintu bia kunua, mulambu dituku diau mulambu dituku diau, malu â adi ha mutu ha matuku a lumingu lua Yehowa ne bintu binudi basue kufila ne ha mutu ha bintu bidi mitshima yenu musue kufila kudi Yehowa. Halua dituku dia matuku dikumi ne atanu a ngondo wa muanda mutekete hanuashikisha kuhuola bintu, nenudie bidia bia Yehowa matuku muanda mutekete, dituku dia kumudilu nedikale dituku dia kuikisha, ne dituku dia muanda mukulu nedikale dituku dia kuikisha. Dituku dia kumudilu nenuangate mamuma a mitshi mimpe ne bikola bia mabue ne matamba a mitshi ne ntuhu ya mu mai, nenusanke ku mesu kua Yehowa, Nzambi wenu, matuku muanda mutekete. Nenudie bidia nunku ku mesu kua Yehowa matuku muanda mutekete ku tshidimu ku tshidimu, eu udi mukenji wa tshiendelele mu bikondo bienu bionso, nenuenze bualu ebu mu ngondo wa muanda mutekete. Nenuikale mu bitandatanda matuku muanda mutekete; bantu bonso hakalelabo mu Isalele nebashikame mu bitandatanda bua kumanyisha bantu ba mu bikondo bienu bionso ne, Bena Isalele bakashikama mu bitandatanda hanakahatuka nʼabo mu buloba bua Ejipitu, meme ndi Yehowa, Nzambi wenu. Mose wakambila Bena Isalele nunku bua matuku a kudia bidia akasungula Yehowa. Yehowa wakambila Mose ne, Wambile Bena Isalele bua bobo balue kûdi ne manyi akatuabo bua kutemesha nʼau minda ku dituku ku dituku. Alona nealongolole minda dilolo ne dinda ku mesu kua Yehowa ku dituku ku dituku, ku mpala kua tshilulu tshia ku muaba wa tshijila mu ntenta wa kusangakena eu udi mukenji wa tshiendelele mu bikondo bienu bionso. Yeye nealongolole minda ha bitekelu biai bia or numpe ku mpala kua Yehowa ku dituku ku dituku. Wangate bukula bubotesha, ulambe nʼabu mikata dikumi ne ibidi, ulambe mukata umue ne bituha bibidi bia dikumi bia épha. Ubiteke milongo ibidi, mulongo isambombo mulongo isambombo, ha mesa adi ku mpala kua Yehowa. Wele manananshi ku mulongo ne ku mulongo, manananshi neikale bu tshivulukidi ha mampa bu mulambu wa kuoshila Yehowa ha kahia. Nealongolole mampa dituku dia lumingu ku mpala kua Yehowa ku lumingu ku lumingu, yeye nênzele Bena Isalele bualu ebu bu tshihungidi tshia tshiendelele. Bintu ebi mbia Alona ne bana bandi balume, ne nebabidie mu muaba udi wa tshijila bualu bua bidi bitambe tshijila ku mesu kua Yehowa munkatshi mua mulambu yonso idibo bosha ha kahia. Eu udi mukenji wa tshiendelele. Muana wakadiku, mamu wandi wakadi Muena Isalele ne tatuʼandi wakadi Muena Ejipitu wakaluhuka munkatshi mua Bena Isalele, muana mulume eu wa mukashi wa Bena Isalele wakasangana ne Muena Isalele mukuabo mu tshituilu, muana mulume wa mukashi wa Bena Isalele wakateta dina dia Yehowa tshitelatela, wakamuhenda, ba kalua handikudi Mose. Dina dia mamu wandi diakadi Shelomita, muana mukashi wa Dibili, wa mu tshisamba tshia Dana. Baka muela mu lukanu bua kuindila mei a kudi Yehowa. Yehowa wakambila Mose ne, Uhatule muntu eu muena bihendu ku butshika bua tshitudilu, bantu bonso bakunvua mei andi batentekashe bianza biabo ha mutu handi ne bantu bonso bamukume ne mabue. Wewe wambile Bena Isalele ne, Muntu yonso udi uhenda Nzambi wandi nendituadile bubi buandi. Muntu udi utela dina dia Yehowa tshitelatela nebamushihe bulelela, bantu bonso nebamukume ne mabue, bikaleye muenyi anyi muntu muledibue mu nsubu yenuhateleye dina dia Yehowa tshitelatela, nebamushihe. Muntu udi ushiha mukuabo nebamushihe. Muntu udi ushiha nyama neafute muena nyama, muoyo ku muoyo. Muntu udi utaha mukuabo mputa nebamuenzele muomumue mputa ku mputa, disu ku disu, dinu ku dinu bu muakenzeleye mukuabo nebamuenzele yeye. Muntu udi ushiha nyama neafute muena nyama ne mundi udi ushiha mukuabo nebamushihe. Nudi ne mukenji muomumue kudi muenyi ne kudi mundi muledibue mu nsubu yenu bualu bua meme ndi Yehowa, Nzambi wenu. Mose wakambila Bena Isalele nunku, ne bobo bakaluhuka ne muena bihendu ku butshika bua tshitudilu, bakamukuma ne mabue Bena Isalele bakenza bu muakambila Yehowa Mose. Yehowa wakambila Mose mu mukuna wa Sinai ne, Wambile Bena Isalele ne, Hanuabuela mu buloba bundi nnuha, nenushiye buloba bua kubandabu kudi Yehowa. Nenukune bintu mu madimi enu bidimu bisambombo, nenulongolole mitshi ya tumuma, ne nuhuole tumuma tua mitshi bidimu bisambombo, kadi tshidimu tshia muanda mutekete buloba nebuikale mua kubandabu kudi Yehowa, kanukunyi bintu mu madimi, kanulongolodi mitshi ya tumuma. Kanuhuodi bintu bidi bidimenena anyi tumuma didi tudimenena etshi ntshidimu tshia kubanda kua buloba. Bintu bidi bidimenena mu tshidimu tshia kubanda kua buloba nebikale bintu bienu bia kudia, bintu biebe ne bia muhika webe mulume ne bia muhika webe mukashi ne bia muena mudimu webe ne bia muenyi udi ushikama nʼebe ne bia bimuna biebe ne bia nyama yonso idi mu buloba buebe bintu bionso biakadimenena nebikale bintu bia kudia. Wewe neubale bidimu bia kubanda kua buloba muanda mutekete, bidimu muanda mutekete misangu muanda mutekete, neubale nunku bidimu muanda mutekete bia kubanda kua buloba misangu muanda mutekete tô ne ku bidimu makumi anai ne tshitema. Nunku wewe neweleshe mpungi bikole dituku dia dikumi mu ngondo wa muanda mutekete, mu dituku dia kubuikila bubi bua bantu wewe neweleshe mpungi kuonso mu buloba buenu. Wewe neujidile tshidimu tshia makumi atanu, newele di bua bantu bonso bahete budishikaminyi, etshi ntshidimu tshia disanka dinene kunudi, neuhingishe buloba buonso kudi bena buloba, ne muntu yonso neahingane kudi bana babo. Tshidimu tshia makumi atanu netshikale tshidimu tshia disanka dinene kunudi, kanukunyi bintu, kanuhuodi bintu bidi bidimenena anyi tumuma tudi tudimenena. Etshi ntshidimu tshia disanka dinene, netshikale tshidimu tshia tshijila kunudi, nenudie bintu bidi bidimenena mu madimi. Mu tshidimu etshi tshia disanka dinene nenuhingane muntu yonso ku buloba buandi muntu yonso ku buloba buandi. Binuahanyisha mukuenu bintu bienu anyi binuasumba bintu ku bianza bia mukuenu, kanuenzedianganyi bibi. Bu mudi bungi bua bidimu ku nyima kua tshidimu tshia disanka dinene wewe neusumbe bintu kudi mukuenu, ne yeye neakusumbishe bu mudi bungi bua bidimu biakamaneye kuhuola bintu. Biahita bidimu bia bungi, wewe udi mumanye mua kuhandisha mushinga wa bintu, ne bialeha bidimu bikese, wewe neuhuekeshe mushinga wabi bu mudi bungi bua bintu bidiye ukusumbisha. Kanuenzedianganyi bibi, nuenu nenutshine Nzambi webe bualu bua meme ndi Yehowa, Nzambi wenu. Nuenu nenutumikile mei anyi ne mikenji yanyi, nenubienze, nenushikame mu buloba talala. Buloba nebukuame bintu bia bungi, nuenu nenukute mafu tente, nenushikame bienu talala. Binuadikonka ne, Netudie tshinyi tshidimu tshia muanda mutekete hatudi katuyi tukuna bintu, katuyi tuhuola bintu? nennuvudishile disanka dianyi tshidimu tshisambombo, ne buloba nebukuame bintu bia bidimu bisatu. Hanuakuna bintu tshidimu tshia muanda mukulu, nenudie bintu bia diambedi biakadi bishale mu nsubu yenu, tô ne ku tshidimu tshia tshitema hanuahuola bintu, nenudie bintu bia diambedi biakadi bishale. Kanuena mua kusumbisha muntu buloba bua yeye kuikala nʼabu tshiendelele, buloba buonso mbuanyi, ne nuenu nudi bu benyi ne bena luendu ku mesu kuanyi. Mu buloba buonso bunudi nuhiana biasumbabo bukuabo, nebashiye tshieya tshia buhikudi bua buloba kudi wakabusumbisha. Bialua mukuenu muntu muhele, biahaneye tshituha tshia buloba buandi, ne bialua bana babo bua kubuhikula, badi mua kuhikula buloba buakahanabo kudi muanʼabo. Bikala muntu eu kayi ne muanʼabo bua kubuhikula, kadi bialueye muntu mubanji udi ne bintu bia kubuhikula nʼabi, yeye neabale bungi bua bidimu biakahita hakamusumbisheye buloba, neamuhingashile mushinga wabu ne bintu bikuabo ha mutu, yeye neahingane mu buloba buandi. Bikaleye kayi ne bintu bia kubuhikula nʼabi, nunku buloba buakahaneye nebuikale mu bianza bia muntu wakabusumba tô ne halua tshidimu tshia disanka dinene, mu tshidimu tshia disanka dinene buloba nebuhikudibue ne yeye neahingane mu buloba buandi. Biahana muntu nsubu mu musoko udi munyungulula ne lumbu yeye udi mua kuhikula nsubu diambedi tshidimu tshimue katshiyi tshianze kuhita, tô tshidimu tshijima yeye udi mua kumuhikula. Kadi biahangeye kumuhikula diambedi tshidimu tshimue katshiyi tshianze kuhita, nunku nsubu wa mu musoko udi munyungulula ne lumbu neikale kudi wakamusumba tô tshiendelele, muena nsubu kena uhingana mu nsubu halua tshidimu tshia disanka dinene. Kadi nsubu ya mu misoko idi kayiyi minyungulula ne lumbu neyikale ne madimi, nudi mua kuyihikula, ne bena nsubu nebahingane halua tshidimu tshia disanka dinene. Kadi misoko ya Bena Lewi ne nsubu ya mu misoko yabo, Bena Lewi badi mua kuyihikula hasuabo. Biahikula Muena Lewi nsubu, nunku nsubu wakahanabo ne musoko wa buhianyi buandi nebihingane kudibo halua tshidimu tshia disanka dinene, bualu bua nsubu ya mu misoko ya Bena Lewi idi buhianyi buabo munkatshi mua Bena Isalele. Kadi kabena mua kuhana madimi adi ku matshika a misoko yabo, ebu mbuhianyi buabo tshiendelele. Bialua mukuenu mundi muhele, biateketa maboko andi ha buihi hebe, wewe neumukuatshishe, yeye neikale kûdi bu muenyi anyi bu muena luendu. Kumulombi tshia kasombela, kadi utshine Nzambi webe, mukuenu neikale nʼebe. Kumulombi tshia kasombela ku argent iwakamusombesha anyi ku bintu bia kudia biwakamuha. Meme ndi Yehowa, Nzambi webe, wakakuhatula mu buloba bua Ejipitu bua kukuha buloba bua Kanâna ne bua kuikala Nzambi webe. Bialua mukuenu mundi muhele, biadihaneye kûdi, kumuenzeshi mudimu bu muhika. Yeye neikale nʼebe bu muena mudimu anyi bu muenyi, neakukuatshile mudimu tô ne halua tshidimu tshia disanka dinene, hashishe yeye neumuke kudi ne yeye ne bana bandi badi nʼandi, nebahingane kudi bana babo ne ku buhianyi bua batatu bandi. Bualu bua bobo badi bantu banyi banakuhatula mu buloba bua Ejipitu, kababahanyi bu bahika. Kumukokeshi ne tshianza tshikole, kadi utshine Nzambi webe. Wewe neusumbe bahika balume ne bahika bakashi kudi bisamba bia bantu badi hehi nʼebe. Udi mua kusumba bana ba benyi badi munkatshi muenu, ne bana ba benyi badi baledibue mu buloba buenu, bobo nebikale bahika benu. Bobo nebikale bu buhianyi bua bana benu badi banulonda ku nyima bua kubahiana tshiendelele, nudi mua kuangata bahika benu munkatshi muabo, kadi kabakokeshi bana benu ba Bena Isalele ne tshianza tshikole. Bialua muenyi wa munkatshi muenu mundi mubanji, ne bialua mukuenu udi ushikama hehi handi muntu muhele, biadihaneye kudiye anyi kudi mundi mukuabo wa mu diku diandi, hadihaneye, badi mua kumuhikula, umue wa bana babo udi mua kumuhikula, mansebʼandi anyi muana mulume wa mansebʼandi anyi muanʼabo mukuabo udi mua kumuhikula, bialueye muntu mubanji, yeye udi mua kudihikula. Bobo nebabange ku tshidimu tshiakudihaneye nebabale bungi bua bidimu tô ne halua tshidimu tshia disanka dinene, mushinga wa kudihikula nʼau newikale bu bungi bua bidimu biakashaleye handi bu muena mudimu. Biashala bidimu bia bungi, neamuhingishile bu mushinga wa kudihikula nʼau tshituha tshia bintu biakamusumbabo babi. Biashala bidimu bikese tô ne ku tshidimu tshia disanka dinene, bobo nebabibale, yeye neamuhingishile tshituha tshia kudihikula nʼatshi bu bungi bua bidimu biandi bidi bishala. Yeye neikale handi bu muena mudimu ku tshidimu ku tshidimu kamukokeshi ne tshianza tshikole ku mesu kuebe. Bikaleye kayi muhikudibue nunku, yeye neumuke halua tshidimu tshia disanka dinene, yeye ne bana bandi. Bualu bua Bena Isalele badi bantu banyi banakahatula mu buloba bua Ejipitu meme ndi Yehowa, Nzambi wenu. Kanusongi mpingu, kanujadiki luhingu lua tshiamu tshiakafulabo, anyi dikunshi anyi dibue diakasongabo mu buloba buenu bua kubmamina, bualu bua meme ndi Yehowa, Nzambi wenu. Nuvuluke matuku anyi a lumingu, nuikale ne kanemu mu nsubu wanyi, meme ndi Yehowa. Binualonda mei, anyi binuatumikila mikenji yanyi, binuayenza, nennuhe nvula mu tshidimu tshia nvula, ne buloba nebukuame bintu bia bungi, ne mitshi ya mu madimi neyikuame mamuma a bungi. Tshikondo tshidibo bashehula bintu netshikale tô ne ku tshikondo tshidibo bahuola mamuma a mitshi, ne tshikondo tshidibo bahuola mamuma netshikale tô ne ku tshikondo tshidibo bakuna bintu, nenukute mafu tente ne bia kudia, nenushikame mu buloba buenu talala. Nennuhe ditalala mu buloba, nenulale tulu, ne bantu kabena banutshinyisha, nengihate nyama mibi mu buloba buenu, ne kabena balue ne muele wa nvita mu buloba buenu. Nuenu nenuihate bantu badi nʼenu lukuna, nenubashihe ne muele wa nvita. Batanu benu nebihate bantu lukama, ne bantu benu lukama nebihate binunu dikumi bia bantu, badi nʼenu lukuna nebafue ku muele wa nvita. Nengikale nʼenu luse, nennuleleshe bana ba bungi, nennuvudishangane, nenjadike tshihungidi tshianyi munkatshi muenu. Nenudie bintu binuakahuola kale, nenumushe bia kale bua kushila bihia-bihia muaba. Nenshimike nsubu wanyi wa tshitendelelu munkatshi muenu, mutshima wanyi kawena wikala ne tshiji kunudi. Meme nengendakane munkatshi muenu, nengikale Nzambi wenu, ne nuenu nenuikale bantu banyi. Meme ndi Yehowa, Nzambi wenu, wakanuhatula mu buloba bua Ejipitu bua nuenu kanuikadi bahika babo, nakatshibula mitshi ya tshikokedi yakatekabo ha nshingu yenu, nakanujalamisha. Kadi binuahidia kunvua dî dianyi, binuahidia kutumikila mikenji yanyi, binuahidia mikandu yanyi, binuabenga mei anyi mu mitshima yenu, kanuyi nuenza mikenji yanyi, binuashiha tshihungidi tshianyi, meme kabidi nennuenzele nunku nengenze malu adi anutshinyisha, nennutumine masama adi anyanyisha mibidi yenu ne disama dia mubidi kahia, masama au neashihe mesu enu, neanyanyishe mitshima yenu, nenukune bintu bienu tshianana, bualu bua bantu badi nʼenu lukuna nebabidie. Meme nengumushe mesu anyi kunudi, nenuhone ku mpala kua bantu badi nʼenu lukuna, bantu badi nʼenu lukuna nebanukokeshe, nenunyeme tshianana, bantu kabayi banze ku nuihata. Binuahidia kunvua di dianyi meme mumane kunuenzela malu au onso, nennukengeshe bikole misangu muanda mutekete bualu bua mibi yenu. Nenjimishe kudisua kunudi nʼaku bua bukole buenu, diulu nedikale bu tshiamu tshifike ne buloba nebuikale bu tshiamu tshia mitaku, nenuenze mudimu wenu tshianana bualu bua buloba kabuena bukuama bintu, ne mitshi ya mu buloba kayena ikuama mamuma. Binuenda mu nshila mdi muhidie, kanuyi nunvua mei anyi, meme nendiundishe makenga enu mahite mibi yenu misangu muanda mutekete. Nentume nyama ya muitu munkatshi muenu, neyinunyenge bana benu bakese, neyishihe bimuna bienu, nuenu nenulue bantu banya-banya nshila yenu neyikale hatuhu. Bikala malu a onso kayi akudimuna mitshima yenu kundi, binuampidia, meme nennuhidie kabidi, nennukume misangu muanda mutekete bualu bua mibi yenu. Nendue ne muele wa nvita munkatshi muenu bu musombuedi wa tshihungidi tshianyi, ne hanuadisangisha mu misoko yenu, meme nentume masama makole munkatshi muenu, nennufile mu bianza bia bantu badi nʼenu lukuna. Hanakehesha bintu bienu bia kudia, bakashi dikumi nebalambe bidia mu luesu lumue, bobo nebanuhimine bintu bia kudia mu tshihimu, nuenu nenuhidie kadi kanuena nukuta. Binuahidia kunvua mei anyi bua malu a onso, binuampidia, meme nennuhidie kabidi, nengikale nʼenu tshiji nennukengeshe misangu muanda mutekete bualu bua mibi yenu. Nenudie munyinyi wa bana benu balume ne wa bana benu bakashi. Meme nenshimbule bitendelelu bienu bidi ku mutu kua mikuna, nenkose mpingu inudi nutendelela nʼai diba, nengele bitalu bienu ha mutu ha mpingu yenu, mutshima wanyi neunulengulule. Meme nembutule misoko yenu, ne bitendelelu bienu nebikale hatuhu, bintu bienu kabiena bi tua dihembu kundi. Meme nembutule buloba buenu, ne bantu badi nʼenu lukuna badi bashikamamu nebakeme bua bualu buabu. Nennumuangalashe mu bisamba bikuabo, nempatule muele wa nvita ku nyima kuenu, buloba buenu nebuikale hatuhu ne misoko yenu neyikale mihaula. Nunku buloba nebuikale ne bidimu bia kubanda, nebuikale hatuhu hanuikala mu buloba bua bantu badi n enu lukuna buloba buenu nebuikale mua kubanda. Buloba nebuikale ne bidimu bia buhafe tô bu bungi bua bidimu binuakuhidia kushiya buloba bua kubandabu hanuakashikamamu. Bungi bua bantu benu badi bashala nebikale ne mitshima mitekete mu buloba bua bantu badi nʼabo lukuna, nebanyeme hunvuabo tshiona tshia dibeshi dia mutshi didi dinyunga kudi luhehele, nebanyeme bu mundi udi unyema ku muele wa nvita, nebadishinde, mundi kayi ubihata. Nebalenduishangane, mundi kayi ubihata, bu bantu badi banyema ku muele wa nvnta, kanuena nuikala ne bukole bua kuimana ku mpala kua bantu badi nʼenu lukuna. Nuenu nenufue munkatshi mua bisamba bikuabo, ne buloba bua bantu badi nʼenu lukuna nebunumine Bantu benu badi bashala nebanyingalale ne makenga a mibi yabo mu buloba bua bantu badi nʼenu lukuna, nebanyingalale ne makenga a mibi ya batatuʼabo kabidi. Bobo nebatonde mibi yabo, nebatonde mitu ya batatuʼabo kabidi disambuka diabo dia mikenji ne kumpidia kuabo, nunku meme nakabahidia, nakabafila mu buloba bua bantu badi nʼabo lukuna. Biahuekeshabo mitshima yabo idi kayiyi mitengula, bitabushabo dikenga dia mibi yabo, nenvuluke tshihungidi tshianyi ne Yakoba ne tshihungidi tshianyi ne Isaka ne tshihungidi tshianyi ne Abalahama, nenvuluke buloba ebu. Buloba buakashiyabo nebuikale ne bidimu bia kubanda, nebuikale hatuhu; bobo nebitabushe dikenga dia mibi yabo bualu bua bobo bakahidia mei anyi, ne mitshima yabo yakalengulula mikenji yanyi. Kadi bua malu au onso hayabo mu buloba bua bantu badi nʼabo lukuna, meme tshiena mbahidia, tshiena ngikala nʼabo tshiji bua kubashiha tshiendelele ne bua kushiha tshihungidi tshianyi tshinakahunga nʼabo, bualu bua meme ndi Yehowa, Nzambi wabo, kadi bua bualu buabo nenvuluke tshihungidi tshianyi tshinakahunga ne bankambua babo banakahatula mu buloba bua Ejipitu ku mesu kua bisamba bia bantu, bua meme kuikala Nzambi wabo meme ndi Yehowa. Ebi bidi mei mafunda ne mei majalame ne mikenji biakela Yehowa hankatshi handi ne Bena Isalele mukana mua Mose mu mukuna wa Sinai. Yehowa wakambila Mose ne, Wambile Bena Isalele ne, Biasua mundi kushikisha kuditshiha kua kudifila kuandi, wewe neubale bungi bua bintu bidiye ufila kudi Yehowa. Wewe neubale bungi bua bintu kudi mundi mulume udi ne bidimu makumi abidi tô ne ku bi dimu makumi asambombo bu nshekele ya argent makumi atanu bu nshekele udibo bafila mu nsubu wa tshitendelelu. Bikaleye muana wa bakashi, neubale nshekele makumi asatu. Bikaleye muana wa balume udi ne bidimu bitanu tô ne ku bidimu makumi abidi, neubale nshekele makumi abidi, ne bikaleye muana wa bakashi, nshekele dikumi. Bikaleye muana wa balume wa ngondo umue tô ne ku bidimu bitanu, neubale nshekele itanu, ne bikaleye muana wa bakashi, nshekele isatu. Bikaleye mulume udi uhita bidimu makumi asambombo, wewe neubale nshekele dikumi ne itanu, ne bikaleye mukashi, nshekele dikumi. Bikaleye muhele kayi ne bungi bua bintu biwakamubadila, nunku nebamushikike ku mpala kua muakuidi, ne muakuidi neatuangane nʼandi mushinga, muakuidi neatuangane ne muena kuditshiha mushinga ku bungi bua bintu bidiye nʼabi. Bialueye ne nyama udibo bafila bu mulambu kudi Yehowa, bintu bionso bidibo baha Yehowa nebikale bintu bia tshijila. Kamushintakashi nansha, nyama muimpe ku nyama mubi anyi nyama mubi ku nyama muimpe, biashintakasheye nyama ku nyama mukuabo, nyama eu ne nyama wakashintakasheye handi nebikale bia tshijila. Bialueye ne nyama mubi udibo kabayi mua kudia bu mulambu kudi Yehowa, yeye neateke nyama ku mpala kua muakuidi, ne muakuidi neatuangane handi mushinga bikala nyama muimpe anyi mubi, nyama neikale wa mushinga wakadiye ne muakuidi. Biasueye kumuhikula, yeye neasakidile tshituha tshitanu ha mutu ha mushinga wandi. Biajidila mundi Yehowa nsubu wandi, muakuidi neatuangane nʼandi mushinga, bikala nsubu muimpe anyi mubi, nsubu neikale ne mushinga wakatueye ne muakuidi. Biasua muena nsubu kuhikula nsubu wandi, yeye neasakidile tshituha tshitanu tshia mushinga wa nsubu ha mutu hau, ne nsubu neikale wandi. Biajidila muntu Yehowa tshituha tshia budimi bua buhianyi buandi, wewe neutuangane nʼandi mushinga ku bungi bua bintu bidiye mukunemu, biakuneye homer wa orge, mushinga wai newikale nshekele ya argent makumi atanu. Biajidileye budimi buandi ku tshidimu tshia disanka dinene, mushinga wabu newikale bu muakatuanganabo. Kadi biajidileye budimi buandi ku nyima kua tshidimu tshia disanka dinene, muakuidi neamubadile mushinga bu bungi bua bidimu bidi bishala tô ne halua tshidimu tshia disanka dinene, nebamuhuekeshile mushinga wakasanganabo. Biasua muntu wakajidila budimi kubuhikula, yeye neasakidile tshituha tshitanu ha mutu ha mushinga wakasanganabo, ne budimi nebuikale buandi. Kadi biahidieye kuhikula budimi, anyi bikaleye muhanyishe muntu mukuabo budimi, kabena mua kubuhikula kabidi, kadi halua tshidimu tshia disanka dinene hahingashabo budimi mu bia nza bia banfumu babu, budimi ebu nebuikale bua tshijila kudi Yehowa, nebuikale mu bianza bia muakuidi. Biajidileye Yehowa budimi buakasumbeye budi kabuyi bua buhianyi buandi, muakuidi neamubadile mushinga uwakatuangana nʼandi ku tshidimu tshia disanka dinene, yeye neafue mushinga uwakatuangana handi dituku adi bu tshintu tshia tshijila kudi Yehowa. Mu tshidimu tshia disanka dinene budimi nebuhingane kudi wakabuhana, kudi muena budimi mene. Neubale mushinga wa bintu bionso bu mushinga wa nshekele wa mu nsubu wa tshitendelelu guéras makumi abidi idi nshekele umue. Muntu kena mua kujidila Yehowa muanʼa bute wa nyama, nansha muana wa ngombe nansha muana wa mukoko etshi ntshintu tshia Yehowa. Bikala nyama kayi muakane, yeye neamuhikule bu mudi mushinga webe, neasakidile tshituha tshitanu ha mutu, bikaleye kayi umuhikula, wewe neumuhane bu mudi mushinga webe. Kabena mua kuhana anyi kuhikula tshintu tshia tshijila tshiakajidilabo kudi Yehowa, nansha tshintu tshia muntu anyi tshia nyama anyi tshia budimi bua buhianyi buandi bintu ebi bidi bitambe tshijila kudi Yehowa. Kabena mua kuhikula muntu mujidile munkatshi mua bantu bua kuhishibua, nebamushihe. Tshintu tshionso tshia dikumi tshia buloba anyi tshia bintu biakakuama mu buloba anyi tshia mamuma a mitshi, etshi ntshintu tshia Yehowa, ntshintu tshia tshijila kudi Yehowa. Biasua muntu kuhikula tshituha tshia tshintu tshia dikumi, yeye neasakidile tshituha tshitanu ha mutu hatshi. Tshintu tshionso tshia dikumi tshia ngombe anyi tshia mikoko bidibo babala netshikale tshintu tshia tshijila kudi Yehowa. Yeye kena ukeba mua kutangila ne tshintu tshidi tshimpe anyi tshidi tshibi, yeye kena mua kutshishintakasha nansha, biabishintakasheye, tshintu etshi ne tshintu tshiakashintakasheye nʼatshi nebikale bia tshima, kabena mua kubihikula. Ei mmikenji yakelela Yehowa Bena Isalele mukana mua Mose mu mukuna wa Sinai. Yehowa wakambila Mose mu tshihela tshia Sinai, mu ntenta wa kusambakena, ku dituku dia kumudilu dia ngondo muibidi mu tshidimu tshibidi tshia kuluhuka kuabo mu buloba bua Ejipitu, ne, Ubale bungi bua Bena Isalele bonso, ku meku abo ne ku nsubu ya batatuʼabo, bungi bua mena a balume, muntu ne mundi, wewe ne Alona nubange kudi balume bonso ba mu Isalele bakahita bidimu makumi abidi to ne ha mutu, nubale buonso buabo ku tshisumbu ne ku tshisumbu badi bamanye mua kuya mu nvita. Nuye bienu ne muntu wa mu tshisamba muntu wa mu tshisamba, muntu yonso udi ku mutu kua nsubu wa batatuʼabo. Au mmena a balume badi mua kuimana nʼenu. Wa mu tshisamba tshia Lubena, Elisu muana mulume wa Shedeu. Wa mu tshisamba tshia Shimeona, Shelumiele muana mulume wa Sulishadai. Wa mu tshisamba tshia Yuda, Nashona muana mulume wa Aminadaba. Wa mu tshisamba tshia Yisakâ, Netanaele muana mulume wa Sua. Wa mu tshisamba tshia Zebuluna, Ehaba muana mulume wa Helona. Wa munkatshi mua bana ba Yosefe, wa mu tshisamba tshia Efelayima, Elishama muana mulume wa Amihuda. Wa mu tshisamba tshia Manashe, Gamaliele muana mulume wa Pedasû. Wa mu tshisamba tshia Benyamina, Abidana muana mulume wa Gideom. Wa mu tshisamba tshia Dana, Ahiezê muana mulume wa Amishadai. Wa mu tshisamba tshia Ashe, Pagiele muana mulume wa Okelana. Wa mu tshisamba tshia Gada, Eleyasafa muana mulume wa Deuele. Wa mu tshisamba tshia Nafatale, Ahila muana mulume wa Enana. Aba mbantu bakabikilabo ba mu tshisumbu tshia Bena Isalele, bakelenge ba bisamba bia batatuʼabo, bakadi ku mutu kua binunu bia Bena Isalele. Mose ne Alona bakangata balume aba bakabikilabo ku mena abo bakasangisha tshisumbu tshionso tshia Bena Isalele ku dituku dia kumudilu dia ngondo muibidi, bakababadila milongo ya bankambua babo ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, muntu ne muntu. Bu muakambila Yehowa Mose, wakababadila mu tshihela tshia Sinai. Bana ba Lubena, muanʼa bute wa Isalele, ku bikondo biabo, ku meku abo, ku nsubu ya batatuʼabo, bungi bua mena abo muntu ne muntu, ku bidimu makumi abidi tô ne ha mutu balume bonso bakamanya mua kuya mu nvita, bakabala ba mu tshisamba tshia Lubena binunu makami anai ne bisambombo ne nkama itanu. Bana ba Shimeona, ku bikondo biabo, ku meku abo, ku nsubu ya batatuʼabo, bungi bua mena abo muntu ne muntu, balume bonso ku bidimu makumi abidi to ne ha mutu, bakamanya mua kuya mu nvita, bakabala ba mu tshisamba tshia Shimeona binunu makumi atanu ne tshitema ne nkama isatu. Bana ba Gada ku bikondo biabo, ku meku abo, ku nsubu ya batatuʼabo, bungi bua mena abo, ku bidimu makumi abidi tô ne ha mutu, bakamanya mua kuya mu nvita; bakabala ba mu tshisamba tshia Gada binunu makumi anai ne bitanu ne nkama isambombo ne makumi atanu. Bana ba Yuda ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita; bakabala ba mu tshisamba tshia Yuda binunu makumi muanda mutekete ne binai ne nkama isambombo. Bana ba Yisakâ ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita, bakabala ba tshisamba tshia Yisakâ binunu makumi atanu ne binai ne nkama mai. Bana ba Zebuluna ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita; bakabala ba mu tshisamba tshia Zebuluna binunu makumi atanu ne muanda mutekete ne nkama mai. Bana ba Yosefe ba mu tshisamba tshia Efelayima ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita, bakabala ba mu tshisamba tshia Efelayima binunu makumi anai ne nkama itanu. Bana ba Manashe ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita, bakabala ba mu tshisamba tshia Manashe binunu makumi asatu ne bibidi ne nkama ibidi. Bana ba Benyamina ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita; bakabala ba mu tshisamba tshia Benyamina binunu makumi asatu ne bitanu ne nkama mai. Bana ba Dana ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi to ne ha mutu, bonso bakamanya mua kuya mu nvita, bakabala ba mu tshisamba tshia Dana binunu makumi asambombo ne bibidi ne nkama muanda mutekete. Bana ba Ashê ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita, bakabala ba mu tshisamba tshia Ashê binunu makumi anai ne tshimue ne nkama itanu. Bana ba Nafatale ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita, bakabala ba mu tshisamba tshia Nafatale binunu makumi atanu ne bisatu ne nkama mai. Aba mbantu bakabalabo kudi Mose ne Alona, ne kudi bakelenge ba Bena Isalele dikumi ne babidi, muntu ku nsubu wa batatuʼabo muntu ku nsubu wa batatuʼabo. Nunku bungi bua Bena Isalele buakabalabo ku nsubu ya batatuʼabo, ku bidimu makumi abidi tô ne ha mutu, bonso bakamanya mua kuya mu nvita mu Isalele bungi bua buonso buabo buakabalabo buakadi binunu nkama isambombo ne bisatu ne nkama itanu ne makumi atanu. Kadi kabakabala Bena Lewi munkatshi muabo ku tshisamba tshia batatuʼabo. Bualu bua Yehowa wakambila Mose ne, Kubadi tshisamba tshia Lewi nansha, kubadi bungi buabo munkatshi mua Bena Isalele, kadi usungule Bena Lewi bua kuenzabo mudimu mu nsubu wa tshitendelelu, ne wa bintu bionso bidimu bobo nebatuale nsubu ne bintu bionso bidimu, bobo nebabibale, nebashikame ha buihi ne nsubu wa tshitendelelu. Hayabo ne nsubu wa tshitendelelu mu nshila, Bena Lewi nebatule nsubu, ne halongololabo tshitudilu, Bena Lewi nebamushimike, bialua muenyi ha buihi nebamushihe. Bena Isalele nebadishimikile ntenta yabo, mundi ne muntu ku tshitudilu tshiandi, hehi ne dibendele diandi ku bisumbu biabo. Kadi Bena Lewi nebashimike ntenta yabo minyunguluke nsubu wa tshitendelelu, bua mulau kaukuatshi Bena Isalele Bena Lewi nebabale nsubu wa tshitendelelu. Bena Isalele bakenza nunku, bakenza malu onso akambila Yehowa Mose. Yehowa wakambila Mose ne Alona ne, Muntu ne muntu wa munkatshi mua Bena Isalele nenshimike ntenta wandi hehi ne dibendele diandi, didi ne bimanyinu bia nsubu ya batatuʼabo bifundahu, nebashimike ntenta yabo minyunguluke tshitendelelu mitangile ku tshitendelelu. Bantu badi ne bimanyinu bia dibendele dia tshisamba tshia Yuda ku tshisumbu ne ku tshisumbu nebashikame ku luseke lua ku esete kudi diba dihatuka. Nashona muana mulume wa Aminadaba neikale mukelenge wa bana ba Yuda. Bantu bandi bakamubadilabo bakadi binunu makumi muanda mutekete ne binai ne nkama isambombo. Bantu ba mu tshisamba tshia Yisakâ nebashikame hehi nʼandi. Netanele muana mulume wa Sua neikale mukelenge wa bana ba Yisakâ. Bantu bandi bakamubadilabo bakadi binunu makumi atanu ne binai ne nkama mai. Tshisamba tshia Zebuluna, Eliaba muana mulume wa Helona neikale mukelenge wa bana ba Zebuluna. Bantu bandi bakamubadilabo bakadi binunu makumi atanu ne muanda mutekete ne nkama mai. Bantu bonso bakabalabo ba mu tshitudilu tshia Yuda bakadi binunu lukama ne makumi muanda mukulu ne bisambombo ne nkama mai ku bisumbu biabo Bobo nebaye ku mpala. Nebateke dibendele dia tshitudilu tshia Lubena ku luseke lua ku sude. Elisu muana mulume wa Shedeu neikale mukelenge wa bana ba Lubena. Bantu bandi bakamubadilabo bakadi binunu makumi anai ne bisambombo ne nkama itanu. Bantu ba mu tshisamba tshia Shimeona nebashikame hehi nʼandi Shelumiele muana mulume wa Sulishadai neikale mukelenge wa bana ba Shimeona. Bantu bandi bakamubadilabo bakadi binunu makumi atanu ne tshitema ne nkama isatu. Tshisamba tshia Gada, Eleyasafa muana mulume wa Luele neikale mukelenge wa bana ba Gada. Bantu bandi bakamubadilabo bakadi binunu makumi anai ne bitanu ne nkama isambombo ne makumi atanu. Bantu bonso bakabalabo ba mu tshitudilu tshia Lubena bakadi binunu lukama ne makumi atanu ne tshimue ne nkama mai ne makumi atanu Bobo nebatonde ku nyima, tshisumbu tshibidi. Nunku nebaye ne ntenta wa kusambakena ne tshisumbu tshia Bena Lewi tshikala munkatshi mua bisumbu bikuabo bu mudibo bashikama mu bitudilu, nebaye ku mpala nunku, muntu mu muaba wandi mundi mu muaba wandi ku mabendele abo. Nebateke dibendele dia tshitudilu tshia Efelayima ku luseke lua ku wesete ku bisumbu biabo Elishama muana mulume wa Amihuda neikale mukelenge wa bana ba Efelayima Bantu bandi bakamubadilabo bakadi binunu makumi anai ne nkama itanu. Bantu ba mu tshisamba tshia Manashe nebashikame hehi nʼandi. Gamaliele muana mulume wa Pedasu neikale mukelenge wa bana ba Manashe. Bantu bakamubadilabo bakadi binunu makumi asatu ne bibidi ne nkama ibidi. Tshisamba tshia Benyamina Abidana muana mulume wa Gideoni neikale mukelenge wa bana ba Benyamina. Bantu bandi bakamubadilabo bakadi binunu makumi asatu ne bitanu ne nkama mai. Bantu bonso bakabalabo ba mu tshitudilu tshia Efelayima bakadi binunu lukama ne muanda mukulu ne lukama lumue ku bisumbu biabo. Bobo nebabalonde ku nyima, tshisumbu tshisatu. Nebateke dibendele dia tshitudilu tshia Dana ku luseke lua ku nôde. Ahiezê muana mulume wa Amishadai neikale mukelenge wa bana ba Dana. Bantu bandi bakamubadilabo bakadi binunu makumi asambombo ne bibidi ne nkama muanda mutekete. Bantu ba mu tshisamba tshia Ashe nebashikame hehi nʼandi Pagiele muana mulume wa Okelana neikale mukelenge wa bana ba Ashe. Bantu bandi bakamubadilabo bakadi binunu makumi anai ne tshimue ne nkama itanu. Tshisamba tshia Nafatale Ahila muana mulume wa Enana neikale mukelenge wa bana ba Nafatale. Bantu bandi bakamubadilabo bakadi binunu makumi atanu ne bisatu ne nkama mai. Bantu bonso bakabalabo ba mu tshitudilu tshia Dana bakadi binunu lukama ne makumi atanu ne muanda mutekete ne nkama isambombo. Bobo nebalonde ku nyima kua bonso ku mabendele abo. Aba mbantu bakabalabo ba Bena Isalele ku nsubu ya batatu abo, bungi bua bantu bakabalabo ba mu bitudilu biabo ku bisumbu biabo buakadi binunu nkama isambombo ne bisatu ne nkama itanu ne makumi atanu. Kadi kabakabala Bena Lewi munkatshi mua Bena Isalele, bu muakambila Yehowa Mose. Bena Isalele bakenza nunku, mu malu onso akambila Yehowa Mose, nunku bakashikama ku mabendele abo, ne bakaya ku mpala ku meku abo ne ku nsubu ya batatuʼabo. Ebi mbikondo bia Alona ne Mose mu dituku diakasomba Yehowa ne Mose mu mukuna wa Sinai. Au mmena a bana ba balume ba Alona Nadaba muanʼa bute ne Abihu ne Eleazâ ne Itamâ. Au mmena a bana ba balume ba Alona bakuidi bakadi ne manyi mela ha mitu, bakajidilabo bua kuenza mudimu wa buakuidi. Nadaba ne Abihu bakafua ku mpala kua Yehowa, hakaluabo ne kahia kakadi kakayi kajidila ku mpala kua Yehowa, mu tshihela tshia Sinai, bobo kabakadi ne bana, ne Eleazâ ne Itamâ bakenza mudimu wa buakuidi ku mesu kua Alona tatuʼabo. Yehowa wakambila Mose ne, Ulue biebe ne tshisamba tshia Lewi, ubateke ku mpala kua Alona muakuidi, bua bobo bamuenzele mudimu. Bobo nebalame bintu biandi ne bintu bia bantu bonso ku mpala kua ntenta wa kusambakena, bua kuenzelabo mudimu wa mu nsubu wa tshitendelelu. Bobo nebalame bintu bia mu nsubu wa tshitendelelu, ne bintu bia Bena Isalele, bua kuenzelabo mudimu wa mu ntenta wa kusambakena. Wewe neufue Bena Lewi kudi Alona ne kudi bana bandi balume bobo badi bafidibue kudi Alona, bua kukuatshishabo Bena Isalele. Wewe neusungule Alona ne bana bandi balume, ne bobo nebashale ne mudimu wa buakuidi, bialua muenyi ha buihi nebamushihe. Yehowa wakambila Mose ne, Mona, meme nakudiangatshila Bena Lewi munkatshi mua Bena Isalele mu miaba ya banʼa bute bonso bakalelabo munkatshi mua Bena Isalele, Bena Lewi nebikale banyi: bualu bua banʼa bute bonso mbanyi, mu dituku dinakashiha banʼa bute bonso mu buloba bua Ejipitu, nakadijidila banʼa bute bonso ba mu Isalele, ne ba bantu ne ba nyama, bobo mbanyi, meme ndi Yehowa. Yehowa wakambila Mose mu tshihela tshia Sinai ne, Ubale bana ba Lewi ku nsubu ya batatuʼabo ne ku meku abo ubale bana ba balume bonso ba mu ngondo umue tô ne ha mutu. Mose wakababala bu mu dî dia Yehowa. Aba mbana ba balume ba Lewi ku mena abo Gêshona ne Kohata ne Melali. Au mmena a bana ba balume ba Gêshona ku meku abo Libini ne Shimei. Bana ba balume ba Kohata ku meku abo Amalama ne Yisehâ ne Hebelone ne Uziele Bana ba balume ba Melali ku meku abo Mali ne Mushi. Au mmeku a Bena Lewi ku nsubu ya batatuʼabo. Mu Gêshona muakadi diku dia Bena Libini ne diku dia Bena Shimei, au mmeku a bena Gêshona. Bantu bakabalabo, bana balume ba mu ngondo umue tô ne ha mutu, bakadi binunu muanda mutekete ne nkama itanu. Meku a Bena Gêshona nebashikame ku nyima kua nsubu wa tshitendelelu ku wesete. Eleyasafa muana mulume wa Laele neikale mukelenge wa nsubu wa batatu ba Bena Gêshona. Bintu bia mu nsubu wa tshitendelelu bidi bana balume ba Gêshona balama nebikale ntenta, ne tshilulu tshidibo bateka ha mutu, ne bilulu bia ku bibi bia ntenta wa kusambakena, ne bilulu bia luhangu ne bilulu bidibo bateka ku mbelu kua luhangu, hehi ne nsubu wa tshitendelelu, ne hehi ne tshioshelu, ne nshinga ya ku luhangu bua mudimu wa tshitendelelu. Mu Kohata muakadi diku dia Bena Amalama ne dia Bena Yisehâ ne dia Bena Hebelone ne dia Bena Uziele au mmeku a Bena Kohata. Bungi bua bana ba balume ba mu ngondo umue tô ne ha mutu buakadi binunu muanda mukulu ne nkama isambombo, bakadi balama bintu bia nsubu wa tshitendelelu. Bantu ba mu meku a bana balume ba Kohata nebashikame ku luseke lua ku sude. Elisafana muana wa balume wa Uziele neikale mukelenge wa nsubu wa batatu ba Bena Kohata. Bobo nebalame mushete wa Nzambi ne mesa ne minda ne bioshelu ne malonga adibo benza nʼau mudimu mu nsubu wa tshitendelelu, ne tshilulu tshidibo bateka ku mpala kua muaba wa tshijila. Eleazâ muana mulume wa Alona, muakuidi, neikale ku mutu kua bakelenge ba Bena Lewi, ne ku mutu kua bantu badi balama bintu bia mu nsubu wa tshitendelelu. Mu Melali muakadi diku dia Bena Mali ne dia Bena Mushi au mmeku a Melali. Bungi bua balume ba mu ngondo umue tô ne ha mutu buakadi binunu bisambombo ne nkama ibidi. Suliele, muana mulume wa Abihayila, neikale mukelenge wa nsubu wa batatu ba meku a Melali bobo nebashikame ku luseke lua nsubu wa tshitendelelu lua ku nôde. Bintu bidi bana balume ba Melali balama bidi mabaya a nsubu wa tshitendelelu, ne mitshi ne makunshi ne nkanu ne bintu biabi bionso; ne makunshi a ku luhangu ne nkanu yai ne mitanda yai ne nshinga yai. Mose ne Alona ne bana bandi balume nebashikame ku mpala kua ntenta wa kusambakena ku luseke lua ku esete kudi diba dihatuka, bua kulama nsubu wa tshitendelelu ne bintu bia Bena Isalele; bialua muenyi ha buihi nebamushihe. Bungi bua Bena Lewi bakabalabo kudi Mose ne Alona bu muakambila Yehowa, ku meku abo, balume bonso ba mu ngondo umue tô ne ha mutu, buakadi binunu makumi abidi ne bibidi. Yehowa wakambila Mose ne, Ubale banʼa bute balume bonso ba Bena Isalele ba mu ngondo umue to ne ha mutu, funda bungi bua mena abo. Wewe newangatshile Bena Lewi (meme ndi Yehowa) mu miaba ya banʼa bute ba munkatshi mua Bena Isalele, ne bimuna bia Bena Lewi mu miaba ya banʼa bute ba bimuna bia Bena Isalele. Mose wakabala banʼa bute bonso ba munkatshi mua Bena Isalele, bu muakamuambila Yehowa. Bungi bua banʼa bute balume ba mu ngondo umue tô ne ha mutu buakabalabo buakadi binunu makumi abidi ne bibidi ne nkama ibidi ne makumi muanda mutekete ne basatu. Yehowa wakambila Mose ne, Angata Bena Lewi mu miaba ya banʼa bute ba munkatshi mua Bena Isalele, ne bimuna bia Bena Lewi mu miaba ya bimuna biabo, Bena Lewi nebikale banyi meme ndi Yehowa Bua kuhikula banʼa bute ba Bena Isalele, nkama ibidi ne makumi muanda mutekete ne basatu, badi bahita balume ba Bena Lewi bungi, newangate nshekele itanu ku muntu ne ku muntu bu nshekele wa mu nsubu wa Nzambi (nshekele udi bu guéras makumi abidi): wewe neufue nshekele ya bungi buabo buakahikulabo, kudi Alona ne kudi bana bandi balume. Mose wakangata argent ya buhikudi bua bantu bakahita Bena Lewi bungi; yeye wakangata nshekele kudi banʼa bute ba Bena Isalele bu tshinunu tshimue ne nkama isatu ne makumi asambombo ne itanu, bu nshekele udibo bafile mu nsubu wa tshitendelelu. Mose wakafua argent ya buhikudi buabo kudi Alona ne bana bandi balume bu muakadi dî dia Yehowa, bu muakambila Yehowa Mose. Yehowa wakambila Mose ne Alona ne, Balai bungi bua bana balume ba Kohata ba munkatshi mua bana balume ba Lewi ku meku abo ne ku nsubu ya batatuʼabo, mu bidimu makumi asatu to ne ku bidimu makumi atanu buonso buabo badi bakuata mudimu wa mu ntenta wa kusambakena. Eu udi mudimu wa bana balume ba Kohata udibo benza ne bintu bia tshijila mu ntenta wa kusambakena, hayabo ku luendu Alona neabuelemu ne bana bandi balume nebatuhe tshilulu tshikudika, nebabituale hatshi mushete wa Nzambi, nebâteke tshibuikilu tshia biseba bia nkonge ha mutu hatshi, nebâteke tshilulu tshifike ha mutu hatshi kabidi, nebabueshemu mitshi ya mushete. Nebateke tshilulu tshia bleu ha mutu ha mesa a mampa, nebâteke ha mutu hatshi malonga ne nkutu ne mpanza ne makoho adibo balongolola nʼau, ne mampa neikalehu, nebatekehu tshilulu tshikunze, nebâteke tshibuikidi tshia biseba bia nkonge ha mutu hatshi, nebabueshemu mitshi ya mesa. Nebangate tshilulu tshia bleu, nebabuikile hatshi bitekelu bia minda ne minda, ne bintu bidibo bajima habi minda, ne tuhanza tua mishila ya kahia, ne bihanza bia manyi adibo bakuatshisha nʼau minda nebateke minda ne malonga ne bintu ebi bionso mu tshibuikidi tshia biseba bia nkonge, nebabiteke ha mitshi ibidi idi mikuatakasha. Nebateke tshilulu tshia bleu ha mutu ha tshioshelu tshia or, nebâteke ha mutu hatshi tshibuikidi tshia biseba bia nkonge, nebabueshemu mitshi ya tshioshelu nebangate malonga onso adibo benza nʼau mudimu wa mu nsubu wa tshitendelelu nebâteke mu tshilulu tshia bleu, nebâbuikde ne tshibuikidi tshia biseba bia nkonge, nebâteke ha mitshi ibidi idi mikuatakasha Nebumushe butue ku tshioshelu, nebatekehu tshilulu tshikunzubile nebâteke ha mutu hatshi bintu bionso bidibo benza nʼabi mudimu watshi ne malonga a kahia ne nkobo ya munyinyi, ne nkasu, ne bihanza ne malonga onso a tshioshelu, nebâteke tshibuikilu tshia biseba bia nkonge, nebabueshemu mitshi yatshi. Kushikisha Alona ne bana bandi balume kubuikila nsubu wa tshitendelelu ne bintu bionso bia mu nsubu, hayabo mu nshila, hashishe bana balume ba Kohata nebalue bua kubituala, kadi bobo kabalengi bintu bia tshijila bianza, bua kabafu. Bintu ebi mmajitu a bana balume ba Kohata mu nsubu wa tshitendelelu. Bintu bidi nʼabi Eleazâ, muana mulume wa Alona, muakuidi, nebikale manyi a minda ne musenga wa manananshi, ne mulambu wa bukula, ne manyi adibo bela ha mutuyeye udi mulami wa nsubu wa tshitendelelu ne bintu bionso bidimu, ne wa muaba wa tshijila ne bintu bionso bidimu. Yehowa wakambila Mose ne Alona ne, Kanumushi tshisamba tshia meku a Bena Kohata munkatshi mua Bena Lewi, nubenzele nunku, bua bikale ne muoyo, kabafu, haluabo ha buihi ne bintu bia tshijila Alona ne bana bandi balume nebabuelemu, nebaleshe muntu ne muntu mudimu wandi ne bujitu buandi, kababuedi bua kutangila bintu bia tshijila nansha kakese, bua kabafu. Yehowa wakambila Mose ne, Ubale bungi bua bana balume ba Gêshona kabidi ku nsubu ya batatuʼabo ne ku meku abo; ba bidimu makumi asatu tô ne ku bidimu makumi atanu wewe neubabale, buonso buabo badi bakuata mudimu mu ntenta wa kusambakena. Eu mmudimu wa meku a Bena Gêshona udibo benza ne majitu adibo batuala nebabidie bilulu bidi binyunguluka nsubu wa tshitendelu, ne ntenta mene wa kusambakena, ne tshilulu tshia ha mutu, ne tshibuikidi tshia biseba bia nkonge tshidi ha mutu hatshi, ne tshilulu tshidi ku mbelu kua nsubu, ne bilulu bia ku luhangu, ne tshilulu tshidi ku tshibi tshia luhangu tshidi hehi ne nsubu wa tshitendelelu tshidi tshinyunguluka tshioshelu tshia kahia, ne nshinga ya ku luhangu, ne bintu bionso bidibo benza nʼabi mudimu, bobo nebenze mudimu eu. Bu mu dî dia Alona ne bana bandi balume Bena Gêshona nebenze mudimu wabo, nebatuale majitu abo; nuenu nenubaleshe majitu abo. Eu udi mudimu wa meku a bana balume ba Bena Gêshona mu ntenta wa kusambakena ne bintu bidibo nʼabi bualu nebikale mu tshianza tshia Itamâ, muana mulume wa Alona muakuidi. Wewe neubale bana balume ba Bena Melali ku meku abo ne ku nsubu ya batatuʼabo, ba bidimu makumi asatu tô ne ku bidimu makumi atanu, wewe neubabale, muntu yonso udi akuata mudimu mu ntenta wa kusambakena. Ebi mbintu bidibo ne bualu bua kutuala, mu mudimu udibo benza mu ntenta wa kusambakena mabaya a nsubu ne mitshi yandi ne makunshi andi ne nkanu yandi, ne makunshi a ku luhangu ne nkanu yau ne milonda yau ne nshinga yau ne bintu biau bionso bidibo benza nʼabi mudimuku mena abi wewe neubaleshe bintu bia majitu abo. Eu udi mudimu wa meku a bana balume ba Melali, udibo benza mu ntenta wa kusambakena, ku tshianza tshia Itamâ, muana mulume wa Alona muakuidi. Mose ne Alona ne bakelenge ba mu tshisumbu tshia Bena Isalele bakabala bana balume ba Bena Kohata ku meku abo ne ku nsubu ya batatuʼabo, ba bidimu makumi asatu to ne ku makumi atanu, muntu yonso wakadi ubuela mu mudimu wa mu ntenta wa kusambakena bakabalabo ku meku abo bakadi binunu bibidi ne nkama muanda mutekete ne makumi atanu. Aba mbantu bakabalabo mu meku a Bena Kohata bakadi benza mudimu mu ntenta wa kusambakena, bakababala kudi Mose ne Alona, bu muakambila Yehowa Mose. Bungi bua bana balume ba Gêshona bakabalabo ku meku abo ne ku nsubu ya batatuʼabo, ba mu bidimu makumi asatu tô ne ku bidimu makumi atanu, buonso buabo bakadi benza mudimu mu ntenta wa kusambakena, bakabalabo ku meku abo ne ku nsubu ya batatuʼabo bakadi binunu bibidi ne nkama isambombo ne makumi asatu. Aba mbana balume ba Gêshona bakabalabo ku meku abo, buonso buabo bakenza mudimu mu ntenta wa kusambakena, bakabalabo kudi Mose ne Alona bu muakamba Yehowa. Bana balume ba Melali bakabalabo ku meku abo ne ku nsubu ya batatuʼabo, ba bidimu makumi asatu to ne ku bidimu makumi atanu, buonso buabo bakadi benza mudimu mu ntenta wa kusambakena, bakabalabo ku meku abo bakadi binunu bisatu ne nkama ibidi. Aba mbana balume ba Melali bakabalabo ku meku abo, bakabalabo kudi Mose ne Alona bu muakambila Yehowa Mose. Bungi bua Bena Lewi bakabalabo kudi Mose ne Alona ne kudi bakelenge ba mu Isalele, ku meku abo ne ku nsubu ya batatuʼabo, ba bidimu makumi asatu tô ne ku bidimu makumi atanu, buonso buabo bakadi benza mudimu ne bakadi batuala majitu a ntenta wa kusambakena, bakabalabo bakadi binunu muanda mukulu ne nkama itanu ne makumi muanda mukulu. Bu muakadi dî dia Yehowa bakabalabo kudi Mose, muntu yonso ku mudimu wandi ne ku bujitu buandi, bakabalabo kudiye bu muakambila Yehowa Mose. Yehowa wakambila Mose ne, Wele dî kudi Bena Isalele bua bobo bihate bena nsudi mu tshitudilu, ne muntu yonso udi ne mputa wa luhangu ne muntu yonso udi munyanguke ku dilenga dia muntu mufue nebihate nansha mulume nansha mukashi ku tshitudilu, kabanyangi tshitudilu tshiabo, mundi mushikame. Bena Isalele bakenza nunku, bakabihata mu tshitudilu, bu muakambila Yehowa Mose, Bena Isalele bakenza nunku. Yehowa wakambila Mose ne, Wambile Bena Isalele ne, Henza mulumi anyi mukashi bualu bubi budi bantu benza, udi ushiha mukenji wa Yehowa, ne badi bahisha muntu au, nunku yeye neatonde bubi buakenzeye, neahingishe bintu bionso biakangateye, neasangishe tshintu tshia tshitanu ha mutu habi, neabihingishe kudi nfumu wabi wakenzeye bubi. Bikala muntu kayi ne muanʼabo wa kumuhingishila bintu bia bubi buandi, bintu bidiye uhingisha bia kudilengesha nʼabi munda kudi Yehowa nebikale bintu bia muakuidi, ha mutu ha mulambu wa tshimpanga udiye ufila bua kudibuikila nʼau bubi buandi. Bintu bionso bia tshijila bia Bena Isalele bidibo banyukula, bidibo bafila kudi muakuidi, nebikale biandi. Bintu bionso bia tshijila bia muntu ne muntu nebikale biandi, ne bintu bionso bidi muntu uha muakuidi nebikale biandi. Yehowa wakambila Mose ne, Wambile Bena Isalele ne, Bikala mukashi wa muntu usesuka, bikaleye umuenzela bibi, bikala mulume mukuabo ulala nʼandi, bikala bualu ebu busokoma ku mesu kua mulume wandi, kabuyi bumanyibue, bikala mukashi muonyibue ne kakuyi mumonyi wa bualu, kabayi bamukuata hakadiye wenda nʼandi, ne bikala mukau mumukuate bualu bua mukashi wandi udi muonyibue anyi bikala mukau umukuata bualu bua mukashi wandi udi kayi muonyibue, hashishe mulume alue biandi ne mukashi wandi kudi muakuidi, nealue ne mulambu wandi, tshituha tshia dikumi tshia tshihiminu tshia bukula bua orge, kedihu nansha manyi, katekihu nansha musenga wa manananshi, bualu bua eu udi mulambu wa mukau, mulambu wa bukula wa tshivulukidi, bua kuvuluishangana bualu bubi. Muakuidi nealue nʼandi ha buihi, neamuteke ku mpala kua Yehowa ne muakuidi neangate mai a tshijila mu tshivuadi tshia dima, neangate dinfuenkenya dia buloba didi hanshi mu ntenta wa kusambakena, neadiele mu mai. Muakuidi neashikike mukashi ku mpala kua Yehowa, neasulule nsuki ya mukashi, neateke mulambu wa bukula wa tshivulukidi mu bianza biandi, eu udi mulambu wa mukau, muakuidi neangate mai a bululu adi elesha mulau mu tshianza tshiandi. Muakuidi neamutshihishe, neambile mukashi ne, Bikala mulume kayi mulale nʼebe, ne wewe kuyi musesuke mu malu mabi kudi mundi udi kayi mulume webe, wewe wikale mubingishibue kudi mai a bululu adi elesha mulau. Kadi biwikala musesuke kudi mundi udi kayi mulume webe, ne biwikala muonyibue ne bikala mundi udi kayi mulume webe mulale nʼebe, (nunku muakuidi neatshihishe mukashi kuditshiha kua mulau) muakuidi neambile mukashi ne, Yehowa akuenzeshe mulau ne kuditshiha munkatshi mua bana benu, haboleshe Yehowa tshibelu tshiebe, ne hatuntumusheye mubidi, ne mai au adi elesha mulau neabuele mu mala ebe, neatuntumushe mubidi webe, neaboleshe tshibelu tshiebe Ne mukashi neitabe ne, Amen, Amen. Muakuidi neatonde milau ei mu mukanda, neanumushe mu mai a bululu, neamushe mukashi mai a bululu adi elesha mulau, ne mai adi elesha mulau neabuele munda muandi, neikale mai a bululu. Muakuidi neangate bukula bua mulambu wa mukau ku bianza bia mukashi, neanyukule mulambu wa bukula ku mpala kua Yehowa, nealue nʼau ku tshioshelu, ne muakuidi neambule dianza tente ne bukula, bu tshivulukidi tshiau, neabuoshele ha tshioshelu, ne ku nyima yeye neamushe mukashi mai. Hakamunuisheye mai, hashishe Bikala mukashi muonyibue, bikaleye muenzele mulume wandi bualu bubi, mai adi elesha mulau neabuele munda muandi, neikale a bululu, ne mubidi wandi neutuntumuke, ne tshibelu tshiandi netshibole ne mukashi neikale ne mulau munkatshi mua bana babo. Bikala mukashi kayi muonyibue, kadi yeye udi muakane, nunku yeye neikale mubingishibue, nealele bana. Eu udi mukenji wa mukau hasesuka mukashi bua kulala ne mundi udi kayi mulume wandi ne yeye udi muonyibue, anyi hakuata mulume mukau bualu bua mukashi wandi, nunku yeye neashikike mukashi ku mpala kua Yehowa, hashishe muakuidi neashikishe mukenji eu wonso kudi mukashi. Mulume neikale mubingishibue ku bubi, ne mukashi eu neadituadile bubi buandi. Yehowa wakambila Mose ne, Wambile Bena Isalele ne, Biatshiha nansha mulume nansha mukashi kuditshiha kua Munazi bua kudijidila kudi Yehowa, neajile muoyo ne maluvu makole kanu vinaigre wa nvinyo anyi vinaigre wa maluvu makole, kanu mai a tumuma tukese, kadi tumuma tubishe anyi tumuma tûme. Mu matuku onso a tshijila tshiandi kadi tshindi tshiakenzabo ne mitshi ya tumuma ku ntete ya tumuma tô ne ku bihusu biatu. Mu matuku onso a tshijila tshiandi kabateki dihaya ha mutu nʼandi, neikale mundi wa tshijila tô ne hashikisheye matuku adiye musue kubijidila kudi Yehowa; nsuki ya ha mutu nʼandi neyikale mile. Mu matuku onso adiye mudijidile kudi Yehowa yeye kena mumanye mua kulua ha buihi ne mundi mufue. Kena mumanye mua kudiona bualu bua tatuʼandi anyi bua mamuʼandi anyi bua muanʼabo mulume anyi bua muanʼabo mukashi hafuabo, bualu bua tshijila tshiandi kudi Yehowa tshidi ha mutu nʼandi. Yeye udi mujidile kudi Yehowa matuku onso a tshijila tshiandi. Bikala muntu mukusuke tshituha tshibi hehi nʼandi, ne bikala mutu wa tshijila tshiandi muonyibue, nunku yeye neabeye nsuki ya ha mutu nʼandi mu dituku didiye mudilengeshe, neadibeye nsuki dituku dia muanda mutekete. Halua dî diku dia muanda mukulu nealue biandi ne nyunyu ya nkutshi ibidi anyi mputu nyunyu ibidi kudi muakuidi ku mbelu kua ntenta wa kusambakena muakuidi neafile umue bu mulambu wa kubuikila nʼau bubi ne mukuabo bu mulambu wa kuosha ha kahia, neamubuikidile bubi buandi buakenzeye bua muntu mufue, neajidile mutu wandi dituku adi mene. Yeye neujidile Yehowa matuku a tshijila tshiandi, nealue biandi ne muana mulume wa mukoko wa tshidimu tshimue bu mulambu wa kubuikila nʼau bihanga diandi, kadi matuku a diambedi adi hatuhu bualu bua tshijila tshiandi tshiakadi tshionyibue. Eu udi mukenji wa Munazi hashikisheye matuku a tshijila tshiandi nebalue nʼandi ku mbelu kua ntenta wa kusambakena: neafile mulambu wandi kudi Yehowa, muana mulume wa mukoko udi kayi ne tshilema wa tshidimu tshimue bu mulambu wa kuosha ha kahia, ne muana mukashi wa mukoko udi muakane wa tshidimu tshimue bu mulambu wa kubuikila hau bubi, ne tshimpanga tshidi tshiakane bu mulambu wa kuvuisha nʼau ditalala, ne tshisaka tente ne mampa adi kayi ne luevene, ne mikata yakenzabo ne bukula bubotesha ne manyi, ne mikata idi kayiyi ne luevene ne manyi mela ha mutu hai, ne mulambu wa bukula ne mulambu wa bintu bia kunua. Muakuidi neabifile kudi Yehowa, neafile mulambu wandi wa kubuikila nʼau bubi ne mulambu wandi wa kuosha ha kahia neafile tshimpanga bu mulambu wa kuvuisha nʼau ditalala kudi Yehowa ne tshisaka tshia mampa adi kâyi ne luevene, muakuidi neafile kabidi mulambu wa bukula ne mulambu wa bintu bia kunua. Munazi neabeye nsuki ya ha mutu ku mbelu kua ntenta wa kusambakena neangate nsuki, neayiteke ha kahia kadi kuinshi kua mulambu wa kuvuisha nʼau ditalala. Muakuidi neangate diboko dia tshimpanga diakalambabo, ne mutanda wa mampa adi kâyi ne luevene mu tshisaka, ne mukata udi kauyi ne luevene, neabiteke mu bianza bia Munazi hashikisheye kubeya mutu wandi, muakuidi neabinyukule bu mulambu udibo banyukula ku mpala kua Yehowa, ebi mbintu bia tshijila kudi muakuidi bidi bisangisha ne tshiadi ne tshibelu bidibo banyukula ku mpala kua Yehowa, hashika bualu ebu, Munazi udi mumanye mua kunua nvinyo. Eu udi mukenji wa Munazi udi uditshiha, ne mulambu wa tshijila tshiandi kudi Yehowa, ha mutu ha bintu bidiye mumanye mua kufila bu kuditshiha kuakaditshiheye nʼaku mbudiye nʼabu mbua kuenza bu mudi mukenji wa tshijila tshiandi. Yehowa wakambila Mose ne, Wambile Alona ne bana bandi balume ne, Nenuvudishile Bena Isalele disanka nunku, nenubambile ne, Yehowa anusankishe, anulame. Yehowa atemeshe mpala wandi kunudi, anufuile luse. Yehowa abandishe mesu andi kunudi, anuhe ditalala. Hashishe nebâteke dina dianyi ha Bena Isalele, meme nembavudishile disanka. Hakalua dituku diakashikisha Mose kushimika nsubu wa tshitendelelu, ne hakeleye manyi ha mutu hatshi, wakatshijidila, ne bintu bionso biakadimu ne tshioshelu ne malonga atshi onso, ne hakeleye manyi ha mutu habi, wakabijidila. Bakelenge ba mu Isalele, bakadi ku mutu kua nsubu ya batatuʼabo, bakafua bintu. Aba mbakelenge ba bisamba, bakadi ku mutu kua bantu bakabalabo bakatua ne bintu biabo ku mpala kua Yehowa makalu manene asambombo ne ngombe dikumi ne ibidi dikalu dimue kudi bakelenge babidi, ne ngombe umue kudi muntu ne mundi, bakalua nʼabi ku mpala kua nsubu wa tshitendelelu. Yehowa wakambila Mose ne, Angata bintu biabo bua kuenza nʼabi mudimu wa ntenta wa kusambakena, ubifile kudi Bena Lewi mundi ne muntu ku mudimu wandi. Mose Wakangata makalu ne ngombe, wakabifila kudi Bena Lewi. Wakaha bana balume ba Gêshona makalu abidi ne ngombe mai, bu muakadi mudimu wabo wakaha bana balume ba Melali makalu anai ne ngombe muanda mukulu bu muakadi mudimu wabo wakenzabo, ku tshianza tshia Itamâ, muana mulume wa Alona muakuidi. Kadi yeye bakaha bana balume ba Kohata tshintu, bualu bua bobo bakadi ne mudimu ne bintu bia mu nsubu wa tshitendelelu, bakabituala ha maha abo. Bakelenge bakafua bintu bia kujidila nʼabi tshioshelu mu dituku diakelabo manyi ha mutu hatshi, mbakelenge mene bakafua bintu biabo ku mpala kua tshioshelu. Yehowa wakambila Mose ne, Buonso buabo nebafile bintu biabo, mukelenge dituku, mukelenge dituku, bua kujidila tshioshelu. Nashona, muana mulume wa Aminadaba wa tshisamba tshia Yuda, wakafua bintu biandi dituku dia kumudilu. Bintu biakafileye biakadi dilonga disalame dia tshiamu tshia argent, bujitu buadi buakadi nshekele lukama ne makumi asatu, ne dilonga dia ndondo dia argent wa nshekele makumi muanda mutekete, bu nshekele wa mu nsubu wa tshitendelelu, bubidi buabi biule tente ne bukula bubotesha busangisha ne manyi bu mulambu wa bukula, ne nkutu wa or wa nshekele dikumi, mule tente ne musenga wa manananshi, ne muana mulume wa ngombe ne tshimpanga tshimue ne muana mulume wa mukoko wa tshidimu tshimue bu mulambu wa kuosha ha kahia, ne mbushi wa mpumbu bu mulambu wa kubuikila nʼau bubi, ne ngombe ibidi ne bimpanga bitanu, ne mbushi ya mpumbu itanu ne bana balume ba mikoko batanu ba tshidimu tshimue bu mulambu wa kumusha nʼau ditalala eu udi mulambu wa Nashona, muana mulume wa Aminadaba. Netanele, muana mulume wa Sua, mukelenge wa Yisakâ, wakaula bintu biandi dituku dibidi. Wa kafila bu mulambu wandi dilonga disalame dia tshiamu tshia argent, bujitu buadi buakadi nshekele lukama ne makumi asatu, ne dilonga dia ndondo dia argent wa nshekele makumi muanda mutekete bu nshekele wa mu nsubu wa tshitendelelu, bubidi buabi biule tente ne bukula bubotesha busangisha ne manyi bu mulambu wa bukula, ne nkutu wa or wa nshekele dikumi mule tente ne musenga wa manananshi, ne muana mulume wa ngombe ne tshimpanga tshimue ne muana mulume wa mukoko wa tshidimu tshimue bu mulambu wa kuosha ha kahia, ne mbushi wa mpumbu bu mulambu wa kubuikila nʼau bubi ne ngombe ibidi ne bimpanga bitanu ne mbushi ya mpumbu itanu ne bana balume ba mikoko batanu ba tshidimu tshimue bu mulambu wa kuvuisha nʼau ditalala eu udi mulambu wa Netanele, muana mulume wa Sua. Ehaba, muana mulume wa Helona, mukelenge wa bana ba Zebuluna, wakafua bintu dituku disatu. Mulambu wandi wakadi dilonga disalame dia tshiamu tshia argent, bujitu buadi buakadi nshekele lukama ne makumi asatu, ne dilonga dia ndondo dia argent dia nshekele makumi muanda mutekete bu nshekele wa mu nsubu wa tshitendelelu, bubidi buabi biule tente ne bukula bubotesha busangisha ne manyi bu mulambu wa bukula, ne nkutu wa or wa nshekele dikumi mûle tente ne musenga wa manananshi, ne muana mulume wa ngombe ne tshimpanga tshimue ne muana mulume wa mukoko wa tshidimu tshimue bu mulambu wa kuosha ha kahia, ne mbushi wa mpumbu bu mulambu wa kubuikila nʼau bubi, ne ngombe ibidi ne bimpanga bitanu ne mbushi ya mpumbu itanu ne bana balume ba mikoko batanu ba tshidimu tshimue bu mulambu wa kuvuisha nʼau ditalala eu udi mulambu wa Ehaba, muana mulume wa Helona. Elisû muana mulume wa Shedeu, mukelenge wa bana balume ba Lubena, wakafua bintu dituku dinai. Mulambu wandi wakadi dilonga disalame dia tshiamu tshia argent, bujitu buadi buakadi nshekele lukama ne makumi asatu, ne dilonga dia ndondo dia argent wa nshekele makumi muanda mutekete bu nshekele wa mu nsubu wa tshitendelelu, bubidi buabi biule tente ne bukula bubotesha busangisha ne manyi bu mulambu wa bukula, ne nkutu wa or wa nshekele dikumi mûle tente ne musenga wa manananshi, ne muana mulume wa ngombe ne tshimpanga tshimue ne muana mulume wa mukoko wa tshidimu tshimue bu mulambu wa kuosha ha kahia, mbushi wa mpumbu bu mulambu wa kubuikila nʼau bubi, ne ngombe ibidi ne bimpanga bitanu ne mbushi ya mpumbu itanu ne bana balume ba mikoko batanu ba tshidimu tshimue bu mulambu wa kuvuisha n au ditalala eu udi mulambu wa Elisû, muana mulume wa Shedeu. Shelumiele, muana mulume wa Shulishadai, mukelenge wa bana ba Shimeona, wakafua bintu dituku ditanu. Mulambu wandi wakadi dilonga disalame dia tshiamu tshia argent bujitu buadi buakadi nshekele lukama ne makumi asatu, ne dilonga dia ndondo dia argent wa nshekele makumi muanda mutekete bu nshekele wa mu nsubu wa tshitendelelu, bubidi buabi biule tente ne bukula bubotesha busangisha ne manyi bu mulambu wa bukula, ne nkutu wa or wa nshekele dikumi mule tente ne musenga wa manananshi, ne muana mulume wa ngombe ne tshimpanga tshimue ne muana mulume wa mukoko wa tshidimu tshimue bu mulambu wa kuosha ha kahia, ne mbushi wa mpumbu bu mulambu wa kubuikila nʼau bubi, ne ngombe ibidi ne bimpanga bitanu ne mbushi ya mpumbu itanu ne bana balume ba mikoko batanu ba tshidimu tshimue bu mulambu wa kuvuisha nʼau ditalala eu udi mulambu wa Shelumiele, muana mulume wa Shulishadai. Eleyasafa, muana mulume wa Deuele, mukelenge wa bana ba Gada, wakafua bintu dituku disambombo Mulambu wandi wakadi dilonga disalame dia tshiamu tshia argent, bujitu buadi buakadi nshekele lukama ne makumi asatu, ne dilonga dia ndondo dia argent wa nshekele makumi muanda mutekete bu nshekele wa mu nsubu wa tshitendelelu, bubidi buabi biule tente ne bukula bubotesha busangisha ne manyi bu mulambu wa bukula, ne nkutu wa or wa nshekele dikumi mûle tente ne musenga wa manananshi, ne muana mulume wa ngombe ne tshimpanga tshimue ne muana mulume wa mukoko wa tshidimu tshimue bu mulambu wa kuosha ha kahia, ne mbushi wa mpumbu bu mulambu wa kubuikila n au bubi, ne ngombe ibidi ne bimpanga bitanu ne mbushi ya mpumbu itanu ne bana balume ba mikoko batanu ba tshidimu tshimue bu mulambu wa kuvuisha nʼau ditalala eu udi mulambu wa Eleyasafa, muana mulume wa Deuele. Elishama, muana mulume wa Amihuda, mukelenge wa bana ba Efelayima, wakafua bintu dituku dia muanda mutekete. Mulambu wandi wakadi dilonga disalame dia tshiamu tshia argent, bujitu buadi buakadi nshekele lukama ne makumi asatu, ne dilonga dia ndondo dia argent wa nshekele makumi muanda mutekete bu nshekele wa mu nsubu wa tshitendelelu, bubidi buabi biule tente ne bukula bubotesha busangisha ne manyi bu mulambu wa bukula, ne nkutu wa or wa nshekele dikumi mûle tente ne musenga wa manananshi; ne muana mulume wa ngombe ne tshimpanga tshimue ne muana mulume wa mukoko wa tshidimu tshimue bu mulambu wa kuosha ha kahia, ne mbushi wa mpumbu bu mulambu wa ku bialeha nʼau bubi, ne ngombe ibidi ne bimpanga bitanu ne mbushi ya mpumbu itanu ne bana balume ba mikoko batanu ba tshidimu tshimue bu mulambu wa kuvuisha nʼau ditalala eu udi mulambu wa Elishama, muana mulume wa Amihuda. Gamaliele, muana mulume wa Pedasû, mukelenge wa bana ba Manashe, wakafua bintu dituku dia muanda mukulu. Mulambu wandi wakadi dilonga disalame dia tshiamu tshia argent, bujitu buadi buakadi nshekele lukama ne makumi asatu ne dilonga dia ndondo dia argent wa nshekele makumi muanda mutekete bu nshekele wa mu nsubu wa tshitendelelu, bubidi buabi biule tente ne bukula bubotesha busangisha ne manyi bu mulambu wa bukula, ne nkutu wa or wa nshekele dikumi mûle tente ne musenga wa manananshi, ne muana mulume wa ngombe ne tshimpanga tshimue ne muana mulume wa mukoko wa tshidimu tshimue bu mulambu wa kuosha ha kahia, ne mbushi wa mpumbu bu mulambu wa kubuikila nʼau bubi, ne ngombe ibidi ne bimpanga bitanu ne mbushi ya mpumbu itanu ne bana balume ba mikoko batanu ba tshidimu tshimue bu mulambu wa kubisha nʼau ditalala eu udi mulambu wa Gamaliele, muana mulume wa Pedasû. Abidana, muana mulume wa Gideoni, mukelenge wa bana ba Benyamina, wakafua bintu dituku dia tshitema. Mulambu wandi wakadi dilonga disalame dia tshiamu tshia argent, bujitu buadi buakadi nshekele lukama ne makumi asatu, ne dilonga dia ndondo dia argent wa nshekele makumi muanda mutekete bu nshekele wa mu nsubu wa tshitendelelu, bubidi buabi biule tente ne bukula bubotesha busangisha ne manyi bu mulambu wa bukula; ne nkutu wa or wa nshekele dikumi mule tente ne musenga wa manananshi, ne muana mulume wa ngombe ne tshimpanga tshimue ne muana mulume wa mukoko wa tshidimu tshimue bu mulambu wa kuosha ha kahia; ne mbushi wa mpumbu bu mulambu wa kubuikila nʼau bubi ne ngombe ibidi ne bimpanga bitanu ne mbushi ya mpumbu itanu ne bana balume ba mikoko batanu ba tshidimu tshimue bu mulambu wa kuyifila nʼau ditalala eu udi mulambu wa Abidana, muana mulume wa Gideoni. Ahiezê, muana mulume wa Amishadai, mukelenge wa bana ba Dana, wakafua bintu dituku dia dikumi. Mulambu wandi wakadi dilonga disalame dia tshiamu tshia argent, bujitu buadi buakadi nshekele lukama ne makumi asatu, ne dilonga dia ndondo dia argent wa nshekele makumi muanda mutekete bu nshekele wa mu nsubu wa tshitendelelu, bubidi buabi biule tente ne bukula bubotesha busangisha ne manyi, ne nkutu wa or wa nshekele dikumi mûle tente ne musenga wa manananshi, ne muana mulume wa ngombe ne tshimpanga tshimue ne muana mulume wa mukoko wa tshidimu tshimue bu mulambu wa kuosha ha kahia, ne mbushi wa mpumbu bu mulambu wa kubuikila nʼau bubi, ne ngombe ibidi ne bimpanga bitanu ne mbushi ya mpumbu itanu ne bana balume ba mikoko batanu ba tshidimu tshimue bu mulambu wa kuvuisha nʼau ditalala eu udi mulambu wa Ahiezê, muana mulume wa Amishadai. Pagiele, muana mulume wa Okelana mukelenge wa bana ba Ashe, wakafua bintu dituku dia dikumi ne dimue. Mulambu wandi wakadi dilonga disalame dia tshiamu tshia argent, bujitu buadi buakadi nshekele lukama ne makumi asatu, ne dilonga dia ndondo dia argent wa nshekele makumi muanda mutekete bu nshekele wa mu nsubu wa tshitendelelu, bubidi buabi biule tente ne bukula bubotesha busangisha ne manyi bu mulambu wa bukula; ne nkutu wa or wa nshekele dikumi mûle tente ne musenga wa manananshi; ne muana mulume wa ngombe ne tshimpanga tshimue ne muana mulume wa mukoko wa tshidimu tshimue bu mulambu wa kuosha ha kahia; ne mbushi wa mpumbu bu mulambu wa kubuikila nʼau bubi, ne ngombe ibidi ne bimpanga bitanu ne mbushi ya mpumbu itanu ne bana balume ba mikoko batanu ba tshidimu tshimue bu mulambu wa kuvuisha nʼau ditalala eu udi mulambu wa Pagiele, muana mulume wa Okelana. Ahila, muana mulume wa Enana, mukelenge wa bana ba Nafatale, wakafua bintu dituku dia dikumi ne abidi. Mulambu wandi wakadi dilonga disalame dia tshiamu tshia argent, bujitu buadi buakadi nshekele lukama ne makumi asatu, ne dilonga dia ndondo dia argent wa nshekele makumi muanda mutekete bu nshekele wa mu nsubu wa tshitendelelu, bubidi buabi biule tente ne bukula bubotesha busangisha ne manyi bu mulambu wa bukula, ne nkutu wa or wa nshekele dikumi mule tente ne musenga wa manananshi; ne muana mulume wa ngombe ne tshimpanga tshimue ne muana mulume wa mukoko wa tshidimu tshimue bu mulambu wa kuosha ha kahia; ne mbushi wa mpumbu bu mulambu wa kubuikila nʼau bubi; ne ngombe ibidi ne bimpanga bitanu ne mbushi ya mpumbu itanu ne bana balume ba mikoko batanu ba tshidimu tshimue bu mulambu wa kuvuisha nʼau ditalala eu udi mulambu wa Ahila, muana mulume wa Enana. Ebi mbintu biakajidilabo nʼabi tshioshelu mu dituku diakelabo manyi ha mutu hatshi kudi bukelenge ba mu Isalele malonga masalame a argent dikumi ne abidi, ne malonga a ndondo a argent dikumi ne abidi, ne nkutu ya or dikumi ne ibidi; bujitu bua dilonga disalame dimue buakadi nshekele lukama ne makumi asatu, ne bua dilonga dia ndondo dimue nshekele makumi muanda mutekete, ne argent yonso ya bintu ebi bionso yakadi nshekele binunu bibidi ne nkama mai bu nshekele wa mu nsubu wa tshitendelelu; ne nkutu ya or dikumi ne ibidi yakadi miule tente ne musenga wa manananshi, bujitu bua nkutu ne nkutu buakadi nshekele dikumi bu nshekele wa mu nsubu wa tshitendelelu, or yonso ya nkutu ei yakadi nshekele lukama ne makumi abidi; ne mulambu wa kuosha ha kahia wakadi balume ba ngombe dikumi ne babidi, bimpanga dikumi ne bibidi, ne bana balume ba mikoko ba tshidimu tshimue dikumi ne babidi, ne mulambu wabi wa bukula, ne mbushi ya mpumbu ya mulambu wa kubuikila nʼau bubi dikumi ne bibidi; ne mulambu wa kuvuisha nʼau ditalala wakadi balume ba ngombe makumi abidi ne banai, ne bimpanga makumi asambombo ne mbushi ya mpumbu makumi asambombo ne bana balume ba mikoko makumi asambombo ba tshidimu tshimue. Ebi mbintu bia kujidila nʼabi tshioshelu, hakelabo manyi ha mutu hatshi. Hakaya Mose mu ntenta wa kusambakena bua kusomba ne Yehowa, hashishe yeye wakunvua Di diakadi diakula nʼandi ha mutu ha tshibuikidi tshia ha mutu ha mushete wa Nzambi hankatshi ha bakeluba babidi ne yeye wakasomba ne Yehowa. Yehowa wakambila Mose ne, Wambile Alona ne, Hawatemesha minda minda muanda mutekete neyikale ku mpala kua tshitekelu tshia muinda. Alona wake nza nunku, wakatemesha minda ku mpala kua tshitekelu tshia muinda, bu muakambila Yehowa Mose. Bakenza tshitekelu tshia muinda ne tshiamu tshia or tshiakafulabo, bakatula tshitaku tshiatshi ne bilongo biatshi ne tshiamu tshia or tshijima, bakenza tshitekelu bu tshidikishilu tshiakalesha Yehowa Mose. Yehowa wakambila Mose ne, Angata Bena Lewi munkatshi mua Bena Isalele, ubalengeshe. Wewe newenze nunku bua kubalengesha ubamiamine mai a kubalengesha nʼau ku bubi, babeye mubidi wabo wonso ne dihaya, buvuwe bilulu biabo ne badilengeshe. Bangate muana mulume wa ngombe ne mulambu wandi wa bukula bubotesha busangisha ne manyi, wewe newangate muana mulume wa ngombe mukuabo bu mulambu wa kubuikila nʼau bubi. Ulue biebe ne Bena Lewi ku mbelu kua ntenta wa kusambakena, usangishe tshisumbu tshionso tshia Bena Isalele, wewe neumueneshe Bena Lewi ku mpala kua Yehowa Bena Isalele nebatentekashe bianza biabo ha mutu ha Bena Lewi: Alona neanyukule Bena Lewi ku mpala kua Yehowa bu mulambu udibo banyukula kudi Bena Isalele, bua bobo bikale bajidile bua kukuatshila Yehowa mudimu. Bena Lewi nebatentekashe bianza biabo ha mutu ha balume ba ngombe wewe neufile umue bu mulambu wa kubuikila nʼau bubi ne mukuabo bu mulambu wa kuosha ha kahia kudi Yehowa, bua kubuikidila Bena Lewi bubi buabo. Wewe neushikike Bena Lewi ku mpala kua Alona ne kua bana bandi balume, ubanyukule ku mpala kua Yehowa. Nunku wewe neumushe Bena Lewi munkatshi mua Bena Isalele, Bena Lewi nebikale banyi. Ku nyima kua bualu ebu Bena Lewi nebabale mu mudimu wa mu ntenta wa kusambakena, wewe neubalengeshe, neubanyukule bu mulambu udibo banyukula. Bualu bua bobo badi bampebue bajima munkatshi mua Bena Isalele mu miabo ya banʼa bute bonso ba Bena Isalele nakadiangatshilabo. Bualu bua banʼa bute bonso ba mu Isalele mbanyi, ne ba bantu ne ba nyama, mu dituku dinakashiha banʼa bute bonso ba mu buloba bua Ejipitu nakabajidila kundi. Nakadiangatshila Bena Lewi mu miaba ya banʼa bute bonso munkatshi mua Bena Isalele. Nakafila Bena Lewi kudi Alona ne bana bandi balume bu kuha kuabo munkatshi mua Bena Isalele, bua kukuatshila Bena Isalele mudimu mu nsubu wa tshitendelelu, ne bua kubuikidila Bena Isalele bubi buabo, bua bualu bubi kabukuatshi Bena Isalele haluabo ha buihi ne ntenta wa kusambakena. Mose ne Alona ne Bena Isalele bonso bakenzela Bena Lewi nunku, Bena Isalele bakenza malu onso akambila Yehowa Mose bua Bena Lewi. Bena Lewi bakadilengesha ku bubi buabo, bakuvuwa bilulu biabo, Alona wakabanyukula bu mulambu udibo banyukula kudi Yehowa, Alona wakadia mulambu wa kubabuikidila nʼau bubi, bualu bua kubalengesha. Ku nyima kua bualu ebu Bena Lewi bakabuela mu ntenta wa kusambakena bua kuenza mudimu ku mpala kua Alona ne kua bana bandi balume, bu muakambila Yehowa Mose bua Bena Lewi, bakabenzela nunku. Yehowa wakambila Mose ne, Ebu mbualu bua mudimu wa Bena Lewi ba bidimu makumi abidi ne bitanu tô ne ha mutu nebenze mudimu mu ntenta wa kusambakena, hahitabo bidimu makumi atanu, nebalekele mudimu, kabankuatshidi mudimu kabidi, kadi nebakuatshile bana babo mu ntenta wa kusambakena, bua kulamabo bintu, kabenji mudimu mukole, wewe newenzele Bena Lewi nunku hawabalesha mudimu wabo. Yehowa wakambila Mose mu tshihela tshia Sinai mu ngondo wa kumudilu wa tshidimu tshibidi tshiakaluhukabo mu buloba bua Ejipitu ne, Bena Isalele nebadie bintu bia kuhita kua Yehowa mu tshikondo tshinakasungula. Mu dituku dia dikumi ne anai dia ngondo eu ku dilolo, nebadie mu tshikondo tshiaku, bobo nebenze bu mudi mei onso ne mikenji yonso bia kuhita kua Yehowa. Mose wakambila Bena Isalele bua bobo bavuluke kuhita kua Yehowa. Bakavuluka kuhita kua Yehowa mu ngondo wa kumudilu mu dituku dia dikumi ne anai ku dilolo, mu tshihela tshia Sinai, bu muakadi mei onso akambila Yehowa Mose, Bena Isalele bakenza nunku. Balume bakuabo bakadiku bakadi banyanguke kudi mubidi wa mundi mufue, kabakamanya mua kuvuluka kuhita kua Yehowa dituku adi, bakatua ku mpala kua Mose ne Alona dituku adi, balume aba bakamuambila ne, Tudi banyanguke bua mubidi wa mundi mufue, bualu kai didi bikandibua bua tuetu katuena mua kufila mulambu wa Yehowa mu tshikondo tshiau munkatshi mua Bena Isalele? Mose wakabambila ne, Imanai, nganji kunvua dî kudi Yehowa bua bualu buenu. Yehowa wakambila Mose ne, Wambile Bena Isalele ne, Bikala mundi wa munkatshi muenu anyi wa munkatshi mua tunkanunuma dienu munyanguke ku dilenga dia mundi mufue, anyi bikaleye muye ku luendu kule yeye neavuluke kuhita kua Yehowa. Mu ngondo muibidi mu dituku dia dikumi ne anai ku dilolo nebakuvuluke, nebadie mampa adi kâyi ne luevene ne matshitshi adi ne bululu, kabashiyi tshintu to ne ku dinda, kabatshibudi nansha mufuba umue, nebenze bu mudi mikenji yonso ya kuhita kua Yehowa. Kadi mundi udi kayi munyanguke, ne udi kayi muye ku luendu, udi uhidia kuvuluka kuhita kua Yehowa, nebumushe muntu au munkatshi muabo; bualu bua yeye kakafila mulambu wa Yehowa mu tshikondo tshiau, muntu au neadituadile bubi buandi. Bikala muenyi munkatshi muenu udi musue kuvuluka kuhita kua Yehowa, yeye nênze bu mudi mikenji ya kuhita kua Yehowa, nenuikale ne mukenji umue kudi muenyi ne kudi muntu mulela munkatshi muenu. Mu dituku diakashimikabo nsubu wa tshitendelelu, ntenta wa dimanyisha dia Yehowa, ditutu diakabuikila nsubu wa tshitendelelu, ku dilolo tô ne ku dinda diakakenka bu kahia ha mutu ha nsubu wa tshitendelelu. Ditutu diakabuikila nsubu matuku onso, diakakenka bu kahia butuku. Hakumuka difutu ku mutu kua Ntenta, hashishe Bena Isalele bakaya ku luendu, mu muaba wakimana ditutu, Bena Isalele bakalongolola tshitudilu. Ku dî dia Yehowa Bena Isalele bakaya ku luendu, ne ku dî dia Yehowa bakalongolola tshitudilu, hakatshidi ditutu dimana ku mutu kua nsubu, bobo bakashala mu tshitudilu. Hakimana ditutu ku mutu kua nsubu matuku a bungi, nunku Bena Isalele bakatumikila dî dia Yehowa, kabakaya ku luendu. Bikondo bikuabo ditutu diakimana ku mutu kua nsubu matuku makese, hashishe bakashala mu tshitudilu bu muakadi dî dia Yehowa, ne bakaya ku luendu bu muakadi dî dia Yehowa. Bikondo bikuabo ditutu bakimana dilolo tô ne ku dinda, ne hakumuka ditutu ne dinda, bakaya ku luendu, hakumuka ditutu nansha mu munya nansha mu butuku, bakaya ku luendu. Bakimana ditutu nansha matuku abidi nansha ngondo nansha tshidimu, Bena Isalele bakashala mu tshitudilu, kabakaya ku luendu, hakumukadi, bakaya ku luendu. Bu muakadi dî dia Yehowa bakashala mu tshituha ne bu muakadi dî ba Yehowa bakaya ku luendu, bakatumikila dî dia Yehowa, bu muakambila Yehowa Mose. Yehowa wakambila Mose ne, Enza biebe mpungi ibidi ya tshiamu tshia argent tshiakafulabo, wewe neubikile nʼai bantu bua kutendelela ne bua kubisha luendu. Helabo mpungi, bantu bonso nebadisangishe kûb ku mbelu kua ntenta wa kusambakena. Helabo mpungi umue, bakelenge ne bantu ba ku mutu kua binunu bia Bena Isalele nebadisangishe kûdi. Hawela mpungi bikole, bantu ba mu bitudilu bia ku esete nebaye ku luendu luabo. Hawela mpungi bikole tshiakabidi, bantu ba mu bitudilu bia ku sude nebaye ku luendu luabo, bobo nebele mpungi bikole bua luendu luabo. Biwasua kusangisha bantu hohamue, wewe newele mpungi, kadi kuedi bikole nansha. Bana balume ba Alona bakuidi nebele mpungi, mpungi neyikale bu mukenji, ku bikondo bienu bionso tshiendelele. Hanuaya kusangana mba ne bantu badi banukengesha mu buloba buenu, nenuele mpungi bikole, nenuikale nuvulukibua ku mesu kua Yehowa, Nzambi wenu, nenusungidibue kudi bantu badi nʼenu lukuna. Mu dituku ba disanka dienu, ne mu bikondo binudi nudia bidia bia Yehowa, ne mu tshibangidilu tshia ngondo yenu, nenuele mpungi ku milambu ya kuosha ha kahia, ne ku milambu ya kuvuisha nʼai ditalala, neyikale bu tshivulukidi ku mesu kua Nzambi wenu meme ndi Yehowa, Nzambi wenu. Mu tshidimu tshibidi, mu ngondo muibidi, mu matuku makumi abidi a ngondo eu, ditutu bakumuka ku mutu kua ntenta wa dimanyisha ba Yehowa. Bena Isalele bakaya ku mpala ku luendu luabo mu tshihela tshia Sinai, ditutu bakimana mu tshihela tshia Palana. Bakaya ku luendu luabo lua kumudilu bu muakambila Yehowa Mose. Bena Yuda bakaya ku mpala ne dibendele dia tshitudilu tshiabo, Nashona, muana mulume wa Aminadaba, wakadi ku mutu kuabo. Netanele, muana mulume wa Suâ, wakadi ku mutu kua Bena Yisakâ. Eliaba, muana mulume wa Helona, wakadi ku mutu kua Bena Zebuluna. Bakatulula nsubu wa tshitendelelu hanshi, ne bana balume ba Gêshona ne bana balume ba Melali, bakadi batuala nsubu, bakaya ku mpala. Bakaya ne dibendele ba tshitudilu tshia Lubena, ne Elisû, muana mulume wa Shedeu, wakadi ku mutu kuabo. Shelumiele, muana mulume wa Sulishadai, wakadi ku mutu kua tshisamba tshia bena Shimeona. Eleyasafa, muana mulume wa Deuele, wakadi ku mutu kua tshisamba tshia Bena Gada. Bena Kohata bakaya ku mpala batuale bintu bia mu nsubu wa tshijila, ne bakuabo bakashimika nsubu wa tshitendelelu diambedi bobo kabayi banze kulua. Bakaya ne dibendele dia tshitudilu tshia Bena Efelayima, ne Elishama, muana mulume wa Amihuda, wakadi ku mutu kuabo. Gamaliele, muana mulume wa Pedasû, wakadi ku mutu kua tshisamba tshia Bena Manashe. Abidana, muana mulume wa Gideoni, wakadi ku mutu kua tshisamba tshia Bena Benyamina. Bakaya ne dibendele dia tshitudilu tshia Dana, bobo bakadi halua ku nyima kua bakuabo, bakaya ku luendu luabo ku bisumbu biabo, ne Ahiezê, muana mulume wa Amishadai, wakadi ku mutu kuabo. Pagiele, muana mulume wa Okelana, wakadi ku mutu kua tshisamba tshia Bena Ashê. Ahila, muana mulume wa Enana, wakadi ku mutu kua tshisamba tshia Bena Nafatale. Ei ngendu ya Bena Isalele ku bisumbu biabo, bakaya ku mpala. Mose wakambila Hobaba, muana mulume wa Luele, Muena Midiyana, tatuʼandi-muenu wa Mose ne, Tutshidi tuya ku muaba wakamba Yehowa ne, Nennuheu, uye nʼetu, netukuenzele bimpe, bualu bua Yehowa wakalaya Bena Isalele bualu buimpe. Yeye wakamba ne, Tshiena nya, nempingane kuetu kudi bana betu. Yeye wakamuambila ne, Kutushiyi, ndi nkusengelela, bualu bua wewe udi mumanye ne, Tuetu netuikale mu tshihela, wewe newikale bu mesu etu. Biwaya biebe nʼetu, hashishe bikala Yehowa mutuenzele bimpe, tuetu netukuenzele bimpe. Bakabika ku mukuna wa Yehowa, bakaya mu luendu matuku asatu, ne mushete wa tshihungidi tshia mei a Yehowa wakaya ku mpala kuabo matuku asatu bualu bua kubakebela muaba wa kuikisha. Ditutu dia Yehowa diakadi ku mutu kuabo mu munya, hakumukabo ku tshitudilu tshiabo. Hakaya mushete ku mpala, Mose wakamba ne, Yehowa, bika biebe, bantu badi nʼebe lukuna batangadishibue, bantu badi nʼebe tshiji banyeme ku mesu kuebe. Hakikisha mushete, yeye wakamba ne, Yehowa, uhingana biebe kudi binunu bia binunu bia Bena Isalele. Bantu bakadi batontolodi, bualu ebu buakadi bubi ku matshu a Yehowa ne hakabunvua Yehowa, tshiji tshiakamukuata, kahia ka Yehowa kakabosha tô ne ku matshika a tshitudilu. Bantu bakadila kudi Mose, ne Mose wakalomba Yehowa, kahia kakajima. Bakidika muaba au ne, Tabela, bualu bua kahia ka Yehowa kakatema munkatshi muabo. Bantu bakuabo ba munkatshi muabo bakadi ne lukuka be Bena Isalele bakadila kabidi, bakamba ne, Nganyi neatuhe munyinyi wa tuetu kudia? Tudi tuvuluka bua munyinyi wa mu mai utuakadia mu Ejipitu tshianana, concombres ne melona ne poireaux ne matungulu ne ail, kadi katataka mioyo yetu idi minyane, katuena ne tshintu tshikuabo tshia kutangila anu mana â. Mana akadi bu ntete ya kolianda, akadi afuanangana ne bedola. Bantu bakaluhuka, bakâsangisha, bakâhela mu biamu ne mu binu, bakâlamba mu bivuadi ne mai, bakalamba nʼau mikata, akashemakana bu manyi mahia-mahia. Kakahanda mume mu tshitudilu butuku, mana akamueneka nʼau. Mose wakumpa muabi wa bantu ku meku ne ku meku, mundi ne mundi ku mbelu kua ntenta wandi tshiji tshiakatamba kukuata Yehowa, tshiji tshiakakuata Mose kabidi. Mose wakambila Yehowa ne, Wewe wakenzela mundi webe bibi nunku bualu kai? Munyi tshiakusangana luse ku mesu kuebe bua wewe wakateka bujitu bua bantu aba bonso hamʼbidi hanyi? Meme nakimitshisha baledi ba bantu aba mafu, anyi, nakabalela, anyi, bua wewe wakungambila ne, Ubatuale ha tshiadi tshiebe, bu mudi muledi utuala muana utshidi wamua, tô ne ku buloba buwakalaya batatuʼabo? Meme ndi mua kudisha bantu aba bonso munyinyi kudi kunyi? Bualu bua bobo badi badila kundi ne, Utuhe munyinyi wa tuetu kudia. Meme nkayanyi tshiena mua kutuala bantu aba bonso, bualu ebu budi buntambe bunene. Biwasua kutuenzela nunku, ndi nkusengelela ne, Unshihe ku tshianza tshiebe, binasangana luse ku mesu kuebe, bua tshitangidi dikenga dianyi nunku. Yehowa wakambila Mose ne, Unsangishile balume makumi muanda mutekete ba bakulu ba mu Isalele, baudi mumanye ne mbakulu ba bantu, ne bakelenge badi ku mutu kuabo, ulue nʼabo ku mpala kua ntenta wa kusambakena, bobo bimaneku nʼebe. Meme nempueke, nensombe nʼebe, nengangate Nyuma udi kûdi, nembaheye, nenukuatshishangane bua kutuala bujitu bua bantu aba, wewe kuena ubutuala nkayebe. Wambile bantu ne, Nudijidile bua makelela, nenudie munyinyi, bualu bua nuenu nuakudila mu matshu a Yehowa ne, Udi utudisha munyinyi nganyi? Bakatuenzela bimpe mu Ejipitu, nunku Yehowa neanuhe munyinyi, nenudie. Kanuena nudia dituku dimue anyi matuku abidi anyi matuku atanu anyi matuku dikumi anyi matuku makumi abidi, kadi ngondo mujima, tô ne hanuaulukila mu diulu, neunutonde, bualu bua nuenu nuakuhidia Yehowa udi munkatshi muenu, nuakudila ku mpala kuandi ne, Tuakaluhuka mu Ejipitu bualu kai? Mose wakamba ne, Bantu bandi nʼabo badi bena nvita binunu nkama isambombo, ne wewe wakuamba ne, Nembahe munyinyi, bua bobo badie ngondo mujima. Netubashihele bisumbu bia mikoko ne ngombe bua kubadisha, anyi? Netusangishe minyinyi yonso ya mu mai manene bua kubadisha, anyi? Yehowa wakambila Mose ne, Tshianza tshia Yehowa tshiakulua tshihi, anyi? Katataka wewe neutangile ne bualu bunakukuambila nebuenjibue anyi kabuena buenjibua. Mose wakaluhuka, wakambila bantu mei a Yehowa, wakasangisha balume makumi muanda mutekete ba bakulu ba bantu, wakabanyungulusha Ntenta. Yehowa wakahueka mu dî ditu, wakasomba nʼandi, wakangata tshituha tshia Nyuma wakadiye nʼandi, wakamuteka kudi bakulu makumi muanda mutekete, hashishe hakalua. Nyuma kudibo, bakamba dî dia Nzambi, kadi kabakenza kabidi musangu mukuabo. Kadi balume babidi bakashala mu tshitudilu, dina dia umue ne Eladada ne dina dia mukuabo ne Medada. Nyuma wakashala kudibo, bakadi ne mena abo mafunda, ka dî kabakaya ku Ntenta, bakamba di dia Nzambi mu tshitudilu. Nsongalume wakadiku, wakaya lubilu, wakamanyisha Mose ne, Eladada ne Medada badi bamba dî dia Nzambi mu tshitudilu. Yoshua, muana mulume wa Nuna, mukuatshishi wa Mose, umue wa balume bakasunguleye, wakamba ne, Mukelenge wanyi, Mose, ubakande. Mose wakamuambila ne, Wewe udi ne mukau ku bualu buanyi, anyi? Nakadi kusua bua bantu ba Yehowa bonso bikale baprofete, ne Yehowa ateke Nyuma wandi kudibo. Mose wakaya mu tshitudilu, yeye ne bakulu ba Isalele. Luhehele luakaheha kudi Yehowa, diakalua ne nyunyu ya nkuadi ku mai manene, luakayihonesha hehi ne tshitudilu, bu luendu lua dituku dimue ku luseke elu ne luendu lua dituku dimue ku luseke lukuabo, yakanyunguluka tshitudilu ku nseke yonso, yakalembelela mulelu mukese bu coudées ibidi. Bantu bakajuka dituku adi, ne butuku bujima tô ne ku dituku dikuabo, bakasangisha nkuadi muntu wakasangisha bungi bukese wakasangisha bihiminu binene dikumi, bakadilongoluelayi mu tshitudilu. Hakatshidi munyinyi mukana, diambedi bobo kabayi banze kûdia ku menu, tshiji tshiakakuata Yehowa bua bantu, ne Yehowa wakasamisha bantu bikole. Bakidika muaba au ne, Kibelota-hatawa, bualu bua bakajikamu bantu bakadi ne lukuka. Bakabisha luendu luabo ku Kibelota-hatawa, bakaya ku Haselota, bakashikama mu Haselota. Mîyama ne Alona bakasonguela Mose bua mukashi wa Bena Kushi wakabakeye, bualu bua yeye wakadi mubake mukashi wa Bena Kushi. Bakamba ne, Bulelela, Yehowa wakasomba anu ne Mose, anyi? Yeye kena usomba nʼetu kabidi, anyi? Yehowa wakunvua. Muntu eu Mose wakadi ne kalolo be, wakatamba bantu bonso ba ha buloba ne kalolo. Tshituha tshibi Yehowa wakambila Mose ne Alona ne Miyama ne, Busatu buenu nulue mu ntenta wa kusambakena Busatu buabo bakaluamu. Yehowa wakahueka mu difutu, wakimana ku mbelu kua Ntenta, wakabikila Alona ne Mîyama, bobo bakaluhuka. Yeye wakamba ne, Unvuai mei anyi, bikala muprofete munkatshi muenu, meme Yehowa nendimanyishe kudiye mu tshikena kumona, meme nensombe nʼandi mu tshilota. Muntu wanyi Mose kena nunku, yeye udi wenza mudimu wandi bimpe mu nsubu wanyi wonso, meme nensombe nʼandi mukana ha mukana, ne mei adiye mumanye, tshiena nsomba nʼandi ne nsumuinu, neatangile mundidimbi wa Yehowa nunku kanuakutshina bua kusonguela mundi wanyi Mose munyi? Tshiji tshia Yehowa tshiakabakuata, yeye wakumuka. Difutu diakumuka ku mutu kua Ntenta, ne tangila, Miyama wakadi mûle tente ne disama dia nsudi mitoke to Alona wakatangila ne Mîyama wakadi mûle tente ne nsudi. Alona wakambila Mose ne, Mukelenge wanyi, kuteki bualu bubi kutudi, bualu bua tuetu tuakuenza buhote, tuakuenza bualu bubi. Kuitabusha bua yeye kuikala bu muntu mufue udi ne tshituha tshia mubidi mubole hamulelabo. Mose wakadila kudi Yehowa ne, Ndi nkusengelela ne, Nzambi, umuondahe. Yehowa wakambila Mose ne, Bikala tatu wandi mumutuile lute ku mesu, yeye wakadi kushala ne bundu matuku muanda mutekete, nansha? Bamuteke ku butshika bua tshitudilu matuku muanda mutekete, ne ku nyima nebamuhingishe kabidi. Mîyama wakashala ku butshika bua tshitudilu matuku muanda mutekete, bantu kabakaya ku luendu to ne hakaluabo ne Mîyama kabidi. Hashishe bantu bakumuka ku Haselota, bakashikama mu tshihela tshia Palana. Yehowa wakambila Mose ne, Utume bantu, bua bobo batentekele buloba bua Kanâna, bundi mpa Bena Isalele, usungule mundi ku tshisamba ku tshisamba, mundi yonso udi bu mukelenge munkatshi muabo. Mose wakabatuma ku Kanâna bumuke ku tshihela tshia Palana, muakamba Yehowa buonso buabo bakadi balume ba ku mutu kua Bena Isalele. Au mmena abo wa mu tshisamba tshia Lubena, Shamua, muana mulume wa Zaku. Wa mu tshisamba tshia Shimeona, Shafata, muana mulume wa Holi. Wa mu tshisamba tshia Yuda, Kaleba, muana mulume wa Yefune. Wa mu tshisamba tshia Yisakâ, Igala, muana mulume wa Yosefe. Wa mu tshisamba tshia Efelayima, Hoshea, muana mulume wa Nuna. Wa mu tshisamba tshia Benyamina, Palati, muana mulume wa Lafu. Wa mu tshisamba tshia Zebuluna, Gadadiele, muana mulume wa Sodi. Wa mu tshisamba tshia Yosefe ne wa mu tshisamba tshia Manashe, Gadi, muana mulume wa Susi. Wa mu tshisamba tshia Dana, Amiele, muana mulume wa Gemali. Wa mu tshisamba tshia Ashe, Setû, muana mulume wa Mikaele. Wa mu tshisamba tshia Nafatale, Nabi, muana mulume wa Wofesi. Wa mu tshisamba tshia Gada, Gewele, muana mulume wa Maki. Au mmena a balume bakatuma Mose bua kutentekelabo buloba Mose wakidika Hoshea, muana mulume wa Nuna ne, Yoshua. Mose wakabatuma bua kutentekela buloba bua Kanâna, wakabambila ne, Yilai ku nshila wa luseke lua Sude, yai bienu mu buloba bua mikuna nutangile buloba ne budi munyi, bantu badimu badi bakole anyi badi batekete, badi banya-banya anyi badi ba bungi: buloba budi munyi budibo bashikama, budi buimpe anyi budi bubi, misoko idibo bashikamamu idi ya hatuhu anyi idi ya mpangu ya mabue, nutangile buloba ne budi ne bufunfule anyi budi busenguluke, mitangile ne mudi metu, anyi kaenamu. Nukoleshe mitshima yenu, nulue ne mamuma a mu buloba abu Hakayabo nunku, mamuma a nvinyo akabanga kulua. Bakaya nunku, bakatentekela buloba ku tshihela tshia Sina tô ne ku Lehoba udi mu nshila wa ku Hamata. Bakayila ku luseke lua sude, bakafua ku Hebelone, ne Ahimana ne Sheshai ne Talemai, bana ba Anaka bakadimu. (Bakasa Hebelone bidimu muanda mutekete ku mpala kua Soana mu Ejipitu.) Bakalua mu tshibanda tshia Eshekola, bakakosamu ditamba diakadi ne tshisumbu tshia mamuma a nvinyo, bakadituala ku mutshi babidi, balualua ne mamuma makuabo a grenade ne a nfigi. Muaba au wakidikibua ne, Tshibanda tshia Eshekola, bualu bua tshisumbu tshia mamuma tshiakakosamu Bena Isalele. Hakatentekelabo buloba nunku matuku makumi anai, bakahingana. Hakafikabo, bakalua kudi Mose ne kudi Alona ne kudi tshisumbu tshionso tshia Bena Isalele mu tshihela tshia Palana ku Kadesha, bakalua kudibo ne kudi tshisumbu tshionso ne dî diabo, bakabalesha mamuma a buloba abu. Bakamuambila ne, Tuakuya mu buloba buwakatutuma, bulelela, buloba abu budi bûle tente ne mabele ne buitshi, â mmamuma a buloba. Kadi bantu badi mu buloba abu badi bakole, misoko yabo idi ne mpangu ya mabue, ne idi minene be; ne bualu bukuabo, tuakamonamu bana ba Anaka. Bena Amaleka badi ku luseke lua ku Sude, Bena Hiti ne Bena Yebuse ne Bena Amole badi ku luseke lua ku mikuna, Bena Kanâna badi hehi ne mai manene ne kukala kua musulu wa Yadene. Kaleba wakakolesha bantu ku mesu kua Mose ne, Tuyai katataka, tunyenge buloba abu, tudi bamanye mua kuhita bena buloba abu bukole. Kadi bantu bakaya nʼandi bakamba ne, Katuena bamanye mua baluangana ne bantu aba, bualu bua badi batutamba bukole. Bakalua kudi Bena Isalele ne lumu lubi lua buloba buakatentekelabo, bakamba ne, Buloba abu butuakutentekela buta buadia bantu badi bikalamu, bantu bonso batuakamonamu badi bantu ba mibidi minene. Tuakamona bantu ba nfiondo, bana balume ba Anaka, hakalelabo kudi Nefilima hatuakaditangila, tuakadi bu mpasu, tuakadi nunku ku mesu kuabo kabidi. Bantu ba mu tshisumbu tshionso bakela dî diabo bikole, bakadila butuku abu. Bena Isalele bonso bakatontolola Mose ne Alona, bakabambila ne, Biakadi bimpe tuafuila mu Ejipitu, anyi tuafuila mu tshihela etshi. Bualu kai Yehowa udi ulua nʼetu ku buloba ebu bua kutushihesha ku miele ya nvita? Bakashi betu ne bana betu bakese nebashihibue, bualu budi butamba buimpe bua tuetu tuhingane mu Ejipitu nansha? Bakambilangana ne, Tusungulai bietu kapitene, netuhingane mu Ejipitu. Hashishe Mose ne Alona bakadikuma hanshi ku mpala kua tshisumbu tshionso tshia Bena Isalele. Yoshua, muana mulume wa Nuna, ne Kaleba, muana mulume wa Yefune, bakaya ne bantu bakatentekela buloba, bakadihanda bilulu biabo, bakambila tshisumbu tshionso tshia Bena Isalele ne, Buloba butuakahita bua kutentekela budi butambe buimpe. Bikala Yehowa ne disanka bualu buetu, yeye nealue nʼetu mu buloba ebu, neatuhebu; buloba budi bûle tente ne mabele ne buitshi. Kanuanji kutombokela Yehowa nansha, kanutshinyi bena buloba; bobo badi bu bintu bia tuetu kudia, bintu bidibo badisungila nʼabi biakumuka, ne Yehowa udi nʼetu; kanubatshinyi. Kadi bantu bonso bakamba ne, Tubakume ne mabue Butumbi bua Yehowa buakamueneka mu ntenta wa kusambakena kudi Bena Isalele bonso. Yehowa wakambila Mose ne, Bantu aba nebampetule musangu bule munyi? Nebikale nʼanyi ne mpata musangu bule munyi bua malu a kukema onso anakenza munkatshi muabo? Nembashihe ne disama dikole, nembahidie, nenkuvuishe wewe tshisamba tshidi tshibahita bunene ne bukole. Mose wakambila Yehowa ne, Nunku Bena Ejipitu nebunvue lumu elu, bualu bua wewe wakahatula bantu aba munkatshi muabo ne bukole buebe, bobo nebamanyishe bena buloba ebu Bobo bakunvua lumu ne, Wewe Yehowa udi munkatshi mua bantu aba, bualu bua wewe Yehowa udi umuenyibua mpala ha mpala, ne ditutu diebe didi dimana ku mutu kuabo, ne wewe utu waya ku mpala kuabo ne difutu didi ne diledi mu munya, ne difutu didi dikenka ne kahia butuku. Biwashiha bantu aba bu mundi umue, hashishe bisamba bionso biakunvua lumu luebe nebiambe ne, Bualu bua Yehowa kakadi ne bukole bua kulua ne bantu aba mu buloba buakahaneye, nunku yeye wakabashiha mu tshihela. Katataka, ndi nkusengelela ne, Bukole bua Yehowa buikale bunene, bu muwakuamba ne, Yehowa kena ukuata tshiji lubilu, udi mûle tente ne luse lujalame, utu wabuikila bubi ne kuhanga bia bantu, kena ubingisha muntu utu wenza bubi, utu watumina bana ba tshihungu tshisatu anyi tshinai mibi ya batatuʼabo. Ndi nkusengelela ne, Ubuikidile bantu aba bubi buabo, bu mudi bunene bua luse luebe lujalame, bu muwakababuikidila bubi buabo ku Ejipitu to ne katataka. Yehowa wakamba ne, Nakubabuikidila bubi bu mudi dî diebe, kadi bulelela, bu mundi ne muoyo, ne bu mudi buloba bûle tente ne butumbi bua Yehowa, bualu bua bantu aba bakamona butumbi buanyi ne malu anyi a kukema anakenza munkatshi muabo mu Ejipitu ne mu tshihela, kadi bakunteta munda misangu ei dikumi, kabakunvua dî dianyi, bulelela, bobo kabena batangila buloba bunakalaya batatuʼabo, bantu bakampidia kabena babutangila, kadi muntu wanyi Kaleba, bualu bua yeye udi ne mutshima mukuabo munda muandi, ne yeye wakundonda bulelela, nendue nʼandi mu buloba buakayeye, tunkanunuma tuandi netubuhiane. Bena Amaleka ne Bena Kanâna badi bashikama mu tshibanda, makelela nuhingane, yai mu tshihela mu nshila wa ku Dishiba Dikunze. Yehowa wakambila Mose ne Alona ne, Nengikale ne bantu aba babi badi bantontolola musangu bule munyi? Nakunvua kutontolola kua Bena Isalele kudibo bantontolola nʼaku. Nubambile ne, Yehowa udi wamba ne, Bu mundi ne muoyo, bu munuakuamba mu matshu anyi, nennuenzele nunku: mibidi yenu neyihone hanshi mifue mu tshihela etshi, buonso buenu baka balabo ba bidimu makumi abidi tô ne ha mutu, bakadi bantontolola, bulelela, nuenu kanuena nulua mu buloba bunakanulaya bua nuenu nushikamemu, anu Kaleba, muana mulume wa Yefune, ne Yoshua, muana mulume wa Nuna. Kadi bana benu bakese banuakuamba ne, Bobo nebafue ku miele ya nvita, nendue nʼabo, bobo nebamanye buloba bunuakuhidia. Kadi nuenu mene, mibidi yenu nenuhone hanshi mifue mu tshihela etshi. Bana benu nebikale bu bena tshiendenda mu tshihela etshi tô bidimu makumi anai, bobo nebatuale bujitu bua masandi enu, tô ne hajimina mibidi yenu mifue mu tshihela etshi. Bungi bua matuku anuakutentekela buloba, matuku makumi anai mene, nebuikale bungi bua bidimu binudi nutuala bujitu bua bubi buenu, nenumanye ne mbualu bukole hangumuka kunudi. Meme Yehowa nakuamba, nengenzele bantu aba bonso badi bampidia nunku, nebajimine mu tshihela etshi, nebafuemu. Balume aba bakatuma Mose bua kutentekelabo buloba, bakadi bahingana, bakadi batontoluesha bantu bonso kudiye, bualu bua bobo bakalua ne lumu lubi lua buloba, balume aba mene bakalua ne lumu tubi lua buloba bakafua ne disama dikole ku mpala kua Yehowa. Kadi Yoshua, muana mulume wa Nuna, ne Kaleba, muana mulume wa Yefune, anu bobo bakashala ne muoyo munkatshi mua bantu bakaya bua kutentekelabo buloba. Mose wakambila Bena Isalele mei au onso, ne mitshima yabo yakanyingalala bikole. Bakabika hatshiatshia, bakahanda ku mutu kua mukuna mule bakamba ne, Tudiku, netuye ku muaba wakatulaya Yehowa, bualu bua tuakenza bualu bubi. Mose wakamba ne, Nudi nuhidia dî dia Yehowa munyi? Bualu ebu kabuena bunusankisha. Kanuyi bualu bua Yehowa kena munkatshi muenu, kanufu ku mesu kua bantu badi nʼenu lukuna. Bena Amaleka ne Bena Kanâna badi ku mpala kuenu, nunku nenufue ku miele ya nvita, bualu bua nuenu nuakuhidia kulonda Yehowa, nunku Yehowa kena wikala nʼenu. Kadi bobo bakaya ku mutu kua mukuna ku bukole, kadi Mose ne mushete wa Yehowa kabiakumuka mu tshitudilu. Hashishe Bena Amaleka bakahueka ne Bena Kanâna bakadi bashikama mu mikuna, bakabahita bukole, bakabihata tô ne ku Homa. Yehowa wakambila Mose ne, Wambile Bena Isalele ne, Hanualua mu buloba buenu, bundi munuhe, ne hanuafila mulambu wa kuosha ha kahia kudi Yehowa bua kushikisha kuditshiha, anyi mulambu udi mitshima yenu misue kufila, anyi mu matuku anudi nudia bidia bia disanka, bualu bua kumusha dihembu kudi Yehowa, nansha mulambu wa ngombe nansha wa mikoko, muntu udi ufila mulambu neafile mulambu wa bukula bubotesha bu tshintu tshia dikumi tshia tshihiminu tshimue, busangisha ne tshituha tshinai tshia dikoho dia manyi. Hanuafila mulambu wa kuosha anyi wa kudifila, nenufile kabidi tshituha tshinai tshia dikoho dia nvinyo bu mulambu udibo banua, nenufile nunku ku muana wa mukoko ne ku muana wa mukoko. Hanuafila mulambu wa tshimpanga, nenulongolole tshintu tshitanu tshia bukula bubotesha busangisha ne tshituha tshisatu tshia dikoho dia manyi, ne tshituha tshisatu tshia nvinyo bu mulambu udibo banua bua kûtuisha dihembu kudi Yehowa. Hanualongolola mulume wa ngombe bu mulambu wa kuosha ha kahia anyi bu mulambu wa kushikisha kuditshiha anyi bu mulambu wa kuvuisha nʼau ditalala kudi Yehowa, nebafile mulambu wa bukula bubotesha bu bituha bisatu bia ha dikumi busangisha ne tshituha tshia dikoho dia manyi, nebafile kabidi tshituha tshia dikoho dia nvinyo bu mulambu udibo banua, bu mulambu wa kuosha, bua kûtuisha dihembu kudi Yehowa. Nenuenze nunku kudi mulume wa ngombe yonso anyi kudi tshimpanga tshionso anyi kudi bana ba balume ba mikoko anyi kudi mbushi. Bu bungi bua milambu mudi nu fila nenulongolole bintu ebi. Bantu bonso badi balela munkatshi muenu nebenze bilele ebi, hafilabo milambu ya kuosha ha kahia bu tshintu tshidi tshitua dihembu kudi Yehowa. Bikala muenyi mushikame munkatshi muenu, anyi muntu yonso muikale munkatshi muenu tô ne ku bikondo bienu bionso udi musue kufila mulambu wa kuosha ha kahia bu tshintu tshidi tshitua dihembu kudi Yehowa, yeye nênze bu munudi nuenza. Bualu bua bantu bonso nebikale ne mukenji umue kunudi ne kudi muenyi udi munkatshi muenu ku bikondo bienu bionso: muenyi neikale bu nuenu ku mesu kua Yehowa. Nenuikale ne mukenji umue ne dî dimue kunudi ne kudi muenyi udi munkatshi muenu. Yehowa wakambila Mose ne, Wambile Bena Isalele ne, Hanualua mu buloba bundi ngamba kunuha, ne hanuadia bintu bia mu buloba abu, nenufile mulambu udibo banyukula kudi Yehowa. Nenunyukule mulambu wa mukata wakelabo ne bukula buakaboteshabo diambedi, nenufile mulambu eu bu mulambu wa bintu biakahuolabo. Nenunyukule mulambu wa bukula buakaboteshabo diambedi kudi Yehowa, ku bikondo bienu bionso. Hanuahanga, kanuyi nutumikila mikenji yonso yakambila Yehowa Mose, malu onso mene akanuambila Yehowa mukana mua Mose ku dituku diakanuheye mikenji yandi tô ne ku bikondo bionso bidi ku mpala, bikala bualu buenjibue ku mpukahuka, bantu ba tshisumbu kabayi babumanye, bantu bonso nebafile muana mulume wa ngombe bu mulambu wa kuosha ha kahia bua kutuisha dihembu dimpe kudi Yehowa, ne mulambu wandi wa bukula ne mulambu wandi wa bintu bidibo banua, ne muana mulume wa mbushi bu mulambu wa kubuikila nʼau bubi, bu mudi mukenji wamba. Muakuidi neafile mulambu wa kubuikidila Bena Isalele bonso bubi, ne bubi buabo nebuikale bubuikidibue, bualu bua bobo bakahanga ne bakalua ne milambu yabo, mulambu wa kuosha ha kahia kudi Yehowa, ne mulambu wa kubuikila hau bubi ku mpala kua Yehowa, bualu bua dihanga diabo; bubi bua Bena Isalele bonso ne bua muenyi udi munkatshi muabo nebuikale bubuikidibue, bualu bua bakadi benze bualu ebu ku mpukahuka. Bikala mundi muenze bualu bubi ku mpukahuka, neafile muana mukashi wa mbushi wa tshidimu tshimue bu mulambu wa kubuikila nʼau bubi. Muakuidi neafile mulambu wa kubuikila nʼau bubi bua mundi wakenza bualu ku mpukahuka ku mpala kua Yehowa, ne bubi buandi nebuikale bubuikidibue. Nenuikale ne mukenji umue kudi muntu mulela munkatshi mua Bena Isalele ne kudi muenyi udi munkatshi muenu, henzeye bualu bubi ku mpukahuka. Kadi muntu udi wenza bualu bubi ne mutshima mukole nansha muntu mulela munkatshi muenu nansha muenyi, muntu au udi uhenda Yehowa, nebamumushe munkatshi muabo. Bualu bua yeye wakalengulula dî dia Yehowa, wakashiha mukenji wandi, nebamûmushilemu bulelela, neadituadile bubi buandi. Hakadi Bena Isalele mu tshihela, bakasangana muntu wangula nkunyi dî diku dia Lumingu. Bantu bakamusangana hakadiye wangula nkunyi, bakalua nʼandi kudi Mose ne Alona ne kudi tshisumbu tshionso tshia Bena Isalele. Bakamuela mu lukanu, bualu bua kabakamanya dî dia Yehowa diakasueye kungenzela. Yehowa wakambila Mose ne, Nebashihe muntu au bulelela bantu bonso nebamukume ne mabue ku butshika bua tshitudilu. Bantu bonso ba mu tshisumbu bakalua nʼandi ku butshika bua tshitudilu, bakamushiha ne mabue, bu muakambila Yehowa Mose. Yehowa wakambila Mose ne, Wambile Bena Isalele bua bobo ne tunkanunuma tuabo badienzele malenda ku bilulu biabo, ne bobo bateke muonshi wa bleu ku malenda abo. Hanuatangila malenda au, nuvuluke mikenji ya Yehowa, nuyenze, kanulondi mitshima yenu ne mesu enu adi anuenzesha malu a masandi, nuenu nuvuluke mikenji yanyi yonso, nuyenze, nuikale bantu ba tshijila kudi Nzambi wenu. Meme nda Yehowa, Nzambi wenu, wakanuhatula mu buloba bua Ejipitu, bua kuikala Nzambi wenumeme ndi Yehowa, Nzambi wenu. Kola, muana mulume wa Yiseha, muana mulume wa Kohata, muana mulume wa Lewi, ne Datana ne Abilama, bana balume ba Eliaba, ne Ono, muana mulume wa Pelete, bana balume ba Lubena, bakabika ne Bena Isalele bakuabo ne bakelenge ba mu tshisumbu bu nkama ibidi ne makumi atanu, bantu bakadi ne lumu lunene, bakadisangisha bua kufuilangana ne Mose ne Alona, bakabambila ne, Nudi nutamba kudienzela malu, bualu bua bantu bonso mbantu ba tshijila ne Yehowa udi munkatshi muabo nuenu nudi nudibandisha ku mutu kua bantu ba Yehowa munyi? Hakunvua Mose dî edi, yeye wa kakuma mpala hanshi, wakambila Kola ne bakadiye habo ne, Dinda Yehowa neadileshe bantu bandi, ne nganyi udi wa tshijila, neamubikile ku mpala kuandi, neabifile wasunguleye ku mpala kuandi. Nuenze bienu nunku Kola ne bantu hadiye habo bangate malonga a kahia, batekemu kahia, batekehu musenga wa manananshi ku mpala kua Yehowa makelela, ne muntu udi musungudibue kudi Yehowa neikale muntu wa tshijila, nuenu bana balume ba Lewi nudi nutamba kudienzela malu. Mose wakambila Kola ne, Unvuai, bana balume ba Lewi: nudi nuelangana meji ne bualu ebu budi bukese bua Nzambi wa Isalele wakamujidila munkatshi mua Bena Isalele, bua nuenu nulue ha buihi nʼandi kumukuatshia mudimu mu nsubu wa Yehowa, ne bua kukuatshila tshisumbu tshonso mudimu kabidi, yeye wakanuhatula ne bana benu bonso ba Lewi ha buihi nʼandi, nuenu nudi nudikebela mudimu wa buakuidi kabidi, anyi? Wewe ne bantu baudi nʼabo nuakudisangisha bua kuelangana ne Yehowa! Alona udi nganyi bua nuenu nudi numutontolola? Mose wakabikila Datana ne Abilama, bana balume ba Eliaba, ne bobo bakamba ne, Katuena tulua, bualu budi bukese bua wewe wakumuka nʼetu mu buloba budi bûle tente ne mabele ne buitshi bua kubishiha mu tshihela, udi musue kudibandisha bu mukelenge wetu kabidi, anyi? Bualu bukuabo, wewe kuena muanze kulua nʼetu mu buloba budi bûle tente ne mabele ne buitshi, kuena mutuhe buhianyi bua madimi ne madimi a tumuma, udi musue kuvuisha bantu aba bafofo, anyi? Katuena tulua. Mose wakadi ne tshiji tshikole ne yeye wakambila Yehowa ne, Kuitabusha milambu yabo nansha, meme tshiakunyenga umue wabo nyama wandi wa mpunda, tshiakuenzela umue wabo bibi. Mose wakambila Kola ne, Wewe ne bantu bonso baudi habo nuikale ku mpala kua Yehowa ne kua Alona makelela: mundi yonso angate dilonga diandi dia kahia, atekehu musenga wa manananshi, bantu bonso balue ne malonga nkama ibidi ne makumi atanu ku mpala kua Yehowa, ne wewe ne Alona, mundi ne dilonga diandi mundi ne dilonga diandi. Muntu yonso wakangata dilonga diandi, wakatekamu kahia, wakatekahu musenga wa manananshi, bakimana ne Mose ne Alona ku mbelu kua nsubu wa tshitendelelu. Kola wakabikila tshisumbu tshonso tshia batomboki ku mbelu kua nsubu wa tshitendelelu, ne butumbi bua Yehowa buakamueneka kudi tshisumbu tshonso. Yehowa wakambila Mose ne Alona ne, Umukai bienu munkatshi mua tshisumbu etshi, nembashihe mu tshituha tshikese. Bobo bakadikuma hanshi, bakamba ne, Nzambi, Nzambi wa mioyo ya bantu, wewe newikale ne tshisumbu tshonso tshiji bua bubi bua mundi umue, anyi? Yehowa wakambila Mose ne, Wambile tshisumbu tshonso ne, Umukai ku nsubu wa tshitendelelu wa Kola ne Datana ne Abilama. Mose wakabika, wakaya kudi Datana ne Abilama, ne bakulu ba mu Isalele bakamulonda ku nyima. Yeye wakambila tshisumbu tshia bantu ne, Umukai, ndi nnusengelela, ku ntenta ya bantu aba babi, kanulengi tshintu tshiabo tshianza, kabanushihi bua mibi yabo. Nunku bakumuka ku nsubu wa tshitendelelu wa Kola ne Datana ne Abalama ku nseke yonso: ne Datana ne Abilama bakaluhuka, bakimana ku mbelu kua ntenta yabo ne bakashi babo ne bana babo balume ne bana babo bakese. Mose wakamba ne, Nenumanye ne Yehowa wakatuma bua kuenza malu au onso, tshiakadienzela bualu bua mutshima wanyi. Biafila balume aba bu mudi bantu bonso bafue, anyi biabakuata bualu bu mudibu bukuata bantu bonso, nunku Yehowa kena muntume. Kadi bikala Yehowa wenza bualu buhia-buhia, ne buloba bubulula mukana muabu bubamina ne bantu bonso hadibo nʼabo, ne bobo baya ku Muaba wa Bafue hatshidibo ne muoyo, nunku nenumanye ne bantu aba bakalengulula Yehowa. Hakashikisheye kubambila mei a onso, buloba buakahandika muinshi mua makasa abo, buloba buakubulula mukana muabu, buakabamina ne bantu bonso ba mu nsubu yabo ne bantu bonso bakalamata Kola ne bintu biabo bionso. Nunku bobo ne bantu bonso bakalamata kudibo bakaya mu Muaba wa Bafue hakadibo ne muoyo, ne buloba buakabuikila mukana muabu ku mutu kuabo, ne bobo biakajimina munkatshi mua tshisumbu. Bena Isalele bonso bakadi ha buihi habo bakanyema hakunvuabo muadi wabo, bobo bakamba ne, Buloba kabutuminyi. Kahia bakahatuka kudi Yehowa, kakosha balume nkama ibidi ne makumi atanu bakadi bafila musenga wa manananshi. Yehowa wakambila Mose ne, Wambile Eleazâ, muana mulume wa Alona muakuidi, bua yeye angate malonga munkatshi mua kahia, ne wewe utangalashe kahia kuaka ebi mbintu bia tshijila, malonga a bantu aba babi bakadijinushila mioyo yabo, wenze nʼau tshibuikilu tshia tshioshelu bobo bakâfila ku mpala kua Yehowa, nunku adi bintu bia tshijila, neikale bu tshivulukidi kudi Bena Isalele. Eleazâ muakuidi wakangata malonga a tshiamu tshia mitaku akatuabo, bakâtula bu tshibuikilu tshia tshioshelu, bua kuikalau tshivulukidi kudi Bena Isalele ne kubamanyisha ne, Muntu udi kayi muana wa Alona, kalu ha buihi bua kuosheye musenga wa manananshi ku mpala kua Yehowa, kenji bu Kola ne bantu bandi, bu muakambila Yehowa Mose. Kadi hakatshiabu Bena Isalele bonso bakatontolola Mose ne Alona ne, Nuenu nuakushiha bantu ba Yehowa. Hashishe bakadisangisha tshisumbu tshia bantu bua kuelangana ne Mose ne Alona, baka tangila ku ntenta wa kusambakena, ne monai, difutu diakamubuikila ne butumbi bua Yehowa buakamueneka, Mose ne Alona bakatua ku mbelu kua ntenta wa kusambakena. Yehowa wakambila Mose ne, Umuka biebe munkatshi mua tshisumbu etshi tshia bantu, nenubashihe mu tshituha tshihi. Bobo bakahaula mpala yabo hanshi. Mose wakambila Alona ne, Angata dilonga dia kahia, tekahu kahia ka ku tshioshelu, tekahu musenga wa manananshi, uye biebe lubilu kudi tshisumbu tshia bantu, bua kubabuikidila bubi buabo, bualu bua tshiji tshiakumana kuhatuka kudi Yehowa, disama dikole diakumana kubanga. Alona wakangata dilonga diandi bu muakamba Mose, wakaya lubilu munkatshi mua tshisumbu tshia bantu, ne monai, disama dikole diakamana kubanga munkatshi mua bantu, yeye wakatekahu musenga wa manananshi bua kubuikidila bantu bubi buabo. Wakimana biandi hankatshi ha bantu bafue ne bantu bakatshidi ne muoyo, ne disama diakashika. Bungi bua bantu bakafua ku disama edi bakadi binunu dikumi ne binai ne nkama muanda mutekete, ha mutu ha bantu bakafua bua bualu bua Kola. Alona wakahingana kudi Mose ku mbelu kua ntenta wa kusambakena, disama diakashika. Yehowa wakambila Mose ne, Ela dî kudi bana ba Isalele, usungule bantu dikumi ne babidi badi bakelenge ba nsubu ya batatuʼabo, wewe wangata milangala kudibo, muntu ne mulangala wandi muntu ne mulangala wandi, wewe ufunde dina dia muntu ne muntu ha mulangala wandi. Wewe neufunde dina dia Alona ha mulangala wa tshisamba tshia Lewi, bualu bua wewe neusungule mulangala umue kudi muntu ne muntu udi ku mutu kua nsubu ya batatuʼabo. Wewe neuyiteke mu ntenta wa kusambakena ku mpala kua mushete kundi ndimuenesha, muaba utudi tusangakana nʼebe. Hashishe mulangala wa muntu unakusungula newele ntonga, meme nenshikishe kutontolola kua Bena Isalele kudibo bakutontolola. Mose wakamanyisha Bena Isalele, bakelenge babo bakamuha milangala dikumi ne ibidi, mukelenge mulangala wandi mukelenge mulangala wandi, bu mu nsubu ya batatuʼabo, ne mulangala wa Alona wakadi munkatshi mua milangala yabo. Mose wakateka milangala ku mpala kua Yehowa mu ntenta wa kusambakena. Hakatshiabu Mose wakabuela mu ntenta wa kusambakena, ne monai, mulangala wa Alona wa mu nsubu wa Lewi wakadi muele ntonga ne bilongo, wakakuama tumuma tukese tua amandes. Mose wakaluhuka ku mpala kua Yehowa ne milangala yonso kudi Bena Isalele bobo bakatangila ne muntu yonso wakangata mulangala wandi. Yehowa wakambila Mose ne, Hingasha mulangala wa Alona ku mpala kua mushete, bu tshivulukidi kudi bantu badi basue kutomboka, neumanye mua kushikisha kutontolola kudibo bantontolola nʼaku bua bobo kabafu nansha. Mose wakenza nunku bu muakamuambila Yehowa, mbu muakenzeye. Bena Isalele bakambila Mose ne, Mona! tudi bafue, ditu tuahanga, ditu tuahanga bonso. Muntu yonso udi ulua ha buihi ne nsubu wa Yehowa utu wadia: buonso buetu netulue, anyi? Yehowa wakambila Alona ne, Wewe ne bana bebe balume ne ba mu nsubu wa ba tatuʼebe nenutuale mahambuka a ku buakane a bantu mu nsubu wa tshitendelelu, wewe ne bana bebe balume nenutuale mahambuka a mudimu wenu wa buakuidi. Bana benu kabidi, tshisamba tshia Lewi, tshisamba tshia tatuʼebe, ulue nʼabo bua bobo bakukuatshile mudimu kadi wewe ne bana bebe balume badi nʼebe nenuikale ku mpala kua ntenta wa kusambakena. Bobo nebalame bintu biebe ne bintu bia mu Ntenta: kadi bobo kabalu ha buihi ne malonga a mu nsubu anyi tshioshelu, bua bobo kabafu ne nuenu kanufu kabidi. Bobo nebakukuatshishe bua bintu bia mu ntenta wa kusambakena, ne mu mudimu wonso wa Ntenta muenyi kalu ha buihi nʼenu. Nuenu nenulame tshitendelelu ne tshioshelu, nunku mulau mukuabo kaukuatshi Bena Isalele. Mona! Meme nakadiangatshila bana benu, Bena Lewi, munkatshi mua Bena Isalele badi bu kuha kuebe kuwakuha Yehowa bua kuenza mudimu wa mu ntenta wa kusambakena. Wewe ne bana bebe balume badi nʼebe nenuikale ne mudimu wa buakuidi bua bintu bionso bia tshioshelu ne bintu bidi ku nyima kua tshilulu tshikudika, nuenu nenuenze mudimu eu, nakunuha mudimu wa buakuidi bu mudimu wa kuha kuenu, muenyi udi ulua ha buihi, nebamushihe. Yehowa wakambila Alona ne, Mona, meme nakakuteka ku mutu kua milambu yanyi idibo banyukula ne bintu bionso bidi Bena Isalele bajila, nakakuha bintu ebi bu tshituha tshia bintu biebe bualu bua kujidila kuebe ne kua bana bebe balume tshiendelele. Nebikale bintu biebe munkatshi mua bintu biakajidilabo ku kahia milambu yabo yonso, ne ya bukula, ne ya kubuikila nʼai bubi buabo, ne ya kubuikila nʼai kusambuka kuabo kua mikenji, milambu idibo bafila kundi neyikale bu tshintu tshia tshijila kûdi ne kudi bana bebe balume. Wewe neudie bintu ebi bia tshijila, muntu mulume yonso neadie bintu ebi ebi mbintu biebe bia tshijila. Ebi mbintu biebe kabidi: bintu bidi Bena Isalele banyukula, ne milambu yonso idibo bakuha, nakunuha ne bana bebe balume ne bana bebe bakashi badi nʼebe, bu tshintu tshienu tshiendelele muntu yonso udi muakane mu nsubu webe neabidie. Bintu bimpe bia manyi ne bia tumuma tukese ne bia manvua ne bia mamuma adibo bahuola diambedi, bintu bionso bidibo bafila kudi Yehowa, nakukuha bintu ebi. Mamuma mimpe a mu buloba buabo buonso adibo bahuola diambedi, adibo halua nʼau kudi Yehowa, neikale mamuma ebe, muntu yonso wa mu nsubu webe udi muakane neadie. Tshintu tshionso tshidibo bajila mu Isalele netshikale tshiebe. Bintu bionso bidibo balela, ne bia bantu ne bia nyama idibo bafila kudi Yehowa, nebikale biebe, kadi wewe neuhikule banʼa bute ba bantu ne banʼa bute bonso ba nyama idi kayiyi miakane. Bintu bidi ne bualu bua kuhikudibua bia ngondo umue, wewe neubihikule bu mudi mushinga wabi, nshekele itanu bu nshekele wa mu nsubu wa tshitendelelu (nshekele udi bu guéras makumi abidi). Kadi banʼa bute ba ngombe ne ba mikoko ne ba mbushi, wewe kuena ubihikula, ebi mbintu bia tshijila wewe neumiamine mashi abi ha tshioshelu, newoshe dianyi diabi bu mulambu wa kuosha ha kahia, bu tshintu tshidi tshitua dihembu kudi Yehowa. Munyinyi wabi newikale webe bu mudi tshiadi tshidibo banyukula ne tshibelu tshia ku tshianza tshia bukole. Milambu yonso ya bintu bia tshijila bidibo banyukula bidi Bena Isalele bafila kudi Yehowa, nakunuhabi ne bana bebe balume ne bana bebe bakashi, bu tshintu tshienu tshiendelele: etshi ntshihungidi tshia luehu tshia tshiendelele ku mesu kua Yehowa kûdi wewe ne kudi bana bebe badi nʼebe. Yehowa wakambila Alona ne, Wewe kuena ne buhianyi mu buloba buabo, wewe kuena ne tshituha munkatshi muabo meme ndi tshituha tshiebe ne buhianyi buebe munkatshi mua Bena Isalele. Mona, nakuha Bena Lewi tshintu tshia dikumi tshionso tshia mu Isalele bu buhianyi buabo bua mudimu udibo benza mu ntenta wa kusambakena. Bena Isalele kabalu ha buihi ne ntenta wa kusambakena bua kabadituadidi bubi buabo, kabafu. Kadi Bena Lewi nebenze mudimu wa mu ntenta wa kusambakena, bobo nebadituadile bubi buabo eu udi mukenji wa tshiendelele ku bikondo bienu bionso, bobo kabena ne buhianyi munkatshi mua Bena Isalele. Bualu bua nakuha Bena Lewi tshintu tshia dikumi tshia Bena Isalele tshidibo banyukula kudi Yehowa, bu buhianyi buabo, bua bualu ebu nakubambila ne, Kabena ne buhianyi munkatshi mua Bena Isalele. Yehowa wakambila Mose ne, Wambile Bena Lewi ne, Hanuangata tshintu tshia dikumi tshia bintu bia Bena Isalele tshinakunuha bu buhianyi buenu, nenutshinyukule bu mulambu udibo banyukula kudi Yehowa, tshintu tshia dikumi tshia tshintu tshia dikumi tshiakanuhabo. Nebanubadile mulambu udibo banyukula bu bintu biakushihulabo ku tshishihuidi ne bu bintu biakukamabo ha tshikaminu. Nunku nuenu nenufile mulambu wa bia dikumi bionso binudi nuangata kudi Bena Isalele bu mulambu udibo banyukula kudi Yehowa, wewe neuhe Alona muakuidi mulambu eu wa bintu bidibo banyukula kudi Yehowa. Nenufile tshituha tshia bintu bienu bionso bu mulambu udibo banyukula kudi Yehowa nenufile bintu bidi bitamba buimpe, bintu bia tshijila mene. Nunku wewe mubambile ne, Hanuanyukula bintu bidi bitamba buimpe, bintu ebi nebikale bibadibue kudi Bena Lewi bu bintu biakuvulangana ku tshishihuidi ne ha tshikaminu. Nenudie bintu ebi mu miaba yonso, ne nuenu ne ba mu nsubu yenu edi ndifutu dienu diakanufutabo bua mudimu wenu mu ntenta wa kusambakena. Bua bualu ebu kanuena nudituadila bubi, hanuanyukula bintu bidi bitamba buimpe kanuena nuona bintu bia tshijila bia Bena Isalele, bua nuenu kanufu. Yehowa wakambila Mose ne Alona ne, Eu udi mukenji wakuela Yehowa ne, Nuambile Bena Isalele bua bobo balue kûdi ne muana wa ngombe mukunze, udi kayi ne ditoba anyi tshilema, udi kayi muanze kuya muinshi mua mutshi wa tshikokedi. Nenumuhe Eleazâ muakuidi, yeye nealue nʼandi ku butshika bua tshitudilu, nebamushihe ku mesu kuandi, ne Eleazâ muakuidi neangate mashi andi ku munu wandi, neamiamine mashi ku luseke lua tshibuelelu tshia ntenta wa kusambakena misangu muanda mutekete. Umue wabo neoshe muana wa ngombe ku mesu kuandi, ne tshiseba tshiandi ne munyinyi wandi ne mashi andi ne tunvi tuandi: ne muakuidi neangate mitshi ya cèdre, ne mabeshi a hysope, ne bintu bikunzubile, neabiele munkatshi mua kahia kadi kosha muana wa ngombe. Hashishe muakuidi neuvuwe bilulu ne mubidi wandi ne mai, ne ku nyima nealue biandi mu tshitudilu, neikale bu muntu udi kayi muakane tô ne ku dilolo. Muntu wakanuisha ne kahia neuvuwe bilulu biandi ne mubidi wandi ne mai, ne yeye neikale bu muntu udi kayi muakane tô ne ku dilolo. Muntu udi muakane neasangishe butue buonso bua muana wa ngombe, neabuteke ku butshika bua tshitudilu ha muaba mutoke, nebabulamine tshisumbu tshia Bena Isalele bu mai a kulengesha hau bubi eu udi bu mulambu wa kubuikila nʼau bubi. Muntu udi usangisha butue bua muana wa ngombe neuvuwe bilulu biandi, neikale bu muntu udi kayi muakane to ne ku dilolo eu udi mukenji wa Bena Isalele ne wa muenyi udi munkatshi muabo tô ne tshiendelele. Muntu udi ulenga bianza ha mubidi wa muntu mufue neikale bu muntu udi kayi muakane tô matuku muanda mutekete, yeye neadilengeshe ne mai au dituku disatu, ne halua dituku dia muanda mutekete yeye neikale muakane, kadi biahidieye kudilengesha dituku disatu, halua dituku dia muanda mutekete yeye kena wikala muakane. Muntu yonso udi ulenga muntu mufue bianza, mubidi wa muntu mumane kufua, ne kena udilengesha, yeye udi wona nsubu wa Yehowa, nebamumushe munkatshi mua Bena Isalele, bualu bua kabakamumiamina mai a kumulengesha nʼau, yeye kena wikala muakane, ne bubi buandi butshidi hamʼbidi handi. Eu udi mukenji wa hafuila mundi mu ntenta mundi yonso udi ubuela mu ntenta au, ne mundi yonso wakadi mu ntenta au neikale bu mundi udi kayi muakane tô matuku muanda mutekete. Malonga onso a mu nsubu, adi kayi ne bibuikidi, neikale bu tshintu tshidi katshiyi tshiakane. Muntu yonso wa mu budimi udi ulenga mundi wakafua ku muele wa nvita bianza, anyi mubidi wa mundi mufue, anyi mufuba wa mundi, anyi lukita, neikale bu mundi udi kayi muakane tô matuku muanda mutekete. Muntu udi kayi muakane neangate butue bua mulambu wakoshabo bua kubuikila nʼau bubi, neangate mai adi ahueka mu dilonga: mundi utshidi muakane neangate mabeshi a hysope, neâtue mu mai, neamiamine ha ntenta, ne ha malonga onso, ne ha bantu bonso bakadimu, ne mundi wakalenga mifuba tshianza, anyi mundi wakafua ku muele wa nvita, anyi mundi mufue, anyi lukita, mundi utshidi muakane neamiamine mai ha mundi udi kayi muakane dî diku disatu ne dituku dia muanda mutekete, ne halua dituku dia muanda mutekete neamulengeshe, yeye neuvuwe bilulu biandi ne mubidi wandi ne mai, neikale muakane ku dilolo. Kadi mundi udi kayi muakane ne kena udilengesha, nebamumushe munkatshi mua tshisumbu, bualu bua yeye wakuona nsubu wa tshitendelelu, kabakamumiamina mai a kumulengesha nʼau, yeye kena muakane. Eu newikale mukenji wa tshiendelele kudibo muntu udi umiamine mai a kubalengesha nʼau, neuvuwe bilulu biandi, muntu udi ulenga mai a kubalengesha nʼau tshianza neikale bu muntu udi kayi muakane tô ne ku dilolo. Bintu bionso bidi muntu udi kayi muakane ulenga bianza nebikale bu bintu bidi kabiyi biakane, ne muntu udi ubilenga tshianza neikale bu muntu udi kayi muakane tô ne ku dilolo. Bena Isalele bonso bakalua mu tshihela tshia Sina mu ngondo wa kumudilu, bakashikama mu Kadesha, Mîyama wakafua, bakamujikamu. Bantu kabakadi ne mai a kunua, bakadisangisha kudi Mose ne kudi Alona. Bantu bakatandangana ne Mose, bakamba ne, Biakadi bimpe bua tuetu kufua bu muakafua bana betu ku mesu kua Yehowa! Nuakulua ne bantu ba Yehowa mu tshihela etshi bualu bua kubishiha ne nyama yetu munyi? Bualu kai nuakatuhatula mu Ejipitu bua kulua nʼetu mu muaba eu mubi? Kimoko kakuena bintu bia kukuna nansha mamuma a nfigi nansha tumuma tukese nansha mamuma a grenade, kakuena mai a kunua. Mose ne Alona bakumuka ku mesu kua bantu, bakaya ku mbelu kua ntenta wa kusambakena, bakatua mpala yabo hanshi. Butumbi bua Yehowa buakamueneka kudibo. Yehowa wakambila Mose ne, Angata mulangala, usangishe bantu bonso ne wewe ne Alona mukuluʼebe, wewe wambile dibue didi ku mesu kuabo, dihatule mai, wewe neubahatuile mai ku dibue, wewe neubanuishe mai ne bimuna biabo. Mose wakangata mulangala ku mpala kua Yehowa bu muakamuambileye. Mose ne Alona bakasangisha bantu bonso ku mpala kua dibue, ne yeye wakabambila ne, Unvuai, bena kutomboka, netunuhatuile mai ku dibue edi, anyi? Mose wakabandisha tshianza tshiandi, wakakuma dibue ne mulangala wandi misangu ibidi, mai a bungi akabuluka, ne bantu bonso bakanua, ne bimuna biabo. Yehowa wakambila Mose ne Alona ne, Bualu bua nuenu kanuakungitabusha bua kunjidila ku mesu kua Bena Isalele, nunku kabuena nulua ne bantu aba mu buloba bunakubaha. Au adi mai a Meliba, bualu bua Bena Isalele bakatanda ne Yehowa, ne yeye wakajidibua ku mesu kuabo. Mose wakatuma miloho ku Kadesha kudi mukelenge wa Edome ne, Muanʼenu Isalele udi wamba ne, Wewe udi mumanye makenga onso akutukuata: bankambua betu bakaya mu Ejipitu, ne tuetu tuakashikama mu Ejipitu musangu mule, Bena Ejipitu bakadienzela bibi ne bankambua betu kabidi: ne hatuakadila kudi Yehowa, yeye wakumpa dî dietu, wakatuma muanjelo wakatuhatula mu Ejipitu, ne tangila, tudi mu Kadesha, musoko udi ku butshika bua buloba buenu mene. Ndi nkusengelela ne, Nuitabushe bua tuetu tuhite ku buloba buenu, katuena tuhita mu madimi anyi mu madimi a tumuma, katuena tunua mai a mena a mai anuakumbula, netuye anu mu musesu wa mukelenge, katuena tusesuka ku tshianza tshia balume anyi ku tshianza tshia bakashi tô ne hakahita butshika buenu. Mukelenge wa Edome wakamuambila ne, Nansha, kanuena nuhita, nendue kusangana nʼebe ne muele wa nvita. Bena Isalele bakamuambila ne, Netuye anu mu musesu munene, bituanua mai ebe nansha tuetu nansha bimuna bietu, netukufute, anji kuitabusha bua tuetu tuhite anu ha makasa etu, katuena bienza bualu bukuabo. Yeye wakamba ne, Kanuena mua kuhita. Mukelenge wa Edome wakalua ne bantu ba bungi, ne tshianza tshikole. Nunku mukelenge wa Edome wakahidia bua Bena Isalele bahite butshika buandi, nunku Bena Isalele bakasesuka kuakadiye. Bakabisha luendu luabo mu Kadesha, ne Bena Isalele bonso bakalua ku mukuna wa Hô. Yehowa wakambila Mose ne Alona mu mukuna wa Hô, hehi ne butshika bua buloba bua Edome ne, Alona neadisangishe kudi bankambua bandi, yeye kena ubuela mu buloba bunakalaya Bena Isalele, bualu bua nuenu nuakuhidia dî dianyi ku mai a Meliba. Wangate Alona ne Eleaza, muanʼandi mulume, ulue nʼabo ku mukuna wa Hô, uvule Alona bilulu biandi, ubiluatshishe Eleazâ, muanʼandi mulume, Alona neasangakene ne bankambua bandi, neafue biandi. Mose wakenza muakamba Yehowa, bakaya ku mutu kua mukuna wa Hô ku mesu kua bantu bonso. Mose wakavula Alona bilulu biandi, wakabiluatshisha Eleazâ, muanʼandi mulume, ne Alona wakafua biandi ha mutu ha mukuna, ne Mose ne Eleazâ bakahueka mu tshibanda. Hakatangila bantu bonso ne Alona wakafua, Bena Isalele bonso bakamujinga tô matuku makumi asatu. Atada, mukelenge wa Bena Kanâna, wakadi ushikama ku luseke lua ku Sude, wakunvua lumu ne, Bena Isalele badi baya mu nshila wa ku Atalima, yeye wakaluangana ne Bena Isalele, wakaya ne bakuabo mu lukanu. Bena Isalele bakaditshiha kudi Yehowa ne, Biwafila bantu aba mu bianza bietu, netushihe misoko yabo yonso. Yehowa wakulua dî dia Bena Isalele, wakafua Bena Kanâna mu bianza biabo, bakabashiha ne misoko yabo yonso, ne dina dia muaba au diakadi Hôma. Bakumuka ku mukuna wa Hô, bakaya mu nshila wa ku Dishiba Dikunze bualu bua kunyunguluka ku nyima kua buloba bua Edome, mitshima ya bantu yakahanga bualu bua nshila. Bantu bakajiana Nzambi ne Mose kabidi ne, Nuakatuluhuila mu Ejipitu bua kutufuisha mu tshihela nunku bua tshinyi? Kakuena bia kudia, kakuena mai, ne bidia ebi bia tshianana biakututonda. Yehowa wakatuma nyoka idi isuma bu kahia kosha munka tshi mua bantu, yakasuma bantu, bantu ba bungi ba Isalele bakafua. Bantu bakalua kudi Mose, bakamba ne, Tuakuenza bibi bualu bua tuetu tuakujiana Yehowa ne wewe kabidi, ulombe Yehowa atumushile nyoka munkatshi muetu Mose wakalombela bantu Nzambi. Yehowa wakambila Mose ne, Enza biebe nyoka ne mubidi bu kahia, umuteke kulu kua mutshi, nunku hamutangila mundi musumibue, neikale ne muoyo. Mose wakenza nyoka ne tshiamu tshia mitaku, wakamuteka kulu kua mutshi, hashishe bakatangila mundi musumibue nyoka wa tshiamu tshia mitaku, wakadi ne muoyo kabidi. Bena Isalele bakaya, bakashikama mu Oboto. Bakumuka mu Oboto, bakashikama mu Iye-habalima, mu tshihela tshidi ku mpala kua Moaba, kudi diba dihatuka. Bakumukamu, bakashikama mu tshibanda tshia Zalede. Bakumukamu, bakashikama dishiya dia mai a Ânona, mu tshihela tshidi ku butshika bua buloba bua Bena Amole, mai a Ânona adi ku butshika bua Moaba, hankatshi ha Moaba ne Bena Amole. Nunku bakafunda mu mukanda dina diau Nvita ya Yehowa ne, Waheba wa mu Sufa ne tshibanda tshia Ânona, buloba budi busendama mu tshibanda ku musoko wa Ala hehi ne butshika bua Moaba. Bakumukamu, bakaya ku Bê, ku mpokolo wa mai, wakambila Yehowa Mose ne, Usangisheku bantu, nembanuishe mai. Hashishe Bena Isalele bakimba musambu eu ne, Mai abande, nuenu nuimbile musambu; mpokolo wa mai wakumbulabo kudi bakelenge, ne kudi miloho ya bantu ne dikombo dia bukelenge ne milangala yabo. Bakumuka mu tshihela, bakaya ku Matana: bakumuka ku Matana, bakaya ku Nahaliele, bakumuka ku Nahaliele, bakaya ku Bamota, bakumuka ku Bamota, bakaya mu tshibanda tshia mu buloba bua Moaba tô ne ku mutu kua mukuna wa Pisega, kuakatangilabo tshihela. Bena Isalele bakatuma miloho kudi Sihona, mukelenge wa Bena Amole, ne, Witabushe bua tuetu tuhitshile ku buloba buebe, katuena tusesuka mu madimi anyi mu madimi a tumuma, katuena tunua mai a mena a mai anuakumbula, netulonde anu mu musesu wa mukelenge tô ne hatuahita ku butshika bua buloba buebe. Sihona wakahidia bua Bena Isalele bahite ku buloba buandi, kadi Sihona wakasangisha bantu bandi bonso, wakaya kudi Bena Isalele mu tshihela tô ne ku Yahasa; wakatuangana nvita ne Bena Isalele. Bena Isalele bakamushiha ne muele wa nvita, bakanyenga buloba buandi ku mai a Ânona tô ne ku mai a Yaboka ku butshika bua buloba bua Bena Amona, bualu bua butshika bua buloba bua Bena Amona buakadi bukole. Bena Isalele bakanyenga bimenga ebi bionso Bena Isalele bakashikama mu bimenga bionso bia Bena Amole, mu Heshebona ne mu misoko ei yonso. Heshebona wakadi tshimenga tshia Sihona, mukelenge wa Bena Amole, wakadi uluangana ne mukelenge mukuabo wa Moaba, wakanyenga buloba buandi buonso mu tshianza tshiandi to ne ku mai a Ânona. Nunku badi belangana nsumuinu ne, Luai bienu ku Heshebona, musoko wa Sihona wikale muibakibue, Bualu bua kahia kakumuka ku Heshebona, ludimi lua kahia ku musoko wa Sihona, luakosha Ala wa Moaba ne bakelenge ba ku mikuna ya mai a Ânona. Mulau ukukuate, Moaba! Nuenu, Bena Kamoshe, nudi bajimine! Bakatua bana babo balume bu banyemi, ne bana babo bakashi bu bena lukanu kudi Sihona, mukelenge wa Bena Amole. Tuakabasa mikete, musoko wa Heshebona udi muhaula tô ne ku Dibona, tuakunyanga buloba tô ne ku Nofa ne ku Medeba. Nunku Bena Isalele bakashikama mu buloba bua Bena Amole. Mose wakatuma bantu bua kutentekelabo buloba bua Yazê, ne bakanyenga misoko ei kabidi, bakihata Bena Amole bakadimu. Bakasesuka, bakaya mu nshila wa ku Bashana, ne Oga, mukelenge wa Bashana, wakaya ne bantu bandi bonso bua kusangana nʼabo nvita ku Edelei. Yehowa wakambila Mose ne, Kumutshinyi nansha, bualu bua nakamufila mu tshianza tshiebe, ne bantu bandi bonso ne buloba buandi, wewe neumuenzele bu muwakuenzela Sifiona, mukelenge wa Bena Amole, wakadi ushikama mu Heshebona. Nunku bakamushiha ne bana bandi balume ne bantu bandi bonso, nansha mundi umue wakashala, bakanyema buloba buandi. Bena Isalele bakaya ku luendu, bakashikama mu mpata wa Moaba dishiya dia mai a Yadene, batangilangana ne Yeleko. Balaka, muana mulume wa Sipô, wakatangila malu onso akenzela Bena Isalele Bena Amole. Bena Moaba bakatamba kutshina bantu, bualu bua bungi buabo; mitshima ya Bena Moaba yakanyingalala bualu bua Bena Isalele. Mukelenge wa Moaba wakambila bakulu ba Midiyana ne, Bantu aba bd bungi nebatukengeshe bu mudi ngombe ukongolesha mashinde a mu budimi ne ludimu luandi Balaka, muana mulume wa Sipô, wakadi mukelenge wa Moaba ku tshikondo atshi. Yeye wakatuma miloho kudi Belâma, muana mulume wa Beô, ku Petô udi hehi ne musulu wa Pelata ku buloba bua bantu bandi bualu bua kumubikila ne, Tangila, bantu bakaluhuka mu Ejipitu, tangila, badi batangalaka buloba buonso, badi bashikama hehi nʼanyi. Nunku lua biebe, ndi nkusengelela, ungelele bantu aba mulau, bualu bua bobo badi bantamba bukole, hashishe nembahite bukole, netubashihe, nengihate mu buloba, bualu bua ndi mumanye ne, Muntu ûdi uvudishila disanka neikale ne disanka, ne mundi ûdi wela mulau neikale ne mulau. Bakulu ba Bena Moaba ne bakulu ba Midiyana bakaya ne bintu bia kumubila nʼabi mu bianza biabo, bakatua kudi Belâma, bakamuambila mei onso a Balaka. Yeye wakabambila ne, Nulale bienu kunoko butuku ebu, nennuambile dî kabidi, bu mudi Yehowa ungambila, ne bakelenge ba Moaba bakashala ne Belâma. Nzambi wakamueneka kudi Belâma wakamuambila ne, Balume aba badi kuebe mbantu kai? Belâma wakambila Nzambi ne, Balaka, muana mulume wa Sipô, mukelenge wa Moaba, wakantumina dî ne, Bantu bakaluhuka mu Ejipitu, bakatangadika buloba buonso, lua biebe, ubangelele mulau, hashishe nemmanye mua kuluangana nʼabo, nembihate. Nzambi wakambila Belâma ne, Kuyi nʼabo, kuedi bantu aba mulau nansha, bantu aba badi basankishibue. Belâma wakabika dinda, wakambila miloho ya Balaka ne, Yai bienu ku buloba buenu, Yehowa wakahidia bua meme kuya nʼenu. Miloho ya Moaba yakabika, yakahingana kudi Balaka, yakamba ne, Belâma udi uhidia bua kulua nʼetu. Balaka wakatuma miloho mikuabo, yakahita miloho mikuabo butumbi. Yakalua kudi Belâma, yakamuambila ne, Balaka, muana mulume wa Sipô, udi wamba ne, Kuitabusha bua bualu buonso bukuhumbishe bua kulua kundi, bualu bua meme nenkuhe butumbi bunene, nengenze mei onso audi wamba, lua biebe, ndi nkusengelela, ungelele bantu aba mulau. Belâma wakitaba kudi miloho ya Balaka ne, Biampa Balaka nsubu wandi mûle tente ne argent ne or, tshiena mumanye mua kuhidia dî dia Yehowa Nzambi wanyi, bua kuenza bualu bukese anyi bualu bunene. Nuanji kulala bienu kunoko butuku ebu kabidi, bua meme kumanya dî didi Yehowa ungambila kabidi. Nzambi wakambila Belâma butuku ne, Bialua balume aba bua kukubikila, ubike biebe, uye habo, kadi wenze biebe anu dî dinakuambila. Belâma wakabika ne dinda, wakela tshiseba ha nyima ha mpunda wandi, wakaya ne miloho ya Bena Moaba. Tshiji tshiakakuata Nzambi bualu bua yeye wakaya, ne muanjelo wa Yehowa wakaditeka mu nshila bu muhumbishi wandi: Belâma wakadi wenda ha nyima ha mpunda wandi, ne bahika bandi babidi bakadi nʼandi. Mpunda wakatangila muanjelo wa Yehowa muimane mu nshila, ne muele wa nvita mu tshianza tshiandi, mpunda wakasesuka mu nshila, wakaya mu budimi, Belâma wakakuma mpunda bua kumuhingisha mu nshila. Muanjelo wa Yehowa wakimana mu nshila mukese udi hankatshi ha madimi a tumuma, lumbu luakadi ku luseke elu, ne lumbu ku luseke lukuabo Mpunda wakatangila muanjelo wa Yehowa, wakadikuma ku lumbu, wakasunsula dikasa dia Belâma ku lumbu, ne yeye wakamukuma kabidi. Muanjelo wa Yehowa wakaya ku mpala, wakimana mu nshila mukese, kakadi ne muaba wa mua kuya ku tshianza tshia balume anyi ku tshianza tshia bakashi. Mpunda wakatangila muanjelo wa Yehowa, wakalala hanshi muinshi mua Belâma, tshiji tshiakakuata Belâma, wakakuma mpunda ne mulangala wandi. Yehowa wakabidika mukana mua mpunda, wakambila Belâma ne, Nakuenza tshinyi bua wewe wakunkuma misangu isatu? Belâma wakambila mpunda ne, Bualu bua wewe wakansekesha, bu meme muikale ne muele wa nvita mu tshianza, nakadi kukushiya. Mpunda wakambila Belâma ne, Meme tshiena mpunda webe uwakenda ha nyima nʼandi matuku ebe onso tô ne katataka, anyi? Nakadi nkuenzela nunku dia mbedi, anyi? Yeye wakamba ne, Nansha. Yehowa wakabidika mesu a Belâma, ne yeye wakamona muanjelo wa Yehowa muimane mu nshala, ne muele wa nvita mu tshianza tshiandi, yeye wakinama mutu wandi, wakatua mpala hanshi. Muanjelo wa Yehowa wakamuambila ne, Wakakuma mpunda webe misangu isatu bualu kai? Tangila, meme nakulua bu muhumbishi webe, bualu bua nshila webe kena muakane ku mesu kuanyi, mpunda wakuntangila, wakusesuka kundi nusangu ei isatu bu mpunda muhidie kusesuka kundi, nakadi kukushiha wewe, ne nakadi kusungila mpunda. Belâma wakambila muanjelo wa Yehowa ne, Nakuenza bibi, bualu bua tshiakamanya ne wewe wakadi muimane bua kunkanda mu nshila. Ne bikala bualu bukufikishe munda, meme nempingane kabidi. Muanjelo wa Yehowa wakambila Belâma ne, Ya biebe ne balume aba kadi wewe wambe anu dî dinaknambila. Nunku Belâma wakaya ne miloho ya Balaka. Hakunvia Balaka lumu ne, Belâma wakalua, wakaya kusangakena nʼandi ku tshimenga tshia Moaba, tshidi ku muelelu wa mai a Amona, ku butshika bua buloba buandi mene. Balaka wakambila Belâma ne, Tshiakakusengelela bua kulua kundi, anyi? Wewe kuena mulue kundi munyi? Meme tshiena mumanye mua kukuha butumbi bulelela, anyi? Belâma wakambila Balaka ne, Mona, nakamana kulua kudi! Ndi mumanye mua kukuambila bualu, anyi? Di didi Nzambi uteka mukana muanyi, nenkuambiledi. Belâma wakaya ne Balaka, bakalua ku Kîyata-husota. Balaka wakamushihela ngombe ne mikoko, wakantumina Belâma ne miloho yakadi nʼandi. Dinda Balaka wakaya ne Belâma ku mutu kua mikuna ya Bâla; yeye wakatangila tô ne ku matshika onso a tshitudilu tshia bantu. Belâma wakambila Balaka ne, Ungashile bioshelu muanda mutekete, undongoluele balume ba ngombe muanda mutekete ne bimpanga muanda mutekete. Balaka Wakenza muakamba Belâma, Balaka ne Belâma bakosha ngombe ne tshimpanga ha tshioshelu ne ha tshioshelu. Belâma wakambila Balaka ne, Wimane ha buihi ne mulambu webe wa kuosha ha kahia ne meme nengumuke, bumue Yehowa nealue kusangakena hanyi, nenkuambile malu onso adiye ungambila Yeye wakaya kulu ku muaba wakadi mutuhu. Nzambi wakasangakena ne Belâma, ne Belâma wakamuambila ne, Nakasa bioshelu muanda mutekete, nakosha mulume wa ngombe ne tshimpanga ha tshioshelu ne ha tshioshelu. Yehowa wakateka dî mukana mua Belâma, wakamba ne, Hingana kudi Balaka, umuambile nunku. Wakahingana kudiye, ne mona, yeye wakadi muimane ha buihi ne mulambu wandi wa kuosha ha kahia, yeye ne miloho ya Moaba yonso. Yeye wakabela lusumuinu luandi ne, Balaka, mukelenge wa Moaba, wakumbikila ku Alama ne ku mikuna ya ku Esete ne, Lua biebe, ungelele bana ba Yakoba mulau, lua biebe kukanda Bena Isalele. Nengele nunku mulau udi kayi muanze kuedibua mulau kudi Yehowa munyi? Nenkande mundi udi kayi muanze kukandibua kudi Yehowa munyi? Bualu bua nakumutangila ku mutu kua mabue, nakamumona ku mutu kua mikuna, bantu aba badi bashikama ha buabo kabena babadibua munkatshi mua bisamba bikuabo. Udi mumanye mua kubala bana ba Yakoba nganyi? udi mumanye mua kubala tshituha tshinai tshia Bena Isalele nganyi? Nfue bianyi lufu lua muntu muakane, ne kunshikidilu kuanyi kuikale bu kuandi. Balaka wakambila Belâma ne, Wakungenzela tshinyi? Nakakubikila bua kungelela bantu badi nʼanyi lukuna mulau, ne mona, wewe wakubavudishila disanka. Yeye wakamuambila ne, Tshiena ne bualu bua kudimuka bua kuamba dî diakuteka Yehowa mukana muanyi, anyi? Balaka wakamuambila ne, Ndi nkusengelela ne, Lua hanyi ku muaba mukuabo kûdi mumanye mua kubatangila, wewe mutangile anu tshituha tshiabo, kuena utangila buonso buabo, ubangelele mulau ku muaba au. Wakaya nʼandi mu mpata wa Sofima, ku mutu kua Pisega, wakasa bioshelu muanda mutekete, wakosha mulume wa ngombe ne tshimpanga ku tshioshelu ne ku tshioshelu. Yeye wakambila Balaka ne, Wimane ha buihi ne mulambu webe wa kuosha ha kahia, nenye kusangakena ne Yehowa kuaka. Yehowa wakasangakena ne Belâma, wakateka dî mukana muandi, wakamba ne, Uhingane kudi Balaka, umuambile nunku. Wakalua kudiye, wakadi muimane ha buihi ne mulambu wandi wa kuosha ha kahia, miloho ya Moaba yakadi nʼandi. Balaka wakamuebesha ne, Yehowa wakuamba tshinyi? Yeye wakamuela lusumuinu luandi ne, Balaka, bika biebe, unvua, ungunvuile, muana mulume wa Sipô: Nzambi kena bu muntu udi wamba mei a mashimi, kena bu muana wa muntu, bua kukudimuneye mutshima. Biambeye dî, kena udishikisha, anyi? Anyi biambeye bualu, kena ubuenza, anyi? Eyo, nakuangata dî bua kubavudishila disanka yeye wakabavudishila disanka, ne meme tshiena mumanye mua kudikudimuna. Yeye kena mutangile malu mabi munkatshi mua bana ba Yakoba, yeye kena mutangile mitshima mikole munkatshi mua Isalele. Yehowa, Nzambi wandi udi nʼandi ne dî dia lubila dia bukelenge didi munkatshi muabo. Nzambi wakabaha tula mu Ejipitu, yeye udi ne bukole bu nyama wa mbowa. Bulelela, kakuena muena muhongo munkatshi mua bana ba Yakoba, kakuena batempi ba mbuku munkatshi mua Bena Isalele, katataka nebambile bana ba Yakoba ne Bena Isalele ne, Yehowa wakuenza tshinyi? Mona, bantu aba badi bahika bu mukashi wa nyama wa ntambue, yeye udi ubika bu nyama wa ntambue, yeye kena ulala kabidi to ne hadieye tshintu, ne hanueye mashi a tshintu tshiakashiheye. Balaka wakambila Belâma ne, Kubedi mulau, kubavudishidi disanka nansha. Kadi Belâma wakambila Balaka ne, Tshiakukuambila ne, Neakuambile mei onso adi Yehowa mungambile, anyi? Balaka wakambila Belâma ne, Lua biebe, nenkuleshe muaba mukuabo, bumue Nzambi neitabushe bua wewe ubangelele mulau ku muaba au. Balaka wakaya ne Belâma ku mutu kua mukuna wa Peô, kuakatangileye ku tshihela. Belâma wakambila Balaka ne, Ungashile bioshelu muanda mutekete, undongoluele balume ba ngombe muanda mutekete ne bimpanga muanda mutekete. Balaka Wakenza muakamba Belâma, wakosha ngombe ne tshimpanga ku tshioshelu ne ku tshioshelu. Hakatangila Belâma ne bualu ebu buakusankisha Yehowa bua kuvudishila Bena Isalele disanka, yeye kakaya kabidi kutempa mbuku bu muakenzeye misangu mikuabo, kadi wakatangisha mpala wandi ku tshihela. Belâma wakabandisha mesu andi, wakatangila Bena Isalele bashikama ku milongo ya bisamba biabo, Nyuma wa Nzambi wakalua kudiye. Yeye wakela lusumuinu luandi ne, Belâma, muana mulume wa Beô, muntu wakadi ne disu diandi dibuikila, udi unvua mei a Nzambi, udi utangila bilota bia Nzambi wa Bukole, hahoneye hanshi, mesu andi adi matabale, udi wamba ne, Yakoba, ntenta yebe idi mimpe! Bena Isalele, bitudilu bienu bidi bimpe! Bidi bibaluluke bu bibanda, bu bibunda bidi hehi ne musulu, bu mitshi ya aloe yakakunabo kudi Yehowa, bu mitshi ya cèdre idi hehi ne mai. Mai adi aluhuka mu milondo yandi, bana bandi nebikale munkatshi mua mai a bungi, mukelenge wandi neahite Agaga bunene, bukelenge buandi nebutumbishibue. Nzambi wakamubadila mu Ejipitu, yeye udi ne bukole bua nyama wa mbowa, yeye neamine bisamba bia bantu badi nʼandi lukuna, neatshibule mifuba yabo bituha, yeye neabatubule ne mikete. Udi walamina bu nyama wa ntambue, udi ulala hanshi bu mukashi wa nyama wa ntambue, nganyi neamubishe? Wakasankisha ikale biandi ne disanka, ne wakuela mulau ikale biandi ne mulau. Tshiji tshiakakuata Balaka bualu bua Belâma wakakuma bianza biandi Balaka wakambila Belâma ne, Nakakubikila bua kungelela bantu badi hanyi lukuna mulau, kadi mona, wewe wakubavudishila disanka misangu ei isatu. Katataka ya kuebe, nakadi ngelangana meji bua kukuha butumbi bunene, kadi mona, wewe wakubavudishila butumbi ebu. Belâma wakambila Balaka ne, Tshiakuambila miloho yebe kabidi iwakuntumina ne, Biampa Balaka nsubu wandi mûle tente ne argent ne or, tshiena mumanye mua kuya ku mpala kua dî dia Yehowa, bua kuenza bualu buimpe anyi bualu bubi mu mutshima wanyi, nenkuambile mei onso adi Yehowa ubambile, tshiakayambila nunku, anyi? Katataka nyaya kudi bantu banyi, lua biebe, nenkuleshe malu adi bantu aba benzela bantu bebe mu matuku adi ku mpala. Yeye wakamuela lusumuinu luandi ne, Belama, muana mulume wa Beô, muntu wakadi ne disu diandi dibuikila, udi Wamba ne, Udi unvua mei a Nzambi, udi ne lungenyi lua Nzambi wa mu diulu, udi utangila bilota bia Nzambi wa Bukole, hahoneye hanshi ne mesu andi adi matabale. Ndi mumutangile kadi tshiena mumutangile katataka, ndi mumumone kadi yeye kena ha buihi, Mutoto nebiluhuke kudi Yakoba, ne dikombo dia bukelenge nedibike munkatshi mua Bena Isalele, nedikume ku matshika a Moaba, nedishihe bana bonso ba Shete. Edome neikale buhianyi, ne Sei, buloba bua bena lukuna bandi, neikale buhianyi buandi, kadi Bena Isalele nebenze malu makole. Muntu nealuhuke kudi Yakoba, neikale ne bukelenge butambe, neashihe tshituha tshia bantu badi bashala mu musoko. Yeye wakatangila kudi Amaleka, wakabela lusumuinu luandi ne, Amaleka wakadi tshisamba tshia ku mpala munkatshi mua bisamba, kadi kunshikidilu tshisamba tshiandi netshijimme tshiendelele. Yeye wakatangila kudi Bena Kene, wakabela lusumuinu ne, Muaba unudi nushikama udi mukole, udi munkatshi mua mabue. Kadi nebahaule Bena Kene tô ne haya Bena Ashû nʼabo bu bena lukanu. Wakela lusumuinu luandi kabidi ne, Nganyi neikale ne muoyo hashikisha Nzambi malu au? Kadi matu manene nealue kukala kua buloba bua Bena Kiti, nebakengeshe Bena Ashû, nebakengeshe Bena Ebê kabidi, yeye neikale muhaudibue kabidi. Belâma wakabika, wakahingana kuandi, Balaka wakaya kuandi kabidi. Bena Isalele bakashikama mu Shitima, bantu bakabanga kuenda masandi ne bana bakashi ba Bena Moaba, bualu bua bakabikila bantu ku milambu ya nzambi yabo, ne bantu bakadia, bakinamina nzambi yabo. Bena Isalele bakadisangisha kudi Bâla-peô ne tshiji tshiakakuata Yehowa bualu bua Bena Isalele. Yehowa wakambila Mose ne, Angata bakelenge bonso ba bantu, ubowe ku mpala kua Yehowa mu munya, nunku tshiji tshikole tshia Yehowa tshiumuke kudi Bena Isalele. Mose wakambila balumbuluishi ba mu Isalele ne, Muntu ne muntu ashihe bantu ba mu tshisamba tshiandi bakadisangisha kudi Bâla-peô. Mona, mukuabo wa Bena Isalele wakalua kudi bana babo ne mukashi wa Bena Midiyana ku mesu kua Mose ne ku mesu kua tshisumbu tshionso tshia Bena Isalele, hakadibo badila ku mbelu kua ntenta wa kusambakena. Hakatangila Pinehasa, muana mulume wa Eleazâ, muana mulume wa Alona muakuidi, bualu ebu, yeye wakabika munkatshi mua tshisumbu, wakangata difuma mu tshianza tshiandi, yeye wakalonda ku nyima kua Muena Isalele mu nsubu wakababambakasha bubidi buabo, Muena Isalele ne mukashi Nunku disama diakalekedibua munkatshi mua Bena Isalele. Bantu bakafua ku disama adi bakadi binunu makumi abidi ne binai. Yehowa wakambila Mose ne, Pinehasa, muana mulume wa Eleazâ, muana mulume wa Alona muakuidi, wakalekesha tshiji tshianyi kudi Bena Isalele, bualu bua yeye wakadi ne mukau bu mukau wanyi munkatshi muabo, nunku tshiakashiha Bena Isalele bonso ne mukau wanyi. Nunku amba biebe ne, Mona, ndi mmuhe dihungila dianyi dia ditalala, nedikale kudiye ne kudi bana badi bamulonda ku nyima, bu dihungila dia mudimu wa buakuidi tshiendelele bualu bua yeye wakadi ne mukau bualu bua Nzambi wandi, wakabuikidila Bena Isalele bubi. Dina dia Muena Isalele wakashihabo ne mukashi wa Bena Midiyana diakadi Zimeli, muana mulume wa Salu, mukelenge wa nsubu ya batatuʼabo ya Bena Shimeona. Dina dia mukashi wa Bena Midiyana wakashihibua diakadi Kozebi, muana mukashi wa Sû, yeye wakadi ku mutu kua nsubu ya batatuʼabo ya mu Midiyana. Yehowa wakambila Mose ne, Utatshishe Bena Midiyana, ubashihe, bualu bua bobo badi banutatshisha ne budimu, bakanushima mu bualu bua Peô ne mu bualu bua Kozebi, muana mukashi wa mukelenge wa mu Midiyana, muanʼabo mukashi, wakamushihabo mu dituku diakalua disama bualu bua Peô. Hashishe hakashika disama, Yehowa wakambila Mose ne Eleazâ, muana mulume wa Alona muakuidi ne, Nubale bungi bua bantu ba mu tshisumbu tshia Bena Isalele, ba mu bidimu makumi abidi tô ne ha mutu, ku nsubu ya batatuʼabo, badi bamanye mua kuya mu nvita ya Bena Isalele. Mose ne Eleazâ bakabambila mu mpata ya Moaba hehi ne mai a Yadene batangilangane ne Yeleko ne, Nubale bungi bua bantu ba mu bidimu makumi abidi to ne ha mutu bu muakambila Yehowa Mose ne Bena Isalele bakaluhuka mu buloba bua Ejipitu. Lubena, muanʼa bute wa Isalele, bana balume ba Lubena, Hanoka ne meku a Bena Hanoka, Palu ne meku a Bena Palu, Heselona ne meku a Bena Heselona, Kantu ne meku a Bena Kami. Au mmeku a Bena Lubena, bungi buabo buakabalabo buakadi binunu makumi anai ne bisatu ne nkama muanda mutekete ne makumi asatu. Bana balume ba Palu: Eliaba. Bana balume ba Eliaba: Nemuele ne Datana ne Abilama Datana eu ne Abilama eu bakabikila tshisumbu tshia bantu, bakatanda ne Mose ne Alona mu tshisumbu tshia Kola, hakadibo batanda ne Yehowa, buloba buakubulula mukana muabu, buakabamma ne Kola, bakafua tshisumbu atshi, kahia kakosha balume aba nkama ibidi ne makumi atanu, ne bobo bakalua bu tshivulukidi kudi Bena Isalele. Kadi bana balume ba Kola kabakafua. Bana balume ba Shimeona ku meku abo Nemuele ne meku a Bena Nemuele, Yamina ne meku a Bena Yamina, Yakina ne meku a Bena Yakina, Sela ne meku a Bena Sela, Shaula ne meku a Bena Shaula. Au mmeku a Bena Shimeona, bantu binunu makumi abidi ne bibidi ne nkama ibidi. Bana balume ba Gada ku meku abo Sefona ne meku a Bena Sefona, Hagi ne meku a Bena Hagi, Shuni ne meku a Bena Shuni, Ozeni ne meku a Bena Ozeni, Eli ne meku a Bena Eli, ne Aloda ne meku a Bena Aloda, ne Aleli ne meku a Bena Aleli. Au mmeku a Bena Gada, bungi buabo buakabalabo buakadi binunu makumi anai ne nkama itanu. Bana balume ba Yuda, Ele ne Onana; Ele ne Onana bakafua mu buloba bua Kanâna. Bana balume ba Yuda ku meku abo. Shela ne meku a Bena Shela, Pelese ne meku a Bena Pelese, Zela ne meku a Bena Zela. Bana balume ba Pelese Heselona ne meku a Bena Heselona, Hamula ne meku a Bena Hamula. Au mmeku a Yuda, bungi buabo buakabalabo buakadi binunu makumi muanda mutekete ne bisambombo ne nkama itanu. Bana balume ba Yisakâ ku meku abo: Tola ne meku a Bena Tola; Puwa ne meku a Bena Puna; Yashuba ne meku a Bena Yashuba, ne Shimelona ne meku a Bena Shimelona. Au mmeku a Yisakâ, bungi buabo buakabalabo buakadi binunu makumi asambombo ne binai ne nkama isatu. Bana balume ba Zebuluna ku meku abo Selede ne meku a Bena Selede; Elone ne meku a Bena Elone; Yalele ne meku a Bena Yalele. Au mmeku a Bena Zebuluna, bungi buabo buakabalabo buakadi binunu makumi asambombo ne nkama itanu. Bana balume ba Yosefe ku meku abo, Manashe ne Efelayima. Bana balume ba Manashe Mala ne meku a Bena Mala, Mala wakalela Gilada; Gilada ne meku a Bena Gilada. Aba mbana balume ba Gilada: Yezê ne meku a Bena Yezê, Heleke ne meku a Bena Heleke; Aseliele ne meku a Bena Aseliele; Shekeme ne meku a Bena Shekeme; Shenuda ne meku a Bena Shenuda, Hefê ne meku a Bena Hefê. Selofehada, muana mulume wa Hefê, kakadi ne bana ba balume nansha, wakadi anu ne bana ba bakashi, mena a bana ba bakashi ba Selofehada. Mala ne Noa ne Hogela ne Mileka ne Tîsa. Au mmeku a Manashe, bungi buabo buakabalabo buakadi binunu makumi atanu ne bibidi ne nkama muanda mutekete. Aba mbana balume ba Efelayima ku meku abo Shutela ne meku a Bena Shutela, Bekê ne meku a Bena Bekê; Tahana ne meku a Bena Tahana. Aba mbana balume ba Shutela: Elana ne meku a Bena Elana. Au mmeku a bana balume ba Efelayima, bungi buabo buakabalabo buakadi binunu makumi asatu ne bibidi ne nkama itanu Aba mbana balume ba Yosefe ku meku abo. Aba mbana balume ba Benyamina ku meku abo Bela ne meku a Bena Bela; Ashabele ne meku a Bena Ashabele; Ahilama ne meku a Bena Abalama; Shefufama ne meku a Bena Shefufama; Hufama ne meku a Bena Hufama. Bana balume ba Bela bakadi Ada ne Nâmana: ne meku a Bena Ada ne meku a Bena Nâmana. Aba mbana balume ba Benyamina ku meku abo, bungi buabo buakabalabo buakadi binunu makumi anai ne bitanu ne nkama isambombo. Aba mbana balume ba Dana ku meku abo: Shuhama ne Bena Shuhama. Au mmeku a Dana ku meku abo. Meku onso a Bena Shuhama, bungi buabo buakabalabo buakadi binunu makumi asambombo ne binai ne nkama mai. Aba mbana balume ba Ashê ku meku abo: Yimena ne meku a Bena Yimena, Yishewi ne meku a Bena Yishewi, Belia ne meku a Bena Belia, ne bana balume ba Belia Hebe ne meku a Bena Hebe, Malekiele ne meku a Bena Malekiele. Dina dia muana mukashi wa Ashê diakadi Sela. Au mmeku a bana balume ba Ashê, bungi buabo buakabalabo buakadi binunu makumi atanu ne bisatu ne nkama mai. Bana balume ba Nafatale ku meku abo Yasele ne meku a Bena Yasele; Guni ne meku a Bena Guni; Yesê ne meku a Bena Yesê, Shilema ne meku a Bena Shilema. Au mmeku a Nafatale, bungi buabo buakabalabo buakadi binunu makumi anai ne bitanu ne nkama mai. Bungi bua Bena Isalele buakabalabo buakadi binunu nkama isambombo ne tshimue ne nkama muanda mutekete ne makumi asatu. Yehowa wakambila Mose ne, Newabanyine bantu aba buloba bua buhianyi buabo bu bungi bua mena abo. Wewe neuhe bantu ba bungi buhianyi bunene, ne bantu bakese buhianyi bukese muntu ne muntu wakabalabo wewe neumuhe buhianyi. Kadi nebabanye buloba anu ku nshobo, bobo nebahiane buloba ku mena a bisamba bia batatuʼabo. Nebabanye buhianyi bunene anyi buhianyi bukese anu ku nshobo. Ebu mbungi bua Bena Lewi ku meku abo Gêshona ne meku a Bena Gêshona, Kohata ne meku a Bena Kohata; Melali ne meku a Bena Melali. Au mmeku a Lewi: diku dia Bena Libina, diku dia Bena Hebelone ne diku dia Mali ne diku dia Bena Mushi ne diku dia Bena Kola Kohata wakalela Amalama. Dina dia mukashi wa Amalama diakadi Yokebede, muana mukashi wa Lewi, wakalelabo mu Ejipitu: yeye wakalelela Amalama Alona ne Mose ne Miyama, muanʼabo mukashi. Alona wakalela Nadaba ne Abihu ne Eleazâ ne Itamâ. Nadaba ne Abihu bakafua hakafuabo kahia kakadi kakayi ka tshijila kudi Yehowa. Bungi buabo buakabalabo buakadi binunu makumi abidi ne bisatu ba mu ngondo umue tô ne ha mutu, kabakababala munkatshi mua Bena Isalele bualu bua kabakadi ne buhianyi munkatshi mua Bena Isalele. Aba mbantu bakabalabo kudi Mose ne kudi Eleazâ muakuidi, bakabala Bena Isalele mu mpata ya Moaba hehi ne Yadene mutangilangane ne Yeleko. Kadi kakuakadi muntu umue munkatshi muabo wakabalabo kudi Mose ne Alona mu tshihela tshia Sinai. Bualu bua Yehowa wakamba ne, Bobo nebafue mu tshihela. Nansha umue wabo wakashala anu Kaleba, muana mulume wa Yefune ne Yoshua, muana mulume wa Nuna. Bana bakashi ba Selofehada, muana mulume wa Hefê, muana mulume wa Gilada, muana mulume wa Mala, muana mulume wa Manashe, wa meku a Manashe, muana mulume wa Yosefe, au mmena a bana bakashi: Mahala ne Noa ne Hogela ne Mileka ne Tîsa. Bobo bakimana ku mpala kua Mose ne kua Eleazâ, muakuidi ne ku mpala kua bakelenge ba mu tshisumbu, ku mbelu kua ntenta wa kusambakena, bakamba ne, Tatu wetu wakafua mu tshihela, yeye kakadi munkatshi mua tshisumbu tshia Kola tshiakadisangisha kudi Yehowa, kadi yeye wakafua anu bualu bua mibi yandi, yeye kakadi ne bana ba balume nansha. Bualu kai nebajimishe dina dia tatu wetu munkatshi mua diku diandi bualu bua yeye kakadi ne muana wa balume? Utuhe bietu buhianyi munkatshi mua bana babo ne tatu wetu. Mose wakaya ne bualu ebu ku mpala kua Yehowa. Yehowa wakambila Mose ne, Bana ba bakashi ba Selofehada badi bamba dî dilelela: Ubahe buhianyi munkatshi mua bana babo ne tatuʼabo, buhianyi bua tatuʼabo nebulue kudibo. Wewe newambile Bena Isalele ne, Biafua muntu udi kayi ne muana wa balume, nunku yeye neaheshe muanʼandi wa bakashi buhianyi buandi. Bikaleye kayi ne muana wa bakashi, yeye neaheshe bana babo buhianyi buandi. Bikaleye kayi ne bana babo, yeye neaheshe bana babo ne tatuʼandi buhianyi buandi. Bikala tatuʼandi kayi ne bana babo, yeye neaheshe muanʼabo udi umulonda mu diku diandi buhianyi buandi, yeye mene neabuhete, eu udi mukenji wa tshiendelele kudi Bena Isalele, bu muakambila Yehowa Mose. Yehowa wakambila Mose ne, Banda biebe ku mukuna wa Abalima, utangile buloba bundi mpa Bena Isalele. Hawabutangila, wewe neusangakene ne bankambua bebe bu muakenza Alona mukuluʼebe, bualu bua nuenu nuakahidia dî dianyi mu tshihela tshia Sina, hakatontolola bantu bualu bua mai, kanuakanjidila ku mesu kuabo. (Au mmai a Meliba mu Kadesha mu tshihela tshia Sina.) Mose wakambila Yehowa ne, Yehowa, Nzambi wa mioyo ya bantu asunguile bantu bandi muntu udi mumanye mua kuya ku mpala kuabo, udi mumanye mua kulua kudibo, udi mumanye mua kubalombola, udi mumanye mua kulua nʼabo mu buloba, bantu ba Yehowa kabikadi bu mikoko idi kayiyi ne mulami. Yehowa wakambila Mose ne, Wangate Yoshua, muana mulume wa Nuna, udi ne Nyuma munda muandi, utentekashe tshianza tshiebe ha mutu nʼandi, umushikike ku mpala kua Eleazâ muakuidi ne ku mpala kua bantu bonso, umuambile dî ku mesu kuabo. Wewe neumuvuishe butumbi buebe, bua Bena Isalele bonso batumikile dî diandi. Yeye neimane ku mpala kua Eleazâ muakuidi, yeye neamukonkele kulumbulula kua Ulima ku mpala kua Yehowa, ku dî diandi bobo nebaluhuke, ne ku dî diandi bobo nebabuelemu, ne yeye ne Bena Isalele bonso badi nʼandi. Mose wakenza bu muakamuambila Yehowa, wakangata Yoshua, wakamushikika ku mpala kua Eleazâ ne kua tshisumbu tshionso, wakatentekasha bianza biandi ha mutu nʼandi, wakamuambila dî, muakambila Yehowa Mose. Yehowa wakambila Mose ne, Wambile Bena Isalele ne, Nulue ne milambu, ne bintu binudi nuosha ha kahia, bidi bitua dihembu kundi, mu matuku anakasungula. Wewe neubambile kabidi ne, Eu udi mulambu wa kuosha ha kahia unudi nûfila kudi Yehowa bana balume ba mikoko ba tshidimu tshimue, badi kabayi ne tshilema, bana babidi ba buatshia-buatshia, bu mulambu wa kuosha wa tshiendelele. Neudie muana wa mukoko umue ne dinda ne mukuabo dilolo, ne tshintu tshia dikumi tshia tshihiminu tshia bukula bubotesha bu mulambu wa bukula busangisha ne tshituha tshinai tshia dikoho dia manyi. Eu udi mulambu wa tshiendelele unakanuelela mukenji mu mukuna wa Sinai, mulambu udi utua dihembu, mulambu wa kuosha ha kahia kudi Yehowa. Mulambu wa kunua newikale tshituha tshinai tshia dikoho ku muana wa mukoko yonso, nebahongoluele Yehowa mulambu wa nvinyo udibo banua mu muaba wa tshijila. Neafile muana wa mukoko mukuabo dilolo, neufile mulambu wa bukula bu mûdi wenza dinda ne nvinyo udibo banua, mulambu udibo bosha ha kahia, udi utua dihembu kudi Yehowa. Mu dituku dia Lumingu neufue bana balume ba mikoko babidi badi kabayi ne tshilema ba tshidimu tshimue, ne bintu bibidi bia dikumi bia tshihiminu tshimue tshia bukula bubotesha bu mulambu wa bukula busangisha ne manyi, ne mulambu wa bintu bidibo banua: eu udi mulambu wa kuosha ha kahia ku matuku a Lumingu, ku mutu kua mulambu udibo bafila buatshia-buatshia. Mu bibangidilu bia ngondo yenu nenufile mulambu wa kuosha ha kahia kudi Yehowa bana balume ba ngombe babidi ne tshimpanga tshimue ne bana balume ba mikoko muanda mutekete ba tshidimu tshimue badi kabayi ne tshilema, ne bintu bisatu bia dikumi bia tshihiminu tshia bukula bubotesha bu mulambu wa bukula busangisha ne manyi ku muana wa ngombe yonso, ne bintu bibidi bia dikumi bia tshihiminu tshia bukula bubotesha bu mulambu wa bukula busangisha ne manyi ku tshimpanga tshionso, ne tshintu tshia dikumi tshia bukula bubotesha bu mulambu wa bukula busangisha ne manyi ku muana wa mukoko yonso, mulambu wa kuosha ha kahia udi utua dihembu kudi Yehowa. Milambu yabi ya bintu bidibo banua neyikale tshituha tshia dikoho dia nvinyo ku muana wa ngombe yonso, ne tshintu tshisatu tshia dikoho dia nvinyo ku tshimpanga tshionso, ne tshintu tshinai tshia dikoho dia nvinyo ku muana wa mukoko yonso, eu udi mulambu unudi nuosha ha kahia ku ngondo ku ngondo tô ne ngondo yonso ya mu tshidimu, Nenufile mulume wa mbushi bu mulambu wa kubuikila nʼau bubi kudi Yehowa ku mutu kua milambu idibo bafila buatshia-buatshia ne milambu ya bintu bidibo banua. Dituku dia dikumi ne anai dia ngondo wa kumudilu ndituku dia kuhita kua Yehowa. Dituku dia dikumi ne atanu dia ngondo eu ndituku dinudi nudia bidia bia Yehowa, nenudie bidia bidi kabiyi ne luevene to matuku muanda mutekete. Dituku dia kumudilu nenuikale ne disangisha dia tshijila, kanuenji mudimu, kadi nenufile mulambu wa kuosha ha kahia kudi Yehowa bana babidi ba ngombe ne tshimpanga tshimue ne bana balume ba mikoko muanda mutekete ba tshidimu tshimue badi kabayi ne tshilema, ne milambu yabi ya bukula bubotesha busangisha ne manyi bintu bisatu bia dikumi ku ngombe ne bintu bibidi bia dikumi ku tshimpanga, ne tshintu tshia dikumi ku muana wa mukoko to ne ku bana bonso ba mikoko muanda mutekete, ne mulume wa mbushi bu mulambu wa kunubuikidila nʼau bubi. Nenufile bintu ebi ku mutu kua milambu mudi nuosha ne dinda bu mulambu wa kuosha wa tshiendelele. Nenufile milambu ya buatshia-buatshia nunku, milambu ya kuosha ha kahia tô matuku muanda mutekete, idi itua dihembu kudi Yehowa, nenufile milambu ei ku mutu kua milambu mudi nuosha buatshia-buatshia ne milambu ya bintu bidibo banua. Dituku dia muanda mutekete nenuikale ne disangisha dia tshijila, kanuenji mudimu. Mu dituku dinudi nuhuola bintu bia kumudilu, hanuafila mulambu wa bukula buhia-buhia kudi Yehowa, nenuikale ne disangisha dia tshijila, kanuenji mudimu, hadi nenufile mulambu wa kuosha ha kahia udi utua dihembu kudi Yehowa bana balume ba ngombe babidi ne tshimpanga tshimue ne bana balume ba mikoko muanda mutekete ba tshidimu tshimue, ne milambu yabi ya bukula bubotesha busangisha ne manyi, bintu bisatu bia dikumi ku muana wa ngombe yonso, ne bintu bibidi bia dikumi ku tshimpanga tshionso, ne tshintu tshia dikumi ku muana wa mukoko tô ne ku bana ba mikoko muanda mutekete, ne mpumbu wa mbushi bu mulambu wa kunubuikidila nʼau bubi. Nenufile bintu ebi bidi kabiyi ne tshilema ku mutu kua milambu idibo bosha buatshia-buatshia, ne milambu ya bintu bidibo banua. Dituku dia kumudilu dia ngondo wa muanda mutekete nenuikale ne disangisha dia tshiula, kanuenji mudimu, edi ndituku didibo bela mpungi. Nenufile milambu ya kuosha ha kahia, idi itua dihembu kudi Yehowa, muana mulume wa ngombe ne tshimpanga tshimue ne bana balume ba mikoko muanda mutekete ba tshidimu tshimue badi kabayi ne tshilema, ne milambu yabi ya bukula bubotesha busangisha ne manyi, bintu bisatu bia dikumi ku muana wa ngombe, ne bintu bibidi bia dikumi ku tshimpanga, ne tshintu tshia dikumi ku muana wa mukoko tô ne ku bana ba mikoko muanda mutekete, ne mpumbu wa mbushi bu mulambu wa kunubuikidila nʼau bubi, ha mutu ha milambu idibo bosha babala ngondo, ne milambu ya bukula ne milambu ya bintu bidibo banua, bu mudi mukenji wamba, milambu ya kuosha ha kahia, idi itua dihembu kudi Yehowa. Dituku dia dikumi dia ngondo eu wa muanda mutekete nenuikale ne disangisha dia tshijila, nenunyingalashe mioyo yenu, kanuenji mudimu, ka dî nenufile mulambu wa kuosha ha kahia udi utua dihembu kudi Yehowa muana mulume wa ngombe ne tshimpanga tshimue ne bana balume ba mikoko muanda mutekete ba tshidimu tshimue badi kabayi ne tshilema, ne milambu yabi ya bukula bubotesha busangisha ne manyi, bintu bisatu bia dikumi ku muana wa ngombe, ne bintu bibidi bia dikumi ku tshimpanga, ne tshintu tshia dikumi ku muana wa mukoko tô ne ku bana ba mikoko muanda mutekete, ne mpumbu wa mbushi bu mulambu wa kunubuikidila nʼau bubi, nenufile bintu ebi ku mutu kua mulambu wa kubuikila nʼau bubi ne milambu ya kuosha ha kahia ya buatshia-buatshia ne milambu ya bukula ne milambu ya bintu bidibo banua. Mu dituku dia dikumi ne atanu dia ngondo wa muanda mutekete nenuikale ne disangisha dia tshijila, kanuenji mudimu, nenudie bidia bia Yehowa matuku muanda mutekete, nenufile milambu ya kuosha ha kahia idi itua dihembu kudi Yehowa bana ba balume ba tshidimu tshimue ba ngombe dikumi ne basatu ne bimpanga bibidi ne bana balume ba mikoko dikumi ne banai badi kabayi ne tshilema, ne milambu yabi ya bukula bubotesha busangisha ne manyi, bintu bisatu bia dî kunu ku muana wa ngombe tô ne ku bana ba ngombe dikumi ne basatu, ne bintu bibidi bia dikumi ku tshimpanga tshionso, ne tshintu tshia dikumi ku muana wa mukoko to ne ku bana ba mikoko dikumi ne banai, ne mpumbu wa mbushi bu mulambu wa kunubuikidila nʼau bubi, ku mutu kua milambu ya kuosha ha kahia buatshia-buatshia, ne milambu ya bukula ne milambu ya bintu bidibo banua. Mu dituku dibidi nenufile bana balume ba ngombe dikumi ne babidi ne bimpanga bibidi ne bana balume ba mikoko dikumi ne banai ba tshidimu tshimue badi kabayi ne tshilema, ne milambu yabi ya bukula ne milambu ya bintu bidibo banua, ku bana ba ngombe ne ku bimpanga ne ku bana ba mikoko bu bungi budi, bu mudi mukenji wamba, ne mpumbu wa mbushi bu mulambu wa kunubuikidila nʼau bubi, ku mutu kua milambu ya kuosha buatshia-buatshia ne milambu ya bukula ne milambu ya bintu bidibo banua. Mu dituku disatu bana balume ba ngombe dikumi ne umue ne bimpanga bibidi ne bana balume ba mikoko dikumi ne banai ba tshidimu tshimue badi kabayi ne tshilema; ne milambu yabi ya bukula ne ya bintu bidibo banua, ku bana ba ngombe ne ku bimpanga ne ku bana ba mikoko bu bungi buai, bu mudi mukenji wamba, ne mpumbu wa mbushi bu mulambu wa kunubuikidila hau bubi, ku mutu kua milambu ya kuosha buatshia-buatshia ne milambu ya bukula ne ya bintu bidibo banua. Mu dituku dinai bana balume ba ngombe dikumi ne bimpanga bibidi ne bana balume ba mikoko dikumi ne banai ba tshidimu tshimue, badi kabayi ne tshilema, ne milambu yabi ya bukula ne ya bintu bidibo banua, ku bana balume ba ngombe ne ku bimpanga ne ku bana ba mikoko bu bungi buai, bu mudi mukenji wamba; ne mpumbu wa mbushi bu mulambu wa kunubuikidila nʼau bubi, ku mutu kua milambu ya kuosha buatshia-buatshia ne milambu ya bukula ne ya bintu bidibo banua. Mu dituku ditanu bana balume ba ngombe tshitema ne bimpanga bibidi ne bana balume ba mikoko dikumi ne banai ba tshidimu tshimue badi kabayi ne tshilema, ne milambu yabi ya bukula ne ya bintu bidibo banua, ku bana balume ba ngombe ne ku bimpanga ne ku mikoko bu bungi buai, bu mudi mukenji wamba, ne mpumbu wa mbushi bu mulambu wa kunubuikidila n au bubi, ku mutu kua milambu ya kuosha buatshia-buatshia ne milambu ya bukula ne ya bintu bidibo banua. Mu dituku disambombo bana balume ba ngombe muanda mukulu ne bimpanga bibidi ne bana balume ba mikoko dikumi ne banai ba tshidimu tshimue badi kabayi ne tshilema, ne milambu yabi ya bukula ne ya bintu bidibo banua, ku bana balume ba ngombe ne ku bimpanga ne ku bana ba mikoko bu bungi buai, bu mudi mukenji wamba, ne mpumbu wa mbushi bu mulambu wa kunubuikidila nʼau bubi, ku mutu kua milambu ya kuosha buatshia-buatshia ne milambu ya bukula ne ya bintu bidibo banua. Mu dituku dia muanda mutekete bana balume ba ngombe muanda mutekete, ne bimpanga bibidi ne bana balume ba mikoko dikumi ne banai ba tshidimu tshimue badi kabayi ne tshilema, ne milambu yabi ya bukula ne ya bintu bidibo banua, ku bana balume ba ngombe ne ku bimpanga ne ku bana ba mikoko bu bungi buai bu mudi mukenji wamba; ne mpumbu wa mbushi bu mulambu wa kunubuikidila nʼau bubi, ku mutu kua milambu ya kuosha buatshia-buatshia ne milambu ya bukula ne ya bintu bidibo banua. Mu dituku dia muanda mukulu nenuikale ne disangisha dia tshijila, kanuenji mudimu, kadi nenufile mulambu wa kuosha ha kahia udi utua dihembu kudi Yehowa muana mulume wa ngombe ne tshimpanga ne bana balume ba mikoko muanda mutekete ba tshidimu tshimue badi kabayi ne tshilema, ne milambu yabi ya bukula ne ya bintu bidibo banua, ku muana mulume wa ngombe ne ku tshimpanga ne ku bana ba mikoko bu bungi buai, bu mudi mukenji wamba: ne mpumbu wa mbushi bu mulambu wa kunubuikidila nʼau bubi, ku mutu kua milambu ya kuosha buatshia-buatshia ne milambu ya bukula ne ya bintu bidibo banua. Nenufile bintu ebi kudi Yehowa mu matuku anudi nudia bidia bia Yehowa, ku mutu kua milambu ya kuditshiha nʼai ne bintu budi mitshima yenu misue kufila, ne milambu yenu ya kuosha ne milambu ya bukula ne milambu ya bintu bidibo banua ne milambu yenu ya kuvuisha nʼai ditalala. Mose wakambila Bena Isalele mei onso akambila Yehowa Mose. Mose wakambila bakadi ku mutu kua bisamba bia Bena Isalele ne, Edi ndî diakutuambila Yehowa. Haditshiha mulume kudi Yehowa, anyi halayeye mulayi wandi, yeye kena mumanye mua kulekela dî diandi, yeye nênze mei onso akaluhuka mukana muandi. Haditshiha mukashi kudi Yehowa, anyi halayeye mulayi wandi, hatshidiye mu nsubu wa tatuʼandi, ku bunsongakashi buandi, biunvua tatu wandi kuditshiha kuandi, biahuwa tatu wandi kudiye, nunku kuditshiha kuandi kuonso ne mei andi onso nebijalame. Kadi bikala tatu wandi mumukande mu dituku diakunvueye kuditshiha kuandi, nunku kuditshiha kuandi ne mei andi onso kabiena bijalama: Yehowa neamubuikidile bualu ebu bua tatuʼandi wakamuitaba. Bikaleye mubaka kudi mulume hatshidiye ne kuditshiha kuandi anyi mei makuabo akaditshiheye nʼau ne biunvua mulume wandi ne biahuweye mu dituku diakunveye kuditshiha kuandi, nunku kuditshiha kuandi ne mei andi onso nebijalame. Kadi bikala mulume wandi mumukande mu dituku diakunvueye kuditshiha, nunku kuditshiha kuandi ne mei andi onso nebikale tshianana, Yehowa neamubuikidile bualu abu. Kadi kuditshiha kua mukashi wa mu lufuila, anyi mukashi udi muhidia kudi mulume wandi, mei andi onso akaditshiheye nʼau neajalame. Bikaleye mudi tshihe mu nsubu wa mulume wandi, anyi mulaye mulayi wandi, ne bikala mulume wandi munvue, muhuwe biandi kayi mumukande nansha, nunku kuditshiha kuandi ne mei andi onso nebijalame. Kadi bikala mulume wandi mumukande mu dituku diakunvueye, nunku kuditshiha kuandi ne mei andi onso kabiena bualame, mulume wandi wakavuisha malu au bu malu a hatuhu, Yehowa neamubiukidile bualu abu. Mulume wandi udi mumanye mua kujadika kudi tshiha kuandi kuonso anyi mei andi onso, anyi udi mua kumusha malu au ne malu a hatuhu. Biahuwa mulume wandi ku dituku diakunvueye kuditshiha kuandi anyi mei makuabo akaluhuka mukana muandi, nunku yeye udi ujadika kuditshiha kuandi kuonso ne mei andi onso, bualu bua yeye wakuhuwa ku dituku diakakunvueye. Bikaleye muvuishe malu au bu malu a hatuhu, hakunvueye, nunku yeye neamutuadile bubi buandi. Ei idi mikenji yakela Yehowa kudi Mose bua mulume ne mukashi wandi, ne bua tatu ne muanʼandi mukashi udi mu nsubu wandi mu bunsongakashi buandi. Yehowa Wakambila Mose ne, Usombuele Bena Isalele bualu bua Bena Midiyana, ku nyima wewe neusangakene ne bankambua bebe. Mose wakambila bantu ne, Bena nvita badi munkatshi muenu bangate bintu bia nvita bualu bua kushikisha dikenga didi Yehowa musue kusombuela nʼadi Bena Midiyana. Tshisamba ne tshisamba tô ne bisamba bionso bia Bena Isalele nebitume bantu tshinunu ku nvita. Nunku bakasangisha ku bisamba bionso bia Bena Isalele bantu tshinunu ku tshisamba, bantu tshinunu ku tshisamba, bena nvita binunu dikumi ne bibidi. Mose wakabatuma ku nvita, bantu tshinunu ku tshisamba ku tshisamba, Pinehasa, muana mulume wa Eleazâ muakuidi, wakaya nʼabo ne bintu bikuabo bia mu nsubu wa tshitendelelu ne mpungi ya kuela nʼai dî dikole mu tshianza tshiandi. Bakaluangana ne Bena Midiyana bu muakambila Yehowa Mose, bakashiha balume bonso. Bakashiha bakelenge ba mu Midiyana kabidi: Evi ne Lekeme ne Sû ne Hû ne Leba bakelenge batanu ba Midiyana bakashiha Belama, muana mulume wa Beô, ne muele wa nvita kabidi. Bena Isalele bakaya ne bakashi ba Bena Midiyana ne bana babo bakese, bakangata kabidi bimuna biabo ne bisumbu bia mikoko ne bintu biabo bionso. Bakosha misoko yabo yakadibo bashikamamu ne bitudilu biabo ne kahia. Bakangata bintu bionso bia bantu ne bia bimuna kabidi. Bakalua ne bantu bakakuatabo ne bintu biabo bionso kudi Mose ne kudi Eleazâ muakuidi ne kudi tshisumbu tshionso tshia Bena Isalele, ku tshitudilu tshiakadi mu mpata ya Moaba, hehi ne Yadene ku Yeleko. Mose ne Eleazâ muakuidi ne bakelenge bonso ba mu tshisumbu bakaya bua kusangakena nʼabo ku butshika bua tshitudilu. Mose wakadi ne tshiji kudi ba ku mutu kua bena nvita, tuhita tua binunu binunu ne tuhita tua nkama nkama, bakahingana ku nvita. Mose wakabambila ne, Nuakushiya bakashi bonso ne muoyo, anyi? Monai, bobo bakenzesha Bena Isalele bua kuenzabo malu mabi kudi Yehowa bualu bua dî dia Belâma mu bualu bua Peô, nunku dikenga dikole diakadi munkatshi mua bantu ba Yehowa. Nunku nushale bana ba balume bakese bonso badi munkatshi muabo ne mukashi yonso ukadi mumanyibue kudi mulume. Kadi bana ba bakashi badi kabayi banze kumanyibua kudi balume nubashiye ne muoyo bualu buenu. Nushikame ku butshika bua tshitudilu matuku muanda mutekete, muntu yonso wakashiha mundi mukuabo, anyi wakalenga muntu mufue tshianza, adilengeshe ku dituku disatu ne dituku dia muanda mutekete ne nuenu ne bantu banuakukuata. Bualu bua bilulu, ne bintu bionso biakenzabo ne biseba, ne bintu bionso biakenzabo ne miosa ya mbushi, ne bintu bionso biakenzabo ne mabaya, nenudilengeshe bua bintu ebi. Eleazâ muakudi wakambila bena nvita bakaya mu nvita ne, Eu udi mukenji wakela Yehowa kudi Mose: kadi or ne argent ne tshiamu tshia mitaku ne tshiamu tshifike ne tshiamu tshia étain ne tshia plomb ne tshintu tshionso tshidi katshiyi tshitua mu kahia, nenutshiteke mu kahia bua kutshilengesha, kadi nenutshilengeshe ne mai adibo balengesha nʼau bintu, bintu bionso bidi bihia mu kahia nenubilengeshe mu mai. Nenuvuwe bilulu dituku dia muanda mutekete, nenubale bakane, ku nyima nenuhingane mu tshitudilu. Yehowa wakambila Mose ne, Ubale bungi bua bintu biakangatabo ne bia bantu ne bia bimuna, ne wewe ne Eleazâ muakuidi ne ba ku mutu kua nsubu ya batatuʼabo mu Isalele. Nutahulule bintu bituha bibidi, tshituha kudi bena nvita bakaya mu nvita ne tshikuabo kudi tshisumbu tshionso tshia Bena Isalele. Nuangate kabidi mulambu wa Yehowa kudi bantu bakaya mu nvita mundi umue ku bantu nkama itanu, ne umue wa ngombe ne wa nyama wa mpunda ne wa mikoko kabidi, nutshiangate kudi tshituha tshiabo, nutshine kudi Eleazâ muakuidi bu mulambu udibo banyukula kudi Yehowa. Mu tshituha tshia Bena Isalele nenuangate umue kudi makumi atanu, wa bantu ne wa ngombe ne wa nyama wa mpunda ne wa mikoko, nubifile kudi Bena Lewi badi balama nsubu wa Yehowa. Mose ne Eleazâ bakenza muakambila Yehowa Mose. Bintu bionso biakangatabo kudi bena nvita biakadi mikoko binunu nkama isambombo ne makumi muanda mutekete ne bitanu, ne ngombe binunu makumi muanda mutekete ne bibidi, ne nyama ya mpunda binunu makumi asambombo ne tshinunu tshimue, ne bakashi binunu makumi asatu ne bibidi badi kabayi banze kumanyibua kudi balume. Tshituha tshiakaheta bantu bakaya ku nvita tshiakadi mikoko binunu nkama isatu ne makumi asatu ne muanda mutekete ne nkama itanu, ne mulambu wa Yehowa wakadi mikoko nkama isambombo ne makumi muanda mutekete ne itanu. Ngombe yakadi binunu makumi asatu ne bisambombo, ne mulambu wa Yehowa wakadi makumi muanda mutekete ne ibidi. Nyama ya mpunda yakadi binunu makumi asatu ne nkama itanu, ne mulambu wa Yehowa wakadi makumi asambombo ne umue. Bantu bakadi binunu dikumi ne bisambombo, ne mulambu wa Yehowa wakadi bantu makumi asatu ne babidi. Mose wakatua mulambu wa Yehowa kudi Eleazâ bu mulambu udibo banyukula, bu muakambila Yehowa Mose. Tshituha tshia Bena Isalele tshiakabatahuluila Mose, tshiakashilangana ne tshia bena nvita, (tshituha tshiabo tshiakadi mikoko binu nu nkama isatu ne makumi asatu ne muanda mutekete ne nkama itanu, ne ngombe binunu makumi asatu ne bisambombo, ne nyama ya mpunda binunu makumi asatu ne nkama itanu, ne bantu binunu dikumi ne bisambombo.) Mose wakangata umue wa makumi atanu wa bintu bia Bena Isalele, ne wa bantu ne wa bimuna wakabifila kudi Bena Lewi bakadi balama nsubu wa Yehowa, muakambila Yehowa Mose. Bakadi ku mutu kua binunu bia bena nvita ne tuhita tua binunu ne binunu ne tuhita tua nkama ne nkama, bakalua kudi Mose, bakambila Mose ne, Bantu bebe bakabala bungi bua bena nvita badi ku nyima kuetu, nansha umue wetu udi mushale. Tuetu tuakulua ne mulambu wa Yehowa, bintu biakangatabo kudi mundi ne mundi, bintu bia or ne nkanu ya ku mikolo ne nkanu ya ku maboko ne tukanu tua ku munu, lukanu tua ku matshu ne tukanu tua ku nshingu, bualu bua kubuikidila nʼabi bubi buetu ku mesu kua Yehowa. Mose ne Eleazâ muakuidi bakangata bintu bia tshiamu tshia or tshiakatulabo ku bianza biabo. Or yonso ya tuhita tua binunu ne binunu yakanyukulabo kudi Yehowa yakadi nshekele binunu dikumi ne bisambombo ne nkama muanda mutekete ne makumi atanu. (Bualu bua bena nvita bonso bakadiangatshila bintu mundi ne mundi.) Mose ne Eleazâ muakuidi bakangata or ya tuhita tua binunu ne binunu ne tuhita tua nkama ne nkama, bakalua nʼai mu ntenta wa kusambakena bu tshivulukidi tshia Bena Isalele ku mesu kua Yehowa. Bena Lubena ne Bena Gada bakadi ne bimuna bia bungi be, hakatangilabo ne buloba bua Yazê ne buloba bua Gilada buakadi muaba muimpe wa bimuna, Bena Gada ne Bena Lubena bakalua kudi Mose ne Eleazâ muakuidi ne kudi bakelenge ba tshisumbu, bakamba ne, Atalota ne Dibona ne Yazê ne Nimela ne Heshebona ne Eleale ne Sebama ne Nebo ne Beone, buloba buakashihabo kudi Yehowa ku mpala kua tshisumbu tshia Bena Isalele, mbuloba bua bimuna, ne bantu benu badi ne bimuna. Bakamba kabidi ne, Bituikala ne luse ku mesu kuenu, nuitabushe bua buloba ebu buikale buhianyi bua bantu benu, kanuyi nʼetu dishiya dia Yadene. Mose wakambila Bena Gada ne Bena Lubena ne, Nudi basue bana benu baye ku nvita, ne nuenu nushikame kunoko, anyi? Nudi basue kuhangisha mitshima ya Bena Isalele bua kuya mu buloba buakabahabo kudi Yehowa munyi? Batatu benu bakenza nunku hanakabatuma ku Kadeshe-bânea bua kutentekelabo buloba. Bualu bua hakayabo mu tshibanda tshia Eshekola, bakatangila buloba, bakahangisha mitshima ya Bena Isalele, bua bobo kabayi mu buloba buakabahabo kudi Yehowa. Tshiji tshiakakuata Yehowa dituku adi, ne yeye wakaditshiha ne, Bulelela, nansha umue wa balume aba bakaluhuka mu Ejipitu, ba mu bidimu makumi abidi tô ne ha mutu, neatangile buloba bunakalaya Abalahama ne Isaka ne Yakoba, bualu bua bobo kabakalonda ne mitshima yabo yonso, anu Kaleba, muana mulume wa Yefune, Muena Kenizi, ne Yoshua, muana mulume wa Nuna, bualu bua bobo bakalonda Yehowa ne mitshima yabo yonso. Yehowa wakadi ne tshiji kudi Isalele ne wakabende sha eku ne eku mu tshihela to bidimu makumi anai tô ne hakafua bantu bonso ba tshikondo atshi, bakadi benze bualu ebu bubi ku mesu kua Yehowa. Nuenu nuakadibisha mu miaba ya batatu benu bu bana ba bantu babi bakavulangana, bua kudiundisha bukole bua tshiji tshia Yehowa kudi Isalele. Binuikala nusesuka bua kulekela kulonda ku nyima kuandi yeye neabashiye mu tshihela, yeye neashihe bantu aba bonso. Bobo bakalua ha buihi nʼandi, bakamba ne, Netuashile mpangu ya bimuna bietu kunoko, ne misoko ya bana betu bakese, kadi tuetu nkayetu netuye ne bintu bia nvita ku mpala kua Bena Isalele to ne hatualua nʼabo ku miaba yabo, ne bana betu bakese nebashikame mu misoko idi ne ngumbu bualu bua bena buloba. Katuena tuhingana ku nsubu yetu diambedi Bena Isalele kabayi banze kuhiana buhianyi buabo kudi mundi ne muntu. Tuetu katuena tuhiana nʼabo buloba budi dishiya dia Yadene to ne ku mpala, bualu bua buhianyi buetu budi dishiya dia munemu ku esete kua Yadene. Mose wakabambila ne, Binuenza bualu ebu, binuangata bintu bia nvita bua kuya nʼabi ku nvita ku mpala kua Yehowa, ne bena nvita bonso badi basabuka Yadene ku mpala kua Yehowa to ne hashikisheye kuihata bantu bonso badi nʼandi lukuna ku mpala kuandi, ne hateketa bena buloba bonso ku mpala kua Yehowa, hashishe nenuhingane, kanuena ne bualu bubi kudi Yehowa ne kudi Bena Isalele, ne buloba ebu nebuikale buhianyi buenu ku mesu kua Yehowa. Ka dî binuahidia kuenza nunku, monai, nuakuenzela Yehowa bualu bubi, numanye bienu ne, Bualu bubi buenu nebunukuate bulelela. Nuase misoko ya bana benu bakese ne mpangu ya mikoko yenu, nuenze mei onso akaluhuka mukana muenu. Bena Gada ne Bena Lubena bakambila Mose ne, Bantu bebe nebenze bu mudi mukelenge Wamba. Bana betu bakese ne bakashi betu ne mikoko ne ngombe yetu nebishale mu misoko ya Gilada, kadi bantu bebe, bena nvita bonso, nebasabuke ku nvita ku mesu kua Yehowa, bu muakuamba mukelenge. Mose wakambila Eleazâ muakuidi ne Yoshua, muana mulume wa Nuna, ne bakadi ku mutu kua nsubu ya batatuʼabo ya bisamba bia Bena Isalele bua bualu buabo. Mose wakabambila ne Bikala Bena Gada ne Bena Lubena basabuka Yadene nʼenu bikala muena nvita yonso ne bintu bia nvita ku mesu kua Yehowa ne bikala bena buloba bateketa ku mesu kuenununku nennubahe buloba bua Gilada bu buhianyi buabo; kadi biabi diabo kusabuka nʼenu ne bintu bia nvita, nunku bobo nebikale ne buhianyi munkatshi muenu mu buloba bua Kanâna. Bena Gada ne Bena Lubena bakamba ne Netuenze bu mudi Yehowa wambila bantu bandi. Netusabuke ne bintu bia nvita ku mesu kua Yehowa mu buloba bua Kanâna, netuikale ne buhianyi buetu dishiya dia munemu dia Yadene. Mose wakaha Bena Gada ne Bena Lubena ne tshituha tshia tshisamba tshia Manashe muana mulume wa Yosefe buloba bua Sihona, mukelenge wa Bena Amole ne buloba bua Oga mukelenge wa Bashana, bungi bua misoko yabo to ne ku matshika abo onso. Bena Gada bakasa Dibona ne Atalota ne Aloe ne Atalota shofana ne Yazê ne Yogebeha, ne Betenimela ne Betehalana, misoko yakadi ne mpangu ya mabue, ne mpangu ya mikoko. Bena Lubena bakasa Heshebona ne Eleale ne Kiyatayima, ne Nebo ne Bâla-meona (bakidika misoko ei mena mahia-mahia) ne Sibema; bakidika misoko mikuabo yakasabo mena mahia-mahia. Bena Maki muana mulume wa Manashe bakaya ku Gilada, bakihata Bena Amole bakadimu bakanyenga musoko. Mose wakaha Maki, muana mulume wa Manashe musoko wa Gilada ne yeye wakasekamamu. Yai muana mulume wa Manashe wakaya wakanyenga misoko mikuabo wakayidika ne, Hawota-yai (misoko ya Yai). Noba wakaya wakanyenga Kenata ne misoko mikuabo wakidika musoko wandi ne Noba, bu diba diandi. Ei ngendu ya Bena Isalele hakaluhukabo mu buloba bua Ejipitu ku tshianza tshia Mose ne Alona bu muakadi bisumbu biabo. Mose wakafunda ngendu yabo bu mu dî dia Yehowa ei idi ngendu yabo. Bakabisha luendu luabo mu Lamesese mu dituku dia dikumi ne atanu dia ngondo wa kumudilu, ku nyima kua dituku dia kuhita kua Yehowa Bena Isalele bakumuka ku mesu kua Bena Ejipitu ne tshianza tshikole, hakadi Bena Ejipitu bajika banʼa bute bakashihabo kudi Yehowa munkatshi muabo Yehowa wakalumbuluisha nzambi yabo kabidi. Bena Isalele bakumuka mu Lamesese bakashikama mu Sukota. Bakumuka mu Sukota, bakashikama mu Etama, udi ku butshika bua tshihela. Bakumuka mu Etama bakahingana ku Pihahilota, udi ku mpala kua Bâla-sefona, bakashikama ku mpala kua Migedola. Bakumuka mu Pihahilota, bakahita munkatshi mua dishiba dia mai bakaya mu tshihela bakaya luendu lua matuku asatu mu tshihela tshia Etama, bakashikama mu Mala. Bakumuka mu Mala bakatua ku Elima mu Elima muakadi mpokolo ya mai dikumi ne ibidi ne mabue a ngashi makumi muanda mutekete bakashikamaku. Bakumuka mu Elima bakashikama hehi ne Dishiba Dikunze. Bakumuka ku Dishiba Dikunze, bakashikama mu tshihela tshia Sina. Bakumuka mu tshihela tshia Sina, bakashikama mu Dofaka. Bakumuka mu Dofaka, bakashikama mu Alusha. Bakumuka mu Alusha bakashikama mu Lefidima, ne bantu kabakadi ne mai a kunua. Bakumuka mu Lefidima bakashikama mu tshihela tshia Sinai. Bakumuka mu tshihela tshia Sinai, bakashikama mu Kibelota hatawa. Bakumuka mu Kibelota-hatawa bakashikama mu Haselota. Bakumuka mu Haselota, bakashikama mu Litema. Bakumuka mu Litema, bakashikama mu Limona-pelese. Bakumuka mu Limona-pelese, bakashikama mu Libina. Bakumuka mu Libina, bakashikama mu Lisa. Bakumuka mu Lisa bakashikama mu Kehelata. Bakumuka mu Kehelata, bakashikama ku mukuna wa Shefe. Bakumuka ku mukuna wa Shefe, bakashikama mu Halada. Bakumuka mu Halada bakashikama mu Makehelota. Bakumuka mu Makehelota bakashikama mu Tahata. Bakumuka mu Tahata, bakashikama mu Tela. Bakumuka mu Tela bakashikama mu Miteka. Bakumuka mu Miteka, bakashikama mu Hashemona, Bakumuka mu Hashemona, bakashikama mu Moselota. Bakumuka mu Moselota, bakashikama mu Bene-yâkana. Bakumuka mu Bene-yâkana, bakashikama mu Ho-hadidegada Bakumuka mu Ho-hadidegada, bakashikama mu Yotebata. Bakumuka mu Yotebata, bakashikama mu Abalona. Bakumuka mu Abalona, bakashikama mu Esione-gebê, Bakumuka mu Esione-gebê, bakashikama mu tshihela tshia Sina (dina dikuabo ne Kadesha). Bakumuka mu Kadesha, bakashikama ku mukuna wa Hô, ku butshika bua buloba bua Edome. Alona muakuidi wakabanda ku mukuna wa Hô bu muakamuambila Yehowa, wakafua biandi mu tshidimu tshia makumi anai ku nyima kua kuhatuka kua Bena Isalele mu buloba bua Ejipitu, mu dituku dia kumudilu dia ngondo muitanu. Alona wakadi ne bidimu lukama ne makumi abidi ne bisatu hakafueye mu mukuna wa Hô. Mukelenge Alada, Muena Kanâna, wakadi ushikama ku luseke lua ku Sude lua buloba bua Kanâna, wakunvua lumu ne, Bena Isalele balualua. Bakumuka ku Hô, bakashikama mu Salemona. Bakumuka mu Salemona, bakashikama mu Punona. Bakumuka mu Bimuna, bakashikama mu Oboto. Bakumuka mu Oboto, bakashikama mu Iye-habalima, ku luseke lua Bena Moaba. Bakumuka mu Iyima, bakashikama mu Dibona-gada. Bakumuka mu Dibona-gada, bakashikama mu Alamona-dibelatayima. Bakumuka mu Alamona-dibelatayima, bakashikama mu mikuna ya Abalama, mitangilangane ne Mukuna wa Nebo. Bakumuka ku mikuna ya Abalima, bakashikama mu mpata ya Moaba hehi ne Yadene mitangilangane ne Yeleko. Bakashikama hehi ne Yadene, ku Bete-yishimota tô ne ku Abele-shitima, mu mpata ya Moaba. Yehowa wakambila Mose mu mpata ya Moaba hehi ne Yadene mitangilangane ne Yeleko ne, Wambile Bena Isalele ne, Hanuasabuka Yadene mu buloba bua Kanâna, nenuihate bena buloba ebu bonso ku mpala kuenu, nushihe mpingu yabo ya mabue, ne mpingu yakatulabo ne tshiamu, ne miaba yabo ya kutendelela, nenunyenge buloba, nenushikamemu, bualu bua nakanuhabu bu buhianyi buenu. Nenuhiane buloba ku meku enu, hanuela nshobo, nenuhe bantu ba bungi buloba bua bungi, ne bantu bakese buloba bukese, biakuata nshobo muntu, buloba abu nebuikale buandi, nenuhiane buloba bu mulongo wa bisamba bia batatu benu. Kadi binuahidia kuihata bena buloba ku mesu kuenu, bantu badi bashala nebikale bu tushingi mu mesu enu ne bu meba mu mbadi yenu, nebamatshishe mu buloba bunudi nushikama. Hashishe nennuenzele bu munakelangana meji bua kubenzela bobo. Yehowa wakambila Mose ne, Wambile Bena Isalele ne, Hanuabuela mu buloba bua Kanâna (ebu mbuloba bua buhianyi buenu, buloba bua Kanâna mene ku mikalu yabo yonso) mukalu wenu wa ku luseke lua sude newikale ku tshihela tshia Sina, ne ku mukalu wa Edome to ne kuinshi kua Dishiba dia Luehu ku luseke lua ku esete, mukalu wenu neunyunguluke mukuna wa Akalabima ku luseke lua ku sude, neutuangane ne tshihela tshia Sina tô ne ku Kadeshe-bânea, tô ne ku Hasâ-adâ, to ne ku Asemona, mukalu wenu neunyunguluke ku Asemona tô ne ku kasulu ka Ejipitu tô ne ku mai manene. Mukalu wenu wa luseke lua ku wesete neutuangane ne muelelu wa mai manene, eu newikale mukalu wenu wa ku wesete. Mukalu wenu wa ku luseke lua ku nôde newikale ku mai manene tô ne ku mukuna wa Hô, ku mukuna wa Hô nenufunde tô ne ku mukalu wa Hamata ku Sedada; mukalu newikale kabidi ku Zifelona tô ne ku mukalu wa Hasâ-enana, eu newikale mukalu wenu wa ku nôde. Nenufunde mukalu wenu wa ku esete ku Hasâ-enana tô ne ku Shefama, mukalu neuhueke ku Shefama to ne ku Libela ku esete kua Ayina, mukalu neuhueke tô ne ku muelelu wa dishiha dia Kinelete ku esete, mukalu neuhueke tô ne ku Yadene uhueka tô ne ku Dishiba dia Luehu Ai mmikalu idi înyunguluka buloba buenu. Mose wakambila Bena Isalele ne, Ebu mbuloba bunudi nuhiana hanuela nshobo, buloba buakuha Yehowa kudi bisamba tshitema ne tshituha tshia tshisamba tshikuabo, bualu bua Bena Lubena ku nsubu ya batatuʼabo, ne Bena Gada ku nsubu ya batatuʼabo, ne tshituha tshia tshisamba tshia Manashe bakamana kuangata buhianyi buabo; bisamba bibidi ne tshituha tshia tshikuabo bakamana kuangata buhianyi buabo dishiya dia Yadene, batangilangane ne Yeleko, ku esete, kudi diba dihatuka. Yehowa wakambila Mose ne, Au mmena a balume badi banutahuluila buloba bua buhianyi buenu, Eleazâ muakindi ne Yoshua, muana mulume wa Nuna. Nenusungule mukelenge wa mu tshisamba ne tshisamba bua kunutahuluila buloba. Au mmena a bakelenge aba: wa tshisamba tshia Yuda, Kaleba, muana mulume wa Yefune; wa tshisamba tshia Shimeona, Shemuele, muana mulume wa Amihuda, wa tshisamba tshia Benyamina, Elidada, muana mulume wa Kiliona, wa tshisamba tshia Dana, Buki, muana mulume wa Yogeli, wa tshisamba tshia Yosefe tshisamba tshia Manashe, Haniele, muana mulume wa Efoda, wa tshisamba tshia Efelayima, Kemuele, muana mulume wa Shifetana, wa tshisamba tshia Zebuluna, Elisafana, muana mulume wa Pânaka, wa tshisamba tshia Yisakâ, Palatiele, muana mulume wa Azana, wa tshisamba tshia Ashê, Ahihuda, muana mulume wa Shelomi, wa tshisamba tshia Nafatale, Pedahele, muana mulume wa Amihuda. Aba mbantu bakasungula Yehowa bua kutahulula Bena Isalele buloba bua Kanâna. Yehowa wakambila Mose mu mpata ya Moaba hehi ne Yadene mitangilangane ne Yeleko ne, Wele mukenji kudi Bena Isalele, bua bobo bahe Bena Lewi misoko ya kushikamamu bu buhianyi buabo, bobo bahe Bena Lewi kabidi tshituha tshia buloba budi bunyunguluka misoko ei. Bobo nebashikame mu misoko ei, ne bimuna ne bintu biabo ne nyama yabo mikuabo nebikale mu buloba budi bunyunguluka misoko. Tshituha tshia buloba bunudi nuha Bena Lewi netshikale ku lumbu lua musoko tô ne ku coudées tshinunu ku nseke yonso. Ku butshika bua musoko nenuidikishe ku luseke lua ku esete coudées binunu bibidi, ne ku luseke lua ku Sude coudées binunu bibidi, ne ku luseke lua ku wesete coudées binunu bibidi, ne ku luseke lua ku nôde coudées binunu bibidi Buloba ebu bua ku matshika a misoko nebuikale buhianyi buabo. Nenuhe Bena Lewi misoko ei isambombo ya kunyemena, biashala muntu muntu mukuabo, yeye neanyemenemu; ha mutu ha misoko ei nenubahe misoko mikuabo makumi anai ne ibidi. Bungi bua misoko mudi nuha Bena Lewi neyikale makumi anai ne muanda mukulu, nenubahe misoko ei ne buloba budi buyinyunguluka. Bualu bua misoko mudi nubaha munkatshi mua Isalele, bantu badi ne misoko ya bungi, nebabahe misoko ya bungi, ne badi ne misoko mikese nebabahe misoko mikese, nebahe Bena Lewi misoko bu bungi bua buhianyi buabo. Yehowa wakambila Mose ne, Wambile Bena Isalele ne, Hanuasabuka Yadene mu buloba bua Kanâna, nenusungule misoko ya kunyemena, ne hashiha muntu muntu mukuabo ku mpukahuka, yeye neanyemenemu. Misoko neyikale bu binyemenu kudi musombuedi, mushihi wa mundi kafu biandi tô ne himaneye ku mpala kua tshisumbu tshia bantu bua kumulumbuluishabo. Nenusungule misoko ya kunyemena isambombo. Nenusungule misoko isatu dishiya dia Yadene, ne isatu mu buloba bua Kanâna, neyikale misoko ya kunyemena. Neyikale misoko ya kunyemenamu kudi Bena Isalele, ne kudi muenyi udi munkatshi muabo, hashiha muntu muntu mukuabo ku mpukahuka, neanyemenemu. Bikaleye mumukume ne tshintu tshia tshiamu tshifike, ne biafileye, yeye udi mushihi wa muntu, nebashihe mushihi wa muntu bulelela. Bikaleye mumukume ne dibue mu tshianza tshiandi, ne biafileye, yeye udi mushihi wa muntu, nebashihe mushihi wa muntu. Anyi bikaleye mumukume ne mutshi mu tshianza, ne biafileye, yeye udi mushihi wa muntu, nebashihe mushihi wa muntu. Musombuedi nkayandi neashihe mushihi wa muntu. Bikaleye mumukume ne tshiji, anyi bikaleye mumuele tshintu, hakadiye muale mu nshila, wakamushiha, anyi bikaleye mumukume ne tshianza tshiandi ne tshiji, mumushihe, nebashihe muntu wakamukuma, yeye udi mushihi wa muntu musombuedi neashihe mushihi wa muntu, hasangakeneye nʼandi. Kadi bikaleye mumutahe kayi ne tshiji, anyi bikaleye muele tshintu, tshimukume, kayi mumualamine mu nshila, anyi bikaleye mumukume ne dibue kayi mumutangile, ne mumushihe, kayi muikale nʼandi lukuna, kayi musue kunuenzela bibi, nebalumbulule tshilumbu tshia mukuna wa muntu ne musombuedi, bu mudi mikenji ei yamba, nebasungile mushihi mu tshianza tshia musombuedi, nebamuhingishe ku musoko wa kunyemena, kuakunyemeneye, ne yeye neashikamemu to ne hafua muakuidi munene, udi ne manyi a tshijila mela ha mutu. Kadi bikala mushihi mubi tshile butshika bua musoko wakanyemeneye, ne bikala musombuedi musangakene nʼandi ku butshika bua musoko wandi wa kunyemena, ne bikala musombuedi mushihe mushihi wa muntu, yeye kena ne bualu bubi, bualu bua yeye wakadi ne bualu bua kuikala mu musoko wa kunyemena to ne bakafua muakuidi munene, kadi ku nyima kua lufu lua muakuidi munene mushihi udi mumanye mua kuhingana ku buloba bua buhianyi buandi. Ei idi mikenji ya kuhumbulula hai malu ku bikondo bienu bionso, mu miaba yonso mudi nushikama, muntu udi ushiha mukuabo, nebashihe mushiku bu mu dî dia bamonyi; kadi kabena bamanye mua kumushiha anu ku dî dia mumonyi umue. Kanuangatshi bintu bia buhikudi kudi mushihi wa muntu udi muhile bulelela, bualu bua nebamushihe bulelela. Kanuangatshi bintu bia buhikudi kudi muntu wakasemena ku musoko wa kunyemena, bualu bua kumuhingisha ku buloba buandi to ne hafua muakuidi munene. Nunku kanuena nuona buloba bunudi nushikamamu, bualu bua mashi adi ona buloba, kabena bamanye mua kuhikula buloba hakamata mashi, anu ku mashi a muntu wakamatshisha mashi. Kanuonyi buloba bunudi nushikamamu, kundi mushikame kabidi, bualu bua meme Yehowa ndi mushikame munkatshi mua Bena Isalele. Bakadi ku mutu kua nsubu ya batatuʼabo ba diku dia Bena Gilada, muana mulume wa Makî, muana mulume wa Manashe, wa meku a bana balume ba Yosefe, bakalua kudi Mose ne kudi bakelenge ba ku mutu kua nsubu ya batatuʼabo ba mu Isalele, bakamba ne, Yehowa wakela dî kudi mukelenge wetu bua kutahulula buloba bua buhianyi ku nshobo, Yehowa wakela dî kudi mukelenge wetu kabidi bua kuha buhianyi bua Selofehada muanʼetu mulume kudi bana bandi bakashi. Bikalabo babakibue kudi balume ba mu tshisamba tshikuabo tshia Bena Isalele, nunku nebanyeme buhianyi buabo ku buhianyi bua batatuʼetu, nebabusangishe ku buhianyi bua tshisamba tshiakayabo. Nunku halua tshidimu tshia disanka dia Bena Isalele, buhianyi buabo nebusangishibue ku buhianyi bua tshisamba tshiakayabo, nunku buhianyi buabo nebumuke ku buhianyi bua batatuʼetu. Mose wakambila Bena Isalele bu mu dî dia Yehowa ne, Ba mu tshisamba tshia bana balume ba Yosefe badi bamba dî dilelela. Edi ndî diakamba Yehowa bualu bua bana bakashi ba Selofehada ne, Bobo babakibue kudi balume hadibo basue, kadi babakibue kudi balume ba mu meku a tshisamba tshia batatuʼabo. Nunku buhianyi bua Bena Isalele kabuena bumuka ku tshisamba ne ku tshisamba, muntu ne muntu wa munkatshi mua Bena Isalele neashale ne buhianyi bua tshisamba tshia batatuʼabo. Muana mukashi yonso udi ne buhianyi munkatshi mua Bena Isalele, neikale mukashi wa umue wa mu tshisamba tshia tatuʼandi, nunku muntu ne muntu wa Bena Isalele neikale ne buhianyi bua batatuʼabo. Nunku buhianyi bumue kabuena bumuka ku tshisamba ne ku tshisamba, tshisamba ne tshisamba tshia Bena Isalele netshikale ne buhianyi buatshi. Bana bakashi ba Selofehada bakenza muakambila Yehowa Mose, bualu bua Mahala ne Tîza ne Hogela ne Mileka ne Noa, bana bakashi ba Selofehada, bakadi babakibua kudi bana balume bakadi bana babo ne tatuʼabo. Bakadi babakibua kudi ba mu meku a bana balume ba Manashe, muana mulume wa Yosefe, buhianyi buabo buakashala mu tshisamba tshia meku a tatuʼabo. Au mmei ne mikenji bakambila Yehowa Bena Isalele mukana mua Mose mu mpata ya Moaba hehi ne Yadene mitangilangane ne Yeleko. Â mmei akambila Mose Bena Isalele dishiya dia Yadene mu tshihela mu Alabâ tshitangilangane ne Sufa, hankatshi ha Palana ne Tofele ne Labana ne Heselota ne Dizababa. Ku Holeba wa mu nshila wa ku mukuna wa Sei tô ne ku Kadeshe-bânea, nduendu lua matuku dikumi ne dimue. Mu tshidimu tshia makumi anai ne mu ngondo wa dikumi ne umue ne dituku dia kumudilu dia ngondo eu, Mose wakamanyisha Bena Isalele bua malu onso akamuambila Yehowa mu mikenji yakabeleleye; hakashiheye Sihona, mukelenge wa Bena Amole, wakadi ushikama mu Heshebona, ne Oga, mukelenge wa Bashana, wakadi ushikama mu Ashetalota ku Edelei. Dishiya dia Yadene mu buloba bua Moaba, Mose wakabanga kubamanyisha bua mikenji ne, Yehowa Nzambi wetu wakatuambila mu Holeba ne, Nuakumana kushikama musangu mule mu mukuna eu: bishai luendu luenu, yai bienu ku mikuna ya Bena Amole, ne ku miaba yonso idi hehi nʼabo mu Alabâ ne mu mikuna ne mu bibanda, ne mu luseke lua ku Sude, ne hehi ne muelelu wa mai manene, mu buloba bua Bena Kanâna ne mu Lebanona tô ne ku musulu munene dina diau Pelata. Monai, nakuteka buloba ebu buonso ku mpala kuenu: nubuelemu, nuhiane buloba buakalaya Yehowa batatuʼetu Abalahama ne Isaka ne Yakoba, bua kubahabu ne tunkanunuina tuabo tudi tubalonda ku nyima. Nakanuambila ku tshikondo atshi ne, Tshiena mua kunutuala nkayanyi: Yehowa, Nzambi wenu, wakunukumbasha ba bungi, ne monai, lelu nudi bu bungi bua mitoto ya mulu. Yehowa, Nzambi wa batatuʼetu, anukumbashe tô ne hanuahita bungi buenu bua katataka misangu tshinunu, anusankishe bu muakunulayeye! Meme nkayanyi ndi mua kutuala malu enu ne bujitu buenu ne kutanda kuenu munyi? Nuangate balume ba lungenyi lule, banudi bamanye, bungi bua bisamba bienu, nembateke ku mutu kuenu. Nuenu nuakangambila ne, Bualu buwakuamba budi buimpe bua tuetu tuenze. Nunku nakasungula balume ba lungenyi lule, banuakamanya, nakabateka ku mutu kuenu, tuhita tua binunu binunu, ne tuhita tua nkama nkama, ne tuhita tua makumi atanu makumi atanu, ne tuhita tua dikumi dikumi, ne miloho bungi bua bisamba bienu. Meme nakadimusha balumbuluishi benu tshikondo atshi ne, Unvuai bilumbu bia bana benu, nulumbulule bilumbu bia muntu ne muanʼabo mulume ne muenyi udi nʼandi biakane. Kanuikadi ne kansungusungu hanualumbulula bilumbu; nunvue dî dia muntu mukese ne dia muntu munene muomumue; kanutshinyi mpala wa muntu; bualu bua kulumbulula kua bilumbu kudi kua Nzambi: tshilumbu tshidi tshihita bukole, nulue nʼatshi kundi, meme nentshiunvue. Mu tshikondo atshi nakanuambila malu onso anudi ne bualu bua kuenza. Tuakabika ku Holeba, tuakenda tô mu tshihela atshi tshinene tshibi tshinuakatangila, ku nshila wa ku mikuna ya Bena Amole, bu muakatuambila Yehowa, Nzambi wetu; tuakalua ku Kadeshe-bânea. Meme nakanuambila ne, Nuakulua ku mikuna ya Bena Amole, buloba budi Yehowa mutuhe. Tangilai, Yehowa, Nzambi wenu, wakateka buloba ku mpala kuenu: yai bienu, nubuhiane, bu muakanuambila Yehowa, Nzambi wa batatuʼenu; kanutshinyi, kanuikadi ne buowa. Nuenu nuakalua kundi, buonso buenu muakamba ne, Tutume bantu ku mpala kuetu, bua hobo batentekele buloba, bahingane, batumanyishe bua nshila utudi tuyamu, ne misoko itudi tubuelamu. Bualu ebu buakusankisha bimpe, nakasungula balume dikumi ne babidi, muntu ku tshisamba muntu ku tshisamba. Bobo bakaya ku mikuna, bakalua mu tshibanda tshia Eshekola, bakatentekela buloba. Bakangata bintu biakadiunda mu buloba mu bianza biabo, bakalua nʼabi kutudi, bakatuambila ne, Buloba budi Yehowa mutuhe budi buimpe. Kadi nuenu nuakahidia bua kuyamu, nuakahidia mukenji wa Yehowa, Nzambi wenu. Nuakatontolola mu ntenta yenu, nuakamba ne, Bualu bua Yehowa wakadi nʼetu tshiji, yeye wakatuhatula mu buloba bua Ejipitu, bua kutufila mu bianza bia Bena Amole, bua bobo batushihe. Netubuelemu munyi? Bana betu bakatekesha mitshima yetu, bakamba ne, Bantu aba badi batuhita hunene ne bule; misoko yabo idi minene, ne mpangu yai ya mabue idi miye mulu mule; bualu bukuabo, tuakatangilamu bana balume ba Bena Anaka. Hashishe nakanuambila ne, Kanuikadi ne buowa, kanubatshinyi. Yehowa, Nzambi wenu, udi uya ku mpala kuenu, yeye neanuluile nvita yenu, bu muakenzeye ku mesu kuenu mu Ejipitu, ne mu tshihela, nuakatangila ne Yehowa, Nzambi wenu, wakanutuala mu maboko, bu mudi tatu utuala muanʼandi mulume, mu nshila yonso inuakaya tô ne hanuakalua ku muaba eu. Kadi mu bualu ebu buonso kanuakatumikila Yehowa, Nzambi wenu, wakaya ku mpala kuenu mu nshila bua kunukebela muaba wa kushimika ntenta yenu, mu difutu dikenka kahia butuku, ne mu dî tulu dia diledi munya, bua kunulombola mu nshila unuakadi ne bualu bua kuenda. Yehowa wakunvua mei enu, wakadi nʼenu tshiji, wakaditshiha ne, Nansha muntu umue wa mu tshikondo etshi tshibi neatangile buloba ebu buimpe, bunakalaya batatuʼenu bua kunuhabu, anu Kaleba, muana mulume wa Yefune, neabutangile; nemmuhe buloba buakadiateye muinshi mua makasa andi, ne kudi bana bandi, bualu bua yeye wakalonda Yehowa bulelela. Yehowa wakadi nʼanyi tshiji bualu buenu, wakamba ne, Wewe kuena ubuelamu: Yoshua, muana mulume wa Nuna, utu wimana ku mpala kuebe, yeye neabuelemu: ukoleshe mutshima wandi, bualu bua yeye neahianyishe Bena Isalele buloba. Kadi bana benu bakese banuakamba ne, Nebafue, badi kabayi banze kumanya malu mimpe ne malu mabi, bobo nebabuelemu, nebahiane buloba. Kadi nuenu, nunyunguluke, yai bienu mu tshihela mu nshila wa ku Dishiba Dikunze. Hashishe nuenu nuakangambila ne, Tuakuenzela Yehowa bibi, netuye, netuluangane, bu muakatuambila Yehowa, Nzambi wetu. Muntu ne muntu wakangata bintu biandi bia nvita; nuakamba kuya ku mikuna. Yehowa wakangambila ne, Ubambile ne, Kanuyi, kanuluanganyi; bualu bua meme tshiena munkatshi muenu; kanuhonyi ku mpala kua bantu badi nʼenu lukuna. Nakanuambila nunku, kanuakangunvuila; kadi nuakadi ne budisu, nuakahidia dî dia Yehowa, nuakadiyila ku mikuna. Bena Amole bakadi bashikama ku mikuna bakaluhuka kunudi, bakanuihata bu mbulubulu, bakanunyemesha mu Sei tô ne ku Hôma. Nuenu nuakahingana, nuakadila ku mpala kua Yehowa; kadi Yehowa kakunvua dî dienu, kakateleja matshu andi kunudi. Nunku nuakashikama mu Kadesha matuku a bungi, nudi bamanye bungi bua matuku anuakashalamu. Tuakanyunguluka, tuakaya mu tshihela mu nshila wa ku Dishiba Dikunze, bu muakangambila Yehowa; tuakanyunguluka mukuna wa Sei matuku a bungi. Yehowa wakangambila ne, Nuakunyunguluka mukuna eu musangu mule, yai bienu ku nôde. Wambile bantu aba ne, Nenuhite mu buloba bua bana benu, bana ba Esau, badi bashikama mu Sei; bobo nebanutshine, nudimuke bienu; kanutandanganyi nʼabo, bualu bua tshiena munuhe buloba buabo, nansha kaba ka bunene bua dikasa dia muntu; bualu bua nakamana kuha Esau mukuna wa Sei bu buhianyi buandi. Nudi mua kudisumbila bia kudia kudibo ku argent, bua nuenu kudia; nenudisumbile mai a kunua kudibo ku argent, bua nuenu kunua. Bualu bua Yehowa, Nzambi wenu, wakatuadishila disanka mu malu onso anuakenza ne tshianza tshienu; yeye wakamanya ngendu yenu mu tshihela etshi tshinene; mu bidimu ebi makumi anai Yehowa, Nzambi wenu, wakadi nʼenu; kanuakakengela tshintu. Nunku tuakahita bana betu, bana ba Esau, bakadi bashikama mu Sei, mu nshila wa ku Alabâ ku Elata to ne ku Esione-gebê. Tuakanyunguluka, tuakaya mu nshila wa ku tshihela tshia Moaba. Yehowa wakangambila ne, Kanutatshishi Bena Moaba, kanuluanganyi nʼabo nvita; bualu bua tshiena munuhe buloba buabo bu buhianyi buenu; bualu bua nakamana kuha bana ba Lota buloba bua Ala bu buhianyi buabo. (Bena Eme bakashikamamu diambedi, bantu banene, bantu ba bungi, bule bua Bena Anaka: badi bababikila kabidi ne, Bena Lefa, bu Bena Anaka; kadi Bena Moaba bakababikila ne, Bena Eme. Bena Holi bakashikama mu Sei diambedi, kadi Bena Esau bakabalonda ku nyima; bakabashiha ku mpala kuabo, bakashikama mu muaba wabo; bu muakenza Bena Isalele ku buloba bua buhianyi buabo, buakabahebua kudi Yehowa.) Katataka bikai bienu, nusabuke kasulu ka Zelede; tuakasabuka kasulu ka Zelede. Bungi bua matuku atuakalala mu nshila ku Kadeshe-bânea tô ne ku kasulu ka Zelede akadi bidimu makumi asatu ne muanda mukulu; tô ne hakafua mulongo wonso wa bena nvita munkatshi mua tshitudilu, bu muakabalaya Yehowa. Tshianza tshia Yehowa tshiakadi kudibo, bua kubashiha munkatshi mua tshitudilu, tô ne hakafuabo buonso buabo. Hashishe hakajimina bena nvita bonso, hakafuabo munkatshi mua bantu, Yehowa wakangambila ne, Lelu nenuhite ku Ala, butshika bua Moaba: hanualua ba buihi ne Bena Amona, kanubatatshishi, kanuluanganyi nʼabo; bualu bua tshiena munuhe buloba bua Bena Amona bu buhianyi buenu, bualu bua nakamana kuha bana ba Lota buloba abu bu buhianyi buabo. (Buloba ebu buakadi buloba bua Bena Lefa: Bena Lefa bakashikamamu diambedi; kadi Bena Amona badi bababikila ne, Bena Zamazuma, bantu bakole, bantu ba bungi, bule bua Bena Anaka; kadi Yehowa wakabashiha ku mpala kuabo, bobo bakabalonda ku nyima, bakashikama mu muaba wabo; bu muakenzeleye bana ba Esau, bakadi bashikama mu Sei, hakashiheye Bena Holi ku mpala kuabo; bobo bakabalonda ku nyima, badi bashikama mu muaba wabo tô ne ku dituku edi. Bena Awa bakadi bashikama mu misoko tô ne ku Gaza ne Bena Kafetô bakafuma ku Kafetô, bakabashiha, bakashikama mu muaba wabo.) Bikai bienu, yai, nuhite mu tshibanda tshia mai a Ânona: monai, nakafila Sihona, Muena Amole, mukelenge wa Heshebona, ne buloba buandi mu tshianza tshienu; nubange kuhiana buloba, nuluangane nʼandi nvita. Lelu nembange kubuesha buowa ne ditshina mu mitshima ya bantu bonso badi muinshi mua diulu, badi bunvua lumu luenu: ne hunvuabo, nebazakale ne mitshima yabo nebanyingalale bualu buenu. Nakatuma bamessager mu tshihela tshia Kedemota kudi Sihona, mukelenge wa Heshebona, ne mei a ditalala ne, Witabushe bua tuetu tuhite mu buloba buebe: netuye anu mu musesu munene, katuena tusesuka ku tshianza tshia balume anyi ku tshianza tshia bakashi. Wewe neutusumbishe bia kudia ku argent bua tuetu kudia; Utuhe mai a kunua ku argent, bua tuetu kunua, anji kuitabusha bua tuetu tuhite ku makasa; bu muakatuenzela bana ba Esau ne Bena Moaba badi bashikama mu Ala, tô ne hatuasabuka Yadene mu buloba buakatuha Yehowa, Nzambi wetu. Kadi Sihona, mukelenge wa Heshebona, wakahidia bua tuetu tuhite mu buloba; bualu bua Yehowa, Nzambi wenu, wakanyengabasha meji andi, wakakolesha mutshima wandi, bualu bua kumufila mu tshianza tshienu, bu muakenzeye lelu. Yehowa wakangambila ne, Mona, nakubanga kufila Sihona ne buloba buandi mu tshianza tshienu, bua nuenu nuhiane buloba buandi. Hashishe Sihona wakalua kutudi ne bantu bandi bonso bua kuluangana nʼetu nvita ku Yahasa. Yehowa, Nzambi wetu, wakamufila mu tshianza tshietu; tuakabashiha ne yeye ne bana bandi balume ne bantu bandi bonso. Tuakanyenga misoko yandi yonso tshikondo atshi, tuakahaula musoko ne musoko muakadi bantu, ne bakashi ne bana bakese: katuakashiya nansha muntu; kadi tuakadiangatshila bimuna, ne bintu biakadi mu misoko ituakanyenga. Ku Aloê udi ku muelelu wa tshibanda tshia Ânona ne ku musoko mukuabo udi mu tshibanda tô ne ku Gilada, katuakasangana musoko umue wakatuhita bukole bua kûnyenga; Yehowa, Nzambi wetu, wakafua misoko yonso mu tshianza tshietu; anu buloba bua Bena Amona, katuakalua ha buihi nʼabu; buloba buonso bua dishiya dia kasulu ka Yaboka, ne misoko ya ku mikuna ne miaba yonso yakatukanda Yehowa, Nzambi wetu. Tuakanyunguluka, tuakaya mu nshila wa ku Bashana: ne Oga, mukelenge wa Bashana, wakalua ne bantu bandi bonso bua kuluangana nʼetu ku Edelei. Yehowa wakangambila ne, Kumutshinyi nansha; bualu bua nakumufila ne bantu bandi bonso ne buloba buandi mu tshianza tshiebe; wewe neumuenzele yeye bu mu wakenzela Sihona, mukelenge wa Bena Amole, wakadi ushikama mu Heshebona. Nunku Yehowa, Nzambi wetu, wakafua Oga, mukelenge wa Bashana, ne bantu bandi bonso mu tshianza tshietu kabidi; tuakabashiha, nansha muntu umue wakashala. Tuakanyenga misoko yandi yonso ku tshikondo atshi, katuakashiya musoko umue; tuakanyenga misoko makumi asambombo, ne luseke tuonso lua Âgoba, bukelenge bua Oga mu Bashana. Misoko ei yonso yakadi ne mpangu mile ne bibi bikanda ne biamu; tuakanyenga misoko mikuabo ya bungi yakadi kayiyi ne mpangu. Tuakabajimisba, bu munuakenzela Sihona, mukelenge wa Heshebona; tuakahaula misoko yonso yakadi ne bantu, ne bakashi ne bana bakese. Kadi tuakadiangatshila bimuna ne bintu bionso bia mu misoko. Tuakanyenga buloba mu bianza bia bakelenge babidi bakadi dishiya dia Yadene, ku tshibanda tshia Ânona tô ne ku mukuna wa Hêmona; (Bena Sidona badi babikila Hêmona ne, Sileona, ne Bena Amole badi babikila Hêmona ne, Senî;) misoko yonso ya mu mpata, ne misoko yonso ya mu Gilada, ne ya mu Bashana tô ne ku Saleka ne Edelei, misoko ya bukelenge bua Oga mu Bashana. (Anu Oga, mukelenge wa Bashana, wakadi mushale wa Bena Lefa; monai, bulalu buandi buakadi bua biamu; budi mu Laba wa Bena Amona: bule buabu buakadi coudées tshitema ne butshiama buabu buakadi coudées mai.) Tuakanyenga buloba ebu ku tshikondo atshi, ku Aloê mu tshibanda tshia Ânona, ne tshituha tshia mikuna ya Gilada ne misoko idimu, nakaha Bena Lubena ne Bena Gada: ne tshituha tshikuabo tshia Gilada ne misoko ya bukelenge bua Oga wa mu Bashana nakaha tshituha tshia tshisamba tshia Manashe: luseke luonso lua Âgoba, misoko yonso ya mu Bashana. (Ebu mbuloba bua Bena Lefa. Yai, muana mulume wa Manashe, wakangata luseke luonso lua Âgoba tô ne ku butshika bua Bena Geshû ne Bena Mâka, wakidika buloba bua Bashana bu dina diandi ne, Hawota-yai tô ne ku dituku edi.) Nakaha Maki Gilada. Nakaha Bena Lubena ne Bena Gada buloba buonso ku Gilada tô ne ku hankatshi ha tshibanda tshia Ânona tô ne ku kasulu ka Yaboka ku butshika bua Bena Amona; ne buloba bua Alabâ kabidi ne tshibanda tshia Yadene ku Kinelete tô ne ku dishiha dia Alabâ, Dishiba dia Luehu, kuinshi kua mukuna wa Pisega ku esete. Nakanuambila ku tshikondo atshi ne, Yehowa, Nzambi wenu, wakanuha buloba abu bu buhianyi: bena nvita nebasabuke ne bintu bia nvita ku mpala kua bana benu ba Bena Isalele. Kadi bakashi benu ne bana benu bakese ne bimuna (ndi mumanye ne, Nudi ne bimuna bia bungi) nebishale mu misoko nakanuha, tô ne haha Yehowa baha benu dikisha bu nuenu, ne bobo badi bahiana buloba budi Yehowa, Nzambi wenu, ubaha, dishiya dia Yadene; hashishe nenuhingane muntu ne muntu ku buhianyi buandi bunakamuha. Nakambila Yoshua ku tshikondo atshi ne, Mesu ebe akatangila malu onso akenzela Yehowa, Nzambi wetu, bakelenge aba babidi: Yehowa nênzele makelenge onso nunku a kunudi nuya. Kanubatshinyi, bualu bua Yehowa, Nzambi wenu, udi unuluila nvita. Nakasengelela Yehowa ku tshikondo atshi, nakamba ne, Mukelenge Yehowa, wewe wakabanga kulesha muntu webe bunene buebe, ne tshianza tshiebe tshikole: nzambi kai udi mu diulu anyi udi ha buloba udi mua kuenza bu mûdi wenza malu ebe a kukema? Witabushe bua meme nsabuke, utangile buloba buimpe budi dishiya dia Yadene, mukuna au muimpe, ne Lebanona. Kadi Yehowa wakadi nʼanyi tshiji bua bualu buenu, yeye kena mungunvuile; Yehowa wakangambila ne, Kuakushika, kungambidi bualu ebu kabidi. Ubande biebe ku mutu kua Pisega, bandisha mesu ebe ku luseke lua ku wesete ne lua ku nôde ne lua ku Sude ne lua ku esete, tangila ne mesu ebe, bualu bua wewe kuena usabuka Yadene eu. Kadi Wambile Yoshua dî, ushindike mutshima wandi, umukoleshe; bualu bua yeye neasabuke ku mpala kua bantu aba, neabahianyishe buloba budi utangila. Nunku tuakashikama mu tshibanda tshitangilangane ne Bete-peô. Katataka, nuenu Bena Isalele, unvuai mei ne mikenji bindi musue kunuyisha, bua nuenu kubienza bua nuikale ne muoyo, nubuelemu, nuhiane buloba budi Yehowa, Nzambi wa batatu benu, unuha. Kanusangishi mei ha mutu ha dî dinakanuambila, kanumushi mei ku dî adi; bua nuenu nutumikile mikenji ya Yehowa, Nzambi wenu, Nakanuambila. Mesu enu akatangila bualu buakenza Yehowa bualu bua Bâla-peô; Yehowa, Nzambi wenu, wakashiha balume bonso munkatshi muenu bakalonda Bâla-peô; kadi nuenu bakalamata Yehowa, Nzambi wenu, nudi ne muoyo lelu eu. Monai, nakanuyisha mei ne mikenji, bu muakangambila Yehowa, Nzambi wanyi, bua nuenu kubienza mu buloba bunudi nubuela bua kubuhiana. Nubivuluke, nubienze; bualu ebu budi lungenyi luenu ne budimu buenu ku mesu kua bantu badi bunvua mikenji ei yonso, badi bamba ne, Bulelela, bantu aba banene badi ne lungenyi ne budimu. Tshisamba kai tshidi ne nzambi ha buihi nʼabo bu mudi Yehowa, Nzambi wetu, hanuaulukila? Tshisamba kai tshidi ne mikenji ne mei majalame bu mikenji ei yonso inakateka ku mpala kuenu lelu? Nuanji kudimuka, nulame mioyo yenu bilengele, bua kanuhu muoyo bua malu anuakatangila ne mesu enu, ne bua mei au kaluhuki mu mitshima yenu matuku onso a muoyo wenu; kadi nuamanyisha bana benu ne bana ba bana benu; dituku dinuakimana ku mpala kua Yehowa, Nzambi wenu, mu Holeba, hakangambila Yehowa ne, Unsangishile bantu, mbunvuishe mei anyi, bua bobo bamanye mua kuntshina matuku abo onso a ha buloba, ne bua bobo bayishe bana babo. Nuenu nuakalua ha buihi, nuakimana kuinshi kua mukuna; mukuna wakatema kahia tô ne mu diulu, ne midima mikole ne matutu. Yehowa wakanuambila mei munkatshi mua kahia: nuenu nuakulua mei kadi kanuakatangila muntu; nuakunvua anu dî dia muntu. Yeye wakanumanyisha bua tshihungidi tshiandi tshiakanuambileye bua nuenu nuenze, mikenji ei dikumi mene mene; yeye wakayifunda ha mabue abidi. Yehowa wakangambilaku tshikondo atshi bua meme nnumanyishe mei ne mikenji, bua nuenu kubienza mu buloba bunudi nubuela bua kubuhiana. Nudimuke bienu bimpe; bualu bua kanuakatangila tshifuanyikishi tshia muntu dituku diakasomba nʼenu Yehowa mu Holeba munkatshi mua kahia; kanuonyi mitshima yenu, kanudisongidi luhingu ne tshifuanyikishi tshia muntu nansha mulume nansha mukashi, nansha tshia nyama yonso ya ha buloba, anyi tshia nyunyu yonso idi yenda mu diulu, anyi tshia tshintu tshidi tshidikoka hanshi ha buloba, anyi tshia munyinyi wa mu mai adi muinshi mua buloba; bua hanuabandisha mesu enu mulu, ne hanuatangila diba ne ngondo ne mitoto ne bintu bionso bia mu diulu, kanubitendeledi, kanubienzedi mudimu; ebu mbualu buakaha Yehowa, Nzambi wenu, bantu bonso bakuabo badi muinshi mua diulu. Kadi Yehowa wakanusungula bienu, wakanuhatula mu tshikutu tshia kahia, mu Ejipitu mene, bua nuenu nuikale bantu ba buhianyi buandi, bu mu dituku edi. Bualu bukuabo, Yehowa wakadi nʼanyi tshiji bua bualu buenu, wakaditshiha ne, Wewe kuena mua kusabuka Yadene ne kubuela mu buloba abu buimpe budi Yehowa, Nzambi wenu, unuha bu buhianyi buenu; kadi bûdi nʼabu mbua kufuila mu buloba ebu, kuena mua kusabuka Yadene; kadi nuenu nenusabuke, nenuhiane buloba abu buimpe. Nudimuke bienu, kanuhu muoyo bua tshihungidi tshia Yehowa, Nzambi wenu, tshiakahungeye nʼenu: kanudisongidi luhingu anyi tshifuanyikishi tshia tshintu tshimue tshiakanuhidisha Yehowa, Nzambi wenu, Bualu bua Yehowa, Nzambi wenu, udi bu kahia kadi kashidisha bionso, udi Nzambi wa mukau. Hanuadia bana, ne bana ba bana benu, hanuashala mu buloba musangu mule, hanuona mitshima yenu bua kudisongela luhingu ne tshifuanyikishi tshia tshintu, hanuenza malu mabi ku mesu kua Yehowa, Nzambi wenu, bua kumufuisha tshiji; ndi mbikila diulu ne buloba bu bamanyi ba bualu kunudi lelu ne, Nenujimine ha buloba bunudi nuhiana dishiya dia Yadene tshituha tshihi; kanuena nuvudishangana matuku enu ha buloba, kadi nebanujimishe bulelela. Yehowa neanumuangalashe munkatshi mua bantu bakuabo, nenuikale bantu bakehe munkatshi mua bisamba mudi Yehowa unutuma. Kuaka nenutendelele nzambi mikuabo yakasongabo ne mitshi ne mabue, kayena mua kutangila anyi mua kunvua anyi mua kudia anyi mua kununkila. Kadi kuaka nenukebe Yehowa, Nzambi wenu, nenusangakene nʼandi hanuamukeba ne mitshima yenu yonso ne mioyo yenu yonso. Hanuakenga mu dikenga, halua malu au onso kunudi, nenuhingane kudi Yehowa, Nzambi wenu, mu matuku adi ku nyima, nenutumikile dî diandi: bualu bua Yehowa, Nzambi wenu, udi Nzambi wa luse; yeye kena unuhanga, kena unujimisha, yeye kena uhua muoyo bualu bua tshihungidi tshia batatuʼenu tshiakahungeye nʼabo. Katataka nudikonke munda bua matuku adi ku nyima akadi ku mpala kuenu, katshia Nzambi wafuka bantu ha buloba, ne ku luseke lumue lua diulu tô ne ku luseke lukuabo ne, Bikalaku bualu bunene nunku, anyi bikalabo bunvue lumu lua bualu bua nunku. Bantu kai bakumpa dî dia Nzambi diakalua kudibo munkatshi mua kahia, bu munuakadiunvua, ne bakikala ne muoyo? Anyi Nzambi wakamba kuya bua kudisunguila tshisamba munkatshi mua tshisamba tshikuabo, kudi mateta ne kudi bimanyinu ne kudi malu a kukema ne kudi nvita ne ku tshianza tshikole ne diboko diandi diolola ne kudi malu manene adi atshinyisha bantu bu muakanuenzela Yehowa, Nzambi wenu, mu Ejipitu ku mesu kuenu, anyi? Wakunuenzela nunku bua kunumanyisha ne, Yehowa udi Nzambi; kakuena Nzambi mukuabo. Yeye wakanunvuisha dî diandi mu diulu bua kunumanyisha malu: wakanuisha kahia kandi kanene hanshi ha buloba; nuenu nuakunyua mei andi munkatshi mua kahia. Bualu bua yeye wakasua batatu benu, nunku yeye wakasungula bana babo bakabalonda ku nyima, yeye nkayandi wakanuhatula mu Ejipitu ne bukole buandi bunene; bua kunuihatshila bisamba bidi binuhita bunene ne bukole ku mesu kuenu, ne bua kulua nʼenu mu buloba buabo bu buhianyi, bu mudi bualu ebu lelu. Numanye bienu lelu, nubueshe bualu ebu mu mitshima yenu ne, Yehowa udi Nzambi wa mu diulu ne hanshi ha buloba kabidi: kakuena mukuabo. Nuenu nutumikile mei andi ne mikenji yandi, bu munakunuambila lelu, bua nuenu nuikale ne disanka ne bana benu badi banulonda ku nyima, ne bua nuenu nuvudishangane matuku enu ha buloba budi Yehowa, Nzambi wenu, unuha tshiendelele. Hashishe Mose wakasungula misoko ya kunyemena isatu dishiya dia Yadene kudi diba dihatuka; bualu bua mushihi wa muntu ku mpukahuka, wakadi kayi nʼandi lukuna diambedi, anyemene ku umue wa mu misoko ei, ikale biandi ne muoyo. Mena a misoko ei akadi: Besê mu tshihela, mu muaba wa mpata, wa mu Bena Lubena; ne Lamota mu Gilada wa Bena Gada; ne Golana mu Bashana wa Bena Manashe. Â mmei akela Mose Bena Isalele: â mmalu ne â mmei ne ei mmikenji wakambila Mose Bena Isalele, hakaluhukabo mu Ejipitu, dishiya dia Yadene, mu tshibanda tshidi tshitangilangane ne Bete-peô, mu buloba bua Sihona, mukelenge wa Bena Amole, wakadi ushikama mu Heshebona, wakashihabo kudi Mose ne Bena Isalele hakaluhukabo mu Ejipitu. Bobo bakanyenga buloba buandi, ne buloba bua Oga, mukelenge wa Bashana, bakelenge babidi ba Bena Amole, bakadi dishiya dia Yadene kudi diba dihatuka; ku Aloê udi ku butshika bua tshibanda tshia mai a Ânona tô ne ku mukuna wa Sileona (dina dikuabo ne Hêmona), ne buloba buonso bua Alabâ dishiya dia Yadene ku esete tô ne ku dishiha dia mai a Alabâ kuinshi kua mukuna wa Pisega. Mose wakabikila Bena Isalele bonso, wakabambila ne, Unvuai, Isalele, mei ne mikenji bindi nnuambila mu matshu enu lelu, bua nuenu nubimanye ne nubienze. Yehowa, Nzambi wetu, wakahunga nʼetu tshihungidi mu Holeba. Yehowa kakahunga tshihungidi etshi ne batatu betu, kadi wakatshihunga anu nʼetu buonso buetu badi ne muoyo lelu eu. Yehowa wakasomba nʼenu mpala ha mpala ha mukuna munkatshi mua kahia, (Meme nakimana hankatshi henu ne Yehowa tshikondo atshi, bua kunulesha dî dia Yehowa; nuenu nuakatshina bualu bua kahia, kanuakabanda ku mukuna;) yeye wakamba ne, Meme ndi Yehowa, Nzambi wenu, wakanuhatula mu buloba bua Ejipitu ne mu nsubu wa lukanu. Kuikadi ne nzambi mikuabo ne meme hohamue. Kudisongidi luhingu anyi tshifuanyikishi tshia tshintu tshia mu diulu anyi tshia tshintu tshia hanshi ha buloba anyi tshia tshintu tshia mu mai adi muinshi mua buloba: kubmamina, kubitendeledi; bua meme Yehowa, Nzambi webe, ndi bianyi Nzambi wa mukau; ntu ngatumina bana ba tshihungu tshisatu anyi tshinai badi nʼanyi lukuna mibi ya batatuʼabo; ntu ngalesha bihungu tshinunu badi bansue ne badi benza mikenji yanyi luse lujalame. Kutedi dina dia Yehowa, Nzambi webe, tshitelatela, bua Yehowa kena ubingisha muntu udi utela dina diandi tshitelatela. Uvuluke dituku dia Lumingu, udijidile, bu muakanuambila Yehowa, Nzambi wenu. Ukuate mudimu webe matuku asambombo, wenza midimu yebe yonso; kadi dituku dia muanda mutekete didi Lumingu lua Yehowa, Nzambi webe: dituku adi kuenji mudimu, nansha wewe nansha muanʼebe mulume nansha muanʼebe mukashi, nansha muhika webe mulume nansha muhika webe mukashi, nansha ngombe webe, nansha mpunda webe, nansha bimuna biebe, nansha muenyi udi ku mbelu kuebe; bualu bua muhika webe mulume ne muhika webe mukashi nebikishe bu wewe mene. Uvuluke ne wewe wakadi muhika mu buloba bua Ejipitu, ne Yehowa, Nzambi webe, wakakuhatulamu ne tshianza tshia bukole ne diboko diandi diolola: nunku Yehowa, Nzambi webe, wakalelela mukenji bua wewe uvuluke dituku dia Lumingu. Unemeke tatuʼebe ne mamuʼebe bu muakanuambila Yehowa, Nzambi webe, bua matuku ebe ikale a bungi, ne bua wewe ukume dikasa dimpe mu buloba budi Yehowa, Nzambi webe, ukuha. Kushihianganyi. Kuendi masandi. Kuibi. Kudingidi mukuenu. Kukumi mutshima webe ku mukashi wa mukuenu, anyi ku nsubu wa mukuenu, anyi ku budimi buandi, anyi ku muhika wandi mulume anyi ku muhika wandi mukashi, anyi ku ngombe wandi anyi ku mpunda wandi anyi ku tshintu tshionso tshia mukuenu. Yehowa wakambila tshisumbu tshienu tshionso mei â ku mukuna munkatshi mua kahia, mu difutu dinene, ne mu midima mikole ne dî dikole; kena usangisha mei makuabo ha mutu. Yeye wakafunda ha mabue abidi, wakampau. Hashishe hanuakunvua dî diakadi munkatshi mua midima, hakadi mukuna mutema kahia, nuenu nuakalua kundi, ne ba ku mutu kua bisamba bienu ne bakulu benu; nuakamba ne, Tangila, Yehowa, Nzambi wetu, wakafuisha butumbi buandi ne bunene buandi, tuakulua dî diandi munkatshi mua kahia: tuakatangila lelu ne Nzambi udi usomba ne muntu, ne yeye udi wikala ne muoyo. Nunku netufue bua tshinyi? Bualu bua kahia aka kanene nekatuoshe; bitunvua dî dia Yehowa, Nzambi wetu, kabidi, hashishe netufue. Muntu kai munkatshi mua bantu bonso wakunvua dî dia Nzambi wa muoyo, diakafuma munkatshi mua kahia, bu tuetu tuakulua, ne wakashala ne muoyo? Semena biebe ha buihi, unvua mei onso adi Yehowa, Nzambi wetu, musue kubambila: utuambile bietu mei onso adi Yehowa, Nzambi wetu, mukuambile; tuetu netulue dî diandi, netudienze. Yehowa wakunyua mei enu hanuakadi basombe nʼanyi; ne Yehowa wakangambila ne, Nakunvua mei a bantu aba, akukuambilabo; mei onso akuambabo adi mimpe. O, nakadi kusua bua mutshima eu wikale munda muabo, bua kuntshina ne bua kuenza mikenji yanyi yonso matuku onso, ne bobo bikale ne dikasa dimpe, ne bana babo badi balonda ku nyima tshiendelele! Ya biebe, ubambile ne, Hinganai bienu ku ntenta yenu. Kadi wewe wimane biebe hehi nʼanyi, nenkuambile mei onso, ne mikenji ne malu bindi musue wewe kubamanyisha, bua bobo babienze mu buloba bundi nnuha. Nuenu nutumikile mei onso adi Yehowa, Nzambi wenu, unuambila; kanusesuki ku tshianza tshia balume anyi ku tshianza tshia bakashi. Nuende bienu mu nshila wakanuambila Yehowa, Nzambi wenu, bua nuenu nuikale ne muoyo, ne bua nuenu nukume dikasa dimpe, ne bua nuenu nuvudishangane matuku enu mu buloba bunudi nuhiana. Ei mmikenji ne â mmei ne â mmalu wakangambila Yehowa bua kunumanyisha, bua nuenu nubienze mu buloba bunudi nuhiana: bua nuenu nutshine Yehowa, Nzambi wenu, bua kutumikila mei andi onso ne mikenji yandi, binakanuambila, ne wewe ne muanʼebe mulume, ne muana wa muanʼebe mulume, matuku onso a muoyo wenu; bua wewe uvudishe matuku ebe. Unvuai, Isalele, nubienze; bua nuenu nukume dikasa dimpe, ne bua nuenu nukumbane ba bungi, bu muakanulaya Yehowa, Nzambi wa batatuʼenu, mu buloba budi bûle tente ne mabele ne buitshi. Unvuai Isalele, Yehowa, Nzambi wetu, udi biandi Yehowa umue; sua Yehowa, Nzambi webe, ne mutshima webe wonso, ne muoyo webe wonso, ne bukole buebe buonso. Mei au anakukuambila lelu eu ikale mu mutshima webe; wewe newayishe bana bebe, wewe neusombelele nʼabo bua mei au, hawashikama mu nsubu webe, ne hawenda mu nshila, ne hawalala, ne hawabika. Wewe newasuike bu tshimanyinu ku tshianza tshiebe, ne hankatshi ha makiki. Newafunde ha minoko ya bibi bia nsubu webe, ne ha bibi bia mishiku ya luhangu luebe. Hashishe halua Yehowa, Nzambi wenu, nʼenu mu buloba buakalayeye batatu benu, Abalahama ne Isaka ne Yakoba, bua kunuhabu, misoko minene ne miakane mudi kanuyi bibake, ne nsubu miule tente ne bintu bimpe mudi kanuyi bûshe, ne mena a mai akumbulabo, anudi kanuyi bumbule, ne madimi a tumuma tukese ne mitshi ya olive, binudi kanuyi bakune; nuenu nenudie, nenukute mafu tente; hashishe nudimukai, bua kanuhu muoyo bua Yehowa wakanuhatula mu buloba bua Ejipitu ne mu nsubu wa buluka. Nutshine Yehowa, Nzambi wenu, numuenzele yeye nkayandi mudimu, nuditshihe kudi dina diandi. Kanulondi nzambi mikuabo ya bantu badi ha buihi nʼenu; bualu bua Yehowa, Nzambi wenu, udi munkatshi muenu, udi Nzambi wa mukau, bua tshiji tshia Yehowa, Nzambi wenu, katshikadi kunudi, ne bua yeye kanujimishi ha mutu ha buloba. Kanutetshi Yehowa, Nzambi wenu, munda bu munuakamuteta mu Masa. Nutumikile mikenji ya Yehowa, Nzambi wenu, ne mei akanuambileye ne malu andi akanumanyisheye. Nuenze anu malu adi makane ne mimpe ku mesu kua Yehowa; bua nuenu nukume dikasa dimpe, ne bua nuenu nubuele ne nuhiane buloba buimpe buakalaya Yehowa batatu benu, bua kunuihatshila bantu bonso badi nʼenu lukuna ku mpala kuenu, bu muakamba Yehowa. Hakukonkabo kudi muanʼebe mulume ne, Mei au ne mikenji ne malu biakanuambila Yehowa, Nzambi wenu, bidi tshinyi? Hashishe newambile muanʼebe mulume ne, Tuakadi bahika ba Palo mu Ejipitu, ne Yehowa wakatuhatula mu Ejipitu ne tshianza tshikole; ne Yehowa wakatulesha bimanyinu ne malu a kukema a bungi ne makole mu Ejipitu ne kudi Palô ne ba mu nsubu muandi, ku mesu kuetu; yeye wakatuhatulamu, bualu bua kulua nʼetu ne bua kutuha buloba buakalayeye batatu betu. Yehowa wakatuela mikenji ei, bua tuetu tutshine Yehowa, Nzambi wetu, bua yeye atuenzele bimpe matuku onso, bua tuetu tuikale ne muoyo utudi nʼau lelu eu. Bituenza mikenji ei ku mesu kua Yehowa, Nzambi wetu, bu muakabambileye, netubadibue ne mbakane. Halua Yehowa nʼenu mu buloba bunudi nuya bua kubuhiana, hanuihatshileye bisamba bia bungi ku mpala kuenu, Bena Hiti ne Bena Gîgashi ne Bena Amole ne Bena Kanâna ne Bena Pelizi ne Bena Hiwi ne Bena Yebuse, bisamba muanda mutekete bidi binuhita bunene ne bukole; habafila Yehowa, Nzambi wenu, mu bianza bienu, nenubashihe; hashishe nenubajimishe ha buloba: kanuhungi nʼabo tshihungidi, kanubaleshi luse, kanubakanganyi nʼabo, kanubakishi muanʼenu mukashi kudi muana wabo mulume, kanuangatshidi muana wenu mulume mukashi kudibo. Bualu bua bobo nebakudimune mutshima wa muanʼenu mulume, bua yeye kandondi meme bua kukuatshileye nzambi mikuabo mudimu: nunku Yehowa neanukuatshile tshiji, neanujimishe lubilu. Kadi nenubenzele nunku: nushihe bishihelu biabo, nuele mabue abo hanshi adibo batendelela, nutahe Bashela babo, nuoshe mpingu yabo ne kahia. Bualu bua nuenu nudi bantu ba tshijila kudi Yehowa, Nzambi wenu; Yehowa, Nzambi wenu, wakanusungula munkatshi mua bisamba bionso bidi hanshi ha buloba, bua nuenu nuikale bantu ba buhianyi buandi. Yehowa kakateka luse luandi kunudi, kakanusungula bualu bua nuenu nuakahita bantu bakuabo bungi; nuenu nuakatamba bantu bonso bukese; kadi bualu bua Yehowa udi munusue ne bualu bua yeye utu watumikila mulayi wakalayeye batatu benu, Yehowa wakanuhatula ne tshianza tshikole, wakanuhikula mu nsubu wa lukanu, ne mu tshianza tshia Palô, mukelenge wa Ejipitu. Numanye bienu ne Yehowa, Nzambi wenu, udi Nzambi mene; Nzambi utu walamata dî diandi, utu watumikila tshihungidi tshiandi ne luse luandi kudi bantu badi bamusue ne batu batumikila mikenji yandi tô ne ku bihungu tshinunu; utu wafuta bantu badi nʼandi lukuna difutu diabo ku mesu kuabo, bua kubashiha: yeye kena uhanga muntu udi nʼandi lukuna, neamufute ku mesu kuandi. Nunku nutumikile mikenji ne malu ne mei binakunuambila lelu, nubienze. Binunvua mikenji ei, binuayenza, hashishe Yehowa, Nzambi wenu, nênze tshihungidi ne luse biakalayeye batatu benu: yeye neanusue, neanusankishe, neanuvudishe, yeye neasankishe bana benu kabidi, ne bintu bidi bidiunda mu buloba buebe, midioko yenu, ne nvinyo yenu mihia-mihia, ne manyi enu ne bana ba ngombe yenu ne bana ba mikoko yenu, mu buloba buakalayeye batatu benu bua kunuhabu. Nuenu nenusankishibue ku mutu kua bantu bonso: nansha mulume nansha mukashi munkatshi muenu anyi munkatshi mua bimuna bienu nebikale nkumba. Yehowa neanumushile masama onso: kena unusamisha masama mabi a mu Ejipitu, anudi bamanye, kadi yeye neasamishe badi nʼenu lukuna masama au. Nujimishe bantu bonso badi Yehowa, Nzambi wenu, ufila mu bianza bienu; kanubafuidi luse, kanutendeledi nzambi yabo; bualu ebu nebuikale bu buteyi kunudi. Binuamba mu mitshima yenu ne, Bisamba ebi bidi bituhita bunene, nembihate munyi? Kanubatshinyi: nuvuluke malu akenzela Yehowa, Nzambi wenu, Palô ne Bena Ejipitu bonso; mateta makole anuakatangila ku mesu, ne bimanyinu, ne malu a kukema, ne tshianza tshikole ne diboko diolola wakanuhatula nʼabi Yehowa, Nzambi wenu; ne Yehowa, Nzambi wenu, nênzele bantu bonso banudi nutshina nunku. Bualu bukuabo kabidi, Yehowa neatume matembue munkatshi muabo, bantu badi bashala nebasokome, tô ne hafuabo ku mpala kuenu. Kanutshinyi ku mesu kuabo, bualu bua Yehowa, Nzambi wenu, udi munkatshi muenu, udi Nzambi munene udi uvuisha ditshina dikole. Yehowa, Nzambi wenu, neanuihatshile bisamba abi ku mpala kuenu bituha bituha: kanubashihi tshikondo tshimue, bualu bua nyama ya muitu neyikumbane munkatshi muenu. Kadi Yehowa, Nzambi wenu, neabafile mu bianza bienu, neabakengeshe ne makenga makole, tô ne hajiminabo. Yeye neafile bakelenge babo mu bianza bienu, nuenu nenjimishe mena abo hanshi ha buloba; kakuena muntu umue udi mua kuimana ku mpala kuenu tô ne hanuabashiha bonso. Nuoshe mpingu yabo yakasongabo ne kahia: kanukumi mitshima yenu kudi argent anyi or idi ha mutu hai, kanuyidiangatshidi, kanudionyi mu buteyi ebu; bualu ebu budi butonda mutshima wa Yehowa, Nzambi wenu. Kanulu ne tshintu tshidi tshitonda Yehowa mu nsubu muenu bua kufuanangana nʼatshi: nuhidie tshintu atshi, nuikale nʼatshi lukuna; atshi ntshintu tshibihe tshia tshijila. Nuenze mikenji yonso inakunuambila lelu, bua nuenu nuikale ne muoyo, nukumbane, nubuelemu bua kuhiana buloba buakalaya Yehowa batatu benu. Nuvuluke malu onso akanuenzela Yehowa, Nzambi wenu, bidimu ebi makumi anai hakadiye munulombole mu tshihela, bualu bua kunuhuekesha, ne kunuteta bualu bua kumanya malu akadi mu mitshima yenu, ne nudi basue kutumikila mikenji yandi, anyi kuyihidia. Yeye wakanuhuekesha, wakanufuisha nzala ne wakanudisha ne mana a mu diulu, anudi kanuyi bamanye, ne akadi batatu benu kabayi bamanye; bua kunumanyisha ne, Muntu kena wikala ne muoyo bualu bua bidia nkayabo kadi utu wikala ne muoyo bualu bua mei onso adi ahatuka mukana mua Yehowa. Bilulu bienu kabiakasunsuka hamʼbidi henu, ne makasa enu kaena mûle bidimu ebi makumi anai. Nuenu nuelangane meji mu mitshima yenu ne, Bu mudi tatu ukengesha muanʼandi mulume, nunku Yehowa, Nzambi wenu, wakanukengesha. Nutumikile mikenji ya Yehowa, Nzambi wenu, nuende mu nshila yandi, numutshine. Bualu bua Yehowa, Nzambi wenu, udi ulua nʼenu mu buloba buimpe, buloba budi bûle tente ne tusulu tua mai, ne mishimi ya mai idi ihatuka mu mikuna ne mu bibanda; buloba bua blê ne orge ne mionshi ya tumuma ne mitshi ya nfigi ne grenade; buloba bua mitshi ya olive ne buitshi; buloba bunudi mua kudia bidia bia bungi, kanuena nukengela tshintu; buloba budi ne biamu bia tubanda, nudi bamanye mua kumbula biamu bikunze bia tubanda ku mikuna yabu. Nenukute mafu tente, nenusakidile Yehowa, Nzambi wenu, bualu bua buloba buimpe buakalayeye. Nudimuke, kanuhu muoyo bua Yehowa, Nzambi wenu, ne bua kutumikila mikenji yandi ne mei andi ne malu anakunuambila lelu: hanuadia bintu bia bungi, hanukuta, hanuasa nsubu mimpe ne hanuashikamamu, hakumbana ngombe yenu ne mikoko yenu ne havulangana biamu bienu bia argent ne bia or, ne havulangana bintu bienu bionso; hashishe nudimuke, kanudisu mu mitshima yenu, kanuhu muoyo bua Yehowa, Nzambi wenu, wakanuhatula mu buloba bua Ejipitu ne mu nsubu wa lukanu; wakanulombola mu tshihela tshinene tshibi, tshiakadi ne nyoka isuma bu kahia ne tuminyiminyi, ne buloba budi kabuyi ne mai; wakanuhatula mai mu dibue dikole; wakanuisha ne mana mu tshihela, adi batatu benu kabayi bamanye; bualu bua kunuhuekesha ne kunuteta, bua kunuenzela bimpe mu matuku a kunshikidilu kuenu: kanuambi mu mitshima yenu ne, Tuakudiangatshila biuma ebi bionso ne bukole bua bianza bietu. Kadi nuvuiuke Yehowa, Nzambi wenu, bua yeye utu wanuha bukole bua kuangata nʼabu biuma; bua yeye akashe nʼenu tshihungidi tshiandi tshiakahungeye ne batatu benu: bu bualu buakuenjibua lelu. Binuahua Yehowa, Nzambi wenu, muoyo, binualonda nzambi mikuabo, binuenzela nzambi mikuabo midimu, binuayitendelela, ndi nnumanyisha lelu ne, Nenufue bulelela. Bu muakajimisha Yehowa bisamba bikuabo ku mpala kuenu, nunku nuenu nenujimine, bualu bua nuenu nuakahidia kunvua dî dia Yehowa, Nzambi wenu. Unvuai, Isalele, nenusabuke Yadene lelu, bualu bua kuihata bisamba bidi binuhita bunene ne bukole, ne misoko minene idi ne mpangu mile idi mihite mulu, bantu banene badi bale, bana balume ba Anaka, banudi bamanye; nuakulua lumu luabo ne, Nganyi udi mua kuimana ku mpala kua bana balume ba Anaka? Numanye bienu lelu ne, Yehowa, Nzambi wenu, udi uya ku mpala kuenu udi bu kahia kadi kabutula bionso; yeye nembashihe, neabahoneshe ku mpala kuenu: nunku nenubihate, nembajimishe lubilu, bu muakanuambila Yehowa. Hashikisha Yehowa kubihata, kanuambi mu mitshima yenu ne, Mbualu bua buakane buetu, Yehowa wakaluamu nʼetu bua kuhiana buloba ebu: bualu bua Yehowa udi ubihata ku mpala kuenu bualu bua bubi buabo. Kanuena nuhiana buloba buabo bualu bua buakane buenu anyi bua dijalama dia mitshima yenu: kadi Yehowa, Nzambi wenu, udi ubihata ku mpala kuenu bualu bua bubi buabo; bualu bua kuakasha nʼenu dî diakalaya Yehowa kudi batatu benu, Abalahama ne Isaka ne Yakoba. Numanye bienu ne, Yehowa kena munuhe buloba ebu buimpe bu buhianyi bualu bua buakane buenu; bualu bua nudi bantu ba tshitshu. Vulukai, kanuhu muoyo bu munuakafuisha Yehowa, Nzambi wenu, tshiji mu tshihela; ku dituku dinuakahatuka mu buloba bua Ejipitu tô ne hanuakafika ku muaba eu, nuakahidia Yehowa. Mu Holeba nuakafuisha Yehowa tshiji kabidi ne Yehowa wakadi nʼenu tshiji, wakamba kunushiha. Hanakabanda ku mukuna bua kuangata mabue akadi ne mei a tshihungidi tshia Yehowa mafundahu, nakashala ku mukuna matuku makumi anai munya ne butuku; tshiakadia bidia, tshiakanua mai. Yehowa wakumpa mabue au abidi akadi mafunda ne munu wa Nzambi; akadi mafundahu mei onso akanuambila Yehowa ku mukuna munkatshi mua kahia mu dituku dia disangisha dietu. Hakaleha matuku makumi anai, Yehowa wakampa mabue au abidi akadi malundahu mei a tshihungidi. Yehowa wakangambila ne, Bika biebe, uhueke lubilu bualu bua bantu bebe bawakahatula mu Ejipitu, bakoneka, bakasesuka lubilu mu nshila unakabalesha; bakadienzela luhingu ne biamu biakatulabo. Yehowa wakangambila kabidi ne, Nakatangila bantu aba ne mona, badi bantu ba tshitshu; undekele, bua meme neashihe, nenjimishe dina diabo muinshi mua diulu; meme nenkuvuishe wewe tshisamba tshidi tshibahita bunene ne bukole. Nunku nakanyunguluka, nakahueka mu tshibanda, ne mukuna wakadi utema ne kahia; ne mabue abidi a mei a tshihungidi akadi mu bianza bianyi bibidi. Nakatangila ne monai, nuakenzela Yehowa, Nzambi wenu, bubi; nuakadienzela kana ka ngombe ne biamu biakatulabo; nuakadi nusesuka lubilu mu nshila wakanulesha Yehowa. Nakangata mabue au abidi akadi mu bianza bianyi, nakashiha ku mesu kuenu. Nakadikuma hanshi ku mpala kua Yehowa matuku makumi anai bu munakenza diambedi, tshiakadia bidia, tshiakanua mai, bualu bua mibi yenu muakenza, hanuakenza bualu ebu bubi ku mesu kua Yehowa bua kumufuisha tshiji. Bualu bua nakutshina difikʼa munda ne tshiji tshikole biakadi Yehowa nʼabi bua kunushiha. Kadi Yehowa wakangunvuila musangu eu kabidi. Yehowa wakadi ne Alona tshiji tshikole bua kumushiha; nakalombela Alona musangu eu kabidi. Nakangata bualu bubi bunuakenza, kana ka ngombe mene, nakakosha ne kahia, nakakadiata munda mua dikasa, nakakabotesha bu dinfuenkenya dia buloba: nakela dinfuenkenya diaku mu kasulu kakadi kafuma ku mukuna. Ku Tabela ne Masa ne Kibelota-hatawa nuakafuisha Yehowa tshiji. Hakanumusha Yehowa ku Kadeshe-bânea ne, Yai bienu, nuhiane buloba bunakanuha; hashishe nuakahidia dî dia Yehowa, Nzambi wenu, kanuakamuitabusha, kanuakunvua di diandi. Nuenu nutu nuahidia Yehowa katshia ku dituku dinakanumanya. Nunku nakadikuma hanshi ku mpala kua Yehowa matuku makumi anai, bualu bua Yehowa wakamba ne, Nembashihe. Nakatendelela Yehowa, nakamba ne, Mukelenge Yehowa, kushihi bantu bebe ne buhianyi buebe buwakahikula ne bukole buebe, bantu bawakahatula mu Ejipitu ne tshianza tshikole. Uvuluke bantu bebe, Abalahama ne Isaka ne Yakoba; kutangidi tshitshu tshia bantu aba anyi buhidia buabo anyi mibi yabo, bua bena buloba buwakatuhatula kabambi ne, Bualu bua Yehowa kakadi ne bukole bua kulua nʼabo mu buloba buakahaneye ne bualu bua yeye wakadi nʼabo tshiji, yeye wakalua nʼabo mu tshihela bua kubashiha. Bobo batshidi bantu bebe ne buhianyi buebe, bawakahatula ne bukole buebe bunene ne diboko diebe diolola. Ku tshikondo atshi Yehowa wakangambila ne, Songa mabue abidi bu mabue a diambedi, ulue biebe kundi ku mukuna, udienzele mushete wa mabaya. Nenfunde ha mabue au mei akadi mafunda ha mabue awakashiha, wewe wabueshe mu mushete. Nunku nakenzela mushete wa mitshi ya acacia, nakasonga mabue abidi bu mabue a diambedi, nakabanda ku mukuna ne mabue abidi mu tshianza tshianyi. Yeye wakafunda ha mabue, bu muakafundeye diambedi, mikenji dikumi yakanuambila Yehowa ku mukuna munkatshi mua kahia mu dituku dia disangisha dietu; Yehowa wakumpau. Nakanyunguluka, nakahueka ku mukuna, nakateka mabue mu mushete unakenza, adimu bu muakangambila Yehowa, (Bena Isalele bakumuka ku Belota Bene-yâkana, bakaya ku Mosela. Alona wakasaku, bakamujika; ne Eleazâ, muanʼandi mulume, wakenza mudimu wandi wa buakuidi. Bakumukaku, bakaya ku Gudugoda; ku Gudugoda bakaya ku Yotebata, muakadi buloba bua tusulu tua mai. Ku tshikondo atshi Yehowa wakajidila tshisamba tshia Lewi, bua kutualabo mushete wa tshihungidi tshia mei a Nzambi, ne bua kuimana ku mpala kua Yehowa bua kamuenzela mudimu, ne bua kuvudishila bantu disanka mu dina diandi, bu mudibo benza lelu. Bua bualu ebu Bena Lewi kabena ne buhianyi munkatshi mua bana babo; Yehowa udi buhianyi buabo bu muakabambila Yehowa, Nzambi wenu). Nakashala ku mukuna matuku makumi anai bu munakenza diambedi: Yehowa wakangunvuila musangu eu kabidi; Yehowa kakanushiha. Yehowa wakangambila ne, Bika, uye biebe ku mpala kua bantu, nebabuelemu, nebahiane buloba bunakalaya batatu babo bua kubahabu. Katataka, nuenu Bena Isalele, Yehowa, Nzambi wenu, udi musue nuenu nuenze malu kai? Mbua kutshina Yehowa, Nzambi wenu, ne kuenda mu nshila yandi yonso, ne bua kumusua, ne bua kuenzela Yehowa, Nzambi wenu, mudimu ne mitshima yenu yonso ne bukole buenu buonso, ne bua kutumikila mikenji ya Yehowa ne mei andi anakunuambila lelu bua nuenu kukuma dikasa dimpe. Tangilai, Yehowa udi muena diulu dikuabo didi ku nyima kua diulu, ne muena buloba ne bintu bionso bidimu. Yehowa wakadi ne disanka bualu bua batatu benu, yeye wakahasua, yeye wakasungula bana babo bakabalonda ku nyima, wakanusungula nuenu mene mene munkatshi mua bantu bonso, bu mutshidi bualu lelu. Nuditengule mu mitshima yenu, kanuikadi bantu ba tshitshu kabidi. Bualu bua Yehowa, Nzambi wenu, udi Nzambi wa nzambi mikuabo, udi Mukelenge wa bakelenge, Nzambi munene ne mukole, udibo batshina, yeye katu watangila bantu ne kansungusungu, kena witabusha matutu. Udi ulesha buakane kudi bana ba nshiya ne bakashi ba mu lufuila, udi musue kuha benyi bintu bia kudia ne bintu bia kuluata. Nunku nuenu nudi ne bualu bua kusua benyi bualu bua nuenu nuakadi benyi mu buloba bua Ejipitu. Nutshine Yehowa, Nzambi wenu, numuenzele mudimu, nulamate kudiye, nuditshihe kudi dina diandi. Yeye udi butumbi buenu, yeye udi Nzambi wenu, wakanuenzela malu manene ne a kukema anuakatangila ku mesu. Bankambua benu makumi muanda mutekete bakaya mu Ejipitu; katataka Yehowa, Nzambi wenu, wakanuvudisha bungi bua mitoto idi mu diulu. Nunku suai Yehowa, Nzambi wenu, numunemeke, nutumikile malu andi ne mei andi ne mikenji yandi matuku onso. Numanye bienu lelu, bualu bua tshiena ngakula ne bana benu badi kabayi bamanye, badi kabayi banze kutangila malu akanuyishabo kudi Yehowa, Nzambi wenu. Kabakanji kutangila bunene buandi ne tshianza tshiandi tshia bukole, ne diboko diandi diolola, ne bimanyinu biandi, ne midimu yandi biakanuenzeleye mu Ejipitu kudi Palô, mukelenge wa Ejipitu, ne ku buloba buandi buonso. Kabakanji kutangila bualu buakenzeye masalayi a mu Ejipitu, ne tubalu tuabo ne makalu abo; muakahingisheye mai a Dishiba Dikunze ha mitu yabo, hakadibo banulonda ku nyima, ne muakabashiha Yehowa tô ne ku dituku edi; ne muakanuenzeleye mu tshihela tô ne hanuakalua ku muaba eu. Kabakatangila bualu buakenzeye Datana ne Abilama, bana balume ba Eliaba, muana mulume wa Lubena; muakabulula buloba mukana muabu, buakabamina, ne ba mu nsubu yabo, ne ntenta yabo ne bintu biabo bionso bia muoyo munkatshi mua Bena Isalele. Kadi mesu enu akatangila malu manene onso akenza Yehowa. Nunku nutumikile mikenji yonso inakunuambila lelu, bua nuenu nuikale ne bukole, ne bua nuenu nubuelemu, ne bua nuenu nuhiane buloba bunudi nuya bua kubuhiana; ne bua nuenu nuvudishangane matuku enu mu buloba buakalaya Yehowa batatu benu bua kubahabu ne tunkanunuma tuabo, buloba budi bûle tente ne mabele ne buitshi. Bualu bua buloba bunuyaya kuhiana kabuena bu buloba bua Ejipitu munuakumuka, bunuakakuna ntete yenu, nuakayimiamina mai nuendakana ku makasa, bu tshibanda tshia midioko; kadi buloba bunuyaya kuhiana mbuloba bua mikuna ne bibanda, buloba ebu budi bumina mai a nvula ya mu diulu, buloba budi Yehowa, Nzambi wenu, ulama; mesu a Yehowa, Nzambi wenu, atu atangila ha buloba abu ku tshibangidilu tshia tshidimu tô ne kunshikidilu kuatshi. Binuateleja matshu bimpe ku mikenji inakunuambila lelu, bua kusua Yehowa, Nzambi wenu, ne kungenzela mudimu ne mitshima yenu yonso ne muoyo wenu wonso, hashishe nentume nvula ha buloba buenu mu tshidimu tshia nvula, ne nvula ya mbedi ne nvula ya ku nyima; nenumanye mua kuhuola manvua enu ne kukama nvinyo mihia-mihia ne manyi enu. Nendiundishe mashinde mu madimi enu bua nuenu kudisha bimuna bienu; nenudie, nenukute. Nudimuke bienu, bua kanudidingi mu mitshima yenu, kanusesuki bua kukuatshila nzambi mikuabo midimu ne kuyitendelela; bualu bua Yehowa neanukuatshile tshiji, yeye neabuikile diulu ne nvula kayena iloka, ne buloba kabuena bukuama bintu; nunku nenujimishibue lubilu mu buloba buimpe buakamba Yehowa. Nunku nubueshe mei â munda mua mitshima yenu ne muoyo wenu; nuasuika ku tshianza tshienu bu tshimanymu ne hankatshi ha makiki enu. Numanyishe bana benu mei â, nubambileu hanuashikama mu nsubu yenu ne hanuenda mu nshila ne hanuaya ne hanuabika. Nuafunda ha minoko ya nsubu yenu, ne ku mishiku ya mpangu yenu; nunku nebavudishe matuku enu ne matuku a bana benu mu buloba buakalaya Yehowa batatu benu bua kubahabo matuku onso atshidi diulu ha mutu ha buloba. Bualu bua binuatumikila mikenji yonso Nakanuambila bua kuyenza bua kusua Yehowa, Nzambi wenu, ne bua kuenda mu nshila yandi yonso, ne bua kulamata kudiye, hashishe Yehowa neanuihatshile bisamba ebi bionso ku mpala kuenu, nenuhiane buloba bua bisamba bidi binuhita bunene ne bukole. Miaba yonso mudi nudiata munda mua makasa enu neyikale yenu: ku tshihela ne mikuna ya Lebanona ne ku musulu munene wa Pelata tô ne ku mai manene adi ku nyima kuenu. Kakuena muntu udi mua kuimana ku mpala kuenu: Yehowa, Nzambi wenu, neateke buowa ne dishina kudi bena buloba buonso bunudi nudiata ku makasa, bu muakanuambileye. Tangilai, nakateka disanka ne mulau ku mpala kuenu lelu. Binunvua mikenji ya Yehowa, Nzambi wenu, inakunuambila lelu, nenuhete disanka; binuahidia kunvua mikenji ya Yehowa, Nzambi wenu, binuasesuka mu nshila unakunulesha lelu bua kulonda nzambi mikuabo, Nudi kanuyi bamanye, nenuhete mulau. Hashishe hanuabuela mu buloba budi Yehowa, Nzambi wenu unuha, nenjadike disanka ku mukuna wa Gelizima, ne mulau ku mukuna wa Ebala. Idi dishiya dia Yadene mu nshila wa kudi diba dibuela, mu buloba bua Bena Kanâna bakadi bashikama mu Alabâ, hehi ne Gilegala, hehi ne mitshi ya telebinta ya Mole. Bualu bua nenusabuke Yadene bua kubuelamu ne bua kuhiana buloba budi Yehowa, Nzambi wenu, unuha; nenubuhiane, nenushikamemu. Nutumikile, nuenze malu onso ne mei onso anakuteka ku mpala kuenu lelu. Â mmalu ne mei anudi ne bualu bua kutumikila mu buloba budi Yehowa, Nzambi wa batatu benu, munuhe bua kubuhiana matuku onso a muoyo wenu ha buloba. Nuenu nudi ne bualu bua kujimisha miaba yonso yakadi bisamba binudi nuihata bitendelelaku nzambi yabo ku mutu kua mikuna mile, ne ku mutu kua tukuna tukese ne muinshi mua mitshi mibishi. Nenushale bioshelu biabo, nutshibule mabue abo bituha, nuoshe Bashela babo ne kahia; nenutahe mpingu yakasongabo ne tshifuanyikishi tshia nzambi yabo; nenjimishe mena abo mu muaba au. Kadi kanuenji Yehowa, Nzambi wenu, nunku. Kadi muaba udi Yehowa, Nzambi wenu, musungule munkatshi mua bisamba bienu bionso, bua kujadikamu dina diandi: nenukebe muaba kudiye mushikame, nenudisangisheku; nenulueku ne milambu yenu ya kuosha, ne nyama mishiha, ne bintu bia dikumi bia bintu bienu, ne bintu bienu bidibo bakuha, ne milambu ya kuditshiha kuenu, ne bintu bidi mitshima yenu misue kufila, ne banʼa bute ba ngombe yenu ne ba mikoko yenu. Nenudieku bidia ku mpala kua Yehowa, Nzambi wenu, nenusanke mu malu onso anudi nuenza ne bianza bienu, ne nuenu ne ba mu nsubu yenu mu malu onso akanusankisha nʼau Yehowa, Nzambi wenu. Kanuenji bu munudi nuenza kunoko lelu, benza muntu yonso anu malu adi mimpe ku mesu kuandi; bualu bua kanuena banze kubuela mu dikisha ne buhianyi bidi Yehowa, Nzambi wenu, unuha. Kadi hanuasabuka Yadene, hanuashikama mu buloba budi Yehowa, Nzambi wenu, unuhianyisha, udi unuha dikisha kudi bena lukuna bonso badi banunyunguluka, ne nenushikame talalâ. Hashishe nenulue ne bintu binakanuambila ku muaba udi Yehowa, Nzambi wenu, Usungula bua kujadikamu dina diandi; milambu yenu ya kuosha ne nyama yenu mishiha, ne bintu bia dikumi bia bintu bienu, ne bintu bienu bidibo bakuha, ne milambu ya kuditshiha kuenu kunudi nuditshiha nʼaku kudi Yehowa. Nenuikale ne disanka dia Yehowa, Nzambi wenu, ne nuenu ne bana benu balume ne bana benu bakashi, ne bahika benu balume ne bahika benu bakashi, ne Bena Lewi badi ku mbelu kuenu badi kabayi ne buhianyi kunudi. Nudimuke, kanufidi milambu ya kuosha mu miaba yonso mudi nutangila; kadi muaba udi Yehowa Usungula munkatshi mua bisamba bienu, nenufileku milambu yenu ya kuosha, nenuenzeku mei onso anakunuambila. Kadi nudi mua kushiha nyama ne mua kudia munyinyi ku mbelu kuenu udi mitshima yenu misue, bu mudi disanka dia Yehowa, Nzambi wenu, diakanusankisheye nʼadi; bantu badi kabayi bakane ne badi bakane badi mua kudia munyinyi wa kabuluku ne mbashi. Kanudi mashi, kadi nuahongolole ha buloba bu mai. Kanudi ku mbelu kuenu tshintu tshia dikumi tshia manvua enu, anyi tshia nvinyo yenu mihia-mihia, anyi tshia manyi enu, anyi tshia banʼa bute ba ngombe yenu ne ba mikoko yenu: nansha milambu yenu mudi nuditshiha nʼai, nansha bintu bidi mitshima yenu misue kufila, nansha milambu idibo bakuha: kadi nubidie ku mpala kua Yehowa, Nzambi wenu, mu muaba udi Yehowa, Nzambi wenu, musungule, ne wewe ne muana webe mulume ne muana webe mukashi ne muhika webe mulume ne muhika webe mukashi, ne Muena Lewi udi ku mbelu kuenu: nuikale ne disanka ku mpala kua Yehowa, Nzambi wenu, mu malu onso anudi nuenza ne bianza bienu. Nudimuke, kanulekedi Muena Lewi tô matuku onso anudi nushala mu buloba buenu. Hadiundisha Yehowa, Nzambi wenu, matshika enu muakanulayeye, ne nuenu nenuambe ne, Netudie munyinyi, bualu bua mitshima yenu idi misue kudia munyinyi; nudi mua kudia munyinyi udi mitshima yenu misue. Bikala muaba udi Yehowa, Nzambi wenu, Usungula bua kujadihamu dina diandi, udi kule, hashishe nenushale ngombe wa mu ngombe yenu ne mukoko wa mu mikoko biakanuha Yehowa, bu munakanuambila; nudi mua kudia ku mbelu kuenu bintu bionso bidi mitshima yenu misue. Nudi mua kudia munyinyi wa kabuluku ne wa mbashi bu mudi bakuabo badia; badi kabayi bakane ne badi bakane badi bamanye mua kudia. Kadi kanudi mashi, bualu bua mashi adi muoyo; kanudi muoyo ne munyinyi hohamue. Kanudi mashi, nuahongolole ha buloba bu mai. Kanudi mashi; bua nukume dikasa dimpe ne bana benu badi banulonda ku nyima, hanuenza malu adi mimpe ku mesu kua Yehowa. Nuye anu ne bintu binuakajidila ne milambu yenu ya kuditshiha ku muaba udi Yehowa Usungula; nenufile milambu yenu ya kuosha, ne munyinyi ne mashi, ha tshioshelu tshia Yehowa, Nzambi wenu; nuhongolole mashi a milambu yenu ha tshioshelu tshia Yehowa, Nzambi wenu; nudie munyinyi wau. Nutumikile, nunvue mei onso anakanuambila: nunku nenukune dikasa dimpe ne bana benu badi banulonda ku nyima tshiendelele, hanuenza malu adi mimpe ne makane ku mesu kua Yehowa, Nzambi wenu. Hashiha Yehowa, Nzambi wenu, bisamba bidi ku mpala kuenu, hanuabihata, hanuahiana buloba buabo, nudimuke, kanukuatshibu kudi mateyi abo bua kubalonda, habajimishabo ku mesu kuenu; kanukonkanganyi bua nzambi yabo ne. Bisamba ebi bidi bitendelela nzambi yabo munyi? Tuetu nkayetu tudi basue kuenza nunku kabidi. Kanuenzedi Yehowa, Nzambi wenu, nunku bualu bua bobo badi benzela nzambi yabo malu onso mabi adi atonda Yehowa; bualu bua bobo badi boshila nzambi yabo bana babo balume ne bana babo bakashi mene mene ha kahia. Nuenu nutumikile, nuenze mei onso anakunuambila; kanutentekashi dî dikuabo ha mutu ha mei au, kanûmushi dî ku mei au. Biabika muprofete anyi mulotshi wa bilota munkatshi muenu, udi unulesha tshimanyinu anyi bualu bua kukema; ne hashikisheye tshimanyinu anyi bualu bua kukema bua kunubikila ne, Tuye, tulonde nzambi mikuabo mudi kanuyi bamanye, tuyenzele mudimu; kanunvu mei a muprofete au, anyi mulotshi au wa bilota; bualu bua Yehowa, Nzambi wenu, udi munutete, bua kumanya ne, Nudi basue Yehowa, Nzambi wenu, ne mitshima yenu yonso ne muoyo wenu wonso. Nuenu nulonde Yehowa, Nzambi wenu, numutshine, nutumikile mikenji yandi, numuenzele yeye nkayandi mudimu, nulamate kudiye. Nebashihe muprofete au anyi mulotshi au wa bilota, bualu bua yeye wakamba mei adi anutombuesha kudi Yehowa, Nzambi wenu, wakanu; hatula mu buloba bua Ejipitu, wakanuhikula mu nsubu wa lukanu; udi musue kunusesuisha mu nshila wakanuambila Yehowa, Nzambi wenubua nuenu kuendamu. Nunku nenumushe malu mabi â munkatshi muenu. Bikala muanʼenu mulume, muana mulume wa mamu webe mene, anyi muanʼebe mulume anyi muanʼebe mukashi, anyi mukashi webe ûdi unanga, anyi mulunda webe wa ha mutshima webe, mukusesuishe mu musokoko ne, Tuye bietu, tuenzele nzambi mikuabo mudimu, inudi kanuyi bamanye, nansha wewe nansha batatu benu; nzambi ya bantu badi ha buihi nʼenu, anyi badi ha bule ku luseke lumue lua buloba tô ne ku luseke lukuabo; kuitabushi, kunvu dî diandi, kumuleshi luse, kumusungidi, kumusokoki; kadi umushihe bulelela; wewe umukuate tshianza bua kumushiha diambedi, ne ku nyima bantu bakuabo bonso nebamukuate. Neumukume ne mabue, neumushihe; bualu bua yeye wakakeba mua kunusesuisha mu nshila wa Yehowa, Nzambi wenu, wakanuhatula mu buloba bua Ejipitu ne mu nsubu wa lukanu. Bena Isalele bonso nebunvue lumu elu, nebatshine, kabena benza bualu ebu bubi kabidi munkatshi muenu. Binunvua lumu lua umue wa misoko yakanuha Yehowa, Nzambi wenu, bua kushikamamu ne, Bantu bakuabo ba tshikamakama, bakumuka munkatshi muenu, bakasesuisha bena musoko wabo ne, Tuye tuenzele nzambi mikuabo mudimu, inudi kanuyi bamanye; hashishe nenuebeshangane, nenukebe, nenukonkangane bimpe; bikala bualu bulelela, bakuenza bualu bua tshikamakama munkatshi muenu, nenushihe bena musoko aba ne miele ya nvita, nenuhaule musoko; nenushihe bimuna ne bintu bidimu ne muele wa nvita. Nenusangishe bintu bionso bia musoko mu musesu, nenuoshile Yehowa, Nzambi wenu, musoko ne bintu ebi bionso; musoko eu newikale musasula tshiendelele, kabena bawasaku kabidi. Ka nudiangatshidi tshintu tshimue tshia mulau tshia musoko au mu tshianza tshienu; nunku Yehowa nealekele tshiji tshiandi tshikole, neanuleshe luse, neanusankishe, neanukumbashe bu muakalayeye batatu benu; hanunvua dî dia Yehowa, Nzambi wenu, bua kutumikila mikenji yandi yonso inakunuambila lelu ne bua kuenza malu adi makane ku mesu kua Yehowa, Nzambi wenu. Nuenu nudi bana ba Yehowa, Nzambi wenu: kanuditahi nsalu, kanubeyi makiki enu bualu bua bantu bafue. Bualu bua nuenu nudi bantu ba tshijila kudi Yehowa, Nzambi wenu; Yehowa wakanusungula munkatshi mua bantu bonso ba ha buloba bua nuenu nuikale bantu ba buhianyi buandi. Kanudi bintu bidi kabiyi biakane. Ei idi nyama mudi mua kudia: ngombe ne mukoko ne mbushi, mbashi ne kabuluku ne ntole ne mbushi wa ha mpata, ne lusumbi, ne ngulungu ne mukoko wa mu mikuna. Bimuna bionso bidi ne mikono mihanduluke, bidi bihingishilula bintu mukana: nudi mua kudia nyama ei. Kadi kanudi nyama mikuabo idi mihingishilula bintu mukana anyi idi ne mikono mihanduluke: kamelo, ne nsenji, ne kabundi ka ku mputu; bualu bua nyama ei idi mihingishilula bintu mukana, kadi kayena ne mikono mihanduluke, kayena miakane kunudi. Ngulube kena muakane kunudi bualu bua yeye udi ne mikono mihanduluke kadi kena uhingishilula bintu mukana; kanudi munyinyi wa nyama ei, kanulengi tshianza hamʼbidi ha bitalu biai. Ebi mbintu bionso bia mu mai binudi mua kudia: bintu bionso bidi ne mialala ne mabamba nudi mua kudia; kanuena mua kudia bintu bidi kabiyi ne mialala ne mabamba; kabiena biakane kunudi. Nudi mua kudia nyunyu yonso idi miakane. Kadi ei nyunyu mudi kanuyi mua kudia: nyunyu wa mukanku, ne nyunyu wa gypaete, ne nyunyu wa orfraie, ne nyunyu wa faucon, ne nyunyu wa milan mufike ne wa milan mukunze, ne mushindu wonso wa tshikololo, ne nyunyu wa nfiondo, ne nyunyu wa chat-huant ne nyunyu wa mouette ne wa nkumbi-kumbi, ne nyunyu wa tshihungulu ne nyunyu wa chouette, ne nyunyu wa ibis, ne nyunyu wa pêlican, ne nyunyu mutoke utu wadia bintu bibole, ne nyunyu wa cormoran, ne nyunyu wa cigogne, ne nyunyu wa hêron ne nyunyu wa huppe ne nyunyu ya mudima. Bintu bionso bidi ne mahuahua ne bidi bidikoka hanshi kabiena biakane kunudi; kanubidi. Nudi mua kudia nyunyu yonso idi miakane. Kanudi tshintu tshidifuile: nudi mua kuha muenyi udi ku mbelu kuenu tshintu atshi, yeye atshidie; anyi nudi mua kutshihanyisha muntu wa bende; bualu bua nuenu nudi bantu ba tshijila kudi Yehowa, Nzambi wenu. Kanulambi muana wa mukoko mu mabele a mamu wandi. Nufile kudi Yehowa tshintu tshia dikumi tshia bintu bionso binudi nuhuola ku tshidimu ku tshidimu. Nudie tshintu tshia dikumi tshia manvua enu ne tshia nvinyo yenu mihia-mihia ne tshia manyi enu ne tshia banʼa bute ba ngombe yenu ne tshia ba mikoko yenu ku mpala kua Yehowa, Nzambi wenu, mu muaba udiye Usungula bua kujadikamu dina diandi; nunku nenubale bualu bua kutshina Yehowa, Nzambi wenu, matuku onso. Hakuvudishila Yehowa, Nzambi webe, disanka, bikala nshila mutambe kule, ne wewe kuena mua kutuala bintu biebe bualu bua muaba udi Yehowa neusungule bua kujadikamu dina diandi udi utamba kule, hashishe neubihane ku argent: wangate argent mu tshianza tshiebe, uye biebe ku muaba udi Yehowa, Nzambi webe, musungule; neudisumbile bintu bidi mutshima webe musue, nansha ngombe nansha mikoko nansha mioyo nansha maluvu makole nansha bintu bionso biudi musue; neubidie ku mpala kua Yehowa, Nzambi webe, neusanke, wewe ne ba mu nsubu webe. Kanuhu Muena Lewi udi ku mbelu kuenu muoyo; bualu bua yeye kena ne tshituha tshiandi ne buhianyi buandi kunudi. Haleha bidimu bisatu nuenu nempatule tshintu tshia dikumi tshia bintu bionso biakakumbana tshidimu atshi, nenutshiteke ku mbelu kuenu; ne Bena Lewi, bualu bua bobo kabena ne tshituha anyi buhianyi kunudi, ne benyi ne bana ba nshiya ne bakashi ba mu lufuila badi ku mbelu kuenu nebalue, nebadie, nebukute; nunku Yehowa, Nzambi wenu, neanuvudishile disanka mu mudimu wonso unudi nuenza ne bianza bienu. Hahita bidimu muanda mutekete nenulekelelangane bintu. Nenulekelelangane bintu nunku: muena dibanza yonso nealekele bintu biakasombesheye muena mutumba nʼandi; yeye kena wenzesha muena mutumba nʼandi ne muanʼabo mulume bua kuhingishabo bintu ebi; bualu bua etshi ntshidimu tshiakabambila Yehowa bua kulekelelangana bintu. Nudi mua kulombela bantu ba bende bintu ebi; kadi bintu bionso bidi muanʼenu mulume nʼabi, nuenu nenubilekele. Kadi bantu bahele kabena bikala munkatshi muenu; (bualu bua Yehowa neanusankishe mu buloba budi Yehowa, Nzambi wenu, munuhe bu buhianyi buenu;) binunvua dî dia Yehowa, Nzambi wenu, bua kutumikila mikenji yonso inakunuambila lelu. Bualu bua Yehowa, Nzambi wenu, neanusankishe bu muakanulayeye; nuenu nenusombeshe bisamba bia bungi bintu, kadi kanuena nusomba bintu kudibi; nuenu nenukokeshe bisamba bia bungi, kadi bisamba ebi kabiena binukokesha. Bikalaku muntu muhele, umue wa bana benu, ku mbelu kua muntu yonso mu buloba budi Yehowa, Nzambi wenu, munuhe, kanukoleshi mitshima yenu, kanubuikidi tshianza tshienu kudi muanʼenu udi muhele; kadi nubulule tshianza tshienu kudiye, numusombeshe bintu bidiye musue bua kushikisheye nʼabi malu andi. Nudimuke, kanuedianganyi meji mabi mu mitshima yenu ne, Tshidimu tshia muanda mutekete, tshidibo balekelelangana bintu tshikadi ha kulua, ne kanuenzedi muanʼenu muhele bibi, bua kubenga kumuha tshintu; bua kadidi kudi Yehowa bualu buebe, ne bua wewe kushadi ne bubi. Numuke bintu bulelela; mitshima yenu kayinyingaladi, hanuamuhabi; bua bualu ebu Yehowa, Nzambi wenu, neanuvudishile disanka mu mudimu wonso unudi nuenza ne bianza bienu. Bualu bua bahele nebikale mu buloba buenu matuku onso, nunku nakanuambila ne, Nubulule tshianza tshienu kudi muanʼenu, kudi mukengi ne kudi muhele mu buloba buenu. Biakusumbishabo Muena Ebelu mulume anyi Muena Ebelu mukashi, yeye neakukuatshile mudimu bidimu bisambombo; kadi hafika tshidimu tshia muanda mutekete wewe neumulekele. Hawamulekela, kumutumi ne bianza bituhu; umuhe bintu bia bungi munkatshi mua mikoko yebe, ne bia bintu biwakuhuola ne bia nvinyo; bu mudi Yehowa, Nzambi webe, mukusankishe, wewe neumuhe. Uvuluke ne wewe wakadi muhika mu buloba bua Ejipitu, ne Yehowa, Nzambi wenu, wakakubikula: ka nunku ndi nkuelela mukenji eu lelu. Bikaleye mukuambile ne, Tshiena musue kumuka kûdi, bualu bua yeye udi ukunanga ne ba mu nsubu webe, wakabela disanka kûdi, hashishe wewe newangate nkulonda, neumutuhite ditshu ku tshibi ne yeye neikale muhika webe tshiendelele. Newenzele muhika mukashi muomumue. Bualu ebu kabuena butamba bakole ku mesu kuebe, hawamulekela, bualu bua yeye wakakuenzela mudimu bidimu bisambombo udi utamba muena mudimu wa difutu misangu ibidi; hashishe Yehowa, Nzambi wenu, neanusankishe mu malu onso anudi nuenza. Nenujidile Yehowa, Nzambi wenu, banʼa bute balume ba ngombe ne ba mikoko; kanuenzeshi banʼa bute ba ngombe mudimu, kanukoshi banʼa bute ba mikoko miosa. Wewe ne ba mu nsubu webe nenubadie ku mpala kua Yehowa, Nzambi wenu, ku tshidimu ku tshidimu mu muaba udi Yehowa musungule. Bikala umue wabo kayi muakane, udi mulema anyi udi mufofo anyi udi muoneka muaba mukuabo, kanumushihedi Yehowa, Nzambi wenu. Nudi mua kumudia ku mbelu kuenu: muntu udi muakane anyi udi kayi muakane udi mua kumudia bu mudiye udia kabuluku anyi mbashi. Kadi kanudi mashi andi; nuahongolole hanshi ha buloba bu mai. Nuvuluke ngondo wa Abiba bua kutendelela kuhita kua Yehowa wenu; bualu bua Yehowa, Nzambi wenu, wakanuhatula mu buloba bua Ejipitu butuku mu ngondo wa Abiba. Nenushihele Yehowa, Nzambi wenu, mulambu wa kuhita kua Yehowa, wa mikoko ne wa ngombe, mu muaba udi Yehowa Usungula bua kujadikamu dina diandi. Kanudi mampa adi ne luevene ne mulambu eu; nenudie nʼau mampa adi kâyi ne luevene matuku muanda mutekete, mbia kudia bia tshivulukidi tshia dikenga; bualu bua nuakahatuka mu buloba bua Ejipitu lubilu; nunku numuke dituku dinuakahatuka mu buloba bua Ejipitu matuku onso a muoyo wenu. Kabatangidi lue-vene mu miaba yenu yonso tô matuku muanda mutekete; kanushiyi munyinyi unuakashiha wa milambu dilolo dia dituku dia ku mpala butuku buonso tô ne ku dinda. Kanushihi milambu ya kuhita kua Yehowa munda mua misoko idi Yehowa, Nzambi wenu, munuhe; anu mu muaba udi Yehowa, Nzambi wenu, Usungula bua kujadikamu dina diandi, nenushihe milambu ya kuhita kua Yehowa dilolo habuela diba, ha diba mene dinuakahatuka mu Ejipitu. Nenuanyike milambu ha kahia, nenuyidie mu muaba udi Yehowa, Nzambi wenu, Usungula; nenualukile dinda, nuhingane mu ntenta yenu. Nenudie mampa adi kâyi ne luevene matuku asambombo; ne dituku dia muanda mutekete nedikale dia tshijila kudi Yehowa, Nzambi wenu; kanuenji mudimu nansha. Nenubale mbingu muanda mutekete: ku tshikondo tshinudi nuhuole bintu nenubange kubala mbingu ei muanda mutekete. Nenudie bidia bia disanka dia mbingu ei muanda mutekete ku mesu kua Yehowa, Nzambi wenu, ne diha didi mitshima yenu misue kufila mu bianza bienu, bu muakanuvudishila Yehowa, Nzambi wenu, disanka. Nenusanke ku mesu kua Yehowa, Nzambi wenu, ne wewe ne muana webe mulume ne muana webe mukashi ne muntu webe mulume ne muntu webe mukashi ne Muena Lewi udi mu musoko webe ne muenyi ne bana ba nshiya ne bakashi ba mu lufuila badi munkatshi muenu, mu muaba udi Yehowa, Nzambi wenu, Usungula bua kujadikamu dina diandi. Numuke ne nuenu nuakadi bahika mu Ejipitu: nutumikile mikenji ei yonso. Nenudie bidia bia disanka dia bitandatanda tô matuku muanda mutekete, hanuashikisha kusangisha bintu ku tshishihuidi ne ku tshikaminu: nenuikale ne disanka hanuadia bidia ebi, ne muana webe mulume ne muana webe mukashi ne muntu webe mulume ne muntu webe mukashi ne Muena Lewi ne muenyi ne bana ba nshiya ne bakashi ba mu lufuila badi mu misoko yenu. Nenudie bidia ebi ku mesu kua Yehowa, Nzambi wenu, tô matuku muanda mutekete, mu muaba udi Yehowa Usungula; bualu bua Yehowa, Nzambi wenu, neanuvudishile disanka ne bintu bienu bionso biakakumbana, ne mudimu wonso unuakenza ne bianza bienu: nenuikale ne disanka dingi. Balume bonso nebamueneke ku mesu kua Yehowa, Nzambi wenu, misangu isatu ku tshidimu ku tshidimu mu muaba udiye Usungula: ku disanka dia mampa adi kâyi ne luevene, ne ku disanka dia mbingu ai muanda mutekete, ne ku disanka dia bitandatanda; kabamueneki ku mesu kua Yehowa ne bianza bituhu: kadi muntu yonso neafile bintu bidiye nʼabi bu muakanuvudishila Yehowa, Nzambi wenu, disanka. Nenudisunguluile balumbuluishi ne bafundi mu misoko yonso, idi Yehowa, Nzambi wenu, munuhe, ku tshisamba ne ku tshisamba; bobo nebalumbuluishe bantu bilumbu biabo ne dilumbuluisha didi diakane. Kanulumbuluishi bantu ne dilumbuluisha didi kadiyi diakane; kanutangidi mpala ya bantu; kanuitabushi bintu bia kunubueshilabo nʼabi; bualu bua bintu bia kunubueshilabo nʼabi bidi bifofomesha mesu a muena lungenyi, bidi binyanga dilumbuluisha didi diakane. Nulonde anu dilumbuluisha didi diakane, nunku nenuikale ne muoyo, nenuhiane buloba budi Yehowa, Nzambi wenu, unuha. Kanukunyi mutshi wa Ashela hehi ne tshishihelu tshia Yehowa, Nzambi wenu, tshinudi badiashile. Kanujadiki dibue dia kutendelela didi Yehowa, Nzambi wenu, ukina. Kanushihedi Yehowa, Nzambi wenu, ngombe anyi mukoko bidi kabiyi biakane, anyi tshintu tshikuabo tshidi tshibi; bualu ebu budi bundu ku mesu kua Yehowa, Nzambi wenu. Binuasangana muntu mu misoko idi Yehowa, Nzambi wenu, unuha, nansha mulume nansha mukashi udi wenza bualu bubi ku mesu kua Yehowa, Nzambi wenu, udi ushiha tshihungidi tshia Yehowa, wakaya bua kukuatshila nzambi mikuabo mudimu, ne wakayitendelela, nansha diba nansha ngondo, nansha bintu bikuabo bia mu diulu bindi muhidie; bikalabo banuambile dî edi anyi binuikala bunvue lumu lua bualu ebu ku matshu, nenukebakebe tô ne bikala bualu ebu bua bundu buenjibue bulelela mu Isalele, hashishe nenulue ne muntu wakenza bualu bubi ebu ku bibi bia musoko, nansha mulume nansha mukashi, nenubakume ne mabue, nenubashihe. Numushihe anu ku mei a bamonyi babidi anyi basatu; kanumushihi anu ku dî dia mumonyi umue. Bamonyi ba bualu nebolole bianza kudiye diambedi bua kumushiha, ne ku nyima bantu bonso nebolole bianza biabo. Nunku nenumushe malu mabi munkatshi muenu. Bikala tshilumbu tshinuhite bukole, nansha hankatshi ha bashihianganyi, nansha hankatshi ha muntu ne muntu badi badiakuilangana, nansha hankatshi ha muntu ne muntu badi batutangana, mmalu adibo batandangana nʼau mu misoko yenu; hashishe nenubike, nenuye ku muaba udi Yehowa, Nzambi wenu, usungula; nenulue kudi bakuidi, Bena Lewi, ne kudi mulumbuluishi munene wa mu matuku au; nenubakonke, ne bobo nebanukosele tshilumbu. Nenuenze bu mudibo bamba ha muaba udi Yehowa, Nzambi wenu, usungula; nuenu nenutumikile mei onso adibo banuyisha: nenuenze bu mudi mikenji idibo banuyisha, ne bu dilumbulula didibo banuambila; kanusesuki ku tshianza tshia balume anyi ku tshianza tshia bakashi mu dî didibo banuambila. Muntu udi ne tshitshu, udi uhidia kunvua dî dia muakuidi udi muimane ku mesu kua Yehowa, Nzambi wenu, bua kumukuatshia mudimu, anyi dî dia mulumbuluishi, nebashihe muntu eu: nunku nenumushe malu mabi munkatshi mua Bena Isalele. Bantu bonso nebunvue mei abo, nebatshine, kabena benza malu a tshitshu kabidi. Hanuabuela mu buloba budi Yehowa, Nzambi wenu, unuha, hanuabuhiana, bakashikamamu, hanuamba ne, Tudisunguile mukelenge bua kuteka ku mutu kuetu bu bisamba bikuabo bidi bituela munkatshi; nenutekele mukelenge ku mutu kuenu anu yeye udi Yehowa, Nzambi wenu, Usungula; nutekele anu wa munkatshi mua bana benu bu mukelenge wenu; kanuteki muenyi udi kayi muanʼenu ku mutu kuenu. Kadi yeye kena ne bualu bua kudikumbashila tubalu tua bungi, anyi bua kuhingisha bantu mu Ejipitu bua kuheteye tubalu tua bungi; bualu bua Yehowa wakamana kunuambila ne, Kanuhinganyi mu nshila au kabidi. Yeye kena ne bualu bua kudiangatshila bakashi ba bungi bua kukudimuneye mutshima wandi; yeye kena ne bualu bua kudikumbashila biamu bia argent ne bia or. Hashikameye ha nkuasa wandi wa bukelenge, yeye neadifundile mukanda wa mikenji idi mifunda mu mukanda au udi mu bianza bia bakuidi ba mu Bena Lewi; yeye neashale ne mukanda eu, neaubale matuku andi onso; nunku yeye neamanye mua kutshina Yehowa, Nzambi wandi, ne mua kutumikila mei onso ne mikenji yonso bidi bifundamu, bua kubienza; nunku mutshima wandi kaudibandishi ku mutu kua bana babo, nunku yeye kasesuki mu nshila wa mikenji nansha ku tshianza tshia balume nansha ku tshianza tshia bakashi; nunku nebavudishe matuku a bukelenge buandi, ne a bana bandi mu Isalele. Bakuidi ba mu Bena Lewi, ne tshisamba tshionso tshia Lewi kabena ne buhianyi munkatshi mua Bena Isalele; bobo nebadie munyinyi wa milambu ya Yehowa idibo bosha ha kahia bu buhianyi bua Yehowa. Bobo kabena ne buhianyi munkatshi mua bana babo; Yehowa udi buhianyi buabo, bu muakabambileye. Bintu ebi bidi tshituha tshia bakuidi kudi bantu badi bafila milambu ya kuosha, nansha ngombe nansha mukoko: bobo nebahe bakuidi diboko ne matama abidi ne tshiadi. Nenubahe kabidi bintu binudi nuhuola diambedi, ne tshia nvinyo muhia-muhia, ne tshia manyi enu, ne miosa ya mikoko. Bualu bua Yehowa wakasungula Bena Lewi munkatshi mua bisamba bienu bionso, bua kunuenzela mudimu mu dina dia Yehowa, ne yeye ne bana bandi balume tshiendelele. Biumuka Muena Lewi ku umue wa misoko ya mu Isalele, muakadiye ushikama, bua kubuela ne mutshima wandi wonso mu muaba udi Yehowa Usungula, hashishe yeye neanuenzele mudimu mu dina dia Yehowa, Nzambi wandi; bu mudi bana babo, Bena Lewi, batu bimana ku mesu kua Yehowa, benza. Bobo nebadie, muntu tshituha tshiandi muntu tshituha tshiandi ku mutu kua buhianyi bua batatuʼabo buakahanabo. Hanuabuela mu buloba budi Yehowa, Nzambi wenu, unuha, kanuyidi bua kulonda ku nyima kua malu a bundu a bisamba abi. Muntu kikadi munkatshi muenu udi utambisha muanʼandi mulume anyi muanʼandi mukashi mu kahia, nansha mutempi wa mbuku, nansha muena dijimbu nansha muena bilengulengu, nansha muena buloshi, nansha musesuishi wa bantu ne miloû yandi, nansha mutendeledi wa bakishi, nansha muena muhongo, nansha muena lubuku lua muzangu. Muntu yonso utu wenza malu au udi bu tshintu tshibi ku mesu kua Yehowa; bualu bua malu au mabi Yehowa, Nzambi wenu, udi Wihata bantu ku mesu kuenu. Nuenu nuikale balamate kudi Yehowa, Nzambi wenu. Bualu bua bisamba ebi binudi nuihata nunku bakadi bunvue mei a bena dijimbu ne a batempi ba mbuku; kadi Yehowa, Nzambi wenu, kena witabusha bua nuenu nuenze nunku. Yehowa, Nzambi wenu, neanubishile muprofete munkatshi mua bana benu bu meme, nenunvue dî diandi: bu munuakalomba Yehowa, Nzambi wenu, mu Holeba mu dituku dituakasambakena nʼenu ne, Katunvu dî dia Yehowa, Nzambi wetu, kabidi, katutangidi kahia aka kanene kabidi, bua katufu. Yehowa wakangambila ne, Bobo bakamba dî dimpe. Meme nembabishile muprofete munkatshi mua bana babo bu wewe; meme nenteke mei anyi onso mukana muandi, ne yeye neabambile mei onso anamuambila. Muntu yonso udi uhidia kunvua mei anyi adiye wamba mu dina dianyi, meme nenkose tshilumbu tshiandi. Muprofete udi udiambila mei mu dina dianyi ne dikamakama andi tshiyi mumuambile anyi udi wamba mei mu dina dia nzambi mukuabo, muprofete au neafue biandi. Binuamba mu mitshima yenu ne, Nemmanye dî didi Yehowa kayi mutuambile munyi? Hamba Muprofete malu mu dina dia Yehowa ne malu au kaena menjibue, au mmalu adi Yehowa kayi mumuambile; muprofete au wakatuambila, kanumutshinyi. Hashiha Yehowa, Nzambi wenu, bisamba abi bia mu buloba budi Yehowa, Nzambi wenu, unuha, hanuabihata, hanuaslukama mu misoko yabo ne mu nsubu yabo, nenuditahuluile misoko isatu mu buloba budi Yehowa, Nzambi wenu, unuha bua nuenu kubuhiana. Nenulongolole nshila, nenutahulule mikalu ya buloba budi Yehowa, Nzambi wenu, munuhe bu buhianyi bituha bisatu, bua mushihianganyi yonso anyemenemu. Aba mbashihianganyi badi mua kunyemenamu bua kuikala ne muoyo: muntu yonso udi ushiha mukuabo ku mpukahuka, kakadi nʼandi tshiji diambedi; bu muntu wakuya ne mukuabo muitu bua kutaha nkunyi, ne hakuambeye kutaha mutshi ne kasui, ne kasui kakukuka, kakutaha muntu mukuabo, kakumushiha; muntu eu neanyemene ku umue wa misoko ei, neikale ne muoyo. Musombuedi kalondi mushihianganyi eu hadiye ne tshiji tshikole, kamuhetshi, bualu bua nshila udi utamba bule, kamushihi diambedi kabayi banze kumuhisha, bualu bua yeye kakadi nʼandi tshiji diambedi. Bua bualu ebu nakanuambila ne, Nuditahuluile misoko isatu. Bikala Yehowa, Nzambi wenu, muleheshe matshika enu, bu muakudi tshiheye kudi bankambua benu, bianuheye buloba buonso buakalayeye bankambua benu; binuatumikila mukenji eu, undi munuelele lelu, binuawenza, bua kusua Yehowa, Nzambi wenu, ne bua kuenda mu nshila yandi; hashishe nenusungule misoko mikuabo isatu ha mutu ha misoko ei isatu. Nunku kabamatshishi mashi a muntu udi kayi ne tshilumbu ha buloba budi Yehowa, Nzambi wenu, nnuha bua nuenu nubuhiane; mashi au kaikadi hamʼbidi henu. Kadi bikala muntu ne muena mutumba nʼandi lukuna, umualamina, ubika, umutaha tô ne hafileye, ne bianyemeye ku umue wa misoko ei; hashishe bakulu ba mu musoko wandi nebatuale bantu, nebamukuatemu, nebamufile mu bianza bia musombuedi bua kufueye. Nuenu kanuikadi ne luse kudi muntu eu, kadi nenumushe mashi a muntu udi kayi ne tshilumbu munkatshi mua Bena Isalele, bua nuenu nuikale ne diakalengele. Kanuhanduludi mikalu ya bantu bakuabo yakahandabo kudi bakaku benu diambedi, mu buhianyi buenu mu buloba budi Yehowa, Nzambi wenu, unuha bua nuenu kubuhiana. Kanuitabushi dî dia mumonyi umue udi utumpila mukuabo tshianana bua dihambuka diandi anyi bua bubi buakenzeye; malu neajalame anu ku mei a bamonyi babidi anyi basatu. Biabika muena mashimi bua kutumpila mukuabo bua malu mabi akadiye wenza, nunku bubidi buabo badi batandangana, nebimane ku mesu kua Yehowa ne ku mesu kua bakuidi ne balumbuluishi ba mu matuku au. Balumbuluishi nebalondolole tshilumbu tô; ne bikala mumonyi eu muena mashimi mutumpile mukuabo tshianana, hashishe bamuenzele yeye bu muakasueye kuenzela muanʼabo: nunku nenumushe malu mabi munkatshi muenu. Bantu bakuabo ne-bunvue, nebatshine, kabena benza malu au mabi munkatshi muenu kabidi. Kanuikadi ne luse kudi batumpidianganyi aba: nebafile muoyo ku muoyo, disu ku disu, dinu ku dinu, tshianza ku tshianza, dikasa ku dikasa. Hanuaya kuluangana nvita ne bantu badi nʼenu lukuna, ne hamutangila tubalu ne makalu ne bantu badi banuhita bungi, kanubatshinyi bualu bua Yehowa, Nzambi wenu, wakanuhatula mu buloba bua Ejipitu, udi nʼenu. Hanuahanga kuluangana, muakuidi neasemene ha buihi ne bantu, neabambile ne, Bena Isalele, unvuai, nuakusemena hehi ne bantu badi nʼenu lukuna bua kuluangana nʼabo lelu: kanuikadi ne mitshima mitekete, kanuikadi ne buowa, kanuzakadi, kanubatshinyi; bualu bua Yehowa, Nzambi wenu, udi unuluila, bua kuluangana ne badi nʼenu lukuna ne bua kunusungila. Ba ha mutu habo nebambile bantu ne, Nganyi wakuasa nsubu muhia-muhia, ne kena muanze kunjidila? Bimpe yeye ahingane ku nsubu kuandi; anyi bialueye mu nvita, muntu mukuabo neajidile nsubu wandi. Nganyi wakukuna mitshi ya tumuma tukese kayi muanze kudia tumuma atu? Bimpe yeye ahingane ku nsubu kuandi; anyi biafileye mu nvita, muntu mukuabo neadie tumuma tuandi. Nganyi wakubangila mukashi kayi muanze kumubaka? Bimpe yeye ahingane ku nsubu kuandi; anyi biafileye mu nvita, muntu mukuabo neabake mukashi au. Ba ha mutu habo nebambile bantu mei makuabo kabidi ne, Nganyi udi ne ditshina ne mutshima mutekete? Bimpe yeye ahingane ku nsubu kuandi, anyi yeye neatekeshe mitshima ya bantu bakuabo. Nunku hambila ba ha mutu habo bantu mei au, nebasungile tuhita tua kutoka ku mutu kua bantu. Hanuasemena hehi ne musoko bua kuluangana nʼabo, diambedi nenubaleshe ditalala; ne bikalabo banukudimune mei makane, bianunzuluilabo bibi, hashishe bantu bonso badimu nebanulambule milambu, nebanukuatshile mudimu. Kadi biahidiabo ditalala, ne bialuanganabo nʼenu, hashishe nenubatshintshimike; ne hafila Yehowa, Nzambi wenu, bantu aba mu bianza bienu, nenushihe balume bonso ne miele ya nvita; kadi bakashi ne bana bakese ne bimuna ne bintu bionso bia mu musoko, nenudiangatshile ebi; nuenu nenudie bintu bionso bia badi nʼenu lukuna, bidi Yehowa, Nzambi wenu, munuhe. Nenuenzele misoko yonso idi kule, idi kayiyi misoko ya bisamba ebi. Kadi misoko ya bantu aba idi Yehowa, Nzambi wenu, unuhayi bua nuenu kuyihiana, kanusungidi tshintu tshimue tshidi tshieyela muhuya; kadi nenubishihe bionso: ne Bena Hiti ne Bena Amole ne Bena Kanâna ne Bena Pelizi ne Bena Hiwi ne Bena Yebuse, bu muakanuambila Yehowa, Nzambi wenu; bua bobo kabanuyishi mua kulonda malu mabi abo, adibo benzela nzambi yabo; nunku nuenu nenuenzele Yehowa, Nzambi wenu, bibi. Hanuatshintshimika musoko musangu mule, hanualuangana nʼabo bua kûnyenga, kanushihi mitshi ya tumuma ne tusui; nudi mua kudia tumuma atu, kanushihi mitshi, bualu bua mitshi ei idi bu bantu banudi uluangana nʼabo, anyi? Kadi mitshi mudi bamanye ne kayena ne tumuma, nudi mua kuyikosa; nuase nʼai bibumba bia nvita ku butshika bua musoko wa badi banuluisha to ne hanuabahita bukole. Biasanganabo muntu mufue mu buloba budi Yehowa, Nzambi wenu, unuha bua nuenu nubuhiane, kabayi bamanye muntu wakamushiha; hashishe bakulu ne balumbuluishi nebaluhuke, nebahime mutantshi kubangila ku muaba udi tshitalu tô ne ku misoko idi ha buihi ne muntu mufue; bakulu ba mu musoko udi utamba ha buihi ne muntu mufue nebangate kana ka ngombe kadi kakayi kanze kuenza mudimu ne tshikokedi; bakulu ba mu musoko nebahueke ne kana ka ngombe mu tshibanda tshidi ne mai adi ahueka, tshidibo kabayi banze kudimamu ne kukunamu bintu, nebatshibule nshingu wa kana ka ngombe mu tshibanda atshi. Bakuidi, bana balume ba Lewi, bakasungulabo kudi Yehowa, Nzambi wenu, bua kumuenzelabo mudimu ne bua kuvudishila bantu disanka mu dina dia Yehowa, nebalue ha buihi: bua mei abo malu onso ne bilumbu bionso bia kukumangana nebijalame. Bakulu bonso ba mu musoko eu udi utamba ha buihi ne muntu mufue, nebuvuwe bianza biabo ha mutu ha kana ka ngombe kadi ne nshingu waku mutshibula mu tshibanda; bobo nebitabe ne, Bianza bietu kabiakamatshisha mashi au, mesu etu kaena mâmone. Yehowa, ubuikile bubi bua bantu bebe Bena Isalele, bawakahikula, kuitabushi bua mashi a muntu udi kayi ne tshilumbu ashale munkatshi mua bantu bebe Bena Isalele. Ne mashi au neabuikidibue. Nunku nenumushe mashi adi kâyi ne tshilumbu munkatshi muenu hanuenza malu adi mimpe ku mesu kua Yehowa. Binuaya kuluangana nvita ne bantu badi nʼenu lukuna ne Yehowa, Nzambi wenu, udi ubafila mu bianza bienu, nuenu nudi nuya nʼabo mu buluka, ne umue wenu udi utangila mukashi udi ne mpala muimpe munkatshi muabo, ne yeye udi mumusue, udi musue kumubaka bu mukashi wandi; hashishe yeye nealue nʼandi ku nsubu kuandi; nebamubeye nsuki ya ku mutu, nebamukose nzadi; yeye neavule bilulu biandi bia buluka, neashale mu nsubu wa muntu eu: neadile tatu wandi ne mamu wandi tô ngondo mujima; ne ku nyima muntu eu neaye kudiye bu mulume wandi, ne yeye neikale mukashi wandi. Bikaleye kayi ne disanka bualu bua mukashi eu, hashishe yeye neamutume kudiye musue kuya; kadi kamuhanyi ku biuma, kamuenji bu muhika, bualu bua yeye wakamukehesha. Bikala mulume ne bakashi babidi, udi musue umue, udi ukina mukuabo, ne bubidi buabo ne mukashi wakadiye musue ne mukuabo wakadiye ukina, hakamulelela bana; ne bikala mukashi wakadiye ukina mumulelele muanʼa bute wandi; hashishe mu dituku didiye uhianyisha bana bandi balume bintu bidiye nʼabi, yeye kena mua kuteka muana wa mukashi wakadiye musue ku mpala kua muanʼa bute wandi wa mukashi wakadiye ukina. Kadi yeye neitabushe muanʼa bute wandi wa mukashi udiye ukina, neamuhe bituha bibidi bia bintu bionso bidiye nʼabi; bualu bua yeye udi wa tshibangidilu tshia bukole buandi; bintu bia buanʼa bute mbiandi. Bikala muntu ne muana mulume udi ne tshitshu ne buhidia, katu watumikila dî dia tatu wandi anyi dia mamu wandi, ne yeye katu wabahvuila biamukengeshaho, hashishe tatu wandi ne mamu wandi nebamukuate, nebaluhuke nʼandi kudi bakulu ba mu musoko wabo ne ku tshibi tshia musoko; nebambile bakulu ba mu musoko wabo ne, Muana wetu eu udi ne tshitshu ne buhidia, kena utumikila mei etu; udi muena lumpukusu ne mukuatshiki wa maluvu. Balume bonso ba mu musoko wabo nebamukume ne mabue tô ne hafueye: nunku nenumushe malu mabi munkatshi muenu; ne Bena Isalele nebunvue, nebatshine. Bikala muntu muenze bualu bubi bua lufu, ne badi bamushiha, nebamuowe ku mutshi; kabashiyi tshitalu tshiandi ku mutshi butuku bujima, bamujike anu dituku adi mene; muntu yonso muowa ku mutshi udi muedibue mulau kudi Nzambi; kanunyangi buloba budi Yehowa, Nzambi wenu, unuha bua nuenu kubuhiana. Binuatangila nansha ngombe nansha mukoko bia mukuenu bihambuka, kusokoki bualu ebu kudiye, kadi ubihingashe kudi mukuenu. Bikala mukuenu kayi ha buihi nʼenu, anyi biwikala kuyi mumumanye, hashishe nuye nʼabi ku nsubu kuenu, nushale nʼabi tô ne halua mukuenu bua kubikeba, nuenu nubihingashe kudiye. Nenuenzele nyama wandi wa mpunda nunku kabidi, ne bilulu biandi; nenuenzele bintu bionso bia mukuenu biakajimisheye ne wewe wakabiangula, kanubisokoki. Binuatangila nansha mpunda nansha ngombe bia mukuenu biakahona hanshi mu nshila, kanubisokoki, kadi numukuatshishe bua kubibisha kabidi. Mukashi kaluatshi bilulu bia mulume, ne mulume kaluatshi bilulu bia bakashi: muntu yonso udi wenza malu au nunku udi bu tshintu tshibi ku mesu kua Yehowa, Nzambi wenu. Binuasangana disua dia nyunyu mu nshila ku mutshi anyi ha buloba, ne bana ba nyunyu anyi makela bidimu, ne mukashi wa nyunyu udi ushikama ha bana anyi ha makela, kanuangatshi mukashi wa nyunyu ne bana bandi kabidi; nulekele mukashi wa nyunyu tshianana, kadi nudi mua kudiangatshila bana ba nyunyu; nunku malu enu neikale mimpe, nenuvudishe matuku enu. Hanuasa nsubu muhia-muhia, nenuenze kabidi lumbu tukese ku mutu kua nsubu, nunku muntu kahonyi hanshi, ne mashi andi kaikadi ku nsubu yenu. Kanukunyi ntete ya mishindu ibidi mishilangane mu budimi bua tumuma tukese, anyi nebajidile bintu bionso biakadiundamu ne ntete inuakukuna ne tumuma tukese tudi mitshi ei ikuama. Kanusuiki ngombe ne mpunda ku mutshi wa tshikokedi umue. Kanuluatshi tshilulu tshiakakumabo ne miosa ya mikoko misambakasha ne buanda bua lin. Nudienzele bisele ku mpenga inai ya bilulu bienu binudi baluata. Biabaka mulume mukashi, adi ulala nʼandi ne udi umukina, udi wambila bakuabo mei a bundu, udi wona lumu luandi, udi wamba ne, Nakabaka mukashi eu ne hanakasangila nʼandi bulalu, tshiakasangana bimanyinu bu mukashi utshidi kamama; hashishe tatu wa mushikankunde eu ne mamu wandi nebaluhuke ne bimanyinu biandi bu bia mukashi utshidi kamama kudi bakulu ba mu musoko ne ku tshilumbuluidi tshia ku tshibi tshia musoko. Tatu wa mushikankunde neambile bakulu ne, Nakafila muanʼanyi kudi mulume eu bu mukashi wandi, ne yeye udi umukina; yeye wakambila bakuabo mei a bundu ne, Tshiakasangana bimanyinu bu bia mukashi utshidi kamama kudi muana webe; kadi ebi mbimanyinu biandi bu bia mukashi utshidi kamama. Nebavungulule tshilulu ku mesu kua bakulu ba mu musoko. Bakulu ba mu musoko au nebakuate muntu au, nebamukengeshe; ne bobo nemmuambile ne, Ufute lukama lua nshekele ya argent ne yeye neayifile kudi tatu wa mushikankunde eu, bualu bua yeye wakuona lumu lua mukashi utshidi kamama mu Isalele: yeye neikale mukashi wandi, yeye kena mua kumuhidia tô matuku andi onso. Kadi bikala bualu ebu bulelela, kabakamusangana ne bimanyinu bu bia mukashi utshidi kamama, hashishe nebalue ne mushikankunde eu ku tshibi tshia nsubu wa tatu wandi, ne balume ba mu musoko nebamukume ne mabue tô ne hafileye, bualu bua yeye wakuenza bualu bua tshikama mu Isalele, wakuenza bu mukashi wa masandi mu nsubu wa tatu wandi: nunku nenûmushe malu mabi munkatshi muenu. Biasanganabo mulume mulale ne mukashi wa muntu mukuabo, nebashihe bubidi buabo, ne mulume wakadi ulala ne mukashi eu ne mukashi kabidi: nunku nenumushe malu mabi munkatshi mua Isalele. Bikalaku mushikankunde utshidi kamama, udi mubangila kudi mulume, ne muntu mukuabo udi usangakena nʼandi mu musoko, udi ulala nʼandi; hashishe nebalue nʼabo bubidi buabo ku tshilumbuluidi tshia ku tshibi tshia musoko au, nenubakume ne mabue tô ne hafuabo; mushikankunde, bualu bua yeye kakadila hakadiye mu musoko, ne mulume, bualu bua yeye wakanyanga mukashi wa muena mutumba nʼandi: nunku nenumushe malu mabi munkatshi muenu. Kadi bikala mulume usangakena ne mushikankunde udi mubangila kudi mulume mukuabo mu budimi, udi umuakuata ku bukole, udi ulala nʼandi, anu mulume wakalala nʼandi neafue biandi; kadi kanuenji mushikankunde bualu; yeye kena muenze bualu bubi budibo mua kumushihela; bualu ebu budi bu muntu udi uhika ku mpala kua muena mutumba nʼandi udi umushiha; bualu bua yeye wakasangakena nʼandi mu budimi; ne mushikankunde mubangila kudi mukuabo wakadila, ne kakuakadi muntu bua kumusungila. Biasangakena mulume ne mushikankunde utshidi kamama, kayi mubangila kudi mukuabo, biamukuateye ku bukole bua kulala nʼandi, ne bantu badi babasangana; hashishe mulume wakalala nʼandi, neafute tatu wa mushikankunde nshekele ya argent makumi atanu, ne yeye neikale mukashi wandi, bualu bua yeye wakamunyanga, kena mua kumuhidia matuku andi onso. Muntu kabaki mukashi wa tatu wandi: muntu kavudi tshilulu tshia tatu wandi. Muntu udi mutaha mputa ku mihesa yandi anyi udi ne mihesa mikosoke kabuedi mu disangisha dia bantu ba Yehowa. Muana wa masandi kabuedi mu disangisha dia bantu ba Yehowa; ne tunkanuniuna tuandi kaubuedi mu disangisha dia bantu ba Yehowa tô ne hahita bikondo dikumi. Muena Amona anyi Muena Moaba kababuedi mu disangisha dia bantu ba Yehowa; ne tunkanunuma tuabo kaubuedi mu disangisha dia bantu ba Yehowa tô ne hahita bikondo dikumi tshiendelele; bualu bua bobo kabakanuha bia kudia ne mai a kunua mu nshila hanuakaluhuka mu Ejipitu; ne bualu bua bobo bakahita Belâma, muana mulume wa Beô ku Petô wa mu Mesopotamia, bua kunueleye mulau. Kadi Yehowa, Nzambi wenu, kakunyua mei a Belâma; kadi Yehowa, Nzambi wenu, wakakudimuna mulau ulua disanka dienu, bualu bua Yehowa, Nzambi wenu, wakanusua. Kanukebi mua kubalesha ditalala ne malu makane tô matuku enu onso. Kanuikadi ne Muena Edome lukuna, bualu bua yeye udi muanʼenu; kanuikadi ne Muena Ejipitu lukuna, bualu bua nuenu nuakadi benyi mu buloba buandi. Bana hadibo balela mu tshikondo tshisatu badi mua kubuela mu disangisha dia Yehowa. Hanuaya kuluangana ne badi nʼenu lukuna, hashishe nudikande mu malu mabi onso. Bikala muntu munkatshi muenu udi kayi muakane bua malu akamukuata butuku, hashishe yeye neaye ku mpenge kua tshitudilu, kabuedi mu tshitudilu; kadi hafika dilolo, yeye neowe mai, ne habuela diba, yeye neahingane mu tshitudilu. Nunku nudisunguile muaba ku mpenge kua tshitudilu bua nuenu nuye ha bule bua kuhuya munda. Muntu yonso aditekele kakasu mu bintu biandi bia nvita, ne hayeye mu tshisuku, neaumbule dina, neahingashe buloba ha mutu ha bintu biakahuyeye; bualu bua Yehowa, Nzambi wenu, udi wendakana munkatshi mua tshitudilu bua kunusungila, ne bua kufila badi nʼenu lukuna mu bianza bienu; nunku tshitudilu netshikale tshia tshijila. Yehowa katangidi tshintu tshibi munkatshi muenu, kasesuki kunudi. Kanuhingashi muhika wakunyemena kunudi munyeme mu bianza bia mukelenge wandi; yeye ashikame nʼenu mu muaba udiye usungula mu umue wa misoko yenu udi utamba kumusankisha; kanumuenzedi bibi. Mukashi wa masandi kikadi munkatshi mua bana bakashi ba mu Isalele, ne muena Sodoma kikadi munkatshi mua bana balume ba mu Isalele. Kanulu ne difutu dia mukashi wa masandi anji dia muntu udi bu mbua, mu nsubu wa Yehowa, Nzambi wenu, bua kushikisha diditshiha dienu; bualu bua bubidi buabo badi bu tshintu tshibi ku mesu kua Yehowa, Nzambi wenu. Kanulombi mukuenu bintu bia kasombela ka bintu biwakamusombesha: kasombela ka argent ne ka bia kudia ne ka bintu bionso biwakamusombesha. Nudi mua kuamba muntu wa bende kasombela; kadi kanulombi mukuenu kasombela; bua Yehowa, Nzambi wenu, anuvudishile disanka mu malu onso anudi nuenza ne bianza, mu buloba bunudi nuya bua kubuhiana. Hanuaditshiha ku mesu kua Yehowa, Nzambi wenu, kanuhangi kushikisha mitshihu yenu; bualu bua Yehowa, Nzambi wenu, nealombe bua nuyishikishe; ne bualu ebu nebuikale bubi kunudi binuahanga kuyisbikisha. Kadi binuikala kanuyi baditshiha, bualu ebu kabuena bubi kunudi. Mei onso akaluhuka mukana muena nuenze bu munuakuditshiha kudi Yehowa, Nzambi wenu, bintu bidi mitshima yenu misue kufila, binuakumulaya mukana muenu. Hanuabuela mu budimi bua tumuma bua mukuenu, nudi mua kudia tumuma kukuta tente, kadi kanuangatshi tumuma mu tshisaka. Hanuabuela mu budimi bua manvua bua mukuenu, nudi mua kutula manvua mu tshianza, kadi kanutahi manvua a mukuenu ne muele. Hangata mulume mukashi bua kumubaka, ne bikala mukashi kayi muimpe ku mesu kuandi bualu bua yeye wakamusangana ne malu adi kayi mimpe, hashishe yeye neamufundile mukanda wa kushiha dibaka, neamuheu mu bianza, neamûmushe mu nsubu wandi. Kumukeye mu nsubu wandi, yeye udi mua kuikala mukashi wa munga muntu. Bikala mulume eu wa ku nyima mumukine, mumufundile mukanda wa kushiha dibaka kabidi, mumuheu mu bianza biandi, mumûmushe mu nsubu wanyi, anyi biafua mulume eu wa ku nyima wakamuangata bu mukashi wandi, mulume wa diambedi, wakamûmusha mu nsubu wandi, kena mua kumuangata bu mukashi wandi kabidi, bualu bua mukashi wakumana kunyangisha; bualu ebu budi bubi ku mesu kua Yehowa. Nunku kanunyangi buloba budi Yehowa, Nzambi wenu, unuha bua nuenu kubuhiana. Habaka mulume mukashi muhia-muhia, kayi mu bisumbu bia bena nvita, kabamutekedi bujitu bukuabo; ashale mu nsubu wandi tô tshidimu tshijima, bua kusambeye mukashi wakuangateye. Muntu kangatshi mabue adibo bahela nʼau manvua, anyi dibue dia mpelu bu tshieya; bualu bua budi bu muntu udi ufila muoyo wandi bu tshieya. Biasanganabo muntu udi wiba muanʼabo umue wa Bena Isalele, udi umuenza bu muhika, anyi udi umuhana, hashishe nebashihe muibi: nunku nenûmusbe malu mabi munkatshi muenu. Nudimuke bualu bua disama dia nsudi, bua nuenu kuenza malu onso bimpe adi bakuidi ba mu Bena Lewi banuyisha: bu munakabambila bobo, nuenu nuenze nunku. Nuvuluke bu muakenzela Yehowa, Nzambi wenu, Miyama mu nshila hanuakalubuka mu Ejipitu. Hanuasombesha mukuenu tshintu, kanuyi mu nsubu wandi bua kudiangatshila tshieya tshiandi. Nuenu mumane ku mbelu ne muntu uwakusombesha tshintu nealuhuke kûdi ne tshieya. Bikala muntu muhele, kanuladi tulu ne tshieya tshiandi; nuhingashe tshieya tshiandi habuela diba, bua yeye alale tulu ne tshilulu tshiandi, anuvudishile disanka; bualu ebu nebuikale buakane kunudi, ku mesu kua Yehowa, Nzambi wenu. Kanukengeshi muntu wakabuela mu mudimu wa difutu, udi muhele ne udi kayi ne bintu, nansha umue wa bana benu nansha muenyi udi ushikama mu buloba buenu ne mu misoko yenu; nubafute difutu diabo buatshia-buatshia diambedi diba kadiyi dianze kubuela; bualu bua bobo badi bahele ne badi bakuma mitshima yabo ku difutu; bobo kabadidi kudi Yehowa bualu buenu, ne bualu ebu kabuikadi bubi kunudi. Batatu kabafuidi bana babo, ne bana kabafuidi batatuʼabo: muntu yonso adifuile bua malu mabi andi. Kanubengi muenyi anyi bana ba nshiya dilumbulula didi diakane; kanuangatshi bilulu bia mukashi wa mu lufuila bu tshieya: nuvuluke ne nuenu nuakadi bahika mu Ejipitu, ne Yehowa, Nzambi wenu, wakanuhikula: bua bualu ebu nakunuelela mukenji eu. Hanuahuola bintu bia mu madimi enu, ne kafulaminyi kadi kanukuata bua kushiya bisumbu bikuabo mu madimi enu, kanuhinganyi bua kubiangata; nebikale bia benyi ne bia bana ba nshiya ne bia bakashi ba mu lufuila; nunku Yehowa, Nzambi wenu, neanuvudishile disanka mu malu onso anudi nuenza ne bianza bienu. Hanuakuna matamba a mitshi yenu ya olive bua mamuma ahone, kanuakumi tshiakabidi; neashale a benyi ne a bana ba nshiya ne a bakashi ba mu lufuila. Hanuahuola tumuma tukese tua mu madimi enu a tumuma, kanutuhuodi tshiakabidi: tumuma netushale tua benyi ne tua bana ba nshiya ne tua bakashi ba mu lufuila. Nuenu nuvuluke ne nuakadi bahika mu buloba bua Ejipitu; bua bualu ebu nakunuelela mukenji eu. Bikala bantu babidi batandangane, ne haluabo bua kulumbuluishibua, balumbuluishi nebalumbulule tshilumbu tshiabo; ku nyima nebabingishe muntu muimpe ne nebahishe muntu mubi. Bikala muntu mubi mukumbane bua kukumibua, hashishe mulumbuluishi neamuladike hanshi, nebamukume ku mpala kuandi; bungi bua mikumu nebuikale bu bubi buandi. Badi mua kumukuma mikumu makumi anai, kadi kabahitshi: biahilabo mikumu ei, muanʼenu neikale bu muntu wa hatuhu kunudi. Kanusuiki nkata ku mishiku ya ngombe udi udiata mponda. Bikala bana balume ba difu dimue bashikame muaba umue, ne biafua umue wabo kayi mushiye muana mulume, mukashi wa muntu mufue kayi ku dibaka kudi mulume mukuabo; muanʼabo ne mulume wandi neamuangate, alue bu mukashi wandi; neamuenzele bualu buakadiye ne bualu bua kuenza bu muanʼabo. Hashishe muanʼa bute udi mukashi eu ulela nebamuidike dina dia muanʼabo wakafua; bua dina diandi kadijiminyi mu Isalele. Bikala muntu kayi musue kuangata mukashi wa muanʼabo, hashishe mukashi wa muanʼabo mulume neaye ku tshibi tshia musoko kudi bakulu, neambe ne, Muanʼabo ne mulume wanyi udi uhidia kulelela muanʼabo wakafua bana mu Isalele, yeye kena mungangate bu mukashi wandi. Hashishe bakulu ba mu musoko wandi nebamubikile, nebasombe nʼandi; ne himaneye, wamba ne, Tshiena musue kumuangata, hashishe mukashi wa muanʼabo nealue kudiye ku mesu kua bakulu, neambulule tshisabata ku dikasa diandi, neamutuile lute ku mesu; neamuambile ne, Nebenzele mulume nunku udi uhidia kudiundisha nsubu wa muanʼabo mulume. Nebamuidike dina mu Isalele ne, Nsubu wa udi ne tshisabata tshiandi tshisulula. Bikala balume babidi baluangane, ne mukashi wa umue wabo ulualua bua kusungila mulume wandi mu tshianza tshia muntu udi umukuma, udi wolola tshianza tshiandi, udi umukuata ku biaha mesu, ku nyima nebamukose tshianza tshiandi, kabamuleshi luse nansha. Kanuikadi ne biamu bibidi bia kuidikisha nʼabi majitu, ne tshinene ne tshikese. Kanuikadi ne bihiminu bibidi mu nsubu yenu, ne tshinene ne tshikese. Nuikale anu ne tshiamu tshimue tshidi tshiakane, ne tshihiminu tshimue tshidi tshiakane; nunku matuku enu neikale a bungi mu buloba budi Yehowa, Nzambi wenu, unuha. Muntu yonso utu wenza malu au, malu au mabi, udi bu tshintu tshibi ku mesu kua Yehowa. Nuvuluke bu muakanuenzela Amaleka mu nshila hanuakaluhuka mu Ejipitu; bu muakasangakeneye nʼenu mu nshila, wakashiha bantu bakashala ku nyima bakadi batekete, hanuakahanga, hanuakamba kufua mu nshila; yeye kakatshina Nzambi. Nunku hafila Yehowa, Nzambi wenu, bantu bonso badi nʼenu lukuna mu bianza bienu, ne hanuaheta dikisha mu buloba budi Yehowa, Nzambi wenu, unuha bua nuenu kubuhiana, hashishe nenujimishe tshivulukidi tshia Amaleka muinshi mua diulu; kanuhu muoyo bua bualu ebu nansha. Hanuabuela mu buloba budi Yehowa, Nzambi wenu, unuha bua nuenu kubuhiana, hanuabunyenga ne hanuashikamamu, hashishe nenuangate bintu bionso bidi biboba diambedi mu buloba budi Yehowa, Nzambi wenu, unuha, nubiteke mu tshisaka, nulue nʼabi mu muaba udi Yehowa, Nzambi wenu, usungula, bua kujadikamu dina diandi. Nulue kudi muakuidi wa mu matuku au, numuambile ne, Ndi nkuambila lelu ku mesu kua Yehowa, Nzambi webe, ne, Nakubuela mu buloba buakaiaya Yehowa batatu betu, bua kutuhabu. Muakuidi neangate tshisaka mu bianza bienu, neatshiteke hanshi ku mpala kua tshioshelu tshia Yehowa, Nzambi wenu. Nenuambe ku mesu kua Yehowa, Nzambi wenu, ne, Tatu wetu wakadi Muena Sulia, wakadi wamba kufua; ne yeye wakaya mu Ejipitu, wakashikamamu bantu banya-banya; yeye wakalua tshisamba tshinene tshia bukole ne bantu ba bungi. Bena Ejipitu bakatuenzela bibi, bakatukengesha, bakatuenzesha mudimu mukole; ne tuetu tuakadi la kudi Yehowa, Nzambi wa bankambua betu, ne Yehowa wakulua dî dietu, wakatangila makenga etu ne mudimu wetu ne majitu etu. Yehowa wakatuhatula mu Ejipitu ne tshianza tshikole ne diboko diandi diolola ne malu makole ne bimanyinu ne malu a dikema; wakalua nʼetu mu muaba eu, wakatuha buloba ebu, buloba budi bûle tente ne mabele ne buitshi. Katataka, Yehowa, tuakulua ne bintu biakaboba diambedi mu buloba buwakutuha. Nenuteke bintu ebi hanshi ku mpala kua Yehowa, Nzambi wenu, nenutendelele ku mpala kua Yehowa, Nzambi wenu; nenusanke mu malu mimpe onso akanuha Yehowa, Nzambi wenu, ne nuenu ne ba mu nsubu yenu, ne Muena Lewi ne benyi badi munkatshi muenu. Hanuashikisha kufila tshia dikumi tshia bintu bienu bionso mu tshidimu tshisatu tshidibo bafila tshia dikumi tshia bintu, nenubale Bena Lewi ne benyi ne bana ba nshiya ne bakashi ba mu lufuila; nunku bobo nebadie mu misoko yenu, nebukute. Nenuambe ku mesu kua Yehowa, Nzambi wenu, ne, Tuakumusha bintu bia tshijila mu nsubu yetu, tuakabiha Bena Lewi ne benyi ne bana ba nshiya ne bakashi ba mu lufuila, bu mukenji uwakutuelela, katuakashiha mikenji yebe, katuakuhua mikenji muoyo. Katuakudia bintu ebi mu madilu etu, katuakabilenga hatuakadi banyanguke, katuakabifila kudi bakadi mu madilu: tuakutumikila dî dia Yehowa, Nzambi wetu; tuakuenza malu onso akatuambileye. Utangile hanshi mu muaba webe wa tshijila mu diulu, uvudishile bantu bebe ba Isalele disanka, ne buloba buwakutuha, bu muwakalaya bankambua betu, buloba budi bûle tente ne mabele ne buitshi. Yehowa, Nzambi wenu, udi unuelela mukenji lelu bua nuenu nuenze mikenji ei ne mei au; nunku nubienze ne mitshima yenu yonso ne mioyo yenu yonso. Nuenu nuakuitabusha Yehowa bu Nzambi wenu lelu, nuakuamba ne, Tuetu netuende mu nshila yandi, netutumikile mei andi ne mikenji yandi ne mikandu yandi, netunvue dî diandi; ne Yehowa wakanuitabusha bu bantu ba buhianyi buandi bu muakanulayeye, bua nuenu nutumikile mikenji yandi yonso, ne kunubandisha ku mutu kua bisamba bionso biakafukeye mu butumbi ne mu dina ne mu buneme; bua nuenu nuikale bantu ba tshijila kudi Yehowa, Nzambi wenu, bu muakuambeye. Mose ne bakulu ba mu Isalele bakambila bantu ne, Nutumikile mikenji yonso indi nnuambila lelu. Halua dituku dinudi nusabuka musulu wa Yadene bua kubuela mu buloba budi Yehowa, Nzambi wenu, unuha, hashishe nenjadike mabue manene, nenuashinguile ne nshimete. Nenufundehu mikenji ei hanuasabuka; nunku nenubuele mu buloba budi Yehowa, Nzambi wenu, unuha, buloba budi bûle tente ne mabele ne buitshi, bu mudi Yehowa, Nzambi wa bankambua benu, munulaye. Hanuamana kusabuka Yadene, nenjadike mabue au mu mukuna wa Ebala, nenuashinguile ne nshimete, bu mundi nnuambila lelu. Nenuenzeleku Yehowa, Nzambi wenu, tshioshelu ne mabue, kanuoshi tshiamu ha mutu hau. Enzelai Yehowa, Nzambi wenu, tshioshelu ne mabue adibo kabayi basonge; nuenu nenuoshilehu Yehowa, Nzambi wenu, milambu; nenufile kabidi milambu yenu ya kuvuisha nʼai ditalala, nenudieku; nenusanke ku mpala kua Yehowa, Nzambi wenu. Nenufunde ha mabue au mei onso a mikenji ne kufunda kuakane. Mose ne bakuidi ba mu Bena Lewi bakambila Bena Isalele bonso ne, Huwai, unvuai, Bena Isalele, lelu nuakulua bu bantu ba Yehowa, Nzambi wenu. Nunku nudi ne bualu bua kutumikila dî dia Yehowa, Nzambi wenu, ne bua kuenza mikenji yandi ne mei andi bindi nnuambila lelu. Mose wakadimusha bantu dituku adi mene ne, Bantu aba nebimane ha mutu ha Gelizima bua kuvudishila bantu disanka hanuasabuka Yadene: Shimeona ne Lewi ne Yuda ne Yisakâ ne Yosefe ne Benyamina. Bantu aba nebimane ha mutu ha Ebala bua kuela bantu mulau: Lubena ne Gada ne Ashe ne Zebuluna ne Dana ne Nafatale. Bena Lewi neitabe, nebambile bantu bonso ba mu Isalele ne dî dikole ne: Muntu yonso udi usonga luhingu anyi udi wenza luhingu ne tshiamu tshiakatulabo kudi muntu udi ne lungenyi lule, udi kujadika mu musokoko, ntshintu tshibi ku mesu kua Yehowa, udi ne mulau. Bantu bonso nebakudimune dî ne, Amen. Muntu yonso udi uhenda tatu wandi anyi mamu wandi udi ne mulau; bantu bonso nebakudimune dî ne, Amen. Muntu yonso udi utentulula mukalu wa muena mutumba nʼandi udi ne mulau. Bantu bonso nebakudimune dî ne, Amen. Muntu yonso udi uhambuisha muntu mufofo mu nshila udi ne mulau. Bantu bonso nebakudimune dî ne, Amen. Muntu yonso udi ulumbuluisha benyi anyi bana ba nshiya anyi bakashi ba mu lufuila dilumbulula didi kadiyi diakane udi ne mulau. Bantu bonso nebakudimune dî ne, Amen. Muntu yonso udi ulala ne mukashi wa tatu wandi udi ne mulau, bualu bua yeye wakavula tshilulu tshia tatu wandi. Bantu bonso nebakudimune dî ne, Amen. Muntu yonso udi ulala ne nyama udi ne mulau. Bantu bonso nebakudimune dî ne, Amen. Muntu yonso udi ulala ne muanʼabo mukashi, nansha muana wa tatu wandi nansha muana wa mamu wandi udi ne mulau. Bantu bonso nebakudimune dî ne, Amen. Muntu yonso udi ulala ne muku wandi udi ne mulau. Bantu bonso nebakudimune dî ne, Amen. Muntu yonso udi ukuma mukuabo mu musokoko udi ne mulau. Bantu bonso nebakudimune dî ne, Amen. Muntu yonso udi witabusha tshintu tshia kumubueshelabo nʼatshi bua kushiha muntu udi kayi ne tshilumbu udi ne mulau. Bantu bonso nebakudimune dî ne, Amen. Muntu yonso udi kayi ujadika mei a mikenji ei bua kuyenza udi ne mulau. Bantu bonso nebakudimune dî ne, Amen. Binuananukila kutumikila mei a Yehowa, Nzambi wenu, bua kuenza mikenji yandi yonso indi nnuambila lelu, hashishe Yehowa, Nzambi wenu, neanuteke ku mutu kua bisamba bionso bia hanshi ha buloba; ne masanka â onso nealue kunudi, neanuhete, binuatumikila dî dia Yehowa, Nzambi wenu. Nenuikale ne disanka mu misoko yenu, nenuikale ne disanka mu madimi enu. Nenuikale ne disanka bua bana banudi nulela, ne bua bintu bidi bidiunda mu buloba, ne bua kukumbasha kua nyama yenu ne bimuna bienu ne mikoko yenu. Nenuikale ne disanka mu bisaka bienu ne mu malonga anudi nuenzelamu mampa. Nenuikale ne disanka hanuabuela mu nsubu, nenuikale ne disanka hanualuhukamu. Yehowa neanuihatshile bena lukuna badi bahika ku mesu kuenu; nebalue kunudi mu nshila umue, nebanyeme ku mesu kuenu mu nshila muanda mutekete. Yehowa nea-nuvudishile disanka mu bisasa bienu, ne mu malu onso anudi nuenza ne bianza bienu; neanuvudishile disanka mu buloba budi Yehowa, Nzambi wenu, nnuha. Yehowa neanujadike bu bantu bandi ba tshijila, bu muakanulayeye, binuatumikila mikenji ya Yehowa, Nzambi wenu, binuenda mu nshila yandi. Bantu bonso ba ha buloba nebamanye ne, Nuenu nudi nubikidibua ku dina dia Yehowa; bobo nebanutshine. Yehowa neanuhe bintu bia bungi bia disanka, ne bia kukumbasha kua bana, ne bia kukumbasha kua bimuna ne bintu bidi bidiunda mu buloba buakalaya Yehowa bankambua benu bua kunuhabu. Yehowa neanunzuluile masanka adiye nʼau mu diulu bua kunulokeshila nvula ha buloba mu tshikondo tshia nvula, ne bua kunuvudishila disanka mu malu anudi nuenza ne bianza bienu; nuenu nenusombeshe bisamba bia bungi bintu, kadi nuenu kanuena nusomba bintu kudibo. Yehowa neanuvuisbe bu mitu, kena unuvuisha bu mikila; nuenu nenuikale anu ku mutu, kanuena nuikala hanshi, binuatumikila mikenji ya Yehowa, Nzambi wenu, indi nnuambila lelu, binuayenza; binuikala kanuyi nusesuka lelu ku tshianza tshia balume anyi ku tshianza tshia bakashi ku mei andi nnuambila, bua kuya kukuatshila nzambi mikuabo mudimu. Kadi binuikala kanuyi nunvua dî dia Yehowa, Nzambi wenu, bua kuenza mikenji yandi yonso ne mei bindi nnuambila lelu, hashishe milau ei yonso neyilue kunudi, neyinukuate. Nenuikale ne milau mu misoko, nenuikale ne milau mu madimi. Nenuikale ne milau mu bisaka bienu ne mu malonga anudi nuenzelamu mampa. Nenuikale ne milau mu kukumbasha kua bana ne mu bintu bidi bidiunda mu buloba ne mu kukumbasha kua bimuna ne kua mikoko. Nenuikale ne milau hanuabuela mu nsubu, nenuikale ne milau hanualuhukamu. Yehowa neanutumine milau ne makenga ne mahumbisha mu malu anudi nuenza ne bianza bienu, tô ne hanuajimishibua ne hanûmushibua lubilu ha buloba; bualu bua bubi bua bienzedi bienu, bua nuakundekela. Yehowa neanutumine masama mabi tô ne hanuajimishibua ha buloba bunudi nuya bua kubuhiana. Yehowa neanutumine disama dia nfuenke ne dia mubidi kahia ne dia biusha ne dia lukanku, ne miele ya nvita, ne luhehele lua nvunde ne butu; malu au neanulonde tô ne hanuafua. Diulu nedikale bu tshiamu tshia mitaku ku mutu kuenu, ne buloba nebuikale bu tshiamu mu makasa enu. Yehowa neavuishe nvula wa buloba buenu bu lufuishi ne nsenga bia mu diulu tô ne hanuajimishibua. Yehowa neanuihate ku mesu kua bena lukuna benu; nuenu nenuye kudibo mu nshila umue, kadi nenunyeme ku mesu kuabo mu nshila muanda mutekete; nebanuendakashe munkatshi mua bisamba bionso bia ha buloba. Bitalu bienu nebikale bu bidia bia nyunyu yonso ya mu diulu ne bia nyama yonso ya ha buloba; kakuena muntu udi uyihata. Yehowa neanutumine biusha bia mu Ejipitu, ne disama dia muiaka, ne mpusu ne lubila: masama adibo kabayi mua kuondaha. Yehowa neanuhadishe, neanutumme bufofo, nenufue mikemu mu mitshima yenu; nenububute munda munya bu mudi muntu mufofo ububuta mu midima; kanuena nuenda dikasa dimpe mu nshila yenu, nebanutatshishe, nebanuibe, kakuena muntu udi mua kunusungila. Neubangile mukashi kadi munga muntu nealale nʼandi; newase nsubu kadi kuena ushikamamu; neukune budimi bua nvinyo, ne kuena udia mamuma abu. Nebashihe ngombe webe ku mesu kuebe, ne wewe kuena udia munyinyi wandi; nebanyenge mpunda webe ku mesu kuebe ku bukole, ne kabena bakuhingishileye; nebahe badi nʼebe lukuna mikoko yebe, kakuena muntu wa kunusungila. Nebahe bantu bakuabo bana benu balume ne bana benu bakashi; mesu enu neabatangile ne mitshima minyingalala matuku onso; kadi kanuena nushala ne bukole nansha bukese mu bianza bienu. Tshisamba tshinudi kanuyi bamanye nebadie bintu biakadiunda mu buloba bualu bua mudimu wenu; nebanunyange, nebanudiate matuku onso; malu anudi nutangila ku mesu neanuhadishe. Yehowa neanutumme biusha bibi ku binu bienu ne ku mikolo yenu, ne ku munda mua makasa tô ne mu lubombo lua mutu: disama didi kadiyi mua kuondahibua. Yehowa nealue nʼenu ne mukelenge unuakateka ku mutu kuenu kudi tshisamba tshinudi kanuyi bamanye, nansha nuenu nansha bankambua benu; nenutendeleleku nzambi mikuabo ya mitshi ne mabue. Nenuikale bu dikema ne bu lusumuinu ne bu bihendu kudi bisamba bionso bidi Yehowa mulela munkatshi muabi. Nenukune maminu a bungi mu madimi, nenuhuole makese, bualu bua mikumbi neyadie. Nenukune mitshi ya tumuma tukese, nenuyilame bimpe, kadi kanuena nunua nvinyo, kanuena nuhuola tumuma; bualu bua bishi nebitudie. Nenuikale ne mitshi ya olive mu madimi enu onso, kadi kanuena nudilaba manyi ai hamʼbidi; bualu bua mamuma neahohoke. Nenulele bana balume ne bana bakashi, kadi bobo kabena benu, bualu bua bobo nebaye mu buluka. Mitshi yenu ne bintu bienu bionso bidi bidiunda mu buloba nebikale bia mikumbi. Benyi badi munkatshi muenu nebabandile ku mutu kuenu, ne nuenu nenuhuekele. Bobo nebanusombeshe bintu, kadi nuenu kanuena nubasombesha bintu; bobo nebikale bu mitu, nuenu nenuikale bu mikila. Milau ei yonso neyilue kunudi, neyinulonde, neyinuhete tô ne hanuajimishibua ba buloba; bualu bua nuenu kanuakunvua mei a Yehowa, Nzambi wenu, bua kutumikila mikenji yandi ne mei andi biakanuambileye: milau ei neyikale kunudi bu tshimanyinu ne dikema, ne kudi bana benu tshiendelele. Bualu bua nuenu kanuakakuatshila Yehowa, Nzambi wenu, mudimu ne disanka mu mitshima yenu bua bintu bionso biakanuheye, nunku nenukuatshile badi nʼenu lukuna mudimu badi Yehowa unutumina, ne nzala ne nyota ne butaka ne kuhanga kua bintu bionso. Bobo nebanuteke tshikokedi tshia tshiamu ha nshingu yenu tô ne hanuajimishibua kudibo. Yehowa neanutumme tshisamba tshia kule kuakua ku ditunga dikuabo bu nyunyu wa mukanku; kanuena bamanye muaku wa tshisamba atshi; badi ne luonji ku mpala kuabo, kabena banemeka bantu banunu, kabena ne luse kudi bana batekete; bobo nebadie kukumbana kua bimuna bienu, ne bintu biakadiunda mu buloba buenu tô ne hanuajimishibua; kabena banushila kabidi manvua anyi nvinyo mihia-mihia anyi manyi anyi kukumbana kua bimuna bienu anyi bana ba mikoko yenu tô ne hanuajimishibua kudibo. Bobo nebanutshintshimike ku bibi bienu bionso tô ne hahona ngumbu yenu yonso inuakueyemena mu buloba buenu buonso; bobo nebanutshintshimike ku misoko yenu yonso mu buloba buonso budi Yehowa, Nzambi wenu, unuha. Nuenu nenudie bana banuakalela, munyinyi wa bana benu balume ne wa bana benu bakashi bakamuha Yehowa, Nzambi wenu, bualu bua kanyinganyinga kadi kanukuata bua ditshintshimika dia misoko yenu ne bua makenga adi bena lukuna benu banukengesha nʼau. Muntu wakadi ne mutshima mulengele ne kalolo neikale ne disu dibi kudi muanʼabo ne kudi mukashi udiye munange ne kudi bana bandi bakashala; nunku yeye kena ubabanyinaku munyinyi wa bana bandi hadiye udia, bualu bua yeye kena ne tshintu tshishala kudiye mu ditshintshimika ne mu ditata didi bena lukuna banutatshisha nʼadi ku misoko yenu yonso. Mukashi wakadi ne mutshima mulengele ne kalolo munkatshi muenu wakatshina mua kuihata makasa ha buloba bualu bua kalolo ne kanemu kakatamba, neikale ne disu dibi kudi mulume udiye munange, ne kudi muanʼandi mulume ne kudi muanʼandi mukashi, ne kudi muana muhia-muhia wakaleleye ha binu biandi ne kudi bana bonso hadiye mulele; yeye neabadie mu musokoko bua kuhanga kua bia kudia mu ditshintshimika ne ditata bidi bena lukuna banutatshisha nʼabi ku misoko yenu. Binuahidia kutumikila mei onso a mikenji idi mifunda mu mukanda eu, bua nuenu nutshine dina edi dia butumbi ne ditshina ne, YEHOWA, NZAMBI WENU; hashishe Yehowa neanuenzele masama a kukema ne bana badi banulonda; masama makole neashale kunudi musangu mule ne makenga manene neashale kunudi musangu mule kabidi. Yeye neanutumine masama onso a mu Ejipitu anuakatshina; masama au neanulamate nuenu. Masama onso ne makenga adi kâyi mafunda mu mukanda wa mikenji, Yehowa neanutumineu, tô ne hanuajimishibua. Diambedi nuakadi bungi bua mitoto ya mu diulu kadi nenushale anu banya-banya, bualu bua kanuakunvua dî dia Yehowa, Nzambi wenu. Bu muakadi Yehowa ne disanka bua kunuenzela bimpe ne bua kunukumbasha ba bungi, mbu mudiye mua kuikala ne disanka bua kunujimisha ne bua kunushiha; nebanûmushe mu buloba bunudi nuya bua kubuhiana. Yehowa neanumuangalashe munkatshi mua bantu bonso ku ditengu edi dia buloba tô ne ku ditengu dikuabo; nenukuatshileku nzambi mikuabo ya mitshi ne ya mabue mudimu, mudi kanuyi bamanye, ne bankambua benu kabakayimanya kabidi. Munkatshi mua bisamba ebi kanuena nusangana ha kuikisha, anyi kua kutalasha munda mua makasa enu; Yehowa neanutumineku mitshima izakala ne mesu a buowa ne kusamina kua muoyo; nenuikale ne mpata bua mioyo yenu; nenuikale ne buowa munya ne butuku, kanuena nuikala ne ditekemena dia mioyo yenu. Dinda nenuambe ne, Tudi basue butuku buile. Dilolo nenuambe ne, Tudi basue butuku butshie bualu bua buowa budi bunukuata mu mitshima yenu, ne bua malu anudi batangila ku mesu. Yehowa neanuhingashe mu Ejipitu kabidi mu matu mu nshila unakanuambila ne, Kanuena numutangila kabidi. Nenukebeku mua kudihana kudi badi nʼenu lukuna bu bahika balume ne bahika bakashi, kadi kakuena muntu udi unusumba. Â mmei a tshihungidi akambila Yehowa Mose bua kuhanga ne Bena Isalele mu buloba bua Moaba, ku mutu kua tshihungidi tshiakahungeye nʼabo mu Holeba. Mose wakabikila Bena Isalele bonso, wakabambila ne, Nuenu nuakatangila malu onso akenzela Yehowa Palo mu buloba bua Ejipitu ku mesu kuenu, ne bantu bandi bonso ne buloba buonso; mateta makole anuakatangila ne mesu, ne bimanyinu ne malu a kukema. Kadi Yehowa kena muanze kunuha mitshima ya kumanya nʼai ne mesu a kutangila nʼau ne matshu a kunvua nʼau tô ne ku dituku edi. Nakanulombola mu tshihela tô bidimu makumi anai: bilulu bienu kabiakasunsuka hamʼbidi henu, ne bisabata kabiakasunsuka ku makasa enu. Kanuakadia mampa, kanua-kanua nvinyo anyi maluvu makole, bua nuenu numanye ne, Meme ndi Yehowa, Nzambi wenu. Hanuakalua ku muaba eu, Sihona, mukelenge wa mu Heshebona, ne Oga, mukelenge wa mu Bashana, bakaluhuka bua kuluangana nʼetu, ne tuetu tuakabahita; bakanyenga buloba buabo, tuakabuha Bena Lubena ne Bena Gada ne tshituha tshia tshisamba tshia Manashe bu buhianyi buabo. Nunku nuenu nutumikile mei a tshihungidi etshi, nuê-nze, bua nuenu nuikale ne dikasa dimpe mu malu onso anudi nuenza. Buonso buenu nudi nuimana ku mpala kua Yehowa, Nzambi wenu, lelu; ne ba ku mutu kuenu, bisamba bienu, bakulu benu, tuhita tuenu, ne balume bonso ba mu Isalele, ne bana benu bakese ne bakashi benu, ne benyi badi munkatshi muenu, ne batatu ba nkunyi ne basunyi ba mai; bua nuenu nubuele mu tshihungidi tshidi Yehowa, Nzambi wenu, muhunge nʼenu ne mu kuditshiha kudi Yehowa, Nzambi wenu, muditshihe nʼenu lelu, bua yeye anuitabushe lelu bu bantu bandi, ne bua yeye kuikala Nzambi wenu, bu muakanuambileye, ne bu muakalayeye bankambua benu, Abalahama ne Isaka ne Yakoba. Tshiena muhunge nʼenu nuenu nkayenu tshihungidi etshi ne kuditshiha eku, kadi ne muntu yonso udi muimane ku mpala kua Yehowa, Nzambi wetu, lelu, ne muntu yonso udi kayi muimane nʼetu lelu. Bualu bua nudi bamanye bu mutuakashikama mu buloba bua Ejipitu, ne mutuakahita munkatshi mua bisamba biakadi mu nshila; ne nuenu nuakatangila malu mabi abo ne mpingu yabo ya mitshi ne ya mabue ne ya tshiamu tshia argent ne tshia or yakadi munkatshi muabo; bua muntu kikadi munkatshi muenu, nansha mulume nansha mukashi nansha diku dia bantu nansha tshisamba, udi akudimuna mutshima wandi kudi Yehowa, Nzambi wenu, bua kukuatshila nzambi ya bisamba abi mudimu; ne bua muji udi ukuama mamuma a mulungu ne a bululu kawikadi munkatshi muenu. Kadi bikala muntu udi unvua mei a mulau eu udiamba mu mutshima wandi ne, Meme nengikale ne ditalala nansha binalonda tshitshu tshia mu mutshima wanyi, bua kutenteka dikuatshika ha mutu ha nyota, Yehowa kena umubuikidila bubi buandi, kadi tshiji tshia Yehowa ne mukau wandi nebimueneke kudi muntu eu ne milau yonso idi mifunda mu mukanda eu neyimukuate, ne Yehowa nenjimishe dina diandi muinshi mua diulu. Yehowa neamutahulule munkatshi mua bisamba bionso bia Bena Isalele bua kamuenzela bibi, bu mudi milau yonso ya tshihungidi etshi mifunda mu mukanda eu wa mikenji. Mu tshihungu tshia bantu tshidi tshitua, bana benu badi banulonda ku nyima ne benyi badi bafuma ku buloba bukuabo, hatangilabo makenga akalua ku buloba abu ne masama onso adi Yehowa mubatumine ne buloba buonso budi bu butue ne luehu ne bintu bioshibue, kabena bakunamu tshintu, kabena bahuolamu tshintu; ne mashinde kaena amenamu: buloba budi buikala bu kubutuka kua misoko ya Sodoma ne Amola ne Adema ne Seboima yakashiha Yehowa mu tshiji tshiandi tshikole; bantu aba bonso nebambe ne, Bualu kai Yehowa wakuenzela buloba ebu nunku? Yeye wakadi ne tshiji tshikole nunku munyi? Hashishe bantu nebambe ne, Bualu bua bobo bakahidia tshihungidi tshia Yehowa, Nzambi wa batatu babo, tshiakahungeye nʼabo hakaluhukeye nʼabo mu buloba bua Ejipitu; ne bobo bakaya bua kukuatshila nzambi mikuabo mudimu, ne bua kuyitendelela; nzambi yakadibo kabayi bamanye, idi Yehowa kayi mubahe: nunku tshiji tshia Yehowa tshiakamueneka mu buloba ebu, bua kushikisha milau yonso idi mifunda mu mukanda eu; ne Yehowa wakabumusha mu buloba abu ne difika dia munda ne tshiji tshikole, wakaya nʼabo mu buloba bukuabo; bualu ebu budi nunku lelu. Malu atshidi masokoka adi malu a Yehowa, Nzambi wetu: kadi malu adi masokolola adi malu etu ne a bana betu tshiendelele, bua tuetu tuenze mei onso a mikenji ei. Halua malu au onso kunudi ne disanka ne mulau, binakuteka ku mpala kuenu, ne hanuayuluka malu au munkatshi mua bisamba bidi Yehowa, Nzambi wenu, unutuma munkatshi muabi, ne hanuakudimuna mitshima yenu kudi Yehowa, Nzambi wenu, bua kutumikila mei andi ne mitshima yenu yonso ne mioyo yenu yonso, bu munakunuambila lelu, ne nuenu ne bana benu; hashishe Yehowa, Nzambi wenu, neakudimune buluka buenu, neanuleshe luse, neahingane kunudi, neanusangishe ba munkatshi mua bantu bonso muakanumuangalasha Yehowa, Nzambi wenu. Bikala bakuabo bamuangalake tô ne ku ditengu dia diulu, Yehowa, Nzambi wenu, neabasangisheku, neabahingisheku kabidi; ne Yehowa, Nzambi wenu, nealue nʼenu mu buloba bua batatu benu, ne nuenu nenubuhiane; yeye neanuenzele bimpe, neanuvudishe ha mutu ha hatatu benu. Yehowa, Nzambi wenu, neanutengule mu mitshima yenu ne ya bana benu, bua nuenu kunanga Yehowa, Nzambi wenu, ne mitshima yenu yonso ne mioyo yenu yonso, bua nuenu kuikala ne muoyo. Yehowa, Nzambi wenu, neateke milau ei yonso hamʼbidi ha bena lukuna ne badi nʼenu tshiji, bakadi banukengesha. Nuenu nenuhingane, nenutumikile dî dia Yehowa, nenuenze mikenji yonso inakunuambila lelu. Yehowa, Nzambi wenu, neanuvudishile disanka mu mudimu wonso unudi nuenza ne bianza, ne mu kukumbasha kua bana ne mu kukumbasha kua bimuna bienu ne mu bintu bionso bidi bidiunda mu buloba; bualu bua Yehowa neikale ne disanka bualu buenu, bu muakasankeye bualu bua batatu benu; binuatumikila dî dia Yehowa, Nzambi wenu, bua kuenza mikenji yandi ne mei andi bidi bifunda mu mukanda eu wa mikenji: binuakudimuka kudi Yehowa, Nzambi wenu, ne mitshima yenu yonso ne mioyo yenu yonso. Bualu bua mikenji ei inakunuambila lelu kayena minuhite bukole bua nuenu kuyenza; kayena kule. Kayena mu diulu bua nuenu nuambe ne, Nganyi neahande mu diulu bua kulua ne mikenji kutudi, ne bua kutunyuisha bua tuetu kuyenza? Mikenji ei kayena dishiya dia mai manene, bua nuenu nuambe ne, Nganyi watusabukila dishiya dia mai manene bua kulua nʼai kutudi ne bua kutunyuisha bua tuetu kuyenza? Kadi dî edi didi ha buihi nʼenu ne mukana muenu ne mu mitshima yenu, bua nuenu kudienza. Tangilai, nakuteka muoyo ne malu mimpe, ne lufu ne malu mabi ku mpala kuenu lelu; mukenji unakunuelela lelu bua kunanga Yehowa, Nzambi wenu, ne bua kuenda mu nshila yandi ne bua kutumikila mikenji yandi ne mei andi ne mikandu yandi: nunku nenuikale ne muoyo, nenukumbane ba bungi, ne Yehowa, Nzambi wenu, neanuvudishile disanka mu buloba bunuyaya kubuhiana. Kadi bikala mitshima yenu mihambuke, ne binuikala kanuyi nunyua, kadi binuatendelela nzambi mikuabo bua kuyikuatshila mudimu, meme ndi nnuambila lelu ne, Nenujimishibue bulelela; kanuena nuvudisha matuku enu mu buloba bunuyaya dishiya dia Yadene bua kubuhiana. Meme ndi mbikila diulu ne buloba bu bamonyi ba bualu ne, Nakuteka muoyo ne lufu, ne disanka ne mulau ku mpala kuenu lelu: muiku nudisunguile muoyo, nenuikale ne muoyo ne nuenu ne bana benu, bua kunanga Yehowa, Nzambi wenu, ne bua kutumikila dî diandi, ne bua kumulamata; bualu bua yeye udi muoyo wenu ne muvudishi wa matuku enu; nunku nenushikame mu buloba buakalaya Yehowa batatu benu, Abalahama ne Isaka ne Yakoba, bua kubahabu. Mose wakaya biandi, wakambila Bena Isalele bonso mei â. Yeye wakabambila ne, Lelu nakuhita bidimu lukama ne makumi abidi; tshiena mua kuya ne mua kulua kabidi; ne Yehowa wakamana kungambila ne, Wewe kuena usabuka Yadene eu. Yehowa, Nzambi wenu, neasabuke ku mpala kuenu; yeye neashihe bisamba abi ku mpala kuenu, nuenu nenubihate; Yoshua neasabuke ku mpala kuenu bu muakamba Yehowa. Yehowa neabenzele bu muakenzeleye Sihona ne Oga, bakelenge ba Bena Amole, bakashiheye ne buloba buabo. Yehowa neabafile mu bianza bienu, nuenu ne nubenzele bu mudi mikenji yonso inakanuambila. Nuikale ne bukole ne mitshima ya dikima, kanubatshinyi, bualu bua Yehowa, Nzambi wenu, yeye mene uyaya nʼenu; yeye kena unuhanga, kena unulekela. Mose wakabikila Yoshua, wakamuambila ku mesu kua Bena Isalele bonso ne, Wikale ne bukole ne mutshima wa dikima, bualu bua wewe uyaya ne bantu aba mu buloba buakalaya Yehowa batatu babo bua kubahabu; ne wewe neubahianyishe buloba abu. Yehowa mene uyaya ku mpala kuebe, yeye neikale hebe, kena ukuhanga, kena ukulekela: kutshinyi, kuzakadi. Mose wakafunda mikenji ei, wakayifila mu bianza bia bakuidi, bana balume ba Lewi, bakadi batuala mushete wa tshihungidi tshia mei a Nzambi, ne kudi bakulu bonso ba mu Isalele. Mose wakabambila ne, Hafika bidimu muanda mutekete, mu tshikondo tshidibo bahingashangana bintu, hadiabo bidia bia disanka dia bitandatanda, halua Bena Isalele bonso ku mpala kua Yehowa, Nzambi wenu, mu muaba udiye usungula, hashishe nenubadile Bena Isalele bonso mikenji ei mu matshu abo. Nusangishe bantu bonso, ne balume ne bakashi ne bana bakese ne benyi badi munkatshi muenu, bua buonso buabo bumue, bayile lungenyi, batshine Yehowa, Nzambi wenu, batumikile mei onso a mikenji ei; nunku bana babo badi kabayi banze kumanya nebunvue, nebamanye mua kutshina Yehowa, Nzambi wenu, tô matuku onso anudi nushikama mu buloba bunudi nuya dishiya dia Yadene bua kubuhiana. Yehowa wakambila Mose ne, Tangila, dituku dia lufu luebe dikadi ha buihi: bikila Yoshua, ne bubidi buenu nudisangishe mu ntenta wa kusambakena, bua meme mmudimushe. Mose ne Yoshua bakaya, bakadisangisha mu ntenta wa kusambakena. Yehowa wakamueneka mu Ntenta mu difutu: difutu diakimana ku mutu kua tshibi tshia Ntenta. Yehowa wakambila Mose ne, Tangila, wewe neulale tulu ne bankambua bebe; ne bantu aba nebabike, nebalonde malu a masandi a nzambi ya bende ya mu buloba buyayabo, nebandekele, nebashihe tshihungidi tshituakahunga nʼabo. Hashishe tshiji tshikole netshinkuate dituku adi, ne meme nembalekele, nengumushe mesu anyi kudibo ne bobo nebajimishibue; ne matata ne makenga a bungi nealue kudibo; bobo nebambilangane dituku adi ne, Malu â mabi onso kaena alua kutudi bualu bua Nzambi wetu kena munkatshi muetu, anyi? Meme nengumushe mesu anyi kudibo dituku adi bulelela, bua malu mabi akenzabo, hakakudimunabo mitshima yabo bua kutendelela nzambi mikuabo. Katataka wewe ubafundile musambu eu, wayisha Bena Isalele bonso musambu; uteke musambu eu mukana muabo, newikale bu mumanyi wa bualu buanyi kudi Bena Isalele. Bualu bua hanakamana kulua nʼabo mu buloba bunakalaya batatuʼabo, budi bûle tente ne mabele ne buitshi, ne hakamanabo kudia, kukuta ne kuvunda, hashishe nebakudimune mitshima yabo bua kutendelela nzambi mikuabo, nebayikuatshile mudimu, nebampetule, nebashihe tshihungidi tshianyi. Nunku halua matata ne makenga makole kudibo, musambu eu newikale bu mumanyi wa bualu, neudiambe kudibo; bana babo kabahu musambu eu muoyo, bualu bua meme ndi mumanye meji adibo nʼau mu mitshima yabo lelu diambedi tshiyi muanze kulua nʼabo mu buloba bunakabalaya. Nunku Mose wakafunda musambu eu dituku adi, wakauyisha Bena Isalele. Yeye wakadimusha Yoshua, muana wa Nuna, ne, Wikale ne bukole ne mutshima wa dikima; bualu bua wewe neulue ne Bena Isalele mu buloba bunakabalaya; meme nengikale nʼebe. Hakashikisha Mose kufunda mei a mikenji ei mu mukanda, hashishe Mose wakadimusha Bena Lewi bakadi batuala mushete wa tshihungidi tshia mei a Yehowa ne, Nuangate mukanda eu wa mikenji, nûteke ku luseke lua mushete wa tshihungidi tshia mei a Yehowa, Nzambi wenu, newikaleku bu mumanyi wa bualu buanyi. Bualu bua meme ndi mumanye kutomboka kuenu ne tshitshu tshienu: monai, hantshidi ne muoyo munkatshi muenu lelu, nuakumana kutombokela Yehowa; nenutambe kutomboka ku nyima kua lufu luanyi! Nusangishe bakulu benu bonso ba mu bisamba bienu ne tuhita tuenu kundi, bua meme kubambila mei â onso ku matshu abo, nembikile diulu ne buloba bu bamonyi ba bualu kudibo. Bualu bua ndi mumanye ne, Ku nyima kua lufu luanyi nenutambe kudisangisha ne kusesuka mu nshila unakunulesha; malu mabi neanukuate mu matuku atshidi ku mpala; bualu bua nuenu nenuenze malu mabi ku mesu kua Yehowa bua kumufikisha munda bua mudimu wa bianza bienu. Mose wakambila Bena Isalele bonso mei a musambu eu mu matshu abo, tô ne hakashikisheye. Diulu, teleja matshu, nengambe, buloba bunvue mei a mukana muanyi. Diyisha dianyi dimate hanshi bu nvula, ne mei anyi akudimuke bu mume; bu nvula mukese ha mashinde a nseku, bu nvula wa mudimbi ha midioko. Bualu bua meme nengambe dina dia Yehowa: tumbishai bunene bua Nzambi wetu. Yeye udi Dibue; mudimu wandi wonso udi muakane, bualu bua nshila yandi yonso idi milulame: Nzambi wa kalolo udi kayi ne bubi, udi ne malu makane a bushuwa. Bantu bakadinyangisha kudiye, kabena bu bana bandi, bakahambuka, malu abo akanyanguka, akalua manyongoboka. Nuenu bantu bahote badi kabayi ne meji, nudi nuhingishila Yehowa malu mabi nunku, anyi? Yeye kena tatu wenu wakanuafuka, wakanuenza, wakanujadika, anyi? Nuvuluke matuku a diambedi, nuelangane meji a bidimu ne bikondo bia bungi: webeshe tatu webe, ne yeye neakuleshe; ne bakulu benu, bobo nebakuambile. Hakaha Nzambi wa mu diulu bisamba buhianyi buabi, hakatahululeye bantu, wakadika mikalu ya bantu bu mudi bungi bua bana ba Isalele. Tshituha tshia buhianyi bua Yehowa mbantu bandi; Yakoba udi buhianyi buandi. Yeye wakasangakena nʼandi mu muaba wa hatuhu, mu tshihela muakadi luhehele nkayalu; yeye wakamunyunguluka, wakamulama bimpe, wakamuenzela bu kamonyi ka disu diandi. Bu mudi nyunyu wa mukanku unyungisha disua diandi, udi uhahala ha mutu ha bana bandi; nunku yeye wakolola mahuahua andi, wakabangata, wakabatuala ha mahuahua andi. Yehowa nkayandi wakamulombola, kakadi nzambi wa bende kudiye. Yeye wakamubandisha ha mutu ha miaba mile ya ha buloba, wakadia bintu biakaboba mu madimi, wakamunuisha buitshi buakadi mu mabue, ne manyi akadi mu mabue makole; Wakamudisha manteke a mabele a ngombe, ne mabele a mbushi, ne dianyi dia mikoko ne bimpanga bia mu Bashana ne mbushi, ne blê yakatamba buimpe, nuakanua nvinyo ya tumuma tukunze tuakadi bu mashi. Kadi Yeshuluna wakavunda, wakatua mikumu: nuenu nuakuvunda, nudi ne mafuta a bungi, nuakusenena; hashishe yeye wakalekela Nzambi wakamufuka, wakahetula Dibue dia luhandu luandi. Bakamufuisha mukau ne nzambi ya bende; bakamufikisha munda ne malu mabi. Bakashihela ba-demon badi kabayi Nzambi nyama, nzambi idibo kabayi bamanye, nzambi mihia-mihia yakamueneka anu katataka, yakadi batatu benu kabayi batshina diambedi. Nuakulekela Dibue diakanufuka, nuakuhua Nzambi wakanulelesha muoyo. Yehowa wakatangila bualu ebu, wakadi nʼabo tshiji, bualu bua mateta a bana bandi balume ne a bana bandi bakashi. Yehowa wakamba ne, Nenkudimune mesu anyi kudibo, neutangile muikala nshikidilu wabo, bualu bua badi bena tshikondo tshia tshitshu, bu bana badi kabayi mua kueyemenyibua. Bakunfuisha mukau ne tshintu tshidi katshiyi Nzambi, bakunfikisha munda ne mpingu yabo ya hatuhu, meme nembafuishe mukau ne bantu ba hatuhu, meme nembafikishe munda ne tshisamba tshia bantu bahote. Bualu bua kahia kakatemeshibua mu tshiji tshianyi, kadi katema tô ne mu Muaba wa Bafue, kadi kosha buloba ne bintu biakadiundamu, kadi kosha makunshi adi muinshi mua mikuna mile. Nententekashe malu mabi ha mitu habo, nembase mikete yanyi; nzala neyibanyange, makala a kahia ne makenga makole neabashihe, nentume nyama ya menu makole munkatshi muabo, ne lulengu lua nyoka idi idikoka hanshi. Muele wa nvita neubashihe ha bula, ne buowa nebubuele mu nsubu yabo; nebashihe bansongalume ne bansongakashi batshidi tumama, ne bana batshidi bamua mabele ne bakulumpe badi ne nvi ku mitu kuabo. Nakadi kuamba ne, Nembamuangalashe kule kuaka, nenjimishe tshivulukidi tshiabo munkatshi mua bantu; bu meme tshiyi nutshine ne bantu badi nʼabo lukuna nebanfikishe munda, ne bobo nebabange kujingulula bimpe, neba diambe ne, Bianza bietu bidi bibandishibua, ne Yehowa kena wenza malu â onso. Bualu bua bobo badi bu tshisamba tshia bantu badi kabayi ne lungenyi, kabena ne dijingulula dia malu munda muabo. Bu bobo bikale ne lungenyi, bakadi kujingulula bualu ebu, bakadi kuela meji a malu atua kudibo. Muntu umue wakadi kumanya mua kuihata tshinunu tshia bantu, ne bantu babidi bakadi kumanya mua kuihata binunu dikumi bia bantu munyi, bikala Dibue kadiyi dibahane, ne Yehowa kayi mubafile kudibo? Bualu bua dibue diabo kadiena bu Dibue dietu nansha bikala bena lukuna balumbuluishi ba bualu. Bualu bua mitshi yabo ya tumuma tukese idi bu mitshi ya mu Sodoma ne ya mu madimi a Amola: tumuma tuabo tudi bu nyongangandu, ne tshisumbu tshia tumuma tshidi ne bululu: nvinyo yabo idi bu lulengu lua nyoka, bu lulengu bikole lua nyoka wa ntoka. Lulengu elu kaluena lusokoma kundi, luteka mu tshibutshilu tshianyi, anyi? Kusombuela kudi kuanyi, ne difutu kabidi, halua dituku didi dikasa diabo difinuka, bualu bua dituku dia dikenga diabo diakalua, ne malu akadi ha kulua kudibo nealue lubilu. Bualu bua Yehowa nealumbuluile bantu bandi bilumbu biabo, neakudimune mutshima wandi bualu bua bantu bandi, hatangileye ne bukole buabo buakujimina, ne kakuena muntu udi mushale muhika anyi mudishikaminyi. Yehowa neambe ne, Nzambi yabo idi kudi kunyi, ne dibue diabo diakadibo batekemena didi hanyi, yakadia manyi a nyama yakadibo bamushihela, yakanua nvinyo yakafilabo? Nzambi yenu ibike, inukuatshishe, inulame. Katataka, tangilai, anu meme nkayanyi, nYeye mene, kakuena nzambi mukuabo, anu meme; meme ndi nshiha bantu, ndi mbabisha ku lufu; meme ndi ntaha bantu mputa, ndi mbondaha kabidi; kakuena muntu udi mua kubasungila mu tshianza tshianyi. Bualu bua ndi mbandisha tshianza tshianyi kulu bua kuditshiha ne, Bu mundi muikale ne muoyo tshiendelele. Binatuisha muele wanyi wa nvita, ne bingolola tshianza tshianyi bua kulumbulula bilumbu, meme nensombuele badi nʼanyi lukuna, neafute badi nʼanyi tshiji. Nenvuishe mikete yanyi bu mukuatshiki wa maluvu bualu bua mashi abo, ne muele wanyi wa nvita neudie munyinyi wabo ne mashi a bafue ne a bena lukanu, ne mitu ya bukelenge ba bena lukuna. Nuenu ba bisamba bionso, sankai ne bantu bandi, bualu bua yeye nealombe mashi a bantu bandi, neasombuele badi nʼandi lukuna, udi umusha dihila dia buloba ne dia bantu bandi. Mose wakalua, wakambila bantu mei onso a musambu eu mu matshu abo, yeye ne Hoshea, muana mulume wa Nuna. Mose wakashikisha kuambila Bena Isalele bonso mdi â onso; yeye wakabambila kabidi ne, Tekai mei onso anakunuambila lelu mu mitshima yenu, mei onso a mikenji mene mudi nuambila bana benu bua bobo kuyenza. Ebu kambualu bua hatuhu kunudi; kadi budi muoyo wenu, budi buvudisha matuku enu mu buloba bunuyaya kuhiana dishiya dia Yadene. Yehowa wakambila Mose dituku adi mene ne, Banda biebe mukuna eu wa Abalima, ku mutu kua mukuna wa Nebo, udi buludiludi ne Yeleko mu buloba bua Moaba, utangile buloba bua Kanâna bundi mpa Bena Isalele bu buhianyi buabo; afue biebe ku mukuna ûdi ubanda, usangishibue kudi bankambua bebe, bu muakafua Alona, mukulu webe, ku mukuna wa Hô, wakasangishibua kudi bankambua bandi: bualu bua wewe wakahidia dî dianyi munkatshi mua Bena Isalele ku mai a Meliba a mu Kadesha mu tshihela tshia Sina; bualu bua wewe kuakanjidila munkatshi mua Bena Isalele. Bualu bua wewe neutangile buloba budi ku mpala kuebe; kadi kuena ubuela mu buloba bundi mpa Bena Isalele. Â mmasanka akavudishila Mose, muntu wa Nzambi, Bena Isalele, diambedi yeye kayi muanze kufua. Yeye wakamba ne, Yehowa wakahueka ha mukuna wa Sinai, wakabika munkatshi muabo ku Sei, wakatemena ku mukuna wa Palana, wakamueneka munkatshi mua binunu makumi bia bantu bandi ba tshijila, wakalua kudibo ne mikenji mitema kahia mu tshianza tshiandi tshia bukole. Bulelela, yeye udi unanga bantu bonso, bantu bandi bonso ba tshijila hadi mu tshianza tshiebe: bobo bakashikama hanshi ku makasa ebe, bua kunvua mei ebe. Mose wakalelela mikenji bu buhianyi bua tshisambakena tshia Yakoba. Yeye wakadi mukelenge wa mu Yeshuluna, hakasangishabo bakadi ku mutu kua bantu ba bisamba bionso bia Bena Isalele. Lubena ikale biandi ne muoyo, kafu nansha, bantu bandi kabikadi banya-banya. Edi ndisanka dia Yuda; wakamba ne, Yehowa, unvua dî dia Yuda, ulue nʼandi kudi bantu bandi: bianza biebe bimukoleshe, wikale mukuatshishi wandi kudi bena lukuna. Bua Lewi yeye wakamba ne, Tumima ne Ulima biebe bikale kudi ûdi musue, uwakateta ku Masa, uwakaluangana nʼandi ku mai a Meliba. Wakambila tatu wandi ne mamu wandi ne, Tshiena mumumone; kena mumanye bana babo, kena mumanye bana bandi, bualu bua bobo bakatumikila dî diebe ne tshihungidi tshiebe. Bobo nebayishe bana ba Yakoba mei ebe, ne Bena Isalele mikenji yebe; nebateke musenga wa manananshi ku mpala kuebe, ne milambu ya kuosha ha kahia ha tshioshelu tshiebe. Yehowa avudishile bintu biandi disanka, itabushe mudimu wa bianza biandi: atshibule nyima ya bantu badi bahika ku mpala kuandi, ne ya badi nʼandi lukuna bua kababiki kabidi. Bua Benyamina yeye wakamba ne, Munangi wa Yehowa neashikame nʼandi talalâ, utu wamubuikila matuku onso, udi ushikama hankatshi ha makaya andi. Bua Yosefe yeye wakamba ne, Yehowa avudishile buloba buandi disanka, bua bintu bia mushinga mukole bia mu diulu, bua mume, ne bua mai adi muinshi mua buloba; ne bua bintu biakakuama mamuma bualu bua diba, ne bua bintu bidi belangana ku ngondo ku ngondo; bua bintu bimpe bia mu mikuna, ne bua mabue a mushinga mukole a mu mikuna ya tshiendelele; ne bua bintu bimpe bia ha buloba ne tshiuwidi tshiabu, ne bua diakalengele dia bantu badi bashikama muitu. Disanka edi nedilue ha mutu ha Yosefe, ne ku lubombo lua mutu wa muntu wakadi mutahuluke kudi bana babo. Butumbi buandi budi bu muanʼa bute wa ngombe, nsengu yandi idi bu nsengu ya ngombe wa mu mpata; yeye neatue bantu bonso ba ha buloba nsengu yandi, ne ba binunu makumi bia bantu ba mu Efelayima ne binunu bia bantu ba mu Manashe. Bua Zebuluna yeye wakamba ne, Usanke mu kuluhuka kuebe; ne Yisakâ, usanke mu ntenta yebe. Bobo nebabikile bantu ku mikuna, nebashiheleku milambu ya buakane: bua bobo nebadie bintu bia bungi bia mu mai manene, ne bintu bimpe bidi bisokoma muinshi mua nsenga. Bua Gada yeye wakamba ne, Muntu wavudishila Gada disanka udi ne disanka: yeye udi walamina bu mukashi wa nyama wa ntambue, yeye udi utula diboko ne lubombo lua ku mutu kabidi. Yeye udi udianjila kudisunguila tshituha tshiandi, bualu bua etshi ntshituha tshia mukokeshi, wakalua nʼatshi kudi ba ku mutu kua bantu; yeye udi ujadika dilumbulula diakane dia Yehowa, ne mikenji yandi kudi Bena Isalele. Bua Dana yeye wakamba ne, Dana udi bu muana wa nyama wa ntambue: udi muhika mumuke ku Bashana. Bua Nafatale yeye wakamba ne, Nafatale wakadiukutshisha ne diakalengele, udi mûle tente ne disanka dia Yehowa. Uhiane biebe buloba bua ku dishiha ne bua ku sude. Bua Ashe yeye wakamba ne, Ashe asanke biandi ne bana, ikale ne diakalengele kudi bana babo: atue dikasa diandi mu manyi. Milonda yebe ya bibi bia musoko neyikale ya tshiamu tshifike ne tshiamu tshia mitaku, bukole buebe nebuikale bule bua matuku ebe onso. Yeshuluna, kakuena mukuabo bu Nzambi, udi ushikama biandi mu diulu bua kukukuatshisha: bulengele buandi budi ku mutu kua matutu. Nzambi wa kashidi udi muaba webe wa kushikama talalâ, ne maboko andi a tshiendelele atu akubisha: yeye wakihata bena lukuna ku mesu kuebe, ne yeye wakamba ne, Bashihai. Isalele udi ushikama biandi talalâ, mpokolo wa Yakoba udi ha nkayandi mu madimi a blé ne a nvinyo mihia-mihia: ne matutu andi adi amatshisha dibungi. Bena Isalele, nuenu nudi ne disanka, banganyi badi bu nuenu basungidibue kudi Yehowa! Yeye udi bu ngabu wa dikuatshisha dienu; udi bu muele wa nvita unudi nutamba nʼau bakuabo! Bantu badi nʼenu lukuna nebanukokele, nuenu nenudiate mikuna yabo mu makasa enu. Mose wakaya ku mpata ya Moaba ku mukuna wa Nebo, ku mutu kua Pisega, kuakadi kutangilangana ne Yeleko. Yehowa wakamufila buloba buonso bua Gilada tô ne ku Dana, ne buloba buonso bua Nafatale, ne bua Efelayima ne Manashe ne buloba buonso bua Yuda tô ne ku mai manene a ku nyima, ne buloba bua ku Sude, ne mpata wa mu tshibanda tshia Yeleko, musoko wa mabue, tô ne ku Soâ. Yehowa wakamuambila ne, Ebu mbuloba bunakalaya Abalahama ne Isaka ne Yakoba ne, Nembuhe tunkanunuina tuenu, nakukuleshabu ne mesu ebe, kadi wewe kuena usabukaku. Nunku Mose, muinu wa Yehowa, wakafua mu buloba bua Moaba muakamba Yehowa. Yehowa wakamujika mu tshibanda tshia buloba bua Moaba tshiakatangilangana ne Bete-peô; kakuena muntu udi mumanye kudi lukita luandi tô ne ku dituku edi. Hakafua Mose, yeye wakadi ne bidimu lukama ne makumi abidi: mesu andi kâkadi bileshileshi ne bukole buandi kabuakahua. Bena Isalele bakadila Mose matuku makumi asatu mu mpata wa Moaba; nunku matuku a kudila kua Mose akashika. Yoshua, muana wa Nuna, wakadi ne lungenyi munda muandi tente bualu bua Mose wakamutentekasha bianza biandi; ne Bena Isalele bakunvua di diandi, bakenza bu muakambila Yehowa Mose. Ku dituku adi kakuena muprofete mukuabo mubike munkatshi mua Bena Isalele bu Mose, wakadi mumanyangane ne Yehowa ku mesu, mu bimanyinu bionso ne mu malu a kukema akamutumina Yehowa bua kuenzeye mu buloba bua Ejipitu, ne bua kuenzela Palo ne bantu bandi bonso ne buloba buandi buonso, ne mu tshianza tshikole, ne mu buowa bunene biakenza Mose ku mesu kua Bena Isalele bonso. Hakafua Mose, muntu wa Yehowa, Yehowa wakambila Yoshua, muana wa Nuna, mukuatshishi wa Mose, ne, Mose, muntu wanyi, udi mufue; nunku bika biebe, usabuka musulu eu wa Yadene, wewe ne bantu aba bonso, uye mu buloba bundi mpa Bena Isalele. Nakanuha miaba yonso inuadiata muinshi mua makasa enu bu munakambila Mose. Mikalu ya buloba buenu neyikale ku tshihela etshi ne ku Lebanona eu tô ne ku musulu munene dina diau Pelata, buloba buonso bua Bena Hiti tô ne ku mai manene kudi kubuelela diba. Kakuena muntu udi mua kuimana ku mpala kuebe tô matuku onso autshidi ne muoyo; nengikale nʼebe bu munakadi ne Mose; tshiena ukulekela, tshiena nkushiya nkayebe. Ikala ne bukole ne mutshima wa dikima, bualu bua wewe neutahuluke bantu aba buhianyi bua buloba bunakalaya batatuʼabo bua kubahabu. Anji kuikala ne bukole ne mutshima wa dikima: udimuke bua kutumikila mikenji yonso yakakuambila muntu wanyi Mose; kusesuka ku tshianza tshia balume anyi ku tshianza tshia bakashi, nunku newikale ne diakalengele kuonso kuwaya. Mukanda eu wa mikenji yanyi kaumuki mukana muebe; kadi welangane meji a mukanda eu munya ne butuku, udimuke mua kuenza malu onso adi mafundamu; hashishe neutute dikasa dimpe, newikale ne diakalengele. Tshiakukuambila, anyi? Ikala ne bukole ne mutshima wa dikima; kutshinyi, kukuatshiki buowa, bualu bua Yehowa, Nzambi webe, udi nʼebe kuonso kuwaya. Hashishe Yoshua wakambila miloho ya bantu ne, Hitshilai munkatshi mua tshitudilu, nuambile bantu ne, Dilongoluelai bia kudia, bualu bua hahita matuku asatu, nenusabuke Yadene eu, bua kuya kuangata buloba, budi Yehowa, Nzambi wenu, munuhe bua nuenu kubuangata. Yoshua wakambila Bena Lubena ne Bena Gada ne tshituha tshia tshisamba tshia Bena Manashe ne, Nuvuluke dî diakanuambila Mose, muntu wa Yehowa, ne, Yehowa, Nzambi wenu, udi unuha dikisha, neanuhe buloba ebu. Bakashi benu ne bana benu bakese ne bimuna bienu nebishale mu buloba buakamba Mose dia munemu dia Yadene; nuenu bantu bakole bonso ba dikima nuhite ku mpala kua bana benu bavuale bintu bienu bia nvita, bua kubakuatshisha; tô ne haha Yehowa bana benu dikisha, bu muakunuheye, ne hangatabo kabidi buloba budi Yehowa, Nzambi wenu, mubahe; ku nyima nenuhingane ku buloba buenu buakanuha Mose, muntu wa Yehowa, dishiya dia Yadene kudi kuhatuka diba, bua nuenu kubuangata. Bobo bakakudimuna Yoshua dî ne, Mei onso awakutuambila, netuênze; netuye kuonso kûdi ututuma. Netutumikile dî diebe bu mutuakatumikila mei onso a Mose; Yehowa, Nzambi webe, ikale nʼebe bu muakadiye ne Mose. Muntu yonso udi uhidia dî diebe, kayi unvua mei audi umuambila, nebamushihe; anji kuikala ne bukole ne mutshima wa dikima. Yoshua, muana wa Nuna, wakatuma batentekedi babidi ku Shitima mu musokoko, wakabambila ne, Yai, nutangile buloba, ne Yeleko. Bobo bakaya, bakabuela mu nsubu wa mukashi muena tshiendenda dina diandi Lahaba, bakalalamu. Bakambila mukelenge wa Yeleko ne, Mona, balume ba Bena Isalele bakafika munemu butuku bua kutentekela buloba. Mukelenge wa Yeleko wakatumina Lahaba dî ne, Hatula balume bakulua kudi, bakubuela mu nsubu muebe; bualu bua bobo bakulua bua kutentekela buloba buonso. Mukashi eu wakangata bantu aba babidi, wakabasuika; yeye wakamba ne, Bulelela, bantu aba bakulua kundi kadi tshiakamanya kuakafumabo; ne bakulua diba didibo binshila bibi bia musoko, hakuila butuku, bantu aba bakaluhuka; kadi meme tshiena mumanye kuakuyabo; nubalonde lubilu, nenubahete. Kadi yeye wakamana kuya nʼabo ku musaka wa nsubu wandi, wakabasokoka muinshi mua mitshi ya lin yakadiye mulonge ha musaka. Balume bakabalonda mu nshila tô ne ku malobo a Yadene; bakaluhuka bantu, bakaya bua kubakeba, bakinshila tshibi. Diambedi kabayi banze kulala tulu, yeye wakabanda kudibo ku musaka wa nsubu; yeye wakambila balume aba ne, Ndi mumanye ne, Yehowa wakanuha buloba, ne buowa buakatukuata bualu buenu ne bena buloba bonso badi batekete-teketê ku mpala kuenu. Tuakunvua lumu bu muakumisha Yehowa mai a Dishiba Dikunze ku mpala kuenu, hanuakaluhuka mu Ejipitu; ne bu munuakenzela bakelenge babidi ba Bena Amole, Sihona ne Oga, bakadi dishiya dia Yadene, banuakashiha. Hatuakunvua lumu alu, mitshima yetu yakahandika, kakuena muntu umue udi mushale ne dikima mu mutshima wandi bualu buenu; bualu bua Yehowa, Nzambi wenu, udi Nzambi wa mu diulu ne ha buloba kabidi. Nunku, ndi nnusengelela ne, Nuditshihe kudi Yehowa bua bualu buanyi bu munakunuenzela bimpe, nuenu kabidi nungenzele meme ne nsubu wa tatu wanyi bimpe, numpe bianyi tshieya tshilelela; nuenu nusungile tatu wanyi ne mamu wanyi, ne bana betu balume ne bana betu bakashi, ne bonso hadibo nʼabo, nusungile mioyo yetu ku lufu. Balume aba bakamuambila ne, Netudie mioyo yetu bua kukufuila. Biwikala kuyi usokolola bualu buetu ebu hatuha Yehowa buloba, netukuenzele malu a luse ne a bushuwa. Nunku yeye wakabatuma ne muonshi ha dididishi dia nsubu, bualu bua nsubu wandi wakadi mutuangane ne lumbu lua musoko, yeye wakashikama ha mutu ha lumbu. Yeye wakabambila ne, Yai bienu ku mikuna, nunku bantu badi banulonda kabanuhetshi; nusokomeku matuku asatu tô ne hahinganabo; ne ku nyima nudi bamanye mua kuya mu nshila wenu. Balume bakamuambila ne, Tuetu netubinge ku mutshihu uwakututshihisha nʼau. Mona, hatuabuela mu buloba, wewe neusuike nshinga eu mukunze ku dididishi dia nsubu kuwakututuila: udisangishe mu nsubu webe ne tatu webe ne mamu webe ne bana benu ne bonso ba mu nsubu wa tatu webe. Kadi muntu yonso udi uluhuka ku bibi bia nsubu webe, Uyaya mu misesu, mashi andi neikale ha mutu handi, ne tuetu netubinge; ne muntu yonso udi wikala nʼebe mu nsubu, mashi andi neikale ha mitu hetu, biamulengabo tshianza. Kadi biwamba bualu ebu, hashishe tuetu netubinge bua mutshihu uwakututshihisha nʼau. Yeye wakamba ne, Bualu buikale bu mudi mei enu. Yeye wakabatuma, ne bobo bakaya; yeye wakasuika nshinga mukunze eu ku dididishi dia nsubu. Bobo bakumuka ne bakaya ku mikuna, bakashalaku matuku asatu tô ne kakahingana babakebi; bantu bakabakeba mu nshila yonso, kadi kabakabamona. Balume aba babidi bakahueka bafume ku mikuna, bakasabuka musulu, bakatua kudi Yoshua, muana wa Nuna; bakamuambila malu onso akabakuata. Bobo bakambila Yoshua ne, Bulelela, Yehowa wakadia buloba buonso mu bianza bietu; ne bualu bukuabo kabidi, bena buloba bonso badi batekete-teketê ku mpala kuetu. Yoshua wakabika ne dinda dionso; bakumuka ku Shitima, bakulua ku Yadene, yeye ne Bena Isalele bonso; bakalalaku diambedi kabayi banze kusabuka. Hakahita matuku asatu, miloho yakendakana munkatshi mua tshitudilu; yakambila bantu ne, Hanuatangila mushete wa tshihungidi tshia mei a Yehowa, Nzambi wenu, ne bakuidi Bena Lewi bautuala, nenumuke ku muaba unudi, nenûlonde. Kadi nushiye muaba hankatshi henu ne mushete bule bua coudées binunu bibidi; kanusemenyi ha buihi nʼau, nunku nenumanye nshila unudi mua kuya; bualu bua kanuakaya mu nshila eu diambedi. Yoshua wakambila bantu ne, Nudijidile, bualu bua makelela Yehowa nênze malu a kukema munkatshi muenu. Yoshua wakambila bakuidi ne, Ambulai mushete wa tshihungidi tshia mei, nusabuke ku mpala kua bantu. Bakambula mushete wa tshihungidi tshia mei, bakaya ku mpala kua bantu. Yehowa wakambila Yoshua ne, Lelu nembange kukubandisha ku mesu kua Bena Isalele bonso, bua bobo bamanye ne, Nengikale nʼebe bu munakadi ne Mose. Wewe Wambile bakuidi badi batuala mushete wa tshihungidi tshia mei ne, Hanuafika kukala kua mai a Yadene, mumane balulame mu Yadene. Yoshua wakambila Bena Isalele ne, Luai kunu, nunvue mei a Yehowa, Nzambi wenu. Yoshua wakamba ne, Bua bualu ebu nenumanye ne Nzambi wa muoyo udi munkatshi muenu, ne yeye kena uhanga kunuihatshila Bena Kanâna ne Bena Hiti ne Bena Hiwi ne Bena Pelizi ne Bena Gigashi ne Bena Amole ne Bena Yebuse ku mpala kuenu. Monai, mushete wa tshihungidi tshia mei a Mukelenge wa buloba buonso udi usabuka Yadene ku mpala kuenu. Nunku musungule bantu dikumi ne babidi ba mu bisamba bia Bena Isalele, muntu umue wa mu tshisamba ne tshisamba. Hadiata makasa a bakuidi badi batuala mushete wa Yehowa, Mukelenge wa buloba buonso, mu mai a Yadene, hashishe mai a Yadene neahanduluke, mai a ku mutu kaena ahueka, neimane dibula. Hakumuka bantu mu ntenta yabo bua kusabuka Yadene, bakuidi bakadi batuala mushete wa tshihungidi tshia mei bakadi ku mpala kua bantu; hakalua bantu bakadi batuala mushete mu Yadene, ne bakatua bakuidi bakadi batuala mushete makasa abo ku muelelu wa mai (bualu bua mai a Yadene atu ahita ha mutu ha bibungubungu mu ngondo yonso ya kuhuola), hashishe mai akadi ahueka ku mutu akimana, akimana dibula kule ku Adama, musoko udi ku luseke lua Saletana, ne mai a kumanda akadi ahueka ku dishiha dia Alabâ, ku Dishiba dia Luehu, akahanduluka; ne bantu bakasabuka buludiludi ne Yeleko. Bakuidi bakadi batuala mushete wa tshihungidi tshia mei a Yehowa bakimana balulame mu lusenga lume munkatshi mua Yadene; ne Bena Isalele bonso bakasabuka mu lusenga lume tô ne hakasabuka bantu bonso Yadene. Hakasabuka bantu bonso Yadene, Yehowa wakambila Yoshua ne, Usungule bantu dikumi ne babidi munkatshi mua bantu, muntu umue wa mu tshisamba ne tshisamba, ubambile ne, Nuangate mabue dikumi ne abidi munkatshi mua Yadene mu muaba wakadiata makasa a bakuidi, nuatuale, nuâele hanshi mu muaba unudi nulala butuku ebu. Hashishe, Yoshua wakabikila bantu dikumi ne babidi bakasunguleye munkatshi mua Bena Isalele, muntu wa mu tshisamba ne tshisamba; Yoshua wakabambila ne, Hitai ku mpala kua mushete wa Yehowa, Nzambi wenu, munkatshi mua Yadene, muntu ne muntu ambule dibue, aditeke ha diaha diandi, bu bungi bua bisamba bia Bena Isalele; nunku mabue au neikale munkatshi muenu bu tshivulukidi, ne hanukonka bana benu mu tshikondo tshialua ne, Mabue â ntshinyi? nenubambile ne, Bualu bua mai a Yadene akahanduluka ku mpala kua mushete wa tshihungidi tshia mei a Yehowa; hakasabuka mushete Yadene, mai a Yadene akahanduluka; ne mabue au neikale bu tshivulukidi kudi Bena Isalele tshiendelele. Bena Isalele bakenza bu muakamba Yoshua, bakambula mabue dikumi ne abidi munkatshi mua Yadene, bu bungi bua bisamba bia Bena Isalele, bu muakambila Yehowa Yoshua; bakâtuala ku muaba wakadibo balala, bakâelaku hanshi. Yoshua wakajadika mabue au dikumi ne abidi munkatshi mua Yadene mu muaba wakadiata makasa a bakuidi bakatuala mushete wa tshihungidi tshia mei: adiku tô ne ku lelu. Bakuidi bakadi batuala mushete bakimana munkatshi mua Yadene, tô ne hakashika malu onso akambila Yehowa Yoshua bua kuambileye bantu, malu onso akambila Mose Yoshua; ne bantu bakasabuka lubilu. Hakasabuka bantu bonso, ku nyima bakuidi bakasabuka ne mushete wa Yehowa ku mesu kua bantu. Bena Lubena ne Bena Gada ne tshituha tshia tshisamba tshia Bena Manashe bakasabuka bavuale bintu biabo bia nvita ku mpala kua Bena Isalele, bu muakabambila Mose; bantu bu binunu makumi anai bakadi ne bintu biabo bia nvita bilongolola bakasabuka ku mpala kua Yehowa, bua kuluangana ku mpata ya Yeleko. Dituku adi Yehowa wakabandisha Yoshua ku mesu kua Bena Isalele bonso; bobo bakamutshina bu muakatshinabo Mose matuku onso a muoyo wandi. Yehowa wakambila Yoshua ne, Wambile bakuidi badi batuala mushete wa tshihungidi ne, Umukai mu Yadene. Yoshua wakambila bakuidi ne, Umukai mu Yadene. Hakumuka bakuidi bakadi batuala mushete wa tshihungidi tshia mei a Yehowa, hakadiatabo makasa abo ha buloba bume, hashishe mai a Yadene akahingana mu muaba wau, aka tua ku muelelu bu diambedi. Bantu bakumuka ku Yadene mu matuku dikumi a ngondo wa kunfudilu, bakasa tshitudilu mu Gilegala ku esete kua Yeleko. Mabue au dikumi ne abidi akangatabo mu Yadene, Yoshua wakâjadika mu Gilegala. Yeye wakambila Bena Isalele ne, Biakonka bana benu batatuʼabo mu matuku atshidi ku mpala ne, Mabue â ntshinyi? nenumanyishe bana benu ne, Bena Isalele bakasabuka Yadene eu ha lusenga lume. Bualu bua Yehowa, Nzambi wenu, wakûmisha mai a Yadene ku mpala kuenu, tô ne hanuakasabuka bonso, bu muakenza Yehowa, Nzambi wenu, ku Dishiba Dikunze diakumisheye ku mpala kuetu, tô ne hatuakasabuka buonso buetu; bua bantu bonso ba ha buloba bamanye ne, Tshianza tshia Yehowa tshidi tshikole; ne bua nuenu nutshine Yehowa, Nzambi wenu, tshiendelele. Hakunvua bakelenge bonso ba Bena Amole bakadi dishiya dia Yadene dia ku wesete, ne bakelenge bonso ba Bena Kanâna bakadi bashikama kukala kua mai manene, lumu ne, Yehowa wakûmisha mai a Yadene ku mpala kua Bena Isalele tô ne hakasabukabo bonso, hashishe mitshima yabo yakahandika, kabakadi ne dikima kabidi bualu bua Bena Isalele. Mu matuku au Yehowa wakambila Yoshua ne, Enza tuele tua mabue, utengule Bena Isalele tshiakabidi. Yoshua Wakenza tuele atu, wakatengula Bena Isalele ku muaba udibo babikila ne, Mukuna wa tshitenguidi. Ebu mbualu buakabatenguila Yoshua; bualu bua balume bonso, bena nvita, bakaluhuka mu Ejipitu bakafua mu nshila mu tshihela, ku nyima kua kuhatuka kuabo mu Ejipitu. Bantu bonso bakaluhuka mu Ejipitu bakadi batengula, kadi bantu bonso bakalelabo mu nshila mu tshihela hakaluhukabo mu Ejipitu kabakadi batengula. Bualu bua Bena Isalele bakendakana mu tshihela bidimu makumi anai tô ne hakajimishibua bena nvita bonso bakaluhuka mu Ejipitu, bualu bua bobo kabakunvua dî dia Yehowa; bakadi Yehowa muditshihe kudibo ne, Nuenu kanuena nutangila buloba buakalaya Yehowa batatu benu ne, Nennuhebu; buloba budi bûle tente ne mabele ne buitshi. Bana babo bakahingasheye mu muaba wabo Yoshua wakabatengula; bualu bua kabakadi batengudibue mu nshila. Hakashikishabo kutengula bantu bonso, bobo bakashala mu miaba yabo mu tshitudilu tô ne hakondahibuabo. Yehowa wakambila Yoshua ne, Lelu nakumusha bundu bua Ejipitu kunudi. Nunku badi babikila muaba au ne, Gilegala tô ne lelu. Bena Isalele bakasa tshitudilu mu Gilegala; dilolo bakadia bidia bia disanka dia Kuhita kua Yehowa mu mpata ya Yeleko mu matuku dikumi ne anai a ngondo. Ku nyima kua disanka dia Kuhita kua Yehowa bakadia bintu biakasanganabo mu buloba, ne mampa adi kayi ne luevene ne manvua akoshabo. Mana akashika hakabangabo kudia bintu biakasanganabo mu buloba; Bena Isalele kabakadi ne mana kabidi; bakadia anu bintu biakasanganabo mu buloba bua Kanâna tshidimu atshi. Hakadi Yoshua hehi ne Yeleko, wakabanduluka, wakatangila ne, monai, muntu wakadi muimane hehi nʼandi ne muele wa nvita mu tshianza tshiandi, ne Yoshua wakaya kudiye, wakamukonka ne, Wewe udi ku luseke luetu anyi ku luseke lua badi nʼetu lukuna? Yeye wakitaba ne, Nansha, nakutuma bu mukelenge wa musumba wa Yehowa. Yoshua wakamututshila mpala hanshi, wakamutendelela, wakamukonka ne, Mukelenge wanyi udi Wambila muntu wandi tshinyi? Mukelenge wa musumba wa Yehowa wakambila Yoshua ne, Umushe bisabata ku makasa ebe; bua muaba ûdi muimane udi wa tshijila. Yoshua Wakenza nunku. Bakinshila bibi bionso bia Yeleko, bakabikanga, bualu bua Bena Isalele; muntu kakahatuka, muntu kakabuelamu. Yehowa wakambila Yoshua ne, Mona, nakulala Yeleko ne mukelenge wa musoko ne bena nvita bonso ba dikima mu tshianza tshiebe. Nuenu bena nvita bonso nenunyunguluke musoko musangu umue. Nenuenze nunku tô matuku asambombo. Bakuidi muanda mutekete nebaye ne mpungi muanda mutekete ya nsengu ya bimpanga ku mpala kua mushete wa tshihungidi; dituku dia muanda mutekete nenunyunguluke musoko misangu muanda mutekete, ne bakuidi nebele mpungi. Nunku helabo mpungi bikole, hanunvua muadi wa mpungi, bantu bonso nebele mbila; ne lumbu lua musoko neludishimbukile hanshi mu muaba walu, ne muntu yonso neabuele mu muaba udi buludiludi nʼandi. Yoshua, muana wa Nuna, wakabikila bakuidi, wakabambila ne, Ambulai mushete wa tshihungidi tshia mei; bakuidi muanda mutekete baye ne mpungi muanda mutekete ya nsengu ya bimpanga ku mpala kua mushete wa tshihungidi wa Yehowa. Bakambila bantu ne, Hitai, nunyunguluke musoko, bena nvita baye ku mpala kua mushete wa Yehowa. Hakambila Yoshua bantu nunku, bakuidi muanda mutekete bakadi baya ne mpungi muanda mutekete ya nsengu ya bimpanga ku mpala kua Yehowa, bakahita, bakela mpungi; mushete wa tshihungidi tshia mei a Yehowa wakabanda ku nyima. Bena nvita bakaya ku mpala kua bakuidi bakadi bela mpungi, bantu bakuabo bakalonda mushete, bakuidi bakadi benda bela mpungi. Yoshua wakambila bantu ne, Kanuedi mbila, dî dienu kadiunvuiki, di dimue kadiluhuki mukana muenu tô ne halua dituku dinanuambila ne, Elai mbila; hananuambila nunku, nuele mbila. Nunku yeye wakanyunguluisha mushete wa Yehowa musoko musangu umue; bantu bakalua kabidi ku tshitudilu, bakalalaku. Yoshua wakabika ne dinda dionso, ne bakuidi bakambula mushete wa tshihungidi wa Yehowa. Bakuidi muanda mutekete bakadi ne mpungi muanda mutekete ya nsengu ya bimpanga bakaya ku mpala kua mushete wa tshihungidi wa Yehowa, bakela mpungi; bena nvita bakaya ku mpala kuabo; bantu bakuabo bakadiunguisha ku nyima kua mushete wa Yehowa, bakuidi bakadi benda bela mpungi. Dituku dibidi bakanyunguluka musoko musangu umue, bakahingana ku tshitudilu; bakenza nunku matuku asambombo. Hakalua dituku dia muanda mutekete, bakabika ne dinda hakatshia butuku, bakanyunguluka musoko misangu muanda mutekete bu muakenzabo diambedi, kadi dituku adi bakanyunguluka musoko misangu muanda mutekete. Hakanyungulukabo musangu wa muanda mutekete, ne hakela bakuidi mpungi, Yoshua wakambila bantu ne, Elai mbila, bualu bua Yehowa wakunuha musoko. Musoko eu ne bintu bionso bidimu bikale bia tshijila kudi Yehowa. Anu Lahaba, mukashi wa tshiendenda, ikale ne muoyo ne bantu bonso badi nʼandi mu nsubu muandi, bualu bua yeye wakasokoka batentekedi batuakatuma. Nuenu nuhidie tshintu tshia tshijila; kanuangatshi tshintu tshinuakajila; binuatshiangata, nenueleshe tshitudilu tshia Bena Isalele mulau, nenutshikengeshe. Kadi tshiamu tshionso tshia argent ne tshia or, ne malonga a tshiamu tshia mitaku ne tshiamu tshifike bidi bajidila kudi Yehowa; bintu ebi bionso nebikale mu tshibutshilu tshia Yehowa. Nunku bantu bakela mbila, ne bakuidi bakela mpungi; hakunvua bantu muadi wa mpungi, bakela mbila bikole, ne lumbu luakadishimbukila, ne bantu bakabuela mu musoko, muntu yonso wakabuelamu anu mu buludiludi nʼandi, bakanyenga musoko. Bakashiha bionso biakadi mu musoko ku miele yabo, balume ne bakashi, bana ne bakulumpe, ngombe ne mikoko ne mpunda. Yoshua wakambila balume babidi bakaya kutentekela buloba ne, Yai bienu mu nsubu wa mukashi au muena tshiendenda, nulue ne mukashi ne bintu bionso bidiye nʼabi, bu munu akadi tshiha kudiye. Batentekedi aba bakayamu, bakalua ne Lahaba ne tatu wandi ne mamu wandi ne bana babo ne bintu bionso biakadiye nʼabi; bakalua ne bena diku diandi bonso kabidi, bakabateka ku butshika bua tshitudilu tshia Bena Isalele. Bakosha musoko ne bintu bionso biakadimu ne kahia; anu tshiamu tshia argent ne tshia or, ne malonga a tshiamu tshia mitaku ne tshia tshiamu tshifike, bakahueka mu tshibutshilu tshia mu nsubu wa Yehowa. Kadi Yoshua wakasungila Lahaba, mukashi muena tshiendenda, ne bantu bonso ba mu nsubu wa tatu wandi ne bintu bionso biakadiye nʼabi; yeye wakashikama munkatshi mua Bena Isalele tô ne ku dituku edi, bualu bua yeye wakasokoka batentekedi bakatuma Yoshua bua kutentekela Yeleko. Yoshua wakadimusha bantu dituku adi, wakabambila ne, Muntu yonso udi ubika bua kuasa musoko eu wa Yeleko kabidi neikale ne mulau ku mpala kua Yehowa; habangeye kuasa musoko neajimishe muanʼa bute wandi ne hajadikeye bibi bia musoko neajimishe muanʼa mukala wandi. Nunku Yehowa wakadi ne Yoshua; ne lumu luandi luakatangadika buloba buonso. Kadi Bena Isalele bakenza bualu bubi ne tshintu tshia tshijila; bualu bua Akana, muana wa Kâmi, muana wa Zabedi, muana wa Zela wa mu tshisamba tshia Yuda, wakadiangatshila tshintu tshia tshijila; ne tshiji tshiakakuata Yehowa bualu bua Bena Isalele. Yoshua wakatuma bantu ku Ai bumuke ku Yeleko, udi hehi ne Bete-awena ku esete kua Betele, wakabambila ne, Yai bienu bua kutentekela buloba. Bantu aba bakaya, bakatentekela Ai. Bobo bakahingana kudi Yoshua, bakamuambila ne, Kambualu bua bantu bonso kuya nansha, kadi anu balume binunu bibidi anyi bisatu baye bua kuluisha Bena Ai; kuenzeshi bantu bonso mudimu eu nansha, bualu hua bobo badi bantu banya-banya. Nunku bantu bu binunu bisatu bakayaku, ne bobo bakanyema ku mpala kua Bena Ai. Bena Ai bakashiha bantu bu makumi asatu ne basambombo, bakabihata ku tshibi tshia musoko tô ne ku Shebalima: bakabashiha mu tshibanda kabidi; mitshima ya bantu yakatekete-teketê, yakakudimuka bu mai. Yoshua wakadihanda bilulu biandi, wakadikuma mpala wandi hanshi ku mpala kua mushete wa Yehowa tô ne ku dilolo; yeye ne bakulu ba Bena Isalele bakadiela buloba mu mitu. Yoshua wakamba ne, Aka! Mukelenge Yehowa, wewe wakulua ne bantu aba dia munemu dia Yadene bua kutufila mu bianza bia Bena Amole ne bua kutufuisha munyi? Biakadi bimpe bua tuetu kushikama dishiya dia Yadene! Mukelenge, nengambe tshinyi, hela Bena Isalele bena lukuna babo nyima? Bualu bua Bena Kanâna ne bena buloba bonso nebulue lumu elu, nebatunyunguluke, nebajimishe dina dietu ha buloba; ne wewe newenze tshinyi bua dina diebe dinene? Yehowa wakambila Yoshua ne, Bika biebe, udi mutuile mpala hanshi tshinyi? Bena Isalele bakenza bibi; bakashiha tshihungidi tshinakahunga nʼabo, bakadiangatshila tshintu tshia tshijila, bakatshiba kabidi, bakasokoka bubi buabo; bakatshiteka munkatshi mua bintu biabo mene. Nunku Bena Isalele kabena mua kuimana ku mpala kua bena lukuna babo; bakela bena lukuna babo nyima bualu bua bobo bakadiela mulau; meme tshiena ngikala nʼenu kabidi anu hanûmusha tshintu tshia tshijila munkatshi muenu. Bika biebe, ujidike bantu, ubambile ne, Nudijidile bua malu a makelela; bualu bua Yehowa, Nzambi wa Isalele, udi Wamba ne, Tshintu tshia tshijila tshidi munkatshi muenu, nuenu Bena Isalele, nunku kanuena mua kuimana ku mpala kua bena lukuna tô ne hanûmusha tshintu tshia tshijila munkatshi muenu. Nunku ne dinda nulue ku tshisamba ku tshisamba: ne hasungula Yehowa tshisamba, bantu nebalue ku meku abo; ne hasungula Yehowa diku, bantu nabalue ku nsubu ne ku nsubu; ne hasungula Yehowa nsubu, bantu nebalue ku muntu ne ku muntu. Biasanganabo mundi ne tshintu tshia tshijila, nebamuoshe mu kahia, ne yeye ne bintu bionso bidiye nʼabi, bualu bua wakashiha tshihungidi tshia Yehowa, Wakenza bualu buhote mu Isalele. Nunku Yoshua wakabika ne dinda dionso, wakasangisha Bena Isalele ku bisamba biabo; bakasungula tshisamba tshia Yuda. Yeye wakalua ha buihi ne meku a Yuda; wakasungula diku dia Bena Zela; wakalua ne diku dia Bena Zela muntu ne muntu; wakasungula Zabedi. Yeye wakalua ne ba mu nsubu wa Zabedi ku muntu ku muntu, wakasungula Akana, muana wa Kâmi, muana wa Zabedi, muana wa Zela wa mu tshisamba tshia Yuda. Yoshua wakambila Akana ne, Muanʼanyi, ndi nkusengelela ne, Utumbishe Yehowa, Nzambi wa Isalele, umutondele bubi buebe; ungambile buwakuenza, kubusokoki kundi nansha. Akana wakambila Yoshua ne, Bulelela, nakenzela Yehowa, Nzambi wa Isalele, bubi; bualu bunakuenza budi nunku: hanakatangila tshilulu tshimpe tshia Bena Babulona ne nshekele nkama ibidi ya argent ne tshiamu tshia or tshia mushinga wa nshekele makumi atanu munkatshi mua bintu, lukuka luakangata, nakabiangata; mona, bidi bisokoka mu buloba munkatshi mua ntenta wanyi, ne tshiamu tshia argent tshidi muinshi muabi. Yoshua wakatuma ba-messager, ne bobo bakaya lubilu ku ntenta; monai, biakadi bisokoka mu ntenta wandi, ne tshiamu tshia argent muinshi muabi. Bakabiangata munda mua ntenta, bakalua nʼabi kudi Yoshua ne Bena Isalele bonso; bakahueka hanshi ku mpala kua Yehowa. Yoshua ne Bena Isalele bonso bakangata Akana, muana wa Zela, ne tshiamu tshia argent ne tshilulu ne tshiamu tshia or ne bana bandi balume ne bana bandi bakashi ne ngombe yandi ne mpunda yandi ne mikoko yandi ne ntenta wandi ne bionso biakadiye nʼabi: bakalua nʼabi mu tshibanda tshia Akola. Yoshua wakamba ne, Wewe wakatukengesha bualu kai? Yehowa neakukengeshe lelu. Bena Isalele bonso bakamukuma ne mabue yeye ne bintu biandi bionso kabidi, bakabiosha ne kahia. Bakunguisha mushiki munene wa mabue ha mutu handi; udiku tô ne lelu; ne Yehowa wakalekela tshiji tshiandi. Nunku badi babikila muaba au ne, Tshibanda tshia Akola tô ne lelu. Yehowa wakambila Yoshua ne, Kutshinyi, kukuatshila buowa, angata bena nvita bonso; bika biebe, ya ku Ai; tangila, nakamana kufila mukelenge wa Ai ne bantu bandi ne musoko wandi ne buloba buandi mu tshianza tshiebe; ne wewe newenzele Ai ne mukelenge wa musoko bu muwakenzela Yeleko ne mukelenge wau; kadi bintu bia mu musoko ne bimuna, nubiangate bu bintu bienu; utume balaminyi ku nyima kua musoko. Nunku Yoshua wakabika ne bena nvita bonso bua kuya ku Ai; Yoshua wakasungula bantu ba bukitu ne ba dikima binunu makumi asatu, wakabatuma butuku. Yeye wakabambila ne, Monai, nulale batentekela ku nyima kua musoko; kanuikadi kule ne musoko, kadi nudimuke bienu. Meme ne bantu bonso badi nʼanyi netusemene ha buihi ne musoko; ne hahatukabo kutudi bu diambedi, tuetu netunyeme ku mpala kuabo. Bobo nebatulonde tô ne hasemenabo kule ne musoko; bualu bua bobo nebambe ne, Badi batunyema, bu muakenzabo diambedi: nunku tuetu netubanyeme. Hashishe nuenu balaminyi nenubike, nenunyenge musoko; bualu bua Yehowa, Nzambi wenu, neaufile mu bianza bienu. Hanuanyenga musoko nenuwoshe ne kahia; nuenze bu mu dî dia Yehowa; monai, nakanuambila. Yoshua wakabatuma, bakaya, bakalalaku bu balaminyi: bakashikama hankatshi ha Betele ne Ai, ku wesete kua Ai; kadi Yoshua wakalala munkatshi mua bantu butuku abu. Yoshua wakabika ne dinda dionso, wakasangisha bantu, ne yeye ne bakulu ba Bena Isalele bakaya ku mpala kua bantu ku Ai. Bena nvita bonso bakadi nʼandi bakaya, bakasemena ha buihi, bakalua ku mpala kua musoko; bakasa tshitudilu ku luseke lua nôde lua Ai; tshibanda tshiakadi hankatshi habo ne Ai. Wakangata bantu bu binunu bitanu, wakabatuma bu balaminyi hankatshi ha Betele ne Ai ku luseke lua wesete lua musoko. Nunku yeye wakangata bantu bu binunu bitanu, wakabateka bua kudiabo bu balaminyi ku luseke lua nôde lua musoko; Yoshua wakaya mu tshibanda butuku abu. Hakatangila mukelenge wa Ai bualu ebu, wakabika lubilu ne dinda ne bantu bandi bonso, bakaluhuka mu musoko bua kuluangana ne Bena Isalele mu muaba wakasungulabo ku mpala kua mpata wa Alabâ; kadi yeye kakamanya ne balaminyi bakadi ku nyima kua musoko. Yoshua ne Bena Isalele bonso hakadimanyisha bu bantu batekete ku mpala kuabo, bakanyema mu nshila wa ku tshihela. Bantu bonso bakadi mu musoko bakadisangisha bua kubalonda, ne bobo bakalonda Yoshua, bakashiya musoko wabo kule. Kakuakadi mulume umue mushale mu Ai anyi Betele, buonso buabo bakalonda Bena Isalele: bakashiya musoko, bakalonda Bena Isalele. Yehowa wakambila Yoshua ne, Tangisha difuma didi mu tshianza tshiebe ku Ai; bualu bua nengufile mu tshianza tshiebe. Yoshua wakatangisha difuma diakadi mu tshianza tshiandi ku Ai. Balaminyi bakabika lukasa ku muaba wabo, bakanyema lubilu hakabandisheye tshianza tshiandi, bakabuela mu musoko, bakaunyenga; bakosha musoko ne kahia. Hakatangila Bena Ai ku nyima kuabo, monai, muishi wa musoko ubanda mulu; kabakadi ne bukole bua kunyema luseke elu anyi lukuabo; bakadi banyema ku tshihela bakakudimuna bakadi babalonda. Hakatangila Yoshua ne Bena Isalele bonso ne balaminyi bakanyenga musoko, ne muishi wa musoko wakabanda mulu, bobo bakakudimuka, bakashiha Bena Ai. Bakuabo bakadi mu musoko bakaluhuka kudibo munkatshi mua Bena Isalele, bakuabo ku luseke elu, bakuabo ku luseke elu; bakabashiha tô, kakuakadi umue wabo wakahanduka. Bakakuata mukelenge wa Ai ne muoyo, bakalua nʼandi kudi Yoshua. Hakashikisha Bena Isalele kushiha Bena Ai bonso bakadi mu madimi ne mu tshihela kuakabalondabo, ne hakahonabo bonso ku miele ya nvita, tô ne hakajiminabo bonso, hashishe Bena Isalele bonso bakahingana ku Ai, bakaubutula ku miele ya nvita. Bena Ai bonso ne balume ne bakashi bakafua dituku adi bakadi binunu dikumi ne bibidi, bantu bonso ba mu Ai mene. Bualu bua Yoshua kakahingasha tshianza tshiandi tshiakadiye muolole ne difuma tô ne hakabutuleye Bena Ai bonso kabutu. Anu bimuna ne bintu bikuabo biakahuolabo bia mu musoko, Bena Isalele bakabiangata bu bintu biabo bu mu dî dia Yehowa diakambileye Yoshua. Nunku Yoshua wakosha Ai ne kahia, wakunguisha bionso biakadimu mushiki tshiendelele, wakahaudibua tô ne ku dituku edi. Bakowa mukelenge wa Ai ku mutshi tô ne ku dilolo; bakamba diba kubuela Yoshua wakamba ne, Batulule tshitalu tshiandi, bakatshiela ku mbelu kua tshibi tshia musoko, bakunguisha mushiki wa mabue ha mutu hatshi, udihu tô ne ku dituku edi. Yoshua wakashila Yehowa, Nzambi wa Isalele, tshioshelu mu mukuna wa Ebala, bu muakambila Mose, muntu wa Yehowa, Bena Isalele, bu muakafundabo mu mukanda wa mikenji ya Mose; bakasa tshioshelu ne mabue adibo kabayi banze kusonga ne biamu; bakafidilahu milambu ya kuosha kudi Yehowa ne milambu ya kuvuisha nʼai ditalala. Wakafunda ha mabue â mikenji ya Mose, yakafundeye ku mpala kua Bena Isalele. Bena Isalele bonso ne bakulu babo ne tuhita ne balumbuluishi babo bakimana ku luseke ne luseke lua mushete ku mpala kua bakuidi, Bena Lewi, bakadi batuala mushete wa tshihungidi tshia mei a Yehowa; benyi kabidi bakimana bu bantu baledibue ba munkatshi muabo; tshituha tshiabo ku mukuna wa Gelezima ne tshituha tshikuabo ku mukuna wa Ebala; bu muakadianjila Mose, muntu wa Yehowa, kubambila, bua kuvudishila Bena Isalele masanka. Ku nyima wakababadila mei onso a mikenji, ne masanka ne milau, bu muakadi malu onso mafunda mu mukanda wa mikenji. Yoshua kakashiya dî dimue dia mei onso akamba Mose; yeye wakâbadila tshisumbu tshijima tshia Bena Isalele ne bakashi ne bana bakese ne benyi bakadi munkatshi muabo. Kakunyua bakelenge bonso ba dia munemu dia Yadene, ku mikuna ne mu bibanda ne kukala kua mai manene ku mpala kua Lebanona, Bena Hiti ne Bena Amole ne Bena Kanâna ne Bena Pelizi ne Bena Hiwi ne Bena Yebuse, lumu elu; Buonso buabo bakahunga dî diabo, bakadisangisha bua kutuisha Yoshua ne Bena Isalele. Kakunyua Bena Gibeona muakenzela Yoshua Yeleko ne Ai, hobo bakenza budimu, bakadisangisha bu miloho yakalua kule, bakateka bibombi bikulakasha ha nyima ha mpunda yabo, ne milondo ya nvinyo ya biseba bihandike ne bilamakasha, ne bisabata bilamakasha ku makasa abo, ne bilulu bisunsuke hamʼbidi habo, ne mampa abo onso akûma, akakuata butu. Bakaya kudi Yoshua mu tshitudilu ku Gilegala, bakamuambila ne Bena Isalele bonso ne, Tuetu tuakufuma kule ku buloba bukuabo, nunku nuhunge nʼetu tshihungidi. Bena Isalele bakambila Bena Hiwi ne, Bumue nuenu nudi ba munkatshi muetu, nunku netuhunge nʼenu tshihungidi munyi? Bobo bakambila Yoshua ne, Tuetu tudi bahika bebe. Yoshua wakabakonka ne, Nudi banganyi? Nuakufuma kudi kunyi? Bakamuambila ne, Bahika bebe bakalua kule ku buloba bukuabo bualu bua dina dia Yehowa, Nzambi webe; bualu bua tuetu tuakunvua lumu luandi ne malu onso akenzeye mu Ejipitu, ne malu akenzeleye bakelenge babidi ba Bena Amole bakadi dishiya dia Yadene, Sihona, mukelenge wa Heshebona, ne Oga, mukelenge wa Bashana, wakadi mu Ashatelota. Bakulu betu ne bena kuetu bonso bakatuambila ne, Angata! bintu bia kudia mu nshila mu bianza bienu, yai bienu kusangakana nʼabo, nubambile ne, Tuetu tudi bahika benu, nuhunge nʼetu tshihungidi. Mampa â akadi ne kahia hatuakângata mu nsubu yetu dituku dituakabanga luendu bua kulua kunudi, kadi monai, adi mûme, adi makuate butu; ne milondo ei ya nvinyo ituakûsha tente yakadi mihia-mihia, kadi monai, yakahandika; ne bilulu ebi ne bisabata bietu biakakulakasha bualu bua luendu bakatamba bule. Bantu bakangata bintu biabo, kabakakonka lungenyi kudi Yehowa. Yoshua wakabaha budishikaminyi, wakahunga nʼabo tshihungidi, bua bobo bikale ne muoyo; bakelenge ba mu Isalele bakaditshiha kudibo. Hakahita matuku asatu ku nyima bamane kuhunga nʼabo tshihungidi, bakunvua lumu ne bobo bakadi nʼabo mutumba, bakashikama munkatshi muabo. Bena Isalele bakabisha luendu luabo, bakalua ku misoko yabo dituku disatu. Mena a misoko yabo akadi Gibeona ne Kefila ne Bêlota ne Kîyata-yalima. Bena Isalele kabakabashiha, bualu bua bakelenge babo bakamana kuditshiha kudibo mu dina dia Yehowa, Nzambi wa Isalele. Kadi bantu bonso bakatontolola bakelenge babo. Kadi bakelenge bonso bakabambila ne, Tuakamana kuditshiha kudibo mu dina dia Yehowa, Nzambi wa Isalele, ne katataka katuena bamanye mua kubalenga tshianza. Ebu mbualu butudi mua kubenzela bua bobo bashale ne muoyo: tshiji katshitukuatshi bualu bua mutshihu utuakuditshiha nʼau. Bakelenge bakabambila kabidi ne, Bobo bikale ne muoyo. Nunku bakalua bahandi ba nkunyi ne basunyi ba mai kudi Bena Isalele bonso, bu muakabambila bakelenge babo. Yoshua wakababikila, wakabambila ne, Bualu kai nuakatudinga ne, Tudi ba kule, nuenu bikale anu munkatshi muetu? Nunku nudi ne mulau, kakuena umue wenu wahanga kuikala muhika: buonso buenu nenuikale bahandi ba nkunyi ne basunyi ba mai ba mu nsubu wa Nzambi wanyi. Bobo bakakudimuna Yoshua dî ne, Bualu bua bakambila bantu bebe bu muakadi Yehowa, Nzambi wenu, muambile muntu wandi Mose bua kunuha buloba buonso, ne bua kushiha bena buloba bonso ku mpala kuenu; nunku tuakatshina bikole bua bualu buenu, ne tuakenza bualu ebu. Katataka, tudi mu tshianza tshiebe, utuenzele budi buimpe ku mesu kuebe. Wakabenzela nunku, wakabasungila mu tshianza tshia Bena Isalele, bua bobo kababashihi. Yoshua wakabayuisha dituku adi bu bahandi ba nkunyi ne basunyi ba mai ba Bena Isalele ne ba tshioshelu tshia Yehowa mu muaba wakadiye musungule tô ne ku dituku edi. Kakunyua Adoni-sedeke, mukelenge wa Yelushalema, bu muakanyenga Yoshua Ai, ne muakauhauleye; ne bu muakenzeleye Yeleko ne mukelenge wau ne bu muakenzeleye Ai ne mukelenge wau; ne bu muakaheta Bena Gibeona budishikaminyi kudi Bena Isalele, ne bu muakashikamabo munkatshi muabo; nunku bobo bakatamba kutshina, bualu bua Gibeona wakadi musoko munene, mufuane tshimenga tshia bakelenge mene mene, ne bualu bua musoko eu wakatamba Ai bunene, ne balume bonso bakadi ne bukitu. Nunku Adoni-sedeke, mukelenge wa Yelushalema, wakatumina Hohama, mukelenge wa Hebelone, ne Pilama, mukelenge wa Yâmuta, ne Yafia, mukelenge wa Lakisha, ne Debî, mukelenge wa Egelona, dî, Wamba ne, Luai bienu kundi, nunkuatshishe, tushihai Gibeona; bualu bua bobo bakaheta budishikaminyi kudi Yoshua ne kudi Bena Isalele. Hashishe bakelenge batanu ba Bena Amole, mukelenge wa Yelushalema, ne mukelenge wa Hebelone ne mukelenge wa Yâmuta ne mukelenge wa Lakisha ne mukelenge wa Egelona, bakadisangisha hamue, bakaya, bobo ne misumba yabo yonso, bakasa tshitudilu ku mpala kua Gibeona, bakaluangana ne benʼau nvita. Bena Gibeona bakatumina Yoshua dî ku tshitudilu tshia ku Gilegala, bamba ne, Kukandi tshianza tshiebe kudi bahika bebe nansha, lua biebe kutudi lubilu, utusungile, utukuatshishe, bualu bua bakelenge bonso ba Bena Amole badi bashikama ku mikuna bakadisangisha bua kutuluisha. Nunku Yoshua wakumuka ku Gilegala, yeye ne bena nvita bonso bakadi nʼandi ne bena ngulu bonso ba bukitu. Yehowa wakambila Yoshua ne, Kubatshinyi nansha, bualu bua nakubafila mu tshianza tshiebe; kakuena muntu wa kudibo udi mua kuimana ku mpala kuebe. Nunku Yoshua wakalua kudibo tshimpalantanta, bualu bua yeye wakumuka ku Gilegala wenda butuku bujima. Yehowa wakabalubakasha ku mpala kua Bena Isalele, wakabashiha ne dishiha dikole ku Gibeona; bakabihata mu nshila wa kubanda ku Bete-holona tô ne ku Azeka ne Makeda. Hakanyemabo ku mpala kua Bena Isalele, ne hakadibo bahueka ku tshibanda tshia Bete-holona tô ne ku Azeka, Yehowa wakahamatshishila mabue a nvula mu diulu ne bakafua: bantu bakafua ku mabue a nvula bakahita bungi bua bantu bakashihabo ku miele ya nvita kudi Bena Isalele. Hashishe Yoshua wakakula ne Yehowa mu dituku diakafila Yehowa Bena Amole mu bianza bia Bena Isalele; ne ku mesu kua Bena Isalele yeye wakamba ne, Diba, imane biebe talalâ ku Gibeona; ne wewe, ngondo, mu tshibanda tshia Ayalona. Diba diakimana ne ngondo wakimana tô ne hakadisombuela Bena Isalele kudi bena lukuna babo. Bualu ebu kabuena bufunda mu mulunda wa Yashâ, anyi? Diba diakimana mulu kaba kamue, kadiakabuela lukasa tô dituku dijima. Kakuakadi dituku dikuabo bu dituku edi ku mpala kuadi anyi ku nyima kuadi, hakunvua Yehowa dî dia muntu nunku; bualu bua Yehowa wakadila Bena Isalele nvita. Yoshua ne Bena Isalele bonso bakadi nʼandi bakahingana ku tshitudilu tshia ku Gilegala. Bakelenge aba batanu bakanyema, bakasokoma mu lubuebue lua ku Makeda. Bakambila Yoshua ne, Tuakasangana bakelenge aba batanu basokome mu lubuebue lua ku Makeda. Yoshua wakamba ne, Bungulushai mabue manene, nuateke ku mushiku wa lubuebue, ne bantu bimaneku bua kubalama; kadi kanushadiku, londai bena lukuna benu, shihai badi bashadile ha nyima; kanuitabushi bua babuele mu misoko yabo kabidi, bualu bua Yehowa, Nzambi wenu, wakabafila mu bianza bienu. Hakashikisha Yoshua ne Bena Isalele kubashiha ne dishiha dikole tô ne hakabajimishabo, tshituha tshiabo tshiakadi tshishala, tshiakahuela mu misoko yakadi ne ngumbu. Bantu bonso bakahingana kudi Yoshua ku tshitudilu tshia ku Makeda talalâ: kakuakadi muntu wakahotela Bena Isalele kahidi. Yoshua wakamba ne, Unzululai mushiku wa lubuebue, hatulai bakelenge aba batanu mu lubuebue, luai nʼabo kundi. Bakenza nunku, bakahatula bakelenge aba batanu mu lubuebue, bakalua nʼabo kudiye, ne mukelenge wa Yelushalema ne mukelenge wa Hebelone ne mukelenge wa Yâmuta ne mukelenge wa Lakisha ne mukelenge wa Egelona. Hakaluabo ne bakelenge aba batanu kudi Yoshua, Yoshua wakabikila balume bonso ba mu Isalele, wakambila tuhita tua bena nvita tuakadi nʼandi ne, Luai bienu ha buihi, diatai makasa enu ha nshingu ya bakelenge aba batanu. Bobo bakalua ha buihi, bakadiata makasa abo ha nshingu yabo. Yoshua wakabambila ne, Kanutshinyi, kanukuatshiki buowa; nuikale ne bukole ne mitshima ya dikima, bualu bua Yehowa nênzele bena lukuna benu bonso banudi nuluisha nunku. Ku nyima Yoshua wakabashiha, wakabowa ku mitshi itanu; bakadi balembelela ku mitshi tô ne ku dilolo. Hakamba diba kubuela, Yoshua wakela dî diandi ne bakahatuka ku mitshi, bakabela mu lubuebue luakadibo basokome, bakateka mabue manene ku mushiku wa lubuebue, adiku tô ne ku dituku edi mene mene. Ku dituku adi Yoshua wakanyenga musoko wa Makeda kabidi, wakabashiha ne mukelenge wabo ku muele wa nvita; wakashiha bantu bonso bakadimu, kakuakadi muntu wakashala; yeye wakenzela mukelenge wa Makeda bu muakenzeleye mukelenge wa Yeleko. Yoshua wakumuka ku Makeda ne Bena Isalele bonso bakadi nʼandi, bakalua ku Libina, bakaluisha Bena Libina; Yehowa wakabafila ne mukelenge wabo mu bianza bia Bena Isalele; wakashiha Libina ku muele wa nvita, ne bantu bonso bakadimu; kakashiyamu nansha umue; yeye wakenzela mukelenge wau bu muakenzeleye mukelenge wa Yeleko. Yoshua wakumuka ku Libina ne Bena Isalele bonso bakadi nʼandi; bakalua ku Lakisha, bakasaku tshitudilu ne bakabaluisha; Yehowa wakafila Lakisha mu bianza bia Bena Isalele, wakaunyenga dituku dibidi, wakashiha ku muele wa nvita ne bantu bonso bakadimu, bu muakenzeleye Libina. Hashishe Holama, mukelenge wa Gezê, wakalua bua kukuatshisha Bena Lakisha; Yoshua wakamushiha ne bantu bandi bonso, kakashiya nansha umue. Yoshua wakumuka ku Lakisha ne Bena Isalele bonso bakadi nʼandi, bakalua ku Egelona, bakasaku tshitudilu, bakauluisha. Bakanyenga musoko dituku adi, bakashiha ku muele wa nvita; wakabutula bantu bonso bakadimu dituku adi, bu muakenzeleye Lakisha. Yoshua wakumuka ku Egelona ne Bena Isalele bonso bakadi nʼandi, bakalua ku Hebelone, bakauluisha. Bakaunyenga, bakashiha ku muele wa nvita, ne mukelenge wau, ne misoko yau yonso, ne bantu bonso bakadimu; kakashiya nansha umue, bu muakenzeleye Egelona; kadi yeye wakaubutula ne bantu bonso bakadimu. Yoshua wakahingana ne Bena Isalele bonso ku Debî, bakauluisha; wakanyenga musoko ne mukelenge wau, ne misoko yau yonso; bakabashiha ne muele wa nvita ne bakabutula bantu bonso bakadimu; kakashiya nansha umue: bu muakenzeye ku Hebelone, nunku wakenzela Debî ne mukelenge wau bu muakenzeleye Libina ne mukelenge wau. Nunku Yoshua wakalekesha buloba bujima, ne bua ku mikuna, ne bua ku Sude, ne bua mu bibanda, ne bua ku tukunakuna, ne bakelenge babu bonso: kakashiya nansha umue, wakabutula bonso bakadi ne muoyo, bu muakamba Yehowa, Nzambi wa Isalele. Yoshua wakabashiha ku Kadeshe-bânea tô ne ku Gaza, ne ba mu buloba buonso bua Goshena tô ne ku Gibeona. Bakelenge aba bonso ne buloba buabo buonso Yoshua wakanyenga musangu umue, bualu bua Yehowa, Nzambi wa Isalele, wakadila Bena Isalele nvita. Yoshua wakahingana, ne Bena Isalele bonso, ku tshitudilu tshia ku Gilegala. Ku nyima hakunvua Yabina, mukelenge wa Hasô, lumu elu, yeye wakatuma di kudi Yobaba, mukelenge wa Madona, ne mukelenge wa Shimelona ne mukelenge wa Akasafa, ne kudi bakelenge bonso ba ku luseke lua nôde lua ku mikuna ne ba mu Alabâ ku luseke lua Sude wa Kinelota, ne mu bibanda ne ku mutu kua mikuna ya Dô ku luseke lua wesete, ne kudi Bena Kanâna ba ku esete ne ba ku wesete ne Bena Amole ne Bena Hiti ne Bena Pelizi ne Bena Yebuse ba ku mikuna ne Bena Hiwi kuinshi kua mukuna wa Hêmona mu buloba bua Misepa. Bobo bakahatuka, bobo ne misumba yabo yonso ba bungi be bu nsenga ya kukala kua mai manene, ne tubalu ne makalu a bungi. Bakelenge aba bonso bakadisangisha hamue; bakalua, bakasa tshitudilu ku mai a Meloma bua kuluangana ne Bena Isalele. Yehowa wakambila Yoshua ne. Kanubatshinyi; makelela diba edi nembafile bonso bashihibue ku mpala kua Bena Isalele; nenukose tubalu tuabo tuonso mifungu yatu ya mikono, nenuoshe makalu abo mu kahia. Nunku Yoshua wakalua kudibo lubilu ne bena nvita bonso bakadi nʼandi ku mai a Meloma, wakadiela kudibo. Yehowa wakabafila mu bianza bia Bena Isalele, bakabashiha, bakabihata tô ne ku Sidona, musoko munene, ne ku Miselefota-mayima, ne ku tshibanda tshia Misepa tshia ku esete; bakabashiha tô, kabakashiya nansha umue. Yoshua wakabenzela bu muakamuambila Yehowa: wakakosa tubalu mifingu ya mikono, wakosha makalu abo mu kahia. Ku tshikondo atshi Yoshua wakahingana, wakanyenga Hasô, wakashiha mukelenge wau ne muele wa nvita; bualu bua Hasô wakadi ku mutu kua makelenge au onso diambedi. Bakashiha bantu bonso bakadimu ne miele ya nvita, bakaba-butula; kabakashiya nansha umue ne muoyo; wakosha Hasô ne kahia. Yoshua wakanyenga misoko yonso ya bakelenge aba ne bakelenge bai kabidi, wakabashiha ne muele wa nvita, wakababutula, bu muakamba Mose, muntu wa Yehowa. Bena Isalele kabakosha misoko yakadi ha mikuna, anu Hasô; Yoshua wakawosha. Bena Isalele bakadiangatshila bintu bionso bia mu misoko ei ne bimuna; kadi bakashiha muntu yonso ne muele wa nvita tô ne hakababutulabo bonso; kabakashiya umue uhuyakana. Bu muakambila Yehowa muntu wandi Mose, nunku Mose wakambila Yoshua, ne Yoshua Wakenza nunku; kakalekela bualu bumue kabuyi buenjibue bua mu malu onso akambila Yehowa Mose. Nunku Yoshua wakanyenga buloba abu buonso, ne buloba bua mikuna ne luseke lujima lua ku Sude, ne buloba buonso bua Goshene, ne bibanda, ne Alabâ, ne buloba bua mikuna ya Isalele ne bibanda biabu; ku mukuna wa Halaka wa ku nshila wa ku Sei tô ne ku Bâla-gada wa mu tshibanda tshia Lebanona kuinshi kua mukuna wa Hêmona; wakakuata bakelenge hai bonso, wakabataha, wakabashiha. Yoshua wakaluangana ne bakelenge aba bonso tô musangu mule. Kakuakadi musoko umue wakahunga dî bua kuikala talalâ ne Bena Isalele, anu Bena Hiwi bakadi bashikama mu Gibeona; bakayinyenga yonso anu ku nvita. Yehowa wakitabusha bua bakoleshe mitshima yabo bua kuluisha Bena Isalele nvita, bua Bena Isalele bababutule bonso, kababafuidi luse, kadi babashihe, bu muakambila Yehowa Mose. Ku tshikondo atshi Yoshua wakalua, wakabutula Bena Anaka ba ku mikuna ne ku Hebelone ne ku Debî ne ku Anaba ne ku mikuna yonso ya Yuda ne ku mikuna yonso ya Isalele: Yoshua wakababutula ne misoko yabo. Kakuakadi muena Anaka wakashala mu buloba bua Bena Isalele; anu mu Gaza ne mu Gata ne mu Ashedodo bakuabo bakashalamu. Nunku Yoshua wakanyenga buloba buonso bu muakambila Yehowa Mose; Yoshua wakabuabanyina Bena Isalele bu buhianyi buabo, tshisamba luseke luatshi tshisamba luseke luatshi. Buloba buakashala talalâ, kakuyi nvita. Au mmena a bakelenge ba buloba bakashihabo kudi Bena Isalele, ne bakanyengabo buloba buabo dishiya dia Yadene kudi kuhatukila diba, ku tshibanda tshia Ânona tô ne ku mukuna wa Hêmona, ne buloba buonso bua Alabâ bua ku esete: Sihona, mukelenge wa Bena Amole, wakadi mushikame mu Heshebona, ne wakadi mukokeshe ku Aloe udi ku muelele wa tshibanda tshia Ânona, ne musoko udi munkatshi mua tshibanda, ne tshituha tshia Gilada tô ne ku musulu wa Yaboka, mukalu wa Bena Amona; ku Alabâ tô ne ku mai a Kinelota a ku esete tô ne ku mai a Alabâ, Dishiba dia Luehu mene, a ku esete mu nshila wa ku Bete-yishimota; ne ku luseke lua ku Sude, kuinshi kua mukuna wa Pisega; tô ne ku mukalu wa Oga, mukelenge wa Bashana, ne wa bakadi bashala ba Bena Lefa bakadi bashikama mu Ashetalota ne mu Edelei, wakadi mubakokeshe mu mukuna wa Hêmona ne mu Saleka, ne mu Bashana mujima tô ne ku mukalu wa Bena Geshû ne Bena Mâka ne tshituha tshia Gilada udi ku mukalu wa Sihona, mukelenge wa Heshebona. Mose, muntu wa Yehowa, ne Bena Isalele bakabashiha; ne Mose, muntu wa Yehowa, wakamuha Bena Lubena ne Bena Gada ne tshituha tshia tshisamba tshia Manashe bu buhianyi buabo. Au mmena a bakelenge ba buloba bakashihabo kudi Yoshua ne Bena Isalele ku luseke lua wesete lua Yadene, ku Bâla-gada mu tshibanda tshia Lebanona tô ne ku mukuna wa Halaka mu nshila wa ku Sei; Yoshua wakabuabanyina bisamba bia Bena Isalele bu buhianyi buabo, bu muakatahuluilabo bisamba; mu buloba bua ku mikuna, ne bua mu bibanda ne bua mu Alabâ, ne buloba bua ku tukuna, ne bua mu tshihela, ne bua mu Sude; Bena Hiti ne Bena Amole ne Bena Kanâna ne Bena Pelizi ne Bena Hiwi ne Bena Yebuse: mukelenge umue wa mu Yeleko, mukelenge umue wa mu Ai hehi ne Betele, mukelenge umue wa mu Yelushalema ne mukelenge umue wa mu Hebelone, mukelenge umue wa mu Yâmuta, mukelenge umue wa mu Lakisha, mukelenge umue wa mu Egelona, mukelenge umue wa mu Gezê, mukelenge umue wa mu Debî, mukelenge umue wa mu Gedê, mukelenge umue wa mu Homa, mukelenge umue wa mu Alada, mukelenge umue wa mu Libina, mukelenge umue wa mu Adulama, mukelenge umue wa mu Makeda, mukelenge umue wa mu Betele, mukelenge umue wa mu Tapua, mukelenge umue wa mu Hefê, mukelenge umue wa mu Afeke, mukelenge umue wa mu Lashalona, mukelenge umue wa mu Malona, mukelenge umue wa mu Hasô, mukelenge umue wa mu Shimelona-melona, mukelenge umue wa mu Akasafa, mukelenge umue wa mu Tanaka, mukelenge umue wa mu Megido, mukelenge umue wa mu Kedeshe, mukelenge umue wa mu Yokenama mu Kâmele, mukelenge umue wa mu Dô ku mukuna wa Dô, mukelenge umue wa mu Goyima mu Gilegala, mukelenge umue wa mu Tîsa: bakelenge bonso makumi asatu ne umue. Yoshua wakadi muntu mununu ne wa bidimu bikumbane; Yehowa wakamuambila ne, Wewe udi muntu mununu ne wa bidimu bikumbane, ne buloba bunene butshidi bushala bua nuenu kubuangata. Ebu mbuloba butshidi bushala: nseke yonso ya Bena Peleshete, ne ya Bena Geshû bonso; ku Shihô udi ku mpala kua Ejipitu tô ne ku mukalu wa Ekelona ku luseke lua nôde ludi bibadibue bu lua Bena Kanâna; bakelenge batanu ba Bena Peleshete; Bena Gaza, Bena Ashedodo, Bena Ashakalola, Bena Giti, ne Bena Ekelona; ne Bena Awa kabidi, ku luseke lua Sude; buloba buonso bua Bena Kanâna, ne Meala udi wa Bena Sidona, tô ne ku Afeke ku mukalu wa Bena Amole; buloba bua Bena Gebala ne Lebanona mujima kudi kuhatukila diba, ku Bâla-gada udi kuinshi kua mukuna wa Hêmona tô ne ku mukalu wa Hamata; bantu bonso badi bashikama ku mikuna ya Lebanona tô ne ku Miselefota-mayima ne kudi Bena Sidona bonso; meme nembihate ku mesu kua Bena Isalele; wewe wanji kubuabanyina Bena Isalele ne nshobo bu buhianyi buabo bu munakakuambila. Nunku wewe wabanyina bisamba tshitema ne tshituha tshia tshisamba tshia Manashe buloba ebu bu buhianyi buabo. Bena Lubena ne Bena Gada ne tshituha tshikuabo tshia Bena Manashe bakamana kuangata buhianyi buabo buakabahabo kudi Mose dishiya dia Yadene ku esete, bu muakabaha Mose, muntu wa Yehowa: ku Aloê udi ku muelelu wa tshibanda tshia Ânona, ne musoko udi munkatshi mua tshibanda, ne mpata mujima wa Medeba tô ne ku Dibona; ne misoko yonso ya Sihona, mukelenge wa Bena Amole wakadi mukokeshe mu Heshebona tô ne ku mukalu wa Bena Amona; ne Gilada ne mukalu wa Bena Geshû ne Bena Mâka ne mukuna wonso wa Hêmona, ne buloba buonso bua Bashana tô ne ku Saleka; bukelenge buonso bua Oga bua mu Bashana, wakadi mukokeshe bantu mu Ashetalota ne mu Edelei (wakadi wa bakadi bashala ba Bena Lefa); bualu bua Mose wakataha bantu aba, wakabihata. Kadi Bena Isalele kabakihata Bena Geshû ne Bena Mâka; kadi Bena Geshû ne Bena Mâka badi bashikama munkatshi mua Bena Isalele tô ne ku dituku edi. Yeye kakaha tshisamba tshia Lewi buhianyi nansha; milambu idibo boshila Yehowa, Nzambi wa Isalele, ha kahia, mbuhianyi buabo, bu muakabambileye. Mose wakaha tshisamba tshia Lubena buhianyi bu bungi bua meku abo. Mukalu wabo wakadi ku Aloê udi ku muelelu wa tshibanda tshia Ânona ne musoko udi munkatshi mua tshibanda ne mpata mujima wa Medeba; Heshebona ne misoko yonso idi mu mpata; Dibona ne Bamota-bâla ne Bete-bâla-meona, ne Yahasa ne Kedemota ne Mefâta, Kiyatayima ne Sibema ne Selete-shaha udi munkatshi mua tshibanda, ne Bete-peô, ne tukuna tua Pisega, ne Bete-yeshimoto, ne misoko yonso ya mu mpata ne bukelenge buonso bua Sihona, mukelenge wa Bena Amole, wakadi mukokeshe mu Heshebona, ne bakelenge ba Midiyana, Ewe ne Lekema, ne Sû ne Hula ne Leba, bana ba Sihona bakadi bashikama mu buloba bakashihabo kudi Mose. Belâma kabidi, muana wa Beo, mutempi wa mbuku, Bena Isalele bakamushiha ne muele wa nvita munkatshi mua bantu bakuabo bakashihabo. Mukalu wa Bena Lubena wakadi musulu wa Yadene ne mukalu wau. Ebu mbuhianyi bua Bena Lubena ku meku abo, ne bimenga ne misoko yabi. Mose wakaha tshisamba tshia Bena Gada buhianyi bu bungi bua meku abo. Mukalu wabo wakadi ku Yazê ne misoko yonso ya Gilada ne tshituha tshia buloba bua Bena Amona tô ne ku Aloe udi ku mpala kua Laba; ne ku Heshebona tô ne ku Lamata-misepa ne Betonima; ne ku Mahanayima tô ne ku mukalu wa Debî; ne mu tshibanda, Bete-halama ne Bete-nimema ne Sukota ne Safona, tshituha tshikuabo tshia bukelenge bua Sihona, mukelenge wa Heshebona, ku mukalu wa Yadene tô ne kunfudilu kua mai a Kinelete dishiya dia Yadene ku esete, Ebu mbuhianyi bua Bena Gada ku meku abo, bimenga ne misoko yabi. Mose wakaha tshituha tshia tshisamba tshia Manashe buhianyi: buakadi bua tshituha tshia tshisamba tshia bana ba Manashe bu bungi bua meku abo. Mukalu wabo wakadi ku Mahanayima, Bashana mujima, bukelenge buonso bua Oga, mukelenge wa Bashana, ne misoko yonso ya Yai, idi mu Bashana, misoko makumi asambombo: ne tshituha tshia Gilada ne Ashetalota ne Edelei; misoko ya mu bukelenge bua Oga mu Bashana yakadi ya Maki, muana wa Manashe, ya tshituha tshia bana ba Maki ku meku abo. Au mmahianyi akabanya Mose mu mpata ya Moaba dishiya dia Yadene ku Yeleko ku esete, Kadi Mose kakaha tshisamba tshia Lewi buhianyi nansha: Yehowa, Nzambi wa Isalele, mbuhianyi buabo bu muakabambileye. Au mmahianyi akangata Bena Isalele mu buloba bua Kanâna, akababanyinabo kudi Eleazâ muakuidi, ne Yoshua, muana wa Nuna, ne kudi bakadi ku mutu kua meku a batatu a mu bisamba bia Bena Isalele; bakatahulula muhianyi abo ne nshobo, bu muakambila Yehowa Mose, bua bisamba tshitema ne bua tshituha tshia tshisamba. Bualu bua Mose wakamana kuha bisamba bibidi ne tshituha buhianyi buabo dishiya dia Yadene; kadi yeye kakaha Bena Lewi buhianyi munkatshi muabo nansha. Bualu bua bana ba Yosefe bakadi bisamba bibidi, Manashe ne Efelayima: kabakaha Bena Lewi buhianyi mu buloba, anu misoko ya kushikamabo ne miaba ya kudishabo bimuna biabo ne ya kutekabo bintu biabo. Bena Isalele bakenza bu muakambila Yehowa Mose; bakabanya buloba. Bena Yuda bakalua kudi Yoshua mu Gilegala. Kaleba, muana wa Yefune, Muena Kenizi, wakamuambila ne, Wewe udi mumanye bualu buakambila Yehowa Mose, muntu wa Nzambi, bualu buanyi ne bualu buebe mu Kadeshe-bânea. Nakatshidi bidimu makumi anai hakantuma Mose, muntu wa Yehowa, ku Kadeshe-bânea bua kutentekela buloba; nakahingana kudiye kabidi ne dî diakadi mu mutshima wanyi. Bana betu batuakaya nʼabo bakatekesha mitshima ya bantu; kadi meme nakalonda Yehowa, Nzambi wanyi. Mose wakaditshiha dituku adi ne, Bulelela, buloba buwakadiata makasa ebe nebuikale kûdi ne kudi bana bebe bu buhianyi tshiendelele, bualu bua wewe wakalonda Yehowa, Nzambi wanyi mene mene. Katataka mona, Yehowa wakundama ne ntshidi ne muoyo, bu muakambeye tô bidimu ebi makumi anai ne bitanu, ku dituku diakambila Yehowa Mose dî adi, hakadi Bena Isalele bendakana mu tshihela: lelu ndi ne bidimu makumi muanda mukulu ne bitanu. Ntshidi ne bukole lelu, bu munakadi nʼabu dituku diakantuma Mose; bu muakadi Bukole buanyi dituku adi, mbu mutshidibu katataka, bua kuluangana nvita ne bua kuya ne bua kuhingana. Katataka Umpe bianyi luseke elu lua ku mikuna, bu muakamba Yehowa dituku adi; bualu bua wewe wakunyua dituku adi bu muakadiku Bena Anaka, ne misoko minene ya ngumbu; bikala Yehowa nʼanyi, nembihate, bu muakamba Yehowa. Yoshua wakamuvudishila disanka; yeye wakaha Kaleba, muana wa Yefune, Hebelone bu buhianyi. Nunku Hebelone wakalua buhianyi bua Kaleba, muana wa Yefune, Muena Kenizi, tô ne ku dituku edi; bualu bua yeye wakalonda Yehowa, Nzambi wa Isalele mene mene. Dina dia Hebelone diambedi diakadi Kîyata-âba; muntu eu Aba wakatamba balume bonso ba munkatshi mua Bena Anaka. Buloba buakashala talalâ, kakuyi nvita. Luseke lua tshisamba tshia Bena Yuda ku meku abo luakafika ku mukalu wa Edome tô ne ku tshihela tshia Sina ku luseke lua ku sude, kunfudilu kua buloba bua ku sude. Mukalu wabo wa ku sude wakadi kunfudilu kua Dishiba dia Luehu, ku tshinkonya tshia mai tshidi tshitangila ku sude; makalu wabo wa ku sude wakayila ku mutu kua Akalabima, wakalonda butshika bua Sina, wakabandila ku sude ku luseke lua Kadeshe-bânea, wakayila ku Heselona, wakabandila ku Adâ, wakanyunguluka ku Kâka; wakayila ku Asumona, wakayila tô ne ku kasulu ka Ejipitu; kunshikidilu kua mukalu kuakadi ku mai manene: eu newikale mukalu wenu wa ku luseke lua Sude. Mukalu wa ku esete wakadi Dishiba dia Luehu tô ne kunshikidilu kua Yadene. Mukalu wa ku luseke lua ku nôde wakadi ku tshinkonya tshia mai tshiakadi kunshikidilu kua Yadene; mukalu wakabandila ku Bete-hogola, wakayila ku nôde kua Bete-alabâ; mukalu wakabandila ku dibue dia Bohana, muana wa Lubena; mukalu wakabandila ku Debî ku tshibanda tshia Akola, wakayila ku nôde kudi kutangilangana ne Gilegala udi kuinshi kua mukuna wa Adumima, udi ku muelelu wa musulu wa ku sude; mukalu wakayila ku mai a Ene-shemeshe, wakashiha ku Ene-logele; mukalu wakabandila ku tshibanda tshia muana wa Hinoma tô ne ku luseke lua Bena Yebuse ku sude (eu udi Yelushalema mene); mukalu wakabandila ku mutu kua mukuna udi ku mpala kua tshibanda tshia Hinoma ku wesete, udi kunfudilu kua tshibanda tshia Bena Lefa ku nôde; mukalu wakadi ku mutu kua mukuna tô ne ku mushimi wa mai a Nefetoa, tô ne ku bimenga bia ku mutu kua mukuna wa Efelona; mukalu wakayila tô ne ku Bala (eu udi Kîyata-yalima mene); mukalu wakanyunguluka ku Bâla ku wesete ku mukuna wa Sei, wakayila ku luseke lua mukuna wa Yalima lua ku nôde (eu udi Kasalona mene), wakahuekela ku Bete-shemeshe, wakanyunguluka ku Timena; mukalu wakayila ku luseke lua Ekelona lua ku nôde; mukalu wakayila tô ne ku Shikelona, wakaya tô ne ku mukuna wa Bâla, wakahatuka ku Yabenêle; kunshikidilu kua mukalu kuakadi kukala kua mai manene. Mukalu wabo wa ku wesete wakadi mai manene. Eu mmukalu wa Bena Yuda ku meku abo. Yeye wakaha Kaleba, muana wa Yefune, tshituha tshiandi munkatshi mua Bena Yuda bu mu dî dia Yehowa kudi Yoshua, musoko wa Kîyata-âba, tatu wa Anaka (eu udi musoko wa Hebelone mene). Kaleba wakihata bana balume basatu ba Anaka: Sheshai ne Ahimana ne Talemai, bana ba Anaka. Wakaya kuluangana ne Bena Debî: dina dia Debî diambedi diakadi Kîyata-sefe. Kaleba wakamba ne, Muntu yonso watamba musoko wa Kîyata-sefe, udi ûnyenga, nemmuhe Akasa, muanʼanyi wa bakashi, bu mukashi wandi. Oteniele, muana wa Kenasa, muanʼabo ne Kaleba, wakaunyenga: yeye wakamuha Akasa, muanʼandi wa bakashi, bu mukashi wandi. Hakalueye kudiye, yeye wakamusengelela bua yeye kulomba tatu wandi budimi; mukashi wakahuka ha nyima ha mpunda wandi, ne Kaleba wakamuebesha ne, Udi musue tshinyi? Yeye wakamuitaba ne, Unvudishile disanka; bualu bua wewe wakunteka ku buloba bua ku Sude, Umpe bianyi kabidi mishimi ya mai. Yeye wakamuha mishimi ya mai yakadi ku mutu ne yakadi kuinshi. Ebu mbuhianyi bua tshisamba tshia Bena Yuda ku meku abo. Bimenga bia kunfudilu kua tshisamba tshia Bena Yuda ku mukalu wa Edome ku Sude biakadi Kabesêle ne Edê ne Yagû, ne Kina ne Dimona ne Adada, ne Kedeshe ne Hasô ne Yitenana, ne Zifa ne Teleme ne Bealota, Hasôhadata ne Keliyota-heselona (eu udi Hasô mene), Amama ne Shema ne Molada, Hasâ-gada, Heshemona, Bete-pelete, ne Hasâ-shuala ne Bê-sheba ne Bizeyoteya, Bâla ne Iyima ne Eseme, Eletolada ne Kesila ne Homa, ne Sikelaga ne Mademana ne Sanesana, ne Lebaota ne Shilihima ne Ayina ne Limona: bimenga bionso bidi makumi abidi ne tshitema ne misoko yabi. Mu tshibanda: Eshetaola ne Solea ne Ashena ne Zanoa ne Ene-ganima, Tapua ne Enama, Yâmuta ne Adulama, Soko ne Azeka ne Shâlayima ne Aditayima ne Gedela ne Gedelotayima; bimenga dikumi ne binai ne misoko yabi. Senana ne Hadasha ne Migedala-gada, ne Dileana ne Misepe ne Yoketêle, Lakisha ne Bosakata ne Egelona, ne Kabona ne Lamama ne Kudisha, ne Gedelote ne Bete-dagona, ne Nâma ne Makeda; bimenga dikumi ne bisambombo ne misoko yabi. Libina ne Etê ne Ashana, ne Ifeta ne Ashena ne Nesiba, ne Kila ne Akeziba ne Malesha; bimenga tshitema ne misoko yabi. Ekelona ne bimenga ne misoko yabi; ku Ekelona tô ne kukala kua mai manene, bimenga bionso biakadi ku luseke lua Ashedodo ne misoko yabi. Ashedodo ne bimenga ne misoko yabi; Gaza ne bimenga ne misoko yabi; ku kasulu ka Ejipitu tô ne kukala kua mai manene. Ku mikuna: Shamî ne Yatî ne Soko, ne Dana ne Kîyata-sana (eu udi Debî kabidi), ne Anaba ne Eshetemo ne Anima, ne Goshene ne Holona ne Gilo; bimenga dikumi ne tshimue ne misoko yabi. Alabâ ne Duma ne Eshana, ne Yanima ne Bete-tapua ne Afeka, ne Humeta ne Kîyata-âba (eu udi Hebelone kabidi) ne Siô; bimenga tshitema ne misoko yabi. Maona, Kâmele ne Zifa ne Yuta, ne Yizelele ne Yokedama ne Zanoa, Kayina, Gibea ne Timena; bimenga dikumi ne misoko yabi. Halelula, Bete-sû ne Gedô, ne Mâlata ne Bete-anota ne Eletekona; bimenga bisambombo ne misoko yabi. Kîyata-bâla (eu udi Kîyata-yalima kabidi) ne Laba; bimenga bibidi ne misoko yabi. Mu tshihela: Bete-alabâ, Midina ne Sekaka, ne Nibeshana ne Tshimenga tshia Luehu, ne Enegedi; bimenga bisambombo ne misoko yabi. Kadi Bena Yuda kabakamanya mua kuihata Bena Yebuse ba mu Yelushalema: Bena Yebuse badi bashikama ne Bena Yuda tô ne ku dituku edi. Bana ba Yosefe bakangata buhianyi buabo ku Yadene ku Yeleko, ku mai a Yeleko ku esete, ne tshihela tshidi tshijima ku Yeleko tô ne ku mukuna wa ku Betele; mukulu wakafumina ku Betele ku Luze, wakaya ku butshika bua Bena Akâ ku Atalota; wakahueka ku wesete ku mukalu wa Bena Yafelete, ku butshika bua Bete-holona udi kumanda tô ne ku Gezê; kunshikidilu kua mukalu kuakadi kukala kua mai manene. Bana ba Yosefe, Manashe ne Efelayima, bakangata buhianyi buabo. Au mmukalu wa Bena Efelayima ku meku abo; mukalu wa buhianyi buabo bua ku esete wakadi Atalota-adalâ tô ne ku Bete-holona udi ku mutu; ne mukalu wa ku wesete wakahatuka ku Mikemetata ku nôde, ne mukalu wakanyunguluka ku esete ku Tânata-shilo, wakaya ku esete kua Yanoa; wakahueka ku Yanoa ku Atalota ne ku Nâla tô ne ku Yeleko, wakahatuka ku Yadene. Mukalu wakayila ku wesete kua Tapua ku musulu wa Kana; wakahatuka kukala kua mai manene. Ebu mbuhianyi bua tshisamba tshia Bena Efelayima ku meku abo; ne bimenga biakatahuluilabo Bena Efelayima munkatshi mua buhianyi bua Bena Manashe; ne bimenga bionso ne misoko yabi. Kabakihata Bena Kanâna bakadi mu Gezê: kadi Bena Kanâna batshidi bashikama munkatshi mua Bena Efelayima tô ne ku dituku edi, bakatua bu bahika babo ba mudimu. Ebu mbuhianyi bua tshisamba tshia Manashe, bualu bua yeye wakadi muanʼa bute wa Yosefe. Bualu bua Maki, muanʼa bute wa Manashe, tatu wa Gilada, wakaheta Gilada ne Bashana, bualu bua yeye wakadi tshilobo. Bakaha bana bakuabo ba Manashe tshituha tshiabo ku meku abo: bana ba Ahiezê, ne bana ba Heleka ne bana ba Aseliele ne bana ba Shekeme ne bana ba Hefê ne bana ba Shemida; aba mbana balume ba Manashe, muana wa Yosefe, ku meku abo. Kadi Selofehada, muana mulume wa Hefê, muana mulume wa Maki, muana mulume wa Manashe, kakadi ne bana ba balume nansha, anu bana ba bakashi; au mmena a bana bandi ba bakashi: Mahala ne Noa ne Hogela ne Mileka ne Tîsa. Bobo bakalua ku mpala kua Eleazâ muakuidi, ne ku mpala kua Yoshua, muana wa Nuna, ne ku mpala kua bakelenge, bakamba ne, Yehowa wakelela Mose mukenji bua kutuha buhianyi munkatshi mua bana betu: nunku yeye wakabaha buhianyi munkatshi mua bana babo ne tatu wabo bu mu dî dia Yehowa. Bena Manashe bakangata bituha dikumi ha mutu ha buloba bua Gilada ne Bashana budi dishiya dia Yadene; bualu bua bana ba bakashi ba Manashe bakangata buhianyi munkatshi mua bana bandi ba balume. Buloba bua Gilada buakadi bua bana ba balume bakuabo ba Manashe. Mukalu wa Bena Manashe wakadi ku Ashê tô ne ku Mikemetata udi ku mpala kua Shekeme; wakayila ku tshianza tshia balume tô ku musoko wa Bena Ene-tapua. Buloba bua Tapua buakadi bua Bena Manashe; kadi musoko wa Tapua wakadi ku mukaba wa Bena Manashe ngua Bena Efelayima. Mukalu wakahueka ku musulu wa Kana ku sude kuau; bimenga ebi biakadi bia Bena Efelayima munkatshi mua bimenga bia Bena Manashe; mukalu wa Bena Manashe wakadi ku luseke lua nôde lua musulu, wakahatukila kukala kua mai manene: luseke lua ku sude luakadi lua Bena Efelayima ne luseke lua ku nôde luakadi lua Bena Manashe, ne mai manene akadi mukalu wabo; mukalu wakafika tô ne ku Ashê ku nôde ne ku Yisakâ ku esete. Bena Manashe bakadi ne misoko ei munkatshi mua Bena Yisakâ ne Bena Ashê: Bete-sheana ne misoko yau, ne Yibelama ne misoko yau, ne Bena Dô ne misoko yabo, ne Bena Endô ne misoko yabo, ne Bena Tanaka ne misoko yabo, ne Bena Megido ne misoko yabo, ne mikuna isatu. Bena Manashe kabakamanya mua kuihata bena misoko ai; kadi Bena Kanâna bakahangidisha bua kushikama mu buloba abu. Kadi hakaheta Bena Isalele bukole, bakalambuisha Bena Kanâna mulambu wa mudimu, kabakabihata mene. Bana ba Yosefe bakambila Yoshua ne, Bualu kai wewe wakatuha anu tshituha tshimue bu buhianyi buetu, tuetu tudi bantu ba bungi bualu bua Yehowa wakatusankisha? Yoshua wakabambila ne, Binuikala bantu ba bungi, yai bienu muitu nuditahile muaba mu buloba bua Bena Pelizi ne bua Bena Lefa; bualu bua buloba bua mikuna ya Bena Efelayima budi butamba bukese kunudi. Bana ba Yosefe bakamba ne, Buloba bua ku mikuna kabuena butukumbana; Bena Kanâna bonso badi bashikama mu tshibanda badi ne makalu a biamu, ne badi mu Bete-sheana ne misoko ei ne badi mu tshibanda tshia Yizelele. Yoshua wakambila ba mu nsubu wa Yosefe, Bena Efelayima ne Bena Manashe, ne, Nuenu nudi bantu ba bungi, nudi ne bukole bua bungi, kanuena anu ne tshituha tshimue: kadi buloba bua ku mikuna nebuikale buenu; ditu didiku, kadi nenuditahe, ne muaba au newikale wenu; nudi mua kuihata Bena Kanâna nansha bobo ne makalu a biamu nansha bobo ne bukole. Bena Isalele bonso bakadisangisha ku Shilo, bakashimikaku ntenta wa kusambakena; buloba buonso buakadi talalâ ku mpala kuabo. Bisamba bia Bena Isalele muanda mutekete biakadi bishala, kabiyi bianze kuangata buhianyi buabo. Yoshua wakambila Bena Isalele ne, Nuenu nenutshimbakane musangu bule munyi bua kuya bua kuangata buloba buakanuha Yehowa, Nzambi wa bankambua benu? Sungulai bantu basatu ku tshisamba ne ku tshisamba; nembatume, bobo nebabike, nebendakane ku buloba buonso, ne bobo nebatangile buloba bu mudi buhianyi buabo; nebalue kundi kabidi. Bobo nebabutahulule bituha muanda mutekete; Bena Yuda nebashikame mu tshituha tshiabo ku sude, ne Bena Yosefe nebashikame mu tshituha tshiabo ku nôde. Nuenu nenutahulule buloba bituha bituha muanda mutekete, nenungambile bu munuakenza; meme nennuelele nshobo ku mesu kua Yehowa, Nzambi wetu. Bualu bua Bena Lewi kabena ne buhianyi munkatshi muenu: bualu bua buakuidi bua Yehowa budi buhianyi buabo. Bena Gada ne Bena Lubena ne tshituha tshia tshisamba tshia Manashe bakamana kuangata buhianyi buabo dishiya dia muamua dia Yadene ku esete, buakabahabo kudi Mose, muntu wa Yehowa. Bantu aba bakabika, bakaya; Yoshua wakadimusha bantu bakadi baya kutangila buloba ne, Yai bienu, nuendakane ku buloba, nuhingane kabidi kundi, nungambile bu munuamona; ne meme nennuelele nshobo kunoko ku mesu kua Yehowa mu Shilo. Bantu aba bakaya, bakendakana mu buloba buonso, bakafunda misoko mu mukanda, bakayitahulula mu bituha muanda mutekete; bakahingana kudi Yoshua ku tshitudilu tshia ku Shilo. Yoshua wakabelela nshobo mu Shilo ku mesu kua Yehowa, ne Yoshua wakatahulula Bena Isalele buloba bu muakadi ditahulula diabo. Tshisamba tshia Benyamina tshiakangata buhianyi buatshi ku meku atshi; mukalu wabo wakahatuka hankatshi ha Bena Yuda ne Bena Yosefe. Mukalu wabo wa ku nôde wakadi ku Yadene: mukalu wakabanda ku nôde ku Yeleko, ne ku mikuna ya ku wesete; wakahatuka ku tshihela tshia Bete-awena. Mukalu wakayila ku Luze (eu udi Betele kabidi) ku luseke lua Luze lua ku sude; mukalu wakahueka ku Atalota-adala, ku mukuna udi ku luseke lua sude lua Bete-holona wa ku tshibanda. Mukalu wakayila nunku ku wesete ne wa kunyunguluka ku sude ku mukuna udi ku mpala kua Bete-holona ku sude; wakahatuka ku Kîyata-bâla (eu udi Kîyata-yalima), musoko wa Bena Yuda: eu mmukalu wa ku wesete. Mukalu wa ku Sude wakadi kunfundilu kua Kîyata-yalima; mukalu wa ku wesete wakayila tô ne ku mishimi ya mai a Nefetoa; mukalu wakahueka tô ne kunfudilu kua mukuna udi ku mpala kua tshibanda tshia muana mulume wa Hinoma, mu tshibanda tshia Bena Lefa ku nôde; wakahueka ku tshibanda tshia Hinoma ku luseke lua Bena Yebuse ku Sude, wakahueka kabidi tô ne ku Ene-logela; wakayila ku nôde, wakahatuka ku Ene-shemeshe ne ku Gelilota ku mpala kua mukuna wa Adumima; wakahueka ku dibue dia Bohana, muana wa Lubena; wakaya ku luseke ludi buludiludi ne Alabâ ku nôde, wakahueka ku Alabâ mene; wakayila ku luseke lua ku nôde ku Bete-hogola; wakahatuka ku tshinkonya tshia ku nôde tshia Dishiba dia Luehu kuinshi kua Yadene ku sude: eu mmukalu wa ku sude. Yadene wakadi mukalu wabu wa ku esete. Ebu mbuhianyi bua Bena Benyamina ku mikalu yabo ku meku abo. Bimenga bia tshisamba tshia Bena Benyamina ku meku abo biakadi Yeleko ne Bete-hogola ne Emeke-kezizi, ne Bete-alabâ ne Semalayima ne Betele, ne Bena Awa ne Pâla ne Ofela, ne Kefâ-amonai ne Ofeni ne Geba; bimenga dikumi ne bibidi ne misoko yabi; Gibeona ne Lama ne Belota, ne Misepe ne Kefila ne Moza, ne Lekema ne Yipele ne Talalâ, ne Sela ne Elefe ne musoko wa Bena Yebuse (Yelushalema mene), Gibena ne Kîyata; bimenga dikumi ne binai ne misoko yabi. Ebu mbuhianyi bua Bena Benyamina ku meku abo. Buhianyi buibidi buakadi bua tshisamba tshia Bena Shimeona ku meku abo, buhianyi buabo buakadi munkatshi mua buhianyi bua Bena Yuda. Buhianyi buabo buakadi Bê-sheba, dina dikuabo Sheba, ne Molada, ne Hasâ-shuala, ne Bala ne Eseme, ne Eletolada ne Betula ne Hôma, ne Sikelaga ne Bete-mâkabota ne Hasâ-susa, ne Bete-lebaota ne Shaluhena; bimenga dikumi ne bisatu ne misoko yabi; Ayina, Limona ne Ete ne Ashana; bimenga binai ne misoko yabi; ne misoko yonso yakadi nuluangane ne bimenga ebi tô ne ku Bâlata-bê ne Lama wa ku Sude. Ebu mbuhianyi bua tshisamba tshia Bena Shimeona ku meku abo. Buhianyi bua Bena Shimeona buakadi munkatshi mua buhianyi bua Bena Yuda, bualu bua tshituha tshia Bena Yuda tshiakabahita bunene: nunku Bena Shimeona bakadi ne buhianyi munkatshi mua buhianyi buabo. Buhianyi buisatu buakadi bua Bena Zebuluna ku meku abo. Mukalu wa buhianyi buabo wakadi ku Salida; mukalu wabo wakayila ku wesete ku Malala tô ne ku Dabeshete; wakabatuala ku musulu udi ku mpala kua Yokenama; wakanyunguluka ku Salida ku esete kudi kuhatukila diba ku mukalu wa Kiselota-tabô; wakahatukila ku Dabelata, wakabandila ku Yafia; wakayila ku esete ku Gata-hefê tô ne ku Eta-kasina; wakahatukila ku Limona udi ufaka ha buihi ne Nea; mukalu wakanyunguluka ku luseke lua nôde ku Hanatona; wakahatukila ku tshibanda tshia Yafetaele; ne Katata ne Nahalala ne Shimelona ne Yidala ne Beteleheme: bimenga dikumi ne bibidi ne misoko yabi. Ebu mbuhianyi bua Bena Zebuluna ku meku abo, bimenga ne misoko yabi. Buhianyi buinai buakadi bua Bena Yisakâ ku meku abo. Mukalu wabo wakadi ku Yizelele ne Kesulota ne Shunema, ne Hafa-layima ne Sidona ne Anahalata, ne Labita ne Kishiona ne Ebese ne Lemeta ne Ene-ganima ne Ene-hada ne Bete-pasesa, ne mukalu wakafika ku Tabô ne Shahasuma ne Bete-shemeshe; mukalu wakahatukila ku Yadene; bimenga dikumi ne bisambombo ne misoko yabi. Ebu mbuhianyi bua Bena Yisakâ ku meku abo: bimenga ne misoko yabi. Buhianyi buitanu buakadi bua tshisamba tshia Bena Ashê ku meku abo. Mukalu wabo wakadi Helekata ne Hali ne Betena ne Akasafa ne Alameleke ne Amada ne Mishala; Wakafika ku Kâmele ku wesete ne ku Shihô-libenata; wakanyunguluka ku Bete-dagona kudi kuhatukila diba, wakafika ku Zebuluna ne ku tshibanda tshia Yifetahele ku Bete-emeke ne Niele; wakahatukila ku Kabula ku tshianza tshia bakashi, ne Ebelona ne Lehoba ne Hamona ne Kana tô ne ku Sidona, musoko munene; mukalu wakanyunguluka ku Lama ne ku musoko wa Tulo wakadi ne lumbu; mukalu wakanyunguluka ku Hosa; wakahatukila kukala kua mai manene ku luseke lua Akiziba; ne Uma kabidi ne Afeke ne Lehobo; bimenga makumi abidi ne bibidi ne misoko yabi. Ebu mbuhianyi bua tshisamba tshia Ashê ku meku abo: bimenga ne misoko yabi. Buhianyi bisambombo buakadi bua tshisamba tshia Bena Nafatale ku meku abo. Mukalu wabo wakadi ku Helefe ku mutshi wa telebinta wa mu Sananima ne Adami-nekeba ne Yabenele tô ne ku Lakuma; wakahatukila ku Yadene; mukalu wakayila ku Azanotatabô, ku wesete, wakayila ku Hukoka; wakafika ku Zebuluna ku sude ne wakatua ku Ashê ku wesete, ne ku Yuda ku Yadene kudi kuhatukila diba. Misoko yakadi ne ngumbu yakadi Sidima, Sê ne Hamata, Lakata ne Kinelete, ne Adama ne Lama ne Hasô, ne Kedeshe ne Edelei ne Ene-hasô, ne Iliona ne Migedala-ele, Holema ne Bete-anata ne Bete-shemeshe; bimenga dikumi ne tshitema ne misoko yabi. Ebu mbuhianyi bua tshisamba tshia Bena Nafatale ku meku abo: bimenga ne misoko yabi. Buhianyi bua muanda mutekete buakadi bua tshisamba tshia Bena Dana ku meku abo. Mukalu wa buhianyi buabo wakadi Solea ne Eshetaola ne Ishemesha, ne Shalabina ne Ayalona ne Yitela, ne Elona ne Timena ne Ekelona, ne Eleteke ne Gibetona ne Bâlata, ne Yehuda ne Bene-belaka ne Gata-limona, ne Me-yâkona ne Lakona ne mukalu udi hehi ne Yopa. Mukalu wa Bena Dana wakasompoka ku mpala kuabo; bualu bua Bena Dana bakaya, bakaluangana ne Bena Leshema, bakanyenga musoko, bakaushiha ku miele ya nvita, bakashikamamu, bakidika Leshema ne, Dana, ku dina dia nkambua wabo Dana. Ebu mbuhianyi bua tshisamba tshia Bena Dana ku meku abo: bimenga ne misoko yabi. Hakashikishabo kuabanyangana buloba buakahanabo ku mikalu yabu, Bena Isalele bakaha Yoshua, muana wa Nuna, buhianyi munkatshi muabo: bu mu dî dia Yehowa bakamuha musoko wakalombeye, Timena-tasela ku mikuna ya Efelayima; yeye wakasa musoko, wakashikamamu. Au mmahianyi akabanyabo kudi Eleazâ muakuidi, ne kudi Yoshua, muana wa Nuna, ne kudi bakadi ku mutu kua bisamba bia Bena Isalele, hakelabo nshobo mu Shilo, ku mpala kua Yehowa, ku mbelu kua ntenta wa kutendelelamu. Nunku bakashikisha kuabanya buloba. Yehowa wakambila Yoshua ne, Ambila Bena Isalele ne, Nudisunguile misoko ya kunyemena bu munakanutumina dî kudi Mose, mushihi wa muntu mukuabo ku mpukahuka anyemenemu; neyikale tshinyemenu tshienu kudi musombuedi. Yeye anyemene ku umue wa misoko ai, imane biandi ku tshibuelelu tshia musoko, ambile biandi bakulu ba musoko bualu buandi; bobo bamuteke mu musoko, bamuhe muaba, ashikame biandi munkatshi muabo. Biamulonda musombuedi, kabafidi mushihi mu tshianza tshiandi, bualu bua yeye wakashiha mukuandi ku mpukahuka, kakadi nʼandi lukuna diambedi. Yeye ashikame biandi mu musoko au tô ne himaneye ku mpala kua tshisumbu, bua kumulumbuluishabo bualu buandi, tô ne hafua muakuidi munene wa mu matuku au; hashishe mushihianganyi ahingane, alue ku musoko wandi, ne ku nsubu kuandi, ku musoko kuakadiye mumuke. Bakasungula Kedeshe wa mu Galela wa mu mikuna ya Nafatale, ne Shekeme wa mu mikuna ya Efelayima, ne Kîyata-âba (dina dikuabo ne, Hebelone) wa mu mikuna ya Yuda. Dishiya dia Yadene ku Yeleko ku esete bakasungula Besê wa mu tshihela tshia mu mpata wa tshisamba tshia Bena Lubena, ne Lamota wa mu Gilada wa mu tshisamba tshia Bena Gada, ne Golana wa mu Bashana wa mu tshisamba tshia Bena Manashe. Ai mmisoko yakasunguilabo Bena Isalele bonso, ne benyi bakadi bashikama munkatshi muabo, bua muntu yonso washiha muntu mukuabo ku mpukahuka anyemenemu, kafu biandi ku tshianza tshia musombuedi, tô ne himaneye ku mpala kua tshisumbu. Hashishe bakadi ku mutu kua meku a Bena Lewi bakalua kudi Eleazâ muakuidi, ne kudi Yoshua, muana wa Nuna, ne kudi bakadi ku mutu kua meku a Bena Isalele; bakabambila mu Shilo mu buloba bua Bena Kanâna ne, Yehowa wakela mukenji wandi kudi Mose bua kutuha misoko ya kushikamamu ne miaba ya kudishamu bimuna bietu. Bena Isalele bakaha Bena Lewi misoko ei ne miaba ei munkatshi mua buhianyi buabo bu muakadi dî dia Yehowa. Meku a Bena Kohata akangata tshiabo tshituha; bana ba Alona muakuidi, Bena Lewi mene mene, bakangata tshiabo tshituha munkatshi mua tshisamba tshia Yuda ne mu tshisamba tshia Shimeona ne mu tshisamba tshia Benyamina, bimenga dikumi ne bisatu. Bakuabo ba Bena Kohata bakangata tshiabo tshituha munkatshi mua meku a tshisamba tshia Efelayima ne mu tshisamba tshia Dana ne mu tshituha tshia tshisamba tshia Manashe, bimenga dikumi. Bena Gêshona bakangata tshiabo tshituha munkatshi mua meku a tshisamba tshia Yisakâ ne mu tshisamba tshia Ashê ne mu tshisamba tshia Nafatale ne mu tshituha tshia tshisamba tshia Manashe tshia mu Bashana, bimenga dikumi ne bisatu. Bena Melali ku meku abo bakangata tshiabo tshituha munkatshi mua tshisamba tshia Lubena ne mu tshisamba tshia Gada ne mu tshisamba tshia Zebuluna, bimenga dikumi ne bibidi. Bena Isalele bakaha Bena Lewi bimenga ebi ne miaba ya ku matshika bu muakambila Yehowa Mose. Bakabaha bimenga ebi biakatelabo mena munkatshi mua tshisamba tshia Bena Yuda ne mu tshisamba tshia Bena Shimeona; biakadi bia bana ba Alona ba mu meku a Bena Kohata, bakadi bana ba Lewi; tshituha tshiabo tshiakadi tshia kumudia. Bakabaha Kîyata-âba, Aba wakadi tatu wa Anaka (udi tshimenga tshia Hebelone) ku mikuna ya Yuda ne miaba ya ku matshika idi mitshinyunguluke. Kadi bakaha Kaleba, muana wa Yefune, madimi adi ha buihi ne tshimenga ne misoko yatshi bu buhianyi buandi. Bakaha bana ba Alona muakuidi, Hebelone, tshimenga tshia kunyemenabo kudi mushihianganyi, ne miaba ya ku matshika, ne Libina ne miaba ya ku matshika, ne Yati ne miaba ya ku matshika, ne Eshetemo ne miaba ya ku matshika, ne Holona ne miaba ya ku matshika, ne Debî ne miaba ya ku matshika, Ayina ne miaba ya ku matshika, ne Yuta ne miaba ya ku matshika, ne Bete-shemeshe ne miaba ya ku matshika; bimenga tshitema munkatshi mua bisamba ebi bibidi. Mu tshisamba tshia Benyamina, Gibeona ne miaba ya ku matshika, ne Geba ne miaba ya ku matshika, Anatota ne miaba ya ku matshika, ne Alamona ne miaba ya ku matshika: bimenga binai. Bimenga bionso bia bana ba Alona bakuidi biakadi bimenga dikumi ne bisatu ne miaba yabi ya ku matshika. Meku a Bena Kohata, Bena Lewi, bakashala, bakangata bimenga bia mu tshituha tshiabo tshia mu tshisamba tshia Efelayima. Bakabala Shekeme ne miaba ya ku matshika mu mikuna ya Efelayima, tshimenga tshia kunyemenamu, ne Gezê ne miaba ya ku matshika, ne Kibesayima ne miaba ya ku matshika, ne Bete-holona ne miaba ya ku matshika; bimenga binai. Munkatshi mua tshisamba tshia Dana, Eleteke ne miaba ya ku matshika, ne Gibetona ne miaba ya ku matshika, Ayalona ne miaba ya ku matshika, Gata-limona ne miaba ya ku matshika: bimenga binai. Munkatshi mua tshituha tshia tshisamba tshia Manashe, Tanaka ne miaba ya ku matshika, ne Gata-limona ne miaba ya ku matshika: bimenga bibidi. Bimenga bionso biakashikama meku a Bena Kohata akashala biakadi dikumi ne miaba yabi ya ku matshika. Bakaha bana ba Geshona ba mu meku a Bena Lewi bimenga bia munkatshi mua tshituha tshia tshisamba tshia Manashe: Golana wa mu Bashana ne miaba ya ku matshika, tshimenga tshia kunyemenabo kudi mushihianganyi, ne Bêshetela ne miaba ya ku matshika; bimenga bibidi. Mu tshisamba tshia Yisakâ, Kishona ne miaba ya ku matshika, ne Dabelata ne miaba ya ku matshika, Yâmuta ne miaba ya ku matshika, ne Ene-ganima ne miaba ya ku matshika: bimenga binai. Mu tshisamba tshia Ashê, Mishala ne miaba ya ku matshika, ne Abidona ne miaba ya ku matshika, Halekata ne miaba ya ku matshika, ne Lehoba ne miaba ya ku matshika: bimenga binai. Mu tshisamba tshia Nafatale, Kedeshe wa mu Galela ne miaba ya ku matshika, tshimenga tshia kunyemenabo kudi mushihianganyi, ne Hamata-dô ne miaba ya ku matshika, ne Kâtana ne miaba ya ku matshika; bimenga bisatu. Bimenga bionso bia Bena Gêshona ku meku abo biakadi dikumi ne bisatu ne miaba yabi ya ku matshika. Bakaha meku a Bena Melali, bakashala ba Bena Lewi, Yokenama ne miaba ya ku matshika, ne Kâta ne miaba ya ku matshika, munkatshi mua tshisamba tshia Zebuluna: Dimana ne miaba ya ku matshika, ne Nahalala ne miaba ya ku matshika: bimenga binai. Munkatshi mua tshisamba tshia Lubena: Besê ne miaba ya ku matshika, ne Yahasa ne miaba ya ku matshika, Kedemota ne miaba ya ku matshika, ne Mefata ne miaba ya ku matshika: bimenga binai. Munkatshi mua tshisamba tshia Gada: Lamota wa mu Gilada ne miaba ya ku matshika, tshimenga tshia kunyemenabo kudi mushihianganyi, ne Mahanayima ne miaba ya ku matshika, Heshebona ne miaba ya ku matshika, ne Yazê ne miaba ya ku matshika: bimenga bionso binai. Bimenga ebi bionso biakadi bia Bena Melali, bakashala ba mu meku a Bena Lewi, bimenga dikumi ne bibidi. Bimenga bionso bia Bena Lewi munkatshi mua buhianyi bua Bena Isalele biakadi bimenga makumi anai ne muanda mukulu ne miaba yabi ya ku matshika. Bimenga ebi bionso biakadi ne miaba yabi ya ku matshika mibinyunguluke: bimenga bionso biakadi nunku. Nunku Yehowa wakaha Bena Isalele buloba buonso buakalayeye bankambua babo; bakabunyenga, bakashikamamu. Yehowa wakabaha dikisha ku nseke yonso bu muakalayeye bankambua babo; kakuakadi umue wa bena lukuna babo bonso wakamanya mua kubatantamena; Yehowa wakafua bena lukuna babo bonso mu bianza biabo. Kabakahanga tshintu tshimpe tshimue tshiakalaya Yehowa Bena Isalele; bakaheta bintu ebi bionso. Yoshua wakabikila Bena Lubena ne Bena Gada ne tshituha tshia tshisamba tshia Bena Manashe, wakabambila ne, Nuenu nuakatumikila mei onso akanuambila Mose, muntu wa Yehowa, nuakunyua dî dianyi mu malu onso anakunuambila; kanuakalekela bana benu matuku au onso tô ne ku dituku edi, kadi nuakatumikila mei a Yehowa, Nzambi wenu. Katataka Yehowa, Nzambi wenu, wakaha bana benu dikisha bu muakabambileye; nunku nuhingane, yai bienu ku ntenta yenu, ku buloba bua buhianyi buenu, buakanuha Mose, muntu wa Yehowa, dishiya dia Yadene. Nuikale ne dinanukila dia kutumikila mei ne mikenji biakanuambila Mose, muntu wa Yehowa, bua kusua Yehowa, Nzambi wenu, ne bua kuenda mu nshila yandi yonso, ne bua kutumikila mikenji yandi, ne bua kulamata kudiye, ne bua kumukuatshia mudimu ne mitshima yenu yonso ne mioyo yenu yonso. Nunku Yoshua wakabandisha a disanka, wakalayangana nʼabo; bakaya ku ntenta yabo. Mose wakamana kuha tshituha tshia tshisamba tshia Manashe buhianyi mu Bashana; kadi Yoshua wakaha tshituha tshiabo tshikuabo buhianyi dishiya dia Yadene ku wesete. Hakabatuma Yoshua ku ntenta yabo, hashishe yeye wakabandisha disanka, wakabambila ne, Yai bienu ne biuma bia bungi ku ntenta yenu, ne bimuna bia bungi, ne tshiamu tshia argent ne or ne tshiamu tshia mitaku ne tshiamu tshifike, ne bilulu bia bungi; nuabanyangane ne bana benu bintu binuakanyenga kudi bena lukuna benu. Bena Lubena ne Bena Gada ne tshituha tshia tshisamba tshia Bena Manashe bakumuka munkatshi mua Bena Isalele mu Shilo wa mu buloba bua Kanâna, bakaya ku buloba ba Gilada ku buloba bua buhianyi buakangatabo bu muakadi di dia Yehowa kudi Mose. Hakafuabo ku luseke ludi hehi ne Yadene mu buloba bua Kanâna, Bena Lubena ne Bena Gada ne tshituha tshia tshisamba tshia Bena Manashe, bakasa tshioshelu ku Yadene, tshioshelu tshinene tshia dikema. Bena Isalele bakuabo bakunvua lumu ne, Bena Lubena ne Bena Gada ne tshituha tshia tshisamba tshia Manashe bakasa tshioshelu ku mukalu wa buloba bua Kanâna hehi ne Yadene ku luseke lua Bena Isalele aba. Hakunvua Bena Isalele lumu alu, tshisumbu tshionso tshia Bena Isalele aba tshiakadisangisha ku Shilo, bua kuluangana nʼabo. Bena Isalele aba bakatuma Pinehasa, muana mulume wa Eleazâ muakuidi, kudi Bena Lubena ne Bena Gada ne tshituha tshia tshisamba tshia Bena Manashe, bakamutuma ne bukelenge dikumi, mukelenge wa ku tshisamba mukelenge wa ku tshisamba; muntu ne muntu wakadi ku mutu bua binunu bia meku a Bena Isalele a mu tshisamba tshiandi. Bakalua kudi Bena Lubena ne Bena Gada ne tshituha tshia tshisamba tshia Bena Manashe mu buloba bua Gilada, bakabambila ne, Tshisumbu tshionso tshia bantu ba Yehowa tshidi tshianza ne, Bualu ebu bubi bunuakuenzela Nzambi wa Isalele budi munyi? Munyi munuakulekela kulonda Yehowa hanuakadiashila tshioshelu bua kutombokela Yehowa lelu? Bualu bubi bua Peô budi bututamba bukese, anyi? Katuyi banze kudilengesha, tô ne ku dituku edi, bua mulau wakela Yehowa tshisumbu tshia bantu, nuenu nudi basue kuhambuka lelu ne kuhanga kulonda Yehowa, anyi? Binuatombokela Yehowa lelu, makelela yeye neakuatshile tshisumbu tshionso tshia Bena Isalele tshiji. Bikala buloba bua buhianyi buenu kabuyi buimpe, nusabuke mu buloba bua buhianyi bua Yehowa, kudi tshitendelelu tshia Yehowa, nuangate buhianyi munkatshi muetu; kadi kanutombokedi Yehowa anyi tuetu bua kudiashila tshioshelu tshikuabo ha mutu ha tshioshelu tshia Yehowa, Nzambi wetu. Akana, muana wa Zela, kakenza bualu bubi hakangateye tshintu tshia tshijila, ne mulau kawakakuata tshisumbu tshionso tshia Bena Isalele, anyi? Muntu au kakafua nkayandi bua bualu bubi buakenzeye. Bena Lubena ne Bena Gada ne tshituha tshia tshisamba tshia Manashe bakambila bakadi ku mutu kua binunu bia Bena Isalele ne, Nzambi Umue Munene, Yehowa, Nzambi Umue Munene, Yehowa, udi mumanye; Bena Isalele nebamanye biabo ne, Bikalaku ditomboka, anyi bikalaku buhidia bua kuhidia Yehowa, kanutusungidi lelu. Bituikala badiashile tshioshelu bua kuhambuka ne bua kuhanga kulonda Yehowa, ne bua kufila milambu ya kuoshilahu, ne milambu ya bukula ne milambu ya kuvuisha nʼai ditalala, Yehowa nkayandi ashikishe bualu. Tuakenza bualu ebu tuela meji ne, Halua matuku makuabo bana benu nebakonke bana betu ne, Nuenu nudi ne Yehowa, Nzambi wa Isalele, bualu, anyi? Bualu bua Yehowa wakateka Yadene bu mukalu hankatshi hetu nʼenu, nuenu Bena Lubena ne Bena Gada; kanuena ne buhianyi kudi Yehowa: nunku bana benu nebakande bana betu bua kutshinabo Yehowa. Nunku tuakuambilangana ne, Tudiashile tshioshelu, kambualu bua kuoshilahu nyama, anyi mulambu; kadi netshikale bu mumanyi wa bualu hankatshi hetu nʼenu, ne hankatshi ha milongo idi ilonda ku nyima kuetu, bua tuetu kuenzela Yehowa mudimu ku mpala kuandi ne milambu ya kuosha ne milambu yetu ya kuvuisha nʼai ditalala; ne bua bana benu kabambidi bana betu mu matuku alualua ku mpala ne, Nuenu kanuena ne buhianyi kudi Yehowa. Nunku tuakuambilangana ne, Hatuambilabo anyi hambilabo milongo idi ilonda ku nyima mei â, netuambe ne, Monai tshifuanyikishi tshia tshioshelu tshia Yehowa tshiakenza batatu betu, kambualu bua kuoshelahu milambu ya kuosha, anyi nyama mishiha; kadi tshidi bu mumanyi wa bualu hankatshi hetu nʼenu. Yehowa atukande bua katumutombokedi, katubambuki kudiye, katuhangi kumulonda, ne katuashi tshioshelu tshia milambu ya kuosha ne ya bukula, ne ya nyama mishiha, anu tshioshelu tshia Yehowa, Nzambi wetu, tshidi ku mpala kua tshitendelelu tshiandi. Pinehasa muakuidi, ne bukelenge ba tshisumbu tshia Bena Isalele bakadi ku mutu kua binunu bia Bena Isalele bakadi nʼandi hakunvuabo mei akabambila Bena Lubena ne Bena Gada ne Bena Manashe, bakadi ne disanka. Pinehasa, muana wa Eleazâ, muakuidi, wakambila Bena Lubena ne Bena Gada ne Bena Manashe ne, Lelu tudi bamanye ne, Yehowa udi munkatshi muetu, bualu bua nuenu kanuakenzela Yehowa bualu bubi ebu: katataka nuakasungila Bena Isalele mu tshianza tshia Yehowa. Pinehasa, muana wa Eleazâ, muakuidi, ne bukelenge bakumuka kudi Bena Lubena ne kudi Bena Gada mu buloba bua Gilada, bakahingana ku buloba bua Kanâna kudi Bena Isalele, bakabalondela mei kabidi. Bualu ebu buakasankisha Bena Isalele; Bena Isalele bakatumbisha Nzambi, kabakamba dî dikuabo bua kuluangana nʼabo, ne bua kubutula buloba buakadi Bena Lubena ne Bena Gada bashikama. Bena Lubena ne Bena Gada bakidika tshioshelu ne Ede, bualu bua hankatshi betu nʼabo tshidi bu mumanyi wa bualu ne, Yehowa udi Nzambi. Hakahita matuku a bungi, ne hakamana Yehowa kuha Bena Isalele dikisha kudi bena lukuna babo bonso bakadi babanyunguluka, ne hakalua Yoshua muntu mununu ne bidimu biandi biakakumbana, Yoshua wakabikila Bena Isalele bonso ne bakulu babo ne bakadi ku mutu kua bisamba biabo ne balumbuluishi babo ne tuhita tuabo, wakabambila ne, Meme ndi muntu mununu, ne bidimu bianyi biakukumbana: nuenu nuakatangila malu onso akenzela Yehowa, Nzambi wenu, bisamba ebi bionso bua bualu buenu; bualu bua Yehowa, Nzambi wenu, yeye mene wakanuluila nvita. Monai, meme nakanuha bisamba ebi bidi bishala bu buhianyi bua bisamba bienu, kutuadishila ku Yadene, ne bisamba bionso binakatamba bukole, tô ne ku mai manene kudi kubuelela diba. Yehowa, Nzambi wenu, neabumushe ku mpala kuenu, neabihate ku mesu kuenu: nuenu nenunyenge buloba buabo bu muakanuambila Yehowa, Nzambi wenu. Nunku nuikale ne mitshima ya dikima bua kutumikila ne kuenza mei onso adi mafunda mu mukanda wa mikenji ya Mose; kanusesuki ku tshianza tshia balume anyi ku tshianza tshia bakashi; kanubuelakanyi ne bisamba ebi bidi bishala munkatshi muenu; kanutedi mena a nzambi yabo, kanuditshihi kudiyi, kanuyikuatshidi mudimu, kanuyikukuidi; lamatai Yehowa, Nzambi wenu, bu munuakuenza tô ne ku dituku edi. Yehowa wakanuihatshila bisamba binene ne bikole; kakuakadi muntu wakanutantamena tô ne ku dituku edi. Umue wenu neihate tshinunu tshia bantu; bualu bua Yehowa, Nzambi wenu, udi unuluila nvita bu muakanuambileye. Nudimuke bienu bua nuenu nusue Yehowa, Nzambi wenu. Kadi binuahingana bua kulamata bisamba ebi bidi bishala munkatshi muenu, ne bua kubakangana nʼabo, ne bua kubuelakana nʼabo, numanye bienu ne, Yehowa, Nzambi wenu, nealekele kunuihatshila bisamba ebi ku mpala kuenu; nebikale bu buteyi ne dijimba kunudi, ne bu nfimbu ha nyima henu, ne bu meba mu mesu enu tô ne hanubutulabo mu buloba ebu buimpe buakanuha Yehowa, Nzambi wenu. Monai, lelu eu nkadi ha kuya mu nshila utu waya bonso ba ha buloba: nudi bamanye mu mitshima yenu yonso ne mu mioyo yenu yonso ne kanuakahanga tshintu tshimpe tshimue tshiakanuha Yehowa, Nzambi wenu; nuakaheta bintu bionso, kanuakahanga tshintu tshimue. Bu munuakaheta bintu bimpe bionso biakanuambila Yehowa, Nzambi wenu, nunku Yehowa neanutumine malu mabi onso tô ne hanubutuleye mu buloba ebu buimpe buakanuha Yehowa, Nzambi wenu. Binuashiha tshihungidi tshia Yehowa, Nzambi wenu, tshinuakahunga nʼandi, ne binuaya bua kukuatshila nzambi mikuabo mudimu ne bua kuyikukuila, hashishe Yehowa neikale nʼenu tshiji, nenujimine lubilu mu buloba buimpe buakanuheye. Yoshua wakasangisha bisamba bionso bia Bena Isalele ku Shekeme, wakabikila bakulu ba Bena Isalele ne bakadi ku mutu kua bisamba ne balumbuluishi babo ne tuhita tuabo; bakadisangisha ku mpala kua Nzambi. Yoshua wakambila bantu bonso ne, Yehowa, Nzambi wa Isalele, udi Wamba ne, Kale bankambua benu bu Tela, tatu wa Abalahama ne wa Nahô, bakadi bashikama dishiya dia musulu wa Pelata, bakadi batendelela nzambi mikuabo. Nakangata nkambua wenu Abalahama dishiya dia musulu wa Pelata, nakamuendesha mu buloba buonso bua Kanâna, nakavudisha bana bandi, nakamufila Isaka. Nakaha Isaka Yakoba ne Esau; nakaha Esau mukuna wa Sei bu buhianyi buandi; Yakoba ne tunkanunuma tuandi bakahueka mu Ejipitu. Nakatuma Mose ne Alona, nakakengesha Bena Ejipitu ne malu onso anakenza munkatshi muabo; hashishe nakanuluhula. Nakaluhula bankambua benu mu Ejipitu, bakatua kukala kua mai manene; Bena Ejipitu bakalonda bankambua benu ne makalu ne tubalu tô ne ku Dishiba Dikunze. Hakadilabo kudi Yehowa, yeye wakateka midima hankatshi habo ne Bena Ejipitu; wakatuma mai manene ha mutu habo, wakababuikila; mesu enu akatangila malu anakenza mu Ejipitu; nuakashikama mu tshihela matuku a bungi. Nakalua nʼenu mu buloba bua Bena Amole bakadi bashikama dishiya dia Yadene; bobo bakaluangana nʼenu, nakabafila mu bianza bienu, nuakanyenga buloba buabo; nakababutula ku mpala kuenu. Balaka, muana mulume wa Sipô, mukelenge wa Moaba, wakabika, wakaluangana ne Bena Isalele; wakatuma bantu, bakabikila Belâma, muana mulume wa Beô, bua kunueleye mulau; kadi meme nakahidia kumufila Belâma; nunku yeye wakanuvudishila disanka; nakanusungila mu tshianza tshiandi. Nuakasabuka Yadene, nuakalua ku Yeleko; Bena Yeleko bakaluangana nʼenu ne Bena Amole ne Bena Pelizi ne Bena Kanâna ne Bena Hiti ne Bena Gîgashi ne Bena Hiwi ne Bena Yebuse; nakabafila mu bianza bienu. Nakatuma matembue ku mpala kuenu, akabihata ku mpala kuenu, bakelenge babidi ba Amole mene; ka nku muele webe wa nvita, anyi ku buta buebe. Nakanuha buloba bunudi kanuyi badima, ne bimenga bia kushikamamu binuakadi kanuyi base, ne nuenu nuakashikamamu; nuakadia tumuma tua nvinyo ne tua olive tunuakadi kanuyi bakune. Nunku nutshine Yehowa, numukuatshile mudimu ne muoyo wonso udi kauyi ne lubombo, nûmushe nzambi yakakuatshila bankambua bena mudimu dishiya dia musulu wa Pelata ne mu Ejipitu; nukuatshile Yehowa mudimu. Binuamona ne kukuatshila Yehowa mudimu kudi kubi, lelu nusungule unudi basue kukuatshila mudimu, ne nzambi yakadi bankambua benu bakuatshile mudimu dishiya dia musulu wa Pelata anyi nzambi ya Bena Amole, bena buloba bunudi bashikame; kadi meme ne ba mu nsubu muanyi netukuatshile Yehowa mudimu. Bantu bakamukudimuna dî ne, Yehowa atukande bua katumulekedi bua kukuatshila nzambi mikuabo mudimu; Yehowa, Nzambi wetu, wakatuluhula ne batatu betu mu buloba bua Ejipitu ne mu nsubu wa buluka, wakenza malu a kukema ku mesu kuetu, wakatulama bimpe mu nshila yonso utuakenda ne munkatshi mua bantu bonso butuakahita mu nshila. Yehowa wakatuihatshila bantu bonso ku mpala kuetu, Bena Amole mene bakadi bashikama mu buloba; netukuatshile Yehowa mudimu kabidi, bualu bua yeye udi Nzambi wetu. Yoshua wakambila bantu ne, Nuenu kanuena mua kukuatshila Yehowa mudimu, bualu bua yeye udi Nzambi wa tshijila, udi Nzambi wa mukau, yeye kena unujimishila mahanga enu anyi mibi yenu. Binualekela Yehowa, binuakuatshi la nzambi ya bende mudimu, hashishe yeye neakudimuke, neanukengeshe, neanubutule, yeye mumane kunuenzela bimpe. Bantu bakambila Yoshua ne, Nansha, netukuatshile Yehowa mudimu. Yoshua wakambila bantu ne, Nuenu nudi bamanyi ba bualu buenu bunuakadiambila ne, Tuakusungula Yehowa, bua kumukuatshia mudimu. Bobo bakamba ne, Tudi bamanyi ba bualu ebu. Wakabambila ne, Numushe nzambi ya bende idi munkatshi muenu, nuteke mitshima yenu kudi Yehowa, Nzambi wa Isalele. Bantu bakambila Yoshua ne, Netukuatshile Yehowa, Nzambi wetu, mudimu, netutumikile dî diandi. Yoshua wakahunga dî ne bantu dituku adi, wakabajadikila mukenji ne dî dijadika mu Shekeme. Yoshua wakafunda mei â mu mukanda wa mikenji ya Nzambi; wakangata dibue dinene, wakadimanyika muinshi mua mutshi wa telebinta wakadi hehi ne tshitendelelu tshia Nzambi. Yoshua wakambila bantu bonso ne, Monai, dibue edi nedikale bu mumanyi wa bualu kutudi, bualu bua diakunvua mei onso a Yehowa akatuambileye; diodi nedikale bu mumanyi wa bualu kunudi, bua kanubidi Nzambi wenu. Yoshua wakamuangalasha bantu, mu ntu ku buhianyi buandi mundi ku buhianyi buandi. Ku nyima kua malu â Yoshua, muana wa Nuna, muntu wa Yehowa, wakafua, wakadi ne bidimu lukama ne dikumi. Bakamujika ku mukalu wa buhianyi buandi mu Timenata-sela wa mu mikuna ya Efelayima, ku nôde kua mukuna wa Gâsha. Nunku Bena Isalele bakakuatshila Yehowa mudimu matuku onso a Yoshua, ne matuku onso a bakulu bakashala ne muoyo hakafua Yoshua ne bakadi bamanye malu onso akenzela Yehowa Bena Isalele. Bakajika mifuba ya Yosefe, yakalua nʼai Bena Isalele ku Ejipitu, mu Shekeme mu tshituha tshia buloba tshiakasumba Yakoba kudi bana ba Hamo, tatu wa Shekeme, ku bituha lukama bia argent; buakalua buhianyi bua tunkanunuma tua Yosefe. Eleazâ, muana mulume wa Alona, wakafua; bakamujika mu mukuna wa Pinehasa, muanʼandi mulume, wakamuhabo mu buloba bua Bena Efelayima. Ku nyima kua lufu lua Yoshua, Bena Isalele bakebesha Yehowa ne, Wadianjila kuya ku mpala kuetu kudi Bena Kanâna bua kuluangana nʼabo nvita nganyi? Yehowa wakamba ne, Bena Yuda nebaye; monai, nakafila buloba mu bianza biabo. Bena Yuda bakambila bana babo ba balume Bena Shimeona ne, Nuye nʼetu ku buhianyi buetu bua tuetu tuluangane ne Bena Kanâna; ne tuetu kabidi netuye nʼenu ku buhianyi buenu. Bena Shimeona bakaya nʼabo. Bena Yuda bakaya, ne Yehowa wakafila Bena Kanâna ne Bena Pelizi mu bianza biabo; bakashiha binunu dikumi bia bantu mu Bezeke. Bakasangana Adoni-bezeke mu Bezeke; bakaluangana nʼandi, bakashiha Bena Kanâna ne Bena Pelizi. Kadi Adoni-bezeke wakanyema; bakamulonda, bakamuheta, bakamukosa biala biandi ne bana ba nkasa banene. Adoni-bezeke wakamba ne, Bakelenge makumi muanda mutekete bakadi ne biala biabo ne bana ba nkasa banene bikoseke bakadi badia bidia biabo muinshi mua mesa anyi; bu munakuenza, Nzambi wakunsombuela. Bakaya nʼandi ku Yelushalema, yeye wakafumaku. Bena Yuda bakaluangana ne Bena Yelushalema, bakaunyenga, bakashiha bena musoko ne muele wa nvita, bakosha tshimenga ne kahia. Ku nyima Bena Yuda bakaya kuluangana ne Bena Kanâna ba ku mukuna, ne ba ku luseke lua ku Sude ne mu tshibanda kabidi. Bena Yuda bakaya kuluangana ne Bena Kanâna bakadi bashikama mu Hebelone (dina dia Hebelone diambedi diakadi Kîyata-âba); bakashiha Sheshai ne Ahimana ne Talemai. Wakumukaku, wakaya kuluisha Bena Debî. (Dina dia Debî diambedi diakadi Kîyata-sefê). Kaleba wakamba ne, Udi ushiha Kîyata-sefê, udi ûnyenga, nemmuhe Akasa, muanʼanyi mukashi, bu mukashi wandi. Oteniele, muana mulume wa Kenaza, muakunyi wa Kaleba, wakaunyenga; yeye wakamuha Akasa bu mukashi wandi. Hakalueye kudiye, yeye wakamuenzesha bua kulombeye tatu wandi budimi; mukashi wakatuluka ha nyima ha mpunda wandi: Kaleba wakamukonka ne, Udi musue tshinyi? Yeye wakamuambila ne, Unvudishile disanka; wewe wakamana kumpa buloba bua ku luseke lua Sude, Umpe kabidi mishimi ya mai. Kaleba wakamuha mishimi ya mai yakadi ku mutu ne yakadi kumanda kabidi. Bana ba Muena Kena, tatuʼandi-muenu wa Mose, bakumuka ku musoko wakadi ne mabue a ngashi, bakaya ne Bena Yuda ku tshihela tshia Yuda, tshidi ku luseke lua ku sude wa Alada; bakaya, bakashikama ne bantu aba. Yuda wakaya ne muanʼabo Shimeona, bakashiha Bena Kanâna bakadi bashikama mu Sefata, bakabutula musoko mene. Dina dia musoko diakadi Homa. Bena Yuda bakanyenga Gaza kabidi ne matshika au, ne Ashekelona ne matshika au, ne Ekelona ne matshika au. Yehowa wakadi ne Bena Yuda, bakihata bakadi ku mikuna, kadi kabakamanya mua kuihata bakadi bashikama mu bibanda bualu bua bobo bakadi ne makalu a biamu. Bakaha Kaleba Hebelone, bu muakamba Mose; yeye wakihata bana balume ba Anaka basatu bakadimu. Bena Benyamina kabakihata Bena Yebuse hakadi bashikama mu Yelushalema; kadi Bena Yebuse badi bashikama ne Bena Benyamina mu Yelushalema tô ne lelu. Bena Yosefe bakaya bua kuluisha Bena Betele; Yehowa wakadi nʼabo. Bena Yosefe bakatuma bantu bua kutentekelabo Betele. (Dina dia Betele diambedi diakadi Luza.) Batentekedi aba bakamona muntu ufuma mu musoko, bakamuambila ne, Tudi tukusengelela ne utuleshe tshibuelelu tshia mu musoko, ne tuetu netukufuile luse. Yeye wakabalesha tshibuelelu tshia mu musoko, bakashiha bena musoko ne muele wa nvita; kadi bakalekela muntu eu ne bantu bonso ba mu nsubu muandi. Muntu eu wakaya ku buloba bua Bena Hiti, wakasaku musoko, wakawidika ne Luza; edi ndina diau tô ne lelu. Bena Manashe kabakihata Bena Bete-sheana ne misoko yau, anyi Bena Tanaka ne misoko yau, anyi Bena Dô ne misoko yau, anyi Bena Yibelama ne misoko yau, anyi Bena Megido ne misoko yau; kadi Bena Kanâna bakadi bashikama mu buloba abu. Hashishe hakakumbana Bena Isalele ba bungi, bobo bakenzesha Bena Kanâna mudimu wa mulambu, kabakabihata mene. Bena Efelayima kabakihata Bena Kanâna bakadi bashikama mu Gezê; kadi Bena Kanâna bakashikama mu Gezê munkatshi muabo. Bena Zebuluna kabakihata bantu ba mu Kitîlona anyi ba mu Nahalola; kadi Bena Kanâna bakashikama munkatshi muabo, bakabenzesha mudimu wa mulambu. Bena Ashe kabakihata bantu ba mu Ako, anyi bantu ba mu Sidona, anyi ba mu Alabâ, anyi ba mu Akiziba, anyi ba mu Heleba, anyi ba mu Lehoba; kadi Bena Ashê bakashikama munkatshi mua Bena Kanâna, bena buloba; bualu bua kabakabihata nansha. Bena Nafatale kabakihata bantu ba mu Bete-shemeshe, anyi ba mu Bete-anata; kadi bakashikama munkatshi mua Bena Kanâna, bena buloba; kadi Bena Bete-shemeshe ne Bena Bete-anata bakabakuatshila mudimu wa mulambu. Bena Amole bakasemesha Bena Dana ku mukuna, bualu bua kabakitabusha bua bahueke mu tshibanda; kadi Bena Amole bakashikama ku mukuna wa Helese, wa mu Ayalona, ne mu Shâlabima; kadi tshianza tshia Bena Yosefe tshiakabahita, bobo bakabakuatshila mudimu wa mulambu. Matshika a Bena Amole akabangila ku dibue dinene, akabanda tô ne ku mutu kua Akalabima. Muanjelo wa Yehowa wakafuma ku Gilegala, wakaya ku Bokima. Yeye wakamba ne, Nakanûmusha mu Ejipitu, nakalua nʼenu ku buloba bunakalaya bankambua benu; nakamba ne, Tshiena nshiha tshihungidi tshinakahunga nʼenu tshiendelele; nuenu kanuhungi tshihungidi ne bena buloba ebu; nutonkole bioshelu biabo. Kadi nuenu kanuakatumikila dî dianyi; nuakuenza nunku bua tshinyi? Bua bualu ebu nakanuambila kahidi ne, Tshiena mbihata ku mpala kuenu, kadi bobo nebikale bu meba mu mbese yenu, ne nzambi yabo neyikale bu buteyi kunudi. Hashishe bakambila muanjelo wa Yehowa Bena Isalele bonso mei â, bobo bakaha miadi, bakadila. Nunku bakidika muaba au ne, Bokima; bakashihelaku Yehowa nyama. Hashishe bakatuma Yoshua bantu, Bena Isalele bonso bakaya muntu ku buhianyi buandi muntu ku buhianyi buandi. Bantu bonso bakakuatshila Yehowa mudimu matuku onso a Yoshua, ne a bakulu bakadi bashala ne muoyo ku nyima kua Yoshua, bakatangilaku malu manene onso akenzela Yehowa Bena Isalele. Yoshua, muana mulume wa Nuna, muntu wa Yehowa, wakafua hakadiye ne bidimu lukama ne dikumi. Bakamujika ku mukalu wa buhianyi buandi mu Timenatahelese, ku mikuna ya mu Efelayima, ku nôde kua mukuna wa Gasha. Bantu bonso ba mu tshikondo atshi bakasangishibua kudi bankambua babo kabidi, ne ba mu tshikondo tshikuabo tshiakabalonda ku nyima kabakamanya Yehowa anyi mudimu munene wakenzeleye Bena Isalele. Bena Isalele bakenza malu akadi mabi ku mesu kua Yehowa, bakakuatshila Bala mudimu; bakalekela Yehowa Nzambi wa batatuʼabo, wakafunda nʼabo mu buloba bua Ejipitu; bakalonda nzambi mikuabo, nzambi ya bantu bakadi ha buihi nʼabo, bakayinamina; bakafikisha Yehowa munda. Bakalekela Yehowa, bakakuatshila Bala ne Ashatelota mudimu. Tshiji tshia Yehowa tshiakadi kudi Bena Isalele, ne yeye wakabafila mu bianza bia bahandi, bakabahaula; yeye wakabahana kudi bena lukuna bakadi ha buihi nʼabo; kabakamanya mua kuimana ku mpala kua bena lukuna babo kabidi. Kuonso kuakayabo tshianza tshia Yehowa tshiakadi kudibo bua kubenzela bibi bu muakamba Yehowa, ne bu muakaditshiha Yehowa kudibo; bakadi ne ntatu ya bungi. Yehowa wakabisha balumbuluishi, bakabasungila mu bianza bia bakadi babahaula. Bobo kabakunvuila balumbuluishi babo; kadi bakenza malu a masandi kudi nzambi yabo, bakayinamina; bobo bakasesuka lubilu mu nshila wakadi batatuʼabo bendamu hakadibo batumikila mikenji ya Yehowa; kadi bobo kabakenza nunku. Hakababishila Yehowa mulumbuluishi, hashishe Yehowa wakadi ne mulumbuluishi eu, wakabasungila mu bianza bia bena lukuna babo matuku onso a mulumbuluishi eu; bualu bua Yehowa wakadi ukudimuna mutshima wandi bualu bua kutua kua mikemu yabo yakatuabo hakadibo babakengesha ne hakadibo babatatshisha. Kadi hakafua mulumbuluishi, hashishe bobo bakalukila ku nyima, bakatamba batatuʼabo kuenza bibi, hakalondabo nzambi mikuabo bua kuyenzela mudimu ne bua kuyinamina; kabakalekela bienzedi biabo bibi anyi tshitshu tshiabo. Tshiji tshia Yehowa tshiakadi kudi Bena Isalele kabidi, ne yeye wakamba ne, Bualu bua tshisamba etshi tshiakashiha tshihungidi tshinakahunga ne batatuʼabo, kabakunvua dî dianyi, meme kabidi tshiena ngihata bisamba bia bantu ku mpala kuabo, biakashiya Yoshua hakafueye: bua meme kuteta nʼabo Bena Isalele bua kumanya ne bobo nebalamate nshila wa Yehowa bua kuendamu bu muakenza batatuʼabo. Nunku Yehowa wakashiya bisamba abi bia bantu mu buloba, kakabihata lubilu; yeye kabidi kakabafila mu tshianza tshia Yoshua. Ebi mbisamba bia bantu biakashiya Yehowa biakateteye nʼabi Bena Isalele, bonso bakadi kabayi bamanye nvita ya Bena Kanâna; anu bua bikondo bikuabo bia Bena Isalele kumanyabi nvita, bungi buabo kabuakadi bumanye nvita diambedi; â mmena abo: bakelenge batanu ba Bena Peleshete, ne Bena Kanâna bonso ne Bena Sidona, ne Bena Hiwi bakadi bashikama ku mukuna wa Lebanona, ku mukuna wa Bâla-hêmona tô ne ku mukalu wa Hamata. Bakabashiya bua kutetabo nʼabo Bena Isalele, bua kumanya ne bobo nebatumikile mikenji ya Yehowa yakeleye batatuʼabo kudi Mose. Bena Isalele bakashikama munkatshi mua Bena Kanâna ne Bena Hiti ne Bena Amole ne Bena Pelizi ne Bena Hiwi ne Bena Yebuse; bakangata bana babo bakashi bu bakashi babo, ne bakafua bana babo bakashi kudi bana babo balume, bakakuatshila nzambi yabo mudimu. Bena Isalele bakenza malu mabi ku mesu kua Yehowa, bakahua Yehowa, Nzambi wabo, muoyo, bakakuatshila Bâla ne Ashelota mudimu. Nunku tshiji tshia Yehowa tshiakadi kudi Bena Isalele, yeye wakabahana mu bianza bia Kushana-lishatayima, mukelenge wa mu Mesopotamia; Bena Isalele bakakuatshila Kudihana-lishatayima mudimu bidimu muanda mukulu. Kakadila Bena Isalele kudi Yehowa, Yehowa wakabisha Bena Isalele musunyi di, nguakabasungila, Oteniele mene, muana wa Kenaza, muakunyi wa Kaleba. Nyuma wa Yehowa wakamutulukila, yeye wakalumbuluila Bena Isalele; yeye wakaya kuluangana nvita, ne Yehowa wakafila Kushana-lishatayima, mukelenge wa mu Mesopotamia, mu tshianza tshiandi; tshianza tshiandi tshiakahita Kushana-lishatayima bukole. Buloba buakadi talalâ bidimu makumi anai. Oteniele, muana wa Kenaza, wakafua. Bena Isalele bakenza malu mabi ku mesu kua Yehowa tshiaku bidi; ne Yehowa wakakolesha Egelona, mukelenge wa Moaba, kudi Bena Isalele, bualu bua bobo bakenza malu mabi ku mesu kua Yehowa. Yeye wakasangisha Bena Amona ne Bena Amaleka kudiye yeye wakaya, bakashiha Bena Isalele, bakanyenga musoko wakadi ne mabue a ngashi. Bena Isalele bakakuatshila Egelona, mukelenge wa Moaba, mudimu bidimu dikumi ne muanda mukulu. Kadi bakadila Bena Isalele kudi Yehowa, Yehowa wakababishila musungidi, Ehuda, muana wa Gela, Muena Benyamina, muena luboko; Bena Isalele bakafila milambu mu bianza biandi bua kuyeye nʼai kudi Egelona, mukelenge wa Moaba. Ehuda wakatula muele wa nvita musakisha nseke ibidi, bule buau buakadi coudée umue; yeye wakaubuesha mu mukaba muinshi mua bilulu biandi ha lukundu lua ku tshianza tshia bukole. Yeye wakafila milambu kudi Egelona, mukelenge wa Moaba: Egelona wakadi ne mafuta a bungi. Hakashikisheye kufila milambu, yeye wakahingasha bambudi ba milambu kuabo. Yeye wakamba kuya, kadi wakatangila ku muaba wakadibo basongela mpingu ya mabue wakadi mu Gilegala, wakamba ne, Mukelenge, ndi ne dî dia kukuambila mu musokoko. Yeye wakamba ne, Anji kuhuwa. Bantu bonso bakadi bimana nʼandi bakumuka. Ehuda wakabuela muakadiye; yeye wakadi mushikame nkayandi mu nsubu wakadi kulu mu muaba mialala. Ehuda wakamba ne, Ndi ne dî dia Nzambi dia kukuambila. Yeye wakabika mu nkuasa wandi. Ehuda wakolola tshianza tshiandi tshia luboko, wakatula muele wakadi ha lukundu luandi lua ku tshianza tshia buhote; wakamu tua mu difu diandi; tshilabi tshia muele tshiakajibikidibua, ne mafuta andi akajimisha muele, bualu bua yeye kahatula muele ku difu diandi, ne muele wakahatuka ha nyima handi. Hashishe Ehuda wakahatuka mu tubanda, wakamuinshidila bibi bia ku nsubu wa kulu, wakela nsahi. Hakaluhukeye, bena mudimu ba mukelenge bakatua, bakatangila, ne monai, bibi bia ku nsubu wa kulu biakadi bihanga; Bakambilangana ne, Bulelela, yeye udi ubuikila makasa andi mu nsubu wa kulu. Bakamuindila tô ne bakabatuala bundu; kadi monai, yeye kakunzulula bibi bia ku nsubu wa kulu; hashishe bakangata luvunguia, ne hakunzululabo bibi, monai, mukelenge wabo wakadi muhone hanshi mufue. Kadi Ehuda wakahatuka hakadibo bamuindila, wakahitshila muaba wakadibo basongela mpingu ya mabue, wakanyema tô ne ku Seila. Hakahinganeye, yeye wakela mpungi ku mikuna ya mu Efelayima: ne Bena Isalele bakahueka nʼandi bafume ku mikuna, yeye wakaya ku mpala kuabo. Yeye wakabambila ne, Nundonde; bualu bua Yehowa wakafila bena lukuna benu, Bena Moaba, mu bianza bienu. Bobo bakahueka bamulonde, bakanyenga malobo a mu Yadene akadi kudi Bena Moaba, kabakitabusha bua muntu umue asabukeku. Ku tshikondo atshi bakashiha balume ba Bena Moaba bu binunu dikumi; buonso buabo bakadi bakole ne ba dikima; nansha muntu umue wakahanduka. Nunku Bena Moaba bakateketa dituku adi ku tshianza tshia Bena Isalele; buloba buakadi talalâ bidimu makumi muanda mukulu. Shamagâ, muana mulume wa Anata, wakabika ku nyima kuandi, yeye wakashiha Bena Peleshete nkama isambombo ne mutshi wa kusaka nʼau ngombe; yeye wakasungila Bena Isalele kabidi. Hakafua Ehuda, Bena Isalele bakenza malu mabi ku mesu kua Yehowa kabidi. Yehowa wakabahana mu bianza bia Yabina, mukelenge wa Bena Kanâna, wakadi ukokesha bantu mu Hasô; kapitene ka masalayi andi kakadi Sisela, wakadi mushikame mu Haloshete, munkatshi mua bisamba bia bende. Bena Isalele bakadila kudi Yehowa, bualu bua yeye wakadi ne makalu a biamu nkama tshitema, yeye wakatamba kukengesha Bena Isalele bidimu makumi abidi. Debola, muprofete wa Nzambi mukashi, mukashi wa Lapidota, wakadi ulumbuluila Bena Isalele ku tshikondo atshi. Yeye wakadi mushikame muinshi mua mabue a Debola, hankatshi ha Lama ne Betele ku mikuna ya Efelayima; Bena Isalele bakahanda kudiye bua yeye abalumbuluile. Yeye wakatuma mukenji, wakabikila Balaka, muana mulume wa Abinoama, ku Kedeshe-nafatale, wakamuambila ne, Yehowa, Nzambi wa Isalele, kakamba ne, Uye biebe ku luseke lua mukuna wa Tabô ne binunu dikumi bia bantu ba munkatshi mua Bena Nafatale ne Bena Zebulona, anyi? Meme nentume Sisela, kapitene ka masalayi a Yabina, kûdi ku musulu wa Kishona, ne makalu andi a nvita ne tshisumbu tshiandi tshinene; nemmufile mu bianza biebe. Balaka wakamukudimuna dî ne, Biwaya nganyi, nenye; kadi biwikala kuyi uya, tshiena nya. Yeye wakamba ne, Bulelela, nenye nʼebe, kadi luendu lûdi uya kaluena lukuvuisha butumbi bualu bua Yehowa neafile Sisela mu bianza bia mukashi. Debola wakabika, wakaya ne Balaka ku Kedeshe. Balaka wakabikila Bena Zebuluna ne Bena Nafatale ku Kedeshe; bantu binunu dikumi bakamulonda ku makasa andi; ne Debola wakaya nʼandi. Hebe, Muena Kena, wakatabuluka kudi Bena Kena bakuabo, bana ba Hobaba, tatuʼandi-muenu wa Mose, wakashimika ntenta yandi hehi ne mitshi ya telebinta ya mu Sânanima, udi hehi ne Kedeshe. Bakambila Sisela ne, Balaka, muana wa Abinoama, wakaya ku mukuna wa Tabô. Sisela wakasangisha makalu andi a biamu onso nkama tshitema, ne bantu bonso bakadi nʼandi, ku Haloshete wa munkatshi mua bisamba bia bende, tô ne ku musulu wa Kishona. Debola wakambila Balaka ne, Bika biebe, bualu bua Yehowa wakafila Sisela mu bianza biebe lelu; Yehowa kena mudianjile ku mpala kuebe, anyi? Nunku Balaka wakahueka mufume ku mukuna wa Tabô, ne bantu binunu dikumi bakamulonda ku nyima. Yehowa wakatatshisha Sisela ne makalu andi onso ne bantu bandi bonso ku miele ya nvita ya Balaka; ne Sisela wakumuka ku dikalu diandi, wakanyema ku makasa andi. Kadi Balaka wakalonda ku nyima kua makalu ne kua bantu tô ne ku Haloshete wa munkatshi mua bisamba bia bende; bantu bonso ba Sisela bakafua ku miele ya nvita; nansha umue wabo wakahanduka. Kadi Sisela wakanyema ku makasa andi ku ntenta wa Yaele, mukashi wa Hebê, Muena Kena; bualu bua ditalala diakadi hankatshi ha Yabina, mukelenge wa Hasô, ne nsubu wa Hebê, Muena Kena. Yaele wakaluhuka bua kusangakena ne Sisela, wakamuambila ne, Buelamu, mukelenge wanyi, ubuele munu, kutshinyi. Yeye wakabuela muakadiye mu ntenta wandi, ne yeye wakamubuikila mu tshiata. Yeye wakamuambila ne, Ndi nkusengelela ne umpe tuima tukese, bualu bua ndi ne nyota. Yeye wakabutula mulondo wa mabele, wakamunuisha, wakamubuikila kabidi. Yeye wakamuambila ne, Wimane ku mushiku wa ntenta, ne bialua muntu bua kukukonka ne, Mulume udiku, anyi? wewe umukudimune dî ne, Nansha. Hashishe Yaele, mukashi wa Hebê, wakangata mutshi wa mulondo wa ntenta, ne marteau mu tshianza tshiandi, wakaya kudiye bitekete bitekete, wakamukumina mutshi au ha luhuhu luandi; ne mutshi wakahatuka, wakabuela mu buloba; bualu bua yeye wakadi mulale tshihuka, mutambe kuhungila, nunku wakafua. Monai, hakadi Balaka ulonda ku nyima kua Sisela, Yaele wakaluhuka bua kusangakena nʼandi, wakamuambila ne, Lua biebe, nenkuleshe muntu ûdi ukeba. Yeye wakaya kudiye, wakatangila Sisela mulale hanshi mufue ne mutshi wa mulondo wa ntenta ha mpuhu yandi. Nunku Nzambi wakalekesha Yabina, mukelenge wa Kanâna, ku mesu kua Bena Isalele dituku adi. Tshianza tshia Bena Isalele tshiakadia, ne tshiakahuela Yabina, mukelenge wa Kanâna, tô ne hakabutulabo Yabina, mukelenge wa mu Kanâna. Hashishe Debola ne Balaka, muana mulume wa Abinoama, bakimba musambu dituku adi ne: Bualu bua balombodi bakalombola Bena Isalele, ne bualu bua bantu bakadifila bua disua diabo, nuvudishile Yehowa disanka! Unvuai, nuenu bakelenge, telejai matshu, nuenu bana ba bakelenge; meme mene, meme nengimbile Yehowa musambu; nengimbile Yehowa, Nzambi wa Isalele, musambu wa kumutumbisha nʼau. Yehowa, hawakumuka ku Sei, hawakafuma ku budimi bua Edome, buloba buakazakala, ne diulu diakamba kuhona, e, matutu akamatshisha nvula. Mikuna minene yakazakala ku mesu kua Yehowa; mukuna au munene wa Sinai mene ku mesu kua Yehowa, Nzambi wa Isalele. Mu matuku a Shamagâ, muana mulume wa Anata, ne mu matuku a Yaele, nshila minene kayakadi mibuwa, ne bena luendu bakenda mu nshila mikonyangale. Bakelenge bakahuwa mu Isalele, bakahuwa mene tô ne hanakabika, meme Debola mene; nakabika bu muledi wa bana mu Isalele. Bobo bakasungula nzambi mihia-mihia, ne hashishe nvita yakadi ku bibi bia musoko; bakamona ngabu anyi difuma munkatshi mua binunu makumi anai bia Bena Isalele, anyi? Mutshima wanyi udi kudi bakokeshi ba mu Isalele bakadifila munkatshi mua bantu bua disua diabo; nuvudishile Yehowa disanka. Nuenu, badi babanda ha nyima ha tubalu tutoke, ambai bualu; nuenu bantu badi bashikama ha biala bia bubanji, ne nuenu badi benda mu nshila, ambai bualu ebu. Ku muaba wakadi mutoyi wa bena nvita bakadi ne mata mu miaba yakasunabo mai, nebambilanganeku bua malu mimpe akenza Yehowa; bua bienzedi biandi bimpe bia bukokeshi buandi mu Isalele. Hashishe bantu ba Yehowa bakaya ku bibi bia misoko. Tabala, tabala, Debola: Tabala, tabala, imba musambu; bika, Balaka, lombola bakuatshibua, wewe, muana wa Abinoama. Hashishe tshituha tshia bakelenge bakashala ne bantu bakahueka; ne Yehowa wakalua kundi bua kuluanganeye ne bantu bakole; bakadi ne muji wabo mu Amaleka bakumuka mu Efelayima, ku nyima kuebe, Benyamina, wakahueka munkatshi mua bantu bebe; bakokeshi bakafuma ku Maki, ne bafundi bakafuma mu Zebulona. Bana balume ba bakelenge banene ba mu Yisakâ bakadi ne Debola; bu muakadi Yisakâ, nunku bu muakadi Balaka; bakamulonda mu makasa andi mu bibanda lubilu. Ku tusulu tua mai tua Lubena bakahangidisha meji manene mu mitshima yabo. Wakashikama munkatshi mua mpangu ya mikoko bua kunvua miadi yai bualu kai? Ku tusulu tua mai tua Bena Lubena, bakahangidisha meji manene mu mitshima yabo. Bena Gilada bakashikama dishiya dia Yadene; Bena Dana bakashala anu mu matu manene bualu kai? Bena Ashê bakatshidi bashikama ku muelelu wa mai manene, bakashikama ku tusulu tuabo. Bena Zebuluna bakadi bu bantu bakamba kufila mioyo yabo tô ne ku lufu, ne Bena Nafatale bakamba kufuila ha mutu ha mpata mile. Bakelenge bakaluhuka, bakaluangana; hashishe bakelenge ba mu Kanâna bakaluangana mu Tanaka hehi ne mai a Megido; bobo kabakaheta bintu bu difutu. Mitoto ya mu diulu yakaluangana, mitoto ya mu nshila yai yakaluangana ne Sisela. Musulu wa Kishona, musulu au wa kale kale, musulu wa Kishona mene mene wakabahita bukole. Mutshima wanyi, enda ne bukole. Hashishe tubalu tuakatua mikono yatu hanshi, ditua diatu, ditua diatu ne bukole. Muanjelo wa Yehowa wakamba ne, Ela Meloze mulau, ela bena musoko au milau mikole bualu bua bobo kabakalua bua kukuatshisha Yehowa: bua kukuatshisha Yehowa ku mpala kua bantu bakole. Yaele, mukashi wa Hebê, Muena Kena, asankishibue ku mutu kua bakashi bonso; yeye neikale ne disanka ku mutu kua bakashi badi bashikame mu ntenta. Yeye wakamulomba mai, kadi yeye wakamuha mabele; wakalua kudiye ne manteke mu dilonga dia mukelenge. Yeye wakolola tshianza tshiandi ku mutshi wa mutondo wa ntenta, wakolola tshianza tshiandi tshia bukole ku marteau a bena mudimu; yeye wakakumina Sisela ne marteau, wakamukumina ku mutu kuandi; e, wakatubula ne wakamukuma ha mpuhu yandi. Yeye wakatua mpala wandi hanshi ku makasa andi, wakahona, mulale hanshi; wakakuma mpala hanshi ku makasa andi, wakalala hanshi; hakakumeye mpala wandi hanshi, yeye wakahonahu mufue. Mamu wa Sisela wakadi mutangile ha disoso dia nsubu, udidila ha masoso akadi ha madidishi ne, Dikalu diandi didi dijanguluka musangu mule nunku bualu kai? Nkata ya makalu andi adi ajanguluka bualu kai? Bakashi benji ba mudimu wandi ba lungenyi bakamukudimuna dî; yeye mene wakadikudimuina dî, wakamba ne, Kabena basangana bintu biakunyengabo kudi bena lukuna, anyi? Kabena babiabanyangana: mushikankunde umue anyi ibidi kudi mulume yonso, bilulu bia mekala mimpe bia kuha Sisela, bilulu bia mekala mimpe bizola, tshilulu tshimpe tshimue anyi bibidi bizola, bia kuela mu nshingu mua mutshimunyi, anyi? Yehowa, bantu bonso badi nʼebe lukuna bafue nunku; kadi bantu badi bakusue bikale bu diba habandadi ne bukole buadi buonso. Buloha buakadi talalâ bidimu makumi anai. Bena Isalele bakenza malu mabi ku mesu kua Yehowa; ne Yehowa wakabafila mu bianza bia Bena Midiyana bidimu muanda mutekete. Tshianza tshia Bena Midiyana tshiakahita Bena Isalele bukole; bualu bua Bena Midiyana, Bena Isalele bakadimbila mena mu mikuna ne mbuebue, bakadiashila ngumbu ya mabue. Hakakuna Bena Isalele bintu mu buloba, hashishe Bena Midiyana ne Bena Amaleka ne bantu ba ku esete bakatua kudibo, bakafila kubalesha; bakabatshintshimika, bakahaula bintu biakamena mu buloba, tô ne nakafikabo ku Gaza; kabakashila Bena Isalele tshia kudia, nansha mukoko nansha ngombe nansha mpunda. Bualu bua hobo bakulua ne bimuna biabo ne ntenta yabo; bakafila bu bungi bua mikumbi; hobo ne tumelo tuabo kabakabadibua; bakafila mu buloba bua kububutula. Bena Isalele bakatamba kulua bahele bualu bua Bena Midiyana; ne Bena Isalele bakadila kudi Yehowa. Kakadila Bena Isalele kudi Yehowa bualu bua Bena Midiyana, hashishe Yehowa wakatumina Bena Isalele muprofete; yeye wakabambila ne, Yehowa, Nzambi wa Isalele, udi wamba ne, Meme nakafuma nʼenu mu Ejipitu, nakanuhatula mu nsubu wa buhika; nakanusungila mu bianza bia Bena Ejipitu ne mu bianza bia bantu bonso bakadi banukengesha, nakabihata ku mesu kuenu, nakanuha buloba buabo. Nakanuambila ne, Meme ndi Yehowa, Nzambi wenu; kanutshinyi nzambi ya Bena Amole, bena buloba bunudi bashikame. Kadi nuenu ka-nuakunvua dî dianyi. Muanjelo wa Yehowa wakalua, wakashikama muinshi mua mutshi wa telebinta wa mu Ofela, mu buloba bua Yoasha, muena Abiezê; ne muanʼandi Gideona wakadi ushihula blé mu tshikaminu tshia tumuma bua kuyisokoka kudi Bena Midiyana. Muanjelo wa Yehowa wakamueneka kudiye, wakamuambila ne, Yehowa udi nʼebe, wewe muntu mukole wa bukitu. Gideona wakamukudimuna dî ne, Mukelenge wanyi, bikala Yehowa nʼetu, malu â onso akatukuata bualu kai? Malu andi a kukema akatuambilabo kudi bakaku betu ehi, hakatuambilabo ne, Yehowa kakatuhatula mu Ejipitu, anyi? Kadi katataka Yehowa wakatula dia, wakatuma mu bianza bia Bena Midiyana. Yehowa wakatshunguluka kudiye, wakamuambila ne, Ya mu bukole ebu mbuebe, usungile Bena Isalele mu bianza bia Bena Midiyana; tshiakakutuma, anyi? Yeye wakamukonka ne, Mukelenge, meme nensungile Bena Isalele munyi? Mona, ba mu diku dianyi badi bahita Bena Manashe bonso bahele, ne meme ndi mutambe buhuekele mu nsubu wa tatu wanyi. Yehowa wakamuambila ne, Bulelela, meme nengikale nʼebe, ne wewe neushihe Bena Midiyana bu muntu umue. Yeye wakamuambila ne, Bingikala musangane diakalengele ku mesu kuebe, undeshe tshimanymu ne, Nguewe mene udi wakula nʼanyi. Ndi nkusengelela ne, Kumuki aha tô ne hanalua ne matabisha anyi a kuteka ku mpala kuebe. Yeye wakamba ne, Nenkuindile tô ne hawalua kabidi. Gideona wakabuela mu nsubu, wakalongolola muana wa mbushi ne mikata ya tshihiminu tshia bukula buakadi kabuyi ne luevene; wakateka munyinyi mu tshisaka ne nsuhu mu luesu, wakalua nʼabi kudiye muinshi mua mutshi, wakabifila kudiye. Muanjelo wa Nzambi wakamuambila ne, Angata munyinyi ne mikata idi kayiyi ne luevene, ubiteke ha mutu ha dibue edi, witshikishe nsuhu. Yeye Wakenza nunku. Hashishe muanjelo wa Yehowa wakatua lusongo lua mulangala wakadi mu tshianza tshiandi ha munyinyi ne ha mikata yakadi kayiyi ne luevene; ne kahia kakahatuka mu dibue, kakosha munyinyi ne mikata yakadi kayiyi ne luevene; muanjelo wa Yehowa wakumuka ku mesu kuandi. Gideona wakamanya ne, Yeye udi muanjelo wa Yehowa; Gideona wakamba ne, Aka, Mukelenge Yehowa! Bualu bua nakumonangana ne muanjelo wa Yehowa mpala ha mpala. Yehowa wakamuambila ne, Ditalala dikale kûdi, kutshinyi, wewe kuena ufila. Hashishe Gideona wakibakilaku Yehowa tshioshelu, wakatshibikila ne, Yehowa-Shaloma; tshitshidiku tô ne lelu mu Ofela wa Bena Abiezê. Butuku abu mene Yehowa wakamuambila ne, Wangate ngombe wa tatu webe, ngombe wandi muibidi bidimu muanda mutekete, ushimbule tshioshelu tshia Bâla tshidi tatu webe nʼatshi, utahe mutshi wa Ashela udi hehi nʼatshi, wibakile Yehowa, Nzambi webe, tshioshelu ha mutu ha dibue edi, mu muaba mulongolola, wangate ngombe au muibidi, umufileku bu mulambu wa kuosha ha kahia ne nkunyi ya mutshi wa Ashela uwataba. Hashishe Gideona wakangata bena mudimu bandi dikumi, wakenza bu muakamuambila Yehowa; bualu bua yeye wakadi nutshine ba mu nsubu wa tatu wandi, ne bena musoko kabidi, yeye kakenza bualu ebu mu munya, kadi wakabuela mu butuku. Bakabika bantu ba mu musoko ne dinda dionso, bakamona ne tshioshelu tshia Bâla tshiakadi tshishimbula, ne mutshi wa Ashela wakadi ha buihi nʼatshi wakadi mutaha, ne hakamana kufila ngombe muibidi ha tshioshelu tshiakasabo. Bakakonkangana ne, Wakuenza bualu ebu nganyi? Hakebeshabo ne hakakonkanganabo, bakamba ne, Gideona, muana wa Yoasha, nguakuenza bualu ebu. Hashishe bantu ba mu musoko bakambila Yoasha ne, Hatula muanʼebe, afue biandi, bualu bua yeye wakashehula tshioshelu tshia Bâla, ne bualu bua yeye wakataha mutshi wa Ashela wakadi ha buihi nʼatshi. Yoasha wakambila bantu honso bakadi bamunguna ne, Nudi basue kuakuila Bâla, anyi? Nudi basue kumusungila, anyi? Muntu udi musue kumubila nvita afue biandi dinda edi; bikaleye nzambi, adiakuile, bualu bua bakashimbula tshioshelu tshiandi. Nunku bakabanga kumubikila dituku adi ne, Yelubâla, bamba ne, Bala amuluishe bualu bua yeye wakasungula tshioshelu tshiandi. Hashishe Bena Midiyana bonso ne Bena Amaleka ne bantu bonso ba ku esete bakadisangisha hamue; bakasabuka, bakasa tshitudilu mu tshibanda tshia Yizelele. Kadi Nyuma wa Yehowa wakatuela Gideona; yeye wakela mpungi ne Bena Abiezê bonso bakadisangisha kudiye. Yeye wakatumina Bena Manashe bonso bamessager, ne bobo bakadisangisha kudiye kabidi. Wakabatumina Bena Ashe ne Bena Zebuluna ne Bena Nafatale, ne bobo bakahanda bua kusangila nʼabo. Gideona wakambila Nzambi ne, Biwasua kusungila Bena Isalele ku tshianza tshianyi bu muwakamba, tangila, nenteke miosa ya mikoko hanshi mu tshishihuidi; bikala mume anu ha miosa ne buloba buonso budi bûme, hashishe nemmanye ne, Wewe neusungile Bena Isalele ku tshianza tshianyi bu muwakamba. Bualu ebu buakenjibua; bualu bua yeye wakabika ne dinda dionso, wakakama miosa, wakanyenga mume wakadi mu miosa, dilonga dîa-kûla tente ne mai. Gideona wakambila Nzambi ne, Tshiji tshiebe katshikadi kundi, nengakule anu musangu eu umue; ndi nkusengelela ne meme ntete musangu mukuabo ne miosa ei; witabusha ne miosa nkayai ikale miume, ne mume wikale ha buloba buonso. Nzambi Wakenza nunku butuku abu; bualu bua miosa yakadi miume nkayai, ne mume wakadi ha buloba buonso. Hashishe Yelubâla, udibo babikila ne, Gideona kabidi, ne bantu bonso bakadi nʼandi, bakabika ne dinda dionso, bakasa tshitudilu tshiabo ku mpokolo wa mai a Haloda; tshitudilu tshia Bena Midiyana tshiakadi ku luseke luabo lua ku node ku mukuna wa Mole tô ne mu tshibanda. Yehowa wakambila Gideona ne, Bantu badi nʼebe badi bahita bungi bua meme kufila Bena Midiyana mu bianza biabo; bobo nebadileshe ku mesu kuanyi, badiamba ne, Tuakudisungila ne bianza bietu. Wambile bantu bonso ku matshu abo ne, Yonso udi ne dishina ne kuikala, alukile, ahingane biandi ku mukuna wa Gilada. Bantu binunu makumi abidi ne bibidi bakahingana, ne binunu dikumi bia bantu biakashala. Yehowa wakambila Gideona kabidi ne, Bantu batshidi batamba bungi; uhueke nʼabo ku mai, nenkutetshileboku; hashishe muntu wakuambila ne, Aye nʼebe, neaye biandi nʼebe; ne muntu wakuambila ne, Kayi nʼebe, kayi nʼebe nansha. Nunku yeye wakalua ne bantu bonso ku mai; Yehowa wakambila Gideona ne, Yonso udi ulaka mai ne ludimi luandi bu mudi mbua ulaka, wewe neumuteke ha buandi; ne muinu yonso udi utua binu hanshi bua kunueye mai, umuteke ha buandi kabidi. Bungi bua bantu bakalaka, bateke bianza ku mishiku, buakadi balume nkama isatu; kadi bantu bonso bakuabo bakatua binu hanshi bua kunuabo mai. Yehowa wakambila Gideona ne, Neufile Bena Midiyana mu tshianza tshiebe, nenkusungile kudi bantu aba nkama isatu bakalaka mai; bantu aba bonso bakuabo baye, muntu ku muaba wandi muntu ku muaba wandi. Nunku bantu bakangata bia kudia ne mpungi mu bianza biabo; yeye wakatuma Bena Isalele bakuabo muntu ku ntenta wandi muntu ku ntenta wandi; wakashala anu ne bantu aba nkama isatu; tshitudilu tshia Midiyana tshiakadi kuinshi kuandi mu tshibanda. Butuku abu mene Yehowa wakamuambila ne, Bika biebe, hueka ku tshitudilu tshiabo, bualu bua nakabifila mu bianza biebe. Kadi biwatshina mua kuya nkayebe, uye ku tshitudilu ne Pula, muena mudimu webe; wewe neunvue mei adibo bambilangana; hashishe bianza biebe nebikoleshibue bua kuhueka mu tshitudilu. Hashishe yeye wakahueka ne Pula, muena mudimu wandi, tô ne kunfudilu kua bena nvita bakadi mu tshitudilu. Bena Midiyana ne Bena Amaleka ne bantu bonso ba ku esete bakadi balale mu tshibanda bu mikumbi bua bungi buaho. Kabakamanya mua kubala tumelo tuabo, bungi bualu buakadi bu nsenga ya ku muelelu wa mai manene. Hakafika Gideona kudibo, wakasangana muntu wakadi wawila mukuabo tshilota tshiandi; yeye wakamuambila ne, Nakalota tshilota, nakatangila mutanda wa bidia bia orge wenda ubunguluka mu tshitudilu tshia Midiyana, wakadikuma ku ntenta, ntenta wakuhuka, wakatua mutu muinshi, wakabataha. Muena kuabo wakamuambila ne, Ebu kambualu bukuabo, anu muele wa nvita wa Gideona, muana wa Yoasha, Muena Isalele; Nzambi wakamana kufila Midiyana ne musumba wandi wonso mu tshianza tshiandi. Kakunyua Gideona kuaula kua tshilota ne kukudimuna kuatshi, hashishe yeye wakatendelela, wakahingana ku tshitudilu tshia Bena Isalele, wakamba ne, Bikai, bualu bua Yehowa wakafila musumba wa Bena Midiyana mu bianza bienu. Yeye wakatahulula bantu nkama isatu bisumbu bisatu, wakabaha mpungi mu bianza biabo bonso ne milondo munda mutuhu ne bimunyi mu milondo. Yeye wakabambila ne, Nuntangile meme, nuenze bu mungenza; ne monai, hanalua ku butshika bua tshitudilu, hashishe nenuenze bu mungenza. Hangela bianyi mpungi, meme ne bonso badi nʼanyi, hashishe nuenu kabidi nuele mpungi ku matshika onso a tshitudilu, nuambe ne, Bualu bua Yehowa ne bua Gideona. Nunku Gideona ne lukama lua bantu bakadi nʼandi, bakalua ku butshika bua tshitudilu mundankulu hakatekabo bansentedi bahia-bahia anu musangu muihi; bakela mpungi, bakashiha milondo yakadi mu bianza biabo. Bantu ba mu bisumbu bisatu bakela mpungi, bakashiha milondo, bakakuata bimunyi mu bianza biabo bia bakashi ne mpungi mu bianza bia balume bua kuyela; bakela mbila ne, Muele wa nvita wa Yehowa ne wa Gideona. Bakimana muntu ha muaha wandi muntu ha muaba wandi, banyunguluke tshitudilu; musumba wonso wakanyema; bakela mbila, bakabihata. Bantu aba nkama isatu bakela mpungi; Yehowa wakabaluishisha muntu ne mukuandi nvita, ne musumba wonso; musumba wonso wakanyema tô ne ku Bete-shita ku luseke lua Zelala tô ne ku butshika bua Abele-mehola hehi ne Tabata. Bena Isalele ba mu Nafatale ne Ashe ne Manashe bakadisangisha, bakalonda Bena Midiyana. Gideona wakatuma ba-messager kudi Bena Efelayima ba ku mikuna ne, Luai kuluisha Bena Midiyana, nunyenge mai adi ku mpala kuabo tô ne ku Bete-bala ne ku Yadene. Nunku Bena Efelayima bakadisangisha hamue, bakanyenga mai onso tô ne ku Bete-bala ne ku Yadene. Bakakuata bana ba mukelenge wa Midiyana babidi, Oleba ne Zêbe; bakashiha Oleba ku dibue dia Oleba ne bakashiha Zêbe ku tshikaminu tshia Zêbe; bakihata Bena Midiyana. Bakalua ne mutu wa Oleba ne wa Zêbe kudi Gideona dishiya dia Yadene. Bena Efelayima bakamuambila ne, Bualu kai wakatuenzela nunku, kuakatubikila hawakaya kuluangana ne Bena Midiyana? Bakamutandisha bikole. Yeye wakabakonka ne, Bualu kai bunakuenza budi butamba bunuakuenza? Kuhuola kua tumuma tua nvinyo tua Efelayima kakuena kuhita kuhuola kua tumuma tua Abiezê buimpe, anyi? Nzambi wakafila bana ba mukelenge wa Midiyana, Oleba ne Zêbe, mu bianza bienu; meme ndi mumanye mua kuidikisha bualu buanyi ne bualu buenu, anyi? Hakambeye dî edi, tshiji tshiabo tshiakashika kudiye. Gideona ne bantu bandi nkama isatu bakadi nʼandi bakalua ku Yadene, bakasabukaku, bahungile, kadi bakatshidi babihata. Yeye wakambila bantu ba mu Sukota ne, Ndi nnusengelela ne numpe mitanda ya bidia bua bantu badi nʼanyi. Bualu bua bobo badi bahungile ne ntshidi ngihata Zêba ne Salemuna, bakelenge ba Midiyana. Bakelenge ba mu Sukota bakamuambila ne, Bianza bia Zêba ne Salemuna bidi mu bianza biebe katataka bua tuetu tukuhe bidia bua bena nvita bebe, anyi? Gideona wakamba ne, Hashikisha Yehowa kufila Zêba ne Salemuna mu bianza bianyi, nenkande minyinyi yenu ne meba a mu tshihela ne mingonge. Wakumukaku, wakaya ku Penuele; wakabambila muomumue; ne bakelenge ba mu Penuele bakamukudimuna anu di diakamba Bena Sukota. Yeye wakambila bantu ba mu Penuele ne, hanahingana ne ditalala nenshimbule tshibumba etshi. Zêba ne Salemuna bakadi mu Kakô, ne misumba yabo yakadi nʼabo, bu binunu dikumi ne bitanu, bonso bakadi bashala ba mu musumba wa bantu ba ku esete; bualu bua bena nvita bu binunu lukama ne makumi abidi bakahona bafue. Gideona wakabanda mu nshila udi uyila kudi badi bashikama mu ntenta ku esete kua Noba ne Yogebeha, wakashiha musumba wabo, bualu bua musumba wakadi mu muaba mukole. Zêba ne Salemuna bakanyema; yeye wakabihata, wakakuata Zêba ne Salemuna, bakelenge babidi ba Midiyana, wakatatshisha musumba wabo wonso. Gideona, muana wa Yoasha, wakalua mufume ku nvita ku mukuna wa Helese. Yeye wakakuata nsongalume wa Bena Sukota, wakamuebesha malu; yeye wakamufundila mena a bakelenge ba mu Sukota ne bakulu babo kabidi makumi muanda mutekete ne muanda mutekete. Yeye wakalua kudi Bena Sukota, wakamba ne, Tangilai Zêba ne Salemuna banuakanseka ne, Bianza bia Zêba ne Salemuna bidi mu bianza biebe katataka bua tukuhe bidia bua bantu bebe badi bahungile, anyi? Yeye wakakuata bakulu ba mu musoko ne meba a mu tshihela ne mingonge, yeye wakatuisha nʼabo Bena Sukota. Yeye kabidi wakashehula tshibumba tshia mu Penuele, wakashiha bena musoko. Hashishe yeye wakambila Zêba ne Salemuna ne, Bantu banuakashiha ku Tabô bakadi ba mushindu kai? Bakamukudimuna ne, Bakadi bu wewe mene; muntu ne muntu bakadi bafuanangana ne bana ba mukelenge. Yeye wakabambila ne, Bobo bakadi bana betu, bana ba mamu wanyi mene. Bu mudi Yehowa ne muoyo, bu nuenu babashiye ne muoyo, meme tshiakadi kunushiha. Yeye wakambila Yetê, muanʼa bute wandi, ne, Bika, ubashihe. Kadi nsongalume kahatula muele wandi wa nvita, yeye wakatshina bualu bua yeye wakatshidi nsongalume. Hashishe Zêba ne Salemuna bakamuambila ne, Bika biebe, unshihe, bualu bua bu mudi mulume mbu mudi bukole buandi kabidi. Gideona wakabika, wakashiha Zêba ne Salemuna; yeye kabidi wakangata bilenga biakadi mu nshingu ya tumelo tuabo. Hashishe balume ba mu Isalele bakambila Gideona ne, Utukokeshe; ne wewe ne muanʼebe mulume, ne muana wa muanʼebe mulume kabidi; bualu bua wewe wakatusungila mu bianza bia Bena Midiyana. Gideona wakabambila ne, Tshiena nnukokesha ne muana wanyi kena unulesha; Yehowa neanuleshe. Gideona wakabambila ne, Ndi musue kunulomba tshintu, muntu ne muntu bampe tukanu tua ku matshu tuakanyengabo mu nvita. (Bobo bakadi ne tukanu tua or ku matshu bualu bua bobo bakadi Bena Yishemaele.) Bobo bakamukudimuna ne, Netukuhetu ne disanka. Bakadisha tshilulu hanshi ne muntu ne muntu bakelamu tukanu tuakanyengabo mu nvita. Bujitu bua or ya tukanu tua ku matshu tuakalombeye buakadi nshekele ya or tshinunu tshimue ne nkama muanda mutekete; ku mutu kua bintu ebi kuakadi bilenga bia ku mitu ya bantu ne tukanu tua ku matshu ne bilulu bifike biakaluatabo kudi bakelenge ba Midiyana ne nkanu ya biamu yakadi mu nshingu ya tumelo tuabo. Gideona Wakenza efoda ne bintu ebi, wakamuteka mu Ofela, musoko wandi; Bena Isalele bonso bakendaku masandi; nunku efoda eu wakalua bu buteyi kudi Gideona ne ba mu nsubu wandi. Nunku Bena Midiyana bakadi batambibue bukole kudi Bena Isalele, kabakabisha mitu yabo kabidi. Buloba buakadi talalâ bidimu makumi anai mu matuku onso a Gideona. Yelubâla, muana wa Yoasha, wakaya, wakashikama mu nsubu muandi. Gideona wakadi ne bana balume makumi muanda mutekete bakaleleye, bualu bua yeye wakadi ne bakashi ba bungi. Mukashi, muhika wandi wakadiye mubake, wa mu Shekeme, wakamulelela muana wa balume kabidi, wakamuidika dina ne Abimeleke. Gideona, muana wa Yoasha, wakafua biandi ku bununu buandi, bakamujika mu majambu a tatu wandi Yoasha mu musoko wa Ofela wa Bena Abiezê. Hakafua Gideona, Bena Isalele bakalukila ku nyima, bakalonda malu a masandi kudi Babala, ne bakavuisha Bâla-belita nzambi wabo. Bena Isalele kabakavuluka Yehowa, Nzambi wabo, nguakabasungila mu bianza bia bantu bakadi nʼabo lukuna bonso ba ku nseke yonso; kabakalesha ba mu nsubu wa Yelubâla, udi Gideona mene, luse bu malu mimpe akalesheye Bena Isalele. Abimeleke, muana wa Yelubâla, wakaya ku Shekeme kudi bana babo ne mamu wandi, yeye wakabambila ne bantu bonso ba mu nsubu wa tatu wa mamu wandi ne, Ntu nnusengelela ne, Nukonke bena Shekeme bonso mu matshu abo ne, Bualu kai budi butambe buimpe ku mesu kuenu bua bana balume bonso ba Yelubâla badi makumi muanda mutekete banukokeshe, anyi bua muntu umue anukokeshe? Nuvuluke kabidi ne meme ndi bu mufuba wa mifuba yenu ne bu musunyi wa misunyi yenu. Bana babo ne mamu wandi bakamuambila mei au onso mu matshu a bena Shekeme bonso; ne mitshima yabo yakasua kulonda Abimeleke; bualu bua bakamba ne, Yeye udi muanʼetu. Bakamuha argent makumi muanda mutekete ya mu nsubu wa Bâla-belita; ne Abimeleke wakafuta nʼai bantu bahote ne ba hatuhu bakamulonda. Wakaya ku nsubu wa tatu wandi wa ku Ofela, wakashiha bana babo bonso, bana ba Yelubâla, makumi muanda mutekete, ha dibue dimue. Kadi Yotama, muanʼa mukala wa Yelubâla, wakashala, bualu bua yeye wakasokoma. Bena Shekeme bonso bakadisangisha hamue ne bonso ba mu nsubu wa Milo bakaya, bakateka Abimeleke mu bukelenge, muinshi mua mutshi wa telebinta ku dibue dinene diakadi mu Shekeme. Hakambabo Yotama bualu ebu, yeye wakaya, wakimana ha mutu ha mukuna wa Gelizima, wakabandisha dî diandi, wakabambila ne, Nuenu bena Shekeme, nungunvuile, bua Nzambi anufuile. Kale mitshi yonso yakadisangisha bua kusungula mukelenge wa ku mutu kuai. Yakambila mutshi wa olive ne, Utukokeshe. Kadi mutshi wa olive wakayambila ne, Nshiye mafuta anyi andi ntumbisha nʼau Nzambi ne bantu kabidi, bua kuya kuhehukahehuka ku mutu kua mitshi mikuabo, anyi? Mitshi yonso yakambila mutshi wa nfigi ne, Lua biebe, ubukokeshe. Kadi mutshi wa nfigi wakayambila ne, Nshiya kushemakana kuanyi ne mamuma anyi mimpe bua kuya kuhehukahehuka ku mutu kua mitshi mikuabo, anyi? Mitshi yakambila muonshi wa tumuma ne, Lua biebe, udikokeshe. Kadi muonshi wakayambila ne, Nshiye nvinyo yanyi mihia-mihia, idi isankisha Nzambi ne bantu kabidi, bua kuya kuhehukahehuka ku mutu kua mitshi yonso mikuabo, anyi? Hashishe mitshi yonso yakambila mutshi wa meba ne, Lua biebe, utukokeshe. Mutshi wa meba wakambila mitshi yonso ne, Binuasua kungela manyi ha mutu bua meme kuikala mukelenge ku mutu kuenu bulelela, hashishe nulue nushikame mu diledi dianyi, kadi binuahidia, kahia kahatuke ku mutshi wa meba bua kuosha mitshi ya cédres ya mu Lebanona. Nunku binuenza bulelela ne buimpe, hanuakuteka Abimeleke mu bukelenge, ne binuenzela Yelubâla ne ba mu nsubu wandi bimpe, ne binuamufuta bu muakadi difutu diandi; (bualu bua tatu wanyi wakanuluila nvita, wakamba kunufuila ne muoyo wandi, wakanusungila mu bianza bia Bena Midiyana; ne nuenu nuakabika ku mpala kua nsubu wa tatu wanyi lelu, nuakushiha bana bandi balume makumi muanda mutekete ha dibue dimue, nuakateka Abimeleke, muana wa mukashi, muenji wa mudimu wandi, mu bukelenge ku mutu kua bena Shekeme, bualu bua yeye udi muanʼenu) binuikala benzele Yelubâla ne ba mu nsubu wandi bualu bulelela ne buimpe lelu, nusanke bualu bua Abimeleke ne yeye asanke bualu buenu kabidi; kadi binuikala kanuyi benze bimpe, kahia kahatuke kudi Abimeleke bua kuosha bena Shekeme ne ba mu nsubu wa Milo; kahia kahatuke kabidi kudi bena Shekeme ne kudi ba mu nsubu wa Milo bua kuosha Abimeleke kabidi. Hashishe Yotama wakumuka, wakanyema, wakaya ku Be, wakashikamaku bualu bua dishina dia Abimeleke muanʼabo. Abimeleke wakadi mukelenge ku mutu kua Bena Isalele bidimu bisatu. Nzambi wakatuma nyuma mubi hankatshi ha Abimeleke ne bena Shekeme; bena Shekeme bakayila Abimeleke ku tshitungu; bua bualu bubi buakenzeleye bana ba Yelubâla makumi muanda mutekete ne mashi abo kabidi bihingane ku mutu kua Abimeleke muanʼabo, nguakabashiha, ne ha mitu ha bena Shekeme bakamukolesha maboko bua yeye kubashiha. Bena Shekeme bakamutekela balaminyi ku mutu kua mikuna yonso, bakanyenga bintu bia bantu bonso bakahita mu nshila; bakambila Abimeleke bualu ebu. Gala, muana wa Ebede, wakalua ne ba mu tshiota tshiandi, Wakafika ku Shekeme; bena Shekeme bakamueyemena. Bakaya mu madimi, bakahuola mamuma abo, bakatua tumuma tuabo tua nvinyo ku makasa abo, bakadia bidia bia disanka, bakabuela mu nsubu wa nzambi wabo, bakadia, bakanua, bakela Abimeleke mulau. Gala, muana wa Ebede, wakamba ne, Abimeleke udi nganyi, ne Shekeme udi nganyi, bua tuetu kumukuatshia mudimu? Yeye kena muana wa Yelubâla, anyi? Zebula kena kapita kandi, anyi? Nuenu nudi nukuatshila Hamo, tatu wa Shekeme, mudimu; kadi tudi ne bua kumukuatshia mudimu bua tshinyi? Ndi musue bantu aba bikale mu tshianza tshianyi, hashishe nengumushe Abimeleke. Yeye wakambila Abimeleke ne, Ukumbashe bena nvita bebe, uluhuke biebe. Kakunyua Zebula, mukelenge wa mu musoko, mei a Gala, muana wa Ebede, tshiji tshiandi tshiakadi tshikole. Yeye wakatuma bamessager kudi Abimeleke mu musokoko bamba ne, Gala, muana wa Ebede, ne bana babo bakatua ku Shekeme, badi bakeba mua kukutombueshila bena musoko. Nunku ulue biebe mu butuku, wewe ne bantu badi nʼebe, nubalamine mu tshisuku; ne dinda habanda diba, wewe ubike hatshiatshia, uye ku musoko lubilu; hashishe haluhukeye ne bantu hadiye nʼabo bua kuluangana nʼebe, wewe neubenzele bu mûdi musue. Nunku Abimeleke wakabika ne bantu bonso bakadi nʼandi, bakaya mu butuku, bakalamina ha buihi ne Shekeme, baditahulule bisumbu binai. Gala, muana wa Ebede, wakaluhuka, wakimana ku tshibi tshia musoko; ne Abimeleke ne bantu bakadi nʼandi bakabika kuakadibo balamina. Hakatangila Gala bantu aba, yeye wakambila Zebula ne, Tangila, bantu badi bahueka ku mutu kua mikuna. Zebula wakamuambila ne, Wewe udi utangila anu maledi a mikuna bu mudiu bantu. Kadi Gala wakamuambila kabidi ne, Tangila, bantu badi bahueka munkatshi mua mikuna, ne tshisumbu tshimue tshidi tshiluila mu nshila wa ku mutshi wa telebinta wa Meonenima. Hashishe Zebula wakamukonka ne, Mukana muebe muakamba ne, Abimeleke udi nganyi, bua tuetu aba kumukuatshia mudimu, mudi kudi kunyi? Aba kambantu bawakahetula, anyi? Ndi nkusengelela ne, Uye biebe, uluangana nʼabo. Gala wakaya ku mpala kua bena Shekeme, wakaluangana ne Abimeleke. Abimeleke wakamuihata, yeye wakanyema ku mpala kuandi, ne ba bungi bakahona hanshi batahike mputa, tô ne ku mbelu kua tshibi tshia musoko. Abimeleke wakashikama ku Aluma; ne Zebula wakihata Gala ne bana babo bua bobo kabashikami mu Shekeme. Hakatshiabu bantu bakaya mu tshisuku, bakambila Abimeleke bualu ebu. Yeye wakangata bantu bandi, wakabatahulula mu bisumbu bisatu, bakalamina; wakatangila bantu baluhuka ku musoko, ne yeye wakabika, wakabaluisha ne wakabashiha. Abimeleke ne bisumbu biakadi nʼandi bakaya lubilu, bakimana ku tshibi tshia musoko, ne bisumbu bibidi biakaya, biakatantshila bonso bakadi mu tshisuku, bakabashiha. Abimeleke wakaluangana ne bena musoko dituku adi dionso, wakanyenga musoko, wakashiha bantu bonso bakadimu. Wakabutula musoko, wakanuaminamu luehu. Hakunvua bantu bonso bakadi mu tshibumba tshia mu Shekeme lumu elu, bakabuela mu nsubu wa mabue wa Ele-belita. Bakambila Abimeleke ne, Bantu bonso bakadi mu tshibumba tshia mu Shekeme bakadisangisha hamue. Hashishe Abimeleke wakabanda ku mukuna wa Salemona, yeye ne bantu bonso bakadiye nʼabo; Abimeleke wakangata tshisui mu tshianza tshiandi, wakakosa nʼatshi ditamba dia mutshi, wakaditeka ha diaha diandi, yeye wakambila bantu bakadi nʼandi ne, Nuakatangila munakuenza, enzai bu munakuenza lubilu. Bantu aba bonso, muntu ne muntu, bakakosa matamba, bakalonda Abimeleke, bakâteka kuinshi kua nsubu, bakosha nsubu ne kahia; nunku bantu bonso bakadi mu tshibumba tshia mu Shekeme bakafua kabidi, bu bantu tshinunu ne balume ne bakashi. Hashishe Abimeleke wakaya ku Tebese, wakaluangana ne Bena Tebese, wakaunyenga. Kadi tshibumba tshikole tshiakadi mu musoko, ne balume bonso ne bakashi bonso ba mu musoko bakanyemenamu, bakinshila bibi; bakahanda ku mutu kua tshibumba. Abimeleke wakalua ha buihi ne tshibumba, wakaluangana ne benʼatshi, wakasemena ku tshibi tshia tshibumba bua kutshiosha ne kahia. Kadi mukashi mukuabo wakela dibue dia mpelu dinene ha mutu wa Abimeleke, wakahanda kabalubalu kandi. Hashishe yeye wakabikila nsongalume, mutuadi wa ngabu wandi, wakamuambila ne, Tula muele webe wa nvita lubilu, unshihe; bantu kabambi ne, Mukashi wakamushiha. Nsongalume wandi wakamutua muele, yeye wakafua biandi. Hakatangila Bena Isalele ne, Abimeleke wakafua, bakaya muntu ku muaba wandi muntu ku muaba wandi. Nunku Nzambi wakasombuela bubi bua Abimeleke buakenzeleye tatu wandi hakashiheye bana babo makumi muanda mutekete. Nzambi wakasombuela bena Shekeme kabidi bua malu mabi onso akenzabo; mulau wa Yotama, muana wa Yelubâla, wakabeleye wakalua ha mitu habo. Ku nyima kua Abimeleke, Tola, muana wa Puwa, muana wa Dodo, wa mu tshisamba tshia Yisakâ, wakabika, wakasungila Bena Isalele; yeye wakadi mushikame ku Shamî wa ku mikuna ya Efelayima. Yeye wakalumbulula Bena Isalele bidimu makumi abidi ne bisatu, wakafua biandi, bakamujika mu Shami. Yai, Muena Gilada, wakabika ku nyima kuandi, wakalumbulula Bena Isalele bidimu makumi abidi ne bibidi, Yeye wakadi ne bana balume makumi asatu bakadi benda ha nyima ha bana ba nyama ya mpunda makumi asatu, bakadi ne misoko makumi asatu idibo babikila ne, Hawota-yai tô ne lelu, idi mu buloba bua Gilada. Yai wakafua, bakamujika mu Kamona. Bena Isalele bakenza malu mabi ku mesu kua Yehowa, bakatendelela Babala ne Bashatelota ne nzambi ya Bena Sulia ne nzambi ya Bena Sidona ne nzambi ya Bena Moaba ne nzambi ya Bena Amona ne nzambi ya Bena Peleshete; bakalekela Yehowa, ka bakamuenzela mudimu. Tshiji tshia Yehowa tshiakadi kudi Bena Isalele, yeye wakabahana mu bianza bia Bena Peleshete ne bia Bena Amona. Bobo bakatatshisha, bakakengesha Bena Isalele tshidimu atshi. Bakatatshisha Bena Isalele bonso bakadi dishiya dia Yadene mu buloba bua Bena Amole budi mu Gilada bidimu dikumi ne muanda mukulu. Bena Amona bakasabuka dishiya dia Yadene bua kuluanganabo ne Bena Yuda ne Bena Benyamina ne Bena Efelayima; Bena Isalele bakadi ne ntatu ya bungi. Bena Isalele bakadila kudi Yehowa, bamba ne, Tuetu tuakakuenzela bibi, bualu bua tuetu tuakalekela Nzambi wetu, tuakakuatshila Babâla mudimu. Yehowa wakambila Bena Isalele ne, Tshiakanusungila kudi Bena Ejipitu ne kudi Bena Amole ne kudi Bena Amona ne kudi Bena Peleshete, anyi? Bena Sidona kabidi ne Bena Amaleka ne Bena Maona bakanutatshisha; nuenu nuakadila kundi, nakanusungila mu bianza biabo. Kadi nuenu nuakandekela, nuakakuatshila nzambi mikuabo mudimu, tshiena nnusungila kabidi. Yai bienu, nudile kudi nzambi inuakasungula; musungile mu ntatu yenu. Bena Isalele bakambila Yehowa ne, Tuakenza bibi, utuenzele bu mûdi musue, kadi anji kutusungila lelu, tudi tukusengelela. Bobo bakumusha nzambi ya bende yakadi munkatshi muabo, bakakuatshila Yehowa mudimu; ne mutshima wandi wakanyingalala bua ntatu ya Bena Isalele. Hashishe Bena Amona bakadisangisha hamue, bakatula tshitudilu tshiabo mu Gilada. Bena Isalele bakadi badisangisha hamue, bakatula tshitudilu tshiabo mu Misepa. Bantu ne bakelenge ba mu Gilada bakakonkangana ne, Muntu kai wahanga nvita bua kuluangana ne Bena Amona? Yeye mene neikale ku mutu kua Bena Gilada bonso. Yefeta, Muena Gilada, wakadi muena nvita wa bukitu, wakadi muana wa mukashi wa masandi; Gilada wakalela Yefeta. Mukashi wa Gilada wakamulelela bana ba balume; hakakola bana ba mukashi wandi mene, bobo bakihata Yefeta, bakamuambila ne, Wewe kuena ne buhianyi mu nsubu wa tatu wetu, bualu bua wewe udi muana wa mukashi wa bende. Hashishe Yefeta wakanyema ku mesu kua bana babo, wakashikama mu buloba bua Tobo; ne bantu ba hatuhu bakadisangishaku kudi Yefeta, bakaluhuka nʼandi. Hakahita tshikondo, Bena Amona bakaluisha Bena Isalele nvita. Hakaluangana Bena Amona ne Bena Isalele nunku, bakulu ba mu Gilada bakaya kuangata Yefeta ku buloba kua Tobo; bakambila Yefeta ne, Lua biebe, wikale kapitene ketu bua tuluangane nvita ne Bena Amona. Yefeta wakambila bakulu ba mu Gilada ne, Nuenu kanuakadi nʼanyi lukuna, kanuakungihata mu nsubu wa tatu wanyi, anyi? Nudi nulua kundi hanudi ne dikenga bualu kai? Bakulu ba mu Gilada bakambila Yefeta ne. Bua bualu ebu mpindiu tuakuhingana kûdi kabidi bua wewe uye nʼetu bua kuluangana ne Bena Amona; wewe newikale mukelenge wetu wa Bena Gilada bonso. Yefeta wakakonka bakulu ba mu Gilada ne, Binuaya nʼanyi kuetu kabidi bua kuluangana ne Bena Amona, ne biabafila Yehowa ku mpala kuanyi, nengikale mukelenge wenu, anyi? Bakulu ba mu Gilada bakambila Yefeta ne, Yehowa ikale mumanyi wa bualu hankatshi hetu; bulelela, netuenze bu mu dî diebe. Hashishe Yefeta wakaya ne bakulu ba mu Gilada, ne bantu bakamuteka mukelenge ku mutu kuabo; Yefeta wakamba mei andi onso ku mpala kua Yehowa mu Misepa. Yefeta wakatumina mukelenge wa Bena Amona ba-messager, bamba ne, Udi nʼanyi bualu kai bûdi uluila kundi bua kuluangana mu buloba buanyi? Mukelenge wa Bena Amona wakakudimuna ba-messager ba Yefeta dî ne, Bualu bua Bena Isalele bakanyenga buloba buanyi hakaluabo mu Ejipitu, ku musulu wa Ânona tô ne ku Yaboka ne ku Yadene; nunku utuhingishile maloba au kabidi talalâ. Yefeta wakatumina mukelenge wa Bena Amona ba-messager bakuabo kabidi, bakamuambila ne, Yefeta udi Wamba nunku: Bena Isalele kabakanyenga buloba bua Moaba anyi buloba bua Bena Amona; kadi hakaluhukabo mu Ejipitu, ne Bena Isalele bakahitshila mu tshihela tô ne ku Dishiba Dikunze, bakafika ku Kadesha; hashishe Bena Isalele bakatumina mukelenge wa Edome ba-messager, bamba ne, Tudi tukusengelela ne, Anji kuitabusha bua tuetu kuhitshila mu buloba buebe; kadi mukelenge wa Edome kakabunvuila. Bakatumina mukelenge wa Moaba ba-messager muomumue, kadi yeye kakitabusha; ne Bena Isalele bakashikama mu Kadesha. Hashishe bakahitshila mu tshihela, bakanyunguluka buloba bua Edome ne buloba bua Moaba kabidi, bakayila ku esete kua buloba bua Moaba, bakashikama dishiya dia musulu wa Ânona; kadi kabakabuela mu mu-kalu wa Moaba, bualu bua Ânona wakadi mukalu wa Moaba. Bena Isalele bakatumina Sihona, mukelenge wa Bena Amole, mukelenge wa mu Heshebona, ba-messager; Bena Isalele bakamuambila ne, Tudi tukusengelela ne, Witabushe bua tuetu kuhitshila mu buloba buebe, tuye ku buloba buetu. Kadi Sihona kakitabusha bua Bena Isalele bahitshile mu buloba buandi; kadi Sihona wakasangisha bantu bandi bonso, bakatula tshitudilu tshiabo mu Yahasa, bakaluangana ne Bena Isalele. Yehowa, Nzambi wa Isalele, wakafila Sihona ne bantu bandi bonso mu bianza bia Bena Isalele, ne bobo bakabashiha; nunku Bena Isalele bakangata buloba bua Bena Amole, bantu ba ku luseke alu. Bakangata buloba buonso bua Bena Amole ku mikalu yabo yonso, ku Ânona tô ne ku Yaboka, ne ku tshihela tô ne ku Yadene. Nunku Yehowa, Nzambi wa Isalele, wakumusha Bena Amole ku mpala kua bantu bandi Bena Isalele; ne wewe neubakokeshe, anyi? Kuena ukokesha buloba buakakuha Kamoshe, nzambi webe, bua kukokesha, anyi? Nunku bantu bonso badi Yehowa, Nzambi wetu, Wihata ku mpala kuetu, netubakokeshe mene. Katataka wewe udi uhita Balaka, muana wa Sipô, mukelenge wa Moaba, buimpe, anyi? Yeye wakalesha Bena Isalele, yeye wakaluangana nʼabo, anyi? Hakadi Bena Isalele bashikama mu Heshebona ne mu misoko yabo ne mu Aloê ne mu misoko yabo ne mu misoko yonso idi ku muelelu wa mai a Ânona bidimu nkama isatu, bualu kai kuakayangata musangu au? Nunku meme tshiakakuenzela bibi, kadi wewe udi ungenzela meme bibi bua kuluangana nʼanyi; Yehowa, Mulumbuluishi, ikale mulumbuluishi hankatshi ha Bena Isalele ne Bena Amona lelu. Kadi mukelenge wa Bena Amona kakunyua mei a Yefeta akamutumineye. Hashishe Nyuma wa Yehowa wakatulukila Yefeta, wakahitshila mu Gilada ne Manashe, ne Misepa wa Gilada; wakumuka ku Misepa wa Gilada, wakafika kudi Bena Amona. Yefeta wakaditshiha kudi Yehowa ne, Biwafila Bena Amona mu tshianza tshianyi, hashishe tshionso tshidi tshiluhuka ku bibi bia nsubu wanyi bua kusangakena nʼanyi, hanahingana kudi Bena Amona ne ditalala, netshikale tshia Yehowa, nentshifile bu mulambu wa kuosha ha kahia. Nunku Yefeta wakafika kudi Bena Amona bua kuluangana nʼabo, ne Yehowa wakabafila mu tshianza tshiandi. Yeye wakabashiha ku Aloê tô ne ku Minita, misoko makumi abidi mene, tô ne ku Abele-kelamima; wakashiha bantu ba bungi. Nunku Bena Amona bakateketa ku mpala kua Bena Isalele. Yefeta wakalua ku Misepa ku nsubu kuandi; ne muanʼandi wa bakashi wakaluhuka bua kusangakeneye nʼandi ne bisanji ne bena maja; yeye wakadi muana wandi umuehele, yeye kakadi ne muana wa balume anyi muana wa bakashi mukuabo. Hashishe, hakamutangileye, yeye wakadihanda bilulu biandi, wakamba ne, Aka! muanʼanyi, wewe wakatamba kumpuekesha, wewe udi umue wa munkatshi mua banutatshisha; bualu bua meme nakabulula mukana muanyi kudi Yehowa, tshiena mua kualukila ku nyima. Yeye wakamuambila ne, Tatu wanyi, wewe wakabulula mukana muebe kudi Yehowa, ungenzele bu mu dî diakahatuka mukana muebe, bualu bua Yehowa wakasombuela bena lukuna bebe, Bena Amona mene, bualu buebe. Yeye wakambila tatu wandi kabidi ne, Bangenzele bualu ebu; bandekele ngondo ibidi bua meme kuya ne balunda banyi ku mikuna bua kujinga matuku antshidi kamama. Yeye wakamuambila ne, Ya biebe. Yeye wakamutuma ha bule tô ngondo ibidi; yeye wakaya ne balunda bandi, bakajinga matuku akatshidiye kamama ku mutu kua mikuna. Hakahita ngondo ibidi, yeye wakahingana kudi tatu wandi, ne yeye wakamuenzela bu mu kuditshiha kuakaditshiheye; yeye kakadi mumanye mulume. Bakadi ne tshilele etshi mu Isalele, bua bana bakashi ba mu Isalele baye ku tshidimu ku tshidimu bua kujingabo muana mukashi wa Yefeta, Muena Gilada, tô matuku anai ku tshidimu ku tshidimu. Bena Efelayima bakadisangisha hamue, bakaya ku luseke lua ku node; bakambila Yefeta ne, Wewe wakasabuka bua kuluangana ne Bena Amona, kuakatubikila bua tuetu kuya nʼebe bualu kai? Netuoshe nsubu webe ne kahia ne wewe kabidi. Yefeta wakabambila ne, Meme ne bantu banyi tuakadi ne nvita mikole kudi Bena Amona, ne hanakanubikila, nuenu kanuakansungila mu bianza biabo. Hanakatangila ne nuenu kanuakansungila, nakateka muoyo wanyi mu tshianza tshianyi, nakasa buka kudi Bena Amona, ne Yehowa wakabafila mu tshianza tshianyi; nuakalua kundi bua kunduisha lelu munyi? Hashishe Yefeta wakasangisha Bena Gilada bonso, bakaluangana ne Bena Efelayima; Bena Gilada bakashiha Bena Efelayima, bualu bua bobo bakamba ne, Nuenu Bena Gilada nudi banyemi ba Efelayima ba munkatshi mua Bena Efelayima ne ba munkatshi mua Bena Manashe. Bena Gilada bakanyenga malobo a Yadene akadi a Bena Efelayima. Nunku hakalua munyemi yonso wa munkatshi mua Bena Efelayima Wamba ne, Ndi musue kusabuka, Bena Gilada bakamukonka ne, Wewe udi Muena Efelayima, anyi? Biakitabeye ne, Nansha, bobo bakamuambila ne, Wambe biebe ne, Shiboleta; ne yeye wakamba ne, Siboleta, bualu bua yeye kakadi mua kuamba dî adi bimpe; hashishe bakamukuata, bakamushihela ku malobo a Yadene. Ku tshikondo atshi Bena Efelayima binunu makumi anai ne bibidi bakafua. Yefeta wakalumbulula Bena Isalele bidimu bisambombo. Hashishe Yefeta, Muena Gilada, wakafua, bakamujika mu umue wa misoko ya Bena Gilada. Ku nyima kuandi Ibisana, Muena Beteleheme, wakalumbulula Bena Isalele. Yeye wakadi ne bana balume makumi asatu, ne bana bakashi makumi asatu bakatumeye ha bula ku mabaka; yeye wakangata bana bakashi makumi asatu bakadi ha bula bu bakashi ba bana bandi balume. Yeye wakalumbulula Bena Isalele bidimu muanda mutekete. Ibisana wakafua, bakamujika mu Beteleheme. Ku nyima kuandi Elona, Muena Zebuluna, wakalumbulula Bena Isalele; yeye wakalumbulula Bena Isalele bidimu dikumi. Elona, Muena Zebuluna, wakafua; bakamujika mu Ayalona mu buloba bua Zebuluna. Ku nyima kuandi Abidona, muana wa Hilele, Muena Pilatona, wakalumbulula Bena Isalele. Yeye wakadi ne bana balume makumi anai ne bikulu makumi asatu bakenda ha nyima ha bana ba nyama ya mpunda makumi muanda mutekete; yeye wakalumbulula Bena Isalele bidimu muanda mukulu. Abidona, muana wa Hilele, Muena Pilatona, wakafua; bakamujika mu Pilatona mu buloba bua Efelayima, ku mikuna ya Bena Amaleka. Bena Isalele bakenza malu mabi ku mesu kua Yehowa kabidi, ne Yehowa wakabafila mu bianza bia Bena Peleshete bidimu makumi anai. Muntu mukuabo wa mu Solea, wa mu diku dia Bena Dana, wakadiku, dina diandi Manoa; mukashi wandi wakadi nkumba, kakadi mulele. Muanjelo wa Yehowa wakamueneka kudi mukashi, wakamuambila ne, Tangila, wewe udi nkumba, kuena muanze kulela; kadi wewe newimite difu, neulele muana wa balume. Nunku udimuke biebe, ndi nkusengelela, kunu nvinyo anyi maluvu makole, kudi tshintu tshidi katshiyi tshimpe; mona, wewe newimite difu, neulele muana wa balume; dihaya kadibeyi ku mutu kuandi; bualu bua muana eu neikale Munazi kudi Nzambi ku difu dia mamu wandi; yeye neabange kusungila Bena Isalele mu bianza bia Bena Peleshete. Hashishe mukashi wakalua, wakambila bayandi ne, Muntu wa Nzambi wakalua kundi, mpala wandi wakadi mufuane mpala wa muanjelo wa Nzambi, wakuntshinyisha; meme tshiakumuebesha kuakafumeye ne yeye kakungambila dina diandi; kadi yeye wakungambila ne, Mona, wewe newimite difu, neulele muana wa balume; nunku kunu nvinyo anyi maluvu makole, kudi tshintu tshidi katshiyi tshimpe; bualu bua muana eu neikale Munazi kudi Nzambi ku difu diebe, tô ne ku dituku dia lufu luandi. Hashishe Manoa wakasengelela Yehowa, wakamba ne, Mukelenge, ndi nkusengelela ne, Witabushe bua muntu wa Nzambi uwakatuma alue kutudi kabidi bua kutuyisha tshibidi mua kuenzela muana utualela. Nzambi wakunyua dî dia Manoa, ne muanjelo wa Yehowa wakalua kudi mukashi kabidi hakadiye mushikame mu budimi, kadi Manoa bayandi kakadi nʼandi. Mukashi wakaya lubilu, wakamanyisha bayandi ne, Mona, muntu au wakalua kundi dituku dikuabo wakumueneka kundi. Manoa wakabika, wakalonda mukashi wandi, wakalua kudi muntu eu, wakamuebesha ne, Wewe udi muntu wakadi uyikila ne mukashi eu, anyi? Yeye wakamba ne, Mmeme. Manoa wakamba ne, Bualu buenjibue bu mu dî diebe; nendiundishe muana munyi, netumuenzele tshinyi? Muanjelo wa Yehowa wakambila Manoa ne, Mukashi adimuke bua mei onso anakamuambila. Kadi tshintu tshiakadiunda ku muonshi wa tumuma tua nvinyo, kanu nvinyo anyi maluvu makole, kadi tshintu tshidi katshiyi tshimpe; enze biandi malu onso anakamuambila. Manoa wakambila muanjelo wa Yehowa ne, Ndi nkusengelela, anji kushala kunoko, tukulongoluele kana ka mbushi. Muanjelo wa Yehowa wakambila Manoa ne, Biwangindisha, tshiena ndia bidia biebe, ne biwalongolola mulambu wa kuosha, bûdi nʼabu mbua kûfila kudi Yehowa. Bualu bua Manoa kakamanya ne, Yeye udi muanjelo wa Yehowa. Manoa wakakonka muanjelo wa Yehowa ne, Dina diebe nganyi, bua tuetu tukutumbishe hashika mei ebe? Muanjelo wa Yehowa wakamuebesha ne, Udi unkonka dina dianyi bualu kai? Mona, didi bualu bua dikema. Nunku Manoa wakangata kana ka mbushi ne mulambu wa bukula, wakabifila kudi Yehowa ha mutu ha dibue; ne muanjelo wakenza malu a kukema; Manoa ne mukashi wandi bakatangila. Bualu bua hakabanda ludimi lua kahia mulu lufume ku tshioshelu, muanjelo wa Yehowa wakabanda mu ludimi lua kahia lua ku tshioshelu; Manoa ne mukashi wandi bakatangila, bakatua mpala yabo hanshi. Kadi muanjelo wa Yehowa kakamueneka kudi Manoa anyi kudi mukashi wandi kabidi. Hashishe Manoa wakamanya ne, Yeye wakadi muanjelo wa Yehowa. Manoa wakambila mukashi wandi ne, Netufue bulelela, bualu bua tuakumona Nzambi. Kadi mukashi wandi wakamuambila ne, Bu Yehowa musue kutushiha, yeye kakadi kuitabusha mulambu wa kuosha ne mulambu wa bukula ku bianza bietu, ne yeye kakadi kutulesha malu â onso kabidi, ne yeye kakadi kubambila malu â ku tshikondo etshi. Mukashi wakalela muana wa balume, wakamuidika dina ne, Shimishona. Muana wakadiunda, ne Yehowa wakamusankisha. Nyuma wa Nzambi wakabanga kumuenzesha mu Mahane-dana, hankatshi ha Solea ne Eshetaola. Shimishona wakahueka ku Timena, wakatangila mukashi wa mu bana bakashi ba Bena Peleshete. Yeye wakabanda, wakamanyisha tatu wandi ne mamu wandi, wakamba ne, Nakatangila mukashi mu Timena wa mu bana bakashi ba Bena Peleshete, numungangatshile bu mukashi wanyi. Hashishe tatu wandi ne mamu wandi bakamuebesha ne, Kakuena mukashi munkatshi mua bana bakashi ba bana betu anyi munkatshi mua bantu bonso ba mu tshisamba tshietu, bua wewe kuya kuangata mukashi kudi Bena Peleshete badi kabayi batengula, anyi? Kadi Shimishona wakambila tatu wandi ne, Umungangatshile, bualu bua yeye udi utamba kunsankisha bimpe. Kadi tatu wandi ne mamu wandi kabakamanya ne, Bualu ebu buakafuma kudi Yehowa, bualu bua yeye wakadi ukeba bualu kudi Bena Peleshete. Ku tshikondo atshi Bena Peleshete bakadi bakokesha Bena Isalele. Hashishe Shimishona wakahueka ne tatu wandi ne mamu wandi ku Timena, bakalua ku madimi a tumuma tua mu Timena, ne muana wa nyama wa ntambue wakasangakena nʼandi udila. Nyuma wa Yehowa wakamutulukila bikole, ne yeye wakamuhanda, bu muakadiye mua kubanda kana ka mbushi; yeye kakadi ne tshintu mu tshianza tshiandi; yeye kakambila tatu wandi anyi mamu wandi bualu buakenzeye. Wakaya biandi, wakayikila ne mukashi, ne yeye wakasankisha Shimishona bimpe. Dituku dikuabo yeye wakahingana kudiye bua kumuangata bu mukashi wandi, ne yeye wakasesuka mu nshila bua kumoneye tshitalu tshia nyama wa ntambue; ne monai, tshisumbu tshia mbulubulu ne buitshi biakadi munda mua tshitalu tshia nyama wa ntambue. Yeye wakamuangata mu bianza biandi, wakaya, wenda ubudia; wakahingana kudi tatu wandi ne mamu wandi, wakabahabu, ne bobo bakabuela; kadi yeye kakabambila ne, Nakangata buitshi munda mua tshitalu tshia nyama wa ntambue. Tatu wandi wakahueka kudi mukashi au, ne Shimishona wakabalambishila bidia bia disanka, bualu bua etshi tshiakadi tshilele tshiakadi bansongalume benza. Hakamutangilabo, bakalua kudiye ne balunda bandi makumi asatu bua kuikalabo nʼandi. Shimishona wakabambila ne, Ndi musue kunuebesha dijimbu, ne binuamanya mua kudijingulula mu matuku muanda mutekete a bidia bia disanka, binuadisokolola, nennuhe bilulu bia lin makumi asatu ne bilulu bikuabo makumi asatu; kadi binuahanga kudijingulula, nuenu nenumpe bilulu bia lin makumi asatu ne bilulu bikuabo makumi asatu. Bobo bakamuambila ne, Ambaku dijimbu diebe, tuetu tudiunvue. Yeye wakabambila ne, Bia kudia biakafuma kudi mudi, ne kushemakana kuakafuma ku tshintu tshikole. Hakahita matuku asatu, kabakamanya mua kujingulula dijimbu. Hakalua dituku dia muanda mutekete, bakambila mukashi wa Shimishona ne, Wewe witabushishe bayebe bua atujinguluile dijimbu, anyi tuetu netuoshe nsubu wa tatu webe ne kahia. Kanuakatumikila anu bua kutuvuisha bahele, anyi? Kabuena nunku, anyi? Mukashi wa Shimishona wakadila ku mpala kuandi wamba ne, Wewe udi nʼanyi lukuna, kuena munsue nansha. Wewe wakuela bana betu dijimbu, kuena mudinjinguluile. Yeye wakamukudimuna ne, Mona, tshiakuanza kudiambila tatu wanyi anyi mamu wanyi, nenkuambiledi, anyi? Yeye wakadila ku mpala kuandi tô matuku muanda mutekete hakadibo badia bidia bia disanka; ne hakalua dituku dia muanda mutekete, yeye wakamujinguluiladi, bualu bua yeye wakamutatshisha bikole; ne yeye wakajinguluila bana babo dijimbu. Bena musoko bakamukonka dituku dia muanda mutekete diambedi diba kadiyi dianze kubuela ne, Tshidi tshihita buitshi kushemakana ntshinyi? tshidi tshihita nyama wa ntambue bukole ntshinyi? Yeye wakabambila ne, Bu nuenu kanuyi badimishe muana mukashi wa ngombe wanyi, kanuakadi kujingulula dijimbu dianyi. Nyuma wa Yehowa wakamutulukila bikole, yeye wakahueka ku Ashekelona, wakashiha balume babo makumi asatu, wakangata bivualu biabo, wakabifila kudi bantu bakajingulula dijimbu diandi. Tshiji tshiandi tshiakatamba kutema; yeye wakabanda ku nsubu wa tatu wandi. Kadi bobo bakavua bafila mukashi wa Shimishona kudi muntu mukuabo, wakadi mulunda wa Shimishona diambedi. Kadi dituku dikuabo, mu tshidimu tshia kuhuolabo blé, Shimishona wakaya kutangila mukashi wandi ne kana ka mbushi; yeye wakamba ne, Nembuele kudi mukashi wanyi mu nsubu. Kadi tatu wandi wa mukashi kakitabusha bua yeye aye. Tatu wandi wa mukashi wakamuambila ne, Nakela ngana meji ne wewe wakadi nʼandi tshiji tshikole, nunku nakamufila kudi mulunda webe; muakunyʼandi kena umuhita bulengele kumona, anyi? Umuangate, ndi nkusengelela, mu muaba wandi. Shimishona wakabambila ne, Musangu eu nengikale mubingishibue kudi Bena Peleshete, hanabenzela bibi. Shimishona wakaya, wakakuata mibuabua nkama isatu, wakangata bimunyi, wakasuikakana mikila, wakasuika tshimunyi hankatshi ha mikila ibidi ibidi. Hakatemesheye bimunyi kahia, yeye wakayituma mu madimi a blé a Bena Peleshete, nunku blé yakadi misuika mu bisumbu ne yakadi mimanyike, ne mitshi ya olive kabidi biakoshibua. Hashishe Bena Peleshete bakakemangana ne, Wakuenza bualu ebu nganyi? Bakamba ne, Shimishona, muku wa Muena Timena, bualu bua yeye wakangata mukashi wandi, wakamufila kudi mulunda wandi. Bena Peleshete bakalua, bakosha mukashi au ne tatu wandi ne kahia. Shimishona wakabambila ne, Binuenza nunku, bulelela, nennusombuele, ne ku nyima nendekele. Yeye wakabakosolola bituha bituha ne kushiha kukole; wakaya, wakashikama mu lubuebue lua dibue dia Etama. Hashishe Bena Peleshete bakabanda, bakasa tshitudilu mu Yuda, bakashimika ntenta yabo mu Lehi. Bena Yuda bakakonka ne, Nuakulua kutuluisha bualu kai? Bakamba ne, Tuakuluila bua kusuika Shimishona, ne bua kumuenzela yeye bu muakatuenzeleye. Hashishe Bena Yuda binunu bisatu bakaya ku lubuebue lua mu dibue dia Etama, bakambila Shimishona ne, Kuena mumanye ne, Bena Peleshete badi batukokesha, anyi? Bualu ebu buwakatuenzela budi tshinyi? Yeye wakabambila ne, Nakabenzela bu muakangenzelabo. Bakamuambila ne, Tuakuluila bua kukusuika, ne bua tuetu tukufile mu bianza bia Bena Peleshete. Shimishona wakamba ne, Nuditshihe kundi ne nuenu nkayenu kanushihi. Bobo bakamuambila ne, Nansha, kadi netukusuike bikole, ne tukufile mu bianza biabo, katuena tukushiha nansha. Bakamusuika ne mionshi mihia-mihia ibidi, bakumuka nʼandi ku dibue. Hakaluabo nʼandi ku Lehi, Bena Peleshete bakela tshibingu hakasangakenabo nʼandi; Nyuma wa Yehowa wakamutulukila bikole, ne mionshi yakadi ku maboko andi yakavingutuka bu nuosha mu kahia, ne nkanu yandi yakakohoka ku bianza biandi. Yeye wakasangana mufuba mubishi wa lubanga lua mpunda, wakolola tshianza tshiandi, wakawambula, wakashiha nʼau bantu tshinunu. Shimishona wakamba ne, Nakabunguisha mishila ne mishiki ne mufuba wa lubanga lua mpunda, nakashiha bantu tshinunu ne mufuba wa lubanga lua mpunda. Hakashikisheye kuamba mei au, yeye wakela mufuba wa lubanga wakadi mu tshianza tshiandi hanshi; bakidika muaba au ne, Lamata-lehi. Yeye wakadi ne nyota mikole, wakabikila Yehowa, wakamba ne, Wewe wakafila luhandu elu lunene ku tshianza tshia muena mudimu webe, ne katataka nenfue bua nyota, nempone mu bianza bia bantu badi kabayi batengula. Kadi Nzambi wakahanda dina diakadi mu dibue dia Lehi ne mai akahatuka; hakanueye mai, muoyo wandi wakahingana ne yeye wakasangala; nunku wakidika muaba au ne, Enehakole, udi mu Lehi tô ne lelu. Yeye wakalumbuluila Bena Isalele mu matuku a Bena Peleshete bidimu makumi abidi. Shimishona wakaya ku Gaza, wakatangilaku mukashi wa masandi, wakabuela kudiye. Bakambila Bena Gaza ne, Shimishona wakulua munemu. Bakamunyunguluka, bakalala butuku buonso ku tshibi tshia ku musoko, bamuindile balamine; bakalala talalâ butuku buonso bamba ne, Tuanji kumuindila ne hatshiabu, netumushihe. Shimishona wakalalamu tô ne mundankulu, wakabika mundankulu, wakakuata bibi bia ku musoko, ne makunshi abi abidi, wakabitula ne biamu bionso, wakabiteka ha maha andi, wakaya nʼabi tô ne ku mutu kua mukuna munene udi ku mpala kua Hebelone. Ku nyima kua malu au yeye wakananga mukashi wa mu tshibanda tshia Soleka, dina diandi Delila. Bakelenge ba Bena Peleshete bakaha kudiye, bakamuambila ne, Umuitabushishe bua kujingulula mudi bukole buandi, ne mua tuetu kumanya mua kumuhita bukole, ne bua tuetu kumusuika, kumukengesha; ne buonso buetu, muntu ne muntu, netukuhe argent tshinunu tshimue ne lukama lumue. Delila wakambila Shimishona ne, Ndi nkusengelela ne, Ungambileku ne mudi bukole buebe bunene, ne bu mudibo bamanye mua kukusuika bua kukukengesha. Shimishona wakamuambila ne, Biansuikabo ne milemu mibishe muanda mutekete, idi kayiyi mianze kûma, nentekete, nengikale bu muntu mukuabo. Hashishe bakelenge ba Bena Peleshete bakalua kudiye ne milemu mibishe muanda mutekete yakadi kayiyi mianze kûma, ne yeye wakamusuika nʼai. Yeye wakamana kuteka bantu bu balaminyi bakadi balala munda mua nsubu; yeye wakamuambila ne, Shimishona, Bena Peleshete badi hamʼbidi hebe. Yeye wakatula milemu bu mudibo hatula nshinga wa mitshi ya diamba, hautuabo kahia. Nunku kabakadi bamanye bukole buandi kuakafumabu. Delila wakambila Shimishona ne, Mona, wakunseka, wakunshima; katataka ndi nkusengelela ne, Ungambile mudibo mua kukusuika. Yeye wakamuambila ne, Biansuikabo ne mionshi mihia-mihia idibo kabayi banze kuenza nʼai mudimu, nentekete, nengikale bu muntu mukuabo. Nunku Delila wakangata mionshi mihia-mihia, wakamusuika nʼai, wakamuambila ne, Shimishona, Bena Peleshete badi hamʼbidi hebe. Balaminyi bakadi balala munda mua nsubu. Yeye wakakula ku maboko andi bu buanda. Delila wakambila Shimishona ne, Diambedi wewe wakunseka, wakungambila anu mashimi, ungambile mudibo mua kukusuika. Yeye wakamuambila ne, Biwakuma bisumbu bia nsuki yanyi muanda mutekete mu mbungu. Yeye wakasuika nsuki yandi ne mundongo, wakamuambila ne, Shimishona, Bena Peleshete badi hamʼbidi hebe. Yeye wakatabala ku tulu tuandi, wakatula mundongo ne mbungu kabidi. Yeye wakamukonka ne, Wewe udi mua kuamba ne, Ndi mukusue munyi, hadi mutshima webe kauyi kundi? Wakunseka misangu ei isatu, kuena mungambile mudi bukole buebe bunene. Hakadiye umusengelela ne mei andi ku dituku ku dituku, wakamutatshisha, mutshima wandi wakatata tô ne ku lufu. Yeye wakamusokoluela malu onso akadi mu mutshima wandi, wakamuambila ne, Dihaya kadiena dianze kubeya ha mutu hanyi, bualu bua nakumana kuikala Munazi kudi Nzambi katshia ku difu dia mamu wanyi; biambeyabo, bukole buanyi nebumuke kundi, nentekete, nengikale bu muntu mukuabo. Hakatangila Delila ne, Yeye wakungambila malu onso a mu mutshima wandi, yeye wakatuma dî, wakabikila bakelenge ba Bena Peleshete, wamba ne, Luai bienu anu musangu eu, bualu bua yeye wakunsokoluela malu onso akadi mu mutshima wandi. Hashishe bakelenge ba Bena Peleshete bakalua kudiye ne argent mu bianza biabo. Yeye wakamuladika tulu ha bibelu biandi; yeye wakabikila mulume, wakamubeya bisumbu bia nsuki muanda mutekete yakadi ku mutu kuandi; yeye wakabanga kumukengesha ne bukole buandi buakumuka kudiye. Yeye wakamba ne, Shimishona, Bena Peleshete badi hamʼbidi hebe. Yeye wakatabala ku tulu tuandi, wamba ne, Nenduhuke bu misangu mikuabo ya diambedi, nendihandishe nkayanyi mu bianza biabo. Kadi yeye kakadi mumanye ne, Yehowa wakamana kundekela. Bena Peleshete bakamukuata, bakatunyina mesu andi, bakahueka nʼandi ku Gaza, bakamusuika ne nkanu ya tshiamu tshia mitaku; yeye wakadi uhela mu nsubu wa lukanu. Kadi nsuki ya ku mutu kuandi yakahanga kumena kabidi, hakamubeyabo. Bakelenge ba Bena Peleshete bakadisangisha hamue bua kufilabo mulambu munene kudi Dagona, nzambi wabo, ne bua kusankabo, bamba ne, Nzambi wetu wakafila Shimishona, muena lukuna wetu, mu bianza bietu. Hakamutangila bantu, bakatumbisha nzambi wabo, bakamba ne, Nzambi wetu wakafila muena lukuna wetu mu bianza bietu, wakadi muhaudi wa buloba buetu, wakatushiha ba bungi. Hakadi mitshima yabo isanka, bakamba ne, Bikilai Shimishona, alue kutusekesha. Bakabikila Shimishona mu nsubu wa lukanu; ne yeye wakahasekesha, bakamuteka hankatshi ha makunshi manene; Shimishona wakambila nsongalume wakadi umukuata ku tshianza ne, Witabushe bua meme kubenga bianza bianyi ku makunshi adi makuate nsubu, bua meme ngeyemeneku. Nsubu wakadi mule tente ne balume ne bakashi; bakelenge bonso ba Bena Peleshete bakadimu; ne bantu bu binunu bisatu ne balume ne bakashi bakadi ha mutu ha nsubu, batangile hakadi Shimishona ubasekesha. Shimishona wakabikila Yehowa, wakamba ne, Mukelenge Yehowa, unvuluke, ndi nkusengelela, unkoleshe anu musangu eu, ndi nkusengelela, Nzambi, bua meme kusombuela Bena Peleshete tshikondo tshimue, bua mesu anyi abidi. Shimishona wakakuata makunshi abidi akadi makuate nsubu, wakeyemenaku tshianza tshia bukole ku dikunshi dimue ne tshianza tshia bakashi ku dikunshi dikuabo. Shimishona wakamba ne, Nfuafue ne Bena Peleshete. Yeye wakaditshiha ne bukole buandi buonso, ne nsubu wakahukila bakelenge ne bantu bonso bakadimu. Nunku bantu bakashiheye mu lufu luandi bakahita bungi bua bantu bakashiheye hakadiye ne muoyo. Hashishe bana babo ne bonso ba mu nsubu wa tatu wandi bakalua, bakamuangata, bakaya nʼandi, bakamujika hankatshi ha Solea ne Eshetaola, mu majambu a Manoa, tatu wandi. Yeye wakalumbuluila Bena Isalele bidimu makumi abidi. Muntu wakadiku wa ku mikuna ya Efelayima, dina diandi Mika. Yeye wakambila mamu wandi ne, Bituha bia argent tshinunu tshimue ne lukama lumue biakibabo kudi, bua wewe wakela bantu mulau bualu buai, wakamba bualu ebu mu matshu anyi; mona, argent ndi nʼai, meme nguakayangata. Mamu wandi wakamba ne, Yehowa akuvudishile disanka, muanʼanyi. Yeye wakatangisha bituha bia argent tshinunu tshimue ne lukama lumue kudi mamu wandi; mamu wandi wakamba ne, Ndi njidila Yehowa argent ku tshianza tshianyi bualu bua muanʼanyi, bua kusongeye nʼai mpingu ne bua kutuleye nʼai mpingu; nunku nenkuhingishileyi. Hakahingisheye argent kudi mamu wandi, mamu wandi wakangata argent nkama ibidi, wakayifila kudi mutudi wa biamu, nguakenza nʼai luhingu lusonga ne luhingu lutula; yakadi mu nsubu wa Mika. Muntu eu Mika wakadi ne nsubu wa mpingu, Wakenza kabidi efoda ne telafima, wakajidila umue wa bana bandi balume, wakalua muakuidi wandi. Mu matuku au kamuakadi mukelenge mu Isalele, muntu yonso wakenza anu malu akadi mimpe ku mesu kuandi. Nsongalume wakadiku wa mu Beteleheme-yuda, wa mu tshisamba tshia Yuda, wakadi Muena Lewi; wakasombaku. Muntu eu wakumuka ku musoko wa Beteleheme-yuda, bua kusomba kuakasanganeye muaba, mu luendu luandi yeye wakalua ku mikuna ya Efelayima ku nsubu wa Mika; Mika wakamukonka ne. Wewe Wakufuma kudi kunyi? Yeye wakamuambila ne. Ndi Muena Lewi wa ku Beteleheme-yuda, ndi nya kusomba kundi nsangane muaba. Mika wakamuambila ne. Ushikame nʼanyi, wikale bu tatu ne muakuidi kundi, nenkuhe bituha bia argent dikumi ku tshidimu ku tshidimu ne bilulu bia kuluata ne bia kudia biebe. Nunku Muena Lewi wakasomba. Muena Lewi wakadi ne disanka bua kushikameye ne muntu eu; nsongalume eu wakadi kudiye bu umue wa bana bandi balume. Mika wakajidila Muena Lewi, ne nsongalume wakalua muakuidi wandi, wakadi mu nsubu wa Mika. Hashishe Mika wakamba ne, Katataka ndi mumanye ne Yehowa neangenzele bimpe, bualu bua meme ndi ne Muena Lewi bu muakuidi wanyi. Mu matuku au kamuakadi mukelenge mu Isalele; mu matuku au ba mu tshisamba tshia Dana bakakeba muaba wa kushikamabo; bualu bua tô ne ku dituku adi bobo kabakadi bangata buhianyi buabo munkatshi mua bisamba bia Isalele. Bena Dana bakatuma bantu batanu ba mu meku abo, bena bukitu ba ku Solea ne ba ku Eshataola bua kutentekelabo buloba ne bua kubutangilabo. Bakabambila ne, Yai bienu, nutangile buloba; bakalua ku mikuna ya Efelayima ku nsubu wa Mika, bakalalaku, Hakadibo ha buihi ne nsubu wa Mika, bakamanya dî dia nsongalume, Muena Lewi; bakasemena ha buihi, bakamukonka ne, Wakalua nʼebe kunoko nganyi? Udi wenza tshinyi mu muaba eu? Wakadila tshinyi kunoko? Yeye wakabambila ne, Mika wakangenzela nunku ne nunku, wakambuesha mu mudimu, nakalua muakuidi wandi. Bobo bakamuambila ne, Tudi tukusengelela ne, Utuebeshile Nzambi bua tuetu tumanye ne tudi ne diakalengele mu nshila wetu utuaya. Muakuidi wakabambila ne, Yai bienu talalâ, nshila unudi nuya udi ku mpala kua Yehowa. Hashishe balume aba batanu bakumuka, bakafika ku Layisha, bakatangila bantu bakadimu, bu muakashikamabo mu miaba mikole ne Bena Sidona, kabayi ne bualu; kakuakadi muntu mu buloba abu wakadi ne bukokeshi bua kubadisha bundu mu malu abo; bakadi kule ne Bena Sidona, kabakadi babuelakana ne bantu bakuabo. Bakahingana kudi bana babo ba ku Solea ne Eshetaola; bana babo bakakonka ne, Nudi nuamba tshinyi? Bakamba ne, Bikai, tuyai kubaluisha; bualu bua tuakatangila buloba ne budi buimpe; nuenu nenushikame tshianana, anyi? Kanujanguluki bua kuya ne bua kubuelamu ne bua kuhiana buloba. Hanuabuelamu nenusangane bantu badi bashikama mu miaba mikole, ne buloba budi bunene; bualu bua Nzambi wakafila buloba budi kabuyi buhanga bintu mu bianza bienu. Balume nkama isambombo ba mu tshisamba tshia Dana, bakadi ne bintu bia nvita bisuika hamʼbidi habo, bakumuka ku Solea ne Eshetaola. Bakaya, bakatula tshitudilu tshiabo mu Kîyata-yalima mu Yuda; nunku badi babikila muaba au ne, Mahane-dana tô ne lelu; monai, udi ku nyima kua Kîyata-yalima. Bakumukaku, bakayila ku mikuna ya Efelayima, bakalua ku nsubu wa Mika. Hashishe balume aba bakaya bua kutentekelabo buloba bua Layisha, bakakonka bana babo ne, Nudi bamanye ne efoda ne telafima ne luhingu luakasongabo ne luhingu luakatulabo bidi mu nsubu ei, anyi? Nunku nuelangane meji a bualu bunudi nʼabu mbua kuenza. Bakasesuka, bakaya ku nsubu wa nsongalume, Muena Lewi, ku nsubu wa Mika mene, bakamukonka ne, Udi bimpe, anyi? Bantu aba nkama isambombo ba mu tshisamba tshia Dana bakadi ne bintu biabo bia nvita bisuika hamʼbidi, bakimana ku tshibi tshia musoko. Balume aba batanu bakadi baye kua kutentekelabo buloba, bakaya, bakabuelamu, bakangata luhingu luakasongabo ne efoda ne telafima ne luhingu luakadibo; muakuidi wakadi muimane ku tshibi tshia musoko hehi ne bantu aba nkama isambombo bakadi ne bintu bia nvita bisuika hamʼbidi. Hakaya bantu aba mu nsubu wa Mika, ne hakangatabo luhingu luakasongabo ne efoda ne telafima ne luhingu luakatulabo, muakuidi wakabakonka ne, Nudi nuenza tshinyi? Bakamuambila ne, Huwa biebe, teka tshianza tshiebe ku mishiku yebe, uye nʼetu, wikale kutudi bu tatu ne muakuidi; bidi bimpe bua wewe kuikala muakuidi wa mu nsubu wa muntu umue, anyi muakuidi wa tshisamba tshijima tshia mu Isalele? Mutshima wa muakuidi wakasanka, yeye wakangata efoda ne telafima ne luhingu luakasongabo, wakaya munkatshi mua bantu. Bakumukaku, bakaya, bakateka bana ne bimuna ne bintu biabo ku mpala kuabo. Hakadibo kaba kale ne nsubu wa Mika, bantu bakadi bashikama mu nsubu ya ha buihi ne nsubu wa Mika bakadisangisha hamue, bakihatshila Bena Dana. Bobo bakadila kudi Bena Dana. Bobo bakatshunguluka kudi Mika, bakamukonka ne, Bualu kai buakukutonda bua wewe wakatulonda ne tshisumbu tshinene nunku? Yeye wakamba ne, Nuakuangata nzambi yanyi inakuenza, ne muakuidi, nuakuya nʼabi, ndi ne bintu bikuabo kudi kunyi? Munyi munuakunkonka ne, Bualu kai budi bukutonda? Bena Dana bakamuambila ne, Dî diebe kadiunvuiki munkatshi muetu, anyi bantu badi ne tshiji nebakukuate, ne wewe neujimishe muoyo webe ne mioyo ya ba mu nsubu webe. Bena Dana bakaya mu nshila; ne bakamanya Mika ne, Badi bampite bukole, yeye wakalukila, wakahingana ku nsubu kuandi. Bobo bakangata bintu bia Mika biakenzeye ne muakuidi wakadiye nʼandi, bakalua ku Layisha, kudi bantu bakadi talalâ ne kabayi ne bualu, bakabashiha ne miele ya nvita, bakosha musoko ne kahia. Kabakadi ne musungula bualu bua musoko wakadi kule ne Sidona, ne bobo kabakabuelakana ne bantu bakuabo; musoko eu wakadi mu tshibanda tshia ha buihi ne Bete-lehoba. Bakasa musoko, bakasanka mamu. Bakidika musoko eu dina ne, Dana, ndina dia Dana nkambua wabo, wakaledibua kudi Isalele; kadi dina dia musoko diakadi Layisha diambedi. Bena Dana hakadimanyisha luhingu lusonga Yonatana, muana wa Gêshoma, muana wa Mose, yeye ne bana bandi balume, bakadi bakuidi ba mu tshisamba tshia Bena Dana tô ne hakayabo mu buluka. Bakadimanyikila luhingu lua Mika luakenzeye tô ne matuku onso a hakadi nsubu wa Nzambi mu Shilo. Mu matuku au hakadibo kabayi ne mukelenge mu Isalele, Muena Lewi mukuabo wakadi mushikame ku nyima kua mikuna ya Efelayima, wakadiangatshila mukashi muhika wa mu Beteleheme-yuda. Mukashi au wakumuka kudiye, wakahingana ku nsubu wa tatu wandi ku Beteleheme-yuda, wakalalaku ngondo mai mijima. Bayandi wakabika, wakamulonda bua kumuambileye mei a kalolo ne bua kumuhingisha kabidi; muikale ne muena mudimu wandi ne mpunda ibidi; mukashi wakalua nʼandi mu nsubu wa tatu wandi. Hakamutangila tatu wa mukashi, yeye wakadi ne disanka bua kusangakena nʼandi. Tatuʼandi-muenu, tatu wa mukashi mene, wakamuhumbisha ne yeye wakalalaku matuku asatu; bakadia, bakanua, bakalalaku. Hakalua dituku dinai, hakabikabo ne dinda dionso, yeye wakabika bua kuyeye; hashishe tatu wa mukashi wakambila muku wandi ne, Kolesha mutshima webe ne bidia bikese, ne ku nyima udi mua kuya mu nshila webe. Nunku bakashikama, bakadia, bakanua, bubidi buabo hohamue; ne tatu wa mukashi wakambila mulume eu ne, Anji kuitabusha bua kulala butuku buonso, ndi nkusengelela ne, Mutshima webe usanke. Mulume wakabika bua kuyeye, kadi tatuʼandi-muenu wakamusengelela, nunku yeye wakalalaku kabidi. Dituku ditanu yeye wakabika ne dinda dionso bua kuyeye, ne tatu wa mukashi wakamuambila ne, Kolesha mutshima webe, ndi nkusengelela, anji kushala tô ne hamba diba kubuela; nunku bubidi buabo bakadia. Bakabika mulume bua kuyeye ne mukashi wandi ne muena mudimu wandi, tatuʼandi-muenu, tatu wa mukashi, wakamuambila ne, Monai, diba diakuamba kubuela, ndi nnusengelela ne, Lalai bienu butuku buonso; butuku buakuamba kuila, lalai bienu kunoko, bua mitshima yenu isanke; makelela nenubike ne dinda dionso, bua nuye bienu kuenu. Kadi mulume kakitabusha bua kulala butuku abu; wakabika, wakaya, wakafika ku Yebuse (udi Yelushalema mene) ne mukashi wandi ne mpunda ibidi yakadi ne biseba ha nyima hai. Hakafikabo ne mukashi muhika wandi wakadi nʼandi ha buihi ne Yebuse, butuku buakamba kuila, ne muena mudimu wakambila mukelenge wandi ne, Lua biebe, ndi nkusengelela, tuye ku musoko eu wa Bena Yebuse, tulalemu. Kadi mukelenge wandi wakamuambila ne, Nansha, katuena tuahuka ku musoko wa bende udi kauyi wa Bena Isalele; netuye ku Gibea. Wakambila muena mudimu wandi kabidi ne, Lua, tusemene ha buihi ne umue wa miaba ei; netulale nansha mu Gibea nansha mu Lama. Nunku bakahita, bakaya mu nshila wabo, ne diba diakababuelela hakadibo ha buihi ne Gibea wa mu Benyamina. Bakâhuka bua kuya kulala mu Gibea. Wakabuela, wakashikama anu mu musesu wa mu musoko, bualu bua kakuakadi muntu wakaya nʼabo mu nsubu wandi bua kudiabo. Monai, muntu mununu wakalua mufume ku mudimu wandi wa budimi dilolo; muntu eu wakufuma ku mikuna ya Efelayima, wakadi mushikame mu Gibea; kadi bena musoko bakadi Bena Benyamina. Muntu au wakabanduluka, wakamona muenyi muikale anu mu musesu wa mu musoko; hashishe muntu mununu wakamukonka ne, Uyaya kudi kunyi? Wakufuma kudi kunyi? Yeye wakamukudimuna ne, Tuakufuma ku Beteleheme-yuda; tuyaya ku nyima kua mikuna ya Efelayima, nkunakafuma. Nakadi muye ku Beteleheme-yuda; katataka ntshidi nya ku nsubu wa Yehowa, ne kakuena muntu udi umbuesha mu nsubu wandi. Kadi tudi ne bintu bia kudisha nʼabi mpunda yetu, ne tudi ne bidia ne nvinyo kabidi bualu buanyi ne bua muhika webe mukashi, ne bua nsongalume udi ne bantu bebe; kakuena dikengela dia tshintu. Muntu au mununu wakamba ne, Ditalala dikale kûdi, kadi bionso biudi ukenga bikale bualu buanyi; kadi kanuladi mu musesu. Nunku yeye wakaya nʼandi mu nsubu muandi, wakadisha mpunda; bakowa makasa abo, bakadia, bakanua. Hakadibo basankisha mitshima yabo, monai, bena musoko, bantu balembakane, bakanyunguluka nsubu, bakume ku tshibi; bakambila mukelenge wa nsubu muntu mununu ne, Lua ne muntu au wakalua mu nsubu muebe bua tuetu tumumanye. Muntu au, mukelenge wa nsubu, wakabambila ne, Nansha, bana betu, ndi nnusengelela ne, Kanuenji bualu bubi; nunku muntu eu wakalua mu nsubu muanyi, kanuenji bualu buhote. Monai, muanʼanyi mukashi utshidi kamama ne mukashi wandi muhika badiku, nenduhuke nʼabo, nubafuishe bundu, ne nuenze nʼabo budi buimpe ku mesu kuenu; kadi kanuenzedi muntu eu bualu bubi. Kadi balume aba kabakamunvuila; nunku mulume eu wakakuata mukashi wandi muhika, wakamufila kudibo, bakamanyangana nʼandi, bakamuenzela bibi tô ne ku dinda; bakamba butuku kutshia, bakamulekela. Hashishe mukashi wakahingana hatshiatshia, wakadishinda hanshi ku mbelu kua nsubu wa muntu kuakadi mukelenge wandi, to ne hakabanda diba. Mukelenge wandi wakabika ne dinda dionso, wakunzulula bibi bia nsubu, wakamba kuya mu nshila wandi; ne monai, mukashi wandi muhika wakadi muhone hanshi ku tshibi tshia nsubu, ne bianza biandi mu mbelu. Yeye wakamuambila ne, Bika, tuye; kadi kakamuitaba. Hashishe yeye wakamuteka ha nyima ha mpunda, ne muntu eu wakaya ku muaba wandi. Hakabueleye mu nsubu muandi, yeye wakangata kele, wakakuata mukashi wandi muhika, wakamukosolola bituha dikumi ne bibidi, wakabituma ku nseke yonso ya Isalele. Bantu bonso bakamona bualu ebu, bakambilangana ne, Bualu ebu kabuakanza kuenjibua mu Isalele ku dituku diakumukabo mu buloba bua Ejipitu tô ne lelu; nubumanye, nuelangane meji, ambai. Hashishe Bena Isalele bonso bakaluhuka bafume ku Dana tô ne ku Bê-sheba ne ba mu buloba bua Gilada, bakadisangisha bu muntu umue kudi Yehowa ku Misepa. Bakelenge ba bantu ba mu bisamba bionso bia Bena Isalele bakamueneka ku disangisha dia bantu ba Nzambi, bena nvita ba miele bakadi benda ku makasa binunu nkama inai. Hashishe Bena Benyamina bakunvua lumu ne, Bena Isalele bakadisangisha ku Misepa. Bena Isalele bakamba ne, Nutuambile ne, Bualu ebu bubi buakalua munyi? Muena Lewi, bayandi wa mukashi wakashihabo, wakabakudimuna ne, Nakalua ku Gibea wa mu buloba bua Benyamina, meme ne mukashi muhika unakabaka, bua kulalaku. Bena Gibea bakadisangisha kundi, bakanyunguluka nsubu unakadi butuku; bakasua kushiha meme, bakakuata mukashi wanyi muhika ku bukole, ne yeye wakafua. Nunku nakangata mukashi wanyi muhika, nakamukosolola bituha, nakabituma ku maloba onso a mahianyi a Bena Isalele; bualu bua bobo bakadi benza bualu bua bundu ne bua buhote mu Isalele. Monai, nuenu Bena Isalele, buonso buenu, leshai meji enu, lumbululai. Bantu bonso bakabika bu muntu umue bamba ne, Katuena tuya, muntu mu ntenta muntu mu ntenta yetu, ne katuena tuahuka, muntu ku nsubu wandi muntu ku nsubu wandi. Kadi ebu mbualu butuenzela Bena Gibea; netubelele nshobo bua kuluangana nʼabo; neusungule bantu dikumi ku lukama lua bantu ba mu bisamba bionso bia Bena Isalele, ne lukama ku tshinunu tshia bantu, ne tshinunu tshimue ku binunu dikumi bia bantu, bua kutuadilabo bantu bia kudia; ne hafikabo ku Gibea wa Benyamina, bobo nebabenzele bu mudi bualu buhote buonso buakenzabo mu Isalele. Nunku Bena Isalele bonso bakadisangisha ku musoko ne mitshima yabo miakanangane bu muntu umue. Bisamba bionso bia Bena Isalele biakatuma bantu munkatshi mua tshisamba tshionso tshia Bena Benyamina, bamba ne, Bualu ebu bubi buakuenjibua munkatshi muenu budi tshinyi? Nunku nufile balume, bantu balembakane, ba mu Gibea kutudi, bua tuetu tubashihe, neamushe bubi ebu mu Isalele. Kadi Bena Benyamina kabakunvua dî dia bana babo, Bena Isalele. Bena Benyamina bonso bakadisangisha bafume ku misoko yabo yonso, bakaya ku Gibea bua kuluanganabo ne Bena Isalele. Bakabala Bena Benyamina ku dituku adi ba ku misoko yabo bu bantu binunu makumi abidi ne bisambombo bakadi ne miele ya nvita, ku mutu kua Bena Gibea nkama muanda mutekete bakasungulabo. Munkatshi mua bantu aba bonso muakadi bantu nkama muanda mutekete hasungula bakadi ne luboko; muntu yonso wakadi mumanye mua kuela mabue mu disoka, kâyi eku ne eku bu ntanta wa bunene bua lusuki, kayi uhanga. Bakabala bena nvita bakadi ne miele mu Isalele ku mutu kua Bena Benyamina bantu binunu nkama inai; bonso aba bakadi bena nvita. Bena Isalele bakabika, bakaya ku Betele, bakebesha Nzambi bualu bua kuenzabo; bakamba ne, Ba kutudi badianjile kuluisha Bena Benyamina mbanganyi? Yehowa wakamba ne, Bena Yuda nebadianjile kuya. Bena Isalele bakabika ne dinda, bakatula tshitudilu tshiabo hehi ne Gibea; Bena Isalele bakaluhuka bua kuluangana ne Bena Benyamina; Bena Isalele bakela mualu wa nvita kudibo ku Gibea. Bena Benyamina bakaluhuka ku Gibea, bakashiha Bena Isalele, bahele hanshi dituku adi, bantu binunu makumi abidi ne bibidi. Bena Isalele bakakolesha mitshima yabo, bakela mualu wa nvita ku muaba wakelabo mualu wa nvita diambedi. Bena Isalele bakaya, bakadila ku mpala kua Yehowa tô ne dilolo; bakebesha Yehowa ne, Netuhingane bua kuluangana ne bana betu Bena Benyamina kabidi, anyi? Yehowa wakabambila ne, Nubaluishe. Bena Isalele bakasemena ha buihi ne Bena Benyamina dituku dibidi. Bena Benyamina bakaluhuka kudibo ku Gibea dituku dibidi, bakashiha Bena Isalele, bahele hanshi, bantu binunu dikumi ne muanda mukulu; aba bonso bakadi ne miele. Hashishe Bena Isalele bonso ne bantu bonso bakaya ku Betele, bakadila, bakashikamaku ku mpala kua Yehowa, bakajila bia kudia dituku adi tô ne dilolo; bakasaku milambu ya kuosha ha kahia ne milambu ya kubavuisha nʼai ditalala kudi Yehowa. Bena Isalele bakakonka Yehowa (bualu bua mushete wa tshihungidi tshia mei a Yehowa wakadiku mu matuku au, ne Pinehasa, muana wa Eleazâ, muana wa Alona, wakadi muimane ku mpala kua mushete mu matuku au), bamba ne, Netuye bua kuluangana ne bana betu Bena Benyamina kabidi, anyi nealekele? Yehowa wakabambila ne, Yai bienu, bualu bua nembafile mu bianza bienu makelela. Bena Isalele bakateka balaminyi banyunguluke Gibea. Bena Isalele bakaya kudi Bena Benyamina dituku disatu, bakela mualu wa nvita ku Gibea bu muakenzabo misangu mikuabo. Bena Benyamina bakaluhuka bua kuluangana ne bantu, bakumuka ku musoko basemena kule; bakabanga kubashiha bu muakenzabo misangu mikuabo mu nshila minene, nshila umue udi ufuma ku Betele ne nshila mukuabo udi ufuma ku Gibea, ne mu tshisuku kabidi; bakashiha Bena Isalele bu makumi asatu. Bena Benyamina bakambilangana ne, Tudi tubashiha bu mutuakenza diambedi. Kadi Bena Isalele bakambilangana ne, Tunyeme bietu, tubasemeshe kule ne musoko, baluile mu nshila minene. Bena Isalele bonso bakabika ku miaba yabo, bakela mualu wa nvita ku Bâla-tamâ; balaminyi ba Bena Isalele bakabika ku miaba yabo ya ku Mâle-geba. Binunu dikumi bia bantu hasungula munkatshi mua Bena Isalele bonso bakalua ku Gibea, bakaluangana nvita mikole; Bena Benyamina kabakadi bamanye ne, Bualu bubi bukadi ha kutukuata. Yehowa wakashiha Bena Benyamina ku mpala kua Bena Isalele; Bena Isalele bakashiha Bena Benyamina dituku adi bantu binunu makumi abidi ne bitanu ne lukama lumue; buonso buabo bakadi bena nvita bakadi ne miele. Bena Benyamina bakamanya ne, Bakatuhita bukole; ne Bena Isalele bakashila Bena Benyamina muaba, bualu bua bobo bakadi beyemena balaminyi bakatekabo ku Gibea. Balaminyi bakabika, bakaya ku Gibea lubilu; balaminyi bakela mualu wa nvita, bakashiha bena musoko bonso ku miele ya nvita. Tshimanyinu tshia Bena Isalele ne balaminyi tshiakahungabo tshiakadi muishi wa kahia munene ujuka mu musoko. Bena Isalele bakatshunguluka mu nvita, ne Bena Benyamina bakabanga kubashiha, bantu bu makumi asatu, bamba ne, Bulelela, tudi tubashiha bu mutuakenza diambedi. Kadi hakabanga muishi wa kahia kujuka mu musoko, Bena Benyamina bakatangila ku nyima kuabo; ne monai, musoko mujima wakahia, ne muishi wakadi ubanda mu diulu. Bena Isalele bakatshunguluka, ne Bena Benyamina bakatua mikemu, bakamanya ne, Bualu bubi buakutukuata. Nunku bakela Bena Isalele nyima, bakamba kuya mu tshihela; kadi nvita mikole yakabalonda; bakashiha kabidi bantu bakadi baluhuka mu misoko mu muaba eu mene. Bakela Bena Benyamina munkatshi, bakabihata, bakabadiata ku miaba yakambabo kuikisha tô ne ku Gibea kudi kuhatukila diba. Bakashiha Bena Benyamina binunu dikumi ne muanda mukulu; bonso aba bakadi bena bukitu. Bakâhuka, bakanyema ku tshihela ku dibue dia Limona; balongolola bantu binunu bitanu mu nshila minene; bakananukila kubihata tô ne ku Gidoma; bakashiha bantu binunu bibidi. Nunku bonso ba mu Benyamina bakafua dituku adi bakadi binunu makumi abidi ne bitanu; buonso buabo bakadi ne miele, bakadi bena bukitu. Bantu nkama isambombo bakâhuka, bakanyema ku tshihela ku dibue dia Limona, bakalalaku ngondo inai. Bena Isalele bakatshunguluka kudi Bena Benyamina kabidi, bakabashiha ne miele ya nvita, ne bena musoko bonso ne bimuna biabo ne bionso biakasanganabo; ne misoko yonso yakasanganabo, bakayosha. Balume bonso ba mu Isalele hakamana kuditshiha ku Misepa ne, Nansha umue wetu kafidi muanʼandi mukashi kudi Muena Benyamina bu mukashi wandi. Bantu bakadisangisha ku Betele, bakashikamaku ku mpala kua Nzambi tô ne dilolo, bakabisha dî diabo, bakadila bikole. Bakamba ne, Yehowa, Nzambi wa Bena Isalele, bualu ebu buakulua munyi, bua tshisamba tshimue katshiyi munkatshi mua Bena Isalele lelu? Hakatshiabu, bantu bakabika ne dinda dionso, bakasaku tshioshelu, bakafua milambu ya kuosha ne milambu ya kubavuisha ditalala. Bena Isalele bakamba ne, Nganyi wa munkatshi mua bisamba bia Bena Isalele wahidia kulua ku disangisha dia Yehowa? Bualu bua bobo bakadi baditshiha ne kuditshiha kukole ne, Wahidia kulua kudi Yehowa ku Misepa neafue bulelela. Bena Isalele bakakudimuna mitshima yabo bualu bua Bena Benyamina, bana babo, bamba ne, Tshisamba tshimue tshidi tshiumushibua munkatshi mua Bena Isalele lelu. Munyi mutuangatshila badi bashala bujike bakashi, bualu bua tuetu tuakamana kuditshiha ne, Katuena tuhia bana betu bakashi kudibo bu bakashi babo? Bakakemangana ne, Tshisamba kai tshia Bena Isalele tshidi katshiyi tshitua kudi Yehowa ku Misepa? Ne monai, nansha muetu umue wa mu tshitudilu tshia Yabesha-gilada wakalua ku disangisha. Bualu bua hakabalabo bantu, monai, kakuakadi umue wa munkatshi mua Bena Yabesha-gilada. Bantu bakadi mu disangisha bakatumaku balume ba bukitu binunu dikumi ne bibidi, bakabambila ne, Yai bienu, nushihe Bena Yabesha-gilada ne miele ya nvita, ne bakashi ne bana bakese. Ebu mbualu bunudi ne bua kuenza: nushihe mulume yonso ne mukashi yonso wakamana kulala ne mulume. Bakasangana munkatshi mua Bena Yabesha-gilada bakashi nkama inai bakatshidi tumama, kabakadi bamanyibue kudi mulume; bakalua nʼabo ku tshitudilu tshia mu Shilo, tshidi mu buloba bua Kanâna. Bena disangisha bonso bakatumina Bena Benyamina bakadi ku dibue dia Limona dî dia kubadisha nʼadi ditalala. Bena Benyamina bakahingana ku tshikondo atshi; bakabaha bakashi bakakuatabo ne muoyo ku Yabesha-gilada; kadi kabakabakumbana. Bantu bakakudimuna mitshima yabo bualu bua Bena Benyamina bualu bua Yehowa wakabayuisha batahuluki kudi bisamba bia Bena Isalele. Hashishe, bakulu ba mu disangisha diabo bakamba ne, Munyi mutuangatshila badi bashala bakashi, bualu bua bakashi ba mu Benyamina bakabutudibua? Bakamba ne, Butudi nʼabu mbua kuha Bena Benyamina badi bashala buhianyi, bua tshisamba tshimue katshijiminyi munkatshi mua Bena Isalele. Kadi katuena mua kubaha bana betu bakashi; bualu bua Bena Isalele hakamana kuditshiha ne, Muntu udi ufila muanʼandi mukashi kudi Muena Benyamina udi ne mulau. Bakamba ne, Monai, batu badia bia kudia bia disanka dia Yehowa ku tshidimu ku tshidimu ku Shilo udi ku node kua Betele ne ku esete kua nshila udi mubande ku Betele muye ku Shekeme, ne udi ku sude kua Lebona. Bakambila Bena Benyamina ne, Yai bienu, nualamine mu madimi a tumuma tukese; numone ne halua bana bakashi ba mu Shilo bua kujabo maja, nuluhuke mu madimi a tumuma tukese, ne muntu ne muntu adiangatshile mukashi wandi munkatshi mua bana bakashi ba mu Shilo, aye biandi mu buloba bua Benyamina. Hashishe, bialua batatuʼabo anyi bana babo kutudi bua kutandangana nʼetu, netubambile ne, Nubafile kutudi bu matabisha bualu bua tuetu katuakubangatshila, muntu ne muntu, mukashi mu nvita, ne nuenu kanuakabahabo; bu nuenu babahebo, nuenu nuakadi kuhila. Bena Benyamina bakenza nunku, bakadiangatshila bakashi bakabakumbana bungi buabo ba munkatshi mua bakadi baja maja, bakakuatabo; bakaya nʼabo, bakahingana ku buhianyi buabo, bakasa misoko, bakashikamamu. Bena Isalele bakumukaku mu tshikondo atshi, bakaya muntu ne muntu ku tshisamba tshiandi ne ku tshiota tshiandi; bakumukaku, muntu ne muntu wakaya ku buhianyi buandi. Mu matuku au kamuakadi mukelenge mu Isalele; muntu ne muntu wakenza anu malu akadi mimpe ku mesu kuandi. Mu matuku a, hakadi balumbuluishi balumbuluisha bilumbu, tshiole tshiakadi mu buloba Muntu mukuabo wakumuka mu Beteleheme-yuda, wakaya bua kushikameye mu buloba bua Moaba, ne yeye ne mukashi wandi ne bana bandi ba balume babidi. Dina dia muntu eu diakadi Elimeleke, ne dina dia mukashi wandi diakadi Naomi, ne mena a bana bandi ba balume babidi akadi Malona ne Kiliona, bakadi Bena Efelata ba mu Beteleheme-yuda. Bakalua mu buloba bua Moaba, bakashikamamu. Elimeleke, bayandi wa Naomi, wakafua, yeye wakashala nkayandi ne bana bandi balume babidi. Bobo bakabaka bakashi ba Bena Moaba, dina dia mukuabo, Ôpa, ne dia mukuabo Luta, bakashikamamu bu bidimu dikumi. Malona ne Kiliona bakafua, bubudi buabo, mukashi eu wakashala nkayandi kayi ne bana bandi, kayi ne bayandi. Hashishe yeye wakabika ne ba mamuenʼandi bua kumukeye mu buloba bua Moaba, bualu bua yeye wakamana kunvua lumu mu buloba bua Moaba ne, Yehowa wakashala kuhingana kudi bantu bandi bua kubaheye bia kudia kabidi. Yeye wakumuka ku muaba wakadiye ne bamamuenʼandi babidi bakadi nʼandi, bakaya mu nshila bua kuhinganabo mu buloba bua Yuda. Naomi wakambila bamamuenʼandi babidi ne, Yai bienu, nuhingane mukuabo ku nsubu wa mamu wandi, mukuabo ku nsubu wa mamu wandi, Yehowa anuenzele malu a kalolo bu munuakenzela ba mufu ne meme kabidi. Yehowa anuvuishe bubidi buenu ditalala mu nsubu ya babayenu. Hashishe yeye wakatuangana nʼabo mishiku, bakabandisha mei abo, bakadila. Kadi bobo bakamuambila ne, Nansha, netuhingane nʼebe kudi bana benu. Naomi wakabambila ne, Bana banyi, nu hingane, nuyaya nʼanyi bua tshinyi? Ntshidi ne bana ba balume munda muanvi bua bobo bikale babayenu, anyi? Bana banyi, nuhingane, yai mu nshila wenu meme nakamana kuhita bununu bua kubakibua kabidi. Bua meme kuamba ne, Ndi ne ditekemena bua kuikala ne mulume butuku ebu bua kundelesheye bana ba balume kabidi, nuenu nenuitabushe bua kubindila to ne hakoldbo, anyi? Nuenu nenuhidie balume bakuabo, anyi? Nansha, bana banyi, mutshima wanyi udi utamba kunyingalala bualu buenu, bualu bua Yehowa wakateka tshianza tshiandi kundi. Bakabandisha mei abo, bakadila kabidi, Ôpa wakatuangana ne mamuenʼandi mishiku, kadi Luta wakamulamata. Yeye wakamuambila ne, Mona, mukenʼebe wakahingana kudi bana babo ne kudi nzambi wandi, wewe ulonde mukenʼebe. Luta waka mba ne, Kunsengeledi bua meme kukushiya ne bua kuhingana tshikulondi, nenye kuwaya, nendale kuwalala, bantu bebe nebikale bantu banyi ne Nzambi webe neikale Nzambi wanyi, nenfue kuwafua, nenjikibuehu kabidi, bialua tshintu tshikuabo hankatshi hetu bua kutuhandulula, anu lufu nkayalu, Yehowa angenzele muonso muenzeye tô ne ha mutu. Hakamoneye ne yeye wakakolesha mutshima wandi bua kuyeye nʼandi, yeye wakalekela kuyikila nʼandi. Nunku bubidi buabo bakahingana ku Beteleheme Hakaluabo ku Beteleheme bena musoko bonso bakadi basasakata bualu buabo bamba ne, Eu nNaomi, anyi? Yeye wakabambila ne, Kanumbikidi ne Naomi kabidi, numbikile ne Mala, budlu bua Nzambi wa Bukole Buonso wakatamba kuhkengesha. Nakaya tente, ne Yehowa wakampingasha kuetu bituhu, nudi numbikidila ne Naomi bua tshinyi, bualu bua Yehowa wakampisha ne Wa Bukole Buonso wakankengesha? Nunku Naomi wakahingana ne Luta, Muena Moaba mamuenʼandi, bafume ku buloba bua Moaba, bakalua ku Beteleheme ku tshibangidilu tshia tshidimu tshia kunowabo orge. Naomi wakadi ne muikulu wa mu tshiota tshia bayandi, Elimeleke, muntu mukole ne mubanji, dina diandi Boaza. Luta, Muena Moaba, wakambila Naomi ne, Anji kuitabusha bua meme kuya mu budimi bua undi mua kusangana luse ku mesu kuandi bua meme kuhumbululaku mpumbuluila Yeye wakamuambila ne, Yaku, muanʼanyi. Yeye wakaya mu budimi, wakahumbulula mpumbuluila mu budimi ku nyima kua banowi, ku mpukahuka yeye wakabuela mu tshituha tshia budimi bua Boaza wakadi wa mu tshiota tshia Elimeleke. Boaza wakalua mufume ku Beteleheme, wakambila banowi ne Yehowa ikale nʼenu, bobo bakamukudimuna ne, Yehowa akusankishe. Hashishe Boaza wakakonka muena mudimu wandi wakadi ku mutu kua banowi ne, Nsongakashi eu ngua nganyi? Muena mudimu wakadi ku mutu kua banowi wakamukudimuna ne, Yeye udi nsongakashi, Muena Moaba, wakahingana ne Naomi, balue ku buloba bua Moaba; yeye wakungambila ne, Ndi nkusengelela, anji kuitabusha bua meme kuhumbulula mpumbuluila ku nyima kua banowi munkatshi mua bisumbu bia orge, nunku yeye wakalua wakashala diandi to ne katataka, anu hakayeye mu nsubu tshituha. Hashishe Boaza wakambila Luta ne, Muanʼanyi, kuena munvue, anyi? Kuyi bua kuhumbulula mpumbuluila mu budimi bukuabo, kumuki kunoko nansha, kadi ushale ne bakashi benji banyi ba mudimu. Mesu ebe ikale ku budimi budibo banowa, ubalonde, meme tshiakamana kudimusha bansongalume ne, Kanumulengi bianza, anyi? Biakusuma nyota, uye biebe ku milondo ya mai, unue mai akasunabo kudi bansongalume. Hashishe yeye wakakuma mpala wandi hanshi, wakamukukuila, wakamukonka ne, Meme nakasangana luse ku mesu kuebe bualu kai bua wewe wakunjingulula wakuntangila, meme muenyi? Boaza wakamu kudimuna ne Bakamana kungambila malu onso awakenzela mamuenʼebe ku nyima kua lufu lua bayebe, ne bu muwakalekela tatu webe ne mamu webe ne buloba buakakulelabo, wa kalua kudi bantu baudi kuyi muji ngulule diambedi. Yehowa akufute bua mudimu webe, bakuhe difutu diebe dionso kudi Yehowa, Nzambi wa Isalele, uwakulua kuso koma muinshi mua mahuahua andi. Hashishe yeye wakamba ne, Mukelenge wanyi, nsangane luse ku mesu kuebe, bualu bua wewe wakunsamba, wakuambila mukashi muenji wa mudimu webe mei a kalolo, tshiakadi kuikala bu umue wa bena mudimu bebe bakashi. Hakafika diba dia kudiabo bidia, Boaza wakamuambila ne, Lua kunoko, udie bidia, utue tshihesa tshiebe mu vinaigre. Yeye wakashi kama luseke lumue ne banowi, bakamulesha mateta akamanabo kukanga, yeye wakadia, wakukuta, wakashiya makuabo. Hakabikeye bua kuhumbulula mpumbuluila, Boaza wakambila bansongalume bandi ne, Nuitabushe bua yeye ahumbulule mpumbuluila munkatshi mua bisumbu bia orge mene, kanumukandi nansha. Bualu bukuabo, numuhatuile orge mikuabo mu bisumbu nuyishiye hanshi, bua yeye ayihumbulule, kanumukandi nansha. Nunku yeye wakahumbulula mpumbuluila mu budimi to ne ku dilolo, ne yeye wakashehula bintu biakahumbululeye, biakadi bu épha wa orge. Yeye wakamuambula, wakaya mu musoko, mamuenʼandi wakatangila biakahumbululeye yeye wakahatula, wakamuha biaka shiyeye hakukuteye. Mamuenʼandi wakamukonka ne, Wakahumbulula mpumbuluila kudi kunyi lelu? Wakenza mudimu kudi kunyi? Mu ntu au wakakujingulula ikale biandi ne disanka Yeye wakamanyisha mamuenʼandi ne, Muena kunakadi wenza mudimu lelu wakadi Boaza. Naomi wakambila mamuenʼandi ne, Yehowa udi kayi ulekela kalolo kandi kudi badi ne muoyo ne badi bafue amusankishe. Naomi wakamuambila ne, Muntu au udi wa ha buihi nʼetu, udi umue wa mu tshiota tshietu. Luta, Muena Moaba wakamukudimuna ne, Bulelela, yeye wakungambila ne, Wewe ulamate bansongalume banyi to ne hashikishabo kunowa bintu bianyi bionso. Naomi wakambila Luta, ma muenʼandi, ne, Bidi bimpe, muan a nyi, bua wewe uluhuke ne bakashi benji ba mudimu bandi, kabakusa nganyi mu budimi bukuabo. Nu nku yeye wakalamata bakashi benji ba mudimu ba Boaza to ne kunshiki dilu kua kunowa kua orge ne blé yeye wakashikama ne mamuen andi. Naomi, mamuenʼandi, wakamuambila ne, Muanʼanyi, tshiena nkukebela muaba wa kuikisha bua wewe wikale ne disanka, anyi? Boaza, muena bakashi benji ba mudimu bawakadi nʼabo kena wa mu tshiota tshietu, anyi? Mona, yeye udi ushihula orge mu tshishihuidi butuku ebu. Nunku wowe mai laba manyi hamʼbidi hebe, uluate bilulu biebe uye biebe ku tshishihuidi, kadi kudimanyishi kudi muntu au tô ne hashikisheye kudia ne kunua. Hashishe, habueleye mu nsubu wa kulaleye tulu, wewe uta ngile muaba udiye mulale, wewe ubuelemu umushe bilulu ku makasa andi ulale biebe ne yeye neakua, mbile tshiudi mua kuenza. Yeye wakamuambila ne, Malu onso audi ungambila nengenze. Yeye wakaya ku tshishihuidi wakenza malu onso akamuambila mamuenʼandi. Hakashikisha Boaza kudia ne kunua, ne mutshima wandi wakadi usanka, yeye wakabuela nu nsubu, wakaya kulala kundekelu kua bisumbu bia orge, wakabuelamu bitekete bitekete, wakumusha bilulu ku makasa andi, wakalala. Hakalua mundankulu, muntu au wakatabuluka, wakandamuka ku luseke lukuabo, ne monai mukashi wakadi mulale ku makasa andi. Yeye wakakonka ne, Wewe udi nganyi? Yeye wakamukudimuna ne Meme Luta, muenji webe wa mudimu, olola tshilamba tshiebe hamʼbidi ha mukashi, muena mudimu webe, bualu bua wewe udi muena tshiota tshietu. Yeye wakamba ne Yehowa akusankishe muanʼanyi, kunshikidilu kua kalolo kebe kuakatamba tshibangidilu tshiaku bualu bua wewe kuakalonda bansongalume, nansha bahele nansha babanju. Katataka, muan anyi, kutshinyi, nenkuenzele malu onso awakuamba, bualu bua bena musoko bonso badi bamanye ne, Wewe udi mukashi wa kanemu. Bulelela, meme ndi bu muena tshiota tshienu, kadi mukuabo udiku udi untamba meme kuikala wa ha buihi ne tshiota mene. Anji kulala butuku ebu, ne hatshiabu, bitabusheye bua kukuenzela bu mudi tshilele tshia buena tshiota mbimpe, enze biandi nunku kadi biahidieye kukuenzela bu mudi tshilele tshia buena tshiota bu mudi Yehowa ne muoyo, meme nenkue nzele bu mudi tshilele tshia buena tshiota, lala biebe to ne hatshiabu. Nunku yeye wakalala ku makasa andi tô ne dinda wakabika diambedi muntu kayi mua kumona ngana ne mukuabo; Boaza wakamba ne, Bualu ebu kabumanyibu ne, Mukashi wakalua ku tshishihuidi. Yeye wakamba ne, Ulue ne tshi lulu tshiudi nʼatshi, utshikuate yeye wakatshikuata, ne wakamubadila bihiminu bia orge bisambombo wakamutekeye, yeye wakaya ku musoko. Hakalueye kudi mamuen andi, yeye wakamukonka ne, Wewe nganyi muan anyi? Wakamuambila malu onso akamuenzela muntu au. Yeye wakamba ne Yeye wakumpa bihiminu ebi bia orge bisambombo, wakungambila ne Kuyi bituhu kudi mamuenʼebe. Hashishe yeye wakamuambila ne, Anji kushikama, muanʼanyi, to ne hawamanya kunshikidilu kua bualu ebu bualu bua muntu au kena wikisha to ne hashikisheye bualu lelu. Hashishe Boaza wakaya ku tshilumbuluidi tshia ku tshibi tshia musoko, wakashikamaku, ne monai, muena tshiota au wakamba Boaza wakahitaku wakamuambila ne, Mulumiana, lua somba aha Yeye wakahuka, wakashikama. Wakabikila bakulu ba mu musoko dikumi, wakabambila ne, Shikamai bienu Bobo bakashikama. Yeye wakambila muena tshiota ne, Naomi, nguakafuma mu buloba bua Moaba udi uhana tshituha tshia buloba tshiakadi tshia muanʼetu, Elimeleke; nakuelangana meji bua kukuambila bualu ebu ku matshu ne, Wewe utshisumbe ku mpala kua bantu badi bashikama aha, ne ku mpala kua bakulu banyi. Biwasua kutshihikula, utshihikule, kadi biwahidia kutshihikula hashishe ngambilaku meme mmanye, bualu bua kakuena mukuabo wa kutshihikula, ne meme ndi nkulonda. Yeye wakamba ne, Nentshihikule. Hashishe Boaza wakamba ne, Dituku diudi usumba budimi abu ku tshianza tshia Naomi, budi nʼabu mbua kubusumba kudi Luta, muena Moaba, kabidi, mukashi wa mufu, bua kuhingisha dina dia mufu au ku buhianyi buandi. Muena tshiota wakamba ne, Tshiena mua kudihikuilatshi, bingenza nunku, nenyange buhianyi buanyi, utshihikule wewe muine, bualu bua tshiena mua kutshihikula. Tshilele etshi tshiakadi mu Isalele mu tshikondo tshia ku mpala tshia kuhikula kua bintu ne tshia kushintakasha kua bintu, bua kujadikabo malu onso muntu wakadi umusha tshisabata tshiandi, wakatshiha mukuandi etshi tshiakadi tshilele tshia kujadikabo bualu mu Isalele. Nunku muena tshiota wakambila Boaza ne, Udisumbiletshi Yeye wakumusha tshisabata tshiandi. Boaza wakambila bakulu ne bantu aba bonso ne, Nuenu nudi bamanyi ba bualu lelu ne, Meme nakusumba bintu bionso bia Elimeleke ne bia Kiliona ne bia Malona ku tshianza tshia Naomi. Bualu bukuabo, nakasumba Luta Muena Moaba, mukashi wa Malona bu mukashi wanyi, bua kuhingisha dina dia mufu ku buhianyi buandi, bua dina dia mufu kadijiminyi mu nkatshi mua bana babo ne ku tshibi tshia muaba wandi nudi bamanyi ba bualu ebu lelu. Bantu bonso bakadi ku tshibi ne bakulu kabidi bakamba ne Tudi bamanyi Yehowa avuishe mukashi eu wakalua mu nsubu muebe bu Lakele ne Lea, bubidi buabo bakibaka nsubu wa Isalele, wenze biebe malu a kanemu mu Efelata, wikale ne butumbi mu Beteleheme; ba mu nsubu webe bikale bu ba mu nsubu wa Pelese, nguakalelela Tama Yuda, bua bana badi Yehowa ukulelesha ne nsongakashi eu. Nunku Boaza wakangata Luta bu mukashi wandi, yeye wakaya ku diye ne Yehowa wakamuimitshisha difu, wakamulelela muana wa balume. Bakashi bakambila Naomi ne, Yehowa, udi kayi mukushiye kuyi ne muena tshiota, asanlashibue, dina diandi ditumbishibue mu Isalele. Yeye neikale kûdi bu musangalashi wa muoyo ne bu mudishi wa mu bununu buebe, bualu bua mamuen ebe, udi mukusue, udi muhite bana ba balume muanda mutekete buimpe kûdi, nguakamulela. Naomi wakangata muana, wakamuladika mu tshiadi tshiandi, wakalua ndeshi wandi. Bakashi, bena mutumba nʼandi, bakamuidika dina, bamba ne, Bakalelela Naomi muana, bakamuidika dina ne, Obeda, nyeye udi tatu wa Yishai, tatu wa Davidi. Ei ndelanganyi ya Pelese: Pelese wakalela Heselona, ne Heselona wakalela Lama, ne Lama wakalela Aminadaba, ne Aminadaba wakalela Nashona, ne Nashona wakalela Salamona, ne Salamona wakalela Boaza, ne Boaza wakalela Obeda, ne Obeda wakalela Yishai, ne Yishai wakalela Davidi. Muntu wa mu Lamatayimasofima wa ku mikuna ya Efelayima wakadiku, dina diandi Elekana, muana wa Yelohama, muana wa Elihu, muana wa Tohu, muana wa Sufa, Muena Efelayima, wakadi ne bakashi babidi: dina dia muadi diakadi Hana, ne dina dia mulonde muadi diakadi Penina. Penina wakadi ne bana kadi Hana kakadi ne bana nansha. Muntu eu wakadi Umuka ku musoko wandi ku tshidimu ku tshidimu bua kutendeleleye ne bua kufileye milambu kudi Yehowa wa misumba ku Shilo. Bana balume babidi ba Eli, bakuidi ba Yehowa, bakadiku mena abo Hofeni ne Pinehasa. Hakalua dituku dia Elekana kufileye milambu, diambedi yeye wakaha Penina, mukashi wandi, ne bana bandi ba balume bonso ne bana bandi ba bakashi, bintu biabo: kadi wakaha Hana bintu misangu ibidi: bualu bua yeye wakananga Hana, kadi Yehowa wakamujidika munda muandi. Mutatshishi wandi wakatamba kumutatshisha ne kumunyingalasha, bualu bua Yehowa wakamujidika munda. Wakadi umuenzela nunku ku tshidimu ku tshidimu hakayeye ku nsubu wa Yehowa: wakamutatshisha nunku, yeye wakadi anu udila, kakadia biandi. Hashishe, Elekana bayandi wakamukonka ne, Hana, udi udidila tshinyi? Kuena udia bua tshinyi? Mutshima webe udi unyingala bua tshinyi? Meme tshiena muhite bana ba balume dikumi kudi, anyi? Hakashikishabo kudia ne kunua mu Shilo, Hana wakabika biandi. Eli muakuidi wakadi ushikama ha nkuasa wandi ku tshilua tshia ku tshibi tshia ntempelo wa Yehowa. Mutshima wa Hana wakatamba kunyingalala, wakadi utendelela Yehowa anu udila. Yeye wakaditshiha, wakamba ne, Yehowa, biwatangila kunyingalala kua muntu webe mukashi, biwanvuluka, biwikala kuyi uhua muntu webe mukashi muoyo, kadi biwaha muntu webe mukashi muana mulume, meme nemmufile kudi Yehowa matuku andi onso a muoyo wandi: dihaya kadiena dibeya ku mutu wandi. Hakananukileye kutendelela ku mpala kua Yehowa, Eli wakatangila mukana muandi. Hana wakadi wakula anu mu mutshima wandi, anu mishiku yandi yakadi inyunga, dî diandi ka diakadi diunvuika; nunku Eli wakelangana meji ne yeye udi mukuatshike maluvu, Eli wakamukonka ne, Wewe neukuatshike maluvu musangu bule munyi? Umushe maluvu ebe. Hana wakamukudimuna ne, Nansha, mukelenge wanyi, ndi mukashi udi ne mutshima munyingalala; tshiakanua nvinyo anyi maluvu makole; kadi nakuambila Yehowa malu onso adi mu mutshima wanyi. Kubadi muntu webe mukashi bu muntu mubi; nakuamba mei â bualu bua kunyingalala kuanyi ne kutatshishibua kuanyi kuakutamba. Hashishe Eli wakamukudimuna ne, Ya biebe talalâ, Nzambi wa Isalele unvue biandi kulomba kuwakumulomba. Yeye wakamba ne, Witabushe bua muntu webe mukashi asangane luse ku mesu kuebe. Nunku mukashi wakabika, wakaya mu nshila wandi, wakadia bidia; mutshima wandi kawakadi unyingalala kabidi. Bakabika dinda hatshiatshia honso, bakatendelela ku mpala kua Yehowa, bakahingana, bakafika ku nsubu wabo mu Lama: Elekana wakamanya Hana, mukashi wandi, ne Yehowa wakamuvuluka. Hana wakimita difu, ne hakakumbana ngondo yandi, wakalela muana wa balume, wakamuidika dina diandi Samuele, wakamba ne, Bualu bua nakumulomba kudi Yehowa. Muntu eu Elekana ne bonso ba mu nsubu wandi bakaya bua kufilabo milambu ya tshidimu atshi kudi Yehowa, ne bua kuditshiha. Kadi Hana kakaya biandi: yeye wakambila bayandi ne, Tshiena nya tô ne halekela muana mabele; hashishe nenye nʼandi bua kumuenekeye ku mesu kua Yehowa ne bua kushaleyeku tshiendelele. Elekana bayandi, wakamuambila ne, Wenze biebe budi buimpe ku mesu kuebe; ushale tô ne halekeleye mabele: Yehowa nkayandi ajadike dî diandi. Nunku mukashi wakashala, wakamusha muanʼandi mulume mabele tô ne hakalekeleye mabele. Hakalekeleye mabele, yeye wakaya nʼandi; wakaya ne bana balume ba ngombe basatu ne épha wa bukula bua blé ne mulondo wa nvinyo; wakalua ne muana ku nsubu wa Yehowa mu Shilo; muana wakatshidi mutekete. Bakashiha muana wa ngombe, bakalua ne muana kudi Eli. Hana wakamba ne, Mukelenge wanyi, bu mudi mutshima webe ne muoyo, bulelela, mukelenge wanyi, meme ndi mukashi au wakimana hehi nʼebe kunoko, utendelela Yehowa. Nakamulomba muana eu, ne Yehowa wakamana kumpa kulomba kuanyi kunakumulomba: nunku nakumuhingisha kudi Yehowa; nakumufila kudi Yehowa matuku onso adiye ne muoyo. Yeye wakatendelelaku Yehowa. Hana wakatendelela, wakamba ne, Mutshima wanyi udi utumbishibua mu Yehowa; lusengu luanyi ludi lubandishibua mu Yehowa. Mukana muanyi mudi mudiundishibua kudi bakadi nʼanyi lukuna: bualu bua meme ndi nsanka mu luhandu luebe. Kakuena muntu udi muakane bu Yehowa, bualu bua kakuena mukuabo udi ku mpala kuebe: kakuena dibue dikuabo didi bu Nzambi wetu. Bantu kabatambi kufunafuna: mei a dihetu kahatula mukana muabo: bualu bua Yehowa udi Nzambi wa lungenyi: utu widikisha bienzedi bia bantu. Mata a bantu bakole akatshibuka: bakadi basuika mikaba mikole mu bimono biabo bakalenduka. Bakadi bukuta mafu bakabuela mu mudimu bua kuangatabo bidia: bakadi ne nzala kabena ne nzala kabidi: wakadi nkumba wakalela bana muanda mutekete: wakadi ne bana ba bungi udi unyingalala. Yehowa udi ushiha ne udi ufululula kabidi: udi ubatuma ku Muaba wa Bafue, udi ubabisha kabidi. Yehowa udi ubavuisha buhele, ne udi ubavuisha bubanji kabidi: udi ubahuekesha, udi ubabandisha kabidi. Udi ujula bahele ha buloba: udi ujula badi ne bintu bualu ku diala: udi ubashikika hohamue ne baminyampala, bua kuhianabo nkuasa wa butumbi: bualu bua makunshi a buloba adi a Yehowa, ne yeye wakajadika buloba ha mutu hau. Yeye nealame makasa a bantu bandi ba tshijila, kadi neahuwishe bantu babi mu mîdima: bualu bua muntu kena utamba ku bukole buandi. Bualu bua Yehowa neabutule bantu badi baluangana nʼandi: neabakume ne makubakuba a mu diulu: Yehowa nealumbuluishe badi kunfudilu kua buloba; neaheshe mukelenge wandi bakole, neabandishe lusengu lua wakueleye manyi ha mutu wandi. Elekana wakahingana ku Lama ku nsubu wandi. Muana wakakuatshila Yehowa mudimu ku mesu kua Eli muakuidi. Bana balume ba Eli bakadi bantu babi, kabakamanya Yehowa. Bakuidi ba bantu bakadi ne tshilele tshiabo bu nunku ne, hakalua muntu yonso ne nyama wa kushiha bu mulambu, ne hakadi munyinyi eu usaba ha kahia, muhika wa muakuidi wakalua ne nkalafa udi ne menu asatu mu tshianza tshiandi: wakatua mu luesu anyi mu dilonga anyi mu luesu lunene; ne muakuidi wakadiangatshila munyinyi wonso wakakuata ku nkalafa. Bakenzela Bena Isalele bonso nunku bakalua ku Shilo. Bulelela, diambedi kabayi banze kuosha dianyi, muhika wa muakuidi wakalua, wamhila muena mulambu ne, Umpe munyinyi wa kuanyikila muakuidi, bualu bua yeye kena musue munyinyi uwakalamba mu luesu, udi musue munyinyi mubishe. Nunku bikaleye mumuambile ne, Nebadianjile kuosha dianyi, hashishe udi mumanye mua kuangata bungi hudi mutshima webe musue, muhika wakamuambila ne, Nansha, biwahidia kumpa katataka, meme nengunyenge ku bukole. Bualuebu bua bansongalume buakatamba bubi ku mesu kua Yehowa, bualu bua bobo bakalengulula mulambu wa Yehowa. Samuele wakenzela Yehowa mudimu; hakatshidiye muana, wakadi uluata efoda wa lin. Mamu wandi wakamulelela diyeka dikese, wakadi ulua nʼadi ku tshidimu ku tshidimu bakalueye ne bayandi bua kufileye milambu ya ku tshidimu ku tshidimu. Eli wakavudishila Elekana ne mukashi wandi disanka, wakamba ne, Yehowa akuhe bana bakuabo ne mukashi eu bualu bua kulomba kuakalombeye Yehowa. Bakahingana ku nsubu wabo. Yehowa wakavuluka Hana; yeye wakimita kabidi, wakalela bana ba balume basatu ne bana ba bakashi babidi. Muana eu Samuele wakadiunda ku mesu kua Yehowa. Eli wakalua muntu mununu; wakunyua lumu lua malu mabi a bana bandi ba balume akenzelabo Bena Isalele bonso, ne bu muakalalabo ne bakashi bakadi benza mudimu ku mbelu kua ntenta wa kusambakena. Yeye wakabakonka ne, Bualu kai nudi nuenza malu â? Nakunvua lumu lua malu mabi anudi nuenzela bantu aba bonso. Nansha, bana banyi balume, tshiakunvua lumu luenu luimpe: nudi nuenzesha bantu ba Yehowa malu mabi kabidi. Bienzela muntu munga muntu bibi, Nzambi neamulumbuluishe, kadi bienzela muntu Yehowa bibi, nganyi wamuakuila? Kadi bobo kabakunvua dî dia tatu wabo bualu bua Yehowa wakamana kuhangidisha bua kubashiha. Muana eu Samuele wakadiunda, wakaleha mu diakalengele kudi Yehowa ne kudi bantu kabidi. Muntu wa Nzambi wakalua kudi Eli, wakamba ne, Yehowa udi ukukonka ne, Tshiakadimuenesha kudi ba mu nsubu wa tatu webe hakadibo mu Ejipitu mu nsubu wa Palo, anyi? Tshiakamusungula munkatshi mua bisamba bionso bia Bena Isalele bua kuikaleye muakuidi wanyi ne bua kufueye milambu ku tshioshelu tshianyi ne bua kuosheye musenga wa manananshi ne bua kulaleye efoda ku mpala kuanyi, anyi? Meme tshiakaha ba mu nsubu wa tatu webe milambu yonso yakosha Bena Isalele ha kahia, anyi? Nudi nudiata milambu yanyi ya kuosha ne bintu bidibo bafila kundi binakanuelela mikenji yanyi bua bualu buabi, ne udi utumbishe bana bebe ba balume ku mutu kuanyi bua kudidiundishabo ne bintu bidi bitamba bulengele bia milambu yonso ya bantu banyi Bena Isalele bualu kai? Nunku Yehowa, Nzambi wa Isalele, udi wamba ne, Nakadianjila kuamba ne, Ba mu nsubu webe ne ba mu nsubu wa tatu webe nebende ku mesu kuanyi tshiendelele; kadi katataka Yehowa udi wamba ne, Bualu ebu bumuke kundi, bualu bua badi bantumbisha nembatumbishe, ne badi bampetula, nembalengulule. Tangila, matuku akadi ha kulua andi nkukosa diboko diebe ne maboko a badi mu nsubu wa tatu webe, nansha muntu mununu washala mu nsubu webe. Wewe neumone dikenga dia badi mu nsubu wanyi havuisha Nzambi Bena Isalele bubanji; nansha muntu mununu washala mu nsubu webe tô ne tshiendelele. Muntu undi tshiyi ngumusha ku tshioshelu tshianyi, neikale bua kukusunsuma mu mesu ebe ne bua kunyingalasha mutshima webe; ne bana bonso hadibo balela mu nsubu webe nebafue hatshidibo ne bukole. Bualu ebu budi bulua kudi bana bebe babidi, Hofeni ne Pinehasa, nebuikale bu tshimanyinu kudi; bubidi buabo nebafue dituku dimue. Nenditekele muakuidi wa kanemu; yeye neangenzele malu anakasungula mu mutshima wanyi ne mu lungenyi luanyi. Meme nenjadike nsubu wandi: yeye nende ku mesu kua wanyi unakuela manyi ha mutu tshiendelele. Hashishe yonso washala mu nsubu webe nealue, neamukukuile bua kuangateye argent umue ne mutanda wa bidia: neambe ne, Ndi nkusengelela ne, Umbuesheku mu mudimu wa buakuidi bua meme mpeteku bia kudia. Muana eu Samuele wakakuatshila Yehowa mudimu ku mesu kua Eli. Dî dia Yehowa diakadi dia mushinga mukole matuku au: kakuakadi tshikena kumona misangu ya bungi nansha. Mu tshikondo atshi hakadi Eli mulale mu muaba wandi (mesu andi akavua bileshileshi, kakamanya mua kutangila bimpe); muinda wa Nzambi kawakanji kujima ne Samuele wakadi mulale tulu mu ntempelo wa Yehowa kuakadi mushete wa Nzambi: Yehowa wakabikila Samuele, ne yeye wakitaba ne, Ndiku. Wakaya lubilu kudi Eli, wakamba ne, Ndiku, bualu bua wewe wakumbikila. Yeye wakamukudimuna ne, Tshiakakubikila, ya ulale biebe kabidi. Nunku wakaya, wakalala mu muaba wandi. Yehowa wakamubikila kabidi ne, Samuele. Samuele wakabika, wakaya kudi Eli, wakamba ne, Ndiku, bualu bua wewe wakumbikila. Wakumukudimuna ne, Tshiakakubikila, muanʼanyi, ya ulale biebe. Samuele kakanji kumanya Yehowa ne dî dia Yehowa kadiakanji kubuluibua kudiye. Yehowa wakabikila Samuele tshiakasatu. Wakabika, wakaya kudi Eli, wakamba ne, Ndiku, bualu bua wewe wakumbikila. Eli wakajingulula ne, Yehowa wakabikila muana. Nunku Eli wakambila Samuele ne, Ya ulale: hashishe, biakubikilabo kabidi, wewe umuitabe ne, Yehowa, ambaku, bualu bua muntu webe udi munvue. Nunku Samuele wakaya, wakalala mu muaba wandi kabidi. Yehowa wakalua, wakimana, wakabikila ne, Samuele, Samuele, bu muakenzeye bikondo bikuabo. Samuele wakamuitaba ne, Ambaku, bualu bua muntu webe udi munvue. Yehowa wakambila Samuele ne, Mona, nengenze bualu mu Isalele, nebuhatshishe matshu a yonso udi ubunvua. Mu dituku adi nenshikishe malu onso anakamba bua Eli ne ba mu nsubu wandi ku tshibangidilu tshiau tô ne kunshikidilu kuau. Bualu bua nakamana kumuambila ne, Nendumbuluishe ba mu nsubu webe tshiendelele, bua malu mabi abo akadiye mumanye: bualu bua bana bandi balume bakadiela mulau, ne yeye kakabakanyina. Nunku nakaditshiha bua ba mu nsubu wa Eli ne, Kabena babuikidila mibi ya ba mu nsubu wa Eli ku milambu ya kuosha ne ku bintu bidibo bafila tshiendelele. Samuele wakalala tô ne muakatshiabu, wakunzulula bibi bia mu nsubu wa Yehowa. Samuele wakatshina mua kuambila Eli bua tshikena kumona. Hashishe Eli wakabikila Samuele, wakamba ne, Samuele, muanʼanyi. Yeye wakamuitaba ne, Ndiku. Yeye wakamukonka ne, Bualu kai buakakuambila Yehowa? Ndi nkusengelela ne, Kubusokoki. Nzambi akuenzele wewe malu au onso ne makuabo ha mutu biwasokoka bunga bualu bua malu onso akakuambileye. Samuele wakamuambila malu onso, kakamusokoka nansha bualu bumue. Eli wakamba ne, Ebu mbualu bua Yehowa; enze biandi malu adi mimpe ku mesu kuandi. Samuele wakadiunda, Yehowa wakadi nʼandi; kakalekela nansha dî dimue hanshi diakamuambileye. Bena Isalele bonso ku Dana tô ne ku Bê-sheba bakamanya ne Samuele wakadi mujadikibue bu muprofete wa Yehowa. Yehowa wakamueneka kabidi mu Shilo: bualu bua Yehowa wakadimuenesha kudi Samuele mu Shilo ku dî dia Yehowa. Dî dia Samuele diakafika kudi Bena Isalele bonso. Bena Isalele bakaya bua kuluangana mata ne Bena Peleshete, bakatula tshitudilu tshiabo hehi ne Ebene-ezê; Bena Peleshete bakatula tshitudilu tshiabo mu Afeka. Bena Peleshete bakabanga kuluangana ne Bena Isalele; hakaluanganabo, Bena Isalele bakadi batambibue kudi Bena Peleshete, bakashiha bena nvita ba Bena Isalele bu binunu binai. Kakahingana bantu ku tshitudilu, bakulu ba mu Isalele bakakonkangana ne, Yehowa wakatushiha lelu ku mesu kua Bena Peleshete bualu kai? Tuyai, tuangate mushete wa tshihungidi tshia mei a Yehowa ku Shilo, ulue munkatshi muetu bua kutusungilau ku tshianza tshia badi nʼetu lukuna. Nunku bantu bakatuma dî ku Shilo, bakalua ne mushete wa tshihungidi tshia mei a Yehowa, utu washikama ku mutu kua bakeluba: bana ba balume babidi ba Eli, Hofeni ne Pinehasa bakadiku ne mushete wa tshihungidi tshia mei a Nzambi. Hakalua mushete wa tshihungidi tshia mei a Yehowa mu tshitudilu, Bena Isalele bakela mbila bikole; nunku buloba buakamba kunyunga. Hakunvua Bena Peleshete tshiona tshia mbila yabo, bobo bakakonkangana ne, Tshiona tshia mbila idi mu tshitudilu tshia Bena Ebelu ntshia tshinyi? Bakajingulula ne mushete wa tshihungidi tshia mei a Yehowa wakalua mu tshitudilu. Bena Peleshete bakatshina, bakamba ne, Nzambi wakalua mu tshitudilu. Bakamba ne, Mulau wakutukuata! Kaluakadi ne bualu nunku diambedi. Mulau wakutukuata! Nganyi watusungila mu bianza bia nzambi ei ya bakole? Ei nnzambi yakashiha Bena Ejipitu ne makenga makole mu tshihela. Nuenu Bena Peleshete, koleshai mitshima, nutantamane bu balume mene, bua nuenu kanuikadi bahika ba Bena Ebelu bu muakadibo bahika benu; nutantamane bu balume mene, nuluangane bikole. Bena Peleshete bakaluangana, bakahita Bena Isalele bukole: muntu yonso wakanyema lubilu ku ntenta wandi; ba bungi bakafua, bualu bua bakashiha Bena Isalele bakadi benda ku makasa binunu makumi asatu. Bakanyenga mushete wa Nzambi, bana ba balume babidi ba Eli, Hofeni ne Pinehasa, bakashihibua. Muena nvita wa mu tshisamba tshia Benyamina wakaya lubilu, Wakafika ku Shilo dituku adi mene ne bilulu biandi bionso bihandika ne buloba buela mu mutu. Hakafikeye, Eli wakadi mushikame mu nkuasa kukala kua nshila, mutentekele; mutshima wandi wakadi ukanka bua mushete wa Nzambi. Hakafika muntu eu ku musoko, ne hakambeye bualu ebu, bena musoko bonso bakadila bikole. Hakunyua Eli tshiona tshia madilu abo, wakakonka ne, Tshiona tshia madilu au ntshia tshinyi? Muntu wakalua lubilu, wakambila Eli. Eli wakadi ne bidimu makumi tshitema ne muanda mukulu, mesu andi akavua bileshileshi, yeye kakadi mua kutangila bilengele. Muntu eu wakambila Eli ne, Meme nyeye wakahanduka, wakanyema munkatshi mua bena nvita lelu. Eli wakamukonka ne, Bualu bishi mbuenjibue, muanʼanyi? Muntu wakadi ulua ne lumu wakamuambila ne, Bena Isalele bakatshimuka ku mesu kua Bena Peleshete: bakashiha bantu ba bungi, ne bana bebe ba balume babidi, Hofeni ne Pinehasa, bakafua; bakanyenga mushete wa Nzambi kabidi. Hashishe, hakambeye dî bua mushete wa Nzambi, Eli wakadishinda bualame ku mpenge kua tshibi, nshingu wandi waka tshihuka, wakafua, bualu bua yeye wakadi muntu mununu ne wa bujitu. Wakamana kulumbulula Bena Isalele bidimu makumi anai. Mukashi wa muanʼandi Pinehasa wakadi ne difu, kulela kuandi kuakadi ha buihi. Hakunvueye lumu ne, Bakanyenga mushete wa Nzambi ne lua lufu lua tatuʼandi-muenu ne lua lufu lua bayandi kabidi, yeye wakatantamana, wakalela bualu bua kanyinganyinga kakamukuata. Hakambeye kufua, bakashi bakadi bimana ha buihi nʼandi bakamuambila ne, Kutshinyi, bualu bua wewe wakulela muana wa balume. Kadi yeye kakaha kudimuna dî, bakajingulula bualu ebu. Wakidika muana dina ne, Ikaboda, wamba ne, Butumbi buakumuka kudi Bena Isalele; bualu bua bakanyenga mushete wa Nzambi ne bualu bua tatuʼandi-muenu ne bua bayandi kabidi. Wakamba ne, Butumbi bua Bena Isalele buakabumuka: bualu bua mushete wa Nzambi udi munyengibue. Bena Peleshete bakanyenga mushete wa Nzambi, bakalua nʼau ku Ebene-ezê tô ne ku Ashedodo. Bena Peleshete bakangata mushete wa Nzambi, bakalua nʼau mu nsubu wa Dagona, bakauteka hehi ne Dagona. Hakatshiabu bakabika Bena Ashedodo, monai, Dagona wakadi mudishinde mutue mpala hanshi ku mpala kua mushete wa Yehowa. Bakakuata Dagona, baka-mushikika mu muaba wandi kabidi. Hakatshiabu hakabikabo, bakasangana Dagona mudishinde mutue mpala hanshi ku mpala kua mushete wa Yehowa; mutu wa Dagona ne bianza biandi bibidi biakadi bikoseke bimate hanshi ku tshibuelelu; anu tshitumpampa tshia Dagona tshiakadi tshishale. Bua bualu ebu bakuidi ba Dagona anyi bakuabo bakadi balue mu nsubu wa Dagona kabena hadiata makasa ku tshibuelelu tshia Dagona mu Ashedodo tô ne lelu. Kadi tshianza tshia Yehowa tshiakadi ne bujitu kudi Bena Ashedodo, yeye wakababutula, wakabashiha ne masungu, Bena Ashedodo mene ne bakadi ku matshika abo kabidi. Hakatangila Bena Ashedodo ne bualu budi nunku, bakambilangana ne, Mushete wa Nzambi wa Isalele kaushadi kutudi, bualu bua tshianza tshiandi tshiakulua bujitu hamʼbidi hetu ne ha Dagona, nzambi wetu. Nunku bakatuma dî, bakabikila bakelenge bonso ba Bena Peleshete kudibo, bakabakonka ne, Netuenze tshinyi ne mushete wa Nzambi wa Isalele? Bakabakudimuna ne, Baye ne mushete wa Nzambi wa Isalele ku Gata. Bakayaku ne mushete wa Nzambi wa Isalele. Hakenzabo nunku, tshianza tshia Yehowa tshiakalesha bena musoko au, ne tshiakabahita bikole; yeye wakashiha bantu ba mu musoko ne bakese ne banene, masungu akabakuata kabidi. Nunku bobo bakatuma mushete wa Nzambi ku Ekelona. Hakaluabo ne mushete wa Nzambi ku Ekelona, Bena Ekelona bakadila ne, Bakalua ne mushete wa Nzambi wa Isalele kutudi bua kutubutuisha ne bana betu kabidi. Bobo bakatuma dî, bakabikila bakelenge ba Bena Peleshete, bakabambila ne, Numushe mushete wa Nzambi wa Isalele kutudi, uye ku muaba wau, kautushihi ne bana betu. Bualu bua bena musoko bakadi ne dikenga dikole, tshianza tshia Nzambi tshiakatamba kubanemena bujitu. Masungu akakuata bantu bakashala ne muoyo ne mu adi wa bena musoko wakafika mu diulu. Mushete wa Yehowa wakadi mu buloba bua Bena Peleshete ngondo muanda mutekete. Bena Peleshete bakabikila babuki ne batempi ba mbuku, bakabakonka ne, Netuenze tshinyi ne mushete wa Yehowa? Nutumanyishe mua kûtuma ku muaha wau. Bakamba ne, Binuatuma mushete wa Nzambi wa Isalele, kanûtumi hatuhu, kadi numutekelehu mulambu wa kubuikila nʼau mibi; nenuondahibue, nenumanye bu mudi tshianza tshiandi katshiyi tshiumuke kunudi. Bakabakonka ne, Netumutekelehu mulambu kai? Bakabakudimuna ne, Bifuanyikishi bia or bitanu bia masungu ne bifuanyikishi bia or bitanu bia mpuku bu bungi bua hakelenge ba Bena Peleshete, bualu bua dikenga diodimue diakanukuata ne bakelenge benu. Nunku nudifuanyikishile bifuanyikishi bia masungu enu ne bifuanyikishi bia mpuku yenu idi misusule buloba buenu: nenuambike Nzambi wa Isalele butumbi bitabusheye bua kuhehesha tshianza tshiandi kunudi ne kudi nzambi yenu ne ku buloba buenu. Nudi nukoleshe mitshima yenu bu muakakolesha Bena Ejipitu ne Palô mitshima yabo bualu kai? Hakenzeye malu a kukema munkatshi muabo kabakalekela bantu ne baye, anyi? Nunku nuangate dikalu dihia-dihia, nudilongolole bimpe, nuangate ngombe ibidi idi ne mabele, idi kayiyi mianze kumanya mutshi wa tshikokedi; nusuike ngombe ku dikalu, nuhingishe bana bai mu nsubu wai; nuangate mushete wa Yehowa, nuteke ha dikalu, nuteke bintu bia or binudi numuhingishila bu mulambu mu mushete mukuabo, nûsuike ku mpenge; nutume mushete, uye. Tangilai, ne biayau malulame mu nshila wa ku mukalu wau wa ku Bete-shemeshe, nemmanye ne Nzambi wakatuenzela bualu ebu bubi; kadi biayau mu nshila mukuabo, nemmanye ne tshianza tshiandi katshiakatushiha, kadi bualu buakatukuata ku mpukahuka. Bakenza nunku: bakangata ngombe ibidi yakadi ne mabele, bakayisuika ku dikalu, bakinshidila bana bai mu nsubu wai; bakateka mushete wa Yehowa ha dikalu, ne mushete mukuabo wakadi ne bifuanyikishi bia or bia mpuku ne bia masungu. Ngombe yakaya mu nshila mululame wa ku Bete-shemeshe: yakaya anu mu nshila munene, yenda idila muadi, kayakasesuka ku tshianza tshia balume anyi ku tshianza tshia bakashi; bakelenge ba Bena Peleshete bakayilonda tô ne ku mukalu wa Bete-shemeshe. Bena Bete-shemeshe bakadi banowa blé yabo mu tshibanda, bakabanduluka, bakamona mushete wa Nzambi, bakasanka bua kûmona. Dikalu diakalua mu budimi bua Yoshua, Muena Bete-shemeshe, diakimana ku dibue dinene; bobo bakahanda mabaya a dikalu, bakafila ngombe kudi Yehowa bu mulambu wa kuosha ha kahia. Bena Lewi bakangata mushete wa Yehowa ne mushete mukuabo wakadi hehi nʼau wakadi ne bintu bia or, bakayiteka ha mutu ha dibue dinene; Bena Bete-shemeshe bakafila milambu ya kuosha ha kahia ne milambu mikuabo kudi Yehowa dituku adi. Hakatangila bakelenge batanu ba Bena Peleshete bualu ebu, bakahingana ku Ekelona dituku adi. Ebi mbifuanyikishi bia or bia masungu biakahingishila Bena Peleshete Yehowa bu milambu ya kubuikidila nʼai mibi; ku Ashedodo tshimue, ku Gaza tshimue, ku Ashekelona tshimue, ku Gata tshimue, ku Ekelona tshimue; ne bifuanyikishi bia or bia mpuku bu bungi bua misoko yonso ya Bena Peleshete yakadi ku nyima kua bakelenge aba batanu, ne misoko yakadi ne ngumbu ne yakadi hatuhu tô ne ku dibue adi dinene diakatekabo mushete wa Yehowa, didi mu budimi bua Yoshua, Muena Bete-shemeshe, tô ne lelu. Nzambi wakabutula Bena Bete-shemeshe bualu bua bobo bakatangila munda mua mushete wa Yehowa, wakashiha bantu binunu makumi atanu ne makumi muanda mutekete: bena musoko bakadila muadi bualu bua Yehowa wakashiha bantu ba bungi ne kushiha kukole. Bena Bete-shemeshe bakakonkangana ne, Nganyi udi mumanye mua kuimana ku mesu kua Yehowa, Nzambi wa tshijila? Humukeye kutudi, neaye kudi banganyi? Bakatuma miloho kudi Bena Kîyata-yalima bambila ne, Bena Peleshete bakahingisha mushete wa Yehowa; luai bienu, nuye nʼau kuenu. Bena Kîyata-yalima bakatua, bakangata mushete wa Yehowa, bakaya nʼau ku nsubu wa Abinadaba ku mukuna: bakajidila Eleazâ, muanʼandi mulume, bua kulameye mushete wa Yehowa. Mushete wa Yehowa wakashala mu Kîyata-yalima tô musangu mule bu bidimu makumi abidi; Bena Isalele bonso bakadila muadi kudi Yehowa. Samuele wakambila Bena Isalele bonso ne, Binuasua kuhingana kudi Yehowa ne mitshima yenu yonso, nunku numushe nzambi ya bende ne ya Bashela munkatshi muenu, kudimunai mitshima yenu kudi Yehowa, numukuatshile yeye nkayandi mudimu; ne yeye neanusungile mu bianza bia Bena Peleshete. Nunku Bena Isalele bakumusha nzambi ya Babâla ne ya Bashela munkatshi muabo, bakakuatshila anu Yehowa mudimu. Samuele wakamba ne, Bena Isalele bonso badisangishile ku Misepa, meme nennulombele Yehowa. Bakadisangisha ku Misepa, bakasuna mai, bakâhongolola ku mesu kua Yehowa, bakajila bia kudia dituku adi, bakamba ne, Tuakuenzela Yehowa bibi. Samuele wakalumbulula Bena Isalele mu Misepa. Hakunvua Bena Peleshete ne Bena Isalele bakadisangisha mu Misepa, bakelenge ba Bena Peleshete bakaya kuluisha Bena Isalele. Hakunvua Bena Isalele lumu elu, bakatshina Bena Peleshete. Bena Isalele bakambila Samuele ne, Kulekedi kutulombela Yehowa, Nzambi wetu, bua yeye atusungile mu bianza bia Bena Peleshete. Samuele wakangata muana wa mukoko utshivua wamua mabele, wakamufila bu mulambu wa kuosha mujima ha kahia kudi Yehowa; Samuele wakalombela Bena Isalele Yehowa bikole; Yehowa wakamunvuila. Hakatshidi Samuele ufila mulambu wa kuosha, Bena Peleshete bakafika ha buihi bua kuluanganabo ne Bena Isalele; Yehowa wakakunguishila Bena Peleshete mikungulu mikole, wakabatatshisha dituku adi, nunku bakashihibua kudi Bena Isalele. Bena Isalele bakumuka ku Misepa, bakalonda Bena Peleshete, bakabashiha tô ne hakafikabo ku Bete-kâ. Hashishe, Samuele wakangata dibue, wakadimanyika hankatshi ha Misepa ne Shene, wakaditeka dina ne, Ebene-ezê, Wamba ne, Yehowa wakaluatshisha tô ne lelu. Nunku Bena Peleshete bakadi batambibue bukole, kabakahitshila ku mikalu ya Bena Isalele kabidi; tshianza tshia Yehowa tshiakaluisha Bena Peleshete matuku onso a Samuele. Bena Peleshete bakahingishila Bena Isalele misoko yabo yakanyengabo ku Ekelona tô ne ku Gata; Bena Isalele bakumusha mikalu yabo mu bianza bia Bena Peleshete. Ditalala diakadi hankatshi ha Bena Isalele ne Bena Amole. Samuele wakalumbulula Bena Isalele matuku onso a muoyo wandi. Ku tshidimu ku tshidimu yeye wakendakana ku luseke alu ku Betele ne Gilegala ne Misepa: wakalumbulula Bena Isalele mu misoko ei yonso. Wakadi uhingana ku Lama bualu bua nsubu wandi wakadiku: wakalumbululaku Bena Isalele, wakashilaku Yehowa tshioshelu. Hakalua Samuele muntu mununu, yeye wakasungula Bena Isalele bana bandi ba balume bu balumbuluishi babo. Dina dia muanʼa bute wandi diakadi Yoele, ne dina dia muakunyi wandi diakadi Abiya: bakadi balumbuluishi mu Bê-sheba. Bana bandi ba balume kabakamulonda mu makasa andi, kadi bakasesuka bualu bua lukuka lua biuma, ne bakangata bintu bia mbueshilu, bakandamusha kulumbulula kuakane. Hashishe, bakulu bonso ba Bena Isalele bakadisangisha hamue, bakalua kudi Samuele ku Lama; bakamuambila ne, Tangila, wewe udi muntu mununu, ne bana bebe ba balume kabalu benda mu makasa ebe, nunku utusungile mukelenge wa kuikaleye utulumbulula bu mudi ba bisamba bionso benza. Bualu ebu kabuakasankisha mutshima wa Samuele hakambabo ne, Utusungile mukelenge wa kuikaleye utulumbuluila. Samuele wakatendelela Yehowa. Yehowa wakambila Samuele ne, Unvile mei a bantu mu malu onso adibo bakuambila; bualu bua bobo kabakakuhidia wewe, bakampidia meme bua meme tshikadi mukokeshi wabo. Bu mudi malu onso akenzabo ku dituku diakumuka nʼabo mu Ejipitu tô ne ku dituku edi, muakandekelabo bua kukuatshilabo nzambi mikuabo mudimu, nunku badi bakenzela wewe kabidi. Nunku unvuile mei abo; kadi ubadimushe bikole ne ubaleshe mushindu wa mukelenge wabakokesha. Samuele wakambila bantu bakamukonka bua mukelenge mei onso a Yehowa. Wakamba ne, Eu newikale mushindu wa mukelenge udi unukokesha: neangate bana benu ba balume, neabateke bu bena makalu andi ne badi benda ha nyima ha nyama yandi ya tubalu; bobo nebalumbile lubilu ku mpala kua dikalu diandi; yeye neabasunguile tupitene tua bantu tshinunu bantu tshinunu, ne tua bantu makumi atanu makumi atanu; neabueshe bakuabo mu mudimu wa kuihila madimi andi ne wa kunowa bintu biandi, ne wa kumuenzela bintu bia nvita ne bintu bia makalu andi. Yeye neangate bana benu ba bakashi bua kumusumbilabo manananshi ne bua kumulambilabo bia kudia. Yeye neanunyenge madimi enu ne madimi a nvinyo ne madimi enu a olive, madimi mene adi matambe buimpe, neâfile kudi bahika bandi. Neanunyenge tshia dikumi tshia maminu enu ne tshia tumuma tuenu tua nvinyo, neatshidie kudi tuhita tuandi ne kudi bahika bandi. Yeye neanunyenge bena mudimu benu balume ne bena mudimu benu bakashi ne bansongalume benu badi batamba bulengele ne tubalu tuenu, neabibueshe mu mudimu wandi. Yeye neanunyenge tshia dikumi tshia bimuna bienu; nuenu nenuikale bahika bandi. Mu dituku adi nenudie bua mukelenge unuakadisunguila, kadi Yehowa kena ununvuila mu dituku adi nansha. Kadi bantu bakahidia kunvua dî dia Samuele, bakamba ne, Nansha, tuikale ne mukelenge ku mutu kuetu, bua tuetu tuikale bu bisamba bikuabo, ne bua mukelenge wetu ahumbulule, aye ku mpala kuetu, atuluile nvita yetu. Samuele wakunyua mei onso a bantu, wakâmba mu matshu a Yehowa kabidi. Yehowa wakambila Samuele ne, Unvue mei abo, ubasunguile mukelenge. Samuele wakambila Bena Isalele ne, Yai bienu, muntu ne muntu ku musoko wandi. Muena Benyamina wakadiku dina diandi Kishi, muana wa Abiele, muana wa Selô, muana wa Bekolata, muana wa Afia, muana wa Muena Benyamina, wakadi biandi muntu mukole mene mene. Wakadi ne muana wa balume, dina diandi Shaula, wakadi nsongalume muakane; munkatshi mua Bena Isalele kamuakadi muntu mukuabo wakamuhita bulengele; wakahia bantu bakuabo bule ku makaya andi ne ku mutu. Nyama ya mpunda ya Kishi, tatu wa Shaula, yakajimina. Kishi wakambila muanʼandi Shaula ne, Wangate umue wa bena mudimu, aye nʼebe: jukai, nuye kukeba nyama ya mpunda. Bakendakana ku mikuna ya Efelayima, bakahitshila ku buloba bua Shalisha, kadi kabakayimona; bakahitshila ku buloba bua Shâlima, kadi kayakadiku; bakahitshila ku buloba bua Benyamina, kadi kabakayimona. Hakafikabo ku buloba bua Sufa, Shaula wakambila muena mudimu wandi wakadi nʼandi ne, Lua, tuhingane, tatu nealekele kunyingalasha mutshima bualu bua nyama ya mpunda, neabange kunyingalasha mutshima bualu buetu. Yeye wakamuambila ne, Mona, mu musoko eu mudi muntu wa Nzambi, bantu bonso badi bamutumbisha; malu onso adiye wamba adi alua malelela; tuye bietu kudiye, yeye atujinguluile ku luendu kutuyaya. Shaula wakambila muena mudimu wandi ne, Mona, bituaya, netutuadile muntu au tshinyi? Bualu bua bidia bionso bia mu mishete yetu biakashika, katuena ne matabisha a kuha muntu wa Nzambi; tudi ne tshintu kai? Muena mudimu wakambila Shaula ne, Mona, ndi ne tshituha tshinai tshia nshekele wa argent mu tshianza tshianyi; nentshihe muntu wa Nzambi bua kutumanyisheye nshila wetu. (Kale kale mu Isalele hakaya muntu bua kukonkeye Nzambi bualu, wakadi wamba ne, Tuye bietu kudi mumonyi wa malu: bualu bua udibo babikila muprofete katataka, diambedimbedi bakadi bamubikila mumonyi wa malu.) Shaula wakambila muena mudimu wandi ne, Mbimpe, lua, tuye; bakabuela mu musoko muakadi muntu wa Nzambi. Hakadibo babanda mu mukuna wa ku musoko, bakasangila ne bansongakashi baye kusuna mai, bakabakonka ne, Mumonyi wa malu udiku, anyi? Bakabakudimuna di ne, E, udiku; monai, udi ku mpala kuenu, endeshai mpindiu, bualu bua yeye wakalua ku musoko anu lelu; bantu badi ne bualu bua kufilabo milambu lelu ku mutu kua mukuna. Hanuabuela mu musoko, hashishe numukebe diambedi yeye kayi muanze kuya ku mukuna bua kudieye bidia: bualu bua bantu kabena badia bidia diambedi yeye kayi muanze kulua, bualu bua yeye udi uvudishila milambu yabo disanka, hashishe bantu bakabikilabo badi badia bidia. Nunku nuye bienu bualu bua nenumusangane ha diba edi. Nunku bakaya ku musoko: hakambabo kubuela mu musoko, Samuele wakasungila nʼabo bua kuyeye ku mutu kua mukuna. Yehowa wakamana kusokoluela Samuele dituku dia ku mpala kua Shaula kayi muanze kulua, wamba ne, Makelela ha diba edi mene nenkutumine muntu mufume ku buloba bua Benyamina ne wewe neumuele manyi ha mutu handi bua kuikaleye mukelenge wa bantu banyi Bena Isalele; yeye neasungile bantu banyi mu bianza bia Bena Peleshete; bua nakatangila bantu banyi bualu bua muadi wabo wakufika kundi. Hakatangila Samuele Shaula, Yehowa wakamuambila ne, Mona muntu unakukuambila, kayeye au! Yeye mene neakokeshe bantu banyi. Hashishe Shaula wakasemena ha buihi ne Samuele ku tshibi, wakamuebesha ne, Ndi nkusengelela ne, Ungambile kudi nsubu kua mumonyi wa malu. Samuele wakakudimuna Shaula dî ne, Meme ndi mumonyi wa malu; ya ku mpala kuanyi ku mukuna bualu bua bûdi nʼabu mbua kudia nʼanyi bidia lelu; kadi hatshiabu nenkutume, nenkuambile malu onso adi mu mutshima webe. Kadi kunyingalashi mutshima bualu bua nyama ya mpunda yakadi mijimine matuku asatu ahitshi, bualu bua hakamana kuyisangana. Mitshima ya Bena Isalele bonso idi kudi nganyi? Kenkûdi ne kudi bonso ba mu nsubu wa tatu webe, anyi? Shaula wakamukudimuna dî ne, Meme tshiena Muena Benyamina, tshisamba tshidi tshihita bisamba bionso bia Bena Isalele bukese, anyi? Diku dianyi kadiena dihita meku onso a tshisamba tshia Benyamina bubale, anyi? Udi ungambila meme malu au munyi? Samuele wakangata Shaula ne muena mudimu wandi, wakaya nʼabo mu nsubu wa tshiala benyi, wakabashiha mu miaba ya butumbi munkatshi mua bantu bonso bakabikilabo bua kudia, bakadi bantu makumi asatu. Samuele wakambila mulambi ne, Lua ne tshituha tshinakukuha, tshinakukuambila ne, Utshiteke. Mulambi wakangata tshibelu ne biakadihu, wakatshiteka ku mesu kua Shaula. Samuele wakamuambila ne, Mona, tshintu tshiakakushilabo, utshiteke ku mesu kuebe, utshidi; tshiakadi tshikutekela tô ne ku diba edi, bualu bua meme nakamba ne, Nakabikila bantu. Nunku Shaula wakadia ne Samuele dituku adi. Hakafumabo ku mutu kua mukuna, bakahingana ku musoko, yeye wakasomba ne Shaula ha mutu ha nsubu. Bakabika hatshiatshia honso: hakatshiabu, Samuele wakabikila Shaula ha mutu ha nsubu, wamba ne, Juka, bua meme nkutume. Shaula wakajuka, bubidi buabo bakahatuka, yeye ne Samuele. Hakambabo kufika kunfudilu kua musoko, Samuele wakambila Shaula ne, Ambile muena mudimu webe ahite ku mpala kuetu (ne yeye wakahita), kadi wimane biebe bua meme kutunyuisha mei a Nzambi. Hashishe Samuele wakangata mulondo wa manyi, wakâhongolola ha mutu handi, wakamutua mishiku, wakamba ne, Yehowa kakakuela manyi bua wewe wikale mukelenge ku mutu kua buhianyi buandi, anyi? Haumuka kundi lelu, wewe neusungile ne balume babidi ha majambu a Lakele ku Selesa ku mukata wa buloba bua Benyamina; bobo nebakuambile ne, Nyama ya mpunda îwakaya kukeba yakamueneka; mona, tatu webe wakalekela kunyingalasha mutshima bua nyama ya mpunda, udi unyingalasha mutshima bualu buebe, wamba ne, Nengenze tshinyi bua muanʼanyi wa balume? Hashishe bûdi nʼabu mbua kumuka ku muaba au tô ne hawafika ku mutshi wa telebinta wa ku Tabô; wewe neusangileku ne balume basatu baya ku Betele bua kutendelela Nzambi, umue mutuale bana ba mbushi basatu, mukuabo muambule mitanda ya bidia isatu, ne mukuabo muambule mulondo wa nvinyo; bobo nebakuele muoyo, nebakuhe mitanda ya bidia ibidi, bûdi nʼabu mbua kuyangata ku bianza biabo. Hashishe bûdi nʼabu mbua kuya ku mukuna wa Nzambi, kudi masalayi a Bena Peleshete; hawafika ha buihi ne musoko, neusangile ne tshisumbu tshia baprofete bafume ku mutu kua mukuna badi ne lunzenze lua nshinga dikumi ne dizele ne lushiba ne tshisanji; bobo mene nebikale bamba dî dia Nzambi. Nyuma wa Yehowa neakutulukile bikole, wewe newambe nʼabo dî dia Nzambi, wewe neukudimuke bu mu ntu mukuabo. Hashishe, halua bimanyinu ebi bionso kûdi, enza muonso mûdi mua kuenza, bualu bua Nzambi udi nʼebe. Bûdi nʼabu mbua kudianjila ku mpala kuanyi ku Gilegala; ne mona, meme nempueke kûdi bua kufila milambu ya kuosha ha kahia ne milambu ya kuvuishila nʼai bantu ditalala; ungindileku matuku muanda mutekete ne hanalua bua kukulesha bualu bûdi ne bua kuenza. Bulelela, hakeleye nyima bua kumuka kudi Samuele, Nzambi wakamuha mutshima mukuabo; ne bimanyinu abi bionso biakalua dituku adi. Hakafikabo ku mukuna, monai, tshisumbu tshia baprofete tshikasangila nʼandi: Nyuma wa Nzambi wakatulukila Shaula bikole, ne yeye wakamba dî dia Nzambi munkatshi muabo. Hakatangila bantu bakadi bamumanye diambedi ne, Monai, yeye udi wamba dî dia Nzambi ne baprofete, bakakonkangana ne, Bualu ebu buakulua kudi muana wa Kishi budi tshinyi? Shaula udi munkatshi mua baprofete, anyi? Muena muaba au wakabakonka ne, Tatu wabo udi nganyi? Nunku dî edi diakalua bu lusumuinu ne, Shaula udi munkatshi mua baprofete, anyi? Hakashikisheye kuamba dî dia Nzambi, yeye wakabanda ku mukuna. Mansebʼa Shaula wakamuambila ne muena mudimu wandi ne, Nuakaya kudi kunyi? Wakamba ne, Ku dikeba dia nyama ya mpunda; hatuakamona ne kayena imueneka, tuakulua kudi Samuele. Mansebʼa Shaula wakamba ne, Ndi nkusengelela ne ungambileku tshiakakuambila Samuele. Shaula wakambila mansebʼandi ne. Yeye wakatujukuila ne, Nyama ya mpunda yakamueneka. Kadi yeye kakamuambila bualu bua bukelenge buakamuambila Samuele. Samuele wakabikila bantu bua kudisangishabo kudi Yehowa ku Misepa. Yeye wakambila Bena Isalele ne, Yehowa, Nzambi wa Isalele, udi wamba ne, Nakumuka ne Isalele mu Ejipitu, nakanusungila mu bianza bia Bena Ejipitu ne mu bianza bia makelenge onso akadi anukengesha; kadi nuenu nuakahidia Nzambi wenu udi unusungila mu makenga enu ne mu ntatu yenu lelu, nuakangambila ne, Nansha, utusungile mukelenge bua bikaleye ku mutu kuetu. Nunku numueneke ku mesu kua Yehowa ku bisamba bienu ne ku binunu bienu. Samuele wakabikila bisamba bionso bia Bena Isalele ha buihi, bakasungula tshisamba tshia Benyamina. Bakabikila tshisamba tshia Benyamina ha buihi ku meku abo ne ku meku abo: bakasungula diku dia Bena Mâteli; bakasungula Shaula, muana mulume wa Kishi. Kadi hakayabo bua kumubikila, kabakamusangana. Nunku bakebesha Yehowa ne, Muntu mukuabo ulualua, anyi? Yehowa wakabambila ne, Monai, yeye wakadisokoka munkatshi mua bintu. Bakaya lubilu, bakaha handi: hakimaneye munkatshi mua bantu, yeye wakafuta buonso buabo bule ku makaya ne ku mutu. Samuele wakambila bantu bonso ne, Tangilai, yeye wakadi Yehowa musungule kakuena mukuabo bu yeye munkatshi mua bantu bonso. Bantu bonso bakela mbila ne, Mukelenge ikale ne muoyo! Samuele wakajinguluila bantu mushindu wa bukelenge, wakafunda mu mukanda, wakauteka ku mpala kua Yehowa. Samuele wakatuma bantu bonso muntu ku nsubu wandi muntu ku nsubu wandi. Shaula wakahingana ku nsubu kuandi ku Gibea; ne tshisumbu tshia bantu bakole bakadi Nzambi ulamakasha mitshima yabo kudiye tshiakaya nʼandi. Kadi bantu bakuabo balembakane bakakonkangana ne, Muntu eu neatusungile munyi? Nunku bakamulengulula, kabakamuha kantu kakese. Kadi yeye wakahuwa biandi talalâ. Nahasha, Muena Amona, wakalua, wakasa tshitudilu bua kuluangana ne musoko wa Yabesha-gilada: bantu bonso ba mu Yabesha bakatumina Nahasha dî ne, Uhunge nʼetu tshihungidi, neakukuatshile mudimu. Nahasha, Muena Amona, wakabambila ne, Netuhunge nʼenu dî ku bualu ebu ne buonso buenu nutule mesu enu a ku bianza bia balume: bualu ebu nebuikale bu kusamina kua Bena Isalele bonso. Bakulu ba mu Yabesha bakamuambila ne, Utuheshe matuku muanda mutekete bua tuetu kutuma bamessager ku nseke yonso ya Isalele; nunku bikala kakuyi muntu wa kutusungila, netulue kudi. Hashishe ba-messager bakalua kudi Shaula ku Gibea, bakamba mei au onso mu matshu a bantu: bantu bonso bakabisha mei abo, bakadila. Shaula wakafuma ku budimi, wenda ulonda ngombe, wakakonka ne, Bantu badi badidila tshinyi? Bakamuambila mei onso akabambila Bena Yabesha. Hakunvua Shaula mei â, Nyuma wa Nzambi wakamutulukila bikole, ne tshiji tshiandi tshiakatema bikole. Wakangata ngombe ibidi yakadi ku mutshi wa tshikokedi, wakayisaya munyinyi, wakayituma mu bianza bia miloho ei ku matshika onso a Isalele, Wamba ne, Yonso udi kayi ulonda Shaula ne Samuele, nebenzele ngombe yandi nunku. Ditshina dia Yehowa diakakuata bantu bonso, bakaluhuka diatshimue. Yeye wakababala mu Bezeke: Bena Isalele bakadi binunu nkama isatu, ne Bena Yuda bakadi binunu makumi asatu. Bakambila miloho yakalua kudibo ne, Nuambile Bena Yabesha-gilada nunku ne, Makelela hafika diba munda munya, nuenu nenusungidibue. Miloho yakalua, yakambila Bena Yabesha dî edi, ne bobo bakasanka. Bena Yabesha bakambila Nahasha ne, Makelela netulue kûdi, neubenzele muonso ûdi umona ne mbimpe. Hakatshiabu, Shaula wakatahulula bantu mu bisumbu bisatu; bakafika ku tshitudilu dinda dionso, bakashiha Bena Amona tô ne ku munda munya; bakadi bashala ne muoyo bakamuangalaka, nansha bantu babidi bakashala kaba kamue. Bena Isalele bakakonka Samuele ne, Nganyi wakamba ne, Shaula neatukokeshe? Lua ne bantu aba, tubashihe. Shaula wakamba ne, Kabena bashiha muntu lelu, bualu bua Yehowa wakamenesha luhandu luandi mu Isalele. Samuele wakambila bantu ne, Luai, tuye ku Gilegala, netujadikileku bukelenge. Bantu bonso bakaya ku Gilegala: bakasungula Shaula mukelenge ku mpala kua Yehowa mu Gilegala; bakafilaku milambu idi ivuisha bantu ditalala ku mpala kua Yehowa; Shaula ne Bena Isalele bonso bakatamba kusankaku. Samuele wakambila Bena Isalele bonso ne, Monai, nakunvua dî dienu mu malu onso anuakungambila, nakateka mukelenge ku mutu kuenu. Katataka monai, mukelenge udi wenda ku mpala kuenu, ne meme ndi muntu mununu, nsuki yanyi idi mitoke tô; bana banyi balume badi nʼenu; meme nakuenda ku mpala kuenu ku buana buanyi tô ne ku dituku edi. Ndiku: numpishe ku mesu kua Yehowa ne ku mesu kua wandi wakedibua manyi: Meme nakunyenga ngombe wa nganyi? Nakunyenga nyama wa mpunda wa nganyi? Nakuiba bintu bia nganyi? Nakukengesha muntu kai tshianana? Nakuitabusha bintu bia mbueshilu kudi nganyi bua meme kubuikila mesu anyi kudiye? Nungambile, ne meme nemuhingishilebi. Bobo bakamba ne, Wewe kuakuiba bintu bietu, kuakutukengesha tshianana, kuakuangata tshintu ku tshianza tshia muntu. Wakabambila ne, Yehowa udi mumanyi wa bualu kunudi, ne wandi wakedibua manyi udi mumanyi wa bualu dituku edi ne kanuakasangana tshintu tshia bende mu tshianza tshianyi. Bakamba ne, Yeye udi mumanyi. Samuele wakambila bantu ne, Yehowa wakasungula Mose ne Alona, nyeye wakafuma ne bankambua benu mu buloba bua Ejipitu. Nunku nuimane talalâ bua meme kunuambila ku mesu a Yehowa malu mimpe onso a Yehowa, akenzeleye bankambua benu ne nuenu kabidi. Hakaya Yakoba mu Ejipitu, ne bakadila bankambua benu kudi Yehowa, hashishe Yehowa wakatuma Mose ne Alona, bobo bakafuma ne bankambua benu mu Ejipitu, bakabateka mu muaba eu. Kadi bobo bakahua Yehowa, Nzambi wabo, muoyo ne yeye wakabahana mu bianza bia Sisela, kapitene ka masalayi a Hazô ne mu bianza bia Bena Peleshete ne mu bianza bia mukelenge wa Moaba: bobo bakabaluisha. Bobo bakadila kudi Yehowa, bakamba ne, Tuakenza bibi, bualu bua tuetu tuakalekela Yehowa, tuakakuatshila Babâla ne Bashatelota mudimu; kadi katataka utusungile mu bianza bia badi nʼetu lukuna, ne tuetu netukukuatshile mudimu. Yehowa wakantumina Yelubâla ne Bedana ne Yefeta ne Samuele, wakanusungila mu bianza bia bakadi nʼenu lukuna ku nseke yonso; nuenu nuakashikama talalâ. Hanuakatangila Nahasha, mukelenge wa Bena Amona, ulua bua kunuluisha, nuenu nuakangambila ne, Nansha, mukelenge utukokeshe, hakatshidi Yehowa, Nzambi wenu, mukelenge wenu. Nunku nutangile mukelenge unuakasungula, unuakalomba; monai, Yehowa wakateka mukelenge ku mutu kuenu. Binuatshina Yehowa, binuamukuatshila mudimu, binuatumikila dî diandi, ne binuikala kanuyi nubenga mikenji ya Yehowa, ne binualonda Yehowa, Nzambi wenu, nuenu ne mukelenge udi unukokesha, mbimpe: kadi binuikala kanuyi nutumikila dî dia Yehowa, binuahidia mikenji ya Yehowa, nunku tshianza tshia Yehowa netshikale kunudi bu muakaditshi kudi bankambua benu. Nunku nuimane talalâ, nutangile bualu ebu bunene budi Yehowa wenza ku mesu kuenu. Kabena banowa blé lelu, anyi? Kadi meme nembikile Yehowa bua yeye anutumine nvula ne mikungulu; nuenu nenumanye, nenutangile ne bubi buenu budi bunene bunuakuenza ku mesu kua Yehowa hanuakadilombela mukelenge. Nunku Samuele wakabikila Yehowa, ne Yehowa wakatuma nvula ne mikungulu dituku adi; bantu bonso bakatamba kutshina Yehowa ne Samuele. Bantu bonso bakambila Samuele ne, Ulombele bantu bebe Yehowa, Nzambi webe, bua tuetu katufu, bualu bua tuetu tuakavudisha bualu ebu bubi bua kudilombela mukelenge ha mutu ha mibi yonso ituakuenza. Samuele wakambila bantu ne, Kanutshinyi: bulelela, nuakuenza bualu ebu bubi, kadi kanulekedi kulonda Yehowa, kadi nukuatshile Yehowa mudimu ne mitshima yenu yonso; kanusesuki mu nshila mukuabo: binuenza nunku nenulonde bintu bia tshianana bidi kabiyi bimanye mua kunukuatshisha ne kunusungila, bualu bua bidi bia hatuhu. Yehowa kena ulekela bantu bandi bualu bua dina diandi dinene, bualu bua Yehowa wakasungula bua kunuvuisha bantu bandi mene. Bua bualu buanyi, tshiena ngitabusha bua kuenzela Yehowa bibi bua kulekela kunulombela Nzambi; kadi meme nennuleshe nshila muimpe ne muakane. Anjai kutshina Yehowa, numukuatshile mudimu mu bulelela ne mitshima yenu yonso; elanganai meji a malu manene akanuenzeleye. Kadi binuananukila kuenza bibi, neanubutule ne mukelenge wenu kabidi. Shaula wakadi ne bidimu makumi anai hakabangeye kukokesha mu Isalele. Hakakokesheye bidimu bibidi, Shaula wakadisunguila Bena Isalele binunu bisatu: binunu bibidi biakadi ne Shaula mu Mikemasha ne ku mukuna wa Betele, ne tshinunu tshikuabo tshiakadi ne Yonatana mu Gibea wa mu buloba bua Benyamina; yeye wakatuma mundi ne mundi ku ntenta wandi wa mu bantu bakashala. Yonatana wakashiha masalayi a Bena Peleshete akadi mu Geba; Bena Peleshete bakunvua lumu elu. Shaula wakelesha mpungi ku nseke yonso ya buloba, wamba ne, Bena Ebelu bonso, unvuai. Bena Isalele bonso bakunvua lumu ne, Shaula wakashiha masalayi a Bena Peleshete ne Bena Isalele bakahetudibua kudi Bena Peleshete. Bantu bonso bakadisangisha kudi Shaula mu Gilegala. Bena Peleshete bakadisangisha bua kuluanganabo nvita ne Bena Isalele, bungi bua bena makalu buakadi binunu makumi asatu, ne bua bakadi babanda ha nyima ha tubalu buakadi binunu bisambombo, ne bungi bua bantu bakadi benda hanshi buakadi bu nsenga ya ku muelelu wa mai manene; bakalua, bakasa tshitudilu tshiabo mu Mikemasha ku esete kua Bete-awena. Hakatangila Bena Isalele ne didi munkatshi mua malu makole (bualu bua bantu bakadi ne ntatu), nunku bakasokoma mu mbuebue ne mu bisuku ne mu mabue ne mu miaba mikuabo ya kusokoma ne mu mena a mikela. Bena Ebelu bakuabo bakadi basabuka musulu wa Yadene ku buloba bua Gada ne bua Gilada; kadi Shaula wakatshidi mushale mu Gilegala, ne bantu bonso bakadi bamulonda bazakala. Yeye wakindilaku Samuele matuku muanda mutekete bu muakahungeye nʼandi dî; kadi Samuele kakaha ku Gilegala; bantu bakabanga kumumuangalala. Shaula wakamba ne, Balue ne milambu ya kuosha ne ya kuvuisha nʼai bantu ditalala kundi. Yeye wakafila milambu ya kuosha ha kahia. Hakashikisheye kufila milambu ya kuosha ha kahia, monai, Samuele wakafika; Shaula wakaya bua kumuakidila bua kumuela muoyo. Samuele wakamba ne, Wewe wakuenza tshinyi? Shaula ne, Bualu bua nakatangila bantu babanga kummuangalala, ne wewe kuakulua mu dituku dituakasungula, ne Bena Peleshete hakamana kudisangisha ku Mikemasha; nunku nakamba ne, Bena Peleshete nebalue kunduisha ku Gilegala diambedi tshiyi muanze kukeba diakalengele kudi Yehowa: nunku nakadienzesha nkayanyi ku bukole, nakafila mulambu wa kuosha ha kahia. Samuele wakambila Shaula ne, Wewe wakenza buhote: wewe kuakanemeka mukenji wa Yehowa, Nzambi webe, wakakuambileye; bu wewe muenze nunku, Yehowa wakadi kujadika bukelenge buebe mu Isalele tshiendelele. Kadi katataka bukelenge buebe kabuena buikalaku; Yehowa wakamana kudikebela muntu udi mutshima wandi musue, Yehowa wakamana kumusungula mukelenge ku mutu kua bantu bandi bualu bua wewe kuakanemeka mukenji wakabambila Yehowa. Samuele wakajuka ku Gilegala, wakaya ku Gibea wa mu buloba bua Benyamina. Shaula wakabala bantu bakashala nʼandi bakadi bu nkama isambombo. Shaula ne muanʼandi wa balume Yonatana ne bantu hakadibo nʼabo bakashala mu Geba wa mu buloba bua Benyamina; kadi Bena Peleshete bakasa tshitudilu tshiabo mu Mikemasha. Bahaudi ba bintu bakafuma mu tshitudilu tshia Bena Peleshete ku bisumbu bisatu: tshisumbu tshimue tshiakayila mu nshila wa ku Ofela wa mu buloba bua Shuala, tshinga tshisumbu tshiakayila ku nshila wa ku Bete-holona, tshisumbu tshikuabo tshiakayila ku nshila wa ku mukalu wakatangila ku tshibanda tshia Seboyima ku luseke lua tshihela. Kamuakadi mufudi wa biamu mu buloba buonso bua Bena Isalele: bualu bua Bena Peleshete bakadi bamba ne, Bena Ebelu kabadifudidi miele ya nvita anyi mafuma: kadi Bena Isalele bonso bakaya kudi Bena Peleshete bua kusakisha bikasu biabo ne miele yabo ne bisui biabo ne nkasu yabo ya kumbula nʼai buloba; kadi bakadi ne makangu a kusakisha nʼau nkasu ne bikasu, ne biamu bia kuboya nʼabi bisonsa, ne bisui ne misonsolo. Nunku hakalua dituku dia nvita kakuakadi muele anyi difuma mu bianza bia bantu bakadi ne Shaula ne Yonatana; kadi Shaula ne muanʼandi Yonatana bakadi nʼabi, Masalayi a Bena Peleshete hakaya kuala mu nshila mubumbakane wa ku Mikemasha. Dituku dikuabo Yonatana, muana mulume wa Shaula, wakambila nsongalume, muambudi wa ngabu wandi ne, Lua, tuye bietu kudi masalayi a Bena Peleshete adi dishiya dia muamua. Kadi yeye kakambila tatu wandi nansha. Shaula wakadi mushikame kunfudilu kua buloba bua Gibea muinshi mua mutshi wa grenade udi mu Migelona: bantu bakadiye nʼabo bakadi bu balume nkama isambombo: ne Ahiya, muana mulume wa Ahituba, muanʼabo ne Ikaboda, muana mulume wa Pinehasa, muana mulume wa Eli, muakuidi wa Yehowa wa mu Shilo, wakadi nʼandi muluate tshilulu tshia efoda. Bantu kabakamanya ne, Yonatana wakaya. Yonatana wakasua kuya kudi masalayi a Bena Peleshete mu nshila mubumbakane, dibue disongoloka diakadi ku tshianza tshia balume, dikuabo disongoloka diakadi ku tshianza tshia bakashi: dina dia dikuabo diakadi Bosese, dina dia dinga diakadi Sene. Dibue dikuabo diakadi ku node ku mpala kua Mikemasha, ne dinga dibue diakadi ku sude ku mpala kua Geba. Yonatana wakambila nsongalume, muambudi wa ngabu wandi, ne, Lua, tuye bietu kudi masalayi au adi kâyi matengula, biasua Yehowa kutukuatshisha; bualu bua kakuena mukandu kudi Yehowa bua kusungila bantu kudi ba bungi anyi kudi bakese. Muambudi wa ngabu wandi wakamuambila ne, Enze biebe malu onso adi mu mutshima webe; tuye bietu, mona, ndi nʼebe anu bua kukuenzela bu mudi mutshima webe musue. Hashishe Yonatana wakamba ne, Mona, netuye kudi bantu aba, netudimueneshe kudibo. Biatuambilabo ne, Anjai kuimana, netulue kunudi aku, hashishe netuimane anu ha wetu muaba, katuena tuya kudibo. Kadi biatuambilabo ne, Luai kunoko, hashishe netuye bualu bua Yehowa wakamana kubafila mu bianza bietu; bualu ebu nebuikale bu tshimanyinu kutudi. Bubidi buabo bakadimuenesha kudi masalayi a Bena Peleshete; Bena Peleshete bakambilangana ne, Monai, Bena Ebelu bakuhatuka mu mena akadibo badisokoke. Masalayi akambila Yonatana ne muambudi wa ngabu wandi ne, Luai kunoko, neanuleshe bualu. Yonatana wakambila muambudi wa ngabu wandi ne, Lua, undonde, bualu bua Yehowa wakamana kubafila mu bianza bia Bena Isalele. Yonatana wakabanda kudibo wenda ukalaba bianza ne makasa; muambudi wa ngabu wandi wakamulonda mu nyima; Bena Peleshete bakashihibua kudi Yonatana, ne muambudi wa ngabu wandi wakashiha bakuabo kabidi. Mu nvita ya ku mpala Yonatana ne muambudi wa ngabu wandi bakashiha balume bu makumi abidi bakadi badisangisha kaba kamue kakadi bu bunene bua tshituha tshia hectare wa buloba. Bantu bonso bakadi mu tshitudilu ne mu madimi kabidi bakazakala; ne masalayi ne bambudi ba bintu bakazakala; buloba buakakanka kabidi, nunku kukanka kunene kua buloba kuakadiku. Batentekedi ba Shaula ba mu Gibea wa mu buloba bua Benyamina bakatangila, ne monai, tshisumbu tshia Bena Peleshete tshiakamuangalaka, bakaya eku ne eku. Hashishe Shaula wakambila bantu bakadi nʼandi ne, Nubale, numone wakumuka kutudi. Hakabalabo nunku, monai, Yonatana ne muambudi wa ngabu wandi kabakadiku. Shaula wakambila Ahiya ne, Lua ne mushete wa Nzambi kundi. Bualu bua mushete wa Nzambi wakadi ne Bena Isalele tshikondo atshi. Hakadi Shaula uyikila ne muakuidi, tshintompatompa tshiakadi mu tshitudilu tshia Bena Peleshete tshiakavulangana; Shaula wakambila muakuidi ne, Huekesha bianza biebe. Shaula ne bantu honso bakadi nʼandi bakunguila hamue, bakalua bua kuluangana nvita; ne monai, muntu ne muntu wakatuisha mukuandi, kuakadi tshintompatompa tshinene. Bena Ebelu bakadi badisangisha ne Bena Peleshete, bakadi bafuma ku buloba buabo habuela nʼabo mu tshitudilu tshiabo, katataka bakakudimuka, bakadisangisha ne Bena Isalele bakadi ne Shaula ne Yonatana. Bena Isalele bakuabo bakadi busokoma ku mikuna ya Efelayima, hakunvuabo lumu ne Bena Peleshete bakanyema, bobo mene bakalonda mu nvita. Nunku Yehowa wakasungila Bena Isalele dituku adi; bakaluangana nʼabo tô ne ku Bete-awena. Bantu ba mu Isalele bakadi ne ntatu dituku adi bualu bua Shaula wakakandisha bantu ne, Muntu udi udia tô ne ku dilolo diambedi tshiyi muanze kusombuela badi nʼanyi lukuna, udi ne mulau. Nunku bantu kabakalabula bia kudia. Bantu bonso bakabuela muitu, buitshi buakadi hanshi ha buloba. Hakabuela bantu muitu, monai, buitshi buakamata hanshi: nansha muntu wakela tshianza mukana muandi bualu bua bakatshina mutshihu. Kadi Yonatana kakunyua hakakandika tatu wandi bantu ne mutshihu: nunku yeye wakatua lusongo lua mulangala wakadi mu tshianza tshiandi mu dihula dia buitshi, wakela tshianza mukana muandi; mesu andi akatanduka. Hashishe umue wabo wakamba ne, Tatu webe wakukandika bantu ne mutshihu ne, Muntu udi udia lelu udi ne mulau. Bantu bakadi bahungile. Hashishe Yonatana wakamba ne, Tatu wanyi wakutatshisha buloba. Ndi nnusengelela ne, Tangilai bu mudi mesu anyi matanduke bualu bua meme nakumbula buitshi ebu bukese. Tuakadi kubahita misangu bungi munyi bu bantu badie lelu bintu bia bena lukuna biakasanganabo? Bualu bua katuena bashihe ba bungi ba munkatshi mua Bena Peleshete. Bakashiha Bena Peleshete dituku adi ku Mikemasha tô ne ku Ayalona. Bantu bakadi batamba kuhungila; bakaya bua kuhaula bintu bia Bena Peleshete, bakakuata mikoko ne ngombe ne bana ba ngombe, bakaushiha, bakayidia ne mashi ai. Bakambila Shaula ne, Mona, bantu badi benzela Yehowa bibi, bualu bua badi badia mashi. Yeye wakamba ne, Nuakuenza bualu bubi; bungulushai dibue dinene kundi eku. Shaula wakamba ne, Muangalalai munkatshi mua bantu, nubambile ne, Muntu yonso alue kundi ne ngombe wandi ne mukoko wandi, netushihe, netuyidie kunoko: katuenzedi Yehowa bibi bua kudia mashi. Bantu bonso bakalua ne ngombe yabo butuku abu, bakayishihaku. Shaula wakashila Yehowa tshioshelu; tshiakadi tshioshelu tshia diambedi tshiakashileye Yehowa. Shaula wakamba ne, Tuyai, tulonde Bena Peleshete butuku ebu, tukuate bintu biabo tô ne hatshiabu: katubashidi nansha muntu wabo umue. Bakamba ne, Wenze tshionso tshidi tshimpe ku mesu kuebe. Hashishe muakuidi wakamba ne, Tusemenai ha buihi ne Nzambi. Shaula wakakonka Yehowa lungenyi ne, Nenye kulonda Bena Peleshete, anyi? Wewe neubafile mu bianza bia Bena Isalele, anyi? Kadi Yehowa bakamukudimuna dî dituku adi. Shaula wakamba ne, Nuenu bukelenge ba bantu, Semenai ha buihi, tumanye bietu, tujingulule bilengele kuakafuma bualu ebu bubi lelu eu. Bu mudi Yehowa ne muoyo, udi usungila Bena Isalele, biafuma bualu ebu kudi Yonatana, muanʼanyi mulume, yeye neafue biandi bulelela. Kadi kakuakadi muntu wa munkatshi mua bantu bonso wakamuandamuna. Hashishe yeye wakambila Bena Isalele ne, Nuenu nuikale ku luseke lumue, meme ne Yonatana, muanʼanyi mulume netuikale ku luseke lukuabo. Bantu bakambila Shaula ne, Wenze tshidi tshimpe ku mesu kuebe. Nunku Shaula wakambila Yehowa, Nzambi wa Isalele, ne, Utumanyishe bualu bulelela. Nshobo yakakuata Yonatana ne Shaula, kadi bantu bakabinga. Shaula wakamba ne, Batuelele ne Yonatana, muanʼanyi mulume nshobo. Nshobo yakakuata Yonatana. Hashishe Shaula wakambila Yonatana ne, Ungambile tshiwakuenza. Yonatana wakamukudimuna dî ne, Bulelela, nakalabula buitshi bukese buakadi ku lusongo lua mulangala wakadi mu tshianza tshianyi; mona, bundi nʼabu mbua kufua. Shaula wakamba ne, Nzambi angenzele bualu ebu ne bukuabo ha mutu, bualu bua wewe Yonatana neufue bulelela. Bantu bakambila Shaula ne, Yonatana, nguakadi Usungila Bena Isalele ne luhandu elu lunene, neafue biandi, anyi? Nansha, bualu ebu kabuikadiku; bu mudi Yehowa ne muoyo, lusuki lumue lua ku mutu kuandi kalumatshi hanshi; bualu bua wakamatshisha ngana ne Nzambi mudimu lelu eu. Nunku bantu bakasungila Yonatana, kakafua nansha. Hashishe Shaula wakalekela kulonda Bena Peleshete; Bena Peleshete bakaya ku muaba wabo. Hakabuela Shaula mu bukelenge bua Isalele, yeye wakaluangana nvita ne bena lukuna bandi bonso ba ku nseke yonso: wakaluangana ne Bena Moaba ne Bena Amona ne Bena Edome ne bakalenge ba mu Seba ne Bena Peleshete; ku miaba yonso yakayeye, yeye wakabahita bukole. Wakadi ne dikima dikole: wakashiha Bena Amaleka, wakasungila Bena Isalele mu bianza bia bakadi bahaula. Bana ba balume ba Shaula bakadi Yonatana ne Yishewi ne Malekishua; au mmena a bana bandi ba bakashi babidi: dina dia muanʼa bute wandi diakadi Melaba, ne dina dia muana muakunyi diakadi Mikalu. Dina dia mukashi wa Shaula diakadi Abinoama, muana mukashi wa Ahimasa. Dina dia kamanda ka masalayi andi diakadi Abinê, muana mulume wa Nê, tatu mukuabo wa Shaula. Kishi wakadi tatu wa Shaula; ne Nê, tatu wa Abinê, wakadi muana mulume wa Abiele. Shaula wakaluangana nvita mikole ne Bena Peleshete matuku andi onso; bakatangila Shaula muntu mukole anyi muntu wa bukitu, yeye wakamuangata bu muntu wandi. Samuele wakambila Shaula ne, Yehowa wakantuma kûdi bua kukuela manyi ha mutu bua wewe kuikala mukelenge ku mutu kua bantu bandi Bena Isalele; nunku unvue biebe mei a Yehowa. Yehowa wa misumba udi wamba ne, Nakavuluka malu akenzela Bena Amaleka Bena Isalele bu muakabatantamenabo mu nshila hakaluhukabo mu Ejipitu. Katataka ya, ushihe Bena Amaleka, ubutule bionso bidibo nʼabi; kubafuidi luse; ubashihe ne balume ne bakashi ne bana bakese ba mu tshiadi ne ngombe yabo ne mikoko ne tumelo ne nyama ya mpunda. Shaula wakabikila bantu, wakababala mu Telaima, bakadi benda hanshi bakadi binunu nkama ibidi; Bena Yuda bakadi binunu dikumi. Shaula wakalua ku musoko wa Bena Amaleka, wakabalamina mu tshibanda. Shaula wakambila Bena Kena ne, Yai bienu, umukai munkatshi mua Bena Amaleka, bua tuetu katunushihi nʼabo; bualu bua nuenu nuakafuila Bena Isalele luse hakaluhukabo mu Ejipitu. Nunku Bena Kena bakumuka munkatshi mua Bena Amaleka. Shaula wakashiha Bena Amaleka ku Hawila tô ne ku Shû udi ku mpala kua Ejipitu. Wakakuata Agaga, mukelenge wa Bena Amaleka, ne muoyo; wakashiha bantu bonso ku miele ya nvita. Kadi Shaula ne bantu bandi bakasungula Agaga ne mikoko ne ngombe ne biakadi ne manyi a bungi ne bana ba mikoko biakatamba buimpe, ne bintu bionso biakadi bimpe, bakahidia kubishiha; kadi bintu bionso bia tshianana, bakaushiha. Hashishe dî dia Yehowa diakalua kudi Samuele ne, Nakakudimuna mutshima bua nakasungula Shaula mukelenge, bualu bua yeye wakasesuka, kena undonda, kena utumikila mikenji yanyi. Samuele wakadi ne tshiji tshikole, wakadila kudi Yehowa butuku abu buonso. Hakatshiabu Samuele wakabika bua kusambakeneye ne Shaula. Bakambila Samuele ne, Shaula wakalua ku Kâmele, ne mona, wakimanyikaku dibue dia tshivulukidi, wakatshunguluka, wakalota, wakaya ku Gilegala. Samuele wakalua kudi Shaula. Shaula wakamuambila ne, Yehowa akuvudishile disanka; nakatumikila mukenji wa Yehowa. Samuele wakamba ne, Muadi wa mikoko ne wa ngombe unakunvua ku matshu anyi udi bishi? Shaula wakamba ne, Bakulua nʼai kudi Bena Amaleka bualu bua bantu katuakashiha mikoko ne ngombe biakatamba bulengele, bua kuyishihela Yehowa, Nzambi webe; kadi tuakashiha bintu bionso bikuabo. Samuele wakambila Shaula ne, Imana, nenkuambile tshiakungambila Yehowa butuku ebu. Yeye wakamuambila ne, Ambaku. Samuele wakamba ne, Bawakadi bu muntu muhuekele ku mesu kuebe, kabena bakuteka ku mutu kua bisamba bia Bena Isalele, anyi? Yehowa wakakuela manyi ha mutu, wakasungula mukelenge wa Isalele; Yehowa wakantuma ku luendu, wakamba ne, Ya biebe, ushihe bantu habi bonso ba Bena Amaleka, uluangane nʼabo nvita tô ne hahatukabo. Nunku wewe kuakatumikila dî dia Yehowa bua tshinyi? Kadi wakahana bintu, Wakenza bualu bubi ku mesu kua Yehowa. Shaula wakambila Samuele ne, Bulelela, nakatumikila dî dia Yehowa, nakaya mu nshila wakantuma Yehowa; nakakuata Agaga, mukelenge wa Bena Amaleka, nakashiha Bena Amaleka bonso. Kadi bantu bakangata bia mu bintu biakahaulabo, mikoko ne ngombe biakatamba bulengele bua kuyishihelabo Yehowa, Nzambi webe, mu Gilegala. Samuele wakakonka ne, Yehowa udi utamba kusanka bua milambu ya kuosha ne nyama mishiha bu mudiye usanka bua kutumikila kua dî dia Yehowa, anyi? Tangila, kutumikila kudi kuhita mulambu wa kuosha ne kunvua kudi kuhita manyi a bimpanga bulengele. Kutomboka kudi bualu bubi bu butempi bua mbuku ne tshitshu tshidi bu kutendelela kua mpingu ne manga a hatuhu. Bualu bua wewe wakahidia dî dia Yehowa yeye kabidi wakakuhidia bua wewe kuikala mukelenge. Shaula wakambila Samuele ne, Nakuenza bualu bubi bualu bua nakuhidia mukenji wa Yehowa ne mei ebe kabidi; nakatshina bantu, nakatumikila mei abo. Katataka ndi nkusengelela ne, Umbuikidile bubi buanyi, uhingane nʼanyi bua meme kutendelela Yehowa. Samuele wakambila Shaula ne, Tshiena mpingana nʼebe nansha, bualu bua wewe wakahidia dî dia Yehowa, ne Yehowa wakakuhidia bua wewe kuikala mukelenge ku mutu kua Bena Isalele. Hakatshunguluka Samuele bua kuya, Shaula wakamukuata kuinshi kua tshikowelu tshiandi, tshiakahandika. Samuele wakamuambila ne, Yehowa wakahanda bukelenge bua Isalele buakadi kûdi lelu, wakabuha mukuenu udi ukuhita buakane. Bukole bua Isalele kabuena bujima anyi bukudimuka, bualu bua yeye kena bu muntu bua kukudimukeye. Hashishe Shaula wakamba ne, Nakuenza bibi, kadi unnemeshe katataka, ndi nkusengelela, ku mesu kua bakulu ba bantu banyi ne kua Bena Isalele, uhingane nʼanyi kabidi bua meme kutendelela Yehowa, Nzambi webe. Nunku Samuele wakakudimuka bua kulonda Shaula; ne Shaula wakatendelela Yehowa. Hashishe Samuele wakamba ne, Nulue kundi ne Agaga, mukelenge wa Bena Amaleka. Agaga wakalua kudiye ne disanka. Agaga wakamba ne. Bulelela, kanyinganyinga ka lufu kakashika. Samuele wakamba ne, Bulelela, bu muakadi muele webe wa nvita mushiye bakashi kabayi ne bana, nunku mamu webe neikale munkatshi mua bakashi kayi ne bana. Samuele wakakosa Agaga bituha bituha ku mpala kua Yehowa mu Gilegala. Hashishe Samuele wakaya ku Lama; Shaula wakabanda ku nsubu wandi ku Gibea wa Shaula. Samuele kakalua kutangila Shaula kabidi tô ne muakafueye; kadi Samuele wakadila muadi bualu bua Shaula; ne Yehowa wakakudimuna mutshima bualu bua yeye wakasungula Shaula mukelenge wa Bena Isalele. Yehowa wakambila Samuele ne, Wewe neudile muadi bua Shaula musangu bule munyi bualu bua meme nakamuhidia mu bukelenge bua Isalele? Ûshe lusengu luebe ne manyi tente, uye biebe, nenkutume kudi Yishai, Muena Beteleheme, bualu bua nakadisunguila mukelenge munkatshi mua bana bandi ba balume. Samuele wakamba ne, Nenye munyi? Biunvua Shaula lumu elu, yeye neanshihe. Yehowa wakamba ne, Uye ne lukungulu lua ngombe, Wamba ne, Nyaya bua kushihela Yehowa. Ubikile Yishai ku tshishihelu, nenkuleshe bualu bûdi ne bua kuenza; wewe newele manyi ha mutu ha undi nkuambila dina diandi. Samuele wakenza muakamba Yehowa, wakaya ku Beteleheme. Bakulu ba musoko bakalua kumuakidila, benda bazakala, bakakonka ne, Ulualua ne ditalala, anyi? Yeye wakamba ne, Ditalala didiku, nakulala bua kushihela Yehowa nyama; nudilengeshe, nulue kundi ku tshishihelu. Yeye wakalengesha Yishai ne bana bandi ba balume, wakababikila ku tshishihelu. Hakaluabo, yeye wakatangila Eliaba, wakamba ne, Bulelela, udi Yehowa musungule udi ku mpala kuandi. Kadi Yehowa wakambila Samuele ne, Kutangidi mpala wandi, anyi bule buandi, bualu bua meme nakamuhidia; Yehowa kena utangila bu mudi bantu batangila, bualu bua bantu badi batangila anu mubidi, kadi Yehowa udi utangila mu mutshima. Hashishe Yishai wakabikila Abinadaba, wakamuhitshisha ku mpala kua Samuele. Wakamba ne, Yehowa kena musungule eu. Yishai wakatatshisha Shama ku mpala kuandi. Yeye wakamba ne, Yehowa kena musungule eu. Yishai wakahitshisha bana bandi ba balume muanda mutekete ku mpala kua Samuele. Samuele wakambila Yishai ne, Yehowa kena musungule aba. Samuele wakakonka Yishai ne, Bana bebe bonso badiku, anyi? Yeye wakamba ne, Muanʼa mukala utshidi mushale; mona, yeye udi ulama mikoko. Samuele wakambila Yishai ne, Bamubikile, bualu bua katuena tushikama tô ne halueye kunoko. Yeye wakatuma di, bakalua nʼandi. Yeye wakadi ne mpala lukunjila-kunjila, wakadi ne mesu mimpe, wakadi muakane kumona. Yehowa wakamba ne, Bika, umuele manyi ha mutu, eu nyeye mene. Hashishe Samuele wakangata lusengu lua manyi, wakamuela manyi ha mutu handi munkatshi mua bana babo; Nyuma wa Yehowa wakatulukila Davidi bikole ku dituku adi. Nunku Samuele wakajuka, wakahingana ku Lama. Nyuma wa Yehowa wakumuka kudi Shaula ne nyuma mubi mufume kudi Yehowa wakamutatshisha. Bena mudimu ba Shaula bakamuambila ne, Tangila, nyuma mubi kudi Nzambi udi ukutatshisha. Mukelenge wetu ambile bena mudimu badi ku mpala kuandi ne, Nuye, nunkebele muntu udi mumanye mua kungimbila tshisanji bimpe: hashishe halua nyuma mubi mufume kudi Nzambi kudi, yeye neimbe tshisanji ne tshianza tshiandi ne wewe newikale bimpe. Shaula wakambila bena mudimu bandi ne, Nunkebele muntu udi mumanye mua kuimba bimpe, nulue nʼandi kundi. Hashishe umue wa bansongalume bandi wakamba ne, Mona, nakatangila muana wa balume wa Yishai, Muena Beteleheme, udi mumanye mua kuimba tshisanji bimpe, udi muntu wa bukitu, muena nvita mene, udi Wamba mei a lungenyi, udi ne mpala mulengele: Yehowa udi nʼandi kabidi. Nunku Shaula wakatuma ba-messager kudi Yishai, bamba ne, Untumine Davidi, muanʼebe, udi ulama mikoko. Yishai wakangata nyama wa mpunda, wakateka mampa ne mulondo wa nvinyo, ne muana wa mukoko ha nyima handi, wakatuma nʼabi Davidi, muanʼandi, kudi Shaula. Davidi wakalua kudi Shaula, wakimana ku mpala kuandi: yeye wakatamba kumunanga; ne yeye wakalua mutuadi wa ngabu wandi. Shaula wakatumina Yishai di ne, Witabushe, ndi nkusengelela, bua Davidi ikale nʼanyi, bualu bua yeye udi ne diakalengele ku mesu kuanyi. Hakalua nyuma mubi mufume kudi Nzambi kudi Shaula, hashishe Davidi wakangata tshisanji, wakatshimba ne tshianza tshiandi: Shaula wakadi usangala, wakalua bimpe, ne nyuma mubi wakumuka kudiye. Bena Peleshete bakasangisha bena nvita babo bua kuluanganabo, bakadisangisha mu Soko, udi mu buloba bua Yuda: bakadi ne tshitudilu tshiabo hankatshi ha Soko ne Azeka mu Efese-damima. Shaula ne Bena Isalele bakadisangisha, bakadi ne tshitudilu tshiabo mu tshibanda tshia Ela; bakela mualu wa nvita ku mpala kua Bena Peleshete. Bena Peleshete bakadi ku mutu kua mukuna ku luseke lumue ne Bena Isalele bakadi ku mutu kua mukuna ku luseke lukuabo, tshibanda tshiakadi hankatshi habo. Tshilobo tshiakaluhuka mu tshitudilu tshia Bena Peleshete, dina diatshi Goleyata wa mu Gata, bule buandi buakadi coudées isambombo ne ntanta wa tshianza. Wakadi ne tshifulu tshia tshiamu tshia mitaku ku mutu kuandi, wakatata tshikowelu tshia tshiamu tshia mitaku, bujitu buatshi buakadi bu nshekele ya tshiamu tshia mitaku binunu bitanu. Wakadi ne nkete ya tshiamu tshia mitaku ku mikolo yandi, wakadi ne difuma dia tshiamu tshia mitaku ha diaha diandi. Mutondo wa difuma wakadi bu mbungu wa mukumi wa bilulu; lusongo lua difuma luakadi ne bujitu bua nshekele ya tshiamu tshifike nkama isambombo; mutuadi wa ngabu wandi wakaya ku mpala kuandi. Yeye wakimana biandi, wakela bena nvita ba Bena Isalele dî ne, Nuakuluhuka bua kuela mualu wenu wa nvita bishi? Meme tshiena Muena Peleshete, anyi? Nuenu kanuena bantu ba Shaula, anyi? Nusungule muntu wa munkatshi muenu, alue biandi kundi. Biamanyeye mua kuluangana nʼanyi ne bua kunshiha, nunku tuetu netuikale bahika benu; kadi binamuhita bukole, binamushiha, nunku nuenu nenuikale bahika betu, nenutukuatshile mudimu. Muena Peleshete wakamba ne, Ndi ntukisha bena nvita ba Bena Isalele lelu eu; bantumine mulume bua tuetu tuluangane. Kakunyua Shaula ne Bena Isalele bonso mei a Muena Peleshete, bakakema, bakatamba kutshina. Davidi wakadi muana wa balume wa Muena Efelata wa mu Beteleheme-yuda, dina diandi diakadi Yishai, wakadi ne bana ba balume muanda mukulu; mu matuku a Shaula yeye wakadi muntu mununu, mukoke munkatshi mua bantu. Bakulu basatu ba Davidi bakadi baya ku nyima kua Shaula bua kuluanganabo nvita: mena a bana balume basatu ba Yishai bakaya ku nvita akadi Eliaba, muanʼa bute, ne Abinadaba wakamulonda, ne muisatu Shama. Davidi wakadi muanʼa mukala; bakulu bandi basatu bakadi balonda Shaula. Davidi wakadi Umuka kudi Shaula misangu mikuabo bua kudisheye mikoko ya tatu wandi mu Beteleheme. Muena Peleshete au wakadi usemena ha buihi dinda ne dilolo wakamuenekamueneka matuku makumi anai. Yishai wakambila muanʼandi Davidi ne, Angatshila bana benu epha wa blé mikanga ne mitanda ei ya bidia dikumi, uye nʼabi lubilu ku tshitudilu kudi bana benu; uye ne fromage ei dikumi kudi kapitene kabo ka tshinunu; utangile bu mudi bana benu, uhingane ne dî diabo. Shaula ne bobo ne Bena Isalele bonso bakadi mu tshibanda tshia Ela, baluangana ne Bena Peleshete. Hakatshiabu Davidi wakabika, wakashiya mikoko mu bianza bia mulami, wakangata bintu abi, wakaya bu muakamuambila Yishai; wakalua ku muaba wakadi makalu a nvita hakadi bena nvita baye ku nvita, hele mbila bua nvita. Bena Isalele ne Bena Peleshete bakela mualu wa nvita, mulongo ne mulongo. Davidi wakashiya bintu biandi mu bianza bia mulami wa makalu, wakaya lubilu kudi bena nvita, wakela bana babo muoyo. Hakadi Davidi uyikila nʼabo, mona, tshilobo, Muena Peleshete wa mu Gata, dina diatshi Goleyata, tshiakumuka munkatshi mua Bena Peleshete, tshiamba mei bu muakuambatshi diambedi; ne Davidi wakûnvua. Hakatangila Bena Isalele bonso muntu au, bakamunyema, bakatamba kutshina. Bena Isalele bakamba ne, Wakatangila muntu au wakulua, anyi? Bulelela, yeye wakulua bua kufuna bulobo ku mpala kua Bena Isalele: muntu wamushiha, mukelenge neanumushe mubanji munene, neamuhe muana wandi mukashi, neahe ba mu nsubu wa tatu wandi budishikaminyi mu Isalele. Davidi wakakonka bantu bakadi bimana ha buihi nʼandi ne, Nebenzele muntu washiha Muena Peleshete eu ne wumusha bundu ku mesu kua Bena Isalele tshinyi? Muena Peleshete eu udi kayi mutengula, udi nganyi bua kufuneye bulobo ku mpala kua bena mata ba Nzambi wa muoyo? Bantu bakamukudimuna dî ne, Nebenzele muntu nunku biamushiyeye. Eliaba mukuluʼandi wakunyua hakambileye bantu nunku, Eliaba wakakuatshila Davidi tshiji, wakamba ne, Wewe wakuluila kunoko tshinyi? Wakashiya mikoko ai mikese mu tshihela kudi nganyi? Ndi mumanye kudisua kuebe ne kudibandisha kua mutshima webe: wewe wakuluila anu bualu bua kutangila mata. Davidi wakamba ne, Nakuenza tshinyi? Nakuamba anu dî nansha? Wakamukuma nyima, wakebesha mukuabo; bantu bakamuambila kabidi anu muomumue. Hakunvuabo mei akamba Davidi, bakâmbila Shaula, ne yeye wakamubikila. Davidi wakambila Shaula ne, Mitshima ya bantu kayihampakanyi bualu buandi; meme muntu webe, nenye kuluangana ne Muena Peleshete eu. Shaula wakambila Davidi ne, Wewe kuena mua kuya bua kuluangana ne Muena Peleshete eu bualu bua wewe utshidi nsongalume ne yeye wakadi muena mata ku bunsongalume buandi tô ne katataka. Davidi wakambila Shaula ne, Muntu webe wakadi ulama mikoko ya tatu wandi: ne hakaha nansha nyama wa ntambue nansha nkashama bua kukuata muana wa mukoko, nakamulonda, nakamushiha, nakasungila muana wa mukoko mukana muandi; hakabikeye bua kunduisha, meme nakamukuata ku buoya buandi, nakamutaha, nakamushiha. Muntu webe wakashiha nyama wa ntambue ne nkashama; ne Muena Peleshete eu udi kayi mutengula neikale nʼai diatshimue bualu bua yeye wakafuna bulobo ku mpala kua bena nvita ba Nzambi wa muoyo. Davidi wakamba ne, Yehowa, nguakansungila ku dikama dia nyama wa ntambue ne dia nkashama, neansungile mu tshianza tshia Muena Peleshete eu. Shaula wakambila Davidi ne, Ya biebe, Yehowa ikale nʼebe. Shaula wakaluatshisha Davidi bintu biandi bia mata, wakateka tshifulu tshia tshiamu tshia mitaku ku mutu kuandi, wakamuluatshisha tshikowelu tshia mata. Davidi wakabisha muele wandi wa nvita ku mukaba wandi, wakakeba kuya, kadi yeye kakanza kubadisha. Davidi wakambila Shaula ne, Tshiena mumanye mua kuya ne bintu ebi, bualu bua tshiena muanze kubadisha. Davidi wakabivula. Davidi wakangata tshibangu tshiandi mu tshianza tshiandi, wakasungula mabue atanu a busenu mu kasulu, wakaela mu mpaya wandi wa bulami bua mikoko wakadiye nʼandi, mu kabombi kandi mene; tshieledi tshiandi tshia mabue tshiakadi mu tshianza tshiandi; wakasemena ha buihi ne Muena Peleshete. Muena Peleshete wakasemena ha buihi ne Davidi: mutuadi wa ngabu wandi wakaya ku mpala kuandi. Muena Peleshete wakakenzakana, hakatangileye Davidi, wakamulengulula bualu bua yeye wakatshidi nsongalume, wakadi ne mpala lukunjila-kunjila, wakadi ne mpala muimpe. Muena Peleshete wakambila Davidi ne, Meme ndi mbua bua wewe udi ulua kundi ne bibangu, anyi? Muena Peleshete wakela Davidi mulau mu mena a nzambi yandi. Muena Peleshete wakambila Davidi ne, Lua kundi, nendishe nyunyu ya mulu ne nyama ya mu tshisuku munyinyi webe. Hashishe Davidi wakambila Muena Peleshete ne, Wewe udi ulua kundi ne muele wa nvita ne difuma ne difuma dia kabenda, kadi meme ndualua kudi mu dina dia Yehowa, Nzambi wa bena nvita ba Bena Isalele uwakafunyina bulobo ku mpala kuandi. Yehowa neakufile mu tshianza tshianyi lelu eu: nenkushihe, nenkutule mutu webe; nendishe nyunyu ya mulu ne nyama ya mu tshisuku bitalu bia bena nvita ba Bena Peleshete lelu; bantu bonso ba ha buloba nebamanye ne, Nzambi udi munkatshi mua Bena Isalele bulelela; ne bantu bonso ba mu tshisumbu etshi nebamanye ne, Yehowa kena Usungila bantu bua muele wa nvita ne bua difuma, bualu bua nvita idi mu bianza bia Yehowa, yeye nennufile mu bianza bietu. Bakabika Muena Peleshete, hakasemeneye ha buihi bua kusangakeneye ne Davidi, hashishe Davidi wakabika lukasa, wakalumbila lubilu kudi bena nvita bua kusangakeneye ne Muena Peleshete. Davidi wakabuesha tshianza tshiandi mu mpaya wandi, wakambula dibue, wakadiela, wakataha Muena Peleshete mu mpala wandi; dibue diakajika mu mpala wandi, yeye wakadishinda mutue mpala hanshi. Nunku Davidi wakalota Muena Peleshete bukole ku tshieledi ne dibue; wakataha Muena Peleshete, wakamushiha; kadi Davidi kakadi ne muele wa nvita mu tshianza tshiandi. Hashishe Davidi wakambila lubilu, wakimana hamʼbidi ha Muena Peleshete, wakahatula muele wandi wa nvita mu luhuhu, wakamutaha, wakatula nʼau mutu wandi. Hakatangila Bena Peleshete ne, Tshilobo tshietu tshiakadia, bakanyema. Bena Isalele ne Bena Yuda bakajuka, bakela mbila, bakihata Bena Peleshete tô ne ku Gata ne ku bibi bia Ekelona. Nunku batahike ba Bena Peleshete bakahona mu nshila wa ku Shâlayima tô ne ku Gata ne ku Ekelona. Bena Isalele bakalekela kuihata Bena Peleshete bakalukila, bakahaula tshitudilu tshiabo. Davidi wakangata mutu wa Muena Peleshete, wakalua nʼau ku Yelushalema, kadi wakateka bintu biandi bia nvita mu ntenta wandi. Hakatangila Shaula Davidi uya bua kuluangana ne Muena Peleshete, yeye wakakonka Abinê, kapitene ka masalayi andi, ne, Abinê, eu mmuana wa nganyi? Abinê wakamukudimuna dî ne, Bu mudi mutshima webe ne muoyo, mukelenge, tshiena mumanye. Mukelenge wakamba ne, Ukonke bantu muena muana eu. Hakadi Davidi ufuma kuakashiheye Muena Peleshete, Abinê wakamuangata, wakaya nʼandi kudi Shaula muambule mutu wa Muena Peleshete mu tshianza tshiandi. Shaula wakamukonka ne, Wewe nsongalume, udi muana wa nganyi? Davidi wakamukudimuna ne, Ndi muana wa muntu webe Yishai, Muena Beteleheme. Hakamana Davidi kuyikilangana ne Shaula, mutshima wa Yonatana wakakuatakana ne mutshima wa Davidi; Yonatana wakamunanga bu mutshima wandi mene. Shaula wakamuangata dituku adi, kakitabusha bua yeye ahingane ku nsubu wa tatu wandi kabidi. Hashishe Yonatana ne Davidi bakahungakasha tshihungidi, bualu bua yeye wakamunanga bu mutshima wandi mene. Yonatana wakavula tshilulu tshiandi tshiakadiye muluate, wakatshiha Davidi; wakamuha muele wandi wa nvita ne buta buandi ne mukaba wandi kabidi. Davidi wakaya mu miaba yonso yakamutuma Shaula, wakadilama bu muena lungenyi; Shaula wakamuteka ku mutu kua bena nvita bandi: bualu ebu buakadi buimpe ku mesu kua bantu bonso ne ku mesu kua bahika ba Shaula kabidi. Mu matuku au kakahingana Davidi kuakashiheye Muena Peleshete, bakashi bakaluhuka mu misoko yonso ya Bena Isalele bua kusambakenabo ne mukelenge Shaula, bakadi bimba misambu, bakadi baja maja, bakadi ne makasa ne bintu bikuabo bia kuimba nʼabi misambu, bakadi ne disanka dinene. Bakashi bakimba, bambilangane ne, Shaula wakashiha binunu bia bantu, Davidi wakashiha binunu makumi bia bantu. Shaula wakadi ne tshiji tshikole; bualu ebu biuakanyingalasha mutshima wandi. Yeye wakamba ne, Bakutumbisha Davidi bua binunu makumi bia bantu, kadi bakuntumbisha meme anu bua binunu bia bantu. Tshinyi tshikuabo tshidiye mua kuangata, anu bukelenge nansha? Shaula wakabanga kuteka mesu andi kudi Davidi ku dituku adi. Hakatshiabu nyuma mubi mulume kudi Nzambi wakatulukila Shaula bikole, yeye wakalubakana mu nsubu muandi; Davidi watamba tshisanji ne tshianza tshiandi bu muakadiye wenza ku dituku ku dituku. Shaula wakadi ne difuma mu tshianza tshiandi. Shaula wakela difuma diandi; bualu bua wakamba ne, Neushihe Davidi, difuma dimusompoke dikuate ku tshimanu tshia nsubu. Kadi Davidi wakahanduka ku mesu kuandi misangu ibidi. Shaula wakadi utshina Davidi bualu bua Yehowa wakadi nʼandi, ne wakadi mumuke kudi Shaula. Nunku Shaula wakamûmusha kudiye, wakamuteka kapitene ka tshinunu tshia bantu; yeye wakaya ne wakalua ku mpala kua bantu. Davidi wakadilama bu muena lungenyi mu nshila yandi yonso; Yehowa wakadi nʼandi. Hakatangila Shaula ne yeye wakadilama bikole bu muena lungenyi, buowa buakamukuata bualu buandi. Kadi Bena Isalele bonso ne Bena Yuda bakananga Davidi, bualu bua yeye wakaya ne wakalua ku mpala kuabo. Shaula wakambila Davidi ne, Mona, muanʼanyi muanʼa bute wa bakashi, Melaba, nenkuheye bua ikale mukashi webe; kadi wewe wikale ne dikima dia kuluila Yehowa nvita yandi. Bualu bua Shaula wakamba ne, Tshiena musue kumulenga tshianza, kadi Bena Peleshete bamulenge bianza. Davidi wakambila Shaula ne, Meme ndi nganyi, ne muoyo wanyi udi tshinyi, ne ba mu nsubu wa tatu wanyi badi banganyi mu Isalele bua meme kuikala muku wa mukelenge? Kadi hakalua dituku diakasungulabo bua kufila Melaba, muana wa bakashi wa Shaula, kudi Davidi bu mukashi wandi, bakamuha kudi Adaliele, Muena Meholata, bu mukashi wandi. Kadi Mikala, muana wa bakashi wa Shaula, wakananga Davidi; bakambila Shaula, ne bualu ebu buakamusankisha. Shaula wakamba ne, Nemmufile kudiye bua yeye ikale bu buteyi kudiye ne bianza bia Bena Peleshete nebikale hamʼbidi handi. Nunku Shaula wakambila Davidi ne, Wewe newikale muku wanyi lelu musangu muibidi. Shaula wakambila bahika bandi ne, Nuenu nuyikile ne Davidi mu musokoko, numuambile ne, Mona, mukelenge udi utamba kusanka bualu buebe ne bahika bandi bonso badi bakunanga; nunku witabushe bua kuikala muku wa mukelenge. Bahika ba Shaula bakamba mei au mu matshu a Davidi. Davidi wakakonka ne, Bualu ebu bua kuikala muku wa mukelenge budi bumueneka kunudi bu bualu bukese, anyi? Bualu bua meme ndi muntu muhele, ne tshiena ne butumbi. Bahika ba Shaula bakamumanyisha ne, Davidi wakadi wamba nunku. Shaula wakamba ne, Nuambile Davidi ne, Mukelenge kena ukeba biuma bia dibaka anu tukoba tua Bena Peleshete lukama: bua kusombuela bena lukuna ba mukelenge. Shaula wakadi wela meji munda muandi bua kushihesheye Davidi ku bianza bia Bena Peleshete. Hakadi bahika bambila Davidi mei â, mutshima wandi wakatamba kusanka bua kuikala muku wa mukelenge. Matuku kâkanza kuleha, Davidi wakajuka ne bantu bandi, bakashiha Bena Peleshete nkama ibidi; Davidi wakalua ne tukoba, wakafila buonso buatu kudi mukelenge bua kuikaleye muku wa mukelenge. Shaula wakamuha Mikala, muanʼandi wa bakashi, bu mukashi wandi. Shaula wakatangila, wakajingulula ne Yehowa wakadi ne Davidi; Mikala, muana mukashi wa Shaula, wakamunanga. Shaula wakatamba kutshina Davidi; Shaula wakadi muena lukuna wa Davidi matuku onso. Hashishe baminyampala ba Bena Peleshete bakatambakana; ne hakadibo benza nunku, Davidi wakahita bahika bonso ba Shaula kudilama bu muena lungenyi; nunku dina diandi diakatamba kutumbishibua. Shaula wakambila Yonatana, muanʼandi mulume, ne bahika bandi bonso bua kushihabo Davidi. Kadi Yonatana, muana mulume wa Shaula, wakatamba kusanka bua Davidi. Yonatana wakambila Davidi ne, Tatu wanyi Shaula udi ukeba kukushiha; nunku ndi nkusengelela ne, Udimuke biebe ne dinda, wikale ha muaba musokome, mubutame; ne meme nenye kuimana ha buihi ne tatu wanyi mu budimi bûdi; meme nenyikile ne tatu wanyi bualu buebe; binamona bualu nenkuambile. Yonatana wakatumbisha Davidi kudi tatu wandi Shaula, wakamuambila ne, Mukelenge kenzedi muntu wandi Davidi bualu bubi, bualu bua yeye kena muanze kukuenzela wewe bibi, ne bualu bua malu onso akakuenzeleye adi matambe buimpe; bualu bua yeye wakateka muoyo wandi mu tshianza tshiandi hakashiheye Muena Peleshete, ne Yehowa wakaha Bena Isalele luhandu lunene: wewe wakatangila bualu ebu, wakasanka; wewe udi musue kumatshisha mashi a muntu muakane bua kushiha Davidi udi kayi ne bualu tshinyi? Shaula wakunyua dî dia Yonatana; Shaula wakaditshiha ne, Bu mudi Yehowa ne muoyo, kabena bamushiha. Yonatana wakabikila Davidi, wakamuambila malu â onso. Yonatana wakalua ne Davidi kudi Shaula, yeye wakadi ku mesu kuandi bu muakadiye diambedi. Nvita yakadiku kabidi; Davidi wakaluhuka, wakaluangana ne Bena Peleshete, wakabashiha ba bungi: bakanyema ku mesu kuandi. Nyuma mubi mutume kudi Yehowa wakadi kudi Shaula hakashikameye mu nsubu muandi ne difuma mu tshianza tshiandi; Davidi wakadi wimba tshisanji ne tshianza tshiandi. Shaula wakakeba kuasa Davidi difuma dimusompoke dikuate mu tshimanu tshia nsubu; kadi Davidi wakehela, wakumuka ku mesu kua Shaula, difuma diakakuata mu tshimanu tshia nsubu; Davidi wakanyema, wakahanduka butuku ebu. Shaula wakatuma bantu ku nsubu wa Davidi bua kumutentekelabo ne bua kumushihabo dinda; Mîkala, mukashi wa Davidi, wakamuambila ne, Biwahidia kusungila muoyo webe butuku ebu, hatshiabu nebakushihe. Nunku Mikala wakahuekeshila Davidi ku disoso dia nsubu; wakanyema biandi, wakahanduka. Mikata wakangata luhingu, wakajadika mu bulalu, wakateka musamu wa miosa ya mbushi ku mutu kualu, wakalubuikila bilulu. Hakatuma Shaula ba-messager bua kukuatabo Davidi, yeye wakamba ne, Udi usama. Shaula wakatuma bantu bakuabo bua kutangilabo Davidi, wamba ne, Luanʼandi kundi mu bulalu bua meme kumushiha. Hakabuela bamessager mu nsubu, bakatangila luhingu mu bulalu ne musamu wa miosa ya mbushi ku mutu kualu. Shaula wakakonka Mikala ne, Bualu kai wakundinga nunku, wakulekela muena lukuna wanyi ne yeye wakuhanduka? Mikala wakakudimuna Shaula dî ne, Yeye wakungambila ne, Undekele, nenkushihe wewe bua tshinyi? Davidi wakanyema, wakahanduka, wakaya kudi Samuele mu Lama, wakamuambila malu onso akamuenzela Shaula. Yeye ne Samuele bakaya, bakashikama mu Nayota. Bakambila Shaula ne, Mona, Davidi udi mu Nayota hehi ne Lama. Shaula wakatuma ba-messager bua kukuatabo Davidi; kadi hakatangilabo tshisumbu tshia baprofete bamba dî dia Nzambi ne Samuele muimane ku mutu kuabo, Nyuma wa Nzambi wakatulukila ba-messager ba Shaula, bobo bakamba dî dia Nzambi kabidi. Hakambilabo Shaula bualu ebu, yeye wakatuma ba-messager bakuabo, bobo bakamba dî dia Nzambi kabidi. Wakatuma ba-messager tshiakasatu, ne bobo bakamba dî dia Nzambi kabidi. Hashishe yeye nkayandi wakaya ku Lama, wakafika ku dina dinene dia mai didi mu Seku, wakakonka bantu ne, Samuele ne Davidi badi banyi? Muntu mukuabo wakamuambila ne, Badi mu Nayota hehi ne Lama. Yeye wakaya ku Nayota hehi ne Lama; ne Nyuma wa Nzambi wakamutulukila kabidi, yeye wakenda wamba dî dia Nzambi tô ne hakafikeye ku Nayota hehi ne Lama. Yeye wakavula bilulu biandi bionso, wakamba dî dia Nzambi ku mesu kua Samuele, wakalala hanshi butaka munya mujima ne butuku bujima. Nunku bakakonkangana ne, Shaula kabidi udi munkatshi mua baprofete, anyi? Davidi wakanyema ku Nayota hehi ne Lama, wakaya kudi Yonatana, wakamukonka ne, Nakuenza tshinyi? Dihanga dianyi didi tshinyi? Nakuenza bualu bubi kai ku mesu kua tatu webe bua yeye udi ukeba muoyo wanyi? Yonatana wakamuambila ne, Bualu ehu kabuikadiku, wewe kuena ufua; tatu wanyi katu wenza bualu bunene anyi bukese diambedi yeye kayi muanze kungambila; tatu wanyi neansokoke bualu ebu bishi? Bualu ebu kabuena bulelela. Davidi wakaditshiha ne, Tatu webe udi mumanye ne, Meme nakasangana luse ku mesu kuebe ne yeye udi wamba ne, Yonatana kimanyi bualu ebu, anyi yeye neanyingalashe mutshima wandi; kadi bu mudi Yehowa ne muoyo ne bu mudi mutshima webe ne muoyo anu katuha kihi kadi kashala hankatshi hanyi ne lufu. Yonatana wakambila Davidi ne, Tshionso tshidi mutshima webe musue, nenkuenzele tshi. Davidi wakambila Yonatana ne, Mona, makelela ngondo udi ubala, ne bundi nʼabu mbua kudia bidia ku mesa a mukelenge; kadi witabushe bua meme kuya kubulama mu budimi tô ne hahita matuku asatu. Biangebesha tatu webe, hashishe wewe umuambile ne, Davidi wakunsengelela bua kuyeye ku Beteleheme, musoko wandi, bualu bua tshidimu etshi ntshidimu tshia kushihela Nzambi nyama kudi bonso ba mu diku diandi. Biambeye ne, Mbimpe, hashishe muntu webe neikale talalâ, kadi biakuateye tshiji, Umanye biebe ne yeye wakahangidisha bua kungenzela bibi. Nunku ufuile muntu webe luse, bualu bua wewe wakamana kuhunga nʼanyi tshihungidi mu dina dia Yehowa; bikala bualu bubi munda muanyi, unshihe nkayebe; udi musue kulua nʼanyi ku mesu kua tatu webe bishi? Yonatana wakamuambila ne, Bualu ebu kabuikadi kûdi. Binamanya ne tatu wanyi ndi musue kukuenzela bualu bubi, tshiena nkumanyisha, anyi? Davidi wakakonka Yonatana ne, Biakuambila tatu webe mei makole, wakambila nganyi? Yonatana wakambila Davidi ne. Lua, tuye bietu mu budimi. Bubidi buabo bakaya mu budimi. Yonatana wakambila Davidi ne, Yehowa, Nzambi wa Isalele, ikale bu mumanyi wa bualu: banabuela tatu wanyi munda bua bualu ebu ha diba edi nansha makelela nansha dia ha nyima; mona, biambeye bualu buimpe bua Davidi, tshiena nkutumina dî bua kukumanyisha bualu ebu, anyi? Yehowa atambe kuenzela Yonatana bibi biamba tatu wanyi kukuenzela wewe bibi ne meme tshiyi nkuambila, tshiyi nkutuma ha bula bua wewe uye ne ditalala; Yehowa ikale nʼebe bu muakadiye ne tatu wanyi. Wewe kabidi, kuhanga kundesha kalolo ka Yehowa hantshidi ne muoyo, bua meme tshihi nansha; ne wewe kumushi luse luebe ku nsubu wanyi tshiendelele nansha habutula Yehowa bena lukuna bonso ba Davidi ha buloba. Nunku Yonatana wakahunga tshihungidi ne ba mu nsubu wa Davidi, Wamba ne, Yehowa neatshimone ku bianza bia bena lukuna ba Davidi. Yonatana wakatshihisha Davidi tshiakabidi bualu bua dinanga diakadiye nʼadi kudiye; bualu bua yeye wakamunanga bu muakanangeye mutshima wandi mene. Yonatana wakamuambila ne, Ngondo udi ubala makelela, nebamanye ne wewe kuenaku bualu bua nkuasa webe neikale hatuhu. Hawalalaku matuku asatu, hashishe uye biebe lubilu ku muaba kuwakasokoma didiku dikuabo, ushaleku hehi ne dibue dia Ezele. Nengele mikete isatu ku mpenge kuadi bu mundi ngela muludikile tshintu. Nunku nentume nsongalume, nemmuambile ne, Ya biebe, ukebe mikete. Bingambila nsongalume ne, Tangila, mikete idi luseke lûdi, uyangate, ulue nʼai; bu mudi Yehowa ne muoyo ditalala didi kûdi, kakuena bualu bubi. Kadi bingambila nsongalume ne, Mona, mikete idi ku mpala kuebe, hashishe ya mu nshila webe, bualu bua Yehowa wakakumina kule. Bua bualu ebu bunakukuambila, Mona, Yehowa udi hankatshi hetu nʼebe tshiendelele. Nunku Davidi wakasokoma mu budimi; bakabala ngondo mukelenge wakashikama bua kudieye bia kudia. Mukelenge wakashikama mu nkuasa wandi hehi ne tshimanu tshia nsubu bu muakenzeye matuku makuabo; Yonatana wakimana ha muaba wandi, ne Abinê wakashikama ku luseke lua Shaula; kadi nkuasa wa Davidi wakadi mushale hatuhu. Shaula kakamba bualu dituku edi, wakelangana meji munda ne, Bualu buakukuata Davidi, yeye kena muakane bua kudieye; bulelela, kena muakane. Hakatshiabu, hakahita dituku diakabala ngondo, nkuasa wa Davidi wakadi mushale anu hatuhu; Shaula wakambila Yonatana, muanʼandi, ne, Muana wa Yishai kakuena nʼetu lelu ne makelela bua tshinyi? Yonatana wakakudimuna Shaula ne, Davidi wakunsengelela bikole bua kuyeye ku Beteleheme; yeye wakungambila ne, Witabushe bua meme kuya, bualu bua badi mu tshiota tshietu badi bashihela Yehowa nyama mu musoko; muanʼetu wakumbikilaku: binasangana luse ku mesu kuebe, witabushe bua meme kuya kutangila bana betu. Nunku yeye kena mulue ku mesa a mukelenge. Hashishe tshiji tshia Shaula tshiakatema kudi Yonatana, wakamuambila ne, Wewe udi muana wa mukashi mubi, muena mampaka, meme tshiena mumanye ne, Wewe wakasungula muana wa Yishai bua kufuisheye wewe ne mamuʼebe wakakula bundu, anyi? Bualu bua batshidi muana wa Yishai ne muoyo ha buloba, wewe ne bukelenge buebe kabiena bijadikibue. Nunku utume bantu, balue nʼandi kundi, bualu bua yeye neafue biandi bulelela. Yonatana wakebesha tatuʼandi Shaula ne, Neumushihe bualu kai? Yeye Wakenza tshinyi? Shaula wakamuela difuma bua kumushiheye; nunku Yonatana wakamanya ne tatu wandi wakamana kusungula bua kushiheye Davidi. Nunku Yonatana wakabika ku mesa ne tshiji tshikole, yeye kakadia bia kudia dituku dibidi dia ngondo au; mutshima wandi wakatamba kunyingalala bua Davidi bualu bua tatu wandi wakamuenzela bibi. Hakatshiabu Yonatana wakaya ne nsongalume mu budimi ha muaba wakambileye Davidi. Yeye wakambila nsongalume ne, Ya biebe lubilu, ukebe mikete indi ngela. Hakadi nsongalume uya, yeye wakela mukete ku mpala kuandi. Hakafika nsongalume ku muaba wakadi mukete wakela Yonatana, wakela nsongalume dî ne, Mukete kawena ku mpala kuebe, anyi? Yonatana wakela nsongalume dî ne, Endesha, ya biebe lubilu, kujanguluki. Nsongalume wa Yonatana wakambila mikete, wakahingana kudi mukelenge wandi. Kadi nsongalume kakadi mumanye bualu, anu Yonatana ne Davidi bakadi bamanye bualu. Yonatana wakahesha nsongalume bintu biandi, wakamuambila ne, Uye nʼabi ku musoko. Hakaya nsongalume, Davidi wakajuka ku muaba wandi wa ku luseke lua Sude, wakakuma mpala wandi hanshi, wakakukuila Yonatana misangu isatu, bakasangana mishiku, bakadilangana tô ne hakahita Davidi. Yonatana wakambila Davidi ne, Waya biebe talalâ bualu bua tuetu tuakahungakasha mei ne, Yehowa neikale hankatshi hetu nʼebe ne hankatshi ha bana bebe ne bana banyi tshiendelele. Yeye wakabika, wakaya; Yonatana wakahingana ku musoko. Davidi wakaya ku Nobo kudi Ahimeleke, muakuidi wa Nzambi. Ahimeleke wakalua kuakidila Davidi, wenda uzakala; wakamuebesha ne, Muwakulua mukuabo kayi nʼebe mmunyi? Davidi wakambila Ahimeleke muakuidi ne, Mukelenge wakuntuma bua mudimu wandi: yeye wakungambila ne, Kumanyishi muntu bua mudimu unakakutumina anyi bua mei anakakuambila; nakamana kutuma bantu ku muaba ne ku muaba. Udi ne tshinyi mu tshianza tshiebe? Umpe mitanda ya bidia itanu mu tshianza tshianyi, anyi bintu bikuabo biudi nʼabi. Muakuidi wakambila Davidi ne, Kakuena bidia bia hatuhu mu tshianza tshianyi, kadi anu bidia bia tshijila, bikala bantu aha kabayi basangile ne bakashi. Davidi wakambila muakuidi ne, Bulelela, katuena basangile ne bakashi tô matuku asatu; hanakumuka ku musoko, bintu bia bantu aba biakadi bijidika, nebitambe kujidibua tô ne lelu nansha? Nunku muakuidi wakamuha bidia bia tshijila, bidia bikuabo kabiyiku anu bidia bia tshijila biakumushabo ku mesu kua Yehowa hakatekabo bidia bihia-bihia ku dituku ku dituku. Muena mudimu wa Shaula wakadiku dituku adi, mukandibue ku mesu kua Yehowa, dina diandi Doege, Muena Edome, kahita ka balami ba mikoko ya Shaula. Davidi wakebesha Ahimeleke ne, Udi ne difuma anyi muele wa nvita mu tshianza tshiebe, anyi? Tshiakalua ne muele anyi bintu bianyi bia nvita bikuabo, bualu bua mudimu wa mukelenge udi bualu bua lubilu. Muakuidi wakamuambila ne, Muele wa nvita wa Goleyata, Muena Peleshete, uwakashiha mu tshibanda tshia Ela, udiku, udi mujingila mu tshilulu ku nyima kua efoda; biwasua kuwangata, uwangate, bualu bua kakuena muele mukuabo kunoko. Davidi wakamba ne, Kakuena mukuabo bu au, ûmpe. Davidi wakajuka dituku adi, wakanyema bualu bua ditshina dia Shaula, wakaya kudi Akisha, mukelenge wa mu Gata. Bantu ba Akisha bakamuebesha ne, Eu ke nDavidi, mukelenge wa buloba, anyi? Kabakamuimbila musambu hakadibo baja maja dituku dikuabo hakambabo ne, Shaula wakashiha binunu bia bantu, Davidi wakashiha binunu makumi bia bantu, anyi? Davidi wakateka mei au onso mu mutshima wandi, wakatamba kutshina Akisha, mukelenge wa mu Gata. Yeye wakakudimuna bienzedi biandi ku mpala kuabo, wakadingisha bu muhale mu bianza biabo: wakafunda tshifundafunda ku bibi bia musoko, lute luandi luakahueka ku muedi wandi. Hashishe Akisha wakambila bantu bandi ne, Monai, muntu eu udi muhale, nuakalua nʼandi kundi munyi? Meme ndi nkengela bahale bua nuenu nuakalua ne muntu eu bua kuenzeye bu muhale ku mesu kuanyi, anyi? Muntu eu nealue mu nsubu wanyi, anyi? Davidî wakumukaku, wakaya ku lubuebue lua Adulama; hakunvua bana babo ne bonso ba mu nsubu wa tatuʼandi lumu elu, bakaya kudiye. Bantu bonso bakadi ne ntatu ne bakadi ne mabanza ne bakadi ne kutontolola bakadisangisha kudiye; yeye wakadi kapitene kabo: bantu bakadi nʼandi bakadi bu nkama inai. Davidi wakumukaku, wakaya ku Misepa wa mu Moaba; yeye wakambila mukelenge wa Moaba ne, Witabushe bua tatuʼanyi ne mamuʼanyi balue, bashikame nʼebe tô ne hanamanya tshidi Nzambi musue kungenzela. Yeye wakalua nʼabo kudi mukelenge wa Moaba: bakashikama nʼandi tô matuku onso akadi Davidi mushale mu musoko wa ngumbu. Gada muprofete wakambila Davidi ne, Kushadi mu musoko wa ngumbu nansha, Umuke biebe, uye mu buloba bua Yuda, Davidi wakumukaku, wakaya mu ditu dia Helete. Shaula wakunyua ne, Bakasangana Davidi ne bantu bakadiye nʼabo; Shaula wakadi mushikame muinshi mua mutshi mu Gibea wa mu Lama, wakadi ne difuma diandi mu tshianza tshiandi, bantu bandi bonso bakadi bimane kudiye. Shaula wakebesha bantu bandi bakadi bimane kudiye ne, Nuenu Bena Benyamina, unvuai, Muana eu wa Yishai neanuhe madimi ne madimi a tumuma tukese, anyi? Yeye neanusunguile tupitene tua binunu bia bantu ne tupitene tua nkama ya bantu, anyi? Bualu kai buonso buenu nuakungelela tshifufu, nansha umue wenu wakummanyisha ne, Muana webe mulume wakahunga dî ne muana wa Yishai? Bualu kai nansha umue wenu udi unyingalasha mutshima wandi bualu buanyi? Bualu kai nansha umue wenu wakummanyisha ne, Muanʼebe mulume wakatombosha muntu webe kûdi, bua kualamineye bu mudiye wenza lelu? Hashishe Doege, Muena Edome, wakadi muimane munkatshi mua bantu ba Shaula, wakamuambila ne, Meme nakatangila muana wa Yishai mulue ku Nobo kudi Ahimeleke, muana wa Ahituba. Yeye wakebesha Yehowa bualu buandi, wakamuha bintu bia kudia ne muele wa nvita wa Goleyata, Muena Peleshete. Mukelenge wakatuma dî, wakabikila Ahimeleke muakuidi, muana wa Ahituba, ne bantu bonso bakadi mu nsubu wandi, bakadi bakuidi ba mu Nobo; buonso buabo bakalua kudi mukelenge. Shaula wakamba ne, Unvua, wewe muana wa Ahituba. Yeye wakamukudimuna ne, Ndiku, mukelenge wanyi. Shaula wakamuebesha ne, Wewe wakungelela tshifufu ne muana wa Yishai bua kumuha bintu bia kudia ne muele wa nvita, wakuebesha Nzambi bualu buandi, bua yeye antombokele, andadile bu mualaminyi bu mudiye wenza lelu bualu kai? Hashishe Ahimeleke wakakudimuna mukelenge dî, wakamba ne, Muntu kai wa munkatshi mua bantu bebe udi ne kanemu bu Davidi? Udi muku wa mukelenge, wakadi ne butumbi mu nsubu muebe ne wewe wakamuebeshaku lungenyi. Meme nakabanga kuebesha Nzambi bualu buandi lelu, anyi? Bualu ebu kabuikadi kundi: mukelenge kabishi muntu wandi bua bualu ebu anyi bonso badi mu nsubu wa tatu wandi; bualu bua muntu webe kena mumanye bualu ebu buonso, ne makese ne a bungi. Mukelenge wakamba ne, Ahimeleke, wewe neufue ne bonso ba mu nsubu wa tatu webe bulelela. Mukelenge wakambila bantu bandi bakadi bimane kudiye ne, Shihai bakuidi ba Yehowa, bualu bua bianza biabo bidi kudi Davidi; bobo bakamanya ne, Davidi wakadi munyeme, kabakungambila. Kadi bantu ba mukelenge bakahidia kulenga bakuidi ba Yehowa bianza biabo. Mukelenge wakambila Doege ne, Wewe ushihe bakuidi. Doege, Muena Edome, wakatshunguluka, wakashiha bakuidi dituku adi makumi muanda mukulu ne batanu bakadi baluata efoda ya lin. Wakabutula Nobo, musoko wa bakuidi, wakashiha balume ne bakashi ne bana ne tuana tuakadi tuamua mabele ne ngombe ne nyama ya mpunda ne mikoko ne muele wa nvita. Umue wa bana ba Ahimeleke, muana wa Ahituba, dina diandi Ebeyatâ, wakahanduka, wakalonda Davidi. Ebeyatâ wakambila Davidi ne, Shaula wakashiha bakuidi ba Yehowa. Davidi wakambila Ebeyatâ ne, Dituku adi diakadiku Doege, Muena Edome, nakamanya ne, Yeye neamanyishe Shaula bulelela. Bantu bonso ba mu nsubu wa tatu webe bakafua bualu buanyi. Ushale nʼanyi, kutshinyi, bualu bua udi ukeba muoyo wanyi ngudi ukeba muoyo webe kabidi; biwashala nʼanyi, neulamibue bimpe. Bakambila Davidi ne, Bena Peleshete badi baluangana ne Bena Kila, badi biba bintu bia bishihuidi. Davidi wakakonka Yehowa ne, Nenye bua kushiha Bena Peleshete aba, anyi? Yehowa wakambila Davidi ne, Ya, ushihe Bena Peleshete, usungile Kila. Bantu ba Davidi bakamuambila ne, Mona, tuetu ludi tutshina kunoko mu Yuda, nunku ludi tutamba kutshina bua kuya ku Kila bua kuluangana ne Bena Peleshete nansha? Hashishe Davidi wakebesha Yehowa tshiakabidi. Yehowa wakamukudimuna dî ne, Juka, uye ku Kila, bualu bua meme nenfile Bena Peleshete mu tshianza tshiebe. Davidi ne bantu bandi bakaya ku Kila, bakaluangana ne Bena Peleshete, bakabashiha ne kushiha kukole, bakahingana ne ngombe yabo. Nunku Davidi wakasungila Bena Kila. Hakanyema Ebeyatâ, muana wa Ahimeleke, kudi Davidi mu Kila, yeye wakadi mulue ne efoda mu tshianza tshiandi. Bakamanyisha Shaula ne, Davidi wakaya ku Kila. Shaula wakamba ne, Nzambi wakamufila mu tshianza tshianyi; bualu bua yeye wakabuela mu musoko udi ne bibi bidi bibaka bikole. Shaula wakasangisha bantu bandi ba nvita, bua kuya ku Kila bua kutshintshimika Davidi ne bantu bandi. Davidi wakamanya ne, Shaula udi ungelela tshifulu: nunku yeye wakabikila Ebeyatâ muakuidi, wakamuambila ne, Lua kundi ne efoda. Hashishe wakamba ne, Yehowa, Nzambi wa Isalele, bulelela, muntu webe wakunvua lumu ne, Shaula udi ukeba mua kulua ku Kila bua kubutula musoko bualu buanyi. Bena Kila nebaufile mu tshianza tshiandi, anyi? Shaula nealue bu lumu luakunvua muntu webe, anyi? Yehowa, Nzambi wa Isalele, ndi nkusengelela ne, Umanyishe muntuʼebe. Yehowa wakamuambila ne, Yeye ulualua. Hashishe Davidi wakakonka ne, Bena Kila nebaufile ne bantu banyi mu tshianza tshia Shaula, anyi? Yehowa wakamba ne, Nebanufile. Hashishe Davidi ne bantu bandi bu nkama isambombo bakajuka, bakumuka mu Kila, bakaya kuakamanyabo mua kuya. Bakamanyisha Shaula ne, Davidi wakumuka mu Kila; yeye wakalekela kuyaku. Davidi wakashikama mu tshihela mu misoko ya ngumbu; wakashala mu mikuna mu tshihela tshia Zifa. Shaula wakamukeba ku dituku ku dituku, kadi Nzambi kakamufila mu tshianza tshiandi. Davidi wakamanya ne, Shaula wakalua kukeba muoyo wanyi. Davidi wakadi mushikame mu tshihela tshia Zifa mu ditu. Yonatana, muana wa Shaula, wakajuka, wakaya kudi Davidi hakadiye muitu, wakakolesha maboko andi mu Nzambi. Yeye wakamuambila ne, Kutshinyi, bualu bua tshianza tshia Shaula, tatuʼanyi, katshiena tshikusangana; wewe newikale mukelenge wa Isalele, ne meme nengikale muibidi nʼebe; Shaula, tatuʼanyi, udi mumanye bualu ebu. Bubidi buabo bakahunga tshihungidi ku mpala kua Yehowa; Davidi wakashala muitu, Yonatana wakahingana ku nsubu kuandi. Hashishe Bena Zifa bakaya kudi Shaula mu Gibea, bakamuambila ne, Davidi kena musokome nʼetu mu misoko ya ngumbu idi muitu ku mukuna wa Hakila udi ku Sude kua tshihela, anyi? Nunku mukelenge, ulue biebe bu mudi mutshima webe musue kulua; bualu buetu nebuikale bua tuetu tumufile mu tshianza tshia mukelenge. Shaula wakabambila ne, Nusankishibue kudi Yehowa, bualu bua nuenu nuakanfuila luse. Ndi nnusengelela ne, Yai bienu, nutangile bimpe muaba mudiye musokome ne bantu bakamutangilaku; bualu bua nakunvua lumu ne, Yeye udi ne budimu bua bungi. Nunku yai bienu, numukebe mu miaba yonso misokome yakadiye musokome, nulue bienu, nungambile bimpe; hashishe nenye nʼenu, ne bikaleye mu buloba nemmukebulule munkatshi mua binunu bia meku a mu Yuda. Bakabika, bakaya ku Zifa ku mpala kua Shaula; kadi Davidi ne bantu bandi bakadi mu tshihela tshia Maona mu Alabâ ku Sude kua tshihela. Shaula ne bantu bandi bakayaku bua kumukeba. Bakamanyisha Davidi; nunku yeye wakaya ku dibue dinene, wakashikama mu tshihela tshia Maona. Shaula wakunyua lumu elu, nunku yeye wakamulonda mu tshihela tshia Maona. Shaula ne bantu bandi bakayila ku luseke elu lua mukuna, ne Davidi ne bantu bandi bakayila ku luseke lualua; Davidi wakaya lubilu bua kuhanduka, bualu bua yeye wakatshina Shaula; bualu bua Shaula ne bantu bandi bakadi bela Davidi ne bantu bandi munkatshi bua kubakuata. Kadi messager wakalua kudi Shaula ne, Ulue biebe lubilu, kujanguluki, bualu bua Bena Peleshete badi bahaula buloba. Nunku Shaula wakalekela kulonda Davidi, wakaya kuluangana ne Bena Peleshete. Nunku wakabikila muaba au ne, Sela-hamalekota. Nunku Davidi wakumukaku, wakashikama mu musoko wa mu Ene-gedi. Hakahingana Shaula ku mata ya ku Bena Peleshete, bakamuambila ne, Mona, Davidi udi mu tshihela tshia Ene-gedi. Hashishe Shaula wakasungula bantu binunu bisatu munkatshi mua Bena Isalele bonso, bakaya kukeba Davidi ne bantu bandi munkatshi mua mabue akadi mbushi ya mu mpata yendelahu. Yeye Wakafika ku mpangu ya mikoko yakadi mu nshila: lubuebue luakadiku, Shaula wakabuelamu bua kubuikileye makasa andi. Davidi ne bantu bandi bakadi basokome mu luseke lukuabo lua lubuebue elu. Bantu ba Davidi bakamuambila ne, Mona, dituku diakakuambila Yehowa ne, Mona neufile muena lukuna webe mu tshianza tshiebe, diakufika; wewe umuenzele bu mûdi umona ne mbimpe. Hashishe Davidi wakajuka, wakakosa tshihesa tshia tshikowelu tshia Shaula mu musokoko. Ku nyima mutshima wa Davidi wakanyingalala bualu bua yeye wakakosa tshihesa tshia tshikowelu tshia Shaula. Davidi wakambila bantu bandi ne, Yehowa ampidishe tshienzedi mukelenge wanyi, wakela Yehowa manyi ha mutu, bualu ebu, tshiolodi tshianza tshianyi kudiye, bualu bua yeye udi muntu muedibue manyi kudi Yehowa. Nunku Davidi wakahanda bantu bandi ne mei â; kakitabusha bua bobo kuluangana ne Shaula. Shaula wakabika, wakumuka mu lubuebue, wakaya mu nshila wandi. Hashishe Davidi wakabika, wakaluhuka mu lubuebue, wakela dî kudi Shaula ne. Mukelenge wanyi. Hakatshunguluka Shaula, Davidi wakatua mpala wandi hanshi, wakamukukuila. Davidi wakambila Shaula ne, Bualu kai wewe wakitabusha mei a bantu ne, Davidi udi ukeba kukuenzela bibi? Mona, lelu mesu ebe adi amona bu mutu Yehowa mukufile mu tshianza tshianyi mu lubuebue; bakuabo bakungambila ne, Umushihe. Kadi nakamba ne, Tshiena ndenga mukelenge wanyi tshianza, bualu bua yeye udi muedibue manyi kudi Yehowa. Bualu bukuabo, tatu wanyi, tangila ne tshihesa tshia tshikowelu tshiebe tshidi mu tshianza tshianyi; bualu bua meme nakukosa tshikowelu tshiebe, tshiakukushiha, nunku umanye biebe ne, Kakuena bualu bubi mu tshianza tshianyi: tshiakukuenzela bibi, kadi wewe ngûdi ukeba muoyo wanyi bua kûnyenga. Yehowa atulumbuluishe hankatshi hetu nʼebe, Yehowa ansombuele bualu buebe, kadi tshianza tshianyi katshiena tshikala kudi. Lusumuinu lua bankambua betu ludi luamba ne, Bualu bubi budi bufuma kudi bantu babi; katu tshianza tshianyi katshiena tshikulenga nansha. Mukelenge wa Isalele udi ukeba nganyi? Wewe udi ulonda neanyi? Udi ukeba mbua mulue, anyi mukenya! Nunku Yehowa ikale mulumbuluishi, akose tshilumbu tshidi hankatshi hetu nʼebe Yehowa atangile, akule bualu buanyi, ansungile mu tshianza tshiebe. Hakashikisha Davidi kuambila Shaula mei â onso, Shaula wakakonka ne, Muanʼanyi Davidi, edi ndi diebe, anyi? Shaula wakabandisha dî diandi, wakadila. Yeye wakambila Davidi ne, Wewe udi untambe meme buimpe: wewe wakungenzela anu malu mimpe, kadi meme nakukuenzela wewe malu mabi. Wewe wakungambila bu muwakungenzela bimpe lelu, bualu bua hakuila Yehowa mu tshianza tshiebe, kuakunshiha nansha. Basangana mundi muena lukuna wandi, neumulekele aye, anyi? Nunku Yehowa akufute bimpe bua bualu buwakungenzela lelu. Katataka ndi mumanye ne, Wewe newikale mukelenge bulelela ne bukelenge bua Isalele nebujadikibue mu tshianza tshiebe. Nunku uditshihe kundi ku mesu kua Yehowa ne, Kuena ushiha bana banyi badi balonda ku nyima, ne kuena ujimisha dina dianyi munkatshi mua nsubu wa tatu wanyi. Davidi wakaditshiha kudi Shaula. Shaula wakahingana kuandi, katu Davidi ne bantu bandi bakaya ku musoko wa lumbu. Samuele wakafua; Bena Isalele bonso bakadisangisha, bakamujinga, bakamujika mu nsubu wandi mu Lama. Davidi wakajuka, wakaya biandi mu tshihela tshia Palana. Muntu wa mu Maona wakadiku wakadi ne bintu biandi ku mukuna wa Kâmele; wakadi muntu munene, wakadi ne mikoko binunu bisatu ne mbushi tshinunu; yeye wakadi ukosa miosa ya mikoko yandi mu Kâmele. Dina dia muntu eu diakadi Nabala; dina dia mukashi wandi Abigayila; mukashi eu wakadi muena meji, wakadi ne mpala mulengele; kadi mulume wandi wakadi muena lukinu, wakadi ne bienzedi bibi; wakadi wa mu tshiota tshia Kaleba. Davidi wakunyua lumu mu tshihela ne, Nabala udi ukosa miosa ya mikoko yandi. Davidi wakasungula bansongalume bandi dikumi, wakabatuma kudi Nabala mu Kâmele ne, Yai, numuambike muoyo mu dina dianyi; numuambile nunku, yeye udi ushikama mu bubanji, ne, Ditalala dikale kûdi ne kudi bonso ba mu nsubu webe ne kudi bintu bionso biudi nʼabi. Nakunvua lumu ne, Wewe udi ukosa miosa ya mikoko; balami bebe ba mikoko bakadi nʼetu, tuetu katuakabenzela bibi, kabakamba tshintu tshimue musangu wonso wakadibo mu Kâmele. Webeshe bansongalume bebe, bobo nebakuambile; witabushe bansongalume aba basangane luse ku mesu kuebe; bualu bua tuetu tuakulua mu dituku dilengele; nunku ndi nkusengelela ne, Uhe bantu bebe ne muanʼebe Davidi tshionso tshidi mu tshianza tshiebe. Hakafika bansongalume ba Davidi kudi Nabala, bakamuambila mei au mu dina dia Davidi, bakahuwa. Nabala wakakudimuna bantu ba Davidi dî ne, Davidi udi nganyi? Muana wa Yishai udi nganyi? Bahika ba bungi badi batombokela bakelenge babo matuku â. Nengangate bidia bianyi ne mai anyi ne munyinyi wanyi unakashihela bakoshi banyi ba miosa ya mikoko bua kubifila kudi bantu bandi tshiyi mumanye kuakafumabo, anyi? Nunku bantu ba Davidi bakalukila, bakahingana kudi Davidi, bakamuambila mei â onso. Davidi wakambila bantu bandi ne, Suikai mikaba, muntu ne muntu muele wandi. Bakasuika mikaba, muntu ne muntu muele wandi; Davidi wakasuika mukaba kabidi ne muele wandi; bantu nkama inai bakalonda Davidi ne bantu nkama ibidi bakashala ha bintu biabo. Umue wa bansongalume wakamanyisha Abigayila, mukashi wa Nabala, ne, Davidi wakatuma bantu ku tshihela bua kuelabo mukelenge wetu muoyo; yeye wakabatandisha. Kadi bantu aba bakatuenzela bimpe, kabakatufuisha bundu, kabakatujimishila nansha tshintu tshimue, musangu utuakuenda nʼabo, hatuakadi mu madimi. Bobo bakadi bu lumbu kutudi butuku ne munya tô matuku onso atuakadi nʼabo balame mikoko. Nunku umanye bualu ebu, welangane meji a bualu bûdi musue kuenza; bualu bubi bulualua kudi mukelenge wetu ne kudi bonso ba mu nsubu wandi; bualu bua yeye udi muntu mulembakana, kakuena muntu udi mumanye mua kuakula nʼandi. Hashishe Abigayila wakaya lubilu, wakangata mitanda ya bidia nkama ibidi ne milondo ya nvinyo ibidi ne mikoko itanu yakadi milamba ne bihiminu bia blé mikanga bitanu ne bisumbu bia tumuma tukese tume lukama lumue ne bisumbu bia nfigi nkama ibidi: wakabiteka ha nyima ha nyama ya mpunda. Wakambila bansongalume bandi ne, Nudianjile ku mpala kuanyi, monai, meme nennulonde. Yeye kakambila bayandi Nabala bualu ebu. Yeye wakadi wenda ha nyima ha nyama wandi wa mpunda; hakadiye uhueka mu tshibanda, Davidi ne bantu bandi bakadi balue kudiye mu nshila bakasangakana nʼandi. Davidi wakadi wamba munda ne. Bulelela, nakalama bintu bia muntu eu mu tshihela tshianana, nansha tshintu tshiandi tshimue tshiakajimina; ne yeye wakushintakasha bubi ku buimpe. Nzambi atambe kuela bena lukuna ba Davidi mulau binashila muntu au muana mulume umue wa bintu bionso bidiye nʼabi tô ne muatshiabu. Hakatangila Abigayila Davidi, yeye wakatuluka ha nyima ha nyama wandi wa mpunda lubilu, wakatua mpala wandi hanshi ku mesu kua Davidi, wakamukukuila. Yeye wakahona ku makasa andi, wakamuambila ne, Mukelenge wanyi, bualu bubi ebu buikale kundi; ndi nkusengelela ne, Witabushe bua muhika webe mukashi akuambile bualu mu matshu ebe, ne unvue biebe mei a muhika webe mukashi. Ndi nkusengelela ne, Mukelenge wanyi kabadi bualu bua muntu mulembakana, Nabala, mene; bualu bua bienzedi biandi bidi bu kukudimuna kua dina diandi: Nabala ndina diandi ne buhote budi nʼandi; kadi meme, muhika webe mukashi, tshiakatangila bansongalume ba mukelenge wanyi bakatumeye. Mukelenge wanyi, bu mudi Yehowa ne muoyo ne bu mudi mutshima webe ne muoyo, bualu bua Yehowa wakakukanda bua wewe kumatshishi mashi hanshi ne bua wewe kudisombuedi ne tshianza tshiebe, nunku badi nʼebe lukuna ne badi bakeba kuenzela mukelenge wanyi bibi, bikale bu Nabala. Nunku diha edi diakula nʼadi muhika webe mukashi kudi mukelenge wanyi difidibue kudi bansongalume badi ne mukelenge wanyi. Ndi nkusengelela ne, Ulekelele muhika webe mukashi dihanga diandi; Yehowa neajadike ba mu nsubu wa mukelenge wanyi bulelela, bualu bua yeye udi uluila Yehowa nvita; bualu bubi kabuena buikala kudi tô matuku ebe onso. Biabika bantu bua kukulonda ne bua kukeba muoyo webe, muoyo wa mukelenge wanyi newikale musuikibue mu tshisumbu tshiotshimue ne muoyo wa Yehowa, Nzambi webe; ne mioyo ya bantu badi nʼebe lukuna, yeye neayele bu mudibo bela mabue mu tshieledi. Hashishe hashikisha Yehowa kuenzela mukelenge wanyi malu mimpe onso akamuambileye ne hakutekeye mukelenge ku mutu kua Bena Isalele, bualu ebu kabuena mua kunyingalasha mutshima webe, ne mutshima wa mukelenge wanyi kawena unema bujitu bualu bua mukelenge wanyi wakamatshisha mashi a bakuabo hanshi tshianana, anyi bua mukelenge wanyi wakasombuela. Henzela Yehowa mukelenge wanyi bimpe, yeye avuluke muhika wandi mukashi. Davidi wakambila Abigayila ne, Yehowa, Nzambi wa Isalele, wakukutuma kundi lelu, asankishibue. Wewe usankishibue kabidi bua lungenyi luebe, bualu bua wewe wakunkanda lelu ne, Kumatshishi mashi a bakuabo hanshi bua meme tshidisombuedi ne tshianza tshianyi. Bulelela, bu mudi Yehowa, Nzambi wa Isalele, ne muoyo, yeye nguakunkanda bua meme tshikuenzedi bibi, bu wewe kuyi mulue kundi lubilu lelu, bulelela, Nabala kakadi kushala ne tshintu, nansha muana mulume umue tô ne hatshiabu. Nunku Davidi wakitabusha bintu bakalueye nʼabi kudiye mu bianza biandi; yeye wakamuambila ne, Uye biebe ku nsubu kuebe talalâ; mona, nakunvua dî diebe, nakukuitabusha. Abigayila wakahingana kudi Nabala; mona, yeye wakamana kulongolola bidia bia disanka mu nsubu muandi bu disanka dia mukelenge; mutshima wa Nabala wakasanka munda muandi bualu bua yeye wakatamba kukuatshika maluvu; nunku mukashi wandi kakamuambila bualu, nansha bukese nansha bunene tô ne hakatshiabu. Hakatshiabu, kukuatshika kua maluvu kua Nabala kuakashika, mukashi wandi wakamuambila malu â onso; mutshima wandi wakafua dihumpa munda muandi ne yeye wakandamuka bu dibue. Hakahita matuku dikumi, Yehowa wakakuma Nabala, yeye wakafua. Hakunyua Davidi ne, Nabala wakafua, yeye wakamba ne, Yehowa asankishibue bualu bua yeye wakungakuila bua bundu bunakaheta ku tshianza tshia Nabala, wakakanda muntu wandi bua yeye kenji bibi; Yehowa wakatangisha bienzedi bibi bia Nabala ha mutu handi. Davidi wakatuma bantu kudi Abigayila bua kumuangateye bu mukashi wandi. Hakafika bantu ba Davidi kudi Abigayila ku Kâmele, bakamuambila ne, Davidi wakatutuma kûdi bua tuetu kubuangata bu mukashi wandi. Yeye wakajuka, wakatua mpala wandi hanshi, wakamba ne, Monai, muntu wenu udi bu muhika bua kuowesheye makasa a bahika ba mukelenge wanyi. Abigayila wakajuka lubilu, wakabanda ha nyima ha nyama wa mpunda, ne bansongakashi bandi batanu bakamulonda; yeye wakalonda bantu ba Davidi, wakalua mukashi wandi. Davidi wakabaka Abinoama wa mu Yizelele kabidi; bubidi buabo bakadi bakashi bandi. Shaula wakamana kufila muanʼandi mukashi, Mikala, mukashi wa Davidi, kudi Palati, muana wa Layisha wa mu Galima. Bena Zifa bakalua kudi Shaula mu Gibea, bakamuambila ne, Davidi kena usokoma mu mukuna wa Hakila udi ku mpala kua tshihela, anyi? Hashishe Shaula wakabika, wakahueka ku tshihela tshia Zifa, wakadi ne bantu binunu bisatu bakasunguleye munkatshi mua Bena Isalele, bua kukebeye Davidi mu tshihela tshia Zifa. Shaula wakasa tshitudilu tshiandi mu nshila wa ku mukuna wa Hakila udi ku mpala kua tshihela. Kadi Davidi wakashikama mu tshihela; yeye wakatangila Shaula ulua, umulonda mu tshihela. Davidi wakatuma batentekedi, wakajingulula ne bulelela, Shaula wakalua. Davidi wakajuka, wakalua ku muaba wakadi Shaula mutule; Davidi wakatangila muaba wakadi Shaula mulale ne Abinê, muana wa Ne, kapitene ka masalayi andi, Shaula wakadi mulale munkatshi mua makalu ne bantu bandi bakadi bamunyunguluka. Hashishe Davidi wakebesha Ahimeleke, Muena Hiti, ne Abishai, muana wa Seluya, muanʼabo ne Yoaba, ne, Udi musue kuhueka nʼanyi kudi Shaula mu tshitudilu tshiandi nganyi? Abishai wakamuambila ne, Meme nenye nʼebe. Nunku Davidi ne Abishai bakafika kudi bantu ba Shaula butuku; monai, Shaula wakadi mulale tulu munkatshi mua makalu ne difuma diandi dishimika hanshi ku mutu wandi; Abinê ne bantu bonso bakadi balala, bamunyunguluka. Hashishe Abishai wakambila Davidi ne, Nzambi wakafila muena lukuna webe mu tshianza tshiebe lelu; ndi nkusengelela ne, Witabushe bua meme kumudia ne difuma diandi, dimusompoke kabidi anu tshikondo tshimue, tshiena mmutua tshikondo tshibidi. Davidi wakambila Abishai ne, Kumushihi nansha; udi mua kulenga muntu wakela Yehowa manyi ha mutu ne kubinga nganyi? Davidi wakamba ne, Bu mudi Yehowa ne muoyo, Yehowa nkayandi neamushihe; dituku diandi dia lufu nedilue anyi yeye neaye mu nvita, neafue. Yehowa ankande bua tshilengi muntu wakela Yehowa manyi ha mutu tshianza; kadi ndi nkusengelela ne, Wangate difuma didi ku mutu wandi ne mulondo wandi wa mai, tuye. Nunku Davidi wakangata mulondo wa mai ne difuma diakadi ku mutu wa Shaula, bakaya. Nansha muntu waka batangila anyi wakamanya bualu ebu; nansha muntu wakabika ku tulu, bualu bua buonso buabo bakadi balale tulu bualu bua tulu tua kashendenda difume kudi Yehowa biaka bakuata. Hashishe Davidi wakaya ku luseke lukuabo, wakimana ba mutu ha mukuna mule, muaba munene wakadi mushale hankatshi habo. Davidi wakela dî kudi bantu ne kudi Abinê, muana wa Nê, wakabakonka ne, Wewe Abinê, kuena witaba, anyi? Hashishe Abinê wakamukudimuna dî ne, Udi wela mukelenge dî nganyi? Davidi wakambila Abinê ne, Kuena muntu wa bukitu, anyi? Muntu kai udi bu wewe munkatshi mua Bena Isalele? Bualu kai wewe kuena ulama mukelenge webe? Bualu bua muntu wakalua kunudi aku bua kushiheye mukelenge webe. Bualu ebu buwakenza kabuena buakane. Bu mudi Yehowa ne muoyo bûdi nʼabu mbua kufua, bualu bua wewe kuakulama mukelenge webe udi muela manyi ha mutu kudi Yehowa. Tangila kudi difuma dia mukelenge ne mulondo wa mai biakadi ku mutu wandi. Shaula wakamanya dî dia Davidi, wakakonka ne, Edi ndî diebe, muanʼanyi Davidi, anyi? Davidi wakamukudimuna ne, Edi ndî dianyi, mukelenge wanyi. Davidi wakakonka ne, Mukelenge wanyi udi ulonda muntu wandi bua tshinyi? Nakuenza tshinyi? Bualu bubi kai budi mu tshianza tshianyi? Katataka ndî nkusengelela ne, Mukelenge wanyi unvue mei a muntu wandi. Bikala Yehowa nguakakusonsolola bualu buanyi, yeye itabushe mulambu; kadi bikala bantu mbakenza nunku, bobo bedibue mulau kudi Yehowa, bualu bua bobo bakungihata lelu bua meme tshikadi mu buhianyi bua Yehowa, badi bangambila ne, Ya, ukuatshile nzambi mikuabo mudimu. Nunku kitabushi bua mashi anyi kumatau hanshi ha buloba anu ku mesu kua Yehowa; bualu bua mukelenge wa Isalele wakalua bua kukeba mukenya bu mudi muntu ukeba nkuadi mu mikuna. Hashishe Shaula wakamba ne, Nakuenza bibi; hingana, muanʼanyi Davidi, bualu bua tshiena nkuenzela bibi tshikondo tshikuabo, bualu bua muoyo wanyi wakadi bu tshintu tshia mushinga mukole ku mesu kuebe lelu; mona, nakuenza bu muntu muhote, nakutamba kuhambuka. Davidi wakamba ne, Mukelenge, tangila difuma; umue wa bantu bebe alue bua kudiangata. Yehowa neafute muntu yonso bu mudi buimpe buandi ne lulamatu luandi lua ku bushuwa; bualu bua Yehowa wakakufila mu tshianza tshianyi lelu ne meme tshiakitabusha bua kulenga muntu wakela Yehowa manyi ha mutu tshianza. Nunku mona, bu muakadi muoyo webe bu tshintu tshia mushinga mukole ku mesu kuanyi lelu, muoyo wanyi wikale bu tshintu tshia mushinga mukole ku mesu kua Yehowa, yeye ansungile mu makenga onso. Hashishe Shaula wakambila Davidi ne, Wewe, muanʼanyi Davidi, usankishibue! wewe newenze malu manene, neutambe bulelela. Nunku Davidi wakaya mu nshila wandi, ne Shaula wakahingana ku muaba wandi. Davidi wakamba mu mutshima wandi ne, Meme nenfue dituku dikuabo ku tshianza tshia Shaula; kakuena bualu budi butamba buimpe kundi bu mudi kunyemena mu buloba bua Bena Peleshete; Shaula neahange kunkeba mu matshika a buloba bua Isalele, nunku nempanduke mu tshianza tshiandi. Davidi wakajuka ne bantu bakadi nʼandi, nkama isambombo, bakaya kudi Akisha, muana wa Maoka, mukelenge wa mu Gata. Davidi wakashikama ne Akisha mu Gata, yeye ne bantu bandi, muntu ne muntu ne ba mu nsubu wandi, ne Davidi ne bakashi bandi babidi, Abinoama, Muena Yizelele, ne Abigayila, muena Kâmele, wakadi mukashi wa Nabala. Bakambila Shaula ne, Davidi wakanyemena mu Gata; yeye kakamukebulula kabidi. Davidi wakambila Akisha ne, Binasangana luse ku mesu kuebe, witabushe bampe muaba mu musoko mukuabo mu buloba buebe, bua meme kushikamamu; muhika webe udi ushikama nʼebe hohamue mu tshimenga tshia mukelenge bualu kai? Nunku Akisha wakamuha musoko wa Sikelaga dituku adi; nunku musoko wa Sikelaga udi ulamata kudi bukelenge ba Yuda tô ne ku dituku edi. Matuku onso akashikama Davidi mu buloba bua Bena Peleshete akadi tshidimu tshijima ne ngondo mai. Davidi ne bantu bandi bakaya, bakahaula bintu bia Bena Geshû ne Bena Gêze ne Bena Amaleka: aba bakadi bena buloba ba diambedi, bakadi bashikama mu nshila udi uya ku Shû tô ne ku buloba bua Ejipitu. Davidi wakabutula misoko ei, kakashiya nansha mulume nansha mukashi ne muoyo; wakaya ne mikoko ne ngombe ne nyama ya mpunda ne tumelo ne bilulu biabo, wakahingana kudi Akisha. Akisha wakamba ne, Wakuhaula bena nganyi lelu eu? Davidi wakamukudimuna ne, Tuakuya ku luseke lua ku Sude lua Yuda ne lua Bena Yelamele ne lua Bena Keni. Davidi kakashiya nansha mulume nansha mukashi ne muoyo bua kulueye nʼabo ku Gata; kakasua bobo baye ne lumu ne, Davidi Wakenza nunku ne yeye nênze nunku to matuku onso adiye mushikame mu buloba bua Bena Peleshete. Akisha wakitabusha mei onso akamuambila Davidi; yeye wakamba ne, Davidi wakavuisha Bena Isalele, bantu bandi, bua bobo bamulengulule, nunku yeye neikale muhika wanyi tshiendelele. Mu matuku au Bena Peleshete bakasangisha masalayi abo bua kuluanganabo ne Bena Isalele. Akisha wakambila Davidi ne, Umanye biebe ne, Bûdi nʼabu mbua kuya hanyi mu nvita, wewe ne bantu bebe. Davidi wakambila Akisha ne, Wewe neumanye bu mudi muntu webe musue kuenza. Akisha wakambila Davidi ne, Nenkuvuishe mulami wa mutu wanyi tshiendelele. Katataka Samuele wakamana kufua, Bena Isalele bonso bakamujinga, bakamujika mu Lama mu musoko wandi mene. Shaula wakamana kumusha bakadi ne mbuku ne bena muhongo mu buloba. Bena Peleshete bakadisangisha, bakasa tshitudilu tshiabo mu Shunema: Shaula wakasangisha Bena Isalele bonso, bakasa tshitudilu tshiabo mu Gileboa. Hakatangila Shaula tshisumbu tshia masalayi a Bena Peleshete, wakatamba kutshina, mutshima wandi wakakanka bikole. Shaula wakakonka Yehowa lungenyi, kadi Yehowa kakamuitaba, nansha mu tshilota nansha ku Ulima, nansha kudi baprofete. Shaula wakambila bantu bandi ne, Nunkebele mukashi mutempi wa lubuku, bua meme kuya kudiye kunuebesha. Bantu bandi bakamuambila ne, Mona, mukashi mutempi wa lubuku udi mu Ene-dô. Shaula wakadifuanyisha bu munga muntu, wakaluata bilulu bikuabo, wakaya ne bantu bandi babidi bakuabo, bakafika kudi mukashi au butuku. Yeye wakamba ne, Ndi nkusengelela ne, Untempe lubuku lua bakishi, umueneshe ku mesu kuanyi muntu undi nkuambila dina diandi. Mukashi wakamuambila ne, Mona, wewe udi mumanye bualu buakenza Shaula bu muakumusheye bakadi ne mbuku ne bena muhongo mu buloba; wewe udi ungela buteyi bua kuluisha bualu kai? Shaula wakaditshiha kudiye mu dina dia Yehowa wamba ne, Bu mudi Yehowa ne muoyo kabena bakuhisha ku bualu ebu. Hashishe mukashi wakamba ne, Udi musue meme nkumueneshile nganyi? Yeye wakamuambila ne, Umueneshile Samuele. Hakatangila mukashi Samuele, yeye wakela di dikole, wakambila Shaula ne, Wakundinga bua tshinyi? Wewe udi Shaula. Mukelenge wakamuambila ne, Kutshinyiudi utangila tshinyi? Mukashi wakambila Shaula ne, Ndi ntangila nzambi uhatuka mu buloba. Shaula wakamuebesha ne, Udi ne tshifuanyikishi kai? Yeye wakamuambila ne, Muntu mununu udi uhatuka, udi muluate tshikowelu. Shaula wakamanya ne nSamuele; wakatua mpala wandi hanshi, wakamukukuila. Samuele wakebesha Shaula ne, Wakantatshisha bua kumbisha nunku bualu kai? Shaula wakamuitaba ne, Bualu bua ndi ntamba kutata. Bualu bua Bena Peleshete bakalua kuluangana nʼanyi ne Nzambi wakandekela, kena muitabe kundi kabidi nansha kudi baprofete nansha ku bilota: nunku nakukubikila bua wewe kummanyisha tshindi mua kuenza. Samuele wakamuambila ne, Udi nngebesha meme munyi, bualu bua Yehowa wakalekela, wakalua bu muena lukuna webe? Yehowa wakakuenzela bu muakambeye mukana muanyi. Yehowa wakamana kunyenga bukelenge mu tshianza tshiebe, wakahidia mukuenu, Davidi mene. Bualu bua wewe kuakatumikila dî dia Yehowa bua kushikisha tshiji tshiandi tshikole kudi Bena Amaleka; nunku Yehowa wakukuenzela bualu ebu lelu. Yehowa neakufile ne Bena Isalele mu bianza bia Bena Peleshete; makelela wewe ne bana bebe balume nenuikale nʼanyi. Yehowa neafile tshisumbu tshia masalayi a Bena Isalele mu bianza bia Bena Peleshete. Hashishe Shaula wakadishinda mudiolole ha buloba, wakatamba kutshina, bualu bua mei a Samuele; yeye kakadi ne bukole munda muandi bualu bua yeye kakadia bidia dituku dijima ne butuku. Mukashi au wakalua kudi Shaula, wakatangila ne yeye udi ne kanyinganyinga kakole, wakamuambila ne, Mona, muntu webe mukashi wakitabusha dî diebe, nakafila muoyo wanyi mu tshianza tshianyi, nakenza bu mu mei onso awakangambila. Nunku ndi nkusengelela ne, Witabushe dî dia muntu webe mukashi bua yeye alue kûdi ne tshihesa tshia bidia: ubidie bua wewe wikale ne bukole hawaya mu nshila. Kadi yeye wakahidia, wakamba ne, Tshiena ndia nansha. Kadi bantu bandi ne mukashi eu bakamusengelela: nunku yeye wakitabusha dî diabo. Nunku yeye wakajuka hanshi mu buloba, wakashikama ha bulalu. Mukashi eu wakadi ne kana ka ngombe ka manyi mu nsubu; yeye wakaya lubilu, wakakashiha; wakangata bukula, Wakenza nʼabu mampa adi kâyi ne luevene; wakalua nʼabi kudi Shaula ne kudi bantu bandi; bakadia. Hashishe bakabika, bakaya mu nshila butuku abu. Bena Peleshete bakasangisha bisumbu bia masalayi abo ku Afeke: Bena Isalele bakasa tshitudilu tshiabo hehi ne mushimi wa mai udi mu Yizelele. Bakelenge ba Bena Peleshete nkama ne nkama ne binunu ne binunu bakahita mu nshila; Davidi ne bantu bandi bakalonda ku nyima ne Akisha. Hashishe baminyampala ba Bena Peleshete bakakonkangana ne. Bena Ebelu aba badi benza tshinyi kunoko? Akisha wakakudimuna baminyampala ba Bena Peleshete ne, Eu ke nDavidi, muntu wa Shaula, mukelenge wa Isalele, wakadi nʼanyi matuku â, nansha bidimu ebi, undi tshiyi musangane bualu bubi kudiye ku dituku diakalueye tô ne katataka, anyi? Kadi baminyampala ba Bena Peleshete bakadi nʼandi tshiji, baminyampala ba Bena Peleshete bakamuambila ne, Hingasha muntu au ku muaba wandi uwakamuha, kayi biandi nʼetu mu nvita ei bua yeye kandamuki muena lukuna wetu. Muntu eu nealengeshe munda ne mukelenge wandi munyi? Kena mua kulengesha ne mitu ya bantu aba, anyi? Eu ke nDavidi, wakatumbishabo ne maja, hakimbabo ne, Shaula wakashiha binunu bia bantu, Davidi wakashiha binunu makumi bia bantu, anyi? Hashishe Akisha wakabikila Davidi, wakamuambila ne, Bu mudi Yehowa ne muoyo, wewe udi muakane: hawakendakana ku mesu kuanyi wakadi anu ne bienzedi bimpe, bualu bua meme tshiakasangana bualu bubi kûdi ku dituku diwakalua kundi tô ne katataka, kadi baminyampala aba kabena bakusue. Nunku uhingane biebe talalâ, bua wewe kufikishi baminyimpala ba Bena Peleshete munda. Davidi wakebesha Akisha ne, Nakuenza tshinyi? Wakusangana bualu bubi kai munda mua muntu webe musangu wonso unakadi nʼebe tô ne lelu, bua meme tshiyi kuluangana ne bena lukuna ba mukelenge wanyi? Akisha wakakudimuna Davidi ne, Ndi mumanye ne wewe udi muimpe ku mesu kuanyi bu muanjelo wa Nzambi, kadi baminyampala ba Bena Peleshete bakamana kuamba ne, Yeye kayi nʼetu ku nvita. Nunku bika biebe ne dinda dionso, ne bantu ba mukelenge webe bakatua nʼebe: ne hanuabika ne dinda dionso, ne hatoka hanshi, nuye. Nunku Davidi wakabika ne dinda dionso, yeye ne bantu bandi, bua kuhingana ku buloba bua Bena Peleshete. Bena Peleshete bakabanda ku Yizelele. Hakahita matuku asatu, Davidi ne bantu bandi bakafika ku Sikelaga; Bena Amaleka bakadi bafuma ku Sude, bahaula bintu, bakabutula Sikelaga, bakawosha ne kahia; bakakuata bakashi bu bahika ne bonso bakadimu, ne banene ne bakese; kabakashiha umue wabo, bakabatuala, bakaya nʼabo. Nunku bakafika Davidi ne bantu bandi ku musoko, monai, musoko wakadi muoshibue ne kahia, ne bakadi bakuata bakashi babo ne bana babo balume ne bana babo bakashi bu bahika. Hashishe Davidi ne bantu bandi bakabisha mei abo, bakadila tô ne hakahangabo mua kudila. Bakashi babidi ba Davidi, Abinoama, Muena Yizelele, ne Abigayila, Muena Kâmele, wakadi mukashi wa Nabala diambedi, bakadi bakuatshibue bu bahika. Davidi wakanyingalala bikole; bualu bua bantu bakadi bahunga dî bua kumukuma mabue; mitshima ya buonso buabo yakanyingalala bua bana babo balume ne bana babo bakashi; kadi Davidi wakadikolesha mu Yehowa, Nzambi wandi. Davidi wakambila Ebeyatâ muakuidi, muana wa Ahimeleke ne, Ndi nkusengelela ne, Ulue kundi ne efoda. Ebeyatâ wakalua kudi Davidi ne efoda. Davidi wakebesha Yehowa ne, Binalonda tshisumbu etshi mu nshila, nembahete, anyi? Yeye wakamukudimuna ne, Ubalonde, wewe neubahete, kuena uhanga kuhingisha bintu bionso. Davidi wakaya, yeye ne bantu bandi nkama isambombo bakadi nʼandi tô ne hakafikabo ku kasulu ka Besô, kuakashala bantu bakuabo ku nyima. Kadi Davidi ne bantu bandi nkama mai bakabalonda; kadi bantu bandi nkama ibidi bakashala ku nyima; bakatamba kuhanga, kabakamanya mua kusabuka kasulu ka Besô. Bakasangana Muena Ejipitu mu budimi, bakatua nʼandi kudi Davidi, bakamuha bintu bia kudia, wakadia; bakamunuisha mai; bakamuha tshisumbu tshia nfigi ne bisumbu bia tumuma tukese tume bibidi: hakadieye bintu ebi, muoyo wandi wakahingana kudiye, bualu bua kakadia tshintu, kakanua mai tô minya isatu ne matuku asatu. Davidi wakamuebesha ne, Wewe udi muntu wa nganyi? Wakufuma kudi kunyi? Yeye wakamukudimuna dî ne, Ndi Muena Ejipitu, muhika wa Muena Amaleka; mukelenge wanyi wakashiya bualu bua disama diakankuata matuku asatu mahite. Tuakahaula bintu ku luseke lua Sude lua Bena Kelete ne lua Bena Yuda ne lua Kaleba; luakosha Sikelaga ne kahia. Davidi wakamukonka ne, Wewe neutulombole kudi tshisumbu etshi, anyi? Yeye wakamuambila ne, Biwaditshiha kundi mu dina dia Nzambi ne, Tshiena nkushiha, tshiena nkufila mu bianza bia mukelenge webe, nennulombole kudi tshisumbu etshi. Hakalueye nʼabo kudibo, monai, bakadi bamuangalaka buloba buonso, bakadi badia bidia, bakadi banua, bakadi baja maja bualu bua bungi bua bintu biakahaulabo mu buloba bua Bena Peleshete ne mu buloba bua Bena Yuda. Davidi wakabashiha ku dilolo adi tô ne ku dilolo dia dituku dikuabo; nansha umue wabo wakahanduka anu bansongalume nkama mai bakadi babanda ha nyima ha tumelo bakanyema. Davidi wakasungila bintu bionso biakanyenga Bena Amaleka; wakasungila bakashi bandi babidi kabidi. Kabakajimisha tshintu nansha tshinene nansha tshikese, nansha muana mulume nansha muana mukashi, nansha tshintu tshimue tshiakanyengabo; Davidi wakahingisha bionso. Davidi wakangata bisumbu bia mikoko ne bia ngombe biakahita ha mutu, wakamba ne. Ebi mbiakahaula Davidi. Davidi Wakafika kudi bantu nkama ibidi bakadi bahanga ne kabakamanya mua kulonda Davidi bakasuabo ku kasulu ka Besô; bakajila kusangila ne Davidi ne bantu bakadiye nʼabo; bakafika Davidi ha buihi ne bantu, yeye wakabela muoyo. Hashishe bena lukinu ne bena mampaka bonso ba bakadi baya ne Davidi bakamba ne, Bualu bua bantu aba kabakaya nʼetu, katuena tubaha nansha tshintu tshikese tshia bintu bi tuakanyenga anu kuhingashila muntu yonso mukashi wandi ne bana bandi bua yeye aye nʼabo, bumuke. Hashishe Davidi wakamba ne, Kanuena mua kuenza nunku, bana betu, ne bintu biakatuha Yehowa, wakatusungila, wakafila tshisumbu tshia bantu tshiakulua kutuluisha mu bianza bietu. Nganyi neunvuile mei enu ku bualu ebu? Bualu bua bu mudi tshituha tshia muntu wakaya mu nvita mbu mudi tshituha tshia muntu wakashala kulama bintu: nebabanyangane bintu muomumue. Nunku ku dituku adi wakajadika mei â bu mukenji mufunda ne mujalame kudi Bena Isalele tô ne ku dituku edi. Hakafika Davidi ku Sikelaga, yeye wakatuma tshituha tshia bintu biakanyengeye kudi bakulu ba mu Yuda ne kudi balunda bandi; wakabambila ne, Monai diha dienu dia mu biakanyengabo kudi bena lukuna ba Yehowa. Wakatuma bintu kudi bakadi mu Betele, ne bakadi mu Lamota lua ku Sude ne bakadi mu Yati, ne bakadi mu Aloê ne bakadi mu Sifemota ne bakadi mu Eshetemoa, ne bakadi mu Lakala ne bakadi mu misoko ya Bena Yelamela ne bakadi mu misoko ya Bena Kene, ne bakadi mu Hôma ne bakadi mu Bô-ashana ne bakadi mu Ataka, ne bakadi mu Hebelone ne mu miaba yonso yakadi Davidi ne bantu bandi bashikamashikama. Bena Peleshete bakaluangana ne Bena Isalele; Bena Isalele bakanyema ku mesu kua Bena Peleshete, badishinde hanshi bafue mu mukuna wa Gileboa. Bena Peleshete bakatamba kulonda ku nyima ha buihi ne Shaula ne bana bandi balume; Bena Peleshete bakashiha Yonatana ne Abinadaba ne Malakishua, bana balume ba Shaula. Nvita yakatamba kutonda Shaula; bena mata a mikete bakamuheta, wakatamba kutahibua kudi bena mata a mikete. Hashishe Shaula wakambila mutuadi wa ngabu wandi ne, Utule muele webe wa nvita, untue, unsompoke, bua bantu aba badi kabayi batengula kabantu, kabansompodi, kabanfuishi bundu. Kadi mutuadi wa ngabu wandi wakahidia bualu bua yeye wakatamba kutshina. Nunku Shaula wakatula muele wandi wa nvita, wakadituaku. Hakatangila mutuadi wa ngabu wandi ne Shaula wakafua, yeye kabidi wakatula muele wandi wa nvita, wakadituaku, wakafua nʼandi. Nunku Shaula ne bana bandi balume basatu ne mutuadi wa ngabu wandi ne bantu bandi bonso bakafua hamue dituku dimue. Hakatangila Bena Isalele bakadi ku luseke lukuabo lua tshibanda ne bakadi dishiya dia musulu wa Yadene ne Bena Isalele bakuabo bakanyema ne Shaula ne bana bandi balume basatu bakafua, bobo kabidi bakumuka mu misoko yabo, bakanyema; hashishe Bena Peleshete bakabuela mu misoko yabo, bakashikamamu. Hakatshiabu, hakalua Bena Peleshete bua kunyenga bintu bia bantu bafue, bakasangana Shaula ne bana bandi balume basatu bafuile ku mukuna wa Gileboa. Bakakosa Shaula mutu, bakayila bintu biandi bia nvita, bakabituma ku buloba bua Bena Peleshete buonso, bua kumanyishabo lumu elu mu nsubu ya mpingu yabo ne munkatshi mua bantu babo. Bakateka bintu biandi bia nvita mu nsubu wa Bashetelota; bakasuika tshitumpampa tshiandi ku lumbu lua musoko wa Bete-shana. Kakunyua Bena Yabesha-gilada lumu lua bualu buakenzela Bena Peleshete Shaula, bena bukitu bonso bakajuka, bakaya butuku, bakangata tshitumpampa tshia Shaula ne bitalu bia bana bandi balume basatu biakadi bisuika ku lumbu lua musoko wa Bete-shana, bakalua nʼabi ku Yabesha, bakabioshaku. Hashishe bakangata mifuba yabo, bakayijika muinshi mua mutshi wa mu Yabesha, bakajila bia kudia tô matuku muanda mutekete. Ku nyima kua lufu lua Shaula, Davidi wakahingana ku dishiha dia Bena Amaleka, wakashikama mu musoko wa Sikelaga matuku abidi; hakatshiabu dituku disatu, mundi muhanduke mu tshitudilu tshia Shaula wakalua kudiye ne bilulu biandi bihandike ne buloba buela mu mutu muandi; hakafikeye kudi Davidi, yeye wakatua mpala wandi hanshi, wakamukukuila. Davidi wakamuebesha ne, Wakufuma kudi kunyi? Yeye wakamukudimuna ne, Nakahanduka mu tshitudilu tshia Bena Isalele. Davidi wakamuebesha ne, Bualu budi munyi? Ndi nkusengelela ne, Ubungambile. Yeye wakamuambila ne, Bantu bakanyema mu nvita ne bantu ba bungi bakafua; Shaula ne muanʼandi mulume Yonatana bakafua kabidi. Davidi wakebesha nsongalume wakamuambila bualu ebu ne, Udi mumanye ne, Shaula ne muanʼandi mulume Yonatana bakafua munyi? Nsongalume wakamuambila ne, Meme nakalua ku mukuna wa Gileboa ku mpukahuka, ne mona, Shaula wakadi mushindamine ku difuma diandi; ne mona, bena makalu ne bantu bakadi benda ha nyima ha tubalu bakadi bamutshintshimike ha buihi. Hakatshungulukeye ku nyima, wakuntangila, wakambikila. Nakamukudimuna ne, Ndiku. Wakangebesha ne, Wewe udi nganyi? Nakamukudimuna dî ne, Ndi Muena Amaleka. Yeye wakangambila ne, Ndi nkusengelela ne, Wimane biebe aha, unshihe; mutshima wanyi udi unyingalala bualu bua ntshidi mushale ne muoyo. Nunku nakimana ha buihi nʼandi, nakamushiha, bualu bua nakamanya bianyi ne, Yeye kena mua kuikala ne muoyo hakadishindeye hanshi nunku; nakangata tshifulu tshiandi tshia butumbi tshiakadi ku mutu kuandi ne lukanu lua ku diboko diandi, nakalua nʼabi kudi mukelenge wanyi. Hashishe Davidi wakakuata bilulu biandi, wakabihanda, bantu bonso bakadi nʼandi bakenza nunku kabidi; bakajinga Shaula ne muanʼandi mulume Yonatana ne bantu ba Yehowa ne Bena Isalele, bakajila bia kudia tô ne hakabuela diba, bualu bua bobo bakafua ku miele ya nvita. Davidi wakebesha nsongalume wakamuambila bualu ebu ne, Wewe wakafuma kudi kunyi? Yeye wakamukudimuna ne, Ndi muenyi kunoko, ndi Muena Amaleka. Davidi wakamuebesha ne, Wewe kuakutshina kulenga muntu wakela Yehowa manyi ha mutu bua kumushiha bua tshinyi? Davidi wakabikila umue wa bansongalume bandi, wakamuambila ne, Semena ha buihi nʼandi, umushihe. Yeye wakamutua muele, ne yeye wakafua. Davidi wakamuambila ne, Mashi ebe ikale ha mutu hebe bualu bua mukana muebe muakukuhisha, muamba ne, Nakashiha muntu wakela Yehowa manyi ha mutu. Davidi wakajinga Shaula ne muanʼandi mulume Yonatana ne kujinga eku: wakela mukenji bua kuyishabo Bena Yuda musambu wa buta bua mikete; monai, bakaufunda mu Mukanda wa Yashâ. Butumbi buenu, Bena Isalele, buakashihibua ha mutu ha mikuna! Monai bu muakashihibua bena bukitu! Kabambi bualu ebu mu Gata, lumu elu kalumanyibu mu misesu ya Ashekelona; bua bana bakashi ba Bena Peleshete kabasanki, bua bana bakashi ba bantu badi kabayi batengula kabatambi bukole. Nuenu, mikuna ya Gileboa, mume ne nvula kabinumatshidi, madimi kikadi ne bia kudia. Bualu bua bakimashaku ngabu wa muena bukitu, ngabu wa Shaula mene, bu muntu wakadi kayi ne manyi mela ha mutu. Buta bua Yonatana kabuakahanga ku mashi a bantu bafue, anyi ku mafuta a bena bukitu, muele wa nvita wa Shaula kawakahingana hatuhu. Shaula ne Yonatana bakadi bakane, bakadi banyishibua kudi bantu mu mioyo yabo, kabakadi bahanduluke mu lufu luabo; bakahita nyunyu ya mikanku lubilu, bakatamba nyama ya ntambue bukole. Nuenu, bana bakashi ba Bena Isalele, nujinge Shaula, wakanuluatshisha bilulu bikunze bia mushinga mukole, wakalengesha bilulu bienu ne bintu bia or. Monai bu muakafua bena bukitu munkatshi mua nvita! Yonatana udi mushihibue ha mutu ha mikuna yenu. Mutshima wanyi udi munyingalale bualu buebe, muanʼetu Yonatana, wewe wakatamba kunsankisha; dinanga diebe kundi meme diakankemesha, diakahita dinanga dia bakashi bulengele. Monai bu mudi bena bukitu bashihibue, ne bintu bia nvita bijimishibue! Ku nyima kua bualu ebu Davidi wakebesha Yehowa ne, Nenye ku umue wa misoko ya Bena Yuda, anyi? Yehowa wakamuambila ne, Ya biebe. Davidi wakamuebesha ne, Nenye ku musoko kai? Wakamuambila ne, Ku Hebelone. Davidi wakayaku ne bakashi bandi babidi, Ahinoama, Muena Yizelele, ne Abigayila, wakadi mukashi wa Nabala, Muena Kâmele. Davidi wakaya ne bantu bonso bakadi nʼandi, muntu ne bantu bonso ba mu nsubu wandi, muntu ne bantu bonso ba mu nsubu wandi; bakashikama mu misoko ya Hebelone. Bena Yuda bakadisangishaku, bakela Davidi manyi ha mutu bua kumuteka mukelenge wa Bena Yuda. Bakambila Davidi ne, Bena Yabesha-gilada bakajika Shaula. Davidi wakatuma miloho yandi kudi Bena Yabesha-gilada, yakabambila ne, Nuenu nusankishibue kudi Yehowa, bualu bua nuenu nuakalesha mukelenge wenu Shaula malu a kalolo, nuakamujika. Yehowa anuleshe luse lujalame ne bulelela; meme kabidi nennufute bua kalolo kenu, bualu bua nuenu nuakenza bualu ebu. Nunku nukoleshe maboko enu, nuikale bena dikima; bualu bua Shaula, mukelenge wenu udi mufue, kadi Bena Yuda bakangela manyi bua meme ngikale mukelenge ku mutu kuabo. Abinê, muana wa Nê, kapitene ka masalayi a Shaula, wakamana kuangata Ishi-boshete, muana wa Shaula, wakalua nʼandi ku Mahanayima; wakamuteka mukelenge ku mutu kua Bena Gilada ne Bena Ashehû ne Bena Yizelele ne Bena Efelayima ne Bena Benyamina ne ku mutu kua Bena Isalele bonso. (Ishi-boshete, muana wa Shaula, wakadi ne bidimu makumi anai hakabangeye kukokesha Bena Isalele, wakabakokesha bidimu bibidi.) Kadi Bena Yuda bakalamata Davidi. Bungi bua bidimu biakakokesha Davidi Bena Yuda mu Hebelone buakadi bidimu muanda mutekete ne ngondo isambombo. Abinê, muana wa Nê, ne bantu ba Ishi-boshete, muana wa Shaula, bakumuka mu Mahanayima, bakaya ku Gibeona. Yoaba, muana wa Seluya, ne bantu bakuabo ba Davidi bakaluhuka, bakasambakena nʼabo hehi ne dishiha dia mu Gibeona; bakashikama hanshi, bakuabo ku muelelu umue wa dishiha, bakuabo ku muelelu mukuabo wa dishiha. Abinê wakambila Yoaba ne, Bansongalume babike, banaye ku mpala kuetu. Yoaba wakamba ne, Babike. Hashishe bakabika, bakadisangisha. Bena Benyamina dikunu ne babidi ne ba Ishi-boshete ne bantu ba Davidi dikumi ne babidi. Bakelangana tuima ku mitu, bakaluangana miele mu mbale; bakadishinda hanshi hohamue; nunku badi babikila muaba au ne, Helekatahasulima, udi mu Gibeona. Bakaluangana nvita bikole dituku adi; bantu ba Davidi bakahita Abinê ne Bena Isalele bukole. Bana balume basatu ba Seluya bakadiku, mena abo Yoaba ne Abishai ne Asahele: Asahele wakadi ne makasa mahehele bu ngulungu. Asahele wakalonda ku nyima kua Abinê; hakadiye ulonda Abinê, yeye kakasesuka ku tshianza tshia balume anyi ku tshianza tshia bakashi. Hashishe Abinê wakatshunguluka, wakamukonka ne, Nguewe Asahele, anyi? Wakamukudimuna ne, Mmeme. Abinê wakamuambila ne, Usesuke nansha ku tshianza tshia balume nansha ku tshianza tshia bakashi, ukuate umue wa bansongalume banyi, umunyenge bintu biandi bia nvita. Kadi Asahele wakahidia kusesuka, wakadi anu umulonda. Abinê wakambila Asahele tshiakabidi ne, Usesuke, lekela kundonda; bundi nʼabu mbua kukushiha, anyi? Bingenza nunku, ndi mua kumonangana ne mukuluʼebe Yoaba mpala ne mpala bishi? Kadi yeye wakahidia kusesuka; hashishe Abinê wakamutua muinshi mua mbale ne mutondo wa difuma, wakamusompoka kabidi; nunku yeye wakadishinda hanshi, wakafua ha muaba au; hakalua bantu ha muaba wakadishindila Asahele mufue, bakimanaku. Kadi Yoaba ne Abishai bakalonda Abinê ku nyima; hakafikabo ku mukuna wa Ama udi ku mpala kua Gia mu nshila wa ku tshihela tshia Gibeona, diba diakabuela. Bena Benyamina bakadisangisha kudi Abinê, bakatua tshisumbu tshimue, bakimana ha mutu ha mukuna. Hashishe Abinê wakebesha Yoaba ne, Muele wa nvita neushihe bantu tshiendelele, anyi? Kuena mumanye ne kunfudilu kua bualu ebu nekuikale anu ne kanyinganyinga? Nunku wewe neubidie kukanda bantu bua kulondabo bana babo musangu bule munyi? Yoaba wakamuambila ne, Bu mudi Nzambi ne muoyo, bu wewe kuyi nulambe nunku, bulelela, bantu kabakadi kualukila hatshiabu, kabakadi kulekela kulonda bana babo. Nunku Yoaba wakela mpungi ne bantu bonso bakimana talalâ, bakalekela kulonda Bena Isalele, kabakaluangana nʼabo kabidi. Abinê ne bantu bandi bakenda butuku bujima, bakahitshila mu buloba bua Alabâ, bakasabuka dishiya dia Yadene, bakahitshila mu buloba bua Bitelona tô ne hakafikabo ku Mahanayima. Yoaba wakalekela kulonda Abinê; hakasangisheye bantu bonso, bantu ba Davidi dikumi ne tshitema ne Asahele kabakadiku. Kadi bantu ba Davidi bakashiha Bena Benyamina ne bantu ba Abinê nkama isatu ne makumi asambombo. Bakambula tshitalu tshia Asahele, bakatshijika mu lukita lua tatu wandi luakadi mu Beteleheme. Yoaba ne bantu bandi bakenda tô butuku bujima; hakatshiabu bakafika ku Hebelone. Nvita yakadi hankatshi ha ba bu nsubu wa Shaula ne ba mu nsubu wa Davidi musangu mule; Davidi wakakohola, ne ba mu nsubu wa Shaula bakateketateketa. Davidi wakalela bana ba balume mu Hebelone: muanʼa bute wandi wakadi Amenona, muana wa Abinoama, Muena Yizelele; muana wandi muibidi wakadi Kileaba, muana wa Abigayila wakadi mukashi wa Nabala, Muena Kâmele; muisatu wakadi Abashaloma, muana wa Mâka, muana mukashi wa Talemai, mukelenge wa mu Geshû; muinai wakadi Adoniya, muana mulume wa Hagita; muitanu wakadi Shefataya, muana wa Abitala; muisambombo wakadi Yitelama, muana wa Egala, mukashi wa Davidi. Aba mbana bakalela Davidi mu Hebelone. Hakadi ba mu nsubu wa Shaula ne ba mu nsubu wa Davidi baluangana nvita, Abinê wakadikolesha mu nsubu wa Shaula. Diambedi Shaula wakadi ne mukashi mukuabo, dina diandi Lizepa, muana wa Aya; Ishi-boshete wakebesha Abinê ne, Bualu kai wewe wakalala ne mukashi wa tatu wanyi? Hashishe Abinê wakadi ne tshiji tshikole bua mei akamuambila Ishi-boshete; yeye wakamukonka ne, Meme ndi bu mutu wa mbua wa Muena Yuda, anyi? Tô ne ku dituku edi Bakafuila ba mu nsubu wa Shaula, tatuʼebe, ne bana benu ne balunda bandi luse, tshiakakufila wewe mu bianza bia Davidi; kadi wewe wakunkanda bualu bubi ne mukashi eu lelu. Nzambi atambe kuela Abinê mulau binahanga kuenzela Davidi malu onso akamulaya Yehowa; bua kunyenga bukelenge mu nsubu wa Shaula ne bua kujadika nkuasa wa butumbi wa Davidi ku mutu kua Bena Isalele ne Bena Yuda ku Dana tô ne ku Bê-sheba. Yeye kakamanya mua kukudimuna Abinê dî dikuabo, bualu bua yeye wakamutshina. Abinê wakatumina Davidi ba-messager, bakamukonka ne, Buloba ebu mbua nganyi? Bakamuambila kabidi ne, Uhunge nʼanyi tshihungidi ne mona, tshianza tshianyi netshikale kûdi bua kulua ne Bena Isalele bonso kûdi. Davidi wakamba ne, Mbimpe, netuhunge nʼebe tshihungidi, kadi bualu bumue bûdi ne bua kuenza budi nunku: kuena mua kutangila mpala wanyi diambedi kuyi muanze kulua ne Mikala, muana mukashi wa Shaula; hashishe neumanye mua kuntangila. Davidi wakatumina Ishi-boshete, muana wa Shaula, ba-messager, bakamuambila ne, Untumine mukashi wanyi Mikala unakafidila tukoba tua Bena Peleshete lukama bualu buandi. Ishi-boshete wakatuma bantu, bakamunyenga kudi bayandi, Palatiele mene, muana mulume wa Layisha. Bayandi wakaya nʼandi, wenda udila; wakamulonda tô ne ku Bahulima. Hashishe Abinê wakamuambila ne, Ya, alukila; nunku yeye wakalukila. Abinê wakayikila ne bakulu ba mu Isalele, wakabambila ne, Mu matuku akashala ku nyima nuenu nuakasua Davidi bua kuikaleye mukelenge ku mutu kuenu. Katataka nushikishe bualu ebu: bualu bua Yehowa wakamba bua Davidi ne, Nensungile bantu banyi Bena Isalele mu bianza bia Bena Peleshete ne mu bianza bia bantu bonso badi nʼabo lukuna ku tshianza tshia muntu wanyi Davidi. Abinê wakamba mei â kabidi mu matshu a Bena Benyamina; Abinê wakaya ku Hebelone bua kuambileye Davidi mu matshu andi mei mimpe onso akamba Bena Isalele ne bonso ba mu nsubu wa Benyamina. Nunku Abinê Wakafika kudi Davidi mu Hebelone ne bantu makumi abidi bakadi nʼandi. Davidi wakalambishila Abinê ne bantu bakadi nʼandi bidia bia disanka. Abinê wakambila Davidi ne, Nenjuke, nenye bianyi, nensangishe Bena Isalele bonso kudi mukelenge wanyi, bua bobo bahunge nʼandi tshihungidi, bua yeye akokeshe bantu bonso badiye musue mu mutshima wandi. Davidi wakatuma Abinê; wakaya biandi talalâ. Monai, bantu ba Davidi ne Yoaba bakahingana mu kuhaula kua bintu, bakalua ne bintu bia bungi; kadi Abinê kakadi ne Davidi mu Hebelone, bualu bua yeye wakamana kumutuma, wakaya biandi talalâ. Hakahingana Yoaba ne bantu bonso bakadi nʼandi, bakambila Yoaba ne, Abinê, muana wa Nê, wakalua kudi mukelenge ne yeye wakamutuma, wakaya biandi talalâ. Hashishe Yoaba wakalua kudi mukelenge, wakamuebesha ne, Wewe Wakenza tshinyi? Mona, Abinê wakalua kûdi; wewe wakamutuma ne yeye wakamana kuya bua tshinyi? Wewe udi mumanye ne Abinê, muana wa Nê, wakalua kûdi anu bua kukushima ne bua kumanyeye kûdi uya ne kûdi ufuma ne bua kumanyeye malu onso audi wenza. Hakaluhuka Yoaba ku mesu kua Davidi, yeye wakatuma bantu ku nyima kua Abinê, banahingana nʼandi ku dina dia mai dia mu Sila; kadi Davidi kakadi mumanye bualu ebu. Hakahingana Abinê ku Hebelone, Yoaba wakaya nʼandi ku tshibi tshia musoko ha nkayandi bua kuyikileye nʼandi talalâ; wakamutua muele muinshi mua mbale yandi bualu bua lukuna lua mashi a Asahele, muakunyʼandi; yeye wakafua. Hakunyua Davidi lumu elu, yeye wakamba ne, Meme ne bantu bonso ba mu bukelenge buanyi tuakubingishibua ku mesu a Yehowa tshiendelele bua mashi a Abinê, muana wa Nê: mashi andi ikale ha mutu ha Yoaba ne bonso ba mu nsubu wa tatu wandi; ne ba mu nsubu wa Yoaba bikale ne munda mashi, bikale bena nsudi anyi bendedi ba ku mitshi batebuke, bafue ku miele ya nvita, kabikadi ne bia kudia! Nunku Yoaba ne muakunyʼandi Abishai bakashiha Abinê bualu bua yeye wakashiha muanʼabo Asahele mu nvita ya mu Gibeona. Davidi wakambila Yoaba ne bantu bonso bakadi nʼandi ne, Nulonde bilulu bienu, nuangate bilulu bikayabala, nudivuadikabi, nujinge Abinê. Mukelenge Davidi wakalonda tshituadilu tshia tshitalu tshiandi. Bakajika Abinê mu Hebelone; mukelenge wakabandisha di diandi, wakadila muadi ku lukita lua Abinê; ne bantu bonso bakadila. Mukelenge wakajinga Abinê, wakamba ne, Abinê wakadi ne bua kufua bu mudi muhote mua kufua, anyi? Bianza biebe kabiakadi bisuikibue, ne makasa ebe kakadi mabueshibue mu nkanu; bu mudi muntu mushihibue ku mpala kua bena lukinu, wewe wakadishinda hanshi. Bantu bonso bakamudila kabidi. Hashishe bantu bonso bakalua kudi Davidi bua adie biandi, diba ditshidi mulu; kadi Davidi wakaditshiha ne, Nzambi atambe kungela mulau binalabula bidia anyi bintu bikuabo diambedi diba kadiyi dianze kubuela. Bantu bonso bakatangila bualu ebu, bakasanka; malu onso akenza mukelenge akasankisha bantu bonso. Nunku bantu bandi bonso ne Bena Isalele bonso bakajingulula dituku adi ne, Mukelenge kakadi ne bualu bua kushiheye Abinê, muana wa Nê. Mukelenge wakakonka bantu bandi ne, Kanuena bamanye ne muenyampala ne muntu munene wakashihibua mu Isalele lelu, anyi? Ndi mukelenge muedibue manyi ha mutu kadi bualu ebu budi buntekesha lelu; bantu aba, bana ba Seluya, badi bampite bukole; Yehowa afute muenji wa malu mabi bu mudi bubi buandi. Kakunyua Ishi-boshete, muana wa Shaula, ne, Abinê wakafua mu Hebelone, maboko andi akateketa ne Bena Isalele bonso bakadi ne lutatu. Ishi-boshete, muana wa Shaula, wakadi ne bantu bahidi bakadi tupitene tua masalayi andi; dina dia mukuabo diakadi Bana, ne dina dia mukuabo Lekaba, bana balume ba Limona, Muena Bêlota, wa mu tshisamba tshia Benyamina (bualu bua Bêlota udi wa tshisamba tshia Benyamina; diambedi Bena Belota bakanyemena mu Gitayima, bakashikamamu kale tô ne katataka). Yonatana, muana wa Shaula, wakadi ne muana mulume, wakadi mulema. Yeye wakadi ne bidimu bitanu hakunvuabo lumu lua Shaula ne Yonatana ku Yizelele; mulami wandi wakamuambula ku lubese, wakanyema; hakadiye unyema nunku, muana wakadishinda, nunku wakalua mulema. Dina diandi diakadi Mefibosheta. Bana balume ba Limona, Muena Bêlota, Lekaba ne Bana, bakalua ku nsubu wa Ishi-boshete munda munya, hakadiye mulale tulu. Bakabuela munda mua nsubu bu bantu bakadi bangata blé; bakamutua muele muinshi mua mbale; Lekaba ne muakunyʼandi Bana bakanyema. Hakabuelabo mu nsubu, yeye wakadi mulale tulu ha bulalu buandi mu nsubu wandi wa bulalu; bobo bakamutua muele, bakamushiha, bakamukosa mutu, bakaya nʼau; bakenda tô butuku bujima mu nshila wa ku Alabâ. Bakalua ne mutu wa Ishi-boshete kudi Davidi mu Hebelone, bakambila mukelenge ne, Tangila, mutu wa Ishi-boshete, muana wa Shaula, muena lukuna webe wakakeba muoyo webe; Yehowa wakasombuela mukelenge wetu lelu bua Shaula ne bana bandi. Davidi wakambila Lekaba ne muakunyʼandi Bâna, bana balume ba Limona, Muena Bêlota ne, Bu mudi Yehowa ne muoyo, wakusungila muoyo wanyi mu makenga onso, hakalua muntu kundi, wamba ne, Shaula udi mufue wela meji munda muandi ne, Nakalua ne lumu luimpe, hashishe nakamukuata, nakamushiha mu Sikelaga bu difutu dia lumu luakalueye nʼalu. Nunku halua bantu babi kundi bakashiha muntu muakane mulale mu nsubu muandi ha bulalu, bualu kabuena butambe kunkuata bua kusombuela mashi andi adi ha bianza bienu bua kunûmusha ha buloba, anyi? Davidi wakela bansongalume bandi dî, bakabashiha, bakabakosa bianza biabo ne makasa abo, bakabisuika hehi ne dishiba dia mu Hebelone. Kadi bakambula mutu wa Ishi-boshete, bakaujika mu lukita lua Abinê mu Hebelone. Hashishe bisamba bionso bia Bena Isalele biakalua kudi Davidi mu Hebelone, bakamuambila ne, Mona, ludi mifuba ya mifuba yebe ne misunyi ya mu misunyi yebe. Mu matuku akahita ku nyima hakadi Shaula mukelenge wetu, nguewe wakaluhuka ne Bena Isalele, wakahingana nʼabo. Yehowa wakamuambila ne, Wewe newikale mulami wa bantu banyi Bena Isalele, wewe newikale mukelenge wabo. Nunku bakulu bonso ba mu Isalele bakalua kudi mukelenge mu Hebelone; mukelenge Davidi wakahunga nʼabo tshihungidi ku mesu kua Yehowa mu Hebelone; bakela Davidi manyi ha mutu bua kuikaleye mukelenge wa Bena Isalele. Davidi wakadi ne bidimu makumi asatu hakabangeye kukokesha; wakakokesha bidimu makumi anai. Wakakokesha Bena Yuda mu Hebelone bidimu muanda mutekete ne ngondo isambombo; wakakokesha Bena Isalele ne Bena Yuda bonso mu Yelushalema bidimu makumi asatu ne bisatu. Mukelenge ne bantu bandi bakaya ku Yelushalema bua kuluanganabo ne Bena Yebuse, bena buloba. Bakambila Davidi ne, Wewe kuena ubuela munemu, anu haumusha bafofo ne balema, bela meji ne Davidi kena mua kubuelamu. Kadi Davidi wakanyenga musoko wa lumbu wa Siona; eu udi musoko wa Davidi. Dituku adi Davidi wakamba ne, Washiha Bena Yebuse, aye biandi ku misulu ya mai, ashihe balema ne bafofo, badi mutshima wa Davidi ukina. Nunku badi bamba ne, Bafofo ne balema kabena habuela mu nsubu. Davidi wakashikama mu musoko wa lumbu, bakawidika ne, Musoko wa Davidi. Davidi wakabanga ku Milo, wakasa lumbu luakanyunguluka musoko. Davidi wakakolakola bualu bua Yehowa, Nzambi wa misumba, wakadi nʼandi. Hilama, mukelenge wa Tulo, wakatumina Davidi ba-messager ne mitshi ya cédre ne bena mabaya ne bena tushola, bakashila Davidi nsubu. Davidi wakajingulula ne Yehowa wakunjadika mukelenge ku mutu kua Bena Isalele, ne yeye wakadiundisha bukelenge buanyi bualu bua bantu bandi Bena Isalele. Hakumuka Davidi ku Hebelone, yeye wakabaka bakashi bakuabo ba mu Yelushalema; bakadiela Davidi bana ba balume ne bana ba bakashi. Â adi mena a bana bakaleleye mu Yelushalema: Shamua ne Shobaba ne Natana ne Solomo, ne Yibeha ne Elishua ne Nefege ne Yafia, ne Elishama ne Elayada ne Elifelete. Hakunvua Bena Peleshete ne, Bakuela Davidi manyi bua kumutekabo mukelenge ku mutu kua Bena Isalele, buonso buabo bakadisangisha hamue bua kukebabo Davidi; hakunvua Davidi lumu elu, yeye wakaya ku musoko wakadi ne lumbu. Bena Peleshete bakadi bamuangalaka kuonso mu tshibanda tshia Lefayima. Davidi wakebesha Yehowa ne, Nenye kuluangana ne Bena Peleshete, anyi? Wewe neubafile mu bianza bianyi, anyi? Yehowa wakambila Davidi ne, Ya biebe, bulelela, nenfile Bena Peleshete mu bianza biebe. Davidi Wakafika ku Bâla-pelasima; Davidi wakabashihelaku; wakamba ne, Yehowa wakahita bena lukuna banyi bukole ku mpala kuanyi, bu mudi mai ahita bintu bukole ku mpala kuau. Nunku wakidika muaba au ne, Bâla-pelasima. Bakashiyaku mpingu yabo; Davidi ne bantu bandi bakaya nʼai. Bena Peleshete bakalua tshikondo tshikuabo, bakamuangalaka mu tshibanda tshia Lefayima. Hakebesha Davidi Yehowa, yeye wakamuambila ne, Kubandi; ya ha nyima habo, ufike kudibo ha buludiludi ne mitshi ya mûr. Haunvua tshiona tshihita ku mitu ya mitshi ya mûr, bûdi nʼabu mbua kudikankamika bualu bua Yehowa wakadianjila ku mpala kuebe bua kushiheye masalayi a Bena Peleshete. Davidi wakenza hu muakamuambila Yehowa, wakashiha Bena Peleshete ku Geba tô ne ku Gesê. Davidi wakasangisha balume bonso hasungula ba mu Isalele, binunu makumi asatu. Davidi wakajuka ku Bâle-yuda ne bantu bonso bakadi nʼandi, bakaya kuhingisha mushete wa Nzambi udibo babikila ku DINA, dina mene dia Yehowa wa misumba udi mushikame ha mutu munkatshi mua bakeluba. Bakateka mushete wa Nzambi ha dikalu dihia-dihia, bakûmusha mu nsubu wa Abinadaba wakadi ku mutu kua mukuna; Uza ne Ahio, bana balume ba Abinadaba, bakadi bendesha dikalu. Bakafuma ku nsubu wa Abinadaba, wakadi ku mutu kua mukuna, ne mushete wa Nzambi; Ahio wakadi wenda ku mpala kua mushete. Davidi ne Bena Isalele bonso bakadi bimba ku mpala kua Yehowa biombelu bia mishindu yonso bienza bia mabaya a mitshi ya cyprès, bisanji ne nzenze ya nshinga dikumi ne mbau ne makasa ne biamu bia kukumangana. Hakafikabo ku tshishihuidi tshia Nakona, Uza wakolola tshianza tshiandi, wakakuata ku mushete wa Nzambi, bualu bua ngombe yakamba kudishinda. Tshiji tshia Yehowa tshiakatemena bualu bua Uza; Nzambi wakamushihelaku bua dihanga diandi; yeye wakafuaku hehi ne mushete wa Nzambi. Mutshima wa Davidi wakanyingala bualu bua Yehowa wakenzela Uza nunku; yeye wakidika muaba au ne Pelese-Uza tô ne ku dituku edi. Davidi wakatshina Yehowa dituku adi. Wakamba ne, Mushete wa Yehowa neulue kundi kabidi munyi? Nunku Davidi wakahidia kuya ne mushete wa Yehowa ku musoko wa Davidi; kadi Davidi wakasesuka nʼau, wakaya ku nsubu wa Obeda-edome, Muena Gita. Mushete wa Yehowa wakashala mu nsubu wa Obeda-edome, Muena Gita, tô ngondo isatu; Yehowa wakavudishila Obeda-edome ne bonso ba mu nsubu wandi disanka. Bakambila Davidi ne, Yehowa wakavudishila Obeda-edome disanka bualu bua mushete wa Nzambi. Nunku Davidi wakaya, wakumusha mushete wa Nzambi mu nsubu wa Obeda-edome, wakalua nʼau ku musoko wa Davidi ne disanka. Hakaya batuadi ba mushete wa Yehowa mutantshi wa makasa asambombo, bakashihela Yehowa ngombe ne muana wa ngombe. Davidi wakaja maja ku mpala kua Yehowa ne bukole buandi buonso: Davidi wakadi ne efoda wa lin musuika mu tshifila tshiandi. Nunku Davidi ne Bena Isalele bonso bakatua ne mushete wa Yehowa, benda bela mbila ne tshiona tshia mpungi. Hakadibo halua ne mushete wa Yehowa mu musoko wa Davidi, Mikala, muana mukashi wa Shaula, wakimana ku disoso dia nsubu, wakatangila Davidi wenda utuhika, uja maja ku mpala kua Yehowa; yeye wakamulengulula mu mutshima wandi. Bakalua ne mushete wa Yehowa, wakauteka mu muaba wau mu ntenta wakawashila Davidi. Davidi wakahia milambu ya kuosha ha kahia ne ya kuvuisha nʼai ditalala ku mpala kua Yehowa. Hakamana Davidi kufila milambu ya kuosha ne ya ditalala, yeye wakavudishila bantu disanka mu dina dia Yehowa wa misumba. Yeye wakabanyina bantu bonso ba mu tshisumba tshia Bena Isalele, ne halume ne bakashi, mitanda ya bidia, minyinyi ne bisumbu bia tumuma tukese tûme. Nunku bantu bakamuangalaka muntu kuandi muntu kuandi. Hashishe Davidi wakahingana bua kuvudishileye ba mu nsubu wandi disanka. Mikala, muana mukashi wa Shaula, wakaluhuka bua kusangakeneye ne Davidi, wakamuambila ne, Mona bu mudi butumbi bua mukelenge wa Isalele lelu hakamuangeye bilulu biandi ku mesu kua bakashi ba bena mudimu bandi bu mudi muntu wa tshianana umuangalasha bilulu biandi kayi ne bundu! Davidi wakambila Mikala ne, Nakenza nunku ku mpala kua Yehowa wakansungula ku mpala kua tatu wanyi ne kua bonso ba mu nsubu wandi, wakanteka mukelenge ku mutu kua bantu ba Yehowa, Bena Isalele mene. Nunku ndi nnaya ku mpala kua Yehowa. Nengenze bualu budi butamba ebu bubi, nendifuishe bundu; kadi bakashi aba bawakuamba, bobo nebannemeke. Mikala, muana mukashi wa Shaula, kakalela muana tô ne ku dituku dia lufu luandi. Hakadi Mukelenge ushikama mu nsubu wandi ne bakamuha Yehowa dikisha kudi bena lukuna bandi bonso, mukelenge wakambila Natana muprofete ne, Tangila, meme ndi nshikama mu nsubu wa mabaya a cèdre, kadi mushete wa Nzambi udi mushale mu nsubu wa bilulu. Natana wakambila mukelenge ne, Ya wenze malu onso adi mu mutshima webe bualu bua Yehowa udi nʼebe. Kadi butuku abu mene dî dia Yehowa diakalua kudi Natana ne, Ya, Wambile muntu wanyi Davidi ne, Yehowa udi ukonka ne, Wewe udi musue kungibakila nsubu wa meme kushikamamu, anyi? Bualu bua tshiakashikama mu nsubu ku dituku dinakumuka ne Bena Isalele mu Ejipitu tô ne mpindiu, kadi nakendakana anu mu ntenta ne mu ntenta wa kusambakena. Mu miaba yonso inakaya ne Bena Isalele, nakakonka mulumbuluishi umue wakasungula bua kulameye bantu banyi Bena Isalele ne, Kuena muanze kungibakila nsubu wa mabaya a cèdre bualu kai? Nunku Wambile muntu wanyi Davidi ne, Yehowa wa misumba udi wamba ne, Nakakûmusha mu luhangu lua mikoko hawakadi ulama mikoko, nakakusungula mukelenge ku mutu kua bantu banyi Bena Isalele; nakadi nʼebe ku miaba yonso iwakaya; nakashiha bena lukuna bebe bonso ku mpala kuebe; nenkuvuishe dina dinene bu dina dia bantu banene ba ha buloba. Nensunguile bantu banyi Bena Isalele muaba, nembajadikemu bua bobo bashikame mu muaba wabo, kabena bumukamu kabidi; bantu babi kabena babatatshisha bu muakenzabo diambedi; bu munakenza mu matuku anakasungula bantu banyi Bena Isalele balumbuluishi, nenkuvuishe dikisha kudi bena lukuna bebe bonso. Yehowa udi ukuambila kabidi ne, Meme nenjadike nsubu webe. Hakumbana matuku ebe, hawalala tulu ne bankambua bebe, nensungile muana webe udi uluhuka munda muebe, nenjadike bukelenge buandi. Yeye neibakile dina dianyi nsubu, nenjadike nkuasa wa bukelenge buandi tshiendelele. Nengikale tatu wandi, yeye neikale muanʼanyi; henzeye bualu bubi, nemmukengeshe ne nsokotshi wa bantu ne mibunda-bunda ya bana ba bantu; luse luanyi lujalame kaluena lumuka kudiye, bu munakalûmusha kudi Shaula, unakumusha ku mpala kuebe. Nsubu webe ne bukelenge buebe nebujadikibue ku mesu kuebe tshiendelele; nkuasa webe wa butumbi neajadikibue tshiendelele. Natana wakambila Davidi bu muakadi mei â onso, ne bu muakadi tshikena kumona etshi. Hashishe mukelenge Davidi wakabuela mu nsubu, wakashikama ku mpala kua Yehowa, wakamba ne, Mukelenge Yehowa, meme ndi nganyi, ne tshiota tshianyi tshidi tshinyi bua wewe wakalua nʼanyi anu kunoko? Mukelenge Yehowa, bualu ebu buakadi bukese ku mesu kuebe; kadi wewe wakamba bua tshiota tshia muntu webe mu matuku adi kayi manze kulua; wewe Mukelenge Yehowa wakangambila bualu ebu bu mudi bantu bambilangana malu! Davidi udi mua kukuambila dî kai dikuabo? Bualu bua wewe Mukelenge Yehowa udi mumanye muntu webe. Bualu bua dî diebe ne bua mutshima webe wewe wakenza malu â onso manene, wakâmanyisha muntu webe. Nunku wewe, Yehowa Nzambi, udi munene: kakuena mukuabo bu wewe, kakuena Nzambi mukuabo anu wewe nkayebe, bu mudi malu onso atuakunvua ku matshu etu. Tshisamba kai tshia hanshi ha buloba tshidi bu bantu bebe Bena Isalele? Nzambi nkayandi wakababikila bu bantu bandi bua kujadikeye nʼabo dina diandi ne bua kubenzeleye malu manene; yeye wakenza malu a kukema mu buloba buabo ku mesu kua bantu bandi bakahikuleye mu Ejipitu mu bianza bia bisamba bikuabo ne bia nzambi yabo. Wewe wakadisunguila bantu bebe Bena Isalele bua kuikalabo bantu bebe tshiendelele; wewe Yehowa wakalua Nzambi waho. Nunku Yehowa Nzambi, dî diwakambila muntu webe bualu buandi ne bua tshiota tshiandi, udijadike tshiendelele; wenze bu muwakamba. Dina diebe ditumbishibue tshiendelele; bantu bambe ne, Yehowa wa misumba udi Nzambi ku mutu kua Bena Isalele; tshiota tshia muntu webe Davidi netshijadikibue tshiendelele ku mpala kuebe. Bualu bua wewe Yehowa wa misumba, Nzambi wa Isalele, wakabulula muntu webe bualu ebu, wamba ne, Nenjadike tshiota tshiebe; nunku muntu webe wakadi ne bualu ebu mu mutshima wandi bua kukutendeleleye ne mitendelelu ei. Nunku Mukelenge Yehowa, wewe udi Nzambi, ne mei ebe adi a bushuwa, wewe wakalaya muntu webe bualu ebu buimpe. Witabushe bua kuvudishila tshiota tshia muntu webe disanka bua tshikaleku tshiendelele ku mpala kuebe; bualu bua wewe, Mukelenge Yehowa, wakamba bualu ebu; disanka diudi nʼadi dikale ku tshiota tshia muntu webe tshiendelele. Ku nyima kua bualu ebu Davidi wakaluangana ne Bena Peleshete, wakabahita bukole; Davidi wakanyenga Metega-hama mu bianza bia Bena Peleshete. Wakashiha Bena Moaba; wakahandika hanshi ha buloba, wakabidikisha ne luidi; wakasungula mulongo ibidi bua kuyishiha, wakasungula mulongo mukuabo bua kushala ne muoyo. Bena Moaba bakalua bahika ba Davidi, bakamulambula milambu. Davidi wakashiha kabidi Hadadezê, muana wa Lehoba, mukelenge wa mu Soba, hakayeye bua kujadika bukelenge buandi buakadi ku musulu wa Pelata. Davidi wakamunyenga bantu bakadi benda ha nyima ha tubalu tshinunu tshimue ne nkama muanda mutekete, ne bakadi benda hanshi binunu makumi abidi; Davidi wakakosa tubalu tuonso mifungu yatu, kadi wakasungula tukuabo bua makalu lukama. Hakalua Bena Sulia ba mu Damaseke bua kukuatshishabo Hadadezê, mukelenge wa mu Soba, Davidi wakashiha Bena Sulia binunu makumi abidi ne bibidi. Davidi wakateka masalayi mu Sulia mu Damaseke; Bena Sulia bakalua bahika ba Davidi, bakamulambula milambu. Yehowa wakaha Davidi bukole bua kutambeye kuonso kuakayeye. Davidi wakangata ngabu ya biamu bia or yakadi bantu ba Hadadezê nʼai, wakalua nʼai ku Yelushalema. Mukelenge Davidi wakangata biamu bia mitaku bia bungi mu Beta ne Belotai, misoko ya Hadadezê. Hakunyua Toi, mukelenge wa mu Hamata, lumu ne, Davidi wakashiha masalayi onso a Hadadezê, Toi wakatuma Yotama, muanʼandi, kudi Mukelenge Davidi bua kumueleye muoyo ne bua kumuvudishileye disanka bualu bua yeye wakaluangana ne Hadadezê, wakamushiha. Bualu bua Hadadezê wakadi uluangana ne Toi. Yolama wakalua ne malonga a tshiamu tshia argent ne a or ne a tshiamu tshia mitaku: ebi kabidi biakajidileye mukelenge Davidi kudi Yehowa bu muakajidileye Yehowa argent ne or bia bisamba bionso biakahiteye bukole; bia mu Sulia ne bia mu Moaba ne bia Bena Amona ne bia Bena Peleshete ne bia Bena Amaleka ne biakanyengeye kudi Hadadezê, muana wa Lehoba, mukelenge wa mu Soba. Davidi wakadivuisha dina dinene hakalukileye ku kushiha kua Bena Sulia mu Tshibanda tshia Luehu, bantu binunu dikumi ne muanda mukulu. Yeye wakateka masalayi mu nseke yonso ya Edome; Bena Edome bonso bakalua bahika ba Davidi. Yehowa wakaha Davidi bukole bua kutambeye kuonso kuakayeye. Davidi wakakokesha Bena Isalele bonso; Davidi wakalumbuluila bantu bandi bonso biakane, wakabenzela malu makane. Yoaba, muana wa Seluya, wakadi ku mutu kua masalayi andi; Yehoshafata, muana wa Ahiluda, wakadi mufundi wa malu a bukelenge; Sadoka, muana wa Ahituba, ne Ahimeleke, muana wa Ebeyatâ, bakadi bakuidi; Selaya wakadi mufundi. Benaya, muana wa Yehoyada, wakadi ku mutu kua Bena Kelete ne Bena Pelete; bana balume ba Davidi bakadi miloho yandi. Davidi wakakonka ne, Muntu mukuabo wa mu nsubu wa Shaula udi mushaleku bua meme kumufuila luse bualu bua Yonatana, anyi? Muhika mukuabo wa mu nsubu wa Shaula wakadiku, dina diandi Siba; bakamubikila kudi Davidi; mukelenge wakamuebesha ne, Wewe udi Siba, anyi? Yeye wakamukudimuna ne, Muntu webe nyeye. Mukelenge wakamukonka ne, Kakuena muntu mukuabo udi mushale mu nsubu wa Shaula bua meme kumufuila luse lua Nzambi, anyi? Siba wakambila mukelenge ne. Muana mukuabo wa Yonatana udi mushale, yeye udi mulema. Mukelenge wakamuebesha ne, Yeye udi kudi kunyi? Siba wakambila mukelenge ne, Mona, yeye udi mu nsubu wa Maki, muana wa Amiele, mu Lo-debâ. Hashishe mukelenge Davidi wakatuma bantu bakamûmusha mu nsubu wa Makî, muana wa Amiele, wa mu Lo-debâ. Mefibosheta, muana wa Yonatana, muana wa Shaula, wakalua kudi Davidi, wakatua mpala wandi hanshi, wakamukukuila. Davidi wakamba ne, Mefibosheta. Yeye wakamukudimuna dî ne, Tangila, muntu webe! Davidi wakamuambila ne, Kutshinyi; bulelela, nenkufuile luse bualu bua Yonatana, tatu webe; nenkuhingishile buloba buonso bua Shaula, kaku webe; wewe neudie bidia ku mesa anyi matuku onso. Yeye wakamukukuila. Yeye wakakonka ne, Muntu webe udi bu nganyi bua wewe udi utangila mbua mufue bu meme? Hashishe Davidi wakabikila Siba, muhika wa Shaula, wakamuambila ne, Nakafila bintu bionso, biakadi kudi Shaula ne kudi ba mu nsubu wandi bonso, kudi muana wa mukelenge webe. Wewe ne bana bebe balume ne bena mudimu bebe bonso nenumudimine budimi buandi; bûdi nʼabu mbua kulua ne bintu biudi uhuola, bua muana wa mukelenge webe ikale ne bia kudia; kadi Mefibosheta, muana wa mukelenge webe, neadie bidia ku mesa anyi tshiendelele. Siba wakadi ne bana ba balume dikumi ne batanu ne bahika makumi abidi. Hashishe Siba wakambila mukelenge ne, Muntu webe nênze malu onso akamuambila mukelenge wandi. Kadi Mefibosheta, bu muakuamba mukelenge, yeye neadie bidia ku mesa anyi bu umue wa bana ba mukelenge. Mefibosheta wakadi ne muana wa balume, nsongalume, dina diandi Mika. Bantu bonso bakadi mu nsubu wa Siba bakadi bahika ba Mefibosheta. Nunku Mefibosheta wakashikama mu Yelushalema; wakadia bidia ku mesa a mukelenge matuku onso: yeye wakadi mulema. Ku nyima kua bualu ebu mukelenge wa Bena Amona wakafua; Hanuna, muana wandi, wakakokesha mu muaba wandi. Davidi wakamba ne, Meme nenfuile Hanuna, muana wa Nahasha, luse, bu muakanfuila tatu wandi luse. Nunku Davidi wakamutumina bantu bua kumusambabo bua tatu wandi. Bantu ba Davidi bakafika ku buloba bua Bena Amona. Kadi baminyampala ba Bena Amona bakambila Hanuna, mukelenge wabo, ne, Udi welangana meji ne, Davidi udi utumbisha tatu webe bualu bua yeye wakakutumina bakusambi, anyi? Davidi kakakutumina bantu bandi bua kutangilabo musoko ne bua kûtentekela ne bua kûhaula, anyi? Nunku Hanuna wakakuata bantu ba Davidi, wakababeya miedi ku ditama dimue dia luseke lumue, wakabakosa bilulu biabo munkatshi ku matuku abo, wakabatuma kuabo. Hakambilabo Davidi bualu ebu, yeye wakatuma bantu kusambakenabo nʼabo, bualu bua balume aba bakadi ne bundu bua bungi. Mukelenge wakamba ne, Nushale mu Yeleko tô ne hamena miedi yenu kabidi, hashishe nenuhingane. Hakatangila Bena Amona ne, Davidi wakalengulula, Bena Amona bakabikila Bena Sulia ba mu Bete-lehoba ne ba mu Soha, binunu makumi abidi bakadi benda hanshi; mukelenge wa Mâka wakafila tshinunu tshia bantu; bantu ba Tobo bakadi binunu dikumi ne bibidi. Hakunvua Davidi lumu elu, yeye wakatuma Yoaba ne masalayi andi onso a bukitu. Bena Amona bakaluhuka, bakela mualu wa nvita ku tshibi tshia musoko; Bena Sulia ba mu Soba ne ba mu Lehoba ne ba mu Tobo ne ba mu Mâka bakadi ha buabo mu madimi. Hakatangila Yoaba ne, Bakela malu ya nvita ku mpala ne ku nyima banjike, yeye wakasungula bena bukitu bonso ba mu Isalele, wakabatahulula, wakela mualu wa nvita kudi Bena Sulia; wakafila bantu bakuabo mu bianza bia Abishai muakunyʼandi, wakela mualu wa nvita kudi Bena Amona. Yeye wakamba ne, Biamba Bena Sulia kutuhita bukole, ulue biebe kutukuatshisha; kadi biamba Bena Amona kukuata bukole, nendue kukukuatshisha. Nuikale ne dikima; tuikale bu balume mene mene bualu bua bantu betu ne bua misoko ya Nzambi wetu; Yehowa enze biandi malu adi mimpe ku mesu kuandi. Nunku Yoaba ne bantu bakadiye nʼabo bakasemena ha buihi ne Bena Sulia bua kuluangana nʼabo; bobo bakanyema ku mpala kuandi. Hakatangila Bena Amona ne, Bena Sulia bakanyema, bobo kabidi bakanyema ku mpala kua Abishai, bakabuela mu musoko. Hashishe Yoaba wakalekela kulonda Bena Amona, wakahingana ku Yelushalema. Hakamanya Bena Sulia ne, Bena Isalele bakatuhita bukole, bakadisangisha hamue. Hadadezê wakatuma dî, wakabikila Bena Sulia bakadi dishiya dia musulu wa Pelata; bakalua ku Helama, ne Shobaka, kapitene ka masalayi a Hadadezê, wakadi ku mutu kuabo. Bakambila Davidi bualu ebu; yeye wakasangisha Bena Isalele bonso hohamue, bakasabuka musulu wa Yadene, bakafika ku Helama. Bena Sulia bakela mualu wa nvita kudi Davidi, bakaluangana nʼandi. Bena Sulia bakanyema ku mpala kua Bena Isalele; Davidi wakashiha bantu ba Bena Sulia bakadi benda mu makalu nkama muanda mutekete, ne bantu bakadi benda ha tubalu binunu makumi anai; wakashiha Shobaka, kapitene ka masalayi abo, wakafuaku. Hakatangila bakelenge bonso bakadi balamata Hadadezê ne, Bena Isalele bakatuhita bukole, bakalekela kuluangana ne Bena Isalele, bakabakuatshila mudimu. Nunku Bena Sulia bakatshina kukuatshisha Bena Amona kabidi. Ku tshibangidilu tshia tshidimu tshikuabo hakadi bakelenge baluhuka bua kuluanganabo, Davidi wakatuma Yoaba ne bantu bandi bakadi nʼandi ne Bena Isalele bonso, bakahaula bintu bia Bena Amona; bakatshintshimika musoko wa Laba. Kadi Davidi wakashala mu Yelushalema. Dilolo dikuabo hakabika Davidi ku bulalu buandi, yeye wakadi wendakana ku mutu kua nsubu wa mukelenge; hakadiye ku mutu kua nsubu, yeye wakatangila mukashi wowa mai; wakadi mukashi mulengele kumona. Davidi wakatuma dî, wakebesha bualu bua mukashi eu. Muntu mukuabo wakamba ne, Yeye udi Beta-sheba, muana wa Eliyama, mukashi wa Uliya, Muena Hiti. Davidi wakatuma bantu bakamuangata, yeye wakabuela kudiye, wakalala nʼandi (bualu bua yeye wakamana kuhatuka ku bukoya buandi). Yeye wakahingana ku nsubu wandi. Mukashi eu wakimita difu; wakatumina Davidi dî ne, Ndi ne difu. Hashishe Davidi wakatumina Yoaba dî ne, Untumine Uliya, Muena Hiti. Nunku Yoaba wakatuma Uliya kudi Davidi. Hakafika Uliya kudiye, Davidi wakamukonka bualu bua Yoaba ne bua bantu ne bua nvita. Davidi wakambila Uliya ne, Ya ku nsubu kuebe, wowe mai ku makasa ebe. Uliya wakumuka ku nsubu wa mukelenge; mukelenge wakamutumina bia kudia. Kadi Uliya wakalala anu ku mbelu kua nsubu wa mukelenge ne bantu bonso ba mukelenge wandi, kakaya ku nsubu kuandi. Hakambilabo Davidi ne, Uliya kakaya ku nsubu kuandi, Davidi wakebesha Uliya ne, Wewe kuakulua ku luendu, anyi? Nunku wakahidia kuya ku nsubu kuebe bua tshinyi? Uliya wakambila Davidi ne, Mushete wa Yehowa ne Bena Isalele ne Bena Yuda bidi mu ntenta; ne mukelenge wanyi Yoaba ne bantu bonso ba mukelenge wanyi badi ne tshitudilu tshiabo mu madimi, nunku bundi nʼabu mbua kubuela mu nsubu wanyi bua kudia ne bua kunua ne bua kulala ne mukashi wanyi, anyi? Bu mudi wewe ne muoyo ne bu mudi mutshima webe ne muoyo tshiena ngenza bualu ebu. Davidi wakambila Uliya ne, Ushale kunoko lelu kabidi, ne makelela nengitabushe bua wewe uye. Nunku Uliya wakashala mu Yelushalema dituku adi tô ne hakatshiabu. Hakamubikila Davidi, yeye wakadia, wakanua ku mpala kuandi; Davidi wakamunuisha maluvu, wakakuatshika; kadi dilolo wakahatuka bua kulala ha bulalu buandi ne bantu ba mukelenge wandi, kakaya ku nsubu kuandi. Hakatshiabu Davidi wakafundila Yoaba mukanda, wakautuma mu bianza bia Uliya. Wakafunda mu mukanda nunku ne, Uteke Uliya ku mpala hadi nvita mikole, umushiyeku, bamushihe, afue biandi. Hakadi Yoaba utentekele musoko, yeye wakateka Uliya ha muaba hakadi bena bukitu. Bena musoko bakaluhuka, bakaluangana ne Yoaba; bantu bakuabo ba Davidi bakafua; Uliya, Muena Hiti, wakafua kabidi. Hashishe Yoaba wakatuma di, wakamanyisha Davidi malu onso a nvita; yeye wakambila messager bikole ne, Hawashikisha kuambila mukelenge malu onso a nvita, ne biakuata mukelenge tshiji, biakonkeye ne, Bualu kai nuakasemena ha buihi ne musoko bua kuluangana? Kanuakamanya ne bakadi bela mikete anu ku lumbu lua musoko? Wakashiha Abimeleke, muana wa Yelubesheta, nganyi? Mukashi wakadi ku mutu kua lumbu kakamutaha dibue dia mpelu, bua yeye wakafua mu Tebese, anyi? Bualu kai nuakasemena ha buihi ne lumbu nunku? Hashishe bûdi nʼabu mbua kuamba ne, Muntu webe, Uliya, Muena Hiti, wakafua kabidi. Nunku messager wakaya, wakafika kudi Davidi, wakanumanyisha malu onso akamuambila Yoaba. Messager wakambila Davidi ne, Bantu aba bakamba kutuhita bakole; bakaluhuka kutudi mu madimi; tuakaluangana nʼabo tô ne ku mbelu kua tshibi tshia ku musoko. Bedi ba mikete bakela bantu bebe mikete ku mutu kua lumbu mene; bantu ba mukelenge bakuabo bakafua ne muntu webe Uliya, Muena Hiti, wakafua kabidi. Hashishe Davidi wakambila messager ne, Bûdi nʼabu mbua kuambila Yoaba ne, Bualu ebu kabunyingalashi mutshima webe, bualu bua muele wa nvita udi ushiha muntu ne muntu; anji kukolesha nvita yebe ku musoko, ubutule; ukoleshe mutshima wandi nunku. Hakunvua mukashi wa Uliya ne, Bayebe Uliya udi mufue, yeye wakashila bayandi madilu. Hakashika madilu, Davidi wakatuma bantu, bakalua nʼandi ku nsubu kuandi; yeye wakalua mukashi wandi, wakamulelela muana. Kadi bualu ebu buakenza Davidi kabuakasankisha mutshima wa Yehowa. Yehowa wakatuma Natana kudi Davidi. Yeye wakafika kudiye, wakamuambila ne, Bantu babidi bakadi mu musoko umue, umue wakadi mubanji, mukuabo wakadi muhele. Muntu mubanji wakadi ne bisumbu bia mikoko ne bia ngombe bia bungi; kadi muntu muhele kakadi ne tshintu, anu kana ka mukoko kamue, kakasumbeye, kakadisheye; bakadiunda kudiye ne bana bandi; kakadia bidia biandi, kakanua mai a mu luhanza luandi mene, kakalala mu tshiadi tshiandi, kakadi bu muana mukashi mulela kudiye. Hashishe muena luendu wakalua kudi muntu mubanji; yeye kakitabusha bua kushihela muena luendu wakadi mulue umue wa mu mikoko yandi anyi umue wa mu ngombe yandi, kadi wakangata kana ka mukoko wa muntu muhele, wakamushihela muenyi wakadi mulue ku mbelu kuandi. Tshiji tshikole tshiakakuata Davidi bua muntu au; yeye wakambila Natana ne, Bu mudi Yehowa ne muoyo, muntu wakenza bualu ebu udi ne bua kufua; budiye nʼabu mbua kumuhingishila mikoko mai bua bualu ebu buakenzeye, bualu bua yeye kakadi ne luse. Hashishe Natana wakambila Davidi ne, Wewe mene udi muntu eu. Yehowa, Nzambi wa Isalele, udi wamba ne, Nakakuela manyi bua wewe wikale mukelenge ku mutu kua Bena Isalele, nakanusungila mu bianza bia Shaula; nakakuha nsubu wa mukelenge webe, nakafila bakashi ba mukelenge webe mu tshiadi tshiebe; nakakuha Bena Isalele ne Bena Yuda kabidi; bikala bintu ebi bitambe bukese, nakadi kukuvudishilabi ha mutu. Wewe wakalengulula dî dia Yehowa bua kuenza bualu ebu bubi ku mesu kuandi bua tshinyi? Wewe wakashiha Uliya, Muena Hiti, ku muele wa nvita, wakangata mukashi wandi bu mukashi webe, wakamushiha ku muele wa nvita wa bana ba Amona. Nunku muele wa mata kawena umuka ku nsubu kuebe tshiendelele bualu bua wewe wakandengulula, wakangata mukashi wa Uliya, Muena Hiti, bu mukashi webe. Yehowa udi Wamba kabidi ne, Mona, nenkubishile bualu bubi mu nsubu webe mene; nenunyenge bakashi bebe ku mesu kuebe, nembafile kudi muena mutumba nʼebe, nealale ne bakashi bebe mu munya. Wewe wakenza bualu ebu mu musokoko, kadi nengenzeshe bualu ebu ku mesu kua Bena Isalele bonso anu hatoke tô. Hashishe Davidi wakambila Natana ne, Nakenzela Yehowa bibi. Natana wakambila Davidi ne, Yehowa wakukubuikidila bubi buebe, wewe kuena ufila. Kadi bua bualu ebu bubi buwakenza wewe wakavuishila bena lukuna ba Yehowa tshikondo tshia kumuhendabo, nunku muana uwakalela neafue biandi bulelela. Natana wakumuka ne wakaya ku nsubu kuandi. Yehowa wakasamisha muana wakalelela mukashi wa Uliya Davidi disama dikole. Nunku Davidi wakalombela muana eu Nzambi. Davidi wakajila bia kudia, wakabuela mu nsubu, wakalala hanshi ha buloba butuku bujima. Bakulu ba mu nsubu muandi bakabika, bakimana ha buihi nʼandi bua kumubishabo ba buloba, kadi yeye kakitabusha, wakahidia kudia nʼabo. Hakahita matuku muanda mutekete muana wakafua. Bantu ba Davidi bakatshina kumuambila ne, Muana udi mufue; bualu bua bakamba ne, Monai, hakatshidi muana ne muoyo tuakayikila nʼandi ne yeye kakunyua dî dietu; monai, udi mua kutamba kunyingalala bituamuambila ne, Muana udi mufue! Kadi hakatangila Davidi bantu bandi banungane, Davidi wakamanya ne muana udi mufue; Davidi wakebesha bantu bandi ne, Muana wakulua, anyi? Bakamba ne, Wakufua. Hashishe Davidi wakajuka ha buloba, wakowa mai, wakataha manyi hamʼbidi, wakaluata bilulu bikuabo; wakabuela mu nsubu wa Yehowa, wakamutendelela; nunku wakahingana ku nsubu kuandi; hakambeye dî, bakamuha bia kudia, yeye wakadia. Hashishe bantu bandi bakamukonka ne, Bualu ebu bûdi wenza budi tshinyi? Hakadi muana ne muoyo, wewe wakadila, wakajila bia kudia; kadi hakafua muana, wewe wakajuka, wakadia bia kudia. Yeye wakamba ne, Hakadi muana ne muoyo, nakajila bia kudia, nakadila, nakadikonka munda ne, Udi mumanye ne, Yehowa kena unfuila luse, bua muana ikale ne muoyo nganyi? Kadi muana wakamana kufua, bundi nʼabu mbua kujila bia kudia bua tshinyi? Ndi mumanye mua kumufululula kabidi, anyi? Nenye kudiye, kadi yeye kena mua kuhingana kundi. Davidi wakasamba Beta-sheba mukashi wandi; wakabuela kudiye, wakalala nʼandi; yeye wakamulelela muana mulume, wakamuidika dina diandi ne, Solomo. Yehowa wakamunanga; wakatuma Natana muprofete kudiye, wakamuidika dina ne, Munangibue kudi Yehowa, bualu bua Yehowa. Yoaba wakaluangana ne Laba, musoko wa Bena Amona, wakanyenga musoko eu wa bukelenge. Yoaba wakatuma ba-messager kudi Davidi, bamba ne, Nakaluangana ne Laba, nakanyenga musoko udi ne mishimi ya mai ya bungi. Nunku usangishe bantu badi bashala, utshintshimike musoko, ûnyenga; binanyenga musoko, nebawidike dina dianyi. Davidi wakasangisha bantu bonso, wakaya nʼabo ku Laba, wakaluangana ne musoko eu, wakaunyenga. Wakangata tshifulu tshia butumbi tshia mukelenge tshiakadi ku mutu kuandi; bujitu buatshi buakadi bua ntalanta wa or, tshiakadi tshilengeshibue ne mabue, a mushinga mukole; bakatshiasa ku mutu kua Davidi. Wakanyenga bintu bia bungi bia mu musoko. Yeye wakangata bantu bakadimu, wakabenzesha mudimu wa kuhandabo mabaya ne scie ne bua kuenzabo biamu bia kuihila nʼabi ne bisui, ne bua kuenzabo tushola; wakenzela Bena Amona ba mu misoko yabo yonso nunku. Davidi ne bantu bandi bonso bakahingana ku Yelushalema. Ku nyima kua bualu ebu Abashaloma, muana wa Davidi, wakadi ne muanʼabo wa bakashi mulengele kumona, dina diandi diakadi Tamâ; Amenona, muana wa Davidi, wakamunanga. Amenona wakatamba kunyingalasha mutshima tô ne bakalueye bu musami, bualu bua muanʼabo wa bakashi, Tamâ; bualu bua yeye wakatshidi kamama ne bualu buakadi bukole kudi Amenona bua kumuenzeleye bualu bubi. Kadi Amenona wakadi ne mulunda, dina diandi Yonadaba, muana wa Shimea, muanʼabo ne Davidi; Yonadaba wakadi ne budimu bukole. Yeye wakebesha Amenona ne, Wewe, muana wa mukelenge, mûdi unyana nunku ku dituku ku dituku munyi? Kuena ungambila meme, anyi? Amenona wakamuambila ne, Ndi munange Tamâ, muanʼabo wa bakashi ne muanʼetu Abashaloma. Yonadaba wakamuambila ne, Lala ha bulalu buebe bu muntu udi ne disama; halua tatu webe kukutangila, umuambile ne, Ndi nkusengelela ne, Anji kuitabusha bua muanʼetu wa bakashi Tamâ alue bua kundisheye bidia, alongolole bia kudia anu ku mesu kuanyi, bua meme mbitangile, mbidie anu ku tshianza tshiandi. Nunku Amenona wakalala hanshi, wakadifuanyisha bu muena disama; hakabuela mukelenge bua kumutangila, Amenona wakambila mukelenge ne, Ndi nkusengelela ne, Anji kuitabusha bua muanʼetu Tamâ andambile mikata ibidi ku mesu kuanyi bua meme nyidie anu ku tshianza tshiandi. Hashishe Davidi wakatuma dî ku nsubu kuakadi Tamâ ne, Uye biebe ku nsubu wa muanʼenu Amenona, umulambile bia kudia. Nunku Tamâ wakaya ku nsubu wa muanʼabo Amenona, wakamusangana mulale hanshi. Yeye wakangata bukula, wakabulongolola, wakenza mikata ku mesu kuandi, wakalamba mikata. Yeye wakangata dilonga, wakayiteka ku mesu kuandi, kadi yeye wakahidia kuyidia. Amenona wakamba ne, Bantu bonso bakuabo bumuke kundi. Bantu bonso bakumuka kudiye. Amenona wakambila Tamâ ne, Ulue ne mikata ai mu nsubu wa bulalu bua meme kuyidia ku tshianza tshiebe. Tamâ wakangata mikata yakeleye, wakaya nʼai mu nsubu wa bulalu kudi muanʼabo Amenona. Hakalueye nʼai kudiye bua kumudisha, yeye wakamukuata, wakamuambila ne, Lua, muanʼetu mukashi, ulale nʼanyi. Yeye wakamukudimuna dî ne, Nansha, muanʼetu mulume, kunkuatshi ku bukole nunku, bualu ebu kabuena mua kuenjibua mu Isalele; kuenji bualu ebu buhote. Meme nenteke bundu buanyi kudi kunyi? Ne bua bualu buebe wewe newikale bu umue wa bahote mu Isalele. Nunku ndi nkusengelela ne, Webeshe mukelenge bualu ebu, yeye kena uhidia kunfila kûdi. Kadi yeye kakunyua dî diandi; kadi bualu bua yeye wakamuhita bukole, yeye wakamukuata ku bukole, wakalala nʼandi. Hashishe Amenona wakatamba kumukina ne lukinu lukole, lukinu luakamukineye nʼalu tuakahita dinanga diakadiye nʼadi kudiye bukole. Amenona wakamuambila ne, Juka, ya biebe. Yeye wakamuambila ne, Nansha, tshiena nya, bualu ebu bua kungumusha nunku budi butamba bukuabo buwakungenzela bubi. Kadi yeye kakunyua dî diandi. Hashishe yeye wakabikila muena mudimu wandi wakadi umukuatshila mudimu, wakamuambila ne, Umushe mukashi eu kundi, wele nsahi ku tshibi. Yeye wakadi muluate bilulu bia bibaka bibaka, bualu bua bana ba bakashi ba mukelenge bakatshidi tumama bakadi ne tshilele tshia kuluata bilulu nunku. Hashishe muena mudimu wandi wakamûmusha, wakela nsahi ku tshibi. Tamâ wakela butue mu mutu wandi, wakadihanda bilulu biandi bia bibaka bibaka biakadiye muluate; yeye wakateka tshianza tshiandi ha mutu handi, wakaya wenda udila bikole. Abashaloma, muanʼabo mulume, wakamuebesha ne, Muanʼetu Amenona wakadi nʼebe, anyi? Udiholeshe, muanʼetu mukashi, yeye udi muanʼenu mulume, kuteki bualu ebu mu mutshima webe. Nunku Tamâ wakashala ne kanyinganyinga mu nsubu wa muanʼabo Abashaloma. Kadi hakunvua mukelenge Davidi malu â onso, wakadi ne tshiji tshikole. Abashaloma kakambila Amenona mei mimpe anyi mei mabi; Abashaloma wakadi ne Amenona lukuna bualu bua yeye wakakuata muanʼabo mukashi Tamâ ku bukole. Hakahita bidimu bibidi bijima, Abashaloma wakasangisha bakoshi ba miosa ya mikoko ku Bâla-hasô, udi hehi ne Efelayima; Abashaloma wakabikilaku bana balume bonso ba mukelenge. Abashaloma wakaya kudi mukelenge, wakamuambila ne, Mona, muntu webe udi ne bakoshi ba miosa ya mikoko, ndi nkusengelela ne, Mukelenge ne bantu bandi baye ne muntu wandi. Mukelenge wakambila Abashaloma ne, Nansha, muanʼanyi, bituaya buonso buetu bualu ebu nebuikale bu bujitu kûdi. Yeye wakamusengelela, kadi yeye kakitabusha kuya; kadi wakamuvudishila disanka. Hashishe Abashaloma wakamba ne, Biwahidia kuya, ndi nkusengelela ne, Witabushe bua muanʼetu Amenona aye nʼetu. Mukelenge wakamuebesha ne, Yeye udi ne bua kuya nʼebe bua tshinyi? Abashaloma wakamusengelela tô; nunku yeye wakitabusha, bua Amenona ne bana balume bonso ba mukelenge baye nʼandi. Abashaloma wakelela bantu bandi mukenji ne, Nutangile Amenona bimpe ne hasanka mutshima wandi mu kukuatshika kua maluvu. Hananuambila ne, Nutahe Amenona, bimpe nu mushihe, kanutshinyi; meme tshiakunuambila dî, anyi? Nukoleshe mitshima, nuikale ne dikima. Bantu ba Abashaloma bakenzela Amenona bu muakabambila Abashaloma. Hashishe bana balume bonso ba mukelenge bakabika, bakabanda ha nyima ha nyama ya mpunda, bakanyema. Hakatshidibo baya mu nshila, lumu luakafika kudi Davidi ne, Abashaloma wakashiha bana balume bonso ba mukelenge, nansha umue wabo udi mushale. Hashishe mukelenge wakabika, wakahanda bilulu biandi, wakalala hanshi mu buloba; bantu bandi bonso bakimana ha buihi nʼandi ne bilulu biabo bihanda. Yonadaba, muana wa Shimea, muanʼabo ne Davidi, wakamuambila ne, Mukelenge kedi meji ne, Bakashiha bansongalume bonso, bana ba mukelenge, bualu bua anu Amenona nkayandi wakafua; bualu bua Abashaloma wakahangidisha bualu ebu ku didiku diakakuateye muanʼabo mukashi Tamâ ku bukole. Nunku mukelenge kateki bualu ebu mu mutshima wandi bua kuelangana meji ne, Bana balume bonso ba mukelenge bakafua; bualu bua anu Amenona nkayandi wakafua. Kadi Abashaloma wakanyema. Nsongalume wakadi mutentekedi, wakabanduluka, wakatangila ne, monai, bantu ba bungi balualua mu nshila wa ku mukuna ku nyima kuandi. Yonadaba wakambila mukelenge ne, Tangila, bana balume ba mukelenge bakulua bu muakamba muntu webe. Hakashikisheye kuamba dî edi, monai, bana ba mukelenge bakafika, bakabandisha mei abo, bakadila; mukelenge ne bantu bandi bonso bakadila bikole kabidi. Kadi Abashaloma wakanyema, wakaya kudi Talemai, muana wa Amihû, mukelenge wa mu Geshû. Davidi wakajuka muanʼandi ku dituku ku dituku. Abashaloma wakanyema nunku, wakaya ku Geshû, wakashikamaku bidimu bisatu. Mutshima wa mukelenge Davidi wakasua kuya kudi Abashaloma: bualu bua yeye wakasambibua bualu bua Amenona, bua yeye wakafua. Yoaba, muana wa Seluya, wakatangila bu muakadi mutshima wa mukelenge muikale kudi Abashaloma. Yoaba wakatuma dî ku Tekoa, wakabikilaku mukashi wakadi ne lungenyi lule, wakamuambila ne, Ndi nkusengelela ne, Udifuanyishe bu muena madilu, uluate bilulu bia muena madilu, kulabi manyi hamʼbidi nansha, kadi wikale bu mukashi wakadi ne madilu a bafue musangu mule; uye kudi mukelenge, umuambile nunku. Yoaba wakateka mei mukana muandi. Hakadi mukashi wa ku Tekoa uyikila ne mukelenge, yeye wakatua mpala wandi hanshi ha buloba, wakamukukuila, wakamba ne, Mukelenge, unkuatshishe. Mukelenge wakamuebesha ne, Bualu kai budi bukutatshisha? Yeye wakamukudimuna dî ne, Bulelela, ndi mukashi wa mu lufuila, bayanyi wakafua. Muntu webe wakadi ne bana balume babidi, bubidi buabo bakaluangana hakadibo mu budimi, nansha muntu wakadiku bua kubasunga, nunku umue wakakuma mukuabo, wakamushiha. Nunku, mona, bantu bonso ba mu diku dietu bakadisangisha kudi muntu webe bamba ne, Ufile wakashiha muanʼabo bua tuetu tumushihe bua muoyo wa muanʼabo wakashiheye; nunku nebashihe muhianyi kabidi; nunku nebajimishe dikala dianyi dia kahia didi dishala, nebashiye bayanyi kayi ne dina hanshi ha buloba. Mukelenge wakambila mukashi ne Ya ku nsubu kuebe, nendonde tshilumbu tshiebe. Mukashi wa ku Tekoa wakambila mukelenge ne, Mukelenge, bualu ebu bubi buikale kundi ne ku nsubu wa tatu wanyi; mukelenge ne nkuasa wandi wa butumbi kabikadi ne bualu. Mukelenge wakamba ne, Biakuambila muntu dî dimue, alue nʼandi kundi, ne yeye kena ukulenga tshianza kabidi. Hashishe yeye wakamuambila ne, Mukelenge avuluke Yehowa, Nzambi wandi, bua musombuedi wa mashi kashihi kabidi, kabashihi muanʼanyi. Yeye wakamba ne, Bu mudi Yehowa ne muoyo, lusuki lumue lua ku mutu kua muanʼebe kaluena luhona hanshi. Hashishe mukashi wakamba ne, Ndi nkusengelela ne, Witabushe bua muntu webe ambile mukelenge wandi dî. Yeye wakamuambila ne, Ambaku. Mukashi wakamba ne, Wewe wakelangana meji bua kuenzela bantu ba Nzambi nunku bualu kai? Bualu bua hamba mukelenge dî edi, yeye udi mudihishe bualu bua mukelenge kena uhingisha muntu wakihateye ku mbelu kuandi kabidi. Bualu bua butudi nʼabu mbua kufua; tudi bu mai akelabo ha buloba, kabena bamanye mua kuasuna kabidi; Nzambi kena unyenga muoyo wa muntu, kadi udi ulongolola bua muntu udibo bihata kikadi bu muntu mubengibue kudiye. Nunku nakulua bua kuambila mukelenge dî edi, bualu bua bantu bakamba kuntshinyisha; nunku muntu webe mukashi wakamba ne, Nengambile mukelenge bualu ebu; bumue mukelenge neitabushe kuenza kulomba kua muntu wandi. Mukelenge neunvue biandi bua kusungila muntu wandi mu tshianza tshia muntu udi ukeba kungumusha hohamue ne muanʼanyi mu buhianyi bua Nzambi. Hashishe muntu webe mukashi wakamba ne, Ndi nkusengelela ne, Dî dia mukelenge wanyi dinsambe; bualu bua mukelenge udi bu muanjelo wa Nzambi bua kujingululeye malu mimpe ne malu mabi. Yehowa, Nzambi webe, ikale nʼebe. Hashishe mukelenge wakambila mukashi ne, Ndi nkusengelela ne, Kunsokoki bualu bundi musue kukuebesha. Mukashi wakamba ne, Mukelenge wanyi ambe dî diandi. Mukelenge wakamuebesha ne, Tshianza tshia Yoaba tshidi nʼebe mu bualu ebu buonso, anyi? Mukashi wakamukudimuna dî ne, Mukelenge wanyi, bu mudi mutshima webe ne muoyo kakuena muntu udi mua kusesuka ku tshianza tshia balume anyi ku tshianza tshia bakashi ku dî diakunkonka mukelenge wanyi; bualu bua Yoaba muntu webe wakantuma, wakateka mei â onso mukana mua muntu webe mukashi; muntu webe Yoaba wakenza nunku bua kukudimuneye bualu ebu; ne mukelenge wanyi udi ne lungenyi lule bu mudi muanjelo wa Nzambi nʼalu bua kujingululeye malu onso adi hanshi ha buloba. Mukelenge wakambila Yoaba ne, Mona, nakuitabusha bualu ebu; nunku uye biebe, uhingishe nsongalume Abashaloma. Yoaba wakatua mpala wandi hanshi, wakamukukuila, wakavudishila mukelenge disanka; Yoaba wakamba ne, Lelu muntu webe udi mumanye ne yeye wakasangana luse ku mesu kua mukelenge wandi bualu bua yeye wakunyua kulomba kua muntu wandi. Nunku Yoaba wakajuka, wakaya ku Geshû, wakahingana ne Abashaloma ku Yelushalema. Mukelenge wakamba ne, Aye biandi ku nsubu kuandi, katangidi mpala wanyi. Nunku Abashaloma wakaya ku nsubu wandi, kakatangila mpala wa mukelenge. Kakuakadi muntu mukuabo wakatumbishabo mu Isalele bua bulengele buandi bu Abashaloma; bualu bua yeye kakadi ne katoba kakese mu lubombo lua mutu wandi tô ne munda mua makasa andi. Hakabeyeye nsuki ya ku mutu (bualu bua yeye wakadi ne tshilele tshia kubeya nsuki yandi ku tshidimu ku tshidimu, bualu bua bujitu buai), hakidikisheye bujitu bua nsuki yandi buakadi bu nshekele nkama ibidi, bu mudi tshidikishilu tshia mukelenge. Abashaloma wakalela bana ba balume basatu ne muana wa bakashi umue, dina diandi Tamâ, wakadi mukashi mulengele kumona. Abashaloma wakashikama mu Yelushalema bidimu bibidi bijima, yeye kakatangila mpala wa mukelenge. Hashishe Abashaloma wakabikila Yoaba bua kumutumeye kudi mukelenge; kadi yeye wakahidia kulua kudiye; yeye wakamubikila tshiakabidi, kadi yeye wakahidia kulua. Nunku yeye wakambila bantu bandi ne, Budimi bua Yoaba budi ha buihi ne buanyi, yeye udi ne orge mikunamu; yai, nuyoshe ne kahia. Bantu ba Abashaloma bakayosha ne kahia. Hashishe Yoaba wakajuka, wakaya kudi Abashaloma ku nsubu kuandi, wakamuebesha ne, Bualu kai bantu bebe bakosha budimi buanyi? Abashaloma wakakudimuna Yoaba dî ne, Mona, nakakubikila ne, Lua kunoko, bua kukutuma kudi mukelenge bua kumuebesha ne, Wakumbikidila ku Geshû bua tshinyi? Biakadi bimpe bua meme kushalaku. Nunku witabushe bua meme kutangila mpala wa mukelenge; ne bingikala ne bualu bubi, anshihe. Nunku Yoaba wakaya kudi mukelenge, wakamuambila mei â. Hakabikileye Abashaloma, yeye wakaya kudi mukelenge, wakatua mpala wandi hanshi ku mpala kua mukelenge; mukelenge wakatua Abashaloma mishiku. Ku nyima kua bualu ebu Abashaloma wakadilongoluela dikalu ne tubalu ne bantu makumi atanu bua kuyabo ku mpala kuandi. Abashaloma wakabika dinda dionso, wakimana ha buihi ne nshila wa ku tshibi tshia musoko; nunku hakalua muntu ne tshilumbu bua kuyeye nʼatshi ku tshilumbuluidi tshia mukelenge, Abashaloma wakamubikila, wakamuebesha ne, Wewe udi wa ku musoko kai? Yeye wakadi umuambila ne, Muntu webe udi wa mu tshisamba tshia Bena Isalele. Hashishe Abashaloma wakamuambila ne, Mona, malu ebe adi malengele ne makane, kadi kakuena muntu musungula kudi mukelenge bua kunvueye malu ebe. Abashaloma wakamba kabidi ne, Bu meme muikale mulumbuluishi wa buloba, muntu yonso udi ne tshilumbu anyi bualu wakadi kumanya mua kulua kundi bua meme kumulumbuluila biakane. Nunku hakasemena muntu ha buihi nʼandi bua kumukukuila, yeye wakolola tshianza tshiandi, wakamutua mishiku. Abashaloma wakenzela Bena Isalele bonso nunku, hakaluabo ku tshilumbuluidi tshia mukelenge; nunku Abashaloma wakiba mitshima ya Bena Isalele. Hakahita bidimu binai, Abashaloma wakambila mukelenge ne, Ndi nkusengelela ne, Witabushe bua meme kuya kushikisha kuditshiha kuanyi kunakaditshiha kudi Yehowa mu Hebelone. Bualu bua hakadi muntu webe mushikame mu Geshû wa mu Sulia wakaditshiha mutshihu ne, Biampingisha Yehowa mu Yelushalema, meme nentendelele Yehowa. Mukelenge wakamuambila ne, Ya biebe talalâ. Nunku wakajuka, wakaya ku Hebelone. Kadi Abashaloma wakatuma batentekedi ku bisamba bionso bia Bena Isalele, benda bamba ne, Hanunvua dî dia mpungi, nenuambe ne, Abashaloma udi mukelenge mu Hebelone. Bantu nkama ibidi bakitaba kudi Abashaloma, bakumuka mu Yelushalema, bakaya nʼandi; bakaya bu mu mpukahuka, kabakadi bamanye bualu. Abashaloma wakatuma dî, wakabikila Ahitofele, Muena Gilo, muena lungenyi wa Davidi, ku musoko wandi, ku Gilo mene, hakadiye ufila milambu. Tshifufu tshiakatamba bukole, bualu bua bantu bakavulangana kudi Abashaloma. Messager wakafika kudi Davidi wamba ne, Mitshima ya Bena Isalele idi kudi Abashaloma. Davidi wakambila bantu bonso bakadi nʼandi mu Yelushalema ne, Jukai, tunyemai; bituashala, nansha umue wetu neahanduke mu bianza bia Abashaloma; tuyai lubilu, yeye katshetshi; biatuheteye neabenzele bibi, neabutule musoko ne miele ya nvita. Bantu ba mukelenge bakamuambila ne, Mona, bantu bebe bakamana kudilongolola bua kuenzabo malu onso adi mukelenge wabo musungule. Mukelenge wakumuka, ne bonso ba mu nsubu muandi bakamulonda. Mukelenge wakashiya bakashi bahika babakibue dikumi bua kulamabo nsubu. Mukelenge wakumuka, ne bantu bonso bakamulonda, bakashikama mu Bete-mêhaka. Bantu bandi bonso bakenda nʼandi hohamue; Bena Kelete bonso ne Bena Pelete bonso ne Bena Giti bonso, bantu nkama isambombo bakamulonda bafume mu Gata, bakadianjila ku mpala kua mukelenge. Hashishe mukelenge wakambila Itai, Muena Giti ne, Wewe uyaya nʼetu kabidi bua tshinyi? Walukile, ushikame ne mukelenge; bualu bua wewe udi muntu wa bende, wakihatabo kabidi; uhingane ku muaba webe. Bualu bua wewe wakalua anu makelela eu, bûdi nʼabu mbua kubanda nʼetu ne kuhueka nʼetu lelu, anyi? Bualu bua meme nyaya kundi mua kuya; hingana biebe, uye ne bana benu, luse ne bulelela bikale nʼebe. Itai wakakudimuna mukelenge dî ne, Bu mudi Yehowa ne muoyo ne bu mudi mukelenge wanyi ne muoyo, bulelela, mu miaba yonso idi mukelenge wanyi uya, nansha mu muaba wa lufu nansha mu muaba wa muoyo, muntu wandi neikaleku kabidi. Davidi wakambila Itai ne, Ya, hita ku mpala. Itai, Muena Giti, wakahita ku mpala ne bantu bandi bonso ne bana bakese bonso bakadi nʼandi. Bena buloba bonso bakadila ne dî dikole; bantu bonso bakahita; mukelenge biandi kabidi wakasabuka kasulu ka Kidilona ne bantu bonso bakasabuka, bakaya mu nshila wa mu tshihela. Monai, Sadoka ne Ebayatâ bakatua ne Bena Lewi bonso bakadi nʼabo, batuale mushete wa tshihungidi tshia mei a Nzambi; bakateka mushete wa Nzambi hanshi; Ebeyatâ wakayaku tô ne hakumuka bantu bonso mu musoko. Mukelenge wakambila Sadoka ne, Hingisha mushete wa Nzambi mu musoko; binasangana luse ku mesu kua Yehowa, yeye neampingishe kabidi, neaundeshe ne musoko wandi kabidi; kadi biangambileye ne, Tshiena nʼebe disanka kabidi, mona, meme ndiku, angenzele budi buimpe kudiye. Mukelenge wakambila Sadoka muakuidi kabidi ne, Wewe kuena mumonyi wa malu, anyi? Hingana ku musoko talalâ, wewe ne bana bebe balume babidi, Ahimasa, muana webe, ne Yonatana, muana wa Ebeyatâ. Meme nenshale mu mpata ya tshihela tô ne hangunvua dî kûdi dia kummanyisha malu. Sadoka ne Eyebatâ bakaya ne mushete wa Nzambi ku Yelushalema kabidi: bakashikamaku. Davidi wakabanda mukuna wa Olive, wenda udila; wakabuikila mutu wandi, wakashiya makasa andi hatuhu, bantu bonso bakadi nʼandi bakabuikila mitu yabo, badile hakabandabo. Bakambila Davidi ne, Ahitofele udi munkatshi mua bena tshifufu ba Abashaloma. Davidi wakamba ne, Yehowa, ndi nkusengelela ne, Kudimuna lungenyi lua Ahitofele lulue luhote. Hakafika Davidi ku mutu kua mukuna kuakadibo batendelela Nzambi, monai, Hushai, Muena Aka, wakalua kusangakena nʼandi ne tshikowelu tshiandi tshihandika ne buloba mu mutu wandi. Davidi wakamuambila ne, Biwaya nʼanyi, wewe newikale bu bujitu kundi; kadi biwahingana ku musoko, biwambila Abashaloma ne, Mukelenge, nengikale muntu webe, bu munakadi muntu wa tatu webe diambedi, nunku nengikale muntu webe katataka; hashishe udi mumanye mua kukuatshisha bua kukudimuna lungenyi lua Ahitofele. Sadoka ne Ebeyatâ, bakuidi, kabena nʼebe, anyi? Nunku mei onso audi unvua mu nsubu wa mukelenge, wâmbile Sadoka ne Ebeyatâ, bakuidi. Mona, badiku ne bana babo balume babidi, Ahimasa, muana wa Sadoka, ne Yonatana, muana wa Ebeyatâ; nunku nudi bamanye mua kubatuma kundi ne mei onso anudi nunyua. Nunku Hushai, mulunda wa Davidi, wakalua mu musoko; ne Abashaloma wakabuela mu Yelushalema. Hakafika Davidi ha mutu ha mukuna, monai, Siba, muena mudimu wa Mefibosheta, wakasangakena nʼandi; wakadi ne nyama ya mpunda ibidi ne biseba bisuike ha nyima hai ne mitanda ya mampa nkama ibidi ne bisumbu bia tumuma tukese tûme lukama ne lukama lua mamuma makuabo ne mulondo wa nvinyo. Mukelenge wakakonka Siba ne, Udi wenza tshinyi ne bintu ebi? Siba wakamba ne, Nyama ya mpunda nya ba mu nsubu wa mukelenge kubandabu; mampa ne mamuma mbua bansongalume kudia; ne nvinyo nya badi bahanga mu tshihela banue. Mukelenge wakamuebesha ne, Muana mulume wa mukelenge webe udi hanyi? Siba wakambila mukelenge ne, Mona, yeye udi mushale mu Yelushalema; bualu bua yeye wakamba ne, Lelu Bena Isalele nebampingishe mu bukelenge bua tatu wanyi. Hashishe mukelenge wakambila Siba ne, Mona, bintu bionso bia Mefibosheta mbiebe. Siba wakamba ne, Meme ndi nkukukuila; mukelenge wanyi, nsangane diakalengele ku mesu kuebe. Hakafika Davidi ku Bahulima, monai, muntu wa mu nsubu wa Shaula, dina diandi Shimei, muan? wa Gela, wakaluhuka, wenda umuhenda hakatshidiye ulua. Wakela Davidi ne bantu bonso ba mukelenge Davidi mabue; bantu bandi bonso ne bena bukitu bonso bakadi ku tshianza tshia balume ne ku tshianza tshia bakashi. Hakamuhenda Shimei, wakamba ne, Umuke, Umuke, wewe udi muntu wa mashi, udi muntu wa tshidingidingi; Yehowa wakahingisha mashi a bantu bonso ba mu nsubu wa Shaula ha mutu hebe; bua wewe udi ukokesha mu muaba wandi, ne Yehowa wakafila bukelenge mu bianza bia Abashaloma muanʼebe, ne mona, bakakukuata mu malu mabi ebe, bualu bua wewe udi muena mashi. Hashishe Abishai, muana wa Seluya, wakakonka mukelenge ne, Mbua eu mufue udi ne bua kuhenda mukelenge wanyi nunku bua tshinyi? Ndi nkusengelela ne, Witabushe bua meme kuya kudiye bua kukosa mutu wandi. Mukelenge wakamuebesha ne, Nuenu bana balume ba Seluya, ndi nʼenu bualu kai? Biampendeye bualu bua Yehowa wakamutuma ne, Uhende Davidi, udi nganyi bua kumuebesha ne, Udi wenza nunku bualu kai? Davidi wakambila Abishai ne bantu bandi bonso ne, Monai, muanʼanyi mulume wakaluhuka munda muanyi udi ukeba muoyo wanyi; nunku Muena Benyamina eu kena mua kutamba kuenza nunku, anyi? Mulekela, ampende, bualu bua Yehowa wakamutuma. Biasua Yehowa, yeye udi mumanye mua kutangila bubi buakungenzeleye; Yehowa udi mumanye mua kungenzela bimpe bua bihendu biandi biakumpendeye nʼabi lelu. Nunku Davidi ne bantu bandi bakaya mu nshila. Shimei wakaya mu nshila wa ku mpenge, wenda umuhenda; wakamuela mabue ne luhuishi. Mukelenge ne bantu bonso bakadi nʼandi bakalua bahungile; wakikishaku. Abashaloma ne bantu bonso, Bena Isalele, bakabuela mu Yelushalema; Ahitofele wakadi nʼandi. Hakafika Hushai, Muena Aka, mulunda wa Davidi, kudi Abashaloma, Hushai wakambila Abashaloma ne, Mukelenge ikale ne muoyo musangu mule! Mukelenge ikale ne muoyo musangu mule! Abashaloma wakebesha Hushai ne, Elu nduse luebe kudi mulunda webe, anyi? Kuakaya ne mulunda webe bua tshinyi? Hushai wakakudimuna Abashaloma dî ne, Nansha; kadi muntu wakasungulabo kudi Yehowa ne kudi Bena Isalele bonso, meme nengikale wandi, nenshikame nʼandi. Bundi nʼabu mbua kukuatshila nganyi mudimu? Tshikuatshi mudimu ku mesu kua muanʼandi mulume, anyi? Bu munakakuata mudimu ku mesu kua tatu webe, neakuate mudimu ku mesu kuebe kabidi. Hashishe Abashaloma wakambila Ahitofele ne, Utuambile tshiadi mua kuenza. Ahitofele wakambila Abashaloma ne, Ubuele mu nsubu kudi bakashi bahika babakibue kudi tatu webe bakashiyeye bua kulamabo nsubu; Bena Isalele bonso nebunvue lumu ne, Wewe udi mulenguludibue kudi tatu webe, nunku maboko a bantu bonso badi nʼebe neakoleshibue. Nunku bakashimika ntenta wa Abashaloma ha mutu ha nsubu; Abashaloma wakabuela kudi bakashi bahika babakibue kudi tatu wandi ku mesu kua Bena Isalele bonso. Mei akamba Ahitofele mu matuku au akadi bu muntu mukonke dî dia Nzambi. Lungenyi luonso bakambila Ahitofele Davidi ne Abashaloma luakadi nunku. Ahitofele wakambila Abashaloma ne, Witabushe bua meme nsungule bantu binunu dikumi ne bibidi, nenjuke butuku ebu mene bua kulonda Davidi; nemmuhete hatshidiye muhungile ne mutekete, nemmutshinyishe; bantu bonso badi nʼandi nebanyeme, Nenshihe anu mukelenge nkayandi, nempingishe bantu bonso kûdi wewe. Muntu ûdi ukeba udi bu bantu bonso bakahingana; nunku bantu bonso nebikale talalâ. Dî edi diakasankisha Abashaloma ne bakulu bonso ba mu Isalele bimpe. Hashishe Abashaloma wakamba ne, Bikilai Hushai, Muena Aka, kabidi, tunvue tshidiye Wamba kabidi. Hakafika Hushai kudi Abashaloma, yeye wakamuambila ne, Ahitofele wakamba nunku; netulonde dî diandi, anyi? Biwahidia, utuambile dî diebe. Hushai wakambila Abashaloma ne, Dî diakukuambila Ahitofele tshikondo etshi kadiena dimpe nansha. Hushai wakamba kabidi ne, Wewe udi mumanye tatu webe ne bantu bandi badi bena bukitu, badi ne tshiji mu mitshima yabo bu nkashama wa muitu wakangatabo bana bandi; tatu webe udi muena nvita, yeye katu walala munkatshi mua bantu bandi. Mona, yeye udi musokome mu lubuebue anyi mu muaba mukuabo; nunku hashihabo bantu bakuabo diambedi, yonso udi unvua lumu elu neambe ne, Kushiha kudi munkatshi mua bantu badi balonda Abashaloma. Ne yeye kabidi, udi ne bukitu, udi ne mutshima bu mutshima wa nyama wa ntambue, nênguluke; bualu bua Bena Isalele bonso badi bamanye ne tatu webe udi muntu mukole ne bantu badi nʼandi badi bena bukitu. Nunku dî dindi nkuambila didi nunku ne, Usangishe Bena Isalele bonso ku Dana tô ne ku Bê-sheba, bungi buabo nebuikale bu nsenga ya ku muelelu wa mai manene; wewe nkayebe uye nʼabo mu nvita. Nunku netumuhete mu muaba mudiye, netumunguile bu mume mukuate ku mashinde; ne yeye ne bantu bonso badi nʼandi, katuena tushiya umue wabo ne muoyo. Biabueleye mu musoko mukuabo. Bena Isalele bonso nebalue ne mionshi ku musoko au, nebaukoke mu musulu tô ne hadibo kabayi basanganamu lusoka lukese. Abashaloma wakambila Bena Isalele bonso ne, Lungenyi luakatuambila Hushai, Muena Aka, ludi luhita lua Ahitofele buimpe. Bualu bua Yehowa wakahangidisha bua kukudimuna mei mimpe akamba Ahitofele bua Yehowa enzele Abashaloma bualu bubi. Hashishe Hushai wakambila Sadoka ne Ebeyatâ bakuidi ne, Ahitofele wakuambila Abashaloma ne bakulu ba mu Isalele nunku ne nunku; ne meme nakubambila nunku ne nunku. Nunku utume dî lubilu, wambile Davidi ne, Kuladi butuku ebu mu mpata wa mu tshihela, kadi usabuke ku luseke lukuabo; kabajimishi mukelenge ne bantu bonso badi nʼandi. Yonatana ne Ahimasa bakadi bashikama mu Ene-logela, ne muena mudimu mukashi wakaya kubambila, ne bobo bakaya, bakambila mukelenge Davidi; bualu bua bobo kabakamanya mua kubuela mu musoko ku mesu kua bantu. Kadi nsongalume mukuabo wakabatangila, wakamanyisha Abashaloma; nunku bubidi buabo bakaya lubilu, bakafika ku nsubu wa muntu wa mu Bahulima, wakadi ne dina dia mai mu luhangu luandi; bakabuela mu dina adi. Mukashi mukuabo wakabuikila mushiku wa dina ne tshilulu, wakabadilahu blé wakatueye; bualu ebu kabuakamanyibua. Bantu ba Abashaloma bakafika ku nsubu wa mukashi eu, bakamuebesha ne, Ahimasa ne Yonatana badi kudi kunyi? Mukashi wakabambila ne, Bakamana kuhita, bakasabuka musulu wa mai. Bobo bakakebakeba, kabakabasa ngana, nunku bakahingana ku Yelushalema. Hakayabo, Ahimasa ne Yonatana bakahatuka mu dina, bakaya, bakamanyisha mukelenge Davidi; bakambila Davidi ne, Juka, usabuke mai lubilu, bualu bua Ahitofele wakamba mei adi kâyi mimpe bua bualu buebe. Hashishe Davidi wakajuka ne bantu bonso bakadi nʼandi, bakasabuka dishiya dia Yadene; hakatshiabu nansha umue wabo wakashala, buonso buabo bakadi basabuka. Hakatangila Ahitofele ne, Bakahidia lungenyi luanyi, yeye wakela tshiseba ha nyima ha nyama wandi wa mpunda, wakajuka, wakaya kuandi ku musoko wandi, wakalongolola malu a mu nsubu wandi, wakadiowa, wakafua, bakamujika mu lukita lua tatu wandi. Davidi wakafika ku Mahanayima. Abashaloma ne Bena Isalele bonso bakadi nʼandi bakasabuka Yadene. Abashaloma wakateka Amasa ku mutu kua masalayi andi mu muaba wa Yoaba. Amasa wakadi muana wa muntu dina diandi Yitela, Muena Isalele, wakabuela kudi Abigayila, muana wa Nahasha, muanʼabo mukashi ne Seluya, mamu wa Yoaba. Abashaloma ne Bena Isalele bakasa tshitudilu tshiabo mu buloba bua Gilada. Hakafika Davidi ku Mahanayima, Shobi, muana mulume wa Nahasha wa mu Laba wa Bena Amona, ne Makî, muana wa Amiele wa mu Lo-debâ, ne Bâzilai, Muena Gilada wa mu Logelima, bakalua ne malalu ne malonga, ne bihanza ne blé ne orge ne bukula ne blé mukanga ne nkunde ne nkunde ya kahelele ne nkunde ya tshikunde-kunde ne buitshi ne manteke ne mikoko ne fromage bua Davidi ne bantu bakadi nʼandi badie. Bualu bua bakamba ne, Bantu badi ne nzala, badi bahungile ne badi ne nyota mu tshihela. Davidi wakabala bantu bakadi nʼandi, wakateka tupitene ku mutu kua binunu bia bantu ne ku mutu kua nkama ya bantu. Davidi wakatuma bantu ku nvita, tshituha tshisatu tshia kumudilu mu bianza bia Yoaba, ne tshituha tshisatu tshikuabo mu bianza bia Abishai, muana wa Seluya, muanʼabo ne Yoaba, ne tshituha tshisatu tshikuabo mu bianza bia Itai, Muena Giti. Mukelenge wakambila bantu ne, Bulelela, meme bianyi nenye nʼenu kabidi. Kadi bantu bakamuambila ne, Kuyi nansha; bualu bua bituanyema, kabena nʼetu bualu; biashihabo tshituha tshia buonso buetu, kabena nʼetu bualu nansha; wewe udi uhita binunu bietu dikumi mushinga mukole; bidi bitamba buimpe bua wewe kudilongolola bua kutukuatshisha ku musoko. Mukelenge wakabambila ne, Nengenze tshinudi basue. Mukelenge wakimana ku luseke lua tshibi, ne bantu bakaluhuka ku nkama ku nkama, ku binunu ku binunu. Mukelenge wakambila Yoaba ne Abishai ne Itai ne, Kanuenzedi nsongalume Abashaloma bibi bua bualu buanyi. Bantu bonso bakunvua mukenji wakelela mukelenge tupitene tuonso bualu bua Abashaloma. Nunku bantu bakaluhuka bua kuya mu mpata bua kuluanganabo ne Bena Isalele; bakadi baluila mu ditu dia Efelayima. Bantu ba Davidi bakahita Bena Isalele bukole; kushiha kunene kua bantu binunu makumi abidi kuakadiku dituku adi. Bualu bua nvita yakadi ku nseke yonso ya buloba; bantu bakafua mu ditu bakahita bantu bakashihibua ku miele ya nvita bungi. Abashaloma wakasangila ne bantu ba Davidi ku mpukahuka. Abashaloma wakadi wenda ha nyima ha nyama wandi wa mpunda; nyama wandi wakabuela muinshi mua matamba a mutshi munene wa telebinta; mutu wandi wakakuata ku ditamba dia mutshi, ne yeye wakakanana hankatshikatshi kulu kule, hanshi hale, ne nyama wakadiye nʼandi wakahita. Muntu mukuabo wakatangila bualu ebu, wakamanyisha Yoaba ne, Mona, nakatangila Abashaloma mulembelele ku mutshi. Yoaba wakambila muntu wakamuambila ne, Mona, wakatangila bualu ebu, kuakamushiha, kuakamuhonesha bua tshinyi? Meme nakadi kukuha argent dikumi ne mukaba. Muntu au wakambila Yoaba ne, Nansha wewe mumpe binunu dikumi bia argent mu tshianza tshianyi, tshiakadi kulenga tshianza tshianyi hamʼbidi ha muana wa mukelenge; bualu bua mukelenge wakanuambila ne Abishai ne Itai mu matshu etu ne, Dimukai, kanulengi nsongalume Abashaloma tshianza. Bu meme muenze nunku, nakadi kudinga muoyo wanyi (kakuena bualu bubi busokoka kudi mukelenge), hashishe wewe nkayebe wakadi kuluangana nʼanyi. Yoaba wakamba ne, Tshiena mua kujanguluka nʼebe bua bualu ebu. Yeye wakangata mikete isatu mu tshianza tshiandi, wakayasa ha muoyo wa Abashaloma hakadiye mulembelele mutshikale ne muoyo munkatshi mua matamba a mutshi. Bansongalume dikumi bakadi batuala bintu bia nvita bia Yoaba, bakela Abashaloma munkatshi, bakamuasa, bakamushiha. Yoaba wakela mpungi ne bantu bakalekela kulonda Bena Isalele, bualu bua Yoaba wakakanda bantu. Bakangata Abashaloma, bakamuha mu lubuebue lunene luakadi muitu, bakamungushila mushiki munene wa mabue; Bena Isalele bonso bakanyema muntu ne muntu ku ntenta wandi. Hakadi Abashaloma ne muoyo, yeye wakadishimikila dibue dinene mu tshibanda tshia mukelenge, wamba ne, Tshiena ne muana mulume bua kujadikeye dina dianyi; yeye wakidika dibue adi dina diandi; badi badibikila ne, Tshivulukidi tshia Abashaloma tô ne katataka. Hashishe Ahimasa, muana wa Sadoka, wakamba ne, Nye lubilu bua kumanyisha mukelenge ne, Yehowa wakakusombuela kudi bena lukuna bebe. Yoaba wakamuambila ne, Kuena uya ne lumu elu lelu eu, kadi neuye nʼalu dituku dikuabo, bualu bua muana wa mukelenge wakafua. Yoaba wakambila Muena Kushi ne, Ya biebe, Wambile mukelenge malu awakatangila. Muena Kushi wakakukuila Yoaba, wakaya. Hashishe Ahimasa, muana wa Sadoka, wakambila Yoaba kabidi ne, Bialua malu onso kundi, anji kuitabusha bua meme ndonde Muena Kushi. Yoaba wakamuebesha ne, Muanʼanyi, wewe udi musue kumulonda bua tshinyi? Kuena mua kuangata difutu dia lumu, anyi? Kadi yeye wakamba ne, Bialua malu onso kundi, nyaya. Yeye wakamuambila ne, Ya. Ahimasa wakayila mu nshila wa mu Mpata, wakahita Muena Kushi lubilu. Davidi wakadi mushikame hankatshi ha bibi bibidi; mutentekedi wakabanda ha mutu ha tshibi tshia lumbu, wakabanduluka, ne monai, muntu udi ulua lubilu nkayandi. Mutentekedi wakela dî, wakambila mukelenge. Mukelenge wakamba ne, Bialueye nkayandi, udi ne lumu mukana muandi. Yeye wakamba kufika ha buihi. Mutentekedi wakatangila muntu mukuabo ulua lubilu; mutentekedi wakambila mulami wa tshibi ne, Mona muntu mukuabo udi ulua lubilu nkayandi. Mukelenge wakamba ne, Yeye udi ulua ne lumu kabidi. Mutentekedi wakamba ne, Ndi ngelangana meji ne luendu lua muntu udi ku mpala ludi bu lua Ahimasa, muana wa Sadoka. Mukelenge wakamba ne, Yeye udi muntu muimpe, udi ulua ne lumu luimpe. Ahimasa wakela dî, wakambila mukelenge ne, Malu onso adi talalâ. Wakatua mpala wandi hanshi ku mesu kua mukelenge, wakamba ne, Yehowa, Nzambi webe, wakafila bantu bakatombokela mukelenge mu bianza bia mukelenge, avudishibue disanka. Mukelenge wakamuebesha ne, Nsongalume Abashaloma udi talalâ, anyi? Ahimasa wakakudimuna ne, Hakatuma Yoaba muntu webe kûdi, nakunvua diyoyo dinene, kadi tshiakamanya muakadi bualu. Mukelenge wakamba ne, Semena, wimane aha. Yeye wakasemena, wakimana. Monai, Muena Kushi wakafika; Muena Kushi wakamba ne, Ndi ne lumu lua kuambila mukelenge, bualu bua Yehowa wakakusombuela lelu kudi bonso bakabika bua kukutombokela. Mukelenge wakebesha Muena Kushi ne, Nsongalume Abashaloma udi talalâ, anyi? Muena Kushi wakamukudimuna ne, Bena lukuna ba mukelenge wanyi ne bonso bakabika bua kukuenzela bibi bikale bu nsongalume au. Kanyinganyinga kakole kakakuata mukelenge, yeye wakabanda ku nsubu wakadi ku mutu kua tshibi, wakadila; hakadiye uya, wakamba ne, Muanʼanyi Abashaloma, muanʼanyi, muanʼanyi Abashaloma! Meme nakadi kukufuila, Abashaloma, muanʼanyi, muanʼanyi! Bakambila Yoaba ne, Mona, mukelenge udi udila madilu bua Abashaloma. Luhandu lua dituku adi luakandamuka madilu, bualu bua bantu bonso bakulua lumu ne, Mukelenge udi ne kanyinganyinga bua muanʼandi. Bantu bakahingana ku musoko mu musokoko dituku adi, bu bantu badi ne bundu batshimukabo mu nvita. Mukelenge wakabuikila mutu wandi, wakadila ne dî dikole ne, Muanʼanyi Abashaloma, Abashaloma muanʼanyi, muanʼanyi! Yoaba wakabuela mu nsubu wa mukelenge, wakamuambila ne, Wewe wakafuisha bantu bebe bonso bundu lelu, bakusungila muoyo webe lelu, ne mioyo ya bana bebe balume ne ya bana bebe bakashi, ne mioyo ya bakashi bebe ne ya bakashi bahika babakibue kudi, bualu bua wewe udi unanga badi bakuona, udi ukina badi bakunanga. Bualu bua wewe wakuamba lelu ne, Baminyampala ne bantu badi tshianana ku mesu kuanyi; ndi ngelangana meji munda ne, Bu Abashaloma muikale ne muoyo, ne bu tuetu bonso bafue, bualu ebu buakadi kunsankisha. Nunku juka biebe, uluhuke, wambile bantu bebe mei a kubasamba nʼau; bualu bua ndi muditshihe kudi Yehowa ne, Biwahidia kuluhuka kudibo, nansha muntu umue neikale nʼebe butuku ebu; dikenga edi neditambe makenga onso akakukuata ku buana buebe tô ne katataka bubi. Hashishe mukelenge wakabika, wakashikama ku tshibi tshia musoko. Bakambila bantu bonso ne, Monai, mukelenge udi ushikama ku tshibi; ne bantu bonso bakalua ku mpala kua mukelenge. Bena Isalele bonso bakadi banyema muntu ne muntu ku ntenta wandi. Bantu bonso ba mu bisamba bionso bia Bena Isalele bakatandangana bamba ne, Mukelenge wakatusungila mu bianza bia bena lukuna betu; wakatusungila mu bianza bia Bena Peleshete kabidi, ne katataka yeye wakanyema mumuke mu buloba bualu bua Abashaloma. Abashaloma utuakela manyi bua kuikaleye ku mutu kuetu wakafua mu mata. Bualu kai kanuena ne di bua kuhingisha mukelenge? Mukelenge Davidi wakatuma mukenji kudi Sadoka ne Ebeyatâ bakuidi wamba ne, Nukonke bakulu ba mu Yuda ne, Nuenu nutshidi bashadile ku nyima bua kuhingisha mukelenge ku nsubu wandi bualu kai? Bualu bua Bena Isalele bonso hakamana kuhunga dî bua kuhingisha mukelenge ku nsubu wandi. Nuenu nudi bana betu, nudi bu mifuba ya mifuba yanyi ne musunyi wa mu misunyi yanyi; nunku nutshidi bashadile ku nyima bua kuhingisha mukelenge bua tshinyi? Nuenu nukonke Amasa kabidi ne, Wewe kuena mufuba wa mu mifuba yanyi ne musunyi wa mu misunyi yanyi, anyi? Nzambi angenzele malu onso adiye musue, binahanga kukuhingishila kapitene ka masalayi mu muaba wa Yoaba. Yeye wakalekesha mitshima ya Bena Yuda bonso, wakakasha mitshima yabo bu mutshima umue; nunku bakatumina mukelenge di ne, Hingana ne bantu bebe bonso. Davidi wakalukila, wakafika ku Yadene. Bena Yuda bakaya ku Gilegala bua kusangakenabo ne mukelenge wabo, ne bua kusambula mukelenge Yadene. Shimei, muana wa Gela, Muena Benyamina wa mu Bahulima, wakaya lubilu ne Bena Yuda bakuabo bua kusangakeneye ne mukelenge Davidi. Bena Benyamina tshinunu bakadi nʼandi, ne Siba, muena mudimu wa Shaula, ne bana bandi balume dikumi ne batanu, ne bena mudimu bandi makumi abidi bakadi nʼandi; bakasabuka Yadene ku mesu kua mukelenge. Bakatuma buatu bunene bua kusambula ba mu nsubu wa mukelenge, ne bua kuenza nʼabu bu muakasueye. Hakasabuka mukelenge Yadene, Shimei, muana wa Gela, wakamukukuila. Yeye wakambila mukelenge ne, Mukelenge wanyi kanfunkununyi bua bubi buanyi, kavuluki bualu buhote buakakuenzela muntu webe dituku diakumuka mukelenge mu Yelushalema, mukelenge kateki bualu ebu mu mutshima wandi. Muntu webe udi mumanye ne, Nakuenza bibi; nunku, mena, nakadianjila ku mpala kua bantu bonso ba mu nsubu wa Yosefe lelu bua kusangakena ne mukelenge wanyi. Kadi Abishai, muana wa Seluya, wakakonka ne, Kabena bashiha Shimei bualu bua yeye wakahenda muntu wakela Yehowa manyi ha mutu, anyi? Davidi wakamba ne, Nuenu bana ba Seluya, nakanuenzela bualu kai bua nuenu nuikale bena lukuna kundi lelu? Nebashihe muntu mu Isalele lelu, anyi? Meme tshiena mumanye ne, Ndi mukelenge wa ku mutu kua Bena Isalele lelu, anyi? Mukelenge wakambila Shimei ne, Wewe kuena utua. Mukelenge wakaditshiha kudiye. Mefibosheta, muana wa Shaula, wakalua bua kusangakeneye ne mukelenge; yeye kakanza kulongolola makasa andi anyi kubeya muedi wandi anyi kuvuwa bilulu biandi ku dituku diakumuka mukelenge tô ne hakahinganeye talalâ. Hakafikeye ku Yelushalema bua kusangakeneye ne mukelenge, mukelenge wakamuebesha ne, Mefibosheta, kuakumuka nʼanyi bua tshinyi? Yeye wakamukudimuna ne, Mukelenge wanyi, muena mudimu wanyi wakundinga; bualu bua muntu webe wakamba ne, Nendielele tshiseba ha nyima ha nyama wa mpunda, bua meme mbande ha nyima handi, nye ne mukelenge; bualu bua muntu webe udi mulema. Ne yeye wakashiminyina muntu webe kudi mukelenge wanyi; kadi mukelenge wanyi udi bu muanjelo wa Nzambi, wenze malu adi mimpe ku mesu kuebe. Bualu bua bantu bonso ba mu nsubu wa tatu wanyi bakadi bu bantu bafue ku mesu kua mukelenge wanyi, kadi wewe wakashilaku muntu webe munkatshi mua bantu bakadi badia ku mesa ebe mene. Nunku ntshidi ne bua kudila kudi mukelenge kabidi bualu kai? Mukelenge wakamuambila ne, Utshidi ungambila bualu buebe bua tshinyi? Ndi ngamba ne, Wewe ne Siba nuabanyangane buloba. Mefibosheta wakambila mukelenge ne, Bimpe, yeye angate buloba buonso, bualu bua mukelenge wanyi wakahingana mu nsubu muandi talalâ. Bâzilai, Muena Gilada, wakafuma ku Logelima, wakasabuka Yadene ne mukelenge, bua kumusambula Yadene. Bâzilai wakadi muntu mununu, bidimu biandi biakadi makumi muanda mukulu; yeye wakadisha mukelenge hakadiye mushale ku Mahanayima, bualu bua yeye wakadi muntu mubanji be. Mukelenge wakambila Bâzilai ne, Lua, usabuka nʼanyi ne meme nenkudishe mu Yelushalema. Bâzilai wakebesha mukelenge ne, Matuku a muoyo wanyi adi bungi munyi bua meme kuya ne mukelenge ku Yelushalema? Lelu eu bidimu bianyi bidi makumi muanda mukulu; ndi mumanye mua kujingulula ne bidi bimpe ne bidi bibi, anyi? Muntu webe udi mumanye mua kulabula bintu bidiye udia ne bidiye unua, anyi? Ntshidi kabidi mua kunvua mei a balume anyi bakashi himbabo misambu, anyi? Muntu webe udi ne bua kuikala bujitu kudi mukelenge wandi bua tshinyi? Muntu webe udi musue anu bua kusabuka Yadene ne mukelenge; mukelenge udi ne bua kunfuta difutu bunene nunku bualu kai? Ndi nkusengelela ne, Witabushe bua muntu webe alukile, bua meme kufuila mu musoko wanyi, hehi ne lukita lua tatu wanyi ne mamu wanyi. Kadi tangila muntu webe Kimehama; aye biandi ne mukelenge wanyi, umuenzele budi buimpe kûdi. Mukelenge wakamba ne, Kimehama neaye nʼanyi, nemmuenzele budi buimpe kûdi; nenkuenzele tshionso tshiudi ungebesha. Bantu bonso bakasabuka Yadene, ne mukelenge wakasabuka; mukelenge wakatua ne Bâzilai mishiku, wakamuvudishila disanka; yeye wakahingana kuandi. Nunku mukelenge wakaya ku Gilegala, ne Kimehama wakaya nʼandi; Bena Yuda bonso ne tshituha tshia Bena Isalele kabidi bakalua ne mukelenge. Monai, Bena Isalele bonso bakalua kudi mukelenge, bakamuebesha ne, Bualu kai bana betu, Bena Yuda, bakakeba, bakasambula mukelenge ne bonso ba mu nsubu wandi ne bantu bonso ba Davidi dia munemu dia Yadene? Bena Yuda bonso bakakudimuna Bena Isalele dî ne, Bualu bua mukelenge udi muikulu wetu wa mu diku dietu; nudi nufuila tshiji bua bualu ebu tshinyi? Mukelenge wakatudisha tshianana, anyi? Yeye wakatuha bukenji, anyi? Bena Isalele bakakudimuna Bena Yuda dî ne, Tuetu tudi bituha dikumi bia mukelenge, nunku tudi tunuhita bungi bualu bua Davidi; nuakatulengulula bua tshinyi? Kanuakatukonka diambedi hanuakahingisha mukelenge wetu bualu kai? Kadi mei a Bena Yuda akatamba mei a Bena Isalele bukole. Muntu mubi wakadiku, dina diandi Sheba, muana wa Bikili, Muena Benyamina; yeye wakela mpungi, Wamba ne, Tuetu katuena ne tshituha kudi Davidi, katuena ne buhianyi kudi muana wa Yishai, nuenu Bena Isalele, muntu ne muntu ahingane ku ntenta wandi. Nunku Bena Isalele bonso bakalekela kulonda Davidi, bakalonda Sheba, muana wa Bikili; kadi Bena Yuda ba ku Yadene tô ne ku Yelushalema bakalamata mukelenge wabo. Davidi wakabuela mu nsubu wandi mu Yelushalema; mukelenge wakangata bakashi bahika dikumi babakibue kudiye, bakashiyeye bua kulamabo nsubu, wakabateka ha buabo, wakabadisha, kadi yeye kakaya kudibo. Bakashala ha muaba au tô ne ku dituku dia lufu luabo bu bakashi ba mu lufuila. Hashishe mukelenge wakambila Amasa ne, Umbikidile Bena Yuda bonso, badisangishe kunoko hahita matuku asatu, wewe wikaleku. Nunku Amasa wakaya kusangisha Bena Yuda; kadi yeye wakashala musangu mutambe wakamuambila mukelenge. Davidi wakambila Abishai ne, Katataka Sheba, muana wa Bikili, neatuenzele bibi bidi bihita biakatuenzela Abashaloma; wangate bantu ba mukelenge webe, umulonde, yeye kabuedi mu misoko ya ngumbu, kahanduki kutudi. Bantu ba Yoaba ne Bena Kelete ne Bena Pelete ne bena bukitu bonso bakamulonda; bakumuka mu Yelushalema bua kulonda Sheba, muana wa Bikili. Hakafikabo ku dibue dinene dia mu Gibeona, Amasa wakasangila habo. Yoaba wakadi muluate bintu biandi bia nvita, wakadi ne muele wa nvita mubuesha ha lukundu luandi mu tshibubu tshiau; hakayeye, muele wakahatuka, wakahona hanshi. Yoaba wakebesha Amasa ne, Muanʼetu, udi mukole, anyi? Yoaba wakakuata Amasa ku muedi ne tshianza tshiandi tshia balume bua kumutua mishiku. Kadi Amasa kakadimuka bua muele wakadi mu tshianza tshia Yoaba; yeye wakamutua muele mu mbale, ne mala andi akahatuka hanshi; yeye kakamutua tshiakabidi, wakafua. Yoaba ne muanʼabo Abishai bakalonda Sheba, muana wa Bikili. Umue wa bansongalume ba Yoaba, wakadi muimane ha buihi handi, wakamba ne, Muntu yonso udi musue Yoaba, udi ku luseke lua Davidi, alonde biandi Yoaba. Amasa wakadi mubunguluke mu mashi andi munkatshi mua nshila. Hakatangila nsongalume ne bantu bonso bakadi bimanaku, yeye wakumusha Amasa mu nshila, wakaya nʼandi mu mpata, wakamubuikila tshilulu; bualu bua yeye wakatangila ne muntu yonso wakafika hakadiye wakimanaku. Hakamûmusheye mu nshila, bantu bonso bakaya ne Yoaba bua kulondabo Sheba, muana wa Bikili. Sheba wakahitshila munkatshi mua bisamba bionso bia Bena Isalele tô ne ku Abele ne Bete-mâka ne kudi Bena Beli bonso; bakadisangisha hamue, bakamulonda. Bakamutshintshimikila mu Abele wa Bete-mâka; bakunguisha mushiki wa mabue ku buludiludi ne lumbu; bantu bonso bakadi ne Yoaba bakumbula kuinshi kua lumbu, bua kulushimbula. Hashishe mukashi wa lungenyi wa mu musoko, wakela dî diandi ne, Unvuai! Telejai! Ndi nnusengelela ne, Ambilai Yoaba alue kunoko bua meme kuyikila handi. Yeye wakalua ha buihi handi ne mukashi wakamuebesha ne, Wewe udi Yoaba, anyi? Yeye wakamba ne, Mmeme. Hashishe yeye wakamuambila ne, Unvua mei a muntu webe mukashi. Yeye wakamukudimuna ne, Ndi munvue. Hashishe yeye wakamuambila ne, Bantu ba kale bakadi ne lusumuinu ne, Bulelela, nebakonke lungenyi ku Abele, nunku bualu nebushike. Meme ndi wa munkatshi mua badi bakeba ditalala ne badi ne kanemu mu Isalele; wewe udi ukeba kushiha musoko ne muledi wa bana wa mu Isalele; wewe udi musue kumina buhianyi bua Yehowa bua tshinyi? Yoaba wakamukudimuna ne, Bualu ebu kabuikadi kundi bua kumina anyi bua kushiha. Bualu kabuena nunku, kadi muntu wa ku mikuna ya Efelayima, dina diandi Sheba, muana wa Bikili, wakatombokela mukelenge Davidi mene; anji kumufila mu bianza bianyi, tuetu netumuke tushiya musoko. Mukashi wakambila Yoaba ne, Mona, nebele mutu wandi kûdi ku nyima ha lumbu. Hashishe mukashi wakaha kudi bantu bonso ne lungenyi luandi. Bakakosa Sheba, muana wa Bikili, mutu, bakawela kudi Yoaba. Yeye wakela mpungi, bantu bonso bakumuka ku musoko, bakaya muntu ne muntu ku ntenta wandi. Yoaba wakahingana kudi mukelenge mu Yelushalema. Yoaba wakadi ku mutu kua masalayi onso a Bena Isalele; Benaya, muana wa Yehoyada, wakadi ku mutu kua Bena Kelete ne Bena Pelete; Adolama wakadi ku mutu kua bena mudimu; Yehoshafata, muana wa Ahiluda, wakadi mufundi wa malu a bukelenge; Sewa wakadi mufundi; Sadoka ne Ebeyatâ bakadi bakuidi; ne Ila, Muena Yaî, wakadi muakuidi ku mutu kua miloho ya Davidi. Tshiole tshiakadi ku buloba mu matuku a Davidi bidimu bisatu bilondangane; Davidi wakebesha Yehowa bualu ebu. Yehowa wakamba ne, Bualu ebu buakalua bua Shaula ne bua mashi akamatshishabo mu nsubu wandi, bualu bua wakashiha Bena Gibeona. Mukelenge wakabikila Bena Gibeona, wakayikila nʼabo. Bena Gibeona kabakadi ba mu bisamba bia Bena Isalele mene, bakadi ba mu tshisamba tshia Bena Amole; diambedi Bena Isalele bakahunga nʼabo tshihungidi, kadi Shaula wakakeba kubashiha bua lukunukunu biakadiye nʼalu kudi Bena Isalele ne Bena Yuda. Davidi wakakonka Bena Gibeona ne, Nennuenzele tshinyi? Nendengeshe nʼenu ne tshinyi bua nuenu nuvudishile buhianyi bua Yehowa disanka? Bena Gibeona bakamuambila ne, Ebu kambualu bua argent anyi or hankatshi hetu ne Shaula ne ba mu nsubu wandi; ne kambualu bua tuetu tushiheshe muntu wa Bena Isalele. Yeye wakamba ne, Tshinudi nuamba, nennuenzeletshi. Bakambila mukelenge ne, Muntu wakatushiha, wakabelela tshifufu bua kutûmusha munkatshi mua Bena Isalele, bimpe ufile bana bandi muanda mutekete mu bianza bietu, tuetu netubowe ku mesu kua Yehowa mu Gibea wa Shaula wakadi musungula kudi Yehowa. Mukelenge wakamba ne, Nembafile. Kadi mukelenge wakasungila Mefibosheta, muana wa Yonatana, muana wa Shaula, bualu bua kuditshiha kuakaditshiheye nʼaku kudi Yehowa bualu buabo, kuakadi hankatshi ha Davidi ne Yonatana, muana wa Shaula. Kadi mukelenge wakangata bana balume babidi ba Lisepa, muana mukashi wa Aya, bakaleleleye Shaula, mena abo Amoni ne Mefibosheta; ne bana balume batanu ba Melaba, muana mukashi wa Shaula, bakaleleleye Adaliele, muana wa Bâsilai, Muena Meholata; wakabafila mu bianza bia Bena Gibeona, bakabowela ku mukuna ku mesu kua Yehowa; bakahona hanshi buonso buabo muanda mutekete; bakabashiha mu matuku a kunowa, mu matuku a tshibangidilu tshia kunowa kua orge. Lisepa, muana mukashi wa Aya, wakangata tshilulu tshikayabala, wakatshibikila ha mutu ha dibue ku tshibangidilu tshia kunowa tô ne hakabalokela nvula ya mu diulu; yeye kakitabusha bua nyunyu yikilehu mu munya, anyi bua nyama ya mu tshisuku isemene ha buihi butuku. Bakambila Davidi bualu buakenza Lisepa, muana mukashi wa Aya, umue wa mu bakashi bahika babakibue kudi Shaula. Davidi wakaya, wakangata mifuba ya Shaula ne ya Yonatana muanʼandi kudi Bena Yabesha-gilada, bakayiba mu misesu ya Bete-shana kuakabowa Bena Peleshete ku dituku diakashiha Bena Peleshete Shaula mu Gileboa. Wakasaku ne mifuba ya Shaula ne ya Yonatana muanʼandi mulume; bakayisangisha ne mifuba ya bantu bakowabo. Bakajika mifuba ya Shaula ne ya Yonatana muanʼandi mu lukita lua Kishi, tatu wandi, mu Sela mu buloba bua Benyamina. Bakenza malu onso akabambila mukelenge. Ku nyima kua bualu ebu Nzambi wakasengeledibua bualu bua buloba. Bena Peleshete bakaluangana ne Bena Isalele kabidi; Davidi wakahueka ne bantu bandi bakadi nʼandi, bakaluangana ne Bena Peleshete; Davidi wakahungila. Yishebi-benoba, wakadi wa bana ba bantu bale ba nfiondo, bujitu bua difuma diandi buakadi bua nshekele ya tshiamu tshia mitaku nkama isatu; wakadi mubueshe muele wa nvita muhia-muhia ku mukaba, wakela meji bua kushiha Davidi. Kadi Abishai, muana wa Seluya, wakanusungila, wakataha Muena Peleshete, wakamushiha. Hashishe bantu ba Davidi bakaditshiha kudiye ne, Wewe kuyi nʼetu mu nvita kabidi bua wewe kujimishi muinda wa Isalele. Ku nyima kua bualu ebu bakaluangana ne Bena Peleshete mu Gobo; Sibekai, Muena Husha, wakashiha Safa, wakadi wa bana ba bantu bale ba nfiondo. Bakaluangana ne Bena Peleshete ku Gobo kabidi; Elehanana, muana wa Yâle-olezima, Muena Beteleheme, wakashiha muanʼabo ne Goleyata, Muena Giti; mutondo wa difuma diandi wakadi bu mbungu wa madiba. Bakaluangana ku Gata kabidi; muntu munene wa nfiondo wakadiku, wakadi ne minu ya nonu isambombo ku tshianza ne tshianza ne bana ba nkasa basambombo ku dikasa ne dikasa, kusangisha makumi abidi ne inai; yeye kahidi wakadi muledibue kudi bantu bale ba nfiondo. Hakahendeye Bena Isalele, Yonatana, muana wa Shimei, muanʼabo ne Davidi, wa kamushiha. Aba banai bakaledibua mu Gata kudi bantu bale ba nfiondo, bakashihibua ku bianza bia Davidi ne bia bantu bandi. Mu dituku diakasungila Yehowa Davidi mu bianza bia bantu bakadi nʼandi lukuna ne mu bianza bia Shaula kabidi, Davidi wakimbila Yehowa mei a musambu eu; yeye wakamba ne, Yehowa udi dibue dianyi, ne musoko wanyi wa lumbu, ne musungidi wanyi mene, Nzambi, dibue dianyi, nengeyemene kudiye, ngabu wanyi, ne lusengu lua luhandu luanyi, tshibumba tshianyi tshile ne tshinyemenu tshianyi, musungidi wanyi, udi usungila ku malu makole onso. Nembikile dina dia Yehowa, udi ne bua kutumbishibua, nunku nensungidibue kudi badi nʼanyi lukuna. Mavuala a lufu akungela munkatshi, bantu babi bu mai adi atuntumuka bakuntshinyisha. Nshinga ya mu Muaba wa Bafue yakunjingila, mateyi a lufu akamba kunkuata. Mu kunyingalala kuanyi nakabikila Yehowa; e, nakadila kudi Nzambi wanyi. Yeye wakunyua dî dianyi mu ntempelo wandi, muadi wanyi wakafika mu matshu andi. Hashishe buloba buakakanka, buakazakala; makunshi a diulu akanyunga, akazakishibua, bualu bua yeye wakadi ne tshiji. Muishi wakahatuka mu diulu diandi, kahia ka mukana muandi kakosha bintu; makala a kahia akatemeshibue kudiku. Yeye wakatubula diulu kabidi wakahueka hanshi; mîdima mikole yakadi munda mua makasa andi. Wakabanda ha nyima ha mukeluba, wakahahala; e, bakamutangila wenda ha mahuahua a luhehele. Yeye Wakenza midima bu ntenta wandi, mai masangisha ne matutu mafike a mu diulu. Ku dinkenka diakadi ku mpala kuandi, makala a kahia akatemeshibua Yehowa wakakunguisha mikungulu ya mu diulu, Mutambe Bunene wa mulu wakela dî diandi. Wakela mikete, yakabamuangalasha; wakahenyisha miele ya nvula, yakabatatshisha. Hashishe lusenga lua mu mai manene luakamueneka, ntakunshi a buloba akasokoloka, bualu bua kubela kua Yehowa, bua bukole bua muhuya wakahatuka mu diulu diandi. Wakolola tshianza tshiandi mu diulu, wakangata, wakankoka mu mai manene a bungi. Wakasungila kudi muena lukuna wanyi mukole, mu bianza bia bakadi bankina, bualu bua bobo bakampita bukole. Bobo bakantulukisha mu didiku dia dikenga dianyi; kadi Yehowa wakadi tshieyemenu tshianyi. Yeye wakalua nʼanyi mu muaba munene; wakasungila, bualu bua wakadi ne disanka bualu buanyi. Yehowa wakanfuta ku buimpe buanyi; wakampingishila bintu ku butoke bua bianza bianyi. Bualu bua meme nakalamata nshila ya Yehowa; tshiakenza bibi bua kusesuka kudi Nzambi wanyi. Bualu bua mikenji yandi yonso mijalame yakadi ku mpala kuanyi; tshiakasesuka ku mikenji yandi mifunda. Nakadi ne mutshima mutoke kudiye, nakadilama ku bubi buanyi. Nunku Yehowa wakanfuta ku buimpe buanyi, ne ku butoke kunakadi nʼabu ku mesu kuandi. Wewe neuleshe luse kudi badi ne luse, neuleshe mutshima mutoke kudi badi ne mutshima mutoke. Wewe neudileshe muakane kudi badi ne buakane; neuleshe mutshima mukole kudi badi ne mutshima mukole. Wewe neusungile bantu badi mu dikenga; kadi mesu ebe adi kudi badi badisue anu bua wewe kubahuekesha. Wewe Yehowa, udi muinda wanyi; Yehowa neatokeshile mîdima yanyi. Bua bualu buebe ndi mumanye mua kuihata tshisumbu tshia bantu; bua Nzambi wanyi ndi mua kutuhika lumbu. Nshila wa Nzambi udi muakane tshishiki; dî dia Yehowa didi ditetshibua; yeye udi ngabu kudi bantu bonso badi banyemena kudiye. Nganyi udi Nzambi bikaleye kayi Yehowa? Nganyi udi dibue, bikaleye kayi Nzambi wetu? Nzambi udi musoko wanyi wa lumbu; udi ulombola badi bakane mu nshila yandi. Yeye udi uvuisha makasa anyi bu makasa a ngulungu; udi unshikika ha miaba yanyi mibanda. Udi uyisha bianza bianyi mua kuluangana nvita; nunku maboko anyi adi mamanye mua kunana buta bua tshiamu tshia mitaku. Wewe wakumpa ngabu wa luhandu luebe; lutulu luebe luakunvuisha munene. Wewe wakadimusha biendedi bianyi, nunku makasa anyi kakahalamuka. Nakihata bakadi nʼanyi lukuna, nakabashiha, tshiakalukila kabidi tô ne hanakabashiha. Nakabajimisha, nakababutula, ne kabakamanya mua kubika kahidi; e, bakahona muinshi mua makasa anyi. Bualu bua wewe wakunduatshisha ne bukole bua kuluangana nʼabu; wewe wakuntekeshila bakajuka bua kunduisha. Wewe wakangelesha nyima ya bakadi nʼanyi lukuna, bua meme kushiha bakadi bankina. Bakakebulula, kadi kakuakadi wa kubasungila; bakadila kudi Yehowa, kadi yeye kakabitaba. Hashishe nakababotesha bu kasoka ka buloba, nakabadiata bu bitotshi bia mu misesu, nakabamuanga lasha. Wewe wakasungila kabidi ku matandu a bantu banyi; wakajadika bua meme kuikala ku mutu kua bisamba bia bantu; bantu bandi tshiyi mumanye nebankuatshile mudimu. Bantu ba bende nebadikokeshe kundi; hunvuabo lumu luanyi nebatumikile. Bantu ba bende nebashinguke, nebumuke mu bisokomenu biabo, bazakale. Yehowa udi ne muoyo; dibue dianyi disankishibue, Nzambi atumbishibue, dibue dia luhandu luanyi. Nzambi mene udi unsombuela, udi untekeshila bantu, udi ungumusha kudi badi nʼanyi lukuna; e, udi umbandisha ku mutu kua bantu bakajuka bua kunduisha, wewe udi usungila mu bianza bia muntu mubuluke. Nunku Yehowa, nenkusakidile munkatshi mua bisamba bionso, nengimbile dina diebe misambu ya butumbi. Yeye udi uhesha mukelenge wandi luhandu lunene, yeye udi ulesha wakeleye manyi ha mutu luse lujalame, kudi Davidi ne kudi tunkanuniuna tuandi tshiendelele. Â adi mei a kunshikidilu a Davidi: Davidi, muana wa Yishai, nyeye muntu wakabandishibua, wakedibua manyi ha mutu kudi Nzambi wa Yakoba, muimbi wa misambu mimpe wa mu Isalele, udi wamba ne, Nyuma wa Yehowa wakungakuila, dî diandi diakadi ha ludimi luanyi. Nzambi wa Isalele wakamba, dibue dia Isalele diakangambila ne, Udi ukokesha bantu ne buimpe, udi ukokesha mu ditshina dia Nzambi, neikale bu munya wa misasa habanda diba, mbu dinda didi kadiyi ne matutu kulu, hamena mashinde a lutende ha buloba, hakenka diba hakumuka nvula. Bulelela, nsubu wanyi kena nunku ku mesu kua Nzambi, kadi yeye wakahunga nʼanyi tshihungidi tshia tshiendelele, tshilongolodibue mu malu onso, ne tshijadikibue, bualu bua tshidi luhandu luanyi luoso ne disua dianyi dionso, yeye kena ubidiundisha, anyi? Kadi bantu babi bonso nebikale bu meba adibo bimasha, bualu bua kabena bamanye mua kuakuata ne tshianza. Kadi muntu udi walenga, udi ne bua kuluata biamu ne difuma, bobo neboshibue ne kahia mu muaba wabo. Â adi mena a bena nvita ba bukitu bakadi nʼabo Davidi: Yoshebashebeta, Muena Takemona, wakadi ku mutu kua tupitene tuonso; dina diandi dikuabo Adino, Muena Esene, wakela bantu nkama muanda mukulu difuma diandi, wakabashiha tshikondo tshimue. Eleazâ, muana wa Dodai, Muena Ahoa, wakamulonda, umue wa bena bukitu basatu bakadi nʼabo Davidi, hakafuna Bena Peleshete bulobo bakadi badisangisha bua kuluangana nvita, hakumuka Bena Isalele; yeye wakajuka, wakashiha Bena Peleshete tô ne bakateketa diboko diandi, ne tshianza tshiandi tshiakala mata tshilabi tshia muele wandi wa nvita: Yehowa wakabayuisha luhandu lunene dituku adi; bantu bakalonda ku nyima kuandi anu bua kuhaula bintu. Shama, muana wa Age, Muena Halala, wakamulonda. Bena Peleshete bakadisangisha mu tshisumbu mu budimi bua nkunde; bantu bakanyema Bena Peleshete. Kadi yeye wakimana munkatshi mua budimi, wakabusungila, wakashiha Bena Peleshete; Yehowa wakabayuisha luhandu lunene. Bantu basatu bakuabo ba munkatshi mua bena bukitu makumi asatu bakaya kudi Davidi hakadiye mu lubuebue lua Adulama mu tshikondo tshia kunowa; Bena Peleshete bakasa tshitudilu tshiabo mu tshibanda tshia Lefayima. Ku tshikondo atshi Davidi wakadi mu musoko wa lumbu, ne masalayi Bena Peleshete akadi mu Beteleheme. Mutshima wa Davidi wakamusamina bua mai a kunua; wakamba ne, Bampeku mai a kunua a dî mu dina dia mu Beteleheme, didi ha buihi ne tshibi! Bena bukitu basatu bakahita munkatshi mua ma salayi a Bena Peleshete, bakasuna mai mu dina dia mu Beteleheme diakadi ha buihi ne tshibi, bakalua nʼau kudi Davidi. Yeye wakabenga bua kunueye mai a, kadi wakâhongolola ku mesu kua Yehowa. Yeye wakamba ne, Yehowa, bualu ebu kabuikadi kundi, bua meme kuenza nunku: ndi mua kunua mashi a bantu bakamba kujimisha mioyo yabo, anyi? Nunku yeye wakabenga kuanua, A mmalu akenza bena bukitu basatu. Abishai, muanʼabo ne Yoaba muana wa Seluya, wakadi ku mutu kua bantu basatu. Yeye wakela bantu nkama isatu difuma diandi, wakabashiha; nunku wakadi ne dina dinene munkatshi mua aba basatu, Yeye kakadi ne dina dia butumbi munkatshi mua aba makumi asatu, anyi? Nunku bakamusungula kapitene kabo; kadi yeye kakadi wa mu mulongo wa basatu ba ku mpala. Benaya, muana wa Yehoyada, muana wa muena bukitu wa mu Kabesele, Wakenza biandi malu manene, wakashiha bana balume babidi ba Aliele wa mu Moaba. Yeye wakahueka kabidi, wakashiha nyama wa ntambue mu lubuebue mu tshikondo tshia neige. Yeye wakashiha Muena Ejipitu, wakadi muena bukitu; Muena Ejipitu wakadi ne difuma mu tshianza tshiandi; kadi Benaya wakaya kudiye ne mulangala, wakanyenga difuma dia Muena Ejipitu mu tshianza tshiandi, wakamushiha ne difuma diandi mene. A mmalu akenza Benaya, muana wa Yehoyada, ne wakadi ne dina dinene munkatshi mua bantu basatu ba bukitu. Yeye wakahita bantu aba makumi asatu butumbi, kadi yeye kakadi wa mu mulongo wa basatu ba ku mpala. Davidi wakamuteka ku mutu kua balami bandi. Asahele, muanʼabo ne Yoaba, wakadi wa bantu aba makumi asatu; ne Elehanana, muana wa Dodo, wa mu Beteleheme, Shama, Muena Haloda, ne Elika, Muena Haloda, Helese, Muena Palati, ne Ila, muana wa Ikeshe, Muena Tekoa, Abiesê, Muena Anatota, ne Mebunai, Muena Husha, Salemona, Muena Ahoa, ne Mahalai, Muena Netofa, Helebe, muana wa Bana, Muena Nefota, ne Itai, muana wa Libai wa mu Gibea wa Bena Benyamina, Benaya, Muena Pilatona, ne Hidai wakafuma ku tusulu tua mu Gâsha, Abi-alabona, Muena Âba, ne Asemaweta, Muena Bâhuma, Eliaba, Muena Shâlebona, bana ba Yashena, Yonatana, Shama, Muena Halala, ne Ahiyama, muana wa Shala, Muena Alala, Elifelete, muana wa Ahasabai, muana wa Mâka, ne Eliyama, muana wa Ahitofele, Muena Gilona, ne Heselo Muena Kâmele, ne Pâlai, Muena Âba, Igala, muana wa Natana wa mu Soba, ne Bani, Muena Gada, ne Seleke, Muena Amona, ne Nahalai, Muena Bêlota, batuadi ba ngabu wa Yoaba, muana wa Seluya, ne Ha, Muena Yitela, ne Galeba, Muena Yitela, ne Uliya, Muena Hiti: buonso buabo bakadi bantu makumi asatu ne muanda mutekete. Tshiji tshia Yehowa tshiakatemena Bena Isalele kabidi, wakenzesha Davidi bualu buabo, wamba ne, Ya, bala bungi bua Bena Isalele ne bua Bena Yuda. Mukelenge wakambila Yoaba, kapitene ka masalayi andi, wakadi nʼandi ne, Wendakane munkatshi mua bisamba bionso bia Bena Isalele, ku Dana tô ne ku Bê-sheba, ubale bantu, bua meme kumanya bungi buabo. Yoaba wakambila mukelenge ne, Yehowa, Nzambi webe, akumbashe bantu bu mudiye musue, nansha misangu lukama lukama, mesu a mukelenge wanyi atangile bualu ebu; kadi mukelenge wanyi udi ukeba disanka ku bualu ebu bua tshinyi? Kadi dî dia mukelenge diakahita mei a Yoaba ne tupitene tua masalayi bukole. Yoaba ne tupitene tua masalayi bakumuka ku mesu kua mukelenge bua kubalabo bungi bua Bena Isalele. Bakasabuka Yadene, bakasa tshitudilu tshiabo ku Aloê, ku luseke lua tshianza tshia balume tshia musoko tshiakadi munkatshi mua tshibanda tshia Gada mu nshila wa ku Yasê. Hashishe bakafika ku Gilada mu buloba bua Tatima-hodeshi; bakafika ku Dana-yana, bakahitshila mu buloba bua Sidona; bakafika ku musoko wa lumbu wa Tulo, ne ku misoko yonso ya Bena Hiwi ne ya Bena Kanâna; bakanyunguluka ku luseke lua Sude lua Yuda tô ne ku Bê-sheba. Nunku hakendakanabo ku buloba buonso, bakalua ku Yelushalema hakahita ngondo tshitema ne matuku makumi abidi. Yoaba wakamanyisha mukelenge bungi bua bantu: bena bukitu bakadi batuale miele ya nvita ba mu Bena Isalele bakadi bantu binunu nkama muanda mukulu, ne ba mu Bena Yuda bakadi bantu binunu nkama itanu. Hakabala Davidi bantu, mutshima wandi wakamuhisha. Davidi wakambila Yehowa ne, Nakenza bubi mu bualu ebu bunakenza; kadi Yehowa, ndi nkusengelela ne, Ubuikile bubi bua muntu webe, bualu bua nakenza bualu buhote. Bakabika Davidi ne dinda dionso, dî dia Yehowa diakalua kudiye kudi muprofete wandi Gada, mumonyi wa malu wa Davidî, ne, Ya, wambile Davidi ne, Yehowa udi wamba ne, Ndi nteka malu asatu ku mpala kuebe, udisunguile bumue buau bûdi musue meme kukuenzelabu. Nunku Gada wakafika kudi Davidi, wakamuambila malu au, wakamukonka ne, Udi musue batume bidimu bia tshiole muanda mutekete mu buloba buebe? Anyi udi musue kunyema ku mesu kua badi nʼebe lukuna tô ngondo isatu? Anyi udi musue batume disama dikole mu buloba buebe tô matuku asatu? Ela meji, ungambile tshindi mua kuitaba kudi wakuntuma kûdi. Davidi wakambila Gada ne, Ndi munkatshi mua malu manene: tuhone mu bianza bia Yehowa, bualu bua luse luandi ludi lunene; tshihonyi mu bianza bia bantu. Nunku Yehowa wakatumina Bena Isalele disama dikole dinda adi tô ne bakafika tshikondo tshiakasunguleye; bantu bakafua ku Dana tô ne ku Bê-sheba bakadi binunu makumi muanda mutekete. Hakamba muanjelo kuolola tshianza tshiandi ku Yelushalema bua kubutula, Yehowa wakakudimuna dî diandi, wakambila muanjelo wakadi ushiha bantu ne, Bualu abu buakukumbana; katataka kandisha tshianza tshiebe. Muanjelo wa Yehowa wakadi hehi ne tshishihuidi tshia Alauna, Muena Yebuse. Hakatangila Davidi muanjelo wakadi ushiha bantu, yeye wakambila Yehowa ne, Mona, nakenza bibi, nakenza bualu buhote; kadi mikoko ei yakenza tshinyi? Ndi nkusengelela ne, Tshianza tshiebe tshikale kundi ne ku tshiota tshia tatu wanyi. Dituku adi Gada wakalua kudi Davidi, wakamuambila ne, Ya, washile Yehowa tshioshelu ku tshishihuidi tshia Alauna, Muena Yebuse. Davidi wakabanda bu mu dî dia Gada diakamba Yehowa. Alauna wakabanduluka, wakatangila mukelenge ne bantu bandi balue kudiye; Alauna wakaluhuka, wakatua mpala wandi hanshi ku mesu kua mukelenge. Alauna wakakonka ne, Mukelenge wanyi wakalua kudi muntu wandi bua tshinyi? Davidi wakamba ne, Bua kusumba tshishihuidi tshiebe, ne bua kuashilaku Yehowa tshioshelu, bua disama edi dishike munkatshi mua bantu. Alauna wakambila Davidi ne, Mukelenge wanyi angate bintu bionso bidiye musue, abifile bu mulambu; tangila ngombe ya kuosha ha kahia kayiyi; wangate bintu bidibo bahehula nʼabi ne bikokedi bia ngombe bua nkunyi: Alauna neahe mukelenge bintu ebi bionso. Alauna wakambila mukelenge kabidi ne, Yehowa, Nzambi webe, akuitabushe. Mukelenge wakambila Alauna ne, Nansha, nengule bintu ebi kûdi ku mushinga; tshiena nfila mulambu wa kuosha ha kahia kudi Yehowa, Nzambi wanyi, milangala hatuhu. Nunku Davidi wakula tshishihuidi ne ngombe ku nshekele ya argent makumi atanu. Davidi wakashilaku Yehowa tshioshelu, wakafilahu milambu ya kuosha ha kahia ne milambu ya kuvuisha nʼai ditalala. Yehowa wakasengeledibua nunku bua buloba, ne disama diakashika munkatshi mua Bena Isalele. Mukelenge Davidi wakadi muntu mununu, mukoke wa bidimu bia bungi; bakamubikila ne bilulu bia bungi, kadi yeye kakunyua luya. Nunku bantu bandi bakamuambila ne, Bakebele mukelenge wanyi nsongakashi utshidi kamama, imane biandi ku mesu kua mukelenge, akukube, alale mu tshiadi tshiebe bua mukelenge wanyi unvue luya. Bakakebakeba nsongakashi mulengele ku matshika onso a buloba bua Isalele; bakasangana Abishaga, Muena Shunama, bakalua nʼandi kudi mukelenge. Nsongakashi eu wakadi mulengele be; yeye wakakuba mukelenge, wakamuenzela mudimu; kadi mukelenge kakamumanya. Hashishe Adoniya, muana wa Hagita, wakadibandisha, wamba ne, Meme nengikale mukelenge: yeye wakadilongoluela makalu ne badi benda ha tubalu ne bantu makumi atanu bua kunyemabo ku mpala kuandi. Tatu wandi kakanza kumufikisha munda tô matuku andi onso bua kumukonka ne, Wewe wakuenza nunku bua tshinyi? Yeye wakadi muntu mulengele, wakaledibua ku nyima kua Abashaloma. Yeye wakahunga dî ne Yoaba, muana wa Seluya, ne Ebeyatâ muakuidi; bobo bakalonda Adoniya, bakanutatshisha. Kadi Sadoka, muakuidi mukuabo, ne Benaya, muana wa Yehoyada, ne Natana muprofete, ne Shimei ne Lei, ne bena bukitu ba Davidi kabakalamata Adoniya. Adoniya wakashihela Nzambi mikoko ne ngombe ne bana ba ngombe ba manyi hehi ne dibue dia mu Soheleta, didi ku luseke lua Ene-logela; yeye wakabikilaku bana babo bonso, bana ba balume ba mukelenge, ne Bena Yuda bonso ne bantu ba mukelenge; kadi yeye kakabikila Natana muprofete, ne Benaya ne bena bukitu ne muanʼabo Solomo. Hashishe Natana wakambila Betasheba, mamu wa Solomo, ne, Kuakunvua lumu ne, Adoniya, muana wa Hagita, udi ukokesha, ne mukelenge wetu Davidi kena mumanye bualu ebu, anyi? Nunku lua biebe kundi, ndi nkusengelela, bua meme kukuha lungenyi lua mua kusungila muoyo webe ne muoyo wa muanʼebe Solomo. Ya biebe kudi mukelenge Davidi, umuambile ne, Mukelenge wanyi, wewe kuakuditshiha kudi muntu webe mukashi ne, Muanʼebe Solomo neakokeshe bantu ku nyima kuanyi bulelela, ne yeye neashikame mu nkuasa wanyi wa bukelenge, anyi? Munyi mudi Adoniya ukokesha bantu? Mona, hautshidi wakulaku ne mukelenge, meme kabidi nembuelemu ku nyima kuebe ne nenjadike mei ebe. Betasheba wakaya muakadi mukelenge mu nsubu wa bulalu: mukelenge wakadi muntu mununu be, ne Abishaga, Muena Shunama, wakadi ukuatshika mukelenge mudimu. Betasheba wakatua mpala wandi hanshi, wakakukuila mukelenge. Mukelenge wakamuebesha ne, Wewe udi ukeba tshinyi? Yeye wakamukudimuna ne, Mukelenge wanyi wakaditshiha kudi muntu wandi mukashi ku mpala kua Yehowa, Nzambi webe, ne, Bulelela, Solomo, muanʼebe wa balume, neakokeshe bantu ku nyima kuanyi, ne yeye neashikame mu nkuasa wanyi wa bukelenge. Kadi katataka, mona, Adoniya udi ukokesha, ne wewe, mukelenge wanyi, kuena mumanye bualu ebu; yeye wakushihela Nzambi ngombe ne bana ba ngombe ba manyi ne mikoko ya bungi; wakabikila bana ba balume bonso ba mukelenge, ne Ebeyatâ muakuidi, ne Yoaba, kapitene ka masalayi; kadi yeye kukubikila muntu webe Solomo. Katataka, mukelenge wanyi, mesu a Bena Isalele bonso adi kûdi bua wewe kubambila washikama mu nkuasa wa mukelenge wanyi ku nyima kuandi. Biwabenga kuenza nunku, hashishe, halala mukelenge wanyi tulu ne bankambua bandi, nebatubale meme ne muanʼanyi Solomo bu bantu badi balenduisha bakuabo. Mona, hakadiye uyikila ne mukelenge nunku, Natana muprofete wakabuela. Bakambila mukelenge ne, Ka Natana muprofete au. Hakabueleye kudi mukelenge, yeye wakatua mpala wandi hanshi ku mesu kuandi. Natana wakambila mukelenge ne, Wewe, mukelenge wanyi, wakuamba ne, Adoniya neakokeshe ku nyima kuanyi, neashikame mu nkuasa wanyi wa bukelenge, anyi? Bualu bua yeye wakuhuka lelu, wakushihela Nzambi ngombe ne bana ba ngombe ba manyi ne mikoko ya bungi, wakuhaula bana ba balume bonso ba mukelenge, ne tupitene tua masalayi andi, ne Ebeyatâ muakuidi. Katataka mona, badiadia, banuanua ku mpala kuandi bamba ne, Mukelenge Adoniya ikale ne muoyo musangu mule! Kadi meme mene, muntu webe, ne Sadoka muakuidi mukuabo, ne Benaya, muana wa Yehoyada, ne muntu webe Solomo, kakatubikila. Bualu ebu buakuenjibua kudi mukelenge wanyi, ne wewe kuena muanze kumanyisha bantu bebe washikama mu nkuasa wa mukelenge wanyi ku nyima kuandi, anyi? Hashishe mukelenge Davidi wakamba ne, Umbikidile Betasheba. Yeye wakasemena ha buihi ne mukelenge, wakimana ku mpala kua mukelenge. Mukelenge wakaditshiha ne, Bu mudi Yehowa ne muoyo, wakuhikula muoyo wanyi mu makenga onso, bulelela, bu munakuditshiha kûdi ku mpala kua Yehowa, Nzambi wa Isalele, ne, Bulelela, Solomo muanʼebe neakokeshe ku nyima kuanyi, neashikame mu nkuasa wanyi wa bukelenge, nunku nengenze bualu ebu lelu. Hashishe Betasheba wakatua mpala wandi hanshi, wakakukuila mukelenge, wamba ne, Mukelenge wanyi Davidi, ikale ne muoyo tshiendelele! Mukelenge Davidi wakamba ne, Umbikidile Sadoka muakuidi, ne Natana muprofete, ne Benaya, muana wa Yehoyada. Bakalua kudi mukelenge. Mukelenge wakabambila ne, Angatai bantu ba mukelenge wenu, nuendeshe Solomo, muanʼanyi, ha nyima ha mpunda wanyi mene, nuye nʼandi ku Gihona. Sadoka muakuidi ne Natana muprofete bamueleku manyi ha mutu bua kumubuesha mu bukelenge ku mutu kua Bena Isalele; elai mpungi, nuambe ne, Mukelenge Solomo ikale ne muoyo tshiendelele! Hashishe, nulonde ku nyima kuandi, ne yeye nealue, neashikame mu nkuasa wanyi wa bukelenge, bualu bua yeye neikale mukelenge mu muaba wanyi: nakamusungula mukelenge ku mutu kua Bena Isalele ne kua Bena Yuda. Benaya, muana wa Yehoyada, wakakudimuna mukelenge ne, Amen. Yehowa, Nzambi wa mukelenge wanyi, ambe biandi nunku kabidi. Bu muakadi Yehowa ne mukelenge wanyi, ikale kabidi ne Solomo bua nkuasa wandi wa bukelenge ahite wa mukelenge Davidi bunene. Nunku Sadoka muakuidi, ne Natana muprofete, ne Benaya, muana wa Yehoyada, ne Bena Kelete ne Bena Pelete bakaya, bakabandisha Solomo ha nyima ha mpunda wa mukelenge Davidi, bakaya nʼandi ku Gihona. Sadoka muakuidi wakangata lusengu lua manyi lua mu Ntenta, wakela manyi ha mutu ha Solomo. Bakela mpungi; bantu bonso bakamba ne, Mukelenge Solomo ikale ne muoyo tshiendelele! Bantu bonso bakalonda ku nyima kuandi: bonso bakadi bela nshiba, bakasanka ne disanka ditamba bunene; buloba buakahandika bua mbila yabo. Adoniya ne bantu bonso bakadi nʼandi bakunvua mbila ku ndekelu kua kudia. Hakunvua Yoaba mei a mpungi, wakamba ne, Ahu diyoyo dinene didi ku musoko ndia tshinyi? Hakatshidiye wakula nunku, Yonatana, muana wa Ebeyatâ muakuidi, wakafika kudibo; Adoniya wakamuambila ne, Buela biebe, bualu bua wewe udi muena kalolo, udi ulua ne lumu luimpe. Yonatana wakambila Adoniya ne, Bulelela, mukelenge wetu Davidi wakusungila Solomo mukelenge: mukelenge wakatuma Sadoka muakuidi, ne Natana muprofete, ne Benaya, muana wa Yehoyada, ne Bena Kelete ne Bena Pelete, bakaya nʼandi, bakamubandisha ha nyima ha mpunda wa mukelenge; Sadoka muakuidi, ne Natana muprofete, bakumana kumuela manyi ha mutu mu Gihona, bua kuikaleye mukelenge; bakumana kufumaku ne disanka dinene nunku musoko udi mule tente ne tshianga. Adi ndiyoyo dinuakunvua. Solomo kabidi udi ushikama mu nkuasa wa bukelenge. Bualu bukuabo kabidi, bantu ba mukelenge bakatua bua kuvudishilabo mukelenge wetu Davidi disanka, bamba ne, Nzambi webe avuishe dina dia Solomo ditambe dina diebe bunene, ne nkuasa wandi wa bukelenge atambe webe bunene. Mukelenge wakakudimana ha bulalu buandi. Mukelenge wakamba kabidi ne, Nunku disanka dinene dikale kudi Yehowa, Nzambi wa Isalele, wakumpa umue bua kushikameye mu nkuasa wanyi wa bukelenge lelu, mesu anyi atangile bualu ebu. Bantu bonso bakadi ne Adoniya bakatshina, bakabika, bakaya muntu nshila wandi muntu nshila wandi. Adoniya wakatshina bualu bua Solomo; wakajuka, wakaya, wakakuata ku nsengu ya ku tshishihelu. Bakambila Solomo ne, Monaku, Adoniya udi utamba kutshina mukelenge Solomo, bualu bua yeye wakukuata ku nsengu ya ku tshishihelu wamba ne, Mukelenge Solomo adianjile kuditshiha kundi ne, Tshiena nshiha muntu wanyi ku muele wa nvita. Solomo wakamba ne, Bienzeye malu a kalolo, lusuki lumue lua ku mutu kuandi kaluena luhona hanshi; kadi bikaleye ne malu mabi munda muandi, neafue. Nunku mukelenge Solomo wakatuma bantu, bakalua nʼandi ku tshishihelu. Yeye wakalua, wakakukuila mukelenge Solomo. Solomo wakamuambila ne, Ya ku nsubu kuebe. Matuku a Davidi akasemena ha buihi bua yeye afue; yeye wakadimusha muanʼandi Solomo, wamba ne, Nyaya mu nshila udi ba ha buloba bonso baya: nunku wikale ne bukole, udivuishe mulume wa bushuwa. Utumikile mei a Yehowa, Nzambi webe, bua kuenda mu nshila yandi, ne bua kulamata mikenji yandi ne mei andi onso ne mikandu yandi ne mianda yandi yonso bu mudibi bifunda mu mikanda ya Mose, bua wewe wikale ne diakalengele mu malu onso audi wenza, ne mu nshila yonso ludi wenda; bua Yehowa kujadikeye di diandi diakangambileye ne, Bikala bana bebe badimuke mu nshila yabo, benda ku mpala kuanyi mu bulelela ne mitshima yabo yonso ne mioyo yabo yonso, hashishe, wewe kuena uhanga muntu wa kushikama mu nkuasa wa bukelenge wa Isalele tshiendelele. Bualu bukuabo kabidi, udi mumanye buakangenzela Yoaba, muana wa Seluya, ne bu muakenzeleye tupitene tubidi tua masalayi a Isalele, Abinê, muana wa Nê, ne Amasa, muana wa Yetê, bakashiheye: nunku wakamatshisha mashi a nvita hatuakadi ne ditalala, wakalaba mashi a nvita ku mukaba wakadi mu tshifuka tshiandi ne ku bisabata biakadi ku makasa andi. Wenze bu mudi lungenyi luebe; kuitabushi bua mutu wandi udi ne nsuki mitoke tô ubuele mu Muaba wa Bafue ne ditalala. Kadi uleshe bana balume ba Bâzilai, Muena Gilada, luse: bobo bikale munkatshi mua badi badia ku mesa ebe; bualu bua bobo bakankuatshisha hanakanyema ku mpala kua muanʼenu Abashaloma. Bualu bukuabo, Shimei, muana wa Gela, udi nʼebe kabidi, Muena Benyamina wa mu Bahulima, wakampenda ne bihendu bibi mu dituku dinakafuma ku Mahanayima, udi nʼebe; yeye wakalua kusangakena nʼanyi ku Yadene; nakaditshiha kudiye ku mesu kua Yehowa ne, Tshiena nkushiha ne muele wa nvita. Kadi kumubadi bu muntu udi kayi ne bualu, bualu bua wewe udi muena lungenyi; neumanye bualu bûdi nʼabu mbua kumuenzela: wewe neutume mutu wandi udi ne nsuki mitoke tô mu Muaba wa Bafue ne mashi. Davidi wakalala tulu ne bankambua bandi, bakamujika mu musoko wa Davidi. Matuku onso akakokesha Davidi Bena Isalele akadi bidimu makumi anai: wakakokesha mu Hebelone bidimu muanda mutekete; wakakokesha mu Yelushalema bidimu makumi asatu ne bisatu. Solomo wakashikama mu nkuasa wa bukelenge wa Davidi, tatu wandi; bukelenge buandi buakajadikibua bikole. Hashishe Adoniya, muana wa Hagita, wakalua kudi Betasheba, mamu wa Solomo. Yeye wakamuebesha ne, Wewe ulualua ne ditalala, anyi? Yeye wakamukudimuna ne, Ditalala didiku. Yeye wakamba kabidi ne, Ndi ne bualu bua kukuambila. Wakamuambila ne, Ambaku. Yeye wakamuambila ne, Wewe udi mumanye ne, Bukelenge ebu buakadi buanyi, ne Bena Isalele bonso bakateka mesu abo kundi bua meme kubakokesha; kadi bukelenge buakukudimuka mpindiu buakulua bua muanʼetu, bualu bua Yehowa wakamuhabu. Katataka ndi nkulomba anu bualu bumue, kumbengi nansha. Yeye wakamuambila ne, Ambaku. Yeye wakamuambila ne, Ndi nkusengelela ne, Ungakuile kudi mukelenge Solomo (bualu bua yeye kena ubenga dî diebe) bua yeye ampe Abishaga, Muena Shunema, ikale mukashi wanyi. Betasheba wakamuambila ne, Kakuena bualu, ne nku akuhe kudi mukelenge. Nunku Betasheba wakaya kudi mukelenge Solomo bua kumuambila bualu bua Adoniya. Mukelenge wakajuka bua kusangakeneye nʼandi, wakatua mpala wandi hanshi ku mesu kuandi, wakashikama mu nkuasa wa bukelenge kabidi; wakamba dî bua kutekelabo mamu wa mukelenge nkuasa wa bukelenge mukuabo, wakashikama ku tshianza tshiandi tshia balume. Hashishe yeye wakamba ne, Ndi ne bualu bukese bua kukukonka, kububengi nansha. Mukelenge wakamuambila ne, Ambaku, mamu wanyi, tshiena mbenga dî diebe nansha. Yeye wakamuambila ne, Fila Abishaga, Muena Shunama, kudi Adoniya muanʼenu bu mukashi wandi. Mukelenge Solomo wakakudimuna mamu wandi ne, Udi ulombela Adoniya Abishaga, Muena Shunama, bua tshinyi? Biakane umulombele bukelenge kabidi, bualu bua yeye udi mukulu wanyi: umulombele ne Ebeyatâ muakuidi, ne Yoaba, muana wa Seluya. Hashishe mukelenge Solomo wakaditshiha kudi Yehowa Wamba ne, Nzambi angenzele malu adiye musue, bikala Adoniya kayi muambe dî edi bua kuhisha nʼadi muoyo wandi. Nunku bu mudi Yehowa ne muoyo, wakunjadika, wakunshikika mu nkuasa wa bukelenge wa tatu wanyi Davidi, wakungenzela nsubu wanyi bu muakandayeye, bulelela, Adoniya neafue biandi lelu. Mukelenge Solomo wakatuma Benaya, muana wa Yehoyada, wakamuhonesha ne yeye wakafua. Mukelenge wakambila Ebeyatâ muakuidi ne, Hingane ku Anatota ku madimi ebe bualu bua udi ne bualu bua kufua: tshiena nkushiha katataka, bualu bua wewe waka tua la mushete wa Mukelenge Yehowa ku mpala kua Davidi, tatu wanyi, ne bualu bua wewe wakakenga ne tatu wanyi mu makenga onso akadiye nʼau. Nunku Solomo wakumusha Ebeyatâ mu buakuidi bua Yehowa, bua kushikisheye dî diakamba Yehowa bua nsubu wa Eli mu Shilo. Lumu luakafika kudi Yoaba; bualu bua Yoaba wakalonda Adoniya, kadi yeye kakalonda Abashaloma. Yoaba wakanyemena mu Ntenta wa Yehowa, wakakuata ku nsengu ya tshishihelu. Bakambila mukelenge Solomo ne, Yoaba udi munyemene mu Ntenta wa Yehowa, udi wimana ku tshishihelu. Hashishe Solomo wakatuma Benaya, muana wa Yehoyada, ne, Ya umushihe. Benaya wakafika ku Ntenta wa Yehowa, wakamuambila ne, Mukelenge udi wamba ne, Hatuka. Yeye wakamba ne, Nansha, nenfuile kunoko. Benaya wakahingana kudi mukelenge, wakamuambila ne, Yoaba wakungambila mei nunku. Mukelenge wakamuambila ne, Umuenzele bu muakuambeye, umushihe, umujike: bua wewe kumusha mashi akamatshisha Yoaba hanshi hatuhu kundi ne ku nsubu wa tatu wanyi. Yehowa neahingishe mashi andi ha mutu nʼandi, bualu bua yeye wakashiha bantu babidi bakadi bamuhita yeye buakane; yeye wakabashiha ne muele wa nvita; tatu wanyi Davidi kakamanya bualu ebu; mena abo akadi Abinê, muana wa Nê, kapitene ka masalayi a Bena Isalele, ne Amasa, muana wa Yetê, kapitene ka masalayi a Bena Yuda. Nunku mashi abo ikale ha mutu ha Yoaba ne ha mitu ha bana bandi tshiendelele; kadi ditalala didi difuma kudi Yehowa dikale kudi Davidi ne kudi bana bandi ne ku nsubu wandi ne ku nkuasa wandi wa bukelenge tshiendelele. Hashishe Benaya, muana wa Yehoyada, wakaya, wakamuhonesha, wakamushiha; wakajikibua mu nsubu muandi wa mu tshihela. Mukelenge wakahingisha Benaya, muana wa Yehoyada, mu muaba wa Yoaba ha mutu ha masalayi; mukelenge wakahingisha Sadoka muakuidi mu muaba wa Ebeyatâ kabidi. Mukelenge wakatuma dî bua kubikila Shimei, wakamuambila ne, Asa nsubu webe mu Yelushalema, ushikamemu, kuhatuki bua kuya kuntu nansha. Bualu bua dituku diudi uhatuka usabuka kasulu ka Kidelona, umanye biebe ne, Wewe neufue bulelela: mashi ebe neikale ha mutu hebe. Shimei wakambila mukelenge ne, Dî diwakuamba ndimpe: muntu webe nênze bu muakamba mukelenge wandi. Shimei wakashikama mu Yelushalema matuku a bungi. Hakahita bidimu bisatu, bantu babidi ba Shimei bakanyemena kudi Akisha, muana wa Mâka, mukelenge wa mu Gata. Bakambila Shimei ne, Mona, bantu bebe badi mu Gata. Shimei wakajuka, wakela tshiseba ha nyima ha mpunda, wakaya kudi Akisha mu Gata bua kukebeye bantu bandi; Shimei wakaya ku Gata, wakahingana ne bantu bandi. Bakambila Solomo ne, Shimei wakumuka mu Yelushalema, wakaya ku Gata, wakahingana kabidi. Mukelenge wakatuma dî bua kubikila Shimei, wakamuambila ne, Tshiakakutshihisha kudi Yehowa, tshiakakuambila dî dikole ne, Dituku diudi Umuka bua kuendakana ha bule, wewe neufue bulelela, anyi? Wewe wakitaba ne, Dî dinakunvua ndimpe. Nunku wewe wakashiha kuditshiha kua kudi Yehowa, ne mukandu unakakuambila bua tshinyi? Mukelenge wakambila Shimei kabidi ne, Wewe udi mumanye malu mabi onso adi masokome mu mutshima webe awakenzela Davidi, tatu wanyi: nunku Yehowa neakudimune bubi buebe ha mutu hebe. Kadi mukelenge Solomo neavudishibue disanka, ne nkuasa wa bukelenge wa Davidi neajadikibue ku mesu kua Yehowa tshiendelele. Nunku mukelenge wakela dî kudi Benaya, muana wa Yehoyada; yeye wakaya, wakamushiha, wakafua. Nunku bukelenge buakajadikibua mu bianza bia Solomo. Solomo wakahunga tshihungidi ne Palô, mukelenge wa Ejipitu, wakangata muana mukashi wa Palô, wakalua nʼandi ku musoko wa Davidi tô ne hakashikisheye kuibaka nsubu wandi ne nsubu wa Yehowa ne lumbu luakadi lunyunguluka Yelushalema. Anu bualu bumue, bantu bakatshidi bashihela Nzambi nyama ha mutu ha mikuna, bualu bua nsubu wa dina dia Yehowa kakanza kubakibua matuku au. Solomo wakananga Yehowa, wakenda mu mikenji ya Davidi tatu wandi; kadi anu bualu bumue, yeye wakashiha nyama, wakosha musenga wa manananshi ha mutu ha mikuna. Mukelenge wakaya ku Gibeona bua kushalaku nyama, bua muaba au wakadi muaba munene. Solomo wakafilaku tshinunu tshia milambu ya kuosha ha tshioshelu atshi. Mu Gibeona Yehowa wakamueneka kudi Solomo mu tshilota butuku; Nzambi wakamuambila ne, Ulombe tshindi mua kukuha. Solomo wakamba ne, Wewe wakalesha muntu webe Davidi, tatu wanyi, luse lunene lujalame, bu muakendeye ku mesu kuebe mu bushuwa ne buakane ne mu butoke bua mutshima kûdi; wewe wakumulamina luse elu lunene lujalame bualu bua wewe wakamuha muana mulume bua kushikameye mu nkuasa wandi wa bukelenge: bualu ebu buakuenjibua lelu. Katataka, Yehowa, Nzambi wanyi, wewe wakavuisha muntu webe mukelenge mu muaba wa tatu wanyi Davidi; ndi anu bu muana mutekete, tshiena mumanye mua kuluhuka ne mua kubuela. Muntu webe udi munkatshi mua bantu bebe bawakusungula: badi bantu banene, kabena mua kubadibua bualu bua bungi buabo. Uhe muntu webe mutshima wa lungenyi bua kulumbuluila nʼau bantu bebe ne bua meme kumanya mua kujingulula hankatshi ha malu mimpe ne malu mabi: bualu bua udi mua kulumbuluila bantu bebe banene nganyi? Mei au akasankisha Yehowa, bualu bua Solomo wakalomba anu bualu ebu. Nzambi wakamuambila ne, Bualu hua wewe wakuamba bualu ebu; kuakudilombela matuku a bungi, kuakudilombela bubanji, nansha mioyo ya badi nʼebe lukuna; kadi wakudilombela lungenyi lua kulumbulula nʼalu; ka nakenza bu mudi dî diebe: nakukuha mutshima muakane wa lungenyi, nunku kakuakadi muntu bu wewe diambedi ne mukuabo kena ulonda ku nyima kuebe bu wewe. Nakukuha kabidi tshiwakadi kuyi mutambe: bubanji ne butumbi; nunku munkatshi mua hakelenge kamuena muikale mukuabo bu wewe matuku ebe onso. Biwenda mu nshila yanyi, biwatumikila mei anyi ne mikenji yanyi bu muakenda tatu webe Davidi, nenkuleheshile matuku ebe a bungi. Solomo wakatabala, mona, buakadi tshilota. Wakahingana ku Yelushalema, wakimana ku mpala kua mushete wa tshihungidi tshia mei a Yehowa, wakafilaku milambu ya kuosha ha kahia, ne milambu ya kuvuisha nʼai ditalala; wakalambishila bantu bandi bonso bidia bia disanka. Hashishe, bakashi babidi ba masandi bakalua kudi mukelenge, bakimana ku mpala kuandi. Mukashi mukuabo wakamba ne, Mukelenge, meme ne mukashi eu tudi bashikame mu nsubu umue; hatuakadi nʼandi mu nsubu nakalela muana. Hakahita matuku asatu, meme mumane kulela, mukashi eu wakalela muana kabidi; anu tuetu babidi bakadi mu nsubu, nansha muntu mukuabo wakadi nʼetu. Muana wa mukashi eu wakafua butuku, bualu bua yeye wakamuikila. Yeye wakabika mundankulu, wakangata muana wanyi wakadi mulale ha buihi nʼanyi, hakadi muntu webe mulale tulu, wakamuladika mu tshiadi; wakaladika muana wandi mufue mu tshiadi tshianyi. Hanakabika dinda dionso bua kuamusha muana wanyi mabele, nakamumona mufue; kadi hanakamutangila bilengele dinda adi, yeye kakadi muana wanyi unakalela. Kadi mukashi mukuabo wakabenga ne, Nansha, muana udi ne muoyo mmuana wanyi, ne muana eu udi mufue mmuana webe. Eu wakamba ne, To, muana mufue mmuana webe, ne udi ne muoyo mmuana wanyi. Bakamba nunku ku mpala kua mukelenge. Hashishe mukelenge wakamba ne, Umue wenu udi wamba ne, Eu mmuana wanyi udi ne muoyo, ne muana webe ngudi mufue; ne mukuabo udi ubenga ne, Nansha, muana webe udi mufue ne muana wanyi ngudi ne muoyo. Mukelenge wakamba ne, Nuntuadile muele wa nvita. Bakalua ne muele wa nvita kudi mukelenge. Mukelenge wakamba ne, Bakose muana udi ne muoyo bituha bibidi, baheshe mukashi umue tshituha tshimue ne mukuabo tshituha tshikuabo. Hashishe mukashi, muledi wa muana wakatshidi ne muoyo, bualu bua mutshima wandi wakadi wela majie a muana wandi, wakambila mukelenge ne, Mukelenge wanyi, umuhe yeye muana udi ne muoyo, kabamushihi nansha. Kadi mukuabo wakabenga ne, Nansha, muana kikadi nansha webe nansha wanyi, bamukose anu bituha. Hashishe mukelenge wakandamuna ne, Bahe mukashi wa ku mpala muana udi ne muoyo, kabanushihi, bualu bua yeye udi muledi wandi. Bena Isalele bonso bakunvua lumu lua kulumbulula kua mukelenge kuakalumbululeye nʼaku, bakatamba kutshina mukelenge, bakajingulula ne, Yeye udi ne lungenyi lua Nzambi munda muandi lua kulumbululeye nʼalu. Solomo wakadi mukelenge ku mutu kua Bena Isalele bonso. Aba mbakuatshishi bakadiye nʼabo. Azaya, muana wa Sadoka, muakuidi; Eleholefe ne Ahiya, bana ba Shisha, bakadi ba-secrétaire; Yehoshafata, muana wa Ahiluda, wakadi mufundi; Benaya, muana wa Yehoyada, wakadi ku mutu kua masalayi; Sadoka ne Ebeyatâ bakadi bakuidi; Azaya, muana wa Natana, wakadi ku mutu kua tuhita tuandi; Zabuda, muana wa Natana, wakadi muloho wandi manene, mulunda wa mukelenge; Alusha wakadi ku mutu kua nsubu wandi; Adonilama, muana wa Abeda, wakadi kahita ka bena mudimu. Solomo wakadi ne tuhita dikumi ne tubidi tuakadi ku mutu kua Bena Isalele bonso, tuakalongolola bia kudia biandi ne nsubu wandi; kahita ne kahita kakadi ne bualu bua kulongolola bia kudia ngondo umue ku tshidimu ku tshidimu. Au mmena atu: Bene-hû, wa ku mikuna va Efelayima; Bene-dekê, wa ku Makasa ne ku Shâlabima ne ku Bete-shemeshe ne ku Elona-bete-hanana; Bene-hesede, wa mu Alubota; (ne wa mu Soko ne buloba bua Hefê); Bene-abinadaba, wa ku mikuna ya Dô; (Tafata, muana wa Solomo, wakadi mukashi wandi); Bana, muana wa Alihuda wa mu Tanaka ne mu Megido ne mu buloba buonso bua Bete-sheana budi ku luseke lua Saletana muinshi mua Yizelele ku Bete-sheana ne Abele-mehola tô ne ku Yokenama; Bene-gebê, wa mu Lamota-gilada, (wakadi ne misoko ya Yaî, muana wa Manashe, idi mu Gilada; ne buloba bua Âgoba bua mu Bashana, misoko makumi asambombo yakadi ne ngumbu ne bibi bia tshiamu tshia mitaku); Abinadaba, muana wa Ido wa mu Mahanayima; Ahimasa, wa mu Nafatale; (Basemata, muana wa Solomo, wakadi mukashi wandi); Bana, muana wa Hushai, wa mu Ashê ne Bealota; Yehoshafata, muana wa Palua, wa mu Yisakâ; Shimei, muana wa Ela, wa mu Benyamina; Gebê, muana wa Uli, wa mu buloba bua Gilada, buloba bua Sihona, mukelenge wa Bena Amole, ne bua Oga, mukelenge wa Bashana; anu yeye wakadi kahita kamue mu buloba abu. Bena Yuda ne Bena Isalele bakadi bungi bua nsenga ya ku muelelu wa mai manene; badiadia, banuanua, basankasanka. Solomo wakakokesha makelenge onso ku musulu wa Pelata to ne ku buloba bua Bena Peleshete ne ku matshika a buloba bua Ejipitu; bakamulambula milambu, bakakuatshila Solomo mudimu tô matuku andi onso. Bia kudia bia Solomo bia dituku dimue biakadi nunku: bihiminu bia bukula bua blé makumi asatu, ne bua manvua makumi asambombo, ne ngombe ya manyi dikumi, ne ngombe ya mu madimi makumi abidi, ne lukama lua mikoko ha mutu ha ngulungu ne tubuluku ne ntole ne nyunyu ya manyi. Bualu bua yeye wakakokesha bantu bonso dishiya dia munemu dia musulu wa Pelata ku Tifesa tô ne ku Gaza; wakadi ku mutu kua bakelenge bonso ba dishiya dia munemu dia musulu wa Pelata; yeye wakadi ne ditalala ku nseke yonso yakadi nunyunguluke. Bena Yuda ne Bena Isalele bonso bakashikama talalâ, muntu ne muntu muinshi mua muonshi wandi wa tumuma tukese ne mua mutshi wandi wa nfigi, ku Dana tô ne ku Bê-sheba, matuku onso a Solomo. Solomo wakadi ne nsubu ya tubalu tua makalu andi binunu makumi anai, ne bantu bakenda ha nyima ha tubalu binunu dikumi ne bibidi. Tuhita atu tuakalongoluela Solomo ne bantu bonso bakadi badia ku mesa a mukelenge Solomo bia kudia, muntu mu ngondo wandi muntu mu ngondo wandi; kabakahanga tshintu tshimue nansha. Bakalua ne orge ne mashinde bia kudisha nʼabi tubalu: muntu ne muntu bu muakadiye mutuale bujitu buandi. Nzambi wakaha Solomo ngenyi ya bungi be ne dijingulula ditambe ne bunene bua mutshima, biakadi bungi bua nsenga ya ku muelelu wa mai manene. Lungenyi lua Solomo luakahita lungenyi lua bantu bonso ba ku esete ne lungenyi luonso lua Bena Ejipitu. Wakahita bantu bonso lungenyi: wakahita Etenana, Muena Ezele, ne Hemana ne Kalakola ne Dâda, bana ba balume ba Mahola, lungenyi luakane; butumbi buandi buakamuangalaka bisamba bionso. Yeye wakela nsumuinu binunu bisatu; misambu yandi yakadi tshinunu tshimue ne itanu. Wakajingulula malu onso a mitshi yonso, ku mutshi wa cèdre wakadi ku mukuna wa Lebanona to ne mitshi ya hisopa yakadi misase tshimanu tshia nsubu; wakamba kabidi malu onso a nyama ne nyunyu ne bintu bidi bidikoka hanshi ne a minyinyi ya mu mai. Ba mu bisamba bionso bakalua bua kunvua meji a Solomo; ba mu banfumu ba buloba, hakunvuabo lumu lua meji andi, bakulua. Hilama, mukelenge wa Tulo, wakatuma bantu bandi kudi Solomo; bualu bua yeye wakunyua lumu ne, Bakamuela manyi bua kumubuesha mu bukelenge mu muaba wa tatu wandi; bualu bua Hilama wakananga Davidi matuku andi onso. Solomo wakatumina kulama dî ne, Wewe udi mumanye ne, Tatu wanyi Davidi kakamanya mua kuasa nsubu bua dina dia Yehowa, Nzambi wandi, bualu bua nvita yakadiye nʼai ku nseke yonso tô ne hakateka Yehowa buonso buai muinshi mua makasa anai. Kadi katataka Yehowa, Nzambi wanyi, wakumpa dikisha ku nseke yonso; kakuena muena lukuna, kakuena bualu bubi. Mpindiu ndi ntekemena kuashila dina ma Yehowa, Nzambi wanyi, nsubu bu muakambila Yehowa Davidi tatu wanyi ne, Muana webe undi nshikika mu nkuasa webe wa bukelenge mu muaba webe, neibakile dina dianyi nsubu. Nunku wewe wambile bantu bebe mukenji bua bobo bankosele mitshi ya cèdre ya mu Lebanona; bantu banyi nebakuatshile bantu bebe, nenfile bantu bebe difutu diudi wamba, bualu bua wewe udi mumanye ne, Kakuena bantu munkatshi muetu badi bamanye mua kukosa mitshi bu Bena Sidona. Hakunvua Hilama mei a Solomo yeye wakatamba kusanka, wakamba ne, Yehowa wakaha Davidi muana wa lungenyi makane bua kukokesheye bantu bandi banene, atumbishibue lelu. Hilama wakatumina Solomo dî ne, Nakunvua dî diwakuntumina, nengenze malu onso awakuamba bua mitshi ya cèdre ne ya cyprès. Bantu banyi nebahueke nʼai ku Lebanona tô ne ku mai manene, nenyisuikishe mu bisumbu, bua kuya nʼai ha mai manene tô ne ku muaba ûdi unsunguila; neyisuludibueku ne wewe neuyangate; wewe nenshikishe bualu bundi musue hawadisha ba mu nsubu wanyi bia kudia. Nunku Hilama wakaha Solomo mitshi ya cèdre ne ya cyprès bu muakasueye muonso. Solomo wakaha Hilama bihiminu bia blé binunu makumi abidi ne bihanza bia manyi makumi abidi bia kudisha nʼabi ba mu nsubu wandi; Solomo wakaha Hilama bintu abi nunku ku tshidimu ku tshidimu. Yehowa wakaha Solomo lungenyi bu muakamulayeye; ditalala diakadi hankatshi ha Hilama ne Solomo, bubidi buabo bakahunga tshihungidi. Mukelenge Solomo wakela mukenji munkatshi mua Bena Isalele bonso: mukenji wakadi bua kumukebela bena mudimu binunu makumi asatu. Wakabatuma ku Lebanona, binunu dikumi bia bantu ku ngondo ku ngondo, bakashala ku Lebanona ngondo umue, ne kuabo ngondo ibidi. Adonilama wakadi ku mutu kua bena mudimu. Solomo wakadi ne batuadi ba majitu binunu makumi muanda mutekete; bakadi bakosa mitshi ku mikuna bakadi binunu makumi muanda mukulu; ku mutu kua bantu aba bonso kuakadi tuhita tua bena mudimu ba Solomo binunu bisatu ne nkama isatu. Mukelenge wakela dî diandi, bakalua ne mabue manene a mushinga mukole, bakasa makunshi a nsubu ne mabue musonga. Bibaki ba Solomo ne ba Hilama ne Bena Gebala bakasonga, bakalongolola mabaya ne mabue a kuibaka nʼau nsubu. Hakahita bidimu nkama inai ne makumi muanda mukulu ku nyima kua dihatuka dia Bena Isalele mu buloba bua Ejipitu, mu tshidimu tshinai tshia bukokeshi bua Solomo ha mutu ha Bena Isalele, mu ngondo wa Ziwa, udi ngondo muibidi, yeye wakabanga kuibaka nsubu wa Yehowa. Bunene bua nsubu wakibakila mukelenge Solomo Yehowa buakadi ne bule bua coudées makumi asambombo, butshiama buandi buakadi coudées makumi abidi, bute buandi bua mulu buakadi coudées makumi asatu. Bule bua mbalanda wakadi ku mpala kua nsubu buakadi coudées makumi abidi bu butshiama bua nsubu; butshiama buandi buakadi coudées dikumi. Wakenza bibi bia ha masoso a nsubu ne tubaya tutshiamakane. Wakasa nsubu milungakashe mu lumbu luakadi lunyunguluke ntempelo ne muaba wa tshijila kabidi; wakenza nsubu ku nseke yonso. Butshiama bua nsubu yakadi kuinshi buakadi coudées itanu, butshiama bua nsubu yakadi hankatshi buakadi coudées isambombo, butshiama bua nsubu yakadi ha mutu buakadi coudées muanda mutekete; wakenza mbalanda minyunguluke bimanu bionso bia nsubu bua makunshi kamueneki mu bimanu bia nsubu. Nsubu wakibakibua ne mabue akasongabo ku muaba wakadi mabue; nunku kabakunvua mikumu ya marteau anyi tshisui anyi tshiamu tshikuabo mu nsubu hakatshidibo bibaka nsubu. Tshibuelelu tshia ku nsubu ya munkatshi tshiakadi ku tshianza tshia balume; bakasa tshibandilu tshikonyangala ku nsubu wa hanshi, tshiakaya ku nsubu ya kulu; tshibandilu tshikuabo tshikonyangala tshiakaya ku nsubu ya ha mutu. Bakibaka nsubu nunku, bakamumana; bakateka mikamba minene ne mabaya a cèdre ku tshisasa tshia nsubu. Bakalungakasha nsubu mukuabo ha mutu, bule buandi bua mulu buakadi coudées itanu; bakateka mabaya a cèdre ku musaka wa nsubu. Dî dia Yehowa diakalua kudi Solomo ne, Bua nsubu eu ûdi wibaka, biwenda mu nshila yanyi, biwenza mei anyi, biwatumikila mikenji yanyi yonso, nunku nenjadike dî dianyi kûdi, diakambila Davidi, tatu webe. Nenshikame munkatshi mua Bena Isalele, tshiena ndekela bantu banyi, Bena Isalele. Nunku Solomo wakibaka nsubu, wakamumana. Wakateka mabaya a cèdre ku bimanu bionso bia munda mua nsubu hanshi tô ne ku mutu; wakabibuikila munda ne mabaya a mitshi; wakabuikila hanshi ha tshiendedi ne mabaya a cyprès. Kuinshi kua nsubu wakenzaku nsubu mukuabo ne mabaya a cèdre, bunene buandi buakadi coudées makumi abidi: wakenza nsubu eu wa muaba wa tshijila. Bule bua nsubu eu buakadi coudées makumi anai. Munda mua nsubu muakadi mabaya a cèdre masonga ne maoshi ne bilongo, onso akadi a cèdre, nansha dibue dimue diakamueneka ku mesu. Wakalongolola muaba wa tshijila munda mua nsubu, bua kutekamu mushete wa tshihungidi tshia mei a Yehowa. Bule bua muaba eu buakadi coudées makumi abidi, butshiama buau buakadi coudées makumi abidi, ne bule buau bua mulu buakadi coudées makumi abidi: wakateka tshiamu tshia or ku nseke yonso; wakateka mabaya a cèdre ha nyima ha tshioshelu kabidi. Nunku Solomo wakateka tshiamu tshia or ku nseke yonso munda mua nsubu, wakateka nkanu ya or ku mpala kua muaba wa tshijila; wakateka tshiamu tshia or ha nyima hatshi. Wakateka tshiamu tshia or ku nseke yonso munda mua nsubu; wakateka tshiamu tshia or ha nyima ha tshioshelu tshionso tshiakadi mu muaba wa tshijila. Mu muaba wa tshijila wakenza bakeluba babidi ne mitshi ya olive, bule buabo bua mulu buakadi coudées dikumi. Bule bua mahuahua abo buakadi coudées itanu: ku lusongo lua dihuahua dimue tô ne dinga kuakadi coudées dikumi. Bule bua mukeluba mukuabo buakadi coudées dikumi: bakeluba aba babidi bakadi bunene bumue, ne mushindu umue. Bule bua mukeluba umue buakadi coudées dikumi, ne bule bua mukuabo buakadi muomumue. Wakateka bakeluba munda mua muaba eu: mahuahua a bakeluba akadi malehe, nunku lusongo lua dihuahua dimue diakalua ku tshimanu tshimue tshia nsubu, ne dinga diakatua ku tshimanu tshikuabo: nsongo ya mahuahua abo akatuangana munda mua nsubu. Wakalamika tshiamu tshia or hamʼbidi ha bakeluba bonso. Bakasonga bakeluba ne mabue a ngashi ne bilongo ku bimanu bionso bia nsubu munda ne ha nyima. Bakalamika tshiamu tshia or hanshi munda mua nsubu ne ha mbelu. Bakenza bibi bia mitshi ya olive ku mbelu kua muaba wa tshijila; biluwa bia ku mbelu biakadi bunene bua tshituha tshitanu tshia tshimanu tshia nsubu. Bakenza bibi bibidi bia mitshi ya olive, bakabisonga ne bakeluba ne mabue a ngashi ne bilongo, bakalamika tshiamu tshia or ha nyima habi bionso; bakalamika or ha bakeluba ne ha mabue a ngashi kabidi. Bakenza biluwa bia ku mbelu kua ntempelo ku mitshi ya olive; bunene buabi buakadi bu tshituha tshinai tshia tshimanu tshia nsubu; bakenza bibi bibidi bia mitshi ya cyprès; bakenza tshibi tshimue ne mabaya abidi ne tshikuabo ne mabaya abidi. Bakasongahu bakeluba ne mabue a ngashi ne bilongo; bakalamika tshiamu tshia or ha mutu habi. Bakenza tshiendedi munda mua nsubu, bakatshienza ne mabue masonga ne mitshi ya cèdre. Bakajadika makunshi a nsubu wa Yehowa mu tshidimu tshinai tshia bukelenge, mu ngondo wa Ziwa. Bakamana nsubu mu tshidimu tshia dikumi ne tshimue tshia bukelenge, mu ngondo wa Bula, udi ngondo wa muanda mukulu. Nunku bakamana nsubu mu bidimu muanda mutekete. Solomo wakibaka nsubu wandi; hakaleha bidimu dikumi ne bisatu, wakamana nsubu wandi mujima. Wakibaka nsubu ne mitshi ya ku Lebanona; bule buandi buakadi coudées lukama, ne butshiama buandi buakadi coudées makumi atanu, ne bule buandi bua mulu buakadi coudées makumi asatu; wakadi ne milongo inai ya makunshi a mitshi ya cèdre, ne mikamba ya mitshi ya cèdre ha mutu ha makunshi. Bakalamika mabaya a cèdre ha mutu ha makunshi makumi anai ne atanu: dikumi ne atanu ku mulongo ne ku mulongo. Wakadi ne biluwa bia bibi bia ha masoso a nsubu mu milongo isatu, masoso adi matangilangane mu milongo isatu. Bibi bionso ne biluwa bionso biakadi bunene bumue; ne bibi bia ha masoso biakatangilangana mu milongo isatu. Bakenza mbalanda ne makunshi: bule buandi buakadi coudées makumi atanu, butshiama buandi buakadi coudées makumi asatu; mbalanda wakadi ku mpala kuabi, makunshi ne mushiku wa mbelu biakadi ku mpala kuabi. Wakateka nkuasa wa bukelenge mu nsubu wakadi mu mbalanda, wakamulongolola bua tshilumbuluidi; wakateka mabaya a cèdre ku nseke yonso, kulu ne hanshi. Nsubu wakadiye mushikame, nsubu mukuabo wa mu mbalanda, wakadi muasa muomumue. Solomo wakibakila muana mukashi wa Palô, wakangateye bu mukashi wandi, nsubu mukuabo bu mbalanda eu. Bakibaka nsubu ei yonso ne mabue a mushinga mukole; bakayidikisha ne luidi; bakayilonda ne scies; bakenza mabue onso nunku ku makunshi a nsubu tô ne ku mutu, ne akakasha hanshi ku tshiendedi tshinene. Mabue a makunshi akadi manene a mushinga mukole, bunene bua makuabo buakadi coudées dikumi, ne bua makuabo buakadi coudées muanda mukulu. Mabue a mushinga mukole masonga ku luidi ne mitshi ya cèdre biakadi ha mutu hau. Tshiendedi tshinene tshiakadi ne milongo ya mabue masonga isatu ne mulongo umue wa mitshi ya cèdre; bu tshiendedi tshia munda mua nsubu wa Yehowa ne mbalanda wa nsubu kabidi. Mukelenge Solomo wakatuma bantu, bakatua ne Hilama ku musoko wa Tulo. Yeye wakadi muana wa mukashi wa mu lufuila wa mu tshisamba tshia Nafatale, ne tatu wandi wakadi Muena Tulo, mutudi wa tshiamu tshia mitaku; wakadi nsenda wa lungenyi lule lua kuenza mudimu wa tshiamu tshia mitaku. Yeye wakalua kudi mukelenge Solomo, wakamuenzela mudimu wandi wonso. Wakenza makunshi mazole a tshiamu tshia mitaku, bule buau bua mulu buakadi coudées dikumi ne muanda mukulu; dibulungu dia tshibumba diakadi coudées dikumi ne ibidi. Wakenza bibuiku bia tshiamu tshia mitaku biakafulabo bibidi bia kuteka ha mutu ha makunshi; bule bua mulu bua tshibuiku tshimue buakadi coudées itanu, ne bule bua mulu bua tshikuabo buakadi coudées itanu. Wakajingila nkanu mifindakasha ne miluka ya kulengesha nʼai bibuiku biakadi ku mutu wa makunshi, nkanu muanda mutekete ku tshibuiku tshimue, nkanu muanda mutekete ku tshibuiku tshikuabo, Wakenza makunshi nunku: wakateka nkanu ei mu milongo ibidi bua kulengesha nʼai bibuiku biakadi ku mutu wa makunshi; Wakenza tshibuiku tshikuabo diatshimue. Bibuiku biakadi ha mutu ha makunshi ku mbalanda biakadi ne bilongo bisongahu biakadi coudées inai. Bakenza bibuiku bikuabo ku mutu kua bibumba bia makunshi; bakenzahu mamuma a grenades nkama ibidi mu milongo minyunguluke tshibuiku tshikuabo. Wakajadika makunshi au ku mbalanda wa ntempelo; wakajadika dikunshi dia ku tshianza tshia balume, wakadidika dina ne, Yakina; wakajadika dikuabo dia ku tshianza tshia bakashi, wakadidika dina ne, Boaza. Bakasonga bilongo ku mitu ya makunshi; nunku mudimu wonso wakashiha. Wakenza tshiowelu tshia tshiamu tshiakafulabo bu tshijengu, bunene buatshi buakadi coudées dikumi, ne bule buatshi bua mulu buakadi coudées itanu; bulungu buatshi buakadi coudées makumi asatu. Bakenza bifuanyikishi bia maoshi muinshi mua mubangu wa tshiowelu, makumi abidi ku coudée ne ku coudée: maoshi akadi mu milongo ibidi hakahongololabo tshiowelu. Bakatshiteka ha nyima ha bifuanyikishi bia ngombe dikumi ne ibidi; bisatu biakadi bitangila ku node, ne bisatu biakadi bitangila ku wesete, ne bisatu biakadi bitangila ku Sude, ne bisatu biakadi bitangila ku esete: tshiowelu tshiakadi ha nyima habi ne miongo yabi yakadi muinshi muatshi. Muhimbu watshi wakadi bu ntanta wa tshianza, wakadi mulengeshibue ne bilongo bu ku mishiku ya dikoho; tshiowelu tshiakamanya mua kûla tente ne bihiminu binunu bibidi. Wakenza bitekelu bia biowelu bia tshiamu tshia mitaku dikumi: bule bua tshitekelu tshimue buakadi coudées inai, ne butshiama buatshi buakadi coudées inai, ne bule buatshi bua mulu buakadi coudées isatu. Bakalongolola bitekelu nunku: bakatahulula bitekelu nseke: nseke ei yakadi hankatshi ha mubangu wa ku mutu ne mubangu wa kuinshi; bakenza bifuanyikishi bia nyama ya ntambue ne bia ngombe ne bia bakeluba ha mutu ha nseke yonso; bakenza mibangu diatshimue; bakenza bisumbu bia bilongo bilembelela muinshi mua nyama ya ntambue ne ngombe. Bakenza makalu a tshiamu tshia mitaku anai ne milonda ya tshiamu tshia mitaku ku tshitekelu ne ku tshitekelu; bakenza bituadilu binai biakadi muinshi mua biowelu ne tshiamu tshiakafulabo, bakabilengesha ne bilongo. Bakenza disoso munda mua tshibuiku ne tshibuiku, bunene buadi buakadi coudée umue; bakalengesha ha nyima ha disoso edi bu muakenzabo bitekelu tô ne ku coudée umue ne tshituha; bakasonga bilongo ku mishiku yadi, bakaditahulula nseke inai, kabiakadi tshijengu. Bakateka makalu anai muinshi mua nseke ei: milonda ya makalu yakadi mikuate mu bitekelu; bule bua mulu bua dikalu ne dikalu buakadi coudée umue ne tshituha. Bakenza makalu au bu mudibo benza makalu a nvita: bakafula milonda yau ne biamu bia nkata ne tulonda tuau ne tshielelu tshia tukanu. Bakadi ne bikuatshilu binai ku matamba anai a tshitekelu tshionso. Bikuatshilu ne tshitekelu biakadi tshintu tshimue. Bakenza lukanu mu mutu mua tshitekelu, bunene bualu buakadi tshituha tshia coudée; mibangu ne ku mpenge biakakuatakana ku lukanu elu. Bakasonga ha nseke ei yonso bakeluba ne nyama ya ntambue ne mabue a ngashi bu mudi muaba wabi ne bisumbu bia bilongo. Bakenza bitekelu ebi dikumi diatshimue: bakafula tshitekelu ne tshitekelu anu ne tshiamu tshijima; buonso buabi biakadi ne luidi lumue ne tshinfuanyi tshimue. Bakenza biowelu bia tshiamu tshia mitaku dikumi: tshiowelu tshimue tshiakadi mua kûla tente ne bihiminu makumi anai; bunene bua tshiowelu ne tshiowelu buakadi coudées inai; bakateka tshiowelu ha mutu ha bitekelu ebi dikumi. Bakateka bitekelu bitanu ku tshianza tshia balume tshia luseke lua nsubu ne bitanu ku tshianza tshia bakashi tshia luseke lua nsubu, bakateka tshiowelu tshinene ku tshianza tshia balume tshia luseke lua nsubu, ku luseke lua ku sude-esete. Hilama Wakenza biowelu ne nkasu ne bihanza. Nunku Hilama wakamana mudimu wonso wakenzeleye mukelenge Solomo mu nsubu wa Yehowa: makunshi au abidi, ne bibuiku biakadi ha mutu hau, ne bilongo biakalengesheye nʼabi bibuiku biakadi ha mutu ha makunshi; ne mamuma a grenades nkama inai, bu luakasongabo milongo ya grenades ibidi ku tshibuiku ne ku tshibuiku biakadi ha mutu ha makunshi; ne bitekelu ebi dikumi ne biowelu ebi dikumi biakadi ha bitekelu; ne tshiowelu atshi tshinene, ne bifuanyikishi bia ngombe dikumi ne ibidi biakadi muinshi muatshi: Bivuadi ne nkasu ne bihanza: bintu ebi bionso biakenzela Hilama mukelenge Solomo mu nsubu wa Yehowa biakadi bia tshiamu tshia mitaku. Mukelenge wakafudila biamu ebi bionso mu maloba a dime a mu mpata wa Yadene, hankatshi ha Sukota ne Saletana. Solomo kakidikisha majitu a biamu ebi bionso, bualu bua biakatamba bungi, nunku kabakamanya bujitu bua tshiamu tshia mitaku tshinonoka. Solomo Wakenza bintu bionso biakatekeye mu nsubu wa Yehowa wakenza tshioshelu ne tshiamu tshia or, ne mesa a or a kutekahu mampa; ne bitekelu bia minda biakadi bia or, bitanu ku tshianza tshia balume ne bitanu ku tshianza tshia bakashi ku mpala kua muaba wa tshijila, ne bilongo ne minda ne nkuatu biakadi bia or; makoho ne lukuatu lua kujima nʼalu minda, ne bihanza ne nkutu ne malonga a kutekamu kahia biakadi bia or; ne biamu bia bibi bionso bia mu nsubu ne bia ku muaba mutambe wa tshijila biakadi bia or. Nunku mudimu wakenza mukelenge Solomo mu nsubu wa Yehowa wakashikishibua. Solomo wakalua ne bintu bionso biakajidila tatu wandi Davidi Nzambi, bintu bia argent ne bia or ne malonga onso, wakabiteka mu bibu tshilu bia mu nsubu wa Yehowa. Solomo wakasangisha bakulu bonso ba mu Isalele, ne bonso bakadi ku mutu kua bisamba biabo, ne tuhita tuakadi ku mutu kua nsubu ya Bena Isalele, kudi mukelenge Solomo mu Yelushalema, bua kuluabo ne mushete wa tshihungidi tshia mei a Yehowa mu musoko wa Davidi, Siona mene. Bena Isalele bonso bakadisangisha kudi mukelenge Solomo bua kudiabo bidia bia disanka mu ngondo wa Etanima udi ngondo wa muanda mutekete. Bakulu bonso ba mu Isalele bakalua ne bakuidi bakambula mushete. Bakalua ne mushete wa Yehowa ne ntenta wa kusambakena ne bintu bia tshijila bionso biakadi mu Ntenta; bakuidi ne Bena Lewi bakatuala bintu ebi bionso. Mukelenge Solomo ne Bena Isalele bonso bakadi badisangisha kudiye bakadi nʼandi ku mpala kua mushete, bakadi bashihela mikoko ne ngombe yakadibo kabayi mua kubala bungi buai. Bakuidi bakalua ne mushete wa tshihungidi tshia mei a Yehowa mu muaba wau wa tshijila wa mu nsubu, ku muaba mutambe wa tshijila muinshi mua mahuahua a bakeluba. Bualu bua bakeluba bakadi bolola mahuahua abo mu muaba muakadi mushete; bakeluba bakabuikila mushete ne mitshi yau. Mitshi ei yakatamba bule, nunku bakamanya mua kuntangila mu muaba wa tshijila; kadi kabakamanya mua kuntangila ha bule; idiku tô ne ku dituku edi. Nansha tshintu tshikuabo tshiakadi mu mushete eu anu mabue abidi akadi ne mikenji mifundahu akatekamu Mose ku Holeba kuakahunga Yehowa tshihungidi ne Bena Isalele hakumukabo mu buloba bua Ejipitu. Hakumuka bakuidi mu muaba wa tshijila, ditutu diakûsha nsubu wa Yehowa tente, nunku bakuidi kabakamanya mua kuenza midimu yabo bualu bua ditutu edi; bualu bua butumbi bua Yehowa buakûsha nsubu wa Yehowa tente. Hashishe Solomo wakamba ne, Yehowa wakamba ne, Meme nenshikame mu mîdima mikole. Meme nakakuashila nsubu bua wewe wikale ne muaba wa kushikama tshiendelele. Mukelenge wakatshungulula mpala wandi, wakavudishila Bena Isalele bonso disanka; Bena Isalele bonso bakimana. Yeye wakamba ne, Yehowa, Nzambi wa Isalele, atumbishibue, wakambila tatu wanyi Davidi mukana muandi, bualu buakamana tshianza tshiandi lelu ne, Katshia ngumuka ne bantu banyi Bena Isalele mu Ejipitu, tshiakasungula musoko munkatshi mua bisamba bia Bena Isalele wa kuasamu nsubu, bua dina dianyi dikalemu; kadi nakasungula Davidi bua kuikaleye ku mutu kua bantu banyi Bena Isalele. Davidi tatu wanyi wakadi wela meji mu mutshima wandi bua kuashileye dina dia Yehowa, Nzambi wa Isalele, nsubu. Kadi Yehowa wakambila Davidi tatu wanyi ne, Wewe wakenza bimpe hawakela meji mu mutshima webe bua kuashila dina dianyi nsubu; kadi wewe kuena mua kungashila nsubu; kadi muana webe mulume udi uluhuka munda muebe, yeye neashale dina dianyi nsubu. Yehowa wakamana kujadika dî diandi diakambeye: bualu bua meme nakahingana mu muaba wa tatu wanyi Davidi bua kushikama mu nkuasa wa bukelenge wa Isalele bu muakatulaya Yehowa; nakamana kuashila dina dia Yehowa, Nzambi wa Isalele, nsubu. Nakalongoluela mushete muaba, mudi tshihungidi tshia Yehowa tshiakahungeye ne bankambua betu hakumukeye nʼabo mu buloba bua Ejipitu. Solomo wakimana ku mpala kua tshioshelu tshia Yehowa ku mesu kua Bena Isalele bonso, wakolola bianza biandi kulu, wakamba ne, Yehowa, Nzambi wa Isalele, kakuena nzambi mukuabo bu wewe mu diulu anyi hanshi ha buloba: utu wamana bihungidi ne luse lujalame kudi bantu bebe badi benda ku mpala kuebe ne mitshima yabo yonso; wakajadika ne muntu webe Davidi tatu wanyi mulayi uwakamulaya; bulelela, wewe udi wamba bualu mukana muebe, utu wabumana ne tshianza tshiebe, bu muwakuenza lelu eu. Ka, Yehowa, Nzambi wa Isalele, ujadike ne muntu webe Davidi tatu wanyi mulayi uwakamuha ne, Wewe kuena uhanga muntu wa kushikameye ku mesu kuanyi mu nkuasa wa bukelenge wa Isalele; bikala bana bebe badimuke mu nshila yabo ku mpala kuanyi bua kuendabo bu muwakuenda ku mpala kuanyi. Nunku Nzambi wa Isalele, ndi nkusengelela ne, Jadika dî diebe diwakambila muntu webe Davidi tatu wanyi. Kadi Nzambi neitabushe bua kuikaleye ha buloba, anyi? Monai, diulu ne diulu ditamba mulu kaena makukumbane, ka nsubu eu unakukuashila neikale muhite bukese! Kadi Yehowa, Nzambi wanyi, teleja matshu ebe ku mei ne ku kutendelela bia muntu webe bua kunvua kudila ne kutendekena kua muntu webe kudiye utendekena nʼaku lelu; bua mesu ebe ikale matabale ku nsubu eu munya ne butuku ku muaba eu uwakamba ne, Dina dianyi nedikaleku; bua kunvua kulomba kua muntu webe kudiye ulomba mu muaba eu. Unvua kutendekena kua muntu webe ne kua bantu bebe Bena Isalele hadibo balomba mu muaba eu; ubunvuile mu diulu mu muaba webe ûdi mushikame; ne hau-nvua, utubuikidile mibi yetu. Bienzela muntu mukuandi bibi, ne biamukuata bualu bua kuditshiheye nʼabu, biabueleye mu nsubu webe bua kuditshiheye ku tshioshelu tshiebe, unvue biebe mu diulu bua kulumbuluila bantu bebe; uhishe muntu mubi bua kuhingisha bualu buandi ha mutu nʼandi; uhingishe muntu udi kayi ne bualu, bua kumuhita ku buimpe buandi. Biahita bena lukuna bantu bebe Bena Isalele bukole bualu bua bobo bakukuenzela bibi, biakudimunabo mitshima yabo kûdi bua kuitabusha dina diebe ne bua kukutendelela ne bua kukutendekena mu nsubu eu, ubunvuile mu diulu, ubuikidile bantu bebe Bena Isalele mibi yabo, ubahingishe kabidi mu buloba buwakuha bankambua babo. Hawakanda diulu bua nvula kayimatshi, bualu bua bobo bakukuenzela bibi; biatendelelabo ku muaba eu, bitabushabo dina diebe, biakudimunabo mitshima yabo bua mibi yabo hawabakengesha, ubunvuile mu diulu, ubuikidile bantu bebe, Bena Isalele, mibi yabo hawabalesha nshila muimpe udibo ne bualu bua kuendela; nunku umatshishe nvula ha buloba buebe buwakuha bantu bebe bu buhianyi buabo. Bialua tshiole mu buloba, anyi disama dikole, anyi biakuata butu anyi bishi, anyi bialua mikumbi anyi meshi, anyi biabatshintshimika bena lukuna babo mu buloba bua misoko yabo, bikalabo ne dikenga kai anyi disama kai; biakutendelela anyi biakutendekena muntu umue anyi Bena Isalele bonso, biamanya muntu yonso dikenga dia mutshima wandi, ne biolololeye bianza biandi ku nsubu eu; ubunvuile mu diulu kûdi ushikama, ubabuikidile mibi yabo, ubenzele bu mûdi mumanye malu adi mu mitshima yabo (bualu bua anu wewe nkayebe ngudi mumanye mitshima ya bantu bonso); bua bobo bakutshine matuku onso adibo bashikame mu buloba buwakaha bankambua babo. Bualu bua muntu wa kua bende udi kayi wa munkatshi mua bantu bebe Bena Isalele, hafumeye mu buloba bua kule bua dina diebe (bualu bua bobo nebunvue lumu lua dina diebe dinene, ne lua tshianza tshiebe tshikole ne lua diboko diebe dilulame), halueye bua kukutendelela ku nsubu eu, umunvuile mu diulu kûdi ushikama, wenzele muntu wa bende malu onso adiye ukulomba; bua bantu bonso ba ha buloba bamanye dina diebe, bua kukutshina bu mudi bantu bebe Bena Isalele benze; bamanye kabidi ne dina diebe didi dibikidibue ku nsubu eu unakukuashila. Biaya bantu bebe bua kuluanganabo ne bena lukuna babo mu nshila yonso iudi ubatuma; hatangilabo mesu abo ku musoko eu uwakusungula ne ku nsubu eu unakuashila dina diebe bua kutendelelabo Yehowa, unvua kulomba kuabo ne kutendekena kuabo mu diulu, ujadike bualu buabo. Biakuenzelabo bibi (ne kakuena muntu udi kayi wenza malu mabi) ne wewe udi nʼabo tshiji, udi ubafila mu bianza bia bena lukuna babo bua kuyabo nʼabo bu bahika mu buloba bua bena lukuna, mu buloba budi kule anyi budi ha buihi; kadi biabangabo kuelangana meji munda muabo mu buloba buwakabatuma bu bahika, ne biakudimunabo mitshima yabo, biakutendekenabo mu buloba buwakabatuma bu bahika, bamba ne, Tuakuenza bibi, tuakuenza bualu buhote, tuakahambuka; biahinganabo kûdi ne mitshima yabo yonso ne mioyo yabo yonso, mu buloba bua bena lukuna babo bakababuesha mu buhika, biakutendelelabo ne mesu abo matangile ku buloba buabo buwakaha bankambua babo, ne ku musoko eu uwakusungula, ne ku nsubu eu unakuashila dina diebe; unvue kulomba kuabo ne kutendekena kuabo mu diulu kûdi ushikama, ujadike bualu buabo. Ulekelele bantu bebe mahanga abo, ubabuikidile mibi yabo yakukuenzelabo; ubafuishe luse kudi bakababuesha mu buhika, bua bobo babafuile luse; (bualu bua bobo badi bantu bebe ne buhianyi buebe buwakalua nʼabo mu buloba bua Ejipitu munkatshi mua tshikutu tshia biamu) bua mesu ebe ikale matabale ku kutendekena kua muntu webe ne kua bantu bebe Bena Isalele bua kubunvuila misangu yonso hadilabo kûdi. Bualu bua wewe, Mukelenge Yehowa, nguakabasungula munkatshi mua bisamba bionso bia ha buloba bua kuikalabo buhianyi buebe, bu muakamuambila muntu webe Mose hawakafuma ne bankambua betu mu Ejipitu. Hakashikisha Solomo kulomba kuandi ne kutendekena kuandi kudi Yehowa, wakajuka ku mpala kua tshioshelu tshia Yehowa kuakatueye binu biandi hanshi ne bianza biandi biolola mulu. Wakimana, wakavudishila Bena Isalele bonso disanka, muele dî dikole ne, Yehowa wakaha bantu bandi Bena Isalele dikisha bu muakabalayeye atumbishibue; nansha dî dimue dia milayi yandi mimpe yonso yakalayeye muntu wandi Mose kadiakahona hanshi hatuhu. Yehowa, Nzambi wetu, ikale nʼetu bu muakikaleye ne bankambua betu; kumuki munkatshi muetu, katulekedi; bua yeye akudimushe mitshima yetu kudiye bua tuetu tuende mu nshila yandi yonso, bua kutumikila mikenji yandi ne mei andi ne mikandu yandi biakambileye bankambua betu. Mei anyi au anakatendekena nʼau Yehowa ikale ha buihi ne Yehowa, Nzambi wetu, munya ne butuku, bua yeye ajadike bualu bua muntu wandi ne bua bantu bandi Bena Isalele bu mudi difuku dionso didi ne bualu buadi; bua bantu bonso ba ha buloba bamanye ne, Yehowa udi Nzambi; kakuena mukuabo. Mitshima yenu ikale miakanangane ne Yehowa, Nzambi wetu, bua nuenu nuende mu nshila yandi bua kutumikila mikenji yandi, bu mudibi lelu. Mukelenge ne Bena Isalele bonso bakadi nʼandi bakafila milambu kudi Yehowa. Solomo wakahia milambu kudi Yehowa ya kuvuisha nʼai bantu ditalala, ngombe binunu makumi abidi ne bibidi ne mikoko binunu lukama ne makumi abidi. Nunku mukelenge ne Bena Isalele bonso bakajidila nsubu wa Yehowa. Mu dituku adi mene mukelenge wakajidila muaba wa tshiendedi wakadi ku mpala kua nsubu wa Yehowa, bualu bua yeye wakafilaku milambu ya kuosha ha kahia ne milambu ya bukula ne manyi a milambu ya kuvuisha nʼai ditalala; bualu bua tshioshelu tshia tshiamu tshia mitaku tshiakadi ku mesu kua Yehowa tshiakatamba bukese bua kukumbana milambu ya kuosha ha kahia ne ya bukula ne ya manyi a milambu ya kuvuisha nʼai ditalala. Nunku Solomo wakalambishila Bena Isalele bonso bakadiye nʼabo tshisumbu tshinene bidia bia disanka ku tshibi tshia ku Hamata tô ne ku kasulu kadi ku mukalu wa buloba bua Ejipitu; bakadia ku mesu kua Yehowa tô mbingu ibidi bu matuku dikumi ne anai. Mu dituku dia muanda mukulu yeye wakatuma bantu kuabo; bobo bakavudishila mukelenge disanka; bakaya ku nsubu yabo ne disanka dinene mu mitshima yabo hua malu mimpe onso akenzela Yehowa muntu wandi Davidi ne bantu bandi Bena Isalele. Hakamana Solomo nsubu wa Yehowa ne nsubu wa mukelenge ne malu onso akasua mutshima wa Solomo kuenza, Yehowa wakamueneka kudi Solomo tshiakabidi bu muakamuenekeye kudiye ku Gibeona. Yehowa wakamuambila ne, Nakunvua kulomba kuebe ne kutendekena kuebe kuwakuntendelela nʼaku; nakajidila nsubu eu uwakungashila bua kutekamu dina dianyi tshiendelele; mesu anyi ne mutshima wanyi nebikaleku tshiendelele. Ne wewe, biwenda ku mpala kuanyi bu muakenda Davidi, tatu webe, mu buimpe ne mu buakane bua mutshima wandi; biwenza mei onso anakukuambila, biwatumikila mei anyi mafunda ne mei anyi majalame; nenjadike nkuasa wa bukelenge buebe ku mutu kua Bena Isalele tshiendelele, bu munakalaya Davidi, tatu webe, hanakamuambila ne, Wewe kuena uhanga muntu wa kushikameye mu nkuasa wa bukelenge wa Isalele tshiendelele. Kadi binuabenga kundonda, nansha wewe nansha bana bebe, kanuyi nutumikila mikenji yanyi ne mei anyi binakuteka ku mpala kuenu; binuaya kukuatshila nzambi mikuabo mudimu ne bua kuyitendelela; nengumushe Bena Isalele mu buloba ebu bunakabaha; nengimashe nsubu eu unakajidila dina dianyi ku mesu kuanyi, ne Bena Isalele nebikale bu lusumuinu ne bu tshihendu munkatshi mua bantu bonso. Bikala nsubu eu bule nunku, kadi bantu bonso badi bahitaku nebakeme, nebafunkune mishiku; nebakonkangane ne, Yehowa wakenzela buloba ebu ne nsubu eu nunku bua tshinyi? Hashishe, nebakudimunangane dî kabidi ne, Bualu bua bobo bakalekela Yehowa, Nzambi wabo, nguakafuma ne bankambua babo mu Ejipitu, bakakuata nzambi mikuabo, bakayitendelela, bakayikuatshila mudimu, ka Yehowa wakatuma dikenga edi dionso kudibo. Hakahita bidimu makumi abidi, Solomo wakamana nsubu ibidi: nsubu wa Yehowa ne nsubu wa mukelenge. (Hilama, mukelenge wa Tulo, wakatumina Solomo mitshi ya cèdre ne mitshi ya cyprès ne or bu muakasueye muonso), ne Solomo wakaha Hilama misoko ya mu Galela makumi abidi. Hilama wakumuka mu Tulo bua kumoneye misoko yakamuha Solomo; kayakamusakisha. Yeye wakamuebesha ne, Ei idi misoko kai iwakumpa, muanʼetu? Yeye wakayidika ne Buloba bua Kabula tô ne ku dituku edi. Hilama wakatumina Solomo ntalanta ya or lukama ne makumi abidi. Bua bualu ebu mukelenge Solomo wakenzesha bantu mudimu wa kuasabo nsubu wa Yehowa ne nsubu wandi ne Milo ne lumbu lua ku Yelushalema ne Hasô ne Megido ne Gezê Diambedi Palo, mukelenge wa Ejipitu, wakanyenga Gezê, wakawosha ne kahia, wakashiha Bena Kanâna bakadimu, wakamua bu buhianyi kudi muanʼandi, mukashi wa Solomo. Nunku Solomo wakasa Gezê kabidi ne Bete-holona, ne Bâlata ne Tama wa mu tshihela mu buloba bua Yuda. Solomo wakasa misoko ya kutekelamu bintu biandi, ne ya makalu andi ne ya bantu bakabanda ha nyima ha tubalu tuandi; wakenza bu muakasueye mu Yelushalema ne mu Lebanona ne mu buloba buandi buonso. Munkatshi mua bantu bonso bakadi bashala mu buloba Bena Amole ne Bena Hiti ne Bena Pelese ne Bena Hiwi ne Bena Yebuse kabakadi ba bisamba bia Bena Isalele. Bana ba bantu aba mene bakadi bashala mu buloba, hakahanga Bena Isalele kubashiha, Solomo wakabenzesha mudimu bu bahika bandi tô ne ku dituku edi. Solomo kakabuesha Bena Isalele mu buhika kadi bobo bakadi bena nvita bandi ne bena mudimu bandi ne miloho yandi ne tupitene tuandi ne tuhita tua bena makalu andi ne tua bantu bakenda ha nyima ha tubalu tuandi. Solomo wakadi ne bantu nkama itanu ne makumi atanu bakadi ku mutu kua bena mudimu bandi. Muana mukashi wa Palô wakumuka mu musoko wa Davidi, wakabuela mu nsubu wakamuashila Solomo; hashishe yeye wakasa Milo. Misangu isatu ku tshidimu ku tshidimu Solomo wakafila milambu ya kuosha ne ya kuvuisha bantu ditalala ha tshioshelu tshiakashileye Yehowa; wakosha musenga wa manananshi ha tshioshelu tshiakadi ku mesu kua Yehowa. Wakamana nsubu nunku. Solomo wakenza matu a bungi mu Esione-gebê, hehi ne Elota, mu buloba bua Edome ku muelelu wa Dishiba Dikunze. Hilama wakatuma bantu bandi bakadi ne lungenyi lua kundesha matu ha mutu ha mai manene ne bantu ba Solomo. Bakaya ku buloba bua Ofi, bakafumaku ne biamu bia or bu bujitu bua ntalanta nkama inai ne makumi abidi; bakatua habi kudi mukelenge. Hakunvua mukelenge mukashi wa mu Sheba lumu lua butumbi bua Solomo ne bua dina dia Yehowa, yeye wakalua bua kunuteta makonka makole. Wakafika ku Yelushalema ne batuadi ba bungi, ne tumelo tuakadi ne bintu bia muhuya muimpe ne biamu bia or bia bungi ne mabue a mushinga mukole; hakafikeye kudi Solomo wakayikila nʼandi, wakamuambila malu onso akadiye nʼau mu mutshima wandi. Solomo wakitaba ku makonka andi onso; yeye kakamusokoka bualu bumue. Hakatangila mukelenge mukashi wa mu Sheba lungenyi luonso lua Solomo, ne nsubu wakaseye, ne bia kudia ku mesa andi ne bu muakashikikeye bena mudimu bandi ne dikuatshisha dia miloho yandi ne bilulu biabo ne batuadi ba makoho andi ne tshibandilu tshiakadiye ubandila ku nsubu wa Yehowa, yeye kakadi ne mutshima wa kumukudimuna dî. Yeye wakambila mukelenge ne. Lumu lunakunvua mu buloba buanyi lua bienzedi biebe ne lungenyi luebe luakadi lulelela. Kadi tshiakuitabusha mei tô ne hanakulua bua kudimuenena ku mesu: hakangambila anu tshituha tshia mei; lungenyi luebe ne bubanji buebe bidi bihita lumu lunakunvua bunene. Bantu aba ne bena mudimu bebe batu bimana ku mpala kuebe bua kunvua lungenyi luebe badi ne disanka. Yehowa, Nzambi webe, udi ne disanka bualu buebe, wakukushikika mu nkuasa wa butumbi wa Isalele, atumbishibue; bualu bua Yehowa udi munange Bena Isalele tshiendelele nunku wakukusungula mukelenge bua wewe kulumbulula malu biakane ne kuenza malu adi makane. Yeye wakaha mukelenge ntalanta ya or lukama ne makumi abidi, ne bintu bia muhuya muimpe bia bungi, ne mabue a mushinga mukole: kabakatangila bungi bua bintu bia muhuya muimpe bu muakaha mukelenge mukashi wa mu Sheba mukelenge Solomo kabidi. Matu a Hilama akafuma ku Ofî ne or akalua ne mitshi ya sandal ne mabue a mushinga mukole bia ku Ofî kabidi. Mukelenge wakenza makunshi a mu nsubu wa Yehowa ne mu nsubu wa mukelenge a mitshi ei ya sandal; wakenza kabidi bisanji ne nzenze ya bimbi ba misambu kuimba; kabakatangila mitshi ya sandal bu ei kabidi tô ne ku lelu. Mukelenge Solomo wakaha mukelenge mukashi wa mu Sheba bintu bionso biakasua mutshima wandi; wakamuha bintu bionso biakamulombeye ha mutu ha bintu biakamuheye diambedi mu bibutshilu bia mukelenge Solomo. Nunku yeye wakahingana ku buloba buandi ne bantu bandi. Bujitu bua or yakangata Solomo ku tshidimu tshimue buakadi ntalanta ya or nkama isambombo makumi asambombo ne isambombo, ha mutu ha or ya basombeshanganyi ne bendi ba mushinga ne ya hakelenge ba Alabâ ne ya ba-gouverneur ba buloba. Mukelenge Wakenza ngabu ya or yakatulabo nkama ibidi: bujitu bua or ya mu ngabu umue buakadi nshekele nkama isambombo. Wakenza ngabu ya or yakatulabo nkama isatu; bujitu bua or ya mu ngabu umue buakadi mines isatu; mukelenge wakayiteka nsubu wa ditu dia Lebanona. Mukelenge Wakenza nkuasa munene e wa bukelenge wa mibanga, wakalamika tshiamu tshia or ha nyima nʼandi honso. Nkuasa wa bukelenge wakadi ne tshibandilu tshia bidiatshilu bisambombo; nyima wa mutu wa nkuasa wakadi tshijengu; bitekelu bibidi bia maboko biakadi ku luseke ne luseke lua nkuasa; tshifuanyikishi tshia nyama wa ntambue tshiakadi tshilamata ku tshitekelu ne tshitekelu tshia maboko. Bifuanyikishi bia nyama ya ntambue dikumi ne bibidi biakadi biteka ku bidiatshilu bisambombo, bibidi ku tshidiatshilu ne tshidiatshilu, tshimue ku luseke tshimue ku luseke; kakuakadi mukuabo bu eu mu bukelenge bukuabo. Makoho onso a kunua nʼau mukelenge Solomo akadi a or, ne malonga onso a mu nsubu wandi wa ditu dia Lebanona akadi a or mene mene; nansha dimue diakadi dia argent: tshiamu atshi katshiakadi tshia mushinga mukole mu matuku a Solomo. Bualu bua mukelenge wakadi ne matu akenda ha mutu ha mai manene ku Tâshishi hohamue ne matu a Hilama: akaya ku Tâshishi musangu umue mu bidimu bisatu, akafumaku ne or, argent ne mibanga ne nkima ne kaiba. Nunku mukelenge Solomo wakahita bakelenge honso ba ha buloba bubanji ne lungenyi. Bantu bonso ba ha buloba bakakeba Solomo bua kunvuabo lungenyi luakateka Nzambi mu mutshima wandi. Muntu yonso wakalua ne mulambu wandi, bintu bia or ne bia argent ne bilulu ne bintu bia nvita ne bintu bia muhuya muimpe ne tubalu ne nyama ya mpunda, ku tshidimu ku tshidimu. Solomo wakadisangishila makalu ne bantu bakenda ha nyima ha tubalu: wakadi ne makalu tshinunu tshimue ne nkama inai, ne bantu bakenda ha nyima ha tubalu binunu dikumi ne bibidi biakatekeye mu misoko ya makalu andi ne mu Yelushalema hehi ne mukelenge. Mukelenge wakakumbasha argent mu Yelushalema bu mabue a nsakabua ne mitshi ya cèdre bu mitshi ya sycomore idi mu tshibanda, bualu bua bungi buabi. Tubalu tuakadi Solomo nʼatu tuakufuma ku Ejipitu: bendi ba mushinga ba mukelenge bakatuangata mu bisumbu, bakafila mushinga ku tshisumbu ne ku tshisumbu. Bakasumba dikalu mu Ejipitu ku nshekele ya argent nkama isambombo, ne kabalu ku nshekele ya argent lukama ne makumi atanu. Bakabituadila hakelenge ba Bena Hiti ne ba Bena Sulia muomumue. Mukelenge Solomo wakananga bakashi ba bende ba bungi, basangisha ne muana mukashi wa Palô; bakashi ba Bena Moaba ne ba Bena Amona ne ba Bena Edome ne ba Bena Sidona ne ba Bena Hiti; bakadi ba mu bisamba bakambila Yehowa Bena Isalele ne, Kanubuelakanyi nʼabo, ne bobo kabalu kunudi nansha, bualu bua bobo nebakudimushe mitshima yenu bua kulonda nzambi yabo; Solomo wakalamata bakashi aba mu dinanga. Wakadi ne bakashi nkama muanda mutekete, bana ba bakelenge ne bakashi bahika bakabakeye nkama isatu; bakashi bandi bakakudimusha mutshima wandi. Bualu bua hakalua Solomo muntu mununu, bakashi bandi bakakudimusha mutshima wandi bua kulondeye nzambi mikuabo; mutshima wandi kawakadi muakane ku mesu kua Yehowa, Nzambi wandi, bu muakadi mutshima wa Davidi, tatu wandi. Bualu bua Solomo wakalonda Bashetelota, nzambi mukashi wa Bena Sidona, ne Milekoma, bundu bua Bena Amona. Solomo Wakenza malu mabi ku mesu kua Yehowa; yeye kakatamba kunanukila kulonda Yehowa bu muakenza Davidi, tatu wandi. Hashishe, Solomo wakashila Kemosha, bundu bua Bena Moaba, tshitendelelu ha mutu ha mukuna udi ku mpala kua Yelushalema, ne tshia Moleke, bundu bua Bena Amona. Wakenzela bakashi bandi ba bende diatshimue, bakadi boshila nzambi yabo musenga wa manananshi ne bakayishihela nyama kabidi. Yehowa wakadi ne Solomo tshiji, bualu bua mutshima wandi wakumuka kudi Yehowa, Nzambi wa Isalele, nguakamueneka kudiye misangu ibidi, nguakamuambila bualu ebu mene mene bua yeye kalondi nzambi mikuabo; kadi yeye kakenza muakamba Yehowa. Yehowa wakambila Solomo ne, Bualu bua wewe wakatamba kuenza nunku, kuakatumikila tshihungidi tshietu ne mei anyi binakukuambila, bulelela, nenunyenge bukelenge, nembuhe muntu webe. Kadi tshiena ngenza bualu ebu mu matuku ebe, bualu bua Davidi tatu webe; kadi nembunyenge mu bianza bia muanʼebe mulume. Kadi tshiena nkunyenga bukelenge buonso nansha, nempe muana webe tshisamba tshimue bualu bua Davidi, muntu wanyi, ne bua Yelushalema unakusungula. Yehowa wakabisha Solomo muena lukuna, dina diandi Hadada, Muena Edome: wakadi muana wa mukelenge wa Bena Edome. Bualu bua hakadi Davidi mu Edome, ne hakaya Yoaba, kapitene ka masalayi, bua kujikeye bantu bafue, bakashihabo mulume yonso mu Edome (bualu bua Yoaba ne Bena Isalele bonso bakashalaku ngondo isambombo bua kushihabo balume ba Bena Edome bonso); kadi Hadada ne bantu bakuabo ba tatu wandi bakanyemena mu Ejipitu; Hadada wakatshidi muana mukese. Bakahitshila mu buloba bua Midiyana, bakafika ku Palana; bakangata bantu ba mu Palana, bakafika nʼabo mu buloba bua Ejipitu ku mesu kua Palô, mukelenge wa Ejipitu; yeye wakamuha nsubu ne bintu bia kudia ne madimi. Hadada wakasangana luse lunene ku mesu kua Palô, wakamuha bukonde buandi bu mukashi wandi, yeye wakadi muanʼabo ne Tapenese, mukelenge mukashi. Muanʼabo ne Tapenese wakamulelela muana mulume dina diandi Genubata; Tapenese wakamujidike mabele mu nsubu wa Palô; Genubata wakadi mu nsubu wa Palô munkatshi mua bana bandi ba balume. Hakunvua Hadada lumu mu Ejipitu ne, Davidi wakalala tulu ne bankambua bandi, ne Yoaba, kapitene ka masalayi andi, wakafua, Hadada wakambila Palô ne, Witabushe bua meme kumuka bua kuhingana ku buloba buanyi. Palô wakamuebesha ne, Wakadi ne tshintu kai bualu hawakashikama nʼanyi bua wewe udi musue kuhingana ku buloba buebe? Yeye wakamukudimuna ne, Nansha tshintu; kadi anji kuitabusha bua meme kuya. Nzambi wakalambishila muena lukuna mukuabo, dina diandi Lesona, muana wa Eliada, wakanyema kudi mukelenge wandi Hadadezê, mukelenge wa mu Soba. Yeye wakadisangisha bantu kudiye, wakalua kapitene kabo, bakabashiha Davidi mu Soha; hashishe, bakaya ku Damaseke, bakashikamamu, ne yeye wakakokesha mu Damaseke. Yeye wakadi muena lukuna wa Bena Isalele matuku onso a Solomo; wakabenzela malu mabi ba mutu ha malu akabenzela Hadada; yeye wakalengulula Bena Isalele, wakakokesha mu Sulia. Yalobama, muana wa Nebata, Muena Efelayima wa mu Zeleda, wakadi muntu wa Solomo, ne mamu wandi wakadi Seluya, mukashi wa mu lufuila, wakatombokela mukelenge kabidi. Ebu mbualu buakatombokeleye mukelenge: Solomo wakasa musoko wa Milo, wakalongolola lumbu lua ku musoko wa Davidi, tatu wandi. Muntu eu Yalobama wakadi muntu mukole wa bukitu; Solomo wakatangila ne, Nsongalume eu udi unanukila mu mudimu wandi, nunku wakamuteka ku mutu kua bena mudimu bonso ba mu Bena Yosefe. Mu matuku äu hakumuka Yalobama mu Yelushalema, Ahiya muprofete, Muena Shilo, wakamusangana mu nshila; Ahiya wakadi muluate tshilulu tshihia-tshihia; bubidi buabo bakadi ha nkayabo mu tshisuku. Ahiya wakangata tshilulu tshihia-tshihia tshiakadiye nʼatshi, wakatshihandulula bihese dikumi ne tubidi. Yeye wakambila Yalobama ne, Angata bihese dikumi, bualu bua Yehowa, Nzambi wa Isalele, udi wamba ne, Mona, nenyenge bukelenge mu bianza bia Solomo, nenkuhe wewe bisamba dikumi (kadi yeye neikale ne tshisamba tshimue bualu bua Davidi, muntu wanyi, ne tshikuabo bua Yelushalema, musoko unakasungula munkatshi mua bisamba bionso bia Bena Isalele), bualu bua bobo bakundekela, bakutendelela Bashetoleta, nzambi mukashi wa Bena Sidona, ne Kemosha, nzambi wa Bena Moaba, ne Milekoma, nzambi wa Bena Amona; kabakuenda mu nshila yanyi, bua kuenzabo malu adi mimpe ku mesu kuanyi ne bua kutumikilabo mei anyi ne mikenji yanyi bu muakenza Davidi tatu wandi. Kadi tshiena nyenga bukelenge buonso mu bianza biandi: nemmuvuishe mukelenge matuku andi onso bualu bua Davidi, muntu wanyi unakasungula, nuakatumikila mikenji yanyi ne mei anyi; kadi nenyenge bukelenge mu bianza bia muanʼandi mulume, nembufile kûdi, mbisamba dikumi mene mene. Nempe muanʼandi tshisamba tshimue, bua Davidi, muntu wanyi ikale ne muinda utema ku mesu kuanyi mu Yelushalema matuku onso, musoko unakasungula bua kutekamu dina dianyi. Nenkusungile, bua wewe kukokesha bantu bu mudi mutshima webe musue; wewe newikale mukelenge wa Isalele. Biunvua mei onso andi nkuambila, biwenda mu nshila yanyi bua kuenza malu adi mimpe ku mesu kuanyi, ne hua kutumikila mei anyi ne mikenji yanyi bu muakenza muntu wanyi Davidi, nengikale nʼebe, nenjadike tshiota tshiebe bulelela, bu munakajadika tshiota tshia Davidi; nenkuhe wewe Bena Isalele. Bua bualu ebu nenkengeshe bana ba Davidi; kadi tshiena mbakengesha tshiendelele. Solomo wakakeba mua kushiha Yalobama, kadi Yalobama wakumuka ne wakanyemena mu Ejipitu kudi Shishaka, mukelenge wa Ejipitu; wakashala mu Ejipitu tô ne hakafua Solomo. Bienzedi bikuabo bia Solomo ne malu onso akenzeye ne meji andi kabiena bifunda mu mukanda wa bienzedi bia Solomo, anyi? Solomo wakakokesha Bena Isalele bonso mu Yelushalema bidimu makumi anai. Solomo wakalala tulu ne bankambua bandi, wakajikibua mu musoko wa Davidi, tatu wandi; Lehabama, muanʼandi wa balume, wakakokesha mu muaba wandi. Lehabama wakaya ku Shekeme, bualu bua Bena Isalele bonso bakadisangishaku bua kumuhingisha mu bukelenge. Kakunyua Yalobama, muana wa Nebata, lumu elu (bualu bua yeye wakatshidi mu Ejipitu kuakanyemeye ku mesu kua mukelenge Solomo; Yalobama wakadi ushikama mu Ejipitu, ne bakatuma dî bua kumubikila), nunku Yalobama ne Bena Isalele bonso bakadisangisha hamue, bakambila Lehabama ne, Tatu webe wakanemesha mutshi wa tshikokedi wetu bujitu butambe; nunku wewe uheheshe bujitu bua mudimu eu mukole wakatuenzesha tatu webe ne mutshi wa tshikokedi wa bujitu bubi wakatutekeleye, nunku tuetu netukukuatshile mudimu. Yeye wakabambila ne, Yai, nushikame matuku asatu, hashishe nuhingane kundi kabidi. Bantu bakaya. Mukelenge Lehabama wakebesha bakulumpe bakadi bimana ne Solomo hakadiye ne muoyo ne, Nuenu nudi nungambilaku lungenyi kai lua kukudimuna bantu aba? Bobo bakamuambila ne, Biwadivuisha muntu wa bantu aba lelu eu, biwabakuatshila mudimu, biwabakudimuna mei mimpe, bobo nebikale bantu bebe tshiendelele. Kadi yeye kakitabusha lungenyi luakamuambila bakulumpe; wakebesha bansongalume bakakola nʼandi, bakadi bimana ku mpala kuandi ne, Nuenu nudi ne lungenyi kai lua kukudimuna bantu aba bakungambila ne, Uheheshe bujitu bua mutshi wa tshikokedi wakatutekela tatu webe? Bansongalume bakakola nʼandi bakamuambila ne, Wambile bantu aba bakukuambila ne, Tatu webe wakatunemeshila mutshi wa tshikokedi wa bujitu, kudi wewe utuebeshile bujitu bua mutshi au, ubambile nunku ne, Munu wanyi wa kantengenene neuhite tshifuka tshia tatu wanyi bunene. Tatu wanyi wakanunemeshila mutshi wa tshikokedi wa bujitu, kadi meme nennukumbashile majitu makuabo: tatu wanyi wakamutuma ne nsokotshi, kadi meme nennukume ne tuminyiminyi. Nunku Yalobama ne Bena Isalele bonso bakahingana kudi Lehabama dituku disatu bu muakabambila mukelenge ne, Nuhingane kundi kabidi hahita matuku asatu. Mukelenge wakambila bantu mei makole, kakalonda lungenyi luakamuambila bakulumpe, kadi wakabambila lungenyi luakamuambila bansongalume ne, Tatu wanyi wakanunemeshila mutshi wa tshikokedi, kadi meme nennukumbashile majitu makuabo: tatu wanyi wakamutuma ne nsokotshi, kadi meme nennukume ne tuminyiminyi. Nunku mukelenge kakunvuila bantu: bua bualu ebu buakafuma kudi Yehowa bua kujadikeye dî diandi diakambileye Yalobama, muana wa Nebata mukana mua Ahiya, Muena Shilo. Hakamona Bena Isalele ne Mukelenge kakabunvuila, bantu bakandamuna ne, Tudi ne tshituha kai mu Davidi? Katuena ne buhianyi mu muana wa Yishai. Nuenu Bena Isalele nuhingane ku ntenta yenu! Nuenu Bena Davidi nudilamine nsubu yenu. Nunku Bena Isalele bakaya ku ntenta yabo. Kadi Lehabama wakakokesha Bena Isalele bakadi bashikama mu misoko ya Bena Yuda. Hashishe, mukelenge Lehabama wakatuma Adolama, wakadi ku mutu kua bena mudimu, ne Bena Isalele bakamushiha ne mabue. Mukelenge Lehabama wakabuela lubilu mu dikalu diandi, bua kunyemena ku Yelushalema. Nunku Bena Isalele bakatombokela ba mu nsubu wa Davidi tô ne ku didiku edi. Hakunvua Bena Isalele bonso lumu ne, Yalobama wakahingana, bakamubikila mu disangisha diabo, bakamuvuisha mukelenge ku mutu kua Bena Isalele bonso; anu tshisamba tshia Yuda tshiakalonda ba mu nsubu wa Davidi. Hakafika Lehabama ku Yelushalema, yeye wakabikila bonso ba mu tshisamba tshia Yuda ne ba mu tshisamba tshia Benyamina, bakadi bena nvita hasungula binunu lukama ne makumi muanda mukulu, bua kuluanganabo ne Bena Isalele ne bua kuhingisha bukelenge kudi Lehabama, muana wa Solomo. Kadi dî dia Nzambi diakalua kudi Shemaya, muntu wa Nzambi, ne, Wambile Lehabama, muana wa Solomo, mukelenge wa Yuda, ne Bena Yuda ne Bena Benyamina bonso ne bantu badi bashala ne, Yehowa udi wamba ne, Kanuyi bua kuluangana ne bana benu, Bena Isalele: muntu ne muntu ahingane ku nsubu kuandi, bualu ebu buakufuma anu kundi meme. Nunku kakunyua dî dia Yehowa; bakahingana mu nshila yabo bu muakadi dî dia Yehowa. Hashishe Yalobama wakasa musoko wa Shekeme mu mikuna ya Efelayima, wakashikamamu; wakumukaku, wakasa Penuele. Yalobama wakamba mu mutshima wandi ne, Katataka bukelenge nebuhingane kudi ba mu nsubu wa Davidi, biaya bantu aba bua kufilabo milambu mu nsubu wa Yehowa wa mu Yelushalema, nebakudimune mitshima yabo kudi Lehabama, mukelenge wabo wa mu Yuda kabidi; nebanshihe meme, nebahingane kudi Lehabama, mukelenge wa Yuda. Nunku mukelenge wakakeba lungenyi, wakatula tuana tua ngombe tua or tubidi; wakambila bantu ne, Budi butamba bukole bua nuenu kuya ku Yelushalema; tangilai nzambi yenu, Bena Isalele, yakanuluhula mu buloba bua Ejipitu. Wakateka kamue mu Betele ne kakuabo mu Dana. Bualu ebu buakalua bubi, bualu bua bantu bakaya kutendelela kamue ne kukuabo tô ne ku Dana. Wakasa bitendelelu ha mutu ha mikuna, wakasungula bakuidi munkatshi mua bantu bonso, bakadi kabayi bana ba Bena Lewi. Yalobama wakabanga tshilele tshia kudia bidia bia disanka mu matuku dikumi ne atanu a ngondo wa muanda mukulu bu muakadiabo mu Yuda; yeye wakafila milambu ha tshioshelu; wakenza nunku mu Betele kabidi, wakashihela tuana tua ngombe tuakenzeye milambu; wakasungula bakuidi, wakabateka mu Betele mu bitendelelu biakenzeye ha mikuna. Yeye wakafila milambu ha tshioshelu tshiakenzeye mu Betele mu matuku dikumi ne atanu a ngondo wa muanda mukulu, mu ngondo wakasunguleye mu mutshima wandi; wakasungula didiku diakadia Bena Isalele bidia bia disanka; wakosha musenga wa manananshi ha tshioshelu kabidi. Muntu wa Nzambi wakafuma mu Yuda, wakafika ku Betele bu mu dî dia Yehowa. Yalobama wakadi muimane ku tshioshelu bua kuosheye musenga wa manananshi. Yeye wakela dî diakamuambila Yehowa ku tshioshelu atshi, wamba ne, Tshioshelu, tshioshelu, Yehowa udi wamba ne, Muana wa balume nealedibue mu nsubu wa Davidi, dina diandi Yoshiya: yeye neafile bakuidi badi bosha musenga wa manananshi ha mutu hebe bu mulambu wa kuosha; neboshe mifuba ya bantu ha mutu hebe. Yeye wakamuha tshimanyinu dituku adi, wamba ne, Etshi ntshimanyinu tshiakuamba Yehowa; mona, tshioshelu etshi netshihandike hankatshi, ne butue budi ha mutu hatshi nebumate hanshi. Hakunvua mukelenge dî diakambila mundi wa Nzambi tshioshelu tshia mu Betele, Yalobama wakumusha tshianza tshiandi ku tshioshelu, wamba ne, Mukuatai. Tshianza tshiandi tshiakololeye kudiye, tshiakafubidila, yeye kakamanya mua kutshikonya kabidi. Tshioshelu tshiakahandika hankatshi, ne butue buakadi ha mutu hatshi buakamata hanshi bu mu tshimanyinu tshiakalesha muntu wa Nzambi mu dî dia Yehowa. Mukelenge wakambila muntu wa Nzambi ne, Undombele luse lua Yehowa, Nzambi webe, bua yeye angakashile tshianza tshianyi kabidi. Muntu wa Nzambi wakamulombela Yehowa ne tshianza tshia mukelenge tshiakakana kabidi bu muakaditshi diambedi. Mukelenge wakambila muntu wa Nzambi ne, Uye nʼanyi kuanyi, wikishe biebe, nenkuhe matabisha ebe. Muntu wa Nzambi wakambila mukelenge ne, Nansha, biwampa tshituha tshia nsubu, tshiena nya nʼebe, tshiena ndia, tshiena nnua mu muaba eu; bualu bua Yehowa wakandimusha ne, Kudi bidia, kunu mai, kuhinganyi mu nshila uwakafumina. Nunku wakaya mu nshila mukuabo; kakahingana mu nshila wa kuakafumeye ku Betele. Muprofete mununu wakadi mushikame mu Betele; ne umue wa bana bandi ba balume wakalua, wakamuambila malu onso akenza muntu wa Nzambi mu Betele didiku adi; bakambila tatu wabo kabidi mei akambileye mukelenge. Tatu wabo wakabebesha ne, Yeye wakaya mu nshila kai? Bana bandi bakatangila nshila muakayila muntu wa Nzambi wakafuma mu Yuda. Yeye wakambila bana bandi balume ne, Nungelele tshiseba ha nyima ha mpunda. Bakamuelela tshiseba ha nyima ha mpunda, ne yeye wakabandahu. Yeye wakalonda ku nyima kua muntu wa Nzambi, wakamusangana mushikame muinshi mua mutshi wa telebinta. Wakamuebesha ne. Wewe, muntu wa Nzambi, wakufuma mu Yuda, anyi? Yeye wakamukudimuna ne, Ka meme eu. Hashishe yeye wakamuambila ne, Tuye nʼanyi kuanyi, udie bidia. Yeye wakamuambila ne, Tshiena mua kuhingana nʼebe bua kubuela mu nsubu webe; tshiena ndia nʼebe, tshiena nnua nʼebe mu muaba eu bualu bua bakungambila dî kudi Yehowa ne, Kudi bidia, kunu mai, kuhinganyi mu nshila uwakafumina. Yeye wakamuambila ne, Kadi meme ndi muprofete bu wewe: muanjelo wakangambila dî ma Yehowa ne, Uhingane nʼandi mu nsubu webe, adieku, anueku. Kadi yeye wakamushima. Nunku yeye wakahingana nʼandi, wakadia mu nsubu muandi, wakanuamu. Hakadibo bashikama ku mesa, dî dia Yehowa diakalua kuai muprofete wakamuhingisha ne yeye wakela dî kudi muntu wa Nzambi wakafuma mu Yuda ne, Yehowa udi wamba ne, Bualu bua wewe wakuhidia dî dia Yehowa, kuakutumikila mukenji wa kukuambila Yehowa. Nzambi webe, kadi wakuhingana, wakudia, wakunua mu muaba wakakuambileye ne, Kudi bitua, kunu mai, nunku kabena bajika mubidi webe mu lukita lua bankambua bebe. Hakashikisheye kudia ne kunua, muprofete au wakamuhingisha, wakamuelela tshiseba ha nyima ha mpunda. Hakayeye mu nshila, nyama wa ntambue wakasangila nʼandi, wakamushiha; tshitalu tshiandi tshiakahona hanshi mu nshila; mpunda wakimana ha buihi nʼatshi, ne nyama wa ntambue wakimana ha buihi ne tshitalu kabidi. Bantu bakadi bahitaku bakatangila tshitalu tshiandi mu nshila ne nyama wa ntambue muimane ha buihi nʼatshi; bakamba bualu ebu mu musoko muakadi muprofete mununu mushikame. Hakunvua muprofete wakamu hingishila mu nshila lumu elu, yeye wakamba ne, Au mmuntu wa Nzambi wakahidia dî dia mukana mua Yehowa: nunku Yehowa wakamutua kudi nyama wa ntambue, yeye wakamuhandulula, wakamushiha bu mu dî dia Yehowa diakamuambileye. Yeye wakambila bana bandi ba balume ne, Nungelele tshiseba ha nyima ha mpunda. Bakamuelela tshiseba ha nyima nʼandi. Wakaya, wakasangana tshitalu tshiandi mu nshila ne mpunda ne nyama wa ntambue bimane ha buihi nʼatshi; nyama wa ntambue kakadia tshitalu tshiandi, kakahandulula mpunda. Muprofete au wakambula tshitalu tshia muntu wa Nzambi, wakatshiteka ha nyima ha mpunda, wakahingana nʼatshi, wakalua mu musoko wa muprofete mununu, wakamujinga, wakamujika. Wakaladika tshitalu tshiandi mu lukita luandi, bakamujinga, bamba ne, E, muan etu. Hakamujikeye, yeye wakambila bana bandi ba balume ne, Hanafua meme, nunjike mu lukita luakajikabo muntu eu wa Nzambi; nuteke mifuba yanyi hehi ne mifuba yandi. Bualu bua mei a Yehowa akambeye bua tshioshelu tshia mu Betele ne bitendelelu bionso bidi ku mikuna ne mu misoko ya Samalea, bulelela, nênjibue. Ku nyima kua bualu ebu Yalobama kakalekela bubi buandi; kadi wakasungula bakuidi munkatshi mua bantu bonso ba tshianana, wakabateka mu bitendelelu biakadi ku mikuna. Yeye wakajidila muntu yonso wakadi musue, bua bakuidi bikale mu bitendelelu bia ha mikuna. Bualu ebu buakalua bubi kudi ba mu nsubu wa Yalobama, bua kubahidiabo ne bua kubajimishabo ha buloba. Mu matuku au disama diakakuata Abiya, muana wa Yalobama. Yalobama wakambila mukashi wandi ne, Bika, ndi nkusengelela ne, Udifuanyishe bu muntu mukuabo, bua bantu kabakumanyi bu mukashi wa Yalobama, uye ku Shilo kudi Ahiya, muprofete wa Nzambi, wakangambila ne, Wewe newikale mukelenge ku mutu kua bantu aba. Uye ne mitanda ya bidia dikumi, ne mikata ne mulondo wa buitshi; yeye neakuambile mualua muana eu. Mukashi wa Yalobama wakenza nunku, wakajuka, wakaya ku Shilo, wakafika ku nsubu wa Ahiya. Ahiya wakadi mufofo, mesu andi akadi bileshileshi bua bununu buandi. Yehowa wakambila Ahiya ne, Tangila, mukashi wa Yalobama ulualua kukuebesha bualu bua muanʼandi; bualu bua yeye udi usama; nunku umuambile mei kampanda; bualu bua habueleye kudi, yeye neadifuanyikishe bu mukashi mukuabo. Nunku hakunvua Ahiya kusesa kua makasa andi hakabueleye ku tshibi, yeye wakamuambila ne, Buela biebe, mukashi wa Yalobama; udi udifuanyikisha bu muntu mukuabo bua tshinyi? Bualu bua bundi nʼabu mbua kukuambila mei adi anemesha bujitu. Ya, wambile Yalobama ne. Yehowa, Nzambi wa Isalele, udi wamba ne, Bualu bua meme nakakutumbisha munkatshi mua bantu, nakakusungula mukelenge ku mutu kua bantu banyi Bena Isalele, nakanyenga bukelenge kudi ba mu nsubu wa Davidi, nakakuhabu; kadi wewe kuakuenza bu muntu wanyi Davidi, wakatumikila mikenji yanyi, wakandonda ne mutshima wandi wonso, bua kuakuenza malu akadi mimpe ku mesu kuanyi; kadi wewe wakutamba bantu bonso bakadi ku mpala kuebe bua kuenza bibi, wa kudienzela nzambi mikuabo, wakutula mpingu bua kunfuisha nʼai tshiji, wakungela meme ku nyima kuebe; nunku nentume malu mabi kudi ba mu nsubu wa Yalobama, nenshihe bana balume bonso ba mu nsubu wa Yalobama ne badi mu nsubu wandi ne badi ha bule mu Isalele; nenkombe ba mu nsubu wa Yalobama bu mudibo bakomba diala dia butue, tô ne hashikadi dionso. Hafua wa mu nsubu wa Yalobama mu musoko, mbua neyimudie; biafuileye mu mpata, nyunyu ya mulu neyimuzokole; bualu bua Yehowa wakuamba dî edi. Nunku ujuke biebe, hingana ku nsubu kuebe; hafika makasa ebe ku musoko, muana neafue. Bena Isalele bonso nebamujinge, nebamujike, bualu bua nebamujike anu yeye wa mu nsubu wa Yalobama, bualu bua yeye udi ne tshituha tshia malu adi asankisha Yehowa, Nzambi wa Isalele, munda muandi mu nsubu wa Yalobama. Yehowa neadisunguile mukelenge mukuabo ha mutu ha Bena Isalele, yeye neashihe bonso ba mu nsubu wa Yalobama mu dituku adi; yeye kena muenze nunku katataka, anyi? E, bulelela, Yehowa neakume Bena Isalele bu mudi mai anyungisha disele; neajule Bena Isalele mu buloba ebu buimpe buakaheye bankambua babo, neabamuangalashe dishiya dia musulu wa Pelata, bualu bua bobo bakadienzela Bashela bua kufuisha nʼai Yehowa tshiji. Yeye nealekele Bena Isalele bua malu mabi akenza Yalobama ne bua malu mabi akenzesheye Bena Isalele. Mukashi wa Yalobama wakajuka, wakaya, wakahingana ku Tîsa; hakafikeye ku mbelu kua nsubu, muana wakafua. Bena Isalele bonso bakamujika, bakamujinga bu muakadi dî dia Yehowa diakambeye mukana mua muprofete wandi Ahiya. Bienzedibia Yalobama bikuabo, muakaluanganeye ne muakakokesheye bidi bifunda mu mukanda wa kulondolola kua malu a bakelenge ba Isalele. Matuku onso akakokesha Yalobama bantu akadi bidimu makumi abidi ne bibidi; wakalala tulu ne bankambua bandi; Nadaba, muana wandi, wakakokesha mu muaba wandi. Lehabama, muana wa Solomo, wakakokesha mu Yuda. Lehabama wakadi ne bidimu makumi anai ne tshimue hakabangeye kukokesha, yeye wakakokesha bidimu dikumi ne muanda mutekete mu Yelushalema, musoko wakasungula Yehowa munkatshi mua bisamba bionso bia Bena Isalele bua kutekamu dina diandi; dina dia mamu wandi diakadi Nâma, Muena Amona. Bena Yuda bakenza malu mabi ku mesu kua Yehowa; bobo bakatamba kumufuisha mukau ne malu mabi akenzabo akahita a batatuʼabo bubi. Bualu bua bobo bakenza bitendelelu ne makunshi a kutendelela ne Bashela ha mutu ha mikuna yonso ne muinshi mua mitshi mibishi yonso; bena Sodoma kabidi bakadi mu buloba; bobo bakenza malu onso a bundu akenza bisamba abi biakadi Yehowa muihate ku mesu kua Bena Isalele. Mu tshidimu tshitanu tshia bukelenge bua Lehabama, Shishaka, mukelenge wa Ejipitu, wakalua ku Yelushalema; wakahaula bintu bionso bia mu nsubu wa Yehowa ne bia mu nsubu wa mukelenge, wakaya ne buonso buabi; wakanyenga ngabu ya or yakenza Solomo. Mukelenge Lehabama Wakenza ngabu ya tshiamu tshia mitaku, wakayiteka mu bianza bia tupitene tuakadi tulama nsubu wa mukelenge. Misangu yonso hakaya mukelenge mu nsubu wa Yehowa, balami bakadi baya nʼai, bakahingana nʼai mu nsubu wabo kabidi. Bienzedi bia Lehabama bikuabo ne malu onso akenzeye kabiena bifunda mu mukanda wa kulondolola kua malu a bakelenge ba Yuda, anyi? Lehabama ne Yalobama bakadi baluangana nvita matuku onso. Lehabama wakalala tulu ne bankambua bandi. Bakamujika mu lukita lua bankambua bandi mu musoko wa Davidi; dina dia mamu wandi diakadi Nama, Muena Amona. Abiyama, muanʼandi wa balume, wakakokesha mu muaba wandi. Mu tshidimu tshia dikumi ne muanda mukulu tshia bukelenge bua Yalobama, muana wa Nebata, Abiyama wakabanga kukokesha mu Yuda. Wakakokesha mu Yelushalema bidimu bisatu; dina dia mamu wandi diakadi Mâka, muana wa bakashi wa Abashaloma. Yeye wakenza malu mabi onso akenza tatu wandi ku mpala kuandi; mutshima wandi kawakadi muakane ku mesu kua Yehowa, Nzambi wandi, bu muakadi mutshima wa Davidi, tatu wandi. Kadi bualu bua Yehowa, Nzambi wandi, wakavuluka Davidi, wakamuha muinda mu Yelushalema bua kuhingisha muanʼandi wa balume ku nyima kuandi, ne bua kujadikeye Yelushalema. Bualu bua Davidi wakenza malu mimpe ku mesu kua Yehowa matuku onso a muoyo wandi; yeye kakasesuka mu dî diakamuambileye matuku andi onso anu bualu bua Uliya, Muena Hiti. Lehabama ne Yalobama bakaluangana nvita matuku onso a muoyo wabo. Bienzedi bia Abiyama bikuabo ne malu onso akenzeye kabiena bifunda mu mukanda wa kulondolola kua malu a bakelenge ba Yuda, anyi? Abiyama ne Yalobama bakaluangana nvita. Abiyama wakalala tulu ne bankambua bandi; bakamujika mu musoko wa Davidi; Asa, muanʼandi wa balume, wakakokesha mu muaba wandi. Mu tshidimu tshia makumi abidi tshia bukelenge bua Yalobama, mukelenge wa Isalele, Asa wakabanga kukokesha mu Yuda. Yeye wakakokesha mu Yelushalema bidimu makumi anai ne tshimue; dina dia mamu wandi diakadi Mâka, muana wa bakashi wa Abashaloma. Asa wakenza malu mimpe ku mesu kua Yehowa bu muakenza Davidi, tatu wandi. Yeye wakihata bena Sodoma mu buloba, wakumusha mpingu yonso yakenza batatuʼandi. Yeye kabidi wakumusha Mâka, mamu wandi, mu nkuasa wa mukelenge mukashi, bualu bua yeye wakenzela Bashela luhingu lua bundu; Asa wakataha luhingu luandi, wakaluosha kahia hehi ne kasulu ka Kidilona. Kadi kabakumusha bitendelelu bionso biakadi ku mutu kua mikuna; kadi mutshima wa Asa wakadi muakane kudi Yehowa matuku andi onso. Yeye wakahingisha bintu biakajidila tatu wandi ne bintu biakajidileye kabidi, bintu bia argent ne bia or ne malonga makuabo mu nsubu wa Yehowa. (2 Kul. 16.1-14) Asa ne Bâsha, mukelenge wa Isalele, bakaluangana nvita matuku abo onso. Bâsha, mukelenge wa Isalele, wakaluangana ne Bena Yuda, wakasa musoko wa Lama, bua muntu kabuedi, kaluhuki kudi Asa, mukelenge wa Yuda. Hashishe Asa wakangata bintu bionso bia argent ne bia or biakadi bishale mu bibutshilu bia mu nsubu wa Yehowa ne mu nsubu wa mukelenge, wakabifila mu bianza bia bantu bandi; mukelenge Asa wakabatuma kudi Bene-hadada, muana wa Tabelimona, muana wa Hezeyona, mukelenge wa Sulia, wakadi ushikama mu Damaseke, bamba ne, Tshihungidi tshikale hankatshi hetu nʼebe bu muakaditshi hankatshi ha tatu wanyi ne tatu webe; ndi nkutumina argent ne or; ya biebe, ushihe tshihungidi tshiwakahunga ne Bâsha, mukelenge wa Isalele, bua yeye Umuke kundi. Bene-hadada wakunvua dî dia mukelenge Asa; wakatuma tupitene tua masalayi andi bua kuluanganabo ne misoko ya Bena Isalele; yeye wakahana Iyona ne Dana ne Abele-bete-mâka, ne buloba buonso bua Kinelota ne buloba buonso bua Nafatale. Hakunvua Bâsha lumu elu, yeye wakalekela kuasa Lama, wakashikama mu Tîsa. Hashishe mukelenge Asa wakela dî kudi Bena Yuda bonso, nansha muntu umue kashadi. Bakangata mabue a ku Lama ne mabaya akadi Bâsha wasa nʼau; mukelenge Asa wakasa nʼau Geba wa mu Benyamina ne Misepa. Bienzedi bia Asa bikuabo biakenzeye ne bukole buandi buonso ne malu onso akenzeye ne misoko yakaseye kabiena bifunda mu mukanda wa kulondolola kua malu a bakelenge ba Yuda, anyi? Hakadiye muntu mununu, disama diakamukuata ku makasa andi. Asa wakalala tulu ne bankambua bandi, bakamujika mu lukita lua batatu bandi mu musoko wa Davidi, tatu wandi. Yehoshafata, muanʼandi wa balume, wakakokesha mu muaba wandi. Nadaba, muana wa Yalobama, wakabanga kukokesha mu Isalele mu tshidimu tshibidi tshia bukelenge bua Asa, mukelenge wa Yuda; yeye wakakokesha mu Isalele bidimu bibidi. Wakenza malu mabi ku mesu kua Yehowa, wakenda mu nshila wa tatu wandi ne mu malu mabi andi akenzesheye Bena Isalele. Bâsha, muana wa Ahiya, wa mu tshisamba tshia Yisakâ, wakamuelela tshifufu. Bâsha wakamushiha ku musoko wa Gibetona mu buloba bua Bena Peleshete, bualu bua Nadaba ne Bena Isalele bonso bakatshintshimika musoko wa Gibetona. Mu tshidimu tshisatu tshia bukelenge bua Asa, mukelenge wa Yuda, Bâsha wakamushiha, wakakokesha mu muaba wandi. Hakahinganeye mu bukelenge, yeye wakashiha bonso ba mu nsubu wa Yalobama; yeye kakashila Yalobama muntu umue ne muoyo; yeye wakabashiha bonso bu mu dî dia Yehowa diakambeye mukana mua muntu wandi Ahiya, Muena Shilo; bualu bua malu mabi akenza Yalobama ne akenzesheye Bena Isalele ne bua tshiji tshiakafuisheye Yehowa, Nzambi wa Isalele. Bienzedi bia Nadaba bikuabo ne malu onso akenzeye kabiena bifunda mu mukanda wa kulondolola kua malu a bakelenge ba Isalele, anyi? Asa ne Bâsha, mukelenge wa Isalele, bakaluangana nvita matuku onso a muoyo wabo. Mu tshidimu tshisatu tshia bukelenge bua Asa, mukelenge wa Yuda, Bâsha, muana wa Ahiya, wakabanga kukokesha Bena Isalele mu Tîsa; wakabakokesha bidimu makumi abidi ne binai. Wakenza malu mabi ku mesu kua Yehowa; wakenda mu nshila wa Yalobama ne mu malu mabi akenzesheye Bena Isalele. Dî dia Yehowa diakalua kudi Yehu, muana wa Hanani, bualu bua Bâsha ne, Bualu bua meme nakakubisha ha buloba, nakakusungula mukelenge ku mutu kua bantu banyi Bena Isalele, ne bua wewe wakalonda anu mu nshila wa Yalobama, wakenzesha bantu banyi Bena Isalele malu mabi, bua kunfuisha tshiji ne malu mabi abo; nunku meme nembutule Bâsha ne bonso ba mu nsubu wandi: nenvuishe ba mu nsubu webe bu munakenzela ba mu nsubu wa Yalobama, muana wa Nebata. Mbua neyidie muntu yonso wa mu nsubu wa Bâsha udi ufuila mu musoko; ne nyunyu ya mulu neyizokole muntu yonso wa mu nsubu wandi udi ufuila mu tshisuku. Bienzedi bia Bâsha bikuabo ne malu onso akenzeye ne bukole buandi kabiena bifunda mu mukanda wa kulondolola kua malu a bakelenge ba Isalele, anyi? Bâsha wakalala tulu ne bankambua bandi, bakamujika mu Tîsa; Ela, muanʼandi mulume, wakakokesha mu muaba wandi. Dî dia Yehowa diakalua kudi muprofete wandi Yehu, muana wa Hanani, bualu bua Bâsha ne bua ba mu nsubu wandi, bua malu mabi akenzeye ku mesu kua Yehowa ne bu muakamufuisheye tshiji bu muakenza ba mu nsubu wa Yalobama; bua malu au yeye wakamushiha. Mu tshidimu tshia makumi abidi ne bisambombo tshia bukelenge bua Asa, mukelenge wa Yuda, Ela, muana wa Bâsha, wakabanga kukokesha Bena Isalele mu Tîsa; wakabakokesha bidimu bibidi. Muntu wandi Zimeli, kapitene ka tshituha tshia makalu andi, wakamuelela tshifufu: yeye wakadi mu Tîsa mukuatshike maluvu mu nsubu wa Âsa wakadi ku mutu kua nsubu wandi mu Tîsa. Zimeli wakabuela mu nsubu, wakamushiha mu tshidimu tshia makumi abidi ne muanda mutekete tshia bukelenge bua Asa, mukelenge wa Yuda; wakakokesha mu muaba wandi. Hakahinganeye mu bukelenge, ne hakabangeye kushikama mu nkuasa wa bukelenge, yeye wakashiha bonso ba mu nsubu wa Bâsha; kakashiya muana mulume mu nsubu wandi, nansha mu nsubu ya bana babo nansha mu nsubu ya balunda bandi. Nunku Zimeli wakashiha bonso ba mu nsubu wa Bâsha: bu mu dî dia Yehowa diakambeye mukana mua Yehu muprofete bualu bua Bâsha; bualu bua malu mabi a Bâsha ne a muanʼandi Ela akenzabo ne akenzeshabo Bena Isalele, bua kufuishabo nʼau Yehowa, Nzambi wa Isalele, tshiji bua mpingu yabo. Bienzedi bia Ela bikuabo biakenzeye ne malu onso akenzeye kabiena bifunda mu mukanda wa kulondolola kua malu a bakelenge ba Isalele, anyi? Mu tshidimu tshia makumi abidi ne muanda mutekete tshia bukelenge bua Asa, mukelenge wa Yuda, Zimeli wakakokesha mu Tîsa matuku muanda mutekete. Bantu bakasa tshitudilu tshiabo bua kuluisha Bena Gibetona, mu buloba bua Bena Peleshete. Bena nvita ba mu tshitudilu bakunvua lumu ne, Zimeli wakela tshifufu, wakashiha mukelenge wetu; nunku Bena Isalele bonso bakasungula Omeli, kapitene ka masalayi abo, mukelenge ku mutu kua Bena Isalele dituku adi mu tshitudilu. Omeli wakafuma ku Gibetona, wakaya ne Bena Isalele bonso, bakatshintshimika Tîsa. Hakatangila Zimeli ne, Bakanyenga musoko, yeye wakabuela mu nsubu wa mukelenge, wakamuosha, wakafuilamu, bua malu mabi akenzeye ku mesu kua Yehowa bua kuendeye mu nshila wa Yalobama ne bua malu mabi akenzesheye Bena Isalele. Bienzedi bia Zimeli bikuabo biakenzeye, ne tshitungu tshiakatungileye, kabiena bifunda mu mukanda wa kulondolola kua malu a bakelenge ba Isalele, anyi? Hashishe Bena Isalele bakadihandulula bituha bibidi; bakuabo bakalonda Tibeni, muana wa Ginata, bakamusungula mukelenge; bakuabo bakalonda Omeli. Kadi bantu bakalonda Omeli bakahita bantu bakalonda Tibeni, muana wa Ginata, bukole; nunku Tibeni wakafua ne Omeli wakakokesha. Mu tshidimu tshia makumi asatu ne tshimue tshia bukelenge bua Asa, mukelenge wa Yuda, Omeli wakabanga kukokesha Bena Isalele; wakabakokesha bidimu dikumi ne bibidi; wakabakokesha bidimu bisambombo mu Tîsa. Wakasumba mukuna wa Samalea kudi Sheme ku ntalanta ibidi ya argent; wakasa musoko wa lumbu ha mutu ha mukuna, wakawidika Samalea bu dina dia muena mukuna Shemê. Omeli Wakenza malu mabi ku mesu kua Yehowa; wakatamba bonso ba diambedi bubi. Bualu bua yeye wakenda mu nshila yonso ya Yalobama, muana wa Nebata, ne mu malu mabi onso akenzesheye Bena Isalele bua kufuishabo Yehowa, Nzambi wa Isalele, tshiji bua mpingu yabo. Bienzedi bia Omeli bikuabo biakenzeye ne bukole buakadiye nʼabu kabiena bifunda mu mukanda wa kulondolola kua malu a bakelenge ba Isalele, anyi? Omeli wakalala tulu ne bankambua bandi, bakamujika mu Samalea; Ahaba, muanʼandi mulume, wakakokesha mu muaba wandi. Mu tshidimu tshia makumi asatu ne muanda mukulu tshia bukelenge bua Asa, mukelenge wa Yuda, Ahaba, muana wa Omeli, wakabanga kukokesha Bena Isalele; Ahaba, muana wa Omeli, wakakokesha Bena Isalele mu Samalea bidimu makumi abidi ne bibidi. Ahaba, muana wa Omeli, Wakenza malu mabi ku mesu kua Yehowa akahita a bonso bakadi ku mpala kuandi bubi. Bualu ebu buakadi butekete ku mesu kuandi bua kuendeye mu malu mabi a Yalohama, muana wa Nebata: nunku wakabaka Izebele, muana wa bakashi wa Etebâla, mukelenge wa Bena Sidona, wakakuatshila Bâla mudimu, wakamutendelela. Wakenzela Bâla tshioshelu mu nsubu wa Bâla wakaseye mu Samalea. Ahaba wakalonda malu a Bashela kabidi; Ahaba wakahita bakelenge ba Isalele bonso bakadi ku mpala kuandi kuenza malu mabi a kuluisha nʼau Yehowa, Nzambi wa Isalele, tshiji. Mu matuku andi Hiele, Muena Betele, wakasa musoko wa Yeleko; hakajadikeye makunshi a musoko, muanʼa bute wandi Abilama wakafua, hakatekeye bibi bia musoko, muaha mukala wandi Seguba wakafua, bu mu dî dia Yehowa diakambileye Yoshua, muana wa Nuna. Eliya, Muena Tishebe, wakadi usomba mu Gilada, wakambila Ahaba ne, Bu mudi Yehowa, Nzambi wa Isalele, ne muoyo, undi ngimana ku mpala kuandi, nansha mume nansha nvula kabiena bimueneka bidimu ebi anu ku dî dianyi. Di dia Yehowa diakalua kudi Eliya ne, Umuke kunoko, uye ku esete, usokome hehi ne kasulu ka Kelita kadi ku mpala kua Yadene. Udi mua kunua mai a mu kasulu aka; nakuelela bikololo mukenji bua kukudishabi kuinaku. Nunku yeye wakaya, wakenza bu muakadi dî dia Yehowa; nunku wakaya, wakashikama ku kasulu ka Kelita kakadi ku mpala kua Yadene. Bikololo biakalua kudiye ne dinda ne bidia ne munyinyi, biakalua habi kabidi dilolo; wakanua mai a mu kasulu. Hakahita matuku makuabo, mai a mu kasulu akûma, bualu bua nvula kayakaloka ha buloba. Dî dia Yehowa diakalua kudiye ne, Juka biebe, uye ku Salefata wa mu buloba bua Sidona, sombaku, bualu bua nakelela mukashi wa mu lufuila mukenji bua kukudisha kuinaku. Nunku wakajuka, wakaya ku Salefata; hakafikeye ku tshibi tshia musoko, wakatangila mukashi wa mu lufuila wakadi wangula nkunyi; wakamubikila, wakamuambila ne, Ndi nkusengelela ne, Untuntshile tuima tukese mu dikoho, nnueku. Hakadiye uya bua kumutuntshila, yeye wakamubikila kabidi ne, Ndi nkusengelela ne, Untuadile tshikese tshia bidia mu tshianza tshiebe. Yeye wakamuambila ne, Bu mudi Yehowa, Nzambi webe, ne muoyo tshiena ne bidia, kadi ndi ne anu dianza tente dia bukula mu mulondo ne manyi tukese mu kasu; tangila, ndi ngangula tutshi tubidi bua meme kudilambila ne muana wanyi, hatuadia, netufue. Eliya wakamuambila ne, Kutshinyi, ya, wenze bu muwakuamba, kadi udianjile kundambila meme bidia bikese, ulue nʼabi kundi, hashishe udilambile ne muana webe. Bualu bua Yehowa, Nzambi wa Isalele, udi wamba ne, Bukula bua mu mulondo kabuena bushika, ne tuanyi tua mu kasu katuena tukeha tô ne ku dituku diatuma Yehowa nvula ha buloba. Wakaya, wakenza bu mu dî dia Eliya; ne yeye ne mukashi ne bonso ba mu nsubu wandi bakabidia matuku a bungi. Bukula abu kabuakashika ne tuanyi tua mu kasu katuakakeha bu muakadi dî dia Yehowa diakambeye mukana mua Eliya. Ku nyima kua malu â, muana wa balume wa mukashi eu, muena nsubu, wakasama; disama edi diakamuhita bukole, kakadi ne muhuya munda muandi kabidi. Mukashi wakakonka Eliya ne, Ndi nʼebe bualu kai, wewe muntu wa Nzambi? Wewe wakuluila bua kunvuluisha bua bubi buanyi ne bua kushiha muanʼanyi! Yeye wakamuambila ne, Umpe muanʼebe mulume. Yeye wakamuangata mu tshiadi tshia mamu wandi, wakaya nʼandi mu nsubu muakadiye mulale, wakamuladika ha bulalu buandi. Yeye wakatendelela Yehowa, wakamba ne, Yehowa, Nzambi wanyi, wewe wakenzela mukashi wa mu lufuila undi mushikame nʼandi bibi bua kushiha muanʼandi mulume, anyi? Yeye wakadiolola hamʼbidi ha muana misangu isatu, wakadila kudi Yehowa ne, Yehowa, Nzambi wanyi, ndi nkusengelela ne, Hingisha muoyo wa muana eu munda muandi kabidi. Yehowa wakunyua dî dia Eliya, muoyo wa muana wakahingana munda muandi kabidi, yeye wakatuluka. Eliya wakangata muana, wakatuluka nʼandi mu muaba wandi, wakabuela nʼandi mu nsubu, wakaya nʼandi kudi mamu wandi; Eliya wakamuambila ne, Tangila, muana webe udi ne muoyo. Mukashi wakambila Eliya ne, Katataka ndi mumanye ne, Wewe udi muntu wa Nzambi ne dî dia Yehowa didi mukana muebe didi dilelela. Hakahita matuku a bungi, dî dia Yehowa diakalua kudi Eliya mu tshidimu tshisatu ne, Ya, udimueneshe kudi Ahaba, ne meme nendokeshe nvula ha buloba. Eliya wakaya bua kudimuenesha kudi Ahaba. Tshiole tshiakatamba bukole mu Samalea. Ahaba wakabikila Obadaya, wakadi ku mutu kua nsubu wandi. Obadaya wakatamba kutshina Yehowa bikole, bualu bua hakakeba Izebele kushiha baprofete ba Yehowa, Obadaya wakangata lukama lua baprofete, wakasokoka makumi atanu mu nyongolo makumi atanu mu nyongolo, wakabadisha bidia, wakabanuisha mai. Ahaba wakambila Obadaya ne, Hitshila mu buloba buonso ku mishimi ya mai yonso ne ku tusulu tuonso, bumue neuheteku mashinde a kudisha nʼau tubalu ne nyama ya mpunda katujimishi nyama yetu yonso nansha. Nunku bakatahulula buloba munkatshi muabo, bobo bakayamu. Ahaba wakaya mu nshila umue nkayandi ne Obadaya wakaya mu nshila mukuabo nkayandi. Hakadi Obadaya mu nshila, Eliya wakasangila nʼandi; yeye wakamumanya, wakatua mpala wandi hanshi, wakamba ne, Ka, wewe, mukelenge wanyi Eliya, anyi? Yeye wakamba ne, Ka meme eu; ya, wambile mukelenge webe ne, Eliya udiku. Yeye wakamuebesha ne, Nakuenza bualu bubi kai, bua wewe udi ukeba kufila muntu webe mu tshianza tshia Ahaba bua yeye anshihe? Bu mudi Yehowa, Nzambi webe, ne muoyo, kakuena tshisamba anyi bukelenge bidi mukelenge wanyi kayi utuma bantu bua kukukeba. Hakambabo ne, Yeye kena kunoko, yeye wakatshihisha ba mu bukelenge abu ne tshisamba atshi bua kuambabo ne, Katuena bamusangane. Katataka wewe udi wamba ne, Ya, wambile mukelenge webe ne, Mona, Eliya udiku. Hashishe hangumuka kûdi, Nyuma wa Yehowa neaye nʼebe kukuabo kundi tshiyi mumanye: nunku hanafika kudi Ahaba bua kumuambila ne yeye kena mumanye mua kukusangana, yeye neanshihe; kadi meme, muntu webe, nakatshina Yehowa katshia ku buana buanyi. Kabakambila mukelenge wanyi bu munakenza hakashiha Izebele baprofete ba Yehowa, bu munakasokoka lukama lua baprofete ba Yehowa, makumi atanu mu nyongolo makumi atanu mu nyongolo mukuabo, bu munakabadisha, bumunakabanuisha, anyi? Katataka wewe udi wamba ne, Ya, wambile mukelenge webe ne, Eliya udiku, yeye neanshihe. Eliya wakamba ne, Bu mudi Yehowa wa misumba ne muoyo, undi ngimana ku mpala kuandi, bulelela, nendimueneshe kudiye lelu eu. Nunku Obadaya wakaya bua kusangileye ne Ahaba, wakamuambila dî edi. Ahaba wakaya bua kusangileye ne Eliya. Hakamona Ahaba Eliya, yeye wakamuambila ne, Ka wewe mutatshishi wa Bena Isalele, anyi? Yeye wakamukudimuna ne, Tshiakatatshisha Bena Isalele, kadi anu wewe ne ba mu nsubu wa tatu webe, bualu bua nuenu nuakahetula mikenji ya Yehowa, nuakalonda Bâla. Nunku utume dî dia kubikila Bena Isalele bonso kundi ha mutu ha mukuna wa Kâmele, ne baprofete ba Bâla nkama inai ne makumi atanu, ne baprofete ba Bashela nkama inai badi badia bidia ku mesa a Izebele. Nunku Ahaba wakatuma dî dia kubikila Bena Isalele bonso ne baprofete bonso ku mukuna wa Kâmele. Eliya wakasemena ha buihi ne bantu bonso, wakabakonka ne, Nudi nuenda nuzobela hankatshi ha nseke ibidi musangu bule munyi? Bikala Yehowa Nzambi, numulonde; kadi bikala Bâla Nzambi, numulonde. Bantu kabakamukudimuna. Hashishe Eliya wakambila bantu ne, Anu meme nkayanyi nakashala muprofete wa Yehowa, kadi baprofete ba Bala badi bantu nkama inai ne makumi atanu. Nunku batuhe habo ngombe ibidi: bobo badisunguila ngombe umue, bamusaye, bamuteke ha nkunyi, kabateki kahia muinshi; meme nendongolole ngombe mukuabo, nemmuteke ha nkunyi, tshiena nteka kahia muinshi. Bobo babikila dina dia nzambi wabo, meme nembikile dina dia Yehowa: ne Nzambi udi witaba ne kahia ikale Nzambi malelela. Bantu bonso bakitaba ne, Wakuamba biakane. Eliya wakambila baprofete ba Bâla ne, Nudisunguile ngombe umue, numulongolole diambedi, bualu bua nuenu nudi ba bungi; nubikile dina dia nzambi wenu, kadi kanuteki kahia muinshi. Bakangata ngombe wakabahabo, bakamulongolola, bakabikila dina dia Bâla ku dinda tô ne ku munda munya, bamba ne, O, Bâla, utunvuile. Kadi kakuakadi dî, nansha muntu wakitaba. Nunku bakatuhika ha mutu ha tshioshelu tshiakenzabo. Hakafika munda munya, Eliya wakabaseka ne, Elai dî dikole, bualu bua yeye udi nzambi: yeye udi welangana meji, anyi wakuya kuntu, anyi wakuya ku luendu, anyi yeye udi ulala tulu ne bunudi nʼabu mbua kumuhisha. Bakela mei makole, bakaditaha ne tuele ne miele ya nvita bu mudi tshilele tshiabo tô ne hakahueka mashi abo hamʼbidi habo. Hakahita munda munya, bakela mei abo tô ne ku dilolo ha diba diakafilabo mulambu wa kuosha; kadi kakuakadi dî, nansha muntu wakitaba. Eliya wakambila bantu bonso ne, Nusemene ha buihi nʼanyi; bantu bonso bakasemena ha buihi nʼandi. Yeye wakalongolola tshioshelu tshia Yehowa tshiakadi tshitonkodibua hanshi. Eliya wakangata mabue dikumi ne abidi, bu bungi bua bisamba bia bana ba Yakoba, wakalelabo kudi Yehowa ne, Isalele ndina diebe. Yeye wakenza tshioshelu ne mabue au mu dina dia Yehowa; wakumbula mutuhu munyunguluke tshioshelu, wakamanya mua kûla tente ne bihiminu bihidi bia ntete. Wakalongolola nkunyi, wakasaya ngombe, wakamuteka ha mutu ha nkunyi. Wakamba ne, Bûshe milondo inai ne mai tente, bâhongolole ha mulambu wa kuosha ne ha nkunyi. Wakamba ne, Benze nunku tshiakabidi; bakenza nunku tshiakabidi. Wakamba ne, Benze nunku tshiakasatu; bakenza nunku tshiakasatu. Mai akahueka hanshi ha tshioshelu, akûsha mutubu tente. Hakafika diba dia dilolo diakafilabo milambu ya kuosha, Eliya muprofete wakasemena ha buihi, wakamba ne, Yehowa, Nzambi wa Abalahama ne wa Isaka ne wa Isalele, bantu bamanye ne, Wewe udi Nzambi wa mu Isalele, ne meme muntu webe nakuenza malu â onso anu ku dî diebe. Ungunvuile, Yehowa, ungunvuile bua bantu aba bamanye ne, Wewe, Yehowa, udi Nzambi, ne wewe wakakudimusha mitshima yabo kabidi. Hashishe kahia ka Yehowa kakahona hanshi, kakosha mulambu ne nkunyi ne mabue ne dinfuenkenya ne kakakamisha mai akadi mu mutuhu. Hakatangila bantu bualu ebu, bakatua mpala yabo hanshi, bamba ne, Yehowa, yeye udi Nzambi; Yehowa, yeye udi Nzambi. Eliya wakabambila ne, Kuatai baprofete ba Bâla, nansha umue wabo kanyemi. Bakabakuata; Eliya wakaya nʼabo ku kasulu ha Kishona, wakabashihelaku. Eliya wakambila Ahaba ne, Juka biebe, udie, unue; bualu bua tshiona tshia nvula ya bungi tshidiku. Nunku Ahaba wakaya bua kudia ne kunua. Eliya wakabanda ha mutu ha Kâmele; wakinama hanshi, wakateka mpala wandi hankatshi ha binu biandi. Wakambila muntu wandi ne, Ya, utangile ku luseke lua ku mai manene. Wakaya, wakatangila, wakamba ne, Kakuena tshintu. Yeye wakamba ne, Ya kabidi misangu muanda mutekete. Hakayeye musangu wa muanda mutekete, yeye wakamba ne, Mona, ditutu dikese bu bunene bua tshianza tshia muntu didi dibanda ku mai manene. Eliya wakamba ne, Ya, wambile Ahaba ne, Longolola dikalu diebe, uhueke biebe bua nvula kakukandi. Anu tshituha tshihi diulu diakafika ne matutu, tshitelele tshiakatuta, nvula ya bungi yakaloka. Ahaba wakaya mu dikalu mu nshila wa ku Yizelele; tshianza tshia Yehowa tshiakadi kudi Eliya; wakasuika mukaba mu tshimona tshiandi, wakanyema ku mpala kua Ahaba tô ne ku tshibi tshia ku Yizelele. Ahaba wakambila Izebele malu onso akenza Eliya ne muakashiheye baprofete bonso ku miele ya nvita. Hashishe Izebele wakatuma mukenji kudi Eliya ne, Nzambi yonso bambe kungenzela malu mabi onso binahanga kuvuisha muoyo webe bu muoyo wa umue wabo makelela ha diba edi. Hakunvueye dî edi, wakajuka, wakanyema bua kusungileye muoyo wandi; hakafikeye ku Bê-sheba wa mu buloba bua Yuda, wakashiyaku muntu wandi. Kadi yeye nkayandi wakaya luendu lua dituku dimue mu tshihela, wakashikama hanshi muinshi mua mutshi wa genêt; wakalomba Nzambi bua kufueye, wamba ne, Kuakushika mpindiu, Yehowa angate muoyo wanyi, bualu bua meme tshiena muhite batatu banyi buakane. Wakalala tulu muinshi mua mutshi wa genêt: mona, muanjelo wakamulenga tshianza, wakamuambila ne, Juka biebe, udie. Wakatabala, wakamona mutanda wa bidia mulamba ha makala a kahia ne mulondo wa mai ku mutu kuandi. Wakadia, wakanua, wakalala kabidi. Muanjelo wakalua kudiye tshiakabidi, wakamulenga tshianza, wamba ne, Juka biebe, udie, bualu bua luendu ludi lukutonda. Wakajuka, wakadia, wakanua, wakaya mu bukole bua bidia abi tô minya ne matuku makumi anai tô ne ku Holeba, mukuna wa Nzambi. Wakabuela mu nyongolo, wakalalamu; dî dia Yehowa diakalua kudiye, diakamukonka ne, Eliya, udi wenza tshinyi kunoko? Yeye wakitaba ne, Nakadi ne lukunukunu lua bungi bualu bua Yehowa, Nzambi wa misumba; bualu bua Bena Isalele bakashiha tshihungidi tshiebe, bakela bioshelu biebe hanshi, bakashiha baprofete bebe ku miele ya nvita; anu meme nkayanyi ndi mushale, ne badi bakeba muoyo wanyi bua kûnyenga. Yeye wakamuambila ne Uluhuke, wimane ku mukuna ku mpala kua Yehowa. Yehowa wakahita ne tshihehele tshinene tshikole tshiakahanda mikuna, tshiakatshibula mabue ku mpala kua Yehowa; kadi Yehowa mene kakadi mu tshihehele. Ku nyima kua tshihehele buloba buakakanka, kadi Yehowa mene kakadi mu kukanka kua buloba. Ku nyima kua kukanka kua buloba, kahia kakadiku; kadi Yehowa mene kakadi mu kahia. Ku nyima kua kahia dî dikese ditekete diakunvuika. Hakunvua Eliya dî adi, wakavunga tshikowelu tshiandi ku mpala kuandi, wakaluhuka, wakimana ku mushiku wa nyongolo. Dî diakalua kudiye, diakamukonka ne, Eliya, udi wenza tshinyi kunoko? Yeye wakamba ne, Nakadi ne lukunukunu lua bungi bualu bua Yehowa, Nzambi wa misumba; bualu bua Bena Isalele bakashiha tshihungidi tshiebe, bakela bioshelu biebe hanshi, bakashiha baprofete bebe ku miele ya nvita, anu meme nkayanyi ndi mushale, badi bakeba muoyo wanyi bua kûnyenga. Yehowa wakamuambila ne, Walukile mu nshila wa mu tshihela tshia ku Damaseke; hawafikaku, bûdi nʼabu mbua kuela Hazaele manyi ha mutu bua kuikaleye mukelenge ku mutu kua Bena Sulia; wele Yehu, muana wa Nimishi, manyi ha mutu bua kuikaleye mukelenge ku mutu kua Bena Isalele; wele Elisha, muana wa Shafata wa mu Abele-mehola, manyi ha mutu bua kuikaleye muprofete mu muaba webe. Hashishe muntu udi uhanduka ku muele wa nvita wa Hazaele, Yehu neamushihe; muntu udi uhanduka ku muele wa nvita wa Yehu, Elisha neamushihe. Kadi nenshale bianyi ne bantu binunu muanda mutekete mu Isalele, badi kabayi banze kutua binu biabo hanshi kudi Bâla, badi kabayi banze kuluangana nʼandi mishiku. Wakumukaku, wakasangila ne Elisha, muana wa Shafata, wakadi wihila budimi ne bikokedi bia ngombe dikumi ne bibidi: yeye wakadi wenda ku tshikokedi tshia dikumi ne tshibidi; Eliya wakafika kudiye, wakela tshikowelu tshiandi hamʼbidi nʼandi. Yeye wakalekela ngombe yandi, wakalonda Eliya lubilu, wakamba ne, Ndi nkusengelela ne, Witabushe bua meme kuya kusangana ne tatu wanyi ne mamu wanyi mishiku, hashishe nenkulonde. Yeye wakamuambila ne, Hingana kabidi, nakukuenzela tshinyi? Wakalukila, wakangata ngombe ya ku tshikokedi, wakayishiha, wakatumpa minyinyi yai ne mutshi wa tshikokedi, wakayila bantu bandi, bobo bakadia. Hashishe wakajuka, wakalonda Eliya, wakamukuatshila mudimu. Bene-hadada, mukelenge wa Sulia, wakasangisha masalayi andi onso: bakelenge makumi asatu ne babidi bakadi nʼandi, ne tubalu ne makalu. Wakaya, wakatshintshimika musoko wa Samalea bua kûluisha. Wakatuma miloho kudi Ahaba, mukelenge wa Isalele, ku musoko, imuambila ne, Bene-hadada udi wamba ne, Tshiamu tshiebe tshia argent ne tshiamu tshiebe tshia or mbanyi; ne bakashi bebe ne bana bebe badi batamba buakane mbanyi kabidi. Mukelenge wa Isalele wakamukudimuna ne, Mukelenge wanyi, bualu ebu nebuikale anu bu mu dî diebe; ndi webe ne bintu bionso bindi nʼabi. Miloho yakahingana kudiye kabidi, yakamba ne, Bene-hadada udi wamba ne, Nakatuma mukenji kûdi wamba ne, Bûdi nʼabu mbua kufila argent yebe ne or yebe ne bakashi bebe ne bana bebe kundi; kadi nentume bantu banyi kûdi makelela ha diba edi mene, bobo nebadikebele mu nsubu webe ne mu nsubu ya bantu bebe, hashishe bintu bionso bidi bimpe ku mesu kuebe bobo nebabiangate mu bianza biabo, nebaye nʼabi. Hashishe mukelenge wakabikila bakulu bonso ba mu buloba, wakabambila ne, Tangilai bu mudi muntu eu ukeba diyoyo; wakantumina mukenji bua kuangateye bakashi banyi ne bana banyi ne argent yanyi ne or yanyi; tshiakabenga nansha. Bakulu bonso ne bantu bonso bakamuambila ne, Kunvu dî diandi nansha, kuitabushi nansha. Nunku yeye wakambila miloho ya Bene-hadada ne, Nuambile mukelenge wanyi ne, Nengenze malu onso awakambila muntu webe diambedi, kadi tshiena ngenza bualu ebu. Miloho yakumuka, yakahingana kudiye kabidi ne ditaba edi. Bene-hadada wakamuambila ne, Nzambi ya hatuhu itambe kungenzela malu onso bikala manza a dinfuenkenya dia buloba dia mu Samalea akumbana bu bungi bua bantu badi bandonda, Mukelenge wa Isalele wakamukudimuna ne, Numuambile ne, Muntu udi uluata bintu bia nvita kadifunyishi bu muntu udi ubivula. Hakunvua Bene-hadada dî edi, wakadi unua maluvu ne bakelenge bakadiye nʼabo mu nsubu, yeye wakambila bantu bandi ne, Nudilongolole. Bakadilongolola bua kuluanganabo ne bena musoko. Muprofete wakalua kudi Ahaba, mukelenge wa Isalele, wamba ne, Yehowa udi ukonka ne, Wewe wakatangila tshisumbu etshi tshia bantu tshinene, anyi? Mona, nentshifile mu bianza biebe lelu, wewe neumanye ne, Meme ndi Yehowa. Ahaba wakakonka ne, Ku bianza bia nganyi? Yeye wakamuambila ne, Yehowa udi wamba ne, Ku bianza bia bena mudimu ba banfumu ba mu buloba buebe. Wakakonka kabidi ne, Wabanga nvita nganyi? Wakamuambila ne, Wewe. Hashishe wakasangisha bena mudimu ba banfumu ba mu buloba, bakadi nkama ibidi ne makumi asatu ne babidi; hashishe wakabikila Bena Isalele bonso bu binunu muanda mutekete. Bakaluhuka munda munya; kadi Bene-hadada ne bakelenge makumi asatu ne babidi bakadiye nʼabo bakadi bakuatshike maluvu mu nsubu. Bena mudimu ba banfumu ba mu buloba bakadianjila ku mpala; Bene-hadada wakatuma dî dia kukonka bualu ebu; bakamuambila ne, Bantu bakufuma ku Samalea. Yeye wakamba ne, Biasuabo ditalala, nubakuate ne muoyo; biasuabo nvita, nubakuate ne muoyo kabidi. Nunku bena mudimu aba bakaluhuka ku musoko, ne bena nvita bakadi babalonda. Muntu yonso wakashiha muntu wakadi uluangana nʼandi; Bena Sulia bakanyema, ne Bena Isalele bakabihata. Bene-hadada, mukelenge wa Sulia, wakabanda ha nyima ha kabalu, wakahanduka ne bantu bakuabo bakadi babanda ha tubalu. Mukelenge wa Isalele wakaluhuka, wakashiha tubalu ne makalu ne Bena Sulia ne kushiha kukole. Muprofete wakalua hehi ne mukelenge wa Isalele, wakamuambila ne, Ya biebe, udikoleshe, udimuke kabidi bua malu audi wenza; bualu bua halua tshidimu tshikuabo, mukelenge wa Sulia neahingane bua kuluangana nʼebe. Bantu ba mukelenge wa Sulia bakamuambila ne, Nzambi wabo udi nzambi wa ku mukuna, nunku bakatuhita bukole; kadi bitualuangana nʼabo mu mpata, tuetu netubahite bukole. Wenze biebe bualu ebu: umushe bakelenge, muntu ne muntu mu muaba wandi, teka tupitene mu miaba yabo; usangishe masalayi bu muwakadi nʼau diambedi awakajimisha, tubalu bungi bumue, makalu bungi bumue; netuluangane nʼabo mu mpata, nembahite bukole bulelela. Yeye wakunyua dî diabo, wakenza nunku. Hakahita tshidimu tshikuabo, Bene-hadada wakasangisha Bena Sulia, bakaya ku Afeke bua kuluanganabo ne Bena Isalele. Bena Isalele bakadisangisha, bakangata bia kudia, bakaya bua kuluanganabo nʼabo. Bena Isalele bakasa bitudilu biabo, bakadi bu bisumbu bia bana ba mikoko bibidi ku mpala kuabo; kadi Bena Sulia bakûsha buloba tente. Muntu wa Nzambi wakasemena ha buihi, wakambila mukulenge wa Isalele ne, Yehowa udi wamba ne, Bualu bua Bena Sulia bakamba ne, Yehowa udi nzambi wa ku mikuna, kadi kena nzambi wa mu bibanda, ka meme nenfile tshisumbu etshi tshionso tshinene mu bianza biebe, ne wewe neumanye ne, Meme ndi Yehowa. Bakashikama mu bitudilu biabo matuku muanda mutekete; kadi mu dituku dia muanda mutekete bakabanga kuluangana; Bena Isalele bakashiha Bena Sulia bakadi benda hanshi binunu lukama mu dituku dimue. Kadi bakuabo bakanyemena mu musoko wa Afeke lumbu luakahukila bantu binunu makumi abidi ne muanda mutekete bakadi bashala. Bene-hadada wakanyemena mu musoko, wakabuela mu tshisokomenu munda mua nsubu. Bantu bandi bakalua kudiye, bakamuambila ne, Mona, tuakunvua lumu ne, Bakelenge ba Bena Isalele badi bakelenge ba luse; tudi tukusengelela ne, Bimpe tuluate bilulu bikayabala mu bifuka bietu, tusuike mionshi ku mitu yetu, tulubuke kudi mukelenge wa Isalele; bumue neasungile muoyo webe. Nunku bakaluata bilulu bikayabala mu bifuka biabo, bakasuika mionshi ku mitu yabo, bakalubuka kudi mukelenge wa Isalele, bakamuambila ne, Muntu webe Bene-hadada udi wamba ne Ndi nkusengelela ne, unshiye ne muoyo. Wakakonka ne, Yeye utshidi ne muoyo, anyi? Yeye udi muanʼetu. Bantu aba bakateleja matshu abo bimpe bua kujingululabo mei akambeye; nunku bakambilangana ne, E, muanʼenu, Bene-hadada. Hashishe yeye wakabambila ne, Yai, numubikile. Hashishe Bene-hadada wakalubuka kudiye; yeye wakamushikika mu dikalu diandi. Bene-hadada wakamuambila ne, Nenkuhingishile misoko yakanyenga tatu wanyi kuai tatu webe; wewe neudilongoluele misesu mu Damaseke, bu muakadilongoluela tatu wanyi mu Samalea. Ahaba wakamuambila ne, Nenkulekele bua tshihungidi etshi. Nunku wakahunga nʼandi tshihungidi, wakandekela. Muntu mukuabo wa bana ba balume ba baprofete wakambila mukuandi dî dia Yehowa ne, Ndi nkusengelela ne, Untute. Kadi muntu wakahidia kumututa. Hashishe yeye wakamuambila ne. Bualu bua wewe wakahidia dî dia Yehowa, mona, hawaya ha bule, nyama wa ntambue neakushihe. Hakumukeye kudiye, nyama wa ntambue wakasangila nʼandi, wakamushiha. Hashishe yeye wakasangila ne muntu mukuabo, wakamuambila ne, Ndi nkusengelela ne, Untute. Muntu wakamututa, wakamutaha mputa. Nunku muprofete au wakumuka, wakalamina mukelenge mu nshila, wakasuika tshilulu ku mesu andi, wakadifuanyikisha bu muntu mukuabo. Hakahita mukelenge, yeye wakadila kudi mukelenge, wakamba ne, Muntu webe wakaya munkatshi mua nvita; mona, muntu mukuabo wakalua kundi ne munga muntu, wakangambila ne, Ulame muntu eu; biajimineye, nebalombe muoyo webe ku muoyo wandi, anyi wewe neufute ntalanta wa argent. Hakadi muntu webe ne malu a bungi eku ne eku, yeye wakumuka. Mukelenge wa Isalele wakamuambila ne, Kulumbulula kuebe nekuikale nunku, wewe wakadikosela tshilumbu. Nunku wakumusha tshilulu ku mesu andi lubilu, ne mukelenge wakamumanya ne, Udi wa baprofete. Muprofete wakamuambila ne, Yehowa udi wamba ne, Bualu bua wewe wakalekela mu bianza biebe muntu unakasua kushiha, nunku nebalombe muoyo webe ku muoyo wandi ne bantu bebe ku bantu bandi. Mukelenge wa Isalele wakaya ku nsubu kuandi mubungame ne mutshima muneme bujitu, wakafika ku Samalea. Ku nyima kua malu â Nabota, Muena Yizelele, wakadi ne budimi bua tumuma tukese mu Yizelele ba buihi ne nsubu wa Ahaba, mukelenge wa mu Samalea. Ahaba wakambila Nabota ne, Umpe budimi buebe bua tumuma tukese bua meme kushala nʼabu bu tshibundu tshia matshitshi, bualu bua budi ha buihi ne nsubu, ne meme nenkuhe budimi bukuabo budi buhita buebe buakane, anyi biwamona ne mbimpe, nenkuhe argent bu mushinga wa budimi. Nabota wakambila Ahaba ne, Yehowa ampidishe bua meme kukuha buhianyi bua batatu banyi. Ahaba wakabuela mu nsubu muandi mubungame ne mutshima muneme bujitu bualu bua dî diakamuambila Nabota, Muena Yizelele; bualu bua yeye wakamuambila ne, Tshiena nkuha buhianyi bua batatu banyi. Wakakudimana ha bulalu buandi, wakatangisha mpala wandi ku tshimanu, kakadia tshintu. Kadi Izebele, mukashi wandi, wakabuela kudiye, wakamuebesha ne, Mutshima webe udi muneme bujitu nunku bua wewe kuena udia bua tshinyi? Yeye wakamuambila ne, Bualu bua nakuambila Nabota, Muene Yizelele, ne, Umpe budimi buebe bua tumuma tukese ku mushinga, anyi biwasua, meme nenkuhe wewe budimi bukuabo. Yeye wakungambila ne, Tshiena nkuha budimi buanyi bua tumuma tukese. Izebele, mukashi wandi, wakamuambila ne, Wewe kuena ukokesha mu bukelenge bua Isalele, anyi? Juka biebe, udie, mutshima webe usanke; meme nenkuhe budimi bua Nabota, Muena Yizelele. Nunku yeye wakafunda mikanda mu dina dia Ahaba, wakatekahu tshimanyinu tshiandi; wakatumina bakulu ne bantu banene ba mu musoko muakadi Nabota mushikame mikanda ei. Wakafunda mei mu mikanda ei ne, Nuele mukenji bua bantu bajile bia kudia, nushikike Nabota munkatshi mua bantu banene; nushikike bantu babidi bena lukinu ku mpala kuandi, bobo bamudingile ne, Wewe wakuhenda Nzambi ne mukelenge kabidi. Hashishe nuye nʼandi ha bule, numushihe ne mabue. Bena musoko wandi, bakulu ne bantu banene ba mu musoko muakadiye mushikame, bakenza bu mu dî dia Izebele diakabafundileye mu mikanda yandi. Bakela mukenji bua bantu bajile bia kudia, bakashikika Nabota munkatshi mua bantu banene. Bantu aba babidi, bena lukinu, bakabuela, bakashikama ku mpala kuandi; bena lukinu aba bakamudingila, Nabota mene, ku mesu kua bantu bonso, bamba ne, Nabota wakahenda Nzambi ne mukelenge kabidi. Hashishe bakumuka nʼandi mu musoko, bakamushiha ne mabue. Hashishe bakatumina Izebele dî ne, Nabota udi mushihibue ne mabue. Hakunvua Izebele dî adi ne, Nabota udi mushihibue ne mabue, Izebele wakambila Ahaba ne, Juka biebe, wangate budimi bua Nabota, Muena Yizelele, buakahidieye kukuhanyisha ku mushinga; bualu bua Nabota kena ne muoyo, udi mufue. Hakunvua Ahaba lumu lua lufu lua Nabota, Ahaba wakajuka, wakaya ku budimi bua Nabota, Muena Yizelele, bua kubuangata. Dî dia Yehowa diakalua kudi Eliya, Muena Tishebe, ne, Juka, uye biebe bua kusangila ne Ahaba, mukelenge wa Isalele, udi mushikame mu Samalea; yeye udi mu budimi bua Nabota buakuyeye kuangata. Bûdi nʼabu mbua kumuambila ne, Yehowa udi ukuebesha ne, Wewe wakumushiha bua kubunyenga ku bukole, anyi? Umuambile kabidi ne, Yehowa udi Wamba ne, Mu muaba wakalakila mbua mashi a Nabota mbua neyilake mashi ebe mene mene. Ahaba wakakonka Eliya ne, Wewe, muena lukuna wanyi, wakusangana, anyi? Yeye wakamukudimuna ne, Nakukusangana bualu bua wewe wakadihanyisha bua kuenza malu mabi ku mesu kua Yehowa. Nentume malu makole kûdi, nenkubutule, nenshihe bana ba balume bonso ba mu nsubu wa Ahaba, ne badi mu nsubu ne badi ha bule mu Isalele; nenvuishe nsubu webe bu nsubu wa Yalobama, muana wa Nebata, ne bu nsubu wa Bâsha, muana wa Ahiya, bua tshiji tshiwakunfuisha ne bua malu mabi awakuenzesha Bena Isalele. Yehowa wakamba bualu bua Izebele ne, Mbua neyidie Izebele hehi ne lumbu lua Yizelele. Hafua muntu wa mu nsubu wa Ahaba mu musoko, mbua neyimudileku; biafuileye mu mpata, nyunyu ya mulu neyimuzokole. Kakuakadi muntu mukuabo bu Ahaba wakadihanyisha bua kuenzeye malu mabi ku mesu kua Yehowa, wakadi musonsolodibue kudi Izebele, mukashi wandi. Wakenza malu a bundu a bungi bua kulondeye mpingu ne bilele bia Bena Amole bakumusha Yehowa ku mpala kua Bena Isalele. Hakunvua Ahaba mei au, wakadihanda bilulu biandi, wakaluata bilulu bikayabala hamʼbidi nʼandi, wakajila bia kudia, wakalala mu bilulu bikayabala, wakenda bitulu bitalu. Dî dia Yehowa diakalua kudi Eliya, Muena Tishebe, ne, Wakutangila bu mudi Ahaba mudihuekeshe ku mesu kuanyi, anyi? Bualu bua yeye wakudihuekesha nunku ku mesu kuanyi, tshiena ngenza malu au makole onso mu matuku andi: kadi nentume malu au makole ku nsubu wandi mu matuku a bana bandi ba balume. Bena Sulia ne Bena Isalele kabakaluangana nvita tô bidimu bisatu. Kadi mu tshidimu tshisatu Yehoshafata, mukelenge wa Yuda wakaya kudi mukelenge wa Isalele. Mukelenge wa Isalele wakambila bantu bandi ne, Nudi bamanye ne, Lamota-gilada udi wetu ne tuetu tudi bashikame tshianana, katuena tûnyenga mu bianza bia mukelenge wa Sulia, anyi? Yeye wakebesha Yehoshafata ne, Wewe neuye nʼanyi bua kuluangana ne Bena Lamota-gilada, anyi? Yehoshafata wakambila mukelenge wa Isalele ne, Meme ndi bu wewe, bantu banyi badi bu bantu bebe, tubalu tuanyi tudi bu tubalu tuebe. Yehoshafata wakambila mukelenge wa Isalele ne, Ndi nkusengelela ne, Udianjile kukonka dî dia Yehowa. Hashishe mukelenge wa Isalele wakasangisha baprofete bu nkama inai, wakabebesha ne, Nye kuluangana ne Bena Lamota-gilada, anyi nshale? Bakamuambila ne, Uye biebe, bualu bua Yehowa neafile musoko mu bianza bia mukelenge. Kadi Yehoshafata wakakonka ne, Kakuena muprofete wa Yehowa mukuabo kunoko utudi mua kuebesha, anyi? Mukelenge wa Isalele wakambila Yehoshafata ne, Muntu mukuabo udiku utudi mua kuebesha Yehowa mukana muandi, dina diandi Mikaya, muana wa Yimela; kadi ndi nʼandi tshiji bualu bua yeye katu wangambila malu mimpe, utu wangambila anu malu mabi, Yehoshafata wakamba ne, Mukelenge kambi nunku nansha. Hashishe mukelenge wa Isalele wakabikila kahita, wakamuambila ne, Lua ne Mikaya, muana wa Yimela, lubilu. Mukelenge wa Isalele ne Yehoshafata, mukelenge wa Yuda, bakadi bashikame mu nkuasa yabo ya bukelenge, baluate bilulu bia bakelenge, ku mbelu kua tshibi tshia ku Samalea; baprofete bonso bakadi bamba mei ku mpala kuabo. Sedekiya, muana wa Kenana, wakadienzela nsengu ya biamu, wakamba ne, Yehowa udi wamba ne, Wewe neusekile nʼai Bena Sulia tô ne hajiminabo. Baprofete bonso bakamba nunku ne, Ya biebe ku Lamota-gilada, wikale ne diakalengele; bualu bua Yehowa neafile musoko mu bianza bia mukelenge. Messager wakaya kubikila Mikaya, wakamuambila ne, Mona, baprofete bonso badi bambila mukelenge mei mimpe bu mukana mumue; nunku ndi nkusengelela ne, Dî diebe difuanangane ne mei abo, bua kumuambila mei mimpe kabidi. Mibi ya wakamba ne. Bu mudi Yehowa ne muoyo, meme nemmuambile anu mei adi Yehowa ungambila. Hakafikeye kudi mukelenge, yeye wakamuebesha ne, Mikaya, tuye kuluangana ne Bena Lamota-gilada, anyi tushale? Yeye wakamuambila ne, Ya biebe, wikale ne diakalengele, Yehowa neafile musoko mu bianza bia mukelenge. Mukelenge wakamuambila ne, Bundi nʼabu mbua kukutshihisha misangu dungi munyi bua wewe kungambila anu dî dilelela mu dina dia Yehowa? Yeye wakamuambila ne, Nakatangila Bena Isalele bonso bamuangalashibue ha mutu ha mikuna bu mikoko idi kayiyi ne mulami; Yehowa wakamba ne, Bobo kabena ne mulami, mbimpe bua buonso buabo bahingane ku nsubu yabo talalâ. Mukelenge wa Isalele wakambila Yehoshafata ne, Tshiakukuambila ne, Yeye kena ungambila malu mimpe, kadi anu malu mabi, anyi? Mikaya wakamba ne, Unvuai dî dia Yehowa: Nakatangila Yehowa mushikame mu nkuasa wandi wa butumbi, ne bisumbu bia bonso badi mu diulu bakadi bimane ha buihi nʼandi ku tshianza tshiandi tshia balume ne ku tshianza tshiandi tshia bakashi. Yehowa wakakonka ne, Nganyi neadinge Ahaba bua kuyeye kuluangana ne Bena Lamota-gilada ne kuhoneyeku? Mukuabo wakamba mei kampanda ne mukuabo wakamba mei kansanga. Hashishe nyuma mukuabo wakimana ku mesu kua Yehowa, wakamba ne, Meme nemmudinge. Yehowa wakamuebesha ne, Bishi? Wakamba ne, Nenye, nengikale bu nyuma wa kudinga mukana mua baprofete bandi bonso. Yeye wakamuambila ne, Wewe neumudinge, neumuhite bukole; ya, wenze nunku. Nunku Yehowa wakateka nyuma wa kudinga mukana mua baprofete bebe bonso; Yehowa wakamba malu mabi bualu buebe. Hashishe Sedekiya, muana wa Kenana, wakasemena ha buihi, wakataha Mikaya dilu ku ditama diandi, wakamuebesha ne, Nyuma wa Yehowa wakaya mu nshila kai hakafumeye kundi bua kukuambila dî? Mikaya wakamuambila ne, Wewe neumone dituku diudi ubuela mu tshisokomenu tshiebe bua kusokoma. Mukelenge wakamba ne, Kuatai Mikaya, nuye nʼandi kudi Amona, nfumu wa musoko, ne kudi Yoasha, muana wa makelenge; nubambile ne, Mukelenge udi wamba ne, Nubueshe muntu eu mu nsubu wa lukanu, numudishe bia kudia bia badi mu dikenga, numunuishe mai a badi mu dikenga tô ne hanahingana talalâ. Mikaya wakamuambila ne, Biwahingana talalâ, bulelela, Yehowa kena mungambile bualu. Yeye wakamba ne, Nuenu bantu bonso, unvuai. Nunku mukelenge wa Isalele, ne Yehoshafata, mukelenge wa Yuda, bakaya kuluangana ne Bena Lamota-gilada. Mukelenge wa Isalele wakambila Yehoshafata ne, Meme nendifuanyikishe bu muntu mukuabo hanaya mu nvita, kadi wewe uluate bilulu bia mukelenge. Mukelenge wa Isalele wakadifuanyisha bu muntu mukuabo, wakaya mu nvita. Mukelenge wa Sulia wakadianjila kuambila tupitene tua makalu andi makumi asatu ne tubidi ne, Kanuluanganyi ne bantu bakese anyi banene anu ne mukelenge wa Isalele mene. Nunku hakatangila tupitene tua makalu Yehoshafata, bakambilangana ne, Bulelela, yeye udi mukelenge wa Isalele, tuakasesuka bua kuluangana nʼandi; Yehoshafata wakela dî diandi. Hakatangila tupitene tua makalu ne, Yeye kena mukelenge wa Isalele; bakalukila, bakalekela kumuihata. Kadi muntu mukuabo wakela buta buandi ku mpukahuka, wakasa mukelenge wa Isalele hakadi biamu bia nvita bituilangane. Yeye wakambila muendeshi wa dikalu diandi ne, Wahuke, umuke nʼanyi munkatshi mua masalayi bualu bua ndi mutaha mputa mukole. Bakaluangana nvita mikole dituku adi; bakajadika mukelenge mu dikalu ku mpala kua Bena Sulia, yeye wakafua dilolo; mashi andi akahatuka mu mputa akahueka hanshi tô ne ha dikalu. Hakamba diba kubuela, bakelangana mei ne, Bantu bonso baye ku misoko yabo ne ku buloba buabo. Nunku mukelenge wakafua, bakaya nʼandi mu Samalea; bakajika mukelenge mu Samalea. Hakadibo buvuwa dikalu ku mushimi wa mai wa mu Samalea, mbua yakalaka mashi andi (bakashi ba masandi bakadi bowelaku mai), bu mu dî diakamba Yehowa. Bienzedi bia Ahaba bikuabo biakenzeye ne nsubu wa mibanga wakaseye ne misoko yonso yakaseye kabiena bifunda mu mukanda wa kulondolola kua malu a hakelenge ba Isalele, anyi? Ahaba wakalala tulu ne bankambua bandi. Ahazaya, muanʼandi, wakakokesha mu muaba wandi. Yehoshafata, muana wa Asa, wakabanga kukokesha mu Yuda mu tshidimu tshinai tshia bukelenge bua Ahaba, mukelenge wa Isalele. Yehoshafata wakadi ne bidimu makumi asatu ne bitanu hakabangeye kukokesha; wakakokesha mu Yelushalema bidimu makumi abidi ne bitanu. Dina dia mamu wandi diakadi Azuba, muana wa Shilihi. Yeye wakenda mu nshila yonso ya tatu wandi Asa; yeye kakasesuka mu nshila yandi, Wakenza malu mimpe ku mesu kua Yehowa; kadi yeye kakumusha bitendelelu bia ku mikuna; bantu bakatshidi bafila milambu ne musenga wa manananshi ha mutu ha mikuna. Yehoshafata wakavuisha ditalala ne mukelenge wa Isalele. Bienzedi bia Yehoshafata bikuabo ne bukole buakadiye nʼabu ne nvita yandi kabiena bifunda mu mukanda wa kulondolola kua malu a bakelenge ba Yuda, anyi? Yeye wakumusha tshituha tshia bena sodoma bakadi bashala mu buloba mu matuku a tatu wandi Asa. Kakuakadi mukelenge mu Edome; anu muloho wakadi mukelenge. Yehoshafata wakenza matu a Tâshishi a kuya nʼau ku Ofî bua kuangata or; kadi kakafikaku, akafuila anu ku Esione-gebê. Hashishe Ahazaya, muana wa Ahaba, wakambila Yehoshafata ne, Mbimpe bua bantu banyi baye ne bantu bebe mu matu. Yehoshafata wakabenga. Yehoshafata wakalala tulu ne bankambua bandi, bakamujika ne bankambua bandi mu musoko wa Davidi, tatu wandi. Yeholama, muanʼandi, wakakokesha mu muaba wandi. Ahazaya, muana wa Ahaba, wakabanga kukokesha Bena Isalele mu Samalea mu tshidimu tshia dikumi ne muanda mutekete tshia bukelenge bua Yehoshafata mukelenge wa Yuda; wakakokesha Bena Isalele bidimu bibidi. Wakenza malu mabi ku mesu kua Yehowa, wakenda mu nshila ya tatu wandi ne ya mamu wandi ne ya Yalobama, muana wa Nebata, wakenzesha Bena Isalele malu mabi. Wakakuatshila Bala mudimu, wakamutendelela bua kufuisha Yehowa, Nzambi wa Isalele, tshiji bu muakenza tatu wandi. Ku nyima kua lufu lua Ahaba, Bena Moaba bakatombokela Bena Isalele. Ahazaya wakakuluka mu tusoso tua mabaya a madidishi a ku nsubu wandi wa kulu wa mu Samalea, wakasama; wakabikila ba-messager bandi, wakabambila ne, Yai bienu kudi Bâla-zebuba, nzambi wa mu Ekelona, numuebeshe ne, Meme nensangale ku disama edi, anyi? Kadi muanjelo wa Yehowa wakambila Eliya, Muena Tishebe, ne, Juka, uye kusangila ne ba-messager ba mukelenge wa Samalea, uheheshe ne, Nudi nuyila kuebesha Bâla-zebuba, nzambi wa Ekelona, bualu, bualu bua kakuena Nzambi mu Isalele, anyi? Nunku Yehowa udi wamba ne, Wewe kuena ujuka ha bulalu bûdi mulale, kadi wewe neufue bulelela. Eliya wakumukaku. Ba-messager bandi bakahingana kudiye, yeye wakabakonka ne, Nuakuhingana bua tshinyi? Bakamuambila ne, Muntu wakasangila nʼetu, wakatuambila ne, Alukilai, nuhingane kudi mukelenge wakanutuma, numuambile ne, Yehowa udi ukonka ne, Nudi nuyila kuebesha Bâla-zebuba, nzambi wa Ekelona, bualu, bualu bua kakuena Nzambi mu Isalele, anyi? Nunku wewe kuena ujuka ha bulalu bûdi mulale, kadi neufue bulelela. Yeye wakabebesha ne, Muntu unuakasangila nʼandi, wakanuambila mei â, wakadi bishi? Bakamuambila ne, Wakadi ne tshikowelu tshia miosa ne mukaba wa tshiseba ku tshifuka tshiandi. Yeye wakamba ne, Yeye udi Eliya, Muena Tishebe. Hashishe mukelenge wakamutumina kapitene ka masalayi ne bantu bandi makumi atanu. Kakaya kudiye, kakamusangana mushikame ha mutu ha mukuna. Kakamuambila ne, Wewe, muntu wa Nzambi, mukelenge udi wamba ne, Uhueke biebe. Eliya wakambila kapitene ka bantu bandi makumi atanu ne, Bingikala muntu wa Nzambi, kahia kafume mu diulu, kakuoshe ne bantu makumi atanu badi nʼebe. Kahia kakafuma mu diulu kakamuosha ne bantu bandi makumi atanu. Yeye wakatuma kapitene kakuabo ne bantu bandi makumi atanu kudiye kabidi. Kakamuambila ne, Wewe, muntu wa Nzambi, mukelenge udi wamba ne, Uhueke biebe lubilu. Eliya wakabambila ne, Bingikala muntu wa Nzambi, kahia kafuma mu diulu, kakuoshe ne bantu bebe makumi atanu. Kahia kakafuma kudi Nzambi, kakamuosha ne bantu bandi makumi atanu. Wakatuma kapitene kakuabo ne bantu bandi makumi atanu. Kapitene kisatu kakaya ne bantu bandi makumi atanu, kakatua binu biandi hanshi ku mpala kua Eliya, kakamusengelela ne, Wewe, muntu wa Nzambi, ndi nkusengelela ne, Witabushe bua muoyo wanyi ne mioyo ya bantu aba, bena mudimu bebe, makumi atanu ikale ya mushinga mukole ku mesu kuebe. Mona, kahia kakafuma mu diulu diambedi kakosha tupitene tubidi ne bantu batu makumi atanu makumi atanu; kadi witabushe bua muoyo wanyi wikale wa mushinga mukole ku mesu kuebe. Muanjelo wa Yehowa wakambila Eliya ne, Uye nʼandi, kumutshinyi. Yeye wakajuka, wakaya nʼandi kudi mukelenge. Yeye wakamuambila ne, Yehowa udi wamba ne, Wewe wakatuma ba-messager bua kuebesha Bâla-zebuba, nzambi wa Ekelona, dî bualu bua kakuena Nzambi mu Isalele bua wewe kumuebesha dî, anyi? Nunku wewe kuena ujuka ha bulalu bûdi mulale, kadi neufue bulelela. Nunku mukelenge wakafua bu mu dî dia Yehowa diakamba Eliya. Yeholama wakabanga kukokesha mu muaba wandi mu tshidimu tshibidi tshia bukelenge bua Yeholama, muana wa Yehoshafata, mukelenge wa Yuda, bualu bua yeye kakadi ne muana wa balume. Bienzedi bia Ahazaya bikuabo biakenzeye kabiena bifunda mu mukanda wa kulondolola kua malu a bakelenge ba Isalele, anyi? Hakafika tshikondo tshiakasungula Yehowa bua kuya ne Eliya mu diulu mu nvunde, Eliya wakafuma ne Elisha mu Gilegala. Eliya wakambila Elisha ne, Ndi nkusengelela ne, Wewe ushikame kunoko, bualu bua Yehowa wakantuma ku Betele. Elisha wakamuambila ne. Bu mudi Yehowa ne muoyo ne bu mudi mutshima webe ne muoyo, tshiena ukulekela. Nunku bubidi buabo bakaya ku Betele. Bana balume ba baprofete bakadi ku Betele, bakalua kudi Elisha, bakamuebesha ne, Udi mumanye ne, Yehowa neumushe mukelenge webe ku mutu kuebe lelu, anyi? Yeye wakabambila ne, E, ndi mumanye, nuanji kuhuwa. Eliya wakambila Elisha ne, Ndi nkusengelela ne, Ushikame kunoko, bualu bua Yehowa wakuntuma ku Yeleko. Yeye wakamuambila ne, Bu mudi Yehowa ne muoyo ne bu mudi mutshima webe ne muoyo, tshiena nkulekela. Nunku bakaya ku Yeleko. Bana balume ba baprofete ba mu Yeleko bakaluhuka kudi Elisha, bakamuebesha ne. Udi mumanye ne, Yehowa neumushe mukelenge webe ku mutu kuebe lelu, anyi? Yeye wakabambila ne, E, ndi mumanye, nuanji kuhuwa. Eliya wakamuambila ne, Ndi nkusengelela ne, Ushikame kunoko, bualu bua Yehowa wakuntuma ku Yadene. Yeye wakamuambila ne, Bu mudi Yehowa ne muoyo ne bu mudi mutshima webe ne muoyo, tshiena nkulekela. Bubidi buabo bakatshidi baya. Makumi atanu ba bana balume ba baprofete bakaya, bakimana ha bule buludiludi nʼabo, bubidi buabo bakimana hehi ne Yadene. Eliya wakakohola tshikowelu tshiandi, wakatshivunga wakatula ha mai, ne mai akahanduluka eku ne eku; bubidi buabo bakasabuka ha buloba bûme. Hakasabukabo, Eliya wakambila Elisha ne, Ulombe tshindi mua kukuenzela diambedi tshiyi muanze kubandishibua kudi Elisha wakamuambila ne, Ndi nkusengelela ne, Witabushe bua bituha bibidi bia nyuma webe bikale kundi. Yeye wakamba ne, Wewe wakulomba bualu bakole, kadi biwantangila hanabandishibua kûdi, bualu nebuenjibue bu mu dî diebe; kedi biwikala kuyi untangila, bualu kabuena buenjibua. Hakatshidibo benda bayikila, monai, dikalu dia kahia ne tubalu tua kahia biakamueneka, biakabahandulula, ne Eliya wakabandishibua mu diulu mu nvunde. Elisha wakamumona, wakela dî diandi ne, Tatu wanyi, tatu wanyi, dikalu dia Isalele ne badi benda ha tabalu tuadi! Yeye kakamutangila kabidi. Yeye wakavula bilulu biandi, wakabihanda bihese bibidi. Wakambula kowelu tshia Eliya tshiakahona kudiye wakahingana, wakimana kumuelelu wa Yadene. Wakangata tshikowelu tshia Eliya tshiakahona kudiye, wakatula ha mai, wakamba ne Yehowa, Nzambi wa Eliya, udi kudi kunyi? Hakatuteye ha mai, mai akahanduluka eku ne eku; Elisha wakasabuka. Hakamutangila bana balume ba baprofete bakadi ku Yeleko, bakambilangana ne, Nyuma wakadi nʼandi Eliya wakatulukila Elisha. Bakalua kumuakidila. Bakinama hanshi ku mpala kuandi. Bakamuambila ne, Mona, bakole makumi atanu badi munkatshi mua bantu bebe badi kunoko; ludi tukusengelela ne. Ubatume, bakehe mukelenge webe; bumue Nyuma wa Yehowa wakabanda nʼandi, wakamuela ha mutu ha mukuna mukuabo anyi mu tshinga tshibanda. Yeye wakamba ne, Kanubatumi. Hakadibo bamusengelele tô ne bakamukuata bundu, yeye wakamua ne, Nubatume. Bakatuma bantu makumi atanu, bakakebakeba tô matuku asatu, kadi kabakamusangana. Bakahingana kudiye hakadiye mu Yeleko; yeye wakabebesha ne, Tshiakanuambila ne, Kanuyi, anyi? Bena musoko bakambila Elisha ne, Mona, tudi tukusengelela ne. Muaba wa musoko wetu udi muimpe, bu mudi mukelenge wetu umona, kadi mai adi mabi, buloba kabuena bumenesha bintu bimpe. Yeye wakamba ne, Nulue kundi ne mulondo muhia-muhia, nuelemu luehu. Bakalua nʼau kudiye. Yeye wakaya ku mishimi ya mai, wakelamu luehu wamba ne, Yehowa udi wamba ne, Nakalengesha mai a; lulu ne kuhoka kua mamuma kabiena bifumaku kabidi. Nunku mai â akalengeshibua tô ne ku difuku edi bu mu dî diakamba Elisha. Yeye wakumukaku, wakaya ku Betele: hakadiye uya mu nshila, bana ba balume bakaluhuka mu musoko, bakamuseka, bakamuambila ne, Banda biebe, muena lubala! Banda biebe, muena lubala! Yeye wakatshunguluka, wakabatangila, wakabela mulau mu dina dia Yehowa. Bakashi ba ours babidi bakaluhuka muitu, bakahandangana bana ba balume makumi anai ne babidi bakadi munkatshi muabo. Wakafumaku, wakaya ku mukuna wa Kâmele, wakahingana ku Samalea. Yeholama, muana wa Ahaba, wakabanga kukokesha Bena Isalele mu Samalea mu tshidimu tshia dikumi ne muanda mukulu tshia bukelenge bua Yehoshafata, mukelenge wa Yuda; yeye wakakokesha bidimu dikumi ne bibidi. Wakenza malu mabi ku mesu kua Yehowa; kadi kakenza bu muakenza tatu wandi ne mamu wandi; bualu bua yeye wakumusha luhingu lua Bâla luakenza tatu wandi. Kadi wakalamata malu mabi a Yalobama, muana wa Nebata, akenzesheye Bena Isalele, yeye kakâlekela nansha. Mesha, mukelenge wa Moaba, wakadi muena mikoko; yeye wakadi ufila miosa ya binunu lukama bia bana ba mikoko ne ya binunu lukama bia bimpanga kudi mukelenge wa Isalele. Kadi hakafua Ahaba, mukelenge wa Moaba wakatombokela mukelenge wa Isalele. Ku tshikondo atshi mukelenge Yeholama wakafuma ku Samalea, wakabikila Bena Isalele bonso. Wakatuma mukenji kudi Yehoshafata, mukelenge wa Yuda, wamba ne, Mukelenge wa Moaba wakuntombokela, wewe neuye nʼanyi bua kuluangana ne Bena Moaba, anyi? Wakamukudimuna ne, Tuyaya nʼebe! Meme ndi bu wewe, bantu banyi badi bu bantu bebe, tubalu tuanyi tudi bu tubalu tuebe. Wakamuebesha ne, Netuyile nshila kai? Wakamukudimuna ne, Mu nshila wa mu tshihela tshia Edome. Mukelenge wa Isalele wakaya ne mukelenge wa Yuda ne mukelenge wa Edome; bakenda luendu lunyunguluke tô lua matuku muanda mutekete; kabakamona mai a kunuisha hau bantu anyi nyama biakadi bienda nʼabo. Mukelenge wa Isalele wakamba ne, Aka, Yehowa wakabikila bakelenge aba basatu basangisha bua kubafila mu bianza bia Bena Moaba. Kadi Yehoshafata wakebesha ne, Kakuena muprofete wa Yehowa kunoko utudi mua kuebesha Yehowa dî mukana muandi, anyi? Umue wa bantu ba mukelenge wa Isalele wakamba ne, Elisha, muana wa Shafata, udiku, wakadi wela mai ha bianza bia Eliya. Yehoshafata wakamba ne, Dî dia Yehowa didi mukana muandi. Nunku mukelenge wa Isalele ne Yehoshafata ne mukelenge wa Edome bakaya kudiye. Elisha wakebesha mukelenge wa Isalele ne, Ndi nʼebe bualu kai? Ya biebe kudi baprofete ba tatuʼebe ne ba mamuʼebe. Mukelenge wa Isalele wakamukudimuna ne, Nansha, bualu bua Yehowa wakabikila bakelenge aba basatu hohamue bua kubafila mu bianza bia Bena Moaba. Elisha wakamba ne, Bu mudi Yehowa wa misumba ne muoyo, undi ngimana ku mpala kuandi, bu Yehoshafata, mukelenge wa Yuda, kayi muikaleku, tshiakadi kutangila luseke lûdi, tshiakadi kukumona. Kadi katataka ulue ne muimbi wa tshisanji kundi. Hakamuimbila muimbi wa tshisanji, tshianza tshia Yehowa tshiakalua kudiye. Yeye wakamba ne, Yehowa udi Wamba ne, Umbulai mitubu mu tshibanda etshi tshionso. Bualu bua Yehowa udi wamba ne, Kanuena nutangila luhehele, kanuena nutangila nvula, kadi tshibanda atshi netshiule tente ne mai, ne nuenu ne bimuna bienu ne tubalu tuenu nenunueku. Kadi bualu ebu budi anu bualu bukese ku mesu kua Yehowa; yeye neafile Bena Moaba mu bianza bienu kabidi. Nuenu nenuhaule misoko yonso idi ne ngumbu, ne misoko yonso idi miakane, nenushimbule mitshi yonso idi mimpe, nenujibike mishimi yonso ya mai, nenunyange madimi onso adi mimpe ne mabue kabidi. Hakatshiabu bu ha diba didibo bafila milambu, mai akafuma ku nshila wa ku Edome, akûsha buloba abu tente. Hakunvua Bena Moaba bonso lumu ne, Bakelenge aba bakalua kuluangana nʼetu, bonso bakadi ne bukole bakaluata bintu bia nvita, bakimana ku mukalu wa buloba buabo. Hakabikabo ne dinda dionso, hakakenka diba ha mai, Bena Moaba bakatangila mai mikale makunze-kunzû bu mashi. Bakambilangana ne, Au mmashi, bakelenge bakabutulangana bulelela, bakashihangana; nunku tuyai bietu, Bena Moaba, kuhaula bintu! Hakafikabo ku tshitudilu tshia Bena Isalele, Bena Isalele bakajuka, bakataha Bena Moaba, bakanyema ku mpala kuabo, bakabuela mu buloba bua Bena Moaba, bakabashiha. Bakahaula misoko yabo; bakela mabue, muntu diandi muntu diandi, ha madimi mimpe, bakadisha tente; bakajibika mishimi ya mai; bakashimbula mitshi mimpe yonso, tô ne hakafikabo ku Kila-halaseta, bakashiyamu mabue nkayau. Kadi bakadi bela mabue ne bieledi, bakanyunguluka, bakaunyenga. Hakatangila mukelenge wa Moaba ne, Bakatuhita bukole, yeye wakasangisha bena nvita ba miele nkama muanda mutekete, wakakeba kuhitshila nʼabo tô ne kudi mukelenge wa Edome; kadi bakahanga. Hashishe yeye wakangata muanʼa bute wandi wakadi mua kukokesha mu muaba wandi, wakamufila bu mulambu wa kuosha ha kahia ha mutu ha lumbu. Bakadi ne Bena Isalele tshiji tshikole, bakumuka kudiye, bakahingana ku buloba buabo. Mukashi wa umue wa bana ba baprofete wakadila kudi Elisha ne, Muntu webe, bayanyi udi mufue; wewe udi mumanye bu muakatshina muntu webe Yehowa; muena dibanza wakalua bua kuangata bana banyi babidi bu bahika. Elisha wakamuebesha ne, Udi musue meme nkuenzele tshinyi? Ungambile tshiudi nʼatshi mu nsubu muebe. Yeye wakamuambila ne, Muntu webe mukashi kena ne tshintu mu nsubu anu kasu ka manyi. Hashishe yeye wakamba ne, Ya, usombe biasu kudi bakuenu bia munda mutuhu: usombe bikumbane bia bungi. Nunku ubuele mu nsubu, wewe ne bana bebe balume, winshile tshibi, uhongolole manyi mu biasu abi bionso; hûla tshiasu tente, utshiteke ha buatshi. Nunku yeye wakumuka kudiye, wakabuela mu nsubu ne bana bandi ba balume, wakinshila tshibi; bobo bakalua ne biasu kudiye, yeye wakahongolola manyi. Hakûsheye biasu bionso tente, yeye wakambila umue wa bana bandi ba balume ne, Umpe tshiasu tshikuabo. Yeye wakamuambila ne, Kakuena tshiasu tshikuabo. Nunku manyi akakama. Hashishe yeye wakaya, wakamanyisha muntu wa Nzambi. Yeye wakamuambila ne, Ya, uhane manyi au, umane dibanza diebe, ne wewe ne bana bebe balume nuikale ne muoyo ku bidi bishale. Dituku dikuabo hakafika Elisha ku Shunema, mukashi wa buneme wakadiku wakamusengelela bua kudieye nʼandi bidia. Misangu yonso hakafikeye ku musoko, wakayaku bua kudia. Yeye wakambila bayandi ne, Ndi mumanye ne, Muntu eu udi muntu muakane wa Nzambi utu walua kutudi. Ndi nkusengelela ne, Tumuenzele nsubu mukese ha mutu ha lumbu, tumutekele bulalu ne mesa ne nkuasa ne tshitekelu tshia muinda; nunku halueye kutudi, yeye udi mua kubuelamu. Dituku dikuabo yeye wakayaku, wakabuela mu nsubu au, wakalalamu. Yeye wakambila Gehazi, muena mudimu wandi, ne, Bikila Muena Shunema eu. Hakamubikileye, yeye wakabuela, wakimana ku mpala kuandi. Yeye wakambila Gehazi ne, Umuambile ne, Mona, wewe wakatulesha dikuatshisha edi dinene, tuetu netukuenzele wewe tshinyi? Udi musue tuetu tukuakuile kudi mukelenge anyi kudi kapitene ka masalayi, anyi? Yeye wakamukudimuna ne, Ndi mushikame munkatshi mua bana betu. Yeye wakamuebesha ne, Netumuenzele tshinyi? Gehazi wakamuambila ne, Yeye kena ne muana wa balume ne bayandi udi muntu mununu. Yeye wakamuambila ne, Umubikile. Hakamubikileye, yeye wakimana ku tshibi. Yeye wakamuambila ne, Ku tshikondo etshi, hakumbana ngondo yebe, wewe neukongoluele muana wa balume. Yeye wakamuambila ne, Nansha, mukelenge wanyi, wewe muntu wa Nzambi, kudingi muntu webe mukashi. Mukashi eu wakimita difu, wakalela muana wa balume ku tshikondo atshi hakakumbana ngondo yandi bu muakamuambila Elisha. Hakakola muana eu, dituku dikuabo yeye wakaya kudi tatu wandi munkatshi mua banowi. Yeye wakadila kudi tatu wandi ne, Mutu wanyi, mutu wanyi! Yeye wakambila muena mudimu ne, Umuambule, uye nʼandi kudi mamu wandi. Hakamuambuleye, wakaya nʼandi kudi mamu wandi; yeye wakashikama ha bibelu bia mamu wandi tô ne munda munya, hashishe wakafua. Yeye wakabanda nʼandi ku nsubu wa kulu, wakamuladika ha bulalu bua muntu wa Nzambi, wakaluhuka, wakinshila tshibi. Yeye wakabikila bayandi, wakamuambila ne, Ndi nkusengelela ne, Untumine muena mudimu ne nyama wa mpunda bua meme kulonda muntu wa Nzambi, mpingane kabidi. Yeye wakamuebesha ne, Udi musue kuya kudiye lelu bua tshinyi? Edi kandituku dia lumingu ne ngondo kena muanze kubala. Mukashi wakamuambila ne, Bualu nebuikale buakane. Hashishe yeye wakela tshiseba ha nyima ha mpunda, yeye wakambila muena mudimu ne, Uye lubilu, kujingakanyi anu ku dî dianyi. Nunku wakaya, wakafika kudi muntu wa Nzambi ku mukuna wa Kâmele. Muntu wa Nzambi wakamutangila hakadiye kule kuakua, wakambila Gehazi, muena mudimu wandi, ne, Mona, Muena Shunema ulualua: ndi nkusengelela ne, Ya lubilu kusangakena nʼandi, umuebeshe ne, Udi bimpe, anyi? Bayebe udi bimpe, anyi? Muana udi bimpe, anyi? Yeye wakamuambila ne, Mbimpe. Kadi hakafikeye kudi muntu wa Nzambi ku mukuna, yeye wakamukuata ku makasa andi. Gehazi wakasemena ha buihi bua kumusakila, kadi muntu wa Nzambi wakamuambila ne, Umulekele bualu bua mutshima wandi udi unema bujitu munda muandi. Yehowa wakunsokoka bualu ebu, kena muanze kubungambila. Hashishe mukashi wakamuebesha ne, Meme nakalombela mukelenge wanyi muana wa balume, anyi? Tshiakakuambila ne, Kundingi anyi? Hashishe yeye wakambila Gehazi ne, Suika mukaba webe, wangate mulangala wanyi mu tshianza tshiebe, ya mu nshila webe; biwasangakena ne muntu, kumuedi muoyo nansha; biakuela muntu muoyo, kuitabi nansha; ya, uteke mulangala wanyi ha mpala ha muana Mamu wa muana wakamba ne, Bu mudi Yehowa ne muoyo ne bu mudi mutshima webe ne muoyo, tshiena nkulekela. Yeye wakajuka, wakamulonda. Gehazi wakadianjila ku mpala kuabo, wakateka mulangala ha mpala ha muana; kadi kakuakadi dî, nansha diunvuika. Nunku wakalukila bua kusangakeneye nʼandi, wakamuambila ne, Muana kena mutabale. Hakabuela Elisha mu nsubu, wakasangana muana mufue muladika ha bulalu buandi. Yeye wakabuela mu nsubu, wakadijidila tshibi, bubidi buabo ha nkayabo, wakatendelela Yehowa. Wakaya ku bulalu, wakalala hamʼbidi ba muana, wakateka mukana muandi ha mukana mua muana, ne mesu andi ha mesu andi ne bianza biandi ha bianza biandi, wakadinana hamʼbidi handi; mubidi wa muana wakakuata luya. Wakajuka, wakendakana mu nsubu, wakabanda kabidi, wakadinana hamʼbidi na muana; muana wakela nyatshi misangu muanda mutekete, wakabulula mesu andi. Wakabikila Gehazi, wakamuambila ne, Bikila Muena Shunema. Yeye wakamubikila. Hakabueleye kudiye, yeye wakamuambila ne, Ambule muana webe. Hashishe yeye wakabuela, wakahona ku makasa andi, wakatua mpala wandi hanshi, wakambula muana wandi, wakaya. Elisha wakaya ku Gilegala kabidi, tshiole tshiakadi mu buloba. Bana ba baprofete bakadi bashikame ku mpala kuandi; wakambila muena mudimu wandi ne, Wambile luesu lunene ha kahia, ulambishile bana ba baprofete kaleji. Umue wabo wakaya mu budimi bua kuaka kaleji, wakasanganamu muonshi wa hatuhu, wakahuola biloaloa mu tshilulu tshiandi, wakahingana nʼabi, wakabihanda, wakabiela mu luesu, kabakabimanya nansha. Nunku bakadilongolola bua bantu badie. Hakadibo badia, bakela dî bamba ne Muntu wa Nzambi, lufu lua diku ludi mu luesu elu. Kabakamanya mua kuhidia. Kadi yeye wakamba ne, Balue kundi ne bukula. Wakabuela mu luesu; wakamba ne, Uhongoluele bantu, badie. Kakuakadi bualu mu luesu kabidi. Muntu wa ku Bâla-shalisha wakalua kudi muntu wa Nzambi ne bintu biakahuolabo diambedi, mitanda ya bidia bia orge makumi abidi, ne manvua mabishi mu tshibombi tshiandi. Yeye wakamba ne, Uhe bantu aba, badie. Muntu wandi wakamuebesha ne, Bundi nʼabu mbua kuteka bintu ebi ku mesu kua bantu lukama, anyi? Kadi yeye wakamuambila ne, Uhe bantu, badie, bualu bua Yehowa udi wamba ne, Bobo nebadie ne bintu nebishale. Nunku wakabiteka ku mpala kuabo, bakadia ne bintu biakashala bu muakadi dî dia Yehowa. Nâmana, kapitene ka masalayi a mukelenge wa Bena Sulia, wakadi muntu munene wa butumbi ku mesu kua mukelenge wandi, bualu bua Yehowa wakalesha Bena Sulia luhandu ku tshianza tshiandi; yeye kabidi wakadi muena bukitu, kadi wakadi muena nsudi. Diambedi Bena Sulia bakamuangalaka mu matunga, bakafuma ku buloba bua Isalele ne nsongakashi mukese bu muhika; yeye wakakuatshila mukashi wa Nâmana mudimu. Yeye wakambila mukelenge wandi mukashi ne, Bu mukelenge wanyi muikale ne muprofete udi mu Samalea, yeye wakadi kumuondaha disama diandi dia nsudi. Muntu mukuabo wakaya kudi mukelenge wandi, wakamuambila ne, Nsongakashi wa mu buloba bua Isalele udi Wamba mei nunku. Mukelenge wa Sulia wakamba ne, Nentumine mukelenge wa Isalele mukanda. Bakaya ne ntalanta dikumi ya argent ne nshekele ya or binunu bisambombo ne bilulu dikumi bitambe buimpe. Wakaya ne mukanda kudi mukelenge wa Isalele, wamba ne, Hawabala mukanda eu, Umanye ne, Nakakutumina muntu wanyi Nâmana, bua wewe kumuondaha disama diandi dia nsudi. Hakabala mukelenge wa Isalele mukanda eu, wakahanda bilulu biandi, wakamba ne, Meme ndi Nzambi bua kushiha ne bua kubishangana ku lufu bua muntu eu udi untumina muntu wandi bua meme kumuondaha disama diandi dia nsudi, anyi? Ndi ngelangana meji ne, Yeye udi ukeba kuntekela diyoyo. Hakunvua Elisha, muntu wa Nzambi, lumu ne, Mukelenge wa Isalele wakahanda bilulu biandi, yeye wakatumina mukelenge dî ne, Wakuhandila bilulu biebe tshinyi? Alue biandi kundi, amanye biandi ne muprofete udi mu Isalele. Nunku Nâmana wakalua ne tubalu tuandi ne makalu andi, wakimana ku mbelu kua nsubu wa Elisha. Elisha wakatuma messager wandi kudiye ne, Ya, wowe mai mu Yadene misangu muanda mutekete, musunyi webe neulue kûdi kabidi; wewe newikale muakane. Kadi Nâmana wakadi ne tshiji, wakasumba, wakamba ne, Nakuelangana meji ne, Bulelela, yeye neahatuke kundi, neimane, neabiele dina dia Yehowa, Nzambi wandi, nealenge tshianza tshiandi ha muaba udi usama, neangondahe nsudi. Abana ne Pâpâ, misulu ya mu Damaseke, kayena mihite mai onso a mu Isalele buakane, anyi? Tshiena mumanye mua kuowamu mai, ngikale muakane, anyi? Wakasumba ne tshiji tshikole. Hashishe bantu bandi bakasemena ha buihi nʼandi, bakamukonka ne, Tatu wetu, bu muprofete mukuambile bua wewe kuenza bualu bunene, kuakadi kubuenza, anyi? Bualu budi butamba kukutonda muakuambeye ne, Wowe mai, wikale muakane, munyi? Hashishe wakahueka, wakadila mu mai a Yadene misangu muanda mutekete bu muakadi dî dia muntu wa Nzambi; musunyi wakahingana bu wa muana mukese, wakadi muakane. Nunku wakahingana kudi muntu wa Nzambi, yeye ne tshisumbu tshiandi tshionso, bakimana ku mpala kuandi; wakamuambila ne, Katataka ndi mumanye ne, Kakuena Nzambi mukuabo ha buloba buonso anu mu Isalele; nunku ndi nkusengelela ne, Wangate kuha kudi muntu webe. Kadi Elisha wakamuambila ne, Bu mudi Yehowa ne muoyo, undi ngimana ku mpala kuandi, tshiena mua kukuangata. Yeye wakamusengelela, kadi yeye wakabenga. Nâmana wakamba ne, Biwabenga, ndi nkusengelela ne, Bahe muntu webe maloba bu majitu adi mpunda ibidi mua kuambula; bualu bua muntu webe kena ufila mulambu kudi nzambi mukuabo, anu kudi Yehowa. Nunku Yehowa abuikile bubi bua muntu webe mu bualu ebu: haya mukelenge wanyi mu nsubu wa Limona bua kutendelelamu, yeye utu washindamena ku tshianza tshianyi ne meme kabidi ntu ngatua mpala wanyi hanshi mu nsubu wa Limona; hashishe hanalua mpala wanyi hanshi mu nsubu wa Limona, Yehowa abuikidile muntu webe bualu bubi ebu. Yeye wakamuambila ne, Ya biebe talalâ. Wakaya mu nshila wandi tshituha. Kadi Gehazi, muena mudimu wa Elisha, muntu wa Nzambi, wakamba ne, Mukelenge wanyi wakafuka Nâmana, Muena Sulia, luse, hakabengeye kuangata bintu biakalueye nʼabi; bu mudi Yehowa ne muoyo, nemmulonde, nengangate bintu kudiye. Nunku Gehazi wakalonda Nâmana. Hakatangila Nâmana muntu wakadi umulonda, wakatuluka mu dikalu diandi bua kusangakeneye nʼandi, wakamuebesha ne, Malu kai? Yeye wakamuitaba ne, Malu mimpe. Mukelenge wanyi wakuntuma kûdi bua kukuambila ne, Anu katataka bansongalume babidi ba bana ba baprofete ba ku mikuna ya Efelayima bakafika kundi; ndi nkusengelela ne, Bimpe ubampele ntalanta wa argent ne bilulu bibidi bitambe buimpe. Nâmana wakamuambila ne, Bimpe wangate ntalanta ibidi. Wakamutendekena, wakateka ntalanta ya argent ibidi mu bibombi bibidi ne bilulu abi bibidi, wakabiteka ha maha a bantu bandi babidi, bobo bakabituala ku mpala kua Gehazi. Hakafikabo ku mukuna, yeye wakabiangata mu bianza biabo, wakabiteka mu nsubu, wakahingisha bantu aba, bakaya. Yeye wakabuela mu nsubu, wakimana ku mesu kua mukelenge wandi, Elisha wakamuebesha ne, Gehazi, udi mufume kudi kunyi? Wakamuitaba ne, Muntu webe kakuya kuntu. Yeye wakamuambila ne, Mutshima wanyi kawakaya nʼebe, hakatuluka muntu mu dikalu diandi bua kusangakeneye nʼebe, anyi? Etshi ntshikondo tshia kuangata argent ne bilulu ne madimi a olive ne a tumuma tukese ne mikoko ne ngombe ne bena mudimu balume ne bena mudimu bakashi, anyi? Nsudi yakadi nʼai Nâmana neyikukuate wewe ne bana bebe tshiendelele. Wakumuka ku mesu kuandi ne nsudi hamʼbidi handi mitoke tô bu neige. Bana balume ba baprofete bakambila Elisha ne, Muaba utudi bashikame ku mpala kuebe udi mutambe kubumbakana. Tudi tukusengelela ne, Witabushe bua tuetu kuya ku Yadene, muntu ne muntu baditahile mitshi, tudienzeleku muaba utudi mua kushikama. Yeye wakabambila ne, Yai bienu. Mukuabo wakamuambila ne, Tudi tukusengelela ne, Witabushe bua kuya ne bantu bebe. Yeye wakabambila ne, Nenye. Nunku wakaya nʼabo. Hakafikabo ku Yadene, bakataha mitshi. Hakadi mukuabo utaha mutshi, tshisui tshiakanuka, tshikahona mu mai; yeye wakadila ne, Aka, mukelenge wanyi, tshiakadi tshisomba. Muntu wa Nzambi wakamuebesha ne, Tshiakahona kudi kunyi? Yeye wakamuosha muaba. Yeye wakakosa mutshi, wakawela mu mai, ne tshisui tshiakalelemuka. Yeye wakamuambila ne, Utshiangate. Yeye wakolola tshianza tshiandi, wakatshiangata. Mukelenge wa Bena Sulia wakadi uluangana ne Bena Isalele; wakambila bantu bandi ne, Tshitudilu tshianyi netshikale mu muaba kampanda. Muntu wa Nzambi wakatumina mukelenge wa Isalele dî ne, Udimuke, kuhitshidi ku muaba kampanda au bualu bua Bena Sulia badi bahuekelaku. Nunku mukelenge wa Isalele wakadianjila kutuma bantu ku muaba wakamuambila muntu wa Nzambi, wakatusungila nansha musangu umue nansha misangu ibidi. Mutshima wa mukelenge wa Sulia wakatamba kunyingalala bua bualu ebu; wakabikila bantu bandi, wakabebesha ne, Kanuena bandesha ne, Nganyi wa munkatshi muetu udi ku luseke lua mukelenge wa Isalele, anyi? Umue wa bantu bandi wakamuambila ne, Mukelenge wetu, kakuena muntu; kadi Elisha, muprofete wa mu Isalele, udi wamhila mukelenge wa Isalele mei audi wamba mu nsubu webe wa bulalu. Yeye wakamba ne, Yai, nutangile kudiye, bua meme ntume bantu, balue nʼandi. Bakamba ne, Udi ku Dotana. Nunku yeye wakafumaku tubalu ne makalu ne masalayi a bungi; bakayaku butuku, bakanyunguluka musoko. Hakabika muena mudimu wa muntu wa Nzambi dinda dionso, wakaluhuka, wakatangila tshisumbu tshia masalayi ne tubalu ne makalu tshiakanyunguluka musoko. Muena mudimu wandi wakamuebesha ne, Aka, mukelenge wanyi, netuenze tshinyi? Yeye wakamuambila ne, Kutshinyi nansha; bualu bua badi nʼetu badi bahita badi nʼabo bungi. Elisha wakatendelela Yehowa ne, Ndi nkusengelela ne, Utabashe mesu andi bua yeye amone. Yehowa wakatabasha mesu a nsongalume, wakamona mikuna miule tente ne tubalu ne makalu a kahia binyunguluka Elisha. Hakasemena bantu aba ha buihi ne Elisha, yeye wakalomba Yehowa ne, Ndi nkusengelela ne, Ufofomeshe mesu a bantu aba. Yeye wakabafofomesha mesu ku dî dia Elisha. Elisha wakabambila ne, Eu kanshila nansha, kammusoko nansha; nundonde, meme nennufile kudi muntu unudi nukeba. Yeye wakabalombola ku Samalea. Hakabuelabo mu Samalea, Elisha wakatendelela Yehowa ne, Utabashe mesu a bantu aba bua bobo bamone. Yehowa wakatabasha mesu abo, bakamona ne, Tudi mu musoko wa Samalea. Hakabatangila mukelenge wa Isalele, yeye wakebesha Elisha ne, Tatu wanyi, nembashihe, anyi? Yeye wakamukudimuna ne, Nansha, kubashihi; udi musue kushiha bantu bawakukuata bahika ku muele wa nvita ne ku buta, anyi? Uteke bidia ne mai ku mpala kuabo, bobo badie, banue, bahingane kudi mukelenge wabo. Yeye wakabalongoluela bintu bia bungi; hakashikishabo kudia ne kunua, yeye wakabatuma kudi mukelenge wabo. Bena Sulia kabakalua mu buloba bua Bena Isalele bua kuhaulabo kabidi. Ku nyima kua malu â Benehadada, mukelenge wa Sulia, wakasangisha masalayi andi onso, bakaya, bakatshintshimika musoko wa Samalea. Tshiole tshinene tshiakadi mu Samalea; bakatshintshimika musoko tô ne hakahanabo mutu wa nyama wa mpunda ku nshekele ya argent makumi muanda mukulu, ne tshituha tshinai tshia bibuelelu bia nyunyu wa nkutshi ku nshekele ya argent itanu. Hakadi mukelenge wa Isalele wendakana ha mutu ha lumbu lua musoko, mukashi mukuabo wakadila kudiye ne, Mukelenge, unkuatshishe. Yeye wakamuebesha ne, Biabenga Yehowa kukukuatshisha, ndi mua kukukuatshisha kudi kunyi? Nenkukuatshishe ne bintu bia ku tshihehudi anyi bia ku tshikaminu tshia tumuma, anyi? Mukelenge wakamuebesha kabidi ne. Udi ne tshilumbu kai? Mukashi wakamuambila ne, Mukashi eu wakungambila ne, Tufile muanʼebe wa balume, tumudie lelu, ne makelela netudie muanʼanyi wa balume. Nunku tuakalamba muanʼanyi wa balume mu mai a kahia, tuakamudia; hakatshiabu, nakamuambila ne, Ufile muanʼebe wa balume, tumudie; kadi yeye wakasokoka muanʼandi wa balume. Hakunvua mukelenge mei a mukashi eu, wakadihanda bilulu biandi (yeye wakadi wendakana ha mutu ha lumbu); bantu bakamona ne, Yeye wakadi ne bilulu bikayabala mubishi mua bilulu hamʼbidi handi. Hashishe yeye wakamba ne, Nzambi angenzele nunku ne malu makuabo ha mutu kabidi biashala mutu wa Elisha, muana wa Shafata, hamʼbidi handi lelu. Elisha ne bakulu bakadiye nʼabo bakadi bashikame mu nsubu muandi; mukelenge wakatuma muntu wandi kudiye, kadi diambedi yeye kayi muanze kufika ha buihi nʼandi, yeye wakambila bakulu ne, Monai muakuntumina muana wa mushihianganyi au muntu eu bua kunkoseye mutu wanyi; halua messager, nuinshile tshibi anu ku mesu kuandi, nutshikuate bikole; mikumu ya makasa a mukelenge wandi kayena ku nyima kuandi, anyi? Hakatshidiye uyikila nʼabo, mukelenge wakamueneka kudiye; yeye wakamba ne, Bualu bubi ebu buakafuma kudi Yehowa. Bualu kai bundi nʼabu mbua kuindila Yehowa kabidi musangu mule? Elisha wakamba ne, Unvue biebe dî dia Yehowa. Yehowa udi wamba ne, Makelela ha diba edi mene nebahane tshihiminu tshia bukula bubotesha ku nshekele umue, ne bihiminu bia bukula bua orge bibidi ku nshekele umue ku tshibi tshia ku Samalea. Hashishe kapitene kakadi mukelenge weyemena ku tshianza tshiandi kakambila muntu wa Nzambi ne, Biatunzuluila Yehowa bibi bia mu diulu, bualu ebu nebuikale munyi? Yeye wakamuambila ne. Mesu ebe neamone bualu ebu, kadi kuena uhidia nansha. Bena nsudi banai bakadi bashikame ku tshibi tshia musoko; bakambilangana ne, Tudi bashikame kunoko tô ne hatuafua bua tshinyi? Bituanua ne, Netubuele mu musoko, ka tshiole tshidiku, netufuileku; bituashikama kunoko tshianana, netufuile kabidi. Nunku tuye bietu kudi masalayi a Bena Sulia; biatusungilabo, netuikale ne muoyo; biatushihabo, netufue. Hakamba diba kubuela, bakajuka, bakaya ku tshitudilu tshia Bena Sulia; hakafikabo ku mpenge wa tshitudilu tshia Bena Sulia, kabakasanganaku muinu, Bualu bua Yehowa wakuosha Bena Sulia tshiona tshia makalu ne tubalu ne tshia masalayi a bungi; bakambilangana ne, Monai, mukelenge wa Isalele wakafuta bakelenge ba Bena Hiti ne bakelenge ba Ejipitu bua kuluanganabo nʼetu. Nunku ha kajimbuʼa buenyi, bakajuka, bakanyema, bakashiya ntenta yabo ne tubalu tuabo ne nyama yabo ya mpunda ne tshitudilu tshiabo bu muakaditshi, bakanyema bua kuhandishabo mioyo yabo. Hakafika bena nsudi aba ku mpenge wa tshitudilu, bakabuela mu ntenta, bakadia, bakanua, bakafumaku ne tshiamu tshia argent ne tshia or ne bilulu, bakaya, bakabisokoka; bakahingana, bakabuela mu ntenta mukuabo, bakangata bintu, bakabisokoka. Hashishe bakamusangana ne, Katuena tuenza bimpe, bualu bua edi ndituku dia lumu luimpe, ne tuetu tudi bahuwe. Bituajingakana tô ne hatshiabu, dikenga neditukuate; nunku tuye bietu kumanyisha ba mu nsubu wa mukelenge. Bakahingana, bakabikila balami ba tshibi tshia musoko, bakabambila ne, Tuetu biakafuma ku tshitudilu tshia Bena Sulia, kabakatangila muntu, katuakunvua dî dia muntu; kadi tuhalu ne nyama ya mpunda biakadi bisuikibue, ne ntenta yakashala hatuhu. Balami ba tshibi bakela dî, bakambila ba mu nsubu wa mukelenge lumu alu. Mukelenge wakabika butuku, wakambila bantu bandi ne, Nennuambile bu muakatuenzela Bena Sulia. Badi bamanye ne, Tuetu tudi ne nzala; nunku bakumuka mu tshitudilu tshiabo, bakasokoma mu mpata, bamba ne, Haluhukabo, netubakuate ne muoyo, netubuele mu musoko. Umue wa bantu bandi wakamuambila ne, Ndi nkusengelela ne, Witabushe bua bangate tubalu tutanu tudi tushala mu musoko, bualu bua tubalu tudi bu tshisumbu tshia Bena Isalele tshidi tshishala, ludi bu tshisumbu tshia Bena Isalele tshiakadia; tubatume, batangile bualu ebu. Nunku bakangata makalu abidi ne tubalu, mukelenge wakatuma bantu ku nyima kua Bena Sulia ne, Yai, nutangile bualu ebu. Bakabihata tô ne ku Yadene; monai, nshila wakadi mûle tente ne bilulu ne bintu biakimasha Bena Sulia mu lubilu luabo. Bantu hakahingana, bakamanyisha mukelenge. Bantu bakaluhuka, bakahaula tshitudilu tshia Bena Sulia. Nunku bakahana tshihiminu tshia bukula bubotesha ku nshekele umue, ne bihiminu bia bukula bua orge bibidi ku nshekele umue bu muakadi dî dia Yehowa. Mukelenge wakasungula kapitene kakadiye weyemena ku tshianza tshiandi bua kulameye tshibi tshia musoko; bantu bakamudiata mu makasa ku tshibi; wakafua bu muakadi dî dia muntu wa Nzambi diakamuambileye hakahueka mukelenge kudiye. Bualu bua bakambila muntu wa Nzambi mukelenge ne, Makelela ba diba edi nebahane bihiminu bia bukula bua orge bibidi ku nshekele umue ne tshihiminu tshia bukula bubotesha ku nshekele umue ku tshibi tshia Samalea; kapitene kakambila muntu wa Nzambi ne, Biatunzuluila Yehowa bibi bia mu diulu bualu ebu nebuikale munyi? Elisha wakamuitaba ne, Mesu ebe neamone bualu ebu, kadi wewe kuena uhidia nansha. Bualu buakalua nunku kudiye; bantu bakamudiata mu makasa ku tshibi, yeye wakafua. Elisha wakambila mukashi, muena muana wakabisbeye ku lufu, ne, Juka, uye ne ba mu nsubu webe, ya ushikame kuonso kûdi mua kushikama, bualu bua Yehowa neatume tshiole mu buloba tô bidimu muanda mutekete. Mukashi wakajuka, wakenza bu muakadi dî dia muntu wa Nzambi; wakaya ne ba mu nsubu wandi, bakashikama mu buloba bua Bena Peleshete tô bidimu muanda mutekete. Hakahita bidimu abi muanda mutekete, mukashi au wakafuma mu buloba bua Bena Peleshete; wakadila kudi mukelenge bua nsubu wandi ne bua buloba buandi. Mukelenge wakadi uyikila ne Gehazi, muena mudimu wa muntu wa Nzambi, wakamuambila ne, Ndi nkusengelela ne, Ungambileku malu manene onso akenza Elisha. Hakadiye umuambila muakabisha Elisha muana ku lufu, mukashi muena muana wakabisheye ku lufu wakadila kudi mukelenge bua nsubu wandi ne bua buloba buandi. Gehazi wakamba ne. Mukelenge wanyi, eu udi mukashi ne eu udi muana wandi wakabisha Elisha ku lufu. Hakebesha mukelenge mukashi bualu ebu, yeye wakamuambilabu. Mukelenge wakambila umue wa ba tuhita tuandi ne, Umuhingishile bintu bionso biakadiye nʼabi diambedi ne bintu bionso biakadiunda mu madimi andi katshia umukamu tô ne katataka. Elisha wakaya ku Damaseke. Bene-hadada, mukelenge wa Bena Sulia, wakadi usama; bakamuambila ne, Muntu wa Nzambi wakulua. Mukelenge wakambila Hazaele ne, Wangate tshintu mu tshianza tshiebe, uye kusangakena ne muntu wa Nzambi; yeye ebeshe Yehowa bualu buanyi ne, Meme nensangale ku disama edi, anyi? Nunku Hazaele wakaya kusangakena nʼandi, wakaya ne kuha kua bintu biakane bionso bia mu Damaseke bikumbane bujitu buakadi tumelo makumi anai mua kutuala, wakimana ku mesu kuandi, wakamba ne, Muanʼebe Benehadada, mukelenge wa Sulia, wakuntuma kûdi bua kukuebesha ne, Meme nensangale ku disama edi, anyi? Elisha wakamuambila ne, Ya umuambile ne, Wewe neusangale bulelela, kadi Yehowa wakundesha ne, Yeye neafue bulelela. Yeye wakamutangila talalâ tô ne bakamukuata bundu. Muntu wa Nzambi wakadila. Hazaele wakamuebesha ne, Mukelenge wanyi, udi udidila tshinyi? Yeye wakamuambila ne. Bualu bua ndi mumanye malu mabi audi muenzele Bena Isalele; wewe newoshe misoko yabo idi ne ngumbu ne kahia, wewe neushihe bansongalume babo ku miele ya nvita, wewe neukosolole bana babo bakese bituha bituha, neuhande bakashi babo badi ne mafu. Hazaele wakamba ne, Kadi muntu webe udi mbua bua yeye udi mua kuenza bualu ebu bunene, anyi? Elisha wakamuitaba ne, Yehowa wakundesha ne, Wewe newikale mukelenge ku mutu kua Bena Sulia. Hashishe yeye wakumuka kudi Elisha, wakahingana kudi mukelenge wandi. Yeye wakamuebesha ne, Elisha wakukuambila tshinyi? Wakamuitaba ne, Yeye wakungambila ne, Wewe neusangale bulelela. Hakatshiabu, Hazaele wakangata tshilulu tshia ha bulalu, wakatshina mu mai, wakatshibuikila ha mpala ha Bene-hadada tô ne hakafueye. Hazaele wakakokesha mu muaba wandi. Mu tshidimu tshitanu tshia bukelenge bua Yolama, muana wa Ahaba, mukelenge wa Isalele, hakadi Yehoshafata mukelenge wa Yuda, Yeholama, muana wa Yehoshafata, mukelenge wa Yuda, wakabanga kukokesha. Wakadi ne bidimu makumi asatu ne bibidi hakabangeye kukokesha; wakakokesha mu Yelushalema bidimu muanda mukulu. Yeye wakenda mu nshila ya hakelenge ba Isalele bu muakenza ba mu nsubu wa Ahaba, bualu bua muana wa Ahaba wakadi mukashi wandi; yeye wakenza malu mabi ku mesu kua Yehowa. Kadi Yehowa wakabenga bua kubutula Bena Yuda, anu bualu bua muntu wandi Davidi, bualu bua wakamulaya bua kumushileye bana bandi muinda tshiendelele. Mu matuku andi Bena Edome bakatombokela Bena Yuda, bakadisunguila mukelenge. Hashishe Yolama wakahitshila ku Saî ne makalu andi onso; bakabika butuku, bakashiha Bena Edome bakadi babanyunguluka ne tupitene tua makalu; bantu bakanyema ku ntenta yabo. Nunku Bena Edome bakatombokela Bena Yuda tô ne ku difuku edi. Mu tshikondo atshi tshimue Bena Libena bakatomboka kabidi. Bienzedi bia Yolama biakenzeye kabiena bifunda mu mukanda wa kulondolola kua malu a bakelenge ba Yuda, anyi? Yolama wakalala tulu ne bankambua bandi, bakamujika ne bankambua bandi mu musoko wa Davidi. Ahazaya, muanʼandi, wakakokesha mu muaba wandi. Mu tshidimu tshia dikumi ne bibidi tshia bukelenge bua Yolama, muana wa Ahaba, mukelenge wa Isalele, Ahazaya, muana wa Yeholama, mukelenge wa Yuda, wakabanga kukokesha. Ahazaya wakadi ne bidimu makumi abidi ne bibidi hakabangeye kukokesha; wakakokesha mu Yelushalema tshidimu tshimue. Dina dia mamu wandi diakadi Atalaya, muana wa Omeli, mukelenge wa Isalele. Wakenda mu nshila wa ba mu nsubu wa Ahaba, wakenza malu mabi ku mesu kua Yehowa bu muakenza ba mu nsubu wa Ahaba, bualu bua yeye wakadi bayandi-tshina wa ba mu nsubu wa Ahaba. Yeye wakaya ne Yolama, muana wa Ahaba, bua kuluanganabo ne Hazaele, mukelenge wa Sulia, ku Lamota-gilada; Bena Sulia bakataha Yolama mputa. Mukelenge Yolama wakaya ku Yizelele bua kumuondahabo mputa yakamutaha Bena Sulia mu Lama, hakaluanganeye ne Hazaele, mukelenge wa Sulia. Ahazaya, muana wa Yeholama, mukelenge wa Yuda, wakayaku bua kutangila Yolama, muana wa Ahaba, mu Yizelele, bualu bua yeye wakadi usama. Elisha wakabikila umue wa bana ba baprofete, wakamuambila ne, Suika mukaba webe, wangate kalondo aka ka manyi mu tshianza tshiebe, ya biebe ku Lamota-gilada. Hawafikaku, ukebe Yehu, muana wa Yehoshafata, muana wa Nimishi; ubuele mu nsubu, umujule munkatshi mua bana babo, uye nʼandi mu nsubu wa munda. Hashishe hatula kalondo ka manyi, wahongoluela ha mutu handi, umuambile ne, Yehowa udi wamba ne, Nakukusungula mukelenge ku mutu kua Bena Isalele. Hashishe unzulula tshibi, ya lubilu, kujingakanyi. Nunku nsongalume eu, muprofete mene, wakaya ku Lamota-gilada. Hakafikeyeku, wakasangana tupitene tua masalayi tuonso tushikame hanshi. Wakambila kapitene kakuabo ne, Ndi nʼebe dî. Yehu wakamuebesha ne, Udi ne nganyi dî munkatshi muetu? Yeye wakamuitaba ne, Wewe, kapitene. Wakajuka, wakabuela nʼandi mu nsubu; wakahongolola manyi ha mutu handi, wakamuambila ne, Yehowa, Nzambi wa Isalele, udi Wamba ne, Nakukusungula mukelenge ku mutu kua bantu ba Yehowa, Bena Isalele mene. Bûdi nʼabu mbua kushiha ba mu nsubu wa Ahaba, mukelenge webe, bua kusombuela mashi a bantu banyi baprofete ne a bantu bonso ba Yehowa akamatshisha tshianza tshia Izebele hanshi. Bualu bua bonso ba mu nsubu wa Ahaba nebafue; nenshihe bana balume bonso ba mu nsubu wa Ahaba, ne badishikamine ne bahika, badi mu Isalele. Nenvuishe ba mu nsubu wa Ahaba bu nsubu wa Yalobama, muana wa Nebata, ne bu nsubu wa Bâsha, muana wa Ahiya. Mbua mene neyidie mubidi wa Izebele mu Yizelele, kabena bamujika nansha. Yeye wakunzulula tshibi, wakaya lubilu. Hashishe Yehu wakahingana kudi bantu ba mukelenge wandi; umue wabo wakamuebesha ne, Malu kai? Muntu au muhote wakakufila bua tshinyi? Yeye wakabambila ne, Nuenu nudi bamanye muntu au ne mei akadiye wamba. Bobo bakamba ne, Yeye udi ushima, utuambile. Yeye wakamba ne, Yeye wakungambila nunku ne, Yehowa udi wamba ne, Nakukusungula mukelenge ku mutu kua Bena Isalele. Hashishe bakaya lubilu, muntu ne muntu, wakangata tshilulu tshiandi, bakabijingila muinshi mua makasa andi hanshi ha tshibandilu, bakela mpungi, bamba ne, Yehu udi mukelenge. Nunku Yehu, muana wa Yehoshafata, muana wa Nimishi, wakelela Yolama tshifufu. Yolama ne Bena Isalele bonso bakadi halama Lamota-gilada bualu bua Hazaele, mukelenge wa Sulia; kadi mukelenge Yolama wakahingana ku Yizelele bua kumuondahabo mputa wakamutahabo kudi Bena Sulia, hakuluanganeye ne Hazaele, mukelenge wa Sulia. Yehu wakamba ne, Bikala bualu ebu mu mitshima yenu, muntu kumuki mu musoko hua kuambeye bualu ebu mu Yizelele. Nunku Yehu wakabanda mu dikalu diandi, wakaya ku Yizelele. Ahazaya, mukelenge wa Yuda, wakamana kuyaku bua kutangileye Yolama. Mutentekedi wakadi wimana ha tshibumba tshia mu Yizelele, wakatangila Yehu ne bantu bandi hakadibo balua mu nshila, wakamba ne, Ndi mutangile tshisumbu tshia bantu. Yolama wakamba ne, Tuma muntu ha nyima ha kabalu bua kusangileye nʼabo, abebeshe ne, Nulualua talalâ, anyi? Nunku muntu wakaya ha nyima ha kabalu bua kusangakeneye nʼabo, wakamba ne, Mukelenge udi ukonka ne, nulualua talalâ, anyi? Yehu wakamukudimuna ne, Wewe udi ukeba ditalala bua tshinyi? Londa ku nyima kuanyi. Mutentekedi wakamba ne, Messager wetu wakafika kudibo, kadi kena uhingana. Hashishe bakatuma muntu muibidi ha nyima ha kabalu; hakafikeye kudibo, wakamba ne, Mukelenge udi ukonka ne, Nulualua talalâ, anyi? Yehu wakamuebesha ne, Udi ukeba ditalala bua tshinyi? Londa ku nyima kuanyi. Mutentekedi wakamba ne, Yeye wakafika kudibo, kadi kena uhingana; tshiendeshilu tshia dikalu tshidi tshifuanangana ne tshiendeshilu tshia Yehu, muana wa Nimishi, bualu bua yeye udi wendesha dikalu lukasa lukasa. Yolama wakamba ne, Balongolole dikalu. Bakalongolola dikalu diandi. Yolama, mukelenge wa Isalele, ne Ahazaya, mukelenge wa Yuda, bakaluhuka, muntu mu dikalu diandi muntu mu dikalu diandi, bua kusangakenabo ne Yehu. Bakamusangana mu budimi bua Nabota, Muena Yizelele. Hakatangila Yolama Yehu, yeye wakamuebesha ne, Yehu, ulualua talalâ, anyi? Yeye wakamukudimuna ne, Tudi ne ditalala kudi kunyi hatshidi malu a masandi a mamu webe ne mbuku yandi bikumbane bia bungi? Yolama wakamuela nyima, wakanyema, wakambila Ahazaya ne, Ahazaya, kusonguela kudiku! Yehu wakanana buta buandi ne bukole buandi buonso, wakasa Yolama ha masangu a nyima, mukete wakasompoka ha dimuma diandi dia muoyo, yeye wakadishinda hanshi mu dikalu diandi. Hashishe Yehu wakambila Bidikâ, kapitene kandi, ne, Umuamhule, umuele mu budimi bua Nabota, Muena Yizelele; uvuluke ne, Hatuakadi meme ne wewe tulonda Ahaba, tatu wandi, Yehowa wakanunemeshila bujitu ebu. Yehowa wakamba ne, Bulelela, makelela nakatangila mashi a Nabota ne a bana bandi balume, nunku nenkusombuele mu muaba eu mene kabidi. Nunku umuambule, umuele mu muaba eu, bu mu dî dia Yehowa. Hakatangila Ahazaya, mukelenge wa Yuda, bualu ebu, yeye wakanyema mu nshila wa ku nsubu wa mu budimi ebu. Yehu wakamulonda, wakamba ne, Mushihelai kabidi mu dikalu diandi. Bakamuasa mukete hakadiye ubanda mukuna wa Gû hehi ne Yibelama. Yeye wakanyema ku Megido, wakafuilaku. Bantu bandi bakamuambula mu dikalu bua kuya ku Yelushalema, bakamujika mu lukita lua bankambua bandi mu musoko wa Davidi. Mu tshidimu tshia dikumi ne tshimue tshia bukelenge bua Yolama, muana wa Ahaba, Ahazaya wakabanga kukokesha mu Yuda. Hakafika Yehu ku Yizelele, Izebele wakunvua lumu elu; wakalaba mukubu ku mesu, wakasuika tshitambala ku mutu, wakatangila ha disoso dia nsubu. Hakabuela Yehu ku tshibi tshia musoko, yeye wakamuebesha ne, Wewe Zimeli, mushihi wa mukelenge webe, ulualua talalâ, anyi? Yeye wakambula mpala wandi bua kutangila ha disoso, wakakonka ne, Udi ku luseke luanyi nganyi? Bantu batungula nansha babidi nansha basatu bakamutangila ha mbelu. Yehu wakabambila ne, Numuele hanshi. Nunku hakamuela hanshi, ne mashi andi makuabo akamatshila ha lumbu ne ha tubalu; tuakamudiata muinshi mua bikono. Wakabuela mu nsubu, wakadia, wakanua. Yeye wakamba ne, Batangile mukashi eu wakedibua mulau, bamujike bualu bua yeye wakadi muana wa mukelenge. Bakaya bua kumujika. Kadi bakasangana anu kabalubalu ka mutu wandi ne makasa ne munda mua bianza. Nunku bakahingana, bakamuambila. Yeye wakamba ne, Edi ndî dia Yehowa diakambeye kudi muntu wandi Eliya, Muena Tishebe, ne, Mbua neyidie Izebele mu muaba wa Yizelele; ne mubidi wa Izebele newikale bu tunvi ha mutu ha buloba bua Yizelele nunku kabena mua kuamba ne, Eu udi Izebele kabidi. Ahaba wakadi ne bana balume makumi muanda mutekete mu Samalea. Yehu wakafundila bakadi ne bukokeshi mu Yizelele, bakulu bakadi badiundisha bana ba Ahaba, mikanda mu Samalea ne, Hafika mikanda ei kunudi, bualu bua bana balume ba mukelenge wenu batshidi nʼenu, ne nudi ne makalu ne tubalu ne musoko wa lumbu ne bintu bia nvita; nunku nudisunguile umue wa bana balume ba mukelenge wenu udi utamba buakane, numushikike mu nkuasa wa bukelenge wa tatu wandi, nuluile ba mu nsubu wa mukelenge wenu nvita. Kadi bobo bakatamba kutshina; bakambilangana ne, Bakelenge babidi kabakamanya mua kuimana ku mpala kuandi, nunku tuetu netuimane munyi? Nunku muntu wakadi ku mutu kua nsubu, ne wakadi ku mutu kua musoko ne bakulu bakadi badiundisha bana ba Ahaba, bakatumina Yehu dî ne, Tuetu tudi bantu bebe, netuenze bu mu dî diebe; katuena tudisunguila muntu bu mukelenge; enza muonso mûdi umona ne muimpe. Hashishe yeye wakabandila mukanda musangu muibidi, wakabambila ne, Binuikala ku luseke luanyi, binuasua kunvua dî dianyi, hashishe nutule mitu ya bana balume ba mukelenge wenu, nulue n ai kundi ku Yizelele makelela ha diba edi. Ku tshikondo atshi bana balume ba mukelenge makumi muanda mutekete bakadi ne bantu banene ba mu musoko bakadi babadiundisha. Hakafika mukanda kudibo, bakakuata bana balume ba mukelenge makumi muanda mutekete, bakabashiha, bakateka mitu yabo mu bisaka, bakamutuminayi ku Yizelele. Messager wakafika kudiye, wakamuambila ne, Bakalua ne mitu ya bana balume ba mukelenge. Yeye wakamba ne, Bayiteke bisumbu bibidi ku tshibi tshia ku musoko tô ne dinda. Hakatshiabu, yeye wakaluhuka, wakimana, wakambila bantu bonso ne, Nuenu nudi bakane; meme nakelela mukelenge wanyi tshifufu, nakamushiha; kadi wakashiha bonso aba nganyi? Nunku numanye bienu ne, Nansha dî dimue dia mei onso akambila Yehowa bualu bua nsubu wa Ahaba nedihone hanshi hatuhu; bualu bua Yehowa wakenza malu onso akambeye mukana mua muntu wandi Eliya. Nunku Yehu wakashiha bonso bakashala mu nsubu wa Ahaba mu Yizelele, ne bantu bandi banene bonso, ne balunda bandi bonso ne bakuidi bandi bonso tô ne hakamushiyeye hatuhu. Wakajuka, wakumuka, wakaya ku Samalea. Hakafikeye ku nsubu wa bakoshi ba miosa ya mikoko wakadi mu nshila, Yehu wakasangila ne bana babo ne Ahazaya, mukelenge wa Yuda, wakabebesha ne, Nudi banganyi? Bakamuitaba ne, Tudi bana babo ne Ahazaya, tuyaya bua kuela bana ba mukelenge ne bana ba mukelenge mukashi muoyo. Yeye wakamba ne, Bakuatai ne muoyo. Bakabakuata ne muoyo, bakabashiha ku dina dia mai dia mu nsubu wa bakoshi ba miosa, bu bantu makumi anai ne babidi. Kabakashiya umue wabo. Hakumukeye ku muaba au, wakasangila ne Yehonadaba, muana wa Lekaba, wakadi ulua kusangakena nʼandi. Yeye wakamuela muoyo, wakamuebesha ne, Mutshima webe udi muakanangane ne mutshima wanyi bu mudi mutshima wanyi muakanangane ne mutshima webe, anyi? Yehonadaba wakamukudimuna ne, E, budi nunku. Bikalau bu nunku, unkuate ku tshianza. Yeye wakamukuata ku tshianza tshiandi, wakamubuesha mu dikalu diandi. Wakamuambila ne, Ulue nʼanyi, umone lukunukunu lundi nʼalu kudi Yehowa. Nunku bakamushikika mu dikalu diandi. Hakafikabo ku Samalea, Yehu wakashiha bonso bakashala ba Ahaba mu Samalea tô ne hakababutuleye bonso bu muakadi dî dia Yehowa diakambileye Eliya. Yehu wakasangisha bantu bonso diatshimue, wakabambila ne, Ahaba wakakuatshila Bâla mudimu mukese, kadi Yehu neamukuatshile mudimu wa bungi. Nunku mbikidilai baprofete bonso ba Bâla ne batendeledi bandi bonso ne bakuidi bandi bonso: nansha umue wabo kashadi, bualu bua bundi nʼabu mbua kufila mulambu munene kudi Bâla; yonso washala kena wikala ne muoyo. Kadi Yehu wakenza bualu ebu ne budimu bua yeye amanye mua kushiha batendeledi ba Bâla. Yehu wakamba ne, Basungule dituku dia kujidila Bâla. Bakadisungula. Yehu wakatuma dî ku nseke yonso ya Isalele; batendeledi ba Bâla bonso bakadisangisha diatshimue, nansha umue wabo wakashala. Bakabuela mu nsubu wa Bâla: bakatamba kûsha nsubu wa Bâla tente tô ne kundekelu kuandi. Wakambila mulami wa bilulu ne, Hatula bilulu bia batendeledi ba Bâla bonso. Yeye wakahatula bilulu. Yehu wakabuela mu nsubu wa Bâla ne Yehonadaba, muana wa Lekaba, wakambila batendeledi ba Bâla ne, Nukebe, nutangile ne anu batendeledi ba Bâla badimu, ne kamuikadi bantu ba Yehowa. Bakabanga kufila milambu ya kuosha ha kahia. Yehu wakadianjila kusungula bantu makumi muanda mukulu, wakabateka ha mbelu, wakabambila ne, Binualekela muntu undi mufile mu bianza bienu, meme nendombe muoyo wenu ku muoyo wandi. Hakamanabo kufila milambu ya kuosha ha kahia, Yehu wakambila balami ne tupitene ne, Buelai, nubashihe, nansha umue kahatuki, Bakabashiha ku miele ya nvita; balami ne tupitene bakabimasha ha mbelu, bakabuela mu musoko muakadi nsubu wa Bâla. Bakangata makunshi akadi mu nsubu wa Bâla, bakaosha mu kahia. Bakatonkolola makunshi a mabue a Bâla hanshi, bakashimbula nsubu wa Bâla, bakamuvuisha bu diala tô ne ku dituku edi. Nunku Yehu wakajimisha bualu bua Bâla munkatshi mua Bena Isalele. Kadi Yehu kakabenga malu mabi onso a Yalobama, muana wa Nebata, akenzesheye Bena Isalele; wakashala ne tuana tua ngombe tua or tuakadi mu Betele ne mu Dana. Yehowa wakambila Yehu ne, Bualu bua wewe wakuenza malu akadi mimpe ku mesu kuanyi, wakuenzela ba mu nsubu wa Ahaba malu anakasungula mu mutshima wanyi, nunku bana bebe ba balume nebashikame mu nkuasa wa bukelenge wa Isalele tô ne ku bikondo binai. Kadi Yehu kakatamba kuenda mu nshila wa mikenji ya Yehowa, Nzambi wa Isalele, ne mutshima wandi wonso; yeye kakabenga malu mabi a Yalobama akenzesheye Bena Isalele. Mu matuku au Yehowa wakabanga kukehesha Bena Isalele. Hazaele wakabashiha mu nseke yonso ya Isalele: ku Yadene kua ku esete ne buloba buonso bua Gilada ne bua Bena Gada ne bua Bena Lubena ne bua Bena Manashe ne ku Aloê udi mu tshibanda tshia Ânona tô ne ku Gilada ne Bashana. Bienzedi bia Yehu bikuabo biakenzeye ne bukole buandi buonso kabiena bifunda mu mukanda wa kulondolola kua malu a bakelenge ba Isalele, anyi? Yehu wakalala tulu ne bankambua bandi; bakamujika mu Samalea. Yehoaza, muanʼandi, wakakokesha mu muaba wandi. Musangu wakakokesha Yehu Bena Isalele mu Samalea wakadi bidimu makumi abidi ne muanda mukulu. Hakatangila Atalaya, mamu wa Ahazaya, ne, Muanʼanyi mulume udi mufue, yeye wakajuka, wakashiha bana balume bonso ba mukelenge. Kadi Yehosheba, muana wa mukelenge Yolama, muanʼabo mukashi ne Ahazaya, wakangata Yoasha, muana wa balume wa Ahazaya, wakamuangata munkatshi mua bana ba mukelenge bakashihabo, wakamuteka ne mulami wandi mu nsubu wandi wa bulalu; bakamusokoka kudi Atalaya, yeye kakashihibua. Yeye wakamusokoka nunku mu nsubu wa Yehowa tô bidimu bisambombo. Atalaya wakakokesha mu buloba. Mu tshidimu tshia muanda mutekete tshia Yoasha Yehoyada wakabikila tupitene tua bantu nkama bantu nkama ba Bena Kala ne ba balami, bakalua kudiye mu nsubu wa Yehowa; yeye wakahunga nʼabo tshihungidi, wakabatshihisha mu nsubu wa Yehowa, wakabalesha muana wa mukelenge. Yeye wakabambila ne, Bunudi nʼabu mbua kuenza nunku: tshituha tshienu tshisatu tshialua dituku dia Lumingu netshikale balami ba nsubu wa mukelenge, tshituha tshisatu tshikuabo netshikale ku tshibi tshia ku Sû; ne tshituha tshisatu tshikuabo netshikale ku tshibi ku nyima kua balami aba; nunku nenumanye mua kulama nsubu bua muntu kabuedi. Nunku bisumbu bienu bibidi bidi biluhuka dituku dia Lumingu nebikale balami ba nsubu wa Yehowa mudi mukelenge muana. Nenunyunguluke mukelenge nunku, muntu yonso ne bintu bia nvita mu bianza biandi; biakela muntu kubuela munkatshi muenu, nebamushihe. Nunku nenuikale ne mukelenge haluhukeye ne habueleye. Tupitene tua bantu nkama bantu nkama tuakenza bu muakadi dî dia Yehoyada, muakuidi wa Nzambi. Bakangata muntu ne muntu bantu bandi, bakuabo bakadi ne bua kubuela dia Lumingu, bakuabo bakadi ne bua kuluhuka dia Lumingu, bakaya kudi Yehoyada, muakuidi wa Nzambi. Muakuidi wa Nzambi wakafila mafuma ne ngabu bia mukelenge Davidi, biakadi mu nsubu wa Yehowa, mu bianza bia tupitene tua bantu nkama bantu nkama. Balami aba bakimana muntu ne muntu ne bintu bia nvita mu bianza biabo ku luseke lua nsubu lua ku tshianza tshia balume tô ne ku luseke lua nsubu lua ku tshianza tshia bakashi, bakanyunguluka tshioshelu ne nsubu ne mukelenge. Hashishe bakaluhuka ne muana wa mukelenge, bakateka tshifulu tshia butumbi ha mutu handi; bakamuha mukanda wa dihungila, bakamujadika mukelenge, bakamuela manyi ha mutu handi; bakamututshila nkashi, bamba ne, Mukelenge ikale ne muoyo! Hakunvua Atalaya mbila ya balami ne ya bantu, yeye wakaya kudi bantu mu nsubu wa Yehowa. Yeye wakamona mukelenge muimane ha tshiambidi bu mudi tshilele tshiabo ne tupitene ne bedi ba mpungi bimane ha buihi ne mukelenge; bantu bonso bakadi hasanka, bela mpungi. Hashishe Atalaya wakadihanda bilulu biandi, wakela dî diandi ne, Bakungelela tshifufu! Bakungelela tshifufu! Yehoyada, muakuidi wa Nzambi, wakela tupitene tua masalayi dî ne, Balue nʼandi munkatshi mua balami; muntu wamulonda bamushihe ne muele wa nvita. Bualu bua muakuidi wakamba ne, Kabamushihi mu nsubu wa Yehowa. Nunku bakamushila mpunga, wakenda mu nshila wa tubalu wa ku nsubu wa mukelenge, bakamushihelaku. Yehoyada wakahunga tshihungidi hankatshi ha Yehowa ne mukelenge ne bantu ne, Tuetu netuikale bantu ba Yehowa; wakahunga tshihungidi tshikuabo hankatshi ha mukelenge ne bantu. Bantu bonso ba mu ditunga bakaya ku nsubu wa Bala, bakamushimbula; bakabutula bioshelu biandi ne mpingu yandi bituha bituha; bakashiha Matana, muakuidi wa Bâla, ku mpala kua tshioshelu. Muakuidi wa Nzambi wakasungula balami ba nsubu wa Yehowa. Wakasangisha tupitene tua bantu nkama bantu nkama, ne Bena Kala ne balami ne bantu bonso ba mu ditunga; bakafuma ne mukelenge mu nsubu wa Yehowa, bakaya nʼandi mu nshila wa ku tshibi tshia balami tô ne mu nsubu wa mukelenge, Yeye wakashikama mu nkuasa wa butumbi wa bakelenge. Nunku bantu bonso ba mu ditunga bakasanka, bakashikama talalâ. Bakashiha Atalaya ne muele wa nvita hehi ne nsubu wa mukelenge. Yoasha wakadi ne bidimu muanda mutekete hakabangeye kukokesha. Mu tshidimu tshia muanda mutekete tshia bukelenge bua Yehu, Yoasha wakabanga kukokesha; wakakokesha mu Yelushalema bidimu makumi anai: dina dia mamu wandi diakadi Sibeya wa mu Besheba. Yoasha wakenza malu mimpe ku mesu kua Yehowa matuku andi onso akadi Yehoyada, muakuidi wa Nzambi, umuyisha. Kadi yeye kakumusha bitendelelu bia ku mikuna; bantu batshivua bafila milambu ya kuosha ha kahia, batshivua bosha musenga wa manananshi ha mutu ha mikuna. Yoasha wakambila bakuidi ba Nzambi ne, Argent yonso ya bintu bidibo balua nʼabi mu nsubu wa Yehowa bua kumujidilabi, ne argent yonso idibo bangata kudi muntu yonso hamubalabo, ne argent yonso idi bantu basue kufila mu nsubu wa Yehowa bua mitshima yabo, bakuidi bitabushe bintu ebi kudi bana babo, balongolole miaba ya mu nsubu wa Yehowa yakashimbuka hanshi. Kadi hakahita bidimu makumi abidi ne bisatu bia bukelenge bua Yoasha, bakuidi kabakanza kulongolola miaba ei. Hashishe mukelenge Yoasha wakabikila Yehoyada ne bakuidi bakuabo bakadi nʼandi, wakabebesha ne, Bualu kai kanuena nulongolola miaba ei mishimbuke mu nsubu wa Yehowa? Kanuitabushi argent mikuabo kudi bana benu, kadi nuyifile bua kulongolola miaba ei idi mishimbuke mu nsubu wa Yehowa. Bakuidi bakitabusha ne, Katuena tuangata argent kudi bantu kabidi, kadi katuena tulongolola miaba mishimbuke ya mu nsubu wa Yehowa. Kadi Yehoyada muakuidi wakangata mushete munene, wakela tubulu mu tshibuiku tshiau, wakauteka ha buihi ne tshioshelu ku tshianza tshia balume tshia ku tshibi tshia mu nsubu wa Yehowa; bakuidi bakadi balama tshibi bakatekamu argent yonso yakatuabo nʼai mu nsubu wa Yehowa. Hakamanyabo ne argent ya bungi idi mu mushete, secrétaire wa mukelenge ne muakuidi munene bakatua ne bibombi, bakabala argent yakadi mu nsubu wa Yehowa. Bakafila argent yakabalabo mu bianza bia bena mudimu ne mu bianza bia bantu bakadi balama nsubu wa Yehowa; bakahita nʼai bena mabaya ne bibaki ba nsubu bakadi benza mudimu wa nsubu wa Yehowa, ne bena tushola ne basongi ba mabue; bakasumba nʼai mabaya ne mabue masonga ne bintu bionso bia kulongololabo nʼabi miaba mishimbuke mu nsubu wa Yehowa. Kadi kabakenza nʼai makoho a argent ne bijimishi bia minda ne malonga ne mpungi; kabakenza tshintu tshia argent anyi tshia or ku argent yakaluabo nʼai mu nsubu wa Yehowa; kadi bakayifila anu kudi bakenza mudimu ne bakalongolola nʼai nsubu wa Yehowa. Kabakalonda dibala dia argent kudi bafutshi ba bena mudimu eu, bualu bua bakadi mua kueyemenyibua. Kabakalua ne argent yakangatabo ku milambu ya bisambukidi ne ku milambu ya kubuikila nʼai mibi mu nsubu wa Yehowa; ei yakadi ya bakuidi. Mu tshikondo atshi Hazaele, mukelenge wa Sulia, wakaya kuluangana ne bena musoko wa Gata, wakaunyenga; Hazaele wakatangila mpala wandi bua kuyeye ku Yelushalema. Yoasha, mukelenge wa Yuda, wakangata bintu bia tshijila wakafila Yehoshafata ne Yeholama ne Ahazaya batatu bandi, bakelenge ba Yuda, mu nsubu wa Yehowa, ne bintu bionso biakajidileye ne biamu bia or bionso biakadi mu bibutshilu bia mu nsubu wa Yehowa ne bia mu nsubu wa mukelenge, wakabituma kudi Hazaele, mukelenge wa Sulia; nunku yeye wakumuka ku Yelushalema. Bienzedi bia Yoasha bikuabo ne malu onso akenzeye kabiena bifunda mu mukanda wa kulondolola kua malu a bakelenge ba Yuda, anyi? Bantu ba Yoasha bakabika, bakamuelela tshifufu, bakamutaha mputa ku nsubu wa Milo, wa mu nshila wa ku Sila. Bualu bua Yozakâ, muana wa Shimeta, ne Yehozabada, muana wa Shomê, bantu bandi bakamutaha mputa; wakafua. Bakamujika ne bankambua bandi mu musoko wa Davidi; Amasaya, muanʼandi, wakakokesha mu muaba wandi. Mu tshidimu tshia makumi abidi ne bisatu tshia bukelenge bua Yoasha, muana wa Ahazaya, mukelenge wa Yuda, Yehoaza, muana wa Yehu, wakabanga kukokesha Bena Isalele mu Samalea; wakabakokesha bidimu dikumi ne muanda mutekete. Wakenza malu mabi ku mesu kua Yehowa; wakalonda mu nshila wa malu mabi a Yalobama, muana wa Nebata, akenzesheye Bena Isalele; yeye kakasesukaku nansha. Tshiji tshia Yehowa tshiakadi kudi Bena Isalele, yeye wakabafila mu bianza bia Hazaele, mukelenge wa Sulia, ne mu bianza bia Bene-hadada, muana wa Hazaele, tô matuku abo onso. Yehoaza wakadila kudi Yehowa ne Yehowa wakamunvuila; bualu bua yeye wakatangila dikenga dia Bena Isalele diakabakengeshabo nʼadi kudi mukelenge wa Sulia. Yehowa wakabishila Bena Isalele musungidi, nunku bakahanduka mu bianza bia Bena Sulia. Bena Isalele bakashikama mu ntenta yabo bu muakenzabo diambedi, Kadi kabakumuka ku malu mabi a ba mu nsubu wa Yalobama akenzesheye Bena Isalele; batshivua bendamu. Bakashiya Bashela mu Samalea kabidi. Mukelenge wa Sulia wakashila Yehoaza anu bantu makumi atanu bakadi benda ha nyima ha tubalu, ne makalu dikumi, ne binunu dikumi bia bantu bakadi benda ku makasa; mukelenge wa Sulia wakababutula, wakabavuisha bu luhuishi lua ku tshituilu. Bienzedi bia Yehoaza bikuabo ne malu onso akenzeye ne bukole buandi kabiena bifunda mu mukanda wa kulondolola kua malu a bakelenge ba Isalele, anyi? Yehoaza wakalala tulu ne bankambua bandi, bakamujika mu Samalea; Yoasha muanʼandi wakakokesha mu muaba wandi. Mu tshidimu tshia makumi asatu ne muanda mutekete tshia bukelenge bua Yoasha, mukelenge wa Yuda, Yehoasha, muana wa Yehoaza, wakabanga kukokesha Bena Isalele mu Samalea; wakabakokesha bidimu dikumi ne bisambombo. Wakenza malu mabi ku mesu kua Yehowa; yeye kakasesuka ku malu malu onso a Yalobama, muana wa Nebata, akenzesheye Bena Isalele, kadi utshivua wendamu. Bienzedi bia Yoasha bikuabo ne malu onso akenzeye ne bukole buakaluanganeye nʼabu ne Amasaya, mukelenge wa Yuda, kabiena bifunda mu mukanda wa kulondolola kua malu a bakelenge ba Isalele, anyi? Yoasha wakalala tulu ne bankambua bandi, bakamujika mu Samalea diatshimue ne bakelenge ba Isalele; Yalobama wakashikama mu nkuasa wandi wa bukelenge. Disama diakakuata Elisha, ne bua disama diandi wakafua. Yoasha, mukelenge wa Isalele, wakaya kumutangila, wakadila muadi, wakamba ne, Tatu wanyi, tatu wanyi, makalu a Isalele ne badi benda ha nyima ha tubalu! Elisha wakamuambila ne, Wangate buta ne mikete; wakangata buta ne mikete. Yeye wakambila mukelenge wa Isalele ne, Teka tshianza tshiebe ha buta; yeye wakatshiteka. Elisha wakateka bianza biandi ha bianza bia mukelenge. Yeye wakamuambila ne, Unzulula tshibi tshia ku esete; wakatshiunzulula. Hashishe Elisha wakamba ne, Ela; yeye wakela. Yeye wakamba ne, Eu mmukete wa dihita dia Yehowa, mukete wa dihitshibua dia Bena Sulia; bualu bua wewe neutahe Bena Sulia bikole mu Afeke, tô ne hawahabutula. Yeye wakamba kabidi ne, Wangata mikete; wakayangata. Wakambila mukelenge wa Isalele ne, Yasai mu buloba. Yeye wakasa misangu isatu, wakalekela. Muntu wa Nzambi wakadi nʼandi tshiji, wakamuambila ne, Wakadi ne bua kuasa misangu itanu nansha misangu isambombo; nunku wakadi kuhita Bena Sulia bukole to ne hawakababutula bonso; kadi katataka wewe neuhite Bena Sulia bukole anu misangu isatu. Elisha wakafua, bakamujika. Ku tshibangidilu tshia tshidimu tshikuabo Bena Moaba bakalua mu bisumbu, bakahaula buloba. Hakadibo bajika muntu mukuabo, bakatangila tshisumbu tshia Bena Moaba; bakimasha tshitalu tshiandi mu lukita lua Elisha; hakalengangana tshitalu tshiandi ne mifuba ya Elisha, wakafuluka, makasa andi. Hazaele, mukelenge wa Sulia, wakakengesha Bena Isalele matuku onso a Yehoaza. Kadi Yehowa wakabalesha dinanga, wakabafila luse, wakabalesha kalolo, bualu bua tshihungidi tshiakahungeye ne Abalahama ne Isaka ne Yakoba, yeye wakabenga bua kubabutula, kakabihata ku mesu kuandi. Hazaele, mukelenge wa Sulia, wakafua; Benehadada, muanʼandi, wakakokesha mu muaba wandi. Yehoasha, muana wa Yehoaza, wakanyenga kabidi misoko mu bianza bia Bene-hadada, muana wa Hazaele, yakanyengeye mu bianza bia Yehoaza, tatu wandi, mu mata. Yoasha wakamuhita bukole misangu isatu, wakasungila misoko ya Bena Isalele. Mu tshidimu tshibidi tshia bukelenge bua Yoasha, muana wa Yehoaza, mukelenge wa Isalele, Amasaya, muana wa Yoasha, mukelenge wa Yuda, wakabanga kukokesha. Wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu makumi abidi ne tshitema; dina dia mamu wandi dia kadi Yehoadina wa mu Yelushalema. Wakenza malu mimpe ku mesu kua Yehowa; kadi kakenza malu onso bu muakenza Davidi, kaku wandi; Wakenza malu onso bu muakenza Yoasha, tatu wandi. Kadi kakumusha bitendelelu bia ku mikuna; bantu batshivua bafila milambu ya kuosha ha kahia ne musenga wa manananshi ha mutu ha mikuna Hakajadikabo bukelenge mu bianza biandi, yeye wakashiha bena mudimu, bashihi ba tatu wandi, mukelenge. Kadi yeye kakashiha bana ba bashihi aba, bu muakamba Yehowa mu mukanda wa mikenji ya Mose ne, Kabashihi batatu bualu bua malu a bana bakalelabo; kabashihi bana bua malu a batatuʼabo, kadi muntu yonso neafue anu bua bubi buandi. Wakashiha binunu dikumi bia Bena Edome mu Tshibanda tshia Luehu; wakanyenga musoko wa Sela mu nvita, wakawidika ne, Yoketele tô ne ku difuku edi. Hashishe Amasaya wakatumina Yehoasha, muana wa Yehoaza, muana wa Yehu, mukelenge wa Isalele, ba-messager bamba ne, Lua biebe, tutangilangane mpala ha mpala Yehoasha, mukelenge wa Isalele, wakatumina Amasaya, mukelenge wa Yuda, dî ne, Dieba diakadi mu Lebanona diakatumina mutshi wa cèdre wa mu Lebanona dî ne, Umpe muanʼebe wa bakashi bu mukashi wa muanʼanyi wa balume. Kadi nyama wa mu Lebanona wakahitaku, wakadiata dieba munda mua dikama. Bulelela, wewe wakuhita Bena Edome bukole, wakadibandisha mu mutshima webe, wakadisua; Shala biebe kuebe, uditumbishe nkayebe. Udi musue kudibuesha mu malu bua kudikengesha ne bua kuhona, wewe ne Bena Yuda hebe, bua tshinyi? Kadi Amasaya kakitabusha. Nunku Yehoasha, mukelenge wa Isalele, wakaya, wakamonangana ne Amasaya, mukelenge wa Yuda, ku mesu mu Bete-shemeshe wa ku luseke lua Yuda. Bena Yuda bakahitshibua bukole kudi Bena Isalele, bakanyemena ku ntenta yabo. Yehoasha, mukelenge wa Isalele, wakakuata Amasaya, mukelenge wa Yuda, muana wa Yehoasha, muana wa Ahazaya, ku Bete-shemeshe; wakaya ku Yelushalema, wakashimbula lumbu lua Yelushalema ku tshibi tshia Efelayima tô ne ku tshibi tshikuabo tshia ku ditumba ntanta wa coudées nkama mai. Wakahaula biamu bionso bia or ne bia argent ne malonga onso akadi mu nsubu wa Yehowa, ne bintu bimpe bionso bia mu nsubu wa mukelenge; wakakuata bantu lukola, wakahingana ku Samalea. Bienzedi bia Yehoasha bikuabo biakenzeye ne bukole buandi ne muakaluanganeye ne Amasaya, mukelenge wa Yuda, kabiena bifunda mu mukanda wa kulondolola kua malu a bakelenge ba Isalele, anyi? Yehoasha wakalala tulu ne bankambua bandi, bakamujika mu Samalea diatshimue ne bakelenge ba Isalele; Yalobama, muanʼandi, wakakokesha mu muaba wandi. Amasaya, muana wa Yoasha, mukelenge wa Yuda, wakikala ne muoyo bidimu dikumi ne bitanu ku nyima kua lufu lua Yehoasha, muana wa Yehoaza, mukelenge wa Isalele. Bienzedi bikuabo bia Amasaya kabiena bifunda mu mukanda wa kulondolola kua malu a bakelenge ba Yuda, anyi? Bakamuelela tshifufu mu Yelushalema, kadi yeye wakanyemena ku Lakisha, bakamuihata ku Lakisha, bakamushihelaku. Bakalua nʼandi ha nyima ha tubalu, bakamujika ne bankambua bandi mu Yelushalema, musoko wa Davidi. Bena Yuda bonso bakangata Uziya, wakadi ne bidimu dikumi ne bisambombo, bakamujadika mukelenge mu muaba wa Amasaya, tatu wandi. Yeye wakasa musoko wa Elata, wakauhingisha kudi Bena Yuda; ku nyima kua bualu ebu yeye wakalala tulu ne bankambua bandi. Mu tshidimu tshia dikumi ne bitanu tshia bukelenge bua Amasaya, muana wa Yoasha, mukelenge wa Yuda, Yalobama, muana wa Yoasha, mukelenge wa Isalele, wakabanga kukokesha mu Samalea, wakabakokesha tô bidimu makumi anai ne tshimue. Wakenza malu mabi ku mesu kua Yehowa; kakasesuka ku malu mabi onso a Yalobama, muana wa Nebata, akenzesheye Bena Isalele. Wakahingisha mukalu wa Isalele ku tshibi tshia ku Hamata tô ne ku dishiha dia mu Alabâ, bu mu dî dia Yehowa, Nzambi wa Isalele, diakambeye mukana mua muntu wandi Yona muprofete, muana wa Ambai wa mu Gata-hefê. Bualu bua Yehowa wakamona dikenga dia Bena Isalele ne diakadi dikole; kabakashala ne bantu mu nsubu anyi ku mbelu, kabakashila Bena Isalele mukuatshishi nansha. Yehowa kakanza kuamba ne, Nenjimishe dina dia Isalele muinshi mua diulu, kadi yeye wakatuma Yalobama, muana wa Yoasha, bua kubasungileye. Bienzedi bia Yalobama bikuabo biakenzeye ne bukole buandi ne nvita yandi, ne muakanyengeye Damaseke ne Hamata, misoko ya Yuda, wakayihingisha mu bianza bia Bena Isalele, kabiena bifunda mu mukanda wa kulondolola kua malu a bakelenge ba Isalele, anyi? Yalobama wakalala tulu ne bankambua bandi, bakelenge ba Isalele; Zekâya, muanʼandi, wakakokesha mu muaba wandi. Mu tshidimu tshia makumi abidi ne muanda mutekete tshia bukelenge bua Yalobama, mukelenge wa Isalele, Uziya, muana wa Amasaya, mukelenge wa Yuda, wakabanga kukokesha. Wakadi ne bidimu dikumi ne bisambombo hakabangeye kukokesha; wakakokesha mu Yelushalema tô bidimu makumi atanu ne bibidi; dina dia mamu wandi diakadi Yekoliya wa mu Yelushalema. Wakenza malu mimpe ku mesu kua Yehowa bu muakenza Amasaya, tatu wandi. Kadi kakumusha bitendelelu bia ku mikuna; bantu batshivua bafila milambu ya kuosha ha kahia ne musenga wa manananshi ha mutu ha mikuna. Yehowa wakasamisha mukelenge ne disama dia nsudi tô ne ku dituku dia lufu luandi; wakashikama mu nsubu ha buandi. Yotama, muana wa mukelenge, wakadi ku mutu kua nsubu wandi ulumbulula malu a bantu ba mu buloba. Bienzedi bia Uziya bikuabo ne malu onso biakenzeye kabiena bifunda mu mukanda wa kulondolola kua malu a bakelenge ha Yuda, anyi? Uziya wakalala tulu ne bankambua bandi, bakamujika hohamue ne bankambua bandi mu musoko wa Davidi. Yotama, muanʼandi, wakakokesha mu muaba wandi. Mu tshidimu tshia makumi asatu ne muanda mukulu tshia bukelenge bua Uziya, mukelenge wa Yuda, Zekâya, muana wa Yalobama, wakakokesha Bena Isalele mu Samalea anu ngondo isambombo. Wakenza malu mabi ku mesu kua Yehowa bu muakenza batatuʼandi; kakasesuka ku malu mabi a Yalobama, muana wa Nebata, akenzesheye Bena Isalele. Shaluma, muana wa Yabesha, wakamuelela tshifufu, wakamukuma ku mesu kua bantu, wakamushiha, wakakokesha mu muaba wandi. Bienzedi bia Zekâya bikuabo bidi bifunda mu mukanda wa kulondolola kua malu a bakelenge ba Isalele. Edi ndi diakambila Yehowa Yehu ne, Bana bebe nebashikame ku nkuasa wa bukelenge wa Isalele tô ne ku tshikondo tshinai. Bualu ebu buakenjibua. Mu tshidimu tshia makumi asatu ne tshitema tshia bukelenge bua Uziya, mukelenge wa Yuda, Shaluma, muana wa Yabesha, wakabanga kukokesha; wakabakokesha mu Samalea ngondo umue. Menahema, muana wa Gadi, wakafuma ku Tîsa, wakaya ku Samalea, wakakuma Shaluma, muana wa Yabesha, mu Samalea, wakamushiha, wakakokesha mu muaba wandi. Bienzedi bia Shaluma bikuabo ne tshifufu tshiakeleye bidi bifunda mu mukanda wa kulondolola kua malu a bakelenge ba Isalele. Hashishe Menahema wakahaula musoko wa Tifesa, wakashiha bantu bakadiku tô ne ku Tîsa; bualu bua bobo kabakunzulula bibi ku mpala kuandi, yeye wakabashiha; bakashi bonso bakadi ne mafu, yeye wakabahanda. Mu tshidimu tshia makumi asatu ne tshitema tshia bukelenge bua Uziya, mukelenge wa Yuda, Menahema, muana wa Gadi, wakabanga kukokesha Bena Isalele; wakakokesha mu Samalea bidimu dikumi. Wakenza malu mabi ku mesu kua Yehowa; kakasesuka mu malu mabi a Yalobama, muana wa Nebata, akenzesheye Bena Isalele matuku andi onso. Pula, mukelenge wa Ashû, wakalua bua kuhaula buloba. Menahema wakaha Pula ntalanta ya argent tshinunu, bua yeye amukuatshishe bua kujadikeye bukelenge mu tshianza tshiandi. Menahema wakalambuisha Bena Isalele, bantu babanji bonso, nshekele ya argent makumi atanu kudi muntu ne muntu, bua kulambuleye mukelenge wa Ashû. Nunku mukelenge wa Ashû wakahingana kuabo, kakashikama mu buloba bua Isalele. Bienzedi bikuabo bia Menahema ne malu onso akenzeye kabiena bifunda mu mukanda wa kulondolola kua malu a bakelenge ba Isalele, anyi? Menahema wakalala tulu ne bankambua bandi; Pekaya, muanʼandi, wakakokesha mu muaba wandi. Mu tshidimu tshia makumi atanu tshia bukelenge bua Uziya, mukelenge wa Yuda, Pekaya, muana wa Menahema, wakabanga kukokesha Bena Isalele mu Samalea; wakabakokesha bidimu bibidi. Wakenza malu mabi ku mesu kua Yehowa; kakasesuka mu malu mabi a Yalobama, muana wa Nebata, akenzesheye Bena Isalele. Peka, muana mulume wa Lemalaya, kapitene ka masalayi andi wakamuelela tshifufu, wakamukuma mu Samalea mu nsubu wa mukelenge; Âgoba ne Aliye ne Bena Gilada makumi atanu bakadi nʼandi; yeye wakamushiha, wakakokesha mu muaba wandi. Bienzedi bikuabo bia Pekaya ne malu onso akenzeye bidi bifunda mu mukanda wa kulondolola kua malu a bakelenge ba Isalele. Mu tshidimu tshia makumi atanu ne bibidi tshia bukelenge bua Uziya, mukelenge wa Yuda, Peka, muana wa Lemalaya, wakabanga kukokesha Bena Isalele mu Samalea; wakabakokesha bidimu makumi abidi. Wakenza malu mabi ku mesu kua Yehowa; kakasesuka mu malu mabi a Yalobama, muana wa Nebata, akenzesheye Bena Isalele. Mu matuku a Peka, mukelenge wa Isalele, Tigelata-pilesê, mukelenge wa Ashû, wakalua, wakahaula Iyona ne Abele-bete-mâka ne Yanoa ne Kedeshe ne Hasô ne Gilada ne Galela ne buloba buonso bua Nafatale, wakaya nʼabo ku Ashû mu buhika. Hoshea, muana wa Ela, wakelela Peka, muana wa Lemalaya, tshifufu, wakamukuma, wakamushiha, wakakokesha mu muaba wandi mu tshidimu tshia makumi abidi tshia bukelenge bua Yotama, muana wa Uziya. Bienzedi bikuabo bia Peka ne malu onso akenzeye bidi bifunda mu mukanda wa kulondolola kua malu a bakelenge ba Isalele. Mu tshidimu tshibidi tshia bukelenge bua Peka, muana wa Lemalaya, mukelenge wa Isalele, Yotama, muana wa Uziya, mukelenge wa Yuda, wakabanga kukokesha. Wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu dikumi ne bisambombo; dina dia mamu wandi diakadi Yelusha, muana wa Sadoka. Wakenza malu mimpe ku mesu kua Yehowa, bu muakenza Uziya, tatu wandi. Kadi kakumusha bitendelelu bia ku mutu kua mikuna; bantu batshivua bafila milambu ya kuosha ha kahia ne musenga wa manananshi ha mutu ha mikuna. Yeye wakalongolola tshibi tshia ku nsubu wa Yehowa. Bienzedi bikuabo bia Yotama ne malu onso akenzeye kabiena bifunda mu mukanda wa kulondolola kua malu a bakelenge ba Yuda, anyi? Mu matuku au Yehowa wakabanga kutuma Lesinyi, mukelenge wa Sulia, ne Peka, muana wa Lemalaya, bua kuluanganabo ne Bena Yuda. Yotama wakalala tulu ne bankambua bandi, bakamujika hohamue ne bankambua bandi mu musoko wa Davidi, tatu wandi; Ahaza, muanʼandi, wakakokesha mu muaba wandi. Mu tshidimu tshia dikumi ne muanda mutekete tshia bukelenge bua Peka, muana wa Lemalaya, Ahaza, muana wa Yotama, mukelenge wa Yuda, wakabanga kukokesha. Ahaza wakadi ne bidimu makumi abidi hakabangeye kukokesha; wakakokesha mu Yelushalema bidimu dikumi ne bisambombo. Yeye kakenza malu mimpe ku mesu kua Yehowa, Nzambi wandi, bu muakenza Davidi, tatu wandi. Kadi yeye wakenda mu nshila wa bakelenge ba Isalele; wakahitshisha muanʼandi wa balume mu kahia bu mu malu a bundu a bantu ba mu bisamba bia bende bakihatabo kudi Yehowa ku mesu kua Bena Isalele. Wakafila milambu ya kuosha ha kahia ne musenga wa manananshi ha mutu ha mikuna ne ha tukuna ne muinshi mua mitshi mibishi yonso. Hashishe Lesinyi, mukelenge wa Sulia, ne Peka, muana wa Lemalaya, mukelenge wa Isalele, bakalua kuluangana ne Bena Yelushalema; bakatshintshimika Ahaza kadi kabakamanya mua kumutshimuna. Ku tshikondo atshi Lesinyi, mukelenge wa Sulia, wakahingisha Elata ku Sulia; wakihata Bena Yuda mu Elata; Bena Sulia bakalua ku Elata, bakashikamamu tô ne ku dituku edi. Nunku Ahaza wakatuma ba-messager kudi Tigelata-pilesê, mukelenge wa Ashû, ne, Meme ndi muntu webe ne muana webe mulume; lua biebe, ansungile mu bianza bia mukelenge wa Sulia ne bia mukelenge wa Isalele, badi baluangana neanyi. Ahaza wakangata biamu bia argent ne bia or biakadi mu nsubu wa Yehowa ne bintu bilengele biakadi mu nsubu wa mukelenge, wakabituma bu matabisha kudi mukelenge wa Ashû. Mukelenge wa Ashû wakamunvuila; mukelenge wa Ashû wakaya kuluangana ne musoko wa Damaseke, wakaunyenga, wakaya ne bantu ku Kî mu buhika; wakashiha Lesinyi kabidi. Ahaza wakaya ku Damaseke bua kusangileye ne Tigelata-pilesê, mukelenge wa Ashû; wakatangilaku tshioshelu tshiakadi mu Damaseke. Ahaza wakatuma tshinfuanyi tshia tshioshelu ne luidi luatshi ne buakane buatshi buonso kudi Uliya muakuidi. Uliya muakuidi wakenza tshioshelu tshikuabo; wakatshifuanyikisha bu bintu bionso biakamutumina mukelenge Ahaza ku Damaseke. Uliya muakuidi wakatshienza ku mpala kua dihingana dia mukelenge Ahaza ku Damaseke. Hakafuma mukelenge ku Damaseke, yeye wakatangila tshioshelu; wakasemena ha buihi ne tshioshelu, wakafilahu milambu. Wakafila milambu ya kuosha ha kahia ne milambu ya bukula; wakahongolola milambu ya bintu bia kunuabo, wakamiamina mashi a milambu ya kuvuisha nʼai ditalala ha tshioshelu. Yeye wakumusha tshioshelu tshia tshiamu tshia mitaku tshiakadi ku mpala kua Yehowa hankatshi ha tshioshelu tshiandi ne nsubu wa Yehowa, wakatshiteka ku luseke lua ku node lua tshioshelu tshiandi. Mukelenge Ahaza wakelela Uliya muakuidi mukenji ne, Ufile milambu ya kuosha ha kahia ya dinda ha tshioshelu tshinene, ne milambu ya bukula ya dilolo ne milambu ya kuosha ne milambu ya bukula ya mukelenge, ne milambu ya kuosha ne milambu ya bukula ne milambu ya bintu bidibo banua ya bantu bonso; umiaminehu mashi a milambu yonso idibo bosha ha kahia; kadi meme nkayanyi nendifidile milambu ha tshioshelu tshia tshiamu tshia mitaku. Uliya muakuidi wakenza malu onso akamba mukelenge Ahaza. Mukelenge Ahaza wakakosa biamu bia ku nseke ya bitekelu, wakumusha biowelu biakadi ha mitu habi, wakumusha tshiowelu tshinene tshiakadi ha nyima ha ngombe ya tshiamu tshia mitaku, wakatshiteka ha mutu ha mabue. Bualu bua Ahaza wakatshina mukelenge wa Ashû, wakandamuna mu nsubu wa Yehowa tshibuelelu tshiakadi ne tshibuikilu ku mutu, tshiakadi bantu babuelamu dituku dia Lumingu tshiakibakabo mu nsubu ne tshibi tshia ku mbelu tshiakadi mukelenge mubuele. Bienzedi bia Ahaza bikuabo biakenzeye kabiena bifunda mu mukanda wa kulondolola kua malu a bakelenge ba Yuda, anyi? Ahaza wakalala tulu ne bankambua bandi, bakamujika hohamue ne bankambua bandi mu musoko wa Davidi; Hezikiya, muanʼandi, wakakokesha mu muaba wandi. Mu tshidimu tshia dikumi ne bibidi bia bukelenge bua Ahaza, mukelenge wa Yuda, Hoshea, muana wa Ela, wakabanga kukokesha Bena Isalele mu Samalea; wakabakokesha bidimu tshitema. Wakenza malu mabi ku mesu kua Yehowa; kadi kakenza bu muakenza bakelenge ba Isalele bakadi ku mpala kuandi. Shalamanese, mukelenge wa Ashû, wakaluangana nʼandi; Hoshea wakalua muntu wandi, wakamulambula milambu. Mukelenge wa Ashû wakamanya ne, Hoshea udi ungelela tshifufu; bualu bua yeye wakatuma ba-messager kudi So, mukelenge wa Ejipitu, kakafila milambu kudi mukelenge wa Ashû bu muakadiye wenza ku tshidimu ku tshidimu; nunku mukelenge wa Ashû wakamukuata, wakamusuika mu nsubu wa lukanu. Hashishe, mukelenge wa Ashû wakalua ku nseke yonso ya buloba, wakafika hehi ne musoko wa Samalea, wakautshintshimika tô bidimu bisatu. Mu tshidimu tshia tshitema tshia bukelenge bua Hoshea, mukelenge wa Ashû wakahaula Samalea, wakaya ne Bena Isalele ku Ashû, wakabashikika mu Halaha ne kukala kua musulu wa Habo wa mu Gozana ne mu misoko ya Bena Madai. Bualu bua Bena Isalele bakadi benza malu mabi ku mesu kua Yehowa, Nzambi wabo, wakabaluhula mu buloba bua Ejipitu mu bianza bia Palo, mukelenge wa Ejipitu, ne bakatshina nzambi mikuabo, bakenda mu mikenji ya bisamba bikuabo biakihata Yehowa ku mesu kua Bena Isalele, ne mu mikenji ya bakelenge ba Bena Isalele yakenzabo. Bena Isalele bakenza mu musokoko malu akadi kâyi mimpe ku mesu kua Yehowa, Nzambi wabo; bakadiashila bitendelelu mu misoko yabo yonso ku tshibumba tshia batentekedi tô ne ku misoko yakadi ne ngumbu; bakadijadikila makunshi ne Bashela ku mutu kua mikuna yonso ne muinshi mua mitshi mibishi yonso. Bakosha musenga wa manananshi ku mutu kua mikuna, bu muakenza bisamba biakihata Yehowa ku mesu kuabo; bakenza malu mabi a kufuisha nʼau Yehowa tshiji. Bakakuatshila mpingu mudimu yakabambila Yehowa ne, Kanuenji bualu ebu. Kadi Yehowa wakadimusha Bena Isalele ne Bena Yuda mukana mua muprofete yonso ne mua mumonyi yonso ne, Kudimunai mitshima yenu ku malu mabi enu; nutumikile mikenji yanyi ne mikandu yanyi bu mudi mikenji makelela bankambua benu mukana mua bantu banyi baprofete. Kadi kabakunvua, bakakolesha mitshima yabo bu muakenza bankambua babo bakadi kabayi bitabusha Yehowa, Nzambi wabo. Bakabenga mikenji yandi ne tshihungidi tshiakahungeye ne bankambua babo ne mei andi akabambileye; bakalonda malu a hatuhu, bakalua bahote, bakalonda bisamba biakadi ha buihi nʼabo biakabambila Yehowa diambedi ne, Kanuenji bu mudibo benza. Bakabenga mikenji yonso yakabambila Yehowa, Nzambi wabo, bakadienzela mpingu ya tshiamu tshiakafulabo, tuana tua ngombe tubidi mene mene; bakadienzela Bashela, bakatendelela bintu bionso bia mu diulu, bakakuatshila Bâla mudimu kabidi. Bakahitshisha bana bakalelabo, balume ne bakashi, mu kahia, bakatempa mbuku, bakabandangana buloshi, bakadihanyisha bua kuenzabo malu mabi ku mesu kua Yehowa, bua kumufuisha nʼau tshiji. Nunku Yehowa wakadi ne Bena Isalele tshiji tshikole, wakabumusha ku mesu kuandi; anu tshisamba tshia Yuda nkayatshi tshiakashala. Bena Yuda kabidi kabakatumikila mikenji ya Yehowa, Nzambi wabo, kadi bakenda mu mikenji ya Bena Isalele yakenzabo. Yehowa wakabenga bonso ba mu tshisamba tshia Bena Isalele, wakabakengesha, wakabafila mu bianza bia bahaudi, tô ne hakabumusheye ku mesu kuandi. Bualu bua yeye wakahandu tula Bena Isalele kudi nsubu wa Davidi; bakadisunguila Yalobama, muana wa Nebata, mukelenge wabo; Yalobama wakasesuisha Bena Isalele kudi Yehowa, wakabenzesha bualu bubi bunene. Bena Isalele bakenda mu malu mabi onso a Yalobama akenzeye, kabakasesukaku nansha; tô ne hakumusha Yehowa Bena Isalele ku mesu kuandi, bu muakabambileye kudi bantu bandi bonso baprofete. Nunku bakumusha Bena Isalele mu buloba buabo, bakaya nʼabo ku buloba bua Ashû tô ne ku dituku edi. Mukelenge wa Ashû wakangata bantu ba mu Babulona ne ba mu Kuta ne ba mu Awa ne ba mu Hamata ne ba mu Sefâwayima, wakabateka mu misoko ya Samalea mu miaba ya Bena Isalele; bobo bakaheta misoko ya Samalea, bakashikamamu. Ku tshibangidilu tshia dishikama diaboku kabakatshina Yehowa; nunku Yehowa wakatuma nyama ya ntambue munkatshi muabo, yakashiha bakuabo babo. Nunku bakambila mukelenge wa Ashû ne, Ba bisamba biwakalua nʼabi bua kuteka mu misoko ya Samalea kabena bamanye mikenji ya nzambi wa mu buloba abu: nunku yeye wakatuma nyama ya ntambue munkatshi muabo, monai, idi ibashiha, bualu bua kabena bamanye mikenji ya nzambi wa buloba abu. Hashishe mukelenge wa Ashû wakela mukenji ne, Hingisha umue wa bakuidi banuakumushaku, yeye aye, ashikame munkatshi muabo, abayishe mikenji ya nzambi wa buloba ahu. Nunku umue wa bakuidi wakumushabo wakahingana, wakashikama mu Betele, wakabayisha mua kutshinabo Yehowa. Kadi bantu ba mu tshisamba ne tshisamba bakadienzela nzambi yabo, bakayiteka mu nsubu yakibaka Bena Samalea ha mutu ha mikuna; bakenza nunku kudi tshisamba ne tshisamba mu misoko yonso yakadibo bashikama. Nunku Bena Babulona bakenza Sukota-benota, ne Bena Kuta bakenza Nêgala ne Bena Hamata bakenza Ashima, Bena Awa bakenza Nibehaza ne Tâtaka; ne Bena Sefâwayima bakoshila Adelameleke ne Anameleke, nzambi ya Bena Sefâwayima, bana bakalelabo mu kahia. Nunku bakatshina Yehowa, kadi bakadisunguila bakuidi ba munkatshi muabo, bakabafidila milambu mu nsubu yakadi ku mutu kua mikuna. Bakatshina Yehowa, kadi bakakuatshila nzambi yabo mudimu, bu muakenza bantu ba mu bisamba biakabumusha. Nunku tô ne ku dituku edi badi benza bu muakenzabo diambedi: Kabena batshina Yehowa, kabena batumikila mikandu ne mei ne mikenji biakambila Yehowa bana ba Yakoba bakidikeye ne, Bena Isalele. Yehowa wakahunga nʼabo tshihungidi, wakabadimusha ne, Kanuena ne bualu bua kutshina nzambi mikuabo, kanuyinaminyi, kanuyikuatshidi mudimu, kanuyifididi milambu ya kuosha ha kahia. Kadi Yehowa wakafuma nʼenu mu buloba bua Ejipitu ne bukole bua bungi ne tshianza tshiandi tshiolola, numutshine yeye, numuinamine, nufile milambu kudiye; ne mikandu yandi ne mei andi ne mikenji yandi biakanufundileye, nubitumikile tô tshiendelele; kanutshinyi nzambi mikuabo. Kanuhu tshihungidi tshinakahunga nʼenu muoyo; kanuena ne bualu bua kutshina nzambi mikuabo; kadi bunudi nʼabu mbua kutshina Yehowa, Nzambi wenu; yeye neanusungile mu bianza bia bantu bonso badi nʼenu lukuna. Kadi kabakamunvuila, bakenza bu mu bilele biabo bia diambedi. Nunku ba bisamba ebi bikuabo bakatshina Yehowa, bakatendelela mpingu yakasongabo; nunku bana bakalelabo ne bana bakadi bana babo balele badi benza bu muakenza batatu babo tô ne ku dituku edi. Mu tshidimu tshisatu tshia bukelenge bua Hoshea, muana wa Ela, mukelenge wa Isalele, Hezikiya, muana wa Ahaza, mukelenge wa Yuda, wakabanga kukokesha. Wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu makumi abidi ne tshitema; dina dia mamu wandi diakadi Abi, muana wa Zekâya. Wakenza malu mimpe ku mesu kua Yehowa bu muakenza Davidi, nkambua wandi. Wakumusha bitendelelu biakadi ku mutu kua mikuna, wakashimbula makunshi akatendelelabo, wakatahila Bashela hanshi, wakabutula nyoka wa tshiamu tshia mitaku Wakenza Mose, bualu bua mu matuku au Bena Isalele bakadi boshila nyoka au musenga wa manananshi; wakamubikila ne, Nehushetana. Yeye wakeyemena Yehowa, Nzambi wa Isalele; kakuakadi muntu mukuabo bu yeye munkatshi mua bakelenge ba Yuda bakalonda ku nyima kuandi, anyi munkatshi mua bakadi ku mpala kuandi. Bualu bua yeye wakalamata Yehowa; kakasesuka mu nshila wandi, kadi wakatumikila mikenji yandi yakambila Yehowa Mose. Yehowa wakadi nʼandi, wakamuvuisha diakalengele kuonso kuakayeye; yeye wakatombokela mukelenge wa Ashû, kakamukuatshila mudimu. Yeye wakahita Bena Peleshete bukole ku luseke lua Gaza ku tshibumba tshia batentekedi tô ne ku musoko wakadi ne lumbu. Mu tshidimu tshinai tshia bukelenge bua Hezikiya, mukelenge wa Yuda, ne mu tshidimu tshia muanda mutekete tshia bukelenge bua Hoshea, muana wa Ela, mukelenge wa Isalele, Shalamanesê, mukelenge wa Ashû, wakalua bua kuluangana ne Bena Samalea; wakabatshintshimika. Hakahita bidimu bisatu, bakahaula musoko; mu tshidimu tshisambombo tshia bukelenge bua Hezikiya ne tshia tshitema tshia bukelenge bua Hoshea, mukelenge wa Isalele, bakanyenga musoko wa Samalea. Mukelenge wa Ashû wakaya ne Bena Isalele mu Ashû; wakabateka mu Halaha ne kukala kua musulu wa Habo mu Gozana ne mu misoko ya Bena Madai, bualu bua kabakatumikila dî dia Yehowa, Nzambi wabo, kadi bakashiha tshihungidi tshiandi; bakabenga mikenji yonso yakabambila Mose, muntu wa Yehowa, kabakayunvua, kabakayenza. Mu tshidimu tshia dikumi ne binai tshia bukelenge bua Hezikiya, Saneheliba, mukelenge wa Ashû, wakalua, wakaluangana ne bena misoko yonso ya Yuda yakadi ne ngumbu, wakayinyenga. Hezikiya, mukelenge wa Yuda, wakatumina mukelenge wa Ashû dî mu Lakisha ne Nakukuenzela bibi; usesuke kundi, nenkuhe mulambu udi ungambila Mukelenge wa Ashû wakafutshisha Hezikiya, mukelenge wa Yuda, milambu ya ntalanta ya argent nkama isatu ne ntalanta ya or makumi asatu. Hezikiya wakamuha argent yonso yakadi mu nsubu wa Yehowa, ne bintu bionso bia mushinga mukole bia mu nsubu wa mukelenge. Mu tshikondo atshi Hezikiya wakumusha or yonso ya ku bibi bia mu ntempelo wa Yehowa ne ya ku makunshi yakalamika Hezikiya, mukelenge wa Yuda; wakabifila kudi mukelenge wa Ashû. Mukelenge wa Ashû wakatuma Tâtana ne Labasalisa ne Labashake, bafume ku Lakisha ne masalayi a bungi bua kuluanganabo ne Hezikiya, mukelenge wa Yuda, mu Yelushalema Bakafika ku Yelushalema. Hakafikabo, bakimana ku mushimi wa mai udi hehi ne nshila wa mu muaba wa muvu wa bilulu. Hakabikilabo mukelenge, Eleyakima, muana wa Hilekiya, wakadi ku mutu kua nsubu wa mukelenge, ne Shebena secrétaire, ne Yoa, muana wa Asafa, mufundi wa malu a bukelenge, bakaluhuka kudiye. Labashake wakabambila ne, Numanyishe Hezikiya ne, Mukelenge munene wa Ashû udi ukuebesha ne, Udi ne tshieyemenu kai tshiudi weyemena? Wewe udi Wamba (kadi udi wamba mei a hatuhu) ne, Hatuahunga dî, tudi ne bukole bua kuluangana nʼabu. Udi weyemena nganyi, hawakuntombokela? Wewe udi weyemena ku mulangala mutshibuke, bukelenge bua Ejipitu mene: bieyemenahu muntu tshianza tshiandi, neubuele mu tshianza tshiandi, neutshisompoke; Palô, mukelenge wa Ejipitu, udi nunku kudi bonso badi bamueyemena. Binuangambila ne, Netueyemene Yehowa, Nzambi wetu; kanyeye mene wakumusha Hezikiya bitendelelu biandi ku mikuna ne bioshelu biandi, wakambila Bena Yuda ne Bena Yelushalema ne, Bunudi nʼabu mbua kutendelela ku mpala kua tshioshelu etshi mu Yelushalema, anyi? Nunku ndi nnusengelela ne, Nuhunge dî ne mukelenge wanyi, mukelenge wa Ashû, hashishe nennuhe tubalu binunu bibidi binuamanya mua kushikika bantu ha nyima hatu. Munyi mudi mumanye mua kusesuisha kapitene kamue kadi katamba kuhuekela munkatshi mua bantu ba mukelenge wanyi bua kutekemenaku Bena Ejipitu bua kunuhabo makalu ne badi benda ha nyima ha tubalu? Meme nakuluila bua kuhaula muaba eu Yehowa kayi nʼanyi, anyi? Yehowa wakungambila ne, Uye biebe, uhaule buloba ebu. Hashishe Eleyakima, muana wa Hilekiya, ne Shebena ne Yoa bakambila Labashake ne, Tudi tukusengelela ne, Uyikile ne bantu bebe mu muaku wa Bena Sulia, bualu bua tuetu tudi baumanye; kuyikidi nʼetu mu muaku wa Bena Yuda mu matshu a bantu badi ha lumbu. Kadi Labashake wakabambila ne, Mukelenge wanyi wakuntuma anu kudi mukelenge wenu ne kunudi kabidi bua kunuambila mei au nkayenu? Yeye kakuntuma kudi bantu badi bashikame ha mutu ha lumbu, bua bobo hadie tunvi tuabo, banue menyi abo diatshimue nʼenu, anyi? Hashishe Labashake wakimana, wakela dî diandi bikole nu muaku wa Bena Yuda, wakamba ne; Unvuai dî dia mukelenge munene wa Bena Ashû. Mukelenge udi wamba ne, Hezikiya kanudingi, bualu bua yeye kena ne bukole bua kunusungila mu tshianza tshiandi; kanueyemenyi Yehowa bualu hua dî dia Hezikiya ne, Yehowa neatusungile, kabena bafila musoko eu mu bianza bia mukelenge wa Ashû. Kanunvu dî dia Hezikiya nansha: bualu bua mukelenge wa Ashû udi wamba ne, Nuhunge nʼanyi dî, nuluhuke kundi, muntu ne muntu adie bintu muinshi mua mitshi yandi ya tumuma tukese ne mitshi ya nfigi, anue mai a mu mena andi kabidi; tô ne hanaya nʼenu ku buloba budi bifuana buloba buenu, buloba bua blé ne nvinyo mihia-mihia ne mampa ne mitshi ya tumuma tukese, ne mitshi ya olive ne buitshi; bua nuenu nuikale ne muoyo, kanufu; kanunvu dî dia Hezikiya hanuambileye ne, Yehowa neatusungile. Munga nzambi wa mu bisamba bikuabo wakusungila buloba buandi mu bianza bia mukelenge wa Ashû, anyi? Nzambi ya Hamata ne ya Âpada idi kudi kunyi? Nzambi ya Sefâwayima ne ya Hena ne ya Iwa idi kudi kunyi? Yakasungila Samalea mu tshianza tshianyi, anyi? Nganyi wa munkatshi mua nzambi yonso ya bisamba wakasungila buloba buabo mu tshianza tshianyi, bua Yehowa amanye mua kusungila Yelushalema mu tshianza tshianyi? Kadi bantu bakahuwa, kabakamukudimuna dî; bualu bua mukelenge wakadianjila kubambila ne, Kanumukudimunyi dî nansha. Hashishe Eleyakima, muana wa Hilekiya, ne Shebena secrétaire, ne Yoa, muana wa Asafa, mufundi wa malu a bukelenge, bakahingana kuai Hezikiya ne bilulu biabo bihanda, bakamuambila mei a Labashake. Kakunyua mukelenge Hezikiya mei au, wakadihanda bilulu biandi, wakaluata bilulu bikayabala, wakabuela mu nsubu wa Yehowa. Yeye wakatuma Eleyakima, wakadi ku mutu kua nsubu wandi, ne Shebena secrétaire ne bakulu ba munkatshi mua bakuidi baluate bilulu bikayabala, kudi Yeshaya muprofete, muana wa Amoza. Bakamuambila ne, Hezikiya udi wamba ne, Edi ndituku dia ntatu ne dia kutubela ne dia kutufuisha bundu; bualu bua diba dia kulela bana diakufika, ne kabena ne bukole bua kubalela. Biasua Yehowa, Nzambi webe, kunvua mei a Labashake, wakatuma mukelenge wa Ashû, mukelenge wandi, bua kubendeye nʼau Nzambi wa muoyo, neamubele bua mei akunvua Yehowa, Nzambi webe; nunku ulombele difuka dia bantu didi dishala Nzambi. Nunku bantu ba mukelenge Hezikiya bakafika kudi Yeshaya. Yeshaya wakabambila ne, Nuambile mukelenge wenu ne, Yehowa udi wamba ne, Kanutshinyi mei anuakunvua akumpenda nʼau bantu ba mukelenge wa Ashû. Meme nenteke nyuma wanyi munda muandi, yeye neunvue ngumu, neahingane ku buloba buandi; meme nemmushiheshe ku muele wa nvita mu buloba buandi. Labashake wakahingana, wakasangana mukelenge wa Ashû uluangana ne Bena Libena; wakadianjila kunvua lumu ne, Yeye wakumuka ku Lakisha. Hakunvueye lumu ne, Tîhaka, mukelenge wa Atiopa, ulualua bua kuluangana nʼebe, wakatuma ba-messager kudi Hezikiya kabidi ne, Nuambile Hezikiya, mukelenge wa Yuda, ne, Nzambi webe ûdi weyemena kakudingi nansha ne, Kabena bafila musoko wa Yelushalema mu bianza bia mukelenge wa Ashû. Monai, wewe wakumana kunvua lumu bu muakenzela bakelenge ba Ashû bantu ba mu bisamba bionso, bakababutula tô; wewe neuhanduke, anyi? Nzambi ya bisamba abi biakabuela batatuʼanyi yakabasungila, anyi? Bisamba bia Gozana ne bia Halana ne bia Lesefe ne bia Edene biakadi mu Telasâ. Bakelenge ba Hamata ne ba Âpada ne ba Sefâwayima ne ba Hena ne ba Iwa badi kudi kunyi? Hezikiya wakangata mukanda mu bianza bia ba-messager, wakaubala; Hezikiya wakabuela mu nsubu wa Yehowa, wakaubulula ku mpala kua Yehowa. Hezikiya wakatendelela Yehowa, wakamba ne, Yehowa, Nzambi wa Isalele, utu washikama ha mutu ha bakeluba, wewe udi Nzambi nkayebe wa makelenge onso a ha buloba; wewe wakafuka diulu ne buloba. Yehowa, teleja matshu, unvue biebe; Yehowa, ubulule mesu ebe, umone; unvue biebe mei a Saneheliba akatumeye bua kuhenda nʼau Nzambi wa muoyo. Bulelela, Yehowa, bakelenge ba Ashû bakabutula bisamba bikuabo, bakahaula buloba buabo, bakela nzambi yabo mu kahia, bualu bua yakadi nzambi ya mitshi ne ya mabue yakasongabo ku bianza bia bantu; kayakadi nzambi milelela, nunku bakaushiha. Nunku ndi nkusengelela, Yehowa, Nzambi wetu, ne, Utusungile mu bianza biandi, bua bisamba bionso bia ha buloba bimanye ne, Wewe Yehowa, udi Nzambi nkayebe. Hashishe Yeshaya, muana wa Amoza, wakatumina Hezikiya dî ne, Yehowa, Nzambi wa Isalele, udi wamba ne, Bualu bua wewe wakundombela hua Saneheliba, mukelenge wa Ashû, meme nakukunvuila. Edi ndî diakamba Yehowa bualu buandi: Mukashi utshidi kamama wa mu Siona wakakulengulula, wakakuseka; muana mukashi wa Yelushalema wakakukuila mutu. Wewe wakafunyina nganyi bukole, wakahenda nganyi? Wakabandisha dî diebe kudi nganyi? Wakatangisha mesu ebe kulu kudi nganyi? Wakenzela Wa Tshijila mene wa mu Isalele nunku! Wakafunyina Mukelenge bukole kudi ba-messager bebe bamba ne, Nakabanda ku mutu kua mikuna ne tshisumbu tshia makalu anyi tshinene, nakafika tô ne ku Lebanona; nenkoseku mitshi ya cèdre minene ne mitshi ya cyprès; nenfike tô ne ku nsubu wandi udi musokome mu metu a mamuma andi. Meme nakumbula mena, nakunua mai a bende, nengumishe misulu ya Ejipitu munda mua makasa anyi. Kuena muanze kunvua lumu munakenza bualu ebu kale, anyi? Meme nakenza bualu ebu bua wewe wakahaula misoko ya ngumbu; wakayivuisha mishiki. Nunku bena buloba abu bakadi ne bukole bukese, bakazakala, bakabondakana; bakadi bu mashinde a mu madimi, bakadi bu midioko, bakadi bu mashinde adi amena ha mitu ya nsubu, bakadi bu blé idi ibola diambedi kayiyi mianze kumena bimpe. Kadi ndi mumanye kûdi mushikame, ne kûdi uluhuka ne kûdi ubuela, ne bu mûdi ufunyina bukole kundi. Bualu bua wewe wakafunyina bukole kundi, ne bualu bua kudisua kuebe ku mesu kuanyi, ka meme nenteke ndobo ku diulu diebe ne lukanu ku mishiku yebe, nenkuhingishe mu nshila kuwakufuma. Etshi netshikale tshimanyinu kunudi: tshidimu etshi nenudie bintu bidi bidimenena mu buloba, mu tshidimu tshibidi nenudie bintu ebi muomumue kabidi; mu tshidimu tshisatu nenukune bintu, nenubihuole; nenukune mitshi ya tumuma tukese, nenudie tumuma tuai. Difuka dia bantu didi dishala ku tshisamba tshia Bena Yuda, nediele miji muinshi, nedikuame mamuma kulu. Bualu bua difuka dia bantu nediluhuke mu Yelushalema, nedihanduke ku mukuna wa Siona; lukunukunu lua Yehowa nebimane bualu ebu. Nunku Yehowa udi Wamba bualu bua mukelenge wa Ashû ne, Yeye kena ufika ha buihi ne musoko eu, kena welaku mukete umue, kena umueneka ku mpala kuau ne ngabu wandi, kena wela mushiki wa buloba ku musoko eu. Yeye neahingane anu mu nshila kuakafumeye; Yehowa udi wamba ne, Yeye kena ufika ha buihi ne musoko eu. Meme nensungile musoko eu bualu buanyi, ne bualu bua muntu wanyi Davidi. Butuku abu mene muanjelo wa Yehowa wakaya munkatshi mua tshitudilu tshia Bena Ashû, wakashiha bantu binunu lukama ne makumi muanda mukulu ne bitanu; hakabika bantu ne dinda dionso, bakasangana bitalu bia bantu bamane kufua bonso. Nunku Saneheliba, mukelenge wa Ashû, wakumuka, wakahingana, wakashikama ku Ninewe. Hakadiye utendelela nzambi wandi Niseloka mu nsubu wandi, Adelameleke ne Shalese bakamushiha ne muele wa nvita; bakanyemena mu buloba bua Alalata. Esâ-hadona, muanʼandi, wakakokesha mu muaba wandi. Mu matuku au disama dikole diakakuata Hezikiya, diakamutonda; Yeshaya muprofete, muana wa Amoza, wakalua kudiye, wakamuambila ne, Yehowa udi wamba ne, Ulongolole nsubu webe, bualu bua wewe neufue, kuena wikala ne muoyo. Hashishe yeye wakakudimuna mpala wandi ku tshimanu tshia nsubu, wakatendelela Yehowa, wakamba ne, Yehowa, ndi nkusengelela ne, Uvuluke bu munakuenda ku mpala kuebe mu bushuwa ne mutshima mutoke, nakuenza malu mimpe ku mesu kuebe. Hezikiya wakatamba kudila. Nunku diambedi Yeshaya kayi muanze kumuka ku tshiendedi, dî dia Yehowa diakalua kudiye ne, Walukile, Wambile Hezikiya, mukelenge wa bantu banyi, ne, Yehowa, Nzambi wa Davidi tatu webe, udi wamba ne, Nakunvua kulomba kuebe ne nakutangila binsonshi biebe, nenkuondahe; hahita matuku asatu, wewe neubuele mu nsubu wa Yehowa. Nenkumbashe matuku ebe tô bidimu dikumi ne bitanu; nenkusungile ne musoko eu mu bianza bia mukelenge wa Ashû, nensungile musoko eu bualu buanyi ne bua muntu wanyi Davidi. Yeshaya wakamba ne, Wenze tshiata tshia mamuma a nfigi, batshiteke ha tshiuja, bua yeye asangale. Hezikiya wakebesha Yeshaya ne, Nempete tshimanyinu kai bua ne Yehowa neangondahe, ne nembuele mu nsubu wa Yehowa hahita matuku asatu? Yeshaya wakamuambila ne, Etshi ntshimanyinu tshia Yehowa kudi bua kukutuisha ne, Yehowa nênze bualu ebu buakuambeye: mundidimbi neuye ku mpala biendedi dikumi, anyi neuhingane biendedi dikumi? Hezikiya wakamba ne, Mbualu bukese bua mundidimbi uye ku mpala biendedi dikumi; mbimpe mundidimbi uhingane biendedi dikumi. Yeshaya muprofete wakadila kudi Yehowa, yeye wakahingisha mundidimbi wakamana kuhueka ku tshibandilu tshia diba tshia Ahaza ku nyima biendedi dikumi. Ku tshikondo atshi Melodaka-baladana, muana wa Baladana, mukelenge wa Babulona, wakatumina Hezikiya mikanda ne bintu, bualu bua yeye wakunvua lumu ne, Hezikiya wakadi ne disama. Hezikiya wakunvua mei a bantu aba, wakabalesha bintu bionso bia mu bibutshilu biandi, bintu bia argent ne bia or ne bintu bia muhuya muimpe ne manyi a mushinga mukole ne nsubu wa bintu biandi bia nvita ne bintu bionso biakadiye nʼabi; Hezikiya kakabenga bua kubalesha bintu bionso bia mu nsubu wandi ne mu bukelenge buandi. Hashishe Yeshaya muprofete wakafika kudi Hezikiya mukelenge, wakamuebesha ne, Bantu aba bakuamba tshinyi? Bobo bakafuma kudi kunyi? Hezikiya wakamuambila ne, Bakafuma ku buloba budi kule, ku Babulona mene. Yeye wakamuebesha ne, Bakatangila bintu kai mu nsubu webe? Hezikiya wakamuambila ne, Bakatangila bintu bionso bia mu nsubu wanyi; kakuena tshintu tshimue tshia mu bintu bianyi tshinakahanga kubalesha. Yeshaya wakambila Hezikiya ne, Unvue biebe dî dia Yehowa. Mu matuku alualua ku nyima bintu bionso bidi mu nsubu webe ne bintu bionso biakabutshila batatuʼebe mu musoko eu, nebiye mu Babulona. Yehowa udi Wamba ne, Nansha tshintu tshimue netshishale. Nebayeku ne bana bebe ba balume baudi ulela; nebikale bantu batungula mu nsubu wa mukelenge wa Babulona. Hashishe Hezikiya wakambila Yeshaya ne, Dî dia Yehowa diwakungambila ndimpe. Wakamba kabidi ne, Kakuena bualu, bikalaku ditalala kakuyi ditshina mu matuku andi nshala ne muoyo. Bienzedi bia Hezikiya bikuabo ne bukole buandi buonso ne bu muakumbuleye dina dinene ne mitubu bia kutuma mai munda mua musoko, kabiena bifunda mu mukanda wa kulondolola kua malu a bakelenge ba Yuda, anyi? Hezikiya wakalala tulu ne bankambua bandi; Manashe, muanʼandi mulume, wakakokesha mu muaba wandi. Manashe wakadi ne bidimu dikumi ne bibidi hakabangeye kukokesha; wakakokesha mu Yelushalema bidimu makumi atanu ne bitanu. Dina dia mamu wandi diakadi Hefesiba. Wakenza malu mabi ku mesu kua Yehowa, wakalonda malu a bundu a bantu ba mu bisamba abi biakihatabo kudi Yehowa ku mesu kua Bena Isalele. Wakasa bitendelelu bia ku mikuna biakashimbula Hezikiya, tatu wandi; wakashila Bâla ne Bashela tshioshelu bu muakenza Ahaba, mukelenge wa Isalele; wakatendelela bintu bionso bia mu diulu, wakabikuatshila mudimu. Wakasa bioshelu bikuabo mu nsubu wa Yehowa wakamba Yehowa ne, Meme nenjadike dina dianyi mu Yelushalema. Yeye wakashila bintu bionso bia mu diulu bioshelu mu biendedi bibidi bia mu nsubu wa Yehowa. Yeye kabidi wakahitshisha muanʼandi wa balume mu kahia, wakatempa mbuku; wakadisunguila bena muhongo ne bena buloshi; wakenza malu mabi a bungi ku mesu kua Yehowa bua kumufuisha nʼau tshiji. Wakateka luhingu lua Bashela luakasongeye mu nsubu wa Yehowa, mu nsubu mene wakambila Yehowa Davidi ne muanʼandi Solomo ne, Nenjadike dina dianyi mu nsubu eu ne mu Yelushalema unakasungula munkatshi mua bisamba bia Bena Isalele tshiendelele; tshiena ngendakasha makasa a Bena Isalele ku buloba ebu bunakaha bankambua babo, biatumikilabo mei onso anakabambila ne mikenji yonso inakabelela mukana mua muntu wanyi Mose. Kadi bobo kabakangunvuila; Manashe wakabenzesha malu mabi akahita a bisamba biakabutula Yehowa ku mesu kua Bena Isalele bubi. Yehowa wakambila dî mukana mua bantu bandi baprofete ne, Bualu bua Manashe, mukelenge wa Yuda, wakuenza malu â onso a bundu, wakutamba Bena Amole kuenza malu mabi, wakutamba bonso bakadi ku mpala kuandi kuenza malu mabi, wakuenzesha Bena Yuda kabidi malu mabi ne mpingu yandi; nunku Yehowa, Nzambi wa Isalele, udi wamba ne, Nentume malu mabi kudi Bena Yelushalema ne Bena Yuda adi ahatshisha matshu a bantu bonso badi baunvua. Nengolole muonshi wa Samalea ha mutu ha Yelushalema, ne luidi lunakateka kudi nsubu wa Ahaba; nenkuhule Yelushalema bu mudi muntu ukuhula dilonga, udi udikuhula, udi udiandamuna. Nengumushe difuka dia buhianyi buanyi didi dishale, nendifile mu bianza bia bantu badi nʼadi lukuna; bobo nebalue bambudibue ne bahaudibue kudi bena lukuna bonso; bualu bua bobo bakuenza malu mabi ku mesu kuanyi, bakunfuisha tshiji ku difuku dinakafuma ne bankambua babo mu Ejipitu tô ne ku dituku edi. Manashe wakamatshisha mashi a bantu bakadi kabayi ne bilumbu hanshi, tô ne hakûsheye Yelushalema tente; wakenza malu au ha mutu ha malu mabi makuabo akenzeye ku mesu kua Yehowa. Bienzedi bia Manashe bikuabo ne malu onso akenzeye ne bubi buandi buakenzeye kabiena bifunda mu mukandu wa kulondolola kua malu a bakelenge ba Yuda, anyi? Manashe wakalala tulu ne bankambua bandi, bakamujika mu tshibunda tshiandi tshiakadi hehi ne nsubu wandi, mu tshibunda tshia Uza mene. Amona, muanʼandi, wakakokesha mu muaba wandi. Amona wakadi ne bidimu makumi abidi ne bibidi hakabangeye kukokesha; wakakokesha mu Yelushalema bidimu bibidi. Dina dia mamu wandi diakadi Meshulemete, muana mukashi wa Halusa wa mu Yoteba. Wakenza malu mabi ku mesu kua Yehowa bu muakenza Manashe, tatu wandi. Wakenda mu nshila yonso ya tatu wandi: wakakuatshila mpingu yakasonga tatu wandi mudimu, wakayitendelela. Wakabenga Yehowa, Nzambi wa bankambua bandi; kakenda mu nshila wa Yehowa nansha. Bantu bandi bakelela Amona tshifufu, bakashiha mukelenge mu nsubu wandi. Kadi bantu bonso ba mu buloba bakashiha bantu bonso bakelela mukelenge Amona tshifufu; bena buloba aba bakasungula Yoshiya, muana wandi, mukelenge mu muaba wandi. Bienzedi bia Amona bikuabo biakenzeye kabiena bifunda mu mukanda wa kulondolola kua malu a bakelenge ba Yuda, anyi? Bakamujika mu lukita luandi lua mu tshibunda tshia Uza; Yoshiya, muanʼandi, wakakokesha mu muaba wandi. Yoshiya wakadi ne bidimu muanda mukulu hakabangeye kukokesha; wakakokesha mu Yelushalema bidimu makumi asatu ne tshimue. Dina dia mamu wandi diakadi Yedida, muana wa Adaya wa mu Bosakata. Wakenza malu mimpe ku mesu kua Yehowa, wakenda mu nshila yonso ya Davidi, nkambua wandi; kakasesuka ku tshianza tshia balume anyi ku tshianza tshia bakashi. Mu tshidimu tshia dikumi ne muanda mukulu tshia bukelenge bua mukelenge Yoshiya, mukelenge wakatuma Shafana, muana wa Asalaya, muana wa Meshulama secrétaire mu nsubu wa Yehowa wamba ne, Ya biebe kudi Hilekiya, muakuidi munene, bua yeye a bale argent yakafilabo mu nsubu wa Yehowa, yakasangisha balami ba ku mbelu kudi bantu; bayifile mu bianza bia badi ku mutu kua mudimu wa mu nsubu wa Yehowa; bobo bayifile mu bianza bia bena mudimu badi balongolola miaba minya nguke mu nsubu wa Yehowa. Bayifile kudi bena mabaya ne bibaki ba nsubu ne bahandi ba mabue, ne bua kusumba nʼai mabaya ne mabue masonga a kulongolola nʼau nsubu. Kadi kababadi nʼabo argent yakafilabo mu bianza biabo, bualu bua bobo badi beyemenyibue. Hilekiya muakuidi munene wakambila Shafana secrétaire ne, Nakusangana mukanda wa mikenji ya Mose mu nsubu wa Yehowa. Hilekiya wakafila mukanda mu bianza bia Shafana; yeye wakaubala. Shafana secrétaire wakahingana kudi mukelenge, wakalua ne dî kudi mukelenge ne, Bantu bebe bakangata argent yakadi mu nsubu wa Yehowa, bakayifila mu bianza bia badi ku mutu kua bena mudimu mu nsubu wa Yehowa. Shafana secrétaire wakambila mukelenge ne, Hilekiya, muakuidi munene, wakumpesha mukanda. Shafana wakaubala ku mpala kua mukelenge. Hashishe, hakunvua mukelenge mei a mu mukandu wa mikenji, yeye wakadihanda bilulu biandi. Mukelenge wakambila Hilekiya, muakuidi munene, ne Ahikama, muana wa Shafana, ne Akabo, muana wa Mikaya, ne Shafana secrétaire ne Asaya, muena mudimu wa mukelenge, ne, Yai bienu, nutuebeshile ne Bena Yuda bonso Yehowa bua malu onso adi mafunda mu mukanda wakasanganabo; bualu bua Yehowa wakakuatshila tshiji tshikole bualu bua bankambua betu kabakatumikila mei adi mu mukanda eu bua kuenzabo malu onso adi mafunda bua bualu buetu. Nunku Hilekiya, muakuidi munene, ne Ahikama ne Akabo ne Shafana ne Asaya bakaya kudi Huleda, muprofete mukashi, wakadi mukashi wa Shaluma, muana wa Tikewa, muana wa Hâhasa, mulami wa bilulu bia mukelenge; (yeye wakadi mushikame mu luseke luibidi lua mu Yelushalema); bakasomba nʼandi. Yeye wakabambila ne, Yehowa, Nzambi wa Isalele, udi wamba ne, Nuambile muntu wakantuma kundi ne, Yehowa udi wamba ne, Monai, meme nentume malu makole ku muaba eu ne kudi bena buloba abu bu mudi mei onso adi mafunda mu mukanda eu wakabala mukelenge wa Yuda. Bualu bua bobo bakundekela, bakuoshila nzambi mikuabo musenga wa manananshi bua kunfuishabo tshiji ku bienzedi bia bianza biabo; nunku tshiji tshianyi netshikale, katshiena tshijima ku muaba eu nansha. Kadi nuambile mukelenge wa Yuda wakanutuma bua nuenu kuebesha Yehowa ne, Yehowa, Nzambi wa Isalele, udi wamba ne, Bualu bua mei awakunvua, wewe wakalekesha mutshima webe, wakadihuekesha ku mpala kua Yehowa; hawakunvua mei anakamba bua muaba eu ne bua bena muaba eu bua bobo balue bu bantu badi bedibue mulau ne badi babutudibue, wewe wakadihanda bilulu biebe, wakadila ku mpala kuanyi; nunku Yehowa udi wamba ne, Nakukunvuila. Nunku nenkusangishe ne bankambua bebe, wewe neubuele mu lukita luebe talalâ; mesu ebe kaena atangila malu mabi onso andi ngenzela muaba eu. Bakamanyisha mukelenge mei au. Mukelenge wakatuma dî bua bakulu bonso ba mu Yuda ne Yelushalema badisangishe kudiye. Mukelenge wakabuela mu nsubu wa Yehowa ne bantu bonso ba mu Yuda ne bonso ba mu Yelushalema bakadi nʼandi, ne bakuidi ne baprofete ne bantu bonso, ne bakese ne banene; yeye wakababadila mei onso a mu mukanda wa tshihungidi wakasanganabo mu nsubu wa Yehowa mu matshu abo. Mukelenge wakimana hehi ne dikunshi dia mu nsubu, wakahunga tshihungidi ku mpala kua Yehowa bua kuendeye ku mpala kua Yehowa ne bua kutumikila mikenji yandi ne mei andi ne mikandu yandi ne mutshima wandi wonso ne muoyo wandi wonso, ne hua kuenzeye mei onso a tshihungidi akadi mafunda mu mukanda eu; bantu bonso bakajadika tshihungidi. Mukelenge wakela dî kudi Hilekiya, muakuidi munene, ne kudi bakuidi ba mu mulongo muibidi ne kudi balami ba nsubu bua bobo bumushe malonga onso a Bâla ne a Bashela ne a kutendelela nʼau misumba yonso ya mu diulu mu nsubu wa Yehowa; wakayosha ku mpenge kua Yelushalema mu madimi a ku Kidelona; bakaya ne butue buabi ku Betele. Wakumusha bakuidi batendeledi ba mpingu, bakasungula bakelenge ba Yuda bua kuoshabo musenga wa manananshi mu bitendelelu bia ku mikuna bia mu misoko ya Yuda ne ku miaba yakanyungulula Yelushalema; wakumusha bakuidi bakadi boshela Bâla ne diba ne ngondo ne mitoto ne misumba yonso ya mu diulu manananshi. Wakumusha luhingu lua Ashela mu nsubu wa Yehowa, wakaya nʼalu ku mpenge ya Yelushalema ku kasulu ka Kidelona, wakaluosha ku kasulu ka Kidelona, wakalubutula bu luhuishi, wakela luhuishi ha nkita ya bantu ba tshianana. Wakashimbula nsubu ya bena Sodoma yakadi ha buihi ne nsubu wa Yehowa kuakadi bakashi bakuma bilulu bia Bashela. Wakumusha bakuidi bonso mu misoko yonso ya mu Yuda, wakanyanga bitendelelu biakadi bakuidi boshahu musenga wa manananshi ku Geba tô ne ku Bê-sheba; wakashimbula bitendelelu biakadi ku tshibuelelu tshia ku tshibi tshia Yoshua, mukelenge wa musoko, biakadi ku tshianza tshia bakashi tshia ku tshibi tshia musoko. Kadi bakuidi ba ku bitendelelu abi kabakalua ku tshioshelu tshia Yehowa tshia mu Yelushalema; bakadia bidia biakadi kabiyi ne luevene munkatshi mua bana habo. Wakanyanga Tofete wakadi mu tshibanda tshia bana ba Hinoma, bua muntu kahitshishi muanʼandi wa balume anyi muanʼandi wa bakashi mu kahia ka Moleke. Wakumusha tubalu tuakajidila bakelenge ba Yuda kudi diba, tuakadi ku tshibuelelu tshia nsubu wa Yehowa, hehi ne nsubu wa Natana-meleke, mulami wa nsubu, wakadi mu luhangu lua nsubu; wakosha makalu a diba mu kahia. Mukelenge wakashimbula bioshelu biakadi ku mutu kua nsubu wa Ahaza, biakenza bakelenge ba Yuda; ne bioshelu biakenza Manashe mu biendedi bibidi bia mu nsubu wa Yehowa; wakaubutula, wakela lufuishi luabi mu kasulu ka Kidelona. Mukelenge wakanyanga bitendelelu bia ku mikuna biakadi ku mpala kua Yelushalema, biakadi ku tshianza tshia balume tshia ku mukuna wa dibutuka wakashila mukelenge Solomo Bashatolete, nzambi wa bundu wa Bena Sidona, ne wa Kemoshe, nzambi wa bundu wa Bena Moaba, ne wa Milekoma, nzambi wa bundu wa Bena Amona. Wakambula makunshi ne wakashimbula mpingu bia Bashela; wakanyanga miaba ei ne mifuba ya bantu bafue. Wakashimbula kabidi tshioshelu tshiakadi ku Betele ne tshitendelelu tshiakenza Yalobama, muana wa Nebata, wakenzesha Bena Isalele malu mabi; wakosha tshitendelelu, wakatshibutula bu luhuishi, wakosha mpingu ya Bashela mu kahia. Hakatshunguluka Yoshiya, yeye wakatangila nkita yakadi ku mikuna; wakatuma bantu, bakangata mifuba yakadi mu nkita, bakayosha ha tshioshelu, wakatshinyanga bu mu dî dia Yehowa diakamba muntu wa Nzambi wakadi wamba ne, Malu â alualua. Hashishe wakebesha ne, Atshi ntshivulukidi tshia nganyi tshindi ntangila? Bena musoko bakamuambila ne, Alu ndukita lua muntu wa Nzambi wakafuma mu Yuda, wakamba malu awakenzela tshioshelu etshi tshia mu Betele. Yeye wakamba ne, Bamulekele; muntu kumushi mifuba yandi nansha. Nunku bakalekela mifuba yandi ne mifuba ya muprofete wakafuma ku Samalea. Yoshiya wakumusha nsubu yonso ya bitendelelu bia ku mikuna bia mu misoko ya Samalea biakenza bakelenge ba Isalele bia kufuisha nʼabi Yehowa tshiji, wakatuenzela bu muakenzeleye bintu bia mu Betele. Wakashiha bakuidi ba bitendelelu abi ha bioshelu biabo, wakoshahu mifuba ya bantu; nunku wakahingana ku Yelushalema. Mukelenge wakelela bantu bonso mukenji ne. Nudie bidia bia kuhita kua Yehowa, Nzambi wenu, bu mudibo bafunde mu mukanda eu wa tshihungidi. Bulelela, kabakudia bidia bia kuhita kua Yehowa nunku ku matuku a balumbuluishi bakalumbuluila Bena Isalele nansha mu matuku onso a bakelenge ba Isalele nansha a bakelenge ba Yuda; kadi bakadila Yehowa bidia bia kuhita kua Yehowa mu Yelushalema mu tshidimu tshia dikumi ne muanda mukulu tshia bukelenge bua Yoshiya. Yoshiya wakumusha kabidi bena mbuku ne bena muhongo ne mpingu yonso ne malu a bundu onso biakadi mu Yuda ne mu Yelushalema bua yeye ajadike mei onso a mikenji akadi mafunda mu mukanda wakasangana Hilekiya muakuidi mu nsubu wa Yehowa. Kakuakadi mukelenge mukuabo ku mpala kuandi wakakudimuna mutshima wandi ne muoyo wandi ne bukole buandi kudi Yehowa bua kutumikileye mikenji yonso ya Mose bu muakenzeye; kakuakadi mukelenge mukuabo wakalonda ku nyima kuandi bu yeye. Kadi Yehowa kakandamuka ku bukole bua tshiji tshiandi tshikole tshiakadiye nʼatshi kudi Bena Yuda, bualu bua malu mabi onso akenza Manashe akamufuisheye nʼau tshiji. Yehowa wakamba ne, Nengumushe Bena Yuda kabidi ku mesu kuanyi bu munakumusha Bena Isalele, nenyenge musoko eu wa Yelushalema mene unakusungula, ne nsubu unakuamba ne, Nenjadikemu dina dianyi. Bienzedi bikuabo bia Yoshiya ne malu onso akenzeye kabiena bifunda mu mukanda wa kulondolola kua malu a bakelenge ba Yuda, anyi? Mu matuku andi Palô-neko, mukelenge wa Ejipitu, wakaya ku musulu wa Pelata bua kuluanganeye ne mukelenge wa Ashû; mukelenge Yoshiya wakaluhuka bua kuluanganeye nʼandi, Palô-neko wakamushiha ku Megido hakamutangileye. Bantu bandi bakamuambila mu dikalu diandi mufue, bumuke ku Megido, bakalua nʼandi ku Yelushalema, bakamujika mu lukita luandi. Bena buloba bakangata Yehoaza, muana wa Yoshiya, bakamuela manyi ha mutu, bakamusungula mukelenge mu muaba wa tatu wandi. Yehoaza wakadi ne bidimu makumi abidi ne bisatu hakabangeye kukokesha; wakakokesha mu Yelushalema ngondo isatu. Dina dia mamu wandi diakadi Hamutula, muana mukashi wa Yelemiya wa mu Libena. Wakenza malu mabi ku mesu kua Yehowa bu muakenza bankambua bandi. Pâlo-neko wakamuela mu lukanu mu Libela mu buloba bua Hamata bua yeye kakokeshi mu Yelushalema; yeye wakalambuisha bena buloba milambu ya ntalanta ya argent lukama ne ntalanta wa or umue. Palô-neko wakasungula Eleyakima, muana wa Yoshiya, mukelenge mu muaba wa Yoshiya, tatu wandi; wakamuidika dina dikuabo ne, Yehoyakima; yeye wakumusha Yehoaza, wakamutuma mu Ejipitu, wakafuilamu. Yehoyakima wakafila argent ne or kudi Palô; kadi wakalambuisha bena buloba bu muakamba Palô; wakalambuisha muntu ne muntu bu mu bintu biakadiye nʼabi, bua kulambuleye Palô-neko. Yehoyakima wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu dikumi ne tshimue; dina dia mamu wandi diakadi Zebida, muana mukashi wa Pedaya wa mu Luma. Wakenza malu mabi ku mesu kua Yehowa bu muakenza bankambua bandi mu malu abo onso. Mu matuku andi Nebukadenesâ, mukelenge wa Babulona, wakalua, ne Yehoyakima wakalua muntu wandi bidimu bisatu, hashishe wakamutombokela. Yehowa wakamutumina bisumbu bia Bena Kasada ne Bena Sulia ne Bena Moaba ne Bena Amona bua kuluanganabo ne Bena Yuda ne bua kubabutula bu muakadi dî dia Yehowa diakabambileye mukana mua bantu bandi baprofete. Bualu ebu buakalua kudi Bena Yuda bu mukenji wa Yehowa bua kubumusha ku mesu kuandi bua malu mabi onso a Manashe akenzeye; ne bua mashi a bantu bakadi kabayi ne bilumbu akamatshisheye hanshi; bualu bua yeye wakûsha Yelushalema tente ne mashi a bantu bakadi kabayi ne bilumbu; nunku Yehowa wakabenga bua kubabuikidila mibi yabo. Bienzedi bikuabo bia Yehoyakima ne malu onso akenzeye kabiena bifunda mu mukanda wa kulondolola kua malu a bakelenge ba Yuda, anyi? Yehoyakima wakalala tulu ne bankambua bandi; Yehoyakina, muanʼandi, wakakokesha mu muaba wandi. Mukelenge wa Ejipitu kakumuka mu buloba buandi kabidi, bualu bua mukelenge wa Babulona wakanyenga makelenge onso akadi malamate mukelenge wa Ejipitu ku kasulu ka Ejipitu tô ne ku musulu wa Pelata. Yehoyakina wakadi ne bidimu dikumi ne muanda mukulu hakabangeye kukokesha; wakakokesha mu Yelushalema ngondo isatu; dina dia mamu wandi diakadi Nehusheta, muana mukashi wa Elenatana wa mu Yelushalema. Wakenza malu mabi ku mesu kua Yehowa, bu muakenza tatu wandi mu malu andi onso. Mu matuku au bantu ba Nebukadenesâ, mukelenge wa Babulona, bakalua ku Yelushalema, bakatshintshimika musoko. Nebukadenesâ, mukelenge wa Babulona, wakalua ku musoko hakadi bantu bandi batshintshimika musoko; ne Yehoyakina, mukelenge wa Yuda, ne mamu wandi ne bantu bandi ne tuhita tuandi ne tupitene tuandi bakaluhuka, bakaya kudi mukelenge wa Babulona. Mukelenge wa Babulona wakamukuata mu tshidimu tshia muanda mukulu tshia bukelenge buandi. Wakatuala bintu bimpe bionso bia mu bibutshilu bia mu nsubu wa Yehowa ne bia mu nsubu wa mukelenge; wakakosa bintu bia or bionso bituha bituha biakenza Solomo, mukelenge wa Isalele, mu ntempelo wa Yehowa, bu muakamba Yehowa. Wakaya ne Bena Yelushalema bonso ne baminyampala bonso ne bena bukitu banso ne bena mudimu bonso ne batudi ba biamu bu binunu dikumi bia bantu; anu bantu bakatamba buhele bakashala mu buloba. Bakaya ne Yehoyakina ku Babulona; ne mamu wa mukelenge ne bakashi ba mukelenge ne tupitene tuandi ne bantu bandi banene bakaya ne buonso buabo ba mu Yelushalema ku Babulona mu buhika. Mukelenge wa Babulona wakaya ne bena bukitu bonso bu binunu muanda mutekete ku Babulona mu buhika, ne bena mudimu ne hatudi ba biamu tshinunu ne bantu bonso bakadi ne bukole bua kuluangana mata. Mukelenge wa Babulona wakasungula Matanaya, muanʼabo ne tatu wa Yehoyakina, mukelenge mu muaba wandi, wakamuidika dina ne, Sedekiya. Sedekiya wakadi ne bidimu makumi abidi ne tshimue hakabangeye kukokesha; wakakokesha mu Yelushalema bidimu dikumi ne tshimue; dina dia mamu wandi diakadi Hamutala, muana mukashi wa Yelemiya wa mu Libena. Wakenza malu mabi ku mesu kua Yehowa bu muakenza Yehoyakima mu malu andi onso. Tshiji tshia Yehowa tshiakakumbana kudi Bena Yelushalema ne kudi Bena Yuda tô ne hakumusheye bonso ku mesu kuandi. Sedekiya wakatombokela mukelenge wa Babulona. Mu tshidimu tshia tshitema tshia bukokeshi buandi ne mu ngondo wa dikumi ne difuku dia dikumi dia mu ngondo eu, Nebuka-denesâ, mukelenge wa Babulona, wakalua ne masalayi andi onso ku Yelushalema, bakatshintshimika musoko; bakanyunguluka musoko ne mishiki ya buloba. Bakatshintshimika musoko tô ne ku tshidimu tshia dikumi ne tshimue tshia bukelenge hua Sedekiya. Mu difuku dia tshitema dia ngondo muinai tshiole tshiakatamba bukole mu musoko; nunku bena buloba kabakadi ne bia kudia. Hashishe bakashimbula tshituha tshia lumbu lua musoko, nunku bena nvita bonso bakanyema butuku mu nshila wa hankatshi ha ngumbu ibidi yakanyunguluka ku tshibunda tshia mukelenge; Bena Kasada bakadi banyunguluka musoko ku nseke yonso. Bakanyema mu nshila wa ku Alabâ. Kadi masalayi a Bena Kasada akihata mukelenge, akamuheta mu mpata ya ku Yeleko; masalayi andi onso akatangadika kudiye. Hashishe bakakuata mukelenge, bakaya nʼandi kudi mukelenge wa Babulona ku Libela; yeye wakamulumbuluishaku. Bakashiha bana balume ba Sedekiya ku mesu kuandi; hashishe bakashiha mesu a Sedekiya, bakamubuesha mu lukanu, bakaya nʼandi ku Babulona. Mu tshidimu tshia dikumi ne tshitema tshia bukelenge bua Nebukadenesâ, mukelenge wa Babulona, mu dituku dia muanda mutekete dia ngondo muitanu, Nebuzaladana, kapitene ka masalayi, muntu wa mukelenge wa Babulona, wakalua ku Yelushalema. Wakosha nsubu wa Yehowa ne nsubu wa mukelenge ne nsubu minene yonso ya mu Yelushalema mu kahia. Masalayi onso a Bena Kasada akadi ne kapitene ka masalayi akashimbula lumbu luakadi lunyunguluka Yelushalema. Bantu bakashiyabo mu musoko diambedi ne bakadi banyema ne bakadi baya kudi mukelenge wa Babulona, Nebuzaladana, kapitene ka masalayi, wakaya ne buonso buabo mu buhika. Kadi kapitene ka masalayi kakashiya bantu bakatamba buhele bua kulamabo mitshi ya tumuma tukese ne bua kudimabo mu buloba. Bena Kasada bakakosa makunshi a tshiamu tshia mitaku bituha bituha akadi mu nsubu wa Yehowa ne bitekelu bia tshiowelu tshia tshiamu tshia mitaku tshinene biakadi mu nsubu wa Yehowa, bakaya ne tshiamu tshia mitaku tshiabi ku Babulona. Bakaya kabidi ne ngesu ne bikasu ne bijimishi bia minda ne nkutu ne bintu bionso bia tshiamu tshia mitaku biakenzabo nʼabi mudimu. Kapitene ka masalayi kakaya ne malonga a kuboya nʼau kahia ne bihanza bia or ne bintu bionso bia argent. Kabakamanya mua kuidikisha bujitu bua makunshi abidi ne tshiowelu tshinene ne bitekelu biatshi ne malonga onso a tshiamu tshia mitaku biakenza Solomo mu nsubu wa Yehowa. Bule bua dikunshi dimue buakadi coudées dikumi ne muanda mukulu; tshibuikilu tshia tshiamu tshia mitaku tshiakadi ha mutu hadi; bule bua tshibuikilu tshia tshiamu tshia mitaku buakadi coudées isatu, tshiakadi tshilengeshibue ne mamuma a grenade ku nseke yonso; dikunshi dibidi diakadi muomumue. Kapitene ka masalayi kakakuata Selaya muakuidi munene ne Sefanya muakuidi muibidi ne balami basatu ba ku mbelu kua nsubu; wakumuka ku musoko, wakaya ne muntu wakadi ha mutu ha bena nvita, ne bantu batanu bakadi hamonangana ne mukelenge mpala ha mpala, ne secrétaire wa kapitene ka misumba kakuabo kakadi kasangisha bantu ba mu buloba, ne bena buloba makumi asambombo bakadibo basangana mu musoko. Nebuzaladana, kapitene ka masalayi, wakabakuata, wakaya nʼabo kudi mukelenge wa Babulona ku Libela. Mukelenge wa Babulona wakabashiha mu Libela mu buloba bua Hamata. Nunku bakumusha Bena Yuda mu buloba buabo, bakaya nʼabo mu buhika. Nebukadenesâ, mukelenge wa Babulona, wakasungula Gedaliya, muana wa Ahikama, muana wa Shafana, mukelenge, wakamuteka ku mutu kua Bena Yuda bakashiyeye mu buloba. Hakunvua tupitene tuonso ne masalayi atu onso lumu ne, Mukelenge wa Babulona wakasungula Gedaliya mukelenge wa buloba, tuakalua ne bantu batu kudi Gedaliya ku Misepa, mena atu ne, Yishemaele, muana wa Netanya, ne Yohanana, muana wa Kalea, ne Selaya, muana wa Tanehumeta, Muena Netofa, ne Yâzanya, muana wa Muena Mâka. Gedaliya wakaditshiha kudibo ne kudi bantu babo ne, Kanutshinyi bantu ba Bena Kasada; nushikame mu buloba, nukuatshile mukelenge wa Babulona mudimu, hashishe malu enu neikale makane. Kadi mu ngondo wa muanda mutekete Yishemaele, muana wa Netanya, muana wa Elishama wa mu tshiota tshia mukelenge, wakalua ne bantu dikumi bakadi nʼandi, bakakuma Gedaliya, bakamushiha ne Bena Yuda ne Bena Kasada bakadi nʼandi ku Misepa. Bantu bonso, ne bakese ne banene, ne tupitene tua masalayi bakajuka, bakaya mu Ejipitu, bualu bua bakatamba kutshina Bena Kasada. Mu tshidimu tshia makumi asatu ne muanda mutekete tshia buhika bua Yehoyakina, mukelenge wa Yuda, mu dituku dia makumi abidi ne muanda mutekete dia ngondo wa dikumi ne ibidi, mu tshidimu tshiakabanga Ewile-melodaka kukokesha mu Babulona, yeye wakabisha mutu wa Yehoyakina, mukelenge wa Yuda, mu nsubu wa lukanu; wakamuambila mei mimpe, wakamushikika mu nkuasa wa butumbi ku mutu kua bakelenge bakuabo bakadiye nʼabo mu Babulona. Wakamuvula bilulu biakadiye muluate mu nsubu wa lukanu. Yehoyakina wakadia ku mesu kuandi matuku onso a muoyo wandi; mukelenge wakamuha bintu biandi bia buatshia-buatshia matuku onso a muoyo wandi. Adama, Shete, Enosha, Kenana, Mahalalele, Yelede, Hanoka, Metushela, Lameke, Noa, Sheme, Hama, Yefeta. Bana balume ba Yefeta: Gomê ne Magoga ne Madai ne Yawana ne Tubala ne Mesheke ne Tilasa. Bana balume ba Gomê: Ashakenaza ne Difata ne Togâma. Bana balume ba Yawana: Elisha ne Tâshighi ne Bena Kiti ne Lodanima. Bana balume ba Hama: Kusha ne Miselayima ne Puta ne Kanâna. Bana balume ba Kusha: Seba ne Hawila ne Sabeta ne Lâma ne Sabeteka. Bana balume ba Lâma: Sheba ne Dedana. Kusha wakalela Nimeloda, wakabanga kuikala muntu mukole mu buloba. Miselayima wakalela Ludima ne Anamima ne Lehabima ne Nafetuhima ne Patalusima ne Kasaluhima (kuakafuma Bena Peleshete) ne Kafetolima. Kanâna wakalela Sidona, muanʼa bute wandi, ne Hete ne Bena Yebuse ne Bena Amole ne Bena Gîgashi, ne Bena Hiwi ne Bena Âka ne Bena Sina ne Bena Âwada ne Bena Semâ ne Bena Hamata. Bana balume ba Sheme: Elama ne Ashû ne Apakashada ne Luda ne Alama ne Uza ne Hula ne Getê ne Mesheke. Apakashada wakalela Shela; ne Shela wakalela Ebê. Ebe wakalela bana balume babidi; dina dia mukuabo Pelege; mu matuku andi bakabanyangana buloba; dina dia muanʼabo mulume diakadi Yoketana. Yoketana wakalela Alamodada ne Shelefe ne Hasâ-maweta ne Yela ne Hadolama ne Uzala ne Dikela ne Ebala ne Abimaele ne Sheba ne Ofî ne Hawila ne Yobaba. Aba bonso mbana balume ba Yoketana. Sheme, Apakashada, Shela, Ebê, Pelege, Leu, Seluga, Nahô, Tela, Abalama (udi Abalahama mene). Bana balume ba Abalahama: Isaka ne Yishemaele. Etu ntukanunuina tuabo: muanʼa bute wa Yishemaele wakadi Nebayota; hashishe Kedâ ne Adabele ne Mibesama, Mishema ne Duma, Masa, Hadada ne Tema, Yetû, Nafisha ne Kedema. Aba mbana balume ba Yishemaele. Bana balume ba Ketula, mukashi muhika mubakibue kudi Abalahama: yeye wakalela Zimelana ne Yokeshana ne Medana ne Midiyana ne Ishebaka ne Shua. Bana balume ba Yokeshana: Sheba ne Dedana. Bana balume ba Midiyana: Efa ne Efê ne Hanoka ne Abida ne Eleda. Aba bonso bakadi bana balume ba Ketula. Abalahama wakalela Isaka. Bana balume ba Isaka: Esau ne Isalele. Bana balume ba Esau: Elifaza ne Luele ne Yeusha ne Yalama, ne Kola. Bana balume ba Elifaza: Temana ne Omâ, Sefi ne Gatama, Kenaza ne Timena ne Amaleka. Bana balume ba Luele: Nahata, Zela, Shama ne Miza. Bana balume ba Sei: Lotana ne Shobala ne Sibiona ne Ana ne Dishona ne Ezê ne Dishana. Bana balume ba Lotana: Holi ne Homama; Timena wakadi muanʼabo mukashi ne Lotana. Bana balume ba Shobala: Abana ne Manahata ne Ebala ne Shefi ne Onama. Bana balume ba Sibiona: Aya ne Ana. Bana balume ba Ana: Dishona. Bana balume ba Dishona: Hamalana ne Eshebana ne Yitelana ne Kelana. Bana balume ba Ezê: Bilehana ne Zawana ne Yakana. Bana balume ba Dishana: Usa ne Alana. Aba mbakelenge bakakokesha mu buloba bua Edome diambedi mukelenge kayi muanze kukokesha Bena Isalele: Bela, muana mulume wa Beô; dina dia musoko wandi diakadi Dinehaba. Bela wakafua ne Yobaba, muana mulume wa Zela wa mu Bosela, wakakokesha mu muaba wandi. Yobaba wakafua ne Hushama, wa mu buloba bua Bena Temana, wakakokesha mu muaba wandi. Hushama wakafua ne Hadada, muana mulume wa Bedada, wakashiha Midiyana mu buloba bua Moaba, wakakokesha mu muaba wandi; dina dia musoko wandi diakadi Awita. Hadada wakafua ne Samala wa mu Maseleka wakakokesha mu muaba wandi. Samala wakafua ne Shaula wa mu Lehobota hehi ne musulu wa Pelata wakakokesha mu muaba wandi. Shaula wakafua ne Bâla-hanana, muana mulume wa Akabo, wakakokesha mu muaba wandi. Bâla-hanana wakafua ne Hadada wakakokesha mu muaba wandi; dina dia musoko wandi diakadi Pai; dina dia mukashi wandi diakadi Mehetabela, muana wa bakashi wa Mateledi, muana wa bakashi wa Me-zahaba. Hadada wakafua biandi. Tulala tua mu Edome tuakadi nunku: kalala Timena, kalala Alia, kalala Yetete, kalala Oholibama, kalala Ela, kalala Pinona, kalala Kenaza, kalala Temana, kalala Mi-bezâ, kalala Magadiele, kalala Hama. Etu tuakadi tulala tua mu Edome. Aba mbana balume ba Isalele: Lubena, Shimeona, Lewi, ne Yuda, Yisakâ ne Zebuluna, Dana, Yosefe ne Benyamina, Nafatale, Gada ne Ashê. Bana ba balume ba Yuda: Ele ne Ônana ne Shela: muana mukashi wa Shua, Muena Kanâna, wakamulelela aba basatu. Ele, muanʼa bute wa Yuda, wakadi muntu mubi ku mesu kua Yehowa; yeye wakamushiha. Tamâ, mukashi wa muanʼandi, wakamulelela Pelese ne Zela. Bana ba balume ba Yuda bonso bakadi batanu. Bana ba balume ba Pelese: Heselona ne Hamula. Bana ba balume ba Zela: Zimeli ne Etana ne Hemana ne Kalakola ne Dala; buonso buabo batanu. Bana ba balume ba Kâmi; Akâ, mutatshi wa Isalele, wakenza bualu bubi ne tshintu tshia tshijila. Bana ba balume ba Etana: Azâya. Bana ba balume ba Heselona bakaleleye bakadi Yelamele ne Lama ne Kelubai. Lama wakalela Aminadaba ne Aminadaba wakalela Nashona, muntu munene wa munkatshi mua Bena Yuda; Nashona wakalela Salama ne Salama wakalela Boaza; Boaza wakalela Obeda, ne Obeda wakalela Yishai; Yishai wakalela muanʼa bute wandi Eliaba ne Abinadaba muana muibidi ne Shimea muana muisatu, Netanele muana muinai ne Ladai muana muitanu, Osema muana muisambombo ne Davidi muana wa muanda mutekete; bana babo ba bakashi bakadi Seluya ne Abigayila. Bana ba balume ba Seluya bakadi Abishai ne Yoaba ne Asahele, bana basatu. Abigayila wakalela Amasa; tatu wa Amasa wakadi Yete, Muena Yishemaele. Kaleba, muana wa balume wa Heselona, wakalela bana ne mukashi wandi Azuba ne mukashi wandi Yeliota; bana bandi ba balume bakadi Yeshê ne Shobaba ne Âdona. Azuba wakafua, ne Kaleba wakabaka Efelata, wakamulelela Hû. Hû wakalela Uli ne Uli wakalela Bezalele. Hashishe Heselona wakaya kudi muana mukashi wa Maki, tatu wa Gilada, wakamuangata bu mukashi wandi hakadiye ne bidimu makumi asambombo; yeye wakamulelela Seguba. Seguba wakalela Yaî, wakadi ne misoko makumi abidi ne isatu mu buloba bua Gilada. Geshû ne Alama bakanyenga misoko ya bena Yai ne Kenata ne misoko yai yonso bu misoko makumi asambombo. Aba bonso bakadi bana ba balume ba Maki, tatu wa Gilada. Hakafua Heselona mu Kaleba-efalata, hashishe Abiya, mukashi wa Heselona, wakamulelela Ashehû, tatu wa Tekoa. Bana ba balume ba Yelamele, muanʼa bute wa Heselona, bakadi Lama, muanʼa bute wandi, ne Buna ne Olena ne Ozema ne Ahiya. Yelamele wakadi ne mukashi mukuabo, dina diandi Atala; yeye wakadi mamu wa Onama. Bana ba balume ba Lama, muanʼa bute wa Yelamele, bakadi Mâsa ne Yamina ne Ekê. Bana ba balume ba Onama bakadi Shamai ne Yada. Bana ba balume ba Shamai: Nadaba ne Abishû. Dina dia mukashi wa Abishû diakadi Abihayila; yeye wakamulelela Abana ne Moliya. Bana ba balume ba Nadaba: Selede ne Apaima; kadi Selede wakafua kayi ne bana ba balume. Bana ba balume ba Apaima: Yishi. Bana ba balume ba Yishi: Sheshana. Bana ba balume ba Sheshana: Ahalai. Bana ba balume ba Yada, muanʼabo wa balume ne Shamai: Yete ne Yonatana; Yete wakafua kayi ne bana ba balume. Bana ba balume ba Yonatana: Pelete ne Zaza. Aba mbana ba balume ba Yelamele. Sheshana kakadi ne bana ba balume, anu bana ba bakashi. Sheshana wakadi ne muena mudimu, Muena Ejipitu, dina diandi Yaha. Sheshana wakafila muanʼandi mukashi, kudi Yaha, muena mudimu wandi, bu mukashi wandi; yeye wakamulelela Atai. Atai wakalela Natana ne Natana wakalela Zabada, Zabada wakalela Efelala, ne Efelala wakalela Obeda, ne Obeda wakalela Yehu, ne Yehu wakalela Azâya, ne Azâya wakalela Helese, ne Helese wakalela Eleasa, ne Eleasa wakalela Sisemai, ne Sisemai wakalela Shaluma, ne Shaluma wakalela Yakameya, ne Yakameya wakalela Elishama. Bana ba, balume ba Kaleba, muanʼabo wa balume ne Yelamele, bakadi Mesha, muanʼa bute wandi tatu wa Zifa; ne bana ba balume ba Malesha: Hebelone. Bana ba balume ba Hebelone: Kola ne Tapua ne Lekeme ne Shema. Shema wakalela Lahama, tatu wa Yôkeama; Lekeme wakalela Shamai. Muana wa balume wa Shamai wakadi Maona; Maona wakadi tatu wa Bete-sû. Efa, mukashi muhika mubakibue kudi Kaleba, wakamulelela Halana ne Mosa ne Gazeza; Halana wakalela Gazeza. Bana ba balume ba Yadai: Legeme ne Yotana ne Geshana ne Pelete ne Efa ne Shâfa. Mâka, munga mukashi muhika mubakibue kudi Kaleba, wakamulelela Shebê ne Tîhana. Yeye wakamulelela kabidi Shâfa, tatu wa Mademana, ne Shewa tatu wa Makebena ne tatu wa Gibea; muana wa bakashi wa Kaleba wakadi Akasa. Aba mbana balume ba Kaleba, Bana ba balume ba Hû, muanʼa bute wa Efelata: Shobala, tatu wa Kîyata-yalima; Salama, tatu wa Beteleheme, Halefe, tatu wa Bete-gadê. Shobala, tatu wa Kîyata-yalima, wakadi ne bana ba balume kabidi, Haloe, tshituha tshia Bena Menuhota. Meku a Kîyata-yalima akadi Bena Yitela ne Bena Puta ne Bena Shumati ne Bena Mishete; Bena Solea ne Bena Eshetaola bakafuma kudibo. Bana ba balume ba Salama: Beteleheme ne Bena Netofa, Atalota-bete-yoaba ne tshituha tshia Bena Manahata, Bena Sola mene. Au mmeku a bafundi akashikama mu Yabesa: Bena Tila ne Bena Shimeata ne Bena Sukata. Aba mBena Kene bakafuma kudi Hamata, tatu wa ba mu nsubu wa Lekaba. Bana ba balume ba Davidi bakamulelelabo mu Hebelone: Amenona, muanʼa bute, muana wa Ahinoama, Muena Yizelele; muana muibidi Danyele, muana wa Abigayila, Muena Kâmele; muana muisatu Abashaloma, muana wa Mâka, muana wa bakashi wa Talemai, mukelenge wa mu Geshû; muana muinai Adoniya, muana wa Hagita; muana muitanu Shefatiya, muana wa Abitala; muana muisambombo Itelema, muana wa mukashi wandi Egela: hakamulelela bana basambombo mu Hebelone kuakakokesheye bidimu muanda mutekete ne ngondo isambombo. Yeye wakakokesha mu Yelushalema bidimu makumi asatu ne bisatu; bakamulelela mu Yelushalema: Shimea ne Shobaba ne Natana ne Solomo, bana banai kudi Bata-shua, muana wa bakashi wa Amiele, ne Ibeha ne Elishama ne Elifelete ne Noga ne Nefege ne Yafia ne Elishama ne Eliada ne Elifelete, buonso buabo tshitema. Aba bonso mbana balume ba Davidi ha mutu ha bana balume ba bakashi bahika babakibue kudiye; Tamâ wakadi muanʼabo mukashi. Muana wa balume wa Solomo wakadi Lehabama, Abiya wakadi muanʼandi, Asa wakadi muanʼandi, ne Yehoshafata wakadi muanʼandi, Yolama wakadi muanʼandi, Ahazaya wakadi muanʼandi, ne Yoasha wakadi muanʼandi, Amasaya wakadi muanʼandi, ne Azaya wakadi muanʼandi, ne Yotama wakadi muanʼandi, Ahaza wakadi muanʼandi, Hezikiya wakadi muanʼandi, ne Manashe wakadi muanʼandi, Amona wakadi muanʼandi, ne Yoshiya wakadi muanʼandi. Bana ba balume ba Yoshiya: Yohanana muanʼa bute wandi, Yehoyakima muana muibidi, Sedekiya muana muisatu ne Shaluma muana muinai. Bana ba balume ba Yehoyakima: Yekoniya ne Sedekiya. Bana ba balume ba Yekoliya, muena lukanu: Shalatiele ne Malekilama ne Pedaya ne Shenasâ ne Yekamiya, Hoshama ne Nedabiya. Bana ba balume ba Pedaya: Zelubabela ne Shimei. Bana ba balume ba Zelubabela: Meshulama ne Hananiya; (Shelomita wakadi muanʼabo wa bakashi), Hashuba ne Ohela ne Belekiya ne Hasadeya ne Yushaba-heseda, buonso buabo batanu. Bana ba balume ba Hananiya: Pelatiya ne Yeshaya; muanʼandi wa balume Lefaya, muanʼandi wa balume Anana, muanʼandi wa balume Obadiya, muanʼandi wa balume Shekaniya. Bana ba balume ba Shekaniya: Shemaya. Bana ba balume ba Shemaya: Hatusha ne Igala ne Baliya ne Nealiya ne Shafata, basambombo bonso. Bana ba balume ba Nealiya: Eleyehoenai ne Hizikiya ne Azalikama, basatu bonso. Bana ba balume ba Eleyehoenai: Hodawiya ne Eleyashiba ne Pelaya ne Akuba ne Yohanana ne Delaya ne Anani, muanda mutekete bonso. Bana ba balume ba Yuda: Pelese, Heselona ne Kâmi ne Hula ne Shobala. Leaya, muana wa Shobala, wakalela Yahata; Yahata wakalela Ahumai ne Lahada. Au mmeku a Bena Solea. Aba mbana ba tatu wa Etama: Yizelele ne Yishema ne Yidebasha; dina dia muanʼabo wa bakashi diakadi Haselele-poni; Penuele, tatu wa Gedô, ne Ezê, tatu wa Husha. Aba mbana ba balume ba Hû, muanʼa bute wa Efelata, tatu wa Beteleheme. Ashehû, tatu wa Tekoa, wakadi ne bakashi babidi, Hela ne Nâla. Nâla wakamulelela Ahuzama ne Hefê ne Temeni ne Hâhashatali. Aba bakadi bana ba balume ba Nâla. Bana ba balume ba Hela bakadi Selete, Yisheâ ne Etenana. Hakosa wakalela Anuba ne Sobeba ne ba mu meku a Ahahele, muana wa balume wa Haluma. Yabesa wakatamba bana babo mu butumbi; mamu wandi wakamuidika dina ne, Yabesa, wamba ne, Nakamulela ne kanyinganyinga. Yabesa wakatendelela Nzambi wa Isalele wamba ne, Nakadi kusua bua wewe kunsankisha ne kulehesha mikalu yanyi ne bua tshianza tshiebe tshikale nʼanyi, bua wewe kundama bua tshibuedi mu malu mabi ne bua meme tshikadi ne kanyinganyinga! Nzambi wakamuha malu akalombeye. Keluba, muanʼabo wa balume ne Shuha, wakalela Mehî wakadi tatu wa Eshetona. Eshetona wakalela Bete-lafa ne Pasea ne Tehina, tatu wa Inahasha. Aba mbantu ba Leka. Bana ba balume ba Kenaza; Oteniele ne Selaya. Bana ba balume ba Oteniele: Hatata. Meonotai wakalela Ofela; ne Selaya wakalela; Yoaba, tatu wa Bena Ge-halashima; bualu bua bobo bakadi bansenda. Bana ba balume ba Kaleba, muana wa Yefune: Ilu, Ela ne Nâma; bana ba balume ba Ela: Kenaza. Bana ba balume ba Yehalelele: Zifa ne Zifaha, Tileya ne Asalele. Bana ba balume ba Ezela: Yete ne Melede ne Efê ne Yalona; mukashi wandi wakamulelela kabidi Mîyama ne Shamai ne Yisheba, tatu wa Eshetemoa. Mukashi wandi, Muena Yuda, wakalela Yelede, tatu wa Gedô, ne Hebê, tatu wa Soko, ne Yekutiele, tatu wa Zanoa. Aba mbana ba balume ba Bitiya, muana wa bakashi wa Palo, wakabakibua kudi Melede. Bana ba balume ba mukashi wa Hodiya, muanʼabo wa bakashi ne Nahama, bakadi batatu ba Keila, Muena Gâma, ne Eshetemoa, Muena Mâka. Bana ba balume ba Shimona: Amenona ne Lina, Bene-hanana ne Tilona. Bana ba balume ba Ishi: Zoheta ne Bene-zoheta. Bana ba balume ba Shela, muana wa Yuda: Ele, tatu wa Leka, ne Lâda, tatu wa Malesha ne ba mu nsubu wa bakumi ba bilulu bia lin, ba mu nsubu wa Ashabea; Yolama ne Bena Kozeba ne Yoasha ne Salafa wakakokesha mu buloba bua Moaba, ne Yashubi-lehema. Eku nkulondolola kua kale kale. Aba mbafumbi ba bivuadi ne bakadi bashikama mu Netaima ne Gedela; bakashikamaku ne mukelenge bua mudimu wandi. Bana ba balume ba Shimeona: Nemuele ne Yamina, Yaliba, Zela, Shaula; Shaluma muanʼandi, Mibesama muanʼandi, Mishema muanʼandi. Bana ba balume ba Mishema: Hamuele muanʼandi, Zakû muanʼandi, Shimei muanʼandi. Shimei wakadi ne bana ba balume dikumi ne basambombo ne bana ba bakashi basambombo; kadi bana babo kabakadi ne bana ba bungi, ne bobo bonso kabakavulangana ba bungi bu muakenza bana ba Yuda. Bobo bakashikama mu Bê-sheba ne mu Molada ne mu Hasâ-shuala ne mu Bileha ne mu Eseme ne mu Tolada ne mu Betuele ne Hôma ne mu Sikelaga, ne mu Bete-makabota ne mu Hasâsu-sima ne mu Bete-bili ne mu Shâla-yima. Ebi biakadi bimenga biabo tô ne ku bukokeshi bua Davidi. Misoko yabo yakadi Etama ne Ayina, Limona ne Tokene ne Ashana, misoko itanu; ne misoko yabo yonso yakadi ha buihi ne bimenga biobimue tô ne ku Bâla. Ei yakadi miaba yabo yakashikamabo, ne bobo bakafunda kulondolola kuabo. Meshobaba ne Yameleke ne Yoasha, muana wa balume wa Amasaya, ne Yoele ne Yehu, muana wa balume wa Yoshibeya, muana wa balume wa Selaya, muana wa balume wa Asiele, ne Eleyehoenai ne Yâkoba ne Yeshohaya ne Asaya ne Adiele ne Yesimiele ne Benaya ne Ziza, muana wa balume wa Shifi, muana wa balume wa Alono, muana wa balume wa Yedaya, muana wa balume wa Shimeli, muana wa balume wa Shemaya; bantu aba batuakutela menʼabo nunku bakadi bakelenge ba mu meku abo ne ba mu nsubu yabo bakatamba kuyisangana. Bakamuangalaka tô ne ku tshibuelelu tshia Gedô ku luseke lua ku esete kua tshibanda bua kukebabo mashinde a kudisha nʼau bimuna biabo. Bakasangana mashinde a bungi ne mimpe, buloba abu buakadi bunene, buakadi kabuyi ne diyoyo, buakadi talalâ; bantu bakadi bashikamaku diambedi bakadi bantu ba Hama. Badi ne mena abo mafunda nunku bakalua mu matuku a Hezikiya, mukelenge wa Yuda, bakashiha ntenta yabo ne Bena Meunima bakadi bashikamaku, bakababutula tô ne ku dituku edi, bakashikama mu miaba yabo; bualu bua bakasanganamu mashinde a kudisha nʼau bimuna biabo. Bakuabo babo, bana ba balume ba Shimeona mene bu nkama itanu, bakaya ku mukuna wa Seî, bakadi ne Pelatiya ne Nealiya ne Lefaya ne Uziele, bana ba balume ba Ishi, bu tupitene tuabo. Bakashiha difuka dia Bena Amaleka bakahanduka diambedi, badi bashikamaku tô ne ku dituku edi. Bana ba balume ba Lubena, muanʼa bute wa Isalele (yeye wakadi muanʼa bute; kadi bualu bua yeye wakanyanga bulalu bua tatu wandi, bakaha bana ba balume ba Yosefe, muana wa Isalele, bintu biandi bia buanʼa bute; kulondolola kuandi kakuena bu kua buanʼa bute. Bualu bua Yuda wakatamba bana babo bukole ne mukelenge wakafuma kudiye; kadi bintu bia buanʼa bute biakadi bia Yosefe). Bana ba balume ba Lubena, muanʼa bute wa Isalele: Hanoka ne Palu, Heselona ne Kâmi. Bana ba balume ba Yoele: Shemaya muanʼandi, ne Gogo muanʼandi, ne Shimei muanʼandi, Mika muanʼandi, ne Leaya muanʼandi, ne Bâla muanʼandi, ne Bela muanʼandi; Tigelata-pilenesê wakaya nʼandi mu buhika; yeye wakadi mukelenge wa Bena Lubena. Bana babo ba mu meku abo, hakabalabo kulondolola kuabo, bakadi tulala Yiele ne Zekâya, ne Bêla, muana wa balume wa Azaza, muana wa balume wa Sheme, muana wa balume wa Yoele, wakashikama mu Aloe tô ne ku Nebo ne Bâla-meona; ne ku esete bakamuangalaka tô ne ku tshibuelelu tshia tshihela ku musulu wa Pelata, bualu bua bimuna biabo biakavulangana mu buloba bua Gilada. Mu matuku a Shaula bobo bakaluangana ne Bena Hageli, bakabashiha; bakashikama mu ntenta yabo mu buloba buonso ku esete kua Gilada. Bana ba balume ba Gada bakashikama ha buihi nʼabo mu buloba bua Bashana ku Saleka; Yoele wakadi ha mutu habo ne Shafama wakamulonda, ne Yanai ne Shafata mu Bashana. Bana babo ba mu nsubu wa batatuʼabo: Mikaele ne Meshulama ne Sheba ne Yolai ne Yakana ne Zia ne Ebê, muanda mutekete bonso. Aba bakadi bana ba balume ba Abihayila, muana wa balume wa Huli, muana wa balume wa Yaloa, muana wa balume wa Gilada, muana wa balume wa Mikaele, muana wa balume wa Yeshishai, muana wa balume wa Yado, muana wa balume wa Buza; Ahi, muana wa balume wa Abediele, muana wa balume wa Guni, wakadi ha mutu ha nsubu ya batatuʼabo. Bakashikama mu Gilada mu Bashana ne mu misoko yai ne mu miaba yonso ya ku matshika a Shalona tô ne ku mpenge yabo. Buonso buabo bakabadibua mu kulondolola kuabo mu matuku a Yotama, mukelenge wa Yuda, ne mu matuku a Yalobama, mukelenge wa Isalele. Bana ba balume ba Lubena ne ba Bena Gada ne ba tshituha tshia tshisamba tshia Manashe, bantu ba bukitu, bantu bakadi ne bukole bua kutuala nʼabu ngabu ne muele wa nvita, ne bua kuela nʼabu buta, ne bakadi ne dikima dia nvita, bakadi binunu makumi anai ne binai ne nkama muanda mutekete ne makumi asambombo, bakadi bena nvita. Bobo bakaluangana ne Bena Hageli ne Yetû ne Nafisha ne Nodaba. Bakuabo bakakuatshishangana nʼabo, ne bobo ne bakadi nʼabo bakahita Bena Hageli bukole; bualu bua bobo bakadila kudi Nzambi mu nvita, ne yeye wakabunvuila, bualu bua bobo bakamueyemena. Bobo bakanyenga bimuna biabo; tumelo tuabo bu binunu makumi atanu, ne mikoko bu binunu nkama ibidi ne makumi atanu, ne nyama ya mpunda binunu bibidi, ne bantu binunu lukama. Ba bungi bakashihibua bualu bua nvita ei yakadi ya Nzambi. Bobo bakashikama mu miaba yabo tô ne hakayabo mu buhika. Bantu ba mu tshituha tshia tshisamba tshia Manashe bakashikama mu buloba; bakavulangana ku Bashana tô ne ku Bâla-hêmona ne ku Senî ne ku mukuna wa Hêmona. Aba bakadi ku mutu kua nsubu ya batatuʼabo: Efê ne Ishi ne Ebele ne Azeliele ne Yelemiya ne Hodaweya ne Yadiele, bena bukitu ne ba butumbi ba ku mutu kua nsubu ya batatuʼabo. Bobo bakenzela Nzambi wa batatuʼabo bibi, bakalonda malu a masandi ne nzambi ya bantu ba mu buloba abu bakashihibua kudi Nzambi ku mpala kuabo. Nzambi wa Isalele wakasonsola mutshima wa Pula, mukelenge wa Ashû, ne mutshima wa Tigelata-pilenesê, mukelenge wa Ashû, ne bobo bakaya nʼabo, Bena Lubena ne Bena Gada ne tshituha tshia tshisamba tshia Manashe mene mu buhika; bakaya nʼabo tô ne ku Halaha ne Habo ne Hala ne ku musulu wa Gozana tô ne ku didiku edi. Bana ba balume ba Lewi: Gêshona, Kohata ne Melali. Bana ba balume ba Kohata; Amalama, Yisehâ ne Hebelone ne Uziele. Bana ba Amalama: Alona ne Mosê ne Miyama. Bana ba balume ba Alona: Nadaba ne Abihu ne Eleazâ ne Itamâ. Eleazâ wakalela Pinehasa, Pinehasa wakalela Abishua, ne Abishua wakalela Buki, ne Buki wakalela Uzi, ne Uzi wakalela Zelaya ne Zelaya wakalela Melayota, ne Melayota wakalela Amalia, ne Amalia wakalela Ahituba, ne Ahituba wakalela Sadoka, ne Sadoka wakalela Ahimâsa, ne Ahimâsa wakalela Azaya, ne Azaya wakalela Yohanana, ne Yohanana wakalela Azaya (yeye Wakenza mudimu wa buakuidi mu nsubu wakasabo kudi Solomo mu Yelushalema), ne Azaya wakalela Amalia, ne Amalia wakalela Ahituba, ne Ahituba wakalela Sadoka, ne Sadoka wakalela Shaluma, ne Shaluma wakalela Hilekiya, ne Hilekiya wakalela Azaya, ne Azaya wakalela Selaya, ne Selaya wakalela Yehosadaka; Yehosadaka wakaya mu buhika hakaya Yehowa ne Bena Yuda ne Bena Yelushalema ku tshianza tshia Nebukadenesâ. Bana ba balume ba Lewi: Gêshoma ne Kohata ne Melali. Au mmena a bana ba balume ba Gêshoma: Libeni ne Shimei. Bana ba balume ba Kohata bakadi Amalama ne Yisehâ ne Hebelone ne Uziele, Bana ba balume ba Melali: Mali ne Mushi. Au mmeku a Bena Lewi ku nsubu ya batatuʼabo. Ya Gêshoma: Libeni muanʼandi, ne Yahata muanʼandi, ne Zima muanʼandi, ne Yoa muanʼandi, ne Yido muanʼandi, ne Zela muanʼandi, ne Yatelai muanʼandi. Bana ba balume ba Kohata: Aminadaba muanʼandi, ne Kola muanʼandi, ne Asî muanʼandi, ne Elekana muanʼandi, ne Ebiyasafa muanʼandi, ne Asî muanʼandi, ne Tahata muanʼandi, ne miele muanʼandi, ne Uziya muanʼandi, ne Shaula muanʼandi. Bana ba balume ba Elekana: Amasai ne Ahimota. Bana ba Elekana: Sofai muanʼandi, ne Nahata muanʼandi, ne Eliaba muanʼandi, ne Yelohama muanʼandi, ne Elekana muanʼandi. Bana ba balume ba Samuele: muanʼa bute wandi Yoele ne Abiya muana muibidi. Bana ba balume ba Melali: Mali ne Libeni muanʼandi, ne Shemei muanʼandi, ne Uza muanʼandi, ne Shimea muanʼandi, ne Hagiya muan andi, ne Asaya muanʼandi, Aba mbantu bakateka Davidi ku mutu kua bimbi ba misambu mu nsubu wa Yehowa hakikishilaku mushete wa tshihungidi tshia mei a Yehowa. Bobo bakimba misambu mu nsubu wa kusambakena tô ne hakasa Solomo nsubu wa Yehowa mu Yelushalema; bakenza mudimu wabo bu muakadi milongo yabo. Aba mbantu bakenza mudimu au ne bana babo ba balume: Bana ba balume ba Bena Kohata: Hemana, muimbi wa misambu, muana wa Yoele, muana wa Samuele, muana wa Elekana, muana wa Yelohama, muana wa Eliele, muana wa Toa, muana wa Sufa, muana wa Elekana, muana wa Mahata, muana wa Amasai, muana wa Elekana, muana wa Yoele, muana wa Azaya, muana wa Sefanya, muana wa Tahata, muana wa Asî, muana wa Ebiyasafa, muana wa Kola, muana wa Yisehâ, muana wa Kohata, muana wa Lewi, muana wa Isalele. Muanʼabo wa balume wakimana ku tshianza tshiandi tshia balume, Asafa mene, muana wa Belekiya, muana wa Shimea, muana wa Mikaele, muana wa Bâseya, muana wa Malakiya, muana wa Eteni, muana wa Zela, muana wa Adaya, muana wa Etana, muana wa Zima, muana wa Shimei, muana wa Yahata, muana wa Gêshoma, muana wa Lewi. Ku tshianza tshia bakashi tshia bana babo bakimana bana ba balume ba Melali: Etana, muana wa Kishi, muana wa Abedi, muana wa Maluke, muana wa Hashabeya, muana wa Amasaya, muana wa Hilekiya, muana wa Amasi, muana wa Bani, muana wa Shemê, muana wa Mali, muana wa Mushi, muana wa Melali, muana wa Lewi. Bana babo Bena Lewi bakadi ku mutu kua midimu yonso ya mu nsubu wa kusambakena wa Nzambi. Kadi Alona ne bana bandi ba balume bakafila milambu ya kuosha ha kahia ne ku tshioshelu tshia musenga wa manananshi ne ya midimu yonso ya mu muaba wa tshijila ne ya kubuikila nʼai mibi ya Bena Isalele bu muakadi mikenji yonso yakela Mose, muntu wa Nzambi. Aba mbana ba balume ba Alona: Eleazâ muanʼandi, ne Pinehasa muanʼandi, ne Abishua muanʼandi, ne Buki muanʼandi, ne Uzi muanʼandi, ne Zelaya muanʼandi, ne Melayota muanʼandi, ne Amalia muanʼandi, ne Ahituba muanʼandi, ne Sadoka muanʼandi, ne Ahimâsa muanʼandi. Ei mmiaba yakashikamabo ku bitudilu biabo mu mikalu yabo; kudi bana ba balume ba Alona ba mu meku a Bena Kohata (bualu bua bobo bakangata tshituha tshiabo ku mpala), bakabaha bobo Hebelone mu buloba bua Yuda ne miaba yau ya ku matshika yakadi ha buihi; kadi bakaha Kaleba, muana wa Yefune, madimi a mu tshimenga ne misoko yatshi. Bakaha bana ba balume ba Alona misoko ya kunyemena, Hebelone, Libena ne miaba ya ku mpenge, ne Yati ne Eshetemoa ne miaba ya ku mpenge, ne Hilene ne miaba ya ku mpenge, ne Debî ne miaba ya ku mpenge, ne Ashana ne miaba ya ku mpenge, ne Bete-shemeshe ne miaba ya ku mpenge; ne mu tshisamba tshia Benyamina, Geba ne miaba ya ku mpenge, ne Alemeta ne miaba ya ku mpenge, ne Anatota ne miaba ya ku mpenge. Misoko yabo yonso ya meku abo onso yakadi dikumi ne isatu. Hakelabo nshobo, bakaha bana ba balume bakuabo ba Kohata, ku meku abo, misoko dikumi ya mu tshituha tshia tshisamba tshia Manashe. Bakaha bana ba balume ba Gêshoma, ku meku abo, misoko dikumi ne isatu ya mu tshisamba tshia Yisakâ ne tshia Ashe ne tshia Nafatale ne tshia Manashe mu buloba bua Bashana. Bakayifila ku nshobo kudi bana ba balume ba Melali, ku meku abo, misoko dikumi ne ibidi mu tshisamba tshia Lubena ne tshia Gada ne tshia Zebuluna. Bena Isalele bakaha Bena Lewi misoko ei ne miaba ya ku mpenge. Bakabaha misoko ei ituakutela mena ai ku nshobo mu tshisamba tshia Yuda ne tshia Shimeona ne tshia Benyamina. Bakuabo ba mu meku a bana ba balume ba Kohata bakadi ne misoko yabo mu buloba bua Efelayima. Bakabaha misoko ya kunyemena, Shekeme wa ku mikuna ya Efelayima ne miaba ya ku mpenge; Gezê kabidi ne miaba ya ku mpenge, Yokemama ne miaba ya ku mpenge, ne Bete-holona ne miaba ya ku mpenge, ne Ayalona ne miaba ya ku mpenge, ne Gata-limona ne miaba ya ku mpenge; ne mu tshituha tshia tshisamba tshia Manashe, Anê ne miaba ya ku mpenge, ne Bilama ne miaba ya ku mpenge, kudi bakuabo ba mu meku a Bena Kohata. Bakaha bana ba balume ba Gêshoma mu tshituha tshia tshisamba tshia Manashe, Golana mu buloba bua Bashana ne miaba ya ku mpenge, ne Ashetalota ne miaba ya ku mpenge; mu tshisamba tshia Yisakâ, Kedeshe ne miaba ya ku mpenge, ne Dabelata ne miaba ya ku mpenge, ne Lamota ne miaba ya ku mpenge, ne Anema ne miaba ya ku mpenge; ne mu tshisamba tshia Ashê, Mashala ne miaba ya ku mpenge, ne Abidona ne miaba ya ku mpenge, ne Hukoko ne miaba ya ku mpenge, ne Lehoba ne miaba ya ku mpenge; ne mu tshisamba tshia Nafatale, Kedeshe mu Galela ne miaba ya ku mpenge, ne Hamona ne miaba ya ku mpenge, ne Kîyata-ayima ne miaba ya ku mpenge. Bakaha Bena Lewi bakuabo, bana ba balume ba Melali, mu tshisamba tshia Zebuluna, Limono ne miaba ya ku mpenge, ne Tabô ne miaba ya ku mpenge; dishiya dia Yadene ku Yeleko ku esete kua Yadene, bakabaha mu tshisamba tshia Lubena, Besê mu tshihela ne miaba ya ku mpenge, ne Yasa ne miaba ya ku mpenge, ne Kedemota ne miaba ya ku mpenge, ne Mefâta ne miaba ya ku mpenge; mu tshisamba tshia Gada, Lamota mu Gilada ne miaba ya ku mpenge, ne Mahanayima ne miaba ya ku mpenge, ne Heshebona ne miaba ya ku mpenge, ne Yasê ne miaba ya ku mpenge. Bana ba balume ba Yisakâ: Tola ne Pua ne Yashuba ne Shimelona, banai. Bana ba balume ba Tola: Uzi ne Lefaya ne Yeliele ne Yamai ne Ibisama ne Shemuele, bakadi ku mutu kua nsubu ya batatuʼabo, ya Tola mene, bena bukitu ba dikima mu bikondo biabo; bungi buabo mu matuku a Davidi buakadi binunu makumi abidi ne bibidi ne nkama isambombo. Bana ba balume ba Uzi: Yizelaya. Bana ba balume ba Yizelaya: Mikaele ne Obadaya ne Yoele ne Yishiya, batanu; buonso buabo bakadi bakelenge. Bena nvita binunu makumi asatu ne bisambombo bakadi basangisha nʼabo mu bikondo biabo mu nsubu ya batatuʼabo, bualu bua bobo bakadi ne bakashi ba bungi ne bana ba balume ba bungi. Bana babo ba munkatshi mua meku onso a Yisakâ, bena nvita ba dikima bakabalabo mu bikondo biabo, bakadi binunu makumi muanda mukulu ne muanda mutekete. Bana ba balume ba Benyamina: Bela ne Bekê ne Yediele, basatu. Bana ba balume ba Bela: Ezebona ne Uzi ne Uziele ne Yelimota ne Ili, batanu; bakadi ku mutu kua nsubu ya batatuʼabo, bena nvita ba dikima; bakaledibua mu bikondo biabo binunu makumi abidi ne bibidi ne makumi asatu ne bantu banai. Bana ba balume ba Bekê: Zemila ne Yosha ne Eliezê ne. Eleyehoenai ne Omeli ne Yelemota ne Abiya ne Anatota ne Alemeta. Aba bonso bakadi bana ba Bekê. Bakadi babadibua mu kulondolola kuabo, mu bikondo biabo, bu ba ku mutu kua nsubu ya batatuʼabo bena nvita ba dikima bakadi binunu makumi abidi ne nkama ibidi. Bana ba balume ba Yediele: Bilehana. Bana ba balume ba Bilehana: Yeusha ne Benyamina ne Ehuda ne Kenana ne Zetana ne Tâshishi ne Ahishahâ. Aba bonso bakadi bana ba balume ba Yediele bakadi ku mutu kua nsubu ya batatuʼabo bena nvita ba dikima binunu dikumi ne muanda mutekete ne nkama ibidi bakadi ne bukole bua kuluangana nvita. Shupima kabidi, ne Hupima, bana ba balume ba Ili, ne Hushima, muana wa Ahe. Bana ba balume ba Nafatale: Yasiele ne Guni ne Yesê ne Shaluma, bana ba balume ba Bileha. Bana ba balume ba Manashe: Aseliele wakamulelela mukashi, Muena Alama, muhika mubakibue kudi Manashe; yeye wakalela Maki, tatu wa Gilada. Maki wakabaka mukashi wa Hupima ne Shupima, dina dia muanʼabo wa bakashi diakadi Mâka; dina dia mukashi wandi mukuabo diakadi Selofehada; Selofehada wakalela bana ba bakashi. Mâka, mukashi wa Maki, wakalela muana wa balume, wakamuidika dina ne, Peleshe; dina dia muanʼabo nʼandi diakadi Sheleshe; ne bana ba balume bandi bakadi Ulama ne Lakema. Bana ba balume ba Ulama: Bedana. Aba mbana ba balume ba Gilada, muana wa Makî, muana wa Manashe. Muanʼabo wa bakashi Hamolekete wakalela Ishehodo ne Abiezê ne Mahala. Bana ba balume ba Shemida bakadi Ahiana ne Shekeme ne Likihi ne Aniama. Bana ba balume ba Efelayima: Shutela, ne Belede muanʼandi, ne Tahata muanʼandi, ne Eleada muanʼandi, ne Tahata muanʼandi, ne Zabada muanʼandi, ne Shutela muanʼandi, ne Ezê, ne Eleada, bakadi bashihibua kudi Bena Gata bakaledibua mu buloba, bualu bua bobo bakatua bua kunyenga bimuna biabo. Efelayima, tatu wabo, wakasa muadi matuku a bungi, ne bana babo bakatua bua kumusambabo. Yeye wakasangila ne mukashi wandi, yeye wakimita difu, wakalela muana wa balume, wakamuidika dina ne, Belia, bualu bua makenga akakuata ba mu nsubu muandi. Muana wandi wa bakashi wakadi Shela, wakasa Bete-holona wa ku tshibanda ne wa ku mukuna, ne Uzeneshêla. Lefa wakadi muanʼandi wa balume, ne Leshefe muanʼandi, ne Tela muanʼandi, ne Tahana muanʼandi, ne Ladana muanʼandi, ne Amihuda muanʼandi, ne Eleshama muanʼandi, ne Nuna muanʼandi, ne Yoshua muanʼandi. Miaba yabo yakashikamabo yakadi Betele ne misoko yakadi ha buihi, ne Nâlana ku esete, ne Gezê ku wesete ne misoko yakadi ha buihi; Shekeme ne misoko yakadi ha buihi tô ne ku Aza ne misoko yakadi ha buihi; ne ku mikalu ya Bena Manashe, Bete-sheana ne misoko yakadi ha buihi, ne Tânaka ne misoko yakadi ha buihi, ne Megido ne misoko yakadi ha buihi, ne Dô ne misoko yakadi ha buihi. Mu miaba ei yakashikama bana ba Yosefe, muana wa Isalele. Bana ba balume ba Ashê: Yimena ne Yishewa ne Yishewi ne Beliya, ne Sela wakadi muanʼabo wa bakashi. Bana ba balume ba Beliya: Hebe ne Malekiele, wakadi tatu wa Bîzawita. Hebê wakalela Yafeleta ne Shomê ne Hotama, ne Shua wakadi muanʼabo wa bakashi. Bana ba balume ba Yafeleta: Pasaka ne Bimehala ne Ashawata. Aba mbana ba Yafeleta. Bana ba balume ba Shemê: Ahi ne Loga ne Yehuba ne Alama. Bana ba balume ba Heleme, muanʼabo wa balume: Sofâ ne Yimena ne Sheleshe ne Amala. Bana ba balume ba Sofâ: Sua ne Hânefê ne Shuala ne Beli ne Yimela ne Bezê ne Hodo ne Shama ne Shilesha, ne Yitelana ne Bela. Bana ba balume ba Yetê: Yefune ne Pisepa ne Ala. Bana ba balume ba Ula: Ala ne Haniele ne Lisia. Aba bonso bakadi bana ba Ashê ba ku mutu kua nsubu ya batatu babo, bena nvita basungula ba bukitu ne tulala tua ha mutu. Bungi buabo buakabalabo mu kulondolola kuabo bua kuluangana nvita bakadi binunu makumi abidi ne bisambombo. Benyamina wakalela Bela muanʼa bute wandi, ne Ashabele muana muibidi, ne Ahala muana muisatu, ne Noha muana muinai, ne Lafa muana muitanu. Bela wakalela bana ba balume: Adâ ne Gela ne Abihuda ne Abishua ne Nâmana ne Ahoa ne Gela ne Shefufana ne Hulama. Aba mbana ba balume ba Ehuda; aba bakadi ku mutu kua nsubu ya batatu babo ba Bena Geba; bakaya nʼabo mu buhika ku Manahata: Nâmana ne Ahiya ne Gela bakaya nʼabo mu buhika kabidi; yeye wakalela Uza ne Ahihuda. Shahalayima wakalela bana mu buloba bua Moaba, bakatumeye bakashi bandi Hushima ne Bâla kuabo. Mukashi wandi Hodesha wakamulelela Yobaba ne Zibia ne Mesha ne Malakama ne Yeuse ne Shakaya ne Mîma. Aba bakadi bana bandi ba balume ba ku mutu kua nsubu ya batatu babo. Hushima wakamulelela Ahituba ne Elepâla. Bana ba balume ba Elepâla: Ebê ne Mishama ne Shemede, wakasa Ono ne Lodo ne misoko yakadi ha buihi; Belia ne Shema, bakadi ku mutu kua nsubu ya batatu babo ba Bena Ayalona, bakihata Bena Gata mu nvita; ne Ahio ne Shashaka ne Yelemota ne Zebadaya ne Alada ne Edê ne Mikaele ne Yisepa ne Yoha, bana ba balume ba Belia; Zebadaya ne Meshulama ne Hiziki ne Hebê ne Yishemelai ne Yizela ne Yobaba, bana ba balume ba Elepâla; ne Yakima ne Zikeli ne Zabedi ne Elienai ne Ziletai ne Ebele ne Adaya ne Belaya ne Shimelata, bana ba balume ba Shimei; Yishe-pana ne Ebê ne Ebele ne Abidona ne Zikeli ne Hanana ne Hananya ne Elama ne Anetotiya ne Yifedeya ne Penuele, bana ba balume ba Shashaka; ne Shameshelai ne Shemaya ne Atalaya ne Yalesheya ne Eliya ne Zikeli, bana ba balume ba Yelohama. Aba bakadi ku mutu kua nsubu ya batatu babo mu bikondo biabo bionso, bantu banene; bakadi bashikama mu Yelushalema. Mu Gibeona muakadi Yiele, tatu wa Gibeona, wakadi ne mukashi, dina diandi Mâka; muanʼa bute wandi wakadi Abidona, bakunyi bandi bakadi Sû ne Kishi ne Bâla ne Nadaba ne Gedô ne Ahio ne Zekê. Mikelota wakalela Shimea. Bobo kabidi bakashikama mu Yelushalema mu buludiludi ne bana babo. Nê wakalela Kishi; Kishi wakalela Shaula; Shaula wakalela Yonatana ne Maleki-shua ne Abinadaba ne Eshebâla. Muana wa balume wa Yonatana wakadi Meliba-bâla; Meliba-bâla wakalela Mika. Bana ba balume ba Mika: Pitona ne Meleke ne Talea ne Ahaza. Ahaza wakalela Yehoada; ne Yehoada wakalela Alemeta ne Asemaweta ne Zimeli; ne Zimeli wakalela Mosa. Mosa wakalela Binea; Lafa wakadi muanʼandi ne Eleasa wakadi muanʼandi ne Asela wakadi muanʼandi. Asela wakadi ne bana ba balume basambombo, mena abo: Azelikama ne Bokelu ne Yishemaele ne Shealeya ne Obadaya ne Hanana. Aba bonso bakadi bana ba balume ba Asela. Bana ba balume ba Esheke muanʼabo: Ulama muanʼa bute wandi, ne Yeusha muana muibidi ne Elifelete muisatu. Bana ba balume ba Ulama bakadi bena nvita ba bukitu, bena mata, bakadi ne bana ba balume ba bungi, ne bana ba bana babo balela, bu lukama ne makumi atanu. Aba bonso bakadi bana ba balume ba Benyamina. Nunku Bena Isalele bakadi babadibua ku kulondolola kuabo; ne monai, badi bafundibue mu mukandu wa bakelenge ba Isalele; bakaya ne Bena Yuda mu buhika ku Babulona bualu bua ditomboka diabo. Bantu ba diambedi bakashikama mu buhianyi buabo mu misoko yabo ya Isalele bakadi bakuidi ne Bena Lewi ne Bena Netinima. Mu Yelushalema nuakashikama bana ba Yuda ne ba Benyamina ne ba Efelayima ne ba Manashe: Utai, muana wa Amihuda, muana wa Omeli, muana wa Imeli, muana wa Bani, wa bana ba Pelese, muana wa Yuda. Ba Bena Shilona: Asaya, muanʼa bute wandi ne bana bandi ba balume. Bana ba balume ba Sela: Yeule ne bana babo nkama isambombo ne makumi tshitema, Bana ba balume ba Benyamina: Salu, muana wa balume wa Meshulama, muana wa Hodaweya, muana wa Hasenua, ne Yibeneya, muana wa Yelohama, ne Ela, muana wa Uzi, muana wa Mikela ne Meshulama, muana wa Shefataya, muana wa Leule, muana wa Yibeniya; ne bana babo mu bikondo biabo nkama tshitema ne makumi atanu ne bantu basambombo. Aba bonso bakadi ku mutu kua nsubu ya batatu babo. Ba bakuidi: Yedaya ne Yehoyada ne Yakina ne Azâya, muana wa Hilekiya, muana wa Meshulama, muana wa Sadoka, muana wa Melayota, muana wa Ahituba, mukokeshi wa mu nsubu wa Nzambi; ne Adaya, muana wa Yelohama, muana wa Pashû, muana wa Malakiya, ne Mâsai, muana wa Adiele, muana wa Yakela, muana wa Meshulama, muana wa Meshilemita, muana wa Imê; ne bana babo ba ku mutu kua nsubu ya batatu babo tshinunu ne nkama muanda mutekete ne makumi asambombo, bantu bakole ba kukuatabo mudimu mu nsubu wa Nzambi. Ba Bena Lewi: Shemaya, muana wa Hashuba, muana wa Azelikama, muana wa Hashabeya wa bana ba balume ba Melali; ne Bakabaka, Heleshi ne Galela ne Mataniya, muana wa Mika, muana wa Zikeli, muana wa Asafa, ne Obadaya, muana wa Shemaya, muana wa Galala, muana wa Yedutuna, ne Belekiya, muana wa Asa, muana wa Elekana, bakadi bashikama mu misoko ya Bena Netofa. Batuadi ba majitu: Shaluma ne Akuba ne Talemona ne Ahimana ne bana babo (Shaluma wakadi ku mutu kuabo), bakadi bimana ku tshibi tshia mukelenge ku esete; bobo bakadi batuadi ba majitu a mu tshitudilu tshia Bena Lewi. Shaluma, muana wa Kole, muana wa Ebiyasafa, muana wa Kola, ne bana babo nʼandi ba mu nsubu wa tatu wandi, Bena Kola, bakadi ku mutu kua mudimu eu, balami ba ku bibuelelu bia mu ntenta wa kusambakena; batatu babo bakadi ku mutu kua tshitudilu tshia Yehowa, balami ba ku bibuelelu. Diambedi Pinehasa, muana wa Eleazâ, wakadi ku mutu kuabo ne Yehowa wakadi nʼandi. Zekâya, muana wa Meshelemiya, wakadi mulami wa ku tshibuelelu tshia mu nsubu wa kusambakena. Buonso buabo bakasungulabo bua kulamabo bibuelelu bia mu nsubu bakadi nkama ibidi ne dikumi ne bantu babidi. Bobo bakadi babadibua mu bikondo biabo mu misoko yabo bakadi bajidibua mu midimu yabo kudi Davidi ne Samuele, mumonyi wa malu. Nunku bobo ne bana babo balela bakadi batangila bibuelelu bia mu nsubu wa Yehowa, nsubu wa kusambakena mene, bu balami babi. Batuadi aba bakadi ku nseke inai, ku esete ne ku wesete ne ku nôde ne ku Sude. Bana babo bakadi mu misoko yabo bakadi ne bua kubuela kudibo hakahita matuku muanda mutekete ku lumingu ku lumingu bua kuikalabo nʼabo; bualu bua balama banene banai, Bena Lewi, bakadi bajidibua mu mudimu eu, bakadi ku mutu kua nsubu ne bibutshilu bia mu nsubu wa Nzambi. Bobo bakadi balala banyunguluke nsubu wa Nzambi, bualu bua bobo bakadi bajidibue mu mudimu eu; bakadi ne bua kunzulula bibi hatshiatshia ku dituku ku dituku. Bakuabo babo bakadi ne mudimu wa kulamabo malonga a mu nsubu; bakadi babala malonga hakabuelabo nʼau ne hakahatukabo nʼau. Bakuabo babo bakadi balami ba bintu bia mu nsubu, ne bivuadi bionso bia mu tshitendelelu, ne ba bukula bubotesha, ne ba nvinyo, ne ba manyi, ne ba musenga wa manananshi, ne ba bintu bia muhuya muimpe. Bana ba balume bakuabo ba bakuidi bakadi balongolodi ba bintu bia muhuya muimpe. Matitiya, umue wa Bena Lewi, muanʼa bute wa Shaluma, Muena Kola, wakadi ne mudimu wa kulama bintu biakalambabo mu malonga. Bakuabo babo, bana ba Kohata, bakadi ne bua kulama bidia bia kulesha ku lumingu ku lumingu. Aba mbimbi ba misambu ba ku mutu kua nsubu ya batatu babo ba Bena Lewi bakadi bashikama mu nsubu ei; bakadi kabayi ne mudimu mukuabo, bualu bua bakadi ne mudimu wabo munya ne butuku. Bobo bakadi ku mutu kua nsubu ya batatu babo ba Bena Lewi mu bikondo biabo bionso, bantu banene; bakadi bashikama mu Yelushalema. Mu Gibeona nuakashikama Yiele, tatu wa Gibeona; dina dia mukashi wandi diakadi Mâka; Abidona wakadi muanʼa bute wandi, ne Sû ne Kishi ne Bâla ne Nê ne Nadaba ne Gedô ne Ahio ne Zekâya ne Mikelota. Mikelota wakalela Shimeama. Bobo bakashikama mu Yelushalema kabidi ha buihi ne bana babo. Nê wakalela Kishi; Kishi wakalela Shaula; Shaula wakalela Yonatana ne Malekishua ne Abinadaba ne Eshebâla. Meliba-bâla wakadi muana wa Yonatana; Meliba-bâla wakalela Mika. Bana ba balume ba Mika: Pitona ne Meleke ne Talea ne Ahaza. Ahaza wakalela Yala; Yala wakalela Alemeta ne Asemaweta ne Zimeli; Zimeli wakalela Mosa; Mosa wakalela Binea; ne Lefaya muanʼandi, ne Eleasa muanʼandi, ne Asela muanʼandi. Asela wakadi ne bana ba balume basambombo; mena abo: Azelikama, Bokelu ne Yishemaele ne Shealeya ne Obadaya ne Etenana; aba bakadi bana ba balume ba Asela. Bena Peleshete bakaluangana nvita ne Bena Isalele; Bena Isalele bakanyema ku mpala kua Bena Peleshete, bakadishinda hanshi bafue ku mukuna wa Gileboa. Bena Peleshete bakihata Shaula ne bana bandi balume; Bena Peleshete bakashiha Yonatana ne Abinadaba ne Maleki-shua, bana balume ba Shaula. Bakatamba Shaula mu nvita, bena mata a mikete bakamuheta mu nshila; yeye wakatahibua kudi bena mata. Hashishe Shaula wakambila muambudi wa ngabu wandi ne, Hatula muele wa nvita webe, untahe, unsompole; bua bantu aba badi kabayi batengula kabalu ha buihi nʼanyi bua kutekabo. Kadi muambudi wa ngabu wandi wakahidia; bualu bua yeye wakatamba kutshina. Nunku Shaula wakahatula muele wa nvita wandi, wakadishindahu. Hakamona muambudi wa ngabu wandi ne, Shaula wakamana kufua, yeye kabidi wakadishinda ha muele wandi, wakafua. Nunku Shaula wakafua ne bana bandi balume basatu; bonso ba mu nsubu wandi bakafua diatshimue. Hakatangila Bena Isalele bakadi bashikama mu tshibanda ne, Bakadi ku mukuna bakanyema, ne Shaula ne bana bandi balume bakafua, bakahatuka mu misoko yabo, bakanyema kabidi; Bena Peleshete bakatua, bakashikamamu. Hakatshiabu, hakalua Bena Peleshete bua kunyengabo bintu bia bantu bafue, bakasangana Shaula ne bana bandi ba balume bahone hanshi ku mukuna wa Gileboa. Bakamunyenga bintu biandi; bakatuma mutu wandi ne bintu biandi bia nvita mu buloba buonso bua Bena Peleshete bua kumanyishabo nzambi yabo ne bantu babo bonso lumu elu. Bakateka bintu biandi bia nvita mu nsubu wa nzambi yabo; bakakumina mutu wandi mu nsubu wa Dagona. Hakunvua Bena Yabesha-gilada lumu lua malu onso akenzela Bena Peleshete Shaula, hashishe bena bukitu bonso bakabika, bakangata tshitalu tshia Shaula ne bia bana bandi ba balume, bakatua nʼabi ku Yabesha, bakajika mifuba yabo muinshi mua mitshi ya telebinta ya mu Yabesha, bakajila bia kudia matuku muanda mutekete. Nunku Shaula wakafua bualu bua bubi buandi buakenzeleye Yehowa ne bua dî dia Yehowa diakahidieye; ne bualu bua yeye wakakeba lungenyi kudi muena buloshi, bakebesha Yehowa; nunku yeye wakamushiha, wakaha Davidi, muana wa Yishai, bukelenge buandi. Hashishe Bena Isalele bonso bakadisangisha kudi Davidi mu Hebelone bamba ne, Mona, tudi bu mifuba yebe ne misunyi yebe. Diambedi hakadi Shaula mukelenge mene, nguewe wakahatuka, wakahingana ne Bena Isalele; Yehowa, Nzambi webe, wakukuambila ne, Wewe newikale mulami wa bantu banyi Bena Isalele, ne wewe newikale mukelenge ku mutu kua bantu banyi Bena Isalele. Nunku bakulu bonso ba Bena Isalele bakatua kudi mukelenge mu Hebelone; Davidi wakahunga nʼabo tshihungidi mu Hebelone ku mpala kua Yehowa; bakela manyi ha mutu ha Davidi bua kuikaleye mukelenge ku mutu kua Bena Isalele, bu mu dî dia Yehowa diakambileye Samuele. Davidi ne Bena Isalele bonso Bakaya ku Yelushalema (udi Yebuse mene); Bena Yebuse, bena buloba bakadiku. Bena Yebuse bakambila Davidi ne, Wewe kuena ubuela kunoko. Kadi Davidi wakanyenga musoko wa Siona wakadi munyungulula ne ngumbu; eu udi musoko wa Davidi. Davidi wakamba ne. Wadianjila kushiha Bena Yebuse yeye neikale mukelenge ne kapitene. Yoaba, muana wa Seluya, wakadianjila kufikaku, wakayuishibua kapitene. Davidi wakashikama mu musoko eu wa lumbu, nunku bakabikila musoko eu ne, Musoko wa Davidi. Yeye wakasa musoko, wakanyunguluka tô ne ku Milo; ne Yoaba wakalongolola tshituha tshikuabo tshia musoko tshiakashala. Davidi wakadiundadiunda, wakalua muntu munene, bualu bua Yehowa wa misumba wakadi nʼandi. Aba mbantu banene bakadi ne Davidi, bakadi nʼandi ne bukole mu bukelenge buandi; bakadisangisha ne Bena Isalele bonso bua kubueshabo Davidi mu bukelenge, bu mu dî dia Yehowa diakambeye bua Bena Isalele. Ebu mbungi bua bantu ba bukitu bakadi ne Davidi: Yashobeama, muana wa Muena Hakemoni, wakadi ha mutu ha bantu makumi asatu; yeye wakambula difuma diandi kudi bantu nkama isatu, wakabashiha diatshimue. Eleazâ, muana wa Dodo, Muena Ahoa, wakadi umue wa bena bukitu bandi basatu wakadi ku nyima kuandi. Yeye wakadi ne Davidi ku Pasa-damima kuakadisangisha Bena Peleshete bua kuluangana mu budimi bua orge; bantu bakanyema ku mpala kua Bena Peleshete. Bobo bakimana munkatshi mua budimi ebu, bakaluangana nʼabo, bakashiha Bena Peleshete; Yehowa wakabasungila ne luhandu lunene. Bantu basatu ba bantu aba banene makumi asatu bakaya kudi Davidi ku dibue dia mu lubuebue lua Adulama; bena nvita ba Bena Peleshete bakasa tshitudilu tshiabo mu tshibanda tshia Bena Lefa. Davidi wakadi mu musoko wakadi ne lumbu, ne bena nvita ba Bena Peleshete bakadi mu Beteleheme. Davidi wakamba ne, Nakadi kusua bua muntu ampe mai a kunua a mu dina dia mu Beteleheme didi hehi ne tshibuelelu tshia musoko. Bantu aba basatu bakahitshila munkatshi mua Bena Peleshete bakakoka mai a mu dina dia mu Beteleheme diakadi ha buihi ne tshibuelelu tshia musoko, bakatua nʼau kudi Davidi; kadi Davidi wakahidia kuanua, wakâhongolola kudi Yehowa, wakamba ne, Nzambi wanyi ampidishe bua meme tshienji nunku; nennue mashi a bantu aba bakuamba kufua bua bualu buanyi, anyi? Bualu bua bobo bakuamba kufila mioyo yabo hakuluabo nʼau. Nunku yeye wakahidia kuanua. Ebu bualu buakenza bantu aba banene basatu. Abishai, muanʼabo ne Yoaba, wakadi ku mutu kua bantu basatu; yeye wakela difuma diandi kudi bantu nkama isatu, wakabashiha, wakadi ne dina dia butumbi munkatshi mua bantu aba basatu. Munkatshi mua bantu aba basatu yeye wakatamba babidi aba bakuabo bunene, bakamuvuisha kapitene kabo; kadi yeye kakalua munene bu bantu aba basatu bakadi ku mpala. Benaya, muana wa Yehoyada, muana wa muena bukitu wa mu Kabesele, wakadi muenze malu manene, wakashiha bana babidi ba Aliele wa mu Moaba; yeye kabidi wakabuela mu lubuebue, wakashiha nyama wa ntambue hakadi neige hanshi ha buloba. Wakashiha Muena Ejipitu, muntu munene wa nfiondo, bule buandi buakadi coudées itanu; mu tshianza tshia Muena Ejipitu muakadi difuma bu mutshi udibo bakuma nʼau bilulu; yeye wakaya kudiye ne tshibonge mu tshianza tshiandi, wakahatula difuma mu tshianza tshia Muena Ejipitu, wakamushiha ne difuma diandi. Au mmalu akenza Benaya, muana wa Yehoyada, wakadi ne dina dinene munkatshi mua bantu banene basatu; yeye wakatamba bantu makumi asatu butumbi, kadi yeye kakalua munene bu bantu aba basatu bakadi ku mpala; Davidi wakamuteka ku mutu kua bena nvita bakadi ha buihi nʼandi. Aba mbena bukitu ba munkatshi mua bena nvita: Asahele, muanʼabo ne Yoaba, Elehanana, muana wa Dodo wa mu Beteleheme, Shamota, Muena Halola, Helese, Muena Pelona, Ila, muana wa Ikishe, Muena Tekoa, Abiezê, Muena Anatota, Sibekai, Muena Husha, Hai, Muena Ahoa, Mahalai, Muena Netofa, Helede, muana wa Bâna, Muena Netofa, Itai, muana wa Libai wa mu Gibea, wa bana ba Benyamina, Benaya, Muena Pilatona, Hulai, wa ku misulu ya Gâsha, Abiele, Muena Âba, Azemaweta, Muena Bahaluma, Eliaba, Muena Shâlabona, bana balume ba Hashema, Muena Gizona, Yonatana, muana wa Shage, Muena Halala, Ahiama, muana wa Sakâ, Muena Halala, Elifala, muana wa Ula, Hefê, Muena Mekelata, Ahiya, Muena Pelona, Heselo, Muena Kâmele, Nâlai, muana wa Ezebai, Yoele, muanʼabo ne Natana, Mibehâ, muana wa Hageli, Seleke, Muena Amona, Nahalai, Muena Belota, muambudi wa ngabu wa Yoaba, muana wa Seluya, Ila, Muena Yitela, Galeba, Muena Yitela, Uliya, Muena Hiti, Zabada, muana wa Ahalai, Adina, muana wa Shiza, Muena Lubena, mukelenge wa mu Bena Lubena, ne bantu makumi asatu bakadi nʼandi, Hanuna, muana wa Mâka, ne Yoshafata, Muena Mitena, Uziya, Muena Ashetelata, Shama ne Yiyele, bana ba balume ba Hotama, Muena Aloê, Yediele, muana wa Shimeli, ne Yoha muanʼabo, Muena Tiso, Eliele, Muena Mahawa, ne Yelibai ne Yoshawia ne bana ba balume ba Elenâma, ne Yitema, Muena Moaba, Eliele ne Obeda ne Yâsiele, Muena Mesobaya. Aba mbantu bakatua kudi Davidi ku Sikelaga hakadiye musokome bualu bua Shaula, muana wa Kishi; bakadi munkatshi mua bena bukitu bandi, bakadi bakuatshisha bandi mu nvita. Bakadi batuadi ba mata a mikete, bakamanya mua kuela mabue ne tshianza tshia balume ne tshia bakashi, bakamanya mua kuela mata abo nunku kabidi; bakadi bana babo ne Shaula, Bena Benyamina. Ahiezê wakadi kapitene kabo; hashishe Yoasha, ne bana balume ba Shemâ, Muena Gibea, ne Yeziele ne Pelete, bana balume ba Asemaweta, ne Belaka ne Yehu, Muena Anatota, ne Yishemaya, Muena Gibeona, muena bukitu wa munkatshi mua bantu makumi asatu ne ku mutu kua bantu makumi asatu, ne Yelemiya ne Yahaziele ne Yohanana ne Yozabada, Muena Gedela, ne Eluzai ne Yelimota ne Bealeya ne Shemaliya ne Shefataya, Muena Halufa, ne Elekana ne Yishiya ne Azalele ne Yoezê ne Yashobeama, Bena Kola, ne Yoela ne Zebadaya, bana ba Yelohama wa mu Gedô. Bena Gada bakuabo bakaya kudi Davidi ku musoko wa lumbu wa mu tshihela, bena bukitu bakayishibua malu onso a nvita, bakamanya mua kuluangana ne ngabu ne mafuma; mpala yabo yakadi bu mpala ya nyama ya ntambue, bakamanya mua kunyema lubilu bu ntole ya mu mikuna; Ezê wakadi ha mutu habo, Obadaya muibidi, ne Eliaba muisatu, Mishemana muinai, ne Yelemiya muitanu, ne Atai muisambombo, ne Eliele wa muanda mutekete, ne Yohanana wa muanda mukulu, ne Elezabada wa tshitema, Yelemiya wa dikumi, Makebanai wa dikumi ne umue. Aba mba mu bana balume ba Gada bakadi tupitene tua masalayi; wakatamba buhuekele wakadi ku mutu kua bantu lukama; wakatamba bunene wakadi ku mutu kua bantu tshinunu. Aba mbantu bakasabuka dishiya dia Yadene mu ngondo wa kumudilu hakadi musulu mûle muhatuke mu mielelu yau; bakihata bantu bonso bakadi mu bibanda ku esete ne ku wesete. Bantu ba Benyamina ne ba Yuda bakalua ku musoko wa lumbu wa Davidi. Davidi wakahatuka bua kusambakena nʼabo, wakabambila ne, Bulualua kundi ne ditalala bua kukuatshishangana neanyi, mutshima wanyi neunvuangane ne mitshima yenu; kadi bulualua bua kuntangila tshitungu kudi bena lukuna banyi, hashishe Nzambi wa batatu betu atangile bualu ebu, anuhele, bualu bua tshiena ne bualu bubi mu bianza bianyi. Hashishe Nyuma wakatulukila Amasai, wakadi ku mutu kua bantu makumi asatu, yeye wakamba ne, Tudi bantu bebe, Davidi; tudi ku luseke luebe, wewe muana wa Yishai! Ditalala, ditalala dikale kûdi, ditalala dikale kudi bakuatshishi bebe! Bualu bua Nzambi webe udi ukukuatshisha. Hashishe Davidi wakabitabusha, wakabavuisha tupitene tua masalayi andi makuabo. Bakuabo ba Bena Manashe bakalua kudi Davidi hakayeye ne Bena Peleshete bua kuluangana ne Shaula; kadi bobo kabakabakuatshisha nansha; bualu bua bakelenge ba Bena Peleshete hakamanyabo bualu ebu bakabatuma kuabo, bamba ne, Yeye neaye kudi mukelenge wandi Shaula bua kufueye mioyo yetu kudiye. Hakadiye uya ku Sikelaga, bakuabo ba Bena Manashe bakalamata kudiye, Adena ne Yozabada ne Yediele ne Mikaele ne Yozabada ne Elihu ne Siletai, tupitene tua binunu bia bantu ba Manashe. Bobo bakahitshisha Davidi kudi bisumbu bia bena tshinyangu; bualu bua buonso buabo bakadi bena bukitu, bakadi tupitene tua masalayi. Bantu bakalua kudi Davidi ku difuku ku dituku bua kunukuatshisha; bakalua tshisumbu tshinene tshia masalayi bu misumba ya Nzambi. Ebu mbungi bua bakadi ku mutu kua bena nvita bakalua kudi Davidi mu Hebelone bua kukudimunabo bukelenge bua Shaula kudiye bu muakadi dî dia Yehowa. Ba munkatshi mua Bena Yuda bakadi bambila ngabu ne mafuma bakadi bena nvita binunu bisambombo ne nkama muanda mukulu. Ba munkatshi mua Bena Shimeona bena nvita ba bukitu bakadi binunu muanda mutekete ne lukama. Ba munkatshi mua Bena Lewi binunu binai ne nkama isambombo. Yehoyada wakadi muenyampala wa mu nsubu wa Alona; bantu binunu bisatu ne nkama muanda mutekete bakadi nʼandi, ne Sadoka, nsongalume muena bukitu, ne ba mu nsubu wa tatu wandi bakadi tupitene makumi abidi ne tubidi. Ba munkatshi mua Bena Benyamina, bana babo ne Shaula, binunu bisatu; bualu bua diambedi bungi buabo bakalamata kudi Shaula. Ba munkatshi mua Bena Efelayima, bena nvita ba bukitu, bantu ba butumbi mu nsubu ya batatuʼabo binunu makumi abidi ne nkama muanda mukulu. Ba munkatshi mua tshituha tshia tshisamba tshia Manashe binunu dikumi ne muanda mukulu bakadi ne menʼabo mafunda bua kusungulabo Davidi mukelenge. Ba munkatshi mua Bena Yisakâ, bakamanya mua kujingulula malu a tshikondo atshi, bua kumanyabo malu akadi Bena Isalele ne bua kuenza, bakadi nkama ibidi ku mutu kuabo; bana babo bonso bakalonda mikenji yabo. Ba munkatshi mua Bena Zebuluna bakadi ne bukole bua kuluangana nvita mu musumba, bakamanya mua kuasa mualu wa nvita ne bintu bia nvita bionso, bakadi binunu makumi atanu; bakamanya mua kuluangana bimpe, kabakadi ne mitshima ibidi. Ba munkatshi mua Bena Nafatale bakadi tupitene tshinunu, ne bantu binunu makumi asatu ne muanda mutekete bambudi ba ngabu ne mafuma. Ba munkatshi mua Bena Dana bakamanya mua kuasa mualu wa nvita bakadi binunu makumi abidi ne muanda mukulu ne nkama isambombo. Ba munkatshi mua Bena Ashê bakamanya mua kuluangana nvita mu musumba ne mua kuasa mualu wa nvita bakadi binunu makumi anai. Dishiya dia Yadene ba Bena Lubena ne ba Bena Gada ne ba mu tshituha tshia tshisamba tshia Bena Manashe bakadi binunu lukama ne makumi abidi bakadi ne bintu bia nvita bionso. Bantu aba bonso, bena nvita bakamanya mua kuasa mualu wa nvita, bakatua ne mitshima mitoke ku Hebelone bua kuhingishabo Davidi mu bukelenge bua Isalele mujima; ne bonso bakuabo ba Isalele bakadi ne mutshima umue bua kuhingisha Davidi mu bukelenge. Bakashala ne Davidi matuku asatu, bakadia ne bakanua nʼandi; bualu bua bana babo bakamana kubalongoluela bia kudia. Bakadi ha buihi nʼabo tô ne ku Yisakâ ne Zebuluna ne Nafatale bakatua ne bia kudia ha nyima ha nyama ya mpunda ne ya tumelo ne ya mpunda mikuabo, ne ya ngombe, bintu bia kudia bia bukula ne bia nfigi ne bia tumuma tukese ne bia nvinyo ne bia manyi ne ngombe ne mikoko ya bungi; bualu bua disanka diakadi mu Isalele. Davidi wakahunga dî ne tupitene tua bantu tshinunu ne tua bantu lukama ne muntu yonso wakadi ku mutu kua bantu bakuabo. Davidi wakambila Bena Isalele bonso ne, Binuelangana meji ne mbimpe, ne biasua Yehowa Nzambi wetu nunku, tubikile bana betu bonso badi bashala mu nseke yonso ya buloba bua Isalele ne bakuidi ne Bena Lewi badi mu misoko yabo ne ku mpenge ya misoko yabo, badisangishe kutudi; tuye bietu, tuangate mushete wa Nzambi wetu, tulue nʼau munkatshi muetu; bualu bua tuetu katuakûkeba mu matuku a Shaula. Bantu bonso bakamba ne, Netuenze nunku; bua bualu ebu buakadi buimpe ku mesu kuabo. Nunku Davidi wakabikila Bena Isalele bonso hamue ku Shihô, kasulu kakese ka ku luseke lua Ejipitu tô ne ku tshibuelelu tshia Hamata, bua kuangatabo mushete wa Nzambi ku Kîyata-yalima. Davidi ne Bena Isalele bakaya ku Bâla, udi Kîyata-yalima mene, ku luseke lua Yuda, bua kuangatabo mushete wa Nzambi, udi mushikame ku mutu kua bakeluba kudibo babikila Dina dia Yehowa. Bakateka mushete wa Nzambi ha dikalu dihia-dihia, bakafuma nʼau mu nsubu wa Abinadaba; Uza ne Ahio bakendesha dikalu. Davidi ne Bena Isalele bonso bakimba misambu ne bisanji ne nzenze ne nkumbi ne makasa ne mpungi ne bukole buabo buonso. Hakafikabo ku tshihehuidi tshia Kidona, Uza wakolola tshianza tshiandi bua kukuateye mushete; bualu bua ngombe yakadishinda hanshi. Tshiji tshia Yehowa tshiakatema kudiye, yeye wakamushiha bualu bua yeye wakolola tshianza tshiandi bua kulengeye mushete; yeye wakafuilaku ku mpala kua Yehowa. Davidi wakafua tshiji bualu bua Yehowa wakenzela Uza nunku; yeye wakabikila muaba au ne, Pelese-uza tô ne ku dituku edi. Davidi wakatshina Nzambi dituku adi, wakamba ne, Nenye ne mushete wa Nzambi kuanyi bishi? Nunku Davidi kakaya ne mushete wa Nzambi ku musoko wa Davidi, kadi wakasesuka, wakaya nʼau ku nsubu wa Obeda-edome, Muena Giti. Mushete wakashala kudi ba mu nsubu wa Obeda-edome ngondo isatu; Yehowa wakavudishila ba mu nsubu wa Obeda-edome ne bintu biabo bionso disanka. Hilama, mukelenge wa Tulo, wakatuma ba-messager kudi Davidi, ne mitshi ya cèdre ne bena tushola ne bena mabaya bua kumuashilabo nsubu. Davidi wakamanya ne, Nzambi wakunjadika mukelenge ku mutu kua Bena Isalele; bualu bua bukelenge buandi buakadi bubandishibue kulu bua bantu bandi Bena Isalele. Davidi wakabaka bakashi bakuabo mu Yelushalema; Davidi wakalela bana ba balume ne bana ba bakashi bakuabo. Aba mbana bakaleleye mu Yelushalema: Shamua ne Shobaba ne Natana ne Solomo ne Yibehâ ne Elishua ne Elepeleta ne Noga ne Nefege ne Yafia ne Elishama ne Bêleyada ne Elifelete. Hakunvua Bena Peleshete lumu ne, Bakuela Davidi manyi ha mutu bua kuikaleye mukelenge wa Bena balele bonso, Bena Peleshete bonso nakaya kukeba Davidi; hakunvua Davidi lumu elu, yeye wakaya bua kuluangana nʼabo. Bena Peleshete hakamana kuhaula misoko ya mu tshibanda tshia Bena Lefa. Davidi wakebesha Nzambi ne, Nye bua kuluangana ne Bena Peleshete, anyi? Wewe neubafile mu tshianza tshianyi, anyi? Yehowa wakamuambila ne, Uye biebe, bualu bua meme nembafile mu tshianza Nunku bobo bakafika ku Bâla-pelasima; Davidi wakabashihelaku. Davidi wakamba ne, Nzambi wakahatuka kudi bena lukuna banyi bu mudi mai ahatuka. Nunku badi babikila muaba au ne, Bâla-pelasima. Bakashiyaku mpingu yabo; Davidi wakela mukenji wandi, bakayosha ne kahia. Bena Peleshete wakahaula misoko ya mu tshibanda kabidi. Davidi wakebesha Nzambi kabidi; Nzambi wakamuambila ne, Kuyi, kubalondi; usesuke kudibo, yila kudibo ku luseke lua mitshi ya mûrier. Hashishe haunvua tshiona mu mitu ya mitshi ya mûrier, uluangane nʼabo; bualu bua Nzambi wakadianjila ku mpala kuebe bua kushiheye musumba wa Bena Peleshete. Davidi Wakenza muakamuambila Nzambi; bakashiha musumba wa Bena Peleshete ku Gibeona tô ne ku Gezê. Lumu lua Davidi tuakamuangalaka ku maloba onso; Yehowa wakavuisha ba mu bisamba bionso ditshina bua bualu buandi. Davidi wakibaka nsubu mu musoko wa Davidi; wakalongolola muaba wa kuteka mushete wa Nzambi, wakashimikaku ntenta wa kûteka. Hashishe Davidi wakamba ne, Anu Bena Lewi badi ne bua kutuala mushete wa Nzambi; bualu bua Yehowa wakabasungila bua kutualabo mushete ne bua kumukuatshilabo mudimu tshiendelele. Davidi wakabikila Bena Isalele bonso ku Yelushalema bua kuangata mushete wa Yehowa, balue nʼau ku muaba wakaulongolueleye. Davidi wakasangisha bana balume ba Alona ne Bena Lewi: ba bana ba Kohata, Uliele mukelenge, ne bana babo lukama ne makumi abidi; ba bana ba Melali, Asaya mukelenge wabo, ne bana babo nkama ibidi ne makumi abidi; ba bana ne bana babo lukama ne makumi asatu; ba bana balume ba Elisafana, Shemaya mukelenge wabo, ne bana babo nkama ibidi; ba bana ba Hebelone, Eliele mukelenge wabo, ne bana babo makumi muanda mukulu; ba bana ba Uziele, Aminadaba mukelenge wabo, ne bana babo lukama ne dikumi ne babidi. Davidi wakabikila Sadoka ne Ebeyatâ bakuidi, ne Bena Lewi ne miele ne Asaya ne Yoele ne Shemaya ne Eliele ne Aminadaba, wakabambila ne, Nuenu nudi ku mutu kua nsubu ya batatu ba mu nsubu ya Bena Lewi; nudijidile ne nuenu ne bana benu, bua nuenu nulue ne mushete wa Yehowa, Nzambi wa Isalele, ku muaba unakûlongoluela. Bualu bua nuenu kanuakautuala diambedi, Yehowa Nzambi wetu wakahatuka kutudi bua kukukengesha, bualu bua tuetu katuakakeha disua diandi mu mukenji eu. Nunku bakuidi ne Bena Lewi bakadijidila bua kuluabo ne mushete wa Yehowa, Nzambi wa Isalele. Bena Lewi bakatuala mushete wa Nzambi ha maha abo ne mitshi, bu muakamba Mose bu muakadi dî dia Yehowa. Davidi wakambila wakadi ku mutu kua Bena Lewi bua kusunguleye bimbi ba misambu munkatshi mua bana babo ne bintu bia kuimba nʼabi misambu, nzenze ne bisanji ne biamu bia kukumakasha, bua kuimbabo misambu ne dî dinene dia disanka. Nunku Bena Lewi bakasungula Hemana, muana wa Yoele; ne ba bana babo, Asafa, muana wa Belekiya; ne ba bana ba Melali, Etana, muana wa Kushaya; ne bana babo ba mu mulongo muibidi, Zekâya ne Bena ne Yaziele ne Shemilamota ne Yehiele ne Uni ne Eliaba ne Benaya ne Mâseya ne Matitiya ne Elifelehu ne Mikeneya ne Obeda-edome ne Yiele, balami ba ku bibi. Nunku bakasungula bimbi ba misambu, Hemana ne Asafa ne Etana bua kuimbabo bikole ne biamu bia mitaku bia kukumakasha; ne Zekâya ne Aziele ne Shemilamota ne Yehiele ne Uni ne Eliaba ne Mâseya ne Benaya bakadi ne nzenze bua kuimbabo tshimbidi tshia Alamota; ne Matitiya ne Elifelehu ne Mikeneya ne Obeda-edome ne Yiele ne Azazaya bakadi ne bisanji bua kuimbabo tshimbidi tshia Sheminita, bua kubishabo misambu. Kenaniya, mukelenge wa Bena Lewi, wakadi ku mutu kua bimbi ba misambu; yeye wakabayisha mua kuimba bualu bua yeye wakadi ne lungenyi elu. Belekiya ne Elekana bakadi balami ba bibi bia nsubu wakadi mushete. Shebanya ne Yoshafata ne Netanele ne Amasai ne Zekâya ne Benaya ne Eliezê bakuidi bakela mpungi ku mpala kua mushete wa Nzambi; Obeda-edome ne Yehiya bakadi balami ba bibi bia nsubu wakadi mushete. Nunku Davidi ne bakulu ba mu Isalele ne tupitene tua binunu bia bantu bakaya bua kuangatabo mushete wa tshihungidi tshia mei a Yehowa ku nsubu wa Obeda-edome ne disanka dinene. Hashishe bakakuatshisha Nzambi Bena Lewi bakadi batuala mushete wa tshihungidi tshia mei a Yehowa, bobo bakamushihela balume ba ngombe muanda mutekete ne bimpanga muanda mutekete. Davidi wakadi uluata tshilulu tshia lin muimpe, ne Bena Lewi bonso bakadi batuala mushete ne bimbi ba misambu ne Kenaniya, mulombodi wa bimbi ba misambu, bakaluata lin muimpe; Davidi wakadi uluata efoda wa lin kabidi. Nunku Bena Isalele bonso bakalua ne mushete wa tshihungidi tshia mei a Yehowa bela mbila ne tshiona tshikole tshia nshiba ne mpungi ne tshia biamu bia kukumakasha, bakadi bimba nzenze ne bisanji ne dî dikole. Hakaluabo ne mushete wa tshihungidi tshia mei a Yehowa ku musoko wa Davidi, Mikala, muana wa bakashi wa Shaula, wakatangila ha disoso dia nsubu, ne hakamoneye Davidi uja maja utuhika, yeye wakamulengulula mu mutshima wandi. Bakalua ne mushete wa Nzambi, bakauteka munkatshi mua ntenta wakadi Davidi mûshimikile; bakafila milambu ya kuosha ne ya kutuisha nʼai ditalala ku mpala kua Nzambi. Hakashikisha Davidi kufila milambu ya kuosha ne ya kuvuisha nʼai ditalala, yeye wakavudishila bantu disanka mu dina dia Yehowa. Yeye wakaha muntu yonso wa mu Isalele ne balume ne bakashi mutanda wa bidia ne tshihesa tshia munyinyi ne tshisumbu tshia tumuma tûme. Yeye wakasungula Bena Lewi bakuabo bua kuenzelabo mudimu ku mpala kua mushete wa Yehowa, ne bua kutendekenabo ne bua kusakidilabo ne bua kutumbishabo Yehowa, Nzambi wa Isalele; Asafa wakadi ku mutu kuabo, ne ku nyima kuandi kuakadi Zekâya ne Yiele ne Shemilamota ne Yehiele ne Matitiya ne Eliaba ne Benaya ne Obeda-edome ne Yiele, bakadi ne nzenze ne bisanji; Asafa wakimba biamu bia kukumakasha bikole; Benaya ne Yahaziele bakuidi bakela mpungi misangu yonso ku mpala kua mushete wa tshihungidi tshia mei a Yehowa. Dituku adi Davidi wakadianjila kuela mukenji bua kusakidilabo Yehowa kudi Asafa ne bana babo ne musambu eu, ne, Nusakidile bienu Yehowa, nubikile dina diandi, numanyishe bienzedi biandi munkatshi mua bukua bantu. Numuimbile misambu, numuimbile misambu ya kumutumbisha nʼai, nuyikilangane bua malu andi onso a kukema. Nutumbile mu dina diandi dia tshijila; mitshima ya badi bakeba Yehowa isanke. Kebai bienu Yehowa ne bukole buandi, kebai mpala wandi matuku onso. Nuvuluke bienu bienzedi bia kukema biakuenzeye, malu andi a kukema, ne dilumbulula dia mukana muandi, nuenu tunkanunuma tua Isalele muntu wandi, nuenu bana ba Yakoba, bantu bakasunguleye. Yeye udi Yehowa Nzambi wetu; dilumbulula diandi diakenjibua mu buloba buonso. Udi uvuluka tshihungidi tshiandi kashidi, ndî mene diakajadikeye tô ne ku bikondo tshinunu, tshihungidi tshiakahungeye ne Abalahama, mmutshihu wandi wakaditshiheye kudi Isaka. Wakaujadika kudi Yakoba bu mukenji ne kudi Isalele bu tshihungidi tshia tshiendelele. Wakamba ne, Nenkuhe buloba bua Kanâna, bua kuikalabu tshituha tshia nuenu kuhiana. Hakadibo anu bantu banya-banya bua bungi buabo, e, hakadibo bantu banya-banya be, ne hakashikamabo mu buloba bu benyi; hakendakanabo ku tshisamba ne ku tshisamba, ne ku bukelenge bumue tô ne kudi bantu bakuabo ba bende, kakitabusha bua muntu umue kubenzela bibi. E, wakabela bakelenge bualu buabo. Wakamba ne, Kanulengi bantu banyi bedibue manyi ha mutu tshianga, kanuenzedi baprofete banyi bibi. Nuimbile Yehowa musambu, nuenu bonso ba ha buloba! Nuambile bantu lumu lua luhandu luandi ku dituku ku dituku. Nuambile ba munkatshi mua bantu ba bende butumbi buandi, numanyishe ba munkatshi mua bantu bonso malu a kukema akenzeye! Bualu bua Yehowa udi munene, budiye nʼabu mbua kutumbishibua bikole; budiye nʼabu mbua kunemeshibua ha mutu ha nzambi yonso ya hatuhu. Bualu bua nzambi yonso ya bantu ba bende idi mpingu; kadi Yehowa wakafuka bia mu diulu. Butumbi ne buneme bidi ku mpala kuandi; bukole ne disanka bidi mu tshitendelelu tshiandi. Nuenu ba mu biota bia bantu, nuambike Yehowa malu andi, nuambike Yehowa butumbi ne bukole. Nuambike Yehowa butumbi budi buakanangane ne dina diandi. Luai ne mulambu kudiye, luai ku mpala kuandi! Tendelelai Yehowa baluate bivualu bia tshijila. Zakalai ku mpala kuandi, nuenu bonso ba ha buloba. E, buloba budi bujadikibue, kabuena mua kunyungishibua. Diulu dikale ne disanka, buloba busanke kabidi. Bambe munkatshi mua bisamba ne, Yehowa udi ukokesha! Mai manene enze tshiona, ne bionso bidimu bibile; budimi bua mu mpata busanke, ne bionso bidimu bisanke kabidi! Hashishe mitshi yonso ya muitu neyimbe misambu bua disanka ku mpala kua Yehowa, bualu bua yeye udi ulua kulumbuluisheye buloba. Nusakidile Yehowa, bualu bua yeye udi muimpe; bua luse luandi ludi lujalame tshiendelele! Nuambe ne, Utusungile, wewe Nzambi wa luhandu luetu, utûmushe munkatshi mua bisamba bia bende bua kutusangisha hamue, bua tuetu tusakidile dina diebe dia tshijila, ne bua tutumbile mu butumbi buebe. Yehowa, Nzambi wa Isalele, avudishibue disanka, ku tshibangidilu tô ne kunshikidilu! Bantu bonso bakamba ne, Amen; bakatumbisha Yehowa. Yeye wakashiya Asafa ne bana babo ku mpala kua mushete wa tshihungidi tshia mei a Yehowa, bua kuenzelabo mudimu ku mpala kua mushete bikondo bionso bu muakadi mudimu wa buatshia-buatshia, ne Obeda-edome ne bana babo makumi asambombo ne muanda mukulu, ne Obeda-edome, muana wa Yedutuna, ne Hosa bua kuikalabo balami ba bibi. Wakashiya Sadoka muakuidi ne bana babo bakuabo bakuidi ku mpala kua nsubu wa Yehowa ku mutu kua mukuna wa Gibeona, bua kufilabo milambu ya kuosha ha tshioshelu ku dituku ku dituku dinda ne dilolo, bu muakafundabo mikenji ya Yehowa yakeleleye Bena Isalele. Hemana ne Yedutuna bakadi nʼabo ne bakuabo bakadi basungudibue bakadi ne mena abo mafunda bua kusakidilabo Yehowa bualu bua luse luandi ludi lujalame tshiendelele; Hemana ne Yedutuna bakadi nʼabo ne mpungi ne biamu bia kukumakasha bua kulombolabo misambu ne bua kuimbabo nʼabi misambu ya Nzambi; bana balume ba Yedutuna bakadi ku bibi. Bantu bonso bakamuangalaka muntu ne muntu ku nsubu wandi; Davidi wakahingana bua kuvudishileye ba mu nsubu wandi disanka. Hakadi Davidi mushikame mu nsubu muandi, Davidi wakambila Natana, muprofete ne, Mona, meme ndi mushikame mu nsubu wa mitshi ya cèdre, kadi mushete wa tshihungidi tshia mei a Yehowa udi mushale mu ntenta. Natana wakambila Davidi ne, Wenze malu onso adi mu mutshima webe; bualu bua Nzambi udi nʼebe. Butuku abu mene dî dia Nzambi diakalua kudi Natana diamba ne, Ya, Wambile Davidi muntu wanyi ne, Yehowa udi Wamba ne, Wewe kuena ungibakile nsubu bua meme kushikamamu nansha; bualu bua meme tshiena muanji kushikama mu nsubu katshia nahatuka ne Bena Isalele tô ne ku dituku edi, kadi nakendakana ku ntenta ne ntenta ne ku tshisombelu ne tshisombelu. Mu miaba yonso inakendakana ne Bena Isalele bonso nakambila umue wa balumbuluishi bonso ba Bena Isalele unaka mbila bua kulameye bantu banyi ne, Wewe kuakungibakila nsubu wa cèdre bualu kai, anyi? Nunku newambile muntu wanyi Davidi ne, Yehowa wa mu diulu udi wamba ne, Nakakubikila mu mpangu ya mikoko hawakadi ulama mikoko, nakakuvuisha mukelenge ku mutu kua bantu banyi Bena Isalele; nakadi nʼebe kuonso kuwakaya, nakashiha bena lukuna bebe bonso ku mpala kuebe; nenkuvuishe dina dinene bu mena a badi ne butumbi hanshi ha buloba. Nensunguile bantu banyi Bena Isalele muaba, nembajadike bimpe, bua bobo bashikame mu muaba wabo, kabena bumushibue kabidi; bena tshimbambila kabena babahaula kabidi bu muakenzabo diambedi; bu munakenza ku dituku dinakela mukenji wanyi bua balumbuluishi bikale ku mutu kua bantu banyi Bena Isalele, ne nempite bantu bonso bakadi nʼebe lukuna bukole. Ndi nkuambila kabidi ne, Yehowa neakuibakile nsubu. Hakumbana matuku ebe bua wewe kuya kudi bankambua bebe, nenjadike umue wa bana bebe balume badi bakulonda ku nyima; nenjadike bukelenge buandi. Yeye neangibakile nsubu, nenjadike nkuasa wandi wa bukelenge tshiendelele. Meme nengikale tatu wandi, yeye neikale muana wanyi; tshiena ngumusha luse luanyi lujalame kudiye bu munakalûmusha kudi wakadi ku mpala kuebe; luidi nemmujadike mu nsubu muanyi ne mu bukelenge buanyi tshiendelele; nkuasa wandi wa bukelenge neajadikibue tshiendelele. Nunku Natana wakambila Davidi mei â onso, wakamuawila tshikena kumona etshi tshionso. Hashishe mukelenge Davidi wakabuela mu nsubu, wakashikama ku mpala kua Yehowa, wakamba ne, Yehowa Nzambi, meme nganyi ne ba mu nsubu muanyi mbanganyi bua wewe wakulua nʼanyi tô ne ku dituku edi? Nzambi, bualu ebu buakadi bukese ku mpala kuebe; kadi wewe wakuamba bua nsubu wa mundi webe musangu mule, wewe wakuntumbisha bu muntu munene, wewe Yehowa Nzambi. Davidi udi mumanye mua kukuambila mei kai makuabo bua butumbi buwakuvuisha muntu webe? Bualu bua wewe udi mumanye muntu webe. Yehowa, bua muntu webe, ne bua malu adi mu mutshima webe, wewe wakuenza malu â onso manene bua kumumanyisha malu â onso. Yehowa, kakuena mukuabo bu wewe, kakuena Nzambi mukuabo ku mpala kuebe, bu mudi malu onso atuakunvua ku matshu etu. Tshisamba kai tshikuabo tshia hanshi ha buloba tshidi bu bantu bebe Bena Isalele, tshiakaya Nzambi kudihikula bu bantu bandi mene, bua kubavuisha dina dinene ku malu manene ne a kukema hawakihata bisamba bikuabo ku mpala kua bantu bebe bawakahikula mu Ejipitu? Bualu bua wewe wakasungula bantu bebe Bena Isalele bua kubavuisha bantu bebe tshiendelele; ne wewe, Yehowa, wakalua Nzambi wabo. Yehowa, dî diwakamba bua mundi webe ne bua nsubu wandi, dijadikibue tshiendelele; wenze bu muwakuamba. Dina diebe dijadikibue, ditumbishibue tshiendelele, ne, Yehowa wa misumba udi Nzambi wa Isalele, Nzambi mene kudi Bena Isalele; ne nsubu wa Davidi muntu webe udi mujadikibue ku mpala kuebe tshiendelele. Bualu bua wewe, Nzambi wanyi, wakumanyisha muntu webe ne, Nenkuibakile nsubu; nunku muntu webe wakadi ne dianyisha bua kutendeleleye ku mpala kuebe. Katataka, Yehowa, wewe udi Nzambi ne wakalaya muntu webe bualu ebu buimpe; katataka uvudishile nsubu wa muntu webe disanka, bua kushaleye ku mpala kuebe tshiendelele; bualu bua tshiudi uvudishile disanka, Yehowa, netshikale ne disanka tshiendelele. Ku nyima kua malu â Davidi wakaluangana ne Bena Peleshete, wakabahita bukole, wakanyenga Gata ne misoko yakadi ha buihi mu bianza bia Bena Peleshete. Wakahita Bena Moaba bukole; Bena Moaba bakatua bahika ba Davidi, bakafila milambu kudiye. Davidi wakahita Hadadezê, mukelenge wa Zoba, bukole tô ne ku Hamata, hakayeye bua kujadika bukelenge buandi kukala kua musulu wa Pelata. Davidi wakamunyenga tshinunu tshia makalu ne bena nvita binunu muanda mutekete bakadi benda ha nyima ha tubalu ne bena nvita binunu makumi abidi bakadi benda hanshi; Davidi wakakosa tubalu tuabo tua makalu mijilu yatu ya bikono, kadi wakasungula tukuabo tuakakumbana ku makalu andi lukama. Hakafuma Bena Sulia ku Damaseke bua kukuatshishabo Hadadezê, mukelenge wa Zoba, Davidi wakashiha Bena Sulia binunu makumi abidi ne bibidi. Hashishe Davidi wakateka masalayi andi mu Damaseke wa mu Sulia; Bena Sulia bakatua bahika ba Davidi, bakafila milambu kudiye. Yehowa wakaha Davidi bakole bua kutamba bena lukuna bandi kuonso kuakayeye. Davidi wakanyenga ngabu ya or yakadi nʼai bantu ba Hadadezê, wakalua nʼai ku Yelushalema. Davidi wakanyenga biamu bia mitaku bia bungi ku Tibehata ne ku Kunu, misoko ya Hadadezê; Solomo wakatula nʼabi tshiowelu tshia tshiamu tshia mitaku ne makunshi ne mpanza ya tshiamu tshia mitaku. Hakunvua Tou, mukelenge wa Hamata, ne, Davidi wakashiha masalayi onso a Hadadezê, mukelenge wa Zoba, yeye wakatuma Hadolama muanʼandi mulume kudi mukelenge Davidi bua kumuela muoyo, ne bua kumuvudishileye disanka bualu bua yeye wakadi muluangane ne Hadadezê, wakamuhita bukole; bualu bua Hadadezê wakadi uluangana ne Tou; yeye wakalua ne mpanza ya mishindu yonso ya or ne ya argent ne ya tshiamu tshia mitaku. Davidi wakabijidila kudi Yehowa ne argent ne or biakanyengeye kabidi kudi bisamba bionso: kudi Bena Edome ne kudi Bena Moaba ne kudi Bena Amona ne kudi Bena Peleshete ne kudi Bena Amaleka. Bualu bukuabo kabidi, Abishai, muana wa Seluya, wakashiha Bena Edome binunu dikumi ne muanda mukulu mu Tshibanda tshia Luehu. Wakateka masalayi mu misoko ya Edome; Bena Edome bonso bakalua bahika ba Davidi. Yehowa wakaha Davidi bukole bua kutamba bena lukuna bandi kuonso kuakayeye. Davidi wakakokesha Bena Isalele bonso mu kulumbulula kuimpe ne mu buakane kudi bantu bandi bonso. Yoaba, muana wa Seluya, wakadi ku mutu kua masalayi andi onso; Yehoshafata, muana wa Ahiluda, wakadi mufundi wa malu a tshisamba; Sadoka, muana wa Ahituba, ne Abimeleke, muana wa Ebeyatâ, bakadi bakuidi; Shawesha wakadi secrétaire; Benaya, muana wa Yehoyada, wakadi ku mutu kua Bena Kelete ne Bena Pelete; bana balume ba Davidi bakadi tuhita ha buihi ne mukelenge. Ku nyima kua malu â Nahasha, mukelenge wa Bena Amona, wakafua, ne muanʼandi wakakokesha mu muaba wandi. Davidi wakamba ne, Nenfuile Hanuna, muana wa Nahasha, luse, bualu bua tatu wandi wakadi nʼanyi luse. Nunku Davidi wakamutumina ba-messager bua kumusamba bua lufu lua tatu wandi. Ba-messager ba Davidi bakafika ku buloba bua Bena Amona kudi Hanuna bua kumusamba. Kadi baminyampala ba Bena Amona bakambila Hanuna ne, Udi wela meji ne, Davidi udi utumbisha tatu webe bualu bua yeye wakutuma basambi aba kûdi, anyi? Bantu bandi kabakuluila bua kukebakeba ne bua kuhaula ne bua kutentekela buloba, anyi? Nunku Hanuna wakakuata bantu ba Davidi, wakababeya nsuki, wakabakosa bilulu biabo hankatshi ku mataku abo mene, wakabihata. Hashishe bantu bakuabo bakaya, bakamanyisha Davidi muakenzeleye bantu bandi. Yeye wakatuma bantu bua kusangakenabo nʼabo; bualu bua bantu bandi aba bakadi ne bundu bunene. Mukelenge wakabambila ne, Nushale ku Yeleko tô ne hamena nsuki yenu kabidi, hashishe nuhingane. Hakamona Bena Amona ne, Tuakadivuisha bu tshintu tshibi kudi Davidi, Hanuna ne Bena Amona bakatuma tshinunu tshia ntalanta ya argent bua kusumbabo makalu ne bena nvita badi benda ha nyima ha tubalu ku Mesopotamia ne ku Alama-mâka ne ku Zoba. Nunku bakasumba makalu binunu makumi asatu ne bibidi; ne mukelenge wa Mâka ne bantu bandi bakalua, bakashimika ntenta yabo ku mpala kua Medeba. Bena Amona bakadisangisha ku misoko yabo yonso bua kuluanganabo. Hakunvua Davidi lumu elu, yeye wakatuma Yoaba ne bena nvita bandi bonso ba bukitu. Bena Amona bakaluhuka, bakasa mualu wa nvita ku tshibuelelu tshia musoko; ne bakelenge bakalua kudibo bakadi ha buabo mu tshisuku. Hakamona Yoaba ne, Bakasa mualu wa nvita ku mpala kuandi ne ku nyima kuandi, yeye wakasungula bena bukitu ba munkatshi mua Bena Isalele bonso, wakasa mualu wa nvita kudi Bena Sulia. Wakafila Bena Isalele bakuabo mu bianza bia Abishai muanʼabo; bobo bakasa mualu wa nvita kudi Bena Amona. Yeye wakamba ne, Biampita Bena Sulia bukole, hashishe nuenu nulue kumatshisha; ne bianuhita Bena Amona bukole, hashishe nendue bua kunukuatshisha. Muikale ne dikima, tuikale balume mene bualu bua bana betu ne bua misoko ya Nzambi wetu; Yehowa enze malu adi mimpe ku mesu kuandi. Nunku Yoaba ne bantu bakadi ha buihi nʼandi bakasemena ha buihi ne Bena Sulia bua kuluanganabo nʼabo; bobo bakanyema ku mpala kuandi. Hakamona Bena Amona ne, Bena Sulia badi banyema, bobo kabidi bakanyema ku mpala kua Abishai, muanʼabo ne Yoaba, bakabuela mu musoko. Hashishe Yoaba wakahingana ku Yelushalema. Hakamona Bena Sulia ne, Tuakutambibua bukole kudi Bena Isalele, bobo bakatuma ba-messager bua kubikila Bena Sulia bakuabo bakadi dishiya dia musulu wa Pelata ne Shofaka, kapitene ka masalayi, a Hadadezê wakadi ku mutu kuabo. Bakamanyisha Davidi bualu ebu; yeye wakasangisha Bena Isalele bonso, wakasabuka dishiya dia Yadene, Wakafika kudibo, wakasa mualu wa nvita. Nunku hakasa Davidi mualu wa nvita kudi Bena Sulia, bobo bakaluangana nʼandi. Bena Sulia bakanyema ku mpala kua Bena Isalele; Davidi wakashiha Bena Sulia bakadi benda mu makalu binunu muanda mutekete ne binunu makumi anai bakadi benda hanshi; wakashiha Shofaka, kapitene ka masalayi, kabidi. Hakamona bantu ba Hadadezê ne, Tuakutambibua bukole kudi Bena Isalele, bakanvuangana ne Davidi, bakamukuatshila mudimu; Bena Sulia bakahidia kukuatshisha Bena Amona kabidi. Hashishe mu tshikondo tshidi bakelenge baluhuka bua kuluanganabo, Yoaba wakaya ne masalayi andi, wakahaula buloba bua Bena Amona, wakatshintshimika musoko wa Laba. Kadi Davidi wakashala mu Yelushalema. Yoaba wakahita Laba bukole, wakahaula musoko. Davidi wakangata tshifulu tshia butumbi ku mutu kua mukelenge wabo, walu dikisha bujitu buatshi bu ntalanta wa or, tshiakadi tshilengeshibue ne mabue a mushinga mukole; bakatshiteka ha mutu ha Davidi; bakalua ne bintu bia bungi biakanyengabo mu musoko. Yeye wakahatuka ne bantu bakadimu, wakabatuma ku mudimu ne scies ne nkasu ya biamu ne bisui. Davidi wakenzela ba mu misoko yonso ya Bena Amona nunku. Davidi ne bantu bandi bonso bakahingana ku Yelushalema. Ku nyima kua malu â Bena Peleshete ba mu Gezê bakabanga kuluangana; hashishe Sibekai, Muena Husha, wakashiha Sipai, umue wa bana balume ba nfiondo; bobo bakateketa. Bena Peleshete bakaluangana kabidi; Elehanana, muana wa Yaî, wakashiha Lami, muanʼabo ne Goleyata, Muena Gata; mulabi wa difuma diandi wakadi bu mutshi udibo bakuma nʼau bilulu. Nvita yakadi mu Gata kabidi, kuakadi muntu munene wakadi ne minu ne bana ba makasa makumi abidi ne binai, minu isambombo ku tshianza ne ku tshianza, ne bana ba makasa basambombo ku dikasa ne ku dikasa; wakaledibua kudi muntu wa nfiondo. Hakafuneye bulobo kudi Bena Isalele, Yonatana, muana wa Shimea, muanʼabo ne Davidi, wakamushiha. Bobo bakadi baledibue kudi muntu wa nfiondo wa mu Gata; bakashihibua ku tshianza tshia Davidi ne ku bianza bia bantu bandi. Satana wakimana ku mpala kua Bena Isalele, wakasonsola mutshima wa Davidi bua kubaleye Bena Isalele. Davidi wakambila Yoaba ne tuhita tua bantu ne, Yai bienu, nubale Bena Isalele ku Bê-sheba tô ne ku Dana; nulue kundi ne dî bua meme kumanya bungi buabo. Yoaba wakamba ne, Yehowa avudishe bantu bandi misangu lukama bu mudibo katataka; kadi, mukelenge wanyi, bobo kabena bantu bebe, anyi? Mukelenge wanyi udi musue bualu ebu bishi? Yeye udi musue kubuesha Bena Isalele mu bualu bubi bishi? Kadi dî dia mukelenge diakahita dî dia Yoaba bukole. Nunku Yoaba wakahatuka, wakaya ku nseke yonso ya buloba bua Isalele, Wakafika ku Yelushalema. Yoaba wakamanyisha Davidi bungi bua bantu bakabalabo. Bena Isalele bonso bakadi binunu tshinunu ne binunu lukama bakadi bena nvita; Bena Yuda bakadi binunu nkama inai ne binunu makumi muanda mutekete bakadi bena nvita. Kadi kabakabala Bena Lewi ne Bena Benyamina, bualu bua dî dia mukelenge diakatondesha Yoaba. Bualu ebu buakafikisha Nzambi munda; nunku yeye wakashiha Bena Isalele bakuabo. Davidi wakambila Nzambi ne, Nakuenza bibi hanakuenza bualu ebu; kadi katataka ndi nkusengelela ne, Ubuikidile bubi bua muntu webe; bualu bua nakuenza bualu buhote. Yehowa wakambila Gada, mumonyi wa malu wa Davidi, ne, Ya, Wambile Davidi ne, Yehowa udi wamba ne, Ndi nteka malu asatu ku mpala kuebe; usungule bumue buau bua meme kukuenzelabu. Nunku Gada wakalua kudi Davidi, wakamuambila ne, Yehowa udi wamba ne, Usungule bûdi musue: bua tshiole tshikale tô bidimu bisatu; anyi bua bena lukuna bakuhite bukole ngondo isatu ne miele yabo ya nvita; anyi bua muele wa Yehowa wikale mu buloba bu tshihuhu matuku asatu, ne muanjelo wa Yehowa ashihe bantu mu nseke yonso ya buloba bua Isalele. Nunku wele meji a dî dindi mua kuikala nʼadi bua kuambila wakuntuma. Davidi wakambila Gada ne, Ndi hankatshikatshi ha malu makole, ndi nkusengelela bua meme kudishinda mu bianza bia Yehowa, bualu bua luse luandi ludi lunene; kuitabushi bua meme kudishinda mu bianza bia bantu. Nunku Yehowa wakatumina Bena Isalele tshihuhu; Bena Isalele binunu makumi muanda mutekete bakafua. Nzambi wakatuma muanjelo ku Yelushalema bua kushiheye bantu bakadimu; ne hakambeye kushiha bantu, Yehowa wakamona, wakakudimuna mutshima wandi ku bualu ebu bubi; wakambila muanjelo wa lufu ne, Kuakushika, ukande tshianza tshiebe. Muanjelo wa Yehowa wakadi wimana ku tshihehuidi tshia Ônana, Muena Yebuse. Davidi wakabanduluka, wakamona muanjelo wa Yehowa muimane hankatshi ha diulu ne buloba ne muele wa nvita mu tshianza tshiandi tshiolola ha mutu ha Yelushalema. Hashishe Davidi ne bakulu baluate bilulu bikayabala bakatua mpala yabo hanshi. Davidi wakambila Nzambi ne, Ka meme eu wakuela mukenji bua kubala bantu. Meme mene nakenza bualu ebu bubi; kadi mikoko ei, yoyi yakenza tshinyi? Yehowa, ndi nkusengelela bua tshianza tshiebe tshikale kundi ne ku nsubu wa tatu wanyi; kadi katshikadi kudi bantu bebe bua bobo bikale ne tshihuhu etshi. Hashishe muanjelo wa Yehowa wakelela Gada mukenji bua kuambileye Davidi, bua Davidi kuya kuashila Yehowa tshioshelu ku tshihehudi tshia Ônana, Muena Yebuse. Nunku Davidi wakaya ku dî dia Gada diakambeye mu dina dia Yehowa. Ônana wakalukila, wakamona muanjelo, ne bana bandi balume banai bakadi nʼandi bakasokoma, Ônana wakadi uhehula blé. Hakalua Davidi kudi Ônana, Ônana wakamona Davidi, wakaluhuka ku tshihehudi, wakatua mpala wandi hanshi ku mpala kua Davidi. Hashishe Davidi wakambila Ônana ne, Umpe muaba wa tshihehuidi etshi, bua meme kuashilahu Yehowa tshioshelu; utshimpe ku mushinga muakane bua tshihuhu etshi tshikandikibue kudi bantu. Ônana wakambila Davidi ne, Utshiangate, mukelenge wanyi enze biandi malu adi mimpe ku mesu kuandi; mona, ndi nkuha ngombe ya mulambu wa kuosha ne mitshi ya mu tshihehuidi bua nkunyi ne blé bua mulambu wa bukula; ndi nkuha bionso. Davidi wakambila Ônana ne, Nansha. Nenkuhe mushinga udi muakane; bualu bua tshiena ngangatshila Yehowa bintu biebe, tshiena nfila mulamba undi tshiyi mufidile mushinga. Nunku Davidi wakaha Ônana nshekele ya or nkama isambombo bua muaba wandi. Davidi wakashilahu Yehowa tshioshelu, wakafilahu milambu ya kuosha ne ya kuvuisha nʼai ditalala, wakabikila dina dia Yehowa; yeye wakitaba ne kahia ka mu diulu ha mutu ha tshioshelu. Yehowa wakela muanjelo dî; yeye wakabuesha muele wandi wa nvita mu luhuhu. Hakamona Davidi ne, Yehowa wakitaba kundi ku tshihehudi tshia Ônana, Muena Yebuse, yeye wakafilaku milambu. Bualu bua nsubu wa kusambakena wa Yehowa wakasabo kudi Mose mu tshihela ne tshioshelu tshiandi biakadi ku mutu kua mukuna wa Gibeona mu tshikondo atshi. Kadi Davidi kakamanya mua kuyaku bua kuebesheye Nzambi bualu bua yeye wakadi utshina muele wa mata wa muanjelo wa Yehowa. Hashishe Davidi wakamba ne, Eu udi nsubu wa Yehowa Nzambi, etshi ntshioshelu tshia Bena Isalele. Davidi wakela mukenji wandi bua kusangishabo bantu bakadi bashikama mu buloba bua Isalele diambedi; wakasungula bahandi ba mabue bua kusongabo mabue a kuibaka nʼau ntempelo wa Nzambi. Davidi wakalongolola biamu bifike bia bungi bua kufulabo nʼabi misamadi ya kuenzabo nʼai bibi ne mabaya makuabo; wakasangisha biamu bia mitaku biakadibo kabayi bamanye mua kubala bujitu buabi; ne mitshi ya cèdre yakadi bungi buakadibo kabayi bamanye; bualu bua Bena Sidona ne Bena Tulo bakalua kudi Davidi ne mitshi ya cèdre ya bungi. Davidi wakamba ne, Muanʼanyi Solomo utshidi nsongalume udi mutekete, ne nsubu utudi tuibakila Yehowa udi ne bua kuikala muakane ne wa butumbi ku nseke yonso ya buloba; nunku meme nembange kusangisha bintu. Nunku Davidi wakasangisha bintu bia bungi diambedi yeye kayi muanze kufua. Hashishe yeye wakabikila Solomo muanʼandi, wakamuelela mukenji bua kuibakileye Yehowa, Nzambi wa Isalele, nsubu. Davidi wakambila Solomo muanʼandi ne. Bualu buakadi mu mutshima wanyi bua kuibaka nsubu mu dina dia Yehowa Nzambi wanyi. Kadi dî dia Yehowa diakalua kundi ne, Wewe wakamatshisha mashi a bungi hanshi, wakaluangana nvita ya bungi; wewe kuena ungibakila nsubu bua meme kutekamu dina dianyi nansha, bualu bua wewe wakamatshisha mashi a bungi hanshi ha buloba ku mesu kuanyi. Kadi mona, wewe neulele muana wa balume, neikale muena ditalala; nemmuhe ditalala kudi bena lukuna bonso badi bamunyunguluke; bualu bua dina diandi nedikale Solomo; nenvuishe ditalala ne dikisha mu buloba bua Isalele mu matuku andi. Yeye neibakile dina dianyi nsubu; yeye neikale muanʼanyi, meme nengikale tatu wandi; nenjadike nkuasa wa bukelenge buandi mu Isalele tshiendelele. Katataka, muanʼanyi, Yehowa ikale nʼebe; wikale ne diakalengele, wibakile Yehowa, Nzambi webe, nsubu bu muakuambeye bualu buebe. Kadi Yehowa akuhe lungenyi ne meji a kujingulula nʼau malu, akuteke ku mutu kua Bena Isalele; bua wewe kutumikila mikenji ya Yehowa, Nzambi webe. Hashishe wewe newikale ne diakalengele biwadimuka bua kutumikila mikenji ne mei biakambila Yehowa Mose bua Bena Isalele; wikale ne dikima ne mutshima mukole; kutshinyi, kukuatshiki buowa. Mona, mu kuhuekela kuanyi nakamana kulongoluela nsubu wa Yehowa binunu lukama lua ntalanta ya or ne binunu tshinunu bia ntalanta ya argent ne biamu bia mitaku ne biamu bifike bidibo kabayi bamanye mua kubala, bualu bua bidi bia bungi; nakalongolola mabaya ne mabue kabidi; wewe udi mumanye mua kusangishila bintu ha mutu habi. Bualu bukuabo kabidi, bena mudimu ba bungi badi nʼebe, bahandi ba mabue ne ba mabaya ne bantu bonso badi ne meji a kuenza midimu yonso, ya or ne ya argent ne ya tshiamu tshia mitaku ne ya tshiamu tshifike, bidi kabiyi mua kubadibua. Juka, ubange mudimu eu; Yehowa ikale nʼebe. Davidi wakelela baminyampala bonso ba mu Isalele mukenji bua kukuatshishabo Solomo muanʼandi, wamba ne, Yehowa Nzambi wenu kena nʼenu, anyi? Yeye kakanuha ditalala mu nseke yonso, anyi? Bualu bua yeye wakafila bena buloba ebu mu bianza bienu; bena buloba bakateketa ku mpala kua Yehowa ne ku mpala kua bantu bandi. Nunku nutokeshe mitshima yenu ne mioyo yenu bua kukeba Yehowa, Nzambi wenu; jukai, nuashile Yehowa Nzambi muaba wandi wa tshijila, bua nuenu nulue ne mushete wa tshihungidi tshia mei a Yehowa ne bintu bia tshijila bia Nzambi mu nsubu unudi mubaka mu dina dia Yehowa. Davidi wakadi muntu mununu wa matuku a bungi; yeye wakahingisha Solomo muanʼandi mu bukelenge ku mutu kua Bena Isalele. Yeye wakasangisha baminyampala bonso mu Isalele ne bakuidi ne Bena Lewi. Bakabala Bena Lewi babange kudi bakamana kukumbana bidimu makumi asatu tô ne ku mutu; bungi buabo bakabalabo muntu ne muntu buakadi binunu makumi asatu ne muanda mukulu. Bakasungula binunu makumi abidi ne binai bua kuikalabo tuhita tua bena mudimu ba mu nsubu wa Yehowa; bantu binunu bisambombo biabo bakadi balami ne balumbuluishi; bantu binunu binai bakadi balami ba ku bibi; bantu binunu binai bakatumbisha Yehowa ne bintu biakenza Davidi bia kumutumbisha nʼabi. Davidi wakabatahulula mu milongo bu muakadi bana balume ba Lewi: Gêshona ne Kohata ne Melali. Ba Bena Gêshona: Ladana ne Shimei. Bana balume ba Ladana: Yehiele wakadi kahita, ne Zetama ne Yoele, basatu. Bana balume ba Shimei: Shelomota ne Haziele ne Halana, basatu. Aba bakadi ku mutu kua nsubu ya batatu ba Ladana. Bana balume ba Shimei: Yahata ne Zina ne Yeusha ne Belia. Aba banai bakadi bana balume ba Shimei. Yahata wakadi kahita, Ziza muibidi; kadi Yeusha ne Belia kabakadi ne bana balume ba bungi; nunku bobo bakadi babadibue mu nsubu umue wa batatu babo. Bana balume ba Kohata: Amalama, Yisehâ, Hebelone, Uziele, banai. Bana balume ba Amalama: Alona ne Mose; Alona wakadi mujidibue bua yeye ajidile bintu bia tshijila, yeye ne bana bandi balume tshiendelele, bua kuoshelabo Yehowa musenga wa manananshi, ne bua kumukuatshilabo mudimu ne bua kuvudishilabo bantu disanka mu dina diandi tshiendelele. Kadi bualu bua Mose, muntu wa Nzambi, bana bandi bakadi babadibue munkatshi mua tshisamba tshia Lewi. Bana balume ba Mose: Gêshoma ne Eliezê. Bana balume ba Gêshoma: Shebuele kahita. Bana balume ba Eliezê bakadi Lehabeya kahita; Eliezê kakadi ne bana bakuabo nansha; kadi bana ba Lehabeya bakadi ba bungi. Bana ba Yisehâ: Shelomita kahita. Bana ba Hebelone: Yeliya kahita, Amalia muibidi ne Yahaziele muisatu ne Yakemama muinai. Bana balume ba Uziele: Mika kahita ne Yishiya muibidi. Bana ba Melali: Mali ne Mushi. Bana ba Mali: Eleazâ ne Kishi. Eleazâ wakafua kayi ne bana balume; wakadi anu ne bana bakashi; ne bana babo balume, bana ba Kishi, bakababaka bu bakashi babo. Bana ba Mushi: Mali ne Edê ne Yelemota, basatu. Aba bakadi bana balume ba Lewi ku nsubu ya batatuʼabo, bakadi ku mutu kua nsubu ya batatuʼabo bu bantu bakabalabo ku mena abo ku muntu ne muntu, bakadi benza mudimu wa mu nsubu wa Yehowa, bakadi ne bidimu bikumbane makumi abidi tô ne ku mutu. Bualu bua Davidi wakamba ne, Yehowa, Nzambi wa Isalele, wakaha bantu bandi ditalala; yeye udi mushikame mu Yelushalema tshiendelele; ne Bena Lewi kabena ne bualu bua kutuala kabidi nsubu wa tshitendelelu ne bintu biakadimu bia kuenza nʼabi mudimu. Bualu bua bakabala bana balume ba Lewi bakadi bakumbana bidimu makumi abidi tô ne ku mutu, bu muakadi mei a kunshikidilu a Davidi. Mudimu wabo wakadi wa kukuatshisha bana ba Alona mu midimu yabo ya mu nsubu wa Yehowa ne mu biendedi ne mu nsubu mikese ne mu kujidila kua bintu bionso ne mu midimu yonso yakenzabo mu nsubu wa Nzambi; ne bua kulongololabo bidia bioshibue ne bukula bua milambu ya bukula bubotesha, nansha bua mikata idi kayiyi ne luevene, nansha bua bidia biakalambabo mu malonga, nansha bua bidia biakinabo mu mai ne bua bihikidi bia mishindu yonso; ne bua kuimanabo lunkelu ku difuku ku dituku bua kusakidilabo Yehowa ne bua kumutumbishabo, ne dilolo kabidi; ne bua kufilabo milambu ya kuosha kudi Yehowa ku matuku a lumingu ne bakabala ngondo ne ku matuku akatuabo bidia bia disanka ku tshikondo tshiau misangu yonso ku mpala kua Yehowa; ne bua bobo balame nsubu wa kusambakena ne muaba wa tshijila, ne bana balume ba Alona, bana babo, mu mudimu wa mu nsubu wa Yehowa. Milongo ya bana balume ba Alona yakadi nunku. Bana balume ba Alona: Nadaba ne Abihu, Eleazâ ne Itamâ. Kadi Nadaba ne Abihu bakafua diambedi tatu wabo kayi muanji kufua; kabakadi ne bana nansha; nunku Eleazâ ne Itamâ bakenza mudimu wa buakuidi. Davidi wakasungula Sadoka wa bana balume ba Eleazâ ne Ahimeleke wa bana balume ba Itamâ, wakabatahulula mu milongo yabo mu midimu yabo. Bantu banene ba munkatshi mua bana balume ba Eleazâ bakahita bana balume ba Itamâ bungi; bakabatahulula nunku: ba bana balume ba Eleazâ ba ku mutu kua nsubu ya batatuʼabo bakadi dikumi ne basambombo; ne ba bana balume ba Itamâ bakadi ku mutu kua nsubu ya batatuʼabo bakadi muanda mukulu. Bakabatahulula ku nshobo ku mudimu ne ku mudimu; bualu bua bakadi ne tuhita tua mu muaba wa tshijila ne tua Nzambi tua munkatshi mua bana ba Eleazâ ne tua Itamâ kabidi. Shemaya, muana wa Netanele, mufundi, wakadi Muena Lewi, wakafunda menʼabo ku mpala kua mukelenge ne ku mpala kua baminyampala ne Sadoka muakuidi, ne Ahimeleke, muana wa Ebeyatâ, ne ku mpala kua nakadi ku mutu kua nsubu ya batatu abo ne ya bakuidi ne ya Bena Lewi; bakasungula nsubu umue wa batatuʼabo ba Eleazâ, ne umue wa batatuʼabo ba Itamâ. Nshobo ya kumudilu yakakuata Yehoyada, mibidi yakakuata Yedaya; misatu yakakuata Halima, mmai yakakuata Seolima, mitanu yakakuata Malakiya, Disambombo yakakuata Miyamina, ya muanda mutekete yakakuata Hakosa, ya muanda mukulu yakakuata Abiya, ya tshitema yakakuata Yeshua, ya dikumi yakakuata Shekanya, ya dikumi ne umue yakakuata Eleyashiba, ya dikumi ne ibidi yakakuata Yakima, ya dikumi ne isatu yakakuata Hupa, ya dikumi ne inai yakakuata Yeshebaba, ya dikumi ne itanu yakakuata Bilega, ya dikumi ne isambombo yakakuata Imê, ya dikumi ne muanda mutekete yakakuata Hezî, ya dikumi ne muanda mukulu yakakuata Hapisese, ya dikumi ne tshitema yakakuata Petahiya, ya makumi abidi yakakuata Yehekezele, ya makumi abidi ne umue yakakuata Yakina, ya makumi abidi ne ibidi yakakuata Gamula, ya makumi abidi ne isatu yakakuata Delaya, ya makumi abidi ne inai yakakuata Mâzaya. Bakabatahulula nunku mu midimu yabo bua kuhuolabo mu nsubu wa Yehowa bu muakadi mikenji yakangatabo kudi Alona tatu wabo, bu muakamuambila Yehowa, Nzambi wa Isalele. Bana balume bakuabo ba Lewi: ba bana ba Amalama, Shubaele; ba bana ba Shubaele, Yedeya. Ba bana ba Lehabeya, Yishiya wakadi kahita. Ba Bena Yisehâ, Shelomota; ba bana ba Shelomota, Yahata. Ba bana ba Hebelone; Yeliya wakadi kahita, Amalia muibidi, Yahaziele muisatu, Yekamama muinai. Ba bana ba Uziele: Mika; ba bana ba Mika: Shamî. Yishiya wakadi muanʼabo ne Mika; ba bana ba Yishiya: Zekâya. Bana ba Melali: Mali ne Mushi; ba bana ba Yâziya: Beno. Ba bana ba Melali: ba Yâziya, Beno, ne Shohama ne Zakû ne Ibeli. Ba bana ba Mali: Eleazâ wakadi kayi ne bana. Ba Kishi; bana ba Kishi: Yelamele. Ba bana ba Mushi: Mali ne Edê ne Yelimota. Aba bakadi bana balume ba Bena Lewi bu muakadi nsubu ya batatuʼabo. Bobo bakela nshobo bu muakenza bana babo bana ba Alona ku mpala kua Davidi mukelenge, ne Sadoka ne Ahimeleke, ne ku mpala kua bakadi ku mutu kua nsubu ya batatuʼabo ya bakuidi ne ya Bena Lewi, nsubu ya batatuʼabo bakadi tuhita tô ne ku nsubu ya bakunyi babo. Bualu bukuabo kabidi, Davidi ne tupitene tua masalayi bakasungula bana balume bakuabo ba Asafa ne ba Hemana ne ba Yedutuna, bua kuimbabo misambu ne nzenze ne bisanji ne biamu bia kukumakasha; bungi buabo bakenza mudimu eu mu milongo yabo buakadi nunku: ba bana ba Asafa: Zakû ne Yosefe ne Netanya ne Ashalela, bana ba Asafa, bakadi ku nyima kua Asafa, wakimba bu muakadi mukenji wa mukelenge. Ba Yedutuna, bana ba Yedutuna: Gedaliya ne Seli ne Yeshaya ne Hashabeya ne Matitiya, basambombo bakadi ku nyima kua tatu wabo Yedutuna ne nzenze, bakimba misambu ya kusakidila ne ya kutumbisha nʼai Yehowa. Ba Hemana, bana ba Hemana: Bukia, Matanaya, Uziele, Shebuele ne Yelimota, Hananya, Hanani, Eliata, Gidaleti ne Lomameti-ezê, Yoshebe-kasha, Maloti, Hotî, Mahaziota. Aba bonso bakadi bana balume ba Hemana, mumonyi wa malu a Nzambi kudi mukelenge, bakadi bela mpungi. Nzambi wakaha Hemana bana ba balume dikumi ne banai ne bana ba bakashi basatu. Aba bonso bakadi ku nyima kua tatu wabo bua kuimbabo misambu mu nsubu wa Yehowa ne biamu bia kukumakasha ne bisanji ne nzenze bua mudimu wa mu nsubu wa Nzambi; Asafa, Yedutuna ne Hemana bakadi mu mulongo wa mukelenge. Bungi buabo basangisha ne bana babo bakadi bayishibue bua kuimbilabo Yehowa misambu, bonso bakadi ne tshimbidi tshiakane, bakadi nkama ibidi ne makumi muanda mukulu ne muanda mukulu. Buonso buabo, banene ne bakese, bayishi ne bayidi, bakela nshobo bua kusungulabo mudimu wabo. Nshobo ya kumudilu wa Asafa yakakuata Yosefe; mibidi yakakuata Gedaliya; yeye ne bana babo bakadi dikumi ne babidi; misatu yakakuata Zakû ne bana bandi ne bana babo dikumi ne babidi; mmai yakakuata Yiseli ne bana bandi ne bana babo dikumi ne babidi; mitanu yakakuata Netanya ne bana bandi ne bana babo dikumi ne babidi; misambombo yakakuata Bukia ne bana bandi ne bana babo dikumi ne babidi; ya muanda mutekete yakakuata Yeshalela ne bana bandi ne bana babo dikumi ne babidi; ya muanda mukulu yakakuata Yeshaya ne bana bandi ne bana babo dikumi ne babidi; ya tshitema yakakuata Matanaya ne bana bandi ne bana babo dikumi ne babidi; ya dikumi yakakuata Shimei ne bana bandi ne bana babo dikumi ne babidi; ya dikumi ne umue yakakuata Azalele ne bana bandi ne bana babo dikumi ne babidi; ya dikumi ne ibidi yakakuata Hashabeya ne bana bandi ne bana babo dikumi ne babidi; ya dikumi ne isatu yakakuata Shubaele ne bana bandi ne bana babo dikumi ne babidi; ya dikumi ne inai yakakuata Matitiya ne bana bandi ne bana babo dikumi ne babidi; ya dikumi ne itanu yakakuata Yelemota ne bana bandi ne bana babo dikumi ne babidi; ya dikumi ne isambombo yakakuata Hananya ne bana bandi ne bana babo dikumi ne babidi; ya dikumi ne muanda mutekete yakakuata Yoshebekasha ne bana bandi ne bana babo dikumi ne babidi; ya dikumi ne muanda mukulu yakakuata Hanani ne bana bandi ne bana babo dikumi ne babidi; ya dikumi ne tshitema yakakuata Maloti ne bana bandi ne bana babo dikumi ne babidi; ya makumi abidi yakakuata Eliata ne bana bandi ne bana babo dikumi ne babidi; ya makumi abidi ne umue yakakuata Hotî ne bana bandi ne bana babo dikumi ne babidi; ya makumi abidi ne ibidi yakakuata Gidaleti ne bana bandi ne bana babo dikumi ne babidi; ya makumi abidi ne isatu yakakuata Mahaziota ne bana bandi ne bana babo dikumi ne babidi; ya makumi abidi ne inai yakakuata Lomameti-ezê ne bana bandi ne bana babo dikumi ne babidi. Mudimu wa balami ba bibi: ba Bena Kola, Meshelemeya, muana wa Kole, wa bana ba Asafa. Meshelemeya wakalela bana balume: Zekâya muanʼa bute, Yediele muibidi, Zebadaya muisatu, Yatamele muinai, Elama muitanu, Yehohanana muisambombo, Eleyahoenai wa muanda mutekete. Obeda-edome wakalela bana balume: Shemaya muanda bute, Yehozabada muibidi, Yoa muisatu, Sakâ muinai, Netanele muitanu, Amiele muisambombo, Yisakâ wa muanda mutekete, Peuletai wa muanda mukulu; bualu bua Nzambi wakamusankisha. Shemaya muanʼandi wa balume wakalela bana ba balume kabidi bakakokesha mu nsubu wa tatu wabo bualu bua bobo bakadi bantu ba bukitu. Bana ba Shemaya: Oteni ne Lefaele ne Obeda ne Elezabada, bana babo Elihu ne Semakaya bakadi bena bukitu. Aba bonso bakadi bana ba Obeda-edome; bobo ne bana babo balela ne bana babo bakadi ne bukole bua kuenza nʼabu mudimu; ba Obeda-edome bakadi makumi asambombo ne bantu bahidi. Meshelemeya wakadi ne bana balume ne bana babo, bena bukitu dikumi ne muanda mukulu. Hosa wa bana balume ba Melali wakadi ne bana balume: Shimeli wakadi kahita (yeye kakadi muanʼa bute kadi tatu wandi wakamuhingisha kahita), Hilekiya muibidi, Tebalaya muisatu, Zekâya muinai; bana balume bonso ba Hosa ne bana babo bakadi dikumi ne basatu. Munkatshi mua bantu aba bakasungula balami ba bibi, tuhita mene tuakadi ne mudimu watu bu bana babo mu nsubu wa Yehowa. Buonso buabo ne banene ne bakese bakela nshobo bu muakadi nsubu ya batatuʼabo, ku tshibi ne ku tshibi. Nshobo ya ku esete yakakuata Shelemeya. Bakelela muanʼandi Zekâya, muena meji makane, nshobo; nshobo yandi yakakuata ku nôde. Yakakuata Obeda-edome ku sude; ne bana bandi ku tshiluminu. Yakakuata Shupima ne Hosa ku wesete, ku tshibi tshia Shalekete ku tshibandilu tshidi tshibandaku, muntu ne muntu mulamate ku kutentekela kuandi. Bena Lewi basambombo bakadi ku esete; banai ku node ku dituku ku dituku; banai ku Sude ku dituku ku dituku, ne babidi babidi ku tshilaminu. Ku Pâbâ ku wesete banai ku tshibandilu, ne babidi ku Pâbâ. Ei yakadi milongo ya balami ba bibi, ba bana balume ba Bena Kola ne ba Melali. Ahiya wa Bena Lewi wakadi mulami wa bibutshilu bia mu nsubu wa Nzambi ne wa bibutshilu bia bintu bia tshijila. Bana ba Lâdana, bana ba Bena Gêshona ba Lâdana, bakadi ku mutu kua nsubu ya batatuʼabo ba Lâdana, Muena Gêshona: Yehieli. Bana ba Yehieli: Zetama ne Yoele muanʼabo bakadi balami ba bibutshilu bia mu nsubu wa Yehowa. Ba Bena Amalama ne ba Bena Yisehâ ne ba Bena Hebelone ne ba Bena Uziele: Shebuele, muana wa Gêshoma, muana wa Mose, wakadi kahita ka balami ba bibutshilu. Bana babo: Eliezê ne muanʼandi Lehabeya ne Yeshaya muanʼandi ne Yolama muanʼandi ne Zikeli muanʼandi ne Shelomota muanʼandi. Shelomota eu ne bana babo bakadi ku mutu kua bibutshilu bia bintu bionso bia tshijila biakajidilabo kudi Davidi mukelenge ne kudi ba ku mutu kua nsubu ya hatatu babo, ne kudi tupitene tua bantu tshinunu ne tua bantu lukama ne kudi tupitene tua masalayi. Bakajidila bia mu bintu biakanyengabo mu nvita bua kulongololabo nʼabi nsubu wa Yehowa. Bintu bionso biakajidila Samuele, mumonyi wa malu a Nzambi, ne Shaula, muana wa Kishi, ne Abinê, muana wa Nê, ne Yoaba, muana wa Seluya, ne muntu yonso wakajidila bintu, biobi biakadi mu bianza bia Shelomota ne bia bana babo. Ba Bena Yisehâ; Kenanya ne bana bandi balume bakadi ne mudimu wabo ha mbelu ha ntempelo mu Isalele bu bakokeshi ne balumbuluishi. Ba Bena Hebelone: Hashabeya ne bana babo, bena bukitu tshinunu ne nkama muanda mutekete, bakadi ku mutu kua Bena Isalele dishiya dia Yadene ku wesete mu malu onso a Yehowa ne a mudimu wa mukelenge. Wa Bena Hebelone: Yeliya wakadi kahita ka Bena Hebelone mene bu muakadi bikondo bia batatuʼabo. Bakabakeba mu tshidimu tshia makumi anai tshia mu bukelenge bua Davidi, bakasangana munkatshi muabo bena bukitu ku Yazê wa mu Gilada. Bana babo, bena bukitu bakadi binunu bibidi ne nkama muanda mutekete, bakadi ku mutu kua nsubu ya batatuʼabo, bakasungudibua kudi Davidi bua kuikalabo balongolodi ba Bena Lubena ne Bena Gada ne ba tshituha tshia tshisamba tshia Bena Manashe mu malu onso a Nzambi ne a mukelenge kabidi. Bena Isalele mu bungi buabo, bakadi ku mutu kua nsubu ya batatuʼabo, ne tupitene tua bantu tshinunu ne tua bantu lukama, ne bakokeshi bakadi bakuatshila mukelenge wabo mudimu mu milongo yonso ya mu ngondo ne ngondo ya mu ngondo yonso ya mu tshidimu, mu tshisumbu ne tshisumbu muakadi bantu binunu makumi abidi ne binai. Yashobama, muana wa Zabediele, wakadi ku mutu kua tshisumbu tshia ngondo wa kumudilu; mu tshisumbu tshiandi muakadi bantu binunu makumi abidi ne binai. Yeye wakadi umue wa bana ba Pelese, wakadi ku mutu kua tupitene tuonso tua mu ngondo wa kumudilu. Dodai, Muena Ahoa, wakadi ku mutu kua tshisumbu tshia mu ngondo muibidi; Mikelota wakadi ku mutu kuabo; mu tshisumbu tshiandi muakadi bantu binunu makumi abidi ne binai. Benaya, muana wa Yehoyada muakuidi, wakadi ku mutu kua tshisumbu tshia mu ngondo muisatu; mu tshisumbu tshiandi muakadi bantu binunu makumi abidi ne binai. Benaya eu wakadi umue wa bantu aba bakole makumi asatu, wakadi ku mutu kuabo mene; mu tshisumbu tshiandi muakadi muanʼandi Amizabada. Asahele, muanʼabo ne Yoaba, wakadi kapitene ka mu ngondo muinai; Zebadaya muanʼandi wakamulonda ku nyima; mu tshisumbu tshiandi muakadi bantu binunu makumi abidi ne binai. Shamehuta, Muena Yisela, wakadi kapitene ka tshisumbu tshia mu ngondo muitanu; mu tshisumbu tshiandi muakadi bantu binunu makumi abidi ne binai. Ila, muana wa Ikeshe, Muena Tekoa, wakadi kapitene ka tshisumbu tshia mu ngondo muisambombo; mu tshisumbu tshiandi muakadi bantu binunu makumi abidi ne binai. Helese, Muena Pelona wa bana ba Efelayima, wakadi kapitene ka tshisumbu tshia mu ngondo wa muanda mutekete; mu tshisumbu tshiandi muakadi bantu binunu makumi abidi ne binai. Sibekai, Muena Husha wa Bena Zela, wakadi kapitene ka tshisumbu tshia mu ngondo wa muanda mukulu; mu tshisumbu tshiandi muakadi bantu binunu makumi abidi ne binai. Abiezê, Muena Anatota wa Bena Benyamina, wakadi kapitene ka tshisumbu tshia mu ngondo wa tshitema; mu tshisumbu tshiandi muakadi bantu binunu makumi abidi ne binai. Mehalai, Muena Netofa wa Bena Zela, wakadi kapitene ka tshisumbu tshia mu ngondo wa dikumi; mu tshisumbu tshiandi muakadi bantu binunu makumi abidi ne binai. Benaya, Muena Pilatona wa Bena Efelayima, wakadi kapitene ka mu tshisumbu tshia mu ngondo wa dikumi ne umue; mu tshisumbu tshiandi muakadi bantu binunu makumi abidi ne binai. Heledai, Muena Netofa wa Oteniele, wakadi kapitene ka tshisumbu tshia mu ngondo wa dikumi ne muibidi; mu tshisumbu tshiandi muakadi bantu binunu makumi abidi ne binai. Tupitene tua bisamba bia Bena Isalele: Eliezê, muana wa Zikeli, wakadi ku mutu kua Bena Lubena; Shefataya, muana wa Mâka, wakadi ku mutu kua Bena Shimeona; Hashabeya, muana wa Kemuele, wakadi ku mutu kua Bena Lewi; Sadoka wakadi ku mutu kua bana ba Alona; Elihu, muanʼabo ne Davidi, wakadi ku mutu kua Bena Yuda; Omeli, muana wa Mikaele, wakadi ku mutu kua Bena Yisakâ; Yishemaya, muana wa Obadaya, wakadi ku mutu kua Bena Zebuluna; Yelemota, muana wa Azazele, wakadi ku mutu kua Bena Nafatale; Hoshea, muana wa Azazaya, wakadi ku mutu kua Bena Efelayima; Yoele, muana wa Pedaya, wakadi ku mutu kua tshituha tshia Bena Manashe; Ido, muana wa Zekâya, wakadi ku mutu kua tshituha tshia Bena Manashe ba mu Gilada; Yâsiele, muana wa Abinê, wakadi ku mutu kua Bena Benyamina; Azalele, muana wa Yelohama, wakadi ku mutu kua Bena Dana. Etu ntupitene tua bisamba bia Bena Isalele. Kadi Davidi kakabala bantu bakadi kabayi bakumbane bidimu makumi abidi; bualu bua Yehowa wakabalaya ne, Nenkumbashe Bena Isalele bu mitoto ya mu diulu. Yoaba, muana wa Seluya, wakabanga kutubala, kadi yeye kakashikisha mudimu eu; tshiji tshia Yehowa tshiakahatukila Bena Isalele bua bualu ebu; kabakafunda bungi buabo mu mukanda wa kulondolola kua malu a mukelenge Davidi. Azemaweta, muana wa Adiele, wakadi ku mutu kua bibutshilu bia mukelenge; Yonatana, muana wa Uziya, wakadi ku mutu kua bibutshilu bia mu madimi ne bia mu bimenga ne bia mu misoko mikese ne bia mu nsubu ya mukelenge; Ezeli, muana wa Keluba, wakadi ku mutu kua mudimu wonso wa madimi; Shimei, Muena Lamata, wakadi ku mutu kua madimi a tumuma tukese; Zabedi, Muena Shefemi, wakadi ku mutu kua bintu biakakumbana mu madimi a tumuma tukese biakatekabo mu bitekelu bia nvinyo; Bâla-hanana, Muena Gedê, wakadi ku mutu kua mitshi ya diye ne ya sycomore ya mu bibanda; Yoasha wakadi ku mutu kua bitekelu bia manyi; Shitelai, Muena Shalona, wakadi ku mutu kua bimuna biakadishabo mu Sifiona; Shafata, muana wa Adelai, wakadi ku mutu kua bimuna bia mu bibanda; Obila, Muena Yishemaele, wakadi ku mutu kua tumelo; Yedeya, Muena Melonita, wakadi ku mutu kua nyama ya mpunda; Yaziza, Muena Hageli, wakadi ku mutu kua mikoko. Aba bonso bakadi ku mutu kua bintu bia Davidi. Yonatana, manseba wa Davidi, muntu wa lungenyi lule ne mufundi kabidi, wakadi mufidi wandi wa meji; Yehiele, muana wa Hakemoni, wakadi mukuatshishi wa bana ba mukelenge; Ahitofele wakadi mufidi wa meji wa mukelenge; Hushai, Muena Eleke, wakadi mulunda wa mukelenge; ku nyima kua Ahitofele kuakadi Yehoyada, muana wa Benaya, ne Ebeyatâ; Yoaba wakadi kapitene ka masalayi a mukelenge. Davidi wakabikila bantu banene bonso ba mu Isalele, bakadi ku mutu kua bisamba, ne tupitene tua bisumbu bia bantu tuakakuatshila mukelenge mudimu mu milongo yatu, ne tupitene tua bantu tshinunu ne tua bantu lukama, ne bakadi ku mutu kua bintu bionso bia mukelenge ne bimuna biandi ne bia bana bandi ne tuhita ne bena bukitu mu Yelushalema. Hashishe mukelenge Davidi wakajuka hanshi, wakimana ku makasa andi, wakamba ne, Unvuai, bana betu ne bantu banyi; meme nakadi ne bualu mu mutshima wanyi bua kuibakila mushete wa tshihungidi tshia mei a Yehowa nsubu wa kuikisha ne tshitekelu tshia muinshi mua makasa a Nzambi wetu; nakabanga kulongolola bintu bia kuasa nʼabi nsubu. Kadi Nzambi wakangambila ne, Wewe kuena wibakila dina dianyi nsubu nansha, bualu bua wewe udi muena nvita, wakamatshisha mashi hanshi. Kadi Yehowa, Nzambi wa Isalele, wakansungula munkatshi mua bonso ba mu nsubu wa tatu wanyi, wakampingisha mu bukelenge bua Isalele tshiendelele; bualu bua yeye wakasungula Yuda bua kuikaleye ku mutu; wakasungula tshiota tshia tatu wanyi mu tshisamba tshia Yuda; munkatshi mua bana ba tatu wanyi yeye wakalesha diakalengele kundi bua kumpingisha mu bukelenge bua Isalele; ne munkatshi mua bana banyi balume (Nzambi wakumpa bana ba bungi) yeye wakasungula Solomo muanʼanyi bua kushikameye mu nkuasa wa bukelenge bua Yehowa ku mutu kua Bena Isalele. Yeye wakangambila ne, Solomo muanʼebe neibake nsubu wanyi ne biendedi bianyi; bualu bua meme nakamusungula bua kuikaleye muanʼanyi, ne meme nengikale tatu wandi. Nenjadike bukelenge buandi tshiendelele, biananukileye kutumikila mikenji yanyi ne mei anyi bu mudibi lelu. Nunku ku mesu kua Bena Isalele bonso ba mu tshisumbu tshia Yehowa, ne mu matshu a Nzambi wetu, nuenze, nukebe mikenji yonso ya Yehowa Nzambi wetu; bua nuenu nuhiane buloba ebu buimpe, bua nuenu nubushile bana benu bu buhianyi buabo tshiendelele. Wewe, muanʼanyi Solomo, Umanye Nzambi wa tatuʼebe, umukuatshile mudimu ne mutshima mutoke ne didikokela kudiye; bualu bua Yehowa udi ukebakeba mitshima ya bantu bonso; udi ujingulula meji onso adibo bela munda muabo; biwamukeba, neumuhete; kadi biwamulekela, yeye neakuhidie tshiendelele. Udimuke biebe, bualu bua Yehowa wakukusungula bua wewe kuibaka nsubu udi mua kuikala muaba wandi wa tshijila; wikale ne bukole, wenze nsubu eu. Hashishe Davidi wakaha Solomo muanʼandi luidi lua mbalanda wa ntempelo, ne lua nsubu wandi, ne lua bibutshilu biandi, ne lua nsubu ya ku mutu, ne lua nsubu ya munda muandi, ne lua muaba wa tshibuikilu tshia or; ne luidi lua ngenyi yandi yonso ya biendedi bia mu nsubu wa Yehowa, ne ya nsubu yandi yonso, ne ya bibutshilu bia mu nsubu wa Yehowa, ne ya bitekelu bia bintu bia tshijila; ne ya milongo ya bakuidi ne Bena Lewi, ne ya midimu yonso ya mu nsubu wa Yehowa, ne ya mpanza yonso ya mu nsubu ya Yehowa. Wakidikisha bujitu bua mpanza ya or, ne bua mpanza ya mishindu yonso; ne bua mpanza ya argent, ne bua mpanza ya mishindu yonso. Wakidikisha bujitu bua bitekelu bia minda bia or ne minda yabi kabidi, ne bua bitekelu bia minda bia argent wakidikisha bujitu bua tshitekelu ne tshitekelu ne bua muinda ne muinda. Wakidikisha bujitu bua mesa a bidia bilesha, ku mesa ne mesa; ne bua argent ya mesa ne mesa; ne bua or ya bitubuidi bia munyinyi ne malonga ne makoho, ne bujitu bua or ya bihanza bionso, ne bua bihanza bia argent kabidi. Wakidikisha bujitu bua or ya tshioshelu tshia musenga wa manananshi ne or ya kuenza nʼai luidi lua dikalu dia bakeluba bakadi bolola mahuahua abo, bakabuikila mushete wa tshihungidi tshia mei a Yehowa. Davidi wakamba ne, Nakamanya malu au onso ku tshifundidi tshia tshianza tshia Yehowa tô ne ku bintu bionso bia mu luidi elu. Davidi wakambila Solomo muanʼandi ne, Wikale ne bukole ne mutshima wa dikima, wenze bualu ebu; kutshinyi, kuhangi bualu ebu; bualu bua Yehowa Nzambi, Nzambi wanyi mene, udi nʼebe; yeye kena ukuhanga, kena ukulekela tô ne hawashikisha mudimu eu wonso wa mu nsubu wa Yehowa. Tangila milongo ya bakuidi ne ya Bena Lewi ya mu midimu yonso ya mu nsubu wa Nzambi; muntu yonso udi ne mutshima wa kuenza ne lungenyi lua kuenza midimu yonso neikale nʼebe; tupitene ne bantu bonso nebatumikile mikenji yebe yonso kabidi. Davidi mukelenge wakambila tshisumbu tshia bantu ne, Solomo muanʼanyi, wakasungulabo kudi Nzambi nkayandi, utshidi nsongalume mutekete, ne mudimu eu udi munene; bualu bua mbalasa eu kena wa muntu, udi wa Yehowa Nzambi. Meme nakamana kulongolola bintu bia mu nsubu wa Nzambi wanyi ne bukole buonso bundi nʼabu, or ya bintu bia tshiamu tshia or, ne argent ya bintu bia tshiamu tshia argent, ne tshiamu tshia mitaku tshia bintu bia tshiamu tshia mitaku, ne tshiamu tshifike tshia bintu bia tshiamu tshifike, ne mitshi ya bintu bia mitshi; ne mabue a onyx ne mabue adibo balengesha nʼau bintu ne mabue a mishindu yonso ne mabue onso a mushinga mukole ne mabue manene matoke a bungi. Bualu bukuabo kabidi, bualu bua meme nakateka mutshima wanyi kudi nsubu wa Nzambi wanyi, meme nakafila mu nsubu wa Nzambi wanyi bibutshilu bianyi bia or ne bia argent ku mutu kua bintu binakalongolola bua muaba eu wa tshijila; bu ntalanta ya or binunu bisatu ya or ya ku Ofî, ne ntalanta ya argent yakatulabo binunu muanda mutekete ya kuteka ha bimanu bia nsubu; ya or ya bintu bia or, ne ya argent ya bintu bia argent ya midimu yonso ya bantu badi ne lungenyi lule. Muntu kai neadijidile lelu eu kudi Yehowa? Hashishe bakadi ku mutu kua nsubu ya batatuʼabo, ne bakadi ku mutu kua bisamba bia Bena Isalele, ne tupitene tua bantu tshinunu ne tua bantu lukama, ne bakadi ku mutu kua midimu ya mukelenge bakafila bintu ne disanka. Bakafila bua mudimu wa mu nsubu wa Nzambi ntalanta ya or binunu bitanu ne dariques binunu dikumi, ne ntalanta ya argent binunu dikumi, ne ntalanta ya tshiamu tshia mitaku binunu dikumi ne muanda mukulu, ne ya tshiamu tshifike binunu lukama. Bakadi ne mabue a mushinga mukole, bakafila mu bibutshilu bia nsubu wa Yehowa mu tshianza tshia Yehiele, Muena Gêshona. Hashishe bantu bakasanka bualu bua bobo bakadifila bintu biabo; bualu bua bakafila bintu biabo ne mitshima mitoke kudi Yehowa; mukelenge Davidi wakatamba kusanka kabidi. Nunku Davidi wakavudishila Yehowa disanka ku mpala kua bantu bonso; Davidi wakamba ne, Yehowa, Nzambi wa Isalele tatu wetu, wikale ne disanka tshiendelele. Yehowa, bunene ne bukole ne butumbi ne kutamba ne bulengele butambe mbiebe; bualu bua bintu bionso bia mu diulu ne bia ha buloba mbiebe; Yehowa, bukelenge mbuebe, ne wewe udi ubandishibua ku mutu kua bionso. Bubanji ne butumbi bidi bifuma kûdi, wewe udi ukokesha bionso; bukole ne bunene bidi mu tshianza tshiebe; tshianza tshiebe tshidi tshivuisha bantu bunene ne bukole. Nunku, Nzambi wetu, tudi tukusakidila, tudi tutumbisha dina diebe dia butumbi. Kadi meme nganyi ne bantu banyi mbanganyi, bua tuetu tuakadifidila bintu bietu nunku? Bualu bua bintu bionso bidi bifuma kûdi, tuakafila anu bintu biebe kûdi. Bualu bua tuetu tudi benyi ku mpala kuebe, tudi anu bu bahitshi ba mu buloba bu muakadi bankambua betu; matuku etu a ha buloba adi bu mundidimbi, katuena ne ditekemena dia kushalaku. Yehowa Nzambi wetu, bintu ebi bionso bituakulongolola bua kukuibakila nʼabi nsubu wa dina diebe dia tshijila biakafuma mu tshianza tshiebe, bionso bidi biebe mene. Nzambi wanyi, ndi mumanye kabidi ne wewe udi uteta mitshima ya bantu, udi usanka mu butoke bua mutshima. Meme nakudifidila bintu ebi bionso mu butoke bua mutshima wanyi; nakumona bantu bebe bonso badi kunoko badifidila bintu biabo ne disanka. Yehowa, Nzambi wa Abalahama ne wa Isaka ne wa Yakoba, bankambua betu, witabushe bua bantu bebe bikale ne meji â onso munda muabo tshiendelele, ujadike mitshima yabo kûdi; uvuishe Solomo muanʼanyi mutshima mutoke, bua kutumikileye mikenji yebe ne mei ebe ne mikandu yebe, bua kuenzeye malu â onso, ne bua kuibakeye mbalasa eu unakabanga kulongolola bintu. Davidi wakambila bantu bonso ne, Tuvudishilai Yehowa Nzambi wetu disanka. Bantu bonso bakavu-dishila Yehowa, Nzambi wa bankambua babo, disanka, bakinama mitu yabo, bakatendelela Yehowa, bakakukuata mukelenge. Bakafila milambu kudi Yehowa; bakafila milambu ya kuosha ha kahia kudi Yehowa, ne lunkelu kabidi bakafila tshinunu tshia balume ba ngombe ne tshinunu tshia bimpanga ne tshinunu tshia bana ba mikoko ne milambu idibo banua; Bena Isalele bonso bakafila milambu ya bungi; bakadia, bakanua ku mpala kua Yehowa dituku adi ne disanka dinene. Bakahingishila Solomo, muana wa Davidi, mu bukelenge tshiakabidi, bakamuela manyi ha mutu bua kuikaleye mukokeshi, ne ha mutu ha Sadoka bua kuikaleye muakuidi. Hashishe Solomo wakashikama mu nkuasa wa Yehowa bu mukelenge mu muaba wa Davidi tatu wandi, wakadi ne diakalengele; Bena Isalele bonso bakamutumikila. Bonso bakadi ku mutu kua bantu, ne bena bukitu bonso, ne bana balume bonso ba mukelenge Davidi bakadikokela kudi mukelenge Solomo. Yehowa wakatamba kudiundisha Solomo ku mpala kua Bena Isalele bonso, wakamuambika butumbi buakatamba bua bakelenge bonso ba mu Isalele bakadi badianjila ku mpala kuandi. Davidi, muana wa Yishai, wakadi ukokesha mu Isalele. Matuku onso akakokesheye mu Isalele akadi bidimu makumi anai; wakakokesha mu Hebelone bidimu muanda mutekete; wakakokesha mu Yelushalema bidimu makumi asatu ne bisatu. Wakafua muntu mununu mukole, wakadi ne bubanji ne butumbi; Solomo muanʼandi wakakokesha mu muaba wandi. Bienzedi bia mukelenge Davidi, bia kumudilu ne bia kunshikidilu, monai, bidi bifunda mu mei a Samuele, mumonyi wa malu a Nzambi, ne mu mei a Natana muprofete, ne mu mei a Gada, mumonyi wa malu a Nzambi, kabidi; ne malu onso a mu bukelenge buandi ne bukole buandi hakadiye ukokesha mu Isalele ne ku mutu kua makelenge onso a mu miaba mikuabo. Solomo, muana wa Davidi, wakakoleshibua mu bukelenge buandi; Yehowa Nzambi wandi wakadi nʼandi, wakatamba kumuvuisha bunene. Solomo wakasomba ne Bena Isalele bonso, ne tupitene tua bantu tshinunu ne tua bantu lukama, ne balumbuluishi bonso, ne bantu banene bonso ba mu Isalele, ne bakadi ku mutu kua nsubu ya batatuʼabo. Nunku Solomo ne Bena Isalele bonso bakadi nʼandi bakaya ku mutu kua mukuna wa mu Gibeona; bualu bua ntenta wa kusambakena wa Nzambi wakasabo kudi Mose, muntu wa Yehowa, mu tshihela wakadiku. Kadi Davidi wakadi mumane kuangata mushete wa Nzambi wakadi ku Kîyata-yalima, wakaya nʼau ku muaba wakalongolola Davidi; bualu bua yeye wakaushimikila nsubu wa ntenta mu Yelushalema. Kadi tshioshelu tshia tshiamu tshia mitaku tshiakenzabo kudi Besalele, muana wa Uli, muana wa Hû, tshiakadiku ku mpala kua nsubu wa tshitendelelu wa Yehowa; ne Solomo ne bantu bakadi nʼandi bakakebelamu Yehowa. Solomo wakasemena ha buihi ne tshioshelu tshia tshiamu tshia mitaku tshia Yehowa tshiakadi ku mpala kua ntenta wa kusambakena, wakafilahu tshinunu tshia milambu ya kuosha. Mu butuku abu Nzambi wakamueneka kudi Solomo, wakamuambila ne, Ulombe tshinakuha. Solomo wakambila Nzambi ne, Wewe wakalesha Davidi tatu wanyi luse lunene lujalame, wakumpuisha mu bukelenge mu muaba wandi. Katataka, Yehowa Nzambi, witabushe bua mulayi webe kudi Davidi tatu wanyi ujadikibue; bualu bua wewe wakumpingisha mu bukelenge ku mutu kua bantu badi bungi bua dinfuenkenya dia buloba. Umpe meji ne lungenyi bua meme kumanya mua kuluhuka ne kulua ku mpala kua bantu aba; bualu bua udi mumanye mua kukokesha bantu aba banene nganyi? Nzambi wakambila Solomo ne, Bua bualu ebu buakadi mu mutshima webe, wewe kuakundomba bubanji ne biuma, nansha butumbi, nansha mioyo ya badi nʼebe lukuna, nansha matuku a bungi ha buloba, kadi wakundomba meji ne lungenyi bia kukokesha nʼabi bantu banyi banakukuhingishila mukelenge ku mutu kuabo. Nakakuha meji ne lungenyi; nenkuhe bubanji ne biuma ne butumbi biakadi bakelenge bonso ku mpala kuebe kabayi nʼabi; kakuena mukuabo udi nkulonda ku nyima neikale nʼabi kabidi. Nunku Solomo wakafuma ku mukuna wa mu Gibeona ku mpala kua ntenta wa kusambakena, wakahingana ku Yelushalema; wakakokesha Bena Isalele. Solomo wakasangisha makalu ne bena tubalu; wakadi ne makalu tshinunu ne nkama inai, ne bena tubalu binunu dikumi ne bibidi biakatekeye mu misoko yakadi ne makalu ne hamue ne mukelenge mu Yelushalema. Mukelenge wakakumbasha argent ne or mu Yelushalema bu mabue; ne mitshi ya cèdre yakadi bu mitshi ya sycomore ya mu bibanda, bualu bua bungi buabi. Tubalu tuakadi nʼatu Solomo tuakafuma mu Ejipitu; bendi ba mushinga ba mukelenge bakatusumba mu bisumbu, tshisumbu ku mushinga watshi, tshisumbu ku mushinga watshi. Bakasumba dikalu mu Ejipitu ku nshekele ya argent nkama isambombo, ne kabalu ku nshekele lukama ne makumi atanu; bakabisumbila Bena Hiti ne Bena Sulia kabidi ku mushinga wabi. Solomo wakasua kuibakila dina dia Yehowa nsubu ne bukelenge buandi nsubu. Solomo wakabala bantu binunu makumi muanda mutekete bua kutualabo majitu, ne binunu makumi muanda mukulu bua kutahabo mitshi ku mikuna, ne tuhita binunu bisatu ne nkama isambombo bua kuikalatu ku mutu kuabo. Solomo wakatumina Hulama, mukelenge wa mu Tulo, dî ne, Bu muwakenzela Davidi tatuʼanyi, wakamutumina mitshi ya cèdre bua kuibakeye nsubu wandi, ungenzele meme nunku kabidi. Tangila, meme ndi ngamba kuibakila dina dia Yehowa Nzambi wanyi nsubu wa kumujidila ne bua kuoshelamu musenga wa manananshi, ne bua kutekamu bidia bia kulesha, ne bua kuoshelamu milambu dinda ne dilolo ne ku dituku dia lumingu ne habala ngondo ne hadiabo bidia bia disanka ku mpala kua Yehowa Nzambi wetu. Eu udi mukenji mujalame wa Bena Isalele tshiendelele. Nsubu undi ngibaka udi munene; bualu bua Nzambi wetu udi munene ku mutu kua nzambi yonso. Kadi nganyi udi mua kumuibakila nsubu, bualu bua yeye udi uhita diulu ne diulu didi ku mutu kua diulu bunene? Meme nganyi bua kumuibakila nsubu, anu bua kuoshelamu musenga wa manananshi ku mpala kuandi? Nunku untumine bantu badi ne lungenyi bua kuenza mudimu mu or ne mu argent ne mu tshiamu tshia mitaku ne mu tshiamu tshifike ne mu bilulu bikunzubile ne bikunzu-kunzû ne bia bleu; ne badi bamanye mua kusonga bintu bionso, bua kuikalabo ne bena lungenyi banyi badi nʼanyi mu Yuda ne Yelushalema bakasungulabo kudi Davidi tatu wanyi. Untumine mitshi ya cèdre ne ya cyprès ne ya sandal ku Lebanona; bualu bua ndi mumanye ne bantu bebe badi bamanye mua kutaha mitshi mu Lebanona; ne mona, bantu banyi nebakuatshilangane ne bantu bebe, bua kutahabo mitshi ya bungi; bualu bua nsubu undi ngibaka newikale munene ne wa butumbi. Nempe bantu bebe badi bataha mitshi bihiminu bia bukula binunu makumi abidi ne bia orge binunu makumi abidi; ne bihiminu bia nvinyo binunu makumi abidi ne bia manyi binunu makumi abidi. Hashishe Hulama, mukelenge wa Tulo, wakafundila Solomo mukanda ne, Bualu bua Yehowa udi unanga bantu bandi, yeye wakakuhingisha mu bukelenge. Hulama wakamba kabidi ne, Yehowa, Nzambi wa Isalele, ikale ne disanka; yeye nguakafuka diulu ne buloba, wakaha Davidi muana wa lungenyi udi ne meji makane ne mutshima muimpe bua kuibakileye dina dia Yehowa nsubu ne bukelenge buandi nsubu. Nakamana kukutumina muntu wa meji udi ne lungenyi lule, muana wa Hulama, tatu wanyi mene, udi muana wa mukashi wa Bena Dana; tatu wandi wakadi Muena Tulo, wakadi ne lungenyi lua kuenza mudimu mu or ne mu argent ne mu tshiamu tshia mitaku ne mu tshiamu tshifike ne mu mabue ne mu mabaya ne mu bilulu bikunzubile ne bia bleu ne mu lin muimpe ne bilulu bikunzu-kunzû; wakamanya mua kusonga bintu bionso ne bua kuenzeye bintu bionso; bua wewe kumuha muaba munkatshi mua bantu bebe ba lungenyi bakasungula mukelenge wanyi Davidi, tatu webe. Blé ne orge ne manyi ne nvinyo biakuambila mukelenge wanyi, anji kutuminabi bantu bandi; tuetu nenutahe mitshi ya mu Lebanona bungi bûdi musue; netulue nʼai mu matu ha mutu ha mai manene tô ne ku Yopa; wewe neuye nʼai ku Yelushalema. Solomo wakabala benyi bonso bakadi mu buloba bua Isalele, bu muakababala Davidi, tatu wandi; bakabala bantu nunku binunu lukama ne makumi atanu ne bisatu ne nkama isambombo. Yeye wakasungula binunu makumi muanda mutekete bua kutualabo majitu, ne binunu makumi muanda mukulu bua kutahabo mitshi mu mikuna ne tuhita binunu bisatu ne nkama isambombo bua kuenzeshatu bantu mudimu. Hashishe Solomo wakabanga kuibaka ntempelo wa Yehowa mu Yelushalema ha mutu ha mukuna wa Moliya kuakamuenekela Yehowa kudi Davidi tatuʼandi ha muaba wakasungula Davidi ku tshihehuidi tshia Ônana, Muena Yebuse. Wakabanga mudimu mu dituku dibidi dia mu ngondo muibidi, mu tshidimu tshinai tshia bukelenge buandi. Â mmalu akayishabo Solomo mua kuibakeye nsubu wa Yehowa. Bule buandi bua luidi lua kumudilu buakadi coudées makumi asambombo; butshiama buandi buakadi coudées makumi abidi. Mbalanda wakadi ku mpala kua nsubu, bule buandi buakadi bu butshiama bua nsubu coudées makumi abidi; bule buandi bua mulu buakadi coudées lukama ne makumi abidi; wakalamika or mutambe buimpe munda muandi ku nseke yonso. Wakateka mabaya a cyprès ku tshisasa tshia nsubu ne or muimpe ha mutu; wakadilengesha ne bifuanyikishi bia mabue a ngashi ne nkanu ya or. Wakalengesha nsubu mujima ne mabue a mushinga mukole; or wakadi wa mu Pâwayima. Wakalamika or ku nseke yonso ya munda mua nsubu, ku mabaya ne ku bilua bia bibi ne ku bimanu ne ku bibi kabidi; bakasonga bifuanyikishi bia bakeluba ku bimanu. Wakalongolola muaba mutambe wa tshijila; bunene buandi buakadi bu butshiama bua nsubu coudées makumi abidi; ne butshiama buandi buakadi coudées makumi abidi; wakateka or ku nseke yonso; mushinga wandi wakadi bu ntalanta ya or nkama isambombo. Bujitu bua misamadi buakadi bu nshekele ya or makumi atanu. Wakalamika or munda mua nsubu yonso yakadi ha mutu. Wakatula bakeluba babidi bua kutekeye mu muaba mutambe wa tshijila; wakalamika or ku nseke yabo yonso. Bule bua mahuahua a bakeluba buakadi coudées makumi abidi; dihuahua dia mukeluba mukuabo diakadi bule bua coudées itanu; lusongo luadi luakafika tô ne ku tshimanu tshia nsubu; dihuahua dikuabo diakadi bule bua coudées itanu, diakafika tô ne ku dihuahua dia mukuabo. Dihuahua dia mukeluba mukuabo diakadi bule hua coudées itanu diakafika tô ne ku tshimanu tshia nsubu; dihuahua dikuabo diakadi bule bua coudées itanu diakatuangana ne dihuahua dia mukuabo. Mahuahua a bakeluba akololodibua tô coudeês makumi abidi; bakeluba bakadi bimana ne makasa abo; mpala yabo yakatangilangana. Wakakuma tshilulu tshikudika ne buanda bua bleu ne bukunzubile ne bukunzu-kunzû ne bua lin muimpe; bakenzamu bifuanyikishi bia bakeluba. Wakajadika makunshi abidi ku mpala kua nsubu, bule buau buakadi coudées makumi asatu ne itanu; bunene bua mutu wa dikunshi ne dikunshi buakadi coudées itanu. Wakatula nkanu mu muaba wa tshijila, wakayiteka ha mutu ha makunshi; wakatula bifuanyikishi bia mamuma a grenade lukama, wakabiteka ha nkanu. Wakajadika makunshi ku mpala kua nsubu; dimue ku tshianza tshia balume, ne dikuabo ku tshianza tshia bakashi; wakidika dina dia ku tshianza tshia balume ne, Yakina, ne dina dia ku tshianza tshia bakashi ne, Boaza. Wakenza tshioshelu tshia tshiamu tshia mitaku, bunene buatshi buakadi coudées makumi abidi, ne butshiama buatshi buakadi coudées makumi abidi, ne bule buatshi buakadi coudées dikumi. Wakenza kabidi tshiowelu tshia tshiamu, bunene buatshi ku mubangu ne ku mubangu buakadi coudées dikumi; bule buatshi buakadi coudées itanu; bule bua dinyungulula diatshi buakadi coudées makumi asatu. Muinshi muatshi muakadi bifuanyikishi bia ngombe yakanyunguluka ku nseke yonso, ku coudées dikumi ku nseke yonso ya tshiowelu. Ngombe yakadi mu milongo ibidi, yakatudibua diatshimue nʼatshi. Tshiotshi tshiakimana ha nyima ha ngombe dikumi ne ibidi; isatu yakatangila ku nôde, isatu ku wesete, isatu ku sude ne isatu ku esete; tshiowelu tshiakadi ha nyima hai; mikila yai yakadi mituangane muinshi mua tshiowelu. Muhimbu watshi wakadi bu ntanta wa tshianza; wakalengeshibua bu mubangu wa luhanza, bu tshifuanyikishi tshia tshilongo; tihiakûla tente ne bihiminu bia mai binunu bisatu. Wakenza biowelu bikuabo dikumi, wakateka bitanu ku tshianza tshia halume ne bitanu ku tshianza tshia bakashi, bua kuoweshamu bintu biakafilabo bu milambu ya kuosha; kadi bakuidi bakowela mu tshiowelu tshinene. Wakatula bitekelu bia minda bia or dikumi bu muakamba mukenji wakabiteka mu ntempelo, bitanu ku tshianza tshia balume ne bitanu ku tshianza tshia bakashi. Wakenza mesa dikumi; wakâteka mu ntempelo, atanu ku tshianza tshia balume ne atanu ku tshianza tshia bakashi. Wakatula mpanza ya or lukama. Bualu bukuabo kabidi, wakalongoluela bakuidi tshiendedi tshinene; wakenza bibi bia tshiendedi, wakalamika tshiamu tshia mitaku ha mutu hahi. Wakajadika tshiowelu ku tshianza tshia balume tshia ntempelo ku luseke lua ku sude-esete. Hulama wakatula bivuadi ne nkasu ne mpanza. Nunku Hulama wakashikisha mudimu wakakuatshileye mukelenge Solomo mu nsubu wa Nzambi; makunshi au abidi ne mpanza ne bintu bilengele biakadi ku mutu kua makunshi, ne bintu bia kulengesha nʼabi mitu ya makunshi au, ne bifuanyikishi bia mamuma a grenade nkama inai bia kulengesha nʼabi makunshi, milongo ibidi ya grenade ku dikunshi ku dikunshi bia kuteka ku bintu bilengele biakadi ku mutu kua makunshi. Wakenza biowelu ne bitekelu biabi kabidi; Wakenza tshiowelu tshinene ne ngombe dikumi ne ibidi yakadi muinshi muatshi kabidi. Bivuadi ne nkasu ne bitubuidi bia munyinyi ne mpanza yonso, Hulama tatu wandi wakatudila Solomo bintu ebi bionso ne tshiamu tshia mitaku tshiakadi tshikenka bia kutekeye mu nsubu wa Yehowa. Mukelenge wakabitula mu mpata wa Yadene, mu muaba muakadi dima, hankatshi ha Sukota ne Zeleda. Nunku Solomo wakatula bintu ebi bia bungi bionso; kabakamanya mua kubala bujitu bua tshiamu tshia mitaku. Solomo wakatula bintu bionso bia kuteka mu nsubu wa Nzambi, ne tshioshelu tshia or ne mesa a bidia bilesha; ne bitekelu bia minda bia or mimpe bia kutemenabi mu nsubu bu muakadi mukenji; ne bilongo ne minda ne mpandu bia or mimpe; ne bijimishi bia minda ne mpanza ne nkutu ne bivuadi bia kutekamu kahia, bia or mimpe; ne ku bibuelelu bia nsubu wakateka bibi bia ku muaba wa tshijila ne bibi biakadi munda mua nsubu, ntempelo mene, biakadi bia or. Nunku mudimu wonso wakenza Solomo wa mu nsubu wa Yehowa wakashikishibua. Solomo wakalua ne bintu biakajidila Davidi tatu wandi ne argent ne or ne mpanza yonso, wakabiteka mu bibutshilu bia mu nsubu wa Nzambi. Hashishe Solomo wakabikila bakulu bonso ba Bena Isalele, ne bonso bakadi ku mutu kua bisamba, ne bakadi ku mutu kua biota bia batatuʼabo ba mu Isalele ku Yelushalema, bua kuangatabo mushete wa tshihungidi tshia mei a Yehowa ku musoko wa Davidi, Siona mene. Bantu bonso ba mu Isalele bakadisangisha kudi mukelenge ku dituku diakadiabo bidia bia disanka mu ngondo wa muanda mutekete. Bakulu bonso ba Bena Isalele bakalua; Bena Lewi bakambula mushete wa Nzambi; bakalua ne mushete wa Nzambi ne ntenta wa kusambakena ne bintu bionso bia tshijila biakadi mu nsubu wa ntenta; bakuidi Bena Lewi bakalua ne bintu ebi bionso. Mukelenge Solomo ne Bena Isalele bonso bakadi badisangisha kudiye, bakaya ku mpala kua mushete wa Nzambi, bafile milambu ya mikoko ne ya ngombe idibo kabayi bamanye mua kubala bualu bua bungi buai. Bakuidi bakalua ne mushete wa tshihungidi tshia mei a Nzambi mu muaba wau, mu muaba wa tshijila mene muinshi mua mahuahua a bakeluba. Bualu bua bakeluba bakadi bolola mahuahua abo ha mutu ha muaba wa mushete; bakeluba bakabuikila mushete ne mitshi yau kabidi. Mitshi ei yakatamba bule, bakamanya mua kumona nsongo yai mu muaba wa tshijila ku mpala kua mushete; kadi kabakamanya mua kuyitangila ha mbelu; udiku tô ne ku dituku edi. Nansha tshintu tshikuabo tshiakadi munda mua mushete, anu mabue abidi akatekamu Mose ku Holeba kuakahunga Yehowa tshihungidi ne Bena Isalele, hakaluhukabo mu Ejipitu. Hashishe bakahatuka bakuidi ku muaba wa tshijila (bualu bua bakuidi bonso bakadiku bakadijidila, kabakenza mudimu wa mu milongo yabo tshikondo atshi; ne Bena Lewi kabidi bakadi bimbi ba misambu, buonso buabo mene, Asafa ne Hemana ne Yedutuna, ne bana babo balela ne bana babo balume baluate bilulu bia lin muimpe, bakadi ne biamu bia kukumakasha ne nzenze ne bisanji, bakimana ku luseke lua tshioshelu tshia ku esete, ne bakuidi lukama ne makumi abidi bakadi nʼabo bela mpungi); hakelabo mpungi kudi bena mpungi ne bimbi ba misambu diatshimue bua kutumbishabo ne bua kusakidilabo Yehowa, ne hakimbabo ne mpungi ne biamu ne biombelu bia kutumbishabo nʼabi Yehowa, bamba ne Yeye udi muimpe, bualu bua luse luandi ludi lujalame tshiendelele, nsubu wakûla tente ne ditutu, nsubu wa Yehowa mene. Nunku bakuidi kabakamanya mua kuimana bua kuenzabo mudimu wabo bualu bua ditutu; bualu bua butumbi bua Yehowa buakûsha nsubu wa Nzambi tente. Hashishe Solomo wakamba ne, Yehowa wakuamba ne, Ndi mushikame mu midima mikole. Kadi meme nakakuibakila nsubu ne muaba wa wewe kushikama tshiendelele. Mukelenge wakanyunguluka, wakavudishila Bena Isalele bonso disanka; Bena Isalele bonso bakadi bimane kulu. Wakamba ne, Yehowa, Nzambi wa Isalele, ikale ne disanka; yeye wakambila Davidi tatu wanyi dî mukana muandi, wakadishikisha ne bianza biandi ne, Ku dituku adi dinakafuma ne bantu banyi mu buloba bua Ejipitu, tshiakasungula musoko mukuabo munkatshi mua bisamba bia Bena Isalele bionso bua kuasamu nsubu bua dina dianyi dikalemu; tshiakasungula muntu mukuabo bua kuikaleye mukelenge ku mutu kua bantu banyi Bena Isalele; kadi katataka nakusungula Yelushalema bua dina dianyi dikalemu; nakusungula Davidi bua kuikaleye ku mutu kua bantu banyi, Bena Isalele. Bualu buakadi munda mua mutshima mua tatu wanyi Davidi bua kuibakileye dina dia Yehowa, Nzambi wa Isalele, nsubu. Kadi Yehowa wakambila Davidi tatu wanyi ne, Wewe wakuenza bimpe bua bualu ebu buakadi mu mutshima webe bua kuibakila dina dianyi nsubu; kadi wewe kuena ungibakila nsubu nansha; kadi muana webe mulume udi uhatuka munda muebe, yeye neibakile dina dianyi nsubu. Yehowa wakashikisha dî diakambeye; bualu bua meme nakajuka mu muaba wa Davidi tatu wanyi, bua kushikama mu nkuasa wa bukelenge bua Isalele, muakalaya Yehowa; nakamana kuibakila dina dia Yehowa, Nzambi wa Isalele, nsubu. Nakatekamu mushete wa Nzambi muakadi tshihungidi tshia Yehowa tshiakahungeye ne Bena Isalele. Yeye wakimana ku mpala kua tshioshelu tshia Yehowa ku mpala kua Bena Isalele bonso, wakolola bianza biandi (bualu bua Solomo Wakenza tshiambidilu tshia tshiamu tshia mitaku: bule buatshi buakadi coudées itanu, ne butshiama buatshi buakadi coudées itanu, ne bule buatshi bua mulu buakadi coudées isatu, wakatshidika mu tshiendedi; yeye wakimana ha mutu hatshi, wakatua binu biandi hanshi ku mpala kua Bena Isalele bonso, wakolola bianza biandi kulu), wakamba ne, Yehowa, Nzambi wa Isalele, kakuena Nzambi mukuabo bu wewe mu diulu anyi hanshi ha buloba; udi ulama tshihungidi tshiebe ne luse lujalame ne bantu bebe badi benda ku mpala kuebe ne mitshima yabo yonso; wakashikisha kudi Davidi tatu wanyi milayi yonso wakamulaya; bulelela, wewe udi wamba dî mukana muebe, udi udishikisha ne bianza biebe, bu muakuenjibua lelu eu. Nunku Yehowa, Nzambi wa Isalele, ushikishe dî diwakalaya muntu webe Davidi tatu wanyi ne, Kuena uhanga muntu mulume wa kushikama ku mpala kuanyi mu nkuasa wa bukelenge bua Isalele, biadimuke bana bebe mu nshila yabo bua kuendabo mu mikenji yanyi bu muwakuenda ku mpala kuanyi. Katataka Yehowa, Nzambi wa Isalele, dî diwakambila muntu webe Davidi dijadikibue. Kadi Nzambi mene neashikame munkatshi mua bantu ba ha buloba bulelela, anyi? Tangila, wewe udi uhita diulu ne muaba udi ha mutu ha diulu bunene; ka bu mudi nsubu eu unakukuibakila neatambe bukese! Kadi witabushe kutendelela ne kutendekena kua muntu webe, Yehowa Nzambi wanyi, bua wewe kunvua dî ne kulomba bidi muntu webe ulomba ku mpala kuebe; bua mesu ebe atabale, atangile ku nsubu eu munya ne butuku, ku muaba eu mene uwakalaya bua kutekamu dina diebe; bua wewe kunvua kulomba kudi muntu webe ulomba ku muaba eu. Witabushe kutendekena kua muntu webe, ne kua bantu bebe Bena Isalele, hatendelelabo ku muaba eu; bulelela, unvue biebe mu muaba webe, mu diulu mene; ne haunvua, utubuikidile mibi yetu. Bienzela muntu muena kuabo bibi, ne biamutshihishabo mitshihu, ne bialueye bua kuditshiha kudi tshioshelu tshidi mu nsubu muebe, unvue biebe mu diulu, wenze biebe, ulumbuluishe bantu bebe, ukengeshe muntu mubi bua kuhingisha bienzedi biandi ha mutu handi; ubingishe muntu muakane bua kumufutshila bu muakadi buakane buandi. Bikala bena lukuna bahite Bena Isalele bukole, bualu bua bobo bakukuenzela wewe bibi, ne bialukilabo bua kutonda mibi yabo kudi dina diebe, biakutendelelabo ne biakutendekenabo mu nsubu eu, unvue biebe mu diulu, ubuikidile bantu bebe Bena Isalele mibi yabo, ulue nʼabo kabidi mu buloba buwakabaha ne batatuʼabo. Hawabuikila diulu, ne nvula kena uloka bualu bua bobo bakukuenzela wewe bibi, biatendelelabo ku muaba eu, ne biatondabo mibi yabo kudi dina diebe, ne bialekelabo mibi yabo bualu bua wewe wakabakengesha, unvue biebe mu diulu, ubuikidile bantu bebe ne Bena Isalele mibi yabo, hawabayisha nshila muimpe udibo ne bua kuendela; ulokeshe nvula ha buloba buwakaha bantu bebe bu buhianyi buabo. Bialua tshiole nansha tshihuhu anyi biakuata bintu mamoma ne butu, nansha mikumbi nansha meshi, biatshintshimika bena lukuna misoko yabo; bialua makenga ne masama onso; biakutendelela ne biakutendekena muntu yonso, nansha Bena Isalele bonso, bualu bua muntu yonso udi mumanye disama diandi ne ntatu yandi, ne biololabo bianza biabo ku nsubu eu; unvue biebe mu muaba webe mu diulu; ubabuikidile mibi yabo, ufute muntu yonso bu muakadi bienzedi biandi, nguewe udi mumanye mutshima wandi (bualu bua wewe nkayebe udi mumanye mitshima ya bantu); bua bobo bakutshine, bende mu nshila yebe hatshidibo bashikame mu buloba buwakaha batatu betu. Bualu bua muenyi udi kayi wa munkatshi mua bantu bebe Bena Isalele, hafumeye ku buloba budi kule bua dina diebe dinene ne bua tshianza tshiebe tshikole ne bua diboko diebe diolola, halueye kutendelela ku nsubu eu, unvue biebe mu muaba webe mu diulu, witabushe malu onso adi muenyi eu ukulomba; bua bantu bonso ba ha buloba bamanye dina diebe, bakutshine, bu mudi bantu bebe Bena Isalele; bamanye kabidi ne nsubu eu unakukuibakila udi ubikidibua dina diebe. Biaya bantu bebe bua kuluanganabo ne bena lukuna babo, mu nshila yonso ûdi ubatumina, ne biakutendelelabo ku musoko eu uwakusungula, ne ku nsubu eu unakuibakila dina diebe, unvue kulomba kuabo ne kutendekena kuabo mu diulu, ujadike malu abo. Biakuenzelabo bibi (bualu bua kakuena muntu udi kayi ne mibi) ne biwikala nʼabo tshiji, biwabafila kudi bena lukuna babo, ne biayabo nʼabo mu buhika ku buloba budi kule anyi budi ha buihi; kadi bielanganabo meji mu buloba buwakabatuma mu buhika, biakudimunabo mitshima yabo, biakutendekenabo mu buloba bua buhika buabo bamba ne, Tuakuenza bibi, tuakubambuka mu nshila, tuakasesuka mu malu mabi; biakudimunabo mitshima yabo yonso ne mioyo yabo kûdi mu buloba bua buhika buabo kuakaya bantu nʼabo mu buhika, ne biatendelelabo bua buloba buabo buwakaha batatuʼabo ne bua musoko eu uwakusungula, ne bua nsubu eu unakuibakila dina diebe; unvue biebe mu diulu, muaba webe ûdi mushikame mene, kutendelela kuabo ne kutendekena kuabo, ujadike malu abo, ubuikidile bantu bebe bakukuenzela bibi mibi yabo. Katataka, Nzambi wanyi, ndi nkusengelela ne, Utabale mesu ebe, teleja matshu ebe ku kulomba kundi ndomba mu muaba eu. Katataka, Yehowa Nzambi, juka, ubuele mu muaba webe wa kuikisha, wewe ne mushete wa bukole buebe; Yehowa Nzambi, bakuidi bebe baluatshishibue ne luhandu; bansanto bebe basanke mu buimpe buebe. Yehowa Nzambi, kukudimushi mpala wa muntu webe wakelabo manyi ha mutu handi; uvuluke luse luebe lujalame kudi Davidi, muntu webe. Hakashikisha Solomo kutendelela Nzambi, kahia kakahona mu diulu, kakosha milambu ya kuosha ne milambu mikuabo; butumbi bua Yehowa buakûsha nsubu tente. Bakuidi kabakadi mua kubuela mu nsuhu wa Yehowa, bualu bua butumbi bua Yehowa buakûsha nsubu tente. Bena Isalele bonso bakatangila bakahona kahia mu diulu, ne hakûsha butumbi bua Yehowa nsubu tente; bobo bakakukuila hanshi, bakatendelela, bakasakidila Yehowa, bamba ne, Yeye udi muimpe, bualu bua luse luandi ludi lujalame tshiendelele. Hashishe mukelenge ne bantu bonso bakafila milambu kudi Yehowa. Mukelenge Solomo wakafila milambu ya ngombe binunu makumi abidi ne bibidi, ne ya mikoko binunu lukama ne makumi abidi. Nunku mukelenge ne bantu bonso bakajidila nsubu wa Nzambi. Bakuidi bakimana mu milongo muakadi midimu yabo; Bena Lewi bakadi ne bintu bia kuimbila nʼabi Yehowa misambu, biakenzabo kudi Davidi bua kusakidila nʼabi Yehowa (bua luse luandi ludi lujalame tshiendelele) hakadi Davidi utumbisha nʼabi Nzambi; bakuidi bakela mpungi ku mpala kuabo; Bena Isalele bonso bakadi bimana kulu. Solomo wakajidila tshiendedi tshiakadi ku mpala kua nsubu wa Yehowa; bualu bua yeye wakafilaku milambu ya kuosha ne dianyi dia milambu ya kuvuisha nʼai ditalala; bualu bua tshioshelu tshia tshiamu tshia mitaku tshiakenzela Solomo katshiakadi mua kukumbana bunene bua milambu ya kuosha ne ya bukula ne ya dianyi. Solomo wakalambishila bantu bidia bia disanka tô matuku muanda mutekete; Bena Isalele ba bungi bakadi nʼandi ku tshibuelelu tshia Hamata tô ne ku kasulu ka Ejipitu. Dituku dia muanda mukulu diakadi dia disangisha dia tshijila; bualu bua bakadi bajidila tshioshelu matuku muanda mutekete, ne bakadia bidia bia disanka matuku muanda mutekete. Ku dituku dia makumi abidi ne asatu dia mu ngondo wa muanda mutekete yeye wakatuma bantu kuabo ku nsubu yabo ya ntenta, bakadi ne disanka dinene mu mitshima yabo, bua buimpe buakalesha Yehowa Davidi ne Solomo ne Bena Isalele, bantu bandi. Nunku Solomo wakashikisha nsubu wa Yehowa ne nsubu wa mukelenge; Solomo wakamana malu onso bimpe akadi mu mutshima wandi bua nsubu wa Yehowa ne bua nsubu wandi kabidi. Yehowa wakamueneka kudi Solomo butuku, wakamuambila ne, Nakunvua kulomba kuebe, nakadisunguila muaba eu bu nsubu wanyi wa milambu. Binabuikila diulu bua nvula kayiloki, anyi binatuma mikumbi bua kudiayi bintu biakamena mu buloba, anyi binatuma tshihuhu munkatshi mua bantu banyi, biadihuekesha bantu banyi badi babikila dina dianyi, biatendelelabo, biakebabo mpala wanyi, ne biakudimunabo mitshima yabo bua mibi yabo, nengunvuile mu diulu, nembabuikidile mibi yabo, nensangashe buloba buabo. Nentabale mesu anyi, nenteleje matshu anyi ku kulomba kudibo balomba mu nsubu eu. Bualu bua nakusungula, nakajidila nsubu eu, bua dina dianyi dikalemu tshiendelele; mesu anyi ne mutshima wanyi nebikalemu tshiendelele. Wewe, bienda ku mpala kuanyi bu muakenza Bayidi tatuʼebe, biwatumikila mikenji yonso inakukuambila, biwananukila kulonda mei anyi mafunda ne mei anyi, majalame, nenjadike nkuasa wa bukelenge buebe, bu munakahunga tshihungidi ne Davidi tatuʼebe ne, Kuena uhanga muntu wa kukokesha Bena Isalele. Kadi biwasesuka, biwalekela mei anyi mafunda ne mikenji yanyi binakateka ku mpala kuebe, biwaya kukuatshila nzambi mikuabo mudimu ne bua kuyitendelela, nenjule bantu aba tô ne ku miji mu buloba buanyi bunakabaha; ne nsubu eu unakajidila dina dianyi, nemmûmushe ku mesu kuanyi, nemmuvuishe bu lusumuinu ne tshihendu munkatshi mua bantu bonso. Nsubu eu udi munene, muntu yonso wahitaku neakeme, wamba ne, Yehowa wakenzela buloba ebu ne nsubu eu nunku bishi? Nebabakudimune ne, Bualu bua bobo bakahidia Yehowa, Nzambi wa batatuʼabo, wakafuma nʼabo mu buloba bua Ejipitu, bakatendelela nzambi mikuabo, bakayitendelela, bakayikuatshila mudimu; nunku yeye wakabatumina makenga â onso. Hakahita bidimu makumi abidi hakamana Solomo kuibaka nsubu wa Yehowa ne nsubu wandi kabidi, Solomo wakasa misoko yakamuha Hulama, wakashikikamu Bena Isalele. Solomo wakaya ku Hamatasoba, wakauhita bukole. Yeye wakasa Tademô mu tshihela, ne misoko mikuabo ya mu Hamata bua kutekelamu bintu biandi. Yeye wakasa kabidi Bete-holona ku mutu kua mukuna ne Bete-holona mukuabo mu tshibanda, misoko ya ngumbu, ne bibi bia biamu; wakasa Balata ne misoko mikuabo yakadi nʼai Solomo bua kutekamu bintu biandi ne misoko ya makalu andi ne misoko ya bena nvita bandi bakadi benda ha nyima ha tubalu ne misoko yonso yakasua Solomo kuasa mu Yelushalema ne mu Lebanona, ne mu nseke yonso yakakokesheye. Bantu bakuabo ba Bena Hiti ne Bena Amole ne Bena Pelese ne Bena Hiwi ne Bena Yebuse bakadi bashala, bakadi kabayi Bena Isalele; Solomo wakabuesha bana babo bakadi bashala ku nyima kuabo, bakadi kabayi bashihibue kudi Bena Isalele, mu buhika tô ne ku dituku edi. Kadi Solomo kakabuesha bana ba Bena Isalele bu bahika mu mudimu wandi; kadi bobo bakadi bena nvita ne tupitene ne tuhita tua bena makalu ne ba bakadi benda ha nyima ba tubalu. Bobo bakadi tupitene tua Solomo ku mutu kua Bena Isalele, tuakadi nkama ibidi ne makumi atanu. Solomo wakumusha muana mukashi wa Palô mu musoko wa Davidi, ku nsubu wakamuibakileye; bualu bua yeye wakamba ne, Mukashi wanyi kena mushikame mu nsubu wa Davidi, mukelenge wa Bena Isalele, bualu bua ei idi miaba ya tshijila yakadi mushete wa Yehowa. Hashishe Solomo wakahia milambu ya kuosha ba tshioshelu tshia Yehowa tshiakaseye mu mbalanda buatshia-buatshia bu muakadi mikenji ya Mose, ku matuku a lumingu, ne hakabala ngondo, ne hakadiabo bidia bia disanka misangu isatu ku tshidimu ku tshidimu, hakadiabo bidia bidi kabiyi ne luevene, ne bidia bia disanka dia mbingu, ne bidia bia disanka dia bitandatanda. Yeye wakasungula milongo ya bakuidi mu midimu yabo, ne Bena Lewi mu midimu yabo bu muakadi mikenji ya Davidi, bua kuimbabo misambu, ne bua kuenzabo midimu ya bakuidi buatshia-buatshia; ne balami ba bibi ku milongo yabo ku tshibi ne ku tshibi; bualu bua Davidi, muntu wa Nzambi, wakela mikenji nunku. Kabakasesuka ku mikenji ya mukelenge kudi bakuidi ne Bena Lewi mu malu au onso nansha mu bibutshilu bia bintu. Bakalongolola midimu yonso ya Solomo ya mu nsubu wa Yehowa ku makunshi tô ne hakamanabo nsubu mujima. Nunku nsubu wa Yehowa wakashikishibua. Hashishe Solomo wakaya ku muelelu wa mai manene ku Esione-gebê, ne ku Elota mu buloba bua Edome. Hulama wakamutumina matu ku bianza bia bantu bandi, mbantu bakamanya mua kuendesha matu; bakaya ne bantu ba Solomo ku Ofî, bakafumaku ne ntalanta ya or nkama inai ne makumi atanu, bakalua nʼai kudi Solomo. Hakunvua mukelenge mukashi wa Sheba lumu lua Solomo, yeye wakalua ku Yelushalema ne tshisumbu tshia bantu tshinene bua kuteteye Solomo ne makonka makole; wakadi ne tumelo tua bungi tutuala bintu bia muhuya muimpe ne or ya bungi ne mabue a mushinga mukole. Hakafikeye kudi Solomo, yeye wakamuambila malu onso akadi mu mutshima wandi. Solomo wakitaba ku makonka andi onso; yeye kakamusokoka bualu bumue, wakamuambila malu onso. Hakamona mukelenge mukashi wa Sheba lungenyi lua Solomo, ne nsubu wakaseye, ne bintu bia kudia bia ku mesa andi, ne muakushikikeye bena mudimu bandi ne bakuatshishi bandi, ne bilulu biabo, ne batuadi ba makoho andi ne bilulu biabo, ne tshibandilu tshiakadiye ubandila ku nsubu wa Yehowa, yeye kakadi ne mutshima wa kumukudimuna di. Yeye wakambila mukelenge ne, Lumu lunakunvua mu buloba buanyi lua bienzedi biebe ne lua lungenyi luebe luakadi lua bushuwa. Kadi meme tshiakitabusha mei a bantu tô ne hanakulua nkayanyi ne hanakubimona ne mesu anyi; tangila, kabakungambila tshituha tshia bunene bua lungenyi luebe; wewe udi uhita lumu lunakunvua bunene. Bantu aba ne bena mudimu bebe badi bimana ku mpala kuebe badi bunvua lungenyi luebe badi ne disanka dinene. Yehowa Nzambi webe, wakasanka bualu buebe bua kukushikika ha nkuasa wandi wa butumbi bua wewe kuikala mukelenge ku mpala kua Yehowa Nzambi webe, avudishibue disanka! Bualu bua Nzambi webe wakananga Bena Isalele bua kubajadika tshiendelele, nunku yeye wakakuhingisha mukelenge ku mutu kuabo bua wewe kuenza malu mimpe ne makane. Mukelenge mukashi wakamuha ntalanta ya or lukama ne makumi abidi, ne bintu bia muhuya muimpe bia bungi, ne mabue a mushinga mukole; kakuakadi bintu bia muhuya muimpe bikuabo bu biakaha mukelenge mukashi wa Sheba mukelenge Solomo. Bantu ba Hulama ne bantu ba Solomo bakalua ne or wa ku Ofî, bakalua ne mitshi ya sandal ne mabue a mushinga mukole. Mukelenge wakenza bintu bilengele bia mu nsubu wa Yehowa ne bia mu nsubu wandi ne bisanji ne nzenze bia bimbi ba misambu ku mitshi ei ya sandal; kabakatangila bintu bu ebi diambedi mu buloba bua Yuda. Mukelenge Solomo wakaha mukelenge mukashi wa Sheba bintu bionso biakanangeye, tshionso tshiakalombeye ha mutu ha bintu biakalueye nʼabi kudi mukelenge. Nunku yeye ne bantu bandi bonso bakahingana ku buloba buandi. Bujitu bua or buakasangisha Solomo mu tshidimu tshimue buakadi bua ntalanta ya or nkama isambombo ne makumi asambombo ne isambombo, ha mutu ha or yakalua nʼai bendi ba mushinga; bakelenge bonso ba mu Alabâ ne ba-gouverneur ba mu nseke ai yonso bakalua ne or ne argent kudi Solomo. Mukelenge Solomo wakatula ngabu ya or nkama ibidi; bakatula ngabu ne ngabu ku nshekele ya or nkama isambombo. Wakatula ngabu ya or nkama isatu mikuabo; wakatula ngabu ne ngabu ku nshekele ya or nkama isatu; mukelenge wakayiteka mu nsubu wa ditu dia Lebanona. Bualu bukuabo, mukelenge wakenza nkuasa wa bukelenge ne mibanga, wakateka or ku nseke yonso. Nkuasa wa bukelenge wakadi ne tshibandilu tshia bidiatshilu bisambombo, ne tshitekelu tshia makasa tshia or tshitue ne nkuasa; bitekelu bibidi bia maboko biakadi ku luseke ne luseke lua nkuasa; tshifuanyikishi tshia nyama wa ntambue tshiakadi tshilamata ku tshitekelu ne tshitekelu tshia maboko. Bifuanyikishi bia nyama ya ntambue dikumi ne bibidi biakadi biteka ku bidiatshilu bisambombo, bibidi ku tshidiatshilu ne tshidiatshilu, tshimue ku luseke, tshimue ku luseke. Kabakadi benza tshintu bu etshi mu bukelenge bukuabo to! Mpanza yonso ya kunuina mukelenge Solomo yakadi ya or, ne mpanza yonso ya mu nsubu wandi wa ditu dia Lebanona yakadi ya or kabidi; kabakabala argent bu tshintu tshia mushinga mukole mu matuku a Solomo. Bualu bua mukelenge wakadi ne matu akaya ku Tâshishi ne bantu ba Hulama; matu au akafuma ku Tâshishi musangu umue mu bidimu bisatu ne or ne argent ne mibanga ne nkima ne nyunyu ya kayiba. Nunku mukelenge Solomo wakatamba bakelenge bonso ba ha buloba bubanji ne mu meji. Bakelenge bonso ba ha buloba bakalua kudi Solomo bua kunvuabo meji akamuha Nzambi mu mutshima wandi. Bakalua muntu ne muntu ne mulambu wandi, mpanza ya or ne ya argent ne bilulu ne bintu bia nvita ne bintu bia muhuya muimpe ne tubalu ne nyama ya mpunda ku tshidimu ku tshidimu, Solomo wakadi ne nsubu ya tubalu ne ya makalu binunu binai, ne bantu bakadi benda ha nyima ha tubalu binunu dikumi ne bibidi bakatekeye mu misoko yakadi ne makalu andi ne mu Yelushalema muakadi mukelenge. Yeye wakakokesha bakelenge bonso ku musulu wa Pelata tô ne ku buloba bua Bena Peleshete ne ku mukalu wa buloba bua Ejipitu. Mukelenge wakakumbasha argent mu Yelushalema bu mabue; wakakumbasha mitshi ya cèdre bu bungi bua mitshi ya sycomore ya mu bibanda. Bakangatshila Solomo tubalu mu Ejipitu ne mu maloba onso. Bienzedi bia Solomo bikuabo, bia kumudilu ne bia kunshikidilu, kabiena bifunda mu kulondolola kua Natana muprofete, ne kua Ahiya, Muena Shiloa, ne mu kulondolola kua bikena kumona bia Ido, mumonyi wa malu, biakamoneye bia Yalobama, muana wa Nebata, anyi? Solomo wakakokesha mu Yelushalema ku mutu kua Bena Isalele bidimu makumi anai. Solomo wakalala tulu diatshimue ne bankambua bandi, bakamujika mu musoko wa Davidi, tatuʼandi. Lehabama, muanʼandi, wakakokesha mu muaba wandi. Lehabama wakaya ku Shekeme; bualu bua Bena Isalele bonso bakadisangisha ku Shekeme bua kumuhingisha mu bukelenge. Hakunvua Yalobama, muana wa Nebata, lumu elu (bualu bua yeye wakadi munyemene mu Ejipitu ku mesu kua Solomo), Yalobama wakahingana mufume mu Ejipitu. Bakamubikila; Yalobama ne Bena Isalele bonso bakalua, bakambila Lehabama ne, Tatu webe wakanvudisha mutshi wetu wa tshikokedi bujitu bukole; nunku wewe uheheshe mudimu mukole wakatukengesha nʼau tatu webe ne tshikokedi etshi tshikole tshiakatekeye mu nshingu yetu, hashishe netukukuatshile mudimu. Yeye wakabambila ne, Nuhingane hahita matuku asatu. Nunku bantu bakumuka ku mpala kuandi. Mukelenge Lehabama wakasangisha dî ne bantu banunu bakadi bimane ku mpala kua tatu wandi Solomo hakadiye ne muoyo ne, Nuenu nudi nungambile lungenyi kai lua kukudimuna nʼalu bantu aba? Bobo bakamuambila ne, Biwalesha bantu aba kalolo, biwabasankisha, biwabambila mei mimpe, bobo nebikale bena mudimu bebe tshiendelele. Kadi yeye wakalengulula dî diakamuambila bantu banunu, wakasangisha di ne bansongalume bakadi bakela nʼandi, bakadi bimana ku mpala kuandi. Yeye wakabakonka ne, Nuenu nudi nungambile lungenyi kai lua kukudimuna nʼalu bantu aba badi bangambila ne, Uheheshe tshikokedi tshiakatukengesha nʼatshi tatuʼebe? Bansongalume bakadi bakola nʼandi bakamuambila ne, Ukudimune bantu aba bakabambila di adi ne, Tatu webe wakatuvudisha tshikokedi tshiakanemesha bujitu, kadi wewe utuheheshetshi; wewe ubambile ne, Kantengenene kanyi nekahite tshimono tshia tatuʼanyi bunene. Tatuʼanyi wakavudisha tshikokedi tshienu, kadi meme nenkumbashe bintu ha mutu hatshi; tatuʼanyi wakanukengesha ne nsokotshi, kadi meme nennukengeshe ne tuminyiminyi. Nunku Yalobama ne bantu bonso bakahingana kudi Lehabama hakahita matuku asatu bu muakabambila mukelenge ne, Nuhingane kundi hahita matuku asatu. Mukelenge wakabakudimuna mei makole; mukelenge Lehabama wakalengulula dî diakamuambila bantu banunu, wakabambila anu mei akamuyisha bansongalume ne, Tatu wanyi wakavudisha mutshi wenu wa tshikokedi bujitu, kadi meme nenkumbashe bintu ha mutu hatshi; tatu wanyi wakanukengesha ne nsokotshi, kadi meme nennukengeshe ne tuminyiminyi. Nunku mukelenge kakunvua dî dia bantu; bua bualu ebu buakafuma kudi Nzambi bua kujadika dî dia Yehowa diakambileye Yalobama, muana wa Nebata, mukana mua Ahiya, Muena Shiloa. Hakamona Bena Isalele bonso ne, Mukelenge kena witabusha dî dietu, bobo bakebesha mukelenge ne, Tuetu tudi ne luseke luetu lua bintu mu Davidi kudi kunyi? Katuena ne buhianyi buetu kudi muana wa Yishai; Bena Isalele, hinganai muntu ne muntu ku nsubu wandi wa ntenta; nuenu ba Davidi nulame nsubu yenu. Nunku Bena Isalele bonso bakahingana ku nsubu yabo ya ntenta. Kadi Lehabama wakakokesha Bena Isalele bakadi bashikame mu misoko ya mu Yuda. Hashishe Lehabama wakatuma Hadolama wakadi ku mutu kua bena mudimu, ne Bena Isalele bakamushiha ne mabue. Mukelenge Lehabama wakabuela mu dikalu diandi lukasa bua kunyemeneye ku Yelushalema. Nunku Bena Isalele bakutombokela ba mu nsubu wa Davidi tô ne ku dituku edi. Hakahingana Lehabama ku Yelushalema, yeye wakasangisha Bena Yuda ne Bena Benyamina, bena nvita binunu lukama ne makumi muanda mukulu, bua kuluanganabo ne Bena Isalele ne bua kuhingisha bukelenge kudi Lehabama kabidi. Kadi dî dia Yehowa diakalua kudi Shemaya, muntu wa Nzambi, ne, Wambile Lehabama, muana wa Solomo, mukelenge wa Yuda, ne Bena Isalele bonso ba mu Yuda ne Benyamina ne, Yehowa udi wamba ne, Kanuyi, kanuluanganyi ne bana benu; nuhingane muntu ne muntu ku nsubu wandi bua bualu ebu budi bufuma kundi. Nunku bakitabusha dî dia Yehowa, bakalukila, kabakaya kuluangana ne Yalobama. Lehabama wakashikama mu Yelushalema, wakibaka misoko ya mabue mu Yuda. Yeye wakasa Beteleheme ne Etama ne Tekoa ne Betesû ne Soko ne Adulama ne Gata ne Malesha ne Zifa ne Adolayima ne Lakisha ne Azeka ne Solea ne Ayalona ne Hebelone, idi mu Yuda ne Benyamina, misoko yakadi ne ngumbu. Yeye wakajadika misoko ya ngumbu bikole, wakatekamu tupitene tua masalayi ne bintu bia kudia ne manyi ne nvinyo. Yeye wakateka ngabu ne mafuma mu misoko yonso, wakayidika bikole. Bena Yuda ne Bena Benyamina bakadi ku luseke luandi. Bakuidi ne Bena Lewi bakadi mu nseke yonso ya Isalele bakalamata kudiye. Bualu bua Bena Lewi bakashiya misoko yabo ne mahianyi abo, bakalua ku Yuda ne Yelushalema; bualu bua Yalobama ne bana bandi balume bakabihata, bua bobo kabenzedi Yehowa mudimu wandi wa buakuidi; yeye wakadisunguila bakuidi bua kufilabo milambu ha mutu ha mikuna ne milambu ya mpumbu ya mbushi ne ya bana ba ngombe yakeleye. Bantu bonso ba mu Isalele bakadi bakeba Yehowa Nzambi wa Isalele ne mitshima yabo yonso bakalonda ku nyima kuabo ku Yelushalema bua kufilabo milambu kudi Yehowa, Nzambi wa bankambua babo. Nunku bakajadika bukelenge bua Yuda, baka-vuisha Lehabama, muana wa Solomo, bukole bidimu bisatu; bualu bua bakenda mu nshila wa Davidi ne wa Solomo bidimu ebi bisatu. Lehabama wakabaka mukashi, dina diandi Mahalata, muana mukashi wa Yelimota, muana wa Davidi ne wa Abihayila, muana mukashi wa Eliaba, muana wa Yishai; yeye wakamulelela bana ba balume, Yeusha ne Shemaliya ne Zahama. Ku nyima kuandi yeye wakabaka Mâka, muana mukashi wa Abashaloma: yeye wakamulelela Abiya ne Atai ne ne Shelomita. Lehabama wakananga Mâka, muana wa Abashaloma, ha mutu ha bakashi bandi bonso ne bakashi bahika bakadiye mubake (bualu bua yeye wakabaka bakashi dikumi ne muanda mukulu ne bakashi bahika makumi asambombo; wakalela nʼabo bana ba balume makumi abidi ne muanda mukulu ne ba bakashi makumi asambombo). Lehabama wakasungula Abiya, muana wa Mâka muenyampala ku mutu kua bana babo balume; bualu bua yeye wakasua kumuhingisha mu bukelenge. Yeye wakadi ne budimu, wakamuangalasha bana bandi balume bonso mu misoko ya Yuda ne Benyamina, mu misoko yakadi ne ngumbu; yeye wakabaha bintu bia kudia bia bungi. Yeye wakabakebela bakashi ba bungi. Hakadi bukelenge hua Lehabama bujadikibue bimpe, ne hakakoleye biakane, yeye wakasesuka ku mikenji ya Yehowa, ne Bena Isalele bakamulonda. Mu tshidimu tshitanu tshia bukelenge bua Lehabama, Shishaka, mukelenge wa Ejipitu, wakalua hua kuluisha Bena Yelushalema, bualu bua bobo bakenzela Yehowa bibi. Wakadi ne mikalu tshinunu ne nkama ibidi ne bantu bakadi benda ha nyima ha tubalu binunu makumi asambombo. Kabakamanya mua kubala bungi bua bantu bakuabo bakafuma nʼandi mu bululu: Bena Lubima ne Bena Sukiya ne Bena Atiopa. Yeye wakanyenga misoko ya ngumbu ya Yuda, wakafika ku Yelushalema. Hashishe Shemaya muprofete wakalua kudi Lehabama ne bantu banene ba mu Yuda, bakadi badisangisha mu Yelushalema bualu bua Shishaka, wakabambila ne, Yehowa udi wamba ne, Nuenu nuakundekela, nunku nakunushiya mu bianza bia Shishaka. Hashishe bantu banene ba mu Isalele ne mukelenge bakadihuekesha; bakamba ne. Yehowa udi muakane Hakamona Yehowa ne bobo bakadihuekesha, dî dia Yehowa diakalua kudi Shemaya kabidi ne, Bobo bakadihuekesha; tshiena mbashiha, kadi nembahandishe tshituha tshihi, tshiena mpatula tshiji tshianyi ku Yelushaluma ku tshianza tshia Shishaka. Kadi bobo nebikale bena mudimu bandi, bua bobo bamanye mudimu wanyi ne mudimu ya makelenge makuabo. Nunku Shishaka, mukelenge wa Ejipitu, wakalua bua kuluisha Bena Yelushalema wakanyenga bintu bia mu bibutshilu bia mu nsubu wa Yehowa ne bia mu nsubu wa mukelenge; wakaya nʼabi bionso; wakangata ngabu ya or yakatulabo kudi Solomo kabidi. Mukelenge Lehabama wakatula ngabu ya tshiamu tshia mitaku mu miaba yai, wakayiteka mu bianza bia tupitene tua balami ba bibi bia nsubu wa mukelenge. Misangu yonso yakabuela mukelenge mu nsubu wa Yehowa tupitene tuakamema ngabu, tuakalua nʼai, hashishe tuakayihingisha mu nsubu wa bulami. Hakadihuekesheye tshiji tshia Yehowa tshiakumuka kudiye, nunku kabakamubutula; kuakadi malu makuabo numpe mu Yuda. Nunku mukelenge Lehabama wakadikolesha mu Yelushalema, wakakokesha bantu; Lehabama wakadi ne bidimu makumi anai ne tshimue hakabangeye kukokesha; wakakokesha bidimu dikumi ne muanda mutekete mu Yelushalema, musoko wakasungula Yehowa munkatshi mua bisamba bia Bena Isalele bionso bua kutekamu dina diandi; dina dia mamu wandi diakadi Nâma, Muena Amona. Yeye wakenza malu mabi, bualu bua yeye kakajadika mutshima wandi bua kukebeye Yehowa. Bienzedi bia Lehabama, bia kumudia ne bia kunshikidilu kabiena bifunda mu kulondolola kua Shemaya muprofete, ne kua Ido mumonyi wa malu, bu mudibo bafunda mikanda ya kulondolola anyi? Lehabama ne Yalobama bakadi baluangana nvita misangu yonso, Lehabama wakalala tulu ne bankambua bandi, bakamujika mu musoko wa Davidi; Abiya, muana wandi, wakakokesha mu muaba wandi. Mu tshidimu tshia dikumi ne muanda mukulu tshia mu bukelenge bua Yalobama, Abiya wakabanga kukokesha mu Yuda. Yeye wakakokesha mu Yelushalema bidimu bisatu; dina dia mamu wandi diakadi Mikaya, muana mukashi wa Uliele wa mu Gibea. Abiya ne Yalobama bakadi baluangana nvita. Abiya wakasa mualu wa nvita ne bena nvita ba bukitu binunu nkama inai; Yalobama wakaluangana nʼandi ne bena nvita ba bukitu binunu nkama muanda mukulu. Abiya wakimana ha mutu ha mukuna wa Semalayima mu luseke lua mikuna ya Efelayima, wakamba ne, Unvuai, Yalobama ne Bena Isalele bonso; kanuena bamanye ne, Yehowa Nzambi wa Isalele, wakaha bukelenge bua Isalele kudi Davidi tshiendelele, kudiye ne kudi bana bandi balume ku tshihungidi tshia luehu, anyi? Kadi Yalobama, muana wa Nebata, muena mudimu wa Solomo, muana wa Davidi, wakajuka, wakatombokela mukelenge wandi. Bilumelume ne bantu ba hatuhu bakadisangisha kudiye, bakadikolesha bua kuhidia Lehabama, muana wa Solomo, hakadi Lehabama nsongalume wa mutshima mutekete, kakadi ne bukole bua kubakandamena. Katataka nuenu nudi nuelangana meji bua kuhumbisha bukelenge bua Yehowa budi mu bianza bia bana ba Davidi; nuenu nudi tshisumbu tshinene, nudi ne bana ba ngombe ba or bakatulabo kudi Yalobama bu nzambi yenu. Kanuakibata bakuidi ba Yehowa, bana ba Alona, ne Bena Lewi, kanuakadisunguila bakuidi bu mudi tshilele tshia bantu ba mu makelenge makuabo, anyi? Nunku muntu yonso walua kudijidila ne muana mulume wa ngombe ne bimpanga muanda mutekete, yeye mene udi mua kuikala muakuidi kudi nzambi ya hatuhu. Kadi bua tuetu, Yehowa udi Nzambi wetu, katuakamulekela; tudi ne bakuidi, bana ba Alona, ne Bena Lewi badi bakuatshila Yehowa mudimu; bobo badi bafila milambu ya kuosha ne musenga wa manananshi kudi Yehowa ku dinda ku dinda ne ku dilolo ku dilolo; badi bateka bidia bilesha ha mesa a tshijila kabidi; badi batemesha minda idi ha bitekelu bia or ku dilolo ku dilolo kabidi; bualu bua tuetu tudi tulonda mukenji wa Yehowa Nzambi wetu; kadi nuenu nuakumlekela. Tangilai, Nzambi udi nʼetu ku mutu kuetu, ne bakuidi bandi badi ne mpungi ya kuela bua kunudimusha. Nuenu Bena Isalele, kanuluanganyi ne Yehowa, Nzambi wa bankambua benu; bualu bua kanuena mua kumuhita bukole. Kadi Yalobama wakamana kuteka bâlaminyi ku nyima kuabo; nunku bakuabo bakadi ku mpala kua Bena Yuda, ne bâlaminyi bakadi ku nyima kuabo. Hakatangila Bena Yuda ku nyima, monai, bakadi baluangana ku nyima kuabo ne ku mpala kuabo kabidi; bakadila kudi Yehowa, ne bakuidi bakela mpungi. Ha diba adi Bena Yuda bakela mbila; hakela Bena Yuda mbila, Nzambi wakalekesha Yalobama ne Bena Isalele bonso ku mpala kua Abiya ne Bena Yuda. Bena Isalele bakanyema ku mpala kua Bena Yuda; Nzambi wakabafila mu bianza biabo. Abiya ne bantu bandi bakabashiha ne kushiha kukole; Bena Isalele ba bukitu binunu nkama itanu bakadishinda hanshi bafue. Nunku Bena Isalele bakateketa tshikondo atshi, ne Bena Yuda bakabahita bukole bualu bua bobo bakeyemena Yehowa, Nzambi wa bankambua babo. Abiya wakalonda ku nyima kua Yalobama, wakamunyenga misoko yandi; Betele ne misoko yakadi ha buihi, ne Yeshana ne misoko yakadi ha buihi, ne Efelona ne misoko yakadi ha buihi. Yalobama kakaheta bukole kabidi mu matuku a Abiya; Yehowa wakamushiha, wakafua. Kadi Abiya wakalua muena bukole bua bungi; wakabaka bakashi dikumi ne banai, wakalela nʼabo bana ba balume makumi abidi ne babidi ne bana ba bakashi dikumi ne basambombo. Bienzedi bia Abiya bikuabo ne midimu yandi ne mei andi bidi bifunda mu mukanda wa kulondolola wa Ido muprofete. Abiya wakalala tulu ne bankambua bandi, bakamujika mu musoko wa Davidi; Asa muanʼandi wakakokesha mu muaba wandi. Mu matuku andi buloba buakadi ne ditalala bidimu dikumi. Asa Wakenza malu akadi mimpe ku mesu kua Yehowa Nzambi wandi; bualu bua yeye wakumusha bioshelu bia bantu ba bende ne bitendelelu biakadi ba mutu ha mikuna, wakabutula makunshi, wakataha mitshi ya Bashela, wakelela Bena Yuda mukenji wa kukebabo Yehowa, Nzambi wa bankambua babo, ne wa kutumikila mikenji ne mei andi. Yeye kabidi wakumusha mpingu yakadi mu misoko ya Yuda ne mpingu ya ku mutu kua mikuna yakatendelelabo nʼai diba; bukelenge buakadi ne ditalala ku mpala kuandi. Yeye wakasa misoko ya ngumbu mu Yuda; bualu bua buloba buakadi ne ditalala, yeye kakadi ne nvita bidimu abi, bualu bua Yehowa wakadi mumuhe ditalala. Bualu bua yeye wakambila Bena Yuda ne, Tuase misoko ei, tuyinyunguluke ne ngumbu ne bibumba ne bibi bia biamu; buloba butshidi ku mpala kuetu bualu bua tuetu tuakakeba Yehowa Nzambi wetu; tuakamukeba, ne yeye wakutuha ditalala ku nseke yonso. Nunku bakasa misoko, bakadi ne diakalengele. Asa wakadi ne bena nvita mu Yuda binunu nkama isatu bakatuala mafuma ne ngabu, ne mu Benyamina binunu nkama ibidi ne makumi muanda mukulu bakatuala ngabu ne mata; aba bonso bakadi bena nvita ba bukitu. Zela, Muena Atiopa, wakalua kudiye ne bena nvita binunu tshinunu ne makalu nkama isatu; wakafika ku Malesha. Hashishe Asa wakaya kusangakena nʼandi, wakasa mualu wa nvita mu tshibanda tshia Sefata ku Malesha. Asa wakadila kudi Yehowa Nzambi wandi, wakamba ne, Yehowa, kakuena mukuabo bu wewe udi mua kukuatshisha badi ne bukole ne badi kabayi ne bukole; utukuatshishe, Yehowa Nzambi wetu; bualu bua tuetu tudi tukueyemena, tuakuluila mu dina diebe bua kuluangana ne tshisumbu etshi tshinene. Yehowa, wewe udi Nzambi wetu; kuitabushi bua bantu bakuhite bukole. Nunku Yehowa wakatekesha Bena Atiopa ku mpala kua Asa ne kua Bena Yuda; Bena Atiopa hakanyema. Asa ne bantu bakadiye nʼabo bakabihata to ne ku Gela; Bena Atiopa ba bungi bakashihibua, kabakamanya mua kudisangisha kabidi; bualu bua bobo bakadi bashihibue ku mpala kua Yehowa ne bantu bandi; Bena Yuda bakanyenga bintu bia bungi. Bobo bakahaula misoko yonso yakadi ha buihi ne Gela, bualu bua ditshina dia Yehowa diakabakuata. Bakahaula misoko ei yonso, bualu bua mu misoko ei muakadi bintu bia bungi. Bakashimbula nsubu ya ntenta yakadi ya ngombe kabidi, bakaya ne mikoko ya bungi ne tumelo, bakahingana ku Yelushalema. Nyuma wa Nzambi wakatulukila Azaya, muana wa Odede; wakaya kusangakena ne Asa, wakamuambila ne, Unvuai, Asa ne Bena Yuda ne Bena Benyamina; Yehowa udi nʼenu, hantshidi nʼandi; binuamukeba, nenumuhete; kadi binuamulekela, yeye neanulekele. Bena Isalele kabakadi ne Nzambi mulelela tô musangu mule, kabakadi ne muakuidi wa kubayisha, kabakadi ne mikenji ya Nzambi; kadi mu ntatu yabo hakakudimunabo mitshima yabo kudi Yehowa, Nzambi wa Isalele, bobo bakamuheta. Mu matuku au ditalala kadiakadi kudi bakaluhuka anyi kudi bakahingana, kadi ntatu mikole yakadi kudi bena buloba bonso. Bakadi babutudibue, tshisamba kudi tshisamba tshikuabo, ne musoko kudi musoko mukuabo; bualu bua Nzambi wakabatatshisha ne ntatu yonso. Kadi nuenu nuikale ne bukole, kanutekeshi maboko enu; bualu bua nebanufute ku midimu yenu. Hakunvua Asa mei â akamuambila Odede muprofete, yeye wakakolesha mutshima wandi, wakumusha malu mabi onso akadi mu buloba bua Yuda ne Benyamina, ne mu misoko yonso yakanyengeye mu mikuna ya Efelayima; yeye wakashila kabidi tshioshelu tshia Yehowa tshiakadi ku mpala kua tshibuelelu tshia ku nsubu wa Yehowa. Yeye wakasangisha Bena Yuda ne Bena Benyamina ne bonso bakadi bashikama mu Efelayima ne Manashe ne Shimeona; bualu bua ba bungi ba mu Bena Isalele bakalamata kudiye hakamonabo ne Yehowa Nzambi wandi wakadi nʼandi. Nunku bakadisangisha mu Yelushalema mu ngondo muisatu wa mu tshidimu tshia dikumi ne bitanu tshia mu bukelenge bua Asa. Bakafila milambu kudi Yehowa dituku adi ya bintu biakanyengabo, ngombe nkama muanda mutekete ne mikoko binunu muanda mutekete. Bakahunga tshihungidi bua kukebabo Yehowa, Nzambi wa bankambua babo, ne mitshima yabo yonso ne mioyo yabo yonso; bua muntu yonso wahidia kukeba Yehowa, Nzambi wa Isalele, ashihibue, nansha muntu mukese nansha muntu munene, nansha mulume nansha mukashi. Bakaditshiha kudi Yehowa ne mei makole, bela mbila ne mpungi ne nsengu. Bualu bua Bena Yuda bonso bakasanka bua tshihungidi tshiabo; bualu bua bobo bakaditshiha ne mitshima yabo yonso, bakamukeba ne dinanga diabo dionso; bobo bakamuheta; Yehowa wakabaha ditalala ku nseke yonso. Asa wakumusha Mâka mamu wandi mumuledi kabidi, bua yeye kikadi mukelenge mukashi, bualu bua yeye wakenza luhingu lua bundu lua kutendelela nʼalu Bashela; Asa wakashimbula luhingu luandi, wakalusunsula tuhese tukese, wakaluosha ne kahia ku musulu wa Kidilona. Kadi kabakumusha bitendelelu bionso biakadi ha mutu ha mikuna ya mu Isalele; kadi mutshima wa Asa wakadi muakane matuku andi onso. Yeye wakateka bintu biakajidila tatu wandi ne bintu biakajidileye nkayandi bia argent ne bia or ne mpanza mu nsubu wa Yehowa. Kabakadi ne nvita kabidi tô ne ku tshidimu tshia makumi asatu ne tshitanu tshia mu bukelenge bua Asa. Mu tshidimu tshia makumi asatu ne tshisambombo tshia mu bukelenge bua Asa, Bâsha, mukelenge wa Isalele, wakaya kuluangana ne Bena Yuda; yeye wakasa Lama bua yeye ahidishe bantu bua kabahatuki ne kabahinganyi kudi Asa, mukelenge wa Yuda. Hashishe Asa wakangata argent ne or bia mu bibutshilu bia mu nsubu wa Yehowa ne mu nsubu wa mukelenge, wakabitumina kudi Bene-hadada, mukelenge wa Sulia, wakadi ushikama mu Damaseke, ne, Tshihungidi tshidi hankatshi hetu bu muakaditshi hankatshi ha tatu wanyi ne tatu webe; mona, nakakutumina argent ne or; ya biebe, ushihe tshihungidi tshiwakahunga ne Bâsha, mukelenge wa Isalele, bua yeye Umuke kundi. Bene-hadada wakitabusha dî dia mukelenge Asa, wakatuma tupitene tua masalayi andi bua kuluangana ne bena misoko ya mu Isalele; bakahaula Iyona ne Dana ne Abele-maima ne misoko ya bibutshilu bia mu Nafatale. Hakunvua Bâsha lumu elu, yeye wakalekela kuasa Lama; mudimu wakashika. Hashishe mukelenge Asa wakaya ne Bena Yuda, bakangata mabue ne mitshi biakadi ku Lama biakadi Bâsha wasa nʼabi; bobo bakasa nʼabi Geba ne Misepa. Mu tshikondo atshi Hanani, mumonyi wa malu, wakalua kudi Asa, mukelenge wa Yuda, wakamuambila ne, Bualu bua wewe wakueyemena mukelenge wa Sulia, kuakueyemena Yehowa Nzambi webe, nunku bantu ba mukelenge wa Sulia bakahanduka mu bianza biebe. Bena Atiopa ne Bena Lubima kabakadi tshisumbu tshinene ne makalu ne bena tubalu bia bungi, anyi? Kadi bualu bua wewe wakueyemena Yehowa, yeye wakabafila mu bianza biebe. Bualu bua mesu a Yehowa adi akenzekana ku nseke yonso ya buloba bua kulesha bakole buandi kudi bantu badi ne mitshima miakane kudiye. Wewe wakuenza buhote mu bualu ebu, kubangila mu dituku edi wewe newikale ne nvita. Ha diba adi Asa wakadi ne mumonyi wa malu tshiji, wakamubuesha mu nsubu wa lukanu; bualu bua tshiji tshikole tshiakamukuata bua bualu ebu. Asa wakakengesha bantu bakuabo mu tshikondo atshi tshiotshimue. Monai, bienzedi bia Asa bia kumudilu ne bia kunshikidilu bidi bifunda mu mukanda wa bakelenge ba Yuda ne Isalele. Mu tshidimu tshia makumi asatu ne tshitema tshia bukelenge buandi disama diakakuata Asa ku makasa andi; disama edi diakadi dikole; kadi mu disama diandi yeye kakakeba Yehowa, kadi wakakeba bangangabuka. Asa wakalala tulu ne bankambua bandi, wakafua mu tshidimu tshia makumi anai ne tshimue tshia bukelenge buandi. Bakamujika mu lukita luakadiumbuileye mu musoko wa Davidi; bakamuladika ha bulalu buakadi ne bintu bia bungi bia muhuya muimpe biakalongololabo kudi bantu ba lungenyi lule; bakamuelela bintu bia bungi mu madilu andi. Yehoshafata muanʼandi wakakokesha mu muaba wandi, wakadikolesha bua kuluisha Bena Isalele. Yeye wakateka masalayi mu misoko yonso ya ngumbu ya mu Yuda; wakateka milongo ya masalayi mu buloba bua Yuda ne mu misoko ya Efelayima yakanyenga Asa tatuʼandi. Yehowa wakadi ne Yehoshafata bualu bua yeye wakenda mu nshila ya diambedi ya Davidi, nkambua wandi, kakakeba nzambi ya Bâla, wakakeba Nzambi wa tatu wandi, wakatumikila mikenji yandi, kakalonda bilele bia Isalele. Nunku Yehowa wakajadika bukelenge mu bianza biandi; Bena Yuda bonso bakalua ne milambu kudi Yehoshafata; yeye wakadi ne bubanji ne butumbi bua bungi. Mutshima wandi wakakoleshibua mu nshila ya Yehowa; yeye wakumusha bitendelelu biakadi ku mutu kua mikuna ne Bashela bakadi mu Yuda. Mu tshidimu tshisatu tshia bukelenge buandi yeye wakatumina bantu bandi banene, Bene-hayila ne Obadaya ne Zekâya ne Netanele ne Mikaya bua kuyishabo mu misoko ya Yuda; wakatumina nʼabo kabidi Bena Lewi: Shemaya ne Netanya ne Zebadaya ne Asahele ne Shemilamota ne Yehonatana ne Adoniya ne Tobiya ne Toba-adoniya, mBena Lewi; ne Elishama ne Yeholama, bakuidi bakadi nʼabo. Bakayisha mu Yuda; bakadi ne mutanda wa mikenji ya Yehowa; bakaya ku misoko yonso ya Bena Yuda, bayisha bantu. Ditshina dia Yehowa diakakuata bantu ba mu makelenge akadi ha buihi ne Bena Yuda, nunku bobo kabakaluangana nvita ne Yehoshafata. Bena Peleshete bakuabo bakalua ne bintu kudi Yehoshafata ne argent ya milambu; Bena Alabâ bakalua kudiye ne bimuna biabo, bimpanga binunu muanda mutekete ne nkama muanda mutekete, ne mpumbu ya mbushi binunu muanda mutekete ne nkama muanda mutekete. Butumbi bua Yehoshafata buakadiundadiunda bikole; yeye wakasa bibumba ne misoko ya bibutshilu mu Yuda. Yeye wakenza midimu ya bungi mu misoko ya Bena Yuda; wakadi ne bena nvita ba bukitu mu Yelushalema. Ebu mbungi buabo bu muakadi nsubu ya batatuʼabo: bua Bena Yuda, tupitene tua binunu bia bantu: Adena wakadi kapitene ne bena bukitu binunu nkama isatu bakadi nʼandi; ku nyima kuandi Yehohanana wakadi kapitene ne bantu binunu nkama ibidi ne makumi muanda mukulu bakadi nʼandi; ku nyima kuandi Amasaya, muana wa Zikeli, wakadifila kudi Yehowa; bena bukitu binunu nkama ibidi bakadi nʼandi. Ba mu Benyamina: Eliada, muena bukitu, ne bantu binunu nkama ibidi bakadi ne mata ne ngabu bakadi nʼandi; ku nyima kuandi Yehozabada ne bantu binunu lukama ne makumi muanda mukulu bakadi ne bintu bia nvita bilongolola bakadi nʼandi. Bantu aba bakalamata kudi mukelenge, ha mutu ha bantu bakateka mukelenge mu misoko yakadi ne ngumbu kuonso mu Yuda. Yehoshafata wakadi ne bubanji ne butumbi bua bungi; wakahunga tshihungidi ne Ahaba. Hakahita bidimu bikuabo, yeye wakaya kudi Ahaba ku Samalea. Ahaba wakamushihela ne bantu bakadi nʼandi mikoko ne ngombe ya bungi; wakamuitabushisha bua kuyeye nʼandi ku Lamota-gilada. Ahaba, mukelenge wa Isalele, wakebesha Yehoshafata, mukelenge wa Yuda, ne, Wewe neuye nʼanyi ku Lamota-gilada, anyi? Yeye wakamukudimuna ne, Meme ndi bu wewe, bantu banyi badi bu bantu bebe; tuetu netuye nʼebe mu nvita. Yehoshafata wakambila mukelenge wa Isalele ne, Ndi nkusengelela ne, Udianjile kukonka dî dia Yehowa. Hashishe mukelenge wa Isalele wakasangisha baprofete nkama inai, wakabebesha ne, Tuye ku Lamota-gilada bua kuluangana nʼabo, anyi tushale? Bakamuambila ne, Uye biebe; bualu bua Nzambi neafile musoko mu bianza bia mukelenge. Kadi Yehoshafata wakakonka ne, Kakuena muprofete mukuabo wa Yehowa bua tuetu tumuebeshe, anyi? Mukelenge wa Isalele wakakudimuna Yehoshafata ne, Muprofete mukuabo udiku; kadi ndi nʼandi lukuna, bualu bua yeye katu wamba malu mimpe bualu buanyi, anu malu mabi; yeye mene udi Mikaya, muana wa Yimela. Yehoshafata wakamuambila ne, Mukelenge kambi nunku nansha. Hashishe mukelenge wa Isalele wakabikila kahita, wakamuambila ne, Ya lubilu, ubikile Mikaya, muana wa Yimela. Mukelenge wa Isalele ne Yehoshafata, mukelenge wa Yuda, bakadi bashikama, muntu mu nkuasa wandi wa bukelenge muntu mu nkuasa wandi wa bukelenge, baluate bilulu biabo bia bukelenge; bakadi bashikama mu muaba wa hatuhu ku tshibuelelu tshia ku Samalea; baprofete bonso bakadi bambangana mei ku mpala kuabo. Sedekiya, muana wa Kenâna, wakadidila nsengu ya tshiamu, wakamba ne, Yehowa udi wamba ne, Wewe newihate nʼai Bena Sulia tô ne habutukabo. Baprofete bonso bakamba mei nunku ne, Uye biebe ku musoko wa Lamota-gilada, ubahite bukole; bualu bua Yehowa neaufile mu bianza bia mukelenge. Kahita kakaya kubikila Mikaya, kakamuambila ne, Mona, baprofete bonso badi bambila mukelenge mei mimpe mukana mumue; ndi nkusengelela ne, Di diebe dikale bu diabo, wambe biebe mei mimpe. Mikaya wakamba ne, Bu mudi Yehowa ne muoyo, nengambe anu mei adi Nzambi wanyi wamba. Hakafikeye kudi mukelenge, yeye wakamukonka ne, Mikaya, netuye ku Lamota-gilada bua kuluangana, anyi tushale? Yeye wakamuambila ne, Ya biebe, ubatambe bukole; nebafidibue mu bianza biebe. Mukelenge wakamuambila ne, Bundi nʼabu mbua kukudimusha misangu bungi munyi bua wewe kungambila anu malu malelela mu dina dia Yehowa? Yeye wakamba ne, Nakamona Bena Isalele bonso batangadishibue ha mutu ha mikuna bu mikoko idi kayiyi ne mulami; Yehowa wakamba ne, Bobo kabena ne mukokeshi, nunku bahingane muntu ne muntu ku nsubu wandi ne ditalala. Mukelenge wa Isalele wakambila Yehoshafata ne, Tshiakukuambila ne, Yeye katu Wamba malu mimpe bualu buanyi, kadi anu malu mabi, anyi? Mikaya wakamba ne, Nunku unvuai dî dia Yehowa: Nakamona Yehowa mushikame mu nkuasa wandi wa butumbi ne bonso ba mu diulu bimane ku tshianza tshiandi tshia balume ne tshia bakashi. Yehowa wakakonka ne, Wadinga Ahaba bua kuyeye kuhona ku Lamota-gilada nganyi? Mukuabo wakamba dî dikuabo ne mukuabo dî dikuabo. Hashishe nyuma wakalua, wakimana ku mpala kua Yehowa, wakamba ne, Meme nemmudinge. Yehowa wakamuebesha ne, Munyi? Yeye wakamuitaba ne, Nenye, nenteke nyuma wa mashimi mukana mua baprofete bandi bonso. Yeye wakamba ne, Wewe neumudinge, neumuhite bukole; ya, wenze biebe nunku. Katataka Yehowa wakumana kuteka nyuma wa mashimi mukana mua baprofete bebe aba; Yehowa wakuamba malu mabi bua bualu buebe. Hashishe Sedekiya, muana wa Kenâna, wakasemena ha buihi, wakatula Mikaya dihi ku ditama diandi, wakamuebesha ne, Nyuma wa Yehowa wakaya kudi kunyi hakumukeye kundi bua kusomba nʼebe? Mikaya wakamuambila ne, Tangila, wewe neumone bualu ebu hawabuela mu tshisokomenu bua kusokoma. Mukelenge wa Isalele wakamba ne, Kuatai Mikaya, nuye n andi kudi Amona, gouverneur wa musoko ne kudi Yoasha, muenyampala; nuambile gouverneur ne, Mukelenge udi wamba ne, Buesha muntu eu mu nsubu wa lukanu, umudishe bidia bia dikenga ne mai a dikenga tô ne hanahingana ne ditalala. Mikaya wakamuambila ne, Biwahingana ne ditalala, Yehowa kakungambila di. Yeye wakamba ne, Unvuai, nuenu bantu bonso. Nunku mukelenge wa Isalele ne Yehoshafata bakaya ku Lamota-gilada. Mukelenge wa Isalele wakambila Yehoshafata ne, Meme nendivuishe bu muntu mukuabo hanaya mu nvita, kadi wewe uluate bilulu biebe bia mukelenge. Nunku mukelenge wa Isalele wakadivuisha bu muntu mukuabo, wakaya mu nvita. Mukelenge wa Bena Sulia wakadianjila kuelela tupitene tua makalu andi mukenji ne, Kanuluanganyi ne bantu bakese anyi bantu banene, anu ne mukelenge wa Isalele. Hashishe bakamona tupitene tua makalu Yehoshafata, tuakambilangana ne, Kayeu mukelenge wa Isalele. Nunku tuakamunyungulula bua kuluangana nʼandi; kadi Yehoshafata wakadila kudi Yehowa, ne Yehowa wakamukuatshisha; Nzambi wakabenzesha bua bobo kumukabo kudiye. Hakamona tupitene tua makalu ne, Yeye kena mukelenge wa Isalele, tuakalekela kumuihata. Muntu mukuabo wakela buta buandi ku mpukahuka, wakatata mukelenge wa Isalele kuakadi bintu biandi bia nvita bituangana, nunku yeye wakambila muendeshi wa dikalu diandi ne, Usesuishe dikalu, bualu bua meme ndi mutahe mputa bikole. Nvita yakadi minene dituku adi; kadi mukelenge wa Isalele wakatantamana mu dikalu diandi kudi Bena Sulia tô ne ku dilolo; bakamba diba kubuela, yeye wakafua. Yehoshafata, mukelenge wa Yuda, wakahingana ku nsubu wandi mu Yelushalema ne ditalala. Yehu, muana wa Hanani, mumonyi wa malu a Nzambi, wakaya kusangakena nʼandi, wakambila mukelenge Yehoshafata ne, Bûdi nʼabu mbua kukuatshisha bantu babi ne bua kunanga badi ne Yehowa lukuna, anyi? Bua bualu ebu Yehowa wakakulesha tshiji tshiandi. Kadi malu mimpe makuabo adi munda muebe bualu bua wewe wakumusha mpingu ya Bashela ku buloba, wakajadika mutshima webe bua kukeba Yehowa. Yehoshafata wakashikama mu Yelushalema; yeye wakendakana munkatshi mua bantu ku Bê-sheba tô ne ku mikuna ya Efelayima, wakabaluisha kudi Yehowa, Nzambi wa batatuʼabo. Yeye wakateka balumbuluishi mu misoko yonso ya ngumbu ya mu buloba buonso bua Yuda, ku musoko ku musoko, wakambila balumbuluishi ne, Nuelangane meji bimpe bua malu anudi nuenza; kanulumbuluishi mu dinu dia bantu, kadi mu dina dia Yehowa; yeye udi nʼenu mu kulumbulula kuenu. Nunku ditshina dia Yehowa dikale kunudi; nudimuke bimpe bu munudi nuenza bualu bua kakuena malu mabi kudi Yehowa Nzambi wetu, yeye kena ne kansungusungu, kena witabusha bintu bia mbueshilu kudi muntu. Bualu bukuabo kabidi, Yehoshafata wakateka Bena Lewi ne bakuidi ne bakadi ku mutu kua biota bia batatuʼabo ba mu Isalele mu Yelushalema bua kulumbuluishabo mu dina dia Yehowa ne bua kukosabo bilumbu. Bakahingana ku Yelushalema. Yeye wakabatshihisha ne, Nuenze malu mu ditshina dia Yehowa ne lulamatu ne mitshima miakane. Bialua bana benu ba ku misoko yonso kunudi ne tshilumbu tshia mashi ne mashi, nansha tshia mikenji, nansha tshia mei mafunda a Yehowa, nansha tshia mei andi majalame, bunudi nʼabu mbua kubadimusha bua bobo kabahidi kudi Yehowa, bua Yehowa kaleshi tshiji tshiandi kunudi ne kudi bana benu; binuenza nunku, kanuena nuhila. Monai, Amalia, muakuidi munene, udi ku mutu kuenu mu malu onso a Yehowa, ne Zebadaya, muana wa Yishemaele, mukokeshi wa tshisamba tshia Bena Yuda, udi ku mutu kuenu mu malu onso a mukelenge; Bena Lewi kabidi nebikale tuhita ku mpala kuenu. Nuikale ne mitshima mikole, Yehowa ikale ne bantu bimpe. Ku nyima kua malu â Bena Moaba ne Bena Amona ne Bena Meunima bakuabo bakalua kuluangana ne Yehoshafata. Hashishe bantu bakuabo bakalua, bakambila Yehoshafata ne, Tshisumbu tshia bantu tshinene tshidi tshilua kûdi tshifuma ku Sulia dishiya dia dishiha dia Luehu; monai, tshitshidi ku Hazazona-tamâ (udi Ene-gedi mene). Yehoshafata wakatshina, wakahangidisha bua kukeba Yehowa; wakela mukenji wa bantu bajile bia kudia mu nseke yonso ya Yuda. Bena Yuda bakadisangisha bua kukeba Yehowa; bakatula kukeba Yehowa, bafume ku misoko yonso ya Bena Yuda. Yehoshafata wakimanaku mpala kua tshisumbu tshia Bena Yuda ne Bena Yelushalema, mu nsubu wa Yehowa, mu tshiendedi tshihia-tshihia, wakamba ne, Yehowa, Nzambi wa hatatu betu, wewe kuena Nzambi wa mu diulu, anyi? Wewe kuena mukokeshi wa makelenge onso a ha buloba, anyi? Bukokeshi ne bukole bidi mu tshianza tshiebe, nunku kakuena muntu udi mua kukukolela. Wewe Nzambi wetu, kuakihata bena buloba aba ku mpala kua bantu bebe Bena Isalele, kuakabuha bana ba Abalahama, mulunda webe, tshiendelele, anyi? Bobo bakashikamamu, bakuashila dina diebe tshitendelelu tshia tshijila, bamba ne, Bialua malu makole kutudi, nansha muele wa nvita, nansha kulumbulula, nansha tshihuhu, nansha tshiole, tuetu netuimane ku mpala kua nsubu eu ne ku mpala kuebe, bualu bua dina diebe didi mu nsubu eu, netudile kudi mu makenga etu, ne wewe neutunvuile, neusungile. Katataka, mona, Bena Amona ne Bena Moaba ne ba ku mikuna ya Seî bawakakandika Bena Isalele bualu buabo ne, Kanuluanganyi nʼabo, hakadibo bafuma mu Ejipitu nunku bakasesuka kudibo, kabakabashiha; kadi mona, mudibo batufuta, bakuluila bua kutuihata mu buhianyi buebe buwakutuha bua tuetu kubuhiana. Nzambi wetu, kuena ubalumbuluishe, anyi? Bualu bua tuetu katuena ne bukole bua kuluangana ne tshisumbu etshi tshinene tshilualua kutuluisha, katuena bamanye mua kuenza; kadi mesu etu adi kûdi. Bena Yuda bonso bakadi bimane ku mpala kua Yehowa ne bana babo bakese ne bakashi babo ne bana babo balume. Hashishe Nyuma wa Yehowa wakatulukila Yahaziele, muana wa Zekâya, muana wa Benaya, muana wa Yiele, muana wa Matanaya, Muena Lewi wa bana ba Asafa, munkatshi mua tshisumbu tshia bantu. Yeye wakamba ne, Unvuai, Bena Yuda bonso ne bonso ba mu Yelushalema, ne wewe mukelenge Yehoshafata, Yehowa udi wamba ne, Kanutshinyi, kanukemi hua tshisumbu etshi tshinene; bualu bua nvita ei kanyenu, nya Nzambi. Makelela nuye kudibo; monai, bobo badi baluila ku mukuna wa Sisi; nenusangakene nʼabo kunfudilu kua tshibanda, ku mpala kua tshihela tshia Yeluele. Kanuena ne bua kuluangana nvita ei; nudijadike, nuimane talalâ, numone luhandu lua Yehowa ludi nʼenu, nuenu Bena Yuda ne Bena Yelushalema; kanutshinyi, kanukemi; nuye kudibo hatshiabu; bualu bua Yehowa udi nʼenu. Yehoshafata wakinama mutu wandi hanshi ha buloba; Bena Yuda bonso ne bonso ba mu Yelushalema bakatua mpala yabo hanshi, bakatendelela Yehowa. Bena Lewi ne bana ba Kohata ne bana ba Kola bakajuka, bakatumbisha Yehowa, Nzambi wa Isalele ne dî dikole. Bakabika hatshiatshia, bakaya ku tshihela tshia Tekoa; hakadibo baye, Yehoshafata wakimana, wakamba ne, Unvuai, Bena Yuda ne ba mu Yelushalema! Nueyemene Yehowa Nzambi wenu, bua nuenu nujadikibue; nuitabushe baprofete bandi, bua nuenu nuikale ne diakalengele. Hakahungeye dî ne bantu, yeye wakasungula bantu bua kuimbilabo Yehowa misambu ne bua kumutumbishabo mu buakane buandi hakadibo baye ku mpala kua bena nvita, bamba ne, Tumbishai Yehowa, bualu bua luse luandi ludi lujalame tshiendelele. Hakabangabo kuimba misambu ne kutumbisha Nzambi, Yehowa wakateka balaminyi kudi Bena Amona ne kudi Bena Moaba ne ba ku mikuna ya Seî, bakaluila kuluisha Bena Yuda; bakadi bashihibue. Bualu bua Bena Amona ne Bena Moaba bakimana ku mpala kua ba ku mikuna ya Seî, bua kubabutula ne kubashiha; hakashikishabo kushiha ba ku mikuna ya Seî, bakashihangana nkayabo. Hakahita Bena Yuda ku tshibumba tshia mu tshihela, bakatangila kuakadi tshisumbu tshia bantu, monai, anu bitalu bilale hanshi ha buloba, nansha muntu wakahanduka, Hakalua Yehoshafata ne bantu bandi bua kuhaulabo bintu, bakasangana bubanji ne bilulu bia bungi, ne bintu bia mushinga mukole biakanyengabo; kabakamanya mua kubituala; bakashalaku matuku asatu bua kuhaulabo bintu, bualu bua biakadi bia bungi. Dituku dinai bakadisangisha mu tshibanda tshia Belaka; bualu bua bakatumbishaku Yehowa; nunku bakidika muaba au ne, Tshibanda tshia Belaka tô ne ku dituku edi, Hashishe Bena Yuda ne ha mu Yelushalema bakahingana ku Yelushalema ne disanka, ne Yehoshafata wakadi wenda ku mpala kuabo; bualu bua Yehowa wakabayuisha disanka ku mpala kua bakadi nʼabo lukuna. Bakalua ku Yelushalema mu nsubu wa Yehowa ne bisanji ne nzenze ne mpungi. Ditshina dia Nzambi diakakuata ba mu bisamba bionso hakunvuabo ne, Yehowa wakaluangana nvita ne bena lukuna ba Bena Isalele. Nunku bukelenge bua Yehoshafata buakadi ne ditalala; bualu bua Nzambi wakamuha ditalala mu nseke yonso. Yehoshafata wakakokesha mu Yuda; wakadi ne bidimu makumi asatu ne bitanu hakabangeye kukokesha; wakakokesha bidimu makumi abidi ne bitanu mu Yelushalema; bina dia mamu wandi diakadi Azuba, muana mukashi wa Shilihi. Yeye wakenda mu nshila ya Asa tatuʼandi, kakasesukamu, wakenza malu akadi mimpe ku mesu kua Yehowa. Kadi yeye kakumusha bitendelelu biakadi ku mutu kua mikuna; bantu bonso kabakafila mitshima yabo kudi Nzambi wa batatuʼabo. Bienzedi bikuabo bia Yehoshafata, bia kumudilu ne bia kunshikidilu, bidi bifunda mu mukanda wa kulondolola kua Yehu, muana wa Hanani, biakafundeye mu mukanda wa bakelenge ba Isalele. Ku nyima kua malu â, Yehoshafata, mukelenge wa Yuda, wakahunga tshihungidi ne Ahazaya, mukelenge wa Isalele, wakadi wenza malu mabi be; wakadisangisha nʼandi hua kuasa matu a kuya nʼau ku Tâshishi; bakasa matu mu Esione-gebê. Hashishe Eliezê, muana wa Dodawahu wa mu Malesha, wakamba dî bua Yehoshafata ne, Bualu bua wewe wakadisangisha ne Ahazaya Yehowa wakumana kushiha midimu yebe. Matu akatshibudibua, kakamanya mua kuya ku Tâshishi. Yehoshafata wakalala tulu ne bankambua bandi, bakamujika diatshimue ne bankambua bandi mu musoko wa Davidi; Yeholama muanʼandi wakakokesha mu muaba wandi. Yeye wakadi ne bana babo, bana halume ba Yehoshafata: Azaya ne Yehiele ne Zekâya ne Azaya ne Mikaele ne Shefataya; aba bonso bakadi bana ba Yehoshafata, mukelenge wa Yuda. Tatu wabo wakabaha maha manene a argent ne or a bungi ne bintu bia mushinga mukole ne misoko ya ngumbu mu buloba bua Yuda; kadi wakahingisha bukelenge kudi Yeholama, bualu bua yeye wakadi muanʼa bute. Hakadia Yeholama bukelenge bua tatuʼandi ne hakadikolesheye, yeye wakashiha bana babo bonso ne muele wa nvita ne bantu banene bakuabo kabidi hakadi mu Isalele. Yeholama wakadi ne bidimu makumi asatu ne bibidi hakabangeye kukokesha; wakakokesha mu Yelushalema bidimu muanda mukulu. Yeye wakenda mu nshila ya bakelenge ba Isalele, bu muakenza ba mu nsubu wa Ahaba; bualu bua yeye wakabaka muana mukashi wa Ahaba; wakenza malu mabi ku mesu kua Yehowa. Kadi Yehowa kakabutula tshiota tshia Davidi, bualu bua tshihungidi tshiakahungeye ne Davidi, bua yeye wakamulaya muinda ne bana bandi tshiendelele. Mu matuku andi Bena Edome bakatombokela Bena Yuda, bakadisunguila mukelenge. Hashishe Yeholama wakasabuka ne tupitene tuandi ne makalu onso akadiye nʼau; bakajuka butuku, bakashiha Bena Edome bakadi babanyunguluka ne tupitene tua makalu. Nunku Bena Edome badi batombokela Bena Yuda tô ne ku dituku edi; hashishe Bena Libina bakamutombokela kabidi, bualu bua yeye wakahidia Yehowa, Nzambi wa batatuʼandi. Bualu bukuabo kabidi, yeye Wakenza bitendelelu ku mutu kua mikuna ya Yuda, wakenzesha Bena Yelushalema malu a masandi, wakahambuisha Bena Yuda. Mukanda wakafika kudiye mutume kudi muprofete Eliya ne, Yehowa, Nzambi wa Davidi tatuʼebe, udi wamba ne, Bualu bua wewe kuena wenda mu nshila ya Yehoshafata tatuʼebe, ne ya Asa mukelenge wa Yuda, kadi udi wenda mu nshila ya bakelenge ba Isalele, wakenzesha Bena Yuda ne ba mu Yelushalema malu a masandi bu muakenza ba mu nsubu wa Ahaba, ne bualu bua wewe wakashiha bana benu ba mu nsubu wa tatuʼebe bakadi bakuhita buakane; mona, Yehowa neatume tshihuhu tshikole kudi bantu bebe ne kudi bana bebe ne kudi bakashi bebe ne kudi bintu bionso biudi nʼabi; disama dikole nedikukuate munda muebe, tô ne hahatuka maja ebe onso bualu bua disama edi ku dituku ku dituku. Yehowa wakasonsola mitshima ya Bena Peleshete ne ya Bena Alabâ badi ha buihi ne Bena Atiopa bua kuluanganabo ne Yeholama; bakalua kudi Bena Yuda, bakahaula buloba, bakaya ne bintu bionso biakadi mu nsubu wa mukelenge ne bana bandi balume ne bakashi bandi; bakamushila anu muana umue, Yehoaza, muanʼandi wa mukala. Ku nyima kua bualu ebu Yehowa wakamutumina disama dia mu mala andi diakadibo kabayi bamanye mua kuondaha. Hakahita bidimu bibidi, mala andi akahatuka bualu bua disama diandi; yeye wakafua bua masama makole. Bantu kabakamuoshela bintu mu madilu andi bu muakenzelabo batatu bandi. Yeye wakadi ne bidimu makumi asatu ne bibidi hakabangeye kukokesha; wakakokesha mu Yelushalema bidimu muanda mukulu; yeye wakumuka, bantu kabayi bamunange; bakamujika mu musoko wa Davidi, kadi kabakamujika mu nkita ya bakelenge. Bena Yelushalema bakahingisha Ahazaya, muanʼa mukala wa mukelenge, mu bukelenge mu muaba wandi; bualu bua bantu bakalua ne Bena Alabâ mu tshitudilu, bakashiha bakulu bandi bonso. Nunku Ahazaya, muana wa Yeholama, mukelenge wa Yuda, wakakokesha bantu. Ahazaya wakadi ne bidimu makumi anai ne bibidi hakabangeye kukokesha; wakakokesha mu Yelushalema tshidimu tshimue; dina dia mamu wandi diakadi Atalaya, muana mukashi wa Omeli. Yeye wakenda mu nshila ya bakadi mu nsubu wa Ahaba; bualu bua mamu wandi wakamulombola mua kuenza malu mabi. Yeye wakenza malu mabi ku mesu kua Yehowa bu muakenza ba mu nsubu wa Ahaba; bualu bua bobo bakadi bafidi bandi ba meji bua kumubutula hakafua tatu wandi. Yeye wakalonda mei abo, wakaya ne Yeholama, muana wa Ahaba, mukelenge wa Isalele, bua kuluangana ne Hazaele, mukelenge wa Sulia, ku Lamota-gilada; Bena Sulia bakataha Yolama mputa. Yeye wakaya ku Yizelele bua kuondahisha mputa yandi yakamutahabo ku Lama hakadiye uluangana ne Hazaele, mukelenge wa Sulia. Ahazaya, muana wa Yeholama, mukelenge wa Yuda wakaya kumona Yeholama, muana wa Ahaba, ku Yizelele, bualu bua yeye wakadi usama. Kubutuka kua Ahazaya kuakadi bua Nzambi, bualu bua yeye wakaya kudi Yolama; bualu bua hakafikeye kudiye, yeye wakaya ne Yeholama bua kuluangana ne Yehu, muana wa Nimishi, nguakelabo manyi ha mutu kudi Yehowa bua kubutuleye ba mu nsubu wa Ahaba. Hakadi Yehu ulumbuluisha ba mu nsubu wa Ahaba, yeye wakasangana bantu banene bi Bena Yuda ne bana balume ba bana babo ne Ahazaya bakuatshile Ahazaya mudimu; yeye wakabashiha. Yeye wakakeba Ahazaya; bakamukuata, musokome mu Samalea bakalua n andi kudi Yehu, yeye wakamushiha; bakamujika, bamba ne, Yeye udi muana wa Yehoshafata, nguakakeba Yehowa ne mutshima wandi wonso. Ba mu nsubu wa Ahazaya kabakadi ne bukole bua kujadika nʼabu bukelenge. Hakamona Atalaya, mamu wa Ahazaya, ne muanʼandi udi mufue yeye wakajuka, wakashiha bana balume bonso ba bakelenge ba Bena Yuda. Kadi Yehoshabata, muana mukashi wa mukelenge, wakangata Yoasha, muana wa Ahazaya, munkatshi mua bana ba mukelenge bakadi bashihibue, wakamusokoka ne mulami wandi mu nsubu wa bulalu. Nunku Yehoshabata, muana mukashi wa mukelenge Yeholama, mukashi wa Yehoyada muakuidi (bualu bua yeye wakadi muanʼabo mukashi dî Ahazaya) wakamusokoka kudi Atalaya; nunku yeye kakamushiha. Yeye wakadi nʼabo musokome mu nsubu wa Nzambi bidimu bisambombo; Atalaya wakadi ukokesha mu buloba. Mu tshidimu tshia muanda mutekete Yehoyada wakadikolesha, wakangata tupitene tua bantu lukama, Azaya, muana wa Yelohama, ne Yishemaele, muana wa Yehohanana, ne Azalaya, muana wa Obeda, ne Maseya, muana wa Adaya, ne Elishafata, muana wa Zikeli, wakahunga nʼabo tshihungidi. Bobo bakendakana ku nseke yonso ya Yuda, bakasangisha Bena Lewi ba mu misoko yonso ya Yuda ne bakadi ku mutu kua nsubu ya batatuʼabo mu Isalele, bakalua nʼabo ku Yelushalema. Bantu aba bonso bakahunga ne mukelenge tshihungidi mu nsubu wa Nzambi. Yeye wakabambila ne, Monai, muana wa mukelenge neakokeshe bu muakamba Yehowa bua bana ba Davidi. Nuenu nenuenze bualu ebu: tshituha tshienu tshisatu tshia bakuidi ne Bena Lewi badi babuelamu dituku dia lumingu netshikale bu bambudi ba bintu ku bibuelelu bia nsubu; tshituha tshienu tshisatu tshikuabo netshikale ku nsubu kua mukelenge; ne tshituha tshienu tshisatu tshikuabo netshikale ku tshibi tshidi kumanda kua nsubu; bantu bonso bakuabo nebikale mu biendedi bia nsubu wa Yehowa. Kanubueshi muntu mukuabo mu nsubu wa Yehowa mene, anu bakuidi ne Bena Lewi badi ne mudimu wabo; bobo nebabuele bualu bua bobo badi bantu ba tshijila; kadi bantu bonso bakuabo batumikile mukenji wa Yehowa. Bena Lewi bonso nebanyunguluke mukelenge, muntu ne muntu ne bintu bia nvita mu bianza biandi; muntu yonso udi ubuela mu nsubu bamushihe; nuenu nuikale ne mukelenge habueleye mu nsubu ne humukeye. Nunku Bena Lewi ne Bena Yuda bonso bakenza muakamba Yehoyada muakuidi; muntu ne muntu wakaya ne bantu bakadiye nʼabo, bakadi babuela dituku dia lumingu ne bakadi bahatuka dituku dia lumingu; bualu bua Yehoyada kakihata milongo ya bena mudimu. Yehoyada muakuidi wakafila mafuma ne ngabu ne bintu bia nvita biakadi bia mukelenge Davidi, biakadi mu nsubu wa Nzambi, kudi tupitene tua lukama lua bantu. Yeye wakimanyika bantu bonso, muntu ne muntu ne bintu bia nvita mu bianza biandi, ku tshianza tshia balume tshia nsubu tô ne ku tshianza tshia bakashi tô ne ku tshioshelu, banyunguluke mukelenge. Hashishe bakalua ne muana wa mukelenge, bakamuashila tshifulu tshia bukelenge, bakamuha mukanda wa dihungila; bakamuhingisha mu bukelenge; Yehoyada ne bana bandi bakamuela manyi ha mutu, bakamba ne, Mukelenge ikale ne muoyo musangu mule! Hakunvua Atalaya tshiono tshia bantu balumbile lubilu, batumbishe mukelenge, yeye wakabuela kudi bantu mu nsubu wa Yehowa; yeye wakabanduluka, wakamona mukelenge muimane ku dikunshi diandi dia ku tshibuelelu, ne tupitene ne bena mpungi bimane ha buihi ne mukelenge, ne bena buloba bonso bakadi basanka, bela mpungi, bimbi ba misambu bakadi bimba bisanji, bakadi bimbisha misambu. Hashishe Atalaya wakadihanda bilulu biandi, wakamba ne, Kutungila kua tshitungu, kutungila kua tshitungu! Yehoyada muakuidi wakahatuka ne tupitene tua bantu lukama tuakadi ku mutu kua bantu, wakatuambila ne, Muihatai hadiye wenda munkatshi mua bantu, muntu wamulonda, numushihe ne muele wa nvita; bualu bua muakuidi wakamba ne, Kanumushihi mu nsubu wa Yehowa. Nunku bakamushila mpunga; yeye wakaya ku tshibuelelu tshia tubalu tshia ku tshibi tshia mukelenge; bakamushihelaku. Yehoyada wakahunga tshihungidi ne bantu bonso ne mukelenge, bua bobo bikale bantu ba Yehowa. Bantu bonso bakaya ku nsubu wa Bâla, bakamushimbula, bakatshibula mpingu yandi ne bioshelu biandi bituha, bakashiha Matana, muakuidi wa Bâla, ku mpala kua tshioshelu. Yehoyada wakasungula bena mudimu ba mu nsubu wa Yehowa bakadi mu bukokeshi bua bakuidi ne Bena Lewi bakasungulabo kudi Davidi mu nsubu wa Yehowa, bua kufilabo milambu ya kuosha kudi Yehowa, bu muakafundabo mu mukanda wa mikenji ya Mose; bakimba misambu ne disanka bu muakadi mukenji wa Davidi. Yeye wakateka balami ku bibi bia ku nsubu wa Yehowa, bua muntu wakadi kayi muakane kabuedi mu nsubu. Yeye wakangata tupitene tua bantu lukama ne bantu banene bonso ne bakokeshi ba bantu ba mu buloba, bakafuma ne mukelenge mu nsubu wa Yehowa; bakabuela ku tshibi tshia ku mutu mu nsubu wa mukelenge, bakashikika mukelenge mu nkuasa wa bukelenge. Nunku bantu bonso ba mu buloba bakasanka, musoko wakadi ne ditalala bakashihabo Atalaya ne muele wa nvita. Yoasha wakadi ne bidimu muanda mutekete hakababangeye kukokesha; wakakokesha mu Yelushalema bidimu makumi anai; dina dia mamu wandi diakadi Sibeya wa mu Bê-sheba. Yoasha wakenza malu mimpe ku mesu kua Yehowa matuku onso a Yehoyada muakuidi. Yehoyada wakamubakisha bakashi babidi; yeye wakalela nʼabo bana ba balume ne bana ba bakashi. Ku nyima kua malu â Yoasha wakasua kukankamasha nsubu wa Yehowa kabidi. Yeye wakasangisha bakuidi ne Bena Lewi, wakabambila ne, Yai bienu ku misoko yonso ya Yuda, nusangishe argent kudi Bena Isalele bonso ya kulongolola nʼai nsubu wa Nzambi wenu ku tshidimu ku tshidimu; nudimuke bua nuenu nuenzeshe bualu ebu lukasa. Kadi Bena Lewi kabakenzesha bualu ebu lukasa. Mukelenge wakabikila Yehoyada muakuidi, wakamuambila ne, Wewe kuakuenzesha Bena Lewi bua bobo balue ne milambu ya Mose, muntu wa Yehowa, kudi Bena Yuda ne ba mu Yelushalema ne ba mu nseke yonso ya Isalele, mu ntenta wa bumanyishi bishi? Bualu bua bana balume ba Atalaya, mukashi au mubi, bakadi habutula nsubu wa Nzambi, bakaha Bâla bintu bia tshijila biakadi mu nsubu wa Yehowa. Nunku mukelenge wakela mukenji, bakalongolola mushete; bakauteka ha mbelu ku tshibi tshia ku nsubu wa Yehowa. Bakela mukenji ku nseke yonso ya Yuda ne Yelushalema bua bantu balue kudi Yehowa ne milambu yakambila Mose Bena Isalele mu tshihela. Bantu banene ne bantu bonso bakasanka, bakatua nʼai, bakayela mu mushete tô ne hakasangishabo yonso. Hakadibo balue ne mushete kudi bena mudimu ba mukelenge ku bianza bia Bena Lewi, ne hakamonabo ne argent ya bungi yakadi mu mushete, secrétaire wa mukelenge ne mukuatshishi wa muakuidi bakahatula bintu mu mushete, bakauhingisha mu muaba wau kabidi. Bakenza nunku ku dituku ku dituku, bakasangisha argent ya bungi. Mukelenge ne Yehoyada bakayifila kudi bantu bakadi benza mudimu mu nsubu wa Yehowa; bobo bakabikila bahandi ba mabue ne bena mabaya bua kulongololabo nsubu wa Yehowa, ne bena biamu bifike ne bena biamu bia mitaku kabidi bua kulongololabo nsubu wa Yehowa. Bena mudimu bakenza mudimu wabo; mudimu wakenda bimpe mu bianza biabo, bakalongolola nsubu wa Nzambi bu muakadiye diambedi, bakamuakasha. Hakamanabo mudimu wonso, bakalua ne argent yakashala kudi mukelenge ne kudi Yehoyada, bakatula nʼai mpanza ya kuteka mu nsubu wa Yehowa, mpanza mene ya kuenza nʼai mudimu ne nkutu ne mpanza ya or ne ya argent. Bakafila milambu ya kuosha ha kahia mu nsubu wa Yehowa misangu yonso mu matuku a Yehoyada. Kadi Yehoyada wakalua muntu mununu, wakadi ne matuku a bungi; wakafua; wakadi ne bidimu lukama ne makumi asatu hakafueye. Bakamujika mu musoko wa Davidi diatshimue ne bakelenge, bualu bua yeye wakenza bimpe mu Isalele, ne kudi Nzambi ne ku nsubu wandi. Ku nyima kua lufu lua Yehoyada bantu banene ba mu Yuda bakalua, bakakukuila mukelenge. Mukelenge wakunvua mei abo. Bakalekela nsubu wa Yehowa, Nzambi wa bankambua babo, bakakuatshila Bashela ne mpingu mudimu; tshiji tshia Nzambi tshiakadi kudi Bena Yuda ne ba mu Yelushalema bualu bua bobo bakenza bualu ebu bubi. Kadi yeye wakabatumina baprofete bandi bua kubahingisha kudi Yehowa kabidi; bobo bakababela; kadi kabakateleja matshu abo kudibo. Nyuma wa Nzambi wakatulukila Zekâya, muana wa Yehoyada muakuidi; yeye wakimana ku mpala kua bantu, wakabambila ne, Nzambi udi wamba ne, Nuenu nudi mishiha mikenji ya Yehowa bua tshinyi? Kanuena ne diakalengele bishi? Bualu bua nuenu nuakulekela Yehowa, ka yeye wakunulekela. Bobo bakamuela tshifufu, bakamuela mabue ku mukenji wa mukelenge mene mu tshiendedi tshia mu nsubu wa Yehowa. Nunku mukelenge Yoasha kakavuluka luse luakamulesha Yehoyada tatu wandi; kadi wakashiha muanʼandi. Hakafueye, yeye wakamba ne, Yehowa atangile bualu ebu, anufute. Kunshikidilu kua tshidimu atshi masalayi a Bena Sulia bakatua bua kuluangana nʼandi; bakafika ku Yuda ne Yelushalema, bakashiha bantu banene bonso ba munkatshi mua bantu, bakatuma bintu biabo bionso kudi mukelenge wa Damaseke. Bena Sulia bakalua ne tshisumbu tshikese tshia masalayi; Yehowa wakafila tshisumbu tshia bantu tshinene mu bianza biabo, bualu bua bobo bakadi bahidie Yehowa, Nzambi wa bankambua babo. Nunku bakalumbuluisha Yoasha. Hakumukabo kudiye (bualu bua bakamushiya ne disama dikole), bantu bandi mene bakamuelela tshifufu, bualu bua mashi a bana balume ba Yehoyada muakuidi, bakamushiha mu bulalu buandi, wakafua; bakamujika mu musoko wa Davidi, kadi kabakamujika mu nkita ya bakelenge. Aba mbantu bakamuelela tshifufu: Zabada, muana wa Shimeata, Muena Amona mukashi, ne Yehozabada, muana wa Shimelite, Muena Moaba mukashi. Malu a bana bandi balume, ne bunene bua majitu akadiye nʼau ne muakalongololeye nsubu wa Nzambi, monai, adi mafunda mu mukanda wa bakelenge. Amasaya muanʼandi wakakokesha mu muaba wandi. Amasaya wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu makumi abidi ne tshitema; dina dia mamu wandi diakadi Yehoadana wa mu Yelushalema. Yeye wakenza malu mimpe ku mesu kua Yehowa, kadi kakadi ne mutshima mutoke tô. Hakamuhingishabo mu bukelenge, yeye wakashiha bena mudimu aba bakashiha mukelenge, tatu wandi. Kadi yeye kakashiha bana babo balela, kadi wakalonda mukenji udi mufunda mu mukanda wa Mose, muakamba Yehowa ne, Batatu kabena bafuila bana babo; bana kabena bafuila batatuʼabo; kadi muntu ne muntu neafue bua mibi yandi. Amasaya wakabikila Bena Yuda bonso, wakabasangisha bu muakadi nsubu ya batatuʼabo, wakateka tupitene ku mutu kua bantu tshinunu ne bantu lukama, mu nseke yonso ya Bena Yuda ne Bena Benyamina; yeye wakababala ku bidimu makumi abidi tô ne ku mutu, bakakumbasha bena nvita binunu nkama isatu bakamanya mua kuluangana ne mafuma ne ngabu. Yeye wakasungula bena bukitu binunu lukama ba mu Isalele ku difutu dia lukama lua ntalanta ya argent. Kadi muntu wa Nzambi wakalua kudiye, wakamuambila ne, Mukelenge, kuitabushi bua Bena Isalele kuya nʼebe; bualu bua Yehowa kena ne Bena Isalele, bana bonso ba Efelayima mene. Kadi biwaya, wikale ne mutshima mukole bua kuluangana; bualu bua Nzambi neakuhoneshe ku mpala kua bena lukuna; bualu bua Nzambi udi ne bukole bua kukukuatshisha ne bua kukuhonesha nʼabu. Amasaya wakakonka muntu wa Nzambi ne, Netuenze tshinyi ne ntalanta ai lukama inakafuta Bena Isalele? Muntu wa Nzambi wakamuambila ne, Yehowa udi mua kukuha bintu bidi bihita ebi bungi. Hashishe Amasaya wakatahulula bantu bakalua kudiye ku Efelayima bua kubahingisha kuabo; nunku tshiji tshiabo tshiakadia kudi Bena Yuda; bakahingana kuabo bûla-ngane ne tshiji tshikole. Amasaya wakakolesha mutshima wandi, wakaya ne bantu bandi ku Tshibanda tshia Luehu, wakashiha Bena Seî binunu dikumi. Bena Yuda bakakuata bantu bakuabo binunu dikumi ne muoyo, bakaya nʼabo ha mutu ha dibue dinene, bakabela hanshi ha mutu ha dibue, nunku bobo bakabakosolola bituha bituha. Kadi bantu aba bakahingisha Amasaya bua bobo kabayi nʼandi mu nvita, bakaluangana ne ba mu misoko ya Bena Yuda ku Samalea tô ne ku Bete-holona, bakashiha bantu binunu bisatu, bakanyenga bintu bia bungi. Hakafuma Amasaya ku kushiha kua Bena Edome, yeye wakalua ne mpingu ya Bena Seî, wakayimanyika bu nzambi yandi, wakakukuila ku mpala kuai, wakayoshela musenga wa manananshi. Nunku tshiji tshia Yehowa tshiakadi kudi Amasaya, yeye wakamutumina muprofete, wakamuambila ne, Wewe wakakeba nzambi ya bantu yakadi kayiyi ne bukole bua kusungila nʼabu bantu babo mu bianza biebe bishi? Hashishe, hakadiye wakula nʼandi, mukelenge wakamuebesha ne, Tuetu tuakukuvuisha mufidi wa meji wa mukelenge, anyi? Uhuwe biebe, butudi nʼabu mbua kukutaha bishi? Hashishe muprofete wakahuwa, wamba ne, Ndi mumanye ne, Nzambi wakulongolola bua kukushiha bua wewe wakuenza bualu ebu, kuena mutumikile mei anyi. Hashishe Amasaya, mukelenge wa Yuda, wakebesha bantu lungenyi, wakatumina Yoasha, muana wa Yehoaza, muana wa Yehu, mukelenge wa Isalele, dî ne, Lua biebe, tumonangane ku mesu. Yoasha, mukelenge wa Isalele, wakakudimuna dî kudi Amasaya, mukelenge wa Yuda, ne, Dieba diakadi ku Lebanona diakatumina mutshi wa cèdre wa mu Lebanona dî ne, Ufile muanʼebe mukashi kudi muanʼanyi mulume bu mukashi wandi; kadi nyama wa luonji wa mu Lebanona wakadiata dieba munda mua dikama diandi. Wewe udi wamba ne, Meme nakashiha Bena Edome; udi unanga tshiadi tshiebe bua kufunafuna; anji kushala kuebe. Bualu kai udi udibuesha mu malu a bakuabo bua kudikengesha ne bua kudilenduisha nʼau, wewe ne Bena Yuda? Kadi Amasaya kakasua kumunvuila; bualu ebu buakadi bua Nzambi bua yeye kubafila mu bianza bia bena lukuna babo, bualu bua bobo bakalonda nzambi ya Bena Edome. Nunku Yoasha, mukelenge wa Isalele, wakaya; yeye ne Amasaya, mukelenge wa Yuda, bakamonangana ku mesu ku Bete-shemeshe wa ku luseke lua Yuda. Bena Isalele bakahita Bena Yuda bukole; bakanyema muntu ne muntu ku nsubu wandi wa ntenta. Yoasha, mukelenge wa Isalele, wakakuata Amasaya, mukelenge wa Yuda, muana wa Yoasha, muana wa Yehoaza, ku Bete-shemesha, wakalua nʼandi ku Yelushalema, wakashimbula lumbu lua Yelushalema ku tshibi tshia Efelayima tô ne ku tshibi tshia ku ditumba bu coudées nkama inai. Yeye wakangata or ne argent ne mpanza yonso yakadi mu nsubu wa Nzambi mu bulami bua Obeda-edome, ne bintu bia mu bibutshilu bia mu nsubu wa mukelenge, ne bantu bakuabo; wakahingana ku Samalea. Amasaya, muana wa Yoasha, mukelenge wa Yuda, wakikala ne muoyo ku nyima kua lufu lua Yoasha, muana wa Yehoaza, mukelenge wa Isalele, bidimu dikumi ne bitanu. Bienzedi bikuabo bia Amasaya, bia kumudilu ne bia kunshikidilu, monai, kabiena bifunda mu mukanda wa bakelenge ba Yuda ne ba Isalele, anyi? Mu dituku diakalekela Amasaya kulonda Yehowa, bantu bakamuelela tshifufu mu Yelushalema; yeye wakanyema ku Lakisha, kadi bakamulonda ku Lakisha, bakamushihelaku. Bakalua nʼandi ha nyima ha tubalu, bakamujika diatshimue ne bankambua bandi mu musoko wa Yuda. Bantu bonso ba mu Yuda bakangata Uziya, wakadi ne bidimu dikumi ne bisambombo, bakamuhingisha mu bukelenge mu muaba wa tatuʼandi Amasaya. Yeye wakasa Elota, wakahingisha musoko eu ku luseke lua Yuda; ku nyima kua bualu ebu mukelenge wakalala tulu ne bankambua bandi. Uziya wakadi ne bidimu dikumi ne bisambombo hakabangeye kukokesha; wakakokesha mu Yelushalema bidimu makumi atanu ne bibidi. Dina dia mamu wandi diakadi Yekoliya wa mu Yelushalema. Yeye Wakenza malu mimpe ku mesu kua Yehowa, bu muakenza Amasaya tatuʼandi. Yeye wakajadika mutshima wandi bua kukebeye Nzambi mu matuku a Zekâya nguakamanya mua kujingulula bikena kumona bia Nzambi; musangu wonso wakadiye ukeba Yehowa, Nzambi wakamuvudishila diakalengele. Yeye wakaya kuluangana ne Bena Peleshete, wakashimbula ngumbu ya Gata ne ya Yabene ne ya Ashedodo; yeye wakasa misoko mikuabo mu buloba bua Ashedodo munkatshi mua Bena Peleshete. Nzambi wakamukuatshisha bua kuluanganeye ne Bena Peleshete, ne Bena Alabâ bakadi bashikama mu Gû-bâla ne Bena Meunima. Bena Amona bakalambula Uziya; lumu luandi luakamanyibua tô ne ku tshibuelelu tshia ku Ejipitu, bualu bua yeye wakalua muena bukole bua bungi. Uziya wakasa bibumba mu Yelushalema ku tshibi tshia ku ditumba dia lumbu, ne ku tshibi tshia mu tshibanda, ne ku ditumba dikuabo dia lumbu, wakatekamu bintu bia nvita. Yeye wakasa bibumba mu tshihela kabidi, wakimba mena a mai, bualu bua yeye wakadi ne bimuna bia bungi; Wakenza nunku mu bibanda ne mu mpata kabidi; yeye wakadi ne bidime ne balami ba mionshi ya tumuma tukese mu mikuna ne mu maloba mimpe; bualu bua yeye wakananga mudimu wa budimi, Uziya wakadi ne bena nvita ba bungi, bakaya bua kuluangana mu bisumbu biabo bu muakabatahulula Yeiele mufundi ne Mâseya kahita, bakadi mu bianza bia Hananya, kapitene kakuabo ka mukelenge. Bungi bua bantu bakadi ku mutu kua nsubu ya batatuʼabo, bena nvita ba bukitu, buakadi binunu bibidi ne nkama isambombo. Bena nvita binunu nkama isatu ne muanda mutekete ne nkama itanu bakadi mu bianza biabo, bakadi baluangana nvita bikole, bua kukuatshisha mukelenge bua kudisheye bena lukuna bandi. Uziya wakabalongoluela, buonso buabo mene, ngabu ne mafuma, ne bifulu bia tshiamu ne bikowelu bia tshiamu ne mata ne mabue a kuela mu bielelu. Yeye wakenzesha mashine mu Yelushalema kudi bantu ba lungenyi lule, bua kuteka mu bibumba ne ha mutu ha ngumbu a kuela nʼau mikete ne mabue manene. Dina diandi diakamanyibua kuonso; bualu bua Nzambi wakamukuatshisha bikole, tô ne bakalueye muena bukole bua bungi. Kadi hakalueye muena bukole bua bungi yeye wakadisua mu mutshima wandi, wakenza malu mabi, wakatombokela Yehowa Nzambi wandi; bualu bua yeye wakabuela mu ntempelo wa Yehowa bua kuosheleye Yehowa musenga wa manananshi ku tshioshelu tshia manananshi. Azaya muakuidi wakamulonda ne bakuidi ba Yehowa makumi muanda mukulu bakadi bena bukitu; bobo bakakandisha Uziya mukelenge, bakamuambila ne, Uziya, kambualu buebe bua kuoshela Yehowa musenga wa manananshi, kadi mbua bakuidi, bana ba Alona, badi bajidibue bua kuoshela Yehowa manananshi; umuka mu muaba eu wa tshijila, bualu bua wewe wakuenza bibi; bualu ebu kabuena bukuvuisha butumbi kudi Yehowa Nzambi nansha. Hashishe Uziya wakakuata tshiji; yeye wakadi ne dilonga dia kuoshelamu musenga wa manananshi mu tshianza tshiandi; hakadiye ne bakuidi tshiji, nsudi yakahatuka ha mpala wandi ku mesu kua bakuidi mu nsubu wa Yehowa, hehi ne tshioshelu tshia musenga wa manananshi. Azaya, muakuidi munene, ne bakuidi bonso bakamutangila ne, monai, yeye wakadi ne nsudi ha mpala handi, bakamûmusha lukasa; yeye kabidi wakahatuka lukasa, bualu bua Yehowa wakamana kumukengesha. Uziya mukelenge wakadi muena nsudi tô ne ku dituku dia lufu luandi; wakashikama mu nsubu ha nkayandi, bualu bua yeye wakadi muena nsudi; bualu bua yeye wakadi mukandibue ne, Kubuedi mu nsubu wa Yehowa; Yotama muanʼandi wakadi ha mutu ha ba mu nsubu wa mukelenge, wakakokesha bena buloba. Bienzedi bikuabo bia Uziya bia kumudilu ne bia kunshikidilu, Yeshaya, muprofete, muana wa Amoza, wakabifunda. Nunku Uziya wakalala tulu ne bankambua bandi; bakamujika diatshimue ne bankambua bandi mu muaba udibo bajika bakelenge, bualu bua bakamba ne, Yeye udi muena nsudi; Yotama muanʼandi wakakokesha mu muaba wandi. Yotama wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu dikumi ne bisambombo; dina dia mamu wandi diakadi Yelusha, muana mukashi wa Sadoka. Wakenza malu mimpe ku mesu kua Yehowa, bu muakenza Uziya tatuʼandi; kadi yeye kakabuela mu ntempelo wa Yehowa. Bantu bakatshidi benza malu mabi. Yeye wakalongolola tshibi tshiakatamba kuikala kulu ku nsubu wa Yehowa; wakasa lumbu lua ku Ofele. Yeye wakasa misoko ya ku mikuna ya Yuda kabidi; wakasa nsubu ya mukelenge ne bibumba muitu. Yeye wakaluangana ne mukelenge wa Bena Amona, wakabahita bukole. Bena Amona bakafila kudiye tshidimu atshi lukama lua ntalanta ya argent ne bihiminu bia blé binunu dikumi ne bia orge binunu dikumi. Bakafila bintu ebi kabidi tshidimu tshibidi ne tshisatu. Nunku Yotama wakalua muena bukole bualu bua yeye wakalongolola nshila yandi ku mpala kua Nzambi wandi. Bienzedi bikuabo bia Yotama ne nvita yandi yonso ne malu akenzeye bidi bifundibue mu mukanda wa bakelenge ba Isalele ne ba Yuda. Wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu dikumi ne bisambombo. Yotama wakalala tulu ne bankambua bandi, bakamujika mu musoko wa Davidi; Ahaza muanʼandi wakakokesha mu muaba wandi. Ahaza wakadi ne bidimu makumi abidi hakabangeye kukokesha; wakakokesha mu Yelushalema bidimu dikumi ne bisambombo; yeye kakenza malu mimpe ku mesu kua Yehowa bu muakenza Davidi nkambua wandi. Kadi yeye wakenda mu nshila ya bakelenge ba Isalele; wakadidila Bala mpingu ya biamu kabidi. Yeye wakosha musenga wa manananshi mu tshibanda tshia muana wa Hinoma kabidi; wakosha bana bandi mu kahia, bu muakadi tshilele tshibi tshia bisamba biakadi Yehowa muihate ku mpala kua Bena Isalele. Yeye wakafila milambu, wakosha musenga wa manananshi ha mutu ha mikuna ne muinshi mua mitshi mibishi yonso. Nunku Yehowa Nzambi wandi wakamufila mu bianza bia mukelenge wa Sulia; bakamubutula, bakaya ne bantu bandi ba bungi mu buhika ku Damaseke. Yeye wakafidibua mu bianza bia mukelenge wa Isalele; bakashiha bantu bandi ba bungi. Peka, muana wa Lemalaya, wakashiha bantu binunu lukama ne makumi abidi mu Yuda dituku dimue, buonso buabo bakadi bena bukitu; bualu bua bobo bakahidia Yehowa, Nzambi wa bankambua babo. Zikeli, muntu mukole wa mu Efelayima, wakashiha Mâseya, muana wa mukelenge, ne Azelikama, mukokeshi wa nsubu wandi, ne Elekana, muenyampala wa mukelenge. Bena Isalele bakaya ne bana babo binunu nkama ibidi ne bakashi ne bana babo balume ne bana babo bakashi mu buhika; bakanyenga bintu biabo bia bungi kabidi, bakaya nʼabi ku Samalea. Kadi muprofete wa Yehowa wakadiku, dina diandi Odede; yeye wakaya kusangakena ne tshisumbu tshia bantu bakadi bahingana ku Samalea, wakabambila ne, Monai, bualu bua Yehowa, Nzambi wa bankambua benu, wakadi ne Bena Yuda tshiji, yeye wakabafila mu bianza bienu, nuenu nuakabashiha ne tshiji tshikole tshiakafika tô ne mu diulu. Katataka nudi basue kubuesha Bena Yuda ne ba mu Yelushalema bu bahika benu bakashi ne balume; kadi nuenu kanuakenzela Yehowa Nzambi wenu bibi, anyi? Nunku unvuai dî dianyi, nuhingishe bahika aba banuakukuata kudi bana benu; bualu bua tshiji tshikole tshia Yehowa tshidi kunudi. Hashishe bantu bakuabo bakadi ku mutu kua Bena Efelayima, Azaya, muana wa Yohanana, ne Belekiya, muana wa Meshilemota, ne Yehizikiya, muana wa Shaluma, ne Amasa, muana wa Hadelai, bakimana ku mpala kua bantu bakadi bafuma ku nvita. Bakabambila m, Kanuena nuhitaku ne bantu banuakukuata mu nvita; bualu bua nudi nukeba kutubuesha mu malu mabi kudi Yehowa ha mutu ha mibi yetu ne malu mabi etu; bualu bua mibi yetu idi minene, ne tshiji tshikole tshidi kudi Bena Isalele. Nunku bena nvita bakashiya bantu bakakuatabo ne bintu biakanyengabo ku mpala kua bantu aba banene ne tshisumbu tshia bantu. Bantu aba batuakutela mena abo bakajuka, bakangata bantu aba bakakuatabo ne bilulu biakanyengabo, bakabiluatshisha bonso bakadi butaka munkatshi muabo, bakabuesha bisabatu ku makasa abo, bakabadisha, bakabanuisha mai, bakabela manyi ha mutu, bakashikika bantu batekete ha nyima ha nyama ya mpunda, bakaya nʼabo ku Yeleko, musoko wa mabue a ngashi, kudi bana babo; hashishe, bakahingana ku Samalea. Ku tshikondo atshi mukelenge Ahaza wakatumina mukelenge wa Bena Ashû dî bua yeye kunukuatshisha. Bualu bua Bena Edome bakadi balue kabidi, bakadi babutule Bena Yuda, bakadi baye ne bakuabo babo mu buhika. Bena Peleshete kabidi bakadi bahaule misoko ya mu bibanda ne ku luseke lua ku Sude kua Yuda, bakadi banyenge Bete-shemeshe ne Ayalona ne Gedelote ne Soko ne misoko yandi, ne Timena ne misoko yandi, ne Gimezo ne misoko yandi; bakashikamamu. Bualu bua Yehowa wakahuekesha Bena Yuda bualu bua Ahaza, mukelenge wa Isalele, bualu bua yeye wakalekela kukandika Bena Yuda, wakenzela Yehowa bibi. Tilegata-pilenese, mukelenge wa Ashû, wakalua kudiye, wakamutatshisha, kakamukuatshisha nansha. Bualu bua Ahaza wakangata bintu bia mu nsubu wa Yehowa ne bia mu nsubu wa mukelenge ne bia mu nsubu ya bantu banene, wakabifila kudi mukelenge wa Ashû, kadi bualu ebu kabuakamukuatshisha. Ahaza, mukelenge eu mene, wakatamba kuenzela Yehowa bibi mu matuku a ntatu yandi. Bualu bua yeye wakashihela nzambi ya mu Damaseke yakamubutula milambu; yeye wakamba ne, Bualu bua nzambi ya Bena Sulia yakabatatshisha, nunku nenyishihele milambu bua yoyo kukuatshisha meme. Kadi yoyo yakamulenduisha ne Bena Isalele bonso. Ahaza wakasangisha mpanza yonso yakadi mu nsubu wa Nzambi, wakataha mpanza ya mu nsubu wa Nzambi bituha bituha, wakinshila bibi bia ku nsubu wa Yehowa; wakashila bioshelu mu miaba yonso ya mu Yelushalema. Yeye wakasa bioshelu bia ku mutu kua mikuna mu misoko yonso ya Yuda bua kuoshelahu musenga wa manananshi bua kufuisha Yehowa, Nzambi wa bankambua bandi, tshiji. Bienzedi biandi bikuabo ne malu andi onso, bia kumudilu ne bia kunshikidilu, bidi bifunda mu mukanda wa bakelenge ba Yuda ne ba Isalele. Ahaza wakalala tulu ne bankambua bandi, bakamujika mu musoko wa Yelushalema mene; kadi kabakamujika mu nkita ya bakelenge ba Isalele; Hezikiya muanʼandi wakakokesha mu muaba wandi. Hezikiya wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu makumi abidi ne tshitema; dina dia mamu wandi diakadi Abiya, muana mukashi wa Zekâya. Yeye wakenza malu mimpe ku mesu kua Yehowa bu muakenza nkambua wandi Davidi mu malu onso. Mu tshidimu tshia kumudilu tshia bukelenge buandi, mu ngondo wa kumudilu, yeye wakunzulula bibi bia nsubu wa Yehowa, wakabilongolola. Yeye wakabuelamu ne bakuidi ne Bena Lewi, wakabasangisha mu muaba munene wa ku esete, wakabambila ne, Unvuai dî dianyi, nuenu Bena Lewi; nudijidile, nujidile nsubu wa Yehowa, Nzambi wa bankambua benu, umushai bukoya buonso budi mu nsubu wa tshijila. Bualu bua batatuʼetu bakenza malu mabi ku mesu kua Yehowa Nzambi wetu, bakamuhidia, bakakema nsubu wa Yehowa nyima, bakatangisha mpala yabo kukuabo. Bobo kabidi bakinshila bibi bia ku mbalanda, bakajima minda; kabakosha musenga ya manananshi, kabakafila milambu ya kuosha kudi Nzambi wa Isalele mu muaba wa tshijila. Nunku tshiji tshia Yehowa tshiakadi kudi Bena Yuda ne Yelushalema, ne yeye wakabafila bua bobo batatshishibue ne bua bobo bikale bu tshintu tshidi tshituisha bantu mikemu ne tshihendu, bu mutudi tumona ne mesu etu. Tangilai, batatu hetu bakashihibua ku miele ya nvita, ne bana betu balume ne bana betu bakashi ne bakashi betu hadi mu buhika bua bualu ebu. Katataka bualu budi mu mutshima wanyi bua kuhunga tshihungidi ne Yehowa, Nzambi wa Isalele, bua tshiji tshiandi tshikole tshiumuke kutudi. Bana banyi balume, kanujangaluki; bualu bua Yehowa wakanusungula bua nuenu nuimane ku mpala kuandi bua kumukuatshila mudimu, ne bua nuenu nuikale bena mudimu bandi ne bua kumuoshela musenga wa manananshi. Hashishe Bena Lewi bakajuka, Mahata, muana wa Amasai, ne Yoele, muana wa Azaya wa bana ba Kohata; ne ba bana ba Melali, Kishi, muana wa Abedi, ne Azaya, muana wa Yehalelele; ne ba bana ba Gêshona, Yoa, muana wa Zima, ne Edene, muana wa Yoa; ne ba bana ba Elisafana, Shimeli ne Yeule; ne ba bana ba Asafa, Zekâya ne Mataniya; ne ba bana ba Hemana, Yehuele ne Shimei; ne ba bana ba Yedutuna, Shemaya ne Uziele. Bobo bakasangisha bana babo, bakadijidila, bakabuela bua kulengesha nsubu wa Yehowa bu muakadi mukenji wa mukelenge ku mei a Yehowa. Bakuidi bakabuela munda mua nsubu wa Yehowa bua kumulengesha, bakalua ne bukoya buonso buakamonabo mu ntempelo wa Yehowa ku tshiendedi tshia mu nsubu wa Yehowa. Bena Lewi bakabuambula, bakabutuala ku musulu wa Kidilona. Bakabanga ku dituku dia kumudilu dia ngondo wa kumudilu kumulengesha, ne ku dituku dia muanda mukulu bakafika ku mbalanda wa nsubu wa Yehowa; bakalengesha nsubu wa Yehowa matuku muanda mukulu; bakamana mudimu eu ku dituku dia dikumi ne disambombo dia ngondo wa kumudilu. Hashishe bakaya kudi mukelenge Hezikiya ku nsubu wandi, bakamuambila ne, Tuakumana kulengesha nsubu wa Yehowa wonso, ne tshioshelu ne mpanza yatshi yonso, ne mesa a bidia bilesha ne mpanza yau yonso. Tuakujidila kabidi mpanza yonso yakimasha mukelenge Ahaza mu bukelenge buandi bubi; Iliona, idi ku mpala kua tshioshelu tshia Yehowa. Hashishe mukelenge Hezikiya wakabika hatshiatshia, wakasangisha bantu banene ba mu musoko, wakabanda nʼabo ku nsubu wa Yehowa. Bakalua ne balume ba ngombe muanda mutekete ne bimpanga muanda mutekete ne mikoko muanda mutekete ne mpumbu ya mbushi muanda mutekete bu milambu ya kubuikila nʼai mibi ya bantu bua bukelenge ne bua nsubu ne bua ba mu Yuda. Yeye wakelela bakuidi, bana ba Alona, mukenji bua kuyifila kudi Yehowa ha tshioshelu. Bakashiha balume ba ngombe, bakuidi bakangata mashi, bakamiamina ha tshioshelu; bakashiha bimpanga, bakamiamina mashi ha tshioshelu; bakashiha mikoko kabidi, bakamiamina mashi ha tshioshelu. Bakalua ne mpumbu ya mbushi ya milambu ya kubuikila nʼai mibi ku mpala kua mukelenge ne kua bantu bonso; bakatentekasha bianza biabo ha mutu hai; bakuidi bakayishiha, bakafila mashi ai ha tshioshelu bua kubuikila nʼau mibi ya Bena Isalele bonso; bualu bua mukelenge wakela mukenji wandi bua bobo bafidile Bena Isalele bonso milambu ya kuosha ne ya kubuikila nʼai mibi. Yeye wakateka Bena Lewi mu nsubu wa Yehowa ne biamu bia kukumakasha ne nzenze ne bisanji bu muakadi mukenji wa Davidi ne wa Gada, mumonyi wa malu wa mukelenge, ne wa Natana muprofete; bualu bua mukenji wakadi wa Yehowa mukana mua baprofete bandi. Bena Lewi bakimana ne bintu bia misambu bia Davidi, ne bakuidi bakadi ne mpungi. Hezikiya wakela mukenji bua kufilabo milambu ya kuosha ha tshioshelu. Hakabangabo kuosha milambu, bakabanga kutumbisha Yehowa ne misambu ne mpungi ne bintu bia kuimba nʼabi bia Davidi, mukelenge wa Isalele. Bantu bonso bakatendelela, bimbi ba misambu bakimba, bena mpungi bakela mpungi; bakenza nunku tô ne hakahia milambu ya kuosha yonso. Hakamanabo kufila milambu, mukelenge ne bantu bonso bakadi nʼandi bakinama mitu yabo, bakatendelela. Mukelenge Hezikiya ne bantu banene bakela mukenji kabidi bua Bena Lewi batumbishe Yehowa ne misambu ya mei a Davidi ne a Asafa, mumonyi wa malu. Bakimba misambu ne disanka, bakinama mitu yabo, bakatendelela. Hashishe Hezikiya wakamba ne, Tuakadi idila kudi Yehowa; semenai ha buihi ne milambu ya kusakidila nʼai Yehowa mu nsubu wandi. Bantu bakalua ne milambu ya kumusakidila nʼai; bantu bakasua kuenza nunku mu mitshima yabo bakalua ne milambu ya kuosha kabidi. Milambu ya kuosha yakalua nʼai bantu yakadi balume ba ngombe makumi muanda mutekete ne bimpanga lukama ne mikoko nkama ibidi; yoyo yonso yakadi milambu ya kuoshela Yehowa. Bintu bia tshijila biakadi ngombe nkama isambombo ne mikoko binunu bisatu. Kadi bakuidi bakatamba bukese, kabakamanya mua kûbula biseba bia milambu yonso ya kuosha; nunku bana babo Bena Lewi bakabakuatshisha tô ne hakamanabo mudimu wonso ne hakadijidila bakuidi bonso; bualu bua Bena Lewi bakadi ne mitshima miakane bua kudijidila bakahita bakuidi kudifila. Milambu ya kuosha yakadi ya bungi, ne manyi a milambu ya kuvuisha nʼai ditalala, ne milambu ya bintu bia kunua bia milambu yonso ya kuosha. Nunku bakalongolola mudimu wa mu nsubu wa Yehowa. Hezikiya wakasanka ne bantu bonso kabidi, bua malu akalongoluela Nzambi bantu; bualu bua bakenza bualu ebu lukasa. Hezikiya wakatumina Bena Isalele ne Bena Yuda bonso dî; wakafundila Bena Efelayima ne Bena Manashe mikanda bua bobo balue ku nsubu wa Yehowa mu Yelushalema, bua kudiabo bidia bia disanka dia kuhita kua Yehowa, Nzambi wa Isalele. Bualu bua mukelenge wakadianjila kuhunga dî ne bantu banene ne bantu bonso ba bu Yelushalema bua kudiabo bidia bu disanka dia kuhita kua Yehowa mu ngondo muibidi. Bualu bua kabakamanya mua kuhidia ku tshikondo tshiabi, bualu bua bakuidi bakuabo kabakanji kudijidila bungi bakumbane ne bantu kabakanji kudisangisha ku Yelushalema. Bualu ebu buakadi buimpe ku mesu kua mukelenge ne kua bantu bonso. Nunku bakahunga dî diabo bua kuela mukenji ku nseke yonso ya Isalele ku Bê-sheba tô ne ku Dana, bua bantu balue ku disanka dia kuhita kua Yehowa, Nzambi wa Isalele, ku Yelushalema; bualu bua bantu ba bungi kabakadia bidia ebi bu muakadi mukenji. Nunku miloho yakaya ne mikanda ya mukelenge ne ya bantu banene ku nseke yonso ya Bena Isalele ne ya Bena Yuda, bu muakadi mukenji wa mukelenge ne, Nuenu Bena Isalele, kudimunai mitshima yenu kudi Yehowa, Nzambi wa Abalahama ne wa Isaka ne wa Isalele, bua yeye ahingane kudi difuka dienu diakahanduka mu bianza bia bakelenge ba Ashû. Kanuikadi bu batatuʼenu ne bu bana benu, bakenzela Yehowa, Nzambi wa bankambua babo, bibi, nunku yeye wakabafila bua bobo batuishe bakuabo mikemu, bu munudi numone. Kanukoleshi mitshima yenu bu muakenza batatu benu; kadi neuhuekeshe kudi Yehowa, nubuele ku muaba wandi wa tshijila wakajidileye tshiendelele; nukuatshile Yehowa Nzambi wenu mudimu bua tshiji tshiandi tshikole tshiumuke kunudi. Bualu bua binuakudimuna mitshima yenu kudi Yehowa kabidi, bakuenu ne bana benu balela nebahete luse ku mesu kua bantu bakaya nʼabo mu buhika, nebahingane ku buloba ebu kabidi; bualu bua Yehowa Nzambi wenu udi mûle tente ne luse ne dinanga, kena unukoma nyima binuahingana kudiye. Nunku miloho yakaya ku musoko ne musoko ya mu Efelayima ne Manashe tô ne ku Zebuluna; kadi bobo bakabaseka, bakabalonda. Kadi bantu bakuabo ba mu Ashe ne Manashe ne Zebuluna bakadihuekesha, bakalua ku Yelushalema. Tshianza tshia Yehowa tshiakadi kudi Bena Yuda bua kubavuisha mutshima umue, bua bobo batumikile mukenji wa mukelenge ne wa bantu bandi banene ku dî dia Yehowa. Bantu ba bungi bakadisangisha ku Yelushalema bua kudiabo bidia bidi kabiyi ne luevene mu ngondo muibidi; tshisumbu tshiakadi tshinene. Bobo bakajuka, bakumusha bioshelu biakadi mu Yelushalema ne mpanza ya kuoshelamu musenga wa manananshi, bakabiela mu musulu wa Kidilona. Bakashiha mikoko ku dituku dia dikumi ne dinai dia mu ngondo muibidi; bakuidi ne Bena Lewi bakakuatshika bundu, bakadijidila, bakatua ne milambu ya kuosha ha-kahia mu nsubu wa Yehowa. Bakimana muntu ne muntu mu muaba wandi bu muakadi mukenji wa Mose, muntu wa Nzambi; bakuidi bakamiamina mashi akangatabo ku bianza bia Bena Lewi. Bualu bua ba bungi bakadi munkatshi muabo bakadi kabayi badidila; nunku Bena Lewi bakadi ne bua kushihela muntu ne muntu wakadi kayi muakane mulambu bua kubajidila kudi Yehowa. Bualu bua bantu ba bungi ba mu Efelayima ne ba mu Manashe ne ba mu Yisakâ ne ba mu Zebuluna kabakanji kudilengesha, kadi bakadia bidia bia disanka dia kuhita kua Yehowa kabayi batumikila mukenji wakafundabo. Bualu bua Hezikiya wakadianjila kutulombela Nzambi ne, Yehowa muimpe abuikile mibi ya muntu yonso wakudimuna mutshima wandi bua kukebeye Nzambi, Yehowa, Nzambi wa bankambua bandi, bikaleye kayi mudilengeshe bu mudi mukenji wa mu muaba wa tshijila wamba. Yehowa wakunvuila Hezikiya, wakasangasha bantu. Bena Isalele bakadi mu Yelushalema bakadia bidia bidi kabiyi ne luevene matuku muanda mutekete ne disanka dinene; Bena Lewi ne bakuidi bakatumbisha Yehowa ku dituku ku dituku, bakela bintu bia kuimba nʼabi bikole. Hezikiya wakasamba Bena Lewi bonso bakadi ne meji makane mu mudimu wa Yehowa. Nunku bakadia bidia abi matuku muanda mutekete, bafile milambu ya kuosha ne milambu ya kuvuisha nʼai ditalala, batonde mibi yabo kudi Yehowa, Nzambi wa bankambua babo. Bantu bonso bakahunga dî diabo bua kudiabo bidia tô matuku muanda mutekete makuabo; bakenza nunku ne disanka. Bualu bua Hezikiya, mukelenge wa Yuda, wakaha bantu balume ba ngombe tshinunu ne mikoko binunu muanda mutekete bua kufilabo bu milambu; ne bantu banene bakaha bantu balume ba ngombe tshinunu ne mikoko binunu dikumi; bakuidi ba bungi bakadijidila. Bena Yuda bonso ne bakuidi ne Bena Lewi ne bantu bonso bakafuma mu Isalele, ne bantu ba bende bakadi bafume mu buloba bua Isalele bakashikama mu Yuda, bakasanka. Nunku disanka dinene diakadi mu Yelushalema; kabakadi ne disanka dinene mu Yelushalema katshia mu matuku a bukelenge bua Solomo, muana wa Davidi, mukelenge wa Isalele. Bakuidi ne Bena Lewi bakajuka, bakavudishila bantu disanka; Nzambi wakunvua dî diabo, ne kutendelela kuabo kuakafika tô ne mu diulu ku muaba wandi wa tshijila. Hakashika malu â, Bena Isalele bonso bakadiku bakamuangalaka ku misoko yonso ya Yuda, bakashimbula makunshi onso a bitendelelu bia mpingu, bakataha mitshi ya Bashela, bakashimbula bioshelu bionso biakadi ha mutu ha mikuna ya mu Yuda ne mu Benyamina, ne ya mu Efelayima ne mu Manashe kabidi, tô ne hakabishimbulabo bionso. Hashishe Bena Isalele bonso bakahingana, muntu ne muntu ku buhianyi buandi ne ku musoko wandi. Hezikiya wakasungula bakuidi ne Bena Lewi bu muakadi milongo yabo, muntu ne muntu ku mudimu wandi, ne bakuidi ne Bena Lewi, bua kufilabo milambu ya kuosha ne ya kuvuisha nʼai ditalala, ne bua kuenzabo midimu yabo, ne bua kusakidilabo ne bua kutumbishabo Nzambi mu bibi bia ku tshitudilu tshia Yehowa. Yeye wakafila luseke lua bintu bia mukelenge lua milambu ya kuosha dinda ne dilolo ne ku dituku dia lumingu ne habala ngondo ne ku matuku a bidia bia disanka, bu muakafundabo mu mikenji ya Yehowa. Bualu bukuabo kabidi, yeye wakelela bantu bakadi bashikama mu Yelushalema mukenji bua bobo bafile bintu biabo bikuabo kudi bakuidi ne Bena Lewi, bua bobo badijidile ku mukenji wa Yehowa. Hakambeye mukenji eu, Bena Isalele bakafila bintu bia bungi bia bintu biakahuolabo diambedi ne bia nvinyo ne bia manyi ne bia buitshi ne bia bintu bionso biakamena mu madimi abo; bakalua ne tshia dikumi tshia bintu biabo bia bungi. Bena Isalele ne Bena Yuda bakadi bashikama mu misoko ya Yuda bakalua ne tshia dikumi tshia ngombe ne tshia mikoko, ne tshia dikumi tshia bintu biakajidilabo Yehowa Nzambi wabo; bakabiteka hanshi mu bisumbu. Bakabanga kuteka bintu hanshi mu bisumbu mu ngondo muisatu, bakamana mudimu eu mu ngondo wa muanda mutekete. Hakalua Hezikiya ne bantu banene, bakamona bisumbu ebi, bakavudishila Yehowa ne bantu bandi Isalele disanka. Hashishe Hezikiya wakebesha bakuidi ne Bena Lewi bua bisumbu ebi. Azaya, muakuidi munene, wa mu nsubu wa Sadoka, wakamukudimuna ne, Katshia bantu bahanga kufila bintu mu nsubu wa Yehowa, tuetu tuakudia, tuakukuta, ne bintu ebi biakushala bia ha mutu; bualu bua Yehowa wakasankisha bantu bandi; bintu ebi bia bungi bidi bishala. Hezikiya wakela dî diandi bua bantu balongolole nsubu ya mu nsubu wa Yehowa; bakenza nunku. Bakalua ne milambu ne bia dikumi bia bintu bia tshijila ne lulamatu lua mitshima yabo; Kenaniya, Muena Lewi, wakadi ku mutu kuabi, ne Shemei muanʼabo wakamulonda. Yehiele ne Azaziya ne Nahata ne Asahele ne Yelimota ne Yozabada ne Eliele ne Yisemakaya ne Mahata ne Benaya bakadi batangidi mu bianza bia Konaniya ne bia Shemei muanʼabo, bua mukenji wa mukelenge Hezikiya ne wa Azaya, mukokeshi wa mu nsubu wa Nzambi. Kole, muana wa Yimena, Muena Lewi, mulami wa tshibi tshia ku esete, wakadi ku mutu kua bintu bia disanka biakafilabo kudi Nzambi, bua kuabanyanganeye milambu ya Yehowa ne bintu bia tshijila. Edene ne Miyamina ne Yeshua ne Shemaya ne Amalia ne Shekanya bakadi ku nyima kuandi mu misoko ya bakuidi ba mu midimu yabo, bua kuabanyangana ne bana babo bintu, ne banene ne bakese. Ha mutu ha balume bakabalabo mu kulondolola kuabo ku bidimu bisatu tô ne ku mutu, muntu yonso wakadi ubuela mu nsubu wa Yehowa, bu muakadi mudimu wa buatshia-buatshia wa ku mulongo wa muntu ne muntu. Bantu bakabalabo bakadi ku kulondolola kuabo kua bakuidi ba mu nsubu ya batatu babo ne Bena Lewi ku bidimu makumi abidi tô ne ha mutu ha bidimu ebi mu midimu yabo; ne bantu bakuabo bakabalabo bakadi ku kulondolola kuabo, bana bakese bonso, ne bakashi, ne bana balume ne bana bakashi, ba mu tshisumbu tshiabo tshionso; bualu bua bobo bakadijidila mu mudimu wabo wa tshijila. Bakatela mena a bantu bakuabo bua kufilabo bintu kudi bana balume ba Alona, bakuidi bakadi bashikame mu madimi akadi ku mpenge kua musoko ne musoko, ne bua kuhabo balume bonso ba bakuidi bintu biabo ne kudi bonso bakadi babadibue mu kulondolola kua Bena Lewi. Hezikiya Wakenza nunku ku nseke yonso ya Bena Yuda; yeye wakenza malu mimpe ne makane ne a lulamatu ku mpala kua Yehowa Nzambi wandi. Malu onso akabangeye mu mudimu wa mu nsubu wa Nzambi ne a mu mikenji ne mei bua kukeba Nzambi wandi, yeye wakaenza ne mutshima wandi wonso, wakadi ne diakalengele. Ku nyima kua malu â ne lulamatu elu lua Nzambi, Saneheliba, mukelenge wa Bena Ashû, wakalua ku buloba bua Yuda, wakasa tshitudilu tshiandi ku misoko ya ngumbu, wakelangana meji bua kuyibutula. Hakamona Hezikiya ne Saneheliba wakalua, wakasua kuluangana ne Yelushalema, yeye wakahunga dî ne bantu bandi banene ne hena bukitu bandi bua kujibika mishimi ya mai yakadi ku mpenge kua musoko; bobo bakamukuatshisha. Nunku bantu ba bungi bakadisangisha hamue, bakajibika mishimi ya mai yonso ne musulu mukese wakadi muhitshile mu buloba, bamba ne, Bakelenge ba Ashû badi ne bua kulua kusangana mai a bungi bishi? Yeye wakakolesha mutshima wandi, wakasa lumbu luakadi lushimbuka, wakajadika bibumba ne lumbu luakadi ku mpenge, wakakolesha Milo mu musoko wa Davidi, wakatula bintu bia nvita ne ngabu bia bungi. Yeye wakateka tupitene ku mutu kua bantu, wakabasangisha kudiye mu muaba wa hatuhu ku tshibi tshia musoko, wakabasamba ne, Nuikale ne dikima, kanutshinyi, kanukemi bualu bua mukelenge wa Ashû, ne bua bantu bonso badiye nʼabo; bualu bua udi nʼetu udi umuhita bunene; bualu bua yeye udi anu ne maboko a bantu, kadi Yehowa Nzambi wetu udi nʼetu bua kutukuatshisha ne bua kutufila nvita. Bantu bakeyemena mei a Hezikiya, mukelenge wa Yuda. Ku nyima kua malu â, Saneheliba, mukelenge wa Ashû, wakatuma bantu bandi ku Yelushalema, (yeye wakadi ku mpala kua musoko wa Lakisha ne bantu bandi bonso) kudi Hezikiya, mukelenge wa Yuda, ne kudi Bena Yuda bonso bakadi mu Yelushalema, bamba ne, Saneheliba, mukelenge wa Ashû, udi ukonka ne, Nudi nueyemena nganyi bua nuenu nudi nushala mu musoko wa Yelushalema udibo bamba kubutula? Hezikiya kena unuitabushisha bua kunuluisha ne tshiole ne nyota, wamba ne, Yehowa Nzambi wetu neatuhandishe mu bianza bia mukelenge wa Ashû, anyi? Hezikiya eu kakumusha bioshelu biakadi ku mutu kua mikuna, kakelela Bena Yuda ne ba mu Yelushalema mukenji ne, Nenutendelele ku mpala kua tshioshelu tshimue, nenuoshelehu musenga wa manananshi, anyi? Nuenu kanuena bamanye malu atuakenzela, meme ne batatu banyi, bantu ba mu maloba makuabo, anyi? Nzambi ya bisamba abi yakadi ne bukole bua kuhandisha nʼabu buloba buabo mu bianza bianyi, anyi? Nzambi kai wa munkatshi mua bisamba biakabutula batatu banyi, wakadi ne bukole bua kuhandisha bantu bandi mu bianza bianyi? Nudi nuelangana meji ne, Nzambi wenu udi ne bukole bua kunuhandisha mu bianza bianyi, anyi? Nunku kanuitabushi bua Hezikiya anudinge, anyi bua kunuitabushisha bua nuenu kueyemena mei andi; bualu bua nansha nzambi umue wa tshisamba tshimue anyi wa bukelenge bumue wakadi ne bukole bua kuhandisha nʼabu bantu bandi mu tshianza tshianyi, ne mu tshianza tshia batatu banyi; Nzambi wenu neanuhandishe bishi? Bantu bandi bakadifila Yehowa Nzambi ne muntu wandi Hezikiya ne mei makuabo. Yeye wakafunda mikanda ya kuhenda nʼai Yehowa, Nzambi wa Isalele, ne ya kumudiula nʼai, wamba ne, Bu muakadi nzambi ya bisamba bia mu maloba makuabo kayiyi ne bukole bua kuhandisha bantu mu bianza bianyi, nunku Nzambi wa Hezikiya kena mua kuhandisha bantu bandi mu tshianza tshianyi. Bakela mei makole mu muaku wa Bena Yuda kudi bantu ba mu Yelushalema bakadi ha mutu ha ngumbu, bua kubatshinyisha ne bua kubatatshisha, bua bobo banyenge musoko. Bakamba mei bua Nzambi wa Yelushalema akamuvuisha bu nzambi ya ba ha buloba, idibo basonga ku bianza bia bantu. Hezikiya mukelenge, ne Yeshaya muprofete, muana wa Amoza, bakalomba Nzambi bua bualu ebu, bakadila kudiye mu diulu. Yehowa wakatuma muanjelo wandi, nguakashiha bena bukitu ne tupitene ne bakadi ku mutu kua Bena Ashû mu tshitudilu tshia mukelenge wa Ashû. Nunku yeye wakahingana ku buloba buandi ne bundu ku mesu. Hakabueleye ku nsubu wa nzambi wandi, bana bandi mene bakahatuka munda muandi, bakamushiha ne muele wa nvita. Nunku Yehowa wakahandisha Hezikiya ne Bena Yelushalema mu bianza bia bena lukuna bandi bonso, wakabalama ku nseke yonso. Ba bungi bakalua ne kuha kudi Yehowa ku Yelushalema, ne bintu bia mushinga mukole kudi Hezikiya, mukelenge wa Yuda; nunku yeye wakadi utumbishibua ku mesu kua bantu ba mu bisamba bionso kubangila ku dituku adi. Mu matuku au Hezikiya wakadi usama, lufu luakamutonda; yeye wakalomba Yehowa; yeye wakamukudimuna dî, wakamulesha bualu bua kukema. Kadi Hezikiya kakenzela Nzambi bimpe bu muakamuenzeleye bimpe, bualu bua yeye wakadisua mu mutshima wandi, nunku tshiji tshia Nzambi tshiakadi kudiye ne kudi Bena Yuda ne ba mu Yelushalema. Kadi Hezikiya wakadihuekesha bua kudisua kuakadiye nʼaku mu mutshima wandi, ne yeye ne bantu ba mu Yelushalema, nunku tshiji tshia Yehowa katshiakafika kudibo mu matuku a Hezikiya. Hezikiya wakadi ne biuma bia bungi ne butumbi bua bungi; yeye Mulongolola bibutshilu bia kutekamu argent yandi ne or yandi ne mabue andi a mushinga mukole ne bintu bia muhuya muimpe ne ngabu yandi ne mpanza yandi yonso; wakasa nsubu ya kutekamu bintu biakamena mu madimi ne nvinyo ne manyi ne nsubu ya kuladikamu bimuna biandi bia mishindu yonso ne mikoko yandi. Wakalongoluela bimuna biandi ne ngombe yandi misoko ya bungi, bualu bua Nzambi wakakumbasha bintu biandi. Hezikiya eu wakakanga mushimi wa mai a ku mutu kua Gihona, wakâlombola ku luseke lua ku wesete kua musoko wa Davidi. Hezikiya wakadi ne diakalengele mu midimu yandi yonso. Kadi hakalua miloho kudi bantu banene ba mu Babulona yakatumabo bua kumuebesha bua malu a kukema akenjibua mu buloba buandi, Nzambi wakamulekela bua kumuteta, bua yeye amanye malu onso akadi munda mua mutshima wandi. Bienzedi bikuabo bia Hezikiya, ne malu mimpe akenzeye, monai, bidi bifunda mu mukanda wa tshikena kumona wa Yeshaya muprofete, muana wa Amoza, ne mu mukanda wa bakelenge ba Yuda ne ba Isalele. Hezikiya wakalala tulu ne bankambua bandi, bakamujika ku mukuna mu nkita ya bana ba Davidi; Bena Yuda bonso ne ba mu Yelushalema bakamutumbisha mu lufu luandi. Manashe muanʼandi wakakokesha mu muaba wandi. Manashe wakadi ne bidimu dikumi ne bibidi hakabangeye kukokesha; wakakokesha mu Yelushalema bidimu makumi atanu ne bitanu. Wakenza malu mabi ku mesu kua Yehowa bu muakenza bisamba biakalonda malu a bundu, biakadi Yehowa muihate ku mpala kua Bena Isalele. Bualu bua yeye wakasa kabidi bioshelu ha mutu ha mikuna biakashimbula Hezikiya tatuʼandi; wakashila Bâla bioshelu, wakakuna mitshi ya Bashela, wakatendelela bintu bia mu diulu, wakabikuatshila mudimu. Yeye wakasa bioshelu mu nsubu wa Yehowa, muakadi Yehowa wamba ne, Dina dianyi nedikale mu Yelushalema tshiendelele. Wakashila bintu bionso bia mu diulu bioshelu mu biendedi bibidi bia mu nsubu wa Yehowa. Yeye wakahitshisha bana bandi mu kahia mu tshibanda tshia muana wa Hinoma; wakatempa matempu, wakatendelela bakishi, wakahaka manga, wakasangisha dî ne batempeshanganyi ba mbuku ne bena buloshi; yeye wakenza malu mabi a bungi ku mesu kua Yehowa bua kumufuisha nʼau tshiji. Yeye wakateka luhingu luakasongeye mu nsubu wa Nzambi, muakadi Nzambi wamhila Davidi ne Solomo muanʼandi ne, Nenteke dina dianyi mu nsubu eu wa mu Yelushalema unakasungula munkatshi mua bisamba bionso bia mu Isalele, nentekemu dina dianyi tshiendelele. Tshiena ngumusha makasa a Bena Isalele ku buloba bunakaha bankambua babo, biatumikilabo mei onso anakabambila, mikenji ne mei mafunda ne mei majalame binakabambila mukana mua Mose. Manashe wakibidisha Bena Yuda ne ba mu Yelushalema bua kuenzabo malu mabi; nunku bakahita bantu ba mu bisamba biakashihabo kudi Yehowa ku mpala kua Bena Isalele kuenza malu mabi. Yehowa wakambila Manashe ne bantu bandi dî diandi; kadi bobo bakamuhetula. Nunku Yehowa wakatuma tupitene tua masalayi a mukelenge wa Ashû kudibo, bakakuata Manashe, bakamusuika nkanu, bakaya nʼandi ku Babulona. Hakadiye mu ntatu nunku yeye wakakeba Yehowa Nzambi wandi, wakatamba kudihuekesha ku mesu kua Nzambi wa bankambua bandi. Wakamutendelela; Nzambi wakamunvuila, wakitabusha kutendekena kuandi, wakamuhingisha ku Yelushalema mu bukelenge buandi kabidi. Hashishe Manashe wakamanya ne, Yehowa udi Nzambi. Ku nyima kua bualu ebu yeye wakasa lumbu luakadi ku mpenge kua musoko wa Davidi ku luseke lua ku wesete kua Gihona, mu tshibanda, tô ne ku tshibuelelu tshia bahanyishi ba minyinyi ya mu mai; wakanyunguluka nʼalu Ofele, wakalulungakasha tô ne kulu; wakateka tupitene tua bukitu mu misoko yonso ya Yuda yakadi ne ngumbu. Yeye wakumusha nzambi ya bende ne luhingu luakatekeye mu nsubu wa Yehowa, ne bioshelu biakaseye ku mukuna kuakadi nsubu wa Yehowa ne mu Yelushalema, wakabimasha ku mpenge kua musoko. Yeye wakalongolola tshioshelu tshia Yehowa, wakafilahu milambu ya kuosha ne ya kuvuisha nʼai ditalala ne ya kusakidila nʼai Nzambi; wakelela Bena Yuda mukenji bua bobo batendelele Yehowa, Nzambi wa Isalele. Kadi bantu bakatshidi bashiha milambu ha mutu ha mikuna, kadi bakayishihela anu Yehowa Nzambi wabo. Bienzedi bikuabo bia Manashe ne mei akalombeye nʼau Nzambi, ne mei akamuambila bamonyi ba malu mu dina dia Yehowa, Nzambi wa Isalele, monai, bidi bifunda mu mukanda wa bienzedi bia bakelenge ba Isalele. Mei akalombeye nʼau Nzambi bakitabusha Nzambi kutendekena kuandi, ne malu mabi onso akenzeye, ne ditomboka diandi, ne bioshelu biakaseye ha mutu ha mikuna, ne mitshi ya Bashela yakakuneye, ne mpingu yakasongeye diambedi yeye kayi muanji kudihuekesha, monai, bidi bifunda mu mukanda wa bamonyi ba malu. Nunku Manashe wakalala tulu ne bankambua bandi, bakamujika mu nsubu muandi; Amona muanʼandi wakakokesha mu muaba wandi. Amona wakadi ne bidimu makumi abidi ne bibidi hakabangeye kukokesha; wakakokesha mu Yelushalema bidimu bibidi. Wakenza malu mabi ku mesu kua Yehowa bu muakenza Manashe tatuʼandi; Amona wakashihela mpingu yonso yakasonga tatuʼandi milambu, wakayikuatshila mudimu. Yeye kakadihuekesha ku mesu kua Yehowa bu muakenza Manashe tatu wandi hakadihuekesheye; kadi Amona eu wakatamba kuenzenza malu mabi. Bantu bandi mene bakamuelela tshifufu, bakamushiha mu nsubu wandi. Kadi bena buloba bakashiha bantu aba bakelela Amona tshifufu; bena buloba bakahingisha Yoshiya muanʼandi mu bukelenge mu muaba wandi. Yoshiya wakadi ne bidimu muanda mukulu hakabangeye kukokesha; wakakokesha mu Yelushalema bidimu makumi asatu ne tshimue. Wakenza malu mimpe ku mesu kua Yehowa, wakenda mu nshila ya Davidi, nkambua wandi; yeye kakasesuka ku tshianza tshia balume anyi ku tshianza tshia bakashi. Bualu bua mu tshidimu tshia muanda mukulu tshia bukelenge buandi, hakatshidiye muana, yeye wakabanga kukeba Yehowa, Nzambi wa Davidi, nkambua wandi; mu tshidimu tshia dikumi ne bibidi yeye wakabanga kumusha bioshelu biakadi ha mutu ha mikuna ne mitshi ya Bashela ne mpingu yakasongabo ne mpingu yakatulabo mu Yuda ne Yelushalema. Bakashimbula bioshelu bia Bâla ku mesu kuandi; yeye wakataha mpingu yakatendelelabo nʼai diba yakadi ha mutu ha mikuna ne mitshi ya Bashela ne mpingu yakasongabo ne mpingu yakatulabo, yeye wakabitshibula bituha bituha, wakabivuisha bu lusenga, wakalumuangalasha ha nkita ya bantu bakadi babishihela milambu. Yeye wakosha mifuba ya bakuidi ha bioshelu biabo, wakalengesha Yuda ne Yelushalema. Wakenza nunku mu misoko ya Manashe ne Efelayima ne Shimeona tô ne ku Nafatale, wakabibutula. Wakashimbula bioshelu, wakabotesha Bashela ne mpingu bu bukula; wakataha mpingu yakadibo batendelela nʼai diba mu nseke yonso ya buloba bua Isalele, wakahingana ku Yelushalema. Mu tshidimu tshia dikumi ne muanda mukulu tshia bukelenge buandi hakamaneye kulengesha buloba ne nsubu, yeye wakatuma Shafana, muana wa Azalaya, ne Mâseya, mukelenge wa musoko, ne Yoa, muana wa Yoahaza mufundi wa malu a bukelenge, bua kulongololabo nsubu wa Yehowa Nzambi wandi. Bakafika kudi Hilekiya muakuidi munene, bakafila kudiye argent yakaya nʼai Bena Lewi, balami ba ku bibuelelu, yakasangishabo ku bianza bia Bena Manashe ne Bena Efelayima ne kudi difuka dia Bena Isalele ne Bena Yuda ne Bena Benyamina ne bonso ba mu Yelushalema mu nsubu wa Nzambi. Bakayifila mu bianza bia bena mudimu bakadi ku mutu kua nsubu wa Yehowa; bena mudimu bakadi mu nsubu wa Yehowa bakayifila kudi balongolodi ba nsubu: kudi bena mabaya ne kudi bibaki bua kusumba nʼai mabue masonga ne mabaya a mikamba ne a kusuika nʼau bintu bia nsubu yakashihabo kudi bakelenge ba Yuda. Bantu aba bakenza mudimu ne disuminyina; Yahata ne Obadaya, Bena Lewi bana ba Melali, bakadi tuhita ku mutu kuabo; Zekâya ne Meshulama, bana ba Bena Kohata, bakenzesha mudimu; Bena Lewi bakuabo bakadiku bakadi bamanye mua kuimba bimpe. Bobo kabidi bakadi ku mutu kua batuadishi ba majitu, bakenzesha bena midimu bonso mu mudimu wa mushindu wonso, Bena Lewi bakadi bafundi ne tuhita ne batuadishi ba bintu. Hakaluabo ne argent mu nsubu wa Yehowa, Hilekiya muakuidi wakasangana mukanda wa mikenji wakafundabo kudi Mose. Hilekiya wakambila Shafana secrétaire ne, Nakusangana mukanda wa mikenji wa Mose mu nsubu wa Yehowa. Hilekiya wakafila mukanda kudi Shafana. Shafana wakaya ne mukanda kudi mukelenge, wakamanyisha mukelenge kabidi ne, Bantu bebe badi benza malu onso awakatuambila. Tuakuangata argent yonso yakadi mu nsubu wa Yehowa, tuakuyifila mu bianza bia tuhita ne mu bianza bia bena mudimu. Shafana secrétaire wakambila mukelenge ne, Hilekiya muakuidi wakumpa mukanda. Shafana wakaubala ku mpala kua mukelenge. Hashishe, hakunvua mukelenge mei a mu mikenji, yeye wikadihanda bilulu biandi. Mukelenge wakambila Hilekiya ne Ahikama, muana wa Shafana, ne Abidona, muana wa Mika, ne Shafana secrétaire, ne Asaya, muena mudimu wa mukelenge, ne, Yai bienu, nunkonkele Yehowa ne bantu badi bashala mu Isalele ne Yuda bua mei adi mu mukanda eu unuakasangana; bualu bua tshiji tshikole tshia Yehowa tshidi kutudi bualu bua batatuʼetu kabakatumikila mei a Yehowa bua kuenza malu onso adi mafunda mu mukanda eu. Nunku Hilekiya ne bantu bakabikilabo kudi mukelenge bakaya kudi Huleda muprofete mukashi, mukashi wa Shaluma, muana wa Tokata, muana wa Hasela, mulami wa bilulu bia mukelenge (mukashi eu wakadi mushikame mu Yelushalema ku luseke luibidi;) bakamuambila bualu ebu. Yeye wakabambila ne, Yehowa, Nzambi wa Isalele, udi wamba ne, Nuambile muntu wakanutuma kundi ne, Yehowa udi wamba ne, Mona, nentumine muaba eu ne bantu badi bashikamamu milau yonso idi mifunda mu mukanda wakubalabo ku mpala kua mukelenge wa Yuda. Bualu bua bobo bakumpidia, bakuoshela nzambi mikuabo musenga wa manananshi, bua kunfuishabo tshiji ku bienzedi bionso bia bianza biabo; nunku tshiji tshianyi tshidi ku muaba eu, katshiena tshijima nansha. Kadi nuambile mukelenge wa Yuda wakanutuma bua kukonka Yehowa ne, Yehowa Nzambi wa Isalele udi wamba ne, Bua mei awakunvua, bualu bua mutshima webe wakanyingalala ne bua wewe wakadihuekesha ku mpala kua Nzambi hawakunvua mei andi akambeye bua muaba eu ne bua bantu badi bashikamamu, wakadihuekesha ku mpala kuanyi, wakadihanda bilulu biebe, wakadila ku mpala kuanyi, Yehowa udi Wamba ne, Meme kabidi nakunvua mei ebe. Mona, nenkusangishe diatshimue ne bankambua bebe, neubuele mu lukita ne ditalala; mesu ebe kaena amona malu makole andi ntuma ku muaba eu ne kudi bantu badi bashikamamu. Bakalua ne dî adi kudi mukelenge. Hashishe mukelenge wakabikila bakulu bonso ba mu Yuda ne ba mu Yelushalema. Mukelenge wakabuela mu nsubu wa Yehowa ne Bena Yuda bonso ne bantu ba mu Yelushalema ne bakuidi ne Bena Lewi ne bantu bonso, ne banene ne bakese; yeye wakababadila mei onso a mu mukanda wa tshihungidi wakasanganabo mu nsubu wa Yehowa. Mukelenge wakimana mu muaba wandi, wakahunga ne Yehowa tshihungidi bua kulonda ku nyima kua Yehowa ne bua kutumikila mikenji yandi ne mei andi ne malu adiye musue muntu enze, ne mutshima wandi wonso ne muoyo wandi wonso, ne bua kutumikila mei a tshihungidi akadi mafunda mu mukanda eu. Yeye wakitabushisha bantu bonso ba mu Yelushalema ne Benyamina bualu ebu kabidi. Bantu ba mu Yelushalema bakatumikila tshihungidi tshia Nzambi, Nzambi wa bankambua babo. Yoshiya wakumusha malu a bundu onso akadi mu maloba a Bena Isalele; wakenzesha bantu bonso ba mu Isalele bua bobo bakuatshile Yehowa Nzambi wabo mudimu. Mu matuku andi onso kabakalekela kulonda Yehowa, Nzambi wa bankambua babo. Yoshiya wakadila Yehowa bidia bia disanka dia kuhita kua Yehowa; bakashiha mikoko ku dituku dia dikumi ne dinai dia mu ngondo wa kumudilu. Yeye wakateka bakuidi mu miaba yabo, wakakolesha mitshima yabo mu mudimu wa mu nsubu wa Yehowa. Yeye wakambila Bena Lewi bakadi bayisha Bena Isalele bonso ne bakadi bajidila kudi Yehowa ne, Nuteke mushete wa tshijila mu nsubu wakasa Solomo, muana wa Davidi, mukelenge wa Isalele; bujitu ebu kabuikadi ha maha enu kabidi; katataka nukuatshile Yehowa ne bantu bandi Bena Isalele mudimu. Nudilongolole ku nsubu ya batatuʼenu mu milongo yenu, bu muakafunda Davidi, mukelenge wa Isalele, ne bu muakafunda Solomo muanʼandi. Nuimane mu muaba wa tshijila bu muakatahululabo nsubu ya batatuʼenu, bana ba mu ditunga, bua muntu ne muntu wa mu nsubu ya batatuʼenu Bena Lewi ikale ne tshituha tshiandi. Nushihe mikoko ya kuhita kua Yehowa, nudijidile, nujidile bana benu, bu muakadi dî dia Yehowa diakambabo kudi Mose. Yoshiya wakaha bantu bonso bakadiku milambu ya kufila mu kuhita kua Yehowa, mikoko ne bana ba mikoko binunu makumi asatu ne balume ba ngombe binunu bisatu; ebi biakadi munkatshi mua bintu bia mukelenge. Bantu banene bakaha bantu ne bakuidi ne Bena Lewi bintu biakasuabo mu mitshima yabo. Hilekiya ne Zekâya ne Yehiele, bakokeshi ba nsubu wa Nzambi, bakaha bakuidi milambu ya kufila: mikoko binunu bibidi ne nkama isambombo ne ngombe nkama isatu. Konaniya ne Shemaya ne Netanele ne bana babo ne Hashabeya ne Yiele ne Yozabada, bantu banene ba Bena Lewi, bakaha Bena Lewi milambu ya kufila: bana ba mikoko binunu bitanu ne ngombe nkama itanu. Nunku bakalongolola midimu yabo, ne bakuidi bakimana mu miaba yabo ne Bena Lewi ku milongo yabo bu muakadi mukenji wa mukelenge. Bakashiha mikoko ya kuhita kua Yehowa, bakuidi bakamiamina mashi akangatabo ku bianza biabo; Bena Lewi bakûbula biseba biai. Bakumusha milambu ya kuosha bua kuyifila kudi Yehowa bu muakadi kutahulula kua nsubu ya batatuʼabo, bana ba mu ditunga, bu muakafundabo mu mukanda wa Mose. Bakenza nunku ne balume ba ngombe kabidi. Bakanyika mikoko ya kuhita kua Yehowa ha kahia bu muakadi mukenji; bakalamba milambu ya tshijila mu ngesu, mu bivuadi ne mu mpanza, bakaya nʼai kudi bantu bonso lukasa. Ku nyima bakadilongoluela bintu biabo ne bia bakuidi, bualu bua bakuidi, bana ba Alona, bakadi bafila milambu ya kuosha ne ya dianyi tô ne hatula butuku; nunku Bena Lewi bakadilongoluela bintu biabo ne bintu bia bakuidi, bana ba Alona. Bimbi ba misambu, bana ba Asafa, bakadi mu miaba yabo bu muakadi mukenji wa Davidi ne wa Asafa ne wa Hemana ne wa Yedutuna, mumonyi wa malu wa mukelenge; batanu bakadi ku tshibi ne ku tshibi; kabakadi ne bua kumuka ku mudimu wabo, bualu bua bana babo Bena Lewi bakabalongoluela bintu biabo. Nunku bakalongolola malu onso dituku adi bua kudia bidia bia disanka dia kuhita kua Yehowa, ne bua kufila milambu ya kuosha ha tshioshelu tshia Yehowa, bu muakadi mukenji wa mukelenge Yoshiya. Bena Isalele bakadiku bakadia bidia bia kuhita kua Yehowa ku tshikondo atshi ne bidia bidi kabiyi ne luevene tô matuku muanda mutekete. Kabakadi ne kuhita kua Yehowa munkatshi mua Bena Isalele bu eku, katshia mu matuku a Samuele muprofete; bakelenge bakuabo kabakadi ne kuhita kua Yehowa bu eku kuakenza Yoshiya ne bakuidi ne Bena Lewi, ne Bena Yuda ne Bena Isalele bakadiku, ne bantu ba mu Yelushalema. Bakadia bidia bia kuhita kua Yehowa mu tshidimu tshia dikumi ne muanda mukulu tshia bukelenge bua Yoshiya, Ku nyima kua bualu ebu, bakamana Yoshiya kulongolola ntempelo, Neko, mukelenge wa Ejipitu, wakaya bua kuluangana ne ba mu Kâkemisha ku muelelu wa musulu wa Pelata; Yoshiya wakaya bua kuluangana nʼandi. Kadi yeye wakamutumina miloho yamba ne, Ndi nʼebe bualu kai, wewe mukelenge wa Yuda? Tshiakuluila bua kuluangana nʼebe lelu eu, kadi ndi nduangana ne badi nʼanyi lukuna; Nzambi wakungambila kahidi ne, Uye lukasa; nunku kudibuesha mu malu a Nzambi udi nʼanyi, bua yeye kakushihi. Kadi Yoshiya wakahidia kumukoma nyima, wakadifuanyikisha bu mukuabo, bua yeye aluangane nʼandi, kakitabusha mei a Neko akamuambilabo kudi Nzambi; wakaya kuluangana nʼandi mu tshibanda tshia Megido. Bena mata bakelela Yoshiya mikete; mukelenge wakambila bantu bandi ne, Nuye nʼanyi, bualu bua ndi mutaha mputa munene. Nunku bantu bandi bakamûmusha mu dikalu diandi, bakamuteka mu dikalu diandi dikuabo diakadiye nʼadi, bakaya nʼandi ku Yelushalema; yeye wakafumaku, bakamujika mu nkita ya bankambua bandi. Bena Yuda bonso ne ba mu Yelushalema bakashila Yoshiya madilu. Yelemiya wakashila Yoshiya madilu kabidi; bimbi ba misambu ne balume ne bakashi hadi batela dina dia Yoshiya mu miadi yabo tô ne ku dituku edi, bakayijadika bu tshilele mu Isalele, ne monai, mei au adi mafunda mu mukanda wa miadi. Bienzedi bikuabo bia Yoshiya ne malu mimpe akenzeye bu muakadi mikenji ya Yehowa, ne malu andi a kumudilu ne a kunshikidilu, monai, bidi bifunda mu mukanda wa bakelenge ba Isalele ne ba Yuda. Hashishe bantu ba mu buloba bakangata Yehoaza, muana wa Yoshiya, bakamuhingisha mu bukelenge mu muaba wa tatuʼandi mu Yelushalema. Yehoaza wakadi ne bidimu makumi abidi ne bisatu hakabangeye kukokesha; wakakokesha mu Yelushalema ngondo isatu. Mukelenge wa Ejipitu wakamûmusha mu bukelenge mu Yelushalema, wakafutshisha bena buloba ntalanta ya argent lukama ne wa or kabidi. Mukelenge wa Ejipitu wakahingisha muanʼabo Eleyakima mu bukelenge bua Yuda ne Yelushalema; wakamuidika dina ne Yehoyakima. Neko wakakuata Yehoaza muanʼabo, wakaya nʼandi mu Ejipitu. Yehoyakima wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu dikumi ne tshimue; wakenza malu mabi ku mesu kua Yehowa Nzambi wandi. Nebukadenesâ, mukelenge wa Babulona, wakalua bua kuluangana nʼandi, wakamusuika nkanu bua kuya nʼandi ku Babulona. Nebukadenesâ wakaya kabidi ne mpanza mikuabo yakadi mu nsubu wa Yehowa, wakayiteka mu ntempelo wandi wa mu Babulona. Bienzedi bikuabo bia Yehoyakima ne malu a bundu akenzeye ne akadi munda muandi bidi bifunda mu mukanda wa bakelenge ba Isalele ne ba Yuda; Yehoyakina muanʼandi wakakokesha mu muaba wandi. Yehoyakina wakadi ne bidimu dikumi ne muanda mukulu hakabangeye kukokesha; wakakokesha mu Yelushalema ngondo isatu ne matuku dikumi; Wakenza malu mabi ku mesu kua Yehowa. Hakabanga tshidimu tshikuabo, mukelenge Nebuka-denesâ wakatuma bantu, bakaya nʼandi ku Babulona ne bintu bia mushinga mukole biakadi mu nsubu wa Yehowa; bakahingisha Sedekiya muanʼabo mu bukelenge bua Yuda ne Yelushalema. Sedekiya wakadi ne bidimu makumi abidi ne tshimue hakabangeye kukokesha; wakakokesha mu Yelushalema bidimu dikumi ne tshimue; wakenza malu mabi ku mesu kua Yehowa Nzambi wandi; kakadihuekesha ku mesu kua Yelemiya muprofete hakamuambileye mei a kudi Yehowa. Yeye kabidi wakatombokela mukelenge Nebukadenesâ, nguakamutshihisha kudi Nzambi; kadi yeye wakadi ne mampaka, wakakolesha mutshima wandi kudi Yehowa, Nzambi wa Isalele. Bualu bukuabo kabidi, bakuidi banene bonso ne bantu bakananukila kulonda malu onso a bundu a bantu ba bisamba bikuabo bakanyanga nsubu wa Yehowa wakajidileye mu Yelushalema. Yehowa, Nzambi wa bankambua babo, wakananukila kubatumina bambi bandi; bualu bua wakadi ne bantu bandi ne muaba wandi luse; kadi bobo bakaseka bambi ba Nzambi; bakahetula mei andi, bakahenda baprofete bandi tô ne hakamueneka tshiji tshia Yehowa kudi bantu bandi tshidi katshiyi tshishika. Nunku yeye wakatuma mukelenge wa Bena Kasada bua kuluanganeye nʼabo, bakashiha bansongalume babo ne muele wa nvita mu muaba wabo wa tshijila; kabakafuila bansongalume ne bansongakashi bakatshidi kamama nansha bantu banunu bakoke luse; wakabafila bonso mu bianza biandi. Bakaya ne mpanza yonso yakadi mu nsubu wa Nzambi, ne minene ne mikese ne bintu biakadi mu bibutshilu bia mu nsubu wa Yehowa ne bia mukelenge ne bia baminyampala bandi, bakaya nʼabi bionso ku Babulona. Bakosha nsubu wa Nzambi ne kahia, bakashimbula ngumbu ya Yelushalema, bakosha mbalasa yau yonso ne kahia, bakahaula bintu bionso bia mushinga mukole. Bakaya ne bantu bakahanduka ku muele wa nvita ku Babulona; bakadi bahika ba mukelenge ne ba bana bandi tô ne hakalua bukelenge bua Pelasa; bua kujadika dî dia Yehowa mukana mua Yelemiya, bua buloba busanke mu matuku abu a lumingu; bualu bua hakadibu bubutula, bakavuluka matuku a lumingu tô ne hakakumbana bidimu makumi muanda mutekete. Mu tshidimu tshia kumudilu tshia Kolesha, mukelenge wa Pelasa, bua kujadika di dia Yehowa diakambeye mukana mua Yelemiya, Yehowa wakasonsola mutshima wa Kolesha, mukelenge wa Pelasa, bua kueleye mukenji mu bukelenge buandi buonso, wakafunda nunku ne, Kolesha, mukelenge wa Pelasa, udi wamba ne, Yehowa, Nzambi wa mu diulu, wakumpa makelenge onso a ha buloba; wakungelela mukenji bua kumuashila nsubu mu Yelushalema udi mu Yuda. Muntu yonso wa bantu bandi bonso badi munkatshi muenu aye biandi, ne Yehowa Nzambi wandi ikale nʼandi. Mu tshidimu tshia kumudilu tshia Kolesha, mukelenge wa Pelasa, bua kushikishabo dî dia Yehowa diakambeye mukana mua Yelemiya, Yehowa wakatabulusha mutshima wa Kolesha, mukelenge wa Pelasa; nunku yeye wakela mukenji ku nseke yonso ya bukelenge buandi, wakaufunda kabidi ne, Kolesha, mukelenge wa Pelasa, udi Wamba ne, Yehowa, Nzambi wa mu diulu, wakumpa makelenge onso a ha buloba; nyeye wakungelela mukenji bua meme kumuashila nsubu mu Yelushalema, udi mu buloba bua Yuda. Nzambi ikale ne yonso wa bantu bandi bonso udi munkatshi muenu, aye ku Yelushalema mu buloba bua Yuda, bua kuashila Yehowa, Nzambi wa Isalele, nsubu, bua yeye udi Nzambi udi mushikame mu Yelushalema. Yonso udi ushala mu muaba wonso udiye mushikame, bantu ba mu muaba wandi bamukuatshishe ne argent ne or ne biuma bikuabo ne nyama, ha mutu ha bintu bidi mitshima yabo misue kufila bua nsubu wa Nzambi wa mu Yelushalema. Hashishe bakajuka kudi ba ku mutu kua biota bia batatu ba mu Bena Yuda ne bia batatu ba mu Bena Benyamina, ne bakuidi ne Bena Lewi, buonso buabo mene bakadi ne mitshima mitabulushibue kudi Nzambi, bua kuyabo bua kulongolola nsubu wa Yehowa udi mu Yelushalema. Bonso bakadi bashikama nʼabo bakakolesha maboko abo ne bintu bia argent ne bia or ne biuma bikuabo ne nyama ne bintu bia mushinga mukole, ha mutu ha bionso biakasuabo kufila. Mukelenge Kolesha kabidi wakalua ne malonga akadi mu nsubu wa Yehowa akalua nʼau Nebukadenesâ ku Yelushalema, akadiye muteke mu nsubu wa nzambi wandi. Kolesha, mukelenge wa Pelasa, wakalua nʼau mikale mu tshianza tshia Miteledata, mulami wa tshibutshilu, wakâbala kudi Sheshebasâ, muntu munene wa mu Yuda. Ebu mbungi buau buakabalabo: malonga a or makumi asatu ne malonga a argent tshinunu ne tuele makumi abidi ne tshitema ne mpanza ya or makumi asatu ne mpanza ya argent nkama inai ne dikumi ne malonga makuabo tshinunu. Malonga onso a or ne a argent akadi binunu bitanu ne nkama inai. Sheshebasâ wakalua nʼau onso, hakumuka bakadi mu buhika ku Babulona bua kuyabo ku Yelushalema. Aba mbantu ba ku luseke lua bakumuka mu buhika bakadi Nebukadenesâ, mukelenge wa Babulona, muye nʼabo ku Babulona, bakahingana kabidi ku Yelushalema ne Yuda, muntu ne muntu ku musoko wandi: hakahia ne Zelubabela bakadi Yeshua, Nehemiya, Selaya, Lêlaya, Môdekai, Bileshana, Misepâ, Bigewai, Lehuma ne Bâna. Bungi bua bantu ba mu Bena Isalele bakadi: Bana ba Palosha, binunu bibidi ne lukama ne makumi muanda mutekete ne babidi. Bana ba Shefataya, nkama isatu ne makumi muanda mutekete ne babidi. Bana ba Ala, nkama muanda mutekete ne makumi muanda mutekete ne batanu. Bana ba Pahata-moaba, bana ba Yeshua ne ba Yoaba, binunu bibidi ne nkama muanda mukulu ne dikumi ne babidi. Bana ba Elama, tshinunu tshimue ne nkama ibidi ne makumi atanu ne banai. Bana ba Zatu, nkama tshitema ne makumi anai ne batanu. Bana ba Zakai, nkama muanda mutekete ne makumi asambombo. Bana ba Bani, nkama isambombo ne makumi anai ne babidi. Bana ba Bebai, nkama isambombo ne makumi abidi ne basatu. Bana ba Azagada, tshinunu tshimue ne nkama ibidi ne makumi abidi ne babidi. Bana ba Adonikama, nkama isambombo ne makumi asambombo ne basambombo. Bana ba Bigewai, binunu bibidi ne makumi atanu ne basambombo. Bana ba Adina, nkama inai ne makumi atanu ne banai. Bana ba Atê wa Hezikiya, makumi tshitema ne muanda mukulu. Bana ba Bezai, nkama isatu ne makumi abidi ne basatu. Bana ba Yola, lukama ne dikumi ne babidi. Bana ba Hashuma, nkama ibidi ne makumi abidi ne basatu. Bana ba Gibâ, makumi tshitema ne batanu. Bana ba Beteleheme, lukama ne makumi abidi ne basatu. Bantu ba mu Netofa, makumi atanu ne basambombo. Bantu ba mu Anatota, lukama ne makumi abidi ne muanda mukulu. Bana ba Azemaweta, makumi anai ne babidi. Bana ba Kîyata-alima ne ba Kefila ne ba Bêlota, nkama muanda mutekete ne makumi anai ne basatu. Bana ba Lama ne Geba, nkama isambombo ne makumi abidi ne umue. Bantu ba mu Mikemasa, lukama ne makumi abidi ne babidi. Bantu ba mu Betele ne Ai, nkama ibidi ne makumi abidi ne basatu. Bana ba Nebo, makumi atanu ne babidi. Bana ba Magebisha, lukama ne makumi atanu ne basambombo. Bana ba Elama mukuabo, tshinunu tshimue ne nkama ibidi ne makumi atanu ne banai. Bana ba Halima, nkama isatu ne makumi abidi. Bana ba Loda ne ba Hadidi ne ba Ono, nkama muanda mutekete ne makumi abidi ne batanu. Bana ba Yeleko, nkama isatu ne makumi anai ne batanu. Bana ba Sena, binunu bisatu ne nkama isambombo ne makumi asatu. Bakuidi: bana ba Yedaya, ba mu nsubu wa Yeshua, nkama tshitema ne makumi muanda mutekete ne basatu. Bana ba Imê, tshinunu tshimue ne makumi atanu ne babidi. Bana ba Pashû, tshinunu tshimue ne nkama ibidi ne makumi anai ne muanda mutekete. Bana ba Halima, tshinunu tshimue ne dikumi ne muanda mutekete. Bena Lewi: bana ba Yeshua ne Kadamiele ne ba Hodaweya, makumi muanda mutekete ne banai. Bimbi ba misambu, bana ba Asafa, lukama ne makumi abidi ne muanda mukulu. Bana ba batuadi ba bintu: bana ba Shaluma ne ba Atê ne ba Talemona ne ba Akuba ne ba Hatita ne ba Shobai, buonso buabo bakadi lukama ne makumi asatu ne tshitema. Bena Netinima: bana ba Siha ne bana ba Hasufa ne ba Tabaota, bana ba Kelosa, bana ba Siaha, bana ba Padona, bana ba Lebana, bana ba Hagaba, bana ba Akuba, bana ba Hagaba, bana ba Shamelai, bana ba Hanana, bana ba Gidela, bana ba Gahâ, bana ba Leaya, bana ba Lesini, bana ba Nekoda, bana ba Gasama, bana ba Uza, bana ba Pasea, bana ba Besai, bana ba Asena, bana ba Meunima, bana ba Nefisima, bana ba Bakâhuka, bana ba Hakufa, bana ba Hâhû, bana ba Baseluta, bana ba Mehida, bana ba Hâsha, bana ba Bâkosa, bana ba Sisela, bana ba Tema, bana ba Nesiya ne bana ba Hatifa. Bana ba bena mudimu ba Solomo: bana ba Sotai, bana ba Hasofeleta, bana ba Peluda, bana ba Yâla, bana ba Dâkona, bana ba Gidele, bana ba Shefatiya, bana ba Hatila, bana ba Pokeleta-hasebayima, bana ba Ami. Bena Netinima bonso ne bana ba bahika ba Solomo bakadi nkama isatu ne makumi tshitema ne babidi. Aba mbakafuma ku Tele-mela, ku Tele-halesha, ku Keluba, ku Adana ne ku Imê; kabakamanya mua kujadika biota bia batatu babo ne tunkanunuma tuabo ne mBena Isalele mene: bana ba Delaya ne bana ba Tobiya ne bana ba Nekoda bakadi nkama isambombo ne makumi atanu ne babidi. Bana ba bakuidi: bana ba Habaya, bana ba Hakosa, bana ba Bâzilai, nguakabaka mukashi wa mu bana ba Bâzilai, Muena Gilada, wakidikibua dina diabo. Bobo bakakeba mena abo mu mukanda wa kulondolola kua bankambua, kadi kabakâsangana; nunku bakadi bu bantu banyanguke, bakabumusha mu buakuidi. Gouvemeur wakabambila ne, Kanuena mua kudia bintu bitambe bia tshijila tô ne habika muakuidi bua kukonkeye bualu ebu ne Ulima ne Tumima. Bonso bakadi badisangisha bakadi binunu makumi anai ne bibidi ne nkama isatu ne makumi asambombo, ha mutu ha bena mudimu babo balume ne bakashi bakadi binunu muanda mutekete ne nkama isatu ne makumi asatu ne muanda mutekete; bakadi ne bimbi ba misambu balume ne bakashi nkama ibidi. Tubalu tuabo tuakadi nkama muanda mutekete ne makumi asatu ne tusambombo; nyama yabo ya mpunda nkama ibidi ne makumi anai ne itanu; nyama yabo ya tumelo, nkama inai ne makumi asatu ne tutanu; nyama yabo ya mpunda binunu bisambombo ne nkama muanda mutekete ne makumi abidi. Hakafika bakuabo bakadi ku mutu kua meku abo ku nsubu wa Yehowa wa mu Yelushalema, bakafila bintu biabo bu muakasua mitshima yabo kufila bia kuasabo nʼabi nsubu wa Nzambi mu muaba wandi; bu muakadibo bamanye mua kufila, bakafila bintu mu tshibutshilu tshia bintu bia mudimu, dariques ya or binunu makumi asambombo ne tshimue, mines ya argent binunu bitanu ne bilulu lukama bia bakuidi. Nunku bakuidi ne Bena Lewi ne bantu bakuabo ne bimbi ba misambu ne batuadi ba bintu ne Bena Netinima bakashikama mu misoko yabo ne Bena Isalele bonso bakashikama mu misoko yabo. Hakafika ngondo wa muanda mutekete, hakadi Bena Isalele bashikame mu misoko yabo, buonso buabo bakadisangisha bu muntu umue ku Yelushalema. Hashishe Yeshua, muana wa Yozadaka, wakimana ne bakuidi bakuabo, ne Zelubabela, muana wa Shaletiele, ne bana babo bakajuka, bakasa tshioshelu tshia Nzambi wa Isalele, bua kufilahu milambu ya kuosha bu muakafundabo mu mukanda wa mikenji ya Mose, muntu wa Nzambi. Bakajadika tshioshelu ha tshitekelu tshiatshi, bualu bua ditshina diakabakuata bua bantu bakadi mu misoko ai; bakafilaku milambu ya kuosha kudi Yehowa dinda ne dilolo. Bakadia bidia bia disanka dia mu nsubu ya bitandatanda bu muakafundabo; bakafila milambu ya kuosha ya buatshia-buatshia bu mudi bungi buai, bu mudi dî dijalame, bu muakadibo ne bua kuenza buatshia-buatshia; ku nyima bakananukila kufila milambu ya kuosha ne milambu ya ngondo mihia-mihia ne ya masanka onso majadika a Yehowa akadi majidibue ne wa muntu yonso wakadi ne mutshima wa disua dia kufila kudi Yehowa. Dituku dia kumudilu dia ngondo wa muanda mutekete bakabanga kufila milambu ya kuosha kudi Yehowa; kadi kabakanza kujadika bishimikidi bia ntempelo wa Yehowa. Bakafila argent yabo kudi bahandi ba mabue ne bena mabaya; bakafila bia kudia ne bia kunua ne manyi kudi ba mu Sidona ne ba mu Tulo bua kuluabo ne mitshi ya cêdre, bafume ku Lebanona, balue ku mai manene ku Yopa, bu muakadi mukenji wakabelela Kolesha, mukelenge wa Pelasa. Mu tshidimu tshibidi tshia dihingana diabo ku nsubu wa Nzambi mu Yelushalema, mu ngondo muibidi, Zelubabela, muana wa Shaletiele, ne Yeshua, muana wa Yozadaka, ne bana babo bakadi bashala ba bakuidi ne Bena Lewi ne bonso bakumuka mu buhika ne bakahingana ku Yelushalema, bakabanga kusungula Bena Lewi ba bidimu makumi abidi tô ne ku mutu bua kuikalabo ku mutu kua mudimu wa mu nsubu wa Yehowa. Hashishe Yeshua ne bana bandi balume ne bana babo ne Kadamiele ne bana bandi balume ne bana balume ba Yuda bakajuka diatshimue bua kuikalabo ku mutu kua mudimu wa mu nsubu wa Nzambi; bana ba Henedada ne bana babo, Bena Lewi, bakadi nʼabo. Hakajadika bibaki bishimikidi bia ntempelo wa Yehowa, bakuidi baluata bilulu biabo bakalua ne mpungi, ne Bena Lewi, bana balume ba Asafa, bakalua ne makasa bua kutumbishabo Yehowa bu muakadi dî dijadika kudi Davidi, mukelenge wa Isalele. Bakimba misambu, bakuabo batume, bakuabo bahungidishe, bakasakidila Yehowa bamba ne, Yeye udi muimpe, bualu bua luse luandi ludi lujalame tshiendelele kudi Bena Isalele. Bantu bonso bakela mbila ne dî dikole hakatumbishabo Yehowa, bualu bua bakajadika bishimikidi bia nsubu wa Yehowa. Kadi bakuidi bakuabo ne Bena Lewi ne bakadi ku mutu kua biota bia batatu babo, bantu banunu bakadi batangile nsubu wa diambedi, hakatangilabo bishimikidi bia nsubu eu bijadikibue ku mesu kuabo, bakadila ne dî dikole; bakuabo bakela mbila bua disanka; nunku bantu kabakamanya mua kutahulula mbila ya disanka ku muadi wa bantu bakadi badila; bualu bua bantu bakabandisha mbila bikole, mbila yakunvuika kule. Hakunvua bena lukuna ba Bena Yuda ne Bena Benyamina lumu ne, Bantu bakahingana ku buhika badi bashila Yehowa, Nzambi wa Isalele, ntempelo, bakalua kudi Zelubabela ne kudi bakadi ku mutu kua nsubu ya batatu babo, bakabambila ne, Tuase bietu nʼenu; bualu bua tuetu tudi tukeba Nzambi wenu bu nuenu, tuakufila milambu kudiye ku dituku diakalua Esâ-hadona, mukelenge wa Ashû, nʼetu kunoko tô ne ku dituku edi. Kadi Zelubabela ne Yeshua ne bakadi ku mutu kua biota bia batatu babo ba mu Bena Isalele bakabambila ne, Nuenu kanuena mua kuasa nʼetu nsubu wa Nzambi wetu; kadi tuetu nkayetu netuashile Yehowa, Nzambi wa Isalele, nsubu bu muakatuambila Kolesha, mukelenge wa Pelasa. Hashishe bena buloba bakatekesha maboko a Bena Yuda, bakatatshisha mu mudimu wabo, bakatatshisha bantu anu bua kubahumbishabo matuku onso a Kolesha, mukelenge wa Pelasa, tô ne ku bukokeshi bua Dayawesha, mukelenge wa Pelasa. Mu bukokeshi bua Ahashawelosha, ku tshibangidilu tshia bukokeshi buandi, bakatanda mukanda bua kubanda ba mu Bena Yuda ne ba mu Yelushalema. Mu matuku a Atashasete, Bishilama ne Miteledata ne Tabêla ne ba ku mulongo wabo bakafundila Atashasete, mukelenge wa Pelasa, mukanda; mukanda eu wakadi mufundibue mu maleta a Bena Sulia, mufundibue mu muaku wa Bena Sulia. Lehuma, mumanyi wa mikenji, ne Shimeshai secrétaire bakafundila Atashasete mukelenge mukanda wa kubanda Bena Yelushalema; hashishe Lehuma, mumanyi wa mikenji, ne Shimeshai secrétaire ne bena mulongo wabo, ne Bena Dina ne Bena Afâsateka ne Bena Tâpela ne Bena Afâseka ne Bena Âkewa ne Bena Babulona ne Bena Shushanaka ne Bena Dahaye ne Bena Elama, ne bisamba bikuabo bia bantu biakalua nʼabi Osenapâ, muntu munene wa butumbi, wakabateka mu musoko wa Samalea ne mu dishiya dia muamua dia musulu wa Pelata. Eu mmukanda wakatuminabo mukelenge Atashasete: Bantu bebe ba ku buloba bua dishiya dia musulu wa Pelata ne ba ku tshikondo etshi badi bakutumina muoyo. Mukelenge amanye biandi ne, Bena Yuda aba bakafuma kûdi bakafika kutudi mu musoko wa Yelushalema; badi basa musoko au mubi wakakutombokela, bakamana kushikisha ngumbu ne bishimikidi biai. Mukelenge amanye biandi kabidi ne, Bikala musoko muashibue ne ngumbu mijadikibue, kabena bafila milambu ne bia bungendʼa mushinga ne mpunga; nunku neunyanyishe luhetu lua hakelenge. Bualu bua tuetu tutu tuadia luehu lua ku nsubu wa mukelenge, kambimpe bua tuetu kutangila bundu bua mukelenge, nunku tuakufunda mukanda eu bua kumanyisha mukelenge wetu; bua yeye atangile mu mikanda yakafunda batatuʼandi ne habaleye mukanda wa kulondolola kua malu a musoko eu, neamanye biandi ne musoko eu udi wa batomboki batu benzela hakelenge ne nseke bibi kale tô ne katataka; anu bua bualu ebu bakabutuisha musoko eu. Tudi tumanyisha mukelenge ne, Bikala musoko eu muashibue, ne bikala ngumbu mishikishibue, wewe kuena ne buebe buhianyi dishiya dia munemu dia musulu wa Pelata. Hashishe mukelenge wakatumina Lehuma, mumanyi wa mikenji, ne Shimeshai secrétaire ne bena mulongo wabo bakadi bashikama mu Samalea ne mu buloba bua dishiya dia musulu wa Pelata mukandu ne, Ditalala dikale kunudi. Bakumbadila mukanda unuakuntumina. Nakuela mukenji wanyi, ne bakukeba mu mikanda ya kulondolola kua malu, bakasangana ne, Musoko eu wakatombokela bakelenge musangu wa kale ne ditomboka ne diela dia bifufu biakadimu. Bakelenge banene bakadi ku mutu kua Yelushalema, bakadi bakokesha buloba buonso bua dishiya dia musulu wa Pelata; bakadi bafila milambu ne bungendʼa mushinga ne mpunga kudibo. Nunku nuelele bantu aba mukenji ne, Balekele mudimu, kabashi musoko au tô ne hangamba dî dikuabo. Nudimuke, kanujingakanyi ku bualu ebu; badi ne bua kudiundisha dikehesha dia bakelenge bua tshinyi? Hakabalabo mukanda wa mukelenge Atashasete ku mesu kua Lehuma ne Shimeshai secrétaire ne bena mulongo wabo, bakaya kudi Bena Yuda mu Yelushalema lubilu, bakakandisha mudimu ku bukole. Nunku bakalekela mudimu wa nsubu wa Nzambi wa mu Yelushalema; bakalekela mudimu nunku tô ne ku tshidimu tshibidi tshia mu bukokeshi bua Dayawesha, mukelenge wa Pelasa. Nunku baprofete Hagai ne Zekâya, muana wa Ido, bakambila Bena Yuda bakadi mu Yuda ne mu Yelushalema dî dia Nzambi; bakabambila dî mu dina dia Nzambi wa Isalele. Hashishe Zelubabela, muana wa Shaletiele, ne Yeshua, muana wa Yozadaka, bakajuka, bakabanga kuasa nsubu wa Nzambi udi mu Yelushalema; baprofete ba Nzambi bakadi nʼabo, bakabakuatshisha. Ku tshikondo atshi Tatenai, gouverneur wa buloba bua dishiya dia muamua dia musulu wa Pelata, ne Shetâ-bozenai ne bena mulongo wabo, bakalua kudibo, bakabakonka ne, Wakunuelela mukenji bua kuasa nsubu eu ne bua kushikisha lumbu nganyi? Hashishe tuakabambila mena a bantu bakadi basa nsubu eu. Kadi mesu a Nzambi wabo akadi kudi bakulu ba Bena Yuda, kabakabakandisha mu mudimu tô ne hakayabo ne bualu ebu kudi Dayawesha, ne hakabafundileye mukanda bua bualu ebu. Eu mmukanda wakadi Tatenai, gouverneur wa buloba bua dishiya dia musulu wa Pelata, ne Shetâbozenai ne Bena Afâsateka, bena mulongo wandi, bakadi dishiya dia musulu wa Pelata, batumine mukelenge Dayawesha; bakamutumina mukanda wakadi mufunda nunku: Ditalala dionso dikale kudi mukelenge Dayawesha. Mukelenge amanye biandi ne, Tuetu tuakuya ku buloba bua Yuda ku nsubu wa Nzambi munene udibo babikila ne mabue manene ne mabaya adi majadikibue mu bimanu bia nsubu; badi benza mudimu eu ne disuminyina ne badi batuma mudimu eu ku mpala ne bianza biabo. Hashishe tuakebesha bakulu aba ne, Wakanuelela mukenji bua nuenu nuase nsubu eu ne bua nuenu numane lumbu elu nganyi? Tuakabebesha mena abo kabidi bua tuetu kukumanyisha ne bua tuetu tukufundile mena a bantu badi ku mutu kuabo. Bakatuandamuna dî diabo nunku ne, Tuetu tudi bena mudimu ba Nzambi wa diulu ne buloba; tudi tuasa nsubu wakasabo bidimu bia bungi bimane kuhita, nsubu wakasabo, wakashikishabo kudi mukelenge munene wa Isalele. Kadi hakafuisha bankambua betu Nzambi wa mu diulu tshiji, yeye wakabafila mu bianza bia Nebukadenesâ, Muena Kasada, mukelenge wa mu Babulona, nguakahaula nsubu eu ne nguakaya ne bantu aba mu Babulona. Kadi mu tshidimu tshia kumudilu tshia bukelenge bua Kolesha, mukelenge wa Babulona, mukelenge Kolesha mene wakela mukenji bua kuasabo nsubu eu wa Nzambi. Malonga a or kabidi ne a argent a mu nsubu wa Nzambi, akangata Nebukadenesâ mu ntempelo wakadi mu Yelushalema, wakaya nʼau mu ntempelo wa mu Babulona, mukelenge Kolesha wakangata malonga au mene mu ntempelo wa mu Babulona, wakâfila kudi muntu, dina diandi Sheshebasâ, nguakasunguleye gouverneur; wakamuambila ne, Angata malonga â, uye nʼau, wâteka mu ntempelo udi mu Yelushalema, base nsubu wa Nzambi mu muaba wandi. Hashishe Sheshebasâ eu mene wakalua, wakajadika bishimikidi bia nsubu wa Nzambi udi mu Yelushalema; batshidi basa nsubu au ku musangu au tô ne katataka, kabena banji kumumana. Biamona mukelenge ne mbimpe, bakebe mu nsubu wa tshibutshilu tshia mukelenge udi kuakua ku Babulona ne, Mukelenge Kolesha wakela mukenji bua kuasa nsubu eu wa Nzambi mu Yelushalema, anyi? Hashishe, mukelenge atuambile bu mudi disua diandi mu bualu ebu. Hashishe mukelenge Dayawesha wakela mukenji, bakakebakeba mu nsubu wa mikanda wakadibo babutshila bintu bia mushinga mukole mu Babulona. Bakasangana mukandu ku Akemeta mu nsubu wa mukelenge udi mu buloba bua Bena Madai, wakadi mufunda nunku: Mu tshidimu tshia kumudilu tshia bukelenge bua mukelenge Kolesha mene, mukelenge Kolesha wakela mukenji eu bua nsubu wa Nzambi wa mu Yelushalema ne: Base nsubu au mu muaba wakadibo bafila milambu, bajadike bishimikidi biandi bikole; bule buabi nebuikale coudées makumi asambombo ne butshiama buabi nebuikale coudées makumi asambombo; base ne milongo ya mabue manene isatu ne mulongo wa mabaya mahia-mahia; difutu dia mudimu eu difume mu nsubu wa mukelenge. Bahingishe malonga a or ne a argent mu nsubu wa Nzambi, akangata Nebukadenesâ mu ntempelo udi mu Yelushalema, akalueye nʼau ku Babulona; baye nʼau kabidi mu ntempelo udi mu Yelushalema, bateke dilonga ne dilonga mu muaba wadi; bateke mu nsubu wa Nzambi. Nunku wewe Tatenai, gouver-neur wa buloba bua dishiya dia musulu wa Pelata, ne Shetâ-bozenai ne Bena Afâsateka, bena mulongo webe badi dishiya dia musulu wa Pelata, kanufiki ha buihi nʼabo; kanuhumbishi mudimu wa nsubu eu wa Nzambi; gouverneur wa Bena Yuda ne bakulu ba Bena Yuda base nsubu eu wa Nzambi mu muaba wandi. Bualu bukuabo kabidi, ndi mulelela mukenji unudi ne bua kuenzela bakulu aba ba Bena Yuda badi basa nsubu eu wa Nzambi ne, Nuangate biuma bia mukelenge bia mu milambu ya mu buloba bua dishiya dia musulu wa Pelata, nubifile kudi bantu aba lubilu bua kubakuatshisha; kabahumbishibu kabidi. Babahe kabidi bintu bidibo nʼabi bualu, bana balume ba ngombe ne bimpanga ne bana ba mikoko bu milambu ya kuoshila Nzambi wa mu diulu; ne blé, luehu, nyinyo ne manyi, bu mudi bakuidi ba mu Yelushalema bamba; babahebi ku dituku ne ku dituku, kabahangi; bua bobo bafile milambu idi mitue dihembu kudi Nzambi wa mu diulu, balombele muoyo wa mukelenge ne wa bana bandi ba balume Nzambi. Nakela mukenji mukuabo kabidi ne, Yonso udi ukudimuna dî edi, batule dibaya dinene dia ku nsubu wandi, bamuoweleku, muasa ku dibaya; bavuishe nsubu wandi bu diala bua bualu ebu; Nzambi nguakajadikishaku dina diandi abutule hakelenge bonso ne bantu bonso badi bolola bianza biabo bua kukudimunabo bualu ebu ne bua kuhaulabo nsubu eu wa Nzambi udi mu Yelushalema. Meme Dayawesha, nakela mukenji eu; batumikile mukenji eu ne mitshima yabo yonso. Hashishe Tatenai, gouverneur wa buloba budi dishiya dia musulu wa Pelata, ne Shetâ-bozenai ne bena mulongo wabo bakenza bualu buakabambila mukelenge Dayawesha ne mitshima yabo yonso. Bakulu ba Bena Yuda bakasa nsubu, bakadi ne diakalengele bualu bua dî dia Nzambi diakabambila Hagai muprofete ne Zekâya, muana wa Ido. Bakasa nsubu, bakamushikisha bu muakadi mukenji wa Nzambi wa Bena Isalele, ne bu muakadi mukenji wa Kolesha ne Dayawesha ne Atashasete, mukelenge wa Pelasa. Bakamana nsubu eu ku dituku disatu dia mu ngondo wa Adâ mu tshidimu tshisambombo tshia bukokeshi bua mukelenge Dayawesha. Bena Isalele ne bakuidi ne Bena Lewi ne bantu bakuabo bakahingana ku buhika bakajidila nsubu eu wa Nzambi ne disanka. Hakajidilabo nsubu eu wa Nzambi bakafila milambu ya ngombe lukama ne bimpanga nkama ibidi ne bana ba mikoko nkama inai; bakafila milambu ya kubuikila nʼai mibi ya Bena Isalele bonso mpumbu ya mbushi dikumi ne ibidi bu bungi bua bisamba bia Bena Isalele. Bakateka bakuidi mu bisumbu biabo ne Bena Lewi mu milongo yabo bua kukuatshilabo Nzambi mudimu mu nsubu udi mu Yelushalema, bu muakafundabo mu mukanda wa Mose. Bantu bakahingana ku buhika bakadia bidia bia disanka dia kuhita kua Yehowa ku dituku dia dikumi ne inai dia ngondo wa kumudilu. Bualu bua bakuidi ne Bena Lewi bakadianjila kudilengesha diatshimue; buonso buabo bakadi balengeshibue; bakashihela bantu bonso bakahingana ku buhika ne bana babo bakuidi mikoko ya disanka dia kuhita kua Yehowa; bakadishihelayi kabidi. Bena Isalele bonso bakadi bumuka mu buhika ne bantu bonso bakadi baditahulule ku malu a bundu a bisamba bia bantu ba ha buloba bua kukebabo Yehowa, Nzambi wa Isalele, bakabidia; bakadia bidia bidi kabiyi ne luevene ne disanka matuku muanda mutekete; bualu bua Yehowa wakabavudishila disanka, wakakudimusha mutshima wa mukelenge wa Ashû kudibo bua kukolesheye maboko abo mu mudimu wa nsubu wa Nzambi, Nzambi wa Bena Isalele. Ku nyima kua malu â, mu bukokeshi bua Atashasete, mukelenge wa Pelasa, Ezela, muana wa Selaya, muana wa Azaya, muana wa Hilekiya, muana wa Shaluma, muana wa Sadoka, muana wa Ahituba, muana wa Amalia, muana wa Azaya, muana wa Melayota, muana wa Zelaya, muana wa Uzi, muana wa Buki, muana wa Abishua, muana wa Pinehasa, muana wa Eleazâ, muana wa Alona, muakuidi mutambe bakuabo; Ezela eu mene wakafuma mu Babulona; wakadi mufundi muakane wa mikenji ya Mose yakafila Yehowa, Nzambi wa Bena Isalele; mukelenge wakamunvuila mu malu onso akamuebesheye bualu bua tshianza tshia Yehowa, Nzambi wandi, tshiakadi kudiye. Bena Isalele bakuabo ne bakuidi ne Bena Lewi ne bimbi ba misambu ne batuadi ba bintu ne Bena Netinima bakaya nʼandi ku Yelushalema mu tshidimu tshia muanda mutekete tshia bukokeshi bua mukelenge Atashasete. Yeye Wakafika ku Yelushalema mu ngondo muitanu wa mu tshidimu tshia muanda mutekete tshia bukokeshi bua mukelenge. Wakabanga luendu luandi dituku dia kumudilu mu ngondo wa kumudilu mu Babulona; Wakafika ku Yelushalema ku dituku dia kumudilu dia ngondo muitanu bualu bua tshianza tshimpe tshia Nzambi wandi tshiakadi kudiye. Bualu bua Ezela wakadi mujadike mu mutshima wandi bua kukeba mikenji ya Yehowa ne bua kuyenza ne bua kuyisheye Bena Isalele mikenji ne mei majalame. Eu mmukanda wakaha mukelenge Atashasete Ezela muakuidi ne mufundi, mufundi mene wa mei a mikenji ya Yehowa ne wa malu akadiye musue benze kudi Bena Isalele: Atashasete, mukelenge wa bakelenge, kudi Ezela, muakuidi, mufundi wa mikenji ya Nzambi wa mu diulu udi muakane: Meme ndi ngela mukenji ne, Bena Isalele bonso ne bakuidi babo ne Bena Lewi badi mu bukelenge buanyi badi basue mu mitshima yabo bua kuya ku Yelushalema, baye nʼebe. Bualu bua wewe udi mutumibue kudi mukelenge ne bena lungenyi bandi muanda mutekete, bua wewe kuebesha bua Yuda ne Yelushalema bu mudi mikenji ya Nzambi webe idi mu bianza biebe, bua wewe kutuala argent ne or biakafua mukelenge ne bena lungenyi bandi bu mudi disua diabo kudi Nzambi wa Isalele, udi mushikame mu Yelushalema, ne argent yonso ne or yonso biudi usangana mu bukelenge bua Babulona, ne bintu bia bantu bonso ne bakuidi biakasuabo kufila bua nsubu wa Nzambi wabo udi mu Yelushalema; nunku bûdi nʼabu mbua kusumba ne argent ei ngombe ne bimpanga ne bana ba mikoko ne milambu yabi ya bukula ne ya bintu bia kunua, biudi ufila ha tshioshelu tshidi mu nsubu wa Nzambi webe udi mu Yelushalema. Tshionso tshidi tshimueneka tshimpe kûdi ne kudi bana benu tshia mua kuenza ne argent ne or bidi bishala, nuenze bu mudi disua dia Nzambi wenu. Malonga adibo bafila kûdi bua kuenza nʼau mudimu wa mu nsubu wa Nzambi webe, wâfila ku mpala kua Nzambi mu Yelushalema. Tshionso tshiudi ukengela bua nsubu wa Nzambi webe, tshiudi ne bua kufila, utshiangate mu tshibutshilu tshia mu nsubu wa mukelenge. Meme, mukelenge Atashasete mene, Ndi ndelela balami bonso ba bintu badi dishiya dia musulu wa Pelata mukenji ne, Nuhe Ezela muakuidi ne mufundi wa mikenji ya Nzambi wa diulu tshionso tshidiye unulomba lubilu, tô ne ku ntalanta ya argent lukama, ne ku bihiminu bia blé lukama, ne ku bihiminu bia nvinyo lukama ne ku bihiminu bia manyi lukama; ne luehu ludi kaluyi lubadibue bungi bualu. Tshionso tshidi Nzambi wa mu diulu wamba tshienjibue mene mene bua nsubu wa Nzambi wa mu diulu; bua tshiji netshikale ku bukokeshi bua mukelenge ne bana bandi ba balume bua tshinyi? Tuditunuelela mukenji kabidi ne, Kanulambuishi bakuidi ne Bena Lewi ne bimbi ba misambu ne batuadi ba bintu ne Bena Netinima anyi bena mudimu bonso ba mu nsubu wa Nzambi milambu, ya bia bungendʼa mushinga ne ya mpunga. Wewe, Ezela, bu mudi lungenyi lua Nzambi webe lûdi nʼalu mu tshianza tshiebe, sungula balumbuluishi banene ne ba-juge bua bobo balumbuluile bantu bonso badi dishiya dia musulu wa Pelata, bonso badi bamanye mikenji ya Nzambi webe; uyishe yonso udi kayi muyimanye. Muntu yonso udi ubenga mua kutumikila mikenji ya Nzambi webe ne mikenji ya mukelenge, bamulumbuluishe lubilu, bamuhishe bua lufu anyi bua kumuihatabo mu buloba buandi, anyi bua kumunyengabo bintu biandi anyi bua kumuelabo mu lukanu. Disanka dikale kudi Yehowa, Nzambi wa bankambua betu, nguakateka bualu ebu mu mutshima wa mukelenge bua kulengesheye nsubu wa Yehowa udi mu Yelushalema, nguakanvuisha diakalengele ku mesu kua mukelenge ne bena lungenyi bandi ne ku mesu kua bantu banene bonso ba mukelenge. Nakakoleshibua bualu bua tshianza tshia Yehowa, Nzambi wanyi, tshiakadi kundi; nakasangisha bantu banene ba mu Isalele bua kuyabo nʼanyi. Au mmena a bakadi ku mitu ya nsubu ya batatu babo, eku nkulondolola kua bakafuma nʼanyi ku Babulona, mu bukokeshi bua mukelenge Atashasete: wa bana balume ba Pinehasa, Gêshoma; wa bana ba Itamâ, Danyele; wa bana ba Davidi, Hatusha; wa bana ba Shekanya ne ba Palosha, Zekâya; bakamubalabo nʼabo bakadi balume lukama ne makumi atanu. Wa bana ba Pahata-moaba, Eleyehoenai, muana wa Zelaya; bakadi nʼandi bakadi balume nkama ibidi. Wa bana balume ba Zatu, Shekanya, muana wa Yahaziele; bakadi nʼandi bakadi balume nkama isatu. Wa bana ba Adina, Ebede, muana wa Yonatana; bakadi nʼandi bakadi balume makumi atanu. Wa bana ba Elama, Yeshaya, muana wa Atalaya; bakadi nʼandi bakadi balume makumi muanda mutekete. Wa bana ba Shefataya, Zebadaya, muana wa Mikaele; bakadi nʼandi bakadi balume makumi muanda mukulu. Wa bana ha Yoaba, Obadaya, muana wa Yehiele; bakadi nʼandi bakadi balume nkama ibidi ne dikumi ne muanda mukulu. Wa bana ba Bani, Shelomita, muana wa Yosifiya; bakadi nʼandi bakadi balume lukama ne makumi asambombo. Wa bana ba Bebai, Zekâya, muana wa Bebai; bakadi nʼandi bakadi balume makumi abidi ne muanda mukulu. Wa bana ba Azegada, Yohanana, muana wa Hakatana; bakadi nʼandi bakadi balume lukama ne dikumi. Ba bana ba Adonikama, bakadi ba kunshikidilu, â mmena abo, Elefilete, Yeule ne Shemaya; bakadi nʼabo bakadi balume makumi asambombo. Ba bana ba Bigewai, Utai ne Zabuda; bakadi nʼabo bakadi balume makumi muanda mutekete. Nakabasangisha ku musulu udi uya ku Ahawa; tuakashikamaku matuku asatu; hanakatangila bantu ne bakuidi, tshiakasangana bana ba Lewi. Hashishe nakabikila Elieze ne Aliele ne Shemaya ne Elenatana ne Yaliba ne Elenatana mukuabo ne Natana ne Zekâya ne Meshulama, bakadi ne lungenyi luhita; ne Yoyaliba ne Elenatana mukuabo bakadi bayishi. Nakabatuma kudi Ido, muntu munene, ku muaba wa Kasifaya; nakabambila mei a kuambilabo Ido ne bana babo, Bena Netinima, ku muaba wa Kasifaya, bua bobo balue kutudi ne benji ba mudimu wa nsubu wa Nzambi wetu. Bu muakadi tshianza tshimpe tshia Nzambi kutudi, bakahingana ne muntu wa lungenyi, umue wa bana ba Mali, muana wa Lewi, muana wa Isalele; ne Shelebaya ne bana bandi balela ne bana babo dikumi ne muanda mukulu; ne Hashabaya ne bakadi nʼandi, Yeshaya wa bana balume ba Melali ne bana babo ne bana babo balela makumi abidi; ne Bena Netinima bakajidila Davidi ne miloho bua kuenzabo mudimu wa Bena Lewi, Bena Netinima nkama ibidi ne makumi abidi: mena a buonso buabo akadi matedibue. Hashishe nakela mukenji bua tuetu kujila bia kudia ku musulu wa Ahawa, bua tuetu kudihuekesha ku mesu kua Nzambi wetu, ne bua yeye atuleshe ne bana betu bakese ne bintu bietu nshila mululame. Bualu bua bundu buakadi bunkuata bua kulomba mukelenge masalayi ne badi benda ha tubalu bua kutusungilabo kudi bena lukuna bakadi mu nshila; bualu bua tuetu tuakadianjila kuambila mukelenge ne, Tshianza tshia Nzambi wetu tshidi kudi bonso badi bamukeba bua kubenzela bimpe; kadi bukole ne tshiji tshiandi bidi kudi bonso badi bamubenga. Nunku tuakajila bia kudia, tuakananukila kulomba Nzambi wetu bualu ebu; yeye wakatunvuila. Hashishe nakatahulula bakuidi banene dikumi ne babidi, Shelebaya ne Hashabaya ne bana babo dikumi bakadi nʼabo, nakidikisha nʼabo bujitu bua argent ne or ne malonga ne bintu bionso biakafilabo mu nsubu wa Nzambi wetu kudi mukelenge ne bena lungenyi bandi ne bantu bandi banene ne Bena Isalele bonso bakadiku. Nakidikisha bujitu bua ntalanta ya argent nkama isambombo ne makumi atanu, nakayiteka mu bianza biabo; ne malonga a argent, bujitu bua ntalanta lukama; ne or, bujitu bua ntalanta lukama; malonga a or makumi abidi, bujitu bua dariques tshinunu; ne malonga abidi a tshiamu tshia mitaku akadi a mushinga mukole bu or mene. Nakabambila ne, Nuenu nuakajidibua kudi Yehowa, ne malonga â adi majidila kabidi, ne argent ne or bidi bifidibue bu muakadi disua dia mitshima kudi Yehowa, Nzambi wa bankambua benu. Nubilame bimpe tô ne hanuidikisha bujitu buabi ku mesu kua bakuidi banene ne Bena Lewi ne bantu banene badi ku mutu kua nsubu ya bankambua babo mu Isalele ku Yelushalema mu nsubu ya munda mua nsubu wa Yehowa. Nunku bakuidi ne Bena Lewi bakangata bujitu bua argent ne or ne malonga onso bua kuya nʼabi ku Yelushalema ku nsubu wa Nzambi wetu. Hashishe tuakumuka ku musulu wa Ahawa mu dituku dia dikumi ne abidi dia ngondo wa kumudilu bua kuya ku Yelushalema; tshianza tshia Nzambi wetu tshiakadi kutudi, wakatusungila mu bianza bia bena lukuna ne kudi balaminyi bakadi mu nshila. Tuakafika ku Yelushalema, tuakashikamaku matuku asatu. Mu dituku dinai tuakidikisha bujitu bua argent ne or ne malonga onso mu nsubu wa Nzambi wetu, tuakabiteka mu tshianza tshia Melemota, muana wa Uliya muakuidi; Eleazâ, muana wa Pinehasa, wakadi nʼandi; Yozabada, muana wa Yeshua, ne Noadaya, muana wa Binui, Bena Lewi, bakadi nʼabo kabidi; tuakabala bintu bionso ne bujitu buabi; bakafunda bujitu bua bintu bionso tshikondo atshi. Bantu bakumuka mu buhika bakafila milambu ya kuosha kudi Nzambi wa Isalele, balume ba ngombe dikumi ne babidi bua Bena Isalele bonso, ne bimpanga makumi tshitema ne bisambombo ne bana ba mikoko makumi muanda mutekete ne muanda mutekete, ne mpumbu ya mbushi dikumi ne ibidi bu milambu ya kubuikila nʼai mibi yabo: bionso ebi biakadi milambu ya kuoshela Yehowa. Bakafila mikenji ya mukelenge mu bianza bia miloho ya mukelenge ne kudi ba-gouverneur bakadi dishiya dia musulu wa Pelata; bobo bakakuatshisha bantu ne mudimu wa nsubu wa Nzambi. Hakashikishabo malu â, bantu banene bakalua kundi, bamba ne, Bena Isalele ne bakuidi ne Bena Lewi kabena baditahulula kudi bena buloba ebu, badi benza malu a bundu a Bena Kanâna ne a Bena Hiti ne a Bena Pelese ne a Bena Yebuse ne a Bena Amona ne a Bena Moaba ne a Bena Ejipitu ne a Bena Amole. Bualu bua bobo ne bana babo balume bakadiangatshila bana bakashi ba bantu aba bu bakashi babo; nunku bantu ba tshijila bakabuelakana ne bena maloba â; bulelela, bantu banene ne bakokeshi bakadianjila kuenza bubi ebu. Hanakunvua bualu ebu, nakadihanda bilulu bianyi ne tshikowelu tshianyi, nakadila nsuki yanyi ne muedi wanyi; akashikama hanshi ntua mikemu. Hashishe bakadisangisha kundi, muntu ne muntu, bakadi bazakala bua mei a Nzambi wa Isalele bualu bua bubi bua bantu aba bakumuka mu buhika; nakashikama hanshi ntua mikemu tô ne ku diba dia kufila mulambu wa ku dilolo. Hakafika diba dia kufila mulambu wa ku dilolo, nakajuka mu kudihuekesha kuanyi ne bilulu bianyi ne tshikowelu tshianyi bihandika; nakatua binu bianyi hanshi, nakolola bianza bianyi kudi Yehowa, Nzambi wanyi; nakamba ne, O Nzambi wanyi, bundu budi bunkuata bikole bua meme kuhandisha mesu anyi kûdi, Nzambi wanyi; bualu bua malu mabi etu akavulangana ha mitu hetu, ne kuhila kuetu kuakamana kufika mu diulu. Ku matuku a bankambua betu tô ne ku lelu tuakutamba kuhila; bua malu mabi etu, tuetu ne bakelenge betu ne bakuidi betu tuakafidibua mu bianza bia bakelenge ba maloba makuabo ku muele wa nvita, ku buhika ne ku kuhaula kua bintu bietu ne ku kufuishibua kua bundu ku mesu, bu mudibiku lelu eu, Katataka mu tshituha tshikese Yehowa, Nzambi wetu, wakutulesha luse luandi bua kutushila difuka dikese dia bantu ne bua kutuha mutshi wa tshikuminu mu muaba wandi wa tshijila, bua Nzambi wetu atabashe mesu etu, bua kutusangasha mu buhika buetu. Bualu bua tudi bahika; kadi Nzambi kakutulekela mu buhika buetu, wakutuvuisha ne luse ku mesu kua bakelenge ba Pelasa bua kutusangashabo ne bua kutuashilabo nsubu wa Nzambi wetu, ne bua kulongololabo miaba idi mihaula ne bua kutahabo lumbu mu Yuda ne mu Yelushalema. Ku nyima kua malu â onso, Nzambi wetu, netuambe tshinyi? Bualu bua tuetu tuakubenga mikenji yebe iwakuelela bantu bebe baprofete ne, Buloba bunudi nuya bua kuhiana budi bunyanguka bua malu mabi a bena buloba ne malu abo a bundu; bakûsha buloba abu tente ne dinyanguka diabo ku mukala umue tô ne kunfudilu kuabu. Nunku kanufidi bana benu bakashi kudi bana babo balume; kanuangatshidi bana benu balume bana babo bakashi; kanukebi ditalala diabo anyi diakalengele diabo tô ne tshiendelele; bua nuenu nuikale ne bukole, bua nuenu nudie bintu bimpe bia mu buloba abu, ne bua nuenu nubushile bana benu bu buhianyi buabo bua tshiendelele. Ku nyima kua makenga onso atuakakenga bua malu mabi etu ne kuhila kuetu kunene, bualu bua wewe Nzambi wetu kuakatamba kutukengesha bu muakadi mibi yetu, ne wakutushila difuka edi dia bantu, netushihe mikenji yebe kabidi bua kubuelakana ne bantu aba mu malu abo a bundu munyi? Bituenza nunku wewe kuena wikala nʼetu tshiji tô ne hawatubutula buonso buetu, nunku difuka dikese dia bantu kadiena mua kushala anyi kuhanduka, anyi? Yehowa, Nzambi wa Isalele, wewe udi muakane; bualu bua wewe wakatahila difuka dihanduka bu mudidi lelu eu; mona, tudi ku mesu kuebe mu kuhila kuetu; kakuena udi mumanye mua kuimana ku mpala kuebe bua bualu ebu. Hakadi Ezela utendelela, utondela bantu mibi, udila, udikuma hanshi ku mpala kua nsubu wa Nzambi, tshisumbu tshinene tshia Bena Isalele, ne balume ne bakashi ne bana, tshiakadisangisha kudiye; bantu bakadila bikole. Shekanya, muana wa Yehiele, umue wa bana balume ba Elama, wakambila Ezela ne, Tuakenzela Nzambi wetu bibi, bualu bua tuakabaka bakashi ba bende ba mu buloba ebu, kadi katataka ditekemena didi kudi Bena Isalele mu bualu ebu. Tuhunge tshihungidi ne Nzambi wetu bua tuetu tûmushe bakashi aba bonso ne bana bakalelabo, bu mudi lungenyi lua mukelenge wanyi ne lua aba bonso badi bazakala ku mukenji wa Nzambi wetu; tuenze bualu ebu bu mukenji. Juka biebe, bualu ebu budi kûdi, tuetu tudi nʼebe; wikale ne mutshima mukole, ubuenze. Hashishe Ezela wakajuka, wakatshihisha bantu banene ba bakuidi ne Bena Lewi ne Bena Isalele bonso ne, Tuetu netuenze bu mu dî edi. Bakaditshiha nunku. Ezela wakajuka ku mpala kua nsubu wa Nzambi, wakabuela mu nsubu wa Yehohanana, muana wa Eleyashiba; hakabueleyemu, kakadia, kakanua, bualu bua yeye wakajinga bua bualu bubi buakenza bantu bakumuka mu buhika. Bakelela bantu bonso bakumuka mu buhika mu nseke yonso ya Yuda ne Yelushalema mukenji bua kudisangishabo ku Yelushalema; ne yonso wahidia kulua mu matuku â asatu bu mudi mukenji wa bantu banene ne bakulu, nebamunyenge bintu biandi bionso, nebamutahulule munkatshi mua bantu bakumuka mu buhika. Hashishe Bena Yuda bonso ne Bena Benyamina bonso bakadisangisha mu Yelushalema mu matuku a asatu; bakadisangisha nunku mu dituku dia makumi abidi dia ngondo wa tshitema; bantu bonso bakashikama mu muaba munene wakadi ku mpala kua nsubu wa Nzambi, bazakale bua bualu ebu ne bua nvula munene. Ezela muakuidi wakajuka, wakabambila ne, Nuakuenza bibi, hanuakabaka bakashi ba bende, nunku nuakakumbasha kuhila kua Bena Isalele. Nunku nutonde mibi yenu kudi Yehowa, Nzambi wa bankambua benu, nuenze bu mudi disua diandi; nuditahulule kudi bena buloba ne kudi bakashi ba bende. Hashishe bantu bonso bakela dî dikole ne, Butudi nʼabu mbua kuenza malu onso awakutuambila. Kadi bantu badi ba bungi ne etshi ntshikondo tshia nvula ya bungi, katuena bamanye mua kuimana ha bula; kemmudimu wa dituku dimue anyi wa matuku abidi; bualu bua tuakatamba kuenza bibi mu bualu ebu. Nunku batusunguile bantu banene ba munkatshi mua tshisumbu tshietu, hashishe bonso aba bakabaka bakashi ba bende baye kudibo mu misoko yabo mu bikondo bidibo basungule; bakulu ne balumbuluishi ba musoko ne musoko baye nʼabo, tô ne hashikishabo bualu ebu bua kukudimuna tshiji tshikole tshia Nzambi wetu kutudi. Anu Yonatana, muana wa Asahele, ne Yahezeya, muana wa Tikewa, bakabanga bualu ebu; Meshulama ne Shabetai, Muena Lewi, bakabakuatshisha. Bantu bakumuka mu buhika bakenza nunku; bakasungula Ezela muakuidi ne bakuabo bakadi ku mutu kua biota bia batatu babo ne buonso buabo ku mena abo bakadi batahuluke, bakashikama mu dituku dia kumudilu dia ngondo wa dikumi bua kulongolola bualu ebu. Hakafika dituku dia kumudilu dia ngondo wa kumudilu, bakashikisha malu a balume bonso bakadi babake bakashi ba bende. Munkatshi mua bana ba bakuidi bakadi babake bakashi ba bende bakasangana bantu nunku: ba bana ba Yeshua, muana wa Yozadaka, ne bana babo Mâseya ne Eliezê ne Yaliba ne Gedaliya. Bakabisha bianza biabo bua kuditshiha ne, Tuetu netûmushe bakashi betu; bakafila tshimpanga tshia mu bisumbu biabo bua dihila diabo. Ba bana ba Imê: Hanani ne Zebedaya. Ba bana ba Halima: Mâseya ne Eliya ne Shemaya ne Yehiele ne Uziya. Ba bana ba Pashû: Eleyehoenai ne Mâseya ne Yishemaele ne Netanele ne Yozabada ne Elasa. Ba Bena Lewi bakadi Yozabada ne Shimeyi ne Kelaya (udi Kelita kabidi) ne Petahiya ne Yuda ne Eliezê. Ba mu bimbi ba misambu: Eleyashiba. Ba batuadi ba bintu: Shaluma ne Teleme ne Uli. Ba Bena Isalele: ba bana ba Palosha: Lamaya ne Yiziya ne Malakiya ne Miyamina ne Eleazâ ne Malakiya mukuabo ne Benaya; ba bana ba Elama: Matanaya ne Zekâya ne Yehiele ne Abedi ne Yelemota ne Eliya; ba bana ba Zatu: Eleyehoenai ne Eleyashiba ne Matanaya ne Yelemota ne Zabada ne Aziza; ba bana ba Bebai; Yehohanana ne Hananya ne Zabai ne Atalai; ba bana ba Bani: Meshulama ne Maluki ne Adaya ne Yashuba ne Sheala ne Yelemota; ba bana ba Pahata-moaba: Adena ne Zelala ne Benaya ne Mâseya ne Matanaya ne Besalele ne Binui ne Manashe; ba bana ba Halima: Eliezê ne Yishiya ne Malakiya ne Shemaya ne Shimeona, Benyamina ne Maluki ne Shemaliya; ba bana ba Hashuma: Matenai ne Matata ne Zabada ne Elifelete ne Yelemai ne Manashe ne Shimei; ba bana ba Bani: Mâdai ne Amalama ne Wele, ne Benaya ne Bediya ne Keluhu, Wanya ne Melemota ne Eleyashiba, Matanaya ne Matenai ne Yâsu, ne Bani ne Binui ne Shimei, ne Shelemeya ne Natana ne Adaya, Makenadebai ne Shashai ne Shalai, ne Azalele ne Shelemeya ne Shemaliya, ne Shaluma ne Amalia ne Yosefe; ba bana ba Nebo: Yiele ne Matitiya ne Zabada ne Zebina ne Yido ne Yoele ne Benaya. Aba bonso mbakadi babake bakashi ba bende; bakashi bakuabo bakabalelela bana. Mei a Nehemiya, muana wa Hakaleya. Mu ngondo wa Kiseleu mu tshidimu tshia makumi abidi hanakadi mu Shushana, nsubu wa mukelenge, Hanani, umue wa bana betu, wakalua kundi ne bakuabo bakadi bafume nʼandi mu Yuda; nakabakonka bualu bua Bena Yuda bakadi bashale bakumuka mu buhika ne bua Yelushalema kabidi. Bakangambila ne, Bantu bakumuka mu buhika mu buloba bukuabo badi bashalaku badi mu dikenga dikole, badi bafuishibua bundu; lumbu lua Yelushalema kabidi tutshidi hanshi, ne bibi bialu bidi bioshibua ne kahia. Hanakunvua mei â, nakashikama hanshi, nakadila, nakajinga matuku makuabo; nakajila bia kudia, nakatendelela ku mpala kua Nzambi wa mu diulu, nakamba ne, Ndi nkusengelela, Yehowa, Nzambi wa mu diulu, Nzambi munene ne wa ditshina, utu walama tshihungidi tshiandi ne luse luandi kudi badi bamunanga ne badi batumikila mikenji yandi, teleja matshu ebe, ubulule mesu ebe bua wewe unvue kulomba kua muntu webe kudiye ukulomba munya ne butuku bualu bua Bena Isalele bantu bebe, hantshidi ntonda mibi ya Bena Isalele yakukuenzelabo. Bulelela, meme ne ba mu nsubu wa tatu wanyi tuakuenza bibi; tuakukuenzela malu a bundu, katuakutumikila mikenji ne mei mafunda ne mei majadika biwakambila muntu webe Mose. Ndi nkusengelela ne, Uvuluke dî diebe diwakambila muntu webe Mose ne, Binuenza malu mabi, nennumuangalashe munkatshi mua ba ha buloba; kadi binuakudimuna mitshima yenu kundi, binuatumikila mikenji yanyi bua kuyenza, binuikala bamuangalashibue kunfudilu kua diulu, nennusangisheku, nennuhingashe ku muaba unakusungula bua kujadikaku dina dianyi. Aba mbena mudimu bebe ne bantu bebe bawakahikula ku bukole buebe bunene ne ku tshianza tshiebe tshikole. Mukelenge, ndi nkusengelela ne, Teleja matshu ebe ku kulomba kua muntu webe ne ku kulomba kua bantu bebe badi ne disanka bua kutshina dina diebe; ndi nkusengelela ne, Uhe muntu webe diakalengele lelu, umufile luse ku mesu kua muntu eu. (Bualu bua meme nakadi mutuadi wa luhanza lua mukelenge). Mu ngondo wa Nisana mu tshidimu tshia makumi abidi tshia bukokeshi bua mukelenge Atashasete hakadibo balua ne nyinyo ku mesu kuandi, meme nakangata nvinyo, nakamuha mukelenge. Diambedi tshiakadi mbungama ku mesu kuandi. Hashishe mukelenge wakangebesha ne, Udi ubungamina tshinyi, bualu bua tshiena nkumona ne udi usama? Ebu kambualu bukuabo anu kunyingalala kua mutshima. Hashishe nakatamba kutshina bikole. Nakambila mukelenge ne, Mukelenge ikale biandi ne muoyo tshiendelele; meme tshiena mua kubungama munyi, bualu bua musoko udi nkita ya bankambua banyi udi muhaula ne bibi biau bidi bioshibua ne kahia? Hashishe mukelenge wakangebesha ne, Udi ulomba tshinyi? Nunku nakatendelela Nzambi wa mu diulu. Nakambila mukelenge ne, Bikala bualu ebu buimpe ku mesu kuebe ne biasangana muntu webe luse ku mesu kuebe, anji kuitabusha bua kuntuma meme ku buloba bua Yuda, ku musoko udi nkita ya bankambua banyi bua meme kuwibaka. Mukelenge wakangebesha (mukelenge mukashi wakadi ushikama nʼandi) ne, Wewe udi ulomba luendu lua matuku bungi munyi? Neuhingane tshikondo kai? Nunku mukelenge wakitabusha bua kuntuma; nakamulaya tshikondo. Nakambila mukelenge kabidi ne, Bitabusha mukelenge, bampe mikanda kudi ba-gouverneur badi dishiya dia musulu wa Pelata, bua bobo bitabushe bua meme kuhitshila mu maloba abo tô ne hanafika ku buloba bua Yuda, ne mukanda mukuabo kudi Asafa, mulami wa metu a mukelenge, bua yeye ampe mabaya a kuenza nʼau mikamba ya bibi bia nsubu wa mukelenge udi hehi ne nsubu wa Nzambi, ne a lumbu lua musoko, ne a nsubu undi mua kulalamu. Mukelenge wakitabusha malu au onso bualu bua tshianza tshimpe tshia Nzambi wanyi tshiakadi kundi. Hashishe nakalua kudi ba-gouverneur bakadi dishiya dia musulu wa Pelata, nakabaha mikanda ya mukelenge. Mukelenge wakantuma ne tupitene tua masalayi ne badi benda ha tubalu. Hakabunvua Sanebalata, Muena Holona, ne Tobiya, Muena Amona, muena mudimu wandi, ne, Muntu wakalua bua kukuatshisheye Bena Isalele, mitshima yabo yakanyingalala. Nakafika ku Yelushalema, nakashikamamu matuku asatu. Nakabika butuku, meme ne bantu bakuabo bakese bakadi nʼanyi; tshiakambila muntu mukuabo malu akateka Nzambi wanyi mu mutshima wanyi bua kuenza ku Yelushalema; kakuakadi nyama mukuabo nʼanyi anu nyama unakadi mubande ha nyima handi. Nakaluhuka butuku ku tshibi tshia ku luseke lua tshibanda, ku dina dia mai a mibuabua ku luseke lua diala, nakatangila lumbu lua Yelushalema luakadi lushimbuka hanshi ne bibi bialu biakadi bioshibua ne kahia. Hashishe nakaya ku tshibi tshia ku luseke lua mpokolo wa mai ne tshiowelu tshia mukelenge; kadi kakuakadi muaba wa nyama unakadi mubande ha nyima handi kuhitshilaku. Hashishe nakaya butuku ku kasulu ka mai, nakatangila lumbu; nakalukila, nakabuelela ku tshibi tshia mu tshibanda; nunku nakahingana. Bantu bakadi ku mutu kua musoko kabakamanya kunakaya anyi malu anakenza; tshiakanza kuambila Bena Yuda anyi bakuidi anyi bantu banene anyi bakadi ku mutu kua musoko anyi benji ba mudimu. Hashishe nakabambila ne, Nudi batangile dikenga ditudi nʼadi ne bu mudi Yelushalema muhaula, ne bu mudi bibi biau bioshibue ne kahia; luai, tuibake kabidi lumbu lua Yelushalema, bua katuikadi ne bundu kabidi. Nakabambila bua tshianza tshia Nzambi wanyi tshiakadi tshimpe kundi, ne bua mei a mukelenge akangambileye. Bobo bakamba ne, Tubikai, tuasai. Nunku bakakolesha maboko abo bua mudimu eu muimpe. Kadi hakabunvua Sanebalata, Muena Holona, ne Tobiya, Muena Amona, muena mudimu wandi, ne Gesheme, Muena Alabâ, bakatuseka, bakalengulula, bakatukonka ne, Bualu ebu bunudi nuenza budi tshinyi? Nudi basue kutombokela mukelenge, anyi? Hashishe nakitaba kudibo, nakabambila ne, Nzambi wa mu diulu neakuatshishangane nʼetu; nunku tuetu bantu bandi netubike, netuase lumbu elu; kadi nuenu kanuena ne buhianyi, nansha tshituha, nansha tshivulukidi mu Yelushalema. Hashishe Eleyashiba muakuidi munene wakabika ne hana babo bakuidi, bakibaka lumbu lua ku luseke lua tshibi tshia mikoko; bakalujidila, bakateka bibi bialu, bakalujidila tô ne ku tshibumba tshia Hamea ne ku tshibumba tshia Hananele. Ku luseke luandi lukuabo bakadi bibaka kudi Bena Yeleko. Ne ku luseke luandi bakadi bibaka kudi Zakû, muana wa Imele. Bana ba Hasena bakasa luseke lua ku tshibi tshia minyinyi ya mu mai; bakajadika makunshi, bakateka bibi bialu ne milonda yabi ne biamu biabi. Ku luseke luabo lukuabo bakasa kudi Melemota, muana wa Uliya, muana wa Hakosa. Ku luseke luabo lukuabo bakasa kudi Meshulama, muana wa Belekiya, muana wa Meshezabela. Ku luseke luabo lukuabo bakasa kudi Sadoka, muana wa Bâna. Ku luseke luabo lukuabo bakasa kudi Bena Tekoa; kadi bantu babo banene kabakalenga bianza biabo ku mudimu wa Mukelenge wabo. Yehoyada, muana wa Pasea, ne Meshulama, muana wa Besodaya, bakasa ku luseke lua mushiku wa mbelu mukulukulu, bakajadika mikamba, bakateka bibi ne milonda ne biamu biabi. Ku luseke luabo lukuabo bakasa kudi Melataya, Muena Gibeona, ne Yadona, Muena Melonita, ne Bena Gibeona bakuabo ne Bena Misepa ba ku luseke lua gouverneur wa dishiya dia musulu wa Pelata. Ku luseke luabo lukuabo bakasa kudi Uziele, muana wa Hâhaya, batudi ba biamu bia or. Ku luseke luandi lukuabo bakasa kudi Hananya, umue wa benji ba manananshi. Bakakolesha lumbu lua Yelushalema tô ne ku lumbu lua muhimbu munene. Ku luseke luabo lukuabo bakasa kudi Lefaya, muana wa Hû, mukokeshi wa tshituha tshia luseke lua Yelushalema. Ku luseke luabo lukuabo bakasa kudi Yedaya, muana wa Halumafa, ku luseke lua nsubu wandi mene. Ku luseke luandi lukuabo bakasa kudi Hatusha, muana wa Hashabaneya. Malakiya, muana wa Halima, ne Hashuba, muana wa Pahata-moaba, bakasa tshituha tshikuabo ne tshibumba tshia bikulu. Ku luseke luandi lukuabo bakalongolola kudi Shaluma, muana wa Halohesha, mukokeshi wa tshituha tshia luseke lua Yelushalema, yeye ne bana bandi ba bakashi. Hanuna ne Bena Zanoa bakalongolola mushiku wa mbelu mutangile tshibanda, bakawasa, bakateka bibi biau ne milonda ne biamu biau; bakasa mutantshi wa coudées tshinunu wa lumbu tô ne ku tshibi tshia ku luseke lua diala. Malakiya, muana wa Lekaba, mukokeshi wa luseke lua Bete-hakeleme, wakalongolola mushiku wa mbelu wa ku luseke lua ku diala; wakawasa, wakateka bibi ne milonda ne biamu biau. Mushiku wa mbelu wa ku mpokolo wa mai bakalongolola kudi Shaluma, muana wa Kole-hosa, mukokeshi wa luseke lua Misepa; wakawasa, wakaubulula, wakateka bibi ne milonda ne biamu; wakalongolola lumbu lua ku dina dia mai a Shela hehi ne tshibunda tshia mukelenge tô ne ku tshibandilu tshidi tshihueka ku musoko wa Davidi. Ku nyima kuandi Nehemiya, muana wa Azabuka, mukokeshi wa luseke lua Bete-sû, wakalongolola tô ne ku muaba wa nkita ya Davidi ne ku dina dia mai diakumbulabo ne ku nsubu wa bena bukitu. Ku nyima kuandi Bena Lewi bakalongolola: Lehuma, muana wa Bani, wakalongolola. Ku luseke luandi lukuabo bakalongolola kudi Hashabiya, mukokeshi wa tshituha tshia luseke lua Kila, bua luseke luandi. Ku nyima kuandi bakalongolola kudi bana babo, Bawai, muana wa Henedada, mukokeshi wa tshituha tshia luseke lua Kila. Ku luseke luandi lukuabo Ezê, muana wa Yeshua, mukokeshi wa Misepa, wakalongolola tshituha tshikuabo, buludiludi ne nsubu wa bintu bia nvita ku ditumba dia lumbu. Ku nyima kuandi Baluka, muana wa Zabai, wakananukila kulongolola tshituha tshikuabo ku ditumba dia lumbu tô ne ku tshibi tshia nsubu wa Eleyashiba muakuidi munene. Ku nyima kuandi Melemota, muana wa Uliya, muana wa Hakosa, wakalongolola tshituha tshikuabo ku tshibi tshia ku nsubu wa Eleyashiba tô ne ku ndekelu wa nsubu wandi. Ku nyima kuandi bakuidi, bantu ba ku Mpata, bakalongolola. Ku nyima kuabo Benyamina ne Hashuba bakalongolola buludiludi ne nsubu wabo. Ku nyima kuabo Azaya, muana wa Mâseya, muana wa Ananiya, wakalongolola ku luseke lua nsubu wandi. Ku nyima kuandi Binui, muana wa Henedada, wakalongolola tshituha tshikuabo, ku nsubu wa Azaya tô ne ku ditumba dia lumbu tô ne ku tshibumba. Palala, muana wa Uzai, wakalongolola buludiludi ne ditumba dia lumbu tô ne ku tshibumba tshiakadi tshiasa hehi ne nsubu wa mukelenge wakadi ku mukuna, tshidi ku luseke lua luhangu lua balami ba ku bibi. Ku nyima kuandi Pedaya, muana wa Palosha, wakalongolola. Bena Netinima hakadi bashikama mu Ofele ku muaba wa buludiludi ne mushiku wa mbelu wa ku mai ku luseke lua esete ne ku tshibumba tshiakadi tshisompoka. Ku nyima kuandi Bena Tekoa bakalongolola tshituha tshikuabo buludiludi ne tshibumba tshinene tô ne ku lumbu lua Ofele. Ku mutu kua mushiku wa mbelu wa tubalu bakuidi bakalongolola, mu ntu ne muntu buludiludi ne nsubu wandi. Ku nyima kuabo Sadoka, muana wa Imê, wakalongolola buludiludi ne nsubu wandi. Ku nyima kuandi Shemaya, muana wa Shekanya, mulami wa ku mushiku wa mbelu wa ku esete, wakalongolola. Ku nyima kuandi Hananya, muana wa Shelemeya, ne Hanuna, muana muisambombo wa Salafa, bakalongolola tshituha tshikuabo. Ku nyima kuabo Meshulama, muana wa Belekiya, wakalongolola buludiludi ne nsubu wandi. Ku nyima kuandi Malakiya, umue wa batudi ba biamu bia or, wakalongolola ku nsubu wa Kena Netinima ne wa bangendʼa mushinga, buludiludi ne mushiku wa mbelu wa Hamifekada tô ne ku luseke ludi lubanda ku tshibumba. Hankatshi ha luseke ludi lubanda ku tshibumba ne mushiku wa mbelu wa mikoko batudi ba biamu bia or ne bangendʼa mushinga bakalongolola. Hakunvua Sanebalata ne, Badi basa lumbu, wakadi ne tshiji tshikole, Wakafika munda, wakaseka Bena Yuda. Yeye wakamba ku mpala kua bana babo ne kua masalayi a Bena Samalea, wakabebesha ne, Bena Yuda aba batekete badi benza tshinyi? Nebadiashile lumbu anyi? Nebafile milambu ya kuosha, anyi? Nebamane bualu ebu dituku dimue, anyi? Nebasangashe mabue adi bu mishiki mu diala akamanabo kuosha, anyi? Tobiya, Muena Amona, wakadi hehi nʼandi, wakamba ne, Babanda mubuabua ha mutu ha lumbu lua mabue ludibo basa udi mua kulushimbula. O Nzambi wetu, unvua bu mudibo batulengulula, ukudimune bihendu biabo ha mutu habo, ubafile mu buloba bua bahika bu bintu biakahaulabo; kubabuikididi mibi yabo, kumushi malu mabi abo ku mesu kuebe nansha; bualu bua bobo bakakufuisha tshiji ku mesu kua bibaki ba lumbu. Nunku tuakasa lumbu; lumbu luonso luakatuangana tô ne ku tshituha tshia bule bualu, bualu bua bantu bakadi ne mitshima ya kuenza mudimu. Kadi hakunvua Sanebalata ne Tobiya ne Bena Alabâ ne Bena Amona ne Bena Ashedodo ne, Badi bananukila kuasa ngumbu ya Yelushalema ne badi bamba kukanda miaba yakadi mishimbuka, bakadi ne tshiji tshikole; hashishe buonso buabo bakatuelela tshifufu bua kuluanganabo ne Bena Yelushalema ne bua kutompakasha malu etu. Kadi tuetu tuakatendelela Nzambi wetu tuakasungula batentekedi bua kutentekelabo munya ne butuku. Bena Yuda bakamba ne, Bukole bua batuadi ba majitu buakukehela, bilu bia bungi bidi bishala, katuena bamanye mua kuasa lumbu. Bakadi nʼetu lukuna bakamba ne, Kabena bamanye bualu, kabena batutangila tô ne hatuamueneka munkatshi muabo bua kubashiha ne bua kubalekesha mudimu. Hashishe, hakalua Bena Yuda kutudi bakadi bashikama ha buihi nʼabo, bakatuambila misangu dikumi ku nseke yonso ne, Bunudi nʼabu mbua kuhingana kutudi. Nunku nakateka bantu ku meku abo kuinshi kua lumbu mu muaba munene ne miele ya nvita ne mafuma ne mata mu bianza biabo. Nakatangila ne nakajuka, nakambila bantu banene ne bakokeshi ne bantu bakuabo ne, Kanubatshinyi, nuvuluke Mukelenge wenu munene, mukole, nuluangane bikole bualu bua bana benu ne bana benu ba balume ne bana benu ba bakashi baledibue ne bua bakashi benu ne nsubu yenu. Hakunvua bena lukuna betu ne, Badi bamanye malu etu, ne Nzambi wabo wakukudimuna tshifufu tshietu, tshiakalua tshianana, tuakahingana buonso buetu ku lumbu, muntu ne muntu ku mudimu wandi. Ku tshikondo atshi tshituha tshia bantu banyi bakenza mudimu ne tshituha tshikuabo tshiakakuata mafuma ne ngabu ne mata ne bikowelu bia nvita; bakokeshi bakashala ku nyima kua tshisamba tshionso tshia Bena Yuda. Bibaki ba lumbu ne batuadi ba bintu bakadiangatshila bintu bia nvita; muntu ne muntu wakenza mudimu ne tshianza tshimue, wakakuata bintu bia nvita mu tshianza tshikuabo; bibaki ba lumbu muntu ne muntu wakadi ne muele wandi wa nvita mubuesha mu mukaba; bakenza mudimu nunku. Muedi wa mpungi wakadi ha buihi nʼanyi. Nakambila bantu banene ne bakokeshi ne bantu bakuabo ne, Mudimu udi mukole ne munene, ne tuetu tudi bahanduluke ba mutu ha lumbu bashilangane umue kudi mukuabo; nunku mu miaba yonso mudi nunyua muadi wa mpungi, nudisangisheku kutudi; Nzambi wetu neatuluile nvita. Tuakenza mudimu nunku: tshituha tshia bantu tshiakakuata mafuma ku dinda tô ne ku butuku hakamueneka mitoto. Ku musangu umue eu nakambila bantu ne, Muntu ne muntu ashikame ne muena mudimu wandi mu Yelushalema bua bobo bamanye mua kutulama butuku ne bua kukuata mudimu mu munya. Nunku meme ne bana betu ne bena mudimu banyi ne bena nvita bakadi bandonda katuakavula bilulu bietu; muntu yonso wakaya ne bintu biandi bia nvita ku mai. Bantu bakuabo ne bakashi babo bakadi ne muadi munene, bakafunda bana babo, Bena Yuda. Bualu bua bakuabo bakamba ne, Tuetu ne bana betu balume ne bana betu bakashi tudi ba bungi; tuangate blé bua tuetu kudia, tuikale ne muoyo. Bakuabo bakamba ne, Tudi tueyeka madimi etu ne madimi a tumuma ne nsubu yetu, bua tusumbe blé bualu bua tshiole tshidiku. Bakuabo bakamba ne, Tuetu tuakasomba argent bua kulambula mukelenge, tuakeyeka madimi etu ne madimi a tumuma. Kadi musunyi wetu udi bu musunyi wa bana betu ne bana betu baledibue badi bu bana babo; tuetu tudi tubuesha bana betu balume ne bana betu bakashi mu huhika, ne bana betu bakashi bakuabo bakamana kuya mu buhika; katuena ne bukole bua kubakuatshisha, bualu bua bantu bakuabo bakamana kuangata madimi etu ne madimi a tumuma. Hanakunvua muadi wabo ne mei â, nakadi ne tshiji tshikole. Nakadielela meji munda muanyi, nakatandangana ne bantu banene ne bakokeshi, nakabambila ne, Muntu ne muntu udi ulomba tshia kasombela kudi muanʼabo. Nakashikika tshisumbu tshinene tshia bantu ku mpala kuabo. Nakabambila ne, Tuetu bua bukole butuakadi nʼabu tuakuhikula bana betu Bena Yuda bakadi bahanyibue mu buhika kudi bisamba bia bantu; nuenu nudi basue kuhana bana benu, anyi? Nudi basue tuetu kubasunga, anyi? Hashishe bobo bakahuwa, kabakadi ne dî dia kungandamuna. Nakamba kabidi ne Bualu ebu bunudi nuenza kabuena buimpe; kanuena ne buabi bua kuenda mu ditshina dia Nzambi wetu bualu bua bihendu bia bisamba bia bantu, bena lukuna betu, anyi? Muomumue meme ne bana betu ne bena mudimu banyi tuakadi mua kubasombesha argent ne blé bua kuheta tshia kasombela. Ndi nnusengelela ne, Tulekelai tshia kasombela aka. Ndi nnusengelela ne, Nuhingishe madimi abo ne madimi a tumuma ne madimi a olive ne nsubu yabo ne tshia lukama lua argent ne blé ne nyinyo ne manyi binuakangata kudibo, anu lelu eu. Hashishe bobo bakamba ne, Netubahingishilebi, katuena tubalomba kasombela; netuenze bu muwakuamba. Hashishe nakabikila bakuidi, nakabatshihisha bua bobo benze bu muakadi mulayi eu. Nunku nakatutula bilulu bianyi, nakamba ne, Nzambi neatutushe muntu yonso ku nsubu wandi ne ku mudimu wandi nunku biahangeye kumana mulayi eu; nebamumushe nunku, yeye neikale hatuhu. Bantu bonso bakamba ne, Amen; bakatumbisha Yehowa. Bantu bakenza bu muakadi mulayi eu. Ku tshikondo tshiakansungulabo gouverneur wabo mu buloba bua Yuda, ku tshidimu tshia makumi abidi tshia bukelenge bua mukelenge Atashasete tô ne ku tshidimu tshia makumi asatu ne bibidi, bu bidimu dikumi ne bibidi, meme ne bana betu katuakanza kudia bidia bia gouverneur. Kadi ba-gouverneur bakadi ku mpala kuanyi bakangata difutu diabo kudi bantu; bakadiangatshila bidia ne nvinyo kudibo ha mutu ha nshekele ya argent makumi anai; bena mudimu babo mene bakakokesha bantu, kadi meme tshiakenza nunku bualu bua dishina dia Nzambi. Meme mene mene nakananukila kulamata mudimu wa lumbu elu, katuakadisumbila madimi; bena mudimu banyi bonso bakadisangishaku bua kuenzabo mudimu. Bena Yuda ne bakokeshi bakuabo lukama ne makumi atanu bakadia ku mesa anyi ha mutu ha bakalua kutudi kudi ba munkatshi mua bisamba bia bantu biakadi bitunyunguluke. Bintu bituakadia bia dituku dimue biakadi ngombe umue ne mikoko ya manyi isambombo; bakandambila nsolo; tuakanua nvinyo yonso musangu umue bu wa matuku dikumi; kadi mu malu â onso tshiakalomba bia kudia bia gouverneur bualu bua mudimu wakadi bujitu kudi bantu aba. Nzambi wanyi, unvuluke bua kungenzela bimpe bua malu onso anakuenzela bantu aba. Hakambilabo Sanebalata ne Tobiya ne Gesheme, Muena Alabâ, ne bena lukuna betu bakuabo ne, Yeye wakumana lumbu, ne kakuena muaba mushimbuke mushaleku (kadi ku tshikondo atshi tshiakanza kuela bibi bionso ku lumbu), Sanebalata ne Gesheme bakantumina dî ne, Lua, tusangakene nʼebe mu umue wa misoko ya mu mpata wa Ono. Kadi bakadi belangana meji bua kungenzela bibi. Nakabatumina ba-messager ne, Meme ndi ngenza mudimu munene, nunku tshiena mua kulua; bundi nʼabu mbua kuhumbisha mudimu hanumuka bianyi bua kulua kunudi bua tshinyi? Bobo bakantumina dî adi misangu inai, kadi meme nakabakudimuna anu dî diodimue. Hashishe Sanebalata wakatuma muntu wandi kundi musangu muitanu ne mukanda mubulula mu tshianza tshiandi, ne mei mafunda nunku ne, Lumu luakatangadika munkatshi mua bisamba bionso bia bantu ne, Gesheme udi wamba bualu ebu ne, Wewe ne Bena Yuda nudi nuelangana meji bua kutomboka; bua bualu ebu wewe udi wibaka lumbu elu; wewe udi musue kuikala mukelenge wabo bu mudi mei â. Wewe kabidi wakamana kudisunguila baprofete hua kukuakuilabo mu Yelushalema, bamba ne, Mukelenge udi mu Yuda; katataka nebaye kuambila mukelenge mei â. Lua, tusangishe lungenyi. Hashishe nakamutumina dî ne, Kabena benza malu bu mudi wamba, kadi wewe wakâfuanyikisha mu mutshima webe nkayebe. Bualu bua bobo bonso bakasua kututshinyisha, bamba ne, Netutekeshe maboko abo mu mudimu, kabawenji nansha. Kadi, Nzambi wanyi, ukoleshe maboko anyi. Nakaya ku nsubu wa Shemaya, muana wa Delaya, muana wa Mehetabela, wakadi mudinshidile mu nsubu; yeye wakamba ne, Tusangakene nʼebe mu nsubu wa Nzambi, mu ntempelo mene, tuinshile bibi, bualu bua nebalue kukushiha; bulelela, nebalue butuku ebu bua kukushiha. Nakamba ne, Muntu bu meme udi ne bua kunyema bua tshinyi? Nganyi udi bu meme neanyemene mu ntempelo bua kusungila muoyo wandi? Tshiena nyamu nansha. Nakujingulula bualu ebu ne, Nzambi kakamutuma, kadi yeye nkayandi wakadiambila bualu ebu kuadi bualu bua Tobiya ne Sanebalata bakamuha mbueshilu. Bakamuha mbueshilu bua kuntshinyisha bua meme kuenza bualu ebu bubi bua bobo bikale ne lumu elu lubi lua kunfuisha nʼalu bundu. Nzambi wanyi, uvuluke Tobiya ne Sanebalata bu mudi bienzedi biabo; uvuluke Noadaya muprofete mukashi ne baprofete bakuabo badi bakeba kuntshinyisha. Nunku lumbu luakashika mu matuku makumi abidi ne atanu a ngondo wa Elula, tuakashikisha mudimu mu matuku makumi atanu ne abidi. Hakunvua bena lukuna betu bonso lumu elu, bisamba bionso bia bantu biakatunyunguluka biakatshina, biakadi ne bundu bunene ku mesu; bualu bua bobo bakajingulula ne, Nzambi wabo nguakenzesha mudimu eu. Mu matuku au bantu banene ba mu Yuda bakatumina Tobiya mikanda ya bungi, ne yeye kabidi wakabatumina mikanda. Bualu bua bantu ba bungi ba mu Yuda bakaditshiha kudiye bualu bua yeye wakadi muku wa Shekanya, muana wa Ala; Yehohanana, muana wandi mulume, wakadi mubake muana mukashi wa Meshulama, muana wa Belekiya. Bobo bakangambila malu andi mimpe, bakamuambila mei anyi kabidi. Tobiya wakantumina mikanda bua kuntshinyisha nʼai. Hakamanabo lumbu ne hakelabo bibi ne hakasungulabo batuadi ba bintu ne bimbi ba misambu ne Bena Lewi, nakasungula muanʼetu Hanani ne Hananya, mulami wa nsubu wa mukelenge, balami ba Yelushalema, bualu bua Hananya wakadi muntu wa kueyemenyibua, wakatamba bakuabo kutshina Nzambi. Nakabambila ne, Kanunzuludi bibi bia ku Yelushalema anu habanda diba mulu; nuinshile bibi hatshidiku balami, bele nsahi, nusungule batentekedi ba munkatshi mua Bena Yelushalema, muntu ne muntu mu muaba wandi, muntu yonso ikale buludiludi ne nsubu wandi. Musoko wakadi munene ne mubaluluke, kadi bantu bakadimu bakadi banya-banya, kabakanza kuibakamu nsubu. Nzambi wanyi wakateka bualu mu mutshima wanyi bua kusangisha bantu banene ne bakokeshi ne bantu bonso bua kubabala ku milongo ya bankambua babo. Nakasangana mukanda wa kulondolola kua bankambua ba bantu bakadianjila kuhingana, malu akadi mafundamu nunku: Aba mbantu ba luseke bakumuka mu buhika, bakadi bangatshibue, bakadi Nebukadenesâ, mukelenge wa Babulona, muangate, bakahingana ku Yelushalema ne ku Yuda, muntu yonso ku mosoko wandi; bakalua ne Zelubabela ne Yeshua ne Nehemiya ne Azaya ne Lâmeya ne Nahamani ne Môdekai ne Bileshana ne Misepelete ne Bigewai ne Nehuma ne Bâna. Abu mbungi bua balume ba mu Bena Isalele: Bana ba Palosha binunu bibidi ne lukama ne makumi muanda mutekete ne babidi. Bana ba Shefataya nkama isatu ne makumi muanda mutekete ne babidi. Bana ba Ala nkama isambombo ne makumi atanu ne babidi. Bana ba Pahata-moaba ne bana ba Yeshua ne Yoaba binunu bibidi ne nkama muanda mukulu ne dikumi ne muanda mukulu. Bana ba Elama tshinunu tshimue ne nkama ibidi ne makumi atanu ne banai. Bana ba Zatu nkama muanda mukulu ne makumi anai ne batanu. Bana ba Zakai nkama muanda mutekete ne makumi asambombo. Bana ba Binui nkama isambombo ne makumi anai ne muanda mukulu. Bana ba Bebai nkama isambombo ne makumi abidi ne muanda mukulu. Bana ba Azagada binunu bibidi ne nkama isatu ne makumi abidi ne babidi. Bana ba Adonikama nkama isambombo ne makumi asambombo ne muanda mutekete. Bana ba Bigewai binunu bibidi ne makumi asambombo ne muanda mutekete. Bana ba Adina nkama isambombo ne makumi atanu ne batanu. Bana ba Atê wa Hezikiya makumi tshitema ne muanda mukulu. Bana ba Hashuma nkama isatu ne makumi abidi ne muanda mukulu. Bana ba Bezai nkama isatu ne makumi abidi ne banai. Bana ba Halifa lukama ne dikumi ne babidi. Bana ba Gibeona makumi tshitema ne batanu. Bantu ba mu Beteleheme ne ba mu Netofa lukama ne makumi muanda mukulu ne muanda mukulu. Bantu ba mu Anatota lukama ne makumi abidi ne muanda mukulu. Bantu ba mu Bete-azamawete makumi anai ne babidi. Bantu ba mu Kîyata-yalima ne ba mu Kefila ne ba mu Belota nkama muanda mutekete ne makumi anai ne basatu. Bantu ba mu Lama ne ba mu Geba nkama isambombo ne makumi abidi ne umue. Bantu ba mu Mikemasa lukama ne makumi abidi ne babidi. Bantu ba mu Betele ne ba mu Ai lukama ne makumi abidi ne basatu. Bantu ba mu Nebo mukuabo makumi atanu ne babidi. Bana ba Elama mukuabo tshinunu ne nkama ibidi ne makumi atanu ne banai. Bana ba Halima nkama isatu ne makumi abidi. Bantu ba mu Yeleko nkama isatu ne makumi anai ne batanu. Bana ba Lodo ne ba Hadidi ne ba Ono nkama muanda mutekete ne makumi abidi ne umue. Bana ba Sena binunu bisatu ne nkama tshitema ne makumi asatu. Bakuidi: Bana ba Yedaya ba mu nsubu wa Yeshua nkama tshitema ne makumi muanda mutekete ne basatu. Bana ba Imê tshinunu ne makumi atanu ne babidi. Bana ba Pashû tshinunu tshimue ne nkama ibidi ne makumi anai ne muanda mutekete. Bana ba Halima tshinunu ne dikumi ne muanda mutekete. Bena Lewi: Bana ba Yeshua ne ba Kadamiele, bana ba Hodewa, makumi muanda mutekete ne banai. Bimbi ba misambu: Bana ba Asafa lukama ne makumi anai ne muanda mukulu. Batuadi ba majitu: Bana ba Shaluma ne bana ba Atê ne bana ba Talemona ne bana ba Akuba ne bana ba Hatita ne bana ba Shobai lukama ne makumi asatu ne muanda mukulu. Bena Netinima: Bana ba Ziha, bana ba Hasufa, bana ba Tabaota, bana ba Kelosa, bana ba Sia, bana ba Padona, bana ba Lebana, bana ba Hagaba, bana ba Salamai, bana ba Hanana, bana ba Gidele, bana ba Gahâ, bana ba Leaya, bana ba Lesini, bana ba Nekoda, bana ba Gazama, bana ba Uza, bana ba Pasea, bana ba Besai, bana ba Meunima, bana ba Nefushesima, bana ba Bakabuka, bana ba Hakufa, bana ba Hâhû, bana ba Baselita, bana ba Mehida, bana ba Hâsha, bana ba Bâkosa, bana ba Sisela, bana ba Tema, bana ba Nesia, bana ba Hatifa. Bana ba bena mudimu ba Solomo: Bana ba Sotai, bana ba Sofeleta, bana ba Pelida, bana ba Yâla, bana ba Dâkona, bana ba Gidele, bana ba Shefataya, bana ba Hatila, bana ba Pokeleta-hasebayima, bana ba Amona. Bena Netinima bonso ne bana ba bena mudimu ba Solomo bakadi nkama isatu ne makumi tshitema ne babidi. Aba mbantu bakafuma mu Tele-mela, Tele-hâsha, Keluba, Adona ne Imê, bobo kabakadi mua kujadika biota biabo ne bankambua babo ne tunkanuniuna tuabo ne, Tudi Bena Isalele: Bana ba Delaya, bana ba Tobiya, bana ba Nekoda nkama isambombo ne makumi anai ne babidi. Ba bakuidi: Bana ba Hobaya, bana ba Hakosa, bana ba Bâzilai, wakabaka mukashi wa bana bakashi ba Bâzilai, Muena Gilada, wakidikibua ku dina diabo. Bobo bakakeba mena abo mu mikanda ya kulondolola kua bankambua, kadi kabakâsangana; nunku bakadi banyanguke, bakumushibua ku mudimu wa buakuidi. Gouverneur wakabambila ne, Kanuena mua kudia bintu bia tshijila anu bimana muakuidi ne Ulima ne Tumima bua kukonka. Buonso buabo bakadi binunu makumi anai ne bibidi ne nkama isatu ne makumi asambombo, ha mutu ha bena mudimu babo balume ne bena mudimu babo bakashi bakadi binunu muanda mutekete ne nkama isatu ne makumi asatu ne muanda mutekete; bakadi ne bimbi ba misambu ne balume ne bakashi nkama ibidi ne makumi anai ne batanu. Tubalu tuabo tuakadi nkama muanda mutekete ne makumi asatu ne tusambombo; nyama yabo ya mpunda nkama ibidi ne makumi anai ne itanu; tumelo tuabo tuakadi nkama mai ne makumi asatu ne tutanu; nyama yabo ya mpunda yakadi binunu bisambombo ne nkama muanda mutekete ne makumi abidi. Bakuabo ba ku mutu kua biota bia batatuʼabo bakafila bintu biabo bia kuenza nʼabi mudimu. Gouverneur wakafila dariques ya or tshinunu ne malonga makumi atanu ne bilulu bia bakuidi nkama itanu ne makumi asatu mu tshibutshilu tshia mudimu. Bakuabo ba ku mutu kua biota bia batatuʼabo bakafila mu tshibutshilu tshia mudimu dariques ya or binunu makumi abidi ne mines ya argent binunu bibidi ne nkama ibidi. Bakuabo bakafila dariques ya or binunu makumi abidi ne mines ya argent binunu bibidi ne bilulu bia bakuidi makumi asambombo ne muanda mutekete. Nunku bakuidi ne Bena Lewi ne batuadi ba majitu ne bimbi ba misambu ne Bena Netinima ne bantu bakuabo ba munkatshi muabo ne Bena Isalele bonso bakashikama mu misoko yabo. Hakalua ngondo wa muanda mutekete, Bena Isalele bakadi mu misoko yabo. Bantu bonso bakadisangisha bu muntu umue mu muaba mubaluluke wakadi ku mpala kua tshibi tshia ku luseke lua mai; bakambila Ezela mufundi ne, Ulue ne mukanda wa mikenji ya Mose yakambila Yehowa Bena Isalele. Ezela muakuidi wakalua ne mukanda wa mikenji ku mesu kua bantu bakadi badisangishaku ne balume ne bakashi ne bonso bakadi ne matshu a kunvua mu dituku dia kumudilu dia ngondo wa muanda mutekete. Yeye wakaubala mu muaba mubaluluke wakadi ku mpala kua tshibi tshia ku luseke lua mai, ku dinda tô ne ku munda munya, ku mpala kua balume ne bakashi ne kua bonso bakadi ne matshu a kunvua; bantu bonso bakateleja matshu abo ku mei a mu mukanda wa mikenji. Ezela mufundi wakimana ha tshiambidilu tshia mabaya tshiakalongololabo bua bualu ebu; Matitiya ne Shema ne Anaya ne Uliya ne Hilekiya ne Mâseya bakimana ku tshianza tshiandi tshia balume; Pedaya ne Mishaele ne Malekiya ne Hashuma ne Hashebadana ne Zekâya ne Meshulama bakimana ku tshianza tshiandi tshia bakashi. Ezela wakavungulula mukanda ku mesu kua bantu, bualu bua yeye wakadi ku muaba wakadi kulu kua bonso; hakavungululeye mukanda, bantu bonso bakimana kulu; Ezela wakavudishila Yehowa Nzambi munene disanka. Bantu bonso bakamuitaba ne, Amen, Amen, bele maboko abo mulu; bakinyika mitu yabo, bakatendelela Yehowa ne mesu abo minangile hanshi. Yeshua ne Bani ne Shelebaya ne Yamina ne Akuba ne Shabetai ne Hodaya ne Mâseya ne Kelita ne Azaya ne Yozabada ne Hanana ne Pelaya ne Bena Lewi bakajingulula bantu mikenji; bantu bonso bakimana mu muaba wabo. Bakadi babala mu mukanda, mu mikenji ya Nzambi, bakajingulula biakane; bakayijinguluila bantu kabidi, nunku buonso buabo bakunvua biakane. Nehemiya gouverneur wakadi ne Ezela muakuidi ne mufundi ne Bena Lewi, bakadi bayisha bantu, bakambila bantu bonso ne, Dituku edi didi dia tshijila kudi Yehowa Nzambi wenu, kanujingi, kanutedi mua dî. Bualu bua bantu bonso bakadi badila hakunvuabo mei a mu mikenji. Hashishe yeye wakabambila ne, Yai bienu kuenu, nudie bintu bia manyi, mume bintu bidi bishemakane, nutumine bantu badi hatuhu bintu bia kudia; bualu bua edi ndituku dia tshijila kudi Mukelenge wetu; kanunyingalashi mitshima yenu, bualu bua disanka dia Yehowa mbukole buenu. Nunku Bena Lewi bakahuwisha bantu bonso ne, Nuikale talalâ, bualu bua edi ndituku dia tshijila, kanunyingalashi mitshima yenu. Nunku bantu bonso bakaya kuabo bua kudiabo ne bua kunuabo ne bua kutuminabo bantu bakadi hatuhu bintu bia kudia ne bua kusankabo, bualu bua bobo bakajingulula mei akabambilabo. Mu dituku dibidi bakadi ku mutu kua biota bia bantu bonso ne bakuidi ne Bena Lewi bakadisangisha kudi Ezela mufundi bua kunvuabo mei a mikenji mene. Bakasangana bualu mu mukanda wa mikenji buakambila Yehowa Mose bua Bena Isalele bashikame mu bitandatanda, badie bidia bia disanka mu ngondo wa muanda mutekete; bua bobo batumine bantu bonso mu misoko yonso ne mu Yelushalema ne, Yai bienu ku mikuna, nuangate matamba a olive ne matamba a olive ya muitu, ne matamba a mitshi ya myrte ne malala a mabue, ne matamba a mitshi mikuabo bua kuenza nʼau bitandatanda bu muakafundabo. Nunku bantu bakaya, bakalua nʼau, bakadienzela bitandatanda, muntu ne muntu ha mutu ha nsubu wandi ne mu mpangu yabo ne mu mpangu ya ku nsubu wa Nzambi ne mu muaba mubaluluke wakadi ku mpala kua tshibi tshia ku luseke lua mai ne mu muaba mubaluluke wakadi ku mpala kua tshibi tshia Efelayima. Bantu bonso bakadi bafume mu buhika bakenza bitandatanda, bakashikama mu bitandatanda; bualu bua Bena Isalele kabakanza kuenza nunku ku matuku a Yoshua, muana wa Nuna, tô ne ku dituku edi. Bakadi ne disanka dinene be. Yeye wakabala mu mukanda wa mikenji ya Nzambi ku dituku ku dituku, ku dituku dia kumudilu tô ne ku dituku dia nshikidilu. Bakadia bidia bia disanka matuku muanda mutekete; dituku dia muanda mukulu diakadi dituku dinene dia disangisha, bu muakadi mukenji mujadike. Bena Isalele bakadisangishaku mu dituku dia makumi abidi ne anai dia ngondo eu, bakajila bia kudia, baluate bilulu bikayabala, bakadiela luhuishi hamʼbidi. Bena Isalele bakadilamununa kudi bantu ba bende bonso, bakimana ha buabo batonde mibi yabo ne malu mabi akenza bankambua babo. Bakimana mu muaba wabo, bakabala mu mukanda wa mikenji ya Yehowa Nzambi wabo tshituha tshinai tshia dituku; mu tshituha tshinai tshikuabo bakatonda mibi yabo, bakatendelela Yehowa Nzambi wabo. Hashishe Yeshua ne Bani ne Kadamiele ne Shebanya ne Buni ne Shelebaya ne Bani mukuabo ne Kenani bakimana ha tshibandilu tshia Bena Lewi, bakadila kudi Yehowa Nzambi wabo ne mei makole. Hashishe Bena Lewi, Yeshua ne Kadamiele ne Bani ne Hashabeneya ne Shelebaya ne Hodiya ne Shebanya ne Petehiya, bakamba ne, Jukai bienu, nuvudishile Yehowa Nzambi wenu disanka ku tshibangidilu tô ne kunshikidilu. Bavudishile dina diebe dia butumbi disanka, didi ditumbishibue ha mutu ha masanka onso ne butumbi buonso. Wewe udi Yehowa, wewe nkayebe mene; wewe wakafuka diulu ne diulu dia mu diulu ne misumba yau yonso ne buloba ne bintu bionso bidimu ne mai manene ne bionso bidimu, wewe utu wabilama buonso buabi; misumba ya mu diulu idi ikutendelela. Wewe Yehowa Nzambi nguakasungula Abalama, nguakafuma nʼandi mu buloba bua Ula wa Bena Kasada, wakamuidika dina dia Abalahama; wewe wakamusangana ne mutshima wa kukueyemena, wakahunga nʼandi tshihungidi bua kumuha buloba bua Bena Kanâna, bua Bena Hiti, bua Bena Amole, bua Bena Pelese, bua Bena Yebuse ne bua Bena Gîgashi, bua kubuha tunkanunuma tuandi; wewe wakenza mei ebe onso, bualu bua wewe udi muakane. Wewe wakatangila dikenga dia bankambua betu mu Ejipitu, wakunvua muadi wabo kukala kua mai a Dishiba Dikunze, wakalesha Palô ne bena mudimu bandi ne bantu bandi bonso bimanyinu ne malu a kukema, bualu bua wewe wakamanya ne, Bobo bakadi bafunyina batatu betu bulobo, ne wewe wakangata dina dinene bu mudi nʼadi lelu. Wewe wakahandulula mai ku mpala kuabo, nunku bakahita munkatshi mua mai manene ha buloba bume; wakela bakadi babalonda mu bunene bua mai bu mudibo bela dibue mu mai manene. Bualu bukuabo, wewe wakabalombola mu munya mu ditutu ne mu butuku mu dî tutu diakatema kahia bua kubatokeshila nshila wa kuakadibo ne bua kuya. Wewe wakumuka ku mukuna wa Sinai, wakahueka mu tshibanda, wakuakula nʼabo mu diulu, wakabaha mei majalame ne mikenji milelela ne mayisha mimpe ne mikandu, wewe wakabamanyisha dituku diebe dia Lumingu lua tshijila; wakabelela mikenji yebe ne mei ebe ne mikandu yebe kudi Mose muntu webe, wewe wakabaha bidia bia mu diulu bia kumana nʼabi nzala yabo, wakabahatuila mai mu mabue a kumana nʼau nyota yabo; wewe wakabelela mukenji bua bobo baye kuhiana buloba buwakabalaya bua kubahabu. Kadi bobo ne bankambua betu bakadisua, bakambula mpala yabo, kabakunvua mikenji yebe, bakabenga mua kuyitumikila, kabakelangana meji a malu a kukema awakenza munkatshi muabo; kadi bakambula mpala yabo; mu kutomboka kuabo bakadisunguila mulombodi wa kubahingisha mu buhika buabo. Kadi wewe udi Nzambi utu wasua kubuikidila bantu mibi yabo, udi ne diakalengele ne luse, kutu wakihata tshiji lubilu, udi mûle tente ne dinanga, kuakabalekela. Bulelela, hakadifudilabo kana ka ngombe, hakambabo ne, Eu nNzambi wetu wakatuluhula mu buloba bua Ejipitu, ne hakakutatshishabo bikole, wewe mu bunene bua luse luebe kuakabalekela mu tshihela; ditutu diakadi dibalombola mu munya kadiakumuka kudibo, bua kubalombola mu nshila; ne ditutu diakadi ditema kahia butuku bua kubatokeshila nshila wa kuakadibo ne bua kuya kadiakumuka kudibo. Wewe kabidi wakabaha Nyuma webe muimpe bua kubayisha, wewe kuakakandisha mana ebe mukana muabo, wewe wakabaha mai a kumana nʼau nyota yabo. Bulelela, wewe wakabalama mu tshihela bidimu makumi anai, kabakadi bakengela tshintu; bilulu biabo kabiakasunsuka ne makasa abo kakûla nansha. Wewe wakabaha makelenge ne ba ha buloba biwakababanyina bu muakadi bituha biabo; nunku bakahiana buloba bua Sihona ne buloba mene bua mukelenge wa Heshebona ne buloba bua Oga, mukelenge wa Bashana. Wewe wakakumbasha tunkanunuma tuabo bu mitoto ya mu diulu; wewe wakalua nʼabo mu buloba buwakalaya bankambua babo ne, Nenubuhiane. Nunku Bena Isalele bakabuela, bakahiana buloba; wewe wakatekesha Bena Kanâna, bena buloba, ku mesu kuabo, wakafila bakelenge babo ne bena buloba mu bianza biabo, bua kuenza nʼabo bu muakasuabo. Bakanyenga misoko ya ngumbu ne buloba buimpe ne nsubu miule tente ne bintu biakane ne mena a mai akumbulabo ne madimi a tumuma tukese ne madimi a olive ne mitshi ya mamuma ya bungi; nunku bakadia, bakukuta, bakalonda, bakasenena, bakasanka bua buimpe buebe bunene. Kadi kabakatumikila dî diebe, bakakutombokela, bakakema mikenji yebe nyima, bakashiha baprofete bebe bakasua kubabela bua kukudimusha mitshima yabo kûdi kabidi; bakakutatshisha ne ntatu mikole. Nunku wewe wakabafila mu bianza bia bena lukuna babo, bakabakengesha; mu tshikondo tshia dikenga diabo hakadilabo kûdi, wewe wakabunvuila mu diulu; bu mudi bunene bua luse luebe wewe wakabaha basungidi bakabasungila mu bianza bia bena lukuna babo. Kadi bakahetabo ditalala, bakenza malu mabi ku mesu kuebe kabidi; nunku wewe wakabashiya mu bianza bia bena lukuna babo bua kubakokeshabo; kadi hakakudimunabo mitshima ne hakadilabo kûdi, wewe wakabunvuila mu diulu; bua luse luebe lunene wewe wakabasungila misangu ya bungi, wewe wakabadimusha bua kubahingisha ku mikenji yebe kabidi. Kadi bobo bakadisua, kabakatumikila mikenji yebe, bakashiha mei ebe majalame (biâtumikila muntu, yeye neikale ne muoyo kudiu), bakasaka makaya, bakambula mpala yabo, kabakunvua. Kadi wewe wakabafuila luse bidimu bia bungi, wakabadimusha kudi Nyuma webe mukana mua baprofete bebe; kadi bobo kabakateleja matshu abo; nunku wewe wakabafila mu bianza bia bena maloba makuabo. Kadi hua luse luebe lunene wewe kuakababutula buonso buabo, kuakabalekela; bualu bua wewe udi Nzambi wa diakalengele ne wa luse. Nunku Nzambi wetu munene, Nzambi mukole ne wa dishina, utu walama bihungidi ne luse lujalame, dikenga edi dikole diakatukuata ne bakelenge betu ne bantu betu banene ne bakuidi betu ne baprofete betu ne batatu betu ne bantu bebe bonso kadikadi dikese ku mesu kuebe, ku tshikondo tshia bakelenge ba Ashû tô ne ku dituku edi. Kadi wewe udi muakane mu malu onso akatukuata; wakatuenzela anu malu a bushuwa, kadi tuetu tuakenza bibi; bualu hua bakelenge betu ne bantu betu banene ne bakuidi betu ne batatu betu kabakatumikila mikenji yebe, kabakunvua mei ebe ne himanyishilu biebe biwakabadimusha nʼabi. Bobo kabakakukuatshila mudimu mu bukelenge buabo, ne mu buimpe buebe bunene buwakabaha ne mu buloba bunene buakane buwakafila ku mpala kuabo, kabakalekela malu mabi abo. Mona, tuetu tudi bena mudimu lelu eu, ne bua buloha buwakaha bankambua betu bua kudiabo mamuma abu ne bintu biabu biakane, mona, tuetu tudi bena mudimu mu buloba ebu. Budi bulua ne bintu bia bungi kudi bakelenge bawakateka ku mutu kuetu bua malu mabi etu; bobo badi ne bukokeshi bua mibidi yetu ne bua bimuna bietu, bu mudi disua diabo, ne tuetu tudi mu dikenga dikole. Kadi bua malu â onso netujadike nʼebe tshihungidi, netutshifunde, bantu betu banene ne Bena Lewi betu ne bakuidi betu nebatekeku tshimanyinu tshiabo. Bantu bakateka tshimanyinu tshiabo ku tshihungidi bakadi Nehemiya gouverneur, muana wa Hakaleya, ne Sedekiya, Selaya, Azaya, Yelemiya, Pashû, Amalia, Malakiya, Hatusha, Shebanya, Maluki, Halima, Melemota, Obadaya, Danyele, Ginetona, Baluka, Meshulama, Abiya, Miyamina, Mâzaya, Bilegai, ne Shemaya: aba bakadi bakuidi. Bena Lewi; Yeshua, muana wa Azanaya, ne Binui, umue wa bana ba Henadada, ne Kadamiele, ne bana babo, Shebanya, Hodiya, Kelita, Pelaya, Hanana, Mika, Lehoba, Hashabeya, Zaku, Shelebaya, Shebanya, Hodiya, Bani ne Beninu. Bakadi ku mutu kua bantu: Palosha, Pahata-moaba, Elama, Zatu, Bani, Buni, Azagada, Bebai, Adoniya, Bigewai, Adina, Atê, Hezikiya, Azû, Hodiya, Hashuma, Bezai, Halifa, Anatota, Nobai, Magapiasha, Meshulama, Hezi, Meshezabele, Zadoka, Yadua, Pelataya, Hanana, Anaya, Hoshea, Hananya, Hashuba, Halohesha, Pileha, Shobeka, Lehuma, Hashabena, Mâseya, Ahia, Hanana, Anana, Maluki, Halima ne Bâna. Bantu bakuabo ne bakuidi ne Bena Lewi ne batuadi ba majitu ne bimbi ba misambu ne Bena Netinima ne bonso bakadilamununa kudi bena buloba bua kulondabo mikenji ya Nzambi ne bakashi babo ne bana babo balume ne bana babo bakashi ne muntu yonso wakadi ne lungenyi lua kujingulula malu bakalamata kudi bana babo ne kudi bantu babo banene, bakadiela mulau, bakaditshiha bua kulondabo mikenji ya Nzambi yakabambileye kudi Mose, muntu wa Nzambi, ne bua kutumikilabo mikenji yonso ya Yehowa, Mukelenge wetu, ne mikenji yandi mijalame ne mei andi mafunda. Katufidi bana betu bakashi kudi bena buloba, katuangatshidi bana betu balume bakashi kudibo; bialua bena buloba kutudi ne bintu biabo anyi blé yabo bua kutubanyishabi dituku dia lumingu, katuena tubiula dituku dia lumingu anyi dituku dikuabo dia tshijila; netujile tshidimu tshia muanda mutekete, netulekelelangane mabanza. Tuakadielela mikenji kabidi bua kufila tshituha tshia nshekele bua mudimu wa mu nsubu wa Nzambi wetu ku tshidimu ku tshidimu; ne bua kufila bintu bia mampa ne bia mulambu wa bukula ne bia dituku dia lumingu ne bia ngondo mihia-mihia ne bia bidia bia disanka ne bia bintu bia tshijila ne bia milambu ya kubuikidila nʼai Bena Isalele mibi yabo ne bia mudimu wonso wa mu nsubu wa Nzambi wetu. Tuetu ne bakuidi ne Bena Lewi ne bantu tuakela nshobo bua mulambu wa nkunyi bua kulua nʼau mu nsubu wa Nzambi wetu, bu muakadi biota bia batatuʼetu bua kuwosha ha tshioshelu tshia Yehowa Nzambi wetu mu bikondo biakasungulabo ku tshidimu ku tshidimu, bu muakafundabo mu mikenji; ne bua kulua ne bintu bia diambedi bia mu buloba buetu ne mamuma a diambedi a mitshi yonso, ku tshidimu ku tshidimu, mu nsubu wa Yehowa; ne bua kulua ne banʼa bute ba bana baledibue ne ba bimuna, bu muakadibo bafunde mu mikenji, ne ba ngombe ne ba mikoko, mu nsubu wa Nzambi wetu kudi bakuidi badi benza mudimu mu nsubu wa Nzambi wetu; ne bua kulua ne bintu bia diambedi bia mampa etu ne bia milambu ya kukuha ne bia mamuma a mitshi yetu yonso ne bia nvinyo mihia-mihia ne bia manyi mahia-mahia kudi bakuidi mu nsubu wa Nzambi wetu; ne bua kulua kudi Bena Lewi ne tshia dikumi tshia bintu bionso bidi bimena mu buloba buetu; bualu bua Bena Lewi batu bangata tshia dikumi tshia bintu bietu bidi bimena mu buloba mu misoko yonso. Muakuidi, muana wa Alona, neikale ne Bena Lewi hangatabo tshia dikumi; Bena Lewi nebalue ne tshia dikumi tshia mu bintu bia tshia dikumi, mu nsubu wa Nzambi wetu mu tshibutshilu tshiandi. Bualu budi Bena Isalele ne Bena Lewi nʼabu mbua kulua ne milambu ya bintu bidibo bakuha bia blé ne ya nvinyo mihia-mihia ne ya manyi mu nsubu idi bintu bia tshijila, ne kudi bakuidi badi benza mudimu, ne kudi batuadi ne kudi bimbi ba misambu; katuena tulekela nsubu wa Nzambi wetu. Bantu banene bakashikama mu Yelushalema; bantu bakuabo bakela nshobo ya kusungulabo umue wa ku dikumi bua kushikameye mu Yelushalema, musoko wa tshijila, ne bakuabo tshitema bakashikama mu misoko mikuabo. Bantu bakuabo bakavudishila bantu bakadi ne disua dia kushikama mu Yelushalema disanka. Aba mbakelenge ba luseke bakashikama mu Yelushalema; kadi Bena Isalele ne bakuidi ne Bena Lewi ne Bena Netinima ne bana ba bena mudimu ba Solomo bakashikama mu misoko ya mu Yuda, muntu ne muntu mu buhianyi buandi. Kadi bakuabo ba Bena Yuda ne ba Bena Benyamina bakashikama mu Yelushalema. Bena Yuda bakadi Ataya, muana wa Uziya, muana wa Zekâya, muana wa Amaliya, muana wa Shefataya, muana wa Mahalalele wa mu bana ba Pelese; ne Mâseya, muana wa Bahika, muana wa Kole-hose, muana wa Hazaya, muana wa Adaya, muana wa Yoyaliba, muana wa Zekâya, muana wa Muena Shiloa. Bana bonso ba Pelese bakashikama mu Yelushalema bakadi bena bukitu nkama inai ne makumi asambombo ne muanda mukulu. Aba mbana ba Benyamina: Salu, muana wa Meshulama, muana wa Yoede, muana wa Pedaya, muana wa Kolaya, muana wa Mâseya, muana wa Itele, muana wa Yeshaya. Gabai ne Salai bakadi ku nyima kuabo bu bantu nkama tshitema ne makumi abidi ne muanda mukulu. Yoele, muana wa Zikeli, wakadi kahita kabo; Yuda, muana wa Hasenua, wakadi muibidi ku mutu kua musoko. Bakuidi bakadi nunku: Yedaya, muana wa Yoyaliba, ne Yakina, Selaya, muana wa Hilekiya, muana wa Meshulama, muana wa Sadoka, muana wa Melayota, muana wa Ahituba, wakadi ku mutu kua malu a mu nsubu wa Nzambi; bana babo bakadi benza mudimu wa mu nsubu wa Nzambi bakadi nkama muanda mukulu ne makumi abidi ne babidi; Adaya, muana wa Yeholama, muana wa Pelalaya, muana wa Amasi, muana wa Zekâya, muana wa Pashû, muana wa Malakiya; bana babo bakadi ku mutu kua biota bia batatuʼabo bakadi nkama ibidi ne makumi anai ne babidi; Amashai, muana wa Azalele, muana wa Azai, muana wa Meshilemota, muana wa Imê, bana babo, bena bukitu, bakadi lukama ne makumi abidi ne muanda mukulu; Zabediele, muana wa Hagedolima, wakadi kahita kabo. Ba Bena Lewi: Shemaya, muana wa Hashuba, muana wa Azelikama, muana wa Hashabeya, muana wa Buni; Shabetai ne Yozabada, bantu banene ba munkatshi mua Bena Lewi, bakadi ku mutu kua mudimu wa ha mbelu ha nsubu wa Nzambi; Matanaya, muana wa Mika, muana wa Zabedi, muana wa Asafa, wakadi muntu munene wakabanga kutendelela kua kusakidila nʼaku Nzambi; Bakabukiya wakadi muibidi munkatshi mua bana babo; Abeda, muana wa Shamua, muana wa Galala, muana wa Yedutuna. Bena Lewi honso ba mu musoko wa tshijila bakadi nkama ibidi ne makumi muanda mukulu ne banai. Batuadi ba majitu bakadi Akuba ne Talemona ne bana babo bakadi balame bibi bia musoko bakadi lukama ne makumi muanda mutekete ne babidi. Bena Isalele bakuabo bonso ne bakuidi ne Bena Lewi bakadi mu misoko yonso ya Yuda, muntu ne muntu mu buhianyi buandi. Kadi benji ba mudimu wa mu ntempelo bakashikama mu Ofele; Ziha ne Gishepa bakadi ku mutu kuabo. Wakadi ku mutu kua Bena Lewi bakadi ku Yelushalema wakadi Uzi, muana wa Bani, muana wa Hashabeya, muana wa Matanaya, muana wa Mika, umue wa bana balume ba Asafa, bimbi ba misambu, wakadi ku mutu kua mudimu wa mu nsubu wa Nzambi. Mukelenge wakela mukenji bua bualu buabo bua kuha bimbi ba misambu bintu biakadibo nʼabi bualu buatshia-buatshia. Petahiya, muana wa Meshezabele, wa mu bana ba Zela, muana wa Yuda, wakadi ha buihi ne mukelenge mu malu onso a bantu. Bena Yuda bakuabo bakashikama mu Kîyata-âba ne mu misoko yau ne madimi au, ne mu Dibona ne mu misoko yau, ne mu Yekabesele ne mu misoko yau, ne mu Yeshua ne mu Molada ne mu Bete-pelete, ne mu Hasâ-shuala, ne mu Bê-sheba ne mu misoko yau, ne mu Sikelaga, ne mu Mekona ne mu misoko yau, ne mu Enelimona ne mu Solea ne mu Yâmuta ne mu Zanoa ne mu Adulama ne mu misoko yai, ne mu Lakisha ne mu madimi au, ne mu Azeka ne mu misoko yau. Nunku bakashikama mu Bê-sheba tô ne ku tshibanda tshia Hinoma. Bena Benyamina kabidi bakashikama mu Geba ne mu Mikemasha ne mu Aya ne mu Betele ne mu misoko yai, ne mu Anatota ne mu Nobo ne mu Ananiya, ne mu Hasô ne mu Lama ne mu Gitayima, ne mu Hadida ne mu Seboima ne mu Nebalata, ne mu Lodo ne mu Ono mu tshibanda tshia bansenda. Milongo ya Bena Lewi bakuabo ba mu Yuda bakalamata kudi Bena Benyamina. Aba mbakuidi ne Bena Lewi bakaya ne Zelubabela, muana wa Shealatiele, ne Yeshua: Selaya ne Yelemiya ne Ezela, Amalaya ne Maluki ne Hatusha, Shekanya ne Lehuma ne Melemota, ne Ido ne Ginetoi ne Abiya, ne Miyamina ne Mâdaya ne Bilega, ne Shemaya ne Yoyaliba ne Yedaya, ne Salu ne Amoka ne Hilekiya ne Yedaya. Aba mbakuidi banene ne bana babo ba mu matuku a Yeshua. Bena Lewi: Yeshua ne Binui ne Kadamiele ne Shelebaya ne Yuda ne Matanaya, yeye ne bana babo bakadi ku mutu kua kutendelela bua kusakidila nʼaku Nzambi. Bakabukiya ne Uno, bana babo, bakadi ha buihi nʼabo mu midimu yabo. Yeshua wakalela Yoyakima, ne Yoyakima wakalela Eleyashiba, ne Eleyashiba wakalela Yoyada, ne Yoyada wakalela Yonatana, ne Yonatana wakalela Yadua. Mu matuku a Yoyakima bakuidi bakadi ku mutu kua nsubu ya batatuʼabo: Melaya wa mu nsubu wa Selaya; Hananya wa mu nsubu wa Yelemiya; Meshulama wa mu nsubu wa Ezela; Yehohanana wa mu nsubu wa Amalia; Yonatana wa mu nsubu wa Maluki; Yosefe wa mu nsubu wa Shebanya; Adena wa mu nsubu wa Halima; Helekai wa mu nsubu wa Melayota; Zekâya wa mu nsubu wa Ido; Meshulama wa mu nsubu wa Ginetona; Zikeli wa mu nsubu wa Abiya; Piletai wa mu nsubu wa Minyamina wa Moadiya; Shamua wa mu nsubu wa Bilega; Yehonatana wa mu nsubu wa Shemaya; Matenai wa mu nsubu wa Yoyaliba; Uzi wa mu nsubu wa Yedaya; Kalai wa mu nsubu wa Salai; Ebê wa mu nsubu wa Amoka; Hashabeya wa mu nsubu wa Hilekiya; Netanele wa mu nsubu wa Yedaya. Bena Lewi bakadi ku mutu kua nsubu ya batatuʼabo mu matuku a Eleyashiba ne Yoyada ne Yohanana ne Yadua; bakuidi kabidi bakadi nunku mu bukokeshi bua Dayawesha, Muena Pelasa. Bena Lewi bakadi ku mutu kua biota bia batatuʼabo bakadi ne mena abo mafunda mu mukanda wa kulondolola kua bankambua tô ne ku matuku a Yohanana, muana wa Eleyashiba. Bena Lewi banene bakadi Hashebeya ne Shelebaya ne Yeshua, muana wa Kadamiele, ne bana babo bakadi nʼabo bua kutumbishabo ne bua kusakidilabo Nzambi bu muakadi mukenji wa Davidi, muntu wa Nzambi, muntu mu muaba wandi muntu mu muaba wandi. Matanaya ne Bakabukiya ne Obadaya ne Meshulama ne Talemona ne Akuba bakadi batuadi ba majitu, bakalama bibutshilu biakadi hehi ne bibi. Bakadiku mu matuku a Yoyakima, muana wa Yeshua, muana wa Yozadaka, ne mu matuku a Nehemiya gouver-neur, ne a Ezela muakuidi ne mufundi. Hakajidilabo lumbu lua Yelushalema, bakabikila Bena Lewi bakadi ku nseke yonso, bakalua nʼabo ku Yelushalema bua kubakuatshishabo mu disanka dia kujidila kua lumbu ne bua kusakidilabo Nzambi ne bua kumutumbishabo ne misambu ne makasa ne bisanji ne nzenze. Bana balume ba bimbi ba misambu bakadisangisha hohamue, bafume ku nseke yonso yakadi minyunguluke Yelushalema ne ku misoko ya Bena Netofa, ne ku Bete-gilegala ne ku nseke ya Geba ne Azamaweta; bualu bua bimbi ba misambu bakasa misoko yabo minyunguluke Yelushalema. Bakuidi ne Bena Lewi bakadilengesha; bakalengesha bantu ne bibi ne lumbu kabidi. Hashishe nakalua ne bantu banene ba mu Yuda ku lumbu, nakabatabulula mu bisumbu binene bibidi, bakenda mu milongo, basakidila Nzambi; tshisumbu tshimue tshiakaya ku tshianza tshia balume tshia ha lumbu tô ne ku tshibi tshia ku diala; Hoshaya ne tshituha tshia bantu banene ba mu Yuda ne Azaya ne Ezela ne Meshulama ne Yuda ne Benyamina ne Shemaya ne Yelemiya ne bana ba bakuidi bakuabo bakabalonda ku nyima bela mpungi; Zekâya, muana wa Yonatana, muana wa Shemaya, muana wa Matanaya, muana wa Mikaya, muana wa Zaku, muana wa Asafa, ne bana babo Shemaya ne Azalele ne Milalai ne Gilalai ne Mai ne Netanele ne Yuda ne Hanani bakabalonda ku nyima ne bintu bia kuimba nʼabi misambu bia Davidi muntu wa Nzambi; Ezela mufundi wakadi ku mpala kuabo. Bakayila ku luseke lua ku tshibi tshia ku mpokolo wa mai, bakabanda ku tshibandilu tshia ku musoko wa Davidi ha lumbu ba mutu ha nsubu wa Davidi tô ne ku tshibi tshia ku mai ku luseke lua ku esete. Tshisumbu tshiabo tshikuabo tshiakadi tshienda tshisakidila Nzambi, tshiakaya kusangakena nʼabo; meme nakadi ku nyima kuabo ne tshituha tshia bantu ha lumbu ku mutu kua tshibumba tshia matanda tô ne ku lumbu lunene mene, ha mutu ha tshibi tshia Efelayima ne hehi ne tshibi tshia diambedi ne tshibi tshia ku luseke lua minyinyi ya mu mai ne tshibumba tshia Hananele ne tshibumba tshia Hamea tô ne ku tshibi tshia mikoko; bakimana talalâ ku tshibi tshia balami ba musoko. Nunku bîsumbu abi bibidi bia bimbi ba misambu biakimana mu nsubu wa Nzambi; meme ne tshituha tshia bantu banene tuakadiku, ne bakuidi Eleyakima, Mâseya, Minyamina, Mikaya, Eleyehoenai, Zekâya ne Hananya bakadi ne mpungi, ne Mâseya ne Shemaya ne Eleazâ ne Uzi ne Yehohanana ne Malakiya ne Elama ne Ezê. Bimbi ba misambu bakimba bikole ne Yizelaya wakadi ku mutu kuabo, Bakafila milambu ya bungi dituku adi, bakasanka, bualu bua Nzambi wakabasankisha ne disanka dinene; bakashi ne bana bakasanka kabidi; nunku bakunvua disanka dia mu Yelushalema kudi bakadi kule. Mu dituku adi bakasungula bantu bua kulamabo nsuhu ya bibutshilu ne bua kufilabo milambu ya kukuha ne ya mamuma a diambedi akahuolabo ne ya tshia dikumi, bua kubisangishabo mu madimi a ku mpenge ya misoko, bituha biakasuagulabo bia bakuidi ne Bena Lewi; bualu bua Bena Yuda bakasanka bua bakuidi ne Bena Lewi bakadi bakuata mudimu. Bakatumikila; mikenji ya Nzambi waho ne ya kudilengesha kuabo; bimbi ba misambu ne batuadi bakenza nunku, bu muakadi mukenji wa Davidi ne muanʼandi Solomo. Bualu bua mu matuku a kale a Davidi ne Asafa bakadi ne bantu banene ku mutu kua bimbi ba misambu ne misambu ya kutumbisha ne kusakidila nʼai Nzambi. Mu matuku a Zelubabela ne Nehemiya Bena Isalele bonso bakafila bintu bua bimbi ba misambu ne bua batuadi bia ku dituku ne ku dituku; bakabanyangana ne Bena Lewi bintu biabo kabidi; Bena Lewi bakaha bana ba Alona tshituha tshia bintu biabo. Mu dituku adi bakabala mu mukanda wa Mose mu matshu a bantu. Bakasangana bualu ebu bufunda ne, Muena Amona ne Muena Moaba kababuedi mu disangisha dia bantu ba Nzambi tshiendelele, bualu bua bobo kabakaya kusangakena ne Bena Isalele ne bidia ne mai; kadi bakaha Belâma mbueshilu bua kubeleye mulau; kadi Nzambi wetu wakakudimuna mulau bua kuluau disanka. Hakunvuabo mikenji, Bena Isalele bakadilamununa kudi bantu ba hatuhu. Ku mpala kua bualu ebu Eleyashiba muakuidi, wakasungulabo ku mutu kua nsubu mukuabo wa mu nsubu wa Nzambi wetu, wakadi mulamatangane ne Tobiya, wakamulongoluela nsubu munene, muakadibo bateka milambu ya bukula ne manananshi ne malonga ne tshia dikumi tshia blé ne nyinyo mihia-mihia ne manyi biakahabo Bena Lewi ne bimbi ba misambu ne batuadi diambedi, ne milambu ya kukuha bua bakuidi, bu muakadi mukenji, Kadi mu tshikondo atshi tahionso meme tshiakadi mu Yelushalema; mu tshidimu tshia makumi asatu ne bibidi tshia bukelenge bua Atashasete, mukelenge wa Babulona, nakaya kudi mukelenge. Hakahita matuku makuabo, nakebesha mukelenge bua luendu luanyi; nakalua ku Yelushalema, nakunvua bualu bubi buakenza Eleyashiba bua Tobiya bua kumulongolueleye nsubu mu biendedi bia nsubu wa Nzambi. Bualu ebu buakatamba kunyingalasha mutshima wanyi; nunku nakumusha bintu bionso bia Tobiya mu nsubu. Hashishe nakela mukenji, bakalengesha nsubu; nakahingashamu malonga a mu nsubu wa Nzambi ne milambu ya bukula ne manananshi. Nakajingulula kabidi ne Bena Lewi kabakadi bangata bintu biabo; nunku Bena Lewi ne bimbi ba misambu, bakadi benza mudimu, bawahingana muntu ne muntu mu budimi buandi. Hashishe nakatandangana ne bakokeshi, nakabebesha ne, Nsubu wa Nzambi udi muledibue hua tshinyi? Nakabasangisha bohamue, nakabateka mu miaba yabo. Hashishe Bena Yuda bonso bakalua ne tshia dikumi tshia blé ne tshia nyinyo mihia-mihia ne tshia manyi mu nsubu ya bibutshilu. Nakasungula balami ba mutu ha bibutshilu: Shelemeya muakuidi ne Sadoka mufundi ne Pedaya, umue wa Bena Lewi, ne Hanana, muana wa Zakû, muana wa Matanaya, wakadi nʼabo kabidi, bualu bua bobo bakadi babadibue ne mbadi beyemenyibue; bakadi ne mudimu wa kuabanyina bana babo bintu. Nzambi wanyi, unvuluke mu bualu ebu; kujimishi bienzedi bianyi bimpe binakenza bua nsubu wa Nzambi wanyi bua mudimu wandi ku mesu kuebe. Mu matuku au nakatangila Bena Yuda bakuabo bakame tumuma tua nvinyo dituku dia lumingu, basuike bisumbu bia blé, babiteke ha nyima ha nyama ya mpunda; bakadi balua ne nyinyo ne tumuma tukese ne nfigi ne bintu bikuabo ku Yelushalema dituku dia lumingu; meme nakabadimusha mu dituku diakadibo bahana bintu. Bena Tulo bakuabo bakadiku, bakalua ne minyinyi ya mu mai ne bintu bionso, bakabibanyisha kudi Bena Yuda mu Yelushalema dituku dia lumingu. Hashishe nakatandangana ne bantu banene ba mu Yuda, nakabebesha ne, Nudi nuenza bualu ebu bubi bua kunyanga dituku dia lumingu bua tshinyi? Bankambua benu kabakenza nunku, anyi? Nzambi wetu kakatukengesha ne musoko eu bua bualu ebu, anyi? Kadi nuenu nudi nutamba kumuenesha tshiji kudi Bena Isalele hanuanyanga dituku dia lumingu. Nunku diambedi diba kadiyi dianze kubuela dituku dia lumingu, nakela mukenji bua kuimbilabo bibi, kababiunzuludi tô ne hahita dituku dia lumingu; nakateka bena mudimu banyi bakuabo ku bibi, kabitabushi bua muntu abuele ne bujitu dituku dia lumingu. Nunku bendi ba mushinga ne bahanyishanganyi ba bintu bakalala ne bintu biabo ku mbelu kua Yelushalema nansha musangu umue nansha ibidi. Hashishe nakabadimusha, nakabakonka ne, Nudi nulala ku mbelu kua musoko bua tshinyi? Binuenza nunku kabidi meme nennukuate. Ku tshikondo atshi kabakalua dituku dia lumingu kabidi. Nakelela Bena Lewi mukenji bua kudilengeshabo ne bua bobo balame ku bibi, bajidile dituku dia lumingu. Nzambi wanyi, unvuluke bua bualu ebu kabidi, unfuile luse bu mudi bunene bua dinanga diebe. Mu matuku au kabidi nakamona ne Bena Yuda bakadi babake bakashi ba Bena Ashedodo ne Bena Amona ne Bena Moaba; bana babo baledibue bakakula tshituha tshia muaku wa Bena Ashedodo, kabakamanya mua kuakula muaku wa Bena Yuda, kadi bakakula miaku ya bantu ne ya bantu. Nunku nakatanda nʼabo, nakabela mulau, nakabakuma, nakatua nsuki yabo, nakabatshihisha kudi Nzambi ne, Kanufidi bana benu bakashi kudi bana babo balume, kanuangatshidi bana benu balume bakashi kudibo, kanudiangatshidibo nuenu kabidi. Solomo, mukelenge wa Bena Isalele, kakenza bibi mu malu â, anyi? Kadi munkatshi mua bisamba bia bungi bia bantu kamuakadi muikale mukelenge bu yeye, wakadi munangibue kudi Nzambi wandi, ne Nzambi wakamuvuisha mukelenge ku mutu kua Bena Isalele bonso; kadi bakashi ba bende bakamuenzesha yeye mene malu mabi. Tuetu netununvuile bua nuenu nuenze bualu ebu bubi bunene buonso ku mesu kua Nzambi wetu bua kubaka bakashi ba bende, anyi? Umue wa bana balume ba Yoyada, muana wa Eleyashiba muakuidi munene, wakadi muku wa Sanebalata, Muena Holona; nunku nakamuihata ku mesu kuanyi. Nzambi wanyi, ubavuluke bualu bua bobo bakanyanga buakuidi ne tshihungidi tshia buakuidi ne tshia Bena Lewi. Nunku nakabalengesha kudi bantu ba bende bonso, nakasungila bakuidi ne Bena Lewi midimu yabo, muntu ne muntu mu mudimu wandi, ne bua milambu ya nkunyi, ku misangu yakasungulabo, bua mamuma a diambedi. Nzambi wanyi, unvuluke bua kungenzela bimpe. Mu matuku a Ahashawelosha (Ahashawelosha eu nguakakokesha bantu ku Inde tô ne ku Atiopa ba mu nseke lukama ne makumi abidi ne muanda mutekete), mu matuku au mene hakashikama Ahashawelosha mu nkuasa wa bukelenge buandi wakadi mu nsubu wandi wa mu Shushana, mu tshidimu tshisatu tshia bukokeshi buandi yeye wakalambishila bantu bandi banene ne bena mudimu bandi bidia bia disanka; bena bukole ba Bena Pelasa ne Bena Madai, bantu banene ne bana ba bakelenge ba mu nseke yonso, bakadi ku mpala kuandi; yeye wakabalesha bubanji bua butumbi, ne bu mudiye ne buneme mu bukelenge, matuku a bungi bu lukama ne makumi muanda mukulu mene. Hakahita matuku â, mukelenge wakalambishila bantu bonso bakadi nʼandi mu nsubu wandi wa mu Shushana, ne banene ne bakese, bidia bia disanka, mu tshiendedi tshia mu tshibunda tshia ku mbalasa wa mukelenge matuku muanda mutekete. Bakalembelesha bilulu bitoke ne bia mai a matamba ne bia bleu bilamakasha ne mionshi ya lin mikunzubile ku nkanu ya argent, misuika ku makunshi a mabue a marbre; matanda akadi a or ne a argent mateke ha tshiendedi tshia mabue a marbre makunze ne matoke ne makunzubile ne mafike. Bakabanuisha nvinyo mu makoho a or (dikoho ha buadi dikoho ha buadi), bakadi ne nvinyo ya bukelenge ya bungi bu muakadi bubanji bua mukelenge. Bakanua nvinyo bu muakadi mukenji; kawakadi wa ku bukole, bualu bua mukelenge wakadianjila kuelela bakadi ku mutu kua nsubu wandi mukenji bua kuenzabo bu muakadi disua dia muntu ne muntu. Washeti, mukelenge mukashi, wakalambishila bakashi bakadi nʼandi mu nsubu wa bukelenge wakadi wa mukelenge Ahashawelosha bidia bia disanka. Mu dituku dia muanda mutekete hakadi mutshima wa mukelenge musanke ne nvinyo yeye wakatuma mukenji kudi Mehumana ne Bizeta ne Hâbona ne Bigata ne Abagata ne Zetâ ne Kakasa, bantu batungula muanda mutekete bakadi benza mudimu ku mesu kua mukelenge Ahashawelosha, bua kuluabo ne Washeti, mukelenge mukashi, ku mpala kua mukelenge muluate tshifulu tshia bukelenge bua kulesheye bantu ne bantu banene bulengele buandi; bualu bua yeye wakadi muimpe kumona. Kadi Washeti, mukelenge mukashi, wakabenga kulua ku mukenji wa mukelenge wakatumeye kudi bantu batungula; nunku mukelenge wakadi ne tshiji tshikole, ne tshiji tshiandi tshiakatema munda muandi. Hashishe mukelenge wakabikila bena meji bakamanya bikondo, bualu bua mukelenge wakadi ne tshilele nunku kudi bamanyi ba mikenji ne dilumbulula: Kâshena ne Sheta ne Ademata ne Tâshishi ne Melese ne Mâsena ne Memukana, bantu aba banene muanda mutekete ba mu Pelasa ne Madai, bakadi batangila mpala wa mukelenge, ne bakadi bashikama mu muaba wa ku mpala mu bukelenge, wakabakonka ne, Netuenzele mukelenge mukashi Washeti tshinyi bualu bua yeye wakabenga kuenza mukenji wa mukelenge Ahashawelosha wakatumeye kudi bantu batungula? Memukana wakitaba ku mesu kua mukelenge ne bantu banene ne, Washeti, mukelenge mukashi, kakenzela anu mukelenge nkayandi bibi kadi wakenzela bantu banene bonso ne bantu bonso ba mu nseke yonso ya mukelenge Ahashawelosha bibi kabidi. Bualu bua bualu ebu buakenza mukelenge mukashi nebufike kudi bakashi bonso, nebufuishe balume babo bundu ku mesu kuabo hamanyabo ne, Mukelenge Ahashawelosha wakatumina Washeti, mukelenge mukashi, mukenji bua kulueye ku mesu kuandi, kadi yeye kakalua. Dituku edi bakashi ba bantu banene ba mu Pelasa ne Madai bakunvua bualu buakenza mukelenge mukashi nebambile bantu banene ba mukelenge muomumue. Nunku nebikale ne bundu ne tshiji bia bungi. Nunku biasua mukelenge kuela mukenji wandi, baufunde mu mikenji ya Bena Pelasa ne Bena Madai idibo kabayi bamanye mua kukudimuna ne, Washeti kalu ku mesu kua mukelenge Ahashawelosha kabidi tshiendelele; mukelenge afile muaba wandi wa bukelenge kudi mukuabo udi umuhita buakane. Hashishe, hatumabo mukenji eu wa mukelenge ku nseke ya bukelenge buandi yonso, bualu bua budi bunene, bakashi bonso, ne banene ne bakese, nebatumbishe babayabo. Bualu ebu buakasankisha mutshima wa mukelenge ne bantu banene; mukelenge Wakenza bu muakadi dî dia Memukana; bualu bua yeye wakatuma mikanda ku nseke yonso, bafundile bantu bonso mu muaku wabo ne, Mulume yonso akokeshe ba mu nsubu wandi, akule mu muaku wa bantu bandi. Ku nyima kua malu â bakalekela mukelenge Ahashawelosha tshiji tshiandi, yeye wakavuluka Washeti ne bualu buakenzeye, ne bua mukenji wakeleye bualu buandi. Hashishe bantu bakadi bakuatshila mukelenge mudimu bakamuambila ne, Bakebele mukelenge bansongakashi balengele batshidi tumama; mukelenge asunguile tuhita tuandi mu nseke yonso ya bukelenge buandi bua bobo basangishe bansongakashi bonso balengele batshidi tumama mu nsubu wa mukelenge wa mu Shushana; babafile mu bianza bia Hegai, muntu mutungula wa mukelenge, mulami wa bakashi ba mukelenge, bashikame mu luhangu lua bakashi, babahe bintu bia kubalengesha nʼabi. Nsongakashi udi usankisha mutshima wa mukelenge ikale mukelenge mukashi mu muaba wa Washeti. Bualu ebu buakasankisha mutshima wa mukelenge; yeye wakenza nunku. Muena Yuda mukuabo wakadi mu nsubu wa mukelenge wa mu Shushana, dina diandi diakadi Môdekai, muana wa Yai, muana wa Shimei, muana wa Kishi, Muena Benyamina. Bakafuma nʼandi mu Yelushalema ne bahika ne Yekonya, mukelenge wa Yuda, bakadi Nebukadenesâ, mukelenge wa Babulona, ulua nʼabo, Yeye wakadiundisha Hadasa, eu udi Esetê mene, muana wa mansebʼandi mu nsubu wandi, bualu bua yeye kakadi ne tatu ne mamu; nsongakashi eu wakadi mulengele muakane ku mesu; hakafua tatu wandi ne mamu wandi, Môdekai wakamuangata bu muanʼandi mukashi mene. Nunku hakunvuabo mukenji wa mukelenge ne dî diandi, ne hakasangishabo bansongakashi ba bungi mu nsubu wa mukelenge wa mu Shushana mu bianza bia Hegai, Esetê wakadi mufidibue mu nsubu wa mukelenge; bakamufila mu bianza bia Hegai, mulami wa bakashi. Nsongakashi eu wakasankisha mutshima wandi, yeye wakasangana luse ku mesu kuandi; yeye wakamuha bintu bia kumulengesha nʼabi lubilu ne bansongakashi muanda mutekete basungula mu nsubu wa mukelenge bua kumukuatshila mudimu; yeye wakamuladika ne bansongakashi bandi muanda mutekete mu muaba wakatamba buakane mu nsubu wa bakashi. Esetê kakanji kubamanyisha bua tshisamba tshiandi anyi bua bana babo; bualu bua Môdekai wakamuambila ne, Kubamanyishibi. Môdekai wakendenda ku luhangu lua bakashi ku dituku ku dituku bua kunvueye lumu lua Esetê ne malu akamukuata. Hakakumbana tshikondo tshia nsongakashi ne nsongakashi kubuela kudi mukelenge Ahashawelosha, hakashikishabo kumuenzela bu muakadi mukenji bualu bua bakashi bua ngondo dikumi ne ibidi, (nunku matuku a kulengeshibua kuabo akashika; akadi nunku: ngondo isambombo bakabalengesha ne manyi a mula, ne ngondo isambombo bakabalengesha ne bintu bia dihembu dimpe ne bintu bikuabo bia kulengesha nʼabi bakashi); nunku nsongakashi ne nsongakashi wakabuela kudi mukelenge; bakamuha tshintu tshionso tshikasueye hakumukeye mu nsubu wa bakashi bua kuyeye mu nsubu wa mukelenge. Mu dilolo wakabuelamu, hakatshiabu yeye wakahingana mu nsubu muibidi wa bakashi mu bianza bia Shâshagaza, muntu mutungula wa mukelenge wakadi ulama bakashi bandi bahika bakabakeye; yeye kakadi ubuela kudi mukelenge kabidi bikala mukelenge kayi musanke bualu buandi, ne bikaleye kayi mumubikile mu dina. Hakafika dituku dia Esetê, muana wa Abihayila, manseba wa Môdekai, wakangateye bu muanʼandi mukashi, kubuela kudi mukelenge, yeye kakalomba bintu bikuabo ha mutu ha bintu biakasungula Hegai, muntu mutungula wa mukelenge, mulami wa bakashi. Esetê wakasangana luse ku mesu kua bantu bonso bakamutangila. Nunku bakaya ne Esetê kudi mukelenge Ahashawelosha mu nsubu muandi mu ngondo wa dikumi, ngondo wa Tebeta, mu tshidimu tshia muanda mutekete tshia bukokeshi buandi. Mukelenge wakananga Esetê ku mutu kua bakashi bonso, yeye wakatamba bansongakashi bonso kusangana luse ku mesu kuandi; nunku yeye wakateka tshifulu tshia bukelenge ha mutu handi, wakamudisha mukelenge mukashi mu muaba wa Washeti. Nunku mukelenge wakalambishila bantu bandi banene bonso ne benji bandi ba mudimu bidia bia disanka dinene bua Esetê; yeye wakaha ba mu nseke yandi dikisha ne maha bu mudi bubanji bua mukelenge. Hakasangishabo bansongakashi musangu muibidi, Môdekai wakadi mushikame ku tshibi tshia mukelenge. Esetê kakanza kumanyisha mukelenge tshisamba tshiandi ne bantu bandi bu muakamuambila Môdekai, bualu bua Esetê wakatumikila dî dia Môdekai bu muakenzeye hakadiye mudiundishibue kudiye. Mu matuku au hakadi Môdekai mushikame ku tshibi tshia mukelenge, bantu batungula babidi ba mukelenge, Bigatana ne Teleshe, ba munkatshi mua balami ba ku tshibi, bakadi ne tshiji, bakakeba kushiha mukelenge Ahashawelosha. Bualu ebu buakamanyibua kudi Môdekai; yeye wakabuesha kudi Esetê, mukelenge mukashi; Esetê wakabuambila mukelenge mu dina dia Môdekai. Hakadibo balumbulula, bakabusangana ne mbua bushuwa; bakabowa bubidi buabo ku mutshi umue; bakafunda bualu ebu mu mukanda wa kulondolola kua malu ku mpala kua mukelenge. Ku nyima kua malu a mukelenge Ahashawelosha wakabandisha Hamana, muana wa Hamedata, Muena Agaga, wakamuteka ku mutu kua bantu banene bonso bakadi nʼandi. Bena mudimu ba mukelenge bonso bakadi ku tshibi tshia mukelenge bakatua binu hanshi, bakakukuila Hamana; bualu bua mukelenge wakela mukenji nunku bua bualu buandi. Kadi Môdekai kakatua binu hanshi, kakamukuila. Hashishe bena mudimu ba mukelenge bakadi bashikame ku tshibi tshia mukelenge bakebesha Môdekai ne, Wewe udi ushiha mukenji wa mukelenge bua tshinyi? Hakadibo bamukonka nunku ku dituku ku dituku ne hakadiye kayi mubunvuile, bakambila Hamana bua kutangilabo ne malu a Môdekai neajalame. Bualu bua yeye wakabambila ne, Meme ndi Muena Yuda. Hakamanya Hamana ne, Môdekai kena utua binu hanshi, kena unkukuila, yeye wakûlangana ne tshiji tshikole. Hakelanganeye meji, yeye wakabenga kukuata Môdekai nkayandi, bualu bua bakamumanyisha bua tshisamba tshia Môdekai; nunku Hamana wakakeba bua kushiheye Bena Yuda bonso bakadi mu bukelenge bua Ahashawelosha, ba mu tshisamba tshia Môdekai mene. Mu ngondo wa kumudilu, ngondo wa Nisana mene, mu tshidimu tshia dikumi ne bibidi tshia bukelenge bua mukelenge Ahashawelosha bakadi bela Pû, eu nnshobo mene, ku mesu kua Hamana ku dituku ku dituku ne ku ngondo ku ngondo tô ne ku ngondo wa dikumi ne ibidi udi ngondo wa Ada mene. Hamana wakambila mukelenge Ahashawelosha ne, Kudi bantu bakuabo bakamuangalaka munkatshi mua bantu ba mu nseke yonso ya bukelenge buebe; mikenji yabo idi mitahuluke ku ya bantu bonso; kabena batumikila mikenji ya mukelenge; nunku kambimpe bua mukelenge abitabushe. Nunku biasua mukelenge, bafunde mukanda bua babutudibue; hashishe meme nenfile ntalanta ya argent binunu dikumi mu bianza bia bantu badi benzela mukelenge mudimu eu, balue nʼai mu tshibutshilu tshia mukelenge. Mukelenge wakakohola kakanu ka ku munu wandi, wakakafila kudi Hamana, muana wa Hamedata, Muena Agaga, muena lukuna wa Bena Yuda. Mukelenge wakambila Hamana ne, Bakakuha argent, ne bantu kabidi; enza nʼabi bu mudi umona ne mbimpe. Hashishe bakabikila bafundi ba mukelenge mu ngondo wa kumudilu mu dituku dia dikumi ne asatu dia ngondo; bakafundila miloho ya mukelenge ne ba-gouverneur ba ku nseke yonso ne bantu banene bakadi ku mutu kua bantu bonso, bantu mu muaku wabo bantu mu muaku wabo, bu muakamba Hamana; bakafunda malu â mu dina dia mukelenge Ahashawelosha, bakatekahu tshimanyinu tshia ku kakanu ka mukelenge. Bakatuma mikanda ei mu bianza bia bantu ku nseke yonso ya mukelenge bua kushihabo ne bua kubutulabo Bena Yuda bonso ne batekete ne banunu ne bana bakese ne bakashi dituku dimue, mu dituku dia dikumi ne asatu dia ngondo wa dikumi ne ibidi, ngondo wa Adâ mene, ne bua kuhaulabo bintu biabo bionso. Bakatuma mikanda ei ku nseke yonso, bakamanyisha bantu bonso bua bikale bamane kudilongolola bua dituku adi. Bena mikanda bakaya lubilu bua mukenji wa mukelenge, ne mukenji wakaledibua mu nsubu wa mukelenge wa mu Shushana. Mukelenge ne Hamana bakashikama bua kunuabo nvinyo, kadi bonso ba mu musoko wa Shushana bakadi bakema. Hakamanya Môdekai malu onso akenzabo, Môdekai wakadihanda bilulu biandi, wakadiluatshisha bilulu bikayabala, wakadiela butue hamʼbidi, wakaya munkatshi mua musoko, wenda, udila bikole; wakalua ku mpala kua tshibi tshia mukelenge, bualu bua muntu kakamanya mua kubuela mu tshibi tshia mukelenge muluate bilulu bikayabala. Mu nseke yonso yakaya mukenji wa mukelenge ne dî diandi, muadi munene wakadi munkatshi mua Bena Yuda, bakajila bia kudia, bakasa muadi, bakadila, ba bungi bakaluata bilulu bikayabala, bakadiela butue hamʼbidi. Bena mudimu bakashi ba Esetê ne bantu bandi batungula bakalua kudiye, bakamuambila bualu ebu; mukelenge mukashi wakatamba kunyingalasha mutshima wandi; yeye wakatuma bilulu bua Môdekai aluate, ne bua kumusheye bilulu biandi bikayabala; kadi yeye kakabiangata. Hashishe Esetê wakabikila Hataka, umue wa bantu batungula ba mukelenge wakasunguleye bua kumukuatshileye mudimu, wakamutuma kudi Môdekai bua kujingululeye ne, Buakadi tshinyi ne buakadi bualu kai. Nunku Hataka wakaya kudi Môdekai mu muaba mubaluluke wakadi ku mpala kua tshibi tshia mukelenge. Môdekai wakamuambila malu onso akadi mamukuate ne bungi bua argent mene yakalaya Hamana balami ba bintu bia mukelenge bua kubutuleye Bena Yuda. Wakamuha kabidi umue wa mikanda yakafundabo mu Shushana wakadi ne mukenji wa kubabutula mufundamu, bua kûlesheye Esetê; wakamuambila dî diandi kabidi bua kuyeye kudi mukelenge bua kumuakuila ne bua kuakuileye bantu bandi ku mesu kuandi. Hataka wakalua, wakambila Esetê mei a Môdekai. Hashishe Esetê wakambila Hataka, wakamuha mukenji wa kuyeye nʼau kudi Môdekai ne, Bena mudimu bonso ba mukelenge ne bantu ba mu bukelenge buandi badi bamanye ne, Muntu yonso, ne mulume ne mukashi, wabuela mu tshiendedi tshia munda mua nsubu wa mukelenge, udi kayi mubikidibue kudi mukelenge, mukenji umue udi kudiye bua kumushiheye, anu muntu yonso udi mukelenge wolola dikombo dia or kudiye bua yeye ashale ne muoyo; kadi kabakambikila bua kubuela kudi mukelenge tô matuku â makumi asatu. Bakambila Môdekai mei a Esetê. Hashishe Môdekai wakabahingisha ne dî kudi Esetê ne, Kuedi meji ne. Wewe neuhanduke munkatshi mua Bena Yuda bonso bualu bua udi mu nsubu wa mukelenge, bualu bua biwahuwa biebe ku tshikondo etshi, dikuatshisha ne luhandu nebimueneke kudi Bena Yuda bifume ku muaba mukuabo, kadi wewe ne ba mu nsubu wa tatu webe nenufue; nganyi udi mumanye ne, Wewe wakabuela mu bukelenge anu bua tshikondo etshi mene? Hashishe Esetê wakabahingisha kudi Môdekai ne dî edi ne, Ya biebe, usangishe Bena Yuda bonso badi mu Shushana, bajile bia kudia bualu buanyi matuku asatu; kabadi tshintu, kabanu tshintu tô matuku â asatu butuku ne munya; meme ne bena mudimu banyi bakashi netujile bia kudia diatshimue; hashishe nenye kudi mukelenge bu mudi kamuyi mu mikenji; binafua, nenfue. Nunku Môdekai wakaya, Wakenza malu onso akamuambila Esetê. Hakahita matuku asatu, Esetê wakadiluatshisha bilulu biandi bia bukelenge, wakimana mu tshiendedi tshia munda mua nsubu wa mukelenge ku mbelu kua nsubu wa mukelenge; mukelenge wakadi mushikame mu nkuasa wandi wa bukelenge mu nsubu wa bukelenge, ku tshibueledi tshia nsubu. Hakadi mukelenge utangila Esetê mukelenge mukashi muimane mu tshiendedi, yeye wakasangana luse ku mesu kuandi, mukelenge wakoluela Esetê dikombo dia or diakadi mu tshianza tshiandi. Nunku Esetê wakasemena ha buihi, wakalenga lusongo lua dikombo. Hashishe mukelenge wakamuebesha ne, Wewe Esetê, mukelenge mukashi, udi musue tshinyi? Dilomba diebe didi tshinyi? Nebakuhedi tô ne ku tshituha tshia bukelenge. Esetê wakamukudimuna ne, Bikalabi bimpe kudi mukelenge, mukelenge ne Hamana balue ku disanka dinakalongoluela mukelenge. Hashishe mukelenge wakamba ne, Babikile Hamana lubilu, benze bu muakuamba Esetê. Nunku mukelenge ne Hamana bakalua ku bidia bia disanka biakabalongoluela Esetê. Hakadibo banue nvinyo ya ku bidia bia disanka, mukelenge wakebesha Esetê ne, Tshiudi ulomba ntshinyi? Nebakuhetshi. Dilomba diebe didi tshinyi? Nebakuhedi, tô ne ku tshituha tshia bukelenge. Hashishe Esetê wakamukudimuna ne, Dikonka ne dilomba dianyi bidi nunku: bingikala ne luse ku mesu kua mukelenge, ne biasua mukelenge kuitaba ku dikonka dianyi ne kuenza bu mudi dilomba dianyi, mukelenge ne Hamana balue ku disanka dinene dindi mbalongoluela, ne makelela nengenze bu muakuamba mukelenge. Hashishe Hamana wakaluhuka ne disanka dia bungi mu mutshima wandi; kadi hakatangila Hamana Môdekai mushikame ku tshibi tshia mukelenge ne yeye kayi mubike, kayi mumushile muaba, wakasangana ne tshiji tshikole kudi Môdekai. Kadi Hamana wakadikanda, wakaya kuandi; wakatuma dî, wakabikila balunda bandi ne mukashi wandi Zeleshe. Hamana wakabamanyisha bua butumbi bua bubanji buandi, ne bungi bua bana bandi bakaleleye, ne ku mutu kua malu onso kuakamuteka mukelenge ne bu muakamubandisheye ku mutu kua bantu banene bonso ne bena mudimu ba mukelenge. Hamana wakamba dî dikuabo kabidi ne, Bulelela, Esetê mukelenge mukashi kakitabusha bua muntu mukuabo aye ne mukelenge ku bidia bia disanka biakalongololeye anu meme; ne makelela kabidi wakumbikila meme ne mukelenge bua kudia nʼandi. Kadi malu a onso kaena asankisha handi ntangila Môdekai, Muena Yuda, mushikame ku tshibi tshia mukelenge. Hashishe mukashi wandi Zeleshe ne balunda bandi bakamuambila ne, Balongolole tshiowelu bule bua coudées makumi atanu, hatshiabu wewe wambile mukelenge bua kuowelaku Môdekai; hashishe neumanye mua kuya ne mukelenge ne disanka ku bidia bia disanka dinene. Bualu ebu buakasankisha mutshima wa Hamana; yeye wakalongololesha tshiowelu. Butuku abu mukelenge kakamanya mua kulala tulu; wakamba dî diandi, bakalua ne mukanda wa kulondolola kua malu, bakaubala ku mesu kua mukelenge. Bakasangana bualu bufundamu ne, Môdekai wakamba bua Bigetana ne Telesha, babidi ba bantu batungula ba mukelenge ba munkatshi mua balami ba tshibi bakadi bakeba bua kushiha mukelenge Ahashawelosha. Mukelenge wakabebesha ne, Kutumbisha kai kuakatumbishabo nʼaku Môdekai bua bualu ebu? Hashishe bena mudimu ba mukelenge bakadi bamukuatshila mudimu bakamuambila ne, Kabena bamuenzele tshintu. Mukelenge wakakonka ne, Udi mu tshiendedi nganyi? Ha diba adi Hamana wakabuela mu tshiendedi tshia mu nsubu wa mukelenge bua kumuebesha bualu bua kuoweye Môdekai ku tshiowelu tshiamulongolueleye. Bena mudimu ba mukelenge bakamuambila ne, Hamana udi muimane mu tshiendedi. Mukelenge wakamba ne, Abuele biandi, Nunku Hamana wakabuela. Mukelenge wakamuebesha ne, Nebenzele muntu udi mukelenge musue kunemeka tshinyi? Nunku Hamana wakadi wamba mu mutshima wandi ne, Nganyi udi mukelenge usanka bua kunemeka muntambe meme? Hashishe Hamana wakambila mukelenge ne, Bua muntu udi mukelenge usanka kunemeka, balue ne bilulu bidi mukelenge uluata ne kabalu kadi mukelenge wenda ha nyima haku ne tshifulu tshia bukelenge tshidiye wasa ku mutu kuandi; bafile bintu ebi ne kabalu mu bianza bia umue wa bantu ba mukelenge badi batamba buneme, baluatshishe muntu udi mukelenge usanka bua kunemeka, bendeshe muntu au ha nyima ha kabalu aka mu musesu wa musoko, bele dî ku mpala kuandi ne, Nebenzele muntu udi mukelenge usanka bua kunemeka nunku. Hashishe mukelenge wakambila Hamana ne, Ya lubilu, wangate bilulu ne kabalu, bu muwakuamba, wenzele Môdekai, Muena Yuda, udi mushikame ku tshibi tshia mukelenge nunku; kuhangi nansha dî dimue dia mu mei onso awakuamba. Hashishe Hamana wakangata bilulu ne kabalu, wakabiluatshisha Môdekai, wakamuendesha ha nyima ha kabalu mu musesu wa musoko, wakela dî ku mpala kuandi ne. Nebenzele muntu udi mukelenge usanka bua kunemeka nunku. Môdekai wakahingana ku tshibi tshia mukelenge. Kadi Hamana wakaya ku nsubu wandi lubilu, udila muadi ne mutu wandi mubuikila tshilulu. Hamana wakambila mukashi wandi Zeleshe ne balunda bandi bualu buonso buakamukuata. Hashishe bena meji bandi ne mukashi wandi Zeleshe bakamuambila ne, Bikala Môdekai, uwakabanga kulekela ku mesu kuandi, wa bana ba Bena Yuda, wewe kuena mumanye mua kumuhita bukole; kadi wewe neuhone ku mpala kuandi bulelela. Hakadibo bayikila nʼandi, muntu mutungula wa mukelenge wakalua bua kubikileye Hamana ku bidia bia disanka dinene biakalongolola Esetê. Mukelenge ne Hamana bakalua bua kudiabo ne Esetê mukelenge mukashi. Hakadibo banua nvinyo ya bidia bia disanka dituku dibidi, mukelenge wakebesha Esetê kabidi ne, Esetê mukelenge mukashi, dilomba diebe didi tshinyi? Nenkuhedi. Disengelela diebe didi tshinyi? Nenkuhedi tô ne ku tshituha tshia bukelenge. Hashishe Esetê mukelenge mukashi wakamukudimuna ne, Bingikala musangane luse ku mesu kuebe, mukelenge, biasua mukelenge, basungile muoyo wanyi ku dilomba dianyi ne basungile bantu banyi ku disengelela dianyi; bualu bua didi bahanyibue, meme ne bantu banyi, bua kubutudibua ne bua kushihibua ne bua kujimishibua. Kadi bu tuetu bahanyibue bu bahika balume ne bahika bakashi, nakadi kuhuwa, kadi muena lukuna kakadi mua kufuta mukelenge ku bualu ebu bubi. Hashishe mukelenge Ahashawelosha wakebesha Esetê mukelenge mukashi ne, Yeye udi nganyi, yeye udi hanyi, udi welangana meji mu mutshima wandi bua kuenza nunku? Esetê wakamba ne, Muhumbishi ne muena lukuna wetu udi muntu eu mubi Hamana mene. Hashishe Hamana wakatamba kutshina ku mesu kua mukelenge ne kua mukelenge mukashi. Mukelenge wakajuka ku nvinyo ya bidia bia disanka ne tshiji tshikole, wakaluhuka, wakendakana mu tshibunda tshia mu luhangu luandi; Hamana wakajuka bua kulombeye muoyo wandi kudi Esetê mukelenge mukashi; bualu bua yeye wakajingulula ne, Mukelenge neakebe kungenzela bibi. Mukelenge wakafuma ku tshibunda tshiandi, wakabuela mu nsubu wa kudia kabidi; Hamana wakamana kudiela ha ditanda hakadi Esetê. Hashishe mukelenge wakakonka ne, Yeye udi ukeba kukuata mukelenge mukashi ku bukole ku mesu kuanyi mu nsubu wanyi, anyi? Hakahatuka dî adi mukana mua mukelenge, bakabuikila mutu wa Hamana tshilulu. Hashishe Hâbona, umue wa bantu batungula bakadi ku mpala kua mukelenge, wakamba ne, Monai, kabidi, tshiowelu atshi bule bua coudées makumi atanu tuakalongoluela Hamana Môdekai, nguakambila mukelenge malu mimpe, tshidi ku nsubu wa Hamana. Mukelenge wakamba ne, Bamuoweleku. Nunku bakowa Hamana ku tshiowelu tshiakalongolueleye Môdekai. Hashishe tshiji tshia mukelenge tshiakalekela. Mu dituku adi mukelenge Ahashawelosha wakafila ba mu nsubu wa Hamana, muena lukuna wa Bena Yuda, kudi Esetê mukelenge mukashi. Môdekai wakalua ku mpala kua mukelenge, bualu bua Esetê wakamuambila bu muakadiye kudiye. Mukelenge wakakohola kakanu kakanyengeye kudi Hamana, wakakaha Môdekai. Esetê wakateka Môdekai ha mutu ha nsubu wa Hamana. Esetê wakayikila ne mukelenge kabidi, wakahona ku makasa andi, wakamusengelela ne binsonshi ku mesu bua kukudimuneye bualu bubi buakamba Hamana, Muena Agaga, kuenzela Bena Yuda. Hashishe mukelenge wakolola dikombo dia or kudi Esetê. Nunku Esetê wakajuka hanshi, wakimana ku mesu kua mukelenge. Yeye wakamuambila ne, Biasua mukelenge, bingikala musangane luse ku mesu kuandi, bikala bualu buimpe ku mesu kua mukelenge, ne binasankisha mesu andi, bafunde mikanda mikuabo ya kukudimunabo nʼai mikanda yakafunda Hamana, muana wa Hamedata, Muena Agaga, yakafundeye bua kubutulabo Bena Yuda ba mu nseke yonso ya mukelenge. Munyi mundi mua kutangila bualu bubi budi bulua kudi bantu banyi? Munyi mundi mua kutangila dibutuka dia bana betu? Hashishe mukelenge Ahashawelosha wakambila Esetê, mukelenge mukashi, ne Môdekai, Muena Yuda, ne, Monai, nakamana kufila ba mu nsubu wa Hamana kudi Esetê, bakamana kumuowa yeye ku tshiowelu bualu bua yeye wakalenga Bena Yuda ne tshianza tshiandi. Nunku nufunde bualu bua Bena Yuda bunudi basue mu dina dia mukelenge, nutekehu tshimanyinu tshia ku kakanu ka mukelenge; bualu bua kakuena muntu udi mumanye mua kukudimuna dî didi difundibua mu dina dia mukelenge, didi ne tshimanyinu tshia ku kakanu ka mukelenge tshitekahu. Hashishe mu tshikondo atshi bakabikila bafundi ba mukelenge mu ngondo muisatu, ngondo wa Siwana mene, mu dituku dia makumi abidi ne asatu dia ngondo; bakafundila miloho ne ba-gouverneur ne bantu banene bakadi mu buloba bua Inde tô ne ku Atiopa, mu nseke lukama ne makumi abidi ne muanda mutekete, bantu mu tshifundilu tshiabo ne mu muaku wabo bantu mu tshifundilu tshiabo ne mu muaku wabo, malu onso akamba Môdekai bualu bua Bena Yuda; bakafundila Bena Yuda mu tshifundilu tshiabo ne mu muaku wabo kabidi. Wakafunda malu au mu dina dia mukelenge Ahashawelosha, wakatekahu tshimanyinu tshia ku kakanu ka mukelenge, wakatuma mikanda ei mu bianza bia bantu badi benda ha nyima ha tubalu tudi tuenda lukasa tuakadi mu nsubu wa mukelenge tuakalelabo kudi kabalu kandi kanene; ne ha nyima ha nyama ya mpunda ne ha tumelo; mu mikanda ei mukelenge wakitabusha bua Bena Yuda badisangishe ku musoko ne ku musoko ne bua kuluangana ne kushiha ne kubutula ne kujimisha bukole buonso bua bantu bakadi bakeba kubaluisha, ne bakashi babo ne bana babo bakese, ne bua kubahaula; bakadi mua kuenza nunku mu nseke yonso ya mukelenge Ahashawelosha mu difuku dia dikumi ne asatu dia ngondo wa dikumi ne ibidi, ngondo wa Adâ mene. Bakatuma mikanda ei ya kumanyisha nʼabi bantu bonso ba mu nseke yonso ne, Budi Bena Yuda nʼabu mbua kudilongolola bua dituku adi bua kudisombuelabo kudi bena lukuna babo. Nunku bakaya ne mikanda bakadi benda ha nyima ha tubalu tuabo tuakenda lubilu tuakadi mu mudimu wa mukelenge, bakaya lukasa bendeshibue ku mukenji wa mukelenge; bakela mukenji eu mu Shushana, musoko wa mukelenge. Môdekai wakumuka ku mesu kua mukelenge muluate bilulu bia bleu ne bitoke bia bukelenge, ne tshifulu tshia butumbi tshia or, ne tshikowelu tshikunzubile tshia bilulu bia lin; bena musoko bakadi mu Shushana bakela mbila, bakasanka. Bena Yuda bakadi ne munya ne musangelu ne disanka ne butumbi. Mu nseke yonso ne mu misoko yonso yakafika mikanda ya mukenji, Bena Yuda bakadi ne musangelu ne disanka, bakalongolola bia kudia bia disanka, bakadi ne dituku dimpe. Bantu bakuabo ba bungi ba mu buloba bakandamuka bu Bena Yuda; bualu bua ditshina dia Bena Yuda diakabakuata. Mu ngondo wa dikumi ne ibidi, ngondo wa Adâ mene, mu dituku dia dikumi ne asatu dia ngondo eu, bakamba diba dia kumana mukenji wa mukelenge kufika, mu dituku diakatekemenabo kudi bena lukuna ba Bena Yuda bua kubakokeshabo (kadi bualu buakakudimuka, ne Bena Yuda bakakokesha bena lukuna babo), Bena Yuda bakadisangisha mu misoko yabo mu nseke yonso ya mukelenge Ahashawelosha bua kukuatabo honso bakasua kubenzela bibi; nansha muntu wakamanya mua kuimana ku mpala kuabo, bualu bua ditshina diabo diakakuata bantu bonso. Bantu banene bonso ba mu nseke yonso ne miloho ne ba-gouverneur ne bonso bakadi benzela mukelenge mudimu bakakuatshisha Bena Yuda; bualu bua ditshina dia Môdekai diakabakuata. Bualu bua Môdekai wakadi muntu munene mu nsubu wa mukelenge, ne lumu luandi luakafika ku nseke yonso; bualu bua muntu eu Môdekai wakadiundadiunda mu butumbi buandi. Bena Yuda bakashiha bena lukuna babo bonso ne miele ya nvita, bakabashiha ne bakababutula ne bakenzela bakadi nʼabo lukinu bu muakasuabo. Mu nsubu wa mukelenge wa mu Shushana Bena Yuda bakashiha ne bakabutula bantu balume nkama itanu. Bakashiha Pâsha-nedata ne Dalafona ne Asepata, Polata ne Adalia ne Alidata, ne Pâmashata ne Alisai ne Alidai ne Wayezata, bana halume dikumi ba Hamana, muana wa Hamedata, muena lukuna wa Bena Yuda; kadi kabakahaula bintu biabo. Mu dituku adi bakamanyisha mukelenge bua bungi bua bantu bakashihabo mu nsubu wa mukelenge wa mu Shushana. Mukelenge wakambila Esetê mukelenge mukashi ne, Bena Yuda bakashiha ne bakabutula bantu balume nkama itanu ba mu nsubu wa mukelenge wa mu Shushana ne bana balume ba Hamana dikumi; bakenza tshinyi mu nseke mikuabo ya mukelenge? Mpindiu dilomba diebe didi tshinyi? Nenkuhedi. Disengelela diebe dikuabo didi tshinyi? Nedienjibue. Hashishe Esetê wakamba ne, Biasua mukelenge, itabushe bua Bena Yuda badi mu Shushana benze makelela kabidi bu mudi mukenji wa lelu, balembeleshe bana balume ba Hamana dikumi ku tshiowelu atshi kabidi. Mukelenge wakela mukenji bua kuenzabo nunku; mukenji eu wakafuma mu Shushana, bakalembelesha bana balume ba Hamana dikumi ku tshiowelu atshi. Bena Yuda ba mu Shushana bakadisangisha mu dituku dia dikumi ne anai dia ngondo wa Adâ, bakashiha bantu balume ba mu Shushana nkama isatu; kadi kabakahaula bintu biabo. Bena Yuda bakuabo bakadi mu nseke yonso ya mukelenge bakadisangisha hamue, bakaluangana bua kusungilabo mioyo yabo, bakadi ne dikisha bua bena lukuna babo, ne bakashiha bena lukinu babo binunu makumi muanda mutekete ne bitanu; kadi kabakahaula bintu biabo. Bakenza bualu ebu mu dituku dia dikumi ne asatu dia ngondo wa Adâ; bakikisha mu dituku dia dikumi ne anai, bakasungula dituku adi bua kudiabo bidia bia disanka ne musangelu. Kadi Bena Yuda ba mu Shushana bakadisangisha hamue mu dituku dia dikumi ne asatu ne mu dituku dia dikumi ne anai kabidi; bakikisha mu dituku dia dikumi ne atanu, bakadisunguila dituku dia kudiabo bidia bia disanka ne musangelu. Nunku Bena Yuda bakadi bashikame mu misoko idi kayiyi ne ngumbu bakasungula dituku dia dikumi ne anai dia ngondo wa Adâ dituku dia kudiabo bidia bia disanka ne musangelu, ne dia kuhanganabo bintu. Môdekai wakafunda malu â, wakatumina Bena Yuda bonso bakadi ku nseke yonso ya mukelenge Ahashawelosha mikanda, ne bakadi ha buihi ne ba kule, ya kubamanyisha ne, Bunudi nʼabu mbua kuvuluka dituku dia dikumi ne anai dia ngondo wa Adâ, ne dituku dia dikumi ne atanu dia ngondo au kabidi ku tshidimu ku tshidimu, bu matuku akaheta Bena Yuda dikisha kudi bena lukuna babo ne bu ngondo wakakudimunabo kanyinganyinga kalua bu disanka, ne muadi ulua bu dituku dilengele; bajidile matuku â bu matuku a kudiabo bidia bia disanka ne musangelu ne bua kuhanganabo bintu ne bua kuhabo bahele bintu. Bena Yuda bakakeba kuenza bu muakabangabo kuenza, ne bu muakadi Môdekai mubafundile; bualu bua Hamana, muana wa Hamedata, Muena Agaga, muena lukuna wa Bena Yuda bonso, wakatungila Bena Yuda tshitungu bua kubabutuleye, wakadi wela Pû, eu nnshobo mene, bua kubashiha ne bua kubabutula; kadi hakamanya mukelenge bualu ebu, yeye wakafundila mikanda bua kukudimuneye bualu bubi buakadiye musue kuenzela Bena Yuda ha mutu handi, ne yeye ne bana bandi balume bakowibua ku tshiowelu. Nunku badi babikila matuku a ne, Pulima, bu mudi dina dia Pû, Nunku bua mei onso akatuabo mu mukanda eu, ne bua malu onso akatangilabo ku mesu ne bua malu onso akadi abakuata, Bena Yuda bakahunga dî diabo bualu buabo ne bua bana babo baledibue ne bua bantu bonso bakalamata kudibo ne, Tuetu katuena tuhanga kuvuluka matuku â abidi bu muakafundabo, ne mu tshikondo tshiakasungulabo, ku tshidimu ku uhidimu; netuvuluke matuku â ne netualame ku bikondo bionso kudi ba mu meku onso ne ba ku nseke yonso ne ba mu misoko yonso; matuku â a Pulima kaena mua kuhanga munkatshi mua Bena Yuda nansha kuvuluka kuau kudi tunkanunuina tuabo tshiendelele. Hashishe Esetê mukelenge mukashi, muana wa Abihayila, ne Môdekai, Muena Yuda, bakafunda ne bukokeshi buonso bua kujadikabo mukanda eu muibidi bualu bua Pulima. Bakatumina Bena Yuda bonso ba mu nseke ei lukama ne makumi abidi ne muanda mutekete ya mu bukelenge bua Ahashawelosha mikanda ya mei a ditalala ne a bushuwa, bua kujadika matuku â a Pulima mu bikondo biakasungulabo bu muakadi dî dia Môdekai, Muena Yuda, ne Esetê mukelenge mukashi, babelele mukenji, bu muakadibo badielela mukenji ne tunkanunuma tuabo, mu malu a kujila kua bia kudia ne muadi wabo. Mukenji wa Esetê wakajadika malu â a Pulima; bakaufunda mu mukanda. Mukelenge Ahashawelosha wakalambuisha bantu ba mu buloba ne mu bisanga bia mu mai manene milambu. Bienzedi bionso bia bukole buandi ne bia bukokeshi buandi ne dilongolola dia bunene bua Môdekai wakadi mukelenge mubandishe kabiena bifunda mu mukanda wa kulongolola kua malu a bakelenge ba Madai ne Pelasa, anyi? Bualu bua Môdekai, Muena Yuda, wakadi muntu muibidi ku nyima kua mukelenge Ahashawelosha, ne wakadi munene munkatshi mua Bena Yuda, wakadi muitabushibue kudi tshisumbu tshia bana babo, mukebe diakalengele dia bana babo, muambile bana babo mei a ditalala. Muntu wakadiku mu buloba bua Usa, dina diandi Yobo. Wakadi muntu wa mutshima mutoke ne wa malu makane, wakatshina Nzambi, wakehuka ku malu mabi. Bakamulelela bana ba balume muanda mutekete ne bana ba bakashi basatu. Bimuna biandi biakadi mikoko binunu muanda mutekete ne tumelo binunu bisatu, ngombe ibidi ibidi ku bikokedi nkama itanu, bakashi ba nyama ya mpunda nkama itanu. Wakadi ne bantu ba bungi mu nsubu muandi kabidi. Nunku muntu eu wakahita bantu bonso ba ku luseke lua Esete buneme. Bana bandi ba balume bakadi ne tshilele tshia kulambishilangana bia kudia mu nsubu yabo, muntu ne muntu dituku diandi; bakadi batuma dî bua kubikila bana ba bakashi basatu bua kudia nʼabo, kunua nʼabo. Hakashika matuku a kudia bidia kudi muntu ne muntu nunku, Yobo wakadi ubabikila kudiye, ubajidila. Wakabika ne dinda dionso, wakafila milambu ya kuosha bu muakadi bungi buabo bonso. Bualu bua Yobo wakamba ne, Bumue bana banyi ba balume bakuenza malu mabi, bakuhenda Nzambi mu mitshima yabo. Yobo wakadi wenza nunku misangu yonso. Dituku dikuabo hakadisangisha bana balume ba Nzambi ku mesu kua Yehowa, Satana kabidi wakamueneka munkatshi muabo, Yehowa wakakonka Satana ne, Udi ufuma kudi kunyi? Satana wakakudimuna Yehowa dî ne, Ndi nfuma ha buloba, nakadi ntambakana, ngendakana eku ne eku. Yehowa wakakonka Satana ne, Wakumona muntu wanyi Yobo, anyi? Kakuena muntu mukuabo bu yeye ha buloba; bu mudiye muntu wa mutshima mutoke ne wa malu makane, udi utshina Nzambi ne udi wehuka ku malu mabi. Satana wakandamuna Yehowa, wakamukonka ne, Yobo udi utshina Nzambi hatuhu, anyi? Wewe kuakumunyunguluka ne nsubu wandi ne bintu biandi bionso ne bulami buebe, anyi? Wewe wakuvudishila mudimu wa bianza biandi disanka, ne bimuna biandi biakuvulangana ha buloba. Kadi mpindiu olola tshianza tshiebe, lenga bintu bionso bidiye nʼabi, ne yeye neakudiule ku mesu kuebe. Nunku Yehowa wakambila Satana ne, Mona, bintu bionso bidiye nʼabi bidi mu bianza biebe; kadi kumulengi tshianza tshiebe. Nunku Satana wakaluhuka ku mesu kua Yehowa. Dituku dikuabo hakadi bana bandi ba balume ne bana bandi ba bakashi badia bidia ne banua nvinyo mu nsubu wa mukulu wabo, messager wakalua kudi Yobo, wamba ne, Bakadi badima mu madimi ne lukasu lukoka kudi ngombe, ne nyama ya mpunda yakadi idia mashinde ha buihi nʼai. Bena Seba bakabikuata, bakaya nʼabi; bakashiha bansongalume bakadi bayilama ku muele wa nvita. Anu meme nkayanyi nakuhanduka bua kukuambila. Hakatshidiye wakula, mukuabo wakalua, wakamba ne, Kahia kafuma kudi Nzambi kakatuluka mu diulu, kakosha mikoko ne bansongalume bakadi bayilama, kakabishidisha. Anu meme nkayanyi nakuhanduka bua kukuambila. Hakatshidiye wakula, mukuabo wakalua, wakamba ne, Bena Kasada bakaditahulula mu bisumbu bisatu, bakakuata tumelo, bakaya nʼatu, bakashiha bansongalume bakadi batulama ku muele wa nvita; anu meme nkayanyi nakuhanduka bua kukuambila. Hakatshidiye wakula, mukuabo kabidi wakalua, wakamba ne, Hakadi bana bebe ba balume ne bana bebe ba bakashi badia bidia ne banua nvinyo mu nsubu wa mukulu wabo, mena, tshihehele tshikole tshiakafumina ku tshihela, tshiakakuma ku matumba a nsubu anai, nsubu wakuhukila bansongalume, bakafua biabo. Anu meme nkayanyi nakuhanduka bua kukuambila. Hashishe, Yobo wakajuka, wakahanda muzabi wandi, wakabeya nsuki ya ku mutu, wakatua mpala wandi hanshi, wakatendelela Nzambi. Wakamba biandi ne, Nakaluhuka mu difu dia mamuʼanyi butaka, nempingane butaka. Yehowa wakampa bintu, Yehowa wakangata bintu; dina dia Yehowa ditumbishibue. Mu malu au onso Yobo kakenza bibi, kakabanda Nzambi ne, Udi wenza bibi. Dituku dikuabo, hakalua bana halume ba Nzambi kudimuenesha ku mesu kua Yehowa, Satana kabidi wakalua munkatshi muabo bua kudimuenesha ku mesu kua Yehowa. Yehowa wakakonka Satana ne, Udi ufuma kudi kunyi? Satana wakakudimuna Yehowa dî ne, Ndi nfuma ha buloba, nakadi ntambakana, ngendakana eku ne eku. Yehowa wakakonka Satana ne, Wakumona muntu wanyi Yobo, anyi? Kakuena muntu mukuabo bu yeye ha buloba; bu mudiye muntu wa mutshima mutoke ne wa malu makane, udi utshina Nzambi ne udi wehuka ku malu mabi. Yeye utshidi unanukila kulamata ku buakane buandi, kadi wewe wakanshikila bualu buandi bua kumubutula kayi ne bualu, Satana wakakudimuna Yehowa ne, Dikoba ku dikoba! Bulelela, bionso bidi muntu nʼabi yeye neabifile bua kusungila muoyo wandi. Kadi anji kuolola tshianza tshiebe, ulenge mifuba yandi ne misunyi yandi, ne yeye neakudiule ku mesu kuebe. Yehowa wakambila Satana ne, Ke yeye au udi mu tshianza tshiebe; kadi usungile muoyo wandi. Nunku Satana wakaluhuka ku mpala kua Yehowa, wakasamisha Yobo ne biusha binene hamʼbidi bonso, munda mua makasa tô ne ku lubombo lua mutu wandi. Yeye wakangata tshiyoyi tshia luesu bua kudikuanya nʼatshi hakadiye ushikama mu diala dia butue. Mukashi wandi wakamukonka ne, Wewe utshidi unanukila kulamata ku buakane buebe, anyi? Diula Nzambi ne fuaku biebe! Kadi Yobo wakamuambila ne, Wewe udi wakula bu mukashi muhote. Kia! Tudi mua kuitabusha anu masanka ku tshianza tshia Nzambi, ne katuitabushi makenga, anyi? Mu malu au onso Yobo kakamba bualu bubi ku mishiku yandi nansha. Hakunvua balunda basatu ba Yobo lumu lua makenga au onso akamukuata, bakalua biabo, muntu ne muntu mufume ku muaba wandi, Elifaza, Muena Temana, Biledada, Muena Shuhi, ne Sofa, Muena Nâmata. Bualu bua bakahunga dî bua kulua hohamue bua kudila nʼandi ne bua kumusamba. Hakadibo kule ne hakabandulukabo, kabakamumanya; nunku bakadila ne mei makole. Bakadihanda, muntu ne muntu, muzabi wandi, bakela buloba mulu mu mitu yabo. Hashishe, bakashikama nʼandi mu buloba tô minya muanda mutekete ne mafuku muanda mutekete. Kakuena muntu mukuabo wakamuambila dî, bualu bua bakamona bu muakadi dikenga diandi dihita bukole. Hashishe, Yobo wakabulula mukana muandi, wakela dituku dia kuledibua kuandi mulau. Yobo wakabanga kuamba dî ne, Dituku diakandelabo dijimine, ne butuku buakamba ne, Muana mulume udi muimitshibue, bujimine. Dituku adi dikale mîdima; Nzambi wa mu diulu kadikebi; munya kauditemenyi. Mîdima ne mufidi mufike fitutû bidiangate. Difutu dishikamehu; bintu bionso bidi bifikisha difuku adi biditshinyishe. Bua bufuku abu, mîdima mikole ibukuate; kabuikadi ne disanka munkatshi mua matuku a tshidimu; kabubadibu munkatshi mua ngondo. E, bufuku abu buikale hatuhu; dî dia disanka kadibuedimu. Badi bamanye mua kuela matuku mulau bele butuku abu mulau, mbadi ne bukole mene bua kualula nyoka munene. Mitoto yakadi ikenka dilolo ikuate mîdima; didiku adi dindile munya, kadi kadiuhetshi; kadimonyi hatshiatshia. Bualu bua kadiakinshila bibi bia difu dia mamu wanyi, kadiakasokoka kanyinganyinga ku mesu kuanyi. Bualu kai tshiakaha diba diakandelabo? Bualu kai tshiakahuela muoyo diba dinakaluhuka munda mua mamu wanyi? Bualu kai tatu wanyi wakitabusha bua banteke ha bibelu biandi? Bualu kai mabele akadiku bua meme kuâmua? Nunku nakadi kulala hanshi diba adi, nakadi kuikala holâ; nakadi kulala tulu; nunku nakadi kuikisha hohamue ne bakelenge ne bena meji ba ha buloba, bakadiashila majambu ku mishiki ya mabue; anyi hohamue ne bakokeshi bakadi ne biamu bia or, bakûsha nsubu yabo tente ne tshiamu tshia argent. Nakadi kuikala bu muana wa kabishi musokoka, bu bana badi kabayi banze kutangila munya. Ku muaba au bantu babi badi halekela kutatshisha banga bantu, badi bahungila badi bikishaku. Ku muaba au bena lukanu badi bashikama talalâ, kabena bunvua dî dia mubenzeshi wa mudimu. Bahuekele ne baneme badiku, muhika udi ne budishikaminyi kudi mukelenge wandi. Bualu kai yeye udi uha muntu udi mu dikenga munya, ne udi uha muntu udi ne kanyinganyinga mu mutshima wandi muoyo? Badi bajinga lufu, ne kaluena tulua kudibo, badi bumbula mu buloba bua kulukeba ne dikeba dihite dia biuma bisokoka bukole. Bobo badi basanka bikole, badi basanka, hasanganabo lukita. Bua tshinyi Nzambi udi uhesha muntu udi ne nshila wandi musokoka munya, ne udiye munyunguluke ne luhangu? Kuhumuna kuanyi kudi kulua ku mpala kua bia kudia bianyi, ne kutua kuanyi kua mikemu kukole kudi kuhumuka bu mai. Bualu bua tshindi utshina tshidi tshinkuata; ne tshiakunkuatshisha buowa tshidi tshilua kundi. Tshiena ne ditalala, tshiena mua kushikama holâ; tshiena ne dikisha; kadi dikenga didi dinkuata. Hashishe, Elifaza, Muena Temana, wakakudimuna Yobo ne, Biakeba muntu kukuambila dî mpindiu, neukuate tshiji, anyi? Kadi muntu kai udi mua kudikanda bua kakudi? Tangila, wewe wakuyisha bantu ba bungi, wakukolesha bianza biakadi bitekete. Mei ebe akubisha muntu wakadi wamba kudishinda, wakukolesha binu biakadi bitekete. Kadi mpindiu bualu ebu budi bukukuata, mutshima webe udi unema bujitu; budi bukulenga, buowa budi bukukuata. Kutshina kuebe kua Nzambi kakuena tshieyemenu tshiebe, anyi? Buakane bua bienzedi biebe kabuena ditekemena diebe, anyi? Ndi nkusengelela ne, Uvuluke, utuambile ne, Muntu kai wakafua kayi ne tshilumbu? Bakabutula bantu bakane kudi kunyi? Bu munakamana kutangila, badi bihila malu mabi, ne badi bakuna ntatu, nebahuole malu â muomumue. Badi bafua ku muhuya udi uhatuka mukana mua Nzambi, bua bukole bua tshiji tshiandi badi babutudibua. Muadi wa nyama wa ntambue ne dî dia nyama wa ntambue udi ne luonji biakuhuwa; ne menu a bana ba nyama ya ntambue onso akutshibuka. Nyama wa ntambue mukulukashi udi ufua bualu bua kena ukuata tshia kudieye, ne bana ba mukashi wa nyama wa ntambue badi batangadika. Dî diakafika kundi mu busokoko, nakunvua anu manunganyi adi. Mu meji a ku bikena kumona bufuku, hadi tulu tukole tukuata bantu, buowa buakankuata ne muzakalu, biakanyungisha mifuba yanyi yonso. Muhuya wakahita ha mpala hanyi, miosa ya hamʼbidi hanyi yakavuayila. Tshintu atshi tshiakimana, kadi meme tshiakamanya mua kumona tshinfuanyi tshiatshi; tshinfuanyi tshiakadi ku mesu kuanyi. Nakunvua dî ditekete diamba ne, Muntu wa ha buloba udi mua kuikala muakane ku mesu kua Nzambi, anyi? Muntu udi mua kuikala ne mutshima mutoke ku mesu kua Mufuki wandi, anyi? Tangila, kena mua kueyemena ba mu diulu badi bamukuatshila mudimu, ne udi ubanda banjelo bandi ne, Badi ne mahanga. Nunku neatambe kumona mahanga kudi badi ne mibidi ya ha buloba, badi ne bishimikidi biabo mu dinfuenkenya, hadi baboteshibua bu tshibayibayi! Ku dinda tô ne ku dilolo badi babatshibula bituha bituha, hadi bafua tshiendelele ne kakuena muntu udi umona lufu luabo. Bikala muonshi wa ntenta wabo mutuka munda muabo, kabena bafua, kabayi banze kuheta meji, anyi? Ela di diebe mpindiu; mukuabo udiku udi mua kuitaba kûdi, anyi? Neuye kudi muntu kai wa munkatshi mua ba tshijila? Bulelela, kanyinganyinga kadi kashiha muhote, ne tshiji tshidi tshishika mujibale. Nakumona muhote hakadiye ubanga kuela miji yandi mu buloba; kadi nakela nsubu wandi mulau lukasa. Bana bandi badi kule ne luhandu, badi babutudibua mu tshilumbuluidi tshia ku tshibi, kabayi ne muntu wa kubahandisha. Udi ne nzala udi udia bintu biakahuolabo, udi ubinyenga munkatshi mua meba mene; ne banyenga badi bubulula mukana bua kumina bintu biabo. Bualu bua makenga kaena atoloka mu dinfuenkenya, lutatu kaluena lumena mu buloba; Kadi muntu udi uledibua bua kukengeye, bu mudi nsase iya mulu. Kadi meme hanyi nakadi kukeba Nzambi, nakadi kufila tshilumbu tshianyi mu bianza bia Nzambi, udi wenza malu manene ne malu adi bantu kabayi mua kujingulula, ne malu a kukema adi kâyi mua kubadibua: udi Ulokesha nvula ha buloba, udi utuma mai mu madimi; udi ubandisha bantu bahuekele mulu, udi ujula badi badila bua bobo bikale ne luhandu; udi uhumbisha malu adi bena budimu bahangidisha, nunku bianza biabo kabiena bimanye mua kubalubuluila bualu buakuhangabo; udi ukuata bena meji mu budimu buabo; ne meji adi bena budimu bahangidisha adi malekedibue. Badi basangakana ne mîdima mu munya, badi benda babubuta munda munya bu mudibo benza mundankulu. Kadi Nzambi udi Usungila bahele ku muele wa nvita wa mukana muabo, udi ubasungila mu bianza bia bantu bakole. Nunku bahele badi ne diteke mena, ne bubi budi bubuikila mukana muabu. Mona, muntu udi Nzambi ubela udi ne disanka; nunku kubengi dikengesha didi Wa Bukole Buonso ukuyisha nʼadi. Bualu bua yeye udi utaha mputa, kadi udi umujingila kabidi; udi ukuma, kadi bianza biandi bidi bishikisha disama. Neakuhandishe ku makenga asa mbombo, e, nansha mu makenga muanda mutekete bualu bubi kabuena bukulenga. Halua tshiole, yeye neakuhandishe ku lufu; halua nvita, neakuhandishe ku bukole bua muele wa nvita. Neakusokoke halua bena bunsonge, kuena utshina kabutu haluaku. Neuseke kabutu ne tshiole, kuena utshina nyama ya ha buloba. Bualu bua neuhunge tshihungidi ne mabue bua kânyangi madimi ebe, ne nyama ya mu mpata neyikale nʼebe ditalala. Neumanye ne, Ntenta wanyi udi ne diakalengele, ne hawaya kutangila luhangu luebe lua bimuna, kuena usangana tshintu tshimue tshijimine. Neumanye kabidi ne, Tunkanu nuina tuanyi tudi tuvulangana, ne bana banyi baledibue badi bu mashinde a ha buloba. Neubuele mu lukita luebe hawalua muntu mukole, bu tshisumbu tshia blé tshidibo babanda nʼatshi ku tshishihuidi mu tshikondo tshiabobeye. Ke muanda eu: tuakumana kukeba kûjingulula, ne udi wa bushuwa; Wewe ûnvue, ûmanye kabidi bua wowo wikale bu diakalengele diebe. Hashishe, Yobo wakandamuna ne, Nakadi kusua bua bujitu bua ntatu yanyi buidikishibue bimpe, ne bua bateke makenga anyi onso mu tshiamu tshia kuidikisha nʼatshi bujitu! Nunku biakadi kutamba nsenga ya ku mai manene bujitu; bua bualu ebu mei anyi akadi a lukasa lukasa. Bualu bua mikete ya Wa Bukole Buonso idi munda muanyi, muoyo wanyi udi unua lulengu luai; malu adi Nzambi untshinyisha nʼau adi mela mualu wa nvita ku mpala kuanyi. Mpunda wa mu tshisuku udi udila muadi hikaleye ne mashinde a kudia, anyi? Ngombe kabidi udi udila muadi hikaleye ne bia kudia, anyi? Badi badia tshintu tshitshihala tshianana kabayi belamu luehu, anyi? Kutua kuimpe kudi mu milembulembu ya makela, anyi? Mutshima wanyi udi ubenga kubilenga; bidi bu bia kudia bidi butonda! Nakadi kusua bua bualu bundi ndomba buenjibue, ne bua Nzambi itabushe bua kumpa muanda undi njinga! Nakadi kusua bua Nzambi ikale ne disanka bua kumbutula; bua yeye alekele kukanda tshianza tshiandi ne ahempe muonshi wa muoyo wanyi! Nunku busambi buakadi kuikala kundi; nakadi kutungila mu kanyinganyinga kadi kakayi kandekela, bua muanda eu ne, Tshiakubenga mei a Wa Tshijila. Ndi ne bukole kai bua meme kumanya mua kuindila talalâ? Nshikidilu wanyi neikale tshinyi bua meme ngikale ne lutulu? Bukole buanyi budi bu bua mabue, anyi? Mubidi wanyi udi bu wa tshiamu tshia mitaku, anyi? Bushuwa, kakuena bualu munda muanyi budi mua kunkuatshisha, ne meji akadi mua kunsungila akûmushibua kundi. Kudi muntu udi wamba kuhanga bidi bimpe bua mulunda wandi kumulesha luse, anyi bumue nealekele dishina dia Wa Bukole Buonso. Bana betu bakundinga bu musulu wa mai udi uhasalala, udi ûma ku nyima, bu nshila wa misulu ya mai idi ikama. Idi ne mai mafike bualu bua mabue a mashika adimu, ne bua neige udi usokomamu. Mu tshikondo tshidi munya utema idi ijimina; hatema munya bikole, idi ikama ne idi yumushibua mu miaba yai. Bisumbu bia bena luendu bidi bisesuka mu nshila yabo; bidi bibuela mu tshihela tshia lusenga, bidi bifua. Bena luendu ba ku Tema bakakeba mai, bisumbu bia bena luendu ba ku Sheba biakâtekemena. Bakafuishibua bundu bualu bua bakâeyemena, bakafika kudiu, bakatamuka. Nuenu nudi nanku kundi mpindiu, nudi numona dikenga dianyi, ne buowa budi bunukuata. Nakunulomba bua kumpa tshintu, anyi? Nakunulomba bua kunfidila mbueshilu, anyi? Nakunulomba bua kunsungila mu bianza bia muena lukuna, anyi? Nakunulomba bua kumpikula mu bianza bia banyengi ba bintu, anyi? Nunyishe, meme nempuwe bianyi; nundeshe bimpe bu mundi muhange. Monai mudi mei malelela ne bukole bua kutuisha muntu! Kadi kubela kuenu kudi kunfuisha ku bubi kai? Nudi nuelangana meji bua kungela bua mei anakuamba, anyi? Kadi mei a muntu udi ne bualu budi kumuhita bukole adi bu luhehele. Bulelela, nuenu nudi basue kuelela muanʼa nshiya nshobo, nudi basue kuenduluka mushinga ne mulunda wenu! Nuanji kuitabusha bua kuntangila ku mesu; bulelela, tshiena ndinga ku mesu kuenu nansha. Ndi nnusengelela ne, Lekelai bualu budi kabuyi buakane; e, vulukai, buakane buanyi butshidi bujalame munda muanyi. Bualu bubi budi buambibua ku ludimi luanyi, anyi? Meme tshiena mua kujingulula malu adi kâyi makane mukana muanyi, anyi? Muntu kena ne tshikondo tshia kuenzeye mudimu mukole hanshi ha buloba, anyi? Matuku andi kaena bu a muena mudimu wa difutu, anyi? Bu mudi muhika ujinga mundidimbi wa dihueka dia diba, bu mudi muena mudimu wa difutu windila difutu diandi, nunku badi bampesha ngondo idi anu ne malu a hatuhu, badi bakunguila mafuku adi ne ntatu. Hanalala hanshi, ndi ndikonka ne, Nembike diba kai, nsangana butuku bumane kutshia? Ndi nsumpakana eku ne eku tô ne hatshia butuku. Bikusu ne mabuwa a buloba bidi hamʼbidi hanyi bonso; dikoba dianyi didi dihandika, dihatuka mai. Matuku anyi adi ahita mundongo wa mukumi wa bilulu kuenda lubilu, adi afika kunshikidilu kuau tshiyi ne ditekemena. Nzambi, uvuluke biebe ne muoyo wanyi udi anu muhuya, disu dianyi kadiena dimona diakalengele kabidi Disu dia udi untangila kadiena dintangila kabidi, mesu ebe neikale kundi, meme tshitshiyihu. Bu mudi ditutu ditangadika ne dijimina, nunku muntu wahueka mu Muaba wa Bafue kena uhingana kabidi, kena uhingana kabidi mu nsubu muandi, ba ku muaba wakadiye ushikama diambedi kabena bamumona kabidi. Meme kabidi tshiena mbuikila mukana muanyi; nengambe di ne kanyinganyinga ka mutshima wanyi; nentontolole bua ntatu ya mu muoyo wanyi. Ndi mai manene anyi nyama wa mu mai manene bua wewe udi uteka mutentekedi bua kuntentekela, anyi? Hangamba bianyi ne, Bulalu buanyi nebunsambe, ditanda dianyi dia kulala nediholeshe meji adi annyingalasha; wewe udi untshinyisha ne bilota, udi unkuatshisha buowa bukole ne bikena kumona. Nunku mutshima wanyi udi utamba kusungula bua kunfiekelabo mu nshingu; ndi nsungula lufu ku mpala kua makenga anyi. Muoyo wanyi udi untonda! Tshiena musue kuikala ne muoyo tshiendelele. Undekele, bualu bua matuku anyi adi anu bu muhuya. Muntu udi tshinyi, bua wewe udi umutumbisha, ne bua wewe udi uteka mutshima webe kudiye; bua wewe udi ulua kumutangila ku dinda ku dinda, ne udi umuteta meba onso? Musangu neulehe bule munyi wewe kuyi muanji kumusha mesu ebe kundi? Neundekele musangu bule munyi bua meme kumina mate anyi? Bingikala muenze bibi, ndi mua kukuenzela tshinyi, wewe, mulami wa bantu? Bualu kai wewe wakunteka bu tshimanyinu tshia kuasaku mikete yebe, tô ne hakalua bualu ebu bujitu kundi? Wewe kuena umbuikidila bubi buanyi, kuena ungumusha malu mabi anyi bua tshinyi? Bualu bua mpindiu nendale hanshi mu dinfuenkenya, ne wewe neunkebe ne disuminyina, kadi tshiena ngikalaku. Hashishe, Biledada, Muena Shuhi, wakakudimuna Yobo ne, Wewe newambe mei â musangu bule bishi? Mei a mukana muebe neikale bu tshihehele tshikole musangu bule bishi? Nzambi udi ukonyangasha kulumbulula kuakane, anyi? Wa Bukole Buonso udi ukonyangasha buakane, anyi? Bikala bana bebe bamuenzele bibi, yeye wakubafila mu dikenga dikole bua bubi buabo; biwasua kukeba Nzambi ne disuminyina, biwasua kulomba Wa Bukole Buonso ne disengelela diebe, biwikala ne mutshima mutoke, biwikala muakane; bulelela, yeye neabike bua kukukuatshisha mu bualu buebe, neahingashe diakalengele ku nsubu webe wa buakane. Nansha bikala tshibangidilu tshiebe tshikese, nshikidilu webe neahite bunene. Ndi nkusengelela bua kukonka bantu ba mu milongo ya kale, teka mutshima webe ku malu akakeba batatu babo kujingulula. Bualu bua tuetu ludi anu bu bantu bakalelabo makelela, katuena bamanye bualu, bualu bua matuku etu a ha buloba adi anu bu mundidimbi. Bobo kabena bakuyisha, kabena bakuambila, kabena bamba mei a mu mitshima yabo, anyi? Lutuhu ludi mua kudiunda bimpe hadi kahayi lunteke, anyi? Disele didi mua kudiunda hadi kahayi mai, anyi? Hatshididi dihia-dihia, kabayi banze kudikosa, didi ditamba midioko yonso kufubidila lubilu. Nshikidilu wa bonso badi bahua Nzambi muoyo udi nunku; ne ditekemena dia muntu udi ubenga Nzambi didi difua; bualu bua ditekemena diandi didi dijimina, ne tshieyemenu tshiandi tshidi bu butande. Yeye udi weyemena nsubu wandi, kadi nsubu kena ushindama; neamuobokele ne bianza biandi, kadi kena ukandamana. Yeye udi bu mudioko mubishi mu munya, ntonga yandi idi ilamba mu tshibidi tshiandi. Miji yandi idi ijingila ku mushiki wa mabue, ne yeye udi udiunda munkatshi mua mabue. Biamubutulabo mu muaba wandi, muaba eu neumubenge ne, Tshiena muanze kukumona. Tangila, edi ndisanka didiye nʼadi mu nshila wandi! Ne bakuabo badi batoloka mu buloba kabidi. Bulelela, Nzambi kena uhidia muntu udi muakane tshishiki, kena ujadika benji ba malu mabi. Yeye neanji kûsha mukana muebe ne tuseku ne mishiku yebe ne mbila ya disanka. Bena lukuna bebe nebafuishibue bundu, ne ntenta wa bantu babi kena wikalaku kabidi. Hashishe, Yobo wakamukudimuna ne, Ndi mumanye bimpe ne, Bualu ebu mbulelela; kadi muntu neamanye mua kuikala muakane ku mpala kua Nzambi munyi? Biasueye kuelangana nʼandi mpata, kena mumanye mua kuitaba ku dikonka dimue munkatshi mua makonka tshinunu. Yeye udi ne meji mu mutshima, ne udi ne bukole buhite, muntu kai wakukolesha mutshima wandi ku mpala kuandi ne wakutula dikasa dimpe? Yeye udi umusha mikuna minene kayiyi mimanye bualu, hayikudimuneye mu tshiji tshiandi. Udi uzakasha buloba, ubûmusha mu muaba wabu, ne bishimikidi biabu bidi bikanka. Udi welela diba mukenji, ne kadiena dibanda, udi ubuikila mitoto, utekahu tshimanyishilu tshiandi. Udi uvungulula bintu bia mu diulu nkayandi, udi wenda ha mavuala a mu mai manene. Udi ufuka mitoto ya Ourse Munene, ya Nyama ne Mbua ne Muntu ne ya Tshidiminanzashi, ne mitoto ya ku sude. Udi wenza malu manene ne adi bantu kabayi bamanye mua kujingulula, udi wenza malu a kukema adi kâyi mua kubadibua. Tangila, yeye udi uhita hehi nʼanyi, tshiena mmutangila nansha, udi utambaku, tshiena mmumona to. Tangila, bîanyengeye tshintu, udi mua kumukanda nganyi? Muntu kai udi mua kumukonka ne, Udi wenza tshinyi? Nzambi kena ukanda tshiji tshia ndi; bakuatshishi ba Lahaba badi binama ku mpala kuandi. Nunku meme hanyi ndi mua kuandamuna dî kudi kunyi anyi kusungula mei bua kuelangana nʼandi mpata? Bu meme muikale muakane, tshiakadi kumanya mua kumufuisha; nakadi kutendekena mulumbuluishi wanyi. Bu meme mumubikile ne bu yeye muitabe kundi, tshiakadi kuitabusha ne, Yeye udi mua kunvua dî dianyi. Bualu bua yeye udi mutshibula ne tshihehele, udi uvudisha mputa yanyi tshiyi ne bualu. Kena witabusha bua meme kueyela, kadi udi ûsha mutshima wanyi tente ne bululu. Bituakula bua bukole, monai, yeye udi muhite bukole! Bituakula bua kulumbulula kuakane, yeye udi wamba ne, Wambikila nganyi? Bingikala mubinge, mukana mua nyi nemumpishe; bingikala muakane, nemungambile ne, Udi ne bualu bubi. Meme muakane! Tshiena mua kudimanya nkayanyi; muoyo wanyi udi untondesha. Malu au onso adi muomumue kundi—nunku ndi ngamba ne, Yeye udi ushiha bantu bakane ne bantu babi. Biashiha tshihuhu bantu lubilu, yeye udi useka bua dikenga dikole dia bantu badi kabayi ne tshilumbu. Buloba budi bufidibua mu bianza bia bantu babi; yeye udi ubuikila mesu a balumbuluishi babu. Bikaleye kayi wenza nunku,— udi wenza bualu ebu nganyi? Matuku anyi adi ahita luendu lua messager lubilu, adi anyema lubilu, kaena atangila diakalengele. Adi ahita bu mudi matu a ntuhu enda, bu nyunyu wa mukanku udi wauka ha tshintu tshia kubakuleye. Bingamba ne, Nempue meji adi annyingalasha muoyo, nendekele kubungama kuanyi, nengikale ne disanka, ndi ntshina makenga anyi onso, ndi mumanye ne, Wewe kuena umbingisha. Nempishibue; nunku ndi ukuata mudimu hatuhu bua tshinyi? Binowa ne neige, binatokesha bianza bianyi ne binshindimba, wewe neungele mu mutubu wa bintampi kabidi, ne bivualu bianyi mene nebindengulule. Bualu bua yeye kena muntu bu meme bua meme kumukudimuna dî, bua tuetu kulua hamue mu tshilumbuluidi. Kakuena musungi hankatshi betu udi mua kutulenga bubidi buetu tshianza. Umushe biandi mulangala wandi kundi, ne buowa buandi kabuntshinyishi; hashishe, nakadi kuakula ne tshia kadi kumutshina, bualu bua tshiena bu muntu ngikala. Mutshima wanyi wakutondeshibua bua muoyo wanyi; nengambe meji adi annyingalasha hatoke tô, nengambe dî mu kanyinganyinga ka mutshima wanyi. Nengambile Nzambi ne, Kumpishi nansha; undeshe bualu butudi tufuila nʼebe. Bidi bimpe ku mesu kuebe bua wewe kunkengesha, bua wewe kubenga mudimu wa bianza biebe, ne bua wewe kutemesha munya webe ku meji a bantu babi, anyi? Wewe udi ne mesu bu a muntu wa ha buloba, anyi? Udi umona bu mudi bantu bamona, anyi? Matuku ebe adi bu matuku a muntu, anyi? Bidimu biebe bidi bu matuku a muntu, anyi? Bua wewe udi ukeba kumanya malu adi ampisha, ne udi ukeba kumanya bubi buanyi, kadi wewe udi mumanye ne, Tshiena muntu mubi; ne kakuena muntu udi mumanye mua kunsungila mu tshianza tshiebe. Bianza biebe biakanfuka ne biakangenza mundi emu, ne wewe udi musue kunshiha. Ndi nkutendekena ne, Uvuluke ne, Wewe wakasumba bu dima; neampingishe mu dinfuenkenya dia buloba kabidi, anyi? Kuakampongolola bu mabele, anyi? Kuakankuatakasha bu fromage, anyi? Wakangasa dikoba ne munyinyi, wakansuikakasha ne mifuba ne mifungu. Wewe wakumpa muoyo ne wakundesha luse lujalame, ne bulami buebe buakulama muoyo wanyi; kadi wewe wakadi usokoka malu â mu mutshima webe. Ndi mumanye ne, Bualu buanyi ebu buakadi mu mutshima webe ne, Bingenza bualu bubi, wewe neuntangile talalâ, ne kuena umbingisha ku bubi buanyi. Bingikala ne bubi, ndi ne mulau; nansha bingikala muakane, tshiena mbisha mutu wanyi, bualu bua nakûshibua tente ne bundu handi ntangila makenga anyi. Bingikala ne bukitu bua kubisha mutu wanyi, wewe neunkebe bu mudi nyama wa ntambue wenza; neangenzele malu manene a kukema kabidi. Udi ubisha bamonyi bahia-bahia bua bobo kumbanda, udi ukumbasha tshiji tshiebe kundi, udi uvuisha bisumbu bihia-bihia bia makenga hamʼbidi hanyi. Wakampatula munda mua mamu wanyi bua tshinyi? Nakadi kuhuola muoyo, ne disu dia muntu kadiakadi kuntangila. Nakadi kuikala bu munakadi tshidiku; bakadi kungangata munda mua mamu wanyi bantuale tô ne ku lukita. Matuku a muoyo wanyi kaena manya-manya, anyi? Yeye anji kundekela tshituha, yeye anji kumuka kundi, bua meme ngikale ne busambi bukese, diambedi tshiyi muanji kuya kundi tshiyi mua kuhingana kabidi, ku buloba bua mîdima ne bua mundidimbi wa lufu. Budi buloba budi ne mufitu bu midima mikole, bua mundidimbi wa lufu ne bua kutompakasha kua malu, kudi munya bu midima mikole. Hashishe, Sofâ, Muena Namata, wakakudimuna Yobo ne, Katuena ne bua kuitaba kudi muena mei a bungi, anyi? Nebabingishe muntu udi utamba kuakula, anyi? Kufunafuna kuebe kudi kumanya mua kuhuwisha bantu, anyi? Hawaseka Nzambi, kakuena muntu udi ukufuisha bundu, anyi? Bua wewe udi wamba ne, Diyisha dianyi didi diakane, ne ndi ne mutshima mutoke ku mesu kuebe. Kadi nakadi kusua bua Nzambi ambe dî diandi, ne abutule mukana muandi bua kukutuisha, ne bua yeye akuleshe malu masokoka a mu meji andi! Bualu bua yeye udi ne lungenyi lule, umanye biebe ne, Nzambi kena ukumbasha dikenga diebe bu mudi bubi buebe. Wewe udi mumanye mua kumona ndekelu wa ndondo wa malu a Nzambi, anyi? Neumanye mua kufika ku nshikidilu wa meji a Wa Bukole Buonso, anyi? Adi ahita diulu bule, udi mua kuenza tshinyi? Adi atamba Muaba wa Bafue ku ndondo; udi mua kumanya tshinyi? Adi atamba buloba bule ku tshidikishilu tshiau, adi atamba mai manene bunene buau. Biahileye mu nshila, biakuateye muntu mu lukanu, biamubikileye ku tshilumbuluidi, wamuhumbisha nganyi? Bualu bua yeye udi mumanye bantu badi ne mashimi; udi umona malu mabi nansha bikaleye kayi wela meji a malu â. Kadi muntu udi kayi ne meji neahete lungenyi, anu biamanya muana wa nyama wa mpunda wa mu mpata mua kuledibua bu muntu. Biwafila mutshima webe kudi Nzambi, wolola bianza biebe kudiye. Bikala bualu bubi mu tshianza tshiebe, ubûmushe kule; kuitabushi bua malu mabi ikale mu ntenta webe. Hashishe, neumanye mua kubandisha mpala webe kayi ne tshilema bulelela, wewe neutantamane ne kuena utshina. Bualu bua tshihua muoyo netshikukuate bua dikenga diebe, neudivuluke anu bu mai mamane kuhueka. Muoyo webe neubike ne dinkenka dihite dia munda munya; nansha bikalaku mîdima, yoyi neyilue bu dinda. Newikale ne tshieyemenu, bualu bua ditekemena didiku; neutentekele miaba yonso diambedi, hashishe, newikishe talalâ. Neumanye mua kulala hanshi, kakuyi muntu wa kukutshinyisha; e, ba bungi nebakebe diakalengele kûdi. Kadi mesu a bantu babi nealue bitayitayi; tshinyemenu tshiabo netshijimme ku mpala kuabo, ne ditekemena diabo nedikale anu kuhuola kua muoyo. Hashishe, Yobo wakakudimuna Sofâ ne, Kakuena mpata mu bualu ebu ne, Nuenu nudi bukua bantu, ne meji neafue nʼenu diatshimue! Kadi meme ndi ne lungenyi bu munudi nʼalu; lungenyi luanyi kaluena lushadila ku luenu; bulelela, muntu kai udi kayi mumanye malu anudi nuamba? Nakulua bu muntu udibo basekaseka kudi muena mutumba nʼandi, meme mene nguakubikila Nzambi, ne yeye wakitaba kundi. Muntu muakane, muntu muakane tshishiki, wakulua tshintu tshia bantu kuseka! Muntu udi kayi ne ntatu udi uhetula muntu udi ututa dikasa dibi; dihetu diandi didi dialamina badi ne makasa amba kuselemuka. Ntenta ya banyengi ba bintu idi anu ne diakalengele, ne badi bakuatshisha Nzambi tshiji badi bashikama talalâ, nansha yonso mulue ne nzambi wandi mu tshianza tshiandi. Kadi ukonke nyama mene, ne yoyi neyikuyishe; ukonke nyunyu ya mulu ne yoyi neyikuambile; anyi akule ne buloba, ne buobu nebukuyishe; ne minyinyi ya mu mai manene neyikuambile dî. Muntu kai udi kayi mumanye bintu ebi bionso ne, Tshianza tshia Yehowa tshiakenza bualu ebu, ne mu tshianza tshiandi mudi muoyo wa bintu bionso bidi ne muoyo ne muhuya wa bukua bantu bonso? Ditshu kadiena diteta mei, bu mudi ludimi lulabula bia kudia bialu, anyi? Meji adi kudi bantu bakoke, ne dijingulula dia malu didi kudi badi ne matuku a bungi. Kudi Nzambi kudi meji ne bukole; yeye udi ne lungenyi ne dijingulula dia malu. Yeye udi usasula ne kabena ba manye mua kuibaka kabidi; udi winshidila muntu mu nsubu wa lukanu ne kakuena disoso dia yeye kuhatukila. Monai, yeye udi ukanda mai a mbila, ne mai adi akama; udi watuma kabidi, ne adi abumbula buloba. Kudi yeye kudi bukole ne meji makane; muhambuki ne muhambuishi badi mu bianza biandi. Yeye udi utuma bena meji mu buhika butaka, udi uvuisha balumbuluishi bu bahote. Udi usulula nkanu idi banfumu basuika nʼai bakuabo, udi ubasuika mikaba mu bifuka. Udi utuma bakuidi mu buhika butaka, udi ubutula bantu badi ne bukole. Udi ukanda mei a ku mishiku ya badibo beyemena, udi unyenga bakulumpe lungenyi. Udi ulengulula bakokeshi, udi usulula mukaba wa bantu bakole. Udi usokolola malu adi masokoma mu mîdima, udi uhatula mufitu mufike fitutû bua kumuenekau mu munya. Udi uvuisha bisamba bia bantu binene, ne udi ubishiha; udi ulehesha mikalu ya bisamba bia bantu, ne udi ubituma mu buhika. Udi unyenga lungenyi lua bakelenge ba bantu ba ha buloba, udi ubendesha mu tshihela mudi kamuyi nshila. Badi benda babubuta mu mîdima kabayi ne muinda, udi ubendesha bu bakuatshila ba maluvu. Monai, mesu anyi akumona malu â onso, matshu anyi akûnvua ne akuajingulula. Malu anudi bamanye meme ndi muamanye kabidi; lungenyi luanyi kaluena lushadila ku luenu. Kadi ndi musue kuakula ne Wa Bukole Buonso, ndi musue kuyikilangana ne Nzambi bualu buanyi. Kadi nuenu nudi bafuki ba malu a mashimi, buonso buenu nudi bondahi ba hatuhu. Nakadi kusua bua nuenu kuhuwa talalâ, ne bua kuhuwa kuenu kuikale bu lungenyi luenu. Nunku, unvuai mei andi nnubela nʼau, telejai matshu ku disengelela dia ku mishiku yanyi. Nudi basue kuakuila Nzambi ne mei adi kâyi makane, anyi? Nudi basue kuamba mei a mashimi bua bualu buandi, anyi? Nudi basue kumunemeka ne kundesha meme kansungusungu, anyi? Nudi basue kuakuila Nzambi, anyi? Bidi bimpe bua yeye anukebekebe, anyi? Nenumanye mua kumudinga bu mudi muntu udinga mukuabo, anyi? Yeye neanubele bikole, binuikala ne kansungusungu mu musokoko. Butumbi buandi kabuena bunutshinyisha, anyi? Buowa bua bualu buandi kabuena bunukuata, anyi? Nsumuinu yenu idi anu nsumuinu ya butue, mei anudi nudividila nʼau adi anu bu ngabu ya dima. Nuanji kutulesha, nundekele bua meme ngakule bianyi; bualu budi busue kunkuata bunkuate. Kakuena bualu; nensume munyinyi wanyi ku menu anyi, nenteke muoyo wanyi mu tshianza tshianyi. Monai, yeye neanshihe; tshiena ne ditekemena; kadi nennanukile kudijidila ku mesu kuandi bua bienzedi bianyi. Kadi bualu ebu nebuikale luhandu luanyi ne, Muntu udi ubenga Nzambi kena ne bukitu bua kulua ku mpala kuandi. Unvuai dî dianyi bimpe, mei andi ngamba abuele mu matshu enu. Tangilai mpindiu ne, Nakuteka tshilumbu tshianyi ku mpala kuandi; ndi mumanye ne, Nembingishibue. Nganyi udi mua kuelangana nʼanyi mpata? Nunku nakadi kuhuwa talalâ ne kuhuola muoyo. Kuandi kungenzela malu abidi, nunku tshiena nsokoma ku mesu kuebe; umushe tshianza tshiebe namʼbidi hanyi; tshikuatshiki buowa bua bualu buebe. Hashishe, umbikile, ne meme nengitabe kudi, anyi meme ngambe dî dianyi, ne wewe witabe kundi. Mibi yanyi ne malu mabi anyi bidi bungi munyi? Ummanyishe ditomboka dianyi ne bualu bubi buanyi. Bualu kai wewe udi usokoka mpala webe kundi, ne udi umbala bu muena lukuna webe? Udi musue kuzakasha dibeshi didi luhehele lumane kunyungisha, anyi? Newihate bisonsa biume, anyi? Bualu bua wewe udi ufunda malu makole bua kumbanda nʼau, ne udi umpingishila makenga bua malu mabi anakadi nʼau ku bunsongalume buanyi. Udi ubuesha makasa anyi mu tshikunyi, udi utentekela nshila yanyi yonso; udi ufunda mukalu ku makasa anyi; kadi meme ndi bu tshintu tshibole tshidi tshinyanguke, bu tshilulu tshidi tubayibayi tumane kudia. Muntu udi muledibue kudi mukashi udi ne matuku makese a muoyo wandi ne udi mûle tente ne ntatu. Udi umena bu tshilongo ne udi ufubidila, udi uhita lubilu bu mundidimbi ne kena ushalaku. Udi ubulula mesu ebe kudi muntu wa nunku, udi umbikila ku mpala kuebe bua kulumbulula nʼebe, anyi? Udi mua kuhatula tshintu tshia kane ku tshintu tshidi katshiyi tshiakane nganyi? Kakuena muntu. Bikala matuku a muntu mamane kuhangidisha, bikala bungi bua ngondo yandi mu bianza biebe; biwikala mujadike mikalu yandi bua yeye kayisambuki, anji kumusha mesu ebe kudiye bua yeye amanye mua kuikisha biandi, tô ne hamanyeye mua kusanka kundekelu kua dituku diandi, bu mudi muena mudimu wa difutu usanka. Bualu bua badi bamanye mua kutekemena mutshi ne, Biakatulabo kuinshi, neusangile kabidi, ne ntonga yau kayena ilekela kusangila. Biafubidila muji wau mu buloba, biafua tshikuku tshiau mu buloba, hashishe, hunvuau mai, newele bilongo, neusampile ntonga bu mutshi utshidi mutekete. Kadi muntu udi ufua ne bukole buandi budi bujimina; e, muntu udi uhuola muoyo wandi, hashishe, udi kudi kunyi? Bu mudi mai a mu dishiha akama, ne bu mudi musulu ûma ne ukamuka, nunku muntu udi ulala hanshi kena ubika kabidi; tô ne hajimina diulu kabena batabala, kabena ba bahisha ku tulu tuabo. Nakadi kusua bua wewe unsokoke mu Muaba wa Bafue, bua wewe unsokoke to ne bumuka tshiji tshiebe, bua wewe unsunguile tshikondo tshijalame ne bua wewe unvuluke! Biafua muntu, neikale ne muoyo kabidi, anyi? Nakadi kuindila matuku onso a tshikondo tshianyi tshia kuluangana nvita, tô ne hakadi kulua tshikondo tshia kundekela. Wewe wakadi ku mbikila ne meme nakadi kuitaba kûdi, wewe wakadi kunjinga, meme mudimu wa bianza biebe. Kadi katataka wewe udi ubala bungi bua biendedi bianyi; kuena utentekela bualu bubi buanyi, anyi? Dihanga dianyi didi disuikibua mu mpaya, ne wewe udi ubuwa bubi buanyi. Kadi biuhuka mukuna mule, udi ujimina hatuhu; ne dibue didi diumuka mu muaba wadi. Mai adi aheula mabue; kuhasalala kua mai kudi kumusha dinfuenkenya dia buloba; wewe udi ujimisha ditekemena dia bantu muomumue. Wewe udi umutamba bukole misangu yonso ne yeye udi ujimina; wewe udi ukudimuna mpala wandi ne udi umuihata. Bana bandi badi baheta butumbi, kadi yeye kena mumanye bualu ebu; badi bahuekeshibua, kadi yeye kena ubamona. Kadi mubidi wandi udi unvua dikenga anu bua bualu buandi nkayandi, ne mutshima wandi udi unyingalala anu bua bualu buandi mene. Hashishe, Elifaza, Muena Temana, wakakudimuna Yobo ne, Bidi bimpe bua muena meji itabe ne lungenyi lua hatuhu, anyi? Bidi bimpe bua yeye adiûshe tente ne luhehele lua ku esete, anyi? Bidi bimpe bua yeye kuelangana mpata ne muaku udi kauyi mua kukuatshisha mukuabo, ne mei adiye kayi mumanye mua kuenza nʼau bimpe, anyi? Wewe mene udi uvuisha ditshina dietu dia Nzambi bu muanda wa hatuhu, ne udi ukanda muntu bua kutendelela Nzambi mu mutshima wandi. Bualu bua bubi buebe budi buyisha mukana muebe, ne wewe udi udisunguila ludimi lua muena budimu. Mukana muebe mudi mukuhisha, kemmeme; ne mishiku yebe idi ikubanda. Wewe mene wakadi muntu wa kumudilu wakalelabo, anyi? Bakakulela diambedi mikuna kayiyi mianze kufukibua, anyi? Wewe udi uteleja matshu ebe ku tshifufu tshidi Nzambi wela, anyi? Wewe udi ubala bakuabo meji bua kuikala nʼau nkayebe, anyi? Wewe udi mumanye bualu kai butudi katuyi bamanye? Udi ujingulula bualu kai budi kabuyi bumanyibue kutudi? Munkatshi muetu mudi badi ne nvî mitoke tô ne banunu bahite tatu webe bununu ku bungi bua matuku abo. Busambi bua Nzambi budi buta mba bukese kûdi, anyi? Dî dituakuakulangana nʼebe dia luse didi bualu bukese kûdi, anyi? Bualu kai tshiji tshia mutshima webe tshidi tshikuata bukole? Mesu ebe adi abajakana ne tshiji munyi, bua wewe udi utekela Nzambi tshiji tshiebe ne udi uhatula mei a nunku mukana muebe? Muntu udi tshinyi bua yeye ikale ne mutshima mutoke, ne bua muntu muledibue kudi mukashi ikale muakane? Tangila mudi Nzambi kayi weyemena bandi ba tshijila, ne diulu kadiena ditoke tô ku mesu kuandi; ke mudi muntu udi umutondesha udi munyanguke, udi unua malu mabi bu mai, utamba kuhanga buakane. Nenkuleshe malu, unvua dî dianyi; nenkuambile malu anakutangila bianyi; malu mene adi bena meji bamba, akunvuabo kudi batatu babo, kabakuasokoka; buloba buakafidibua kudibo nkayabo, ne kakuakadi muntu wa bende wakahita munkatshi muabo. Muntu mubi udi ukenga ne didinyenga matuku andi onso, ne badi batekela mukengeshi wa bantu anu bidimu bidibo bamubadila. Tshiona tshia malu adi amukuatshisha buowa tshidi mu matshu andi; hadiye mushikame talalâ, mushihianganyi udi ulua kumubunda. Yeye kena witabusha ne, Nempanduke kabidi mu mîdima; badi bamuindila bua kufueye ku muele wa nvita. Udi wendakana ukeba bia kudia, ukonka ne, Bidi kudi kunyi? Udi mumanye ne dituku dia midima didi dimuindila. Dikenga ne kanyinganyinga bidi bimutshinyisha; bidi bimuhita bukole bu mukelenge mudilongolole bua kuluangana nvita. Bualu bua wakuolola tshianza tshiandi bua kutombokela Nzambi, ne udi udifunyisha kudi Wa Bukole Buonso. Udi uya kuluangana nʼandi muinyike mutu, mutekemene ngabu yandi ya bukole. Bualu bua matama andi akulua mafuta, ne milemba yandi yakudiunda ne mafuta hamʼbidi hai. Wakushikama mu misoko yakubutulabo, mu nsubu idi kayiyi mimpe bua muntu kushikama, yakadi yamba kulua mishiki ya mabue. Yeye kena wikala mubanji, ne biuma biandi kabiena bishala kudiye; ne miehu ya bia kudia biandi kayena inama mu buloba. Yeye kena wehuka midima; ludimi lua kahia nelufubishe ntonga yandi; ku muhuya wa mukana mua Nzambi yeye neahehuke. Keyemenyi biandi malu a hatuhu, kadidingi biandi, bualu bua malu a hatuhu neikale difutu diandi. Nebamufute difutu diandi dionso diambedi dituku diandi kadiyi dianze kufika, ne dilala diandi dia dibue kadiena dishala dibishi kabidi. Neanyange tumuma tuandi tua nvinyo tubishi, bu mudi muonshi watu wenza, neamatshishe tshilongo tshiandi hanshi bu mudi mutshi wa olive wenza. Bualu bua tshisumbu tshia babengi ba Nzambi katshiena tshitanta, ne kahia nekashidishe ntenta ya bena mbueshilu. Badi bimita ntatu, badi balela makenga, ne mitshima yabo idi ibalongoluela kudinga. Hashishe, Yobo wakakudimuna Elifaza ne, Nakunvua malu a bungi bu nunku, nudi basambi badi bantatshisha, buonso buenu! Mei a hatuhu adi ne nshikidilu, anyi? Bualu kai budi bukufikisha munda bua wewe udi witaba? Meme kabidi nakadi kumanya mua kuakula bu munudi nuakula, bu nuenu bikale mu muaba wanyi. Nakadi mua kubambakasha nʼenu mei bua kunudiula, nakadi mua kunukuhila mutu wanyi. Nakadi mua kukolesha mitshima yenu ne mei a mukana muanyi, ne busambi bua ku mishiku yanyi buakadi kunuholesha. Bingamba di, kanyinganyinga kanyi kakena kaholeshibua; binahuwa bianyi, nekumuke kundi, anyi? Kadi mpindiu yeye wakuntekesha, wewe wakubutula bonso banakadi nʼabo. Wewe wakunshinguisha; muanda eu wakulua dibandibua dianyi; dinyana dianyi didi dibika bua kunkanda, didi dimbanda ku mesu kuanyi. Tshiji tshiandi tshiakumpanda ne tshiakunduisha, yeye wakundiangena menu andi, muena lukuna wanyi wakuntshika mesu andi bikole. Bakela miau bua bualu buanyi; bakuntaha mahi ku matama hakumpetulabo; badi badisangisha hamue bua kungelela tshifufu. Nzambi udi unfila mu bianza bia bantu babi, udi umbuesha mu bianza bia benji ba malu mabi. Nakadi nshikama talalâ, kadi yeye wakuntshibula bituha bituha. Wakunkuata ku nshingu, wakunkanda bihesa. Wakungimanyika bu tshimanyinu tshiandi tshia kuasaku mikete. Mikete yandi idi innyunguluka nseke yonso. Udi uhanda tumuma tua tuonyi tuanyi hankatshi, kayi unfuila luse. Udi uhumuna nyongangandu wanyi hanshi ha buloba. Udi untaha mputa mu miaba yonso, udi ulua kundi lubilu bu mudi umena bukitu. Nakuditelela bilulu bikayabala bindi nduata hamʼbidi hanyi, nakuladika lusengu luanyi mu buloba. Mpala wanyi wakulua mukunzekunzû bualu bua kudila kuanyi, ne ha bilafinyi bianyi hadi mundidimbi ya lufu. Kadi kakuena bienzedi bia tshimbambila ku bianza bianyi, kulomba kuanyi kakuena ne lubombo. Wewe buloba, kubuikidi mashi anyi, muadi wanyi kausanganyi muaba wa kuhuwilau talalâ! Kadi mpindiu mene, monai, mumonyi wa bualu buanyi udi mu diulu, ne mujadiki wa dî dianyi udi mulu kabidi. Balunda banyi badi bambuidia; kadi mesu anyi adi ahumuina Nzambi binsonshi, bua yeye ajadike buakane bua muntu mu tshilumbu tshiandi ne Nzambi, ne buakane bua muntu mu tshilumbu tshiandi ne muena mutumba nʼandi. Bualu bua hahita bidimu bikese, nenye bianyi mu nshila undi tshiyi mua kuhingana kabidi. Muoyo wanyi wakubutuka, matuku anyi adi ahuwa; lukita ludi lungalamina. Bulelela, banseki badi ha buihi nʼanyi, ne disu dianyi ditu diamona ditatshisha diabo. Mpindiu ungeyeke tshieya, wikale mueyeki wa tshieya bua bualu buetu nʼebe, nganyi watutakasha nʼanyi bianza bua kuhunga tshihungidi? Bualu bua wewe wakubuikila mitshima yabo bua kabikadi ne lungenyi, nunku wewe kuena witabusha bua bobo bahite bukole. Muntu udi unyoka balunda bandi bua tshituha tshia bintu, mesu a bana bandi mene neahange. Yeye wakunvuisha bu lusumuinu lua bantu kuelabo, ndi bu muntu udibo batuila lute ku mesu. Mesu anyi akulua bitayitayi bualu bua kanyinganyinga, ne bituha bianyi bionso bia mubidi bidi bu mundidimbi. Bantu bakane badi bakema bua muanda eu, muntu udi kayi ne tshilumbu udi ujuka bua kukanda bantu babi. Kadi muntu muakane neananukile kuenda mu nshila wandi, ne udi ne bianza bitoke neadiundediunde mu bukole buandi. Kadi buonso buenu hinganai kabidi ku mei enu a diambedi! Tshiena nsangana muena meji munkatshi muenu. Matuku anyi akumana kuhita; malu anakuhangidisha mu mutshima akulua tshianana, meji mene a mu mutshima wanyi. Badi bandamuna butuku bua kuikalabu munya, badi bamba ne, Munya udi hehi, hamba butuku kuila. Binatekemena ne, Muaba wa Bafue newikale nsubu wanyi, binalongolola bulalu buanyi mu midima, bingambila Dijimba dia Bafue ne, Wewe udi tatu wanyi; bingambila tshikusu ne, Wewe mmamu wanyi ne muanʼetu wa bakashi; ditekemena dianyi didi kudi kunyi? Muntu kai neamone ditekemena dianyi? Neuhueke nʼanyi tô ne ku bibi bia ku Muaba wa Bafue, anyi? Netuhueke nʼabi mu buloba hohamue, anyi? Hashishe, Biledada, Muena Shuhi, wakakudimuna Yobo ne, Neukebe mei a kuamba musangu bule bishi? Wele meji, hashishe nenyikile. Bualu kai wewe udi utubala bu nyama? Bualu kai ludi bu batshimbakanyi ku mesu kuebe? Wewe udi udituanya mu tshiji tshiebe, buloba nebushale tshianana kabuyi ne bantu bua bualu buebe, anyi? Anyi dibue nediumushibue mu muaba wadi, anyi? Bulelela, muinda wa bantu babi neujime, ne ludimi lua kahia kandi kaluena lukenka. Munya neulue mîdima mu ntenta wandi, ne muinda wa mulu mua nsubu wandi neujime. Biendedi bia bukole buandi nebibumbakane, ne meji adiye uhangidisha neamulenduishe. Bualu bua makasa andi mene neamubueshe mu bukuondo, nênde ha mutu ha dijimba. Buteyi nebumukuate ku tshikankanyi; neahie ku disoka. Badi bamusokokela disoka mu buloba bua kumukuata nʼadi, badi bamuteya ne buteyi bua tshilamba mu nshila wandi. Malu a buowa adi amutshinyisha ku nseke yonso, adi amulonda ku nyima, adi amuihata. Nzala neidie bukole buandi buonso, dibutuka nedimuindile mu nshila. Disama nedidie dikoba diandi; muanʼa bute wa lufu neadie hidimba biandi. Nebamuhatule mu ntenta wandi wakadiye weyemena, nebalue nʼandi ku mpala kua mukelenge udi ukuatshisha buowa. Mu ntenta wandi nemuikale bintu bidi kabiyi biandi, nebamuangalashe soufre mu muaba wakadiye ushikama. Miji yandi neyume muinshi, nebahempe matamba andi kulu. Tshivulukidi tshia bualu buandi netshijimine ha buloba, dina diandi kadiena dimanyibue mu ditunga. Nebamuihate mu munya bua kuyeye mu mîdima, nebamuihate ha buloba. Yeye kena ne muana anyi kankanunuina munkatshi mua bantu bandi, kakuena muntu washala ne muoyo mu miaba yakadiye ushikama. Badi bamulonda nebakeme bua dituku diandi dia lufu, bakadianjila ku mpala kuandi nebakuatshike buowa bukole. Bulelela, ebu mbualu budi bukuata nsubu ya bantu babi, eu mmuaba wa muntu udi kayi mumanye Nzambi. Hashishe, Yobo wakandamuna ne, Musangu bule munyi nenunyingalashe mutshima wanyi, nenuntshibule bituha bituha ne mei enu? Misangu ei dikumi nuakumana kumbela; kanuena ne bundu bualu bua nudi nungenzela bibi. Bingikala muhange bulelela, dihanga dianyi didi dishala kundi nkayanyi. Binuadibandisha ku mpala kuanyi bulelela, binuakeba kuntuisha bua bundu bundi nʼabu, nuamanya bienu ne, Nzambi wakutamba bukole, wakunnyunguluka ne bukuondo buandi. Monai, ndi ngela dî dikole ne, Badi bakeba kunshiha, kadi kabena bunvua dî dianyi; ndi ngela di dikole ne, Unkuatshishe, kadi kulumbulula kuakane kakuenaku. Yeye wakuasa luhangu lunyunguluka nshila wanyi bua meme tshihitshi; udi uteka mîdima mu nshila yanyi. Wakunvula butumbi buanyi, wakangumusha tshifulu tshia bukelenge ku mutu kuanyi. Wakalubutula ne bujima buanyi, nakamana kufua; wakutula ditekemena dianyi bu mudibo bajomona mutshi. Wakatemesha tshiji tshiandi kundi, udi umbala bu muena lukuna wandi. Misumba ya masalayi andi adi alua hamue, adi ela mushiki wa buloba bua kutshintshimika, adi anyunguluka ntenta wanyi ne bitudilu biabo. Wakûmusha bana betu kundi, balunda banyi bonso bakulua bu bantu ba bende kundi. Ba mu diku dianyi bakumpanga, bantu bakadi bammanye bimpe bakumana kumpua muoyo. Badi bashikame mu nsubu muanyi ne bakashi benji ba mudimu wanyi badi bambala bu muenyi; ndi bu muntu wa bende ku mesu kuabo. Binabikila muena mudimu wanyi, kena witaba kundi nansha; bundi nʼabu mbua kumusengelela ne mukana muanyi. Muhuya wa mukana muanyi udi ulonda mukashi wanyi, ndi ntonda kabidi bana betu ba difu dimue. Bana bakese mene badi bampetula; binajuka, badi bampenda. Bantu bonso banakeyemena badi bandengulula, banakunanga bakungela nyima. Mifuba yanyi idi ilamatangana ne dikoba dianyi ne munyinyi wanyi, nakuhanduka anu ne nyama ya mu menu. Nunfuile luse, nuenu balunda banyi; nunfuile luse; bualu bua tshianza tshia Nzambi tshiakundenga. Bualu kai nudi basue kundonda ne kunkengesha bu mudi Nzambi wenza, kanuena banze kukuta munyinyi wanyi? Nakadi kusua bua bafunde mei anyi! Nakadi kusua bua bâfunde mu mukanda muvunga! Nakadi kusua bua mei â asongibue ha dibue tshiendelele ku tshiamu tshia kusonga nʼatshi maleta, ne ku tshiamu tshia lutende! Kadi meme hanyi ndi mumanye ne, Muakudi wanyi udi ne muoyo; ne mu matuku a kunshikidilu yeye neimane ha buloba. Habutuka dikoba dianyi, hashishe, tshiyi ne mubidi wanyi, nemmonangane ne Nzambi. Meme mene nemmumone nkayanyi, ne mesu anyi neamumone yeye mene, kayi bu muenyi kundi. Mutshima wanyi udi mule tente ne dijinga dia bualu ebu! Binuamba ne, Monai bu mutulualua kumukengesha! Binuamba ne, Bualu bua muji wa bualu bua makenga andi udi umueneka munda muandi! Nutshine bienu muele wa nvita: bualu bua tshiji tshikole tshia Nzambi tshidi tshivuisha makengesha adi alua ku muele wa nvita, bua nuenu numanye ne, Kulumbulula kudiku. Hashishe, Sofâ, Muena Nâmata, wakakudimuna Yobo ne, Bua mei â meji anyi adi ampesha diandamuna kûdi; bua muanda eu ndi musue kuamba dî lukasa. Nakunvua kumbela eku kudi kunfuisha bundu; kadi mutshima wanyi udi ukudimuna dî bu mudi dijingulula dianyi. Kuena mumanye bualu ebu bua kale, katshia bateka muntu ha buloba, ne, Kutumba kua muenji wa malu mabi kudiku anu musangu muihi, ne disanka dia badi bahidia Nzambi didiku anu tshituha tshia diba? Nansha biafikeye tô ne mu diulu, nansha mutu wandi mulenge matutu, hashishe, yeye neafue tshiendelele bu mudi tunvi tuandi tujimine; bakamumona diambedi nebakonke ne. Udi kudi kunyi? Neaye biandi lubilu bu mudi tshilota tshihita, kabena bamusangana kabidi. E, nebamuihate bu mudi tshikena kumona tshijimina butuku. Disu diakamumona kadiena dimumona kabidi, ne muaba wandi kawena umumona kabidi. Bana bandi nebakebe diakalengele kudi bahele, ne bianza biandi nebihingishe biuma biandi biakanyengeye. Mifuba yandi idi miule tente ne bukole bua bunsongalume buandi, kadi buobu nebulale nʼandi mu buloba. Nansha biashemakana malu mabi mukana muandi, nansha biâsokokeye muinshi mua ludimi luandi; nansha biânangeye bimpe ne kayi witabusha bua kualekela, kadi biashaleye nʼau mukana muandi, hashishe, bia kudia bia munda muandi bidi bikudimuka, bidi bilua lulengu lua nyoka ya mbanvu munda muandi. Yeye udi umina biuma, ne udi ubiluka kabidi; Nzambi udi ubihatula mu difu diandi. Udi unua lulengu lua nyoka ya mbanvu; ludimi lua nyoka wa ntoka ludi lumushiha. Kena umona misulu, misulu idi miule tente ne buitshi ne manteke. Neahingishe bintu biakakuatshileye mudimu bua kubiheta, ne kena mua kubimina; kena usanka bua bungi bua luhetu ludiye wangata ku kuenduluka kuandi kua mushinga. Bualu bua wakukengesha bahele ne wakubashiya hatuhu, wakunyenga nsubu ku bukole udiye kayi muibake. Bualu bua kakunvua ditalala munda muandi, kena mumanye mua kusungila tshintu tshia mu bintu bidiye mutambe kusua. Kakuakadi tshintu tshimue tshiakadiye kayi udia bua lukuka luandi; nunku diakalengele kadiena dishala kudiye. Mu dikumbana dia bintu biandi yeye neakengele bintu; tshianza tshia muntu yonso udi mu dikenga netshimukengeshe. Hambeye kukuta, Nzambi neatemeshe tshiji tshiandi kudiye, neamuhumuinetshi bu bia kudia biandi. Neanyeme bua kuhanduka ku tshielelu tshia nvita tshia tshiamu tshifike, nebamuase mukete ne buta bua tshiamu tshia mitaku, mumusompoke. Udi uhatula mukete mu mubidi wandi, lusongo luau ludi luengelela ludi luhatuka mu kanyonga kandi; buowa bua lufu budi bunukuata. Mîdima mikole neyikale mu tshibutshilu tshiandi, kahia kadi muntu kayi mutemeshe nekamushidishe; nekabutule bintu bionso bidi bishala mu ntenta wandi. Diulu nedisokolole bubi buandi, buloba nebujuke bua kumuhisha. Bintu biakabutshileye mu nsubu muandi nebajimine; nebajimine mu dituku dia tshiji tshikole tshia Nzambi. Elu nduseke Iudi muntu mubi uhela kudi Nzambi, ne buhianyi budi Nzambi mumusunguile. Hashishe, Yobo wakakudimuna Sofâ ne, Telejai matshu enu ku dî dianyi bimpe, ne bua kuteleja kuenu kuikale bu busambi kundi. Itabusha ngakule, hanamana kuakula, wewe udi mua kunseka. Meme hanyi, ndi utontolola muntu, anyi? Tshiena mua kuzuka ne muoyo bua tshinyi? Nuntangile, nukeme, tekai bianza ku mishiku. Hanavuluka muanda eu, ndi ne dishina, buowa budi bunkuata. Bualu kai bantu babi badi bashala ne muoyo, balua banunu ne bikala ne bukole bua bungi? Bana bakalelabo ne tunkanunuma tuabo badi bajadikibua ku mesu kuabo ne badi ha buihi nʼabo, maminu abo adi enjibua nunku: ku mesu kuabo. Mu nsubu yabo mudi ditalala, kamuyi buowa, mulangala wa Nzambi kawena uyikuma. Mulume wabo wa ngombe udi wimitshisha mafu, kena uhanga; mukashi wabo wa ngombe udi ulela bana, kena utula difu. Badi balekela bana babo bakese bua bendakane bu tshisumbu tshia mikoko, ne bana bakalelabo badi baja maja. Badi bimba misambu ne mazele ne lunzenze, badi basanka helabo nshiba. Matuku abo onso adi ahita anu ne diakalengele, mu katuha kihi badi bahueka mu Muaba wa Bafue. Kadi badi bambila Nzambi ne, Umuka kutudi; katuena basue kumanya nshila yebe. Wa Bukole Buonso udi tshinyi, bua tuetu kumukuatshila mudimu? Bidi bitukuatshisha munyi bua tuetu kumutendelela? Tangilai, diakalengele diabo kadiena dilua kudibo ku bukole buabo, meji a bantu babi adi kule nʼanyi. Misangu bungi munyi idibo bajima muinda wa bantu babi, anyi makenga adi afika kudibo anyi Nzambi udi ubatahuluila ntatu mu tshiji tshiandi? Misangu ya bungi idibo bu bisonsa ku luhehele, ne bu bisote bidi nvunde uhehula? Nudi nuamba ne, Nzambi udi ukengesha bana ba muntu mubi bua bubi bua tatu wabo; mbimpe akengeshe muntu eu nkayandi, bua yeye amanye mua kunvua dikenga bu mudidi. Mesu andi mene amone kubutuka kuandi, yeye mene anue tshiji tshikole tshia Wa Bukole Buonso. Bua yeye udi ne disanka kai kudi ba mu nsubu muandi badi bashala ku nyima kuandi hashika ngondo yandi ha buloba? Muntu neamanye mua kuyisha Nzambi lungenyi, anyi, yeye ngudi ulumbuluisha ba mu diulu? Muntu udi ufua hashika bukole buandi, kayi ne lutatu, muikale ne ditalala. Mpanza yandi idi miule tente ne mabele, ne buongo bua mu mifuba yandi butshidi buhishi. Mukuabo udi ufua ne mutshima unyingalala bikole, kayi muanze kuheta tshintu tshimpe nansha musangu umue. Bubidi buabo badi balala mu buloba muomumue, ne bikusu bidi bibadia. Bushuwa, ndi mumanye meji enu, ne meji a budimu anudi nʼau munda muenu bua kungenzela bibi. Bualu bua nudi nuamba ne. Nsubu wa mukokeshi udi kudi kunyi? Ntenta wakadi bantu babi bashikame udi kudi kunyi? Kanuakukonka bahitshi ba mu nshila, anyi? Kanuena bamanye bifuanyikishi bidibo banulesha bua bualu ebu ne, Badi basungila muntu mubi dituku dia dikenga, ne badi bahehula dituku dia tshiji tshikole, anyi? Muntu kai wamubela ku mesu kuandi bua bienzedi biandi? Muntu kai wamufuta bua malu akenzeye? Badi baya nʼandi ku lukita, ne banga bantu badi balama majambu andi. Mabuwa a mu tshibanda adi amusankisha, ne bantu bonso badi bamulonda, bu muakenzabo kudi bakuabo ku mpala kuandi badi kabayi mua kubadibua. Nunku nudi nukeba kunsamba ne mei a hatuhu munyi? Bualu bua mei anudi nunkudimuna adi anu mei a kundinga. Hashishe, Elifaza, Muena Temana, wakakudimuna Yobo ne, Muntu udi mua kukuatshisha Nzambi ne tshintu, anyi? Nansha; muntu udi ne meji udi udikuatshisha yeye nkayandi. Biwikala muakane bualu ebu budi bukuatshisha Wa Bukole Buonso, anyi? Biwenda ne mutshima mutoke, bualu ebu budi bumuhetesha tshintu, anyi? Yeye udi ukukengesha bualu bua wewe udi umutshina, ne udi ulumbulula nʼebe, anyi? Bubi buebe kabuena bunene, anyi? Kakuena kunfudilu kua malu mabi ebe. Bualu bua wewe udi witabusha bieya kudi bana benu hatuhu; udi uvula bilulu bia badi butaka. Kuena unuisha badi bahungila mai, ne udi uhala udi ne nzala bia kudia. Kadi muena diboko dikole wa kaheta buloba, ne muena butumbi wakadi ushikamamu. Wewe wakuhingisha bakashi ba mu lufuila kuabo ne bianza bituhu, maboko adi atuala bana ba nshiya akutshibuka. Nunku mateyi adi akunyunguluka, ne buowa budi bukukuata lubilu. Midima idi ikukuata, ne kuena mua kumona, ne mai mahite bungi adi akubuikila. Nzambi kena mulu mu diulu, anyi? Tangila mitoto idi mitambe kuikala mulu mule! Kadi wewe udi wamba ne, Nzambi udi mumanye tshinyi? Hadiye utangila mu midima mikole, yeye udi mua kulumbulula bilumbu, anyi? Matutu mafike adi amubuikila bua yeye kamonyi; udi wenzela anu ha mutu ha matutu a mu diulu. Wewe udi musue kunanukila kuenda mu nshila wa kale, wakadi bantu babi bendela, anyi? Bobo bakumushibua ha buloba diba diabo kadiyi dianze kufika, bishimikidi biabo biakashimbuka ne biakahumuka bu musulu wa mai. Bakambila Nzambi ne, Umuka kutudi; bakakonka ne, Wa Bukole Buonso udi mua kutuenzela tshinyi? Kadi yeye mene wakûsha nsubu yabo tente ne bintu bimpe. Kadi meji a bantu babi adi kule nʼanyi! Bantu bakane badi bamona malu â ne badi basanka, badi kabayi ne tshilumbu badi baseka bantu babi, bamba ne, Bushuwa, hakadi nʼetu lukuna bakubutuka, kahia kakushidisha bintu biabo bia bungi. Unvuangane biebe ne Nzambi, wikale ne ditalala; nunku diakalengele nedilue kûdi. Itabusha diyisha dia mukana muandi, buesha mei andi mu mutshima webe, Biwahingana kudi Wa Bukole Buonso, biadihuekesha, biûmusha malu adi kayi makane mu ntenta webe, biwela tshiamu tshia or ha buloba, biwela or wa ku Ofî munkatshi mua mabue a mu tusulu, Wa Bukole Buonso neikale tshiamu tshiebe tshia or ne tshiamu tshia argent tshia mushinga mukole kûdi. Mu diba adi neusanke mu Wa Bukole Buonso, neubishe mpala webe kudi Nzambi. Neumutendelele ne yeye neakunvuile, nushikishe mitshihu yebe. Neuhangidishe bualu, nebujalame bua bualu buebe; munya neutemene mu nshila yebe. Bualu bua Nzambi udi uhuekesha badi badibandisha, udi ubandisha udi ne mesu andi minama. Neabandishe muntu mene udi kayi mubingishibue, e, neanuhandishe bua butoke bua bianza biebe. Hashishe, Yobo wakakudimuna Elifaza ne, Lelu mene kutontolola kuanyi kutshidi bu kutomboka, tshianza tshianyi tshidi tshinemena bujitu handi ntua mikemu. Nakadi kusua kumanya kundi mua kusangakana nʼandi, ne bua meme kufika kudiye mushikame! Nakadi kuteka bualu buanyi buonso hatoke ku mpala kuandi, nakadi kûsha mukana muanyi ne mei a kulumbulula nʼau. Nakadi kusua kumanya mei adiye ungandamuna, ne kujingulula mei angambileye. Yeye wakadi kufuilangana nʼanyi mu bukole buandi bunene, anyi? Nansha; wakadi kungunvuila. Kuakua muntu muakane wakadi kumanya mua kutetangana nʼandi mei, ne meme nakadi kumanya mua kudibandisha kudi mulumbuluishi wanyi tshiendelele. Kadi ndi nya ku mpala, ne yeye kenaku; ndi ngalukila ku nyima, kadi tshiena mua kumumona. Ndi mmukeba ku luseke lua tshianza tshia bakashi, kadi tshiena mua kumumona; udi utshinguluka ku tshianza tshia balume ne tshiena mua kumumona. Kadi yeye udi mumanye nshila undi ngendela; ne hamaneye kunteta, nempatuke bu tshiamu tshia or. Dikasa dianyi diakulamata biendedi biandi; nakananukila kuenda mu nshila wandi, tshiakasesuka nansha. Tshiakulekela kutumikila mukenji wa ku mishiku yandi; nakubuta mei a mukana muandi mu mutshima wanyi. Kadi yeye wakadisunguila bualu bumue, ne muntu kai udi mua kukudimuna meji andi? Bualu budi mutshima wandi Usungula mbudiye wenza. Bualu bua neashikishe buakumpangidishileye, ne malu makuabo a bungi bu â adi mu mutshima wandi. Nunku nakukuatshika buowa ku mpala kuandi; hangelangana meji a bualu ebu, ndi mmutshina. Nzambi wakutekesha mutshima wanyi; Wa Bukole Buonso wakuntshinyisha. Bualu bua tshiena mutambibue bukole ku mîdima, ne mîdima kayakubuikila mpala wanyi. Bualu kai Wa Bukole Buonso kena uteka bikondo bia kulumbuluisheye bantu? Bualu kai badi bamumanye kabena bamona matuku andi? Bakuabo badi bumusha mikalu; badi biba bisumbu bia mikoko ne badi bayidisha mu madimi abo a mashinde. Badi banyenga nyama wa mpunda wa muanʼa nshiya; badi bangata ngombe wa mukashi wa mu lufuila bu tshieya. Badi basesuisha hakengi mu nshila ku bukole; bahele bonso ba ha buloba badi basokoma. Bulelela, bu mudi nyama ya mpunda ya mu tshisuku yendakana mu tshihela, bobo badi baluhuka bua kuya ku mudimu wabo, bakebakeba bia kudia; tshihela tshidi tshibameneshila bia kudia bua bana bakalelabo. Badi bahuolela bimuna bia kudia bidi bishala mu budimi, badi bahumbulula tumuma tua nvinyo mu budimi bua muenji wa malu mabi. Badi balala butaka butuku bujima kabayi ne tshilulu, kabayi ne tshia kudibuikila nʼatshi bua mashika. Badi baboleshibua ku nvula ya ku mikuna, badi buhukila mabue bituha bualu bua kabena ne tshinyemenu tshikuabo. Bakuabo badi bumusha muanʼa nshiya ku dibele, ne badi banyenga tshitalu tshia muhele bu tshieya. Nunku bahele badi bendakana butaka; badi ne nzala, kadi badi batuala bisumbu bia blé. Badi baka ma mafuta mu mpangu ya bantu aba; badi hadiata tumuma tua nvinye mu bikaminu biabo badi ne nyota. Mu musoko mudi munvuika mikemu ya bantu bafuafua, ne mutshima wa muntu mutahibue mputa udi usasabala; kadi Nzambi udi ulengulula malu mabi au. Aba mbantu badi batombokela munya; kabena bamanye nshila yau, ne kabena bananukila kuenda mu nshila yau. Mushihianganyi udi ubika hahatuka diba, yeye udi ushiha bahele ne bakengi; mu butuku yeye udi bu muibi. Mesu a muena masandi adi indila kajimbʼa buenyi, yeye udi wamba ne, Kakuena disu dilualua kummona. Udi usokoka mpala wandi ne tshilulu tshikudika. Bibi badi batubula nsubu masoso butuku; mu munya badi badinshidila mu nsubu yabo; kabena bamanye munya. Bualu bua mundankulu mudi bu dinda kudibo bonso, bua bobo badi bamanye malu a mundankulu adi akuatshisha bantu buowa. Bantu babi badi bahueka lubilu, balelema ha mutu ha mai; badi bela buhianyi buabo mulau ha buloba. Kabena bahingana kabidi mu madimi a tumuma tua nvinyo. Munanga ne luya lukole bidi bikamisha mai a ku neige; muomumue, Muaba wa Bafue udi unyenga bantu bakuenza bibi. Difu dia muledi wandi didi dimuhua muoyo; tshikusu tshidi tshimudia ne disanka; bantu kabena bamuvuluka kabidi; bubi budi butshibudibue bu mutshi. Udi udia bintu bia mukashi wa nkumba udi kayi ne muana, kena wenzela mukashi wa mu lufuila bimpe. Nzambi udi ulehesha matuku a muoyo wa muntu mukole ku bukole buandi; badi kabayi ne ditekemena dia muoyo badi bajuka. Nzambi udi ubaha ditekemena, ne badi bajadikibuamu; mesu andi adi atangila nshila yabo. Badi batumbishibua tshituha tshihi, badi bajimine; badi bahuekeshibua, badi bumushibua mu nshila bu bakuabo. Badi babakosa bu mudibo bakosa miehu ya mponda. Bikala bualu ebu kabuyi nunku, nganyi neantuishe ne, Udi ushima? Nganyi neandeshe ne, Mei ebe adi a hatuhu? Hashishe, Biledada, Muena Shuhi, wakakudimuna Yobo ne, Bukokeshi ne ditshina bidi kudiye, udi uvuisha ditalala mu miaba yandi ya mu diulu. Misumba ya bena nvita bandi idi mua kubadibua, anyi? Munya wandi kawena utemena bonso, anyi? Nunku muntu wa ha buloba udi mua kubingishibua ku mesu kua Nzambi munyi? Udi muledibue kudi mukashi udi mua kuikala ne mutshima mutoke munyi? Ngondo mene mene kena ne dinkenka, mitoto kayena mulengele ku mesu kuandi. Monai mudi muntu mutambe kukeheshibua, udi bu tshikusu, ne mudi muana wa muntu mukeheshibue, udi bu musanda! Hashishe, Yobo wakakudimuna Biledada ne, Mona muwakukuatshisha wakadi kayi ne bukole, ne muwakusungila dihoko diakadi kadiyi ne bukole! Mona muwakulesha meji kudi wakadi kayi ne meji, ne muwakumumanyisha lungenyi luakane ne mei mavule! Wakuambila nganyi mei ebe, ne nyuma wa nganyi wakufumina kudi? Bakishi ba bafue badi bazakala muinshi mua mai ne mua bintu bidimu. Muaba wa Bafue udi hatoke tô ku mpala kua Nzambi, ne Abadona kena ne tshibuikilu. Wakavungulula luseke lua nôde ha muaba mutuhu, wakafuka buloba kabuyi bukudika ku tshintu. Udi uteka mai mu matutu andi manene; ditutu kadiena dihandika bua bujitu buau. Udi ubuikila nkuasa wandi wa butumbi, udi ubalula ditutu diandi ha nkuasa. Wakafunda tshijengu ha mutu ha mai, bu mukalu hankatshi ha munya ne mîdima. Makunshi a diulu adi azakala, adi atua mikemu bua kubela kuandi. Ku bukole buandi yeye udi utalasha mai manene; ku lungenyi luandi udi ukuma Lahaba, udi umusompola. Ku muhuya wandi diulu didi dilengeshibua; tshianza tshiandi tshiakusompola nyoka munene udi wenda lubilu. Monai, malu â adi anu kukala kua bienzedi biandi; monai mutudi tunvua anu dinunganyi dikese kudiye! Kadi mukungulu wa bukole buandi—nganyi udi mua kûjingulula? Yobo wakabanga mei andi kabidi ne, Bu mudi Nzambi ne muoyo, wakunyenga kulumbulula kuakane kundi, ne bu mudi Wa Bukole Buonso, wakunyingalasha mutshima wanyi bikole; tô ne hantshidi ne muoyo munda muanyi, ne hatshidi muhuya wa Nzambi mu mihembu ya diulu dianyi, bulelela, mishiku yanyi kayena yamba mei a mashimi ne ludimi luanyi kaluena luamba di dia kudinga nʼadi! Bualu ebu kabuikadi kundi bua meme kunubingisha. Tô ne hanafua bianyi tshiena ngitabusha bua mutshima wanyi mutoke ûmuke kundi. Nennanukile kukuata buakane buanyi ne tshiena mkulekela nansha. Mutshima wanyi kawena umpisha bua dituku dimue dia ku matuku anyi onso. Muena lukuna wanyi ikale bu muntu mubi, ne muntu udi ubika bua kumbanda ikale bu muntu udi kayi muakane. Muntu udi uhidia Nzambi udi ne ditekemena kai halua Nzambi kukosa matuku andi, halua Nzambi kunyenga muoyo wandi musûke? Nzambi neunvue muadi wandi halua dikenga kudiye, anyi? Yeye neadisankishe mu Wa Bukole Buonso, anyi? Neubikile dina dia Nzambi misangu yonso, anyi? Nennuyishe bualu bua tshianza tshia Nzambi, tshiena nsokoka malu adi mu meji a Wa Bukole Buonso. Monai, buonso buenu nuakumona bualu ebu; nunku nudi nuelangana meji a hatuhu bua tshinyi? Ebu mbuhianyi budi muntu mubi uheta kudi Nzambi, buhianyi budi bakengeshi ba bakuabo bangata kudi Wa Bukole Buonso. Biavulangana bana bandi, mbua bobo kushihibua ku muele wa nvita; ne tunkanunuma tuandi katuena ne bia kudia bikumbane. Badi bashala ku nyima kua lufu luandi nebajikibue ku tshihuhu, ne bakashi babo ba mu lufuila kabena babashila madilu. Nansha biadibutshileye biamu bia argent bu luhuishi, nansha biadilongolueleye bivualu bu bitahikidi; yeye udi mua kubilongolola, kadi bantu bakane nebabiluate, ne badi kabayi ne tshilumbu nebabanyangane biamu biandi bia argent. Yeye udi wasa nsubu wandi bu tshibayibayi, ne bu tshitandatanda tshidi mutentekedi wa mu budimi wasa. Udi ulala hanshi bu muntu mubanji, kadi kena wenza nunku kabidi; udi ubulula mesu andi, bionso biakujimina. Malu a buowa adi amuhita bukole bu mai mavule; tshihehele tshikole tshidi tshimuangata butuku. Luhehele lua ku esete ludi luya nʼandi, ne yeye udi umukaku; ludi lumûmusha mu muaba wandi. Bualu bua Nzambi udi wela mikete yandi kudiye, kayi umufuila luse; yeye wakadi kusua kuhanduka ku tshianza tshia Nzambi. Bantu badi batuta bikashi bua dibutuka diandi, badi bamubingila bua kumuihata mu muaba wandi. Bulelela, tshina tshidiku tshia bantu kumbula tshiamu tshia argent, ne ditanda didiku dia kufulamu tshiamu tshia or bua kutshilengesha. Badi bumbula tshiamu tshifike mu buloba, badi bafula tshiamu tshia mitaku tshifume ku mabue. Bantu badi bihata midima, badi baya ne minda tô ne kunfudilu kua tshina, badi bakeba tubanda ludi mu mufitu ne mîdima mikole. Yeye udi umbula tshina mu muaba udi kauyi hehi ne miaba idi bantu bashikame, mu miaba idi bantu kabayi bavuluka; badi kule, kabayi hehi ne bantu bakuabo, badi balembelela eku ne eku. Buloba budi bumenesha bia kudia, kadi munda muabu mene mudi mukudimuka bua kahia kadi kabuandamuna. Mabue abu adi ne mabue a saphir munda muau, ne munda muabu mudi musenga wa tshiamu tshia or. Nyunyu itu yadia bintu biakubakulayi kayena mimanye nshila wa ku tshina atshi, mesu a nyunyu wa nkumbi-kumbi kaena manze kumumona. Nyama minene kayena mianze kumuihata, ne nyama wa ntambue kena muanze kuhitshilamu. Muntu udi wolola tshianza tshiandi bua kulenga mabue makole; yeye udi umbula mikuna minene ku bitaku biai. Udi uhanda nshila munkatshi mua mabue; mesu andi adi amona bintu bionso bia mushinga mukole. Udi wela misulu nkila bua mai kâhueki, tshidi tshisokoka ntshidiye usokolola. Kadi meji nebâsangane kudi kunyi? Muaba wa kujingulula malu udi kudi kunyi? Muntu kena mumanye mushinga wau; kabena bâsangana mu buloba bua badi ne muoyo. Ndondo wa muinshi mua buloba udi wamba ne, Kaena munda muanyi; mai manene adi amba ne, Kaena nʼanyi. Kabena bamanye mua kufila tshiamu tshimpe tshia or bua kuaheta; kabena bamanye mua kuidikisha tshiamu tshia argent bu mushinga wau. Kabena bamanye mua kuelekesha mushinga wau ne wa or wa ku Ofî, anyi wa mabue a onyx a mushinga mukole, anyi wa dibue dia saphir. Or ne ntalatala kabiena nʼau muomumue, ne kabena bamanye mua kushintakasha bilenga bia or bia mushinga mukole bua kuangata. Katuena mua kutela mena a mabue a corail ne a cristal diatshimue nʼau. Diheta dia meji didi ditamba dia mabue a perles mushinga mukole. Dibue dia topaze dia ku Atiopa kadiena muomumue nʼau; kabena bamanye mua kubala mushinga wau diatshimue ne wa or wakufulabo mu ditanda. Meji adi mafume kudi kunyi? Muaba wa kujingulula kua malu udi kudi kunyi? Bualu bua muaba wau udi masokoka kudi bintu bionso bidi ne muoyo, ne udi musokoka kudi nyunyu ya mu diulu. Kubutuka ne Lufu bidi biamba ne, Tuakunvua lumu luau ku matshu etu. Nzambi udi ujingulula nshila wa kudiu, ne yeye udi mumanye muaba wau. Bualu bua yeye udi umona tô ne kunfudilu kua buloba, ne udi umona miaba yonso ya muinshi mua diulu. Hakidikisheye luhehele bujitu bualu, hakidikisheye bungi bua mai ne luidi luandi, hakeleye nvula mukenji wandi, hakalongolueleye miele ya nvula ne muku ngulu nshila, Mu diba adi yeye wakamona meji ne wakâlondela bantu; wakajadika ne wakâkononona. Hashishe, wakambila bantu ne, Monai, ditshina dia Mukelenge didi meji; ne kumuka ku malu mabi kudi kujingulula kua malu. Yobo wakabanga mei andi kabidi ne, Nakadi kusua kuikala bu munakadi mu ngondo ya kale, bu munakadi mu matuku akadi Nzambi undama; hakadi muinda wandi utemena ha mutu hanyi, ne hanakahita mu mîdima bualu bua munya wandi. Nakadi kusua kuikala bu munakadi mu matuku a bukole buanyi, hakadi bulunda bua Nzambi mu ntenta wanyi; hakatshidi Wa Bukole Buonso nʼanyi, ne bana banyi bakadi bannyunguluka; hakadi makasa anyi muvuwa ne mabele, ne dibue diakampatuila tusulu tua manyi. Hanakaluhuka ku tshibi tshianyi bua kuya ku musoko, hanakalongolola nkuasa wanyi wa bulumbuluishi mu muaba wandi munene, bansongalume bakantangila ne bakumuka ku mpala kuanyi, bantu banunu bakajuka, bakimana kulu. Bakokeshi bakalekela kuakula, bakateka bianza ku mishiku yabo. Dî dia bena butumbi diakahuwa, ne ndimi yabo yakalamata mu bilakalaka biabo. Bualu bua hakunvua matshu dî dianyi, akanvudishila disanka; hakammona mesu, akammanyishisha kudi bakuabo. Bualu bua nakasungila bahele bakadila dikuatshisha, ne muanʼa nshiya ne mukuabo yonso wakadi kayi ne mukuatshishi. Disankisha dia kudi muntu wakadi wamba kufua diakalua kundi; nakimbisha mutshima wa mukashi wa mu lufuila musambu wa disanka. Nakaluata buakane bu tshivualu. Buakane buanyi buakadi bu muzabi ne bu tshitambala tshia ku mutu. Nakadi bu mesu kudi bantu bafofo, nakadi bu makasa kudi bantu balema. Nakadi bu tatu kudi bakengi, nakakeba kujingulula tshilumbu tshia muntu unakadi tshiyi muanze kumanya. Nakatshibula menu a ku tshinyanganyanga a muntu mubi, nakanyenga tshiakakuateye ku bukole ku menu andi. Hashishe, nakamba ne, Nenfuile mu nsubu muanyi; nenvudishe matuku anyi bu dinfuenkenya dia buloba; muji wanyi udi ulamba tô ne ku mai, mume udi ukuata ditamba dianyi bufuku bujima; butumbi buanyi budi buhia-buhia munda muanyi, buta buanyi budi bukoleshibua mu tshianza tshianyi. Bantu bakateleja matshu abo kundi, bakindila di dianyi, bakahuwa talalâ bua kunvua lungenyi luanyi. Hanakamba mei anyi, kabakankudimuna; mei anyi akabamatshila bu nvula. Bakangindila bu mudibo bindila nvula, bakabuela mukana muabo bu mudibo bindila nvula ya mishisha. Nakabatuila mimuemue hakadibo kabayi ne tshieyemenu, kabakakanda munya wa mpala wanyi. Nakabasunguila nshila bua bobo kuendela, nakashikama bu nfumu wabo, nakashikama bu mukelenge munkatshi mua masalayi andi, bu muntu udi usamba badi badila. Kadi katataka bantu bandi mpita bidimu badi banseka, bena batatu babo banakadi ne bundu bua kuteka hamue ne mbua idi ilama mikoko yanyi. Bukole bua bianza biabo budi mua kunkuatshisha munyi? Munda muabo muakufua bukole bua bunsongalume buabo. Badi banyana bua dikengela dia bia kudia ne nzala; badi bakunya buloba bume bua mu tshihela, budi kabuyi buhuka ne budi buatuke. Badi baka mabeshi a buanji hehi ne mitshi mihi, ne bia kudia biabo bikuabo bidi miji ya mitshi ya genêts. Badi babihata munkatshi mua bantu bakuabo, badi bahela mbila bu mudibo bela muibi mbila. Bua nunku badi bashikame mu mpongo, mu mikele ya mu buloba ne munkatshi mua mabue. Munkatshi mua bihuka bia mu tshihela badi bela mikunda yabo, muinshi mua mingonge badi babutama hohamue. Badi bana ba batshimbakanyi ne bana ba badi kabayi bamanyibue, bakabihata ne nsokotshi ha buloba. Mpindiu nakulua musambu wabo wa kuimbimba, ndi bu lusumuinu lua bobo kuela. Badi bandengulula ne dihetu, badi bimana bashilangana nʼanyi kule, kabena badikanda bua kuntuila lute mu mesu. Bualu bua Nzambi wakusulula mulemu wa ku buta buanyi, ne wakunfuisha bundu, bobo bakudiumushila bualu buonso budi bubakanda ku mpala kuanyi. Bantu ba tshianana badi babika ku tshianza tshianyi tshia balume; badi benda basakila makasa anyi mu nshila, badi bangelela mishiki yabo ya buloha mu nshila bua kumbutula nʼai. Badi bashiha nshila wanyi, badi bendesha kubutuka kuanyi, mbantu badi kabayi ne mukuatshishi wabo. Badi baya ku mpala bu mudibo babuela mu muaba wa lumbu wakushimbulabo, mu muaba wakushimbuka badi bankuata. Malu a buowa adi antshintshimika; adi ihata buneme buanyi bu mudi luhehele lubuhehula; diakalengele dianyi diakuhita bu ditutu. Mpindiu mutshima wanyi udi uhumuna kanyinganyinga kau munda muanyi; matuku a makenga anyi adi ankuata. Butuku budi batubula mifuba yanyi, buyihatula hamʼbidi hanyi, makenga adi ankunyakunya, kaena alala hanshi bua kuikisha. Ku bukole bua disama dianyi tshivualu tshianyi tshidi tshinyanguka; tshidi tshinsuika bu mudi nshingu wa kazaku kanyi mukuate. Yeye wakungela mu bitahikidi, nakulua bu luhuishi ne butue. Ndi ndila kûdi ne kuena witaba kundi, ndi ngimana kulu ne udi unjoja talalâ. Wewe wakakudimuka bu muena lukisu kundi; udi unkengesha ku bukole bua tshianza tshiebe. Wewe udi ungambula mu luhehele, udi ungendeshamu, udi unvingutula mu tshihuhu. Bua ndi mumanye ne, Wewe neunfikishe ku lufu, ne ku nsubu wakusunguila Nzambi bonso badi ne muoyo. Kadi muntu udi wamba kukuluka kena wolola tshianza tshiandi mulu, anyi? Anyi bikaleye ne dikenga, kena wela dî diandi kudi bakuabo bua bamukuatshishe, anyi? Tshiakadila bualu bua muntu mukuabo wakadi mu dikenga, anyi? Mutshima wanyi kawakanyingalala bualu bua bakengi, anyi? Hanakatekemena diakalengele, dikenga diakalua; hanakindila munya, butuku buakila. Munda muanyi mudi mukungulu, kamuena muhuwa; matuku a dikenga dianyi akulua kusambakena nʼanyi. Ndi ngendakana mufikishibue, kadi kembua munya; ndi mbika mu disangisha dia bantu, ndila dikuatshisha diabo. Nakulua muanʼabo ne nyama ya mibuabua, ne mulunda wa nyunyu ya nfiondo. Dikoba dianyi diakulua difike, diakuhuluka, ne mifuba yanyi idi mioshibue ku munya mukole. Kuimba kua lunzenze luanyi kuakuandamuka madilu, ne muadi wa lushiba luanyi wakandamuka dî dia badi badila. Nakahunga tshihungidi ne mesu anyi, nunku nakadi kumanya mua kutuhika mesu anyi kudi mushikankunde utshidi kamama bishi? Bua buhianyi bua kudi Nzambi wa mu diulu budi mua kuikala tshinyi? Buhianyi bua kudi Wa Bukole Buonso wa mu diulu budi mua kuikala tshinyi? Kabuena dikenga kudi bantu babi, anyi? Kabuena dibutuka kudi benji ba malu mabi, anyi? Yeye kena umona nshila yanyi, kena ubala bungi bua biendedi bianyi bionso, anyi? Bingikala muende ne mashimi, bikala dikasa dianyi diye lubilu bua kudinga bantu, (Yeye angidikishe mu tshidikishilu tshidi tshidikisha biakane, bua Nzambi amanye buakane buanyi!) bikala dikasa dianyi disesuke mu nshila, bikala mutshima wanyi mulonde lukuka lua mesu anyi, bikala ditoba dilamate ha bianza bianyi; hashishe meme nkune ntete, mukuabo adie bidi bitoloka; e, bia kudia bianyi bionso bijudibue. Bikala mutshima wanyi muteyibue bua mukashi, ne bingikala mualamine ku mbelu kua muena mutumba nʼanyi, nunku, mukashi wanyi ahelele bakuabo bukula, ne bakuabo bantu bamuinangile mu mutu! Bua muanda eu wakadi kuikala tshilumbu tshifike bukole; bulelela, wakadi kuikala bualu bubi budi balumbuluishi ne bua kukengesha benji bau. Bua udi bu kahia kadi mua kungosha tô ne ku Kubutuka; ne udi mua kujula biuma bianyi bionso. Bingikala muhetule tshilumbu tshia muhika wanyi mulume anyi mukashi, hakadibo balumbulula nʼanyi, nunku, nengenze tshinyi habika Nzambi bua kundumbuluisha? Halueye kunkonka muanda eu, nemmukudimune dî kai? Wakunfuka munda mua mamu wanyi kakamufuka biandi, anji? Wakatufuanyikisha mu difu kena Mufuki umue, anyi? Bingikala muhidie kuha muhele tshintu tshiakasueye, bingikala muvuishe mesu a mukashi wa mu lufuila bitayitayi, bingikala mu dî e tshituha tshianyi tshia bia kudia nkayanyi, ne bana ba nshiya kabayi badie tshituha tshiabo; nansha, katshia ku matuku a bunsongalume buanji yeye wakakola mu bianza bianyi bu mudiye mukole kudi tatu wandi, nakalombela mukashi wa mu lufuila katshia mamu wanyi wandela, bingikala mumone muntu ufua bualu bua kena ne bia kuluata, anyi bingikala mumone bakengi kabayi ne bia kudibuikila nʼabi, bikala tshifuka tshiandi katshiyi tshinvudishila disanka, bikaleye kayi munvue luya hamʼbidi handi bualu bua miosa ya mikoko yanyi, bingikala mubishe tshianza tshianyi bua kukuma muanʼa nshiya, bualu hua nakamona bankuatshishi mu tshilumbuluidi tshia ku tshibi, tshikayakaya tshianyi tshihatuke ku diaha, tshimate hanshi, diboko dianyi diumuke mu ntuangenu yadi. Bualu bua dikenga difume kudi Nzambi diakankuatshisha buowa, tshiakadi ne bukole ku mpala kua butumbi buandi. Bingikala muvuishe or bu ditekemena dianyi, muambile or wakafulabo ne, Wewe udi tshieyemenu tshianyi, bingikala musanke bualu bua bubanji buanyi buakadi bunene, anyi bualu bua tshianza tshianyi tshiakaheta biuma bia bungi, bingikala mumone diba hakatemadi, anyi ngondo hakendeye mu dinkenka diandi, bikala mutshima wanyi muteyibue mu busokoko, bikala tshianza tshianyi tshitue ku mishiku yanyi bua kubitendelela, bualu ebu kabidi buakadi kuikala tshilumbu tshibi tshidi balumbuluishi ne bua kukengesha bahidi ba Nzambi, bualu bua nakadi kubenga Nzambi wa mu diulu. Bingikala musanke bualu bua dibutuka dia muntu wakankina, bikala mutshima wanyi mutambe kusanka hakalua dikenga kudiye, (tshiakuitabusha bua mukana muanyi muenze bualu bubi bua kulomba muoyo wandi wedibua mulau,) bikala bantu ba mu ntenta wanyi kabayi bambilangane ne, Muntu kai udiku udi kayi muanze kukuta ne bia kudia biandi? (Muenyi kakalala mu musesu butuku, kadi nakunzuluila bahitshi ba mu nshila bibi bianyi.) Bingikala mubuikile malu mabi anyi bu mu tshilele tshia bantu, hanakasokoka bualu buanyi bubi mu tshiadi tshianyi, bualu bua nakatshina tshisumbu tshinene tshia bantu, ne bualu bua dihetu dia bena meku diakantshinyisha, ne bua bualu ebu nakahuwa bianyi, tshiakahatuka ha mbelu. Nakadi kusua bua umue ikaleku bua kungunvuileye! Mona tshifundilu tshianyi tshia dina, Wa Bukole Buonso itabe kundi! Nakadi kusua kuikala ne mukanda wakufunda mumbandi wanyi bua kumbanda nʼau! Bulelela, nakadi kûtuala ha diaha dianyi; nakadi kuwasa ku mutu wanyi bu tshifulu tshianyi tshia butumbi. Nakadi kumubadila bungi bua biendedi bianyi; nakadi kusemena ha buihi nʼandi bu mudi muana wa mukelenge mua kuenza. Bikala buloba buanyi budile bua kumbanda, bikala mabula abu mase muadi diatshimue, bingikala mudie bia kudia biabu tshianana, tshiyi mufile argent, bingikala mujimishishe mioyo ya banfumu babu, nunku, meba adiunde mu muaba wa blé, bisonsa bia tshianana bunene mu muaba wa orge. Mei a Yobo akuhuwa. Nunku bantu aba basatu bakalekela kukudimuna Yobo mei, bualu bua yeye wakadi muakane ku mesu kuandi. Hashishe tshiji tshia Elihu, muana wa Balakela, Muena Buzi, wa diku dia Lama, tshiakatema. Tshiakatemena Yobo, bualu bua yeye wakadingisha, kakabingisha Nzambi. Tshiji tshiandi tshiakatemena balunda bandi basatu kabidi, bualu bua bobo kabakamona mei a kukudimuna nʼau Yobo, kadi bakaosha Yobo. Elihu wakadi muindile Yobo ne mei a kumuambila, bualu bua bantu aba bakadi ne bidimu bihite biandi bungi. Hashishe, hakatangila Elihu ne kakuakadi ditaba kudi Yobo mukana mua bantu aba basatu, tshiji tshiandi tshiakatema kudibo. Elihu, muana wa Balakela, Muena Buzi, wakabanga kuakula ne, Meme ndi anu nsongalume, ne nuenu nudi banunu, bua muanda eu nakadikanda, nakatshina kunulesha munakadi ngela meji. Nakamba munda munda ne, Wa matuku a bungi udi ne bua kuakula, ne bena bidimu bivule badi ne bua kuyisha bantu meji. Kadi nyuma udi munda mua muntu, ne muhuya wa munda mua Wa Bukole Buonso udi ubaha lungenyi. Kembantu badi ne bidimu bia bungi mbadi ne meji, kembanunu mbadi bajingulula kulumbulula kuakane. Nunku ndi ngamba ne, Unvuai dî dianyi; nennuleshe lungenyi lundi nʼalu, meme mene. Monai, nakindila bua kunvua mei enu, nakateleja matshu bua kunvua meji enu, tô ne hanuakadi nukebakeba mei a kumukudimuna nʼau. E, nakateleja matshu anyi kunudi, ne monai, kakuakadi muntu umue wakatuisha Yobo, kakuakadi umue wenu wakandamuna mei andi. Nudimuke bua nuenu kanuambi bienu ne, Tuakusangana meji munda muandi; Nzambi udi mua kumutamba bukole, muntu kena mua kuenza nunku. Bualu bua yeye kena muanze kulongolola mei andi bua kuntuisha nʼau; tshiena mmukudimuna dî ne mei anuakuamba. Badi ne ditshina, kabena bamuandamuna dî kabidi; kabena ne dî dia kuamba. Nengindile bualu bua bobo kabena bakula, bualu bua badi bimana talalâ, ne kabena bamuandamuna dî kabidi, anyi? Meme kabidi nengandamune tshituha tshianyi tshia mei, meme kabidi nengambe lungenyi lundi nʼalu. Bualu bua ndi mule tente ne mei; nyuma udi munda muanyi udi ungenzesha. Monai, munda muanyi mudi bu maluvu adi kayi ne mushiku wa kuhatukila; mudi bu milondo ya biseba mihia-mihia idi ne maluvu munda muai ne idi yamba kuhandika. Nengambe dî dianyi bua meme mmanye mua kuhuyakana bimpe; nembuele mukana muanyi bua kumukudimuna dî dianyi. Ndi nnusengelela ne, Meme tshikadi ne kansungusungu kudi muntu yonso nansha; tshitumbishi muntu ne mei a lubombo. Bualu bua tshiena mumanye mua kubomba muntu ne mei a lubombo; bingenza nunku, Mufuki wanyi neangumushe lukasa. Kadi Yobo, ndi nkusengelela ne, Unvua mei anyi; teleja matshu ebe ku mei anyi onso. Mona biebe, nakubuela mukana muanyi; ludimi lua mukana muanyi luakuamba dî. Mei anyi neikale bu buakane bua mutshima wanyi, mishiku yanyi neyambe malu adiyi mi manye kayiyi ne lubombo. Nyuma wa Nzambi wakunfuka, muhuya wa Wa Bukole Buonso wakumpa muoyo. Biwamanya mua kuenza nunku, kudimuna dî dianyi; longolola mei ebe ku mualu wa nvita ku mpala kuanyi, imanaku! Mona, ndi ku mesu kua Nzambi bu mûdi wewe; ndi mufuanyikisha ku dima muomumue nʼebe. Mona, buowa bua bualu buanyi kabuena mua kuntshinyisha nansha; kukuenzesha kuanyi kakuena kukunemeshila bujitu. Bulelela, wewe wakuamba dî dinakunvua mu matshu anyi, nakunvua tshiona tshia mei a ne, Ndi ne mutshima mutoke, tshiena ne bualu bubi; ndi muakane, tshiena ne dihila bua malu mabi. Mona, yeye udi ukeba malu a kunkanda nʼau, udi umbala bu muena lukuna wandi. Udi ubuesha makasa anyi mu muomba, udi utentekela nshila yanyi yonso. Kadi mu muanda eu wewe kuena wamba dî dilelela; nenkukudimune dî; bualu bua Nzambi udi muhite bantu bunene. Bualu kai wewe udi musue kufuilangana nʼandi, umubanda ne, Kena usokoluela bantu bienzedi biandi? Bualu bua Nzambi udi wamba dî diandi mu tshiambidi tshimue, misangu mikuabo mu biambidi bibidi, kadi muntu kena udiunvua. Mu tshilota mene, mu tshikena kumona tshia butuku, hakuatshike bantu tulu tukole, halalabo tulu ha malalu; mu diba adi yeye udi ujikula matshu a bantu, udi ubayisha mu busokoko, bua yeye umushe muntu ku bienzedi bibi, ne bua yeye akande muntu ku dihetu; bua yeye akande muoyo wandi musûke bua kauhonyi mu Dijimba dia Bafue, bua kusungila muoyo wandi bua kaufu ku muele wa nvita. Yeye udi ukengeshibua bua bamulengeshe ne disama ha bulalu buandi, ne difuilangana dia mifuba yandi didiku tshiendelele. Bua muanda eu bidia bidi bitonda muoyo wandi, ne bia kudia bimpe bidi bitonda mutshima wandi. Munyinyi wa hamʼbidi handi udi mukuatshike tshinyanu tô ne hajiminau ku mesu kua bantu; mifuba yandi yakadi kayiyi imueneka idi imueneka. Nunku musûke wandi udi usemena ha buihi ne Dijimba dia Bafue, ne muoyo wandi udi usemena ha buihi ne bashihi. Bikala muanjelo ha buihi nʼandi, muakuidi wandi mene, umue munkatshi mua tshinunu tshia banjelo bakuabo, bua yeye kulesha muntu buakane budiye ne bua kuenza, hashishe, yeye udi umulesha luse, udi wamba ne, Umusungile bua kahueki biandi mu Dijimba dia Bafue, bualu bua nakusangana tshia kumuhikula nʼatshi. Munyinyi wa hamʼbidi handi neuhite wa muana bulengele, udi uhingana ku matuku a bunsongalume buandi. Udi utendelela Nzambi, yeye udi uluangana nʼandi bimpe, nunku udi umona mpala wa Nzambi ne disanka; yeye udi uhingishila muntu buakane buakadiye nʼabu. Udi wimba ku mpala kua bantu, wamba ne, Nakuenza bibi, nakukonyangasha malu akadi malulame diambedi, Nzambi kakanfutshisha dikenga diakanangane ne bubi buanyi. Wakuhikula musûke wanyi bua kauhueki mu Dijimba dia Bafue, muoyo wanyi neumone munya. Monai, Nzambi udi wenzela muntu malu â onso, udi umuenzela malu â misangu ibidi, e, misangu isatu mene; bua kuhingisha muoyo wandi kauhonyi mu Dijimba dia Bafue, bua yeye atanduke ne munya wa muoyo. Teleja bimpe, Yobo, ungunvuile; huwa talalâ, nengakule bianyi. Biwikala ne dî dikuabo dia kuamba, udinkudimune; ambaku, bualu bua ndi musue kukubingisha. Biwikala kuyi ne dî, ungunvuile; anji kuhuwa, nenkuyishe meji. Elihu wakandamuna dî diandi kabidi ne, Nuenu bena meji, unvuai mei anyi, nuenu bena lungenyi, telejai matshu enu kundi. Bualu bua ditshu didi diteta mei bu mudi ludimi lulabula bia kudia. Tudisunguile bualu budi buakane, tumanye munkatshi muetu bualu budi buimpe. Bualu bua Yobo udi wamba ne, Ndi muakane; Nzambi wakunyenga kulumbulula kuakane kundi. Ndi mubinge kadi badi bambala bu muena mashimi, kabena bamanye mua kûmisha mputa wanyi, kadi tshiakuenza bualu bubi. Muntu kai udi bu Yobo, udi unua bihendu bu mai, udi ukuata bulunda ne benji ba malu mabi, udi wenda mu nshila ne bantu babi? Bualu bua yeye udi wamba ne, Kuikala ne disanka kudi Nzambi kakuena kukuatshisha muntu nansha ku bualu bumue. Nunku nungunvuile, nuenu badi bajingulula malu; bualu ebu kabuikadi kudi Nzambi bua yeye kuenza malu mabi, anyi bua Wa Bukole Buonso kuenzeye bibi! Bualu bua Nzambi neafute muntu bu mudi bienzedi biandi, yeye neavuishile muntu yonso bualu bu muakenzenzeye. E, bulelela, Nzambi kena wenza bibi, Wa Bukole Buonso kena unyanga kulumbulula kuakane. Wakamuha bukokeshi ha mutu ha buloba nganyi? Wakamuha buloba bujima bua yeye kubulama nganyi? Biumusheye mutshima wandi bua kuhinganau kudiye, biasangisheye nyuma wandi ne muhuya wandi munda muandi nkayamu, ba ha buloba bonso nebajimine diatshimue, ne bantu nebahingane ku dinfuenkenya. Biwikala ne dijingulula dia malu unvua dî edi; teleja matshu ebe ku mei andi nkuambila. Udi ukina kulumbulula kuakameka udi mua kukokesha bakuabo anyi? Neubishe udi mukole ne udi muakane, anyi? Neubishe udi wambila mukelenge ne, Wewe udi muntu wa tshianana, udi wambila bantu banene ne, Nudi babi, anyi? Neuhishe udi ubenga kunemeka anu bana ba bakelenge, udi kayi ubala babanji ne, Badi ku mpala kua bahele; bualu bua buonso buabo badi mudimu wa ku bianza biandi? Mu tshituha tshia diba badi bafua; nansha ha diba dia mundankulu mene bantu badi bazakashibua ne badi bajimina; bakole badi bumushibua tshianza tshia muntu katshiyi tshibumusha. Bualu bua yeye udi uteka mesu andi ku nshila idi muntu wendela, udi umona biendedi biandi bionso. Kakuena midima, kakuena mufitu mukole kudi benji ba malu mabi bamanye mua kusokomena. Bualu bua yeye kena ne bualu bua kusunguila muntu tshikondo tshijalame bua yeye kuya ku mpala kua Nzambi bua kulumbuluishibua. Udi utshibula bantu banene bituha bituha, kayi muanze kukonkonona malu abo, udi ujadika bakuabo mu miaba yabo. Bualu bua udi mumanye midimu yabo, udi ubatonkola mu butuku, nunku badi babutudibua. Udi ubakuma bua bubi buabo ku mesu kua bantu bonso, bualu bua bakasesuka mu nshila, kabayi balonda Nzambi, kabakasua kuenda mu nshila yandi yonso. Bua bualu ebu bakafikisha muadi wa bahele kudiye, ne yeye wakunvua muadi wa bakengi. Biahuweye talalâ, muntu kai wamubisha? Biasokokeye mpala wandi, muntu kai wamanya mua kumumona? Yeye udi wenzela tshisamba tshijima ne muntu umue muomumue, bua muntu udi ubenga Nzambi kamanyi mua kukokesha, kamanyi mua kukuata bantu mu buteyi. Muntu kai wakuambila Nzambi dî edi ne, Nakumana kukenga, tshiena ngenza bualu bubi kabidi, wewe unyishe bualu bundi tshiyi muanze kumona; bingikala muenze bualu bubi, tshiena mbuenza kabidi? Yeye neakuenzele bu mûdi musue bualu bua wakabenga dikosa diandi dia nsambu, anyi? Bûdi nʼabu mbua kusungula, kembualu buanyi to. Nunku utuambile bualu bûdi mumanye. Bantu badi bajingulula malu nebangambile, e, muena meji yonso udi unvua dî dianyi neambe ne, Yobo udi wakula bu udi kayi ne lungenyi, ne mei andi kaena mei a meji. Tuakadi kusua bua Yobo atetshibue tô ne ku ndekelu, bualu bua wakuitaba bu mudi bantu babi bitaba. Bualu bua udi utentekasha ditomboka ha mutu ha bubi buandi; udi ututa tshikashi munkatshi muetu, ne udi uvudisha mei andi adiye ubanda nʼau Nzambi. Elihu wakakudimuna Yobo kabidi ne, Udi welangana meji ne ebu mbualu buakane, anyi? Udi wamba ne, Udi muakane ku mpala kua Nzambi, anyi, hawamba ne. Bualu ebu budi bukuatshisha kudi kunyi? Anyi hawamba ne, Ndi mpeta mushinga kai mutambe wa hanakuenza bualu bubi? Nengitabe kûdi, ne kudi balunda bebe diatshimue nʼebe. Tangila mu diulu, mona biebe; tangila matutu adi makuhite bule! Biwikala muenze bibi, udi umuenzela yeye bualu kai? Bikala malu mabi ebe makumbane, udi umuenzela yeye tshinyi? Biwikala muakane, udi umulesha tshintu kai? Anyi yeye udi wangata tshinyi ku tshianza tshiebe? Bubi buebe budi mua kukengesha muntu bu wewe, ne buakane buebe budi bumanye mua kukuatshisha muana wa muntu. Bualu bua makengesha mavule adi alua kudibo, bakuabo badi badila; badi badila bua kuheta dikuatshisha kudi bakuabo bua kuhanduka mu bianza bia muena tshimbambila. Kadi kakuena umue udi wamba ne, Nzambi Mufuki wanyi udi kudi kunyi? Nyeye udi utuha misambu ya kuimba butuku, udi utuyisha lungenyi luhite lua nyama ya ha buloba, udi utuvuisha bena meji bahite nyunyu ya mulu. Hashishe, badi badila, kadi yeye kena witaba, bualu bua dihetu dia mu mitshima ya bantu babi. Bulelela, Nzambi kena unvua muadi wa hatuhu, Wa Bukole Buonso kena uteleja matshu andi kudiu. Nunku neatambe kuhidia kunyua hawamba ne, Tshiena mmumona; bualu buebe budi ku mpala kuandi, umuindile! Ne mpindiu bualu bua tshiji tshiandi katshiena tshianze kukengesha bantu babi, ne bualu bua yeye kena muanze kubala buhote bua muntu, Yobo udi ubulula mukana muandi hatuhu, udi ukumbasha mei bu mudiye kayi ne lungenyi. Hashishe, Elihu wakamba mei andi kabidi ne, Anji kungindila tshituha bua meme mmanye mua kukulesha manga malu; bualu bua ndi ne mei makuabo a kuamba bua kuhingisha nʼau Nzambi. Nengambe lungenyi luanyi lunakuangata ku miaba ya kule, nennuleshe ne, Mufuki wanyi udi ne buakane. Bulelela, mei anyi kaena a mashimi, muntu udi ne lungenyi tshishiki udi wimana ku mpala kuebe. Mona, Nzambi udi ne bukole buhite ne kena uhetula muntu, udi ne bukole buhite bua kujingulula malu. Kena Usungila mioyo ya bantu babi, ne udi uha badi mu dikenga malu makane a bobo kuangata. Kena umusha mesu andi kudi bantu bakane; kadi udi ubashikika hohamue ne bakelenge mu nkuasa ya bukelenge tshiendelele, ne badi batumbishibue. Bikalabo bedibue mu nkanu, bikalabo bakuatshibue mu mionshi ya makenga; yeye udi ubalesha bienzedi biabo ne malu mabi abo; udi ubalesha ne, Badi badibandisha. Udi ujikula matshu abo bua bamanye mua kunvua diyisha, udi ubelela mukenji bua bobo balekele malu mabi bua kuhingana kudiye. Biunvuabo dî diandi ne biamukuatshilabo mudimu, badi hashikisha matuku abo munkatshi mua diakalengele, ne bidimu biabo munkatshi mua masanka. Kadi bikalabo kabayi bunvua dî diandi, nebashihibue ku muele wa nvita, nebafue kabayi banze kuheta lungenyi. Badi babenga Nzambi mu mitshima yabo badi baditekelamu tshiji; kabena badila dikuatshisha diandi habakengesheye. Badi bafua mu bunsongalume buabo, ne mioyo yabo idi ijimina munkatshi mua benji ba malu a bundu. Udi ubandisha bakengi ku dikenga diabo, ne udi ujikula matshu abo ku tshinyangu. E, wakasua kukukoka bua kukumusha mu makenga, bua kulua nʼebe mu muaba munene udi kauyi mubumbakane; ne bintu bidibo bateka ha mesa hebe bidi ne manyi tente. Kadi wewe udi mule tente ne kulumbuluisha kua bantu babi; kulumbulula ne dikosa dia nsambu bidi bikukuata. Kuitabushi bua tshiji tshiebe tshikuteye bua wewe kuhetula Nzambi; kuitabushi bua bunene bua buhikudi bukusesuishe mu nshila muakane. Muadi webe neumanye mua kukumbana bua wewe kukengi, anyi? Bienzedi bionso bia bukole buebe bidi mua kuenza nunku, anyi? Kujingi biebe ne, Butuku buile, humushabo bantu ku miaba yabo. Udimuke bua wewe kukudimunyi mutshima webe ku bualu bubi, bualu bua wewe wakusungula bubi ebu ku mpala kua makenga. Monai, Nzambi udi wenza bienzedi bihite bunene mu bukole buandi; nganyi udi muyishi bu yeye? Wakamusunguila nshila idiye ne bua kuendela nganyi? Udi mumanye mua kumuambila ne, Wewe wakuenza bienzedi bidi kabiyi biakane nganyi? Uvuluke bua wewe kutumbisha mudimu wandi udi bantu batumbisha mu misambu yabo. Bantu bonso bakaumona; bantu badi bautangidila kule. Mona, Nzambi udi munene, ne katuena bamumanye nansha; bungi bua bidimu biandi kabuena mua kumanyibua. Bualu bua udi ukoka mamata a mai mulu; adi enguluka, andamuka mula mufume ku dibungi, udi matutu alokesha; nvula wa bungi udi umatshila bantu. Muntu kai udi mua kujingulula ditangalaka dia matutu, ne mikungulu idi ihatuka mu ntenta wandi? Mona, yeye udi udinyungulula ne nuele ya nvula, udi ubuikila ndondo wa mai manene. Ku dikuatshisha dia bintu ebi yeye udi ulumbuluisha bantu; udi ubaha bia kudia bivulangana. Udi ubuikila bianza biandi bibidi ne miele ya nvula, udi uyelela mikenji bua yoyo ikume muaba udiye musue. Tshiona tshia mukungulu wa nvula tshidi tshiambila bantu lumu luandi; tshidi tshiambila bimuna mene ne, Yeye udi ha buihi. E, bua muanda eu mutshima wanyi udi uzakala, udi ukanka, umuka mu muaba wau. Unvua biebe, unvua tshiona tshia dî diandi ne mukungulu udi uhatuka mukana muandi. Yeye udi utuma bua kukungulau muinshi mua diulu dionso, udi utuma muele wandi wa nvula tô ne kunfudilu kua buloba. Ku nyima kuau tshiona tshia mukungulu wa nvula tshidiku; yeye udi ukunguisha mukungulu ne dî dia butumbi buandi; kena ukanda miele ya nvula bunvuabo dî diandi. Nzambi udi ukunguisha mukungulu ne dî diandi didi dikemesha bantu; udi wenza malu manene atudi katuyi bamanye mua kujingulula. Bualu bua udi wamhila neige ne, Mata ha buloba; udi wamhila kabidi nvula udi uloka bitulu bitulu ne nvula yandi idi iloka bikole ne, Lokai. Udi ukonyisha bianza bia muntu yonso, bua bantu bonso bakafumeye bamanye mudimu wandi. Mu diba adi nyama ya mu tshisuku idi ibuela mu bisokomenu, ne idi ishala mu mikele yai. Nvunde udi ufuma ku sude, mashika makole adi afuma ku nôde. Ku muhuya wa Nzambi kudi kuhatuka mabue a mashika, mai akadi mahasalala adi akuatakana. Yeye udi ûsha matutu mafike ne tshitelele tente; udi utangalasha ditutu diandi didi ne muele wa nvula. Adi anyunguluka ne adi akudimuka ku bulombodi buandi, bua wowo enze malu onso adiye wâmbila bua kuenzau hanshi ha buloba hadi bantu. Nansha bikalau mulangala wa kututa nʼau buloba, anyi bua kulesha luse luandi, yeye udi uwendesha bua kumuenekau. Unvua dî edi, Yobo; imana biebe talalâ, elangana meji a midimu ya kukema idi Nzambi wenza. Wewe udi mumanye bu mudi Nzambi welela matutu mukenji wandi, ne bu mudiye wenzesha munya wa mu ditutu diandi bua kutemau, anyi? Udi ujingulula bu mudi matutu alembelela mulu, ne malu a kukema a udi ne lungenyi lukumbane tshishiki, anyi? Wewe muena bivualu bia luya, hikala buloba talalâ bualu bua luhehele lua ku sude; wewe udi mumanye mua kubalulula nʼandi diulu didi dikole bu ludimuenu luakufulabo mu kahia, anyi? Utuyishe dî ditudi bamanye mua kumuambila! Katuena bamanye mua kulongolola mei etu bualu bua mîdima idiku. Bidi bimpe bua meme kumuambila ne, Ndi musue kuakula, anyi? Muntu kai udi wamba ne, Ndi musue kuminyibua? Mpindiu bantu kabena bamanye mua kumona munya udi ukenka mu diulu, kadi luhehele ludi luhita ne ludi luditokesha. Ku luseke lua nôde kudi kuhatuka dinkenka didi bu dia or. Hamʼbidi ha Nzambi hadi butumbi budi bukuatshisha bantu buowa. Katuena bamanye mua kujingulula malu onso a Wa Bukole Buonso; yeye udi munene mu bukole buandi, ne bualu bua yeye udi ne buakane bukumbane bua bungi, kena ukengesha muntu tshianana. Bua muanda eu bantu badi bamutshina; yeye kena utangila muntu udi udibala ne meji mu mutshima wandi yeye. Hashishe, Yehowa wakandamuna Yobo dî dihatuka mu nvunde ne, Eu nganyi udi usokoka meji mu mîdima ku mei adi kâyi ne lungenyi? Suika mukaba webe mu tshimono bu muntu mulume; bualu bua nenkukonke ma makuabo, ne wewe ummanyisheu. Wewe wakadi kudi kunyi hanakujadika bishimikidi bia buloba? Amba biebe, biwikala ne lungenyi lua kujingulula bua ebu. Wakasungula bidikishilu biabu nganyi, biwamanya mua kungambila? Anyi wakolola muonshi wa luidi ha mutu habu nganyi? Bakajadika bitekelu bia makunshi abu ha binganyi, ne wakaladika dibue dia ku ditumba diabu mu muaba wadi nganyi, bakimba mitoto ya nkesha misambu diatshimue, ne hakela bana balume bonso ba Nzambi mbila yabo bua disanka diabo? Nganyi wakinshidila mai manene bibi, hakahatukau, mûmuke munda mua buloba bu mudi muana umuka mu difu dia mamu wandi; hanakavuisha matutu bu tshivualu tshiau, ne mîdima mikole bu mukaba wa kuajingila; hanakâjadikila mukulu wanyi unakausunguila diambedi, ne hanakautekela nkanu a kuakanyika ne bibi kabidi; ne hanakamba bianyi ne, Nuemanye mua kufika aku, kadi kuhitshi nansha; ne kunu mene nebalekeshe kudibandisha kua mavuala ebe? Katshia wabanga matuku ebe wewe wakuelela lunkelu mukenji, anyi? Wakalesha kabundubundu muaba waku uwakakasunguila, bua koko kakuate matengu a buloba, ne bua koko kitshikishilemu bantu babi, anyi? Buloba budi buandamuka bu mudi dima diandamuka muinshi mua tshiamu tshidi tshifundahu tshimanyinu, bintu biabu bionso bidi bimueneka bu tshivualu tshilengele. Munya wabu udi umushibua kudi benji ba malu mabi, ne diboko didi didibandisha didi ditshibuka. Wewe wakuya tô ne ku mishimi ya muinshi mua mai manene, anyi? Wakuendakana mu mikele ya mu ndondo wa mai manene, anyi? Bakusokoluela bibi bia ku lufu, anyi? Wewe wakumona bibi bia ku mundidimbi wa lufu, anyi? Wakajingulula butshiama bua buloba, anyi? Ungambileku, biwamanya malu au onso. Nshila wa ku muaba udi munya mushikame udi hanyi? Midima kabidi idi ne muaba wai kudi kunyi bua wewe Umanye mua kuyifila tô ne ku butshika buai, ne bua wewe umanye nshila ya ku nsubu wai? Wewe udi mumanye muanda eu, bualu bua bakakulela mu diba adi, ne bungi bua matuku ebe budi bukumbane be! Wakufika ku nsubu idibo babutshilamu neige, anyi wakumona nsubu idibo babutshilamu mabue a mashika, bindi inulame tô ne hafika tshikondo tshia dikenga, hafika dituku dia nvita ne dia kubishangana, anyi? Nshila kai udi uya ku muaba udi munya muabanyibua ha buloba? Luhehele lua ku esete ludi ludimuangalasha ha buloba mu muaba kai? Nganyi wakabandila mai a nvula nshila yau, ne nshila ya makubakuba kuyialamu, bua kulokesheye nvula ha buloba budi kabuyi ne bantu, ne mu tshihela mudi kamuyi muntu; bua kukutshisha buloba budi binyanguke ne buatuke, ne bua kutolosha mashinde a lutende? Nvula udi ne tatu wandi, anyi? Wakalela mamata a mume nganyi? Mabue a mai makuatakasha kudi mashika akahatuka mu difu dia nganyi? Wakalela dibungi dia mu diulu udi mukuatakasha kudi mashika nganyi? Mai adi akuatakana bikole bu mabue, ha mutu ha mai hadi hakuatakana bu dibue. Wewe udi mumanye mua kusuika nkanu ya ku mitoto ya Tshidiminanzashi, anyi kusulula mukaba wa mitoto ya nyama ne mbua ne muntu? Udi mua kulombela mitoto ya mu Mazalota mu tshikondo tshiai, anyi? Udi mua kulombela mutoto wa Ourse Munene ne bana bandi, anyi? Wewe udi mumanye mikenji idi Nzambi welela bintu bia mu diulu, anyi? Udi mua kubilongoluela bukokeshi buabi ha buloba, anyi? Udi mua kuhandisha dî diebe tô ne ku matutu, bua mai a nvula a bungi akubuikile, anyi? Udi mua kutuma miele ya nvula bua yoyo iye, ne bua ikuambile kabidi ne, Ka tuetu aba? Wakuteka meji munda mua mu ntu nganyi? Wakuha mutshima wandi dijingulula dia malu nganyi? Udi mua kubala bungi bua matutu ku meji andi nganyi? Udi uhumuna mai a nvula mafume mu diulu halua lusenga kudiungusha mu mishiki, ne halua mabuwa kulamatangana nganyi? Wewe udi mua kukebela mukashi wa nyama wa ntambue bintu bia kudieye, anyi udi mua kumana nzala ya bana ba ntambue habutamabo mu mikele yabo, ne halaminabo bia kudia mu tshihuka, anyi? Udi uhesha nyunyu wa tshikololo tshia kudia tshiandi, hadila bana hatshi kudi Nzambi, ne hendakanabo kabayi ne bia kudia nganyi? Udi mumanye tshikondo tshidi mbushi idi yenda ha mutu ha mikuna mile ilela bana, anyi? Udi mua kutentekela bua kumona didinyenga dia kulela kua ngulungu, anyi? Udi mumanye mua kubala ngondo idiyi ikumbasha bua kulela, ne udi mumanye tshikondo tshidiyi ilela, anyi? Idi inama hanshi, idi ilela bana bai, idi idiumushila didinyenga diai. Bana bai badi bakola, badi baheta bukole mu mpata, badi banyema ne kabena bahingana kabidi. Wakutuma nyama wa mpunda wa mu mpata bua kuyeye mu budishikaminyi buandi nganyi? Anyi wakusulula nkanu ya mpunda udi unyema lubilu nganyi? Nyeye unakusungula tshihela bu nsubu wandi, ne buloba budi ne miu ya luehu bu muaba wandi wa kushikama. Yeye udi useka diyoyo didi mu musoko, kena unvua mei makole a muenzeshi wa mudimu. Udi wendakana ha mutu ha mikuna bu muaba wandi wa kudileye mashinde, ne udi ukebakeba midioko yonso mibishi. Mbowa udi witabusha bua kukukuatshila mudimu, anyi? Yeye neitabushe bua kulala butuku hehi ne tshidilu tshiebe tshia nyama, anyi? Udi mua kusuika mbowa ne mionshi bua yeye kuela mabula mu budimi, anyi? Yeye neitabushe bua kuenda ku nyima kuebe ukukokela lukasu lua kushiha nʼalu mabuwa a buloba a mu tshibanda, anyi? Wewe udi mua kumueyemena bualu bua bukole buandi budi bua bungi, ne udi mua kumushila mudimu webe wa mu budimi bua yeye kuwenza, anyi? Udi mua kumueyemena bua yeye kuhingana ne maminu ebe, ne bua kuasangisheye ha tshishihuidi, anyi? Dihuahua dia nyunyu wa nfiondo didi dihahala ne disanka, kadi yeye udi ne mahuahua ne masala adi alesha bana bandi luse, anyi? Bualu bua udi ushiya makela andi ha buloba, udi wâkuatshisha luya mu dinfuenkenya dia buloba, udi uhua muoyo bualu buau ne, Bumue dikasa dia mualu didi mua kuashila; anyi nyama wa mu mpata udi mua kuadiata. Yeye udi wenzela bana bandi bibi bitambe, bu badi kabayi bandi mene; mudimu wandi wa kutoya kua bana udi hatuhu, kadi yeye kena utata bua muanda eu. Bualu bua Nzambi wakamuhuisha meji muoyo, ne kakamuha tshituha tshiandi tshia lungenyi. Mu tshikondo tshidiye ujuka bua kunyema lubilu, yeye udi ulengulula kabalu ne muntu udi ubanda ha nyima haku bua kuenda. Wewe wakuha kabalu bukole buaku, anyi? Wakukavuadika buoya budi bulembelela mu nshingu muaku, anyi? Wakukenzesha bua kutuhikaku bu mudi mukumbi utuhika, anyi? Kadi ne butumbi ne kuhembula kudi kukuatshisha bantu buowa. Kadi katua mikono mu tshibanda ne kadi kasanka bua bukole buaku. Kadi kaya ku mpala bua kusangakanaku ne badi ne bielelu bia nvita. Kadi kaseka buowa, kakena katshinyishibua; kakena kahingana ku nyima hua kuhanduka ku muele wa nvita. Musaka wa mikete udi uvuma, ututa hamʼbidi haku, difuma dibalakane ne kabenda bidi bikatuta kabidi. Mu luonji luaku ne tshiji kadi kamina buloba mu lubilu luaku; kakena kumana talalâ hunvuaku tshiona tshia mpungi. Misangu yonso idibo bela mpungi kadi kamba ne, Eyo, tuyai! Kadi kunyua muhuya wa nvita hatshidiku kule, kadi kunyua dî dikole dia tupitene ne mbila ya bena nvita. Nkumbikumbi udi alembelela mulu bua dikuatshisha dia meji ebe hololeye mahuahua andi matangishe ku luseke lua sude, anyi? Nyunyu wa mukanku udi ubanda mulu, udi wibaka disua diandi kulu bua mukenji webe, anyi? Udi mushikame ha dibue didi ha mukuna mule, udi wibakahu disua diandi, ku mutu kua lusongo lua dibue ne ku muaba mukole munkatshi mua mabue. Kule kuakua yeye udi utentekela ha buloba, ukebakeba tshintu tshia kubakuleye! mesu andi adi atangila bintu bidi kule. Bana bandi badi banua mashi; hadi bitalu bia bantu bishihibue, nyunyu ei idiku. Yehowa wakakudimuna Yobo dî ne, Muntu udi udiula mei andi neasue kubambakasha mei ne Wa Bukole Buonso, anyi? Muntu udi utetangana mei ne Nzambi, itabe makonka andi. Hashishe, Yobo wakandamuna Yehowa dî ne, Mona, ndi muntu muhuekele; nenkukudimune wewe dî kai? Ndi nteka tshianza tshianyi ku mishiku yanyi. Nakuamba dî dianyi musangu umue, tshiena ukudimuna dî kabidi; e, nakuamba di misangu ibidi, kadi tshiena ngamba mei makuabo. Hashishe, Yehowa wakitaba kudi Yobo ne dî dihatuke mu nvunde ne, Suika mukaba webe mu tshimono bu muntu mulume; nenkukonke malu makuabo, ne wewe ummanyishe malu â. Wewe udi musue kuvuisha kulumbuluisha kuanyi kuakane ne, Kudi tshianana, anyi? Udi musue kunuisha meme bua wewe umanye mua kubingishibua, anyi? Wewe udi ne diboko bu dia Nzambi, anyi? Udi mua kuela dî diebe bu mukungulu wa nvula bu mudiye wenza, anyi? Udilengeshe ne bulengele ne bunene, udiluatshishe ne butumbi ne buneme. Lesha tshiji tshiebe tshikole; tangila muntu yonso udi mudisue ne umuhuekeshe. Tangila muntu yonso udi mudisue, umuhuekeshe hanshi; diata bantu babi mu makasa mu miaba yonso idibo bimana. Ubajike hohamue mu dinfuenkenya dia buloba, jingila mpala yabo mu miaba misokome. Hashishe, nenkutumbishe kahidi ne, Diboko diebe dia tshianza tshia balume didi dimanye mua kunsungila. Tangila biebe nguvu, unakafuka nʼebe diatshimue. Yeye udi udia mashinde bu mudi ngombe wenza. Bukole buandi budi mu bidimba biandi, ngulu yandi idi mu mifungu ya mu difu diandi. Yeye udi ukonya mukila wandi, ûkolesha bu ditamba dia ku mutshi wa cèdre. Mifungu ya ku bibelu biandi idi misuikakasha. Mifuba yandi idi bu mishiba ya tshiamu tshia mitaku, mikolo yandi idi bu milonda ya tshiamu tshifike. Yeye udi wa ku mpala munkatshi mua bintu biakenza Nzambi; anu yeye wakamufuka ngudi umuha muele wandi wa nvita. Bulelela, mikuna idi imuvuishila bia kudia biandi, mu miaba idi nyama yonso ya mu tshisuku inaya. Yeye udi ulala muinshi mua mitshi ya ku muelelu wa musulu, mu tshisokomenu tshia mu malenga ne mu bintampi. Mitshi ya ku muelelu wa mai idi mubuikila ne dileshi diai; malenga a ku kasulu adi amunyunguluka. Mona, biahasalala musulu bikole, kena uzakala; yeye udi ushala holâ, nansha biula musulu bu wa Yadene ne mai tô ne hafikau mukana muandi. Mukuabo udi mua kumukuata hadiye untangila ku mesu, anyi? Mukuabo udi mua kutubula diulu diandi ne lukanu, anyi? Udi mumanye mua kuhatula ngandu mu mai ne ndobo, anyi? Udi mumanye mua kushindika ludimi luandi ne muonshi, anyi? Udi mumanye mua kuela muonshi wa mukudi wa ntuhu mu diulu diandi, anyi kutubula lubanga luandi ne lukanu, anyi? Yeye neakutendekene ne mitendekenu ya bungi, anyi? Neakule hebe ne mei a kalolo, anyi? Neahunge nʼebe tshihungidi, bua wewe umuangate bu muena mudimu webe tshiendelele, anyi? Udi mua kunaya handi bu mûdi unaya ne nyunyu, anyi? Udi mua kumusuika bua mishikankunde yebe inaye nʼandi, anyi? Bilembi nebienduluke handi mushinga, anyi? Nebamuabanyangane munkatshi mua benduluki ba mushinga, anyi? Wewe udi mua kûsha tshiseba tshiandi tente ne biamu bidi ne milonda mitue, anyi mutu wandi tente ne tubenda, anyi? Lenga tshianza tshiebe hamʼbidi handi; elangana meji a nvita ei; kuena wenza muanda eu kabidi kashidi! Mona, ditekemena dia muntu udi ukeha kumukuata didi hatuhu. Mutshima wa muntu kawena uhanga munda muandi anu biamumoneye ku mesu, anyi? Kakuena muntu udi ne tshimbambila bua yeye amusonsole; nunku nganyi udi mua kuimana ku mpala kuanyi? Muntu kai wakadianjila kumpa tshintu, bua meme mmufute kabidi? Bintu bionso bidi muinshi mua diulu mbianyi. Tshiena mpuwa talalâ bua bidimba biandi, anyi bua bukole buandi ne bua bulengele bua mubidi wandi. Muntu kai udi mua kuvula bivualu biandi bidi hamʼbidi handi? Muntu kai udi mua kubuela mu mbanga yandi? Muntu kai udi mua kubulula mukana muandi? Kunyunguluka kua menu andi kudi buowa bukole. Nyima wandi udi ne milongo ya mabamba adi bu ngabu yandi, mikuatakane hohamue bu mituangashe bikole. Diamba dimue didi ditamba kukuatakana ne dikuabo, ne bua muanda eu luhehele kaluena lumanye mua kuhita hankatshi hau nansha. Dinga didi dilamatangana ne dikuabo; onso adi alamatangana bikole, kaena mua kuhanduludibua. Kuela kuandi kua nyashi kudi kukenkesha dinkenka bu munya, mesu andi adi bu bilafinyi bia kabundubundu ka dinda. Ndimi ya kahia idi ihatuka mukana muandi, nsase ya kahia idi ihatuka munda muandi kabidi. Muishi wa kahia udi uhatuka mu mihembu ya diulu diandi, bu mudiu uhatuka mu tshivuadi tshidi tshisaba ha kahia ka ntuhu idi ihia muinshi muatshi. Muhuya wandi udi utemesha makala a kahia, ludimi lua kahia ludi luhatuka mukana muandi kabidi. Bukole budi bujalama mu nshingu wandi, buowa budi buja maja ku mpala kuandi. Bituha bia munyinyi wandi bidi mu difu diandi bidi bilamatangana, bidi bikole hamʼbidi handi ne kabiena mua kunyunguishibua. Mutshima wandi udi mukole bu dibue; e, udi mukole bu dibue dia kuhelelahu manvua. Hajukeye, bantu bakole badi batshina, bualu bua buowa budi bubakuata, badi balua bu bahale. Bakeba muntu kumutaha ne muele wa nvita, kawena umuenzela bualu. Difuma anyi kabenda anyi mukete kabiena binuenzela bualu. Yeye udi ubala tshiamu tshifike bu nsona, ne tshiamu tshia mitaku bu mutshi mubole. Mukete kawena mumanye mua kumuihata. Yeye udi wandamuna mabue a bieledi alue bu bihatu kudiye. Bikau bidi bibadibue kudiye bu bisonsa; udi useka tshiona tshia kabenda hamuelaboku. Tshiseba tshia mu tshiadi tshiandi ne tshia mu difu bidi bu biyoyi bia ngesu; udi ushiya tshikoka hanshi ha bintampi bu mudi tshiamu tshia kushihula nʼatshi tshishiya. Yeye udi uhunja mai male bua asa be bu mudi mai asaba mu tshivuadi. Udi utuntumika mai manene bu mudi manyi a kulaba ha mputa atutuka mu mulondo. Udi ushiya mulanjilanji mu mai ukenka ku nyima kuandi, mukuabo wakadi welangana meji ne. Mai manene adi ne nvi mitoke tô. Kakuena nyama mukuabo bu yeye hanshi ha buloba, udi mufukibue kayi ne buowa. Yeye udi utangila bintu bionso bidi bidibandisha, ubihetula; udi mukelenge wa nyama yonso idi iditumbisha. Hashishe, Yobo wakakudimuna Yehowa dî ne, Ndi mumanye ne, Wewe udi ne bukole bua kuenza malu onso, ne kakuena muntu udi mua kukanda bualu buwakuhangidisha. Nganyi udi usokoka meji hadiye kayi ne lungenyi? Nunku nakuamba malu andi tshiyi mujingulule bimpe, malu adi atamba kunkemesha anakadi tshiyi mumanye. Ndi nkusengelela ne, Unvue, nenkuambile bualu; nenkukonke, ne wewe ummanyishe. Nakunvua lumu luebe diambedi anu ku matshu, kadi mpindiu mesu anyi akukumona. Bua muanda eu ndi mudihishe, ndi ukudimuna mutshima wanyi, ndi nsomba mu luhuishi ne mu butue. Kakambila Yehowa Yobo mei â, Yehowa wakambila Elifaza, Muena Temana, ne, Tshiji tshianyi tshidi tshitema kudi ne kudi balunda bebe babidi. Bualu bua kanuakuamba mei malelela bua bualu buanyi, bu mudi muntu wanyi Yobo wamba. Nunku nudiangatshile balume ba ngombe muanda mutekete ne bimpanga muanda mutekete, nuye nʼabi kudi muntu wanyi Yobo. Nubifile bu milambu ya kuosha bua bualu buenu; ne muntu wanyi Yobo nennulombele Nzambi. Bualu bua ne-ngunvue disengelela diandi bua bualu buenu, bua tshinuenzedi bibi bua buhote buenu. Bua kanuakuamba mei malelela bua bualu buanyi, bu muakuamba muntu wanyi Yobo. Hashishe, Elifaza, Muena Temana, Biledada, Muena Shuhi, ne Sofa, Muena Namata, bakaya kuenza bu muakabambila Yehowa; ne Yehowa wakitabusha disengelela dia Yobo. Yehowa wakakudimuna dikenga dia Yobo, wakamu hingishila diakalengele, hakalombeleye balunda bandi Nzambi. Yehowa wakavudisha bintu bia Yobo bihite bia diambedi misangu ibidi. Hashishe, bana babo ba balume bonso ne bana babo ba bakashi bonso ne bonso bakadi balunda bandi diambedi bakalua kumumona, bakadia nʼandi bia kudia mu nsubu muandi. Bakamulesha luse luabo, bakamusamba bua makenga onso akadi Yehowa mumutumine. Muntu yonso wakamuha tshituha tshimue tshia tshiamu tshia or ne kakanu ka or ka ku munu. Yehowa wakasankisha Yobo mu matuku andi a kunshikidilu ne disanka dihite diakadiye nʼadi mu matuku a ku tshibangidilu. Yeye wakadi ne mikoko binunu dikumi ne binai, tumelo binunu bisambombo, ne ngombe ibidi ibidi ku tshikokedi tshimue bu bikokedi tshinunu ne bakashi ba nyama ya mpunda tshinunu. Yobo wakaheta bana ba balume muanda mutekete ne bana ba bakashi basatu. Wakidika muanʼa bute wa bakashi dina ne, Yemima; muibidi ne, Kesia; ne muanʼa mukala ne, Kelene-hapuka. Mu buloba abu buonso kabakâsangana bakashi bakuabo ne mpala milengele bu muakadi bana ba bakashi ba Yobo. Tatu wabo wakabaha buhianyi munkatshi mua bana babo ba balume. Ku nyima kua malu au Yobo wakashala ne muoyo bidimu lukama ne makumi anai; ne bua muanda eu wakamona bana bandi ba balume ne bana ba bana bandi ba balume, tô ne ku milongo inai. Nunku Yobo wakafua, muntu mununu, matuku andi mule tente ne disanka. Disanka didi kudi muntu udi kayi ulonda lungenyi lua bantu babi, udi kayi wimana mu nshila diatshimue ne benji ba malu mabi, udi kayi mushikame mu tshisombelu tshia babuidi. Kadi disanka diandi didi mu mikenji ya Yehowa, ne mu mikenji yandi mudiye welangana meji munya ne butuku. Yeye udi bu mutshi wakukunabo kukala kua misulu ya mai, udi ukuama mamuma au mu tshidimu tshiau; dibeshi diau kadiena difubidila. Malu onso adiye wenza adi atuta diakalengele. Bantu babi kabena nunku nansha, kadi badi bu bisote bidi luhehele luhehula. Nunku bantu babi kabena bajalame halua kulumbuluisha kuabo. Benji ba malu mabi kabena bamanye mua kushala mu disangisha dia bantu bakane. Bualu bua Yehowa udi mumanye nshila wa bantu bakane, kadi nshila wa bantu babi neajimine. Bualu kai ba mu bisamba bia bende badi badisangisha hohamue bua bafune bulobo, ne bantu ba bende badi bahangidisha meji a malu a hatuhu? Bakelenge ba ha buloba badi badijadika, ne bakokeshi badi bela tshifufu, bua kutombokela Yehowa ne wandi muedibue manyi, bamba ne, Tutshibule nkanu yabo bituha, tumushe mionshi yabo hamʼbidi hetu. Yeye udi mushikame mu diulu udi useka, Mukelenge udi uhahetula. Hashishe, yeye neakule nʼabo mu tshiji tshiandi, neabatshinyishe mu tshiji tshiandi tshikole, wamba ne, Meme hanyi nakujadika Mukelenge wanyi ha mutu ha Siona, mukuna wanyi wa tshijila. Nengambile bantu mukenji wandi; Yehowa wakungambila ne, Wewe udi muana wanyi; lelu eu nakuelela. Ulombe, nenkuhe bantu ba bisamba bia bende bu buhianyi buebe, ne ba kunfudilu kua buloba bu bantu bebe. Wewe neubatshibule ne dikombo dia tshiamu; neubasunsulule bu mudibo basunsula luesu lua mufumbi wa ngesu. Nunku, nuenu bakelenge, nuikale ne meji; nuyishibue, nuenu bakokeshi ba ha buloba. Nukuatshile Yehowa mudimu ne dishina, nusanke nʼandi ne nuzakale diatshimue. Nuluangane mishiku ne muana wandi wa balume, bua yeye kikadi ne tshiji, ne bua nuenu kanujiminyi mu nshila. Bualu bua tshiji tshiandi tshidi tshitemeshibua lukasa. Disanka didi kudi bonso badi bamueyemena! Yehowa, mona mudi bena lukuna banyi basangane nunku! Ba bungi badi bajuka bangimanyina bua kunduisha. Ba bungi badiku badi bambila mutshima wanyi ne, Kakuena luhandu luebe kudi Nzambi. Kadi wewe, Yehowa, udi ngabu udi undama nseke yonso, wewe mbutumbi buanyi ne mujudi wa mutu wanyi. Ndi ndila kudi Yehowa ne dî dianyi dikole, ne yeye udi witaba kundi ne dî difuma ku mukuna wandi wa tshijila. Nakalala hanshi, nakadila tulu; nakabika ku tulu, bualu bua Yehowa wakundama. Tshiena ntshina mbombo ya bantu badi bantshintshimika ku nseke yonso. Juka bieba, Yehowa, ansungile, Nzambi wanyi. Bualu bua wewe wakakuma bena lukuna banyi bonso ku matama abo, Wakatshibula menu a bantu babi. Luhandu ludi lufuma kudi Yehowa. Disankisha diebe dikale kudi bantu bebe! Hanakuela dî, ungitabe, wewe Nzambi wa buakane buanyi; wewe wakunshikika mu muaba munene hanakadi mu dikenga; unfuile luse, unvue kulomba kuanyi. Nuenu bana balume ba bantu, nenuandamune butumbi buanyi bua kuluabu bundu musangu bule bishi? Nenusue malu a hatuhu, nenukebe mashimi musangu bule bishi? Kadi mimanye ne, Yehowa wakudijidila muntu muakane bua bualu buandi; Yehowa neangunvuile hanamuela dî. Nuikale ne tshiji, kanuenji malu mabi; nuelangane meji a bualu ebu mu mitshima yenu hanuikala ha malulu enu, ne huwai. Nufile milambu ya buakane, nueyemene Yehowa. Ba bungi badi bamba ne, Muntu kayi watulesha diakalengele? Yehowa, utubandishile munya wa mpala webe. Wewe Wakuteka disanka mu mutshima wanyi, ditamba dia mu tshikondo tshia kuyisangana kua maminu abo ne nyinyo yabo mihia-mihia. Nendale hanshi, nendale tulu mu ditalala kabidi, bualu bua wewe nkayebe, Yehowa, udi unvuishila muaba wa kusomba talalâ. Yehowa, teleja matshu ebe ku mei anyi, unvua meji andi ngela. Unvua dî dia muadi wanyi, Mukelenge wanyi ne Nzambi wanyi; bualu hua kudi wewe nkundi ndomba. Yehowa, mu dinda neunvue di dianyi; mu dinda nenteke kulomba kuanyi ku mpala kuebe, nengindile ditaba diebe. Bualu bua wewe kuena Nzambi udi usanka mu malu mabi; malu mabi kaena mamanye mua kushala nʼebe kaba kamue. Bantu badi bafunafuna kabena bamanye mua kuimana ku mesu kuebe. Wewe udi ne benji ba malu mabi bonso lukuna. Wewe neubutule bena mashimi. Yehowa udi ukenuka bantu badi bamatshisha mashi hanshi ne badi badinga bakuabo. Kadi meme hanyi nembuele mu nsubu muebe bua kukumbana kua luse luebe; nenkuinamine mu ntempelo webe ne dikutshina dianyi. Yehowa, undombole mu buakane buebe bualu bua bena lukuna banyi; ululamishe nshila webe ku mesu kuanyi. Bualu bua kakuena mei mukana muabo atudi mua kueyemena, mitshima yabo idi miule tente ne malu mabi; miminu yabo idi bu nkita mibulula, badi babomba bakuabo ne ndimi yabo. Nzambi, ubahishe; bua bobo bine badishinde ku malu adibo bahangidisha. Bualu bua malu mabi abo akuvulangana, ubihate; bualu bua bakukutombokela. Nunku bonso badi banyemena kudi basanke, bele mbila ya disanka tshiendelele; ne wewe neubalame; bonso badi bananga dina diebe bikale ne disanka kûdi. Bualu bua wewe, Yehowa, udi uvudishila muntu muakane disanka; udi amunyunguluka ne diakalengele bu mudibo benza ne ngabu. Yehowa, kumbedi mu tshiji tshiebe, ne kunkengeshi mu kufika kuebe kua munda bikole. Yehowa, unfuile luse, bualu bua ndi ngamba kuteketa; Yehowa, unsangashe, bualu bua mifuba yanyi idi izakala. Mutshima wanyi udi unyingalala bikole. Ne wewe, Yehowa, neunshiye nunku musangu bule bishi? Alukila, Yehowa, usungile muoyo wanyi; usungile bualu bua luse luebe. Bualu bua kakuena dikuvuluka mu lufu. Mu Muaba wa Bafue wakutumbisha nganyi? Kutua kuanyi kua mikemu kudi kuntonda; butuku buonso ndi mpumuna binsonshi bu mai mu bulalu buanyi, ne mu kudila kuanyi ndi mbolesha bulalu buanyi. Mesu anyi adi mondoke ne tshinyanu bualu bua kanyinganyinga kanyi, adi alua bileshileshi bualu bua bena lukuna banyi. Nuenu, benji ba malu mabi bonso, umukai kundi; bualu bua Yehowa wakunvua dî dia muadi wanyi. Yehowa wakunvua kusengelela kuanyi. Yehowa neitabushe kutendelela kuanyi. Bena lukuna banyi bonso nebafuishibue bundu, nebikale ne buowa bukole. Nebalukile tshianyima; nebafuishibue bundu ku mesu lukasa. Yehowa, Nzambi wanyi, ndi munyemene kûdi. Unsungile kudi bantu bonso badi bangihata, umpandishe. Bua kabampandi bu mudi nyama wa ntambue mua kuenza, badi bantuanya bihesa bihesa handi tshiyi ne musungidi. Yehowa, Nzambi wanyi, bingikala muenze bualu ebu; bingikala ne bualu bubi mu bianza bianyi; bingikala mufute muntu malu mabi hakadiye nʼanyi talalâ; (e, nakusungila muena lukuna wanyi, meme tshiyi nʼandi bualu); bua malu â udi nʼanyi lukuna angihate, ampete; e, adiatakashe muoyo wanyi mu buloba, aladike butumbi buanyi hanshi mu dinfuenkenya. Yehowa, ujuke biebe mu tshiji tshiebe, udibisbe bua kutamba tshiji tshia bena lukuna banyi bukole, utabale bua bualu buanyi mu kulumbulula kuwakusungula. Disangisha dia bantu ba ha buloba dikunyunguluke; ne hawikala ku mutu kuadi, hingana biebe mu diulu. Yehowa udi ulumbuluisha bantu ba ha buloba. Undumbuluishe meme, Yehowa, bu mudi buakane buanyi ne bu mudi butoke bua mutshima wanyi. Bubi bua bantu babi bushike, kadi ujadike bantu bakane; bualu bua Nzambi muakane udi uteta meji abo ne mitshima yabo. Ngabu wanyi udi kudi Nzambi, udi usungila badi ne mitshima miakane. Nzambi udi mulumbuluishi muakane, Nzambi mene udi ufua tshiji ku dituku ku dituku. Biabenga muntu kukudimuna mutshima wandi, yeye neasakishe muele wandi wa nvita; wakunana buta buandi, wakubulongolola bimpe. Wakumulongoluela bielelu bia nvita bia lufu kabidi; udi ukudimuna mikete yandi hua kuluayi mikete idi ne kahia kasuikaku. Monai, muntu eu mubi udi utantamana ne malu mabi; wakimita bubi, wakulela mashimi. Wakumbula dijimba, wakudidiundisha, wakuhona mu mutubu wakambileye. Bualu buandi bubi nebuhingane ha mutu handi mene, ne tshimbambila tshiandi netshihingane ha lubuyangala lua mutu wandi mene. Nensakidile Yehowa bu mudi buakane buandi, nengimbile dina dia Yehowa Mutambe Bunene wa mu diulu misambu ya kumutumbisha nʼai. Yehowa, Mukelenge wetu, ke mudi dina diebe ne butumbi ha buloba buonso nunku! Wewe Wakuteka butumbi buebe ha mutu ha diulu! Mukana mua bana ne mua batshidi bamua mabele mmuwakujadika bukole buebe, bualu bua bena lukuna bebe, bua wewe mumanye mua kuhuwisha muena lukuna ne mudisombuedi. Handi ntangila diulu diebe, didi mudimu wa bianza biebe, ne ngondo ne mitoto biwakufuka; Muntu udi nganyi bua wewe kumuelela meji? Ne muana wa muntu udi nganyi bua wewe udi umulama ne dinanga? Bualu hua wakunfuisha ku nyima kua Nzambi anu kakese, wakamuasa tshifulu tshia butumbi ne buneme. Wakumuvuisha mukokeshi wa ha mutu ha midimu ya bianza biebe, wakuteka bintu bionso muinshi mua makasa andi: mikoko yonso ne ngombe, ne nyama ya mu tshisuku; ne nyunyu ya mulu ne minyinyi ya mu mai manene, bintu bionso mene bidi bihitakana mu nshila ya mu mai manene. Yehowa, Mukelenge wetu, ke mudi dina diebe butumbi ha buloba buonso nunku! Nensakidile Yehowa ne mutshima wanyi wonso; nengambile bantu bua malu ebe onso a kukema. Nengikale ne disanka ne musangelu bua bualu buebe; nengimbile dina diebe misambu ya kuhumbisha nʼai, wewe Nzambi Mutambe Bunene wa mu diulu. Bualu bua bena lukuna banyi badi babikila ku nyima, badi balenduka ne badi bajimina ku mesu kuebe. Buala bua wakujadika buakane buanyi mu tshilumbu; wakushikama mu mkuasa wa bukelenge ulumbulula ne kulumbulula kuakane. Wakabela bisamba bia bantu, wakubutula bantu babi; wakujimisha dina diabo tshiendelele. Bena lukuna bakubutidibua; misoko yabo lwakushimbula yakulua bikulu tshiendelele. Tshivulukidi tshiai mene tshiakajimina. Kadi Yehowa udi mushikame bu Mukelenge tshiendelele. Wakulongolola nkuasa wandi wa bukelenge bua kulumbulula kuandi. Nealumbuluishe ba ha buloba mu buakane buandi, neakose bilumbu bia bantu, kayi ne kansungusungu. Nunku Yehowa neikale tshibumba tshile kudi bantu badi bakengeshibua. Neikale tshibumba tshile kudi bantu mu tshikondo tshia ntatu. Badi bamanye dina diebe nebakueyemene; buala bua wewe, Yehowa, kuena muanze kulekela bantu badi bakukeba. Nuimbile Yehowa udi mushikame mu Siona misambu ya kumutumbisha nʼai; numanyishe bienzedi biandi munkatshi mua bantu ba ha buloba. Bualu bua yeye udi usombuela mashi abo udi ubavuluka; kena uhua muadi wa bahele muoyo. Yehowa, unfuile luse, tangila dikenga dindi nʼadi kudi badi nʼanyi lukuna; wewe udi umbisha bua kungumusha ku bibi bia ku lufu; bua meme kumanyisha bantu bua butumbi buebe buonso, bua meme kusanka bua luhandu luebe ku bibi bia muana wa bakashi wa Siona. Ba mu bisamba bia bantu bakuhona mu dijimba diakumbulabo; dikasa diabo diakukuatshibua mu bukuondo buakusokokabo: Yehowa wakudimanyisha kudi bantu, wakukosa bilumbu biabo; bantu babi badi bakuatshibua mu mateyi akenzabo ne bianza biabo. Budi bantu babi nʼabu mbua kualukila mu Muaba wa Bafue; bonso mene ba mu bisamba bia bantu badi bahua Nzambi muoyo nebenze nunku. Bualu bua kabena bahua badi bakengela bintu muoyo tshiendelele, ne ditekemena dia badi ne mitshima mihuekele kadiena dijimina kashidi. Yehowa, juka biebe; kuitabushi bua bantu bakutambe bukole, balumbuluishe ba mu bisamba bia bantu ku mesu kuebe. Yehowa, ubakuatshishe buowa, ba mu bisamba bia bantu bamanye biabo ne, Tudi anu bantu. Yehowa, wewe udi wimana kule kuakua bua tshinyi? Udi usokoma mu bikondo bia makenga bua tshinyi? Muntu mubi mu kudisua kuandi udi wihata bantu bahele bikole; witabushe bua bantu babi bakuatshibue mu mateyi akuhangidishabo. Bualu bua muntu mubi udi ufunafuna bua malu adi mutshima wandi musue, munyengi wa bintu udi uhenda Yehowa ne udi umuhetula. Muntu mubi udi wamba mu diambu diandi ne, Nzambi kena ukengesha muntu. Meji andi onso adi anu nunku ne, Kakuena Nzambi. Bienzedi biandi bidi bimuvuishila diakalengele misangu yonso; kulumbulula kuebe kudi kule kudiye, kudi mesu andi kâyi mua kukumona. Ne mutudi tumona bua bena lukuna bandi bonso, yeye udi ubela muhuya. Udi wamba mu mutshima wandi ne, Kabena bannyungisha; tô ne mu bikondo bionso tshiena ntuta dikasa dibi. Mukana muandi mudi mûle tente ne bihendu ne kudinga ne nvita; muinshi mua ludimi luandi mudi lukinu ne malu mabi. Udi ushikama mu miaba misokoma ya mu misoko, walamina bantu; mu bisokomenu udi ushiha badi kabayi ne tshilumbu. Mesu andi adi atentekela badi kabayi mua kudikuatshisha. Udi ulala walamina bu mudi nyama wa ntambue walamina mu tshihuka; udi walamina nunku bua kukuata muena dikenga. Udi ukuata muena dikenga hamukokeye mu bukuondo buandi. Udi ubutama, udi winama hanshi; badi kabayi ne dikuatshisha badi babona ku mpala kua bantu bandi bakole. Yeye udi udiamba mu mutshima wandi ne, Nzambi wakuhua muoyo; udi usokoka mpala wandi, kena utangila bualu ebu kashidi. Yehowa, juka biebe, Nzambi wetu, bisha tshianza tshiebe. Kuhu hadi mu dikenga muoyo. Muntu mubi udi ulengulula Nzambi bua tshinyi, ne udi wamba mu mutshima wandi ne, Wewe kuena unkengesha? Wewe wantangila bualu ebu, bualu bua utu watangila kanyinganyinga ne dikenga, bua kubikanda ku tshianza tshiebe. Udi kayi ne dikuatshisha udi udifila mu bianza biebe; wewe wakumana kuikala mukuatshishi wa bana ba nshiya. Utshibule diboko dia muntu mubi, bakebekebe bubi bua muenji wa malu mabi tô ne hawikala kuyi mua kubumona kabidi. Yehowa udi Mukelenge tô ne tshiendelele; bisamba bia bantu biakujimina mu buloba buandi. Yehowa, wewe wakunvua kulomba kua badi ne mitshima mihuekele; udi ujadika mitshima yabo, udi uteleja matshu ebe kudibo. Bua wewe kulumbulula bilumbu bia bana ba nshiya ne bia badi bakengeshibua ne kulumbulula kuakane; bua muntu wa ha buloba kamanyi mua kukuatshisha bakuabo buowa kabidi tshiendelele. Ndi nyemena kudi Yehowa; munyi munudi nungambila ne, Unyeme bu nyunyu ku mukuna webe? Bua mona mudi bantu babi banana buta buabo, hadi bahayika mukete ku mulemu, bua kuwela mu mîdima bua kuasa nʼau badi ne mitshima mitoke. Hashimbulabo bishimikidi bia nsubu, muntu muakane udi mua kuenza tshinyi? Yehowa udi mu ntempelo wandi wa tshijila, Yehowa mene udi ne nkuasa wandi wa butumbi mu diulu. Mesu andi adi amena, bilafinyi biandi bidi biteta bana ba bantu. Yehowa udi uteta muntu muakane; kadi mutshima wandi udi ne muntu mubi ne muntu udi musue malu a tshimbambila lukuna. Yeye nealokeshile bantu babi makala a kahia; kahia ne soufre ne luhehele ludi luosha nebikale tshituha tshia luhanza luabo tshidibo baheta. Bualu bua Yehowa udi muakane; udi unanga buakane; bantu badi bakane nebamonangane nʼandi ku mesu. Yehowa, unkuatshishe; bualu bua muntu muakane kenaku kabidi; bualu bua badi mua kueyemenyibua badi bajimina munkatshi mua bukua bantu. Badi bambilangana mashimi, muntu ne muntu ne muena mutumba nʼandi. Badi bakula ne mishiku ya lubombo ne mitshima ibidi. Yehowa udi umushe bonso badi ne mishiku ya lubombo, ne ludimi ludi lufunafuna malu manene. Badi bamba ne, Netudivuishe bantu bakole ku ndimi yetu; mishiku yetu itudi nʼai nyetu; mukelenge ku mutu kuetu nganyi? Bualu bua badi bakengesha bahele, bualu bua badi bakengela bintu badi balua mikemu, Yehowa udi Wamba ne, Nembike bianyi; nemmushikike mu muaba wa luhandu udiye ukebakeba. Mei a Yehowa adi mimpe; adi bu tshiamu tshia argent tshiakufulabo mu ditanda dia ha buloba, tshiakufulabo misangu muanda mutekete. Wewe Yehowa, neubalame; neubalame bua kubasungila ku tshikondo etshi tô ne tshiendelele. Bantu babi badi bendakana ku nseke yonso, hatumbishabo malu a bundu munkatshi mua bukua bantu. Yehowa, musangu bule munyi wewe neuhue bualu buanyi muoyo? Ntshiendelele, anyi? Neusokoke mpala webe kundi musangu bule bishi? Musangu bule munyi undi mua kuikala ne ntatu munda muanyi, ne kanyinganyinga mu mutshima wanyi ku dituku ku dituku? Muena lukuna wanyi neadibandishe ku mutu kuanyi musangu bule munyi? Untangile ne witabe kundi, Yehowa, Nzambi wanyi. Utandule mesu anyi, bua tshiadi tulu tua lufu; bua muena lukuna wanyi kambi biandi ne, Nakumutamba bukole; ne bua bahumbishi banyi kabasanki bualu bua nakudishinda. Kadi nakueyemena luse luebe; mutshima wanyi neusanke bua luhandu luebe. Nengimbile Yehowa musambu, bualu bua wakungenzela malu mimpe makumbane. Muhote udi wamba mu mutshima wandi ne, Kakuena Nzambi. Bobo badi banyanguke, badi benza malu mabi adi afuisha bundu; kakuena nansha umue wabo udi wenzaku malu mimpe. Yehowa wa mu diulu wakatangila hanshi hadi bana ha bantu, bua kumoneye ne, Umue wabo udi wenza bu muena meji, anyi? Umue wabo udi ukeba Nzambi, anyi? Buonso buabo bakusesuka mu nshila; buonso buabo bakumana kunyanguka hamue. Kakuena umue wabo udi wenza bimpe; kakuena nansha umuehele udi muimpe. Benji ba malu mabi bonso kabena ne meji, anyi? Badi badia bantu banyi bu mudibo badia bidia, ne kabena babikila dina dia Yehowa. Ku muaba wawa badi ne buowa bukole; bualu bua Nzambi udi mu mulongo wa bantu bakahe. Nuenu nudi basue kufuisha malu akudihangidishila muhele bundu, kadi Yehowa udi tshinyemenu tshiandi. Nakadi kusua bua luhandu lua Bena Isalele lufume ku Siona! Hakudimuna Yehowa buhika bua bantu bandi bua kubaha diakalengele, Yakoba neasanke, ne Bena Isalele nebikale ne disanka kabidi. Yehowa, muntu kai neashikame mu nsubu webe wa ntenta? Washikama mu mukuna webe wa tshijila nganyi? Nyeye udi wenda mu buakane, udi wenza malu makane, udi wamba mei malelela mu mutshima wandi. Nyeye udi kayi wela mukoso ne ludimi luandi, udi kayi wenzela mulunda wandi bibi, udi kayi unvua mei a bunsonge adibo bamba bua muena mutumba nʼandi. Ku mesu andi muntu mubi udi mulenguludibue; kadi udi utumbisha bantu badi banemeka Yehowa. Biaditshiheye ne bualu bubi budi bumukuata, yeye kena wandamuka ku dî diandi. Kena usombesha bakuabo argent yandi bua kuangateye kasombela kudibo, kena witabusha dibueshila bua kunyangeye tshilumbu tshia muntu udi kayi ne bualu. Muntu udi wenza malu â kena unyungishibua tshiendelele. Nzambi undame, bualu bua ndi nkeba tshinyemenu tshianyi kûdi. Nakuambila Yehowa ne, Wewe udi Mukelenge wanyi, tshiena ne diakalengele didi dikuhita wewe. Ndi ngamba bua bansanto ba ha buloba ne, Badi bantu bimpe bandi ne disanka bualu buabo. Tunyinganyinga tuabo netukumbane kudi badi baha nzambi mikuabo maha abo bua kubenga Yehowa. Meme tshiena nfila milambu yabo ya mashi idibo bahumuna, tshiena ntela mena ai ku mishiku yanyi. Yehowa udi luanyi luseke lua buhianyi buanyi ne lua luhanza luanyi; wewe mene udi unjadikila luseke luanyi lua buhianyi. Mionshi ya luidi yakubona mu miaba mimpe bua bualu buanyi; bulelela, ndi ne buhianyi bulengele. Nenvudishile Yehowa disanka, wakumpa lungenyi; bulelela, mu meba a butuku mutshima wanyi udi unyisha. Nakuteka Yehowa ku mpala kuanyi misangu yonso; bualu bua yeye udi ku tshianza tshianyi tshia balume tshiena nyungishibua. Nunku mutshima wanyi udi usanka, ne nyuma wanyi udi usanka kabidi Mubidi wanyi udi mushikame muhandishibue. Bualu bua wewe kuena ushiya muoyo wanyi mu Muaba wa Bafue; kuena witabusha bua muntu webe wa tshijila atangile Dijimba dia Bafue. Wewe neundeshe nshila wa muoyo. Tshiuwidi tshia masanka tshidi ha buihi nʼebe; masanka adi mu tshianza tshiebe tshia balume tshiendelele. Yehowa, unvua bualu budi buakane; teleja matshu ebe ku kudila kuanyi; teleja matshu ebe ku kulomba kuanyi kudi kuhatuka ku mishiku idi kayiyi ne lubombo. Dikosa dia nsambu yanyi difume kuebe kûdi mushikame; mesu ebe atangile bualu budi buakane. Wewe wakuteta mutshima wanyi; wewe wakulua kundi mu butuku; wewe wakunteta, kukumangana ne meji mabi. Mukana muanyi kabidi kamuena muamba malu mabi. Mu bikadilu bia bantu nakudimuka, bualu bua dî dia ku mishiku yebe, bua tshilondi nshila ya bena dibutuka. Bienzedi bianyi biakulamata nshila yebe bikole, makasa anyi kâkuselemuka. Nzambi, ndi nkubikila, bualu bua wewe newitabe kundi. Teleja matshu ebe kundi, unvua dî dianyi. Lesha luse luebe ludi lutukemesha, wewe udi Usungila badi bakeba tshinyemenu ku tshianza tshiebe tshia bukole bua kuhanduka kudi badi bajuka bua kubaluisha. Undame bu kamonyi ka disu diebe; unsokoke muinshi mua mundidimbi wa mahuahua ebe, kudi bantu babi badi bankengesha, kudi bena lukuna banyi badi bannyunguluka ku nseke yonso bakeba kunshiha, Bakukanda mitshima yabo bua kabikadi ne luse, badi bamba mei a diambu mukana muabo. Miaba yonso itudi basue kuenda bakutunyungulukaku mpindiu, badi bateka mesu abo kutudi bua kutuhonesha hanshi, mbu mudi nyama wa ntambue hadiye ne lukuka lua kukuata tshintu, ne bu mudi muana wa nyama wa ntambue walamina mu miaba misokoma. Yehowa, ujuke biebe, wimane ku mpala kuandi, umuele hanshi; usungile muoyo wanyi kudi muntu mubi ne muele webe wa nvita. Yehowa, unsungile kudi bantu ne tshianza tshiebe, kudi bantu badi ne luseke luabo lua muoyo anu ha buloba ebu, ne bena mafu awakûsha tente ne bintu bia mu tshibutshilu tshiebe. Bana hadibo balela badi bûkuta, badi bashila bana babo bakese bintu bidi bishala ha mutu. Kadi meme hanyi, mu kubingishibua kuanyi, nemmone mpala webe: nengikale ne disanka dikumbane hanatabala ne hanatangila tshifuanyikishi tshiebe. Ndi nkunanga, wewe Nzambi, bukole buanyi. Yehowa udi dibue dianyi, musoko wanyi wa ngumbu ya nvita, ne musungidi wanyi. Udi Nzambi wanyi, dibue dianyi mundi nnyemenamu. Udi ngabu wanyi, ne lusengu lua luhandu luanyi, tshibumba tshianyi tshile. Nembikile Yehowa, udi muakanangane ne butumbi bua bantu bamutumbisha. Nunku nakusungidibua mu bianza bia bena lukuna banyi. Makuondo a lufu akanyunguluka, kubutuka kuakadi bu mai mahasalala kuakantshinyisha. Makuondo a Muaba wa Bafue akanyunguluka, mateyi a lufu akadi ku mpala kuanyi. Mu kanyinganyinga kanyi nakadibikila Yehowa, nakadila kudi Nzambi wanyi. Yeye wakunua dî dianyi hakadiye mu ntempelo wandi, muadi wanyi kudiye wakafika ku matshu andi. Ka buloba buakazakala ne buakanyunga, bishimikidi bia mikuna mile biakazakala kabidi ne biakakanka, bualu bua yeye wakadi ne tshiji. Muishi wa kahia mufume mu diulu diandi wakabanda mulu, kahia kakahatuka mukana muandi kakosha bintu. Makala a kahia matemesha kudiye akakalundula. Yeye wakinamisha diulu kabidi, wakahueka biandi hanshi; midima mikole yakadi muinshi mua makasa andi. Wakenda mubande ha nyima ha mukeluba, wakahahala; e, wakaya lubilu ne mahuahua a luhehele. Wakavuisha midima tshisokomenu tshiandi, wakavuisha matutu manene akadi mafike bua mai akadimu bu ntenta mumunyunguluke. Mu dikenka diakadi ku mpala kuandi muakahatuka matutu andi manene akadi ne mabue a nvula ne makala a kahia. Yehowa wakakunguisha mikungulu ya nvula kabidi mu diulu, Mutambe Bunene wa mu Diulu wakamba dî diandi, mabue a nvula ne makala a kahia. Wakela mikete yandi, wakamuangalasha bena lukuna banyi; wakahenyisha miele ya nvula, wakabahita bukole. Hashishe, nshila ya mu mai manene yakamueneka ku mesu, ne bishimikidi bia buloba biakasokolodibua, bua kubela kuebe, Yehowa, ne bua kuhuja kua muhuya wa mu diulu diebe. Wakatuma tshianza tshiandi tshifume mu diulu, wakankuata, wakampa tula mu mai a bungi. Wakansankisha mu bianza bia muena lukuna wanyi mukole, ne bia bantu bakankina, bualu bua bakampita bukole. Bakalua ne nvita ku mpala kuanyi mu dituku dia dikenga dianyi; kadi Yehowa wakadi tshieyemenu tshianyi. Wakaluhuka nʼanyi, wakanteka mu muaba munene, wakampandisha, bualu bua wakasanka bua bualu buanyi. Yehowa wakanfuta difutu diakadi dikumbana buakane buanyi; wakampingashila difutu bu muakadi butoke bua bianza bianyi. Bualu bua nakalamata nshila ya Yehowa, ne tshiakumuka kudi Nzambi wanyi bua kumuenzela malu mabi. Mikenji yandi yonso mijalame yakadi ku mpala kuanyi, ne tshiakumusha mikenji yandi kundi. Tshiakadi ne tshilumbu ku mpala kuandi, nakadikanda bua tshienji bualu bubi. Bua malu â Yehowa wakanfuta bu muakadi buakane buanyi ne bu muakadi butoke bua bianza bianyi ku mesu kuandi. Wewe udi udimuenesha bu muena luse kudi badi ne luse, udi udimuenesha kuyi mua kubandibua kudi muntu udi kayi ne tshilumbu. Udi udimuenesha muena mutshima mutoke kudi muntu udi ne mutshima mutoke; udi udimuenesha muena budimu kudi muntu udi ne tshitshu. Bualu bua udi ubandisha bantu badi badihuekesha; kadi udi uhuekesha badi ne mesu a dihetu, E, udi untemeshila muinda wanyi; Yehowa Nzambi wanyi udi untokeshila midima yanyi. E binuikala nʼebe, ndi mua kutshimuna mualu wa bena nvita, ne ku dikuatshisha dia Nzambi wanyi ndi mua kutuhika lumbu. Au mmalu a Nzambi — nshila wandi udi muakane tshishiki; dî dia Yehowa diakatetshibua ne, Didi dia bushuwa. Yeye udi ngabu wa banso badi banyemena kudiye. Bualu bua Nzambi udi nganyi, bikaleye kayi Yehowa nkayandi? Udi dibue nganyi, bikaladi kadiyi Nzambi wetu? Nzambi mene udi unjingila ne bukole, udi uvuisha nshila wanyi mululame tshishiki. Udi uvuisha makasa anyi bu mikono ya ngulungu mukashi, udi ungimanyika ha mutu ha mikuna yanyi mile. Udi uyisha bianza bianyi mua kuluanganabi nvita; nunku maboko anyi adi mua kunana buta bua tshiamu tshia mitaku. Wewe wakumpa ngabu wa luhandu luebe, tshianza tshiebe tshia balume tshiakungimanyika, ne kudihuekesha kuebe kuakunvuisha muntu munene. Wakadiundisha muaba undi ngendela muinshi mua makasa anyi, bua makasa anyi kâselemuki. Nakihata badi nʼanyi lukuna, nakabaheta; tshiakalukila kabidi tô ne hanakamana kubashiha. Nakabasa, nakabasompola, nunku kabakamanya mua kujuka kabidi; bakahona muinshi mua makasa anyi. Bualu bua wewe wakajingila ne bukole bua kuluangana nvita; wakinamisha bantu bakabika bua kuntantamena muinshi muanyi. Wewe wakenzesha bena lukuna banyi bua kunkomabo nyima, nakadimusha bakadi nʼanyi lukuna. Bakadila; kadi kakuakadi muntu wakabasungila, bakadila kudi Yehowa mene, kadi yeye kakitaba kudibo. Ka nakababotesha balue bu luhuishi ku mpala kua luhehele, nakabimasha bu bitahikidi bia mu misesu. Wewe wakansungila ku mafuilangana a bantu; wakanteka ku mutu kua bisamba bia bantu. Bantu banakadi tshiyi muanze kumanya diambedi bakankuatshila mudimu. Mu diba diakunvuabo lumu luanyi bakantumikila; ba mu bisamba bia bende bakulua kunkokela ne lubombo. Ba mu bisamba bia bende bakateketa, bakaluhuka mu miaba yonso ya ngumbu bazakala. Yehowa udi ne muoyo; dibue dianyi divudishibue disanka, ne Nzambi wa luhandu luanyi atumbishibue, Nzambi eu mene udi usombuela, udi uhuekesha bantu muinshi mua bukokeshi buanyi. Udi unsungila mu bianza bia bena lukuna banyi; e, wewe udi umbandisha ku mutu kua badi bajuka ne nvita ku mpala kuanyi; udi umpandisha kudi bena tshimbambila. Bua malu â nenkutumbishe munkatshi mua bisamba bia bantu, Yehowa, nengimbile dina diebe misambu. Yeye udi uhesha mukelenge wakasunguleye luhandu lunene, udi ulesha muntu wandi muedibue manyi ha mutu luse lunene, udi ulesha Davidi ne tunkanunuma tuandi luse tô ne tshiendelele. Diulu didi diamba butumbi bua Nzambi; bia mu diulu bibaluluke bidi bimuenesha midimu ya bianza biandi. Dituku dimue didi diakulangana ne dikuabo dituku, ne butuku budi bumanyisha bukuabo lungenyi. Kakuena muaku, kakuena mei; dî diabi kadiena diunvuibua; mukunda wabi udi uya mu miaba yonso ya ha buloba, ne mei abi adi aya tô ne kunfudilu kua buloba. Munkatshi muabi muakashimikileye diba nsubu wa ntenta, didi bu mubaki wa mukashi haluhukeye mu nsubu muandi, ne didi disanka bua kuendadi luendu luadi bu mudi muntu mukole usanka. Dihatuka diadi didi kunfudilu kua diulu, ne kunyunguluka kuadi kudi kufika kundekelu kua diulu; kakuena tshintu tshidi tshisokoka ku munya wadi. Mikenji ya Yehowa idi miakane tshishiki isangasha muoyo wa muntu; Tshimanyishilu tshia Yehowa tshidi mua kueyemenyibua, tshidi tshivuisha muntu udi mudibakane muena meji. Mei a Yehowa adi malelela, adi asankisha mutshima; mukenji wa Yehowa udi mulengele, udi utandula mesu a bantu. Ditshina dia Yehowa didi ditoke, didi dishindama tshiendelele; dî dijalame dia Yehowa didi dia bushuwa, didi ne buakane misangu yonso. Kubinanga kudi kuhita kunanga or buimpe; e, kudi kuhita kunanga or wa mushinga mukole wa bungi buimpe. Bidi bihita buitshi ne mamata a buitshi a ku dihula kushemakana. Muntu webe udi mudimushibue kabidi kudibi; ne mu kutumikila kuabi mudi bukenji bunene. Udi mumanye mua kujingulula mahanga andi nganyi? Umbingishe ku malu mabi andi tshiyi mumone ku mesu. Ukande muntu webe kabidi bua kenji malu mabi mu tshitshu tshiandi; malu â mabi kânkokeshi nansha! Nunku nengikale tshiyi ne bualu bua kumbandabo nʼabu, nembingishibue ku malu mabi manene. Mei a mukana muanyi ne meji andi ngela mu mutshima wanyi ikale mitabushibue ku mesu kuebe, Yehowa, dibue dianyi ne muhikudi wanyi. Yehowa itabe kudi mu dituku dia dikenga diebe! Dina dia Nzambi wa Yakoba dikushikike ku muaba wa kulu! Yeye akutumine dikuatshisha difume ku nsubu wandi wa tshijila, akukoleshe ne bukole bufume ku Siona! Yeye avuluke milambu yonso ya bia kudia iudi ufila, ne itabushe milambu yebe ya kumuoshila ne disanka! Akuhe malu adi mutshima webe munange, akushikishile malu onso awahangidisha! Netuele mbila ya disanka bua luhandu luebe mu nvita yetu, ne mu dina dia Nzambi wetu netuimanyike mabendela etu. Yehowa akushikishile milombu yebe yonso. Katataka ndi mumanye ne, Yehowa neasungile wakueleye manyi ha mutu handi, neitabe kudiye ne ditaba difume mu diulu diandi dia tshijila, ku bienzedi bikole bia tshianza tshiandi tshia balume tshidi tshimusungila. Bakuabo badi beyemena makalu a nvita, bakuabo badi beyemena tubalu; kadi tuetu netutele dina dia Yehowa Nzambi wetu. Bobo nebiname, nebadishinde hanshi; kadi tuetu nenjuke, netujalame. Yehowa, usungile mukelenge; witabe kutudi hatu a kubikila. Yehowa, mukelenge neasanke mu bukole buebe, ke, mudiye usanka bikole bua luhandu luebe! Wewe wakanuha bualu buakadi mutshima wandi musue, kuakuhidia kunyua dilomba dia ku mishiku yandi. Bualu bua udi umuakidila ne masanka mimpe; udi wasa tshifulu tshia bukelenge tshia or wa mushinga mukole ha mutu handi. Yeye wakakulomba muoyo, wewe wakamuhau, wakamuha matuku awakamuleheshila tô ne tshiendelele. Butumbi buandi budi bunene bualu bua luhandu luebe, udi uteka buneme ne butumbi hamʼbidi handi. E, wewe udi umuvisha bu udibo batamba kuvudishila masanka tshiendelele; udi umusankisha ne disanka dia kuikaleye nʼebe ku mpala kuebe. Bualu bua mukelenge udi weyemena Yehowa; ne bualu bua luse lua Nzambi Mutambe Bunene wa mu Diulu yeye kena unyungishibua. Tshianza tshiebe netshihete bonso badi nʼebe lukuna; tshianza tshiebe tshia balume netshihete badi bakukina. Neubavuishe bu tshikutu tshidi tshitema ne kahia mu tshikondo tshiwamueneka. Yehowa neabamine mu tshiji tshiandi, ne kahia nekabashidishe. Wewe neubutule bana baledibue kudibo, neubumushe ha buloba, neumushe tunkanunuma tuabo munkatshi mua bukua bantu. Bualu bua bakuhunga di bua kukuenzela bibi; bakakuhangidishila bualu munda muabo, kadi kabena bamanye mua kubushikisha. Bualu bua wewe neubakomeshe nyima bua kubanyemesha; muludikile mikete mu milemu yebe ya buta bua kubasa mu mpala yabo. Wewe Yehowa, utumbishibue mu bukole buebe! Netuimbe misambu, netutumbishe bukole buebe! Nzambi wanyi, Nzambi wanyi, wakundekela tshinyi? Bualu kai wewe udi aku kule kuyi unkuatshisha, kuyi unvua mei a kutua kuanyi kua mikemu? Aka, Nzambi wanyi, ndi ndila kûdi mu munya, kadi wewe kuena witaba; ndi ndila kûdi mu diba dia butuku, kadi tshiena nsangana dikisha. Kadi wewe udi wa tshijila, udi mushikika mu nkuasa wa butumbi munkatshi mua butumbi bua Bena Isalele. Batatu betu bakakueyemena, bakakueyemena, ne wewe wakabasungila, Bakadila kûdi, bakahandishibua; bakakueyemena, kabakafuishibua bundu. Kadi meme hanyi ndi munanyi, tshiena muntu; ndi tshidibo bahetula kudi bantu, ndi mulenguludibue kudi bantu. Bonso badi bantangila badi banseka, badi banfunkuna mishiku, badi bakuha mitu, bamba ne, Wakadifila kudi Yehowa; yeye amusungile, yeye amuhandishe, bualu bua udi usanka bualu buandi! Kadi wewe nyeye wakampatula mu difu dia mamu wanyi; wewe wakauyisha mukueyemenyi hanakadi mu tshiadi tshia mamu wanyi. Bakanua bua dindama diebe ku dituku diakandelabo; wewe udi Nzambi wanyi katshia mamu wanyi wandela. Kuikadi nʼanyi kule; bualu bua dikenga didi ha buihi, ne kakuena munkuatshishi. Balume ba ngombe ba bungi badi bannyunguluka, balume ba ngombe bakole ba mu Bashana badi banjika nseke yonso. Badi bambuluila mukana muabo bitongatonga, bu mudi nyama wa ntambue utuanya wenda udila. Ndi muhongoloke bu mai, mifuba yanyi yonso idi mihauke mu manungu ai; mutshima wanyi udi bu dihula, wakufingatuka munda muanyi. Bukole buanyi buakûma bu tshiyoyi tshia luesu, ne ludimi luanyi ludi lulamatu tshilakalaka tshianyi. Wewe udi undadika mu dinfuenkenya dia lufu. Bualu bua mbua yakunnyunguluka, tshisumbu tshia benji ba malu mabi tshidi tshingela munkatshi; bakuntaha mputa misompoke mu bianza ne mu makasa. Ndi mua kubala mifuba yanyi yonso. Badi banjosha talalâ, badi bangosha mesu. Badi babanyangana bilulu bianyi munkatshi muabo, badi belela bivualu bianyi nshobo. Kadi wewe, Yehowa, kuikadi kule nansha! Wewe, udi bukole buanyi, ulue lukasa bua kunkuatshisha! Usungile muoyo wanyi musûke bua kaufu ku muele wa nvita, usungile muoyo wanyi muine ku bukole bua mbua. Unsungile mukana mua nyama wa ntambue, usungile muoyo wanyi mukengeshibue ku lufu lua ku nsengu ya mbowa! Nengambile bana betu bua dina diebe; nenkutumbishe munkatshi mua ba mu disangisha dia bantu ba Nzambi. Nuenu badi batshina Yehowa, numutumbishe! Nuenu, bana bonso ba Yakoba, numutumbishe; nuenu, bana bonso ba Isalele, nukuatshike buowa ku mpala kuandi! Bualu bua yeye kakahetula ne kakakenuka makenga a wakadi mu dikenga; kakasokoka mesu andi kudiye, kadi wakamunvuila hakadieye kudiye. Kukutumbisha kuanyi mu disangisha dinene dia bantu ba Nzambi kudi kufuma anu kûdi wewe; nemmane mitshihu yanyi ku mpala kua badi bamutshina. Badi ne mitshima mihuekele nebadie, nebûkute; badi bakeba Yehowa nebamutumbishe. Mitshima yenu ikale ne muoyo tshiendelele! Ba mu kunfudilu kua buloba nebamuvuluke, nebakudimune mitshima yabo kudi Yehowa. Ba mu biota bionso bia bisamba bia bantu nebatendelele ku mpala kuebe. Bualu bua bukelenge budi bualu bua Yehowa, ne yeye udi mukokeshi wa bisamba bia bantu. Bulelela, bonso badi badibandisha ha buloba nebamuinamine; bonso badi bahueka tô ne mu dinfuenkenya nebamukukuile, yeye mene udi kayi mumanye mua kudisungila muoyo wandi nênze nunku. Tunkanunuina tua bantu netumukuatshile mudimu. Bantu nebambile bena mulongo udi ubalonda ku nyima bualu bua Mukelenge. Nebambile bantu badi kabayi banze kuedibua bua buakane buandi, nebabandile ne, Yeye wakubuenza. Yehowa udi mulami wanyi, tshiena nkengela tshintu; Yeye udi undadika mu mitoloka ya mashinde. Udi undombola hehi ne mai adi talalâ; udi ukankamasha mutshima wanyi. Udi undombola mu nshila ya buakane bualu bua dina diandi. Nansha bingenda muhitshile mu luhongo lua mundidimbi wa lufu, tshiena ntshina bualu bubi; bualu bua wewe udi nʼanyi; tshibongo tshiebe ne tshibangu tshiebe bidi binsamba. Wewe udi ulongolola mesa ku mesu kuanyi ku mpala kua badi nʼanyi lukuna; udi wela manyi ha mutu hanyi, luhanza luanyi ludi luhongoloka. Bulelela, buimpe ne luse nebindonde matuku onso a muoyo wanyi; nengikale mu nsubu wa Yehowa tshiendelele. Buloba budi bua Yehowa ne tshiuwidi tshiabu, buloba buine ne badi bashikamamu. Bualu bua yeye wakabushikika ha mai manene, wakabujadika ha misulu ya mai. Wabanda mukuna wa Yehowa nganyi? Wimana mu muaba wandi wa tshijila nganyi? Nyeye udi ne bianza bidi kabiyi bienza bualu bubi ne udi ne mutshima mutoke, udi kayi mubandishile muoyo wandi ku malu a mashimi, udi kayi muditshihe mitshihu bua kudingeye nʼai. Yeye neangate disanka diamuvudishilabo kudi Yehowa, ne buakane budi Nzambi wa luhandu luandi umubingisha nʼabu. Aba mbantu ba mu tshikondo etshi badi bamukeba, badi bakeba mpala webe, wewe Nzambi wa Yakoba. Ambulai mitu yenu, nuenu bibi bia musoko; banuambule, nuenu bibi bia kale, bua Mukelenge wa Butumbi abuelemu! Mukelenge wa butumbi nganyi? NYehowa, udi ne dikanda ne bukole buhite, Yehowa udi mukole mu nvita! Ambulai mitu yenu, nuenu bibi bia musoko! E, banuambule, nuenu bibi bia kale, bua Mukelenge wa Butumbi abuelemu. Mukelenge eu wa butumbi nganyi? NYehowa wa misumba, Yeye udi Mukelenge wa Butumbi! Yehowa, ndi muambule mutshima wanyi kûdi. Nzambi wanyi, nakukueyemena wewe; kuitabushi bua banfuishe bundu; kuitabushi bua bena lukuna banyi bampite bukole. Bulelela, nansha umue wa badi bakuindila neafuishibue bundu; nebafuishe badi benzela bantu malu a bunsonge hatuhu bundu. Yehowa, ummanyishe bienzedi biebe! unyishe nshila yebe. Undombele biebe mu bulelela buebe, unyishe; bualu bua wewe udi Nzambi wa luhandu luanyi; ndi nkuindila wewe dinda tô ne ku dilolo. Yehowa, uvuluke luse luebe ne dinanga diebe dijalame, bualu bua biakadiku kale tô ne mpindiu. Kuvuluki malu mabi anakenza mu bunsongalume buanyi, anyi matomboka anyi; Yehowa, bu mudi luse luebe lujalame, unvuluke bualu bua buimpe buebe. Yehowa udi muimpe ne muakane; nunku udi uyisha bantu babi nshila wa bobo kuendela. Udi ulombola badi ne mitshima mihuekele mu malu adi makane; udi uyisha badi ne mitshima mihuekele nshila wandi Nshila yonso ya Yehowa idi ya luse lujalame ne lulamatu kudi badi batumikila tshihungidi tshiandi ne mikenji yandi. Bualu bua dina diebe, Yehowa, umbuikidile bubi buanyi, bualu bua budi bunene. Muntu kai udi utshina Yehowa? Yehowa neamumanyishe nshila udiye ne bua kusungula. Muoyo wandi muine newikale ne diakalengele, ne tunkanunuina tuandi netuhiane buloba. Bulunda bujalame bua Yehowa budi kudi badi bamutshina, ne yeye udi ubamanyisha tshihungidi tshiandi. Mesu anyi atu atangila kudi Yehowa misangu yonso, bualu hua yeye neahatule makasa anyi mu bukuondo. Ukudimuke bua kuntangila, undeshe luse luebe; bualu bua ndi nkayanyi ne ndi ne dikenga. Uholeshe tunyinganyinga tua mu mutshima wanyi, ne umpatule mu makenga anyi. Wele meji a dinyingalala dianyi ne a dikenga dianyi, ne umbuikidile mibi yanyi yonso. Wele meji a bena lukuna banyi, mudibo ba bungi, ne mudibo bankina ne lukuna lukole. Ulame muoyo wanyi, umpandule; kuitabushi hua meme kufuishibua bundu, bualu bua ndi munyemene kûdi. Lulamatu luanyi kûdi ne buakane buanyi bindame; bualu bua ndi nkuindila. Nzambi, uhikule Bena Isalele, ubahandule mu makenga abo onso. Yehowa, unkosele tshilumbu tshianyi ne kulumbulula kuakane, bualu bua nakuenda mu buakane buanyi, nakueyemena Yehowa tshiyi ndembakana. Tangila munda muanyi, Yehowa, untete; untete mu mutshima wanyi ne mu meji anyi. Bualu bua luse luebe lujalame ludi ku mesu kuanyi, ne ndi ngenda mu bulelela buebe. Tshiena mushikame ne bantu badi balonda malu a mashimi, tshiena mbuelakana ne badi basokoka malu mabi abo mu lubombo. Ndi nkina disangisha dia benji ba malu mabi, tshiena mushikame ne bantu babi. Ndi ngowa bianza bianyi tshiyi ne tshilumbu; nunku, Yehowa, ndi nyunguluka tshioshelu tshiebe; bua meme kunvuisha bantu dî dia kusakidila, ne bua kubambila bienzedi biebe bionso bia kukema. Yehowa, ndi nnanga muaba ûdi mushikame mu nsubu muebe, ne muaba udi butumbi buebe bushikame. Kumushi muoyo wanyi musûke ne bantu babi diatshimue, kumushi muoyo wanyi diatshimue ne bantu badi bakeba kumatshisha mashi, badi ne malu mabi mu bianza biabo adibo bahangidisha, ne badi ne bianza biabo bia balume biule tente ne mbueshilu. Kadi meme hanyi ndi ngenda mu buakane buanyi; umpikule, unfuile luse. Dikasa dianyi didi dimana mu muaba muhunga; nenvudishile Yehowa disanka mu masangisha a bantu bandi. Yehowa udi munya wanyi ne luhandu luanyi; nentshine nganyi? Yehowa udi ngumbu ya nvita mu muoyo wanyi; udi mua kunkuatshisha buowa nganyi? Hakalua benji ba malu mabi ha buihi nʼanyi bua kumbunda, bua kudiabo munyinyi wa mubidi wanyi, bakadi bakengeshi banyi ne bena lukuna banyi bakalenduka; bakadishinda hanshi. Nansha bialua musumba wa bena nvita kuasabo tshitudilu tshiabo bua kuntshintshimika, mutshima wanyi kawena ukuatshika buowa. Nansha biajuka nvita ku mesu kuanyi, mu muanda eu mene nengikale ne dieyemena dianyi. Nakulomba Yehowa bualu bumuehele, mbuobu bundi ukebakeba: bua meme kushikama mu nsubu wa Yehowa matuku onso a muoyo wanyi, bua kumona buimpe bua Yehowa, ne bua kuelangana meji a malu a mu ntempelo wandi. Bualu bua halua dituku dia diakabi, yeye neansokoke mu tshisokomenu tshiandi; yeye neansokoke munda mua nsubu wandi wa ntenta, neambandishe, neanshikike ha mutu ha dibue. Ka yeye neabandishe mutu wanyi mulu mpindiu ha mutu ha bena lukuna banyi badi banyunguluka; nenfile milambu mu nsubu wandi wa ntenta diatshimue ne mbila ya disanka. Nengimbe misambu; e, nengimbile Yehowa misambu bua kumutumbisha nʼai. Yehowa, ungunvuile hanadila ne dî dianyi kûdi; unfuile luse, witabe kundi! Wewe wakuamba ne, Ukebe mpala wanyi. Mutshima wanyi wakukuambila ne, Yehowa, nenkebe mpala webe. Kusokoki mpala webe kundi nansha. Kumushi muntu webe ku mpala kuebe mu tshiji, wewe wakadi mukuatshishi wanyi. Kungihatshi, kundekedi, wewe Nzambi wa luhandu luanyi! Nansha biandekela tatu wanyi ne mamu wanyi, Yehowa neangambule. Yehowa, unyishe nshila webe, undombele mu nshila mulandakane, bualu bua bena lukuna banyi. Kunfidi mu bianza bia bena lukuna banyi bua bangenzele bu mudibo basue; bualu bua bantemu badi ne mashimi badi bajuka bua kumbanda, badi bafunyina ne bukole. Ndi ngitabusha ne, Nemmone buimpe bua Yehowa mu buloba bua badi ne muoyo. Windile Yehowa; wikale ne bukole, ne mutshima webe wikale ne dikima; e, windile biebe Yehowa! Kûdi wewe, Yehowa nkundi ngela dî dianyi; dibue dianyi, kuikadi ne bitshi kundi; bua, biwahuwa, kuyi ungunvuila, nengikale bu badi bahueka mu Dijimba dia Bafue. Unvua dî dia kutendekena kuanyi, hanadila kûdi, longolola bianza bianyi ku muaba webe mutambe wa tshijila. Kunkoki bua kuya nʼanyi diatshimue ne bantu babi, diatshimue ne badi benji ba malu mabi; badi bambila bena mutumba nʼabo mei a luvuenge, kadi mu mitshima yabo mudi meji a malu mabi. Ubafute bu mudi mudimu wabo, ne bu mudi bubi bua bienzedi biabo, ubafute bu mudi mudimu wa bianza biabo; ufile bukenji kudibo budibo ne bua kuangata. Bualu bua kabena banemeka bienzedi bia Yehowa, anyi mudimu wa bianza biandi, yeye neabashimbule hanshi, kena ubibaka kabidi. Yehowa avudishibue disanka, bualu bua wakunvua biandi dî dia kutendekena kuanyi! Yehowa udi bukole buanyi ne ngabu wanyi; mutshima wanyi wakumueyemena, ndi mukuatshishibue. Nunku mutshima wanyi udi utamba kusanka, nemmutumbishe ne musambu wanyi. Yehowa udi bukole bua bantu bandi, udi lumbu lua luhandu kudi wandi muedibue manyi ha mutu. Usungile bantu bebe, uvudishile badi buhianyi buebe disanka; wikale mulami wabo, ubatuale tshiendelele. Samunai Yehowa, nuenu ba mu diulu, samunai Yehowa ne mei a butumbi buandi ne bukole buandi. Samunai Yehowa ne butumbi budi buakanangane ne dina diandi; tendelelai Yehowa, nuvuale bienu bivualu bilengele bia tshijila. Di dia Yehowa didi ha mai; Nzambi wa butumbi udi ukungusha mikungulu ya nvula, Yehowa mene udi uyikungusha ha mutu ha mai mangi. Dî dia Yehowa didi dî dikole, dî dia Yehowa didi diule tente ne butumbi. Di dia Yehowa didi ditshibula mitshi ya cèdre, e, Yehowa udi utshibula mitshi ya cèdre ya mu Lebanona bituha. Yeye udi utuhisha mukuna wa Lebanona bu mudi muana wa ngombe utuhika, udi utuhisha mukuna wa Sileona bu mudi muana wa mbowa utuhika. Di dia Yehowa didi dihenyisha miele ya nvula bu ndimi ya kahia. Di dia Yehowa didi dizakasha tshihela, Yehowa udi uzakasha tshihela tshia Kadesha. Dî dia Yehowa didi dilelesha ngulungu bana, didi diubula mitshi ya metu, divuisha metu matuhu. Mu ntempelo wandi bonso badi bela mbila ne, Mutumbishai! Yehowa wakashikama mu nkuasa wa butumbi mu tshikondo tshia nvula munene; e, Yehowa udi mushikame bu Mukelenge tshiendelele. Yehowa neaheshe bantu bandi bukole, Yehowa neasankishe bantu bandi ne ditalala. Yehowa, nenkutumbishe, bualu bua wakutula, kuakuitabusha bua badi nʼanyi lukuna basanke ku mutu kuanyi. Ke, Yehowa Nzambi wanyi, nakadila kudi bua wewe unkuatshishe, ne wewe wakunsangasha. Ke, Yehowa, wakuhaula muoyo wanyi mu Muaba wa Bafue, wakumpingashila muoyo wanyi bua meme tshikadi munkatshi mua badi bahueka mu Dijimba dia Bafue. Imbilai Yehowa misambu ya kumutumbisha nʼai, nuenu bansanto bandi, sakidilai dina diandi dia tshijila. Bualu bua tshiji tshiandi tshidiku anu tshituha tshihi, luse luandi ludiku matuku onso a muoyo wa muntu. Muadi udi mua kulua bu muladi butuku, kadi disanka didi dilua hatshiabu. Meme hanyi, hanakadi ne diakalengele, nakamba ne, Tshiena nyungishibua tshiendelele. Wewe Yehowa, bua luse luebe wakadi mujadike mukuna wanyi bua kushindamau bikole; wakasokoka mpala webe; nakatshina. Yehowa nakadi ndila kûdi, nakadi ntendekena Yehowa ne, Kumatshisha kua mashi anyi kudi mua kukukuatshisha munyi, binahueka mu Dijimba dia Bafue? Luhuishi nenkutumbishe, anyi? Neluambile bantu hua lulamatu luebe ku bushuwa, anyi? Yehowa, ungunvuile, undeshe luse luebe! Yehowa, wikale biebe mukuatshishi wanyi! Wewe wakungandamuina muadi wanyi bua kuluau kuja kua maja; wakusulula bilulu bianyi bikayabala, wakubinyula, wakunjingila ne mukaba wa disanka; Bua muoyo wanyi ukuimbile misambu ya kukutumbisha nʼai, kauhuwu. Yehowa Nzambi wanyi, nenkusakidile tshiendelele. Yehowa, ndi nnyemena kûdi; kuitabushi bua meme kufuishibua bundu kashidi, unsungile bua buakane buebe. Teleja matshu ebe kundi, umpandishe lubilu! Wikale dibue dia luhandu kundi, wikale musoko wa ngumbu ya nvita bua kunsungila! Bualu bua wewe udi dibue dianyi ne ngumbu yanyi ya nvita; nunku, bualu bua dina diebe wikale mulombodi wanyi, undombele mu nshila. Umpatule mu bukuondo buakungandabo mu musokoko, bualu bua wewe udi ngumbu yanyi ya nvita. Ndi nteka muoyo wanyi mu bianza biebe; wewe wakumpikula, Yehowa, wewe Nzambi udi ulamata ku bushuwa. Ndi nkina badi banemeka bintu bia hatuhu bidi bidinga bantu; kadi ndi ngeyemena Yehowa. Nengikale ne disanka, nensanke bua luse luebe lujalame, bualu bua wakumona dikenga dianyi, wakumanya malu adi amatshisha mu muoyo wanyi; ne kuakunfila mu bianza bia udi nʼanyi lukuna; wakujadika makasa anyi mu muaba munene. Unfuile luse, Yehowa, bualu bua ndi mu dikenga; mesu anyi adi mondoke ne tshinyanu bualu bua kanyinganyinga, muoyo wanyi ne mubidi wanyi bidi bienza nunku kabidi. Bualu bua muoyo wanyi udi ufika kunshikidilu kuau ne kanyinganyinga, ne bidimu bianyi biakuhita mu kuhumuna. Bukole buanyi budi buhanga bua bubi buanyi, mifuba yanyi idi mifingutuke. Nakulua muntu wa kubishabo tshihendu kudi badi nʼanyi lukuna, nakutamba kulua tshihendu kudi bena mutumba nʼanyi, ne bu tshintu tshia kubakuatshisha buowa kudi bilongo bianyi. Badi batangila ha bule ha nsubu badi banyema. Badi bampua muoyo mu mitshima yabo, bu mudibo bahua muntu mufue muoyo. Nakulua bu luesu ludi luhandike. Bualu bua ndi ngunvua dinunganyi dia mei a bunsonge a bantu ba bungi — buowa ku nseke yonso — hadibo badisangisha hohamue bua kungelela tshifufu, hadibo basangisha dî bua kunyengabo muoyo wanyi. Kadi ndi ngeyemena kudi, Yehowa, ndi ngamba ne, Wewe udi Nzambi wanyi. Bikondo bianyi bidi mu bianza biebe; umpandishe mu bianza bia badi nʼanyi lukuna, kudi badi bankengesha. Mpala webe atemene muntu webe, unsungile bua luse luebe lujalame. Yehowa, kuitabushi bua meme kufuishibua bundu, bualu bua ndi nkubikila. Bantu babi bafuishibue bundu, bahueke, babuwe talalâ, mu Muaba wa Bafue. Mishiku idi yamba mashimi ilue tumama, idi idiula bantu bakane ne dikamakama, ne mu diambu ne dihetu. Ke mudi buimpe buebe bukumbane, buwakubutshila badi bakutshina, buwakuenzela badi banyemena kûdi, buwakubenzela ku mesu kua bukua bantu! Wewe udi ubasokoka mu tshisokomenu tshiebe ku bifufu bidi bantu babelela. Udi ubalama mu musokoko mu tshitandatanda ku matandu adi ahatuka ku ndimi yabo. Yehowa avudishibue disanka, bualu bua wakundesha luse luandi lujalame ludi lunkemesha hanakadi mu musoko wa ngumbu ya nvita. Meme hanyi nakamba mu ditshina dianyi ne, Nakumushibua ku mesu kuebe, kadi wewe wakunvua di dia kutendekena kuanyi, hanakadila kûdi. Nangai Yehowa, nuenu bansanto bandi bonso. Yehowa udi ulama badi bananukila kumueyemena, kadi udi ufuta muntu udi wenza malu a diambu difutu didi dikumbana. Nuikale ne bukole, ne mitshima yenu ikale ne dikima, nuenu bonso badi bindila Yehowa! Disanka didi kudi muntu udi ne ditomboka diandi diumushibue, ne udi ne bubi buandi bubuikidibue! Disanka didi kudi muntu udi Yehowa kayi ubadila dihambuka diandi dia ku buakane, ne udi kayi ne lubombo mu mutshima wandi! Hanakadi muhuwe, mifuba yanyi yakafingutuka bualu bua kutua kuanyi kua mikemu dinda tô ne ku dilolo. Bualu bua munya ne butuku tshianza tshiebe tshiakanemena bujitu hamʼbidi hanyi; tshitelele tshianyi tshiakulua bu munanga wa mushihu. Nakatonda bubi buanyi kûdi, tshiakasokoka dihambuka dianyi ku buakane. Nakamba ne, Nentonde matomboka anyi kudi Yehowa; ne wewe wakandekelela dihila dia bubi buanyi. Bua bualu ebu muntu yonso udi unanga Nzambi akulombe mu tshikondo tshidiye mumanye mua kukusangana; bulelela, halua mai manene kuhasalala, kaena afika ha buihi nʼandi. Wewe udi tshisokomenu tshianyi; neundame bua tshikadi ne dikenga; neunnyunguluke ne misambu ya luhandu. Nenkuyishe lungenyi, nenkuleshe nshila udi ne bua kuendela, nenkuhe meji hatshidi disu dianyi kudi. Kanuikadi bu kabalu anyi bu nyama wa mpunda bidi kabiyi ne lungenyi, bidi ne bua kukandibua ne lukanu mukana muabi ne mionshi ya kubilombola nʼai, anyi kabiena bilua ha buihi nʼebe. Muntu mubi udi ne tunyinganyinga tua bungi, kadi muntu udi weyemena Yehowa udi munyunguluka ne luse lijalame. Nuikale ne disanka mu Yehowa, nusanke bikole, nuenu bantu bakane; elai mbila bua disanka dienu, buonso buenu badi bakane mu mitshima yenu! Nuenu bantu bakane, nusanke mu Yehowa. Kutumbisha Nzambi kudi kuakanangana ne bantu bakane. Nusakidile Yehowa ne tshisanji, numuimbile misambu ya kumutumbisha nʼai ne lunzenze ludi ne nshinga dikumi. Numuimbile musambu muhia-muhia, numuimbile ne tshimbilu tshimpe ne kuela kua mbila ya disanka. Bualu bua dî dia Yehowa didi diakane, udi wenza mudimu wandi wonso ne lulamatu lua bushuwa. Yeye udi unanga buakane ne kulumbulula kuakane, buloba budi bûle tente ne luse lujalame lua Yehowa. Ku dî dia Yehowa bintu bia mu diulu bia kufukibua, tshisumbu tshiabi tshionso tshiakafukibua ku muhuya wa mukana muandi. Udi ukungisha mai a mu mai manene mimane dibula; udi ubutshila ndondo ya mai manene mu bibutshilu. Ba ha buloba bonso batshine Yehowa; bonso badi bashikame ha buloba bikale ne buowa ku mpala kuandi. Bualu bua yeye wakamba dî diandi, ne buloba buakadiku; wakela mukenji, buakajalama. Yehowa udi uvuisha meji adi ba mu bisamba bia bantu bahangidisha malu a hatuhu; udi uhumbisha malu adi bantu bahangidisha bua kuenzabo. Lungenyi ludi Yehowa usungula ludi lujalama tshiendelele, meji adiye uhangidisha mu mutshima wandi adi ajalama tô ne ku bikondo bionso. Disanka didi kudi tshisamba tshidi ne Yehowa bu Nzambi watshi, mbantu bakusunguleye bua kuikalabo buhianyi buandi mene! Yehowa udi utangila hanshi, hadiye mu muaba wandi wa mu diulu, udi umona bana bonso ba bantu. Ku muaba udiye mushikame udi ujosha talalâ bonso badi bashikame ha buloba, yeye udi ufuka mitshima ya buonso buabo, udi umona bienzedi biabo bionso. Mukelenge kena usungidibua ku tshisumbu tshinene tshia masalayi, muena bukitu kena uheta luhandu ku bukole buandi bunene. Kabalu ka nvita kadi tshintu tshia hatuhu kudi badi batekemena luhandu kudiku; kakena mua kusungila bantu ku bukole buaku bunene. Monai, mesu a Yehowa adi kudi badi bamutshina, adi kudi badi ne ditekemena diabo mu luse luandi lujalame, bua yeye asungile mioyo yabo ku lufu, ne bua kubalama bua bikale ne muoyo halua tshiole. Muoyo wetu udi windila Yehowa; yeye udi dikuatshisha dietu ne ngabu wetu. Bua mitshima yetu idi isanka kudiye, bualu bua tudi tueyemena dina diandi dia tshijila. Yehowa, luse luebe lujalame luikale kutudi, bu mutudi tutekemena kudi. Nenvudishile Yehowa disanka bikondo bionso, kumutumbisha kuanyi nekuikale mukana muanyi misangu yonso. Muoyo wanyi neutumbile mu Yehowa; badi bahuekele nebunvue lumu elu, nebasanke. Tumbishai nʼanyi Yehowa, tunemeke bietu dina diandi diatshimue. Nakakeba Yehowa, ne yeye wakitaba kundi, wakansungila ku malu onso anakatshina. Bantu bakatangila kudiye bakadi ne mpala yabo mikenke ne disanka; mpala yabo kayena ikuatshika bundu tshiendelele. Muena dikenga eu wakadila kudiye, ne Yehowa wakamunvuila, wakamusungila ku makenga andi onso. Muanjelo wa Yehowa udi wasa tshitudilu tshiandi tshinyunguluke badi bamutshina, udi ubasungila. Teta, ulabule, unvue ne, Yehowa udi muakane; disanka didi kudi muntu udi unyemena kudiye! Nuenu bansanto bandi, nutshine Yehowa; bualu bua badi bamutshina kabena bakengela tshintu. Bana balume ba nyama ya ntambue badi bakengela bia kudia, nzala idi ibasuma; kadi badi bakeba Yehowa kabena bakengela tshintu tshimpe tshimue. Luai bienu, nuenu bana banyi ba balume, telejai matshu enu kundi; nennuyishe mudi ditshina dia Yehowa. Muntu kai udiku udi unanga muoyo, udi musue matuku andi alehe bua yeye amonemu diakalengele? Kanda ludimi luebe bua kaluambi malu mabi, kanda mishiku yebe bua kayambi mei a kudinga nʼau. Umuka ku malu mabi, enza malu mimpe; ukebe ditalala, udilonde. Mesu a Yehowa adi kudi bakane, ne matshu andi adi buashi ku kudila kuabo. Mpala wa Yehowa udi mutangisha kudi benji ba malu mabi bua kubakengesha, bua kujimisheye tshivulukidi tshiabo ha buloba. Bantu bakane badi badila dikuatshisha, Yehowa udi ubunvuila, udi ubahandula mu makenga abo onso. Yehowa udi ha buihi ne bantu badi ne mitshima idi itamba kunyingalala, udi Usungila badi ne mitshima ya majia. Makenga a muntu muakane adi a bungi; kadi Yehowa udi umusungila ku buonso buau. Yeye udi ulama mifuba yanyi yonso; kakuena umue wai udi utshibuka. Malu mabi neashihe muntu mubi; badi ne bantu bakane lukuna nebahishibue. Yehowa udi uhikula mioyo ya badi bamukuatshila mudimu; kakuena umue wa badi banyemena kudiye wahishibua. Yehowa, ufuilakane ne badi bafuilangana nʼanyi; uluishe badi baluangana nʼanyi. Ukuate ngabu mukese ne ngabu munene, ujuke biebe bua kunkuatshisha. Hatula difuma ne tshisola bua kukanda nʼabi badi bangihata. Ambila muoyo wanyi ne, Meme ndi luhandu luebe. Badi bakeba muoyo wanyi bafuishibue bundu, bakeheshibue. Badi bahangidisha malu mabi a kungenzela, bahingashibue ne babuandakashibue. Bikale biabo bu bisote ku mpala kua luhehele, hatshidi muanjelo wa Yehowa ubihata. Nshila wabo ikale ne mîdima ne busenu, hatshidi muanjelo wa Yehowa ubihata. Bualu bua hanakadi tshiyi ne tshilumbu, bakunsokokela bukuondo buabo mu dijimba; hanakadi tshiyi ne tshilumbu, bakumbuila muoyo wanyi tshina. Dibutuka dimukuate mu mpukahuka; bukuondo buandi buasokokeye bumukuate yeye muine; abuele biandi mu dibutuka adi mene. Ka muoyo wanyi newikale ne disanka mu Yehowa, neusanke mu luhandu luandi. Mifuba yanyi yonso neyambe ne, Yehowa, udi bu wewe nganyi? Wewe udi usungila muena makenga kudi muntu udi umuhita bukole, udi usungila muntu udi muena makenga ne muhele kudi muntu udi mumunyenge. Bantemu badi bena tshikisu badi bajuka; badi bankonka bua malu andi tshiyi mumanye. Badi bampingashila malu mabi ku malu mimpe; banshiya ne muoyo munyingalala. Kadi meme hanyi, hakadibo ne disama, nakaluata bilulu bikayabala; nakakengesha muoyo wanyi ne kujila kua bia kudia; kutendelela kuanyi nekuhingane mu tshiadi tshianyi nkayatshi. Nakendakana ne majia bu munakadi mua kudila mulunda wanyi anyi muanʼetu; nakinama mutu wanyi bua kudila bu munakadi kuashila mamu wanyi muadi. Kadi hanakalenduka, bakasanka, bakadisangisha kaba kamue; bena bunsonge ne bantu banakadi tshiyi mumanye bakadisangisha hamue bua kungenzelabo bibi, bakampenda kabayi mua kulekela. Bu mudi baseki badi ne dikamakama benza bua kuhetabo tshituha tshia mampa, bakandiangena ku menu abo. Mukelenge, neutangile bualu ebu hatuhu musangu bule bishi? Usungile muoyo wanyi musûke ku kubutula kuabo, usungile muoyo wanyi muine kudi nyama ya ntambue. Nenkusakidile mu disangisha dinene dia bantu; nenkutumbishe munkatshi mua tshisumbu tshinene tshia bakole. Kuitabushi bua badi nʼanyi lukuna bualu bua bunsonge buabo basanke ku mutu kuanyi. Kuitabushi bua badi bankina handi tshiyi ne bualu banjibe disu. Bualu bua kabena bamba mei a ditalala, kadi badi bahangidisha mei a mashimi bua kusonguelabo nʼau bantu badi bashikame talalâ mu buloba. E, badi babulula mukana muabo bitongatonga bua kunseka; badi bamba ne, Eyo, eyo, mesu etu akukumona! Yehowa, wewe wakumona bualu ebu; kuhuwu nansha. Mukelenge, kuikadi nʼanyi kule. Udisonsole, utabale bua kukosa nsambu yanyi biakane; bua kunkuatshisha mu tshilumbu tshianyi, Nzambi wanyi ne Mukelenge wanyi. Yehowa Nzambi wanyi, unkosele tshilumbu tshianyi bu mudi buakane buebe; bobo kabasanki bualu buanyi. Kabambi mu mitshima yabo ne, Eyo, ebu mbualu butudi basue. Kabambi ne, Tuakumumina. Badi basanka bualu bua dikenga dianyi bafuishibue bundu, babuandakashibue, buonso buabo hohamue. Badi badibandisha ku mpala kuanyi baluatshishibue bundu ne dikeheshibua. Badi basanka bua bualu buanyi buakane bele mbila ne bikale ne disanka. E bambe biabo matuku onso ne, Yehowa atumbishibue, yeye mene udi usanka mu diakalengele dia muntu udi umukuatshila mudimu. Ka ludimi luanyi nebambile bantu bua buakane buebe ne bua butumbi buebe dinda tô ne ku dilolo. Ditomboka diandi didi diambila muntu mubi dî munda mua mutshima wandi; kakuena ditshina dia Nzambi ku mesu kuandi. Bualu bua didi dimubomba ku mesu kuandi ne, Kabena bamuenesha dihambuka diebe dia ku buakane, kabena badikina. Mei a mukana muandi adi a kuenza malu a tshianana ne a kudinga; wakulekela kuikala muena meji ne mua kuenza malu mimpe. Udi uhangidisha bua kuenza malu a dihambuka halaleye mu bulalu buandi; udi udijadika mu nshila udi kayi muakane; kena ulengulula malu mabi. Yehowa, luse luebe lujalame ludi lufika tô ne mu diulu, lulamatu luebe lua bushuwa ludi lufika tô ne mu matutu. Buakane buebe budi bu mikuna ya Nzambi, kulumbulula kuebe kuakane kudi bu ndondo wa mu mai manene. Yehowa, wewe udi ulama bantu ne nyama bua kuikalabi ne muoyo. Nzambi, ke mudi luse luebe lujalame luikale lua mushinga mukole! Bana ba bantu badi banyemena muinshi mua mundidimbi wa mahuahua ebe. Badi bukuta ne bintu bia manyi bikumbana bia mu nsubu muebe, wewe udi ubanuisha ku musulu wa masanka ebe. Kûdi wewe kudi mushimi wa mai a muoyo; mu munya webe, tudi tumona munya. Unanukile kulesha luse luebe lujalame kudi badi bakumanye, ne buakane buebe kudi badi ne mitshima miakane. Dikasa dia diambu kadifiki kundi bua kundiata, ne tshianza tshia bantu babi katshingihatshi kule. Mu muaba wawa benji ba malu mabi badi balala hanshi, bakedibua hanshi, kabayi bamanye mua kujuka kabidi. Kunyingabadi bua benji ba malu mabi, kuikadi ne badi benza bienzedi bibi mukau. Bualu bua nebafubidile tshituha tshihi bu mashinde mataha, nebafubidile bu midioko mitekete. Eyemena Yehowa ne enza malu mimpe; nunku neushikame mu buloba, neudie bia kudia mu dimueyemena diebe. Wikale ne disanka diebe mu Yehowa, ne yeye neakuhe milombu idi mutshima webe ulomba. Uteke nshila webe mu bianza bia Yehowa; umueyemene yeye kabidi, ne yeye nênze malu andi. Yeye neumueneshe buakane buebe bu mudi munya umueneka, neamueneshe dibingishibua diebe bu diba dia munda munya. Shala holâ ku mpala kua Yehowa, umuindile ne lutulu. Kunyingabadi bualu bua muntu udi ututa dikasa dimpe mu nshila muandi, ne bua muntu udi ujadika malu mabi adiye uhangidisha. Lekela kufua tshiji, uhidie kuikala ne njiya. Kunyingabadi; bualu ebu budi mua kukuenzesha anu bualu bubi. Bualu bua benji ba malu mabi nebabutudibue; kadi badi bindila Yehowa nebahiane buloba. Tshituha tshihi katshiyi tshianji kuleha, muntu mubi kena wikalaku kabidi; e, neukebe kumona muaba wandi ne disuminyina, kena wikalaku. Kadi badi ne mitshima mihuekele nebahiane buloba, mioyo yabo neyisanke mu ditalala dikumbane. Muntu mubi udi welela muntu muakane tshifufu, udi umudiangena ku menu. Mukelenge udi umuseka, bualu bua udi umona ne, Dituku dia kumukengesha dilualua. Bantu babi badi bahatula muele wa nvita, badi banana buta buabo, bua kuhonesha bahele ne bakengedi ba bintu hanshi, bua kushihabo badi bakane mu nshila udibo bayamu. Muele wabo wa nvita neutubule mitshima yabo, mata abo neatshibuke. Bintu bikese bidi muntu muakane nʼabi bidi bitamba bintu bia bungi bia bantu babi bangi bulengele. Bualu bua maboko a bantu babi neatshibudibue, kadi Yehowa udi ukolesha bantu bakane. Yehowa udi mumanye matuku a bantu badi ne mitshima miakane, buhianyi buabo nebushale tshiendelele. Kabena bafuishibua bundu bikondo bia diakabi; mu matuku a tshiole nebukute. Kadi bantu babi nebajimine, ne badi ne Yehowa lukuna nebikale bu bulengele bua mashinde a mu madimi; nebajimine — bu mudi muishi wa kahia ujimina, nebajimine biabo. Muntu mubi udi usomba bintu, kena ubifuta kabidi; kadi muntu muakane udi ulesha bantu luse, udi ubaha bintu. Bualu bua badi Yehowa uvudishila disanka nebahiane buloba, ne badiye wela mulau nebajimishibue. Biendedi bia muntu bidi bijadikibua kudi Yehowa, ne yeye udi usanka bua nshila wandi. Biatankukeye, kena udishinda tshiula, bualu bua Yehowa udi umukuata ne tshianza tshiandi. Nakadi nsongalume, katataka nakulua muntu mukole; kadi tshiena muanze kutangila muntu muakane mushale hatuhu, anyi bana bandi baledibue balombe bia kudia. Dinda tô ne ku dilolo yeye udi ulesha bantu luse, udi ubasombesha bintu; tunkanuniuna tuandi tudi tuvudishibua disanka. Umuka ku malu mabi, enza malu mimpe; nunku neushale tshiendelele. Bualu bua Yehowa udi unanga kulumbulula kuakane, kena ulekela bansanto bandi. Bantu bakane nebalamibue tshiendelele, kadi bana ba bantu babi nebajimishibue. Bantu bakane nebahiane buloba, nebashikamemu tshiendelele. Mukana mua muntu muakane mudi muamba mei a lungenyi, ludimi luandi ludi luamba kulumbulula kuakane. Mukenji wa Nzambi wandi udi mu mutshima wandi; biendedi biandi kabiena biselemuka. Muntu mubi udi utentekela muntu muakane, udi ukeba kumushiha. Yehowa kena umushiya mu tshianza tshiandi, kena witabusha bua bamuhishe haluabo kumulumbuluisha. Windile Yehowa, ulamate nshila wandi, yeye neakubandishe bua wewe kuhiana buloba. Habutulabo bantu babi, wewe neumone muanda eu. Nakumona muntu mubi muikale ne bukole buandi bua bungi, mudituntumushe bu mutshi mubishi udi udiunda mu buloba buau, kadi nakahitshilaku, ne mona, yeye kakadiku; e, hanakamukeba, tshiakamanya mua kumusangana. Tangila muntu udi ne mutshima mutoke bimpe, mona muntu udi muakane; bualu bua tunkanunuma netuikale kudi muena ditalala. Kadi batomboki nebabutudibue, buonso buabo mene. Tunkanunuina tua bantu babi netujimishibue. Kadi luhandu lua bantu bakane ludi lufuma kudi Yehowa; yeye udi tshinyemenu tshiabo halua tshikondo tshia dikenga. Yehowa udi ubakuatshisha, udi ubasungila; udi ubabandisha mu bianza bia bantu babi, udi ubasungila, bualu bua badi banyemena kudiye. Yehowa, kumbedi mu tshiji tshiebe, kunkengesha mu kufika kuebe kua munda. Bualu bua mikete yebe yakubuela munda muanyi; tshianza tshiebe tshiakuhueka hamʼbidi hanyi bikole. Kakuena bukole mu misunyi yanyi bualu bua tshiji tshiebe; kakuena bukole kabidi mu mifuba yanyi bualu bua bubi buanyi. Bualu bua malu mabi anyi akûla, akuhita ha mutu hanyi. Bu bujitu bunene, adi atamba kunnemena bujitu. Mputa yanyi idi inunka muhuya mubi idi ihatula tufina, bualu bua buhote buanyi. Ndi ne nyima mukobame ne dikenga, ndi muhuekeshibue bikole; ndi ngendakana ndila dinda tô ne ku dilolo. Bualu bua mulemba wanyi udi mûle tente ne disama didi dingosha, kakuena bukole mu misunyi yanyi. Nakubanga ne ndi mutshibuke bikole; ndi ntua mikemu bualu bua dihampakana dia mu mutshima wanyi. Mukelenge, malu onso andi musue adi ku mpala kuebe; kuhumuna kuanyi kakuena kusokokibua kûdi. Mutshima wanyi udi ukuma, bukole buanyi budi bumuka kundi; munya wa mu mesu anyi kawenaku — wowo kabidi wakumuka kundi. Banangi banyi ne balunda banyi badi bashilangana nʼanyi bualu bua disama dindi nʼadi, ne bana betu badi bimana ha bule. Bantu badi bakeba kumana muoyo wanyi badi banteyela ndende yabo, badi bakeba kungenzela bibi badi bamba mei bualu bua kabutu, ne badi belangana meji a kudinga nʼau dinda tô ne ku dilolo. Kadi meme hanyi ndi bu muena bitshi, tshiena ngunvua; ndi bu kamama kadi kakayi kabulula mukana muaku. Bulelela, ndi bu muntu udi kayi unvua, ne udi kayi ne mei mukana muandi a kukudimuna nʼau badi bamubanda. Bualu bua kûdi wewe, Yehowa, kundi ntekemena; wewe neubakudimune dî, Mukelenge Nzambi wanyi. Bualu bua nakamba ne, Kabasanki bua bualu buanyi, badi badibandisha ku mpala kuanyi, haselemuka dikasa dianyi. Bualu bua ndi ngamba kudishinda, ne kanyinganyinga kanyi kadi ku mpala kuanyi matuku onso. Bualu hua ndi ntonda dihambuka dianyi ku buakane, ndi nyingalala bualu bua bubi buanyi. Kadi bena lukuna banyi badi batantamena, badi bakole; badi bankina hatuhu badi bavulangana. Badi bampingashila malu mabi ku malu mimpe badi nʼanyi lukuna, bualu bua ndi ndonda muanda udi muimpe. Yehowa, kundekedi nansha! Nzambi wanyi, kuikadi nʼanyi kule! Udiendeshe lubilu bua kunkuatshisha, Mukelenge, luhandu luanyi! Nakamba ne, Nendame mundi ngenda mu nshila yanyi, bua tshienji bibi ku ludimi luanyi. Nenteke tshintu tshia kujibika nʼatshi mukana muanyi, tô ne hatshidi muntu mubi ku mpala kuanyi. Nakadi kamama, nakahuwa talalâ nakahuwa tshiyi ne disanka, ne kanyinganyinga kanyi kakajudibua. Mutshima wanyi wakahiakana munda muanyi; hanakadi ngelangana meji munda muanyi, kahia kakatemamu; hashishe, nakamba di ne ludimi luanyi. Yehowa, ummanyishe nshikidilu wa muoyo wanyi, ne tshidikishilu tshia matuku anyi ne, Adi bungi munyi? Ummanyishe mudi muoyo wanyi uhita tshituha tshihi. Mona, wakunvuisha matuku anyi bu ntanta ya tshianza mu tshidikishilu tshiau, ne hidimu bia muoyo wanyi bu tshintu tshia hatuhu ku mesu kuebe. Bulelela, muntu yonso hadiye wimana mujalame udi anu bu muhuya. Bulelela, muntu yonso udi bu mundidimbi hadiye wendakana. Bulelela, badi batatakana anu bua bualu bua hatuhu. Muntu udi ubumba mishiki ya bintu, kadi kena mumanye ne, Wabisangisha nganyi? Mpindiu, Mukelenge, ndi ngindila tshinyi? Ditekemena dianyi didi anu kûdi. Umpandishe ku matomboka anyi onso. Kunvuishi muntu udi muhote uhenda. Ndi kamama, tshiena mbulula mukana muanyi; bualu bua wewe wakuenza bualu ebu. Ungumusha mukumu webe wa disama uwakunkuma; ndi ngamba kujimina bua dituta dia tshianza tshiebe. Hawabulukila muntu ne kubela kuebe bualu bua malu mabi andi, udi ujimisha bualu budiye utamba kusua bu mudi tshibayabaya tshienza. Bulelela, muntu yonso udi anu muhuya. Yehowa, unvua kulomba kuanyi, uteleje matshu ebe ku muadi wanyi. Kuhuwu talalâ nansha bua binsonshi bianyi. Bualu bua ndi muenyi udi nʼebe tshituha, ndi mushikame anu tshituha tshihi, bu muakadi batatu banyi bonso. Umusha mesu ebe kundi, bua meme kumanya mua kusanka kabidi; diambedi tshiyi muanze kumukaku, tshikadihu kabidi. Nakindila Yehowa ne lutulu, wakatelela matshu andi kundi, wakunvua muadi wanyi. Wakampa tula mu dijimba dia kabutu mu bintampi muakadi bitoshi. Wakimanyika makasa anyi ha dibue, wakajadika biendedi bianyi. Wakateka musambu muhia-muhia mukana muanyi, musambu wa kutumbisha nʼau Nzambi wetu. Bantu ba bungi nebamone luhandu luanyi, nebatshine, nebeyemene Yehowa. Disanka didi kudi muntu udi uvuisha Yehowa tshieyemenu tshiandi, udi kayi ukudimuna kudi badi badisue, anyi kudi badi hasesuka bua kulondabo mashimi. Yehowa Nzambi wanyi, wakuvudisha malu a kukema awakuenza ne malu awakuhangidisha bua kutuenzela, kakuena mukuabo utudi bamanye mua kuelekesha nʼebe. Binakeba kualondolola ne bua kuambila bantu malu â, neampite bua kuabala. Wewe kuena unanga mulambu wa nyama mushiha ne mulambu wa bia kudia; wewe wakujikula matshu anyi. Kuakulomba mulambu wa kuosha ha tshioshelu ne mulambu wa kubuikila nʼau mibi. Hashishe, nakamba ne, Mona, ndi ndua; mu mukanda muvunga mudi mufunda bua bualu buanyi; ndi ne disanka bua kuenza disua diebe, Nzambi wanyi, bulelela, mukenji webe udi mu mutshima wanyi. Nakuamba lumu luimpe lua buakane buebe mu disangisha dinene dia bantu, mona, tshiakukanda mishiku yanyi, wewe Yehowa, udi mumanye bualu ebu. Tshiakusokoka buakane buebe munda muanyi hawakumbingisha, nakuambila bantu bua lulamatu luebe lua bushuwa ne bua luhandu luebe. Tshiakusokokela ba mu disangisha dinene dia bantu luse luebe lujalame ne lulamatu luebe lua bushuwa. Yehowa, kunkandidi luse luebe lunene; luse luebe lujalame ne lulamatu luebe lua bushuwa bindame tshiendelele. Bua malu mabi adi kâyi mua kubadibua akunyunguluka; mahambuka anyi a ku buakane akundonda, akumpeta, tô ne handi tshiyi mua kutangila. Adi atamba nsuki ya ku mutu kuanyi bungi; mutshima wanyi wakumpangishila bukole. Yehowa, wikale ne disanka bua kumpandisha; Yehowa, ulue lukasa bua kunkuatshisha. Bantu aba bafuishibue bundu ne babuandakashibue, buonso buabo diatshimue, badi bakeba muoyo wanyi bua kûmushaku. Balukishibue tshianyima ne bakeheshibue, bobo mene badi basue kungenzela bibi. Badi bamba ne, Eyo, eyo! bakuatshike buowa bualu bua bundu buabo. Bonso badi bakukeba basanke ne bikale ne disanka bua bualu buebe. Bonso badi bananga luhandu luebe bambe matuku onso ne, Yehowa atumbishibue. Ahu meme hanyi ndi muhele ne mukengi, kadi Mukelenge udi wela meji a bualu buanyi. Wewe udi mukuatshishi wanyi ne musungidi wanyi; kujanguluki, Nzambi wanyi. Disanka didi kudi muntu udi wela meji a luse bua muntu udi ne mubidi mutekete! Yehowa neamuhandishe mu dituku dia dikenga. Yehowa neamulame, neamukube bua yeye ashale ne muoyo. Nebamubale bu muntu udi muvudishibue disanka ha buloba; ne wewe kumufidi mu bianza bia badi nʼandi lukuna bua bamuenzele bu mudibo basue. Yehowa neamukoleshe hadiye ulala ha bulalu bua butekete bua mubidi wandi; wewe wakukudimuna bulalu buandi bua disama buonso bua yeye asangale. Meme hanyi nakamba ne, Yehowa, unfuile luse; usangashe muoyo wanyi, bualu bua nakukuenzela bibi. Badi nʼanyi lukuna badi bamba mei mabi bua bualu buanyi ne, Yeye neafue diba kai, ne dina diandi nedijimine diba kai? Bialua umue wabo kuntangila, udi Wamba mei a kumbomba nʼau. Mutshima wandi udi uditekela malu a bunsonge. Haluhukeye bua kuya ha bule, udi wamba malu â. Bonso badi nʼanyi lukuna badi banungana hohamue bua bualu buanyi. Badi bangelela tshifufu bua dikenga dianyi, bamba ne, Bualu budi buvuisha lufu budi bulamata bikole kudiye, ne mpindiu yeye mumane kulala hanshi kena ujuka kabidi. Mulunda wanyi mene unakadi nʼandi ditalala ne unakeyemena, wakadi udia bidia bianyi wakuntua museba. Kadi wewe, Yehowa, unfuile luse, umbishe kabidi; bua meme kumanya mua kubahingashila difutu diabo. Ku muanda eu ndi mumanye ne, Wewe udi usanka bua bualu buanyi, bualu bua muena lukuna wanyi kakumpita bukole. Kadi mundi ngamba bua bualu buanyi, wewe udi unkolesha bualu bua buakane buanyi, udi unshikika ku mesu kuebe tshiendelele. Yehowa, Nzambi wa Isalele, avudishibue disanka ku tshibangidilu tô ne kunshikidilu! Amen! Amen! Bu mudi ngulungu uhuyakana, ujinga mai adi a musulu udi uhueka, nunku muoyo wanyi udi uhuyakana, ukujinga, wewe, Nzambi. Muoyo wanyi udi ne nyota ya kumona Nzambi, ya kumona Nzambi udi ne muoyo. Nenye kumueneka ku mesu kua Nzambi tshikondo kai? Binsonshi bianyi biakulua bia kudia bianyi munya ne butuku, hatshidi bantu bankonka dinda tô ne ku dilolo ne, Nzambi webe udi hanyi? Ndi nvuluka malu â handi mpumuna muoyo munda muanyi: bu munakaya ne tshisumbu tshia bantu, bu munakabalombola benda mu mulongo bua kuyabo ku nsuhu wa Nzambi, bela biabo mbila ya disanka ne bimba misambu ya kumutumbisha nʼai. Bakadi tshisumbu tshinene tshia bantu bavuluka biabo dituku dia tshijila. Mutshima wanyi, wewe udi muitshikile bua tshinyi? Udi ulubakana munda muanyi bua tshinyi? Wikale ne ditekemena diebe mu Nzambi; bualu bua nemmutumbishe kabidi, bualu bua yeye udi luhandu luanyi ne Nzambi wanyi. Mutshima wanyi udi muitshikile munda muanyi, bua bualu ebu ndi nkuvuluka wewe, Nzambi, mubange ku buloba bua Yadene ne bua mu mikuna ya Hêmona, ne ku mukuna wa Misâ. Ndondo wa mai udi Ubikila ndondo mukuabo hunvueye tshiona tshia bibila biebe. Mavuala ebe ne mambuanka ebe onso akuhita ha mutu hanyi. Mu munya Yehowa neantumine luse luandi lujalame ku dî diandi, ne butuku musambu undi mmuimbila nengikale nʼau, mutendelelu mene undi utendelela nʼau Nzambi wa muoyo wanyi. Nengambile Nzambi, dibue dianyi, ne, Wakuhua bualu buanyi muoyo bualu kai? Ndi ngenda ndila bua dinkengesha kudi muena lukuna bua tshinyi Bu mudibo batshibula mifuba yanyi, bena lukuna banyi badi bampenda, hatshidibo bankonka dinda tô ne ku dilolo ne, Nzambi webe udi hanyi? Mutshima wanyi, wewe udi muitshikile bua tshinyi? Udi ulubakana munda muanyi bua tshinyi? Wikale ne ditekemena diebe mu Nzambi; bualu bua nemmutumbishe kabidi bualu bua yeye udi luhandu luanyi ne Nzambi wanyi. Nzambi, ukose nsambu yanyi biakane, ungakuile tshilumbu tshianyi ku mpala kua ba mu tshisamba tshia bantu badi bahidia Nzambi. Umpandishe mu bianza bia bantu badi badinga ne badi ne malu mabi. Bualu bua wewe udi Nzambi wa tshieyemenu tshianyi; wakungumushila tshinyi? Ndi ngenda ndila bua dinkengesha dia muena lukuna bua tshinyi? Utume munya webe ne bushuwa buebe ku mpala kuebe; bindombole, binfile tô ne ku mukuna webe wa tshijila, ne ku muaba webe kûdi mushikame. Ka nenye ku tshioshelu tshia milambu tshia Nzambi, kudi Nzambi udi disanka dianyi dihite bunene. Nenkutumbishe ne lunkombe, Nzambi, Nzambi wanyi. Mutshima wanyi, wewe udi muitshikile bua tshinyi? Udi ulubakana munda muanyi bua tshinyi? Wikale ne ditekemena diebe mu Nzambi; bualu bua nemmutumbishe kabidi, bualu bua yeye udi luhandu luanyi ne Nzambi wanyi. Nzambi, tuakunvua ku matshu etu, batatu betu bakuambila, bua malu awakenza mu matuku abo, mu matuku akahita kale. Wewe wakihata bisamba bia bantu ne tshianza tshiebe; kadi wakashilaku batatu mu buloba. Wakakengesha bantu bakuabo, kadi wakavudisha batatu mu miaba yonso. Bualu bua kabakadinyengela buloba abu ku muele wabo wa nvita, ne diboko diabo kadiakabasungila mu nvita; kadi tshianza tshiebe tshia balume ne diboko diebe ne munya wa ha mpala hebe biakabasungila. Bualu bua wewe wakadi nʼabo luse. Nzambi, wewe udi Mukelenge wanyi; wele dî diebe bua Yakoba ahite bukole mu nvita. Ku dikuatshisha diebe tudi mua kushindika badi nʼetu lukuna hanshi. Mu dina diebe tudi mua kudiata badi babika kutuluisha muinshi mua makasa etu. Bualu bua tshiena ngeyemena buta buanyi, ne muele wanyi wa nvita kawena mua kunsungila. Kadi wewe wakusungila mu bianza bia badi nʼetu lukuna, wakufuisha badi batulama bundu. Tuakuditumbisha bualu bua Nzambi dinda tô ne ku dilolo, netuele dina diebe tuasakidila tshiendelele. Kadi mpindiu wewe wakutûmusha, wakutukehesha; kuena uluhuka bua kulombela bisumbu bietu bia bena nvita. Udi utuhingasha tshianyima bua kunyema badi nʼetu lukuna. Badi nʼetu lukinu badi badinyengela bintu bietu. Wakutuvuisha bu mikoko misungula bua kudia, wakutumuangalasha munkatshi mua bisamba bia bantu. Udi uhana bantu bebe ku mushinga wa hatuhu, kuakuheta luhetu lua bungi ku mushinga wabo. Udi utuvuisha bu tshintu tshia kulondabo kudi bena mutumba nʼetu, bu tshintu tshia kuhetulabo ne kusekabo kudi bantu badi batunyunguluka. Udi utuyisha bu lusumuinu ludibo bela munkatshi mua bisamba bia bantu, bu tshintu tshia kukuhilabo mitu munkatshi mua bantu. Dinda tô ne ku dilolo kukeheshibua kuanyi kudi ku mpala kuanyi, ne bundu budi bunkuata ku mesu kuanyi, bualu bua dî dia muntu udi unseka ne umpenda ne mei mabi, bualu bua mpala wa muena lukuna ne musombuedi udi umueneka kundi. Malu â onso akufika kutudi, kadi katuakukuhua muoyo, katuakushiha mei a tshihungidi tshiebe ne mashimi etu. Mitshima yetu kayakuhinguluka, biendedi bietu kabiena bisesuka bua kumukabi mu nshila webe, bua wewe wakuntshibula bituha bituha bua muanda eu mu muaba wa mizeu, ne bua wewe wakutubuikila mu mîdima mikole. Bituahua dina dia Nzambi wetu muoyo, anyi bituolola bianza bietu kudi nzambi wa bende, Nzambi kena ukeba bualu ebu bua kubusokolola, anyi? Bualu bua yeye udi mumanye meji adi masokoka mu mutshima. E, bua bualu buebe tudi tushihibua dinda tô ne ku dilolo; tudi lubadibue bu mikoko ya kushihabo. Mukelenge, utabale! Udi ulala tulu bua tshinyi? Bika; kumbengi tshiendelele! Udi usokoka mpala webe bua tshinyi? Udi uhua dikenga dietu ne dikengeshibua dietu muoyo bua tshinyi? Bualu bua muoyo wetu udi muiname hanshi mu dinfuenkenya, mibidi yetu idi milamike ku buloba. Juka biebe bua kutukuatshisha, utuhikule bua luse luebe lujalame. Mutshima wanyi udi uhumuna mei adi mimpe. Ndi ngamba ne, Musambu wanyi udi bualu bua mukelenge. Ludimi luanyi ludi bu mutshi wa mai wa mufundi udi ufunda lubilu. Wewe udi uhita bana balume ba bantu bonso bulengele; badi bateka kalolo mukana muebe; nunku Nzambi wakukuvudishila disanka tshiendelele. Luata muele webe wa nvita ha lubese luebe, wewe muena bukitu; luata butumbi buebe ne buneme buebe. Mu butumbi buebe wende biebe utamba bukole mu nvita bua malu a bushuwa, a kalolo ne a buakane. Tshianza tshiebe tshia balume tshikuyishe bienzedi bidi bikuatshisha bantu buowa. Mikete yebe idi mitue — bantu badi bahona ku mpala kuebe — idi ibuela mu mitshima ya bena lukuna ba mukelenge. Nzambi, nkuasa webe wa bukelenge udiku tô ne tshiendelele; dikombo dia buakane ndikombo dia bukelenge buebe. Udi unanga malu makane ne udi ne malu mabi lukuna. Bua bualu ebu Nzambi, Nzambi webe mene, wakukuna manyi a disanka ha mutu hebe ne diela dia manyi ditamba diakeleye bakuebe. Bivualu biebe bionso bidi binunka muhuya wa myrrhe, wa aloes ne wa casse. Tshiona tshia bisanji tshidi tshifuma mu mbalasa ya mibanga tshidi tshikusankisha. Bana bakashi ba bakelenge badi bashikama munkatshi mua bakashi bebe badi ne butumbi. Mukelenge mukashi webe udi wimana ku tshianza tshiebe tshia balume muluate or wa ku Ofî. Wewe, muanʼanyi mukashi, ungunvuile, welangane meji, ne uteleje matshu ebe. Uhue bantu bebe ne nsubu wa tatu webe muoyo; nunku mukelenge neasue bulengele buebe. Bualu bua yeye udi mukelenge webe, umukukuile. Ba mu Tulo nebalue kûdi ne diha, badi bahita bubanji munkatshi mua bantu nebakebe diakalengele kûdi. Muana mukashi wa mukelenge udi ne butumbi buonso mu nsubu wa munda mua mbalasa wa mukelenge. Bilulu biandi bidi bitedibue ne buanda bua or. Badi baya nʼandi kudi mukelenge muluate bilulu bitedibue ne malenda. Bansongakashi batshidi tumama, balunda bandi, badi bamulonda, badi bafidibua kûdi. Badi babafila ne disanka ne musangelu, badi babuela mu mbalasa wa mukelenge. Bana bebe ba balume ba wakalela nebahingane mu muaba wa batatuʼebe; neubavuishe bakokeshi mu miaba yonso ya ha buloba. Nenvuishe dina diebe bu dina didibo bavuluka mu bikondo bionso; nunku bantu nebakutumbishe tô ne kashidi. Nzambi udi tshinyemenu tshietu ne bukole buetu, udi dikuatshisha dietu mu makenga didi kadiyi dihanga tshiendelele. Nunku katuena tutshina, nansha biandamuka buloba, nansha biatenkakana mikuna mile idi munkatshi mua mai manene; nansha biabila mai a mu mai manene ne biatutukau ntutu; nansha biazakala mikuna mile bualu bua kutuntumuka kuau. Musulu udiku, ne tusulu tuau tudi tusankisha musoko wa Nzambi, muaba wa tshijila udi ne nsubu ya Mutambe Bunene wa mu Diulu. Nzambi udi munkatshi muau, kabena bamanye mua kûnyungisha; Nzambi neaukuatshishe hatshia butuku. Ba mu bisamba bia bantu bakajula diyoyo, makelenge akatenkakana; yeye wakamba dî diandi, buloba buakafingatuka. Yehowa wa misumba udi nʼetu; Nzambi wa Yakoba udi tshinyemenu tshietu. Luai bienu, nutangile bienzedi bia Yehowa, bu muakuenzesheye dibutuka dia bungi ha buloba. Yeye udi ulekesha nvita bua ishike tô ne kunfudilu kua buloba; udi utshibula buta, udi ukosa difuma bituha bituha; udi wosha makalu a nvita mu kahia. Imanai talalâ, numanye bienu ne, Meme ndi Nzambi. Nentumbishibue munkatshi mua bisamba bia bantu, nentumbishibue ha buloba. Yehowa wa misumba udi nʼetu; Nzambi wa Yakoba udi tshinyemenu tshietu. Nuenu bantu bonso, hitai nkashi; elai mbila kudi Nzambi ne dî dia disanka. Bualu bua Yehowa, Mutambe Bunene wa mu Diulu, udi ukuatshisha bantu buowa, udi Mukelenge munene wa ha mutu ha buloba buonso. Udi ubuesha bantu muinshi mua bukokeshi buetu, udi uteka bisamba bia bantu muinshi mua makasa etu. Udi utusunguila buhianyi buetu, budi butumbi bua Yakoba udiye nʼandi dinanga. Nzambi wakubanda mu diulu munkatshi mua mbila, Yehowa wakubanda mu tshiona tshia dî dia mpungi. Nuimbile Nzambi misambu ya kumutumbisha nʼai, imbai! Nuimbile Mukelenge wetu misambu ya kumutumbisha nʼai, imbai! Bualu bua Nzambi udi Mukelenge wa ba ha buloba bonso; numuimbile musambu ne meji. Nzambi udi ukokesha ku mutu kua bisamba bia bantu; Nzambi udi mushikame mu nkuasa wandi wa bukelenge ne iya tshijila. Bakokeshi ba bantu badi badisangisha hamue ne bantu ba Nzambi wa Abalahama. Bualu bua ngabu ya ha buloba idi ya Nzambi; yeye udi mutumbishibue bikole. Yehowa udi munene, udi muakane bua kumutumbisha bikole mu musoko wa Nzambi wetu, mu mukuna wandi wa tshijila. Mukuna wa Siona udi mulengele mu kubanda kuau mulu, ku nseke ya ku nôde, disanka dia ba ha buloba bonso, musoko wa Mukelenge munene. Nzambi wakudimanyisha mu mbalasa yau bu tshinyemenu tshile. Bua monai muakadisangisha bakelenge hamue, bakahitshilaku hohamue. Bakaumona, hashishe bakakema, bakakuatshika buowa, bakanyema lubilu. Dizakala diakabakuataku; kanyinganyinga kakabakuata bu ka mukashi udi ne didinyenga dia ha kuleleye. Wewe wakatshibula matu manene a ku Tâshishi ne luhelele luakafuma ku luseke lua esete. Bu mutuakunvua lumu, mbu mutuakumona mu musoko wa Yehowa wa misumba, mu musoko wa Nzambi wetu: Nzambi neajadike bua kuikalaku tshiendelele. Nzambi, tuakuelangana meji a luse luebe lujalame munda mua ntempelo webe. Nzambi, bu mudi dina diebe dimanyibue, mbu mudi ditumbishibua diebe difika tô ne kunfudilu kua buloba. Tshianza tshiebe tshia balume tshidi tshiule tente ne buakane. Mukuna wa Siona wikale ne disanka; bana bakashi ba Bena Yuda basanke bualu bua mikenji yebe mijalame. Endakanai ku nseke yonso ya Siona, numunyunguluke, balai bungi bua bibumba biandi. Tangilai bimpe ngumbu yandi ya nvita, nubuele mu nsubu yandi mikole, bua numanye mua kuambila ba mu tshikondo tshidi tsnmulonda ku nyima ne, Eu udi Nzambi, Nzambi wetu tô ne tshiendelele. Yeye neikale mulombodi wetu tô ne hatuafua. Unvuai bualu ebu, nuenu bantu bonso! Telejai matshu enu, bonso ba ha buloba, ne bahuekele ne banene, babanji ne bahele diatshimue. Mukana muanyi nemuambe mei a lungenyi; meji andi ngela mu mutshima wanyi neikale meji a dijingulula dia malu. Nenteleje matshu anyi ku lusumuinu, nengandule dijimbu dianyi ku kuimba kua lunkombe. Bualu kai ndi ne bua kutshina mu matuku a makenga, hadi dihambuka dia ku buakane dia bena lukuna banyi dinnyunguluka nseke yonso? Mbantu badi beyemena luhetu luabo, badi baditumbisha bua bungi bua biuma biabo. Bulelela, kakuena muntu udi mua kuhikula muanʼabo ku tshintu tshiandi tshimue, anyi kufila mushinga wa kumuhikula nʼau kudi Nzambi, bualu bua mushinga wa kuhikula nʼau mioyo yabo udi mukole, udi uhanga kukumbana tshiendelele, bua yeye ashale ne muoyo tshiendelele, bua kamonyi biandi Dijimba dia Bafue. E, yeye neamone ne, Bena meji badi bafua; muhote ne muntu mujibale badi bafua muomumue ne badi bashila banga bantu biuma biabo. Meji adibo bela munda muabo adi ne, Nsubu yetu neyishaleku tshiendelele, miaba itudi tushikama neyikaleku tô ne ku bikondo bionso. Badi binyika maloba abo ku mena abo mine. Kadi muntu kena mua kushala mu butumbi buandi, udi bu nyama idi ijimina. Eu nnshila udi badi bahote mu kudieyemena kuabo bayamu; kadi badi balua ku nyima kuabo badi basanka bua mei akambabo. Badi basungudibua bu tshisumbu tshia mikoko bua kubuelabo mu Muaba wa Bafue; Lufu neluikale mulami wabo. Bantu bakane nebabakokeshe ne lunkelu. Mibidi yabo neyinyane, neyijimine; Muaba wa Bafue newikale muaba wa bobo kushikama. Kadi Nzambi, neahikule muoyo wanyi ku bukole bua Muaba wa Bafue, bua yeye neangangate. Kutshinyi havuishibua muntu bubanji, havulangana biuma bia mu nsubu muandi. Bualu bua, hafueye, kena uya ne tshintu tshimue nansha, butumbi buandi kabuena buhueka nʼandi bua kumulonda ku nyima kuandi. Nansha biavudishileye mutshima wandi disanka hatshidiye ne muoyo, nansha hikala bantu bamutumbishe haditutshisheye dikasa dimpe, yeye neaye anu ku mulongo wa bankambua bandi, kabena bamona munya kabidi tshiendelele. Muntu udi ne butumbi, kadi kena ujingulula, udi bu nyama idi ijimina. Wa Bukole, Nzambi, Yehowa mene, wakuamba dî diandi, wakubikila buloba kudi kuhatuka diba tô ne kudi kubueladi. Mu muaba wandi wa mu Siona, udi mulengele tshishiki, Nzambi udi utema biandi. Nzambi wetu udi ulua, kena uhuwa talalâ, kahia kadi ku mpala kuandi kadi kosha bintu, tshihuhu tshitambe bukole tshidi tshimunyunguluka. Yeye udi wela dî kudi diulu didi mulu ne kudi buloba, bua yeye kulumbuluisha bantu bandi, wamba ne, Sangishai bienu bantu banyi ba tshijila kundi, bantu aba mene bakuhunga neanyi tshihungidi ku difila dia mulambu. Diulu didi diamba bua buakane buandi, bualu bua Nzambi muine udi mulumbuluishi. Unvuai, nuenu bantu banyi, nengakule; Bena Isalele, nennubande. Meme ndi Nzambi, Nzambi wenu mene. Tshiena nnubela bua milambu yenu; milambu yenu ya kuosha idi ku mpala kuanyi matuku onso. Tshiena ngitabusha ngombe umuehele wa ku nsubu yenu, anyi mpumbu ya mbushi ya mu mpangu yenu. Bualu bua nyama yonso wa muitu nguanyi, bimuna bia ha mikuna tshinunu mbianyi kabidi. Ndi mumanye nyunyu yonso ya ha mikuna, ne tshionso tshidi tshiendakana mu mpata ntshianyi. Bu meme muikale ne nzala, tshiakadi kukuambila; bualu bua buloba mbuanyi ne tshiuwidi tshiabu tshionso ntshianyi. Ntu ngadia munyinyi wa ngombe, anyi? Ntu nganua mashi a mbushi, anyi? Fila mulambu wa disakidila kudi Nzambi, futa mitshihu yebe kudi Udi Mutambe Bunene wa mu Diulu. Umbikile mu dituku dia makenga; nenkuhandishe, ne wewe neuntumbishe. Kadi Nzambi udi webesha muntu mubi ne, Wewe udi ne bukokeshi kai bua kumanyisha bantu mikenji yanyi, anyi bua kubuesha mei a tshihungidi tshianyi mukana muebe? Bualu bua wewe udi ukina diyisha, udi wimasha mei anyi ku nyima kuebe. Hawamona muibi, udi usanka bua kuikala nʼandi; ne udi ukuata bulunda ne bendi ba masandi. Udi ufidisha mukana muebe bua kuambau malu mabi, ludimi luebe ludi lusangakasha mei a kudinga. Udi ushikama hanshi, udi usonguela muanʼenu; udi wela muana wa mamu webe mene mukoso. Wewe wakuenza malu â, ne meme nakuhuwa talalâ. Wakuela meji munda muebe ne, Nzambi udi bu meme mu malu onso. Kadi ndi ngamba kukubela mpindiu ne kukulondela malu â ku mesu kuebe. Telejai matshu enu ku dî edi, nuenu badi bahua Nzambi muoyo, bua meme tshinuhandi bihesa bihesa, kakuena wa mua kunuhandisha! Udi ufila disakidila bu mulambu wandi udi untumbisha; nendeshe luhandu lua Nzambi kudi muntu udi ulongolola nshila wandi bimpe. Nzambi, unfuile luse, bu mudi luse luebe lujalame; ku divulangana dia luse luebe, unjimishile matomboka anyi. Unguvuwe tshishiki ku mahambuka anyi, untokeshe ku bubi buanyi. Bualu bua ndi mumanye matomboka anyi, ne buanyi butu buikala ku mpala kuanyi matuku onso. Nakukuenzela wewe, wewe nkayebe, bibi; nakuenza bualu bubi abu ku mesu kuebe; bua wewe Umanye mua kubingishibua hawamba dî dia kumpisha nʼadi, ne mua kuikala ne mutshima mutoke mu kulumbulula kuebe. Mona, nakaledibua mu dihambuka, ne mu bubi mamu wanyi wakangimita munda muandi. Mona, wewe udi musue bushuwa buikale munda mua muntu; udi ummanyisha mua kuikala ne meji munda muanyi. Untokeshe ne hysope, nengikale mutoke; unguvuwe, nempite neige butoke tô. Ungunvuishe mei a disanka ne a musangelu mu matshu anyi; bua mifuba iwakutshibula isanke. Usokoke mpala webe ku malu mabi anyi, unjimishile mahambuka anyi onso. Nzambi, unfukile mutshima mutoke munda muanyi, ungenzele nyuma mujalame munda muanyi. Kungihatshi bua tshikadi ku mpala kuebe, kungumushidi Nyuma webe Muimpe. Umpingishile disanka dia luhandu luebe, ushindike ne mutshima wa mua kuenza bu mu disua diebe. Hashishe, nenyishe badi bahambuke nshila yebe, ne bantu babi nebahingane kûdi. Wewe Nzambi, Nzambi wa luhandu luanyi, unsungile ku dihila dia dimatshisha dia mashi, ne ludimi luanyi neluimbe musambu ne dî dikole bua buakane buebe. Mukelenge, ubulule mishiku yanyi, ne mukana muanyi nemumanyishe bantu butumbi buebe. Bualu bua wewe kuena usanka bua difila dia milambu, anyi nakadi kuyifila, wewe kuena usanka bua mulambu wa kuosha ha kahia. Milambu idi Nzambi mua kuitabusha idi mutshima wa majia. Wewe Nzambi, kuena uhetula mutshima wa majia ne udi unyingalala bua bubi buau. Wenzele Siona bimpe mu disanka diebe dimpe, wibake ngumbu ya Yelushalema. Hashishe, newikale ne disanka bua milambu mifidibue mu buakane, neusanke bua milambu ya kuosha ha kahia ne ya nyama ya kuosha mijima. Hashishe, nebafile bana balume ba ngombe ha tshioshelu tshiebe. Wewe, muena tshinyangu mukole, udi ufuna bulobo mu malu mabi ebe bua tshinyi? Luse lujalame lua Nzambi ludiku matuku onso. Ludimi luebe ludi luamba malu a kabutu awakuhangidisha, ludi bu dihaya ditue, wewe muenji wa malu a lubombo. Wewe udi utamba kunanga malu mabi ku mpala kua malu mimpe; wewe udi utamba kunanga kuamba kua mashimi ku mpala kua kuamba kua mei a bushuwa. Wewe, ludimi ludi ludinga bantu, udi unanga mei onso adi abutula bantu. Nzambi neakubetekashe tshiendelele. Neakukuate, neakubatule mu ntenta webe; neakujomone, neakûmushe mu buloba bua badi ne muoyo. Bantu bakane nebatangile bualu ebu, nebatshine, nebamuseke ne, Mona muntu eu wakadi kayi uvuisha Nzambi tshieyemenu tshiandi, kadi wakeyemena dilengama dia biuma biandi, wakadikolesha mu malu mabi andi. Kadi meme hanyi ndi bu mutshi wa olive utshidi usampila mu nsubu wa Nzambi. Ndi ngeyemena luse lua Nzambi tô ne tshiendelele. Nenkusakidile tô ne tshiendelele, bualu bua wakuenza bualu ebu. Nentekemene dina diebe ku mpala kua bansanto bebe, bualu bua didi dimpe. Muhote udi wamba mu mutshima wandi ne, Kakuena Nzambi. Badi banyanguke, badi benza malu mabi adi afuisha bundu; kakuena nansha umue wabo udi wenzaku malu mimpe. Nzambi wa mu diulu wakatangila hanshi hadi bana ba bantu, bua kumoneye ne, Umue wabo udi wenza bu muena meji, anyi? Umue wabo udi ukeba Nzambi, anyi? Buonso buabo bakusesuka mu nshila, buonso buabo bakumana kunyanguka hamue. Kakuena umue wabo udi wenza bimpe; kakuena nansha umuehele udi muimpe. Benji ba malu mabi kabena ne meji, anyi? Badi badia bantu banyi bu mudibo badia bidia, ne kabena babikila dina dia Nzambi. Ku muaba wawa badi ne buowa bukole, bakuatshike buowa buakadi kabuyiku diambedi. Bualu bua Nzambi neatangadishe mifuba ya muntu udi wasa tshitudilu tshiandi bua kukuluisha. Wewe neubafuishe bundu ku mesu bualu bua Nzambi wakubabenga. Nakadi kusua bua luhandu lua Bena Isalele lufume ku Siona! Hakudimuna Nzambi buhika bua bantu bandi bua kubaha diakalengele, Yakoba neasanke, ne Bena Isalele nebikale ne disanka kabidi. Nzambi, unsungile mu dina diebe, umbingishe ku bukole buebe. Nzambi, unvue kulomba kuanyi; uteleje matshu ebe ku mei a mukana muanyi. Bualu bua bana ba bende bakunjukila bua kuntantamena, bena tshimbambila badi bakeba muoyo wanyi. Kabena bateka Nzambi ku mpala kuabo. Mona, Nzambi udi mukuatshishi wanyi; Mukelenge udi mukoleshi wa muoyo wanyi. Yeye neahingashile bena lukuna banyi difutu dia bubi buabo; ubabutule mu lulamatu luebe lua bushuwa. Nenfile mulambu wanyi kûdi ne mulambu wa kukusakidila nʼau; nensakidile dina diebe, Yehowa, bualu bua didi dimpe. Bualu bua wakumpandisha mu makenga anyi onso, ne mesu anyi akumona ne disanka mudi bena lukuna banyi batambibue bukole. Nzambi, teleja matshu ku kulomba kuanyi, kusokomi bua kunvu biebe kutendekena kuanyi. Teleja matshu ebe, witabe kundi. Ndi nsasakata ne meji adi antatshisha, ndi ne bualu bua kutua mikemu bikole, bualu bua dî dia muena lukuna, bualu bua dinkengesha dia bantu babi. Bualu bua badi bavuisha malu mabi bua kukulukau hamʼbidi hanyi, ne mu tshiji tshiabo badi bangenzela bibi. Mutshima wanyi udi unyingalala munda muanyi, buowa bua lufu budi bunkuate. Kutshina ne kuzakala kudi kufika kundi, kuvuayila kudi kukuata mubidi wanyi wonso. Ndi ngamba ne, Nakadi kusua kuikala ne mahuahua a nyunyu bu mudi nyunyu wa nkutshi nʼau! Nunku nakadi kutua mulelu bua kuya kule, nakadi kushikamaku mu ditalala, eyo, nakadi kunyema kule, nakadi kushikama mu tshihela. Nakadi kudiendesha lubilu bua kuheta bianyi tshinyemenu bua kunyema tshihehele tshikole ne tshihuhu. Mukelenge, ubutule malu adibo bahangidisha, uhandulule ndimi yabo, bualu bua ndi mmona tshimbambila ne ditandangana mu musoko. Munya ne butuku badi banyunguluka musoko, benda ha mutu ha ngumbu yau. Kunyanguka ne mukodi bidi munkatshi muau, kubutuka kudi munkatshi muau. Kunyenga kua bintu ku bukole ne mashimi kabiena biumuka mu muaba wau wa tshisalu. Keni muena lukuna udi umpenda — nakadi kumanya mua kuitabusha muanda wawa; kem muntu udi unkina udi udibandisha ne diambu ku mpala kuanyi — ka nakadi kumanya mua kusokoma bua tshikadi ku mesu kuandi. Kadi nguewe mene, muntu unakadi mbala ne, Udi muomumue nʼanyi, muntu unakeyemena ne wakadi mulunda wanyi unakamanya bimpe. Tuakadi tuyikilangana hohamue ne diyiki dimpe; tuakadi tuenda nʼebe diatshimue ne tshisumbu tshia batendeledi bua kubuela mu nsubu wa Nzambi. Dibutuka dikuluke hamʼbidi habo, bahueke biabo ne muoyo tô ne ku Muaba wa Bafue, bualu bua malu mabi adi mu nsubu yabo ne munkatshi muabo. Kadi meme hanyi nendibikidile Nzambi; Yehowa neansungile. Dilolo ne dinda ne ha diba dia munda munya ndi musue kumuambila meji adi antatshisha, ndi ntua mikemu, ne yeye neunvue dî dianyi. Yeye neuhikule muoyo wanyi talalâ munkatshi mua nvita indi nduangana, bualu bua badi baluangana nʼanyi badi ba bungi. Nzambi neunvue dî diabo, yeye mene udi mushikame mu nkuasa wa bukelenge hu muakadiye ku tshibangidilu neabakengeshe, bualu bua kabena ne dikudimuka dia malu abo, ne kabena batshina Nzambi. Eu wakolola bianza biandi bua kulenga bakadi nʼandi talalâ, wakanyanga tshihungidi tshiandi tshiakahungeye nʼabo. Mukana muandi muakatamba manteke kuikala ne busenu, kadi nvita yakadi mu mutshima wandi. Mei andi akahita manyi kusenunuka, kadi akadi miele ya nvita mihatula mu luhaha. Teka bujitu buebe hamʼbidi ha Yehowa, ne yeye neakukoleshe; kena witabusha tshiendelele bua bantu bakane banyungishibue. Kadi wewe Nzambi, neutulule bantu aba hanshi tô ne ku ndondo wa dijimba dia kabutu; bantu badi bamatshisha mashi ne badi badinga kabena bashala ne muoyo tshituha tshia hankatshi tshia matuku abo. Kadi meme nenkueyemene wewe. Nzambi, unfuile luse, bualu bua bantu badi bandiatakasha muinshi mua makasa; dinda tô ne ku dilolo bena nvita badi bankengesha. Badi bangalamina badi bandiatakasha muinshi mua makasa dinda tô ne ku dilolo; bualu bua ba bungi badi baluangana nʼanyi mu dihetu diabo. Handi ntshina, ndi nkueyemena wewe. Mu Nzambi, ndi ntumbisha dî diandi, mu Nzambi mundi ngeyemena, tshiyi ne buowa. Bantu badi mua kungenzela tshinyi? Dinda tô ne ku dilolo badi bakeba kunyanga malu anyi; badi bangelela meji abo onso bua kungenzelabo bibi. Badi badisangisha hamue mu bifufu, badi bangalamina mu busokoko, badi batentekela biendedi bianyi. Bu muakualaminabo muoyo wanyi, badi mua kuhanduka ne dikuatshisha dia bubi buabo, anyi? Mu tshiji tshiebe, Nzambi, wele bantu hanshi! Wewe udi ubala nsumpakana anyi; wele binsonshi bianyi mu mulondo webe. Kabiena bifundibua mu mukanda webe, anyi? Nunku bena lukuna banyi nebahingane ku nyima mu dituku dindi nkubikila. Ndi mumanye bualu ebu ne, Nzambi udi nʼanyi. Mu Nzambi, undi ntumbisha dî diandi, mu Yehowa, undi ntumbisha di diandi, mu Nzambi mene mundi ngeyemena, tshiyi ne buowa. Bantu badi bamanye mua kungenzela tshinyi? Nzambi, ndi ne bualu bua kumana mitshihu inakuditshiha kûdi; nenfile milambu ya kusakidila nʼai kûdi. Bualu bua wewe wakuhandisha muoyo wanyi ku lufu, wakulama makasa anyi bua kalenduki bua mmanye mua kuenda ku mpala kua Nzambi mu munya wa muoyo. Unfuile luse, Nzambi, unfuile luse, bualu bua muoyo wanyi udi unyemena kûdi. Bulelela, nennyemene mu mundidimbi wa mahuahua ebe bua kushalaki tô ne hahita dikenga dia kabutu. Nendile kudi Nzambi Mutambe Bunene wa mu diulu, kudi Nzambi udi ungenzela malu onso akunsunguileye. Yeye neantumine luhandu lufume mu diulu, neansungile, neafuishe badi bandiatakasha muinshi mua makasa bundu. Nzambi neantumine luse luandi lujalame ne lulamatu luandi lua bushuwa. Muoyo wanyi udi munkatshi mua nyama ya ntambue; ndi ne bualu bua kulala munkatshi mua bantu badi bu kahia munkatshi mua bana ba bantu mene badi bena menu adi mafuma ne mikete, ne bena ndimi idi miele ya nvita mitue. Wewe, Nzambi, wikale mubandishibue ne butumbi ha mutu ha diulu dionso! Butumbi buebe buikale ha mutu ha buloba buonso! Bakuandila biendedi bianyi bukuondo; muoyo wanyi wakuinamishibua hanshi. Bakunguisha dijimba ku mpala kuanyi, bobo bine bakahona munda muadi. Mutshima wanyi udi mushindame, Nzambi, mutshima wanyi udi mushindame. Nengimbe misambu, nenkutumbishe ne biombelu. Wewe, muoyo wanyi, tabala biebe! Tabalai, nuenu lunzenze ne lunkombe! Meme muine nentabashe kabundubundu. Mukelenge, nenkusakid le munkatshi mua bantu; nenkuimbile misambu ya kukutumbisha nʼai munkatshi mua bisamba bia bantu. Bualu bua luse luebe lujalame ludi lunene lufika tô ne mu diulu, lulamatu luebe lua bushuwa ludi lufika tô ne ku matutu. Wewe, Nzambi, wikale mubandishibue ne butumbi ha mutu ha diulu dionso! Butumbi buebe buikale ha mutu ha buloba buonso! Nuenu, bantu banene, nudi nuamba mei makane, anyi? Nudi nulumbuluisha bana ba bantu ne kulumbulula kuakane, anyi? Nansha, mu mitshima yenu nudi nuhangidisha malu mabi, ne ha buloba nudi nuidikishila bantu bujitu bua tshimbambila tshia bianza bienu. Bantu babi badi bahambuka mu diba didibo bahatuka munda mua bamamuʼabo, badi bahambuka mu nshila dituku dia kuledibua kuabo, bamba mei a mashimi. Lulengu luabo ludi bu lulengu lua nyoka, ludi bu lulengu lua nyoka wa dikala udi ne bitshi udi ujibika matshu andi, udi kayi unvua dî dia badi bakeba kumuibidisha hanu, anyi dia muntu udi ukeba kumuibidisha ne budimu buhite bukole. Nzambi, utshibule menu abo mukana muabo; Yehowa, uhuole menu a ku tshikankanyi a bana balume ba nyama ya ntambue! Bajimine bu mudi mai ahueka, adi akaminyina; haludikilabo mikete yabo, yoyo ikale bu idi mitshibuke. Bikale bu dilandi didi disunsuka, didi dijimina, bikale bu muana wa kabishi udi kayi muanze kumona diba. Diambedi ngesu yenu kayiyi mianze kukuata kahia ka mingongo ya meba, ne itshidi mibishi, ne idi mikuate kahia, yeye ayumushe ne nvunde. Muntu muakane neasanke hamoneye kudisombuela kuandi, neuvuwe makasa andi mu mashi a bantu babi. Nunku bakua bantu nebambe ne, Bulelela, difutu didiku bua muntu muakane; bulelela, Nzambi udiku udi ulumbulula bilumbu ha buloba. Nzambi wanyi, umpandishe mu bianza bia badi nʼanyi lukuna, umbandishe kulu bua badi bajuka bua kunduisha kabafiki kundi. Umpandishe mu bianza bia benji ba malu mabi, unsungile mu bianza bia badi bamatshisha mashi a bantu. Bua, mona, badi balamina muoyo wanyi; bena tshimbambila badi badikunguisha hamue bua kutekelabo diyoyo. Yehowa, kambualu bua ditomboka dianyi anyi bua bubi buanyi, badi banyema lukasa, badilongolola mu mualu wa nvita, meme tshiyi ne dibanda. Utabale, biebe, ungakidile ne dikuatshisha diebe, umone! Wewe muine Yehowa, Nzambi wa misumba, udi Nzambi wa Isalele. Juka bua kukengesha bisamba bionso bia bantu; kufuidi umue wa batungidi aba luse. Badi balukila ku dilolo ku dilolo, bela mikunda bu mbua, badi banyunguluka musoko. Mona! Badi bahumuna mei mabi mukana muabo, miele ya nvita idi ku mishiku yabo. Badi bamba ne, Nganyi udi mutunvue? Kadi wewe Yehowa, udi ubaseka; udi uhetula ba mu bisamba bia bantu bionso. Wewe, Bukole buanyi, nenkuindile ne ditekemena, bua Nzambi udi tshibumba tshianyi tshile. Nzambi wanyi nealue kungakidila bua luse luandi lujalame. Nzambi neitabushe bua meme ntangile badi nʼanyi lukuna batambibue bukole. Kubashihi nansha, bua bantu banyi kabahu muoyo; ubalenduishe ku bukole buebe, ubashindishe hanshi, wewe Mukelenge, ngabu wetu! Bua malu mabi adi mukana muabo, bua mei adi ku mishiku yabo mene, bakuatshibue mu buteyi bua diambu diabo. Bua milau idibo bela ne bua mei a mashimi adibo bamba, ubabutule mu tshiji tshiebe, ubabutule bua kabikadiku kabidi. Bamanye biabo ne, Nzambi udi ukokesha bana ba Yakoba tô ne kunfudilu kua buloba. Badi balukila ku dilolo ku dilolo, bela mikunda bu mbua, badi banyunguluka musoko. Badi bendakana eku ne eku bakeba bia kudia, ne bikalabo kabayi bûkuta, badi batontolola. Kadi meme hanyi nengimbe bua bukole buebe, nengimbe ne dî dikole mu dinda bualu bua luse luebe lujalame. Bualu bua wewe wakumana kuikala tshibumba tshianyi tshile ne tshinyemenu mu dituku dia dikenga dianyi. Bukole buanyi, nenkuimbile misambu ya kukutumbisha nʼai, bualu bua wewe, Nzambi, udi tshibumba tshianyi tshile, Nzambi udi nʼanyi luse lujalame. Wewe Nzambi, wakutubenga, wakuhanduka mualu wetu wa nvita; wewe wakadi nʼetu tshiji; utuhingashe kudi kabidi. Wakuzakasha buloba, wakubuhanda mitanta; utuangashe mitanta yabu kabidi, bualu bua butshidi butenkakana. Wakumueneshila bantu bebe malu makole akukengabo; wakutunuisha nyinyo yakutulenduisha. Wakatumikila badi bakunemeka dibendele, bua bobo banyemeneku ku mpala tua buta. Bua bantu bebe baudi munange babandishibue, ubasungile ne tshianza tshiebe tshia bukole, utunvuile. Nzambi wakuamba dî mu tshijila tshiandi ne, Nensanke, nenuhaule buloba bua Shekeme, nengabanye Tshibanda tshia Sukota. Gilada nguanyi; Manashe nguanyi kabidi; Efelayima udi tshifulu tshikole tshia ha mutu hanyi; Yuda udi dikombo dianyi dia bukelenge. Moaba udi luesu luanyi lua mai a kuowa, ndi ngela tshisabata tshianyi hamʼbidi ha Edome; ndi ngela mbila ha mutu ha Peleshete. Wanfikisha mu musoko wa ngumbu ya nvita nganyi? Wandombola tô ne ku Edome nganyi? Wewe Nzambi, kuakutubenga, anyi? Nzambi, kuena uluhuka bua kufila misumba ya masalayi etu. Utuheshe dikuatshisha diebe mu nvita yetu ne bena lukuna, bualu bua dikuatshisha dia bantu didi hatunu. Bituikala ne dikuatshisha dia Nzambi, nebenze bienzedi bia bukitu; bualu bua nyeye udi udiatakasha badi nʼetu lukuna muinshi mua makasa andi. Wewe Nzambi, unvua muadi wanyi, teleja matshu ku kulomba kuanyi. Kunfudilu kua buloba ndi nkuela dî dianyi, bahanga mutshima wanyi. Undombele ku dibue didi dintamba kulu bualu bua wewe udi tshinyemenu tshianyi, udi tshibunda tshikole ku mpala kua badi nʼanyi lukuna. Witabushe bua meme nshikame bianyi tshiendelele mu nsubu webe wa ntenta; bua meme mpete tshinyemenu mu dibuikila dia mahuahua ebe. Bualu bua wewe, Nzambi, wakunvua mitshihu yanyi, wakumpa buhianyi bua badi banemeka dina diebe. Nealeheshele mukelenge matuku a muoyo wandi; bidimu biandi nebivulangane bikondo bia bungi. Neashikame biandi mu nkuasa wandi wa bukelenge tshiendelele ku mpala kua Nzambi; Wambile luse lujalame ne lulamatu lua bushuwa dî bimulame. Nunku nengimbe misambu ya kutumbisha nʼai dina diebe tshiendelele, handi mmana mitshihu yanyi ku dituku ne ku dituku. Mutshima wanyi udi muhuwe talalâ windila Nzambi nkayandi; luhandu luanyi ludi lufuma kudiye; Yeye nkayandi udi dibue dianyi ne luhandu luanyi, tshibumba tshianyi tshile; tshiena nyungishibua bikole. Nenubunde muntu musangu bule munyi bua kumubetekasha, buonso buenu, bu mudiye lumbu ludi lusendama, bu luhangu ludi lutenkakana? Bantu aba badi bahunga di diabo anu bua kumutuma hanshi ku muaba wandi wa buneme. Badi basanka mu kuamba kua mashimi; badi bavudishila muntu disanka mukana muabo, kadi munda muabo badi bamuela mulau. Mutshima wanyi, uhuwe biebe talalâ, windile Nzambi nkayandi; bualu bua ditekemena dianyi didi difuma kudiye. Yeye nkayandi udi dibue dianyi ne luhandu luanyi, tshibumba tshianyi tshile; tshiena nyungishibua. Luhandu luanyi ne butumbi buanyi bidi kudi Nzambi; dibue dia bukole buanyi, ntshinyemenu tshianyi mene, tuai kudi Nzambi. Nuenu bantu, numueyemene misangu yonso, nuhumune milombu ya mu mitshima yenu ku mpala kuandi; Nzambi udi tshinyemenu tshietu. Bulelela, bantu bahuekele badi anu muhuya, bantu badi ne buneme bunene badi mashimi. Mu tshiamu tshia kuidikisha nʼatshi bujitu badi babanda kulu; buonso buabo basangisha hohamue badi bahita muhuya kuhehela. Kanueyemenyi tshinyangu, kanuikadi ne ditekemena dia hatuhu mu kunyenga kua bintu; biavulangana luhetu luenu, kanuteki mitshima yenu kudilu. Nzambi wakuamba dî diandi musangu umue; nakunvua di edi misangu ibidi ne, Bukole mbualu bua Nzambi; ne kudi wewe kabidi, Mukelenge, kudi luse lujalame. Bualu bua udi ufuta muntu yonso difutu bu mudi mudimu wandi. Nzambi, wewe udi Nzambi wanyi; ndi nkukeba bikole; muoyo wanyi udi ne nyota bualu buebe; mubidi wanyi udi uhanga mu dikujinga diau, mu buloba bume ne budi bukama, budi kabuyi mai. Nunku nakukutangila talalâ mu nsubu webe wa tshijila, bua kumona bukole buebe ne butumbi buebe. Bualu bua luse luebe lujalame ludi luhita muoyo bulengele, mishiku yanyi neyikutumbishe. Nunku nenkuvudishile disanka hantshidi ne muoyo; nengolole bianza bianyi kulu bua kutendelela mu dina diebe. Muoyo wanyi neukute bu mudiu ukuta ne buongo bua mifuba ne manyi, ne mukana muanyi nemukutumbishe ne mishiku idi yela mei a disanka, handi nkuvuluka ha bulalu buanyi, handi ngelangana meji a bualu buebe mu mpola ya kutentekela butuku. Bualu bua wakumana kuikala mukuatshishi wanyi, ne mu mundidimbi wa mahuahua ebe nengimbe misambu bua disanka dianyi. Muoyo wanyi udi ulamata kûdi; tshianza tshiebe tshia balume tshidi tshingimanyika biakane. Kadi badi bakeba muoyo wanyi bua kûbutula nebahueke muinshi mua ndondo wa buloba. Nebafidibue ku bukole bua muele wa nvita; nebikale bintu bia kudiabo kudi mizeu. Kadi mukelenge neusanke mu Nzambi. Muntu yonso udi uditshiha mu dina dia Nzambi neatumbilemu; bualu bua mukana mua badi bamba mei a mashimi nemubuikidibue. Nzambi, unvua dî dianyi mu ditontolola dianyi, ulame muoyo wanyi bua kautshinyi muntu udi nʼanyi lukuna. Unsokoke ku bifufu bia mu musokoko bia bantu babi ne ku diyoyo dia benji ba malu a tshinyangu. Badi basakisha ndimi yabo bua kuikalabu bu miele ya nvita, badi baludikila mei a bululu bu mikete, bua kuelau muntu mu musokoko udi kayi ne tshilumbu. Badi bamuelau lukasa kabayi batshina. Badi badikolesha mu bualu bubi buakuhangidishabo; badi bayikilangana bua kuteyabo ndende mu musokoko. Badi bamba ne, Watangila malu â nganyi? Badi bahangidisha malu mabi, bamba ne, Tuakumana kuhanga tshihangu tshituakuhangila ne budimu. Meji adi munda ne mutshima bia muntu ne muntu bidi ndondo mule. Kadi Nzambi neabele mukete wandi; nebatahibue mputa lukasa. Ka nebabalenduishe, bualu bua ndimi yabo yakubahisha. Bantu bonso badi babatangila nebabakuhile mitu yabo. Bantu bonso nebatshine, nebambe mudimu udi Nzambi muenze, nebele meji bimpe bua bienzedi biakuenzeye. Bantu bakane nebasanke mu Yehowa, nebanyemene kudiye; bonso badi bakane mu mitshima yabo nebalumbile kudiye. Nzambi, kukutumbisha kudi kukuindila talalâ mu Siona; nebakushikishile wewe mitshihu. Wewe udi unvua milombu, bukua bantu bonso nebufike kûdi. Malu a dihambuka dianyi adi antamba bukole; wewe udi umbuikidila matomboka etu. Disanka didi kudi muntu udi usungula ne ûdi ufikisha hehi nʼebe, bua ashikame mu biendelu bia tshitendelelu tshiebe! Tuetu netuikale ne mitshima mitalale bua buimpe bua nsubu webe, ntempelo webe wa tshijila. Wewe utu witaba kutudi mu buakane ku bienzedi biebe bidi bikuatshilu bantu buowa, wewe Nzambi wa luhandu luetu, wewe ntshieyemenu tshia bonso ba kunfudilu kua buloba, ne tshia badi benda ha mai manene adi atamba kule. Wewe nyeye wakujadika mikuna ku bukole buebe, udi ne bukole bunyunguluka nseke yonso. Udi ukolesha tshiono tshia mai manene, ne tshiono tshia mavuala au, ne mutoyi wa bantu. Badi bashikame mu nseke ya kunfudilu kua buloba badi batshina hamonabo bimanyinu biebe. Wewe udi welesha dihatuka dia diba ne dibuela diadi mbila ya disanka. Udi ulua kumona buloba, udi ubulokeshila nvula, udi ubumeneshila bia kudia bia bungi, musulu wa Nzambi udi mule tente ne mai, udi ubakuamishila blé, bualu bua wakubulongolola nunku. Udi ulokeshila mikidi ya mabula nvula ya bungi, udi ulandakasha mabula, udi utekesha buloba ne nvula idi iloka bitekete, udi uvudishila bidi bimenamu disanka. Udi unyunguluka tshidimu tshia buimpe buebe ne tshifulu tshia butumbi; nshila yebe idi tente ne bia mu madimi ebe. Bidi bimata mu mpata idi imena mashinde, mikuna mihi idi minyunguluke ne disanka. Miaba idi mashinde idi miule tente ne bisumbu bia mikoko, bibanda bidi bidibuikile ne blé; bidi biela mbila ya disanka, bidi bimba misambu kabidi. Nuenu bonso ba ha buloba, nuelele Nzambi mbila ya disanka. Nuimbe bienu musambu udi ulesha butumbi bua dina diandi, numutumbishe ne ditumbisha dihite bunene. Nuambile Nzambi ne, Mona mudi bienzedi biebe bikuatshisha bantu buowa! Bualu bua bukole buebe budi bunene, badi nʼebe lukuna badi bakukokela ne lubombo. Ba ha buloba bonso nebakutendelele; nebakuimbile misambu ya kukutumbisha nʼai; nebimbile dina diebe misambu. Luai, numone bienzedi bidi Nzambi muenze: udi ubakuatshisha buowa ne bienzedi bidiye wenza munkatshi mua bukua bantu. Wakandamuna mai manene bua kuluau buloba bûme; bantu bakahitshila mu musulu benda ku makasa. Tuakasankamu bua malu andi, Udi ukokesha bantu ku bukole buandi tshiendelele; mesu andi adi atentekela bisamba bia bantu — batombokedi kabadibandishi nansha. Nuenu bukua bantu, nuvudishile Nzambi wetu disanka; dî dinudi numutumbisha nʼadi diunvuike; wakatulama bua tuikale munkatshi mua badi ne muoyo, ne kakitabusha makasa etu aselemuke. Bualu bua wewe Nzambi wakatuteta; wakatuteta bu mudibo bateta tshiamu tshia argent mu tshikutu tshia kahia. Wakatufikisha mu bukuondo; wakateka dikenga diakatunemeshila bujitu mu bifuka bietu. Wakitabusha bua bantu bende babande ha mitu hetu; tuakahitshila mu kahia ne mu mai. Kadi wakatuluhulamu bua tuetu kuikala mu muaha mukumbane. Nembuele mu nsubu muebe ne milambu ya kuosha ha kahia; nenfile mitshibu yanyi kûdi, yoyo yakamba mishiku yanyi, yakaditshiha mukana muanyi, hanakadi mu dikenga. Nenfile milambu ya mikoko idi ne manyi kûdi bu milambu ya kuosha ha kahia, ne dihembu dia muishi wa milambu ya bimpanga diatshimue nʼai. Nenfile milambu ya bana balume ba ngombe ne ya mbushi. Luai bienu, nunvue, nuenu bonso badi banemeka Nzambi, nennuambile malu akuenzeleye muoyo wanyi. Nakamuela dî dikole mukana muanyi, nakamutumbisha ne ludimi luanyi. Bu meme inulame malu mabi mu mutshima wanyi, Mukelenge kakadi kungunvuila. Kadi bulelela, Nzambi wakangunvuila; wakateleja matshu ku dî dia kulomba kuanyi. Nzambi avudishibue disanka, udi kayi musesuishe mei a kulomba kuanyi, udi kayi mungumushile luse luandi lujalame! Nzambi atufuile luse, atuvudishile disanka, atemeshe munya wa mpala wandi kutudi; bua nshila webe amanyibue ha buloba, ne luhandu luebe lumanyibue munkatshi mua bisamba bionso bia bantu. Nzambi, ba ha buloba bakutumbishe; ba ha buloba bonso bakutumbishe. Ba mu bisamba bia bantu bikale ne disanka, bimbe biabo misambu bua disanka diabo, bualu bua wewe udi ulumbuluisha bantu ne kulumbulula kuakane, udi ulombola bisamba bia bantu ha buloba. Nzambi, ba ha buloba bakutumbishe, ba ha buloba bonso bakutumbishe. Buloba buakukuamisha bintu biabu bivule; Nzambi, Nzambi wetu mene, neatuvudishile disanka. Nzambi neatuvudishile disanka, ne bonso ba kunfudilu kua buloba nebamutshine! Nzambi ajuke, badi nʼandi lukuna bamuangalashibue; bonso badi nʼandi lukuna banyeme ku mpala kuandi. Bu mudi luhehele lumuangalasha muishi, wewe ubihata; bu mudi dihula dienguluka ku luya lua kahia, bantu babi bajimine ku mpala kua Nzambi muomumue. Kadi bantu bakane bikale ne disanka, balumbile ku mpala kua Nzambi; e, basanke bikole mu disanka diabo. Imbilai Nzambi misambu, imbidilai dina diandi misambu ya kumutumbisha nʼai. Buwai nshila bualu bua yeye ulualua kuhita mu bihela; dina diandi nYehowa; tumbilai bienu ku mpala kuandi. Mu muaba wandi wa tshijila mudiye mushikame mudi Nzambi, tatu wa bana ba nshiya ne mulumbuluidi wa bakashi ba mu lufuila. Nzambi udi uhesha bantu bashiya hatuhu nsubu bua bobo bashikamemu, udi uluhula bena lukanu, udi ubaha diakalengele; kadi badi bamutombokela badi bashikame mu buloba bûme budi munya wosha. Nzambi, hawakaluhuka bua kuya ku mpala kua bantu bebe, hawakenda uhitshila mu tshihela, buloba buakazakala, matutu a mu diulu akalokesha nvula hakamuenekau ku mesu kua Nzambi. Sinai au wakakanka ku mesu kua Nzambi, Nzambi wa Isalele. Wewe, Nzambi, wakalokesha nvula ya bungi; wakakankamasha ba mu buhianyi buebe hakambabo kuhungila. Tshisumbu tshia bantu bebe tshiakashikama mu buloba abu; bualu bua buimpe buebe, Nzambi, wewe wakasubula bahele. Mukelenge udi wamba dî diandi, bakashi badi bambila bantu lumu elu badi tshisumbu tshinene, bamba ne, Bakelenge ba misumba ya masalayi badi banyema, badi banyema! Bakashi badi bashala mu nsubu yabo badi babanyangana bintu binyengibue mu nvita. Nenulale munkatshi mua mpangu ya mikoko, bu mahuahua a nyunyu wa nkutshi adi mabuikidibue ne tshiamu tshia argent, ne masala andi mabuikidibue ne or mukunze. Hakamuangalasha Nzambi Mutambe Bunene bakalenge mu buloba abu, neige wakamata ha Salemona. Wewe, mukuna wa Nzambi, mukuna wa Bashana; mukuna udi ne mitu ya bungi, mukuna wa Bashana! Munyi mûdi ne mukau, wewe mukuna udi ne mitu ya bungi, hawamona mukuna udi Nzambi musue bu muaba wandi wa kushikamahu? E, Yehowa neashikamehu tô ne tshiendelele. Makalu a nvita a Nzambi adi binunu makumi abidi, adi binunu ha mutu ha binunu mene. Mukelenge udi munkatshi muau; ku Sinai udi mu muaba wandi wa tshijila. Wewe wakubanda mulu, wakuyamu ukoka bantu bawakukuata mu nvita ku nyima kuebe; wakuangata maha munkatshi mua bantu; e, wakuângata kabidi munkatshi mua badi bakutombokela, bua Yehowa Nzambi ashikameku. Mukelenge avudishibue disanka, udi ututuadila bujitu buetu ku dituku ku dituku; Nzambi mene udi luhandu luetu. Nzambi udi Nzambi wa luhandu kutudi, ne kudi Yehowa Mukelenge kudi kufuma kuhanduka ku lufu. Kadi Nzambi neahande mitu ya bena lukuna bandi bihesa, neahande lubombo lua mutu ludi ne nsuki ya bungi lua muntu udi unanukila kuenda mu bubi buandi. Mukelenge wakamba ne, Nempinganeku kabidi ne bandi ngumusha mu Bashana, nempinganeku kabidi ne bandi mpatula mu ndondo wa mu mai manene; bua wewe Umanye mua kudiatshisha makasa ebe mu mashi, bua ndimi ya mbua yebe ikale ne tshituha tshiai tshia mashi a badi nʼebe lukuna. Nzambi, bantu bebe bakutangila ngendu yebe, bakutangila ngendu ya Nzambi, Mukelenge wanyi, hakubueleye mu muaba wandi wa tshijila. Bimbi ba misambu badi badianjila ku mpala, bimbi ba bisanji badi babalonda ku nyima, ne hankatshi habo hadi bansongakashi bimba biabo makasa: Bimba ne, Vudishilai Nzambi disanka mu masangisha a bantu; vudishilai Mukelenge disanka, nuenu mushimi wa mai wa Bena Isalele. Ka Benyamina mukese udiku, mukokeshi wabo; bakokeshi ba Yuda mu tshisumbu tshiabo tshinene, bakokeshi ba Zebuluna ne bakokeshi ba Nafatale badiku. Nzambi, lesha bukole buebe; Nzambi, jadika malu awakuenza bualu buetu. Bualu bua ntempelo webe wa mu Yelushalema bakelenge nebalue ne maha abo kûdi. Ubele biebe nyama ya munkatshi mua ntuhu, ubele tshisumbu tshia balume ba ngombe diatshimue ne bana ba ngombe ba bantu. Udiate bantu aba muinshi mua makasa ebe badi balua kukokela kûdi ne bituha bia tshiamu tshia argent. Umuangalashe bantu badi basanka bua kuluangana nvita. Bantu banene badi bafume ku Ejipitu, Atiopa udi udiendesha lukasa bua kuololeye bianza biandi kudi Nzambi. Nuenu ba mu makelenge a ha buloba, nuimbile Nzambi musambu; nuimbile Mukelenge misambu ya kumutumbisha nʼai. Nuimbile udi wenda mubande ha mutu ha diulu misambu, ha diulu mene diakadiku kale kale. Monai, udi wela dî diandi, dî diandi dikole mene. Leshai bantu ne, Nzambi udi ne bukole. Buneme buandi budi ha mutu ha Bena Isalele, ne bukole buandi budi mu diulu. Wewe Nzambi, udi ukuatshisha bantu buowa ne malu a ku miaba yebe ya tshijila, Nzambi wa Isalele, yeye udi uhesha bantu bandi bukole ne mukanda. Nzambi avudishibue disanka. Nzambi, usungile! Bualu hua mai akûla to ne mu muoyo wanyi. Ndi mpueka mu lunteke ludi kaluyi ne muaba wa meme kuimana. Nakafika mu mai a dilembue, mudi mai mashilangane adi ahita ha mutu hanyi. Ndi muhungile bualu bua kudila kuanyi, mununu wanyi wakûma bikole. Mesu anyi adi ne bileshileshi bua kuindila kua Nzambi wanyi. Badi nʼanyi lukuna kabayi mua kumbanda ne tshilumbu badi bahita nsuki ya ku mutu wanyi bungi. Badi basue kumbutula badi bakole, bikale bena lukuna banyi anu bua mashimi. Tshinakadi tshiyi munyenge ntshindi ne bua kuhingasha. Nzambi, wewe udi mumanye buhote buanyi; malu mabi anyi kaena masokokibue ku mesu kuebe. Kuitabushi bua badi bakutekemena bafuishibue bundu bua bualu buanyi, Mukelenge Yehowa wa misumba. Kuitabushi bua badi bakukeba bakeheshibue bua bualu buanyi, Nzambi wa Isalele. Bualu bua nakuitabusha bihendu bua bualu buebe, bundu buakunkuata ku mesu. Nakulua muenyi kudi bana betu, ne mulungidi kudi bana ba mamu wanyi. Lukunukunu lua ku nsubu webe luakundia, luakummana, ne bihendu bia bantu bakukuhenda biakuhona hamʼbidi banyi. Hanakanyingalasha muoyo wanyi ne kujila kua bia kudia, bualu ebu buakalua tshihendu kundi. Hanakavuisha bilulu bikayabala bivualu bianyi, nakalua bu lusumuinu kudibo. Badi bashikama mu tshibuelelu tshia ku musoko badi bayikilangana bualu buanyi; bakuatshiki ba maluvu badi bimba misambu bualu buanyi. Kadi meme hanyi, Yehowa, nenkutendelele ne mulombu wanyi. Mu tshikondo tshidi tshiakane ku mesu kuebe, Nzambi, mu kukumbana kua luse luebe lujalame, witabe kundi ne luhandu luebe ludi mua kueyemenyibua. Umpatule mu lunteke bua meme tshidinyimu, umpandishe mu bianza bia badi nʼanyi lukuna, umpatule mu mai a dilembue. Kuitabushi bua mai adi atuntumuka ahite ha mutu hanyi, kuitabushi bua ndondo wa mai ammine; Dijimba dia Bafue kadijibiki mukana muanyi ha mutu hanyi. Yehowa, witabe kundi, bualu bua luse luebe lujalame ludi luakane; bu mudi divulangana dia luse luebe, ukudimuke kundi. Kusokoki muntu webe mpala webe; bualu bua ndi mu dikenga, witabe kundi lukasa. Usemene ha buihi ne muoyo wanyi, ûhikule; umpikule bua bena lukuna banyi. Wewe udi mumanye bu mudibo bampenda, udi mumanye mudibo banfuisha bundu, ne mudibo bakebesha; bonso badi nʼanyi lukuna badi bamanyibue kudi. Bihendu biakutamba kubanda mutshima wanyi, dinyingalala diakuntonda. Nakatekemena ne, Muntu neanfuile luse, kadi kakadiku; nakatekemena ne, Basambi nebamueneke, kadi tshiakasangana nansha umue. Bakumpa bintu bia nyongangandu mu bia kudia bianyi; bua kutalasha nyota yanyi bakannuisha nyinyo wakadi ne buanji. Mesa adibo nʼau ku mpala kuabo andamuke, alue muba kudibo; hadibo bashikama mu ditalala, alue bukuondo kudibo. Mesu abo ikale ne bileshileshi, hua kâmonyi, ukankishe bifuka biabo bua kabilekedi kukanka. Uhumune tshiji tshiebe hamʼbidi habo, ditema dia tshiji tshiebe tshikole difike kudibo, dibakuate. Tshitudilu tshiabo tshilue muaba wa dibutuka; muntu kashikama mu nsubu yabo ya ntenta. Bualu bua badi bakengesha muntu uwakukuma; badi bambila bantu bua dikenga dia bawakutaha mputa. Utenteke tshishiku ha mutu ha tshishiku tshidibo nʼatshi, kabafiki ku buakane buebe. Mena abo ajimishibue mu mukanda wa muoyo, kabafundibu hohamue ne mena a bantu bakane. Kadi meme hanyi ndi ne diakabi, ndi ne dikenga; luhandu luebe, Nzambi, lumbandishe kulu! Nentumbishe dina dia Nzambi ne musambu, nemmunemeke ne kusakidila kuanyi. Bualu ebu nebusankishe Yehowa ne disanka dihite dia kufila kua ngombe, anyi diodi dia difila dia mulume wa ngombe udi ne nsengu ne bikono. Bantu bahuekele bakatangila bualu ebu, bakasanka. Nuenu badi bakeba Nzambi, mitshima yenu ikale ne muoyo kabidi. Bualu bua Yehowa udi unvua dî dia badi bakengela bintu, kena uhetula bantu bandi badi bakuatshibue mu nkanu. Diulu ne buloba bimutumbishe, mai manene ne tshintu tshionso tshidi tshiendakanamu bimutumbishe. Bualu bua Nzambi neasungile Siona, nease misoko ya mu Yuda kabidi; bantu bandi nebashikamemu, nebikale nʼandi bu musoko wabo. Bana ba bantu bandi nebauhiane, ne badi bananga dina diandi nebashikamemu. Nzambi, wikale ne disanka bua kumpandisha, Yehowa, ulue lukasa bua kunkuatshisha. Badi bakeba muoyo wanyi, bafuishibue bundu ne babuandakashibue. Badi basanka bua kungenzela bibi, balukishibue tshianyima, bakeheshibue. Badi bamba ne, Eyo, eyo, balukishibue tshianyima bualu bua bundu budi bubakuata. Bonso badi bakukeba basanke ne bikale ne disanka bua bualu buebe! Bonso badi bananga luhandu luebe bambe matuku onso ne, Nzambi atumbishibue! Kadi meme hanyi ndi muntu muhele, ne mukengedi; Nzambi, ulue kundi lukasa! Wewe udi mukuatshishi wanyi ne musungidi wanyi; Yehowa, kujanguluki nansha! Yehowa, ndi nyemena kudi; kabanfuishi bundu ku mesu tshiendelele! Bualu bua buakane buebe umpandishe, usungile; teleja matshu ebe kundi; unsungile. Wikale kundi bu dibue dia meme kushikamahu, dia meme kunyemena kabidi matuku onso. Wewe wakuela mukenji webe ne, Bamusungile; bualu bua udi dibue dianyi ne musoko wanyi wa ngumbu ya nvita. Nzambi wanyi, unsungile mu bianza bia muntu mubi, unsungile mu tshianza tshiakunkuata tshia muntu udi muenji wa malu mabi ne muena tshinyangu. Bualu bua wewe, Mukelenge Yehowa, udi ditekemena dianyi; udi tshieyemenu tshianyi ku buana buanyi to ne katataka. Kûdi wewe mene nkundi mushindame katshia bandela, wewe nyeye wakumpatula munda mua mamu wanyi. Kutumbisha kuanyi kudi bua bualu buebe matuku onso. Ndi bu muntu udi ukemesha ba bungi; kadi wewe udi tshinyemenu tshianyi tshikole. Mukana muanyi mudi mûle tente ne butumbi buebe ne buneme buebe dinda tô ne ku dilolo. Kungumushi kûdi mu tshikondo tshia bununu buanyi; kunshiyi hatuhu hahanga bukole buanyi. Bualu bua badi nʼanyi lukuna badi bambilangana bualu buanyi, ne badi batentekela muoyo wanyi badi bela tshifufu. Badi bamba ne, Nzambi wakunulekela; numuihate, numukuate, bualu bua kakuena muntu wa kumuhandisha. Nzambi, kuikadi nʼanyi kule; wewe Nzambi wanyi, endesha lubilu bua kunkuatshisha. Badi ne muoyo wanyi lukuna bafuishibue bundu, bajimishibue; badi bakeba kungenzela bibi baluatshishibue bundu ne dikeheshibua. Kadi meme hanyi nengikale ne ditekemena misangu yonso, nennanukile kukutumbisha musangu ne musangu. Mukana muanyi nemuambile bantu bua bienzedi bia buakane buebe, nembambile bua malu a luhandu luebe dinda tô ne ku dilolo; bualu bua tshiena mumanye bungi buabi. Nendue ne mei bua bienzedi binene bia Mukelenge Yehowa, nengambile bantu bua buakane buebe, bua buakane buebe nkayabu. Nzambi, wewe wakunyisha ku buana buanyi tô ne mpindiu; tô ne mpindiu utshidi ngambila bantu bua bienzedi biebe bia kukema. Nzambi, kundekedi nansha, tô ne ku bununu buanyi ne hangikala ne nvi; kundekedi tô ne bangambila ba mu tshikondo tshialua bua tshianza tshiebe tshikole, ne hangambila badi bandonda ku nyima bua bukole buebe. Nzambi, buakane buebe budi bufika tô ne kulu. Wewe wakuenza malu manene, Nzambi, udi bu wewe nganyi? Wewe wakundesha makenga makole a bungi neunsangashe kabidi, neumpatule kabidi mu ndondo wa mu buloba. Uvudishe buneme buanyi, uhingane kabidi kundi, unsambe. Nenkutumbishe kabidi ne lunzenze, nentumbishe lulamatu luebe lua bushuwa, Nzambi wanyi; nenkuimbile misambu ya kukutumbisha nʼai ne lunkombe, wewe wa Tshijila wa Isalele. Mishiku yanyi neyele mbila ya disanka hanakuimbila misambu ya kukutumbisha nʼai, ne muoyo wanyi uwakuhikula nenkutumbishe muomumue. Ludimi luanyi neluambile bantu bua buakane buebe mu kulumbulula dinda tô ne ku dilolo; bualu bua bakadi bakeba kungenzela bibi bakufuishibua bundu, bakutamuka. Wewe Nzambi, uheshe mukelenge kulumbulula kuebe kuakane, uheshe muana wa mukelenge buakane buebe. Yeye nealumbuluishe bantu bebe ne buakane, nealumbuluishe bantu bebe bahele ne kulumbulula kuakane. Mikuna mile neyivuishile bantu ditalala, mikuna mihi neyibavuishiledi bua buakane buebe. Yeye nealumbuluile bahele bilumbu biabo, neasungile bana ba badi bakengela bintu, neatshibule mukengeshi wabo bituha bituha. Bantu nebakutshine hatshidi diba ditema, ne hatshidi ngondo ukenka, tô ne ku bikondo bionso. Yeye neikale bu nvula udi uloka ha mashinde makoshibue, neikale bu nvula ya tunsense idi imiamina mai ha buloba. Mu matuku andi bantu bakane nebikale ne diakalengele, ditalala divule nedikaleku tô ne hajimina ngondo tshiendelele. Yeye neikale ne bukokeshi ku mai manene tô ne ku mai manene makuabo, ne ku Musulu wa Pelata tô ne kunfudilu kua buloba. Badi bashikame mu tshihela nebinyike mitu yabo ku mpala kuandi, ne badi nʼandi lukuna nebalake biabo dinfuenkenya dia buloba. Bakelenge ba mu Tâshishi ne ba mu bisanga bia mai manene nebafile milambu kudiye; bukelenge ba mu Sheba ne ba mu Seba nebalue ne maha abo kudiye. E, bakelenge bonso bamukukuile, ba mu bisamba bionso bia bantu bamukuatshile mudimu. Bualu bua neahandishe mukengedi wa bintu hadileye kudiye, neabandishe muntu muhele udi kayi ne mukuatshishi. Neafuile udi mutekete ne udi ukengela dikuatshisha luse, neasungile mioyo ya bakengedi. Neuhikule mioyo yabo ku tshinyangu ne malu makole, ne mashi abo neikale tshintu tshia mushinga mukole ku mesu kuandi. Yeye ikale ne muoyo, bamuhe bituha bia or wa ku Sheba; bamulombele Nzambi mafuku onso, bamuvudishile disanka dinda tô ne ku dilolo. Blé ikale mivule ha buloba, tô ne ha mitu ha mikuna, miehu yai ihehe bu mudi mitshi ya mu Lebanona iheha. Bantu bavulangane mu musoko, badiunde bu mudi mashinde a ha buloba adiunda. Dina diandi nedishaleku tshiendelele! Dina diandi netushale kudi tunkanunuma tuandi hatshidi diba ditema. Bantu nebadivudishile disanka mu bualu buandi; bisamba bionso bia bantu nebimubikile ne, Udi ne disanka. Yehowa Nzambi, Nzambi wa Isalele, avudishibue disanka, anu yeye nkayandi udi wenza malu a kukema. Dina diandi dia butumbi divudishibue disanka tshiendelele; buloba bujima bûshibue tente ne butumbi buandi. Amen ne Amen. Mitendelelu ya Davidi, muana wa Yishai, yakuhua. Bulelela, Nzambi udi muimpe mu bienzedi biandi kudi Bena Isalele, kudi badi ne mitshima mitoke. Kadi mbu mundi ngamba bualu buanyi, makasa anyi akamba kusesuka kaba kabalê; biendedi bianyi biakamba kuselemuka. Bualu bua nakadi mukuatshile bantu badi badisue mukau, hanakatangila diakalengele dia bantu babi. Bualu bua kabena ne kanyinganyinga ha kufua kuabo; kadi bukole buabo butshidi bukandamane. Kabena habo ne makenga adi bantu bakuabo nʼau, kabena bakengeshibua bu mudi banga bantu. Nunku kudisua kudi bu lukanu ludi lujingila mu nshingu yabo, tshimbambila tshidi tshibabuikila bu tshitalu. Mesu abo adi atuntumuka bualu bua mafuta abo, bintu bidibo nʼabi bidi bihita bidi mitshima yabo misue. Badi babuidia bantu, mu bubi buabo badi bamba mei a kukengesha nʼai bakuabo; badi bakula badibandisha. Badi babandisha mei a mukana muabo tô ne mulu, ndimi yabo idi yendakana ha buloba. Bua malu â bantu bandi badi bahingana kudibo; badi banua mai mavule, bâmane tô ne bishikishiki biau. Badi bamba ne, Nzambi udi mumanye munyi? Mutambe Bunene wa mu diulu udi ne lungenyi, anyi? Monai, aba mbantu babi; ne badi kabayi ne ntatu matuku onso, badi bavudisha biuma biabo. Bulelela, nakalengesha mutshima wanyi hatuhu, nakôwa bianza bianyi hanakadi tshiyi ne tshilumbu. Bualu bua dinda tô ne ku dilolo nakukumibua, nakukengeshibua ku dinda ne ku dinda. Bu meme muambe ne, Nengakule nunku, monai, nakadi kutungila ba mu mulongo wa bana bebe tshitungu. Hanakela meji bua kumanya bualu ebu, buakuhita kunkengesha, tô ne hanakabuela mu muaba wa tshijila wa Nzambi, ne nakelanganamu meji a kunshikidilu kuabo. Bulelela, wewe udi ubateka mu miaba ya busenu; wewe udi ubela hanshi mu dibutuka Mona mudibo babutuke kabutu mu katuha ka diba! Badi bajimishibue tshiendelele ku buowa bua bungi. Bu mudi bualu bua tshilota hatabala muntu, nunku, Mukelenge, hawabika, neulengulule binfuanyi biabo. Bualu bua mutshima wanyi wakadi unyingalala bikole, ne bualu bua nakadi mutahike munda muanyi, nakadi mujibale, tshiyi ne lungenyi, nakadi bu nyama ku mesu kuebe. Kadi ntu ngikala nʼebe mafuku onso; wewe udi mikuata ku tshianza tshianyi tshia balume. Wewe neundombole ne meji ebe, hashishe, neumbueshe mu butumbi. Ndi ne nganyi mu diulu anu wewe nkayebe? Kakuena mukuabo ha buloba undi musue anu wewe. Mubidi wanyi ne mutshima wanyi bidi bihanga, kadi Nzambi udi dibue dia mutshima wanyi ne buhianyi buanyi tshiendelele. Bua mona, badi nʼebe kule nebajimine. Wewe wakubutula bonso badi bakulekela bua kulondabo malu a masandi. Kadi bidi bimpe bua meme kusemena ha buihi ne Nzambi. Nakuvuisha Mukelenge Yehowa tshinyemenu tshianyi, bua mmanye bianyi mua kuambila bantu bua midimu yebe yonso. Wewe Nzambi, bualu kai wakutubenga tshiendelele? Tshiji tshiebe tshidi tshihatuila mikoko ya mu tshidilu tshiebe tshidi ne mashinde muishi wa kahia bua tshinyi? Uvuluke tshisumbu tshia bantu bebe bawakangata kule, bawakahikula bua kuikalabo tshisamba tshia buhianyi buebe. Uvuluke mukuna wa Siona mûdi wewe mushikamemu. Ambula makasa ebe bua kuya ku miaba yakubutuka tshiendelele; malu mabi onso akenza muena lukuna mu muaba webe wa tshijila. Badi nʼebe lukuna bakuela Mbingu munkatshi mua muaba wa tshisambakenu tshiebe. Bakushimikamu mabendele abo bobo bu bimanyinu. Bakamueneka bu bantu badi bahisha bisui bua kutaha nʼabi tshihuka. Mpindiu badi batshibula mabaya onso adi ne bifuanyikishi bisongahu, bâshimbula ne tusui ne marteaux. Bakosha tshitendelelu tshiebe ne kahia, bakanyanga muaba wa kuikala wa dina diebe, bakatshishimbula hanshi ha buloba. Bakamba mu mitshima yabo ne, Tubanyange, buonso buabo diatshimue. Bakosha miaba yonso ya bisambakenu bia Nzambi bidi ha buloba. Katuena tumona bimanyinu bietu; kakuenaku muprofete kabidi, ne kakuena muntu munkatshi muetu udi mumanye bule bua tshikondo tshia bualu ebu. Nzambi, muena lukuna neakubuidie musangu bule bishi? Muena lukuna neahende dina diebe tshiendelele, anyi? Udi ukanda tshianza tshiebe, tshianza tshiebe tshia bukole mene bua tshinyi? Utshihatule mu tshiadi tshiebe, ubabutule. Kadi Nzambi udi Mukelenge wanyi wa kale tô ne mpindiu, udi wenza malu a luhandu munkatshi mua ba ha buloba. Wewe muine wakahandulula mai manene ku bukole buebe, wakatshibula mitu ya nyama minene ya mu mai manene. Wakabela mitu ya Léviathan, wakamuha bu bia kudia kudi bantu badi bashikame mu tshihela. Wakahanda nshila bua mishimi ya mai ne tusulu bihuekelemu, wakabaluisha misulu yakadi ihueka misangu yonso. Munya udi webe, bufuku budi buebe kabidi; wewe wakajadika bia mu diulu bidi bikenka ne diba kabidi. Wewe wakahanda mikalu yonso ya buloba, wakafuka tshidimu tshia munya ne tshia mashika. Yehowa, uvuluke bualu ebu ne, Muena lukuna wakukuhenda, ne bantu badi kabayi ne lungenyi bakuhetula dina diebe. Kufidi muoyo wa nyunyu webe wa nkutshi kudi nyama wa luonji, kuhu muoyo tshiendelele bua bantu bebe ba bungi badi mu dikenga. Utangile tshihungidi tshiebe bimpe; bualu bua miaba ya mu midima ya mu buloba idi miule tente ne bisokomenu bia bena tshimbambila. Kuitabushi bua badi badiatshishibue muinshi mua makasa a bantu bahingane ku nyima bafuishibue bundu. Bahele ne badi bakengela bintu batumbishe dina diebe. Juka biebe, Nzambi, udiakuile bualu buebe; uvuluke mudi bantu badi kabayi ne meji bakuhenda matuku onso. Kuhu di dia bena lukuna bebe muoyo; mutoyi wa badi bakutombokela utu wabanda kulu matuku onso. Tudi tukusakidila, Nzambi, tudi tukusakidila; dina diebe didi ha buihi, tudi tuamba bienzedi biebe bia kukema. Hanafika ku tshikondo tshinakusungula, meme muine nendumbuluishe bantu ne kulumbulula kuakane. Hafingatuka buloba ne bantu bonso badi bashikamemu, meme muine ndi njadika makunshi abu. Ndi neambila badi ne diambu ne, Kanuikadi ne diambu; ndi ngambila bantu babi ne, Kanuambudi lusengu luenu mulu; Kanuambudi lusengu luenu mulu, kanuambi mei a dikamakama ne nshingu yenu nutantamane. Bualu bua kubandisha kua muntu kakuena kufuma ku esete anyi ku wesete anyi ku tshihela. Kadi Nzambi nyeye udi mulumbuluishi; udi uhuekesha munga muntu, udi ubandisha mukuabo. Bualu bua mu tshianza tshia Yehowa mudi luhanza ne maluvu adi alulukamu; ludi lûle tente ne bintu bia muhuya muimpe bisangisha ne maluvu, ne yeye udi uhumunamu tshituha tshialu. Bulelela, bantu babi bonso ba ha buloba nebanuemu tô ne bishikishiki bialu, nebabinue kabidi. Kadi meme hanyi nengambe butumbi buebe tshiendelele, nengimbile Nzambi wa Yakoba misambu ya kumutumbisha nʼai. Nenkose nsengu yonso ya bantu babi, nenyumushe; kadi nsengu ya bantu bakane neyibandishibue. Badi bamanye Nzambi mu Yuda, dina diandi didi dinene mu Isalele. Mu Salema kabidi mudi nsubu wandi wa ntenta mushimikibue, ne muaba wandi wa kuikala udi mu Siona. Mu muaba au yeye wakatshibula mikete yakadi mu mata ne ngabu ne muele wa nvita ne bielelu bia nvita. Wewe udi ne butumbi, udi ne buneme buhite mikuna ya banyengi ba bintu binene. Bena mitshima nutantamane bakulua bu bintu bia kunyenga; bakumana kulala mu tulu tuabo; bena bukitu aba kabakadi ne bukole mu bianza biabo. Bua kubela kuebe, Nzambi wa Yakoba, muena dikalu dia nvita ne kabalu kadi biakuedibua mu tulu tua kashendende. Wewe, wewe hebe, udi ukuatshisha bantu buowa; nganyi udi mumanye mua kuimana ku mpala kuebe hawakuata tshiji? Wewe wakunvuisha bantu dikosa diebe dia bilumbu difuma mu diulu; buloba buakatshina, buakahuwa talalâ, bakajuka Nzambi bua kulumbululeye bilumbu, bua kusungileye bahuekele bonso ba ha buloba. Bulelela, tshiji tshia bantu netshikutumbishe; wewe neudiluatshishe ne tshiji tshidi tshishala. Uditshihe kudi Yehowa Nzambi webe mitshihu yebe, umufutai; bonso badi bamunyunguluke balue ne maha abo kudi udibo ne bua kutshina; udi ukanda kudisua kua bakokeshi, udi ukuatshisha bakelenge ba ha buloba buowa. Neudile kudi Nzambi ne dî dikole, nendile ne dî dikole kudi Nzambi, ne yeye neateleshe matshu andi kundi. Mu dituku dia makenga anyi nakakeba Mukelenge. Tshianza tshianyi tshiakadi tshiolola kudiye butuku katshiyi tshihange; muoyo wanyi wakabenga kusambibua. Ndi nvuluka Nzambi, ndi ntua mikemu; ndi ngelangana meji munda muanyi, nyuma wanyi udi uhanga. Wewe udi ukuata bilafinyi bia mesu anyi bua ashale matabale; ndi ntata tô ne handi tshiyi mumanye mua kuamba dî. Nakuelangana meji bua matuku a kale, ne bua bidimu bia bikondo bia diambedimbedi. Ndi nvuluka musambu unakimba butuku; ndi ngelangana meji mu mutshima wanyi muine; ne nyuma wanyi udi unanukila kukeba mua kujingulula malu. Mukelenge neabenge tshiendelele, anyi? Kena wikala ne diakalengele kabidi, anyi? Luse luandi lujalame luakumana kuhuwa tshiendelele, anyi? Mulayi wandi wakuhanga tshiendelele, anyi? Nzambi wakuhua muoyo bua kutufuileye luse luandi, anyi? Wakujibika luse luandi bualu bua udi ne tshiji, anyi? Ndi ngamba ne, Ebu mbualu budi busamisha mutshima wanyi ne, Tshianza tshia bukole tshia Mutambe Bunene wa mu diulu tshiakukudimuka. Nentele bienzedi bia Yehowa, bualu bua nenvuluke malu ebe a kukema awakenza kale. Nengelangane meji a mudimu webe wonso, nengelangane meji munda muanyi a bienzedi biebe. Nzambi, nshila webe udi wa tshijila. Nzambi kai udi munene bu mudi Nzambi wetu? Wewe udi Nzambi udi wenza malu a kukema; wewe wakumuenesha bukole buebe munkatshi mua bantu. Wewe wakuhikula bantu bebe ne diboko diebe, bana ba Yakoba ne bana ba Yosefe. Nzambi, mai akakutangila; mai akakutangila, akakuatshika buowa; e, ndondo wa mai wakakanka kabidi. Matutu akahumuna mai; diulu diakatuma mukungulu; mikete yebe yakendakana kuonso. Dî dia mukungulu webe wa nvula diakadi mu nvunde, miele yebe ya nvula yakahenyina ba ha buloba. Buloba buakakanka, buakazakala. Nshila webe wakadi mu mai manene, nshila yebe yakahita mu mai matambe bukole; ne biendedi biebe kabiakamanyibua. Wakalombela bantu bu tshisumbu tshia mikoko, ku tshianza tshia Mose ne tshia Alona. Nuenu bantu banyi, telejai matshu enu kudi diyisha dia mikenji yanyi; telejai matshu enu ku mei adi ahatuka mukana muanyi. Nembulule mukana muanyi bua kunuelela lusumuinu; nennuambile malu masokome akadiku kale. Mmalu atuakunvua, atuakumanya, ne akutuambila batatu betu. Katuena tusokokela bana babo baledibue malu â; netuambile ba mu tshikondo tshialua malu a butumbi bua Yehowa, netubambile bua bukole buandi ne bua bienzedi biandi bia kukema biakuenzeye. Bualu bua yeye wakajadika tshimanyishilu tshia Yakoba, wakasungula diyisha dia mikenji mu Isalele, biakeleleye batatu betu mukenji bualu buabi ne, Nubiyishe kudi bana benu baledibue. Bua ba mu tshikondo tshiakadi ha kulua, bana mene bakadi kabayi banze kuledibua babimanye, bajuke biabo babiambile bana babo baledibue; bua bana aba bajadike ditekemena diabo mu Nzambi, bua kabahu bienzedi bia Nzambi muoyo, kadi batumikile mikenji yandi. Bua bana aba kabikadi bu muakadi batatu babo, bakadi mulongo wa bena tshitshu ne batomboki, mulongo wa bantu bakadi kabayi ne mitshima yabo nutantamane, ne bakadi ne nyuma yakadi kayiyi nueyemene Nzambi. Bena Efelayima, bakadi ne mata bu bielelu biabo bia nvita, bakalukila tshianyima mu dituku dia nvita. Kabakatumikila mei a tshihungidi tshia Nzambi, bakabenga kuenda mu mikenji yandi. Bakahua bienzedi biandi muoyo, ne malu a kukema akabalesheye. Yeye wakenza malu a kukema ku mesu kua batatu babo, mu buloba bua Ejipitu, mu madimi a mu Soana. Wakahanda nshila mu mai manene, wakabahitshishamu; wakimanyika mai bu tshimanu. Mu munya yeye wakabalombola ne ditutu, butuku tô ne lunkelu wakabalombola ne dinkenke dia kahia. Wakahanda mabue a mu tshihela, wakabaha mai a kunua a bungi bu muakadiu muhatuke mu ndondo wa mu mai manene. Wakahatula misulu ya mai kabidi mu dibue, wakahuekeshaku mai bu mudi misulu ihueka. Kadi bakatamba kunanukila kumuenzela malu mabi, ne bua kutombokela Mutambe Bunene wa mu diulu mu tshihela. Bakatela Nzambi mu mitshima yabo hakalombabo bia kudia biakasamina mitshima yabo. E, bakajiana Nzambi; bakakonka ne, Nzambi udi mua kulongolola mesa a bia kudia mu tshihela, anyi? Monai, yeye wakakuma dibue, ne hua muanda eu mai akahatukamu, ne misulu yakahasalala. Udi mua kutuha bidia kabidi, anyi? Udi mua kulongoluela bantu bandi munyinyi, anyi? Nunku Yehowa wakunvua mei abo, wakadi ne tshiji; kahia kakatema bua kuoshaku Yakoba, tshiji tshiakabanda kabidi, tshiakakengesha Bena Isalele; bualu bua kabakitabusha mei a Nzambi, kabakeyemena luhandu luandi. Kadi yeye wakelela matutu a mu diulu mukenji, wakunzulula bibi bia mu diulu; wakahuekeshila mana bua bobo bâdie, wakabaha blé wa mu diulu. Buonso buabo bakadia bidia bia bantu bakole; wakabatumina bia kudia bikumbane. Wakabaluisha luhehele lua ku esete bua kuhehalu mu diulu, wakalombela luhehele lua ku sude ku bukole buandi. Wakabalokeshela munyinyi bu luhuishi, wakabatumina nyunyu idi ibuka ne mahuahua, yakadi bu bungi bua nsenga ya kukala kua mai manene. Wakayihonesha munkatshi mua tshitudilu tshiabo, minyunguluke miaba yakadibo bashikamamu. Nunku bakadia, bakukuta bimpe, bualu bua yeye wakabaha bintu biakajingabo. Diambedi kabayi banze kushikisha nzala yakabasuma, hakatshidi bia kudia mukana muabo mene, tshiji tshia Nzambi tshiakajuka bua kubakengesha, ne yeye wakashiha bantu bakatamba bukole munkatshi muabo, wakakuma bansongalume ba Bena Isalele, wakabahonesha hanshi. Nansha malu â onso mikanku, bakananukila kuenza bibi, kabakitabusha malu a kukema akenzeye. Nunku yeye Wakajimisha matuku abo bu mudi muhuya ujimina, Wakajimisha bidimu biabo mu buowa bukole. Hakabashiheye, hashishe, bakamukeba; bakahingana kudiye, bakakeba Nzambi ne lukunukunu. Bakavuluka ne, Nzambi udi dibue dietu, ne Nzambi Mutambe Bunene wa mu diulu udi muhikudi wetu. Kadi bakamubomba ne mukana muabo, bakamudinga ne ndimi yabo. Bualu bua mitshima yabo kayakadi mikandamane kudiye, kabakanemeka tshihungidi tshiandi ne lulamatu. Kadi bualu bua yeye wakadi mûle tente ne luse, wakababuikidila tshitshu tshiabo, kakababutula. Bulelela, yeye wakakanda tshiji tshiandi misangu ya bungi, kakasonsola tshiji tshiandi tshionso nansha. Wakavuluka ne, Badi anu ba ha buloba, badi bu luhehele ludi luhita, kaluena luhingana kabidi. Monai bungi bua misangu yakamutombokelabo mu tshihela, ne yakanyingalashabo mutshima wandi mu muaba wa hatuhu! E, bakahingana ku nyima, bakatela Nzambi, bakatatshisha wa Tshijila wa Bena Isalele. Kabakavuluka bukole bua tshianza tshiandi, anyi dituku diakabahikuleye mu bianza bia muena lukuna; hakatekeye bimanyinu biandi mu Ejipitu, hakenzeye malu andi a kukema mu madimi a mu Soana. Wakandamuna misulu yabo bua kuluayi mashi, ne bua muanda eu kabakamanya mua kunua mai a mu misulu yabo. Wakatuma mikongolo ya njiji munkatshi muabo, yakabasuma, yakabadia; wakabatumina biula, biakababutula. Wakafila bintu biabo bia kunowa kudi meshi, ne wakafila mamuma a ku mudimu wabo kudi mikumbi. Wakashiha mionshi yabo ya tumuma tua nvinyo ne mabue a nvula, wakashiha mitshi yabo ya sycomore ne mabue manene a nvula. Wakafila bimuna biabo kabidi ku lufu lua ku mabue a nvula, wakafila bisumbu biabo bia mikoko ku lufu lua ku miele ya nvula. Wakabela kahia mu tshiji tshiandi, tshiji, difikʼa munda ne makenga, biakadi bu banjelo badi benza malu mabi bakabatumineye. Wakabatamishila tshiji tshiandi nshila; kakengeleka muoyo wabo bua kaufu, kudi wakafila mioyo yabo ku tshihuhu. Wakashihesha banʼa bute bonso ba mu Ejipitu, wakashiha bana aba bakadianjilabo kulela mu bukole buabo mu nsubu ya ntenta ya Hama. Kadi wakendesha bantu bandi mene bu mikoko, wakabalombola mu tshihela bu tshisumbu tshia mikoko. Wakabalombola kabayi ne bualu bubi bubakuate, ne bua muanda eu kabakadi ne ditshina; kadi mai manene akahita ha mutu ha bakadi nʼabo lukuna. Wakasankisha ku butshika bua buloba buandi bua tshijila, tô ne ku mukuna eu wakadi tshianza tshiandi tshia bukole tshihete. Wakihata bisamba bia bantu ku mpala kuabo; wakababanyina buloba bu buhianyi buabo ku muonshi wa luidi, wakashikamisha bisamba bia Bena Isalele mu nsubu yabo ya ntenta. Kadi bakamuteta ne bakatombokela Nzambi Mutambe Bunene wa mu diulu, kabakatumikila bimanyishilu biandi. Bakalukila tshianyima, bakamutungila tshitungu bu muakenza batatu babo, bakasesuisha a bu mudi buta budi ne buelafi. Bualu bua bakamufikisha munda ne bitendelelu biabo bia ha mikuna, bakasonsola mukau munda muandi ne mpingu yabo misonga. Hakunvua Nzambi muanda eu, wakadi ne tshiji, wakatamba kuhidia Bena Isalele. Bua muanda eu wakumuka mu nsubu wandi wa ntenta wa mu Shilo, nsubu wandi wa ntenta mene wakashimikeye munkatshi mua bantu. Wakafila bukole buandi bua kubuelabu mu buhika, wakafila butumbi buandi mu bianza bia bena lukuna. Wakafila bantu bandi ku bukole bua muele wa nvita, wakadi ne bena buhianyi buandi tshiji. Kahia kakushidisha bansongalume babo, kabakatumbisha bansongakashi babo bakatshidi tumama ne musambu wa kubuela mu dibaka. Bakuidi babo bakahona ku muele wa nvita, ne bakashi babo ba mu lufuila kabakusa madilu. Hashishe Mukelenge wakatabala bu mudi muntu mubike ku tulu, bu mudi muena bukitu udi wela mbila bualu bua nyinyo wakamukuata. Wakalukisha bena lukuna bandi tshianyima; wakabaluisha bundu tshiendelele. Yeye wakabenga nsubu wa ntenta wa Yosefe, bakasungula tshisamba tshia Efelayima; Kadi wakasungula tshisamba tshia Yuda, Mukuna wa Siona mene udiye munange. Wakasa tshitendelelu tshiandi bua kuikalatshi bu miaba ya mu diulu, ne bu buloba buakujadikeye tshiendelele. Wakasungula Davidi muntu wandi, wakamûmusha mu mpangu ya mikoko. Wakalua nʼandi hakadiye ulonda bakashi ba mikoko bakadi bamusha bana babo batekete; wakamuvuisha mulami wa ba mu Yakoba bantu bandi, ne wa Bena Isalele buhianyi buandi. Nunku yeye wakadi mulami wabo mu buakane bua mutshima wandi; wakabalombola ku meji a bianza biandi. Nzambi, bisamba bia bantu biakubuela mu buhianyi buebe; kunyanga ntempelo webe wa tshijila; biakubutula Yelushalema bua kulueye mishiki ya mabue. Biakufila bitalu bia bantu bebe kudi nyunyu ya mu diulu bua kuikalabi bia kudia biai, biakufila minyinyi ya mibidi ya bansanto bebe kudi nyama ya ha buloba. Biakamatabisha mashi abo bu mai mu miaba idi minyunguluke Yelushalema, kakuakadi wa kubajika. Tuakulua bu tshintu tshia kulondabo kudi bena mutumba nʼetu, tuakulua bintu bia kubuidia ne kuseka kudi badi batunyunguluka. Yehowa, bualu ebu nebulehe musangu bule bishi? Newikale ne tshiji tshiendelele, anyi? Mukau webe newoshe bu kahia, anyi? Uhumuna njiya yebe hamʼbidi ha bisamba bia bantu bidi kabiyi bikumanye, ne ha mutu ha makelenge adi kâyi abikila dina diebe! Bualu bua bakadia Yakoba, bakabutula muaba wandi wa kuikala. Kuvuluki malu a tshishiku a bankambua betu bua kutulesha nʼau: luse luebe lulue kubakidila lukasa, bualu bua bakutamba kutuhuekesha. Wewe Nzambi wa luhandu luetu, utukuatshishe bua butumbi bua dina diebe! Utuhandishe, Utubuikidile malu mabi etu, bua bualu bua dina diebe! Bua tshinyi ba mu bisamba bia bantu badi batukonka ne, Nzambi wenu udi kudi kunyi? Disombuela dia mashi a bantu bebe akumatshishabo hanshi dimanyishibue ku mesu kuetu munkatshi mua ba mu bisamba bia bantu. Dihumuna dia bena lukanu difike ku matshu ebe. Bu mudi bunene bua bukole buebe usungile bantu aba badi basungudibue bua kufuabo. Uhingashile bena mutumba nʼetu bihendu mu biadi biabo bivudisha misangu muanda mutekete, biakukuhendabo nʼabi, Mukelenge wetu. Nunku tuetu bantu bebe, mikoko ya mu tshidilu tshiebe tshidi ne mashinde, netukusakidile tshiendelele; netumanyishe ba mu bikondo bionso butumbi buebe. Teleja matshu ebe, wewe Mulami wa mikoko wa Bena Isalele, wewe udi ulombola bana ba Yosefe bu tshisumbu tshia mikoko. Wewe udi mushikika mu nkuasa wa butumbi ha mutu ha bakeluba, uteme biebe. Usonsole bukole buebe ku mpala kua Bena Efelayima, Bena Benyamina ne Bena Manashe, ulue bua kutusungila. Wewe Nzambi, utuandamune mitshima yetu kabidi; mpala webe ateme, ne netusungidibue! Yehowa, Nzambi wa misumba, neukuatshile kutendelela kua bantu bebe tshiji musangu bule bishi? Wakabadisha bidia bia binsonshi, wakabanuisha binsonshi bikumbane mu tshihiminu tshinene. Udi utuvuisha tshintu tshia kufuilangana nʼatshi kudi bena mutumba nʼetu; badi nʼetu lukuna badi basekeshangana bua bualu buetu. Wewe Nzambi wa misumba, utuandamune mitshima yetu kabidi; mpala webe ateme, ne netusungidibue! Wewe wakalufila muonshi wa tumuma tua nvinyo mu Ejipitu; wakihatamu bisamba bia bantu, wakûkuna. Wakalongolola muaba wau ku mpala kuau, wakela miji mile munda mua buloba, wakatampakana buloba bujima. Mikuna mile yakabuikidibua ne dileshi diau, matamba au akadi bu mitshi ya cèdre ya Nzambi. Wakalehesha matamba au, akafika tô ne ku mai manene, ntonga yau yakafika tô ne ku Musulu wa Pelata. Wakushimbula luhangu luau bualu kai, bua bonso badi bahita mu nshila badi bahuola mamuma au? Ngulube wa ditu udi ûnyanga, ne nyama ya mu tshisuku idi yudia. Nzambi wa misumba, tudi tukusengelela ne, Wandamuke; kûdi mushikame mu diulu utangile hanshi, ûmone, welangane meji a muonshi eu. Ukube muonshi munene wakadi tshianga tshiebe tshia bukole tshikuna, ne muana eu wa balume uwakukolesha bua bualu buebe. Bakuwosha ne kahia, bakûtaha, bauhula; badi bafua hamonabo dinyenga dia mpala webe. Tshianza tshiebe tshikale hamʼbidi ha muntu wa ku tshianza tshiebe tshia bukole, hamʼbidi ha muana wa muntu uwakukolesha bua bualu buebe. Nunku katuena tualukila tshianyima bua kumuka kûdi. Utuangashe, nembikile dina diebe! Yehowa Nzambi wa misumba, utuandamune mitshima yetu kabidi; mpala webe ateme, ne netusungidibue! Nuimbile Nzambi udi bukole buetu musambu ne dî dikole; nuelele Nzambi wa Yakoba mbila ya disanka! Nuambulule mei enu mu musambu, nuakuishe dikasa, nuimbe lunkombe ludi ne tshiona tshimpe, nuimbe hamue ne lunzenze. Nuele mpungi habala ngondo, ne halua ngondo tshibalu, mu dituku dietu dia bidia bia disanka. Bualu bua eu mmukenji mufundila Bena Isalele, ne dî dijalame diakela Nzambi wa Yakoba. Yeye wakajadikila Yosefe mukenji eu bu tshimanyishilu, hakahiteye mu buloba bua Ejipitu. Ndi ngunvua dî mu muaku unakadi tshiyi muanze kumanya ne, Nakatentumuna diaha diandi ku dituala dia bujitu, bianza biandi biakasululuka ku tshibondo. Wakungela dî hawakadi mu dikenga, nakakuhidisha; nakitaba kûdi mu tshisokomenu tshianyi tshia mukungulu; nakakuteta ku mai a Meliba. Unvuai, nuenu bantu banyi, nennudimushe. Nuenu Bena Isalele, nakadi kusua bua nuenu nunvue dî dianyi! Nzambi wa bende kikadi munkatshi muenu, kanukukuidi nzambi wa bantu ba bende. Meme ndi Yehowa Nzambi webe wakakuluhula mu buloba bua Ejipitu. Bulula mukana muebe bitongatonga, nemmûshe tente. Kadi bantu banyi kabakunvua dî dianyi; Bena Isalele kabakasua kungitabusha, nansha kakese. Nunku nakabalekela bua kulondabo tshitshu tshia mu mitshima yabo, bua kuendabo mu nshila wakadi meji abo masungule. Nakadi kusua bua bantu banyi bunvue mei anyi, ne bua Bena Isalele bende mu nshila yanyi! Nakadi kutekesha bena lukuna babo lukasa, nakadi kukudimuna tshianza tshianyi bua kukengesha nʼatshi badi baluangana nʼabo. Badi ne Yehowa lukuna bakadi kulua kumukokela ne lubombo, kadi tshikondo tshia Bena Isalele tshiakadi kuleha to ne kashidi. Yeye wakadi kubadisha ne blé mutambe buimpe, nakadi kubukutshisha ne buitshi bua mu dibue. Nzambi udi udimanyika mu muaba wandi wa disangisha dia Nzambi, udi ulumbulula bilumbu munkatshi mua nzambi mikuabo. Nenulumbuluile bilumbu ne kulumbulula kubi, nenunemeke mpala ya bantu babi, musangu bule munyi. Nulumbulule bantu batekete ne bana ba nshiya ne kulumbulula kuakane; ulumbuluile badi ne dikenga ne badi bakengela bintu bua kubabingisha. Nusungile bantu batekete ne bahele, nubahandishe mu bianza bia bantu babi. Kabena bamanye, kabena bajingulula malu; badi bendakana eku ne eku mu midima. Bishimikidi bionso bia buloba bidi bikankishibue. Meme nakamba ne, Nudi nzambi, buonso buenu nudi bana ba balume ba Mutambe Bunene wa mu diulu. Kadi nenufue bu bantu bakuabo, nenuhone hanshi bu mukokeshi yonso. Nzambi, bika biebe, ulumbuluishe ba ha buloba; bualu bua wewe neuhiane bisamba bionso bia bantu. Nzambi, kuikadi biebe talalâ; kuhuwu biebe talalâ, Nzambi, kushikama hatuhu! Mona, badi nʼebe lukuna badi bateka diyoyo; badi bakukina bakuambula mitu yabo. Badi babangila malu a budimu a kuenzela bantu bebe; badi bela bifufu biabo hohamue bua kulekela bantu bawakusokoka diyoyo. Badi bamba ne, Luai, tubabutule bua kabikadi tshisamba tshia bantu kabidi; bua kabavuluki dina dia Bena Isalele kabidi tshiendelele! Bualu bua badi bela bifufu biabo hohamue ne mutshima umue, badi bahunga tshihungidi bua kukuenzela wewe bibi — Mbadi bashikame mu ntenta ya mu Edome ne ya Bena Yishemaele. Badi ba mu Moaba ne Bena Hagâ, mba mu Gebala, Amona ne Amaleka; badi ba mu Peleshete diatshimue ne badi bashikame mu Tulo. Ba mu Ashû kabidi bakudisangisha nʼabo; bobo badi diboko dikole dia bana ba Lota. Wenzele bantu aba bu muwakenzela Midiyana; bu muwakenzela Sisela ne Yabina ku musulu wa Kishona, bakashihibua ku Ene-dô, bakatua bu tunvi tua kuela ha buloba. Uvuishe bantu babo banene bu Olebe ne Zêbe, uvuishe bakokeshi babo bonso bu Zeba ne Salemuna. Bakamba biabo ne, Tudinyengele miaba ya kuikala ya Nzambi bua kuikalayi miaba yetu. Wewe, Nzambi wanyi, ubavuishe bu luhuishi ludi lunyunguluka ku mpala kua nvunde, bu bisote ku mpala kua luhebele. Bu mudi kahia kosha ditu, bu mudi ludimi lua kahia lutemesha kahia ha mikuna, wewe ubihate ne tshihuhu tshiebe, ubatshinyishe ne tshihehele tshiebe tshikole. Ubafuishe bundu ku mesu tente, bua bakebe dina diebe, Yehowa. Batatshishibue bundu ne batshine tshiendelele; e, batamuke, bajimine biabo. Mbua bamanye biabo ne wewe nkayebe, ngudi muidike dina dia Yehowa, udi Mutambe Bunene wa ha mutu ha buloba bujima. Yehowa wa misumba, ke mudi muaba webe ûdi mushikame mulengele nunku! Mutshima wanyi udi ujinga, e, ndi muhange ne dijinga dia biendedi bia mu tshitendelelu tshia Yehowa. Mutshima wanyi ne mubidi wanyi bidi biela mbila bua Nzambi wa muoyo. E, mushamusha wakudisanganyina nsubu, ne kandindi kakadisanganyina disua dia kutekamu bana baku; bidi hehi ne bioshelu biebe, Yehowa wa misumba, Mukelenge wanyi ne Nzambi wanyi. Disanka didi kudi bantu badi bashikame mu nsubu muebe! Batshidi bakutumbisha. Disanka didi kudi bantu badi ne bukole buabo kûdi, badi ne nshila ya ku Siona mifunda mu mitshima yabo! Hahitshiabo mu tshibanda tshia Baka, badi batshivuisha muaba wa mishimi ya mai; e, nvulʼa mbedi udi utshibuikila ne bintu bivuishila bantu disanka. Badi baya ku bukole ne bukole; muntu yonso wa munkatshi muabo udi umueneka ku mpala kua Nzambi mu Siona. Wewe Yehowa Nzambi wa misumba, unvua kutendelela kuanyi; wewe Nzambi wa Yakoba, uteleje matshu ebe kundi. Mona, wewe Nzambi, ngabu wetu, utangile mpala wa muntu webe udi muedibue manyi ha mutu! Bualu bua dituku dimue mu biendedi bia mu tshitendelelu tshiebe didi dihita matuku tshinunu a kukuabo buimpe. Nakadi kusungula bua kuimana ku mbelu kua nsubu wa Nzambi wanyi ku mpala kua kushikama mu ntenta ya malu mabi. Bualu bua Yehowa Nzambi udi diba ne ngabu; Yehowa udi uha bantu luse ne butumbi. Kena uhala badi benda mu buakane tshintu tshimpe tshimue. Yehowa wa misumba, disanka didi kudi muntu udi ukueyemena! Yehowa, wewe wakavuishila buloba buebe diakalengele; wakakudimuna buhika bua Yakoba, wakumuha diakalengele. Wakumushila bantu bebe tshishiku tshiabo, waka babuikidila malu mabi abo onso. Wakumusha njiya yebe yonso, wakadikudimuna bua wewe kuikadi ne tshiji tshiebe tshidi tshitema. Utuhingashe, Nzambi wa luhandu luetu, ulekele tshiji tshiudi nʼatshi kutudi. Newikale nʼetu tshiji tshiendelele, anyi? Neulunguluishe tshiji tshiebe tô ne ku bikondo bionso, anyi? Kuena utusangasha kabidi, bua bantu bebe basanke bualu buebe, anyi? Utuleshe luse luebe lujalame, Yehowa, Utuhe luhandu luebe. Ngunvue bianyi tshidi Nzambi, Yehowa mene, wamba; bualu bua neambile bantu bandi ne bansanto bandi mei a ditalala; kadi kabahinganyi ku nyima bua kulondabo malu a hatuhu. Bulelela, luhandu luandi ludi ha buihi ne badi bamutshina, bua butumbi bushikame mu buloba buetu. Luse lujalame ne lulamatu lua bushuwa biakusangakanangana; buakane ne ditalala biakutuangana mishiku. Lulamatu lua bushuwa ludi lutoloka mu buloba; buakane bua mu diulu budi butangila hanshi. Bulelela, Yehowa neatuheshe masanka adi mimpe, buloba buetu nebukuame bintu biabu bikumbane. Buakane nebuende ku mpala kuandi, nebuvuishe biendedi biandi nshila wa kuendelamu. Yehowa, uteleje matshu ebe, witabe kundi, bualu bua ndi muhele, ndi nkengela bintu. Ulame muoyo wanyi, bualu bua ndi muntu udi munange Nzambi; wewe Nzambi wanyi, usungile muntu webe udi ukueyemena. Unfuile luse, Mukelenge, bualu bua ndi ndila kûdi dinda tô ne ku dilolo. Usankishe muoyo wa muntu webe, Mukelenge, bualu bua ndi ngambula mutshima wanyi kûdi. Bualu bua wewe, Mukelenge, udi muimpe, ne mutshima webe udi musue kubuikidila bantu mihi yabo; udi mûle tente ne luse lujalame kudi bonso badi bakubikila, Yehowa, uteleje matshu ebe ku kutendelela kuanyi, unvue dî dia mitendekenu yanyi. Mu dituku dia dikenga dianyi nenkubikile; bualu bua wewe newitabe kundi. Mukelenge, kakuena umue bu wewe munkatshi mua nzambi ya hatuhu; kakuenaku minga midimu bu midimu yebe. Ba mu bisamba bionso bia bantu biwakufuka nebalue kukukuila ku mesu kuebe, Mukelenge, nebatumbishe dina diebe. Bualu bua wewe udi munene, ne udi wenza malu a kukema; anu wewe nkayebe udi Nzambi. Unyishe nshila webe, Yehowa, bua ngende mu bushuwa buebe; uvuishe mutshima wanyi mutshima umue udi utshina dina diebe. Mukelenge Nzambi wanyi, nenkuele tuasakidila ne mutshima wanyi wonso, nentumbishe dina diebe tshiendelele. Bua luse luebe lujalame lûdi undesha ludi lunene; bualu bua wakuhandisha muoyo wanyi ku ndondo wa mu Muaba wa Bafue. Nzambi, badi badisue bakujuka bua kuntantamena, tshisumbu tshia bena tshimbambila tshiakukeba muoyo wanyi, kabakukuteka wewe ku mpala kuabo. Kadi wewe, Mukelenge, udi Nzambi udi ufuila bantu luse ne diakalengele; udi ne lutulu ludi lukanda tshiji tshiebe, udi mûle tente ne luse lujalame ne lulamatu lua bushuwa. Uhingane kundi, unfuile luse; uhe muntu webe bukole buebe, usungile muana wa balume wa muntu webe mukashi. Undeshe tshimanyinu tshia disanka diebe kundi, bua badi nʼanyi lukuna bamanye mua kutshimona, bafuishibua bundu; bualu bua wewe, Yehowa, wakunkuatshisha, wakunsamba. Bishimikidi bia musoko wandi bidi mu mikuna ya tshijila. Yehowa udi unanga bibuelelu bia ku Siona ne dinanga dihite didiye nʼadi ku miaba yonso idi Yakoba muikale. Badi bamba malu a kukutumbisha nʼau, wewe musoko wa Nzambi. Ndi mela dina dia Lahaba ne dia Babulona munkatshi mua badi bammanye. Monai, Peleshete ne Tulo, ne Atiopa kabidi — eu wakaledibua mu musoko au. E, nebambe dî edi bualu bua Siona ne, Bakalela muntu eu ne muntu wawa munkatshi muau; bualu bua Mutambe Bunene wa mu diulu neajadike. Yehowa neababale bu bandi, hafundeye mena a bantu, ne, Eu wakaledibua mu musoko au. Badi bimba misambu ne badi baja maja badi bamba ne, Mishimi yanyi ya mai yonso idi munkatshi muenu. Yehowa, Nzambi wa luhandu luanyi, nakudila ku mpala kuebe munya ne butuku. Mutendelelu wanyi ufike ku mpala kuebe, uteleje matshu ebe ku muadi wanyi. Bualu bua mutshima wanyi udi mûle tente ne ntatu, ne muoyo wanyi udi usemena hehi ne Muaba wa Bafue. Badi bambala ne bayaya mu Dijimba dia Bafue; ndi bu muntu udi kayi ne bukole. Udibo bashiya hatuhu munkatshi mua bafue, bu bantu bashihibue badi balala mu nkita, baudi kuyi uvuluka kabidi, kadi badi bumushibue ku tshianza tshiebe. Wewe wakundadika mu ndondo wa Dijimba, mu miaba ya mu midima, idi munda mua buloba mene. Tshiji tshiebe tshidi tshinnemeshila bujitu hamʼbidi hanyi, wewe wakukengesha ne mavuala ebe onso. Wakumusha balunda banyi kundi, wakubateka kule; wakunvuisha tshintu tshia bobo kukenuka. Ndi mukomena, tshiena mua kuluhukamu. Mesu anyi adi alua bitayitayi bualu bua makenga. Yehowa, nakukubikila ku dituku ku dituku, nakuolola bianza bianyi kûdi. Udi wenzela bantu bafue malu a kukema, anyi? Bantu bakumana kufua badi mua kujuka bua kukubingisha, anyi? Luse luebe lujalame ludi mua kuambibua mu lukita, anyi? Lulamatu luebe lua bushuwa ludi mua kuambibua mu Kabutu, anyi? Malu ebe a kukema adi mua kumanyibua mu midima, anyi? Buakane buebe budi mua kumanyibua mu buloba budi bantu ne tshihua muoyo, anyi? Kadi meme hanyi, Yehowa, nakudila kûdi; hatshia butuku, kutendelela kuanyi nekufike kûdi. Yehowa, udi umusha muoyo wanyi ku mpala kuebe bua tshinyi? Udi usokoka mpala webe kundi hua tshinyi? Ndi mukengeshibue ne nakadi hehi ne lufu ku matuku a buana buanyi tô ne mpindiu. Nakumana kukenga ne malu ebe adi ankuatshisha buowa tô ne handi ngamba kuhanga. Tshiji tshiebe tshikole tshiakuhita ha mutu hanyi; bienzedi biebe bidi bintshinyisha bikole biakumbutula. Biakunyunguluka bu mai mavulangane dinda tô ne ku dilolo, biakunyengela nseke yonso, buonso buabi diatshimue. Wewe wakumusha muntu udi unnanga ne mulunda wanyi kundi, wakubateka kule, bandi ntamba kumanya bimpe badi ba mu mîdima. Nengimbe bua luse lujalame lua Yehowa kashidi; mukana muanyi nemumanyishe bantu tô ne ku bikondo bionso mudi lulamatu luebe lua bushuwa. Bualu bua nakuamba ne, Luse luebe lujalame neluibakibue tshiendelele; nenjadike lulamatu luebe lua bushuwa mu diulu mene. Nakuhunga tshihungidi ne muntu unakusungula, nakuditshiha kudi Davidi muntu wanyi ne, Nenjadike tunkanunuma tuebe tshiendelele, nengase nkuasa webe wa bukelenge tô ne ku bikondo bionso. Yehowa, bia mu diulu nebitumbishe malu ebe a kukema; nentumbishe lulamatu luebe lua bushuwa mu disangisha dia ba tshijila. Nganyi udi mu diulu udi mua kuelekeshibua ne Yehowa? Nganyi munkatshi mua bana halume ba bakole ba mu diulu udi mua kufuanangana ne Yehowa, nNzambi udibo batshina bikole mu disangisha dia ba tshijila, Udi utamba bonso badi bamunyunguluka kutshinyishibua? Yehowa Nzambi wa misumba, udi ne bukole bu mûdi wewe, Yehowa, nʼabu nganyi? Lulamatu luebe lua bushuwa ludi lukunyunguluka. Udi ukokesha kutuntumuka kua mai manene; habanda mavuala au, wewe udi wabutamisha. Wewe wakabetekasha Lahaba, wakamuvuisha bu tshitalu tshia muntu mushihibue, wakamuangalasha badi nʼebe lukuna ne diboko diebe dikole. Diulu ndiebe, buloba mbuebe kabidi; wewe muine wakasa buloba ne bintu bionso bidimu. Wewe wakafuka luseke lua ku nôde ne lua ku sude; mukuna wa Tabô ne wa Hêmona idi isanka bua dina diebe. Wewe udi ne diboko didi ne bukole; tshianza tshiebe tshidi tshikole, tshianza tshiebe tshia balume tshidi tshibandishibue kulu. Buakane ne kulumbulula kuakane bidi bishimikidi bia nkuasa webe wa butumbi; luse lujalame ne lulamatu lua bushuwa bidi bienda ku mpala kuebe. Disanka didi kudi bantu badi bamanye tshiona tshia badi basanka. Yehowa, badi benda biabo mu munya wa ha mpala hebe. Badi basanka mu dina diebe dinda tô ne ku dilolo, ne bua buakane buebe badi batumbishibue. Bualu bua wewe muine udi butumbi bua bukole buabo; ne bua dianyisha diebe kutudi wewe udi ubandisha lusengu luetu mulu. Bualu bua ngabu wetu ngua Yehowa; mukelenge wetu ngua Wa Tshijila wa Isalele. Mu dituku adi wewe wakambila muntu webe uwakananga dî mu tshikena kumona ne, Nakuteka dikuatshisha dianyi hamʼbidi ha muena bukitu, nakubandisha muntu unakusungula munkatshi mua bantu. Nakusangana Davidi, muntu wanyi; nakumuela manyi anyi a tshijila ha mutu handi; tshianza tshianyi netshimujadike, diboko dianyi kabidi nedimukoleshe. Muena lukuna kena umubunda yeye kayi muanze kudimuka, muena malu mabi kena umukengesha. Nembetekashe bena lukuna bandi ku mpala kuandi, nenkume badi nʼandi lukuna ne lufu. Lulamatu luanyi ne luse luanyi lujalame nebikale nʼandi; ne mu dina dianyi nebabandile lusengu luandi mulu. Nenteke tshianza tshiandi ha mai manene, ne tshianza tshiandi tshia balume ha misulu ya mai. Yeye neangele dî ne, Wewe udi Tatu wanyi, Nzambi wanyi, ne Dibue dia luhandu luanyi. Nemmuvuishe muanʼa bute wanyi, mukelenge udi muhite bakelenge ba ha buloba kutumba. Nemmutekele luse luanyi lujalame kashidi; tshihungidi tshianyi netshishale tshihungidi tshidiye mua kueyemena. Nenjadike mulongo wa tunkanuniuna tuandi bua wikaleku tshiendelele, nenjadike nkuasa wandi wa bukelenge bua ikaleku bu mudi diulu dikalaku ne matuku adi. Biabenga bana bandi diyisha dia mikenji yanyi, bikalabo kabayi benda mu mei andi mbambila; bianyangabo mei anakabafundile bua kuenzabo, biahidiabo kutumikila mikenji yanyi; hashishe, nembakengeshe bua matomboka abo ne mulangala, nembakengeshe bua mahambuka abo ne mikumu ya nsokotshi Kadi tshiena ngumusha luse luanyi lujalame kudiye kashidi, tshiena mudinge ku lulamatu luanyi. Tshiena nshiha tshihungidi tshianyi, tshiena ukudimuna dî diakahatuka mukana muanyi. Nakaditshiha mu kudijidila kuanyi musangu umue tshiendelele ne, Tshiena ndinga Davidi nansha. Milongo ya tunkanunuma tuandi neyilondangane kashidi, nkuasa wandi wa bukelenge neikaleku ku mpala kuanyi bu mudi diba tshiendelele. Neajadikibue tshiendelele bu mudi bikondo bia ngondo bijadikibue, mumanyi wa mu diulu udi mujalame. Kadi mpindiu wewe wakumubenga, wakumuhetula, wewe udi nukuatshile ne muntu webe uwakuela manyi ha mutu handi tshiji. Wakuhidia tshihungidi tshiwakahunga ne muntu webe, wakunyenga tshifulu tshiandi tshia butumbi, wakutshiela hanshi ha buloba. Wakushimbula ngumbu yandi yonso; wakubutula misoko yandi minyungulula ne ngumbu ya nvita. Bonso badi bahitaku mu nshila badi banyenga bintu biandi; yeye muine wakulua bu tshintu tshia bena mutumba nʼandi kuhendabo. Wewe wakubandisha tshianza tshia bukole tshia bena lukuna bandi mulu; wakusankishe mitshima ya bonso badi nʼandi lukuna. E, wakutshihasha ditua dia muele wandi wa nvita, kuakumujadika bua yeye kudimanyika mu nvita. Wewe wakuhuwisha butumbi buandi, wakuela nkuasa wandi wa bukelenge hanshi ha buloba. Wakukehesha matuku a bunsongalume buandi, wakumufuisha bundu ku mesu tente. Yehowa, bualu ebu nebulehe musangu bule munyi? Neusokome kashidi, anyi? Tshiji tshiebe netshiteme, netshioshe bu kahia, musangu bule munyi? Uvuluke bukese bua matuku anyi; uvuluke bu muwakafukila bana bonso ba bantu hatuhu! Muntu kai wamanya mua kushala ne muoyo kayi utangila lufu? Wamanya mua kuhandisha muoyo wandi mu bukole bua Muaba wa Bafue nganyi? Mukelenge, luse luebe lujalame luwakadi nʼalu diambedi, luwakaditshiha nʼalu kudi Davidi bualu bua lulamatu luebe kudiye ludi kudi kunyi? Mukelenge, uvuluke bihendu bidibo bahenda nʼabi bantu bebe. Uvuluke mundi utuala bihendu bia bantu ba bungi mu tshiadi tshianyi, biakutuhendabo nʼabi kudi bantu badi nʼebe lukuna, Yehowa, biakusekabo nʼabi biendedi bia makasa a muntu webe muedibue manyi ha mutu. Yehowa avudishibue disanka tshiendelele! Amen ne Amen. Mukelenge, wewe udi muikale muaba wa tuetu kushikamamu mu bikondo bionso. Diambedi mikuna kayiyi mianze kumueneka, diambedi wewe kuyi muanze kufuka buloba ne bifukibua, ku tshibangidilu tô ne kunshikidilu wewe udi Nzambi. Wewe udi uhingasha bantu mu dinfuenkenya kabidi, udi Wamba kabidi ne, Hinganai, nuenu bana ba bantu. Bualu bua bidimu tshinunu bidi ku mesu kuebe bu dituku dia makelela dimane kuhita, anyi bidi bu tshituha tshia diba tshidi mutentekedi utentekelamu butuku. Wewe udi ubumusha bu muakadi mai mûla ahueka nʼabo; badi bu tshilota, bu mashinde adi akola ne dinda. Adi adiunda bimpe ne dinda, adi akola; halua dilolo, adi mutahibue ne adi afubidila. Bualu bua tuakushidishibua mu tshiji tshiebe, bua njiya yebe tuakukuatshika buowa. Wewe wakuteka malu mabi etu ku mpala kuebe, Wakuteka mihi ituakuenza mu busokoko mu munya wa ha mpala hebe. Bualu bua matuku etu onso adi ajimina bualu bua tshiji tshiebe; bidimu bietu bidi bishika bu kuhumuna kua muhuya. Matuku a mu bidimu bietu adi akumbana bu bidimu makumi muanda mutekete; anyi, bituikala ne bukole, bidi mua kukumbana bidimu makumi muanda mukulu; kadi dileha diabi didi dituvuishila anu mudimu mukole ne kanyinganyinga, bualu bua bidi bihita lubilu, ne ludi tuya lukasa. Udi mumanye bukole bua tshiji tshiebe nganyi? Udi mumanye njiya yebe idi itshinyisha bantu nganyi? Utuyishe mua kubala matuku etu onso ne dibala edi nunku — bua tuetu kudihetela mutshima udi ne meji. Yehowa, hingana biebe! Muanda eu neulehe musangu bule munyi? Mutshima webe ufuile bantu bebe luse! Ûshe mitshima yetu tente ne luse luebe lujalame ne dinda, bua tuetu tumanye mua kuikala ne musangelu ne disanka matuku etu onso. Utusankishe ne disanka didi diakanangana ne bungi bua matuku awakutukengeshamu, ne bungi bua bidimu bi tuakatangilamu diakabi. Mudimu webe umueneke kudi bantu bebe, butumbi buebe kudi bana babo baledibue. Dianyisha dia Mukelenge Nzambi wetu dikale kutudi, utujadikile mudimu wa bianza bietu; e, bulelela, ujadike mudimu wa bianza bietu tshishiki. Udi mushikame mu tshisokomenu tshia Nzambi Mutambe Bunene wa mulu neikale mu mundidimbi wa Nzambi wa Bukole Buonso. Nengambe bua Yehowa ne, Yeye udi tshinyemenu tshianyi ne musoko wanyi munyunguluke ne Nzambi wanyi undi ngeyemena. Bualu bua neakuhandishe ku buteyi bua tshilembi tshia nyunyu, neakusungile ku tshihuhu tshidi tshivuisha lufu. Neakubuikile ne masala andi, neusangane tshinyemenu muinshi mua mahuahua andi; bujalame buandi bua bushuwa budi ngabu wa ha tshiadi ne ngabu wa ku tshianza. Kuena utshina bualu budi bukuatshisha muntu buowa butuku, anyi mukete udi uhita lubilu mu munya; anyi tshihuhu tshidi tshiendakana mu midima, anyi dibutuka didi dibutula bantu munda munya. Bantu tshinunu badi mua kuhona ku luseke luebe, ne bantu binunu dikumi badi mua kuhona ku luseke lua tshianza tshiebe tshia balume; kadi bualu ebu kabuena bufika ha buihi nʼebe. Neumone difutu dia bantu babi anu ne mesu ebe, neutangile mudibo babafuta. Bualu bua wewe, Yehowa, udi tshinyemenu tshianyi, ne wakuvuisha Nzambi Mutambe Bunene wa mulu muaba webe wa kushikamamu, nunku bualu bubi kabuena bukukuata, kakuena tshihuhu tshiafika ha buihi ne nsubu webe wa ntenta. Bualu bua yeye neakufile mu bianza bia banjelo bandi kukulamabo mu nshila yebe yonso. Nebakuambule mu bianza biabo bua wewe kututshi dikasa diebe ku dibue. Neudiate ha nyama wa ntambue ne ha nyoka wa dikala, neutue muana wa nyama wa ntambue ne nyoka miseba. Bualu bua yeye udi ulamata kundi mu dinanga diandi, nemmuhandishe; nemmushikike mu muaba udi kulu, bualu bua yeye udi mumanye dina dianyi. Hambikileye, nengitabe kudiye; nengikale nʼandi habueleye mu dikenga, nemmuhandishe, nemmutumbishe. Nensankishe mutshima wandi ne dileha dia matuku andi, nemmuleshe luhandu luanyi. Bidi bimpe bua kusakidila Yehowa, ne bua kuimba misambu ya kutumbisha nʼai dina diebe, Nzambi Mutambe Bunene wa mulu. Bidi bimpe bua kuambila bantu bua luse luebe lujalame ne dinda, ne bua kubamanyisha dilolo bu mûdi wewe mua kueyemenyibua, hatudi tukuimbila misambu ne lunzenze ludi ne nshinga dikumi ne ku tshisanji mene; hatudi tuimba ne tshiona tshimpe tshia lunkombe. Bualu bua wewe, Yehowa, wakunsankisha bua bienzedi biebe; bua midimu ya ku bianza biebe nengimbe misambu ya disanka. Mona mudi bienzedi biebe binene, Yehowa! Meji ebe adi atamba bule! Muntu udi kayi ne meji kena mumanye bualu ebu, ne muntu mujibale kena ubujingulula: ne, Biadiunda bantu babi bu mudi mashinde atoloka, ne bikala benji ba malu mabi bonso ne diakalengele, budi bua bobo kujimishibua tshiendelele. Kadi wewe, Yehowa, udi mushikame mu muaba udi kulu kashidi. Bua mona, hadi nʼebe lukuna, Yehowa; bua mona, badi nʼebe lukuna nebajimine; benji ba malu mabi bonso nebamuangalashibue. Kadi wewe wakubandisha lusengu luanyi bu lua mbowa, wakungela manyi mahia-mahia ha mutu hanyi. Mesu anyi akumona mulau wakukuata badi hanyi lukuna; matshu anyi akunvua bua dibutuka dia bakumbunda nvita. Bantu bakane badi bakola bu dibue dia ngashi, badi baleha bu mutshi wa cèdre wa mu Lebanona. Badi bakunyibua mu nsubu wa Yehowa, badi bakola mu biendedi bia tshitendelelu tshia Nzambi wetu. Nebakuame mamuma tô ne mu bununu buabo, nebikale mitshi miule tente ne mai ne idi mibishi tshiendelele, bua kuleshabo bantu ne, Yehowa udi muakane. Yeye udi dibue dianyi dia mutunda, kakuena bualu bubi munda muandi. Yehowa udi ukokesha; udi muluate butumbi; Yehowa udi muluate bukole, wakudijingila nʼabu. E, buloba budi bujadikibue, kabuena bunyungishibua. Nkuasa webe wa butumbi udi mujadikibue katshia ku kale tô ne lelu; wewe udiku ku tshibangidilu tô ne kunshikidilu. Mai mûla akubandisha, Yehowa, mai mûla akubandisha dî diau; mai mûla adi abandisha tshiona tshia mavuala au. Yehowa mu muaba wandi wa kulu udi mukole, muhite biandi tshiona tshia kukungula kua mai mangi bukole, muhite mambuanka makole a mu mai manene. Bileshilu biebe bidi bia bushuwa, malu a tshijila adi akanangana ne nsubu webe, Yehowa, tô ne tshiendelele. Wewe Yehowa, Nzambi wa disombuela, wewe, Nzambi wa disombuela, utemene biebe! Udijule, wewe mulumbuluishi wa ba ha buloba; ufute bena dihetu difutu bu mudi bienzedi biabo. Yehowa, bantu babi nebenze nunku musangu bule munyi? Bantu babi nebatumbe musangu bule munyi? Badi bavudisha mei abo, badi bamba mei a diambu; benji ba malu mabi bonso badi baditumbisha. Badi batshibula bantu bebe bituha, Yehowa, badi bakengesha ba mu buhianyi buebe. Badi bashiha mukashi wa mu lufuila ne muenyi, badi bashiha bana ba nshiya. Badi bamba ne, Yehowa kena umona malu etu; Nzambi wa Yakoba kena ubala malu â. Elanganai meji a bualu ebu, nuenu badi bajibale munkatshi mua bantu! Nuenu bantu bahote, nenulue bena meji dituku kai? Yeye wakasa ditshu, kena unvua biandi, anyi? Yeye wakafuka disu, kena umona, anyi? Yeye udi uha bantu lungenyi, yeye udi uyisha ba mu bisamba bia bantu, kena mua kubabela ne mitutu, anyi? Yehowa udi mumanye meji adi muntu wela ne, Adi anu muhuya. Yehowa, disanka didi kudi muntu ûdi wewe ukengesha, ûdi wewe uyisha ne diyisha dia ku mikenji yebe bua kumuha biebe ditalala, bua yeye katatshi biandi mu matuku a dikenga, tô ne humbuilabo bantu babi dijimba. Bualu bua Yehowa kena wihata bantu bandi, kena ulekela ba mu buhianyi buandi. Bualu bua dilumbulula diakane nedihingane kudi badi bakane, ne bonso badi ne mitshima miakane nebadilonde. Wajuka bua bualu buanyi bua kutantamena bantu babi nganyi? wadimanyika bua bualu buanyi bua kutantamena benji ba malu mabi nganyi? Bu Yehowa kayi muikale mukuatshishi wanyi, muoyo wanyi wakuamba kufua. Hanakamba ne, Dikasa dianyi didi diselemuka, luse luebe lujalame, Yehowa, luakangimanyika. Mu divulangana dia matata munda muanyi, masamba ebe adi asankisha mutshima wanyi. Bakokeshi babi badi bahangidisha malu mabi adi alonda mikenji yabo, ba mu tshilumbuluidi tshia malu mabi badi mua kudisangisha nʼebe hamue, anyi? Badi belela mioyo ya bantu bakane tshifufu, badi bahisha badi kabayi ne bualu. Kadi Yehowa wakulua tshibumba tshianyi tshile, Nzambi wanyi udi dibue dianyi dia tshinyemenu. Yeye ueabahingashile malu mabi abo, neabajimishe bua malu mabi abo; Yehowa Nzambi wetu neabajimishe. Luai bienu, tuimbile Yehowa musambu; tuelele dibue dia luhandu luetu mbila ya disanka! Tuye ku mpala kuandi ne disakidila, tumusankidile ne dî dikole ne misambu ya disanka. Bualu bua Yehowa udi Nzambi munene, udi Mukelenge munene ha mutu ha nzambi yonso ya hatuhu. Mu tshianza tshiandi mudi mpongo ya ndondo; miaba ya ha mutu ha mikuna idi yandi kabidi. Mai manene ngandi, bualu bua yeye wakafuka; bianza biandi biakafuka buloba bûme kabidi. Luai bienu, tumutendelele ne tumukukuile; tutue binu bietu hanshi ku mpala kua Yehowa Mufuki wetu. Bualu bua yeye udi Nzambi wetu, tuetu tudi bu mikoko ya mu mpata wandi, ne mikoko idi tshianza tshiandi tshilombola. Ndi njinga bua nuenu nunvue dî diandi lelu eu! Kanukoleshi mitshima yenu bu munuakenza ku Meliba, bu munuakenza dituku adi ku Masa mu tshihela; hakanteta batatu benu, hakantetabo bua kumanya mudi bujalame buanyi, ne bakamona bienzedi bianyi. Bantu ba mu tshikondo atshi bakantondesha bidimu makumi anai, nunku nakamba ne, Badi bantu badi bahambuka mu mitshima yabo kabena bamanye nshila yanyi. Nunku nakaditshiha mu tshiji tshianyi ne, Kabena babuela mu dikisha dianyi. Nuimbile Yehowa musambu muhia-muhia; nuimbile Yehowa musambu, nuenu bonso ba ha buloba. Nuimbile Yehowa musambu, nuvudishile dina diandi disanka; nuambile bantu lumu lua luhandu luandi ku dituku ku dituku. Nuambile ba munkatshi mua bantu ba bende butumbi buandi, numanyishe ba munkatshi mua bantu bonso malu a kukemi akenzeye. Bualu bua Yehowa udi munene, budiye nʼabu mbua kutumbishibua bikole; budiye nʼabu mbua kunemeshibua ha mutu ha nzambi yonso ya hatuhu. Bualu bua nzambi yonso ya bantu ba bende idi bintu bia hatuhu; kadi Yehowa wakafuka bia mu diulu. Butumbi ne buneme bidi ku mpala kuandi; bukole ne bulengele bidi mu tshitendelelu tshiandi. Nuenu ba mu biota bia bantu, nuambike Yehowa malu andi, nuambike Yehowa butumbi ne bukole. Nuambike Yehowa butumbi budi buakanangane ne dina diandi. Luai ne mulambu kudiye, nubuele mu biendedi bia tshitendelelu tshiandi. Tendelelai bienu Yehowa baluate bivualu bia tshijila, Zakalai ku mpala kuandi, nuenu bonso ba ha buloba. Nuambe munkatshi mua bisamba bia bantu ne, Yehowa udi ukokesha e, buloba budi bujadikibue, kabuena mua kunyungishibua. Yeye nealumbuluishe bantu kayi ne kansungusungu. Diulu dikale ne disanka, buloba busanke kabidi. Mai nianene enze tshiona, ne bionso bidimu bibile. Budimi bua mu mpata busanke, ne bionso bidimu bisanke kabidi. Hashishe mitshi yonso ya muitu neyimbe misambu bua disanka dia ku mpala kua Yehowa, bualu bua yeye udi ulua, bua udi ulua bua kulumbuluisheye ba ha buloba. Nealumbuluishe ba ha buloba bu mudi buakane buandi, nealumbuluishe bukua bantu bu mudi lulamatu luandi lua bushuwa. Yehowa udi ukokesha; buloha busanke; maloba mavule a ku muelelu wa mai manene ikale ne disanka. Matutu ne mîdima bidi bimunyunguluka; buakane ne kulumbulula kuakane bidi bishimikidi bia nkuasa wandi wa butumbi. Kahia kadi kadianjila ku mpala kuandi, kudi kosha bena lukuna bandi, ka banyunguluka nseke yonso. Miele yandi ya nvula yakahenyeshila ba ha buloba; buloba buakatangila bualu ebu, buakazakala. Mikuna mile yakafingatuka bu dihula ku mpala kua Yehowa, ku mpala kua Mukelenge wa buloba bujima. Bia mu diulu bidi bimanyisha bantu buakane buandi, ba ha buloba bonso bakumona butumbi buandi. Bonso badi bakuatshila mpingu misonga mudimu bafuishibue bundu ku mesu, badi baditumbisha bua mpingu. Kukuilai bienu Yehowa, nuenu nzambi ya hatuhu. Siona wakunvua, wakadi ne disanka; bana ba bakashi ba Bena Yuda kabidi bakasanka, bualu bua dilumbulula diebe, Yehowa. Bualu bua wewe, Yehowa, udi mutambe bunene ha mutu ha buloba buonso; udi mutambe kutumbishibua ha mutu ha nzambi yonso ya hatuhu. Nuenu badi bunanga Yehowa, nuikale ne malu mabi lukuna. Yeye udi ulama mioyo ya bansanto bandi, udi ubahandisha mu bianza bia bantu babi. Munya utu watema bua bantu bakane mu buloba, disanka didi dikunyinamu bua badi bakane mu mitshima yabo. Nusanke bienu mu Yehowa, nuenu bantu bakane; numusakidile hanuavuluka tshijila tshiandi. Nuimbile Yehowa musambu muhia-muhia, bualu bua wakuenza malu manene a kukema. Tshianza tshiandi tshia balume ne diboko diandi dia tshijila biakumuhetela luhandu. Yehowa wakumanyisha bantu luhandu luandi, wakumuenesha kudibingisha kuandi ku mpala kua bisamba bia bantu. Wakuyuluka luse luandi lujalame ne lulamatu luandi lua bushuwa kudi ba mu tshisamba tshia Bena Isalele. Badi kunfudilu kua buloba bakumona luhandu lua Nzambi wetu. Nuelele Yehowa mbila ya disanka, nuenu bonso ba ha buloba; bandishai mei enu mu kuimba kua misambu bua disanka dienu; e, nuimbe misambu ya kumutumbisha nʼai. Nuimbile Yehowa misambu ya kumutumbisha nʼai ku lunkombe, nuimbe ku lunkombe ne tshiona tshia kuimba kuimpe. Nuele mbila ya disanka ku mpala kua Mukelenge, Yehowa mene, diatshimue ne kuela kua mpungi ne ku tshiona tshia dî dia lusengu. Mai manene enze tshiona ne bionso bidimu biele bibila, buloba bua bantu ne bonso badi bashikamemu biele mbila. Misulu ya mai itutakashe bianza; mikuna mihuekele imbe diatshimue bua disanka diai ku mpala kua Yehowa; bualu bua udi ulua kulumbuluisheye ba ha buloba. Nealumbuluishe ba ha buloba ne buakane, nealumbuluishe bantu ne kulumbulula kuakane. Yehowa udi ukokesha; bantu bazakale! Udi mushikame biandi mu nkuasa wa butumbi ha mutu ha bakeluba; buloba butenkakane! Yehowa udi munene mu Siona; udi mubandishibue kulu ba mutu ha bantu bonso. Batumbishe biabo dina diebe dinene didi dikuatshisha bantu buowa. Yeye udi wa tshijila! Bukole bua Mukelenge budi bunanga kulumbulula kuakane. Wewe wakajadika buakane mu kulumbulula; wakulumbulula ne kulumbulula kuakane, wakuenza bienzedi biakane munkatshi mua bana ba Yakoba. Tumbishai bienu Yehowa Nzambi wetu; numukukuile ku ditanda diandi dia muinshi mua makasa. Yeye udi wa tshijila! Mose ne Alona bakadi munkatshi mua bakuidi bandi, Samuele kabidi wakadi munkatshi mua badi babikila dina diandi, bakadila kudi Yehowa, yeye wakabitaba. Yeye wakabambila mei andi mu mulanjilanji wa mu ditutu. Bakatumikila bimanyishilu biandi ne mukenji wakabeleye. Yehowa Nzambi wetu, wewe wakitaba kudibo; wakadi Nzambi wakababuikidila mihi yabo, kadi wakadisombuela bualu bua bienzedi biabo bibi. Tumbishai bienu Yehowa Nzambi wetu, numutendelele ku mpala kua mukuna wandi wa tshijila; bualu bua Yehowa Nzambi wetu udi wa tshijila. Nuelele Yehowa mbila ya disanka, nuenu bonso ba ha buloba! Nukuatshile Yehowa mudimu ne disanka. Nuiye ku mpala kuandi ne kuimba kua misambu. Numanye bienu ne, Yehowa udi Nzambi! Nyeye mene wakatufuka, tudi bantu bandi; tudi bantu bandi ne mikoko ya mu mpata wandi. Buelai bienu mu bibuelelu biandi ne disakidila, buelai mu biendedi biandi ne misambu ya kumutumbisha nʼai. Numusakidile, nuvudishile dina diandi disanka. Bualu bua Yehowa udi muimpe; luse luandi lujalame ludiku tshiendelele, lulamatu luandi lua bushuwa ludiku tô ne ku bikondo bionso. Nengimbe bua luse luebe lujalame ne bua kulumbulula kuebe kuakane. Yehowa, nenkuimbile misambu ya kukutumbisha nʼai. Nendimuke bua kuyila mu nshila udi mululame tshishiki. Wewe neufike kundi dituku kai? Nengende mu nsubu muanyi ne mutshima udi muakane tshishiki. Tshiena nteka tshintu tshibi ku mesu kuanyi. Ndi nkina bienzedi bia badi basesuka mu nshila webe; kabiena bindamata. Mutshima udi ne tshishiku neumuke kundi, tshiena musue kumanya bualu bubi. Wasonkuela muena mutumba nʼandi mu busokoko, nemmubutule yeye. Wikala ne mesu adi ne dihetu ne mutshima udi ne kudisua, tshiena mmuitabusha. Mesu anyi neikale kudi badi mua kueyemenyibua mu buloba, bua kushikamabo nʼanyi muaba umue. Muntu udi wenda mu nshila udi mululame tshishiki neankuatshile biandi mudimu. Muntu udi wenza malu a kudinga kena ushikama mu nsubu muanyi; muntu udi wamba mei a mashimi kena ujadikibua ku mpala kuanyi. Ku dinda ku dinda nembutule bantu babi bonso ba mu buloba ebu, bua kumusha benji ba malu mabi bonso mu musoko wa Yehowa. Unvua kulomba kuanyi, Yehowa; muadi wanyi ufike kûdi. Kusokoki mesu ebe kundi mu dituku dia dikenga dianyi! Teleja matshu ebe kundi, witabe kundi lubilu dituku dindi nkubikila. Bualu bua matuku anyi adi ajimina bu muishi wa kahia, mifuba yanyi idi mishila bu tshishelele. Mutshima wanyi udi mutahibue bu mashinde, wakufubidila; bualu bua ndi mpua muoyo bua kudia bidia bianyi. Bua muadi mukole wa kutua kuanyi kua mikemu mifuba yanyi idi ilamata ku misunyi yanyi. Ndi bu mpunga tshikola wa mu tshihela, nakulua bu tshihungulu tshia mu miaba ya kubutuka. Ndi ndala tshitabala, nakulua bu mushamusha udi wikala ha nkayau ha musonga wa nsubu. Dinda tô ne dilolo badi nʼanyi lukuna badi bampenda, badi nʼanyi lukuna lutambe bukole badi batela dina dianyi helabo bantu milau. Bua nakudia butue bu mundi ndia bidia, nakusangisha binsonshi ne bia kunua bianyi, bualu hua njiya yebe ne tshiji tshiebe kundi. Bua wewe wakungambila, wakunguisha. Matuku anyi adi bu mundidimbi udi uleha hamba diba kubuela; nakufubidila bu mashinde. Kadi wewe Yehowa, udi mushikame mu nkuasa wa butumbi kashidi; nebakuvuluke tô ne ku bikondo bionso. Wewe neujuke, nenfuile musoko wa Siona luse; bua tshikondo tshiakufika tshia kuwanyisha; e, tshikondo tshiwakuamba tshiakufika. Bualu bua bantu bebe badi ne mabue au dinanga, badi bafuila luhuishi luau luse. Nunku ba mu bisamba bia bantu nebatshine dina dia Yehowa, bakelenge bonso ba ha buloba nebatshine butumbi buebe. Bualu bua Yehowa neibake Siona kabidi, neamueneke mu butumbi buandi. Neateleje matshu andi ku kulomba kua bakengi, kena ulengulula mulombu wabo. Bafundile ba mu tshikondo tshialua bualu ebu, bua bantu balueye kufuka batumbishe Yehowa. Bualu bua wakuntangila hanshi ku muaba wandi wa tshijila wa mulu. Mu diulu mudi Yehowa mumone buloba, bua kunvueye kutua kua mikemu kua bena lukanu, bua kusululeye bantu badi bamane kuhisha bua kufua, bua bantu bambile ba mu Siona dina dia Yehowa, babamanyishe butumbi buandi mu Yelushalema, badisangisha bantu hohamue, hadisangisha makelenge kabidi, bua kukuatshilabi Yehowa mudimu. Wakutekesha bukole buanyi mu nshila mundi nyilamu; wakukehesha matuku anyi. Ndi ngamba ne, Nzambi wanyi, kungumushi hankatshi ha matuku anyi, wewe muena bidimu bidi bileba tô ne ku bikondo bionso. Wewe wakajadika bishimikidi bia buloba kale kale, bia mu diulu bidi bienzedi bia bianza biebe. Bintu ebi nebijimine, kadi wewe udi ushala tshiendelele; e, buonso buabi nebikulukashe bu tshivualu. Wewe neubishintakashe bu mudibo bashintakasha tshitalu, nebikudimuke. Kadi wewe udi muomumue, ne bidimu biebe kabiena ne nshikidilu. Bana baledibue ba bantu bebe nebashikame mu buloba talalâ, ne tunkanunuma tuabo netujadikibue ku mpala kuebe. Mutshima wanyi, uvudishile Yehowa disanka; bionso bidi munda muanyi bivudishile dina diandi dia tshijila disanka! Mutshima wanyi, uvudishile Yehowa disanka; kuhu muoyo bua masanka onso akutuheye: Udi umbuikidila malu mabi ebe onso, udi ushikisha mabedi ebe onso; udi uhikula muoyo webe ku dibutuka, udi ukuteka luse lujalame ne dinanga ha mutu hebe; udi ukuatshisha ne bintu bimpe bidimu biebe bionso, nunku bukole bua bunsongalume buebe budi buhingane bu bua nyunyu wa mukanku. Yehowa udi wenza bienzedi biakane, udi ulumbulula biakane bua kukuatshisha bonso badi bakengeshibua. Wakalesha Mose nshila yandi, ne Bena Isalele bienzedi biandi. Yehowa udi ne luse ne dinanga, kena ukuata tshiji lubilu, ud mûle tente ne dinanga dijalame. Kena utandangana nʼetu tshiendelele, kena ushala ne tshiji tshiandi kashidi. Kena mutuenzele bu mudi mibi yetu, kena mutufute bu mudi malu etu a tshishiku. Bua bu mudi diulu kulu kule ha mutu ha buloba, mbu mudi bunene bua luse luandi lujalame kudi badi bamunemeka. Bu mudi luseke lua esete kule ku wesete, mbu mudiye mumushe matombokela etu kule kutudi. Bu mudi tatu ufuila bana bandi luse, mbu mudi Yehowa ufuila badi bamunemeka luse. Bua yeye udi mumanye buntu buetu, udi uvuluka ne tudi dinfuenkenya. Bua mundi matuku andi adi bu mashinde, udi utumpuka bu tshilongo tshia mu budimi. Bualu bua luhehele ludi luheha hamʼbidi hatshi, tshidi tshijimina, muaba watshi kawena mutshimanye kabidi. Kadi luse lujalame lua Yehowa ludi ku tshibangidilu tô ne kunshikidilu kudi badi bamunemeka. Buakane buandi budi kudi bana ba bana baledibue. Bidi kudi badi batumikila tshihungidi tshiandi, ne kudi badi bavuluka mikenji yandi bua kuyenza. Yehowa wakajadika nkuasa wandi wa butumbi mu diulu, buandi budi bukokesha ku mutu kua bantu bonso. Nuvudishile Yehowa disanka, nuenu banjelo bandi, badi bena bukitu mu bukole buabo, badi benza dî didiye wamba, badi batumikila dî dia mukenji wandi Nuvudishile Yehowa disanka, nuenu ba mu misumba yandi yonso, nuenu bakuatshi bandi ba mudimu badi benza mudiye musue. Nuvudishile Yehowa disanka, nuenu bifukibua biandi bionso, mu miaba yonso ya bukokeshi buandi. Mutshima wanyi, uvudishile Yehowa disanka! Mutshima wanyi, uvudishile Yehowa disanka! Wewe Yehowa, Nzambi wanyi, udi mutambe buneme! Udi muluate buneme ne butumbi, wewe udi uluata munya bu tshitalu; udi uvungulula bia mu diulu bu tshilulu tshikudika. Udi ujadika makunshi a nsubu wandi wa mulu mu mai, udi uvuisha matutu bu dikalu diandi, udi wendakana ha mahuahua a luhehele. Udi uvuisha mpehele bu ba-messager bandi, ne ndimi ya kahia bu bakuatshi bandi ba mudimu. Wakajadika buloba ha bishimikidi biabu, bua kabunyungi tô ne kashidi. Wakabiluatshisha ne mai a ndondo bu tshivualu, mai akûla ha mutu ha mikuna. Hawakabela mai, akanyema; hakunvuau tshiona tshia mukungulu webe, akumukaku lukasa, mikuna mile yakabanda kulu, bibanda biakahueka hanshi to ne ku muaba uwakubilongoluela. Wakasungula mai mukalu wakadiu kâyi mua kusambuka, bua kâhinganyi kabidi bua kubuikila buloba. Udi utuma mishimi idi ihatula mai mu mpongo, misulu idi ihueka munkatshi mua mikuna. Idi inuisha nyama yonso ya mu mpata mai, nyama ya mpunda ya mu tshisuku idi Imana nyota yai. Nyunyu ya mulu idi ne masua ai hehi nʼai, idi idila munkatshi mua matamba a mitshi. Udi utuma mai ha mikuna mafume ku nsubu wandi wa mulu. Buloba budi bûle tente ne mamuma a ku mudimu webe. Udi umeneshila bimuna mashinde, udi umeneshila bantu midioko bua kuyidiundishabo. Mbua bamanye mua kuhatula bia kudia mu buloba, ne nyinyo idi isankisha mutshima wa muntu, ne manyi adi akenkesha mpala wandi, ne bidia bidi bikolesha mutshima wandi. Mitshi ya Yehowa idi miule tente ne tshitelele, mmitshi ya cêdre ya mu Lebanona yakatentuleye. Nyunyu idi yibakamu masua ai, kasongo nyunyu kadi ne nsubu waku mu mitshi ya cyprès. Mikuna mile idi bua mbushi ya tshisuku; mabue adi tshinyemenu tshia nyama ya nsenji. Wakufika biandi ngondo bua kutahulula ngandi bidimu; diba didi dimanye tshikondo tshia kubueladi. Udi uvuisha biebe mîdima, butuku budi biula, halua nyama yonso ya muitu kuhatuka bua kubombelelai. Bana ba nyama ya ntambue badi badila tshintu tshia kukuatabo, badi bakeba bia kudia biabo kudi Nzambi. Diba didi dibanda, badi bumuka bua kuyabo, badi balala mu mena ai. Bantu badi baluhuka bua kuya ku midimu yabo ne bua kuyenza, tô ne habuela diba. Yehowa, mona mudi bungi bua mishindu ya midimu yebe! Wewe wakenza buonso buai ne lungenyi luebe; buloba budi bûle tente ne bintu biwakafuka. Kuakua kudi mai manene, adi manene ne adi ne butshiama bunene, mudi bintu bidi kabiyi mua kubadibua biendakanamu, nnyama mikese ne nyama minene kabidi. Aha hadi hahita matu manene, ne nyama munene udimu uwakafuka bua kunayamu. Bintu ebi bionso bidi bikutekemena, bua wewe kubiha bia kudia biabi mu tshikondo tshiabi. Wewe udi ubihabi, bidi bibisangisha; udi ubulula tshianza tshiebe, bidi biukuta ne bintu bimpe. Udi usokoka mpala webe, bidi bitshina; udi ubiumushila muhuya wabi, bidi bifua ne bidi bihingana ku dinfuenkenya diabi kabidi. Udi utumaku Nyuma webe, bidi bifukibua; udi wandamuna mpala wa buloba tshiakabidi bulue buhia-buhia. Butumbi bua Yehowa buikaleku tshiendelele; Yehowa asanke mu bienzedi biandi. Udi umona buloba, budi buzakala; udi ulenga mikuna tshianza, idi ihatula muishi wa kadilu. Nengimbile Yehowa misambu hantshidi ne muoyo; nengimbile Nzambi wanyi misambu ya kumutumbisha nʼai hantshidiku. Meji andi ngela bua bualu buandi amusankishe, bua meme ndi nsanka mu Yehowa. Benji ba malu mabi bajimine, bumushibue mu buloba, bantu babi kabikadiku kabidi! Mutshima wanyi, uvudishile Yehowa disanka! Tumbishai Yehowa! Nusakidile bienu Yehowa, nubikile dina diandi, numanyishe bienzedi biandi munkatshi mua bukua bantu. Numuimbile misambu, numuimbile misambu ya kumutumbisha nʼai, nuyikilangane bua malu andi onso a kukema. Nutumbile mu dina diandi dia tshijila; mitshima ya badi bakeba Yehowa isanke. Kebai bienu Yehowa ne bukole buandi, kebai mpala wandi matuku onso. Nuvuluke bienu bienzedi bia kukema biakenzeye, malu andi a kukema ne dilumbulula dia mukana muandi, nuenu tunkanuniuna tua Abalahama muntu wandi, nuenu bana ba Yakoba, bantu bakasunguleye. Yeye udi Yehowa Nzambi wetu; dilumbulula diandi diakenjibua mu buloba buonso. Udi uvuluka tshihungidi tshiandi kashidi, ndi mene diakajadikeye tô ne ku bikondo tshinunu, tshihungidi tshiakahungeye ne Abalahama, mmutshihu wandi wakaditshiheye kudi Isaka. Wakajadika kudi Yakoba bu mukenji ne kudi Isalele bu tshihungidi tshia tshiendelele. Wakamba ne, Nenkuhe buloba bua Kanâna, bua kuikalabu tshituha tshia nuenu kuhiana. Hakadibo bantu banya-banya bua bungi buabo, e, hakadibo bantu banya-banya be, ne hakashikamabo mu buloba bu benyi; hakendakanabo ku tshisamba ne ku tshisamba, ne ku bukelenge bumue tô ne ku bantu bakuabo ba bende. Yeye kakitabusha bua muntu umue kubenzela bibi. E, wakabela bakelenge bualu buabo. Wakamba ne, Kanulengi bantu banyi bedibue manyi ha mutu tshianza, kanuenzedi baprofete banyi bibi. Wakabikila tshiole bua kuluatshi ha buloba abu; wakumusha tshintu tshionso tshiakeyemenabo bua kuheta bia kudia. Wakatuma muntu bua kudianjileye ku mpala kuabo, Yosefe mene wakahanyibua bu muhika. Bakasamisha makasa andi ne nkanu yakasuikabo nʼai, bakamuela lukanu lua tshiamu tshifike; dî dia Yehowa diakamuteta tô ne hakafika tshikondo tshia malu akambeye. Mukelenge wakatuma dî bua kumusulula, mukokeshi wa bantu mene wakamulekesha. Wakamuyisha mukelenge ku mutu kua nsubu wandi, ne mukokeshi wa bintu biandi bionso. Bua kulesheye baminyampala bu muakadiye musue, ne bua kuyisheye bakulu bandi meji. Isalele kabidi wakabuela mu Ejipitu; Yakoba wakashikama mu buloba bua Hama. Yehowa wakavudisha bantu bandi bua kukumbanabo ba bungi, wakabavuisha bantu bahite bena lukuna babo bukole. Wakakudimuna mitshima ya bantu aba bua kuikalabo ne bantu bandi lukuna, bua kuenzela bakuatshi bandi ba mudimu malu a budimu. Wakatumaku Mose muntu wandi, ne Alona wakasunguleye. Bobo bakabalesha bimanyinu biandi munkatshi muabo, bakenza malu a kukema mu buloba bua Hama. Wakatuma mîdima, wakayosha mufitu mu buloba; ne bakatombokela mei andi. Wakakudimuna mai a misulu yabo bua kuluau mashi, wakashiha minyinyi yabo ya mu mai. Buloba buabo huakûla tente ne biula, bibuele mu nsubu ya bakelenge babo mene. Wakamba dî diandi, njiji yakalua mu bisumbu bia bungi, ne nkusu yakamueneka mu nseke yonso ya buloba buabo. Wakabaha mabue a nvula akabalokela bu nvula, ne miele ya nvula yakahenya mu buloba buabo. Wakashiha mionshi yabo ya nyinyo kabidi, ne mitshi yabo ya nngi, wakatshibula mitshi yakadi mu buloba buabo. Wakela dî diandi, mikumbi yakalua, bana ba mikumbi bakadi kabayi mua kubadibua bakahia. Yakadia midioko yonso ya mu buloba buabo, yakadia bia kudia biakadi buloba buabo budiundisha. Wakashihesha banʼa bute bonso ba mu buloba buabo, bana aba mene bakadianjilabo kulela mu buloba buabo. Ka yeye wakaluhula Bena Isalele batuala biabo biamu bia argent ne or; kakuakadi muntu umue munkatshi mua bisamba biabo wakalenduka. Ba mu Ejipitu bakadi ne disanka hakaya bantu aba; bualu bua buowa buakamana kubakuata bualu buabo. Yeye wakababaluluila ditutu bu tshibuikidi, ne kahia ka kubatemena butuku. Bakamulomba ne yeye wakabaha nkuadi, wakabukutshisha ne bidia bia mu diulu. Yeye wakahanda dibue, mai akahumukamu; akahueka mu miaba miume bu musulu. Bualu bua wakavuluka biandi dî diandi dia tshijila, ne Abalahama muntu wandi. Wakaluhula bantu bandi ne disanka, bantu bakasunguleye mene bimba biabo misambu. Wakabaha maloba a bisamba bia bantu ba bende; bakadiangatshila bintu biakaheta bantu ba bende ku mudimu wabo mukole. Bua kulondabo mei akabambileye; ne bua kutumikilabo mikenji yandi. Tumbishai Yehowa! Tumbishai Yehowa! Nusakidile Yehowa, bualu bua yeye udi muimpe; bua luse luandi ludi lujalame tshiendelele. Udi mua kuambila bantu bua bienzedi binene bia Yehowa nganyi? Anyi udi mua kubalesha butumbi buandi buonso nganyi? Disanka didi kudi badi balonda kulumbulula kuakane, ne badi benza malu makane misangu yonso. Yehowa, unvuluke hawalesha bantu bebe luse, ulue kunkuatshisha ne luhandu lûdi ubaha, bua utangile bianyi diakalengele dia bantu bawakusungula, bua nsanke bianyi mu disanka dia tshisamba tshiebe, bua ntumbe bianyi diatshimue ne ba mu buhianyi buebe. Tuakuenza bibi bu muakenza batatu betu; tuakuenza malu a tshishiku, tuakuenza malu mabi. Batatu betu bakadi mu Ejipitu kabakalama malu ebe a kukema mu mitshima yabo. Kabakavuluka divulangana dia luse luebe lujalame, kadi bakatombokela Nzambi Mutambe Bunene wa mu diulu ku Mai Manene Makunze. Kadi yeye wakabasungila bualu bua dina diandi, bua kumanyisheye bantu bua bukole buandi bunene. Wakabela Mai Manene Makunze kabidi ne akakama; nunku wakabalombola bua kubahitshisha mu mai a ndondo bu muakadibo mua kuhita ha buloba bûme. Ka wakabasungila mu bianza bia wakabakina, wakababikila mu bukole bua bakadi nʼabo lukuna, Mai akubuikila bakengeshi babo, kakuakadi umue wabo wakashala. Hashishe, bakitabusha mei andi, bakimba misambu ya kumutumbisha nʼai. Bakahua bienzedi biandi muoyo lukasa; kabakindila dî diandi. Kadi bakasamina muoyo ne lukuka lukole mu tshihela; bakatela Nzambi mu tshihela tshia lusenga. Yeye wakabaha tshintu tshiakalombabo, kadi wakatuma tshinyanu mu mitshima yabo. Bakadi ne Mose mukau kabidi mu tshitudilu; bakadi ne Alona, muntu wa tshijila wa Yehowa, mukau muomumue. Buloba buakabulula mukana muabu, buakamina Datana, buakabuikila ba mu tshisumbu tshia Abilama. Kahia kakatema munkatshi mua tshisumbu tshiabo; ludimi lua kahia luakosha bantu babi. Bakenza kana ka ngombe ku Holeba, bakatendelela luhingu luakatulabo. Bakashintakasha wabo wa butumbi ku tshifuanyikishi tshia ngombe utu wadia mashinde. Bakahua Nzambi Musungidi wabo muoyo, wakabenzela malu manene mu Ejipitu, wakabenzela bienzedi bia kukema mu boloba bua Hama ne malu akamatshisha bantu buowa ku Mai Manene Makunze. Nunku yeye wakamba ne, Nembabutule; bualu buakadiye kuenza, kadi Mose, muntu wandi musungula, wakimana hankatshi habo ne Nzambi bua kukudimuneye tshiji tshiandi bua kababutudi. Hashishe, bakahetula buloba abu buimpe, kabakitabusha dî dia mulayi wandi. Kadi bakatontolola mu nsubu yabo ya ntenta, kabakunvua dî dia Yehowa. Nunku yeye wakabisha tshianza tshiandi bua kuditshiha bua bualu buabo ne, Nembahoneshe mu tshihela, nentangadishe tunkanunuma tuabo munkatshi mua bisamba bia bantu ba bende, nentumuangalashe mu maloba au. Bakadilamika kudi Bâla-Peô; bakadia milambu mifila kudi bafue. Nunku bakakuatshisha Yehowa tshiji bua bienzedi biabo, ne tshihuhu tshiakamueneka munkatshi muabo. Hashishe, Pinehasa wakajuka, wakashikisha tshilumbu, nunku tshihuhu tshiakalekeshibua. Bualu ebu buakabadibua kudiye bu buakane ku tshikondo ku tshikondo tô ne tshiendelele. Bakakuatshisha Yehowa tshiji kabidi ku mai a Meliba, ne muanda eu wakakebela Mose dikenga bua bualu buabo. Bualu bua bakanyingalasha mutshima wandi, ne wakamba biandi mei akadi kâyi ne meji ku mishiku yandi. Kabakabutula bena buloba abu bu muakabambila Yehowa, kadi bakabuelakana ne ba mu bisamba abi bia bantu, bakayila mua kuenza bu muakadibo benza. Bakakuatshila mpingu yabo mudimu, yakalua buteyi kudibo. Bulelela, bakashihela bademon bana babo baledibue, balume ne bakashi, bu milambu. Bakatatshisha mashi a bantu bakadi kabayi ne tshilumbu hanshi, akadi mashi a bana babo baledibue, balume ne bakashi, bakashihelabo mpingu ya mu Kanâna bu milambu. Buloba buakanyanguka ne mashi. Nunku bakadibihisha ku bienzedi biakenzabo, bakalonda malu a masandi mu bienzedi biabo. Bua malu â tshiji tshia Yehowa tshiakatemena bantu bandi bua kuba kengesha, yeye wakakenuka ba mu buhianyi buandi. Wakabafila mu bianza bia bisamba bia bantu ba bende; bantu bakadi nʼabo lukuna bakabakokesha. Bena lukuna babo kabidi bakabakengesha, ne bakinamishibua muinshi mua bukole buabo. Yeye wakabahandisha misangu ya bungi, kadi bakamutombokela ne malu akahangidishabo, ne bakahuekeshibua hanshi bualu bua malu abo a tshishiku. Kadi yeye wakamona dikenga diabo hakunvueye muadi wabo. Wakavuluka tshihungidi tshiandi bua bualu buabo, wakakudimuna mutshima wandi bu mudi divulangana dia luse luandi lujalame. Yeye wakabayuisha bantu ba kufuidibua luse kudi bonso bakadi babakuata mu buhika. Utusungile, wewe Yehowa Nzambi wetu, utûmushe munkatshi mua bisamba bia ba bende bua kutusangisha hamue, bua tuetu tusakidile dina diebe dia tshijila, ne bua tutumbile mu butumbi buebe. Yehowa, Nzambi wa Isalele, avudishibue disanka, ku tshibangidilu tô ne kunshikidilu! Bantu bonso bambe biabo ne, Amen! Tumbishai Yehowa! Sakidilai bienu Yehowa, bualu bua yeye udi muimpe; bua luse luandi ludi lujalame tshiendelele. Bantu badi Yehowa muhikule bambe biabo nunku, bobo mene badiye muhikule mu bianza bia muena lukuna, hakumusheye mu maloba onso bua kubasangisha hamue, a ku luseke lua esete ne ku wesete, a ku luseke lua nôde ne ku sude. Bakendakana mu tshihela, mu tshihela tshia lusenga muakadi kamuyi nshila; kabakasangana musoko bua kushikamamu. Bakadi ne nzala ne nyota, mitshima yabo yakahanga munda muabo. Nunku bakadila kudi Yehowa mu ntatu yabo, ne yeye wakabahandisha mu makenga abo. Yeye wakabalombola mu nshila mululame, bua bamanye mua kufika mu musoko wa kushikamabo. Basakidile biabo Yehowa bua luse luandi lujalame ne bua bienzedi biandi bia kukema bidiye wenzela bana ba bantu! Bualu bua yeye udi uha muntu tshidiye ujinga, ne udi ukutshisha muena nzala ne bintu bimpe. Banga bantu aba bakashikama mu mîdima ne mu mufitu muhite bukole, bakadi basuikibua mu makenga ne mu nkanu ya tshiamu tshifike, bualu bua bakatombokela mei a Nzambi, bakalengulula lungenyi luakadi Mutambe Bunene wa mu diulu mubaleshe. Bua malu â yeye wakahuekesha mitshima yabo ne mudimu mukole; bakadishinda hanshi, kakuakadi wa kubakuatshisha. Nunku bakadila kudi Yehowa mu ntatu yabo, ne yeye wakabahandisha mu makenga abo. Wakabaluhula mu midima ne mu mufitu mukole, wakatshibula nkanu yabo bituha. Basakidile Yehowa bua luse luandi lujalame ne bua bienzedi biandi bia kukema bidiye wenzela bana ba bantu! Bualu bua wakutshibula bibi bia tshiamu tshia mitaku, wakukosa milonda ya tshiamu tshifike yakabikuata. Bantu bahote badi badivuishila dikenga bua diya diabo mu nshila wa ditombokela diabo, ne bua malu abo a tshishiku. Mitshima yabo idi ikenuka mishindu ya bia kudia yonso; badi basemena ha buihi ne bibi bia ku lufu. Nunku bakadila kudi Yehowa mu ntatu yabo, ne yeye wakabahandisha mu makenga abo. Wakabatumina dî diandi, wakashikisha masama abo, wakabahandisha mu dibutuka diabo. Basakidile Yehowa bua luse luandi lujalame ne bua bienzedi biandi bia kukema bidiye wenzela bana ba bantu! Bafile milambu kudiye ya kumusakidila nʼai, bambile bantu bienzedi biandi ne misambu ya disanka! Bakahueka ku mai manene mu matu, bendulula mushinga ha mai manene, bakamona biabo bienzedi bia Yehowa, ne malu andi a kukema mu mai a ndondo. Bualu bua wakela mukenji, wakahehesha tshihehele tshiakadi bu tshihuhu, tshiakabandisha mavuala a mu mai manene. Bakabanda mulu, bakahueka kabidi muinshi mu mai a ndondo, mitshima yabo yakandamuka bu mai bualu bua lutatu. Bakatenkakana eku ne eku, bakadi balendukalenduka bu muntu mukuatshike maluvu, meji abo onso akabuelakana. Nunku bakadila kudi Yehowa mu ntatu yabo, ne yeye wakabahandisha mu makenga abo. Wakaholesha tshihuhu bua tshituye biatshi, mavuala a mai manene akabatama. Ka bobo bakasanka bualu bua mavuala au akabatama, ne yeye wakabafikisha mu dilobo diakasuabo kufikamu. Basakidile biabo Yehowa bua luse luandi lujalame ne bua bienzedi biandi bia kukema bidiye wenzela bana ba bantu! Bamunemeshe mu disangisha dia bantu, bamutumbishe mu tshishikaminu tshia bakulu. Udi ukudimuna misulu bua kuluayi tshihela tshia lusenga, ne mishimi ya mai bua kuluayi buloba budi kabuyi ne mai. Udi ukudimuna buloba bufuke bua kuluabu tshihela tshia luehu, bua malu mabi a bantu badi bashikamemu. Udi ukudimuna tshihela tshia lusenga bua kuluatshi dishiba dia mai, ne buloba bûme bua kuluabu mishimi ya mai. Mu miaba yaya udi ushikamisha badi ne nzala, bua baseku musoko wa kushikamamu. Badi bakuna maminu mu madimi, badi batentula mionshi ya tumuma mu manga madimi, badi bahuola mamuma mavulangane. Udi ubavudishila disanka, badi bavulangana ba bungi; kena witabusha bua bungi bua bimuna biabo bukehe. Hadi bungi buabo bukeheshibua, ne hadibo bahuekeshibua hanshi bua dikengeshibua diabo ne ntatu ne kanyinganyinga, yeye udi uhongolola kulengulula kuandi ha baminyampala, udi ubendakasha mu muaba wa hatuhu mudi kamuyi nshila. Kadi udi ushikika bahele mu muaba wa mulu bumushibue biabo mu dikenga, udi ukumbasha bena meku babo bu tshisumbu tshia mikoko. Bantu bakane badi batangila bualu ebu, badi basanka; benji ba malu mabi badi bahuwa biabo. Udi ne meji adimuke biandi bua malu â; bantu belangane meji a luse lujalame lua Yehowa. Nzambi, mutshima wanyi udi mushindike; nengimbe misambu; bulelela, nengimbe misambu ya kukutumbisha nʼai, kukuimbila mbutumbi buanyi. Tabalai, nuenu lunzenze ne lunkombe! Meme hanyi nentabashe kabundubundu! Nenkusakidile wewe, Yehowa, munkatshi mua bantu; nenkuimbile misambu ya kukutumbisha nʼai munkatshi mua bisamba bia bantu. Bualu bua luse luebe lujalame ludi lunene, lufika tô ne ha mutu ha diulu; lulamatu luebe lua bushuwa ludi lufika ku matutu. Nzambi, wikale mubandishibue ne butumbi ha mutu ha diulu! Butumbi buebe buikale ha buloba buonso! Bua bantu bebe baudi munange bahandishibue, ubasungile ne tshianza tshiebe tshia bukole, ungitabe. Nzambi wakuamba dî mu kudijidila kuandi ne, Nentumbe bianyi, nentahulule buloba bua Shekeme, nengabanye tshibanda tshia Sukota. Gilada nguanyi; Manashe nguanyi kabidi; Efelayima udi tshifulu tshia tshiamu ku mutu wanyi; Yuda udi dikombo dianyi dia bukelenge. Moaba udi dilonga dianyi dia kuowelamu; nengele Edome tshisabata tshianyi; nengele mbila bua nakutamba Peleshete. Wanfikisha mu musoko mukolesha ne ngumbu nganyi? Wandombola tô ne ku Edome nganyi? Wewe Nzambi, kuakutubenga, anyi? Nzambi, kuena uluhuka bua kufila misumba ya masalayi etu. Utuheshe dikuatshisha diebe mu nvita yetu ne bena lukuna, bua dikuatshisha dia bantu didi hatuhu. Bituikala ne dikuatshisha dia Nzambi, netuenze bienzedi bia bukitu; bualu bua nyeye udi udiata badi nʼetu lukuna muinshi mua makasa andi. Nzambi undi ntumbisha kuhuwu biebe talalâ! Bualu bua mukana mua muntu mubi ne mua mashimi mudi mubulula bua kumbanda. Bakunsonguela ne ndimi idi yamba mashimi. Bakanyunguluka ne mei a lukuna kabidi, bakumbunda tshiyi ne bualu. Nansha meme mubanange, badi bambanda hatuhu; kadi ndi mbalombela Nzambi. Bakumpingashila malu mabi ku malu mimpe kabidi, ne lukuna bu difutu bua dinanga dianyi. Sungula biebe muntu mubi bua kuikaleye ku mutu kuandi; mumubandi wandi imane ku tshianza tshiandi tshia balume. Hamulumbuluishabo, aluhuke mu tshilumbuluidi mumane kuhila, mulombu wandi ubadibue kudiye bu bubi. Matuku andi ikale manya-manya; munga muntu angate butangidi buandi Bana bandi bikale bana ba nshiya, mukashi wandi ikale mukashi wa mu lufuila. Bana bandi bikale bena tshiendenda, balombe biabo bintu. Badikebele bia kudia biabo kule ku miaba mibutuke idibo bashikame. Musombeshanganyi angate bintu bionso bidiye nʼabi ku mateyi andi. Benyi bahaule bionso biakuheteye ku mudimu wandi. Muntu kamufuidi luse; muntu kafuidi bana bandi ba nshiya luse. Tunkanunuma tuandi tujimishibue; dina diandi dijimine mu tshikondo tshidi tshilonda. Malu a tshishiku a batatu bandi avulukibue ku mpala kua Yehowa kababuikidi bubi bua mamuʼandi. Malu â ikale ku mpala kua Yehowa misangu yonso, bua yeye umushe divuluka dia bantu aba ha buloba. Bualu bua muntu au kakavuluka bua kulesha bantu luse, kadi wakakengesha muena dikenga ne muntu muhele, wakakengesha muena mutshima munyingalala, bua kubashiha. Wakananga kuela kua mulau kabidi; mulau umukuate yeye! kakasua kuvudishila muntu disanka; disanka dikale kule kudiye! Wakadiluatshisha kuela kua mulau bu muakadiye uluata tshivualu; mulau ubuele biau tô ne munda muandi bu mai, ubuele biau bu manyi mu mifuba yandi. Wikale biau kudiye bu tshmialu tshidiye udiluatshisha nʼatshi, bu mukaba udiye udijingila nʼau matuku onso. Edi nedikale difutu difume kudi Yehowa bua kufuta badi bambanda, dia bantu badi bambilangana malu mabi a kuenzela muoyo wanyi. Kadi wewe hebe, Yehowa Mukelenge wanyi, ungenzele meme hanyi bimpe bua dina diebe; bua luse luebe lujalame ludi luimpe, umpandishe bianyi. Bualu bua ndi muena dikenga ne ndi muhele, ne mutshima wanyi udi mutahika ka mputa munda muanyi. Nyaya bu mundidimbi haleheshibuau, badi bangumusha bu mudibo batutula mukumbi hamʼbidi. Binu bianyi bidi bitekete bualu bua kujila kuanyi kua bidia; mubidi wanyi wakunyana. Nakulua tshintu tshidibo badiula; hantangilabo, badi bakuha mitu yabo. Unkuatshishe, Yehowa Nzambi wanyi; unsungile bua luse luebe lujalame. Bamanye biabo ne, Etshi tshianza tshiebe; ne wewe muine, Yehowa, wakuenza bualu ebu. Nansha bobo bangele mulau, kadi wewe unvudishile disanka. Badi bajuka bua kufuilangana nʼanyi bafuishibue bundu, kadi muntu webe asanke biandi. Badi bambanda bavuale dinyanguka dia lumu luabo, badibuikile ne bundu bu mudi mu ntu mudibuikile tshikowelu: Nensakidile Yehowa bikole ne mei a mukana muanji, nemmutumbishe munkatshi mua bantu ba bungi. Bualu bua yeye udi wimana ku tshianza tshia balume tshia muhele, bua kumusungila mu bianza bia badi bakeba kumuhisha. Yehowa udi wambila mukelenge wanyi ne, Ushikame biebe ku tshianza tshianyi tshia balume tô ne hanavuisha badi nʼebe lukuna ditanda dia muinshi mua makasa ebe. Yehowa neolole bukokeshi buebe bu dikombo kule bubangile mu Siona. Ukokeshe biebe munkatshi mua badi nʼebe lukuna. Bantu bebe badi badifila kûdi ne disanka mu dituku diudi ukungisha misumba ya masalayi ebe. Bansongalume bebe badi balua kûdi bu mume, baluate biabo bilenga bia tshijila, bahatuke munda mua lunkelu. Yehowa wakuditshiha, kena ukudimuna mutshima wandi ne, Wewe udi muakuidi tshiendelele wa ku mulongo wa Melekisedeke. Mukelenge udi ku tshianza tshiebe tshia balume, neatekeshe bakelenge halua dituku dia tshiji tshiandi. Nealumbuluishe ba mu bisamba bia bantu, neûshe maloba abo tente ne bitalu. Neatekeshe badi ku mutu kua buloba butantakane. Neanue mai ku kasulu kadi mu nshila, nunku neabishe mutu wandi. Tumbishai Yehowa! Nensakidile Yehowa ne mutshima wanyi mujime, mu tshihangu tshia bantu bakane ne mu disangisha diabo. Midimu ya Yehowa idi minene, idi mikononona kudi bonso badi basanka bualu buai. Mudimu udiye wenza udi ne buneme ne butumbi; buakane buandi budiku tô ne kashidi. Wakayuluisha bantu bua midimu yandi ya kukema. Yehowa udi ne dinanga, udi ufuila bantu luse. Wakuha badi bamunemeka bia kudia, utu wavuluka tshihungidi tshiandi tshiendelele. Wakalesha bantu bandi bukole buandi mu kuenza kua midimu yandi, hakabaheye buhianyi bua bisamba bia bantu. Bienzedi bia bianza biandi bidi bilesha bushuwa buandi ne kulumbulula kuandi kuakane, mei onso adiye wambila bantu adi mua kueyemenyibua. Adi majadikibue tô ne tshiendelele, akenjibua mu lulamatu lua bushuwa ne mu buakane. Wakatumina bantu bandi luhandu, wakabajadikila tshihungidi tshiandi bua tshikaleku tshiendelele. Dina diandi ndia tshijila ne didi divuishisha bantu dikema. Ditshina dia Yehowa didi tshibangidilu tshia meji; badi batumikila mikenji yandi badi ne dijingulula dia malu. Butumbi buandi budiku tshiendelele. Tumbishai Yehowa! Disanka didi kudi muntu udi unemeka Yehowa, udi usanka bikole bua mikenji yandi! Tunkanunuina tuandi netuikale ne bukitu bua bungi ha buloba; mulongo wa bantu bakane newikale ne disanka. Luhetu ne bubanji bidi mu nsubu muandi; buakane buandi budiku tô ne tshiendelele. Munya udi umueneka mu midima bua kutemena bantu bakane; Yehowa udi ne dinanga, udi ufuila bantu luse ne udi muakane. Muntu udi ulesha bantu luse ne udi ubasombesha bintu udi ne disanka, udi ulonda malu andi anu ha muanda. Bualu bua kabena bamunyungisha tshiendelele, nebavuluke muntu muakane kashidi. Kena utshina ngumu mibi; mutshima wandi udi mushindame, udi weyemena Yehowa. Mutshima wandi udi mukole, kena utshina, tô ne hamoneye bualu budiye musue bukuate bena lukuna bandi. Yeye wakuabanya bintu, wakuhesha bahele bintu; buakane buandi budiku tô ne tshiendelele; lusengu luandi nelubandishibue mu butumbi. Muntu mubi neatangile muanda eu, neakuatshike kanyinganyinga; neasumakane menu, neajimine. Disua dia bantu babi nedijimine. Tumbishai Yehowa! Nuenu bantu ba Yehowa, mutumbishai bienu, tumbishai dina dia Yehowa! Dina dia Yehowa divudishibue disanka ku dituku edi tô ne tshiendelele. Ku dihatuka dia diba tô ne ku dibuela diadi dina dia Yehowa didi ne bualu bua kutumbishibua. Yehowa udi mulu ku mutu kua bisamba bionso bia bantu, butumbi buandi budi ku mutu kua bidi mu diulu. Udi bu Yehowa wetu nganyi, udi ne nkuasa wandi mulu, udi winangila hanshi bua kumona diulu ne buloba? Udi ubisha muhele mu dinfuenkenya, udi ujula mukengi udi mushikame mu diala, bua kumushikamisha munkatshi mua baminyampala, munkatshi mua bantu bandi baneme. Udi ushikamisha mukashi udi nkumba mu nsubu, umuvuisha muledi wa bana udi ne disanka. Tumbishai Yehowa! Hakaluhuka Bena Isalele mu Ejipitu, hakaluhuka ba mu tshiota tshia Yakoba munkatshi mua bakadi bakula muaku wa bende, Yuda wakalua nsubu wandi wa tshijila, Bena Isalele bakalua bukokeshi buandi. Mai manene akamona muanda eu, akanyema, musulu wa Yadene wakahingana tshianyima. Mikuna mile yakatuhika bu bimpanga, mikuna mihuekele yakatuhika bu bana ba mikoko. Budi bukukuata ntshinyi, wewe mai manene, bua udi unyema? Ne wewe, Yadene, bua udi uhingana tshianyima? Budi bunukuata ntshinyi, nuenu mikuna mile, bua nudi nutuhika bu bimpanga? Ne nuenu, mikuna mihuekele, bua nudi nutuhika bu bana ba mikoko? Zakala, wewe buloba, ku mesu kua Mukelenge, ku mesu kua Nzambi wa Yakoba, wakakudimuna dibue bua kuluadi kashiba ka mai, wakakudimuna dibue dia mutemu bua kuluadi mushimi wa mai. Kututumbishi tuetu, Yehowa, kututumbishi tuetu, kadi utumbishe dina diebe, bualu bua luse luebe lujalame ne bua udi mua kueyemenyibua. Munyi mudibo bakonka kudi bisamba bia bantu ne, Ahu, Nzambi wabo udi hanyi? Kadi Nzambi wetu udi mu diulu, yeye utu wenza malu onso adiye musue. Mpingu yabo idi ya tshiamu tshia argent ne tshia or, bintu bienza kudi bianza bia bantu. Idi ne mukana, kadi kayena yakula; idi ne mesu, kadi kayena imona. Idi ne matshu, kadi kayena yunvua; idi ne mûlu, kadi kayena inunkila. Idi ne bianza, kadi kayena ilenga tshintu; idi ne makasa, kadi kayena yenda. Kayena yamba dî mu miminu yai. Bayenji badi bafuanangana nʼai, bulelela, bonso badi bayeyemena badi nunku. Nuenu, Bena Isalele, nueyemene bienu Yehowa! Yeye udi dikuatshisha diabo ne ngabu wabo. Nuenu, ba mu nsubu wa Alona, nueyemene Yehowa! Yeye udi dikuatshisha diabo ne ngabu wabo. Nuenu badi banemeka Yehowa, nueyemene Yehowa! Yeye udi dikuatshisha diabo ne ngabu wabo. Yehowa wakutuvuluka; yeye neatuvudishile disanka. Yeye neavudishile Bena Isalele disanka; neavudishile ba mu tshiota tshia Alona disanka. Neavudishile badi banemeka Yehowa disanka, ne badi bahuekele ne badi banene. Yehowa anuvudishe bua nukumbane ba bungi, nuenu ne bana banudi nulela. Nusankishibue kudi Yehowa, wakafuka diulu ne buloba. Diulu ne diulu mbia Yehowa; kadi wakuha bana ba bantu buloba. Bafue kabena batumbisha Yehowa, ne kakuena muntu wahueka mu muaba wa bahuwa talalâ udi umutumbisha. Kadi tuetu netuvudishile Yehowa disanka ku dituku edi tô ne tshiendelele. Tumbishai Yehowa! Ndi munange Yehowa, bualu bua wakunvua dî dianyi ne kutendakena kuanyi. Bualu bua wakuteleja matshu andi kundi, nunku nendile kudiye matuku onso antshidi ne muoyo. Mionshi ya lufu yakunyunguluka; makenga a mu Muaba wa Bafue akankuata; nakasangana ntatu ne kanyinganyinga. Hashishe, nakabikila dina dia Yehowa ne, Yehowa, ndi nkusengelela ne, Uhandishe muoyo wanyi. Yehowa udi ne dinanga, udi muakane; Nzambi wetu udi ufuila bantu luse. Yehowa udi ulama badi mua kutshimbakashibua. Nakahuekeshibua ne yeye wakansungila. Alukila ku dikisha diebe, wewe muoyo wanyi, bualu bua Yehowa wakukuenzela malu mimpe makumbane. Bualu bua wewe wakumpandisha bua muoyo wanyi kawikadi lufu; ne bua mesu anyi kaikadi ne binsonshi, ne bua makasa anyi kâlenduki. Nengende ku mpala kua Yehowa mu buloba bua badi ne muoyo. Nakadi ngeyemena Yehowa, nansha hanakadi ngamba ne, Ndi ntamba kukengeshibua. Nakamba mu ditenkakana dia mutshima wanyi ne. Bonso badi bandinga. Nempingashile Yehowa tshinyi bua malu andi mimpe onso akungenzeleye? Nengambile luhanza lua luhandu, nembikile dina dia Yehowa. Nemmane mitshihu yanyi kudi Yehowa; bulelela, nenyimane ku mesu kua bantu bandi bonso. Lufu lua bansanto bandi ludi wa mushinga mukole ku mesu kua Yehowa. Yehowa, bulelela, ndi muena mudimu webe, ndi muena mudimu webe, muana wa muena mudimu webe mukashi. Wewe wakusulula mionshi yakadi minsuike. Nenfile mulambu wa disakidila kûdi, nembikile dina dia Yehowa. Nemmane mitshihu yanyi kudi Yehowa; bulelela, nenyimane ku mesu kua bantu bandi bonso, mu biendedi bia mu nsubu wa Yehowa, munkatshi muenu, Bena Yelushalema. Tumbishai Yehowa! Tumbishai Yehowa, nuenu ba mu bisamba bionso bia bantu! Numutumbishe, nuenu bukua bantu bonso! Bua luse luandi lujalame luakatufuileye ludi lunene; lulamatu lua Yehowa lua bushuwa ludiku tshiendelele. Tumbishai Yehowa! Sakidilai Yehowa, bualu bua yeye udi muimpe; bua luse luandi ludi lujalame tshiendelele. Bena Isalele bambe biabo ne, Luse luandi ludi lujalame tshiendelele. Ba mu nsubu wa Alona bambe biabo ne, Luse luandi ludi lujalame tshiendelele. Badi banemeka Yehowa bambe biabo ne, Luse luandi ludi lujalame tshiendelele. Mu makenga anyi nakabikila Yehowa; Yehowa wakitaba kundi, wakansulula, wakanteka mu muaba munene. Yehowa udi nʼanyi, tshiena ntshina nansha. Muntu udi mua kungenzela tshinyi? Yehowa udi nʼanyi, udi mukuatshishi wanyi; nunku nentangile bualu bundi musue bukuata badi nʼanyi lukuna. Kunyemena kudi Yehowa kudi kuhita kueyemena muntu buimpe. Kunyemena kudi Yehowa kudi kuhita kueyemena bakelenge buimpe. Ba mu bisamba bionso badi bannyunguluka; mu dina dia Yehowa nembakose bituha. Badi bannyunguluka; bulelela, badi bannyunguluka nseke yonso; mu dina dia Yehowa nembakose bituha. Badi bannyunguluka bu mbulubulu, badi batema bu mudi kadilu ka mingonga ya meba kajikuka. Mu dina dia Yehowa nembakose bituha. Wewe, muena lukuna, wakanunkila bua meme kuhona hanshi, kadi Yehowa wakankuatshisha. Yehowa udi bukole buanyi ne musambu wanyi, yeye wakulua luhandu luanyi. Mbila ya disanka ne ya luhandu lua mu nvita idi yunvuika mu nsubu ya ntenta ya bantu bakane; tshianza tshia bukole tshia Yehowa tshidi tshienza malu a bukitu; tshianza tshia bukole tshia Yehowa tshiakubandishibua, tshianza tshia bukole tshia Yehowa tshidi tshienza malu a bukitu. Tshiena ufua nansha, nengikale ne muoyo, nendondele bantu bienzedi bia Yehowa. Yehowa wakunkengesha bikole, kadi kakanfikisha ku lufu. Ungunzuluile bibi bia ku buakane; nembuelemu, nengele Yehowa tuasakidila. Etshi ntshibi tshia Yehowa; bantu bakane nebabueleku. Nenkuhe tuasakidila, bualu bua wakuitaba kundi, wakulua luhandu luanyi kabidi. Dibue diakahidiabo kudi bibaki ba nsubu diakulua mutu wa ditumba. Mudimu eu ngua Yehowa, udi bualu bua kukema ku mesu kuetu. Edi ndituku didi Yehowa mujadike; tusanke bietu, disanka dietu dikalemu. Tudi tukusengelela, Yehowa, ne, Utusungile. Yehowa, ludi tukusengelela ne, Ututumme diakalengele. Udi ubuela mu nsubu wa Yehowa udi muvudishibue disanka! Tuetu tudi tukuvudishila disanka didi difumamu. Yehowa udi Nzambi, yeye wakututemeshila munya. Suikai nyama wa mulambu ne mionshi, umulombole tô ne ku nsengu ya ha tshioshelu. Wewe udi Nzambi wanyi, nenkuele tuasakidila; wewe udi Nzambi wanyi, nenkutumbishe. Sakidilai Yehowa, bualu bua yeye udi muimpe; bua luse luandi ludi lujalame tshiendelele! Disanka didi kudi badi bajalame tshishiki mu bienzedi biabo, badi balonda mikenji ya Yehowa! Disanka didi kudi badi banemeka mei andi, badi bamukeba ne mitshima yabo mijima. Bulelela, kabena benza malu mabi, badi benda mu nshila yandi. Wewe wakajadika mikenji yebe bua tuetu tuyenze ne dinanukila. Bienzedi bianyi bikale bishindame bua meme kutumikila mikenji iwakunfundila! Nunku tshifuishibu bundu handi mmona mikenji yebe yonso bimpe. Nenkuele tuasakidila ne buakane bua mutshima, hanamanya kulumbulula kuebe kuakane. Nentumikile mikenji iwakunfundila; kundekedi kashidi nansha. Nsongalume nealengeshe bienzedi biandi munyi? Adimuke biandi bu mudi dî diebe diamba. Nenkukebe ne mutshima wanyi mujima; kuitabushi bua meme kusesuka ku mikenji yebe. Nakulama dî diebe mu mutshima wanyi, bua meme tshikuenzedi bibi. Wewe Yehowa, usankishibue, unyishe mikenji yebe mifunda. Mishiku yanyi idi ilondela bantu kulumbulula kuonso kua mukana muebe. Ndi ne disanka mu dilonda dia mei ebe, bu mundi nsanka mu bubanji buonso. Nengelangane meji bua mikenji yebe, nendamate mu nshila yebe. Nendisankishe mu mikenji yebe mifunda, tshiena mpua dî diebe muoyo. Wenzele muntu webe malu mimpe makumbane, bua meme ngikale ne muoyo, ne bua ntumikile dî diebe. Utabashe mesu anyi, bua meme kumona malu a kukema a mu mikenji yebe. Ndi muenyi ha buloba ebu; kusokoki mikenji yebe kundi. Muoyo wanyi udi muhandike bua dijinga dindi nʼadi ku kulumbulula kuebe kuakane misangu yonso. Wewe udi ubela badi badisue, badi bedibue mulau, badi bahambuka ku mikenji yebe. Ungumushile dihetu ne kulengulula, bualu bua nakulama mei ebe awakummanyisha. Hashikama baminyampala bangelela tshifufu, muntu webe nêlangane meji a mikenji yebe mifunda. Mei ebe awakammanyisha adi disanka dianyi, adi bu bantu badi bandesha meji. Muoyo wanyi udi ulamata ku luhuishi; unsangashe kabidi bu mudi di diebe. Nakakulondela bienzedi bianyi, ne wewe wakungitaba. Unyishe mikenji yebe mifunda. Unjinguluile nshila wa malu audi musue ngenze, ne nengelangane meji a bienzedi biebe bia kukema. Muoyo wanyi udi wenguluka bua kanyinganyinga; unkankamishe bu mudi dî diebe. Ungumushile nshila wa mashimi, unyishe mikenji yebe bua dinanga diebe. Nakusungula nshila wa lulamatu lua bushuwa, nakuteka mei ebe majalame ku mpala kuanyi. Ndi ndamata ku mei ebe awakummanyisha; Yehowa kunfuishi bundu nansha. Nenyemene mu nshila wa mikenji yebe, hawadiundisha mutshima wanyi. Yehowa, unyishe nshila wa mikenji yebe mifunda, nendamatemu tô ne kunfudilu kuandi. Umpe lungenyi, bua ndame mikenji yebe; ne bua meme kuyitumikila ne mutshima wanyi mujima. Ungendeshe mu nshila wa mikenji yebe, bualu bua ndi ne disanka bualu buai. Inyika mutshima wanyi bua kulondau mei awakummanyisha, kûkumishi ku lukuka lua luhetu. Ukudimune mesu anyi bua kâtangidi malu a hatuhu, usangashe muoyo wanyi mu nshila yebe. Ujadikile muntu webe mulayi webe kudiye, wowo udiku bua badi bakunemeka. Ungumushile tshihendu tshindi ntshina, bualu bua mei ebe majalame adi mimpe. Mona, nakujinga malu awakunsunguila bua meme kuenza, usangashe muoyo wanyi mu buakane buebe. Yehowa, luse luebe lujalame lufike kundi, nduhandu luebe mene, bu mudi mulayi webe. Nunku nengikale ne dî dia kukudimuna muntu udi umpenda, bualu bua ndi ngeyemena dî diebe. Kungumutshidi dî dia bushuwa mukana muanyi kashidi; bualu bua ndi ne ditekemena mu mei ebe majalame. Nunku nentumikile mikenji yebe matuku onso, tô ne tshiendelele mene. Nengendakane mu budishikaminyi, bualu bua nakakeba kuenza malu a wakungambila. Nengambe kabidi mei ebe awakammanyisha ku mesu kua bakelenge, ne tshiena nkuatshika bundu. Nendisankishe mu mikenji yebe, indi nnanga. Nengolole bianza bianyi kabidi ku mikenji yebe, indi nnanga. Nengelangane meji a mikenji yebe mifunda. Uvuluke mulayi webe kudi mu ntu webe, uwakubuesha nʼau ditekemena munda muanyi. Ebu mbusambi buanyi mu dikenga dianyi ne, Mulayi webe udi usangasha muoyo wanyi. Badi badisue bakutamba kunseka, kadi tshiakusesuka ku mikenji yebe. Nakuvuluka mei ebe majalame a kale, Yehowa, nakukolesha mutshima wanyi. Tshiji tshikole tshiakunkuata bualu bua bantu babi, badi balekela kutumikila mikenji yebe. Mikenji yebe mifunda yakuikala misambu yanyi mu nsubu mundi mushikame bu muena luendu. Ndi nvuluka diha diebe butuku, Yehowa, ndi ndonda mikenji yebe. Ebu mbualu buimpe bundi nʼabu, bualu bua nakatumikila mei awakangambila. Yehowa udi buhianyi buanyi; nakuamba ne, Nendame mei ebe. Nakulomba luse luebe ne mutshima wanyi mujima; unfuile luse bu mudi mulayi webe. Nakelangana meji a bienzedi bianyi, nakahingasha makasa anyi ku mei awakatumanyisha. Nakenda lukasa, tshiakajanguluka, bua kulonda mikenji yebe. Mionshi ya bantu babi yakunjingila, kadi tshiakuhua mikenji yebe muoyo. Ndi mbika mundankulu bua kukuela tuasakidila, bualu bua mei ebe makane majalame. Ndi mulunda wa bonso badi bakunemeka, ne wa bonso badi benza bu mudi mei ebe amba. Yehowa, buloba budi bûle tente ne luse luebe lujalame; unyishe mikenji yebe mifunda. Wewe wakuenzela muntu webe bimpe, Yehowa, bu mudi dî diebe. Unyishe dijingulula dimpe dia malu ne meji, bualu bua nakueyemena mikenji yebe. Diambedi tshiyi muanze kukengeshibua, nkadi mpambuka mu nshila, kadi mpindiu ndi ntumikila dî diebe. Wewe udi muimpe, utu wenza bimpe; unyishe mikenji yebe mifunda. Badi badisue badi banshiminyina bikole, kadi nendame mei awakungambila ne mutshima wanyi mujima. Mitshima yabo yakuvunda ne manyi, kadi ndi nsanka mu mikenji yebe. Bidi bimpe kundi bua nakukengeshibua, bua nyile bianyi mikenji yebe mifunda. Mikenji ya mukana muebe idi ihita bituha binunu bia biamu bia or ne bia argent kundi. Bianza biebe biakunfuka, biakunvuisha bu mundi; Umpe lungenyi bua meme kuyila mikenji yebe. Badi bakunemeka nebantangile, ne basanke, bualu bua nakutekemena dî diebe. Yehowa, ndi mumanye ne, Kulumbulula kuebe kudi kuakane, ne bua lulamatu luebe lua bushuwa wewe wakunkengesha. Ndi nkusengelela ne, Luse luebe lujalame luikale busambi buanyi, bu muwakalaya muntu webe. Luse luebe lufike kundi, bua ngikale bianyi ne muoyo; bualu bua mikenji yebe idi disanka dianyi. Badi badisue bafuishibue bundu, bualu bua bakunyanga bualu buanyi ne mashimi abo; meme hanyi nengelangane meji bua mei audi ungambila. Badi bakunemeka balukile kundi, ne bobo badi bamanye mei ebe awakammanyisha. Mutshima wanyi wikale muakane tshishiki mu kulamata kua mikenji yebe mifunda bua tshifuishibu bundu ku mesu. Muoyo wanyi udi muhungile ne dijinga dia luhandu luebe, ndi ntekemena dî diebe. Mesu anyi adi ateketa handi ngindila mulayi webe, handi nkonka ne, Wewe neunsambe diba kai? Bualu bua nakulua bu mulondo wa tshiseba wa nyinyo ba muishi wa kahia; kadi tshiena muhue mikenji yebe mifunda muoyo. Matuku a muena mudimu webe adi bungi munyi? Wewe neulumbuluishe badi bankengesha dituku kai? Badi badisue bakungumbuila majimba, badi kabayi balonda mikenji yebe. Mikenji yebe yonso idi mua kueyemenyibua. Badi bankengesha ne bimbandidi bia mashimi; unkuatshishe! Bakamba kummana kaba kabalê ha buloba, kadi tshiakalekela kutumikila mei ebe mafunda. Usangashe muoyo wanyi bu mudi luse luebe lujalame, bua ndame mikenji ya mukana muebe. Yehowa, dî diebe didi dishindame mu diulu tshiendelele. Lulamatu luebe lua bushuwa ludiku tô ne ku bikondo bionso; wewe wakujadika buloba, ne budi bushindama. Bidi bishindama tô ne dituku edi, bu mûdi ubielela mikenji bua bintu bionso bidi bikukuatshidi bia mudimu. Bu mikenji yebe kayiyi mikale disanka dianyi, nakadi kujimina mu makenga anyi. Tshiena mpua mei audi ungambila muoyo kashidi, bualu bua wewe wakusangasha nʼau muoyo wanyi. Meme ndi webe, nusungile, bualu bua nakukeba kumanya mei ebe awakungambila. Bantu babi badi bangalamina bua kunshiha, kadi nengelangane meji a mikenji yebe ne dinanukila. Nakumona kunfudilu kua malu onso makane, kadi mukenji webe udi ne butshiama budi butamba bunene. Mona mundi munange mikenji yebe! Ndi ngelangana meji bualu buai dinda tô ne ku dilolo. Mikenji yebe idi invuisha muhitshi wa bena lukuna banyi meji; bualu bua yoyo itu yikala munda muanyi matuku onso. Ndi ntamba bayishi banyi bonso kujingulula malu, bualu bua mikenji yebe idi mu meji andi ngela. Ndi mpita bantu banunu kujingulula malu, bualu bua nakulama mei awakungambila. Ndi nkanda makasa anyi bua kaendedi mu nshila yonso mubi, bua ntumikile dî diebe. Tshiakuehuka ku mei ebe majalame, bualu bua wewe muine wakunyisha. Mona mudi mei ebe mashemakane handi ngalabula, mahite buitshi kushemakana mukana muanyi! Ndi mpeta lungenyi ku mei audi ungambila, nunku ndi nkina nshila yonso ya mashimi. Dî diebe didi muinda ku makasa anyi ne munya muteme mu nshila wanyi. Nakuditshiha, nengenze munakuditshiha ne, Nentumikile mei ebe makane majalame. Ndi mukengeshibue bikole; usangashe muoyo wanyi, Yehowa, bu mudi dî diebe. Yehowa, witabushe mei adi mukana muanyi mufile kûdi bu milambu ya luse; unyishe mei ebe majalame. Muoyo wanyi udi mu muaba wa njiu matuku onso, kadi tshiena mpua mikenji yebe muoyo. Bantu babi bakunteya buteyi, kadi tshiakuehuka ku mei awakungambila. Nakuangata mikenji yebe bu bubianyi tshiendelele, bualu bua idi disanka dia mu mutshima wanyi. Nakuinyika mutshima wanyi bua kuenzau mikenji yebe mifunda tshiendelele tô ne kunshikidilu mene. Ndi nkina bena mitshima ibidi; kadi ndi nnanga mikenji yebe. Wewe udi tshisokomenu tshianyi ne ngabu wanyi; ndi ntekemena dî diebe. Nuenu benji ha malu mabi, umukai kundi, bua meme kutumikila mikenji ya Nzambi wanyi. Unjadike bu mudi mulayi webe, bua ngikale bianyi ne muoyo; tshifuishibu bundu mu ditekemena dianyi. Ungimanyike kulu, bua mpanduke bianyi, ndi nnanukila kutangila mikenji yebe mifunda matuku onso. Wewe udi ulengulula bonso badi behuka ku mikenji iwakubafundila; bua malu adibo badingangana nʼau adi hatuhu. Wewe udi umana bantu babi bonso ba ha buloba bu mudi mualu umusha tshikanganya; bua muanda eu ndi nnanga mikenji idi ilesha bu mûdi. Mubidi wanyi udi uzakala bua dikutshina dianyi; ne ndi ntshina kulumbulula kuebe. Nakuenza bienzedi bualame ne biakane, kundekedi mu bianza bia bankengeshi. Wikale tshieya kudi umena mudimu webe bua kumuenzela bimpe; badi badisue kabankengeshi nansha. Mesu anyi adi ateketa ne ditekemena diau dia luhandu luebe, ne dia dishikisha dia mulayi webe muakane. Wenzela muena mudimu webe bu mudi luse luebe lujalame; unyishe mikenji yebe mifunda. Ndi muena mudimu webe; umpeshe lungenyi, bua mmanye bianyi mikenji yebe idi ilesha bu mûdi. Tshikondo tshiakufika bua Yehowa kuenza mudimu wandi wa kulu mbuluisha, bua bantu aba bakavuisha mikenji yebe ne ntshianana. Bua malu â ndi ntamba kunanga mikenji yebe ku mpala kua tshiamu tshia or; e, ku mpala kua or mufula mu ditanda. Bua malu a ndi mbala mei ebe onso audi ungambila ne, Adi makane; ndi nkina nshila yonso wa mashimi. Mikenji yebe idi ilesha bu mûdi idi ya dikema, nunku muoyo wanyi udi uyilama. Kubulula kua mei ebe kudi kutemeshila bantu munya, kudi kuhesha muntu mutshimbakane lungenyi. Nakubuela mukana muanyi bu tshibalubalu, nakuhuyakana, bualu bua nakujinga mikenji yebe. Ukudimune mpala webe kundi, undeshe dinanga, bu mutu wenzela badi bananga dina diebe. Ujadike biendedi bianyi mu dî diebe, kuitabushi bua dihambuka dia ku buakane dinkokeshe. Umpikule ku dikengesha dia bantu, bua ndame mei audi ungambila. Utemeshile muena mudimu webe mpala webe, unyishe mikenji yebe mifunda. Mesu anyi adi ahatula binsonshi bu misulu ya mai; bualu bua bantu kabena batumikila mikenji yebe. Yehowa, wewe udi muakane, kulumbulula kuebe kudi kuakane kabidi. Wewe wakujadika mikenji yebe mu buakane buebe ne mu lulamatu luebe lua bushuwa luhita bunene. Lukunukunu luanyi luakunshiha, bualu bua bena lukuna banyi badi bahua mei ebe muoyo. Dî diebe didi dilengeshibue tshishiki, nunku muena mudimu webe udi nʼadi dinanga. Ndi muntu wa hatuhu, ndi muhetudibue, kadi tshiena mpua mei audi ungambila muoyo. Buakane buebe budi buakane bua kashidi, mikenji yebe idi ya bushuwa. Dikenga ne kanyinganyinga biakunkuata, kadi mikenji yebe idi disanka dianyi. Mikenji yebe idi ilesha bu mûdi idi miakane tô ne kashidi, umpeshe lungenyi bua ngikale ne muoyo. Ndi nkubikila ne mutshima wanyi mujima; witabe kundi, Yehowa. Nendame mikenji yebe mifunda. Ndi nkubikila; unsungile, bua ntumikile mikenji yebe idi ilesha bu mûdi. Ndi ndianjila kubika butuku kabuyi buanji kutshia, ndi nkubikila, ndi ntekemena mei ebe. Mesu anyi adi matahale diambedi mpolo ya kutentekela butuku kayiyi mianze kufika, bua ngelangane meji a mulayi webe. Unvue dî dianyi bua luse luebe lujalame. Yehowa, usangashe muoyo wanyi bu mudi kulumbulula kuebe kuakane. Badi balengesha bua malu mabi abo badi basemena ha buihi nʼanyi; badi kule ne mikenji yebe. Wewe Yehowa, udi ha buihi; mikenji yebe yonso idi ya bushuwa. Katshia matuku mahite kele mikenji yebe idi ilesha bu mûdi yakammanyisha ne, Wewe wakajadika kuikalayiku tshiendelele. Umone dikenga dianyi, umpandishemu, bualu bua tshiena mpua mikenji yebe muoyo. Ungakuile tshilumbu tshianyi, umpikule; usangishe muoyo wanyi bu mudi mulayi webe. Luhandu ludi kule ne bantu babi, bualu bua kabena bakeba mikenji yebe mifunda. Luse luebe ludi lunene, Yehowa, usangashe muoyo wanyi bu mudi kulumbulula kuebe kuakane. Bakengeshi banyi ne badi nʼanyi lukuna badi ba bungi, kadi tshiakuehuka ku mikenji yebe idi ilesha bu mûdi. Nakatangila batungidi ba tshitungu, malu abo akantonda, bualu bua kabena batumikila dî diebe. Elangana meji bu mundi munange mei audi ungambila! Yehowa, usangashe muoyo wanyi bu mudi luse luebe lujalame. Dishina dia dî diebe mbushuwa, ne kulumbulula kuebe kuonso kudiku tshiendelele. Baminyampala bakunkengesha kakuyi bualu, kadi mutshima wanyi udi utshina anu mei ebe. Ndi nsanka bua di diebe, bu mudibo basanka hasanganabo bintu bingi biakunyengabo mu nvita. Ndi nkina mashimi, ndi ngalengulula, kadi ndi nnanga mikenji yebe. Ndi nkutumbisha misangu muanda mutekete ku dituku ku dituku, bualu bua mei ebe makane majalame. Badi bananga mikenji yebe badi ne ditalala dinene; kakuena tshidi mua kubalenduisha. Ndi ntekemena luhandu luebe, Yehowa, ndi ngenza mudi mikenji yebe yamba. Muoyo wanyi udi ulamata mikenji yebe idi ilesha bu mûdi; ndi ntamba kuyinanga. Ndi ndama mei ebe ne mikenji yebe; bua nshila yanyi yonso idi ku mpala kuebe. Kudila kuanyi kufike ku mesu kuebe, Yehowa; umpeshe lungenyi bu mudi dî diebe. Kutendekena kuanyi kufike ku mesu kuebe; umpandishe bu mudi mulayi webe. Mishiku yanyi ikutumbishe, bualu bua wewe udi unyisha mikenji yebe mifunda. Ludimi luanyi luimbe bua dî diebe, bualu bua mikenji yebe yonso idi miakane. Tshianza tshiebe tshikaleku bua kunkuatshisha, bualu bua nakusungula mei audi ungambila. Ndi njinga luhandu luebe, Yehowa, ne mikenji yebe idi disanka dianyi. Mutshima wanyi wikale ne muoyo, ne wowo neukutumbishe; mei ebe majalame ankuatshishe! Nakuhambuka bu mukoko mujimine; ukebe muena mudimu webe, bualu bua tshiena mpua mikenji yebe muoyo. Mu dikenga dianyi ndi ndila kudi Yehowa, ne yeye udi ungunvuila. Yehowa, uhandishe muoyo wanyi ku mishiku ya mashimi, ku ludimi ludi ludinga. Nebakuhe tshinyi, nebakutentekele bualu bukuabo kai ha mutu, wewe ludimi ludi ludinga? Nebakuase mikete misakisha ya muena bukitu, diatshimue ne makala adi atema bikole a ku mutshi wa mukenyi. Mulau udi mikuata bua ndi ndala mu Mesheke, bua ndi mushikame munkatshi mua nsubu ya ntenta ya Kedâ! Muoyo wanyi wakumana kushikama musangu muhite bule munkatshi mua badi bakina ditalala. Ndi nnanga ditalala; kadi hanamba dî bualu buadi, bobo badi basue nvita. Ndi mbandisha mesu anyi ku mikuna mile. Dikuatshisha dianyi didi difuma kudi kunyi? Dikuatshisha dianyi didi difuma kudi Yehowa, wakafuka diulu ne buloba. Yeye kena witabusha bua dikasa diebe diselemuke; utu wakinama kena ulala tulu. Mona, udi ulama Bena Isalele kena ulala tulu, kena ubunga tulu. Yehowa udi mulami webe; Yehowa udi dileshi diebe ku tshianza tshiebe tshia balume. Diba kadiena dikuenzela bualu mu munya, nansha ngondo mu butuku. Yehowa neakulame ku malu makole onso; yeye nealame muoyo webe. Yehowa neakulame hawahatuka ne hawabuela, ku dituku edi tô ne tshiendelele. Nakadi ne disanka hakungambilabo ne, Tuye mu nsubu wa Yehowa. Makasa etu atshidi mimane ku mishiku yebe ya mbelu, Yelushalema. Yelushalema, udi muasa bu musoko udi ne nsubu yau mituangane bilengele. Nkudi bisamba bibanda, bisamba bia Yehowa mene, bu muakadi mukenji muelela Bena Isalele, bua kusakidila dina dia Yehowa. Bua bakajadikamu nkuasa ya bukelenge bua kukoselahu bilumbu, nkuasa ya bukelenge ya ba mu tshiota tshia Davidi. Nulombele Yelushalema ditalala. Badi bakunanga bikale ne diakalengele. Eli talalâ dikale munda mua ngumbu yebe, diakalengele dikale mu nsubu ya bakelenge bebe. Bua malu a bana betu ne a balunda banyi, nengambe bianyi ne, Ditalala dikale munda muebe. Bualu bua nsubu wa Yehowa, Nzambi wetu, nennukebele diakalengele. Ndi mbandisha mesu anyi kûdi, wewe udi mushikame mu diulu. Mona, bu mudi mesu a bena mudimu matangisha ku tshianza tshia nfumu wabo, bu mudi mesu a muenu mudimu mukashi matangisha ku tshianza tshia nfumu wandi mukashi; mbu mudi mesu etu atangila Yehowa Nzambi wetu tô ne hatufuileye luse. Utufuile luse, Yehowa, utufuile luse, bualu bua tuakutamba kuhetudibua. Mioyo yetu idi itamba kubuidibua kudi badi bikisha ne kulenguludibua kudi badi badisue. Yehowa kayi muikale ku luseke luetu, ba mu Isalele bambe nunku ne, Bu Yehowa kayi muikale ku luseke luetu, hakajuka bantu bua kutuluisha, ha diba adi bakadi kutumina, tuetu batshikale ne muoyo, hakadi tshiji tshiabo tshitema bua kutuosha; ha diba adi mai akadi kuhita ha mitu hetu, musulu mûla wakadi kuhita ha mutu ha mioyo yetu; ha diba adi mai matambe kûla akadi kuhita ha mutu ha mioyo yetu. Yehowa asankishibue, udi kayi mutufile kudibo bu tshintu tshia kukuatabo ku menu. Mioyo yetu yakuhanduka bu mudi nyunyu uhanduka mu buteyi bua bilembi. Buteyi buakutshibuka, tuakuhanduka. Dikuatshisha dietu didi mu dina dia Yehowa wakafuka diulu ne buloba. Badi beyemena Yehowa badi bu mukuna wa Siona, udi kauyi mua kunyungishibua, kadi udi mukandamane kashidi. Bu mudi mikuna inyunguluka Yelushalema, mbu mudi Yehowa unyunguluka bantu bandi ku dituku edi tô ne tshiendelele. Bua dikombo dia malu mabi kadiena dishala kashidi ku luseke lua buhianyi bua bantu bakane, bua bantu bakane kabolodi bianza biabo ku malu adi abahambuisha. Yehowa, wenzele bantu bakane bimpe, ne badi bakane mu mitshima yabo. Kadi badi basesuka bua kuya mu nshila mikonyangale, Yehowa neahumushe diatshimue ne benji ba maluʼmabi. Ditalala dikale kudi Bena Isalele! Hakakudimuna Yehowa buhika bua Siona bua kuhingashamu bantu bandi, tuakadi bu badi balota tshilota. Mu diba adi mukana muetu muakadi mûle tente ne tuseku ludimi luetu luakûla tente ne mbila ya disanka. Mu diba adi bakambila ngana munkatshi mua bisamba bia bantu ne Yehowa wakabenzela malu manene. Yehowa wakatuenzela malu manene; tudi ne disanka. Yehowa, ukudimune buhika buetu bua kutuha diakalengele; bu mûdi ûsha misulu ya mai mu Luseke lua Sude. Badi bamiamina maminu ne binsonshi ku mesu nebahuole bia kudia ne mbila ya disanka. Udi uya biandi, wenda udila, mutuale maminu bua kukuna, neahingane bulelela ne mbila ya disanka, mutuale bisumbu biandi bia blé. Bikala Yehowa kayi wasa nsubu, badi bamuasa badi bakuata mudimu eu hatuhu. Bikala Yehowa kayi ulama musoko, mutentekedi udi utabala hatuhu. Ebu mbualu bua hatuhu ne, Nudi nubika hatshiatshia, nudi nunenga ha kulala butuku, nudi nudia bidia binuakukuatshila mudimu mukole; bualu bua yeye udi ubifila kudi bananga bandi hatshidibo balala tulu. Monai, bana badi buhianyi bufume kudi Yehowa, bana badi bahatuka munda mua mamu wabo badi difutu diandi. Bu mudi mikete ya mu tshianza tshia muena bukitu, nunku mudi bana baledibue mu bunsongalume bua tatu wabo. Disanka didi kudi muntu udi ne musaka wandi mule tente nʼabo! Kabena bamufuisha bundu hayikileye ne bena lukuna bandi mu tshibuelelu tshia ku musoko. Disanka didi kudi muntu yonso udi unemeka Yehowa, udi wenda mu nshila yandi! Bua wewe neudie bia kudia biwakukuatshila mudimu ku bianza biebe; newikale ne disanka, newikale ne diakalengele. Mukashi webe neikale bu muonshi wa tumuma udi ukuama bimpe munda mua nsubu muebe. Bana bebe baledibue nebikale bu ntonga ya mitshi ya olive, banyunguluke mesa ebe. Mona, adi ndisanka dia muntu udi unemeka Yehowa. Yehowa akuvudishile disanka difume mu Siona! Umone biebe diakalengele dia Yelushalema matuku onso a muoyo webe. E, umone biebe bana ba bana bebe baledibue. Ditalala dikale kudi Bena Isalele! Bakankengesha ku buana buanyi tô ne mpindiu — ba mu Isalele bambe nunku ne, Bakankengesha ku buana buanyi tô ne mpindiu, kadi kabakumpita bukole. Bakadi badima ne lukasu lukoka kudi nyama bakendeshila lukasu ha nyima hanyi; bakalehesha nshila yabo. Yehowa udi muakane; yeye wakakosa mionshi ya bantu babi. Bonso badi bakina Siona bafuishibue bundu, batshungulushibue luanyima. Bikale bu bisosa bibishe bidi bimena ha misaka ya nsubu, bidi bifubidila kabiyi bianze kudiunda; bidi munowi kayi ubiusha mu tshianza tshiandi, ne musuiki wa bisumbu bia blé kayi ubiusha mu tshiadi tshiandi. Badi bahita mu nshila kabidi kabena bamba ne, Disanka dia Yehowa dikale kunudi; tudi tunuvudishila disanka mu dina dia Yehowa. Ndi ndila kûdi, Yehowa, mu dijimba dia kanyinganyinga mundi mushikame. Mukelenge, unvue dî dianyi. Matshu ebe ateleje dî dia kutendekena kuanyi. Yehowa, bu wewe mubale dihambuka dia bantu, muntu kai wakadi mua kuimana, Mukelenge? Kadi dibuikidila dia mibi didi kûdi, bua wewe unemekibue. Ndi ngindila Yehowa, muoyo wanyi udi umuindile, ne mu dî diandi mundi ntekemena. Muoyo wanyi udi windila Yehowa, mutambe dindila dia batentekedi badi bindila kutshia kua butuku; bulelela, mutambe dindila dia batentekedi badi bindila kutshia kua butuku. Bena Isalele, nuikale ne ditekemena dienu mu Yehowa, bualu hua kudi Yehowa ke kudi luse lujalame, kudiye kudi buhikudi bukumbane kabidi. Ne yeye neahikule Isalele ku dihambuka diandi dionso. Yehowa, mutshima wanyi kawena udibandisha, mesu anyi kaena ne dihetu. Tshiena ngela meji anyi ku mianda mitambe bunene, anyi ku mianda mitambe kunkemesha bua meme kuyenza. Bulelela, nakuholesha mutshima wanyi, nakûtalasha, bu muana mujile mabele utshidi kudi mamuʼandi. Muoyo udi munda muanyi udi bu muana mujile mabele. Nuenu Bena Isalele, nuikale ne ditekemena dienu mu Yehowa, ku diba edi tô ne tshiendelele. Yehowa, mubike Davidi mu ntatu yandi yonso. Uvuluke muakaditshiheye kudi Yehowa, muakalayeye Nzambi Mukole wa Yakoba ne, Bulelela, tshiena mbuela mu nsubu wanyi wa ntenta, tshiena mbanda ha bulalu buanyi; tshiena ngitabusha bua tulu tunkuate ku mesu anyi, anyi bua tulu tukole tubuikile bilafinyi bianyi; tô ne hanaheta muaba wa Yehowa kuikaleyemu, nsubu wa Nzambi Mukole wa Yakoba kuikaleyemu. Monai, tuakunvua lumu lua muaba eu mu Efelata, tuakûmona mu madimi a mu Yala. Tubuele mu muaba mudiye muikale, tumutendelele ku ditanda dia muinshi mua makasa andi. Juka biebe, Yehowa, uye ku tshikishilu tshiebe, wewe muine ne mushete wa tshihungidi wa bukole buebe. Baluatshishe bakuidi bebe ne buakane, bansanto bebe bele mbila bua disanka diabo. Bualu bua muena mudimu webe Davidi, kubengi mpala wa webe ûdi muele manyi ha mutu. Yehowa wakaditshiha kudi Davidi ne mutshima udi wa bushuwa, kena ukudimuka bua kubenga dî diandi ne, Neashikike wahatuka munda muebe mu nkuasa webe wa bukelenge. Biatumikila hana bebe tshihungidi tshianyi ne mikenji yanyi bindualua kubayisha, bana babo baledibue nebashikame mu nkuasa webe wa bukelenge tô ne tshiendelele. Bualu bua Yehowa wakusungula Siona; wakamunanga bu muaba wandi wa kuikaleye, wamba ne, Etshi ntshikishilu tshianyi tô ne kashidi. Nengikaleku, bualu bua ndi mutshinange. Nenyudishile bia kudia bia musoko eu disanka dikumbane; nengukutshishe bahele badimu ne bia kudia. Nenduatshishe bakuidi badimu luhandu, bansanto badimu nebele mbila bua disanka diabo. Mu musoko au nemmueneshile Davidi lusengu; nakulongoluelamu undi muele manyi muinda. Nenduatshishe bena lukuna bandi bundu, ka dî tshifulu tshiandi tshia butumbi netshikenke ku mutu wandi. Monai, bidi bitamba buimpe ne bia disanka bua bukua bantu badikunguishe hamue ne mutshima umue! Bidi bu manyi a mushinga mukole medibue ha mutu, ahuekela ha muedi, ha muedi wa Alona mene, ahuekela tô ne ha mubangu wa ha mutu ha bivualu biandi. Bidi bu mume wa ku mukuna wa Hêmona, udi uhuekela ha mikuna ya Siona. Bualu bua Yehowa wakavudishilaku bantu disanka, disanka mene dia muoyo tshiendelele. Monai, nuvudishile Yehowa disanka, nuenu bena mudimu bonso ba Yehowa, badi bimana mu nsubu wa Yehowa butuku! Bishai bianza bienu ku muaba wa tshijila, nuvudishile Yehowa disanka. Yehowa akuvudishile disanka difume ku Siona, yeye mene wakafuka diulu ne buloba. Tumbishai Yehowa. Tumbishai dina dia Yehowa. Numutumbishe, nuenu bena mudimu ba Yehowa, nuenu badi bimane mu nsubu wa Yehowa, mu biendedi bia mu nsubu wa Nzambi wetu. Tumbishai Yehowa, bua Yehowa udi muimpe; nuimbe misambu ya kutumbisha nʼai dina diandi, bualu ebu budi bulengele. Bua Yehowa wakudisunguila Yakoba bua kuikaleye nʼandi, wakadisunguila Isalele bu buhianyi buandi. Bualu bua ndi mumanye ne, Yehowa udi munene, ne Mukelenge wetu udi ha mutu ha nzambi yonso Yehowa wakenza malu onso akasueye kuenza, mu diulu ne ha buloba, mu mai manene ne mu ndondo yonso. Yeye udi ubandisha dibungi ku matengu a buloba, udi wenzela nvula miele ya nvula, udi uhatula luhehele mu bibutshilu biandi. Yeye wakashiha banʼa bute ba mu Ejipitu, ba bantu ne ba nyama. Yeye wakatuma bimanyinu ne malu a kukema munkatshi muenu, nuenu Bena Ejipitu, biakakengesha Palô ne bena mudimu bandi bonso. Yeye wakabutula bisamba bia bantu bia bungi, wakashiha bakelenge bakadi ne bukole: Sihona, mukelenge wa Bena Amole, Oga, mukelenge wa Bashana, ne bakelenge bonso ba mu Kanâna. Wakahesha bantu bandi bukole buabo bu buhianyi, bu buhianyi kudi Bena Isalele, bantu bandi. Yehowa, dina diebe didiku tô ne tshiendelele; Yehowa, divuluka dia dina diebe didiku tô ne ku bikondo bionso. Bualu hua Yehowa nealumbuluile bantu bandi ne kulumbulula kuakane, neafuile bena mudimu bandi luse. Mpingu ya bisamba bia bantu idi ya tshiamu tshia argent ne tshia or, idi bintu bienza ku bianza bia bantu. Idi ne mukana, kadi kayena yakula; idi ne mesu, kadi kayena imona. Idi ne matshu, kadi kayena yunvua; mukana muai kamuena muhuya. Badi bayenza badi bafuanangana nʼai; bulelela, bonso badi bayeyemena badi nunku! Nuenu Bena Isalele, nuvudishile Yehowa disanka! Nuenu ba mu tshiota tshia Alona, nuvudishile Yehowa disanka! Nuenu ba mu tshiota tshia Lewi, nuvudishile Yehowa disanka! Nuenu badi banemeka Yehowa, nuvudishile Yehowa disanka! Badi mu Siona bavudishile Yehowa disanka, Yeye mene udi mushikame mu Yelushalema! Tumbishai Yehowa! Sakidilai Yehowa, bualu bua yeye udi muimpe, bua luse luandi ludi lujalame tshiendelele. Sakidilai Nzambi wa nzambi yonso, bua luse luandi ludi lujalame tshiendelele. Sakidilai Mukelenge wa bakelenge, bua luse luandi ludi lujalame tshiendelele. Numusakidile bua yeye nkayandi udi wenza malu a kukema, bua luse luandi ludi lujalame tshiendelele. Numusakidile bua Yeye wakafuka bia mu diulu ne meji andi, bua luse luandi ludi lujalame tshiendelele. Numusakidile bua yeye wakadisha buloba ha mutu ha mai, bua luse luandi ludi lujalame tshiendelele. Numusakidile bua yeye wakafuka minda minene, bua luse luandi ludi lujalame tshiendelele. Wakafuka diba bua kukokeshadi mu munya, bua luse luandi ludi lujalame tshiendelele. Wakafuka ngondo ne mitoto bua kukokeshabi butuku, bua luse luandi ludi lujalame tshiendelele. Numusakidile bua yeye wakashiha banʼa bute ba mu Ejipitu, bua luse luandi ludi lujalame tshiendelele. Wakaluhula Bena Isalele munkatshi muabo, bua luse luandi ludi lujalame tshiendelele. Wakabaluhula ne tshianza tshikole ne diboko diandi diolola, bua luse luandi ludi lujalame tshiendelele. Numusakidile bua Yeye wakahandulula mai a mu Mai Manene Makunze hankatshinkatshi, bua luse luandi ludi lujalame tshiendelele. Wakahitshisha Bena Isalele hankatshi hau, bua luse luandi ludi lujalame tshiendelele. Kadi wakabutula Palô ne misumba yandi ne masalayi mu Mai Manene Makunze, bua luse luandi ludi lujalame tshiendelele. Numusakidile bua Yeye wakalombela bantu bandi bua kuhitshilabo mu tshihela, bua luse luandi ludi lujalame tshiendelele. Numusakidile bua Yeye wakashiha bakelenge banene, bua luse luandi ludi lujalame tshiendelele. Wakashiha bakelenge bakadi ne lumu lunene, bua luse luandi ludi lujalame tshiendelele: Sihona, mukelenge wa Bena Amole, bua luse luandi ludi lujalame tshiendelele, ne Oga, mukelenge wa Bashana, bua luse luandi ludi lujalame tshiendelele. Wakafila buloba buabo bu buhianyi kudi bantu bandi, bua luse luandi ludi lujalame tshiendelele. Wakabufila bu buhianyi kudi Isalele muntu wandi, bua luse luandi ludi lujalame tshiendelele. Yeye wakatuvuluka hatuakadi bantu bahuekele, bua luse luandi ludi lujalame tshiendelele. Wakatuhandisha mu bianza bia bakadi nʼetu lukuna, bua luse luandi ludi lujalame tshiendelele. Yeye utu wafila bia kudia kudi bintu bionso bidi ne muoyo, bua luse luandi ludi lujalame tshiendelele. Sakidilai Nzambi wa mu diulu, bua luse luandi ludi lujalame tshiendelele. Hatuakadi hehi ne misulu ya mu Babulona, tuakashikamaku, bulelela, tuakadila, hatuakavuluka Siona. Tuakakudika nkombe yetu ku mitshi ya nshiba yakadi mu buloba abu. Bualu bua mu buloba abu bakadi batubuesha mu buhika bakasua kutuimbisha mei a misambu; bakadi banukengesha bakasua tuetu tubimbile musambu wa disanka bamba ne, Nutuimbile musambu wa mu misambu ya mu Siona, Netumanye mua kuimba musambu wa Yehowa mu buloba bua bende munyi? Yelushalema, binahua bualu buebe muoyo, tshianza tshianyi tshia balume tshihange mudimu watshi! Ludimi luanyi lulamate mu tshilakalaka tshianyi, bingikala tshiyi nkuvuluka; bingikala tshiyi ntumbisha Yelushalema ha mutu ha disanka dianyi didi ditamba bunene! Yehowa, uvuluke muakenza Bena Edome mu dituku dia makenga a mu Yelushalema, bu muakambabo ne, Ubutulai! Ubutulai, tô ne ku bishimikidi biau! Ahu, wewe muana mukashi wa Babulona, udi ne bualu bua kubutudibua, disanka dikale kudi wakuhingashila difutu didi bu bienzedi biwakutuenzela. Disanka dikale kudi wakuata bana bebe batekete, wabatuta mitu yabo ku mabue. Ndi nkusakidila ne mutshima wanyi mujima, nenkuindile misambu ya kukutumbisha nʼai ku mpala kua nzambi ya hatuhu. Nenkutendelele ne mutu wanyi muinyika mutume ku ntempelo webe wa tshijila, neasakidile dina diebe bua luse luebe lujalame ne bua lulamatu luebe lua bushuwa. Bualu bua wakutumbisha dina diebe ne dî diebe ha mutu ha malu onso. Mu dituku dinakukubikila, wewe wakitaba kundi, wakankolesha bikole mu muoyo wanyi. Yehowa, bakelenge bonso ba ha buloba nebakusakidile, bualu bua bakunvua mei a mukana muebe. Bulelela, nebimbe misambu bua bienzedi bia Yehowa, bua butumbi bua Yehowa budi bunene. Yehowa udi muhandishibue mulu, kadi udi umona bantu bahuekele; udi mumanye badi ne dihetu hatshidibo kule. Nansha bingenda munkatshi mua makenga, wewe neusangashe muoyo wanyi. Udi wolola tshianza tshiebe bua kukanda tshiji tshia badi nʼanyi lukuna, tshianza tshiebe tshia balume tshidi tshinsungila. Yehowa neamane malu adiye uhangidisha bua bualu buanyi. Yehowa, luse luebe ludi lujalame tô ne tshiendelele. Kulekedi mudimu uwakenza ne bianza biebe. Yehowa, wewe wantangila munda muanyi, wakummanya! Wewe muine udi mumanye hanashikama hanshi ne hanajuka; udi ujingulula meji anyi hantshidi kule. Wewe udi ujingulula kuenda kuanyi ne kulala kuanyi hanshi, udi mumanye bienzedi bianyi bionso. Bua dî kadiyi dianze kuikala ku ludimi luanyi, ne mona, wewe Yehowa udi mudi manye tshishiki. Wewe udi unnyunguluka ku nyima ne ku mpala, udi uteka tshianza tshiebe hamʼbidi hanyi. Lungenyi alu nunku ludi lutamba kunkemesha; ludi lutamba bule, tshiena mua kuluheta. Kunyi kundi mua kuya kudi kakuyi Nyuma webe? Ndi mua kunyemena kudi kunyi kudi mesu ebe kâyi ammona? Binabanda mu diulu, wewe udiku! Binavuisha Muaba wa Bafue bu muaba wanyi wa kulala, mona wewe udiku! Binangata mahuahua a dinda, binaya kushikama mu nseke idi kunfudilu kua mai manene, tshianza tshiebe netshindomboleku, tshianza tshiebe tshia balume netshinkuateku. Butamba bianyi ne, Bulelela mîdima neyimbuikile, ne munya udi unnyunguluka newikale bu butuku; mîdima mene kayena ijibakasha bintu bua kubisokoka kûdi, butuku budi butema bu munya; bua mîdima idi bu munya kûdi. Bua wewe wakafuka bituha bianyi bia munda mua mubidi, wakalamakasha bituha bianyi bia mubidi mu difu dia mamuʼanyi. Ndi nkusakidila, bualu bua difukibua dianyi didi dilengesha meji a mua kukunemeka bikole, didi dikemesha. Midimu yebe yonso idi malu a kukema; mutshima wanyi udi mumanye bualu ebu bimpe. Mubidi wanyi kawakadi musokoka kûdi, hanakadi nfukibua mu busokoko, hakadi bituha bia mubidi wanyi bilamakasha mu ndondo ya buloba. Mesu ebe akamona bituha bia mubidi wanyi kabiyi bianze kulamakana. Matuku anyi onso akadi mafunda mu mukanda webe, matuku mene awakahangidisha bua meme ngikale ne muoyo, diambedi dituku dimue dia munkatshi muau kadiyi dianze kuikalaku. Nzambi, mona mudi meji ebe mikale a mushinga mukole kundi! Mona mudi bungi buau buhite bunene! Bu meme muâbale, akadi kuhita lusenga bungi. Hanatabala, ntshidi nʼebe. Nzambi, bidi bimpe bua wewe ushihe bantu babi, ne bua badi bamatshisha mashi a bantu bumuke kundi. Badi bakutombokela ne mei abo mabi, badi nʼebe lukuna badi batela dina diebe tshitelatela. Yehowa, tshiena nkina badi bakukina, anyi? Tshiena nyingalala bua badi bajuka bua kukutantamena, anyi? Ndi mbakina ne lukuna lukole lua tshishiki; ndi mbabala bu bena lukuna banyi. Nzambi, utangile munda muanyi, umanye mutshima wanyi. Untete, Umanye meji anyi. Umone ne malu mabi adi munda muanyi, undombole mu nshila wa tshiendelele. Yehowa, umpandishe mu bianza bia bantu babi; undame kudi bena tshimbambila. Badi bahangidisha malu mabi mu mitshima yabo, badi basonsola bantu bua kuluanganabo nvita matuku onso. Badi basakisha ndimi yabo bua kutuayi bu ya nyoka, lulengu lua nyoka wa mbanvu ludi mukana muabo. Yehowa, undame ku bianza bia bantu babi, undame kudi bena tshimbambila, bakuhangidisha bua kuselemusha makasa anyi. Badi badisue bakasokoka buteyi bua kunkuatamu, bakunsokokela masoka; bakuanda bukuondo ha buihi ne nshila, bakume ya mateyi. Ndi ngambila Yehowa ne, Wewe udi Nzambi wanyi; Yehowa, teleja matshu ebe ku kutendekena kuanyi. Yehowa, Mukelenge wanyi, bukole bua luhandu luanyi, wewe wakubuikila mutu wanyi mu dituku dia nvita. Yehowa, kuheshi mundi mubi malu adiye musue; kulumbuluishi bualu buandi bubi buakuhangidisheye. Hadi badi bannyunguluke bahisha mitu yabo, malu mabi adi ahatuka mu mishiku yabo ahone ha mutu habo. Bamatshishe makala a kahia atshidi atema hamʼbidi habo. Bedibue mu kahia, mu majimba male, bua kabajuki kabidi. Muena mukoso kajadikibu mu buloba; dikenga dibi dikebe muena tshimbambila bua kumubutula. Ndi mumanye ne, Yehowa neabingishe muena dikenga hamulumbuluishabo, nealumbuluile bahele biakane. Bulelela, bantu bakane nebasakidile dina diebe; badi ne mitshima miakane nebashikame ku mpala kuebe. Yehowa, ndi nkubikila; ulue kundi lukasa. Teleja matshu ebe ku dî dianyi handi nkubikila. Kulomba kuanyi kuikale ku mpala kuebe bu muhuya wa musenga wa manananshi, ne kuolola kua bianza bianyi kuikale bu mulambu udibo bafila dilolo. Yehowa, uteke mutentekedi bua kukanda mukana muanyi; ulame tshibi tshia ku mishiku yanyi. Kuinyiki mutshima wanyi ku bualu bubi, ne mu kuenza kuanyi kua bienzedi bibi handi ndamata kudi benji ba malu mabi. Tshidi bianyi bia kudia biabo bilengele. Muntu muakane antute, muanda eu newikale luse kundi; ambele biandi, kubela kuandi nekuikale bu manyi ha mutu hanyi; mutu wanyi kaubengi manyi au; bua ntshidi ndomba bua malu mabi abo. Hedibue bakokeshi babo hanshi ha mabue, nebunvue mei anyi, bua adi mashemakane. Bu mudi muntu ubundulula buloba, ubuhanda ne lukasu, mbu mudi mifuba yetu mimuangalashibue ku mushiku wa Muaba wa Bafue. Kadi mesu anyi adi kûdi wewe, Yehowa Mukelenge; ndi nkueyemena wewe; kushiyi muoyo wanyi hatuhu. Undame bua tshikuatshibu mu bukuondo buakungandabo, ne mu mateyi a benji ba malu mabi. Bantu babi bakuatshibue mu makuondo abo bobo, handi mpanduka. Ndi ndila ne dî dianyi kudi Yehowa, ndi ntendekena Yehowa ne dî dianyi. Ndi mpumuna mei a kuabakana kuanyi ku mpala kuandi, ndi mmulondela ntatu yanyi ku mpala kuandi. Hahanga nyuma wanyi munda muanyi, wewe udi mumanye nshila wanyi. Mu nshila mundi ngendela bakunteya buteyi. Utangile ku tshianza tshianyi tshia balume, umone biebe; bua kakuena muntu udi mummanye; kakuena tshinyemenu tshia meme kunyemena, kakuena muntu udi ne muoyo wanyi bualu. Ndi ndila kûdi, Yehowa; ndi ngamba ne, Wewe udi tshinyemenu tshianyi, udi buhianyi buanyi mu buloba bua badi ne muoyo. Unvua kudila kuanyi, bualu bua ndi mutambe kuhuekeshibua hanshi. Umpandishe mu bianza bia bakengeshi banyi, bualu bua badi bampita bukole. Umushe muoyo wanyi mu nsubu wa lukanu, bua nsakidile dina diebe. Bantu bakane nebalue kunyunguluka; bualu bua wewe neunvudishile diakalengele. Yehowa, unvua kulomba kuanyi, uteleje matshu ebe ku kutendekena kuanyi, witabe kundi bua lulamatu luebe lua bushuwa, ne bua buakane buebe kabidi. Kulumbuluishi muena mudimu webe, bualu bua kakuena muntu udi muakane ku mesu kuebe hatshidiye ne muoyo. Bua muena lukuna wakukengesha muoyo wanyi; wakututa muoyo wanyi hanshi ha buloba; wakunshikamisha mu miaba ya midima bu bantu bakafua kale. Nunku muoyo wanyi udi uhanga munda muanyi, mutshima wanyi udi mukuatshike buowa munda muanji. Ndi nvuluka matuku a diambedi, ndi ngelangana meji a bienzedi biebe bionso; ndi ngelangana meji a mudimu wa bianza biebe. Ndi ngolola bianza bianyi kûdi; muoyo wanji udi ukujinga bu mudi buloba bûme busue mai. Yehowa, witabe kundi lukasa; nyuma wanyi udi uhanga. Kusokoki mpala webe kundi, bua tshikadi bu badi bahueka mu Dijimba dia Bafue. Ungunvuishe luse luebe lujalame ne dinda dionso, bua ndi ngeyemena kûdi. Ummanyishe nshila undi ne bualu bua kuendela, bualu bua ndi mbisha muoyo wanyi kûdi. Yehowa, umpandishe kudi badi nʼanyi lukuna; ndi nyemena kûdi bua kusokoma. Unyishe mua kuenza bu mudi disua diebe, bualu bua wewe udi Nzambi wanyi. Nyuma webe muimpe andombole mu buloba bulandakane. Yehowa, usangashe muoyo wanyi bua dina diebe. Mu buakane buebe uhatule muoyo wanyi mu dikenga. Mu luse luebe lujalame ujimishe badi nʼanyi lukuna, ubutule bonso badi batatshisha muoyo wanji; bualu bua ndi muena mudimu webe. Yehowa, dibue dianyi, avudishibue disanka; udi uyisha bianza bianyi mua kuluanganabi nvita, ne minu yanyi mua kuelayi bielelu bia nvita. Yeye udi mundeshi wa luse lujalame, ne musoko wanyi mukoleahibue ne ngumbu, udi tshibumba tshianyi tshile, ne muhandishi wanyi. Udi ngabu wanyi ne ndi mpeta tshinyemenu kudiye. Yeye udi ukokesha bantu banyi ku nyima kuanyi. Yehowa, muntu udi nganyi, bua wewe udi mumumanye? Muana wa muntu udi nganyi bua wewe udi umuelela meji? Muntu udi bu muhuya; matuku andi adi bu mundidimbi udi ujimina. Yehowa, winyike diulu diebe, uhueke biebe hanshi. Ulenge mikuna bua muishi wa kahia uhatukemu. Ubahenyishele miele ya nvula, ubamuangalashe; ubele mikete yebe, ubihate. Olola tshianza tshiebe mulu mûdi mushikame, umpandishe, umpatule munda mua mai mavule, mu bianza bia bantu ba bende. Mukana muabo mudi muamba mei a mashimi, tshianza tshiabo tshia balume tshidi tshidinga. Nzambi, nenkuindile musambu muhia-muhia; nenkuimbile misambu ya kukutumbisha nʼai ne lunzenze ludi ne nshinga dikumi. Wewe udi uha bakelenge luhandu mu nvita, udi ubandisha Davidi, muntu webe, ku muele udi ushihangana. Unsungile, umpandishe mu tshianza tshia bantu ba bende, badi bena mukana mudi muamba mei a mashimi, badi bena tshianza tshia balume tshidi tshidinga. Bana betu ba balume bikale bakole mu bunsongalume buabo bu mitshi yakumana kudiunda. Bana betu ba bakashi bikale bu makunshi a ku matumba a nsubu masonga bu mabue adibo basa nʼau nsubu wa mukelenge Mayeba etu ûle tente, atuheshe bia kudia bia mushindu ne mushindu. Mikoko yetu ilele binunu ne binunu bia bana mu madimi etu; ngombe yetu ituale bujitu bua bungi. Kabahangi ngumbu, kabaluhukimu; kakuikadi muadi mukole mu misesu yetu. Disanka didi kudi bantu badi mu tshikadilu atshi! Disanka didi kudi bantu badi ne Yehowa, Nzambi wabo! Nenkutumbishe, Nzambi wanyi, Mukelenge wanyi. Nenvudishile dina diebe disanka tô ne tshiendelele. Nenkuvudishile disanka ku dituku ku dituku, nentumbishe dina diebe tô ne tshiendelele. Yehowa udi munene, budiye nʼabu mbua kutumbishibua bikole. Bunene buandi kabuena mua kujinguludibua. Ba mu mulongo umue wa bantu nebatumbishile ba mu mulongo wabo mukuabo midimu yebe, nebabamanyishe bienzedi biebe binene. Nengelangane meji a buneme butambe bua butumbi buebe, ne a midimu yebe ya kukema. Bantu nebambilangane bua bukole bua bienzedi biebe bidi bibakuatshisha buowa; meme nembalondele bienzedi biebe binene. Nebatule mei a tshivulukidi tshia buimpe buebe bunene, nebimbe bikole bua buakane buebe. Yehowa udi ne dinanga, udi ne luse, kena ukuata tshiji lubilu, udi ne luse lujalame lua bungi. Yehowa udi wenzela bantu bonso bimpe; luse luandi ludi ha mutu ha bintu bionso biakafukeye. Yehowa, bintu bionso biwakafuka nebikusakidile, bansanto bebe nebakuvudishile disanka. Nebambilangane bua butumbi bua bukelenge buebe, nebakulangane bua bukole buebe, bua kumanyishabo bana ba bantu bienzedi biebe binene, ne butumbi bua buneme bua bukelenge buebe. Bukelenge buebe budi bukelenge bua tshiendelele, ne bukokeshi buebe budi bushala tô ne ku bikondo bionso. Yehowa udi wimanyika bonso badi bamba kuhona, udi ubisha bonso badi biname hanshi. Mesu a bifukibua bionso adi akutekemena; wewe udi ubihesha bia kudia biabi mu tshikondo tshiabi. Udi ubulula tshianza tshiebe, tshintu tshionso tshidi ne muoyo udi utshiukutshisha ne diakalengele. Yehowa udi muakane mu nshila yonso idiye uyilamu, udi ulesha dinanga mu bienzedi biandi bionso. Yehowa udi ha buihi ne bonso badi bamubikila, kudi bonso badi bamubikila mu bushuwa. Yeye udi umana dijinga dionso dia badi bamutshina, udi unvua muadi wabo kabidi, udi ubasungila. Yehowa udi ulama bonso badi bamunanga, kadi neabutule bantu babi bonso. Mukana muanyi nemuambe butumbi bua Yehowa, bukua bantu bonso buvudishile dina diandi dia tshijila disanka tô ne kashidi. Tumbishai Yehowa! Wewe muoyo wanyi, utumbishe Yehowa! Nentumbishe Yehowa hantshidi ne muoyo; nengimbile Nzambi wanyi misambu ya kumutumbisha nʼai ntshidiku. Kanueyemenyi baminyampala, anyi muana wa muntu, unudi kanuyi mua kusangana dikuatshisha kudiye. Muhuya wandi udi uhatuka, udi uhingana kabidi ku dinfuenkenya diandi; mu dituku dine adi malu akadiye uhangidisha adi ajimina. Disanka didi kudi muntu udi ne dikuatshisha diandi kudi Nzambi wa Yakoba, udi ne ditekemena diandi mu Yehowa Nzambi wandi, wakafuka diulu ne buloba, mai manene ne bintu bionso bidimu, udi ulama bushuwa buandi tô ne tshiendelele. Udi ulumbuluila badi bakengeshibue ne kulumbulula kuakane; udi uhesha badi ne nzala bia kudia. Yehowa udi ulekesha bena lukuna; Yehowa udi utabasha mesu a bafofo; Yehowa udi ubisha bantu badi biname hanshi; Yehowa udi unanga bantu bakane. Yehowa udi ulama benyi, udi ukuatshisha bana ba nshiya ne bakashi ba mu lufuila: kadi udi ukonyangasha nshila wa bantu babi. Yehowa neakokeshe tô ne kashidi; Siona, Nzambi webe neakokeshe tô ne bikondo bionso. Tumbishai Yehowa! Tumbishai Yehowa! Bua bidi bimpe bua kuimbila Nzambi wetu misambu ya kumutumbisha nʼai. Bua yeye udi muimpe, ne kumutumbisha kudi kuakane. Yehowa udi wasa Yelushalema kabidi; ukungisha ba mu Isalele bakadi bamuangalashibue hohamue. Udi ukolesha badi ne mitshima minyingalale, udi ujingila bilulu ha mputa yabo. Udi ujadika bungi bua mitoto, udi uyibikila buonso buai ku mena ai. Mukelenge wetu udi munene, udi ne bukole bukumbane; dijingulula diandi dia malu kadiena ne kunfudilu kuadi. Yehowa udi wimanyika bahuekele, udi wela bantu babi hanshi ha buloba. Imbilai Yehowa misambu ne disakidila dienu; nuimbile Nzambi wetu misambu ne lunkombe. Udi ubuikila diulu ne matutu, udi ulongoluela buloba nvula, udi umenesha mashinde ha mikuna. Udi uha nyama bia kudia biai, udi ubihesha bana ba bikololo habididilabo. Kena ne disanka bua bukole bua kabalu, kena ne disanka bua mikolo ya muntu. Kadi Yehowa udi usanka bua badi bamutshina, bua badi ne ditekemena diabo mu luse luandi lujalame. Wewe Yelushalema, tumbisha Yehowa; wewe Siona, tumbisha Nzambi webe. Bualu bua wakukolesha nkanu idi ikuata bibi biebe, wakuvudishila bana bebe badi munda mua ngumbu yebe disanka. Udi uvuisha ditalala mu matshika ebe, udi ukûkutshisha ne blé udi mutambe buimpe. Udi utuma mukenji wandi ha buloba; dî diandi didi diya lubilu. Udi umatshisha neige mufuane miosa ya mikoko; udi umuangalasha mume mukuatakasha mashika bu butue. Udi umatshisha mabue andi a mashika bu nkototo. Wamanya mua kuimana talalâ ku mpala kua mashika andi nganyi? Udi utuma dî diandi, udi ulengulula, udi ulehesha luhehele luandi, mai adi ahueka Udi umanyisha Yakoba di diandi, udi uyisha Bena Isalele mikenji yakafundileye ne mei adiye musue benze. Kena muenzele ba mu tshinga tshisamba nunku nansha; kabena bamanye kulumbulula kuandi. Tumbishai Yehowa! Tumbishai Yehowa! Tumbishai Yehowa, nuenu ba mu diulu; numutumbishe mu miaba ya mulu! Numutumbishe, nuenu banjelo bandi bonso; numutumbishe, nuenu misumba yandi yonso! Numutumbishe, nuenu diba ne ngondo; numutumbishe, nuenu mitoto yonso idi itema! Umutumbisha, wewe diulu dia ha mutu ha diulu; nuenu, mai adi ha mutu ha diulu, numutumbishe! Bionso bitumbishe dina dia Yehowa; bua yeye wakela dî diandi, biakafukibua. Wakabidika kabidi bua kuikalabi tô ne kashidi. Wakabelela mukenji udibi kabiyi bisambuka. Tumbishai Yehowa, nuenu bia ha buloba, nuenu nyama minene ya mu mai manene, ne ndondo yonso; kahia ne mabue a nvula, neige ne dibungi, tshihehele tshikole tshidi tshitumikila mukenji wandi! Mikuna mile ne mikuna mihi yonso, mitshi idi ikuama mamuma ne mitshi ya cèdre yonso, himutumbishe! Nyama ya mu tshisuku ne bimuna bionso, bintu bidi bidikoka hanshi ne nyunyu yonso idi ihahala, bimutumbishe! Bakelenge ba ha buloba ne bukua bantu bonso, baminyampala ne balumbuluishi bonso ba ha buloba, bamutumbishe! Bansongalume ne bansongakashi kabidi, bantu banunu ne bana, bamutumbishe! Batumbishe dina dia Yehowa, bualu bua dina diandi nkayadi didi ditumbishibua; butumbi buandi budi ha mutu ha buloba ne diulu. Yeye wakuambuila bantu bandi lusengu, wakudivuisha wa kutumbishibua kudi bansanto bandi bonso, kudi bantu ba mu Isalele badi ha buihi nʼandi. Tumbishai Yehowa! Tumbishai Yehowa! Nuimbile Yehowa musambu muhia-muhia, nuimbe musambu wa kumutumbisha nʼau mu disangisha dia bantu bandi bananga! Isalele ikale ne disanka mu Mufuki wandi, bana ba Siona bikale ne disanka mu Mukelenge wabo! Batumbishe dina diandi ne maja a disanka, Bamuimbile misambu ya kumutumbisha nʼai ku tshiona tshia mazele ne lunkombe! Bualu bua Yehowa udi ne disanka mu bantu bandi. Udi ulengesha badihuekeshi ne luhandu. Bantu handi bahanga basankile mu butumbi, bimbe ne disanka halalabo ha malalu abo. Kutumbisha kukole kua Nzambi kuikale mukana muabo; muele wa nvita musakishe nseke ibidi wikale mu bianza biabo, bua kusombuela bisamba bia bantu, bua kukengeshabo bukua bantu, bua kusuika banfumu babo ne nkanu, ne bua bakokeshi babo ne bikata bia nkanu. Bua kushikisheye kulumbuluishibua kuabo kuakamana kufundibua. Ebu mbutumbi budibo nʼabu kudi bananga bandi bonso. Tumbishai Yehowa! Tumbishai Yehowa! Tumbishai Nzambi mu muaba wandi wa tshijila; numutumbishe mu diulu didi dilesha bukole buandi! Numutumbishe bua bienzedi biandi binene. Numutumbishe bu mudi bunene buandi buhite bunene! Numutumbishe ne tshiona tshia dî dia mpungi; numutumbishe ne tshisanji ne lunzenze! Numutumbishe ne mazele ne maja a disanka; numutumbishe ne biombelu bidi ne nshinga ne lushiba! Numutumbishe ne biamu bidi bivuma, numutumbishe ne biamu bia kukumakasha bidi biakula ne tshiona tshikole! Bintu bionso bidi bihuyakana bitumbishe Yehowa! Tumbishai Yehowa! Nsumuinu ya Solomo, muana wa Davidi, mukelenge wa Isalele: Bua bantu bamanye lungenyi ne diyisha, bua bajingulule mei a meji. Bua bahete diyisha dia mua kuenza bienzedi bia meji, dia mu buakane, dia mu dikosa diakane dia nsambu, ne dia mu kulumbulula kuakane. Bua kuha muntu udi kayi mutantamane mu lungenyi budimu, bua kulesha nsongalume meji ne bukole bua kuhangidisha malu makane. Muena meji unvue biandi, adiunde mu malu adibo bamuyisha; muena dijingulula dia malu ahete meji adi amukuatshisha bua kuenza bimpe: bua kujingululeye lusumuinu ne tshifuanyikishi, mei a bena meji ne majimba abo. Ditshina dia Yehowa ntshibangidilu tshia lungenyi; bahote badi bahetula meji ne diyisha. Muanʼanyi, unvue diyisha dia tatu webe, kuhidi diyisha dia mamu webe. Bualu bua biobi nebikale tshitotolo tshilengele tshia ku mutu webe, ne nkanu ya mu nshingu muebe. Muanʼanyi, biakuteya bantu babi, kuitabushi nansha. Biambabo ne, Lua kutudi, tualamine muntu bua kumatshisha mashi andi hanshi, tulale bu bena lusoko bua kukuata bantu badi kabayi ne bualu, tubamine hatshidibo ne muoyo bu mudi Muaba wa Bafue wenza, hatshidibo ne bukole buonso bua mubidi; bu mudi bantu bahueka mu Dijimba dia Bafue. Netusangane biuma bionso bia mushinga mukole, netûshe nsubu yetu tente ne bintu bitudi tunyenga. Biwaya nʼetu, netusangishe bintu bietu bionso mu tshibutshilu tshimue. Muanʼanyi, kuendi nʼabo mu nshila umue nansha, ukande dikasa diebe bua kadidiatshi mu nshila yabo. Bua makasa abo adi aya lubilu ku malu mabi, badi baya lukasa bua kumatshisha mashi hanshi. Kuanda bukuondo ku mesu kua nyunyu kudi hatuhu; ne bantu aba badi balamina mashi abo nkayabo, badi balala bu bena lusoko bua mioyo yabo mene. Nshila ya bonso badi ne lukuka lua kunyenga bintu ku bukole idi nunku; ludi lujimisha mioyo ya badi nʼalu. Meji adi ela dî dikole mu musesu, adi abandisha dî diau mu bisalu. Adi ela dî ku masangu a nshila ya mitoyi. Ku tshibuelelu tshia mu bibi bia mu musoko adi amba mei â ne Nuenu batshimbakanyi, nenunange butshimbakane musangu bule munyi? Badi babuidia nebasanke mu kubuidia kuabo, bahote nebakine lungenyi musangu bule munyi? Andamukai bua kunvua kubela kuanyi. Monai! Nennuitshikishile nyuma wanyi hamʼbidi henu, nennumanyishe mei anyi. Bualu bua nakunubikila, ne nuenu nuakuhidia kunvua. Nakuolola tshianza tshianyi, kakuakadi muntu wakuitaba. Nuakulengulula lungenyi luonso lunakunulesha kabidi, kanuakadi basue kunyua kubela kuanyi. Meme kabidi nenseke halua dikenga dienu; nennubingile hanukuata buowa; hanukuata buowa bu mudi tshihuhu tshibika, halua dikenga dienu bu mudi tshinvunde tshilua, hanukuata ntatu ne kanyinganyinga. Hashishe nebambikile, kadi tshiena ngitaba; nebankebe ne lukunukunu, kadi kabena bansangana. Bualu bua bakakula lungenyi, kabakasungula ditshina dia Yehowa. Kabakasua kuitabusha lungenyi lunakabalesha, bakahetula kubela kuanyi kuonso. Bua malu â nebadie mamuma adi bienzedi biabo bikuama, nebukute ne malu adibo bahangidisha. Bualu hua dihingana tshianyima dia batshimbakanyi nedibashihe, ne kalengu ka bahote nekababutule. Kadi muntu yonso udi ungunvuila neashikame talalâ, neikale holâ kayi ne ditshina dia dikenga dibi. Muanʼanyi, bi witabusha mei anyi, biwateka mikenji yanyi munda muebe, bua wewe utelejishe matshu ebe ku meji, bua kufila mutshima webe ku dijingulula dia mianda; e, biwadidila dijingulula dia mianda muadi, biwabandishila kumanya kua malu dî diebe, biwakukeba bu mûdi ukeba tshiamu tshia argent, biwakukeja bu mûdi ukeja biuma bisokoka, nunku neujingulule ditshina dia Yehowa, neusangane dimanya dia malu a Nzambi. Bualu bua Yehowa udi uha bantu meji; mukana muandi mudi muhatuka lungenyi ne dijingulula dia mianda. Yeye udi ubutshila bantu bakane lungenyi ludi lubakuatshisha; udi biandi ngabu kudi badi benda ne mitshima mitoke; bua yeye alame nshila ya kulu mbulula kuakane, bua alengeshe nshila wa bansanto bandi. Hashishe neujingulule buakane ne dikosa diakane dia nsambu, neujingulule kulumbulula kuakane, nshila yonso mene udi uya ku buimpe. Bualu bua meji neabuele mu mutshima webe, lungenyi neluikale lulengele mu muoyo webe. Budimu nebutangidile malu adi afika kûdi, dijingulula dia malu nedikulame; bua kukuhandisha ku nshila wa malu mabi, mu bianza bia bantu badi bamba mei a tshishiku; badi balekela kuya mu nshila ya buakane bua kuendabo mu nshila ya mîdima. Badi basanka bua kuenza bienzedi bibi, badi batamba kusanka mu tshishiku tshia malu mabi. Badi bakonyangasha nshila yabo, badi benda eku ne eku. Bua bualu ebu budi bua kukuhandisha mu bianza bia mukashi wa bende, mu bianza bia mukashi udi muena tshiendenda udi ukubomba ne mei andi. Udi ulekela mulombodi wakamubangila hakadiye nsongakashi, udi uhua tshihungidi tshia Nzambi wandi muoyo. Bualu bua nsubu wandi udi uhueka tô ne ku lufu, nshila yandi idi ihueka tô ne ku bantu bafue. Kakuena muntu wa badi babuela kudiye uhingana kabidi, kabena basangana nshila ya muoyo kabidi. Bua bualu ebu budi bua wewe wende mu nshila ya bantu bimpe, bua ulamate biebe kudi nshila ya bantu bakane. Bualu bua badi ne mitshima miakane nebashikame mu buloba, badi ne mutshima umue mutoke nebajalame. Kadi nebajimishe bantu babi ha buloba, nebumushehu bena tshitungu. Muanʼanyi, kuhu diyisha dianyi muoyo kadi mutshima webe ntumikile mikenji yanyi. Bua neyikutentekashile dileha dia matuku ne bidimu bia muoyo ne ditalala. Luse ne lulamatu lua ku bushuwa kabiumuki kûdi. Ubisuike mu nshingu muebe, ubifunde mu mutshima webe. Nunku neusangane diakalengele ne lumu luimpe ku mesu kua Nzambi ne kua bantu. Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamishile nshila yebe. Kuikadi umena meji ku mesu kuebe wewe; utshine Yehowa, umuke ku malu mabi. Muanda eu neuvuishe kusangasha kudi mubidi webe, neutuishe kukankamasha kudi mifuba yebe. Tumbisha Yehowa ne biuma biebe ne mamuma a kumudilu a mu madimi ebe. Nunku mayeba ebe neûle tente ne bintu bia bungi, bikaminu biebe nebihongolole nvinyo mihia-mihia. Muanʼanyi, kuhetudi dikengesha didi Yehowa ukuyisha nʼadi, kubela kuandi kakukutondi. Bualu bua Yehowa udi ubela udiye munange, bu mudi tatu ubela muanʼandi mulume udi umusankisha. Disanka didi kudi mundi udi usangana lungenyi, ne kudi muntu udi uheta dijingulula dia mianda. Bualu bua kuheta kuau kudi kutamba kuheta kua argent buimpe, ne makasa adilu lubulula adi atamba tshiamu tshia or bulengele. Wowo adi ahita mabue a bilenga mushinga mukole; kakuena tshintu tshiudi ujinga tshiudi mua kuelekesha nʼau. Dileha dia matuku a muoyo didi mu tshianza tshiau tshia balume; mu tshianza tshiau tshia bakashi mudi bubanji ne butumbi. Nshila yau idi nshila ya disanka, nshila yau yonso idi nshila ya ditalala. Adi mutshi wa muoyo kudi badi bâkuata mu bianza; bonso badi bâkuata bikole badi ne disanka. Yehowa wakafuka buloba ne meji andi; wakajadika bia mu diulu ne lungenyi luandi. Bua lungenyi luandi mai male akahatuka, ne matutu a mu diulu adi amatshisha dibungi. Muanʼanyi, malu â kaumuki ku mesu kuebe; ulame meji adi akukuatshisha, ne bukole bua kuhangidisha malu. Nunku nebikale muoyo ku mutshima webe ne tshilenga mu nshingu muebe. Hashishe, newende mu nshila webe kuyi ne ditshina, dikasa diebe kadiena dilenduka. Hawalala hanshi, kuena utshina; bulelela, ha wamana kulala hanshi, tulu tuebe netuikale tuimpe. Kutshinyi buowa budi bulua kûdi lukasa, anyi kubutuka kua bantu babi hafikaku kudibo. Bualu bua Yehowa neikale tshieyemenu tshiebe, nealame dikasa diebe bua kadikuatshibu mu buteyi. Kuhadi bantu tshintu tshimpe, badi bakumbane bua kuikala nʼatshi, hawikala ne bukole bua kubaha tshi. Kuambidi muena mutumba nʼebe ne, Anji kuya, uhingane kabidi, makelela nenkuhetshi, hautshidi nʼatshi ha buihi. Kuhangidisha bualu bubi bua kuenzela muena mutumba nʼebe, hadiye ushikama hehi nʼebe mukueyemene. Kufuilanganyi ne muntu hatuhu, bikaleye kayi mukuenzele bibi. Kuikadi ne muena tshimbambila mukau, kulondi bualu, nansha bumue, budiye wenza. Bualu bua Yehowa udi ukina muntu udi ne tshishiku, kadi bunyana buandi budi kudi badi ne mitshima miakane. Mulau wa Yehowa udi mu nsubu wa bantu babi, kadi udi uvudishila nsubu wa bantu bakane disanka. Udi ubuidia babuidi, kadi udi ulesha badi bahuekele luse. Bena meji nebahiane butumbi, adi bundu budi buhianyi bua bahote. Bana banyi balume, unvuai diyisha dia tatu, nuikale ne mbabi bua kumanya dijingulula dia mianda. Bualu bua ndi nnulesha diyisha dimpe, kanulekedi kulonda diyisha dianyi. Bualu bua nakadi muana mulume mulela kudi tatu wanyi, nakadi muana mutekete ne bu muana umuehele munangibue ku mesu kua mamu wanyi. Tatu wakadi unyisha kabidi, wakadi ungambila ne, Mutshima webe ulamate mei anyi bikole; utumikile mikenji yanyi, wikale ne muoyo. Heta meji, uhete biebe dijingulula dia mianda; kuhu muoyo, kusesuki ku mei a mukana muanyi. Kualekedi nansha, ne wowo neakulame; wanange, neakutangidile malu adi mua kukukuata. Tshibangidilu tshia meji tshidi dî edi ne, Angata meji; e, angata dijingulula dia mianda ku mpala kua malu onso makuabo. Wabale bu tshintu tshia mushinga mukole, wowo neakubandishe; neakuvuishile butumbi, biwaela tshituha mu nshingu. Nease tshitotola tshilengele ku mutu kuebe; neakuhe tshifulu tshia butumbi. Unvua, muanʼanyi, witabusha mei anyi, ne bidimu bia muoyo webe nebikale bia bungi. Nakukuyisha mua kuenda mu nshila wa meji, nakukulombola mu nshila ya malu makane. Hawenda, biendedi biebe kabiena bikandibue; biwanyema, kuena ulenduka. Kuata diyisha bikole, kudilekedi nansha; udilame, bualu bua didi muoyo webe. Kubuedi mu nshila wa bantu babi nansha; kuendi mu nshila wa benji ba bienzedi bibi. Ehuka ku nshila au, kuhitshimu nansha; umukamu, hita ku mpala. Bualu bua kabena balala tulu bikalabo kabayi benze bibi; tulu ludi tumuka kudibo bikalabo kabayi bahoneshe muntu. Bualu bua badi badia bia kudia bia bubi, badi banua nvinyo ya tshimbambila. Kadi nshila wa bantu bakane udi bu diba dia kabundubundu, didi ditema ne dikenkakenka tô ne hakumbana diba dia munda munya. Nshila wa bantu babi udi bu mîdima mikole; kabena bamanye tshidi tshibalenduisha. Muanʼanyi, unvua mei anyi bimpe, teleja matshu ebe ku mianda indi nkuambila. Mei â kaumuki ku mesu kuebe; wâteke munda mua mutshima webe. Bualu bua adi muoyo kudi badi bâheta, adi asangasha mibidi yabo yonso. Ulame mutshima webe ne dilama dionso, bualu bua munda muau mudi muhatuka mishimi yonso ya muoyo. Umusha mei a kusesuisha nʼau bakuabo mukana muebe, umusha mei a kuhambuisha nʼau bantu ku mishiku yebe. Mesu ebe atangile ku mpala kuebe, kâkenzakanyi, bilafinyi biebe bishale bitabala bitangila ku mpala. Ubatamishile makasa ebe nshila, ne nshila yebe yonso ikale miludika bimpe. Kusesuki ku tshianza tshia balume anyi ku tshianza tshia bakashi, umushe dikasa diebe ku malu mabi. Muanʼanyi, tinvua meji anyi; uteleje matshu ebe ku dijingulula dianyi dia malu, bua wewe kushala ne bukole bua kuhangidisha mianda bimpe, ne bua mishiku yebe ilame lungenyi. Bua mishiku ya mukashi wa bende idi imata buitshi, mukana muandi mudi muhite manyi busenu. Kadi kunshikidilu yeye udi ne bululu bu nyongangandu, udi mutue bu muele wa nvita musakisha nseke ibidi. Makasa andi adi ahueka tô ne ku lufu, biendedi biandi bîdi bilamata ku Muaba wa Bafue. Bua yeye kena udimuka bua nshila mulandakane wa muoyo, yeye udi utakankana mu nshila yandi kayi mumanye bualu. Mpindiu, bana banyi, nungunvuile, kanumuki ku mei a mukana muanyi. Semesha nshila webe kule nʼandi, kufika ha buihi ne tshibi tshia ku nsubu kuandi, bua wewe kufidi buneme buebe kudi bantu ba bende, ne bidimu biebe kudi muena lukisu, bua benyi kabukutshi ne biuma biebe, ne luhetu lua ku mudimu webe kaluikadi mu nsubu wa muntu wa bende. Nunku wewe kufu mikemu kunshikidilu kua muoyo webe, hanyanguka misunyi yebe ne mubidi webe, ne udi wamba ne, Mona munakukina dikengesha diakadi dinyisha ne muakadi mutshima wanyi uhetula mei a kumbela nʼau! Tshiakunvuila dî dia bayishi banyi, tshiakuteleja matshu anyi kudi bakadi basue kundesha lungenyi. Nakamba kubuela mu dikengesha dionso anu kaba kabalê munkatshi mua disangisha dia bantu ne bakadi badikungisha. Unue mai a mu tshina tshiebe wewe, ne mai a mushimi audi uhatula mu dina diebe wewe. Mishimi yebe ya mai idi ne bua kumuangalashibua mu muaba wa ha bule, anyi? Tusulu tuebe tua mai tudi ne bua kuhueka mu misesu, anyi? Biobi bikale bintu biebe nkayebe, kabikadi bia bantu ba bende diatshimue nʼebe. Mushimi webe wa mai uvudishibue disanka; usanke bua mukashi uwakabaka mu bunsongalume buebe. Yeye udi bu ntole mukashi udi muena dinanga, udi bu dishina dia ngulungu didi dilengele ku mesu! Mabele andi akusankishe misangu yonso; wikale mukuatshike ne dinanga diandi matuku onso. Bua munyi, wewe muanʼanyi, mûdi ne bua kukuatshika ne dinanga dia mukashi wa bende, ne bua kuela tshituha mu tshiadi tshia muena tshiendenda? Bualu bua nshila ya muntu idi ku mesu kua Yehowa, yeye udi widikisha nshila yandi yonso bimpe. Malu a tshishiku a muntu mubi adi umukuata mu buteyi, udi musuikibue ne mionshi ya bubi buandi. Udi ufua bua dihanga diandi dia kuheta diyisha didi dimuludikila nshila; bua bukole bua buhote buandi udi uhambuka. Muanʼanyi, biweyeka tshieya kudi muena mutumba nʼebe; biwoluela muntu wa bende tshianza; biwikala mudijingile mu kahamba bua mei a mukana muebe, mukuatshibue mu buteyi bua mei a mukana muebe; enza nunku, muanʼanyi, bua kudi handisha, bualu bua wakubuela mu tshianza tshia muena mutumba nʼebe: ya, udihuekeshe, wenzeshe muena mutumba nʼebe ne mei a dinanukila. Kuitabushi bua tulu tukukuate ku mesu ebe, anyi bua tulu tukole tubuikile bilafinyi biebe. Udihandishe bu mudi kabuluku kadisungila mu bianza bia tshilembi, bu mudi nyunyu udihandisha mu bianza bia tshilembi tshia nyunyu. Wewe, muntu mufuba, ya kudi kankenene; welangane meji mudiku kaya mu nshila yaku, wikale ne meji. Koko, kakayi ne mukelenge, mutangidi, anyi mukokeshi, katu kadilongoluela bidia biaku mu tshikondo tshia munya mukole; katu kaditekela bia kudia biaku mu tshikondo tshia kunowa. Wewe, mufuba, neulale hanshi musangu bule munyi? Neujuke bua kutabala ku tulu tuebe diba kai? Anu tulu tukese, anu kulala tulu tshituha; anu kudikuata ne bianza bua kuhunga tulu kakese. Hashishe buhele buebe nebukukuate bu munyengi, ne tshiole netshikukuate bu muena nvita. Muntu wa tshidingidingi, muena tshinyangu, udi wendakana ne mei a kuhambuisha nʼau bantu. Udi uhodia ne mesu andi, udi usheta makasa andi, udi uloba muntu ne bianza. Udi ne mutshima wa tshishiku, utu wahangidisha malu mabi matuku onso, udi uvudisha matandu. Bua malu â neabuluke lubilu; mu katuha ka diba neatshibuke bituha, kayi uheta tshia kumusangasha. Mianda isambombo idiku idi Yehowa ukina; e, mianda muanda mutekete idi imunyingalasha: mesu adi ne dihetu, ludimi ludi lushima, ne bianza bidi bimatshiha mashi a badi kabayi ne tshilumbu hanshi, mutshima udi uhangidisha mianda ya meji mabi, makasa adi aya lubilu kudibo benza malu mabi, mumanyi wa malu udi wamba mei a kudinga, ne muntu udi utudisha matandu munkatshi mua bena muntu. Muanʼanyi, lama mukenji wa tatuʼebe, kulekedi diyisha dia mamuʼebe. Ubilame matuku onso mu mu tshima webe, ubijingile mu nshingu muebe. Hawenda, lungenyi alu nelukulombole; hawalala hanshi, neluikale mulami webe; bawatabala, neluakule nʼebe. Bualu bua mukenji udi muinda, diyisha diau didi munya, kubela kudi ne diyisha kudi nshila wa muoyo. Biobi nebikulame ku buteyi bua mukashi munyanguke, ku ludimi lua mukashi wa bende ludi luamba mei a lubombo. Kusaminyi muoyo ku bulengele buandi nansha, yeye kakukuatshi mu buteyi ne kuvinya kua mesu andi. Bua bualu bua mukashi wa ndumba muntu neashale anu ne tshihesa tshia nshima; ne mukashi mubaka udi wenda masandi udi ulemba muoyo wa mushinga mukole wa muntu. Muntu udi mua kuteka kahia mu tshiadi tshiandi, bivualu biandi kabiyi bihia, anyi? Muntu udi mua kudiata ha makala a kahia adi atema, makasa andi kâyi ashila, anyi? Bidi muomumue kudi muntu udi ubuela kudi mukashi wa muena mutumba nʼandi; muntu yonso wamulenga bianza neakengeshibue. Bantu kabena bahetula muibi, bibeye tshia kudia hunvueye nzala. Kadi biamukuatabo, neahingishe bintu bivudisha misangu muanda mutekete; neafile biuma bionso bidi mu nsubu muandi. Udi wenda masandi ne mukashi kena ne lungenyi, udi wenza muanda au udi udibutula. Neahete mikumu ne dilengulula; bundu buandi kabuena bujimishibua. Bualu bua mukau udi ubandisha tshiji tshia mulume, kena unvua luse dituku dia kudisombuela. Kena witabusha bintu bia kubuikidila nʼabi bubi buandi, kena ushala ne mutshima muhole, nansha biwamuha mbueshilu ya bungi. Muanʼanyi, ulame mei anyi, uteke mikenji yanyi mu mutshima webe. Ulame mikenji yanyi, wikale ne muoyo; ulame diyisha dianyi bu mûdi ulama kamonyi ka disu diebe. Ubisuike ku minu yebe; ubifunde mu mutshima webe. Wambile meji ne, Udi muanʼetu wa bakashi; widike dijingulula dia mianda dina ne, Mukuetu wa bakashi. Bua biobi bikulame bua wewe kuebela mukashi wa bende, bua kuehela biebe mukashi wa bende udi wamba mei a tshianyishanyisha. Bualu bua ku dididishi dia mu nsubu muanyi nakatangila mu tusoso tua mabaya matshiamakanangane ha mbelu. Nakatangila munkatshi mua batshimbakanyi, munkatshi mua bansongalume, nakamona nsongalume wakadi kayi ne lungenyi. Wakadi uhitshila mu musesu hehi ne masangu akadi nsubu wa mukashi, wakahuka ku nsubu kuandi, mu diba dia kafuanshimba, hakabuela diba, munkatshi mua butuku ne mîdima mikole. Monai! Mukashi udi ulua kumuakidila, muluate bivualu bia mukashi wa masandi, muikale ne mutshima wa budimu. Udi ne mutoyi, udi ne tshishiku; makasa andi kaena ashala mu nsubu muandi. Musangu eu udi mu misesu, musangu mukuabo udi mu bisatu, ne mu masangu onso udi umualamina. Hashishe, udi umukuata, udi uluangana nʼandi mishiku, muikale ne mpala wa dikamakama, udi umuambila ne, Nakadi ne bua kufuta milambu ya kuyuisha nʼai ditalala; lelu eu nakumana mitshihu yanyi. Nunku nakuluhuka bua kumuakidila, bua kukebakeba mpala webe, ne nakukumona. Nakulongolola bulalu buanyi ne bilulu bia kububuikila; bilulu bidi ne mihola bia ku buanda bua ku Ejipitu. Nakumiamina manananshi ha bulalu buanyi adi a mula, a alo, ne a cinnamone. Lua, tumanyangane mu dinanga tô ne ku dinda, tudisankishe mu dinanga. Bualu bua mulume wanyi kena ku nsubu, wakuya ku luendu lule. Wakuya ne tshibombi tshia argent, neahingane hatentama ngondo. Yeye udi umuitabushishe ne mei a bungi a kutekesha nʼau mutshima wandi, udi umuenzesha bua kuya nʼandi hamubombeye ne mei andi. Ha diba adi udi umulonda, bu mudi ngombe uya ku tshishihelu, bu mudi muntu muhote musuikibue bua kumukengeshabo, tô ne hamuasabo mukete musompoke mutshima wandi. Mbu mudi nyunyu ubuela mu buteyi lubilu, ne kena mumanye ne neajimishe muoyo wandi. Nunku nuenu, bana banyi ba balume, unvuai dî dianyi, nuteleje matshu ku mei a mukana muanyi. Mutshima webe kausesuki bua kuyila mu nshila yandi, kuhambuki bua kubuela mu nshila idiye wendela. Bua bantu bakutaheye bahone hanshi badi ba bungi; e, bonso bakushiheye badi musumba munene. Nsubu wandi udi nshila wa ku Muaha wa Bafue, udi uhueka tô ne ku nsubu ya lufu. Meji kaena ela dî diau, anyi? Dijingulula dia mianda kadiena dihandisha dî diadi, anyi? Wowo adi mimane ha mutu ha mikuna idi hehi ne nshila, ku masangu a nshila mene. Hehi ne bibuelelu bia musoko, kudi bantu babuelela mu bibi nkudiu ela dî diau ne, Nuenu bantu, ndi nnuela dî dianyi; ne dî dianyi didi kudi bukua bantu. Nuenu batshimbakanyi, nuyile mua kumanya budimu; nuenu bahote, nuyile mua kuikala ne mutshima wa kujingulula malu. Unvuai, bualu bua nengambe mianda minene; ne ku mishiku yanyi nekuhatuke mei makane. Bualu bua mukana muanyi nemuambe mei malelela; bubi budi tshintu tshidi tshintonda ku mishiku yanyi. Mei onso a mukana muanyi adi ambibua mu buakane; kakuena dî dia mashimi anyi dikonyangale munkatshi muau. Buonso buau adi mei a bushuwa kudi muntu udi ujingulula mianda, adi mei makane kudi badi baheta lungenyi. Nusungule diyisha dianyi, kanusungudi tshiamu tshia argent; nusungule lungenyi bu tshintu tshihite tshiamu tshia or wa mushinga mukole buimpe. Bua meji adi ahita mabue a bilenga bulengele; bintu bionso biudi mua kujinga kabiena mua kuelekeshibua nʼau. Meme, meji, ndi nvuisha budimu muaba wanyi wa kushikama, ndi mpeta lungenyi ne bukole bua kuhangidisha malu bimpe. Kutshina Yehowa nkuikala ne malu mabi lukuna. Kudisua, kudibandisha ne nshila wa malu mabi, mukana mudi muamba mei a tshitshu, ndi mbikina. Ndi mua kulesha bantu lungenyi, ndi meji a kukuatshisha nʼau bantu; ndi dijingulula dia mianda, ndi ne bukole. Bakelenge badi bakokesha bua bualu buanyi, ne bakokeshi badi balumbulula ne kulumbulula kuakane. Bua bualu buanyi bakokeshi badi bakokesha, ne badi ne butumbi badi bakokesha ne balumbuludi bonso ba ha buloba mene. Ndi munange badi bannanga, bonso badi bankeba ne lukunukunu nebansangane. Biuma ne butumbi bidi kundi, biuma mene bidi bishala musangu mule ne buakane bidi kundi. Mamuma anyi adi ahita or buimpe, mahite or yakulengeshabo mu ditanda buimpe; luhetu lundi mpeta ludi lutamba tshiamu tshia argent tshia mushinga mukole buimpe. Ndi ngenda mu nshila wa buakane, mu nshila ya kulumbulula kuakane, bua kuhesha badi bannanga buhianyi bua biuma, bua kûsha bibutshilu biabo tente. Yehowa wakanfuka ku tshibangidilu tshia bufuki buandi, ku mpala kua bintu biandi bionso, ku tshibangidilu mene. Nakajadikibua ku tshibangidilu tshia bidimu, ku tshibangidilu mene, diambedi buloba kabuyiku. Hakadi ndondo ya mai kayiyi mianze kuikalaku, nakaledibua; hakadi mishimi miule tente ne mai kayiyiku, nakadiku. Diambedi mikuna mile kayiyi mianze kujadikibua, ku mpala kua mikuna mihuekele, nakaledibua. Hakadiye kayi muanze kufuka buloba ne madimi abu, anyi luhuishi lua kumudilu lua ha buloba, nakadiku. Hakashimikeye bia mu diulu, nakadiku. Hakatekeye tshijengu tshibaluluke ha mutu ha ndondo wa mai manene, hakashindikeye matutu a mu diulu, hakavula mishimi ya mu ndondo wa mai manene mu miaba yai, hakahandileye mai manene mukalu wau, bua mai adimu kâsambuki mukenji wandi, hakasunguleye miaba ya bishimikidi bia buloba, ha diba adi nakadi hehi nʼandi bu muena mudimu wandi. Nakadi ne disanka ku dituku ku dituku, nakadi nnaya ku mpala kuandi matuku onso. Nakadi nsanka mu buloba buandi budi ne bantu bashikamamu, ne disanka dianyi divule diakadi bua kusomba ne bukua bantu. Nunku, bana banyi ba balume nungunvuile: bua badi balamata mu nshila yanyi badi ne disanka. Unvuai diyisha, nuikale ne meji, kanudihetudi nansha. Muntu udi ungunvuila, udi wimana ku bibi bianyi ku dituku ku dituku, udi windila ku bilua bia ku bibi bianyi, udi ne disanka. Bualu bua wansangana udi usangana muoyo, udi uheta diakalengele kudi Yehowa. Kadi wahanga kunsangana udi wenzela muoyo wandi bibi; bonso badi bankina badi bananga lufu. Meji akuasa nsubu wau, akusonga makunshi au muanda mutekete. Akushiha nyama yau, akusangisha nvinyo yau ne bintu bia muhuya muimpe; akulongolola mesa au kabidi. Akutuma mishikankunde idi yakuatshila mudimu, adi ela dî diau hadiu imana ha mikuna ya mu musoko ne, Muntu yonso udi utshimbakana abuele biandi munemu. Adi ambila muntu udi uhanga kuikala ne mutshima wa lungenyi ne, Luai, nudie bidia bianyi, nunue nyinyo inakusangisha. Lekelai kutshimbakana, nuikale ne muoyo, nuende mu nshila wa dijingulula dia mianda. Udi usamina mubuidi udi udiangatshila bihendu, udi ubela muntu mubi udi udifuishisha bundu. Kubedi mubuidi, bua yeye kakukinyi; biwabela muena meji, yeye neakunange. Uyishe muena meji, yeye neikale ne meji mahite a diambedi; uyishe muntu muakane, yeye neadiunde mu lungenyi. Ditshina dia Yehowa ntshibangidilu tshia meji, kumanya Wa Tshijila ndijingulula dia mianda. Bua kundi meme matuku ebe neavulangane, ne bidimu bia muoyo webe nebileheshibue. Biwikala ne meji, meji ebe nga kudikuatshisha nʼau; biwabuidiangana, mibuidi yebe neyikuandamukile. Mukashi muhote udi ne lutoyitoyi, udi muntu mujibale, kena mumanye bualu. Udi ushikama ku mbelu kua nsubu wandi, mu tshishikaminu tshia ha mikuna ya mu musoko, bua kubikila badi bahita mu nshila, badi benda balulame mu nshila yabo ne, Muntu yonso mujibale abuele biandi munemu. Udi wambila muntu udi kayi ne lungenyi ne, Mai miba adi mashemakane, bidia bibidi bidia mu musokoko bidi bilengele. Kadi muntu au kena mumanye ne, Bafue badimu; kena mumanye ne, Badi bamuendela buenyi badi mu ndondo wa Muaba wa Bafue. Nsumuinu ya Solomo. Muana mulume udi ne meji udi usankisha tatuʼandi, kadi muana muhote udi unyingalasha mutshima wa mamuʼandi. Biuma biheta ku bubi kabiena bilubuluka, kadi buakane budi buhandisha muntu ku lufu. Yehowa kena witabusha bua muntu muakane afue nzala, kadi udi uhidia lukuka lua bantu babi. Tshianza tshia mufuba tshidi tshimuvuisha muhele, kadi tshianza tshia muena disuminyina tshidi tshimuvuisha mubanji. Udi uhuola mu tshikondo tshia munya mukole udi muana mulume wa meji, kadi walala tulu mu tshikondo tshia kuhuola udi muana mulume udi udifuishisha bundu. Masanka adi ha mutu ha muntu muakane, kadi mukana mua bantu babi mudi musokoka mei a tshimbambila. Tshivulukidi tshia muntu muakane tshidi tshivudisha disanka, kadi dina dia bantu babi nedibole. Muena mutshima wa meji udi witabusha mikenji, kadi muena biakulakula neahone hanshi. Udi wenda ne mutshima mutoke kena ne ditshina, kadi udi ukonyangasha nshila yandi neamanyibue. Udi uvinya disu diandi udi mbisha kanyinganyinga, ne muena biakulakula neahone hanshi. Mukana mua muntu muakane mudi mushimi wa muoyo, kadi mukana mua bantu babi mudi musokoka mei a tshimbambila. Lukuna ludi lusonsola nvita, kadi dinanga didi dikanda ditomboka dionso. Badi basangana meji mukana mua muntu udi ujingulula mianda, kadi mulangala udiku bua kututa nʼau nyima wa muntu udi kayi ne lungenyi. Bena meji badi baditekela lungenyi, kadi tshiakulakula tshia muhote tshidi tshivuisha kubutuka ha buihi. Biuma bia mubanji bidi musoko wandi wa ngumbu; buhele bua bantu bahele budi kubutuka kuabo. Difutu dia mudimu wa muntu muakane didi dimuvuisha muoyo, luhetu ludi muntu mubi uheta ludi lumubuesha mu malu mabi. Udi utumikila diyisha udi mu nshila wa muoyo, kadi udi ubenga bantu bedi udi uhambuka mu nshila. Udi usokoka lukuna luandi udi ne mashimi mukana muandi, udi wamba mei a mukoso udi muhote. Havulangana mei, kushiha kua mikenji kudiku, kadi udi ukanda mishiku yandi udi ne meji. Ludimi lua muntu muakane ludi bu tshiamu tshia argent tshia mushinga mukole, mutshima wa muntu mubi udi wa mushinga mutekete. Mishiku ya muntu muakane idi idisha ba bungi, kadi badi bahote badi bafua bua dihanga dia lungenyi. Disankisha didi difuma kudi Yehowa didi divuisha bubanji, ne kena utenteka kanyinganyinga ha mutu hadi. Budi bu kunaya kudi muntu muhote bienzeye bibi, kadi meji adi disanka kudi mujinguludi wa mianda. Tshidi muntu mubi utshina netshilue kudiye, tshidi bantu bakane basue netshifidibue kudibo. Bu mudi nvunde uhita, mbu mudi muntu mubi ujimina kabidi, kadi muntu muakane udi mujalame tshiendelele. Bu mudi vinaigre ne nvuenvue ku menu, bu mudi muishi wa kahia mu mesu, mbu mudi muntu mufuba kudi badi bamutuma. Ditshina dia Yehowa didi dilehesha matuku a muoyo, kadi bidimu bia bantu babi nebikeleshibue. Ditekemena dia bantu bakane nedishihe ne disanka, kadi ditekemena dia bantu babi nedijimine. Nshila wa Yehowa udi musoko wa ngumbu kudi muntu muakane, kadi udi kubutuka kudi benji ba malu mabi. Muntu muakane kena umushibua kashidi, kadi bantu babi kabena bashikama ha buloba. Mukana mua muntu muakane mudi muhatula meji, kadi ludimi ludi luamba mei a kuhambuisha bantu nelukoshibue. Mishiku ya muntu muakane idi mimanye tshidi mua kusankisha bantu, kadi mukana mua bantu babi mudi ne tshitshu. Tshiamu tshidibo bidikisha nʼatshi bujitu tshia mashimi tshidi tshitondesha Yehowa, kadi bujitu budibo bidikisha biakane budi disanka diandi. Halua kudibandisha, bundu bulualua kabidi; kadi meji adi kudi bantu bahuekele. Butoke bua mutshima bua bantu bakane nebubalombole; kadi kuhambuka kua bedi ba tshitungu nekubabutule. Biuma kabiena bikuatshisha muntu mu dituku dia tshiji tshikole, kadi buakane budi bumuhandisha ku lufu. Buakane bua muena mutshima mutoke budi bululamisha nshila wandi, kadi muntu mubi neadishinde ku bubi buandi yeye. Buakane bua bantu bakane budi bu babandisha, kudi bedi ba tshitungu badi bakuatshibua ku lukuka luabo mene. Hafua muntu mubi, ditekemena diandi didi dijimina; ditekemena dia badi beyemena bukole didi dijimina. Badi babandisha muntu muakane mu dikenga, ne muntu mubi udi uhinganamu. Mufudi wa mei a Nzambi udi ubutula muena mutumba nʼandi ne mei andi, kadi bantu bakane nebahandishibue ku lungenyi. Bikala bantu bakane ne diakalengele, ba mu musoko badi basanka; hajimina bantu babi, badi bela mbila ya disanka. Bikala bantu bakane ne disanka, musoko udi mutumbishibue, kadi udi ubutudibua mukana mua bantu babi. Udi ulengulula muena mutumba nʼandi kena ne meji, kadi udi ujingulula mianda udi uhuwa biandi. Udi wendakana bu muena mukoso udi usokolola malu masokoka, kadi udi mua kueyemenyibua udi usokoka dî didibo bamuambila. Bikalaku kakuyi bulombodi, bantu badi badishinda hanshi; kadi mu tshisumbu tshinene tshia bafidi ba meji mudi luhandu. Muntu ndi weyeka muntu wa bende tshieya neatate, kadi udi ukina kueyela kua bieya udi ushala talalâ. Mukashi udi ne kalolo udi uheta butumbi, bena tshimbambila badi baheta bubanji. Muena luse udi wenzela muoyo wandi bimpe, kadi muena lukisu udi ukengesha mubidi wandi. Muntu mubi udi wangata difutu didi dimudinga, kadi udi ukuna buakane udi uheta difutu dia bushuwa. Udi mushindame mu buakane neahete muoyo, kadi ndi ulonda bubi neafue biandi. Badi ne mitshima ya tshitshu badi batondesha Yehowa, kadi badi bakane tshishiki mu bienzedi biabo badi bamusankisha. Manya bimpe ne, Muntu mubi kena uhanga kukengeshibua, kadi tunkanunuma tua bantu bakane neluhandishibue. Bu mudi lukanu lua or mu diulu dia ngulube mbu mudi mukashi wa mpala mulengele udi kayi ne lungenyi. Dijinga dia bantu bakane didi dibavuishila anu diakalengele, ditekemena dia bantu babi didi dibavuishila tshiji tshikole. Munga muntu udi wabanyina bantu bintu, kadi udi ubivudisha; mukuabo udi uhala bantu bidiye ne bua kubaha udi ukengela bintu. Muena mutshima wa diha neavuishibue mubanji; wamiamina bakuabo mai neamiaminyibue handi mai kabidi. Badi bela muntu udi udilaminyina manvua mulau, kadi badi basankisha udi wahana. Udi unanukila kukebela banga bantu diakalengele udi uheta luse, kadi udi ubakebela bubi, nebulue kudiye. Udi weyemena biuma biandi neahile hanshi, kadi bantu bakane nebadiunde bu mudi dianyi dibishi didiunda. Udi utatshisha ba mu nsubu muandi neahiane luhehele, muntu muhote neikale muhika wa muena mutshima wa meji. Mamuma adi muntu muakane akuama adi mutshi wa muoyo, udi ubandisha mioyo ya bakuabo udi ne meji. Tangila, nebaleshe muntu muakane difutu diandi ha buloba; nebatumbe kufuta muntu mubi ne muenji wa malu mabi! Udi unanga diyisha didi dimuludikila nshila udi unanga lungenyi, kadi udi ukina kubedibua kuandi udi mujibale. Muntu muimpe udi uheta diakalengele kudi Yehowa, kadi yeye udi uhisha muntu udi uhangidisha malu mabi. Muntu kena mushindame ku malu mabi, kadi muji wa bantu bakane kawena unyungishibua. Mukashi udi ne tshikadilu tshimpe udi tshifulu tshia butumbi kudi bayandi, kadi mukashi udi umufuisha bundu udi ubolesha mifuba yandi. Meji adi bakane bahangidisha adi malulame, kadi malu adi bantu babi bahangidisha adi a mashimi. Mei a bantu babi adi bu kualamina bua kumatshisha mashi hanshi, kadi mukana mua bantu bakane mudi muhandisha bantu. Badi babutula bantu babi; bantu babi kabenaku kabidi; kadi nsubu wa bantu bakane neajalame. Badi banyisha muntu muakane bu mudi meji andi, kadi badi bahetula muntu udi ne mutshima wa tshishiku. Muntu udi muhuekele, udi kayi mumanyibue, udi udikuatshila mudimu, udi ne diese ditamba dia muntu udi uditumbisha kadi udi ukengela bia kudia. Muntu muakane udi welela muoyo wa tshimuna tshiandi meji, kadi mitshima ya bantu babi idi ne lukisu. Udi udima budimi buandi neikale ne bia kudia bia bungi, kadi udi ulonda malu a hatuhu kena ne lungenyi. Bantu babi badi basamina muoyo ku bintu bidi benji ba malu mabi banyenga, kadi muji wa bantu bakane udi ukuama mamuma. Muntu mubi udi ukuatshika mu buteyi bua mei mabi a ku mishiku yandi, kadi muntu muakane udi uhanduka mu dikenga. Muntu udi uheta diakalengele ku mei makane a mukana muandi, ne bienzedi bidi bianza bia muntu bienza nebihingane kudiye. Nshila udi muhote wenda udi muimpe ku mesu kuandi, kadi udi unvua lungenyi ludibo bamulesha udi ne meji. Tshiji tshia muhote tshidi tshimanyibua lukasa, kadi muntu mudimuke udi ubuikila tshihendu. Udi wamba mei malelela udi umanyisha bulumbuluishi buakane bua tshilumbu, kadi mumanyi wa mashimi udi wamba mei adi abadinga. Muntu udi wamba mei a tshiakulakula adi ataha bu muele wa nvita, kadi ndimi ya bena meji idi isangasha bantu. Muntu udi wamba mei malelela neashaleku kashidi, kadi udi wamba mei a mashimi udiku anu katuha kihi. Mashimi adi mu mitshima ya badi bahangidisha malu mabi, kadi badi bajingila bantu ditalala badi ne disanka. Kakuena bualu bubi buakuata muntu muakane, kadi bantu babi badi bûle tente ne diakabi. Mishiku idi yamba mashimi idi itondesha Yehowa, kadi badi benza malu a bushuwa badi bamusankisha. Muntu mudimuke udi usokoka lungenyi luandi, kadi meji a bahote adi asokolola buhote buabo. Tshianza tshia muena disuminyina netshikokeshe, kadi nebenzeshe bafuba mudimu ku bukole. Lutatu mu mutshima wa muntu ludi lumunemeshila bujitu, kadi dî dia luse didi dimusangulusha. Muntu muakane udi ulombola muena mutumba nʼandi, kadi bienzedi bia bantu babi bidi bibahambuisha. Muntu mufuba kena ukuata tshidiye ulemba, kadi muena disuminyina neahete biuma bia mushinga mukole. Mu nshila wa buakane mudi muoyo, kadi mu nshila wa bubi mudi lufu. Muana mulume udi ne meji udi unvua diyisha dia tatuʼandi, kadi mubuidi kena uteleja mibelu. Muntu muimpe udi udia mamuma makane, kadi mitshima ya be dî ba bitungu idi misue tshimbambila. Udi ulama mukana muandi udi ulama muoyo wandi, kadi udi ubulula mukana muandi bitongatonga neabutuke. Mufuba udi usamina muoyo, kena ubiheta, kadi muoyo wa muena disuminyina udi ûshibua tente ne diakalengele. Muntu muakane udi ukina mei a mashimi, kadi muntu mubi udi wenza malu a bundu ne adi avuisha bihendu. Buakane budi bulama muntu udi ne mutshima mutoke, kadi bubi budi bubutula muenji wa malu mabi. Munga muntu udi udivuisha bu mubanji, kadi kena ne tshintu; munga udi udivuisha bu muhele, kadi udi ne biuma bia bungi. Biuma bia muntu bidi difutu dia kuhikula nʼadi muoyo wandi, kadi muhele kena unvua mei a badi bamufunyina. Munya wa bantu bakane udi utema ne disanka, kadi muinda wa bantu babi udi ujima. Kudisua kudi kuhatula anu matandu, kadi badi bitabusha mei a lungenyi badi ne meji. Biuma bidibo bangata ku malu a hatuhu bidi bikeha, kadi udi ubisangisha ku tshituha ku tshituha udi ubivudisha. Ditekemena didibo balayidila didi disamisha mutshima, kadi kukumbasha kua dijinga kudi bu mutshi wa muoyo. Udi ulengulula dî dia Nzambi udi udivuisha muena dibanza kudidi, kadi udi unemeka mukenji neahete disanka. Diyisha dia muena meji didi mushimi wa mai a muoyo, bua kuehuka mateyi a lufu. Dijingulula dimpe dia mianda didi dihetesha diakalengele, kadi nshila wa bahidi ba Nzambi udi bizakala-bizakala. Muntu mudimuke yonso udi wenza malu andi ne lungenyi, kadi muhote udi ulesha bantu buhote buandi. Messager mubi udi uhona mu dikenga, kadi muloho udi mua kueyemenyibua udi usangasha bantu. Buhele ne bundu bidi bilua kudi muntu udi ubenga diyisha, kadi udi udimuka hadibo bamubela udi mutumbishibue. Kukumbasha kua dijinga kudi kusankisha mutshima, kadi bahote badi bakina bua kumuka ku malu mabi. Udi wenda ne bena meji udi ulua muena meji, kadi udi ubuelakana ne bahote neakenge bua bualu ebu. Diakabi didi dilonda benji ba malu mabi, kadi diakalengele didi difutu dia bantu bakane. Muntu muimpe udi ushila bana ba bana bandi buhianyi, kadi biuma bia muenji wa malu mabimbitekela bantu bakane. Budimi budi muhele udima budi bukuama bia kudia bia bungi, kadi budi bujimina bua dikosa dibi dia nsambu. Udi kayi ukanda ne lukodi udi ne muanʼandi lukuna, kadi udi unanga muanʼandi udi unanukila kumukanda. Muntu muakane udi udia, udi ushikisha nzala yandi, kadi difu dia muntu mubi didi diunvua nzala. Meji adi asa nsubu wau, kadi buhote budi bumusasula ne bianza biabu mene. Udi wenda mu buakane buandi udi utshina Yehowa, kadi udi ukonyangasha nshila yandi udi umuhetula. Mukana mua muhote mudi mulangala wa diambu, kadi mishiku ya bena meji idi ibalama. Kudi kakuyi ngombe, tshidilu tshiai tshidi munda mutuhu, kadi bukole bua ngombe budi buhetesha bia kudia bivule. Mumonyi udi mua kueyemenyibua kena udinga nansha, kadi mumonyi udi udinga udi uhatula mei a mashimi. Mubuidi udi ukeba meji, kena waheta, kadi diheta dia lungenyi didi bualu butekete kudi mujinguludi wa mianda. Umuke biebe ku mesu kua muntu muhote; kuena uhetaku mei a lungenyi. Meji a muena budimu adi a kujingulula nshila wandi, kadi buhote bua bahote budi bubahambuisha. Bahote badi baseka bua malu mabi, kadi munkatshi mua bantu bakane mudi dinangangana. Mutshima wa muntu udi mumanye kanyinganyinga kau, ne kakuena muntu wa bende udi mua kujingulula disanka diau. Nebashimbule nsubu wa bantu babi, kadi ntenta wa bantu bakane neajalame. Nshila udiku udi mululame ku mesu kua muntu, kadi nshikidilu wandi udi lufu. Mu tuseku mene mutshima udi ne kanyinganyinga, ne nshikidilu wa disanka udi majia. Muntu udi usesuka neukute bintu bidiye uhuola mu nshila yandi, ne muntu muimpe neukute bintu bidi bienzedi biandi bimutuadila. Mutshimbakane udi witabusha dî dionso, kadi muena budimu udi utangila kudiye uya. Muena meji udi udimuka, udi wehuka ku bubi, kadi muhote udi ne dikamakama, udi udieyemena. Udi ukuata tshiji lubilu udi wenza malu mahote, kadi muena lungenyi udi ne lutulu. Batshimbakanyi badi bahiana buhote, kadi badi ne budimu badi ne lungenyi bu tshifulu tshiabo tshia butumbi. Bantu babi badi binamina bantu bimpe, ne benji ba malu mabi badi binama ku bibi bia bantu bakane. Muhele udi mukinyibue kudi muena mutumba nʼandi mene, kadi balunda ba muntu mubanji badi ba bungi. Udi uhetula muena mutumba nʼandi udi wenza bualu bubi, kadi udi ufuila bena dikenga luse udi ne disanka. Badi bahangidisha malu mabi kabena bahambuka mu nshila, anyi? Kadi badi bahangidisha malu mimpe badi basangana luse lujalame ne bulelela. Mudimu wonso udi uvudisha muntu bintu, kadi tshiakulakula tshia ku mishiku tshidi tshivuisha muntu muhele. Tshifulu tshia butumbi tshia bena meji tshidi biuma biabo, kadi tshifulu tshia bahote tshidi buhote buabo. Mumonyi udi wamba mei a bushuwa udi ubandisha mioyo, kadi wahatula mei a mashimi mukana udi udinga bena tshilumbu. Udi utshina Yehowa udi ne tshieyemenu tshikole, ne bana bandi nebikale ne tshinyemenu. Ditshina dia Yehowa didi mushimi wa mai a muoyo, bua kuehuka ku mateyi a lufu. Bantu bavule mbutumbi bua mukelenge, kadi dikeha dia bantu ndibutuka dia mukokeshi. Udi kayi ukuata tshiji lubilu udi ne lungenyi lule, kadi udi ne mutshima wa lukuluku udi ubandisha buhote. Mutshima muhole udi muoyo wa mubidi, kadi mutshiaudi udi ubolesha mifuba. Udi ukengesha muhele udi uhenda Mufuki wandi, kadi udi ulesha mukengedi wa bintu luse udi umutumbisha. Muntu mubi udi wedibua hanshi bua malu mabi andi, kadi muntu muakane udi ne tshinyemenu mu lufu luandi. Meji adi ashikama talalâ mu mutshima wa mujinguludi wa mianda, kadi kaena mumanyibue mu mitshima ya bahote. Buakane budi butuma tshisamba tshia bantu ku mpala, kadi malu mabi adi afuisha bantu bonso bundu. Muena mudimu udi ne meji udi uheta diakalengele kudi mukelenge wandi, kadi tshiji tshia mukelenge tshidi kudi muntu udi umufuisha bundu. Dî dia kalolo didi diandamuna tshiji, kadi dî dikole didi disonsola tshiji. Ludimi lua muena meji ludi luhatula lungenyi, kadi mukana mua bahote mudi muhatula buhote. Mesu a Yehowa adi kuonso, adi alama bantu babi ne bantu bimpe. Ludimi ludi luamba mei a kalolo ludi bu mutshi wa muoyo, kadi ludi luamba mei a buhidia ludi lunyanga mutshima. Muhote udi uhetula diyisha dia tatuʼandi, kadi udi unvuila bamubedi udi ne budimu. Mu nsubu wa muntu muakane mudi tshibutshilu tshinene, kadi luhetu lua bantu babi ludi lujimina. Mishiku ya bena meji idi itangalasha lungenyi, kadi mitshima ya bahote kayena yenza nunku. Mulambu udi bantu babi bafila udi utondesha Yehowa, kadi ditendelela dia bantu bakane didi dimusankisha. Bienzedi bia muntu mubi bidi bitondesha Yehowa, kadi yeye udi unanga muntu udi ulonda buakane. Nebakengeshe muntu udi uhambuka mu nshila bikole; udi ukina mibelu neafue biandi. Muaba wa Bafue ne wa Kubutuka bidi buashi ku mesu kua Yehowa, mitshima ya bantu idi mitambe kubululuka kudiye! Mubuidi kena musue bantu bamubele; kena uya kudi bena meji nansha. Mutshima wa disanka udi uvuisha mpala wa musangelu, kadi bikala mutshima ne kanyinganyinga, muoyo wa muntu udi utekela teketê. Mutshima wa mujinguludi wa mianda udi ukeba lungenyi, kadi mukana mua bahote mudi mudia buhote. Matuku onso a mukengi adi mabi, kadi muena mutshima wa disanka utu wikala ne bidia bia disanka matuku onso. Kuikala ne bintu bibalê ne ditshina dia Yehowa kudi kutamba kuikala ne biuma bia bungi ne ntatu buimpe. Kudia anu matamba nkayau hadi dinanga kudi kutamba kudia munyinyi wa ngombe wa manyi hadi lukuna buakane. Muntu udi ukuata tshiji lukasa udi usonsola nvita, kadi udi ukuata tshiji bitekete udi ukolesha matandu. Nshila wa mufuba udi ne luhangu lua mingonge ya meba, kadi nshila wa bantu bakane udi bu tshibebe tshibatamisha. Muana mulume wa meji udi usankisha tatuʼandi, kadi muntu muhote udi uhetula mamuʼandi. Buhote budi disanka kudi muntu udi kayi ne meji, kadi mujingulule wa mianda udi utangisha mpala wandi mu nshila mululame. Bikalaku kakuyi bulombodi bua meji, malu adi bantu bahangidisha adi ahumbishibua, kadi bikalaku tshisumbu tshia balombodi, malu â adi alubuluka. Disanka didi dikuata muntu bua dî didi mukana muandi muandamune; monai mudi dî diamba mu tshikondo tshiakane mudidi diakane! Kudi muena meji nshila wa muoyo udi kulu, bua yeye ehuke ku Muaba wa Bafue udi hanshi. Yehowa udi usasula nsubu wa badi badisue, kadi udi ujadika mukalu wa buloba bua mukashi wa mu lufuila. Meji a malu mabi adi atondesha Yehowa, kadi mei a disanka adi makane kudiye. Muntu udi ne lukuka lua luhetu udi ukengesha ba mu nsubu muandi, kadi udi ukina mbueshilu neikale ne muoyo. Mutshima wa muntu muakane udi welangana meji a bualu budiye mua kukudimuna, kadi mukana mua bantu babi mudi muhatula malu mabi. Yehowa udi kule ne bantu babi, kadi udi unvua kulomba kua bantu bakane. Ntangidilu wa musangelu udi usankisha mutshima, lumu luimpe ludi lusangasha mifuba. Udi ne matshu adi ateleja mibelu ya muoyo neashikame munkatshi mua bena meji. Udi ubenga diyisha udi uhetula muoyo wandi, kadi udi unvua dî dia bamubedi udi uheta lungenyi. Ditshina dia Yehowa didi diyisha dia meji, ne kudihuekesha kudi kuya ku mpala kua butumbi. Malu adi bantu bahangidisha mu mitshima adi afuma kudibo, kadi dî didi ludimi lukudimuna didi difuma kudi Yehowa. Nshila yonso idi muntu wendela idi mitoke ku mesu kuandi, kadi Yehowa udi uteta mioyo ya bantu. Teka mudimu webe mu bianza bia Yehowa, ne malu awahangidisha nealubuluke. Yehowa wakafuka tshintu tshionso ne kafukila katshi; e, wakalongoluela muntu mubi dituku dia dikenga. Muntu yonso udi ne kudisua mu mutshima udi utondesha Yehowa, manya bimpe ne, Kena uhanga kukengeshibua. Luse lujalame ne lulamatu lua ku bushuwa bidi bibuikila malu mabi, ne bua ditshina diabo dia Yehowa bantu badi bahanduka mu dikenga. Bikala bienzedi bia muntu bisankishe Yehowa, yeye udi umulengeshisha ne bena lukuna bandi. Kuikala ne bintu bibale ne buakane kudi kuhita kuikala ne luhetu luvule ne kulumbulula kubi buimpe. Mutshima wa muntu udi uhangidisha bua kuya ku luendu, kadi Yehowa udi ulombola makasa andi. Dikosa dia bualu dia tshijila didi ku mishiku ya mukelenge; mukana muandi kamuena mushiha mikenji hakoseye nsambu. Tshiamu ne malonga bidi biteta bujitu biakane mbia Yehowa; mabulu onso a mu tshibombi mbintu biakuenzeye. Bienza bakelenge malu mabi, badi banyanguke, bualu bua nkuasa wa bukelenge udi ujadikibua ku buakane. Mishiku idi yamba mei makane idi isankisha bakelenge, badi bananga muntu udi wamba dî diakane. Tshiji tshia mukelenge tshidi messager wa lufu, muntu udi ne meji neatshitalashe. Mpala wa musangelu wa mukelenge udi uvuisha muoyo, diakalengele didi muntu uheta kudiye didi bu matutu adi avuisha nvula mishishe. Mona mudi diheta dia meji dihita tshiamu tshia or bulengele! Bulelela, kuheta dijingulula dia mianda kudi kuhita kusungula kua tshiamu tshia argent bulengele. Nshila wa bantu bakane nkuehuka ku malu mabi, muntu udi ulama muoyo wandi udi utangile kudiye uya. Kudisua kudi kuya ku mpala kua dibutuka, mutshima wa kudibandisha udi uya ku mpala kua dihona. Kuikala ne mutshima muhuekele diatshimue ne badihuekeshi kudi kutamba kuabanyangana bintu binyenga mu nvita ne badisu buimpe. Udi unvua dî ne ntema neahete diakalengele; udi weyemena Yehowa neikale ne disanka. Badi babikila muena meji ne, Mujinguludi wa mianda; bulengele bua mei a ku mishiku budi buitabushisha bantu. Lungenyi ludi bu mushimi wa mai a muoyo kudi muntu udi nʼalu, dikengesha dia bahote mbuhote buabo. Mutshima wa muena meji udi uyisha mukana muandi lungenyi, udi uhetamu bukole bua kuitabushisha bantu. Mei malengele adi bu dikatshi dia buitshi, adi mashemakane ku muoyo ne adi asangulusha mubidi. Nshila udiku udi mululame ku mesu kua muntu, kadi nshikidilu wandi udi lufu. Muoyo wa muena mudimu udi usamina bia kudia udi umuenzesha mudimu, bualu bua mukana muandi mudi mumuenzesha bua kukuata mudimu. Muntu mulembakana udi umbuila bantu dijimba dia dikenga; mei a ku mishiku yandi adi bu kahia kadi kashidisha. Muena mashimi udi utudisha matandu; muena mukoso udi uhandulula balunda banangangane. Muena tshimbambila udi uteya muena mutumba nʼandi, udi umulombola mu nshila udi kayi muimpe. Udi ubuikila mesu andi bua kuhangidisha malu a bunsonge, udi ubuta mishiku yandi, wakumana kuvuisha malu mabi. Nsuki mitoke tô idi tshifulu tshia butumbi, nebatshihete mu nshila wa buakane. Udi kayi ukuata tshiji lubilu udi uhita muena bukitu buimpe, udi ukokesha muoyo wandi udi uhita munyengi wa musoko kutumba. Badi belela nshobo ha bibelu, kadi dikosa dionso dia bualu didi difuma kudi Yehowa. Kuikala ne diampa diume ne ditalala nkutamba kuikala ne nsubu mule tente ne munyinyi ne diyoyo buimpe. Muhika udi wenza mudimu wandi ne meji neakokeshe muana mulume wa mu tshiota udi wenza mianda ya bundu, neikale ne tshituha tshia buhianyi munkatshi mua bana ba mu tshiota. Luesu ludiku lua kulengesha tshiamu tshia argent, tshikutu tshidiku tshia kulengeshila tshiamu tshia or; kadi Yehowa udi uteta mitshima. Muenji wa malu mabi udi uteleja matshu andi ku mishiku idi ihatula mei mabi; muena mashimi udi uteleja matshu andi ku ludimi ludi luamba mei adi ataha bantu. Muntu udi useka muhele udi uhenda Mufuki wandi, udi usanka bua dikenga dia mukuabo kena uhanga kukengeshibua. Bikulu badi tshifulu tshia butumbi tshia bantu banunu; butumbi bua bana mbatatu babo. Mei a buneme kaena akumbana kudi muhote; mishiku idi yamba mashimi kayena itamba kukumbana muntu muneme. Diha didi bu dibue dia mushinga mukole ku mesu kua muenʼadi; kuonso kudiye utangisha mpala wandi udi ne diakalengele. Udi ubuikidila dihanga dia muntu udi ukeba dinanga, kadi udi wambulula mianda udi uhandulula balunda banangangane. Dî dia mibelu didi dibuela mu mutshima wa muena lungenyi didi dihita mikumu lukama hamʼbidi ha muhote. Muntu mubi udi ukeba kutomboka, nunku nebamutumine messager wa lukisu bua kumukuata. Kusangakana ne nkashama udi ne bana bandi banyengibue kudiye kudi kutamba kusangakana ne muhote mu buhote buandi buimpe. Bi uhingisha muntu malu mabi ku malu mimpe, malu mabi kaena umuka mu nsubu muandi. Tshibangidilu tshia matandu tshidi bu kuhatuka kua mai; nunku diambedi matandu kâyi manze kuhatuka, lekela difuilangana. Udi ubingisha muntu mubi ne udi uhisha muntu muakane, bubidi buabo badi batondesha Yehowa. Bua tshinyi muhote udi ne mushinga mu tshianza tshiandi bua kusumba nʼau meji, hadiye kayi ujingulula mianda? Mulunda utu wananga mu bikondo bionso, muanʼetu utu walesha bulela mu tshikondo tshia dikenga. Muntu udi kayi ne lungenyi udi uhunga tshihungidi, udi weyeka tshieya ku mesu kua muena mutumba nʼandi. Udi unanga bubi udi unanga matandu, udi ubisha tshibi tshiandi kulu udi ukeba dibutuka. Udi ne mutshima wa mashimi kena uheta diakalengele, udi ne ludimi ludi luamba mei a buhidia ludi bibuela mu dikenga. Udi ulela muana muhote udi ne kanyinganyinga; tatu wa muhote kena ne disanka. Mutshima wa disanka udi buanga hudi busangasha bimpe, kadi muoyo wa muntu udi ne majia udi inuisha mifuba. Muntu mubi udi witabusha mbueshilu misokoka muinshi mua tshivualu bua kuhumbisha kulumbulula kuakane. Mujinguludi wa mianda udi utangisha mpala wandi ku meji, kadi mesu a muhote adi akenzakana tô ne kunfudilu kua buloba. Muana mulume muhote udi uvuisha tatuʼandi kanyinganyinga, udi bu tshintu tshia bululu kudi mamu wakamulela. Kembimpe bua kufutshisha muntu muakane tshibau, anyi bua kukuma bantu baneme bua buakane buabo. Udi ukanda mei andi udi ne lungenyi, udi ne muoyo muhole udi mujinguludi wa mianda. Muhote mene, biahuweye biandi, udi mubadibue bu muena meji; habuteye mishiku yandi, badi bamubala bu muena budimu. Udi udihandulula kudi banga bantu udi ukeba anu bualu budiye musue, ne udi uhatula mei a tshiji tshikole bua kuhidia meji makane. Muntu muhote kena ne disanka mu dijingulula dia mianda, kadi udi usanka anu hiasokolola mutshima wandi meji adiye nʼau. Halua muntu mubi, dihetu didi dilua kabidi; bihendu ne bundu bidi bilua diatshimue. Mei a mukana mua muntu adi bu mai adi ne ndondo; mpokolo wa meji udi kasulu ka mai kadi kahueka. Kembimpe bua kunemeka muntu mubi, anyi bua kukonyangasha kulumbulula kua bantu bakane. Mishiku ya muhote idi ivuisha matandu; mukana muandi mudi mumubikidila mitutu. Mukana mua muhote mudi ku butuka kuandi, mishiku yandi idi buteyi ku muoyo wandi. Mei a umena bunsonge adi bu tuhesa tua bia kudia bilengele; adi abuela tô ne munda mua mubidi, Muntu udi ulenguluka mu mudimu wandi udi muanʼabo ne mubutudi. Dina dia Yehowa didi tshibumba tshikole; mundi muakane udi unyemenaku, udi uhanduka. Biuma bia mundi mubanji bidi musoko wandi wa ngumbu, bidi bu lumbu lule mu meji andi. Mutshima wa kudisua udi uya ku mpala kua dibutuka; kudihuekesha kudi kuya ku mpala kua butumbi. Biakudimuma mundi dî kayi muanze kuteleja matshu diambedi, bualu ebu budi bulua buhote ne bundu kudiye. Muoyo wa mundi neumukoleshe mu butekete buandi, kadi udi mua kujula mutshima wa kanyinganyinga kulu nganyi? Mutshima wa mujinguludi wa mianda udi uheta lungenyi; matshu a bena meji adi ukeba lungenyi. Kuha kua mundi kudi kumuhetesha muaba, kudi kumuvuisha ku mpala kua bantu banene. Udi udianjila kuamha tshilumbu tshiandi udi umueneka bu mubinga; kadi halua muena tshilumbu nʼandi, udi ukononona buluba buandi. Kuela kua nshobo kudi kukosesha matandu, kudi kukosa tshilumbu tshidi tshihandulula bantu bakole. Kulengesha ne muanʼabo wakenzelabo bibi kudi kuhita kunyenga kua musoko wa ngumbu bukole; matandu adi bu biamu bidibo bakanga nʼabi bibi bia mbalasa mukole. Muntu udi ukuta mamuma adi mukana muandi mukuama, udi ukuta bintu bidi mishiku yandi ikuama. Lufu ne muoyo bidi mu bukokeshi bua ludimi; badi bananga kuakula nʼalu nebadie mamuma adilu lukuama. Udi uheta mukashi udi uheta disanka, ndiakalengele didiye uheta kudi Yehowa. Muntu muhele udi wakula mei a disengelela, kadi muntu mubanji udi ukudimuna ne mei makole. Muntu udi ne balunda ba bungi udi udibutuisba, kadi kudi mulunda udi uhita muanʼabo ne muntu kumulamata. Muntu muhele udi ne mutshima mutoke udi uhita udi ne tshishiku ne buhote buimpe. Kembimpe bua mundi kuhanga lungenyi; udi wenda lukasa lukasa udi uhambuka mu nshila. Buhote bua muntu budi bunyanga nshila wandi; mutshima wandi udi ukuatshila Yehowa tshiji. Biuma bidi bivudishila muntu balunda ba bungi, kadi mulunda wa muhele udi uhanduluka kudiye. Mumonyi udi ne mashimi kena uhanga kukengeshibua; udi uhatula mei a mashimi mukana muandi kena uhanduka. Ba bungi badi bakeba diakalengele kudi muntu udi tshihahai; muntu yonso udi mulunda wa muntu udi uhangana. Bana babo ne muhele bonso badi nʼandi lukuna; mona mudi balunda bandi batamba bana babo kumuka kudiye! Udi ubasengelela ne mei andi, kadi bakumana kuya. Udi uheta meji udi unanga muoyo wandi; udi ulama dijingulula dia mianda neahete diakalengele. Mumonyi udi ne mashimi kena uhanga kukengeshibua; udi uhatula mei a mashimi mukana muandi neajimine. Kuikala ne bintu bimpe bia bungi kakuena kukumbanyina muhote; bidi bitamba bubi bua muhika kukokesha bakokeshi. Lungenyi luimpe lua muntu ludi lukanda tshiji, ne butumbi buandi nkulekela muntu bubi. Tshiji tshia mukelenge tshidi bu muadi wa nyama wa ntambue, kadi diakalengele diandi didi bu mume ha mashinde. Muana muhote udi ubutuisha tatuʼandi; matandu a mukashi mubake adi bu mai adi kâyi alekela kumata. Nsubu ne biuma bidi buhianyi budi bufuma kudi batatu, kadi mukashi mubake wa meji udi diha didi difuma kudi Yehowa. Bufuba budi buladika muntu tulu tukole, ne muena bukata neikale ne nzala. Udi utumikila mukenji udi ulama muoyo wandi; udi uhetula nshila idiye wendela neafue biandi. Udi ufuila muhele luse udi usombesha Yehowa bintu; yeye neamuenzele bimpe ku buimpe buakamuenzeleye. Kengesha muanʼebe bua kumuyisha, bualu bua ditekemena ditshidiku; kumuleshi luse bua kalulu dibutuka diandi. Muena tshiji tshikole neatule tshibau; bualu bua biwamuhandisha ku mpala, neumuenzele nunku tshiakabidi. Unvua meji adibo bakuha, witabusha diyisha, bua wewe wikale ne meji mu matuku alualua. Mutshima wa muntu udi ne malu a bungi adiye uhangidisha, kadi malu adi Yehowa Usungula neajadikibue. Tshidi tshivuisha muntu dinanga kudi bakuabo nduse luandi; muntu muhele udi uhita muena mashimi buimpe. Ditshina dia Yehowa didi dilombola muntu ku muoyo; udi nʼadi neashikame talalâ, dikenga kadiena dimukuata. Mufuba udi ubuesha tshianza tshiandi munda mua dilonga, kadi kena ne bukole bua kutshihingisha mukana muandi kabidi. Kuma mubuidi, nunku mutshimbakanyi neadimuke; ubele mujinguludi wa mianda, yeye neahete lungenyi. Muntu udi unyanga biuma bia tatuʼandi, udi wihata mamuʼandi, udi muana mulume udi ubafuisha bundu ne udi ubavuishisha bihendu. Muanʼanyi, lekela kunvua diyisha didi dikuhambuisha ku mei a lungenyi. Mumonyi wa hatuhu udi uhetula kulumbulula kuakane; mukana mua bantu babi mudi mumina malu a tshishiku. Bakulongoluela babuidi makengesha, bakulongoluela nyima ya bahote mitutu. Nyinyo udi museki wa bantu, maluvu makole adi bu muena diyoyo; muntu yonso udi ubikuatshika kena ne meji. Buowa budi mukelenge utshinyisha nʼabu bantu budi bu muadi wa nyama wa ntambue; udi umufuisha tshiji udi udienzela muoyo wandi bibi. Butumbi budi kudi muntu biashilanganeye ne matandu, kadi muhote yonso neahatule mei a kutandangana nʼau. Muhote kena udima budimi tshikondo tshidi mashika a banga; nunku hakebeye bia kudia mu tshikondo tshia kunowa, kena ne tshintu. Meji adi muntu uhangidisha mu mutshima adi bu mai male, kadi mujinguludi wa mianda neâhatule. Ba bungi badi badiamba ne, Tudi bena luse; kadi udi mua kusangana muntu udi mua kueyemenyibua nganyi? Muntu muakane udi wenda mu buakane bua mutshima wandi,— bana bandi badi bamulonda badi bavudishibue disanka! Mukelenge udi ushikama mu nkuasa wa bukelenge ukosamu bilumbu udi usungulula malu mabi onso ne mesu andi. Muntu kai udi mua kuamba ne, Nakuvuisha mutshima wanyi mutoke, ndi mulengeshibue ku bubi buanyi? Majitu a mishindu ibidi ne bihiminu bia mishindu ibidi, bubidi buabi bidi bitondesha Yehowa. Muana mene udi umuenesha tshikadilu tshiandi ku bienzedi biandi, ne bikala mianda idiye wenza milengele ne miakane. Ditshu didi diunvua ne disu didi ditangila,— Yehowa wakafuka bubidi buabi. Kunangi tulu, bua kubuedi mu buhele; tabala mesu ebe, newikale ne bia kudia bikumbane. Musumbi udi wamba ne, Tshidi tshibi, tshidi tshibi; kadi hayeye, udi utshianyisha. Or ne mabue a bungi a mushinga mukole bidiku; kadi mishiku idi ne mei a lungenyi idi tshianga tshia mushinga mukole. Angata tshivualu tshia muntu udi mueyeke muenyi tshieya; ukuate udi mueyeke ba tshisamba tshia bende tshieya lukola. Bidia bidi muntu uheta ku kudinga kuandi bidi bishemakana mukana muandi, kadi ku nyima mukana muandi nemûshibue tente ne tusoka. Malu adi bantu bahangidisha adi ajadikibua ku kuhunga kua dî; hakuhabo lungenyi lua kuenza, luangana nvita. Udi wendakana wamba buambamba udi usokolola malu masokoka; nunku kubuelakana ne muntu udi wakula biakulakula. Biela muntu tatuʼandi anyi mamuʼandi mulau, nebajime muinda wandi mu midima mikole. Buhianyi budi muntu uheta lubilu ku tshibangidilu kabuena buvudishibua disanka kunshikidilu kuabu. Kuambi ne, Nempingishe bubi ku bubi; windile Yehowa, yeye neakusungile. Majitu a mishindu ibidi adi atondesha Yehowa; tshiamu tshia kuidikisha nʼatshi bujitu tshidi tshidinga katshiena tshimpe kabidi. Biendedi bia muntu bidi biendeshibua kudi Yehowa; nunku muntu neamanye mua kujingulula nshila wandi munyi? Budi buteyi kudi muntu bua kuambeye lukasa ne, Tshidi tshia tshijila, ne bua kuelanganeye meji anu ku nyima bua kuditshiha kuandi. Mukelenge udi ne meji udi usungula bantu babi, udi ubungulusha dikalu dia kushihula nʼadi hamʼbidi habo. Nyuma wa muntu udi muinda wa Yehowa, ukebakebe malu onso adi munda muandi. Luse lujalame ne lulamatu lua bushuwa bidi bilama mukelenge; nkuasa wandi wa bukelenge udi mushindame ku luse lujalame. Butumbi bua bansongalume mbukole buabo, bulengele bua bantu banunu budi mutu mutoke tô. Mitutu idi itaha mputa idi ilengesha muntu ku malu mabi; mikumu idi ilengesha malu adi munda muandi. Mutshima wa mukelenge mu bianza bia Yehowa udi bu misulu ya mai, yeye udi ûtuma kuonso kudiye musue. Nshila yonso udi muntu wendela udi muakane ku mesu kuandi, kadi Yehowa udi uteta mitshima. Kuenza malu makane ne kukosa nsambu biakane bidi bihita kufila kua nyama mishiha kusankisha Yehowa. Mesu adi ne dihetu ne mutshima udi udibandisha bidi disanka dia bantu babi, bidi malu mabi. Meji adi muena mutshima wa mudimu uhangidisha adi amuvudishila luhetu luvule, kadi muntu yonso udi ne lukuluku neahete anu buhele. Kuheta tshibutshilu ku ludimi lua mashimi kudi bu dibungi didi luhehele lumuangalasha, kudi buteyi bua lufu kabidi. Tshimbambila tshia bantu babi netshibumusheku, bualu bua badi babenga kulumbulula bilumbu biakane. Nshila wa muntu mutambe bubi udi mukonyangale, kadi bienzedi bia udi ne mutshima mutoke bidi biakane. Kushikama ha ditumba dia ha mutu ha nsubu kudi kutamba kushikama mu mbalasa hohamue ne mukashi udi ne mutoyi buimpe. Mutshima wa muntu mubi udi musue kuenzela bantu bibi; muena mutumba nʼandi kena usangana luse ku mesu kuandi. Hakengeshabo mubuidi, mutshimbakanyi udi uheta meji; hayishaho muena meji, yeye udi uheta lungenyi. Muntu muakane udi umona ba mu nsubu wa muntu mubi bu mudibo; bantu babi badi bedibua hanshi tô ne habutukabo. Udi ujibika mu matshu andi bua kaunvu muadi wa muhele nêle biandi dî bikole, kabena bamunvuila nansha. Diha didi muntu ufila mu musokoko didi diholesha tshiji; mbueshilu misokoko muinshi mua tshibalu idi iholesha tshiji tshikole. Kulumbulula biakane kudi disanka kudi muntu muakane, kadi kudi kukuatshisha benji ba malu mabi buowa. Muntu udi uhambuka mu nshila wa dijingulula dia mianda neashikame mu disangisha dia bantu bafue. Udi unanga disanka neikale muhele; udi unanga nvinyo ne manyi kena wikala mubanji. Muntu mubi udi tshia kuhikula nʼatshi muntu muakane; muena tshitungu udi ubuela mu muaba wakadi bantu bakane. Kushikama mu tshihela tshia lusenga kudi kutamba kushikama mu nsubu ne mukashi, muena matandu ne munyengabadi buimpe. Mu nsubu wa muena meji mudi biuma bia mushinga mukole ne manyi kabidi, kadi muntu muhote udi ubimina. Udi ulonda buakane ne luse lujalame udi uheta muoyo, buakane ne butumbi. Muena meji udi ubanda mu mu soko wa bena bukitu, udi ushimbula ngumbu ya nvita idibo beyemena. Udi ulama mukana muandi ne ludimi luandi udi ulama muoyo wandi bua kaubuedi mu makenga. Mubuidi ndina didibo binyika muntu udi ne dihetu ne didibandisha, udi wenza malu andi ne kudisua kuhite bukole. Disua dia mufuba didi dimushiha, bualu bua bianza biandi bidi bibenga kukuata mudimu. Muntu mubi udi usamina bintu muoyo dinda tô ne ku dilolo, kadi muntu muakane udi uhesha bantu bintu, kena ubahalabi nansha. Mulambu udi bantu babi bafila udi utondesha Yehowa; mona mudiu utamba kumutondesha haluabo nʼau ne mitshima idi ihangidisha malu mabi! Mumonyi udi ne mashimi nea jimine, kadi muntu udi unvua neambe dî didi dishala kashidi. Muntu mubi udi unyenga mpala wandi, kadi muntu muakane udi welangana meji bua nshila idiye wendela. Kakuena meji, anyi dijingulula dia mianda, anyi kuhunga kua mei, bidi mua kuhita Yehowa bukole. Badi basakila kabalu bintu bia nvita difuku dia kuluangana, kadi luhandu lulualua kudi Yehowa. Kuikala ne lumu luimpe kudi kuhita kuikala ne bubanji bua bungi buakane, ne kuheta dianyisha kudi kuhita kuheta kua tshiamu tshia argent ne tshia or buimpe. Babanji ne bahele badi basangila hamue; Yehowa udi mufuki wa buonso buabo. Muntu mudimuke udi utangila dikenga diamba kumukuata, udi usokoma; kadi batshimbakanyi badi bahitaku, badi bakengeshibua. Difutu dia kudihuekesha ne dia ditshina dietu dia Yehowa didi bubanji, butumbi ne muoyo. Mingonge ya meba ne mateyi bidi mu nshila wa muena tshitshu; udi ulama muoyo wandi neabiehuke kule kudibi. Yisha muana mu nshila udiye ne bua kuendela; nunku hakoleye, kena umukamu. Mubanji udi ukokesha bahele; musombi wa bintu udi muhika wa mumusomheshi. Udi ukuna malu mabi neahuole dikenga, mulangala wa tshiji tshiandi tshikole neajimine. Udi ufuila bakuabo luse neavudishibue disanka, bualu bua udi wabanyangana bia kudia biandi ne bahele. Biwihata mubuidi, difuilangana nediumuke; matandu ne bihendu nebihuwe. Udi munange butoke bua mu tshima, udi ne mei a luse ku mishiku yandi, mukelenge neikale mulunda wandi. Mesu a Yehowa adi alama lungenyi, kadi yeye udi utuisha muena tshitungu ku mei. Mufuba udi wamba ne, Nyama wa ntambue udi ha mbelu! Nenshihibue mu misesu! Mukana mua bakashi ba bende mudi dijimba dile; muntu udi Yehowa mukuatshile tshiji neahonemu. Buhote budi busuikibue mu mutshima wa muana; kadi lukodi nelubûmushe kudiye. Udi ukengesha muhele hua kuvudisha luhetu luandi, anyi muntu udi uhesha mubanji bintu, neabuele anu mu buhele. Teleja matshu ebe, unvue mei a bena meji, teka mutshima webe ku mei andi nkumanyisha. Bualu bua newikale ne disanka, biwâlama munda muebe, biajadikibuau ku mishiku yebe. Bua dieyemena diebe dikale mu Yehowa, nakukumanyishau lelu eu, kûdi wewe mene. Tshiena muanze kukuindila mei a kukudimusha nʼau ne a kukuyisha nʼau lungenyi, bua kukujadikila mei a bushuwa, bua wewe kuhingana ne mei a hushuwa kudi bantu hadi bakutuma, anyi? Kunyengi bintu bia muhele bualu bua buhele buandi, kukengeshi muhuekele mu tshilumbuluidi tshia ku tshibuelelu tshia musoko. Bualu bua Yehowa neabalumbuluile tshilumbu tshiabo, neanyenge mioyo ya badi banyenga bintu biabo. Kukuatshi bulunda ne muntu utu wakuata tshiji, kuendi diatshimue ne muena tshiji tshikole; bua wewe kuibididi mu nshila idiye wenda, bua wewe kukuatshishi muoyo webe mu buteyi. Kuikadi munkatshi mua badi batutangana bianza bua kuhunga dî, anyi badi beyeka bantu bieya ku mabanza. Bualu bua biwikala kuyi ne tshintu tshia kumufuta nʼatshi, nebumushe bulalu buebe bûdi uladila tshinyi? Kumushi mukalu wa kale wakajadikabo kudi batatu bebe. Udi utangila muntu udi wenza mudimu wandi ne lungenyi, anyi? Yeye neimane ku mpala kua bakelenge, kena wimana ku mpala kua bantu bahuekele. Hawashikama bua kudia bidia ne mukokeshi, welangane meji bimpe bua muntu udi ku mpala kuebe; uteke kele ku mununu webe, biwikala muena mudi. Kusaminyi muoyo ku bidia biandi bishemakane, bualu bua bidi bikudinga. Kudihangishi ne mudimu mukole bua kudivuisha mubanji, lekela kulonda meji au. Neutshike mesu ebe ku biuma, biobi bimane kujimina, anyi? Bua biuma bidi bidiasa mahuahua, bitua mulelu bu nyunyu bua kuya mulu. Kudi bidia bia muena tshitu; kusaminyi muoyo ku bidia biandi bishemakane. Bualu bua bu mudiye welangana meji munda muandi, ke mudiye. Yeye udi ukuambila ne, Udie biebe, unue biebe; kadi mutshima wandi kawena kûdi. Neuluke biebe bihesa bia bidia biwakudia; mei ebe mimpe neajimine. Kuambi dî mu matshu a muhote, bualu bua neahetule meji a mei ebe. Kumushi mukalu wa kale; kubuedi mu madimi a bana ba nshiya. Bualu bua Musungidi wabo udi mukole; yeye neabakuile tshilumbu tshiabo ku mesu kuebe. Teka mutshima webe ku diyisha, uteleshe matshu ebe ku mei a lungenyi. Kubengi bua kubela muana; biwamututa ne lukodi, kena ufua nansha. Umutute ne lukodi bua kusungila muoyo wandi mu Muaba wa Bafue. Muanʼanyi, bikala mutshima webe ne meji, mutshima wanyi mene newikale ne disanka. Bulelela, mutshima wanyi neusanke hamba mishiku yebe mei makane. Mutshima webe kaukuatshidi bantu babi mukau, kadi wikale biau ne ditshina dia Yehowa dinda tô ne ku dilolo. Bua bulelela, malu makuabo nealue kûdi, ne ditekemena diebe kadiena dijimina. Unvua biebe, muanʼanyi, wikale ne meji; lombola mutshima webe mu nshila mululame. Kuikadi munkatshi mua hanu ba maluvu, anyi munkatshi mua bena lumpukusu. Bualu bua mukuatshiki wa maluvu ne muena lumpukusi nebabuele mu buhele; tulu netuluatshishe muntu bi lulu bisunsuke. Unvua mei a tatu webe waka kulela; kuhetudi mamu webe halueye muntu mununu. Sumba bushuwa, kubuhanyi nansha; sumba meji, diyisha ne dijingu tula dia mianda. Tatu wa muntu muakane neatambe kusanka; udi ulela muana wa meji neasanke bualu buandi. Tatuʼebe ne mamuʼebe bikale ne disanka, mamu wakakuela ikale ne disanka. Muanʼanyi, Umpe mutshima webe, mesu ebe atangile nshila yanyi. Bualu bua mukashi wa ndumba udi tshina tshile, ne mukashi wa bende udi dijimba dibumbakane. Yeye udi walamina muntu bu munyengi; udi uvudisha bahambuki munkatshi mua bantu. Udi udila ne, Ndi ne mulau nganyi? Udi ne kanyinganyinga nganyi? Udi ne matandu nganyi? Udi utontolola nganyi? Udi ne mputa hamʼbidi kayi wenza bualu nganyi? Udi ne mesu makunze-kunzû nganyi? Mbadi bashikama ku maluvu musangu mule; mbadi baya kuteta maluvu masambakashe. Kutangidi maluvu a nvinyo hatshidiu makunze, hadiu engelela munda mua luhanza, hadiu ahueka bitekete ha muminu. Kunshikidilu adi asuma bu nyoka, adi asuma bu nyoka wa mbanvu. Mesu ebe neamone bintu bidi bikukemesha, mutshima webe neuhatule mei a buhote. Bulelela, wewe newikale bu muntu udi ulala munkatshi mua mai manene, newikale bu muntu udi ulala ha mutu ha mutshi udibo basuikila tshilulu tshia buatu. Newambe ne, Bakunkuma, kadi tshiakunvua dikenga; bakukuta, kadi tshiakumanya bualu. Nenubale diba kai? Nempingane bua kuakeba kabidi. Kuikadi ne bantu babi mukau, kujingi bua kubuelakana nʼabo. Bualu bua mitshima yabo idi yelangana meji a kuenzela bantu bibi, mishiku yabo idi yakula bua kuenza malu mabi. Badi bibaka nsubu ne meji, dijingulula dia mianda didi dimujadika. Lungenyi ludi lûshisha nsubu idi munda muandi tente ne biuma bionso bia mushinga mukole ne bia disanka. Muena meji udi mukole; muntu udi ne lungenyi udi uvudisha bukole buandi. Bua, hakuhabo lungenyi lua kuenza, neumanye mua kuluangana nvita; mu tshisumbu tshinene tshia bafidi ba meji mudi luhandu. Meji adi atamba muhote bule; kena ubululula mukana muandi ku tshibuelelu tshia musoko. Udi uhangidisha bua kuenza malu mabi, nebamubikile ne, Muena tshinvundu. Kuhangidisha buhote kudi bualu bubi; mubuidi udi utondesha bantu. Biwateketa halua dituku dia dikenga, bukole buebe budi bukeha. Handisha badibo baya nʼabo ku lufu; usungile badi bamba kushihibua. Biwamba ne, Kabiakadi bamanye muanda eu, yeye udi uteta mitshima kena ûmona, anyi? Udi ulama muoyo webe kena mûmanye, anyi? Kena ufuta muntu bu mudi mudimu wandi, anyi? Muanʼanyi, udie buitshi, bualu bua budi buimpe, mamata a buitshi adi mashemakane mukana muebe. Wamanya ne meji adi muomumue ku muoyo webe: Biwâheta, malu mimpe makuabo nealue kûdi, ne ditekemena diebe kadiena dijimina. Wewe muntu mubi, kualaminyi ku muaba udi muntu muakane mushikame; kunyangi muaba udiye uladila. Bualu bua muntu muakane udi uhona misangu muanda mutekete, udi ubika kabidi; kadi bantu babi badi balenduka mu dikenga. Kusanki hahona muena lukuna webe, mutshima webe kawikadi ne disanka halendukeye; bua Yehowa kamonyi mudiye wenza, kikadi biandi ne disanka; bua yeye kumushi tshiji tshiandi kudiye bua kutshituma kûdi. Kudinyengabashi bua benji ba malu mabi, kuikadi ne bantu babi mukau. Bualu bua muntu mubi kena ne nshikidilu muimpe; nebajime muinda wa bantu babi. Muanʼanyi, tshina Yehowa ne mukelenge kabidi; kubuelakana ne babueshakanyi ba malu. Bualu bua dibutuka diabo dilualua lukasa; udi mumanye kabutu kadi kabakuata bubidi buabo nganyi? Mei â kabidi adi mei akamba bena meji. Kambimpe kulesha kansungusungu mu kulumbulula kua bilumbu. Udi wambila muntu mubi ne, Wewe udi mubinga, bantu nebanuibe mulau ne bisamba ha bantu nebimulengulule. Kadi badi bamubela nebikale ne diakalengele, nebasankishibue bikole. Udi ukudimuna dî diakane udi bu muntu udi uluangana mishiku. Longolola mudimu webe ha mbelu, udilongolueleu mu budimi; hashishe wase nsubu webe. Kuikadi mumonyi udi ubanda muenu mutumba nʼebe hatuhu, kudingi ne mishiku yebe. Kuambi ne, Nemmuenzele bu muakungenzeleye; nempingishile muntu eu difutu diakanangane ne bienzedi biandi. Nakahita ha buihi ne budimi bua muntu mufuba, ha buihi ne budimi bua tumuma tua nvinyo bua muntu wakadi kayi ne lungenyi. Monai! Buakadi ne mingonge mitoloka kuonso, buakadi tente ne mpesa, ne luhangu luabu lua mabue luakadi lushimbuke. Hashishe nakamona, nakelangana meji bimpe bua muanda eu; nakautangila, nakabela diyisha ne, Anu tulu tukese, anu kulala tulu tshituha; anu kudikuata ne bianza bua kubunga tulu kakese. Hashishe buhele buebe nebukukuate bu munyengi, ne tshiole netshikukuate bu muena nvita. Ei kabidi idi nsumuinu ya Solomo yakatentulabo kudi bantu ba Hezikiya, mukelenge wa Yuda. Butumbi bua Nzambi nkusokoka muanda, kadi butumbi bua bakelenge nkukononona muanda. Bu mudi bule bua diulu ne ndondo wa buloba, mbu mudibo kabayi mua kukononona mitshima ya bakelenge. Umusha tshikanganyi ku tshiamu tshia argent, ne tshiamu tshia kuenza nʼatshi dilonga tshidi tshimueneka kudi nsenda. Umusha muntu mubi ku mpala kua mukelenge, ne nkuasa wandi wa bunfumu neajadikibue mu buakane. Kuditeki mu muaba wa butumbi ku mpala kua mukelenge; kuimanyi mu muaba wa bantu banene. Bua bobo kukuambila ne, Banda biebe kuneku, bidi bitamba bua kukushikika mu muaba mutambe kuhuekela ku mpala kua mukokeshi uwakumona ku mesu buimpe. Kuyi lukasa bua kufuilangana ne muntu mu tshilumbu, bua kabakukonki ne, Newenze tshinyi kunshikidilu, halua muena mutumba nʼebe kukufuisha bundu? Utulumbuluila tshilumbu tshiebe ne muena mutumba nʼebe, ne kusokolodi bualu busokoka bua munga muntu: bua muntu udi unvua dî diebe kakufuishishi bundu, ne lumu luebe lubi kaluikadiku. Dî diamba mu tshikondo tshiakane didi bu mamuma a tshiamu tshia or mu tshitekelu tshia argent. Bu mudi kakanu ka or ku ditshu ne bu mudi tshilenga tshia or wa mushinga mukole, mbu mudi mubedi wa meji kudi muena ditshu didi dimutelesha. Bu mudi mashika a neige mu tshikondo tshia kuhuola mbu mudi messager udi mua kueyemenyibua kudi bantu badi bamutuma. Bualu bua udi ukankamasha muoyo wa nfumu wandi. Bu mudi matutu ne luhehele kabiyi ne nvula mbu mudi muntu udi uditumbisha bua maha adiye nfila, kadi udi udinga. Udi ulesha lutulu lule udi mua kuitabushisha mulumbuluishi, ludimi ludi ne mei matekete ludi lutshibula mufuba. Wakusangana buitshi, anyi? Udie anu tshituha tshiabu tshidi tshikukumbanyina, bua biwatamba kubudia, neuluke. Dikasa diebe didiate ku nsubu wa muena mutumba nʼebe anu misangu mibalê, bua bualu buebe kabumutondeshi ne bua yeye kikadi nʼebe lukuna. Muntu udi ubanda muena mutumba nʼandi tshibandabanda udi bu tshikau, muele wa nvita ne mukete mutue. Kueyemena muntu udi kayi mua kueyemenyibua mu tshikondo tshia dikenga kudi bu dinu ditshibuke anyi bu dikasa dikoyoboke. Udi wimbila mutshima udi unema bujitu misambu udi bu muntu udi uvula tshivualu mu dituku dia mashika ne bu vinaigre muedibue ha buanga bua nsabanga. Bikala muena lukuna webe ne nzala, umuhe bia kudia; bikaleye ne nyota, umuhe mai a kunua. Bualu bua neumuhuile njiya, ne Yehowa neakufute. Luhehele lua ku nôde ludi lulua ne nvula; ludimi lua bunsonge ludi luvuisha mpala munyenge. Kushikama ha ditumba dia ha mutu ha nsubu kudi kutamba kushikama mu mbalasa hohamue ne mukashi udi ne mutoyi buimpe. Bu mudi mai ma tulala kudi muntu muhungile bua nyota, mbu mudi lumu luimpe ludi lufuma ku buloba bua kule. Bu mudi mushimi wa mai mudiata muinshi mua makasa ne bu mudi mpokolo munyanguke, mbu mudi muntu muakane utekela ku mpala kua muntu mubi. Kambimpe bua kudia buitshi bua bungi; nunku kambimpe bua bantu bakononone butumbi buabo. Muntu udi kayi mumanye mua kudikanda udi bu musoko wakashimbulabo, udi kauyi ne ngumbu. Bu mudi neige mu tshidimu tshia munya, bu mudi nvula mu tshikondo tshia kuhuola, mbu mudi buneme kabuyi buakanangane ne muhote. Bu mudi mushamusha uhahala eku ne eku, wikila eku ne eku, bu mudi kandindi katua mulelu, mbu mudi mulau udi bantu bela hatuhu kauyi ukuata. Mushosho udi wa kututa nʼau kabalu, mionshi idi ya kulombela nʼai nyama wa mpunda, ne mulangala udi wa kukuma nʼau bahote ha nyima. Kukudimunyi muhote dî bu mudi buhote buandi, bua wewe kufuanangana nʼandi. Kudimuna muhote dî bu mudi buhote buandi, bua yeye kedi meji ne, Ndi muena meji. Udi utuma dî ku tshianza tshia muhote, udi udikosa makasa andi, udi unua tshimbambila. Bu mudi mikolo ya muntu mulema ilemba kayiyi ne bukole, mbu mudi lusumuinu mukana mua bahote. Bu mudi muntu usuika dibue mu tshielelu tshiadi, mbu mudi muntu udi uhesha muhote butumbi. Bu mudi mungonge mutue mu tshianza tshia mukuatshiki wa maluvu, mbu mudi lusumuinu mukana mua bahote. Bu mudi muena buta bua mikete udi wasa bantu bonso mputa, mbu mudi muntu udi ubuesha muhote mu mudimu wandi, anyi udi ubueshamu badi bahita mu nshila. Bu mudi mbua uhingana ku bilushi biandi, mbu mudi muhote uhingana ku buhote buandi. Udi umona muntu udi wela meji ne, Ndi muena meji, anyi? Ditekemena didibo nʼadi bua muhote didi dihita didibo nʼadi bua muntu au bunene. Mufuba udi wamba ne, Nyama wa ntambue udi mu nshila; nyama wa ntambue udi mu misesu! Bu mudi tshibi tshiendakana ha biamu biatshi, mbu mudi mufuba ukudimuka mu bulalu buandi. Mufuba udi ubuesha tshianza tshiandi munda mua dilonga; bua kutshihingisha mukana muandi budi bumuhangisha. Mufuba udi wela meji ne, Ndi ne lungenyi luhite lua bantu muanda mutekete badi mua kukudimuna dî ne meji. Udi uhita mu nshila, ubuela mu matandu adi kayi bua bualu buandi, udi bu muntu udi ukuata mbua ku matshu. Bu mudi mubuluke udi wela bishelele, mikete ne bia lufu, mbu mudi muntu udi udinga muena mutumba nʼandi ne, Tshiena ngamba mei a matuku, anyi? Hikalaku kakuyi nkunyi, kahia kadi kajima; hikalaku kakuyi muena bunsonge, kutandangana kudi kuhuwa. Bu mudi makala mela ha mutu ha makala a kahia, bu mudi nkunyi miela mu kahia, mbu mudi muena matandu udi usonsola nvita. Mei a muena bunsonge adi bu tuhesa tua bia kudia bilengele; adi abuela tô ne munda mua mubidi. Mishiku idi ne mei a lubombo ne mutshima mubi bidi bu tshikanganya tshia tshiamu tshia argent tshilamika ha nyima ha luesu lua dima. Muntu udi ne lukuna udi ulusokoka ku mei adi mishiku yandi yamba, kadi udi muteke kudinga mu mutshima wandi. Havuisheye dî diandi bu dî dia luse, kuitabushi dî diandi nansha; bualu bua malu munyanguke muanda mutekete adi mu mutshima wandi. Bikala lukuna luandi lubuikila ne lubombo, bubi buandi nebusokolodibue mu disangisha dia bantu. Udi wumbula dijimba neahonemu; dibue didi muntu ubungulusha nedihingane hamʼbidi handi. Ludimi ludi ne mashimi ludi lukina bantu bakutahalu mputa; mukana mudi muamba mei a lubombo mudi muvuisha dibutuka. Kuditumbushi bua malu a makelela, bualu bua kuena mumanye muanda walua dituku dikuabo. Munga muntu akutumbishe, kadi mukana muebe kamukutumbishi nansha. Muntu wa bende akutumbishe, kadi mishiku yebe kayikutumbishi. Dibue didi ne bujitu, lusenga ludi lunema kabidi; kadi tshiji tshia muhote tshidi tshitamba bubidi buabi bujitu. Tshiji tshikole tshidi ne lukinu, tshiji tshidi bu mai adi ahasalala; kadi muntu kai udi mua kuimana ku mpala kua mukau? Kubela muntu hatoke kudi kutamba luse lusokoka buimpe. Hadi mulunda mukutahe mputa udi mua kumueyemena, kadi kutuangana kua mishiku kua muena lukuna kudi ne kudinga. Muntu udi mûkute udi udiata dikatshi dia buitshi muinshi mua makasa, kadi tshintu tshionso tshidi ne bululu tshidi tshishemakana mukana mua udi ne nzala. Bu mudi nyunyu udi uhambuka, umuka ku disua diandi, mbu mudi muntu udi uhambuka umuka ku muaba wandi. Manyi ne manananshi bidi bisankisha muntu; ne mei malengele a mulunda wa muntu adi afuma ku lungenyi luimpe adi amusankisha muomumue. Kulekedi mulunda webe ne mulunda wa tatu webe; kubuedi mu nsubu wa muanʼenu dituku dia dikenga diebe. Kuikala ne muena mutumba udi ha buihi kudi kuhita kuikala ne muanʼenu udi kule buimpe. Muanʼanyi, wikale ne meji, usankishe mutshima wanyi, bua mmanye mua kuitaba kudi muntu udi umpenda. Muntu mudimuke udi utangila dikenga diamba kumukuata, udi usokoma; kadi batshimbakanyi badi bahitaku, badi bakengeshibua. Angata tshivualu tshia muntu udi mueyeke muenyi tshieya; ukuate udi mueyeke ba tshisamba tshia bende tshieya lukola. Biavudishila muntu muena mutumba nʼandi disanka ne dî dikole ne dinda dionso, nebamubadile muanda eu bu mulau. Kumatamata kua mai dituku dia nvula wa mudimbi ne mukashi muena matandu bidi muomumue. Udi ukeba kumukanda udi bu udi ukanda luhehele, tshianza tshiandi tshia balume tshidi bu tshidi tshikuata manyi. Bu mudi tshiamu tshisakisha tshinga tshiamu, mbu mudi muntu ulengesha tshikadilu tshia mulunda wandi. Muntu udi ulama mutshi wa nfigi neadie mamuma au, ne udi ukuba nfumu wandi neatumbishibue. Bu mudi mpala umueneka mu mai, mbu mudi mutshima wa muntu umumuenesha kudi munga muntu. Muaba wa Bafue ne wa Kubutuka kabiena biule kashidi; mesu a muntu kaena ûkuta kashidi. Luesu ludiku lua kulengesha tshiamu tshia argent, tshikutu tshidiku tshia kulengesha tshiamu tshia or; ne badi bateta muntu ku tshidiye utumbisha. Biwatua muhote ne muinshi mu tshinu hamue ne manvua, buhote buandi kabuena bûmuka kudiye. Umanye bimpe mudi mushindu wa bisumbu bia mikoko yebe, ela meji mudi mua kulama bisumbu bia bimuna biebe. Bualu bua biuma kabienaku tshiendelele; tshifulu tshia bunfumu tshidi tshishala tô bikondo bionso, anyi? Hatahabo bisoso bia kudisha nʼabi himuna bua kubilama, batoloka mashinde a lutende, hakosabo mashinde adi adiunda ha mikuna, bana ba mikoko nebikaleku bua bivualu biebe, ne mbushi neyikuheteshe mushinga wa budimi. Newikale ne mabele a mbushi makumbane bua bia kudia biebe, bua bia kudia bia ba mu nsubu muebe, ne bua wewe ukube nʼau mishikankunde idi ikukuatshila mudimu. Bantu babi badi banyema kakuyi muntu udi ubihata, kadi bantu bakane badi ne dikima bu dia nyama wa ntambue. Bua ditomboka dia ba ha buloba bakokeshi babu badi ba bungi; kadi bikalaku bajinguludi ba mianda ne bena lungenyi, bukokeshi bujalame nebushale musangu mule. Muntu muhele udi ukengesha bahele udi bu nvula wa tshihuhu udi kayi ushiya tshintu tshia kudia. Badi balekela kulonda diyisha dia mikenji badi batumbisha bantu babi, kadi badi batumikila diyisha dia mikenji badi bafuilangana nʼabo. Bantu babi kabena bajingulula kulumbulula kuakane, kadi badi bakeba lungenyi kudi Yehowa badi bakajingulula tshishiki. Muntu muhele udi wenda mu buakane bua mutshima udi utamba udi mu nshila mikonyangale buimpe, nansha bikaleye mubanji. Udi utumikila diyisha dia mikenji udi muana mulume udi ne meji, kadi udi ukuata bulunda ne bena lumpukusu udi ufuisha tatuʼandi bundu. Udi utudisha biuma biandi ku kasombela ne ku makasa udi ubisangishila muntu udi ufuila bahele luse. Udi umusha matshu andi ku diyisha dia mikenji, mulombu wandi udi utondesha Nzambi. Udi uhambuisha bantu bakane bua bobo bende mu nshila mubi neahone mu dijimba didiye umbula; kadi badi ne mitshima mitoke nebahiane diakalengele. Muntu mubanji udi wela meji ne, Ndi ne meji, kadi muhele udi ne dijingulula dia mianda udi ukononona tshikadilu tshiandi. Hatumba bantu bakane, butumbi bunene budiku; kadi habanda bantu babi, bantu badi basokoma. Udi usokoka matomboka andi kena wikala ne diakalengele, kadi udi uwatonda, uwalekela, neafuidibue luse. Disanka didi kudi muntu udi utshina malu mabi misangu yonso, kadi udi ukolesha mutshima wandi neabuele mu dikenga. Bu nyama wa ntambue udi udila, anyi bu nkashama udi ukeba nyama ya kudia, mbu mudi mukokeshi mubi udi ku mutu kua bantu bahele. Mukokeshi udi kayi ne lungenyi udi mukengeshi mukole kabidi; kadi udi ukina luhetu lua ku malu mabi nealeheshe matuku andi. Muntu udibo bahisha bualu bua mashi a munga muntu adi hamʼbidi handi aye mu dijimba; muntu kamukuatshisha nansha. Muntu udi wenda mu buakane neahandishibue, kadi udi wenda mu nshila mikonyangale neahone lukasa. Udi udima budimi buandi neikale ne bia kudia bia bungi, kadi udi ulonda malu a hatuhu neikale ne buhele bua bungi. Muntu udi mua kueyemenyibua neavudishibue ne masanka a bungi, kadi udi ne lukuluku bua kudivuisha mubanji kena ubinga. Kulesha kansungusungu kakuena kuimpe; kadi muntu nênze malu mabi bua tshihesa tshia nshima. Muena lukuka udi wenda lukasa bua kuheta biuma, kena mumanye ne, Buhele nebunkuate. Udi ubela muntu neahete diakalengele dihite dia udi umubomba ne ludimi luandi. Udi wiba bintu bia tatuʼandi anyi bia mamuʼandi, wamba ne, Muanda eu kawena wa ditomboka, udi mulunda wa mubutudi. Udi ne mutshima wa lukuka udi usonsola matandu, kadi udi weyemena Yehowa neavuishibue mubanji. Udi weyemena mutshima wandi udi muhote, kadi udi ulonda meji neahandishibue. Udi uha bahele bintu kena ukengela tshintu, kadi udi ubuikila mesu andi nebamuele milau ya bungi. Habuela bantu babi mu bukokeshi, banga bantu badi basokoma; kadi hajiminabo, bantu bakane badi bavulangana. Muntu udi mubedibue misangu ya bungi, kadi udi wela mpala mulu, neabutudibue mu katuha ka diba, kayi ne tshia kumusangasha nʼatshi. Hikala bantu bakane ne bukokeshi, bantu badi basanka; kadi hakokesha muntu mubi, bantu badi batua mikemu. Muntu udi unanga meji udi usankisha tatuʼandi, kadi udi ubuelakana ne bakashi ba masandi udi utangalasha bintu biandi. Mukelenge udi ujadika buloba buandi ku kulumbulula kuakane, kadi muntu udi ulomba milambu mihite udi ububutula. Udi ubomba muena mutumba nʼandi udi wandila makasa andi bukuondo. Mu ditomboka dia muntu mubi mudi buteyi, kadi muntu muakane udi wimba misambu, udi usanka. Muntu muakane udi mumanye ne, Bahele badi bakengela kulumbulula kuakane, kadi muntu mubi kena ujingulula lungenyi alu nansha. Babuidi badi batemesha kahia mu musoko, kadi bena meji badi bandamuna tshiji. Biatandangana muena meji ne muhote mu tshilumbu, muhote udi ukuata tshiji ne udi useka, kakuena ditalala. Badi bakeba kumatshisha mashi badi bakina muntu muakane; kadi bantu bakane badi balama muoyo wandi. Muhote udi uhatula tshiji tshionso tshidiye nʼatshi, kadi muena meji udi ntshibanda, udi utshiholesha. Biunvua mukokeshi mei a mashimi, bonso badi bamukuatshila mudimu badi balua babi. Muhele ne mukengeshi badi basangile hamue; Yehowa udi umunyika mesu a bubidi buabo. Bialumbuluisha mukelenge bahele ne lulamatu lua bushuwa, nkuasa wandi wa bukelenge neajadikibue tshiendelele. Lukodi ne kubela bidi biyisha meji, kadi muana udibo balekela nkayandi udi ufuishisha mamuʼandi bundu. Hikala bantu babi mu bukokeshi, ditomboka didi didiunda; kadi bantu bakane nebamone dihona diabo talalâ. Kengesha muanʼebe bua kumuyisha, ne neakuhe dikisha; e, neasankishe mutshima webe. Bikalaku kakuyi tshikena kumona tshia muprofete, bantu badi balekela kudikanda; kadi udi utumikila diyisha dia mikenji udi ne disanka. Kabena bamanye mua kuyisha muhika ne mei nkayau; bualu bua nansha biâjingululeye, kena watumikila. Udi umona muntu udi wamba mei andi lukasa lukasa, anyi? Ditekemena didibo nʼadi bua muhote didi dihita didibo nʼadi bua muntu au bunene. Udi udiundisha muhika wandi bimpe ku buana tô ne hakoleye, kunshikidilu neikale kudiye bu muanʼandi muledibue. Muena tshiji udi usonsola ma tandu; muntu utu wafua tshiji lukasa udi utamba kubishisha ditomboka. Kudisua kua muntu nekumuhuekeshe, kadi udi ne mutshima muhuekele neahete buneme. Udi wabanyangana ne muibi udi ukina muoyo wandi mene, udi unvua mei a mulau hamutshihishabo, kena usokolola bualu. Hatshina muntu bakuabo, bualu ebu budi buteyi kudiye, kadi udi weyemena Yehowa neahanduke. Ba bungi badi bakeba diakalengele kudi mukokeshi, kadi dikosa dia nsambu dia muntu didi difuma kudi Yehowa. Muena tshishiku udi utondesha bantu bakane, kadi udi wenda mu nshila muakane udi utondesha bantu babi. Mei a Agû, muana wa Yake: di dia tshijila: Muntu au udi wambila Itiele, udi wambila Itiele ne Ukala, ne, Bulelela, tshiena ne meji bu a muntu; tshiena njingulula mianda bu muntu. Tshiena muanze kuyila meji, tshiena ne lungenyi lua malu a Wa Tshijila. Wakubanda mu diulu, wakahueka hanshi kabidi nganyi? Wakusangisha luhehele mu bianza biandi bitunya nganyi? Wakukuta mai mu tshivualu tshiandi nganyi? Wakujadika matshika onso a kunfudilu kua buloba nganyi? Dina diandi nganyi, ne dina dia muanʼandi nganyi? Bulelela, wewe udi mumanye! Di dionso dia Nzambi diakutetshibua ne, Didi dia bushuwa; yeye udi ngabu kudi badi banyemena kudiye. Kutentekashi dî ku mei andi, bua yeye kakubedi, kukusanganyi muena mashimi. Ndi nkulomba malu abidi; kubengi kuampa tshiyi muanze kufua: Ungumushile kudinga ne kuamba kua mashimi kundi; kumpi buhele anyi bubanji nansha, undishe bia kudia bidi binkumbanyina, bua meme tshiukutshi, tshikubengi, tshiandi ne, Yehowa nganyi? Anyi bua tshikadi muhele ne tshibi bianyi, bua tshinyangi dina dia Nzambi wanyi. Kusonguedi muena mudimu kudi nfumu wandi, bua yeye kakuedi mulau, bua wewe kuhishibu. Bantu badiku badi bela batatu babo mulau, kabayi bavudishila bamamu babo disanka. Bantu badiku badi bamba ne, Tudi balengele, kadi kabena balengeshibue ku bukoya buabo. Bantu badiku,—mona mudi mesu abo ne dihetu, ne mudibo bahanda mesu mulu! Bantu badiku badi ne menu bu miele ya nvita, badi ne menu a ku binyanganyanga bu tuele bua kudiabo bahele, kubajimisha ha buloba, bua kudiabo bakengi, kubumusha munkatshi mua bantu. Musundu udi ne bana bakashi babidi badi badila ne, Utuhe, Utuhe. Bintu bisatu bidiku bidi kabiyi biukuta kashidi; bintu binai mene bidiku bidi kabiyi biamba kashidi ne, Tuakukuta: Muaba wa Bafue, mukashi wa nkumba, buloba budi kabuyi mua kumana nyota yabu kashidi, ne kahia kadi kakayi kamba kashidi ne, Nakukuta. Disu dia muntu udi useka tatu, ne udi uhetula ditumikila dia mamu,— nyunyu ya bikololo bia mu tshibanda nebiditue minu, nebiditule, ne bana ba nyunyu itu yadia bintu bibole nebadidie. Bintu bisatu bidi bitamba kunkemesha bua kubimanya; e, kudi bintu binai bindi tshiyi mujingulule: nshila wa nyunyu wa mukanku mu luhehele, nshila wa nyoka udi wenda ujongoloka ha dibue, nshila wa buatu munkatshi mua mai manene, ne nshila wa muntu mulume udi wenda ne mushikankunde. Nshila wa mukashi wa masandi udi nunku: udi udia, udi ukuhula ku mishiku, udi wamba ne, Tshiena muenze bualu bubi. Buloba budi bikanka bua malu asatu; kabuena mua kutuala bujitu bua malu anai: muhika habueleye mu bukelenge, muhote hukuteye bia kudia; mukashi, udibo bakina, hayeye ku dibaka; ne mukashi muenji wa mudimu udi uhiana bintu bia nfumu wandi mukashi. Kudi bintu binai bitamba bukese hanshi ha buloba, kadi bidi ne meji male: Tunkenene tudi bu bantu badi kabayi ne bukole, kadi tudi tubuta bia kudia biatu mu tshikondo tshia munya. Nyama ya nsenji idi bu bantu batekete, kadi idi yasa nsubu yai munkatshi mua mabue. Mikumbi kayena ne mukelenge, kadi buonso buai idi yenda bu mialu ya nvita. Udi mua kukuata musodi ne bianza, kadi wowo udi mu mbalasa ya bakelenge. Bintu bisatu bidiku bidi bienda mananga; e, bintu binai bidi ne butumbi hadibi bienda. Nyama wa ntambue udi uhita nyama yonso bukole, kena wahuka bua kushila mukuabo nshila. Kabalu ka nvita, mpumbu wa mbushi, ne mukelenge udi wenda ku mpala kua masalayi andi. Biwikala muenze buhote bua kudibandisha kuebe, anyi biwikala muhangidishe bualu bubi, uteke tshianza tshiebe ku mishiku yebe. Bualu bua kukuma mabele kudi kuvuisha manteka, kubela diulu kudi kuhatuisha mashi, ne kukolesha tshiji kudi kuvuisha nvita. Mei a mukelenge Lemuele: dî dia tshijila diakamuyisha mamu wandi. Ngambe tshinyi, muanʼanyi? Ngambe tshinyi, muana mulume wa munda muanyi? Ngambe tshinyi, muana wa mitshihu yanyi? Kuheshi bakashi bukole buebe nansha, kulekeledi nshila yebe mu bianza bia badi babutula bakelenge. Lemuele, bualu ebu kabuena buimpe, kambimpe bua bakelenge kunuabo nyinyo, anyi bua bakokeshi kujingabo malulu makole. Kabânu, kabahu mikenji muoyo, kabasesuishi bakengi kulumbulula kuakane. Nuisha muntu udi wamba kufua maluvu makole, nuisha muena mutshima munyingalale nyinyo; anue biandi, ahue buhele buandi muoyo, kavuluki makenga andi kabidi. Buluila kamama mukana muebe, ûbulule bua kulumbuluila bonso hadibo bashiya hatuhu. Bulula mukana muebe, ulumbulule bilumbu ne buakane; ulumbuluile bahele ne bakengi bilumbu biabo. Udi mua kuheta mukashi wa tshikadilu tshimpe nganyi? Bulengele buandi budi butamba mabue a bilenga mushinga mukole. Mutshima wa bayandi udi umueyemena, kena ukengela bintu. Yeye udi wenzela bayandi malu mimpe, kena umuenzela bualu bubi matuku onso a muoyo wandi. Udi ukeha miosa ya mikoko ne buanda bua lin, udi wenza mudimu wa bianza ne disanka. Udi bu matu a ngendʼa mushinga, udi ulua ne bia kudia biandi ku miaba ya kule. Udi ubika butuku kabuyi buanze kutshia, udi uha ba mu nsubu muandi bia kudia, udi uha bakashi benji ba mudimu wandi tshituha tshiabo tshia mudimu. Udi ukenketa budimi, udi ubusumba; udi utentuisha mionshi ya nyinyo ku luhetu lua ku bianza biandi. Udi usuika bukole bu mukaba mu tshifuka tshiandi, udi ukolesha maboko andi. Udi mumanye ne, Bintu bindi ngenduluka nʼabi mushinga bidi bimpe. Muinda wandi kawena ujima butuku. Udi ulongolola mbungu wandi; udi ukuata mundongo mu bianza biandi. Udi woluela bahele tshianza tshiandi; e, udi woluela bakengi bianza biandi. Yeye kena utshina ne, Mashika a neige neakuate ba mu nsubu muanyi, bualu bua yeye udi umatshisha bonso ba mu nsubu muandi bilulu bikunze. Udi udikumina bilulu bia ha bulalu; bivualu biandi bidi bia lin bia mushinga mukole ne bikunzubile. Bayandi udi mumanyibue ku bibuelelu bia ku musoko, hashikameye munkatshi mua bakulu ba ditunga. Udi utela bivualu bia lin, udi ubihana; udi ufila mikaba kudi ngendʼa mushinga. Bukole ne buneme bidi bivualu biandi; udi usanka bua matuku alualua. Udi ubulula mukana muandi ne meji, diyisha dia luse didi ha ludimi luandi. Udi utangila malu a ba mu nsubu muandi benza, katu wadia bia kudia bia bufuba. Bana bandi badi bajuka, badi bamuvudishila disanka. Bayandi kabidi udi ujuka, udi umutumbisha ne, Bana bakashi bangi bakuenza bimpe, kadi wewe udi utamba buonso buabo. Diakalengele didi didinga, mpala mulengele udi hatuhu, kadi mukashi udi unemeka Yehowa neatumbishibue. Umuhe difutu dia midimu ya bianza biandi; midimu yandi imutumbishe ku bibuelelu bia ku musoko. Â mmei a Mulambi, muana wa Davidi, mukelenge wa mu Yelushalema. Muambi udi Wamba ne, Malu a hatuhu, malu a hatuhu! Malu onso adi hatuhu. Muntu udi uheta tshinyi ku mu dimu wonso udiye wenza muinshi mua diba? Tshikondo tshimue tshidi tshiya ku mpala, tshikuabo tshidi tshilonda ku nyima; ka dî buloba budi muomumue tshiendelele. Diba didi dibanda, didi dibuela, didi dihita lubilu kabidi ku muaba udidi dibanda. Luhehele ludi luya ku Sude, ludi luhingana ku nôde; lufu luanyunguluka bua kuhingana kabidi ku muaba wakafumalu. Misulu yonso idi ibuela mu mai manene, kadi mai manene kaena ûla tente; mu miaba yonso idi misulu ihueka, idi ihinganamu kabidi. Malu onso adi mûle tente ne ntatu; muntu kena mumanye mua kuâmba; kumona kakuena kutonda disu; kunyua kakuena kudiatshisha ditshu. Malu akadiku diambedi neikaleku; malu akenzabo diambedi nênjibue; kakuena tshintu tshihia-tshihia muinshi mua diba. Tshintu tshidiku tshidibo ba manye mua kuamba ne, Tangila, etshi ntshintu tshihia-tshihia, anyi? Tshiakadiku kale, mu bikondo biakadi ku mpala kuetu. Kabena bavuluka bantu ba kale; balualua ha nyima kabena babavuluka kudi bantu badi babalonda kabidi. Meme Muambi nakadi mukelenge wa Isalele mu Yelushalema. Nakateka mutshima wanyi ne meji anyi mu kukeba ne mu kujingulula kua malu onso adi menjibue muinshi mua diulu; eu mmudimu wa lutatu wakuha Nzambi ba ha buloba bua kubadisha nʼau. Nakatangila malu onso adi menjibue muinshi mua diba; monai, malu au onso adi hatuhu, adi bu kuihata kua luhehele. Tshidi tshikonyangala, kabena mua kutshiludika kahidi; tshintu tshidi katshiyihu, kabena mua kutshibala. Nakamba mu mutshima wanyi ne, Nakuheta lungenyi lua bungi, muhite bonso bakadi ku mpala kuanyi mu Yelushalema; bulelela, mutshima wanyi wakajingulula meji a bungi ne lungenyi lua bungi. Nakuteka mutshima wanyi mu kukeba kua meji ne mu kujingulula kua buhote ne malu a tshianana; nakamanya ne bualu ehu kabidi budi bu kuihata kua luhehele. Bualu bua mu meji a bungi mudi kanyinganyinga ka bungi; wavudisha lungenyi neavudishe kanyinganyinga kabidi. Nakambila mutshima wanyi ne, Tuye bietu, nenkutete ne masanka; nunku usanke biebe. Monai, buakadi hatuhu kabidi. Nakamba bua tuseku ne, Tudi tuhote, bua masanka ne, Adi enza tshinyi? Nakelangana meji mu mutshima wanyi bua kusankisha mubidi wanyi ne nvinyo, mutshima wanyi mutshikale undombola mu meji; nakateta malu a buhote bua kujingulula tshidi tshimpe bua ba ha buloba benze muinshi mua diulu matuku onso a muoyo waho. Meme nakenza midimu minene; nakadiashila nsuhu; nakakuna mionshi ya tumuma tua nvinyo; nakadilongoluela bibundu ne miaba ya biendelu; nakakunamu mitshi ya mamuma ya mishindu yonso; nakadiumbuila mena a mai bua kusunabo mai a kumiamina mitshi inakakuna; nakasumba bahika balume ne bahika bakashi; nakadi ne bana ba bahika baledibue mu nsubu muanyi; nakadi ne bimuna bia bungi, ngombe ne mikoko, bihite bia bonso bakadi ku mpala kuanyi mu Yelushalema. Nakaheta argent ne or ne bintu bia mushinga mukole bifume kudi bakelenge ne ku provinces; nakadiangatshila bimbi ba misambu, balume ne bakashi, ne biombelu bia mishindu yonso bia kuimba nʼabi misambu. Nakalota lumu lunene; bintu bianyi biakavulangana, biakahita bia bonso bakadi ku mpala kuanyi mu Yelushalema; nakatshidi anu ne meji anyi. Tshiakahidia nansha tshintu tshimue tshiakajinga mesu anyi; tshiakalesha mutshima wanyi nansha disanka dimue; mutshima wanyi wakasanka bua midimu yonso makela; edi ndifutu dianyi dia ku midimu yonso biakenza. Hashishe, nakatangila midimu yonso yakenza bianza bianyi, ne lutatu lunakadi nʼalu; monai, malu onso akadi hatuhu bu kuihata kua luhehele; kakuakadi bualu buimpe muinshi mua diba. Nakahingana bua kutangila meji ne buhote ne malu a tshianana, kadi muntu walonda mukelenge udi mua kuenza tshinyi? Nênze anu malu akamanabo kuenza. Hashishe, nakamona ne, Meji adi ahita malu a tshianana buakane bu mudi munya muhite midima. Mesu a muena meji adi matangile ku mpala, ne muhote udi wenda mu midima; kadi nakajingulula ne, Bualu bumue budi bubakuata bonso. Hashishe, nakamba mu mutshima wanyi ne, Bualu budi bukuata muhote nebunkuate kabidi; tshindi muvudishile meji ntshinyi? Nakamba mu mutshima wanyi ne, Bualu ebu budi hatuhu kabidi. Kabena bavuluka nansha muena meji nansha muhote, bualu bua matuku alualua bubidi buabo nebabahue muoyo. Monai, muena meji ufuafua muomumue ne muhote! Nunku nakakina muoyo, bualu bua mudimu udi muenjibue muinshi mua diba wakannyingalasha. Bualu bua malu onso adi hatuhu bu kuihata kua luhehele. Nakakina midimu yonso inakenza muinshi mua diba hanakamona ne, Ndi nyishila muntu udi undonda. Udi mumanye ne, Yeye neikale muena meji anyi muhote nganyi? Kadi yeye neakokeshe midimu yanyi yonso inakenza ne yakalesha bantu lungenyi lunakadi nʼalu muinshi mua diba. Ebu mbualu bua batuhu kabidi. Nunku ditekemena dia malu onso anakenza muinshi mua diba diakajimina. Bualu bua misangu mikuabo muntu udi wenza mudimu wandi wa lungenyi, wa meji ne mulengele tshishiki udi ushila muntu buhianyi budiye kayi mukuatshile mudimu. Bualu ebu budi bua hatuhu, budi butambe bubi. Muntu udi uheta tshinyi ku midimu yandi yonso yakenzeye ne yakanyingalasheye nʼai mutshima wandi muinshi mua diba? Bualu bua matuku andi onso adi ne ntatu ne mudimu wandi udi wa kanyinganyinga; mutshima wandi mene kawena wikisha butuku. Ebu mbualu bua hatuhu kabidi. Kakuena disanka kudi muntu bu kudia, kunua ne kusankisha mutshima wandi mu midimu yandi. Nakatangila disanka edi ne, Ndifume ku tshianza tshia Nzambi. Bualu bua udi mumanye mua kumpua meme ku didia ne disanka nganyi? Nzambi udi uha muntu udi umusankisha meji, lungenyi ne disanka; kadi udi uha muntu mubi lutatu lua kukunguisha bintu bia kuhesha mukuabo udi usankisha Nzambi. Bualu ebu mbua hatuhu kabidi ne bu kuihata kua luhehele. Bualu bua tshintu tshionso tshidi ne tshikondo tshiatshi, ne bualu buonso budi ne diba diabu muinshi mua diulu kabidi: tshikondo tshia kuledibua ne tshikondo tshia kufua; tshikondo tshia kukuna bintu ne tshikondo tshia kubihuola; tshikondo tshia kushiha ne tshikondo tshia kuondaha; tshikondo tshia kubutula ne tshikondo tshia kuibaka; tshikondo tshia kudila ne tshikondo tshia kuseka; tshikondo tshia kuasa madilu ne tshikondo tshia kuja maja; tshikondo tshia kuimasha mabue ne tshikondo tshia kusangisha mabue kabidi; tshikondo tshia kuelangana bituha ku nshingu ne tshikondo tshia kubenga kuelangana bituha; tshikondo tshia kukeba ne tshikondo tshia kujimisha; tshikondo tshia kulama ne tshikondo tshia kuimasha; tshikondo tshia kubanda ne tshikondo tshia kutela; tshikondo tshia kuhuwa ne tshikondo tshia kuakula; tshikondo tshia kunanga ne tshikondo tshia kukuta; tshikondo tshia kuluangana nvita ne tshikondo tshia kushikama talalâ. Muena mudimu udi uheta tshinyi ku mudimu udiye wenza? Nakatangila mudimu wa lutatu wakaha Nzambi ba ha buloba bua kubibidisha nʼau. Yeye wakafuka tshintu tshionso tshiakane mu tshikondo tshiatshi; wakuteka lungenyi mu mitshima ya bantu, kadi kabena bamanye mua kujingulula mudimu wa Nzambi wakenzeye ku tshibangidilu tshia buloba tô ne kunshikidilu kuabu. Ndi mumanye ne, Kakuena bualu buimpe bu kusanka ne kuenza malu mimpe matuku onso hatshidi muntu ne muoyo. Muntu yonso adie biandi, anue biandi, asanke biandi mu midimu yandi yonso, bua eku nkuha kua Nzambi. Ndi mumanye ne, Malu onso adi Nzambi wenza neajalame tshiendelele; kabena bamanye mua kusangisha tshintu ha mutu, kabena bamanye mua kumushaku tshintu; Nzambi wakenza nunku bua bantu bamutshine. Malu adiku katataka akadiku kale; ne malu adi kâyi manze kulua akadiku diambedi; Nzambi neamueneshe kabidi malu akamana kujimina. Nakatangila muinshi mua diba ne mu muaba wa tshilumbuluidi muakadi dihetu, ne mu muaba wa buakane muakadi bubi kabidi. Nakamba mu mutshima wanyi ne, Nzambi nealumbuluishe bantu bakane ne bantu babi; bualu bua malu onso ne midimu yonso bidi ne tshikondo tshiabi. Nakamba mu mutshima wanyi ne, Nzambi udi wenzela bana ba bantu nunku bua kubateta ne bua bobo badimanye ne, Tuetu tudi anu bu nyama. Bualu bua malu adi akuata bana ba bantu adi akuata nyama kabidi; mufuafua umue mmufuafua mukuabo; bidi ne muhuya muomumue; bantu kabena bahita nyama buakane; malu onso adi hatuhu. Bionso biyaya ku muaba umue; bionso bidi anu dinfuenkenya dia buloba, nebiandamuke dinfuenkenya dia buloba kabidi. Udi mumanye ne, Muoyo wa muntu udi ubanda kulu, anyi muoyo wa nyama udi uhueka muinshi mua buloba nganyi? Nunku nakajingulula ne, Kakuena bualu buimpe bu bua muntu kusanka mu midimu yandi; bualu bua edi ndifutu diandi; wamuhingasha ha buloba bua kutangileye malu adi alonda ku nyima kuandi nganyi? Nakatangila kabidi makenga onso adibo bakengesha nʼau bantu muinshi mua diba; monai binsonshi bia bakadi bakengeshibua kabayi ne musambi! Bakabakengesha bakadi ne bukole, bobo kabakadi ne musambi. Nunku nakamba ne, Bantu bakamana kufua badi batamba batshidi ne muoyo kusanka, ne badi kabayi banze kuledibua ne kabayi banze kutangila malu mabi adibo benza muinshi mua diba badi batamba buonso buabo kusanka. Hashishe, nakatangila mudimu wonso ne ngenzelu wau mulengele bidi bivuisha bantu mukau. Bualu ebu budi hatuhu, bu kuihata kua luhehele. Muhote udi udikuata bianza, udi udidia mubidi wandi. Dianza diule tente ne ditalala didi dihita manza abidi mûle tente ne mudimu mukole ne kuihata kua luhehele. Nakatangila kabidi malu a hatuhu muinshi mua diba; mukuabo udiku udi nkayandi kayi ne muntu, nansha muana wa balume nansha muanʼabo wa balume, kadi nshikidilu wa mudimu wandi kenaku; mesu andi kaena manze kutshina ne bubanji. Hashishe, udi udikonka munda ne, Ndi ngenzela nganyi mudimu? Ndi ndikandika masanka bua tshinyi? Ebu mbualu bua hatuhu ne mudimu wa lutatu. Bantu babidi badi bahita umue, bua bobo badi baheta difutu dimpe ku mudimu wabo. Bualu bua biadishindabo, umue neabishe mukuandi; kadi diakabi didi kudi udi udishinda nkayandi kayi ne mukuabo bua kumuhisha. Bualu bukuabo, bialala bantu babidi kaha kamue badi bakuatshishangana luya; kadi udi ulala nkayandi udi mua kukuata luya munyi? Muntu udi mua kuhita mukuabo bukole, kadi bantu babidi badi mua kumuhita yeye bukole; kabena mua kutula mionshi isatu milukakasha lukasa. Nsongalume muhele udi ne lungenyi udi uhita mukelenge mukulukashi muhote udi kayi witabusha mibelu, nansha yeye muluhuke mu nsubu wa mashika bua kubuela mu bukelenge, nansha yeye muledibue mu bukelenge buandi. Nakatangila bonso hadi ne muoyo bendakana muinshi mua diba hohamue ne nsongalume wakahiana bukelenge buandi; bungi buabo kabuakadi mua kubadibua ne yeye wakadi ha mutu ha buonso buabo. Kadi balonda ha nyima kabena mua kusanka bua bualu buandi. Bulelela, ebu mbualu bua hatuhu kabidi, bu kuihata kua luhehele. Ulame makasa ebe hawabuela mu nsubu wa Nzambi; kusemena ha buihi bua kunvua kudi kuhita milambu ya bahote buakane, bualu bua bobo kabena bamanye ne, Tudi tuenza bualu bubi. Mei kâluhuki mukana muebe lukasa; mutshima webe kauhatudi bualu ku mpala kua Nzambi lubilu; bualu bua Nzambi udi mu diulu, wewe udi ha buloba; nunku mei ebe ikale makehele. Tshilota tshidi tshilua ne malu a bungi; diakula dia muhote didi dihatula mei a bungi. Hawaditshiha kudi Nzambi, kujanguluki bua kumana mulayi; bualu bua yeye kena ne bahote disanka; ufute tshiwakalaya. Kubenga mua kuditshiha kudi kuhita kudinga buakane. Kuitabushi bua mukana muebe kukulenduisha; kuambidi messager ne, Nakadi mutuhakane; udi musue Nzambi ikale ne tshiji bua mei ebe, ashihe mudimu wa bianza biebe bua tshinyi? Bualu bua mu bilota bia bungi mudi mei a bungi ahatuka, kadi utshine Nzambi. Biwatangila bahele bakengeshibue ne kunyanga kua bilumbuluidi ne kushiha kua mikenji mu province wenu, kukemi bua malu au; bualu bua banfumu bonso badi ne banga badi babatangila, ne udi mubatambe bonso udi ha mutu habo. Dikuatshisha dia buloba didi kudi bantu bonso; mukelenge muine udi ukuatshishibua ne bintu bia mu madimi. Wananga biuma kena usankishibua ku biuma; wananga bubanji kena ukuta bubanji; ebu mbualu bua hatuhu kabidi. Bualu bua hakumbana bintu, badi babidia badi bakumbana kahidi; ne nfumuʼabi udi ne difutu kai dikuabo, anu bua kuntangila ku mesu? Tulu tua muena mudimu tudi tuimpe biadieye bintu bikese anyi bia bungi; kadi kukuta kua muntu mubanji kakuena kumuladika tulu. Nakatangila bualu bubi muinshi mua diba bua muntu mudilamine luhetu tô ne hakamukengeshalu; luhetu elu ludi lujimina mu malu mabi; kadi bialeleye muana wa balume, kena ne tshia kumushila. Bu muakahatukeye munda mua mamu wandi butaka, yeye neahingane kabidi; kena uya ne tshintu tshimue mu bianza biandi tshia mu midimu yonso yakenzeye. Ebu mbualu bubi kabidi bua muntu udi uhingana anu bu muakalueye. Udi ne difutu kai? Wakenzela luhehele mudimu; matuku andi onso akadi mu midima, mu kanyinganyinga, ntatu, masama ne mu tshiji tshikole. Monai, bualu bundi mmona buimpe ne bukumbanyine muntu: adie biandi, anue biandi ne asanke mu midimu yandi yonso idiye wenza muinshi mua diba, matuku onso a muoyo wandi adi Nzambi mumuhe; edi ndifutu diandi. Muntu yonso udi Nzambi muhe bintu ne bubanji ne bukole bua kubidia, bua kuangateye difutu diandi ne kusankeye mu midimu yandi amanye ne, Edi ndiha dia Nzambi. Yeye kena mua kutamba kuvuluka matuku a muoyo wandi; bualu bua Nzambi udi umuvuishisha disanka mu mutshima wandi. Kudi bualu bubi bunakatangila muinshi mua diba budi bunemena bantu bujitu: muntu udi Nzambi uha biuma, bubanji ne butumbi ne kena uhanga tshintu, kena uheta bukole kudi Nzambi bua kuhidia; kadi muenyi udi uhidia; ebu mbualu bua hatuhu ne bua dikenga dikole. Bialela muntu bana lukama ne biashaleye ne muoyo bidimu bia bungi, kadi bikala mutshima wandi kauyi mukulu ne malu mimpe, anyi bantu kabayi bamujike bimpe, ndi ngamba ne, Muana wa kabishi udi mumuhite ku dikasa dimpe; bualu bua yeye udi uledibua hatuhu, udi umuka mu mîdima, ne dina diandi didi dijimine mu mîdima; yeye kakatangila diba, kena mudimanye; kadi udi uhita muntu au kuheta dikisha; bulelela, nansha yeye mushale ne muoyo bidimu tshinunu misangu ibidi, kadi kayi ne disanka, kena uya kuyaya bonso, anyi? Midimu yonso idi muntu wenza mbua kusankisha mukana muandi, kadi nzala yandi kayena ishika. Muena meji udi mutambe muhote munyi? Muntu muhele udi ne lumu kai hendakaneye ku mpala kua bakua ndi? Kumona ne mesu kudi kutamba kujinga buakane; ebu mbualu bua hatuhu, bu kuihata kua luhehele. Tshintu tshionso tshidiku katataka tshiakamana kuidikibua dina diatshi kale; muntu udi mumanyibue kabidi, nunku kena mumanye mua kufuilangana ne udi mua kumuhita bukole. Hadi mei avulangana, kudisua kudi kuyisangana kabidi, ne bualu buimpe budi muntu uheta budi hanyi? Nganyi udi mumanye malu adi makanyine muntu udi uhitshisha matuku makese a muoyo wandi wa hatuhu bu mundidimbi? Nganyi udi mua kuambila muntu malu alualua ku mpala kuandi muinshi mua diba? Dina dimpe didi dihita manyi a mushinga mukole buakane, dituku dia lufu ndihita dia kuledibua bulengele. Kubuela mu nsubu wa madilu kudi kuhita kubuela mu nsubu wa bidia bia dibanji buakane; bualu bua eu nshikidilu wa bantu bonso, ne badi ne muoyo nebateke bualu ebu mu mitshima yabo. Kanyinganyinga kadi kahita tuseku buakane; mpala wa majia udi uvuisha mutshima disanka. Mutshima wa muena meji udi mu nsubu wa madilu; kadi mitshima ya bahote idi mu nsubu ya tuseku. Kunyua mibelu ya bena meji kudi kuhita kunyua misambu ya bahote buakane. Tuseku tua bahote tudi bu kutudika kua meba muinshi mua luesu; bualu ebu mbua hatuhu kabidi. Muena meji udi wandamuka muhote ku dikengesha didiye nʼadi, mbueshilu idi inyanga mutshima. Nshikidilu wa muanda udi uhita tshibangidilu tshiau bulengele; mutshima wa buhuekela udi uhita mutshima wa dihetu buakane. Kukuatshi tshiji mu mutshima webe lukasa, bualu bua tshiji tshidi tshiala mu tshiadi tshia bahote. Kudikonki ne, Matuku a diambedi adi mahite a mpindiu buakane bua tshinyi? Bualu bua kuena ukonka bualu ebu ne meji mimpe. Lungenyi ludi luakane bu buhianyi; ludi dikuatshisha kudi badi batangila diba. Bualu bua lungenyi ludi ne dikuatshisha bu dia biuma; kadi lungenyi ludi lutamba bua ludi luvuisha muoyo kudi muenʼalu. Welangane meji a mudimu wa Nzambi; tshiakamaneye kukonyangasha, watshiludika nganyi? Mu dituku dia diakalengele usanke biebe; ne mu dituku dia dikenga, welangane meji; bulelela, Nzambi wakavuisha dituku dimue diakanangane ne dikuabo, bua muntu kajinguludi malu atshilualua. Nakatangila malu onso mu matuku a ditshimbakana dianyi; muntu muakane udiku, udi ufua mu buakane buandi; muntu mubi udi uvudisha matuku andi mu bubi buandi. Kuhitshi kudibingisha; kudivuishi bu muena lungenyi lutambe; udi musue kudibutula bua tshinyi? Kuvudishi malu mabi; kuikadi muhote; udi musue kufua dituku dia lufu luebe kadiyi dianze kufika bua tshinyi? Mbimpe kulamata ku bualu ebu bikole; kumushiku tshianza tshiebe nansha; bualu bua watshina Nzambi neahanduke mu malu onso. Lungenyi ludi luvuisha bukole kudi muena meji, buhite bua bileba dikumi mu musoko. Bulelela, kakuena muntu muakane ha buloba utu wenza malu makane, kayi wenza malu mabi. Kuteleji matshu ebe ku mei onso adibo bamba, bua wewe kunvu bihendu bia muhika webe; bualu bua mutshima webe udi mumanye ne, Wewe biebe wakahenda bakuabo misangu ya bungi. Nakateka malu au onso mu meji; nakamba ne, Nempete meji, kadi nakuahanga. Malu adiku, adi kule, adi ne ndondo mule; udi mumanye mua kuajingulula nganyi? Nakateka mutshima wanyi ku kumanya ne kujingulula lungenyi ne kusokolola kua malu onso bua meme kumanya buhote bua malu mabi, ne ditshimbakana dia malu a hatuhu. Nakasangana ne, Mukashi udi ne mutshima mufuanangane ne mateyi ne bukuondo ne bianza bidi bu mionshi, yeye udi mutambe lufu bululu; wasankisha Nzambi neahanduke mu bianza biandi; kadi yeye neakuate muntu mubi. Muambi udi Wamba ne, Monai munakasangana hanakateta kusangisha bualu bumue ku bukuabo bua kuheta bualu bujalame; kadi tshiakasangana bualu buakadi mutshima wanyi ukeba tô ne mpindiu; nakasangana muntu mulume umue mujalame munkatshi mua tshinunu tshia bantu, kadi tshiakasangana muntu mukashi munkatshi muabo. Nakasangana anu bualu ebu bumue ne, Nzambi wakafuka bantu ne mitshima mijalame, kadi bobo bakadikebela malu a ngenyi yabo. Udi bu muena meji nganyi? Udi mumanye dijingulula dia bualu nganyi? Meji a muntu adi akenkesha mpala wandi, ne mpala wakadiye munyenge udi usululuka. Ndi ngamba ne, Utumikile mukenji wa mukelenge; bualu bua wakamana kuditshiha kudi Nzambi. Kumuki ku mesu kuandi lukasa; kunanukidi mu bualu budi kabuyi bumusankisha, bualu bua yeye utu wenza bu mudiye musue. Bualu bua dî dia mukelenge didi dishikisha bualu; nganyi udi mua kumukonka ne, Udi wenza tshinyi? Mutumikidi wa mikenji kena ukengeshibua; mutshima wa muena meji udi ujingulula bikondo ne ngenzelu. Bualu buonso budi ne tshikondo tshiabu ne ngenzelu wabu; dikenga dia muntu didi dimunemena bujitu; bualu bua yeye kena mumanye malu alualua; nganyi udi mua kumanya muikalau? Kakuena muntu udi mua kukandika muhuya wa muoyo; yeye kabidi kena mua kuindisha dituku dia lufu; kabena balekela bena nvita hatshidibo baluangana; bubi kabuena mua kuhandisha muenʼabu. Nakatangila malu au onso; nakateka mutshima wanyi ku malu onso adi enjibua muinshi mua diulu; tshikondo tshidiku tshidi muntu ne bukole bua kukengesha mukuabo. Nakatangila bantu babi bajikibue; bakadi babuele, bahatuke ku muaba wa tshijila; bena musoko bakabatula muoyo kabidi; ebu mbualu bua hatuhu. Bualu bua kabena bakengesha benji ba malu mabi lukasa, mitshima ya bana ba bantu idi ikoleshibua bua kuenza malu mabi. Nansha muntu muenze malu mabi misangu lukama, nansha mushale ne muoyo musangu mule, bulelela, ndi mumanye ne, Badi batshina Nzambi nebahete diakalengele ku mesu kuandi, bua badi bamunemeka; kadi muntu mubi kena uheta diakalengele, yeye kena uvudisha matuku andi, adi bu mindidimbi; bualu bua yeye kena utshina ku mesu kua Nzambi. Bualu bua hatuhu budi buenjibue ha buloba, bua bantu bakane badiku bakaheta malu akadi kuikala kudi bantu babi; bantu babi badiku bakaheta malu akadi kuikala kudi bantu bakane. Nakamba ne, Bualu ebu budi hatuhu kabidi. Hashishe, nakanyisha disanka, bualu bua muntu kena ne bualu buimpe bukuabo muinshi mua diba budi butamba kudia, kunua ne kusanka: bualu bua mu malu a mudimu wandi, â ke adi ashala kudiye matuku a muoyo wandi adi Nzambi mumuhe muinshi mua diba. Hanateka mutshima wanyi ku dijingulula dia meji ne ku dimona dia midimu idi yenjibua ha buloba (bualu bua bakuabo badiku badi kabayi baheta tulu ku mesu munya ne butuku), nunku nakatangila midimu yonso ya Nzambi, nakamona ne, Muntu kena mumanye mua kujingulula midimu yonso idi mienjibue muinshi mua diba, nansha muntu munanukile bua kuyikeba, yeye kena usheta; bielangana muena lungenyi meji ne, Nakayimanya, yeye mene kena ne bukole bua kuyisangana. Bualu bua nakateka malu â onso mu mutshima wanyi bua kuateta bu mudi bantu bakane ne bena meji ne midimu yabo bidi mu bianza bia Nzambi; bikalaku dinanga anyi lukuna, muntu kena mumanye; malu onso adi ku mpala kuabo. Nshikidilu wa bantu bonso udi muomumue: udi muomumue kudi bantu bakane ne kudi bantu babi, kudi bantu bimpe badi ne mitshima mitoke ne kudi badi ne mitshima mifike, kudi badi bashihela Nzambi nyama ne kudi badi kabayi bamushihela nyama; muntu muakane udi anu bu muntu mubi; udi muditshihe udi muomumue ne udi utshina mua kuditshiha. Ebu mbualu bubi bua mu malu onso adi menjibue muinshi mua diba ne nshikidilu umue udi kudi bantu bonso; bulelela, mitshima ya bana ba bantu idi miule tente ne malu mabi; kutomboka kudi mu mitshima yabo hatshidibo ne muoyo; ku nyima badi baya kudi bafue. Bualu bua udi ubadibue munkatshi mua badi ne muoyo udi ne ditekemena; bualu bua mbua udi ne muoyo udi uhita nyama wa ntambue mufue. Bualu bua badi ne muoyo badi bamanye ne, Netufue; kadi bafue kabena bamanye bualu bumue, kabena ne difutu diabo kabidi; kabena babavuluka. Dinanga diabo ne lukinu luabo ne mukau wabo biakajimina kale; kabena ne bualu bukuabo tshiendelele mu malu onso adi enjibua muinshi mua diba. Ya biebe, udie bidia biebe ne disanka; unue nvinyo yebe ne mutshima wa disanka; bualu bua Nzambi wakumana kuitabusha midimu yebe. Bilulu biebe bikale bitoke tô matuku onso; kuhangi kuela manyi ha mutu hebe. Usanke ne mukashi webe ûdi munange matuku onso a muoyo webe wa ha buloba akukuhabo muinshi mua diba, matuku ebe mene a ha buloba; ebu mbuebe buhianyi bua mu muoyo ne mu midimu yebe iudi wenza muinshi mua diba. Malu onso audi wenza wenze ne bukole buebe buonso; bualu bua kakuena mudimu, kakuena kulongolola kua malu, kakuena lungenyi anyi meji ku Muaba wa Bafue kûdi uya. Nakatangila kabidi muinshi mua diba ne, Bena lubilu lukole kabena bahita hakuaho mu kutumbila lubilu misangu yonso, nansha bena bukitu kabena bahitahita bakuabo bukole mu nvita; bena meji kabalu baheta bia kudia bionso; bena lungenyi kabatu baheta bubanji buonso; badi ne ngenzelu muimpe kabatu baheta diakalengele dionso; kadi buonso buabo badi ne bikondo bidi malu abatulukila. Muntu kena mumanye tshikondo tshiandi; bu mudi minyinyi ya mu mai ikuatshibua mu kahamba kabi, ne bu mudi nyunyu ihia masoka, nunku bana ba bantu badi bakuatshibua mu tshikondo tshibi haluatshi kudibo lukasa. Nakatangila lungenyi lua nunku muinshi mua diba, luakunkemesha, luakumueneka bu bualu bunene kundi: Musoko mukese wakadiku, anu bantu banya-banya bakadimu; mukelenge munene wakalua kuluisha, wakautshintshimika ne wakasa bibumba; bakasanganamu muena meji muhele; bua lungenyi luandi yeye wakasungila musoko, kadi kakuakadi muntu wakavuluka muhele eu. Hashishe, nakamba ne, Lungenyi ludi luhita bukole buakane; kadi badi balengulula lungenyi lua muntu muhele ne kabena bunvua mei andi. Mei a bena meji adibo bunvua talalâ adi ahita mbila ya mukokeshi wa bahote buakane. Lungenyi ludi luhita bintu bia nvita bukole; kadi muntu mubi umue udi unyanga malu makane a bungi. Njiji mifue idi inunkisha manyi a muenji wa manananshi muhuya mubi; nunku buhote bukese budi bujimisha lungenyi ne butumbi. Mutshima wa muenu meji udi ku tshianza tshiandi tshia balume; kadi mutshima wa muhote udi ku tshianza tshiandi tshia bakashi. Bulelela, henda muhote mu nshila, mutshima wandi udi umuhangisha, yeye udi umanyisha bantu bonso ne, Ndi muhote. Biakutekela mukokeshi tshiji, kumuki ku muaba webe nansha, bualu bua kalolo kadi katekesha bihendu bia bungi. Nakatangila bualu bubi muinshi mua diulu, budi bu dituhakana didi difuma kudi mukokeshi; malu mahote adi atumbishibua bikole, kadi babanji badi bashikame mu miaba mihuekele. Nakatangila bahika babanda ha nyima ha tuhalu; nakatangila bakokeshi benda hanshi bu bahika. Udi umbula dijimba neadishindemu; udi uluhula disoso mu tshimanu, nyoka neumusume. Udi uhanda mabue, wowo neamukengeshe; udi uhanda nkunyi neyimuheteshe njiu. Biatshihala tshiamu, hikala muntu kayi mutshinone, nunku budiye nʼahu mbua kutaha ne bukole buonso; lungenyi ludi mua kumutungunusha. Bulelela, nyoka neasume bikalaku kakuyi ditekesha; muenu biakulakula udi biandi muomumue. Mei a mukana mua muena meji adi ne kalolo, kadi mishiku ya muhote neyimumine. Ku tshibangidilu tshia mei a mukana muandi kudi butshimbe; nshikidilu wa mei andi udi buhale bubi. Muhote udi utudisha mei, kadi muntu kena mumanye malu adi kâyi manze kulua; udi mumanye mua kumuambila malu adi amulonda nganyi? Midimu ya bahote idi ibatekesha; kabena bamanye mua kuya ku musoko. Mulau kûdi, wewe tshisamba, tshidi ne mukelenge mutshikale muana, tshidi ne haminyampala batu badia mu dinda! Disanka kûdi, wewe tshisamba, tshidi ne mukelenge muneme, tshidi ne baminyampala batu badia ha diba dikumbane bua kuheta bukole kabuyi bua kukuatshika maluvu. Bua bufuba musaka wa nsubu udi uhuka; bua lulengu mai adi amata mu nsubu. Bidia bidi bisankisha bantu; nvinyo idi isankisha mitshima ya bantu; biuma bidi bihetesha bintu bionso. Kuhendi mukelenge mu meji ebe nansha; kuhendi babanji mu nsubu webe wa bulalu; bualu bua nyunyu wa mulu neaye ne dî diebe, ne tshidi ne mahuahua netshimuangalashe lumu elu. Wele bidia biebe ha mutu ha mai, bualu bua neubisangane kabidi hahita matuku a bungi. Uhe bantu muanda mutekete nansha muanda mukulu tshituha tshia bintu biebe, bualu bua wewe kuena mumanye bubi buamueneka ha buloha. Bikala matutu mûle tente ne mai a nvula, adi amumatshisha ha buloba; biahona mutshi ku luseke lua ku sude anyi lua ku nôde, mutshi newikale anu mu muaba wakahonenau. Udi utangila bu mudi luhehele luenza kena ukuna bintu; udi utangila bu mudi matutu enda kena uhuola. Bu mûdi kuyi mumanye mudi luhehele luheha, bu mûdi kuyi mumanye mudi mifuba idiunda munda mua mukashi udi ne difu, nunku kuena mumanye mudimu wa Nzambi udi wenza malu onso. Kuna maminu ebe ne dinda, kuikishi dilolo; bualu bua kuena mumanye ne bidi bidiunda ngebi anyi mbiabia, anyi bubidi buabi nebidiunde. Bulelela, munya udi muimpe; mesu adi asanka bua kumona diba. Biashala muntu ne muoyo bidimu bia bungi, asankilemu; kadi avuluke biandi kabidi matuku a mîdima, bualu bua neikale a bungi. Malu onso alualua adi hatuhu. Wewe nsongalume, usanke mu bunsongalume buebe, mutshima webe akusankishe mu matuku a bunsongalume buebe; wende mu nshila yonso idi mutshima webe musue ne idi mimpe ku mesu kuebe; kadi Umanye biebe ne, Nzambi neakulumbuluishe bua malu au onso. Umushe kanyinganyinga mu mutshima webe ne malu mabi a mubidi webe; bualu bua bikondo bia buana ne bunsongalume bidi hatuhu. Uvuluke Mufuki webe mu matuku a bunsongalume buebe, hadi matuku mabi kayi manze kulua anyi bidimu kabiyi bianze kufika ha buihi, haudi wamba ne, Tshiena nʼabi disanka; hadi diba, munya, ngondo ne mitoto kabiyi bianze kulua mîdima ne matutu kâyi manze kuhingana haloka nvula; mu matuku adi balami ba nsubu bazakala, bantu hakole nebiname ne bahedi ba manvua nebalekele mudimu bualu bua badi banya-banya; batangidi ba ha madidishi kabena bamona bimpe; ne bibi bionso bia ku misesu bidi binshila; tshiona tshia dihela dia manvua tshidi tshitekete; muntu neajuke anu bua muadi wa nyunyu; bana ba bakashi bonso, bimbi ba misambu, nebahungile; bakulumpe nebatshine mikuna; buowa nebubakuate mu nshila; ne mutshi wa amande newele bilongo; ne mpasu mene neamunemene bujitu; dijinga nedimutalale ku muoyo; bualu bua muntu uyaya ku muaba wandi wa tshiendelele; bena madilu badi bendakana mu misesu; diambedi nshinga wa tshiamu tshia argent kayi muanze kusuluka, anyi dilonga dia tshiamu tshia or kadiyi dianze kufua anyi mulondo kauyi muanze kufua ku mpokolo wa mai, anyi nkata kayi muanze kutshibuka ku dina dia mai; nunku mubidi newandamuke dinfuenkenya dia buloba kabidi ne muhuya wa muoyo neuhingane kudi Nzambi wakaufila. Muambi udi wamba ne, Malu a hatuhu, malu onso adi hatuhu. Bualu bukuabo, Muambi wakadi ne meji, yeye wakayisha bantu lungenyi; bulelela, yeye wakelangana meji, wakakebakeba ne wakalondolola nsumuinu ya bungi. Muambi wakadifila bua kuheta mei adi asankisha bantu, mei makane ne malelela. Mei a bena meji adi bu misongolo; adi masangishibue bu misumadi mikumine bikole kudi mulami umue. Bualu bukuabo, muanʼanyi, udimuke; kakuena ndekelu wa kufunda kua mikanda ya bungi; kutamba kuyila kudi kutekesha mubidi. Eu nshikidilu wa malu onso; malu onso adi munvuike. Utshine Nzambi, utumikile mikenji yandi; ebu mbualu buonso budi muntu ne bua kuenza. Bualu bua Nzambi nealumbulule mudimu wonso ne bualu buonso busokoka, nansha buimpe nansha bubi. Musambu wa mu misambu, udi wa Solomo. Utuangane nʼanyi mishiku, Bualu bua dinanga diebe didi dihita nvinyo buakane, manyi ebe adi ne dihembu dimpe, dina diebe didi bu manyi adibo bahongolola; nunku bansongakashi batshidi tumama badi bakunanga. Unkoke; netukulonde lukasa. Mukelenge wakulua nʼanyi mu nsubu muandi. Netusanke bua bualu buebe; kutumbisha kuetu kua dinanga diebe kudi kutamba kutumbisha kuetu kua nvinyo; badi bakunanga bulelela. Nuenu bana bakashi ba mu Yelushalema, meme ndi mufike kadi ndi mulengele bu nsubu ya ntenta ya mu Kedâ ne bu bilulu bikudika bia Solomo. Kanuntangidi bualu bua dikoba dianyi didi difike, bualu bua munya wakungosba. Bana betu ba balume ba difu dimue bakadi nʼanyi tshiji, bakunteka bua kulama mionshi ya tumuma tua nvinyo tua bakuabo, kadi tshiakalama mionshi yanyi. Wewe, udi mutshima wanyi munange, ungambile kûdi udisha mikoko yebe ne kudiyi ilala munda munya. Bua tshinyi ndi ne bua kuikala bu muhambuke munkatshi mua mikoko ya balunda bebe? Wewe mukashi udi uhita bakuabo bulengele, biwikala kuyi mumanye, ya biebe, ulonde mikono ya mikoko, udishe bana bebe ba mikoko ha buihi ne ntenta ya balami. Wanyi munanga, nakakuelekesha ne kabalu kadi kakoka dikalu dia Palô. Matama ebe adi malengele bua mabue adi malembelelahu, ne nshingu webe udi mulengesha ne mabue a mushinga mukole. Netukulongoluele bilenga bia or bilamika argent. Hakadi mukelenge mushikame ku mesa andi, manananshi anyi akanunka muhuya muimpe. Wanyi munanga udi kundi bu kabombi ka myrrhe kadi kalala mu mabele anyi. Wanyi munanga udi kundi bu tshisumbu tshia bilongo bia mu madimi a Ene-gedi. Mona, wanyi munanga, wewe udi mulengele, mona, udi mulengele be; mesu ebe adi bu a nyunyu wa nkutshi. Mona, wanyi munanga, wewe udi mulengele, udi mulengele be; bulalu buetu budi buadisha mabeshi a mitshi. Mikamba ya mu nsubu muetu idi ya mitshi ya cèdre maleka etu adi a mitshi ya cyprès. Meme ndi bu tshilongo tshia mu Shalona ne bu tshilongo tshia nsungubidi tshia mu tshibanda. Bu mudi tshilongo tshia nsungubidi munkatshi mua meba, wanyi munanga udi nunku munkatshi mua bana ba bakashi. Bu mudi mutshi wa mamuma a pommes munkatshi mua mitshi ya ditu, wanyi munanga udi nunku munkatshi mua bana ba balume. Nakashikama hanshi mu mundidimbi wandi ne disanka dinene, mamuma andi akadi mashemakane mukana muanyi. Yeye wakalua nʼanyi mu nsubu wa dibanji, dibendela diandi diakadi diheha mu mutu wanyi diakadi dinanga. Unkoleshe ne tumuma tukese tûme, unsangashe ne mamuma a pommes, bualu bua dinanga diakunkengesha. Tshianza tshiandi tshia bakashi tshidi bu musamu ku mutu wanyi; wakungela tshituha ne tshianza tshiandi tshia balume. Nuenu, bana ba bakashi ba mu Yelushalema, ndi nnusengelela ne, Bu mudibo bahita bitekete hadi ngulungu ne ntole milale mu mpata, kanunyangishi, kanubishi wanyi munanga anu hasueye. Dî dia wanyi munanga! Tangilai, yeye ulualua, udi wenda utuhika ha mikuna minene, udi wenda wela bidi ha mikuna mikese. Wanyi munanga udi bu ngulungu anyi bu lukungulu lua ntole. Monai, yeye udi muimane ku nyima kua tshimanu tshietu, udi utangidila ha madidishi a nsubu, udi ukenzakana ha masoso a madidishi. Wanyi munanga wakungambila ne, Juka biebe, wanyi munanga, wanyi mulengele, tuye bietu. Bualu bua tshikondo tshia mashika tshiakuhita; nvula yakushika. Bilongo bidi bimena mu buloba; tshikondo tshia kuimba misambu tshiakulua; dî dia nyunyu wa nkutshi didi diunvuika mu buloba buetu. Mamuma a mitshi ya nfigi akuboba; mionshi ya tumuma tua nvinyo yakuela bilongo, bidi binunka muhuya muimpe. Juka, wanyi munanga, wanyi mulengele, tuye bietu. Wewe, nyunyu wanyi wa nkutshi, udi usokoma mu mabue a mu mbuebue, mu miaba misokoka ya mu mbuwa; witabushe bua meme kumona mpala webe ne kunyua dî diebe; bualu bua dî diebe didi dimpe ne mpala webe udi mulengele. Utukuatshile tunyama, tunyama tua mikenga, tudi lunyanga mionshi ya tumuma tua nvinyo, bualu bua mionshi yetu idi ne bilongo bitekete. Wanyi munanga nguanyi, meme ndi wandi kabidi; yeye udi udishila mikoko yandi mu bilongo bia nsungubidi, tô ne hatalala munya ne haleha mindidimbi, wanyi munanga walukile, wikale bu ngulungu anyi ntole ha mikuna ya Bete. Butuku hanakadi ndala ha bulalu buanyi nakakeba udi mutshima wanyi munange; nakamukeba, kadi tshiakamuheta. Nakamba ne, Nenjuke, nengendakane mu musoko; nenkebe udi mutshima wanyi munange mu misesu ne mu miaba minene; nakamukeba, kadi tshiakamuheta. Bansentedi badi bendakana mu musoko bakasangakena nʼanyi; nakabebesha ne, Nuakutangila udi mutshima wanyi munange, anyi? Hanakumuka kudibo, nakaya anu tshituha, nakasangana udi mutshima wanyi munange; nakamukuata bikole, tshiakamulekela tô ne hanakalua nʼandi mu nsubu wa mamu wanyi, mu nsubu mene wa wakandela. Nuenu, bana ba bakashi ba mu Yelushalema, ndi nnusengelela ne, Bu mudibo bahita bitekete hadi ngulungu ne ntole mu mpata, kanunyungishi, kanubishi wanyi munanga anu hasueye. Nganyi udi ufuma mu tshihela bu muishi wa kahia, mununke muhuya wa myrrhe ne manananshi, ne bintu bionso bia dihembu dimpe bia muendi wa mushinga? Monai, ntshihoyi tshia Solomo! Bena bukitu makumi asambombo ba mu bakole ba mu Isalele badi batshiambula. Buonso buabo badi ne miele ya nvita, badi ne bukitu bua kuluangana; muntu yonso udi ne muele wandi musuika ku mukaba wandi, bua buowa bua butuku. Mukelenge Solomo wakadienzela tshihoyi tshia mitshi ya ku Lebanona. Wakenza makunshi atshi ne tshiamu tshia argent, ne tshitaku tshiatshi ne tshia or, nkuasa watshi wakadi mulengeshibue ne bilulu bikunzubile; tshiakadi tshilengeshibue munda ku dinanga dia bana ba bakashi ba mu Yelushalema. Nuenu, bana ba bakashi ba mu Siona, hatukai bua kutangila mukelenge Solomo, ne tshifulu tshia butumbi tshiakamuasabo kudi mamu wandi dituku dia dibaka diandi, dituku mene dia disanka dia mutshima wandi. Mona, wanyi munanga, wewe udi mulengele, mona, udi mulengele be! Mesu ebe adi bu a nyunyu wa nkutshi; nsuki yebe idi bu tshisumbu tshia mbushi idi ilala ku mukuna wa Gilada. Menu ebe adi bu tshisumbu tshia mikoko yakakosabo miosa, yakufuma ku tshiowelu tshia mai; buonso buai yakulela bana ba mahasa, kakuena umue mujimine. Mishiku yebe idi bu buanda bukunze-kunzû; mukana muebe mudi mulengele. Matama ebe adi bu bihesa bia dimuma dia grenade, ku nyima kua tshilulu tshiebe tshibuikilu ha mutu hebe. Nshingu webe udi bu tshibunda tshia Davidi, tshiakaseye bua bintu biandi bia nvita, tshidibo balembeleshe bintu bia nvita bia bantu tshinunu ne ngabu ya bena bukitu. Mabele ebe abidi adi bu bana ba ngulungu, bu bana ba mahasa ba ngulungu, badi badia munkatshi mua nsungubidi. Hatalala munya ne haleha mi ndidimbi, nembande ku mukuna munene udi ne mitshi ya myrrhe ne ku mukuna mukese udi ne mitshi ya manananshi. Wanyi munanga, wewe udi mulengele be; kuena ne ditoba, nansha dikese. Mukashi wanyi muhungile, umuke nʼanyi ku Lebanona; umuke nʼanyi ku Lebanona. Umuke ku mukuna wa Amana, ne ku wa Senî ne wa Hêmona, ku miaba idi mena a nyama ya ntambue, ne ku mikuna idi ne nkashama. Wewe, muanʼetu mukashi, mukashi wanyi muhungile, wakakoka mutshima wanyi, wakakoka mutshima wanyi ne disu diebe dimue, ne dibue dimue dia ku mabue a mu nshingu muebe. Muanʼetu mukashi, mukashi wanyi mubangile, dinanga diebe didi dimpe be! Dinanga diebe didi ditamba nvinyo buakane, muhuya wa manyi ebe udi uhita wa manananshi onso bulengele! Mukashi wanyi mubangile, mishiku yebe idi bu dikatshi dia buitshi; buitshi ne mabele bidi muinshi mua ludimi luebe; muhuya wa bilulu biebe udi bu wa Lebanona. Muanʼetu mukashi, mukashi wanyi mubangile, udi bu tshibunda tshidi ne tshibi tshinshila; udi bu mpokolo wa mai mubuikile, udi bu mushimi wa mai udi ne tshibuikilu. Wewe udi bu mitoloko mimene mu tshibunda tshia mamuma a grenade a mushinga mukole, ne mitshi ya bilongo ne ya nard, nard ne safran, cannelle ne cinnamone, ne mitshi yonso ya musenga wa manananshi, ne myrrhe ne aloès, ne bintu bionso bia muhuya muimpe— Wewe udi bu mushimi wa mai mu tshibunda tshia bilongo, bu dina dia mai a muoyo, ne bu misulu ya mai idi ihatuka ku Lebanona. Luhehele lua ku nôde, tabala, wewe, luhehele lua ku sude, heha! Nuhehe mu tshibunda tshianyi bua muhuya wa manananshi anyi uhatuke. Wanyi munanga abuele mu tshibunda tshiandi, adie biandi mamuma andi mimpe. Muanʼetu mukashi, mukashi wanyi mubangile, nakabuela mu tshibunda tshianyi. Nakasangisha myrrhe wanyi ne bintu bia muhuya muimpe; nakadia buitshi buanyi busangishe ne dikatshi; nakanua nvinyo yanyi misangisha ne mabele. Balunda banyi, diai, nuai bienu; bananga banyi, nuai bintu bia bungi. Nakadi mulale tulu, kadi mutshima wanyi wakadi mutabale; edi ndi dia wanyi munanga udi ukokola ku tshibi, wamba ne, Muanʼetu, wanyi munanga, nyunyu wanyi wa nkutshi, wanyi mulengele tshishiki, ungunzuluile tshibi; bualu bua dibungi didi ku mutu wanyi, dibungi dia butuku didi dimatshila ku nsuki yanyi. Nakavula bilulu bianyi, nembiluate munyi? Nakowa ku makasa anyi, ndi mua kuanyanga kabidi, anyi? Wanyi munanga wakabuesha tshianza tshiandi ku dididishi, mutshima wanyi wakatabuluka bualu buandi. Nakajuka bua kunzulula wanyi munanga tshibi; manananshi a myrrhe akadi amata ku bianza bianyi, akadi ku minu yanyi akumatshila ku tshikuatshidi tshia tshibi. Nakunzuluila wanyi munanga tshibi, kadi wanyi munanga wakadi mumane kuya. Mutshima wanji wakabungama hakadiye wakula; nakamukeba, kadi tshiakamuheta; nakamubikila, kadi yeye kakuitaba. Bansentedi badi bendakana ku musoko, bakasangakena nʼanyi; bakankina, bakantaha mputa; balami bakadi bashikame ha mutu ha ngumbu bakanyenga tshilulu tshianyi. Nuenu bana ba bakashi ba mu Yelushalema, ndi nnusengelela ne, Binuasangakena ne wanyi munanga, numuambile ne, Dinanga didi dinkengesha. Webe munanga udi uhita bakuabo munyi, wewe mukashi udi mutambe bulengele? Webe munanga udi uhita bakuabo munyi, bua wewe udi utusengelela nunku? Wanyi munanga udi mutoke ne mpala wandi udi lunkunjilakunjila; yeye udi muneme munkatshi mua bantu binunu dikumi. Mutu wandi udi bu or wa mushinga mukole be; nsuki yandi idi mifike fitutû bu nsala ya tshikololo, idi mijinga bikata. Mesu andi adi bu a nyunyu ya nkutshi ibidi mishikame kukala kua mai, masukula ne mabele, majalame bimpe mu bihoko. Matama andi adi bu bibunda bia bintu bia dihembu dimpe ne bu midioko ya muhuya muimpe; mishiku yandi idi bu nsungubidi, manananshi a myrrhe adi amataku. Bianza biandi bidi bu tukanu tua or tulengesha ne mabue a chrysolithes; mubidi wandi udi bu mubanga muhela mulengesha ne mabue a saphirs. Mikolo yandi idi bu makunshi a mabue masonga mujadike mu or; tshinfuanyi tshiandi tshidi bu Lebanona tshilengele bu mitshi ya cèdres. Mei a mukana muandi adi mashema; bulelela, yeye udi mutambe bulengele. Nuenu, bana ba bakashi ba mu Yelushalema, mulunda wanyi ne wanyi munanga udi nunku. Webe munanga wakuya kudi kunyi, wewe mukashi udi uhita bakuabo bulengele? Webe munanga wakuya kudi kunyi bua tuetu tukukebeleye? Wanyi munanga wakuya ku tshibunda tshiandi, ku malalu andi a bintu bia muhuya muimpe bua kudieye bintu mu tshibunda tshiandi, ne bua kuangateye bilongo bia nsungubidi. Meme ndi wa wanyi munanga; wanyi munanga nguanyi kabidi; yeye udi udisha mikoko yandi munkatshi mua nsungubidi. Wanyi munanga, wewe udi mulengele bu mukuna wa Tisa: udi mulengele bu Yelushalema; udi ukuatshisha bakuabo buowa bu tshisumbu tshia masalayi tshidi ne mabendela. Umusha mesu ebe kundi, bua adi atshinyisha. Nsuki yebe idi bu tshisumbu tshia mbushi idi yendakana ku mukuna wa Gilada. Menu ebe adi bu tshisumbu tshia mikoko idi ifuma ku tshiowelu tshia mai; buonso buai yakalela bana ba mahasa, nansha umue wai wakufua. Matama ebe adi bu bihela bia dimuma dia grenade ku nyima kua tshilulu tshiebe tshibuikila ha mutu hebe. Bakelenge bakashi makumi asambombo badiku, ne bakashi bahika babakibue makumi muanda mukulu badiku, ne bakashi batshidi tumama badiku badi kabayi mua kubadibua. Wanyi nyunyu wa nkutshi udi muakane be, udi anu umue umuehele; yeye udi muana umuehele wa mamu wandi; yeye udi muana mulengele kudi mumuledi. Bana ba bakashi bakamutangila, bakamuvudishila disanka; bakelenge bakashi ne bakashi bahika babakibue bakamutangila, bakamutumbisha. Nganyi udi ufuanangana ne lunkelu, udi ne bulengele bu ngondo, udi ukenka bu diba, udi ukuatshisha bantu buowa bu tshisumbu tshia masalayi tshidi ne mabendela? Nakaya bianyi mu tshibunda tshia mamuma, bua kutangila Buitshi idi mimene mu tshibanda; bua kumona mionshi bikalayi miele ntonga, ne grenades bikalayi miele bilongo. Diambedi tshiyi muanji kumanya bualu, mutshima wanyi wakanshikika munkatshi mua makalu a bantu banyi banene. Hingana, hingana, wewe Muena Shulama; hingana, hingana, bua tuetu tukutangile. Nuenu nudi nutangila Muena Shulama bu munudi nutangila maja a bisumbu bibidi bia masalayi bua tshinyi? Wewe muana wa mukelenge, makasa ebe adi atamba bulengele mu bisabata. Bibelu biebe bidi bu mabue a mushinga mukole adi masonga ku bianza bia nsenda. Mubidi webe udi luhanza luenza ne dibumba, ludi kaluyi luhanga nvinyo misangisha, tshifuka tshiebe tshidi bu tshisumbu tshia blé tshidi tshisuika bilongo bia nsungubidi. Mabele ebe abidi adi bu bana ba mahasa ba ngulungu. Nshingu webe udi bu tshibumba tshia mubanga. Mesu ebe adi bu mashi ba a mai a mu Heshebona adi hehi ne tshibuelelu tshia ku Bata-labima. Diulu diebe didi bu tshibumba tshia ku Lebanona tshidi tshitangila ku luseke lua Damaseke. Mutu webe udi ufuanangana ne mukuna wa Kâmele; nsuki ya ku mutu webe idi bu bintu bikunzubile; mukelenge udi muvuishibue bu muhika bua bulengele buai. Wewe udi mulengele be, udi unsankisha, wanyi munanga, dishina dia masanka. Mubidi webe udi bu dibue dia ngashi, ne mabele ebe adi bu ntungu ya ngashi. Nakamba ne, Nembande ku dibue dia ngashi, nenkuate ku matata adi; mabele ebe ikale bu bisumbu bia tumuma tukese, muhuya webe wikale bu muhuya wa mamuma a pommes. Mukana muebe muikale bu nvinyo ya mushinga mukole; idi ne nse mu hilakalaka kudi munanga wanyi, idi inyungisha mishiku ya badi balala tulu. Ndi wa wanyi munanga, dinanga diandi didi kundi. Lua biebe, wanyi munanga, tuye bietu mu madimi; tushikame bietu mu misoko. Tujuke lunkelu bua kuya mu madimi a tumuma tukese; tutangile mionshi bikalabi miele ntonga ne bilongo, ne grenades bikalayi miele bilongo; nenkuheku dinanga dianyi. Tumuma tua mandragores tudi tutuma muhuya muimpe; mamuma a mishindu yonso adi ku mbelu kuetu, ne mahia-mahia ne mukulukulu, anakukutekela, wewe wanyi munanga. Bu wewe muikale muanʼetu wa balume, wa dibele dimue, nakadi kusangila nʼebe ha bula ne nakadi kutuangana nʼebe mishiku; muntu kakadi kulengulula. Nakadi kukulombola, nakadi kulua nʼebe mu nsubu wa mamu wanyi udi unyisha malu; nakadi kukumusha nvinyo misangisha ne bintu bia muhuya muimpe ne mai a mamuma anyi a grenades. Tshianza tshiandi tshia bakashi tshidi bu musamu ku mutu wanyi, tshianza tshiandi tshia balume tshidi tshingela tshituha. Ndi nnutshihisha, nuenu bana bakashi ba mu Yelushalema, ne, Kanusonsolodi, kanubishi wanyi munanga anu hasueye. Udi ufuma ku tshihela mukuate ku diboko dia wandi munanga nganyi? Nakakutahasha muinshi mua mutshi wa mamuma; mamu webe wakadiku ne kanyinganyinga bualu buebe, yeye wakakulelaku ne kanyinganyinga. Unteke mu mutshima webe bu tshimanyinu ne bu tshimanyinu ha diboko diebe; bualu bua dinanga didi ne bukole bua lufu; mukau udi ne bukole bua Muaba wa Bafue; udi utema bu ndimi ya kahia, bu kahia ka Yehowa mene. Misulu ya mai ya bungi kayena mimanye mua kujima dinanga, mai a bungi kaena mamanye mua kudifuisha mu mai; bikala muntu mushintakashe bintu bionso bia mu nsubu wandi ku dinanga, ne bamuhishe bikole. Tudi ne muakunyʼetu wa bakashi udi kayi muase mabele; netuenzele muakunyʼetu wa bakashi tshinyi dituku diamubangilabo? Bikaleye bu tshimanu tshia nsubu, netumuashileku tshibumba tshia tshiamu tshia argent; bikaleye bu tshibi tshia mu nsubu, netumubuikile ne mabaya a mitshi ya cèdre. Meme ndi bu tshimanu tshia nsubu, mabele anyi adi bu bibumba biatshi; nunku nakadi ku mesu kuandi bu muntu muhele dikisha. Solomo wakadi ne budimi bua tumuma tukese mu Bâla-hamona, yeye wakafila budimi ebu mu bianza bia balami; muntu ne muntu wakadi ne bua kumufila tshinunu tshia biamu bia argent ku mamuma abu. Budimi buanyi, budi buanyi nkayanyi, budi ku mpala kuanyi; wewe Solomo neuhete tshinunu tshia biamu bia argent, ne balami ba mamuma nebahete nkama ibidi. Wewe udi mushikame mu bibunda, balunda bebe badi bateleja matshu ku dî diebe; udingunvuishe. Wanyi munanga, ulue lukasa; wikale bu kabuluku anyi bu lukungulu lua ntole ha mutu ha mikuna ya bintu bia muhuya muimpe. Tshikena kumona tshia Yeshaya, muana, wa Amoza, tshiakatangileye bualu bua Yuda ne Yelushalema, mu matuku a Uziya, Yotama, Ahaza ne Hezikiya, bakelenge ba Yuda. Diulu, unvua biebe, ne wewe buloba, teleja matshu ebe, bualu bua Yehowa wakuamba dî ne, Nakudisha, nakukolesha bana, ne bakuntombokela. Ngombe udi mumanye nfumu wandi, mpunda udi mumanye tshidilu tshia mukelenge wandi; kadi Bena Isalele kabena bamanye bualu, bantu banyi kabena bajingulula malu. Nuenu, tshisamba tshia bantu babi, tshia badi banema bujitu bua malu mabi, tunkanunuma tua benji ba malu mabi, bana badi banyanga bienzedi biabo! Bakulekela Yehowa, bakulengulula Wa Tshijila wa Isalele, bakulua bu benyi kudiye, bakumukoma nyima. Bualu kai nutshidi ne bualu bua banukume kabidi, bua nudi nunanukila kutombokela? Mutu wonso udi musame, mutshima wonso udi muhungile. Munda mua makasa tô ne ku lubombo lua mutu kakuena muaba udi kauyi ne disama, anu mputa, biuja, ne mibundabunda mihia-mihia, bidi kabiyi bianze kukama, kabiyi bianze kujingila ne tshilulu, kabiyi bianze kutekeshibua ne manyi. Buloba buenu budi bubutuka, misoko yenu idi mioshibue ne kahia; bantu ba bende badi badia bintu bia mu buloba buenu ku mesu kuenu mene, ne budi bubutuka bu mudibo bahaula musoko kudi bantu ba bende. Badi bashiya muana mukashi wa Siona bu tshisambusambu tshia mu budimi bua tumuma tua nvinyo, bu tshitandatanda tshia mu tshibidi tshia tumuma tua tunsalala, bu musoko udibo batshintshimika. Bu Yehowa wa misumba kayi mutushile difuka dikese dia bantu bakahanduka munkatshi mua bantu bakadiku diambedi, tuakadi kuikala bu Sodoma, tuakadi kufuanangana ne Amola. Nuenu bakokeshi ba mu Sodoma, unvuai dî dia Yehowa! Nuenu bantu ba mu Amola, telejai matshu enu ku diyisha dia Nzambi wetu! Yehowa udi unukonka ne, Bisumbu bia milambu yenu bidi bu tshinyi kundi? Nakumana kukuta ne milambu ya kuosha ya bimpanga ne ya manyi a nyama midisha; tshiena nsanka bua mashi a balume ba ngombe, anyi a bana ba mikoko anyi a mpumbu ya mbushi. Hanualua kumueneka ku mesu kuanyi, wakunuelela mukenji nganyi bua nuenu nudiate biendedi bianyi? Kanulu kabidi ne milambu ei ya hatuhu; muishi wa musenga wa manananshi wakuntonda. Disanka dia ngondo muhia-muhia ne dia lumingu ne kubikila kua masangisha, mmalu adi atondesha mutshima wanyi. Ebu mbualu bubi; tshiena mua kutukisha ne lutulu bua malu mabi ne bua disangisha dia tshijila. Mutshima wanyi udi ukina masangisha enu a ngondo mihia-mihia ne matuku enu masungula bua kudiamu bia kudia bia disanka; adi anemesha mutshima wanyi bujitu, ne kutuala kuau kudi kuntonda. Nunku, hanuolola bianza bienu kundi, nensokoke mesu anyi kunudi; e, hanuantendelela ne mitendelelu ya bungi mene, tshiena nnunvuila; bianza bienu bidi biule tente ne mashi. Nudioweshe bienu, nudilengeshe, numushe bubi bua bienzedi bienu ku mesu kuanyi; nulekele kuenza malu mabi, nuyile mua kuenza malu makane; nukebe kulumbulula kuakane, nuenzeshe mukengeshi bua yeye kuenza biakane; nulumbulule bilumbu bia bana ba nshiya ne kulumbulula kuakane, nuakuile bakashi ba mu lufuila mu bilumbuluidi. Yehowa udi Wamba ne, Luai bienu, tuhunge dî bua bualu ebu: nansha hikala mihi yenu mikunze-kunzû, neyikale ne butoke bua neige; anyi bikalayi mikunze bu mashi, neyikale mitoke bu miosa ya mikoko. Binuikala ne mitshima ya kuenza malu anyi ne ya kutumikila dî dianyi, nenudie bintu bimpe bia mu buloba; kadi binuabenga ne binuatomboka, nebanushihe ku muele wa nvita; bualu bua mukana mua Yehowa muakuamba dî edi. Monai mudi musoko eu wakamanyabo mua kueyemena diambedi muandamuke mukashi wa masandi! Wowo wakadi mule tente ne kulumbulula kuakane, kuakadi buakane bushikamemu diambedi, kadi katataka anu bashihianganyi badimu! Biamu biebe bia argent biakuandamuka anu bikanganya, nvinyo yebe yakutekeshibua ne mai. Bakokeshi bebe badi batomboka, ne badi bakuatanganyi ba bulunda ne bibi. Muntu yonso wa munkatshi muabo udi musue mbueshilu, udi ukeba anu maha. Kabena balumbulula bilumbu bia bana ba nshiya ne kulumbulula kuakane, ne tshilumbu tshia mukashi wa mu lufuila katshiena tshifika kudibo. Nunku Mukelenge, Yehowa wa misumba, Mukole wa Isalele, udi Wamba ne, Tangilai! Nendiholeshe bua badi bankina, nendisombuele kudi badi nʼanyi lukuna. Nempingishe tshianza tshianyi kabidi hamʼbidi hebe bua kukukengesha, nenkulengeshile ku tshikanganya tshiebe bu mudibo balengesha ne buanga bua nsabanga, nenkûmushile tshiamu tshiebe tshionso tshia hatuhu. Nenkuhingashile balumbuluishi bebe bu muakadi aba ba diambedi, ne bafidi bebe ba meji bu muakadi ba ku tshibangidilu. Hashishe nebakubikile ne, Musoko wa buakane, musoko udi bantu bamanye mua kueyemena. Nebabikile Siona ku kulumbulula kuakane, nebahikule bantu bandi badi bahingana kudi Yehowa ku buakane. Kadi kubutuka nekuhone hamʼbidi ha bantombokedi ne bantu babi diatshimue, ne bantu badi balekela kulonda Yehowa nebabutudibue. Bualu bua bundu nebubakuate bua mitshi ya telebinta inuakunanga, nenuikale babuandakashibue bualu bua bibidi binuakusungula. Bualu bua nenuikale bu mutshi wa telebinta udi mabeshi au mafubidila, ne bu tshibidi tshidi katshiyi mai. Muntu mukole neikale bu tshikanfu tshia kutemesha, ne mudimu wandi newikale bu lusase lua kahia. Bubidi buabi nebihie bohamue, kakuena wa kubijima. Dî dia Yeshaya, muana wa Amoza, diakatangileye bualu bua Yuda ne bua Yelushalema. Mu matuku atshidi alua mukuna wa nsubu wa Yehowa neujadikibue bu mukuna muhite mikuabo bule, neubandishibue ha mutu ha mikuna mikese; ne ba mu bisamba bionso nebabuelemu. Bantu ba bungi nebayeku, nebambe ne, Luai bienu, tubande ku mukuna wa Yehowa, tubuele mu nsubu wa Nzambi wa Yakoba; bua yeye atuyishe bienzedi biandi, ne bua tuetu tuende mu nshila yandi. Bualu bua diyisha dia mikenji nedifume mu Siona, ne dî dia Yehowa nedihatuke mu Yelushalema. Yeye nealumbulule bilumbu bia munkatshi mua bisamba bia bantu, neakosele bantu ba bungi bilumbu biabo; bobo nebafule nkasu ya kudima nʼai ku miele yabo ya nvita, nebatule miele ya kukosa nʼai matamba mafubidila a mitshi ku mafuma abo; tshisamba tshikuabo katshiena tshibisha muele wa nvita bua kuluisha nʼau tshisamba tshikuabo, ne kabena bayila lungenyi lua kuluangana nʼalu nvita kabidi. Bana ba Yakoba, luai bienu, tuende mu munya wa Yehowa. Bualu bua wewe, Yehowa, wakulekela bantu bebe, ba mu tshiota tshia Yakoba, bualu bua badi batamba kulonda batempi ba mbuku ba ku luseke lua esete, bakatua batempi ba mbuku bu mudi Bena Peleshete, ne badi batutakashangana bianza ne bana ba bisamba bia bende. Buloba buabo budi bûle tente ne argent ne or, ne kakuena kunfudilu kua biuma biabo; buloba buabo budi bule tente ne tubalu, ne kakuena kunfudilu kua makalu abo. Buloba buabo budi bûle tente ne mpingu; badi batendelela bintu bidibo basonga ku bianza biabo, bidi minu yabo mene yenza. Muntu muhuekele udi muiname, muntu munene udi muhuekeshibue; nunku kubabuikididi mihi yabo. Buelaku mu lubuebue, udisokoke mu dinfuenkenya dia buloba, ku mesu a Yehowa adi akuatshisha bantu buowa, ne ku butumbi bua buneme buandi. Mesu a diambu a bantu neinamishibue, dihetu dia bantu banene nedihuekeshibue, ne Yehowa nkayandi neatumbishibue mu dituku adi. Bualu bua Yehowa wa misumba udi ne dituku didiye ulumbuluisha bifukibua bionso bidi biditumbisha ne bidi bidisue, ne tshifukibua tshionso tshidi tshidibandisha; nebihuekeshibue, nedikale ku mitshi ya cèdre yonso ya ku Lebanona idi mile ne idi mileha mulu, ne ku mitshi ya telebinta yonso ya mu Bashana; nedikale ku mikuna mile yonso, ne ku mikuna mikese yonso idi mibande; ne ku tshibumba tshionso tshile, ne ku lumbu luonso ludi lukoleshibue ne bielelu bia nvita; ne ku matu onso a ku Tâshishi, ne ku bintu bionso bidi bimpe ku mesu. Diambu dia bantu nedihuekeshibue, kudisua kua bantu nekukeheshibue; anu Yehowa nkayandi neatumbishibue mu dituku adi. Mpingu yonso neyijimine tshiendelele. Bantu kabidi nebabuele mu mbuebue ya mu mabue ne mu nyongolo ya mu buloba, bua kusokomabo ku mesu a Yehowa adi abakuatshisha buowa, ne ku butumbi bua buneme buandi, hajukeye bua kuzakasha buloba bikole. Mu difuku adi bantu nebimashe mpingu yabo ya argent, ne mpingu yabo ya or, yakudifudilabo bua kuyitendelela, nebayimashe kudi bibulebule ne kudi tuhulukusu, bua bobo bine kubuelabo mu mbuebue, ne mu mitanta ya mbuebue, bua kusokomabo ku mesu a Yehowa adi abakuatshisha buowa, ne ku butumbi bua buneme buandi, hajukeye bua kuzakasha buloba bikole. Lekelai kueyemena muntu, udi ne muhuya mu mimpempe ya mu diulu diandi; bua badi mua kumubala bu tshinyi? Monai! Mukelenge, Yehowa wa misumba mene, udi umusha tshieyemenu ne tshibangu mu Yelushalema ne mu Yuda, tshieyemenu tshionso tshia bia kudia ne tshieyemenu tshionso tshia mai a kunua. Udi umusha muena bukitu ne umena nvita, mulumbuluishi wa bilumbu ne muprofete, mutempeshanganyi wa mbuku ne nkolomo; kapitene ka masalayi makumi atanu, ne muena butumbi, mufidi wa meji, muena majimbu udi ne lungenyi, ne muena muhongo. Nenvuishe bana ba balume bakokeshi babo, ne bana batekete nebakokeshe ku mutu kuabo. Bantu nebakengeshangane, muntu yonso neakengeshibue kudi mukuabo, ne muntu yonso neakengeshibue kudi muena mutumba nʼandi. Muana neadileshe ku mpala kua muntu mukole, ne muntu udi bakuabo bahetula neadileshe ku mpala kua muntu udi ne butumbi. Halua muntu kukuata muanʼabo mu nsubu wa tatu wandi, wamba ne, Wewe udi ne tshivualu, newikale mukokeshi wetu, ne buloba ebu bubutuke nebuikale muinshi mua tshianza tshiebe; mu difuku adi mene yeye neahidie ne dî dikole, wamba ne, Tshiena musue kuikala mukokeshi; bualu bua mu nsubu muanyi kamuena bia kudia anyi bia kuvuala; kanuena numbuesha mu bukokeshi ku mutu kua bantu aba. Bualu bua Yelushalema wakulenduka, ne Yuda wakuhona; bualu bua mei abo ne bienzedi biabo bidi bihidia Yehowa, bidi bivuisha tshiji ku mesu kua udi ne butumbi. Kansungusungu kabo ka mu bilumbu kadi kabahisha; badi balesha bakuabo bubi buabo, kabena babusokoka, bu muakenza Bena Sodoma. Mulau wikale kudibo! Bualu bua badi badivuishila malu mabi! Nuambile bantu bakane dî edi ne, Nenuikale ne diakalengele; bua nebadie mamuma a bienzedi biabo. Mulau wikale kudi muntu mubi! Neafute dikasa dibi; bualu bua nebamuenzele yeye bienzedi biakuenzeye ne bianza biandi. Ebu mbualu bua bantu banyi kabidi! Bana batekete badi bakengeshi babo, ne bakashi badi babakokesha. Bantu banyi! Badi banulombola badi banuhambuisha, badi banyanga nshila unudi nuendela. Yehowa udi ujuka bua kusengelela bantu bandi, udi wimana kulu bua kubalumbuluisha. Yehowa neabande bankolomo ne bakokeshi babo ba bantu bandi ne, Nuenu mene bakudia tumuma tuonso tua mu budimi bua tumuma tua nvinyo; bintu binuakunyenga kudi bahele bidi mu nsubu yenu. Nudi nudiata bantu banyi muinshi mua makasa enu, nudi nuhela mpala ya bahele ne mpelu yenu munyi? Edi ndikonka didi Mukelenge, Yehowa wa misumba mene, unukonka. Yehowa udi wamba kabidi ne, Bualu bua bana bakashi ba mu Siona badi badisue, badi benda bolola nshingu yabo, bakenzakana mesu mabi, bazunzuka, bakuisha nkanu idi miela ku mikolo yabo; nunku Mukelenge neameneshe nsudi ha mbombo ya mitu ya bana bakashi ba mu Siona, Yehowa neabavule bilulu biabo bua kusokolola butaka buabo. Mu dituku adi Mukelenge neumushe bulengele bua nkanu ya ku mikolo yabo ne bilulu ne bintu bilengele ku mitu yabo, tukanu tua ku matshu abo ne tua ku maboko abo ne bilulu bibuikila ha mpala yabo. Neumushe bitambala bia ku mitu ne biamu bilengele bia ku mikolo ne mikaba ya tshilulu, tushete tua kuelamu manananshi, ne manga. Neumushe tukanu tua ku minu ne mabue makane a ku mûlu, bilulu bia dibanji ne bia kuela ha maha, bibombi, ndimuenu ya kukuata ku bianza, bilulu bia mushinga mukole bia lin, bifulu ne bilulu bia kubuikila ha mpala. Halua tshikondo atshi, mu muaba wa bintu bia muhuya muimpe nemuikale bintu bibole; mu muaba wa kusuikabo mukaba wa tshilulu nebasuike nshinga; mu muaba wa nsuki idi miluka bihia nemuikale mabala, ne mu muaba wakadibo baluata diyeke dimpe, nebadijingile ne tshilulu tshidi tshiosha; nsalu ya muhika misadibue ne tshiamu tshidi tshiosha nebikale mu muaba wa bulengele bua mpala yabo. Nebashihe balume benu ku muele wa nvita, ne bilobo bienu nebifue mu nvita. Ba mu bibuelelu bia ku Siona nebase madilu, nebadie; ne yeye udibo bahaula neashikame hanshi ha buloba. Mu dituku adi bakashi muanda mutekete nebakuate mulume umue ku tshianza, bamba ne, Netudie bidia bietu tuetu, netuluate bilulu bietu tuetu; kadi anji kuitabusha bua batubikile ku dina diebe; utûmushile bundu buetu. Mu dituku adi lutonga lua Yehowa neluikale lulengele ne lua butumbi, ne mamuma adi buloba bumenesha neikale mimpe ne bu tshilenge kudi ba mu Isalele batshidi bashala ne muoyo. Hashishe, nebabikile muntu udibo bashiya mu Siona ne utshidi mushale mu Yelushalema ne, Wa Tshijila, mmuntu yonso mene udibo bafunda dina diandi munkatshi mua bantu basungudibue bua kuikaleye ne muoyo mu Yelushalema. Nebabikidibue ku dina adi hashikisha Mukelenge kuvuwa bukoya bua bana bakashi ba mu Siona, ne halueye kumusha mamata a mashi a ba mu Yelushalema munkatshi mua musoko, ku nyuma wa kulumbulula kuakane ne ku nyuma wa kubutula. Mu diba adi Yehowa neafuke ditutu didi ne muishi wa kahia mu munya, ne dinkenke dia kahia kadi katema butuku, bua kubiteka ha mutu ha muaba wonso wa mu Mukuna wa Siona udi bantu bashikamemu, ne ha mutu ha bitendelelu bidibo badisangishilamu. Bualu bua nebâdishe tshibuikidi ha mutu ha butumbi buonso. Tshitandatanda netshikaleku bua kubaha dileshi mu diba dia munya mukole, ne bua kuikalatshi tshinyemenu ne tshibuikidi halua tshihuhu ne nvula. Ngimbile wanyi munanga musambu wanyi wa dinanga bua budimi buandi bua tumuma tua nvinyo: Wanyi munanga wakadi ne budimi bua tumuma tua nvinyo ha mutu ha mukuna wakadi ne buloba buimpe. Yeye wakabubundulula, wakumusha mabue onso akadimu, wakakunamu mionshi ya tumuma yakatamba buimpe, wakasa tshibumba tshia batentekedi munkatshi muabu, wakumbula tshikaminu tshia tumuma mu dibue diakadimu; wakatekemena ne, Budimi nebukuamishe tumuma tua nyinyo tuimpe, kadi buakakuamisha tumuma tusasa. Nunku, nuenu badi bashikame mu Yelushalema, ne bantu ba mu Yuda, ndi nnusengelela ne, Nulumbulule tshilumbu tshidi hankatshi hanyi ne budimi buanyi. Nakadi kumanya mua kuenza tshinyi mu budimi buanyi tshindi tshiyi muanze kuenza? Bualu kai, hanakatekemena ne, Nebukuamishe tumuma tuimpe tua nvinyo, buakakuamisha anu tumuma tuzaza? Mpindiu nennuambile malu andi ngamba kuenzela budimi buanyi: nentule luhangu luabu lua mingonge ya meba, nebabunyange; nenshimbule lumbu luabu lua mabue, ne nebanudiate muinshi mua makasa. Nenkubutule, ne kabena balengesha matamba a mionshi yabu kabidi, kabena babulula; kadi meba ne mingonge nehimenemu; nengele matutu mukenji bua kalokeshi nvula hamʼbidi habu. Bualu bua budimi bua tumuma tua nvinyo bua Yehowa wa misumba budi tshisamba tshia Bena Isalele, ne bantu ba mu Yuda badi mitshi yandi idiye munange. Yeye wakatekemena kulumbulula kuakane, kadi monai! Kumatshisha kua mashi kudiku; wakatekemena buakane, kadi monai! Muadi udiku. Mulau wikale kudi badi balamakasha nsubu ne nsubu, ne badi basangakasha budimi ku budimi, tô ne hikalaku kakuyi muaba, ne badi banushikamisha ha nkayenu munkatshi mua buloba! Yehowa wa misumba udi wamba mu matshu anyi ne, Bulelela, nsubu ya bungi neyikale munda mutuhu, yoyo mene mminene ne miakane, kayiyi ne bantu bashikamemu. Bualu bua hectares itanu ya buloba mu budimi bua nvinyo neyilue anu ne tshihiminu tshimue tshia nvinyo, ne ntshihiminu tshimue tshia homer tshia maminu netshikuamishe anu tshihiminu tshimue tshia épha tshia bia kudia. Mulau wikale kudi bantu badi bajuka hatshiatshia bua kuya kukeba maluvu makole, kudi bantu badi batabale tô ne munda mua butuku, tô ne halua maluvu kutemesha mitshima yabo! Mu bidia biabo bia disanka badi ne tshisanji ne lunzenze, dikasa ne lujiba, ne maluvu kabidi; kadi kabena belangana meji a bienzedi bia Yehowa, kabena bamona mudimu udiye wenza ne bianza biandi. Bua malu â bantu banyi badi babuela mu buhika bualu bua kabena ne meji; bantu babo baneme badi bafua ne nzala, ne nyota idi isuma ba mu tshisumbu tshiabo tshia bantu bangi. Nunku Muaba wa Bafue wakudiundisha kunvua kuau kua nzala, wakubutula mukana muau kamuyi ne nshikidilu, ne badi ne butumbi mu Yelushalema badi bahuekamu, tshisumbu tshiabo tshia bantu bangi, ne tshia badi babishamu diyoyo, ne muntu udi uditumbishamu. Muntu muhuekele udi muiname, muntu munene udi muhuekeshibue, mesu a badi badibandisha adi mahuekeshibue. Kadi Yehowa wa misumba udi mutumbishibue ku kulumbulula kuakane. Nzambi wa Tshijila udi udimuenesha bu Wa Tshijila ku buakane buandi. Hashishe, bana ba mikoko nebadieku mashinde bu muakadibo mua kudia mu budimi buabo bua mashinde, nyama idi ne manyi ne bana ba mikoko nebidie mashinde munkatshi mua bikulu. Mulau wikale kudi badi bakoka malu mabi kudibo ne mionshi ya mashimi, badi bakoka bualu bubi bu muakadibo babukoka ne nshinga ya ku dikalu, badi bamba ne, Endeshe biandi lubilu, endeshe bua kushikisha mudimu wandi bua tuetu tûmone; bualu budi Wa Tshijila wa Isalele muhangidishe busemene ha buihi, bumueneke, bua tuetu tubumanye! Mulau wikale kudi badi babikila bualu bubi ne, Mbualu buakane, ne bualu buakane ne, Mbubi; badi babala midima bu munya, badi babala munya bu midima; badi babala bintu bia bululu bu bintu bisheme ne bintu bidi bisheme bu bintu bia bululu! Mulau wikale kudi badi badimona bu bena meji, badi badimona bu bena budimu! Mulau wikale kudi badi ne bukitu mu kunua kua maluvu ne badi ne dikima dia kusangakasha maluvu makole; badi babingisha muntu muhila ku mbueshilu, badi bahisha muntu mubinga ku dikosa dibi dia tshilumbu tshiandi! Nunku bu mudi ludimi lua kahia luosha misengeleke ya mponda, ne bu mudi bisonsa biume bihona hanshi mu kahia, muji wabo newikale bu tshintu tshibole, tshilongo tshiabo netshibande mulu bu mudi luhuishi luenza, bualu bua bakuhita diyisha dia mikenji ya Yehowa wa misumba, bakulengulula dî dia Wa Tshijila wa Isalele. Bua malu â tshiji tshia Yehowa tshiakatema kudi bantu bandi, ne yeye wakolola tshianza tshiandi bua kubakuma nʼatshi, wakabatuta; mikuna yakazakala, ne bitalu biabo biakalala munkatshi mua misesu bu bintu bia kuela ku diala. Bua malu â onso tshiji tshiandi katshiena tshikudimuke, kadi tshianza tshiandi tshitshidi tshiolola. Yeye neabishe dibendela diandi bua kusangishaku ba mu bisamba bidi kule, nele muosa bua kubabikila kudiye, bafume kunfudilu kua buloba; ne monai, nebadiendeshe bua kufika kudiye lubilu! Kakuena umue wabo udi uhanga anyi udi ulenduka mu nshila; kakuena umue wabo udi ubunga tulu anyi udi ulala tulu; kakuena umue wabo udi ne mukaba wa ku tshimono tshiandi musululuke, anyi muonshi wa ku bisabata biandi mukoseke. Mikete yabo idi misakisha bimpe, mata abo onso adi mamanyibue; mikono ya tubalu tuabo idi ifuana dibue dikole mu meji abo, nkata ya makalu abo idi iya lubilu bu nvunde. Tshibingu tshiabo netshikale bu kudila kua nyama wa ntambue mukashi, nebele tshibingu bu mudi bana ba nyama wa ntambue badila ne nebakungule, nebakuate tshintu tshidibo banyenga, nebanyeme nʼatshi, kakuyi muntu wa kutshihandisha. Mu dituku adi nebele bantu aba tshibingu tshidi bu tshiona tshia mai manene; ne biamona muntu buloba, ke, mîdima ne kanyinganyinga bidiku; ne munya udi ulua midima ku matutu mafike. Mu tshidimu tshiakafua mukelenge Uziya nakamona Mukelenge mushikame mu nkuasa wandi wa bukelenge, muikale kulu ne mubandishibue mulu, ne tshilulu tshia kumanda kua muzabi wandi tshia-kûsha ntempelo tente. Ha mutu handi hakimana baselafima; muselafima ne muselafima wakadi ne mahuahua asambombo. Wakabuikila mesu andi ne mahuahua abidi, wakabuikila makasa andi ne abidi, ne wakahahala ne abidi makuabo. Bakananukila kuelangana mei, bambilangana ne, Wa Tshijila, Wa Tshijila, Wa Tshijila udi Yehowa wa misumba; buloba buonso budi bûle tente ne butumbi buandi. Bishimikidi bia ku mbelu kua nsubu biakakanka bua dî dia wakadi wela lubila, ne nsubu wakûla tente ne muishi wa kahia. Ka meme nakamba ne, Mulau wakunkuata! Bualu bua ndi mujimine; bualu bua ndi muntu udi ne mishiku idi kayiyi miakane, ne ndi mushikame munkatshi mua bantu badi ne mishiku idi kayiyi miakane; bualu bua mesu anyi akumona Mukelenge, Yehowa wa misumba mene! Hashishe, umue wa baselafima wakahahala kundi, muikale ne dikala dia kahia diakadi ditema mu tshianza tshiandi, diakangateye ne lukuatu ku tshioshelu tshia milambu. Wakaditua mukana muanyi, wakamba ne, Mona, edi diakulua mishiku yebe; bubi buebe budi bûmushibue, ne malu mabi ebe adi mabuikidibue. Hashishe nakunvua dî dia Mukelenge diamba ne, Nentume nganyi, neatuyile nganyi? Nunku nakamba ne, Ka meme eu, untume meme! Yeye wakamba ne, Ya, wambile bantu aba ne, Unvuai! Unvuai! Kadi kanujinguludi! Monai! Monai! Kadi kanumanyi nansha! Vuisha mitshima ya bantu aba mitshima idi ne manyi, vuisha matshu abo mpudimatshu, ne buikila mesu abo; bua kabamonyi ne mesu abo, kabunvu ne matshu abo, kabajinguludi malu ne mitshima yabo, kabakudimunyi mitshima yabo bua kusangashibua. Hashishe nakamukonka ne, Mukelenge, bualu ebu nebulehe musangu bule munyi? Yeye wakakudimuna dî ne, Tô ne habutuka misoko mishale mutuhu, tô ne hashala nsubu idimu mutuhu; tô ne halua buloba kushala anu tshihela tshia hatuhu; tô ne halua Yehowa kumusha bantu bua kubateka kule, tô ne havulangana makolo. Biashalamu tshia dikumi, tshiotshi netshioshibue mu kahia tshiakabidi, bu mudi mutshi wa telebinta anyi mutshi wa chêne ishiya bikuka hayitahabo hanshi. Tunkanunuina tua tshijila netuikale tshikuka tshia bantu aba. Mu matuku a Ahaza, muana wa Yotama, muana wa Uziya, mukelenge wa Yuda, Lesine, mukelenge wa Sulia, ne Peka, muana wa Lemalaya, mukelenge wa Isalele, bakabanda mu musoko wa Yelushalema bua kuluangana nʼabo, kadi kabakamanya mua kubatshimuna. Bakambila ba mu nsubu wa Davidi ne, Bena Sulia bakuasa tshitudilu tshiabo mu buloba bua Efelayima. Mutshima wa mukelenge wakazakala, ne mitshima ya bantu bandi yakazakala, bu mudi mitshi ya muitu izakala ku mpala kua luhehele. Hashishe, Yehowa wakambila Yeshaya ne, Ya biebe, wakidile Ahaza, wewe ne muanʼebe, Shea-yashuba, ku ndekelu kua mutuba wa mai udi uhatuka mu tshina tshia mai tshidi ku mutu kua mukuna, mu nshila udi uyila ku budimi bua Muvuwi wa Bilulu. Wambile Ahaza ne, Udimuke biebe, wikale talalâ! Kutshinyi, ne mutshima webe kauteketshi, bualu bua nshikidilu ya bimunyi ebi bibidi bidi bihatula anu muishi wa kahia, bua tshiji tshikole tshia Lesine ne Bena Sulia ne tshia muana wa Lemalaya. Bualu bua Bena Sulia, Bena Efelayima ne muana wa Lemalaya bakukuelela tshifufu, bamba ne, Tubandeku bua kuluisha buloba bua Yuda, tutshinyishe badimu, tuhandemu muaba bua bualu buetu, tubueshe muana wa Tabêle mu bukelenge munkatshi muabu. Bua bualu ebu Yehowa udi wamba ne, Muanda eu kawena ujalama, kawena wikalaku. Bualu bua Damaseke udi mutu wa Sulia, ne Lesine udi mutu wa Damaseke; ne haleba bidimu makumi asambombo ne bitanu, Efelayima neahandike bihesa, bua kikadi tshisamba tshia bantu kabidi. Samalea udi mutu wa Efelayima, ne muana wa Lemalaya udi mutu wa Samalea. Binuikala kanuyi nuitabusha, kanuena nujadikibua bulelela. Yehowa wakambila Ahaza dî tshiakabidi ne, Lombela biebe Yehowa Nzambi webe tshimanyinu. Utshilombe nansha mu muaba wa mu ndondo wa mu buloba, nansha mu muaba udi mulu mene. Kadi Ahaza wakamba ne, Tshiena ntshilomba, tshiena nteta Yehowa munda. Yeshaya wakamba ne, Unvuai bienu, nuenu ba mu tshiota tshia Davidi. Budi bualu buhite butekete bua nuenu kuhangisha bantu, bua nudi basue malu enu atondeshe Nzambi wanyi kabidi, anyi? Nunku Mukelenge muine neanuhe tshimanyinu. Monai! Mukashi utshidi kamama neimite difu, nealele muana wa balume, neamuidike dina ne, Imanuele. Bia kudia biandi nebikale manteke ne buitshi hamanyeye mua kubenga malu mabi ne mua kusungula malu makane. Bualu bua diambedi muana eu kayi muanze kumanya mua kubenga malu mabi ne mua kusungula malu makane, buloba bua bakelenge aba babidi baudi utamba kutshina nebushale dikolo. Yehowa neafikishe kûdi wewe, ne kudi bantu bebe, ne kudi ba mu nsubu wa tatu webe, matuku mabi adi kayi manji kulua diambedi, katshia difuku diahanduluka Bena Efelayima kudi Bena Yuda, neanutumine mukelenge wa Ashû mene. Mu dituku adi Yehowa nêle muosa bua kubikila lujiji ludi kunfudilu kua misulu ya mai ya mu Ejipitu, ne lubulubulu ludi mu buloba bua Ashû. Yoyo neyilue, ne buonso buai neyikile mu mpongo ya hatuhu, ne mu mitanta ya mabue, ne hamʼbidi ha mitshi idi ne meba, ne ha madimi onso a kudishamu bimuna. Mu dituku adi Mukelenge neanuheye ne dihaya diakabuesheye mu mudimu wandi, ne diakangateye mu nseke ya buloba idi ku nyima kua Musulu wa Pelata, neanubeye ne mukelenge wa Ashû mene, neabeye nsuki ya ku mitu ne miosa ya ha makasa; dihaya nediumushe muedi wonso kabidi. Mu dituku adi muntu neadishe lukungulu lua ngombe ne mikoko ibidi; ne bua bungi bua mabele adiye ukama kudibi, yeye neadie manteke, bualu bua manteke ne buitshi nebikale bia kudia bia muntu yonso washala munkatshi mua buloba abu. Mu dituku adi, mu muaba wonso muakadi mionshi ya tumuma tua nvinyo tshinunu, yakadi mushinga wa bituha bia argent tshinunu, nemuikale buloba budi bumenesha anu meba ne mingonge. Bantu nebalueku ne mikete ne mata, bualu bua buloba buonso nebulue ne meba ne mingonge. Ne ebu mbualu bualua ku mikuna yakadibo babundulula ne lukasu diambedi; kuena mua kuyaku bualu bua buowa nebukukuate bua meba ne mingonge; kadi neyikale anu miaba ya kutumaku ngombe ne miaba idi mikoko mua kudiata. Yehowa wakangambila dî ne, Udiangatshile dibue dinene, ufundehu ne maleta adi muntu yonso mumanye mua kubala ne, Kuhaula-kua-bintu-kudi-kulua-lubilu, Kunyenga-kua-bintu-kudi-kudiendesha-lukasa. Nakadiangatshila bamonyi bakadi mua kueyemenyibua bua kujadikabo tshifundu, Uliya muakuidi, ne Zekâya, muana wa Yebelekaya. Hashishe, nakabuela kudi mukashi wanyi wakadi muprofete mukashi wa Nzambi, ne yeye wakimita difu, wakalela muana wa balume. Nunku Yehowa wakangambila ne, Umuidike dina ne, Kuhaula-kua-bintu-kudi-kulua-lubilu, Kunyenga-kua-bintu-kudi-kudiendesha-lukasa. Bualu bua diambedi muana eu kayi muanji kumanya mua kudila ne, Tatu wanyi, ne, Baba wanyi, biuma bia Damaseke ne bintu binyengibue mu Samalea nebiumushibue; nebaye nʼabi ku mpala kua mukelenge wa Ashû. Yehowa wakangambila dî kabidi ne, Bualu bua bantu aba bakuhetula mai a mu Shiloa adi ahueka talalâ, ne badi basanka bua bualu budi bukuata Lesine ne muana wa Lemalaya, tangila, Mukelenge neabavuishile mai a ku Musulu wa Pelata, adi makole ne adi mavula-ngane, au mmukelenge wa Bena Ashû ne butumbi buandi buonso. Wowo neubande ha mutu ha mitubu yau yonso, neuhasalale mibungiji yau yonso. Newende ku mpala tô ne habuelau mu Yuda, neuhasalale ne neuhitshilemu, neufike tô ne ku nshingu ya bantu. Kuolola kua mahuahua au nekûshe nseke yonso ya buloba buebe, Imanuele! Tshibukai bituha bituha, nuenu bantu, nukuatshike buowa; telejai matshu enu, nuenu ba mu maloba adi kule; nudiluatshishe bielelu bia nvita, nukuatshike buowa; nudiluatshishe bielelu bia nvita, nukuatshike buowa. Elai tshifufu tshienu, kadi netshiandamuke bualu bua hatuhu; ambai dî, kadi kadiena dijalama, bualu bua Nzambi udi nʼetu. Bualu bua Yehowa wakangambila nunku ne tshianza tshiandi tshikole tshinkuate, wakandimusha bua meme tshiendi mu nshila wa bantu aba, wamba ne, Kutshibikidi ne, Ntshifufu, malu onso adi bantu aba babikila ne, Ntshifufu; kutshinyi malu adibo batshina, ne kuikadi ne buowa. Kadi Yehowa wa misumba nyeye ûdi wewe ne bua kunemeka bu wa tshijila. Nyeye unudi ne bua kutshina ne bua kuikala ne buowa kudiye. Yeye nealue muaba wa tshijila, ne dibue dia kukumaku dikasa, ne mutunda wa dibue wa kubalenduisha kudi ba mu nseke ibidi ya Isalele; neikale bukuondo ne buteyi kudi badi bashikame mu Yelushalema. Ba bungi ba munkatshi muabo nebalenduke; nebadishinde hanshi, nebatshibuke; nebakuatshibue mu buteyi, nebanyengibue. Kuta mukanda wa dî dianyi dia tshimanyishilu mu muvungu, jadika diyisha dianyi mu mitshima ya bayidi banyi. Nengindile Yehowa udi usokoka mpala wandi kudi bana ba Yakoba, nemmutekemene mene. Monai, meme ne bana bakumpabo kudi Yehowa tudi bu bimanyinu ne bu malu a kukema mu Isalele bidi Yehowa wa misumba, udi mushikame mu mukuna wa Siona, mutumine bantu. Hanuambila bantu ne, Nukebe lungenyi kudi bena lubuku lua muzangu ne kudi bena muhongo badi bakula bu biambi ne badi banungana, bualu kabuena bukuata bantu bua kukeba lungenyi kudi Nzambi wabo, anyi? Bua kukuatshisha badi ne muoyo, budibo nʼabu mbua kuya kudi bafue, anyi? Tuye ku diyisha dia mikenji ne ku tshimanyishilu tshia dî dia Nzambi! Bikala bantu kabayi bambe dî didi diakanangane ne dî adi, bulelela, butuku kabuena buanze kubatshila. Nebahitshile mu buloba batata bikole ne nzala ibasuma; ne mu diba adi bikalabo ne nzala, tshiji netshibakuate, nebahende mukelenge wabo ne Nzambi wabo. Nebatangishe mpala yabo mulu, nebatangile kabidi ha buloba, ne monai! Anu ntatu ne mîdima, mufitu wa kanyinganyinga nebikaleku! Nebabibale bua babuele mu mîdima mikole. Kadi mufitu kawena wikalaku kabidi ha buloba buakadi ne kanyinganyinga diambedi. Mu tshikondo tshia diambedi yeye wakafuisha buloba bua Zebulona ne buloba bua Nafatale bundu, kadi mu matuku atshidi alua neavuishe butumbi kudi buloba budi mu nshila udi uyila ku mai manene, budi dishiya dia Yadene, Galela wa munkatshi mua bisamba bia bantu. Bakadi benda mu midima bakumona munya munene; ha bantu bakadi bashikame mu buloba bua mîdima mikole hakatemena munya au. Wewe wakuvudisha ba mu tshisamba etshi, wakudiundisha disanka diabo. Badi basanka ku mpala kuebe bu mudi bantu basanka hahuolabo bia kudia mu madimi, bu mudi bena nvita basanka habanyanganabo bintu binyenga mu nvita. Bualu bua wewe wakutshibula mutshi wa tshikokedi wakadi bujitu buabo, ne mulangala wakadi ututa diaha diandi, ne tshibonge tshia mukengeshi wandi, bu muwakenza mu dituku diakahitabo Bena Midiyana bukole. Bualu bua tshisabata tshionso tshidi disalayi diluata mu diyoyo dia nvita, ne bivualu bia nvita biakinabo mu mashi, nebikale bintu bia kuoshabo, bu nkunyi ya kuela mu kahia. Bualu bua bakungelela muana, bakutuha muana mulume; bukokeshi nebuikale ha diaha diandi. Nebamuidike dina ne, Mubakemeshi, Muena Meji, Nzambi Mukole, Tatu wa Tshiendelele, Mukelenge wa Ditalala. Kukudisha kua bukokeshi buandi ne kua ditalala kakuena kuikala ne nshikidilu, bua kujadika nkuasa wa bukokeshi wa Davidi, ne bukelenge buandi, ne bua kubukolesha ku kulumbulula kuakane ne ku buakane, mpindiu tô ne tshiendelele. Lukunukunu lua Yehowa wa misumba neluenze bualu ebu. Mukelenge wakutumina Yakoba dî, nedihone hamʼbidi ha Bena Isalele. Bantu bonso nebadimanye, ba mu Efelayima ne badi bashikame mu Samalea mene, badi bamba mu kudisua kuabo ne mu dikamakama dia mu mitshima yabo ne, Tushola tuakushimbuka hanshi, kadi netuase musoko kabidi ne mabue masonga; bakutaha mitshi ya sycomores, kadi netuteke mitshi ya cèdre mu miaba yakadiyi. Nunku Yehowa wakibisha badi ne Lesine lukuna bua kuluanganabo ne Bena Isalele, wakusonsola bena lukuna babo, Bena Sulia ku luseke lua esete, ne Bena Peleshete ku luseke lua wesete bakudia Bena Isalele mukana muabo mubulula. Bua malu â onso tshiji tshiandi katshiena tshikudimuke, kadi tshianza tshiandi tshitshidi tshiolola. Kadi bantu aba kabakuhingana kudi yeye wakabakuma, kabakukeba Yehowa wa misumba. Nunku Yehowa wakukosela Isalele mutu ne mukila, dilala dia dibue ne disela, mu dituku dimue. Nkolomo ne muena butumbi nyeye udi mutu mene, ne muprofete udi uyisha mashimi udi mukila. Balombodi ba bantu aba bakulua bahambuishi babo, ne bantu bakadibo balombela ba kuminyibua. Nunku Mukelenge kena usanka bua bansongalume babo, kena ufuila bana babo ba nshiya ne bakashi babo ba mu lufuila luse. Bualu bua muntu yonso wa munkatshi muabo udi muhidi wa bualu bua Nzambi ne udi muenji wa malu mabi, ne mukana muonso mudi muamba mei mabi. Bua malu â onso tshiji tshiandi katshiena tshikudimuke, kadi tshianza tshiandi tshitshidi tshiolola. Bualu bua malu mabi adi osha bu kahia, kadi kosha meba ne mingonge, hashishe kadi katemesha mitshi ya mu bihuka kabidi, ne bidi bibanda mulu mu milanjilanji ya muishi wa kahia. Bualu bua tshiji tshia Yehowa wa misumba buloba buakulua, ne bantu badi bu nkunyi ya kuela mu kahia, kakuena muntu udi Usungila muanʼabo. Mukuabo wakunyenga bintu ku luseke lua tshianza tshia balume ne wakashala ne nzala; bakuabo bakudia bintu ku luseke lua tshianza tshia bakashi, kadi kabakukuta; muntu yonso wakudia munyinyi wa muena mutumba nʼandi. Manashe wakudia Efelayima, ne Efelayima wakudia Manashe, ne bubidi buabo bakubunda Yuda. Bua malu â onso tshiji tshiandi katshiena tshikudimuke, kadi tshianza tshiandi tshitshidi tshiolola. Mulau wikale kudi bantu badi bela mikenji idi kayiyi miakane, ne kudi bafundi badi bafunda mifundu idi ne mei mabi, bua kusesuisha badi bakengela bintu bua kabikadi ne dikosa dimpe dia bilumbu biabo, ne bua kunyenga kulumbulula kuakane kudi bahele ba munkatshi mua bantu banyi, bua bakashi ba mu lufuila bikale bintu bia kuhaulabo, ne bua kuvuishabo bana ba nshiya bintu bia kunyengabo! Nenuenze tshinyi mu difuku dia kunulumbuluisha, ne dia kubutuka kudi kufuma ku muaba mule? Nenunyemene kudi nganyi bua yeye ankuatshishe? Nenushiye biuma bienu kudi kunyi? Nenumanye anu mua kusokoma munkatshi mua bena lukuna badi bakuatshibue mu nvita, nenubatame munkatshi mua bitalu bia bantu bashihibue! Bua malu â onso tshiji tshiandi katshiena tshikudimuke, kadi tshianza tshiandi tshitshidi tshiolola. Tangila, wewe Muena Ashû, mulangala wa tshiji tshianyi, tshibonge tshia njiya yanyi! Ndi mmutuma bua kuluangana ne ba mu tshisamba tshia badi babenga Nzambi, ndi mmuelela mukenji bua bantu banakukuatshila tshiji tshianyi, bua kubahaula ne bua kunyenga bintu biabo, ne bua kubadiata muinshi mua makasa bu mudi bantu badiata bitahikidi bia mu misesu. Kadi yeye kena welangana meji nunku, ne mutshima wandi kawena ne meji â; kadi mu mutshima wandi mudi anu muanda wakuhangidisheye, wa kubutula, ne wa kumana bisamba bia bungi. Bualu bua yeye udi wamba ne, Tupitene tuanyi tua masalayi tuonso katuena banfumu, anyi? Kaleno kawena bu Kâkemisha, anyi? Hamata kawena bu Apada, anyi? Samalea kawena bu Damaseke, anyi? Bu muakufika tshianza tshianyi kudi makelenge akadi ne mpingu, akadi ne mpingu mihite ya mu Yelushalema ne ya mu Samalea bunene, tshiena ngenzela musoko wa Yelushalema ne mpingu yau bu munakuenzela musoko wa Samalea ne mpingu yau, anyi? Kadi halua Mukelenge kushikisha mudimu wandi wonso udiye wenzela mukuna wa Siona ne musoko wa Yelushalema, yeye neakengeshe bienzedi bia mu mutshima wa diambu wa mukelenge wa Ashû, neuhuekeshe butumbi bua kudilesha kuandi. Bualu bua wakuamba biandi ne, Nakuenza malu â ku bukole bua tshianza tshianyi, ne ku lungenyi luanyi, bualu bua ndi ne meji. Nakûmusha mikalu idi ihandulula bantu, nakunyenga bintu bia mu bibutshilu biabo; ne bu mudi muena bukitu wenza, nakuhuekesha badi bashikame mu nkuasa ya bukelenge. Tshianza tshianyi tshiakaheta biuma bia bantu bu muditshi tshikuate disua dia nyunyu. Bu mudi muntu usangisha makela mu disua diakulekelabo kudi nyunyu, nakusangisha bia ha buloba bionso. Kakuakadi umue wakuolola dihuahua diandi, anyi wakubulula muinu, anyi wakudila. Tshisui netshimanye mua kufunyina nfumu watshi udi utaha nʼatshi, anyi? Scie neamanye mua kudibandisha kudi udi uhanda nʼandi, anyi? Ebu mbu muakadi mulangala kulembelela bantu badi baubisha, anyi mbu muakadi tshibonge kubisha muntu udi kayi mufukibue mutshi! Nunku Mukelenge, Yehowa wa misumba mene, neatume disama dia tshinyanu munkatshi mua bena nvita bandi badi ne mafuta, ne muinshi mua butumbi buandi nebatemeshe tshidi tshitema bu kuosha kua kahia. Munya wa Bena Isalele newandamuke kahia, ne wandi wa Tshijila neandamuke ludimi lua kahia; neluoshe, nelumane meba andi ne mingonge yandi mu dituku dimue. Yeye neavingutule butumbi bua ditu diandi ne bua budimi buandi budi bulua ne bia kudia bia bungi ne muoyo wandi ne mubidi wandi. Bualu ebu nebuikale bu muntu musame unyananyana tô ne ku lufu. Mitshi itshidi ishala ne muoyo mu ditu diandi neyikale anu mikese, ne bua bukeha buai muana neamanye mua kufunda bungi buai mu mukanda. Mu dituku adi difuka dikese dia ba mu Isalele ne ba mu bana ba Yakoba badi bahanduka ku lufu, kabena beyemena muntu wakabakuma, kadi nebeyemene Yehowa, Wa Tshijila wa Isalele, mu bushuwa. Bamue ba munkatshi mua bantu bakadiku diambedi, bamue ba mu bana ba Yakoba batshidi bashale mene, nebahingane kudi Nzambi Mukole. Bualu bua bikala bantu bebe bungi bua nsenga ya kukala kua mai manene, Isalele, anu tshituha tshia bungi buabo netshihingane. Kubutuka kudi kusungudibua, kudi kuhumuka ne buakane. Bualu bua Mukelenge, Yehowa wa misumba, neashikishe mudimu wa kubutula munkatshi mua ba ha buloba bonso bu muakadihangidishileye. Nunku Mukelenge, Yehowa wa misumba, udi wamba ne, Nuenu bantu banyi badi bashikame mu Siona, kanutshinyi Bena Ashû, nansha bianukumabo ne mulangala, ne biabishabo tshibonge tshiabo bua kunututa nʼatshi, bu muakenza Bena Ejipitu. Bualu bua, haleha anu tshituha tshihi, tshiji tshianyi tshiakadi tshinkuata bua bualu buenu netshihuwe, netshibakudimukile hua kubabutula. Yehowa wa misumba neababishile nsokotshi bu muakakumeye Bena Midiyana ku Dibue dia Olebe; ne bu muakabisheye tshibonge tshiandi ha mutu ha mai manene, nunku yeye neatshioshile kabidi bu muakenzenzeye mu Ejipitu. Mu dituku adi bujitu buandi nebûmuke ha diaba diebe, ne mutshi wandi wa tshikokedi neûmuke ha nshingu hebe. Mutshi eu wa tshikokedi neutshibuke bualu bua kuvulangana. Yeye wakulua ku Ayata, wakuhitshila mu Migelona; ku Mikemasha udi utula bihia bia luendu. Wakumana kuhitshila ku tshibuelelu tshia mu luhongo; badi bamba ne, Geba ntshitudilu tshietu tshia butuku. Ba mu Lama badi bazakala, ba mu Gibea wa Shaula badi banyema. Tayika biebe, wewe muana mukashi wa Galima! Teleja matshu ebe, wewe musoko wa Layisha! Witabe kudibo, wewe musoko wa Anatota! Ba mu Mademana bakumana kunyema; badi bashikame mu Gebima badi basangisha bia mu nsubu yabo bua kunyemabo. Dituku edi mene neatule ku Nobo, neavunge mbala ku mukuna wa muana mukashi wa Siona, mukuna wa Yelushalema mene. Monai, Mukelenge, Yehowa wa misumba, neakose matamba a mutshi ne tshiona tshidi tshivuisha buowa; mitshi mile-mile neyitahibue hanshi, ne idi mimane mulu neyihuekeshibue hanshi. Yeye neatahe bihuka ne tshisui tshia tshiamu tshifike, ne Lebanona neahone ku mikumu ya Nzambi Mukole. Lutonga nelutoloke ku tshikuku tshia Yishai, ne ditamba dia ku miji yandi nedikuame mamuma. Nyuma wa Yehowa neashikame hamʼbidi handi, nyuma wa meji ne wa kujingulula kua malu, nyuma udi umukuatshisha ne meji ne bukole, nyuma wa kumanya Yehowa ne wa kumunemeka. Disanka diandi nedikale mu dinemeka diandi dia Yehowa. Kena ulumbulula bilumbu anu bua malu adi mesu andi amona, kena ubikosa anu bua malu adi matshu andi unvua; kadi nealumbuluishe bahele ne buakane, neakose bilumbu bia badi ne kalolo ha buloba ne kulumbulula kuakane; neakume buloba ne tshibonge tshia mukana muandi, neashihe bantu babi ku muhuya wa ku mishiku yandi. Buakane nebuikale mukaba wa mu tshimono tshiandi, kujalama kuandi kulelela nekuikale mukaba wa ku tshifuka tshiandi. Tshimungu netshiule mu nsubu umue ne muana wa mukoko, ne nkashama nealale hohamue ne muana wa mbushi. Muana wa ngombe ne nyama wa ntambue ne nyama udi ne manyi neyidie mashinde mu muaba umue, ne muana mutekete neayilombole. Mukashi wa ngombe ne nkashama nebidie mashinde hohamue, bana abi nebalale mu muaba umue; ne nyama wa ntambue neadie mashinde bu mudi ngombe wenza. Muana utshidi wamua mabele neanayile ha mutu ha buina bua nyoka wa dikala, muana mumane kujila mabele neateke tshianza tshiandi ha buina bua nyoka wa ntoka. Kabiena bienzela bikuabo bintu bibi, kabiena bishiha bikuabo, mu mukuna wanyi wa tshijila wonso; bualu bua buloba nebuikale bûle tente ne kumanya kua Yehowa, bu mudi mai a mu mai manene abuikila miaba yau yonso. Hashishe mu dituku adi Lutonga lua ku miji ya Yishai neluimane bialu bu dibendela dia kusangishaku bisamba bia bantu. Ba mu bisamba ebi nebaye kudiye bua kumulomba lungenyi, ne muaba udiye mushikame newikale wa butumbi. Mu dituku adi Mukelenge neolole tshianza tshiandi tshiakabidi bua kuhikuleye difuka dia bantu bandi badi mu Ashû, mu Ejipitu, mu Patelosa, mu Atiopa, mu Elama, mu Shinâ, mu Hamata ne mu maloba adi ku muelelu wa mai manene. Yeye neabishile ba mu bisamba bia bantu dibendela, neasangisheku ba mu Isalele bakihatabo kudi bantu ba bende, neasangishe honso bamuangalashibue ba mu Yuda hohamue, ba ku matengu anai a buloba. Efelayima nealekele mukau wandi, ne badi batatshisha Yuda nebajimine. Efelayima kena wikala ne Yuda mukau, ne Yuda kena utatshisha Efelayima. Nebâuke ha diaha dia Bena Peleshete ku luseke lua wesete, ne bubidi buabo nebanyenge bintu bia bena luseke lua esete. Nebolole bianza biabo bua kukokesha Edome ne Moaba, ne Bena Amona nebatumikile mei abo. Yehowa neakamishe diboko dia mai manene a mu Ejipitu tshishiki; neakuhe tshianza tshiandi ha mutu ha Musulu wa Pelata, ne luhehele luandi ludi lûmisha, nenutahulule mu tusulu muanda mutekete, neasabulehu bantu ne bisabata biabo kabiyi bibola. Nshila munene mufume ku buloba bua Ashû neikaleku bua difuka dia bantu bandi diendelemu, bu muakadiku tshikuabo bua Bena Isalele bendelemu mu dituku diakahatukabo mu buloba bua Ejipitu. Mu dituku adi newambe biebe ne, Nenkusakidile wewe, Yehowa; bualu bua wakankuatshila tshiji diambedi, kadi tshiji tshiebe tshiakukudimuka kundi, wakunsamba. Mona, Nzambi udi luhandu luanyi; nemmueyemene, ne tshiena ntshina nansha; bualu bua Yehowa, Yehowa mene, udi bukole buanyi ne musambu wanyi, ne yeye wakulua luhandu luanyi. Nunku nenuhatule mai ne disanka mu bina bia mai bia luhandu. Mu dituku adi nenuambe ne, Sakidilai Yehowa, tumbishai dinu diandi! Ambilai bantu bienzedi biandi munkatshi mua bisamba bionso, nubamanyishe ne, Dina diandi didi ditumbishibua. Imbilai Yehowa misambu, bualu bua yeye wakuenza malu adi amuvuishila butumbi; muanda eu umanyibue mu miaba yonso ya ha buloba. Bandisha dî diebe, ela mbila, wewe muena musoko wa Siona; bualu bua udi munene munkatshi muebe nyeye Wa Tshijila wa Isalele. Dî dia tshijila bualu bua Babulona diakunvuabo kudi Yeshaya, muana wa Amoza. Bisha dibendela ha mutu ha mukuna udi kauyi ne mitshi hamʼbidi hau, ubabikile ne dî dikole; kuha tshianza bua bantu babuele biabo mu bibuelelu bia bakokeshi banene. Nakuelela bakudijidila kundi mukenji; nakubikila bena bukitu banyi, bantu banyi badi batumbila ku outumbi buanyi, bua kuenza mudimu udi tshiji tshianyi tshiamba. Unvuai, tshiona tshia mbila mu mikuna tshidi bu tshia tshisumbu tshinene tshia bantu! Unvuai, mutoyi udiku wa tshintompantompa tshia makelenge a bisamba bia bantu badi badikunguisha hohamue! Yehowa wa misumba udi usangisha musumba wa bena nvita bua nvita yandi! Badi bafuma ku buloba budi kule, kunfudilu kua diulu, Yehowa mene ne bielelu bia nvita bia tshiji tshiandi bua kubutula buloba buonso. Asai muadi! Bualu bua dituku dia Yehowa didi ha buihi; nedilue bu kubutuka kudi kufuma kudi Nzambi wa Bukole Buonso! Nunku bianza bia bantu bonso nebitekete, mutshima wa muntu yonso newenguluke, ne bobo nebakuatshike buowa. Makenga ne tunyinganyinga nebibakuate; nebikale ne dikenga bu mukashi udi ne didinyenga dia ha kuleleye, Nebatangilangane muntu ne muntu ne ditshina, mpala yabo mikale bu mpala miteme ne kahia. Monai, dituku dia Yehowa dilualua, dikengesha bantu, dikala dia tshikisu ne dia tshiji tshikole, ndia kuyuisha buloba bu tshihela tshia hatuhu, ndia kubutula bantu babi. Bualu bua mitoto ya mu diulu ne bisumbu bia mitoto bidimu kabiena bitema, diba nedifikuluke habandadi, ne ngondo kena ukenka ha buloba. Nenkengeshe ba ha buloba bua bubi buabo, ne bantu babi bua malu mabi abo; nempuwishe kudilesha kua badi badisue, nempuekeshe kudibandisha kua bakokeshi badi bakengesha bantu babo. Nenvishe bungi bua bantu butamba bua or bukese, nembuvuishe butamba bua or wa Ofi mene bukese. Nunku nenzakashe bintu bia mu diulu, nenkankishe buloba tô ne humukabu mu muaba wabu, bualu bua tshiji tshia Yehowa wa misumba mu dituku dia tshiji tshiandi tshikole. Mu dituku adi, bu mudi ngulungu udibo bihata, ne bu mudi mikoko idi kayiyi ne mulami wa kuyiangisha, muntu yonso neahingane kudi bana babo, muntu yonso neanyemene ku buloba buandi. Nebatubule muntu yonso udibo basangana, ne muntu yonso udibo bakuata neahone mushihibue ku muele wa nvita. Nebele bana batekete ba bantu aba hanshi, babahanda nseke ku mesu kuabo; nebahaule nsubu yabo, nebakuate bakashi babo ku bukole. Monai! Nensonsole Bena Madai bua kuleshabo bantu aba, ne bobo kabena bamona argent bu tshintu tshimpe, ne or kena ubasankisha. Mata abo neasunsule mibidi ya bansongalume, kabena bafuila badi bahatuka mu mafu luse, mesu abo kaena amona bana ne dinanga dia mua kubasungila. Ne Babulona, butumbi bua makelenge, bulengele budibo banyisha kudi Bena Kasada, neikale bu Sodoma ne Amola hakabutulabo kudi Yehowa. Kena wikala ne bantu kashidi, bantu kabena bashikamamu kabidi tô ne tshiendelele. Muena Alaba kena ushimikamu ntenta wandi kabidi, ne balami ba mikoko kabena baladikaku mikoko yabo. Kadi nyama ya ku tshihela tshia lusenga neyikale ne miaba idiyi ilalamu, nsubu yabo neyikale tente ne nyama idi idila muadi; nyunyu ya nfiondo neyishikamemu, ne mbushi ya mu mpata neyinayileku. Nyama ya bimungu neyidile mu mbalasa ya bukelenge babo, mibuabua neyidile mu nsubu yabo ya mushinga mukole. Tshikondo tshiandi tshia kubutuka tshidi tshiamba kufika, ne matuku andi kaena aleha. Bualu bua Yehowa neafuile Yakoba luse, neasungule ba mu Bena Isalele bu bantu bandi kabidi, ne neabashikike mu buloba buabo bua diambedi. Bantu ba bende nebadisangishe nʼabo, nebadilamike kudi ba mu bana ba Yakoba. Ba mu bisamba bia ba bende nebabangate, nebabafile ku muaba wabo. Ba mu Bena Isalele nebadiangatshile bantu aba bu buhianyi buabo mu buloba bua Yehowa bua kuikalabo bahika babo balume ne bahika babo bakashi. Nunku nebabueshe bantu aba mu buhika bakadi bababuesha mu buhika diambedi, ne nebakokeshe ku mutu kua bakadi babakengesha. Hashishe, mu difuku adi hakukuha Yehowa dikisha ku dikenga diebe ne ku malu akadi akutatshisha ne ku mudimu mukole wakakuenzeshabo ku bukole, neubange kuimba musambu eu wa kutshimbisha nʼau mukelenge wa mu Babulona. Newambe biebe ne, Mona mudi mutukengeshi muholeshibue, ne mudi tshiji tshiandi tshiakudibandisheye nʼatshi tshihuwishibue! Yehowa wakutshibula mulangala wa bantu babi, dikombo mene dia bakokeshi, bakadi bakuma bantu mu tshiji tshiabo, babakuma ne mikumu yakadi kayiyi ne ndekelu, bakadi bakokesha ba mu bisamba bia bantu ne luonji, babakengesha ne dikenga diakadi muntu kayi mua kukanda. Ba ha buloba honso badi ne dikisha, badi ne ditalala, badi babisha mei abo mu kuimba kua musambu. Mitshi ya cyprès mene idi isanka bua kubutuka kuebe, ne mitshi ya cèdre ya mu Lebanona kabidi idi yamba ne, Katshia wahuekeshibua kakuena muena tshisui wakulua bua kututaha. Muaba wa Bafue udi muinshi mua buloba udi mubishibue bua kukuakidila hawafikamu, udi ukusonsuela bafue, bakokeshi banene bonso ba ha buloba mene, bua kukuakidilabo; udi ujula bakelenge bonso ba bisamba bia bantu mu nkuasa yabo ya bukelenge. Buonso buabo nebakukudimune dî, nebakuambile ne, Wewe kabidi wakulua mutekete bu tuetu, anyi? Bakukufuanyishisha bu tuetu, anyi? Butumbi buebe buakuhuekeshibua tô ne ku Muaba wa Bafue, ne mutoyi wa nzenze yebe kabidi; bikusu bidi biadisha bu bulalu muinshi muebe, ne bikusu bidi tshibuikidilu tshiebe. Mona muwakuluka mu diulu, wewe mutoto wa nkesha, muana wa lunkelu! Mona muakukushimbulabo tô ne hanshi ha buloba, wewe nguashimbula bisamba bia bantu! Wewe wakamba mu mutshima webe ne, Nembande mu diulu, nembandishe nkuasa wanyi wa bukelenge mulu ha mutu ha mitoto ya Nzambi; nenshikame bianyi ha mutu ha mukuna wa disangisha kunfudilu kua luseke lua nôde. Nembande kulu ha mutu ha matutu, nendivuishe bu Nzambi Mutambe wa Mulu. Kadi neuhuekeshibue tô ne ku Muaba wa Bafue, ku ndekelu wa Tshina tshia Bafue. Badi bakumona nebakujoshe bikole, nebakuelele meji ne, Eu mmuntu wakazakasha buloba, wakakankisha makelenge, anyi? Eu nyeye wakavuisha buloba bu tshihela, wakabutula misoko yabu, wakahidia kulekela bena lukanu hua kuhinganabo kuabo, anyi? Banfumu bakuabo ba bisamba bia bantu, buonso buabo mene, badi balala munkatshi mua butumbi, muntu ne muntu mulale mu majambu andi; kadi wewe wakumushibua mu majambu ebe bu muana wa kabishi udibo bahetula, udi muluatshishibue bitalu bia bantu bashihibue, bakasompolabo ne muele wa nvita, badi bahueka tô ne ku mabue a mu Tshina, bu tshitalu tshidiatshibue muinshi mua makasa. Wewe kuena usangishibue nʼabo mu dijikibua diebe, bualu bua wakubutula buloba buebe, wakushiha bantu bebe. Kabena batela mena a tunkanunuina tua benji ba malu mabi tshiendelele! Longoluelai bana bandi tshishihelu bualu bua malu mabi a batatu babo, bua kabajuki bua kuangatabo buloba bu biuma biabo, ne bua kabûshi buloba tente ne bimenga biabo. Yehowa wa misumba udi wamba ne, Nenjuke bua kubaluisha, nengumushe ku Babulona badi babikidibue ku dina diau ne difuka dia bantu bau didi dishala, muana mulume ne muikuluʼandi, mmudi Yehowa wamba. Yehowa wa misumba udi Wamba ne, Nenvuishe musoko eu muaba wa nkese ne muaba wa bintampi. Nenkombemu ne lukombo lua kubutula nʼalu. Yehowa wa misumba wakuditshiha, wamba ne, Bulelela, bu munakuhangidisha bua kuenza, bualu nebuenjibue; bu nuina kusungula mu mutshima wanyi, nebujalame muomumue, mbua kutshibula Muena Ashû bituha mu buloba buandi, nemmudiate muinshi mua makasa anyi ha mutu ba mikuna yanyi; hashishe, mutshi wandi wa tshikokedi neûmushibue ba nshingu ya bantu banyi, ne bujitu buandi nebûmuke ha maha abo. Ebu mbualu bunakuhangidisha bua kuenzela ba ha buloba bonso; etshi ntshianza tshidi tshiolola ha mutu ha bisamba bionso. Bualu bua Yehowa wa misumba wakuhangidisha bualu, ne muntu kai neamanye mua kubuvuisha hatuhu? Yeye wakuolola tshianza tshiandi, muntu kai neatshihingashe ku nyima? Mu tshidimu tshiakafua mukelenge Ahaza muakamueneka dî edi dia tshijila ne, Nuenu ba mu Peleshete, buonso buenu, kanusanki bualu bua tshibonge tshiakanututabo nʼatshi tshiakutshibuka, bualu bua nyoka wa dikala neahatuke mu muji wa nyoka, ne muana udi dikala dilela neikale nyoka udi uhahala ne udi utema bu kahia. Banʼa bute ba bahele nebikale ne bia kudia, ne bakengi nebalale tulu kabayi ne ntatu; kudi nenshihe ba ku muji webe ne tshiole, ne bantu bebe badi bashala ne muoyo nebashihibue. Ela mukunda, wewe tshibuelelu tshia ku musoko; asa muadi, wewe musoko! Fingaluka ne buowa, wewe buloba bua Peleshete, buloba buebe buonso! Bualu bua muishi wa kahia udi uluhuka mu luseke lua nôde, ne kakuena muendi wa bitulu mu milongo ya bena mata bau. Nunku muntu neamanye mua kukudimuna miloho ya tshisamba etshi dî kai? Neambe ne, Yehowa wakujadika Siona, ne bantu bandi bakengeshibue nebasanganemu tshinyemenu. Dî dia tshijila bualu bua Moaba. Bualu bua mu butuku bumue bakubutula Ala wa Moaba, bakuyisha Moaba bu muaba wa hatuhu; bualu bua mu butuku bumue bakubutula Kî wa Moaba, bakuyisha Moaba bu muaba wa hatuhu. Muana mukashi wa Dibona wakubanda ku bitendelelu bia mu mukuna bua kudilaku; ba mu Moaba badi badila ha mukuna wa Nebo, ne ha mukuna wa Medeba. Ha mitu yabo yonso hadi mabala, muedi wonso udi mubeyibue. Mu misesu yabo badi badiluatshisha bilulu bikayabala; ha miaba idi ha mutu ha nsubu yabo ne mu miaba minene ya misoko yabo, bantu bonso badi basa muadi, badila ne binsonshi bivule. Ba mu Heshebona ne ba mu Eleale badi badila bikole, mei abo adi unvuika tô ne ku Yahasa; nunku bena nvita ba mu Moaba badi basa muadi bikole, ne mutshima wa Moaba udi uzakala. Mutshima wanyi udi udidila Moaba bikole; bihatshibue babo badi banyema tô ne ku Soâ, ku Egelata-shelishiya. Bualu bua badi babanda mu nshila udi uyila ku Luhita, bendela badila; ne mu nshila udi uyila ku Holonayima badi babandisha mei abo ne, Tuakubutuka; bualu bua mai a Nimelima adi kabutu, mashinde akufubidila, mashinde matekete akûma; kakuena mudioko umue utshidi mubishi. Nunku badi baya ne bintu bivule biakudiangatshilabo ne bintu biakubutshiabo, babituala dishiya dia Kasulu ka Mitshi ya Saules. Bualu bua muadi wakumana kunyunguluka matshika onso a Moaba; kudila kuau kudi kufika ku Egelayima, kuasa kuau kudi kufika tô ne ku Bê-elima. Bualu bua mai a Dibona akûla tente ne mashi, kadi nenvuishile Dibona malu makuabo ha mutu, nyama wa ntambue neadiele hamʼbidi ha ba mu Moaba badi banyema, ne hamʼbidi ha bantu bakuabo ba mu buloba batshidi bashalamu. Tuminai bienu mukokeshi wa buloba mulambu wa bana ba mikoko, bumuke biabo nʼau ku Sela, bayile nʼau mu nshila wa mu tshihela, tô ne ku mukuna wa muana mukashi wa Siona. Bu mudi nyunyu yendakana mulu, bu tunyunyu tua mu disua didi disasula, mbu mudi bana bakashi ba Moaba ku tshisabukilu tshia ku musulu wa Ânona. Nebambe ne, Utuleshe lungenyi, utukosele tshilumbu tshietu ne kulumbulula kuakane; uvuishe mundidimbi webe bu butuku mu diba dia munda-munya; usokoke bantu aba badibo bihata, kusokolodi bisokomenu bia badi banyema. Itabusha bua bantu bakihatabo mu Moaba bashikame nʼebe; wikale kudibo bu tshibuikilu tshidi tshibasokoka ku mesu kua mushihianganyi. Hafika munyengi wa bintu ku ndekelu kuandi, halekela muhaudi wa bintu kuhaula, halua badiatshi ba bantu kujimina mu buloba kabidi; mu diba adi nkuasa wa bukelenge neajadikibue mu kuleshangana kua luse. Mukuabo neashikamemu mu kujalama kuandi kua bushuwa, mu ntenta wa Davidi mene, neikale mulumbuluishi udi ukeba kulumbulula ne kulumbulula kuakane, muikale ne lukunukunu lua kuenza bienzedi biakane. Tuakunvua lumu lua diambu dia Moaba ne, Udi ne diambu dihita bukole. Tuakunvua lumu lua kudisua kuandi, lua dihetu diandi, ne lua dikamakama diandi; kufunafuna kuandi kudi bualu bua hatuhu. Nunku Bena Moaba badidile Moaba muadi, buonso buabo badile muadi. Nudile bua mikata ya Kî-hala-sete, nuenu bamane kubutudibua. Bualu bua madimi a mu Heshebona adi amba kuhanga, ne muonshi wa mu Sibema udi uhanga kabidi; bakokeshi ba bisamba bia bantu bakuahula matamba au, matamba a muonshi wawa akafika tô ne ku Yazê, wakendakana tô ne ku tshihela, ntonga yau yakenda mu miaba mikuabo, yakasabuka mai manene. Nunku nendidile muonshi wa mu Sibema ne muadi wa Yazê; nennuboleshe ne binsonshi bianyi, nuenu Heshebona ne Eleale; bualu bua mbila ya bena nvita yakunvuika mu muaba wa tumuma tuenu ne ha diba dia kunowa kuenu. Disanka ne tuseku biakumuka mu budimi buakadi ne maminu; ne mu madimi a tumuma tua nvinyo kamuena muikala kuimba kua misambu anyi kuela kua mbila ya disanka. Kakuena mukami wa nvinyo wadiata tumuma mu bikaminu bua kukameye nvinyo, Nakuhuwisha mbila ya disanka ya bahuodi ba tumuma tua nvinyo. Bua malu â mutshima wanyi udi udidila Moaba ne tshiona bu tshia lunzenze, ne munda muanyi mudi mujinga Kî-helese. Mu diba adi, halua Moaba ku mpala kuanyi, hadihangisheye ne mitendelelu ha mutu ha mukuna, habueleye mu tshitendelelu tshiandi bua kutendelela, kena udikuatshisha ne bualu bumue bua malu â. Edi ndi diakamba Yehowa bualu bua Moaba mu bidimu biakamana kuhita. Kadi katataka Yehowa wakuamba ne, Hahita bidimu bisatu, bu mudibo babala bidimu bia mudimu wa muntu mubueshibue bua ditutu, nebayishe butumbi bua Bena Moaba hualu bua kuhetula, nansha bikalabo tshisumbu tshinene tshia bantu. Badi bashala ne muoyo munkatshi mua bantu bakadiku diambedi nebikale anu banya-banya, nebikale batekete. Dî dia tshijila bualu bua Damaseke. Yehowa wa misumba udi wamba ne, Monai, badi bumusha Damaseke mu muaba wandi wa butumbi bua kikadi musoko munene, neikale tshikulu tshia nsubu mifue. Badi bashiya misoko ya mu Aloê hatuhu bua ishale bikulu; neyikale miaba ya kudishamu bimuna, nebilalemu kakuyi wa mua kuyitshinyisha. Nebumushile Efelayima musoko wandi wa lumbu wakadi tshieyemenu tshiandi mu nvita, nebumushile Damaseke bukelenge buandi; ne bantu ba mu Sulia batshidi bashalamu ne muoyo nebikale bu butumbi bua Bena Isalele. Mu dituku adi butumbi bua Yakoba nebutekeshibue, ne mafuta a mubidi wandi nealue tshinyanu. Bualu ebu nebuikale bu mudibo benza hadi banowi ba blé banowa maminu adi ashala mu budimi, ne tshianza tshiandi tshidi tshinowa miehu ya blé, muomu, nebuikale bu mudibo benza hanowa muntu miehu ya blé mu tshibanda tshia Bena Lefa. Nebashiyemu bintu bia kuhumbulula bu mudibo benza hanyukulabo mutshi wa tumuma tua olive: tumuma tua olive, nansha tubidi nansha tusatu, tudi tushala ku mutu kua katongabela ka mutshi, tunai anyi tutanu tudi tushala ku matamba makuabo a mutshi wawa wakadi ukuama tumuma tua bungi. Edi ndi didi Yehowa Nzambi wa Isalele wamba. Mu dituku adi bantu nebatangile kudi Mufuki wabo, ne mesu abo neanemeke wa Tshijila wa Isalele. Kabena batangila ku bioshelu, bintu bidi bianza biabo bienza, kabena banemeka bintu bidi minu yabo mienze, nansha bikalabi mitshi ya Bashela, nansha bikalabi mpingu ya kutendelela nʼai diba. Mu dituku adi misoko yabo yakadi ne bukole neyikale bu bikulu ne makolo bidi ha mikuna, misoko yakalekelabo hatuhu kudi bantu hakanyemabo ku mpala kua Bena Isalele; neyikale kabutu. Bualu bua wewe wakuhua Nzambi wa luhandu luebe muoyo ne kuakuvuluka Dibue dia tshinyemenu tshiebe, nunku ukadi ukuna mitshi mimpe, ukadi utentula ntonga ya mioshi ya nzambi wa bende. Mu dituku diudi wikuna nansha wewe winyunguluka ne luhangu lua mitshi hatshiabu ne dinda wewe mumane kukuna nansha wewe muvuishe maminu ebe bilongo, kadi bintu bia kunowa nebikujimine mu dituku dialua masama ne kanyinganyinga kadi kakayi kamanye mua kuholeshibua. Aka! Mutoyi wa bantu ba bungi udiku, badi bahisha mutoyi udi bu tshiona tshia mai manene! Diyoyo didiku dia luendu lukole lua bisamba bia bantu badi benda lubilu bu mudi dihueka dia lukasa dia mai mahita bungi! Ba mu bisamba bia bantu badi mua kuenda lubilu bu dihueka dia lukasa dia mai a bungi, kadi Yehowa neababele, ne nebanyeme kule, nebihatshibue bu mudi bisote bia ku tshituilu tshia ha mukuna bihehudibua halua luhehele, ne bu mudi luhuishi lunyunguluka ne nvunde. Habuela diba, monai, buowa bukole budiku! Dinda kadiyi dianji kulua, kabenaku! Edi ndikenga didi bantu badi batuhaula bahiana, ne bualu bubi buakusunguilabo badi banyenga bintu bietu. Ke, buloba budi ne tshiona tshia kuhahala kua masala a bishi, budi ku nyima kua misulu ya Atiopa, budi butuma miloho yabu mu nshila udi uyila ha mutu ha mai manene, yenda biayi mu matu maluka ne papyrus ha mai! Yai bienu, nuenu miloho idi yenda lubilu, kudi tshisamba tshia bantu badi bale ne badi basenene, kudi bantu badi bakuatshisha bakuabo badi ha buihi ne badi kule buowa; ntshisamba tshidi tshikole ne tshidi tshidiata banga bantu muinshi mua makasa, tshidi misulu itahulula buloba buatshi. Nuenu bonso ba ha buloba bua bukua bantu, ne nuenu badi bashikame ha buloba, habandishabo dibendela ha mutu ha mukuna, tangilai! Helabo mpungi, unvuai bienu! Bualu bua Yehowa wakungambila dî edi ne, Nentangile malu talalâ bandi mu muaba undi mushikame, bu luya ludi lubanda mu munya, lukenka bikole; bu ditutu dia dibungi mu luya lua mu tshikondo tshia kunowa. Bualu bua diambedi tshidimu tshia kunowa katshiyi tshianji kufika, huma tshilongo, ne hakudimuka lutonga luatshi kamuma ka nvinyo kamba kuboba, yeye neahempe ntonga ne miele, neayitahe, neumushe matamba a mutshi adi matanyinyika kudiu. Nebashiye buonso buabi kudi nyunyu ya mu mikuna itu yadia munyinyi, ne kudi nyama ya mu mpata. Nyunyu itu yadia munyinyi neyiyikile bamʼbidi habi mu tshidimu tshia luya, nyama yonso ya mu mpata neyimane hadibi mu tshidimu tshia mashika. Mu tshikondo atshi nebalue ne diha kudi Yehowa wa misumba didi difuma kudi bantu bale ne basenene, difuma kudi bantu badi bakuatshisha badi ha buihi ne badi kule buowa; ntshisamba tshidi tshikole ne tshidi tshidiata bantu muinshi mua makasa abo, tshidi misulu itahulula buloba buatshi. Nebalue nʼadi ku muaba udi Yehowa wa misumba uteka dina diandi, ku mukuna wa Siona mene. Di dia tshijila bualu bua Ejipitu. Monai, Yehowa udi wenda mubande ba ditutu didi diya lukasa, ne neafike ku Ejipitu. Mpingu ya mu Ejipitu neyizakale ku mpala kuandi, mitshima ya ba mu Ejipitu neyivingutuke munda muabo. Nensonsole Bena Ejipitu bua kuluishangana ne Bena Ejipitu bakuabo, nebaluangane muntu yonso ne muanʼabo, muntu yonso ne muena mutumba nʼandi; ba mu musoko umue nebaluangane ne ba mu munga musoko, bena bukelenge bumue nebaluangane ne bena bukelenge bukuabo. Nyuma wa ba mu buloba bua Ejipitu neahange munda muabo, ne nentuhakashe meji adibo nʼau; nebaye kudi mpingu bua kudikebela lungenyi, ne kudi batempi ba mbuku, kudi bena mbuku ya mibangu, ne kudi bena muhongo. Mukelenge, Yehowa wa misumba, udi wamba ne, Nenfile Bena Ejipitu mu bianza bia mukokeshi udi muena tshinyangu; ne mukelenge udi ne luonji neabakokeshe. Mai a mu mai manene neûme onso, ne Musulu wa Nile neunyanguke, neûme. Misulu yau neyinunke muhuya mubi, maboko a musulu wa mu Ejipitu neakame, neûme; binkete ne luehu lua miû nebifubidile. Miaba ya masele adi hehi ne Nile, ku muelelu wa Nile mene, ne madimi onso adi ha buihi ne Nile, adibo bakunamu maminu, nebiume, nebihehudibue, nebijimine. Bilembi bia mishiha nebiase muadi, ne bonso badi bela ndoho mu mai nebadile, badi bâdisha tuhamba tuabo ha mai nebatekete. Baluki ba bilulu bia lin, ne badi bakuma tshilulu tshia ndanda, nebatuhakashibue. Badi bu makunshi adi akolesha buloba bua Ejipitu nebatshibuke bituha, bantu bonso badi benza mudimu wa ditutu nebikale ne kanyinganyinga mu mitshima yabo. Bakokeshi ba mu Soana badi anu bahote; lungenyi lua bena meji ba Palô badi batamba kuikala ne meji luakulua buhote. Nudi bamanye mua kuambila Palô ne, Ndi muana wa bena meji, muana wa bakelenge ba kale munyi? Nunku bena meji bebe badi kudi kunyi? Bobo bakuambile mpindiu, bamanye biabo bualu budi Yehowa wa misumba muhangidishe bua kuenzela Ejipitu. Bakokeshi ba mu Soana bakulua bahote, bakokeshi ba mu Mempi bakudingibua; bantu badi bu dibue dia mu ditumba dia bisamba biabo bakuhambuisha ba mu Ejipitu. Yehowa wakusonsola nyuma wa tshibondakasha munkatshi muabo; ne bakuhambuisha Bena Ejipitu mu mudimu wabo wonso, bu mudi muntu mukuatshike maluvu wenda ututubila mu nshila uluka bilushi biandi. Ne kakuena kushala mudimu mukuabo mu Ejipitu, udi mutu anyi mukila, dilala dia dibue anyi disele mua kuenza. Mu dituku adi Bena Ejipitu nebikale bu bakashi. Nebazakale ne nebatshine bua kukuha kua tshianza tshia Yehowa wa misumba tshidiye ukuha ha mutu habo. Buloba bua Yuda nebuhatshishe Ejipitu buowa. Muntu yonso wa ku muaba kudibo batela dina dia Yuda neatshine, bualu bua muanda udi Yehowa muhangidishe, udiye mudisunguile bua kuenzela Ejipitu. Mu dituku adi nemuikale misoko itanu mu buloba bua Ejipitu idi ne bantu bakula muaku wa Bena Kanâna, ne badi baditshiha kudi Yehowa wa misumba. Nebabikile umue wa munkatshi mua misoko yaya ne, Musoko wa Dibutuka. Mu dituku adi tshioshelu tshia Yehowa netshikale mu muaba wa munkatshi mua buloba bua Ejipitu, ne dikunshi nedikale ku mukalu wabu dijidila kudi Yehowa. Nedikale bu tshimanyinu ne bu tshimanyishilu kudi Yehowa wa misumba mu buloba bua Ejipitu; bualu bua hadilabo kudi Yehowa bua babakengeshi babo, neabatumine musungidi udi kabidi tshilobo, ne yeye neabasungile. Yehowa nendimanyishe kudi ba mu Ejipitu, ne Bena Ejipitu nebamanye Yehowa mu ditukuadi. Mmuomu, nebamutendelele ne milambu ya kumuoshela ne milambu ya bia kudia biabo, nebaditshihe mutshihu kudi Yehowa, nebenze bu mudibo baditshiha. Yehowa neakume ba mu Ejipitu, neabatahe ne neabasangashe kabidi; nebahingane kudi Yehowa, ne yeye neitabushe bua bamulombe, neakoleshe mibidi yabo. Mu dituku adi nshila munene neikaleku muhatuke mu Ejipitu ne muyile tô ne ku Ashû, ne muena Ashû neayilemu bua kufikeye mu Ejipitu, ne muena Ejipitu neayilemu bua kufikeye mu Ashû. Ne Bena Ejipitu nebatendelele Nzambi hohamue ne Bena Ashû. Mu dituku adi Isalele neikale tshituha tshisatu tshidi tshisangisha Ejipitu ne Ashû bu disankisha dia bantu munkatshi mua ba ha buloba. Bualu bua Yehowa wa misumba wakabavudishila disanka, wamba ne, Nuvudishibue disanka, ba mu Ejipitu, bantu banyi, ne Bena Ashû, mudimu wa bianza bianyi, ne Bena Isalele, buhianyi buanyi. Mu tshidimu tshiakulua Tâtana ku Ashedodo, mutumibue kudi Sâgona, mukelenge wa Ashû, wakaluangana ne bena musoko wa Ashedodo ne wakabahita bukole. Mu tshikondo atshi Yehowa wakambila Yeshaya, muana wa Amoza, ne, Ya usulule bilulu bikayabala bidi mu tshimono tshiebe, umushe bisabata biebe ku makasa ebe. Yeye Wakenza nunku, wenda butaka ne kayi ne bisabata. Hashishe Yehowa wakamba ne, Bu muakuenda muntu wanyi Yeshaya butaka ne kayi ne bisabata bidimu ebi bisatu, bu tshimanyinu ne bu bualu bua dikema kudi ba mu Ejipitu ne kudi ba mu Atiopa, nunku mukelenge wa Ashû neaye kuabo ne bantu badiye mukuate mu Ejipitu ne badiye mumushe mu Atiopa bua kubalela kule, bana ne bakulumpe diatshimue, bikale butaka ne kabayi ne hisabata, kabayi ne bilulu bia kubuikila ku mataku abo, bua kufuisheye ba mu Ejipitu bundu. Bena Yuda nebakuatshike buowa, nebikale babuandakanangane, bualu bua Atiopa wakadi ditekemena diabo ne bua Ejipitu wakadi butumbi buabo. Ne badi bashikame mu buloba ebu budi ku muelelu wa mai manene nebambe mu dituku adi ne, Monai, ebu mbualu buakukuata batuakutekemena, batuakunyemena bua batukuatshishe bua tuetu kuhanduka mu bianza bia mukelenge wa Ashû! Ne tuetu hetu netuhanduke munyi? Dî dia tshijila bualu bua tshihela tshia ku luseke lua mai manene. Bu mudi nvunde ya mu Sude ihitshilamu bikole, lumu ludi lufuma ku tshihela, ku buloba budi bukuatshisha bantu buowa. Bakummanyisha tshikena kumona tshikole; muena lukinu udi wenza malu a lukinu, muhaudi udi uhaula. Bandaku, Elama; tshintshimika, Madai! Nempuwishe kuhumuna kuonso kuakuvuisheye ku luseke alu. Nunku tshimono tshianyi tshiakûla tente ne kanyinganyinga, didinyenga diakunkuata, bu dia mukashi udi ne didinyenga dia ha kuleleye. Nakulua mukobame, ne bua muanda eu tshiena mua kunvua; nakukuatshika buowa, ne bua muanda eu tshiena mua kutangila. Mutshima wanyi udi uhampakana, buowa buhite bukole buakuntshinyisha. Kafuanshimba kanakasua kakukudimuka kuzakala kundi. Badi balongolola mesa, badi bâdisha biata, badi badia, badi banua. Jukai, nuenu bana ba mukelenge, labai manyi ha ngabu! Bualu bua Mukelenge wakungambila ne, Ya, utekeku nsentedi, yeye atuambile malu adiye umona. Ne biatangileye bisumbu bia makalu a nvita, babandi ba ha nyima ha tubalu benda ku babidi ku babidi, tshisumbu tshia nyama ya mpunda, tshisumbu tshia nyama ya tumelo, ateleje matshu andi, ikale ne mbabi. Ka yeye au wakadila bu nyama wa ntambue ne, Mukelenge, ndi ngimana nusangu yonso ha mutu ha tshibumba tshia nsentedi mu diba dia munya, ne badi banteka mu muaba wanyi wa butentekedi bufuku, ku dituku ku dituku. Ne mona, tshisumbu tshia bena tubalu tshidi tshilua, babandi ha nyima ha tubalu benda ku babidi ku babidi! Yeye wakampingishila dî ne, Babulona wakûhuka, wakûhuka; mpingu yonso ya nzambi yabo yakutshibuka bituha bituha, yakuhona hanshi ha buloba. Ke, wewe muntu wanyi mushihudibue, ne muana wanyi wa tshishihuidi! Mei anakunvua kudi Yehowa wa misumba, Nzambi wa Isalele, au mmei anakukuambila. Dî dia tshijila bualu bua Duma. Muntu wa mu Seî udi ungela dî ne, Mutentekedi, udi wamba tshinyi bua butuku? Mutentekedi, udi wamba tshinyi bua butuku? Mutentekedi udi witaba ne, Butuku bukadi butshia, kadi nebuile kabidi. Binuasua kunkonka kabidi, nunkonke bienu. Alukilai kabidi, luai bienu. Dî dia tshijila bualu bua Alaba. Bunudi nʼabu mbua kuasa tshitudilu tshienu mu bihuka bia mu Alaba, nuenu batuadi ba bintu ba Bena Dedana. Luai ne mai kudi muntu udi ne nyota, nuenu badi bashikame mu buloba bua Tema, sankidilai bihatshibue ne bia kudia. Bualu bua bakanyema miele ya nvita, bakanyema muele muhatula mu luhaha, ne buta bimana, ne dikenga dikole dia nvita. Bualu bua Mukelenge wakungambila dî edi ne, Hahita tshidimu tshimue, bu mudi muena mudimu wa ditutu ubala bidimu biandi, butumbi buonso bua Kedâ nebuhange. Badi bashala ba ku bungi bua bena mata ba diambedi, bena bukitu ba munkatshi mua bana ba Kedâ, nebikale anu banya-banya. Bualu bua Yehowa, Nzambi wa Isalele, wakuamba di edi. Dî dia tshijila bualu bua tshibanda tshia tshikena kumona. Bualu kai buakunkuata mpindiu bua buonso buenu nuakubanda ha mitu ha nsubu? Wewe udi mûle tente ne mbila, musoko udi ne diyoyo tente, musoko udi usanka bikole; bakushihibua munkatshi muebe kabakushihibua ku miele, kabena bafue mu nvita. Bakokeshi bebe bonso bakanyema diatshimue, bakabasuika hakadibo kabayi ne mata abo; bantu bebe bonso bakamonabo bakasuikibua hohamue, bobo mene bakadi banyema kule. Nunku nakamba ne, Lekelai kuntangila, bua meme ndile bikole. Kanukebi kunsamba bualu bua kubutuka kua muana mukashi wa bantu banyi. Bualu bua edi ndituku dia tshintompatompa, dia kudiata bantu muinshi mua makasa, dia kulubakana kua mitshima, difume kudi Mukelenge, Yehowa wa misumba, mu tshibanda tshia tshikena kumona; ndituku dia kushimbula ngumbu ya musoko, ne dia muadi udi ufika tô ne ku mikuna. Bena Elama bakambula nkaha ya mikete, bakalua ne bena makalu ne babandi ba ha nyima ha tubalu; Bena Kî bakasulula tshibuikilu tshia ha ngabu. Bibanda biebe bia mushinga mukole biakadi biule tente ne makalu, ne bena tubalu bakasa mualu wa nvita ku tshibuelelu tshia ku musoko. Yeye wakumusha tshibuikilu ku mesu kua Bena Yuda. Mu dituku adi wewe wakatangila kudi bielelu bia nvita biakadi mu nsuhu wa muitu. Nuakamona miaba mishimbula mu musoko wa Davidi ne, Idi ya bungi; nuakasangisha mai a mu tshina tshia mu tshibanda hohamue. Nuakabala nsubu ya mu Yelushalema kabidi, nuakashimbula, nsubu mikuabo bua kukolesha nʼai lumbu. Nuakumbula tshina tshia mai hankatshi ha ngumbu ibidi bua kukuatamu mai a mu tshina tshia diambedi. Kadi kanuakatangila kudi wakavuisha muanda eu, kanuakanemeka wakadihangidishila muanda eu kale. Mu dituku adi Mukelenge, Yehowa wa misumba, wakanubikila bua kudila ne bua kuasa madilu, bua kubeya nsuki yenu ne bua kudiluatshisha bilulu bikayabala; ne monai, disanka dia bungi didiku ne musangelu, kushiha kua ngombe ne kua mikoko, kudia kua munyinyi ne kunua kua maluvu, nuambe bienu ne, Tudie bietu, tunue bietu, bua makelela tufuafua. Yehowa wa misumba wakadimuenesha mu dî dinakunvua mu matshu anyi ne, Bulelela, bubi buenu kabuena bujimishibua tô ne ku lufu luenu; Mukelenge Yehowa wa misumba udi wamba nunku. Mukelenge, Yehowa wa misumba, udi wamba ne, Ya biebe kudi mulami eu wa bintu, kudi Shebena mene, udi ha mutu ha nsubu wa mukelenge, umuebeshe ne, Udi wenza tshinyi kunoko, ne udi ne muntu kai kunoko, bua wewe wakudiumbuila majambu? Wakudiumbuila majambu ha mukuna, wakadisongela muaba mu dibue bua yeye kulalamu! Mona, wewe muntu mukole, Yehowa neakuhidie kule ne bukole buandi buonso. Neakukuate bikole, neakuvunge tshivungu bulelela, nenkuele bu mudiye wela ndundu mu buloba bunene. Mu muaba wawa neufue biebe, ne mu muaba wawa nemuikale makalu ebe a mushinga mukole, wewe mufuishishi wa nsubu wa nfumu webe bundu. Nenkûmushe mu mudimu webe, nebakutulule ku muaba webe. Mu dituku adi nembikile muntu wanyi Eleyakima, muana wa Hilekiya, nemmuluatshishe tshivualu tshiebe, nemmujingile mukaba webe, nenfile bukokeshi buebe mu bianza biandi; ne yeye neikale tatu kudi ba mu Yelushalema ne kudi ba mu Bena Yuda. Nenteke luvungula lua ku nsubu wa Davidi ha diaha diandi; yeye neutulule tshibi, kakuena muntu watshinshila; neatshioshile, kakuena muntu watshiunzulula. Nemmujadike bu mudibo basa tshikudika mu muaba mushindame, ne yeye neikale bu nkuasa wa butumbi kudi ba mu nsubu wa tatuʼandi. Nebakudike bujitu buonso bua tshiota tshia tatuʼandi hamʼbidi handi, bana bakalelabo ne bantu ba hatuhu baledibue kudi bana aba, dilonga dionso dia tshianana mene, ku makoho tô ne ku mbidiki yonso. Yehowa udi wamba ne, Mu dituku adi tshikudika tshiakadi tshiasa mu muaba mushindame netshihete; nebatshikose, netshihone hanshi, ne bujitu buakadi bukudikaku nebubutuke, bualu bua Yehowa wakuamba dî edi. Dî dia tshijila bualu bua Tulo. Asai miadi, nuenu matu a Tâshishi, bualu bua bakubutula musoko wenu udi ne ngumbu ya nvita, ne kakuenamu nsubu kabidi, kakuena dilobo dia kutudilamu! Mu luendu luau lua ku buloba bua Kitima bualu ebu buakubuluibua kudiu. Nuikale bu tumama, nuenu badi bashikame ku muelelu wa mai manene, nuenu bangendʼa mushinga ba ku Sidona, bakahita ha mutu ha mai manene, bakendulukila mushinga ha mutu ha mai a bungi; maminu a ku Shihô akadi luhetu luabo, bia kudia biakahuolabo ku luseke lua musulu wa Nile; musoko au wakadi tshisalu tshia bisamba bia bantu. Nuenu ba mu Sidona, nukuatshike bundu, bualu bua mai manene akuamba dî, musoko wa ngumbu ya nvita wa ha mai manene wakuamba ne, Tshiena muanze kutantamena, tshiena muanze kulela, tshiena muanze kukolesha bansongalume anyi kudiundisha mishikankunde itshidi tumama. Hafika lumu elu ku Ejipitu, nebikale ne kanyinganyinga bualu bua lumu lua ku Tulo. Hitshilai mu mai manene tô ne ku Tâshishi; asai miadi, nuenu badi bashikame ku muelelu wa mai manene. Eu mmusoko wenu wakadi ne disanka, wakadi tshibangidilu tshiau mu bidimu biakahita kale, nguakadi makasa au aya nʼau kule bua kushikamaku, anyi? Tulo nguakadi muheshi wa bifulu bia bukelenge kudi banfumu; nguakadi bangendʼa mushinga bandi bikale bakokeshi; nguakadi bahanyishanganyi bandi ba bintu bikale bantu ba butumbi ha buloba! Wakadihangidishila bua kumuenzela nunku nganyi? Yehowa wa misumba wakadihangidishila bualu ebu bua kubihisheye butumbi buonso, ne bua bonso badi ne butumbi ha buloba bahetudibue. Hongolokai biebe ha buloba buebe buonso, wewe muana mukashi wa Tâshishi, bu mudi musulu wa, Nile uhasalala mibungiji yau; kakuena tshintu tshia kukukanda kabidi. Wakuolola tshianza tshiandi ha mutu ha mai manene, wakuzakasha makelenge. Yehowa wakuela mukenji bualu bua buloba bua Kanâna, bua kubutulabo misoko yabu idi ne ngumbu ya nvita. Wakamba ne, Kuena usanka kabidi, wewe muana mukashi wa Sidona udi mukengeshibue. Juka biebe, uhitshile mu mai manene tô ne ku Kitima; nansha wewe muikale kuakua kuine kuena uheta dikisha. Mona buloba bua Bena Kasada! Bantu aba kabenaku kabidi; Bena Ashû bakabusungula bua kubufila kudi nyama ya mu tshihela. Bakasa bibumba biabo bua kutshintshimika nʼabi musoko, bakashimbula mbalasa ya banfumu bau, bakauvuisha dikolo. Asai miadi, nuenu matu a Tâshishi; bua musoko wenu udi ne ngumbu ya nvita wakubutudibua. Mu dituku adi nebahue Tulo muoyo bidimu makumi muanda mutekete, bu mudi bantu babala matuku a mukelenge umue. Hashika bidimu makumi muanda mutekete, nebenzele Tulo bu mudi mei a musambu wa mukashi wa ndumba amba ne, Angata lunzenze, endakana mu musoko, wewe mukashi wa ndumba udibo bahue muoyo. Imba lunzenze luebe bimpe, imba misambu ya bungi, bua bantu bakuvuluke kabidi! Hashika bidimu makumi muanda mutekete, Yehowa nealue kabidi bua kumona musoko wa Tulo, ne wowo neuhingane kabidi ku difutu diau dia bundumba, newende masandi ne makelenge onso a ba ha buloba adi hanshi ha buloba. Kadi luhetu luau ne ditutu diau bua bundumba nebijidibue kudi Yehowa; kabiena bibutshidibua ne kabiena bitekedibua. Bualu bua luhetu luau lua ku kuendulula kua mushinga neluikale bintu bia kukuatshisha nʼabi bantu badi bashikame ku mpala kua Yehowa, bua bobo bikale ne bia kudia bikumbane ne bivualu bimpe. Monai, Yehowa udi wamba kuvuisha buloba butuhu, udi wamba kubuvuisha bu tshihela tshia lusenga, udi wamba kubukudimuna ubutua mutu wabu muinshi, ne kumuangalasha bantu babu kuonso. Mu dituku adi, bu mudibo benzela bantu mbu mudibo benzela bakuidi; bu mudibo benzela muhika mulume mbu mudibo benzela nfumu wandi; bu mudibo benzela muhika mukashi mbu mudibo benzela nfumu wandi mukashi; bu mudibo benzela musumbi wa bintu mbu mudibo benzela muhanyi wa bintu; bu mudibo benzela musombeshanganyi mbu mudibo benzela muena dibanza; bu mudibo benzela muangatshi wa kasombela mbu mudibo benzela mutentekedi wa kasombela. Buloba nebuvuishibue butuhu bushuwa, nebubutudibue tshishiki; bualu bua Yehowa wakuamba di edi. Buloba budi ne muadi ne budi bujimina, buloba bua bukua bantu budi buteketa ne budi bujimina, badi bahita butumbi munkatshi mua ba ha buloba badi bateketa. Buloba buakunyanguka bualu bua malu mabi a badi bashikamehu; bualu bua bakusambuka mei a Nzambi, bakuhetula mikenji yandi, bakuhidia kutumikila tshihungidi tshia tshiendelele. Bua bualu ebu mulau wakunyanga buloba, ne badi bashikamehu bakuhishibua, nunku ba ha buloba bakuoshibua ne kahia, anu bantu banya-banya badi bashala. Nvinyo muhia-muhia udi ujinga, muonshi wa tumuma tua nvinyo wakulekela, bonso badi ne mitshima ya disanka badi bahumuna. Disanka dia mazele didi dihuwa, mbila ya badi basanka yakushika, disanka dia lunzenze diakuhuwa. Kabena banua nvinyo ne kuimba kua musambu, maluvu makole neikale ne bululu kudi bantu badi bânua. Musoko wa kabutu wakushimbuka hanshi; bibi bia ku nsubu yonso bidi binshila, bua muntu kabuedimu. Muadi udi mu misesu bualu bua nvinyo kenaku; disanka dionso diakuandamuka midima, tuseku tua ba ha buloba tuakuhuwa. Mu musoko mudi mushala dibutuka, ne tshibuelelu tshiau tshiakubutudibua, tshiakutshihuka bituha bituha. Bualu nebuikale nunku munkatshi mua buloba, munkatshi mua bantu badimu, bu mudi kunyukula kua mutshi wa olive, bu mudi kuhumbulula kua tumuma tua nvinyo ku nyima kua kuhuola kuatu kua diambedi. Bantu aha nebabandishe mei abo, nebele mbila ya disanka; bua butumbi bua Yehowa badi bela dî dikole difume ku mai manene. Bua malu â tumbishai bienu Yehowa mu maloba a ku esete, tumbishai dina dia Yehowa, Nzambi wa Isalele, mu maloba a ku muelelu wa mai manene. Tuakunvua misambu mufume kunfudilu kua buloba mimbe ne, Muntu Muakane atumbishibue! Kadi nakamba ne, Tshinyanu tshidi tshinkuata, tshinyanu tshidi tshinkuata, mulau wankuatshi! batundianganyi ba tshitungu badi bantungila tshitungu, e, batundianganyi ba tshitungu badi batamba kuritungila tshitungu. Buowa ne dijimba ne buteyi bidi ku mpala kuetu, wewe muntu wa ha buloba! Wanyema ku diyoyo didi dimukuatshisha buowa neahone mu dijimba; ne waluhuka munda mua dijimba neakuatshibue mu buteyi; bualu bua bibi bia mu diulu bidi kunzulula, ne bishimikidi bia buloba bidi bizakala. Buloba buakutshibuka kuonso, buloba buakuhandika hankatshi, buloba budi butenkakana bikole. Buloba nebuende bulenduke bu muntu mukuatshike maluvu, nebutenkakane eku ne eku bu tshihoyi. Kutomboka kudimu nekubunemeshile bujitu, nebudishinde hanshi, kabuena bujuka kabidi. Mu dituku adi Yehowa neakengeshe tshisumbu tshia bakokeshi ba mu diulu ne bakelenge ba hanshi ha buloba. Nebasangishibue hohamue, bu mudibo basangisha bena lukanu mu tshina tshia mu nsubu wa lukanu; nebabakomene mu nsubu wa lukanu, ne hahita matuku a bungi nebabakengeshe. Hashishe ngondo neabuandakane, ne diba nedidisokoke bua bundu buadi; bualu bua Yehowa wa misumba neakokeshe mu mukuna wa Siona, ne mu Yelushalema; ku mpala kua bakulu bandi nekuikale butumbi. Yehowa, wewe udi Nzambi wanyi; nenkutumbishe, nentumbishe dina diebe; bualu bua wewe wakuenza malu a kukema, malu awakadihangidishila kale kale bua kuenza mu kujalama kuebe tshishiki. Bualu bua wakuyisha musoko munene dikolo, wakuvuisha musoko wa ngumbu ya nvita dibutuka, wakuyisha muaba mukole wa bantu ba bende hatuhu bua kawikadi musoko kabidi, ne kabena bawibaka kabidi tshiendelele. Nunku ba mu tshisamba tshia bantu bakole nebakutumbishe; ba mu misoko ya bisamba bidi bikuatshisha bantu buowa nebakunemeke. Bualu bua wewe wakadi bu musoko wa ngumbu kudi bahele, bu muaba mukole kudi mukengi mu dikenga diandi, bu tshinyemenu tshia kunyemenamu tshikondo tshia tshihuhu, bu dileshi mu diba dia munya mukole, hikala muhuya wa bena tshinyangu babi bu dikuma dia tshihuhu ku tshimanu, bu mudi luya lua mu muaba mûme luenza. Wewe neuhuwishe mutoyi wa bantu ba bende; bu mudi luya luenza ne dileshi dia ditutu, musambu wa badi bakuatshisha bakuabo buowa neuhuwishibue. Mu mukuna eu Yehowa wa misumba nealongoluele bantu bonso bidia bia disanka bia manyi, bidia bia disanka bia nvinyo muladike ndala, bia kudia bia manyi bisangisha ne buongo bua mu mifuba, bia nvinyo muladike ndala mulengeshibue bimpe. Ha mukuna eu yeye neumushe tshilulu tshikudika tshidi tshibuikila ha mitu ya bantu bonso, ne tshibuikilu tshidi tshiadisha ha mutu ha bisamba bionso. Yeye wakumina lufu tshiendelele; ne Mukelenge Yehowa neakuhule binsonshi ku mesu kua bantu bonso; neumushe tshihendu tshidibo bahenda nʼatshi bantu bandi, utshiumusha ha buloba buonso; bualu bua Yehowa wakuamba dî edi. Mu dituku adi nebambe ne, Monai, eu udi Nzambi wetu utuakutekemena ne, Neatusungile; eu udi Yehowa utuakutekemena; netuikale ne disanka, netusanke mu luhandu luandi. Bua tshianza tshia Yehowa netshikole ha mukuna eu, ne nebatuale Moaba hanshi hadiye mushikame, bu mudibo badiata bisonsa hanshi mu mai a diala dia tunvi tua bimuna. Yeye neolole bianza biandi munkatshi mua mei â, bu mudi muombedi wa mai wolola bianza biandi bua kuombeleye; kadi Yehowa neuhuekeshe kudisua kuandi nansha bienzeye majimbu andi onso ne bianza biandi. Neashimbule miaba mikole ya bielelu bia nvita idi misasa kulu ha mutu ha ngumbu yebe, neayihuekeshe hanshi, neayitulule tô ne hanshi ha buloba, mu dinfuenkenya mene. Mu dituku adi nebimbe musambu eu mu buloba bua Yuda, bimba ne, Tudi ne musoko mukole; yeye neajadike luhandu bua kuikalalu ngumbu yau ne bibumba biau bikole. Unzululai bibi, bua ba mu tshisamba tshia bantu bakane badi balamata ditabusha babuelemu. Wewe udi ulama muntu udi ne mutshima wandi mujalame bua yeye ikale ne ditalala dia tshishiki, bualu bua yeye udi ukueyemena. Eyemena! Yehowa tshiendelele, bualu bua Yehowa, Yehowa mene, udi dibue didiku tshiendelele! Bualu bua yeye wakahuekesha bakadi bashikame kulu, wakuhuekesha musoko wakadi mudibandishe kulu. Udi ûtulula hanshi, udi ûtulula tô ne hanshi ha buloba, udi ûtulula tô ne mu dinfuenkenya. Dikasa nediudiate muinshi muadi; makasa a bahele, ne bidiatshidi bia bakengi nenudiate hanshi. Nshila wa bantu bakane udi mululame; wewe udi ulandakasha nshila wa bantu bakane. Bulelela, Yehowa, mu nshila wa kulumbulula kuebe, tuakukuindila; mitshima yetu idi ijinga dina diebe, idi ijinga tshivulukidi tshiebe. Nakukujinga mu mutshima wanyi butuku; e, ndi nkukeba ne mutshima wanyi wonso. Bualu bua, hikala kulumbulula kuebe ha buloba, badi bashikame ha buloba badi bayila buakane. Bialeshabo muntu mubi diakalengele, kena uyila buakane; munkatshi mua buloba bua buakane mene yeye nênze malu mabi, ne kena umona butumbi bua Yehowa. Yehowa, tshianza tshiebe tshidi tshibishibua kulu, kadi kabena batshimona; kedi bamone lukunukunu lûdi nʼalu bua bantu bebe, bafue bundu; bushuwa, kahia nekoshe badi nʼebe lukuna! Yehowa, neutujadikile ditalala; bualu bua wakutuenzela midimu yetu yonso. Yehowa Nzambi wetu, bakelenge bakuabo bakadi kabayi bu wewe bakutukokesha; kadi bua dikuatshisha diebe nkayadi netutumbishe dina diebe. Bafue kabena hikala ne muoyo kabidi, bakahuola muoyo, kabena babika kabidi. Nunku wewe wakubakengesha ne wakubabutula, wakujimisha tshivulukidi tshiabo tshionso. Wewe wakuvudisha ba mu tshisamba tshietu, Yehowa, wakuvudisha ba mu tshisamba tshietu; wewe udi mutumbishibue; wakulehesha mikalu yonso ya buloba buetu. Yehowa, hakadibo mu makenga, bakakukeba; bakatuma milombu kûdi bakadi makengesha ebe hamʼbidi habo. Bu mudi mukashi udi ne difu wenza, hafika tshikondo tshia kuleleye, udi ukenga ne udi usasabala mu didinyenga diandi, tuakadi nunku ku mpala kuebe, Yehowa; tuakadi ne mafu, tuakadi tudinyenga, tuakadi bu badi balela luhehele. Katuakuhetela ba ha buloba luhandu, ne kakuena bantu ba ha buloba baledibue bua bualu buetu. Bafue bebe nebikale ne muoyo; mibidi yabo mifue neyibike. Tabalai ne imbai bienu, nuenu badi balala mu dinfuenkenya! Bua mume webe udi bu mume wa munya, buloba nebuluhule bafue badimu. Luai, bantu banyi, buelai mu nsubu yenu, nuinshile bibi bienu ku nyima kuenu; nusokome katuha kihi, tô ne hahita tshikondo tshia njiya. Bua, monai, Yehowa udi uluhuka mu muaba wandi bua kukengesha ba ha buloba bua bubi buabo; buloba kabidi nebusokolole mashi akanuabu, kabuena busokoka kabidi bakadi bashihibuamu. Mu dituku adi Yehowa neikale ne muele wandi wa nvita mukole ne munene, neakengeshe nyoka mimene udi unyema lubilu, nyoka munene udi wenda utunyangala; neashihe nyama munene udi mu mai manene. Mu dituku adi nebimbe musambu eu: Budimi bua tumuma tua nvinyo buimpe budiku, nuimbe musambu bualu buabu! Meme Yehowa ndi mulami wabu; nembumiamine mai diba dionso. Bua muntu kabanyangi, nembulame butuku ne munya. Tshiji katshiena munda muanyi. Nakadi kusua ne meba ne mingonge bikale ku mpala kuanyi bua kuluangana nʼanyi nvita! Nakadi kubidiata muinshi mua makasa, nakadi kubiosha kaba kamue. Anyi muntu mubi alue biandi kuangata luhandu luanyi, bua adilengeshe nʼanyi; bulelela, adilengeshe nʼanyi. Mu matuku adi kâyi manji kulua Yakoba nêle miji; Isalele neabaluluke, neasampile ntonga; nebûshe buloba buonso ne tumuma tua nvinyo. Yehowa wakubakuma bu muakakumeye bakuabo bakabakuma, anyi? Bakushihibua bu muakashiheye bakabashiha, anyi? Hawabihata, hawabatuma kukuabo, udi ufuilangana nʼabo; wakabumusha ne luhehele luandi lukole mu dituku diakafuma tshihehele ku luseke lua esete. Bua muanda eu bubi bua Yakoba nebujimishibue, ne au mmamuma onso adi Yehowa musue bua kumûmushila bubi buandi: bua yeye avuishe mabue onso a bioshelu biandi bu mabue a luhemba adibo babotesha, bua Bashela ne mpingu idibo batendelela nʼai diba kabikadiku kabidi. Bualu bua musoko wa ngumbu ya nvita udi ushala ha buau, tshishikaminu tshidibo balekela, tshidibo bashiya hatuhu, bu tshihela mene. Mu muaba wawa muana wa ngombe neadie mashinde, nealaleku, neadie ne neamane matamba a mitshi. Huma matamba a mitshi, nebâhule, ne bakashi nebalue, nebatemeshe nʼau kahia; bualu bua badi bantu badi kabayi ne lungenyi; nunku yeye wakabafuka kena ubafuila luse, wakabafuanyikisha kena ubalesha diakalengele. Mu dituku adi Yehowa neashihule miehu yandi ya blé ya ku musulu wa Pelata tô ne ku kasulu ka Ejipitu; ne ba nusangishe muntu ne muntu, nuenu, Bena Isalele. Mu dituku adi nebele mpungi munene; bakadi bamba kufua mu buloba bua Ashû, ne bakadi bihatshibue bua kubuelabo mu buloba bua Ejipitu, nebalue; nebatendelele Yehowa mu mukuna wa tshijila wa ku Yelushalema. Mulau wikale kudi tshifulu tshia bunfumu tshia diambu tshia bakuatshiki ba maluvu ba mu Efelayima, kudi tshilongo tshidi ne bulengele buatshi bua butumbi tshidi tshifubidila, tshidi tshimena ha mutu ha luhongo luimpe lua bantu aba badi maluvu mahite bukole! Monai, Mukelenge udi ne muntu munene ne mukole udi bu tshihuhu tshia mabue a mula tshidi tshishiha bintu bikuabo, udi bu mai adi ahueka bikole adi ahasalala mielelu ya musulu ku mpala kua tshihuhu, udi wela bintu hanshi ne tshianza tshiandi tshikole. Tshifulu tshia bunfumu tshia diambu tshia bakuatshiki ba maluvu ba mu Efelayima netshidiatshibue muinshi mua makasa. Tshilongo tshidi ne bulengele buatshi bua butumbi tshidi tshifubidila, tshidi tshimena ha mutu ha luhongo luimpe, netshikale bu dimuma dia nfigi didi didianjila kuboba diambedi matuku a luya kayi manze kulua; hadimona muntu, yeye neadidie hatshididi mu tshianza tshiandi. Mu dituku adi Yehowa wa misumba neikale tshifulu tshia butumbi ne tshitotolo tshia bulengele kudi difuka dia bantu bandi. Neikale nyuma wa kulumbulula kuakane kudi muntu udi mushikame mu tshilumbuluidi, neikale bukole kudi bantu badi bihata bena nvita badi bafika ku tshibuelelu tshia musoko. Kadi bantu aba mene badi batshinkakana ne nvinyo, badi batenkakana bualu bua maluvu makole; muakuidi ne muprofete badi batshinkakana bualu bua maluvu makole, badi baboteshibua bualu bua nvinyo, badi batenkakana bualu bua maluvu makole; badi batuhakana mu dijingulula dia bikena kumona, badi balenduka hakosabo bilumbu. Mesa onso adi mabuikila ne bilushi biabo ne bukoya, kakuenahu muaba udi kauyi ne bukoya. Neayishe muntu kai lungenyi? Neajinguluile muntu kai dî diandi? Neayishe bana badi bajidika mabele, badi bumushibua mu biadi bia bamamuʼabo, anyi? Bualu bua mukenji ha mutu ha mukenji udiku, mukenji ha mutu ha mukenji, luidi ha mutu ha luidi ludiku, luidi ha mutu ha luidi; tshituha eku ne tshituha kuakua. Eyo, kadi ku mishiku ya muena tshikukumina ne mu muaku wa bantu ba bende, yeye neambile bantu aba dî. Wakumana kubambila ne, Etshi ntshikondo tshia kuikisha, nuheshe muntu muhungile dikisha; etshi ntshikondo tshia kukankamika. Kadi kabakasua kunvua nansha. Nunku dî dia Yehowa nedikale mukenji ha mutu ha mukenji kudibo, mukenji ha mutu ha mukenji, luidi ha mutu ha luidi, luidi ha mutu ha luidi; tshituha eku, tshituha kuakua; bua bobo baye kudishinda luanyima, batshibuke, bahone mu mateyi, bakuatshibuemu. Nunku, unvuai bienu dî dia Yehowa, nuenu babuidi badi bakokesha bantu aba ba mu Yelushalema! Bualu bua nuakuamba bienu ne, Tuakuhunga tshihungidi ne lufu, tuakuhungakasha dî ne Muaba wa Bafue; halua tshihuhu tshidi tshihongoloka kuhitshilamu, katshiena tshifika kutudi; bualu bua tuakuvisha mashimi tshinyemenu tshietu, tuakusokoma muinshi mua kudinga. Bua mei â Mukelenge Yehowa udi wamba ne, Tangilai, ndi nteka dibue mu Siona bua kuasahu bishimikidi bia nsubu, ndibue diakutetshibua bimpe, dibue dia mushinga mukole didi ditumba dia mu bishimikidi bijadikibue bikole; waditabusha kena udiendesha lukasa. Nenvuishe kulumbulula kuakane luidi, ne buakane tshiamu tshia plomb tshia kuteta nʼatshi tshimanu. Mabue a nvula neumushe tshinyemenu tshia mashimi, mai neahitshile ha mutu ha tshisokomenu. Tshihungidi tshienu ne lufu netshishihibue, ne dî dinuakuhunga ne Muaba wa Bafue kadiena dijalama; hahitshilamu tshihuhu tshidi tshihongoloka, netshinudiate hanshi. Misangu yonso iditshi tshihitshilamu, netshinkuate; bualu bua ku dinda ne ku dinda netshihitshilemu, munya ne butuku kabidi; kujingulula kua dî dia muprofete nekunuvuishile anu buowa bukole. Bualu bua bulalu budi buhita buihi bua muntu adiololehu, tshilulu tshidi tshibubuikila tshidi tshitamba kukeha bua yeye adijingile nʼatshi. Bua Yehowa neajuke bu muakajukeye ha mukuna wa Pelazima, neikale ne tshiji bu muakadiye nʼatshi mu luhongo lua Gibeona; bua kuenza mudimu wandi, mudimu udi ukemesha bantu, bua kumana tshienzedi tshiandi, tshienzedi tshiandi tshidiye kayi muanze kuenza diambedi. Nunku kanuikadi babuidi, bua nkanu yenu kayikoleshibu; bualu bua nakunvua mukenji wa kubutula mufume kudi Mukelenge, Yehowa wa misumba, wakueleye ba ha buloba bonso. Telejai matshu, unvuai dî dianyi; ungunvuilai, unvuai mei andi ngamba. Muntu udi ubundulula buloba bua kukunamu maminu utu wabubundulula misangu ne misangu, anyi? Utu wasekununa ne utu walandakasha budimi buandi, anyi? Hashikisheye kulandakasha buloba bua ha mutu ha budimi, kena umiamina maminu a nielle ne kuelamu maminu a cumin, anyi? Kena ukuna blé mu mabula ne maminu a orge mu muaba wau musungula, ne maminu a épeautre kukala kua budimi, anyi? Bualu bua Nzambi wandi udi umulesha lungenyi luimpe lua kulondeye, udi umuyisha. Bua kabena bashihula maminu a nielle ne tshiamu tshitue, ne kabena babungusha nkata wa dikalu ha mutu ha maminu a cumin; kadi badi batuta maminu a nielle ne mulangala, badi batuta maminu a cumin ne mutshi. Badi babotesha maminu adibo benza nʼau bidia, anyi? Nansha, muntu katu wâshihula musangu ne musangu; kadi habungulusheye nkata wa dikalu diandi ne hendesheleye tubalu tuandi ha mutu hau, kena wâbotesha nansha. Lungenyi elu kabidi ludi lufuma kudi Yehowa wa misumba, udi ulesha bantu meji adi abakemesha, ne udi ne lungenyi lutambe buimpe. Mulau wikale kûdi, Aliele, Aliele, musoko muakasamu Davidi tshitudilu tshiandi! Tentekashai tshidimu ha mutu ha tshidimu; bikondo bia bidia bia disanka bilondangane mu bidimu biabi. Hashishe nentatshishe Aliele, ne madilu ne muadi nebikalemu; ne musoko eu newikale kundi bu diku dia tshioshelu. Nenkunyungulule ne bitudilu bianyi, nenkutshintshimike ne mialu ya mata, nengele mabula manene, ne nengibake bibumba bikoleshibue ne bielelu bia nvita bua kukuluisha nʼabi. Nebakutulule hanshi, newambe mei ebe hawikala muinshi mua buloba, muaku webe ndifume munkatshi mua dinfuenkenya. Dî diebe nedikale bu dî dia muakuishi wa biambi dihatuka munda mua buloba, ne mei ebe neikale bu biambi bihatuka mu dinfuenkenya. Kadi tshisumbu tshia badi nʼebe lukuna netshikale bu dinfuenkenya dibotesha, tshisumbu tshia badi bakuatshisha bantu buowa netshikale bu bisote bidi bihehuka kudi luhehele. Bulelela, bualu ebu nebumueneke lubilu, mu kubunya kua disu: Yehowa wa misumba nealue kûdi ne mikungulu, kukanka kua buloba, diyoyo dinene, nvunde ne tshihuhu, ne ludimi lua kadilu kadi kayi ngutula bintu bionso. Tshisumbu tshia bisamba bionso bidi biluisha Aliele, tshia bantu bonso badi balua ngana nʼandi, ne miaba yandi ya ngumbu ya nvita ne badi bamukengesha nebikale bu tshilota, bu tshikena kumona butuku mene. Muanda au newikale bu tshilota tshidi muntu udi ne nzala uhita ne, Ndi ndia bia kudia, kadi udi utabala, ne mutshima wandi utshidi ne kusamina kua bia kudia. Anyi newikale bu tshilota tshidi muntu udi ne nyota ulota ne, Ndi nnua mai, kadi udi utabala, ne udi muhungile, ne mutshima wandi utshidi usamina mai. Bualu nebuikale nunku ne tshisumbu tshia bisamba ebi bionso bidi biluangana nvita ne ba mu mukuna wa Siona. Hampakanai! Tuai mikemu! Nudifofomeshe mesu! Nuikale bafofo! Badi bakuatshike, kadi kabayi banua nvinyo; badi butenkakana, kadi kabayi banua maluvu makole. Bualu bua Yehowa wakatshihisha nyuma udi ne tulu tukole hamʼbidi henu; wakubuikila mesu enu, mbaprofete mene, wakubuikila mitu yenu, mbamonyi ba bikena kumona mene. Tshikena kumona tshia bualu ebu buonso tshiakulua kunudi bu mei a mu mukanda muvunga, udi bantu bafila mu bianza bia muntu udi mumanye mua kujingulula maleta, bamba ne, Tudi tukusengelela ne, Utubadile mutanda eu; ne yeye udi ubahingishila dî ne, Tshiena mumanye mua kûbala, bualu bua udi muvunga. Badi bafila mutanda kudi muntu udi kayi mumanye mua kubala mikanda, bamba ne, Tudi tukusengelela ne, Utubadile mukanda eu; ne yeye udi wamba ne, Tshiena mumanye mua kubala mikanda. Mukelenge wakamba ne, Bualu bua bantu aba badi basemena hehi nʼanyi ne badi bantumbisha ne mukana muabo ne mishiku yabo, kadi bakumusha mitshima yabo kundi ne idi kule, ne badi bantshina anu bualu bua mukenji wa bantu wakuyilabo mu mitu yabo; nunku, tangilai, nengenze kabidi malu munkatshi mua bantu aba adi abakemesha, malu mene adi atamba kubakemesha ne adi biau malu a kukema; ne meji a bena meji babo neajimine, lungenyi lua bena lungenyi babo nelusokokibue. Mulau wikale kudi bantu badi bafundika bifufu biabo muinshi mule bua kubisokoka ku mesu kua Yehowa, ne badi ne midimu yabo mu midima, badi bamba ne, Muntu kai udi mutumone? Muntu kai udi mummanye? Monai tshitshu tshienu! Mufumbi neabadibue bu dima, anyi, bua tshintu tshidiye ufumba tshiambe bua mufumbi watshi ne, Yeye kakunfumba nansha? Tshintu tshienjibue netshiambe bua yeye wakutshienza ne, Yeye kena ne lungenyi, anyi? Diba ndishala dikese bua Lebanona kuandamuka bu budimi budi bulua ne bintu bia bungi, ne budimi budi bulua ne bintu bia bungi nebubadibue bu ditu, anyi? Mu dituku adi badi ne mahaha nebunvue mei a mu mukandu, ne mesu a bafofo neamone mu mufitu ne mu mîdima. Bena kalolo kabidi nebavudishe disanka diabo mu Yehowa, bahele ba munkatshi mua bantu nebasanke mu Wa Tshijila wa Isalele. Bualu bua amena tshinyangu wakuvuishibua muntu wa hatuhu, mubuidi wa bualu bua Nzambi wakuhuwa, ne bonso badi batentekela diba dia kubuelabo mu malu mabi badi bajimina. Badi bavuisha muntu bu muhishibu mu tshilumbu ku dî diabo dia mashimi, badi belela muntu buteyi udi ubela bantu babi ku tshilumbuluidi tshia ku tshibuelelu tshia musoko, badi basesuisha kubinga kua muntu mubinge mu tshilumbu anu bua bualu bua tshianana. Nunku Yehowa wakahikula Abalahama udi wamba dî edi bua bana ba Yakoba ne, Yakoba kena wikala ne bundu ku mesu mpindiu, mpala wandi kena utokoloka kabidi. Kadi hamena bana bandi midimu inuakuenza ne bianza bianyi munkatshi muabo, nebajidile dina dianyi; bulelela, nebajidile Wa Tshijila wa Yakoba, nebikale ne ditshina ku mpala kua Nzambi wa Isalele. Bantu kabidi badi batuhakana mu mitshima yabo nebikale ne lungenyi, ne badi batontolola nebayile diyisha. Yehowa udi wamba ne, Mulau wikale kudi bana badi bantombokela, badi benza bualu buakudihangidishilabo, kadi budi kabuyi bufume kundi; badi bahunga tshihungidi, kadi kantshia Nyuma wanyi, bua kutentekasha bubi ha mutu ha bubi! Badi bahisha luendu bua kuhuekabo mu Ejipitu, ne kabena bakonka lungenyi mukana muanyi. Badi basue kunyemena tshinyemenu kudi Palô, ne kudisokoka muinshi mua mundidimbi wa Ejipitu! Nunku bukole bua Palô nebulue bu bualu bua kunufuisha bundu, ne tshisokomenu tshia mu mundidimbi wa Ejipitu netshilue dibuandakana dienu. Bualu bua nansha bikala bakokeshi bandi ku Soana, ne biafika miloho yandi ku Hanesa, buonso buabo nebafue bundu bualu bua bantu badi kabayi bamanye mua kubakuatshisha, badi kabayi balua ne dikuatshisha anyi diakalengele, kadi badi babafuisha bundu, badi babavuisha bu bahendibu. Dî dia tshijila bua nyama ya ku luseke lua Sude. Badi bahitshila mu buloba bua dikenga ne kanyinganyinga, kudi nyama wa ntambue mukashi ne nyama wa ntambue mulume, kudi kufuma nyoka wa ntoka ne nyoka wa kahia udi uhahala, badi batuala biuma biabo bidibo bateka ha nyima ha nkungulu ya mpunda, ne bintu biabo bia mushinga mukole ha nyama ya tumelo, baya nʼabi kudi bantu badi kabayi mua kubakuatshisha. Bualu bua dikuatshisha dia Ejipitu didi hatuhu, kadiyi dibahetela bualu; nunku nakunubikila ne, Lahaba-udi-mushikame-muhuwe. Ya biebe mpindiu, funda dî edi ha dibue ku mpala kuabo, udifunde mu mukanda kabidi, bua dikaleku mu matuku adi kâyi manji kulua, bu tshimanyishilu tô ne tshiendelele. Bua bantu aba badi batomboka, badi bana, bena mashimi, badi bana badi kabayi basue kunvua diyisha dia Yehowa. Badi bambila bamonyi ba bikena kumona ne, Kanubimonyi; badi bambila baprofete ne, Kanutuambidi mei a malu makane, nutuambile mei mashemakane, nutuambile malu adi mua kufu dinga! Numuke mu nshila, nusesuke mu nshila unudi nuendelamu, kanutunvuishi kabidi dina dia Wa Tshijila wa Isalele. Bua mei â Wa Tshijila wa Isalele udi wamba ne, Bualu bua nuakuhetula dî dianyi, ne nudi nueyemena anu malu a tshinyangu ne a tshitshu, ne nudi nuatekemena kabidi; nunku bualu bubi ebu nebuikale kunudi bu mutanta wa mu lumbu lule udi uhuekahuekamu, utantakana tô ne lushimbuka lumbu, ne dishimbuka dialu didi difika lukasa, mu katuha ka diba mene. Dishimbuka diatu didi bu kushiha kua luesu lua mufumbi wa bivuadi, udi ulusunsula bihese bihese; nunku kabena basangana kayoyi munkatshi mua bihese bialu ka kuhatula nʼaku dikala dia kahia muiku, anyi bua kutuma nʼaku mai a mu mukete wa mai. Bualu bua Mukelenge Yehowa, wa Tshijila wa Isalele wakamba ne, Hanualukila kundi, hanuaheta dikisha kundi, nenusungidibue; mu buhote bua mutshima ne mu kungeyemena kuenu nemuikale bukole buenu. Nuenu kanuakasua nunku, kadi nuakuamba bienu ne, Nansha, bualu bua netunyeme ba nyima ha tubalu! Nunku, nenunyeme bulelela. Nuakuamba kabidi ne, Netuende babande ha nyima ha nyama idi inyema lubilu; nunku badi banuihata nebanyeme lubilu kabidi. Tshinunu tshienu netshinyeme bua kufuna kua bulobo kua muntu umue; bua kufuna kua bulobo kua bantu batanu nenunyeme, tô ne hadibo banushiya bu mutshi wa dibendela ha mutu ha mukuna mule, ne bu dibendela ha mutu ba mukuna muihi. Nunku Yehowa udi windila bua kunulesha dinanga diandi; ne bua muanda eu neadioshe bua kunulesha luse; bualu bua Yehowa udi Nzambi udi ulumbulula biakane; bonso badi bamuindila badi bavudishibue disanka. Nuenu, ba mu Siona badi bashikame mu Yelushalema, kanuena nudila kabidi. Yeye neanuleshe dinanga diandi bulelela hunvueye muadi wenu; mu diba didiye unvua neitabe kunudi. Nansha biakuha Mukelenge bia kudia bidi bikeha mu tshikondo tshibi, ne mai adi akeha mu tshikondo tshia makenga. Muyishi webe kena usokoma kabidi, mesu ebe neamone Muyishi webe. Hawakeba kusesuka ku tshianza tshia balume, anyi ku tshianza tshia bakashi, matshu ebe neunvue dî difume ku nyima kuebe, diamba ne, Nshila kayeu, endelamu. Nenunyange tshiamu tshia argent tshinudi balamike ku mpingu yebe misonga, ne tshiamu tshia or tshinudi balamike ku mpingu yebe mifudibue; nenubimashe bu tshilulu tshinyanguke ne bukoya; nenubambile ne, Umukai kutudi! Yeye neakutumine nvula bua maminu ebe audi ukuna mu buloba, ne bidia bia ku matete adi buloba budiundisha nebikale ne manyi, nebikale bia bungi. Mu dituku adi bimuna biebe nebidie mashinde mu madimi manene. Ngombe ne nyama ya mpunda idi ibila buloba mu budimi buebe neyidie bia kudia bimpe bisangisha ne luehu, bia kudia mene bidibo bahehula ne tshikasu tshia mpau ne tshihehudi. Tusulu tua mai ne misulu mikuabo nebikale ha mutu ha mukuna mule wonso ne ha mutu ha mukuna muihi wonso, mu dituku dia kushiha kunene, huhuka bibumba. Bualu bukuabo kabidi, munya udi ufuma ku ngondo newikale bu munya udi ufuma ku diba, ne munya wa ku diba neuvudishibue misangu muanda mutekete, newikale bu munya wa matuku muanda mutekete, mu dituku didi Yehowa ujingila mputa ya bantu bandi, ne udi ukamisha mputa yakatahibuabo. Monai, dina dia Yehowa didi difuma kule, didi ditema ne tshiji tshiandi, didi mu mulanjilanji wa muishi mufike udi ubanda. Mishiku yandi idi miule tente ne tshiji, ne ludimi luandi ludi bu kahia kadi kashidisha. Muhuya wandi udi bu musulu udi uhasalala mielelu yau, udi ufika tô ne mu nshingu wa muntu. Udi ulua bua kusenga bisamba bia bantu mu munyingu wa kubabutula nʼau; lukanu ludi lubahambuisha neluikale mu mbanga ya bantu aba. Nuenu nenuikale ne musambu bu musambu udibo bimba ku butuku hadiabo bidia bia disanka dia tshijila; nenuikale ne disanka dia mutshima, bu disanka dia muntu udi wenda wela lushiba hayeye ku mukuna wa Yehowa, kudi Dibue dia Isalele mene. Yehowa neunvuishe bantu dî diandi dia butumbi, neamueneshe dihueka dia diboko diandi hanshi mu kuvulangana kua tshiji, mu ludimi lua kahia kadi kashidisha, mu kuhumuka kua nvula, mu tshihuhu ne mu mabue a nvula. Bua dî dia Yehowa Muena Ashû neikale ne buowa bukole; neamukume ne tshibonge tshiandi. Mukumu wonso wa mulangala wa mulau udi Yehowa umukuma nʼau newikale ne tshiona tshia makasa ne nzenze; nealue kudibo ne diboko diela mulu, utshintshila bua kuluangana nʼabo. Bualu bua bakumana kulongolola tshioshelu tshia kuoshelahu bitalu; e, bakutshilongoluela mukelenge; bakutshivuisha tshile ne tshinene; bakutentekashaku makala ne nkunyi ya bungi; muhuya wa Yehowa, udi bu musulu wa soufre, udi ubitemesha. Mulau wikale kudi bantu badi bahueka mu nshila wa ku Ejipitu bua kudiangatshila dikuatshisha diabo, badi batekemena tubalu, badi beyemena makalu a nvita bualu bua adi a bungi, ne badi babanda ha nyima ha tubalu bualu bua badi batamba bukole, kadi kabena batangila kudi Wa Tshijila wa Isalele, ne kabena bakeba lungenyi kudi Yehowa! Kadi yeye kabidi udi ne meji, udi uvuisha makenga, kena ukudimuna mei andi, kadi neajuke bua kukanda ba mu nsubu wa benji ba malu mabi, ne bakuatshishi ba badi benza malu mabi. Bena Ejipitu badi bantu, kabena Nzambi nansha; tubalu tuabo tudi nyama, katuena nyuma nansha. Holola Yehowa tshianza tshiandi, mukuatshishi nealenduke, ne udiye mukuatshishe neadishinde, ne buonso buabo nebajimine hohamue. Bua Yehowa udi ungambila dî edi ne, Bu mudi nyama wa ntambue ne muana mulume wa ntambue ukungula hadieye nyama udiye mukuate, ne habikilabo tshisumbu tshia balami ba mikoko bua kumuluisha, bu mudiye kayi utshina mei adibo bamuela, kayi unvuila mbila yabo, nunku Yehowa wa misumba neahueke hanshi bua kuluangana nvita ha Mukuna wa Siona ne ha mutu ha mukuna wau. Bu mudi nyunyu ilembelela ha buihi ne masua ai, Yehowa wa misumba nealame Yelushalema; neamulame, neamuhandishe, neamushiye ne neanusungile. Hinganai bienu, nuenu bana ba Isalele, kudi yeye unuakutamba kutombokela. Bua mu dituku adi muntu yonso wa munkatshi muenu neimashe mpingu yandi ya argent ne mpingu yandi ya or, inuakudienzela ne bianza bienu bua kuenza nʼai bubi. Ne Muena Ashû neahone ku muele wa nvita, kauyi wa bantu; muele wa nvita, kauyi wa bantu, neumubutule. Yeye neanyeme muele wa nvita, ne nebabueshe bansongalume bandi mu mudimu wa buhika. Neahite dibue diandi dia tshinyemenu, nediumuke bualu bua buowa, ne bilobo biandi nebitshine, nebinyeme dibendela, mmudi Yehowa wa misumba wamba, udi ne kahia kandi mu Siona ne tshikutu tshiandi mu Yelushalema. Monai, mukelenge neakokeshe mu buakane, ne bakokeshi nebakokeshe mu kulumbulula kuakane. Muntu neikale bu tshisokomenu ku tshihehele, ne tshinyemenu tshia ku tshihuhu, neikale bu misulu ya mai mu muaba mûme, bu dileshi dia dibue dinene mu buloba budi butondesha bantu. Mesu a bantu badi bamona kaena abuikidibua kabidi, ne matshu a bantu badi bunvua neateleje. Mutshima wa muntu udi wamba malu lukuluku newikale ne lungenyi lua kujingulula, ne ndimi ya bena tshikukumina neyikale mihehele, neyakule bimpe. Kabena babikila muhote kabidi ne, Udi muntu wa butumbi, kabena bamba bua muena budimu ne, Udi muntu mimene. Bualu bua muhote neakule biakulakula, mutshima wandi newele meji bua kuenzeye bibi, bua kuenzela Yehowa malu a dikamakama, bua kuamba mashimi bualu bua Yehowa, bua kuyuisha mutshima wa muena nzala munda mutuhu, ne bua kuhidisha badi ne nyota mai. Bielelu bia nvita bia muena budimu bidi bibi; udi udihangidishila biandi bienzedi bibi bua kubutula nʼabi bahele ku mei a mashimi, nansha hamba muntu muhele mei adi malelela. Kadi muena buneme udi udihangidishila bienzedi bia buneme; ne yeye neananukile kuenza malu a buneme. Nuenu bakashi badi bashikame holâ banema, bikai bienu, unvuai dî dianyi, nuenu bana bakashi badi badieyemena, telejai matshu ku mei anyi. Hahita tshidimu tshijima ne matuku makese ha mutu, nemuikale, nuenu badi badieyemena; bualu bua mionshi ya tumuma tua nvinyo neyihange kukuama, kuhuola kuatu kakuena kumueneka. Hampakanai ne buowa, nuenu bakashi badi banema; zakalai, nuenu badi kabayi ne ntatu; nuvule bilulu bienu, nushale butaka; nudijingile bilulu bikayabala mu bimono bienu. Badikume mu biadi bua kujinga kuabo kua madimi akadi abasankisha, bua muonshi wa tumuma tua nvinyo wakadi ukuama bimpe; bua buloba bua bantu banyi bukadi ha kumenesha meba ne mingonge, ne kua nsubu yonso ya disanka ya mu musoko wa disanka. Bua mbalasa wa nfumu neikale munda mutuhu; musoko wakadi ne bantu bavule newikale dikolo. Mukuna ne tshibumba tshia batentekedi nebikale mena a nyama tshiendelele, nebikale miaba ya disanka kudi mpunda ya mu tshisuku ne budimi bua mashinde bua kudishamu bimuna. Malu â neikaleku tô ne hatshikishabo Nyuma wa mu diulu hamʼbidi hetu, handamuka tshihela budimi budi bulua ne bia kudia bia bungi, ne babadibua budimi budi bulua ne bintu bia bungi bu ditu. Mu diba adi kulumbulula kuakane nekushikame mu tshihela, buakane nebushale mu budimi budi bulua ne bia kudia bia bungi. Dimuma didi buakane bukuama nedikale ditalala, malu adi alonda buakane neikale ditalala ne ditekemena tshiendelele. Bantu banyi nebashikame mu miaba ya ditalala, ne mu nsubu idi kayiyi ne njiu hehi, ne mu bikishilu bia ditalala. Kadi mabue a nvula neamate mu kubutuka kua ditu; nebashimbule musoko mene. Badi bamiamina maminu ku mielelu ya mai onso, ne badi basulula mikono ya ngombe ne ya mpunda bua kuendakanayi nebikale ne disanka. Mulau wikale kûdi, wewe udi ubutula, ne kabakubutula; udi mutungidianganyi wa tshitungu kadi kabena banze kukutungila wewe tshitungu. Hawamana kulekela kubutula bakuabo, nebakubutule wewe; hawamana kutungila bantu bakuabo tshitungu, nebakutungile wewe tshitungu. Yehowa, utuleshe dinanga diebe; tuakukuindila; wikale diboko dietu dia bukole ku dinda ne ku dinda, ne luhandu luetu mu tshikondo tshia dikenga. Hunvuabo tshibingu, bantu badi banyema; hawadibandisha mulu, bisamba bia bantu bidi bitangadike. Nebasangishe bintu biwakunyenga mu nvita bu mudi meshi a mbudibudi adia bintu; bu mudi mikumbi yikila ha bintu, bantu nebadiele hamʼbidi habi. Yehowa udi mutumbishibue, bualu bua udi mushikame mu diulu; wakûsha Siona tente ne kulumbulula kuakane ne buakane. Luhandu lukumbane, meji ne lungenyi nebikale bukole bua tshikondo tshiebe; ditshina dia Yehowa didi biuma bia mu tshibutshilu tshia Siona. Monai, bena bukitu babo badi badila ha bule; miloho yabo ya ditalala idi idila bikole. Nshila yabo minene yakushala tshianana, muena luendu kena wendelamu kabidi; muena lukuna wakushiha tshihungidi, wakuhetula misoko, kena unemeka muntu. Buloba budi ne muadi, budi buteketa; Lebanona udi ubuandakana, udi ufubidila; Shalona udi bu tshihela tshia tshianana; Bashana ne Kâmele bidi bilakata mabeshi. Yehowa udi Wamba ne, Nenjuke mpindiu, nendibishe mpindiu, nentumbishibue mpindiu. Wakuimita difu didi ne bisote, neulele misekeleke; muhuya webe udi bu kahia kadi kakushidisha. Ne bantu nebikale bu mabue adibo bosha alua luhemba, bu mionshi ya meba yakatahabo, idibo bosha mu kahia. Unvuai bu munakuenza, nuenu badi kule; nuenu badi ha buihi, nuitabushe ne, Yeye udi ne bukole. Bantu babi ba mu Siona badi batshina; lukanku luakukuata badi kabayi bitabusha Nzambi. Muntu kai wa munkatshi muetu udi mua kushikama hehi ne kadilu kadi kashidisha? Muntu kai udi mua kushikama hehi ne kahia kadi kosha tshiendelele? Nyeye udi wenda mu buakane, udi wakula mei makane; udi uhetula luhetu ludi bantu baheta ku mashimi, udi utu tula bianza biandi bua kumushahu kulenga kua mbueshilu, udi ujibika matshu andi bua kaunvu lumu lua kumatshisha kua mashi, udi ubuikila mesu andi bua kâmonyi malu mabi, Yeye mene neashikame mu miaba idi kulu; tshinyemenu tshiandi netshikale muaha mukoleshibue ne mabue; nebamuhe bia kudia biandi, mai adiye unua kaena ahanga tshiendelele. Mesu ebe neamone Mukelenge mu bulengele buandi, neamone buloba budi bulunguluka tô ne kule. Mutshima webe newelangane meji a buowa buakumana kushika ne, Muntu wakadi ubala ne wakadi widikisha bujitu bua mulambu udi kudi kunyi! Wakadi ubala bungi bua bibumba bietu udi kudi kunyi? Kuena utangila bantu badi ne luonji, bantu aba badi bakula muaku mukole ûdi kuyi mumanye mua kujingulula, badi ne ludimi lua tshikukumina lûdi kuyi mumanye mua kunvua. Tangila biebe Siona, musoko utudi tutekaku bikondo bijalame bia bidia bia disanka! Mesu ebe neamone Yelushalema, tshishikaminu tshidi ne ditalala, nsubu wa ntenta udibo kabayi bavunga kabidi, udibo kabayi batula mitondo yandi kabidi, ne kakuena umue wa ku mionshi yandi wakoseka. Kadi mu muaba wawa Yehowa neikale nʼetu mu butumbi, neikale nʼetu mu muaba wa misulu minene ne misulu mikese, kudi buatu buitshibue ne nkaya kabuyi buendahu, ne buatu bunene bulengele kabuena buhitaku. Bualu bua Yehowa udi mulumbuluishi wetu, Yehowa udi mutueledi wa mikenji, Yehowa udi Mukelenge wetu; yeye neatusungile. Mionshi ya buatu buebe yakusululuka; kayakamanya mua kujadika tshitaku tshia mutshi mu dihoka diau kudi kusuikaku tshilulu tshia kuendesha nʼatshi buatu, kayakamanya mua kutshibalulusha. Hashishe, bakuabanyangana bintu bia bungi biakunyengabo mu nvita; bantu balema bakuangata bintu biakanyengabo. Muena musoko kena wamba ne, Ndi ne disama, bantu badi bashikamemu nebikale ne mihi yabo mijimishibue. Nuenu ba mu bisamba bia bantu, luai bienu ha buihi bua kunvua; nungunvuile, nuenu bantu bonso! Buloba bunvue, ne tshiuwidi tshiabu tshionso; buloba buine ne bintu bionso bidi bifuma kudibu. Bualu bua Yehowa udi ne bisamba bionso bia bantu tshiji, udi ne misumba yabo yonso tshiji tshikole; wakumana kubahisha bua kufuabo, wakubafila ku kubutuka. Bashihibue babo nebimashibue, muhuya mubi wa bitalu biabo neubande mulu, mikuna neyivingutuke ne mashi abo. Bintu bionso bia mu diulu nebivingutuke kabidi; nebavunge bia mu diulu hohamue bu mukanda muvunga. Misumba yabi yonso neyijimine bu mudi dibeshi difubidila dihohoka ku muonshi, ne dibeshi difubidila dihohoka ku mutshi wa nfigi. Bua muele wanyi wa nvita wakunua mashi makumbane mu diulu. Monai, neuhueke hanshi hamʼbidi ha Edome, ne hamʼbidi ha bantu banakuteka muinshi mua mulau bua kubalesha. Muele wa Yehowa wakula tente ne mashi, wakûla tente ne mafuta, ne mashi a bana ba mikoko ne a mpumbu ya mbushi, ne mafuta adi alamata kudi tuonyi tua bimpanga; bualu bua Yehowa udi ne mulambu wa kuosha mu Bosela, udi ne nyama ya bungi ya kushiheye mu buloba bua Edome. Ngombe ya mu mpata neyihueke nʼai ku tshishihelu, ngombe idi mihakula ne balume ba ngombe hohamue. Buloba buabo nebukuatshike mashi, dinfuenkenya diabo nedivuishibue diule tente ne mafuta. Bualu bua Yehowa udi ne dituku dia kusombuela ne tshidimu tshia kubafutshisha ditutu bua malu mabi akenzelabo ba mu Siona. Misulu ya Bena Edome neyandamuke kamonyi, dinfuenkenya diabo nediandamuke soufre, buloba buabo nebuikale bu kamonyi kudi kahia. Kabena babujima butuku anyi munya; muishi wabu neubande mulu tshiendelele. Nebulale bubutuke ku tshikondo ne ku tshikondo; kakuena muntu wahitshilamu tô ne tshiendelele. Kadi mpunga tshikola ne nkese nebidiangatshilebu bu miaba yabi; tshihungulu ne tshikololo nebishikamemu. Yehowa neolole nshinga wa dibondakana ne tshiamu tshia tshidikishilu tshia dibutuka ha mutu habu. Nebabikile bantu babo banene bua kubuelabo mu bunfumu, kadi kakuena bunfumu bua bobo babuelemu; ne bakokeshi babu bonso nebikale bantu ba hatuhu. Meba neatoloke mu mbalasa yabo ya bunfumu, mpesa ne mingonge nebitoloke munda mua ngumbu yabo ya nvita; nebuikale muaba wa mibuabua kuendakanayimu, tshiendelu tshia nyunyu ya nfiondo. Nyama ya mu tshihela neyisangakaneku ne nyama mikuabo idi idila, mbushi wa mu tshisuku nêle muanʼabo dî; nyama munene mukashi udi wendakana butuku neashikameku, neahete tshikishilu tshiandi mu muaba au. Tshihungulu netshienze disua diatshi, netshiele mayi, netshiatoye, netshisangishe bana bandi muinshi mua dileshi diatshi. Nyunyu itu yadia nyama mibole neyidisangisheku, nyunyu yonso ne muanʼabo. Nukebe dî edi mu mukanda wa Yehowa, nudibale; kakuena umue munkatshi mua nyama ne nyunyu yaya udi uhanga kuikalaku, kakuena umue wai udi uhanga kuikala ne muanʼabo mu muaba wawa; bualu bua mukana mua Yehowa mudi muele mukenji, ne Nyuma wandi wakuyisangishaku. Yeye wakuyelela nshobo, tshianza tshiandi tshiakuyabanyina buloba ne luidi; neyibuangate tshiendelele; ku tshikondo tô ne ku tshikondo neashikamemu. Tshihela ne buloba bûme nebikale ne disanka; tshihela tshia lusenga netshisanke; netshimeneshe bintu bu mudi tshilongo tshia nsungubidi tshienza, netshimeneshe bilongo bia bungi, netshisanke ne disanka ne misambu mene. Nebatshiheshe butumbi bua Lebanona, bulengele bua Kâmele ne Shalona; nebatangile butumbi bua Yehowa ne bulengele bua Nzambi wetu. Nukoleshe bianza bidi bitekete, ne nukankamike binu bidi bitenkakana. Nuambile badi ne mitshima ikuma lubilu lubilu ne, Nuikale bakole, kautshinyi! Monai, Nzambi wenu udiku! Nealue ne disombuela, nealue ne ditutu dia Nzambi dia kunufuteye; nealue bua kunusungila. Mu dituku adi mesu a mufofo matabale, matshu a badi ne mahaha neajikuke. Mu diba adi muntu mulema neatuhike bu ngulungu, ludimi lua kamama neluimbe misambu; bualu bua mishimi ya mai neyihatuke mu buloba bua hatuhu, misulu neyihueke mu tshihela tshia lusenga. Lusenga ludi lubalakana neluandamuke dishiha dia mai, ne buloba budi kabuyi ne mai nebuikale ne mishimi ya mai; mu miaba yakalala mibuabua nemuikale muaba wa masele ne malenge. Tshibebe tshikaleku, ne nshila, nebamubikile ne, Nshila wa Tshijila; badi kabayi balengeshibue ku bubi buabo kabena bamanye mua kuhitshilaku, kadi neikaleku bua bantu bandi; bena luendu, nansha bahote mene, kabena bendelamu. Kakuena kuikalamu nyama wa ntambue, nyama mukuabo udi utuasangana kena ubandamu; kabena bayisanganamu; kadi bakuhikudibua ku buhi nebendelemu. Bantu badi Yehowa muhikule nebahingane, nebalue ku Siona bimba misambu; disanka dia tshiendelele nedikale ha mitu habo; nebahete disanka ne diakalengele; kanyinganyinga ne kuhumuna nebinyeme kule. Mu tshidimu tshia dikumi ne tshinai tshia bukokeshi bua mukelenge Hezikiya, Saneheliba, mukelenge wa Ashû, wakalua, wakaluangana ne bena misoko yonso ya ngumbu ya mu Yuda, wakayinyenga. Mukelenge wa Ashû wakatuma Labashake ne masalayi a bungi bua kubika ku Lakisha ne kuya ku Yelushalema kudi Hezikiya. Yeye wakimana ha buihi ne mutubu wa mai udi uyila ku kashiba ka mai kadi ku mutu kua mukuna mu nshila wa budimi bua muvuwi wa bilulu. Hashishe Eleyakima, muana wa Hilekiya, wakadi ha mutu ha bena mudimu ba mu nsubu wa mukelenge, Shebena wakadi secrétaire, ne Yoa, muana wa Asafa, wakadi mufundi, bakaluhuka mu nsubu bua kuya kudiye. Labashake wakabambila ne, Nuambile Hezikiya ne, Mukelenge munene, mukelenge wa Ashû mene, udi ukuebesha ne, Etshi ntshieyemenu kai tshiudi weyemena? Ndi ngamba ne, Lungenyi ludibo bakulesha ne bukole buebe bua kuluangana nʼabu nvita bidi anu mei a hatuhu. Udi weyemena nganyi mpindiu hawakuntombokela? Mona, wewe udi weyemena disele ditshibuke, Ejipitu mene; biadieyemena muntu, netubuele mu tshianza tshiandi, neditshisompoke. Palô, mukelenge wa Ejipitu, udi nunku kudi bonso badi bamueyemena. Kadi biwangambila ne, Tudi tueyemena Yehowa Nzambi wetu, eu kanyeye mene udi Hezikiya mumushile bitendelelu biandi ku mikuna ne bioshelu biandi, muambile ba mu Yuda ne ba mu Yelushalema ne, Bunudi nʼabu mbua kutendelela ku mpala kua tshioshelu etshi, anyi? Nunku ndi nkusengelela ne, Udie luhiku ne mukelenge wanyi, mukelenge wa Ashû: nenkuhe tubalu binunu bibidi, biwamanya biebe mua kushikika bahandi ha nyima hatu. Munyi mudi mumanye mua kusesuishe kapitene kamue ka munkatshi mua bantu ba mukelenge wanyi batambe kuhuekela, haweyemena Bena Ejipitu bua kuheta makalu a nvita ne bena tubalu? Nakudiluila mpindiu bua kubutula muaba eu Yehowa kayi nʼanyi, anyi? Yehowa mene wakungambila ne, Ya uluishe bena buloba ebu, ubabutule. Hashishe Eleyakima ne Shebena ne Yoa bakambila Labashake ne, Tudi tukusengelela ne, Wakule ne bantu bebe mu muaku wa Bena Sulia, bualu bua tuetu tudi tûjingulula; kuakudi nʼetu mu muaku wa Bena Yuda mu matshu a bantu badi ha mutu ha lumbu. Kadi Labashake wakabambila ne, Mukelenge wanyi wakuntuma kudi mukelenge webe ne kunudi kabidi bua kuamba mei â, anyi? Yeye kakuntuma kudi bantu badi bashikama ha mutu ha lumbu, bua bobo badie tunvi tuabo, banue menyi abo diatshimue nʼenu, anyi? Hashishe Labashake wakimana, wakela dî dikole mu muaku wa Bena Yuda, wakamba ne, Unvuai dî dia mukelenge munene, mukelenge wa Bena Ashû mene. Mukelenge udi wamba ne, Hezikiya kanudingi, bualu bua yeye kena mumanye mua kunusungila mu tshianza tshiandi. Kanuitabushi bua Hezikiya abueshe ditekemena dia Yehowa mu mitshima yenu hambeye ne, Yehowa neatusungile bulelela; kabena bafila musoko eu mu bianza bia mukelenge wa Ashû. Kanunvu dî dia Hezikiya nansha; bualu bua mukelenge wa Ashû udi wamba ne, Nudilengeshe nʼanyi, nuluhuke kundi; nunku muntu yonso adie tumuma tua ku muonshi wandi wa nvinyo ne mamuma a ku mutshi wandi wa nfigi, ne muntu yonso anue biandi mai a ku dina diandi dia mai; tô ne hanalua bua kuya nʼenu ku buloha budi bufuana buloba buenu, buloba bua maminu ne bua nvinyo muhia-muhia, buloba bua bia kudia ne bua mionshi ya tumuma tua nvinyo. Nudimuke bua Hezikiya kanuitabushishi dî diandi hambeye ne, Yehowa neatusungile. Munga nzambi wa mu bisamba bia bantu wakusungila buloba buandi mu bianza bia mukelenge wa Ashû, anyi? Nzambi ya Hamata ne ya Âpada, idi kudi kunyi? Nzambi ya mu Sefawayima idi kudi kunyi? Yakasungila musoko wa Samalea mu tshianza tshianyi, anyi? Yakadi binganyi munkatshi mua nzambi yonso ya bisamba ebi yakasungila buloba buai mu tshianza tshianyi, bua Yehowa asungile Yelushalema mu tshianza tshianyi? Kadi bantu bakahuwa talalâ, kabakamukudimuna dî; bualu hua mukelenge wakadi wela mukenji ne, Kanumukudimunyi dî. Hashishe Eleyakima, muana wa Hilekiya, wakadi ha mutu ha bena mudimu ba mu nsubu wa mukelenge, ne Shebena secrétaire, ne Yoa, muana wa Asafa, mufundi wa malu a bukelenge, bakalua kudi Hezikiya ne bilulu biabo bihanda, bakamuambila mei a Labashake. Hakunvua mukelenge Hezikiya mei â, wakahanda bilulu biandi, wakadiluatshisha bilulu bikayabala, wakabuela mu nsubu wa Yehowa. Wakatuma Eleyakima, wakadi ha mutu ha bena mudimu ba mu nsubu wa mukelenge, ne Shebena secrétaire, ne bakulu ba munkatshi mua bakuidi, baluate bilulu bikayabala, kudi muprofete Yeshaya, muana wa Amoza. Bakamuambila ne, Hezikiya udi wamba ne, Edi ndituku dia makenga ne dia kutubela ne dia kutufuisha bundu; bualu bua diba dia kulela bana diakufika, ne kakuenaku hukole bua kubalela. Bumue Yehowa Nzambi webe neunvue mei a Labashake, udi mukelenge wa Ashû, mukelenge wandi, mutume bua kufunyineye Nzambi udi ne muoyo bulobo, ne neasamine mei adi Yehowa Nzambi webe munvue; nunku ubishe mei ebe bua kulombela bantu badi bashala Nzambi. Nunku bantu ba mukelenge Hezikiya bakafika kudi Yeshaya. Yeshaya wakabambila ne, Nuambile mukelenge wenu ne, Yehowa udi wamba ne, Kutshinyi mei awakunvua, adi bantu ba mukelenge wa Ashû bampende nʼau. Tangila, nenteke nyuma munda muandi, ne yeye neunvue lumu, neahingane ku buloba buandi; meme nemmushiheshe ku muele wa nvita mu buloba buandi. Labashake wakahingana, wakasangana mukelenge wa Ashû uluangana ne Bena Libena; bualu bua wakamana kunvua ne, Yeye wakumuka ku Lakisha. Hakunvueye lumu ne, Tihaka, nfumu wa Atiopa, ulualua bua kuluangana nʼebe, wakatuma ba-messager kudi Hezikiya kabidi ne, Nuambile Hezikiya, mukelenge wa Yuda, ne, Nzambi webe ûdi weyemena kakudingi nansha, hambeye ne, Kabena bafila Yelushalema mu bianza bia mukelenge wa Ashû. Tangila, wewe wakumana kunvua bu muakenzela bakelenge ba Ashû ba mu bisamba bionso hakababutulabo kashidi; wewe neuhanduke, anyi? Nzambi ya bisamba bia bantu biakubutula batatu banyi, Bena Gozana ne Bena Halana ne Bena Lesefe ne Bena Edene bakadi mu Telasâ, yakabasungila, anyi? Mukelenge wa Hamata ne mukelenge wa Âpada, ne mukelenge wa musoko wa Sefâwayima, ne mukelenge wa Hena, ne mukelenge wa Iwa badi kudi kunyi? Hezikiya wakangata mukanda mu bianza bia ba-messager, wakaubala. Hashishe, Hezikiya wakabuela mu nsubu wa Yehowa, wakauvungulula ku mpala kua Yehowa. Hezikiya wakatendelela Yehowa, wamba ne, Yehowa, Nzambi wa Isalele, udi mushikame mu nkuasa wa butumbi udi ha mutu ha bakeluba, wewe udi Nzambi, anu wewe nkayebe, wa makelenge onso a ha buloba; wewe wakufuka diulu ne buloba. Yehowa, teleja matshu ebe, unvue biebe; Yehowa, ubulule mesu ebe, utangile; unvue mei onso a Saneheliba, akatumeye bua kufunyineye Nzambi udi ne muoyo bulobo. Bulelela, Yehowa, bakelenge ba Ashû bakabutula ba mu bisamba bionso bia bantu ne maloba abo; bakela nzambi yabo mu kahia, bualu bua kayakadi nzambi mene, kadi yakadi bintu bienza ku bianza bia bantu mene, bia mitshi ne bia mabue; nunku bakayibutula. Nunku, ndi nkusengelela, Yehowa Nzambi wetu, utusungile mu tshianza tshiandi, bua ba mu makelenge onso a ha buloba bamanye ne wewe Yehowa udi Nzambi nkayebe. Hashishe Yeshaya, muana wa Amoza, wakatumina Hezikiya dî ne, Yehowa, Nzambi wa Isalele, udi wamba ne, Bualu bua wewe wakundombela bua Saneheliba, mukelenge wa Ashû, edi ndi didi Yehowa muambe bua bualu buandi ne, Muana mukashi wa Siona utshidi kamama udi kulengulula, udi ukubuidia; muana mukashi wa Yelushalema udi ukuha mutu wandi ku nyima kuebe. Wewe wakufunyina nganyi bulobo, wakuhenda nganyi? Wakubishila nganyi dî diebe? Wakubandishila nganyi mesu ebe ne diambu? Wakuenzela Wa Tshijila wa Isalele nunku! Wewe wakufunyina Mukelenge bulobo mukana mua bahika bebe, wakuamba ne, Meme nakubanda tô ne ku mutu kua mikuna ne tshisumbu tshinene tshia makalu anyi a mitu, tô ne ku nseke ya mu Lebanona idi misokome ku mesu; nenshimbule mitshi mile ya cèdre idimu, ne mitshi ya cyprès ya mushinga mukole idimu; nembuele tô ne mu nsubu wandi udi muhite kuikala mulu, mu ditu dia mamuma andi. Meme nakumbula mena, nakunua mai au, nenkumishe misulu yonso ya mu Ejipitu ne kudiata kua makasa anyi. Kuena muanze kunvua bu munakenza bualu ebu kale, ne bu m unaka dia njila kudihangidishilabu mu matuku a kale, anyi? Mpindiu nakuvuisha muanda eu, bua wewe Umanye mua kubutula misoko ya ngumbu bua kuluayi mishiki ya bintu bia tshianana. Nunku bena misoko ei bakadi ne bukole bukese, bakatshina, bakabondakana; bakadi bu mashinde a mu budimi, bu mashinde a lutende, bu masele mabishi adi amena ha misaka ya nsubu, ne bu budimi bua maminu adi anyanguka kâyi manji kumena bimpe. Ndi mumanye kûdi mushikame, kûdi uluhuka ne kûdi ubuela, ne bu mûdi unfunyina bulobo. Bualu bua wakanfunyina bulobo ne bua diambu diebe diakufika ku matshu anyi, nunku nenteke ndobo wanyi ku diulu diebe, ne lukanu luanyi mukana muebe bua kukuendesha nʼalu, nenkutshingulule bua kukuhingashasha mu nshila kuwakufuma. Etshi netshikale tshimanyinu kûdi: tshidimu etshi nenudie bia kudia bidi bidimenena, ne mu tshidimu tshibidi nenudie bintu bidi bidimenena ku bintu abi; mu tshidimu tshisatu nukune bintu, nubihuole; nutentule mitshi ya tumuma tukese mu madimi, nudie tumuma tuai. Bantu ba mu tshiota tshia Bena Yuda batshidi bashala ne muoyo nebele miji muinshi, nebakuame mamuma kulu. Bualu bua difuka dia bantu nediluhuke mu Yelushalema, ne ba mu mukuna wa Siona badi bahanduka nebaluhukemu. Lukunukunu lua Yehowa wa misumba neluenze muanda eu. Nunku Yehowa udi wamba bualu bua mukelenge wa Ashû ne, Kena ufika ha buihi ne musoko eu, kena welaku mukete, kena ulua ku mpala kuau ne ngabu, kena unguishaku mushiki wa buloba ku musoko eu. Yehowa udi wamba ne, Yeye neahingane mu nshila muakafumeye; yeye kena ufika ha buihi ne musoko eu. Bualu bua nenduile bena musoko eu nvita bua kubasungila, bua bualu buanyi ne bua bualu bua muntu wanyi Davidi. Muanjelo wa Yehowa wakaluhuka, wakashiha ba mu tshitudilu tshia Bena Ashû binunu lukama ne makumi muanda mukulu ne bitanu. Hakabika bantu ne dinda dionso, monai, bakasangana bantu aba bonso anu bitalu. Nunku Saneheliba, mukelenge wa Ashû, wakumukaku, wakaya kuabo, wakashikama mu Ninewe. Hakadiye utendelela mu nsubu wa Niseloka, nzambi wandi, Adalameleke ne Shalese, bana bandi balume, bakamushiha ne muele wa nvita, bakanyema mu buloba bua Alalata. Esâ-hadona muanʼandi wakakokesha mu muaba wandi. Mu matuku au Hezikiya wakadi ne disama dia lufu. Yeshaya muprofete, muana wa Amoza, wakalua kudiye, wakamuambila ne, Yehowa udi wamba ne, Ulongolole malu a mu nsubu muebe; bualu bua neufue, kuena wikala ne muoyo. Diba adi Hezikiya wakatangisha mpala wandi ku tshimanu tshia nsubu, wakalomba Yehowa. Wakamba ne, Yehowa, ndi nkusengelela ne, Uvuluke munakuenda ku mpala kuebe mu bushuwa ne mu buakane bua mutshima, ne munakuenza malu akadi mimpe ku mesu kuebe. Hezikiya wakadila bikole. Hashishe, dî dia Yehowa diakalua kudi Yeshaya ne, Ya wambile Hezikiya ne, Yehowa Nzambi wa tatu webe Davidi udi wamba ne, Nakunvua kulomba kuebe, nakutangila binsonshi biebe; tangila, nententekashe bidimu dikumi ne bitanu ha mutu ha matuku a muoyo webe. Nenkusungile wewe ne musoko eu mu bianza bia mukelenge wa Ashû; nenduile bena musoko eu nvita. Etshi netshikale tshimanyinu kûdi tshifume kudi Yehowa bua kukulesha ne, Yehowa nênze bualu ebu buakuambeye: Tangila, nempingashe mundidimbi wa diba wa ha tshibandilu, wakuhueka ha tshidikishilu tshia mpolo ya diba tshia Ahaza hakuhueka diba, bua kuhinganau bidiatshilu dikumi bia tshibandilu. Nunku mundidimbi wa diba wakahingana bidiatshilu dikumi ha tshidikishilu tshia diba ku tshidiatshilu kuakabangau kuhueka diambedi. Au mmei akafunda Hezikiya, mukelenge wa Yuda, hakasameye ne hakasangaleye ku disama diandi: Nakuamba ne, Nembuele mu bibuelelu bia ku Muaba wa Bafue mu matuku a munda munya a bidimu bianyi; bakunyenga tshituha tshia bidimu bia muoyo wanyi tshiakadi tshishala. Nakuamba ne, Tshiena ntangila Yehowa, tshiena ntangila Yehowa mu buloba bua badi ne muoyo; tshiena ntangila bantu kabidi munkatshi mua ba ha buloba. Bakûmusha nsubu wanyi, bakuntudileye bu mudibo batula nsubu wa ntenta wa mulami wa mikoko bua kuya nʼandi; nakuvunga muoyo wanyi bu mudi mukumi wa bilulu uvunga tshilamba tshiakukumeye; yeye neankose bua kungumusha mu mbungu; ku munya tô ne ku butuku wewe udi unfikisha ku ndekelu wa muoyo wanyi. Nakadila tô ne ku dinda. Yeye udi utshibula mifuba yanyi yonso, bu mudi nyama wa ntambue wenza; ku munya tô ne ku butuku wewe udi unfikisha ku ndekelu wa muoyo wanyi. Nakadila bu mudi nyunyu wa kandindi anyi nyunyu wa mudinga udila, nakadila bu nyunyu wa nkutshi. Mesu anyi adi ahanga ne kutangila kuau mulu; Mukelenge, badi bankengesha; wikale tshieya tshianyi! Nengambe tshinyi? Yeye wakungambila dî, ne yeye muine wakuenza muanda eu; nengende bitulu bitulu bidimu bianyi bionso bualu bua kanyinganyinga kakole ka mu mutshima wanyi. Mukelenge, bantu batu bikala ne muoyo bua malu â; ne bua malu â onso nyuma wanyi udi ne muoyo; nunku unsangashe ne umpingashile muoyo kabidi. Mona, bua meme kuheta ditalala ku nyima nakadi ne kanyinganyinga kakole diambedi; kadi dinanga diebe dia muoyo wanyi diakûmusha mu dijimba dia kabutu; bualu bua wewe wakuela mibi yanyi yonso ku nyima kuebe. Bualu bua Muaba wa Bafue kawena mua kukutumbisha, lufu kaluena lumanye mua kukunemeka; badi bahueka mu Dijimba dia Lufu kabena bamanye mua kutekemena kuheta lulamatu luebe lua bushuwa. Udi ne muoyo, muntu udi ne muoyo, neakutumbishe, bu mundi ngenza dituku edi; tatu neamanyishe bana bandi lulamatu luebe lua bushuwa. Yehowa udi musue kunsungila; nunku netuimbe misambu yanyi ne bisanji bidi ne masela matuku onso a muoyo wetu mu nsubu wa Yehowa. Yeshaya wakamana kuamba ne, Bangate ditahi dia nfigi, baditeke ha tshiuja tshiandi, bua yeye asangale. Hezikiya wakakonka kabidi ne, Tshimanyinu kai tshidi tshindesha ne nembande ku nsubu wa Yehowa? Mu tshikondo atshi Melodaka-baladana, muana wa Baladana, mukelenge wa Babulona, wakatumina Hezikiya mikanda ne kuha; bualu bua wakunvua muakadiye ne disama ne muakasangaleye. Hezikiya kabidi wakasanka bualu buabo, wakabalesha nsubu yakadi ne bintu biandi bia mushinga mukole, argent, or, bintu bia muhuya muimpe, manyi matambe buimpe, nsubu ya bielelu biandi bia nvita bionso, ne bintu bionso biakadi mu nsubu ya bibutshilu biandi. Kakuakadi tshintu mu nsubu muandi, anyi mu bukelenge buandi buonso, tshiakadi Hezikiya kayi ubalesha. Yeshaya muprofete wakalua kudi mukelenge Hezikiya, wakamuebesha ne, Bantu aba bakuamba tshinyi? Bakafuma kudi kunyi hakuluabo kudi? Hezikiya wakamba ne, Badi balue kundi bafume ku buloba bua kule, ku Babulona mene. Yeye wakamukonka ne, Bakutangila tshinyi mu nsubu muebe? Hezikiya wakamba ne, Bionso bia mu nsubu muanyi dî bi a kumona ba; kakuena tshintu tshia munkatshi mua bia mu bibutshilu bianyi tshindi tshiyi mubaleshe. Nunku Yeshaya wakambila Hezikiya ne, Unvua dî dia Yehowa wa misumba: Yehowa udi wamba ne, Wamanya biebe, matuku adi alua hayabo ku Babulona ne bionso bidi mu nsubu muebe, ne bionso biakabutshila batatu bebe tô ne ku dituku edi; kabena bashiya tshintu. Nebaye ne bamue ba bana bebe ba balume badi bafuma kûdi, ne baudi ulela mene; nebikale batungula mu mbalasa wa mukelenge wa Babulona. Hashishe Hezikiya wakambila Yeshaya ne, Dî edi dia Yehowa diwakungambila didi dimpe. Yeye wakamba kabidi ne. Nunku ditalala ne malu a bushuwa nebikaleku mu matuku anyi. Sambai bienu, sambai bienu bantu banyi, Nzambi webe udi wamba nunku. Nuambile mutshima wa Yelushalema mei makane; numuele dî ne, Tshikondo tshiebe tshia mudimu mukole tshiakushika, bakukubuikidila bubi buebe. Wakuheta makenga ku tshianza tshia Yehowa akuvudisheye misangu ibidi bua malu mabi ebe. Dî dia muntu udi wela lubila ne, Longolola! nshila wa Yehowa mu tshihela; nululamishile Nzambi wetu nshila munene mu tshihela tshia hatuhu. Tshibanda tshionso netshibandishibue, mukuna mule wonso ne mukuna muihi wonso neyihikidishibue; miaha idi mibuiyika neyilulame bu mpata, ne miaba idi bizakalabizakala neyikale milandakane. Hashishe butumbi bua Yehowa nebubuluibue, ne bantu bonso nebabutangile diatshimue; bualu bua mukana mua Yehowa muakuamba nunku. Dî dia muntu udi wamba ne, Ela dî! Meme nakamba ne, Nengele dî kai? Bantu bonso badi bu mashinde, bulengele buabo buonso budi bu tshilongo tshia mu budimi. Mashinde adi afubidila, tshilongo tshidi tshitutuka, bualu bua Yehowa udi wela muhuya wandi hamʼbidi habi; bulelela, bantu badi bu mashinde. Mashinde adi afubidila, tshilongo tshidi tshiumuka; kadi dî dia Nzambi wetu nedijalame tshiendelele. Wewe udi wambila ba mu Siona lumu luimpe, banda ha mutu ha mukuna mule; wewe udi wambila ba mu Yelushalema lumu luimpe, bandisha dî diebe bikole, udikoleshe, kutshinyi; Wambile ba mu misoko ya mu Yuda ne, Tangilai Nzambi wenu! Monai! Mukelenge Yehowa nealue bu muena bukole, ne diboko diandi nedimukokeshile bantu. Monai! Bukenji buandi budi nʼandi, ne ditutu diandi didi ku mpala kuandi. Neadishe tshisumbu tshiandi tshia mikoko bu mudi mulami wa mikoko uyidisha, neambule bana ba mikoko mu maboko andi, neabatuale mu tshiadi tshiandi, ne nealom,bole mikoko idi imuamushila bana bitulu bitulu. Eu nganyi wakidikisha mai onso munda mua tshianza tshiandi, wakuelekesha diulu ne ntanta wa tshianza tshiandi, wakusangisha dinfuenkenya dia buloba mu tshihiminu bua kulubala, wakuidikisha bujitu bua mikuna mile mu tshidikishilu, ne bujitu bua mikuna mihi mu tshiamu tshia kuidikisha nʼatshi bujitu? Wakulombola Nyuma wa Yehowa nganyi? Anyi wakumuyisha meji bualu bua udi mufidi wandi wa meji nganyi? Yeye wakusangisha dî ne nganyi bua kuheteye meji? Wakumuyisha bua yeye amanye nshila wa kulumbulula kuakane nganyi? Wakumuyisha lungenyi, wakumulesha nshila wa kujingulula kua malu nganyi? Monai, bisamba bia bantu bidi bu dimata dia mai didi ditanduka ku luesu, yeye udi ubibala bu luhuishi lukese lua ha tshiamu tshia kuidikisha nʼatshi bujitu; monai, yeye udi wambula bisanga bia mu mai manene bu tshintu tshitamba bukese. Mitshi ya mu Lebanona kayena ikumbana bu nkunyi ya kuosha, ne nyama idimu kayena ikumbana bu mulambu wa kumuoshila. Bisamba bionso bidi hatuhu ku mesu kuandi; yeye udi ubibala bu bintu bia hatuhu, bu bintu bidi bibuelakana. Nenuelekeshe Nzambi ne nganyi? Nenumufuanyikishe kudi tshifuanyikishi kai? Muena mudimu wakusonga luhingu, mutudi wa tshiamu tshia or udi ulamika or hamʼbidi halu, udi ulutudila nkanu ya argent. Udi mutambe buhele bua kufila mulambu ndi usungula mutshi udi kauyi ubola; udi udikebela muena mudimu udi ne lungenyi bua kumulongoluela luhingu ludi kaluyi lutenkakana. Kanuakumanya? Kanuakunvua? Kabakunuambila ku tshibangidilu? Kanuakujingulula katshia bajadika bishimikidi bia buloba, anyi? Nyeye udi mushikame ha mutu ha mukalu udi utuangasha buloba ne diulu ne ba ha buloba badi bu mpasu; udi uvungulula bia mu diulu bu tshilulu tshikudika, udi ubibalulula bu ntenta wa kushikamamu. Nyeye udi uvuisha bakokeshi bu bantu ba hatuhu, udi uvuisha balumbuluishi ba ha buloba bu babuelakanyi. Kabena banze kukunyibua musangu mule, kabena banze kumiaminyibua, kabena banze kuela miji yabo bikole mu buloba, heleye muhuya wandi hamʼbidi habo, ne badi bafubidila, ne nvunde udi ubumusha bu bisote. Wa Tshijila udi ukonka ne, Nenunfuanyikishe kudi nganyi, bua meme ngikale nʼandi muomumue? Bandishai mesu enu kulu, numone bienu! Wakafuka bintu ebi nganyi? Nyeye udi uhatula misumba yabi, ubala bungi buabi, ne udi ubuikila buonso buabi mena abi; ne bualu bua bunene bua bukole buandi, ne bualu bua bukole bua bukokeshi buandi, kakuena umue wabi udi uhanga kumueneka. Bualu kai, wewe Yakoba, udi wamba, ne wewe Isalele udi wamba muomumue ne, Nshila wanyi udi musokoka ku mesu kua Yehowa, Nzambi wanyi wakuhua muoyo bua kulumbulula kuakane kudiye ne bualu bua kundesha? Kuakumanya, anyi? Kuakunvua, anyi? Yehowa udi Nzambi wa tshiendelele, Mufuki wa nseke yonso ya ha buloba tô ne kunfudilu kuabu. Yeye kena uteketa nansha, kena uhungila nansha; kakuena muntu udi mua kumanya kujingulula kuandi kua malu biakebeye kukumanya. Yeye udi ukolesha badi bahanga, udi ukumbasha bukole bua muntu udi kayi ne ngulu. Nansha tuahanga bitende ne biahungilabo, nansha bikala bansongalume bimpe badishinde hanshi mene, badi bindila Yehowa nebasangashe bukole buabo; nebabande mulu ne mahuahua bu nyunyu ya mukanku, nebanyeme lubilu ne kabena babungila, nebende ne kabena bateketa. Nuenu, maloba a ku muelelu wa mai manene, huwai bua kuteleja; bantu badimu basangashe bukole buabo; balue ha buihi nʼanyi, hashishe bambe dî diabo; tulue bietu hohamue bua kulumbuluishangana. Wakubisha muntu ku luseke lua esete, udi buakane buakidila mu muaba wonso uyayeye nganyi? Yeye udi umuhesha bisamba bia bantu bidi ku mpala kuandi; udi umuhesha bukokeshi bua kukokesha nʼabu bakelenge; muele wandi wa nvita udi ubavuisha bu dinfuenkenya, buta buandi budi bubavuisha bu bisote bihehuka kudi luhehele. Udi ubihata, udi uhita ku mpala kuabo kayi ne bualu bumukuata, wenda mu nshila mene wakadiye kayi muanze kutekamu makasa andi diambedi. Wakuenza bualu ebu wakubushikisha udi ubikila milongo ya bantu ku tshibangidilu nganyi? Meme Yehowa, ndi wa kumudilu, ndi kabidi muomumue ne wa kunshikidilu; mmeme mene. Maloba a ku muelelu wa mai manene akumona, akutshina; mikalu ya buloba idi izakala; idi isemena ha buihi, idi ilua. Badi bakuatshishangana, muntu yonso udi ukuatshisha muena mutumba nʼandi; muntu yonso udi wambila muan abo ne, Kolesha mutshima webe. Nunku muena mabaya udi ukolesha mutshima wa mutudi wa tshiamu tshia or, udi usenesha or ne marteau udi ukolesha mutshima wa muntu udi ututa nyindu, umuambila bua kulamika kuandi kua or ne, Kudi kuimpe; udi ukukolesha ne misonso bua or kalamuki. Kadi wewe, Isalele muntu wanyi. Yakoba unakusungula, kankanunuina ka Abalahama mulunda wanyi, Wewe unakukuata bua kulua nʼebe kunfudilu kua buloba, unakubikila ku matengu abu, unakuambila ne, Wewe udi mukuatshishi wanyi wa mudimu, nakukusungula ne tshiena mukuhidie. Kutshinyi, bualu bua ndi nʼebe; kukenzakanyi bua buowa nansha, bualu bua ndi Nzambi webe; nenkukoleshe, bulelela, nenkukuatshishe; bulelela, netujadike ne tshianza tshianyi tshia balume tshia buakane buanyi. Monai, bonso badi bakukuatshile tshiji nebafuishibue bundu, nebabuelakane; badi bafuilangana nʼebe nebikale ba hatuhu, nebajimine. Neukebe bantu aba badi batandangana nʼebe, kadi kuena ubaheta; badi baluangana nʼebe nebikale ba hatuhu, bu tshintu tshia tshianana. Bualu bua meme, Yehowa Nzambi webe, nenkukuate ku tshianza tshiebe tshia balume, nkuambila ne, Kutshinyi, nenkukuatshishe. Kutshinyi, wewe Yakoba, tshishishi, ne nuenu Bena Isalele! Nenkukuatshishe, ndi dia Yehowa, Muhikudi webe, Wa Tshijila wa Isalele. Mona, nakukuvuisha bu tshiamu tshihia-tshihia tshitue tshidi ne menu tshia kubundulula nʼatshi; wewe neubundulule mikuna mile, neuyiboteshe bu luhuishi, neuvuishe mikuna mihi bu bisote. Neuyibehuishe, ne luhehele neluyihehule, ne nvunde neayimuangalashe; ne wewe neusanke mu Yehowa, neutumbile mu Wa Tshijila wa Isalele. Bahele ne badi bakenga badi bakeba mai, ne kaenaku, ne ha ndimi yabo hadi hatumba kûma bualu bua nyota. Meme Yehowa nengitabe kudibo; meme Nzambi wa Isalele tshiena mbalekela. Nempatule misulu ya mai mu mikuna idi kayiyi ne mai, ne mishimi ya mai munkatshi mua bibanda; nenvuishe tshihela bu kashiba ka mai, ne buloba bûme bu mishimi ya mai. Nententule mitshi ya cèdre, ya acacia, ya myrtes ne ya olive mu tshihela; nententule mitshi ya cyprès, ya orme ne ya buis hohamue mu tshihela tshia lusenga; bua bantu batangile, bamanye, bele meji ne bajingulule diatshimue ne, Tshianza tshia Yehowa tshiakuenza bualu ebu, Wa Tshijila wa Isalele wakubufuka. Yehowa udi Wamba ne, Nulue ne tshilumbu tshienu; Mukelenge wa Yakoba udi wamba ne, Ambai mei enu makole anudi nudibingisha nʼau. Balue nʼau ku mpala kuetu, batuambile malu alualua kumueneka; ambai bienu malu akadiku diambedi ne, Akadi nunku; bua tuetu kuelangana meji a malu â ne bua kumanya bietu nshikidilu wau; anyi neuleshe malu adi kayi manji kulua. Nutuambile malu adi alua mu bidimu bitshidi ku mpala, bua tuetu tumanye ne nudi nzambi; bulelela, nuenze bualu budi buimpe anyi bualu budi bubi, bua tuetu tujoshangane, tutue bikemu ne tubumone nʼenu diatshimue. Monai, nudi bintu bia hatuhu, ne mudimu wenu udi wa hatuhu; wanusungula udi muena tshinyangu. Nakubisha muntu wa ku nôde, ne yeye wakumana kulua; nakubisha muntu ku muaba wa kudi kuhatuka diba udi ubikila dina dianyi. Yeye nealue kudiata bakokeshi bu tshimama, bu mudi mufumbi udiata dima. Nganyi wakadianjila kutuambila bualu ebu ku tshibangidilu, bua tuetu tubumanye, ne wakutuambilabu diambedi kabuyi buanze kumueneka, bua tuetu tuambe bietu ne, Wakuamba bulelela? Bulelela, kakuena muntu udi unuambila, kakuena muntu udi unulesha, kakuena muntu udi unvua mei enu. Meme ndi wa kumudilu wakudianjila kuambila Siona ne, Tangila, ubatangile! Nentume kudi Yelushalema udi uya ne lumu luimpe kudiye. Hanatangila, kakuenaku muntu; munkatshi mua nzambi ei kakuenaku mufidi umue wa meji, bua, hanamukonka bualu, udi mumanye mua kumpingishila dî. Monai, buonso buabo badi ba hatuhu; midimu yabo idi ya tshianana, ne mpingu yakutulabo idi luhehele ne bintu bibuelakane. Tangilai, muntu wanyi undi nshindika, wanyi musungula udi mutshima wanyi usanka bualu buandi. Nakumuela Nyuma wanyi hamʼbidi handi; yeye neavuishile bisamba bia bende kulumbulula kuakane. Yeye kena wela dî dikole, kena ubandisha dî diandi, kena udiunvuisha mu misesu. Kena utshibula disele didi diamba kukoseka, kena ujima kalulu ka muinda kadi kafuîmba muishi. Neavuishe kulumbulula kuakane mu dilamata diandi dia malu a bushuwa. Kena uhanga kushindama, mutshima wandi kawena unema bujitu, tô ne hajadikeye kulumbulula kuakane ha buloba; ne ba mu maloba a ku muelelu wa mai manene nebindile diyisha dia mikenji yandi. Nzambi Yehowa wakafuka bia mu diulu ne wakabivungulula, wakafuka buloba ne bintu bionso bidi bifumamu, udi uha bantu badihu muhuya ne bantu badi bendahu nyuma. Udi wamba ne, Meme Yehowa nakukubikila mu buakane, nenkukuate ku tshianza tshiebe tshia balume, nenkulame; nenkufile wewe bu tshihungidi tshia bantu, bu munya wa bisamba bionso; bua kutabasha mesu a bafofo, bua kuhatula bena lukanu mu tshina tshia lukanu, ne bua kumusha badi bashikame mu midima mu nsubu wa lukanu. Meme ndi Yehowa, adi ndina dianyi; tshiena mpa mukuabo butumbi buanyi, anyi kutendelela kuanyi kudi mpingu misonga. Monai, malu a diambedi akumana kulua, ndi nnuambila malu mahia-mahia; ndi nnuambila malu â diambedi kayi manji kumueneka. Imbilai Yehowa musambu muhia-muhia, numutumbishe tô ne kunfudilu kua buloba! Nuenu badi benda ha mai manene, ne bintu bionso bidimu, maloba a ku muelelu wa mai manene ne bantu bonso badimu bimutumbishe. Tshihela tshisanke, ne misoko idimu, misoko mene idi Bena Kedâ bashikamemu; badi bashikame mu Sela bimbe biabo, bele biabo mbila ha mutu ha mikuna. Batumbishe Yehowa, bambile ba mu maloba a ku muelelu wa mai manene butumbi buandi. Yehowa nealuhuke bu muena nvita mukole; neasonsole lukunukunu luandi bu muena nvita; nêle dî diandi, nêle mbila mikole; neadimueneshe bu muena bukitu kudi bena lukuna bandi. Nakuhuwa bianyi tô musangu mule, nakushikama talalâ ne nakadikanda; katataka nengase muadi bu mukashi udi ne didinyenga dia ha kuleleye; nempatule muhuya wanyi lubilu ne nempuyakane diatshimue. Nembutule mikuna minene ne mikuna mikese; nenfubishe midioko yonso idi idiundamu; nenkudimune misulu ilue bisanga, nenkamishe tushiba tua mai tuonso. Nenye ne bafofo mu nshila udibo kabayi bamanye; nembalombole mu nshila idibo kabayi bamanye; nenkudimune mîdima bu munya ku mpala kuabo, ne miaba ya bizakalabizakala bu miaba milandakane. Au mmalu andi ngenza, tshiena mpanga mua kuashikisha. Nebakudimune bantu aba mu nshila, nebatambe kubafuisha bundu, badi beyemena mpingu yakutulabo, badi bambila mpingu yakutulabo ne, Nudi nzambi yetu. Unvuai, bena mahaha, ne nuenu bantu bafofo, joshai talalâ bua nuenu numone! Nganyi udi mufofo bu muena mudimu wanyi? Nganyi udi ne mahaha bu mudi muloho wanyi undi ntuma? Nganyi udi mufofo bu yeye undi muidike? Nganyi udi mufofo bu mudi muena mudimu wa Yehowa? Wewe wakumona malu a bungi, kadi kuena wabuesha mu mutshima; matshu ebe adi majibuke, kadi kuena unvua bimpe. Yehowa wakadi ne disanka bua buakane buandi bua kuvuisha diyisha diandi dinene ne ditumbishibue. Kadi aba mbantu badibo banyenga bintu biabo ne babahaula, buonso buabo badi bakuatshibue mu majimba, badi basokokibue mu nsubu ya lukanu; bakulua bu bintu bidi bakuabo banyenga ku bukole, kakuyi muntu wa kubahandisha; badi bu bintu bia kuhaudibua, kakuena muntu udi wamba ne, Ubahingashe kutudi. Nganyi wa munkatshi muenu wateleja matshu andi ku bualu ebu, wateleja ne wunvua biandi bua matuku adi kâyi manji kulua? Wakafila bana ba Yakoba mu bianza bia bahaudi, ne Bena Isalele mu bianza bia banyengi nganyi? Yehowa kakenza bualu ebu, anyi? Nyeye wakenzelabo bibi, wakabengabo kuenda mu nshila yandi, wakahidiabo kutumikila diyisha diandi. Nunku yeye wakahumuna bukole bua tshiji tshiandi, ne bukole bua nvita hamʼbidi habo. Nvita yakabatemeshila kahia mu nseke yonso, kadi kabakajingulula bualu ebu; kahia kakabosha, kadi kabakateka bualu ebu mu mitshima yabo. Kadi mpindiu, Yehowa, wakakufuka wewe, Yakoba, wakakufuanyikisha wewe, Isalele, udi wamba ne, Kutshinyi, bualu bua nakukuhikula, nakukubikila ku dina diebe, wewe nguanyi. Hawahitshila mu mai, nengikale nʼebe; hawahitshila mu misulu, kayena ihasalala ha mutu hebe; hawahita mu kahia, kuena ushila, ludimi lua kahia kaluena lukuosha. Bualu bua meme ndi Yehowa Nzambi webe, Wa Tshijila wa Isalele, Musungidi webe. Nakufila Ejipitu bu biuma bua kukubikila nʼabi, nakudia Atiopa ne Seba bua kubashintakasha nʼebe. Bualu bua wewe udi tshintu tshia mushinga mukole ku mesu kuanyi, mutumbishibue ne munangibue kundi, nunku nenfile bantu bakuabo mu muaba webe, nenshintakashe mioyo ya binga bisamba ku muoyo webe. Kutshinyi, bualu bua ndi nʼebe; nendue kabidi ne tunkanunuma tuebe ludi ku esete, nennusangishe nuenu badi ku wesete. Nengambile luseke lua node ne, Ubalekele, nengambile luseke lua Sude ne, Kukandamanyi nʼabo; nulue kundi ne bana banyi ba balume badi ku luseke lua kule, ne bana banyi ba bakashi badi kunfudilu kua buloba. Nulue ne muntu yonso udibo bidika dina dianyi, unakafuka ne unakufuanyikisha, unakuenza bua butumbi buanyi. Nulue ne bantu badi bafofo kadi badi ne mesu, ne badi ne mahaha kadi badi ne matshu. Bisamba bionso bidisangishe hohamue, ne bantu badikunguishe kadi muntu kai wa munkatshi muabo neamanye mua kutulesha malu a diambedi? Balue ne bamanyi babo bua kujadika mei abo ne, Adi mei a bushuwa, bua kunvua mei abo ne kuamba biabo ne, Ebu mbulelela. Yehowa udi wamba ne, Nuenu nudi bamanyi banyi, ne nudi muntu wanyi unakusungula, bua nummanye ne nuitabushe dî dianyi, ne nujingulule bu mundi yeye mene. Kakuakadi nzambi mukuabo mufukibue ku mpala kuanyi, kakuena kuikala mukuabo ku nyima kuanyi. Meme, meme mene, ndi Yehowa; kakuena musungidi mukuabo kabidi anu meme nkayanyi. Meme nakuamba dî dianyi, nakusungila bantu, nakubalesha malu anyi; kakuakadi nzambi wa bende munkatshi muenu wakamanya mua kuenza nunku; nunku nuenu nudi bamanyi banyi; edi ndî dia Yehowa. Meme ndi Nzambi, ku tshibangidilu ne ku dituku edi tô ne tshiendelele ndi mundi emu. Kakuena mukuabo udi mua kuhandisha bantu mu bianza bianyi; ndi ngenza mudimu, neamanye mua kûkudimuna nganyi? Yehowa, Muhikudi wenu, Wa Tshijila wa Isalele, udi wamba nunku ne, Bua bualu buenu, nakutuma dî ku Babulona, nempuekeshe bonso badimu, Bena Kasada mene, bu banyemi badi benda mu matu akadi abasankisha diambedi. Meme ndi Yehowa, wenu Wa Tshijila, Mufuki wa Isalele, Mukelenge wenu. Yehowa, udi uhanda nshila munene mu mai manene, ne nshila udi uhitshila mu mai matambe bukole, udi uhatula dikalu dia nvita ne kabalu, musumba wa masalayi ne bena nvita badi balala hanshi hohamue, kabena bajuka kabidi, badi bajimina, badi bu kalulu ka muinda kakujimabo— Yehowa mene udi wamba nunku ne, Kanuvuluki malu a diambedi, kanuedianganyi meji a malu a kale. Monai, nengenze bualu buhia-buhia; nebumueneke mpindiu, kamina babumanye, anyi? Nengenze nshila mu tshihela, nempatule misulu mu tshihela tshia lusenga. Nyama ya mu mpata neyintumbishe, mibuabua ne nyunyu ya nfiondo muomumue, bualu bua ndi mpatula mai mu tshihela, ne misulu mu tshihela tshia lusenga bua kunuisha bantu banyi banakusungula, bantu banakudifukila bua bualu buanyi, bua bobo baleshe bonso butumbi buanyi. Ahu wewe, Yakoba, kuakudibikidila dina dianyi; kadi wewe wakudihangisha bua bualu buanyi, Isalele! Kuakufila mikoko yebe kundi bu milambu ya kuosha, kuakuntumbisha ne milambu yebe mikuabo. Tshiakukunemeshila bujitu bua kufila milambu ya bia kudia, tshiakukutondesha ne difila dia bintu bia muhuya muimpe. Kuakunsumbila mienge ku argent yebe, kuena mungukutshishe ne manyi a milambu yebe; kadi wakunemeshila bujitu ne mihi yebe, wakuntondesha ne malu mabi ebe. Meme, meme mene, ndi yeye udi ukubuikidila mihi yebe bua bualu buanyi bume, tshiena nvuluka malu mabi ebe kabidi. Unvuluishe bua malu ebe, tuakulangane malu â diatshimue; ungambile bualu buebe, bua wewe ubingishibue. Tatu webe wa kumudilu wakenza bibi, bambidi bebe bakutombokela. Nunku nakubihisha bakokeshi bebe bakujidikabo kundi; nakujidila Yakoba bua kuikaleye tshintu tshia kubutula, ne Isalele bu tshintu tshia kuhendabo. Kadi unvua biebe mpindiu, Yakoba, mutu wanyi, wewe Isalele unakusungula. Yehowa, wakakufuka, wakakufuanyikisha munda mua mamu webe, udi ukukuatshisha, udi wamba ne, Kutshinyi, Yakoba, mutu wanyi, Yeshuluna unakusungula. Bualu bua nendongolole mai ha buloba budi kabuyi ne mai, nempatule misulu mu buloba budi bûme; nengitshikishe Nyuma wanyi hamʼbidi ha bana bebe, ne disankisha dianyi hamʼbidi ha tunkanunuma tuebe. Nebamene bu mashinde mu muaba udi ne mai, ne bu malenge adi kukala kua misulu ya mai. Mukuabo neambe ne, Meme ndi muntu wa Yehowa; mukuabo neadidike ku dina dia Yakoba; mukuabo neafunde ha tshianza tshiandi ne, Ntshia Yehowa, neabikile dina diandi dibidi ne, Isalele. Yehowa, Mukelenge wa Isalele, Muhikudi wandi, Yehowa wa misumba, udi wamba ne, Ndi wa kumudilu, ndi wa kunshikidilu; kakuena nzambi mukuabo, anu meme nkayanyi. Udi mua kuamba malu adi kâyi manji kulua, bu mundi ngenza, katshia najadika bantu ba kale, nganyi? Ambe biandi muandu eu, aubulule ku mpala kuanyi. Bambile biabo malu adi alua ne malu alualua kuhita. Kanutshinyi, kanuikadi ne buowa. Tshiakukuambila bualu ebu kale, tshiakukuleshabu, anyi? Nuenu nudi bamanyi bianyi. Nzambi mukuabo udiku muomumue nʼanyi, anyi? Nansha dibue dikuabo kadienaku; tshiena mumanye dikuabo nansha. Bonso badi basonga mpingu badi bantu badi babuelakana; malu adi abasankisha kaena mua kubakuatshisha; bamonyi babo kabena batangila, kabena bajingulula bualu ebu, bua bafuishibue bundu. Muntu kai wakufuanyikisha nzambi, anyi wakutula luhingu ludi kaluyi lumanye mua kumukuatshisha? Monai, bonso badi bakuata nʼandi mudimu eu nebafuishibue bundu, ne bena mudimu bandi badi anu bantu. Buonso buabo badisangishe hohamue, badimanyike; nebatshine, nebafuishibue bundu diatshimue. Mutudi udi uteka tshiamu tshia luhingu ha mutu ha makala a kahia, udi utshitula ne marteau, utshifula ne diboko diandi dikole. Nzala idi imusuma, bukole buandi budi buhanga; kena unua mai, udi ubanga kuhungila. Muena mabaya udi uvungulula luidi luandi ha dibaya, udi ufundahu ne mutshi wa mukanda, udi udikona ne nkono, udi ufundahu tshidikishilu ne biamu bia compas, udi usonga luhingu ludi ne tshifuanyikishi tshia muntu, luikale ne bulengele bu bua muntu, bua luikale mu nsubu. Udi uditahila mitshi ya cèdre, udi usungula mutshi wa rouvre anyi wa telebinta, udi ûlekela tô ne hakolau munkatshi mua mitshi ya muitu. Udi utentula mutshi wa cèdre, ne nvula idi yudiundisha. Hashishe mutshi eu newikaleku bua muntu kuwosha mu kahia. Udi wangata tshituha tshiau bu nkunyi, udi wota kahia; e, udi utemesha nʼatshi kahia, udi ulamba bidia. Bulelela, udi wenza nʼatshi nzambi, udi umutendelela; udi usonga nʼatshi luhingu, udi ulukukuila hanshi. Udi wosha tshituha tshiau mu kahia; udi udia munyinyi udiye ulamba ne tshituha tshikuabo; udi wanyika munyinyi, udi ukuta biandi; udi wota kahia, udi wamba ne, Eyo, nakuota kahia, nakumona dinkenke dia kahia. Udi wenza nzambi, luhingu luandi lusonga mene, ne tshituha tshiau tshidi tshishala; udi umukukuila, udi umutendelela, udi umulomba malu ne, Umpandishe, bualu bua wewe udi nzambi wanyi. Bobo kabena bamanye, kabena belangana meji; bualu bua yeye wakumana kubuikila mesu abo ne kabena mua kutangila; wakukanda mitshima yabo ne kabena mua kujingulula. Kakuena umue wabo udi uvuluka, ne kakuena lungenyi anyi dijingulula munda muandi bua kuambeye ne, Nakuosha tshituha mu kahia, nakulamba bidia ha mutu ha makala atshi; nakuanyikaku munyinyi, nakudia; nenvushe tshituha tshiau tshidi tshishala tshintu tshia kudinyanga nʼatshi, anyi? Nenkukuile tshibasa tshia mutshi, anyi? Yeye udi udia butue bua kahia; mutshima wandi munyanguke ne mashimi wakumusesuisha. Kena mua kuhandisha muoyo wandi, kena mua kuamba ne, Tshiena nkuata mashimi mu tshianza tshianyi tshia bukole, anyi? Vuluka malu â, Yakoba, Isalele mene; bualu bua wewe udi muntu wanyi! Nakukufuka, wewe udi muntu wanyi; tshiena nkuhua muoyo, Isalele. Nakujimisha matomboka ebe bu mudi ditutu difike dijimina, ne malu mabi ebe bu mudi dibungi dijimina; uhingane kundi, bualu bua nakukubikila. Bia mu diulu, imbai bualu bua Yehowa wakuenza nunku; bidi mu ndondo wa buloba, elai mbila! Bandishai mei enu mu kuimba kua misambu, nuenu, mikuna, ditu, ne mitshi yonso idimu! Bualu bua Yehowa wakuhikula Yakoba, neaditumbishishe mu Isalele. Yehowa, Muhikudi webe, wakakufuanyikisha munda mua mamu webe, udi wamba ne, Meme ndi Yehowa udi ufuka bintu bionso; udi ubalula bintu bia mu diulu nkayandi; udi ubalula buloba kabidi (wakadi nʼanyi nganyi?). Ndi yeye udi uhumbisha bimanyinu bia bena mashimi, udi uvuisha batempi ba mbuku bu bahale; udi wakikisha bena meji tshianyima, udi uvuisha meji abo buhote. Ndi yeye udi ujadika dî dia muntu wandi, udi ushikisha mei a miloho yandi. Ndi yeye udi wamba bua Yelushalema ne, Bantu nebashikamemu; udi wamba bua misoko ya Yuda ne, Neyibakibue kabidi, nengase nsubu tshiakabidi mu miaba idi bikulu. Ndi yeye udi wambila mai male ne, Ukame biebe, ne nenkamishe misulu yebe; udi wamba bua Kolesha ne, Udi mulami wa mikoko yanyi, nênze malu onso andi mudihangidishile. Udi wamba bua Yelushalema ne, Nebamuibake kabidi; ne bua ntempelo ne, Nebajadike bishimikidi biebe. Yehowa udi wamhila muntu wandi udiye muele manyi ha mutu dî, Kolesha mene, unakukuata ku tshianza tshiandi tshia bukole, bua kutulula bisamba bia bantu ku mpala kuandi, ne bua kusulula mikaba ya ku bimono bia bakelenge; bua kunzulula bibi ku mpala kuandi, ne bua bibi kabinshidi kabidi. Udi umuambila ne, Nenye ku mpala kuebe, nendandakashe mikuna idi bizakalabizakala; nentshibule bibi bia tshiamu tshia mitaku bituha bituha, nenkose nkanu ya biamu hankatshi. Nenkuhe luhetu ludibo basokoka mu midima, ne biuma bidibo babutshila mu busokoko; bua wewe Umanye ne, Yeye udi Yehowa udi umbikila ku dina dianyi. Nzambi wa Isalele mene. Bua bualu bua Yakoba muntu wanyi, ne Isalele unakusungula, nakukubikila ku dina diebe, nakukuinyika dina diebe dibidi, wewe kuyi muanze kumanya. Meme ndi Yehowa, kakuena mukuabo nansha; kakuena nzambi mukuabo muomumue nʼanyi nansha; nenkusuike mukaba, wewe kuyi muanze kummanya nansha; bua bantu ba kudi kuhatuka diba, ne ba kudi kubuela diba bamanye ne kakuena mukuabo muomumue nʼanyi. Meme ndi Yehowa, ne kakuena mukuabo nansha. Ndi ngenza munya, ndi nfuka midima kabidi; ndi nvuisha ditalala, ndi nvuisha makenga; meme ndi Yehowa udi wenza malu â onso. Diulu, witshikishe biebe buakane hanshi ha buloba, ne matutu alokeshe buakane, buloba bunzuluke bua buhatulemu luhandu, bumeneshe nʼalu buakane diatshimue; meme Yehowa nakubufuka. Mulau wikale kudi muntu udi ufuilangana ne Mufuki wandi! Ntshiyoyo munkatshi mua biyoyo bia ha buloba! Dima nedikonke mufumbi udi udifumba ne, Udi wenza tshinyi, anyi? Anyi mudimu webe udi mua kukuambila ne, Wewe kuena ne bianza, anyi? Mulau wikale kudi muntu udi ukonka tatu ne, Udi ulela tshinyi? Anyi udi webesha mukashi ne, Udi ne didinyenga bua kulela tshinyi? Yehowa, Wa Tshijila wa Isalele, ne Mufuki wandi, udi wamba ne, Nenungebeshe bua malu adi kâyi manji kulua, anyi? Nenungelele mukenji bua bana banyi balume, anyi bua mudimu wa bianza bianyi, anyi? Nakafuka buloha, nakafuka bantu badimu. Bianza bianyi nkayabi biakabaha diulu, ne nakelela bintu biadi bionso mukenji. Nakubisha muntu mu buakane buanyi, nemmululamishile nshila yandi yonso; yeye nease musoko wanyi, nealekele bantu banyi bakuatshibue mu maloba a bende, kayi ulomba mushinga anyi mbueshilu; Yehowa wa misumba udi wamba nunku. Yehowa udi wamba ne, Luhetu lua ku Ejipitu ne biuma bia buendaluki bua mushinga mu Atiopa, ne Bena Seba bine, bantu bale, nebibuele ku luseke luebe, nebikale bintu biebe. Nebakulonde, nebalue ku luseke luebe ne nkanu mibasuike. Nebahone hanshi ku mpala kuebe bua kukukuila; nebakutendekene ne, Munkatshi muenu mudi Nzambi bulelela; kakuena mukuabo, kakuena Nzambi mukuabo muomumue nʼandi. Bulelela, wewe udi Nzambi udi usokoma, wewe Nzambi wa Isalele, Musungidi. Benji ba mpingu badi bafuishibue bundu ne badi babuandakana, buonso buabo diatshimue, badi babuela mukubuelakana hohamue. Kadi Bena Isalele nebasungidibue kudi Yehowa ne luhandu lua tshiendelele; kanuena nufuishibua bundu, kanuena nubuandakana tô ne tshiendelele. Bua edi ndî didi Yehowa wakafuka diulu wamba, Nzambi mene wakafuka buloba ne wakabuenza, wakabujadika, kakabufuka bu tshintu tshia hatuhu, wakabufuka bua bantu bashikamehu; yeye mene udi wamba ne, Meme ndi Yehowa, ne kakuena mukuabo nansha. Tshiakuamba dî mu musokoko, mu muaba wa mu buloba bua mîdima: tshiakuambila tunkanunuma tua Yakoba ne, Nunkebe mu muaba udi mutuhu. Meme Yehowa ndi ngamba mei a bushuwa, ndi ngamba mei adi majalame. Nudisangishe hohamue, nulue; nusemene ha buihi hohamue, nuenu badi bahanduke munkatshi mua bisamba bia bantu! Badi benda batuala mutshi wa luhingu luakusongabo, badi batendelela nzambi udi kayi mumanye mua kubasungila, kabena ne lungenyi. Nuambe bienu, nuleshe malu anudi basue kutumbila: bulelela, bele tshifufu, batuleshe ne, Wakunuambila bualu ebu mu bidimu bia diambedi nganyi? Wakadianjila kuamba bualu ebu kale nganyi? Meme Yehowa tshiakuenza bualu ebu, anyi? Kakuena nzambi mukuabo muomumue nʼanyi, muakane ne Musungidi; kakuena mukuabo muomumue nʼanyi. Hinganai kundi, nusungidibue, nuenu ba kunfudilu kua buloba; bualu bua meme ndi Nzambi, ne kakuena mukuabo muomumue nʼanyi. Nakuditshiha mu dina dianyi nkayanyi, dî diakane diakuhatuka mukana muanyi, kadiena dihingana: Diamba ne, Tshinu tshionso netshintuile hanshi, ludimi luonso neluditshihe, bamba ne, Anu mu Yehowa mmudi buakane ne bukole. Bantu nebalue kudiye, bonso bakadi bakuata tshiji bualu buandi nebafuishibue bundu. Tunkanunuma tuonso tua Isalele netubingishibue mu Yehowa, neutumbile kudiye. Bele udi winama, Nebo udi ubalama; mpingu yabo idi ha nyima ha nyama ne ha bimuna; badi bateka bintu binuakuendakana nʼabi mu ngendu bu bujitu ha nyima ha nyama idi mihungile. Nzambi ei idi ibalama, idi inama nyima yai diatshimue; kayakamanya mua kuhandisha mpingu ne bujitu buai, kadi yoyo mine idi ibuela mu buhika. Nungunvuile, nuenu ba mu tshiota tshia Yakoba, ne bonso batshidi bashale ba Bena Isalele, banakutuala bu bujitu katshia nualedibua, banakuya habo katshia muhatuka mu difu. Tô ne ku bununu buenu meme ndi anu mundi emu; tô ne halua nsuki yenu mitoke, nakunufuka, nennutuale, nennutuale, nennusungile. Nenunfuanyikishe ne nganyi, nenunkelemeshe ne nganyi, nenungelekeshe ne nganyi, bua tuetu tufuanangane? Badi bahumuna or mu tshibombi, badi bidikisha argent mu tshiamu tshia kuidikisha nʼatshi bujitu, badi ba buesha mutudi wa tshiamu tshia or mu mudimu wabo, ne yeye udi utula nʼatshi luhingu lua nzambi wabo; badi binama mitu yabo kudilu, e, badi batendelela! Badi baluambula ha diaha, badi bautuala, badi baluimanyika mu muaba walu, ne ludi luimanaku; kaluena mua kumuka mu muaba walu; e, muntu udi mua kuela di diandi kudilu, kadi kaluena lumanye mua kuitaba kudiye, kaluena lumanye mua kumusungila mu makenga andi. Nuvuluke bualu ebu, nubujadike; nuelangane meji kabidi mu mitshima yenu, nuenu bantombokedi, nuvuluke malu akadiku diambedi, bua meme ndi Nzambi, ne kakuena mukuabo; meme ndi Nzambi ne kakuena mukuabo bu meme, ndi ndianjila kulesha bantu nshikidilu wa bualu ku tshibangidilu tshiabu, ne mu bidimu bia kale mubaleshe malu akadi kâyi manji kuenjibua. Ndi ngamba ne, Bualu bunakadihangidishila bua kuenza nebuenjibue, nengenze malu anakusua kuenza; ndi mbikila nyunyu ku luseke lua esete udi mushihianganyi, ndi mbikila muntu udi wenza di dianyi mufume ku buloba budi kule. Bulelela, nakuamba dî dianyi, nendimane; nakadihangidishila bualu, nembuenze. Nuenu, badi ne mitshima idi ne tshitshu, badi bashilangana ne buakane kule, telejai matshu enu kundi. Ndualua ne buakane buanyi ba buihi nʼenu, kabuena bushala kule, ne luhandu luanyi kaluena lujanguluka; nenteke luhandu mu Siona, nempe Bena Isalele butumbi buanyi. Hueka biebe, ushikame mu dinfuenkenya, wewe, Babulona, muana mukashi utshidi kamama; shikama hanshi ha buloba kuyi ne nkuasa wa bukelenge, wewe muana mukashi wa Bena Kasada! Bua kabena bakubikila kabidi nej Mutekete ne mulengele. Angata mpelu ya mabue, hela nʼai bukula; umushe tshilulu tshidi tshikudika ku mpala, uvule tshilulu tshiebe tshile hamʼbidi hebe, uvule tshilulu tshia ku mikolo yebe, uhitshile mu misulu. Butaka buebe nebusokoloke, e, bundu buebe nebumueneke ku mesu kua bantu. Nendisombuele, ne tshiena ndengesha ne muntu. Muhikudi wetu, Yehowa wa misumba ndina diandi, udi Wa Tshijila wa Isalele. Ushikame muhuwe, buela mu midima, wewe muana mukashi wa Bena Kasada; bualu bua kabena bakubikila kabidi ne, Mukelenge mukashi wa makelenge. Nakadi ne bantu banyi tshiji, nakanyanga buhianyi buanyi, nakabafila mu tshianza tshiebe; wewe kuakabafuila luse; wakuteka mutshi webe wa tshikokedi ha nshingu ya bantu banunu, wakubanemeshila bujitu. Wewe wakamba ne, Nengikale mukelenge mukashi tshiendelele, kadi kuakateka malu â mu mutshima webe, ne kuakelangana meji bua kunfudilu kuau. Nunku unvua bualu ebu, wewe udi udikebela masanka, udi mushikame talalâ kuyi ne bualu, udi wamba mu mutshima webe ne, Meme ndiku, kakuena mukuabo nʼanyi hohamue; tshiena mushikame bu mukashi wa mu lufuila, tshiena mmona lufu lua bana banyi. Kadi malu â abidi neakukuate mu tshituha tshia diba tshia dituku dimue, lufu lua bana, ne lufu lua bayebe diatshimue; mu tshiuwidi tshiau tshionso malu â nealue kûdi munkatshi mua bungi bua malu ebe a buloshi, ne malu a bungi a kulowa kuebe. Bualu bua wewe wakueyemena malu mabi ebe; wakuamba biebe ne, Kakuena muntu udi untangila. Meji ebe ne lungenyi luebe biakukusesuisha mu nshila; ne wewe wakuamba mu mutshima webe ne, Meme ndiku, kakuena mukuabo nʼanyi hohamue. Nunku makenga neakukuate, ne kuena mua kuihata ne kutempa kuebe kua mbuku; kabutu nekahone hamʼbidi bebe, kuena mumanye mua kuamusha kûdi; kubutuka nekulue kûdi lukasa kûdi kuyi mumanye mua kuehula. Shala mueyemene kulowa kuebe, ne bungi bua malu ebe a buloshi, biwakuditondesha nʼabi katshia bakuela; bumue neumanye mua kudikuatshisha, ne bumue neumanye mua kukuatshisha bakuabo buowa. Meji a ba bungi badi basue kukulesha meji akukutonda; badi bafunda bintu bia mu diulu ha mukanda wa carte, badi batangila mitoto, badi bakuambila ku ngondo ku ngondo bualu budi buamba kulua kûdi, bimane kulu, bakusungile ku malu adi alua hamʼbidi hebe. Mona, nebikale bu bisonsa; kadilu nekaboshe; kabena badisungila ku bukole bua kadilu; bua kadilu aka kakena kikala makala a kuotaku, kakena kikala kahia ka kushikama ku mpala kuaku. Ebu mbualu budi bukuata bintu biakukutonda; bawakuenduluka nʼabo mushinga ku buana buebe badi balenduka muntu ne muntu mu nshila wandi; kakuena kuikala umue wabo wa kukusungila. Unvuai bualu ebu, nuenu bana ba Yakoba, badibo babikila ku dina diandi dia Isalele, ne badi bahatuka munda mua Yuda; badi baditshiha ku dina dia Yehowa, badi batela dina dia Nzambi wa Isalele, kadi kabena baditela mu bushuwa anyi mu buakane. Bualu bua badi badibikila ne, Bena musoko wa tshijila, ne badi beyemena Nzambi wa Isalele; Yehowa wa misumba ndina diandi. Kale nakuamba malu akadiku diambedi; bulelela, malu â akahatuka mukana muanyi, ne nakadianjila kunuleshau. Hashishe nakaenza lukasa, akamueneka. Bualu bua nakamanya ne, Wewe udi muena tshitshu, nshingu webe udi bu mulungu mukole bu tshiamu, ne mpala webe udi bu tshiamu tshia mitaku; nunku nakakuambila malu â kale, diambedi kâyi manji kulua nakakuleshau, bua wewe kuambi ne, Luhingu luanyi luakaenza, luhingu luanyi lunakusonga ne luhingu luanyi lunakutula yakela mukenji ne, Enjibue. Wewe wakumpa bualu ebu; mona bualu ebu buonso; ne nuenu, nuenu mene kanuena numanyisha bantu ne, Buakushika, anyi? Ku tshikondo etshi tô ne ku mpala ndi nkulesha malu mahia-mahia, malu masokoka mene, audi kuyi muanze kumanya. Akufukibua katataka, kemu bidimu bia kale nansha; ku mpala kua difuku edi kuakanza kunvua lumu luau, bua wewe kuambi ne, Bulelela, nakuamanya. Bushuwa, wewe kuena munvue, kuena mumanye malu â, ne tô ne ku mpindiu matshu ebe kakanza kujikuka. Bualu bua nakamanya ne wewe udi utamba kuikala muena bunsonge, ne wakamanyibua bu muntombokedi katshia bakulela. Bua dina dianyi ndi mpumbisha tshiji tshianyi, bua butumbi buanyi ndi nkukandilatshi, bua meme tshikûmushi ha buloba. Mona, nakukulengesha, kadi tshiakukulengesha bu mudibo balengesha tshiamu tshia argent; nakukuteta mu tshikutu tshia makenga. Bua bualu buanyi meme, anu bua bualu buanyi nkayabu, ndi ngenza bualu ebu; bua dina dianyi didi ne bua kuhendibua munyi? Tshiena mpa mukuabo butumbi buanyi. Teleja matshu kundi, wewe Yakoba, Isalele mene unakubikila! Meme ndi yeye; ndi wa kumudilu, ndi wa kunshikidilu kabidi. Bulelela, tshianza tshianyitshiakajadika bishimikidi bia buloba, tshianza tshianyi tshia bukole tshiakabalula diulu; hanabibikila, bidi bimana hohamue. Buonso buenu nudisangishe muaba umue, nuteleje matshu enu! Wa munkatshi muenu wakunuambila malu â adi alua nganyi? Muntu udi Yehowa unanga nênzele Babulona malu adiye musue kumuenzela, nênzele Bena Kasada malu andi makole. Meme, meme mene, nakuamba dî dianyi, nakamubikila; nakumuvuisha, ne yeye ne a winshile nshila wandi diakalengele. Semenai ha buihi nʼanyi, unvuai bualu ebu! Ku tshibangidilu tô ne mpindiu tshiakuamba dî mu busokoko; katshia ku tshikondo tshiakenjibuabu meme nakadiku; ne katataka Mukelenge Yehowa wakuntuma ne Nyuma wandi. Yehowa, Muhikudi webe, Wa Tshijila wa Isalele udi wamba ne, Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu nshila ûdi ne bualu bua kuendelamu. Aka! Bu wewe munvue mikenji yanyi, ditalala diebe diakadi kuikala bu musulu, ne buakane buebe buakadi kuikala bu mavuala a mai manene! Tunkanunuma tuebe tuakadi kuikala bu nsenga, ne bana badi bahatuka munda muebe bakadi kuikala bu tusoka tuai; dina diabo kadiakadi diumushibua anyi kushihibua ku mpala kuanyi. Hatukai mu Babulona, nunyeme Bena Kasada! Nuambe bualu ebu ne dî dia kuimba musambu, nuambe bualu ebu, nutume dî edi tô ne kunfudilu kua buloba! Nuambe bienu ne, Yehowa wakuhikula muntu wandi Yakoba. Kabakadi ne nyota hakabalomboleye mu bihela bia lusenga; yeye wakabahatuila mai mu dibue; wakahanda dibue kabidi, ne mai akahatuka. Yehowa udi wamba ne, Kakuena ditalala dia bantu babi kuikala nʼadi. Nuenu, maloba a ku muelelu wa mai manene, telejai matshu kundi; nuenu bantu badi kule, nungunvuile. Yehowa wakumbikila diambedi tshiyi muanze kuedibua; hanakadi munda mua mamu wanyi, wakungidika dina dianyi. Wakuvuisha mukana muanyi bu muele wa nvita udi musakisha bimpe; wakunsokoka mu dileshi dia tshianza tshiandi; wakunvuisha mukete musenene, wakunsokoka mu musaka wandi wa mikete. Wakungambila ne, Wewe udi muntu wanyi, Isalele, mundi ntumbishibuamu. Kadi meme nakuamba ne, Nakuenza mudimu wanyi tshianana, nakujimisha bukole buanyi hatuhu tshiyi muhete tshintu; kadi bulelela, kulumbulula kuakane kundi nʼaku bualu kudi kufuma kudi Yehowa, ne ditutu dianyi didi kudi Nzambi wanyi. Yehowa wakunfuka munda mua mamu wanyi bua meme kuikala muntu wandi, bua kualukisha Yakoba kudiye kabidi, ne bua Isalele asangishibue kudiye; bua ndi ne butumbi ku mesu kua Yehowa, ne Nzambi wanyi wakulua bukole buanyi, mpindiu Yeye udi wamba ne, Mbualu budi butamba bukese bua wewe kuikala muntu wanyi bua kubisha kabidi bisamba bia Yakoba, ne bua kuhingasha ba mu Isalele badi bashala ne muoyo; ka nenkuyishe bu munya kudi ba bisamba bia bende, bua luhandu luanyi lufike tô ne kunfudilu kua buloba. Yehowa, Muhikudi wa Isalele ne Wa Tshijila wandi, udi wambila muntu udibo bahetula kudi bantu, udibo bakenuka kudi bantu, udi muhika wa bakokeshi babi, ne, Bakelenge nebamone butumbi buebe, nebajuke; bana ba bakelenge nebajuke kabidi, nebakukukuile hanshi; bualu bua Yehowa utudi mua kueyemena, Wa Tshijila wa Isalele, wakukusungula. Yehowa udi wamba dî edi ne, Mu tshikondo tshia diakalengele nakitaba kûdi, ne mu dituku dia luhandu nakukukuatshisha; nenkutume, nenkume kudi bantu bu tshihungidi tshiabo, bua kujadika buloba, bua kubahesha mahianyi akadi mashale makolo. Newambile badi basuika mu nkanu ne, Hatukai; newambile badi bashikame mu midima ne, Dimueneshai. Mu nshila yonso idibo baya nebikale ne bia kudia, ne ha mutu ha mikuna yonso idi kayiyi ne mashinda nehikale madimi abo a mashinda. Nzala ne nyota kayena ibasuma; luhehele ludi luvuisha luya lukole ne munya kabiena bibosha, bua yeye utu wa bafuila luse neaye ku mpala kuabo, neabalombole ha buihi ne mishimi ya mai. Nenvuishe mikuna yanyi yonso nshila minene, bibebe bianyi nebiedibue mabula. Monai, bantu aba nebafume kule, ne bantu aba nebafume ku nôde, ne ku wesete, ne bantu aba nebafume ku buloba bua Bena Siene. Diulu, imbaku biebe; buloba, sankaku biebe; nuenu mikuna, bandishai mei enu mu kuimba kua misambu! Bualu bua Yehowa wakusamba bantu bandi, ne neafuile bantu bandi badi bakenga luse. Kadi Siona wakamba ne, Yehowa wakundekela, Mukelenge wakuntua muoyo. Mukashi udi mua kuhua muanʼandi utshidi wamua mabele muoyo, bua yeye kafuidi muana wa balume wakuleleye luse, anyi? Bulelela, bantu aba mene badi mua kuhua muoyo, kadi meme tshiena nkuhua wewe muoyo. Tangila, nakunufunda munda mua bianza bianyi; ngumbu yebe idi ku mpala kuanyi misangu yonso. Bana bebe badi balua lukasa; bakukushiha ne bakukubutula nebumuke kûdi. Bandulukaku, tangila nseke yonso, umone biebe! Bantu aba bonso badi badisangisha hohamue, badi balua kûdi. Yehowa udi wamba ne, Bu mundi ne muoyo, wewe neudiluatshishe ne buonso buabo bu tshilenga, neudijingile nʼabo bu mudi mukashi udi wamba kuya ku dibaka wenza. Bualu bua miaba yebe minyanguke ne misoko yebe yakadi bikulu, ne buloba buebe buakadi bubutuke, nebitambe kubumbakana bua bantu bashikamemu. Bantu bakakumina diambedi nebikale kule. Bana bawakulela mu tshikondo tshia mu lufuila luebe nebanze kuamba mu matshu ebe ne, Muaba eu udi utamba kubumbakana bua bualu buetu, utuhe muaba mukumbane bua tuetu kushikamamu. Hashishe wewe newambe mu mutshima webe ne, Wakundelela bana aba nganyi? Bualu bua nakadi mu lufuila lua bana banyi, nakushala hatuhu, muihatshibue tô ne ku buloba bua bende, ngendakana tshianana; wakukolesha bana aba nganyi? Monai, bakashiya meme nkayanyi; bantu aba bakadi kudi kunyi? Mukelenge Yehowa udi wamba ne, Tangila, meme nengolole tshianza tshianyi kudi bisamba bia bantu, nembandishe dibendela dianyi bu tshimanyinu kudi bantu. Nebalue ne bana bebe ba balume mu tshiadi tshiabo, nebatuale bana bebe ba bakashi ha maha abo. Bakelenge nebikale batatu bebe balami, ne bakelenge babo bakashi nebikale bamamu bebe bandeshi. Nebatue mpala yabo hanshi ku mpala kuebe, nebalake luhuishi lua ku makasa ebe. Ka wewe neummanye meme ne, Ndi Yehowa mene; badi bangeyemena kabena bafuishibua bundu. Nebamanye mua kunyenga muena bukitu tshintu tshidiye ukuata mu nvita, anyi nebahandishe bantu badi muntu muakane ukuata, anyi? Kadi Yehowa udi wamba ne, E, nebanyenge muena bukitu bantu badiye ukuata mu nvita, nebahandishe badi muena tshinyangu ukuata. Bualu bua nenfuilangane ne muntu udi ufuilangana nʼebe, nensungile bana bebe. Nendishe badi bakukengesha minyinyi ya ha mibidi yabo mene, nebakuatshike mashi abo mene bu mudibo bakuatshila maluvu a dimeme. Hashishe bantu bonso nebamanye ne, Meme Yehowa, ndi Musungidi webe, ne Muhikudi webe, Wa Bukole wa Yakoba. Yehowa udi ukonka ne, Mukanda wa kushiha kua dibaka unakuha mamu webe hanakumûmusha udi hanyi? Nakukuhana kudi musombeshanganyi kai? Mona, bakukuhana bua malu mabi ebe, ne bua mantombokela ebe bakûmusha mamu webe. Bualu kai, hanakulua, kakuakadi muntu bua kungakidila? Hanakukubikila, kakuakadi muntu bua kuitaba munyi? Tshianza tshianyi tshidi tshitamba buihi bua kukuhikula tshi, anyi? Tshiena ne bukole bua kukusungila, anyi? Tangila, ku kusamina kuanyi ndi ngumisha mai manene; ndi nvuisha misulu bu tshihela tshia lusenga; minyinyi yai idi inunka muhuya mubi bualu bua kakuena mai, idi ifua ne nyota. Ndi nduatshisha diulu matutu mafike, ndi nvuisha bilulu bikayabala tshibuikidi tshiadi. Mukelenge Yehowa wakumpa ludimi lua badi bayila bua meme kumanya mua kukuatshisha muntu muhungile ne dî. Ku dinda ku dinda udi utabala, udi utelejesha ditshu dianyi bua kunvua bianyi bu mudi bayidi bunvua. Mukelenge Yehowa wakujikula matshu anyi, ne tshiakamutombokela, tshiakamukoma nyima. Nakafila nyima wanyi kudi batutshi, ne matama anyi kudi batudi ba nsuki ya muedi wanyi; tshiakasokoka mpala wanyi ku bundu ne kudi batuidi ba lute. Bualu bua Mukelenge Yehowa neankuatshishe, nunku tshiakubuandakana; bua bualu ebu nakutantamasha mpala wanyi bu dibue, ndi mumanye ne, Tshiena ngikala ne bundu ku mesu; udi umbingisha udi ha buihi nʼanyi. Wafuilangana nʼanyi nganyi? Tuimane bietu hohamue. Muntu kai neambande ne tshilumbu? Alue ha buihi nʼanyi! Monai, Mukelenge Yehowa neankuatshishe; muntu kai neampishe? Monai, buonso buabo nebasunsuke bu tshmialu; tshibayibayi netshibadie. Muntu kai wa munkatshi muenu udi utshina Yehowa, udi utumikila dî dia muntu wandi? Biendeye mu mîdima kayi ne muinda, eyemene biandi dina dia Yehowa, atekemene biandi Nzambi wandi! Ahu nuenu bonso badi batemesha kahia, ne badi baditemeshila kantolentole ka kahia, nuendakane bienu mu ndimi ya kahia kenu, ne munkatshi mua bimunyi binuakutemesha! Ebu mbualu buenu budi tshianza tshianyi tshinusunguila: bua nuenu kulala mu muaba wa makenga makole. Telejai matshu enu kundi, nuenu badi balonda buakane, nuenu badi bakeba Yehowa. Tangilai ku dibue kuakanuhandabo, ne ku tshina tshia mabue kuakanumbulabo. Tangilai kudi Abalahama tatu wenu, ne kudi Sala wakamuela; bualu bua hakadiye ha nkayandi nakamubikila, nakamuvudishila disanka, nakamuvudisha bua ikale bantu ba bungi. Bualu bua Yehowa wakusamba Siona, wakusamba miaba yau yonso yakadi bikulu, wakuvuisha tshihela tshiau bu budimi bua Edene ne tshihela tshiau tshia lusenga bu budimi bua Yehowa. Disanka ne disankidila nebikalemu, ne kusakidila ne dî dia kuimba kua misambu. Unvuai dî dianyi, nuenu bantu banyi; telejai matshu enu kundi, nuenu ba mu tshisamba tshianyi; bualu bua diyisha dia mikenji nedihatuke kundi, ne kulumbulula kuanyi kuakane nekuikale munya kudi bantu. Buakane buanyi nebusemene ha buihi tshituha tshihi, luhandu luanyi luakuya ku mpala, maboko anyi neakokeshe bantu; ba mu maloba a ku muelelu wa mai manene nebangindile, nebeyemene diboko dianyi. Bandishai mesu enu mu diulu, tangilai buloba muinshi muadî; bualu bua diulu nedijimine bu muishi, buloba nebusunsuke bu tshilulu, ne badi bashikamemu nebafue bu tuishi; kadi luhandu luanyi neluikaleku tshiendelele, ne buakane buanyi kabuena bumushibue. Nungunvuile, nuenu badi bamanye buakane, badi ne diyisha dianyi dia mikenji mu mitshima yenu; kanutshinyi bihendu bia bantu, buowa kabunukuatshi bua matuka abo. Bualu bua tshibayibayi netshibadie bu tshivualu, ne tshishi netshibadie bu miosa ya mikoko; kadi buakane buanyi nebuikaleku tshiendelele, luhandu luanyi neluikaleku tô ne ku bikondo bionso. Tabala, tabala, udiluatshishe bukole, wewe, diboko dia Yehowa! Tabala bu muwakenza mu matuku a kale, mu bikondo biakamana kuhita kale. Kenguewe wakakosa Lahaba bituha bituha, wakatubula nyama munene ne muele, anyi? Kenguewe, anyi, wakakamisha mai manene, mai a mu ndondo wa mu mai manene; wakavuisha ndondo wa mu mai manene nshila bua bahikudibue kuhitshilamu? Ka bantu bakuhikudibue kudi Yehowa nebalukilemu, nebalue ku Siona bimba misambu, disanka dia tshiendelele nedikale ha mitu yabo; nebikale ne disankidila ne disanka; kanyinganyinga ne kuhumuna nebinyeme kule. Meme, meme mene, nyeye udi unusumba; wewe nnganyi bua kutshina muntu ulualua kufua, ne muana wa muntu udi uvuishibua bu mashinde? Wewe nnganyi bua kuhila Yehowa Mufuki webe muoyo, wakabalula diulu ne wakajadika bishimikidi bia buloba; ne utu watshina dinda tô ne dilolo bualu bua tshiji tshikole tshia mukengeshi, haludikeye mukete bua kubutula nʼau? Tshiji tshikole tshia mukengeshi tshidi kudi kunyi? Muena lukanu udi mukoke nyima neasululuke ku nkanu lubilu; kena ufua bua kuhueka biandi mu Tshina tshia Bafue, ne bia kudia biandi kabiena bihanga. Bualu bua meme ndi Yehowa Nzambi webe, udi usonsola mai manene, bua mavuala au abile ne tshiona tshinene; Yehowa wa misumba ndina diandi. Nakuteka mei anyi mukana muebe, nakukusokoka mu mundidimbi wa tshianza tshianyi, bua meme kuasa diulu ne kujadika bishimikidi bia buloba, ne bua kuambila Siona ne, Wewe udi bantu banyi, Tabala, tabala, bika biebe, Yelushalema, wakunua luhanza lua tshiji tshiandi ku tshianza tshia Yehowa, wakunua luhanza ludi lukutenkakasha, waku dî mana tô ne ku binyindanyinda. Kakuena umue wa munkatshi mua bana ba balume bonso bakuleleye udi mumanye mua kunulombola; ne kakuena umue wa munkatshi mua bana ba balume bonso bakukolesheye udi umukuata ku tshianza tshiandi tshia balume. Malu â abidi akukukuata— wadila nʼebe nganyi? Dibutuka ne kuhaula, tshiole ne muele wa nvita; neakusambe nganyi? Bana bebe ba balume bakufua tshihuka badi balala hanshi mu masanga a misesu yonso, bu ngulungu mukuate mu bukuondo; badi bûle tente ne tshiji tshia Yehowa, ne kubela kua Nzambi webe. Nunku unvua bualu ebu, wewe muena dikenga, udi mukuatshike, kadi kenku maluvu a nvinyo nansha: Mukelenge webe Yehowa, Nzambi webe, udi wakuila bantu bandi mu tshilumbu tshiabo, udi wamba dî edi ne, Tangila, nakumusha luhanza lua ditenkakana mu tshianza tshiebe, nakûmusha luhanza lua tshiji tshianyi tshikole; kuena unuinamu kabidi nansha. Nenduteke mu tshianza tshia badi bakukengesha, bakukuambila ne, Koba nyima bua tuetu tuhite ha nyima hebe! Ne wewe wakuvuisha nyima webe bu buloba, bu musesu mene bua bantu bahitshilemu. Tabala, tabala, wewe Siona, udiluatshishe bukole buebe; udiluatshishe bivualu biebe bilengele, wewe Yelushalema, musoko wa tshijila! Bualu bua ku dituku edi tô ne ku mpala udi kayi mutengula ne udi mubiha kabena babuela munda muebe kabidi. Umuke mu dinfuenkenya, uditutule hamʼbidi hebe; juka, shikama mu nkuasa wa bukelenge, wewe Yelushalema; udisululuile nkanu idi ha nshingu hebe, wewe muana mukashi muhika wa Siona. Bua Yehowa udi wamba dî ne, Bakanuhana tshianana, nebanuhikule kabayi banuhikula ne argent. Bua Mukelenge Yehowa udi wamba dî edi ne, Bantu banyi bakahueka ku Ejipitu ku tshibangidilu bua kushikamaku tshituha, ne Bena Ashû bakabakengesha hatuhu. Nunku mpindiu Yehowa udi ukonka ne, Ndi mmona tshinyi kunoko, bualu bua bakuya ne bantu banyi mu buhika tshianana? Yehowa udi wamba ne, Badi babakokesha badi bela bibingu, ne dina dianyi ditu diahendibua dinda tô ne dilolo. Nunku bantu banyi nebamanye dina dianyi; nunku nebamanye halua difuku diadia ne, Mmeme Yehowa udi wamba dî edi; ka meme ndiku. Mona makasa a muntu udi ulua ne lumu luimpe bu mudiu malengele ha mikuna, udi umuangalasha lumu lua ditalala, udi ulua ne lumu lua diakalengele, udi umuangalasha lumu lua luhandu, udi wambila Siona ne, Nzambi webe udi ukokesha! Unvua! Batentekedi bebe badi babandisha mei abo, badi bimba misambu diatshimue; bualu bua nebamone dihingana dia Yehowa ku Siona ne mesu abo mene. Bandishai mei enu diatshimue mu kuimba kua misambu, nuenu miaba ya mu Yelushalema yakadi bikulu; bualu bua Yehowa wakusamba bantu bandi, wakuhikula Yelushalema. Yehowa wakuvula tshilulu ha diboko diandi dia tshijila ku mesu kua bisamba bionso bia bantu; ne bonso ba kunfudilu kua buloba bakumona luhandu lua Nzambi wetu. Umukai, umukai, nuluhuke mu muaba wawa, kanulengi tshintu tshidi tshibiha! Nuluhuke munkatshi mua musoko au; nudilengeshe, nuenu badi batuala malonga a Yehowa. Bualu bua kanulubukimu lukasa, kanunyemi lubilu; bualu bua Yehowa neaye ku mpala kuenu, ne Nzambi wa Isalele neanulame ku nyima kuenu. Monai, muntu wanyi neikale ne diakalengele, neatumbishibue, neahandishibue mulu, neatambe kuikala mulu. Bu muakadi ba bungi ne dikema bua bualu buandi, bualu bua mpala wandi wakadi munyanguke ne dinyanguka dihite dia muntu, ne tshifuanyikishi tshiandi tshiakahita tshia bana ba bantu kunyanguka. Nunku yeye neatabuluishe bisamba bia bungi; bakelenge nebabuikile mukana muabo bua bualu buandi; bualu bua nebamone malu adi bakuabo kabayi banze kubambila; nebelangane meji a malu adibo kabayi banze kunvua. Wakuitabusha bualu butuakunvua nganyi? Diboko dia Yehowa diakubuluibua kudi nganyi? Bualu bua yeye wakakola ku mpala kua Yehowa bu mutshi utshidi lutende, ne bu muji udi uhatuka mu buloba bûme. Kakadi ne tshifuanyikishi anyi bulengele bua tuetu kumutangila, anyi buimpe bua mpala bua tuetu kumunanga. Bakamulengulula, bakamulekela kudi bantu; wakadi muena kanyinganyinga, wakamanya makenga; wakadi bu muntu udi bantu basokoka mpala yabo kudiye, wakadi muhetudibue, ne katuakumuanyisha nansha. Bulelela, wakututuadila makenga etu, wakutuambuila kanyinganyinga ketu; ne tuetu tuakamubala bu mundi mukumibue, mututshibue kudi Nzambi, ne mukengeshibue. Kadi bakamutaha mputa bua mibi yetu, bakamukuma bua malu mabi etu; dikenga didi divuisha ditalala dietu diakadi hamʼbidi handi, ne tuakukoleshibua ku mibundabunda yandi. Buonso buetu tuakubambuka bu mikoko, tuakukudimuka bua kuya muntu wandi nshila muntu wandi nshila; Yehowa wakuteka dihila dia bubi bua buonso buetu hamʼbidi handi. Bakamukengesha, kadi wakadihuekesha, ne kakabulula mukana muandi; bu mukoko udibo baya nʼau ku tshishihelu, bu mukashi wa mukoko udi muhuwe ku mpala kua bakoshi ba miosa yau, yeye kakabulula mukana muandi. Wakumushibua ku kumukengesha ne kumulumbuluisha kubi; ne nganyi wa munkatshi mua bena mulongo bandi wakelangana meji bua bualu buakamukuata, bua yeye wakumushibua mu buloba bua badi ne muoyo, ne bua matomboka a bantu banyi wakashihibua? Bakamuenzela lukita hohamue ne bantu babi ne muntu mubanji bakafueye; kadi yeye kakadi ne diyoyo, ne mei a mashimi kâkadi mukana muandi. Kadi Yehowa wakasua kumukuma, yeye wakamusamisha. Halueye kufila muoyo wandi bu mulambu wa kubuikila nʼau mibi, yeye neatangile tunkanunuma tuandi, nealeheshe matuku a muoyo wandi, ne muanda udi Yehowa musungule bua kuwenza newikale ne diakalengele mu tshianza tshiandi. Yeye neamone kanyinganyinga ka muoyo wandi, neasanke; muntu wanyi muakane neavuishe bantu bangi bakane ne kumanya kuandi kua Nzambi, neabatuadile malu mabi abo. Nunku nemmutahuluile luseke lua bintu hohamue ne bantu banene, ne yeye neabanyangane bintu binyenga mu nvita hohamue ne bantu bakole; bualu bua wakahumuna mashi a muoyo wandi tô ne ku lufu, wakabadibua munkatshi mua bantu babi, hakatualeye mibi ya ba bungi, ne wakakuila benji ba malu mabi. Imba biebe, wewe mukashi wa nkumba, wewe udi kuyi mulele; bandisha mei ebe mu kuimba kua misambu, wela dî dikole, wewe udi kuyi muikale ne didinyenga dia ha kulela! Bualu bua Yehowa udi wamba ne, Bana ba mukashi udi mushale hatuhu badi bahita bana ba mukashi mubaka bungi. Vundisha muaba wa ntenta webe, bavungulule bilulu bikudika bia mu nsubu muebe; kababihihishi nansha, lungakasha mionshi ya ntenta webe, hohela mitondo. Bualu bua wewe neubaluluke ku tshianza tshia balume ne ku tshianza tshia bakashi; tunkanunuma tuebe netuhiane buhianyi bua bisamba bia bantu, nebashikame mu misoko yakadi bikulu. Nzambi webe udi wamba ne, Kutshinyi; bualu bua bundu kabuena bukukuata; kubuandakanyi, bualu bua kabena bakufuisha bundu. Bualu bua wewe neuhue bundu bua bunsongakashi buebe muoyo; kuena uvuluka kabidi tshihendu tshiakakuhendabo nʼatshi hawakadi mukashi wa mu lufuila. Bua Mufuki webe udi bayebe, Yehowa wa misumba ndina diandi. Wa Tshijila wa Isalele udi Muhikudi webe; nebamubikile ne, Nzambi wa buloba buonso. Bualu bua Yehowa wakumbikila bu mukashi mulekedibue ne munyingalashibue mu mutshima wandi, bu mukashi mubakibue mu bunsongakashi buandi hamuhidiabo. Yehowa Muhikudi webe udi wamba ne, Nakukulekela katuha kihi, kadi nenkuhingashe kundi ne luse lunene. Mu tshiji tshitamba hukole nakasokoka mpala wanyi kûdi katuha kihi kadi mu dinanga dia tshiendelele nenkufuile luse. Bua bualu ebu budi bu muakadi matuku a Noa kundi; bua bu munakadi tshiha bua mai a nvula mu matuku a Noa ne, Kaena alua ha buloba kabidi, nunku nakuditshiha ne, Tshiena nkuata nʼebe tshiji kabidi, tshiena nkubela. Bualu bua mikuna mile idi mua kumuka, ne mikuna mihuekele idi mua kuzakashibua, kadi dinanga dianyi kadiena diumuka kûdi, ne tshihungidi tshianyi tshia ditalala katshiena tshiumushibua, mudi Yehowa udi ukufuila luse wamba. Yehowa udi wamba ne, Wewe udibo bakengesha, udibo basumpakasha ne tshihehele, udi kuyi musambibue, mona, nenteke mabue ebe munkatshi mua mabue a antimoine, nenshimike bishimikidi biebe ne mabue a saphir. Nengase bibumba bia mu nsubu yebe ne mabue a rubis, nengase bibi bia musoko webe ne mabue a escarboucle, ne ngumbu yebe yonso idi ikunyunguluka ne mabue a mushinga mukole. Bana bebe bonso nebikale bayidi ba Yehowa; ditalala dia bana bebe nedikale dinene. Nebakushimike mu buakane; wewe newikale mu muaba ûdi ushiya makenga kule, bualu bua kuena wikala ne bualu bua kutshina; ne buowa nebushale kule nʼebe, bualu bua kabuena bulua ha buihi nʼebe. Mona, biakutekela muntu diyoyo, kadiena difuma kundi; muntu yonso udi ukulekela diyoyo neabutuke bua bualu buebe. Tangila, nakufuka mutudi wa biamu udi uhuhisha kadilu ka makala ne udi uhatula tshielelu tshia nvita tshiakanangane ne mudimu watshi; ne nakufuka muhaudi bua kuhauleye; kakuena tshielelu tshia nvita tshidibo batula bua kukuluisha nʼatshi tshidi mua kuikala ne diakalengele; wewe neutuishe ludimi luonso ludibo babandisha bua kukubanda nʼalu mu tshilumbu. Ebu mbuhianyi bua badi bakuatshila Yehowa mudimu, ne eku nkubingishibua kuabo kudi kufuma kundi. Telejai! Nuenu bonso badi ne nyota, nulue bienu ku mai; nansha kanuyi ne argent, nulue bienu, nusumbe bienu, nudie bienu! Eyo, nulue bienu, nusumbe nvinyo ne mabele kanuyi ne argent, kanuyi ne mushinga. Munyi munudi nuidikishila bantu argent bua kusumba tshidi katshiyi bidia? Nudi nufila luhetu lua ku mudimu wenu bua kusumba tshidi katshiyi tshinukuatshisha munyi? Binuangunvuila bimpe, nenudie tshintu tshidi tshilengele, ne mitshima yenu neyisanke mu bia kudia bidi ne manyi. Telejai matshu enu, nulue kundi; nunvue bienu, nenuikale ne muoyo. Bua nempunge nʼenu tshihungidi tshia tshiendelele, tshidi luse lunajadikila Davidi kashidi. Monai, nakamusungula bu mumanyi wanyi kudi bantu, bu mukokeshi wabo ne kapitene ka bantu. Monai, wewe neubikile tshisamba tshiudi kuyi muanze kumanya, ne bisamba bidi kabiyi bianze kukumanya nebinyemene kûdi, bualu bua Yehowa Nzambi webe, ne bua Wa Tshijila wa Isalele; bua yeye wakukutumbisha. Yehowa udi wamba ne, Keba Yehowa haudi mumanye mua kumusangana; umubikidile hatshidiye ha buihi. Muntu mubi alekele kuenda mu nshila wandi mubi, udi kayi muakane alekele meji andi mabi; ahingane biandi kudi Yehowa, yeye neamufuile luse; ne kudi Nzambi wetu, bualu bua yeye neatambe kumubuikidila mibi yandi. Bualu bua meji anyi kaena meji enu, ne nshila yenu kayena nshila yanyi. Bualu bua bu mudi diulu dihita buloba kuikala mulu, muomumue mudi nshila yanyi ihita nshila yenu kuikala mulu, ne mudi meji anyi ahita meji enu kuikala mulu. Bualu bua bu mudi nvula uloka, ne bu mudi neige ifuma mu diulu, ne kayena ihinganamu kabidi kayiyi mianze kumiamina mai ha buloba ne kubumeneshila midioko ne kubusampishila mitshi, ivuishila muku nyi maminu, ne ihesha mudi wa bia kudia bia kudia biandi, nunku dî didi dihatuka mukana muanyi nedikale muomumue; kadiena dihingana kundi hatuhu, kadiyi dianze kuenza muanda undi musue dienze, kadiyi dianze kushikisha muanda unakaditumina. Bualu bua nenduhuke ne disanka, nebanulombole ne ditalala; mikuna minene ne mikuna mikese neyibishe mei ai mu kuimba kua misambu ku mpala kuenu; mitshi yonso ya mu mpata neyitutakashe bianza. Mu muaba muakadi meba mutshi wa cyprès neutoloke, mu muaba muakadi mungonge mutshi wa myrte neutoloke; Yoyo neyikale kudi Yehowa bu tshivulukidi, bu tshimanyinu tshia tshiendelele tshidibo kabayi mua kujimisha. Yehowa udi wamba dî edi ne, Nulonde kulumbulula kuakane, nuenze malu makane; bua luhandu luanyi ludi luamba kumueneka, ne buakane buanyi mu luhandu budi buamba kubuluibua. Udi muvudishibue disanka mmuntu udi wenza muanda eu, muana wa muntu udi ûlamata bikole, udi ulamata dituku dia Lumingu bua kadinyangi, udi ukanda tshianza tshiandi bua katshienji bualu bubi. Muena tshisamba tshia bende wakalamata kudi Yehowa kambi biandi ne, Yehowa neantahulule kudi bantu bandi bulelela; ne muntu mutungula kambi biandi ne, Mona, ndi mutshi mûme. Bualu bua Yehowa udi wamba dî edi ne, Ndi ngambila bantu batungula badi bajidila matuku anyi a Lumingu, badi basungula malu adi ansankisha, ne badi balamata ku tshihungidi tshianyi ne, Nembahe tshivulukidi ne dina mu nsubu muanyi ne munda mua ngumbu yanyi bidi bihita bana balume ne bana bakashi buimpe; nembahe dina dia tshiendelele didi kadiyi dijimishibua. Bantu ba bende kabidi badi balamata kudi Yehowa bua kumukuatshila mudimu, bua kunanga dina dia Yehowa, ne bua kuikalabo bantu bandi, muntu yonso udi ujidila dituku dia Lumingu bua kadinyangi, udi ulamata tshihungidi tshianyi bikole— nendue ne bantu aba ku mukuna wanyi wa tshijila, nembavudishile disanka mu nsubu wanyi wa kutendelela. Milambu yabo ya kuosha ne milambu yabo ya bia kudia neyitabushibue ha tshioshelu tshianyi; bualu bua nebabikile nsubu wanyi ne, Nsuhu wa tshitendelelu tshia bantu bonso. Mukelenge Yehowa, udi usangisha bamuangalashibue ba mu Isalele, udi wamba ne, Nensangishe bakuabo kudiye kabidi, ha mutu ha banakamana kusangisha diambedi. Nuenu nyama yonso ya mu mpata, nulue kudia, ne nuenu nyama yonso ya muitu kabidi. Batentekedi bandi badi bafofo, buonso buabo kabena ne meji, buonso buabo badi bu mbua idi ihuwa, idi kayiyi mua kubuluka; idi ilotakana, idi ilala hanshi, idi misue kulala tulu. Mbua idi ne lumpukusu kabidi, kayena mua kukuta; ne bantu aba badi balami ba mikoko badi kabayi ne meji. Buonso buabo bakuhingana bua kuenda mu nshila yabo, muntu ne muntu udikebela luhetu luandi, kakuyi muntu udi kayi wenza nunku. Badi bamba ne, Luai bienu, ndi ndua ne nvinyo, netûshe mafu etu tente ne maluvu makole; makelela neikale bu mudi lelu, dituku ditamba bunene. Muntu muakane udi ufua, kakuena muntu udi uteka bualu ebu mu mutshima wandi; bantu badi banemeka Nzambi badi bumushibua, kakuena muntu udi wela meji a muanda eu. Bualu bua muntu muakane udi umushibua ku malu mabi, udi ubuela biandi mu ditalala; badi bikisha mu malalu abo, muntu ne muntu mene udi wenda mu buakane buandi. Kadi Semenai bienu ha buihi, nuenu bana ba mukashi mutempeshanganyi wa mbuku, baledibue kudi muena masandi ne kudi mukashi wa ndumba. Nudi nuseka nganyi? Nudi nubuluila nganyi mukana bitongatonga, nudi nuhatuila nganyi ndimi yenu? Kanuena bana baledibue kudi bantombokedi, tunkanunuina tua mashimi, anyi? Nuenu badi badisonsuela lukuka lua masandi munkatshi mua mitshi ya telebinta, ne muinshi mua mutshi wonso udi ne muoyo; badi bashiha bana mu bibanda muinshi mua mitanta ya mabue. Munkatshi mua mabue a mu tshibanda adi ne busenu mudi luseke luwakusungula; mabue au, mabue au mene adi luseke luebe; wakuahumuina mulambu wa bia kunua, wakufila mulambu wa bia kudia kudiu. Mutshima wanyi udi mua kuholeshibua bua malu â, anyi? Wakuteka bualu buebe ha mutu ha mukuna mule mubande mulu; wakubandahu bua kufila mulambu. Wakushimika tshivulukidi tshiebe tshia nzambi wa tshianana ku nyima kua bibi ne kua mpanda ya nsubu; bualu bua wakundekela meme, wakuvunguluila mukuabo bilulu bia bulalu buebe, wakubandahu, wakubuvundisha, wakuhunga nʼabo tshihungidi, wakunanga bulalu buabo, wakubulongoluela muaba. Wakaya biebe kudi nfumu Moleke ne manyi, wakavudisha manananshi ebe, wakatuma miloho yebe kule, wakadihuekesha tô ne ku Muaba wa Bafue. Wakadihangisha bualu bua bule bua luendu luebe, kadi kuakamba ne, Bualu ebu budi hatuhu! Wakamona bukole buebe buhingana kûdi, nunku kuakahunga nansha. Wakutshina nganyi ne nganyi wakunkuatshisha buowa, bua wewe udi ushima, ne kuakunvuluka, kuakuteka bualu buanyi mu mutshima webe? Tshiena muhuwe talalâ, tô ne musangu mule mene, ne bua muanda eu kuena untshina, anyi? Nengambile bantu bua buakane buebe ne bua bienzedi biebe, kadi kabiena bikukuatshisha. Hawadila, mpingu yebe ya tshianana iwakusangisha ikuhandishe! Luhehele neluye nʼai, muhuya neumushe buonso buai. Kadi wanyemena kundi neahiane buloba, neahiane mukuna wanyi wa tshijila. Nebambe dî edi ne, Elai, elai bienu mabula, longololai nshila, numushe tshilenduishi tshionso mu nshila wa bantu banyi. Bualu bua Wa mu Diulu ne udi Mubandishibue mulu udi mushikame mujadikibue mu nkuasa wandi wa butumbi tshiendelele, udi dina diandi ne, Wa Tshijila, udi wamba ne, Ndi mushikame mu muaba udi mulu ne udi wa tshijila, ndi mushikame kabidi ne muntu udi ne mutshima munyingalale ne mudihuekeshe, bua kusangasha nyuma wa udi mudihuekeshe ne bua kusangasha mutshima wa muntu udi unyingalala bua bubi. Bualu bua tshiena ntandangana nʼandi tshiendelele, tshiena ngikala ne tshiji matuku onso; bua nyuma wa muntu udi ufuma kundi, ne nakufuka muhuya wa muoyo. Bua bubi bua lukuka luandi nakadi nʼandi tshiji, nakamukuma, nakasokoka mpala wanyi ne nakadi ne tshiji; kadi yeye wakananukila kuhingana ku nyima mu nshila wakadi mutshima wandi musue kuendela. Nakutangila bienzedi biandi, ne nenshikishe disama diandi; nemmulombole kabidi, nemmufute ne busambi, nenfukile bianyi bena madilu bandi mamuma a ku mishiku. Yehowa udi wamba ne, Ditalala, ditalala dikale kudi muntu udi kule ne kudi muntu udi ha buihi; nemmuondahe. Kadi bantu babi badi bu mai manene adi asampuka, bualu bua kaena mua kubatama, ne mai au adi asampula bitotshi ne bivuanduvuandu. Nzambi wanyi udi wamba ne, Kakuena ditalala kudi bantu babi. Bandisha dî diebe bikole, kudikandi nansha, bandisha dî diebe bu dî dia mpungi, manyisha bantu banyi kushiha kuabo kua mikenji ne bana ba Yakoba mihi yabo. Kadi badi bakeba lungenyi kundi ku dituku ku dituku, badi ne disanka bua kumanyabo nshila yanyi, bu mudi bantu badi benza malu adi makane, ne badi kabayi balekela kulonda mikenji ya Nzambi wabo benza; badi bandomba mikenji idi mua kuyuisha buakane, badi basanka bua kusemena ha buihi ne Nzambi. Badi bakonka ne, Tuakajila bia kudia, kuakututangila munyi? Tuakunyingalasha mitshima yetu, wewe wakulengulula muanda eu munyi? Tangilai, mu dituku dinudi nujila bia kudia nudi milonda anu malu adi mitshima yenu misue kuenza, nudi nukengesha bena mudimu benu bonso. Monai, nudi nujila bia kudia bua kuikala ne diyoyo ne difuilangana, bua kutuangana ne bisusu bia bantu babi. Kujila kua bia kudia bu kuenu dituku edi kakuena mua kunvuisha dî dienu mu diulu. Kujila aku kua bia kudia nkujila kunakusungula, ndituku dia kunyingalasha mutshima wandi, anyi? Kudi bua muntu kuinama mutu wandi bu disele, bua kuadisha bilulu bikayabala ne butue muinshi muandi, anyi? Neubikile bualu ebu ne, Kujila kua bia kudia, ne dituku didi disankisha Yehowa, anyi? Eku kakuena kujila kua bia kudia kunakusungula, anyi? Mbua kusulula nkanu ya malu mabi, mbua kusulula majita adi asuika mutshi wa tshikokedi, mbua kulekela bakengeshibue, ne mbua kutshibula mutshi wa tshikokedi wonso. Eku kakuena kufila kua bia kudia biebe kudi badi ne nzala, ne bua kulua ne bahele badi kabayi ne muaba wa kushikama mu nsubu muebe, anyi? Eku kakuena kuluatshisha kua udi ne butaka tshilulu hawamutangila butaka, ne bua wewe kusokomi kudi muanʼenu wa mashi amue, anyi? Nunku munya webe neutshie bu mudi kabundubundu katshia, ne kusangala kuebe nekumueneke lukasa. Buakane buebe mu tshilumbu nebudianjile ku mpala kuebe, ne butumbi bua Yehowa nebukulame ku nyima, Hashishe wewe neumubikile, ne Yehowa neitabe kudi; neumudidile, ne yeye neakuitabe ne, Ndiku. Biûmusha mutshi wa tshikokedi munkatshi muenu; biûmusha kufunkuna kua munu kua dihetu, ne kuamba kua mei mabi; biwafila tshidi mutshima webe musue kudi badi ne nzala, biwakutshisha kujinga kua badi ne dikenga, hashishe munya webe neutemene mu mîdima, ne mufitu webe neulue bu munda munya. Yehowa neakulombele matuku onso, neaukutshishe muoyo webe mu tshikondo tshia munanga, neakoleshe mifuba yebe. Wewe newikale bu budimi budibo bamiamina mai, bu mushimi wa mai udi mai au kâyi akama. Bamue ba bantu bebe nebase tshiakabidi mu miaba yakadi nushale bikulu; wewe neubishe kabidi bishimikidi biakashimikabo mu bikondo bia bungi bia diambedi. Nebakubikile ne, Muibaki wa ngumbu yakushimbuka, muhingashi wa misesu ya kushikamamu. Biwalukisha dikasa diebe bua kadinyangi dituku dia Lumingu, bua wewe kuenji malu adi mutshima webe musue kuenza mu dituku dianyi dia tshijila; biwabikila dituku dia Lumingu ne, Dituku dia disanka, ne dituku dia tshijila dia Yehowa ne, Dituku dia butumbi; biwatumbisha dituku edi, kuyi ulonda nshila yebe, kuyi ukeba malu adi mutshima webe musue, kuyi wamba mei a hatuhu; nunku newikale ne disanka mu Yehowa, ne meme nenkuendeshe ha mutu ha mikuna ya ha buloba. Nenkudishe ne buhianyi bua Yakoba, tatu webe, bualu bua mukana mua Yehowa muakuamba nunku. Tangilai, tshianza tshia Yehowa katshiena tshitamba buihi bua katshisungidi bantu, ne matshu andi kaena mahate bua kâmanyi mua kunvua. Kadi malu mabi enu akadi alua hankatshi henu ne Nzambi wenu, ne mibi yenu yakadi isokoka mpala wandi kunudi, nunku yeye kena unvua. Bualu bua bianza bienu bidi binyanguke ne mashi, minu yenu idi minyanguke ne malu mabi; mishiku yenu yakuakula mashimi, ndimi yenu idi yamba mei mabi. Kakuena muntu udi ufunda tshilumbu ne mutshima muakane, kakuena muntu udi wakula tshilumbu tshiandi mu bulelela; buonso buabo badi beyemena malu a hatuhu, badi bamba mashimi; badi bimita mafu adi ne malu mabi ne badi balela bualu bubi. Badi batoya makela a nyoka wa dikala, badi baluka butande bua ntanda; wadia makela â udi ufua, ne dikela didi muntu ushiha didi ditoya nyoka wa dikala. Matande adibo baluka kaena mua kuandamuka bivualu biabo, ne bantu kabena mua kudiluatshisha bienzedi biabo. Bienzedi biabo bidi bienzedi bibi, ne bienzedi bia diyoyo bidi mu bianza biabo. Makasa abo adi aya lubilu kudi malu mabi, adi adiendesha lubilu bua kumatshisha mashi a muntu udi kayi ne tshilumbu; meji abo adi meji mabi, kubutuka ne kuoneka kudi mu nshila yabo minene. Kabena bamanye nshila wa ditalala, kakuena kulumbulula kuakane mu bidiatshilu biabo; bakukonyangasha nshila yabo; muntu yonso udi wendelamu kena mumanye ditalala. Bua malu â kulumbulula kuakane kudi kule nʼetu, ne buakane kabuena butuheta; tudi tukeba munya, kadi monai, midima; tudi tukeba dinkenke, kadi tudi tuenda mu mufitu. Tudi tububuta bua kuheta tshimanu bu mudi bafofo benza; e, tudi tububuta bu badi kabayi ne mesu; tudi tulenduka munda munya bu mutudi tuenza mu kajimbʼa buenyi; munkatshi mua batshidi ne bukole buabo buonso tudi bu bantu bafue. Tudi tukanga bu nkashama, tudi tudila ne muadi bu nyunyu wa nkutshi; tudi tukeba kulumbulula kuakane, ne kakuenaku; tudi tukeba luhandu, ne ludi kule nʼetu. Bualu bua malu mabi etu akuvulangana ku mpala kuebe, ne mihi yetu idi ituhisha; bualu bua malu mabi etu adi ikala nʼetu, ne ludi bamanye mibi yetu: ludi tumutombokela, ne tudi tuhidia Yehowa; tudi tuhingana, katuyi tulonda Nzambi wetu; tudi tuamba mei a dikengesha ne ditomboka; tudi tuelangana meji a mashimi ne tudi tuamba mei a mashimi adi afuma mu mitshima yetu. Ka kulumbulula kuakane kudi kuhingashila ku nyima, ne buakane budi buimana ha bule; bua bushuwa budi bulenduka, dudishinda mu muaba munene wa musoko, ne buakane kabuena bumanye mua kubuelamu. Bulelela, bushuwa kabuena bumueneka, ne muntu udi wehuka ku malu mabi udi udivuisha tshintu tshia kuhaulabo. Yehowa wakatangila bualu ebu, ne buakamufikisha munda ne, Kulumbulula kuakane kakuenaku. Yeye wakamona muakadiku kakuyi muntu, wakakema bualu bua kakuakadi muntu bua kuakuileye bushuwa ne buakane; nunku diboko diandi mene diakamuvuishila luhandu, ne buakane buandi buakamujadika. Yeye wakavuala buakane bu kazaku ka tshiamu ka nvita, wakasa tshifulu tshia luhandu ha mutu handi, wakavuala bivualu bia disombuela bu bilulu biandi, wakadiluatshisha lukunukunu lua nvita bu tshikowelu. Bu mudi bienzedi biabo, mbu mudiye ubafuta, tshiji tshiandi kudi hafuilanganyi nʼandi, difutu diabo kudi badi nʼandi lukuna; neafute ba mu maloba a ku muelelu wa mai manene difutu diabo. Nunku nebatshine dina dia Yehowa ku wesete, nebanemeke butumbi buandi ku luseke ludi diba dibanda; bualu bua yeye nealue bu musulu wa mai adi ahueka lubilu, udi muhuya wa Yehowa wendesha. Yehowa udi wamba ne, Nealue ku Siona bu Muhikudi, kudi ba mu Yakoba badi bakudimuna mitshima bua kulekela malu mabi. Yehowa udi wamba ne, Bu mundi ngamba, etshi ntshihungidi tshindi mpunga nʼabo: Nyuma wanyi udi hamʼbidi hebe, ne mei anakuteka mukana muebe, kabiena biumuka mukana muebe, anyi mukana mua bana bebe baledibue, anyi mukana mua bikulu bebe, ku dituku edi to ne tshiendelele. Yehowa udi wamba nunku. Juka, temena; bua munya webe wakulua, ne butumbi bua Yehowa buakubanda, buakukutemena. Bua mena, midima neyibuikile buloba, ne mîdima mifike-fitutû neyibuikile bantu; kadi Yehowa neabande hamʼbidi hebe mene, butumbi buandi nebumueneshibue hamʼbidi hebe. Bisamba bia bantu nebilue ku munya webe, bakelenge nebalue ku dinkenke dia kubanda kua munya webe. Banduluka biebe, tangila ku nseke yonso; buonso buabo badi badisangishe hohamue, badi balua kûdi; bana bebe ba balume nebafume ku miaba idi kule, bana bebe ba bakashi nebalue batuadibue mu lubese. Mu diba adi neumone muanda eu, neutambe kusanka, mutshima webe neukume, neûle ne disanka; bua nebakudimune biuma bidi bituadibue ha mai manene, nebanfikishe kûdi, ne luhetu lua bisamba bia bantu nelufike kûdi. Tshisumbu tshia tumelo netshikubuikile, bana balume ba tumelo ba ku Midiyana ne ba ku Efa nehalue, tumelo atu tuonso tua ku Sheba netulue; netulue ne or ne manananshi, netumanyishe bantu bua butumbi bua Yehowa. Bisumbu bionso bia mikoko ya ku Kedâ nebisangishibue kûdi, bimpanga bia ku Nebayota nebikukuatshile mudimu; nebibande ha tshioshelu tshianyi bu mulambu undi mua kuitabusha; nendengeshe nsubu wanyi udi ne butumbi. Aba mbanganyi badi baya lukasa bu ditutu, bu nyunyu ya nkutshi idi ibuela ha masoso a nsubu wai? Bulelela, maloba a ku muelelu wa mai neangindile, ne matu a ku Tâshishi neadianjile kufika, bua kulua ne bana bebe ba balume ku miaba idi kule, balua ne argent wabo ne or wabo diatshimue nʼabo, bua muanda wa dina dia Yehowa Nzambi webe, ne bua muanda wa Wa Tshijila wa Isalele, bualu bua yeye wakukutumbisha. Bantu ba mu bisamba bia bende nebibake ngumbu yebe kabidi, bakelenge babo nebakukuatshile mudimu; bualu bua nakakukuma mu tshiji tshianyi, kadi mu dinanga dianyi dinakukulesha nakukufuila luse. Bibi biebe nebikale buashi matuku onso; kabena babinshila munya anyi butuku; bua bantu babuelemu bakutuadila biuma bia bisamba bia bantu, balua ne banfumu babo balombodibue mu mulongo bu bahika bamane kukuata. Bua tshisamba atshi ne bukelenge abu bidi kabiyi bikukuatshila mudimu nebijimine; bulelela, nekabutule bisamba abi tshishiki. Butumbi bua Lebanona nebufike kûdi, mutshi wa cyprès, wa orme ne wa buis hohamue, bua kulengesha nʼai nsubu wanyi wa tshijila; nenvuishe tshidiatshilu tshia makasa anyi muaba wa butumbi. Bana ba balume ba bantu aba bakakukengesha nebalue badinamina hanshi kûdi; bantu aba bonso bakakuhetula nebatue mpala yabo hanshi tô ne ku makasa ebe mene; nebakubikile ne, Musoko wa Yehowa, Siona wa Wa Tshijila wa Isalele. Mu muaba wa kuikala biebe, musoko mushiye hatuhu wa wakadibo nʼau lukuna, kakuyi muntu wahitshila munkatshi muebe, mpindiu nenkuvishe musoko udi ne butumbi tshiendelele, disanka dia ku tshikondo tô ne ku tshikondo tshikuabo. Newamue mabele a bisamba bia bantu, newamue mabele a bakelenge; neumanye ne, Yeye, Yehowa, udi Musungidi wanyi ne Muhikudi wanyi, Mutambe Bukole wa Yakoba. Nendue ne or mu muaba muakadi tshiamu tshia mitaku, nendue ne argent mu muaba muakadi tshiamu tshifike, nendue ne tshiamu tshia mitaku mu muaba muakadi mabaya, ne tshiamu tshifike mu muaba muakadi mabue. Nenvuishe Ditalala bukokeshi buebe, nenvuishe Buakane nfumu webe. Kabena bunvua diyoyo kabidi mu buloba buebe, kabena bunvua kubutuka anyi kuoneka ku matshika a buloba buebe; kadi neubikile ngumbu yebe ne, Luhandu, newidike bibi biebe ne, Butumbi. Diba kadiena dikala munya webe mu diba dia munya, ne ngondo kena ukutemena dinkenke; kadi Yehowa neikale munya wa tshiendelele kûdi, ne Nzambi webe neikale butumbi buebe. Diba diebe kadiena dihueka kabidi, ngondo webe kena ubuela kabidi; bualu bua Yehowa neikale munya webe wa tshiendelele, ne matuku a madilu ebe neashike. Bantu bebe bonso nebikale bakane; nebahiane buloba tshiendelele, bu lutonga lua dikuna dianyi, bu mudimu wa bianza bianyi, bua meme ntumbishibue. Muntu udi utamba kuhuekela nealue tshisamba, udi mutambe bukese nealue tshisamba tshihite bukole. Meme Yehowa nengendeshe muanda eu mu tshikondo tshiau. Nyuma wa Mukelenge Yehowa udi hamʼbidi hanyi, bualu bua Yehowa wakunjidika ne manyi ha mutu hanyi bua meme kuambila badi mu dikenga lumu luimpe; wakuntuma bua kusangasha mitshima ya badi batamba kunyingalala, bua kuambila badi babueshibue mu buhika dî bua budishikaminyi buabo, ne bua kuambila badi basuikibue mu nsubu wa lukanu bua dikohoka diabo; wakuntuma bua kuambila bantu bua tshidimu tshia diakalengele dia Yehowa, ne bua dituku dia disombuela dia Nzambi wetu; wakuntuma bua kusamba bonso badi mu madilu, bua kusamba badi badila mu Siona, bua kubaha nkata mulengele bua kubuesha ku mutu mu muaba wa butue, mafuta a disanka mu muaba wa madilu, tshivualu tshia butumbi mu muaba wa mutshima muneme bujitu; bua babikidibue ne, Mitshi ya telebinta ya buakane, ditentula dia Yehowa, bua yeye atumbishibue. Nebase tshiakabidi nsubu yakadi bikulu bia kale, nebabishe kabidi miaba yakadi mibutuke diambedi; nebalongolole misoko yakadi minyanguke, yakadi mibutuke bikondo bia bungi. Bantu ba mu bisamba bia bende nebimaneku, nebadishe bisumbu bia bimuna bienu, ba ku maloba a ba bende nebikale bendeshi benu ba lukasu ludibo badima nʼalu ne balengeshi ba mionshi yenu ya tumuma tua nvinyo. Kadi nuenu nenubikidibue ne, Bakuidi ba Yehowa; bantu nebanuidike dina ne, Bi kuatshi ba mudimu wa Nzambi wetu. Nenudie biuma bia bisamba bia bantu, ne nenuditumbishe mu butumbi buabo. Mu muaba wa bundu buenu nenuikale ne nseke ibidi ya buhianyi, mu muaba wa dikeheshibua nebikale ne disanka mu buhianyi buabo; nunku nebikale ne bituha bibidi bia buhianyi mu buloba buabo; disanka diabo nedikale disanka dia tshiendelele. Bualu bua meme Yehowa ndi musue kulumbulula kuakane, ndi nkina kunyenga kua bina ne kuenza kua malu mabi; nembahe difutu diabo mu lulamatu luanyi lua bushuwa, nempunge nʼabo tshihungidi tshia tshiendelele. Bana bakalelabo nebamanyibue munkatshi mua bisamba bia bantu, ne bana badi maminu abo nebamanyibue munkatshi mua bantu; bonso badi babamona nebabitabushe ne, Badi bantu badi Yehowa muvudishile disanka. Nentambe kusanka mu Yehowa, mutshima wanyi neutambe kusanka mu Nzambi wanyi; bualu bua yeye wakunduatshisha bivualu bia luhandu, wakumbuikila ne tshikowelu tshia buakane, bu mudi mubaki wa mukashi udilengesha ne nkata mulengele, ne bu mudi mukashi udi wamba kubuela mu dibaka udilengesha ne bilenga biandi. Bualu bua bu mudi buloba bumenesha lutonga luabu, bu mudi tshibidi tshitolesha maminu adibo bakunamu, nunku Mukelenge Yehowa neameneshe buakane ne butumbi ku mpala kua bisamba bionso bia bantu. Bua bualu bua Siona tshiena mpuwa talalâ, ne bua bualu bua Yelushalema tshiena ngikala hola, tô ne haluhuka kubingishibua kuandi bu dinkenke, ne luhandu luandi bu tshimunyi tshidi tshitema. Ba mu bisamba bia bantu nebamone kubingishibua kuebe, ne banfumu bonso nebamone butumbi buebe; nebakubikile ku dina dihia-dihia didi mukana mua Yehowa mukuinyike. Newikale tshifulu tshia bulengele mu tshianza tshia Yehowa, ne tshifulu tshia bukelenge mu tshianza tshia Nzambi webe. Kabena bakubikila kabidi ne, Mushiya hatuhu; kabena babikila buloba buebe kabidi ne, Bubutuke; kadi nebakubikile ne, Disanka-dianyi-didi-kudiye, nebabikile buloba buebe ne, Mubakibue; bualu bua Yehowa udi nʼebe disanka, ne buloba buebe nebuikale bu mukashi mubakibue kudi mulume. Bu mudi nsongalume ubaka mukashi utshidi kamama, muibaki webe neikale bayebe, ne bu mudi mubaki wa mukashi usanka bua mukashi udiye ubaka, nunku Nzambi webe neasanke bua bualu buebe. Nakuteka batentekedi ha mutu ha ngumbu yebe, Yelushalema; kabena bahuwa talalâ munya anyi butuku. Nuenu badi bavuluki ba Yehowa mu mitshima yenu, kanuikadi ne dikisha, kanumuki yeye dikisha kabidi tô ne hajadikeye Yelushalema, ne hamuvuisheye musoko udi ne butumbi ha buloba. Yehowa wakuditshiha ku tshianza tshiandi tshia balume, ne ku diboko diandi dikole ne, Bulelela, tshiena nfila maminu ebe kabidi bu bia kudia kudi badi nʼebe lukuna; ne bantu ba bende kabena banua nyinyo webe muhia-muhia uwakukuatshila mudimu. Kadi badi babihuola nebabidie ne nebatumbishe Yehowa; badi basangisha tumuma nebanue nvinyo yatu mu biendelu bia tshitendelelu tshianyi. Hitai, hitai mu bibuelelu, longoluelai bantu nshila; elai, elai mabula mu tshibebe, umushaimu mabuo, bandishilai bantu dibendela. Monai, Yehowa wakuela mukenji tô ne kunfudilu kua buloba ne, Ambilai muana mukashi wa Siona ne, Tangila, luhandu luebe ludi lulua; tangila, yeye udi ulua ne bukenji buandi, ne udi utuma difutu diandi ku mpala kuandi. Nebababikile ne, Bantu ba tshijila, Bahikudibue kudi Yehowa; nebakubikile ne, Musoko mukebibue, musoko udi kauyi mushiya hatuhu. Eu nganyi udi ufuma ku Edome, mufume ku Bosela ne bivualu bikunze-kunzû, yeye eu ne bivualu bia butumbi, wenda biandi mu bunene bua bukole buandi? Mmeme muine, ngudi wamba bianyi mei a buakane, muikale ne bukole bukumbane bua kusungila bantu. Bilulu biebe bidi bikunze bualu kai? Bivualu biebe bidi bu bia udi udiata tumuma mu tshikaminu tshia tumuma tua nvinyo munyi? Nakudiata tshikaminu nkayanyi, ne kakuakadi umue wa munkatshi mua bantu wakadi nʼanyi. Bulelela, nakabadiata mu tshiji tshianyi, nakabatua museba hanshi mu njiya yanyi; mashi a mioyo yabo akunsampukila ha bilulu bianyi, nakunyanga bivualu bianyi bionso. Bualu bua dituku dia kusombela diakadi mu mutshima wanyi, tshidimu tshianyi tshia kuhikula bantu banyi tshiakufika. Nakatangila, ne kakuakadi muntu bua kunkuatshisha; nakatamba kukema, kadi kakuakadi muntu bua kunkolesha; nunku diboko dianyi dine diakunvuishila luhandu, ne tshiji tshianyi tshikole tshiakunkolesha. Nakadiata bantu hanshi mu tshiji tshianyi, nakabavuisha bu bantu bakuatshika mu tshiji tshianyi, nakahumuna mashi a mioyo yabo hanshi ha buloba. Nenvuluishe bantu bua bienzedi bia luse lujalame lua Yehowa, bua bienzedi bia Yehowa bidi bimutumbisha, bu mudibi bimpe bua malu onso adi Yehowa mutuenzele, ne bua malu andi manene akuenzeleye Bena Isalele, akubahesheye bu mudi luse luandi, ne bu mudi dikumbana dia dinanga diandi dijalame. Bualu bua yeye wakamba ne, Bulelela, badi bantu banyi, badi bana banyi badi kabayi bandinga; nunku yeye wakalua Musungidi wabo. Mu makenga abo onso yeye wakunvua dikenga, ne muanjelo utu wimana hehi nʼandi wakabasungila; mu dinanga diandi ne mu dibafuila diandi dia luse yeye wakabahikula; wakabambula ne wakabatuala mu matuku onso a kale. Kadi bakamutombokela, bakanyingalasha Nyuma wandi Muimpe; nunku yeye wakadikudimuna bua kuikaleye muena lukuna wabo, ne yeye muine wakaluangana nʼabo. Hashishe, yeye wakavuluka matuku a kale, a Mose ne bantu bandi. Wakaluhula balami ba mikoko yandi mu mai manene udi kudi kunyi? Wakatuma Nyuma wandi Muimpe munkatshi muabo udi kudi kunyi? Wakendesha diboko diandi didi ne butumbi ku luseke lua tshianza tshia balume tshia Mose, wakahandulula mai manene ku mpala kuabo, bua kudiangatshila dina ma tshiendelele, wakabalombola mu ndondo wa mai manene udi kudi kunyi? Bu mudi kabalu kenda mu tshihela bobo kabakalenduka nansha. Bu mudi ngombe idi ihueka mu tshibanda, Nyuma wa Yehowa wakabaha dikisha. Wewe wakalombela bantu bebe nunku bua kudivuishila dina dia butumbi. Tangila hanshi ku muaba webe wa mu diulu, ne ku muaba webe wa tshijila ne wa butumbi, umone biebe. Lukunukunu luebe ne bienzedi biebe binene bidi kudi kunyi? Dijinga dia mu mutshima webe ne luse luebe bidi bikandibua kundi. Bualu bua wewe udi Tatu wetu, nansha bikala Abalahama kayi mutumanye, nansha bikala Isalele kayi mutuitabushe bu bana bandi. Wewe, Yehowa, udi Tatu wetu; Muhikudi wetu wa ku tshibangidilu ndina diebe. Yehowa, munyi mudi utulekela bua tuetu tuhambuke mu nshila yebe, mûdi ukoleshisha mitshima yetu bua tuetu katukutshinyi? Hingisha bisamba bia buhianyi buebe bualu bua bantu bebe. Bantu bebe ba tshijila bakadi ne tshitendelelu tshiebe tshituha tshihi, bena lukuna betu bakutshidiata muinshi mua makasa abo. Tuakulua bu bantu bawakadi kuyi muanze kukokesha diambedi, bu bantu bakadi kabayi babikidibue ku dina diebe. Nakadi kusua bua wewe ubande diulu, uhueke hanshi ha buloba bua mikuna ikanke ku mpala kuebe, bu mudi muanda mulue hosha kahia tshisala, ne hasabisha kadilu mai, bua kumanyisha badi nʼebe lukuna dina diebe, bua ba mu bisamba bia bantu bazakale ku mpala kuebe! Hawakenza malu akatukuatshisha buowa atuakadi katuyi batekemena, wakahueka biebe, mikuna yakakanka ku mpala kuebe. Bua ku bikondo bia kale kakuena muntu wakumana anyi wakujingulula ku matshu, kakuena disu diakumona Nzambi udi muomumue nʼebe, udi ukuatshila badi bamuindila mudimu. Wewe udi wakidila muntu udi wenza bienzedi biakane ne disanka, udi wakidila badi bakuvuluka mu bienzelu biebe. Mona, wewe wakadi ne tshiji, ne tuakenza malu mabi; tuakadimu musangu mule, netusungidibue, anyi? Buonso buetu tuakulua bu muntu mubiha, ne bienzedi bietu biakane bionso biakulua bu tshivualu tshidi tshinyanguke. Buonso buetu ludi tufubidila bu dianyi dia mutshi, ne malu mabi etu adi atûmusba bu mudi luhehele luhehula mabeshi. Kakuena muntu udi udibikila dina diebe, udi udisonsola bua kulamata kûdi; bua wewe wakusokoka mpala webe kutudi, wakutufila mu bukole bua malu mabi etu. Kadi wewe Yehowa udi Tatu wetu; tuetu tudi dima ne wewe udi mufumbi; buonso buetu tudi bintu biwakuenza ku bianza biebe. Yehowa, kuikadi nʼetu tshiji tshikole, ne kuvuluki malu mabi etu tshiendelele. Unvua, tudi tukusengelela ne, Utumone, buonso buetu tudi bantu bebe. Misoko yebe ya tshijila yakulua tshihela, Siona wakulua tshihela, Yelushalema wakulua mubutuke. Nsubu wetu wa tshijila mulengele, kuakadi batatu betu bakutu-mbishilamu wakulua ne kahia, miaba yetu yonso yakadi itusankisha yakulua bikulu. Yehowa, neudikande bua malu â, anyi? Neuhuwe talalâ, neutambe kutukengesha, anyi? Nakadiku bua bantu bakadi kabayi bandombe diambedi bandombele lungenyi, nakamanya mua kumueneka kudi bantu bakadi kabayi bankeba. Nakambila ba mu tshisamba bakadi kabayi badibikidila dina dianyi ne, Meme ndiku, meme ndiku. Nakuolola bianza bianyi dinda tô ne dilolo kudi bantu badi bantombokela, badi benda mu nshila udi kayi muimpe, balonda malu adi bobo bine badihangidishila. Mbantu badi bantatshisha tshiji hatoke misangu yonso, bafila milambu ya hatuhu mu bibidi ne bosha musenga wa manananshi ha matafuadi. Badi bashikame munda mua majambu, badi balala butuku mu miaba idi misokoke; badi badia munyinyi wa ngulube, ne mukelekele wa munyinyi wa tshianana udi mu ngesu yabo; badi bambila muetu ne, Anji kuimana ha nkayebe, kufila hehi nʼanyi bua meme mukutambe kujidibua. Bantu aba badi bu muishi wa kahia mu mimpempe yanyi, kahia kadi katema dinda tô ne dilolo. Yehowa udi wamba ne, Tangila, dî edi didi difundibue ku mpala kuanyi ne, Tshiena mpuwa talalâ, kadi nembahingishile difutu; bulelela, nembahingishile difutu mu biadi biabo, malu mabi enu mene ne malu mabi a batatu benu diatshimue, bualu bua bakosha musenga wa manananshi ha mutu ha mikuna mile, ne bakampenda ha mutu ha mikuna mihi, nembidikishile difutu dia bienzedi biabo bia diambedi dikongoluela mu biadi biabo. Yehowa udi wamba dî edi ne, Bu mudi bantu bamona nvinyo mihia-mihia mu tshisumbu tshia tumuma tua nvinyo, ne badi bamba ne, Kutshinyangi nansha, bualu bua disanka didi munda muatshi, nengenze muomumue bua bualu bua bantu banyi, ne tshiena nshiha buonso buabo. Nempatule tunkanunuma mu Yakoba, nempatule bahianyi ba mikuna yanyi mu Yuda; bantu banakusungula nebahiane buloba, ne badi bankuatshila mudimu nebashikamemu. Shalona nealue budimi bua mashinde bua mikoko, ne Luhongo lua Akola neluikale muaba wa bimuna kulalamu, bua bantu banyi bakunkeba. Kadi ebu mbualu buenu badi balekela kulonda Yehowa, badi bahua mukuna wanyi wa tshijila muoyo, badi balongoluela nzambi wakabikilabo ne, Dikasa Dimpe mesa, badi belela nzambi wakabikilabo ne, Tshishikidilu maluvu masangisha ne bintu bia muhuya muimpe mu mpanza, nennusunguile lufu lua ku muele wa nvita, ne buonso buenu nenuinyike mitu ku kubutuka; bualu bua, hanakanubikila, kanuakitaba; hanakamba dî, kanuakateleja matshu; kadi nuakenza malu akadi mabi ku mesu kuanyi, nuakasungula malu akadi kâyi ansankisha. Nunku Mukelenge Yehowa udi wamba ne, Tangilai, bantu banyi nebadie, kadi nuenu nenuikale ne nzala; tangilai, bantu banyi nebanue, kadi nuenu nenuikale ne nyota; tangilai, bantu banyi nebasanke, kadi nuenu nenufuishibue bundu; tangilai, bantu banyi nebimbe misambu bua disanka dia mu mitshima yabo, kadi nuenu nenudie bua kanyinganyinga ka mu mitshima yenu, nenuase muadi bua mitshima yenu yakuhandika. Nenushile bantu banyi banakusungula dina dienu bu dia mulau, ne Mukelenge Yehowa neanushihe; kadi neabikile bantu bandi ku dina dikuabo. Nunku muntu udi udivudishile disanka mu buloba neadivudishile disanka mu Nzambi wa bushuwa, ne muntu udi uditshiha mu buloba neaditshihe mu Nzambi wa bushuwa; bualu bua makenga a diambedi adi akuata tshihua muoyo, ne bualu bua adi masokoka ku mesu kuanyi. Bua monai, ndi nfuka diulu dihia-dihia ne buloba buhia-buhia; malu a diambedi kaena avulukibua, ne malu â kaena abuela mu mitshima kabidi. Kadi nuikale bienu ne disanka, nusanke tshiendelele, mu muanda eu undi nfuka; bua monai, ndi nfuka Yelushalema bua kuikaleye disanka, ne ndi nfuka bantu bandi bua kuikalabo disanka. Nensanke bua Yelushalema, nensanke bua bantu banyi; kabena bunvua dî dia madilu anyi dia muadi wa dikenga munkatshi muandi kabidi. Kakuena kuikalamu kabidi muana mutekete udi ushala ne muoyo anu matuku manya-manya, anyi muntu mununu udi kayi muanze kushikisha matuku andi makumbane; bualu bua muana neafue hakumbana bidimu lukama kudiye, ne muntu mubi udi ufika ku bidimu lukama nêdibue mulau. Nebase nsubu, nebashikamemu; nebatentule mionshi ya tumuma tua nvinyo mu madimi, nebadie tumuma tuai. Kabena basa nsubu bua mukuabo abuelemu; kabena bakuna bintu bua mukuabo abidie; bualu bua bu mudi matuku a muoyo wa mutshi mbu mudi matuku a bantu banyi, ne bantu banakusungula nebasanke musangu mule mu mudimu wa bianza biabo. Kabena bakuata mudimu wabo hatuhu, kabena balela bana bua kabutu kakuate bana lubilu; bualu bua bobo nebikale bana baledibue kudi badi Yehowa muvudishale disanka, ne bana babo badibo balela nebasankishibue nʼabo diatshimue. Diambedi kabayi banze kumbikila, nengitabe kudibo; hatshidibo bakula, nembunvuile. Tshimungu ne muana wa mukoko nebikale hohamue bua kudia, nyama wa ntambue neadie mashinde bu ngombe, ne dinfuenkenya nedikale bia kudia bia nyoka. Yehowa udi wamba ne, Kabiena bienzela bintu bibi ne kabiena bibishiha mu mukuna wanyi wa tshijila wonso. Yehowa udi wamba dî edi ne, Diulu didi nkuasa wanyi wa bukelenge ne buloba budi tshitekelu tshia muinshi mua makasa anyi; nenungibakile nsubu kai? Muaba kai newikale tshikishilu tshianyi? Yehowa udi wamba ne, Bua tshianza tshianyi tshiakufuka bintu ebi bionso, ne bintu ebi bionso biakulua bianyi. Kadi eu mmuntu undi ntekemena, nyeye udi ne mutshima muhuekele ne wa majia, udi uzakala ku dî dianyi. Udi ushiha ngombe udi muomumue ne muntu udi ushiha munga muntu; udi ulambula mukoko udi muomumue ne muntu udi utshibula nshingu wa mbua; udi ulambula mulambu wa bia kudia mmuomumue ne muntu udi ufila mashi a ngulube bu mulambu; udi wosha musenga wa manananshi bu tshivulukidi udi muomumue ne mu ntu udi uvudishila luhingu disanka. Bulelela, bantu aba bakudisunguila nshila yabo, ne mitshima yabo idi isanka mu bienzedi bia tshinyangu tshiabo. Meme kabidi nembasunguile malu adi abatatshisha, nembavuishile malu adi abakuatshisha buowa; bualu bua, hanakababikila, kakuakadi umue wabo wakitaba; hanakakula, kabakateleja matshu abo; kadi bakenza malu akadi mabi ku mesu kuanyi, bakadisunguila malu akadi kâyi ansankisha. Nuenu badi bazakala hanunvua dî diandi, unvuai dî dia Yehowa ne, Bana benu badi nʼenu lukuna ne bakanuihata bua bualu bua dina dianyi bakuamba ne, Yehowa atumbishibue, bua tuetu tumone disanka dienu; kadi mbobo bine balualua kufuishibua bundu. Unvuai! Mutoyi udi ufuma ku musoko, dî didi difuma ku ntempelo! Ndî dia Yehowa udi uha badi nʼandi lukuna difutu diabo! Diambedi Siona kayi muanji kutantamana, wakalela; diambedi didinyenga diandi dia ha kulela kadiyi dianji kumukuata, wakalela muana wa balume. Wakunvua bualu bu nunku diambedi nganyi? Wakumona malu bu nunku diambedi nganyi? Buloba budi mua kuledibua mu dituku dimue, anyi? Tshisamba tshia bantu netshiledibue mu diba dimue, anyi? Bualu bua mu diba diakadi Siona mutantamane, wakalela bana bandi. Yehowa udi ukonka ne, Nenkumbashe matuku a kulela bana, tshiena mbavuisha bukole bua kubalela, anyi? Nzambi webe udi ukonka ne, Meme hanyi, udi ulelesha bana, nenkandike mafu, anyi? Buonso buenu badi bamunange, sankai bienu ne Yelushalema; nuikale ne disanka bua bualu buandi; buonso buenu badi badila bualu buandi, nusanke nʼandi ne disanka dienu; Bua nuamue mabele a kunusamba kuandi, nukute; bua nuamue a bungi ne disanka ku dikumbana dia butumbi buandi. Bualu bua Yehowa udi wamba dî edi ne, Monai, nemmukumbashile diakalengele bu musulu wa mai, nemmukumbashile biuma bia bisamba bia bantu bu musulu udi uhasalala mielelu yau; nenuamue mabele andi, nebanutuale ha lubese luandi, nebanukuongoluele ha bibelu biandi. Bu mudi muntu udi mamuʼandi usamba, nennusambe muomumue; nenusambibue mu Yelushalema. Nenumone malu â, ne mitshima yenu neyisanke; mifuba yenu neyidiunde bimpe bu mashinde a lutende. Bukole hua tshianza tshia Yehowa nebumanyibue kudi bantu bandi, ne tshiji tshiandi netshikale kudi badi nʼandi lukuna. Bua, monai, Yehowa nealue mu kahia, ne makalu andi a nvita neâlue bu nvunde, bua kulesheye njiya yandi ne tshiji tshikole, ne kulesheye kubela kuandi ne ndimi ya kahia. Bualu bua Yehowa neashikishe dikosa diandi dia bilumbu ne kahia, ne ku muele wa nvita hamʼbidi ha bantu bonso; ne badi bashihibua kudi Yehowa nebikale bangi. Yehowa udi wamba ne, Badi badidila ne badi badilengesha bua kubuelabo mu bibidi bua kutendelela, balonda muntu wa munkatshi muabo, badia munyinyi wa ngulube, wa tshintu tshibi ne wa kahuku, nebalue ku nshikidilu wabo hohamue. Bualu bua ndi mumanye midimu yabo ne meji abo, ndualua bua kusangisha bisamba bionso bia bantu ne nuaku yonso; nebalue, nebamone butumbi buanyi, nenteke tshimanyinu munkatshi muabo. Nentumine bamue badi bahanduka munkatshi muabo kudi bisamba bia bantu, ku Tâshishi, ku Pula, ku Luda, bobo badi banana buta, ku Tubala ne ku Yawana, ku maloba a kule adi ku muelelu wa mai manene, hadi kabayi banze kunvua lumu luanyi lunene, kabayi banze kumona butumbi buanyi. Nebabambile bua butumbi buanyi munkatshi mua bisamba bia bantu. Nebalue ne bana benu bakuhatulabo mu bisamba bionso bia bantu bua kubafila bu mulambu kudi Yehowa, babendesha ha nyima ha tubalu, mu makalu, mu bihoyi, ha nyima ha nyama ya mpunda, ne ha nyima ha tumelo. Yehowa udi wamba ne, Nebalue nʼabo ku mukuna wanyi wa tshijila, Yelushalema mene, bu mudi Bena Isalele balua ne mulambu wabo wa bia kudia mu dilonga ditoke ku nsubu wa Yehowa. Yehowa udi wamba ne, Neadiangatshile bamue babo bua kuikalabo bakuidi ne bua kuikalabo Bena Lewi. Bualu bua bu mudi diulu dihia-dihia ne buloba buhia-buhia, bindi ngenza bishala ku mpala kuanyi, mmudi Yehowa wamba, mbu mudi tunkanunuma tuenu ne dina dienu bishala. Ku ngondo mutekete tô ne ku ngondo mutekete mukuabo, ne ku dituku dia Lumingu dimue tô ne ku dituku dia Lumingu dikuabo, bantu bonso nebalue kutendelela ku mpala kuanyi, mmudi Yehowa wamba. Nebaluhuke, nebatangile bitalu bia bantu bakuntombokela; bualu bua tshikusu tshiabo katshiena tshilua, kahia kabo kakena kajima, ne bobo nebikale bintu bidi bantu bonso bahetula. Â mmei a Yelemiya, muana wa Hilekiya, muakuidi wa munkatshi mua bakuidi bakadi ku Anatota mu buloba bua Benyamina. Dî dia Yehowa diakalua kudiye mu matuku a Yoshiya, muana wa Amona, mukelenge wa Yuda, mu tshidimu tshia dikumi ne tshisatu tshia bukokeshi buandi. Dî edi diakalua kudiye kabidi mu matuku a Yehoyakima, muana wa Yoshiya, mukelenge wa Yuda; diakashala tô ne kunshikidilu kua tshidimu tshia dikumi ne tshimue tshia bukokeshi bua Sedekiya, muana wa Yoshiya, mukelenge wa Yuda, ne tô ne hakayabo ne Bena Yelushalema mu buhika mu ngondo muitanu. Dî dia Yehowa diakalua kundi, diamba ne, Diambedi tshiyi muanji kukufuanyikisha munda mua mamu webe nakakumanya, ne diambedi kuyi muanji kuhatuka munda muandi nakajidila; nakakusungula muprofete wa bisamba bia bantu. Mu diba adi nakamba hanyi ne, Aka, Mukelenge Yehowa! Mona, tshiena mua kuakula bimpe, bualu hua ntshidi anu muana. Kadi Yehowa wakangambila ne, Kuambi ne, Ntshidi anu muana; bualu bua neuye kudi muntu yonso kundi nkutuma, newambe mei onso anakuambila. Yehowa wakamba ne, Kuikadi ne buowa kudibo, hualu bua ndi nʼebe bua kukuhandisha. Mu diba adi Yehowa wakolola tshianza tshiandi, wakalenga mukana muanyi. Yehowa wakangambila kabidi ne, Mona, nakuteka mei anyi mukana muebe; mona, lelu eu nakukuteka ha mutu ha bisamba ne makelenge, bua kujula ne bua kushimbula, bua kubutula ne bua kunyanga, bua kuasa ne bua kukuna. Dî dia Yehowa diakalua kundi kabidi ne, Yelemiya, udi umona tshinyi? Nakamuitaba ne, Ndi mmona mulangala wa mutshi wa amande. Yehowa wakangambila ne, Wakumona bimpe, bualu bua ndi ndama dî dianyi bua kudishikisha. Dî dia Yehowa diakalua kundi tshiakabidi diamba ne, Udi umona tshinyi? Nakamuitaba ne, Ndi mmona luesu lunene lua mai adi asaba, ne mpala walu udi utangila ku node. Hashishe Yehowa wakangambila ne, Makenga neahatuke mafume ku node; nealue kukuata bonso badi bashikame mu buloba ebu. Yehowa wakamba ne, Mona, ndi mbikila ba mu meku onso a mu makelenge a ku node; nebalue, buonso buabo nebajadike nkuasa yabo ya bunfumu ku bibuelelu bia ku bibi bia mu Yelushalema, bua kushimbulabo ngumbu idi inyungulula musoko ku nseke yonso, ne bua kuluishabo bena misoko yonso ya mu Yuda. Nembambile mei onso a kulumbulula kuanyi bua malu mabi abo onso, bualu bua bakundekela, bakuoshila nzambi mikuabo musenga wa manananshi, bakutendelela bintu biakusongabo ne bianza biabo. Nunku suika mukaba mu tshimono tshiebe, juka, ubambile mei onso andi nkuambila. Kuzakadi bua bualu buabo, bua meme tshikuzakashi ku mpala kuabo. Mona, lelu eu ndi nkuvuisha bu musoko wa lumbu, ne bu dikunshi dia tshiamu, ne bu bimanu bia tshiamu tshia mitaku ku mpala kua bena buloba aba bonso, ku mpala kua bakelenge ba Yuda, ku mpala kua baminyampala babo, ku mpala kua bakuidi babo, ne kua bantu ba hatuhu ba mu buloba ebu. Yehowa wakamba ne, Nebaluangane nʼebe, kadi kabena bakuhita bukole; bualu bua meme ndi nʼebe bua kukuhandisha. Dî dia Yehowa diakalua kundi diamba ne, Ya wele lusanzu mu matshu a Bena Yelushalema, ubambile ne, Yehowa udi wamba ne, Ndi nkuvuluisha bua luse lua mu bunsongakashi buebe, bua dinanga diwakadi nʼadi hanakakubangila, bu muwakandonda mu tshihela, mu buloba buakadi kabuyi ne bintu bikunamu. Yehowa wakamba ne, Isalele wakadi wa tshijila kudi Yehowa, bu mamuma akakuama diambedi mu bintu biandi bia kunowa. Bonso bakamudia bakahila; makenga akabakuata. Unvuai bienu dî dia Yehowa, nuenu ba mu tshiota tshia Yakoba ne bonso ba mu meku a Bena Isalele. Yehowa udi ukonka ne, Batatu benu bakasangana dihanga kai munda muanyi bua bobo bakandekela, bakaya kule, bakalonda tshintu tshia hatuhu, ne bobo bine bakalua ba hatuhu? Kabakakonka ne, Yehowa wakafuma nʼetu mu buloba bua Ejipitu udi hanyi? Nguakatulombola mu tshihela, mu buloba bua lusenga ne bua majimba, mu buloba buakadi nvula kayi muloke ne bua mîdima mikole, mu buloba buakadi muntu kayi muhitshile, ne muakadi muntu kayi mushikame. Nakalua nʼenu mu buloba buakadi bumenesha bia kudia bia bungi, bua nuenu kudia mamuma abu ne bintu biabu bimpe; kadi hanuakabuelamu, nuakanyanga buloba buanyi, nuakavuisha buhianyi buanyi bu tshintu tshinyanguke. Bakuidi kabakakonka ne, Yehowa udi hanyi? Bayishi ba mikenji yanyi kabakammanya; bakokeshi kabidi bakatombokela, baprofete bakamba mei abo mu dina dia Bâla, bakalonda bintu bidi kabiyi mua kubakuatshisha. Yehowa udi wamba ne, Bua bualu ebu tshidi ntanda nʼenu, nentande kabidi ne bana ba bana benu baledibue. Nusabuke ku bisanga bia Kitima, numone; tumai bantu ku Kedâ, nuelangane meji bimpe; numone ne bualu bua mushindu eu bukadi bumueneke diambedi, anyi? Tshisamba tshidi tshikudimune nzambi yatshi, idi kayiyi nzambi milelela, anyi? Kadi bantu banyi bakushintakasha Butumbi buabo ku bintu bidi kabiyi bibakuatshisha. Yehowa udi wamba ne, Diulu, ukeme biebe bikole bua bualu ebu; wikale ne buowa buhite bukole, utambe kuzakala. Bualu bua batu banyi bakuenza malu mabi abidi: bakundekela meme, mushimi wa mai a muoyo, bakudiumbuila mena a mai, mena mamane kûhuka mene, adi kâyi mua kulama mai. Isalele udi muhika, anyi? Udi muhika muledibue mu nsubu wa nfumu wandi, anyi? Wakulua bu tshintu tshidibo bakuata mu bulembi bualu kai? Bana ba nyama ya ntambue bakadila muadi wa luonji kudiye, badi babandisha mei abo; bakanyanga buloba buabo; misoko idi mihia ne kahia, kayiyi ne hatu ba kushikamamu. Bana balume ba mu Mempi ne Tapanehese bakuhanda lubombo lua mutu webe. Kadi wewe muine kuena mudikebele bualu ebu hawakulekela Yehowa Nzambi webe, mu tshikondo tshiakakulomboleye mu nshila, anyi? Katataka kuya kuebe mu Ejipitu kudi kumuhetesha tshinyi? Anu bua kunua mai a musulu wa Nile, anyi? Kuya kuebe mu Ashû kudi kukuhetesha tshinyi? Anu bua kunua mai a musulu wa Pelata, anyi? Mukelenge Yehowa wa misumba udi wamba ne, Bubi buebe buine nebukusamine, kundekela kuebe bua kuhingana ku malu a tshianana nekukubele. Nunku neumanye, neumone kabidi, bu mudi muanda eu wa kulekela Yehowa Nzambi webe mmuanda mubi ne wa bululu, ne mudi ditshina dianyi kadiyi munda muebe. Bua kale kale wewe wakatshibula mutshi wa tshikokedi wa ha nshingu hebe, wakakosa nkanu yebe, wakamba kabidi ne, Tshiena nkukuatshila mudimu. Wakinamina mpingu mutu ha mutu ha mukuna wonso mule ne muinshi mua mutshi wonso mubishi, wenda nʼai masandi. Kadi nakakutentula bu muonshi mutambe buimpe, bu muonshi wakadi anu ne maminu makane; wakandamuka kundi bu matamba munyanguke a muonshi wa bende munyi? Mukelenge Yehowa udi wamba ne, Biwowa ne buanga bua nsabanga, biwangata nsabanga wa bungi, bubi buebe butshidi bufunda ku mpala kuanyi. Udi mua kuamba ne, Tshiena munyanguke, tshiakulonda Babala munyi? Mona nshila uwakuendela wa mu tshibanda, umanye malu awakuenza; bu nsongakashi wa kamelo ka lubilu kadi kanyunguluka mu nshila, bu nyama wa mpunda udi muibidila mu tshihela, udi ununkila luhehele mu lukuka luandi; nganyi neamanye mua kukanda lukuka luandi mu tshikondo tshialu? Bonso badi bamukeba kabena ne bualu bua kuhungila; mu ngondo wandi wa kuleleye nebamumone. Kandika makasa ebe bua kaendi kâyi ne bisabata, kandika muminu webe bua kawikadi ne nyota; kadi wewe wakuamba ne, Bualu ebu budi hatuhu; nansha, ndi musue nzambi ya bantu ba bende, nenye kudiyi. Bu mudi muibi Ukuatshika bundu hamukuatabo, ba mu Bena Isalele nebakuatshike bundu nunku; bobo bine, bakelenge babo, baminyampala babo, bakuidi babo ne baprofete babo; badi bambila tshibasa tshia mutshi ne, Wewe udi tatu wetu; badi bambila dibue ne, Wewe wakatulela; bualu bua bakunkoma nyima yabo, kabakutangisha mpala yabo kundi; kadi mu tshikondo tshialua makenga kudibo nebangele dî ne, Juka, utusungile! Kadi nzambi yebe iwakudienzela idi hanyi? Yoyo ibike, biamanyayi mua kukusungila mu dituku dia dikenga diebe. Bualu bua bu mudi bungi bua misoko yebe mbu mudi bungi bua nzambi yebe, wewe Yuda. Yehowa udi ukonka ne, Bua tshinyi nudi basue kumbanda meme, ne buonso buenu nuakuntombokela? Nakuhita bana benu, nakubanga; kabakuatabusha kubela kuanyi; muele wenu wa nvita wakushiha baprofete benu, bu mudi nyama wa ntambue ushiha nyama mikuabo. Nuenu ba mu tshikondo etshi, unvuai dî dia Yehowa. Nakadi bu tshihela kudi Isalele, anyi? Nakadi bu buloba budi ne mîdima mikole, anyi? Bua tshinyi bantu banyi badi bamba ne, Tudi bakelenge nkayetu; katuena tulua kûdi kabidi? Mushikankunde utshidi kamama udi mua kuhua bilenga biau muoyo, anyi mukashi uyaya ku dibaka udi mua kuhua bilulu biandi bia dibaka muoyo, anyi? Kadi bantu banyi bakumpua muoyo matuku adi kâyi mua kubadibua. Ke bu mûdi wewe ulongolola nshila yebe ne budimu bua kudikebela dinanga! Nunku wakuyisha bakashi babi mene bienzedi biebe! Bualu bukuabo kabidi, badi basangana mashi a mioyo ya bahele badi kabayi ne bilumbu mu bivualu biebe. Kuena mubasangane bahanda nsubu bua kubuelamu, kadi wakubasangana bahidia kuenza malu au onso. Kadi wewe udi wamba ne, Tshiena ne tshilumbu; bulelela, tshiji tshiandi tshiakûmuka kundi; mona, ndi nkulumbuluisha bualu bua udi wamba ne, Tshiakuenza bualu bubi. Bua tshinyi udi wendakana eku ne eku bua kukudimuna nshila webe? Ejipitu neakufuishe bundu bu muakukufuishabo bundu kudi Ashû. Neuluhukemu ne bianza biebe biteka mu mutu; bualu bua Yehowa wakuhidia bantu bawakueyemena, kuena wikala nʼabo diakalengele. Yehowa udi wamba ne, Badi bamba ne, Biumusha mulume mukashi wandi, ne biumukeye kudiye bua kulua mukashi wa munga mulume, yeye neahingane kudi mukashi au tshiakabidi, anyi? Buloba abu kabuena mua kutamba kunyanguka, anyi? Kadi wewe wakulua bu mukashi wa masandi kudi bakunangi bebe ba bungi; anji kuhingana kundi kabidi. Banduluka, umone miaba idi ha mutu ha mukuna idi kayiyi ne mitshi. Ha muaba kai hadibo kabayi banze kulala nʼebe? Wewe wakushikama kukala kua nshila ubalamina bu mudi Muena Alaba wenza mu tshihela; wakunyanga buloba ne masandi ebe ne malu mabi ebe. Nunku Nzambi wakukanda nvula ya diambedi, ne nvula mishishe kayena miloke; kadi wewe udi ne mpala wa muena masandi, udi ubenga kukuatshika bundu. Kuakudila kundi mpindiu ne, Tatu wanyi, mulombodi wanyi mu buana buanyi neashale ne tshiji tshiandi tshiendelele, anyi? Neashale nʼatshi tô ne kundekelu kuatshi, anyi? Mona, wewe wakuamba nunku, kadi wakuenza malu mabi onso akadi mutshima webe musue kuenza. Yehowa wakangambila dî dikuabo mu matuku a mukelenge Yoshiya ne, Wakumona malu akuenza Isalele hakunkomeye nyima, anyi? Wakubanda ha mutu ha mukuna mule wonso, wakulala muinshi mua mutshi mubishi wonso, wakuendaku masandi. Nakamba munda muanyi ne, Hashikisheye kuenza malu a onso, nealukile kundi; kadi kakalukila kundi nansha. Muanʼabo mukashi Yuda udi kayi mua kueyemenyibua wakamona muanda eu. Nakumusha Isalele ne nakamuha mukanda wa kushiha kua dibaka dietu nʼandi, bualu bua yeye wakenda masandi misangu yonso; kadi Yuda, muanʼabo mukashi ne Isalele ne muena dikamakama, kakadi ne ditshina; yeye kabidi wakaya kuenda masandi. Bualu bua dikamakama diandi mu masandi andi buloba buakanyanguka, ne wakenda masandi ne mabue ne bibasa bia mitshi. Yehowa udi wamba ne, Malu â onso akamueneka, kadi muanʼabo mukashi Yuda, muena dikamakama, kakahingana kundi ne mutshima wandi mujima, kadi wakashala ne lubombo. Yehowa wakangambila kabidi ne, Isalele, mundekedi, udi umueneka muhite Yuda, muena dikamakama, buakane. Ya, wele mbila ei ku luseke lua node, wamba ne, Yehowa udi wamba ne, Wewe Isalele, mundekedi, hingana kundi, Yehowa udi wamba ne, Tshiena nkutangila ne tshiji; bualu bua ndi ne luse; tshiena ngikala ne tshiji tshiendelele. Yehowa udi wamba ne, Anji kutonda bubi buebe, bu muwakatombokela Yehowa Nzambi webe; wakaya eku ne eku bua kudinyanga ne nzambi ya bantu ba bende muinshi mua mutshi wonso mubishi, ne kuakatumikila dî dianyi. Yehowa udi wamba ne, Hinganai kundi, nuenu bana banyi bakadi bandekela, bualu bua ndi bayenu. Nennusungulule, muntu umue ku musoko umue, bantu babidi ku diku ne ku diku, nendue nʼenu ku Siona. Nennusunguile balami badi benza bu mudi mutshima wanyi musue, nebanudishe ne lungenyi ne meji mimpe. Yehowa udi wamba ne, Mu matuku au hanuavulangana ne hanuakumbana ba bungi mu buloba, kabena batela kabidi mushete wa tshihungidi tshia mei a Yehowa, kabena belangana meji bualu buau, kabena bauvuluka, kabena baya kudiu bua kukeba lungenyi, kabena bawenza kabidi. Mu tshikondo atshi nebabikile Yelushalema ne, Nkuasa wa bukelenge wa Yehowa; bantu ba mu bisamba bionso nebadisangisheku bua kutumbisha dina dia Yehowa mu Yelushalema; kabena benda kabidi bu muakadi tshitshu tshia mu mitshima yabo mibi. Mu matuku au ba mu Bena Yuda nebende hohamue ne ba mu Bena Isalele; nebaluhuke hohamue mu buloba bua ku node, nebafike ku buloba bunakaha bankambua benu bu buhianyi buabo. Nakamba ne, Ahu nenkuteke munkatshi mua bana banyi, nenkuhe buloba buimpe ne buhianyi buimpe munkatshi mua bisamba bionso bia bantu! Nakamba kabidi ne, Neumbikile ne Tatu wanyi ne kuena uhingana ku nyima kuyi undonda. Yehowa udi wamba ne, Bulelela, bu mudi mukashi utungila bayandi tshitungu bua kumuka kudiye, nunku nuenu ba mu Bena Isalele nuakuntungila tshitungu muomumue. Dî didi diunvuibua ku mutu kua mukuna udi kauyi ne tshintu tshidiundahu, didi muadi ne kutendekena bia bana ba Bena Isalele: bualu bua bakakonyangasha nshila wabo, bakahua Yehowa Nzambi wabo muoyo. Nuenu, bana banyi bandekedi, hinganai kundi, nennuondahe ku buhidia buenu. Mona, tuakulua kûdi; bualu bua wewe udi Yehowa Nzambi wetu. Bulelela, dikuatshisha didibo batekemena ku mikuna mihi didi hatuhu, ne tshintompatompa tshia ha mikuna mile tshidi hatuhu kabidi; bulelela, luhandu lua Bena Isalele ludi lufuma kudi Yehowa Nzambi wetu. Kadi luhingu elu ludi lufuisha bundu luakumana kudia mamuma a midimu ya batatu betu ku buana buetu mene, bisumbu bia mikoko yabo, ne bia bimuna biabo, bana babo balume ne bana babo bakashi. Tulale bietu hanshi mu bundu buetu, malu etu a bundu atubuikile; bualu bua tuakuenzela Yehowa Nzambi wetu bibi, tuetu ne batatu betu kabidi, ku buana buetu tô ne ku dituku edi; katuakutumikila dî dia Yehowa Nzambi wetu. Yehowa udi wamba ne, Biwahingana kundi, wewe Isalele, biwahingana kundi, ne biûmusha malu a tshinyangu tshiebe ku mesu kuanyi, nunku wewe kuena umushibua. Biwaditshiha ne, Bu mudi Yehowa ne muoyo, uditshihe nunku mu bushuwa, mu kulumbulula kuakane ne mu buakane; mu diba adi bisamba bia bantu nebivuishibue disanka kudiye, nebitumbile mudiye. Bualu bua Yehowa udi wamhila ba mu Yuda ne ba mu Yelushalema ne, Bundululai buloba buenu budi bubanda, kanukunyi maminu munkatshi mua meba. Nuditengule bua kudijidila kudi Yehowa, numushe misoso ya ku mitshima yenu kabidi, nuenu bantu ba mu Yuda ne badi bashikame mu Yelushalema; bua tshiji tshianyi katshihatuki bu kahia, katshilu bu kahia kadi muntu kayi mua kujima, bualu bua bubi bua bienzedi bienu. Umanyishe ba mu Yuda ne wele dî edi mu Yelushalema, ubambile ne, Elai mpungi ha buloba; bandisha mei ebe, ubambile ne, Nudisangishe hohamue, tubuele bietu mu misoko idi ne ngumbu. Jadikai dibendela ditangilangana ne Siona; nyemai bua kudibandisha, kanujanguluki nansha; bualu bua nenyishe makenga ku luseke lua nôde, ne kubutuka kunene. Nyama wa ntambue wakubandaku, mufume mu tshihuka muakadiye, mubutudi wa bisamba bia bantu; udi mu nshila wandi, muhatuke mu muaba wandi bua kuvuisha buloba buenu tshihela, bua misoko yebe ibutuke, ikale kayiyi ne bantu. Bua bualu ebu nudiluatshishe ne bilulu bikayabala, asai miadi ne nudile bienu; bua tshiji tshikole tshia Yehowa katshiena tshianji kumuka kutudi. Yehowa udi wamba ne, Mu dituku adi mutshima wa mukelenge neufue, mitshima ya baminyampala neyifue kabidi; bakuidi nebakeme, baprofete nebatue mikemu. Hashishe nakamba ne, Aka! Mukelenge Yehowa! Bulelela, wakudinga bantu aba ne ba mu Yelushalema bikole hawakamba ne, Nenuikale ne ditalala, kadi muele wa nvita udi ubatubula tô ne ku mioyo yabo. Mu tshikondo atshi nebambile bantu aba ne ba mu Yelushalema ne, Luhehele ludi luosha ludi lufuma ku miaba ya hatuhu ya ha mutu ha mikuna ya mu tshihela, nelufike kudi muana mukashi wa bantu banyi, kaluyi luhehula, kaluyi lutokesha. Luhehele lutambe bukole bua kuenza nunku nelulue bua bualu buanyi; mpindiu meme kabidi nembalumbuluishe. Monai! Yeye udi ubandaku bu mudi matutu abanda, makalu andi a nvita nende lubilu bu nvunde; tubalu tuandi tudi tuhita nyunyu ya mikanku lubilu. Mulau udi utukuata! Bualu bua tuakubutuka. Wewe, Yelushalema, uvuwa mutshima webe ku malu mabi, bua wewe kusungidibua. Meji ebe mabi neashale munda muebe musangu bule bishi? Bualu bua dî didi difuma ku Dana, didi diamba lumu lubi lufuma ku mikuna ya Efelayima! Nuambile ba mu bisamba bia bantu bualu ebu; nuambile ba mu Yelushalema kabidi ne, Monai, batentekedi badi bafuma ku buloba budi kule, badi bela misoko ya mu Yuda dî bua kuyidimusha, Yehowa udi wamba ne, Bu mudi bansentedi ba budimi habunyunguluka, badi batshintshimika Bena Yuda nseke yonso, bualu bua bakatombokela. Nshila webe ne bienzedi biebe biakukuhetesha malu â; au mmamuma a bubi buebe; adi a bululu, adi afika tô ne ku mutshima webe. Ndi nyingalala! Ndi nyingalala! Ndi ne kanyinganyinga tô ne ku mutshima wanyi mene! Mutshima wanyi udi ukumakuma munda muanyi; tshiena mua kuhuwa talalâ; bualu bua wewe, mutshima wanyi, wakumpa dî dia mpungi, didi dibisha bantu bua kuluanganabo nvita. Kubutuka kudi kulonda kubutuka, bualu bua buloba buonso buakubutuka; ntenta yanyi idi ishimbuka lukasa, ne bilulu bianyi bikudika bidi bituanyika mu kuvinya kua disu. Nentangile dibendela, nengunvue dî dia mpungi musangu bule kai? Bantu banyi badi bahote, kabena bammanye; badi bu bana badi kabayi ne lungenyi, kabena ne dijingulula dia malu; badi ne lungenyi lua kuenzabo malu mabi, kadi kabena ne lungenyi lua kuenzabo malu mimpe. Nakatangila buloba, ne mona, buakadi bubondakana ne butuhu; nakamona diulu, ne munya kawakadimu. Nakamona mikuna mile; mona, yoyo yakazakala, ne mikuna mihi yakanyungakana. Nakatangila kabidi, ne mona, muntu kakadiku! Ne nyunyu yonso idi ihahala mulu yakamana kuya. Nakatangila, ne mena, buloba buakadi bukuamisha mamuma buakalua tshihela, ne misoko yabu yonso yakadi mibutudibue ku mpala kua Yehowa ne ku mpala kua tshiji tshiandi tshikole. Bualu bua Yehowa udi wamba ne, Buloba buonso nebuikale muaba wa hatuhu, kadi tshiena mbutula bintu bionso tshishiki. Bua bualu ebu ba ha buloba nebase miadi, diulu nedikale difike; bualu bua nakuamba bualu ebu, nakubuhangidisha, ne tshiakukudimuna mutshima wanyi bua bualu ebu, tshiena akudimuka kabidi. Ba mu misoko yonso badi banyema bua tshiona tshia bena nvita, badi babanda ha nyima ha tubalu ne tshiona tshia bena mata; badi baya mu bihuka, badi babanda ha mutu ha mabue; badi bashiya misoko yonso hatuhu, kakuena muntu udi mushikamemu. Ne wewe, udibo banyange, newenze tshinyi? Nansha biwadiluatshisha ne bilulu bikunzubile, biwadilengesha ne bilenga bia or, biwalaba tukula ku mesu ebe, udi udilengesha hatuhu, bakunangi bebe badi bakuhetula, badi bakeba muoyo webe. Bualu bua nakunvua dî bu dia mukashi udi mukuatshike ne didinyenga dia kulela, kanyinganyinga kandi bu ka mukashi udi wamba kulela muanʼandi wa diambedi. Didi bu muadi wa muana mukashi wa Siona, udi uhuyakana, udi wolola bianza biandi ne, Mulau wakunkuata! Bualu bua mutshima wanyi udi muhungile ku mpala kua banshihi banyi. Endakanai lubilu mu misesu ya mu Yelushalema, numone, numanye, nukebekebe mu miaba minene yonso, binuamanya mua kuhetaku muntu umue udi wenza malu mimpe, udi ukeba malu malelela, ne nemmubuikidile malu mabi andi. Nansha biaditshihabo ne, Bu mudi Yehowa ne muoyo, badi baditshiha ne mashimi. Wewe Yehowa, mesu ebe kaena amona bualu bulelela, anyi? Wewe wakubakengesha, kadi kabakunyingalala; wewe wakubabutula, kadi bakubenga kuitabusha diyisha; bakukolesha mpala yabo mihite mabue bukole, bakuhidia kualukila kûdi. Mu diba adi nakamba ne, Bulelela, bantu aba badi anu bahele, badi bahote; bualu bua kabena bamanye nshila wa Yehowa, anyi mikenji ya Nzambi wabo. Nenye kudi bantu babo banene, nenyikile nʼabo; bualu bua badi bamanye nshila wa Yehowa ne mikenji ya Nzambi wabo. Kadi bobo kabidi bakamana kutshibula mutshi wa tshikokedi wakadi ha nshingu yabo, bakakosa nkanu yabo. Nunku nyama wa ntambue wa mu ditu neabashihe, tshimungu tshia mu tshihela netshibabutule, nkashama neabalamine mu misoko yabo; muntu yonso wahatukamu neahandibue bihesa bihesa; bualu bua mibi yabo idi ya bungi, ne kundekela kuabo kuakutamba. Ndi mumanye mua kukubuikidila mihi yebe munyi? Bana bebe bakundekela ne bakaditshiha ku mena a bintu bidi kabiyi nzambi; hanakabadisha tô ne hakukutabo, bakenda masandi, bakadisangisha bisumbu ne bisumbu mu nsubu ya bakashi ba masandi. Bakadi bu tubalu tudishibua bimpe tudi tuendakana hatuhu; muntu ne muntu wakela dî kudi mukashi wa muena mutumba nʼandi bu muadi wa kabalu. Yehowa udi wamba ne, Tshiena mbakengesha bua malu â, anyi? Mutshima wanyi kawena udisombuela bua ba mu tshisamba bu etshi, anyi? Endelai mu mpunga ya mionshi ya tumuma tua nvinyo, nuyikose, kadi kanuyikoshi yonso; numushe matamba ai, bualu bua kaena a Yehowa. Yehowa udi wamba ne, Bena Isalele ne Bena Yuda bakutamba kuntangila tshitungu. Bakahidia Yehowa, bamba ne, Kanyeye nansha; makenga kaena atukuata tuetu; katuena tumona muele wa nvita anyi tshiole. Baprofete nebandamuke luhehele, dî dia Nzambi kadiena munda muabo; nebabenzele malu â. Nunku Yehowa, Nzambi wa misumba, udi wamba ne, Bualu bua nudi nuamba dî edi, tangilai, nenvuishe mei anyi a mukana muebe bu kahia, nenvuishe bantu aba bu nkunyi, nekabashidishe. Yehowa udi wamba kabidi ne, Unvuai, nendue ne tshisamba tshidi kule bua kuluangana nʼenu, nuenu ba mu Bena Isalele. Tshidi tshisamba tshikele, tshidi tshisamba tshiakadiku kale, tshidi tshisamba tshidi ne muaku unudi kanuyi bamanye, tshidi tshisamba tshidi ne mei anudi kanuyi njingulula. Musaka wabo wa mikete udi bu lukitu lushiya buashi, buonso buaho badi bena bukitu. Nebadie bintu bia mu madimi enu ne bidia bienu, nebashihe bana benu ba balume ne bana benu ba bakashi; nebadie bisumbu bienu bia mikoko ne bimuna; nebanyange mionshi yenu ya tumuma ne mitshi ya nfigi; nebashimbule misoko yenu ya ngumbu inuakueyemena ne muele wa nvita. Kadi Yehowa udi wamba ne, Mu matuku au mene tshiena nkubutula bua kumana bantu bebe bonso. Mu matuku au hanuakonkangana ne, Yehowa Nzambi wetu wakutuenzela malu â onso bua tshinyi? Mu diba adi mene ubahingishe dî dia Yehowa ne, Bu munuakulekela meme, ne bu munuakukuatshila nzambi ya bende mudimu mu buloba buenu mene, nunku nenukuatshile bantu ba bende mudimu mu buloba budi kabuyi buenu. Wamba dî edi mu nsubu wa Yakoba, udiambe kabidi mu buloba bua Yuda ne, Unvuai bienu dî edi, nuenu bantu bahote ne badi kabayi ne mitshima idi ijingulula; nudi ne mesu, kadi kanuena numona; nudi ne matshu, kadi kanuena nunvua. Yehowa udi ukonka ne, Kanuena nuntshina, anyi? Kanuena nuzakala ku mpala kuanyi, meme nguakuteka nsenga bu mukalu wa mai manene, bu nkila wa tshiendelele udi mai manene kâyi mua kuhitaku, anyi? Bialua mavuala bua kuditutaku, kaena mua kumubumbula; bialuau ne tshiona tshikole, kaena mua kumusambuka. Kadi bantu aba badi ne mutshima mubi ne mutshima wa kutomboka; bakuntombokela, bakuya. Kabena bamba mu mitshima yabo ne, Tutshine Yehowa Nzambi wetu, udi untokeshila nvula, ne nvula ya diambedi ne nvula mishishe, mu bikondo biai; udi utulamina mbingu yakutusunguileye bua tuetu kuhuola bintu bia kudia. Malu mabi enu akanûmushila malu â, mihi yenu yakanuhangisha masanka bua kâfiki kunudi. Bualu bua bantu babi badi bamueneka munkatshi mua bantu banyi; badi batentekela bantu bu mudi bilembi bia nyunyu biyalamina; badi balongolola buteyi, badi bakuata bantu. Bu mudi musasa mûle tente ne nyunyu, nsubu yabo kabidi idi miule tente ne mashimi; nunku bakulua bantu banene ne babanji. Badi ne mafuta a bungi hamʼbidi habo, dikoba diabo didi dinuna; badi batamba kuenza malu mabi; kabena bakuila bana ba nshiya bilumbu biabo bua bana bikale ne diakalengele, kabena bakuatshisha bakengi bua kuhetabo bintu bidibo nʼabi bualu. Yehowa udi wamba ne, Tshiena mbakengesha bua malu a, anyi? Mutshima wanyi kawena udisombuela kudi tshisamba bu etshi, anyi? Bualu bubi budi bunkemesha ne budi bunkuatshisha buowa buakumueneka mu buloba ebu. Baprofete badi bamba mei mu mena a nzambi ya tshianana, bakuidi badi balombodibua ku bianza bia baprofete; bantu banyi badi bananga malu au ne, Ikale nunku; kadi nenuenze tshinyi kunshikidilu kuau? Nuenu, hana ba Benyamina, nyemai bua kudihandisha, numuke mu Yelushalema, elai mpungi mu Tekoa, ne bandishai tshimuenu ha mutu ha Bete-hakeleme; bualu bua makenga mafume ku luseke lua node adi amha kunukuata, ne kubutuka kunene. Nenshihe muntu eu mulengele ne muengeleke, muana mukashi wa Siona mene. Balami ba mikoko nebalue kumuluisha, bobo ne bisumbu biabo bia mikoko; nebashimike ntenta yabo numunyunguluke nseke yonso, muntu ne muntu neadishe mikoko yandi mu muaba udiye mudisunguile. Nulongolole nvita bua kumuluisha; jukai, tuye kuluangana nʼandi munda munya. Mulau udi utukuata! Diba didi diamba kubuela; mindidimbi ya dilolo idi ileha. Jukai, tuye kumulesha butuku, tushimbule nsubu yandi ya bukelenge. Bualu bua Yehowa wa misumba wakuamba ne, Tahai mitshi, bumbai mushiki wa buloba bua kubandabu ne kuluisha ba mu Yelushalema! Bualu bua eu udi musoko undi ne bualu hua kukengesha; munda muau mudi anu bakengeshi. Bu mudi mushimi uhatula mai adimu, nunku musoko udi uhatula malu mabi au; diyoyo ne kubutuka bidi biunvuibua munda muau; ku mpala kuanyi misangu yonso kudi masama ne mputa. Wewe Yelushalema, udimuke, bua mutshima wanyi kaumuki kûdi; bua meme tshikuvuishi bu tshikulu, bu buloba budi kabuyi ne bantu. Yehowa wa misumba udi wamba ne, Nebalumbulule difuka dia Bena Isalele bimpe, bu mudibo bahumbulula tumuma tua ku muonshi; hingasha tshianza tshiebe ha mutu ha ntonga ya ku muonshi, bu mudi muhuodi wa tumuma wenza. Nengambile banganyi mei, nendimushe banganyi bua kunvuabo? Monai, ditshu diabo kadiena dijidila, kabena mua kunvua bimpe; monai, dî dia Yehowa diakulua bu tshihendu kudibo; kabena ne disanka bualu buadi. Nunku nakûla tente ne tshiji tshidi Yehowa nʼatshi; kutshikanda kudi kuntonda. Utshihumuine ha bana badi mu misesu, ne bansongalume bunguila hohamue; nebakuate mulume ne mukashi wandi, nebakuate muntu mununu ne muntu udi ne matuku makumbane. Yehowa udi wamba ne, Nsubu yabo neyifidibue kudi bakuabo, madimi abo ne bakashi babo muomumue; bualu bua nengolole tshianza tshianyi bua kukengesha ba mu buloba ebu. Bualu bua buonso buabo, kudi mutambe buhuekele tô ne kudi mutambe bunene munkatshi muabo badi bakuatshike ne lukuka lua bintu; buonso buabo, kudi muprofete tô ne kudi muakuidi, badi badingangana. Bakûmisha mputa wa bantu ba nyi anu kakese, bamba ne, Ditalala, ditalala; ne ditalala kadiyiku. Bakakuatshika bundu hakadibo benze malu mabi, anyi? Nansha, kabakakuatshika bundu, nansha kakese; bakûma mu mesu; nunku Yehowa udi wamba ne, Nebahone munkatshi mua badi bahona; mu tshikondo tshinabakengesha nehalenduke. Yehowa udi wamba ne, Imanai mu nshila, numone, nukonke bua nshila ya diambedi, kudi nshila muimpe, nuendelemu, nenuhete dikisha mu mitshima yenu. Kadi bobo bakamba ne, Katuena tuendelamu. Nunku nakateka batentekedi ha mutu henu, nakanuambila ne, Telejai matshu ku dî dia mpungi; kadi bakamba ne, Katuena tuditeleja. Nunku unvuai, nuenu bisamba bia bantu, numanye kabidi, nuenu badi badisangisha, bualu budi buamba kubakuata. Wewe buloba, unvua biebe; nentumine bantu aba makenga, mmamuma adi meji abo akuama, bualu bua kabena batumikila mei anyi; bakahetula mikenji yanyi. Manananshi a ku Sheba adi nebualu kai kundi, ne mienge idi ne muhuya muimpe ya ku buloba bua kule? Tshiena ngitabusha milambu yenu ya kuosha, ne milambu yenu mikuabo kayena isankisha. Nunku Yehowa udi wamba ne, Monai, nenteke bilenduishi ku mpala kua bantu aba; batatu babo ne bana nebalenduke hohamue; muena mutumba ne mulunda wandi nebafue. Yehowa udi wamba ne, Tangilai, bantu badi bafuma ku buloba bua ku nôde; tshisamba tshihite bukole netshibike kunfudilu kua buloba. Badi bakuata buta ne difuma; badi ne lukisu, kabena ne luse; tshiona tshiabo tshidi bu tshiona tshia mai manene; badi babanda ha nyima ha tubalu, muntu yonso mudilongolole bua kukuluisha, wewe, muana mukashi wa Siona. Tuakunvua lumu luabo, bianza bietu bidi bilembelesha; kanyinganyinga kakutukuata bu didinyenga dia mukashi udi wamba kulela. Kanuluhuki bua kubuela mu budimi, kanuendi mu nshila! Bualu bua muele wa nvita wa bena lukuna ne buowa bukole bidi ku nseke yonso. Wewe, muana mukashi wa bantu banyi, udiluatshishe ne bilulu bikayabala, udibonde mu butue; udiashile muadi bu mudibo bashila muana mulume umuehele wa muntu, muadi muhite bukole; bualu bua mushihianganyi neatuluishe lukasa. Nakukusungula bu mukunjishi ne mutetshi wa tshiamu munkatshi mua bantu banyi; bua wewe Umanye ne utete bienzedi biabo. Buonso buabo badi bahita kutomboka, badi bendakana ne mei a bunsonge; badi bu tshiamu tshia mitaku ne tshiamu tshifike; buonso buabo badi benzelangana bibi. Mubanze udi mushila, tshiamu tshia lutende tshiakulua mu kahia; badi bananukila kulengesha biamu hatuhu; bualu bua bantu babi kabena bumushibua. Bantu nebababikile ne, Bikanganya bia tshiamu tshia argent, bualu bua Yehowa wakubahidia. Dî difume kudi Yehowa diakafika kudi Yelemiya ne, Imana ku mbelu kua tshibi tshia ku nsubu wa Yehowa, ambaku dî edi ne, Unvuai bienu dî dia Yehowa, nuenu Bena Yuda bonso badi babuela mu bibi ebi bua kutendelela Yehowa. Yehowa wa misumba, Nzambi wa Isalele, udi wamba ne, Longololai bienzedi bienu ne malu enu bimpe, ne nennushikamishe mu muaba eu. Kanueyemenyi mei a mashimi a badi bamba ne, Eu udi ntempelo wa Yehowa, ntempelo wa Yehowa, ntempelo wa Yehowa. Bualu bua binalongolola bienzedi bienu ne malu enu ne bilongolola dimpe tshishiki, binualumbulula bilumbu bia hankatshi ha muntu ne muena mutumba nʼandi ne kulumbulula kuakane tshishiki, binuikala kanuyi nukengesha benyi ne bana ba nshiya ne bakashi ba mu lufuila, binuikala kanuyi numatshisha mashi a badi kabayi ne bualu hanshi mu muaba eu, binuikala kanuyi nulonda nzambi ya hatuhu bua kudikengesha nʼai, nennushikamishe mu muaba eu bimpe, mu buloba bunakaha bankambua benu, ku dituku adi tô ne tshiendelele. Tangilai, nudi nueyemena mei a mashimi adi kâyi mua kunukuatshisha. Kia! Nenuibe, nenushihe bakuabo, nenuende masandi, nenuditshihe ne mashimi, nenuoshile Bâla musenga wa manananshi, nenulonde nzambi ya hatuhu mudi kanuyi bamanye, anyi? Hashishe nenulue bua kuimana mu nsubu eu udibo bambikila ku dina dianyi, nuamba ne, Tuakuhandishibua; nudi basungidibue anu bua kuenza malu â mabi, anyi? Nsubu eu udibo bambikila ku dina dianyi wakalua tshisokomenu tshia banyengi ku mesu kuenu, anyi? Yehowa udi wamba ne, Monai, meme nkayanyi, nakadimuenena bualu ebu. Kadi nuye bienu ku tshitendelelu tshianyi tshiakadi ku Shilo, kunakajadika dina dianyi diambedi, numone malu anakenzela muaba eu bua malu mabi a bantu banyi Bena Isalele. Yehowa udi wamba kabidi ne, Katataka, bualu bua nuenu nuakuenza bienzedi ebi bionso, ne meme nakakula nʼenu, mbika lunkelu bua kuakula nʼenu, kadi nuenu kanuakunvua; nakanubikila kabidi, kadi kanuakuitaba kundi; nunku nengenzele nsubu eu udibo bambikila dina dianyi, unudi nueyemena, ne muaba eu unakanuha nuenu ne batatu benu, bu munakenzela Shilo. Nennuihate ku mesu kuanyi bu munakihata bana benu bonso, bana bonso ba Efelayima mene. Nunku wewe kulombedi bantu aba Nzambi nansha, kubeledi dî anyi kubalombedi bua kubakuatshisha, kubakuidi kundi nansha, bualu bua tshiena nkunvuila. Kuena utangila malu adibo benza mu misoko ya mu Yuda ne mu misesu ya Yelushalema, anyi? Bana badi bangula nkunyi, batatu babo badi batemesha kahia, bamamu babo badi benza mampa, badi balambila mukelenge mukashi wa mu diulu mikata, badi bahongoluela nzambi mikuabo milambu ya bia kunua bua kunkuatshisha tshiji. Yehowa udi ukonka ne, Badi bankuatshisha meme tshiji, anyi? Kabena badihishisha bua kudifuisha bundu, anyi? Nunku Mukelenge Yehowa udi wamba ne, Monai, nempongolole tshiji tshianyi ne njiya yanyi ha muaba eu, ha bantu, ha nyama, ha mitshi ya mu madimi ne ha bia kudia bidi buloba bumenesha; biobi nebibioshe bu kahia kadi kakayi kajima. Yehowa wa misumba, Nzambi wa Isalele, udi wamba ne, Tentekashai milambu yenu ya kuosha ha kahia ha mutu ha milambu yenu mikuabo, nudie munyinyi wai. Bualu bua tshiakambila batatu benu, tshiakabelela mukenji mu dituku dinakabaluhula mu buloba bua Ejipitu, bua milambu ya kuosha ne milambu mikuabo. Kadi nakabelela mukenji eu ne, Unvuai dî dianyi, nunku nengikale Nzambi wenu, nuenu nenuikale bantu banyi; nuende mu nshila yonso unakunuambila, bua nuenu nuhete diakalengele. Kadi bobo kabakunvua, kabakateleja matshu, bakalonda anu lungenyi luabo ne tshitshu tshia mu mitshima yabo mibi; bakalukila ku nyima, kabakaya ku mpala nansha. Ku dituku diakaluhuka bankambua benu mu buloba bua Ejipitu tô ne ku dituku edi nakabatumina bantu banyi bonso, baprofete mene, mbika bianyi ha lunkelu buatshia-buatshia bua kubatuma kudibo; kadi kabaka-ngunvuila, kabakateleja matshu abo kundi; kadi bakakolesha tshishiku tshiabo, bakahita batatu babo bubi. Neubambile mei â onso, kedi kabena bunvua dî diebe; neubabikile, kadi kabena bitaba kûdi. Nunku ubambile ne, Etshi ntshisamba tshidi katshiyi tshiunvua dî dia Yehowa Nzambi wabo, tshidi katshiyi tshianji kubuesha diyisha diandi mu mitshima yabo; dî dilelela diakujimina kudibo, diakûmuka mukana muabo. Beyai nsuki yenu ne nuyimashe, nuase muadi ha mutu ha mikuna idi hatuhu; bualu bua Yehowa wakahidia ne wakalekela ba mu tshikondo etshi bakabisha tshiji tshiandi. Yehowa udi wamba ne, Bena Yuda bakuenza malu adi mabi ku mesu kuanyi, bakushimika mpingu yabo ya tshinyangu mu nsubu udibo bambikidila dina dianyi, bua kunyanga nsubu eu. Bakuasa bibumba bia Tofete bidi mu luhongo lua muana mulume wa Hinoma, bua kuoshahu bana babo ba balume ne bana babo ba bakashi mu kahia; badi benza bualu bundi tshiyi muele mukenji, bundi tshiyi muele meji bua bobo kubuenza. Nunku Yehowa udi wamba ne, Monai matuku alualua, hikalabo kabayi babikila tshibumba ne, Tofete, anyi ne, Luhongo lua muana mulume wa Hinoma; kadi nebalubikile ne, Luhongo lua Kushihelamu Bantu; bualu bua nebajike bantu mu Tofete, kakuena kuikala muaba mukuabo wa kubajikamu. Bitalu bia bantu aba nebikale bia kudia bia nyunyu ya mulu ne nyama ya ha buloba; kakuena kuikala muntu bua kuyihata. Nendekeshe dî mu misoko ya mu Yuda ne mu misesu ya Yelushalema, dî dia tuseku ne dia disanka, dia mubaki wa mukashi ne dia mukashi udiye Ubaka kabidi; bualu bua buloba nebulue tshihela tshia hatuhu. Yehowa udi wamba ne, Mu tshikondo atshi nebahatule mifuba ya bakelenge ba Yuda, ne mifuba ya baminyampala babo, ne mifuba ya baprofete babo ne mifuba ya Bena Yelushalema bonso mu majambu abo. Nebashale ku mpala kua diba ne kua ngondo ne kua bintu bionso bia mu diulu, bintu biakanangabo ne biakakuatshilabo mudimu, ne biakalondabo ku nyima kuabi, ne biakatempabo nʼabi ne biakatendelelabo; kayena isangishibua kabidi, kabena bayijika kabidi, kadi nebayishiye hanshi ha buloba bu tunvi. Yehowa wa misumba udi wamba ne, Nebasungule lufu ku mpala kua muoyo kudi bantu bonso badi bashala ba mu tshisamba etshi tshibi, kudi badi bashala mu miaba yonso inakabihata. Newikale ne bualu bua kubambila kabidi ne, Yehowa udi wamba ne, Biadishinda bantu hanshi, kabena bajuka kabidi, anyi? biahambuka muntu mu nshila, kena uhingana mu nshila muimpe kabidi, anyi? Kadi Bena Yelushalema badi balukila ku nyima tshiendelele bualu kai? Badi bakuata malu a mashimi bikole; badi babenga kuhingana. Nakuteleja matshu ne nakunua, kadi kabakamba mei makane; kakuena umue udi unyingalala bua bubi buandi, wamba ne, Nakuenza tshinyi? Muntu yonso udi wenda mu nshila udiye mudisunguile, bu mudi kabalu kaya ku nvita kinyika mutu hanshi. E, lusongo nyunyu tua mu diulu, tudi tumanye bikondo biatu; nyunyu wa nkutshi ne kandinda ne nyunyu wa mudinga idi ivuluka bikondo biai bia kuluayi; kadi bantu banyi kabena bamanye mikenji ya Yehowa. Munyi munudi nuamba ne, Tudi bena meji, tudi ne mikenji ya Yehowa? Kadi monai, mutshi wa bafundi udibo bafunda nʼau mashimi wakayivuisha anu mei a mashimi. Bena meji badi bafuishibue bundu, badi bakuatshika buowa ne badi bakuatshibua; monai, bakahetula dî dia Yehowa; meji kai adi munda muabo? Nunku nenfile bakashi babo kudi bantu bakuabo, ne madimi abo kudi badi babatamba bukole, bualu bua, kudi udi mutambe buhuekele tô ne kudi udi mutambe bunene, muntu yonso udi ne lukuka lua biuma; kudi muprofete tô ne kudi muakuidi badi badingangana. Bakûmisha mputa wa bantu banyi anu kakese, bamba ne, Ditalala, ditalala, ne ditalala kadiyiku. Bakakuatshika bundu hakenzabo malu mabi, anyi? Nansha, kabakakuatshika bundu, nansha kakese; bakûma mu mesu; nunku Yehowa udi wamba ne, Nebahone munkatshi mua badi bahona; mu tshikondo tshinabakengesha nebalenduke. Yehowa udi wamba ne, Nembabutule kabutu; kakuena kuikala kamuma kamue ku muonshi wa tumuma tua nvinyo anyi kamuma ka nfigi ku mutshi wa nfigi; mabeshi mene neafubidile, ne bintu bionso binakubaha nebijimine. Tudi bashikame hanshi bua tshinyi? Tudisankishe hamue, tubuele mu misoko idi ne ngumbu, tufuilemu; bualu bua Yehowa Nzambi wetu wakutuhisha bua tuetu kufua, wakutunuisha mai adi ne lulengu bua tuetu kunua, bualu bua tuakuenzela Yehowa bibi. Tuakatekemena ditalala, kadi diakalengele kadiakulua kutudi; tuakatekemena tshikondo tshia kusangala, kadi monai, kabutu kadiku! Badi bunvua kufembula kua tubalu tuabo kufuma mu Dana; hunvua buloba bujima muadi wa balume ba tubalu tuabo, budi bukanka; bualu bua bakumana kufika, bakudia buloba ne bintu bionso bidimu, musoko ne bantu bonso badi bashikamemu. Yehowa udi wamba ne, Monai, nentume nyoka munkatshi muenu, nyoka ya mbanvu idibo kabayi mua kuibidisha hanu; neyinusume. Nakadi kusua kuikala ne bukole bua kudisamba nʼabu mu kanyinganyinga kanyi; mutshima wanyi udi musame munda muanyi. Unvuai! Dî dia muadi wa muana mukashi wa bantu banyi didi difuma ku buloba budi kule kutamba, diamba ne, Yehowa kena mu Siona, anyi? Mukelenge wandi kenamu, anyi? Bualu kai bakunkuatshika tshiji ku mpingu yabo misonga ne bintu bia hatuhu ya bantu ba bende? Tshidimu tshia kunowa tshiakuhita, tshidimu tshia munya mukole tshiakushika, ne tuetu katuena basungidibue. Bua dikenga dia muana mukashi wa bana betu mutshima wanyi udi musame, ndi ngasa muadi; buowa buakunkuata. Kakuena buanga mu Gilada, anyi? Kakuenaku ngangabuka, anyi? Nunku, muoyo wa muana mukashi wa bana betu kawena muanji kusangala bua tshinyi? Nakadi kusua bua mutu wanyi wikale bu mai, ne mesu anyi ikale bu mushimi wa binsonshi, bua meme ndile munya ne bufuku bua bantu bakashihabo ba muana mukashi wa bana betu! Nakadi kusua kuikala ne muaba wa tshilala benyi mu tshihela wa bena ngendu bua meme mmanye mua kushiya bana betu ne kumuka kudibo! Bualu bua buonso buabo badi bendi ba masandi ne tshisumbu tshia batungidianganyi. Yehowa udi wamba ne, Badi banana ndimi yabo bua kushimabo bu mudibo banana buta; bakulua bantu bakole mu buloba, kadi kabena ne bukole bua kunanukila mu buakane, bualu bua badi baya kuenza bualu bubi butentekasha ha mutu ha bualu bubi ne kabena bammanye meme. Muntu yonso adimukile muena mutumba nʼandi; kueyemenyi biebe nansha umue wa mu bana benu; bualu bua muanʼenu yonso neangate bintu biebe, ne muena mutumba yonso nêndekane ne mei a mukoso. Muntu ne muntu neadinge muena mutumba nʼandi, kabena bamba dî dilelela; bakayisha ndimi yabo bua kuambayi mashimi; badi baditekesha ne kuenza kuabo kua malu mabi. Yehowa udi wamba ne, Wewe udi mushikame munkatshi mua mashimi; bualu bua mashimi abo badi babenga kummanya meme. Nunku Yehowa wa misumba udi wamba ne, Monai, nembengulule, nembatete, bualu kai bukuabo bundi mua kuenza muana mukashi wa bana betu? Ludimi luabo ludi bu mukete wa lufu, ludi luamba mashimi; muntu udi wambila muena mutumba nʼandi mei a ditalala mukana muandi, kadi mu mutshima wandi udi umualamina bua kumukuata. Yehowa udi ukonka ne, Tshiena ne bua kubakengesha bua malu â, anyi? Mutshima wanyi kawena udisombuela bua tshisamba tshidi bu etshi, anyi? Nengashile mikuna muadi, nempatule binsonshi, nengashile miaba ya mu tshihela idi ne mashinde muadi mukole, bualu bua bakayosha, nunku kakuena muntu wahitshilaku; bantu kabena mua kunvua miadi ya ngombe kabidi; nyunyu ya mulu ne nyama ya mu tshisuku yakanyema, yakaya. Nenvuishe Yelushalema bu diala ne bu muaba udi mibuabua nushikame; nenvuishe misoko ya mu Yuda bikulu bidi kabiyi ne bantu. Muena meji udi nganyi, bua yeye amanye mua kujingulula bualu ebu? Mukana mua Yehowa muakuambila muntu kai bualu ebu bua yeye amanye mua kumanyisha bakuabo? Buloba budi bubutudibua, budi buoshibua bu tshihela, bua kakuyi muntu uhitshilamu bua tshinyi? Yehowa udi wamba ne, Bualu bua bobo bakubenga mikenji inakateka ku mpala kuabo, ne kabena batumikila dî dianyi, kabena bendelamu, kadi bakulonda anu mampaka a mu mitshima yabo, ne bakulonda Babâla, bu muakabayishabo kudi batatuʼabo. Nunku Yehowa wa misumba, Nzambi wa Isalele, udi wamba ne, Monai, nendishe bantu aba mamuma a bululu, nembanuishe mai a lulengu. Nembatangadishe munkatshi mua bisamba bia bantu bidibo ne batatuʼabo kabayi banze kumanya. Nentume muele wa nvita ku nyima kuabo tô ne hanamana kushiha buonso buabo. Yehowa wa misumba udi wamba ne, Elanganai meji, bikilai bakashi, bena kasala, balue; bikilai bakashi badi mua kuimba bimpe, balue biabo, balue lukasa, batuashile madilu, bua binsonshi bia bungi bihatuke ku mesu, ne bua mai a bungi ahatuke muinshi mua bilafinyi bietu. Bualu bua badi bunvua dî dia muadi didi difuma ku Siona diamba ne, Tuakubutudibua munyi? Tudi tukuatshika bundu bikole bualu bua tuakadi ne bua kulekela buloba buetu, ne bualu bua bakushimbula nsubu yetu. Kadi nuenu bakashi, unvuai dî dia Yehowa; matshu enu itabushe dî dia mukana muandi; nuyishe bana benu bakashi mua kuasabo muadi; muntu yonso ayishe muena mutumba nʼandi bua kudileye. Bualu bua lufu luakubanda, luakubuela mu madidishi etu, luakubuela mu nsubu ya bakelenge betu bua kushihalu bana betu bakese ne kubumusha mu misesu ne bansongalume betu ku miaba idi bantu bunguila. Yehowa udi wamba ne, Amba biebe ne, Bitalu bia bantu nebihone hanshi mu madimi bu tunvi, ne bu mudi dianza dia maminu dimata hanshi ku nyima kua muhuodi; kakuena muntu wabisangisha. Yehowa udi wamba ne, Muena meji katumbidi mu meji andi, muena bukitu katumbidi mu bukole buandi, muntu mubanji katumbidi mu bubanji buandi; kadi muntu udi utumba atumbile mu bualu ebu ne, Ndi mmujingulula, ndi mumumanye ne, Yeye, Yehowa mene, ngudi wenzesha luse ne kulumbulula kuimpe ne buakane ha buloba. Bua Yehowa udi wamba ne, Ndi nsanka mu malu â. Yehowa udi wamba ne, Monai, matuku nealue hanakengesha badi batengudibue ne ditengula didi kadiyi dilelela: Ba mu Ejipitu, ba mu Yuda, ba mu Edome, ba mu Amona, ba mu Moaba ne bonso badi ne nsuki yabo mibeya biketu badi bashikame mu tshihela; bualu bua ba mu bisamba abi bionso kabena ne ditengula dilelela, ne Bena Isalele kabena batengudibue mu mitshima yabo. Nuenu, Bena Isalele, unvuai dî dia Yehowa didiye unuambila. Yehowa udi wamba ne, Kanulondi nshila wa bisamba bia bantu, kanuikadi ne buowa bua bimanyinu bia mu diulu; bualu bua bisamba ebi bidi ne buowa bualu buabi, bualu bua bilele bia kutendelela kua bantu aba bidi hatuhu. Bidi bu mutshi udi muntu utaha muitu, udi mudimu wa muena tshisui udiye wenza ne bianza biandi. Udi ûlengesha ne argent ne or; badi baushimika ne misumadi ne marteau bua kautuki. Mpingu yaya idi bu dikunshi diakusongabo, kayena yakula. Idi ne bualu bua muntu kuyituala, bualu bua kayena mua kuenda. Kanuyitshinyi bualu bua kayena mua kuenza bibi, kayena ne bukole bua kuenza bimpe. Kakuena mukuabo bu wewe, Yehowa; wewe udi munene, dina diebe didi dinene mu bukole buadi. Muntu kai udiku udi kayi ne bualu bua kukunemeka, wewe Mukelenge wa bisamba bia bantu? Bua bukelenge budi buebe; bualu bua munkatshi mua bena meji bonso ba mu bisamba bia bantu, ne munkatshi mua bakelenge babo bonso, kamuena umue bu wewe. Kadi bantu kabena ne meji, badi anu ne buhote; diyisha dia mpingu didi hatuhu; idi anu tshituha tshia mutshi! Tshidi tshilamika ne tshiamu tshia argent tshiakafumabo nʼatshi ku Tâshishi, ne tshiamu tshia or tshia ku Ufaza, mmudimu wa nsenda ne mutudi wa or; badi ne bilulu bifike ne bikunzubile; buonso buabi mmudimu wa bena lungenyi. Kadi Yehowa udi Nzambi wa bushuwa; yeye udi Nzambi wa muoyo ne Mukelenge wa tshiendelele. Buloba budi buzakala hikaleye ne tshiji, ne ba mu bisamba bia bantu kabena mua kuimana ku mpala kua tshiji tshiandi. Bualu bua nuenu kubambila budi nunku ne, Nzambi idi kayiyi mifuke diulu ne buloba neyijimine ha buloba ne muinshi mua diulu. Nzambi nyeye wakafuka buloba ku bukole buandi, wakajadika bia ha buloba ku lungenyi luandi, wakavungula diulu ku meji andi. Hambeye dî diandi, tshiona tshia mai a muenshi tshidi mu diulu, ne udi ubandisha dibungi ku matengu a buloba; udi wenzela nvula miele ya nvula, udi uhatula mpehele mu bibutshilu biandi. Muntu yonso wakuandamuka bu muhote udi kayi ne meji; mutudi wa or yonso wakufuishibua bundu ku mpingu yakusongeye; bualu bua mpingu yakufulabo idi ya mashimi, kakuena muhuya munda muai. Idi bintu bia hatuhu bua kudinga nʼabi bakuabo; mu tshikondo tshia kuyiteta neyijimine. Yehowa, luseke lua buhianyi bua Yakoba kena nunku nansha; bualu bua yeye udi mufuki wa bintu bionso; Bena Isalele badi tshisamba tshia buhianyi buandi; Yehowa wa misumba ndina diandi. Angula dibuki diebe hanshi ha buloba, wewe musoko udibo batshintshimika. Bualu bua Yehowa udi wamba ne, Monai, mu tshikondo etshi nengihate bantu mu buloba, nembatatshishe bikole tô ne hammanyabo. Mulau udi unkuata bua dikenga dianyi! Mputa wanyi udi usama bikole, kadi nakamba ne, Bulelela, edi ndikenga dianyi dindi ne bua kutuala. Ntenta wanyi udi mushimbuke, mionshi yanyi yonso yakukoseka. Bana banyi bonso bakûmuka kundi, kabenaku kabidi; kakuena mukuabo wa kunvunguluila ntenta wanyi kabidi, anyi wa kundongoluela bilulu bianyi bikudika. Bualu bua balami bonso bakuandamuka bahote, kabakulomba lungenyi kudi Yehowa; nunku kabakuheta diakalengele, ne bisumbu bionso bia bimuna biabo biakutangadika. Unvuai! Lumu luakufika, ne tshintompatompa tshifume ku buloba bua ku node tshidiku! Mbua kuyuisha misoko ya mu Yuda bikulu, bishikaminu bia nyama ya mibuabua. Yehowa, ndi mumanye ne nshila wa muntu kena munda muandi; muntu kena ne bukole munda muandi bua kuendesha nʼabu biendedi biandi bimpe. Yehowa, umbele, kadi umbele mu kulumbulula kuakane; kunkengeshi mu tshiji tshiebe, bua wewe kunvuishi muntu wa hatuhu. Hongolola tshiji tshiebe ha mutu ha bisamba bidi kabiyi bikumanye, ne ha mutu ha bantu badi kabayi babikila dina diebe; bualu bua biakabutula bana ba Yakoba; bulelela, biakubabutula, biakubamana, biakuhaula tshishikaminu tshiabo. Dî dia Yehowa diakalua kudi Yelemiya ne, Unvua mei a tshihungidi etshi, umanyishe bantu balume ba mu Yuda ne Bena Yelushalema, ubambile ne, Yehowa, Nzambi wa Isalele, udi wamba ne, Mulau neukuate muntu udi kayi unvua mei a mu tshihungidi etshi, tshinakahunga ne bankambua benu dituku dinakabaluhula mu buloba bua Ejipitu, mu ditanda mudibo bafula tshiamu, ngamba bianyi ne, Nutumikile dî dianyi, nuenze malu onso andi nnuambila. Nunku nenuikale bantu banyi, ne meme nengikale Nzambi wenu; bua njadike mutshihu wanyi unakaditshiha kudi bankambua benu, bua kubaha buloba budi bûle tente ne mabele ne buitshi, bu mudibu lelu eu. Hashishe meme nakitaba, nakamba ne, Amen, Yehowa! Yehowa wakangambila ne, Amba mei â onso mu misoko ya mu Yuda ne mu misesu ya Yelushalema, ubambile ne, Unvuai mei a tshihungidi etshi, nuenze. Bualu bua nakasengelela bankambua benu bikole mu dituku dinakabaluhula mu buloba bua Ejipitu tô ne ku dituku edi, mbika ne lunkelu bua kubadimusha ne, Nutumikile dî dianyi. Kadi kabakatumikila dî dianyi, kabakateleja matshu kundi; kadi buonso buabo bakenda anu mu tshitshu tshia mu mitshima yabo mibi; nunku nakabavuishila mei onso a mu tshihungidi etshi anakabambila bua kuenzabo, kadi kabakenza nansha. Yehowa wakangambila kabidi ne, Tshifufu tshibi tshidi munkatshi mua Bena Yuda ne munkatshi mua Bena Yelushalema. Bakahingana ku malu mabi akenza bankambua babo, mbakabenga kunvua mei anyi; bakulonda nzambi mikuabo bua kuyikuatshilabo mudimu. Bena Isalele ne Bena Yuda bakushiha tshihungidi tshinakuhunga ne bankambua babo. Nunku Yehowa udi wamba ne, Nembatumine dikenga didibo kabayi mua kudinyema. Nebadie kundi, kadi tshiena mbunvuila. Mu diba adi ba mu misoko ya mu Yuda ne ba mu Yelushalema nebaye kudila kudi nzambi idibo boshila musenga wa manananshi, kadi yoyo kayena ibasungila mu dituku dia dikenga diabo. Bualu bua bu mudi bungi bua misoko yenu, nuenu Bena Yuda, mbu mudi bungi bua nzambi yenu; bu mudi bungi bua misesu ya mu Yelushalema, mbu mudi bioshelu binuakuashila tshintu etshi tshia bundu, bioshelu mene bia kuoshilahu Bâla musenga wa manananshi. Nunku kulombedi bantu aba Nzambi, kubishi nansha dî diebe anyi kulomba kuebe bua bualu buabo; bualu bua tshiena mbunvuila mu tshikondo tshidibo badila kundi bua dikenga diabo. Wanyi munanga udi mua kuenza bualu kai mu nsubu muanyi, yeye mumane kuenza malu a bundu? Mitshihu yebe ne munyinyi wa tshijila nebimanye mua kukûmushila mulau ne mua kukuhandisha ku bintu ebi, anyi? Ha wenza malu mabi, ke haudi usanka. Yehowa wakakuidika dina ne, Mutshi wa olive mubishi, udi mulengele muikale ne mamuma makane; kadi yeye wakautemeshila kahia ka tshiona tshinene, ne matamba au akatshibuka. Bualu bua Yehowa wa misumba, wakukukuna, wakukuhisha bua wewe kukenga, bualu bua bubi bua Bena Isalele ne bua Bena Yuda, budibo bankuatshishe nʼabu tshiji, hakafilabo musenga wa manananshi kudi Bâla. Yehowa wakammanyisha malu abo ne nakâmanya; hashishe wakandesha bienzedi biabo. Kadi nakadi bu muanʼa mukoko mutalale udibo baya nʼau ku tshishihelu; tshiakamanya muakadibo bangelele tshifufu bamba ne, Tutahe mutshi ne mamuma au diatshimue, tumûmushe ha buloba bua badi ne muoyo, bua bantu kabavuluki dina diandi kabidi. Kadi Yehowa wa misumba udi ne kulumbulula kuakane, udi uteta mutshima ne meji bia muntu, nentangile busombuedi buebe hamʼbidi habo, bualu bua nakuteka bualu buanyi mu bianza biebe. Bua bualu ebu Yehowa udi wamba bua bantu ba ku Anatota badi bakeba muoyo wanyi ne badi bamba ne, Kuambi dî mu dina dia Yehowa kabidi bua wewe kufu ku bianza bietu! Nunku Yehowa wa misumba udi wamba ne, Mona, nembakengeshe; bansongalume babo nebafue ku miele ya nvita, bana babo balume ne bana babo bakashi nebafue ku tshiole. Kakuena umue wabo washala, bualu bua nenvuishe ntatu kudi bantu ba ku Anatota, tshikondo tshia kubala malu mabi abo mene. Yehowa, wewe udi muakane hanakeba kukuela mpata, kadi ndi musue kuyikilangana nʼebe bualu buanyi: Nshila wa bantu babi udi ne diakalengele bualu kai? Bualu kai bonso badi basonguelangana badi ne ditalala? Wewe wakubakuna, bakuela miji; badi badiunda; e, badi bakuama mamuma; Wewe udi ha buihi ne mishiku yabo, udi kule ne mitshima yabo. Kadi wewe, Yehowa, udi mu mmanye meme, wewe udi untangila, udi uteta mutshima undi nʼau kûdi; ubahatule bu mudibo bahatula mikoko mu luhangu bua kuya nʼai ku tshishihelu, ne ubalongoluele bua kufuabo dituku dia kubashiha. Buloba nebuase muadi, ne midioko ya buloba buonso neyifubidile musangu bule bishi? Bua bubi bua bantu badi bashikamemu nyama ne nyunyu yakûmushibua ha buloba; bualu bua bantu aba badi bamba ne, Nzambi kena umona kunshikidilu kua malu etu. Biwikala mulumbile lubilu ne bantu badi benda hanshi, ne bakukuhangisha, neumanye mua kutetangana lubilu ne tubalu kudi kunyi? Biwahanga kuenda bimpe mu buloba budi ne ditalala, newenze tshinyi mu ditu dia Yadene didi dikutakane? Bualu bua bana benu mene ne ba mu tshiota tshia tatu webe bakukutungila tshitungu; bobo mene badi bakulonda ne mbila; kuitabushi mei abo, nansha biakuambilabo mei mimpe. Nakulekela nsubu wanyi, nakubenga buhianyi buanyi; nakufila wanyi munanga mu bianza bia badi nʼandi lukuna. Yuda, buhianyi buanyi, wakulua kundi bu nyama wa ntambue wa mu ditu; yeye wakungela dî bua kumpidia, nunku ndi nʼandi lukuna. Yuda, buhianyi buanyi, wakulua kundi bu nyunyu udi ne matoba matoba udi udia munyinyi, anyi? nyunyu idi idia munyinyi idi imunyunguluka bua kumuluisha, anyi? Yai bienu, nusangishe nyama yonso ya mu mpata, nulue nʼai bua kumudiayi. Balami ba mikoko ba bungi bakunyanga budimi buanyi bua tumuma tua nvinyo, bakudiata luseke luanyi lua buhianyi mu makasa; bakuyisha luseke luanyi luakane bu tshihela tshia hatuhu. Bakuluvuisha bu muaba wa hatuhu, buloba budi bushala butuhu budi budila kundi; buloba buonso buakuvuishibua butuhu, bualu bua kakuena muntu udi uteka bualu ebu mu mutshima wandi. Bahaudi bakulua ha mutu ha mikuna yonso ya mu tshihela idi hatuhu, bualu bua muele wa Yehowa udi ushiha bantu ku ditengu dia buloba to ne kunfudilu kuabu; kakuena muntu udi ne ditalala. Bakukuna maminu a blé, bakuhuola meba; bakudikengesha ne mudimu mukole, kabakudihetela luhetu; nebikale ne bundu bua mamuma abo, bualu bua tshiji tshikole tshia Yehowa. Yehowa udi wamba dî edi bualu bua bena mutumba nʼanyi babi, badi balenga bianza biabo ha buhianyi bunakuhesha bantu banyi Bena Isalele ne, Monai, nembajule mu buloba buabo, nenjule Bena Yuda munkatshi muabo. Hanashikisha kubajula, nengalukile kudibo ne nembafuile luse, nembahingashe tshiakabidi, muntu ne muntu ku buhianyi buandi, muntu ne muntu ku buloba buandi. Biananukilabo kuyila bienzedi bia bantu banyi, bua kuditshihabo ku dine dianyi ne, Bu mudi Yehowa ne muoyo; bu muakuyishabo bantu banyi mua kuditshiha kudi Bala; nebajadikibue bimpe munkatshi mua bantu banyi. Yehowa udi wamba ne, Kadi bikalabo kabayi bangunvuila, nenjule tshisamba atshi, nentshibutule. Yehowa wakangambila ne, Ya biebe, ule mukaba wa tshilamba tshia lin, ûsuike mu tshifuka tshiebe, kûtu mu mai nansha. Nunku nakula mukaba bu mu dî dia Yehowa, nakausuika mu tshifuka tshianyi. Dî dia Yehowa diakalua kundi tshiakabidi ne, Angata mukaba uwakula, udi mu tshifuka tshiebe, juka, uye ku musulu wa Pelata, ûsokokeku mu mutanta wa dibue. Nunku nakaya, nakausokoka hehi ne musulu wa Pelata, bu muakangambila Yehowa. Hakahita matuku a bungi, Yehowa wakangambila ne, Juka biebe, uye ku musulu wa Pelata, wangateku mukaba unakakuambila bua kûsokokaku. Nunku nakaya ku musulu wa Pelata, nakumbula, nakangata mukaba mu muaba unakausokoka; ne, monai, mukaba wakumana kunyanguka, kawakadi ne mudimu kabidi. Mu diba adi dî dia Yehowa diakalua kundi ne, Yehowa udi wamba ne, Nenyange dihetu dia Bena Yuda ne dihetu dinene dia Bena Yelushalema muomumue. Bantu aba babi badi bahidia kunvua mei anyi, badi benda mu tshitshu tshia mu mitshima yabo, bakalonda nzambi mikuabo bua kuyikuatshilabo mudimu ne bua kuyitendelelabo, nebikale bu mukaba eu udi kauyi ne mudimu kabidi. Bualu bua bu mudi mukaba ulamatangana ne tshifuka tshia muntu, nunku Yehowa udi wamba ne, Nakulamakasha Bena Isalele bonso ne Bena Yuda bonso kundi, bua bobo bikale kundi bu bantu banyi, bu dina dianyi, bu butumbi buanyi ne bu buneme buanyi; kadi bobo kabakunvua. Nunku ubambile dî edi ne, Yehowa, Nzambi wa Isalele, udi wamba ne, Mulondo wonso neûle tente ne nvinyo. Nebakukonke ne, Katuena bamanye ne, Mulondo wonso neûle tente ne nvinyo, anyi? Hashishe wewe neubambile ne, Yehowa udi wamba ne, Monai, nenkuatshishe bantu bonso ba ha buloba maluvu, kudi bakelenge badi bashikame mu nkuasa wa Davidi, bakuidi ne baprofete ne ba mu Yelushalema bonso. Yehowa udi wamba ne, Nembatutakashangane, batatu ne bana babo hohamue; tshiena mbafuila luse, tshiena mbasungila, luse kaluena lunkuata bua bualu buabo, kakuena tshintu tshidi mua kunkanda bua meme kubabutula. Unvuai, telejai matshu, kanuikadi ne dihetu, bualu bua Yehowa wakuamba dî diandi. Tumbishai Yehowa Nzambi wenu, diambedi yeye kayi muanze kunutumina mîdima, diambedi makasa enu kayi manze kulenduka ha mutu ha mikuna idi ne mîdima, ne hantshidi nukeba munya, yeye neawandamune bua kuikalau mufitu, neauvuishe mîdima mikole. Kadi binuahidia kunyua dî diandi, mutshima wanyi neudile mu musokoko bualu bua dihetu dienu; binsonshi bia bungi bia ku mesu kuanyi nebihueke hanshi, bualu bua bakukuata tshisumbu tshia mikoko ya Yehowa mu buhika. Wambile mukelenge ne mukelenge mukashi mamu wandi mumuledi ne, Nudihuekeshe bikole, nushikame hanshi; bualu bua bintu bilengele bidi biasa ha mitu henu, tshifulu tshienu tshia bukelenge tshihite bulengele, biakuhona hanshi. Bakinshila bibi bia ku misoko ya ku Sude, kakuena muntu wakunzulula kabidi; bakuya ne ba mu Yuda mu buhika, buonso buabo mene; bakuya ne buonso buabo mene. Banduluka, umone badi bafume ku node. Tshisumbu tshia mikoko tshiakukuhabo tshidi hanyi, tshisumbu atshi tshilengele? Newambe tshinyi hatekabo bantu ha mutu hebe baudi mumane kuyisha bua kuikalabo balunda bebe? Kanyinganyinga kakena kakukuata bu didinyenga dia mukashi udi wamba kulela, anyi? Biwadikonka mu mutshima webe ne, Malu â onso akunkuata bua tshinyi? Mbua malu mabi ebe a bungi badi bavula bivualu biebe, ne dikenga didi dikukuata to ne ku bikankanyi biebe. Muena Atiopa udi mua kuandamuna dikoba diandi, anyi nkashama udi mua kuandamuna matoba andi, anyi? Nunku nuenu batu benza malu mabi nenumanye mua kuenza malu makane. Nunku nembatangadishe bu mudi bisote bijimina ku mpala kua luhehele lua mu tshihela. Yehowa udi wamba ne, Elu nduseke luebe lua buhianyi, ne tshituha tshinakukuidikishila, bualu bua wakumpua meme muoyo, wakueyemena mashimi. Nunku nenkuvule bilulu ku mesu kuebe, bundu buebe nebumueneke. Nkutangila malu mabi ebe, masandi ebe, mei a kusamina kuebe kua masandi, bundu bua masandi ebe, ha mutu ha mikuna ya mu mpata. Mulau newikale kûdi, Yelushalema! Musangu neulehe bule bishi kuyi muanze kutokeshibua? Dî dia Yehowa diakalua kudi Yelemiya bualu bua munanga: Ba mu Yuda badi basa muadi, ne ba mu bibi biandi badi bateketa, bashikame hanshi ha buloba baluate bilulu bifike; ne muadi wa Yelushalema udi ubanda kulu. Bena butumbi badi batuma bantu babo bahuekele bua kusunabo mai; badi bafika ku mena a mai, kabena basangana mai; badi bahingana ne milondo yabo munda mutuhu; badi bakuatshika bundu, badi bahuekeshibua, badi babuikila mitu yabo. Bualu bua buloba budi buhandika mitanta, bua nvula kayiloki ha buloba; ba bidime badi bakuatshika bundu, badi babuikila mitu yabo. Ngulungu mene udi ulela muana mu mpata udi umulekela, bualu bua kakuena mashinde. Nyama ya mpunda ya ha mpata idi imana ha mutu ha mikuna idi kayiyi ne mashinde, idi ihuyakana bu mibuabua; mesu ai adi ateketa-teketê, bualu bua kakuena mashinde a kudia. Bulelela, mihi yetu idi ituhisha, kadi wewe Yehowa, utukuatshishe bualu bua dina diebe; tuakualukila ku mibi misangu ya bungi, tuakukuenzela bibi. Wewe ditekemena dia Bena Isalele, Musungidi wabo mu tshikondo tshia dikenga; wewe ukadi kutudi bu muenyi wa mu buloba ebu, bu muena luendu udi utula bua kulaleye anu butuku bumue bua tshinyi? Bualu kai ukadi kutudi bu muntu udi ne buowa, bu muena bukitu udi kayi mua kutusungila? Kadi wewe, Yehowa, udi munkatshi muetu; tuetu ludi tubikidibua ku dina diebe; kutulekedi nansha. Yehowa udi wambila bantu aba ne, Bobo bakunanga kuendakana mu nshila, kabakukanda makasa abo; nunku Yehowa kena mua kubitabusha nansha; mpindiu yeye neavuluke mibi yabo, neakengeshe benji ba malu mabi. Yehowa wakangambila ne, Kulombedi bantu aba bua kuikalabo ne diakalengele. Hajilabo bia kudia, tshiena ngunvua dî diabo, hafilabo milambu ya kuosha ne ya bia kudia, tshiena ngitabusha; kadi nembashihe ku muele wa mata, ku tshiole ne ku tshihuhu. Hashishe nakamba ne, Aka, Mukelenge Yehowa. Mona, baprofete babo badi babambila ne, Kanuena numona muele wa nvita, kanuena nuikala ne tshiole; kadi nuenu nenuikale ne ditalala dia bushuwa mu muaba eu. Ka Yehowa wakungambila ne, Baprofete badi bamba mei a mashimi mu dina dianyi. Tshiakubatuma, tshiakubaha mukenji, tshiakubambila dî dianyi. Badi banuambila tshikena kumona tshia mashimi, mei a mbuku, malu a hatuhu ne mei a kudinga a mu mitshima yabo. Nunku Yehowa udi wamba bualu bua baprofete badi bamba mei mu dina diandi, yeye kayi mubatume, kadi badi bamba ne, Muele wa nvita ne tshiole kabiena bikuata buloba ebu, ne, Baprofete aba mene nebashihibue ku muele wa nvita ne ku tshiole. Bantu badibo bambila mei abo nebimashibue mu misesu ya Yelushalema, bamane kufua ku tshiole ne ku muele wa nvita, kakuyi muntu wa kubajika—-nansha bobo bine nansha bakashi babo nansha bana babo balume nansha bana babo bakashi—bualu bua nembahongoluele makenga bualu bua malu mabi abo. Wewe ubambile dî edi ne, Mesu anyi ahuekeshe binsonshi munya ne butuku, kabikami; bualu bua muana mukashi wa bantu banyi utshidi kamama, wakashimbuka ne kushimbuka kunene bu lumbu, wakutahibua mputa munene. Binaya mu budimi, monai, bashihibue ku muele wa nvita badimu! Binabuela mu musoko, monai, badi balekesha kudi tshiole badimu! Bualu bua muprofete ne muakuidi, bubidi buabo, badi bendakana mu buloba batatakana kabayi ne lungenyi. Wewe wakuhidia Yuda tshiendelele, anyi? Mutshima webe udi mutondibue bua Siona, anyi? Wakututaha bikole nunku ne kakuena kuondaha kua mputa wetu, anyi? Tuakatekemena ditalala, kadi diakalengele kadiakalua kutudi; tuakatekemena tshikondo tshia kusangala, kadi monai, kabutu kadiku! Yehowa, tudi tutonda mibi yetu ne malu mabi a batatu betu; bualu bua tuakukuenzela bibi. Kutulenguludi, bualu bua dina diebe; kufuishi nkuasa webe wa butumbi bundu; uvuluke, kushihi tshihungidi tshiwakahunga nʼetu nansha. Mukuabo udiku wa munkatshi mua nzambi ya hatuhu ya bantu ba bende udi mua kulokesha nvula, anyi? Diulu dine didi mua kulokesha nvula nkayadi, anyi? Kenguewe, Yehowa Nzambi wetu, udi mua kuenza nunku, anyi? Nunku netukuindile, bualu bua wewe wakuenza malu â onso. Hashishe Yehowa wakangambila ne, Bu Mose ne Samuele bimane ku mpala kuanyi, tshiakadi kulesha bantu aba diakalengele. Ubihate ku mesu kuanyi, bahatuke biabo. Hakukonkabo ne, Tuyaya kudi kunyi? wewe ubambile ne, Yehowa udi wamba ne, Badi basungula tshihuhu nebaye ku tshihuhu; badi basungula muele wa nvita, nebaye ku muele wa nvita; badi basungula tshiole nebafue ku tshiole; badi basungula buhika nebaye mu buhika. Yehowa udi wamba ne, Nembasunguile mishindu inai ya makenga, muele wa nvita bua kubashiha, mbua bua kubahanda, nyunyu ya mulu ne nyama ya ha buloba bua kubadia ne bua kubashiha. Nembatangadishe eku ne eku munkatshi mua makelenge a ha buloba bualu bua malu a Manashe, muana wa Hezikiya, mukelenge wa Yuda, akenzeye mu Yelushalema. Yelushalema, nganyi wakuluila luse, nganyi wakuashila muadi? Nganyi wimana mu nshila bua kukuela muoyo? Yehowa udi wamba ne, Wewe wakumpidia, wakualukila kabidi ku mihi yebe; nunku nakuolola tshianza tshianyi bua kukushiha; kukudimuna mutshima wanyi kuakuntonda. Nakubahehula ne tshihehudi ku bibuelelu bia mu buloba buabo; nakubanyenga bana bakalelabo, nakubutula bantu banyi, kadi kabakalekela bienzedi biabo bibi. Bakashi babo ba mu lufuila badi bahita nsenga ya mu mai manene bungi; nakubishila bakashi baledi ba bansongalume mushihianganyi munda munya. Nakubatumina kanyinganyinga ne buowa lukasa. Mukashi wakalela bana muanda mutekete udi ufua majia, udi uhuola muoyo wandi; diba diandi diakabuela hatshididi munda munya; wakufuishibua bundu ne wakuhuekeshibua. Yehowa udi wamba ne, Nenfile bantu badi bashala ku muele wa nvita ku mpala kua bena lukuna babo. Mamu wanyi mundedi, ndi muedibue mulau, bua wewe wakandela bu muena mutoyi ne mufuidianganyi ne ba ha buloba bonso! Tshiena musombeshe muntu mukuabo tshintu, ne kakuena muntu wakunsombesha tshintu tshiandi, kadi muntu yonso wa munkatshi muabo udi ungela mulau. Yehowa wakamba ne, Bulelela, nenkukoleshe bua wewe kuikala ne diakalengele; bulelela, nenkuakuile kudi bena lukuna bebe mu tshikondo tshia ntatu ne tshia dikenga. Muntu udi mua kutshibula tshiamu, tshiamu tshidi tshifuma ku nôde ne tshiamu tshia mitaku, anyi? Nenfile biuma biebe ne bidi mu tshibutshilu tshiebe bia mu maloba ebe onso kudi badi babinyenga ku hukole, kabayi bafile mushinga, nengenze nunku bua malu mabi ebe onso. Nembitume hohamue ne bena lukuna bebe mu buloba bûdi kuyi mumanye; bualu bua kadilu ka tshiji tshianyi kakutema nekakuoshe. Yehowa, wewe udi mumanye bualu ebu; unvuluke, ulue kundi ne unsombuele kudi bankengeshi; mu lutulu luebe lunene kungumushi nansha; Umanye biebe bu munakuhendibua bua bualu buebe. Nakasangana mei ebe, nakâdia; mei ebe akadi kundi bu disanka ne akasankisha mutshima wanyi; bualu bua badi bambikila ku dina diebe, wewe Yehowa, Nzambi wa misumba. Tshiakashikama munkatshi mua bakadi ne tuseku, tshiakaseka nʼabo tuseku; nakashikama ha nkayanyi, bualu bua bujitu bua tshianza tshiebe; bualu bua wewe wakungusha tente ne kanyinganyinga. Kanyinganyinga kanyi kadi ka kashidi, mputa wanyi wa lubangu udi uhidia kumishibua bua tshinyi? Wewe newikale kundi bu kasulu ka mai kadi kadinga bantu ne bu mai adi akama, anyi? Nunku Yehowa udi wamba ne, Biwalukila kundi, nenkuhingashe bua wewe wimane ku mpala kuanyi; biûmusha malu ebe matambe buimpe bua kâbuelakanyi ne malu adi mabi, wewe newikale bu mukana muanyi. Bobo nebahingane kûdi, kadi wewe kuena ne bua kuhingana kudibo. Yehowa udi wamba ne, Nenkuvuishe bu lumbu lua tshiamu tshia mitaku kudi bantu aba; nebaluangane nʼebe, kadi kabena bakuhita bukole, bualu bua meme ndi nʼebe bua kukusungila ne bua kukuhandisha. Nenkuhandishe mu bianza bia bantu babi, nenkuhikule mu bianza bia bakengeshi babi. Dî dia Yehowa diakalua kundi ne, Wewe kubaki mukashi, kuledi bana ba balume anyi bana ba bakashi ku muaba eu. Bualu bua Yehowa udi wamba bua bana ba balume ne bana ba bakashi bakaledibua mu muaba eu, ne bua bamamu hakabalela ne bua batatu bakabalelesha mu buloba ebu, ne. Bobo nebafue ne lufu lua masama mabi, bantu kabena babashila muadi ne kabena babajika; nebikale bu tunvi ha buloba. Nebashihibue ku muele wa nvita ne ku tshiole; bitalu biabo nebikale bia kudia bia nyunyu ya mulu ne bia nyama ya ha buloba. Bua Yehowa udi wamba ne, Kubuedi mu nsubu wa madilu, kuyimu bua kubajinga anyi kubashila muadi, bualu bua nakûmusha ditalala dianyi, nduse luanyi lujalame kudi bantu aba. Ne bantu banene ne bantu bahuekele nebafue mu buloba ebu; kabena bajikibua, bakuabo kabena babajinga anyi baditaha mputa bualu buabo, anyi badibeya nsuki bualu buabo. Kabena mua kuhesha bena madilu bidia bua kubasamba bua bafue baho; kabena mua kubahesha luhanza lua kubasamba nʼalu bua lufu lua batatuʼabo anyi lua bamamuʼabo. Wewe kubuedi mu nsubu mudi bidia bia disanka bua kushikama nʼabo, bua kudia nʼabo ne bua kunua nʼabo. Bualu bua Yehowa wa misumba, Nzambi wa Isalele, udi wamba ne, Monai, nendekeshe di dia tuseku ne di dia disanka, dî dia mubaki wa mukashi ne dia mukashi udiye ubaka mu muaba eu, ku mesu kuebe ne mu matuku ebe. Mu diba edi, hawalesha bantu aba mei â onso, nebakukonke ne, Yehowa wakuamba mei â onso bua kutuhisha nʼau bualu kai? Tuakuhambuka kudi kunyi? Tuakuenzela Yehowa Nzambi wetu bubi kai? Nunku neubambile ne, Yehowa udi wamba ne, Bualu bua batatu benu bakundekela, bakulonda nzambi ya bende, bakuyikuatshila mudimu, bakuyitendelela, bakundekela ne kabakutumikila mikenji yanyi. Nuenu kabidi nuakuhita batatu benu kuenza malu mabi; bua, monai munudi nuenda, muntu ne muntu, mu tshitshu tshia mutshima wandi mubi, kayi ungunvuila. Bua malu â nennuihate mu buloba ebu bua kunutuma ku buloba bunudi kanuyi banze kumanya, nansha nuenu nansha batatu benu; ne mu muaba wawa nenukuatshile nzambi mikuabo mudimu munya ne butuku; bualu bua tshiena nnulesha diakalengele. Nunku Yehowa udi wamba ne, Monai, matuku nealue ikalabo kabayi bamba kabidi ne, Bu mudi Yehowa ne muoyo wakaluhula Bena Isalele mu buloba bua Ejipitu; kadi nebambe ne, Bu mudi Yehowa ne muoyo wakaluhula Bena Isalele mu buloba bua ku node ne ku maloba onso kuakabihateye. Nendue nʼabo kabidi mu buloba bunakaha bankambua babo. Yehowa udi wamba ne, Monai, nentume di bua kubikila bilembi bia minyinyi ya mu mai bia bungi, nebibakuate; ku nyima nembikile bilembi bia nyama bia bungi, ne biobi nebibakebe ku mikuna mile yonso ne ku mikuna mikese ne munkatshi mua mena a mu mabue. Bualu bua mesu anyi adi amona nshila yabo yonso, kayena misokoma kundi, ne mibi yabo kayena misokoma ku mesu kuanyi. Nendianjile kubafuta dikenga dia musangu muibidi bua malu mabi abo ne bua mibi yabo, bualu bua bakunyanga buloba buanyi ne bitalu bia bintu biabo bibi, ne bakûsha buhianyi buanyi tente ne malu abo a bundu. Wewe Yehowa, bukole buanyi ne musoko wanyi mukoleshibue ne ngumbu, tshinyemenu tshianyi mu dituku dia dikenga, ba mu bisamba bia bantu nebalue kûdi, bafume kunfudilu kua buloba, bamba ne, Batatu betu bakahiana anu mashimi ne malu a hatuhu adi kâyi mua kubakuatshisha. Muntu neadisongele mpingu idi kayiyi nzambi, anyi? Nunku, Monai, nembamanyishe, musangu eu umue nembamanyishe tshianza tshianyi ne bukole buanyi; nebamanye ne, Dina dianyi didi Yehowa. Bubi bua ba mu Yuda budi bifundibue ne tshiamu tshia kutaha nʼatshi maleta ne ku lusongo lua dibue dia diamant; budi butahibue ha dibue dia mu mitshimai yabo ne ha nsengu ya bioshelu biabo. Bana bakalelabo kabidi badi bavuluka bioshelu biabo ne Bashela babo badi hehi ne mitshi mibishi idi ha mikuna mile. Wewe, mukuna wanyi wa mu mpata, nenfile biuma biebe ne bintu biebe bionso bia mushinga mukole bia mu maloba ebe onso kudi bakuabo bu bintu biakunyengabo ne bitendelelu bia ha mikuna kabidi, bualu bua bubi buebe. Wewe nkayebe neulekele kulama buhianyi bunakukuha; nenkuenzeshe bua wewe kukuatshila badi nʼebe lukuna mudimu mu buloba bûdi kuyi mumanye; bualu bua nsola tshiji tshianyi bu kahia kadi kosha tshiendelele. Yehowa udi wamba ne, Mulau udi ukuata muntu udi weyemena bantu, udi uvuisha bantu bu diboko diandi dia bukole, ne udi umusha mutshima wandi kudi Yehowa. Bualu bua yeye neikale bu mutshi wa tshianana wa mu tshihela tshia lusenga, kena umona halua bualu buimpe kudiye, kadi neashikame anu mu miaba yakoshabo mu tshihela, mu buloba budi ne luehu kabuyi ne bantu badi bashikamemu. Muntu udi weyemena Yehowa ne udi ubala Yehowa nkayandi bu tshieyemenu tshiandi, udi ne disanka. Bualu bua yeye neikale bu mutshi mukunyibue hehi ne mai, udi utuma miji yau ku mai a musulu, udi kauyi utshina halua munya mukole, kadi mabeshi au neashale mabishi; kawena uhohoka mabeshi mu tshidimu tshia munanga, kawena uhanga kukuama mamuma. Mutshima udi uhita bintu bionso kudinga muntu, ne udi utamba kunyanguka, muntu kai udi mua kûmanya? Meme Yehowa, ndi ntangila meji a muntu, ndi nteta malu adi mu mutshima bua kufuta muntu yonso bu mudi bienzedi biandi, ne bu mamuma a bienzedi biandi. Bu mudi nkuadi usangisha bana badiye kayi mutoye, mbu mudi muntu uheta bubanji budiye wangata ku bienzedi bidi kabiyi bimpe; munkatshi mua matuku andi nebimushiye, ne kunshikidilu kuandi neikale muhote. Muaba wetu wa tshijila udi nkuasa wa butumbi mujadikibue ha mutu ha mukuna wa tshijila ku tshibangidilu. Yehowa, wewe nditekemena dia Bena Isalele, bonso badi bakuhidia nebafuishibue bundu. Bantu badi bakulekela nebikale bu maleta mafunda ha buloba, bualu bua bakubenga Yehowa, mushimi wa mai a muoyo. Yehowa, ungondahe bua meme nsangale kabidi; unsungile, bua meme nsungidibue; bualu bua wewe udi butumbi buanyi. Mona, badi bankonka ne, Dî dia Yehowa didi hanyi? Dilue mpindiu! Meme hanyi tshiakubenga kuikala mulami wa mikoko bua kukulonda; tshiakujinga dituku dia kukengesha bantu, mudi wewe mumanye! Mei akahatuka mukana muanyi akadi ku mpala kuebe. Kuikadi kundi munkuatshishi wa buowa, wewe udi tshinyemenu tshianyi mu dituku dia dikenga. Bantu badi bankengesha bafuishibue bundu kadi kuitabushi bua meme kufuishibua bundu; bobo batshinyishibue, kadi kuitabushi bua meme kutshinyishibua; ubavuishile dituku dia dikenga, ne ubabutule ne kubutuka kua misangu ibidi. Yehowa wakangambila ne, Ya biebe, wimane ku tshibi tshia ku musoko wa bantu banyi, kudi bakelenge ba Yuda babuelela ne kudibo bahatukila ne ku bibi bionso bia ku Yelushalema. Ubambile ne, Unvuai dî dia Yehowa, nuenu bakelenge ba Yuda, ne ba mu Yuda bonso, ne Bena Yelushalema bonso, badi babuelela ku bibi ebi. Yehowa udi wamba ne, Binuasua kusungila mioyo yenu, kanutuadi bujitu dituku dia Lumingu, kanulu nʼabu ku bibi bia ku Yelushalema. Kanuluhudi bujitu mu nsubu yenu dituku dia Lumingu, kanuenji mudimu; kadi nujidile dituku dia Lumingu, bu munakambila batatu benu. Kadi bobo kabakunvuila, kabakateleja matshu abo, kadi bakakolesha mitshimi yabo, bua kabunvu biabo, kabitabushi diyisha dianyi. Yehowa udi wamba ne, Binuananukila kungunvuila, bua kanubuedi mu bibi bia ku musoko eu ne bujitu dituku dia Lumingu, bua kujidila dituku dia Lumingu, bua kanuenjimu mudimu; mu diba adi bakelenge ne baminyampala babo badi bashikame mu nkuasa wa bunfumu wa Davidi nebabuele ku bibi bia musoko eu, benda mu makalu ne ha nyima ha tubalu; ne bobo ne bakelenge bana babo, bantu ba mu Yuda ne badi bashikame mu Yelushalema; musoko eu newikale ne bantu tshiendelele. Nebafume ku misoko ya Yuda ne ku miaba yonso idi minyunguluke Yelushalema, ne ku buloba bua Benyamina ne ku tshibanda ne ku luseke lua mikuna ne ku Sude, batuala milambu ya kuosha ha kahia, milambu ya munga mushindu, milambu ya bia kudia, musenga wa manananshi ne milambu ya kusakidila nʼai Nzambi, babuela nʼai mu nsubu wa Yehowa. Kadi binuahidia kungunvuila mu muanda eu wa kujidila dituku dia Lumingu, kanuyi badikande bua kutuala bujitu anyi kubuela nʼabu ku bibi bia ku Yelushalema dituku dia Lumingu, ka nentemeshe kahia ku bibi ebi, ne koko nekoshe nsubu ya banfumu ya mu Yelushalema, ne kakena kajima nansha. Dî dia Yehowa diakalua kudi Yelemiya ne, Juka, uhueke biebe ku nsubu wa mufumbi wa ngesu, nenkunvuisheku mei anyi. Nunku nakahueka ku nsubu wa mufumbi wa ngesu, ne monai, yeye wakadi wenza mudimu wandi ku nkata wa dima. Hakadi luesu luakadiye ufumba ne dima lunyanguke mu tshianza tshia mufumbi, yeye wakafumba nʼadi luesu lukuabo, bu muakadiye musue kulufumba. Mu diba adi dî dia Yehowa diakalua kundi ne, Yehowa udi wamba ne, Nuenu Bena Isalele, tshiena mua kunuenzela bu mudi mufumbi eu wenza, anyi? Monai, bu mudi dima mu bianza bia mufumbi, mbu munudi mu bianza bianyi, nuenu Bena Isalele. Mu diba dionso dindi ngamba dî dianyi bua tshisamba anyi bua bukelenge, bua kubijula ne bua kubitshibula ne bua kubibutula; biakudimuna bantu ba mu tshisamba atshi tshiakuamba di bualu buatshi mitshima yabo, meme hanyi nenkudimune mutshima wanyi bua dikenga dinakelangana meji bua kubakengesha nʼadi. Mu diba dionso kabidi dindi ngamba dî dianyi bua tshisamba anyi bua bukelenge, bua kubibaka ne bua kubikuna; bienzabo malu adi mabi ku mesu kuanyi, bualu bua kabena batumikila dî dianyi, ke nenkudimune mutshima wanyi bua malu mimpe anakadianjila kuamba ne, Nembenzeleu. Nunku wambile bantu ba mu Yuda ne ba mu Yelushalema dî edi ne, Yehowa udi wamba ne, Monai, ndi nnulongoluela makenga, ndi nnusunguila bualu bua kunuenzela; nunku buonso buenu nulekele kuenda mu nshila idi mihi, nulengeshe bienzedi bienu ne malu anudi nuenza. Kadi badi bamba ne, Ebu mbualu bua hatuhu; bua netulonde anu malu atudi basue kulonda, netuenze bietu, muntu ne muntu, bu mudi tshitshu tshia mu mutshima wandi mubi. Nunku Yehowa udi wamba ne, Nukonke ba munkatshi mua bisamba bia bantu ne, Nganyi wakunvua lumu lua malu a mushindu eu? Muana mukashi wa mu Isalele utshidi kamama wakuenza bualu buhite bubi. Neige ya ha mutu ha Lebanona neyijimine ha mutu ha dibue dia mu budimi, anyi? Mai a mashika a ku mikuna adi ahueka hanshi neakame, anyi? Bualu bua bantu banyi bakumpua muoyo, bakuoshila nzambi ya hatuhu musenga wa manananshi; bakulenduka hakuyilabo mu nshila yabo, mu nshila yabo ya kale, bua kuendabo mu tushila tukuabo, mu tushila didi katuyi tulongolola bimpe. Bua malu â badi bavuisha buloba buabo bu tshintu tshia kukuatshisha bakuabo buowa, tshia kuelabo tshibingu tshiendelele; muntu yonso udi uhitaku neakeme, neakuhe mutu. Nembatangadishe ku mpala kua bena lukuna babo bu mudi luhehele lua ku esete lutangadisha bisonsa; nembakome nyima wanyi, tshiena ngalesha mpala wanyi, mu didiku dia dikenga diabo. Mu diba adi bakamba ne, Luai, tuelele Yelemiya tshifufu; bualu bua mikenji kayena yumuka kudi muakuidi, meji kaena umuka kudi bena meji, ne dî kadiena diumuka kudi muprofete. Luai, tumutahe ne ludimi, katuteleji matshu etu ku mei andi kabidi. Yehowa, ungunvuile; unvua mei a badi bafuilangana nʼanyi. Nebafute malu mabi ku malu mimpe, anyi? Bualu bua bakuimbila muoyo wanyi dijimba. Uvuluke bu munakimana ku mpala kuebe bua kubakuila kûdi, ne bua kukudimuna tshiji tshiebe bua katshifiki kudibo. Nunku udie bana bakalelabo bua kufuabo ne tshiole; ubafile ku bukole bua muele wa nvita; bakashi babo bashale kabayi ne bana bakalelabo ne bakashi ba mu lufuila; balume babo bafue ku tshihuhu, bansongalume babo bashihibue mu nvita ku muele wa nvita. Muadi wa ku nsubu unvuibue, hawabaluisha lukasa ne tshisumbu tshia masalayi, bualu bua bakumbula dijimba bua kunkuata munda muadi, ne bakusokoka mateyi bua kukuatamu makasa anyi. Kadi wewe, Yehowa, udi mumanye malu onso a tshifufu tshiakungelelabo bua kunshiha; kubalekedi malu mabi abo; kubajimishidi bubi buabo ku mesu kuebe; kadi balenduishibue ku mpala kuebe; ubakengeshe mu tshikondo tshia tshiji tshiebe. Yehowa wakamba ne, Ya biebe, usumbe mulondo wa dima wakafumbabo kudi mufumbi; bikila bakulu ba munkatshi mua bantu ne bakulu ba munkatshi mua bakuidi; uye nʼabo mu tshibanda tshia muana mulume wa Hinoma, tshidi ku tshibuelelu tshia tshibi tshia Hâsita, ubambileku mei andi nkuambila. Ubambile ne, Unvuai bienu dî dia Yehowa, nuenu bakelenge ba mu Yuda ne bantu ba mu Yelushalema. Yehowa wa misumba, Nzambi wa Isalele, udi wamba ne, Monai, nentume makenga ku muaba eu; hunvua muntu yonso lumu luau, matshu andi neahate. Bualu bua bakundekela, bakuvuisha muaba eu bu muaba wa bantu ba bende, bakuoshilamu nzambi mikuabo musenga wa manananshi, nzambi mene yakadibo kabayi bamanye, nansha bobo bine nansha batatu babo nansha bakelenge ba Yuda; bakûsha muaba eu tente ne mashi a bantu bakadi kabayi ne bualu. Bakuasa bitendelelu bia Bâla ha mutu ha mikuna bua kuoshilahu bana babo balume bu milambu ya kuoshila Bâla mu kahia, muanda undi tshiyi mubambile ne, Enzai, undi tshiyi mutele, undi tshiyi muele meji bua kuenzabo. Nunku Yehowa udi wamba ne, Monai, mu matuku alualua kabena babikila muaba eu kabidi ne, Tofete, anyi Tshibanda tshia muana mulume wa Hinoma, kadi nebaubikile ne, Tshibanda tshia Kushihelamu Bantu. Nenvuishe mei akuhungabo kudi ba mu Yuda ne ba mu Yelushalema mei a tshianana mu muaba eu; nembahoneshe ku muele wa nvita mu bianza bia bena lukuna babo ne mu bianza bia badi bakeba mioyo yabo; nenfile bitalu biabo kudi nyunyu ya mulu ne kudi nyama ya ha buloba bu bia kudia biai. Nendishe musoko eu bu tshintu tshidi tshikemesha bantu ne tshia kubingila ne tuseku; muntu yonso udi uhitshilaku neabingile ne tuseku bua makenga onso adi aukuata. Nembadishe munyinyi wa bana babo balume ne munyinyi wa bana babo bakashi; ne buonso buabo, muntu ne muntu, neadie munyinyi wa mulunda wandi, mu kutshintshimika kua musoko ne mu dikenga bidi bena lukuna babo, bobo mene badi bakeba mioyo yabo, babakengesha nʼabi. Hashishe, ushihe biebe mulondo au ku mesu kua bantu badi bakuha, ubambile ne, Yehowa wa misumba udi wamba ne, Nembutule bantu aba ne musoko eu bu mudi muntu ushiha mulondo wa mufumbi udibo kabayi bamanye mua kufumba bua kuikalau mujima kabidi; nebajike bantu mu Tofete bualu bua kakuena kushala munga muaba bua kubajika. Yehowa udi wamba ne, Nengenzele muaba eu ne bantu badimu nunku, nenvuishe musoko eu bu Tofete mene. Nsubu ya mu Yelushalema ne nsubu ya bakelenge ba Yuda, nsubu idibo banyanga, neyikale bu muaba wa Tofete, nsubu yonso mene kuakadibo boshila bintu bionso bia mu diulu musenga wa manananshi ha mutu hai, kuakadibo bahongoluela nzambi mikuabo milambu ya bia kunua. Hashishe Yelemiya wakafuma ku Tofete, kuakamutumabo kudi Yehowa bua kuambeye dî edi, ne wakimana mu tshiendelu tshia mu nsubu wa Yehowa, wakambila bantu bonso ne, Edi ndî didi Yehowa wa misumba, Nzambi wa Isalele, wamba ne, Monai, nentumine ha mu musoko eu ne ba mu ntshiama yau yonso makenga onso anakubambila, bualu bua bakukolesha mitshima yabo bua kabunvu mei anyi. Pashû, muana wa Imê muakuidi, wakadi kahita kanene ka bakuidi mu nsubu wa Yehowa, wakunvua mei a Yelemiya hakambeye malu â. Hashishe Pashû wakakuma muprofete Yelemiya, wakamubuesha mu bikunyi biakadi hehi ne tshibi tshia Benyamina tshia ha mutu, tshiakadi mu nsubu wa Yehowa. Hakatshiabu, Pashû wakahatula Yelemiya mu bikunyi. Mu diba adi Yelemiya wakamuambila ne, Yehowa kena ukuidika dina ne, Pashû, kadi wakukuidika ne, Buowaku-Nseke-Yonso. Bualu bua Yehowa udi wamba ne, Mona, nenkuvuishe bu mukuatshiki wa buowa kûdi wewe mene ne kudi balunda bebe bonso. Nebashihibue ku muele wa nvita wa bena lukuna babo, ne mesu ebe neamone muanda eu. Nenfile ba mu Yuda bonso mu bianza bia mukelenge wa Babulona kabidi, ne yeye neaye nʼabo mu buhika mu Babulona, neabashihe ne muele wa nvita. Nenfile kabidi biuma bionso bia musoko eu, luhetu luau luonso ne bintu biau bia mushinga mukole bionso, ne bintu bionso bia mu bibutshilu bia bakelenge ba Yuda mu bianza bia bena lukuna babo; bobo nebabihaule, nebabiangate, nebaye nʼabi ku Babulona. Ne wewe, Pashû, ne bonso badi bashikame mu nsubu muebe, nenuye mu buhika. Wewe neuye ku Babulona, neufuileku, nebakujikeku, wewe ne balunda bebe bonso bawakuambila mei a mashimi. Yehowa, wewe wakungenzesha, ne nakuitabushishibua; wewe udi umpita bukole, wakuntamba. Nakulua bu tshintu tshidibo baseka dituku dijima, muntu yonso udi unseka. Misangu yonso hanakeba kuamba dî, ndi ndila bianyi, ndi ndila ne, Nvita ne kubutuka; bualu bua dî dia Yehowa diakulua kundi bu tshintu tshia kuhendabo ne tshia kusekabo dituku dijima. Bingamba kabidi ne, Tshiena ntela dina diandi, ne tshiena ngambila bantu dî diandi kabidi, mu diba adi didi mu mutshima wanyi bu kahia kadi kosha munda mua mifuba yanyi; kudikanda kudi kuntonda, ne tshiena mua kuhuwa. Bualu bua nakunvua kusonguela kua bantu ba bungi, buowa ku nseke yonso ne, Numunyoke, ne tuetu netumunyoke, mbu mudibo bamba kudi balunda banyi badi bansue, badi bakeba kumona kudishinda kuanyi; bumue yeye neitabushishibue, nênzeshibue ku bukole, netumuhite bukole, netudisombuele kudiye. Kadi Yehowa udi nʼanyi bu muena bukitu mukole ne mukuatshishi wa buowa, nunku bankengeshi nebalenduke, kabena bampita bukole; nebafuishibue bundu tshishiki, bualu bua kabakuenza muanda wakadibo basue kuenza; nebafuishibue bundu bua tshiendelele, budi kabuyi mua kuhuibua muoyo. Wewe Yehowa wa misumba, udi uteta buakane bua bantu, udi umona mutshima ne meji, witabushe bua meme ntangile kusombuela kuebe kubakuata, bualu bua nakukusokoluela tshilumbu tshianyi. Imbilai Yehowa misambu, tumbishai bienu Yehowa; bualu bua yeye wakusungila muoyo wa muena dikenga mu bianza bia benji ba malu mabi. Dituku diakandelabo dikale ne mulau, dituku adi mene diakandela mamu wanyi kadikadi ne disanka! Mulau wikale kudi muntu wakalua ne di kudi tatu wanyi bua kumusankisha bikole ne, Badi bakulelele muana wa balume, muntu eu ikale bu misoko yakabutulabo kudi Yehowa kayi ubalesha luse; yeye unvue mu adi wa bantu ne lunkelu, ne lubila lua nvita munda munya; bualu bua kakanshiha hanakadi mu difu dia mamu wanyi, bua munda mua mamu wanyi muakadi kuikala lukita luanyi, ne difu diandi diakadi kushala tshiendelele. Bualu kai nakahatuka munda mua mamu wanyi anu bua kumona ntatu ne kanyinganyinga, bua kuhitshishila matuku anyi mu bundu? Edi ndî dia Yehowa diakalua kudi Yelemiya mu tshikondo tshiakamutumina mukelenge Sedekiya Pashû, muana wa Malekiya, ne Sefanya, muana wa Maseya muakuidi, wamba ne, Ndi nkusengelela bua kutukonkelaku Yehowa bua bualu buetu; bualu bua Nebukadenesâ, mukelenge wa Babulona, udi uluangana nʼetu mata. Bumue Yehowa neatuenzele bimpe bu mudi midimu yandi yonso ya kukema, bua muntu eu umuke kutudi. Hashishe Yelemiya wakabambila ne, Nuambile Sedekiya ne, Yehowa, Nzambi wa Isalele, udi wamba ne, Tangilai, nennukudimune bielelu bia nvita bidi mu bianza bienu, binudi nuluangana nʼabi ne mukelenge wa Babulona ne Bena Kasada badi banutshintshimika ha nyima ha ngumbu yenu; nembasangishe bonso munda mua musoko eu. Meme hanyi nenduangane nʼenu ne tshianza tshiolola kunudi ne diboko dianyi dikole, ne tshiji, ne tshifikʼa munda, ne tshiji tshikole. Nenshihe ba mu musoko eu, ne bantu ne bimuna biabo, nebafue ku tshihuhu tshikole. Yehowa udi wamba ne, Ku nyima kua malu au nenfile Sedekiya, mukelenge wa Yuda, ne hena mudimu bandi ne bantu badi bashala mu musoko bahanduke ku tshihuhu, ku muele wa nvita, ku tshiole, mu bianza bia Nebukadenesâ, mukelenge wa Babulona, ne mu bianza bia bena lukuna babo ne mu bianza bia badi bakeba mioyo yabo. Yeye neabashihe ne muele wa nvita, kena ubasungila, kena ubalesha kalolo, kena ubafuila luse. Wambile bantu aba ne, Yehowa udi wamba ne, Tangilai, ndi nteka nshila wa muoyo ne nshila wa lufu ku mpala kuenu. Washala mu musoko eu nebamushihe ne muele wa nvita ne ku tshiole ne ku tshihuhu; kadi wahatuka udi ufika kudi Bena Kasada badi banutshintshimika, neikale ne muoyo, ne muoyo wandi newikale kudiye bu tshintu tshidiye unyenga mu nvita. Yehowa udi wamba ne, Bualu bua nakutangisha mpala wanyi ku musoko eu bua kûvuishila makenga, kembua kûvuishila diakalengele, neufidibue mu bianza bia mukelenge wa Babulona, ne yeye neawoshe ne kahia. Wambile ba mu nsubu wa mukelenge wa Yuda ne, Unvuai bienu dî dia Yehowa, nuenu ba mu nsubu wa Davidi! Yehowa udi wamba ne, Nulumbulule bilumbu ne kulumbulula kuakane ne lunkelu, nuhandishe muntu udi ne bintu biandi binyengibue mu bianza bia mumukengeshi, bua tshiji tshianyi katshihatuki bu kahia, kadi kosha kakuyi udi mua kutshijima, bualu bua bubi bua bienzedi bienu. Yehowa udi wamba ne, Mona, ndi nkuhidia, wewe udi mushikame mu tshibanda, ne ha dibue dia mu mpata, wewe udi wamba ne, Nganyi neahuekemu bua kutuluisha? Anyi nganyi wabuela mu miaba itudi bashikame? Yehowa udi wamba ne, Nenkukengeshe bu mudi mamuma a bienzedi biebe, nentemeshe kahia mu ditu diandi, nekoshe bintu bionso bidi bimunyunguluka. Yehowa wakamba ne, Uhueke biebe ku nsubu wa mukelenge wa Yuda, wambileku ne, Unvuai dî dia Yehowa, wewe mukelenge wa Yuda, udi mushikame mu nkuasa wa bukelenge wa Davidi, wewe mene, ne bena mudimu bebe, ne bantu bebe badi babuela ku bibi ebi bia ku musoko. Yehowa udi wamba ne Lumbululai bilumbu ne kulumbulula kuakane ne enzai bienzedi biakane; nuhandishe udi ne bintu biandi bi nyengibue mu bianza bia mumukengeshi. Kanubenzedi bibi, kanukengeshi nansha muenyi nansha muanʼa nshiya nansha mukashi wa mulufuila; kanumatshishi mashi a muntu udi kayi ne bualu hanshi mumuaba eu. Bua binuatumikila mei â bulelela, nunku banfumu badi bashikame mu nkuasa wa bukelenge wa Davidi nebabuele mu bibi bia ku nsubu eu, benda mu makalu ne ha nyima ha tubalu, bobo, bena mudimu babo ne bantu babo. Yehowa udi wamba ne, Kadi binuahidia kunvua mei â, ndi nditshiha nkayanyi ne, Nsubu eu neabutuke kabutu. Bualu bua Yehowa udi wamba bua tshiota tshia mukelenge wa Yuda ne, Wewe udi kundi bu Gilada, ne bu mutu wa Lebanona, kadi bulelela, nenkuvuishe bu tshihela, ne musoko udi kauyi ne bantu. Nendongolole babutudi bua kubutulabo, muntu ne muntu ne bielelu bia nvita mu bianza biandi; bobo nebatahe mitshi yebe ya cédre idi itamba buimpe, nebayele mu kahia. Ba mu bisamba bia bungi nebahitshile hehi ne musoko eu, muntu yonso ne muena mutumba nʼandi nebakonkangane ne, Yehowa wakuenzela musoko eu munene nunku bua tshinyi? Mu diba adi nebabakudimune ne, Bualu bua bakashiha tshihungidi tshia Yehowa Nzambi wabo, bakatendelela nzambi mikuabo, ne bakayikuatshila mudimu. Kanuashidi muntu eu mufue muadi, kanumujingi; kadi nudile bikole bua muntu udi uya kukuabo, bualu bua kena uhingana kabidi, kena umona buloba buakamulelabo. Bua Yehowa udi wamba bualu bua Shaluma, muana wa Yoshiya, mukelenge wa Yuda, wakakokesha mu muaba wa Yoshiya tatu wandi ne wakaluhuka mu muaba eu, ne, Yeye kena uhingana kabidi; kadi neafuile ku muaba wikalabo baye nʼandi mu buhika, kena umona buloba ebu kabidi. Mulau wikale kudi muntu udi wasa nsubu wandi ku malu mabi, ne udi ulongolola nsubu idi munda mua nsubu ku kulumbulula kubi; udi wenzesha muena mutumba nʼandi mudimu udi kauyi ne difutu, ne kena umuha difutu; udi wamba ne, Nendiashile nsubu munene udi ne nsubu mikuabo minene munda, udi utekamu madidishi a bungi; udi uteka mabaya a cèdre ku bisasa, udi ulabahu mukubu mukunzekunvû. Wewe neumanye mua kukokesha bakuabo bualu bua udi ukeba kubahita mu kuasa kua mabaya a cèdre, anyi? Tatu webe kakadia, kakanua, hakakoseye bilumbu bimpe ne hakenzeye biakane, anyi? Mu diba adi wakadi ne diakalengele. Yeye wakalumbulula bilumbu bia bahele ne bakengi; nunku wakadi ne diakalengele. Yehowa udi ukonka ne, Bualu ebu kabuena bukuatshisha muntu bua kummanya, anyi? Kadi mesu ebe ne mutshima webe bidi anu ku luhetu lûdi muangate ku mashimi, ne ku kumatshisha kua mashi a badi kabayi ne bualu, ne ku kunyenga kua bintu ne ku kukengesha kua bakuabo. Nunku Yehowa udi wamba bua Yehoyakima, muana wa Yoshiya, mukelenge wa Yuda ne, Kabena bamuashila muadi, badila ne, Aka, muanʼetu mulume! Aka, muanʼetu mukashi! Kabena bamujinga ne, Aka, mukelenge wetu! Anyi ne, Aka, butumbi buandi! Nebamujike bu mudibo bajika nyama wa mpunda, bamukoke hanshi ne bamuimashe ha nyima ha bibi bia ku Yelushalema. Banda mukuna wa Lebanona, washilahu muadi; bisha dî diebe mu Bashana; muadi webe ufume ku Abalima, bualu bua bakubutula banangi bebe bonso. Nakakuambila dî hawakadi ne diakalengele diebe; kadi wewe wakamba ne, Tshiena ngunvua nansha. Etshi tshiakadi tshilele tshiebe tshia ku buana buebe ne wewe kuakutumikila dî dianyi. Luhehele neludie balami bebe ba mikoko bonso, ne banangi bebe nebabuele mu buhika. Bulelela, mu diba adi neukuatshike bundu, neutshinyishibue bua malu mabi ebe onso. Wewe udi mushikame ha mukuna wa Lebanona, udi wibaka disua diebe mu mitshi ya cèdre, mona bu muwajinga kufuidibua luse halua didinyenga kukukuata, bu kanyinganyinga ka mukashi udi wamba kulela! Yehowa udi wamba ne, Bu mundi bianyi ne muoyo, bu wewe Yekoniya, muana wa Yehoyakima, mukelenge wa Yuda, muikale kakanu ka tshimanyishilu ka ku tshianza tshianyi tshia balume, nakadi kukukohola. Nenkufile mu bianza bia badi bakeba muoyo webe ne mu bianza bia bantu baudi utshina, mu bianza bia Nebukadenesâ, mukelenge wa Babulona, ne mu bianza bia Bena Kasada. Nenkutume wewe ne mamu webe wakakulela mu buloba bukuabo, munuakadi kanuyi baledibue, nenufuilemu. Kadi kamina nuhingana kabidi ku buloba budi mitshima yenu ijinga bua kuhingana. Muntu eu Yekoniya udi bu mulondo mufue udibo bahetula, anyi? Udi bu mulondo udi kauyi usankisha muntu, anyi? Nunku bua tshinyi badi babihata, yeye ne bana bandi, badi babatuma mu buloba budibo kabayi bamanye? Wewe buloba, buloba, buloba, unvua dî dia Yehowa! Yehowa udi wamba ne, Funda muntu eu bu muntu udi kayi ushala ne muana, bu muntu udi kayi uheta diakalengele mu matuku andi; bualu hua kakuena kuikala kabidi muana wa munkatshi mua bana bandi waheta diakalengele, washikama biandi mu nkuasa wa bukelenge wa Davidi, wakokesha kabidi mu buloba bua Yuda. Yehowa udi wamba ne, Mulau wikale kudi balami badi bashiha ne badi batangadisha mikoko ya mu mpata wanyi. Nunku Yehowa, Nzambi wa Isalele, udi wamba dî edi bua kuhisha balami badi badisha bantu bandi ne, Nuenu nuakutangadisha mikoko yanyi, nuakuyihata, kanuakulua kuyitangila. Nunku Yehowa udi wamba ne, Tangilai, nennutumine makenga bua bienzedi bienu. Nensangishe mikoko ya mu tshisumbu tshianyi idi ishala, nenyumushe mu maloba onso anakuyituma, nendue nʼai kabidi mu mpangu yai; neyilelangane, neyikumbane ya bungi. Yehowa udi wamba ne, Nenteke balami ha mutu hai, nebayidishe bimpe; kayena itshina kabidi, kayena ikuatshika buowa, kakuena kuikala umue wa munkatshi muai wajimina. Yehowa udi wamba ne, Monai, mu matuku atshidi alua, nensampishile Davidi Lutonga luakane; yeye neakokeshe bu mukelenge, nealeshe bakuabo meji makane, neajadike kulumbulula kuimpe ne buakane mu buloba. Mu matuku andi ba mu Yuda nebasungidibue, ne ba mu Isalele nebashikame holâ; ne edi ndina didibo bamubikila ne, Yehowa udi buakane buetu. Nunku Yehowa udi wamba ne, Tangilai, matuku nealue hikalabo kabayi bamba kabidi ne, Bu mudi Yehowa ne muoyo wakahatula Bena Isalele mu buloba bua Ejipitu; kadi nebambe ne, Bu mudi Yehowa ne muoyo wakaluhula ne wakalombola bana ba Bena Isalele ku buloba bua ku nôde ne ku maloba onso kunakabihata. Nebashikame mu buloba buabo mene. Bualu bua baprofete: Mutshima wanyi udi uhandika munda muanyi, mifuba yanyi yonso idi ikanka; ndi bu muntu mukuatshike maluvu, ne bu muntu udi maluvu a nvinyo mahite bukole, bualu bua Yehowa ne bua mei andi a tshijila. Bualu bua buloba budi bûle tente ne bena masandi; buloba budi bujinga bualu bua mulau, ne mpata ya mu tshihela yakudishila mikoko yakufubidila Badi benda mu malu mabi, bukole buabo kabuena buakane. Yehowa udi wamba ne, Muprofete ne muakuidi badi banyanguke; e, nakusangana malu mabi abo mu nsubu muanyi. Yehowa udi wamba ne, Nunku nshila wabo neikale kudibo bu miaba ya busenu mu mîdinembendeshemu, nebahonemu; bualu bua nembatumine makenga mu tshidimu tshia dikenga diabo. Nakumona malu a hatuhu munkatshi mua baprofete ba mu Samalea; bakamba mei abo mu dina dia Bâla, bakasesuisha bantu banyi Kena Isalele. Nakumona malu mahite bubi munkatshi mua baprofete ba mu Yelushalema kabidi; badi benda masandi, badi benda mu mashimi; badi bakolesha maboko a benji ba malu mabi, nunku kakuena muntu udi walukila kundi, ulekela bubi buandi; nunku buonso buabo bakulua bu Bena Sodoma ku mesu kuanyi, ne bena musoko eu bakulua bu Bena Amola. Nunku Yehowa wa misumba udi wamba bua baprofete aba ne, Tangilai, nembadishe ne bintu bia bululu, nembanuishe mai a lulengu, bualu bua malu mabi mafume kudi baprofete ba mu Yelushalema, akutangadika mu buloba buonso. Nunku Yehowa wa misumba udi wamba ne, Kanunvu mei a baprofete badi banuambila mei. Badi banuyisha malu a hatuhu; batu banuambila bua tshikena kumona tshiakafuma anu mu mitshima yabo, katshiakafuma mukana mua Yehowa. Batu bambila bantu babi bampetula ne, Yehowa wakuamba ne, Nenuikale ne ditalala. Badi bambila muntu yonso udi wenda mu tshitshu tshia mu mutshima wandi ne, Dikenga kadiena dikukuata. Nganyi munkatshi muabo wakuimana ku mpala kua Yehowa bua kumanya ne kunvueye dî diandi? Nganyi wakuteleja matshu andi ku dî diandi, wakudiunvua? Tangilai, tshihuhu tshia Yehowa, tshiji tshiandi mene tshiakuhatuka, nvunde mukole mene! Netshitayikile ha mutu ha bantu babi. Tshiji tshia Yehowa katshiena tshikudimuka tô ne hashikisheye kuenza malu onso akuhungeye mu mutshima wandi. Mu matuku alualua ku mpala nenujingulule bualu ebu bimpe. Tshiakatuma baprofete aba, kadi bakadifila, tshiakabambila dî, kadi bakadiambiladi. Bu bobo bimane ku mpala kuanyi bua kuangata lungenyi, hashishe bakadi kunvuisha bantu mei anyi; bakadi kubatshungulula ku nshila yabo mibi, ne ku bienzedi biabo bibi. Yehowa udi ukonka ne, Meme ndi Nzambi udi anu ha buihi, ne tshiena Nzambi udi kule kabidi, anyi? Yehowa udi ukonka ne, Muntu udi mua kusokoma miaba ya mu busokoko indi tshiyi mumanye mua kumutangila, anyi? Yehowa udi ukonka ne, Tshiena ngûsha diulu ne buloba tente, anyi? Nakunvua mei adi baprofete bamba, badi bamba mashimi mu dina dianyi ne, Nakulota tshilota, nakulota tshilota. Bualu ebu nebuikale mu mitshima ya baprofete badi bamba mei a mashimi, badi badidinga mu mitshima yabo, musangu bule bishi? Badi belangana meji bua kukuatshisha bantu banyi tshihua muoyo bua dina dianyi ku bilota biabo bidibo bawilangana, bu muakahua batatuʼabo muoyo bua dina dianyi bualu bua Bâla. Muprofete udi ulota tshilota aule tshilota tshiandi: muntu udi ne dî dianyi ambile dî dianyi ne mutshima mutoke. Yehowa udi ukonka ne, Bisonsa bidi ne maminu a blé mudimu kai? Yehowa udi wamba ne, Dî dianyi kadiena bu kahia, anyi? Kadiena bu marteau udi uhanda mabue bihesa bihesa, anyi? Yehowa udi wamba ne, Nunku ndi mpidia baprofete badi biba mei anyi, badi bibangana mei anyi, muntu yonso kudi muena mutumba nʼandi. Yehowa udi wamba ne, Tangilai, ndi mbenga mei a baprofete badi bangata ndimi yabo bua kuamba nʼai dî edi ne, Yeye udi wamba. Yehowa udi wamba ne, Tangilai, ndi mbenga baprofete badi bamba mei a mashimi bua bilota biabo, badi babiawila bantu bakuabo, badi benzesha bantu banyi bua kuenzabo malu mabi ne ku mashimi abo ku kufuna kuabo; kadi tshiakabatuma, tshiakabelela mukenji bua kuyabo; Yehowa udi wamba ne, Kabena bakuatshisha bantu aba, nansha kakese. Yehowa udi wamba ne, Hanukonka bantu aba, anyi muprofete anyi muakuidi ne, Bujitu bua dî dia Yehowa budi tshinyi? Nenubahingashile dî ne, Nuenu bine nudi bujitu ebu, ne meme nennuihate. Biamba muntu yonso, nansha muprofete nansha muakuidi nansha muntu wa hatuhu, ne, Ebu mbujitu bua dî dia Yehowa, nenkengeshe muntu au ne ba mu tshiota tshiandi kabidi. Nunku bunudi nʼabu mbua kukonkangana, muntu yonso akonke muena mutumba nʼandi ne muanʼabo ne, Yehowa wakuitaba tshinyi? Yehowa wakuamba tshinyi? Kanutedi bujitu bua di dia Yehowa kabidi; bualu bua dî dia muntu yonso nkayadi didi bujitu buandi, nunku nuakunyanga mei a Nzambi udi ne muoyo, a Yehowa wa misumba, Nzambi wetu. Nunku nuebeshe muprofete ne, Yehowa wakuitaba tshinyi? Anyi, Yehowa wakuamba tshinyi? Kadi binuamba ne, Ebu mbujitu bua dî dia Yehowa, ka Yehowa udi wamba ne, Bualu bua nudi nutela dî edi ne, Mbujitu bua Yehowa, hanakunutumina mukenji ne, Kanutedi bujitu bua Yehowa kabidi; nunku monai, nennuhue muoyo tshiendelele, nennûmushe ku mesu kuanyi, nuenu ne musoko unakanuha ne batatu henu. Nennuvuishile bihendu bia tshiendelele ne bundu bua tshiendelele, bidi bantu kabayi bahua muoyo. Yehowa wakahesha bihondo bibidi bia mamuma a nfigi biteka ku mbelu kua ntempelo wa Yehowa, hakadi Nebukadenesâ, mukelenge wa Babulona, mumane kuya ne Yekoniya, muana wa Yehoyakima, mukelenge wa Yuda, ne baminyampala ba mu Yuda ne bena mabaya ne batudi ba biamu, mumuke nʼabo ku Yelushalema, mulue nʼabo ku Babulona. Tshibondo tshimue tshiakadi ne mamuma a nfigi mimpe, bu mamuma a nfigi akulua diambedi; tshibondo tshikuabo tshiakadi ne mamuma a nfigi mahite bubi, akadibo kabayi mua kudia. Yehowa wakankonka ne, Yelemiya, udi umona tshinyi? Nakamukudimuna ne, Nfigi; mamuma mimpe mmimpe be; mamuma mabi mmabi be adibo kabayi mua kudia. Hashishe dî dia Yehowa diakalua kundi ne, Yehowa, Nzambi wa Isalele, udi wamba ne, Bu mundi ntangila mamuma â a nfigi mimpe, nunku nentangile bahika ba ku Yuda, banakûmusha ku muaba eu bua kubatuma ku buloba bua Bena Kasada, bua kubenzela bimpe. Nenteke mesu anyi kudibo bua kubenzela bimpe, nendue nʼabo mu buloba ebu kabidi. Nembase kabidi, tshiena mbasasula kabidi; nenukune, tshiena mbatula kabidi. Nembahe mitshima ya kummanya ne, Meme ndi Yehowa; bobo nebikale bantu banyi, ne meme nengikale Nzambi wabo; bualu bua nebahingane kundi ne mitshima yabo mijima. Bu mundi mpidia mamuma mabi a nfigi adibo kabayi mua kudia bualu bua adi atamba bubi, Yehowa udi wamba ne, Muomumue nempidie Sedekiya, mukelenge wa Yuda, ne baminyampala bandi, Bena Yelushalema badi bashala mu buloba ebu ne bantu aba badi bashikame mu buloba bua Ejipitu. Nembafile bua kuikalabo bintu bia kukuatshisha bakuabo buowa munkatshi mua makelenge onso a ha buloba, bua kudivuishilabo tshihendu ne lusumuinu lubi, bu tshintu tshidibo baseka ne bela mulau, mu miaba yonso indualua kubihata. Nentume muele wa nvita ne tshiole ne tshihuhu munkatshi muabo tô ne hanababutula mu buloba bunakabaha ne batatu babo. Edi ndî diakalua kudi Yelemiya bualu bua bantu bonso ba mu Yuda, mu tshidimu tshinai tshia bukokeshi bua Yehoyakima, muana wa Yoshiya, mukelenge wa Yuda. Tshidimu atshi tshiakadi tshidimu tshia kumudilu tshia bukokeshi bua Nebukadenesâ, mukelenge wa Babulona. Edi ndî diakambila Yelemiya muprofete bantu bonso ba mu Yuda ne bonso bakadi bashikame mu Yelushalema ne, Ku tshidimu tshia dikumi ne tshisatu tshia bukokeshi bua Yoshiya, muana wa Amona, mukelenge wa Yuda, tô ne ku dituku edi, bidimu ebi makumi abidi ne bisatu, dî dia Yehowa diakalua kundi, ne nakunuambiladi, njuka bianyi dinda dionso bua kunuambiladi, kadi kanuakunvua. Yehowa wakunutumina bantu bandi bonso, baprofete mene, ujuka biandi ne lunkelu bua kubatumina kunudi, kadi kanuakumi, kanuakuteleja matshu enu bua kunvua mei abo. Bobo bakadi banuambila ne, Buonso buenu, muntu ne muntu, nukudimune mitshima yenu, nulekele kuenda mu nshila wenu mubi ne kuenza bienzedi bibi, bua nushikame mu buloba buakanuha Yehowa, nuenu ne batatu benu, ku kale tô ne tshiendelele. Kanulondi nzambi mikuabo bua kuyikuatshila mudimu ne kuyitendelela, ne kanunkuatshishi tshiji ku bienzedi bia bianza bienu, ne tshiena nnuenzela malu adi anukengesha. Yehowa udi wamba ne, Kadi kanuakungunvuila, nunku nuakunkuatshisha tshiji ku bienzedi bia bianza bienu, bua kudivuishila dikenga. Yehowa wa misumba udi wamba ne, Bualu bua kanuakumi mei anyi, monai, nentume dî bua kuangata ba mu meku onso a ku luseke lua ku nôde, mmudi Yehowa wamba; nembikile Nebukadenesâ, mukelenge wa Babulona, muntu wanyi; nendue nʼabo bua kuluisha bena buloba ebu ne bonso badi bashikamemu, ne bua kuluisha ba mu bisamba bidi binunyunguluke. Nembutule ba mu buloba ebu, nembavuishe bu tshintu tshidi tshikemesha bantu, tshidibo babingila, bu bikulu tshiendelele. Nembumushile dî dia tuseku, dî dia disanka, dî dia mubaki wa mukashi ne dia mukashi muena dibaka, ne tshiona tshia mabue a mpelu ya blé ne dinkenke dia muinda. Buloba ebu bujima nebushale bu tshikulu, ne bu tshintu tshidi tshikemesha bantu; ba mu bisamba ebi nebakuatshile mukelenge wa Babulona mudimu bidimu makumi muanda mutekete. Yehowa udi wamba ne, Hashishe, hakumbana bidimu ebi makumi muanda mutekete, nenkengeshe mukelenge wa Babulona ne tshisamba atshi bualu bua bubi buabo, ne buloba bua Bena Kasada; nembuvuishe bu tshikulu tô ne tshiendelele. Nengenzele ba ha buloba abu mei onso anakamba bualu buabu, adi mafunda mu mukanda eu, adi Yelemiya muambe bua kuhisha nʼau bisamba bionso bia bantu. Bualu bua ba mu bisamba bia bungi ne bakelenge banene nebababueshe mu buhika mene; meme nembafute bu mudi bienzedi biabo ne bu mudi midimu ya ku bianza biabo. Yehowa, Nzambi wa Isalele, wakangambila ne, Angata luhanza elu lua nvinyo wa njiya yanyi ku tshianza tshianyi, ulunuishe bisamba bionso bia bantu bia kundi nkutuma. Nebalunue, nebalenduke, nebahale, bualu bua muele wa nvita undi ntuma munkatshi muabo. Nunku nakangata luhanza ku tshianza tshia Yehowa, nakalunuisha ba mu bisamba bionso biakadi Yehowa muntume: ba mu Yelushalema ne misoko ya mu Yuda ne bakelenge babo ne baminyampala babo, bua kubabutula kabutu, bua kubavuisha bu tshintu tshidi tshikemesha bantu, tshidibo babingila, tshidibo bela mulau, bu mudibo lelu eu. Nakalunuisha Palô, mukelenge wa Ejipitu, ne bahika bandi ne baminyampala bandi ne bantu bandi bonso; bantu ba bisamba bikuabo badi babuelakana nʼabo; bakelenge bonso ba mu buloba bua Uza, bakelenge bonso ba mu buloba bua Bena Peleshete, ba mu Ashekelona, ba mu Gaza, ha mu Ekelona ne ba mu Ashedodo badi bashale. Nakalunuisha Bena Edome, Bena Moaba ne bana ba Amona. Nakalunuisha bakelenge bonso ba mu Tulo, bakelenge bonso ba mu Sidona ne bakelenge ba mu maloba a ku muelelu wa mai manene. Nakalunuisha ba mu Dedana, Tema ne Buza ne bonso badi babeya nsuki yabo biketu; ne bakelenge bonso ba mu Alaba ne bakelenge ba bantu ha bisamba bikuabo badi babuelakana nʼabo ne badi bashikame mu tshihela; ne bakelenge bonso ba Zimeli ne bakelenge bonso ba Elama ne bakelenge bonso ba Bena Madai; nakalunuisha bakelenge bonso ba ku node ba kule ne ba ha buihi muntu unua ne mukuabo ne ba mu makelenge onso a ha buloba. Ne mukelenge Sheshaka neanue biandi ku nyima kua buonso buabo. Wewe ubambile ne, Yehowa wa misumba, Nzambi wa Isalele, udi wamba ne, Nuai bienu, nukuatshike maluvu au, nuluke, nudishinde, kanujuki kabidi, bualu bua muele wa nvita undi ntuma munkatshi muenu. Biabengabo kuangata luhanza ku tshianza tshiebe bua kulunuabo, ka neubambile ne, Yehowa wa misumba udi wamba ne, Nenulunue bulelela. Bualu bua, monai, ndi mbanga kukengesha musoko eu udibo binyika dina dianyi, ne nuenu nenuhange kukengeshibua, anyi? Yehowa wa misumba udi wamba ne, Kanuena nuhanga kukengeshibua; bualu bua nembikile muele wa nvita bua kutaha nʼau bonso ba ha buloba. Nunku ubamanyishe mei â onso, ubambile ne, Yehowa neakungule ku muaba wa mulu, neambe dî diandi didi difuma ku muaba wa tshijila udiye mushikame; neadile ne dî dinene kudi ba mu luhangu luandi lua mikoko; nêle mbila, bu mudibo benza kudi bantu badi badiata tumuma tua nvinyo mu tshikaminu, bua kuhisha ba ha buloba bonso. Diyoyo adi nedifike tô ne kunfudilu kua buloba; bualu bua Yehowa udi ne ba mu bisamba bionso tshilumbu; nealumbuluishe bonso badi ne muoyo; ne bua bantu babi Yehowa udi wamba ne, Nembafile ku muele wa nvita. Yehowa wa misumba udi wamba ne, Makenga neamuangalake mu tshisamba ne mu tshisamba tshia bantu, tshihuhu tshinene netshibike, tshifume kunfudilu kua buloba. Badi Yehowa ushiha mu dituku adi nebikale ha buloba ku ditengu diabu dimue tô ne kunfudilu kuabu. Kabena babajinga, kabena babasangisha, kabena babajika, kadi nebikale anu bu tunvi hanshi ha buloba. Nuenu, balami ba mikoko, asai miadi, nudile; nuenu, bakokeshi ba tshisumbu tshia mikoko, nudibonde mu butue bua kahia; bualu bua matuku a kunushiha ne a kunutangadisha akumana kulua, ne nenufue bu mudibo bashiha mulondo wa mushinga mukole. Balami kabena bamona nshila wa kunyemenamu, ne badi ku mutu kua mikoko kabena baheta tshinyemenu. Unvuai! Dî dia muadi wa balami, ne dia kujinga kua badi ku mutu kua mikoko! Bua Yehowa udi unyanga mpata yabo ya kudishila mikoko. Mpangu ya mikoko yakadi ne ditalala yakunyanguka bualu bua tshiji tshikole tshia Yehowa. Yeye wakulekela tshisokomenu tshiandi bu mudi nyama wa ntambue wenza; bualu bua buloba buakulua bu tshihela bualu bua bukole bua muele wa nvita wa Yehowa, ne bua bukole bua tshiji tshiandi. Ku tshibangidilu tshia bukokeshi bua Yehoyakima, muana wa Yoshiya, mukelenge wa Yuda, dî edi dia Yehowa diakalua kudi Yelemiya ne, Yehowa udi wamba ne, Imana biebe mu tshiendelu tshia mu nsubu wa Yehowa, wambile ba mu misoko yonso ya mu Yuda badi balua kutendelela mu nsubu wa Yehowa mei onso andi nkuambila; kukosolodi dî dimue nansha. Bumue nebakunvuile, bua buonso buabo, muntu ne muntu, balukile, balekele kuenda mu nshila wabo mubi, bua meme nkudimune mutshima wanyi bua makenga andi mpangidisha kubakengesha nʼau bua bienzedi biabo bibi. Ubambile ne, Yehowa udi wamba ne, Binuahidia kunvua mei anyi, bua kuenda bienu mu mikenji inakuteka ku mpala kuenu, ne bua kunvua bienu mei a bantu banyi baprofete bandi nnutumina, njuka hanyi dinda dinda bua kubatuma kunudi, kadi kanuakubunvuila; nunku nenvuishe nsubu eu bu Shilo, ne musoko eu newikale wa mulau kudi bisamba bionso bia ha buloba. Bakuidi ne baprofete ne bantu bonso bakunvua Yelemiya wamba mei â mu nsubu wa Yehowa. Hakashikisha Yelemiya kuamba mei onso akamuambila Yehowa bua kuambileye bonso, bakuidi ne baprofete ne bantu bonso bakamukuata, bamba ne, Wewe neufue bulelela. Bualu kai wakuamba dî edi mu dina dia Yehowa ne, Nsubu eu neikale bu Shilo, ne musoko eu newikale bu muaba wa hatuhu, kauyi ne bantu? Bantu bonso bakunguila Yelemiya tshisumbu mu nsubu wa Yehowa. Hakunvua baminyampala ba mu Yuda lumu lua malu â, bakafuma mu nsubu wa mukelenge, bakabanda ku nsubu wa Yehowa; bakashikama ku mbelu kua tshibi tshihia-tshihia tshia mu nsubu wa Yehowa. Mu diba adi bakuidi ne baprofete bakambila baminyampala ne bantu bonso ne, Muntu eu udi ne bualu bua kufua; bualu bua yeye wakuamba mei mabi bua musoko eu, bu munuakunvua ku matshu enu. Hashishe Yelemiya wakambila bakokeshi ne bantu ba hatuhu bonso ne, Yehowa wakuntuma bua kuamba mei a kuhisha nʼau nsubu eu ne mei a onso anuakunvua. Nunku nulengeshe nshila yenu ne bienzedi bienu bibi, nutumikile dî dia Yehowa, Nzambi wenu; ne Yehowa neakudimune mutshima wandi bua makenga akuambeye bua kunutumina. Kadi monai, meme ndi anu mu bianza bienu, nungenzele malu onso adi mimpe ku mesu kuenu. Kadi numanye bienu bualu ebu bimpe ne, Binuanshiha, nenuteke mashi a muntu udi kayi ne bualu hamʼbidi henu ne ha musoko eu ne hamʼbidi ha bena musoko; bualu bua Yehowa wakuntuma kunudi bulelela bua kunuambila mei â onso mu matshu enu. Hashishe baminyampala ne bantu bonso bakambila bakuidi ne baprofete ne, Muntu eu kena ne bualu bua kufua, bualu bua yeye wakutuambila dî mu dina dia Yehowa, Nzambi wetu. Mu diba adi bakulu bakuabo ba mu buloba bakajuka ku mpala kua bantu, bakamba ne, Mika, Muena Molesheta, wakambila bantu dî dia Nzambi mu matuku a Hezikiya, mukelenge wa Yuda. Yeye wakambila Bena Yuda bonso ne, Yehowa wa misumba udi wamba ne, Nebabundulule Siona bu mudibo babundulula budimi, Yelushalema nealue anu bikulu, ne mukuna wa ntempelo newikale bu mukuna mu ditu. Hezikiya, mukelenge wa Yuda, ne ba mu Yuda bonso bakamushiha, anyi? Hezikiya kakatshina Yehowa, kakasengelela Yehowa bua kumuha diakalengele, anyi? Ne Yehowa kakakudimuna mutshima wandi bua makenga akadiye musue kubatumina, anyi? Nunku tuetu tudi tuamba kudivuishila dikenga dinene. Muntu mukuabo wakadiku kabidi, wakamba dî mu dina dia Yehowa, dina diandi Uliya, muana wa Shemaya wa ku Kîyata-yalima. Yeye wakamba mei bua kuhisha nʼau musoko eu ne buloba ebu bu muakadi mei onso akamba Yelemiya. Hakunvua mukelenge Yehoyakima mei andi ne bena bukitu bandi bonso ne baminyampala bandi bonso, mukelenge wakakeba kumushiha. Kadi hakunvua Uliya lumu elu, wakatshina, wakanyemena ku Ejipitu. Mukelenge Yehoyakima wakatuma bantu ku Ejipitu, Elenatana, muana wa Akabo, ne bantu hakuabo nʼandi, bakakuata Uliya, hakumuka nʼandi mu Ejipitu, bakalua nʼandi kudi mukelenge Yehoyakima, wakamushiha ne muele wa nvita, wakela tshitalu tshiandi mu nkita ya bantu ba hatuhu. Kadi tshianza tshia Ahikama, muana wa Shafana, tshiakadi tshikuatshisha Yelemiya, bua kabamufidi mu bianza bia bantu bua bobo bamushihe. Ku tshibangidilu tshia bukokeshi bua Sedekiya, muana wa Yoshiya, mukelenge wa Yuda, dî dia Yehowa diakalua kudi Yelemiya, diamba ne, Yehowa udi ukuambila ne, Udienzele tshikokedi tshia mionshi ne mitshi ne utshiteke mu nshingu muebe; ubitume kudi mukelenge wa Edome, kudi mukelenge wa Moaba, kudi mukelenge wa Bena Amona, kudi mukelenge wa Tulo ne kudi mukelenge wa Sidona, mu bianza bia miloho yabo yakulua ku Yelushalema kudi Sedekiya, mukelenge wa Yuda. Welele miloho mukenji bua kuambilayi bakelenge bai ne, Yehowa wa misumba, Nzambi wa Isalele, udi wamba ne, Nuambile banfumu benu ne, Nakufuka buloba ebu ne bantu ne nyama bidi hanshi ha buloba, ku bukole buanyi ne ku diboko dianyi diolola; ndi mbidia muntu yonso bu mundi musue. Katataka nakufila makelenge â onso mu bianza bia Nebukadenesâ, mukelenge wa Babulona, muntu wanyi; nakumuha nyama yonso ya mu mpata kabidi bua kumukuatshilayi mudimu. Ba mu bisamba bionso nebamukuatshile mudimu ne muanʼandi mulume, muana wa muanʼandi mulume, tô ne hakumbana tshikondo tshia buloba buandi bua kufuabu; hashishe ba mu bisamba bia bungi ne bakelenge banene nebamuvuishe biandi muhika wabo. Yehowa udi wamba ne, Mu dituku adi, nenkengeshe ba mu tshisamba ne ba mu bukelenge badi kabayi bakuatshila Nebukadenesâ eu, mukelenge wa Babulona, mudimu, ne badi kabayi bitabusha bua kubueshabo nshingu yabo muinshi mua mutshi wa tshikokedi wa mukelenge wa Babulona; nenkengeshe ba mu tshisamba atshi ne muele wa nvita ne tshiole ne tshihuhu, tô ne hanababutula ku tshianza tshiandi. Kadi nuenu, kanunvu mei a baprofete benu, anyi a bena lubuku benu, anyi a badi banuambila bilota biabo, anyi a bena muhongo benu anyi a bena lubuku lua muzangu badi banuambila ne, Kanuena nukuatshila mukelenge wa Babulona mudimu. Bualu bua badi banuambila mei a mashimi bua kunûmusha mu buloba buenu bua kunutuma kule, ne bua meme nnuihatemu, ne bua nuenu mijimine. Yehowa udi wamba ne, Kadi tshisamba tshiabuesha nshingu watshi muinshi mua mutshi wa tshikokedi wa mukelenge wa Babulona ne tshiamukuatshila mudimu, nengitabushe bua ba mu tshisamba atshi bashale mu buloba buabo mene; nebabudime, nebashikamemu. Nakambila Sedekiya, mukelenge wa Yuda, mei â onso, nakamuambila ne, Nubueshe nshingu yenu muinshi mua mutshi wa tshikokedi wa mukelenge wa Babulona, numukuatshile ne bantu bandi mudimu bua nuikale ne muoyo. Bua tshinyi wewe ne bantu bebe nudi basue kufua ku muele wa nvita ne ku tshiole ne ku tshihuhu, bu muakuamba Yehowa bualu bua ba mu tshisamba badi kabayi bakuatshila mukelenge wa Babulona mudimu? Kanuitabushi mei a baprofete badi banuambila ne, Kanuena nukuatshila mukelenge wa Babulona mudimu; bualu bua badi banuambila mei a mashimi. Bualu bua Yehowa udi wamba ne, Tshiakubatuma, kadi bobo badi bamba mei a mashimi mu dina dianyi, bua meme nnuihate, ne bua nuenu nujimine, nuenu mene ne baprofete aba badi banuambila mei â. Nakambila bakuidi ne bantu aba bonso kabidi ne, Yehowa udi wamba ne, Kanuitabushi mei a baprofete benu badi banuambila ne, Tangilai, tshituha tshihi nebalue ne mpanza yakadi mu nsubu wa Yehowa diambedi, nebahime nʼai ku Babulona; bua badi banuambila mei a mashimi. Kanubunvuidi; nukuatshile mukelenge wa Babulona mudimu, bua nuikale ne muoyo. Musoko eu udi ne bualu bua kulua bikulu bua tshinyi? Bikalabo baprofete, ne bikala dî dia Yehowa munda muabo, basengelele biabo Yehowa wa misumba mpindiu bua mpanza itshidi ishala mu nsubu wa Yehowa ne mu nsubu wa mukelenge wa Yuda ne mu Yelushalema, bua kayiyi ku Babulona. Bualu bua Yehowa wa misumba udi wamba dî diandi bua makunshi a tshiamu tshia mitaku, bua tshiowelu tshia mai ne bitekelu biatshi, ne bua mpanza itshidi ishala mu musoko eu, biobi biakadi Nebukadenesâ, mukelenge wa Babulona, kayi muye nʼabi hakayeye ne Yekoniya, muana wa Yehoyakima, mukelenge wa Yuda, mu buhika, diatshimue ne bena butumbi bonso ba mu Yuda ne ba mu Yelushalema, mumuke nʼabo ku Yelushalema, muye nʼabo ku Babulona. Bushuwa, Yehowa wa misumba, Nzambi wa Isalele, udi wamba dî edi bua mpanza yonso itshidi ishala mu nsubu wa Yehowa ne mu nsubu wa mukelenge wa Yuda ne mu Yelushalema. Yehowa udi wamba ne, Nebaye nʼai ku Babulona, neyikaleku tô ne ku dituku dindi nyivuluka; mu diba adi nendue nʼai, nenyihingashe mu muaba eu. Mu tshidimu atshi mene, ku tshibangidilu tshia bukokeshi bua Sedekiya, mukelenge wa Yuda, mu tshidimu tshiabu tshinai ne ngondo wabu muitanu, Hananya, muana wa Azû, muprofete wa ku musoko wa Gibeona, wakangambila ai mu nsubu wa Yehowa, ku mesu kua bakuidi ne bantu bonso ne, Yehowa wa misumba, Nzambi Isalele udi wamba ne, Nakutshibula muishi wa tshikokedi wa mukelenge wa Babulona. Diambedi bidimu bibidi kabiyi bianze kukumbana, nempingashe mpanza yonso yakadi nsubu wa Yehowa, yakumushabo kudi Nebukadenesâ, mukelenge wa Babulona, ne yakayeye nʼai ku Babulona. Yehowa udi wamba ne, Nempingashe kabidi mu muaba eu Yekoniya, muana wa Yehoyakima, mukelenge wa Yuda, ne ba mu Yuda to bakayabo nʼabo mu buhika ku Babulona; bualu bua nentshibule mutshi wa tshikokedi wa mukelenge wa Babulona. Hashishe Yelemiya muprofete wakakudimuna Hananya muprofete dî ku mpala kua bakuidi ne kua bantu bonso bakadi bimana mu nsubu wa Yehowa. Yelemiya muprofete wakamuambila ne, Amen. Yehowa enze nunku, Yehowa enze mei ebe awakuamba, bua kuhingasheye mpanza yakadi mu nsubu wa Yehowa ne honso hakadi mu buhika mu Babulona, abihingashe ku muaba eu. Kadi unvua biebe dî edi dindi nkuambila mu matshu ebe ne matshu a bantu bonso. Baprofete bakadiku ku mpala kuanyi ne ku mpala kuebe, mu matuku a kale, bakamba mei a kuhisha nʼau bisamba bia bungi ne makelenge manene, mei a kubadimusha bua nvita, bua makenga ne bua tshihuhu. Hamba muprofete dî bua ditalala, halua dî dia muprofete dilelela, nunku nebamanye bua muprofete eu ne, Yehowa udi mumutume bulelela. Hashishe Hananya muprofete wakumusha mutshi wa tshikokedi mu nshingu wa Yelemiya muprofete, wakautshibula. Hananya wakamba dî edi ku mesu kua bantu bonso ne, Yehowa udi wamba ne, Nentshibule muomumue mutshi wa tshikokedi wa Nebukadenesâ, mukelenge wa Babulona, bua kumusha mu nshingu ya bantu ba mu bisamba bionso diambedi bidimu bibidi kabiyi bianze kukumbana. Yelemiya muprofete wakaya mu nshila wandi. Hakadi Hananya muprofete mumane kutshibula mutshi wa tshikokedi wakadi ha nshingu wa Yelemiya muprofete, dî dia Yehowa diakalua kudi Yelemiya ne, Ya wambile Hananya ne, Yehowa udi wamba ne, Wewe wakutshibula mutshi wa tshikokedi udibo benze ne mitshi, kedi newikale ne mutshi wa tshikokedi tshia tshiamu mu muaba wau. Bualu bua Yehowa wa misumba. Nzambi wa Isalele, udi wamba ne, Meme nakuteka mutshi wa tshikokedi wa tshiamu mu nshingu ya ba mu bisamba ebi bionso, bua bakuatshile Nebukadenesâ, mukelenge wa Babulona, mudimu; nebamukuatshile mudimu bulelela, nakumana kufila nyama yonso ya mu mpata mu bianza biandi kabidi. Yelemiya muprofete wakambila Hananya muprofete ne, Unvua biebe, Hananya! Yehowa kakukutuma nansha; kadi wewe udi wenzesha bantu aba bua kueyemenabo mei a mashimi. Nunku Yehowa udi wamba ne Mona, nenkûmushe ha buloba; tshidimu etshi neufue biebe, bualu bua wakuamba mei a kutombokela nʼau Yehowa. Nunku Hananya muprofete wakafua tshidimu atshi mene mu ngondo wa muanda mutekete. Â mmei a mu mukanda mufume ku Yelushalema wakatuma Yelemiya muprofete kudi bakadi bashala ba munkatshi mua bakulu bakaya mu buhika, ne kudi bakuidi, baprofete ne bantu bonso bakadi Nebukadenesâ mumushe ku Yelushalema bua kuya nʼabo mu buhika ku Babulona. Wakatuma mukanda hakumukabo mu Yelushalema kudi Yekoniya mukelenge, mukelenge mukashi mamuʼandi mumuledi, bantu bandi batungula, baminyampala ba mu Yuda ne ba mu Yelushalema, bena mabaya ne batudi ba biamu. Wakautuma mu bianza bia Elasa, muana wa Shafana, ne Gemaleya, muana wa Hilekiya udi Sedekiya, mukelenge wa Yuda, mutume ku Babulona kudi Nebukadenesâ, mukelenge wa Babulona, wamba ne, Yehowa wa misumba, Nzambi wa Isalele, udi wambila bantu bonso bakumushisheye mu Yelushalema bua kubuelabo mu buhika mu Babulona dî edi ne, Asai nsubu, nushikamemu; nukune bintu mu madimi, nudie mamuma abi. Nubake bakashi, nulele nʼabo bana ba balume ne bana ba bakashi, nuangatshile bana benu balume bakashi, nufile bana benu ba bakashi ku mabaka, bua bobo balele bana ba balume ne bana ba bakashi; nuvulangane muaba au, kanukebi. Nukebe kuvuishila musoko unakanutuma mu buhika ditalala, nûlombele diakalengele kudi Yehowa; bua bikalau ne ditalala, nuenu nenuikale ne ditalala. Bualu bua Yehowa wa misumba, Nzambi wa Isalele, udi wamba ne, Kanuitabushi bua baprofete badi munkatshi muenu ne bena mbuku banudinge; kanuteleji matshu enu ku bilota bidibo balota. Bualu bua badi banuambila mei a mashimi mu dina dianyi. Yehowa udi wamba ne, Tshiakubatuma. Bualu bua Yehowa udi wamba ne, Hakumbanyina Babulona bidimu makumi muanda mutekete, nendue kunudi, nenshikishe dî dianyi dimpe dinakunuambila, nennuhingashe mu muabu eu. Yehowa udi wamba ne, Bua ndi mumanye meji andi nnuelela, adi meji a kunuvuisha ditalala, kaena a kunuvuisha diyoyo; adi bua kunuha ditekemena mu matuku atshidi ku mpala. Nenumbikile, nenulue kuntendelela, ne nennûnvuile. Nenunkebe ne nenumpete, hanuankeba ne mitshima yenu mijima. Yehowa udi wamba ne, Nengitabushe bua nuenu nunsangane, nenkudimune buhika buenu, nennusangishe bua kunûmusha mu bisamba bionso ne mu miaba yonso inakunuihata; nendue nʼenu kabidi mu muaba unakanuangata hanakanutuma mu buhika. Bualu bua nuakuamba ne, Yehowa wakutubishila baprofete mu Babulona; edi ndî didi Yehowa wamba bua mukelenge udi mushikame mu nkuasa wa bukelenge wa Davidi, ne bua bantu bonso badi bashikame mu musoko eu, bana benu mene badi kabayi baluhuke nʼenu bua kuya mu buhika. Yehowa wa misumba udi wamba ne, Monai, nembatumine muele wa nvita, tshiole ne tshihuhu; nembavuishe bu mamuma mabi a nfigi adibo kabayi mua kudia bualu bua adi atamba bubi. Nembihate ne muele wa nvita, tshiole ne tshihuhu, ne nembafile bua kuikalabo bu tshidi tshikuatshisha buowa munkatshi mua makelenge onso a ha buloba, nebikale bu tshintu tshiela mulau, tshidi tshibakemesha, tshidibo babingila ne tshidibo bahenda kudi ba munkatshi mua bisamba bionso bia bantu kunabatuma. Bualu bua Yehowa udi wamba ne, Kabakutumikila mei anyi anakabatumina kudi bantu banyi baprofete, njuka bianyi ne lunkelu bua kubatuma; kadi kabakasua kunvua. Nunku unvuai dî dia Yehowa, nuenu bonso badi mu buhika, banakumusha mu Yelushalema bua kubatuma mu Babulona. Yehowa wa misumba, Nzambi wa Isalele, udi wamba bualu bua Ahaba, muana wa Kolaya, ne bua Sedekiya, muana wa Maseya, badi banuambila mei a mashimi mu dina dianyi ne, Monai, nembafile mu bianza bia Nebukadenesâ, mukelenge wa Babulona, ne yeye neabashihe ku mesu kuenu. Bua bualu buabo, ba mu Yuda badi mu buhika mu Babulona nebabange kuela bantu bakuabo mulau, bamba ne, Yehowa akuvuishe bu Sedekiya ne bu Ahaba badi mukelenge wa Babulona muoshe mu kahia! Yehowa udi wamba ne, Bualu bua bantu aba bakuenza malu a hatuhu mu Isalele, bakuenda masandi ne bakashi ba bena mutumba nʼabo; bakuamba mei a mashimi mu dina dianyi andi tshiyi mubambile bua kuambabo; meme nyeye udi mumanye bualu ebu ne udi mumanyi wabu. Wambile Shemaya, Muena Nehelama, ne, Yehowa wa misumba, Nzambi wa Isalele, udi wamba ne, Bualu bua wewe wakutuma mikanda mu dina diebe kudi bantu bonso ba mu Yelushalema ne kudi Sefanya muakuidi, muana wa Maseva, ne kudi bakuidi bakuabo bonso, wakufunda ne, Yehowa wakukusungula bu muakuidi mu muaba wa Yehoyada muakuidi, bua balombodi bikale mu nsubu wa Yehowa ne ha mutu ha muntu yonso munale udi udivuisha muprofete ne bua kumubuesha mu nkanu ne mu tshikunyi. Nunku bualu kai kuena muanze kubela Yelemiya, muena musoko wa Anatota, udi udivuisha muprofete munkatshi muenu? Bualu hua yeye wakututumina tuetu ba mu Babulona dî ne, Buhika ebu nebulehe musangu mule, nunku asai nsubu, nushikamemu, nukune bintu mu madimi, nudie mamuma abi. Safanya muakuidi wakabala mukanda eu mu matshu a Yelemiya muprofete. Mu diba adi dî dia Yehowa diakalua kudi Yelemiya ne, Utumine badi mu buhika ebu ai edi ne, Yehowa udi wamba bua Shemaya, Muena Nehelama ne, Bualu bua Shemaya wakunuambila mei a, ne meme tshiena mumutume nansha, ne yeye wakunuenzesha bua nuenu kueyemena mei a mashimi; nunku Yehowa udi wamba ne, Monai, nenkengeshe Shemaya, Muena Nehelama, ne bana bandi kabidi. Yeye kena wikala ne muntu umuehele washala munkatshi mua bantu aba, ne kena umona diakalengele dindi nvuishila bantu banyi, bualu bua yeye wakuamba mei a kutombokela nʼau Yehowa. Edi ndî dia kudi Yehowa diakalua kudi Yelemiya ne, Yehowa, Nzambi wa Isalele, udi wamba ne, Fundai mei onso anakukuambila mu mukanda. Bualu bua Yehowa udi wamba ne, Mu matuku alualua nenkudimune buhika bua bantu banyi Bena Isalele ne Bena Yuda, nembahingashe mu buloba bunakaha batatu babo, ne bobo nebikale nʼabu. A mmei akamba Yehowa bualu bua Bena Isalele ne Bena Yuda. Bualu bua Yehowa udi wamba ne, Tuakunvua dî dia buowa ne tua kuzakala, kandi dia ditalala nansha. Nukonkangane, numone ne muntu mulume udi mua kuikala ne kanyinganyinga ka kuleleye muana, anyi? Kadi bualu kai ndi mmona muntu mulume yonso ne bianza biandi bikuate mu tshifuka, bu mukashi udi ne didinyenga dia ha kulela, ne mpala yabo yonso idi mitokoloke bua dikenga? Aka! Dituku adi didi dinene, kakuena dikuabo bu diodi. Tshidi tshikondo tshia lutatu lua bana ba Yakoba, kadi nebabasungile kudilu. Yehowa wa misumba udi wamba ne, Mu dituku adi nentshibule mutshi wa tshikokedi bua kûmusha mu nshingu yabo, nentshibule nkanu yabo; bantu ba bende kabena babenzesha mudimu bu bahika babo kabidi, kadi nebakuatshile Yehowa Nzambi wabo mudimu, ne Davidi mukelenge wabo unababishila. Nunku Yehowa udi wamba ne, Kutshinyi biebe, wewe Yakoba muntu wanyi; wewe Isalele, kuikadi ne buowa; bualu bua, mona, nenkusungile ku buloba budi kule, nensungile bana bebe mu buloba bua buhika buabo. Yakoba neahingane, neikale nolâ ne ditalala, ne kakuena muntu wamutshinyisha. Yehowa udi wamba ne, Ndi nʼebe bua kukusungila. Nembutule bisamba abi bionso kashidi binakunumuangalasha munkatshi muabo, kadi tshiena nkubutula wewe kabutu. Nenkubele ne kulumbulula kuakane, kadi tshiena nkulekela tshianana, kuyi mukengeshibue. Bua Yehowa udi wamba ne, Kabena mua kushikisha disama diebe, ne mputa webe udi ukusamisha. Kakuena muntu udi mua kukukuatshisha, bua kumisha mputa webe, kakuena buanga budi mua kushikisha disama diebe. Bakunangi bebe bonso bakukuhua muoyo, kabena bakukeba kabidi; bualu bua nakukutaha mputa bu wa muena lukuna, nakukukengesha ne dikengesha dia muena lukuna udi kayi ne luse, bualu bua mibi yebe yakadi ya bungi, ne malu mabi ebe akuvulangana. Bualu kai udi udila bua mputa webe ne, Kabena mua kushikisha dikenga dianyi? Bualu bua bubi buebe budi bukole, ne bualu bua malu mabi ebe akuvulangana, nakukuenzela malu â. Nunku bantu bonso badi bakukengesha nebakengeshibue kabidi; bena lukuna bebe bonso, buonso buabo mene, nebaye mu buhika; badi banuhaula nebikale bintu bia bakuabo kuhaula; nenfile bonso badi banyenga bintu bienu bu tshintu tshidi bakuabo banyenga. Yehowa udi wamba ne, Nenkusangashe, nengumishe mputa yebe, bualu bua badi bakubikila ne, Muntu udibo bihata, Siona, udi muntu kayi nʼandi bualu. Yehowa udi wamba ne, Nempingashe ba mu ntenta ya Yakoba, nenfuile ba mu nsubu yandi luse; nebase musoko eu ha mukuna wau, nebashimike nsubu wa mukelenge ha muaba wakadiye diambedi. Dî dia kusakidila nedihatuke munda muai, ne dî dia bantu badi basanka. Nembavudishe ne kabena bikala bantu babalê; nembatumbishe, ne kabena bikala bantu bahuekele. Bana balelabo nebikale bu muakadibo mu matuku a diambedi, ne disangisha diabo nedijadikibue ku mpala kuanyi; nenkengeshe bantu bonso badi babakengesha. Yehowa udi wamba ne, Muenyampala wabo neikale muntu muledibue munkatshi muabo, mukokeshi wabo neafume munkatshi muabo; nemmusemeshe ha buihi nʼanyi ne yeye nealue kundi; bualu bua muntu kai udi ne bukitu bua kusemeneye ha buihi nʼanyi? Nuenu nenuikale bantu banyi, ne meme nengikale Nzambi wenu. Tangilai, tshihuhu tshia Yehowa, tshiji tshiandi mene tshiakuluhuka, tshihehele tshidi tshihehula bintu; netshitayikile ha mutu ha bantu babi. Tshiji tshikole tshia Yehowa katshiena tshihingana kudiye, tô ne hamaneye kuenza ne kushikisha malu onso akahangidisheye mu mutshima wandi. Mu matuku alualua ku mpala nenujingulule bualu ebu. Yehowa udi wamba ne, Mu tshikondo atshi nengikale Nzambi wa meku onso a mu Isalele, ne bobo nebikale bantu banyi. Yehowa udi wamba ne, Bantu bakahanduka ku muele wa nvita bakaheta diakalengele mu tshihela; Bena Isalele mene, hanakaya kubaha dikisha. Yehowa wakamueneka kundi kale, wamba ne, Nakukunanga ne dinanga dia tshiendelele, nunku nakunanukila kukulesha luse lujalame. Nenkuase kabidi, ne wewe newashibue, wewe muana mukashi wa Isalele utshidi kamama. Newangate mazele ebe kabidi, neuluhuke nʼau bua kubuela mu maja a badi basanka. Neukune mionshi ya tumuma tukese kabidi mu madimi a ha mutu ha mikuna ya mu Samalea; bakunyi nebayikune, nebasanke bua kudia tumuma tuai. Bualu bua dituku nedilue, hela batentekedi badi ha mikuna ya mu Efelayima dî ne, Jukai, tubande ku Siona kudi Yehowa Nzambi wetu. Bualu bua Yehowa udi wamba ne, Nungimbile misambu ya disanka bualu bua Yakoba; elai mbila bua tshisamba tshidi ha mutu ha bisamba bia bantu, manyishai bantu, tumbishai Yehowa, numuambile ne, Yehowa, sungila bantu bebe, difuka dia mu Isalele. Tangilai, meme ndifume nʼabo ku luseke lua ku node, nembasangishe bua kubumusha ku miaba idi kunfudilu kua buloba, bafofo ne balema nebalue nʼabo, mukashi udi ne difu ne yeye udi wamba kulela; nebahingane kunoko mu tshisumbu tshinene. Nebalue badila muadi; nembalombole ne disengelela; nembendeshe ha buihi ne misulu ya mai, mu nshila mululame mudibo kabayi mua kulenduka; bualu bua ndi tatu wa Bena Isalele, ne Efelayima udi muanʼa bute wanyi. Nuenu ba mu bisamba bia bantu, unvuai dî dia Yehowa, nudiambe mu maloba a ku muelelu wa mai manene adi kule; nuambe ne, Wakatangadisha Bena Isalele neabasangishe kabidi, neabalame bu mudi mulami ulama mikoko yandi. Bualu bua Yehowa wakuhikula Yakoba, wakamusungila mu bianza bia wakadi umuhita bukole. Nebalue ku mutu kua Siona, nebimbeku misambu, nebatambe kusanka bua buimpe bua Yehowa kudibo, bua manvua ne nvinyo mihia-mihia, bua manyi, ne bua bana ba munkatshi mua mikoko ne bimuna bikuabo. Mitshima yabo neyikale bu tshibundu tshidibo bamiamina mai; kabena banyingalala kabidi tô ne kashidi. Hashishe mishikankunde itshidi kamama neyisanke mu kuja kua maja, ne bansongalume ne bakulumpe nebasanke diatshimue; bualu bua nengandamune madilu abo alue disanka, nembasambe, nembahingashile disanka bua kanyinganyinga kakadibo nʼaku. Yehowa udi wamba ne, Nengukutshishe mitshima ya bakuidi ne manyi, ne bantu banyi nebukute ne buimpe buanyi. Yehowa udi wamba dî edi ne, Badi bunvua dî mu Lama, madilu ne muadi mukole. Lakele udi udila bana bandi; yeye udi uhidia bua bamusambe bua bana bandi, bualu bua kabenaku. Yehowa udi wamba ne, Kanda dî diebe bua kadididi, kanda mesu ebe bua kâikadi ne binsonshi; bualu bua Yehowa udi wamba ne, Nebakufute bua mudimu webe; nebahingane kabidi kuabo, bafume ku buloba bua bena lukuna babo. Yehowa udi wamba ne, Ditekemena didiku bua nshikidilu wenu, bana benu baledibue nebalue kabidi ku misoko yabo. Bulelela, nakunvua Efelayima udila nunku ne, Wewe wakunkengesha, ne nakuitabusha bua bankengeshe, bu muana wa ngombe udi kayi mumanye mutshi wa tshikokedi bimpe; umpingashe, ne nempingane kûdi; bualu bua wewe udi Yehowa Nzambi wanyi. Hakantuminabo kukuabo, nakakudimuna mutshima wanyi; hakanyishabo ne dikenga, nakadikuma ha tshibelu; nakadi ne bundu bulelela, nakatshinyishibua, bualu bua nakadituadila malu a mu bunsongalume akanfuisha bundu. Efelayima udi muanʼanyi munanga, anyi? Udi muana undi nkongoluela, anyi? Bua misangu yonso hanamujiana, ntshidi mmuvuluka. Yehowa udi wamba ne, Nunku mutshima wanyi udi umujinga, nemmufuile luse bulelela. Udishimikile bimanyishilu bia nshila, utujadikile makunshi adi mua kukulesha nshila; uteke mutshima webe mu nshila munene, mu nshila uwakendela diambedi. Hingana biebe, wewe muana mukashi wa Isalele utshidi kamama, wakikala ku misoko yebe kabidi. Wewe muana mukashi wakunkoma nyima, newendakane eku ne eku musangu bule bishi? Bualu bua Yehowa wakufuka tshintu tshihia-tshihia ha buloba: mukashi neatambe mulume. Yehowa wa misumba, Nzambi wa Isalele, udi wamba ne, Hanabumusha mu buhika bua kubaha diakalengele, nebambe mei â mu buloba ne mu misoko ya mu Yuda ne, Yehowa akusankishe, wewe nsubu wa buakane, wewe mukuna wa tshijila! Ba mu Yuda ne ba mu misoko yabo yonso nebashikamemu hohamue, ba bidime ne balami badi bendakana ne bisumbu bia mikoko. Bualu bua nakuholesha mutshima wa muntu wakadi muhungile, nakukankamasha mitshima ya bantu bonso bakadi ne kanyinganyinga. Hashishe nakatabala, nakatangila, ne tshilota tshianyi tshiakadi tshimpe ku mesu kuanyi. Yehowa udi wamba ne, Monai, mu matuku alualua, Nemmiamine maminu mu tshisamba tshia Bena Isalele ne mu tshisamba tshia Bena Yuda adi amenesha bana ba bantu ne bana ba bimuna. Yehowa udi wamba ne, Mu diba adi bu munakateka mesu anyi kudibo bua kubajula ne bua kubasasula, bua kushimbula ne kubabutula ne kubakengesha, nunku nenteke mesu anyi kudibo bua kubasa ne bua kubakuna kabidi. Mu matuku au kabena bamba kabidi ne, Batatu bakudia tumuma tua buanji, ne menu a bana babo adi ne nvuenvue. Kadi muntu yonso neafue bua bubi buandi yeye; muntu yonso udi udia tumuma tua buanji, menu andi neikale ne nvuenvue. Yehowa udi wamba ne, Monai, mu matuku alualua, nempunge tshihungidi tshihia-tshihia ne Bena Isalele ne Bena Yuda. Yehowa udi wamba ne, Katshiena tshikala bu tshihungidi tshinakahunga ne batatu babo mu dituku diakabakuata ku tshianza bua kuluhuka nʼabo mu buloba bua Ejipitu; bualu bua bakashiha tshihungidi tshianyi, ne meme nakadi mukelenge wa ha mutu habo. Yehowa udi wamba ne, Kadi etshi ntshihungidi tshindualua kuhunga ne Bena Isalele ku nyima kua matuku au: nenteke mikenji yanyi munda muabo, nenyifunde mu mitshima yabo; meme nengikale Nzambi wabo, ne bobo nebikale bantu banyi. Kabena bayishangana kabidi muntu yonso ne muena mutumba nʼandi, ne muntu yonso ne muanʼabo, bamba ne, Umanye biebe Yehowa; bualu bua buonso buabo nebammanye, kudi udi mutambe buhuekele munkatshi muabo tô ne kudi udi mutambe bunene munkatshi muabo. Bualu bua nembabuikidile mibi yabo, ne tshiena nvuluka malu mabi abo kabidi. Edi ndi didibo bamba kudi Yehowa, udi utekela bantu diba bua kubatemeshila munya, udi welela ngondo ne mitoto mikenji bua kubakenkelayi butuku, udi uvuandulula mai a mu mai manene tô ne hahatula mavuala au tshiona tshikole; Yehowa wa misumba ndina diandi. Yehowa udi wamba ne, Biumuka mikenji ei ku mesu kuanyi, mmuomumue bana ba Bena Isalele nebalekele kuikala tshisamba tshia bantu ku mpala kuanyi tshiendelele. Yehowa udi wamba ne, Biamanyabo mua kuidikisha diulu, biamanyabo mua kuidikisha bishimikidi bia mu ndondo wa buloba, mmuomumue nempidie bana bonso ba Bena Isalele bua malu onso akuenzabo. Yehowa udi wamba ne, Monai, matuku alualua hashilabo Yehowa musoko ubanga ku tshibumba tshia Hananele ufika tô ne ku tshibi tshia ditumba. Nebaye ne luidi mu nshila mululame tô ne ku mukuna wa Galeba, nebanyunguluke tô ne ku Goa. Tshibanda tshionso tshia Hinoma, tshidi ne bitalu ne butue, ne madimi onso adi ayila tô ne ku kasulu ka Kidilona, tô ne ku ditumba dia tshibi tshia tubalu ku luseke lua esete, nebikale miaba ya tshijidila kudi Yehowa; kabena babitula kabidi, kabena babishimbula tô ne tshiendelele. Dî dia Yehowa diakalua kudi Yelemiya mu tshidimu tshia dikumi tshia bukokeshi bua Sedekiya, mukelenge wa Yuda, tshiakadi tshidimu tshia dikumi ne muanda mukulu tshia bukokeshi bua Nebukadenesâ. Mu tshikondo atshi masalayi a mukelenge wa Babulona akadi atshintshimika Yelushalema, ne bakamana kubuesha muprofete Yelemiya mu lukanu luakadi mu tshiendelu tshia bansentedi tshia mu nsubu wa mukelenge wa Yuda. Bualu bua Sedekiya, mukelenge wa Yuda, wakamana kumuela mu lukanu alu, umubanda ne, Bualu kai wewe udi wambila bantu dî, wamba ne, Yehowa udi wamba ne, Monai, nenfile musoko eu mu bianza bia mukelenge wa Babulona, ne yeye neaunyenge? Udi wamba kabidi ne, Sedekiya, mukelenge wa Yuda, kena uhanduka mu bianza bia Bena Kasada, kadi nebamufile mu bianza bia mukelenge wa Babulona bulelela, neayikile nʼandi mpala ne mpala, neamonangane nʼandi ku mesu. Yehowa udi wamba ne, Mukelenge eu neaye ne Sedekiya ku Babulona, ne yeye neikaleku tô ne hanalua kudiye. Nansha binualuangana ne Bena Kasada, kamuena nubatamba bukole. Yelemiya wakamba ne, Di dia Yehowa diakalua kundi ne, Tangila, Hanamele, muana wa Shaluma mansebʼebe, nealue kudi wamba ne, Usumbe hudimi buanyi budi mu Anatota bualu bua bukokeshi bua kubuhikula ku mushinga budi kudi. Nunku Hanamele, muana wa mansebʼanyi, wakalua kundi mu tshiendelu tshia balami ba nsubu wa lukanu bu muakadi di dia Yehowa, wakangambila ne, Ndi nkusengelela ne, Usumbe budimi buanyi budi mu Anatota, mu buloba bua Benyamina; bua bukokeshi bua buhianyi budi kûdi ne bua kubuhikula budi kûdi; udisumbilebu. Nunku nakamanya di adi ne ndi dia Yehowa. Nunku nakasumba budimi buakadi mu Anatota kudi Hanamele, muana wa mansebʼanyi, nakamuidikishila bituha bia argent, bu nshekele ya argent dikumi ne muanda mutekete. Nakafunda dina dianyi ku mukanda, nakatekaku tshimanyinu, nakabikila bamanyi ba bualu, nakamuidikishila biuma mu tshiamu tshia kuidikisha nʼatshi bujitu. Hashishe nakangata mikanda ya kula kua budimi, wowo wakadi muvunga ne muteka ne tshimanyinu bu muakadi mikenji ne tshilele, ne mukuabo wakadi muvungulula. Nakafila mikanda ya kusumba kua budimi mu bianza bia Baluka, muana wa Neliya, muana wa Mâseya, ku mesu kua Hanamele, muana wa mansehʼanyi, ne ku mesu kua bamanyi bakadi bafunda mena abo mu mikanda ya kusumba kua budimi, ne ku mesu kua Bena Yuda bonso bakadi bashikama mu tshiendelu tshia bansentedi ba mukelenge. Nakela Baluka mukenji ku mesu kuabo ne, Yehowa wa misumba, Nzambi wa Isalele, udi wamba ne, Wangate mikanda ei ya kusumba kua budimi ne mukanda eu udi mulamika ne tshimanymu, ne mukuabo eu udi muvungulula, witeke mu mulondo wa dima, bua ishale milengele matuku a bungi. Bualu bua Yehowa wa misumba, Nzambi wa Isalele, udi wamba ne, Haleha tshikondo, nebasumbishangane kabidi nsubu ne madimi a tumuma tua nvinyo ne madimi makuabo mu buloba ebu. Hanakafila mukanda wa kusumba kua budimi kudi Baluka, muana wa Neliya, nakatendelela Yehowa ngamba bianyi ne, Aka Mukelenge Yehowa! Mona, wewe wakafuka diulu ne buloba ku bukole buebe bunene ne diboko diebe diolola, ne kakuena bualu budi bukuhita bukole. Wewe udi ufuila binunu ne binunu bia bantu luse, udi uhingasha difutu dia bubi bua batatu mu biadi bia bana bakalelabo badi babalonda. Wewe udi Nzambi munene ne wa bukole, Yehowa wa misumba ndina diebe. Wewe udi munene mu kulesha kuebe kua lungenyi kudi bantu, udi ne bukole bua bungi mu bienzedi biebe, udi ne mesu ebe mabulule bua kumona nshila yonso ya bana ba bantu, ne bua kufuta muntu yonso bu mudi bienzedi biandi ne bu mudi mamuma a ku bienzedi biandi. Wewe wakenza bimanyinu ne malu a kukema mu buloba bua Ejipitu, bu mûdi wenza tô ne lelu eu, munkatshi mua Bena Isalele ne munkatshi mua bantu bakuabo kabidi; wakadivuisha dina dinene diudi nʼadi tô ne lelu eu. Wakaluhula bantu bebe Bena Isalele mu buloba bua Ejipitu ku bimanyinu ne ku malu a kukema, ku tshianza tshikole, ku diboko diolola ne ku ditshinyisha dikole dia bantu. Wakabaha buloha ebu buwakaditshiha kudi batatu babo ne, Nennuhebu, buloba budi bûle tente ne mabele ne buitshi. Bakabuelamu, bakabuangata bu buloha buabo. Kadi kabakatumikila dî diebe, ne kabakenda mu mikenji yebe; kabakenza bualu bumue bua malu onso awakabambila bua kuenzabo. Nunku wewe wakubatumina malu â onso. Tangila, mishiki ya buloba ya kutshintshimika nʼai musoko idiku; ne bua bukole bua muele wa nvita, tshiole ne tshihuhu, badi bamba kufila bena musoko mu bianza bia Bena Kasada hadi babaluisha. Malu awakuamba ne, Neafike, akufika; monai, wewe wakuatangila. Wewe, mukelenge Yehowa, wakungambila ne, Usumbe budimi ebu ku nshekele, ubikile bamanyi ba bualu; kadi musoko udi mufidibue mu bianza bia Bena Kasada. Hashishe dî dia Yehowa diakalua kudi Yelemiya ne, Tangila, meme ndi Yehowa, Nzambi wa bonso ha ha buloba; bualu budiku budi mua kumpita bukole, anyi? Nunku Yehowa udi wamba ne, Mona, nenfile musoko eu mu bianza bia Bena Kasada ne mu bianza bia Nebukadenesâ, mukelenge wa Babulona, ne yeye neaunyenge. Bena Kasada badi baluangana ne bena musoko eu, nebalue bua kuwosha ne kahia, bua kûshidisha, hohamue ne nsubu kuakufidilabo musenga wa manananshi kudi Bâla ha mutu hai, kuakuhumunabo nzambi mikuabo milambu ya bia kunua bua kunkuatshishabo nʼabi tshiji. Yehowa udi wamba ne, Bua Bena Isalele ne Bena Yuda bakuenza anu malu adi mabi ku mesu kuanyi ku buana buabo tô ne katataka; Bena Isalele kabena benza bunga bualu, anu buobu budi bunkuatshisha tshiji bua mudimu wa bianza biabo. Bualu bua ba mu musoko eu, ku dituku diakawasabo tô ne lelu eu, bakankuatshisha tshiji ne tshifike munda, bua meme kûmusha ku mesu kuanyi, bua malu mabi onso adi Bena Isalele ne Bena Yuda benze bua kunkuatshishabo tshiji, ne bobo bine ne bakelenge babo ne baminyampala babo, bakuidi babo ne baprofete babo, bantu ba mu Yuda ne bantu badi bashikame mu Yelushalema, Bakunkoma nyima, kabena bandesha mpala yabo; nansha hanakubayisha, mbika ne lunkelu mene bua kubayisha, kabakuteleja matshu bua kunvua diyisha dianyi, kadi bakateka bintu biabo bidi bimunyanga mu nsubu udibo binyika dina dianyi, bua kumunyangabo. Bakasa bibumba bia Bâla bidi mu tshibanda tshia muana wa Hinoma, bua kufilahu bana babo ba balume ne bana babo ba bakashi bu milambu ya kuoshila Moleke; muanda undi tshiyi mubambile bua kuenzabo, udi kauyi mubuele mu mutshima wanyi, bua bobo benze tshinyangu etshi, bua kuenzesha ba mu Yuda malu mabi. Mpindiu Yehowa, Nzambi wa Isalele, udi wamba dî edi bualu bua musoko eu, uwakuamba ne, Udi mufidibue mu bianza bia mukelenge wa Babulona ku muele wa nvita ne ku tshiole ne ku tshihuhu: Mona, nembasangishe munkatshi mua maloba onso anakabatuma mu tshiji tshianyi ne mu tshifikʼa munda ne mu tshiji tshianyi tshikole, nendue nʼabo mu muaba eu, nembashikamishemu ne ditalala. Bobo nebikale bantu banyi, ne meme nengikale Nzambi wabo. Nembahe mutshima umue ne nshila umue, bua bannemeke tshiendelele, bua diakalengele diabo ne dia bana babo badi babalonda ku nyima kuabo. Nempunge nʼabo tshihungidi tshia tshiendelele ne, Tshiena ndekela kubalonda bua kubenzela bimpe; nenteke dintshina mu mitshima yabo, bua bobo kabahambuki kundi kabidi. Bulelela, nensanke bua kubenzela bimpe, ne nembakune mu buloba ebu mu bushuwa ne mutshima wanyi mujima ne muoyo wanyi mujima. Bualu bua Yehowa udi wamba ne, Bu munakutumina bantu aba makenga â makole onso, nunku nembatumine masanka onso anakubalaya. Bantu nebasumbe madimi mu buloba ebu kabidi bunudi nuamba ne, Budi bushala bikulu, kabuyi ne bantu anyi bimuna, budi bufidibue mu bianza bia Bena Kasada. Yehowa udi wamba ne, Bantu nebasumbe madimi ku biuma, nebafunde mena abo mu mikanda, nebayilamike ne bimanyinu, nebabikile bamanyi ba bualu, mu buloba bua Benyamina ne mu miaba yonso idi ha buihi ne Yelushalema, ne mu misoko ya mu Yuda, ne mu misoko ya ku mikuna ne mu misoko ya mu tshibanda ne mu misoko ya ku luseke lua Sude; bualu bua nenkudimure buhika buabo bua kubahingashila diakalengele diabo. Dî dia Yehowa diakalua kudi Yelemiya tshiakabidi, hakatshidiye mu lukanu mu tshiendelu tshia bansentedi ba mukelenge. Edi ndî didi Yehowa wakafuka buloba ne wakabuenza bujadika, Yehowa ndina diandi, wamba ne, Umbikile, nengitabe kudi, nenkuleshe malu a kukema ne malu makole audi kuyi mumanye. Bualu bua Yehowa, Nzambi wa Isalele, udi wamba bua nsubu ya mu musoko eu ne bua nsubu ya bakelenge ba Yuda yakushimbulabo bua kunguisha mishiki bua kudihandula ku miele ya nvita, bua kudikuatshisha bua kuihataku Bena Kasada badi balua bua kubaluisha, ne bua kûsha muaba eu tente ne bitalu bia bantu bandi nshiha mu tshifikʼa munda tshianyi ne mu tshiji tshianyi tshikole, ne bua bubi buabo bundi nsokokela musoko eu mpala wanyi. Monai, nempe ba mu musoko eu kusangala ne bukole bia mubidi, nenshikishe disama diabo; nembaleshe ditalala ne bushuwa bikumbana. Nenkudimune buhika bua Bena Yuda ne buhika bua Bena Isalele bua kubahingashila diakalengele, nembajadike bua bikale bu muakadibo diambedi. Nembalengeshe ku malu mabi onso akadibo bangenzela; nembabuikidile mibi yabo yonso yakadibo bangenzela ne yakantombokelabo nʼai. Musoko eu newikale kundi bu dina dia disanka, bu dianyisha ne bu butumbi, munkatshi mua ba mu bisamba bionso bia ha buloba balualua kunvua lumu lua malu mimpe andi ngenzela; nebatshine ne nebazakale bua diakalengele ne ditalala binauhesha. Yehowa udi wamba ne, Mu muaba eu unudi nuamba ne, Udi munyanguke, kauyi ne bantu anyi bimuna, mu misoko ya mu Yuda ne mu misesu ya Yelushalema yakushala hatuhu, kayiyi ne bantu, kayiyi ne bena nsubu, kayiyi ne nyama, nebunvue kabidi dî dia kunaya ne dia disanka, dî dia mubaki wa mukashi ne dia mukashi mubaka, dî dia bantu badi bamba mei abo, haluabo ne milambu ya kusakidila nʼai Yehowa mu nsubu muandi ne, Sakidilai Yehowa wa misumba, bualu bua Yehowa udi muimpe, bua luse luandi ludi lujalame tshiendelele. Yehowa udi wamba ne, Bualu bua nenkudimune buhika bua mu buloba ebu bua kuhingasha diakalengele diakadibu nʼadi diambedi. Yehowa wa misumba udi wamba ne, Mu muaba eu mudi tshihela tshia hatuhu, kauyi ne bantu ne kauyi ne nyama, ne mu misoko yau yonso, nemuikale miaba ya balami kushikamamu, baladika mikoko yabo. Yehowa udi wamba ne, Mu misoko ya ku mikuna, mu misoko ya mu Tshibanda, mu misoko ya ku luseke lua Sude, mu buloba bua Benyamina, mu miaba idi hehi ne Yelushalema ne mu misoko ya mu Yuda, mikoko neyihitshile muinshi mua maboko a badi bayibala. Yehowa udi wamba ne, Monai, mu matuku alualua nenshikishe dî diakane diakuamba bua Bena Isalele ne bua Bena Yuda. Mu matuku au ne mu tshikondo atshi nemmeneshile Davidi Lutonga lua buakane, yeye neajadike kulumbulula kuimpe ne buakane mu buloba. Mu matuku au nebasungile Bena Yuda, ne Bena Yelushalema nebashikame talalâ; ne edi ndina didibo bamuidika ne, Yehowa mBuakane Buetu. Bualu bua Yehowa udi wamba ne, Davidi kena uhanga kuikala ne muana mulume bua kushikameye mu nkuasa wa bukelenge wa Isalele tshiendelele; ne bakuidi ne Bena Lewi kabena bahanga kuikala ne muntu bua kufileye milambu ya kuosha kundi, ne bua kungoshileye milambu ya bia kudia, anyi bua kufileye milambu mikuabo kundi matuku onso. Dî dia Yehowa diakalua kudi Yelemiya ne, Yehowa udi wamba ne, Binuamanya mua kushiha tshihungidi tshianyi tshinakahunga ne munya ne tshihungidi tshianyi tshinakahunga ne butuku, bua munya ne butuku kabikadiku mu tshikondo tshiabi; nunku nebamanye mua kushiha tshihungidi tshinakahunga ne Davidi muntu wanyi, bua yeye kikadi ne muana mulume wa kushikama mu nkuasa wandi wa bukelenge bua kukokesheye, ne tshinakahunga ne Bena Lewi bakuidi, bankuatshidi ba mudimu. Bu mudibo kabayi mua kubala bintu bia mu diulu ne kabayi mua kuidikisha nsenga ya ku mai manene, nunku nenvudishe tunkanunuma tua Davidi muntu wanyi, ne Bena Lewi hadi bankuatshila mudimu. Dî dia Yehowa diakalua kudi Yelemiya ne, Kuena unvua mei adi bantu aba bamba, anyi? Badi bamba ne, Yehowa wakuhidia bantu ba mu meku abidi akusunguleye. Nunku bakuhetula bantu banyi bua kabikadi kabidi tshisamba ku mpala kuabo. Nunku Yehowa udi wamba ne, Bikala tshihungidi tshianyi katshiyi tshijalame ne munya ne butuku, ne bingikala tshiyi mujadike mikenji indi ngelela bintu bia mu diulu ne bia ha buloba, nunku kabidi nempidie bana ba Yakoba ne ba Davidi muntu wanyi, bua tshisungudi umue wa mu tunkanunuina tuandi bua bobo bikale bakokeshi ha mutu ha tunkanunuma tua Abalahama, tua Isaka ne tua Yakoba; kadi nenkudimune buhika buabo bua kubahingashila diakalengele, nembafile luse. Dî dia Yehowa diakalua kudi Yelemiya hakadi Nebukadenesâ, mukelenge wa Babulona, ne masalayi andi onso ne makelenge onso a hanshi ha buloba bakadi muinshi mua bukokeshi buandi ne ba mu bisamba bionso, baluangana ne Yelushalema ne misoko yau yonso: Yehowa, Nzambi wa Isalele, udi wamba ne, Ya wambile Sedekiya, mukelenge wa Yuda, ne, Yehowa udi wamba ne, Monai, nenfile musoko eu mu bianza bia mukelenge wa Babulona, ne yeye neawoshe ne kahia. Ne wewe mene kuena uhanduka mu tshianza tshiandi, kadi nebakukuate bushuwa, nebakufile ku tshianza tshiandi; neumonangane ne mukelenge wa Babulona ku mesu mene, ne yeye neayikile nʼebe mpala ne mpala mene; neuye ku Babulona. Kadi unvue dî dia Yehowa, wewe Sedekiya, mukelenge wa Yuda! Yehowa udi wamba dî edi bua bualu buebe ne, Wewe kuena ufua ku muele wa nvita; neufue mu ditalala ne nebakuimbile musenga wa manananshi, bu muakoshilabo bankambua bebe ne bakelenge bakadi ku mpala kuebe; nebakuashile muadi, bamba ne, Aka, mukelenge! Bua meme nakuamba dî. Nunku Yelemiya muprofete wakambila Sedekiya, mukelenge wa Yuda, mei â onso mu Yelushalema, hakadi masalayi a mukelenge wa Babulona aluangana ne Bena Yelushalema ne misoko yonso ya mu Yuda yakadi ishala, Lakisha ne Azeka; bua anu misoko ei ya Bena Yuda yakushala munkatshi mua misoko yakadi ne ngumbu. Dî dia Yehowa diakalua kudi Yelemiya, hakashikisha mukelenge Sedekiya kuhunga tshihungidi ne bantu bonso bakadi mu Yelushalema bua kubambileye mukenji wa budishikaminyi ne, Muntu yonso alekele muhika wandi mulume ne muhika wandi mukashi badi Bena Ebelu, baye hatuhu; bua kakuikadi Muena Yuda wabuesha muanʼabo mu buhika. Baminyampala bonso ne bantu bonso bakatumikila mukenji eu, bakadi bahunga tshihungidi etshi tshia kulekela bahika babo, ne balume ne bakashi, baye hatuhu, bua kababakuatshi mu buhika kabidi; bakatumikila mukenji eu diambedi, bakabalekela ne, Baye. Kadi ku nyima bakakudimuna muanda eu, bakahingasha bahika aba bakadibo bahikula, ne balume ne bakashi, bakababuesha mu buhika tshiakabidi. Nunku dî dia Yehowa diakalua kudi Yelemiya ne, Yehowa, Nzambi wa Isalele, udi wamba ne, Nakahunga tshihungidi ne batatu benu mu dituku dinakabaluhula mu buloba bua Ejipitu, mu nsubu wa buhika mene ne, Hakumbana bidimu muanda mutekete, bunudi habu mbua kulekela, muntu ne muntu, muanʼenu wa Bena Ebelu wakudihana kunudi, ne wakunukuatshila mudimu bidimu bisambombo; nudi ne bualu bua kumulekela ne umuke kunudi hatuhu. Kadi batatu benu kabakangunvuila, kabakateleja matshu abo kundi. Nuenu nuakukudimuka mpindiu, nuakuenza bualu ebu buakadi buakane ku mesu kuanyi, hanuakumanyishangana dî dia budishikaminyi, muntu ne muntu ne muena mutumba nʼandi, ne hanuakuhunga mei bua muanda eu mu nsubu udibo bambikidila. Kadi nuakukudimuka ne nuakuhetula dina dianyi, nuakudihingashila, muntu ne muntu, bahika banuakadi balekele, balume ne bakashi, ne nuakubabuesha mu buhika tshiakabidi bua kuikalabo bahika benu, balume ne bakashi. Nunku Yehowa udi wamba ne, Kanuakutumikila dî dianyi bua kumanyishangana dî dia budishikaminyi, muntu yonso kudi muanʼabo, ne muntu yonso kudi muena mutumba nʼandi. Monai, ndi nnumanyisha dî dia budishikaminyi, bua nuenu kufua ku muele wa nvita, ku tshihuhu ne ku tshiole; nennuvuishe bu tshintu tshidi tshikuatshisha makelenge onso ha buloba buowa. Ndi ngamba bua bantu bakushiha tshihungidi tshianyi, badi kabayi benze bu muakambabo mu tshihungidi atshi tshiakahungabo ku mpala kuanyi, hakahandabo muana wa ngombe nseke ibidi ne hakahitshilabo munkatshi mua nseke ei; baminyampala ba Bena Yuda ne ba Yelushalema mene, bantu babo batungula, bakuidi ne bantu bonso ba mu buloba ebu bakahitshila munkatshi mua nseke ibidi ya muana wa ngombe. Mbobo bandi ngamba ne, Nembafile mu bianza bia badi nʼabo lukuna, ne mu bianza bia badi bakeba mioyo yabo. Bitalu biabo nebikale bia kudia bia nyunyu ya mulu ne bia nyama ya ha buloba. Nenfile Sedekiya, mukelenge wa Yuda, ne baminyampala bandi mu bianza bia bena lukuna babo, ne mu bianza bia badi bakeba mioyo yabo ne mu bianza bia masalayi a mukelenge wa Babulona akumuka kunudi tshituha. Yehowa udi wamba ne, Monai, ndi ngela mukenji, nengahingashe ku musoko eu, nealuangane ne benʼau, neabatambe bukole, neawoshe ne kahia; ne nenvuishe misoko ya mu Yuda bu bikulu, kayiyi ne bantu. Dî dia Yehowa diakalua kudi Yelemiya mu matuku a Yehoyakima, muana wa Yoshiya, mukelenge wa Yuda, ne, Ya ku nsubu wa Bena Lekaba, uyikile nʼabo, ulue nʼabo mu nsubu mukuabo wa mu nsubu wa Yehowa, ubaheshe maluvu a nvinyo bua kunuabo. Nunku nakangata Yâzanya, muana wa Yelemiya, muana wa Habasinya, ne bana babo ba mu diku diandi, ne bana bandi balume bonso ne bantu bonso bakadi mu nsubu wa Bena Lekaba. Nakalua nʼabo ku nsubu wa Yehowa, mu nsubu mua bana balume ba Hanana, muana mulume wa Yigedalaya, muntu wa Nzambi, wakadi ha buihi ne nsubu wa baminyampala, wakadi ha mutu ha nsubu wa Maseya, muana wa Shaluma, mulami wa ku mbelu kua nsubu. Nakateka malonga akadi ne nvinyo tente ne mpanza ya kunua nʼai ku mpala kua bana balume ba tshiota tshia Bena Lekaba; nakabambila ne, Nuai nvinyo. Kadi bakamba ne, Katuena tunua nvinyo nansha; bualu bua Yonadaba, muana wa Lekaba, nkambua wetu, wakatuelela mukenji ne, Kanunu nvinyo, nansha nuenu nansha bana benu balume tshiendelele. Kanuashi nsubu, kanukunyi maminu, kanukunyi mionshi ya tumuma tua nvinyo mu budimi, kanuikadi nʼabi; kadi nushikame mu ntenta matuku enu onso; bua nuenu nuikale ne muoyo matuku a bungi mu buloba bunudi bashikamemu. Tuetu tuakutumikila dî dia Yonadaba, muana wa Lekaba, nkambua wetu, mu malu onso akatuambileye bua tuetu tuenze bua katunu nvinyo matuku etu onso, nansha tuetu, nansha bakashi betu, nansha bana betu balume, nansha bana betu bakashi; bua katuashi nsubu bua kushikamamu; bua katuikadi ne budimi bua mionshi ya tumuma tua nvinyo, bua katuikadi ne budimi, anyi maminu; kadi tuakushikama mu ntenta, tuakulonda mikenji yonso yakatuelela Yonadaba nkambua wetu. Kadi mu diba edi, hakabuela Nebukadenesâ, mukelenge wa Babulona, mu buloba ebu tuakambilangana ne, Luai tubande ku Yelushalema bua ditshina dietu dia masalayi a Bena Kasada, ne bua ditshina dietu dia masalayi a Bena Sulia; nunku tudi bashikame mu Yelushalema. Mu diba adi dî dia Yehowa diakalua kudi Yelemiya ne, Yehowa wa misumba, Nzambi wa Isalele, udi wamba ne, Ya wambile Bena Yuda ne ba mu Yelushalema ne, Yehowa udi ukonka ne, Kanuena nuitabusha diyisha bua nuenu kutumikila mei anyi, anyi? Bakuenza mei a Yonadaba, muana wa Lekaba, akambileye bana bandi balume, ne, Kanunu maluvu a nvinyo. Tô ne lelu eu kabena banua, bualu bua badi batumikila mukenji wa nkambua wabo. Kadi meme nakunuambila dî dianyi, mbika bianyi ne lunkelu bua kunuambiladi, kanuena nungunvuila. Nakunutumina kabidi bena mudimu banyi honso, baprofete mene, mbika ne lunkelu bua kubatuma kunudi bua kunuambila ne, Muntu yonso alekele kuenda mu nshila wandi mubi, alongolole bienzedi biandi, kalondi nzambi mikuabo bua kuyikuatshila mudimu, bua nushikame mu buloba bunakanuha nuenu ne batatu benu. Kadi kanuakuteleja matshu enu kundi, kanuakungunvuila. Nunku, bualu bua bana balume ba Yonadaba, muana wa Lekaba, bakutumikila dî dia nkambua wabo diakabambileye, kadi bantu aba kabakungunvuila; nunku Yehowa, Nzambi wa misumba, Nzambi wa Isalele, udi wamba ne, Monai, nentumine Bena Yuda ne bantu bonso ba mu Yelushalema makenga onso anakubambila; bualu bua nakubambila dî, ne kabena bunvua, nakubabikila, ne kabena bitabe. Yelemiya wakambila ba mu nsubu wa Lekaba kabidi ne, Yehowa wa misumba, Nzambi wa Isalele, udi wamba ne, Bualu bua nuakutumikila mukenji wa Yonadaba, nkambua wenu, nuakulonda mei andi onso, nuakuenza malu onso akanuambileye; nunku Yehowa wa misumba, Nzambi wa Isalele, udi wamba ne, Yonadaba, muana wa Lekaba, kena uhanga muana mulume bua kuimaneye ku mpala kuanyi tshiendelele. Mu tshidimu tshinai tshia bukelenge bua Yehoyakima, muana wa Yoshiya, mukelenge wa Yuda, dî edi dia Yehowa diakalua kudi Yelemiya ne, Wangate mabeshi a mukanda muvungulula, ufundemu mei onso anakukuambila bua kuhisha nʼau Bena Isalele, Bena Yuda ne bisamba bionso bia bantu, ku dituku dinakudianjila kukuambila mu matuku a Yoshiya tô ne ku lelu eu. Bumue Bena Yuda nebunvue bua makenga onso andi mpangidisha kubenzela, bua bobo balekele, muntu ne muntu kuenda mu ushila wandi mubi; bua meme mmanye mua kubabuikidila malu mabi abo ne bubi buabo. Nunku Yelemiya wakabikila Baluka, muana wa Neliya; ne Baluka wakafunda mei onso a Yehowa akunvueye mukana mua Yelemiya mu mabeshi a mukanda muvungulula. Yelemiya wakambila Baluka ne, Ndi mukandibue bua kubuela mu nsuhu wa Yehowa. Nunku ya biebe, ubale mei onso a Yehowa awakafunda, akahatuka mukana muanyi mu matshu a bantu bonso badi mu nsubu wa Yehowa mu dituku didibo bajila bia kudia; wabale kabidi mu matshu a ba mu Yuda bonso badi bafuma mu misoko yabo. Bumue, haluabo kutendekena Yehowa, nebalekele kuenda, muntu ne muntu, mu nshila wabo mubi; bualu bua tshifikʼa munda ne tshiji tshikole bia Yehowa bidiye uhisha nʼabi bantu aba bidi binene. Baluka, muana wa Neliya, wakenza malu onso akamuambila Yelemiya muprofete, ubala mei a Yehowa akadi mu mukanda mu nsuhu wa Yehowa. Mu tshidimu tshitanu tshia mu bukelenge bua Yehoyakima, muana wa Yoshiya, mukelenge wa Yuda, mu ngondo wa tshitema, bantu bonso ba mu Yelushalema ne bantu banso bakafuma ku misoko ya Yuda bua kubuela mu Yelushalema, bakela mukenji bua kujila bia kudia ku mpala kua Yehowa. Mu diba adi Baluka wakabala mei a Yelemiya akadi mu mukanda mu matshu a bantu bonso mu nsubu wa Yehowa, mu nsubu wa Gemaleya, muana wa Shafana secrétaire, mu tshiendelu tshia kulu, hehi ne tshibuelelu tshia ku tshibi tshihia-tshihia tshia nsubu wa Yehowa. Hakunvua Mikaya, muana wa Gemaleya, muana wa Shafana, mei onso a Yehowa akadi mu mukanda, yeye wakahueka ku nsubu wa mukelenge, ubuela mu nsubu wa secrétaire. Monai, baminyampala bonso bakadi bashikamamu, menʼabo ne, Elishama secrétaire, ne Delaya, muana wa Shemaya, Elenatana, muana wa Akabo, Gemaleya, muana wa Shafana, Sedekiya, muana wa Hananya, ne baminyampala bakuabo bonso. Nunku Mikaya wakabambila mei onso akunvueye hakabala Baluka mukanda mu matshu a bantu bonso. Bua muanda eu baminyampala bonso bakatuma Yehuda, muana wa Netaniya, muana wa Shelemeya, muana wa Kushi, kudi Baluka, bamba ne, Angata mukanda uwakubala mu matshu a bantu mu tshianza tshiebe, ulue kutudi. Nunku Baluka, muana wa Neliya, wakangata mukanda mu bianza biandi, wakalua kudibo. Bakamuambila ne, Shikama biebe mpindiu, ubale mu matshu etu. Nunku Baluka wakaubala mu matshu abo. Hakunvuabo mei onso, bakatangilangana ne buowa, bakambila Baluka ne, Bulelela, netumanyishe mukelenge mei â onso. Bakakonka Baluka ne, Utuambile dî edi, wewe wakufunda mei â akuluhuka mukana muandi munyi? Baluka wakabahingashila dî ne, Yeye wakangambila mei â onso mukana muandi, ne meme nakâfunda mu mukanda ne mai a mukanda. Hashishe, baminyampala bakambila Baluka ne, Ya biebe usokome, wewe ne Yelemiya kabidi, kanumanyishi muntu muaba unudi. Hakashikishabo kuteka mukanda mu nsubu wa Elishama secrétaire, bakaya kudi mukelenge mu tshiendelu tshia nsubu wandi; bakamba mei au onso mu matshu a mukelenge. Mukelenge wakatuma Yehudi bua kuangateye mukanda; yeye wakawangata mu nsubu wa Elishama secrétaire. Yehudi wakaubala mu matshu a mukelenge ne mu matshu a baminyampala bonso bakadi ha buihi ne mukelenge bua kamukuatshisha. Mukelenge wakadi ushikama mu nsubu muandi mu tshikondo tshia mashika mu ngondo wa tshitema; kahia kakadi katema muiku ku mpala kuandi. Hakabala Yehudi mabeshi asatu anyi anai, mukelenge wakâkosa ne kele, wakaela mu kahia kakadi muiku tô ne hakahia mukanda mujima mu kahia kakadi muiku. Kadi bantu aba kabakatshina, kabakahanda bilulu biabo, nansha mukelenge nansha mukuabo wa bantu banai bonso bakunvua mei a onso. Bualu bukuabo, Elenatana ne Delaya ne Gemaleya hakamana kusengelela mukelenge ne, Kuoshi mukanda nansha; kadi yeye kakabunvuila. Mukelenge wakela mukenji kudi Yelamele, muana wa mukelenge, ne kudi Selaya, muana wa Azaliele, ne kudi Shelemiya, muana wa Abedele, bua kukuatabo Baluka mufundi ne Yelemiya muprofete, kadi Yehowa wakabasokoka. Mu diba adi hakamana mukelenge kuosha mukanda ne mei akafunda Baluka akaluhuka mukana mua Yelemiya, dî dia Yehowa diakalua kudi Yelemiya ne, Wangate mukanda mukuabo, ufundemu mei onso akadi mu mukanda wa diambedi wakuoshabo kudi Yehoyakima, mukelenge wa Yuda, mu kahia. Bua Yehoyakima, mukelenge wa Yuda, wambe biebe ne, Yehowa udi wamba ne, Wakuosha mukanda eu wamba biebe ne, Bualu kai wakufundamu mei a ne, Mukelenge wa Babulona nealue bushuwa, neabutule buloba ebu, neashihemu bantu ne nyama kabidi? Nunku Yehowa udi wamba bua Yehoyakima, mukelenge wa Yuda, ne, Yeye kena wikala ne muana wa kushikama mu nkuasa wa bukelenge wa Davidi, ne nebimashe tshitalu tshiandi mu munya ne mu mashika a butuku. Nemmukengeshe ne bana bandi ne bena mudimu bandi, bua malu mabi abo; nembatumine ne bantu ba mu Yelushalema ne bantu ba mu Yuda, makenga onso anakubambila, kadi kabakangunvuila. Hashishe, Yelemiya wakangata mukanda mukuabo, wakaha Baluka, muana wa Neliya, wakafundamu mei akaluhuka mukana mua Yelemiya, mei onso akadi mu mukanda wakoshabo mu kahia kudi Yehoyakima, mukelenge wa Yuda. Baluka wakasangishamu mei makuabo a bungi mafuanangane ne a diambedi. Sedekiya, muana wa Yoshiya, wakasungulabo mukelenge mu buloba bua Yuda kudi Nebukadenesâ, mukelenge wa Babulona, wakadi ukokesha bantu bu mukelenge mu muaba wa Yekoniya, muana wa Yehoyakima. Kadi kabakunvua mei a Yehowa akambeye mukana mua muprofete wandi Yelemiya, nansha yeye nansha bena mudimu bandi nansha bantu ba mu buloba abu. Mukelenge Sedekiya wakatuma Yehukala, muana wa Shelemeya, ne Sefanya muakuidi, muana wa Mâseya, kudi Yelemiya muprofete, bamba ne, Utulombele Yehowa, Nzambi wetu. Yelemiya wakatshidi utambakana munkatshi mua bantu, bualu bua kabakanji kumubuesha mu lukanu. Masalayi a Palô akamana kumuka mu Ejipitu; hakunvuabo Bena Kasada bakadi batshintshimika musoko wa Yelushalema lumu luau, bakumuka ku Yelushalema. Mu diba adi dî dia Yehowa dia kalua kudi muprofete Yelemiya ne, Yehowa, Nzambi wa Isalele, udi wamba ne, Wambile mukelenge wa Yuda, wakukutuma kundi bua kungebesha lungenyi, dî edi ne, Tangila masalayi a Palô adi Umuka kuabo bua kulua kunukuatshisha, neâhingane mu Ejipitu ku buloba buau. Bena Kasada nebalue kabidi bua kuluanganabo ne bena musoko eu, nebabatambe bukole, nebawoshe ne kahia. Yehowa udi wamba ne, Kanudidingi, nuamba ne, Bulelela Bena Kasada nebatshimuke, bualu bua kabena batshimuka nansha. Nansha binuatamba masalayi onso a Bena Kasada adi aluangana nʼenu bukole, biashala bantu badi batahika mputa muntu ne muntu mu ntenta wandi, bakadi kubika ne bi kadi kuosha musoko eu ne kahia. Mu diba adi hakalekelabo kutshintshimika Yelushalema kudi masalayi a Bena Kasada, bualu bua akatshina masalayi a Palô, Yelemiya wakaluhuka mu Yelushalema bua kuyeye ku buloba bua Benyamina bua kuangataku luandi luseke lua buhianyi munkatshi mua bantu bakadimu. Hakafikeye ku mbelu kua tshibi tshia Benyamina, kahita ka bansentedi kakadiku, dina diandi Iliya, muana wa Shelemeya, muana wa Hananya. Kakakuata Yelemiya muprofete, kakamba ne, Wewe udi mulekela bua kuya ku luseke lua Bena Kasada. Kadi Yelemiya wakamuhingashila dî ne, Au mmei a mashimi; tshiena nnulekela bua Kuya ku luseke lua Bena Kasada. Kadi kahita kakakamunvuila. Nunku Iliya wakakuata Yelemiya, wakaya nʼandi kudi baminyampala. Baminyampala aba bakadi ne Yelemiya tshiji, bakâmukuma, bakamubuesha mu nsubu wa lukanu wakadi mu nsubu wa Yonatana secrétaire; bualu bua bakasungula nsubu au bu nsubu wa lukanu. Hakabuela Yelemiya mu nsubu wa lukanu wakadi ne tshina munda ne tusubu tuakadimu, Yelemiya wakashalamu matuku a bungi. Hashishe mukelenge Sedekiya wakatuma bantu ne bakamubikila kudiye. Mukelenge wakamukonka mu busokoko hakadibo mu nsubu wandi ne, Dî dia Yehowa didiku, anyi? Yelemiya wakamba ne, Didiku. Wakamba kabidi ne, Nebakufile mu bialua bia mukelenge wa Babulona. Yelemiya wakakonka mukelenge Sedekiya kabidi ne, Nakukuenzela bualu bubi kai, nakuenzela bena mudimu bebe anyi bantu aba bubi kai, bua nuakumbuesha mu nsubu wa lukanu? Baprofete benu bakanuambila diadi ne, Mukelenge wa Babulona kena ulua kuluangana nʼenu, kena uluangana ne ba mu buloba ebu, badi hanyi? Nunku, mukelenge wanyi, ndi nkutendekena bua kungunvuila; ndi nkusengelela bua kulomba kuanyi kufike kûdi, bua wewe kumpingashi mu nsubu wa Yonatana secrétaire, bua tshifuidimu. Hashishe, mukelenge Sedekiya wakela mukenji wandi ne bakabuesha Yelemiya mu tshiendelu tshia balami ba nsubu wa lukanu; bakamuha mutanda wa bidia bia ku musesu wa balambi ba bidia ku dituku ka dituku tô ne hakashika bidia bionso bia mu musoko. Nunku Yelemiya wakashala mu tshiendelu tshia balami ba nsubu wa lukanu. Shefataya, muana wa Matana, Gedaliya, muana wa Pashû, Yukala, muana wa Shelemeya, ne Pashû, muana wa Malakiya, bakunvua mei akambila Yelemiya bantu bonso ne, Yehowa udi wamba ne, Washala mu musoko eu nealue ku muele wa nvita, ku tshiole ne ku tshihuhu; hadi waluhukamu bua kuyeye kudi Bena Kasada neikale ne muoyo, ne muoyo wandi newikale kudiye bu tshintu tshiakanyengeye mu nvita, ne yeye neikale ne muoyo. Yehowa udi wamba ne, Bulelela, nebafile musoko eu mu bianza bia masalayi a mukelenge wa Babulona, ne yeye neaunyenge. Hashishe baminyampala bakambila mukelenge ne, Tudi tukusengelela bua bashihe muntu eu, bualu bua udi utekesha maboko a bena nvita badi bashala mu musoko eu, ne maboko a bantu bakuabo bonso, habambileye mei a nunku; bualu bua muntu eu kena ukebela bantu diakalengele, kadi udi ubakebela dikenga. Mukelenge Sedekiya wakabambila ne, Monai, yeye udi mu bianza bienu, bualu bua mukelenge kena mua kuenza bualu bua kunuhumbisha. Nunku bakakuta Yelemiya, bakamuela mu dina dia mai dia Malekiya, muana wa mukelenge, diakadi mu tshiendelu tshia balami; bakahuekesha Yelemiya ku mionshi. Mu dina adi kamuakadi mai, anu bitotshi; ne Yelemiya wakabuela mu bitotshi. Hakunvua Ebede-meleke, Muena Atiopa, muntu mutungula wakadi mu nsubu wa mukelenge, ne, Bakubuesha Yelemiya mu dina dia mai (mu diba adi mukelenge wakadi ushikama hehi ne Tshibi tshia Benyamina), Ebede-meleke wakaluhuka mu nsubu wa mukelenge, wakambila mukelenge ne, Mukelenge wanyi, bantu aba bakuenza bibi mu malu a onso akenzelabo Yelemiya muprofete wakuelabo mu dina; yeye udi mua kufua mu muaba udiye, bualu bua tshiole; bualu bua kakuena bidia bikuabo mu musoko eu. Hashishe mukelenge wakambila Ebede-meleke, Muena Atiopa, ne, Angatai bantu makumi asatu bua kuya nʼebe, nuhatule Yelemiya muprofete mu dina diambedi yeye kayi muanze kufua. Nunku Ebede-meleke wakaya ne bantu aba, wakabuela mu nsubu wa mukelenge wakadi muinshi mua nsubu wa tshibutshilu, wakangataku mikusu ne bilulu bisunsuke, wakabihuekeshila Yelemiya mu dina ku muonshi. Ebede-meleke, Muena Atiopa, wakambila Yelemiya ne, Teka mikusu ei, bilulu ebi bisunsuke, muinshi mua maha ebe, uhaike mionshi ha mutu habi. Yelemiya wakenza nunku. Nunku bakakokela Yelemiya ku mionshi, bakanuihata mu dina; ne Yelemiya wakashala mu tshiendelu tshia balami ba nsubu wa lukanu. Mukelenge Sedekiya wakatuma bantu bua kumubikila, wakakidila Yelemiya ku tshibuelelu tshisatu tshia mu nsubu wa Yehowa. Mukelenge wakambila Yelemiya ne, Nenkukonke bualu; kunsokoki bualu bumue nansha. Yelemiya wakambila Sedekiya ne, binakuambilabu, kuena unshiha bulelela, anyi? Binakulesha lungenyi lua wewe kulonda, kuena ungunvuila. Nunku mukelenge Sedekiya wakaditshiha kudi Yelemiya mu musokoko, wamba ne, Bu mudi Yehowa ne muoyo, wakutufukila muoyo wetu, tshiena nkushiha, tshiena nkufila mu bianza bia bantu aba badi bakeba muoyo webe. Nunku Yelemiya wakambila Sedekiya ne, Yehowa wa misumba, Nzambi wa Isalele, udi wamba ne, Biwaluhuka kudi baminyampala ba mukelenge wa Babulona, nebasungile muoyo webe ne kabena bosha musoko eu ne kahia; wewe newikale ne muoyo ne ba mu nsubu muebe. Kadi biwabenga kuluhuka kudi baminyampala ba mukelenge wa Babulona, nunku nenfile musoko eu mu bianza bia Bena Kasada; bobo nebawoshe ne kahia, ne wewe kuena uhanduka mu bianza biabo. Mukelenge Sedekiya wakambila Yelemiya ne, Ndi ntshina Bena Yuda bakubuela ku luseke lua Bena Kasada, bua tshifidibu mu bianza biabo, ne bua bobo kabantshimbishi. Kadi Yelemiya wakamba ne, Kabena bakufila kudibo. Ndi nkusengelela ne, Utumikile dî dia Yehowa dindi nkuambila, bua wewe wikale ne diakalengele ne bua mutshima webe wikale ne muoyo. Biwabenga kuluhuka kudibo, edi ndî dia Yehowa diakundesheye ne, Mona, nebahatule bakashi bonso badi bashala mu nsubu wa mukelenge wa Yuda, nebaye nʼabo kudi baminyampala ba mukelenge wa Babulona; bakashi aba nebambe ne, Balunda bebe baudi unanga bakundinga, bakukuhita bukole; mpindiu hamba makasa ebe kubuela mu bitotshi, badi bakukoma nyima. Nebaye ne bakashi bebe bonso ne bana bebe bonso kudi Bena Kasada, wewe kuena uhanduka mu bianza biabo, kadi bianza bia mukelenge wa Babulona nebikukuate, ne newoshishe musoko eu ne kahia. Hashishe Sedekiya wakambila Yelemiya ne, Munga muntu kamanyi mei â, ne wewe kuena ufua nansha. Kadi biunvua baminyampala lumu lua diyiki dianyi nʼebe, ne bialuabo kûdi bua kukuambila ne, Utuambile mei awakuambila mukelenge, ne mei akukuambila mukelenge, kutusokoki bualu, ne katuena tukushiha; mu diba adi wewe ubambile ne, Nakadi nsengelela mukelenge ne kampingashi ku nsubu wa Yonatana bua meme kufuilaku. Hashishe baminyampala bakalua kudi Yelemiya, bakamukonka muanda eu, ne yeye wakabambila dî bu muakadi mei onso akamuambila mukelenge. Nunku bakalekela kuakula nʼandi, bualu bua kabakunvua diyiki diandi ne mukelenge. Nunku Yelemiya wakashala mu tshiendelu tshia balami ba nsubu wa lukanu tô ne ku dituku diakanyengabo Yelushalema. Mu tshidimu tshia tshitema tshia bukokeshi bua Sedekiya, mukelenge wa Yuda, mu ngondo wa dikumi, Nebukadenesâ, mukelenge wa Babulona, wakalua ne masalayi andi onso bua kuluisha Bena Yelushalema, ne bakautshintshimika. Mu tshidimu tshia dikumi ne tshimue tshia bukokeshi bua Sedekiya, mu ngondo muinai, ne mu dituku dia tshitema dia mu ngondo eu, bakashimbula tshituha tshia lumbu lua musoko. Mu tshikondo atshi baminyampala ba mukelenge wa Babulona hakabuela mu musoko, bakashikama hehi ne tshibi tshia hankatshinkatshi ha lumbu lua musoko. Menʼabo akadi Nêgala-shalesê, Samagâ-Nebo, Sâsekima, kapita ka Bantu Batungula, Nêgala-shalesê, kapita ka Bena Meji, ne baminyampala bakuabo bonso ba mukelenge wa Babulona. Hakabatuma mukelenge Sedekiya, mukelenge wa Yuda, ne bena nvita bandi bonso, bakanyema, bakaluhuka mu musoko butuku, bakayila mu nshila wa tshibidi tshia mukelenge, bahitshila mu tshibi tshiakadi hankatshi ha ngumbu ibidi, bakayila mu nshila wa ku tshibanda tshia Alabâ. Kadi masalayi a Bena Kasada akabalonda ku nyima, akabihata, akaheta Sedekiya mu mpata wa Yeleko. Hakamukuatau, akalua nʼandi kudi Nebukadenesâ, mukelenge wa Babulona, ku Libela mu buloba hua Hamata; ne yeye wakamulumbuluisha. Mu diba adi mukelenge wa Babulona wakashiha bana balume ba Sedekiya ku mesu kuandi mu Libela. Mukelenge wa Babulona wakashiha bantu banene ba mu Yuda bonso kabidi. Wakashiha mesu a Sedekiya, wakamusuika ne nkanu bua kuyeye nʼandi ku Babulona. Bena Kasada bakosha nsubu wa mukelenge ne nsubu ya bantu ba hatuhu ne kahia, bakashimbula ngumbu ya Yelushalema. Hashishe Nebuzaladana, kapitene ka bansentedi ba masalayi, wakaya ne bantu bakashala mu musoko mu buhika ku Babulona, ne bakadi badifila kudiye, ne bantu bonso bakadi bashala. Kadi Nebuzaladana, kapitene ka bansentedi, wakashiya bantu bahele bakadi kabayi ne tshintu mu buloba bua Yuda, ne wakabaha madimi a tumuma tua nvinyo ne madimi makuabo diatshimue. Nebukadenesâ, mukelenge wa Babulona, wakelela Nebuzaladana, kapitene ka bansentedi, mukenji bualu bua Yelemiya ne, Umukuate, umulame, kumuenzedi bualu bubi; kadi umuenzele anu bu mudiye ukuambila. Nunku Nebuzaladana, kapitene ka bansentedi, ne Nebushazabana, kapita ka Bantu Batungula, Nêgala-shalesê, kapita ka Bena Meji, ne tupitene tunene tua mukelenge wa Babulona bakatuma bantu, bakumushe Yelemiya mu tshitendelu tshia balami ba nsubu wa lukanu, bakamufila mu bianza bia Gedaliya, muana wa Ahikama, muana wa Shafana, bua yeye amufile ku nsubu kuandi. Nunku Yelemiya wakashikama munkatshi mua bantu bakuabo. Dî dia Yehowa diakalua kudi Yelemiya hakadiye musuika mu tshiendelu tshia balami ba nsubu wa lukanu ne, Ya Wambile Ebede-meleke, Muena Atiopa, ne, Yehowa wa misumba, Nzambi wa Isalele, udi wamba ne, Mona, nenshikishe mei anyi onso anakuamba bua musoko eu bua kuwenzela malu mabi, kembua kuwenzela malu mimpe; neashikishibue ku mpala kuebe dituku adi. Kadi Yehowa udi wamba ne Nenkuhandishe mu dituku adi, kuena ufidibua mu bianza bia bantu aha baudi utshina. Yehowa udi wamba ne, Nenkusungile bushuwa, wewe kuena ushihibua ku muele wa nvita, kadi muoyo webe newikale kûdi bu tshintu tshilenga mu nvita, bualu bua wewe wakungeyemena. Dî dia Yehowa diakalua kudi Yelemiya ku nyima kua diba diakadi Nebuzaladana, kapitene ka bansentedi ba masalayi, umulekele ku Lama, wakadi mumusangane musuika ne nkanu munkatshi mua ba mu Yelushalema ne ba mu Yuda bakakuatabo, ne bakadibo baya nʼabo mu buhika ku Babulona. Kapitene ka bansentedi kakakuata Yelemiya, kakamuambila ne, Yehowa Nzambi webe wakahisha bena musoko eu ne mulau eu. Yehowa wakushikisha dî diandi, wakuenza bu muakambeye; bualu bua nuakenzela Yehowa bibi, kanuakatumikila dî diandi; nunku malu a onso akunukuata. Mona, lelu eu ndi nkusulula nkanu ei idi ku bianza biebi. Biwamona ne, Mbimpe bua kuya nʼanyi ku Babulona, lua nʼanyi, ne meme nenkuenzele bimpe. Kadi biwamona ne, Kulua nʼanyi ku Babulona kakuena kuimpe, wanji kushala; tangila, buloba buonso budi ku mpala kuebe; udi mua kuya ku muaba wonso udi umueneka ku mesu kuebe bu muaba muimpe ne mukumbane. Biwashala, uhingane kudi Gedaliya, muana wa Ahikama, muana wa Shafana, wakutekabo gouverneur wa misoko ya mu Yuda kudi mukelenge wa Babulona; ushikame nʼandi munkatshi mua bantu; anyi uye biebe kuonso kukuabo kudi kuimpe ku mesu kuebe. Nunku kapitene ka bansentedi kakamuha bia kudia ne matabisha, kakamulekela. Hashishe, Yelemiya wakaya kudi Gedaliya, muana wa Ahikama, ku Misepa; wakashikama nʼandi munkatshi mua bantu bakadi bashala mu buloba. Hakunvua tupitene tuonso tua masalayi akadi mu mpata ne bena nvita batu kabidi ne, Mukelenge wa Babulona wakuteka Gedaliya muana wa Ahikama, gouverneur mu buloba, wakufila balume ne bakashi ne bana, bobo mene bakadi bahele ne bakadi kabayi baye mu buhika mu Babulona mu bianza biandi, bakalua kudi Gedaliya mu Misepa. Menʼabo akadi Yishemaele, muana wa Netanya, Yohanana ne Yonatana, bana balume ba Kalea, Selaya, muana wa Tanehumeta, bana balume ba Efai, Muena Netofa, ne Yezanya, muana wa Muena Mâka, bobo mene ne bantu babo. Gedaliya, muana wa Ahikama, muana wa Shafana, wakaditshiha kudibo ne kudi bantu balume babo ne, Kanutshinyi kukuatshila Bena Kasada mudimu. Shikamai mu buloba, nukuatshile mukelenge wa Babulona mudimu, nenuikale ne diakalengele. Mona, meme hanyi nenshikame mu Misepa, bua kunuakuila ku mpala kua Bena Kasada badi balua kutumona; kadi nuenu nusangishe tumuma tua nvinyo ne mamuma makuabo ne manyi, nubiteke mu mpanza yenu, nushikame mu misoko inuakuangata. Muomumue, hakunvua Bena Yuda bakadi mu Moaba ne munkatshi mua Bena Amona ne mu Edome ne bakadi mu makelenge makuabo onso ne, Mukelenge wa Babulona wakashiya bantu bakuabo mu Yuda ne wakateka Gedaliya, muana wa Ahikama, muana wa Shafana, ku mutu kuabo, Bena Yuda aba bonso bakumuka mu miaba yonso yakabatumabo, bakahingana, bakalua ku buloba bua Yuda, kudi Gedaliya mu Misepa, bakasangisha nvinyo ne mamuma bia bungi. Yohanana, muana wa Kalea, ne tupitene tuonso tua bena nvita bakadi mu mpata bakalua kudi Gedaliya mu Misepa, bakamuambila ne, Udi mumanye ne, Bâlisa, mukelenge wa Bena Amona, wakutuma Yishemaele, muana wa Netanya, bua kukushiha, anyi? Kadi Gedaliya, muana wa Ahikama, kakitabusha di diabo. Nunku Yohanana, muana wa Kalea, wakambila Gedaliya ku Misepa mu musokoko ne, Ndi nkusengelela ne, Witabushe bua meme nye kushiha Yishemaele, muana wa Netanya, muntu kabumanyi. Bualu kai yeye udi ukeba kukushiha, bua Bena Yuda badi badisangisha kudi batangadishibue, ne bua ba mu Yuda badi bashala bafue? Kadi Gedaliya, muana wa Ahikama, wakambila Yohanana, muana wa Kalea, ne, Kuenji bualu ebu nansha, bualu bua udi ushiminyina Yishemaele. Hashishe, mu ngondo wa muanda mutekete Yishemaele, muana wa Netanya, muana wa Elishama, muena tshiota tshia mukelenge, kapitene ka masalayi a mukelenge, wakalua ne bantu dikumi kudi Gedaliya, muana wa Ahikama, ku Misepa. Hakadibo badia hohamue mu Misepa, Yishemaele, muana wa Netanya, ne bantu dikumi bakadi nʼandi bakajuka, bakataha Gedaliya, muana wa Ahikama, muana wa Shafana, ne muele wa nvita, bobo bakashiha muntu wakatekabo gouverneur kudi mukelenge wa Babulona. Yishemaele wakashiha Bena Yuda bonso kabidi bakadi ne Gedaliya mu Misepa; wakashiha bena nvita ba Bena Kasada bakadiku. Hakatshiabu ku nyima kua dituku diakashiheye Gedaliya, ne hakadi muntu kayi mumanye muanda eu, bantu makumi muanda mukulu bakafuma ku Shekeme, ku Shilo ne ku Samalea, bikale ne miedi yabo mibeya ne bilamba biabo bihandika, baditahe ne mputa kabidi, bakalua ne milambu ya bia kudia ne ya musenga wa manananshi mu Dianza biabo bua kubifila mu nsubu wa Yehowa. Yishemaele, muana wa Netanya, wakaluhuka mu Misepa bua kuya kubakidila, wenda mu nshila udila. Hakasangileye nʼabo, wakabambila ne, Luai bienu kudi Gedaliya, muana wa Ahikama. Hakafikabo munkatshi mua musoko, Yishemaele, muana wa Netanya, ne bantu bakadi nʼandi bakabashiha, bakabela mu dina dia mai. Kadi bantu dikumi bakadi munkatshi muabo bakambila Yishemaele ne, Kutushihi, bualu bua tuetu tudi ne bintu bisokoka mu madimi etu: blé, erge, manyi ne buitshi. Nunku yeye wakabalekela hatuhu, kakabashiha hohamue ne bana babo. Dina adi diakadi Yishemaele welamu bitalu bia bantu bakashiheye, hehi ne tshitalu tshia Gedaliya, diakadi dina dinene dia mai diakumbulabo kudi Mukelenge Asa bua ditshina diandi dia Bâsha, mukelenge wa Isalele. Yishemaele, muana wa Netanya, wakadiûsha ne bitalu bia bantu bakashiheye. Ku nyima Yishemaele wakakuata bantu bakashala mu Misepa, wakaya nʼabo, bana bakashi ba mukelenge mene ne bantu bonso bakashiyabo kudi Nebuzaladana, kapitene ka bansentedi ba masalayi, mu bianza bia Gedaliya, muana wa Ahikama. Yishemaele, muana wa Netanya, wakaya nʼabo mu buhika, wakabanga kusabuka musulu bua kuya kudi Bena Amona. Kadi hakunvua Yohanana, muana wa Kalea, ne tupitene tuonso tua bena nvita tuakadi nʼandi, lumu lua malu mabi akenza Yishemaele, muana wa Netanya, bakasangisha bantu babo bonso, bakaya kuluangana ne Yishemaele, muana wa Netanya, bakamuheta hehi ne dishiha dinene dia mu Gibeona. Hakadi bantu bonso bakadi ne Yishemaele batangila Yohanana, muana wa Kalea, ne tupitene tuonso tua bena nvita tuakadi nʼandi, bantu bonso bakadi ne Yishemaele bakadi ne disanka. Nunku bantu bonso bakadi Yishemaele mukuate ku Misepa uya nʼabo mu buhika bakalukila, bakahingana kudi Yohanana, muana wa Kalea. Kadi Yishemaele ne bantu bandi muanda mukulu bakahanduka mu bianza bia Yohanana, muana wa Netanya, bakaya kudi Bena Amona. Hashishe Yohanana, muana wa Kalea, ne tupitene tuonso tua bena nvita tuakadi nʼandi, bakangata bantu bakasungilabo munkatshi mua bantu bakadi Yishemaele, muana wa Netanya, uya nʼabo mu buhika hakumukeye ku Misepa, ku nyima kua dituku diakashiheye Gedaliya, muana wa Ahikama. Bakadi bena nvita, bakashi, bana ne bantu batungula, bakadi Yohanana uhingasha, mufume ku Gibeona. Bakaya kabidi, bakashikama mu nsubu wa tshilala benyi wa Kimehama, udi hehi ne Beteleheme, basue kuya kubuela mu buloba bua Ejipitu bualu bua Bena Kasada. Bakabatshina bualu bua Yishemaele, muana wa Netanya, wakashiha Gedaliya, muana wa Ahikama, wakatekabo gouverneur ha mutu ha buloba abu kudi mukelenge wa Babulona. Hashishe tupitene tuonso tua bena nvita ne Yohanana, muana wa Kalea, ne Yezanya, muana wa Hoshaya, ne bantu bonso bakuabo, kudi udi mutambe kuhuekela tô ne kudi udi mutambe bunene, bakasemena ha buihi nʼandi, bakambila Yelemiya muprofete ne, Tudi tukusengelela bua kunvua kutendekena kuetu, utulombele Yehowa Nzambi webe, tuetu bantu aba bonso badi bashala, bualu bua tuakushala anu bakese ba ku bantu ba diambedi, bu mudi mesu ebe amona. Utulombele bua Yehowa Nzambi webe atuleshe nshila utudi ne bua kuendela ne muanda utudi ne bua kuenza. Nunku Yelemiya muprofete wakabambila ne, Nakunvua disengelela dienu. Monai, nennulombele Yehowa Nzambi wenu bu munuakuamba, ne nennuambile mei onso adi Yehowa ungambila bua bualu buenu; tshiena nnusokoka dî dimue. Nunku bakambila Yelemiya ne, Yehowa ikale mumanyi wa bushuwa ne utudi mua kueyemena, bua atuhishe bituikala katuyi benze dî dionso didi Yehowa Nzambi webe ututumina mukana muebe. Bikala dî diandi ditusankisha anyi kadiyi ditusankisha, netutumikile dî dia Yehowa Nzambi wetu, utudi tukutuma, bua tuetu tuikale ne diakalengele hatuatumikila dî dia Yehowa Nzambi wetu. Hakahita matuku dikumi, dî dia Yehowa diakalua kudi Yelemiya. Nunku yeye wakabikila Yohanana, muana wa Kalea, ne tupitene tuonso tua bena nvita tuakadi nʼandi, ne bantu bonso kudi udi mutambe kuhuekela tô ne kudi udi mutambe bunene, wakabambila ne, Yehowa, Nzambi wa Isalele, kunuakuntuma bua kufila kutendekena kuenu, udi wamba ne, Binuashala mu buloba ebu, nennuase kabidi ne tshiena nnusasula, nennukune ne tshiena nnujula; bualu bua ndi nkudimuna mutshima wanyi bua makenga anakunutumina. Yehowa udi wamba ne, Kanutshinyi mukelenge wa Babulona unudi nutshina katataka, kanumutshinyi; bualu bua meme ndi nʼenu bua kunusungila ne bua kunuhandisha mu bianza biandi. Nennufute luse, nentekeshe mutshima wandi bua yeye anufuile luse, anuhingashe mu buloba buenu. Kadi binuamba ne, Katuena tushikama mu buloba ebu, nubenga bienu dî dia Yehowa Nzambi wenu; binuamba ne, Nansha, netuye mu buloba bua Ejipitu mutudi katuyi tumona nvita, katuyi tunvua muadi wa mpungi wa nvita, katuyi ne nzala ya bia kudia, netushikamemu; nunku unvuai dî dia Yehowa, nuenu ba mu Yuda batshidi bashala. Yehowa wa misumba, Nzambi wa Isalele, udi wamba ne, Binuatangisha mpala yenu bua kuya ku Ejipitu, binuayaku bua kushikama, muele wa nvita unudi nutshina neunuhete mu buloba bua Ejipitu, ne tshiole tshinudi nutshina netshinulonde ku nyima kuenu kuakua mu Ejipitu; nenufuileku. Bantu bonso badi batangisha mpala yabo bua kuya ku Ejipitu bua kushikamaku nebafue ku muele wa nvita, ku tshiole ne ku tshihuhu, ne kakuena umue wabo washala anyi wahanduka mu makenga andi mbatumina. Bualu bua Yehowa wa misumba, Nzambi wa Isalele, udi wamba ne, Bu munakukuatshila Bena Yelushalema tshifikʼa munda ne tshiji tshianyi tshikole, nunku nennukuatshile tshiji tshianyi tshikole hanuabuela mu Ejipitu. Nenuikale bu tshintu tshidibo bahenda, tshidi tshikuatshisha bantu buowa, tshidibo bela mulau ne tshidibo bahetula. Kanuena nutangila muaba eu kabidi. Yehowa wakungambila dî edi bua bualu buenu, nuenu ba mu Yuda badi bashala ne muoyo, ne, Kanuyi mu Ejipitu! Numanye bienu bimpe ne, Nakunudimusha lelu eu. Nuakudienzela nkayenu bibi. Bualu bua nuakuntuma kudi Yehowa Nzambi wenu ne, Utulombele Yehowa Nzambi wetu; utuambile dî dionso didi Yehowa wamba, ne tuetu netudienze. Lelu eu nakunuambila dî edi, kadi kanuakutumikila dî dia Yehowa Nzambi wenu mu bualu bumue buakuntumeye bua kunuambila. Nunku numanye bienu ne, Nenufue ku muele wa nvita, ku tshiole ne ku tshihuhu mu muaba unudi basue kuya bua kushikama. Hakashikisha Yelemiya kuambila bantu aba mei onso a Yehowa Nzambi wabo, mei â onso mene akamutuma Yehowa Nzambi wabo nʼau bua kubambila, Azâya, muana wa Hoshaya, Yohanana, muana wa Kalea, ne bena dihetu bonso bakambila Yelemiya ne, Wewe udi wamba mei a mashimi. Yehowa Nzambi wetu kakukutuma bua kutuambila ne, Kanuyi ku Ejipitu bua kushikamaku; kadi Baluka, muana wa Neliya, udi ukukabila kutudi, bua kutufila mu bianza bia Bena Kasada, bua batushihe ne bua baye nʼetu mu buhika ku Babulona. Nunku Yohanana, muana wa Kalea, ne tupitene tuonso tua bena nvita ne bantu bonso kabakatumikila dî dia Yehowa ne, Bashikame mu buloba bua Yuda. Kadi Yohanana, muana wa Kalea, ne tupitene tuonso tua nvita bakangata bonso ba mu Yuda bakadi bashala, bobo mene bakadi bahingane ku Yuda bua kushikamaku, bafume ku makelenge onso kuakadibo babatume. Bakadi balume, bakashi ne bana, bana bakashi ba mukelenge ne muntu yonso wakadi Nebuzaladana, kapitene ka bansentedi ba masalayi, mushiye mu bianza bia Gedaliya, muana wa Ahikama, muana wa Shefana; Yelemiya muprofete kabidi ne Baluka, muana wa Neliya. Bakalua mu buloba bua Ejipitu; bualu bua kabakatumikila dî dia Yehowa; bakafika ku Tapanehese. Hashishe dî dia Yehowa diakalua kudi Yelemiya mu Tapanehese ne, Angata mabue manene mu bianza biebe, wateke mu tshimama tshia matafuadi a mu tshiendelu tshidi ku tshibuelelu tshia ku nsubu wa Palô udi mu Tapanehese. Enza nunku ku mesu kua Bena Yuda, ubambile ne, Yehowa wa misumba, Nzambi wa Isalele, udi wamba ne, Tangilai, nentume dî bua kubikila Nebukadenesâ, mukelenge wa Babulona, muntu wanyi; ne yeye neajadike nkuasa wandi wa bukelenge ha mutu ha mabue â anakusokoka, yeye neashimike tshitanda tshiandi tshia bukelenge ha mutu hau. Yeye nealue, neakume ba mu buloba bua Ejipitu, ufila ku lufu bandi nsunguila lufu, ubuesha mu buhika bandi nsunguila buhika, ufila ku muele wa nvita bandi nsunguila muele wa nvita. Nentemeshe kahia mu nsubu ya nzambi ya mu Ejipitu, Nebukadenesâ neoshe nsubu ne neaye ne nzambi ei mu buhika. Nealengeshe buloba bua Ejipitu bu mudi mulami wa mikoko umusha tuishi ku tshmialu tshiandi, nealuhukemu ne ditalala. Neashimbule bibumba bia ku Bete-shemeshe mu buloba bua Ejipitu kabidi; neoshe nsubu ya nzambi ya mu Ejipitu ne kahia. Dî diakalua kudi Yelemiya bua Bena Yuda bonso bakadi bashikama mu buloba bua Ejipitu, mu Migedola, mu Tapanehese, mu Mempi ne mu luseke lua Patelosa. Diakamba ne, Yehowa wa misumba, Nzambi wa Isalele, udi Wamba ne, Nuakutangila makenga onso anakutumina ba mu Yelushalema ne ba mu misoko yonso ya mu Yuda; monai, lelu eu misoko ei idi bikulu, ne kakuena muntu udi mushikamemu; bualu bua malu mabi abo akenzabo bua kunkuatshishabo tshiji, hakayabo kuosha musenga wa manananshi ne kutendelelabo nzambi mikuabo yakadibo kabayi bamanye, nansha bobo nansha nuenu nansha batatu benu. Kadi nakanutumina bena mudimu banyi bonso baprofete, njuka hanyi ne lunkelu bua kubatuma, ngamba hanyi ne, Kanuenji bualu ebu budi bunfuisha bundu, bundi nkina. Kadi kabakunvua, kabakateleja matshu bua kukudimunabo mitshima yabo ku bubi buabo, bua kulekela kuoshila nzambi mikuabo musenga wa manananshi. Nunku nakakuatshika tshiji tshikole ne tshifikʼa munda ne biakatema mu misoko ya mu Yuda ne mu misesu ya Yelushalema, ne yakanyanguka ne yakabutuka bu mudibi lelu eu. Nunku Yehowa, Nzambi wa misumba, Nzambi wa Isalele, udi wamba mpindiu ne, Nudi nuenzela mioyo yenu mene bualu bubi, bua meme kunûmushila balume ne bakashi, muana mukese ne muana utshidi wamua mabele, munkatshi mua Bena Yuda, tshiyi nnushila muntu umue, bua tshinyi? Bualu kai nuenu nuakunkuatshisha tshiji ku bintu binudi nuenza ne bianza bienu, hanuoshila nzambi mikuabo musenga wa manananshi mu buloba bua Ejipitu, munuakuya bua kushikama; bua nuenu kudifuisha ne bua kudivuisha tshintu tshidibo bahenda ne bahetula munkatshi mua bisamba bionso bia ha buloba. Nuakuhua muoyo bua malu mabi a batatu benu, bua malu mabi a banfumu ba Yuda, bua malu mabi a bakashi babo, bua malu mabi enu mene ne bua malu mabi a bakashi benu, akenzabo mu buloba bua Yuda ne mu misesu ya Yelushalema, anyi? Kabena banji kudihuekesha tô ne ku dituku edi, kabena banji kutshina, kabena banji kuenda mu mikenji yanyi anyi mu mayisha anyi, binakuteka ku mpala kuenu ne kua batatu benu. Nunku Yehowa wa misumba, Nzambi wa Isalele, udi wamba ne, Monai, nentangishe mpala wanyi kunudi bua kunuenzela bibi, bua kubutula bonso ba mu Yuda mene. Nengangate bantu ba mu Yuda batshidi bashala bakutangisha mpala yabo bua kuya ku Ejipitu bua kushikamaku, buonso buabo nebabutudibue; nebashihibue mu buloba bua Ejipitu; nebashihibue ku muele wa nvita ne ku tshiole; nebafue, kudi udi mutambe kuhuekela tô ne kudi udi mutambe bunene, nebafue ku muele wa nvita ne ku tshiole; nebikale bu tshintu tshidibo bahenda ne tshidi tshikuatshisha buowa, tshidibo bela mulau ne bahetula. Nenkengeshe badi bashikame mu buloba bua Ejipitu, bu munakakengesha ba mu Yelushalema, ne muele wa nvita, tshiole ne tshihuhu, bua kakuikadi umue wa ba mu Yuda badi bashala bakuya mu buloba bua Ejipitu bua kushikamamu wahanduka anyi washala bua kuhinganeye ku buloba bua Yuda kudibo bajinga bua kuhingana ne kushikama. Bualu bua kakuena bakuabo bahingana, anu bantu banya-banya badi banyema. Hashishe balume bonso bakadi bamanye bua bakashi babo ne, Badi boshila nzambi mikuabo musenga wa manananshi, ne bakashi bonso bakadi bimana ha buihi, bantu aba mene bakadi bashikama mu buloba bua Ejipitu ne mu Patelosa, ntshisumbu tshinene mene, bakakudimuna Yelemiya dî ne, Tudi tuamba bua dî diebe diwakutuambila mu dina dia Yehowa ne, Katuena tukunvuila. Kadi bulelela, netuenze mei onso akumana kuhatuka mukana muetu bua kuoshila mukelenge mukashi wa mu diulu musenga wa manananshi ne bua kumuhongoluela milambu ya bia kunua, bu mutuakuenza mu misoko ya Yuda ne misesu ya Yelushalema, ne tuetu ne batatu betu ne banfumu betu ne baminyampala betu. Bua mu tshikondo atshi tuakadi ne bintu bia kudia bikumbane, tuakadi ne diakalengele, katuakamona dikenga. Kadi katshia tualekela kuoshila mukelenge mukashi wa mu diulu musenga wa manananshi ne kumuhongoluela milambu ya Dia kunua, tuakukengela bintu bionso, tuakufua ku muele wa nvita ne ku tshiole. Bakashi bakamba ne, Hatuakadi tuoshila mukelenge mukashi wa mu diulu musenga wa manananshi, hatuakadi tumuhongoluela milambu ya bia kunua, hatuakamuambila mikata yakadi ne tshifuanyikishi tshiandi tshifundahu, hatuakamuhongoluela milambu ya bia kunua, katuakadi ne babayetu, anyi? Hashishe Yelemiya wakambila bantu aba bonso, ne balume ne bakashi, bantu aba bonso mene bakadi bamukudimuna dî adi ne, Yehowa kakavuluka musenga wa manananshi unuakosha mu misoko ya Yuda ne mu misesu ya Yelushalema, nuenu ne batatuʼenu, banfumu benu ne baminyampala benu, ne bantu ba mu buloba buenu, anyi? Malu â kakadi mu mutshima wandi, anyi? Yehowa kakamanya mua kuitabusha kabidi bienzedi bienu bibi ne malu enu manyanguke. Bua bualu ebu buloba buenu buakulua bikulu, budi bukuatshisha buowa kudi bakuabo, budi ne mulau, kabuyi ne bantu bu mudibu dituku edi. Makenga â akunukuata, atudi tumona lelu, bualu bua nuakuoshila nzambi mikuabo musenga wa manananshi, ne nuakuenzela Yehowa bibi, kanuakutumikila dî dia Yehowa, kanuakuenda mu mikenji yandi, mu mei andi majalame ne mu mikenji idi ilesha bu mudiye. Yelemiya wakambila bantu bonso ne bakashi bonso kabidi ne, Unvuai di dia Yehowa, nuenu Bena Yuda bonso badi mu buloba bua Ejipitu. Yehowa wa misumba, Nzambi wa Isalele, udi wamba ne, Nuenu ne bakashi benu nuakuamba mei â onso mukana muenu, nuakuênza ne bianza bienu, nuamba ne, Bulelela, netushikishe mitshihu yetu ituakuditshiha, bua kuoshila mukelenge mukashi wa mu diulu musenga wa manananshi ne bua kumuhongoluela milambu ya bia kunua. Nunku nuenze bu munuakuditshiha, nushikishe mitshihu yenu! Nunku unvuai dî dia Yehowa, nuenu ba mu Yuda badi bashikame mu buloba bua Ejipitu! Yehowa udi wamba ne, Monai, meme nakuditshiha mu dina dianyi dinene ne, Kabena batela dina dianyi kabidi mukana mua muntu munkatshi mua Bena Yuda badi mu buloba buonso bua Ejipitu, wamba ne, Bu mudi Mukelenge Yehowa ne muoyo. Monai, ndi mbatangila bua kubenzela bibi, kembua kubenzela bimpe. Bena Yuda bonso badi bashikame mu buloba bua Ejipitu nebashihibue ku muele wa nvita ne ku tshiole, tô ne hanabamana bonso. Badi bahanduka ku muele wa nvita nebaluhuke mu buloba bua Ejipitu bua kuhingana ku buloba bua Yuda, anu bantu banya-banya mene. Bonso ba mu Yuda batshidi bashala bakaya mu buloba bua Ejipitu bua kushikamamu nebamanye dî didi dijalame bushuwa, ne ndî dianyi, anyi ndî diabo! Yehowa udi wamba ne, Etshi ntshimanyinu tshindi nnulesha ne nennukengeshe mu muaba eu, bua nuenu numanye ne mei anakuamba ne, Nennuenzele bibi, neajalame bulelela. Yehowa udi wamba ne, Nenfile Palô Hofela, mukelenge wa Ejipitu, mu bianza bia bena lukuna bandi, mu bianza bia badi bakeba muoyo wandi, bu munakufila Sedekiya, mukelenge wa Yuda, mu bianza bia Nebukadenesâ, mukelenge wa Babulona, wakadi muena lukuna wandi ne wakadi ukeba muoyo wandi. Edi ndî dia Yelemiya muprofete diakambileye Baluka, muana wa Neliya, hakafundeye mei â akaluhuka mukana mua Yelemiya mu tshidimu tshinai tshia bukokeshi bua Yehoyakima, muana wa Yoshiya, mukelenge wa Yuda. Yehowa, Nzambi wa Isalele, udi ukuambila, wewe Baluka, ne, Wewe wakuamba ne, Ndi ne mulau: Bualu bua Yehowa wakutentekasha kanyinganyinga ha mutu ha dikenga dianyi; ndi muhungile ne kutua kuanyi kua mikemu, ne tshiena mpeta dikisha. Umuambile dî edi ne, Yehowa udi wamba ne, Mona, nensasule tshintu tshinakuasa, nentule tshintu tshinakukuna; nengenze nunku mu buloba bujima. Wewe udi udikebela malu manene, anyi? Yehowa udi wamba ne, Kudikebediu nansha; bualu bua mona, nentumine bonso ba ha buloba makenga. Kadi nenkuhe muoyo webe bu tshintu tshiudi unyenga mu nvita mu miaba yonso iudi uya. Edi ndî dia Yehowa diakalua kudi Yelemiya muprofete bualu bua bisamba bia bantu. Bualu bua Ejipitu bualu bua masalayi a Palô-Neko, mukelenge wa Ejipitu, akadi ne tshitudilu tshiau ku muelelu wa musulu wa Pelata mu Kâkemisha, akadi Nebukadenesâ, mukelenge wa Babulona, mutambe bukole mu tshidimu tshinai tshia Yehoyakima, muana wa Yoshiya, mukelenge wa Yuda: Longololai ngabu mukese ne ngabu munene, semenai ha buihi bua kuluangana nvita; suikai biseba ha nyima ha tubalu, nubande ha nyima hatu, nuenu bena nvita, nuimane mu mulongo, baluate bifulu bienu bia nvita; seneshai mafuma enu, luatai bivualu bia nvita! Nakumona muanda kai? Badi bakuatshike buowa, bakuabo babalukisha ku nyima; badi batamba bena bukitu babo bukole, badi banyema lubilu, kabena batangila ku nyima; Yehowa udi wamba ne, Buowa budi bubakuata mu nseke yonso. Muena lubilu kena mua kunyema, muntu mukole kena mua kuhanduka; ku luseke lua node, hehi ne musulu wa Pelata, bakulenduka ne bakudishinda. Eu nganyi udi ubika bu musulu wa Nile, udi mai au atuta mambuanka? Eu udi Ejipitu udi ujuka bu musulu wa Nile, bu misulu idi mai ai atuta mambuanka. Yeye udi wamba ne, Nenjuke, nembuikile buloba; nembutule misoko ne bantu badi bashikamemu. Bandaiku, nuenu tubalu; bishai diyoyo, nuenu makalu; bena bukitu bahatuke; Bena Kusha ne Bena Puta badi batuala ngabu, Bena Luda kabidi badi bakuata ne badi banana mata. Bualu bua dituku adi ndituku dia Mukelenge Yehowa wa misumba; dituku dia kusombuela, didiye udisombuela kudi bena lukuna bandi. Muele wa nvita neudie bantu, neukute, neunue mashi tô ne hashika nyota yau. Bualu bua Mukelenge, Yehowa wa misumba, neabale bantu bashihibue bu mulambu wa kuosha ku buloba bua nôde, hehi ne musulu wa Pelata. Banda ku Gilada, wangateku buanga bua kulaba, wewe Ejipitu, muana mukashi utshidi kamama! Udi udikebela manga a bungi hatuhu, bualu bua kakuena buanga bua kushikisha disama diebe. Ba mu bisamba bia bantu bakunvua lumu lua bundu buebe, buloba budi bûle tente ne muadi webe; bualu bua muena bukitu wakalenduka kudi muena bukitu mukuabo, bubidi buabo badi badishinda diatshimue. Edi ndî diakambila Yehowa Yelemiya muprofete bualu bua Nebukadenesâ, mukelenge wa Babulona, ne, Nealue kubutula buloba bua Ejipitu. Wambe dî edi mu Ejipitu, udimanyishe mu Migedola; utumanyishe kabidi mu Mempi ne mu Tapanehese; ubambile ne, Imanai, elai mualu wa nvita, bualu bua muele wa nvita wakushiha bantu ku nseke yebe yonso. Bualu kai bakihata bena bukitu bebe? Kabakimanaku, bualu bua Yehowa wakabahonesha hanshi. Yeye wakalenduisha ba bungi; bulelela, bakadishinda, mukuabo ha mutu ha mukuabo. Bakuamba ne, Jukai, tuhingane bietu kudi bana betu, ku buloba kuakutulelabo, bua kuhanduka ku muele wa nvita udi utukengesha. Bakabandisha mei abo, bamba ne, Palô, mukelenge wa Ejipitu, udi anu muena kufunafuna, wakuitabusha bua tshikondo tshiandi tshiakane tshihite hatuhu. Mukelenge udi ne dina ne, Yehowa wa misumba, udi wamba ne, Bu mundi meme ne muoyo, mukuabo nealue bulelela bu Tabô munkatshi mua mikuna, anyi bu Kâmele udi ku muelelu wa mai manene. Wewe, muana mukashi udi mushikame mu Ejipitu, udilongoluele bintu biebe bua kuya mu buhika! Bualu bua musoko wa Mempi neulue tshikulu, nebawoshe, newikale kauyi ne bantu. Ejipitu udi lukungulu lua ngombe lulengele, kadi dingulunge dia ku luseke lua nôde diakulusuma. Masalayi andi mabueshibue mu mudimu wandi ku difutu adi bu bana ba ngombe mu tshikumbi, bualu bua wowo mene akualukila ku nyima, akunyema, buonso buau hohamue, kâkimana; bualu bua dituku dia dibutuka diabo diakufika, tshikondo tshia dikengesha diabo. Tshiona tshiandi tshidi bu tshiona tshia nyoka udikoka hanshi; bualu bua masalayi a bena lukuna bandi adi alua a bungi; adi alua kumuluisha ne bisui bu batahi ba mitshi. Yehowa udi wamba ne, Neatahe ditu diandi, nansha biahitadi bunene; bualu bua adi atamba mikumbi bungi, kabena mua kubala bungi buau. Muana mukashi wa Ejipitu neakuatshike bundu, nebamufile mu bianza bia bantu ba ku luseke lua nôde. Yehowa wa misumba, Nzambi wa Isalele, udi wamba ne, Monai, nenkengeshe Amona, nzambi wa Nô, ne Palô ne Ejipitu ne nzambi yabo ne bakelenge babo; nenkengeshe Palô mene ne badi bamueyemena. Nembafile mu bianza bia badi bakeba mioyo yabo, mu bianza bia Nebukadenesâ, mukelenge wa Babulona, ne mu bianza bia bantu bandi; kadi ku nyima kua malu â bantu nebikale mu Ejipitu, bu muakadibo mu matuku a diambedi. Edi ndî dia Yehowa. Kadi wewe, Yakoba, muntu wanyi, kutshinyi, ne wewe, Isalele, kukuatshiki buowa! Bualu bua mona, nenkusungile ku buloba budi kule, nensungile bana bebe baledibue mu buloba bua buhika buabo, Yakoba neahingane, neikale ne ditalala, kena wikale ne ntatu, kakuena muntu wamukuatshisha buowa. Yehowa udi wamba ne, Wewe, Yakoba, muntu wanyi, kutshinyi, bualu bua udi nʼebe; nentume kabutu ka tshiendelele kudi bisamba bionso binakakutuma, kadi tshiena nkubutula wewe kashidi; nenkulengeshe ne kulumbulula kuakane, kadi tshiena nkushiya hatuhu, kuyi mukengeshibue. Edi ndi dia Yehowa diakalua kudi Yelemiya muprofete bualu bua Bena Peleshete, diambedi Palô kayi muanji kuluisha bena musoko wa Gaza. Yehowa udi wamba ne, Mona, mai adi abanda ku luseke lua nôde ne adi ahatukamu; nealue bu musulu munene udi uhueka lubilu bu tshibila tshinene; neahasalale ha buloba ebu ne bintu bionso bidimu, ha misoko ne ha bantu badi bashikamemu. Balume nebadile, ne bena buloba buonso nebase muadi. Hunvuabo tshiona tshia kutua kua mikono ya tubalu tuandi, hamonabo kuenda kua lubilu kua makalu a nvita ne tshiona tshia nkata yau, batatu kabena batangila ku nyima bua kusungila bana babo, bualu bua maboko abo adi ateketa. Bualu bua dituku didi dilua bua kubutula Bena Peleshete bonso, ne bua kumusha mukuatshishi wabo yonso udi ushala kudi Tulo ne Sidona; bualu bua Yehowa neabutule Bena Peleshete, bantu batshidi bashala ku muelelu wa mai wa Kafetô. Dibala diakulua ha mutu ha Gaza, Ashekelona udi munyanguke, ne badi bashala mu tshibanda tshiandi, nenuditahe mputa musangu bule bishi? Wewe, muele wa nvita wa Yehowa, musangu hule bishi neulehe, wewe kuyi muanji kuhola? Udibueshe mu luhaha luebe; wikishe biebe, wikale talalâ! Kadi udi mua kuikala talalâ munyi, bualu bua Yehowa wakuwelela mukenji? Wakusunguila mudimu wa kukengesha ba mu Ashekelona ne ba ku muelelu wa mai manene. Bualu bua Moaba. Yehowa wa misumba, Nzambi wa Isalele, udi wamba ne, Mulau wikale kudi Nebo! Bualu bua udi munyanguke; Kîyata-ayima udi mukuatshike bundu, udi munyengibue; muaba udibo bakolesha ne bielelu bia nvita udi mukuatshike bundu, bakûtamba bukole. Butumbi bua Moaba kabuenaku kabidi; mu Heshebona bakumuelela tshifufu ne, Tuye kubabutula, bua kabikadi ne muaba wabo munkatshi mua bisamba bikuabo! Wewe kabidi, Mademena, nebakulekeshe dî, bualu bua muele wa nvita neukuihate. Unvuai! Tshiona tshia muadi tshidi tshifuma ku Holonayima, ntshia kubutuka ne kuhaula kunene! Moaba wakahaudibua; bana bandi bakese haku asa muadi. Badi babanda mukuna wa Luhita, benda badila; hahuekabo mu nshila udi uyila tô ne ku Holonayima; bakunvua mbila ya bena kubutuka ne, Nyemai bienu! Nusungile mioyo yenu! Nuikale bu mutshi wa tshianana mu tshihela. Bualu bua wakueyemena bienzedi bia bianza biebe ne luhetu luebe, nebakukuate wewe kabidi; nebaye ne Kemoshe mu buhika, ne bakuidi bandi ne baminyampala bandi. Mushihianganyi nealue mu misoko yonso, kakuena musoko umue wahanduka. Tshibanda netshifue, ne mpata wa ha mutu ha mikuna neabutudibue; bu muakuamba Yehowa. Nuhe Moaba mahuahua, bua yeye ahahale, anyeme. Misoko yandi neyilue bikulu, kayiyi ne bantu ba kushikamamu. Mulau wikale kudi wajingakana mu mudimu wa Yehowa, mulau wikale kudi wakanda muele wandi wa nvita ne, Kaumatshishi mashi hanshi! Moaba wakushikama talalâ, kayi ne ntatu, ku buana buandi tô ne mpindiu, wakushikama bu maluvu mu bisekeseke, kabena bamuhongolola ku mulondo ku mulondo, kabena banze kuya nʼandi mu buhika, nunku nse yandi yakushala kudiye, ne muenyi wandi kawakuanda muka. Nunku Yehowa udi wamba ne, Monai, mu matuku alualua nentume basendeki kudiye, nebamusendeke, nebahongolole bintu bidi mu milondo yandi, nebashihe milondo yandi bihese. Moaba neakuatshike bundu bualu bua Kemoshe, bu muakakuatshika Bena Isalele bundu bualu bua Betele, tshieyemenu tshiabo. Nudi mua kuamba munyi ne, Tudi bantu bakole, tudi bena bukitu mu nvita? Moaba wakubutudibua, misoko yandi yakulua mu kadilu, bansongalume bandi bahite buakane badi bahona mu lufu kudi babashihi. Edi ndî dia Mukelenge udibo babikila ne, Yehowa wa misumba. Kubutuka kua Moaba kudi kuamba kufika, dikenga diandi didi dilua lukasa. Nuenu, bantu bonso badi bamunyunguluka, ne buonso buenu badi bamanye dina diandi, nuambe bienu ne, Monai mudi dikombo dikole dia bukelenge ditshibuke, dikombo diandi dilengele be! Wewe, muana mukashi udi mushikame mu Dibona, tuluka mu nkuasa webe wa butumbi, ushikame mu buloba buminyine, bualu bua muhaudi wa Moaba wakulua kukuluisha wakushimbula misoko yebe idi ne ngumbu. Wewe muana mukashi udi mushikame mu Aloê, imana kukala kua nshila, utentekeleku; konka muntu mulume udi unyema biandi ne muntu mukashi udi uhanduka ne, Bualu kai buakulua? Bakufuisha Moaba bundu, bakumutamba bukole, umuashile muadi, umudidile! Ambai dî edi ku muelelu wa musulu wa Ânona ne, Bakuhaula Moaba. Nunku mulau wakukuata misoko idi mu mpata: Holona ne Yaza ne Mefâta ne Dibona ne Nebo ne Bete-dibelatayima ne Kîyata-ayima ne Bete-gamula ne Bete-meona ne Keliyota ne Bosela ne misoko yonso ya mu buloba bua Moaba, idi hehi ne idi kule. Yehowa udi wamba ne, Bakuhempa lusengu lua Moaba, diboko diandi diakutshibuka. Numukuatshishe maluvu bualu bua wakudilesha ku mesu kua Yehowa; ba mu Moaba nebabunguluke mu bilushi biabo, nebasekibue. Kuena museke Isalele, anyi? Bakumusangana munkatshi mua bibi, anyi? Bua misangu yonso hawatela dina diandi, wewe udi ukuha mutu webe. Nuenu badi bashikame mu Moaba, numuke mu misoko, nushikame munkatshi mua mena a mu mabue; nuikaleku bu nyunyu wa nkutshi udi wibaka disua diandi ku kala kua lubû. Tuakunvua lumu lua dihetu dia Moaba ne udi ne dihetu dinene, tuakunvua kabidi bua kudilesha kuandi, dihetu diandi ne kudisua kuandi, ne bu mudiye unanga tshiadi tshiandi. Yehowa udi wamba ne, Ndi mumanye tshiji tshiandi ne tshidi hatuhu; kudiamba kuandi kakuena kuenze bualu. Nunku nendidile Moaba; nengashile bonso ba mu Moaba muadi, nengashile ba mu Kile-helese madilu. Wewe, muonshi wa tumuma tua nvinyo wa mu Sibema, nenkuashile muadi muhite unakuashila Yazê! Matamba ebe akahita ha mutu ha mai manene, akafika tô ne ku Yazê; muhaudi wakudiela ha mamuma ebe a mu tshikondo tshia luya ne ha tumuma tuebe tua nvinyo Disanka ne tuseku bidi biumushibua mu madimi akadi ne diminu mu buloba bua Moaba; nakukandisha nvinyo bua kayihatuki mu bikaminu, kakuena mukami udi udiata tumuma tua nvinyo ne kuela kua mbila, mbila kayena mbila ya disanka. Heshebona ne Eleale badi badila, tô ne ku Yahaza badi bunvuisha bantu di diabo, ku Soâ tô ne ku Holonayima ne ku Egelata-sheleshiya; bualu bua mai a mu Nimelima kabidi neakame. Yehowa udi wamba ne, Nendekeshe kabidi mundi wa mu Moaba udi ubanda ku tshioshelu tshidi ha mutu ha mukuna, udi ufilahu mulambu wa musenga wa manananshi kudi nzambi yandi. Nunku mutshima wanyi udi ujinga bua Moaba ne muadi bu muadi wa lushiba, mutshima wanyi udi ujinga bua Kile-helese ne muadi bu muadi wa lushiba kabidi. Nunku biuma bia bungi biakadisangishilabo biakujimina. Ha mutu ha muntu yonso hakutuka dibala, ne bakubeya muevu wa muntu yonso; ha bianza bia muntu yonso hadi mputa yakuditaheye, mu tshifuka tshia muntu yonso mudi bilulu bikayabala. Yehowa udi wamba ne, Ha mutu ha nsubu yonso ya mu Moaba ne mu misesu yonso muadi udi kuonso; bualu bua nakutshibula Moaba bu dilonga dia tshianana. Monai mudi Moaba mushimbuke! Monai mudibo badila muadi! Monai mudi Moaba muele nyima wandi bualu bua bundu buakumukuata! Nunku Moaba nealue bu tshintu tshidibo baseka, tshidi tshikuatshisha bonso badi bamunyunguluke buowa. Bualu bua Yehowa udi wamba ne, Monai, muena lukuna neahahale mulu bu nyunyu wa mukanku, neolole mahuahua andi bua kuluisha Bena Moaba. Nebahite misoko yandi bukole, nebanyenge misoko idi ne ngumbu ya mabue; mitshima ya bena bukitu ba mu Moaba neyikale bu mutshima wa mukashi udi ne didinyenga dia ha kuleleye. Ba mu Moaba nebashihibue bua kabikadi bu tshisamba tshia bantu, bualu bua bakutamba kudibandisha kudi Yehowa. Yehowa udi wamba ne, Buowa, dijimba ne buteyi bidi biamba kukukuata, wewe udi mushikame mu Moaba. Yehowa udi wamba ne, Udi unyema buowa neahone mu dijimba, wahanduka mu dijimba neakuatshike mu buteyi; bualu bua nentumine ba mu Moaba malu â mu tshidimu tshia kubala malu mabi abo. Bakadi banyema badi bimana, kabayi ne bukole kabidi, mu mundidimbi wa Heshebona. Bualu bua kadilu kakuluhuka mu Heshebona, ludimi lua kadilu luakuluhuka mu musoko wa Sihona, luakuosha mpala wa Moaba, ne lubombo lua mutu lua bena diyoyo. Mulau wikale kûdi, Moaba! Batendeledi ba Kemoshe badi bafue. Bakuya ne bana benu balume mu buhika, bakuya ne bana benu bakashi mu buloba bua bende. Yehowa udi wamba ne, Kadi kunshikidilu kua matuku makuabo nempingashe diakalengele dia Moaba kudiye. Eku nkulumbuluisha kua ba mu Moaba. Bualu bua Bena Amona. Yehowa udi wamba ne, Isalele kena ne bana balume, anyi? Kena ne muhianyi wa bintu biandi, anyi? Kadi Milekoma wakumana buloba bua Gada munyi? Bantu bandi badi bashikame mu misoko yau bishi? Nunku Yehowa udi wamba ne, Monai, mu matuku alualua nengunvuishe bantu mbila ya bena nvita badi baluisha bena Laba wa bana ba Amona; musoko eu neulue tshikulu, neboshe misoko yau idi mu ntshiamba ne kahia. Yehowa udi wamba ne, Bena Isalele nebangate buhianyi bua bakadi bangata buhianyi buabo diambedi. Wewe, Heshebona, asa muadi, bualu bua bakubutula musoko wa Ai! Nuenu, bana bakashi ba Laba, nudiluatshishe ne bilulu bikayabala, asai madilu, nuendakane mu mpangu nudila; bualu bua nebaye ne Milekoma mu buhika hohamue ne bakuidi bandi ne baminyampala bandi. Bualu kai, wewe muana mukashi udi ukoma Nzambi nyima, udi wanyisha bibanda biebe, tshibanda tshiebe tshidi ne mai ahuekamu? Munyi udi weyemena luhetu luebe, wamba ne, Walua kunduisha nganyi? Yehowa wa misumba udi wamba ne, Mona, nenkuvuishile buowa buai bufuma kudi bonso badi bakunyunguluka, nebanuihate, muntu ne muntu wa munkatshi muenu unyema lubilu mutangile ku mpala, kakuena muntu washala bua kusangisheye banyemi kabidi hohamue. Kadi Yehowa udi wamba ne, Ku nyima kua malu â nempingashe diakalengele dia Bena Amona mu muaba wa buhika buabo. Bualu bua Edome. Yehowa wa misumba udi wamba ne, Meji kaena mu Temana kabidi, anyi? Lungenyi lua bena meji babo luakufua, anyi? Meji abo onso akujimina, anyi. Nuenu badi bashikame mu Dedana, nyemai lubilu, hinganai kuenu, nushikame mu bisokomenu bidi kabiyi bimueneke! Bua nemmutumine dikenga dia Esau mu tshikondo tshinamukengesha. Bialua bahuodi ba tumuma tua nyinyo kûdi, kabena bakushila tumuma bua wewe kutuhumbulula, anyi? Bialua bibi kuebe butuku, kabena bahaula bintu to ne habatondabi, anyi? Kadi nakuhaula bionso bia Esau, nakumushiya hatuhu; nakusokolola bisokomenu biandi, ne yeye kena mua kusokoma. Badi bashiha bana bandi ne bana babo, ne bena mutumba handi; ne yeye kenaku kabidi. Shiya bana bebe ba nshiya, nembalame bua bikale ne muoyo, bakashi bebe ba mu lufuila bangeyemene meme. Bua Yehowa udi wamba ne, Mona, bikala badi kabayi bahile ne bua kunua luhanza, wewe neuhanduke kuyi mulengeshibue, anyi? Kuena uhanduka kabayi bakakengesha, kadi neunue luhanza bulelela. Bualu bua Yehowa udi wamba ne, Nakuditshiha meme nkayanyi ne, Musoko wa Bosela neulue tshintu tshidi tshikuatshi ha bantu buowa ne tshidibo bahenda, bu tshihela ne tshidibo bela mulau; misoko yau yonso idi mu ntshiamba neyikale bikulu tô ne tshiendelele. Nakunvua dî kudi Yehowa, wakutuma muloho wandi munkatshi mua bisamba bionso ne dî diandi ne, Nudisangishe hamue, yai kumuluisha, buelai mu nvita! Bualu bua mena, nakukuvuisha bu tshisamba tshikese munkatshi mua bisamba bia bantu, bu tshintu tshidibo bahetula munkatshi mua bantu. Bualu bua ditshina diwakutshinyisha nʼadi bakuabo ne dihetu dia mu mutshima webe biakukudinga, Yehowa udi wamba ne, Wewe udi mushikame mu miaba mikole ya mu Sela, udi ulamata miaba idi mibande ha mutu ha mikuna, nansha biwibaka disua diebe kulu bu mudi nyunyu wa mukanku wenza, nenkukulule hanshi. Edome nealue bu tshintu tshidi tshikuatshisha bakuabo huowa; mufitu yonso wahitaku neakeme, neamubingile bua makenga adi amukuata. Yehowa udi wamba ne, Bu muakadi kubutula kua Sodoma ne Amola, ne misoko yakadi hehi nʼai, kakuena muntu washikamamu, kakuena muana wa muntu watulamu. Monai, neabandeku bu mudi nyama wa ntambue mufume ku ditu dia ku musulu wa Yadene bua kuluisheye mikoko idi mu luhangu ludi hola, nunku nembihate mu muaba wabo lukasa, nenteke muntu yonso undi nsungula ha mutu hau. Bualu bua udi bu meme nganyi! Nganyi udi mua kusunguila tshikondo tshia kuenza bualu? Mulami wa mikoko kai udi mua kuimana ku mpala kuanyi? Nunku unvuai bualu budi Yehowa muhangidishe bua kuenzela Edome, ne malu akahangidisheye bua kuenzela badi bashikame mu Temana. Bulelela, nebabahulumune bua kuya nʼabo, nansha bana bakese ba mu tshisumbu tshia mikoko mene; bushuwa, ba mu luhangu luabo lua mikoko nebakeme bua bualu bubi bubakuata. Buloba budi buzakala bualu bua tshiona tshia kubutuka kuabo, muadi udiku ne tshiona tshiau tshidi tshiunvuika tô ne ku Mai Manene Makunze. Monai, yeye neabuke kulu, neahahale bu nyunyu wa mukanku, neolole mahuahua andi bua kuluisha ba mu Bosela; mitshima ya bena nvita ba mu Edome mu dituku adi neyikale bu mutshima wa mukashi mu didinyenga diandi dia ha kulela. Udi wamba bua Damaseke ne, Badi batshinyisha Hamata ne Âpada kabidi, bualu bua bakunvua ngumu mibi, badi benguluka ne buowa, batu batatshishibue bu mudi mai manene adi kâyi mua kutalala. Damaseke wakulekela, udi utshunguluka bua kunyemeye, kuzakala kudi kumukuata; majia ne kanyinganyinga bidi bimukuata bu mudi mukashi mukuatshike didinyenga dia ha kulela. Monai mudibo balekela musoko wa butumbi, musoko wa disanka dianyi! Yehowa wa misumba udi wamba ne, Nunku bansongalume bau nebahone mu misesu yau, bena nvita bau bonso nebatekeshibue dituku adi. Neatemeshe kadilu mu ngumbu ya Damaseke, nekoshe nsubu ya mukelenge Bene-hadada. Edi ndi dia Yehowa bualu bua Kedâ ne makelenge a Hasô akayishabo benʼau kudi Nebukadenesâ, mukelenge wa Babulona. Yehowa udi wamba ne, Jukai, yai bienu ku Kedâ, nubulule bantu ba ku luseke lua esete. Nebanyenge ntenta yabo ne bisumbu bia bimuna biabo, nebangate bilulu biabo bikudika ne malonga abo onso, ne tumelo tuabo bua kuya nʼabi; bantu nebabele mbila bamba ne, Buowa budi ku nseke yonso. Yehowa udi wamba ne, Nyemai bienu, yai ku muaba mule, sokomai mu mena male, nuenu Bena Hasô, bualu bua Nebukadenesâ, mukelenge wa Babulona, wakuela meji bua kunuenzela bibi, wakuhangidisha bua kunukengesha. Yehowa udi wamba ne, Jukai, yai kuluangana ne tshisamba tshidi tshishikame talalâ, tshidi tshishikame katshiyi ne ntatu, tshidi katshiyi ne nkanu ne bibi, tshidi tshishikame ha nkayatshi. Yehowa udi wamba ne, Tumelo tuabo netuikale bintu bia kunyengabo, bisumbu biabo bia bimuna bingi nebikale bintu bia kuhaulabo; nentangadishe bantu badi ne nsuki yabo mikosa biketu ku mpehele yonso; nembatumine makenga adi afuma ku nseke yabo yonso. Hasô newikale muaba wa mibuabua kushikamayi, newikale tshikutu tshiendelele; kakuena muntu washikamamu, kakuena muana wa muntu washalamu. Edi ndî dia Yehowa diakalua kudi Yelemiya muprofete bualu bua Elama, ku tshibangidilu tshia bukokeshi bua Sedekiya, mukelenge wa Yuda. Yehowa wa misumba udi wamba ne, Mona, nentshibule buta bua Elama, tshieyemenu tshia bukole buabo. Nentumine Elama mpehele mai ya ku nseke mai ya diulu, nembatangadishe ku mpehele ei yonso, kakuena kuikala tshisamba tshidibo kabayi bafika kudi badibo bihata mu Elama. Nenkuatshishe Bena Elama buowa ku mpala kua badi nʼabo lukuna, ku mpala kua badi bakeba mioyo yabo. Yehowa udi wamba ne, Nembavuishile ntatu, tshiji tshianyi tshikole mene. Nentume muele wa nvita ku nyima kuabo, tô ne hanababutula bonso. Yehowa udi wamba ne, Nenjadike nkuasa wanyi wa bukelenge mu Elama, ne ku muaba wawa nenshihe mukelenge ne baminyampala. Yehowa udi wamba ne, Kadi mu matuku alualua ku mpala nempingashe diakalengele dia Elama mu muaba wa buhika. Edi ndî dia Yehowa diakambeye bualu bua Babulona ne bua buloba bua Bena Kasada, mukana mua Yelemiya muprofete: Ambai dî edi munkatshi mua bisamba bionso, nubamanyishe lumu elu, bandishai dibendela, ambilai bantu dî edi, kanusokoki dî dimue; ambai ne, Bakuhita Babulona bukole, Bele udi mufuishibue bundu, Melodaka udi mushimbula, bintu biandi bidibo basonga bidi bifuishibue bundu, mpingu yandi idi mitambibue bukole. Bualu bua tshisamba tshidi tshifume ku luseke lua node tshidi tshilua bua kumuluisha, tshilualua kuvuisha buloba buandi tshikisu, kakuena muntu washikamamu; ne bantu ne nyama nebinyeme, nebiye. Yehowa udi wamba ne, Mu matuku au ne mu tshikondo atshi bana ba Isalele nebalue, bobo ne Bena Yuda hohamue; nebaye mu nshila wabo, benda badila, nebakebe Yehowa Nzambi wabo. Nebebeshe bantu bua nshila wa ku Siona, batangishe mpala yabo ku musoko wawa, bamba ne, Luai, lulamate kudi Yehowa mu tshihungidi tshia tshiendelele tshidi katshiyi mua kuhuibua muoyo. Bantu banyi bakadi bu mikoko mijimine, balami babo bakubahambuisha mu nshila, bakubalekelela bua kuendakanabo hatuhu ha mikuna; bakuendakana ku mukuna munene tô ne ku mukuna mukese; bakuhua muaba wa tshikishilu tshiabo muoyo. Bonso bakadi babasangana bakubadia, bena lukuna babo bakamba ne, Tuetu katuena bahile, bualu bua bobo bakuenzela Yehowa bibi. Yeye nduhangu lua buakane, bakuenzela Yehowa mene, ditekemena dia batatu babo, bibi. Hatukai mu Babulona bua kunyema, luhukai mu buloba bua Bena Kasada; nuikale bu mpumbu ya mbushi ku mpala kua bisumbu biai. Bua monai, nembishe tshisumbu tshia bantu ba mu bisamba binene bia ku luseke lua node, nembatume bua kuluanganabo ne Bena Babulona, nebele mualu wa nvita ku mpala kuabo, babaluisha tô ne habumushabo mu muaba wabo. Mikete yabo neyikale bu mukete wa umena ndudi udi kayi uhingana bianza bituhu. Yehowa udi wamba ne, Buloba bua Bena Kasada nebuikale bu tshintu tshinyengibue mu nvita. Bonso badi babahaula nebukute. Bualu bua nudi nusanka ne nudi nuseka, nuenu badi bahaula buhianyi buanyi, bualu bua nudi nunaya bu lukungulu lua ngombe mu mashinde, ne nudi nukungula bu balume ba tubalu; mamu wenu neafuishibue bundu tshishiki, wakanulela neatshinyishibue, monai, yeye neikale ku nyima kua bisamba bia bantu, neikale tshihela, buloba bume, ne tshihela tshia lusenga. Bualu bua tshiji tshia Yehowa yeye neikale buloba budi kabuyi ne bantu, kadi neikale tshikulu mu miaba yonso. Bonso badi bahitshila mu Babulona nebakeme, nebamubingile bualu bua bihuhu biandi. Nuele mualu wa nvita ku nseke yonso ya Babulona, nuenu bonso badi banana buta; numuele mikete, kanubengi kumuela mikete yenu yonso, bualu bua yeye wakuenzela Yehowa bibi. Numuele bibingu ku nseke yandi yonso, udi wamba kuteketa, bishimikidi biandi biakuhuka, badi bashimbula ngumbu yandi. Bualu bua edi ndisombuela dia Yehowa, nunku nudisombuele kudiye, numuenzele yeye bu mudiye wenzela bakuabo. Nushihe mukunyi wa maminu ne muena muele udi unowa bia kudia bia mu Babulona mu tshikondo tshia kunowa. Bua dishina diabo dia muele wa nvita nebalukile, muntu ne muntu, kudi bana babo, nebanyeme, muntu ne muntu, ku buloba buandi. Isalele udi bu tshisumbu tshia mikoko idi mitangadisha, nyama ya ntambue yakumuihata. Diambedi mukelenge wa Ashû wakamumina, hashishe, mu tshikondo etshi Nebukadenesâ, mukelenge wa Babulona, wakutshibula mifuba yandi. Nunku Yehowa wa misumba, Nzambi wa Isalele, udi wamba ne, Monai, nenkengeshe mukelenge wa Babulona ne buloba buandi, bu munakukengesha mukelenge wa Ashû. Nempingashe Isalele mu luhangu luandi lua mikoko, neadie mashinde a ku Kâmele ne Bashana, muoyo wandi neukute ha mikuna ya mu Efelayima ne ya mu Gilada. Yehowa udi wamba ne, Mu matuku au ne mu tshikondo atshi nebakebe dihambuka dia Bena Isalele dia ku buakane, kadi kabena badimona, nebakebe malu mabi a Bena Yuda, kadi kabena basangana; bualu bua meme nembuikidile mibi ya bantu bandi nshiya bu difuka didi dishala. Yehowa udi wamba ne, Yai bienu kuluangana ne ba mu buloba bua Melatayima nuluangane ne badi bashikame mu Pekoda. Ubashihe ne ubabutule kabutu, wenze bu mudi mei onso anakukuambila. Tshiona tshia nvita tshidi mu buloba, tshiona tshia kubutuka kunene. Mona mudi marteau wa buloba buonso mukoshibue ne mudiye mutshibula bituha! Mona mudi Babulona mushale bikulu munkatshi mua bisamba ma bantu! Wewe Babulona, nakukuelela buteyi, wakukuatshibuamu kuyi muanze bukudimuka; bakukusanganamu, bakukukuata, bualu bua wewe wakuluangana ne Yehowa. Yehowa wakunzulula nsubu wa bielelu biandi bia nvita, wakuhatulamu bielelu bia nvita bi bia tshiji tshiandi; bualu bua Mukelenge, Yehowa n wa misumba, udi ne mudimu wa kuenzeye mu buloba bua Bena Kasada. Luai bienu ku nseke yonso bua kumuluisha, unzululai bibi bia ku mayeba andi, mubumbai bu mikishi ya manvua, mubutulai tshiendelele, tshintu tshiandi tshimue katshishadi kudiye nansha! Shihai balume ba ngombe yandi bonso, bahueke biabo ku tshishihelu. Mulau wikale kudibo! Bualu bua dituku diabo diakufika, tshikondo tshia kubakengesha. Edi ndî dia badi banyema ne badi bahanduka mu buloba bua Babulona, dia kuambila ba mu Siona bualu bua kudisombuela kua Yehowa Nzambi wetu, disombuela didiye udisombuela nʼadi ntempelo wandi. Bikilai bananyi ba mata bua kuluisha Bena Babulona, bonso badi banana buta; babanyunguluke ne bitudilu bia bena nvita mu nseke yonso, muntu wandi umue kahanduki: Numufute bu mudi bienzedi biandi, bualu bua wakudibandisha ku mpala kua Yehowa, Wa Tshijila wa Isalele. Yehowa udi wamba ne, Nunku bansongalume bandi nebahone mu misesu yandi, bena nvita bandi bonso nebatekeshibue mu dituku adi. Mukelenge Yehowa wa misumba udi wamba ne, Mona, ndi nkubenga wewe, umena dikamakama, bualu bua dituku diebe diakufika tshikondo tshia kukukengesha, Muena dikamakama nealenduke, neahone, kakuyi muntu wa kumubisha kabidi; nentemeshe kadilu mu misoko yandi, nekoshe bionso bidi binunyunguluke. Yehowa wa misumba udi wamba ne, Bana ba Isalele ne bana ba Yuda badi bakengeshibua hohamue, bonso bakaya nʼabo mu buhika badi babakuata bikole, badi babenga kubakela. Muhikudi wabo udi mukole; Yehowa wa misumba ndina diandi; yeye neabakuile tshilumbu tshiabo biakane, bua amanye mua kuvuishila buloba dikisha ne bua kutatshisheye ba mu Babulona. Yehowa udi wamba ne, Muele wa nvita ufike kudi Bena Kasada, kudi ba mu Babulona, kudi baminyampala bandi ne bena meji bandi! Muele wa nvita ufike kudi bena mbuku, bua bandamuke bahote! Muele wa nvita ufike kudi bena nvita bandi bakole, bua bakuatshike buowa! Muele wa nvita ufike kudi tubalu tuandi, ne kudi makalu andi a nvita, ne kudi bantu ba bende bonso badi bashikame munkatshi mua bantu bandi, bua bandamuke biabo bu bakashi! Muele wa nvita ufike ku bintu bia mu bibutshilu biabo, bua bakuabo babanyengebi! Munanga ukuate mai a mu misulu yandi, bua akame; bua buloba buandi budi buloba bua mpingu, badi badivuisha bantu bahale ku mpingu. Nunku nyama ya mu tshihela ne mibuabua idi idila miadi neyikalemu, ne nyunyu ya nfiondo neyikalemu; bantu kabena bashikamamu kabidi tô ne tshiendelele, bantu kabena bikalamu ku tshinga tshikondo tô ne ku tshikondo tshikuabo. Yehowa udi wamba ne, Bu muakashiha Nzambi Sodoma ne Amola ne misoko yakadi ha buihi, nunku kakuena muntu washikamamu, kakuena muana wa muntu watulamu. Tangilai, bantu bakuabo badi bafuma ku luseke lua nôde, ba mu tshisamba tshinene ne banfumu ba bungi nebabishibue tô ne kunfudilu kua buloba. Badi batubula buta ne difuma, badi ne lukinu ne kabena ne luse. Dî diabo didi dikungula bu tshiona tshia mai manene; badi babanda ha nyima ha tubalu, buonso buabo badi badilongolola mu mualu wa nvita bu muntu umue bua kuluangana nʼebe, wewe muana mukashi wa Babulona. Mukelenge wa Babulona wakunvua lumu luabo, maboko andi akulua matekete; kanyinganyinga kakumukuata, dikenga bu didinyenga dia mukashi udi wamba kulela. Monai, bu mudi nyama wa ntambue uluhuka mu ditu dia ku Yadene bua kuhaula luhangu lua mikoko ludi ne ditalala, nunku nembihate ku muaba wabo lukasa, nenteke muntu yonso undi musue kusungula ha mutu hau. Bualu bua udi bu meme nganyi? Udi mua kunsunguila diba nganyi? Mulami kai udi mua kuimana ku mpala kuanyi? Nunku unvuai bualu budi Yehowa nʼabu bua kuenzela Babulona, ne bualu budiye uhangidisha bua kuenzela ba mu buloba bua Bena Kasada! Bulelela, nebahulumune bana bakese bahite butekete ba mu tshisumbu tshia mikoko bua kuya nʼabo; bulelela, ba mu luhangu luabo nebakeme bua bualu abu budi bubakuata. Buloba nebuzakale, bua diyoyo dia ha kutambabo Babulona bukole, ne muadi wandi neufike mu matshu a ba mu bisamba bia bantu. Yehowa udi wamba ne, Monai, nembishile ba mu Babulona ne badi bashikame mu Lebe-kamai tshihehele tshidi tshibashi-ha. Nentumine Bena Babulona bahehudi balualua kubahehula, nebashiye buloba buabo butuhu; bua mu dituku dia makenga abo nebabaluishe ku nseke yonso. Muena buta anane buta buandi kudi udi umunanyina buta bukuabo, ne kudi muluishi udi udimanyika ku mpala kuandi muluate tshibalu tshiandi tshia nvita. Kanutudi bansongalume bandi luse kadi nubutule bena nvita bandi bonso. Nebadishinde hanshi hafue mu buloba bua Bena Kasada, basompoke mu misesu ya misoko yabu. Bualu bua Nzambi wabo, Yehowa wa misumba, kena mushiye Bena Isalele anyi Bena Yuda bua kuikalabo bakashi bu ba mu lufuila nansha buloba buabo buikale bûle tente ne malu mabi akenzelabo wa Tshijila wa Isalele. Numuke mu Babulona, nunyenge, muntu yonso asungile muoyo wandi; kanufu nʼandi mu bubi buandi, bualu bua etshi ntshikondo tshia disombuela dia Yehowa, yeye neabafute difutu diabo. Babulona wakadi luhanza lua or mu tshianza tshia Yehowa, luakakuatshisha ba ha buloba bonso maluvu a malu mabi andi, ba mu bisamba bia bantu bakuma nvinyo yandi, nunku ba mu bisamba ebi bakuhala. Babulona wakushimbuka lukasa, wakubutudibua, numuashile muadi! Numuangatshile buanga bua kulaba ha mputa handi; bumue disama diandi nedishihe. Tuakadi kushikisha disama dia Babulona, kadi disama diandi kadiena dishika. Tumulekele, tuye bietu muntu ku buloba buandi, muntu ku buloba buandi; bualu bua kulumbulula kuandi kudi kufika tô ne mu diulu, kudi kubandishibua tô ne ku matutu. Yehowa wakulesha bantu dibingishibua dietu, luai, tuye kuambila ba mu Siona, bu mudi Yehowa Nzambi wetu mutuenzele! Sakishai mikete, kuatai ngabu bikole; Bualu bua Yehowa wakusonsola mitshima ya banfumu ba Bena Madai, bualu bua yeye wakuhangidisha bua kubutula Babulona; bua edi ndisombuela dia Yehowa, disombuela didiye nʼadi bua ntempelo wandi. Bishai dibendela dia nvita bua bashimbule ngumbu ya Babulona, nanukilai bua kutentekela musoko, nutekeku batentekedi, nubalamine bua kubakuata; bualu bua Yehowa wakuhangidisha ne wakuenza dî diakambeye bualu bua bantu badi bashikame mu Babulona. Wewe udi mushikame hetu ne misulu ya mai ya bungi, udi ne luhetu lua bungi, nshikidilu webe wakumana kufika, luhetu luwakuangata ku buihi ludi luamba kujimina. Yehowa wa misumba wakuditshiha nkayandi ne, Nenkûshe ne bantu tente, bavulangana bu mukumbi, ne bobo nebakuele mbila bua bakukutamba bukole. Nyeye wakafuka buloba ku bukole buandi, wakajadika bintu bionso bidimu ku meji andi, wakavungulula diulu ne lungenyi luandi. Hambeye dî diandi, diyoyo dia mai a bungi didi mu diulu, yeye udi ubandisha dibungi didi difuma kunfudilu kua buloba. Udi wenzela nvula miele ya nvula, udi uhehesha mpehele idiye uhatula mu bibutshilu biandi. Muntu yonso wakulua muhote udi kayi ne meji, mufudi yonso wa biamu bia or wakufuishibua bundu bua tshifuanyikishi tshiakufuleye, bualu bua mpingu yandi idi bintu bia kudinga nʼabi bantu, kamuena muhuya munda muai. Idi bintu bia hatuhu bia kudinga nʼabi bantu, halua tshikondo tshiabi tshia kufua, nebijimine. Yehowa, Luseke lua Buhianyi bua Yakoba, kena bu bintu ebi, kadi yeye udi mufuki wa bintu bionso; Bena Isalele ntshisamba tshia buhianyi buandi, Yehowa wa misumba ndina diandi. Wewe udi tshilonda tshianyi ne bielelu bianyi bia nvita, nentshibule nʼabi ba mu bisamba bia bantu bituha, nembutule nʼabi makelenge; nenkose nʼabi tubalu ne badi benda ha nyima hatu bituha, nentshibule nʼabi makalu a mata bituha, nenkose nʼabi badi bendahu; nenkose nʼabi mulume ne mukashi bituha, nenkose nʼabi muntu mununu ne nsongalume bituha. Nenkose nʼabi nsongalume ne mushikankunde utshidi kamama bituha; nenkose nʼabi mulami wa mikoko ne mikoko yandi bituha, nenkose nʼabi tshidime ne ngombe yandi bituha; nenkose nʼabi ba-gouverneur ne miloho yabo bituha. Yehowa udi wamba ne, Nenfute Babulona ne bonso ba mu buloba bua Bena Kasada difutu ku mesu kuenu, bua malu mabi abo onso akuenzabo mu Siona. Yehowa udi wamba ne, Mona, ndi nʼebe tshilumbu, wewe mukuna munene udi ubutula mikuabo, udi ubutula buloba buonso. Nengolole tshianza tshianyi bua kukukengesha, nenkûmushe munkatshi mua mabue a mulu bua kukubunguluisha hanshi, nenkuvuishe bu mukuna wakadi muhia kahia kau kajima. Yehowa udi wamba ne, Kabena bumusha dibue kûdi bua kuditeka ku ditumba dia nsubu, anyi bua kuditeka ku bishimikidi bia nsubu; kadi newikale hatuhu tshiendelele. Bishai dibendela mu buloba, elai mpungi munkatshi mua bisamba bia bantu, nulongolole bisamba ebi bua kuyabi kuluangana nʼandi nvita, nubikile ba mu makelenge a Alalata ne Mini ne Ashekenaza bua kuluangana nʼandi; nusungule kapitene kanene bua kuluangana nʼandi, nutume tubalu tua nvita bu bungi bua mikumbi idi ibisha masala. Nulongolole ba mu bisamba bia bantu bua kuluangana nʼandi, bakelenge ba Bena Madai, ba-gouvemeur babo ne miloho yabo yonso, nulongolole buloba bujima budibo bakokesha. Buloba budi buzakala, budi ne dikenga, bualu bua malu adi Yehowa muhangidishe bua kuenzela Babulona adi majalame, bua kuvuisheye buloba bua Babulona bu tshikisu, kakuyi muntu mushikamemu to. Bena nvita ba mu Babulona bakulekela kuluangana, badi bashala mu mpangu yabo ya mabue, bukole buaho buakashika, bakulua bu bakashi; nsubu yandi idi mikuate kahia, biamu bia ku bibi biandi biakutshibuka. Muena mikanda udi unyema bua kusangakaneye ne mukuabo, messager udi unyema bua kusangakaneye ne mukuabo, bua kumanyisha mukelenge wa Babulona ne, Musoko webe udi munyengibue ku nseke yonso; bakunyenga bisabukilu bionso, bakuosha masele a mu bitotshi ne kahia, buowa budi bukuata bena mata bonso. Bualu bua Yehowa wa misumba, Nzambi wa Isalele, udi wamba ne, Muana mukashi wa Babulona udi bu tshishihuidi mu tshikondo tshidibo bashihula blé, hahita musangu muihi, tshidimu tshia kuhuola bintu biandi netshifike. Nebukadenesâ, mukelenge wa Babulona, wakundia, wakundiata munda mua makasa andi, wakunvuisha bu dilonga didi munda mutuhu, wakummina bu mudi nyama munene wenza, wakûsha matama andi tente ne bia kudia bianyi bia nse, wakunsukasha. Ba mu Siona bambe biabo ne, Dikenga diakutukengeshabo nʼadi dikale hamʼbidi ha Babulona! Bena Yelushalema bambe biabo ne, Mashi etu ikale hamʼbidi ha ba mu buloba bua Bena Kasada. Nunku Yehowa udi wamba ne, Monai, nennuakuile tshilumbu tshienu, nennusombuele; nenkamishe mai andi manene, nengumishe mushimi wandi wa mai. Babulona neikale anu mishiki ya nsubu minyanguke, muaba udi mibuabua nushikame, tshintu tshidi tshikemesha bantu ne tshidibo babangila, kakuyi muntu wushikamamu. Nebakungule diatshimue bu nkungulu ya nyama ya ntambue, ne bakenge bu bana ba nyama ya ntambue. Yehowa udi wamba ne, Huiwuabo luya lua nvinyo, nembalongoluele bidia bia disanka, nembakuatshishe maluvu, bua basanke biabo, balale tulu tua tshiendelele, kabayi batabale. Nendue nʼabo ku tshishihelu bu bana ba mikoko, bu mudibo balueku ne bimpanga ne mpumbu ya mbushi. Tangila muakunyengabo Sheshaka, muakukuatabo butumbi bua bonso ba ha buloba! Tangila muakulua Babulona tshintu tshia kukemesha ba mu bisamba bia bantu! Mai manene akabanda ha mutu ha Babulona, wakubuikidibua ne kuelangana kua mambuanka a bungi. Misoko yabo yakushala bikulu, buloba bûme, ne tshihela tshia lusenga, buloba budi kabuyi ne bantu bashikamemu, budi kabuyi ne muana wa muntu uhitshilamu kabidi. Nenkengeshe Bele mu Babulona, nempatule bintu biakumineye mukana muandi. Bena lukanu ba mu bisamba bia bantu kabena baya mu bisumbu kudiye kabidi, e, lumbu lua Babulona luakushimbuka. Bantu banyi, luhukai munkatshi muandi! Muntu yonso adisungile ku tshiji tshikole tshia Yehowa. Mitshima yenu kayiteketshi, ne kanutshinyi bienu, bua ngumu mudi nunyua mu buloba ebu. Bualu bua lumu lukuabo nelulue mu tshidimu tshimue, ne lukuabo nelulue mu tshidimu tshikuabo; diyoyo nedikale mu buloba, mukokeshi udi ufuilangana ne mukokeshi mukuabo. Nunku, tangilai, mu matuku alualua, nenkengeshe mpingu misonga ya mu Babulona, ne ba mu buloba buandi bonso nebafuishibue bundu; bantu bandi bashihibue bonso nebahone hanshi munkatshi mua buloba buandi. Yehowa udi wamba ne, Mu diba adi diulu ne buloba ne bintu bionso bidimu nebimbe misambu ya disanka bua kubutuka kua Babulona; bualu bua bamubutudi nebafike kudiye bafume ku luseke lua nôde. Budi Babulona nʼabu mbua kuhona bualu bua Bena Isalele bashihibue, bu muakahoneshibua ba ha buloba bujima bua Babulona atumbishibue. Nuenu, bakuhanduka ku muele wa nvita, yai bienu, kanuimanyi talalâ! Nuvuluke Yehowa ku miaba yenu ya kule, nuelangane meji a Yelushalema mu mitshima yenu. Tuakufuishibua bundu, bualu bua tuakunvua bihendu; bundu buakutukuata ku mesu, bualu bua bantu ba bende bakubuela mu miaba ya tshijila ya nsubu wa Yehowa. Yehowa udi wamba ne, Nunku, monai matuku alualua analumbuluisha mpingu yandi misonga, ne bantu badibo bataha mputa nebatue mikemu mu buloba buandi buonso. Yehowa udi wamba ne, Nansha biabanda Babulona tô ne mu diulu, nansha biakolesheye muaba wandi mukole kulu mene, bahaudi nebabike kudiye ba tume kundi meme. Unvuai! Tshiona tshia muadi tshifume ku Babulona, tshiona tshia kubutuka kunene kufume ku buloba bua Bena Kasada! Bualu bua Yehowa udi ubutula Babulona, udi uhuwisha dî diandi dinene. Badi baluangana nʼandi badi bela mbila bu tshiona tshia mai a bungi, mutoyi wa mei abo udi ubandaku. Bualu bua bashihianganyi bakumana kufika ku Babulona, badi bakuata bena nvita bandi, badi batshibula mata abo bituha, bualu bua Yehowa udi Nzambi wa busombuedi, yeye neabasombuele bulelela. Mukelenge udibo babikila ne, Yehowa wa misumba, udi wamba ne, Nenkuatshishe baminyampala bandi ne bena meji bandi maluvu, ba-gouverneur bandi, miloho yandi, bena nvita bandi bakole muomumue; nebalale tulu tua tshiendelele, kabena batabala kabidi. Yehowa wa misumba udi wamba ne, Ngumbu minene ya Babulona nevishimbudibue kashidi, ne bibi biandi bile nebioshibue ne kahia; nunku bantu badi bakuata mudimu hatuhu, ne bisamba bia bantu bidi biditatshisha anu bua kumona midimu yabo mihie mu kahia. Edi ndî diakela nʼadi Yelemiya muprofete mukenji kudi Selaya, muana wa Neliya, muana wa Mâseya, hakaya Selaya mu Babulona ne Sedekiya, mukelenge wa Yuda, mu tshidimu tshinai tshia bukokeshi buandi; Selaya wakadi kahita ka bena mudimu ba mu nsubu wa mukelenge. Yelemiya wakafunda makenga onso akadi alua kudi Babulona mu mukunda, mei â onso mene akafundibua Babulona. Yelemiya wakambila Selaya ne, Hawafika ku Babulona, kuhangi kubala mei â onso, wambe biebe ne, Wewe Yehowa, wakuamba dî diebe bualu bua muaba eu ne, Nengubutule bua mundi anyi nyama kabishikamimu, kadi newikale bikulu tshiendelele. Hawashikisha kubala mukunda eu, usuikeku dibue, uwele mu bunene bua musulu wa Pelata. Amba kabidi ne, Babulona neadine nunku, kena ubika kabidi, bualu bua malu makole andualua kumutumina; nebabange bikole. Tô ne aha hadi mei a Yelemiya. Sedekiya wakadi ne bidimu makumi abidi ne tshimue hakabangeye kukokesha; wakakokesha bidimu dikumi ne tshimue mu Yelushalema. Dina dia mamu andi diakadi Hamutala, muana mukashi wa Yelemiya wa ku Libena. Yeye wakenza malu akadi mabi ku mesu kua Yehowa, bu muakenza Yehoyakima. Tshiji tshia Yehowa tshiakatema bikole kudi Bena Yelushalema ne Bena Yuda tô ne hakahiteye ku mesu kuandi. Sedekiya wakatombokela mukelenge wa Babulona. Mu tshidimu tshia tshitema tshia bukokeshi buandi, mu ngondo wa dikumi, mu dituku dia dikumi dia ngondo, Nebukadenesâ, mukelenge wa Babulona, ne masalayi andi onso, wakalua kuluangana ne Bena Yelushalema; bakasaku bitudilu biabo, ne bakasa lumbu lua kuba tshintshimika nseke yonso ne bielelu bia nvita. Bakatshintshimika musoko to ne ku tshidimu tshia dikumi ne tshimue tshia bukokeshi bua Sedekiya. Mu ngondo muinai, mu dituku dia tshitema dia mu ngondo eu, tshiole tshiakadi tshikole mu musoko ne kakuakadi bia kudia bua bena buloba kudia. Hashishe bakashimbula tshituha tshia ngumbu ya musoko, ne bena nvita bonso bakanyema, bakaluhuka mu musoko butuku, bahatukilamu mu nshila wa ku tshibi tshia hankatshi ha ngumbu ibidi, wakayila hehi ne tshibidi tshia mukelenge; (mu diba adi Bena Kasada bakadi batshintshimika musoko mu nseke yonso); bakayila mu nshila wa ku tshibanda tshia Alabâ. Kadi masalayi a Bena Kasada akalonda mukelenge mu nyima, akaheta Sedekiya mu mpata ya Yeleko, ne masalayi andi onso akamulekela, akatangadika. Nunku bakakuata mukelenge, bakaya nʼandi kudi mukelenge wa Babulona ku Libela mu buloba bua Hamata, ne yeye wakamulumbu luisha. Mukelenge wa Babulona wakashiha bana ba Sedekiya ku mpala kuandi. Wakashiha kabidi baminyampala ba Yuda bonso ku Libela. Wakashiha mesu a Sedekiya; ne mukelenge wa Babulona wakamusuika mu nkanu, wakaya ngandi ku Babulona, wakamubuesha mu nsubu wa lukanu tô ne ku dituku dia lufu luandi. Mu ngondo muitanu, mu dituku dia dikumi dia ngondo—tshidimu tshiakadi tshidimu tshia dikumi ne tshitema tshia bukokeshi bua mukelenge Nebukadenesâ, mukelenge wa Babulona—Nebuzaladana, kapitene ka bansentedi ba masalayi, mukuatshishi wa mukelenge wa Babulona, wakalua ku Yelushalema. Yeye wakoshesha nsubu wa Yehowa ne nsubu ya mukelenge; wakayoshesha ne nsubu yonso ya mu Yelushalema, nsubu minene yonso mene ne kahia. Masalayi onso a Bena Kasada akadi kudi kapitene ka bansentedi ba masalayi akashimbula ngumbu ya Yelushalema yakunyunguluka musoko. Nebuzaladana, kapitene ka masalayi au, wakaya ne bantu batambe buhele, wakabahesha mu buhika; wakaya ne bantu bakadi bashala mu musoko ne bakuabo bakumuka kudi Sedekiya bua kudifila kudi mukelenge wa Babulona hohamue ne bena mabaya hakuabo bakadi bashala. Kadi Nebuzaladana, kapitene ka masalayi, wakashiya bakuabo bena buloba abu bahite buhele bua kuikalabo bahempi ba mionshi ya tumuma tua nvinyo ne ba bidime ba mu madimi. Bena Kasada bakatshibula makunshi a tshiamu tshia mitaku bituha akadi mu nsubu wa Yehowa, bitekelu bia tshiowelu ne tshiowelu tshia tshiamu tshia mitaku biakadi mu nsubu wa Yehowa; bakaya ne biamu biabi bia mitaku bionso ku Babulona. Bakaya ne ngesu kabidi ne tukasu tua bianza, biamu bia kujima nʼabi minda, malonga, nkutu ne bintu bionso bia tshiamu tshia mitaku biakenzabo nʼabi mudimu mu ntempelo. Muomumue, bakaya ne mpanza, malonga a kutuadilamu kahia, malonga makuabo, ngesu, bitekelu bia minda, nkutu ne bitembue—tshintu tshiakadi tshia tshiamu tshia or, kapitene ka masalayi kakaya nʼatshi bua or watshi; tshintu tshia tshiamu tshia argent, kakaya nʼatshi bua argent watshi. Makunshi abidi, tshiowelu tshimue, ngombe ya tshiamu tshia mitaku dikumi ne ibidi yakadi muinshi mua tshiowelu bu bitekelu biatshi, biakenzabo kudi mukelenge Solomo bua kubiteka mu nsubu wa Yehowa—bintu ebi bionso biakadi ne bujitu bua tshiamu tshia mitaku buakadibo kabayi mua kuidikisha. Dikunshi ne dikunshi dia makunshi au abidi diakadi ne bule bua coudées dikumi ne muanda mukulu, kubulunga kua dikunshi kuakadi coudées dikumi ne ibidi; muhimbu wa dikunshi wakadi bu ntanta wa minu inai; munda muadi muakadi mutuhu. Tshilenga tshia tshiamu tshia mitaku tshiakadi ha mutu ha dikunshi ne dikunshi; bule bua tshilenga ne tshilenga buakadi coudées itanu, ne bakalengesha bilenga ebi ne bifuanyikishi bia mionshi mihindakasha ne bia tumuma tua grenades biakafulabo ne tshiamu tshia mitaku. Dikunshi dibidi diakadi ne bifuanyikishi bia mionshi mihindakasha ne bia grenades muomumue ne dikunshi dikuabo. Mamuma a grenades makumi tshitema ne asambombo akadi mu nseke yonso ya makunshi, mamuma onso a grenades akadi hamʼbidi ha bifuanyikishi bia mionshi mihindakasha akadi lukama. Kapitene ka masalayi kakakuata Selaya, muakuidi munene, ne Sefanya, muakuidi muibidi, ne balami basatu bakadi balama mishiku ya mbelu ya nsubu. Kakakuata muntu mutungula wakadi ha mutu ha bena nvita, kakamûmusha ku musoko, ne bantu muanda mutekete ba ha buihi ne mukelenge bakamonaku mu musoko; kakakuata secrétaire wa kapitene ka masalayi wakadi ne mudimu wa kufunda mena a bantu ba mu buloba bakabuela mu busalayi; ne bantu makumi asambombo ba bena buloba abu bakamonaku mu musoko. Nebuzaladana, kapitene ka bansentedi ba masalayi, wakakuata bantu aba. Wakaya nʼabo kudi mukelenge wa Babulona ku Libela. Mukelenge wa Babulona wakabakina, wakabashiha ku Libela mu buloba bua Hamata. Nunku bakumusha Bena Yuda mu buloba buabo, bakaya nʼabo mu buhika. Ebu mbungi bua bantu bakadi Nebukadenesâ muye nʼabo mu buhika: mu tshidimu tshia muanda mutekete, Bena Yuda binunu bisatu ne makumi abidi ne basatu. Mu tshidimu tshia dikumi ne muanda mukulu tshia bukokeshi bua Nebukadenesâ, wakumusha bantu nkama muanda mukulu ne makumi asatu ne bantu babidi ku Yelushalema bua kuya nʼabo mu buhika. Mu tshidimu tshia makumi abidi ne tshisatu tshia bukokeshi bua Nebukadenesâ, Nebuzaladana, kapitene ka masalayi au, wakaya ne Bena Yuda nkama muanda mutekete ne makumi anai ne bantu batanu, wakababuesha mu buhika. Bantu aba bonso bakadi bantu binunu binai ne nkama isambombo. Mu tshidimu tshia makumi asatu ne muanda mutekete tshia mu buhika bua Yehoyakina, mukelenge wa Yuda, mu ngondo wa dikumi ne muibidi, mu dituku dia makumi abidi ne atanu dia ngondo, Ewile-melodaka, mukelenge wa Babulona, mu tshidimu tshia kumudilu tshia bukokeshi buandi, wakabandisha Yehoyakina, mukelenge wa Yuda, wakamuhatula mu nsubu wa lukanu. Wakamuambila mei a kalolo, wakajadika nkuasa wandi wa bukelenge ha mutu ha nkuasa ya bakeleye bakuabo bakadi nʼandi mu Babulona, wakamûmusha bilulu biandi bia lukanu. Yehoyakina wakadia bia kudia biandi ku mpala kua mukelenge matuku onso a muoyo wandi. Mukelenge wa Babulona wakamuha dikuatshisha ku dituku ku dituku, tshituha tshia bintu bia buatshia-buatshia tô ne ku dituku dia lufu luandi. Wakenza nunku matuku onso a muoyo wandi. Monai musoko wakadi tente ne bantu mudiu mushale mutuhu! Wowo wakadi munene munkatshi mua bisamba bia bantu wakulua bu mukashi wa mu lufuila! Yeye wakadi mukelenge mukashi munkatshi mua misoko mikuabo ya buloba ukadi uyilambula! Yeye udi udila bikole bufuku, muikale ne binsonshi ku matama andi; kena ne muntu wa kumusamba munkatshi mua bonso bakadi bamunanga; balunda bandi bonso bakumutungila tshitungu; bakulua bena lukuna bandi. Bakuya ne Yuda mu buhika bua kuikaleye ne dikenga ne bua kuenzeye mudimu mukole wa buhika; udi mushikame munkatshi mua bisamba bia bantu, kena uheta dikisha, bakadi bamuihata bakamukuata mu ntatu yandi. Nshila ya ku Siona idi idila muadi, bualu bua kakuena badi bendelamu bua kuya ku masanka a tshijila a Yehowa; bibuelelu biandi bidi bishala hatuhu; bakuidi bandi badi batua mikemu. Mishikankunde yandi yakukengeshibua, ne yeye muine wakushala mu kanyinganyinga. Bamukengeshi bakumutshimuna, badi nʼandi lukuna badi ne diakalengele; bualu bua Yehowa wakunkengesha bua kuvulangana kua malu mabi andi. Bana handi batekete bakubuela mu buhika kudi bena lukuna bandi. Bulengele buonso bua muana mukashi wa Siona buakumuka; baminyampala bandi bakulua bu ngulungu idi kayiyi iheta mashinde, idi inyema kayiyi ne bukole ku mpala kua udi uyihata. Mu matuku a makenga andi ne a kanyinganyinga kandi Yelushalema udi uvuluka masanka andi onso akadiye nʼau mu matuku a kale. Hakabona bantu bandi mu bianza bia bena lukuna babo, kakuakadi muntu bua kumukuatshisha; bamukengeshi bakamumona, bakamuseka bua kubutuka kuandi. Yelushalema wakenzela Nzambi bibi, nunku wakalua bu tshintu tshidi ne manyanu; bonso bakadi bamutumbisha diambedi hadi bamuhetula mpindiu, bualu bua badi bamone butaka buandi; e, yeye udi utua mikemu, udi ukoma nyima wandi. Bukoya buandi buakadi ku bilulu biandi; kakela meji a kunfudilu kuandi; nunku wakuhueka bikole, kena ne musambi. Wewe Yehowa, mona dikenga dianyi; bualu bua muena lukuna wakuntshimuna! Muena lukuna wandi wakuhaula bintu biandi bionso bia mushinga mukole; bulelela, yeye wakumona ba mu bisamba bia bantu babuela mu nsubu wandi wa tshijila, bobo mene bawakulela mukenji ne, Kababuedi mu nsubu wanyi wa kusambakena. Bantu bandi bonso badi hatua mikemu mu dikeba diabo dia bia kudia; bakushintakasha bintu biabo bia mushinga mukole ku bia kudia bia kukankamasha mioyo yabo. Wewe Yehowa, umone, umone bu munakuhetudibua! Monai, nuenu honso badi bahita mu nshila, nutangile buonso buenu ne dikenga dikuabo didiku didi bu dikenga diakunkengeshabo nʼadi, didi Yehowa unkengesha nʼadi mu dituku dia tshiji tshiandi tshikole, anyi? Ku muaba wandi wa mu diulu yeye wakatuma kahia hanshi, kakabuela mu mifuba yanyi; wakadisha bukuondo bua kukuata makasa anyi; wakashindisha; wakunvuisha muena kanyinganyinga ne muena mutshima mutekete dituku dijima. Mibi yanyi yakusuikibua bu mutshi wa tshikokedi; tshianza tshiandi tshiakuyisuika ha nshingu hanyi; yeye wakutekesha hukole buanyi. Mukelenge wakunfila mu bianza bia bantu bandi tshiyi mumanye mua kuluisha. Mukelenge wakuyisha bena nvita banyi bakole bonso bu bantu ba hatuhu munkatshi mua musoko; yeye wakubikila tshisumbu tshia bantu bua kunduishabo, bua kubutulabo bansongalume banyi. Mukelenge wakudiata muana mukashi wa Yuda bu mudibo badiata tumuma tua nvinyo mu tshikaminu. Bua malu â onso udi ndila; binsonshi bidi bihatuka ku mesu kuanyi; bualu bua musambi udi mua kukankamisha mutshima wanyi udi nʼanyi kule; bana banyi badi ne kanyinganyinga, bualu bua bena lukuna bakutamba bukole. Siona udi wolola bianza biandi ne kakuena mumusambi; Yehowa wakuela mukenji bualu bua Yakoba ne, Badi bamunyunguluka bikale bamukengeshi. Yelushalema wakulua bu tshintu tshinyanguke munkatshi muabo. Yehowa udi mubinge, bualu bua nakutombokela mukenji wandi. Unvuai, nuenu bantu bonso, nutangile kanyinganyinga kanyi, bua mishikankunde yanyi ne bansongalume banyi badi baye mu buhika. Nakubikila banangi banyi, kadi bakundinga; bakuidi banyi ne bakulu banyi bakuhuola muoyo mu musoko, hakadibo bakeba bia kudia bua kukankamisha nʼabi mioyo yabo. Yehowa, tangila biebe, bualu bua ndi mu ntatu, mutshima wanji udi usama; mutshima wanyi wakunyengabala munda muanyi, bualu bua nakutombokela Nzambi bikole. Ha mbelu muele wa nvita wakubishila bantu lufu, mu nsubu mudi lufu kabidi. Bakunvua mundi ntua mikemu, kakuyi munsambi; bonso badi nʼanyi lukuna bakunvua lumu lua dikenga dianyi; badi basanka bualu bua wewe wakungenzela nunku. Uvuishe dituku diwakuamba bua bobo bikale bu mundi emu. Mibi yabo yonso imueneke ku mesu kuebe, ubenzele bobo bu muwakungenzela meme bua ditomboka dianyi dionso; bua mikemu yanyi idi mivule, mutshima wanyi wakuhanga. Mona mudi Mukelenge mubuikile muana mukashi wa Siona ne ditutu mu tshiji tshiandi! Wakukulula butumbi bua Isalele mu diulu bua kubuhuekesha hanshi; kakuvuluka ditanda dia muinshi mua makasa andi mu dituku dia tshiji tshiandi. Mukelenge wakubutula nsubu yonso ya Yakoba, kayi uyilesha luse; mu njiya yandi wakushimbula miaba ya muana mukashi wa Yuda yakadi minyunguludibue ne ngumbu; wakuyuhula hanshi, wakunyangisha bukelenge ne bakokeshi babu. Yeye wakuhempa lusengu luonso lua Isalele mu tshiji tshiandi tshikole; wakûmusha tshianza tshiandi tshia balume kudibo ku mpala kua bena lukuna babo. Wakuosha nseke yonso ya Yakoba, bu kahia kadi katangadîka kosha bintu bionso bidi ha buihi nʼaku. Wakunana buta buandi bu mudi umena lukuna wenza, wakuimana mubukuate ne tshianza tshiandi tshia balume bu muena lukuna; wakushiha bonso bakadi balengele ku mesu. Mu ntenta wa muana mukashi wa Siona wakumuenesha tshiji tshiandi bu kahia. Mukelenge wakulua bu muena lukuna, wakubutula buloba bua Isalele; wakûhula nsubu yandi yonso ya bakelenge, wakushimbula misoko yandi minyunguludibue ne ngumbu; wakuvudishila muana mukashi wa Yuda madilu ne muadi. Wakusasula tshitendelelu tshiandi ku bukole, tshitandatanda tshia mu budimi; wakubutula tshisangishilu tshiandi. Yehowa wakuenzesha bantu tshihua muoyo bua masangisha abo masungula bua kudia bidia ne bua dituku dia Lumingu, mu Siona; bua tshiji tshiandi tshikole wakuhetula mukelenge ne muakuidi. Mukelenge wakuhidia tshioshelu tshiandi, wakulengulula nsubu wandi wa tshijila; wakufila bimanu bia nsubu yandi ya bakelenge mu bianza bia bena lukuna. Bobo bakubisha diyoyo mu nsubu wa Yehowa bu diyoyo dia dituku dia bidia bia disanka. Yehowa wakahangidisha bualu bua kubutula lumbu lua muana mukashi wa Siona; wakaluidikisha ne muonshi; kakukanda tshianza tshiandi bua katshilûhuidi; wakashisha tshibumba tshikole ne lumbu muadi, bidi biteketa diatshimue. Bibi biandi biakubuela mu buloba; yeye wakutshibula biamu biabi bituha bituha; mukelenge wandi ne miloho yandi badi bamuangalaka munkatshi mua bisamba bia bantu, mudi kamuyi mikenji; nansha baprofete kabatshiena bamona bikena kumona bifume kudi Yehowa. Bakulu ba muana mukashi wa Siona badi bashikame hanshi mu buloba bahuwa talalâ; bakudiela buloba mu mitu yabo, bakudiluatshisha ne bilulu bikayabala; mishikankunde ya mu Yelushalema idi inyika mitu yabo hanshi. Mesu anyi adi mûle tente ne binsonshi, mutshima wanyi udi unyingalala; mutshima wanyi wakuhandika, bualu bua kubutuka kua muana mukashi wa bana betu, bualu bua bana batekete ne bana batshidi bamua mabele badi bahungila mu misesu ya musoko. Hatshidibo baleuka mu misesu bu mudi muntu udibo bataha mputa wenza, hatshidibo bahuola mioyo yabo mu biadi bia bamamuʼabo, badi bakonka bamamuʼabo ne, Bia kudia ne nvinyo bidi kudi kunyi? Nenkuambile tshinyi, nenkuidikishe ne tshinyi, wewe muana mukashi wa Yelushalema? Nenkuelekeshe ne tshinyi, bua mmanye mua kukusamba, wewe muana mukashi wa Siona utshidi kamama? Bualu bua mputa webe udi munene muikale bu mai manene; washikisha disama diebe nganyi? Bua bualu buebe baprofete bebe bakumona bikena kumona bidi bikudinga ne bia tshianana; kabakukusokoluela bubi buebe, bua kuandamuna buhika buebe bukudimuke diakalengele, kadi bua bualu buebe bakumona malu a kukudinga nʼau, ne malu adi akusesuisha mu nshila. Bantu bonso badi bahita mu nshila badi bakututshila bikashi; badi bakubingila, badi bakuha mitu yabo kudi muana mukashi wa Yelushalema, bamba ne, Kemmusoko wakadibo babikila ne, Mulengele tshishiki, disanka dia ba ha buloba bonso, anyi? Bena lukuna bebe bonso bakubutula mukana muabo bua kukuhenda; badi bakubingila basumakana menu, bamba ne, Tuakumumina; bulelela, edi ndituku dituakutekemena; tuakudiheta, tuakudimona ne mesu. Yehowa wakuenza bualu ebu buakuhangidisheye bua kuenza; wakushikisha dî diandi; bu muakeleye mukenji kale, wakukubutula kayi mukuleshe luse; wakusankisha bena lukuna bua bualu buebe, wakubandisha lusengu lua bakukengeshi. Mitshima yabo yakadila kudi Mukelenge, wewe lumbu lua muana mukashi wa Siona, binsonshi bihueke ku mesu bu musulu munya ne butuku; kudikandi nansha; mesu ebe kalekedi kuhatula binsonshi. Juka, asa muadi mu butuku, ku tshibangidilu tshia mpolo ya diba dia batentekedi; uhumune malu a mu mutshima webe bu mai ku mesu kua Mukelenge; bisha bianza kudiye bua kumulomba mioyo ya bana bebe, badi baleuka bua nzala mu misesu yonso. Yehowa, utangile uwakuenzela mudiye! Bakashi nebadie bana bakalelabo, badibo bakuongoluela mu maboko, anyi? Muakuidi ne muprofete nebashihibue mu tshitendelelu tshia Mukelenge, anyi? Bansongalume ne bakulumpe badi balala hanshi mu misesu; bansongakashi banyi ne bansongalume banyi bakushihibua ku muele wa nvita; wewe wakubashiha mu dituku dia tshiji tshiebe; wakubashiha kuyi mubafuile luse. Wakumbikidila buowa bunnyunguluke nseke yonso, bu mudibo babikila bantu mu dituku didibo badia bidia bia disanka; kakuena muntu wahanduka anyi washala mu dituku dia tshiji tshia Yehowa; bobo banakukuongoluela ne banakukolesha mbadi muena lukuna wanyi mushihe. Meme ndi muntu wakumona dikenga ku mulangala wa tshiji tshiandi. Yeye wakundombela ne wakungendesha mu mîdima, kakungendesha mu munya. Bulelela, wakunkengesha ne tshianza tshiandi ku musangu ne ku musangu dinda tô ne ku dilolo matuku onso. Wakumanyisha munyinyi wa mubidi wanyi ne dikoba dianyi; wakutshibula mifuba yanyi. Wakungomekela ntatu, wakunnyungulula ne kanyinganyinga kakole. Wakunshikika mu miaba ya midima bu mudi bantu bakafua kale. Wakunnyungulula ne lumbu, nunku tshiena mua kuhatuka; wakunemesha bujitu bua hamʼbidi hanyi. Bulelela, banadila, hanakeba dikuatshisha, udi ukanda kulomba kuanyi. Yeye wakujika nshila yanyi ne mabue masonga, wakukuonyangasha nshila yanyi. Yeye udi bu nkashama kundi udi ungalamina, bu nyama wa ntambue ungalamina mu tshisuku. Yeye wakunsesuisha mu nshila wanyi, wakumpanda bihese bihese; wakunshiya nkenga. Wakunana buta buandi, waku nteka kulu bu tshidikishilu tshia kuasa mukete. Wakasa mutshima wanyi mikete ya mu musaka wandi. Nakulua bu tshintu tshidibo baseka kudi bantu bonso, ne bu musambu udibo bimba matuku onso. Wakungusha tente ne nyongangandu, wakungukutshisha ne bululu. Wakutshibula menu anyi ne nsoka mikese; wakumbuikila ne butue bua kahia. Wakûmusha ditalala dia mu mutshima wanyi, wakuditeka kule; nakuhua diakalengele muoyo. Nunku nakuamba hanyi ne, Bukole buanyi buakujimina, ne ditekemena dianyi kudi Yehowa diakujimina. Uvuluke dikenga dianyi ne kanyinganyinga kanyi, bidi bu nyongangandu ne bintu bia bululu kundi. Mutshima wanyi utshidi ubivuluka, udi unema bujitu munda muanyi. Ndi nvuluka muanda eu, nunku ntshidi ne ditekemena ne: Malu makane a Yehowa kaena ashika tshiendelele, ne luse luandi kaluena luhanga; bidi bihia-bihia ku dinda ku dinda, bujalami buebe budi butamba bunene! Mutshima wanyi udi wamba ne, Yehowa udi buhianyi buanyi, nunku ndi ne ditekemena dianyi kudiye. Yehowa udi ne luse kudi badi bamuindila, kudi muetu udi umukeba. Bidi bimpe bua muntu atekemene ne indile biandi luhandu lua Yehowa talalâ. Bidi bimpe bua muntu ambule biandi mutshi wa tshikokedi mu bunsongalume buandi. Ashikame biandi nkayandi ahuwe talalâ, bualu bua bakûteka ha nshingu bandi. Atue mishiku yandi mu buloba, bua bumue ditekemena nedikaleku. Afile ditama diandi kudi udi umututa; ukutshishibue tente ne bihendu. Bualu bua Mukelenge kena wihata muntu tshiendelele. Kadi hamukengesheye, neamufuile luse bu mudi divulangana dia dinanga diandi. Bualu bua kena usanka bua kubakengesha, anyi bua kunyingalasha mitshima ya bukua bantu. Bualu bua badiatabo bena lukanu bonso ha buloba munda mua makasa, hasesukabo ku kulumbulula kuakane kua muntu ku mesu kua Mutambe Bunene wa mu diulu, hanyangabo tshilumbu tshia muntu ne kulumbulula kubi, Mukelenge kena witabusha malu â. Muntu kai udi mua kuela dî ne, Bualu buenjibue, bikata Mukelenge kayi muanze kuela dî diandi? Makenga ne masanka kabiena bifuma kudi Mutambe Bunene wa mu Diulu, anyi? Nunku bualu kai muntu utshidi ne muoyo udi utontolola hamukengeshabo bua malu mabi andi? Tukebulule mu mitshima yetu, tumanye nshila itudi tuendela, tuhingane kudi Yehowa kabidi. Tubandishe mitshima yetu ne bianza diatshimue kudi Nzambi wa mu diulu. Tuakushiha mikenji yebe ne tuakukutombokela; wewe kuakutubuikidila mibi yetu. Wewe wakudibuikila ne tshiji, wakutuihata mu nshila, wakushiha bantu kuyi mubafile luse. Wakudibuikila ne ditutu, nunku kakuena mutendelelu udi mua kufika kûdi. Wakutuvuisha bu tshintu tshia hatuhu tshidibo bimasha munkatshi mua ba ba buloba. Bena lukuna betu bonso bakubulula mukana muabo bua kutuhenda. Buowa ne dijimba bidi ku mpala kuetu, diyoyo ne kubutuka kabidi. Mesu anyi adi ahatula binsonshi bu misulu ya mai bualu bua kubutuka kua muana mukashi wa bana betu. Mesu anyi adi uhuekesha binsonshi, bidi kabiyi bikama, kabiyi bikeha, tô ne hatangila Yehowa wa mu diulu hanshi, hamoneye malu â. Mutshima wanyi udi unyingalala bua malu adi mesu anyi amone, bualu bua bana bakashi bonso ba mu musoko wanyi. Bena lukuna banyi bakunkina hatuhu, kahayi ne tshilumbu tshia kumbanda nʼatshi, bakungihata bu mudibo bihata nyunyu. Bakungela mu tshina bua kujimisha muoyo wanyi, bakuela mabue ha mutu banyi. Mai akahita ha mutu banyi; nakamba ne, Ndi mujimine. Yehowa, nakabikila dina diebe, hanakadi mu ndondo wa tshina atshi. Wewe wakunvua dî dianyi ne, Kujibiki matshu ebe ku kuhumuna kuanyi, ku muedi wanyi mene. Wewe wakasemena ha buihi nʼanyi mu dituku dinakukubikila; wakamba ne, Kutshinyi nansha. Wewe, Mukelenge, wakungakuila ku bilumbu bia mu mutshima wanyi; wakuhikula muoyo wanyi. Wewe, Mukelenge, wakumona malu mabi akungenzelabo; wewe ukose tshilumbu tshianyi. Wewe wakumona disombuela diabo ne bifufu biabo bionso bidibo bangelela. Yehowa, wakumpua bihendu biabo ne bifufu biabo bionso bidibo bangelela, mei adi ahatuka mukana mua bambanda ne kunjiana kuabo dituku dijima. Tangila hashikamabo, hajukabo; meme ndi musambu udibo bimba. Yehowa, wewe ne ubafute difutu bu mudi mudimu wa bianza biabo. Neubahe mitshima mikole, mulau webe newikale hamʼbidi habo. Yehowa, wewe ne ubihate ne tshiji, nembabutule bua kabikadi miunshi mua diulu. Monai, tshiamu tshia or tshiakubuitshidila! or mulelela wakakudimuka! Badi bela mabue akadi mu nsubu wa tshijila hanshi mu misesu yonso. Bana balume ba Siona ba mushi nga mukole, bu or mulelela, badi babadibua mpindiu bu milondo ya dima, mudimu wa bianza bia mufumbi mene! Nyama ya mibuabua mene mene idi yamusha bana bai mabele; kadi muana mukashi wa bana betu wakulua bu muena lukinu, bu nyunyu ya nfiondo ya mu tshihela tshia lusenga. Ludimi lua muana utshidi wamua mabele ludi lulamata mu tshilakalaka bualu bua nyota yandi. Bana batekete badi balomba bidia, ne kakuena muntu udi ubahabi. Bakadi badia bia kudia bishema badi bafue mu misesu mpindiu; bakadi baluata bilulu bikunzekunzû diambedi badi balala mu diala mpindiu. Dikenga diakukuata muana mukashi wa bana betu bua mibi yandi didi dihita dikenga diakukuata musoko wa Sodoma bukole, musoko wakubutulabo mu kuvinya kua disu, kauyi ne tshianza tshia muntu tshilenga. Bakokeshi bandi bakadi ne mitshima mihite neige butoke, yakahita mabele kutoka; mibidi yabo yakadi ne lukunjilakunjila luhite dibue dia corail kukunza; dinkenke diai diakadi bu dia dibue dia saphir. Kadi mpindiu mpala yabo idi ihita makala a kahia bufike; kabena bamanyibue kabidi hahitabo mu misesu; dikoba diabo difuate didi dilamata ha mifuba yabo; didi diandamuke bu mutshi mûme. Diakalengele dia badi bashihibue ku muele wa nvita didi dihita dia badi bashihibue ne nzala buakane; bua badi baleuka, bateketa-teketê, bualu bua kabena ne bintu bia mu madimi. Bianza bia bakashi badi ne mitshima ya luse biakalamba bana babo baledibue ha kahia; bakalua bia kudia biabo mu tshikondo tshia kubutuka kua muana mukashi wa bana betu. Yehowa wakabakengesha tô ne hakashika tshiji tshiandi, wakahumuna tshiji tshiandi tshitambe bukole; wakatemesha kahia mu Siona, kakosha bishimikidi biandi. Bakelenge ba ha buloba ne bantu bonso kabidi kabakitabusha ne, Mukengeshi ne muena lukuna nebabuele mu bibi bia ku Yelushalema. Malu â akulua bualu bua mibi ya baprofete bandi ne malu mabi a bakuidi bandi, bakamatshisha mashi a bantu bakane munkatshi mua musoko. Bakadi babubuta bu bantu bafofo mu misesu; bakadi banyanguke ne mashi, nunku bantu kabakadi mua kulenga bivualu biabo. Bakabela mbila ne, Umukai kutudi! Nudi banyanguke! Unvuai, unvuai, kanutulengi! Nunku bakalua banyemi ne bendakanyi; bantu bakamba munkatshi mua bisamba bia bantu ne, Kabena mua kushala nʼetu kabidi. Tshiji tshia Yehowa tshiakubamuangalasha; yeye kena ubatangila kabidi; kabakunemeka bakuidi babo, kabakulesha bakulu kanemu. Mesu etu akufula hatuakadi bindile, batekemena dikuatshisha; kadi kuindila kuetu kuakadi hatuhu; tshisamba tshitu akutekemena katshiakadi mua kutusungila. Batukebi bakadi benda batulonda bua kututatshisha, nunku katuakadi mua kuenda mu misesu yetu; nshikidilu wetu wakadi ha buihi, matuku etu akakumbana, bualu bua nshikidilu wetu wakafika. Batuihatshi bakahita nyunyu ya mikanku ya mulu kuya lubilu; bakatuihata tô ne ha mikuna, bakatualamina mu tshihela. Mukelenge muedibue manyi kudi Yehowa, wakakuatshibua mu majimba abo, utuakatekemena bu muhuya wa mûlu etu; uwakamba bualu buandi ne, Muinshi mua mundidimbi wandi netuikale ne muoyo munkatshi mua bisamba bia bantu. Wewe muana mukashi wa Edome, udi mushikame mu buloba bua Uza, anji kusanka, wikale ne disanka mu mutshima. Luhanza nelufike kûdi kabidi; neukuatshike maluvu, neuvule bilamba biebe bionso. Wewe muana mukashi wa Siona, dikenga diebe bua bubi diakushika, kabena baya nʼebe mu buhika kabidi. Kadi wewe muana mukashi wa Edome, nebakukengeshe bua bubi buebe; nebasokolole malu mabi ebe. Yehowa, uvuluke bualu buakutukuata; tangila, umone bu mutudi bakuatshike bundu. Bakufila buhianyi buetu kudi bantu ba bende, ne nsubu yetu kudi ba mu bisamba bia bende. Tuakulua bu bana ba nshiya, bu badi kabayi ne batatuʼabo; bamamuʼetu badi bu bakashi ba mu lufuila. Tudi tusumba mai atudi tunua; nkunyi yetu idi isumbibua anu ku mushinga. Batuihatshi badi batutua tshianza mu dikoshi; tudi tuenza mudimu mukole, katuyi bahete dikisha. Tuakuolola bianza bietu kudi Bena Ejipitu, ne kudi Bena Ashû, bua kulomba bia kudia bikumbane. Batatuʼetu bakenza malu mabi, kabenaku kabidi; ne tuetu tuakuhiana mibi yabo. Bahika badi batukokesha, kakuena muntu wa kutuhandisha mu bianza biabo. Tudi tukeba kujiuka hatuaheta bia kudia bietu, bualu bua muele wa nvita udi mu tshihela. Dikoba dietu didi ditema bu luesu ludi heku, bualu bua luya lua tshiole ludi lutuosha. Badi bakuata bakashi ku bukole mu Siona, ne bana bakashi batshidi tumama mu misoko ya mu Yuda. Badi balembeleshe bakokeshi kulu bakudika ku bianza biabo; kabena banemeka bakulu. Bansongalume badi benza mu dimu wa kuhela blé ha dibue, batshidi bana badi balenduka bua bujitu bua nkunyi. Bakulu kabena bashikama kabidi mu bilumbuluidi bia ku bibi, bansongalume bakulekela kuimba misambu. Disanka dia mitshima yetu diakujimina, maja etu akuandamuka madilu. Tshifulu tshia butumbi tshiakutuka ku mutu kuetu; tudi ne mulau! Bualu bua tuakuenza bibi. Bua bualu ebu mitshima yetu yakuteketa; bua malu â mesu etu adi bitayitayi; bualu bua Mukuna wa Siona wakulua bu tshihela tshia hatuhu, ne mibuabua idi yendelamu. Wewe, Yehowa, udi mushikame mu nkuasa webe wa butumbi tshiendelele; nkuasa webe wa butumbi udiku ku bikondo ne bikondo. Bualu kai udi musue kutuhita muoyo tshiendelele, ne kutulekela musangu bule nunku? Utuhingashe kûdi kabidi, Yehowa, ne tuetu netuhingane; utulengeshile matuku etu bu muakadiu diambedi, biwikala kuyi mutuhidie tshishiki, biwikala kuyi nʼetu tshiji tshitamba bukole. Mu tshidimu tshia makumi asatu, mu ngondo muinai, mu dituku ditanu dia ngondo, hanakadi munkatshi mua bahika ku muelelu wa musulu wa Kebâ, diulu diakabuluka, ne nakamona bikena kumona bia Nzambi. Mu dituku ditanu dia ngondo, mu tshidimu tshitanu tshia buhika bua Mukelenge Yehoyakina, dî dia Yehowa diakalua kudi Yehezekele muakuidi, muana wa Buzi, mu buloba bua Bena Kasada, ku muelelu wa musulu wa Kebâ; tshianza tshia Yehowa tshiakadi hamʼbidi handi ha muaba au. Nakamona, ekumona! Nkunde mukole wakahatuka ku luseke lua ku nôde ne ditutu dinene; kahia kakadi kakenyakenya ne dinkenke diakadi ku nseke yadi yonso; munkatshi muadi ne munkatshi mua kahia muakadi bu tshiamu tshiakadi tshikenka bikole. Munkatshi muadi muakahatuka tshinfuanyi tshia bifukibue binai bidi ne muoyo. Tshinfuanyi tshiabi tshiakadi nunku: Biakadi ne tshifuanyikishi tshia muntu. Buonso buabi biakadi ne mpala inai ne mahuahua anai. Mikolo yabi yakadi milulame; munda mua makasa abi muakadi bu munda mua mukono wa lukungulu lua ngombe, akakenka bu tshiamu tshia mitaku tshinonoke. Muinshi mua mahuahua abi, ku nseke yabi inai, muakadi bianza bia muntu. Buonso buabi binai biakadi ne mpala yabi ne mahuahua abi nunku: mahuahua abi akadi matuangane, dihuahua dimue dituangane ne dihuahua dikuabo; mpala yabi kayakandamuka hakadibi biya, kadi tshifukibue ne tshifukibue tshiakaya ku mpala mu nshila mululame. Bua binfuanyi bia mpala yabi nakamona ne buonso buabi binai biakadi ne mpala wa muntu ne mpala wa nyama wa ntambue ku luseke lua tshianza tshia balume, ne mpala wa ngombe ne mpala wa nyunyu wa mukanku ku luseke lua tshianza tshia bakashi. Mahuahua a buonso buabi binai akadi mabaluluke mulu, mahuahua abidi a tshinga tshifukibue akadi nuluangane ne a tshifukibue tshikuabo, ne mahuahua makuabo abidi akabuikila mubidi watshi. Buonso buabi biakaya ku mpala; kuonso kuakasua nyuma yabi kuya biakaya; kabiakandamuka hakadibi biya. Munkatshi mua bifukibue bidi ne muoyo muakamueneka bintu bu makala a kahia akadi atema, bifuanangane ne bimunyi bitambakane munkatshi mua bifukibua; kahia kakakenka bikole ne nuele ya nvula yakahatuka munkatshi mua kahia. Bifukibue bidi ne muoyo biakanyema ne biakalukila kabidi bu mudi muele wa nvula umueneka ku mesu hahenyau. Hanakadi ntangila bifukibue bidi ne muoyo, ekumona, hanshi ha buloba ne hehi ne tshifukibue ne, tshifukibue hakadi nkata wa dikalu. Mibidi ya nkata ya mukulu yakadi bu ya dibue dia chrysolithe; buonso buai inai yakadi ne tshinfuanyi tshimue, ne dilamakashibua mai diakadi dimueneka bu mudi nkata muela munda mua mukuabo. Hakayayi, yakaya mu nshila mitangile ku nseke yai inai, kayakatshunguluka hakayayi nansha. Nkata yakadi ne tukanu, ne hanakayimona, ekumona, nkata yonso inai yakadi ne mesu nseke yonso. Hakaya bifukibue bidi ne muoyo ku muaba mukuabo, nkata yakaya n abi diakamue; hakajuka bifukibue hanshi, nkata yakajuka nʼabi diakamue. Kuonso kuakasua nyuma kuya, yakamulonda; bualu hua nyuma wa bifukibue bidi ne muoyo wakadi munda mua nkata kabidi. Hakaya bifukibue ebi, nkata yakaya, hakimana bifukibue ebi talalâ, nkata ai yakimana kabidi; hakajuka difukibue ebi hanshi, nkata yakajuka nʼabi diakamue; bualu bua nyuma wa bifukibue bidi ne muoyo wakadi munda mua nkata. Ha mutu ha bifukibue bidi ne muoyo hakadi tshinfuanyi tshia diulu, tshiakadi tshikenka bu dibue dinene dia nvula, ne tshiakabaluluka ha mutu habi. Muinshi mua diulu edi mahuahua abi akadi mabaluluke, mahuahua abidi a tshifukibue tshikuabo matuangane ne mahuahua abidi a tshifukibue tshikuabo, ne mahuahua makuabo abidi a tshifukibue ne tshifukibue akabuikila mubidi watshi. Hakayabi, nakunvua tshiona tshia mahuahua abi bu tshiona tshia mai manene makole, bu tshiona tshia dî dia Mutambe Bunene wa mu Diulu, tshiona tshia tshintompantompa tshia misumba ya masalayi. Hakimanabi talalâ, biakabuikila mahuahua. Dî diakadiku difume mu diulu diakadi ha mutu habi. Hakimanabi talalâ, biakabuikila mahuahua abi. Ha mutu ha diulu diakadi ha mutu habi hakadi tshinfuanyi tshia nkuasa wa bukelenge, muikale ne mubidi wa dibue dia saphir; ne ha tshinfuanyi tshia nkuasa wa bukelenge hakadi tshinfuanyi tshia mundi mushikame mulu amu. Nakatangila ku tshinfuanyi tshia tshifuka tshiandi tô ne ku mutu tshintu bu tshiamu tshikunze tshinonoke, bu tshinfuanyi tshia kahia kanyunguluke nseke yonso; ku tshinfuanyi tshia tshifuka tshiandi tô ne kuinshi nakatangila tshintu bu kahia kakadi kela nsase nseke yonso, tshifuana muanzankongolo udi umueneka mu matutu mu dituku didi nvula uloka; ke muakadi tshinfuanyi tshia kukenka kukole kuakamunyunguluka. Etshi tshiakadi tshinfuanyi tshia butumbi bua Yehowa tshiakamueneka kundi. Hanakatshimona, nakatua mpala wanyi hanshi, nakunvua dî dia mukuabo wakadi wakula. Yeye wakangambila ne, Muana wa muntu, juka biebe, nenyikile nʼebe. Nyuma wakabuela munda muanyi hakadiye wakula nʼanyi ne wakangimanyika kulu. Nakunvua dî dia wakadi wakula nʼanyi. Yeye wakangambila ne, Muana wa muntu, ndi nkutuma kudi bana ba Isalele, kudi tshisamba tshia bakuntombokela; bobo ne batatu babo bakungenzela bibi tô ne ku lelu eu. Bana babo kabidi badi ne dikamakama ne tshitshu. Ndi nkutuma kudibo, ne wewe ubambile ne, Mukelenge Yehowa udi wamba nunku. Bobo, nansha biunvuabo dî diebe, nansha biabengabo kudiunvua (bualu bua badi tshisamba tshia bantombokedi) nebamanye ne, Muprofete udi munkatshi muetu. Wewe, muana wa muntu, kubatshinyi nansha, kutshinyi mei abo kabidi, nansha hikala mingonge ne meba bikunyunguluke, nansha biwikala mushikame munkatshi mua tuminyiminyi; kutshinyi mei abo, kukuatshiki buowa bua mpala yabo, bualu bua badi tshisamba tshia bantombokedi. Wewe ubambile mei anyi, nansha biasuabo kûnvua, nansha biabengabo kûnvua; bualu bua badi diku dia bantombokedi. Kadi wewe, muana wa muntu, unvua dî dindi nkuambila; kuntombokedi bu mudibo benza kudi tshisamba atshi tshia bantombokedi. Bulula mukana muebe, udie tshintu tshindi nkuha. Hanakatangila, ekumona tshianza tshiakadi tshiolola kundi, ne munda muatshi muakadi mukanda muvunga. Yeye wakauvungulula ku mpala kuanyi. Wakadi ne mei mafunda munda muau ne ha nyima hau; mei a muadi, madilu ne mulau akadi mafundamu. Yeye wakangambila ne, Muana wa muntu, diaku malu audi umona munemu; diaku mukanda eu muvungulule, hashishe, ya wambile ba mu tshisamba tshia Bena Isalele dî. Nunku nakabulula mukana muanyi ne yeye wakandisha mukanda. Wakangambila ne, Muana wa muntu, diaku mukanda eu undi nkuha, ûhatshishe munda muebe tente. Nunku nakaudia; ne wakadi mutue nse-nse bu buitshi mukana muanyi. Yeye wakangambila ne, Muana wa muntu, ya kudi ba mu tshisamba tshia Bena Isalele, ubambile mei andi mbatumina. Bualu bua tshiena nkutuma kudi bantu badi bakula muaku ûdi kuyi mumanye ne kudi badi ne ludimi luneme, kadi ndi nkutuma kudi Bena Isalele. Tshiena nkutuma kudi bantu bangi badi bakula muaku ûdi kuyi mumanye ne kudi badi ne ludimu luneme, badi bakula mei audi kuyi mumanye mua kujingulula. Bulelela, bu meme mukutume kudi ba nanku au, bakadi kukunvuila. Kadi Bena Isalele kabena bakuluila; bualu bua kabena bunvua di dianyi; bualu bua bonso ba mu tshisamba tshia Bena Isalele badi ne mitu mikole bu dibue ne mitshima ya tshitshu. Kadi mona, nenkoleshe mutu webe muhite yabo bukole, ne tshitshu tshiebe netshihite tshiabo. Nenvuishe mutu webe mukole bu dibue dia mbonga mene, muhite dibue dia mutemu bukole. Kubatshinyi nansha, kukuatshiki buowa ku mesu kuabo, bua badi diku dia bantombokedi. Wakangambila kabidi ne, Muana wa muntu, itabusha mu mutshima webe mei anyi onso andualua kukuambila, ûnvua bimpe mu matshu ebe. Hashishe, ya kudi badi mu buhika, kudi bana benu ba mu tshisamba tshiebe, akula nʼabo, ubambile ne, Mukelenge Yehowa udi wamba dî edi, nansha biasuabo kunvua nansha biabengabo kunvua. Hakumuka butumbi bua Yehowa mu muaba wakadibu, Nyuma wakanjula, ne nakuhua ku nyima kuanyi tshiona tshia kukanka kua buloba kunene; tshiakadi tshiona tshia mahuahua a bifukibue bidi ne muoyo hakatutakanau, ne tshiona tshia nkata yakadi nʼabi, biakavuisha tshiona bu tshia kukanka kua buloba. Ka Nyuma wakanjula, wakaya nʼanyi; nakaya ne kanyinganyinga ne nyuma wanyi utema bikole, tshianza tshia Yehowa tshiakanema bikole hamʼbidi hanyi. Hashishe, nakalua kudi bantu bakadi mu buhika ku Tele-abiba, bakadi bashikama ku muelelu wa musulu wa Kebâ, ne nakashikama habo mu muaba au matuku muanda mutekete ne mutshima wanyi mukuatshike buowa. Hakashika matuku au muanda mutekete, dî dia Yehowa diakalua kundi ne, Muana wa muntu, nakukuteka bu mudimushi kudi ba mu tshisamba tshia Bena Isalele; nunku haunvua dî mukana muanyi, ubadimushe ne dî dianyi. Hangambila muntu mubi ne, Wewe neufue bulelela, ne wewe udi uhanga kumudimusha, anyi kuena wamba dî bua kudimusha muntu mubi bua kuleleye kuenda mu nshila wandi mubi bua asungile muoyo wandi; muntu eu mubi neafue mu bubi buandi, kadi nendombe mashi andi ku tshianza tshiebe. Kadi biwadimusha muntu eu mubi, ne yeye kena ukudimuna mutshima wandi bua kulekeleye bubi buandi, anyi bua kulekeleye kuenda mu nshila wandi mubi, yeye neafue mu bubi buandi, kadi wewe neuhandishe muoyo webe. Bualu bukuabo kabidi, biakudimuka muntu muakane ku buakane buandi, bienzeye bibi ne binateka tshilenduishi ku mpala kuandi, yeye neafue. Bualu bua wewe kuakamudimusha, yeye neafue mu bubi buandi, ne kabena bavuluka bienzedi biandi biakane biakenzeye; kadi nendombe mashi andi ku tshianza tshiebe. Kadi biwadimusha muntu au muakane bua kenji biandi bidi, ne bikaleye kayi wenza bibi, yeye neikale ne muoyo bualu bua wakunvua kudimusha kuebe; wewe wakuhandisha muoyo webe. Tshianza tshia Yehowa tshiakalua hamʼbidi hanyi mu muaba au, yeye wakangambila ne, Juka, ya biebe mu mpata, nenyikile nʼebe aku. Nunku nakajuka, nakaya mu mpata, ekumona, butumbi bua Yehowa buakadiku, bu butumbi bunakamona ku muelelu wa musulu wa Kebâ, ne nakatua mpala wanyi hanshi. Kadi Nyuma wakabuela munda muanyi, wakangimanyika kulu; wakayikila nʼanyi, wakangambila ne, Ya, udijidile mu nsubu muebe. Tangila, muana wa muntu, nenteke mionshi hamʼbidi hebe ne nenkusuike nʼai, bua wewe kumanyi mua kuendakana munkatshi mua bantu. Nendamike ludimi luebe mu tshilakalaka tshiebe, bua wewe wikale bu kamama, kuyi mumanye mua kubabela; bualu bua badi diku dia bantombokedi. Kadi hangakula nʼebe, nembulule mukana muebe, ne wewe neubambile dî edi ne, Yehowa Nzambi udi wamba nunku! Wasua kunvua, unvue biandi; wasua kubenga, abenge biandi; bualu bua badi diku dia bantombokedi. Wewe kabidi, muana wa muntu, angata dimpana, uditeke ku mpala kuebe, fundahu tshifundu tshia musoko, Yelushalema mene. Utshintshimike, asaku mabula manene a kutshintshimika, unguishe mishiki ya buloba bua bena nvita babandehu bua kûluisha, asaku bitudilu bia bena nvita binyunguluka musoko, ne longololaku mitshi minene ya kushimbula nʼai ngumbu. Udiangatshile mpanu wa tshiamu tshifike, umuteke bu lumbu lua tshiamu tshifike hankatshi hebe ne musoko; tangisha mpala webe kudiu, ûvuishe bu musoko udibo batshintshimika, ne wewe ûtshintshimike. Etshi netshikale tshimanyinu kudi Bena Isalele. Nunku lala biebe ku luseke lua ku tshianza tshiebe tshia bakashi, nenteke mibi ya Bena Isalele hamʼbidi hebe. Bu mudi bungi bua matuku awalala, mbu mudi bungi bua matuku awatuala mibi yabo. Bualu bua nakujadika ne bungi bua bidimu binabakengesha bua bubi buabo nebuikale kûdi bu bungi bua matuku nkama isatu ne makumi tshitema mene, ne mu matuku au onso neutuale bubi bua ba mu tshiota tshia Bena Isalele. Hawamana matuku au, ulale kabidi ku luseke lua ku tshianza tshiebe tshia balume, utuale mibi ya ba mu tshisamba tshia Bena Yuda; ndi nkulekela matuku makumi anai, dituku dimue dikale bu tshidimu tshijima. Tangisha mpala webe ku kutshintshimika kua Yelushalema, olola diboko diebe kadiyi ne tshilulu, ne amba mei a kuhisha nʼau badimu. Tangila biebe, nenkusuike ne mionshi hamʼbidi hebe, bua wewe kuandamuki ku luseke ne ku luseke anu hakumbana matuku audi utshintshimika musoko. Angata blé, orge, nkunde minene, nkunde ya kambula, mponda, ne êpeautre; ubiele mu luesu lumue, enza nʼabi bia kudia; ne mu matuku au onso audi ulala ku luseke luebe, matuku nkama isatu ne makumi tshitema, neubidie. Nunku bia kudia biebe biudi udia bilonde tshihiminu tshiabi, nshekele makumi abidi, musangu umue ku dituku ku dituku. Unue mai a kunua bu mudi tshihiminu tshiau, litre umue dituku dimue, wanua diba diodiumue ku dituku ku dituku. Bidia biebe nebikale mushindu wa mikata ya orge, ne wewe ubilambe ku mpala kua bantu ne tunvi tua bantu bu nkunyi. Yehowa wakamba ne, Bena Isalele nebadie bia kudia biabo ne bukoya bua nunku munkatshi mua bisamba bia kundi mbatuma. Hashishe nakamba ne, Aka, Mukelenge Yehowa! Mona, mutshima wanyi kawena muanze kunyanguka nunku; bualu bua ku bunsongalume buanyi tô ne mpindiu tshiena muanze kudia munyinyi wa nyama mudibi! e anyi wakatuanyabo kudi nyama mukuabo; ne munyinyi munyanguke kawena muanze kubuela mukana muanyi. Nunku yeye wakangambila ne, Tangila, nakakuha tunvi tua ngombe bu nkunyi mu muaba wa tunvi tua muntu, bua wewe ulambehu bia kudia biebe. Yeye wakangambila dî dikuabo kabidi ne, Muana wa muntu, tangila, nentshibule tshintu tshidibo beyemena mu Yelushalema bua kuangata bia kudia biabo, ne bobo nebikale ne bua kudia bidia biabo bilonda tshihiminu ne bakuatshika buowa; nebanue mai malonda tshihiminu kabidi ne mu dikuatshika dia buowa, tô ne haluabo kukengela bia kudia ne mai a kunua, ne bua muanda eu nebatangilangane bafue mikemu, nebatekete-teketê bua kukengeshibua kuabo. Wewe kabidi, muana wa muntu, angata muele wa nvita mutue bu nteula bua kuenza nʼau mudimu wa kubeya, ne beya nʼau nsuki ya ku mutu ne ya ku muedi; hashishe, angata tshiamu tshia kuidikisha nʼatshi bujitu, ne idikisha nʼatshi nsuki. Osha tshituha tshisatu tshia nsuki mu kahia munkatshi mua musoko hashika matuku a kutshintshimika kuau; angata tshituha tshikuabo tshisatu, utshitahe ne muele wa nvita hautshidi wendakana mu nseke yonso ya musoko; hehula tshituha tshikuabo tshisatu mu luhehele, ne nempatule muele wa nvita bua kubihata. Angata nsuki mikese munkatshi muai, wikute mu mibangu ya tshivualu tshiebe. Angata mikuabo ya munkatshi mua nsuki ei kabidi, uyele mu kahia ne uyoshe; kahia nekahatukemu tô ne kudi bonso ba mu tshisamba tshia Bena Isalele. Mukelenge Yehowa udi Wamba ne, Eu nYelushalema mene. Nakateka musoko eu munkatshi mua binga bisamba ne maloba makuabo munyunguluke. Kadi bena musoko eu bakutombokela mikenji yanyi mu kuenza kua malu mahite a bisamba bikuabo ne a ba mu maloba adi abanyunguluka bubi; bualu bua bakuhidia mikenji yanyi, kabakuenda mikenji inakabafundila. Nunku Mukelenge Yehowa udi wamba ne, Bualu bua nuenu nuakutamba ba mu bisamba bidi binunyunguluka kutomboka, kanuakulonda mikenji yanyi, kanuakutumikila mei anyi, kadi nuakulonda mikenji mene ya bisamba bidi binunyunguluka, bua muanda eu Mukelenge Yehowa udi wamba ne, Monai, meme ndi nnubela, meme hanyi, ne nennulumbuluishe ku mpala kua bisamba bikuabo. Bua malu enu onso manyanguke nengenze malu munkatshi muenu andi tshiyi muanze kuenza diambedi, malu a mushindu undi tshiyi ngenza kabidi. Nunku batatu nebadie bana babo munkatshi muenu ne bana nebadie batatu babo; nennulumbuluishe, nennumuangalashe buonso buenu badi bashala ne muoyo ku mpehele yonso. Yehowa udi wamba ne, Bu mundi meme ne muoyo, bualu bua nuakunyanga tshitendelelu tshianyi ne mpingu yenu yonso idi intonda ne malu enu onso adi atshinyanga, nennuhoneshe hahshi; disu dianyi kadiena dinumona ne dinanga ne tshiena nnulesha luse. Tshituha tshisatu tshia bana benu netshifue ne tshihuhu, anyi netshifue ne tshiole tshidi munkatshi muenu; tshituha tshikuabo tshisatu netshihone ku muele wa nvita ku nseke yenu yonso; nemmuangalashe tshituha tshikuabo tshisatu ku mpehele yonso, nempatule muele wa nvita bua kubihata. Bua nunku tshiji tshianyi netshishike, tshiji tshianyi tshikole netshikale kudibo, hashishe netshibole, nensambibue. Nebamanye ne meme Yehowa nakuamba dî bua mukau wanyi, hanahumuna tshiji tshianyi hamʼbidi habo. Bualu bukuabo, nenvuishe musoko eu tshikulu munkatshi mua bisamba bikuabo bidi biunyunguluka, bu tshintu tshidibo bahenda kudi bonso badi bahita mu nshila. Newikale tshintu tshidibo bahenda ne tshidibo bahetula, tshidi tshibadimusha ne tshidi tshihatuisha mikemu, kudi bisamba bidi biunyunguluka, hananulumbuluisha mu difikʼa munda dianyi ne mu tshiji tshianyi tshikole, ne mu dikengesha didi dihita hukole; meme Yehowa nguakuamba nunku. Nennuele mikete mihi ya tshiole, ya dibutula mene, indi ntuma bua kunubutula. Nenkoleshe tshiole munkatshi muenu, nentshibule tshinudi nueyemena bua kuangata bia kudia. Nennutumine tshiole ne nyama ya luonji, nebinyenge bana benu kunudi; tshihuhu ne mashi nebihitshile munkatshi muenu; nenvuishe muele wa nvita hamʼbidi henu. Meme Yehowa nakuamba dî edi. Dî dia Yehowa diakalua kundi ne, Muana wa muntu, tangisha mpala webe ku mikuna ya mu Isalele, uyambile mei a kuyibela. Amba biebe ne, Nuenu, mikuna ya mu Isalele, unvuai dî dia Mukelenge Yehowa! Mukelenge Yehowa udi wamhila mikuna mile ne mikuna mikese dî edi, udi wamhila bibanda ne mpongo ne, Monai, meme, meme hanyi, nenvuishe muele wa nvita hamʼbidi henu, nenshimbule bitendelelu bienu bidi ha mikuna. Nebashimbule bioshelu bienu ne makunshi anudi nutendelela nʼau diba; nengele bana benu bashihibue hanshi ku mpala kua mpingu yenu. Nendadike bitalu bia Bena Isalele ku mpala kua mpingu yabo, nemmuangalashe mifuba yenu kuinshi kua bioshelu bienu ku nseke yonso. Mu miaba yonso mudi bashikame nebabutule misoko yenu, nebashimbule bitendelelu bienu bidi ha mikuna, bua bioshelu bienu bibutudibue ne bivuishibue hatuhu, bua mpingu yenu itshibuke ne ishihibue, bua makunshi anudi nutendelela nʼau diba akoshibue ne midimu yenu ijimishibue. Nebashihe bana benu, nebabahoneshe munkatshi muenu, ne nuenu nenumanye ne, Ndi Yehowa. Kadi nenshiye difuka dia bantu bakuabo munkatshi muenu bahanduke ku muele wa nvita wa munkatshi mua bisamba bikuabo, hanuamuangalashibua mu maloba makuabo. Ba munkatshi muenu badi bahanduka nebanvuluke munkatshi mua bisamba biaya nʼabo mu buhika, hananyingalasha mitshima yabo ya masandi yakûmushabo kundi, ne hanafofomesha mesu abo akadibo batangisha ku mpingu yabo bu bena masandi. Malu mabi akenzabo neababihishe ku mesu kuabo, malu abo a bundu mene. Nebamanye ne, Meme ndi Yehowa; tshiakamba dî dia hatuhu hanakamba ne, Nembenzele malu au makole onso. Mukelenge Yehowa udi wamba ne, Tua tshikemu, tua museba hanshi, amba ne, Aka! Bualu bua malu mabi onso a bundu a ba mu tshisamba tshia Bena Isalele, bua malu â nebafue ku muele wa nvita, ku tshiole ne ku tshihuhu. Udi ku muaba wa kule neafue ku tshihuhu; udi ha buihi neafue ku muele wa nvita; washala ne muoyo hatshintshimikabo musoko neafue ku tshiole; nunku nenshikishe tshiji tshianyi tshikole hamʼbidi habo. Nebamanye ne, Ndi Yehowa, haladikabo bana babo bashihibue munkatshi mua mpingu yabo ne kuinshi kua bioshelu biai ku nseke yonso, ha mutu ha mukuna wonso muhuekele, ha mutu ha mikuna mibande yonso, muinshi mua mutshi wonso udi ne muoyo ne muinshi mua mutshi wonso wa telebinta, miaba ei yakafidilabo bintu bia muhuya muimpe kudi mpingu yabo yonso. Nengolole tshianza tshianyi hamʼbidi habo, nembutule buloba buabo ne nembunyange, miaba yonso idibo bashikamemu, ku tshihela tô ne ku Libela. Nebamanye ne, Ndi Yehowa. Dî dia Yehowa diakalua kundi kabidi ne, Wewe, muana wa muntu, amba ne, Mukelenge Yehowa udi wambila ba mu buloba bua Isalele ne, Nshikidilu wafiki, nshikidilu wafiki ku matengu anai onso a buloba! Mpindiu nshikidilu wakufika kunudi; nentume tshiji tshianyi bua tshinukengeshe, nennulumbuluishe bu mudi bienzedi bienu; nennuhingashile difutu bua malu enu onso manyanguke. Disu dianyi kadiena dinutangila ne dinanga ne tshiena nnufuila luse; kadi nennuhingashile difutu dia bienzedi bienu bibi, ne nenteke malu enu a bundu hamʼbidi henu; nenumanye ne, Ndi Yehowa. Mukelenge Yehowa udi wamba ne, Mulau ha mutu ha mulau! Monai, udi ulua! Nshikidilu wafiki, nshikidilu wafiki, udi unutabalela; monai, udi ulua! Mulau wenu wakufika kunudi, nuenu ba ha buloba! Tshikondo tshiakufika, difuku didi ha buihi, dituku dia tshintompantompa, kandia mbila ya disanka ha mutu ha mikuna. Tshituha tshihi nennuhongoluele tshiji tshianyi tshikole, nemmane difikʼa munda dianyi kunudi; nennulumbuluishe bu mudi bienzedi bienu, nennuhingashile difutu bua malu enu onso a bundu. Disu dianyi kadiena dinutangila ne dinanga, tshiena nnufuila luse; nennutumine dikenga bu mudi bienzedi bienu, nenteke malu enu a bundu hamʼbidi henu; nenumanye ne, Meme Mukelenge ntu ngakuma bantu. Monai, dituku edi didiku! Monai, didi dilua! Kunshikidilu kudi kulua ha buihi. Mulangala webe wa bubi wakuela ntonga, dihetu diakusampila, diyoyo diakudiunda tô ne hakuluadi mulangala wa bubi; kadi kakuena bualu bumue budi bufume kudibo, nansha ku tshintompantompa tshiabo anyi ku diyoyo diabo; kakuena bukokeshi bukole munkatshi muabo. Tshikondo tshiakufika, dituku didi disemena ha buihi! Musumbi wa bintu kasanki biandi, muhanyi wa bintu kâshi madilu, bua tshiji tshikole tshidi tshihona hamʼbidi ha tshisumbu tshiabo tshionso. Bualu bua muhanyi kena wangata kabidi bintu biakuhaneye, nansha bikala bintu biakuhaneye bitshidi ne muoyo; bualu bua tshiji tshianyi tshikole tshidi tshikuata tshisumbu tshionso tshia bantu katshiena tshikudimuka; kakuena muntu wadikolesha mu bubi wahandisha muoyo wandi. Bakuela mpungi, bakulongolola malu onso; kadi kakuena muntu udi uya ku nvita; bualu bua tshiji tshianyi tshikole tshidi tshihona hamʼbidi ha tshisumbu tshiabo tshionso. Muele wa nvita udi ha mbelu, tshihuhu ne tshiole bidi munda mua nsubu; udi mu mpata neafue ku muele wa nvita, udi mu musoko neafue ku tshiole ne ku tshihuhu. Biahanduka bakuabo ba munkatshi mua bantu batshidi bashala ne muoyo, nebikale ha mitu ha mikuna bu nyunyu ya nkutshi ya mu bibanda idila, buonso buabo badila bua bubi buabo. Bianza biabo nebilembelele bua butekete buabi, binu biabo nebitekete-teketê bu mai. Nebadiluatshishe ne bilulu bikayabala ne buowa nebubakuate; bundu nebukuate buonso buabo ku mesu, nebatuke mabala ha nutu habo bonso. Nebimashe bintu biabo bia argent mu misesu, ne tshiamu tshiabo tshia or netshikale kudibo bu tshintu tshidi ne manyanu. Biamu biabo bia argent ne bia or kabiena bimanye mua kubahandisha mu dituku dia tshiji tshikole tshia Yehowa; kabiena bisankisha mitshima yabo, kabiena biukutshisha mafu abo, bualu bua biakadi tshilenduishi tshiakabahonesha mu bubi. Bakaditumbisha bua bulengele bua bintu ebi, ne bakafula nʼabi mpingu ya malu abo a bundu ne a tshinyangu; nunku nakubivuisha bu tshintu tshidi ne bukoya. Nembike mu bianza bia bantu ba bende bu bintu bidibo banyenga ku bukole, ne kudi bantu babi ba ba buloba bu bintu bidibo bahaula; ne bobo nebabinyange. Nenkudimune mpala wanyi bua tshibatangidi, ne bobo nebanyange muaba wanyi wa mushinga mukole; banyengi nebabuelemu, nebaunyange. Fula lukanu; bualu bua buloba ebu budi bûle tente ne kumatshisha kua mashi, ne musoko udi mule tente ne malu mabi makole. Bua muanda eu nenvuishemu bisamba Dia bantu bahite bakuabo bubi, ne bobo nebanyenge nsubu ya bena musoko; nenjimishe bukole buakadi ba mu buloba ebu badisue nʼabu, ne miaba yabo ya tshijila neyibihibue. Kanyinganyinga kalualua; bobo nebakebe ditalala, ne diodio kadiena dikalaku, Kubutuka nekulonde ha nyima ha kubutuka kukuabo, ne lumu nelulonde ha nyima ha lumu lukuabo; nebakebe tshikena kumona kudi muprofete, kadi diyisha dia mikenji kudi muakuidi nedishike, ne bakulu kabena bikala ne bukole bua kulesha bakuabo meji. Mukelenge neabuele mu madilu, muenyampala neadiluatshishe ne bivualu bia kukuatshika kua buowa, ne bianza bia bena buloba nebizakale. Nembenzele anu bu mudi bienzedi biabo, nembalumbuluishe bu mudi midimu yabo; nebamanye ne, Ndi Yehowa. Mu tshidimu tshisambombo, mu ngondo muisambombo, mu dituku ditanu dia ngondo, hanakadi nshikama mu nsubu muanyi, hakadi bakulu ba Yuda bashikama ku mpala kuanyi, tshianza tshia Mukelenge Yehowa tshiakakuma hamʼbidi hanyi. Mu diba adi nakatangila, ekumona! Tshinfuanyi tshiakadiku bu tshinfuanyi tshia muntu, ku tshifuka tshiandi tô ue kuinshi kuakadi tshinfuanyi tshia kahia; ne ku tshifuka tshiandi tô ne ku mutu kuakadi tshinfuanyi tshia dinkenke bu dia tshiamu tshikunze tshinonoke. Yeye wakolola tshinfuanyi tshia tshianza, wakankuata ku tshisuba tshia nsuki ya ku mutu kuanyi; Nyuma wakambisha mulu hankatshi ha buloba ne diulu, wakaya nʼanyi mu bikena kumona bia Nzambi to ne ku Yelushalema, ku tshibi tshia ku tshibuelelu tshia ku luseke lua node tshidi tshibuela mu tshiendelu tshia munda mua ntempelo, kuakadi luhingu lua mukau, ludi lusonsola mukau. Monai! Butumbi bua Nzambi wa Isalele buakadiku, bu tshinfuanyi atshi tshinakamona diambedi mu mpata. Hashishe yeye wakangambila ne, Muana wa muntu, banduluka, tangila ku luseke lua ku node. Ahu nakabanduluka, nakatangila ku luseke lua ku node, ekumona, ku luseke lua ku nôde kua tshibuelelu tshia ku tshioshelu, ku mbelu kuatshi, kuakadi luhingu elu lua mukau. Yeye wakankonka ne, Muana wa muntu, udi umona bu mudibo benza, anyi? Malu a bundu adi ba mu tshisamba tshia Bena Isalele benza munemu, adi angihata ku nsubu wanyi wa tshijila, udi umona mene, anyi? Kadi neumone malu makuabo a bundu adi ahita â bunene. Yeye wakalua nʼanyi ku tshibi tshia ku tshiendelu; ne hanakatangila, nakamona disoso mu tshimanu tshia nsubu. Hashishe yeye wakangambila ne, Muana wa muntu, utubule disoso mu tshimanu. Hanakatubula disoso mu tshimanu, nakamona tshibi. Yeye wakangambila ne, Buela, umone malu a bundu adibo benzamu. Nunku nakabuelamu, nakatangila, ekumona! Bifuanyikishi bionso bia bintu bidi bidikoka hanshi, bia nyama mibiha, ne bia mpingu yonso ya Bena Isalele, biakadi bifunda ku nseke yonso ya bimanu bia nsubu. Bakulu makumi muanda mutekete ba munkatshi mua bakulu ba Bena Isalele bakadi bimana ku mpala kua mindidimbi ai; ne munkatshi muabo muakadi Yâzanya, muana wa Shafana, muimane. Muntu ne muntu wa munkatshi muabo wakadi mukuate dilonga dia kuoshelamu musenga wa manananshi ku tshianza tshiandi, ne muhuya wa muishi wa ku musenga wa manananshi wakabanda mulu. Hashishe Yehowa wakangambila ne, Muana wa muntu, udi umona bu mudi bakulu ba mu tshisamba tshia Bena Isalele benza mu mîdima, muntu ne muntu mu nsubu wandi wa mindidimbi, anyi? Bua badi bamba ne, Yehowa kena utumona; Yehowa wakulekela buloba buetu, wakumuka. Yeye wakangambila dî dikuabo ne, Neumone malu makuabo a bundu adibo benza adi ahita â bubi. Hashishe wakalua nʼanyi ku tshibi tshia ku tshibuelelu tshia ku nsubu wa Yehowa tshia ku luseke lua nôde; nakamona bakashi bashikameku badila Tamuza. Hashishe yeye wakankonka ne, Muana wa muntu, wakumona muanda eu, anyi? Neumone malu makuabo a bundu mahite â bubi. Wakalua nʼanyi mu tshiendelu tshia munda mua nsubu wa Yehowa; ekumona! Ku tshibi tshia ku ntempelo wa Yehowa, hankatshi ha mbalanda ne tshioshelu, kuakadi balume bu makumi abidi ne batanu bimane ne nyima yabo miele ku ntempelo wa Yehowa ne mpala yabo mitangishe ku luseke lua ku esete; bakadi batendelela diba ku luseke lua esete. Nunku yeye wakankonka ne, Muana wa muntu, wakumona muanda eu, anyi? Mbualu bukese ku mesu kua ba mu tshisamba tshia Bena Yuda bua kuenzabo malu a bundu adibo benza mu muaba eu, anyi? Bua meji abo a nunku badi busha buloba tente ne ditomboka diabo, ne batshidi bankuatshisha tshiji. Tangila mudibo bateka ditamba ku mûlu abo! Nunku nengenze malu anyi ne tshiji tshikole. Disu dianyi kadiena dibatangila ne dinanga, tshiena mbafuila luse; nansha biadilabo ne di dikole mu matshu anyi, tshiena mbunvuila. Hashishe Yehowa wakela dî dikole mu matshu anyi ne, Nuenu badi bakokesha ku mutu kua musoko eu, Nusemene ha buihi nʼanyi, muntu yonso ikale ne tshielelu tshiandi tshia nvita mu bianza biandi. Monai kabidi! Bantu basambombo bakafuma ku luseke lua ku tshibi tshia ku mutu tshiakadi tshitangile ku luseke lua node. Muntu yonso wa munkatshi muabo wakadi ne tshilonda tshiandi mu tshianza tshiandi. Munkatshi muabo muakadi muntu mukuabo muluate bivualu bia lin, muikale ne kalondo ka mai a mukanda ka mufundi kasuika mu tshifuka tshiandi. Bakabuela mu ntempelo, hakimana hehi ne tshioshelu tshia tshiamu tshia mitaku. Butumbi hua Nzambi wa Isalele buakumuka ku mutu kua bakeluba kuakadibu bushikame diambedi, buakaya ku mbelu kua nsubu. Yeye wakela dî kudi muntu wakadi muluate bivualu bia lin, wakadi ne kalondo ka mai a mukanda ka mufundi kasuika mu tshifuka tshiandi. Yehowa mene wakamuambila ne, Hitshila mu musoko, munkatshi mua misesu ya Yelushalema mene, funda tshimanyinu ha mpala ha bantu badi bahumuna muoyo ne badi badila bualu bua malu a bundu adi bakuabo benza munkatshi muau. Wakambila bakuabo mu matshu anyi ne, Yai, nuhitshile mu musoko ku nyima kuandi, nutahe bantu. Mesu enu kâbatangidi ne dinanga, kanubafuidi luse; shihai bantu bakulumpe, bansongalume ne mishikankunde, bana batekete ne bakashi; kadi kanuyi ha buihi ne muntu umue udi ne tshimanyinu atshi. Bangilai ku nsubu wanyi wa tshijila. Nunku bakabanga kushiha bakulu bakadi ku mpala kua nsubu. Yeye wakabambila ne, Nyangai nsubu eu, nûshe biendelu biandi tente ne bantu hanudi nushiha, nulubukemu. Bakaluhukamu, hakashiha bantu mu musoko. Hakadibo bashiha bantu bakuabo ne hanakashala nkayanyi, nakatua mpala wanyi hanshi, nakabandisha dî dianyi, nakamba ne, Aka, Mukelenge Yehowa! Neushihe bonso ba mu Isalele badi bashala ne muoyo mu kuhumuna eku kua tshiji tshiebe tshikole hamʼbidi ha Yelushalema, anyi? Hashishe yeye wakangambila ne, Bubi bua Bena Isalele ne bua Bena Yuda budi buhita hunene, buloba budi bûle tente ne kumatshisha kua mashi, ne musoko udi mûle tente ne kunyanga kua bilumbu bia bantu. Bualu bua badi bamba ne, Yehowa wakulekela buloba buetu, ne Yehowa kena utumona. Nunku meme hanyi tshiena mbalesha dinanga, tshiena mbafuila luse, kadi nempingashe dikenga bu difutu dia bienzedi biabo ha mitu babo. Hashishe muntu wakadi muluate bivualu hia lin, wakadi ne kalondo ka mai a mukanda ka mufundi kasuika mu tshifuka tshiandi, wakahingana ne dî ne, Nakuenza bu muwakungambila. Hashishe nakatangila, ekumona! Mu diulu diakadi ha mutu ha bakeluba muakamueneka tshinfuanyi tshia nkuasa wa bukelenge, muikale ne mubidi wa dibue dia saphir. Yehowa wakambila muntu wakadi muluate bivualu bia lin ne, Buela munkatshi mua nkata idi inyunguluka muinshi mua bakeluba, ûsha bianza biebe tente ne makala a kahia matema adi hankatshi ha bakeluba, wamuangalashe ha mutu ha musoko. Nunku yeye wakabuelamu ku mesu kuanyi. Hakabuela muntu eu, bakeluba bakadi bimana ku luseke lua nsubu lua ku tshianza tshia balume, ne ditutu diakusha tshiendelu tshia munda mua nsubu. Bualu bua butumbi bua Yehowa buakumuka ku mitu kua bakeluba, buakaya ku mbelu kua nsubu; nsubu wakula tente ne ditutu, ne tshiendelu tshiakula tente ne dinkenke dia butumbi bua Yehowa. Tshiona tshia mahuahua a bakeluba tshiakunvuibua tô ne ku tshiendelu tshia ha mbelu ha nsubu, tshikale tshikole bu dî dia Nzambi Mutambe Bukole hakuleye. Hakambileye muntu wakadi muluate tshivualu tshia lin ne, Angata kahia kakuabo ka munkatshi mua nkata idi inyunguluka, ku muaba wa hankatshi ha bakeluba, muntu eu wakabuelamu, wakimana hehi ne nkata mukuabo. Mukeluba mukuabo wakolola tshianza tshiandi ku kahia kakadi hankatshi ha bakeluba bakuabo, wakangata dikala diaku, wakaditeka mu bianza bia muntu wakadi muluate tshivualu tshia lin, ne yeye wakadiangata, wakaluhuka nʼadi. Munkatshi mua bakeluba muakamueneka tshinfuanyi tshia tshianza tshia muntu muinshi mua mahuahua abo. Nakatangila kabidi, ekumona! Nkata inai yakadiku hehi ne bakeluba, nkata umue hehi ne mukeluba umue, nkata mukuabo hehi ne mukeluba mukuabo; nkata yakadi ne mubidi bu wa dibue dia chrysolithe. Nkata yonso inai yakadi ne tshinfuanyi tshimue, bu mudi nkata umue muikale munda mua mukuabo. Hakayayi, yakaya mu nshila yonso kuakatangila nseke yai inai, kayakatshunguluka hakayayi, hualu bua yakayila mu nshila kuakatangishayi mpala yai; kayakanyunguluka hakayayi. Mibidi mijima ya bakeluba banai, nyima yabo, bianza biabo, ne mahuahua abo ne nkata kabidi muomumue, biakadi biule tente ne mesu ku nseke yonso. Nakunvua babikila nkata ai ne, Nkata idi inyunguluka bu nvunde. Mukeluba yonso wakadi ne mpala inai: mpala wa kumudilu wakadi mpala wa mukeluba mene, muibidi wakadi wa muntu, muisatu wakadi wa nyama wa ntambue ne muinai wakadi wa nyunyu wa mukanku. Bakeluba bakabanda mulu. Bakadi bifukibue bidi ne muoyo binakamona ku muelelu wa musulu wa Kebâ. Hakaya bakeluba, nkata yakaya nʼabo diatshimue; ne hakolola bakeluba mahuahua abo bua kubuka ha buloba, nkata kayakumuka ku miaba yai ya hehi nʼabo. Hakimanabo, nkata ai yakimana kabidi; hakabandabo mulu, nkata ai yakabanda nʼabo; bualu bua nyuma wa bifukibue wakadi munda muai. Butumbi bua Yehowa buakumuka ku mbelu kua nsubu, buakimana ha mitu ha bakeluba. Bakeluba bakolola mahuahua abo, bakabuka ha buloba, bakabanda mulu ku mesu kuanyi, ne nkata yakashala hehi nʼabo hakayabo nunku. Bakimana ku tshibi tshia nsubu wa Yehowa tshia ku luseke lua esete; butumbi bua Nzambi wa Isalele buakadi ba mitu habo. Ebi biakadi bifukihue bidi ne muoyo binakamona muinshi mua Nzambi wa Isalele ku muelelu wa musulu wa Kebâ; nakamanya ne badi bakeluba. Mukeluba yonso wakadi ne mpala inai ne mahuahua anai; ne muinshi mua mahuahua abo muakadi tshinfuanyi tshia bianza bia muntu. Eu mmuanda wa binfuanyi bia mpala yabo: biakadi mpala inakamona ku muelelu wa musulu wa Kebâ; buonso buabo bakaya ku mpala mu nshila mululame. Hashishe Nyuma wakambandisha mulu, wakalua nʼanyi ku tshibi tshia ku nsubu wa Yehowa tshia ku luseke lua esete, tshidi tshitangila ku esete; ekumona! Ku mbelu kua tshibi kuakadi balume makumi abidi ne batanu, ne munkatshi muabo nakamona Yâzanya, muana wa Azû, ne Pelataya, muana wa Benaya, baminyampala ba bantu. Yehowa wakangambila ne, Muana wa muntu, aba mbantu badi bahangidisha malu mabi ne badi balesha bakuabo lungenyi lubi mu musoko eu, bamba biabo ne, Tshikondo katshiena tshikumbana bua tuetu kuibaka nsubu, anyi? Musoko eu udi luesu lunene ne tuetu tudi munyinyi. Nunku ubambile mei a kubahisha nʼau, ubambile mei a, muana wa muntu. Nyuma wa Yehowa wakantulukila kabidi, yeye wakangambila ne, Amba biebe ne, Yehowa udi wamba dî edi ne, Nuenu ba mu tshisamba tshia Bena Isalele nuakuamba nunku, bualu bua ndi mumanye malu adi abuela mu mitshima yenu. Nuakushiha bantu bavule mu musoko eu, nuakûsha misesu yau tente ne bantu banuakushiha. Nunku Mukelenge Yehowa udi wamba ne, Bana benu banuakushiha ne banuakuladika hanshi munkatshi muau badi munyinyi, ne musoko eu udi luesu lunene; kadi nennuhatule munkatshi muau. Yehowa udi wamba ne, Nudi nutshina muele wa nvita; nenvishe muele wa nvita hamʼbidi henu. Nennuluhule munkatshi mua musoko, nennufile mu bianza bia bantu ba bende, nenshikishe bilumbu bienu ne dinukengesha. Nebanushihe ku muele wa nvita: tô ne ku butshika bua buloba bua Isalele nennulumbuluishe; nenumanye ne, Ndi Yehowa. Musoko eu kawena wikala luesu lunene kunudi, ne nuenu kanuena nuikala munyinyi munda mualu. Nennulumbuluishe ku butshika bua buloba bua Isalele; nunku nenumanye ne, Ndi Yehowa, muena mei anudi kanuyi nulonda, muena mikenji mudi kanuyi nuenza, kadi nuakuenza bu mudibo benza kudi bisamba bidi binunyunguluka. Hanakadi ngamba mei â, Pelataya, muana wa Benaya, wakafua. Nunku nakatua mpala wanyi hanshi, nakela dî dianyi dikole ngamba ne, Aka Mukelenge Yehowa! Wewe neubutule bakuabo ba mu Bena Isalele badi bashala ne muoyo, anyi? Dî dia Yehowa diakalua kundi ne, Muana wa muntu, bantu badi bashikame mu Yelushalema badi bamba bua bana benu, bua bana benu badi nʼebe mu buhika, bonso ba mu tshisamba tshia Bena Isalele mene, ne, Badi kule, kabena hehi ne Yehowa; badi batuha tuetu buloba ebu bu buhianyi buetu. Nunku amba biebe ne, Yehowa udi wamba ne, Nansha bingikala mubatume kule munkatshi mua bisamba bia bantu, nansha bingikala mubamuangalashe munkatshi mua maloba makuabo, nakadi kudibo bu tshitendelelu tshidi katshiyi tshianze kukumbana munkatshi mua maloba akayabo; kadi Yehowa udi wamba ne, Nennusangishe munkatshi mua bantu ba bende, nennukunguishe aku bua kunuhatula munkatshi mua maloba akanumuangalashabo, ne nennuhe buloba bua Isalele. Nebahinganemu, nebumushe bintu bionso bidi hibubihisha ne bintu bionso bidi bibunyanga. Nembahe mutshima muhia-muhia, nenteke nyuma muhia-muhia munda muabo, nengumushe mutshima wa dibue munda muabo, nembahe mutshima wa muntu; bua bobo balonde mikenji yanyi ne batumikile mei anyi ne babienze. Nunku nebikale bantu banyi ne meme nengikale Nzambi wabo. Kadi Yehowa udi wamba bua bantu aba badi ne mitshima yabo mitekibue ku bintu biabo bidi bibiha ne binyanguka ne, Nembavuishile makenga ha mutu habo bua bienzedi biabo bibi. Hashishe bakeluba bakolola mahuahua abo, ne nkata yakashala hehi nʼabo; butumbi bua Nzambi wa Isalele kabidi buakadi ha mitu habo. Butumbi bua Yehowa buakabika kuakadibo munkatshi mua musoko, buakimana ha mutu ha mukuna udi ku luseke lua esete lua musoko. Hashishe Nyuma wakambandisha, wakalua nʼanyi mu tshikena kumona tshifume kudi Nyuma wa Nzambi tô ne ku buloba bua Bena Kasada, kudi bantu bakadi mu buhika. Nunku tshikena kumona tshinakamona diambedi tshiakumuka kundi. Hashishe nakambila bakadi mu buhika malu onso akandeshabo kudi Yehowa. Dî dia Yehowa diakalua kundi ne, Muana wa muntu, wewe udi mushikame munkatshi mua ba mu tshisamba etshi tshia bantombokedi, badi ne mesu a kumona nʼau kadi kabena bamona, badi ne matshu a kunyua nʼau kadi kabena bunvua; hualu bua badi diku dia bantombokedi. Nunku, muana wa muntu, udilongoluele bintu bia luendu lua kuya ku buhika, wenze nunku mu munya ku mesu kuabo; Umuka mu muaba webe bua kuya ku muaba mukuabo ku mesu kuabo; bumue nebelangane meji a muanda eu, nansha bikalabo bena diku dia bantombokedi. Hatula bintu biebe bia luendu mu munya ku mesu kuabo, bu mudi bintu bia kuya nʼabi mu buhika; mu diba dia dilolo wewe muine uhatuke mu nsubu ku mesu kuabo, bu mudi bantu benza hadibo baya mu buhika. Utubule disoso mu tshimanu tshia nsubu ku mesu kuabo, hatukilaku ne bintu biebe. Ambula bintu biebe bia luendu ha diaha ku mesu kuabo, luhuka nʼabi butuku; buikila mesu ebe bua wewe kutangidi buloba; bualu bua nakukuteka bu tshimanyinu kudi ba mu tshisamba tshia Bena Isalele. Nakenza bu muakangambileye. Nakahatula bintu bianyi bia luendu mu munya, bu mudi bintu bia kuya nʼabi mu buhika; hakabuela diba, nakaluhula disoso mu tshimanu tshia nsubu ne tshianza tshianyi, nakahatukilaku nʼabi butuku ne nakabituala ha diaha dianyi ku mesu kuabo. Hakatshiabu, dî dia Yehowa diakalua kundi ne, Muana wa muntu, ba mu tshisamba tshia Bena Isalele, ba mu diku edi dia bantombokedi mene, kabakukukonka ne, Wewe udi wenza tshinyi, anyi? Ubambile ne, Mukelenge Yehowa udi wamba ne, Di edi dia Yehowa didi dikuata mukelenge wa mu Yelushalema ne bonso ba mu tshisamba tshia Bena Isalele badi mu musoko eu. Ubambile ne, Meme hanyi ndi tshimanyinu kunudi. Nebanuenzele bu munakuenza, nenuye mu buloba bua bende, mu buhika mene. Mukelenge udi munkatshi muenu neambule bintu biandi bia luendu ha diaha diandi, nealuhuke butuku; nebamutubuile disoso mu lumbu lua musoko bua kumuluhuilamu; yeye neabuikile mpala wandi bua katangidi buloba ebu ku mesu. Nengande bukuondo ku mpala kuandi, yeye neakuatshibue mu buteyi buanyi; nenye nʼandi ku Babulona, ku buloba bua Bena Kasada; kena ubumona ku mesu, kadi neafuilemu. Nemmuangalashe badi nʼandi, bakuatshishi bandi ne masalayi andi onso, ku mpehele yonso; nempatule muele wa nvita bua kubihata. Nebamanye ne, Ndi Yehowa, hanabamuangalasha munkatshi mua bisamba bikuabo ne hanabatangadisha mu maloba a bende. Kadi nensungile bantu banya-banya ba munkatshi muabo ku muele wa nvita, ku tshiole ne ku tshihuhu, bua bobo batondele ba mu bisamba bia kudibo baya malu a bundu akadibo benza; nunku nebamanye ne, Ndi Yehowa. Dî dia Yehowa diakalua kundi kabidi ne, Muana wa muntu, dia bidia ne dikanka, nua mai ne dizakala ne buowa. Ambila ba mu buloba ebu ne, Mukelenge Yehowa udi wamba bua badi bashikame mu Yelushalema mu buloba bua Isalele ne, Nebadie bidia biabo ne kuhampakana, nebanue mai abo ne tutshina; bua buloba buabo nebuikale tshikulu, nebuhaudibue ne bintu bionso bidimu, bualu bua ditomboka dia bantu bonso badi bashikamemu. Misoko idi ne bantu neyibutudibue, buloba nebuandamuke tshihela tshia tshianana; nunku nenumanye ne, Ndi Yehowa. Dî dia Yehowa diakalua kundi ne, Muana wa muntu, elu ndusumuinu kai lunudi nʼalu mu buloba bua Isalele ne, Matuku adi aleha ne tshikena kumona tshionso tshidi tshihanga kuenza bualu buatshi? Bua muanda eu ubambile ne, Mukelenge Yehowa udi wamba ne, Nendekeshe lusumuinu elu, ne kabena baluela bu lusumuinu mu buloba bua Isalele kabidi. Kadi ubambile ne, Matuku akukumbana ne tshikena kumona tshionso netshijadikibue. Kakuena kuikala tshikena kumona tshia kudinga nʼatshi bantu kabidi, anyi kutempa kua mbuku kua mei a lubombo munkatshi mua ba mu tshisamba tshia Bena Isalele. Bualu bua meme Yehowa nengambe dî dianyi, ne dî dindi ngamba nedijadikibue, kadiena dijanguluka kabidi. Bua mu matuku enu, nuenu ba mu diku dia bantombokedi, nengambe dî dianyi, nendimane; â mmei adi Mukelenge Yehowa wamba. Dî dia Yehowa diakalua kundi kabidi ne, Muana wa muntu, mona, ba mu tshisamba tshia Bena Isalele badi bamba ne, Tshikena kumona tshidiye umona ntshia matuku a bungi atshidi ku mpala, ne yeye udi wamba malu a bikondo bitshidi kule. Nunku ubambile ne, Mukelenge Yehowa udi wamba ne, Kakuena dî dianyi dimue didi dijanguluka kabidi; Mukelenge Yehowa udi wamba ne, Hangamba dî, nedishike. Dî dia Yehowa diakalua kundi kabidi ne, Muana wa muntu, bela baprofete ba Bena Isalele badi badiamba, ambila bantu aba badi bamba mei adi afuma anu mu mitshima yabo mene ne, Unvuai dî dia Yehowa. Mukelenge Yehowa udi wamba ne, Mulau wikale kudi baprofete bahote badi balonda meji adi nyuma yabo ibalesha, kabayi banze kumona tshikena kumona! Monai, Bena Isalele, baprofete benu badi bu mibuabua mu bikulu. Kanuakubanda bua kulongolola miaba ya mu lumbu mishimbuke, kanuakuashila ba mu tshiota tshia Isalele lumbu bua bobo bamanye mua kuimana bakandamana mu nvita dituku dia Mukelenge. Bakumona bikena kumona bia mashimi ne kutempa kua mbuku kudi kubadinga; badi bamba ne, Yehowa udi wamba dî edi, kadi Yehowa kakubatuma. Badi batekemena ne dî didibo bamba nedijadikibue. Kanuakumona tshikena kumona tshidi tshinudinga ne kanuakuamba mei a kutempa kua mbuku kudi kushima, anyi? Nudi nuamba bienu ne, Yehowa udi wamba dî edi, kadi meme tshiakudiamba nansha. Bua bualu ebu Mukelenge Yehowa udi wamba ne, Bualu bua nuakuamba mei a mashimi ne nuakumona bikena kumona bidi bidinga bantu, nunku, Mukelenge Yehowa udi wamba ne, Ndi nnuhidia. Tshianza tshianyi kabidi netshikale hamʼbidi ha baprofete badi bamona bikena kumona bidi bidinga bantu ne badi bamba mei a mashimi mu kutempa kuabo kua mbuku. Kabena bashikama mu tshilumbuluidi tshia bantu banyi, kabena bikala ne mena abo mafunda mu mikanda ya mena a ba mu tshisamba tshia Bena Isalele, ne kabena bamanye mua kubuela mu buloba bua Isalele; hashishe nenumanye ne, Ndi Yehowa. Bualu bua bakahambuisha bantu banyi, bamba biabo ne, Ditalala didiku, kadi ditalala kadiyiku; ne bibaka muntu mukuabo lumbu lutekete, bobo badi balabahu anu luhemba. Nunku ambila badi balaba luhemba ku lumbu ne, Nelushimbuke. Nvula munene nealoke, ne mabue a nvula neahone, ne tshihuhu tshikole netshilushimbule. Tangila, hashimbuka lumbu, kabena banukonka ne, Luhemba lunuakulabahu ludi hanyi? Nunku Yehowa udi wamba ne, Mu tshiji tshianyi tshikole nembishe tshihuhu bua kulushimbula, mu tshiji tshianyi mene nvula munene nealoke bua kulukuma, ne mu tshifika munda mabue manene neahone bua kumbutula. Nunku nenshimbule lumbu lunuakulaba lubemba, nenushimbule hanshi, bua bishimikidi bialu bimueneshibue hatoke tô; hashimbukalu, nuenu nenufue muinshi mualu; nunku nenumanye ne, Ndi Yehowa. Nunku Yehowa udi wamba ne, Nemmanyine tshiji tshianyi tshikole ba lumbu ne bantu badi balulaba luhemba; nennuambile ne, Lumbu kaluenaku kabidi ne bakalulaba luhemba kabenaku; mbaprofete ba Bena Isalele mene badi bamba mei abo bua Yelushalema ne badi bamona bikena kumona bia ditalala, kadi ditalala kadiyiku. Wewe, kabidi, muana wa muntu, kolesha disu kudi bana bakashi ba bana benu, badi bamba mei adi afuma anu mu meji a mu mitshima yabo; ubambile mei a kubahisha nʼau ne, Mukelenge Yehowa udi wamba ne, Mulau wikale kudi bakashi badi batela mikaba ya kusuika ha tunsanki tua bantu bonso, ne badi benza bitambala bia kusuika ku mitu ya bantu bonso, ne bale ne bihi, bua kukebabo mioyo yabo! Nenukebe mioyo ya bantu banyi anu bua kusungila yenu, anyi? Nuakuhenda dina dianyi munkatshi mua bantu banyi anu bua kuheta manza a orge ne bihese bia bidia; nuakushiha bantu badi kabayi ne bua kufua, ne nuakusungila bakuabo badi kabayi ne bua kushala ne muoyo, bualu bua nuakudinga bantu banyi badi bitabusha mashimi enu. Nunku Yehowa udi wamba ne, Ndi mpidia mikaba yenu mudi nukeba nʼai mioyo ya bantu, nenyitule ku maboko enu, ne nempikule mioyo ya bantu inudi nukeba bua kujimisha. Nempande bitambala bienu, nensungile bantu banyi mu bianza bienu, bua kabashadi mu bianza bienu kabidi bua nuenu kukeba mioyo yabo; nunku nenumanye ne, Ndi Yehowa. Bualu bua ku mashimi enu nuakunyingalasha mutshima wa muntu muakane, undi tshiyi munyingalashe; nuakukolesha mutshima wa muntu mubi bua yeye kalekedi kuenda mu nshila wandi mubi bua kuhandisha muoyo wandi. Bua bualu ebu kanuena numona bikena kumona bidi bidinga bantu kabidi, ne kanuena nuamba mei a mashimi mu mbuku yenu. Nempandishe bantu banyi mu bianza bienu; nunku nenumanye ne, Ndi Yehowa. Hashishe bakulu bakuabo ba mu Bena Isalele bakahia kundi, bakashikama ku mpala kuanyi. Dî dia Yehowa diakalua kundi ne, Muana wa muntu, bantu aba bakujadika mpingu yabo mu mitshima yabo, bakuteka tshilenduishi tshia kudibuesha mu bubi ku mpala kuabo; ngunvue kulomba kuabo, anyi? Nunku akula nʼabo, ubambile ne, Mukelenge Yehowa udi wamba ne, Muntu yonso wa mu tshisamba tshia Bena Isalele wajadika mpingu yandi mu mutshima wandi, waditekela tshilenduishi ku mpala kuandi bua kudibuesha mu bubi, bialueye kudi muprofete bua yeye amulombele lungenyi, meme Yehowa nkayanyi nemmukudimune dî bu mudi bungi bua mpingu yandi, bua meme mmanye mua kukuata ba mu tshisamba tshia Bena Isalele mu nkuka ya mu mitshima yabo, bualu bua buonso buabo bakalua kundi bu bantu ba bende bualu bua mpingu yabo. Bua malu â ambila ba mu tshisamba tshia Bena Isalele ne, Mukelenge Yehowa udi wamba ne, Kudimunai mitshima yenu, nukome mpingu yenu nyima, umushai mesu ku malu enu a bundu. Bualu bua muntu yonso wa mu tshisamba tshia Bena Isalele, anyi wa munkatshi mua bantu ba bende badi bashikame mu buloba bua Isalele, waditahulula kundi, wadijadikila mpingu yandi mu mutshima wandi, waditekela tshilenduishi ku mpala kuandi tshia kudibuesha nʼatshi mu bubi, bialueye kudi muprofete bua yeye amulombele lungenyi kundi, meme Yehowa nkayanyi nengitabe kudiye. Nempidie muntu eu, nemmuvuishe bu tshifuanyikishi ne bu bualu badibo bamba mu nsenda, nemmûmushe munkatshi mua bantu banyi; nunku nenumanye ne, Ndi Yehowa. Bikala muprofete eu muteyibue bua kuamba dî dikuabo, meme Yehowa nakuitabusha bua muprofete eu ateyibue, ne nengolole tshianza tshianyi bua kulenga hamʼbidi handi, nemmubutule bua kumûmusha munkatshi mua bantu banyi Bena Isalele. Yehowa udi wamba ne, Buonso buabo nebakengeshibue bua mibi yabo. Muprofete neakengeshibue muomumue ne muntu wa kukeba lungenyi kudiye; bua ba mu tshisamba tshia Bena Isalele kabahambuki kundi kabidi, kabadinyangi kabidi ne malu mabi abo onso, kadi bua bobo bikale bantu banyi, ne meme ngikale Nzambi wabo. Dî dia Yehowa diakalua kundi ne, Muana wa muntu, biangenzelabo bibi kudi ba mu buloba bukuabo mu buhidia buabo bua mikenji yanyi, ne bingolola tshianza tshianyi kudibo bua kubakengesha, binashiha tshintu tshidibo beyemena bua kuangata bia kudia, binatuma tshiole mu buloba ebu bua kubutulamu bantu ne nyama kabidi, Yehowa udi wamba ne, Nansha bu bantu aba basatu, Noa, Danyele ne Yobo, bikaminu, bakadi kuhandisha anu mioyo yabo nkayai ku buakane buabo. Binahitshisha nyama ya luonji mu buloba ebu, ne biashihayi bantu badimu ne biabutulayi bua kakuikadi muntu wamanya mua kuhitshilamu bualu bua nyama ei, Mukelenge Yehowa udi wamba ne, Nansha bu bantu aba basatu bikalemu, bu mundi ne muoyo, kabakadi kuhandisha mioyo ya bana babo balume anyi ya bana babo bakashi; anu bobo nkayabo bakadi kusungidibua, kadi buloba buine buakadi kubutudibua. Anyi binavuisha muele wa nvita ha buloba abu, bingamba ne, Muele wa nvita, hita mu buloba ebu; nunku nenshihemu bantu ne nyama; Mukelenge Yehowa udi wamba ne, Nansha bu bantu aba basatu bikalemu, bu mundi ne muoyo, kabakadi kuhandisha mioyo ya bana babo balume anyi ya bana babo bakashi; anu bobo nkayabo bakadi kuhanduka. Anyi binatuma tshihuhu mu buloba ebu, binahumuna tshiji tshianyi tshikole ha buloba mu kumatshisha kua mashi, bua kushihamu bantu ne nyama kabidi; Mukelenge Yehowa udi wamba ne, Bu Noa, Danyele ne Yobo bikalemu, bu mundi ne muoyo, kabakadi kuhandisha muoyo wa muana mulume anyi wa muana mukashi; bakadi kuhandisha anu mioyo yabo nkayai bua buakane buabo. Bua malu â Mukelenge Yehowa udi wamba ne, Bualu nebuhite bukole hanatuma milau yanyi mikole inai ku Yelushalema, muele wa nvita, tshiole, nyama ya luonji ne tshihuhu, bua kubutulamu bantu ne nyama! Kadi biashala bakuabo bahanduke, nebashale, bana balume ne bana bakashi, nebahatukemu bua kulua kunudi, nuenu nenumone bienzedi biabo ne midimu yabo, nenusambibue bua makenga anakutumina Yelushalema, bua malu au onso mene anakubatumina. Yehowa udi wamba ne, Bobo nebanusambe hanuamona bienzedi biabo ne midimu yabo; nenumanye ne, Malu â onso anakuenza tshiakuenza hatuhu. Dî dia Yehowa diakalua kundi ne, Muana wa muntu, muonshi udi uhita mitshi mikuabo ya muitu kudi kunyi, ditamba adi dia muonshi didi munkatshi mua mitshi ya muitu? Badi bamanye mua kuangata dibaya kudiu bua kuenza nʼadi tshintu, anyi? Badi bamanye mua kusonga tshikudikilu ne tshituha tshiau bua kukudikaku luesu, anyi? Tangila, badi bawela mu kahia bu nkunyi; kahia kadi kosha nsongo yau ibidi, ne hankatshi hau hakuhia kabidi; badi bamanye mua kuenza nʼau mudimu kai? Tangila, hakadiu muonshi mujima, kabakenza nʼau mudimu nansha; nunku hakuwosha kahia ne hakushilau, badi mua kuenza nʼau mudimu kai kabidi? Yehowa udi wamba ne, Bu mudi muonshi munkatshi mua mitshi ya muitu, indi nteka mu kahia bu nkunyi, nunku nakufila badi bashikame mu Yelushalema ku lufu. Nembahidie; bakuhatuka mu kahia, kadi kahia kakuabo nekabavingutule; nenumanye ne, Ndi Yehowa, hanabahidia. Yehowa udi wamba ne, Nembutule buloba ebu kabutu, bualu bua bakushiha mikenji yanyi. Dî dia Yehowa diakalua kundi kabidi ne, Muana wa muntu, wamanyisha Yelushalema bua malu mabi andi a tshinyangu. Umuambile ne, Mukelenge Yehowa udi wambila Yelushalema ne, Ku tshibangidilu tshiebe ne ku kuledibua kuebe wewe udi wa mu buloba bua Kanâna; tatu webe wakadi Muena Amole, ne mamu webe wakadi Muena Hiti. Kadi ebu mbualu bua kuledibua kuebe ne mu dituku diakakulelabo kabakakosa dila dia ku muofu webe, kabakakuowesha mai bua kutokesha mubidi webe, kabakakulaba luehu, kabakakujingila tshilulu. Kakuakadi muntu wakakufuila luse bua kukuenzela malu â onso a luse; kadi bakakuimasha mu tshisuku, bualu bua bakalengulula muoyo webe mu dituku diakakulelabo. Hanakahitshila hehi nʼebe mu nshila, nakakumona udibonda mu mashi ebe, ne nakakuambila ne, Ikala ne muoyo mu mashi ebe; e, nakakuambila ne, Mu mashi ebe wikale ne muoyo! Nakakudiundisha bu mudi tshintu tshidiunda mu budimi, ne wewe wakaleha ne wakakola, tô ne hawakalua ku tshikondo tshia bukole buebe. Mabele ebe akasaba, nsuki yebe yakamana kuleha; kadi wakadi butaka kuyi ne tshilulu hamʼbidi. Hanakahitshila ha buihi nʼebe kabidi, nakakutangila, ne wakatshidi mu tshikondo tshia kukunangabo; nunku nakakubaluila tshmialu tshianyi, nakabuikila butaka buebe. Nunku Mukelenge Yehowa udi wamba ne, Bulelela, nakaditshiha kûdi, nakahunga nʼebe tshihungidi, ne wewe wakalua wanyi. Hashishe nakakuowesha mai, nakakuvuwa mashi ebe, nakakuela manyi hamʼbidi. Nakakuluatshisha ne mayeka akadi ne malenda mimpe, nakabuesha bisabata bia tshiseba tshia nyama wa mu mai ku makasa ebe, nakakujingila tshilulu tshia lin tshinefuke, nakakuluatshisha tshilulu tshia soie. Nakukulengesha ne bilenga, nakakuela tukanu ku maboko, nakakujingila lukanu mu nshingu, nakakuela kakanu ku diulu ne tukanu tukuabo ku matshu, nakakuasa tshifulu tshia butumbi. Nunku wewe wakalengeshibua ne biamu bia or ne bia argent, ne bivualu biebe biakadi bia tshilulu tshia lin tshinefuke, tshia soie ne tshia malenda mimpe. Wakadia bukula bubotesha bimpe, buitshi ne manyi; wakadi ne bulengele bua mubidi buhite be, ne wakadi ne diakalengele bu dia mukelenge mukashi! Mukelenge Yehowa udi wamba ne, Lumu lua bulengele buebe luakamuangalaka munkatshi mua bisamba bia bantu; bulengele buebe buakadi buimpe tshishiki bualu bua butumbi bunakateka hamʼbidi hebe. Kadi wakeyemena bulengele bua mubidi webe, ne bua lumu lua butumbi buebe wakenda masandi; wakendenda masandi ne muntu yonso wakadi uhita mu nshila. Wakavula bivualu biebe, wakadilongoluela nʼabi bitendelelu ha mitu ha mikuna bilengeshibue ne mibidi ya mushindu ne mushindu, wakendelamu masandi; malu a mushindu eu kaena manze kuenjibua, ne kaena enjibua kabidi. Wakangata bilenga biebe bimpe bia or ne bia argent binakakuha, wakafula nʼabi bifuanyikishi bia bantu balume, wakenda nʼabi masandi. Wakangata bivualu biebe biakadi ne malenda mimpe, wakabiluatshishabi, wakateka manyi anyi ne musenga wanyi wa manananshi ku mpala kuabi. Mukelenge Yehowa udi wamba ne, Bidia bianyi binakakuha, bukula bubotesha bimpe, manyi ne buitshi, binakakudisha nʼabi, wakabiteka ku mpala kuabi bu bintu bidi bitua dihembu dimpe; bualu buakadi nunku. Eu mmuanda mukuabo kabidi: wakuangata bana bebe ba balume ne bana bebe ba bakashi bawakundelela, wakubafila bu milambu ya kuosha kudibi bua biobi bibadie. Masandi ebe akadi bualu buhite butekete, bua wewe kushiha bana banyi kabidi, kubafila bu milambu ya kuoshela bintu abi, anyi? Mu malu ebe onso a tshinyangu ne a masandi kuakuvuluka matuku a buana buebe, hawakadi butaka kuyi ne tshivualu, udibonda mu mashi ebe. Mukelenge Yehowa udi wamba ne, Ha mutu ha malu mabi ebe onso, mulau, mulau wikale kûdi! Wakudiashila bibumba mu misesu yonso. Wakuasa tshibunda tshile ku mbangilu wa nshila yonso, wakuvuisha bulengele buebe bu tshintu tshia bundu, wakufila mubidi webe kudi muntu yonso wakadi uhita mu nshila ne wakuvudisha masandi ebe. Wakuenda masandi ne Bena Ejipitu, bena mutumba nʼebe badi ne mibidi ya mafuta, wakuvudisha masandi ebe bua kunkuatshisha tshiji. Bua malu â, mena, nakuolola tshianza tshianyi ha mutu hebe, nakukehesha bia kudia biebe bia buatshia-buatshia, nakukufila mu bianza bia badi nʼebe lukuna bua bakuenzele bu mudibo basue, bana bakashi ba Bena Peleshete mene badi bakuatshika bundu bua malu ebe a tshikama. Kadi wakuenda masandi ne Bena Ashû kabidi, bualu bua lukuka luebe kaluakadi luanze kushika; e, wakuenda nʼabo masandi, kadi lukuka luebe kaluakadi luanze kushika. Wakamudisha masandi ebe kabidi ku buloba bua Kanâna tô ne ku buloba bua Bena Kasada mene; kadi lukuka luebe kaluakanza kushika. Mukelenge Yehowa udi wamba ne, Tangila mudi mutshima webe mutekete, bualu bua udi wenza malu â onso, bu mudi mukashi wa masandi wa dikamakama wenza; bualu bua udi wasa tshibumba tshiebe ku mbangilu ya nshila yonso, ne udi udienzela tshibumba tshile mu misesu yonso, ne kuena bu mukashi wa ndumba bualu bua wewe udi uhetula difutu dia masandi. Aka! Wewe mukashi mubake, udi wenda masandi, udi witabusha balume ba bende mu muaba wa bayebe! Bobo badi bahesha bakashi ba ndumba difutu; kadi wewe udi ufila difutu kudi balunda bebe bonso, ne udi ubabueshila bua kuluabo ku nseke yonso bua kuenda nʼebe masandi. Wewe udi ushilangana ne bakashi bakuabo ba masandi, bualu bua muntu kena ukukeba bua kuenda nʼebe masandi, wewe udi umukeba, ne bualu bua wewe udi umuha difutu, kadi yeye kena ukuha difutu; mu muanda eu wewe udi ushilangana nʼabo. Bua malu â, wewe ndumba, unvua dî dia Yehowa. Mukelenge Yehowa udi wamba nunku ne, Bualu bua wakadifuishisha bundu, ne butaka buebe buakamueneka hawakenda masandi ne balunda bebe, ne bua mpingu yonso ya tshikama tshiebe kabidi, ne bua mashi a bana bebe bawakafila kudiyi, bua malu â nensangishe balunda bebe bonso bawakadisankisha nʼabo, bonso bawakananga mene ne bonso bawakadi nʼabo lukuna hohamue; nenkunguishe bantu aba ba ku nseke yonso bua kukutshintshimikabo, nemmueneshe butaka buebe kudibo bua bobo babumone hatoke. Nenkulumbuluishe bu mudibo balumbuluisha bakashi badi bashiha mabaka ne badi bamatshisha mashi a bakuabo hanshi; nenteke mashi a tshiji ne a mukau hamʼbidi hebe. Nenkufile mu bianza biabo kabidi, ne nebashimbule tshibumba tshiebe, nebabumbule bibumba biebe bile; nebakuvule bivualu biebe, nebakunyenge bilenga biebe biakane; nebakushiye butaka kuyi ne tshivualu hamʼbidi. Nebalue ne tshisumbu tshia bantu bua kukuluisha, nebakukume mabue, nebakukose bituha ne miele ya nvita. Neboshe nsubu yebe ne kahia, nenkulumbuluishe ku mpala kua bakashi ba bungi; nunku nenkulekeshe kuenda kuebe kua masandi, ne kuena uha balunda bebe difutu kabidi. Nunku nempuwishe tshiji tshianyi kûdi, mukau wanyi undi nʼau kûdi neûmuke, nengikale holâ, tshiena ngikale ne tshiji kabidi. Mukelenge Yehowa udi wamba ne, Bualu bua kuakuvuluka matuku a buana buebe, kadi wakunfikisha munda ne malu â onso, nunku meme hanyi nenkukengeshe bua bienzedi biebe. Kuakuenza muanda eu wa tshikama ha mutu ha malu ebe onso a bundu, anyi? Mona, muntu yonso udi wela nsumuinu neakuelele lusumuinu elu ne, Bu mudi mamu, mbu mudi muanʼandi wa bakashi. Wewe udi muana wa bakashi, muena mamuʼebe, udi ne mulume wandi ne bana bandi lukuna; wewe kabidi, udi muena bana benu ba bakashi bakadi ne babayabo ne bana bakalelabo lukuna. Mamu webe wakadi Muena Hiti ne tatu webe wakadi Muena Amole; mukuluʼebe wa bakashi wakadi Samalea, wakadi ushikama ne bana bandi ba bakashi ku luseke luebe lua nôde; muakunyi webe wa bakashi wakadi Sodoma, wakadi ushikama ne bana bandi ba bakashi ku luseke luebe lua sude. Kadi wewe wakuenda mu nshila yabo ne wakuenza malu abo a bundu; kadi kuakuenza malu au nkayau, malu abo akadi bu makese habalabo malu ebe, wewe wakubatamba kunyanguka mu bienzedi biebe bionso. Mukelenge Yehowa udi wamba ne, Bu mundi ne muoyo, muanʼenu wa bakashi Sodoma ne bana bandi ba bakashi kabakuenza malu audi wewe ne bana bebe ba bakashi nuenza. Tangila, ebu buakadi bubi bua muanʼenu wa bakashi Sodoma; yeye ne bana bandi ba bakashi bakadi ne kudisua ne bia kudia bivule, kabayi bakengela tshintu; kabakakolesha maboko a bahele ne a bakengi. Bakadi ne dihetu, bakenza malu a bundu ku mpala kuanyi; nunku nakabumusha, hanakamona muanda eu. Samalea kabidi kena muenze malu mabi bu muwakuenza, nansha tshituha tshiau mene; kadi wewe wakubatamba kuvudisha malu mabi a bundu, ne wakubingisha bana benu ba bakashi ku malu mabi ebe a bundu awakuenza. Bualu bua wakukosa tshilumbu tshia bana benu ba bakashi mu kubabingisha kuebe nunku, bûdi nʼabu mbua kudituadila bundu buebe nkayebe; bua malu ebe a bundu awakuenza adi mahite malu abo kunyanguka, bobo badi bakutamba buakane. Eyo, wewe ufuishibue bundu, ne itabusha bua kudituadila bundu buebe, bualu bua wakubingisha bana benu ba bakashi. Nembumushe mu buhika bua kubaha diakalengele, buhika bua Sodoma ne bana bandi ba bakashi, buhika bua Samalea ne bana bandi ba bakashi, ne buluka bua bantu bebe bakaya mu buhika munkatshi muabo; bua wewe umanye mua kudituadila bundu buebe mene ne mua kukuatshika bundu bua malu au onso awakuenza, bualu bua wewe udi musambi wabo. Bana benu ba bakashi kabidi, Sodoma ne bana bandi ba bakashi, nebahingane ku tshikadilu tshiabo tshia diambedi, ne Samalea ne bana bandi ba bakashi nebahingane ku tshikadilu tshiabo tshia diambedi; ne wewe ne bana bebe ba bakashi nenuhingane ku tshikadilu tshienu tshia diambedi. Kadi kuakadi uhenda muanʼenu wa bakashi, Sodoma, mukana muebe mu dituku dia kudisua kuebe, diambedi kabayi banze kusokolola bubi buebe, anyi? Wewe muine wakulua tshihendu mukana mua bana bakashi ba Sulia ne mua bonso badi hehi nʼabo ne mua bana bakashi ba Bena Peleshete, ne bonso badi hehi nʼabo badi bakuhetula. Yehowa udi wamba ne, Udi udituadila dikenga diebe bua malu ebe a tshikama ne a bundu. Bualu bua Mukelenge Yehowa udi wamba ne, Nenkuenzele bu mudi malu awakuenza, wewe wakuhetula mutshihu webe hawakushiha tshihungidi tshietu. Kadi nenvuluke tshihungidi tshinakahunga nʼebe mu matuku a buana buebe, nenjadike nʼebe tshihungidi tshia tshiendelele. Mu diba adi wewe neuvuluke bienzedi biebe, neukuatshike bundu hawitabusha bana benu ba bakashi, mukuluʼebe ne muakunyʼebe, ne hanabafila kûdi bu bana bebe ba bakashi bawakalela, kadi kambualu bua tshihungidi tshiwakuhunga nʼanyi. Mukelenge Yehowa udi wamba ne, Nenjadike tshihungidi tshinakubunga nʼebe, ne neumanye ne, Ndi Yehowa; bua wewe uvuluke, ukuatshike bundu, bua wewe kubuludi mukana muebe kabidi kashidi, bualu bua bundu nebukukuate, hanashikisha kukubuikidila malu mabi onso awakuenza. Dî dia Yehowa diakalua kundi ne, Muana wa muntu, ubele dijimbu ne welele Bena Isalele lusumuinu elu; ubambile ne, Mukelenge Yehowa udi wamba ne, Nyunyu munene wa mukanku, wakadi ne mahuahua manene, mahuahua male mene, muase masala a bungi akadi ne mibidi ya mishindu mishilangane, wakalua ku Lebanona; wakangata ditamba dia ku lusongo lua mutshi wa cêdre; wakahia ditamba diau diakatamba mulu, wakaya nʼadi ku buloba bua bungendʼa mushinga, wakadishimika mu musoko wa bahanyi ba bintu. Wakangata kabidi diminu dia mu buloba ebu, waka dikuna mu budimi buakadi ne buloba buimpe; wakaditeka hehi ne mai a bungi, wakadikuma bu mutshi wa saule, diakatoloka, ne diakalua muonshi udi ulamba kauyi mutambe bule, matamba a muonshi atangilangana nʼandi, ne miji yau iya muinshi muakadiye. Nunku wowo wakalua muonshi, wakasampila ntonga, wakasa matamba. Munga nyunyu mimene wa mukanku wakalua kabidi, wakadi ne mahuahua manene ne masala a bungi; monai! Muonshi eu wakadi mutangishe miji yau kudiye, ne ku muaba kuakadibo baukuna. Wakatuma matamba au kudiye, bua yeye aumiamine mai. Wakakunyibua mu buloba buimpe, hehi ne mai a bungi, bua wowo wase matamba ne ukuame biau mamuma ne ulue muonshi mulengele. Amba biebe ne, Mukelenge Yehowa udi ukonka ne, Neumanye mua kudiunda, anyi? Yeye kena ujula miji yau, kena uhuola mamuma au, anyi? Bua mabeshi au matekete onso afubidile anyi kûjula tô ne ku miji yau bidi bikengela kuikala ne diboko dikole ne bantu ba bungi. Bulelela, wakakunyibua, kadi udi mua kudiunda, anyi? Kawena mua kufubidila tshiendelele, haututa luhehele lua ku esete, anyi? E, neufubidile mu buloba buakadiundilau. Hashishe dî dia Yehowa diakalua kundi ne, Ambila ba mu diku dia bantombokedi ne, Kanuena njingulula malu â, anyi? Ubambile ne, Monai, mukelenge wa Babulona wakalua ku Yelushalema, wakakuata mukelenge ne baminyampala bakuabo bakadimu, wakaya nʼabo ku Babulona. Wakangata muana mukuabo wa mu diku dia mukelenge, wakahunga nʼandi tshihungidi, wakamutshihisha mutshihu ku bukole. Wakaya ne bantu baneme ba mu buloba ebu, bua bukelenge buikale buhuekele, bua kabudibandishi kabidi, kadi bumanye mua kujalama ku kutumikila kua tshihungidi. Kadi muntu wakasunguleye wakatombokela mukelenge, hakatumeye miloho yandi mu Ejipitu, bua bamuhe tubalu ne masalayi a bungi. Neikale ne diakalengele, anyi? Udi wenza malu bu nunku neahanduke, anyi? Neahanduke hashiheye tshihungidi tshiakahungeye, anyi? Mukelenge Yehowa udi wamba ne, Bu mundi meme ne muoyo, bulelela, yeye neafue mu muaba udi mukelenge wakamubuesha mu bunfumu mushikame, muena mutshihu udiye muhetule, muena tshihungidi tshidiye mushihe, mu Babulona mene. Palô ne tshisumbu tshiandi tshinene tshia masalayi ne tshia bena nvita ba bungi kabena mua kumukuatshisha mu dituku dia nvita, haluabo kukungisha mishiki ya buloba ne kuela mabula manene a kutshintshimika nʼau musoko, bua kushihabo bantu ba bungi. Bualu bua yeye wakahetula mutshihu wandi hakashiheye tshihungidi; wakakuatangana bianza ne mukelenge bua kuditshiha kudiye, kadi wakenza malu â onso; kena mua kuhanduka. Nunku Mukelenge Yehowa udi wamba ne, Bu mundi meme ne muoyo, bua mutshihu wanyi wakahetuleye ne tshihungidi tshianyi tshiakashiheye, nemmukengeshe. Nemmuande bukuondo buanyi, neakuatshibue mu buteyi buanyi; nendue nʼandi ku Babulona, nemmulumbuluishileku bua ditomboka diandi diakantombokeleye. Bonso ba mu bisumbu biandi bia masalayi badi banyema nebashihibue ku muele wa nvita, ne badi bashala nebamuangalashibue ku mpehele yonso; nunku nenumanye ne, Meme Yehowa nguakuamba dî. Mukelenge Yehowa udi wamba ne, Meme kabidi nengangate lusongo lua mutshi wa cèdre, nendushimike hanshi; nengahule ditamba ditekete didi ku mutu kualu, nendikune ha mutu ha mukuna mule munangahale. Nendikune ha mutu ha mukuna mule wa Isalele; nediase matamba, nedikuame mamuma, nedilue mutshi wa cêdre muakane; muinshi muau nemuikale nyunyu ya mishindu yonso, mu dileshi dia matamba au neyase masua ai. Mitshi yonso ya mu mpata neyimanye ne, Meme Yehowa nakuhuekesha mutshi mule, nakubandisha mutshi muhuekele, nakûmisha mutshi mubishi, nakuelesha mutshi mume ntonga; meme Yehowa nakuamba dî edi ne nakudienza. Di dia Yehowa diakalua kundi kabidi ne, Nudi nuelela lusumuinu elu mu buloba bua Isalele ne, Batatu bakadia tumuma tua nvinyo tua buanji, ne menu a bana adi ne nvuenvue bualu kai? Mukelenge Yehowa udi wamba ne, Bu mundi meme ne muoyo, kanuena ne ha kuelela lusumuinu elu mu buloba bua Isalele. Tangilai, mioyo ya bantu bonso nyanyi; bu mudi muoyo wa tatu nguanyi, nunku muoyo wa muanʼandi wa balume nguanyi kabidi; muntu udi wenza bualu bubi, yeye muine neafue. Mukelenge Yehowa udi wamba ne, Bikala muntu muakane, ne bienzeye malu adi makanangane ne mikenji ne malu adi makane, ne bikaleye kayi mudie munyinyi muelele mpingu ha mikuna, kayi muanze kutangisha mesu andi ku mpingu ya ba mu tshisamba tshia Bena Isalele; bikaleye kayi munyange mukashi wa muena mutumba nʼandi, ne bikaleye kayi mulue hehi ne mukashi mu tshikondo tshia tshijila tshiandi; bikaleye kayi muenzele mukuabo bibi, kadi muhingashile muena dibanza tshieya tshiandi, kayi munyenge bintu ku bukole, kadi muhe bakadi ne nzala bia kudia biandi, ne muluatshishe bakadi butaka bivualu; bikaleye kayi musombeshe mukuabo bintu bua kuheta kasombelu ka ha mutu, kayi mudiangatshile makasa; biumusheye tshianza tshiandi ku malu mabi, biakoseye bilumbu bia hankatshi ha muntu ne muntu anu ne kulumbulula kuakane, bialondeye mikenji yanyi, biatumikileye mei anyi bua kuenzeye bimpe, muntu eu udi muakane, neikale ne muoyo bulelela. Bialeleye muana mulume udi munyengi wa bintu ne mumatshishi wa mashi hanshi, anyi udi wenza bualu bukuabo budi bua mushindu eu; udi uhanga kuenza malu akadiye ne bua kuenza, kadi wakudia munyinyi muelele mpingu ha mikuna, ne wakunyanga mukashi wa muena mutumba nʼandi, wakuenzela bahele ne bakengi bibi, wakunyenga bintu ku bukole, kakuhingasha tshieva kudi muenʼatshi, wakutangisha mesu andi ku mpingu, wakuenza malu a bundu, wakusombesha bakuabo bintu bua kuheta kasombela ne wakudiangatshila makasa, muntu eu neikale ne muoyo, anyi? Nansha, kena wikale ne muoyo. Wakuenza malu â onso a tshinyangu; nebamushihe bulelela; mashi andi neikale hamʼbidi handi. Kadi bialela muntu eu muana mulume udi umona malu mabi onso adi tatu wandi wenza ne udi utshina ne kena wenza muomumue: udi kayi udia munyinyi muelele mpingu ha mikuna, udi kayi utangisha mesu andi ku mpingu ya ba mu tshisamba tshia Bena Isalele, udi kayi unyanga mukashi wa muena mutumba nʼandi, udi kayi wenzela mukuabo bibi, kayi wangata tshieya kudi muena dibanza, udi kayi unyenga tshintu ku bukole kadi udi ufila bia kudia biandi kudi badi ne nzala, udi uluatshisha muntu udi butaka tshialu, udi umusha tshianza tshiandi ku malu mabi, udi kayi wangata kasombela anyi makasa, udi ulonda mikenji yanyi, udi utumikila mei anyi; muntu eu kena ufua bua bubi bua tatu wandi, neikale ne muoyo bulelela. Kadi bua tatu wandi mene, bualu bua wakakengesha bakuabo bikole, wakanyenga bintu kudi bana babo ku bukole ne wakenza malu adi kâyi makane munkatshi mua bana babo; monai, neafue bua mihi yandi. Kadi nudi nunkonka ne, Bualu kai muana kena ne bua kuhila bua mihi ya tatu wandi? Bikala muana muenze malu adi makanangane ne mikenji ne malu adi makane, ne bikaleye mutumikile mikenji yanyi ne muyenze, yeye neikale ne muoyo bulelela. Muntu udi wenza bibi nyeye muine udi ufua; muana wa balume kena ne bua kuhila bua mibi ya tatu, ne tatu kena ne bua kuhila bua mihi ya muanʼandi wa balume. Buakane bua muntu muakane nebuikale hamʼbidi handi, bubi bua muntu mubi nebuikale hamʼbidi handi. Kadi bialekela muntu mubi malu mabi andi onso akenzeye, biatumikileye mikenji yanyi yonso ne bienzeye malu adi makanangane ne mikenji ne malu adi makane, neikale ne muoyo bulelela, kena ufua nansha. Kabena bavuluka bualu bumue bua mu malu mabi akenzeye diambedi bua kumubunda nʼabu; mu buakane buandi buakenzeye yeye neikale ne muoyo. Mukelenge Yehowa udi ukonka ne, Ndi ne disanka bua lufu lua bantu babi, anyi? Tshiena nsanka bua yeye umuke mu nshila wandi mubi bua ikale ne muoyo, anyi? Kadi bialekela muntu buakane buandi ne bienzeye malu mabi ne bialondeye bienzedi bionso bia tshinyangu bidi muntu mubi wenza, yeye neikale ne muoyo, anyi? Kabena bavuluka bualu bumue bua mu malu makane akenzeye. Bua ditomboka diandi ne bua bubi budiye wenza, yeye neafue. Kadi nuenu nudi nuamba ne, Nshila wa Mukelenge kena mululame. Unvuai, nuenu ba mu tshisamba tshia Bena Isalele. Nshila wanyi kena mululame, anyi? Nshila yenu kayena mikonyangale, anyi? Bialekela muntu buakane buandi ne bienzeye malu mabi, neafuilemu; bua bubi buakenzeye yeye neafue. Kadi bialekela muntu mubi bubi buakadiye wenza ne bienzeye malu adi makanangane ne mikenji ne malu adi makane, neahandishe muoyo wandi. Bualu bua udi welangana meji munda ne udi ulekela malu mabi onso akenzeye diambedi, bulelela, yeye neikale ne muoyo, kena mua. Kadi ba mu tshisamba tshia Bena Isalele badi bamba ne, Nshila wa Mukelenge kena mululame. Nuenu Bena Isalele, nshila yanyi kayena milulame, anyi? Nshila yenu kayena mikonyangale, anyi? Nunku, Mukelenge Yehowa udi wamba ne, Nuenu Bena Isalele, nennulumbuluishe, muntu yonso bu mudi bienzedi biandi. Alukilai, kudimunai mitshima yenu bua kulekela malu mabi enu, bua bubi buenu kabuikadi bu tshilenduishi kunudi. Nudiumushile malu mabi enu onso anuakungenzela, nudiangatshile mutshima muhia-muhia ne nyuma muhia-muhia. Bualu kai nudi basue kufua, nuenu ba mu tshisamba tshia Bena Isalele? Bualu bua Mukelenge Yehowa udi wamba ne, Tshiena ne disanka bua lufu lua muntu udi ufua; nunku nuhingane kundi, nuikale ne muoyo. Nunku wewe washile baminyampala ba mu Isalele madilu, wamba ne, Mamu webe wakadi nganyi? Wakadi nyama wa ntambue mukashi munkatshi mua nyama ya ntambue mikuabo; wakalala munkatshi mua bana ba nyama ya ntambue, wakakolesha bana bandi. Wakakolesha muanʼandi mukuabo, tô ne hakatantamaneye, ne wakayila mua kukuata nyama ya kudieye; wakadia bantu. Ba mu bisamba bia bantu bakunvua lumu luandi, bakamukuata mu dijimba diabo; bakaya nʼandi musuika nkanu tô ne mu buloba bua Ejipitu. Hakatangila mamuʼandi ne, Nakumuindila ne ditekemena dianyi didi dijimina, yeye wakangata muanʼandi mukuabo, wakamulekesha tô ne hakatantamaneye. Yeye wakendakana munkatshi mua ntambue mikuabo, wakalua biandi nyama mukole; wakayila mua kukuata nyama ya kudieye; wakadia bantu. Wakanyanga nsubu yabo minene, wakabutula misoko yabo; buloba buakanyanguka ne bintu biabu bionso, bualu bua mukungulu wa muadi wandi. Hashishe ba mu bisamba bia bantu bakamunyunguluka ne mateyi, bakamuanda bukuondo, bakamukuata mu dijimba diabo. Bakamuteka mu tshikumbi, bamuela nkanu, bakaya nʼandi kudi mukelenge wa Babulona; bakamuteka mu miaba mikole, bua dî diandi kadiunvuiki ha mikuna ya Bena Isalele. Mamu webe wakadi bu muonshi, mufuanangane nʼebe, mukuna hehi ne mai. Wakakuama mamuma a bungi, wakadi ne matamba a bungi, bualu bua bungi bua mai. Wakasa matamba makole, akalua bu makombo a bakokeshi, munkatshi mua matamba au mangi, wowo wakaleha mulu; akamueneka bua bule buau ne bua bungi bua matamba au. Kadi bakajula muonshi au ne tshifikʼa munda, bakawela hanshi ha buloba; luhehele lua ku esete luakafubisha mamuma au; matamba au makole akufubidila, ne kahia kakawosha. Mpindiu bakamana kûkuna mu tshihela, mu buloba bûme budi kabuyi ne mai. Kahia kakahatuka mu matamba au, kakosha matamba ne mamuma au; nunku kamuakushala ditamba dikole bu dikombo dia kukokesha nʼadi. Eu udi musambu wa muadi, newikaleku bu kasala ka madilu. Mu tshidimu tshia muanda mutekete, mu ngondo muitanu ne mu dituku dia dikumi dia ngondo, bakuabo ba munkatshi mua bakulu ba Bena Isalele bakalua kulomba lungenyi kudi Yehowa, bakashikama ku mpala kuanyi. Nunku dî dia Yehowa diakalua kundi ne, Muana wa muntu, akula ne bakulu ba Bena Isalele, ubambile ne, Mukelenge Yehowa udi unukonka ne Nuakulua kulomba lungenyi kundi, anyi? Mukelenge Yehowa udi wamba ne, Bu mundi ne muoyo, tshiena ngitabusha bua nuenu milombe lungenyi kundi. Muana wa muntu, wewe neubalumbuluishe, anyi? Neubalumbuluishe, anyi? Nunku ubamanyishe bua malu a tshinyangu a batatu babo. Ubambile ne, Mukelenge Yehowa udi wamba ne, Mu dituku dinakasungula Isalele, ne dinakabisha tshianza tshianyi bua kuditshiha kudi tunkanunuma tua Yakoba, ne dinakadimuenesha kudibo mu buloba bua Ejipitu, hanakaditshiha kudibo mutshihu eu ne, Meme ndi Yehowa, Nzambi wenu; mu dituku adi nakabisha tshianza tshianyi bua kuditshiha kudibo bua kubahatula mu buloba bua Ejipitu ne kubateka mu buloba bunakamana kubatentekelela, buloba budi bûle tente ne mabele ne buitshi, budi ne butumbi ku mpala kua maloba onso. Nakabambila ne, Buonso buenu, muntu ne muntu, nuimashe bintu bionso bia tshinyangu bidi binusamina muoyo, kanudinyangi ne mpingu ya mu Ejipitu, bualu bua meme ndi Yehowa Nzambi wenu. Kadi bobo bakantombokela, kabakangunvuila. Kabakimasha, muntu ne muntu, bintu bia tshinyangu biakadi bibasamina muoyo, kabakalekela mpingu ya mu Ejipitu. Nunku nakahangidisha bua kuba koleshila tshiji tshianyi, bua kubamanyina tshiji tshianyi tshikole mu buloba bua Ejipitu. Kadi nakabenzela malu â bualu bua dina dianyi, bua kadihendibu ku mesu kua ba mu bisamba bia bantu, kuakadibo bashikama, bantu mene bakadi bantangila hanakadimuenesha kudi Bena Isalele mu dituku dinakabahatula mu Ejipitu. Nunku nakabahatula mu buloba bua Ejipitu, nakalua nʼabo mu tshihela. Nakabaha mei anyi a kulondabo, nakabamanyisha mikenji yanyi; muntu wayenza neikale ne muoyo bua bualu buai. Nakabaha matuku anyi a mbingu kabidi, bua kuikalau tshimanyinu hankatshi hanyi nʼabo, bua bobo bamanye ne, Meme Yehowa ngudi ubajidila. Kadi Bena Isalele bakantombokela mu tshihela, kabakalonda mei anyi, bakahidia mikenji yanyi idi ivuisha muntu muoyo hayenzeye, ne bakanyanga matuku anyi a mbingu. Nunku nakahangidisha bua kubakoleshila tshiji tshianyi mu tshihela bua kubabutula. Kadi nakabenzela malu â bualu bua dina dianyi, bua kadihendibu ku mesu kua ba mu bisamba bia bantu bakadi bantangila banakahatula Bena Isalele mu Ejipitu. Bualu bukuabo kabidi, nakabisha tshianza tshianyi bua kuditshiha kudibo mu tshihela ne, Tshiena ndua nʼenu mu buloba bunakanuha, buloba budi bûle tente ne mabele ne buitshi, budi ne butumbi ku mpala kua maloba onso. Bualu bua bakabenga mikenji yanyi, kabakalonda mei anyi ne bakanyanga matuku anyi a mbingu; bualu bua mitshima yabo yakadi isamina mpingu yabo muoyo. Kadi mesu anyi akabatangila ne luse, tshiakabashiha nansha ne tshiakababutula buonso buabo mu tshihela. Mu tshihela nakambila bana bakalelabo ne, Kanulondi malu a batatu benu, kanutumikidi mikenji yabo, kanudinyangi ne mpingu yabo. Meme ndi Yehowa Nzambi wenu; nuende mu mei anyi, nutumikile mikenji yanyi, nuyenze. Nujidile matuku anyi a mbingu kabidi, ikale biau tshimanyinu hankatshi banyi nʼenu, bua nuenu numanye ne, Meme ndi Yehowa Nzambi wenu. Kadi bana bakantombokela kabidi; kabakenda mu mei anyi, kabakatumikila mikenji yanyi bua kuyenza, idi ivuisha muntu muoyo hayenzeye; bakanyanga matuku anyi a mbingu. Nunku nakahangidisha bua kubakoleshila tshiji tshianyi, bua Kubamanyina tshiji tshianyi tshikole mu tshihela. Kadi nakumusha tshianza tshianyi kudibo, nakabenzela malu â bua dina dianyi kadihendibu ku mesu kua ba mu bisamba bia bantu bakantangila hanakahatula Bena Isalele mu Ejipitu. Kadi nakabisha tshianza tshianyi bua kuditshiha kudibo mu tshihela ne, Nennumuangalashe munkatshi mua bisamba bia bantu, nennutangadishe mu maloba makuabo, bualu bua kabakenza mikenji yanyi kadi bakahidia mei anyi, bakanyanga matuku anyi a mbingu, ne mioyo yabo yakasamina mpingu ya batatu babo muoyo. Nakabaha mei a kulondabo akadi kâyi makane, ne mikenji yakadi kayiyi mua kubavuisha muoyo. Nakabihishisha kuha kuabo, bualu bua bakela banʼa bute babo mu kahia bu milambu ya kuosha, bua meme mmanye mua kubabutula, ne bua bobo bamanye ne, Ndi Yehowa. Nunku, muana wa muntu, akula ne ba mu tshisamba tshia Bena Isalele, ubambile ne, Mukelenge Yehowa udi wamba ne, Batatu benu bakahenda dina dianyi hakantombokelabo. Bualu bua hanakalua nʼabo mu buloba bunakaditshiha bua kubaha, ne bobo bakatangisha mesu abo ku mukuna wonso mule anyi ku mutshi wonso wa mabeshi a bungi, bakafilahu milambu yabo, bakafilahu bintu biakankuatshisha tshiji; bakoshelaku bintu bia muhuya muimpe, bakahongololaku milambu ya bia kunua. Hashishe nakabebesha ne, Muaba eu mubandile unudi nuya mmuaba kai? Nunku badi babikila muaba eu ne, Bama, tô ne ku lelu eu. Nunku ambila ba mu tshisamba tshia Bena Isalele ne, Mukelenge Yehowa udi wamba ne, Kanuena nudinyanga bu muakenza batatu benu, anyi? Kanuena nuenda masandi mu kulonda kuenu kua malu abo a tshinyangu, anyi? Hanuafila kuha kuenu, hanuela bana benu mu kahia, kanuena nudinyanga ku mpingu yenu yonso tô ne ku lelu eu, anyi? Nenumanye mua kulomba lungenyi kundi munyi, nuenu ba mu tshisamba tshia Bena Isalele? Mukelenge Yehowa udi wamba ne, Bu mundi ne muoyo, tshiena ngitabusha bua nuenu nulombe lungenyi kundi. Meji au kabidi, anudi nuhangidisha kaena ajalama, bualu bua nudi nuamba ne, Netuikale bu bisamba bia bantu, bu meku a mu maloba makuabo, netukuatshile mutshi ne dibue mudimu. Mukelenge Yehowa udi wamba ne, Bu mundi ne muoyo, nengikale mukelenge ku mutu kuenu ne tshianza tshikole, ne diboko diolola kunudi, ne tshiji tshianyi tshinukoleshile. Ku tshianza tshikole, ku diboko diolola kunudi, ne ku tshiji tshianyi tshinukoleshile, nennuhatule munkatshi mua bantu ba bende, nennusangishe bua kunûmusha mu maloba akanumuangalashabo. Nendue nʼenu mu tshihela tshia bantu ba bende, nendumbulule nʼenu mpala ne mpala. Mukelenge Yehowa udi wamba ne, Bu munakalumbulula ne batatu benu mu tshihela mu buloba bua Ejipitu, nunku nendumbulule nʼenu. Nennuhitshishe muinshi mua mulangala, nennusuike mu tshihungidi. Nengumushe badi bantombokela ne badi bangenzela bibi munkatshi muenu. Nembahatule mu buloba budibo bashikame, kadi kabena babuela mu buloba bua Isalele; nunku nenumanye ne, Meme ndi Yehowa. Mukelenge Yehowa udi wamba bua bualu buenu, nuenu ba mu tshisamba tshia Bena Isalele, ne, Yai bienu, muntu ne muntu, nukuatshile mpingu yenu mudimu; kadi ku nyima nenungunvuile bimpe, ne kanuena munyanga dina dianyi dia tshijila ku bintu binudi nufila ne ku mpingu yenu. Mukelenge Yehowa udi wamba ne, Bualu bua ha mukuna wanyi wa tshijila, ha mukuna wa Isalele udi mubande mulu, bonso ba mu tshisamba tshia Bena Isalele, buonso buabo mene, nebankuatshile mudimu mu buloba ebu. Mu muaba wawa nembitabushe, ne mu muaba wawa nennulombe milambu yenu ne mamuma a kumudilu anudi nufila kundi ne bintu bienu bionso bia tshijila. Nennuitabushe bu tshintu tshidi tshintuila dihembu, hananuhatula munkatshi mua bantu ba bende, hananusangisha bua kunûmusha mu maloba akanutangadishabo; nendimueneshe Wa Tshijila munkatshi muenu ku mpala kua bisamba bionso. Nunku nenumanye ne, Ndi Yehowa, hanalua nʼenu mu buloba bua Isalele, mu buloba bunakaditshiha bua kuha batatu benu. Mu muaba wawa nenuvuluke malu enu ne bienzedi bienu bionso, binuakadinyanga nʼabi; malu mabi enu onso anuakenza neanutonde. Mukelenge Yehowa udi wamba ne, Tshiena nnuenzela bu mudi malu mabi enu, anyi bu mudi bienzedi bienu binyanguke, nuenu ba mu tshisamba tshia Bena Isalele, kadi nenumanye ne, Ndi Yehowa, hananuenzela malu bua dina dianyi. Dî dia Yehowa diakalua kundi ne, Muana wa muntu, tangisha mpala webe ku luseke lua ku sude, ela dî diebe ku luseke lua ku sude; amba mei a kubela nʼau ditu dia ku luseke lua ku Sude. Ambila ditu dia ku Sude ne, Unvua dî dia Yehowa! Mukelenge Yehowa udi wamba ne, Mona! Nentemeshe kahia munkatshi muebe, nekoshe mutshi mubishi wonso udimu ne mutshi mume wonso; kahia kadi kalamba kakena kajima, nekoshe mpala yonso ya ku luseke lua sude tô ne ku nôde. Bantu bonso nebamone ne, Meme Yehowa nguakakatemesha; kakena kajima. Hashishe nakamba ne, Aka, Mukelenge Yehowa! Badi bamba bualu buanyi ne, Yeye kena muedi wa nsumuinu, anyi? Dî dia Yehowa diakalua kundi ne, Muana wa muntu, tangisha mpata webe ku Yelushalema, ela dî diebe ku miaba ya tshijila, bela buloba bua Isalele. Ambila buloba bua Isalele ne, Yehowa udi wamba ne, Ndi nkuhidia, nempatule muele wanyi wa nvita mu tshimanga tshiau, nembutule bantu ba munkatshi muenu, bakane ne babi. Bualu bua ndi mbutula bantu bakane ne bantu babi ba munkatshi muebe, nunku muele wanyi wa nvita neuhatuke mu tshimanga tshiau bua kutaha bantu bonso ba ku luseke lua sude tô ne ku luseke lua node. Bantu bonso nebamanye ne, Meme Yehowa nakuhatula muele wanyi wa nvita mu tshimanga tshiau; kawena uhinganamu kabidi. Nunku, muana wa muntu, humuna muoyo, humuna muoyo ne kanyinganyinga kakole ne mutshima wa majia ku mesu kuabo. Hakukonkabo ne, Bualu kai udi uhumuna muoyo? Wewe ubakudimune dî ne, Bualu bua lumu ludi lulua; ne halunvuabo, mitshima ya bantu bonso neyihandike, maboko onso neikale matekete, mioyo ya bantu bonso neyihange, binu bionso nebitekete-teketê bu mai. Mukelenge Yehowa udi wamba ne, Tangila, bualu ebu hudi bulua, nebuenjibue. Dî dia Yehowa diakalua kundi kabidi ne, Muana wa muntu, ambila bantu mei a buprofete buebe, ubambile ne, Yehowa udi wamba ne, Muele wa nvita, muele wa nvita, udi musekeshibue bimpe ne udi munonoke kabidi; udi musekeshibue bua kushiha nʼau bantu, udi munonoke bua kuhenya bu muele wa nvula! Tuetu netusekeshangane, anyi? Wewe mulangala wa muanʼanyi wa balume, udi uhetula mutshi wonso. Badi baufila bua kûnonabo, bua baukuate mu tshianza; muele wa nvita udi musekeshibue ne munonoke bua bauteke mu tshianza tshia mushihianganyi. Muana wa muntu, asa muadi, dila biebe! Bualu bua muele udi utaha bantu banyi ne bakokeshi bonso ba Bena Isalele. Bakabateka ku mpata kua muele wa nvita, bobo ne bantu banyi hohamue. Nunku uditute ku tshibelu. Bualu bua kuteta kudiku; Mukelenge Yehowa udi ukonka ne, Wamanya mua kuhetula mulangala wanyi nganyi? Nunku, wewe, muana wa muntu, amba mei ebe, tuta tshikashi, muele wa nvita utahe tshiakabidi, utahe tshiakasatu, muele wa nvita wa bantu bashihibue, muele wa nvita mene wa bantu bashihibue udi ubalamina ku nseke yonso. Nakubabishila muele wa nvita bua kubakuatshisha buowa, tô ne hahandika mitshima yabo, bua bantu ba bungi badishinde hehi ne bibi biabo bionso. Muele wa nvita udi uhenya bu muele wa nvula, udi musekeshibue bua kushiha nʼau bantu! Tshunguluka, wewe, muele wa nvita, ku luseke lua tshianza tshia balume, ne ku luseke lua tshianza tshia bakashi, kuonso kudi mpata webe utangila! Meme kabidi nentute bikashi, nendekele tshiji tshianyi; meme Yehowa nakuamba mei anyi. Dî dia Yehowa diakalua kundi kabidi ne, Wewe kabidi, muana wa muntu, usungule nshila ibidi idi muele wa nvita wa mukelenge wa Babulona mua kuyilamu, bubidi buai mihatuke mu buloba bumue; teka tshimanyinu mu nshila, utshiteke ku disanga dia nshila udi mutangile ku musoko. Sungula biebe nshila bua muele wa nvita uyilemu bua kufika ku Laba, musoko wa Bena Amona, ne nshila wa ku Yelushalema, musoko wa mu Yuda, udi munyunguluke ne ngumbu. Bualu bua mukelenge wa Babulona udi wimana ku masangu a nshila, kundekelu kua nshila ei ibidi, bua kutempesha lubuku; udi unyungisha mikete, udi webesha telafima, udi utangila mu mutshima wa nyama. Bintu bia kutempa nʼabi bia mu tshianza tshiandi tshia balume biakamulesha bua Yelushalema bantu kushikamamu, mua kuela mbila ya nvita, mua kujadika mitshi minene ku mpala kua bibi bua kubishimbula, mua kuela mishiki ya buloba ne kuasa bibumba bia kutshintshimika nʼabi musoko. Ku mesu kua ba mu Yelushalema kutempa eku kua mbuku nekuikale bu kutempa kudi kubadinga, bualu bua badi bela meji ne, Tshikondo netshilehe tô ne ku mbingu ya bungi; kadi Yehowa udi uvuluka bubi buabo, bua bobo bakuatshibue. Nunku Mukelenge Yehowa udi wamba ne, Bualu bua nuakunvuluisha bua mibi yenu, bua malu mabi enu akusokolodibua, ne mibi yenu idi imueneka mu bienzedi bienu bionso; bualu bua badi banuvuluka ku malu â nebunukuate ku bukole. Ne wewe, muntu mubi udi mutaha ne mputa wa lufu, mukokeshi wa Bena Isalele, muena dituku dia dikenga didi ha buihi, mu tshikondo tshia dikenga dia kunshikidilu, Mukelenge Yehowa udi ukuambila ne, Umusha tshitambala, utule tshifulu tshiebe tshia bunfumu; malu onso neandamuke! Bandisha bahuekele, huekesha babandile. Nembutule, nembutule, nembubutule kabutu; kabuena buikalaku kabidi tô ne halua udi muakanangane nʼabu, ne nemuhebu. Wewe kabidi, muana wa muntu, amba mei a buprofete buebe, ubambile ne, Mukelenge Yehowa udi wamba bualu bua Bena Amona, bua bihendu bidibo bahenda nʼabi Bena Isalele, ne, Muele wa nvita, muele wa nvita, udi muhatula bua kushiha nʼau bantu, udi munonoke bua kuhenya bu muele wa nvula; bualu bua bakukulesha bikena kumona bidi bikudinga, bakukutempela mbuku ya mashimi, bakukuelela mukenji bua wewe kuteka muele eu ha nshingu ya bantu babi badi batahibue mputa ya lufu, bena dituku diakumana kufika mu tshikondo tshia dikenga dia kunshikidilu. Uhingashe mu tshimama tshiau! Bualu bua mu muaba wakakufukabo, mu buloba buwakaledibua, nenkulumbuluishe. Nenkukoleshe tshiji tshianyi, nenkuelele kahia ka tshiji tshianyi; nenkufile mu bianza bia bantu badi bu nyama mene, badi ne lungenyi lule lua kubutula nʼalu bakuabo. Newikale bu lukunyi mu kahia; mashi ebe neamate mu buloba; kabena bakuvuluka kabidi; bualu bua meme, Yehowa, nakuamba nunku. Dî dia Yehowa diakalua kundi kabidi ne, Wewe, muana wa muntu, neulumbuluishe, neulumbuluishe musoko eu wa bamatshishi ba mashi hanshi, anyi? Nunku ubamanyishe bua malu abo onso a tshinyangu. Amba biebe ne, Mukelenge Yehowa udi wamba ne, Wewe musoko udi umatshisha mashi hanshi munkatshi muau, bua tshikondo tshia kubutuka kuau tshifike kudiu, udi udisongela mpingu bua wowo unyanguke! Wewe wakuhila bua mashi awakumatshisha hanshi, wakunyanguka bua mpingu yebe iwakusonga; wakusemesha dituku dia kubutuka kuebe ha buihi, wakukumbasha bidimu bia meme kukubadila malu mabi ebe; nunku nakukuvuisha tshintu tshidibo bahenda kudi bisamba bia bantu, ne tshidibo baseka kudi ba mu maloba mikuabo onso. Badi ha buihi nʼebe ne badi kule nebakuseke, wewe umena lumu lubi, mûle tente ne diyoyo. Tangila, baminyampala ba Betu Isalele, bakumatshisha mashi a be munkatshi muenu hanshi, muntu ne muntu bu muakadi bukole buandi. Ba munkatshi muenu bakuhetula batatu ne bamamu; ba munkatshi muenu bakukengesha muntu wa bende; ba munkatshi muenu bakuenzela bana ba nshiya ne bakashi ba na lufuila bibi. Wakuhetula bintu bianyi bia tshijila, wakunyanga mataku anyi a mbingu. Ba munkatshi muenu bakusonguelangana bua kumatshishabo mashi a bakuabo hanshi; munkatshi muenu muakadi bantu bakadia bintu bielela mpingu ha mikuna; munkatshi muenu muakadi bantu bakulonda malu a masandi. Bakuabo ba munkatshi muenu bakuhia tshibindi ne bakashi ba batatu babo; ba munkatshi muebe bakufuisha bakashi bundu hakadibo mu tshikondo tshia tshijila tshiabo. Mukuabo wakuenza bualu bua bundu ne mukashi wa muena mutumba nʼandi; munga wakunyanga mukashi wa muanʼandi mulume ne wakuhia tshibindi; mukuabo wa munkatshi muenu wakufuisha muanʼabo mukashi bundu, muana wa tatuʼandi mumuledi mene. Mukelenge Yehowa udi wamba ne, Bakuabo ba munkatshi muenu bakuitabusha mbueshilu bua kumatshisha mashi a bakuabo hanshi; wewe wakulomba bia kasombela ne bia makasa, wakunyenga bintu kudi bena mutumba nʼebe ku bukole; wakumpua muoyo. Tangila, bua malu â nakukatshila bua bintu biwakunyenga ku mashimi ebe, ne bua mashi awakumatshisha munkatshi muenu. Mutshima webe udi mua kushindama ne bianza biebe bidi mua kushala bikole mu dituku dindi nkubikila ku tshilumbu, anyi? Meme, Yehowa, nakuamba dî edi, nendijadike kabidi. Nenkutangadishe munkatshi mua bisamba bia bantu, nenkumuangalashe munkatshi mua maloba makuabo; nengumushe bukoya budi munda muebe. Nebakufuishe bundu ku mesu kua bisamba bia bantu; neumanye ne, Meme ndi Yehowa. Dî dia Yehowa diakalua kundi ne, Muana wa muntu, ba mu tshisamba tshia Bena Isalele bakulua bu bikanganya kundi; buonso buabo bakadi bu tshiamu tshia mitaku, bu tshiamu tshia étain, bu tshiamu tshifike ne bu tshiamu tshia lutende mu ditanda, bakulua bu bikanganya bia tshiamu tshia argent. Nunku Mukelenge Yehowa udi wamba ne, Bualu bua buonso buenu nuakulua bu bikanganya, nunku tangilai, nennusangishe hohamue munkatshi mua Yelushalema. Bu mudi muntu usangisha tshiamu tshia argent, tshiamu tshia mitaku, tshiamu tshifike, tshiamu tshia lutende ne tshiamu tshia êtain mu ditanda, bua kuimba mubanze ne kubiela kahia bua kubiengulula, nunku nennusangisheku mu tshiji tshianyi ne mu tshiji tshianyi tshikole, nennuelemu, nennuengulule. Eyo, nennusangishe hohamue, nennuele muhuya ne kahia ka tshifikʼa munda, nenuenguluke mu musoko eu. Bu mudi tshiamu tshia argent tshienguluka mu ditanda, nunku nuenu nenuenguluke mu musoko. Nunku nenumanye ne, Meme, Yehowa, nakunuhongoluela tshiji tshianyi tshikole. Dî dia Yehowa diakalua kundi kabidi ne, Muana wa muntu, ambila Yelushalema ne, Wewe udi buloba budi kabuyi bulengeshibue, budi nvula kayi mulokelehu mu dituku dia tshiji tshikole. Baprofete bandi badi bu nyama wa ntambue udi wasa muadi hatshidiye udia nyama wakukuateye; bakujimisha mioyo ya bantu, badi banyenga bintu bia mu tshibutshilu ne bintu bia mushinga mukole, bakuvuisha bakashi ba mu lufuila ba bungi munkatshi muabo. Bakuidi bandi bakushiha mikenji yanyi, bakunyanga bintu bianyi bia tshijila; kabakusungulula bintu bia tshijila ne bintu bia hatuhu, kabakuyisha bantu mua kujingululabo ditahuluka didi hankatshi ha bintu bibiha ne bidi kabiyi bibiha; bakusokoka mesu abo ku kunyanga kua matuku anyi a mbingu, ne meme ndi muhendibue munkatshi muabo. Bakokeshi bandi badi bu nyama ya nkashama idi idia nyama yakukuatayi, badi bamatshisha mashi a bakuabo hanshi, badi bajimisha mioyo ya bantu bua kuheta luhetu ku buibi buabo. Baprofete bandi badi balaba luhemba ku bimanu bia nsubu yabo, badi baula bikena kumona bidi bibadinga, badi babadinga ne ditempa dia mbuku ya mashimi, bamba ne, Mukelenge Yehowa udi wamba nunku, Yehowa kayi muanze kuamba dî nansha. Bena buloba bakukengeshangana hatuhu, bakunyenga bintu bia bakuabo; bakutatshisha bahele ne bakengi, bakukengesha muntu wa bende wakadi kayi ne bualu. Nakakeba muntu munkatshi muabo wakamanya mua kuibaka lumbu kabidi, ne bua kuimaneye ku mpala kuanyi mu muaba wakashimbuka bua kukuatshisha ba mu buloba ebu, bua meme tshibubutudi; kadi tshiakasangana muntu. Mukelenge Yehowa udi wamba ne, Nunku nakubahongoluela tshiji tshianyi tshikole; nakubabutula ne kahia ka tshifikʼa munda; nakubatumina dikenga bualu bua bienzedi biabo. Dî dia Yehowa diakalua kundi kabidi ne, Muana wa muntu, bakashi babidi bakadiku, bana ba difu dimue. Bakalonda malu a masandi mu Ejipitu; bakalonda malu a masandi hakatshidibo bansongakashi. Mu buloba abu balume bakakamata mabele abo, ne bakalenga bianza biabo ha biadi bia bumama buabo. Mena abo akadi Ohola, muanʼa bute, ne Oholiba, muakunyʼandi. Bakalua banyi, bakalela bana ba balume ne bana ba bakashi. Mena abo akadi nunku: Samalea udi Ohola, ne Yelushalema udi Oholiba. Ohola wakalonda malu a masandi hakadiye wanyi, wakatamba kulesha dinanga kudi bamunangi bandi, kudi Bena Ashû mene, bena mutumba nʼandi, bakadi baluate bilulu bikunze, bakadi ba-gouverneur ne miloho, buonso buabo bakadi bansongalume balengele, bakenda babande ha nyima ha tubalu. Yeye wakadifila kudibo mu masandi, buonso buabo bakadi balume bahite bulengele ba munkatshi mua Bena Ashû; wakadinyanga ne mpingu ya bantu aba bakatambeye kunanga. Katshia ku matuku akatumeye mu Ejipitu, kena muanze kulekela masandi andi; bualu bua ku bunsongakashi buandi bakasangila nʼandi bulalu, bakalenga bianza biabo ku mabele a bumama buandi, bakatamba kulonda nʼandi malu a masandi. Bua malu â nakamufila mu bianza bia bamunangi bandi, mu bianza bia Bena Ashû mene bakatambeye kunanga. Bobo bakamuvula bivualu biandi, bakakuata bana bandi ba balume ne ba bakashi, bakamushiha ne muele wa nvita; ne hakamulumbuluishabo, lumu luandi luakanyanguka munkatshi mua bakashi bakuabo. Muakunyʼandi Oholiba wakamona muanda eu, kadi yeye wakatamba mukuluʼandi kunyanguka ku lukuka, ne masandi andi akahita a mukuluʼandi bukole. Yeye wakatamba kunanga Bena Ashû, ba-gouverneur ne miloho, bena mutumba nʼandi, baluate bivualu bihite bulengele, bende ha nyima ha tubalu, buonso buabo bakadi bansongalume balengele. Nakatangila bu muakadinyangeye, bakashi aba babidi bakaya mu nshila umue. Yeye wakavudisha masandi andi; bualu bua wakamona mindidimbi ya balume mifunda ha bimanu bia nsubu, bifuanyikishi bia Bena Kasada bifundahu ne mukubu mukunze-kunzû, badijingila mikaba mu bifuka biabo, badijingila bitambala bile ku mitu yabo, buonso buabo bakamueneka bu bakokeshi, bafuanangane ne mindidimbi ya Bena Babulona, ba mu buloba bua Bena Kasada muakaledibuabo. Hakabatangileye, wakatamba kubananga, wakabatumina ba-messager bandi mu buloba bua Bena Kasada. Hashishe Bena Babulona bakahia kudiye, bakasangila nʼandi bulalu mu dinanga, bakamunyanga ne masandi abo, ne yeye wakanyanguka kudibo, ne mutshima wandi wakabahidia. Wakasokolola masandi andi nunku, wakamuenesha butaka buandi; bua malu â mutshima wanyi wakamuhidia, bu muakahidia mutshima wanyi mukuluʼandi. Kadi wakavudisha masandi andi, uvuluka biandi matuku a bunsongakashi buandi, hakalondeye malu a masandi mu buloba bua Ejipitu. Wakatamba kunanga balume bakenda nʼandi masandi, bakadi ne lukuka lua mubidi bu lukuka lua nyama ya mpunda ne lua balume ba tubalu. Nunku wakavuluisha bantu bua malu a masandi a mu bunsongakashi buebe, hakakamatabo mabele ebe kudi Bena Ejipitu, ne hakalengabo ha tshiadi tshia bunsongakashi buebe. Nunku, Oholiba, Mukelenge Yehowa udi wamba ne, Mona, nenjule bakunangi bua kubuelabo mukoso, bobo mene badi mutshima webe uhidia, nembajule bafume ku nseke yonso bua kukuluishabo: Bena Babulona ne Bena Kasada bonso, ba mu Pekoda ne Shoa ne Koa ne Bena Ashû bonso nebalue nʼabo diatshimue, bansongalume balengele, buonso buabo ba-gouverneur ne miloho, bakokeshi ne bena meji, buonso buabo benda ha nyima ha tubalu. Nebalue kukuluisha ne bielelu bia nvita, makalu a nvita ne makalu a hatuhu ne tshisumbu tshia bantu; nebaluangane nʼebe nvita bakunyunguluke nseke yonso, bikala ne ngabu wa ha tshiadi ne wa ku diboko ne tshifulu tshia tshiamu. Nenfile dikosa dia tshilumbu tshiebe mu bianza biabo, ne bobo nebalumbuluishe bu mudi kulumbulula kuabo. Nengikale nʼebe tshiji tshikole, ne bobo nebakuelele malu mabi mu tshifika munda tshiabo; nebakukose diulu ne matshu, bana benu badi bashala nebashihibue ne muele wa nvita. Nebakuate bana bebe ba balume ne ba bakashi bua kuya nʼabo, ne bana benu badi bashala nebahie mu kahia. Nebakuvule bilulu biebe, nebakunyenge bilenga biebe bia mushinga mukole. Nunku nenkuleshe malu ebe a tshikama, ne masandi awakalua nʼau ku buloba bua Ejipitu; nunku wewe kuena utangisha mesu ebe kudiu ne kuena uvuluka Ejipitu kabidi. Bualu bua Mukelenge Yehowa udi wamba ne, Tangila, nenkufile mu bianza bia baudi ukina, mu bianza bia bantu badi mutshima webe uhidia. Bobo nebakuenzele malu mu lukinu luabo, nebakunyenge bintu bionso biwakuheta ku mudimu webe, nebakushiye butaka kuyi ne bivualu. Nebakufuishe bundu bua masandi ebe, malu ebe a tshikama ne a masandi mene. Nebakuenzele malu â bualu bua wewe wakenda masandi ne ba mu bisamba bia bantu hawakadinyanga ne ditendelela dia mpingu yabo. Wewe wakulonda mu nshila wakenda mukuluʼebe wa bakashi; nunku nenteke luhanza luandi mu tshianza tshiebe. Mukelenge Yehowa udi wamba ne, Newikale ne bua kunua luhanza lua mukuluʼebe wa bakashi, ludi lua ndondo ne ludi lunene; newikale bu tshintu tshidibo bahetula ne tshidibo baseka, bualu bua ludi tente. Makenga ne kanyinganyinga nebikukuate, luhanza ludi lukuatshisha bantu buowa ne kubutuka, ludi luhanza lua mukuluʼebe Samalea mene. Mukelenge Yehowa udi wamba ne, Wewe neulunue ne neumane bionso bidimu, neulumane tô ne bisekeseke bialu, neuhande mabele ebe; bualu bua nakuamba nunku. Bua malu â Mukelenge Yehowa udi wamba ne, Bualu bua wakumpua muoyo, wakungela nyima, nunku wewe neudituadile makenga adi alonda malu ebe a tshikama ne a masandi. Yehowa wakankonka ne, Muana wa muntu, neulumbuluishe Ohola ne Oholiba, anyi? Nunku ubamanyishe bua malu mabi abo. Bualu bua bakuenda masandi, ne mashi adi ha bianza biabo; bakulonda malu a masandi ne mpingu yabo; bakuela bana babo ba balume bakandelelabo mu kahia bu milambu ya kuoshela mpingu. Baku ngenzela malu makuabo kabidi: bakunyanga tshitendelelu tshianyi dituku adi diodimue, bakunyanga matuku anyi a mbingu. Bualu bua bakashihabo bana bakalelabo bu mulambu wa kufila kudi mpingu, mu dituku adi diodimue bakabuela mu tshitendelelu tshianyi bua kutshinyanga; ne mona, bakenza nunku mu nsubu muanyi. Bualu bukuabo kabidi: wewe wakatuma mukenji bua kubikila bantu badi bafuma kule, wakabatumina messager, ne mena, bakalua; ne bua bualu buabo wakowa mai, wakalaba bintu bikunze ku mesu, wakadilengesha ne bilenga, wakashikama ha bulalu bulengeshibue, buikale ne mesa malongolola ku mpala kuabu, bawakateka musenga wanyi wa manananshi ne manyi anyi. Diyoyo dia tshisumbu tshinene tshia bakadi basanka ne banaya diakunvuikaku; ne bakalua ne tshisumbu tshia bantu ba hatuhu basangisha ne tshisumbu tshia bakuatshiki ba maluvu bafume ku tshihela; bakabela nkanu ku maboko abo ne bakabasa bifulu bia bukelenge bilengele ku mitu yabo. Hashishe nakamba dî edi bualu bua mukashi eu wakamana kukola mu malu a masandi ne, Mpindiu nebalonde nʼandi malu a masandi, ne yeye nende nʼabo, anyi? Bakaya kudiye bu mudi bantu bakaya kudi muena masandi; bobo baye kudi Ohola ne Oholiba, bakashi aba ba masandi. Bantu bakane nebabahishe ne dihisha didibo bahisha nʼadi bakashi ba masandi ne dihisha dia bakashi badi bamatshisha mashi a bakuabo hanshi; bualu bua badi bakashi ba masandi, ne mashi adi ha bianza biabo. Bualu bua Mukelenge Yehowa udi wamba ne, Nendue ne tshisumbu tshia bantu bua kubaluisha, nembafile kudibo bua kubakuatshisha buowa ne bua kunyengabo bintu biabo. Tshisumbu atshi tshia bantu netshibakume ne mabue, netshibashihe ne miele yabo ya nvita; nebashihe bana babo ba balume ne ba bakashi, neboshe nsubu yabo ne kahia. Nunku nendekeshe malu a tshikama mu buloba ebu, bua bakashi bonso badimuke biabo, kabalondi malu enu a tshikama. Difutu dienu nedikale makenga bua malu enu a tshikama, ne nenukenge bualu bua kutendelela kuenu kua mpingu; nenumanye ne, Meme ndi Mukelenge Yehowa. Mu tshidimu tshia tshitema, mu ngondo wa dikumi, ne mu dituku dia dikumi dia ngondo, dî dia Yehowa diakalua kundi ne, Muana wa muntu, funda dina dia dituku edi, dituku edi mene; bualu bua mukelenge wa Babulona wakabanga kutshintshimika Yelushalema dituku edi mene. Elela ba mu nsubu eu wa bantombokedi lusumuinu, ubambile ne, Mukelenge Yehowa udi wamba ne, Teka luesu lunene heku, lutekahu, elamu mai; elamu mahunda a munyinyi, mahunda mimpe onso mene, ne tshibelu ne diboko: ûsha luesu ne mifuba idi mihite buimpe. Sungula mukoko muhite mikuabo ya mu tshisumbu tshiai buimpe, buesha nkunyi muinshi mua luesu, ulusabishe bimpe, bua mifuba itumpishibue munda mualu. Nunku Mukelenge Yehowa udi wamba ne, Mulau wikale kudi musoko eu udi umatshisha mashi a bakuabo hanshi, kudi luesu elu lunene ludi ne dimoma munda mualu, ne ludi ne dimoma didi kadiyi dianze kumuka! Luhula dihunda ne dihunda, kudieledi nshobo bua kudisungula. Bualu bua udi ne mashi munda muau; wakela ha dibue didi hatuhu, ne kakâhongoluela hanshi ha buloba bua luhuishi luabuikile. Meme hanyi nakela mashi a musoko ha dibue didi hatuhu, bua kâbuikidibu, ne bua ajule tshiji tshianyi bua kudisombuela. Nunku Mukelenge Yehowa udi wamba ne, Mulau wikale kudi musoko eu udi umatshisha mashi hanshi! Meme hanyi nenkunguisheku mushiki munene wa nkunyi. Vudisha nkunyi, temesha kahia kakole, sabisha munyinyi bimpe, lamba mukelekele mutoto, mifuba yoshibue. Hashishe ambika luesu luikala munda mutuhu heku bua tukuate kahia kakole, bua tshiamu tshialu tshia mitaku tshikuate kahia tô ne hakunzatshi, ne bua bukoya bualu bulungule ne buvingutuke munda mualu, ne bua dimoma dialu diumuke. Musoko wakuditondesha ne midimu mikole, kadi dimoma diau dinene kadiena dianze kumuka munda muau, dimoma kadiena diumushibua kudi kahia. Nunku, bualu bua bukoya bua malu ebe a tshikama, bualu bua nakukeba kukulengesha ne wewe kuena muanze kulengeshibua, kuena ulengeshibua ku bukoya buebe kabidi tô ne hanalekela tshiji tshianyi tshindi nʼatshi kûdi. Meme Yehowa nakuamba di edi, nedikale dilelela, ne meme nendienze. Tshiena mpingana ku nyima, tshiena nkufuila luse, tshiena nkudimuna bualu bunakuhangidisha mu mutshima wanyi. Nebakose tshilumbu tshiebe bu mudi bienzedi biebe ne midimu yebe. Edi ndî didi Mukelenge Yehowa wamba. Dî dia Yehowa diakalua kundi kabidi ne, Muana wa muntu, tangila, nkadi ngumusha mukashi webe lukasa udi utamba kusankisha mesu ebe; kadi wewe kumuashidi muadi ne kumudidi nansha, ne binsonshi kabihueki ku mesu kuebe. Humuna biebe muoyo, kadi humuna muoyo anu talalâ, kuashidi mufue webe eu madilu; ujingile tshitambala ku mutu kuebe, luata bisabata biebe ku makasa; kubuikidi mishiku yebe, ne kudi bidia bia bena madilu. Nakambila bantu dî edi mu lunkelu; dilolo mukashi wanyi wakafua; Hakatshiabu dinda nakenza bu muakangelelabo mukenji. Bantu bakankonka ne, Kuena utujingulula malu â audi wenza, anyi? Adi tshimanyinu kai kutudi? Nunku nakabambila ne, Dî dia Yehowa diakalua kundi ne, Ambila ba mu tshisamba tshia Bena Isalele ne, Mukelenge Yehowa udi wamba ne, Monai, nenyange muaba wanyi wa tshijila, muaba udi butumbi bua bukole buenu, udi usankisha mesu enu, udi mitshima yenu manga; ne bana benu ba balume ne bana benu ba bakashi banuakashiya ku nyima kuenu nebashihibue ku muele wa nvita. Hashishe nenuenze bu munakuenza: kanuena nubuikila mishiku yenu, kanuenji nudia bidia bia madilu. Bitambala bienu nebishale bisuika ku mitu yenu, ne bisabata nebikale ku makasa enu; kanuena nuasa muadi, kanuena nudila, kadi nenunyingalale mu mitshima yenu bualu bua mibi yenu, nenutuilangane mikemu. Yehezekele neikale tshimanyinu kunudi bu muakuenzeye mu malu â onso nuenu nenuenze. Halua bualu ebu bunakuamba, mu diba adi nenumanye ne, Meme ndi Mukelenge Yehowa. Wewe, muana wa muntu, mu dituku dindi nyenga tshinyemenu tshiabo, disanka diabo didibo banyisha, tshintu tshidi tshisankisha mesu abo tshidi mitshima yabo manga, ne bana baho ba balume ne bana babo ba bakashi, mu dituku adi mene muntu udi muhanduke kena ufika kudi bua kukuambila lumu elu ku matshu ebe, anyi? Mu dituku adi mukana muebe nemubuluibue kudi muntu au udi uhanduka, newakule nʼandi, kuena wikale kamama kabidi. Nunku newikale tshimanyinu kudibo; ne bobo nebamanye ne, Meme ndi Yehowa. Dî dia Yehowa diakalua kundi ne, Muana wa muntu, tangisha mpala webe kudi Bena Amona, ubadiule. Ambila Bena Amona ne, Unvuai dî dia Mukelenge Yehowa. Mukelenge Yehowa utu wamba ne, Bualu bua nuakela tshibingu ne, O! kudi nsubu wanyi wa tshijila hakamunyangabo, ne ku buloba bua Isalele hakabubutulabo, ne kudi Bena Yuda hakayabo mu buhika; bua malu â nennufile mu bianza bia bantu ba ku luseke lua esete bu bintu biabo, ne bobo nebashimike ntenta yabo munkatshi muenu, nebashikame munkatshi muenu; nebadie mamuma enu, nebanue mabele enu. Nenvuishe Laba bu tshikumbi tshia tumelo, ne misoko ya Bena Amona bu mpangu ya mikoko; hashishe nenumanye ne, Meme ndi Yehowa. Bualu bua Mukelenge Yehowa udi wamba ne, Bualu bua nuakututa bikashi, nuakutua mikumu hanshi ne nuakusanka ne lukuna luonso lua mu mitshima yenu bua malu akukuata buloba bua Isalele, nunku, tangilai, uakuolola tshianza tshianyi hamʼbidi henu, nennufile kudi ba mu bisamba bia bantu bu tshintu tshidibo banyenga; nennûmushe munkatshi mua bantu bakuabo, nennujimishe munkatshi mua maloba makuabo; nennushihe; nenumanye ne, Meme ndi Yehowa. Mukelenge Yehowa udi wamba ne, Bualu bua ba mu Moaba ne ba mu Seî badi bamba ne, Monai, ba mu tshisamba tshia Bena Yuda bakulua bu bisamba bikuabo bionso, nunku nengunzulule luseke lua Moaba, lua ku misoko idi ku matshika a buloba tô ne ku Bete-yishimota, Bâla-meona ne Kîyata-yalima, butumbi bua buloba ebu. Nenfile Bena Moaba ne Bena Amona kabidi kudi ba ku luseke lua esete bu bintu biabo, bua kababavuluki munkatshi mua bisamba bia bantu. Nendumbuluishe Bena Moaba; nebamanye ne, Meme ndi Yehowa. Mukelenge Yehowa udi wamba ne, Bualu bua ba mu Edome bakenzela ba mu tshisamba tshia Bena Yuda bibi hakadisombuelabo kudibo, ne bakadivuishila dihila ditambe bukole hakadisombuelabo, nunku Mukelenge Yehowa udi wamba ne, Nengolole tshianza tshianyi kudi Bena Edome, nengumushemu bantu ne nyama, nenvuishe buloba ebu tshikulu; ku Temana tô ne ku Dedana nebafue ku muele wa nvita. Nendisombuele kudi Bena Edome ku tshianza tshia bantu banyi Bena Isalele, ne bobo nebenzele Bena Edome bu mudi tshiji tshianyi ne bu mudi tshiji tshianyi tshikole; Mukelenge Yehowa udi wamba ne, Nebamanye kudisombuela kuanyi. Mukelenge Yehowa udi wamba ne, Bualu bua Bena Peleshete bakenzela Bena Isalele bibi hakadisombuelabo kudibo, hakadisombuela ne lukuna mu mitshima yabo bua kubabutula ne lukuna ludi kaluyi lushika; nunku Mukelenge Yehowa udi wamba ne, Nengolole tshianza tshianyi kudi Bena Peleshete; nembutule Bena Kelete; nenshihe difuka dia bantu badi bashala ku muelelu wa mai manene. Nendisombuele kudibo ne kusombuela kukole, nembabele ne tshiji tshianyi tshikole; nebamanye ne, Meme ndi Yehowa hanashikisha kudisombuela kudibo. Mu tshidimu tshia dikumi ne tshimue, mu dituku dia kumudilu dia ngondo, dî dia Yehowa diakalua kundi ne, Muana wa muntu, bualu bua Tulo wakuamba dî dibi bualu bua Yelushalema ne, Kia! Musoko wakadi tshibuelelu tshia bantu ba bende wakuhuka, wakunzuluka kundi, nengikale ne bintu tente, bualu bua wowo wakubutuka; nunku Mukelenge Yehowa udi wamba ne, Mona, ndi nʼebe tshilumbu, wewe musoko wa Tulo, nentume bisamba bia bungi kûdi bua kuluishabi bana benu, bu mudi mai manene alua ne mambuanka. Nebashimbule ngumbu ya Tulo, nebabumbule bibumba biandi. Nenkuhule luhuishi luandi, nemmuvuishe bu dibue didi hatuhu. Newikale muaba wa kuadishaku tuhamba munkatshi mua mai manene; Mukelenge Yehowa udi wamba ne, Bualu bua nakuamba dî edi, yeye neikale bu tshintu tshidibo banyenga kudi ba mu bisamba bia bantu. Bana bandi, misoko idi mu mpata hehi ne mai manene, nebashihibue ku muele wa nvita; nunku nebamanye ne, Meme ndi Yehowa. Bualu bua Mukelenge Yehowa udi wamba ne, Tangilai, nentumine Bena Tulo Nebukadenesâ, mukelenge wa Babulona, mukelenge wa bakelenge, mufume biandi ku luseke lua nôde, muikale ne tubalu ne makalu a nvita ne babandi ba ha nyima ha tubalu ne tshisumbu tshinene tshia bantu bakuabo. Yeye neashihe bana bebe, misoko idi mu mpata, ku muele wa nvita; nele mabula a kukutshintshimika nʼau, nele mishiki ya buloba bua kubandahu bua kuluisha bana benu. Neajadike ngabu munene ku mpala kuebe. Neajadike ntshinyi andi a kushimbula nʼau ngumbu ku mpala kua ngumbu yebe, neashimbule bibumba ku bisui biandi. Bualu bua bungi bua tubalu tuandi, luhuishi luditu tubisha nelukubuikile. Bualu bua tshiona tshia bena tubalu ne tshia makalu a hatuhu ne tshia makalu a nvita, ngumbu yebe neyikanke habueleye mu bibi biebe, bu mudi muntu ubuela mu musoko hashimbuka tshituha tshia lumbu. Yeye neadiate misesu yebe yonso ne bikono bia tubalu tuandi, neashihe bana benu ku muele wa nvita, neatulule makunshi ebe makole hanshi. Nebanyenge biuma biebe bionso, nebahaule luhetu luebe; nebashimbule ngumbu yebe, nebasasule nsubu yebe idi isankisha bantu; nebele mabue ebe ne mabaya ebe ne luhuishi luebe munkatshi mua mai manene. Nempuwishe dî dia misambu yebe, kabena bunvua muadi wa bisanji biebe kabidi. Nenkuvuishe bu dibue didi hatuhu, newikale bu muaba wa kuadishilaku tuhamba, kabena bakuibaka kabidi; bualu bua meme Yehowa nakuamba dî edi: edi ndi dia Mukelenge Yehowa. Mukelenge Yehowa udi wambila Bena Tulo ne, Ba mu maloba adi ku muelelu wa mai manene kabena bazakala, hunvuabo bua kubutuka kuebe, hatua batahibue mikemu, ne hashihabo bantu bangi munkatshi muenu, anyi? Mu diba adi bakokeshi ba ku muelelu wa mai manene nebatuluke mu nkuasa yabo ya bukelenge, nebavule bilulu biabo, nebakohole bivualu biabo bidi ne malenda; nebashale ne dizakala; nebashikame hanshi ha buloba, nebazakale diba dionso, nebakuatshike buowa bualu buenu. Nebanuashile madilu, nebanuambile ne, Mona muwakulua, wewe musoko wakadibo bashikame kudi bendakanyi ba ha mai manene, musoko wakadi ne lumu lunene, wakadi ne bukole ha mai manene, wowo ne bantu bakadi bashikamemu, wakakuatshisha bonso bakadi bendahu buowa! Mpindiu ba mu maloba a ku muelelu wa mai manene nebazakale mu dituku dia kubutuka kuebe; ba mu bisenga bia mu mai manene nebakuatshike buowa bualu bua kujimina kuebe. Bualu bua Mukelenge Yehowa udi wamba ne, Hanakuvuisha tshikulu, bu mudi misoko idi kayiyi ne bantu, hanahongolola mai male ha mutu hebe, ne halua mai manene kukubuikila; hashishe nenkuhuekeshe hanshi hohamue ne badi bahueka mu Dina dia Bafue, kudi bantu ba tshikondo tshia kale, nenkushikamishe mu miaba idi mu ndondo wa mu buloba, mu miaba yakadi mituhu ku kale tô ne mpindiu, ushikame hebe ne badi bahueka mu Dina, bua wewe ushale mu muaba mudi kamuyi bantu, ne bua wewe kushadi mu buloba bua badi ne muoyo. Mukelenge Yehowa udi wamba ne, Nenkubutule kabutu, ne kuena wikala ne muoyo kabidi; nansha biakebabo, kabena bakusangana kabidi. Di dia Yehowa diakalua kundi ne, Wewe kabidi, muana wa muntu, ashila Tulo muadi, ambila Tulo, udi mushikame ku tshibuelelu tshia ku mai manene, udi ngendʼa mushinga munkatshi mua bantu ha bungi badi mu maloba a ku muelelu wa mai manene, ne, Mukelenge Yehowa udi wamba ne, Wewe, Tulo, wakuamba ne, Bulengele buanyi budi bulengele tshishiki. Matshika a buloba buebe akadi anu munkatshi mua mai manene, bibaki bebe bakakuibaka bilengele tshishiki. Bakahanda mabaya ebe onso a kuenza nʼau matu a mitshi ya cyprès ya ku Senî, bakangata mutshi wa cêdre ku mukuna wa Lebanona bua kusongela mutshi wa kusuikaku bilulu bia buatu. Bakasonga nkaya yebe ku mitshi ya telebinta ya ku Bashana; bakenza biendedi biebe ne mabaya a nsanga ya ku bisanga bia Kitima, mikale ne mibanga milamikaku. Tshilulu tshiebe tshia kuendesha nʼatshi buatu tshiakadi tshilulu tshia lin tshilengele tshia ku Ejipitu tshiela ne malenda, tshikale bu dibendela diebe; tshilulu tshia ntenta tshia ha mutu ha buatu tshiakadi tshifike ne tshikunze tshia ku bisanga bia Elisha. Bantu ba ku Sidona ne ba ku Âwada bakadi bitshi bebe; Tulo, bena meji bebe bakadi munkatshi muenu, bakukukuatshila mudimu bu bena yenda bebe. Bakulu ba ku Gebala ne bena lungenyi bandi bakadi munkatshi muenu bua kujika mitanta yebe ne kamonyi; matu onso akadi enda ha mai manene ne bena matu bakadi munkatshi muenu bua kuhanyishangana nʼebe bintu biebe. Bantu ba ku Pelasa, Luda ne Puta bakadi mu tshisumbu tshia masalayi ebe, bakadi baluanganyi bebe ba nvita; bakakudika ngabu yabo ne bifulu biabo bia biamu ku bimanu biebe, bakalesha bakuabo butumbi buebe. Bantu ba ku Âwada ne ba ku Heleke bakadi ha mutu ha ngumbu yebe bua kutentekela nseke yonso, bantu ba ku Gamada bakadi mu bibumba biebe; bakakudika ngabu yabo ku bimanu biebe ku nseke yonso, bakavuisha bulengele buebe bulengele tshishiki. Ba ku Tâshishi bakenduluka nʼebe mushinga bualu bua bintu biebe bivule bia mishindu yonso, bakashintakasha nʼebe biamu biabo bia argent, bia tshiamu tshifike, tshia étain ne tshia lutende ku bintu biebe. Ba ku Yawana, Tubala ne Mesheke bakenduluka nʼebe mushinga; bakashintakasha nʼebe bahika ne malonga a tshiamu tshia mitaku ku bintu biebe biwakenduluka nʼabi. Bena Togâma bakashintakasha nʼebe tubalu tudi tuambula majitu, tubalu tua nvita ne nyama ya mpunda, ku bintu biebe biwakenduluka nʼabi. Bantu ba ku Dedana bakenduluka nʼebe mushinga; bantu ba mu maloba mangi a ku muelelu wa mai bakakukuatshila mudimu bu bangendʼa mushinga; bakalua kûdi ne milambu ya mibanga ne mitshi ya ébéne. Ba ku Sulia bakenduluka nʼebe mushinga bualu bua bintu bivule biwakenza ku bianza biebe; bakashintakasha nʼebe mabue a grenat, bintu bia kuina nʼabi bilulu bikunze, bilulu biakadi ne malenda, bilulu bia lin bilengele, mabue a corail ne a rubis, ku bintu biwakenduluka nʼabi. Ba mu Yuda ne ba mu buloba bua Isalele bakenduluka nʼebe mushinga; bakashintakasha nʼebe blé wa ku Minita, dihula, buitshi, manyi ne manyi a kulaba, ku bintu biwakenduluka nʼabi. Ba mu Damaseke bakenduluka nʼebe mushinga bualu bua bintu bivule biwakenza ku bianza biebe, ne bua biuma biebe bikumbana bia mishindu yonso, bakendulukangana nʼebe mushinga bua nvinyo ya ku Helebone ne miosa mitoke ya mikoko. Ba mu Uzala bakakuhanyisha tshiamu tshifike tshinonoke, casse ne roseau. Ba mu Dedana bakenduluka nʼebe mushinga bua mbulankete ya kuambika ha nyima ha tubalu. Ba mu Alaba ne bakokeshi ba mu Kedâ bakakukuatshila mudimu wa bungendʼa mushinga; bakakuhanyisha bana ba mikoko, bimpanga ne mbushi. Bangendʼa mushinga ba ku Sheba ne Lama bakendulukangana nʼebe mushinga; bakashintakasha nʼebe bintu bia muhuya muimpe bitambe mushinga mukole, mabue a mushinga mukole matamba bulengele ne or, ku bintu biwakenduluka nʼabi. Ba mu Halana, Kane, Edene, Sheba, Ashû ne Kilemada bakendulukangana nʼebe. Bakendulukangana nʼebe mushinga bua bilulu bia mushinga mukole, tuzaku tufike tuakadi ne malenda mimpe, bilulu bia mibidi ya mushindu ne mushindu ne mionshi miluke bikole; bangendʼa mushinga bebe bakalua ne bintu ebi. Matu a ku Tâshishi akatuala bintu biebe biwakenduluka nʼabi. Nunku wewe wakushibua tente, bakakusha ne majitu a bungi munkatshi mua mai manene. Bitshi bebe bakukuhitshisha mu mai male; luhehele lua ku esete luakukutshibula hawakadi munkatshi mua mai manene. Biuma biebe, bintu biebe bia kuhana ne bintu biudi wenduluka nʼabi mushinga, bena matu bebe, bena yenda bebe, bajiki ba kamonyi mu mitanta yebe, bangendʼa mushinga bebe, ne masalayi ebe adi munkatshi muenu, tshisumbu tshia bantu bonso badi munkatshi muenu, nebadine munkatshi mua mai manene mu dituku dia kubutuka kuebe. Hunvuabo kudila kua bena yenda bebe, maloba a ku muelelu wa mai manene neazakale. Bonso badi bita matu, bena matu bonso ne bena yenda bonso ba ha mai manene nebahatuke mu matu abo, nebimane ku muelelu wa mai manene, nebabandishe dî diabo bua kukudila, nebakuashile muadi ne kanyinganyinga kakole; nebele buloba mu mitu yabo, nebadibonde mu butue. Nebakungule mitu yabo bua bualu buebe, nebadiluatshishe bilulu bikayabala; nebakuashile muadi ne kanyinganyinga kakole ka mutshima ne muadi mutambe bukole. Mu kudila kuabo nebakuashile muadi bua bualu buebe, nebakudile bamba ne, Musoko kai wakadi bu Tulo, musoko eu wakahuwishabe munkatshi mua mai manene? Hawakaluhula bintu biebe mu mai manene, wewe wakukutshisha nʼabi bantu ba bungi, wakavuisha bakelenge ba ha buloba babanji ku dikumbana dia biuma biebe ne dia bintu biwakenduluka nʼabi mushinga. Mu tshikondo etshi hawakutshibuka ha mai manene, mu ndondo wa mai, bintu biebe biwakenduluka nʼabi mushinga ne tshisumbu tshia bantu bebe biakadina nʼebe mu mai manene. Bonso badi bashikame ku muelelu wa mai bakukema bua bualu buebe, ne banfumu babo bakukuatshika buowa butambe bukole, badi banyenga mpala yabo bua ntatu yabo. Bangendʼa mushinga ba munkatshi mua bantu badi bakubingila, bualu bua wakufua biebe, kubutuka kuebe kudi kukuatshisha bantu buowa, ne kuena wikala ne muoyo kabidi tshiendelele. Dî dia Yehowa diakalua kundi kabidi ne, Muana wa muntu, ambila mukokeshi wa mu Tulo ne, Mukelenge Yehowa udi wamba ne, Wakunanga tshiadi tshiebe, wakuamba ne, Ndi Nzambi, ndi mushikame mu tshishikaminu tshia Nzambi munkatshi mua mai manene; kadi wewe udi anu muntu, kuena Nzambi, nansha wewe wela meji ne, Ndi Nzambi. Tangila, wewe udi uhita Danyele lungenyi! Kakuena bualu busokome kûdi! Ku meji ebe ne ku dijingulula diebe wewe wakudihetela biuma; wakudibutshila bintu bia or ne bia argent mu bibutshilu biebe. Bua lungenyi luebe lule lua kuenduluka nʼalu mushinga wewe wakuvudisha biuma biebe, ne bua luhetu luebe mutshima webe udi mule tente ne kudisua. Bua malu â onso Mukelenge Yehowa udi wamba ne, Bualu bua wakuela meji ne, Ndi Nzambi, nunku nenkutumine bantu ba bende bua kukuluishabo, bobo mene badi bahita ba mu bisamba bikuabo kukuatshisha bantu buowa; nebahatule miele yabo ya nvita bua kujimisha bulengele bua lungenyi luebe, nebanyange butumbi buebe. Nebakuele tô ne ku Dina dia Bafue, neufue lufu bu lua badi bashihibue, neufue munkatshi mua mai manene. Newambe ku mpala kua mukushihi ne, Meme ndi Nzambi, anyi? Kadi wewe udi anu muntu mu bianza bia mukutahi wa mputa; kuena Nzambi nansha. Mukelenge Yehowa udi wamba ne, Bualu bua nakuamba dî edi, wewe neufue lufu bu lua muntu udi kayi mutengudibue, neushihibue ku bianza bia bantu ba bende. Dî dia Yehowa diakalua kundi kabidi ne, Muana wa muntu, ashile mukelenge wa Tulo muadi, umuambile ne, Mukelenge Yehowa udi wamba ne, Wewe wakadi tshidikishilu tshia bulengele tshishiki, mûle tente ne meji, mukumbane mu bulengele buebe. Wakadi mu Edene, budimi bua Nzambi. Wakalengeshibua ne mabue a mushinga mukole a mishindu yonso, a rubis, a topaze, a mbonga, a chrysolithe, a onyx, a jaspe, a saphir, a escarboucle ne a émeraude; bakabiteka mu tukanu tua or. Bakakulongoluelabi mu dituku dî wakafidibua. Wewe wakadi hohamue ne mukeluba wakadi ulama budimi, nakakutekamu; wakadi ha mukuna wa tshijila wa Nzambi; wakendakana munkatshi mua mabue akadi akenka ne kahia. Wewe wakadi muakane tshishiki mu bienzedi biebe ku dituku diakakufukabo tô ne hakasanganabo bubi munda muebe. Bualu bua divudisha dia bungendʼa mushinga buebe mutshima webe wakula tente ne ditomboka, ne wewe wakahona mu bubi. Bua muanda eu nakakuihata mu mukuna wa Nzambi bu tshintu tshia tshihendu kudi Nzambi, ne mukeluba, wakadi mulami wa budimi, wakakuihata bua wewe kuikadi munkatshi mua mabue adi akenka ne kahia. Mutshima webe wakula tente ne diambu bualu bua bulengele buebe, wakanyanga meji ebe bualu bua butumbi buebe; nunku nakakuela hanshi, nakakuladika hanshi ku mesu kua bakelenge bua bobo bakumone, bakubingile. Bualu bua malu mabi ebe mavule, bua bubi bua bungendʼa mushinga buebe, wewe wakanyanga miaba yebe ya tshijila; nunku nakatemesha kahia munkatshi muenu; kakabosha, ne nakakuvuisha bu butue hanshi ha buloba ku mpala kua bonso badi bakumona. Bonso badi bakumanye munkatshi mua bantu ba bende nebakuatshike buowa bua bualu buebe; wewe neulue tshimanyinu tshia dibutuka didi dikuatshisha bantu buowa, ne kuena wikala ne muoyo kabidi. Di dia Yehowa diakalua kundi kabidi ne, Muana wa muntu, tangisha mpala webe ku Sidona, umudiule, amba biebe ne, Mukelenge Yehowa udi wamba ne, Tangila, ndi nkudiula, wewe Sidona, nemmueneshe butumbi buanyi munkatshi muenu. Bobo nebamanye ne, Meme ndi Yehowa, hanabalumbuluisha, hanamuenesha tshijila tshianyi ku malu andi mbenzela; bualu bua nentume bihuhu munkatshi muabo, ne kumatshisha kua mashi mu misesu yabo; badi batahibue mputa nebahone munkatshi muabo, bualu bua muele wa nvita udi hamʼbidi habo mu nseke yonso; nunku nebamanye ne, Ndi Yehowa. Ba mu tshisamba tshia Bena Isalele kabena basangana dieba didi mua kubataha, anyi mungonge udi mua kubakengesha, munkatshi mua bena mutumba nʼabo badi babanyunguluka ku nseke yonso, ne bakadi babenzela bibi. Nebamanye ne, Ndi Mukelenge Yehowa. Mukelenge Yehowa udi wamba ne, Hanasangisha ba mu tshisamba tshia Bena Isalele bua kubumusha munkatshi mua bantu muakatangadikabo, hanamuenesha tshijila tshianyi mu bienzedi bindi mbenzela ku mesu kua bisamba bia bantu, hashishe, nebashikame mu buloba buabo buine bunakaha muntu wanyi Yakoba. Nebashikamemu kabayi ne bualu kubatatshisha, nebibakemu nsubu, nebakune tumuma tua nvinyo mu madimi, nebashikamemu kabayi ne bualu bubatatshisha, hanalumbuluisha bena mutumba nʼabo badi babanyunguluka ne badi babakengesha; nebamanye ne, Meme ndi Yehowa Nzambi wabo. Mu tshidimu tshia dikumi, mu ngondo wa dikumi, mu dituku dia dikumi ne dibidi dia ngondo, dî dia Yehowa diakalua kundi ne, Muana wa muntu, tangisha mpala webe kudi Palô, mukelenge wa Ejipitu, umubele, ne bonso ba mu Ejipitu. Ela dî diebe, amba ne, Mukelenge Yehowa udi wamba ne, Ndi nʼebe tshilumbu, wewe Palô, mukelenge wa Ejipitu, wewe ngandu munene udi ulala munkatshi mua misulu yebe, wamba ne, Musulu eu nguanyi mene, nakudienzelau nkayanyi. Nengele ndobo mu mbanga yebe, nendamike mishiha ya mu misulu yebe ku mabamba ebe; nenkuhatule munkatshi mua misulu yebe, ne mishiha yonso ya mu misulu yebe idi ilamata ku mabamba ebe. Nenkuele mu tshihela tshia lusenga, wewe ne mishiha yonso ya mu misulu yebe. Neuhone mu mpata wa hatuhu, kabena batubula tshitalu tshiebe, kabena bakujika. Nakukuha bu bia kudia kudi nyama ya ha buloba ne kudi nyunyu ya mulu. Nunku Bena Ejipitu bonso nebamanye ne, Meme ndi Yehowa. Bualu bua bakadi tshieyemenu tshitekete bu disele kudi ba tshisamba tshia Bena Isalele; hakakukuatabo mu tshianza, wewe wakatshibuka, wakahanda maha abo onso; hakakueyemenabo, wakatshibuka, wakazakasha milemba yabo yonso. Nunku Mukelenge Yehowa udi wamba ne, Mona, nenkutumine muele wa nvita, nenkûmushile nʼau bantu ne nyama. Buloba bua Ejipitu nebuikale tshihela tshia hatuhu ne tshikulu; nunku nebamanye ne, Ndi Yehowa. Bualu bua wewe wakuamba ne, Musulu wa Nile nguanyi, meme nakudienzelau nkayanyi; mona, meme ndi nkudiula ne misulu yebe, nenvuishe buloba bua Ejipitu tshihela tshia hatuhu ne tshikulu, ku Migedola tô ne ku Siene, ne ku butshika bua Atiopa kabidi. Kakuena dikasa dia muntu dihitshilamu, kakuena dikama dia nyama dihitshilamu; kakuena muntu washikamamu tô ne hahita bidimu makumi anai. Nenvuishe buloba bua Ejipitu tshihela munkatshi mua maloba makuabo akubutuka, ne bidimu makumi anai misoko yabu neyishale bikulu munkatshi mua misoko yakubutuka; nentangadishe Bena Ejipitu munkatshi mua bisamba bia bantu, nembamuangalashe munkatshi mua maloba makuabo. Nunku Mukelenge Yehowa udi wamba ne, Hahita bidimu makumi anai, nensangishe Bena Ejipitu bua kubumusha munkatshi mua bantu muakadibo batangadishibue. Nengumushe Bena Ejipitu mu buhika bua kubaha diakalengele, nembahingashe mu buloba bua Patelosa, mu buloba bua bangabanga; nebikalemu bu bukelenge buhuekele. Nebuhite makelenge makuabo onso buhuekele; kabuena budibandisha ha mitu ha bisamba bia bantu kabidi; nembakeheshe bua bobo kabamanyi mua kukokesha bisamba bia bantu kabidi. Kabuena buikala tshieyemenu kudi Bena Isalele kabidi, tshivulukidi tshia bubi buabo, hahinganabo bua kubakeba; nebamanye ne, Meme ndi Mukelenge Yehowa. Mu tshidimu tshia makumi abidi ne muanda mutekete mu ngondo wa kumudilu, mu dituku dia kumudilu dia ngondo, dî dia Yehowa diakalua kundi ne, Muana wa muntu, Nebukadenesâ, mukelenge wa Babulona, wakenzesha masalayi andi mudimu mukole mu nvita yandi ne Bena Tulo. Mutu wa muntu yonso wakalua dikunyi, diaha dia muntu yonso diakadi ne mabuba; kadi yeye kakaheta difutu, ne masalayi andi kâkangata difutu, bua mudimu wakenzabo wa nvita ne Bena Tulo. Nunku Mukelenge Yehowa udi wamba ne, Mona, nenfile buloba bua Ejipitu kudi Nebukadenesâ, mukelenge wa Babulona; yeye neaye kuabo ne biuma biabo bivule, neabuhaule, neabunyenge bintu biabu; ne bintu ebi nebikale difutu dia masalayi andi. Mukelenge Yehowa udi wamba ne, Nakumuha buloba bua Ejipitu bu difutu dia mudimu wakungenzeleye, bualu bua bakunkuatshila mudimu. Mu dituku adi nemmeneshile ba mu tshisamba tshia Bena Isalele lusengu; nenkuhe hukole bua kubulula mukana muebe munkatshi muabo bua wewe kuakula bimpe; nunku nebamanye ne, Meme ndi Yehowa. Dî dia Yehowa diakalua kundi kabidi ne, Muana wa muntu, amba mei a buprofete buebe, amba ne, Mukelenge Yehowa udi wamba ne, Asa muadi bua mulau ulualua dituku adi! Bualu bua dituku adi didi ha buihi, dituku dia Yehowa mene didi ha buihi, nedikale dituku didi ne matutu, tshikondo tshia kubutuka kua bisamba bia bantu. Muele wa nvita neufike kudi Ejipitu, kanyinganyinga nekikale mu Atiopa, hahona bantu bashihibue mu Ejipitu, nebaye ne tshisumbu tshia bintu biabo, ne bishimikidi biabo nebishimbuke. Atiopa, Puta, Luda ne bonso ba mu Alaba, ne Libue, ne bisamba bikuabo bibuelakana nebahone nʼabo ku muele wa nvita. Yehowa udi wamba ne, Bonso badi bakuatshisha Ejipitu nebahone, bukole buabo budi buvuisha dihetu mu mitshima yabo nebujimine; Mukelenge Yehowa udi wamba ne, Ku Migedola tô ne Siene nebashihibue ku muele wa nvita mu buloba ebu. Nebabutuke kabutu munkatshi mua maloba makuabo akubutuka; ne misoko yabo neyikale bikulu munkatshi mua misoko mikuabo yakubutuka. Nebamanye ne, Meme ndi Yehowa, hanatemesha kahia mu Ejipitu, ne halua kubutuka kudi bakuatshishi babo bonso. Mu dituku adi nentume ba-messager, bumuka kundi, benda mu matu, bua kukuatshishabo Bena Atiopa aba badi kabayi ne ntatu buowa; ne kanyinganyinga kakole nekabakuate mu dituku dia kubutuka kua Ejipitu. Bua, monai, dilualua! Mukelenge Yehowa udi wamba ne, Nenjimishe tshisumbu tshia bantu mu Ejipitu ku tshianza tshia Nebukadenesâ, mukelenge wa Babulona. Nemmutume ne bantu badiye nʼabo, badi bahita ba mu binga bisamba kukuatshisha bantu buowa, bua kubutulabo buloba ebu; nebahatule miele yabo ya nvita bua kuluangana ne ba mu Ejipitu, nebushe buloba ebu tente ne bitalu bia bantu badibo bashiha. Nenkamishe misulu, nensumbishe bantu babi buloba ebu; nembutuishe buloba ne bintu bionso bidimu kabutu ku bianza bia bantu ba bende. Meme, Yehowa, nakuamba dî edi. Mukelenge Yehowa wakuamba ne, Nentshibule mpingu, nenshiheshe bintu biakasongabo bia mu musoko wa Mempi, ne kakuena kuikala mukokeshi mu buloba bua Ejipitu, nenkuatshishe ba mu buloba bua Ejipitu buowa. Nembutule Patelosa, nentemeshe kahia mu Soana, nendumbuluishe No. Nempongoluele Sina tshiji tshianyi, musoko wa mu Ejipitu udi ne ngumbu ya mabue, nenshihe tshisumbu tshia bantu badi mu No. Nentemeshe kahia mu Ejipitu, ba mu Sina nebikale ne kanyinganyinga kakole, musoko wa No neubuludibue, nebashimbule ngumbu ya Mempi kudi bena lukuna. Bansongalume ba mu Awena ne ba mu Pi-besete nebashihibue ku muele wa nvita, ba mu misoko ei nebabuele mu buhika. Ku Tehafenehese dituku nedikale mîdima hanatshibula mitshi ya bikokedi idi ba mu Ejipitu bakokesha nʼai bakuabo, hashika bukole buabo budi buvuisha dihetu mu mitshimi yabo, ditutu nedibabuikile, bana bakashi ba mu Ejipitu nebabuele mu buhika. Nunku nendumbuluishe ba mu Ejipitu ne malu â; bobo nebamanye ne, Meme ndi Yehowa. Mu tshidimu tshia dikumi ne tshimue, mu ngondo wa kumudilu, mu dituku dia muanda mutekete dia ngondo, dî dia Yehowa diakalua kundi ne, Muana wa mundi, nakutshibula diboko dia Palô, mukelenge wa Ejipitu; ne tangila, kabena badijingila tshilulu, kabena balabahu buanga bua kudisangasha ne kabena basuikaku tshilulu, bua dikale ne bukole bukumbane bua kukuata muele wa nvita. Nunku Mukelenge Yehowa udi wamba ne, Tangila, ndi ne Palô, mukelenge wa Ejipitu, tshilumbu, nentshibule maboko andi, ne diboko diandi ditshidi ne bukole buadi ne diboko diandi diakutshibuka diambedi, nemponeshe muele wa nvita udi mu tshianza tshiandi. Nentangadishe Bena Ejipitu munkatshi mua bisamba bia bantu, nembamuangalashe munkatshi mua maloba makuabo. Nenkoleshe maboko a mukelenge wa Babulona, nenteke muele wa nvita mu bianza biandi, kadi nentshibule maboko a Palô, ne yeye neatue mikemu ku mpala kuandi, mikemu bu ya muntu udi mutahibue mputa ya lufu. Nengambule maboko a mukelenge wa Babulona mulu, kadi maboko a Palô nealembelele hanshi; nebamanye ne, Meme ndi Yehowa hanateka muele wanyi wa nvita mu bianza bia mukelenge wa Babulona, ne hawololeye ha buloba bua Ejipitu. Nunku nentangadishe Bena Ejipitu munkatshi mua bisamba bia bantu, nembamuangalashe munkatshi mua manga maloba; nunku nebamanye ne, Meme ndi Yehowa. Mu tshidimu tshia dikumi ne tshimue, mu ngondo muisatu, mu dituku dia kumudilu dia ngondo, dî dia Yehowa diakalua kundi ne, Muana wa muntu, ambila Palô, mukelenge wa Ejipitu, ne tshisumbu tshia bantu bandi ne, Wewe udi bu nganyi bua bunene buebe? Mbu mutshi munene wa cèdre mu Lebanona, udi ne matamba manene malengele, ne dileshi diau didi bu dia mutshi wa muitu, bule buau budi buya mulu mule, katongabela kau kabidi kadi kafika mu matutu. Mai a mu misulu akaukolesha, dilembue dia musulu diakaudiundisha, diakahongolola mai a tusulu tuadi mu nseke yonso ya muaba muakadiundau, diakatuma tusulu tuadi tua mai ku mitshi yonso ya muitu. Nunku katongabela ka mutshi eu kakaya mulu ha mutu ha mitshi yonso ya muitu; matamba au manene akavulangana, matamba au makese akalua male, bualu bua mai a bungi akadi mu tusulu akaumiamina. Nyunyu yonso ya mulu yakibaka masua ai munkatshi mua matamba au manene, muinshi mua matamba au makese nyama yonso ya mu mpata yakalela bana bai, ne mu dileshi diau muakashikama ba mu bisamba binene bionso. Nunku wakadi mulengele bua bunene buau, ne bua bule bua matamba au; bualu bua miji yau yakadi hehi ne mai a bungi. Mitshi ya cèdres ya mu budimi bua Nzambi kayakamanya mua kuelekeshibua nʼau, mitshi ya cyprès kayakamanya mua kuelekeshibua ne matamba au manene; mitshi ya platane kayakamanya mua kuelekeshibua ne matamba au makese; kakuakadi mutshi umue wa mu budimi bua Nzambi wakamanya mua kuelekeshibua nʼau ku bulengele buau. Nakaulengesha ku bungi bua matamba au, nunku mitshi yonso ya mu Edene, mu budimi bua Nzambi mene, yakadi nʼau mukau. Bua malu â Mukelenge Yehowa udi wamba ne, Bualu bua wakaleha tô ne mulu, wakatuma katongabela kau tô ne mu matutu, ne mutshima wau wakadibandisha bua bule buau; nengufile mu bianza bia mukokeshi munene wa bisamba bia bantu, ne yeye neawenzele bu mudi bukole bua bubi buau. Nakawihata. Bantu ba bende, ba mu bisamba bia bantu badi batamba kukuatshisha bakuabo buowa, nebautahe, nebaushiye. Ha mitu ha mikuna ne mu bibanda bionso matamba au neahone hanshi, ne matamba au manene nealale matshibuke mu bihonga bionso bia ha buloba. Bantu bonso ba ha buloba nebumuke mu dileshi diau bua kunyemabo. Nyunyu yonso ya mulu neyikile ha mutshi eu udi muhone hanshi, ne nyama yonso ya mu mpata neyilue ku nsanzu yau, bua mitshi mikuabo idi hehi ne mai kayimanyi mua kudibandisha mulu, anyi kutuma tutongabela tuai mu matutu, ne bua mitshi idi mua mai kayimanyi mua kutamba mikuabo bule. Bualu bua bakahisha buonso buai bua kuluayi, bua kuhuekayimu ndondo wa buloba, munkatshi mua bukua bantu, hohamue ne badi bahueka mu Dina dia Bafue. Mukelenge Yehowa udi wamba ne, Mu dituku didiu uhueka mu Muaba wa Bafue nengashishe dilembue dia musulu muadi bualu buau, nenkande misulu yadi, misulu minene neyilekele kuenda; nengashishe Lebanona muadi bualu buau, ne mitshi yonso ya mu mpata neyitekete ne kanyinganyinga bualu buau. Nenzakashe ba mu bisamba bia bantu ku tshiona tshia kuhona kuau, hanawela mu Muaba wa Bafue hohamue ne badi bahueka mu Dina dia Bafue; ne mitshi yonso ya mu Edene, mitshi yonso ya mu Lebanona idi mihite buimpe, mitshi yonso idi ikoleshibua ne mai, neyisambibue mu ndondo wa buloba. Ba mu bisamba bia bantu nebahueke nʼau mu Muaba wa Bafue, kudi bantu badi bashihibue ku muele wa nvita; bantu aba bakadi bakuatshishi bau kabidi, bakadi bashikame mu dileshi diau munkatshi mua bisamba bikuabo, nebahuekemu kabidi. Wewe udi bu nganyi mu butumbi ne bunene buebe munkatshi mua mitshi ya mu Edene? Kadi neuhuekeshibue diatshimue ne mitshi ya mu Edene tô ne mu ndondo wa buloba. Neulale munkatshi mua badi kabayi batengudibue ne badi bashihibue ku muele wa nvita. Ebu mbualu budi bukuata Palô ne tshisumbu tshia bantu bandi. Mukelenge Yehowa udi wamba nunku. Mu tshidimu tshia dikumi ne tshibidi, mu ngondo wa dikumi ne muibidi, mu dituku dia kumudilu dia ngondo, dî dia Yehowa diakalua kundi ne, Muana wa muntu, ashila Palô, mukelenge wa Ejipitu, muadi, umuambile ne, Wakudifuanyikisha bu muana wa nyama wa ntambue wa munkatshi mua bisamba bia bantu, kadi udi anu bu nyama munene wa mu mai manene, uhembula, uhatuisha mai mu mimpempe ya diulu diebe, uvuandulula mai a musulu ne makama ebe, unyanga tusulu tuau. Mukelenge Yehowa udi wamba ne, Nenkuande bukuondo buanyi ne tshisumbu tshia bantu nebankuatshishe, nenkuhatule mu mai mu bukuondo buanyi. Nenkushiye hanshi ha buloba, nenkuele mu mpata, nembikile nyunyu yonso ya mulu bua kuikilayi hamʼbidi hebe, nengukutshishe nyama ya ha buloba buonso ne tshitalu tshiebe. Nendadike munyinyi webe ha mikuna, nengushe bibanda bionso ne minyinyi ya tshitalu tshiebe. Nemboleshe buloba, tô ne ku mitu kua mikuna, ne mashi adi ahatuka munda muebe, ne bihongo nebiule tente ne minyinyi yebe. Hanakujimisha, neabuikile diulu, nenkudimune mitoto ilue midima; nembuikile diba ne ditutu, ne ngondo kena ukenka. Mukelenge Yehowa udi wamba ne, Nenkudimune minda yonso ya mu diulu idi ikenka bua ikale mîdima kûdi, nentume mîdima ha buloba buebe. Nentatshishe mitshima ya bantu ba bungi hangambila ba mu bisamba bia bantu lumu lua kubutuka kuebe, hanaluambila ba mu maloba audi kuyi muanze kumanya. Bulelela, nenkemeshe bantu ba bungi bua bualu buebe, ne bakelenge babo nebazakale ne buowa bukole bua bualu buebe, hanahenyesha muele wanyi wa nvita ku mpala kuabo. Nebazakale diba dionso, muntu ne muntu bua muoyo wandi, mu dituku dia kubutuka kuebe. Bualu bua Mukelenge Yehowa udi wamba ne, Muele wa nvita wa mukelenge wa Babulona neufike hamʼbidi hebe, nembutule bantu bangi ba mu tshisamba tshiebe ku miele ya nvita ya bena bukitu, bonso badi bahite ba mu bisamba bia bantu kubakuatshisha buowa. Nebajimishe dihetu dia Bena Ejipitu, ba mu tshisumbu tshiabo tshionso nebabutudibue. Nembutule bimuna biabo bionso bua kabikadi hehi ne misulu ya bungi. Kakuena dikasa dia muntu diayivuandulula kabidi, kakuena mukono wa nyama yonso wayinyanga kabidi. Mukelenge Yehowa udi wamba ne, Hashishe nembatamishe mai abo, nempuekeshe misulu yabo bu mudi manyi menguluke ahueka. Hanamana kubutula buloba bua Ejipitu kabutu, hanabuvuisha bu buloba butuhu kabuyi ne bintu biakadibu nʼabi tente diambedi, hanashiha bonso badi bashikamemu; mu diba adi nebamanye ne, Meme ndi Yehowa. Mukelenge Yehowa udi wamba ne, Eu mmuyenga udibo badila; udi bana bakashi ba mu bisamba bia bantu badila; nebaudile bua Ejipitu ne bua tshisumbu tshiabo tshionso. Mu tshidimu tshia dikumi ne ibidi, mu ngondo wa kumudilu, mu dituku dia dikumi ne itanu dia ngondo, dî dia Yehowa diakalua kundi ne, Muana wa muntu, ashile tshisumbu tshia ba mu Ejipitu muadi, ubahuekeshe hanshi, yeye ne bana bakashi ba mu bisamba bineme bia bantu, ubatume tô ne mu ndondo wa buloba, hohamue ne bantu aba badi bahueka mu Dina dia Bafue. Wewe udi uhita nganyi bulengele? Hueka biebe, bakuladike munkatshi mua badi kabayi batengudibue. Hona hanshi ne lala biebe munkatshi mua badi bashihibue ku muele wa nvita, wewe ne tshisumbu tshiebe tshia bantu bavule! Bantu bakole ba munkatshi mua bena bukitu nebamuele dî diabo mu Muaba wa Bafue, bamuambila ne badi bamukuatshisha ne, Bakuhueka munemu, badi balala hohamue ne badi kabayi batengudibue, munkatshi mua bakushihibua ku muele wa nvita. Ashû udiku ne bantu bandi bonso, nkita yabo idi minyunguluke lukita luandi, buonso buabo badi bashihibue, bashihibue ku muele wa nvita. Nkita yabo idi mu miaba misokoma ya mu Dina dia Bafue, ne tshisumbu tshia bantu bandi tshidi tshinyunguluka lukita luandi; buonso buabo badi bashihibue, bashihibue ku muele wa nvita, bakadi bakuatshisha ba ha buloba bakadi ne muoyo buowa. Elama udiku ne tshisumbu tshionso tshia bantu bandi bavule tshinyunguluka lukita luandi; buonso buabo bashihibue, bashihibue ku muele wa nvita, bahueke mu ndondo wa buloba kabayi banze kutengudibua, bakadi bakuatshisha ba ha buloba bakadi ne muoyo buowa; badi badituadila bundu buabo diatshimue ne bantu badi bahueka mu Dina dia Bafue. Bakumulongoluela bulalu munkatshi mua badi bashihibue, hohamue ne tshisumbu tshiandi tshionso tshia bantu bavule tshinyunguluke lukita luandi, buonso buabo bakadi kabayi batengudibue, bashihibue ku muele wa nvita; bualu bua bakakuatshisha buowa kudi bakadi ne muoyo ha buloba. Badi badituadila bundu buabo hohamue ne bantu badi bahueka mu Dina dia Bafue. Bobo badi batekibue munkatshi mua bantu badi bashihibue. Mesheke udiku ne Tubala ne tshisumbu tshiabo tshionso tshia bantu bavule tshinyunguluke nkita yabo, buonso buabo bakadi kabayi banze kutengudibua, bashihibue ku muele wa nvita, bualu bua bakakuatshisha buowa kudi bakadi ne muoyo ha buloba. Kabena balala hohamue ne bena bukitu ba kale, bakuhueka mu Muaba wa Bafue ne bielelu biabo bia nvita mu bianza biabo, bakinama mitu yabo ha miele yabo ya nvita, ne ngabu yabo idi ha mutu ha mifuba yabo, bualu bua ditshina dikole dia bukole buabo diakakuata bantu bakadi ne muoyo ha buloba. Nunku wewe Palô nebakutshibule munkatshi mua badi kabayi batengudibue, neulale hohamue ne badi bashihibue ku muele wa nvita. Edome udiku, ne bakelenge bandi ne bakokeshi bandi badiku, bobo bakadi ne bukole buabo buonso, kadi badi bajadikibua ne bantu badi bashihibue ku muele wa nvita; badi balala ne badi kabayi batengudibue, ne badi bahueka mu Dina dia Bafue. Bakokeshi ba ku luseke lua nôde badiku, buonso buabo, ne Bena Sidona bonso, bakuhueka ne bantu badi bashihibue; bobo bakadi batshinyisha banga bantu bua bukole buabo, kadi badi bafuishibue bundu ne badi balala, bobo bine kabayi banze kutengudibua, hohamue ne badi bashihibue ku muele wa nvita; badi badituadila bundu buabo hohamue ne badi bahueka mu Dina dia Bafue. Mukelenge Yehowa udi wamba ne, Palô neabamone, neasambibue bua tshisumbu tshiandi tshia bantu bavule badi bashihibue ku muele wa nvita, Palô muine ne masalayi andi onso. Mukelenge Yehowa udi wamba ne, Bualu bua yeye wakakuatshisha buowa kudi bakadi ne muoyo ha buloba, nebamuladike munkatshi mua badi kabayi batengudibue hohamue ne badi bashihibue ku muele wa nvita, Palô muine ne tshisumbu tshiandi tshionso tshia bantu bavule. Dî dia Yehowa diakalua kundi ne, Muana wa muntu, akula ne bana benu, ubambile ne, Binatuma muele wa nvita mu buloba, ne biasungula bantu ba mu buloba ebu muntu wa munkatshi muabo bua kumuteka bu mudimushi wabo, hamoneye muele wa nvita ulua ha buloba, bieleye mpungi, biadimusheye bantu, hashishe, muntu yonso udi unvua dî dia mpungi, kayi udimuka, bialua muele wa nvita kumushiha, mashi andi neikale anu ha mutu handi yeye. Yeye wakunvua dî dia mpungi, kadi kakudimuka; mashi andi neikale hamʼbidi handi; kadi bu yeye mudimuke, wakadi kuhandisha muoyo wandi. Kadi biamona mudimushi muele wa nvita ulua, kayi wela mpungi, ne bantu kabena badimushibua; bialua muele wa nvita ne biashihau muntu umue wa munkatshi muabo, muntu eu udi ushihibua bua bubi budiye nʼabu, kadi nendombe mashi andi ku bianza bia mudimushi. Nunku, muana wa muntu, ndi nkusungula bu mudimushi wanyi kudi ba mu tshisamba tshia Bena Isalele; nunku haunvua dî mukana muanyi, ubadimushe mu muaba wanyi. Hangambila muntu mubi ne, Wewe muntu mubi, neufue bulelela, ne wewe udi uhanga kuamba dî dimue bua kudimusha muntu mubi bua kulekeleye kuenda mu nshila wandi mubi, muntu eu mubi neafue bua bubi buandi, kadi nendombe mashi andi ku tshianza tshiebe. Kadi biwadimusha muntu eu mubi bua kulekeleye kuenda mu nshila wandi mubi, ne bikaleye kayi ulekela kuenda mu nshila wandi mubi, yeye neafue bua bubi buandi, kadi wewe wakuhandisha muoyo webe. Wewe, muana wa muntu, ambila Bena Isalele ne, Nuenu nudi nuamba mei â ne, Ditomboka dietu ne bubi buetu bidi hamʼbidi hetu, ne mibidi yetu idi miteketangane ne kanyinganyinga bualu buabi; nunku netushale ne muoyo bishi? Ubambile ne, Mukelenge Yehowa udi wamba ne, Bu mundi meme ne muoyo, tshiena ne disanka bua lufu lua muntu mubi, kadi ndi nsanka bua muntu mubi umuke mu nshila wandi mubi bua ikale ne muoyo. Tshingulukai! Tshingulukai! Lekelai bienzedi bienu bibi! Bualu kai nudi basue kufua, nuenu Bena Isalele? Wewe kabidi, muana wa muntu, ambila bana benu ne, Buakane bua muntu muakane kabuena bumuhandisha mu dituku dia bubi buandi; bubi bua muntu mubi kabuena bumushihesha mu dituku didiye ukudimuna mutshima wandi bua kulekeleye bubi buandi. Muntu muakane kena mua kuikala ne muoyo bua buakane buandi mu didiku didiye wenza malu mabi. Hangambila muntu muakane ne, Newikale ne muoyo bulelela, ne bieyemeneye buakane buandi ne bienzeye bualu bubi, kabena bavuluka bualu bumue bua malu makane akadiye wenza, kadi bua bubi buakuenzeye yeye neafue. Bualu bukuabo kabidi, bingambila muntu mubi ne, Wewe neufue bulelela, ne yeye udi umuka ku bubi buandi ne udi wenza malu adi makanangane ne mikenji ne adi makane kabidi; biahingasha muntu eu mubi tshintu tshiakadiye muangate bu tshieya, biahingasheye bintu biakuangateye bu munyengi, biendeye mu mikenji idi ivuisha muoyo, kayi wenza bualu bubi, yeye neikale ne muoyo, kena ufua nansha. Kabena bavuluka bubi bumue bua mu malu mabi akenzeye diambedi bua kumubanda nʼabu. Yeye wakuenza malu adi makanangane ne mikenji ne adi makane, neikale ne muoyo bulelela. Kadi bana benu badi bamba ne, Nshila wa Yehowa kena mululame; tudi tuamba ne, Nshila wabo kena mululame. Bialekela muntu muakane buakane buandi, ne bienzeye malu mabi, neafue bualu buau. Bialekela muntu mubi bubi buandi, ne bienzeye malu adi makanangane ne mikenji ne adi makane, neikale ne muoyo bualu buau. Kadi nudi nuamba ne, Nshila wa Mukelenge kena mululame. Nuenu Bena Isalele, nennulumbuluishe, muntu ne muntu, bu mudi bienzedi biandi. Mu tshidimu tshia dikumi ne ibidi tshia buhika buetu, mu ngondo wa dikumi, mu dituku ditanu dia ngondo, muntu muhanduke ku Yelushalema wakalua kundi, wamba ne, Bakushiha musoko. Tshianza tshia Yehowa tshiakadi hamʼbidi hanyi dilolo diambedi muntu au muhanduke kayi muanze kufika kundi; ne Yehowa wakamana kubulula mukana muanyi mu diba adi diakalua muntu au kundi dinda; nunku mukana muanyi muakabuluibua ne tshiakadi bu kamama kabidi. Mu diba adi kabidi, dî dia Yehowa diakalua kundi, diamba ne, Muana wa muntu, bantu aba badi bashikame mu bikulu bia mu buloba bua Isalele batshidi bamba ne, Abalahama wakadi anu muntu umuehele, kadi yeye wakahiana buloba ebu; nunku, bualu bua tuetu ludi ba bungi, nebatuhe buloba ebu bu buhianyi buetu. Nunku wewe ubambile ne, Yehowa udi wamba ne, Nudi nudia munyinyi udi ne mashi ne nudi nutangisha mesu enu ku mpingu yenu, nudi numatshisha mashi a bakuabo hanshi; nenuhiane buloba ebu munyi? Nudi nudikolesha ku muele wenu wa nvita, nudi nuenza malu a bundu, ne buonso buenu nudi nunyanga bakashi ba bena mutumba nʼenu; nenuhiane buloba ebu munyi? Nunku ubambile ne, Mukelenge Yehowa udi wamba ne, Bu mundi meme ne muoyo, badi bashikame munkatshi mua bikulu abi nebashihibue ku muele wa nvita; nenfile badi bashala mu mpata kudi nyama bu bia kudia biai; badi mu miaha mikoleshibue ne mabue ne mu nyongolo nebafue ku tshihuhu. Nenvuishe buloba bikulu ne tshihela tshia tshianana; bukole buabu buakadi bubuheshisha dihetu nebujimine, ne mikuna ya mu Isalele neyishale hatuhu, kakuyi muntu wahitshila ha mitu hai. Hashishe nebamanye ne, Meme udi Yehowa, hanavuisha buloba ebu bikulu ne tshihela tshia tshianana, bualu bua malu onso a tshinyangu akenzabo. Wewe, muana wa muntu, umanye ne, Bana benu badi batela dina diebe hehi ne bimanu ne bibi bia nsubu, badi bambilangana ne, Katuye, tunvue dî didi difuma kudi Yehowa. Nunku badi balua kûdi bu muakadibo balua diambedi, ne badi bashikama ku mpala kuebe badifuanyikisha bu bantu banyi; badi bunvua mei ebe, kadi kabena baenza; badi ne dinanga dinene ku mishiku, kadi mitshima yabo idi mitangisha ku luhetu luabo. Wewe udi kudibo bu muimbi wa misambu ya dinanga, muikale ne dî diakane, ne mumanye mua kuimba tshisanji bimpe; badi bunvua mei ebe, kadi kabena baenza. Hamueneka malu â—nealue bulelela— nebamanye ne muprofete wakadi munkatshi muabo. Dî dia Yehowa diakalua kundi ne, Muana wa muntu, diula balami ba mikoko ba Bena Isalele, amba mei a buprofete, ubambile bobo, balami aba ba mikoko mene, ne, Mukelenge Yehowa udi wamba ne, Mulau wikale kudi balami ba mikoko ba Bena Isalele, badi badidisha! Balami kabakadi kudisha mikoko, anyi? Nuakunua mabele ai, nuakudiluatshisha miosa yai; nuakushiha mikoko idi ne manyi, kadi kanuakudisha mikoko. Kanuakusangasha yakadi mitekete, kanuakukolesha yakadi ne mibidi misame, ka nuaku jingila yakadi mitahike mputa tshilulu, kanuakuhingasha yakuihatabo ne kanuakukeba yakadi mijimine; kadi nuakuyikokesha ne tshianza tshikole ne tshikisu. Yakatangadishibua bualu bua kakuakadi mulami; yakalua bia kudia bia nyama yonso ya mu mpata. Mikoko yanyi yakatangadishibua, yakendakana ha mutu ha mikuna mile yonso ne ha mutu ha mikuna yonso mikuabo; bushuwa, mikoko yanyi yakatangadishibua ha buloba honso; kakuakadi muntu wakuyikeba anyi wakuyilonda. Bua malu â, nuenu balami ba mikoko, unvuai dî dia Yehowa! Mukelenge Yehowa udi wamba ne, Bu mundi meme ne muoyo, bualu bua mikoko yanyi yakulua bu bintu bia kuhaulabo, ne mikoko yanyi yakulua bia kudia bia nyama yonso ya mu mpata, bualu bua kayakadi ne mulami ne bualu bua balami banyi kabakakeba mikoko yanyi, kadi balami bakadidisha, kabakadisha mikoko yanyi; bua malu â, nuenu balami, unvuai dî dia Yehowa! Mukelenge Yehowa udi wamba ne, Monai, ndi ne balami ba mikoko tshilumbu; nendombe mikoko yanyi ku tshianza tshiabo, nembakande bua balekele kudisha mikoko yanyi; balami kabena badidisha kabidi; nempandishe mikoko yanyi mukana muabo bua kayikadi bu bia kudia biabo kabidi. Bualu bua Mukelenge Yehowa udi wamba ne, Monai, meme, meme nkayanyi nendonde mikoko yanyi, nenyikebe. Bu mudi mulami wa mikoko ukeba tshisumbu tshia mikoko yandi mu dituku didiyi mitangadishibue, nunku nenkebe mikoko yanyi; nenyisungile ku miaba kudiyi mitangadishibue mu dituku dia matutu ne dia mîdima mikole. Nenyihatule munkatshi mua bantu ba bende, nenyisangishe bua kuyumusha munkatshi mua maloba makuabo, nendue nʼai mu buloba buai; nenyidishe ha mikuna ya mu Isalele, hehi ne mishimi ya mai ne mu miaba yonso idi bantu bashikame. Nenyidishe mu madimi adi ne mashinde makane, ne luhangu luai neluikale ha mutu ha mikuna mile ya mu Isalele. Mu muaba wawa neyilale mu luhangu luimpe, ne neyidie mashinde mu madimi a mashinde mimpe ha mikuna ya mu Isalele. Mukelenge Yehowa udi wamba ne, Meme mume nengikale mulami wa mikoko yanyi, meme mume nenjadike mu madimi a mashinde. Nenkebe yakadi mijimine, nempingashe yakihatabo, nenjingile yakadi mitahike mputa tshilulu, nenkoleshe yakadi isama; nendame idi ne manyi ne idi ne bukole, nenyidishe ne kulumbulula kuakane. Bua bualu buenu, nuenu ba mu tshisumbu tshianyi tshia mikoko. Mukelenge Yehowa udi wamba ne, Monai, nendumbulule bilumbu bidi hankatshi ha mukoko ne mukoko ne bia hankatshi ha bimpanga ne mpumbu ya mbushi. Mbualu butekete ku mesu kuenu bua kudia mashinde mimpe a mu budimi, ne bua kudiata mashinde mimpe makuabo muinshi mua bikono bienu, anyi? Mbualu butekete bua kunua mai mimpe ne bua kuvuandulula mai makuabo ne bikono bienu, anyi? Kadi mikoko yanyi idi ne bua kudia mashinde au anuakudiata, ne bua kunua mai anuakunyanga ku bikono bienu, anyi? Bua malu â Mukelenge Yehowa udi ubambila ne, Monai, meme, meme nkayanyi, nendumbulula bilumbu bidi hankatshi ha mikoko idi ne manyi ne mikoko idi minyane. Bualu bua nudi nusakila ne lubese ne diaha ne nudi nutua mikoko mitekete nsengu yenu, tô ne hanuayitangadisha mu miaba mikuabo, nunku nensungile tshisumba tshianyi tshia mikoko, kayena ikala bu tshintu tshia kuhaulabo, nendumbulule tshilumbu tshidi hankatshi ha mukoko ne mukoko. Nenteke mulami umue ha mutu hai, yeye neayidishe, muntu wanyi Davidi mene; yeye neayidishe, yeye neikale mulami wai. Ne meme, Yehowa, nengikale Nzambi wai, ne muntu wanyi Davidi neikale mukokeshi wai; meme, Yehowa, nakuamba dî edi. Nempunge nʼai tshihungidi tshia ditalala, nengumushe nyama ya luonji mu buloba, bua mikoko ishikame talalâ mu tshihela ne bua ilale tulu muitu. Nenyisankishe mu miaba yonso idi inyunguluka mukuna wanyi, nendokeshe nvula mu tshikondo tshiandi; nvula ya kusankisha bantu neyiloke. Mitshi va mu budimi neyikuame mamuma ai, buloba nebulue ne bia kudia biabu, ne mikoko neyikale mu buloba buai kayiyi ne ntatu; neyimanye ne, Meme ndi Yehowa, hanatshibula mitshi yabo ya bikokedi, hanayihandisha mu bianza bia bantu bakayibuesha mu buhika. Kayena ikala kabidi bu tshintu tshia kunyengabo kudi ba mu bisamba bia bantu, ne nyama ya ha buloba kayena iyidia; kadi neyishikame talalâ kayiyi ne ntatu, ne kakuena muntu wayitshinyisha. Nenyilongoluele buloba budi ne lumu lunene bualu bua kumenesha kuabu, kayena ishihibua kabidi ne nzala mu buloba abu, kayena ifiushibua bundu kabidi kudi ba mu bisamba bia bantu. Mukelenge Yehowa udi wamba ne, Neyimanye ne meme, Yehowa Nzambi wai, ndi nʼai; ne yoyo Bena Isalele, mbantu banyi. Mukelenge Yehowa udi wamba ne, Nuenu, mikoko yanyi, mikoko ya mu budimi buanyi bua mashinde, undi bantu, ne meme ndi Nzambi wenu. Dî dia Yehowa diakalua kundi kahidi ne, Muana wa muntu, tangisha mpala webe ku mukuna wa Seî, ûdiule; uwambile ne, Mukelenge Yehowa udi wamba ne, Monai, ndi nʼebe tshilumbu, wewe mukuna wa Sei, nengolole tshianza tshianyi ha mutu hebe bua kukukengesha, nenkuvuishe tshikulu ne tshihela tshia hatuhu. Nembutule misoko yebe, ne neyishale bikulu; neumanye ne, Meme ndi Yehowa. Bualu bua wakadi ne Bena Isalele lukuna lua tshiendelele, wakahaula kudi bakadi ne miele ya nvita mu tshikondo tshia dikenga diabo, mu tshikondo mene tshia kukengeshibua kuabo kua kunshikidilu. Nunku Mukelenge Yehowa udi wamba ne, Bu mundi meme ne muoyo, nenkulongoluele mashi ne mashi neakulonde, bualu bua wewe wakuhua hawakumatshisha mashi abo hanshi, mashi neakulonde. Nunku nenvuishe mukuna wa Seî tshikulu ne tshihela tshia tshianana; ku muele wa nvita nenshihe muntu wabuelamu ne muntu wahatukamu. Nendishe mikuna yau tente ne bantu bau bashihibue; bantu bashihibue ku muele wa nvita nebahone mu mikuna yebe ne mu bibanda biebe ne mu bihongo biebe bionso. Nenkubutule tshiendelele, ne misoko yebe neyishale kayiyi ne bantu; nunku nenumanye ne, Meme udi Yehowa. Bualu bua wewe wakuamba ne, Bisamba ebi bibidi ne maloba abi abidi nebikale bianyi, ne meme nembiangate bu buhianyi buanyi; kadi Yehowa waka dimu; nunku Mukelenge Yehowa udi wamba ne, Bu mundi meme ne muoyo, nenkuenzele wewe bu muakadi tshiji tshiebe ne mukau webe bi wakabuesha bualu bua lukuna luwakadi nʼalu kudibi; nendimanyishe munkatshi muenu hananulumbuluisha. Neumanye kabidi ne, Meme Yehowa nakunvua bihendu bionso biwakuhenda nʼabi mikuna ya mu Isalele bawakuamba ne Yakubutuka, yakufidibua kutudi bu bia kudia bietu. Bualu bua wewe wakudibandisha ku mpala kuanyi ne mei a mukana muebe, wa kundi ula ne mei mavule, ne meme nakaunvua; nunku Mukelenge Yehowa udi wamba ne, Hasanka ba ha buloba bonso, nenkubutule kabutu. Bu muwakasanka bualu bua kubutuka kua buhianyi bua Bena Isalele, nenkuenzele wewe muomumue: Wewe mubutuke, mukuna wa Sei, ne buloba bua Edome buongo: nunku nebamanye ne, Meme ndi Yehowa. Wewe kabidi, muana wa muntu, ambila mikuna ya mu Isalele dî dia baprofete, uyambile ne. Nuenu mikuna ya mu Isalele, unvuai dî dia Yehowa! Mukelenge Yehowa udi wamba ne, bualu bua badi nʼenu lukuna bakunuseka ne, Aka! Mikuna yaya ya kale yakulua buhianyi buetu; nunku uyambile ne, Mukelenge Yehowa udi Wamba ne, Bualu bua bakunubutula, bakununyanga ku nseke yonso, bua nuenu nuikale buhianyi bua bisamba bikuabo bia bantu, ne bualu bua bakutela mena enu kudi bena musoko, ne bakunsonguela munkatshi mua bantu; bua malu â, nuenu mikuna ya mu Isalele, unvuai dî dia Mukelenge Yehowa! Mukelenge Yehowa udi wamhila mikuna mile ne mikuna mikese, bihongo ne bibanda, miaba yakubutuka ne misoko yakushala bikulu, biakulua bu tshintu tshia kunyengabo ne kusekabo kudi bisamba bikuabo bidi binunyunguluka. Nunku Mukelenge Yehowa udi wamba ne, Bulelela, nakuamba dî mu kahia ka mukau wanyi bua kuhisha nʼadi ba mu bisamba bikuabo bia bantu, ne bua kuhisha nʼadi ba mu buloba buonso bua Edome, badi badisunguila buloba buanyi bu buhianyi buabo, benza nunku ne disanka dinene ne mitshima ya lukuna, bua kubukuata bu tshintu tshidibo banyenga. Bua malu â, amba biebe mei ebe bualu bua buloba bua Isalele, ambila mikuna minene ne mikuna mikese, bihongo ne bibanda ne, Mukelenge Yehowa udi wamba ne, Monai, nakuamba dî mu mukau wanyi ne mu tshiji tshianyi tshikole, bualu bua nuakufuishibua bundu kudi ba mu bisamba bia bantu. Nunku Mukelenge Yehowa udi wamba ne, Nakubisha tshianza tshianyi bua kuditshiha ne, Ba mu bisamba bidi binunyunguluka nebadituadile bundu buabo. Kadi nuenu, mikuna ya mu Isalele, nenuele ntonga yenu, nenukuamine bantu banyi Bena Isalele mamuma enu, bualu bua bobo nebalueku tshituha tshihi. Tangilai bienu, ndi ku luseke luenu, nempingane kunudi, ne nebadime buloba buenu, nebakunemu maminu. Nennuvudishe ba bungi, nuenu bonso ba mu tshisamba tshia Bena Isalele; misoko neyikale ne bantu, nebibake mu miaba yakadi mibutuke. Nenvudishe bantu ne bimuna bia bungi; nebivulangane, nebilele bana ba bungi; nenjadike ba bungi munkatshi muenu bu muakadi bualu buenu diambedi, nennuenzele bienzedi bimpe bihite bia mu matuku enu a ku tshibangidilu; nunku nenumanye ne, Meme ndi Yehowa. Nengendeshe bantu ha mutu heńu kabidi, bantu banyi Bena Isalele mene; nebanuangate bu bintu biabo, nenuikale buhianyi buabo ne kanuena nubashiya kabayi ne bana kabidi. Mukelenge Yehowa udi wamba ne, Bualu bua bantu badi bakuambila ne, Wewe buloba bua Isalele udi mudi wa bantu, udi unyenga bana baledibue kudi bantu bebe kabidi, nunku kuena udia kabidi bantu, kuena unyenga kabidi bana baledibue kudibo. Mukelenge Yehowa udi wamba dî edi. Mukelenge Yehowa udi wamba ne, Tshiena ngitabusha bua wewe kunvua kabidi mei a bihendu adi ba mu bisamba bia bantu bamba bua bualu buebe, ne kuena wikala ne bualu bua kuitabusha bihendu bia bantu ba bende kabidi, ne kuena ulenduisha ba mu tshisamba tshiebe kabidi. Dî dia Yehowa diakalua kundi kabidi ne, Muana wa muntu, hakadi Bena Isalele bashikama mu buloba buabo, bakabunyanga ne bilele biabo ne bienzedi biabo. Bilele biabo biakadi ku mpala kuanyi bu bukoya bua mukashi utshidi ku katshetshi. Bua malu â nakabahongoluela tshiji tshianyi tshikole bualu bua mashi akadibo bamatshisha ha buloba ne bualu bua bakabunyanga ne mpingu yabo. Nakabamuangalasha munkatshi mua bisamba bia bantu, ne bakatangadishibua munkatshi mua maloba makuabo; nakabalumbuluisha bu muakadi bilele biabo bibi ne bienzedi biabo. Hakafikabo munkatshi mua bisamba abi kuakayabo, bakanyanga dina dianyi dia tshijila; bualu bua bantu bakuabo bakamba bua bualu buabo ne, Aba mbantu ba Yehowa, bakaluhuka mu buloba buandi. Kadi nakasua bantu bonso banemeke dina dianyi dia tshijila, diakadi Bena Isalele banyanga munkatshi mua bisamba bia bantu kuakayabo. Nunku ambila Bena Isalele ne, Yehowa udi wamba ne, Tshiena ngenza malu â bua bualu buenu, nuenu Bena Isalele, kadi ndi ngenza bualu bua dina dianyi dia tshijila dinuakanyanga munkatshi mua bisamba abi munuakaya. Mukelenge Yehowa udi wamba ne, Nenjidile dina dianyi dinene diakanyangabo munkatshi mua bisamba bia bantu, dinuakanyanga bienu mene munkatshi muabo; ne ba mu bisamba abi nebamanye ne, Meme ndi Yehowa, hanadimuenesha bu Wa Tshijila ku mpala kuabo ku bienzedi bindi nnuenzela. Bua nennuhatule munkatshi mua bisamba bia bantu, nennusangishe bua kunûmusha munkatshi mua maloba makuabo, nendue nʼenu mu buloba buenu mene. Nennumiamine mai matoke tô, nenuikale bakane; nennulengeshe ku bukoya buenu buonso ne ku mpingu yenu yonso. Nennuhe mutshima muhia-muhia kabidi, nenteke nyuma muhia-muhia munda muenu; nengumushe mutshima udi bu dibue munda muenu, nennuhe mutshima wa buntu. Nenteke Nyuma wanyi munda muenu, nennuendeshe mu mikenji yanyi mifunda, nenutumikile mikenji yanyi, nengenze. Nenushikame mu buloba bunakaha batatu benu; nenuikale bantu banyi, meme nengikale Nzambi wenu. Neanuhandishe ku malu enu onso a bukoya. Nembikile maminu enu bua kuluau, nengakumbashe, ne tshiena ntuma tshiole tshikuabo munkatshi muenu. Nenkumbashe mamuma ku mitshi ne bia kudia mu madimi, bua kabanuhendi kabidi kudi ba munkatshi mua bisamba bia bantu bualu bua tshiole. Hashishe nenumuke bilele Dienu bibi, ne bienzedi bienu biakadi kabiyi biakane; malu enu mabi ne a bundu neanutonde mene. Mukelenge Yehowa udi wamba ne, Numanye muanda eu ne, Tshiena ngenza malu â bua bualu buenu, nukuatshike bundu, nudihuekeshe bua bienzedi bienu, nuenu Bena Isalele. Mukelenge Yehowa udi wamba ne, Mu dituku dindi nnulengesha ku malu mabi enu onso, nenjadike bantu mu misoko yenu, nebibake kabidi miaba yakadi bikulu. Nebadime buloba buakadi bubutula diambedi, kabuena bushala bubutula ku mesu kua bonso badi bahitshilaku. Bantu nebambe ne, Buloba ebu buakadi bubutula diambedi buakulua bu budimi bua Edene; misoko yakadi minyanguke ne mibutula ne yakadi bikulu yakalua misoko ya ngumbu idi ne bantu bashikamemu. Hashishe ba mu bisamba bidibo bashiye binunyunguluka nebamanye ne, Meme Yehowa nakuibaka misoko yakadi bikulu, nakujadika kabidi miaha yakadi mibutuke. Meme Yehowa nakuamba di edi, ne meme nendienze. Mukelenge Yehowa udi wamba ne, Nengitabushe kabidi bua Bena Isalele bandombe bua mbenzele muanda eu wa kubakumbashila bantu bua bikale ba bungi bu tshisumbu tshia mikoko, bu tshisumbu tshia mikoko yakajidilabo bu milambu ya kufila kudi Yehowa, bu tshisumbu tshia mikoko ya mu Yelushalema mu bikondo bia bidia biabo bia disanka, nunku misoko yakadi bikulu diambedi neyule tente ne bisumbu bia bantu; nunku nebamanye ne, Meme ndi Yehowa. Tshianza tshia Yehowa tshiakadi hamʼbidi hanyi, ne yeye wakaya nʼanyi mu Nyuma wa Yehowa, wakanshikika munkatshi mua tshibanda tshiakadi tshiule tente ne mifuba. Wakampitshisha hehi nʼai, nakayinyunguluka, ekumona! Yakadi ya bungi hanshi mu tshibanda, ne yakadi miume be. Yeye wakankonka ne, Muana wa muntu, mifuba ei idi mua kuikala ne muoyo, anyi? Nakamuhingasha di ne, Wewe, Mukelenge Yehowa, udi mumanye. Yeye wakangambila kabidi ne, Ela dî diebe dia buprofete kudi mifuba ei, uyambile ne, Nuenu mifuba miume, unvuai dî dia Yehowa! Mukelenge Yehowa udi wambila mifuba ei ne, Tangilai, nengele muhuya munda muenu, nenuikale ne muoyo. Nenteke mifungu hamʼbidi henu, nennuluatshishe misunyi, nennubuikile ne dikoba, nennuele muhuya munda muenu, ne nenuikale ne muoyo; nunku nenumanye ne, Meme ndi Yehowa. Nunku nakamba di dianyi bu muakangambileye; ne hanakadi ngamba mei anyi, tshiona tshiakadiku, ne monai, tshiona bu tshia nvunde tshiakadiku; ne mifuba yakasangakana mufuba mukuabo wakatuangana ne mufuba mukuabo. Nakayimona kabidi, ekumona! Mifungu yakadi hamʼbidi hai, misunyi yakamueneka, ne dikoba diakayibuikila mu miaba yonso; kadi kakuakadi muhuya munda muai. Hashishe yeye wakangambila ne, Ela di diebe dia buprofete kudi luhehele; ela dî diebe, wewe muana wa muntu, ambila luhehele ne, Mukelenge Yehowa udi wamba ne, Lua ku mpehele inai, wewe muhuya, buela munda mua bantu aba bashihibue bua bobo bikale ne muoyo. Nunku nakela dî dianyi bu muakangambileye, ne muhuya wakabuela munda muabo, bakadi ne muoyo, bakimana ne makasa, tshisumbu tshinene tshia bantu. Yeye wakangambila ne, Muana wa muntu, mifuba ei idi bonso ba mu tshisamba tshia Bena Isalele. Tangila, badi bamba ne, Mifuba yetu yakûma, ditekemena dietu diakujimina, tuakufila bietu. Nunku amba mei ebe a buprofete, ubambile ne, Mukelenge Yehowa udi wamba ne, Monai bienu, nembulule nkita yenu, nennuhatule mu nkita yenu, nuenu bantu banyi, nendue nʼenu mu buloba bua Isalele. Nenumanye ne, Meme ndi Yehowa, hanabulula nkita yenu, hananuhatula mu nkita yenu, nuenu bantu banyi. Yehowa udi wamba ne, Nenteke Nyuma wanyi munda muenu, nenuikale ne muoyo, nennuteke mu buloba buenu mene; nenumanye ne, Meme ndi Yehowa. Nakuamba dî edi, nendienze. Dî dia Yehowa diakalua kundi kabidi ne, Wewe, muana wa muntu, angata mutshi umue, ufundehu mei ne, Bualu bua Yuda ne bua Bena Isalele badi balamata kudiye. Angata mutshi mukuabo, ufundehu mei ne, Bualu bua Yosefe ne bonso ba mu tshisamba tshia Bena Isalele badi balamata kudiye. Ulungakashe mutshi umue ne mukuabo bu mutshi umue, bua ilue mutshi umue mu tshianza tshiebe. Ne hakukonka bana benu ne, Kuena utujinguluila bualu bûdi utufuanyikishila malu â, anyi? ubambile ne, Mukelenge Yehowa udi wamba ne, Monai, nengangate mutshi wa Yosefe udi mu tshianza tshia Efelayima ne bisamba bia Bena Isalele bidi bilamatangana nʼandi, nengulungakashangane ne mutshi wa Yuda, nenyivuishe mutshi umue, nebikale mutshi umue mu tshianza tshianyi. Mitshi iudi mufunde ikale mu tshianza tshiebe ku mesu kuabo, hawabambila ne, Mukelenge Yehowa udi wamba ne, Monai, nengumushe Bena Isalele munkatshi mua bisamba bia bantu muakayabo, nensangishe ba ku nseke yonso, nendue nʼabo mu buloba buabo mene. Nembavuishe tshisamba tshimue mu buloba abu ha mikuna ya mu Isalele; mukelenge umuehele neikale nfumu wa buonso buabo; kabena bikala bisamba bibidi kabidi, kabena batahuluka kabidi makelenge abidi kashidi. Kabena badinyanga kabidi ne mpingu yabo ne bintu biabo bidi bibahihisha, anyi ne malu mabi abo makuabo; ne nembasungile ku matomboka abo onso akadibo bantombokela nʼau, nembalengeshe; nunku nebikale bantu banyi, ne meme nengikale Nzambi wabo. Muntu wanyi Davidi neikale mukelenge ku mutu kuabo; buonso buabo nebikale ne mulami wa mikoko umue; nebende mu malu andi mbambila, nebatumikile mikenji yanyi, nebayenze. Nebashikame mu buloba bunakahesha Yakoba, muntu wanyi, muakashikamabo kudi batatu benu; bobo ne bana bakalelabo ne bikulu babo, nebashikamemu tô ne tshiendelele; ne Davidi, muntu wanyi, neikale mukokeshi wabo kashidi. Bualu bukuabo, nempunge nʼabo tshihungidi tshia ditalala; netshikale tshihungidi tshia tshiendelele; nembajadike mu buloba buabo, nembakumbashe ba bungi, nenteke tshitendelelu tshianyi munkatshi muabo tshiendelele. Nenshikame hohamue nʼabo; nengikale Nzambi wabo, ne bobo nebikale bantu banyi. Nunku ba mu bisamba bia bantu nebamanye ne, Meme Yehowa ndi njidila Bena Isalele, hashala tshitendelelu tshianyi munkatshi muabo tshiendelele. Dî dia Yehowa diakalua kundi ne, Muana wa muntu, tangisha mpala webe kudi Gogo wa buloba bua Magoga, mukokeshi wa mu Losha, Mesheke ne Tubala, umudiule ne mei ebe a buprofete. Amba biebe ne, Mukelenge Yehowa udi wamba ne, Ndi nʼebe tshilumbu, wewe Gogo, mukokeshi wa Losha, Mesheke ne Tubala. Nenkuimanyike, nenteke ndobo mu mbanga yebe; nenkutume ku nvita ne masalayi ebe onso, tubalu tuebe ne bena tubalu bebe, buonso buabo baluatshishe bivualu bia biamu, tshisumbu tshinene tshia masalayi mambule ngabu wa ha tshiadi ne ngabu wa ku diboko, ne buonso buabo bakuate miele ya nvita mu bianza: biabo. Ba mu Pelasa, Kusha ne Puta nebikaleku, buonso buabo bikale ne ngabu ne bifulu bia tshiamu, ne ba mu Gomê ne bisumbu biandi bionso bia bantu; Bena Togâma ne bisumbu biabo bionso, bafume ku miaba ya kunfudilu kua luseke lua ku nôde; bantu ba bungi nebikale nʼebe. Longolola bintu biebe bionso, imana ne malu onso malongolola, wewe wikaleku ne bisumbu biebe bionso bia masalayi biakudisangisha nʼebe, ushaleku bua kuenza mundi nkuambila. Hahita matuku a bungi, nebakubikile bua kuluangana; kunshikidilu kua bidimu ubange kuya bua kuluisha bena buloba bakuhanduka ku kubutuka kua muele wa nvita, tshisamba tshia bantu badibo bahatula munkatshi mua bisamba bia bungi bia bantu; bakabasangisha ha mikuna ya mu Isalele yakadi mibutuke ne dibutuka dia tshiendelele diambedi, kadi idi ne bantu bashikamehu mpindiu bakuhatulabo munkatshi mua bisamba bia bungi bia bantu, buonso buabo bashikamehu kabayi ne bualu budi bubahumbisha. Wewe bandaku, lua bu tshihuhu tshinene, ikala bu ditutu didi dibuikila buloba, wewe ne bisumbu biebe Ma masalayi, ne bantu ba bungi badi nʼenu. Mukelenge Yehowa udi wamba ne, Mu dituku adi meji neabuele mu mutshima webe, ne wewe neuhangidishe kuenza bualu bubi. Newambe ne, Nembandeku bua kuluisha ba mu misoko idi mu mpata; nenye kuluangana ne bantu aba badi bashikame talalâ, kabayi ne bualu budi bubahumbisha, buonso buabo badi bashikameku kabayi ne ngumbu, anyi nkanu ne bibi. Neuhangidishe bua kuhaula ne kunyenga bintu biabo ku bukole, bua kuhingasha tshianza tshiebe kabidi ku bihela bidi ne bantu bashikamemu mpindiu bua kubinyanga, bua kuluishamu bantu aba bakahatulabo munkatshi mua bisamba bia bantu, bakamana kuangata bimuna ne luhetu, badi bashikame munkatshi mua buloba. Sheba ne Dedana ne bangendʼa mushinga ba ku Tâshishi ne bana babo banene nebakuele dikonka ne, Wakulua biebe bua kuhaula bantu aba, anyi? Wakusangisha bisumbu biebe bia masalayi bua kunyenga bintu biabo, ne bua kuya ne biamu bia argent ne bia or ne bimuna ne luhetu ne bintu biwakunyenga, anyi? Bua malu â, muana wa muntu, amba mei ebe a buprofete, ambila Gogo ne, Mukelenge Yehowa udi wamba ne, Mu dituku didi bantu banyi Bena Isalele bashikameku kabayi ne bualu budi bubahumbisha, wewe kuena mumanye muanda eu, anyi? Wewe neufume ku muaba webe wa kunfudilu kua nôde, wewe ne bantu ba bungi, buonso buabo babande ha nyima ha tubalu, tshisumbu tshinene tshia bantu ne tshisumbu tshinene tshia masalayi. Neulue kuluisha bantu banyi Bena Isalele, bu ditutu didi dibuikila buloba. Mu matuku a kunshikidilu, nenkutume bua kuluangana ne ba mu buloba buanyi, bua ba mu bisamba bia bantu bammanye meme, hanamuenesha tshijila tshianyi ku mesu kuabo ku bienzedi bindi nkuenzela wewe, Gogo. Mukelenge Yehowa udi wamba ne, Wewe kuena muntu unakambila bantu malu ebe mu matuku a kale, bantu banyi baprofete ba Bena Isalele, bakadi bamba mei abo mu matuku au tô ne ku bidimu bia bungi, babalesha mundualua nʼebe bua wewe kubaluisha, anyi? Mukelenge Yehowa udi wamba ne, Mu dituku adi dialua Gogo kuluangana ne ba mu buloba bua Isalele, tshiji tshianyi tshikole netshinunke tô ne mu diulu dianyi. Mu mukau wanyi ne mu kahia ka tshiji tshianyi tshikole nakamba ne, Mu dituku adi kuzakala kunene nekuikale mu buloba bua Isalele; ne bua muanda eu mishiha ya mu mai manene ne nyunyu ya mulu ne nyama ya mu mpata ne bintu bionso bidi bidikoka hanshi ne bantu bonso badi ha buloba nebizakale ku mpala kuanyi, ne mikuna yonso neyuhuke, ne bibungubungu nebibumbuke, ne ngumbu yonso neyishimbuke. Mukelenge Yehowa udi wamba ne, Nembikile muele wa nvita bua kuluangana nʼandi ha mikuna yanyi yonso; muele wa muntu yonso neukebe kutaha muanʼabo ne muntu. Nemmulumbuluishe ne bihuhu ne mashi, nemmulokeshile ne bisumbu biandi bia masalayi ne bantu badi nʼandi nvula udi uhuka bikole, ne mabue manene a nvula, kahia ne soufre. Nemmueneshe bunene buanyi ne tshijila tshianyi, nendimanyishe ku mesu kua bisamba bia bungi bia bantu. Nunku nebamanye ne, Meme ndi Yehowa. Wewe, muana wa muntu, udiule Gogo, umuambile ne, Mukelenge Yehowa udi wamba ne, Tangila, ndi nʼebe tshilumbu, wewe Gogo, mukelenge wa Losha, Mesheke ne Tubala. Nenkuimanyike, nenkuendeshe ku bukole; nendue nʼebe ku luseke lua kunfudilu kua nôde; nenkufikishe ha mikuna ya mu Isalele. Hashishe nenkume buta buebe bua bumuke mu tshianza tshiebe tshia bakashi, nemponeshe mikete yebe idi mu tshianza tshiebe tshia balume. Wewe neuhone ha mikuna ya mu Isalele, wewe ne bisumbu biebe bionso bia masalayi, ne bantu bonso badi nʼebe; nenkufile kudi nyunyu ya mishindu yonso idi idia munyinyi, ne kudi nyama ya mu mpata bu bia kudia biai. Mukelenge Yehowa udi wamba ne, Neuhone hanshi mu mpata wa hatuhu; bualu bua meme nakuamba nunku. Nentume kahia hamʼbidi ha ba mu Magoga ne hamʼbidi ha badi bashikame kabayi ne ntatu mu miaba ya ku muelelu wa mai manene; nunku bobo nebamanye ne, Meme ndi Yehowa. Nemmueneshe tshijila tshia dina dianyi munkatshi mua bantu banyi Bena Isalele; ne tshiena ngitabusha bua dina dianyi dia tshijila dihendibue kabidi; nunku ba mu bisamba bia bantu nebamanye ne, Meme ndi Yehowa, Wa Tshijila wa mu Isalele. Mukelenge Yehowa udi wamba ne, Monai! Bualu ebu bunakuamba nebulue, nebuenjibue; edi ndituku mene dinakanuambila. Mu diba adi badi bashikame mu misoko ya mu Isalele nebaluhuke, nebatemeshe kahia kabo ne bielelu abi bia nvita, nebabioshe bu nkunyi yabo: ne ngabu ya ha tshiadi ne ngabu ya ku diboko, ne mata ne mikete, ne mafuma mibi ne mafuma male; nebatemeshe kahia ne bintu ebi tô ne hahita bidimu muanda mutekete. Nunku kabena ne bua kudiangatshila nkunyi mu madimi abo, anyi kutaha mutshi mukuabo muitu bua kutshiaba nkunyi, bualu bua nebatemeshe kahia kabo ne bielelu abi bia nvita; nebahaule bantu aba bakabahaula, nebanyenge bintu bia bantu aba bakanyenga bintu biabo. Mukelenge Yehowa udi wamba dî edi! Mu dituku adi mene nempe Gogo muaba wa kujikibua mu Isalele, mu tshibanda tshia Abalima mene, ku luseke lua esete lua Dishiba dia Lufu. Bakuabo nebele nkila ku mutu kua Tshibanda tshia Abalima bua kutshijibika, ne mu muaba wawa nebajike Gogo ne tshisumbu tshiandi tshionso tshia bantu; nebaubikile ne, Tshibanda tshia Hamona-Gogo. Bena Isalele nebikale ne mudimu wa kujika bantu aba ne wa kulengesha buloba ngondo muanda mutekete. Eyo, bantu bonso ba mu buloba ebu nebikale ne mudimu wa kubajika; Mukelenge Yehowa udi wamba ne, Muanda eu neubavuishile lumu lunene mu dituku dindi mmuenesha butumbi buanyi. Nebasungule bantu badi ne bua kuenza mudimu eu ku dituku ku dituku bua bobo bendakane mu buloba, bakebekebe badi bashala hanshi ha buloba ebu kabayi banze kujikibua, bua kubulengesha. Hashika ngondo muanda mutekete nebabange kukeba bitalu bikuabo. Hahita bakuabo mu buloba, ne hamona mukuabo mufuba wa muntu mufue, budiye nʼabu mbua kuteka tshimanyinu hehi nʼau, tshishaleku tô ne halua bajiki kûjika mu Tshibanda tshia Hamona-Gogo. (Musoko wa Hamona udiku kabidi) Nunku nebalengeshe buloba. Mukelenge Yehowa udi ukuambila wewe, muana wa muntu, ne, Ambila nyunyu ya mishindu yonso ne nyama yonso ya mu mpata ne, Nudisangishe hohamue, nulue; nufume ku nseke yonso, nudikunguishe ku muaba udi minyinyi yanyi indi nnushihela, milambu mene indi nnulongoluela ha mikuna ya mu Isalele, bua nuenu nudie munyinyi ne nunue mashi. Nenudie munyinyi wa bena bukitu, nentume mashi a bakokeshi ba ha buloba, bimpanga, bana ba mikoko, mpumbu ya mbushi, balume ba ngombe, bionso nnyama ya manyi ya ku Bashana. Nenudie mafuta tô ne hula mafu enu tente, nentume mashi tô ne hanuâkuatshika, ku minyinyi ya milambu inakunushihela. Mukelenge Yehowa udi wamba ne, Nenukute ku mesa anyi ne munyinyi wa tubalu ne wa nyama idi bantu babanda ha nyima hai, wa bena bukitu ne wa bena nvita ba mishindu yonso. Nenjadike butumbi buanyi munkatshi mua bisamba bia bantu; ne ba mu bisamba bionso nebamone munakushikisha kulumbulula kuanyi kunakubalumbuluisha, ne tshianza tshianyi tshinakuteka hamʼbidi habo. Nunku mu dituku adi tô ne tshiendelele Bena Isalele nebamanye ne, Meme ndi Yehowa Nzambi wabo. Ba mu bisamba bia bantu nebamanye ne, Bena Isalele bakabuela mu buhika bualu bua bubi buabo; bualu bua bakantombokela, nakabasokoka mpala wanyi, nakabafila mu bianza bia bena lukuna babo ne buonso buabo bakashihibua ku muele wa nvita. Bu muakadi bukoya buabo ne bu muakadi kuntombokela kuabo mbu munakabenzela; nunku nakabasokoka mpala wanyi. Bua malu â Mukelenge Yehowa udi wamba ne, Mpindiu nengumushe Yakoba mu buhika bua kumuha diakalengele, nenfuile bonso ba mu tshisamba tshia Bena Isalele luse; ne nengikale ne lukunukunu lua dina dianyi dia tshijila. Nebahue muoyo bua bundu buabo ne bua ditomboka diabo diakantombokelabo, haluabo kushikama mu buloba buabo kabayi ne bualu budi bubahumbisha, ne kakuyi muntu umue wa kubatshinyisha, hanabumusha munkatshi mua bantu ba bende bua kubahingasha, hanabasangisha bua kubumusha mu maloba a bena lukuna babo, ne hanamuenesha tshijila tshianyi mu malu andi mbenzela ku mesu kua ba mu bisamba bia bungi bia bantu. Bobo nebamanye ne, Ndi Yehowa Nzambi wabo mu mianda ei ne, Nakabatuma mu buhika munkatshi mua bisamba bia bantu, hashishe nakubasangisha mu buloba buabo mene; ne tshiena nshiya umue wabo munkatshi mua bisamba bia bantu kabidi. Tshiena mbasokoka mpala wanyi kabidi; bualu bua nakuhumuina Bena Isalele Nyuma wanyi. Mukelenge Yehowa udi wamba dî edi. Mu tshidimu tshia makumi abidi ne tshitanu tshia buhika buetu, ku tshibangidilu tshia tshidimu, mu dituku dia dikumi dia ngondo, tshiakadi tshidimu tshia dikumi ne tshinai tshia ku nyima kua tshidimu tshiakashihabo musoko, mu dituku adi mene tshianza tshia Yehowa tshiakadi hamʼbidi hanyi, ne yeye wakalua nʼanyi kuinaku. Mu bikena kumona bia Nzambi yeye wakalua nʼanyi mu buloba bua Isalele, wakanshikika ha mutu ha mukuna mule mule, kuakadi nsubu muidikishe hanshi bu musoko ku luseke lua sude. Yeye wakalua nʼanyi mu muaba au, ekumona! Muntu wakadiku wakadi ne tshinfuanyi bu tshia tshiamu tshia mitaku, muikale ne muonshi wa lin mu tshianza tshiandi, ne luidi lua kuidikisha nʼalu; wakimana biandi mu tshibuelelu. Muntu eu wakangambila ne, Muana wa muntu, mona ne mesu ebe, unvua ne matshu ebe, teka mutshima webe ku malu andualua kukulesha; bualu bua bakulua nʼebe kunoko bua meme kukulesha malu â; ambila Bena Isalele malu onso audi umona. Nakamona lumbu lunyunguluke nsubu nseke yonso. Muntu au wakaluidikisha ne luidi luakadi mu tshianza tshiandi, bule bualu buikale coudées mile isambombo, coudée umue muikale bu coudée umue ne ntanta wa tshianza; wakidikisha mulumbu wa lumbu, wakausangana muikale luidi lumue, ne bule bualu bua mulu buakadi luidi lumue. Hashishe yeye wakalua nʼanyi ku tshibuelelu tshidi tshitangila ku luseke lua esete; hakabandeye ku tshibandilu tshiatshi, wakidikisha mushiku watshi wa mbelu, wakaumona muikale luidi lumue mu butshiama buau; mushiku wa mbelu mukuabo mutangilangane ne tshitendelelu wakadi luidi lumue mu butshiama buau. Nsubu yonso ya bansentedi yakadi ne bule bua luidi lumue ne butshiama bua luidi lumue, ne muaba wa hankatshi ha nsubu ne nsubu wakadi coudées itanu; ne tshibuelelu tshia ku mbalanda wa ku tshibi tshiakatangilangana ne tshitendelelu tshiakadi bule bua luidi lumue. Wakidikisha mbalanda wa ku tshibuelelu, ne wakadi coudées muanda mukulu mu butshiama buandi, ne biluwa biandi biakadi coudées ibidi mu butshiama bua tshiluwa ne tshiluwa; ne mbalanda wa tshibuelelu wakatangilangana ne tshitendelelu. Nsubu ya bansentedi ya munda mua tshibuelelu tshia ku luseke lua esete yakadi isatu ku luseke lua tshinga tshianza ne isatu ku luseke lua tshianza tshikuabo; buonso buai yakadi bunene bumue; biluwa bia ku luseke ne ku luseke biakadi bunene bumue kabidi. Wakidikisha butshiama bua mushiku wa mbelu wa ku tshibuelelu etshi, wakadi coudées dikumi; ne butshiama bua nshila wa munda mua tshibuelelu buakadi coudées dikumi ne isatu. Ku mpala kua nsubu ne nsubu ya bansentedi kuakadi tshididi tshiakajika munda mua tshibuelelu ku luseke ne ku luseke coudée umue, ne nsubu yonso ya bansentedi yakadi coudées isambombo ku luseke ne ku luseke. Wakidikisha butshiama bua tshibuelelu ku nfundu kua nsubu umue wa bansentedi tô ne ku nfundu kua nsubu mukuabo wa bansentedi, buakadi coudées makumi abidi ne itanu, ku tshibi tô ne ku tshinga tshibi. Wakidikisha bule bua mbalanda, buakadi coudées makumi abidi mu muaba muakadi tshiendelu tshia munda mua ntempelo tshituangana ne mbalanda eu. Nunku, ku mushiku wa mbelu wa ku mpala kua tshibuelelu tô ne ku mushiku wa mbelu wakadi ku mpala kua mbalanda eu kuakadi coudées makumi atanu. Madidishi mikale ne tubaya tutshiamakashe akadi mu bimanu bia nsubu ya bansentedi, mu miaba ya hankatshi ha nsubu ei, ne mu bimanu bia mbalanda, mu nseke yonso ya munda mua tshibuelelu, ne ha tshiluwa ne tshiluwa tshia tshibuelelu hakadi bifuanyikishi bia mabue a ngashi. Hashishe wakalua neanyi mu tshiendelu tshia ntempelo tshia mu luhanza, ne nakamona nsubu mitangilangane ne nshila mulongolola ne mabue hanshi munyunguluke tshiendelu; nsubu makumi asatu yakadiku ne mpala yai mitangile ku nshila eu. Nshila eu wakayila hehi ne bibuelelu, ne butshiama buandi buakadi muomumue ne bule bua bibuelelu; nshila eu wakadi wa mu tshibanda. Ku nyima wakidikisha butshiama bua tshiendelu tshia hankatshi ha mushiku wa tshibuelelu tshia mu tshibanda tô ne ku mushiku wa tshibuelelu tshiakayila ku tshiendelu tshia munda, buakadi coudées lukama ku luseke lua esete ne ku luseke lua nôde muomumue. Wakalua nʼanyi ku tshibuelelu tshia mu tshiendelu tshia mu lubanza tshiakatangila ku luseke lua nôde, wakidikisha bule buatshi ne butshiama buatshi. Tshiakadi ne nsubu isatu ya bansentedi ku luseke elu ne nsubu isatu ku luseke lukuabo, biluwa biatshi ne mbalanda watshi biakadi ne bunene buobumue ne bua bia tshibuelelu tshia kumudilu. Bule buatshi buakadi coudées makumi atanu ne butshiama buatshi buakadi coudées makumi abidi ne itanu. Madidishi atshi, mbalanda watshi, mabue atshi a ngashi, biakadi ne luidi luolumue ne lua tshibuelelu tshia ku luseke lua esete. Bakabanda ku tshibandilu tshiakadi ne bidiatshilu muanda mutekete; ne mbalanda watshi wakatangilangana ne munda mua ntempelo. Tshiendelu tshia munda mua ntempelo tshiakadi ne tshibuelelu tshitangilangane ne tshibuelelu tshia mu lubanza, tshikuabo ku luseke lua nôde ne tshikuabo ku luseke lua esete; wakidikisha muaba wa hankatshi ha tshibuelelu tshia munda tô ne ku tshibuelelu tshia mu luhanza, wakadi coudées lukama. Wakandombola ku luseke lua Sude; nakamona tshibuelelu tshitangile ku luseke lua Sude. Wakidikisha biluwa biatshi ne mbalanda watshi, wakabimona hikala ne luidi luolumue ne lua bibuelelu bikuabo. Tshibuelelu ne mbalanda watshi biakadi ne madidishi mu nseke yatshi yonso, ne akadi muomumue ne madidishi makuabo. Bule buatshi buakadi coudées makumi atanu, butshiama buatshi buakadi coudées makumi abidi ne itanu. Tshiakadi ne tshibandilu tshia bidiatshilu muanda mutekete bua bantu babandilehu, ne mbalanda watshi wakatangilangana ne munda mua ntempelo. Tshiakadi ne bifuanyikishi bia mabue a ngashi ha biluwa biatshi, dibue dimue ku luseke elu ne dibue dimue ku luseke lukuabo. Tshiendelu tshia munda mua ntempelo tshiakadi ne tshibuelelu tshitangilangane ne tshibuelelu etshi tshia ku luseke lua sude; yeye wakidikisha muaba wa hankatshi ha tshibuelelu ne tshibuelelu, wakadi coudées lukama. Hashishe yeye wakalua nʼanyi ku tshiendelu tshia munda mua ntempelo, uyilamu ku tshibuelelu tshia ku luseke lua sude. Wakidikisha tshibuelelu atshi ne luidi luakidikishileye nʼalu bikuabo, nsubu yatshi ya bansentedi, biluwa biatshi, ne mbalanda watshi; ne wakabisangisha bikale ne bunene buobumue ne bua bikuabo. Tshibuelelu ne mbalanda watshi biakadi ne madidishi ku nseke yabi yonso; bule buatshi buakadi coudées makumi atanu, ne butshiama buatshi buakadi coudées makumi abidi ne itanu. Mbalanda watshi wakadi ne bule bua coudées makumi abidi ne butshiama bua coudées itanu; ne mbalanda wakatangilangana ne tshiendelu tshia mu lubanza. Bifuanyikishi bia mabue a ngashi biakadi ha biluwa biatshi, ne tshibandilu tshiatshi tshiakadi ne bidiatshilu muanda mukulu. Hashishe wakalua nʼanyi mu tshiendelu tshia munda ku luseke lua ku esete; wakidikisha tshibuelelu tshia munda bu muakidikisheye bikuabo, ne nsubu yatshi ya bansentedi ne biluwa biatshi ne mbalanda watshi, wakabimona bikale ne bunene buobumue ne bua bikuabo. Tshibuelelu ne mbalanda watshi biakadi ne madidishi nseke yonso, ne tshibuelelu tshiakadi ne coudées makumi atanu mu bule buatshi ne coudées makumi abidi ne itanu mu butshiama buatshi. Mbalanda watshi wakatangilangana ne tshiendelu tshia ntempelo tshia mu lubanza; bifuanyikishi bia mabue a ngashi biakadi ha biluwa biatshi ku luseke elu ne ku luseke lukuabo, ne tshibandilu tshiatshi tshiakadi ne bidiatshilu muanda mukulu. Hashishe wakalua nʼanyi ku tshibuelelu tshia ku tshiendelu tshia munda mua ntempelo ku luseke lua ku nôde; wakatshidikisha bu muakidikisheye bikuabo, nsubu yatshi ya bansentedi, biluwa biatshi, ne mbalanda watshi. Tshiakadi ne madidishi nseke yonso ya munda muatshi. Bule buatshi buakadi coudées makumi atanu, ne butshiama buatshi buakadi coudées makumi abidi ne itanu. Mbalanda watshi wakatangilangana ne tshiendelu tshia mu lubanza; bifuanyikishi bia mabue a ngashi biakadi ha biluwa biatshi, ku luseke elu ne ku luseke lukuabo; ne tshibandilu tshiatshi tshiakadi ne bidiatshilu muanda mukulu. Nsubu mukuabo wakadiku ne mushiku wandi wa mbelu mutangilangane ne mbalanda wa tshibuelelu etshi, ne bakuvuwamu milambu ya kuosha. Ha mbalanda wa tshibuelelu etshi hakadi mesa abidi ku luseke elu ne mesa abidi ku luseke lukuabo, bua kushihelahu mulambu wa kuosha, mulambu wa kubuikidila nʼau mibi ne mulambu wa kumusha dihila dia bubi. Ku luseke lukuabo lua mu lubanza lua mbalanda, luayila muntu habandeye ku mbelu kua tshibuelelu tshia ku luseke lua nôde, kuakadi mesa abidi ku luseke elu ne mesa abidi ku luseke lukuabo; mbu kuamba ne, Mesa anai munda mua tshibuelelu, ne mesa anai mu luhanza luatshi, mesa muanda mukulu mene akadibo bashihelahu milambu. Mesa anai akasongabo ku mabue akadiku, mesa ne mesa mikale ne bule bua coudée umue ne tshituha, ne butshiama bua coudée umue ne tshituha, ne bule bua mulu coudée umue, kuakatekelabo tuele ne biamu bia kushiha nʼabi milambu ya kuosha ne milambu mikuabo. Akadi ne mibangu bule bua ntanta wa tshianza mikuate ku nseke yau yonso inai; ne bakateka minyinyi ya milambu ha mesa. Wakalua nʼanyi mu tshiendelu tshia munda mua ntempelo, ne nakamona nsubu ibidi mu tshiendelu tshia munda, mukuabo ku luseke lua tshibuelelu tshia ku luseke lua node, mushiku wandi wa mbelu mutangilangane ne luseke lua sude; mukuabo ku luseke lua tshibuelelu tshia ku luseke lua sude, mushiku wandi wa mbelu mutangilangane ne luseke lua nôde. Yeye wakangambila ne, Nsubu eu udi mutangile ku luseke lua sude udi wa bakuidi badi balami ba nsubu wa tshitendelelu; ne nsubu eu mukuabo udi mutangile ku luseke lua nôde udi wa bakuidi badi bakuata mudimu wa tshioshelu; aba mbana balume ba Sadoka, ne anu bobo nkayabo ba munkatshi mua bana ba Lewi badi mua kulua hehi ne Yehowa bua kumukuatshila mudimu. Wakidikisha tshiendelu tshia munda, bule buatshi coudées lukama, butshiama buatshi coudées lukama, nseke yatshi yonso yakadi luidi lumue; ne tshioshelu tshia milambu tshiakadi ku mpala kua nsubu wa tshitendelelu. Hashishe wakalua nʼanyi ku mbalanda wa nsubu wa tshitendelelu, wakidikisha biluwa bia mbalanda, biakadi ne butshiama bua coudées itanu ku luseke ne ku luseke. Butshiama bua mushiku wa mbelu buakadi coudées dikumi ne inai, ne tshibi tshia ku luseke ne ku luseke lua mushiku tshiakadi coudées isatu mu butshiama buatshi. Bule bua mbalanda buakadi coudées makumi abidi, butshiama buandi buakadi coudées dikumi ne ibidi. Bakabanda ku tshibandilu tshiakadi ne bidiatshilu dikumi. Makunshi akadi hehi ne biluwa bia mbalanda, dikuabo ku luseke elu ne dikuabo ku luseke lukuabo. Wakalua nʼanyi mu ntempelo, wakidikisha makunshi a ku mbelu, akadi coudées isambombo mu butshiama buau ku luseke ne ku luseke. Butshiama bua mushiku wa mbelu buakadi coudées dikumi, tshibi tshia ku luseke ne ku luseke lua mushiku tshiakadi ne butshiama bua coudées itanu. Hashishe wakidikisha munda mua tshitendelelu, muakadi coudées makumi anai mu bule buamu ne coudées makumi abidi mu butshiama buamu. Ku nyima wakabuela mu nsubu wa munda mua tshitendelelu, wakidikisha makunshi a ku mbelu; dikunshi ne dikunshi diakadi bunene bua coudées ibidi; mushiku wa mbelu wakadi ne butshiama bua coudées isambombo, ne bule bua tshimanu tshia ku luseke elu lua mushiku buakadi coudées muanda mutekete, bule bua tshimanu tshia ku luseke lukuabo buakadi coudées muanda mutekete. Wakidikisha bule bua nsubu mene, coudées makumi abidi, ne butshiama buandi buakadi coudées makumi abidi, ku mpala kua muaba wa tshijila wa ntempelo. Yeye wakangambila ne, Muaba eu udi muaba mutambe tshijila. Wakidikisha tshimanu tshia tshitendelelu, muhimbu watshi coudées isambombo; ne butshiama bua nsubu yonso yakadi minyunguluke bimanu buakadi coudées inai, nsubu ei mikale ku nseke yonso ya tshitendelelu. Nsubu ei mituangane yakadi isatu mitentakasha; nsubu makumi asatu yakadi mu mulongo umue; milongo yakadi isatu. Yakajadikibua ha miaba yakayilongoluelabo mu tshimanu tshia tshitendelelu mu nseke yatshi yonso, bua nsubu ijadikibue ha miaba yai ne bishimikidi biai bishilangane ne bia tshimanu tshia tshitendelelu. Nsubu ei yakadi minyunguluke bimanu bia tshitendelelu yakenda idiunda mu butshiama buai kulu, bualu bua bimanu bia tshitendelelu biakenda bikeha kulu. Bua kubanda mu nsubu ya mulu, muntu wakadi ne bua kuhitshila mu nsubu ya hankatshi. Nakamona kabidi ne nsubu wa tshitendelelu wakadi! muashila ha tshibumba tshinene, bule buatshi mulu buakadi coudées isambombo ne tshituha, ne bishimikidi bia nsubu yakadi minyunguluke bimanu bia tshitendelelu biakadi ha mutu hatshi. Muhimbu wa bimanu bia ha mbelu bia nsubu mituangane wakadi coudées itanu, ne tshituha tshia tshibumba tshiakashala tshiakadi coudées itanu. Ha mbelu ha tshibumba hakadi muaba wa butshiama bua coudées makumi abidi minyunguluke tshitendelelu. Mishiku ya mbelu ya nsubu yakadi minyunguluke bimanu bia tshitendelelu yakatangila ku tshituha tshia tshibumba tshiakadi tshishala hatuhu, mushiku mukuabo mutangile ku luseke lua nôde, mukuabo mutangile ku luseke lua sude. Butshiama bua tshituha atshi tshiakadi tshishala buakadi coudées itanu ku nseke yonso. Nsubu mukuabo wakadi ku luseke lua wesete wakadi coudées makumi muanda mutekete mu butshiama buandi; bimanu bia nsubu eu biakadi ne muhimbu wa coudées itanu ne bule bua coudées makumi tshitema. Hashishe yeye wakidikisha nsubu yonso ya tshitendelelu, bule buatshi coudées lukama; ne muaba wa coudées makumi abidi ne nsubu wa ku luseke lua wesete ne bimanu biandi biakadi ne bule bua coudées lukama. Butshiama bua tshitendelelu ku mpala kuatshi ku luseke lua esete ne bua muaba wa coudées makumi abidi busangisha buakadi coudées lukama. Wakidikisha nsubu wa ku luseke lua wesete ku mpala kua muaba wa coudées makumi abidi, ne bimanu biandi bia ku luseke ne ku luseke, bule buabi bisangisha buakadi coudées lukama. Muaba wa tshijila wa mu tshitendelelu, muaba mutambe tshijila ne mbalanda wa ku mpala kua tshitendelelu biakadi bibamba mabaya ku bimanu munda mua nsubu. Buonso buabi bisatu biakadi ne madidishi ku nseke yonso mabuikila ne tubaya tutshiamakashe. Bimanu bia munda mua tshitendelelu biakadi bibamba mabaya ku nseke yonso, hanshi tô ne ku madidishi andi, ku madidishi tô ne kulu, ku muaba wa ha mutu ha mushiku wa mbelu wa ku muaba mutambe tshijila tô ne kulu, munda ne ha mbelu. Ha bimanu bia tshitendelelu, mu muaba mutambe tshijila ne mu muaba wa tshijila kabidi, bakazola bifuanyikishi bia bakeluba ne bia mabue a ngashi. Dibue dia ngashi diakadi hankatshi ha mukeluba ne mukeluba, ne mukeluba yonso wakadi ne mpala ibidi. Nunku mpala wa muntu wakatangila dibue dia ngashi ku luseke lukuabo, ne mpala wa nyama wa ntambue wakatangila dibue dia ngashi ku lunga luseke. Bintu ebi bizola biakadi munda mua nsubu muonso. Bakazola bifuanyikishi bia bakeluba ne mabue a ngashi ku bimanu bia tshitendelelu hanshi tô ne kulu; nunku bakalengesha bimanu bia ntempelo. Bimanu bia muaba mutambe wa tshijila biakadi luidi lumue nseke yonso; ku mpala kua muaba mutambe tshijila kuakadi tshinfuanyi bu tshia tshioshelu. Tshioshelu tshiakadi tshia mabaya, tshiakadi coudées isatu mu bule bua mulu, coudées ibidi mu bule, coudées ibidi mu butshiama; ku mpenga yatshi, tshitekelu tshiatshi ne nseke yatshi biakadi bia mabaya. Yeye wakangambila ne, Au mmesa adi ku mpala kua Yehowa. Muaba wa tshijila ne muaba mutambe tshijila biakadi ne bibi bibidi ku mishiku ya mbelu. Tshibi ne tshibi tshiakadi ne bituha bibidi biakamanya mua kutuangana, bituha bibidi ku tshibi tshikuabo, bituha bibidi ku tshibi tshikuabo. Bakazola bifuanyikishi bia bakeluba ne bia mabue a ngashi hamʼbidi habi, bu muakabizolabo ha bimanu bia nsubu. Tshitadikilu tshia mabaya tshiakadi ha mutu ha tshibuelelu ku mpala kua mbalanda. Bifuanyikishi bia bakeluba ne bia mabue a ngashi biakadi ha bimanu bibidi biakadi ku luseke ne ku luseke lua mbalanda ne ha tshitadikilu atshi kabidi. Hashishe yeye wakalua nʼanyi mu tshiendelu tshia munda tshiakadi ku luseke lua nôde, wakalua nʼanyi ku nsubu wakadi mululamangane ne muaba au wa coudées makumi abidi ne wakadi buludiludi ne nsubu mukuabo wa ku luseke lua nôde. Bule bua nsubu eu wakadi ne nsubu isatu mitentakasha buakadi coudées lukama, butshiama buandi buakadi coudées makumi atanu. Buludiludi ne muaba wawa wa coudées makumi abidi wakadi mu tshiendelu tshia munda mua ntempelo, ne buludiludi ne nshila mulongolola ne mabue hanshi ne munyunguluke tshiendelu tshia ha mbelu, tshitadikilu tshia nsubu muisatu wa mulu tshiakadi tshitangilangana ne tshia nsubu wakadi buludiludi nʼandi Ku mpala kua nsubu ei kuakadi nshila, butshiama buandi coudées dikumi, bule buandi coudées lukama; ne mishiku ya mbelu ya nsubu yakatangila ku nshila eu. Nsubu ya ha mutu yakahita ya muinshi kukeha mu butshiama, bualu bua bitadikilu bia ku mpala kuai biakakehesha butshiama buai ne dikeha dihite dia nsubu ya hankatshi ne ya muinshi. Bualu bua bakasa nsubu ei mu milongo isatu, mulongo mukuabo mutentakasha ha mutu ha munga, ne kayakadi ne makunshi bu muakadi nsubu ya mu tshiendelu tshia ha mbelu; nunku nsubu ya ha mutu yakatamba ya muinshi ne ya hankatshi kukeba mu butshiama. Lumbu lua ha mbelu, luakadi tshimanu ku nsubu wakadi buludiludi ne tshiendelu tshia ha mbelu, luakadi ne bule bua coudées makumi atanu; bualu bua nsubu wakadi buludiludi ne tshiendelu tshia ha mbelu wakadi anu coudées makumi atanu mu bule; kadi nsubu wakadi buludiludi ne ntempelo wakadi coudées lukama mu bule buandi. Muinshi mua nsubu ai muakadi tshibuelelu tshiai ku luseke lua esete, hakasua muntu kubuelamu ufuma ku tshiendelu tshia ha mbelu. Ku luseke lua sude, ku mpala kua muaba wa coudées makumi abidi ne buludiludi ne nsubu mukuabo, kuakadi mulongo mukuabo wa nsubu. Nshila wakadi ku mpala kuau, ne nsubu yau yakadi bu nsubu ya ku luseke lua nôde, yakadi ne bule buobumue ne butshiama buobumue; yakadi ne miaba ya kuhatukamu ne malu makuabo malongolola muomumue, ne bibuelelu biai biakadi bifuanangana nʼabi, kadi biakatangila ku luseke lua Sude. Tshibuelelu tshiakadi kundekelu kua nshila, ku mpala kua lumbu lua ha mbelu, hakasua muntu kubuelamu ufuma ku luseke lua esete. Yeye wakangambila ne, Nsubu ya ku luseke lua node ne nsubu ya ku luseke lua sude idi mitangile ku muaba wa coudées makumi abidi idi nsubu ya tshijila, idi miaba idi bakuidi badi basemena ha buihi ne Yehowa ne bua kudila bintu bihite tshijila, idibo ne bua kutekamu bintu bihite tshijila, milambu ya bia kudia, milambu ya kubuikila nʼai mibi ne milambu ya disambuka dia mikenji; bualu bua muaba eu udi wa tshijila. Habuela bakuidi mu muaba wa tshijila wa mu ntempelo, kababatukimu bua kubuela mu tshiendelu tshia ha mbelu diambedi kabayi banze kutekamu bilulu biakadibo baluata hakadibo benza mudimu wabo, bua bidi bia tshijila; badi ne bua kuluata bilulu bikuabo, hashishe badi bamanye mua kubuela mu luseke lua ntempelo ludi bantu bakuabo bamanye mua kubuela. Hakashikisheye kuidikisha nsubu ya munda mua ngumbu yakadi minyunguluke ntempelo, wakalua nʼanyi mu nshila wakadi muye mu tshibuelelu tshidi tshitangila ku luseke lua esete, wakidikisha ntempelo mujima nseke yandi yonso. Wakadianjila kuidikisha luseke lua ku esete ne luidi, luakadi coudées nkama itanu bu tshidikishilu tshia luidi. Wakidikisha luseke lua node, luakadi nkama itanu bu tshidikishilu tshia luidi. Wakidikisha luseke lua sude, luakadi coudées nkama itanu bu tshidikishilu tshia luidi. Wakatshunguluka ne wakaya ku luseke lua wesete, wakaluidikisha, luakadi coudées nkama itanu ku tshidikishilu tshia luidi. Wakidikisha ntempelo ku nseke yandi inai, wakadi ne lumbu lunyunguluke ku nseke yonso, bule bualu coudées nkama itanu ne butshiama bualu coudées nkama itanu, bua luhandulule malu a tshijila ku malu makuabo a hatuhu. Ku nyima kua malu â yeye wakalua nʼanyi ku tshibuelelu tshiakadi tshitangila ku luseke lua esete. Ekumona! Butumbi bua Nzambi wa Isalele buakadi bufuma ku luseke lua esete. Tshiona tshia dî diandi tshiakadi bu tshiona tshia mai a bungi; ne buloba buakadi bukenka ne butumbi buandi. Tshinfuanyi tshinakamona tshiakadi bu tshinfuanyi tshinakamona hakalueye bua kushiha musoko, ne bu tshinfuanyi tshinakamona ku muelelu wa musula wa Kebâ; nakatua mpala wanyi hanshi. Butumbi bua Yehowa buakabuela munda mua ntempelo mu nshila wa ku tshibuelelu tshidi tshitangua ku luseke lua esete. Nyuma wakangambula, wakalua nʼanyi mu tshiendelu tshia munda, ekumona! Butumbi bua Yehowa buakusha ntempelo tente. Nakunvua mukuabo ungambila dî diakafuma mu nsubu wa tshitendelelu, muntu wakadi muimane hehi nʼanyi. Yeye wakangambila ne, Muana wa muntu, eu mmuaba wa nkuasa wanyi wa butumbi, eu mmuaba wa makasa anyi kudiatau, muaba undualua kushikama munkatshi mua Bena Isalele tshiendelele. Bena Isalele kabanyangi dina dianyi dia tshijila kabidi, nansha bobo bine, nansha bakelenge babo, ku masandi abo ne mpingu, ne ku bitalu bia banfumu babo hafuabo. Bakadinyanga hakatekabo mushiku wabo wa mbelu hehi ne mushiku wanyi wa mbelu, ne dikunshi diabo hehi ne dikunshi dianyi, ne bakadi anu ne lumbu hankatshi hanyi nʼabo. Bakunyanga dina dianyi dia tshijila ku malu a bundu akuenzabo. Bua malu â onso nakubashihesha mu tshiji tshianyi. Mpindiu bumushe masandi abo a kutendelela kuabo kua mpingu ku mpala kuanyi ne bitalu bia banfumu babo, bateke malu â kule, ne meme nenshikame munkatshi muabo tshiendelele. Wewe kabidi, muana wa muntu, lesha Bena Isalele ntempelo eu, tshifundu tshiandi ne tshidikishilu tshiandi, bua bundu bubakuate bua malu onso akenzabo. Bikalabo ne bundu bua malu onso akenzabo, ubamanyishe bua tshifundu tshia kuasa nʼatshi nsubu wa ntempelo, miaba ya kuhatukila ne ya kubuelela, bilele bia kulondamu, kulongolola kua kutendelela ne mikenji yandi; funda malu au onso ku mesu kuabo bua bobo balonde dilongolola dia malu andi onso, batumikile mikenji yandi yonso ne benze malu au onso. Eu mmukenji bua ntempelo: nseke yonso idi inyunguluka muaba eu wa ha mutu ha mukuna ikale miaba mitambe tshijila. Mona biebe ne, Eu ndi mukenji bua ntempelo. Eku nkuidikisha kua tshioshelu tshia milambu ku luidi lua coudées, luidi lua coudées ludi coudée umue ne ntanta wa tshianza. Tshitekelu tshiatshi tshikale coudée umue mu bule buatshi, coudée umue mu butshiama buatshi, ne tshikale ne muhimbu bunene bua ntanta wa tshianza ku mibangu yatshi; tshitaku tshiatshi tshia muinshi mua tshioshelu tshikale nunku. Ku mutu kua tshitekelu tshia muinshi tô ne ku tshia tshioshelu tshia ha mutu hatshi kuikale coudées ibidi, ne butshiama bua tshituha etshi buikale coudée umue. Ku mutu kua tshituha etshi tshidi tshihite bukese tô ne ku tshituha tshia ha mutu hatshi tshidi tshihite bunene kuikale coudées inai, butshiama buatshi buikale coudée umue. Matshua a tshioshelu a ha mutu hatshi ikale coudées inai mu bule bua mulu; nsengu inai ikale ha mutu ha matshua, lusengu ne lusengu luikale ne bule bua coudée umue. Matshua a tshioshelu ikale ne bule bua coudées dikumi ne ibidi ne butshiama bua coudées dikumi ne ibidi, nseke yau inai ikale bunene bumue. Tshituha tshia tshioshelu tshia muinshi mua matshua tshikale bunene bumue ne nseke yatshi inai, coudées dikumi ne mai mu bule buatshi ne coudées dikumi ne inai mu butshiama buatshi; tshikale ne muhimbu bunene bua tshituha tshia coudée munyunguluke nseke yatshi inai. Tshibandilu tshia ku tshioshelu tshikale ku luseke lua esete. Hashishe yeye wakangambila ne, Muana wa muntu, Mukelenge Yehowa udi wamba ne, Ei idi mikenji bua tshioshelu mu dituku didibo batshijadika, bua kufidilahu milambu ya kuosha ne bua kumiaminabu mashi. Mukelenge Yehowa udi wamba ne, Uheshe bakuidi ba Bena Lewi, tunkanunuma tua Sadoka, badi ha buihi nʼanyi bua kunkuatshila mudimu, mulumʼa ngombe bu mulambu wa kubuikila nʼau bubi. Angata mashi andi makuabo, laba ku nsengu inai ya tshioshelu, ne ku matumba anai a tshituha tshia tshioshelu tshidi muinshi mua matshua, ne ku mihimbu idi mitshinyunguluke; nunku lengesha tshioshelu ne utshiumushile bubi. Hashishe angata mulumʼa ngombe wa mulambu wa kubuikila nʼau bubi, umuoshe mu muaba musungula wa mu luhangu lua ntempelo udi kauyi mu tshitendelelu. Halua dituku dibidi, fila mpumbu wa mbushi udi kayi ne tshilema bu mulambu wa kubuikila nʼau mibi; nunku tshioshelu ne tshilengeshibue bu muakalengeshibuatshi ku mulambu wa mulumʼa ngombe. Hawamana kutshilengesha, fila mulumʼa ngombe udi kayi ne tshilema, ne tshimpanga tshia mu tshisumbu tshia mikoko tshidi katshiyi ne tshilema. Hawalua ne munyinyi wabi ku mpala kua Yehowa, bakuidi belehu luehu ne bobo babifile bu mulambu wa kuoshela Yehowa. Tô ne hahita matuku muanda mutekete longolola mpumbu wa mbushi buatshia-buatshia bu mulambu wa kubuikila nʼau bubi; bobo balongolole kahidi mulumʼa ngombe udi kayi ne tshilema ne tshimpanga tshia mu tshisumbu tshia mikoko tshidi katshiyi ne tshilema. Tô ne hahita matuku muanda mutekete balengeshe tshioshelu ne hatshiumushile bubi buatshi, nunku, batshijidile. Hashika matuku au, ku dituku dia muanda mukulu tô ne tshiendelele bakuidi bafile milambu yenu ha tshioshelu, milambu yenu ya kuoshela Yehowa, milambu yenu ya kuvuisha nʼai ditalala kabidi; Mukelenge Yehowa udi wamba ne, Meme nenuitabushe. Hashishe yeye wakalukila nʼanyi mu nshila wa ku tshibuelelu tshia ha bule tshia tshitendelelu, tshibuelelu tshidi tshitangila ku luseke lua esete, ne tshiakadi tshinshila. Yehowa wakangambila ne, Tshihi tshia ku tshibuelelu etshi tshishale tshinshila, kabatshiunzuludi, ne muntu kabuedimu; bualu bua Yehowa, Nzambi wa Isalele, wakabuelamu, nunku tshishale tshinshila. Mukokekeshi nkayandi udi mua kushikamamu bua kudia bidia ku mpala kua Yehowa; yeye abuele mu nshila wa mu mbalanda wa tshibuelelu, ne ahatukile mu nshila eu muomumue. Hashishe yeye wakalua nʼanyi mu nshila wa ku tshibuelelu tshia ku luseke lua nôde tô ne ku mpala kua ntempelo; nakatangila, ekumona! Butumbi bua Yehowa buakusha tshitendelelu tshia Yehowa tente, ne nakatua mpala wanyi hanshi. Yehowa wakangambila ne, Muana wa muntu, dimuka, mona ne mesu ebe, unvua ne matshu ebe, malu onso andi nkuambila bua bilele bia kulonda mu ntempelo wa Yehowa ne hua mikenji yandi yonso; mona bimpe bibuelelu bia ku tshitendelelu ne miaba ya kuhatukila. Ambila bantombokedi ba mu tshisamba tshia Bena Isalele ne, Mukelenge Yehowa udi wamba ne, Nuenu Bena Isalele, kanuikadi ne malu enu a tshinyangu kabidi, bualu bua nuakulua ne bantu ba mu bisamba bia bende mu tshitendelelu tshianyi, badi kabayi batengula mu mutshima ne kabayi batengula mu mubidi, bua kunyengabo nsubu wanyi, hanuafila bia kudia bianyi, manyi ne mashi mene! Nuakushiha tshihungidi tshianyi, hanuakutentekasha bubi ebu ha mutu ha malu mabi enu onso a tshinyangu. Kanuakulama bintu bianyi bia tshijila bimpe, kadi nuakateka balami ba hatuhu bua kulama tshitendelelu tshianyi. Bua muanda eu Yehowa udi wamba ne, Muntu wa mu tshisamba tshia bende, udi kayi mutengula mu mutshima anyi mubidi, wa mu bantu aba bonso ba mu bisamba bia bende badi munkatshi mua Bena Isalele, kabuedi mu tshitendelelu tshianyi. Kadi Bena Lewi bakumuka kundi, bakaya kule, hakahambuka Bena Isalele aba bakandekela bua kulondabo mpingu yabo, badituadile dihila diabo bua mibi yabo. Nebikale bakuatshi ba mudimu mu tshitendelelu tshianyi, bikale ne mudimu wa kulama bibuelelu bia ku ntempelo, bakuate mudimu wabo munda mua ntempelo, bashihele bantu milambu yabo ya kuosha ne milambu mikuabo, bimane ku mpala kuabo bua kubakuatshila mudimu. Bualu bua bakakuatshila bantu mudimu ku mpala kua mpingu yabo, ne bakahia tshilenduishi kudi Bena Isalele bua kubashindisha mu malu mabi, nunku Mukelenge Yehowa udi wamba ne, Nakubisha tshianza tshianyi bua kuditshiha bua bualu buaho ne, Badi ne bualu bua kudituadila dihila dia malu mabi abo. Kabasemenyi ha buihi nʼanyi bua kunkuatshila mudimu bu bakuidi banyi, ne kabafiki hehi ne tshintu tshimue tshia munkatshi mua bintu bianyi bia tshijila, tshia bintu bianyi bihite tshijila mene; kadi badituadile bujitu bua bundu buabo ne bua malu mabi abo akuenzabo. Kadi nembasungule bu balami ha ntempelo wanyi, bua kukuatabo mudimu udimu ne bua kuenzabo malu onso adibo benzamu. Mukelenge Yehowa udi wamba ne, Kadi bakuidi ba munkatshi mua Bena Lewi, bana ba Sadoka, bakadi balama tshitendelelu tshianyi hakahambuka Bena Isalele bua kumuka kundi, bobo bine basemene ha buihi hanyi bua kunkuatshilabo mudimu; bimane ku mpala kuanyi bua kufila manyi ne mashi kundi. Babuele mu tshitendelelu tshianyi, balue ku mesa anyi bua kunkuatshila mudimu, ne bobo balame malu anyi. Habuelabo mu bibuelelu bia ku tshiendelu tshia munda, baluate bivualu bia lin; kabikadi ne tshintu tshia miosa ya mikoko hamʼbidi habo hatshidibo bakuata mudimu munda mua luhangu lua ku tshiendelu tshia munda, anyi mu tshitendelelu mene. Bikale ne bitambala bia lin bisuike ku mitu kuabo, baluate mihanu ya lin mu bimono biabo; kabaluatshi tshintu tshidi mua kubahatuisha tshisululu. Hahatukabo bua kubuela mu tshiendelu tshia ha bule, bua kusangakena ne bantu bakuabo, bavule bivualu bidibo baluata bakuatabo mudimu mu ntempelo, babiteke mu nsubu yaya ya tshijila; baluate bivualu bikuabo, bua kabavuishi bantu bakuabo bu ba tshijila ku bivualu biabo. Kabakungudi mitu yabo ne dihaya ne kabitabushi bua nsuki yabo ilue mile; kadi bakose nsuki yabo ne tushola. Kabanu nvinyo kudi umue wa bakuidi, habueleye mu tshiendelu tshia munda mua ntempelo. Muakuidi kabaki mukashi wa mu lufuila wa hatuhu bu mukashi wandi, anyi mukashi mumusha kudi bayandi, kadi abake mushikankunde utshidi kamama wa munkatshi mua hana ba mu tshisamba tshia Bena Isalele, anyi mukashi wa mu lufuila wa munga muakuidi. Bayishe bantu banyi ditahuluka didi hankatshi ha bintu bia tshijila ne bintu bia hatuhu, habaleshe mua kujingulula malu adi atahulula bintu bidi bibiha ku bintu bidi kabiyi bibiha. Halua tshilumbu ku mpala kuabo, batshiunvue bua kutshilumbulula, batshikose bu mudi mikenji yanyi yamba; balonde mikenji yanyi ne batumikile mei anyi hua bikondo bianyi bia bidia bia disanka binakusungula; banemeke matuku anyi a Lumingu. Kabafiki mu muaba udi muntu mufue bua kudinyanga; kadi bua tatu, anyi bua mamu, anyi bua muanʼandi wa balume, anyi bua muanʼandi wa bakashi, anyi bua muanʼabo wa balume, anyi bua muanʼabo wa bakashi wa difu dimue udi kayi ne mulume, badi bamanye mua kudinyanga. Hamulengeshabo ku nyima, bamubadile matuku muanda mutekete. Mukelenge Yehowa udi wamba ne, Mu dituku didiye ubuela mu tshitendelelu, mu tshiendelu tshia munda mua luhangu, bua kukuata mudimu wa mu tshitendelelu, afile mulambu wandi wa kubuikila nʼau bubi. Kabikadi ne buhianyi, bualu bua meme ndi buhianyi buabo; kanubahi luhetu mu Isalele, bualu bua meme ndi luhetu luabo. Badie mulambu wa bia kudia, mulambu wa kubuikila nʼau bubi ne mulambu wa kumusha nʼau dihila; tshintu tshionso tshidibo bajidila kudi Nzambi mu buloba bua Isalele tshikale tshiabo. Bidi bihita buakane munkatshi mua bintu binudi nuhuola diambedi, ne maha a munkatshi mua bintu bionso binudi nufila kudi Nzambi, bikale bintu bia bakuidi. Nuheshe bakuidi bukula buhite buimpe bua mampa anudi milamba, bua disanka dikale mu nsubu muenu. Bakuidi kabadi tshintu tshidifuila anyi tshituanya, kudi nyunyu anyi kudi nyama. Hanuatahuluila bantu buloba ebu bua kubaha mahianyi abo, nudianjile kufila tshituha tshiabu kudi Yehowa bu tshintu tshiandi tshia tshijila; bule buatshi buikale coudées binunu makumi abidi ne bitanu, butshiama buatshi buikale coudées binunu makumi abidi; tshikale buloba bua tshijila ku nseke yatshi yonso. Tshinga tshituha tshia buloba ebu bua tshijila tshikale luhangu lua kuasamu ntempelo, bule bualu coudées nkama itanu ne butshiama bualu coudées nkama itanu, nseke yalu ikale muomumue; bashiye muaba mutuhu numunyunguluke, coudées makumi atanu ku nseke yau yonso. Idikisha tshituha tshikuabo tshia buloba ebu bua tshijila, bule buatshi coudées binunu makumi abidi ne bitanu, butshiama buatshi coudées binunu dikumi, bu muaba wa tshitendelelu, buloba buhite tshijila. Netshikale luseke lua tshijila lua buloba; netshikale buloba bua bakuidi badi bakuata mudimu mu tshitendelelu ne badi basemena hehi ne Yehowa bua kumukuatshila mudimu; netshikale muaba wa kuashila bakuidi nsubu ne muaba wa tshijila wa tshitendelelu. Luseke lukuabo, bule bualu coudées binunu makumi abidi ne bitanu, butshiama bualu coudées binunu dikumi, neluikale buloba bua Bena Lewi badi bakuata mudimu mu ntempelo; neluikale buloba buabo bua misoko ya kushikamamu. Nusungule buloba budi butuangane ne buloba abu bua tshijila, buikale ne butshiama bua coudées binunu bitanu ne bule bua coudées binunu makumi abidi ne bitanu, ne buobu nebuikale buloba bua bonso ba mu tshisamba tshia Bena Isalele. Mukokeshi ikale ne buloba bua ku nseke yonso ibidi ya buloba bua tshijila ne ya buloba bua musoko. Buloba buandi butangilangane ne buloba bua tshijila ne buloba bua musoko ku luseke lua esete ne ku luseke lua wesete; bule buabu buikale bule bua tshituha tshia buhianyi bukuabo bua bisamba bia Bena Isalele, ku butshika bua buloba ku luseke lua wesete tô ne ku butshika buabu ku luseke lua esete. Buloba ebu buikale buhianyi buandi mu buloba bua Isalele. Bakokeshi banyi kabakengeshi kabidi bantu banyi, kadi batabuluile Bena Isalele buloba bu mudi bunene bua bisamba biabo. Mukelenge Yehowa udi wamba ne, Nuenu, bakokeshi ba Bena Isalele, nuitabushe bua malu makole anuakenza ne ashike! Lekelai kuenza malu makole ne kunyenga bintu ku bukole; kosai bilumbu ne kulumbulula kuakane ne londai malu makane; lekelai kuihata bantu banyi mu nsubu yabo. Nuikale ne biamu bidi bidikisha bintu ne tshidikishilu tshiakane, tshihiminu tshia épha tshiakane, ne tshihiminu tshia bintu bienguluke tshiakane. Tshihiminu tshia épha ne tshihiminu tshia bintu bienguluke bikale ne tshihiminu tshimue, bua tshihiminu tshia épha tshikale tshituha tshia dikumi tshia homer; nunku tshihiminu tshia homer tshikale luidi lua kuidikisha nʼalu. Nshekele umue ikale guéra makumi abidi (nshekele itanu ikale nshekele itanu mene mene, nshekele dikumi ikale nshekele dikumi mene mene), ne nshekele makumi atanu ikale mine umue. Mukelenge Yehowa udi wamba ne, Ei idi milambu mudi ne bua kufila: tshituha tshisambombo tshia êpha umue tshiumushibue ku homer umue wa blé; tshituha tshisambombo tshia épha umue tshiumushibue ku homer umue wa orge; difuka dia manyi bu tshituha tshia dikumi tshia tshihiminu tshimue tshiumushibue ku kor, bihiminu ebi dikumi bidi mu kor; mukoko umue munkatshi mua tshisumbu tshia mikoko nkama ibidi. Bena meku ba Bena Isalele bafile milambu ei bu mulambu wa bia kudia, mulambu wa kuosha, ne bu mulambu wa kuvuisha nʼau ditalala, bua kubuikila nʼai mibi yabo. Bantu bonso ba mu buloba bafile milambu ei kudi mukokeshi wa Bena Isalele. Mukokeshi neikale ne bualu bua kufila milambu ya kuosha, milambu ya bia kudia ne milambu ya bia kunua, halua bikondo bia bidia bia disanka, bia ngondo mihia-mihia, matuku onso a Lumingu, ne matuku onso a bidia bia disanka akusunguilabo Bena Isalele. Yeye afile mulambu wa kubuikila nʼau bubi, mulambu wa bia kudia, mulambu wa kuosha, ne milambu ya kuvuisha nʼai ditalala, bua kujimishila nʼai Bena Isalele mibi yabo. Mukelenge Yehowa udi wamba ne, Mu ngondo wa kumudilu, mu dituku dia kumudilu dia ngondo, angata muana wa ngombe udi kayi ne tshilema, lengesha nʼandi tshitendelelu tshia ntempelo. Muakuidi angate tshituha tshia mashi a mulambu wa kujimisha nʼau bubi, âlabe ha makunshi a ntempelo ne ba matumba anai a tshioshelu ne mihimbu mitshinyunguluke, ne ha makunshi a ku tshibuelelu tshia ku tshiendelu tshia munda. Mu dituku dia muanda mutekete dia ngondo, enza muomumue bua bubi bua muntu wakuenza bibi bualu bua dituhakana diandi, anyi bua dihanga diandi dia lungenyi; nunku nulengeshe ntempelo. Mu ngondo wa kumudilu, dituku dia dikumi ne dinai dia ngondo, nuikale ne disanka dia kuhita kua Yehowa; tô ne hahita matuku muanda mutekete nudie bidia bidi kabiyi biela luevene. Mu dituku adi mukokeshi alongolole bua bualu buandi ne bua bantu bonso ba mu buloba mulumʼa ngombe bu mulambu wa kujimisha nʼau bubi. Mu matuku au muanda mutekete a disanka edi dia bidia bidi kabiyi biela luevene yeye alongolole mulambu wa kuoshela Yehowa, balume ba ngombe muanda mutekete badi kabayi ne tshilema ne bimpanga muanda mutekete bidi kabiyi ne tshilema, bua kuhifileye buatshia-buatshia tô matuku muanda mutekete; afile mpumbu wa mbushi buatshia-buatshia bu mulambu wa kujimisha nʼau bubi. Alongolole mulambu wa bia kudia, tshihiminu tshia épha ku ngombe umue, ne tshihiminu tshia épha ku tshimpanga, ne tshihiminu tshia hin wa manyi ku épha ne ku épha. Mu ngondo wa muanda mutekete, mu dituku dia dikumi ne ditanu dia ngondo, ne mu matuku muanda mutekete a kudia bidia bia disanka edi, afile milambu yoyimue ne ya diambedi, bu mulambu wa kubuikila nʼau mibi, mulambu wa kuoshela Yehowa, mulambu wa bia kudia ne mulambu wa manyi. Mukelenge Yehowa udi wamba ne, Tshibi tshia ku tshiendelu tshia munda tshidi tshitangila ku luseke lua esete tshishale tshinshila matuku asambombo adi bantu bakuata mudimu; kadi batshiunzulule Dituku dia Lumingu, batshiunzulule kabidi dituku diabala ngondo. Mukokeshi abuelemu hafumeye mu nshila udi uya mu mbalanda wa ku tshibuelelu tshia ha mbelu, imane hehi ne makunshi a tshibuelelu; bakuidi balongolole mulambu wandi wa kuosha ne milambu yandi ya kuvuisha nʼai ditalala, ne yeye atendelele ku mbelu kua tshibuelelu etshi, hashishe aluhuke biandi; kadi kabinshidi tshibi anu habuela diba. Bantu ba mu buloba ebu batendelele ku mpala kua Yehowa hehi ne tshibi tshia ku tshibuelelu etshi mu matuku a Lumingu ne mu matuku abala ngondo. Mulambu wa kuoshela Yehowa udi mukokeshi ufila kudiye Dituku dia Lumingu wikale bana ba mikoko basambombo badi kabayi ne tshilema ne tshimpanga tshimue tshidi katshiyi ne tshilema. Mulambu wa bia kudia wikale tshihiminu tshia épha tshimue bua kufila ne tshimpanga, ne mulambu wa bia kudia wa kufila ne bana ba mikoko wikale bu mudiye mumanye mua kufila, ne tshihiminu tshia manyi tshia hin tshifidibue ne épha ne épha. Mu dituku diabala ngondo mulambu eu wikale muana wa balume wa ngombe udi kayi ne tshilema, ne bana ba mikoko basambombo ne tshimpanga bidi kabiyi ne tshilema. Alongolole mulambu wa bia kudia, tshihiminu tshia épha bua kutshifila ne ngombe, tshihiminu tshia épha bua kutshifila ne tshimpanga, ne bungi budiye mumanye mua kufila ne bana ba mikoko, ne tshihiminu tshia manyi tshia hin tshifidibue ne épha ne épha. Habuela mukokeshi mu tshibuelelu atshi, abuele mu nshila udi uya mu mbalanda wa tshibuelelu, ne ahatukilemu muomumue. Kadi halua bantu ba mu buloba ebu ku mpala kua Yehowa mu bikondo biakusunguleye bua masanka a bidia, muntu wabuela bua kutendelela Yehowa ayile mu nshila wa ku tshibuelelu tshia ku luseke lua nôde, aluhukile mu nshila udi uya mu tshibuelelu tshia ku luseke lua sude; kadi wabuela mu nshila wa ku tshibuelelu tshia ku luseke lua sude aluhukile mu nshila udi uya mu tshibuelelu tshia ku luseke lua nôde; kahinganyi mu nshila wa ku tshibuelelu kuakubueleleye, kadi aluhukile mu nshila udi mululame ku mpala kuandi. Habuela bantu kabidi, mukokeshi ikale munkatshi muabo, abuele nʼabo diatshimue; haluhukabo, buonso buabo baluhuke diatshimue. Mu matuku a masanka a kudia bidia ne mu bikondo bisungula bia bidia abi mulambu wa bia kudia wikale tshihiminu tshia épha bua kutshina ne ngombe, tshihiminu tshia épha bua kutshifila ne tshimpanga, ne bungi budiye mua kufila ne bana ba mikoko, ne tshihiminu tshia hin tshia manyi tshifidibue ne épha ne épha. Halongolola mukokeshi mulambu wa kufila bua disanka dia mu mutshima wandi, hafileye nansha mulambu wa kuosha nansha mulambu wa kuvuisha hau ditalala bu mulambu wa kusangileye nʼau Yehowa, bamunzuluile tshibi tshia ku tshibuelelu tshia ku luseke lua esete, afile mulambu wandi wa kuosha anyi milambu yandi ya kuvuisha nʼai ditalala bu mudiye wenza Dituku dia Lumingu; hashishe aluhuke biandi, binshile tshibi ku nyima kuandi. Wewe longolola muana wa mukoko wa tshidimu tshimue udi kayi ne tshilema bua kumufila kudi Yehowa bu mulambu wa buatshia-buatshia; ku dinda ne ku dinda waulongolola. Ku dinda ne ku dinda longolola mulambu wa bia kudia, tshituha tshisambombo tshia épha umue, tshituha tshisatu tshia hin wa manyi bua kusangisha nʼau bukula; eu mmulambu wa bia kudia udibo ne bua kufila kudi Yehowa ku dituku ku dituku bu mukenji wandi wa tshiendelele. Balongolole nunku muana wa mukoko ne mulambu wa bia kudia ne manyi, ku dinda ku dinda, bua kubifila bu mulambu wa kuosha buatshia-buatshia. Mukelenge Yehowa udi wamba ne, Biafila mukokeshi tshintu kudi umue wa hana bandi ba balume, ebu mbuhianyi buandi, nebuikale bua bana bandi ba balume; budi luhetu luabo ludibo bangata bu buhianyi. Kadi biafileye tshintu tshia mu bintu bia buhianyi buandi kudi umue wa bahika bandi, tshishale kudi muntu eu tô ne ku tshidimu tshiaheteye budishikaminyi buandi; mu tshidimu atshi tshintu atshi tshihingane kudi mukokeshi; kadi buhianyi budi muanʼandi wa balume uhiana bushale kudiye. Bualu bukuabo kabidi, mukokeshi kanyengi tshituha tshia buhianyi bua bantu bakuabo bua kubihata mu buloba buabo; angate tshituha tshia luhetu luandi mene bua kuhesha bana bandi balume buhianyi buabo, bua bantu banyi kabatangadiki eku ne eku bualu bua bakabumusha mu buloba buabo. Hashishe yeye wakahitshila nʼanyi mu mushiku wa mbelu udi hehi ne tshibuelelu, wakabuela nʼanyi mu nsubu nujidile bakuidi yakadi mitangile ku luseke lua nôde; nakatangila muaba mukuabo kundekelu kuai ku luseke lua wesete. Yeye wakangambila ne, Eu mmuaba udi bakuidi ne bua kulambila mulambu wa disambuka dia mikenji ne mulambu wa kubuikila nʼau mabi, ne wa kuoshela mulambu wa bia kudia mu nfulu; bua kabahatuki nʼabi ku tshiendelu tshia ha mbelu bua kuvuisha bantu ba hatuhu bu ba tshijila. Hashishe yeye wakaluhuka nʼanyi, wakabuela hanyi mu tshiendelu tshia ha bule, wakampitshisha hehi ne matumba atshi anai; ne nakamona mu ditumba ne mu ditumba dia tshiendelu etshi ne lubanza luakadiku. Mu matumba anai a tshiendelu tshia ha mbelu muakadi mbanza yaya minyungulula ne bimanu; buonso buai inai yakadi bunene bumue, coudées makumi anai mu bule ne coudées makumi asatu mu butshiama. Mulongo wa matafuadi wakadi munyunguluke lubanza ne lubanza, ne bakenza meku muinshi muau mu nseke yonso, Yeye wakangambila ne, Abi mbilambilu bidi benji ba mudimu ba mu ntempelo ne bualu bua kulambila bantu milambu yabo. Wakahingana nʼanyi tô ne ku tshibi tshia ku ntempelo, ekumona! Mai akahatukila muinshi mua mushiku wa mbelu wa ntempelo ne akaya mu nshila wa ku esete (bualu bua mpala wa nsubu wakadi mutangile ku luseke lua esete); ne mai akahueka mu nshila wa ku luseke lua nsubu luakadi lutangila ku sude, ku luseke lua tshioshelu lua ku sude. Hashishe wakaluhuka nʼanyi mu nshila wa ku tshibuelelu tshia ku luseke lua ku nôde, wakandombola mu nshila wakadi munyunguluke lumbu lua ntempelo ha mbelu tô ne ku tshibuelelu tshiakadi tshitangila ku luseke lua esete; monai, mai akadi ahatuka ku luseke lua tshibuelelu lua ku sude. Hakaya muntu ku luseke lua ku esete ne luidi mu tshianza tshiandi, wakidikisha coudées tshinunu, wakampitshisha mu mai, ne mai akafika mu tuhombo tuanyi. Wakidikisha tshinunu tshikuabo, wakampitshisha mu mai, mai akafika mu binu bianyi. Wakidikisha tshinunu tshisatu, wakampitshisha mu mai, mai akafika mu tshifuka tshianyi. Ku nyima wakidikisha tshinunu tshinai, ne akadi musulu unakadi tshiyi mumanye mua kusabuka ku makasa; bualu bua mai akamana kubanda, mai a dilembue a kuowela, musulu wakadi muntu kayi mumanye mua kusabuka ku makasa. Yeye wakangambila ne, Muana wa muntu, wakumona muanda eu, anyi? Yeye wakandombola, wakampingasha ku muelelu wa musulu. Hanakahinganaku, nakamona muelelu wa musulu muikale ne mitshi ya bungi dishiya dia muamua ne dia munemu. Hashishe yeye wakangambila ne, Mai â adi ahueka ku luseke lua ku esete, neahueke tô ne mu Alabâ, neahueke ku Dishiba dia Luehu; habuela mai â mu Dishiba dia Luehu, mai a luehu nealue mai mimpe. Hashishe mu miaba yonso idi musulu ubuela, bintu bidi ne muoyo bia mishindu yonso ne bidi bivulangana nebikalemu; minyinyi ya mu mai ya bungi neyikalemu; bualu bua musulu eu udi ufikaku, bua mu miaba yonso idiu ufika mai a luehu neakudimuke mai mimpe kabidi, ne bintu bionso nebikale ne muoyo kuonso kuyaya musulu. Bilembi bia minyinyi ya mu mai nebimane kukala kua musulu, ku Enegedi tô ne ku Ene-gelayima, nebelemu tuhamba tuabo; minyinyi idimu neyikale ya mishindu ya bungi, neyikumbane ya bungi, bu mudi minyinyi ya mu Mai Manene. Kadi miaba yau idi bitahikidi ne lunteke kayena ilua mimpe; nebayishiye nunku bua bantu bangateku luehu. Ku mielelu ya musulu, dishiya dia muamua ne dia munemu, mitshi ya mishindu yonso idi ikuama mamuma a kudia neyidiunde, idi ne mabeshi adi kayi afubidila, ne idi ne mamuma adi kâyi atundumbila; kadi neyikuame mamuma mahia-mahia ku ngondo ku ngondo, bualu bua mai adi ayimiamina adi afuma ku tshitendelelu tshia Nzambi; mamuma ai neikale bia kudia, ne mabeshi ai neikale luondahu. Mukelenge Yehowa udi wamba ne, Ei idi mikalu ya buloba bunuabanyangana munkatshi mua bisamba dikumi ne bibidi bia Bena Isalele. Yosefe ikale ne bituha bibidi; kadi bunudi nʼabu mbua kuabanyangana buhianyi muomumue, muntu umue angate bu mudi muanʼabo wangata. Bualu bua nakaditshiha bua kubuhesha batatu benu; nunku buloba ebu nebuikale kunudi bu buhianyi buenu. Mikalu ya buloba ikale nunku: Ku luseke lua nôde, ku Mai Manene, mu nshila wa ku Helelona, ku tshibuelelu tshia ku Hamata tô ne ku Sedada, Hamata, Belota ne Sibelayima, udi ku mukalu wa hankatshi ha Damaseke ne Hamata, ne Hasâ-enona udi ku mukalu wa Haulana. Nunku mukalu wende ku Mai Manene tô ne ku Hasâ-enona, ku butshika bua Damaseke, ne ku luseke lua ku nôde kuikale tshibuelelu tshia ku Hamata. Eu mmukalu wa ku luseke lua nôde. Mukalu wa ku luseke lua esete, ubanga ku mukalu wa hankatshi ha Haulana ne Damaseke, ne wa hankatshi ha Gilada ne buloba bua Isalele, wikale musulu wa Yadene; uwidikishe ku butshika bua buloba bua ku luseke lua nôde tô ne ku mai manene a ku luseke lua esete. Eu mmukalu wa buloba ku luseke lua esete. Mukalu wa ku luseke lua sude uyile ku Tamâ tô ne ku mai a Melibota-kadeshe ne ku kasulu ka Ejipitu tô ne ku Mai Manene. Eu mmukalu wa ku luseke lua sude. Mukalu wa ku luseke lua wesete wikale Mai Manene, ubanga ku butshika bua ku luseke lua sude wenda tô ne ku muaba udi mutangilangane ne tshibuelelu tshia ku Hamata. Eu mmukalu wa ku luseke lua wesete. Nunku nuabanyangane buloba munkatshi muenu bu mudi bisamba bia Bena Isalele. Nubutahulule ku kuela kua nshobo bua buikale buhianyi buenu, ne bua bantu ba bende badi bashikame munkatshi muenu ne badi balela bana munkatshi muenu. Bobo bikale kunudi bu bana baledibue mu meku a Bena Isalele; bikale ne buhianyi hohamue nʼenu munkatshi mua bisamba bia Bena Isalele. Mukelenge Yehowa udi wamba ne, Mu tshisamba tshionso mudi muntu wa bende mushikame, mu muaba au nudi ne bua kumuha buhianyi buandi. Au mmena a bisamba: Ku butshika bua ku luseke lua nôde, ku Mai Manene, kuyila mu nshila wa ku Helelona tô ne ku tshibuelelu tshia ku Hamata, ne ku Hasâ-enona wa ku butshika bua Damaseke, musoko wa Hamata muikale ku butshika ku luseke lua nôde. Dana ikale ne tshituha tshimue tshia buloba tshiyila ku esete tô ne ku wesete. Ashê ikale ne tshituha tshimue tshituangane ne mukalu wa Dana, ku luseke lua esete tô ne ku luseke lua wesete. Nafatale ikale ne tshituha tshimue tshituangane ne mukalu wa Ashê, ku luseke lua esete to ne ku luseke lua wesete. Manashe ikale ne tshituha tshimue tshituangane ne mukalu wa Nafatale, ku luseke lua esete tô ne ku luseke lua wesete. Efelayima ikale ne tshituha tshimue tshituangane ne mukalu wa Manashe, ku luseke lua esete tô ne ku luseke lua wesete. Lubena ikale ne tshituha tshimue tshituangane ne mukalu wa Efelayima, ku luseke lua esete tô ne ku luseke lua wesete. Yuda ikale ne tshituha tshimue tshituangane ne mukalu wa Lubena, ku luseke lua esete tô ne ku luseke lua wesete. Ku mukalu wa Yuda ku luseke lua esete tô ne ku luseke lua wesete kuikale muaba wa tshijila unudi nujidila Yehowa; butshiama buau buikale coudées binunu makumi abidi ne bitanu, bule buau buikale muomumue ne bule bua buhianyi bua tshinga tshisamba ku luseke lua esete to ne ku luseke lua wesete; ne tshitendelelu tshikale munkatshi muau. Muaba unudi ne bua kufila kudi Yehowa bu tshituha tshia buloba wikale coudées binunu makumi abidi ne bitanu mu bule buau, ne coudées binunu makumi abidi mu butshiama buau. Bakuidi bikale ne luseke lukuabo lua muaba eu wa tshijila, bule bualu buikale coudées binunu makumi abidi ne bitanu ku luseke lua esete tô ne ku luseke lua wesete, butshiama bualu buikale coudées binunu dikumi ku luseke lua nôde tô ne ku sude, ne tshitendelelu tshia Yehowa tshikale munkatshi mualu. Luseke elu lua buloba luikale buloba bua bakuidi ba munkatshi mua bana balume ba Sadoka badi ba dijidila kudi Nzambi, bakadi kabayi bahambuke bu muakenza Bena Lewi hakahambuka Bena Isalele bakuabo. Muaba eu wikale bu tshituha tshikuabo tshia buloba tshiumushibue ku tshituha tshia buloba tshidi tshijidila Yehowa, tshintu tshitambe tshijila, muaba udi mutuangane ne butshika bua Bena Lewi. Buludiludi ne mukalu wa bakuidi, Bena Lewi bikale ne muaba, bule buau coudées binunu makumi abidi ne bitanu, butshiama buau coudées binunu makumi abidi. Nunku bule bua buloba bua bakuidi ne bua Bena Lewi busangisha hohamue buikale coudées binunu makumi abidi ne bitanu, ne butshiama buikale coudées binunu makumi abidi. Kabahanyi tshituha tshiabu, kabashintakashi tshituha tshiabu, kabitabushi bua tshituha tshia buloba tshijidila Yehowa tshibuele mu bianza bia bantu ba bende; bualu bua budi bajidila Yehowa. Tshituha tshia buloba tshidi tshishala, butshiama buatshi coudées binunu bitanu, ne bihidi ku mpala kua mukalu wa coudées binunu makumi abidi ne bitanu, tshikale buloba bua malu makuabo bua kuasamu musoko, bua nsubu, bua madimi; musoko wikale munkatshi mua muaba eu. Musoko wikale bunene nunku: Luseke lua nôde coudées binunu binai ne nkama itanu, luseke lua sude coudées binunu binai ne nkama itanu, luseke lua esete coudées binunu binai ne nkama itanu, luseke lua wesete coudées binunu binai ne nkama itanu. Musoko wikale ne madimi: ku luseke lua nôde coudées nkama ibidi ne makumi atanu, ku luseke lua sude coudées nkama ibidi ne makumi atanu, ku luseke lua esete coudées nkama ibidi ne makumi atanu ne ku luseke lua wesete coudées nkama ibidi ne makumi atanu. Muaba Edi ushala, buludiludi ne tshituha tshia buloba tshijidila Yehowa, coudées binunu dikumi mu bule buau ku luseke lua esete, coudées binunu dikumi mu bule buau ku luseke lua wesete, wikale buloba bua musoko; bintu bidi bidiundamu bikale bia kudia bia bantu badi benza mudimu mu musoko. Badi benza mudimu mu musoko, ba mu bisamba bionso bia mu Isalele mene, badime madimi adimu. Buloba ebu buonso, tshituha tshia buloba tshijidila Yehowa tshisangisha ne tshituha tshia buloba tshia musoko, buikale ne coudées binunu makumi abidi ne bitanu ku nseke yabu yonso. Mukokeshi ikale ne buloba budi bushala, bukuabo ku lunga luseke ne bukuabo ku luseke lukuabo lua muaba udi usangisha buloba bujidila Nzambi ne buloba bua musoko hohamue; bukuabo buikale ku mpala kua mukalu wa muaba au wa coudées binunu makumi abidi ne bitanu tô ne ku butshika bua buloba bua Isalele ku luseke lua esete, bukuabo buikale ku luseke lua wesete lua muaba au wa coudées binunu makumi abidi ne bitanu tô ne ku butshika bua buloba bua Isalele ku luseke lua wesete; buloba budi buludiludi ne mahianyi a bisamba bia Bena Isalele, buikale buloba bua mukokeshi, ne tshituha tshia buloba tshidibo bajidila Yehowa ne muaba wa tshitendelelu nebikale munkatshi muabu. Buloba bua Bena Lewi ne buloba bua musoko kabidi bikale munkatshi mua buloba bua mukokeshi; ne buloba bua mukokeshi buikale hankatshi ha mukulu wa Yuda ne makalu wa Benyamina. Buhianyi bua bisamba bikuabo buikale nunku: Ku luseke lua esete tô ne ku luseke lua wesete Benyamina ikale ne tshituha tshimue. Shimeona ikale ne tshituha tshimue tshituangane ne mukalu wa Benyamina, ku luseke lua esete tô ne ku luseke lua wesete. Yisakâ ikale ne tshituha tshimue tshituangane ne mukalu wa Shimeona, ku luseke lua esete tô ne ku luseke lua wesete. Zebuluna ikale ne tshituha tshimue tshituangane ne mukalu wa Yisakâ, ku luseke lua esete tô ne ku luseke lua wesete. Gada ikale ne tshituha tshimue tshituangane ne mukalu wa Zebuluna, ku luseke lua esete tô ne ku luseke lua wesete. Ku luseke lua Gada lua ku sude mukalu ubange ku Tama uye tô ne ku mai a Melebota-kadeshe, ku kasulu ka Ejipitu, tô ne ku Mai Manene. Ebu mbuloba bunudi ne bua kuabanyangana ku kuela kua nshobo munkatshi mua bisamba bia Bena Isalele bu buhianyi buabo. Mukelenge Yehowa udi wamba ne, Ebi mbituha biabo. Ebi mbibi bidibo bahatukila mu musoko bua kuya ha bule, tshibi ne tshibi tshikale ne dina dia tshisamba tshikuabo tshia Bena Isalele. Ku luseke lua nôde, bule bualu coudées binunu binai ne nkama itanu mu tshidikishilu tshialu, kuikale bibi bisatu: tshibi tshia Lubena, tshibi tshia Yuda ne tshibi tshia Lewi. Ku luseke lua esete, bule bualu coudées binunu binai ne nkama itanu, kuikale bibi bisatu: tshibi tshia Yosefe, tshibi tshia Benyamina ne tshibi tshia Dana. Ku luseke lua sude, coudées binunu binai ne nkama itanu mu bule bualu, kuikale bibi bisatu: tshibi tshia Shimeona, tshibi tshia Yisakâ ne tshibi tshia Zebuluna. Ku luseke lua wesete, coudées binunu binai ne nkama itanu mu bule, kuikale bibi bisatu: tshibi tshia Gada, tshibi tshia Ashê ne tshibi tshia Nafatale. Nyungulukilu wa musoko mu nseke yau mai ikale coudées binunu dikumi ne muanda mukulu. Nebabikile dina dia musoko ku dituku adi tô ne tshiendelele ne, Yehowa udi aha. Mu tshidimu tshisatu tshia bukokeshi bua Yehoyakima, mukelenge wa Yuda, Nebukadenesâ, mukelenge wa Babulona, wakafika ku Yelushalema, wakautshintshimika. Mukelenge Yehowa wakafila Yehoyakima, mukelenge wa Yuda, mu bianza biandi, ne tshituha tshia malonga ne mpanza bia mu nsubu wa Nzambi; yeye wakaya nʼabi mu buloba bua Shinâ mu nsubu wa nzambi wandi. Wakabiteka mu nsubu wa tshibutshilu tshia nzambi wandi. Mukelenge wakambila Ashepenaza, kahita ka bantu bandi batungula ne, Lua ne bantu bakuabo ba Bena Isalele, bana ba bakelenge ne ba bantu banene; bansongalume badi kabayi ne tshilema hamʼbidi habo, badi ne mpala milengele, meji makane a ngenyi yonso, bayishibue meji, bajingulule lungenyi lua malu onso, bakumbane biabo bua kukuata mudimu mu nsubu wa mukelenge; bua yeye amanye mua kubayisha mikanda ne muaku bia Bena Kasada. Mukelenge wakabatekela tshituha tshia bia kudia biandi bishema bia buatshia-buatshia ne tshia nvinyo wakadiye unua, bua bobo bakoleshibue nunku bidimu bisatu; bua ku ndekelu kua bidimu ebi bamanye mua kuimana ku mpala kua mukelenge. Munkatshi mua bantu aba muakadi bakuabo ba Bena Yuda, Danyele, Hananiya, Mishaele, ne Azaliya. Kahita ka bantu batungula kakahidia mena makuabo. Kakidika Danyele ne, Beleteshasâ; kakidika Hananiya ne, Shadalaka; kakidika Mishaele ne, Meshaka; kakidika Azaliya ne, Abedenego. Kadi Danyele wakahangidisha bualu mu mutshima wandi bua kadinyangi ne bia kudia bia mukelenge ne nvinyo wakadiye unua. Nunku wakasengelela kahita ka bantu batungula bua yeye kikadi ne bua kudinyanga. Nzambi wakendesha Danyele diakalengele ne luse ku mesu kua kahita ka bantu batungula. Kahita ka bantu batungula kakambila Danyele ne, Meme ndi ntshina mukelenge wanyi, wakanulongoluela bia kudia ne bia kunua bienu. Munyi mudiye mua kulua kumona mpala yenu mihite ya bansongalume ba mulongo wenu bubi? Nunku nenumbueshishe mu tshilumbu tshia kunkosesha mutu kudi mukelenge. Hashishe, Danyele wakambila mulami wakatekabo ku mutu kua Danyele ne Hananiya ne Mishaele ne Azaliya kudi kahita ka bantu batungula ne, Ndi nkusengelela ne, Anji kuteta bantu bebe matuku dikumi; batuhe midioko ya kudia ne mai a kunua; hashishe, batangile mpala yetu ne mpala ya bansongalume batu badia bia kudia bia mukelenge, nunku utuenzele tuetu bantu bebe bu muwamona. Nunku yeye wakabunvuila mu bualu ebu, wakahateta matuku dikumi. Hakashika matuku au dikumi, mpala yabo yakamueneka mihite bulengele, ne mibidi yabo yakasenena mihite ya bansongalume aba bonso bakadi badia bia kudia bishema bia mukelenge. Nunku mulami wakahumushila bia kudia abi ne nvinyo wakadibo ne bua kunua, wakabaha midioko. Nzambi wakaha bansongalume aba banai meji ne lungenyi mu diyila dia mikanda yonso ne mu meji makuabo; ne Danyele wakadi ne lungenyi lua kujingulula bikena kumona bionso ne bilota. Hakakumbana matuku au akamba mukelenge bua kulua nʼabo kudiye, kahita ka bantu batungula kakalua nʼabo ku mpala kua Nebukadenesâ. Mukelenge wakayikila nʼabo; munkatshi mua buonso buabo kakasangana bakuabo bu Danyele, Hananiya, Mishaele ne Azaliya. Nunku bakalua bimanyi ba ku mpala kua mukelenge. Mu malu onso a meji ne lungenyi lule biakabebesha mukelenge, wakabasangana bahite bena mbuku ne bena buloshi bonso ba mu bukelenge buandi misangu dikumi. Nunku Danyele wakashala mu mudimu eu tô ne ku tshidimu tshia kumudilu tshia bukokeshi bua Mukelenge Kolesha. Mu tshidimu tshibidi tshia bukokeshi bua Nebukadenesâ, yeye Nebukadenesâ wakalota bilota; mutshima wandi wakahampakana, kakadi ne tulu ku mesu. Hashishe, mukelenge wakela dî bua kubikilabo batempi ba mbuku, bamanyi ba malu a mitoto, bena muhongo ne Bena Kasada, bua bobo bajinguluile mukelenge bilota biandi. Nunku bakabuela, bakimana ku mpala kua mukelenge. Mukelenge wakabambila ne, Nakulota tshilota, mutshima wanyi udi utata bua kumanya tshilota etshi. Hashishe, Bena Kasada bakandamuna mukelenge mu muaku wa Bena Alama ne, Mukelenge, wikale ne muoyo tshiendelele! Wawile bantu bebe tshilota, nunku netukujinguluiletshi. Mukelenge wakakudimuna Bena Kasada dî ne, Dî diakumana kuhatuka mukana muanyi ne, Binuahanga kundesha tshilota ne dijingulula diatshi, nebanukose bituha bituha, nebavuishe nsubu yenu bu diala. Kadi binuandesha tshilota ne dijingulula diatshi, nenuangate maha ne matabisha ne butumbi bunene kundi. Nunku nungambile tshilota ne dijingulula diatshi. Bakamuandamuna tshiakabidi ne, Mukelenge awile bantu bandi tshilota, ne tuetu netumuleshe dijingulula diatshi. Mukelenge wakabandamuna dî ne, Ndi mumanye bulelela ne nudi nukeba kulehesha diba bualu bua nudi numona ne dî diakumana kuhatuka mukana muanyi ne, Binuikala kanuyi nungambila tshilota etshi, mukenji au umuehele neunukuate bonso. Bualu bua nuakuhunga dî bua kuamba mei a mashimi ne a kudinga nʼau ku mpala kuanyi, tô ne hakudimuka bualu. Nunku nungambile tshilota, nemmanye ne nudi bamanye mua kundesha dijingulula diatshi. Bena Kasada bakandamuna mukelenge ne, Kakuena muntu ha buloba udi mua kulesha mukelenge bualu ebu, bualu bua kakuena mukelenge, nansha bikaleye muntu muhite bunene ne bukole, ukadi muebeshe muena mbuku, mumanyi wa malu a mitoto, anyi Muena Kasada bualu bua nunku. Ebu mbualu bukole budi mukelenge ukonka, ne kakuena udi mua kubulesha mukelenge, anu nzambi idi kayiyi mishikame munkatshi mua ba ha buloba. Bua bualu ebu mukelenge wakafua tshiji, wakafika munda bikole, wakela mukenji wandi bua kubutulabo bena meji bonso ba mu Babulona. Nunku mukenji eu wakaya kuonso bua bena meji bashihibue, bakakeba Danyele ne balunda bandi bua kubashiha. Hashishe, Danyele wakahingisha ditaba dia meji ne dia budimu kudi Aliyoka, kapitene ka masalayi akadi alama mukelenge, kakadi kaya bua kushiha bena meji ba mu Babulona. Wakambila Aliyoka, kapitene ka mukelenge, ne, Bualu kai mukenji wa mukelenge udi mukole nunku? Nunku Aliyoka wakamanyisha Danyele muanda eu. Danyele wakabuela muakadi mukelenge, wakasengelela mukelenge bua yeye amuleheshile tshikondo bua amanye mua kulesha dijingulula dia tshilota. Ku nyima Danyele wakaya ku nsubu kuandi, wakamanyisha Hananiya, Mishaele ne Azaliya, balunda bandi, bualu ebu, bua bobo balombe luse kudi Nzambi wa mu diulu mu bualu ebu busokoka; bua Danyele ne balunda bandi kabafu diatshimue ne bena meji bakuabo ba mu Babulona. Hashishe, bualu ebu busokoka buakasokolodibua kudi Danyele mu tshikena kumona butuku. Mu diba adi Danyele wakatumbisha Nzambi wa mu diulu. Danyele wakamba ne, Dina dia Yehowa ditumbishibue kashidi ne kashidi, bualu bua meji ne bukole mbiandi. Yeye udi ukudimuna bikondo ne bidimu; udi umusha bakelenge, udi ujadika bakelenge; udi ufila meji kudi bena meji, ne lungenyi kudi badi bamanye mua kujingulula malu. Udi usokolola malu adi makole ne adi masokoka; udi mumanye malu adi mu mîdima, munya utu wikala nʼandi kaba kamue. Ndi nkusakidila, ndi nkutumbisha, wewe Nzambi wa bankambua banyi, wakumpa meji ne bukole, ne mpindiu wakummanyisha bualu butuakulomba kûdi; bualu bua waku tumanyisha bualu abu bua mukelenge. Nunku Danyele wakabuela kudi Aliyoka, wakatumabo kudi mukelenge bua kushiheye bena meji ba mu Babulona. Wakabuela muakadiye, wakamuambila ne, Kushihi bena meji ba mu Babulona nansha. Unfikisha kudi mukelenge, meme nendeshe mukelenge dijingulula dia tshilota tshiandi. Hashishe, Aliyoka wakaya ne Danyele kudi mukelenge lukasa, wakamuambila ne, Nakumona muntu munkatshi mua bantu ba ku Yuda bakabueshabo mu buhika udi mua kujingulula mukelenge tshilota tshiandi. Mukelenge wakebesha Danyele, wakadibo babikila ne Beleteshasâ, ne, Wewe udi mua kummanyisha tshilota tshinakulota ne dijingulula diatshi, anyi? Danyele wakakudimuna mukelenge ne, Bualu busokoka budi mukelenge muebeshe mbualu budi bena meji, bamanyi ba malu a mitoto, bena buloshi ne batempi ba mbuku kabayi bamanye mua kumujinguluilabo. Kadi Nzambi udiku mu diulu udi usokolola malu masokoka, ne yeye wakumanyisha mukelenge Nebukadenesâ malu akadi ha kulua mu matuku atshidi ku mpala. Tshilota tshiebe ne bikena kumona biwakumona ku mutu webe mu bulalu bidi nunku: Wewe, mukelenge, wakadi welangana meji mu bulalu buebe a malu atshidi ku mpala; yeye au udi usokolola malu masokoka wakukulesha malu atshidi ku mpala. Kadi meme hanyi bualu ebu busokoka kabuakusokolodibua kundi bua meji andi nʼau adi mahite a bantu bakuabo, kadi mbua dijingulula dimanyishibue kudi mukelenge, ne bua wewe umanye meji adi mu mutshima webe. Wewe, mukelenge, wakatangila, ekumona, luhingu lunene! Luhingu alu luakadi lunene be ne luakadi lukenka ne dinkenke dikole, luakimana ku mpala kuebe; tshinfuanyi tshialu tshiakakukuatshisha buowa. Mutu wa luhingu alu wakadi wa tshiamu tshia or muimpe, tshiadi tshialu ne maboko alu biakadi bia tshiamu tshia argent, dilu dialu ne bibelu bialu biakadi bia tshiamu tshia mitaku. Mikolo yalu yakadi ya tshiamu tshifike; makasa alu akadi tshituha tshiamu tshifike, tshituha dima. Wewe wakadi mutangile tô ne hawakamona dibue diumuke, tshianza tshia muntu katshiyi tshidinga, diakalututa ku makasa alu akadi a tshiamu tshifike ne dima bisangishe, diakâtshibula bituha bituha. Hashishe, tshiamu tshifike, dima, tshiamu tshia mitaku, tshiamu tshia argent ne tshiamu tshia or biakatshibuka bituha bituha diatshimue; biakalua bu bisote bidi bihehuka mu bishihuidi mu tshidimu tshia munya. Luhehele luakabihehula, bua muanda eu kabakasangana nansha katuha kabi kabidi; kadi dibue adi diakakuma luhingu diakalua mukuna munene, diakusha buloba bujima tente. Ke muakadi tshilota nanku; netulonde dijingulula diatshi ku mpala kua mukelenge. Wewe, mukelenge, udi mukelenge wa bakelenge, udi Nzambi wa mu diulu muhe bukelenge, bukokeshi, bukole ne butumbi. Yeye wakufila bukua bantu mu bianza biebe, nyama ya mu mpata, nyunyu ya mulu, ne miaba yonso idibi tushikame, wakauteka wewe mukokeshi ku mutu kuabi. Wewe mume udi mutu au wa or. Ku nyima kuebe bukelenge bukuabo, buhite buebe buhuekela, nebubike; hashishe, bukelenge buisatu bua tshiamu tshia mitaku mene nebumueneke, nebukokeshe ba ha buloba bonso. Bukelenge buinai nebuikale ne bukole bua tshiamu tshifike; bualu bua bu mudi tshiamu tshifike tshitshibula bintu bionso bituha bituha ne tshibibotekasha, ne bu mudi tshiamu tshifike tshibotesha bintu ebi bionso, nunku bukelenge abu nebutshibule, nebubutule makalenge â onso. Bu mu wakumona makasa ne bana ba nkasa hikala tshituha dima dia mufumbi, tshituha tshiamu tshifike, nunku bukelenge abu nebuikale butahuluke. Kadi munda muabu nemuikale tshituha tshia bukole bua tshiamu, bu muwakumona tshiamu tshifike tshisangisha ne dima. Bu muakadi bana ba nkasa tshituha tshia tshiamu tshifike ne tshituha tshia dima, nunku bukelenge abu nebuikale tshituha ne bukole, tshituha ne butekete. Bu muwakumona tshiamu tshifike tshisangisha ne dima, bena bukelenge abu nebabuelakane ne bakuabo; ka dî kabena bilamatangana, bu mudi tshiamu tshifike katshiyi tshilamatangana ne dima. Mu matuku a bakelenge aba Nzambi wa mu diulu neajadike bukelenge bukuabo budi kabuyi bubutudibua tshiendelele. Bukokeshi buabu kabuena buhianyibua kudi bantu bakuabo, kadi nebutshibule makelenge â onso bituha bituha, nebuabutule, ne buobu nebujalame tshiendelele. Bualu ebu budi bu muwakumona, dibue diakulamuka ku mukuna, tshianza tshia muntu katshiyi tshi dilenga, diakutshibula tshiamu tshifike, tshiamu tshia mitaku, dima, argent ne or. Nzambi Munene wakumanyisha mukelenge malu atshidi alua. Tshilota tshidi tshia hushuwa ne dijingulula diatshi didi dilelela. Hashishe mukelenge Nebukadenesâ wakatua mpala wandi hanshi, wakakukuila Danyele, wakela mukenji bua bamulambule, bamuoshele musenga wa manananshi a muhuya muimpe. Mukelenge wakambila Danyele ne, Bulelela, Nzambi webe udi Nzambi wa nzambi yonso, Mukelenge wa bakelenge, musokolodi wa malu masokoka, bualu bua wewe wakumanya mua kusokolola bualu ebu busokoka. Hashishe mukelenge wakavuisha Danyele muntu munene, wakamuha bintu bia bungi, wakamuvuisha mukokeshi wa ha mutu ha province mujima wa Babulona, wakamuteka mukokeshi munene ku mutu kua bena meji bonso ba mu Babulona. Ku dilomba dia Danyele, mukelenge wakateka Shadalaka, Meshaka ne Abedenego ku mutu kua malu a mu province wa Babulona. Kadi Danyele wakashikama mu luhangu lua mukelenge. Mukelenge Nebukadenesâ wakenza luhingu lua tshiamu tshia or, bule bualu buakadi coudées makumi asambombo, butshiama bualu buakadi coudées isambombo. Wakaluimanyika ku mpata wa Dula mu province wa Babulona. Hashishe nfumu Nebukadenesâ wakatuma dî bua kusangishabo tuhita, miloho, ba-gouverneur, balumbuluishi, balami ba tshibutshilu, bena meji, bamanyi ba mikenji ne bakokeshi bonso ba mu province, balue biabo ku dijidila dia luhingu luakadi nfumu Nebukadenesâ muimanyike. Hashishe, tuhita, miloho, ba-gouverneur, balumbuluishi, balama ba tshibutshilu, bena meji, bamanyi ba mikenji ne bakokeshi bonso ba mu province bakasangishibua ku dijidila dia luhingu luakadi mukelenge Nebukadenesâ muimanyike; bakimana ku mpala kua luhingu luakadi Nebukadenesâ muimanyike. Messager wa nfumu wakela dî dikole ne, Badi banuelela mukenji eu, nuenu ba bisamba bionso ne miaku yonso ne, Diba dinunvua tshiona tshia mpungi, tshia nshiba, tshia nzenze, tshia nkombe, tshia guitare, tshia bimama ne tshia biombelu bionso, tuai mpala hanshi, tendelelai luhingu lua or ludi mukelenge Nebukadenesâ muimanyike. Muntu yonso wabenga kutua mpala hanshi ne kulutendelela, mu diba adi mene nebamuele mu tshikutu tshia kahia kakole. Nunku hakunvua bantu bonso tshiona tshia mpungi, tshia nshiba, tshia nzenze, tshia nkombe, tshia guitare, tshia bimama ne tshia biombelu bionso, ba bisamba bionso ne ba miaku yonso bakatua mpala yabo hanshi, bakatendelela luhingu lua or luakadi mukelenge Nebukadenesâ muimanyike. Mu diba adi Bena Kasada bakuabo bakasemena ha buihi, bakabanda Bena Yuda. Bakambila mukelenge Nebukadenesâ ne, Wewe Mukelenge, wikale ne muoyo tshiendelele! Wewe Mukelenge, wakuela mukenji ne, Hunvua muntu yonso tshiona tshia mpungi, tshia nshiba, tshia nzenze, tshia nkombe, tshia guitare, tshia tumama ne tshia biombelu bionso, budiye nʼabu mbua kutua mpala hanshi ne kutendelela luhingu lua or. Muntu yonso wabenga kutua mpala wandi hanshi ne kulutendelela, nebamuele mu tshikutu tshia kahia kakole. Bena Yuda bakuabo badiku bawakuteka ku mutu kua malu a mu province wa Babulona, menʼabo Shadalaka, Meshaka ne Abedenego. Bantu aba, mukelenge wetu, kabakukunemeka mene, kabena bakuatshila nzambi yebe mudimu, kabena batendelela luhingu lua tshiamu tshia or luwakuimanyika. Bua mei â Nebukadenesâ wakafika munda ne wakakuata tshiji tshikole, wakela mukenji ne, Balue ne Shadalaka, Meshaka ne Abedenego. Nunku bakalua ne bantu aba ku mpala kua mukelenge. Nebukadenesâ wakabebesha ne, Edi ndî dia bushuwa, anyi? Nuenu, Shadalaka, Meshaka ne Abedenego, kanuena nukuatshila nzambi yanyi mudimu, kanuena nutendelela luhingu lua or lunakuimanyika, anyi? Katataka binuitabusha kutua mpala yenu hanshi ne kutendelela luhingu lunakuenza, hanunvua tshiona tshia mpungi, tshia nshiba, tshia nzenze, tshia nkombe, tshia guitare, tshia bimama ne tshia biombelu bionso, mbimpe. Kadi binuikala kanuyi nutendelela, ha diba adi mene nebanuele munda mua tshikutu tshia kahia kakole; ne nzambi kai udi mua kunuhandisha mu bianza bianyi? Shadalaka, Meshaka ne Abedenego bakakudimuna mukelenge dî ne, Mukelenge Nebukadenesâ, katuena ne bualu bua kukukudimuna dî mu muanda eu nansha. Biasua Nzambi wetu utudi tukuatshila mudimu kutusungila, yeye neatuhandishe ku tshikutu tshia kahia kakole ne mu tshianza tshiebe kabidi, mukelenge. Kadi bikaleye kayi musue kuenza nunku, Umanye biebe, mukelenge, ne katuena tukuatshila nzambi yebe mudimu, katuena tutendelela luhingu lua or luwakuimanyika. Ha diba edi Nebukadenesâ wakulangana tente ne tshiji, ne mpala wandi wakakudimukila Shadalaka, Meshaka ne Abedenego. Nunku wakela dî diandi ne, Bahishe tshikutu ne kahia kadi kahita ka matuku makuabo misangu muanda mutekete. Wakambila bakuabo ba munkatshi mua bena nvita bandi bahite bukole bua kusuikabo Shadalaka, Meshaka ne Abedenego ne bua kubelabo mu tshikutu tshia kahia kakole. Nunku bakasuika bantu aba bavuale binkutu biabo, bitambala biabo, bifulu biabo ne bivuala biabo bikuabo, bakabela mu tshikutu tshia kahia kakole. Bualu bua mukenji wa mukelenge wakadi mukole ne bua tshikutu tshiakatamba kuhishibua, nunku ndimi ya kahia yakashiha bantu aba bakadi bambula Shadalaka, Meshaka ne Abedenego. Bantu aba basatu, Shadalaka, Meshaka ne Abedenego bakahona basuika mu tshikutu tshia kahia kakole. Hashishe, mukelenge Nebukadenesâ wakakuatshika buowa, wakajuka lukasa; wakakonka miloho yandi ne, Katuakuela bantu basatu basuika mu kahia, anyi? Bakandamuna mukelenge ne, Mbulelela, mukelenge. Yeye wakabakudimuna ne, Monai, ndi ntangila bantu banai basuluke, bendakana mu kahia, kabayi ne bualu. Tshinfuanyi tshia muinai tshidi bu tshinfuanyi tshia muana mukuabo wa nzambi. Hashishe, Nebukadenesâ wakaya ha buihi ne mushiku wa tshikutu tshia kahia kakole, wakela dî ne, Shadalaka, Meshaka ne Abedenego, nuenu bantu ba Nzambi Mutambe Bunene wa mu diulu, hatukai, luai kunoku. Shadalaka, Meshaka ne Abedenego bakaluhuka munkatshi mua kahia. Tuhita, miloho, ba-gouverneur, ne bena meji ba mukelenge, bamane kudisangishaku, bakatangila bantu aba, bakamona ne kahia kakakenza bualu hamʼbidi habo, nsuki ya ku mitu yabo kayakababuka, binkutu biabo kabiakanyanguka ne muhuya wa kahia kawakadi hamʼbidi habo, Nebukadenesâ wakamba kabidi ne, Batumbishe Nzambi wa Shadalaka, Meshaka ne Abedenego, wakutuma muanjelo wandi bua kuhandisha bantu bandi bakamueyemena. Bakahidia mukenji wa mukelenge, bakafila mibidi yabo ku lufu bua kabakuatshidi nzambi mukuabo mudimu, kabamutendeledi mu muaba wa Nzambi wabo mene. Nunku ndi ngela mukenji ne, Muntu yonso, wa tshisamba tshionso, anyi wa muaku wonso wadiula Nzambi wa Shadalaka, Meshaka ne Abedenego, nebamukose bituha bituha, nebavuishe nsubu wandi bu diala; bualu bua kakuena nzambi mukuabo udi mua kuhandisha bantu bu muakuenzeye. Hashishe, mukelenge wakahandisha Shadalaka, Meshaka ne Abedenego mu province wa Babulona. Mukelenge Nebukadenesâ udi utuma dî kudi bantu bonso, ba bisamba bionso ne ba miaku yonso badi bashikame ha buloba buonso ne, Ditalala dikumbane kunudi. Nakuelangana meji ne, Mbimpe bua meme kunumanyisha bua bimanyinu ne malu a kukema biakungenzela Nzambi Mutambe Bunene wa mu diulu. Monai bunene bua bimanyinu biandi! Monai bukole bua malu andi a kukema! Bukelenge buandi budi bukelenge bua tshiendelele, bukokeshi buandi budi bushala ku tshikondo ku tshikondo. Meme, Nebukadenesâ, nakadi nshikama talalâ mu nsubu muanyi, nakadi ne diakalengele mu mbalasa wanyi wa bukelenge. Nakalota tshilota tshiakankuatshisha buowa; meji anakadi ngela munda ha bulalu buanyi ne bikena kumona binakamona ku mutu wanyi biakantatshisha. Nunku nakela mukenji ne, Balue ne bena meji bonso ba mu Babulona ku mpala kuanyi, bua bobo bamanye mua kummanyisha dijingulula dia tshilota tshianyi. Hashishe, bena mbuku, bena buloshi, Bena Kasada ne bamanyi ba malu a mitoto bakalua ku mpala kuanyi; nakabawila tshilota, kadi kabakamanya mua kummanyisha dijingulula diatshi. Kadi ku nyima Danyele, udibo babikila ne Beleteshasâ, bu mudi dina diandi dia nzambi wanyi, ne udi ne nyuma wa nzambi ya tshijila munda muandi, wakalua ku mpala kuanyi. Nakamuawila tshilota tshianyi ne, Wewe, Beleteshasâ, kahita ka batempi ba mbuku, bualu bua ndi mumanye ne nyuma wa nzambi ya tshijila udi munda muebe, ne kakuena bualu busokoka budi bukukolela, ungambile bikena kumona binakumona mu tshilota tshianyi ne dijingulula diabi. Bikena kumona binakamona ku mutu wanyi hanakadi mu bulalu buanyi biakadi nunku: Nakatangila, ekumona, mutshi wakadi munkatshi mua buloba; bule buau buakadi buhite! Mutshi wakadiunda, wakalua mukole, lusongo luau luakafika mu diulu, wakamueneka kudi ba kunfudilu kua buloba. Mabeshi au akadi malengele, mamuma au akadi a bungi be, akadi makumbane bia kudia bia bantu bonso. Nyama ya mu mpata yakalala mu dileshi diau, nyunyu ya mulu yakikila ha matamba au ne bonso bakadi ne muoyo bakadia bia kudia kudiu. Mu bikena kumona bia ku mutu wanyi binakadi nʼabi mu bulalu buanyi nakatangila, ekumona, mutangidi, muntu wa tshijila, uhueka hanshi, mufume mu diulu. Yeye wakela dî dikole, wamba ne, Shimbulai mutshi eu, kosai matamba au, hoholai mabeshi au, tangalashai mamuma au! Nyama yumuke muinshi muau, nyunyu idi ha matamba au ibuke. Kadi shiyai tshikuku ne miji yatshi mu buloba, tshisuikibue ne mukaba wa tshiamu tshifike ne wa tshiamu tshia mitaku, munkatshi mua mashinde a lutende. Muntu au aboleshibue ne dibungi dia mulu, adie mashinde a mu mpata bu nyama. Mutshima wandi wa buntu wandamuke bu wa nyama; ashale nunku bidimu muanda mutekete. Dikosa dia bualu ebu didi difume ku mukenji wa batangidi ne ku dilomba dia ba tshijila; bua bonso badi ne muoyo bamanye ne Mutambe Bunene wa mu dilulu udi ukokesha bukelenge bua bantu, udi ubuhesha muntu yonso udiye musue, udi uteka muntu mutambe buhuekele ku mutu kuabu. Tshilota etshi ntshiotshi tshinakulota, meme, Mukelenge Nebukadenesâ; ne wewe, Beleteshasâ, ungambile dijingulula diatshi, bualu bua bena meji bonso ba mu bukelenge buanyi kabena bamanye mua kundesha dijingulula diatshi. Kadi wewe udi mumanye mua kuenza nunku, bualu bua nyuma wa nzambi ya tshijila udi munda muebe. Hashishe, Danyele, udibo babikila ne, Beleteshasâ, wakadi ne mutshima muhandike tô tshituha tshia diba, ne meji andi akamutatshisha. Mukelenge wakamuambila ne, Beleteshasâ, tshilota etshi ne dijingulula diatshi kabikutatshishi nansha. Beleteshasâ wakamukudimuna ne, Mukelenge wanyi, tshilota etshi tshikale kudi badi nʼebe lukuna, ne dijingulula diatshi dikale kudi badi basue kukunyoka. Mutshi au uwakamona, wakadiunda tô ne hakaluau mimene ne mukole, lusongo luau luakafika mu diulu, wakamueneka kudi ba kunfudilu kua buloba; mabeshi au akadi malengele, mamuma au akadi a bungi, akadi makumbane bia kudia bia bantu bonso; mu dileshi diau muakadi nyama ya mu mpata ilala, ne munkatshi mua matamba au nyunyu ya mulu yakadi ne miaba ya kuikila. Mutshi eu nguewe muine, mukelenge. Wewe wakudiunda mimene ne mukole; bualu bua bunene buebe buakuhita bunene, budi bufika tô ne mu diulu, bukokeshi buebe budi bufika tô ne kunfudilu kua buloba. Mukelenge wakamona mutangidi, muntu wa tshijila, uhueka hanshi mufume mu diulu, wamba ne, Shimbulai mutshi eu, ûkosololai; kadi shiyai tshikuku ne miji yatshi mu buloba, tshisuikibue ne mukaba wa tshiamu tshifike ne wa tshiamu tshia mitaku, munkatshi mua mashinde a lutende; muntu au aboleshibue ne dibungi dia mulu; adie mashinde a mu mpata bu nyama tô ne hahita bidimu muanda mutekete. Edi ndijingulula dia tshilota, mukelenge, ne edi ndî dia Mutambe Bunene wa mu diulu, diakulua kudi mukelenge wanyi: nebakuihate munkatshi mua bantu, neushikame ne nyama ya mu mpata, neudie mashinde bu mudi ngombe idia; neuboleshibue ne dibungi dia mulu. Bidimu muanda mutekete nebihie tô ne hawamanya ne, Mutambe Bunene wa mu diulu udi ukokesha bukelenge bua bantu, ne udi ubuhesha muntu yonso udiye musue. Bu muakelabo mukenji bua kushiya tshikuku tshia mutshi ne miji yatshi, bukelenge buebe nebuikale kûdi hawamanya ne wa mu diulu nyeye muine udi ukokesha. Bua muanda eu, mukelenge wanyi, wanji kuitabusha lungenyi luanyi: ulekele mibi yebe, uhingashe bienzedi biakane mu muaba wai; ulekele malu ebe a tshishiku, ufuile bahele luse; nunku, bumue, diakalengele diebe nedileheshibue. Malu â onso akakuata mukelenge Nebukadenesâ. Hakahita ngondo dikumi ne ibidi, yeye wakadi wendakana mu mbalasa wa bukelenge mu province wa Babulona. Mukelenge wakamba ne, Eu Babulona mimene, tshiakuibaka musoko eu bu muaba wa mukelenge kushikameye ku bukole buanyi bunene bua mpete butumbi ne buneme, anyi? Hakatshidi mei â mukana mua mukelenge, dî diakafuma mu diulu ne, Mukelenge Nebukadenesâ, badi bakuambila wewe muine ne, Bukelenge buakumuka kûdi. Nebakuihate munkatshi mua bantu, neushikame ne nyama ya mu mpata; neudie mashinde bu mudi ngombe idia; ne bidimu muanda mutekete nebihite tô ne hawamanya ne, Mutambe Bunene wa mu diulu udi ukokesha bukelenge bua bantu, ne udi ubuhesha muntu yonso udiye musue. Mu diba adi mene bualu abu buakakuata Nebukadenesâ. Bakamuihata munkatshi mua bantu, wakadia mashinde bu mudi ngombe idia. Mubidi wandi wakabola ne dibungi dia mulu, tô ne hakaleha nsuki yandi bu masala a nyunyu wa mukanku, ne nzadi yakalua bu nzadi ya nyunyu. Hakahita matuku â, meme, Nebukadenesâ, nakabanduluka ne nakatangisha mesu anyi mu diulu; meji anyi akahingana kundi. Nakavudishila Mutambe Bunene wa mu diulu disanka, nakamutumbisha ne nakamunemeka, Yeye udi ne muoyo tshiendelele. Bualu bua bukokeshi buandi budi bukokeshi bua tshiendelele, ne bukelenge buandi budi bujalame ku tshikondo ku tshikondo. Bonso ba ha buloba badi hatuhu ku mesu kuandi. Yeye utu wenza bu mudiye musue munkatshi mua misumba ya ba mu diulu ne munkatshi mua ba ba buloba; kakuena muntu udi mua kukauda tshianza tshiandi, anyi kumuebesha ne, Udi wenza tshinyi? Mu diba adi mene meji anyi akahingana kundi; ne bua butumbi bua bukelenge buanyi, buneme buanyi ne butumbi buanyi biakahingana kundi. Bena meji banyi ne miloho yanyi hakalua kundomba lungenyi. Nakajadikibua mu bukelenge buanyi, ne butumbi buanyi buakahita bua diambedi bunene. Katataka, meme Nebukadenesâ, ndi ntumbisha, ndi nganyisha, ndi nnemeka Mukelenge wa mu diulu; bualu bua bienzedi biandi bionso bidi bia bushuwa, ne malu andi adi makane; yeye udi ne bukole hua kuhuekesha badi benda ne dihetu diabo. Mukelenge Beleshasâ wakalambishila miloho yandi tshinunu bidia bia disanka bia bungi, wakanua nvinyo ku mpala kua bantu aba tshinunu. Hakadi Beleshasâ ulabula nvinyo, wakatuma mukenji ne, Balue ne mpanza ya or ne ya argent, yakadi tatu wandi Nebukadenesâ muhaule mu ntempelo wa mu Yelushalema bua mukelenge ne miloho yandi, bakashi bandi ne bakashi hahika bakabakeye banuinemu. Nunku bakalua ne mpanza ya or ne ya argent, biakahaulabo mu ntempelo wa mu Yelushalema; yeye mukelenge ne miloho yandi, bakashi bandi ne bakashi bahika bakabakeye bakanuinamu. Bakanua nvinyo, bakatumbisha nzambi ya or ne ya argent, ya tshiamu tshia mitaku, ya tshiamu tshifike, ya mitshi ne ya mabue. Mu diba adi mene minu ya tshianza tshia muntu yakamueneka, yakafunda ha tshimanu tshia mbalasa wa mukelenge, tshiakadi tshilaba luhemba, tshitangilangane ne tshitekelu tshia minda; mukelenge wakatangila tshituha tshia tshianza tshiakadi tshifundahu. Ha bualu ebu mpala wa mukelenge wakandamuka, ne mutshima wandi wakahampakana ne buowa. Manungu a bidimba biandi akahauka, binu biandi biakatutakana. Mukelenge wakela dî dikole ne, Balue ne bamanyi ba malu a mitoto, Bena Kasada, ne batempi ba mbuku. Mukelenge wakambila bena meji ba mu Babulona ne, Muntu yonso wabala tshifundu etshi, wandesha dijingulula diatshi nebamuluatshishe bilulu bikunzubile, nebamuele lukanu lua or mu nshingu muandi, nebamuteke bu muisatu munkatshi mua bakokeshi na bukelenge ebu. Nunku bena meji bonso ba mukelenge bakabuela muakadiye, kadi kabakamanya mua kubala tshifundu atshi, ne kabakamanya mua kulesha mukelenge dijingulula diatshi. Bua muanda au mukelenge Beleshasâ wakakuatshika buowa bikole, mpala wandi wakandamuka, ne mitshima ya milono yandi yakalubakana. Bua mei a mukelenge ne a miloho yandi, mukelenge mukashi, mamu muledi wa mukelenge, wakabuela mu nsubu wa bidia bia disanka. Mukelenge eu mukashi wakambila mukelenge ne, Mukelenge wikale ne muoyo tshiendelele; mutshima webe kauhampakanyi, mpala webe kandamuki nunku nansha. Muntu mukuabo udiku mu bukelenge buebe udi ne nyuma wa nzambi ya tshijila munda muandi. Mu matuku a tatuʼebe bakamusangana muikale ne munya, dijingulula dia malu, ne meji, bu meji a nzambi yetu mene. Mukelenge Nebukadenesâ, tatuʼebe mene, wakamuteka kahita ka batempi ba mbuku, bamanyi ba malu a mitoto, Bena Kasada ne bena meji bakuabo. Bualu bua bakasangana mu Danyele eu, wakuinyikabo ne, Beleteshasâ, kudi mukelenge, lungenyi luhite bukole, meji, dijingulula dia malu, lungenyi lua kujinguluila bantu bilota, lua kutandula majimbu ne lua kuitaba nʼalu makonka makole. Babikile Danyele, yeye neakuleshe dijingulula dia bualu ebu. Nunku bakalua ne Danyele ku mpala kua mukelenge. Mukelenge wakakonka Danyele ne, Wewe udi Danyele au, wa munkatshi mua bahika ba ku buloba bua Yuda, wakangata tatu wanyi mukelenge ku buloba bua Yuda, anyi? Nakunvua lumu luebe ne, Nyuma wa nzambi udi munda muebe, ne munya, ne dijingulula dia malu ne meji mahite bulengele bidi bimueneka munda muebe. Bakulua ne bena meji, bamanyi ba malu a mitoto, ku mpala kuanyi, bua kumbadila tshifundu etshi ne kummanyishabo dijingulula diatshi; kadi kabakamanya mua kundesha dijingulula dia bualu. Kadi nakunvua lumu luebe ne, wewe udi mua kujingulula bantu malu a nunku ne kuitaba makonka makole. Nunku, biwamanya mua kubala tshifundu etshi ne kummanyisha dijingulula diatshi, nebakuluatshishe bivualu bikunzubile, nebakuele lukanu lua or mu nshingu muebe ne nebakuteke bu muisatu wa mu bukelenge buanyi. Hashishe, Danyele wakakudimuna dî ku mpala kua mukelenge ne, Uditekele bintu biebe, uheshe muntu mukuabo biudi musue kunfuta; kadi nembadile mukelenge tshifundu, nemmumanyishe dijingulula diatshi. Mukelenge, umanye ne, Nzambi Mutambe Bunene wa mu diulu wakaha Nebukadenesâ tatuʼebe bukelenge, bunene, butumbi ne buneme. Bua bunene buakamuhesheye, bantu ba bisamba bionso ne ba mu miaku yonso bakazakala ku mpala kuandi ne bakamutshina. Bakasueye kushiha, wakabashiha; bakasueye kushiya ne muoyo, wakabashiya ne muoyo; bakasueye kubandisha, wakababandisha; bakasueye kuhuekesha, wakabahuekesha. Kadi hakadisueye, ne hakakolesheye mutshima wandi, ne bua malu â yeye wakenza malu a dihetu, bakamûmusha mu nkuasa wandi wa bukelenge, bakamunyenga butumbi buandi. Bakamuihata munkatshi mua bukua bantu, mutshima wandi wakavuishibua bu wa nyama, wakashikama ne nyama ya mpunda ya mu mpata. Wakadia mashinde bu mudi ngombe idia, ne mubidi wandi wakabola ne dibungi dia mulu to ne hakamanyeye ne, Nzambi Mutambe Bunene wa mu diulu udi ukokesha mu bukelenge bua bantu, ne udi uteka muntu yonso udiye musue ku mutu kuabu. Ne wewe muanʼandi, Beleshasâ, kuena muanji kudihuekesha, nansha wewe mumanye malu au onso. Kadi wakudibandisha ne wakuhetula Mukelenge wa mu diulu; bua bakulua ne mpanza ya mu nsubu muandi ku mpala kuebe; wewe ne miloho yebe, bakashi bebe ne bakashi bahika bawakabaka nuakunuinamu nvinyo. Wewe wakutumbisha nzambi ya tshiamu tshia argent ne tshia or, ya tshiamu tshia mitaku, ya tshiamu tshifike, ya mitshi ne ya mabue, nzambi idi kayiyi mua kumona anyi kunyua anyi kumanya bualu. Kuena mutumbishe Nzambi udi ne muhuya webe mu tshianza tshiandi, udi mumanye bienzedi biebe bionso. Bua malu â wakatuma tshituha atshi tshia tshianza tshiakafunda tshifundu etshi. Etshi ntshifundu tshiakafundibua: MENE, MENE, TEKEL, OUPHARSIN. Eku nkujingulula kua muanda eu: MENE, Nzambi wakubala matuku a bukelenge buebe, wakubumana. TEKEL, bakukuidikisha mu tshiamu tshia kuidikisha nʼatshi bujitu, bakukusangana kuyi mukumbane. PERES, bakutahulula bukelenge buebe, bakubuha Bena Madai ne Bena Pelasa. Mu diba adi Beleshasâ wakela dî diandi, bakaluatshisha Danyele bilulu bikunzubile, bakamuela lukanu lua or mu nshingu muandi, bakela mukenji bualu buandi ne ikale mukokeshi muisatu wa mu bukelenge. Mu butuku abu mene Beleshasâ, mukelenge wa Bena Kasada, wakashihibua. Dayawesha, Muena Madai, wakadia bukelenge, wakadi ne bidimu bu makumi asambombo ne bibidi. Dayawesha wakamona ne, Mbimpe bua kuteka miloho lukama ne makumi abidi mu bukelenge buandi bua yoyo ikokeshe bukelenge buonso. Wakateka ba-gouverneur basatu ku mutu kuai, Danyele wakadi umue wabo, bua miloho ai itabe kudibo bua mukelenge kajimishi tshintu tshimue. Danyele eu wakatamba ba-gouverneur bakuabo ne miloho kutumba, bualu bua lungenyi luakadi luhita bule munda muandi; mukelenge wakelangana meji bua kumuteka ku mutu kua bukelenge buandi buonso. Nunku ba-gouverneur ne miloho bakakeba bualu bua kubanda nʼabu Danyele bua muanda wa mu dikokesha diandi dia bukelenge, kadi kabakamusangana ne bualu anyi dihanga, bualu bua yeye wakamanya mua kueyemenyibua, ne kabakasangana dituhakana anyi dihanga munda muandi. Hashishe, bantu aba bakamba ne, Katuena tusangana bualu bua kubanda nʼabu Danyele eu, anu bituabukeba mu mikenji ya Nzambi wandi. Hashishe, ba-gouverneur aba ne miloho bakadisangisha ku mpala kua mukelenge, bakamuambila ne, Mukelenge Dayawesha, wikale ne muoyo tshiendelele. Ba-gouverneur bonso ba mu bukelenge, balumbuluishi, miloho, bena meji ne bakokeshi bakahunga dî dimue ne, Mukelenge ajadike mukenji, ele mukandu mukole, wamba ne, Muntu yonso walomba bualu kudi nzambi mukuabo anyi kudi muntu mukuabo mu matuku makumi asatu, kayi ubulomba kûdi nkayebe, mukelenge, bamuele mu huma bua ntambue. Nunku, mukelenge, ujadike mukandu eu, ufunde dina diebe ha mukanda udi ne mukenji eu, bua muntu kamanyi mua kuwandamuna, bu mudi mukenji wa Bena Madai ne Bena Pelasa, udi kauyi mua kukudimuka. Bua mei abo mukelenge Dayawesha wakafunda dina diandi ha mukanda wakadi ne mukenji ne mukandu. Hakamanya Danyele ne mukelenge wakamana kufunda dina diandi ha mukanda udi ne mukenji, wakabuela mu nsubu wandi wa mulu wakadi ne madidishi matangile ku luseke lua Yelushalema. Wakadi utua binu biandi hanshi misangu isatu ku dituku ku dituku, ulomba Nzambi wandi, umusakidila bu muakadiye wenza diambedi. Hashishe, bantu aba bakadisangisha, bakasangana Danyele utendelela ne ulomba malu ku mpala kua Nzambi wandi. Nunku bakaya kudi mukelenge, bakamukonka bua mukandu wa mukelenge ne, Wewe mukelenge, kuakufunda dina diebe ha mukanda wamba ne, Muntu yonso walomba bualu kudi nzambi mukuabo anyi kudi muntu mukuabo mu matuku au makumi asatu, kayi ubulomba kûdi nkayebe, mukelenge, bamuele mu buina bua ntambue, anyi? Mukelenge wakabandamuna ne, Muanda eu udi wa bushuwa, bu mudi mukenji wa Bena Madai ne Bena Pelasa, udi kauyi mua kukudimuka. Nunku bakakudimuna mukelenge di ne, Danyele au udi umue wa bahika ba Bena Yuda, kena ukunemeka, mukelenge, anyi mukandu uwakujadika ne dina diebe, kadi utshidi utendelela misangu isatu ku dituku ku dituku. Hakunvua mukelenge mei â, wakanyingalala bikole, wakahangidisha munda bua kuhandisha Danyele; tô ne bakabuela diba wakatshinta mua kumuhandisha. Hashishe, bantu aba bakadisangisha ku mpala kua mukelenge, bakambila mukelenge ne, Wamanya, mukelenge, ne mukenji wa Bena Madai ne wa Bena Pelasa udi wamba ne, Kakuena mukandu anyi mukenji wakujadikabo kudi mukelenge udi mua kukudimuka. Nunku mukelenge wakela dî diandi; bakalua ne Danyele, bakamuela mu buina bua ntambue. Mu diba edi mukelenge wakambila Danyele ne, Nzambi webe ûdi utendelela ku dituku ku dituku akusungile. Bakalua ne dibue, bakaditeka ku mushiku wa buina bua ntambue; ne mukelenge wakalamikahu tshimanyishilu tshiandi ne tshia miloho yandi, bua muntu kamanyi mua kukudimuna bualu bumue bua mu malu akakuata Danyele. Hashishe, mukelenge wakabuela mu mbalasa wandi, wakashikamamu butuku bujima ujila bia kudia; kabakalua ne biombelu bia kuholesha nʼabi mutshima wandi, tulu tuakumuka ku mesu kuandi. Hatshiatshia, bakamba hanshi kutoka, mukelenge wakajuka, wakaya lukasa ku buina bua ntambue. Hakafikeye ha buihi ne buina buakadi Danyele, mukelenge wakela dî dikole dia kanyinganyinga kudi Danyele, umuebesha ne, Danyele, mutendeledi wa Nzambi udi ne muoyo, Nzambi webe, ûdi utendelela ku dituku ku dituku, wakumanya mua kukusungila mukana mua nyama ya ntambue, anyi? Danyele wakandamuna mukelenge ne, Mukelenge, wikale ne muoyo tshiendelele! Nzambi wanyi wakutuma muanjelo wandi, wakusuika mbanga ya ntambue, ne kayakungenzela bibi; bualu bua bakunsangana tshiyi ne dihila ku mpala kuandi; ne ku mpala kuebe, mukelenge, tshiakuenza bualu bubi. Bua mei â mukelenge wakatamba kusanka, wakela di diandi ne, Bahatule Danyele mu buina bua ntambue. Hakahatulabo Danyele mu buina, kabakamusangana ne mputa hamʼbidi handi, bualu bua yeye wakeyemena Nzambi wandi. Hashishe, mukelenge wakela dî diandi ne, Balue ne bantu aba bakabanda Danyele, babele mu buina bua ntambue, bobo bine, bana babo baledibue ne bakashi babo. Diambedi kabayi banze kufika hanshi ha buina mene, ntambue yakabahita bukole, yakatshibula mifuba yabo yonso bituha bituha. Hashishe, mukelenge Dayawesha wakafunda mukanda, wakautumina bantu bonso ba mu bisamba bionso ne ba miaku yonso, badi bashikame mu buloba buonso, ubambila ne, Ditalala divulangane kunudi! Ndi ngela mukenji ne. Mu nseke yonso ya bukelenge bundi nkokesha, bantu bazakale, bikale ne ditshina ku mpala kua Nzambi wa Danyele; Bualu bua yeye udi Nzambi wa muoyo, udiku tshiendelele; bukelenge buandi mbukelenge budi kabuyi mua kubutudibua kashidi, bukokeshi buandi nebuikaleku tô ne kunshikidilu kua malu onso. Yeye udi ubandisha, udi usungila, udi ulesha bimanyinu, udi wenza malu a kukema mu diulu ne hanshi ha buloba; nyeye wakusungila Danyele kudi nyama ya ntambue. Nunku Danyele wakadi ne diakalengele mu matuku a bukokeshi bua Dayawesha ne mu bukokeshi bua Kolesha, Muena Pelasa. Mu tshidimu tshia kumudilu tshia bukokeshi bua Beleshasa, mukelenge wa Babulona, Danyele wakalota tshilota, wakamona bikena kumona ku mutu wandi hakadiye mu bulalu buandi; hashishe, wakafunda tshilota tshiandi, utela malu onso akamoneye. Danyele wakamba ne, Nakadi ntangila mu tshikena kumona tshianyi butuku, ekumona, mpehele inai ya mu diulu yakaheha ha mutu ha mai manene. Nyama minene mai yakahatuka mu mai manene, kayiyi mifuanangane, nyama mukuabo mushilangane ne mukuabo. Wa ku mpala wakadi bu nyama wa ntambue, wakadi ne mahuahua bu nyunyu wa mukanku. Hanakadi ntangila, bakatula mahuahua andi, bakamujula hanshi, bakamuimanyika ku makasa abidi bu muntu, bakamuha mutshima bu wa muntu. Monai! Nyama muibidi wakadiku, mufuanangane ne nyama wa ours, wakadi mulale kabese, wakadi ne mifuba ya mbavu isatu mukana muandi mikuata ku menu andi; bakamuela dî ne, Juka, udie munyinyi wa bungi. Ku nyima kua muanda eu nakatangila, ekumena, mukuabo wakadiku mufuanangane ne nkashama, wakadi ne mahuahua anai bu a nyunyu ha nyima handi. Nyama eu wakadi ne mitu inai kabidi, bakamuha bukokeshi. Hashishe, mu bikena kumona bia butuku nakamona nyama muinai, wakadi ukuatshisha bantu buowa ne wakadi ne luonji lukole, muhite bukole, muikale ne menu manene a tshiamu tshifike. Wakadia bintu biakakuateye, wakabitshibula bituha bituha, wakadiata biakashala muinshi mua makama andi. Wakashilangana ne nyama mikuabo yonso yakadi ku mpala kuandi, wakadi ne nsengu dikumi. Hanakadi ngela meji a nsengu ei, ekumona, munkatshi muai muakamena lusengu lukuabo, lusengu lukese mene; ku mpala kualu bakatula nsengu isatu ya diambedi ne bitaku biai! Monai! Ku lusengu elu kuakadi mesu bu a muntu, mukana muakadi muamba mei a diambu. Hanakadi ntangila, bakateka nkuasa ya bukelenge. Wa Kale wa Matuku a Bungi wakashikamahu. Bivualu biandi biakadi bitoke tô bu neige, ne nsuki ya ku mutu wandi yakadi bu miosa ya mikoko. Nkuasa wandi wa bukelenge wakadi bu ludimi lunene lua kahia, nkata ya ku nkuasa wandi yakadi kahia kakole. Ndimi ya kahia yakahatuka kudiye bu musulu, kahia kakela ndimi ku mpala kuandi. Banjelo binunu ne binunu bakamukuatshila mudimu, banjelo binunu dikumi misangu binunu dikumi bakimana ku mpala kuandi. Bena tshilumbuluidi bakashikama bua kukosa bilumbu, bakabutula mikanda. Hanakadi ntangila, bualu bua mei a diambu akambabo kudi lusengu, bakashiha nyama au, bakabutula mubidi wandi, bakaufila bua kûshidisha mu kahia. Nyama ai mikuabo, bakayinyenga bukokeshi buai, kadi bakayilehesha matuku a mioyo yai tô ne ku tshikondo tshikuabo. Nakatangila mu bikena kumona butuku kabidi, ekumona, mukuabo mufuane muana wa muntu ulua mu matutu a mu diulu, wakafika kudi Wa Kale wa Matuku a Bungi, bakafua nʼandi ku mpala kuandi. Bakamuha bukokeshi, butumbi ne bukelenge, bua bantu bonso, ba bisamba bionso ne ba miaku yonso bamukuatshile mudimu. Bukokeshi buandi budi bukokeshi bua tshiendelele, budi kabuyi mua kujimina, bukelenge buandi m bukelenge budi kabuyi mua kubutudibua. Meme, Danyele, mutshima wanyi wakalubakana munda muanyi, bikena kumona bia ku mutu wanyi biakankuatshisha buowa. Nakasemena ha buihi ne mukuabo wa bakadi bimane, nakamulomba ne, Unjinguluile malu au onso hatoke. Nunku yeye wakangambila, wakammanyisha dijingulula dia malu au. Wakamba ne, Nyama ei minene mai idi banfumu banai, badi bahatuka mu buloba. Kadi bansanto ba Nzambi Mutambe Bunene wa mu diulu nebangate bukelenge, bukelenge nebuikale kudibo tshiendelele, lahalaha. Hashishe, nakasua kumanya dî dia bushuwa bualu bua nyama au muinai wakadi mushilangane ne mikuabo yonso, uhita kukuatshisha bantu buowa, muikale ne menu a tshiamu tshifike ne nzadi ya tshiamu tshia mitaku; wakadia bintu biakakuateye, wakabitshibula bituha bituha, wakadiata bikuabo muinshi mua makama andi. Nakasua kumanya kabidi bualu bua nsengu ai dikumi yakadi ha mutu handi, ne be lusengu alu lukuabo luakamenabu, bakatulabo nsengu mikuabo isatu ku mpala kualu, lusengu alu mene luakadi ne mesu, ne mukana muamba mei a diambu, luakadi luhite mikuabo bunene. Nakamona lusengu alu luluangana ne bansanto, lubahita bukole tô ne hakalua Wa Kale wa Matuku a Bungi. Mu tshilumbuluidi yeye wakabingisha bansanto ba Mutambe Bunene wa mu diulu hakalua tshikondo tshia bansanto kudiabo bukelenge. Yeye wakangambila ne, Nyama eu muinai neikale bukelenge buinai ha buloba budi bushilangana ne makelenge makuabo onso. Nebubutule buloba bujima, nebubudiatakashe mu makasa, nebubusunsule. Bua nsengu ei dikumi, umanye ne bakelenge dikumi nebabike, nebahatuke mu bukelenge ebu. Mukuabo neajuke ku nyima kuabo mushilangane ne banfumu ba diambedi; yeye neahuekeshe bakelenge basatu. Yeye neadiule Nzambi Mutambe Bunene wa mu diulu ne mei mabi, neatatshishe bansanto ba Mutambe Bunene wa mu diulu tô ne hahangabo. Neahangidishe bua kukudimuna bikondo bia tshijila ne mikenji, ne bansanto nebafidibue mu bianza biandi tô ne hahita tshikondo tshimue, bikondo bibidi ne tshituha tshia tshikondo. Kadi mu diba adi nebakose tshilumbu, nebamunyenge bukelenge buandi bua kubushihabo ne bua kububutulabo tô ne hanshi. Nebafile bukelenge ne bukokeshi ne butumbi bua makelenge a muinshi mua diulu dionso kudi bantu ba bansanto ba Nzambi Mutambe Bunene wa mu diulu. Bukelenge buabo nebuikale bukelenge bua tshiendelele, ba mu makokeshi onso makuabo nebabakuatshile mudimu ne nebatumikile mei abo. Eu nshikidilu wa muanda eu. Meme hanyi, Danyele, mutshima wanyi wakahampakana ne buowa, ne mpala wanyi wakandamuka; kadi nakalama muanda eu mu mutshima wanyi. Mu tshidimu tshisatu tshia bukokeshi bua mukelenge Beleshasâ tshikena kumona tshiakamueneka kundi meme Danyele, bu muakamuenekatshi kundi ku tshibangidilu. Nakamona malu â mu tshikena kumona; hanakâmona, nakamanya ne, Ndi mu Shushana, luhangu lunene lua mukelenge lua mu province wa Elama; mu tshikena kumona atshi nakadimona hehi ne musulu wa Ulai. Nakabanduluka, nakatangila, ekumona, tshimpanga tshiakadi ne nsengu ibidi tshiakimana ku muelelu wa musulu. Nsengu ei yakadi mile, kadi lumue luakahita lukuabo bule, ne lusengu alu luhite bule luakamena ku nyima kua lukuabo. Nakatangila tshimpanga tshituta nsengu ku luseke lua wesete, lua nôde ne lua sude; kakuakadi nyama mikuabo yakamanya kua kuimana ku mpala kuatshi, kakuakadi munga wakamanya mua kuhandishibua ku bukole buatshi; kadi tshiakenza bu muakasuatshi kuenza, tshiakadibandisha kabidi. Hanakadi ngela meji a muanda eu, ekumona, mpumbu wa mbushi wakadi ufuma ku luseke lua wesete uhita ha mutu ha buloba buonso, kayi ubulenga. Mbushi eu wakadi ne lusengu lumueneka hatoke tô hankatshi ha mesu andi. Hakafikeye kudi tshimpanga tshiakadi ne nsengu ibidi, tshinakamona tshimana ku muelelu wa musulu, wakaya lubilu bua kutshibunda ne tshiji tshikole. Nakamumona ufika hehi ne tshimpanga, wakatshifuila tshiji tshikole, wakabunda tshimpanga, wakatshibula nsengu yatshi ibidi. Tshimpanga katshiakadi ne bukole kabidi bua kuimana ku mpala kuandi, kadi mpumbu wakatshituta hanshi, wakatshidiata. Kakuakadi munga wakamanya mua kuhandisha tshimpanga ku bukole bua mpumbu. Mpumbu wa mbushi Wakenza malu mahite bunene; kadi hakahiteye bukole, lusengu alu lunene luakatshibuka, mikuabo mai yakamena mu muaba walu, mitangilangane ne mpehele inai ya mu diulu. Lusengu lukuabo, lusengu lukese mene, luakahatuka ku lunga lusengu lua mu nsengu ai inai, luakadiunda tô ne hakahitalu bunene ku luseke lua sude, lua esete ne ku luseke lua buloba bulengele. Luakalua lunene bu bintu bia mu diulu; luakela misumba mikuabo ya mitoto hanshi, luakayidiata muinshi mualu. E, luakadivuisha bunene bu Mukokeshi wa misumba ya ba mu diulu, luakamunyenga milambu yandi ya kuosha ya buatshia-buatshia, luakanyanga muaba wa tshitendelelu tshiandi. Bakafila musumba wa mu diulu ne mulambu wa kuosha wa buatshia-buatshia kudilu, bualu bua ditombokela Nzambi. Luakela malu a bushuwa hanshi, luakenza bu muakadilu lusue kuenza, luakatuta dikasa dimpe. Hashishe, nakunvua mukuabo wa tshijila wakula; muibidi wa tshijila wakakonka wakadi wakula diambedi ne, Kumusha kua mulambu wa kuosha wa buatshia-buatshia, bualu bubi budi buvuisha kabutu, ne kufila kua tshitendelelu ne musumba wa mu diulu bua kudiatshibuabi muinshi mua makasa, malu â akamueneka mu tshikena kumona neikaleku musangu bule munyi? Yeye wakamuitaba ne, Tô ne hahita matuku, dinda ne dilolo, binunu bibidi ne nkama isatu; hashishe nebalengeshe tshitendelelu. Hashishe, meme Danyele, hanakatangila tshikena kumona etshi, nakadi nkeba kutshijingulula, ekumona, tshinfuanyi bu tshia muntu tshimana ku mpala kuanyi! Nakunvua dî dia muntu difuma munkatshi mua musulu wa Ulai diamba ne, Gabaliele, jinguluila muntu eu tshikena kumona. Yeye wakasemena ha buihi ne muaba unakimana. Hakafikeyeku, nakakuatshika buowa bukole, nakatua mpala wanyi hanshi. Kadi yeye wakangambila ne, Teleja, wewe muana wa muntu; tshikena kumona etshi tshidi tshikulesha malu a mu tshikondo tshia kunshikidilu. Hakadiye wakula nʼanyi, nakashala mufue tshihuka, mutue mpala wanyi hanshi, kadi yeye wakandela tshianza, wakangimanyika kulu. Wakamba biandi ne, Mona! Nenkumanyishe malu adi alua mu tshikondo tshia ndekelu wa tshiji tshikole tshia Nzambi, bualu bua tshikena kumona etshi tshidi tshilesha malu a mu tshikondo tshisungula tshia kunshikidilu. Bua tshimpanga tshiwakamona tshiakadi ne nsengu ibidi, nsengu ai idi bukelenge ba Bena Madai ne Bena Pelesa. Mpumbu wa mbushi udi mukelenge wa Bena Gelika; lusengu lua hankatshi ha mesu andi ludi mukelenge wa kumudilu. Bu muakatshibulabo lusengu alu ne bu muakamueneka nsengu mikuabo mai mu muaba walu, nunku kabidi, makelenge anai neabike mahatuke mu tshisamba tshiandi, kedi kaena ne bukole bu buandi. Mu tshikondo tshia kunshikidilu tshia makelenge â, havulangana malu mabi, mukelenge mukuabo udi ne mpala wa luonji wa disu dikole ne wa budimu neajuke. Yeye neikale ne bukokeshi bua bungi, kadi kena ubuheta ku bukole buandi nkayandi. Yeye neavuishe dibutuka didi ditamba bukole, neatute dikasa dimpe mu malu mabi adiye wenza neabutule bantu badi ne bukole ne bantu ba bansanto diatshimue. Bua budimu buandi neatutshishile bakuabo dikasa dimpe ku mashimi andi; neikale ne diambu mu mutshima wandi, neabutule bantu ba bungi badi kabayi banze kudimuka. Neatombokele Mukokeshi wa bakokeshi mene mene, kadi nebamutshibule bituha bituha, tshianza tshia muntu katshiyi tshimulenga. Tshikena kumona tshiakukuambilabo bua dilolo ne dinda tshidi tshia bushuwa, kadi wewe sokoka tshikena kumona etshi, bualu bua tshidi tshilesha malu a matuku a bungi atshidi ku mpala. Meme, Danyele, nakahungila nakadi ne disama matuku makuabo! Hashishe, nakajuka, nakakuatshila mukelenge mudimu wandi. Nakalubakana kabidi bua tshikena kumona etshi, hualu bua tshiakatshijingulula. Mu tshidimu tshia kumudilu tshia bukokeshi bua Dayawesha, muana wa Ahashawelosha, wa tshisamba tshia Bena Madai, wakalelabo mukelenge ku mutu kua bukelenge bua Bena Kasada; mu tshidimu tshia kumudilu tshia bukokeshi buandi, meme Danyele, nakatangila mu Mifundu ya Nzambi ne bidimu makumi muanda mutekete nebihite diambedi dibutuka dia Yelushalema kadiyi dianze kushika bu bungi bua bidimu biakambila Yehowa Yelemiya muprofete. Nakatangisha mpala wanyi kudi Mukelenge Nzambi bua kumukeba mu kulomba ne kutendekena, mu kujila kua bia kudia, mu kuluata kua bilulu bikayabala ne mu kulaba kua butue. Nakatendelela Yehowa Nzambi wanyi, nakalonda mibi yanyi kudiye, nakamba ne, Mukelenge, Nzambi mimene udi ukuatshisha bantu buowa, udi ulonda tshihungidi tshiandi ne udi ulesha luse lujalame kudi bantu badi bamunanga ne badi batumikila mikenji yandi; tuakuenza malu mabi, tuakuhambuka mu nshila wa buakane, tuakuenza bibi, tuakutomboka, tuakusesuka ku mikenji yebe ne mei ebe. Katuakunvuila bantu bebe, baprofete, bakuamba mei mu dina diebe kudi bakelenge betu, bakokeshi betu, batatu etu ne kudi bantu bonso ba mu buloba buetu. Mukelenge wetu, buakane budi kudi, kadi tuetu tudi ne bundu ku mesu, bu mudibu lelu eu, kudi bantu ba mu Yuda ne kudi badi bashikame mu Yelushalema, kudi Bena Isalele bonso, kudi badi ha buihi ne kudi badi kule, mu maloba onso awakubatuma, bualu bua kutomboka kuabo kuakukutombokelabo. Mukelenge, ku mesu kuetu kudi anu bundu, kudi bakelenge betu, kudi bakokeshi betu ne kudi batatuʼetu, bualu bua tuakukuenzela bibi. Kudi Mukelenge Nzambi wetu kudi luse ne kujimisha kua mibi yetu, bualu bua tuakumutombokela. Katuakutumikila dî dia Yehowa Nzambi wetu, bua kulonda mikenji yandi yakatekeye ku mpala kuetu mu mei akamba bantu bandi baprofete. Bulelela, bonso ba mu Isalele bakushiha mikenji yebe, bakusesuka, kabakunvua dî diebe. Nunku bakutuha mulau bu muakuamba mutshihu udi mufunda mu mikenji ya Mose, muntu wa Nzambi, bualu bua tuakuenzela Nzambi bibi. Yeye wakujadika mei andi akutuhisheye nʼau, ne akuhisheye nʼau bakokeshi betu bakadi batukokesha hakututumineye dikenga dikole. Kabena banze kuenza muanda muinshi mua diulu dionso bu muanda eu wakuenzelabo Yelushalema. Dikenga edi diakutukuata, bu muakafundabo mu mikenji ya Mose; katuena banze kulomba luse kudi Yehowa Nzambi wetu; katuena banze kulekela malu mabi etu ne katuakutumikila mei ebe a bushuwa. Bua malu â Yehowa wakalongolola dikenga edi, wakadituma kutudi: bualu bua Yehowa Nzambi wetu udi muakane mu bienzedi biandi bionso, tuetu katuakutumikila dî diandi. Katataka, Mukelenge Nzambi wetu, wakuluhula bantu bebe mu buloba bua Ejipitu ku tshianza tshikole, wakunvuisha dina diebe dinene bu mudidi lelu eu, tuakuenza bibi, tuakuenza malu mabi. Mukelenge, bu mudi bienzedi biebe bionso biakane udi nkusengelela ne, Tshifikʼa munda tshiebe ne tshiji tshiebe tshikole biumuke ku musoko webe Yelushalema, mukuna webe wa tshijila. Bualu bua mitu yetu ne bua malu mabi a batatuʼetu, Yelushalema ne bantu bebe biakulua tshihendu kudi bantu bonso badi batunyunguluke. Bua muanda eu, Nzambi wetu, unvua kulomba kua muntu webe ne misengelelu yandi, ne bua bualu buebe mpala webe atemene tshitendelelu tshiebe tshidi tshinyanguke. Nzambi wanyi, uteleje matshu ebe, unvue. Ubulule mesu ebe, umone dibutuka dietu ne dia musoko udi muinyika dina diebe. Bualu bua katuena tukutendekena bua tudi ne bienzedi biakane, kadi anu bualu bua luse luebe lunene. Mukelenge, unvue biebe; Mukelenge, unjimishile mibi yetu; Mukelenge, utunvuile, wenze bualu ebu; kujanguluki bua muanda webe, Nzambi wanyi, bualu bua musoko webe ne bantu bebe bidi bidikibua dina diebe. Hanakadi ngakula, ndomba Nzambi, ntonda bubi buanyi ne mibi ya bana betu Bena Isalele, hanakadi ntendekena ku mpala kua Yehowa Nzambi wanyi bualu bua mukuna wa tshijila wa Nzambi wanyi, bulelela, hanakatshidi utendelela, muntu eu Gabaliele, unakumona ku tshikena kumona tshia diambedi, wakalua kundi lukasa diba dia kufila mulambu wa dilolo. Yeye wakalua kundi, wakangambila ne, Danyele, nakulua mpindiu bua kukuha lungenyi lua kujingulula n alu malu. Ku tshibangidilu tshia kutendekena kuebe, dî diakafuma kudi Nzambi; nakulua bua: kunuambiladi, bualu bua wewe udi munangibue bikole. Nunku teleja matshu ebe ku bualu ebu, jingulula tshikena kumona etshi. Bakukosela bantu bebe ne musoko webe wa tshijila mbingu makumi muanda mutekete, bua kumana ditomboka, bua kuvuisha nshikidilu wa malu mabi, bua kulengeshisha bahambuki kudi Nzambi, bua kubavuishila buakane budi bushala tshiendelele, bua kujadika tshikena kumona ne buprofete, ne bua kujidila muaba muhite tshijila. Nunku Umanye, ujingulule ne, Diba diakahatuka mukenji ne, Bahingashe bantu mu Yelushalema ne base musoko tshiakabidi, tô ne ku difika dia muntu muedibue manyi ha mutu, mukokeshi mene, mbingu muanda mutekete neyihite. Hashishe, mu mbingu makumi asambombo ne ibidi nebase musoko tshiakabidi, muikale ne muaba munene bu wa tshisalu ne misesu; tshikondo etshi netshikale tshia ntatu mene. Hashika mbingu ai makumi asambombo ne ibidi, nebashihe muntu muedibue manyi ha mutu; kakuena muntu wahiana mudimu wandi. Bantu be mukokeshi ulualua nebashihe musoko ne tshitendelelu; nshikidilu wandi neikale bu kûla ne kuhasalala kua musulu wa mai. Bakujadika ne, Dibutuka nedikaleku tô ne hashika nvita. Muntu neajadike tshihungidi tshikole ne bantu ba bungi bua kushalatshi lumingu lumue. Hankatshi ha lumingu nealekeshe difila dia mulambu wa nyama mishiha ne wa bia kudia. Mu muaba wa milambu ei yeye neateke tshinyangu tshia dibutuka, tô ne halua dibutuka diakasungula Nzambi hamʼbidi ha muena tshinyangu. Mu tshidimu tshisatu tshia bukokeshi bua Kolesha, mukelenge wa Pelasa, bualu bukuabo buakabulula kudi Danyele, wakabikilabo ne Beleteshasâ. Bualu ebu buakadi bulelela, buakamulesha bua nvita minene. Yeye wakateleja matshu andi ku bualu ebu, wakajingalula tshikena kumona. Mu matuku au, meme Danyele nakadi ndiladila mbingu isatu. Tshiakadia bia kudia bimpe, munyinyi ne nvinyo kabiakabuela mukana muanyi, tshiakadilaba manyi hamʼbidi, tô ne hakashika mbingu isatu mijima. Mu matuku makumi abidi ne anai a ngondo wa kumudilu, hanakadi ku muelelu wa musulu munene wa Hidekela, nakabanduluka, nakatangila, eku mona, muntu wakadiku, muluate bilulu bia lin, musuike mukaba wa or wa mushinga mukole wa ku Ufasa. Mubidi wandi wakadi ukenka bu dibue dia chrysolite, mpala wandi bu muele wa nvula, mesu andi bu bimunyi bia kahia! maboko ne makasa andi bu tshiamu tshia mitaku tshinonoke, tshiona tshia mei andi tshiakadi bu tshiona tshia musumba wa bantu. Meme Danyele, nkayanyi nakamona tshikena kumona; bantu bakadi nʼanyi kabakamona tshikena kumona etshi, kadi kuzakala kukole kuakabakuata, bakanyema bua kusokoma. Bakanshiya nkayanyi, nakamona tshikena kumona etshi tshinene, tshiakadi ne bukole munda muanyi; bualu bua bulengele bua mpala wanyi buakandamuka ne buakanyanguka, bukole buanyi buakajimina. Kadi nakunvua tshiona tshia mei andi; ne hanakunvua tshiona tshia mei andi, nakafua tshihuka nakatua mpala wanyi hanshi. Monai! Tshianza tshiakandenga, tshiakantuishisha binu bianyi hanshi ne bianza kabidi. Yeye wakangambila kabidi ne, Danyele muntu munangibue bikole, teleja matshu ebe ku mei andi nkuambila, bika biebe, bualu bua bakantuma kudi mpindiu. Hakangambileye dî edi, nakimana uzakala. Hashishe, yeye wakangambila ne, Danyele kutshinyi nansha! Bualu bua dituku diwakateka mutshima webe ku dijingulula dia malu â ne diwakadihuekesha ku mpala kua Nzambi webe, yeye utu unvua mei ebe: nakulua bua kulomba kuebe. Muanjelo-mulami wa bukelenge bua Pelasa wakantantamena matuku makumi abidi ne dimue; kadi Mikaele umue wa banfumu ba banjelo, wakalua kunkuatshisha; nakamushiya mu, muaba au ne muanjelo-mulami wa banfumu ba Pelasa. Mpindiu nakulua bua kukujinguluila malu adi akuata bana benu mu matuku alualua; bualu bua tshikena kumona etshi tshidi tshikulesha malu a mu matuku adi kayi manji kulua. Hakayikileye nʼanyi, ungambila mei â, nakinama hanshi, tshiyi ngakula. Mona! Mukuabo wakadi ne tshinfuanyi tshia muana wa muntu wakalenga ku mishiku yanyi; nakabulula mukana muanyi, nakayikila ne wakadi wimana ku mpala kuanyi, nakamuambila ne, Mukelenge wanyi, bua tshikena kumona etshi kanyinganyinga kakunkuata, tshiena kabidi ne bukole. Meme muntu wa mukelenge, ndi mua kuakula ne mukelenge wanyi munyi? Mpindiu tshiena ne bukole munda muanyi, nkadi muhungile. Hashishe mukuabo wakadi ne tshinfuanyi tshia muntu, wakandenga tshianza ne wakankolesha. Yeye wakamba ne, Wewe muntu munangibue bikole, kutshinyi nansha! Ditalala dikale kûdi! Ikala ne bukole, tantamana biebe! Hakangambileye dî edi nakakoleshibua, nakamba ne Mukelenge wanyi akule biandi, bualu bua wakunkolesha. Yeye wakamba ne, Wewe udi mumanye bualu bunakuluila kûdi, anyi? Mpindiu nempingane bua kuluangana ne muanjelo-mulami wa Bena Pelasa. Hanashikisha nʼandi nvita, muanjelo-mulami wa Bena Gelika nealue Kadi nenkuambile mei adi mafunda mu mukanda wa bushuwa; kakuena mukuabo udi unkuatshisha bua kuluangana nʼabo, anu Mikaele, muanjelo-mulami wenu. Meme hanyi, mu tshidimu tshia kumudilu tshia bukokeshi bua Dayawesha, Muena Madai, nakimana bua kumukuatshisha ne kumukolesha. Katataka nenkuambile dî dia bushuwa. Tangila! Banfumu basatu bakuabo nebabike mu buloba bua Pelasa; hashishe, muinai neahite bakuabo bonso bubanji. Haheteye bukole bua bungi bua bubanji buandi, nênzeshe bantu bandi bonso bua kuyabo kuluangana ne ba mu bukelenge bua Bena Gelika. Mukelenge wa bukitu neabike, neakokeshe ne bukokeshi bukole, nênze bu mudi mutshima wandi musue. Hatantamaneye, nebanyenge bukelenge buandi, nebabutahulule tô ne ku mpehele inai ya mu diulu; kadi kabena babuhiana kudi bana bandi, kabuena buikala ne bukole buakadibu nʼabu hakadiye ubukokeshe; bualu bua nebabuangate, nebabuheshe banga bantu badi kabayi ba munkatshi mua bantu bandi. Hashishe, mukelenge wa ku sude neikale ne bukole; kadi umue wa munkatshi mua tupitene tuandi neamuhite yeye bukole, neakokeshe bukelenge, bukokeshi buandi nebuhite bukole. Hahita bidimu bikuabo, nebadie tshiovu; muana mukashi wa mukelenge wa ku sude neafidibue kudi mukelenge wa ku nôde bua kuvuisha ditalala hankatshi habo. Kadi mukashi eu kena wikala ne diboko dikole; mulume wandi kena ujalama ne diboko diandi kadiena ne bukole. Nebumushe mukashi eu diatshimue ne bamufidi ne muanʼandi ne wakamukolesha tshikondo atshi. Mu matuku au muntu neabike mu muaba wa tatuʼandi bu lutonga lua ku miji yandi. Yeye nealue ne masalayi, neabuele mu musoko wa mukelenge wa ku nôde muasa ne ngumbu ya nvita, neamuenzele ne bantu bandi bu mudiye musue, neabahite bukole. Neanyenge nzambi yabo, mpingu yakatulabo, ne malonga abo mimpe a argent ne a or, neaye nʼabi mu Ejipitu. Neadikande bidimu bikuabo bua kaluishi kabidi mukelenge wa ku nôde. Hashishe, mukelenge eu neabuele mu bukelenge bua mukelenge wa ku sude, kadi neahingane ku buloba buandi. Ku nyima bana bandi nebabishe nvita, nebasangishe tshisumbu tshia masalayi a bungi; umue wabo neaye ku mpala, neahitshile mu buloba bu musulu mûle ne mai mahasalala mahite mielelu yau; hashishe, nealukile ku nvita, nealuangane tô ne ku musoko wa mukelenge wa ku sude muasa ne ngumbu ya nvita. Mukelenge wa ku sude neakuatshike tshiji, neahatuke biandi, nealuangane ne mukelenge wa ku nôde. Mukelenge wa ku nôde neabishe tshisumbu tshinene tshia bena nvita, kadi tshisumbu etshi netshifidibue mu bianza bia mukelenge wa ku sude. Yeye neaye ne tshisumbu etshi, mutshima wandi neusanke, neahoneshe binunu makumi a bantu hanshi, kadi kena ubatamba bukole. Mukelenge wa ku nôde nealukile kabidi, neakunguishe tshisumbu tshia bena nvita tshihite tshia diambedi bunene; haleha bidimu bikuabo, yeye nealue ne tshisumbu tshinene tshia bena nvita ne bintu bia bungi bidiye nʼabi bualu. Mu tshikondo atshi ba bungi nebabike bua kuluangana ne mukelenge wa ku sude, ne bena tshimbambila ba munkatshi muenu nebatomboke bua kujadika tshikena kumona; kadi nebahange. Hashishe, mukelenge wa ku nôde neafikeku, ne unguishe mishiki ya buloba, neanyenge musoko udi muasa ne ngumbu ya nvita. Bena nvita ba ku luseke lua sude ne bena nvita basungula bua bukitu buabo kabena bamanye mua kumutantamena. Kadi yeye eu, udi ulua kuluisha mukelenge wa ku sude, nênze bu mudi mutshima wandi musue; kakuena muntu udi mua kumutantamena. Neimane biandi mu buloba bulengele, neabubutule ne tshianza tshiandi. Yeye neatangishe mpala wandi bua kuyeye kudi mukelenge wa ku sude ne bukole buonso bua bukelenge buandi ne bua kuhunga nʼandi tshihungidi: neamuhe muanʼandi bu mukashi wandi bua kubutula buloba bua Ejipitu, kadi muanda udiye uhangidisha kawena ujalama ne kawena umulubulula. Ku nyima kua bualu ebu yeye neatangishe mpala wandi ku maloba a ku muelelu wa mai manene, neanyenge a bungi, kadi kamanda kakuabo ka masalayi nekalekeshe mei a diambu adiye uhenda nʼau bakuabo; e, bulelela, neahingashe bihendu ebi kudiye. Hashishe, yeye neatangishe mpala wandi ku misoko ya mu buloba buandi idi nuasa ne ngumbu ya nvita, kadi nealenduke, neadishinde hanshi, kabena bamusangana kabidi. Mukuabo neahingane mu muaba wandi; neatume mulambuishi bua kuhiteye ku luseke lua bukelenge ludi luhita bulengele; kadi hahita anu matuku mibi, yeye neumushibue kakuyi tshiji, kakuyi nvita. Muntu udi bakuabo bahetula neahingane mu muaba wandi, wakadibo kabayi banze kunemeka bu mukelenge; yeye neamueneke mu tshikondo tshidi bantu basombe talalâ, neahete bukelenge ku mei andi a lubombo. Bena nvita nebanyeme ku mpala kuandi bu mai mahasalale mahite mielelu ya musulu, nebabutudibue; mukelenge wa tshihungidi kabidi neabutudibue. Habunga nʼandi mukuabo tshihungidi, mu diba adi mene yeye neabange kuenza malu a kumudinga nʼau; nealue muntu mimene, muikale ne bantu babalê ku nyima kuandi. Mu tshikondo tshidi bantu basombe talalâ, nealue ku miaba ya mu province idi mihite bulengele, nênze malu adi ba tatuʼandi anyi bankambua bandi kabayi banze kuenza. Neabanyine ba munkatshi muabo bintu biakunyengeye, bintu biakuhauleye ne biuma bikuabo. E, neahangidishe malu adiye musue kuenzela misoko miasa ne ngumbu ya nvita, kadi nênze nunku anu hakumbana tshikondo. Tshisumbu tshinene tshia masalayi netshimukuatshishe, neikale ne bukole ne dikima bua kuluisha mukelenge wa ku sude. Mukelenge wa ku sude nealuangane nʼandi nvita ne tshisumbu tshia bena nvita tshihite bunene ne bukole, kadi neahange mu nvita bualu bua nebamuelele bifufu. Bushuwa, badi badia bia kudia biandi bishema nebamuhangishishe mu nvita, bena nvita bandi nebatangalake bu mudi mai a mu musulu mabasalale mahite mielelu yau; ba bungi nebahone hanshi bashihibue. Bakelenge aba babidi nebateke mitshima yabo ku malu mabi bua kuenza, nebambilangane mei a mashimi batshidibo bashikame ku mesa amue. Kadi muanda udibo bahangidisha kawena alubuluka, bualu bua nshikidilu wa malu au neafike anu mu tshikondo tshiakasungula Nzambi. Hashishe, neahingane mu buloba buandi ne bintu bia bungi; kadi mutshima wandi udi uhidia tshihungidi tshia tshijila, nênze bu mudi mutshima wandi musue, nealukile ku buloba buandi. Mu tshikondo tshiakasungulabo yeye neahingane ku luseke lua sude; kadi malu a mu tshikondo etshi kaena ikala bu muakadi malu a mu mbikondo tshia diambedi. Bualu bua matu a ku Kitima nealue kudiye ne nvita, ne mutshima wandi neuneme bujitu. Bua muanda eu neahidie tshihungidi tshia tshijila, nênze bu mudiye musue. Nealukile kuabo neunvuangane ne bantu aba badi bahidia tshihungidi tshia tshijila. Bena nvita nehalue kudiye babatumineye mukenji, nebanyange tshitendelelu ne muaba muasa ne ngumbu ya nvita, nebalekeshe diosha dia mulambu wa kuosha wa buatshia-buatshia, nebajadike tshinyangu tshia dibutuka mu muaba wau. Bua milayi yandi ya lubombo ne mashimi neanyange bantu aba badi bahidia tshihungidi; kadi bantu badi bamanye Nzambi wabo nebatantamane, nebenze malu makole. Ba munkatshi mua bantu badi ne meji nebayishe ba bungi lungenyi, kadi hahita matuku a bungi nebashihibue ne muele wa nvita ne kahia, nebaye mu buhika, nebabanyenge bintu. Hahonabo, bakuabo nebabakuatshishe ne dikuatshisha dikese, kadi ba bungi nebabalamate anu ne mei a lubombo. Bamue ba munkatshi mua badi ne meji nebahone bua kulengeshibua, bua kuvuishibua balengele ne bua kutokeshibua, tô ne hafika tshikondo tshia kunshikidilu. Bualu bua tshikondo tshiakasungulabo tshitshidi ku mpala. Mukelenge au nênze bu mudi mutshima wandi musue; neadinemeshe, neadibandishe ba mutu ba nzambi yonso, neadiule Nzambi wa nzambi ne mei adi matambe bubi. Neatute dikasa dimpe tô ne hashika tshiji tshia Nzambi, bualu bua malu akahangidisheye nênjibue. Yeye kena unemeka nzambi ya ba tatuʼandi, kena unemeka nzambi udi bakashi banyisha anyi nzambi yonso mukuabo; bualu bua yeye neaditumbishe ku mutu kua buonso buai. Kadi mu muaba wa nzambi ai neatumbishe nzambi wa misoko miasa ne ngumbu ya nvita. Neatumbishe nzambi wakadi hatatu bandi kabayi bamanye, neafile biamu bia or ne bia argent, mabue a mushinga mukole ne bintu bilengele kudiye. Yeye nealuangane ne misoko miasa ne ngumbu ya nvita mihite bukole, ku dikuatshisha dia nzambi wa ba bende. Neatumbishe bantu bonso hadi bamunemeka; neabahe bukokeshi ku mutu kua ba bungi, neababanyine buloba kabidi ku mushinga wamubabo. Mu matuku a kunshikidilu mukelenge wa ku Sude neamubunde; mukelenge wa ku nôde nealue kumuluisha bu nvunde, muikale ne makalu a nvita ne badi benda ha nyima ha tubalu tua nvita ne mu matu a bungi; neabuele mu matunga a bungi, uhita bu mudi musulu wa mai uhasalala. Neabuele kabidi mu buloba bulengele, neabutule binunu makumi a bantu; kadi ba mu Edome, ba mu Moaba ne tshituha tshinene tshia Bena Amona nebahanduke mu bianza biandi. Nealuishe ba mu makelenge makuabo; ba mu Ejipitu kabena bahanduka. Bintu bia or ne bia argent bia mu tshibutshilu ne bintu bionso bikuabo bia mushinga mukole bia mu Ejipitu nebikale biandi. Bena Libue ne Bena Atiopa kabidi nebakokeshibue kudiye. Kadi ngumu ya ku luseke lua esete ne lua ku nôde neyimukuatshishe buowa, neahatuke mûlangane ne tshiji tshikole bua kubutuleye ba bungi. Hashishe, neashimike ntenta yandi ya bukelenge hankatshi ha mai manene ne mukuna wa tshijila ne wa butumbi. Kadi neafike kunshikidilu kua muoyo wandi, kayi ne muntu wa kumukuatshisha. Ku tshikondo atshi Mikaele, mukelenge wa banjelo, mulami wa bana benu, neajuke. Makenga neikaleku, katshia tshisamba tshia bantu tshiabanga tô ne ku tshikondo atshi makenga bu nunku kâkadi manze kumueneka; kadi mu tshikondo atshi bana benu bonso badi ne menʼabo mafunda mu mukanda wa muoyo nebabande. Bafue ba bungi nebabike, bakuabo bua kuikalabo ne muoyo wa tshiendelele, bakuabo bua kufuishibuabo bundu ne kuhetudibua tshiendelele. Badi ne meji nebakenke bu bintu bia mu diulu, ne badi balombola bantu ba bungi ku buakane nebakenke bu mitoto kashidi ne kashidi. Kadi wewe, Danyele, lama mei a, uteke tshimanyishilu ku mukanda eu, bishale nunku tô ne ku tshikondo tshia kunshikidilu. Ba bungi nebatambakane, lungenyi neluvulangane. Hashishe meme, Danyele, nakatangila, ekumona, bantu bakuabo babidi bakadi bimane ku musulu, mukuabo dia munemu, mukuabo dia muamua. Umue wabo wakakanka muntu wakadi muluate bilulu bia lin, wakadi umueneka ku mutu kua mai a musulu, ne, Malu â a kukema neashike tshikondo kai? Nakunvua dî dia muntu wakadi muluate bilulu bia lin, ne wakadi umueneka ku mutu kua mai a musulu, hakabisheye tshianza tshiandi tshia balume ne tshia bakashi mulu, wakaditshiha mu dina dia udi ne muoyo tshiendelele ne, Malu â neashike hahita tshikondo tshimue, bikondo bibidi ne tshituha tshia tshikondo, hamanabo kutekesha bukole bua bantu ba tshijila. Nakunvua mei â, kadi tshiakâjingulula nansha; nunku nakakonka ne, Mukelenge wanyi, ndekelu wa malu â neikale bishi î Yeye wakamba ne, Danyele, ya biebe; bualu bua mei â adi masokoka ne adi mateka tshimanyishilu tô ne halua tshikondo tshia kunshikidilu. Ba bungi nebadilengeshe, nebaditokeshe, nebavuishibue balengele; kadi bantu babi nebananukile kuenza malu mabi; kakuena umue wa mu bantu babi wajingulula malu, kadi bantu badi ne meji nebâjinguile. Tshikondo tshidibo bumusha mulambu wa kuosha wa buatshia-buatshia tô ne tshidibo bateka tshinyangu tshia dibutuka mu muaba wau, matuku neahite tshinunu ne nkama ibidi ne makumi tshitema. Muntu udi windila tô ne hafikeye ku matuku tshinunu ne nkama isatu makumi asatu ne atanu udi ne disanka. Kadi wewe, ya, windile tô ne hashika malu â; newikishe, hashishe neujalame mu buhianyi buebe kunshikidilu kua matuku â. Dî dia Yehowa diakalua kudi Hoshea, muana wa Beli, mu matuku a Uziya, Yotama, Ahaza ne Hezikiya, bakelenge ba Yuda, ne mu matuku a Yalobama, muana wa Yoasha, mukelenge wa Isalele. Ku tshibangidilu hakayikila Yehowa ne Hoshea, Yehowa wakamuambila ne, Ya biebe, ubake mukashi wa masandi, ulele nʼandi bana ba mu masandi; bualu bua ba mu buloba ebu badi balonda malu a masandi, bahambuke kudi Yehowa. Nunku wakaya biandi, wakabaka Gomê, muana wa bakashi wa Dibelayama; ne yeye wakimita difu, wakamulelela muana wa balume. Yehowa wakamuambila ne, Umuidike dina ne, Yizelele; bualu bua hahita musangu muihi, nensombuele mashi a Yizelele akadibo bamatshisha hanshi kudi ba mu tshiota tshia Yehu, nengumushe bukelenge kudi Bena Isalele. Mu dituku adi nentshibule buta bua Bena Isalele mu tshibanda tshia Yizelele. Yeye wakimita difu kabidi, wakalela muana wa bakashi. Yehowa wakambila Hoshea ne, Umuidike dina ne, Udibo-kabayi-bafuila-luse; bualu bua tshiena nfuila Bena Isalele luse bua kubabuikidila mibi yabo. Kadi nenfuile Bena Yuda luse; nembahandishe ku bukole bua Yehowa Nzambi wabo, tshiena mbahandisha ku buta, anyi ku muele wa nvita, anyi ku nvita anyi ku tubalu anyi kudi bena tubalu. Bakajila Udibo-kabayi-bafuila-luse mabele, Gomê wakimita difu dikuabo, wakalela muana wa balume. Yehowa wakamba ne, Umuidike dina ne, Kambantu-banyi !; bualu bua nuenu kanuena bantu banyi, ne tshiena ngikala Nzambi wenu. Kadi bungi bua Bena Isalele nebuikale bu nsenga ya ku mai manene, idibo kabayi mua kuidikisha anyi kubala; ne mu muaba wakadibo bamba ne, Kanuena bantu banyi, nebabambile ne, Nudi bana balume ba Nzambi wa muoyo. Nebasangishe Bena Yuda ne Bena Isalele hohamue, ne bobo bine nebadisunguile muntu umue bua kuikaleye ha mutu habo; nebumuke mu buloba ebu, bua dituku dia Yizelele nedikale dinene. Ambilai bana benu ba balume ne, Nudi bantu banyi; ambilai bana benu ba bakashi ne, Nuakuheta luse. Sengelelai mamu wenu, numusengelele; bualu bua kena mukashi wanyi, ne meme tshiena bayandi; bua yeye umushe malu andi a masandi ku mesu kuandi, ne masandi andi mene hankatshi ha mabele andi; bua tshiadi bivualu biandi, tshimushiyi butaka bu muakadiye mu dituku diakamulelabo; tshimuvuishi bu tshihela tshia lusenga, tshimuvuishi bu buloba bûme, tshimushihi ne nyota. Bulelela, tshiena nfuila bana bandi luse, bualu bua badi bana ba muena masandi. Bualu bua mamu wabo wakulonda malu a masandi; yeye wakabalela wakuenza malu a bundu. Bualu bua wakamba biandi ne, Nendonde bannangi badi bampa bidia bianyi ne mai a kunua, miosa yanyi ya mikoko ne buanda bua lin, manyi anyi ne bia kunua bianyi. Nunku nenjike nshila wandi ne luhangu lua meba, nengase lumbu lua kumukanda bua yeye kamonyi nshila yandi. Yeye nealonde bamunangi, kadi kena ubaheta; yeye neabakebe, kadi kena ubamona. Hashishe, neambe biandi ne, Nempingane kudi bayanyi wa ku mpala, bualu bua tshikadilu tshiakadi nʼatshi diambedi tshiakahita tshindi nʼatshi mpindiu buimpe. Yeye kakamanya ne mmeme mene nakamuha manvua, nvinyo mihia-mihia ne manyi; nakamukumbashila argent ne or biakukuatshilabo nʼabi Bâla mudimu. Nunku nengangate kabidi manvua anyi mu tshidimu tshiau, ne nvinyo mihia-mihia mu tshikondo tshiai; nenyenge miosa yanyi ya mikoko ne bilulu bia lin biakadiye nʼabi bualu bua kubuikila butaka buandi. Mpindiu nensokolole bundu buandi kudi bamunangi, kakuena muntu wamuhandisha mu tshianza tshianyi. Nendekeshe miloû yandi yonso, bidia biandi bia masanka, masanka andi a ngondo mihia-mihia, matuku andi a mbingu ne bikondo bionso biakudisu-nguileye bua kusanka. Nenkose mionshi yandi ya tumuma tua nvinyo, ne mitshi yandi ya nfigi biakuambeye bualu buabi ne, Edi ndifutu diakumpabo kudi bannangi. Nembivuishe bu tshihuka, ne nyama ya mu mpata neyibidie. Nunku Yehowa udi wamba ne, Nendue kudiye ne makenga bua matuku akoshileye Ba-Bâla musenga wa manananshi, ne akadilengesheye ne kakanu ka ku diulu ne bilenga biandi, hakalondeye bamunangi, ne wakatula bualu buanyi muoyo. Nunku, mona, nemmuitabushishe, nemmulombole mu tshihela, nengambile mutshima wandi mei makane. Hashishe, nemmuhingashileku madimi andi a tumuma tua nvinyo, nemmuhe tshibanda tshia Akola bu tshibuelelu tshia ku ditekemena. Yeye neitabe kundi bu muakenzeye mu bunsongakashi buandi, bu mu dituku diakaluhukeye mu Ejipitu. Yehowa udi wamba ne, Mu dituku adi yeye neambikile ne, Bayanyi; kena umbikila ne, Nfumu wanyi. Bualu bua nengumushe mena a Ba-Bâla mukana muandi, kabena batela mena abo kabidi. Mu dituku adi kabidi nembahungile tshihungidi ne nyama ya mu mpata, nyunyu ya mulu ne bintu bidi bidikoka hanshi; nentshibule buta ne muele wa nvita ne bielelu bia nvita, nemmumushe mu buloba, nembaladike hanshi kabayi ne ntatu. Nenkubangile kabidi bua kukubumbakasha kundi tshiendelele; bulelela, nenkubangile bua kukutuangasha nʼanyi mu buakane ne mu kulumbulula kuakane ne mu dinanga ne mu kukufuila kua luse. Nenkubangile ne kuditshiha kûdi mua kueyemena, ne wewe neumanye Yehowa. Yehowa udi wamba ne, Mu dituku adi nengitabe, nenkudimune diulu dî ne diulu nedikudimune buloba dî; ne buloba nebukudimune manvua, nvinyo ne manyi dî, ne biobi neakudimune Yizelele dî, ne meme nemmumiamine mu buloba bua bualu buanyi; nenfuile luse kudi Wakadi-kayimufuidibue-luse; nengambile Badi-kabayi-bantu-banyi ne, Nudi Bantu-banyi; ne yeye neambe ne, Wewe udi Nzambi wanyi. Yehowa wakangambila ne, Ya kabidi, nanga mukashi udi munangibue kudi mulunda wandi ne udi muena masandi, bu mudi Yehowa unanga Bena Isalele, nansha bobo bafila mitshima yabo kudi nzambi mikuabo ne bananga mikata ya tumuma tua nvinyo. Nunku nakamusela ku bituha bia argent dikumi ne bitanu, ne ku homer ne tshituha tshia hankatshi tshia homer bia matete a orge. Nakamuambila ne, Bûdi nʼabu mbua kuikala muena kuanyi matuku a bungi; kulondi malu a masandi, kuikadi mukashi wa muntu mukuabo; ne meme nengikale muomumue kûdi. Bualu bua Bena Isalele nebashale matuku a bungi kabayi ne mukelenge, kabayi ne mukokeshi, kabayi ne milambu mishihela Yehowa, kabayi ne dikunshi dia tshijila, kabayi ne tshilamba tshia efoda, ne kabayi ne telafima. Hashishe, Bena Isalele nebahingane ne nebakebe Yehowa Nzambi wabo ne Davidi mukelenge wabo; nebalue kudi Yehowa ne ditshina, ne ku buimpe buandi mu matuku adi alua. Unvuai dî dia Yehowa, nuenu Bena Isalele! Bualu bua Yehowa udi ne tshilumbu tshia kulumbuluisheye bantu ba mu buloba ebu; bualu bua kakuena bulelela, kakuena buimpe, kakuena kumanya kua Nzambi kudibo mu buloba. Anu kuditshiha ne mitshihu ya mashimi, kudinga, kushihangana, kuiba ne kuenda kua masandi kudiku. Badi bashimbula bimanu bia nsubu, ne kumatshisha kua mashi kudi kulonda kumatshisha kua mashi. Bua mianda yaya buloba budi buasa muadi, ne bantu bonso badi bashikamemu badi batekete, ne nyama ya mu mpata ne nyunyu ya mu diulu bidi bitekete muomumue; minyinyi ya mu mai kabidi idi ifua. Kadi muntu kabambakashi mei ne mukuabo, kabandi mukuabo; bualu bua bana benu badi benza bu bantu badi batanda ne muakuidi. Ne wewe, muakuidi, neulenduke mu munya; muprofete nealenduke nʼebe butuku; ne meme nenshihe mamu webe. Bantu banyi badi babutudibua bualu bua kabena ne lungenyi; bualu bua wewe wakubenga lungenyi, nenkubenge kabidi, bua wewe kuikadi muakuidi wanyi. Bualu bua wakuhua mikenji ya Nzambi webe muoyo, meme kabidi nempue bana bebe muoyo. Bu muakakumbanabo ba bungi, mbu muakangenzelabo bibi; nenkudimune butumbi buabo bulue bundu. Badi badia bukute bua malu mabi a bantu banyi, badi basamina mitshima yabo ku milambu ya dihila dia bubi. Bualu ebu nebuikaleku ne, Bu mudi bantu, mbu mudi muakuidi; ne nembakengeshe bu mudi tshikadilu tshiabo, nembafute bu mudi bienzedi biabo. Nebadie, kadi kabena bukuta; nebalonde malu a masandi, kadi kabena bavudisha bana; bualu bua bakulekela kuteleja matshu abo kudi Yehowa. Masandi ne maluvu ne nvinyo mihia-mihia bidi biumusha meji a mu mutshima. Bantu banyi badi balomba lungenyi ku tshibasa tshia mutshi, ne tshibangu tshiabo tshidi tshibatempela; bualu bua mutshima wa masandi wakubahambuisha, ne bakulonda malu a masandi, batombokela Nzambi wabo. Badi bashihela mpingu milambu ha mitu ha mikuna mile, badi bayoshela musenga wa manananshi ha mikuna mikese, muinshi mua mitshi ya chêne, ya peuplier ne ya térébinthe, bualu bua dileshi diai didi dimpe. Nunku bana benu ba bakashi badi balonda malu a masandi, ne bakashi ba bana benu ba balume badi benda masandi. Tshiena nkengesha bana benu ba bakashi habuelabo mu bundumba, anyi bakashi ba bana benu ba balume hendabo masandi; bualu bua balume bine badi baya ha nkayabo ne bakashi ba masandi, badi bashihela mpingu milambu diatshimue ne bakashi ba masandi ba mu bitendelelu. Bantu badi kabayi bajingulula nebabutudibue. Bena Isalele, nansha binualonda malu a masandi, Bena Yuda kabahishibu bua muanda eu nansha. Kanulu ku Gilegala, kanubandi ku Bete-awena, kanuditshihi nunku ne, Bu mudi Yehowa ne muoyo. Bena Isalele bakulua bena tshitshu bu lukungulu lua ngombe ludi ne tshitshu; Yehowa neamanye mua kubadisha bu mudiye udisha muana wa mukoko mu mpata mimene, anyi? Bena Efelayima bakudilamika kudi mpingu yabo, nubalekele nʼai! Kunua kuabo kua maluvu kudi kuamba kushika, badi bananukila kuenda masandi; bakokeshi babo badi batamba kunanga malu a bundu. Luhehele luakuya nʼabo mu mahuahua alu; nebakuatshike bundu bua bioshelu biabo. Unvuai dî edi, nuenu bakuidi! Nungunvuile, nuenu Bena Isalele! Telejai matshu enu, nuenu ba mu nsubu wa mukelenge! Bualu bua tshilumbu tshidi tshinukuata mene; bualu bua nuakulua buteyi ku Misepa, ne bukuondo buvungulule ha mukuna wa Tabô. Bakumbula dijimba dile ku Shitima, kadi meme nembakengeshe buonso buabo. Ndi mumanye Bena Efelayima, ne Bena Isalele kabena basokoma kundi. Bualu bua mpindiu, nuenu Bena Efelayima, nuakulonda malu a masandi, Bena Isalele bakunyanguka. Bienzedi biabo kabiena bikumbana bua bahingane kudi Nzambi wabo, bualu bua mutshima wa masandi udi munda muabo, kabena bamanye Yehowa. Dihetu dia Bena Isalele didi dibahisha ku mesu kuabo, Bena Efelayima nebalenduke mu bubi buabo; Bena Yuda nebalenduke nʼabo. Nebaye ne bisumbu biabo bia mikoko ne ngombe bua kukeba nʼabi Yehowa, kadi kabena bamusangana; yeye wakûmuka kudibo. Bobo bakutungila Yehowa tshitungu, bualu bua bakulela bana ba mu masandi. Mpindiu ngondo muhia-muhia neabashihe mene ne bintu biabo. Elai lusengu mu Gibea, ne mpungi mu Lama! Elai mbila ku Bete-awena; Bena Benyamina, tulonde ku nyima kuabo! Bena Efelayima nebabutudibue mu dituku dia dikengeshibua diabo. Munkatshi mua bisamba bia Bena Isalele nakubamanyisha muanda ulualua bulelela. Bakokeshi ba mu Yuda bakulua bu bantu badi basemesha makalu; nembahongoluele tshiji tshianyi tshikole bu mai. Bena Efelayima badi bakengeshibue, badi batshibuke bituha mu dilumbuluishibua diabo, bualu bua bobo bakadi ne disanka bua kulonda anu mukenji wa muntu. Nunku meme ndi bu tshibayibayi kudi Bena Efelayima, ne kudi Bena Yuda ndi bu tshintu tshibole. Hakamona Bena Efelayima disama diabo, hakamona Bena Yuda mputa wabo, mu diba adi Bena Efelayima bakaya ku Ashû, bakatuma dî kudi Mukelenge Yaleba. Kadi yeye kena ne bukole bua kunushikishila disama dienu, kena mua kunûmishila mputa wenu. Bualu bua nengikale bu nyama wa ntambue kudi Bena Efelayima, ne bu muana wa nyama wa ntambue kudi Bena Yuda. Meme, meme mene, nembahande ne nengumuke; nenye nʼabo ne kakuena muntu wa babandisha. Nenye, nempingane ku muaba wanyi, tô ne hatondabo bubi buabo ne hakebabo mpala wanyi. Mu makenga abo nebankebe ne lukunukunu, bamba ne, Luai bienu, tuhingane kudi Yehowa; yeye wakatuhanda, kadi neashikishe disama dietu; yeye wakatutaha, kadi neajingile mputa wetu tshilulu. Hahita matuku abidi, yeye neahingashe; halua dituku disatu, yeye neatubishe bua tuetu tuikale ne muoyo ku mpala kuandi. Tumumanye bietu, tunanukile kukeba kumanya Yehowa. Kulua kuandi kudi kujadikibua bulelela bu mudi butuku butshia; nealue kutudi bu nvula mbedi, bu mudi nvula mishishe iloka ha buloba. Nuenu. Bena Efelayima, nennuenzele tshinyi? Nuenu, Bena Yuda, nennuenzele tshinyi? Bua buimpe buenu budi bu ditutu dia lunkelu, anyi bu mume udi ukama lukasa. Nunku nakubafila ku mei a baprofete, nakubashiha ku mei a mukana muanyi; ne kulumbulula kuanyi kudi kuhatuka bu mudi munya uhatuka. Bualu bua ndi musue kudifila kuenu, kankufila kua milambu; ndi musue kumanya kuenu kua Nzambi, kankuosha kua milambu. Kadi bobo bakashiha tshihungidi tshianyi bu muakenza Adama; bakantungila tshitungu musangu au. Gilada udi musoko wa benji ba malu mabi, bakushiyamu bidiatshilu bia mashi. Bu mudi bisumbu bia banyengi balamina muntu, mbu mudi tshisumbu tshia bakuidi bashiha bantu; mu nshila wa ku Shekeme bakushiha bantu, e, bakulonda malu mabi. Munkatshi mua Bena Isalele nakumona muanda muhite bubi; mu muaba au Bena Efelayima bakulonda malu a masandi. Bena Isalele bakunyanguka. Bua bualu buenu, Bena Yuda bakunusunguila tshikondo tshia makenga, hanakusua kumusha bantu banyi mu buhika bua kubaha diakalengele, Hanakusua kushikisha disama a dia Bena Isalele, bubi bua Bena Efelayima buakusokoloka, ne bubi bua Bena Samalea buakumueneshibua. Bualu bua bakuenza malu a mashimi, muibi udi ubumbula nsubu, ne tshisumbu tshia banyengi tshidi tshinyenga bintu ha mbelu. Kabena belangana meji mu mitshima yabo ne, Yehowa udi uvuluka bubi buetu buonso, bienzedi bietu bibi bidi bitunyunguluka, bidi ku mpala kuandi. Badi basankisha mukelenge ne bubi buabo, ne bakokeshi babo ne mashimi abo. Buonso buabo badi bena masandi; badi bu nfulu udi mulambi mutemeshe, udi ulekela kusonsola kahia, ku tshikondo tshidiye uhanga kuenza mampa tô ne hatuntumukau. Mu dituku dia disanka dia mukelenge wetu bakokeshi bakadisamisha ku luya lua maluvu a nvinyo; yeye wakolola tshianza tshiandi diatshimue ne baseki. Bualu bua bakuvuisha mitshima yabo bu nfulu, hatshidibo balala bu balaminyi ba bantu; tshiji tshiabo tshidi tshilala tulu butuku bujima, kadi mu lunkelu tshidi tshitema bu kahia kadi katema bikole. Buonso buabo badi batema bu nfulu, badi bamina bakokeshi babo. Bakelenge babo bonso bakubikuka mu bukelenge; kakuena umue wa munkatshi muabo udi umbikila. Bena Efelayima badi babuelakana ne malu a bisamba bia bantu; Bena Efelayima badi bu mukata udibo kabayi banji kuandamuna. Bantu ba bende badi badia bukole buabo, ne bobo kabena bamanye bualu ebu; nsuki mitoke tô idi ku mitu yabo, ne bobo kabena bamanye muanda eu. Dihetu dia Bena Isalele didi dibahisha, kadi kabena bahingana kudi Yehowa Nzambi wabo; kabena bamukeba, nansha malu â onso mikale nunku. Bena Efelayima badi bu nyunyu wa nkutshi muhote udi kayi ne lungenyi; badi bela dî diabo ku Ejipitu, badi baya ku Ashû. Hatshidibo baya, nenvungulule bukuondo buanyi ku mpala kuabo; nembahoneshe hanshi bu nyunyu ya mulu; nembakengeshe bu mudi malu mabi abo. Mulau wikale kudibo, bualu bua bakuhambuka! Kubutuka kuikale kudibo, bualu bua bakuntombokela! Nakadi kubuhikula, kadi bakunshiminyina malu. Kabakudia kundi ne mitshima yabo, kadi badi basa muadi ha malalu abo; badi badisangisha hohamue bua kuangata manvua ne nvinyo muhia-muhia, badi bantombokela. Nakubayisha ne nakukolesha maboko abo, kadi badi bahangidisha bua kungenzela malu mabi. Badi bahingana, kadi kabena bahingana kudi Nzambi wa mu diulu, badi bu buta buela buelavi. Bakokeshi babo nebashihibue ku muele wa nvita bualu bua tshiji tshikole ku ndimi yabo; netshibavuishe bihendu mu buloba bua Ejipitu. Teka mpungi ku mishiku yebe! Muena lukuna neadiele ku nsubu wa Yehowa bu nyunyu wa mukanku, bualu bua bakushiha tshihungidi tshianyi, bakusambuka mikenji yanyi. Nebadile kundi ne, Nzambi wetu, tuetu ba mu Isalele tudi bakumanye. Bena Isalele bakubenga malu adi makane; badi nʼandi lukuna nebamulonde. Bakadisunguila bakelenge, tshiyi mubambile; bakaditekela bakokeshi, kadi tshiakamanya muanda eu; bakadifudila mpingu ku biamu bia argent ne bia or, bua bobo babutudibue. Bena Samalea, nakûmusha muanʼa ngombe wenu! Tshiji tshianyi tshiakubatemena bikole; nebashale musangu bule munyi bua kulengesha mitshima yabo? Luhingu elu luakufuma ku buloba bua Isalele; nsenda wakulufula, ne kaluena Nzambi nansha; bulelela, muanʼeu wa ngombe wa Bena Samalea neatshibudibue bituha. Bua bobo badi bakuna luhehele, nebahuole nvunde; kakuena kuikala lukolakola lua manvua; lutonga kaluena lukuama tshintu; biakuamalu, bantu ba bende nebadie maminu alu. Bakumana kumina Bena Isalele. Mpindiu badi munkatshi mua bisamba bia bantu bu luesu ludi kaluyi ne mushinga. Bualu bua bakuhanda ku Ashû, bu mpunda wa mu mpata wa diendankaya wenda. Bena Efelayima bakufila bintu bua kuheta banangi. Nansha biadiabo bulunda ne ba munkatshi mua bisamba bia bantu, nembasangishe kabidi tshituha tshihi, nebabange kukenga muinshi mua tshikokedi tshia mukelenge wa bakokeshi. Bualu bua Bena Efelayima bakuvudisha bioshelu bua kuenzelahu malu mabi, nunku bioshelu ebi biakulua bintu bidi bi benzesha bubi. Nansha bina bakindila mayisha mangi a mu mikenji yanyi bobo nebâbale bu malu a bantu ba bende. Badi bafila milambu ya nyama minshihela, badi bafila munyinyi ne badi baudia; kadi Yehowa kena usanka bua bintu ebi. Mpindiu neavuluke bubi buabo neabakengeshe bua malu mabi abo; nebahingane mu Ejipitu. Bua Bena Isalele bakuhua Mufuki wabo muoyo, bakuasa nsubu minene ya bakelenge; Bena Yuda bakuvudisha misoko ya nvita idi ne ngumbu ya mabue; kadi nentume kahia mu misoko yabo, nekoshe nsubu yabo ya bakelenge. Bena Isalele, kanusanki bua kutumba bu mudi ba mu bisamba bia bende hatumba! Bua nuakulonda malu a masandi hanuakulekela Nzambi wenu; nuakunanga difutu dia bena masandi dia ha bishihuidi bionso bia maminu. Tshishihuidi ne tshikaminu kabiena bibadisha kabidi, nebahange nvinyo mihia-mihia. Kabena bashala mu buloba bua Yehowa, kadi ba mu Efelayima nebahingane mu Ejipitu, nebadie bia kudia bidi bibiha mu Ashû. Kabena bahongoluela Yehowa milambu ya nvinyo, ne milambu yabo ne nyama mimushihula kayena imusankisha kabidi. Bia kudia biabo nebikale bu bia kudia bia bena madilu, bualu bua bonso badi babidia nebabihe. Bualu bua bia kudia biabo bidi biabo nkayabo; kabiena mua kubuela mu nsubu wa Yehowa. Nenuenze tshinyi mu disanka dia kudia bia kudia, ne mu dituku dia bidia bia disanka dia Yehowa? Monai, bakuya kukuabo bualu bua kubutuka kua buloba buabo, kadi Ejipitu neabasangishe kudiye, Mempi neabajike. Mpesa neyihiane bintu biabo bilengele bia argent; mingonge ya meba neyikale mu ntenta yabo. Matuku a kubakengesha akufika, matuku a kubafuta akulua; Bena Isalele nebamanye muanda eu ne, Muprofete udi muhote, muntu udi ne nyuma udi muhale, bualu bua bubi buenu buvule, ne bualu bua lukuna luenu ludi lukole. Bena Efelayima badi balamina Nzambi wanyi; buteyi bua tshilembi tshia nyunyu budi mu nshila ya baprofete, ne lukuna ludi mu nsubu wa Nzambi wandi. Bakudinyanga ne tshinyangu tshikole, bu muakenzabo mu matuku a Gibea. Yeye neavuluke bubi buabo, neabakengeshe bua malu mabi abo. Nakasangana Bena Isalele bu tumuma tua nvinyo tua mu tshihela, nakamona batatu benu bu tumuma tua ku mpala tua mutshi wa nfigi. Kadi bakahia ku Bâla-peô, bakadijidila kudi Bâla udi ubafuisha bundu, bakalua bena tshinyangu bu muakadi tshintu tshiakanangabo. Butumbi bua Bena Efelayima nebûmuke kudibo bu mudi nyunyu ubuka, nunku kakuena kuikala kulela kua bana, kakuena kuikala mukashi ne difu, kakuena kuikala kuimita kua difu. Nansha biakoleshabo bana, nembanyengabo, bua muntu umue kashadi. E, mulau newikale kudibo hangumuka kudibo! Bu munakadianjila kumona, bana ba balume ba Bena Efelayima badi ne bua kukuatshibua kudi bena nvita, ne Bena Efelayima nebikale ne bua kuhatula bana babo bua bakuabo babashihe. Yehowa, ubahe; neubahe tshinyi? Ubahe difu didi dituka ditshikale ditekete, ne biadi biume. Bubi buabo buonso budi mu Gilegala, mu muaba au nakabakina. Bua malu mabi abo nembihate mu nsubu muanyi; tshiena mbananga kabidi; bakokeshi babo bonso badi bantombokedi. Ba mu Efelayima bakutahibua, muji wabo wakûma, kabena bakuama mamuma. E, nansha bialelabo bana, nenshihe bana bananga badibo balela. Nzambi wanyi neabihate, bualu bua kabakamunvuila; nebikale bena tshiendenda munkatshi mua bisamba bia bantu. Bena Isalele badi bu muonshi udi ulamba bikole, udi ukuama mamuma a bungi. Bu muakakuamabo mamuma a bungi, mbu muakavudishabo bioshelu bia bungi; bu muakadi buimpe bua buloba buabo, mbu muakalengeshabo makunshi a tshijila. Mitshima yabo idi mitahuluke nseke ibidi; mpindiu badi ne bua kukenga bua muanda eu; Yehowa neatshibule bioshelu biabo bituha bituha, neashimbule makunshi abo a tshijila. Bulelela, nebambe biabo ne, Katuena ne mukelenge; bualu bua katuena tutshina Yehowa, ne mukelenge eu, yeye udi mua kutuenzela tshinyi? Badi bamba mei a hatuhu; badi baditshiha ne mitshihu ya mashimi, badi bahunga bihungidi; nunku kulumbulula kuabo kua bilumbu nekujuke bu mudi mamuma a mulungu atoloka mu mabula a madimi. Bua muana wa ngombe wa ku Bete-awena Bena Samalea nebakuatshike buowa; bualu bua bantu bandi ne bakuidi bandi nebamuashile madilu; nebase muadi bua butumbi buandi, bualu bua buakûmuka kudiye. Nebaye nʼandi kabidi ku Ashû, bua kumufila bu mulambu kudi Mukelenge Yaleba. Bena Efelayima nebakuatshike bundu, ne Bena Isalele nebakuatshike bundu bua meji akadibo balesha bakuabo. Mukelenge wa mu Samalea neabutudibue bu tshihatu ha mutu ha mai. Bitendelelu bia ha mukuna wa Awena nebibutudibue, biakadi bubi bua Bena Isalele; meba ne mingonge nebimene ha bioshelu biabo; ne bobo nebambile mikuna ne, Nutubuikile! Nebambile mikuna mikese ne, Nutuhonene! Ku matuku a ku Gibea tô ne mpindiu, nuenu Bena Isalele nuakuenza bibi; mu muaba au bantu babi bakatantamena; nvita kayakafika kudi bantu babi mu Gibea, anyi? Hanasua kubakengesha, nembakengeshe; ne ba mu bisamba bia bantu nebadisangishe hohamue bua kubabunda, hanabakengesha bua malu mabi abo abidi. Bena Efelayima bakadi bu lukungulu lua ngombe luakuyishabo, ludi lunanga kudiata mamimu bua kuashihula; kadi nakuteka mutshi wa tshikokedi ha nshingu walu muimpe. Nenteke Bena Efelayima muinshi mua mutshi wa tshikokedi; Bena Yuda nebendeshe lukasu lukoka kudi ngombe, Bena Yakoba nebavingutule mabuwa. Nudikunyine buakane, nuhuole luse lujalame; nudime buloba buenu bukadi bubande; bualu bua etshi ntshikondo tshia kukeba Yehowa, tô ne halueye kunulokeshila buakane bu nvula. Nunkukuna malu mabi, nuakuhuola anu bubi, nuakudia mamuma a mashimi; bualu bua nuakueyemena nshila wenu ne tshisumbu tshia bena bukitu benu. Nunku diyoyo nedijuke munkatshi mua bana benu, misoko yenu yonso ya ngumbu ya nvita neyibutudibue, bu muakashiha Shalamana Bete-âbela mu dituku dia nvita; bakatshibula bamamu ne bana bakalelabo diatshimue. Nuenu Bena Isalele, nebanuenzele nunku bualu bua bunene bua bubi buenu; hatshiabu, mukelenge wa Isalele neabutudibue kabutu. Hakadi Bena Isalele bana, nakabananga, ne nakabikila bana banyi bua kumukabo mu Ejipitu. Kadi hanakananukila kubabikila, bobo bakatamba kumuka kundi. Bakashihela Ba-Bâla milambu ya nyama, bakoshila mpingu musenga wa manananshi. Kadi meme nguakayisha Bena Efelayima mua kuendabo; nakabakuongoluela mu maboko anyi, ka dî kabakamanya ne nakabondaha. Nakabakoka ne mionshi idibo bakoka nʼai muntu, ne mionshi ya dinanga mene; nakadi kudibo bu muntu udi wambula mutshi wa tshikokedi ha nshingu yabo; ne nakateka bia kudia ku mpala kuabo. Kabena bahingana mu buloba bua Ejipitu; kadi Muena Ashû neikale nfumu wabo, bualu bua bakabenga kualukila kundi. Muele wa nvita neufike mu misoko yabo, neubutule badi bafuna bulobo, neubashihe, bualu bua mei akahungabo. Bantu banyi badi basue anu kuntombokela; nansha biababikilabo kudi Wa mu Diulu, kakuena umue wabo wamutumbisha. Bena Efelayima, ndi mua kunulekela munyi? Bena Isalele, ndi mua kunufila kudi mukuabo munyi? Ndi mua kunuenzela bu munakenzela Adema munyi? Ndi mua kunuvuisha bu Bena Seboima munyi? Mutshima wanyi wakuandamuka munda muanyi, luse luanyi luonso luakutema. Tshiena ngenza malu onso adi bukole bua tshiji tshianyi bingambila nansha, tshiena mpingana kudi Bena Efelayima bua kubabutula; bualu bua meme ndi Nzambi, tshiena muntu; ndi Wa Tshijila munkatshi muenu; tshiena ndua kabidi ne tshiji tshikole. Nebalonde Yehowa; yeye nêle dî bu nyama wa ntambue; bualu bua yeye nêle dî diandi, bana bandi nebalue kudiye bazakale, bafume ku wesete. Nebafume ku Ejipitu bazakale bu nyunyu, nebafume ku buloba bua Ashû bu nyunyu wa nkutshi; nembashikike mu nsubu yabo kabidi. Â mmei adi Yehowa Wamba. Bena Efelayima badi bannyunguluka ne mashimi, Bena Isalele badi bannyunguluka ne mei a kundinga nʼau; kadi Bena Yuda batshidi bamanyibue kudi Nzambi, ne batshidi beyemena Wa Tshijila. Bena Efelayima badi badidisha ne luhehele, badi balonda luhehele lua ku esete. Badi bavudisha mashimi ne tshimbambila nusangu yonso; badi bahunga tshihungidi ne Bena Ashû, ne badi baya ne manyi ku Ejipitu. Yehowa udi ne tshilumbu tshia kulumbuluisha Bena Yuda, ne neakengeshe Yakoba bu mudi bienzedi biandi; neamufute bu mudi midimu yandi. Hakadiye mu difu dia mamuʼandi, wakakuata muanʼabo ku tshikankanya; ne hakakoleye, wakaluangana ne Nzambi. Eyo, wakaluangana ne muanjelo, wakamutamba bukole; wakadila, wakamutendekena. Wakasangakena ne Nzambi ku Betele, ne mu nsubu eu yeye wakayikila nʼandi. Yehowa udi Nzambi wa misumba, dina diandi dia Yehowa ntshivulukidi tshiandi. Nunku hinganai kudi Nzambi wenu, londai luse ne kulumbulula kuakane, indilai Nzambi wenu matuku onso. Bena Efelayima badi bangendʼa mushinga, tshiamu tshia kuidikisha nʼatshi bujitu tshia kudinga nʼatshi tshidi mu bianza biabo; bobo badi bananga kukengesha bakuabo. Bena Efelayima bakuamba ne, Tuakulua babanji, tuakuheta biuma; mu malu onso atuakuenza kabena banji kutusangana ne dihanga dia bubi. Kadi meme ndi Yehowa Nzambi wenu, kutuadisha ku buloba bua Ejipitu tô ne kunoku; nennushikike kabidi mu ntenta, bu munuakashikama mu matuku a disanka dia kudia bidia. Nakambila baprofete mei, nakabalesha bikena kumona bivule, ne mu mei anakateka mukana mua baprofete nakela nsumuinu. Bikala Gilada tshintu tshia hatuhu, badi bashikamemu badi bantu ba hatuhu; mu Gilegala badi bafila balume ba ngombe bu milambu kudi mpingu, e, bioshelu biabo bidi bu mishiki ya mabue mu mabula a mu budimi. Yakoba wakanyemena mu madimi a mu Alama; Isalele wakakuata mudimu bua kusela mukashi, ne bua kuheta mukashi yeye wakaja ma mikoko. Yehowa wakaluhula Bena Isalele mu Ejipitu ku bulombodi bua muprofete, ne wakabalama ku bulami bua muprofete. Bena Efelayima bakamukuatshisha tshiji tshikole; nunku Mukelenge wabo neabahishe bua kumatshisha kuabo kua mashi, neabahingashile difutu dia bihendu biabo. Hakamba Bena Efelayima dî, buowa buakakuata bantu; bakamutumbisha kudi Bena Isalele; kadi hakahendabo Nzambi mu kutendelela kuabo kua Bâla, bakafua. Mpindiu badi bananukila kulonda malu mabi, badi badifudila bifuanyikishi bia nzambi yabo ku tshiamu tshiabo tshia argent, ne mpingu bu mudi lungenyi luabo, bintu ebi bionso biakadi midimu ya bansenda. Badi bamba bualu buabi ne, Badi bafila milambu, badi baluangana ne bana ba ngombe mishiku. Bua muanda eu nebikale bu ditutu dia lunkelu, ne bu mume udi ukama lukasa, bu bisote bidi nvunde uhehula ku tshishihuidi, anyi bu muishi wa kahia udi uhatuka mu dididishi. Kadi meme ndi Yehowa Nzambi wenu, kutuadisha ku buloba bua Ejipitu tô ne lelu, ne kanuena bamanye Nzambi mukuabo, anu meme; kakuena musungidi mukuabo, anu meme. Nakanumanya mu tshihela tshia lusenga, mu buloba bua munanga mukole. Hakadibo mu buloba bua mashinde, bakukuta; bakukuta, ne mitshima yabo yakadibandisha; nunku bakumpua meme muoyo. Nunku nengikale bu nyama wa ntambue kudibo, nembalamine bu nkashama kukala kua nshila. Nembabunde bu nkashama udibo banyenga bana bandi, nembahande tô ne ku lukutu lua mutshima; nembafile bu mudi mukashiʼa nyama wa ntambue wenza; nyama wa mu mpata neabahande bihesa. Bena Isalele, eku akubutuka kuenu, kuena ku luseke luanyi, meme mukuatshishi wenu. Mukelenge wenu udi kudi kunyi bua kunuhandisheye mu misoko yenu yonso? Balumbuluishi benu badi kudi kunyi, bawakuamba ne, Utuhe mukelenge ne bakokeshi? Nakunuha mukelenge mu tshifikʼa munda tshianyi, nakumunyenga mu tshiji tshianyi tshikole. Dihila dia Bena Efelayima didi disuikibue mu dibuki, ne bakubutshila bubi buabo mu tshibutshilu. Didinyenga didi dikuata mukashi udi wamba kulela nedibakuate mene, kadi bobo mbana ba balume badi kabayi ne meji: bualu bua tshikondo etshi kantshikondo tshia kujanguluka mu difu. Nembahikule ku bukole bua Muaba wa Bafue, anyi? Nembahandishe ku lufu, anyi? Lufu, makenga ebe adi kudi kunyi? Muaba wa Bafue, kubutula kuebe kudi hanyi? Kukudimuna kua mitshima kudi kusokokibua ku mesu kuanyi. Nansha biavudishabo bana munkatshi mua bana babo, luhehele lua ku esete neluhehe, luhehele lua Yehowa lufume mu tshihela; ne mushimi wabo wa mai neukame, ne mpokolo wabo neume; neluhaule bintu bionso bilengele bidi mu tshibutshilu. Bena Samalea nebahishibue bualu bua bakutombokela Nzambi wabo. Nebafue ku muele wa nvita, bana babo batekete nebakoshibue bituha, ne bakashi babo badi ne mafu nebahandibue. Nuenu, Bena Isalele, hinganai kudi Yehowa Nzambi wenu, bualu bua nuakudishinda hanshi bua mibi yenu. Nuye ne mei makane, hinganai kudi Yehowa. Numuambile ne, Utûmushile mibi yonso, witabushe malu adi makane, bua tuetu tufile mishiku yetu kûdi bu milambu ya ngombe. Bena Ashû kabena batusungila; katuena tubanda ha nyima ha tubalu tua nvita bua kuenda; katuena tuambila bintu bituakufula ku bianza bietu ne, Nudi nzambi yetu; bualu bua bana ba nshiya badi baheta luse kûdi. Meme nengondahe, nenshikishe kutomboka kuabo; nembanange ne mutshima wanyi wonso; bualu bua tshiji tshianyi tshinakadi nʼatshi kudibo tshiakûmuka. Nengikale bu mume kudi Bena Isalele, bobo nebele bilongo bu tshilongo tshilengele, nebele miji bu mitshi ya mu Lebanona; matamba abo neabaluluke; bulengele buabo nebuikale bu bua mutshi wa olive, ne muhuya wabo muimpe newikale bu wa Lebanona. Nebahingane, nebashikame mu dileshi dianyi, nebavudishe maminu, nebele bilongo bu muonshi wa tumuma tua nvinyo; tshivulukidi tshiabo netshikale bu tshia nvinyo ya mu Lebanona. Bena Efelayima, mpingu yenu idi ne mushinga kai kundi kabidi? Mmeme ndi nnunvuila ne adi nnulama. Ndi bu mutshi wa cyprès udi ne muoyo, nudi nuheta mamuma enu kundi. Udi ne meji ajingulule malu â; udi ne lungenyi lua kuamanya, âmanye biandi; bualu bua nshila ya Yehowa idi milulame; bantu bakane badi bendamu, kadi bantu babi badi badishindamu. Dî dia Yehowa diakalua kudi Yoele, muana wa Petuele, ne, Unvuai dî edi, nuenu bantu bakulumpe; telejai matshu enu, nuenu badi bashikame mu buloha ebu! Muanda bu nunku wakamueneka mu matuku enu, anyi? Wakamueneka mu matuku a batatu benu, anyi? Ambilai bana benu muanda eu, bana benu bambile bana babo kabidi, babo bana bambile bena mulongo mukuabo udi ulonda wabo mulongo. Tshintu tshiakashiyabo kudi mukumbi udi ukosa ntshiakudiabo kudi mukumbi udi ulela bana bavule; tshidi mukumbi udi ulela bana bavule mushiye ntshiakudiabo kudi mukumbi udi utuhika; tshidi mukumbi udi utuhika mushiye ntshiakudiabo kudi mukumbi udi uhohola. Tabalai, nuenu bakuatshiki ba maluvu, dilai bienu; asai miadi, nuenu bonso banu ba maluvu a nvinyo, bualu bua nvinyo mihia-mihia yakûmushibua mukana muenu. Bualu bua tshisamba tshia bantu tshiakulua kubunda ba mu buloba buanyi, tshidi tshikole ne katshiyi mua kubadibua. Menu atshi adi menu a nyama wa ntambue, menu atshi a tshinyanganyanga adi menu a mukashiʼa nyama wa ntambue. Tshiakunyanga mionshi yanyi ya tumuma tua nvinyo, tshiakuvuisha mitshi yanyi ya nfigi bu mitshi miume; tshiakubula bihusu ne tshiakubimasha; matamba au akulua matoke tô. Asai muadi bu mukashi utshidi kamama muluate bilamba bikayabala udidila mulume udi mumubangile mu bunsongakashi buandi. Mulambu wa bia kudia ne mulambu wa bia kunua yakushika, kayena mu nsubu wa Yehowa kabidi. Bakuidi, bena mudimu ba Nzambi, badi basa muadi. Madimi akubutudibua; buloba budi buasa muadi; bualu bua manvua akunyanguka, nvinyo mihia-mihia yakukama, ne manyi adi ahua. Ba bidime bakufua bundu, balengeshi ba mionshi ya tumuma tua nvinyo bakuasa muadi, bualu bua blé ne orge kabienaku; bua bia kudia bia mu madimi biakufua. Muonshi wa tumuma udi munyanguke, mutshi wa nfigi udi ufuba; mutshi wa grenadier, wa dibue, wa pommier, mitshi yonso ya mu budimi mene yakufubidila; bua muanda eu disanka diakushika munkatshi mua bukua bantu. Luatai bilulu bikayabala, asai muadi, nuenu bakuidi, asai muadi, nuenu bakuatshi ba mudimu wa tshioshelu; luai bienu, lalai baluate bilulu bikayabala bufuku bujima, nuenu badi bakuatshila Nzambi wanyi mudimu! Bualu bua mulambu wa bia kudia ne mulambu wa bia kunua yakûmushibua mu nsubu wa Nzambi wenu. Jidilai tshikondo tshia kujila bia kudia, kunguishai disangisha dia tshijila. Nuenu bakulu, sangishai bantu bonso badi bashikame mu buloba ebu mu nsubu wa Yehowa Nzambi wenu; dilai kudi Yehowa. Aka! Bua difuku adi! Bua dituku dia Yehowa didi ha buihi, ne didi dilua bu kubutuka kufume kudi Nzambi wa Bukole Buonso. Bia kudia kabiena biumushibue ku mesu kuetu, anyi? Disanka ne musangelu kabiena biumushibue mu nsubu wa Nzambi wetu, anyi? Maminu adi abola muinshi mua mabuwa a buloba, mayeba adi manyanguke, nsubu ya kuelamu bia kudia yakûhuka, bualu bua manvua akufubidila. Monai mudi bimuna bitua mikemu! Bisumbu bia ngombe bidi biendakana eku ne eku, bualu bua kabiena ne mashinde; e, bisumbu bia mikoko kabidi bidi bikenga. Yehowa, ndi ndila kûdi; bualu bua kahia kakuosha mpata ya mashinde a mu tshihela, ne ludimi lua kahia luakuosha mitshi yonso ya mu mpata. E, nyama ya mu mpata mene idi idila kûdi, bualu bua misulu ya mai yakukama, ne kahia kakuosha mpata ya mashinde ya mu tshihela. Elai mpungi mu Siona, elai mbila mu mukuna wanyi wa tshijila! Bena buloba ebu bonso bazakale; bualu bua dituku dia Yehowa didi diamba kulua, didi ha buihi! Ndituku dia mîdima ne dia mufitu, ndituku dia matutu ne dia mîdima mikole. Bu mudi kabundubundu ka lunkelu katshila ha mutu ha mikuna, bantu aba banene ne bakole badi nunku. Kakuena kuanji kuikala bakuabo bu bobo diambedi; kakuena kuikala bakuabo bu bobo ku nyima kuabo, tô ne ku bidimu bia mulongo ne mulongo. Ku mpala kua mikumbi ei kahia kadi kosha bintu, kabimana, ne ku nyima kuai kahia kadi kashidisha bintu kabidi. Buloba buakadi bu budimi bua Edene diambedi kayiyi mianze kulua, ku nyima kuai buloba budi bu tshihela tshia hatuhu; e, kakuena tshintu tshimue tshidi tshihanduka kudiyi. Tshifuanyikishi tshiai tshidi bu tshifuanyikishi tshia tubalu; ne bu mudi tubalu tua nvita tuenda lukasa, mbu mudiyi yenda. Bu mudi tshiona tshia makalu a nvita ha mikuna mbu mudiyi ituhika; bu kutudika kua kahia kadi kalamba ne kadi kosha bisonsa; bu bantu bakole baluate bivualu bia nvita ne badi bela mualu wa nvita. Bantu badi bazakala ku mpala kuai ne buowa bukole, mpala ya bantu bonso idi itokoloka. Idi inyema lukasa bu bena bukitu; idi ibanda lumbu lua musoko bu bena nvita. Mukumbi ne mukumbi udi uya anu mu nshila wau, ne kayena ihambuka mu nshila. Kayena isakilangana, mukumbi ne mukumbi udi uya mu nshila wau. Idi ihita bintu bionso bidi bantu bakeba kuyikanda nʼabi, kayena itahibua. Idi yenda idiela mu musoko, idi yenda ha lumbu lua musoko; idi ibanda munda mua nsubu ya bantu; idi ihuelela ha masoso bu mudi muibi ubuela. Buloba budi buzakala ku mpala kuai; diulu didi dikanka; ngondo ne diba bidi bilua mîdima, ne mitoto idi ikanda dinkenke diai. Yehowa udi wela dî dikole ku mpala kua masalayi andi; bualu bua tshisumbu tshiandi tshia masalayi tshidi tshinene, bualu bua muenji wa dî diandi udi ne bukole. Bualu bua dituku dia Yehowa didi dinene, didi dikuatshisha bantu buowa bukole; nganyi washindama ku mpala kuadi? Yehowa udi wamba ne, Mpindiu mene, nuhingane kundi ne mitshima yenu yonso, jilai bia kudia, dilai, asai miadi. Handai mitshima yenu, kanuhandi hivualu bienu, hinganai kudi Yehowa, Nzambi wenu; bualu bua yeye udi unulesha dinanga ne udi unufuila luse, kena ukuata tshiji lukasa, udi ne luse lujalame lukumbane; udi ukudimuna mutshima wandi bua makenga adiye wamba kutumina bantu. Nganyi udi mumanye ne kena ukudimuna mutshima wandi, kena uhanga kunushila disanka, disanka mene dia mulambu wa bia kudia ne mulambu wa bia kunua bia Yehowa Nzambi wenu? Elai mpungi mu Siona, jidilai tshikondo tshia kujila bia kudia, kunguishai disangisha dia tshijila; sangishai bantu. Jidilai disangisha, sangishai bakulu ne bantu, sangishai bana ne bana batshidi bamua mabele. Mubaki wa mukashi ahatuke mu nsubu muandi, mukashi mubaka ahatuke mu ntenta wandi. Bakuidi, bakuatshi ba mudimu wa Yehowa, badidile muadi hankatshi ha mbalanda wa ntempelo ne tshioshelu; bambe biabo ne, Sungila bantu bebe, Yehowa, kufidi buhianyi buebe kudi bahendianganyi bua babahende, bua ba munkatshi mua bisamba bia bantu babaseke. Munyi muambilanganabo munkatshi mua bantu ne, Nzambi wabo udi nʼanyi? Hashishe, Yehowa wakakuatshika mukau bua buloba buandi, wakafuna bantu bandi luse. Yehowa wakakudimuna bantu bandi dî, wakabambila ne, Tangilai, nennutumine manvua ne nvinyo mihia-mihia ne manyi, nennukutshishebi; ne tshiena nnuvuisha bu tshintu tshia kuhendabo munkatshi mua bisamba bia bantu kabidi. Nennûmushile bena luseke lua nôde, nembatume kule; nembihate bua kuyabo mu buloba bua munanga ne bua tshihela tshia lusenga; tshituha tshiabo tshia ku mpala tshibuele mu mai manene a ku luseke lua esete, tshituha tshiabo tshia ku nyima tshibuele mu mai manene a ku luseke lua wesete; muhuya wabo mubi ne mukuhu wabo nebibande mulu, bualu bua bakuenza malu manene. Wewe buloba, kutshinyi nansha! Wikale ne disanka ne musangelu, bualu bua Yehowa wakuenza malu manene! Nyama ya mu mpata, kanu tshinyi; bualu bua mashinde a mu mpata adi asasa kabidi, mutshi udi ukuama mamuma au, mutshi wa nfigi ne muonshi wa tumuma tua nvinyo bidi bikuama mamuma abi. Nuenu bana ba balume ba mu Siona, sankai bienu, ikalai ne disanka mu Yehowa Nzambi wenu; bualu bua yeye udi untokeshila nvula mbedi, udi untokeshila nvula ya bungi, nvula mbedi ne nvula mishishe, bu muakenzeye diambedi. Bishihuidi nebiule tente ne blé, ne nyinyo mihia-mihia ne manyi nebihongoloke mu bikaminu. Nennuhingashile bintu ha mutu ha bienu biakadiabo kudi mikumbi, kudi mukumbi udi utuhika, kudi mukumbi udi uhohola, ne kudi mukumbi udi ukosa, tshisumbu tshianyi tshinene tshia bena nvita tshinakatuma munkatshi muenu. Nenudie bintu bikumbane, nenukute; nenutumbishe dina dia Yehowa Nzambi wenu, wakunuenzela malu a kukema; ne bantu banyi kabena bafuishibua bundu kabidi kashidi. Nenumanye ne meme ndi munkatshi mua Bena Isalele, meme Yehowa, ndi Nzambi wenu, ne kakuena Nzambi mukuabo; bantu banyi kabena bafuishibua bundu kabidi kashidi. Ku nyima kua malu â nengitshikishile bantu bonso Nyuma wanyi; bana benu ba balume ne bana benu ba bakashi nebambe malu adi kâyi manze kulua, bakulumpe benu nebalote bilota, bansongalume benu nebamone bikena kumona. Nengitshikishile Nyuma wanyi kabidi hamʼbidi ha bahika balume ne bahika bakashi mu matuku au. Nendeshe bantu malu a kukema mu ditu ne ha buloba: mashi, kahia ne mulanjilanji wa muishi. Diba nedikudimuke midima ne ngondo neakudimuke mashi, diambedi dituku adi dinene dia Yehowa, didi dikuatshisha bantu buowa, kadiyi dianze kulua. Halua bualu ebu, muntu yonso watela dina dia Yehowa neasungidibue; bualu bua mu mukuna wa Siona ne mu Yelushalema nemuikale bakuabo bahanduke bu muakamba Yehowa; ne munkatshi mua bantu aba badi bashala nemuikale bakuabo badi Yehowa Ubikila. Monai, mu matuku au ne mu tshikondo atshi, hangumusha Bena Yuda ne Bena Yelushalema mu buhika bua kubaha diakalengele, nensangishe ba mu bisamba bionso, nempueke nʼabo mu tshibanda tshia Yehoshafata; nembalumbuluishilema bua bantu banyi, buhianyi buanyi, Bena Isalele, bakamuangalashabo munkatshi mua bisamba bia bantu. Bakabanyangana buloba buanyi, bakelela bantu banyi nshobo, bakahana muana wa balume ku mukashi wa masandi, bakahana muana wa bakashi ku maluvu a nyinyo, bakânua. E, nuenu kabidi, Tulo ne Sidona, ne nseke yonso ya Peleshete, nudi bu banganyi kundi? Nudi basue kunfuta bua bualu bunakuenza, anyi kungenzela bunga bualu, anyi? Nennuhingashile difutu lukasa bua malu mabi enu! Bualu bua nuakangata biamu bianyi bia argent ne bia or, ne nuakaya ne bintu bianyi bia mushinga mukole mu ntempelo yenu. Nuakahana Bena Yuda ne Bena Yelushalema kudi Bena Gelika bua kubumusha mu buloba buabo ne bua kubatuma kule. Monai, nembanuishe ku muaba unuakabahana; nennuhingashile difutu bua bualu bunuakenza. Nempane bana benu ba balume ne bana benu ba bakashi kudi Bena Yuda, ne bobo nebabahane kudi Bena Seba, bantu aba ba kule. Bualu bua Yehowa wakuamba dî edi. Elai dî edi munkatshi mua bisamba bia bantu ne, Longololai bintu bia nvita. Bishai bena bukitu. Bena nvita bonso basemene ha buihi, baye ku nvita. Tulai miele ya nvita ku nkasu yenu, tulai mafuma ku miele yenu ya kulengesha nʼai mionshi ya tumuma; muntu mutekete ambe biandi ne, Ndi muena bukitu. Ambulusbai ne luai bienu, nuenu bisamba bionso bia bantu bidi bitunyunguluka, nudikunguishe hohamue. Yehowa, tuma bena hukitu bebe mu tshibanda. Ba mu bisamba bia bantu babike, balue mu tshibanda tshia Yehoshafata; bua mu muaba au nenshikame bua kulumbuluisha bisamba bionso bia bantu bidi bitshinyunguluka. Tualai muele wa kunowa nʼau, bua bintu bia kunowa biakuboba. Luai, diatai; bua tshikaminu tshidi tshiule tente ne tumuma tua nvinyo. Milondo ya maluvu a nvinyo idi ihongoloka, bualu bua bubi buabo budi bunene. Misumba ne misumba ya bantu idi mu tshibanda tshia tshilumbuluidi! Bualu bua dituku dia Yehowa didi ha buihi mu tshibanda tshia tshilumbuluidi. Diba ne ngondo biakuandamuka mîdima, mitoto kayena ikenka. Yehowa udi wela dî diandi dikole difume ku Siona, udi wela dî diandi bu mukungulu wa nvula difume ku Yelushalema; diulu ne buloba bidi bikanka. Kadi Yehowa udi tshinyemenu kudi bantu bandi, udi bu musoko wa ngumbu kudi Bena Isalele. Nunku nuenu nenumanye ne, Meme, Yehowa Nzambi wenu, ndi mushikame mu Siona, mukuna wanyi wa tshijila. Yelushalema neikale muaba wa tshijila, bantu ba bende kabena bahitshilamu kabidi. Hashishe, mu dituku adi mikuna minene neyimatshishe nvinyo idi ne kushemakana, mikuna mikese neyihatule mabele, ne tusulu tuonso tua mu Yuda ne bile tente ne mai. Mushimi wa mai neuhatuke mu nsubu wa Yehowa, neutume mai au mu tshibanda tshia Shitima. Ejipitu neabutudibue, Edome nealue tshihela tshia hatuhu, bua malu makole akenzelabo Bena Yuda; bualu bua mu buloba buabo bakamatshisha mashi a bantu bakadi kabayi bahila mu tshilumbu. Kadi Bena Yuda nebajalame tshiendelele, ne bantu nebashikame mu Yelushalema bikondo bionso. Nensombuele mashi abo andi tshiyi muanji kusombuela; bualu bua Yehowa udi mushikame mu Siona. Au mmei a Amosa, wakadi munkatshi mua balami ba mikoko ba ku Tekoa, akunvueye bualu bua Bena Isalele, mu matuku a Uziya, mukelenge wa Yuda, ne mu matuku a Yalobama, muana wa Yoasha, mukelenge wa Isalele, bidimu bibidi ku mpala kua kutaka kua buloba. Yeye wakamba ne, Yehowa udi wela dî dikole difume ku Siona, udi wamba dî diandi difume ku Yelushalema; mpata ya mashinde ya balami ba mikoko idi yasa muadi, ne bia ha mutu ha Kâmele bidi bifuba. Yehowa udi wamba ne, Bua malu mabi asatu a Bena Damaseke, nansha bua anai, tshiena nkudimuna dikenga dindualua kubakengesha nʼadi, bualu bua bakushihula Gilada ne bishihuidi bia biamu. Nunku nentumine ba mu nsubu wa Hazaele kahia; nekoshe mbalasa minene ya Bene-hadada. Nentshibule lukanu lua ku tshibi tshia ku Damaseke, nembutule badi bashikame mu tshibanda tshia Awena, ne mukuatshi wa dikombo dia bukelenge ku Bete-edene; bantu ba mu Sulia nebabuele mu buhika ku Kî. Yehowa udi wamba nunku. Yehowa udi wamba dî edi ne, Bua malu mabi asatu a ba mu Gaza, nansha bua anai, tshiena nkudimuna dikenga dindualua kubakengesha nʼadi; bualu bua bakaya ne tshisamba tshijima tshia bantu mu buhika, bua kubafila kudi Bena Edome. Kadi nentemeshe kahia ha lumbu lua Gaza, nekoshe nsubu ya bakelenge mu musoko eu, nekayishidishe. Nengumushe bena musoko ba mu Ashedodo, nengumushe mukuatshi wa dikombo dia bunfumu mu Ashekelona; nembishe tshianza tshianyi bua kukuma Ekelona, ne Bena Peleshete batshidi bashala ne muoyo nebafue. Mukelenge Yehowa udi amba nunku. Yehowa udi wamba dî edi ne, Bua malu mabi asatu a ba mu Tulo, nansha bua anai, tshiena nkudimuna dikenga dindualua kubakengesha nʼadi; bualu bua bakafila bantu ba mu tshisamba tshijima kudi Bena Edome, ne kabakavuluka tshihungidi tshiakahungabo nʼabo bu bana babo. Kadi nentemeshe kahia ha lumbu lua Tulo, nekashidishe nsubu ya bakelenge. Yehowa udi wamba dî edi ne, Bua malu mabi asatu a Bena Edome, nansha bua anai, tshiena nkudimuna dikenga dindualua kubakengesha nʼadi; bualu bua bakihata bana babo ne muele wa nvita, bakabenga kubalesha luse nansha lukese; tshiji tshiabo tshiakadiku bikondo bionso, ne bobo bakashala nʼabo lukuna kashidi. Kadi nentemeshe kahia mu Temana, nekashidishe nsubu ya bakelenge ya mu Bosela. Yehowa udi wamba dî edi ne, Bua malu mabi asatu a Bena Amona, nansha bua anai, tshiena nkudimuna dikenga dindualua kubakengesha nʼadi; bualu hua bakahanda bakashi ba mu Gilada bakadi ne mafu, bua bamanye mua kulehesha mikalu yabo. Nunku nentemeshe kahia ha lumbu lua Laba, nekashidishe nsubu ya bakelenge; kuela kua mbila nekuikaleku mu dituku dia nvita, ne tshihuhu netshikaleku mu dituku dia nvunde. Mukelenge wabo neabuele mu buhika, yeye ne badi bakokesha nʼandi diatshimue. Yehowa udi wamba nunku. Yehowa udi wamba dî edi ne, Bua malu mabi asatu a Bena Moaba, nansha bua anai, tshiena nkudimuna dikenga dindualua kubakengesha nʼadi; bualu bua bakosha mifuba ya mukelenge wa Edome, yakalua luhemba. Nunku nentume kahia bua kuosha Moaba, nekashidishe nsubu ya banfumu idi mu Keliyota. Moaba neafue munkatshi mua tshintompatompa tshia nvita, helabo mbila ne tshiona tshia mpungi. Nenshihe nfumu bua kikadi munkatshi muabo, nenshihe bakokeshi bonso diatshimue nʼandi. Yehowa udi wamba nunku. Yehowa udi wamba dî edi ne, Bua malu mabi asatu a Bena Yuda, nansha bua anai, tshiena nkudimuna dikenga dindualua Kubakengesha nʼadi; bualu bua bakubenga mayisha a mu mikenji ya Yehowa, kabakutumikila mikenji yandi; kadi mashimi abo akabahambuisha mu nshila, mashimi mene akadi batatu babo nʼau. Nunku nentumine Bena Yuda kahia, nekashidishe nsubu ya bakelenge ya mu Yelushalema. Yehowa udi wamba ne, Bua malu mabi asatu a Bena Isalele, nansha bua anai, tshiena nkudimuna dikenga dindualua kubakengesha nʼadi; bualu bua bakuhana bantu bakane ku argent, bakuhana bahele ku mukolo wa bisabata. Badi bajinga bua kumona luhuishi mene ha mitu ya bahele, badi basesuisha bena dikenga mu nshila. Muana wa balume ne tatuʼandi badi basangila bulalu ne nsongakashi umue, badi banyanga dina dianyi dia tshijila nunku. Badi badiolola hanshi hehi ne bioshelu bionso ha bilamba biakangatabo bu tshieya; mu nsubu wa Nzambi wabo badi banua nvinyo ya bantu bakafutshishabo bibau. Kadi meme hanyi nakashiha Muena Amole ku mpala kuabo, bule buandi buakadi bu bua mitshi ya cèdre, ne bukole buandi buakadi bu bua mitshi ya telebinta; kadi nakanyanga mamuma andi akadi kulu, ne miji yandi ya kuinshi. Meme nakanuluhula mu buloba bua Ejipitu, nakanulombola mu tshihela tô bidimu makumi anai, bua nuenu nuangate buloba bua Bena Amole. Nakabisha bakuabo ba munkatshi mua bana benu ba balume bua kuikalabo baprofete, ne bakuabo ba munkatshi mua bansongalume benu bua kuikalabo Banazi. Bualu ebu kabuena bulelela, anyi, nuenu Bena Isalele? Yehowa udi wamba nunku. Kadi nuakenzesha Banazi bua kunuabo maluvu a nvinyo, nuakelela baprofete mukenji ne, Kanuambi mei enu a buprofete nansha. Monai, nennushindike hanshi mu muaba wenu, bu mudi dikalu dibeta buloba hikaladi ne bujitu bua bisumbu bia blé munda muadi. Bukole bua kunyema nebujimine kudi muena lubilu, ne muena dikanda kena unvua bukole bua kudikuatshisha, ne muena nvita kena udihandisha. Muedi wa buta kena ushindama, muena lubilu kena udihandisha, ne mubandi wa ha kabalu kena udisungila. Udi ne mutshima mukole munkatshi mua bena bukitu neanyeme butaka halua dituku adi. Yehowa udi wamba nunku. Nuenu Bena Isalele, unvuai dî edi didi Yehowa unuhisha nʼadi, dia kunuisha nʼadi bonso ba mu tshisamba tshinakahatula mu buloba bua Ejipitu, ne, Nuenu nkayenu mbanakumanya munkatshi mua bisamba bionso bia hanshi ha buloba; nunku nennukengeshe bua malu mabi enu onso. Bantu babidi badi bendela hamue, bikalabo kabayi badianjile kunvuangana, anyi? Nyama wa ntambue udi ukungula muitu, bikaleye kayi mukuate nyama, anyi? Muana wa nyama wa ntambue udi wela dî diandi ku buina buandi bikaleye kayi mukuate tshintu, anyi? Nyunyu udi ukuatshibua mu buteyi hanshi, bikalahu kahayi buteyi bua kumukuata, anyi? Musubula udi uhaula disoka, kadiyi dianze kukuata tshintu, anyi? Bielabo mpungi wa nvita mu musoko, bena musoko kabena bakuatshika buowa, anyi? Bualu bubi budi bukuata musoko, bikala Yehowa kayi mubutume, anyi? Bulelela, Yehowa Nzambi kena wenza bualu, bikaleye kayi muanji kubusokoluela bantu bandi baprofete diambedi. Nyama wa ntambue udi mukungule; nganyi udi kayi utshina? Yehowa Nzambi udi wamba dî diandi; muprofete kai udi kayi udiambila bantu? Elai dî ku nsubu ya bakelenge ba mu Ashedodo, ne ku nsubu ya bakelenge ba mu buloba bua Ejipitu, nubambile ne, Disangisha! ha mikuna ya mu Samalea, monai mudi tshintompantompa mu musoko, ne mudi bena musoko bakengeshibue. Yehowa udi wamba ne, Bantu aba badi babutshile bintu biakanyengabo ku tshimbambila mu nsubu ya banfumu babo, kabena bamanye mua kuenza malu makane. Nunku Yehowa Nzambi udi wamba ne, Muena lukuna neanyunguluke buloba, ne neanutekeshe, nebahaule nsubu ya banfumu benu. Yehowa udi wamba ne, Bu mudi mulami wa mikoko udihula maboko abidi anyi tshihesa tshia ditshu mukana mua nyama wa ntambue, nunku nebahandishile Bena Isalele badi bashikame mu Samalea ku ditumba dia bulalu, ne ha biata bia mu Damaseke. Mukelenge Yehowa, Nzambi wa misumba, udi wamba ne, Unvuai bienu, bandai ba mu tshiota tshia Yakoba, mu dituku dinatumina Bena Isalele makenga bua malu mabi abo, nenshihe bioshelu bia Betele; nebakose nsengu ya ku tshioshelu ne neyihone hanshi. Nenshihe nsubu udibo balala mu tshikondo tshia mashika, ne nsubu udibo balala mu tshikondo tshia luya; nsubu yakalengeshabo ne mibanga neyinyanguke; ne nsubu mikuabo ya bungi neyifue tshiendelele. Yehowa udi wamba di edi. Unvuai dî edi, nuenu bakashi ba ngombe ba ku Bashana, nuenu badi bashikame ha mukuna wa Samalea, badi bakengesha bantu bahele, badi badiata bakengi, badi bambila babayabo ne, Luai ne nvinyo, tunue bietu. Mukelenge Yehowa wakaditshiha ku buimpe bua tshijila tshiandi ne, Monai, matuku alualua anuhulumunabo ne ndobo bua kuya nʼenu kukuabo, ne bakuabo ba munkatshi muenu badi bashala nebabumushe ne ndobo. Nenuhatukile mu miaba idi ngumbu mishimbuke, mukashi yonso wendela mutangile ku mpala; nenuedibue mu muaba mukole wa mu Hâmona. Yehowa udi wamba dî edi. Luai ku Betele, enzai malu mabi enu; ne ku Gilegala, vudishai mibi yenu; luai ne milambu yenu buatshia-buatshia, ne bintu bienu bia tshia dikumi ku matuku asatu ku matuku asatu. Oshilai Nzambi mulambu wa kumusakidila wa bidia biela luevene, ambilai bantu bua balue ne milambu idi mitshima yabo misue, manyisha! bantu bualu buai! Ebu mbunudi basue kuenza, nuenu Bena Isalele. Mukelenge Yehowa udi wamba di edi. Yehowa udi wamba ne, Meme hanyi nakatuma tshiole mu misoko yenu yonso, ne dikenga dia bia kudia mu miaba yenu yonso; kadi kanuena banze kuhingana kundi. Meme kabidi nakakanda nvula bua kanulokedi, hakadi ngondo isatu mishale tshikondo tshia kunowa katshiyi tshianji kufika; nakalokeshila musoko mukuabo mula, nakakanda nvula bua kalokedi musoko mukuabo. Nvula yakalokela budimi bukuabo, kadi bintu bia mu budimi buakadi kabuyi ne nvula biakafubidila. Yehowa udi wamba ne, Nunku ba mu misoko ibidi anyi isatu bakendakana bakeba mai a kunua ku musoko mukuabo, nyota yabo kayakashika; kadi kanuakahingana kundi. Yehowa udi wamba ne, Nakanukengesha hanakafubisha midioko yenu ne butu; mikumbi yakadia madimi enu mavule a masolo ne madimi enu a tumuma tua nvinyo, mitshi yenu ya nfigi ne ya olive kabidi; kadi kanuakahingana kundi. Yehowa udi wamba ne, Nakatuma tshihuhu munkatshi muenu bu tshinakatumina ba mu Ejipitu; nakashiha bansongalume benu ku muele wa nvita; nakanyengesha tubalu tuenu mu nvita; nakanunkisha mûlu enu muhuya mubi wa tshitudilu tshienu; kadi kanuakahingana kundi. Yehowa udi wamba ne, Nakabulula misoko ya munkatshi muenu, bu muakabulula Nzambi Sodoma ne Amola, ne nuakadi bu tshishelele tshidibo bahatula mu kahia; kadi kanuakahingana kundi. Nunku nennuenzele muanda eu, Bena Isalele; nuenu, Bena Isalele, nudilongolole bua kusambakena ne Nzambi wenu, bualu bua nennuenzele muanda eu. Monai, yeye udi wimanyika mikuna ne udi utuma luhehele, udi umanyisha muntu meji adi munda muandi, udi uvuisha kabundubundu midima, udi wenda ha miaba mibandile ya ha buloba; Yehowa, Nzambi wa misumba, ndina diandi. Unvuai dî edi dia muadi dindi nnuashila, nuenu Bena Isalele. Muana mukashi utshidi kamama, Isalele mene, udi muhone hanshi; kena ujuka kabidi kashidi; bakamuela hanshi; kakuena muntu wa kumujula kabidi. Bualu bua Mukelenge Yehowa udi wamba ne, Mu musoko mudi muhatuke bantu tshinunu nemushale anu lukama; ne mu musoko mudi muhatuke bantu lukama nemushale anu dikumi dia Bena Isalele. Bua Yehowa udi wambila Bena Isalele dî edi ne, Nkeba! meme ne nenuikale ne muoyo; kadi kanukebi Betele, kanuyi ku Gilegala, kanuyi ku Bê-sheba. Bualu bua ba mu Gilegala nebabuele mu buhika bulelela, ne Betele nealue muaba wa hatuhu. Kebai Yehowa, nenuikale ne muoyo; bua yeye katemeshi kahia mu tshiota tshia Yosefe, bua koko kakabashidishi, kakuyi muntu mu Betele udi mua kukajima; nuenu mbadi bakudimuna kulumbulula kuakane bua kuluaku anu bululu, mbadi badiate buakane ne makasa. Yeye wakafuka mitoto ya Tshidiminanzashi ne ya Nyama ne Mbua ne Muntu, udi ukudimuna mundidimbi wa lufu bua kuluau bu dinda, udi ukudimuna munya bua kuluau butuku; udi Ubikila mai a mu mai manene kudiye, ne udi wahongoluela ha buloba; Yehowa ndina diandi. Yeye udi utuma dibutuka kudi bena bukitu, ne udi ubutula misoko ya ngumbu. Badi ne muntu udi ubabela ku tshibuelelu tshia musoko lukuna, badi bahetula muntu udi wamba mei malelela. Nudi nudiata muntu muhele muinshi mua makasa enu, ne nudi numunyenga milambu ya blé ku bukole; nunku bua bualu ebu nsubu ya mabue masonga inuakuibaka, kanuena nushikamamu; tumuma tuimpe tua nvinyo tunuakukuna, kanuena nunua nvinyo yatu. Bualu bua ndi mumanye ne malu mabi enu adi mavule, ne mibi yenu idi mihite bukole; nuenu nudi nukengesha badi bakane, nudi nuangata mbueshilu, nudi nusesuishe bahele ku tshibuelelu tshia musoko. Nunku muntu udi ne budimu neahuwe mu tshikondo atshi, bualu bua ntshikondo tshibi. Kebai malu makane, kanukebi malu mabi, bua nuenu nuikale ne muoyo; nunku Yehowa, Nzambi wa misumba, neikale nʼenu, bu munutu nuamba. Kinai malu mabi, nangai malu mimpe, jadikai kulumbulula kuakane ku tshibuelelu tshia musoko. Bumue Yehowa, Nzambi wa misumba, nealeshe luse luandi kudi ba mu tshiota tshia Yosefe badi bashala ne muoyo. Nunku Yehowa, Nzambi wa misumba, Mukelenge, udi wamba ne, Muadi newikale mu misesu minene yonso, ne mu misesu yonso bantu nebambe ne, Aka! Aka! Nebabikile ba bidime bua kuasabo madilu, nebabikile bena kasala bonso badi bamanye mua kudila muadi. Yehowa udi wamba ne, Mu madimi onso a tumuma tua nvinyo nemuikale muadi; hualu bua nempite munkatshi muenu. Mulau unukuate nuenu badi ba sue dituku dia Yehowa dimuenekele! Nudi ntekemena tshinyi mu dituku dia Yehowa? Didi mîdima, kadiena munya nansha. Didi bu muntu munyeme nyama wa ntambue ne udi usambakena ne nyama wa nkashama! Anyi didi bu muntu mubuele mu nsubu muandi, muteke tshianza tshiandi ku tshimanu tshia nsubu, ne nyoka udi umusuma! Kanuena bamanye ne dituku dia Yehowa nedikale mîdima, kadiyi ne munya, anyi? Didi mufitu, kadiyi ne dinkenke nansha kakese. Ndi mbenga bidia bienu bia disanka, bidi bintonda; tshiena ngunvua disanka hua masangisha enu. Bulelela, nansha binuafila milambu yenu kundi mudi nungoshila, ne milambu yenu ya bia kudia, tshiena ngiyitabusha; tshiena ntangisha mesu anyi ku milambu yenu ya bimuna bidi ne manyi bua kuyuisha nʼai ditalala. Umukai kundi ne mutoyi wa misambu yenu, tshiena nteleja matshu anyi ku muadi wa bisanji bienu. Kadi kulumbulula kuakane kuhueke hanshi bu mai, ne buakane buikaleku bu musulu udi uhueka tshiendelele. Nuenu Bena Isalele, nuakulua budi ne milambu ya nyama minshihela ne ya bia kudia bidimu makumi anai mu tshihela, anyi? Kadi nuakuambula ntenta wa mukelenge wenu, ne tshitekelu tshia mpingu yenu, mutoto wa nzambi wenu binuakudifudila. Nunku meme nennutume mu buhika mu buloba budi buhita Damaseke kule. Yehowa, Nzambi mene wa misumba, udi wamba dî edi. Mulau wikale kudi badi bashikame talalâ mu Siona bu badi kabayi ne bualu, ne kudi badi bashikame mu mukuna wa Samalea bu badi kabayi ne ntatu, bantu baneme ba munkatshi mua bisamba binene bia bantu, kudibo baya kudi Bena Isalele! Hitai tô ne ku Kalene, nutangile; umukaiku, nuye ku Hamata munene; hashishe, nuhueke tô ne ku Gata wa Bena Peleshete. Bobo badi bahita makelenge enu â buakane, anyi? Buloba buabo budi buhita buenu bunene, anyi? Nuenu badi bakeba kusemesha dituku adi dibi kule, ne badi basemesha bukokeshi bua tshimbambila ha buihi. Badi balala ha malalu a mibanga, ne badi badiolola ha matanda; badi badia bana ba mikoko ba mu tshisumbu tshia mikoko, ne bana ba ngombe ba mu tshikumbi. Badi bimba misambu ya tshimbimba ne lunzenze, badi badienzela bisanji bu muakenza Davidi. Badi banuina nvinyo mu malonga, badi badilaba manyi a mushinga mukole hamʼbidi; kadi kabena banyingalasha mitshima yabo bualu bua kubutuka kua Yosefe! Bua mianda ai nebadianjile kubuela mu buhika, ne mbila ya disanka ya bakadi badiolola ha matanda neyijimine. Mukelenge Yehowa wakuditshiha, yeye muine; Yehowa, Nzambi wa misumba, udi wamba ne, Dihetu dia Yakoba didi dintonda, ndi nkina nsubu yandi ya bunfumu; nunku nenfile musoko ne bintu bionso bidimu kudi badi nʼau lukuna. Halua tshikondo atshi, bikala bantu dikumi mu nsubu umue, nebafue biabo. Halua muanʼabo ne muntu mufue bua kumuambula, yeye mene ngudi ne bua kuosha tshitalu tshiandi, ne hambeye kuhatula mifuba yandi ha mbelu, neakose munga muntu udi munda mua nsubu ne, Muntu mukuabo udi nʼebe, anyi? Wakonkeye nunku neitabe ne, Nansha. Hashishe, mukuabo neamuambile ne, Huwa biebe talalâ, bualu bua katuena bamanye mua kutela dina dia Yehowa. Nunku monai, Yehowa udi wela mukenji ne, Nebauhule nsubu munene tô ne hashaleye tshibû, ne nsubu mukese tô ne hashaleye buloba. Tubalu tudi mua kunyemena lubilu ha mabue, anyi? Muntu udi mua kuendeshelahu ngombe bua kukoka lukasu lua kudima nʼalu, anyi? Bua nuenu nuakukudimuna kulumbulula kuakane bu nyongangandu, ne mamuma a buakane bu bululu! Nuenu nudi nusankila mu tshintu tshia tshianana, nudi nuamba ne, Tuetu bine nkayetu katuena badiangatshile bukole ku makanda etu, anyi? Yehowa, Nzambi wa misumba, udi wamba ne, Nunku monai, nembishe tshisamba tshikuabo tshilualua kunuluisha, nuenu tshisamba tshia Bena Isalele; tshiotshi netshinukengeshe ku tshibuelelu tshia ku Hamata tô ne ku kasulu ka Alabâ. Mukelenge Yehowa wakandesha tshikena kumona etshi: Monai, yeye wakadi utuma mikumbi ku tshibangidilu tshia kutoloka kuibidi kua bia kudia; monai, kuakadi kutoloka kuakalonda bia kudia biakanowelabo mukelenge. Hakashikishayi kudia mashinde onso a ha buloba, nakamba ne, Mukelenge Yehowa, ndi nkutendekena ne, Ubabuikidile mibi yabo. Yakoba neashindame munyi? Bualu bua udi mushale anu mubalê. Yehowa wakakudimuna mutshima wandi bua muanda eu; Yehowa wakamba ne, Kawena wenjibua nansha. Mukelenge Yehowa wakandesha tshikena kumona etshi: Monai, Mukelenge Yehowa wakela dî bua kutuma kahia; ne kakakamisha mai manene, kakadi kamba kuhidisha buloba kabidi. Hashishe, nakamba ne, Mukelenge Yehowa, ndi nkutendekena ne, Wanji kulekela. Yakoba neashindame munyi? Bualu bua yeye udi mushale anu mubalê. Yehowa wakakudimuna mutshima wandi bua muanda eu; Mukelenge Yehowa wakamba ne, Muanda eu kahidi kawena wenjibua. Yeye wakandesha tshikena kumona etshi: Monai, Yehowa wakadi muimane ha mutu ha lumbu luakaludikabo diambedi ne nshinga udi ne tshiamu tshia plomb, luidi elu lua plomb luikale mu tshianza tshiandi Yehowa wakankonka ne, Amosa, udi umona tshinyi? Nakamba ne, Luidi lua plomb. Ka Yehowa wakamba ne, Mona, nendembeleshe plomb munkatshi mua bantu banyi Bena Isalele; tshiena mbabuikidila bubi kabidi. Bitendelelu bia Isaka bia ha mikuna nebibutudibue; bitendelelu bia Bena Isalele nebiuhudibue; nembike bua kubunda tshiota tshia Yalobama ne muele wa nvita. Hashishe, Amasaya, muakuidi wa ku Betele, wakatumina Yalobama, mukelenge wa Isalele, dî ne, Amosa wakulelela tshifufu tshibi munkatshi mua tshisamba tshia Bena Isalele; buloba kabuena mua kulama mei andi onso. Bualu bua Amosa udi wamba ne, Nebashihe Yalobama ku muele wa nvita, nebaye ne Bena Isalele mu buhika babumushe mu buloba buabo. Amasaya wakambila Amosa kabidi ne, Wewe mumonyi wa malu, ya biebe, nyemene ku buloba bua Yuda, diaku bidia, ambaku mei ebe a buprofete. Kadi kuedi dî diebe kabidi mu Betele tshiendelele; bualu bua eu mmuaba wa tshijila wa mukelenge, ne mbalasa wandi wa bukelenge udimu. Mu diba adi Amosa wakakudimuna Amasaya di ne, Tshiena muprofete, ne tshiena muana wa muprofete; kadi ndi mulami wa bimuna ne musangishi wa tumuma tua mitshi yê sycomore. Yehowa wakangangata hanakadi ndama bimuna, ne Yehowa wakangambila ne, Ya biebe, ambila bantu banyi Bena Isalele dî diebe dia buprofete. Wewe unvua dî dia Yehowa; wewe udi wamba ne, Kuambi dî dia kuhisha nʼadi Bena Isalele, kuhatudi dî diebe bua kuhisha ba mu tshiota tshia Isaka. Nunku Yehowa udi wamba ne, Mukashi webe neikale mukashi wa masandi mu musoko eu, ne bana bebe ba balume ne ba bakashi nebashihibue ku muele wa nvita; nebabanyangane buloba buebe ku luidi. Wewe muine neufue mu buloba bubiha, nebaye ne Bena Isalele mu buhika, babumushe mu buloba buabo. Mukelenge Yehowa wakandesha tshikena kumona etshi: Monai, tshibondo tshia mamuma mabobe. Yeye wakankonka ne, Amosa, udi umona tshinyi? Nakamuitaba ne, Tshibondo tshia mamuma mabobe. Hashishe, Yehowa wakangambila ne, Nshikidilu wakufika kudi bantu banyi Bena Isalele; tshiena mbabuikidila bubi kabidi tshiendelele. Mukelenge Yehowa udi wamba ne, Misambu ya mu nsubu wa mukelenge neyandamuke miadi dituku adi. Bitalu bia bafue nebikale bia bungi; nebabimashe mu miaba yonso, bahuwe talalâ. Unvuai bualu ebu, nuenu badi badiata bakengi mu makasa, ne badi babutule bahele ba mu ditunga, nuambe ne, Ngondo neafue diba kai bua tumanye mua kuhana manvua? Dituku dia Lumingu nedishike diba kai bua tumanye mua kuhatula blé ya kuhana, tukeheshe tshihiminu tshia épha ne tubandishe mushinga wa blé, tudinge bantu ne tshidikishilu tshia mafi; bua tusumbe bahele ku tshiamu tshia argent ne bakengi ku bisabata bibidi, ne bua tuhane bisote bia blé bu blé miakane? Yehowa wakuditshiha ku bulengele bua Yakoba ne, Bulelela, tshiena mpua bienzedi biabo bionso muoyo tshiendelele. Buloba kabuena mua kuzakala bua muanda eu, anyi? Bonso badi bashikamemu kabena mua kuasa miadi, anyi? E, buloba buonso nebubande bu mudi musulu wa Nile ubanda; nebunyungishibue, nebuhueke kabidi bu mudi musulu wa Ejipitu wenza. Mukelenge Yehowa udi wamba ne, Hamueneka malu â dituku adi, nengenzeshe diba bua kubueladi munda munya, nenfikishe buloba hatshidi diba mulu. Nenkudimune bikondo bienu bia kudia bia disanka bua kulabi bu bia madilu, ne misambu yenu yonso bua kuluayi miadi; nenvuadike bantu bonso bilulu bikayabala mu bifuka biabo, nentule dibala ha mutu wonso; nenvuishe tshikondo atshi bu tshia madilu adibo bashila muana umuehele muledibue, ne kunshikidilu kuatshi nekuikale bu dituku dia kanyinganyinga kakole. Mukelenge Yehowa udi wamba ne, Monai, mu matuku ulualua, nentume tshiole mu buloba, tshidi katshiyi bu tshiole tshia bia kudia, ne nyota idi kayiyi bu nyota ya mai, kadi ntshiole tshia kunvua mei a Yehowa. Nebendakane ku mai manene tô ne ku mai manene makuabo, ne ku node tô ne ku esete; nebendakane eku ne eku bua kukebabo dî dia Yehowa, kadi kabena badisangana. Mu dituku adi mishikankunde ya mpala mimpe ne bansongalume nebahungile ne nyota. Badi baditshiha ku bubi bua Samalea, bamba ne, Wewe Dana, bu mudi nzambi webe ne muoyo! Bu mudi nshila wa ku Bê-sheba mutshikaleku, bobo aba nebahone hanshi, kabena bajuka kabidi tshiendelele! Nakatangila Yehowa muimane ha buihi ne tshioshelu; yeye wakamba ne, Kuma ku mitu ya makunshi a ku bibuelelu bia nsubu bua azakale; wâtshibule bituha ha mitu ha bantu bonso; nenshihe bakuabo badi bashala ne muoyo ku muele wa nvita, kakuena umue wabo wanyema, kakuena umue wabo wahanduka. Nansha biumbulabo dina tô ne ku Muaba wa Bafue, tshianza tshianyi netshibakuateku; nansha biabandabo tô ne mu diulu, nembatulule hanshi. Nansha biabutamabo ku mutu kua Kâmele, nembakebeku ne nembakuate bua kubumushaku; nansha biasokomabo ku mesu kuanyi mu ndondo wa mai manene, nengele nyoka dî mu muaba wawa bua yeye abasume. Nansha biayabo mu buhika hatungunusha ku mpala kudi badi nʼabo lukuna, mu muaba au nengele muele wa nvita dî, bua wowo ubashihe; nentangishe disu dianyi kudibo bua kubenzela bibi, kembua kubenzela bimpe. Bualu bua Yehowa, Nzambi wa misumba, nyeye udi ulenga buloba tshianza ne budi buvingutuka, ne bonso badi bashikamehu badi basa muadi. Buloba buonso budi bubanda bu mudi musulu wa Nile ubanda, budi buhueka kahidi, bu mudi musulu wa Ejipitu uhueka. Nyeye udi wibaka nsubu yandi mu diulu, udi ujadika diulu diandi didi ha mutu ha buloba; udi Ubikila mai a mu mai manene kudiye, udi wahongolola hanshi ha buloba; Yehowa ndina diandi. Yehowa udi ukonka ne, Nuenu Bena Isalele, kanuena bu bana ba Bena Atiopa kundi, anyi? Tshiakaluhula Bena Isalele mu buloba bua Ejipitu, ne Bena Peleshete ku Kefetô ne Bena Sulia ku Kî, anyi? Monai, mesu a Yehowa Nzambi adi matangishe ku bukelenge budi ne malu mabi; nembubutule ne nembûmushe hanshi ha buloba; kadi tshiena mbutula tshisamba tshia Yakoba kabutu nansha. Yehowa udi wamba nunku. Monai, nengele dî dianyi, nennyungishe tshisamba tshia Bena Isalele munkatshi mua bisamba bionso, bu mudi muntu usenga manvua mu munyingu, diteta nansha dimue kadiyi dihona hanshi. Nebashihe bantu babi bonso ba munkatshi mua bantu banyi ku muele wa nvita, babo bamba ne, Bualu bubi kabuena butuheta, kabuena bufika kutudi nansha. Mu dituku adi nengibake kabidi nsubu wa Davidi wakadi muhuke, nengibake kabidi bituha bia bimanu biandi bidi bishimbuke; nengibake bituha biandi biakanyanguka, nemmuase bua kuikaleye bu muvueye diambedi. Bua bebe bangate difuka dia Bena Edome didi dishala ne ba mu bisamba bionso bidi dina dianyi ditedibue munkatshi muabo; mmudi Yehowa, udi wenza muanda eu, wamba. Yehowa udi wamba ne, Monai, matuku alualua adi mudimi ne munowi balondangane ha buihi, ne mudiatshi wa tumuma tua nvinyo neihatshile mukunyi wa maminu; mikuna minene neyimatshishe nvinyo mishemakane, ne mikuna mikese yonso neyihatuke mai. Nengumushe bantu banyi Bena Isalele mu buhika bua kubaha diakalengele, nebibake kabidi misoko yakadi bikulu, nebashikamemu; nebakune tumuma tua nvinyo mu madimi, nebanue nvinyo yatu; nebadime madimi, nebadie mamuma aluamu. Meme nembajadike mu buloba buabo mene; kabena bumushibue kabidi mu buloba bunakubaha. Yehowa Nzambi webe udi wamba mei â. Tshikena kumona tshia Obadaya. Mukelenge Yehowa udi wamba dî edi bualu bua Bena Edome ne, Tuakunvua lumu lufume kudi Yehowa, ne bakutuma muloho munkatshi mua bisamba bia bantu, wamba ne, Jukai, tuyai kuluangana ne Bena Edome. Mona, nakukuvuisha bu tshisamba tshikese munkatshi mua binga bisamba, wewe udi muhetudibue bikole. Dihetu dia mu mutshima webe diakukudinga, wewe udi mushikame mu miaba mikole ya mu mabue, udi ne tshishikaminu tshiebe mulu, udi wamba munda munda ne, Nganyi wampuekesha hanshi? Yehowa udi wamba ne, Nansha biwahahala mulu bu mudi nyunyu wa mukanku wenza, nansha bikala disua diebe dibakibue munkatshi mua nutoto mene, nenkutulule hanshi ku muaba au. Bialua bibi, nansha banyengi, kûdi bufuku, tangila bu mudibo bakubutula! Kabena biba bintu tô ne hakumbanabi, anyi? Bialua bahuodi ba tumuma tua nvinyo kûdi, kabena bashiya tumuma tua kuhumbulula, anyi? Monai mudibo bahaule Bena Esau, ne bu mudi biuma bia mu tshibutshilu tshiabo bisokolodibue! Bonso bakadi bahunga nʼebe tshihungidi bakukuihata tô ne ku butshika bua buloba buebe, bakadi bashikama nʼebe talalâ diambedi bakukutungila tshitungu, bakukuhita bukole, bakadi badia bidia biebe bakukuteya. Wewe kuena ujingulula malu â. Yehowa udi wamba ne, Tshiena nshiha bena meji ba mu Edome dituku adi, anyi? Tshiena ngumusha bajinguludi ba malu ku mikuna ya Esau, anyi? Temena, bena bukitu bebe nebakuatshike buowa, ne muntu yonso neashihibue ne neumushibue ku mukuna wa Esau. Bua tshimbambila tshiwakenzela muanʼenu Yakoba, bundu nebukukuate, ne neubutudibue tshiendelele. Mu dituku adi diwakimana mutangilangane nʼabo, dituku adi mene diakaya bantu ba bende ne bmtu biandi kuabo, ne ba mu bisamba bia bende bakabuela ku bibi biandi, bakela nshobo bua bintu biakahaulabo mu Yelushalema, wewe mene wakadi bu umue wabo. Kadi kuvuishi dituku dia makenga a muanʼenu bu dituku dia disanka, kusanki bua makenga a Bena Yuda mu dituku dia kubutuka kuabo, kubaseki dituku dia ntatu yabo. Kubuedi mu tshibuelelu tshia bantu banyi dituku dia dikenga diabo; kusanki hawatangila bualu bubi budi bubakuata dituku dia dikenga diabo, kuolodi tshianza tshiebe ku biuma biabo dituku dia dikenga diabo. Kuimanyi mu masanga a nshila bua kushiha bana babo badi bahanduka, kufidi bana babo badi bashala ne muoyo kudi bena lukuna dituku dia ntatu yabo. Bualu bua dituku dia Yehowa didi ha buihi dilongoluela bisamba bionso bia bantu, bu muwakenza biebe, mbu mudibo bakuenzela, bienzedi biebe nebikuhingane. Bu munuakunua makenga ha mukuna wanyi wa tshijila, ba mu bisamba bionso bia bantu nebânue habo tshiendelele, e, nebanue, nebamine, nebikale bu bantu badi kabayi banze kuikalaku. Kadi mu mukuna wa Siona nemuikale tshisumbu tshia bantu bahanduke, ne wowo newikale wa tshijila, ne ba mu tshisamba tshia Yakoba nebahete buhianyi buabo kabidi. Bena Yakoba nebikale kahia, ne Bena Yosefe nebikale ludimi lua kahia, ne Bena Esau nebikale bisonsa, ne bobo nebaboshe, nebabashidishe, kakuena muntu umuehele washala kudi Bena Esau, bualu bua Yehowa nguakuamba dî edi. Badi ku luseke lua Sude nebadiangatshile mukuna wa Esau, badi mu Tshibanda nebadiangatshile buloba bua Bena Peleshete, nebadiangatshile madimi a mu Efelayima, ne madimi a mu Samalea, ne Benyamina neadiangatshile Gilada. Bahika bakadi mu busalayi ebu bua Bena Isalele nebadiangatshile buloba buakadi nʼabu Bena Kanâna tô ne ku Salefata, ne ba mu Yelushalema bakadi mu buhika ku Sefalada nebadiangatshile misoko ya mu Sude. Bahikudi nebabande ha mukuna wa Siona bua kulumbuluisha mu mukuna wa Esau, ne bukelenge nebuikale bua Yehowa. Dî dia Yehowa diakalua kudi Yona, muana wa Amitai, diamba ne, Bika, ya ku Ninewe, musoko au muneme, ûbele; bualu bua bubi buabo buakubanda ku mesu kuanyi, Kadi Yona wakabika bua kunyemeneye ku Tâshishi bua kumuka ku mesu kua Yehowa. Wakahueka ku Yopa, wakasangana buatu buamba kuya ku Tâshishi; wakafuta mushinga wa luendu, wakabuela mu buatu bua kuyeye ne bena buatu ku Tâshishi, unyema Yehowa. Kadi Yehowa wakatuma tshihehele tshikole ha mai manene, ne tshihuhu tshikole tshiakadi ha mai manene; buatu buakamba kutshibuka. Hashishe, bena buatu bakakuatshika buowa, muntu ne muntu wakadila kudi nzambi wandi; bakahatula bintu biakadibo nʼabi mu buatu ne bakabiela mu mai manene bua kubuhehesha. Kadi Yona wakadi mumane kuhueka mu nsubu mukuabo wa munda mua buatu, wakadi mulale tulu tukole. Nunku kapitene ka buatu kakalua kudiye, kakamuebesha ne, Ahu, wewe udi muladile tulu tshinyi? Juka biebe, bikila dina dia nzambi webe; bumue nzambi au nele meji a bualu buetu, bua tuetu katufu nansha. Bakambilangana ne, Tuye kuela nshobo bua kumanya ne bualu ebu bubi budi butukuata mbua nganyi? Nunku bakela nshobo, nshobo yakakuata Yona. Hashishe, bakamuambila ne, Tudi tukusengelela bua wewe kutuambila ne muanda eu udi mutukuate mbua bubi bua muntu kai? Mudimu webe udi tshinyi? Udi mufume kudi kunyi? Buloba buebe budi hanyi? Udi wa tshisamba kai? Yeye wakabakudimuna ne, Ndi Muena Ebelu; ndi ntshina Yehowa, Nzambi wa mu diulu, wakafuka mai manene ne buloba bûme. Hashishe, bantu aba bakatamba kutshina bakamuambila ne, Tshiudi muenzele nunku ntshinyi? Bua bantu aba bakamanya ne yeye wakadi unyema Yehowa, bualu bua wakamana kubambila nunku. Hashishe, bakamuebesha ne, Tukuenzele tshinyi hua mai manene abatame? Bualu bua mai manene akadi abisha mavuala. Nunku yeye wakabambila ne, Nungambule nungele mu mai manene, bua mai manene abatame; bualu bua ndi mumanye ne tshihuhu etshi tshinene tshidi tshinukuate bua bualu buanyi. Kadi bena buatu bakita bikole bua kuhingasha buatu ku mpata hadi bakahanga; bualu bua mai manene akabisha mavuala matambe bunene ku mpala kuabo. Bua muanda eu bakadila kudi Yehowa, bamba ne, Yehowa, tudi tukusengelela, kuitabushi bua tuetu kufua bua muntu eu, kuteki mashi a muntu udi kayi muhishibue hamʼbidi hetu; bualu bua wewe Yehowa, wakuenza bu muwakadi mumone ne mbimpe. Nunku bakambula Yona, bakamuela mu mai manene, ne mai manene akalekela kubisha mavuala manene. Hashishe bantu aba bakatshina Yehowa bikole, bakafila milambu kudi Yehowa, bakaditshiha mitshihu. Yehowa wakalongolola munyinyi munene wa mu mai bua kuminau Yona; ne Yona wakadi munda mua munyinyi wa mu mai minya isatu ne mafuku asatu. Mu diba adi Yona wakatendelela Yehowa Nzambi wandi hakadiye munda mua munyinyi wa mu mai, wakamba biandi ne, Mu dikenga dianyi nakela dî dianyi kudi Yehowa, ne yeye wakitaba kundi; mu Muaba wa Bafue nakadila kûdi, ne wewe wakunvua dî dianyi. Bualu bua wewe wakadi mungele mu ndondo wa mai, munkatshi mua mai manene mene, mai akannyunguluka ku nseke yonso; mavuala ebe ne mambuanka ebe onso akahita ha mutu hanyi. Nakuamba ne, Bakungihata ku mesu kuebe, kadi nentangishe mesu anyi kabidi ku ntempelo webe wa tshijila. Mai akannyunguluka amba kujimisha muoyo wanyi; ndondo wa mai manene wakannyunguluka; ndau yakanjingila ku mutu wanyi. Nakadila tô ne ku bitaku bia mikuna; ku buloba budi ne nkanu minsuike tshiendelele. Kadi wewe wakahatula muoyo wanyi mu Dijimba, Yehowa Nzambi wanyi! Hakadi muoyo wanyi muhungile, nakavuluka Yehowa; kulomba kuanyi kuakufika kûdi mu ntempelo webe wa tshilua mene. Badi beyemena mpingu ya hatuhu idi ibadinga badi balekela Mubafuidi wa luse. Kadi meme hanyi nenfile milambu kûdi ne dî dia disanka; nenfile bintu bi nakuditshiha hua kukuha. Luhandu ludi lufuma kudi Yehowa. Hashishe, Yehowa wakela munyinyi au dî diandi ne munyinyi wakaluka Yona ku mpata. Dî dia Yehowa diakalua kudi Yona tshiakabidi ne, Bika, ya biebe ku Ninewe, musoko au munene, ubambile mei andi nkuambila. Nunku Yona wakabika, wakaya ku Ninewe, bu muakamba Yehowa. Ninewe wakadi musoko muhite bunene, wakadi luendu lua matuku asatu bua kûnyunguluka. Yona mumane kuenda luendu lua dituku dimue munda mua musoko, wakabanga kuela dî ne, Hahita matuku makumi anai, nebabutule Ninewe. Bena Ninewe bakitabusha mei a Nzambi; bakajila bia kudia, bakaluata bivualu bikayabala, kubangila kudi baneme tô ne kudi bahuekele. Hakafika lumu elu ku matshu a mukelenge wa mu Ninewe, yeye wakajuka mu nkuasa wandi wa bukelenge, wakavula tshivualu tshiandi tshia bunfumu, wakaluata bivualu bikayabala, wakashikama mu butue. Wakela mukenji ne wakelesha dî mu nseke yonso ya Ninewe, wamba bu muakamba mukenji wa mukelenge ne bantu bandi banene ne, Kabalabudi tshintu kudi muntu anyi kudi nyama, kudi ngombe anyi kudi mikoko; kabidi tshia kudia, kabinu mai. Biluate bivualu bikayabala, bantu ne bimuna bidile bikole kudi Nzambi; muntu ne muntu umuke mu nshila wandi mubi, alekele kuenza malu makole adi bianza biandi biamba kuenza. Nganyi udi mumanye ne, Yehowa neakudimune mutshima wandi ne nealekele tshiji tshiandi tshikole, bua tuetu katufu? Nzambi wakamona bienzedi biabo, bu muakalekelabo nshila wabo mubi; ne Nzambi wakakudimuna mutshima wandi bua muanda mukole wakambeye diambedi ne, Nembenzele; yeye kakawenza nansha. Kadi muanda eu wakafikisha Yona munda bikole, ne yeye wakakuatshika tshiji. Wakatendelela biandi Yehowa, wakamba ne, Yehowa, ndi ukukonka ne, Tshiakamba dî edi hantshivua mu buloba buanyi, anyi? Bua muanda eu nakadianjila kunyemena ku Tâshishi; bualu bua nakamanya ne wewe udi Nzambi wa luse, mûle tente ne dinanga, kuyi ukuatshika tshiji lubilu, udi ulesha bantu luse lujalame lukumbane, udi ukudimuna mutshima webe bua dikenga kadikuatshi bantu. Nunku Yehowa, ndi nkusengelela ne, Angata muoyo wanyi; bualu bua kufua kudi kuhita kushala ne muoyo buakane kundi. Yehowa wakamba ne, Udi wenza bimpe haudi ukuata tshiji nunku, anyi? Hashishe, Yona wakahatuka mu musoko, wakashikama mu muaba wakadi mutangilangane ne musoko ku luseke lua esete ne wakadibakilaku tshitandatanda, wakadi mushikame muinshi mua dileshi diatshi bua kumoneye ne malu kai akuata musoko. Yehowa Nzambi wakamenesha mudiantondo, wakaulehesha tô ne ha mutu ha Yona, bua wikale dileshi ha mutu handi bua kumûmushila lutatu luandi. Nunku Yona wakatamba kusanka bua mudiantondo. Kadi hakatshiabu, Nzambi wakatuma tshishi tshiakadia mudiantondo, wakafubidila. Hashishe, hakabanda diba, Nzambi wakatuma luhehele lua munanga lua ku esete; munya wakosha Yona mu mutu bikole, yeye wakahungila, wakalomba Nzambi ne, Nfue bianyi; wamba kabidi ne, Kufua kudi kuhita kushala ne muoyo buakane kundi. Nzambi wakebesha Yona ne, Udi wenza bimpe haudi ukuata tshiji nunku bua mudiantondo, anyi? Yeye wakamuandamuna ne, Ndi ngenza bimpe bua kuikala nʼatshi tô ne ku lufu. Hashishe, Yehowa wakamuambila ne, Wewe udi unyingalala bua mudiantondo, ûdi kuyi mukuatshile mudimu, kuyi mudiundishe; mumene bufuku bumue, ekufua bufuku bukuabo. Ne meme tshiakadi ne bua kunyingalala bua Ninewe, musoko au munene, mudi bantu binunu lukama ne makumi abidi badi kabayi mua kujingulula tshianza ne ntshia balume ne ntshia bakashi, ne mudi bimuna bia bungi kabidi, anyi? Dî dia Yehowa diakalua kudi Mika, Muena Molesheta, mu matuku a Yotama, Ahaza ne Hezikiya, bakelenge ba Yuda, bualu bua Samalea ne Yelushalema. Unvuai, nuenu bantu, buonso buenu; telejaiku, wewe buloba ne bintu biebe bionso. Mukelenge Yehowa, Mukelenge mu ntempelo wandi wa tshijila, anuleshe. Monai, Yehowa udi uhatuka mu muaba wandi, neahueke hanshi ne neadiate ha mitu ha mikuna ya ha buloba. Mikuna neyivingutuke muinshi mua makasa andi, bibanda nebihandike mitanta, bu dihula mu kahia, bu mai ahueka ha tshibungubungu. Bua kutomboka kua Bena Yakoba malu â onso adi alua, ne bua mibi ya tshisamba tshia Bena Isalele. Kutomboka kua Bena Yakoba ntshinyi? KanSamalea, anyi? Bubi bua Bena Yuda budi tshinyi? KanYelushalema, anyi? Bua malu â nenvuishe Samalea bu mushiki wa mabue mu budimi, bu madimi a kukuna tumuma tua nvinyo. Nembungulushe mabue andi mu tshibanda, nemmueneshe bishimikidi biandi hatoke tô. Nebatshibule mpingu yabo yonso misonga bituha, neboshe bintu biabo bionso biakafilabo kudi mpingu mu kahia, ne nembutule mpingu yabo yonso yakafulabo. Bualu bua bakabiheta ku difutu dia mukashi wa masandi, nebihingane kudi mukashi wa masandi bu difutu diandi. Bua muanda eu nengase muadi, nendile, nengende butaka ne ku makasa kutuhu; nengase muadi bu wa mibuabua, nendile ne kudila bu kua nyunyu wa nfiondo. Bualu bua mputa wakumutahabo kena mua kuondahibua, bualu bua wakufika tô ne ku Yuda; wakufika ku tshibi tshidi bantu hanyi babuelela, ku Yelushalema mene. Kanuambi bualu ebu mu Gata, kanudidi nansha. Mu Betele-afela nudibonde mu dinfuenkenya. Hita biebe, muana mukashi udi mushikame butaka, udi mufuishibue bundu mu musoko wa Shafila. Muana mukashi wa mu musoko wa Sânana kena muanji kuluhukamu. Muadi wa Bete-esele neunuhumbishe bua kuimana hehi nʼandi. Muana mukashi udi mushikame mu Malota udi uhampakana hadiye windila lumu luimpe. Bualu bua dikenga difume kudi Yehowa diakufika tô ne ku tshibuelelu tshia ku Yelushalema. Suika makalu ku tubalu tudi tuenda lubilu, wewe muana mukashi udi mushikame ku Lakisha. Wewe wakadi tshibangidilu tshia bubi kudi muana mukashi wa mu Siona, bualu bua bakasangana malu mabi a Bena Isalele kûdi. Nunku bûdi nʼabu mbua kufila tshintu tshia kulayangana nʼatshi kudi Molesheta-Gata. Nsubu ya Akiziba neyilue tshilenduishi kudi bakelenge ba Isalele. Wewe, muana mukashi udi mushikame mu Malesha, nendue kukuha muntu udi ukuhiana. Butumbi bua Isalele nebulue ku Adulama. Dikungula mutu, kosa nsuki yebe yonso, bua kujinga bana baudi usankila; ubeye dibala mu mutu bu dia nyunyu wa mukanku, bualu bua nebumushibue kûdi bua kuya mu buhika kule. Mulau wikale kudi badi belangana meji a kuenza bibi, ne badi bahangidisha malu mabi munda muabo ha malalu abo! Hatshiabu badi benza malu â, bualu bua bukole bua kuaenza budi mu bianza biabo. Badi bakuma mitshima yabo ku madimi a bakuabo, badi bânyenga; ne ku nsubu ya bende, badi bayinyenga. Badi bakengesha muntu ne ba mu nsubu wandi, muntu mene ne buhianyi buandi. Bua malu â Yehowa udi wamba ne, Monai, ndi nnuhangidishila, nuenu ba tshisamba etshi, dikenga dinudi kanuyi mua kumusha ha nshingu yenu, ne kanuena nuenda ne dihetu, bualu bua tshikondo etshi netshikale tshibi. Mu dituku adi nebanusendeke, nebanubingile bikole, bamba ne, Tuakubutudibua kabutu; yeye wakuha bakuabo buhianyi buetu; ke bu mudiye mubûmushe kutudi! Udi wabanyina bantombueshi madimi etu. Nunku mu disangisha dia Yehowa kanuena nuikala ne muntu wanutahuluila buloba bua buhianyi buenu nansha. Badi bambila baprofete ne, Lekelai tshiakulakula tshienu; lekelai kuakula malu â; bihendu kabiena bishika. Nebamanye mua kunukonka, nuenu Bena Yakoba, ne, Nyuma wa Nzambi kena ne lutulu, anyi? Ebi mbienzedi biandi, anyi? Mei andi kaena alengesha muntu udi wenda mu buakane, anyi? Kadi anu makelela bantu banyi bakubika bu bena lukuna kundi. Nudi nuvula tshilamba tshia ha mutu ha bivualu bia badi bahita mu nshila talalâ, kabayi basue nvita. Nudi nuihata bakashi ba bantu banyi mu nsubu yabo mudibo ne disanka; nudi nunyenga butumbi buanyi kudi bana babo batekete tshiendelele. Jukai, yai bienu! Ebu kembuloba bua nuenu kuikisha; bualu bua bubi buenu nenubutudibue kabutu! Bianudinga muntu ne mei a mashimi, wamba ne, Nennuambile mei bua nvinyo ne maluvu makole, yeye neikale muprofete wa bantu aba. Bulelela, nensangishe bana benu bonso, Yakoba; bulelela, nensangishe difuka dia Bena Isalele hohamue; nembasangishe hohamue bu mikoko mivule mu luhangu, bu tshisumbu tshia mikoko mu mpata wai wa mashinde, nebikale ne mutoyi bualu bua bungi buabo. Muhandi wa lumbu neadianjile ku mpala kuabo; nebabande lumbu ne nebahitshile mu nshila wa ku tshibi, nebahatukilemu. Mukelenge wabo neadianjile ku mpala kuabo, ne Yehowa neikale ku mutu kuabo. Nakamba kabidi ne, Ndi nnutendekena bua nunvue bienu, nuenu nudi ha mutu ha Bena Yakoba, ne badi bakokesha Bena Isalele; munyi munudi kanuyi bamanye mua kulumbulula biakane? Nuenu nudi ne buimpe lukuna ne nudi nunanga bubi; nudi mibulula dikoba dia bantu banyi, ne minyinyi ya ku mifuba yabo; nudi nudia munyinyi wa bantu banyi, nudi nubula dikoba diabo, nudi nutshibula mifuba yabo, nudi nubakosa mahunda mahunda, bu mudibo benza munyinyi wa kuela mu luesu, ne munyinyi wa nyama mu tshifuadi. Hashishe, nebadile kudi Yehowa, kadi yeye kena ubunvuila; yeye mene neusokoke mpala wandi kudibo mu tshikondo atshi, bualu bua bakuenza malu mabi. Yehowa udi wamba dî edi bualu bua baprofete badi babambuisha bantu bandi; badi bamba ne, Ditalala didiku hikalabo bukute; kadi hahanga muntu kubaha tshia kudia, badi balongolola bielelu bua kuya kuluangana nʼandi nvita. Nunku butuku nebunuidile, kanuyi numona kabidi bikena kumona, mîdima neyikaleku, bua nuenu kanumanyi mua kutempa mbuku; diba nedibuelele baprofete, ne munya newandamuke midima kudibo. Bamonyi ba malu nebatatakane, batempi nebakuatshike bundu; buonso buabo nebabuikile bianza ku mishiku, bualu bua Nzambi kena ubitaba. Kadi meme hanyi, ndi mule tente ne bukole bua kudi Nyuma wa Yehowa, ne dijingulula dia malu makane, ne bukole bua mutshima, bua kulesha Bena Yakoba malu mabi abo ne Bena Isalele bubi buabo. Ndi nnusengelela bua nunvue bienu muanda eu, nuenu badi ha mutu ha tshiota tshia Yakoba, ne bakokeshi ba tshisamba tshia Bena Isalele, badi bakina kulumbulula kuakane, badi banyanga malu makane. Badi bibaka Siona ne mashi, ne Yelushalema ne malu mabi. Badi ha mutu ha musoko budi balumbulula bilumbu anu bua mbueshilu, bakuidi badi bayisha anu bua difutu, ne baprofete badi bajingulula bantu malu anu bua kuheta argent. Kadi badi beyemena Yehowa, ne badi bamba ne, Yehowa kena munkatshi muetu, anyi? Bualu bubi kabuena mua kutukuata. Nunku bua bualu buenu nebabundulule Siona ne lukasu bu mudibo babundulula budimi; Yelushalema neikale bu mishiki ya mabue, ne mukuna wa ntempelo newikale bu mikuna ya muitu. Mu matuku alualua mukuna wa nsubu wa Yehowa neujadikibue bu mukuna wa ha mutu ha mikuna minene, neubandishibue ha mutu na mikuna mikese; ne ba mu bisamba bionso nebabuelemu. Ba mu bisamba bia bungi bia bantu nebalue, nebambe ne, Luai bienu, tubande ku mukuna wa Yehowa, tubuele mu nsubu wa Nzambi wa Yakoba; yeye neatuyishe bienzedi biandi, tuetu netuende mu nshila yandi; bualu bua diyisha nediluhuke mu Siona, ne dî dia Yehowa nedihatuke mu Yelushalema. Yeye nealumbulule bilumbu bu munkatshi mua bantu bu bungi, neakose bilumbu bia bisamba binene bia bantu bidi kule; bobo nebangate nuele yabo ya nvita, nebayifule nkasu ya kudima nʼai; nebangate mafuma abo, nebafule miele ya kulengesha nʼai matamba a mionshi ya tumuma tua nvinyo. Tshisamba tshikuabo tshia bantu katshiena tshibisha muele wa nvita bua kuluisha nʼau tshinga tshisamba; kabena mua kuyila lungenyi lua kuluangana nʼalu nvita kabidi. Kadi nebashikame, mu ntu ne muntu, muinshi mua muonshi wandi wa tumuma tua nvinyo ne muinshi mua mutshi wandi wa nfigi; kakuena muntu wabakuatshisha buowa; bualu bua mukana mua Yehowa wa misumba muakamba nunku. Bualu bua ba mu bisamba bionso batshidi benda muntu ne muntu mu dina dia nzambi wandi; kadi tuetu netuende mu dina Yehowa Nzambi wetu tshiendelele. Yehowa udi wamba ne, Mu dituku adi nensangishe tua benda bazobele, nenkunguishe bantu bakuihatabo, ne bantu banakukengesha. Nenyishe badi benda bazobele difuka dia tshisamba, nenvuishe bantu bakihatabo diambedi bu tshisamba tshinene, ne Yehowa neabakokeshe mu mukuna wa Siona ku dituku edi tô ne tshiendelele. Wewe, tshibumba tshia balami ba mikoko yanyi, mukuna wa muana mukashi wa Siona, bukokeshi nebufike kûdi; e, bukokeshi buwakadi nʼabu diambedi nebufike kûdi, bukelenge bua muana mukashi wa Yelushalema. Bualu kai udi ubandisha mei ebe a muadi mpindiu? Kakuena mukelenge munkatshi muenu, anyi? Mukulu wa meji wakufua, anyi? Bua bualu ebu kanyinganyinga kakukukuata bu ka mukashi udi ne didinyenga dia ha kulela munyi? Ukenge hebe, tantamana, ulele, wewe muana mukashi wa Siona, bu mukashi udi ne didinyenga dia ha kulela; bualu bua katataka neuluhuke mu musoko, neushikame mu mpata, neuye tô ne ku Babulona; ku muaba au nebakuhandishe, ku bianza bia badi nʼebe lukuna. Katataka bisamba bia bungi bia bantu badi badisangisha bua kukuluisha, badi bamba ne, Anyangibue, mesu etu ajoshe Siona mu dikenga diandi. Kadi kabena bamanye meji adi mu mutshima wa Yehowa, kabena bajingulula bualu budiye muhangidishe munda, kabena bamanye ne yeye wakubakunguisha bu bisumbu bia blé ku tshishihuidi. Bika biebe, ubashihule, wewe muana mukashi wa Siona, bualu bua nenvuishe lusengu luebe tshiamu, nenvuishe mikono yebe tshiamu tshia mitaku; ne wewe neuboteshe bantu ba bungi; neujidile luhetu luabo kudi Yehowa, ne biuma biabo kudi Mukelenge wa buloba buonso. Mpindiu udisangishe mu misumba, wewe muana mukashi, muena misumba; badi bakutshintshimika; nebakune mulumbuluishi wa Bena Isalele mulangala ku ditama. Kadi wewe, Betelehema Efelata, udi mukese munkatshi mua biota bia Yuda, mukuabo nealuhuke munda muebe bua bualu buanyi, bua kuikala mukokeshi wa Bena Isalele; tshibangidilu tshiandi tshidi tshia kale kale, tshia ku ntuadishila mene Nunku yeye neabafile mu bianza bia badi nʼabo lukuna tô ne ku tshikondo tshialela mukashi muana, ne hahingana difuka dia bana babo kudi Bena Isalele. Yeye neajalame, neadishe mikoko yandi mu bukole bua Yehowa, mu butumbi hua dina dia Yehowa Nzambi wandi. Yoyi neyishikame tshiendelele, bualu bua mu tshikondo atshi yeye neikale ne butumbi tô ne kunfudilu kua buloba. Yeye eu neikale ditalala dietu. Halua Muena Ashû mu buloba buetu, hadiateye mu nsubu ya bakelenge betu, hashishe, nembishe balami ba mikoko muanda mutekete ne bakokeshi muanda mukulu munkatshi mua bantu bua kumuihata. Nebabutule buloba bua Ashû ne muele wa nvita, ne buloba bua Nimeloda tô ne ku bibuelelu biabu. Yeye neatuhandishe kudi Muena Ashû halueye mu buloha buetu, hadiateye ku mikalu yetu. Difuka dia Yakoba nedikale munkatshi mua bisamba bia bungi bu mume mufume kudi Yehowa, bu kumata kua nvula ha mashinde, bidi kabiyi bindila dî dia muntu, ne bidi kabiyi bindila mei a bana ba balume ba bantu. Difuka dia Yakoba nedikale munkatshi mua bisamba bia bantu, munkatshi mua bisamba bia bungi, bu nyama wa ntambue munkatshi mua nyama ya muitu, bu muana wa ntambue munkatshi mua bisumbu bia mikoko; yeye mene, biahiteye munkatshi muai, udi widiata, udi wisunsula, ne kakuena muntu wayihandisha. Tshianza tshiebe tshitekeshe badi baluangana nʼebe, ne bonso badi nʼebe lukuna babutuke. Yehowa udi wamba ne, Mu dituku adi nembutule tubalu tuenu tudi munkatshi muenu, nentshibule makalu enu a nvita kabidi. Nenshihe misoko minene ya mu buloba buenu, nenshimbule ngumbu yenu yonso ya nvita. Nengumushe bia kutempa nʼabi mbuku mu tshianza tshienu; kanuena nuikala ne batempeshi ba mbuku kabidi. Nentshibule mpingu yenu ne bibumba bienu bia tshijila bua kubiumusha munkatshi muenu; ne kanuena nutendelela kabidi bintu binuakuenza ne bianza bienu. Nenjule mitshi yenu ya Bashela idi munkatshi muenu, nembutule misoko yenu. Nendisombuele ne njiya ne tshiji tshikole kudi ba bisamba bia bantu bidi kabiyi biunvue. Unvuai dî didi Yehowa wamba, Bikai bienu, nulumbulule ku mpala kua mikuna minene; mikuna mikese yunvue dî dienu! Nuenu mikuna minene, unvuai mpata idi Yehowa nʼai; telejai matshu, nuenu bishimikidi bia buloba, bualu bua Yehowa udi ne mpata kudi bantu bandi, ne yeye nealumbulule ne Bena Isalele. Bantu banyi, nakunuenzela tshinyi? Nakunutonda munyi? Nungambile. Bualu bua nakanuluhula mu buloba bua Ejipitu, nakanuhikula mu nsubu wa buhika; nakatuma Mose, Alona ne Miyama ku mpala kuenu. Bantu banyi, vulukai bienu mpindiu bualu buakahangidisha Balaka, mukelenge wa Bena Moaba, bua kuenza; ne mei akamukudimunabo kudi Belâma, muana wa Beô; vulukai luendu lua ku Shitima tô ne ku Gilegala, bua nuenu nujingulule bienzedi biakane bia Yehowa. Ndue ne tshintu kai ku mpala kua Yehowa bua kukukuila Nzambi Mutambe Bunene wa mu diulu? Ndue ku mpala kuandi ne milambu ya kuosha, ne ya bana ba ngombe ba tshidimu tshimue, anyi? Yehowa neasanke bua binunu bia bimpanga, ne binunu dikumi bia misulu ya manyi, anyi? Nfile muanʼa bute wanyi bua malu mabi anyi, diminu dia mubidi wanyi bua bubi bua mutshima wanyi, anyi? Wewe kampanda, bakukulesha bualu budi buakane; ne Yehowa udi utekemena malu kai kûdi? Anu bua wewe kuenza malu makane, kunanga kulesha bakuabo luse, ne kuenda ne Nzambi webe ne mutshima muhuekele. Dî dia Yehowa didi diedibua mu musoko, muena meji neatshine dina diandi. Biuma biakuhetabo ku bibi bitshidi mu nsubu ya bantu babi, anyi? Tshihiminu tshia buivi tshindi ngela mulau tshidimu, anyi? Ndi mumanye mua kuitabusha muntu udi ne tshihiminu tshidi tshidinga, ne udi ne tshibombi tshia bihiminu bidi biba, bu muena mutshima mutoke, anyi? Bualu bua bantu babanji ba mu musoko eu badi bûle tente ne tshimbambila, ne bena musoko badi bamba malu a mashimi, ludimi luabo ludi anu ne mashimi mukana muabo. Nunku meme kabidi nennutahe, nennubutule bualu bua mibi yenu. Nenudie, kadi kanuena nukuta; tshiole netshikale munkatshi muenu. Nansha wewe inulame bantu bebe ne bintu biebe, kuena unsungila; nembibutule ne muele wa nvita. Nenukune maminu, kadi kanuena nuahuola; nenudiate tumuma tua olive, kadi kanuena nudilaba mafuta atu; nenudiate tumuma tua nyinyo mu tshikaminu, kadi kanuena nunua nyinyo yatu. Bualu bua nudi nutumikila mikenji ya Omeli, nudi nulonda bienzedi bia mu nsubu wa Ahaba, nudi nuenda bu mudi lungenyi luabo, meme nenyishe musoko wenu tshikulu, ne bantu badimu nebedibue tshibingu, ne nuenu nenuhendibue ne bihendu bidibo bahenda nʼabi bantu banyi. Bualu bukole buakunkuata! Bualu bua ndi bu mudi tshikondo tshidibo bahuola tumuma tubobe, bu mudi kuhumbulula kua tumuma tua nvinyo; kakuena disanji dimue dia muntu kudia; kakuena kamuma kamue ka nfigi kakukuama diambedi kadi mutshima wanyi usamina. Muntu muakane wakujimina ha buloba, kakuena muntu mujalame munkatshi mua bantu kabidi. Bonso badi balamina bakuabo bua kumatshisha mashi abo hanshi; muntu yonso udi wanda muanʼabo bukuondo. Bianza biabo bidi ku malu mabi bua kuaenza lukasa; mukokeshi ne mulumbuluishi badi bakeba mbueshilu; muntu munene udi wamba bubi budi mutshima wandi musue kuenza; nunku badi banyanga malu makane hohamue. Udi uhita bakuabo buimpe udi bu dieba, udi uhita bakuabo kulonda malu makane udi bu luhangu lua mingonge. Dituku diakambabo kudi baprofete benu, dituku dia dikenga dienu mene diakufika; mu diba edi mitshima yabo neyilubakane. Kueyemenyi muena mutumba nʼebe, kueyemenyi mulunda webe munangibue; kubuludi mukana muebe kudi mukashi webe, udi weyemena mu tshiadi tshiebe. Bualu bua muana wa balume udi uhetula tatuʼandi, muana wa bakashi udi utombokela mamuʼandi mumuledi, mukashi wa muana udi utombokela mamuʼandi-muenu; badi ne muntu lukuna mba mu nsubu muandi mene. Kadi meme hanyi nentangishe mesu anyi kudi Yehowa; nengindile Nzambi wa luhandu luanyi; Nzambi wanyi neangunvuile. Kusanki bua dikenga dianyi, wewe muena lukuna wanyi; binahona hanshi, nembike kabidi; nansha hanashikama mu midima, Yehowa neikale munya wanyi. Nengitabushe tshiji tshia Yehowa tshidiye nʼatshi kundi, tô ne hangakuileye tshilumbu tshianyi, hankoseleye tshilumbu tshianyi ne kulumbulula kuakane, bualu bua nakumuenzela bibi. Yeye neampatule bua kunteka mu munya, nemmone buakane buandi. Hashishe, umena lukuna wanyi neamone muanda eu, bundu nebumukuate, yeye wakadi unkonka ne, Yehowa, Nzambi webe, udi kudi kunyi? Mesu anyi neamumone bimpe, ne tshituha tshilu nebamudiate munda mua makasa bu bitahikidi bia mu misesu. Dituku dia kuibaka ngumbu yebe kabidi nedifike! Mu dituku adi mikalu yebe neyisemene kule kulê. Mu dituku adi nebalue kûdi, bafume ku Ashû to ne ku misoko ya mu Ejipitu mene, ku Ejipitu tô ne ku musulu wa Pelata, ku mai manene tô ne ku mai manene makuabo, ku mukuna tô ne ku mukuna mukuabo. Kadi buloba nebulue tshikulu bualu bua bantu babi badi bashikamemu, ne bua mamuma mabi atu bienzedi biabo bikuama. Ulombele bantu bebe ne mulangala webe wa bulami, mikoko ya buhianyi buebe, idi mishikame ha nkayai mu ditu munkatshi mua Kâmele; badie biabo mu Bashana ne mu Gilada, bu muakenzabo mu matuku a kale. Bu munakenza mu matuku anuakuluhuka mu buloba bua Ejipitu, nembaleshe malu a kukema. Ba mu bisamba bia bantu nebamone malu â, nebakuatshike bundu nansha bobo bikale ne bukole bua bungi; nebateke bianza biabo ku mishiku, ne matshu abo neikale mahate. Nebalake dinfuenkenya bu nyoka bu bintu bia ha buloba bidi bidikoka hanshi, bobo nebahatuke ku mena abo ne dizakala. Nebakanke ku mpala kua Yehowa Nzambi wetu, bakuatshike buowa; nebatshine bua bualu buenu kabidi. Neanyi udi Nzambi bu wewe, udi ubajimishila bubi, udi ulekelela difuka dia buhianyi buandi bubi bua ditomboka diabo? Yeye kena ushala ne tshiji tshiendelele, bualu bua udi usanka bua kulesha bantu luse lujalame. Yeye neatufuile luse kabidi, neadiate malu mabi etu munda mua makasa andi. Wewe newele malu mabi abo onso mu ndondo wa mai manene. Neuleshe Yakoba lulamatu luebe, ne luse luebe lujalame kudi Abalahama, bu muwakaditshiha kudi batatu betu, bibangile ku matuku a kale. Di bualu bua Ninewe Mukanda wa tshikena kumona tshia Nahuma, Muena Elekosha Yehowa udi Nzambi wa mukau ne udi udisombuela, Yehowa udi udisombuela, udi mûle tente ne tshiji, Yehowa udi udisombuela kudi badi nʼandi lukuna, udi ulamina bena lukuna bandi tshiji Yehowa kena ukuata tshiji lukasa, udi ne bukole bua bungi, kadi kena ubingisha badi bahila bua bubi, nansha kakese. Yehowa udi ne nshila wandi mu nvunde ne mu tshihuhu, matutu adi luhuishi lua ku makasa andi. Udi ubulukila mai manene, udi wakandisha, udi ukamisha misulu yonso Bashana ne Kâmele bidi bifuba, lutonga lua mu Lebanona ludi lufubidila. Mikuna minene idi ikanka ku mpala kuandi, mikuna mikese idi ivingutuka Buloba budi bubutuka ku mpala kuandi, buloba bujima ne bonso badi bashikamemu. Udi mua kuimana ku mpala kua tshiji tshiandi nganyi? Udi mua kukolela njiya yandi nganyi? Tshiji tshiandi tshikole tshidi tshitema bu kahia, ne yeye udi uhanda mabue. Yehowa udi muimpe, udi tshinyemenu mu dituku dia ntatu, udi mumanye bantu badi banyemena kudiye. Kadi yeye neabutule muaba wa badi nʼandi lukuna ku bungi bua mai adi ahasalala, neihate badi nʼandi lukuna tô ne mu mîdima. Nudi nuelela Yehowa tshifufu kai? Yeye udi wamba kubabutula kabutu, kena udisombuela kudibo musangu muibidi. Badi bajingakane bu mingonge ya meba, badi bakuatshike maluvu abo, badi balue bu bisonsa biume Umue wakahatuka kûdi, wakelangana meji bua kuenzela Yehowa bibi, wakambila bakuabo bua benze biabo malu a tshianana. Yehowa udi wamba dî edi ne, nansha bikalabo ne bukole buabo buonso, nansha bikalabo ba bungi, nebatahibue, nebajimine. Nansha meme mukukengeshe, tshiena nkukengesha kabidi. Mpindiu nentshibule mutshi wandi wa tshikokedi udi ha nshingu hebe, nenkose mionshi yebe bituha. Yehowa wakuela mukenji bua bualu buebe ne, Kabaledi kankanunuina kakuabo ka dî mua kuangata dina diebe kabidi. Nengumushe luhingu lusonga ne luhingu luakatulabo mu nsubu wa nzambi yebe, nenkulongoluele lukita, bualu bua udi muhetudibue. Monai, ha mikuna hadi makasa a messager udi ulua ne lumu luimpe, udi wela lubila lua ditalala! Uvuluka masanka ebe a bia kudia, Yuda, Shilesha mitshihu yebe; bualu bua mundi mubi au kena uhitshila munkatshi muenu kabidi, yeye wakubutudibua kabutu. Mubutudi udi ulua kukubunda Lama lumbu luebe lua nvita, tentekela ku nshila, suika mukaba webe bikole, tantamana bikole. Bualu bua Yehowa udi ujadika butumbi bua Yakoba bu muakajadikeye butumbi bua Isalele, bualu bua bahaudi bakabahaula, bakatudila mionshi ya tumuma tuabo tua nvinyo hanshi. Ngabu ya bena bukitu bandi idi mikunze-kunzû, bena bukitu badi bavuale bivualu bikunze. Makalu a mata adi akenka bu tshiamu tshidi tshibalakana dituku didibo balongolola malu a nvita. Badi bafuna bulobo ne mitshi ya cyprès. Makalu a mata adi e nza diyoyo mu misesu, adi atutakana mu misesu minene. Adi akenka bu bimunyi, adi atambakana bu kukenya kua miele ya nvula. Mukelenge wa Ashû udi uvuluka bilobo biandi, bidi bienda bitetuka mu luendu luabi, bidi biya lukasa ku lumbu lua musoko bua kuluisha badi babatshi-ntshimika. Bibi bia ku nkila ya misulu bidi biunzuluka, nsubu wa mukelenge udi ushimbuka. Bakukuata mukelenge mukashi, bakuvula bivualu biandi, bakuya nʼandi mu buhika, bena mudimu bandi bakashi badi batua mikemu bu miadi ya nyunyu ya nkutshi, badikuma mu biadi biabo. Kale Ninewe wakadi mule tente ne bantu, kadi mpindiu badi banyema. Badi babela dî ne, Imanai, imanai! Kadi kakuena umue wabo udi utshinguluka. Haulai biamu bia argent! Haulai biamu bia or! Kakuena ndekelu wa bintu mu bibutshilu biabo, bubanji bua bintu bia mushinga mukole bia mishindu yonso. Musoko eu udi mutuhu, kauyi bantu, kauyi bintu! Mutshima udi uteketa, binu bidi bikanka, bimono bionso bidi bisama bikole, ne mpala ya bantu bonso idi itokoloka. Buina bua nyama ya ntambue ne tshidilu tshia bana ba ntambue kuakadi mulumeʼa ntambue, mukashiʼa ntambue ne muanʼa ntambue bibuela, kakuyi muntu wa kubitshinyisha, bidi hanyi? Nyama wa ntambue wakasunsuluila bana bandi munyinyi, wakalekela nyama mu nshingu bua kuhesha bakashi bandi, wakusha buina buandi ne nyama mikuabo yakakuateye, ne tshidilu tshiandi ne bisunsukile. Yehowa wa misumba udi wamba ne, Mona, ndi nkuhidia, nenshidishe makalu ebe mu kahia, muele wa mata neumane bana bebe ba ntambue, bintu biebe biwakunyenga, nembiumushe ha buloba, bantu kabena bunvua kabidi dî dia ba-messager bebe. Mulau wikale kudi musoko eu udi umatshisha mashi a bantu hanshi, udi mûle tente ne mashimi ne tshimbambila, kunyenga kua bintu kakuyi kushika. Tshiona tshia nfimbu ne tshiona tshia nkata ya makalu bidi biunvuika, tubalu didi tuenda tutuhika, makalu adi alundumuka. Bena tubalu badi bendesha tubalu tuabo lubilu, muele wa nvita udi ukenya, difuma didi dikenka, bashihibue badi bavule, ne mushiki mimene wa bantu bafue, kabena mua kubala bungi bua bitalu! Badi badishindila ha bitalu! Malu â akulua bua masandi mavule a mukashi wa masandi, muimpe kumona, muena buloshi, udi uhana bisamba bia bantu ku malu andi a masandi, ne biota biabo ku muhongo wandi. Yehowa wa misumba udi wamba ne, Mona, meme ndi nku hidia, nenvule bivualu biebe ku mesu kuebe, nemmueneshe butaka buebe kudi bisamba bia bantu, nenkufuishishe bundu kudi makelenge makuabo. Nenkuele bintu bia bukoya hamʼbidi hebe, nenkufuishe bundu, nenkuvuishe tshintu tshidi bantu batangila ne dihetu. Bua mianda ai mundi yonso udi ukumona neakunyeme, wamba ne, Ninewe wakubutudibua, wamuashila mua dî nganyi? Nemmukebele bamusambi kudi kunyi? No-amona eu, wakadi munkatshi mua mihasa ibidi ya Musulu, wakadi ne mai ku nseke yau yonso, wakadi ne mai manene bu lumbu ku mpala, ne mai makuabo bu lumbu ku nyima, udi umuhita buimpe, anyi? Atiopa ne Ejipitu biakadi bukole buandi, bukole buhite bungi, ba mu Puta ne Lubima bakadi bakuatshishi bandi. Kadi bakaya nʼandi kukuabo, wakabuela biandi mu buhika Bakashiha bana bandi batekete mu misesu yonso, bakelela bantu bandi baneme nshobo, bakasuika bantu bandi ba butumbi ne nkanu. Wewe kabidi neukuatshike maluvu, neufue tshihuka, neukebe tshinyemenu bua kuhanduka kudi muena lukuna. Ngumbu yebe ya mata neyikale bu mitshi ya nfigi idi ne tumuma tubobe, bianyungishabo mitshi, tumuma didi dihona mukana mua mundi udi ne nzala. Mona, bena nvita bebe badi anu bu bakashi munkatshi muenu. Bibi bia ku ditunga diebe bidi biunzuluka kudi bena lukuna bebe, kahia kadi kavingutula biamu biebe bia kuinshila nʼabi bibi. Suna mai bua kuikala nʼau mu matuku a kutshintshimika kua musoko, kolesha ngumbu yebe ya nvita, buela mu tshina tshia dima, sohakasha tshimama, angata mushete wa kukuma nʼau matafuadi. Mu muaba eu kahia nekakushidishe, muele wa mata nenkushihe, neukudie bu mudi mukumbi wenza. Vulangana bu bana ba mikumbi, vulangana bu mikongolo wa mikumbi. Bangendʼa mushinga bebe badi bahita mitoto ya mu diulu bungi. Mukumbi muana udi udiubulula, udi wasa masala, udi ubuka. Bakokeshi bebe badi bu mikumbi, bafundi bebe badi bu mikongolo ya mikumbi, idi yikila mu bihuka tshikondo tshia mashika. Habanda diba, idi ibuka, ne muaba wakuyayi kawena mumanyibue kabidi. Wewe mukelenge wa Ashû, balami bebe ba mikoko badi balala tulu, bantu bebe banene badi bashikame hatuhu, bantu bebe badi bamuangalake mu mikuna, kakuena mundi wa kubasangisha hohamue kabidi. Kakuena diondaha dia mputa webe, mputa webe wa lubangu kena ûma. Bonso badi bunvua lumu luebe nebakubingile bibingu, nganyi mene udi bubi buebe kabuyi buanze kufika kudiye ku musangu ne ku musangu? Dî dia Yehowa diakunvua muprofete Habakuka. Yehowa, nendile kûdi musangu bule bishi bua wewe unkuatshishe? Kuena ungunvuila, anyi? Ndi ndila kûdi bua tshimbambila tshidiku, ne wewe kuena utuhandisha. Bualu kai udi ummueneshisha bienzedi bibi ne utangishisha mesu anyi ku dikengeshangana dia bantu? Kubutuka ne malu makole bidi ku mpala kuanyi; nvita ne kufuilangana bidi bijuka. Bua malu â diyisha dia mikenji diakuteketa, ne kulumbulula kuakane kakuenaku. Bualu bua bantu babi badi basesuisha muntu muakane, nunku kulumbulula kua bilumbu kudi kunyanguka. Tangilai bienu munkatshi mua bisamba bia bantu. Monai, ne kemai bikole! Bualu bua ndi ngenza bualu mu matuku enu bunuakadi kanuyi mua kuitabusha bikalabo banuambilebu. Monai, ndi mbisha Bena Kasada, tshisamba atshi tshia bantu badi ne luonji ne benji ba malu lukasa lukasa, badi bahitshila mu buloba bujima bua kunyengabo miaba ya kushikama idi kayiyi yabo. Badi bazakasha mitshima ya bantu ne badi babakuatshisha buowa; dikosa diabo dia bilumbu ne kudibandisha kuabo bidi bifuma munda muabo nkayabo. Tubalu tuabo tudi tuhita nyama ya nkashama lubilu, tudi ne luonji luhite lua bimungu bidi bimueneka bufuku; bena tubalu babo badi benda ne didisua; e, bena tubalu babo badi bafuma kule; badi baya lubilu bu mudi nyunyu wa mukanku wauka ha tshintu bua kutshidieye. Buonso buabo badi balua bua kuenza tshimbambila; badi batangisha mesu abo ku mpala, badi basangisha bena lukanu bakuatshibue mu nvita bu nsenga ya mu mai. Badi bahetula bakelenge, badi baseka bakokeshi. Badi baseka ngumbu yonso ya nvita; bualu bua badi bela mishiki ya buloba bua kubandilahu bua kuhita musoko bukole. Hashishe, badi bahita mu nshila bu luhehele, badi baya ku mpala benza malu mabi, badi bavuisha bukole buabo bu nzambi wabo mene. Yehowa Nzambi wanyi, wewe kuena wanyi Wa Tshijila kale tô ne mpindiu, anyi? Katuena tufua! Wewe Yehowa, wakumusungula bua kulumbuluisheye bantu; wewe Dibue, wakumujadika bua kukengesheye bantu. Wewe udi ne mesu mahite buakane adi kâyi mua kutangila malu mabi, ne kuena mua kutangila bienzedi biabo bibi tshianana. Nunku bualu kai udi utangila bantu aba hadi benza malu mabi abo a bunsonge, ne udi uhuwa talalâ halua muntu mubi kumina mukuabo udi umuhita buakane? Wewe udi uvuisha bantu bu minyinyi ya mu mai manene, bu bintu bidi bidikoka hanshi, bidi kabiyi ne mukokeshi ha mutu habi. Yeye udi ukuata buonso buabo ne ndobo; udi ubakoka munda mua kahamba kandi bua kuya nʼabo, udi ubasangisha mu bukuondo buandi; nunku udi usanka ne udi utumba. Bua malu â yeye udi ushihela kahamba kandi milambu, udi woshila bukuondo buandi musenga wa manananshi; bualu bua luseke luandi lua bintu ludi luvulangana ne bia kudia biandi bidi bikumbane bia bungi. Yeye neananukile kuhumuna kahamba kandi tshiendelele ne kena ulekela kushiha ba mu bisamba bia bantu, anyi? Nengimane ha tshibumba tshianyi tshia butentekedi, nengimane ha mutu ha tshibumba tshia masalayi; nenteleje bua kunvua tshidiye musue kungambila, ne mei adiye musue kukudimuna bualu bua kudila kuanyi. Hashishe, Yehowa wakangitaba ne, Funda tshikena kumona ha dibeshi dinene hatoke tô, bua muntu udi ubala amanye mua kutshibala lubilu. Bualu bua tshikena kumona etshi ntshia tshikondo tshiakuhangishishabo bua kumuenekatshi, tshidi tshienda lukasa ku tshikondo tshiatshi, katshiena tshidinga, biajangulukatshi, utshindile; bualu bua netshimueneke bulelela, katshiena tshihanga kulua. Monai, mutshima wa udi udibandisha kawena muakane munda muandi; kadi muntu muakane neikale ne muoyo bua lulamatu luandi. Bualu bua dikuatshika diandi dia maluvu didi dimuvuisha umena dikamakama, muena dihetu udi kayi musue kushala kuandi; maluvu adi adiundisha lukuka luandi ku bunene bua Muaba wa Bafue, bu lufu ludi kaluyi mua kukuta; kadi yeye udi usangisha ba mu bisamba bionso ne udi ukungisha bantu bonso kudiye. Bantu aba kabena bamubingila tshibingu, anyi? Kabena bamuela nsenda, anyi? Nebambe ne. Mulau wikale kudi udi uvudisha bintu bidi kabiyi biandi; nênze nunku musangu bule bishi? Mulau wikale kudi muntu udi wangata bujitu bua mabanza a bungi! Bakunangi kabena babika lukasa, anyi? Bakuzakashi kabena batabala, anyi? Newikale kudibo bu tshintu tshihaula. Bualu bua wewe wakuhaula bintu bia bisamba bia bungi, difuka dia bantu badi bashala nebahaule bintu biebe, bualu bua kumatshisha kuebe kua mashi a bantu, ne tshimbambila tshiebe kudi buloba ne misoko yabo, ne kudi bantu bonso badi bashikamemu. Mulau wikale kudi udi wangatshila ba mu nsubu muandi luhetu ku malu mabi andi, bua kuibaka nʼalu disua diandi kulu bua kuhanduka ku makenga! Wewe wakufuisha ba mu tshiota tshiebe bundu ku bienzedi biebe, ne kubutula kuebe kua bantu ba bungi; wakujimisha muoyo webe muine bua bualu ebu. Nunku dibue dia mu tshimanu tshia nsubu nediele dî, ne mukamba wa munkatshi mua musaka wa nsubu newitabe kudidi. Mulau wikale kudi udi wasa musoko ku kumatshisha kua mashi, udi ujadika tshimenga ku malu mabi! Monai, Yehowa wa Misumba kena muhangidishe bua midimu ya bantu kujiminayi mu kahia, anyi? ba mu bisamba bia bantu kabena baditatshisha hatuhu, anyi? Kadi buloba nebûshibue tente ne kumanya kua Yehowa, bu mudi mai avuisha mai manene onso. Mulau wikale kudi udi uhongoluela muena mutumba nʼandi maluvu mu mulondo wa lukuna luandi, udi umukuatshishau bua kumona butaka buandi. Bundu buebe nebutambe, butumbi buebe nebukehe; nua biebe, utetuke! Luhanza lua mu tshianza tshia bukole tshia Yehowa nelufike kûdi, bundu bukole nebubihishe butumbi buebe. Malu a tshimbambila awakuenzela Lebanona neakuandamukile, ne kubutula kua nyama nekukuatshishe buowa; bualu bua wakumatshisha mashi a bantu, ne bua malu a tshimbambila awakuenzela buloba, musoko ne bonso badi bashikamemu. Luhingu luakusongabo ludi ne dikuatshisha kai kudi mulusongi? Anyi luhingu luakutulabo ludi ne dikuatshisha kai kudi mulutudi? Ludi anu muyishi wa mashimi! Muntu udi utula luhingu, ne udi ufula bintu bia tshianana bidi kabiyi mua kuakula, udi ubieyemena bishi? Mulau wikale kudi udi wambila mutshi ne, Tabala! Udi wambila dibue didi kadiyi mua kuakula ne, Bika! Tshintu etshi tshidi mua kuyisha bantu, anyi? Monai, tshidi tshilamika or ne argent, kadi munda muatshi kamuena muhuya, nansha mukese! Kadi Yehowa udi mu ntempelo wandi wa tshijila; ba ha buloba bonso bahuwe ku mpala kuandi! Kutendelela kua Habakuka muprofete, kulongolola mu tshimbilu tshia Shigionota. Yehowa, nakunvua lumu luebe, ndi ntshina. Yehowa, sangulusha mudimu webe munkatshi mua bidimu ebi, munkatshi mua bidimu ebi ûmanyishe kudi bantu; mu njiya yebe uvuluke luse. Nzambi wakafuma ku Temena, Wa Tshijila wakafuma ku mukuna wa Palana. Butumbi buandi buakabuikila diulu, buloba buakûla tente ne butumbi buandi. Kubalakana kuandi kuakadi bu kukenka kua munya, nsasa ya munya yakahatuka mu tshianza tshiandi; munkatshi muai muakadi bukole buandi busokome. Bihuhu biakaya ku mpala kuandi, biakalonda mu makasa andi kabidi. Wakimana, wakatangila buloba; wakamona, wakakankisha bisamba bia bantu. Mikuna yakadiku ku tshibangidilu yakahandika; mikuna mikese yakadiku kale yakabatalala; bienzedi biandi bidi bu muakadibi kale. Nakatangila ntenta ya Kushana mu dikenga; bilulu bikudika bia mu ntenta ya mu buloba bua Midiyana biakazakala. Yehowa, tshiji tshiebe tshikatema kudi misulu, anyi? Wakadi ne mikuna tshiji, anyi? Njiya yakakukuata bua mai manene, bua wewe kuenda ha nyima ha tubalu tuebe, ne mu makalu ebe a luhandu, anyi? Wakumusha buta buebe mu tshilaminu tshiebe. Wakahayika mukete ku mulemu. Wakahanda buloba bua misulu ihueke. Mikuna yakakumona, yakadi ne didinyenga; matutu akalokeshisha nvula; ndondo wa mai wakela dî diandi, wakabandisha bianza biandi mulu. Diba ne ngondo biakimana mu miaba yakadibi, bualu bua dinkenke dia mikete yebe hakahitayi, bualu bua kukenka kua difuma diebe diakadi dibalakana. Mu njiya yebe mikole wewe wakahitshila mu buloba, wewe wakadiata bisamba bia bantu mu tshiji tshiebe. Wakahatuka biebe bua kuhandisha bantu bebe, bua kuhandisha muntu webe muedibue manyi ha mutu; wakatshibula musonga wa nsubu wa bantu babi, mumueneshe bishimikidi biandi hatoke tô ne ku mutu kua tshimanu. Wakasompola mitu ya bena nvita ne mafuma ebe, bakalua bu nvunde bua kuntangadisha. Disanka diabo diakadi bu dia bantu badi basue kumina bahele mu busokoko. Wewe wakadiatshisha tubalu tuebe ha mai manene, ha muenshi wa mai makole. Nakunua malu â, ne mutshima wanyi wakuhampakana, mishiku yanyi yakukanka bua tshiona atshi. Mifuba yanyi yakuvingutuka, nakuzakala mu muaba unakuimana; ndi ne bua kuindila dituku dia ntatu, muhuwe talalâ; tô ne haluadi kudi bantu badi batukengesha. Bikala mutshi wa nfigi kauyi usampila ntonga, hikalaku kakuyi tumuma ku mionshi ya nyinyo; biahanga mutshi wa olive kukuama, biahanga madimi kulua bia kudia; bikala mikoko ya mu luhangu kayiyiku, ne bikalaku kakuyi bimuna mu mpangu yabi; kadi meme hanyi nensanke mu Yehowa, nentumbile mu Nzambi wa luhandu luanyi. Yehowa, Mukelenge mene, udi bukole buanyi; udi uvuisha makasa anyi bu mikono ya ngulungu, udi ungendesha ha mutu ha mikuna yanyi mile. Kudi mulombodi wa bimbi ba misamba: ne biombelu. Dî dia Yehowa diakalua kudi Sefanya, muana wa Kushi, muana wa Gedaliya, muana wa Amalia, muana wa Hezikiya mu matuku a Yoshiya, muana wa Amona, mukelenge wa Yuda. Yehowa udi wamba ne, Nembutule bintu bionso hanshi ha buloba kabutu. Nembutule bantu ne nyama, nembutule nyunyu ya mulu ne minyinyi ya mu mai manene; nengumushe bilenduishi ne benji ba malu mabi diatshimue. Yehowa udi wamba ne. Nembutule bukua bantu hanshi ha buloba. Nengolole tshianza tshianyi bua kukuma Bena Yuda ne bonso badi bashikame mu Yelushalema; nengumushe batendeledi ba Bâla ku muaba eu, tô ne ku difuka diabo dionso; nengumushe dina dia balama ba mpingu ne dia bakuidi babi diatshimue nʼabo; ne badi batendelela bintu bia mu diulu ha mitu ha nsubu yabo; badi batendelela ne badi baditshiha kudi Yehowa, ne badi baditshiha kudi Milekoma diatshimue. Nengumushe kabidi badi balekela kulonda Yehowa ne badi kabayi bakeba Yehowa, kabayi bamulombe lungenyi luandi. Huwa biebe ku mpala kua Mukelenge Yehowa, bualu bua dituku dia Yehowa didi ha buihi! Bualu bua Yehowa wakumana kulongolola mulambu; wakujidila bantu bakubikileye bua kudia nʼandi bidia. Mu dituku didibo bafila mulambu wa Yehowa nenkengeshe bakokeshi ne bana ba mukelenge, ne bonso bakuabo badi baluata bivualu bia bantu ba bende. Mu didiku adi nenkengeshe muntu yonso udi ubandila ha mutu ha mushiku wa mbelu, ne badi busha nsubu wa mukelenge wabo tente ne malu a tshimbambila ne mashimi adibo badingangana nʼau. Yehowa udi Wamba ne, Mu dituku adi tshiona tshia muadi netshifume ku Tshibi tshia Mishiha, miadi neyifume ku luseke luibidi lua musoko, mukungulu wa diuhuka dia musoko neunvuike ku mikuna. Asai miadi, nuenu badi bashikame mu Maketesha, bualu bua bantu bonso ba mu Kânana nebubutuke; bonso badi batuala bujitu bua biamu bia argent nebashihibue. Mu tshikondo atshi nenkebekebe mu Yelushalema ne minda, nenkengeshe bantu badi bashikame tshianana bua maluvu a nyinyo musambakena ha bisekeseke, badi bamba mu mitshima yabo ne, Yehowa kena wenza malu mimpe, kena wenza malu mabi. Biuma biabo nebinyengibue kudi bakuabo, nsubu yabo neyilue bikulu. E, nebase nsubu, kadi kabena bashikamamu; nebakune tumuma tua nvinyo, kadi kabena banua nyinyo yatu. Dituku dinene dia Yehowa didi ha buihi; didi ha buihi ne didi didiendesha lukasa! Tshiona tshia dituku dia Yehowa tshidiku; muena bukitu neadile bikole mu diba adi. Dituku adi ndituku dia njiya, ndituku dia ntatu ne kanyinganyinga, ndituku dia kunyanguka ne kubutuka, ndituku dia mîdima ne mufitu, ndituku dia matutu ne mîdima mikole, ndituku dia kuela kua mpungi ne kua mbila ya nvita bua kuluisha bena misoko mikoleshibue ne ngumbu ya nvita, ne bua kubumbula bibumba bia ku matumba a ngumbu. Nentumine bantu makenga, nebende babubuta bu bantu bafofo, bualu bua bakuenzela Yehowa bibi. Mashi abo neahongoloke hanshi bu luhuishi, minyinyi yabo neyimashibue bu tunvi. Biamu biabo, nansha bia argent, nansha bia or, kabiena mua kubahandisha mu dituku dia njiya ya Yehowa; kadi buloba buonso nebuhie ku kahia ka mukau wandi. Bualu bua neabutule bantu bonso badi bashikame ha buloba ne dibutula didi dikuatshisha bantu buowa. Nudisangishe hohamue, e, nudisangishe hohamue, nuenu ba mu tshisamba tshidi katshiyi ne bundu; diambedi mukenji kauyi muanze kukola, diambedi dituku kadiyi dianze kuhita luhilu bu mudi bisote bihehuka, diambedi tshiji tshikole tshia Yehowa katshiyi tshianze kufika kunudi; diambedi dituku dia tshiji tshia Yehowa kadiyi dianze kufika kunudi. Kebai Yehowa, nuenu bena kalolo bonso ba ha buloba, badi batumikila mikenji yandi; kebai buakane, kebai kalolo; bumue nebanusokoke mu dituku dia tshiji tshia Yehowa. Bualu bua Gaza neashale tshikulu, ne Ashekelona neikale tshihela tshia tshianana. Nebihate ba mu Ashedodo munda munya, nebajule Ekelona tô ne ku miji yandi. Mulau wikale kudi bantu badi bashikame ku muelelu wa mai manene, tshisamba tshia Bena Kelete! Di dia Yehowa didi dinuhisha, nuenu ba mu Kânana, buloba bua Bena Peleshete! Nennubutule, kakuena kuikala muena musoko umue kabidi. Ku muelelu wa mai manene nekuikale miaba ya mashinde ne miaba ya balami kushikama, ne mpangu ya kubuesha mikoko. Buloba budi ku muelelu wa mai manene nebuikale bua difuka dia Bena Yuda. Nebadishilemu mikoko yabo. Butuku nebalale mu nsubu ya mu Ashekelona. Bualu bua Yehowa Nzambi wabo neahingane kudibo, neabumushe mu buhika bua kubaha diakalengele. Nakunvua bibingu bia Bena Moaba, ne bihendu bia Bena Amona biakuhendabo nʼabi bantu banyi, biakudibandishabo nʼabi bakasuabo kukehesha mikalu ya buloba bua bantu banyi. Yehowa wa misumba, Nzambi wa Isalele mene, udi wamba ne, Bu mundi ne muoyo, Moaba neikale bu Sodoma, Bena Amona nebikale bu Amola, bu buloba bûle tente ne mpesa ne mena a luehu, bu tshihela tshia tshianana tshiendelele. Difuka dia bantu banyi nedibahaule, ba mu tshisamba tshianyi badi bashala ne muoyo nebabahiane. Mianda ai neyilue kudibo bualu bua kudisua kuabo, bualu bua bakatshimbisha bantu ba Yehowa wa misumba ne bakadibandisha ku mpala kuabo. Yehowa neabakuatshishe buowa; bualu bua neatekeshe nzambi yonso ya ha buloba ne tshiole; nebamutendelele muntu ku muaba wandi, muntu ku muaba wandi, tô ne ku maloba onso adi ku muelelu wa mai manene. Nuenu kabidi, Bena Atiopa, nenushihibue ku muele wanyi wa nvita! Yeye neolole tshianza tshiandi bua kukuma ba ku luseke lua nôde, nebabutule Ashû. Neavuishe Ninewe bikulu, muaba mume bu tshihela tshia lusenga. Bisumbu bia nyama nebilale hanshi munkatshi muau, nyama ya mu mpata ya mishindu yonso. Mpunga tshikola ne nkese nebishikame ha mutu ha bibumba; nyunyu mikuabo bu tshihungulu ne tshikololo neyele dî mu masoso a nsubu; dibutuka nedikale mu mbelu yonso, bualu bua yeye wakamuenesha hatoke tô miaba yakalengeshabo ne mabaya a cêdre. Musoko eu wakadi bantu basankila bikole, bashikame kabayi ne ntatu, wakadi udiamba ne, Meme ndiku, kakuena musoko mukuabo, anu meme. Monai, mudiu mulue tshihela tshia hatuhu, muaba wa nyama ya mu mpata kulala! Muntu yonso udi uhitshilaku nêle tshibingu, uhoha ne tshianza. Mulau wikale kudi musoko udi mutomboke ne munyanguke, musoko udi ukengesha bantu! Kawakunvuila dî, kawakuitabusha diyisha. Kawakueyemena Yehowa, kawakusemena hehi ne Nzambi wau. Bakokeshi ba munkatshi muau badi bu nyama ya ntambue ikungula; balumbuluishi bau badi bu bimungu bidi biendakana butuku; kabiena bishiya tshintu tshia kudia hatshia butuku. Baprofete babo badi babuluke ne bena bunsonge; bakuidi babo badi banyanga bintu bia tshijila, ne badi banyanga mikenji. Yehowa udi muakane munkatshi muau; yeye kena wenza bualu bubi. Ku dinda ku dinda udi umuenesha kulumbulula kuakane hatoke, katu wahanga; kadi badi kabayi ne buakane kabena bamanye bundu. Wakushiha bisamba bia bantu; bibumba biabo bia masalayi bia ku matumba a ngumbu biakubutuka. Nakuvuisha misesu yabo mituhu, kayiyi ne bantu bahitshilamu. Misoko yabo yakubutudibua, ne kakuenamu muntu, kakuenamu muntu umuehele udi mushikamemu. Nakadiamba munda muanyi ne, Yeye kena uhanga kuntshina bulelela; neitabushe dikenga didi dimuyisha; ne kakuena bualu bumue bunakuteka hamʼbidi handi bua yeye kuenza buajimina ku mesu kuandi; kadi bakadiendesha lukasa bua kunyanga bienzedi biabo bionso. Nunku Yehowa udi wamba ne, Nungindile, tô ne ku dituku dindi mbika bua kunyenga bintu; hualu bua nakuhangidisha bua kusangisha bisamba bia bantu, bua kukungisha makelenge, bua meme kuhumuna tshiji tshianyi hamʼbidi habo, kahia konso ka tshiji tshianyi mene; bualu bua buloba buonso nebulue mu kahia ka lukunukunu luanyi. Bualu bua nenkudimune muaku wa bantu ba bende bua wikale muaku wa ku mishiku milengeshibue; bua bobo bamanye mua kubikila dina dia Yehowa, bamukuatshile mudimu ne diaha dionso muinshi mua bujitu. Ku miaba idi dishiya dia misulu ya mu Atiopa nebalue ne batendeledi banyi, bantu banyi batangadishibue mene, nebalue ne mulambu kundi. Mu dituku adi kuena ufuishibua bundu bua bienzedi biebe bionso biwakuntombokela nʼahi; bualu bua mu dituku adi nengumushe munkatshi muenu bantu bebe badi baditumbisha ne dihetu diabo; wewe kuena wikala ne dihetu kabidi mu mukuna wanyi wa tshijila. Bualu bua nenshiye bantu bakengeshibue ne bahele munkatshi muenu, bobo nebanyemene ku dina dia Yehowa. Ba mu Isalele batshidi bashala kabena benza malu mabi kabidi, kabena bamba mashimi; kabena basangana mukana muabo ludimi ludi ludinga; bualu bua nebadie ne nebalale hanshi; kakuena kuikalaku muntu wabatshinyisha. Imba biebe, wewe muana mukashi wa Siona; Bena Isalele, elai mbila; ikale ne disanka, sankaku bikole ne mutshima webe wonso, wewe muana mukashi wa mu Yelushalema! Yehowa wakûmusha bilumbu biebe, wakuihata badi nʼebe lukuna; Mukelenge wa Isalele, Yehowa mene, udi munkatshi muenu; kuena umona makenga kabidi. Mu dituku adi nebambile Yelushalema ne, Kutshinyi, wewe Siona; bianza biebe kabiteketshi. Yehowa Nzambi webe udi munkatshi muenu, muena bukitu bukole udi ukusungila. Yeye neasanke bua bualu buebe ne disanka dinene, neakusangashe mu dinanga diandi, neasanke bua bualu buebe ne kuimba kua misambu. Nensangishe hohamue badi bajinga dituku dia tshijila bakadi nʼebe diambedi; bihendu biakanemesha bujitu hamʼbidi habo. Mona, mu tshikondo atshi nenshikishe tshilumbu tshia bonso bakadi bakukengesha; nempandishe udi mulema, nempingashe wakuihatabo; nembavuishe bantu badi ne butumbi ne badi ne dina dinene, bakadi bakuatshike bundu mu buloba buonso diambedi. Mu tshikondo atshi nendue nʼenu, ne mu tshikondo atshi nennusangishe hohamue; bua nennuvuishile dina dinene ne butumbi munkatshi mua bantu bonso ba ha buloba, hanahingasha diakalengele dienu ku mesu kuenu mu muaba wa buhika buenu. Yehowa udi wamba dî edi. Mu tshidimu tshibidi tshia mukelenge Dayawesha, mu ngondo muisambombo, mu dituku dia kumudidi dia ngondo, dî dia Yehowa diakalua mukana mua muprofete Hagai kudi Zelubabela, muana wa Shalatiele, gouverneur wa mu Yuda, ne kudi Yoshua, muana wa Yehosadaka, muakuidi wa ha mutu ha bakuabo, Diakamba ne, Yehowa wa misumba udi wamba ne, Bantu aba badi bamba ne, Tshikondo kantshianze kulua bua kuibaka nsubu wa Yehowa kabidi. Mu diba adi dî dia Yehowa diakalua mukana mua muprofete Hagai ne, Etshi ntshikondo tshia nuenu bine kushikama mu nsuhu yenu idi ne mabaya malamike munda muai, hatshidi nsubu eu ushala munyanguke, anyi? Kadi mpindiu Yehowa wa misumba udi wamba ne, Elanganai meji a bienzedi bienu. Nuakukuna bintu bia bungi, nuakuhuola bintu bibalê; nudi nudia, kadi kanuena mua kukuta; nudi nunua, kadi kanuena mua kukuta ne binudi nunua; nudi nudiluatshisha bilulu, kadi kanuena mua kuota nʼabi; ne muntu udi wangata difutu ku mudimu wandi udi udiangata bua kuditeka mu tshibombi tshidi tshitubuke. Yehowa wa misumba udi wamba ne, Elanganai meji a bienzedi bienu. Bandai ku buloba bua mu mikuna, hinganai ne mabaya, ibakai nsubu eu; ne meme nensanke nʼandi ne nentumbishibuemu. Nuakutekemena bia kudia bia bungi, ne monai, biakadi anu bibalê; hanuakulua nʼabi kuenu, nakubihehuka! Bualu kai? Edi ndikonka dia Yehowa wa misumba. Mbualu bua nsubu wanyi udi mulale munyanguke, hanudi nunyema, muntu ne muntu, ku nsubu kuandi. Bua muanda eu diulu didi ha mutu henu didi dikanda dibungi, ne buloba hudi bukanda kuvudisha kuabu kua bia kudia. Nakabikila munanga bua kulua mu buloba, ne ha mikuna ne ha maminu ne ha nvinyo ne ha manyi, ne ha bintu bionso bidi buloba bulua nʼabi; ne kudi bantu ne nyama, ne ku midimu yonso ya ku bianza biabo. Hashishe, Zelubabela, muana wa Shalatiele, ne Yoshua, muana wa Yehosadaka, muakuidi wa ha mutu ha bakuabo, ne bantu bonso bakadi bashala, bakatumikila dî dia Nzambi wabo, ne mei a muprofete Hagai, bualu bua Yehowa Nzambi wabo, wakamutuma; ne bantu bakadi batshina ku mpala kua Yehowa. Nunku Hagai, muena mukenji wa Yehowa, wakambila bantu dî dia Yehowa diakabatumineye ne, Yehowa udi wamba ne, Meme ndi nʼenu. Yehowa wakasonsola mutshima wa Zelubabela, muana wa Shalatiele, gouverneur wa mu Yuda, ne mutshima wa Yoshua, muana wa Yehosadaka, muakuidi wa ha mutu ha bakuabo, ne mitshima ya bantu bonso bakadi bashala, ne bua muanda eu bakalua ne bakabanga mudimu wa ku nsuhu wa Yehowa wa misumba, Nzambi wabo, mu dituku dia makumi abidi ne anai dia ngondo muisambombo, mu tshidimu tshibidi tshia bukokeshi bua mukelenge Dayawesha. Mu ngondo wa muanda mutekete, mu dituku dia makumi abidi ne dimue dia ngondo, dî dia Yehowa diakalua kudi muprofete Hagai ne, Ambila Zelubabela, muana wa Shalatiele, gouverneur wa mu Yuda, ne Yoshua, muana wa Yehosadaka, muakuidi munene, ne bantu bonso badi bashale ne, Muntu kai udi mushale munkatshi muenu wakamona nsubu eu mu butumbi buandi diambedi? Nudi numumona bu tshinyi mpindiu? Kena ku mesu kuenu bu tshintu tshia hatuhu, anyi? Kadi Yehowa udi wamba ne, Kolesha mutshima webe mpindiu, Zelubabela; wikale ne mutshima mukole, wewe Yoshua, muana wa Yehosadaka, muakuidi munene; koleshai mitshima yenu, nuenu bantu bonso ba mu buloba ebu; enzai mudimu kabidi, bualu bua Yehowa wa misumba udi wamba ne, Meme ndi nʼenu. Dî dinakahunga nʼenu hanuakaluhuka mu Ejipitu didi dijalame. Nyuma wanyi neikale munkatshi muenu; kanutshinyi. Bualu bua Yehowa wa misumba udi wamba ne, Hahita tshikondo tshihi, nenzakashe diulu ne buloba, mai manene ne buloba bûme. Yehowa wa misumba udi wamba ne, Nenzakashe bisamba bionso, ne meme nengûshe nsubu eu ne butumbi tente. Yehowa wa misumba udi wamba dî edi. Yehowa wa misumba udi wamba ne. Bintu bia argent bidi bianyi, bintu bia or bidi bianyi. Yehowa wa misumba udi wamba ne, Butumbi bua nsubu eu bua matuku alualua nebuhite butumbi buandi bua diambedi bunene; mu muaba eu nempeshe bantu ditalala. Mu dituku dia makumi abidi ne anai dia ngondo wa tshitema, mu tshidimu tshibidi tshia bukokeshi bua mukelenge Dayawesha, dî dia Yehowa diakalua kudi muprofete Hagai ne, Yehowa wa misumba udi wamba ne, Ebesha bakuidi bualu bua mikenji, bakonka ne, Biatuala muntu munyinyi wa tshijila mu luzemba lua tshivualu tshiandi, bialenga luzemba luandi mampa, anyi bialengalu bintu bia mu tshifuadi, anyi nvinyo, anyi manyi, anyi tshia kudia tshia mushindu wonso, bintu ebi nebikale bia tshijila, anyi? Bakuidi bakamukudimuna ne, Nansha. Hashishe, Hagai wakabakonka ne, Bikala muntu mubihe ku dilenga diandi dia tshitalu tshia muntu mufue, bialengeye tshintu tshikuabo tshia mu bintu abi bionso, tshintu atshi netshikale tshibihe, anyi? Bakuidi bakamukudimuna ne, Netshikale tshibihe. Hashishe, Hagai wakabandamuna ne, Yehowa udi wamba ne, Bantu aba badi nunku, ne tshisamba etshi tshidi nunku, ku mesu kuanyi, ne midimu yonso ya bianza biabo idi nunku kabidi; ne bintu bidibo bafila ku muaba wawa bidi bibihe. Mpindiu ndi nnusengelela ne, Nuelangane meji a bualu ebu mu mitshima yenu ku dituku edi tô ne ku matuku atshidi alua. Diambedi kabayi banji kutenteka dibue ha mutu ha dikuabo mu ntempelo wa Yehowa, nuakusangana malu kai? Mu tshikondo atshi, hakalua muntu ku mushiki wa bihiminu makumi abidi bia bia kudia, anu dikumi biakadiku; ne hakalua muntu ku mulondo munene wa nvinyo bua kutunta bihiminu makumi atanu, wakasangana anu makumi abidi. Yehowa udi wamba ne, Nakanukengesha ne kufubisha kua midioko ne butu, nakanutumina mabue a nvula, biakanyanga midimu yonso ya bianza bienu; kadi kanuakakudimuna mitshima yenu kundi. Ndi munusengelele ne, Nuelangane meji a muanda eu; ku dituku edi tô ne ku matuku atshidi ku mpala, ku dituku dia makumi abidi ne anai dia ngondo wa tshitema, ku dituku diakajadikabo bishimikidi bia ntempelo wa Yehowa; elanganai meji a muanda eu. Maminu akuanji kulua mu diyeba, anyi? E, muonshi wa tumuma tua nyinyo, mutshi wa nfigi, mutshi wa grenade ne mutshi wa olive kayena nuanji kukuama mamuma; kadi ku dituku edi tô ne ku mpala nennusankishe. Dî dia Yehowa diakalua kudi Hagai tshiakabidi mu dituku dia makumi abidi ne anai dia ngondo ne, Ambila Zelubabela, gouverneur wa mu Yuda, dî edi ne, Nkadi ha kuzakasha diulu ne buloba; nkadi ha kutokola nkuasa wa bunfumu, nkadi ha kubutula bukole bua makelenge a bisamba bia bantu, ne ha kutokola makalu a nvita ne badi bendamu; tubalu ne badi babanda ha nyima hatu nebikumibue hanshi, muntu ne muntu wa munkatshi muabo neahone hanshi ku muele wa nvita wa muanʼabo. Yehowa wa misumba udi wamba ne, Mu dituku adi, Nenkuangate wewe Zelubabela, muntu wanyi, muana wa Shalatiele, nenkuvuishe bu kakanu ka ku munu wanyi; bualu bua nakukusungula. Yehowa wa misumba udi wamba mei â. Mu ngondo wa muanda mukulu wa tshidimu tshibidi tshia bukokeshi bua Dayawesha, dî dia Yehowa diakalua kudi Zekâya, muana wa Belekiya, muana wa muprofete Ido, diamba ne, Yehowa wakadi ne batatu benu tshiji tshikole. Nunku ubambile ne, Yehowa wa misumba udi wamba ne, Hinganai kundi, ne meme nempingane kunudi! Yehowa wa misumba udi wamba nunku. Kanuikadi bu muakadi batatu benu, bobo mene bakambilabo kudi baprofete ba diambedi ne, Yehowa wa misumba udi wamba ne, Alukilai bienu kundi ne lekelai kulonda bienzedi bienu bibi ne malu mabi enu. Kadi Yehowa udi wamba ne, Bobo kabakangunvuila, kabakateleja matshu abo kundi. Batatu benu, bobo badi kudi kunyi? Baprofete, bobo badi bashala ne muoyo tshiendelele, anyi? Kadi mei anyi ne mikenji yanyi, binakuelela bantu banyi baprofete, kabiakafika kudi batatu benu, anyi? Nunku bobo bakakudimuka, bakamba ne, Bu muakadi Yehowa wa misumba muhangidishe bua kutuenzela bua bienzedi bietu ne bua malu etu, mbu mudiye mutuenzele. Mu dituku dia makumi abidi ne anai dia ngondo wa dikumi ne umue, udi ngondo wa Shebata, mu tshidimu tshibidi tshia bukokeshi bua Dayawesha, dî dia Yehowa diakalua kudi Zekâya, muana wa Belekiya, muana wa muprofete Ido, diamba ne, Bufuku abu nakamona, ne tangilai, muntu wenda ha nyima ha kabalu kakunze; wakadi muimane munkatshi mua mitshi ya myrtres mu muaba wa dileshi, ne ku nyima kuandi kuakadi tubalu: tukunze, tukunzubile ne tutoke. Nakamba ne, Mukelenge wanyi, ebi mbinganyi? Muanjelo wakadi uyikila nʼanyi wakangambila ne, Nenkujinguluile bintu ebi. Muntu wakadi muimane munkatshi mua mitshi ya myrtres wakangandamuna ne, Aba mbantu hadi Yehowa mutume bua kuendakana bua kutentekela malu mu buloba. Bobo bine bakambila muanjelo wa Yehowa wakadi muimane munkatshi mua mitshi ya myrtres ne, Tuakuendakana bua kutentekela buloba; mona, buloba buonso budi anu holâ, budi talalâ. Ha diba adi muanjelo wa Yehowa wakamba ne, Yehowa wa misumba, musangu neulehe bule munyi bua wewe kufuila ha mu Yelushalema ne ba misoko ya mu Yuda luse, hawakakuatshila tshiji bidimu ebi bionso makumi muanda mutekete? Yehowa wa kandamuna muanjelo wakadi uyikila nʼanyi mei makese, mei a kumusamba nʼau. Nunku muanjelo wakadi uyikila nʼanyi wakangambila ne, Amba ne, Yehowa wa misumba udi wamba ne, Ntshidi mukuatshike mukau mukole bua Yelushalema ne bua Siona tô ne mpindiu. Ntshidi ne tshiji tshikole kudi bisamba bidi bishikame tshianana bualu bua hanakadi ne tshiji tshikese, malu mabi akatshibandisha. Nunku Yehowa udi wamba ne, Nempingane ku Yelushalema ne luse; nebasemu nsubu wanyi kabidi. Yehowa wa misumba udi wamba ne, Nebolole muonshi bua kuidikisha nʼau Yelushalema. Amba kabidi ne, Yehowa wa misumba udi wamba ne, Misoko yanyi neyule tente kabidi ne diakalengele, ne Yehowa neasambe Siona kabidi, neajadike Yelushalema kabidi. Nakabanduluka, nakatangila; ne monai, nsengu inai yakadiku! Nunku nakambila muanjelo wakadi uyikila nʼanyi ne, Ebi mbinganyi? Yeye wakangandamuna dî ne, Ei nnsengu yakatangadisha Bena Yuda, Bena Isalele ne Bena Yelushalema. Yehowa wakandesha batudi ba biamu banai. Nunku meme nakamukonka ne, Bantu aba bakulua kuenza tshinyi? Yeye wakamba ne, Ei nnsengu yakatangadisha Bena Yuda, ne bua muanda eu kakuakadi muntu wakabisha mutu wandi; ne hatudi aba bakulua bua kubakuatshisha buowa, ne bua kukosa hanshi nsengu ya ba mu bisamba bia bantu, biakambula nsengu yabo bua kuluisha nʼai ba mu buloba bua Yuda ne bua kutangadisha badimu. Nakabanduluka, nakatangila; ekumona! Muntu muikale ne luidi mu tshianza tshiandi. Nunku nakamukonka ne, Uyaya kudi kunyi? Yeye wakangandamuna ne, Bua kuidikisha Yelushalema, bua kutangila ne udi ne butshiama kai ne bule kai. Monai, muanjelo wakadi uyikila nʼanyi wakumuka, ne munga muanjelo wakalua kusangakena nʼandi; wakamuambila ne, Ya lubilu, ambila nsongalume eu ne, Yelushalema neikale ne bantu muomumue ne misoko idi kayiyi ne ngumbu, bualu bua bisumbu bivule bia bantu ne bia bimuna nebikalemu. Bualu bua meme hanyi nengikale kudiye bu lumbu lua kahia lumunyunguluke, ne nengikale butumbi buandi munkatshi muabo. Yehowa udi wamba nunku. Yehowa udi Wamba ne, Telejai bienu! Hatukai mu buloba bua ku node, nyemai, bualu bua nakanutangalasha ku mpehele inai ya diulu, Wewe Siona, nyema, wewe udi mushikame ne muana mukashi wa Babulona. Udi ubisha tshianza tshiandi kudi Bena Isalele udi utu mu kamonyi ka disu dia Yehowa. Bua bualu ebu, Yehowa wa misumba, mumane kuntuma bua kumuhetela butumbi kudi ba mu bisamba bia bantu bakanuhaula, udi wamba ne, Monai, nenkume tshianza tshianyi ha mutu habo, ne bobo nebikale bintu bia kuhaulabo kudi bakadi babakuatshila mudimu; nenumanye ne Yehowa wa misumba wakuntuma. Yehowa udi wamba ne, Imba misambu, sanka biebe, wewe muana mukashi wa mu Siona; bualu bua nendue, nenshikame munkatshi muenu. Bisamba bia bungi nebilamate Yehowa dituku adi, nebikale bantu banyi; ne meme nenshikame munkatshi muenu, ne wewe neumanye ne Yehowa wa misumba wakuntuma kûdi. Yehowa neangate Yuda bu buhianyi buandi mu buloba bua tshijila, neasungule Yelushalema kabidi. Huwai ku mpala kua Yehowa, nuenu bonso ba ha buloba; bualu bua yeye wakatabala mu muaba wandi wa tshijila. Wakandesha Yoshua muakuidi munene muimane ku mpala kua muanjelo wa Yehowa, ne Satana muimane ku tshianza tshiandi tshia balume bua kumudingila malu. Yehowa wakambila Satana ne, Yehowa akubele wewe, Satana; eyo, Yehowa wakasungula Yelushalema akubele! Etshi kantshishelele tshiakahatulabo mu kahia, anyi? Yoshua wakadi muimane ku mpala kua muanjelo mulale bivualu bia bukoya. Muanjelo wakambila bakadi bimane ku mpala kuandi ne, Vulai bivualu ebi bia bukoya hamʼbidi handi. Wakambila Yoshua ne, Mona, nakakûmushila bubi buebe, nakakuluatshisha bivualu bia disanka. Nakamba ne, Bamujingile tshitambala tshitoke ku mutu kuandi. Nunku bakamujinga tshitambala tshitoke ku mutu kuandi, bakamuluatshisha bisalu biakane; ne muanjelo wa Yehowa wakadi muimane ha buihi. Muanjelo wakambila Yoshua ne, Yehowa wa misumba udi wamba ne, Biwenda mu nshila yanyi, ne biwenza mudimu wanyi bimpe, nunku neukokeshe nsubu wanyi ne neulame mbanza yanyi; neakuhe miaba ya kuendela munkatshi mua badi bimana kunoku. Nunku, unvuai, wewe Yoshua muakuidi munene, wewe ne balunda bebe badi bashikame ku mpala kuebe; bualu bua badi tshimanyinu tshia malu mimpe alualua ku mpala; bualu bua nendue ne muntu wanyi Lutonga. Yehowa wa misumba udi wamba ne, Monai dibue dinakuimanyika ku mpala kua Yoshua; ha dibue edi hadi mesu muanda mutekete. Monai, nensongehu tshifundu tshiadi, nengumushe bubi bua mu buloba ebu dituku dimue. Yehowa wa misumba udi wamba ne, Dituku adi buonso buenu, muntu ne muntu, neabikile muena mutumba nʼandi, neasombe nʼandi muinshi mua muonshi wandi wa tumuma tua nvinyo ne muinshi mua mutshi wandi wa nfigi. Muanjelo wakadi uyikila nʼanyi wakalua kabidi, wakambisha bu mudibo babisha muntu ku tulu tuandi. Wakankonka ne, Udi umona tshinyi? Nakamuitaba ne, Ndi mmona tshitekelu tshia minda tshia or mubidi watshi wonso, ne luhanza ludi ha mutu hatshi, ne minda yatshi muanda mutekete idihu; ne milonda muanda mutekete idi ifika ku minda idi ha mutu hatshi. Mitshi ya olive ibidi idi ha buihi nʼatshi, umue ku tshianza tshia balume tshia luhanza alu, mukuabo ku tshianza tshialu tshia bakashi. Nakakula kabidi ne muanjelo wakadi uyikila nʼanyi, nakamukonka ne, Ebi mbinganyi, mukelenge wanyi? Nunku muanjelo wakadi uyikila nʼanyi wakangandamuna ne, Kuena mumanye bintu ebi, anyi? Nakamukudimuna ne, Nansha, mukelenge wanyi. Nunku yeye wakitaba, wakangambila ne, Edi ndî dia Yehowa kudi Zelubabela ne, Kabiena bua bungi bua masalayi, anyi bua bukole, kadi mbua Nyuma wanyi; Yehowa wa misumba udi wamba nunku. Wewe, mukuna eu munene, udi tshinyi? Ku mpala kua Zelubabela nebakulandakashe bu mpata. Yeye neahatule dibue dia ku musonga wa nsubu helabo mbila ne, Diakalengele, diakalengele dikale kudidi. Dî dia Yehowa diakalua kundi kabidi ne, Bianza bia Zelubabela biakujadika bishimikidi bia nsubu eu; bianza biandi nebimushikishe; hashishe, neumanye ne Yehowa wa misumba wakuntuma kûdi. Muntu yonso wakujiana dituku dia malu makese neasanke, neamone luidi lua plomb mu tshianza tshia Zelubabela. Mesu au muanda mutekete adi mesu a Yehowa adi akenzakana eku ne eku ha buloba buonso. Hashishe, nakamuebesha ne, Mitshi ei ibidi ya olive idi binganyi, wa ku tshianza tshia balume tshia tshitekelu tshia muinda, ne wa ku tshianza tshia bakashi? Nakamuebesha kabidi ne, Matamba â abidi a mitshi ya olive adi binganyi, adi ha buihi ne milonda ibidi ya or idi ituma manyi adi munda muai mu luhanza lua or lua ha mutu? Yeye wakangandamuna ne, Kuena mumanye bintu ebi, anyi? Meme nakitaba ne, Nansha, mukelenge wanyi. Nunku yeye wakamba ne, Ebi bidi bu bantu babidi bakajidilabo ne manyi, badi bimana ha buihi ne Mukelenge wa buloba buonso. Nakabanduluka kabidi, nakatangila, ekumona, mukanda muvunga wakadi ubuka! Yeye wakangebesha ne, Udi umona tshinyi? Nakamuandamuna ne, Ndi ntangila mukanda muvunga ubuka; bule buau budi coudées makumi abidi ne butshiama buau budi coudées dikumi. Ahu yeye wakangambila ne, Eu udi mulau udi utangalaka ha buloba buonso. Bualu bua muntu yonso udi wiba neumushibue ku luseke elu bu mudiu wamba; ne muntu yonso udi uditshiha ne mashimi neumushibue ku luseke alu bu mudiu wamba. Yehowa wa misumba udi wamba ne, Nengutume, neubuele mu nsubu wa muibi, ne mu nsubu wa muntu udi uditshiha ne mashimi mu dina dianyi; neushale munda mua nsubu wandi, neumuoshe diatshimue ne mabaya andi ne mabue andi kabidi. Hashishe, muanjelo wakadi uyikila nʼanyi wakaluhuka, wakangambila ne, Banduluka, mona tshintu etshi tshidi tshihatuka ne, Ntshintu kai? Nakamuebesha ne, Etshi ntshinyi? Yeye wakamba ne, Etshi ntshihiminu tshia épha tshidi tshihatuka. Wakamba kabidi ne, Etshi ntshifuanyikishi tshia malu mabi abo ha buloba buonso. Ne monai! Bakambula tshibuikilu tshiatshi tshiakadi tshibulunge tshia tshiamu tshia ntende, ne mukashi wakadi ushikama munda mua tshihiminu tshia épha! Yeye wakamba ne, Mukashi eu udi Bubi mene; wakamusakila munda mua tshihiminu, wakabuikila tshibuikilu tshia tshiamu tshia ntende ku mishiku yatshi. Hashishe, nakabanduluka, nakatangila, ekumona! Bakashi babidi baluhuke, luhehele luakadi mu mahuahua abo; bakadi ne mahuahua bu mahuahua a kasonga nyunyu. Bakambula tshihiminu tshia épha ne bakatshibandisha hankatshi ha diulu ne buloba. Nakakonka muanjelo wakadi uyikila nʼanyi ne, Badi baya ne tshihiminu tshia épha kudi kunyi? Yeye wakangambila ne, Bua kutshiashila nsubu mu buloba bua Shinâ; hashikishabo kumujadikaku, nebatshishimikeku ha tshitekelu tshiatshi. Nakabanduluka kabidi, nakatengila, ekumona! Makalu a nvita anai akadi afuma hankatshi ha mikuna ibidi; mikuna ei yakadi mikuna ya tshiamu tshia mitaku. Ku dikalu dia kumudilu kuakadi tubalu tukunze; ku dikalu dibidi kuakadi tubalu tufike; ku dikalu disatu kuakadi tubalu tutoke; ku dikalu dinai kuakadi tubalu tutokoloke tuakadi ne matoba. Nunku nakebesha muanjelo wakadi uyikila nʼanyi ne, Ebi mbinganyi, mukelenge wanyi? Muanjelo wakangandamuna ne, Ebi bidi makalu adi aya ku mpehele mai ya diulu mimane kudimuenesha ku mpala kua Mukelenge wa buloba bujima. Dikalu didi ne tubalu tufike didi diya ku buloba bua ku nôde; tutoke tudi tuya ku buloba bia ku wesete; tudi ne matoba tudi tuya ku buloba bua ku sude. Tubala tua lubilu lukole tuakaluhuka, tuakakeba kutambakana ha buloba. Yeye wakamba ne, Yai bienu, tambakanai ha buloba. Nunku tuakatambakana ha buloba. Hashishe, yeye wakatuela dî ne, Tangila, tudi tuya ku buloba bua ku nôde tuakuholesha mutshima wanyi mu buloba bua ku nôde. Dî dia Yehowa diakalua kundi ne, Angata bintu bidibo bafila kudi bantu aba bakadi mu buhika, Heledai, Tobiya ne Yedaya mene; dituku adi mene, wewe muine, ya ku nsubu wa Yoshiya, muana wa Selanya, kuakatulabo hakafumabo ku Babulona. Eyo, angata argent ne or kudibo, wifule bifulu bia butumbi, ubiase ku mutu kua Yoshua, muana wa Yehosadaka, muakuidi mimene. Umuambile ne, Yehowa wa misumba udi wamba dî edi ne, Monai, muntu udi ne dina dia Lutonga; neadiunde mu muaba wandi, nease ntempelo wa Yehowa. Yeye mene nease ntempelo wa Yehowa, neikale ne butumbi, neashikame mu nkuasa wandi wa bukelenge, neakokeshemu; neikale muakuidi mu nkuasa wandi wa butumbi; midimu ei ibidi neyikuatshishangane. Bifulu ebi bia bukelenge nebikale kudi Heledai ne kudi Tobiya ne kudi Yedaya ne kudi Yoshiya, muana wa Sefanya, bu tshivulukidi mu ntempelo wa Yehowa. Bantu badi kule nebalue, nebenze mudimu wa kuasa ntempelo wa Yehowa, nenumanye ne, Yehowa wa misumba wakuntuma kunudi. Muanda eu neulue nunku, binuananukila kutumikila dî dia Yehowa Nzambi wenu. Mu tshidimu tshinai tshia bukokeshi bua mukelenge Dayawesha, dî dia Yehowa diakalua kudi Zekâya mu dituku dinai dia ngondo wa tshitema, ngondo wa Kiseleu mene. Ba mu Betele bakadianjila kutuma Shalesê ne Legeme-meleke ne bantu babo bua kulombabo diakalengele kudi Yehowa; bua kukonka bakuidi ba mu nsubu wa Yehowa wa misumba ne baprofete bandi ne, Ndi mua kuasa madilu ne kujila bia kudia mu ngondo muitanu bu munakumana kuenza bidimu ebi bia bungi, anyi? Dî dia Yehowa wa misumba diakalua kundi ne, Akula ne bantu bonso ba mu buloba ebu, ne bakuidi kabidi, ubambile ne, Hanuakajila bia kudia ne hanuakasa muadi mu ngondo muitanu ne mu ngondo wa muanda mutekete mu bidimu ebi makumi muanda mutekete, nuakajila bia kudia bua bualu buanyi mene, anyi? Hanuadia ne hanuanua, kanuena nudia, kanuena nunua anu bua kudisankisha, anyi? Kanuakunvua mei akamba Yehowa mukana mua baprofete ba diambedi, hakadi Yelushalema ne bantu ne diakalengele, ne hakadi misoko numunyunguluke, ne hakadi bantu bashikame mu buloba ku Sude ne mu tshibanda, anyi? Hashishe, dî dia Yehowa diakalua kudi Zekâya ne, Yehowa wa misumba wakamba ne, Kosai bilumbu ne dikosa dia bushuwa, leshanganai dinanga ne nufuilangane luse, muntu ne muntu ne mukuabo. Kanukengeshi bakashi ba mu lufuila, anyi bana ba nshiya, anyi muenyi, anyi bahele; muntu kahangidishi bualu mu mutshima wandi bua kuenzela muanʼabo bibi. Kadi bobo bakabenga kungunvuila, bakasaka makaya, bakajibika matshu abo bua bobo kabunvu. Eyo, bakavuisha mitshima yabo bu dibue dia diamant, bua kabunvu diyisha dia mikenji ne mei akadi Yehowa wa misumba mubatumine ku bukole bua Nyuma wandi mukana mua baprofete ba diambedi. Nunku tshiji tshikole tshia Yehowa wa misumba tshiakaha kudibo. Hashishe, Yehowa wa misumba wakamba ne, Nakababikila, kadi bobo kabakangunvuila. Nunku bobo nebadile kundi, ne tshiena mbunvuila. Nakabatangadisha mu nvunde munkatshi mua bisamba bionso biakadibo kabayi banze kumanya. Nunku buloba buakumukabo buakabutudibua ku nyima kuabo, kakuakadi muntu wakayamu anyi wakafumamu; buloba buakadi busankisha mitshima ya bantu buakakudimuka tshikulu. Tshiakabidi Dî dia Yehowa wa misumba diakalua kundi ne, Yehowa wa misumba udi wamba ne, Ndi munvue mukau bua Siona, nakukuatshika tshiji tshikole bua bualu buandi. Yehowa udi wamba ne, Nempingane ku Siona, nenshikame munkatshi mua Yelushalema; nebabikile Yelushalema ne, Musoko wa kungeyemena; nebabikile mukuna wa Yehowa wa misumba ne, Mukuna wa tshijila. Yehowa wa misumba udi wamba ne, Bantu banunu, balume ne bakashi, nebashikame kabidi mu misesu ya mu Yelushalema, muntu ne muntu ne tshibangu tshiandi mu tshianza bualu bua bidimu biandi biakavulangana. Misesu ya mu musoko neyikale tente ne bana ba balume ne bana ba bakashi banaya mu misesu yau. Yehowa wa misumba udi wamba ne, Bikala bualu ebu bualu bua kukema ku mesu kua bantu aba ba mu matuku au, nebuikale kabidi bua kukema ku mesu kuanyi, anyi? Edi ndikonka dia Yehowa wa misumba. Yehowa wa misumba udi wamba ne, Monai, nempatule bantu banyi mu buloba bua ku luseke ludi diba dihatuka ne mu buloba bua ku luseke ludi diba dibuela. Nembahingashe bua kushikamabo munkatshi mua Yelushalema, nebikale bantu banyi, ne meme nengikale Nzambi wabo mu bushuwa ne mu buakane. Yehowa wa misumba udi wamba ne, Koleshai maboko enu; nuenu badi bunvua mei â a mu matuku â mukana mua baprofete bakadiku mu dituku diakajadikabo bishimikidi bia nsubu wa Yehowa wa misumba, ntempelo eu mene, bua kumuibakabo. Bualu bua ku mpala kua matuku au muntu kakaheta difutu ku mudimu wandi, anyi difutu ku mudimu wa bimuna biandi; muntu yonso wakaluhuka anyi wakabuela kakadi ne ditalala bualu bua bena lukuna bandi; bualu bua nakasonsola bantu bonso bua muntu ne muntu aluishe muena mutumba nʼandi. Yehowa wa misumba udi wamba ne, Katataka tshiena bu munakadi mu matuku a diambedi kudi difuka dia bantu aba. Nebakune maminu ne ditalala, nebahete diakalengele; muonshi wa tumuma neukuame tumuma tuau, buloba nebulue ne bintu bia kudia biabu, diulu nedilokeshe dibungi, nengenzeshe difuka edi dia bantu aba bua kuhianabo bintu ebi bionso. Bu munuakadi bantu bedibue mulau munkatshi mua bisamba bia bantu, nuenu Bena Yuda ne Bena Isalele, nunku ndi musue kunuhandisha, ne nenulue bantu badi basankisha bakuabo. Kanutshinyi, maboko enu ikale ne bukole. Bualu bua Yehowa wa misumba udi wamba ne, Bu munakela meji bua kunuenzela bibi, bakankuatshisha batatu benu tshiji, ne tshiakakudimuna mutshima wanyi; nunku, nakuhangidisha mu matuku â bua kuenzela Yelushalema ne Bena Yuda bimpe. Kanutshinyi. Nudi ne bua kuenza malu â. Ambilanganai mei a bushuwa, buonso buenu, muntu ne muntu ne muena mutumba nʼandi; kosai bilumbu mu bilumbuluidi bidi ku bibuelelu bia musoko ne kulumbulula kua bushuwa ne kua ditalala. Yehowa udi wamba ne, Nansha umue wa munkatshi muenu kahangidishi bualu mu mutshima wandi bua kuenzeleye muena mutumba nʼandi bibi; kanunangi mutshihu wa mashimi, bualu bua ndi nkina malu â onso. Dî dia Yehowa wa misumba diakalua kundi kabidi ne, Edi ndî didi Yehowa wa misumba wamba ne, Kujila kua bia kudia kua mu ngondo muinai, kua mu ngondo muitanu, kua mu ngondo wa muanda mutekete ne kua mu ngondo wa dikumi, nekuikale bu masanka ne musangelu, ne bu bikondo bia bia kudia bia disanka kudi Bena Yuda. Nunku suai bushuwa ne ditalala. Yehowa wa misumba udi wamba ne, Bantu nebalue kabidi, bafume mu misoko ya bungi. Ba mu musoko mukuabo nebaye ku mukuabo bamba ne, Tuyai lukasa bua kulengesha ne Yehowa, ne bua kukeba Yehowa wa misumba. Tuetu netuye hetu. Bantu bavule ne ba mu bisamba bia bukole nebalue kukeba Yehowa wa misumba mu Yelushalema ne bua kulengesha nʼandi Yehowa wa misumba udi wamba dî edi ne, Mu matuku au bantu dikumi ba mu muaku ne mu muaku nebakuate ku luzemba lua tshivuali tshia Muena Yuda, bamuambila ne, Tudi basue kuya nʼebe, bualu bua tuakunvua ne Nzambi udi nʼebe. Dî dia Yehowa didi dihisha buloba bua Hadalaka, ne didi dishindamena Damaseke; bualu bua disu dia Yehowa didi dimona bantu bakuabo bu mudidi dimona bisamba bionso bia Bena Isalele; Hamata kabidi, ku butshika bua Damaseke; ne Tulo ne Sidona, nansha yoyi mikale ne meji a bungi. Tulo wakadiashila musoko mukoleshibue ne ngumbu, wakadikungishila argent bu luhuishi, ne or bu bitahikidi mu misesu. Kadi monai, Mukelenge neauhaule, nêle ngumbu yau mu mai manene; neulue mu kahia. Musoko wa Ashekelona neumone muanda eu, neutshine; wa Gaza kabidi newikale ne kanyinganyinga kakole; wa Ekelona kabidi neufuishibue bundu bualu bua ditekemena diakadiu nʼadi nedihange. Mukelenge wa mu Gaza neajimine, bantu kabena bashikama mu Ashekelona kabidi. Bantu ba bende nebashikame mu Ashedodo, nengumushe malu adi Bena Peleshete baditumbisha nʼau. Nengumushe mashi mukana muabo, ne bintu bia tshinyangu ku menu abo; bobo nebikale kudi Nzambi wetu bu difuka dia bantu bandi, nebikale bu tshiota tshia mu Yuda mene, ne Ekelona newikale bu Muena Yebuse. Nenyunguluke nsubu wanyi bu mudi bansentedi bamulama, bua muntu kahitshi eku ne eku; bua mubakengeshi kafila ku luseke luabo kabidi; bualu bua mpindiu udi mulami wabo mutabale. Sanka bikole, wewe muana mukashi wa mu Siona; ela mbila ne disanka, wewe muana mukashi wa mu Yelushalema. Mona, Mukelenge webe udi ulua kûdi; yeye udi muakane ne wakutamba hadi nʼandi lukuna bukole; udi ne kalolo, udi wenda ha nyima ha mpunda, ba nyima ha muana wa nyama wa mpunda mene. Yeye neatshibule dikalu dia nvita ku Efelayima, neashihe kabalu ka nvita ku Yelushalema, neatshibule buta bua nvita; neambe mei a kuvuisha nʼau ditalala munkatshi mua bisamba bia bantu. Bukokeshi buandi nebuikale ku mai manene tô ne ku mai manene makuabo, ne ku musulu wa Pelata tô ne kunfudilu kua buloba. Wewe kabidi, Umanye ne, Bualu bua mashi a tshihungidi tshianyi nʼebe, nempatule bantu bebe batshidi mu buhika mu tshina tshidi katshiyi ne mai. Hinganai bienu ku musoko udi ne ngumbu ya mabue, nuenu bena lukanu badi batekemena luhandu; dituku edi mene ndi nnuambila ne, Nennuvudishile disanka tshiakabidi. Bualu bua ndi nnana Yuda bu buta buanyi, nentekemu Efelayima bu mukete wanyi. Wewe Siona, nensonsole bana bebe balume, bua kuluanganabo ne bana balume ba Bena Gelika; nenkuvuishe bu muele wa nvita wa muena bukitu. Yehowa neamueneke ha mutu habo, mukete wandi neuhatuke bu muele wa nvula. Mukelenge Yehowa nêle mpungi, neaye biandi mu nvunde ya ku luseke lua sude. Yehowa wa misumba neabalame, ne bobo nebatshimune, nebadiate badi bahela mabue; nebanue mashi abo, nebateke diyoyo bu badi bakuatshike nvinyo; nebukute bu malonga adi ne mashi a mulambu, bu matumba a tshioshelu. Yehowa Nzambi wabo nebahandishe mu dituku adi, nealame bantu bandi bu tshisumbu tshia mikoko; bualu bua nebikale bu mabue a mushinga mukole mu tshifulu tshia mukelenge, bakenka mu buloba buandi. Monai mudi diakalengele diandi ne buimpe buandi bihite bunene! Maminu a blé neadiundishe bansongalume bikole, ne nvinyo muhia-muhia neadiundishe mishikankunde. Lombai Yehowa nvula mu tshikondo tshia nvula mishishe. Yehowa udi uhenyisha miele ya nvula, udi ulokeshila bantu nvula ya bungi, udi umeneshila muntu yonso midioko mu budimi buandi. Bualu bua mpingu ya telafima idi yamba mei a hatuhu, batempi ba mbuku badi batempa ne mashimi; badi balota bilota badi bawilangana bilota bia mashimi, badi basambangana ne busambi hua tshianana. Bua malu â bantu badi batatakana bu mikoko, badi bakenga kabayi ne mulami. Tshiji tshianyi tshidi kudi balami, nenkengeshe balombodi; bualu bua Yehowa wa misumba udi ulama mikoko yandi, Bena Yuda mene, neabavuishe bu kabalu kandi ka lumu mu nvita. Dibue dia mu ditumba dia nsubu nedifume kudi Bena Yuda, ne mutondo wa ntenta neufume kudibo kabidi; buta bua kuluangana nʼabu nvita nebufume kudibo, ne bakokeshi bonso nebafume kudibo. Nebikale bu bena bukitu mu nvita badi badiata badi nʼabo lukuna mu bitahikidi bia misesu; nebaluangane nvita bualu bua Yehowa udi nʼabo, nebafuishe babandi ba ha nyima ha tuhalu bundu. Nenkoleshe Bena Yuda, nempandishe ba mu tshiota tshia Yosefe, nembahingashe kabidi bualu bua ndi nʼabo luse, nebikale bu bavua kabayi bihatshibue kundi; bualu bua ndi Yehowa Nzambi wabo, nembunvuile. Bena Efelayima nehikale bu bena bukitu; mitshima yabo neyisanke bu mudibo banue nvinyo. Bana babo nebamone muanda eu, nebasanke; mitshima yabo neyikale ne disanka mu Yehowa. Nembele muoso, nembasangishe hamue; bualu bua nakubahandisha, nebavulangane bu muakadibo diambedi. Nansha bingikala mubatangalashe munkatshi mua bisamba bia bantu, nebanvuluke mu miaba ya kule; nebakoleshe bana bakalelabo, nebahingane. Nendue nʼabo kabidi bafume mu buloba bua Ejipitu, nembasangishe hamue, nembaluhule bafume mu buloba bua Ashû; nendue nʼabo mu buloba bua Gilada ne bua Lebanona, ne kabena basanganamu muaba wa kubateka. Yehowa neahite mu mai manene a ntatu, neatute mavuala a mai manene, ndondo yonso ya musulu wa Nile neyikame. Nebahuekeshe kudibandisha kua Ashû, ne dikombo dia bukelenge dia Ejipitu nediumukemu. Yehowa udi wamba ne, Nembakoleshe mu Yehowa, nebatumbile mu dina dianyi. Lebanona, unzulule bibi biebe, bua kahia kashidishe mitshi yebe ya cèdre! Asa muadi, wewe mutshi wa cyprès, bualu bua mutshi wa cèdre wakubona, mitshi ya butumbi yakubutudibua. Asai miadi, mitshi ya chène ya mu Bashana, bualu bua ditu dinene diakutahibua. Unvuai muadi wa balami ba mikoko bualu bua butumbi buabo buakubutudibua! Unvuai muadi wa bana ba nyama ya ntambue, bualu bua ditu dinene dia Yadene diakatumbishabo didi dibutuke! Yehowa Nzambi wanyi wakangambila ne, Disha mikoko idibo hamba kushiha. Basumbi badi bayishiha, ne kakuena udi ubahisha; bahanyi badi bamba ne, Yehowa atumbishibue bualu bua tuakulua babanji! Balami bai kabena bayifuila luse. Yehowa udi wamba ne, Nunku tshiena nfuila ba mu buloba ebu luse kabidi; monai, nenfile bantu aba bonso, muntu ne muntu mu bianza bia muena mutumba nʼandi, muntu ne muntu mu bianza bia mukelenge wandi; nebavuishe buloba tshikulu, ne tshiena mbahandisha mu bianza bia babashihi. Nunku nakadisha mikoko yakambabo kushiha, yoyi mene yakadi mihite kunyana. Nakangata milangala ibidi, nakidika mukuabo ne, Diakalengele, nakidika mukuabo ne, Buobumue. Nunku nakadisha mikoko. Nakashiha balami basatu mu ngondo umue bualu bua mutshima wanyi wakabanga kuikala nʼabo lutulu, ne mitshima yabo yakandengulula. Nunku nakamba ne, Tshiena nnudisha kabidi. Ufuafua, ufue; udi ujimina, ujimine; yashala ne muoyo idiangane. Nakangata mulangala wanyi, Diakalengele, nekaukosa hankatshi bua kushiha bianyi tshihungidi tshinakahunga ne ba mu bisamba bionso. Tshiakafua dituku adi; ne mikoko yakadi mihite kunyana yakunvua dî dianyi, yakamanya ne, Di adi diakadi dia Yehowa. Nakayambila ne, Bikala bualu ebu buimpe ku mesu kuenu, numpe difutu dianyi; kadi binuamanya ne, Kambimpe, nubulekele. Nunku bakabidikishila bituha bia argent makumi asatu bu difutu dianyi. Yehowa wakangambila ne, Wele bintu ebi bia tshishingashinga tshiakuntuilabo mu tshibutshilu. Nunku nakangata bituha bia argent makumi asatu, nakabiela mu tshibutshilu tshia mu nsubu wa Yehowa. Hashishe, nakakosa mulangala wanyi mukuabo, Buobumue mene, bua kushiha buobumue bua Bena Yuda ne Bena Isalele. Yehowa wakangambila kabidi ne, Udiangatshile kabidi bintu bia mulami muhote. Mona, ndi ngamba kubisha mulami ha buloba, ne yeye kena umona mikoko idi mijimine, kena ukeba mikoko idi mitangadike, kena ukolesha idi mitahike mputa; kena udisha idi mimane ne bukole, kadi neadie munyinyi wa idi ne manyi, neabande bikono biai bihesa. Mulau wikale kudi mulami wa tshianana, udi ushiya mikoko! Muele wa nvita utahe diboko diandi ne disu diandi dia ku tshianza tshia balume! Diboko diandi difube, ne disu diandi dia ku tshianza tshia balume difue tshiendelele! Edi ndî dia Yehowa bualu bua Bena Isalele. Edi ndî dia Yehowa udi ubalulula diulu, udi ujadika bishimikidi bia buloba, udi uteka nyuma wa buntu munda mua muntu, ne, Monai, nenyishe Yelushalema bu luhanza lua kudilenduishabo nʼalu kudi bantu bonso badi bamunyunguluka, ne nvita ei neyiluishe Bena Yuda hatshintshimikabo Yelushalema. Mu dituku adi nenvuishe Yelushalema bu dibue dihite bujitu kudi bantu bonso; bonso badi badiambula nebatahike mputa mibi, ne ba mu bisamba bionso bia ha buloba nebadisangishe hamue bua kumuluisha. Yehowa udi wamba ne, Mu dituku adi nenkuatshishe kabalu konso ne buowa, nempadishe mubandi wa ha nyima haku. Nembulule mesu anyi kudi Bena Yuda, nenfofomeshe mesu a tubalu tuonso tua ba ha buloba! Banfumu ba Yuda nebambe mu mitshima yabo ne, Bena musoko wa Yelushalema badi ne bukole mu Yehowa wa misumba, Nzambi wabo. Mu dituku adi nenvuishe banfumu ba biota bia Bena Yuda bu dilonga dia kahia munkatshi mua nkunyi, ne bu tshimunyi munkatshi mua bisumbu bia blé; neboshe ba mu bisamba bionso bidi bibanyunguluka, ku tshianza tshia balume ne ku tshianza tshia bakashi; kadi ba mu Yelushalema nebashikame mu muaba wabo, mu Yelushalema mene. Yehowa neadianjile kuhandisha ba mu ntenta ya Bena Yuda, bua butumbi bua tshiota tshia Davidi ne butumbi bua badi bashikame mu Yelushalema kabutambi bua Bena Yuda. Mu dituku adi Yehowa nealame bantu badi bashikame mu Yelushalema; ne muntu wa munkatshi muabo udi mutambe kuteketa neikale bu Davidi mu dituku adi, tshiota tshia Davidi netshikale bu Nzambi, bu muanjelo wa Nzambi ku mpala kuabo. Mu dituku adi nenkebe kubutula bisamba bionso bidi bilua kuluisha ba mu Yelushalema. Nengitshikishile ba mu tshiota tshia Davidi ne ba mu Yelushalema nyuma wa luse ne wa kutendekena; nebamumone wakutuabo difuma; nebamuashile muadi bu mudi muntu washila muanʼandi umuehele muadi, nebamudile ne kanyinganyinga kakole, bu mudi muntu udila ne kanyinganyinga kakole bua lufu lua muanʼa bute wandi. Mu dituku adi muadi munene newikale mu Yelushalema, bu madilu a ku Hadadalimona mu tshibanda tshia Megido. Ba mu buloba abu nebase madilu, diku dionso ha buadi: ba mu diku dia tshiota tshia Davidi ha buabo, ne bakashi babo ha buabo; ba mu diku dia tshiota tshia Natana ha buabo, ne bakashi babo ha buabo; ba mu diku dia Bena Lewi ha buabo, ne bakashi babo ha buabo; ba mu diku dia Bena Shimei ha buabo, ne bakashi babo ha buabo; ne ba mu meku onso adi ashala, ba mu diku dionso ha buabo, ne bakashi babo ha buabo. Mu dituku adi nebabuluile ba mu tshiota tshia Davidi ne ba mu Yelushalema mushimi wa mai, bua kubalengesha ku bubi ne ku malu a bukoya. Yehowa wa misumba udi wamba ne, Mu dituku adi nenjimishe mena a mpingu mu buloba, ne bantu kabena bayivuluka kabidi kashidi; nengihate baprofete ne nyuma ya bukoya mu buloba. Bikalaku muntu utshidi wamba mei bu muprofete, tatu wandi ne mamu wandi bakamulela nebamuambile ne, Kuena ushala ne muoyo, bualu bua wakuamba mei a mashimi mu dina dia Yehowa. Nunku tatu wandi ne mamu wandi bakamulela nebamutahe bamusompola hatshidiye wamba mei bu muprofete. Mu dituku adi baprofete nebakuatshike bundu, muntu ne muntu bua tshikena kumona tshiandi, hambeye mei bu muprofete; kena udiluatshisha ne tshikutu tshia miosa bua kudinga nʼatshi bakuabo. Neambe biandi ne, Tshiena muprofete, ndi tshidime; bualu bua eu mmudimu wa ku buana buanyi tô ne katataka. Mukuabo neamuebeshe ne, Ei mmputa kai idi mu bianza biebe? Yeye neambe ne, Bakayintaha mu nsubu wa balunda banyi. Bika, muele wa nvita, taha mulami wanyi wa mikoko, ne muntu udi nyanʼanyi mu mudimu! Edi ndi dia Yehowa wa misumba. Taha mulami wa mikoko, mikoko itangadishibue; nengolole tshianza tshianyi kudi bana ba mikoko. Yehowa udi wamba ne, Muanda eu newikale mu buloba ebu buonso, nebashihe bituha bibidi, nebafue; kadi tshituha tshisatu netshishalemu. Nengele tshituha etshi tshisatu mu kahia, nembafule bu mudibo bafula tshiamu tshia argent, nembatete bu mudibo bateta tshiamu tshia or. Nebambikile mu dina dianyi, nembunvuile. Nengambe bianyi ne, Bobo badi bantu banyi; bobo nebambe ne, Yehowa udi Nzambi wetu. Monai, dituku dia Yehowa dilualua, dialuabo kuabanyangana bintu biebe munkatshi muenu mene biakanyengabo mu nvita. Bualu bua nensangishe ba mu bisamba bionso bua kuluanganabo nvita ne Bena Yelushalema; nebanyenge musoko, nebahaule bia mu nsubu, nebakuate bakashi ku bukole; tshituha tshia hankatshi tshia bena musoko netshibuele mu buhika, kadi bantu hadi bashala kabena bumushibua mu musoko. Mu diba adi Yehowa nealuhuke, nealuangane ne ba mu bisamba abi, bu muakaluanganeye mu dituku dia nvita. Makasa andi neashindame dituku adi ha Mukuna wa Olive, udi ku mpala kua Yelushalema mu luseke lua esete; ne Mukuna wa Olive neuhandike hankatshi, ku luseke lua esete tô ne ku wesete, tshibanda tshitamba bunene netshimuenekeku; tshituha tshia hankatshi tshia mukuna netshisemene ku luseke lua node, ne tshituha tshikuabo tshia hankatshi netshisemene ku luseke lua Sude. Tshibanda tshia Hinoma netshikale tshijibikila tô ne ku Azele. E, nenunyeme bu munuakanyema ku mpala kua kutaka kua buloba mu matuku a Uziya, mukelenge wa Yuda. Yehowa Nzambi nealue, banjelo bandi ba tshijila nebalue nʼandi. Mu dituku adi munya kawena utema bikole, ne mufitu kawena wikalaku; kadi nedikale dituku dimue ha buadi, didi dimanyibua kudi Yehowa; kakuena munya, kakuena butuku; kadi hila butuku, munya neuteme. Mu dituku adi mai a muoyo neahatuke mu Yelushalema; tshituha tshiau netshihueke ku mai manene a ku esete, ne tshituha tshiau tshikuabo netshihueke ku mai manene a ku wesete; bualu nebuikale nunku mu tshikondo tshia luya ne mu tshikondo tshia mashika. Yehowa neikale Mukelenge wa buloba bujima. Mu dituku adi Yehowa neikale anu umue, ne dina diandi nedikale dimue. Buloba buonso nebukudimuke bu mpata, ku Geba tô ne ku Limona, ku luseke lua Sude lua Yelushalema. Musoko wa Yelushalema newikale ha mukuna, neushale mu muaba wau, ku tshibi tshia Benyamina tô ne ku muaba wa tshibi tshia diambedi, ku tshibi tshia ku ditumba ne ku tshibumba tshia Hananele tô ne ku bikaminu bia nvinyo bia mukelenge. Bantu nebashikamemu, kabena bikala ne mulau kabidi; ba mu Yelushalema nebashikame talalâ. Edi ndikenga dilualua Yehowa kukengesha nʼadi bantu bonso bakaluangana ne Bena Yelushalema, minyinyi ya hamʼbidi habo neyibole hatshidibo bimana ne makasa abo, mesu abo neabole mu bihokohoko biabo, ndimi yabo neyibole mukana muabo. Mu dituku adi bualu bukole bufume kudi Yehowa nebuikale munkatshi muabo; nebatatakane bianza, mukuabo neakuate tshianza tshia munga bua kumuluisha. Bena Yuda bine nebaluangane ne Bena Yelushalema kabidi. Nebasangishemu biuma bia bisamba bionso bidi binyunguluka musoko eu: or, argent, bivualu bikumbane. Muomumue kabidi tshihuhu utshikuate tubalu, mpunda, tumelo, mpunda ne nyama yonso idimu bitudilu biabi, netshikale bu dikenga diakakuata bantu. Mu tshikondo atshi kabidi bantu bonso badi bashale munkatshi mua bisamba abi bionso biakaluisha Bena Yelushalema nebabandeku ku tshidimu ku tshidimu bua kutendelelabo Mukelenge Yehowa wa misumba, ne bua kujidila bidia bia disanka dia bitandatanda. Biahanga ba mu meku onso a ha buloba kuhandabo ku Yelushalema bua kutendelela Mukelenge Yehowa wa misumba, nvula kayena ibalokela. Bikala tshisamba tshia Bena Ejipitu katshiyi tshibandeku anyi tshibuelemu, nvula kayena ibalokela kabidi; hashishe, tshihuhu netshibalukile tshidi Yehowa ukengesha nʼatshi bisamba bidi kabiyi bibandaku bua kujidila bidia bia disanka dia bitandatanda. Dikenga edi nedikale kudi Bena Ejipitu, ne kudi bisamba bionso bidi kabiyi bibandaku bua kujidila bidia bia disanka dia bitandatanda. Mu dituku adi nemuikale mei mafunda ha ndibu ya tubalu ne, BIA TSHIJILA BIA YEHOWA; ne ngesu ya mu nsubu wa Yehowa neyikale ya tshijila bu mudi malonga a milambu adi ku mpala kua tshioshelu. Bulelela, luesu luonso lua mu Yelushalema ne lua mu buloba bua Yuda nelujidibue kudi Yehowa wa misumba; ne bonso badi bafila milambu nebalue, nebangate ngesu yaya mikuabo, nebayilambemu minyinyi yabo ya ku milambu. Mu dituku adi kakuena kuikala ngendʼa mushinga kabidi mu nsubu wa Yehowa wa misumba. Dî dia tshijila dia Yehowa diakambileye Bena Isalele mukana mua Malaki. Yehowa udi wamba ne, Nakunusua, kadi nudi nuamba ne, Wakutunanga munyi? Yehowa udi ukonka ne, Esau kakadi muanʼabo ne Yakoba, anyi? Nakananga Yakoba, kadi nakadi ne Esau lukuna; nakavuisha mikuna yandi tshihela tshia tshianana, nakavuisha buhianyi buandi muaba wa mibuabua ya mu mpata. Biamba Edome ne, Bakatubutula, kadi netuibake mu bikulu kabidi, Yehowa wa misumba udi wamba ne, Base biabo, kadi meme nenguhule. Bakuabo nebababikile ne, Buloba bua bubi, ne Bantu badi Yehowa nʼabo tshiji tshiendelele. Mesu enu neamone malu â, nenuambe ne, Yehowa udi munene, nenuambe dî edi tô ne mu miaba mihite butshika bua buloba bua Isalele. Muana wa balume udi unemeka tatuʼandi, muhika udi unemeka nfumu wandi; kadi bingikala tatu, kunemekibua kuanyi kudi hanyi? Bingikala mukelenge, dintshina didi hanyi! Edi ndikonka dia Yehowa wa misumba kunudi, nuenu bakuidi, badi balengulula dina dianyi. Kadi nudi nunkonka ne, Tuakulengulula dina diebe munyi? Nudi nufila bia kudia binyanguka ha tshioshelu tshianyi. Nudi nunkonka ne, Tuakubinyanga kudi kunyi? Nudi nubinyanga hanuamba ne, Mesa a Yehowa adi tshintu tshia kulengulula. Hanuafila nyama idi ne bufofo, kambualu bubi, anyi? Hanuafila mikuabo idi milema ne idi misame, kambualu bubi, anyi? Binuayifila kudi gouverneur wenu, yeye neikale nʼenu disanka, anyi? Yehowa wa misumba udi unukonka nunku. Kadi ndi nnuambila mpindiu ne, Kebai diakalengele kudi Nzambi bua yeye atuleshe luse luandi; bua muanda eu unuakuenza ku bianza bienu, yeye neanuanyishe ne disanka, anyi? Yehowa wa misumba udi unukonka nunku. Nakadi kusua bua muntu wa munkatshi muenu inshile bibi bia ku biendelu bia mu ntempelo bua nuenu kanutemeshi kahia ha tshioshelu tshianyi tshianana! Yehowa wa misumba udi wamba ne, Tshiena ne disanka bua malu enu, tshiena ngitabusha mulambu ku tshianza tshienu. Yehowa wa misumba udi wamba ne, Ku kuhatuka kua diba tô ne ku kubuela kuadi dina dianyi didi dinene munkatshi mua ba mu bisamba bia bantu. Mu muaba wonso badi bangoshila musenga wa manananshi ne badi bafila mulambu, mulambu muakane mene, mu dina dianyi; bualu bua dina dianyi didi dinene munkatshi mua ba mu bisamba bia bantu. Kadi nuenu nudi nunyanga dina dianyi, hanuamba ne, Mesa a Yehowa adi mabiha, ne bia kudia biandi, milambu ya ha mesa, mbintu bia kulengulula. Yehowa wa misumba udi wamba ne, Nuenu nudi nuamba ne, Monai mudi bualu ebu butulonda! Nuakubilengulula, nuakulua ne nyama inuakunyenga ku bukole, milema ne misame; nudi nulua nʼabi bu milambu! Ndi mua kubitabusha ku bianza bienu, anyi? Edi ndikonka dia Yehowa. Kadi mulau wikale kudi udi udinga, udi ne mulume wa mikoko mu bimuna biandi, udi ulaya bua kumufila, hashishe, udi ufila mukuabo udi mulema kudi Yehowa. Yehowa wa misumba udi wamba ne, Meme ndi Mukelenge mimene, dina dianyi didi ditshinyisha ha mu bisamba bia bantu. Nuenu, bakuidi, mukenji eu udi kunudi. Yehowa wa misumba udi wamba ne, Binuikala kanuyi baunvuile, ne binuikala kanuyi bauteka mu mitshima yenu, bua kunemeka dina dianyi, nennutumine mulau, nenkudimune masanka enu alue milau; eyo, nakumana kuavuisha milau, bualu bua kanuena nuteka dî dianyi mu mitshima yenu. Monai, nentekeshe maboko enu, nendabe tunvi ha mpala henu, tunvi tua nyama mifila bu milambu mu bidia bienu bia disanka; nebaye nʼenu ku muaba udibo batuimasha. Yehowa wa misumba udi wamba ne, Nenujingulule ne meme nakunutumina mukenji eu, bua tshihungidi tshinakadi nʼatshi ne Bena Lewi tshijalame. Tshihungidi tshianyi tshiakadi kudibo tshiakadi tshia muoyo ne ditalala, nakabahabi bua bantshine; ne bobo bakatshina, bakakuatshika buowa bua dina dianyi. Diyisha dia mei a bushuwa diakadi mukana muabo, ne mei mabi kakahatuka ku mishiku yabo. Bobo bakenda nʼanyi mu ditalala ne mu buakane, bakadimusha mitshima ya ba bungi bua balekele bubi buabo. Bualu bua mishiku ya muakuidi idi ne bua kulama lungenyi, ne bantu badi ne bua kukeba diyisha diakane mukana muandi; bualu bua yeye udi messager wa Yehowa. Kadi Yehowa wa misumba udi wamba ne, Nuenu nuakusesuka mu nshila; nuakulenduisha ba bungi ku diyisha dienu; nuakunyanga dihungila dia Bena Lewi. Bua malu â nennuvuishe bantu bahetudibue ne bahuekeshibue ku mpala kua bantu bonso, bualu bua kanuena nulama mei anyi, kadi nudi nulesha bantu kansungusungu mu diyisha dia mikenji. Tuetu bonso katuena ne tatu umue, anyi? Nzambi umue kakatufuka, anyi? Bualu kai tudi tusonguelangana, tunyanga bietu dihungila dia batatu betu? Yuda wakalekela Yehowa, tshinyangu tshiakenjibua mu Isalele ne mu Yelushalema; bualu bua Yuda wakanyanga tshitendelelu tshia Yehowa tshidiye unanga, ne wakubaka mukashi mutendeledi wa nzambi wa bende. Yehowa umushe muntu udi wenza nunku mu ntenta ya Yakoba, nansha mukonki nansha muitabi, nansha udi ulua ne mulambu kudi Yehowa wa misumba. Eu mmunga muanda unudi nuenza kabidi: Nudi nubuikila tshioshelu tshia Yehowa ne binsonshi ne kudila ne kuhumuna kuenu, bualu bua yeye katshiena utangisha mesu andi ku mulambu ne katshiena uwitabusha ne disanka ku bianza bienu. Nuenu nudi nukonka ne, Bualu kai? Mbualu bua Yehowa wakadi mumonyi wa hankatshi hebe ne mukashi wa ku bunsongalume buebe awakulekela; kadi yeye udi muena kuebe ne mukashi wa dihungila diwakuhunga. Nzambi kakatufuka ne kakatuha muoyo, anyi? Yeye udi ukeba tshinyi? Udi ukeba bana badi banemeka Nzambi. Nunku nudimuke bienu bua umue wenu kalekedi mukashi wa ku bunsongalume buandi. Yehowa, Nzambi wa Isalele, udi wamba ne, Ndi nkina dishiha dia dibaka; Yehowa wa misumba udi wamba ne, Ndi nkina muntu udi ukengesha mukashi wandi nunku. Nudimuke bienu, bua nuenu kanulekedianganyi. Nuakutondesha Yehowa ne mei enu. Kadi nudi nukonka ne, Tuakumutondesha munyi? Hanuamba ne, Muntu yonso udi wenza malu mabi udi muakane ku mesu kua Yehowa, ne yeye udi usanka bualu buandi; anyi hanuakonka ne, Nzambi utu walumbulula bilumbu ne kulumbulula kuakane udi kudi kunyi? Yehowa wa misumba udi wamba ne, Monai, ndi ntuma messager wanyi, yeye nealongolole nshila ku mpala kuanyi; Mukelenge unudi nukeba nealue lubilu mu ntempelo wandi, messager wa dihungila, unudi nʼandi disanka, monai mudiye ulua! Kadi nganyi wamanya mua kushala holâ mu dituku dia kulua kuandi? Nganyi washindama hamuenekeye? Bualu bua yeye udi bu kahia ka mukunjishi wa biamu, ne bu nsabanga wa musukuidi wa bilulu. Yeye neashikame hanshi ukunjisha ne ulengesha tshiamu tshia argent, nealengeshe bana ba Lewi. Neabakenkeshe bu or ne argent, bua bobo bikale kudi Yehowa bu bantu badi bafila milambu kudiye mu buakane. Hashishe, mulambu wa Yuda ne wa Yelushalema neyisankishe Yehowa, bu muakamusankishayi mu matuku a kale ne mu bidimu biakamana kuhita. Yehowa wa misumba udi wamba ne, Nensemene ba buihi nʼenu bua kulumbulula bilumbu bienu; nengikale mumonyi udi utuisha batempeshi ba mbuku ne bena masandi lubilu, bantu badi baditshiha ne mitshihu ya mashimi, badi bakengesha muena mudimu hadibo bamufuta difutu diandi ne mukashi wa mu lufuila ne muanʼa nshiya, bantu badi bakengesha muntu wa tshisamba tshia bende ne badi kabayi bantshina mene. Bua meme Yehowa tshitu ngakudimuka, nunku nuenu, bana ba Yakoba, kanuena nubutuka. Mu matuku a batatu benu tô ne mpindiu nuakûmuka ku mikenji yanyi, kanuakuyitabusha. Yehowa wa misumba udi wamba ne, Hinganai kundi ne meme nempingane kunudi. Kadi nudi nuamba ne, Netuhingane munyi? Muntu neibe bintu bia Nzambi, anyi? Kadi nudi nuiba bintu bianyi! Nudi nunkonka ne, Tuakuiba bintu biebe kudi kunyi? Nku tshia dikumi tshia bintu ne ku bintu binudi nufila. Nuakuedibua mulau, bualu bua nudi nuiba bintu bianyi, bonso ba mu tshisamba etshi mene. Luai ne tshia dikumi tshionso mu nsubu wa kubutshila bintu, bua bia kudia bikale mu nsubu muanyi; Yehowa wa misumba udi wamba ne, Nuntete mpindiu ne muanda eu, numone bingikala tshiyi mununzuluile bibi bia mu diulu, munulokeshile masanka, kanuyi nukengela bintu bikuabo kabidi. Yehowa wa misumba udi wamba ne, Nenkanyine mudi wa bia kudia, bua yeye kabutudi bintu bidi buloba buenu bumenesha; ne muonshi wenu wa tumuma mu budimi kawena uhohoka tumuma tua nvinyo hatshididi tubishe. Yehowa wa misumba udi wamba ne, Ba mu bisamba bionso nebanubikile ne, Basankishibue; bualu bua nenuikale bena buloba budi ne disanka dimpe. Yehowa udi wamba ne, Mei enu akadi annyoka. Kadi nuenu nudi nunkonka ne, Tuakukunyoka munyi? Nuakuamba ne, Kukuatshila Yehowa mudimu kudi muanda wa hatuhu; tuakuangata difutu kai hatuakutumikila mei andi ne hatuakuenda baluate bivualu bia madilu ku mpala kua Yehowa wa misumba? Mpindiu tudi tubikila badi badisue ne, Badi ne dikasa dimpe; bulelela, benji ba malu mabi hadi bajadikibua; bulelela, badi bateta Nzambi badi bahanduka. Hashishe, bakadi banemeka Yehowa bakasombeshangana, ne Yehowa wakabateleja matshu, wakabumuna, ne mukanda wa tshivulukidi wakafundibua ku mpala kuandi bua kuanyisha bantu aba bakadi batshina Nzambi ne bakadi banemeka dina diandi. Yehowa wa misumba udi wamba ne, Bobo nebikale banyi, mu dituku dindi ngenza malu â, nebikale bantu banyi nkayanyi mene; meme nembafuile luse bu mudi muntu ufuila muanʼandi mulume udi umukuatshila mudimu luse. Hashishe, nenujingulule ditahuluka didi hankatshi ha bantu bimpe ne bantu babi, hankatshi ha badi bakuatshila Nzambi mudimu ne badi kabayi bamukuatshila mudimu. Yehowa wa misumba udi wamba ne, Monai, dituku nedilue didi diosha bu kahia ka mu tshikutu, ne bonso badi badisue ne benji ba malu mabi honso nebikale bu bisonsa; ne dituku adi didi dilua nedibashidishe, kadiena dibashila nansha muji nansha ditamba. Kadi diba dia buakane nedinubandile nuenu badi banemeka dina dianyi, mibidi yenu neyondahibue mu nkenka yadi. Nuenu nenuluhuke, nenunaye bu bana ba ngombe haluhukabo mu tshikumbi. Yehowa wa misumba udi wamba ne, Nenudiate bantu babi, bualu bua nebikale bu dinfuenkenya muinshi mua makasa enu mu dituku dindi ngenza malu au. Vulukai mikenji ya Mose muntu wanyi, inakamuelela mu Holeba bua Bena Isalele bonso, mayisha anyi ne mei anyi mene. Monai, nennutumine Eliya muprofete diambedi dituku dia Yehowa kadiyi dianji kulua, dituku adi dinene ne didi dikuatshisha bantu buowa. Yeye neakudimune mitshima ya batatu bua ihingane kudi bana babo, neakudimune mitshima ya bana bua ihangane kudi batatu babo; bua meme tshilu kubutula buloba ku mulau. Mukanda wa bankambua ba Yesu Kilisto, muana wa Bayidi, muana wa Abalahama. Abalahama wakalela Isaka; Isaka wakalela Yakoba; Yakoba wakalela Yuda ne bana babo; Yuda ne mukashi wandi Tamâ bakalela Pelese ne Zela; Pelese wakalela Heselona; Heselona wakalela Lama; Lama wakalela Aminadaba; Aminadaba wakalela Nashona; Nashona wakalela Salamona; Salamona ne mukashi wandi Lahaba bakalela Boaza; Boaza ne Luta bakalela Obeda; Obeda wakalela Yishai; Yishai wakalela mukelenge Davidi. Davidi ne mukashi wakadi kudi Uliya bakalela Solomo; Solomo wakalela Lehabama; Lehabama wakalela Abiya; Abiya wakalela Asa; Asa wakalela Yehoshafata; Yehoshafata wakalela Yolama; Yolama wakalela Uziya; Uziya wakalela Yotama; Yotama wakalela Ahaza; Ahaza wakalela Hizikiya; Hizikiya wakalela Manashe; Manashe wakalela Amona; Amona wakalela Yoshiya; Yoshiya wakalela Yekonya ne bana babo ku tshikondo tshiakayabo nʼabo ku Babulona. Hakayabo nʼabo ku Babulona, Yekonya wakalela Shalatiele; Shalatiele wakalela Zelubabela; Zelubabela wakalela Abihuda; Abihuda wakalela Eleyakima; Eleyakima wakalela. Azô; Azô wakalela Sadoka; Sadoka wakalela Akimi; Akimi wakalela Eliyuda; Eliyuda wakalela Eleazâ; Eleazâ wakalela Matana; Matana wakalela Yakoba; Yakoba wakalela Yosefe bayandi wa Malia muledi wa Yesu, udibo babikila ne, Kilisto. Nunku bikondo bionso ku Abalahama tô ne ku Davidi bidi dikumi ne binai; ku Bayidi tô ne hakayabo nʼabo ku Babulona bidi dikumi ne binai; bakayabo nʼabo ku Babulona tô ne ku Kilisto bidi dikumi ne binai. Kuledibua kua Yesu Kilisto kuakadi nunku: Hakadi baba wandi Malia mubangila kudi Yosefe, diambedi kaba! banze kulua hohamue, bakamusangana muimitshisha difu kudi Nyuma Muimpe. Yosefe, bayandi, wakadi muntu muakane, yeye kakasua kumulesha kudi bantu, wakamba kumulekela mu musokoko. Hakadiye welangana meshi a malu â, muanjelo wa Mukelenge wakamueneka kudiye mu tshilota tshiandi, wakamba ne, Yosefe, muana wa Bayidi, kutshinyi mua kuangata mukashi webe Malia, bualu bua udi muimita munda muandi ngua Nyuma Muimpe. Yeye nealele muana mulume, umuidike ne, Yesu, bualu bua yeye neasungile bantu handi ku mibi yabo. Malu â onso akalua bua kushikisha dî dia Mukelenge diakambabo kudi muprofete ne, Mukashi utshidi kamama neimite difu, nealele muana mulume, Nebamuidike dina ne, Imanuele, kuandamuna kua muaku ne, Nzambi udi nʼetu. Yosefe wakabika ku tulu, wakenza bu muakamuambila muanjelo wa Mukelenge, wakangata mukashi wandi; yeye kakamumanya tô ne hakaleleye muana mulume: wakamuidika ne, Yesu. Hakalelabo Yesu mu Beteleheme wa mu Yudaya mu matuku a mukelenge Helode, Bena Meshi ba ku esete bakalua ku Yelushalema, bakonka ne, Udi muledibue Mukelenge wa Bayuda udi kudi kunyi? Tuakutangila mutoto wandi ku esete, tuakuluila kumukukuila. Hakunvua mukelenge Helode bualu ebu, mutshima wandi wakahandika ne ya bantu bonso bakadi nʼandi mu Yelushalema. Wakasangisha bakuidi banene ba Nzambi bonso ne bafundi ba bantu, wakabakonka ne, Nebalele Kilisto kudi kunyi? Bakamuambila ne, Mu Beteleheme wa mu Yudaya; bualu bua dî edi diakufundibua kudi muprofete ne, Wewe Beteleheme, buloba bua Yudaya, Kuena tshianana munkatshi mua banfumu ba mu Yudaya, Bualu bua ngovena nealuhuke munda muebe, Yeye neikale mulami wa Isalele, bantu banyi. Hashishe Helode wakabikila Bena Meshi mu musokoko, wakabakonka diba mene mene diakamueneka mutoto. Yeye wakabatuma ku Beteleheme, wakamba ne, Yai bienu, nulonde bualu bua muana bitulu bitulu; hanuamusangana, nulue kundi ne dî, nunku meme kabidi nendue kumukukuila. Hakunvabo dî dia mukelenge, bakaya biabo; mutoto wakamonabo ku esete wakaya ku mpala kuabo tô ne hakimanau ha buludi hakadi muana, Hakamonabo mutoto, bakatamba kusanka. Bakabuela mu nsubu, bakamona muana ne baba wandi Malia; bakatua binu hanshi, bakamukukuila; hakabululabo bibutshilu biabo, bakamusawila bintu, ngolo ne mananashi ne mula. Hakabadimusha Nzambi mu tshilota ne, Kanuhinganyi kudi Helode, bakaya kuabo mu munga nshila. Hakayabo, muanjelo wa Mukelenge wakamueneka kudi Yosefe mu tshilota, wakamuambila ne, Bika biebe, angata muana ne baba wandi, unyemena mu Ejipitu, ushaleku tô ne hanakuambila; bualu bua Helode neakebe muana bua kumushiha. Yeye wakabika, wakangata muana ne baba wandi butuku, wakaya mu Ejipitu; wakashalamu tô ne hakafua Helode; bua dî dia Mukelenge diakambabo kudi muprofete dishikisha e ne, Nakubikila muana wanyi umuke mu Ejipitu. Hakamanya Helode ne, Bena Meshi badi banseka, wakadi ne tshishi tshikole, wakatuma bua kushihabo bana balume bonso ba mu Beteleheme ne ba ku matshika a musoko ba katataka tô ne ba bidimu bibidi, bu ba tshikondo tshiakumanyineye kudi Bena Meshi. Nunku bakashikisha dî diakambibua kudi muprofete Yelemiya ne, Bakunvua dî mu Lama, Madilu ne muadi mukole, Lakele udi udila bana bandi, Yeye udi uhidia bamusambe, bualu bua bana bandi kabenaku. Hakafua Helode, monai, Muanjelo wa Mukelenge wakamueneka kudi Yosefe mu tshilota mu Ejipitu, wakamuambila ne, Bika biebe, angata muana ne baba wandi, uya mu buloba bua Isalele; bua bakebi ba muoyo wa muana bakufua. Wakabika biandi, wakangata muana ne baba wandi, wakalua mu buloba bua Isalele. Kadi hakunvueye lumu ne, Âkelao wakuhingana mu bukelenge bua tatu wandi Helode, wakadi ukokesha Yudaya, wakatshina mua kuyaku! Nzambi wakamudimusha mu tshilota, wakayila mu luseke lua Galela, wakalua mu musoko dina diau Nazaleta, wakashikamamu, buala bua kushikisha dî diakamba baprofete ne, Nebamuidike ne, Muena Nazaleta. Mu matuku au Yone Mubanji wakalua wambila bantu mu tshihela tshia Yudaya ne, Kudimunai mitshima yenu; bualu bua bukelenge bua mu diulu budi hehi. Eu nguakadibo bamba kudi muprofete Yeshaya ne, Dî dia muntu udi wela lubila mu tshihela ne, Longololai nshila wa Mukelenge, Nululamishe nshila yandi. Yone wakadi biandi ne tshikowelu tshiandi tshia mioso ya kamelu, wakadi kabidi ne mukaba wa tshiseba mu tshimono tshiandi; bia kudia biandi biakadi mikumbi ne buitshi. Bena Yelushalema bakumuka, ne bantu ba mu luseke luonso lua Yudaya, ne ba mu luseke luonso lua hehi ne musula wa Yadene, bakaya kudiye; bakabadibua kudiye mu musulu wa Yadene, batonda mibi yabo. Kadi hakamoneye Bafalese ba bungi ne Basadoke balua kubatijibua, yeye wakabakonka ne, Nuenu bana ba nyoka, wakunudimusha bua kunyema ku mulau ulualua nganyi? Nukuame mamuma makane adi alesha dikudimuna dia mitshima yenu; kanuedianganyi meshi munda muenu ne, Tuetu iudi ne Abalahama tatu wetu; ndi nuambila ne, Nzambi udi mumanye mua kubisha mabue â alue bana ba Abalahama. Katataka tshisui tshidi tshiladika ha muji wa mutshi wonso; mutshi wonso udi kawi ukuama mamuma mimpe nebaushimbule, nebawele mu kahia. Bulelela, ndi nubatiza mu mai bualu bua nuenu nukudimune mitshima yenu; kadi udi ulua ku nyima kuanyi udi muntambe meme, tshiena ne buakane bua kutuala bisabata biandi; yeye neanubatize mu Nyuma Muimpe ne mu kahia; tshihehudi tshiandi tshidi mu tshianza, yeye neatokeshe tshituilu tshiandi bimpe; yeye neasangishe mponda wandi mu mudiba, kadi yeye neoshe bisote mu kahia kadi kakai kajima tshiendelele. Hashishe Yesu wakumuka ku Galela, wakalua ku musulu wa Yadene kudi Yone bua Yone amubatize. Yone wakamba kubenga ne, Meme ndi ne bualu bua wewe kumbatiza meme, munyi muwakulua kundi? Kadi Yesu wakamuandamuna ne, Tuenze bietu musangu eu, bualu bua mbimpe tukumbashe buakane buonso nunku. Yone wakitabusha. Hakamubatizabo nunku, Yesu wakumuka mu mai; ne monai, diulu diakamubuikila, yeye wakatangila Nyuma wa Nzambi uhueka bu nyunyu wa nkutshi, umuikila; ne unvuai, dî diakafuma mu diulu ne, Eu udi Muana wanyi munanga, yeye udi unsankisha bimpe. Hashishe Nyuma wa Nzambi wakalombola Yesu mu tshihela bua diabolo amuteye. Hakajileye bia kudia minya makumi anai ne mafuku makumi anai, wakadi ne nsala. Muteyi wakalua, wakamuambila ne, Biwikala Muana wa Nzambi, amba mabue â andamuke mitanda ya bidia. Kadi yeye wakamuandamuna ne, Bakafunda dî ne, Muntu kikadi biandi ne muoyo bualu bua bidia nkayabi, ikale hiandi nʼau bualu bua mei onso adi aluhuka mukana mua Nzambi. Hashishe diabolo wakaya nʼandi mu musoko wa tshijila; wakamushikika ha musonga wa ntempelo, wakamuambila ne, Biwikala Muana wa Nzambi, udiele hanshi, bualu bua bakufunda ne, Yeye neakufile mu bianza bia banjelo bandi; Nebakutuale mu bianza biabo Bua wewe kukumi dikasa diebe ku dibue. Yesu wakamuambila ne, Bakufunda kabidi ne, Kuteyi Mukelenge Nzambi webe. Diabolo kabidi wakaya nʼandi ku mutu kua mukuna wakadi mule be, wakamulesha makelenge onso a ha buloba ne butumbi buau; wakamuambila ne, Nenkuhe bintu ebi bionso, biwatua binu biebe hanshi, biwankukuila. Yesu wakamuambila ne, Satana, umuka; bualu bua bakuanda dî ne, Kukuila Mukelenge Nzambi webe, umuenzele yeye nkayandi mudimu. Hashishe diabolo wakamushîa; ne monai, banjelo bakalua, bakadi bamukuatshisha ne biakadiye nʼabi bualu. Hakunvueye lumu ne, Bakukuata Yone, wakaya biandi mu Galela; wakumuka mu Nazaleta, wakalua kushikama mu Kapênuma, musoko eu udi hehi ne dishiba, udi ku mukalu wa Zebuluna ne Nafatale; bua kushikisha dî diakambabo kudi muprofete Yeshaya ne, Buloba bua Zebuluna ne buloba bua Nafatale, Nshila wa hehi ne dishiba, dishia dia Yadene, Galela wa bisamba bia bende, Bantu bakadi bashikame mu midima Bakatangila dinkenka dinene, Munya wakatemena bantu bakadi bashikame mu muaba wa lufu Ne mu mundidimbi walu. Ku tshikondo atshi Yesu wakabanga kuambila bantu bualu bua Nzambi ne, Kudimunai mitshima yenu; bualu bua bukelenge bua mu diulu budi hehi. Hakadiye wenda hehi ne dishiba dia Galela, wakamona balume babidi, bana ba muntu umue, Simona, udibo babikila ne, Petelo, ne muanʼabo Andele, bakadi bela kahamba mu dishiha; bualu bua bobo bakadi bilembi. Yeye wakabambila ne, Luai ku nyima kuanyi, nenuvuishe bilembi bia bantu. Bakashîa tuhamba tuabo hanshi lukasa, bakumulonda. Hakadiye uya ku mpala, wakamona banga balume babidi, bana ba muntu umue, Yakobo muana wa Zebedayo, ne muanʼabo Yone, bakadi mu buatu ne tatu wabo Zebedayo, balukulula tuhamba tuabo; yeye wakababikila. Bakashîa buatu ne tatu wabo lukasa, bakamulonda. Yesu wakendakana mu luseke luonso lua Galela, uyisha bantu mu nsunagoga yabo, ubambila lumu luimpe lua bukelenge bua mu diulu; ukolesha bantu bakadi ne mabedi ne matekete onso. Lumu luandi luakatangadika mu luseke luonso lua Sulia; bakalua kudiye ne bantu bonso bakadi basame, bakuabo bakadi bakuatshike mabedi a bungi ne didinyenga, bakuabo bakadi bakuatshike kudi bademon, bakuabo bakadi ne tshiseke, bakuabo bakadi ne tuneke; yeye wakashikisha masama abo. Bisumbu bia bantu bia bungi bia mu Galela biakamulonda, ne bia mu Dekapoli ne bia mu Yelushalema ne bia mu Yudaya ne bia dishia dia Yadene. Hakamona Yesu bisumbu bia bantu, wakabanda ku mukuna; hakashikameye, bayidi bandi bakatua kudiye; yeye wakabulula mukana muandi, wakabayisha ne: Badi bahele mu mitshima yabo badi ne disanka, bua bukelenge bua mu diulu budi buabo. Badi badila badi ne disanka, bua bobo nebasambibue. Badi ne mitshima mihuekela badi ne disanka, bua bobo nebahiane buloba. Badi ne nsala ne nyota ya buakane badi ne disanka bua bobo nebûkute. Badi ne luse badi ne disanka, bua bantu bakuabo nebabafue luse. Badi ne mitshima mitoke badi ne disanka, bua bobo nebamone Nzambi. Basungi ba bantu badi ne disanka, bua nebabidike ne, Bana ba Nzambi. Bakakengeshibua bua buakane buabo badi ne disanka, bua bukelenge bua mu diulu budi buabo. Hanuhendabo ne hanukengeshabo ne hanushiminyinabo mashimi onso, bua bualu buanyi, nenuikale ne disanka. Nusanke, nuikale ne disanka dingi, bualu bua difutu dienu didi mu diulu ndinene; bakakengesha baprofete nunku bakadi ku mpala kuenu. Nuenu nudi lueho lua buloba; hatshihala lueho kutua kualu, nebalutuishe kabidi ne tshinyi? Ludi tshianana, nebaluimashe, nebaludiate mu makasa. Nuenu nudi munya wa buloba. Kabena bamanye mua kusokoka musoko udi muasa ha mukuna. Bantu kabatu batemesha muinda bua kûbuesha munshi mua mushete, batu bauteka ha mesa a muinda, utemene bantu bonso mu nsubu. Nunku munya wenu uteme ku mesu kua bantu, bamone midimu yenu mimpe, batumbishe kabidi Tatu wenu udi mu diulu. Kanuedianganyi meshi ne, Nakuluila bua kushiha mikenshi ya Mose ne mei a baprofete; tshiakuluila bua kubishiha, nakuluila bua kubishikisha. Bulelela, ndi nuambila ne, Tô ne hajimina diulu ne buloba, kaleta kamue kakese ka mikenshi ya Mose kakena kajimina ne katoba kamue kakese tô ne hashika malu onso akafundabo. Washiha mukenshi umue wa mu mikenshi ei idi mitambe butekete, ne wayisha bantu bakuabo nunku, nebamuidike ne, Mutambe bukese mu bukelenge bua mu diulu; kadi wayenza, ne wayisha bantu bakuabo nunku, nebamuidike ne, Munene mu bukelenge bua mu diulu. Ndi nuambila ne, Bikala buakane buenu kabui butambe bua bafundi ne bua Bafalese, kanuena nubuela mu bukelenge bua mu diulu. Nuenu nuakunvua dî diakane Habo bantu ba kale ne, Kushihi muntu mukuabo; washiha muntu mukuabo nebamubande ku tshilumbuluidi; kadi meme ndi nuambila ne, Muntu yonso udi ne muanʼabo tshishi nebamubande ku tshilumbuluidi; muntu yonso wamhila muanʼabo ne, Laka, nebamubande kudi balumbuludi banene; muntu yonso wambila munga muntu ne, Wewe udi muhote, udi mua kukengeshibua mu Ngena wa kahia. Hautshidi ufila kuha kuebe ku tshishihelu ne biwavuluka ne, Muanʼetu udi nʼanyi bualu, ushîe kuha kuebe ku mpala kua tshishihelu, uye biebe, ulengeshe nʼandi; hashishe ulue, ufile kuha kuebe. Ulengeshe ne udi nʼebe lukuna lukasa, hautshidi nʼandi mu nshila; biwikala kui wenza nunku, udi nʼebe lukuna neakufile mu bianza bia mulumbuludi, ne mulumbuludi neakufile mu bianza bia mpolushe, nebakuele mu nsubu wa lukanu. Bulelela, ndi nkuambila ne, Kuena uluhukamu tô ne hawafuta dibanza dionso, nasha kakuta kakese kushala. Nuakunyua dî diakambabo ne, Kuendi masandi; kadi meme ndi nuambila ne, Muntu yonso udi utangila mukashi ne lukuka lua masandi wakumana kuenda nʼandi masandi mu mutshima wandi. Bikala disu diebe dia ku tshianza tshia balume dikulenduisha, wadiula, wadimasha; bualu bua kujimisha tshintu tshimue tshia mubidi webe kudi kutamba kuedibua kua mubidi webe wonso mu Ngena. Biakulenduisha tshianza tshiebe tshia balume, watshikosa, watshimasha, bualu bua kujimisha tshintu tshimue tshia mubidi webe kudi kutamba kuya kua mubidi wonso mu Ngena. Bakuamba kabidi ne, Biahidia mulume mukashi wandi, ahe mukashi makanda wa kushiha dibaka; kadi meme udi nuambila ne, Biahidia mulume mukashi wandi, kabui bua masandi, neamuvuishe amena masandi; wabaka mukashi muhidia nunku neikale muena masandi. Kabidi, nuenu nuakunyua dî diakambilabo bantu ba kale ne, Kuditshihi tshianana, wenzele Nzambi mitshihu yebe; kadi meme ndi nuambila ne, Kanuditshihi; ne kudi diulu, bualu bua diulu didi nkuasa wa butumbi wa Nzambi; ne kudi buloba, bualu bua buloba budi tshitekelu tshia makasa andi; ne kudi Yelushalema, bualu bua Yelushalema udi musoko wa Mukelenge Munene. Wewe kuditshihi kudi mutu webe, bualu bua wewe kuena mumanye mua kuvuisha lusuki lumue anyi lutoke anyi lufike. Nuikale ne dî ne, E, E, anyi Nasha, Nasha. Dî ditentekesha ha mutu didi difuma kudi bualu bubi. Nuakunyua dî diakambabo ne, Disu ku disu, dinu ku dinu. Kadi meme udi nuambila ne, Kanuluanganyi ne muntu mubi; biakukuma muntu dihi ku ditama dia ku tshianza tshia balume, umuandamuine dia ku bakashi kabidi. Biasua muntu kuya nʼebe ku tshilumbu bua kuangateye nshemise webe, angate ne kazaku kabidi. Biakuendesha muntu ntanta wa kilometa umue ku bukole, wende nʼandi ntanta wa kilometa ibidi. Udi ukulomba tshintu umuhetshi, udi musue kukusomba tshintu kumukomi nyima. Nuakunyua dî diakambabo ne, Sua mukuenu, ikala ne udi nʼebe lukuna tshishi; kadi meme ndi nuambila ne, Suai badi nʼenu lukuna, lombelai badi banukengesha Nzambi; nunku nenuikale bana ba Tatu wenu udi mu diulu; bualu bua yeye utu wabandishila bantu babi ne bantu bimpe diba, yeye kabidi utu watumina bantu bakane ne bantu babi nvula. Binuasua badi banusue, nenuikale ne difutu kai? Basangishi ba mulambu mene kabatu benza nunku, anyi? Binuakidila anu bana benu, nenuenze bualu budi butambe bua banga bantu kudi kunyi? Bantu ba bende kabatu benza nunku, anyi? Nunku nuenu nenuikale bakane bu mudi Tatu wenu wa mu diulu muakane. Nudimuke, kanuenji buakane buenu ku mesu kua bantu ne, Bobo batumone; binuenza nunku, kanuena ne difutu kudi Tatu wenu udi mu diulu. Hawaha bantu bintu bia luse, kuedi mpungi ku mpala kuebe bu mutu bena lubombo benza mu nsunagoga ne mu misesu, bua bantu babatumbishe. Bulelela, ndi nuambila ne, Bobo bakumana kuangata difutu diabo. Kadi wewe hawaha bantu bintu bia luse, tshianza tshiebe tshia bakashi katshimanyi tshidi tshianza tshiebe tshia balume tshienza; nunku uhe bantu bintu biebe bia luse mu musokoko, ne Tatu webe udi umona mu musokoko neakuhe. Hanuatendelela Nzambi, kanuikadi bu bena lubombo; bobo badi basue kutendelela Nzambi bimana mu nsunagoga ne mu masanga a nshila bua bantu babamone. Bulelela, ndi nuambila ne, Bobo bakumana kuangata difutu diabo. Kadi wewe, hawatendelela Nzambi, ubuele mu kasubu kebe ka tshisokomenu, winshile tshibi, utendelele Tatu webe, udi biandi mu tshisokomenu, ne Tatu webe udi umona mu musokoko neakuhe. Hanuatendelela Nzambi, kanuakudi biakulakula bu mutu bantu ba bende benza; bobo batu belangana meshi ne, Nebatunvuile bua mei etu adi a bungi. Kanuikadi bu bobo; bualu bua Tatu wenu udi mumanye binudi nʼabi bualu diambedi kanui banze kumulomba. Nutendelele Nzambi nunku: Tatu wetu udi mu diulu, banemeke dina diebe. Bukelenge buebe bulue. Benze ha buloba mûdi musue bu mudibo benza mu diulu. Utuhe tshituha tshia bidia bietu bia buatshia-buatshia lelu. Ulekelele mabanza a malu mabi etu bu mutuakumana kulekela kabidi badi nʼetu mabanza a malu mabi. Kutufikishi hadi mateyi, kadi utusungile kudi bubi. [ ] Binuajimishila bantu mibi yabo, Tatu wenu udi mu diulu neanujimishile mitu yenu. Kadi binuikala kanui nujimishila bantu mibi yabo, Tatu wenu kena unujimishila mibi yenu. Bualu bukuabo kabidi, hanuajila bia kudia, kanuikadi babungame bu mudi bena lubombo benza, bobo badi balaba mishila ku mesu bua bantu babamone ne, Badi bajile bia kudia. Bulelela, ndi nuambila ne, Bakumana kuangata difutu diabo. Kadi wewe, hawajila bia kudia, ulabe manyi ku mutu, wowe mai ku mesu; nunku bantu kabakumonyi ne, Udi mujile bia kudia; kadi Tatu webe udi mu musokoko neakumone; ne Tatu webe udi umona mu musokoko neakuhe. Kanubutshidi bintu bienu hanshi ha buloba hadi bishi ne dimoma bibibihisha, ne hadi bibi babumbula nsubu, babiba; di nuenu nubutshile bintu bienu nu diulu mudi kamui bishi ne dimoma bia kubibihisha, ne mudi kamui bibi ba kubumbula nsubu babiba; mutshima webe kabidi udi kudi bintu bia mu tshibutshilu tshiebe. Disu didi muinda wa mubidi; bikala disu diebe dimona tshintu bimpe, mubidi webe wonso neutoke ne munya. Kadi bikala disu diebe dibi, mubidi webe wonso neufike ne midima. Nunku bikala munya wa munda muebe muikale mîdima, mîdima ei idi mitambe kufika. Muntu kena mumanye mua kukuatshila banfumu babidi mudimu diakamue; yeye neikale ne mukuabo lukuna ne mukuabo dinanga, anyi nealamate mukuabo neahidie mukuabo. Kanuena bamanye mua kukuatshila Nzambi mudimu ne Mamona diakamue. Ebu mbualu bundi nuambila ne, Kanutambi kuelangana meshi bua muoyo wenu ne, Netudie tshinyi? Netunue tshinyi? Kanutambi kuelangana meshi bua mibidi yenu ne, Netuluate tshinyi? Muoyo kawena utamba bidia, anyi? Mubidi kawena utamba bilulu, anyi? Monai nyunyu ya mu diulu, kaitu yakuna maminu, kaitu yahuola, kaitu yasangisha bintu mu mayeba, kadi Tatu wenu udi mu diulu utu waidisha. Nuenu kanuena baitambe, anyi? Muntu kai wa munkatshi muenu, bikaleye utamba kuelangana meshi, udi mumanye mua kubinga ku bule buandi nkubita umue? Nudi nutamba kuelangana meshi a bilulu tshinyi? Monai bilongo bia mu mpata mudibi bileha; kabitu biakuata mudimu, kabitu biasala buanda; kadi adi nuambila ne, Solomo wakadi ne butumbi buandi bunene, kadi kabakamuluatshisha bu tshilongo etshi! Bisosa bia mu mpata bidiku lelu, makelela nebibueshibue mu matshua; nuenu bena ditabusha dikese, bialuatshisha Nzambi bisosa nunku, yeye kena utamba kunuluatshisha bienu, anyi? Kanutambi kuelangana meshi ne, Netudie tshinyi? Netunue tshinyi? Netudiluatshishe tshinyi? Bisamba bia bende bidi bikeba bintu ebi bionso; Tatu wenu udi mu diulu udi mumanye ne, Nudi ne bintu ebi bionso bualu. Kadi diambedi kebai bukelenge buandi ne buakane buandi, nunku nebanuhe bintu ebi bionso. Kanutambi kuelangana meshi a makelela, bualu bua makelela neadielelangane meshi. Lutatu lua ku dituku ne ku dituku ludi lukumbane. Kanulumbuludi malu adi munda mua bantu bakuabo, nunku bobo kabena balumbulula matu adi munda muenu. Nebalumbulule malu adi munda muenu bu munudi nulumbulula malu adi munda muabo; nebanuidikishile bintu ne luidi lunudi nuidikishila nʼalu kabidi. Udi utangidila kasosa kadi mu disu dia muanʼenu tshinyi, kui utangila mutshi munene udi mu disu diebe? Munyi mûdi wambila muanʼenu ne, Nkumushe kasosa kadi mu disu diebe, kadi mutshi munene udi mu diebe disu? Wewe udi muena lubombo, diambedi umushe mutshi munene udi mu disu diebe, nunku neumone bimpe mua kumusha kasosa kadi mu disu dia muanʼenu. Kanuhi mbua tshintu tshia tshijila; kanuedi mabue enu a mushinga mukole hanshi hadi ngulube yendela, kayadiatshi munshi mua bikono, kayandamuki bua kunutuanyakanya. Nulombe, nebanuhe; nukebe, nenumone; nukokole, nebanunzuluile. Bualu bua muntu yonso udi ulomba, neahete; udi ukeba, neamone; udi ukokola, nebamunzuluile. Muntu kai wa munkatshi muenu, biamulomba muanʼandi mutanda wa bidia, neamuhe dibue, anyi? Biamulombeye munyinyi wa mu mai, neamuhe nyoka, anyi? Nunku nuenu bantu babi, binuamanya mua kuha bana benu bintu bimpe, Tatu wenu udi mu diulu kena utamba kuha badi bamulomba bintu bimpe, anyi? Nuenzele bantu malu onso anudi basue bamuenzele, bualu bua mikenshi ya Mose ne mei a baprofete bidi nunku. Nubuele ku mushiku wa mbelu mubumbakane; bualu bua mushiku wa mbelu udi munene, ne nshila wa kabutu udi munene, ne bantu ba bungi badi babuelamu. Mushiku wa mbelu udi mubumbakane, ne nshila wa ku muoyo udi mubumbakane, ne bantu banya-banya badi bamumona. Nuende badimuke kudi baprofete badi ne mashimi, batu balua kunudi baluate biseba bia mikoko, kadi munda muabo mudi nkashama idi ne luonji. Nenubajingulule ku mamuma abo. Bantu batu bahuola mamuma a nvinyo ku mionshi ya meba, anyi? Batu bahuola nfigi ku mingonge, anyi? Nunku mitshi yonso idi mimpe itu yakuama mamuma mimpe; kadi mitshi mibi itu yakuama mamuma mabi. Mutshi muimpe kawena mumanye mua kukuama mamuma mahi, mutshi mubi kawena mumanye mua kukuama mamuma mimpe. Mutshi wonso udi kawi ukuama mamuma mimpe nebaushimbule, nebawele mu kahia. Nunku nenubajingulule ku mamuma abo. Bantu batu bambikila ne, Mukelenge, Mukelenge, kabena babuela bonso mu bukelenge bua mu diulu, anu yeye utu wenza bu mudi Tatu wanyi udi mu diulu musue. Dituku adi bantu ba bungi nebangambile ne, Mukelenge, Mukelenge, katuena bambile bantu bualu buebe mu dina diebe, anyi? Katuena bumushe bademon mu dina diebe, anyi? Katuena benze malu a kukema a bungi mu dina diebe, anyi? Dituku adi nembambile ne, Tshiakunumanya; umukai kundi, nudi benji ba malu mabi. Muntu yonso udi munvue mei anyi â ne utu wâtumikila neikale bu muena meshi, wakibaka nsubu wandi ha mutu ha dibue; nvula yakaloka, misulu yakûla, bihuhu biakalua, biakadina ku nsubu, kadi nsubu kakuhuka, hua yeye wakadi muibaka ha dibue. Muntu yonso Udi munsue mei anyi â, Itai watumikila, udi biandi bu muntu muhote, wakibaka nsubu wandi ha lusenga; nvula yakaloka, misulu yakula, bihuhu biakalua, biakakuma ku nsubu, nsubu wakuhuka; kuhuka kuandi kuakadi kunene. Hakashikisha Yesu mei â, diyisha diandi diakakemesha bantu; bualu bua yeye wakabayisha bu muena mei, kakabayisha bu bafundi. Hakahuekeye ha mukuna, bisumbu binene bia bantu biakamulonda. Muena nsudi wakalua kudiye, wakamukukuila, ne, Mukelenge, biwasua, udi mumanye mua kundengesha. Yesu wakolola tshianza tshiandi, wakamulenga ne, Ndi musue, wikale mulengeshibue. Nsudi yandi yakashika lukasa. Yesu wakamuambila ne, Kuambidi muntu bualu ebu, uye biebe, udileshe kudi muakuidi wa Nzambi, ufile tshiakamba Mose bu tshimanyishilu ku mesu kua bantu. Hakabueleye mu Kapênuma, kapitene ka masalayi lukama wakalua kudiye, wakamutendekena ne, Mukelenge, muntu wanyi udi mulale mu nsubu, udi ne disama dia kaneke, udi ukenga bikole. Yesu wakamuambila ne, Nendue kushikisha disama diandi. Kapitene wakamuandamuna ne, Mukelenge, meme tshiena muntu mimene mua wewe kubuela mu nsubu muanyi; wewe wamba anu dî diebe, Buntu wanyi neasangale. Meme kabidi ndi ku nyima kua bakuabo, ndi ne masalayi ku nyima kuanyi; ntu ngambila edi disalayi ne, Ya, yeye waya; ntu ngambila dikuabo ne, Lua, yeye walua; ntu ngambila Buntu wanyi ne, Enza bualu ebu, yeye wenza. Hakunvua Yesu dî diandi, yeye wakakema, wakambila bakadi bamulonda ne, Bulelela, Udi nuambila ne, Munkatshi mua Bena Isalele mene mene tshiakusanganamu ditabusha dinene nunku. Ndi nuambila ne, Bantu ba bungi nebalue ku esete ne ku wesete, nebadie bidia ne Abalahama ne Isaka ne Yakoba mu bukelenge bua mu diulu; kadi nebimashe bana ba mu bukelenge ha bula mu mîdima; muadi newikalemu ne kusumakana menu. Yesu wakambila kapitene ka masalayi ne, Ya biebe; bualu bua wewe wakuitabusha, nebakuenzele tshiwakulomba. Muntu wandi wakasangala ha diba adi mene. Hakabuela Yesu mu nsubu wa Petelo, wakamonamu muku wandi mukashi mulale hanshi ne disama dia mubidi kahia. Yesu wakalenga ku tshianza tshia mukashi, kahia kakamulekela; yeye wakabika, wakamulongoluela bia kudia. Hakamba diba kuhueka, bakalua ne bantu ba bungi bakadi bakuatshike ne bademon kudiye; wakumusha nyuma mibi ne dî diandi, wakakolesha bena mabedi bonso; bua kushikisha dî diakamba muprofete Yeshaya ne, Yeye wakuangata matekete etu, wakutuala mabedi etu. Hakatangila Yesu bisumbu bia bantu bamunguile, yeye wakamba ne, Tuyai dishia dia dishiba. Mufundi wakalua kudiye, wakamuambila ne, Muyishi nenkulonde kuonso kuwaya. Yesu wakamuambila ne, Mibuabua idi ne mena ai, nyunyu ya mulu idi ne masua ai; kadi Muana wa muntu kena ne ha kuladika mutu wandi. Muyidi wandi mukuabo wakambila Yesu ne, Mukelenge, witabusha bua meme nye diambedi bua kujikisha tatu wanyi. Kadi Yesu wakamuambila ne, Ndonda meme, shîa bafue bajike bafue babo. Hakabueleye mu buatu, bayidi bandi bakamulonda. Tshihuhu tshikole tshiakalua ha dishiba, mavuala akabuikila buatu; kadi Yesu wakadi mulale tulu. Bobo bakalua kudiye, bakamubisha ne, Mukelenge, utusungile, tudi tufua. Yeye wakabambila ne, Nuenu bena ditabusha dikese, nudi nutshinyina tshinyi? Hashishe, yeye wakabika, wakabuikila luhehele ne mai a dishiba, muaba au wakatalala talalâ. Bantu bakakema ne, Eu udi muntu kai? Luhehele ne mai a dishiba bidi bimunvuila. Hakafikeye dishia mu luseke lua Bena Gadala, bantu babidi bakadi bakuatshike ne bademon bakalua kusangila ne Yesu, bakaluhuka mu majambu, bakadi bafuna bulobo, bantu kabakamanya mua kuhitshilaku. Bakela dî bikole ne, Wewe Muana wa Nzambi, tudi nʼebe bualu kai? Wewe wakulua kutukengesha diambedi dituku dia dikenga dietu kadî dianze kulua, anyi? Tshisumbu tshia ngulube ya bungi tshiakadi kuakua, yakadi idia mashinde. Bademon bakamutendekena ne, Biwatumusha, ututuma mu tshisumbu tshia ngulube. Yeye wakabambila ne, Yai bienu. Bakaluhuka, bakabuela munda mua ngulube; tshisumbu tshionso tshiakanyemena lubilu ku tshibungubungu, yakahona mu dishiba, yakafila mu mai. Badishi ba ngulube bakanyema, bakaya ku musoko, bakamba malu onso ne bualu buakulua kudi badi bakuatshike ne bademon. Bantu bonso ba mu musoko bakalua kusangila ne Yesu; hakamumonabo, bakamutendekena ne, Umuka ku luseke luetu. Yesu wakabuela mu buatu, wakasabuka, wakalua mu musoko muandi. Bakalua ne muntu wakadi ne disama dia kaneke mulale ha bulalu; bakatangila Yesu ditabusha diabo, wakambila muena kaneke ne, Muanʼanyi, kolesha mutshima webe, mibi yebe idi mijimishibue. Bafundi bakuabo bakamba munda munda ne, Muntu eu udi uhenda Nzambi. Yesu wakamanya meshi abo, wakamba ne, Nudi nuelangana meshi a bualu bubi munda muenu bua tshinyi? Tshidi tshitambe butekete ntshinyi, kuambila muena kaneke ne, Mibi yebe idi mijimishibue, anyi kumuambila ne, Bika, enda biebe? Kadi bua nuenu mimanye ne, Muana wa muntu udi ne bukole, hatshidiye ha buloba bua kujimisheye mibi (yeye wakambila muena kaneke ne), Bika biebe, ambula bulalu buebe, uye ku nsubu kuebe. Yeye wakabika, wakaya ku nsubu kuandi. Kadi bakatangila bantu bualu ebu, bakatshina, bakatumbisha Nzambi, bualu bua yeye wakaha bantu bukole nunku. Hakadi Yesu umukaku, wakamona muntu, dina diandi Matayo, mushikame ku tshilambuidi, wakamuambila ne, Undonde; yeye wakabika, wakamulonda. Hakadiye ushikama udia bidia mu nsubu, basangishi ba mulamba bakalua, ne bantu babi kabidi, bakashikama ku mesa ne Yesu ne bayidi bandi. Hakamona Bafalese bualu ebu, bakambila bayidi bandi ne, Muyishi wenu udi udila ne basangishi ba mulambu ne bantu babi tshinyi? Hakunvua Yesu dî diabo, yeye wakamba ne, Badi ne bukole kabena ne muondahi bualu, anu badi ne mabedi. Yai bienu nuyile dî edi ne, Ndi musue luse, tshiena nsua nyama minshihela; meme tshiakuluila bua kubikila badi bakane, nakuluila bua kubikila badi babi. Hashishe, bayidi ba Yone bakahia kudi Yesu ne, Tuetu ne Bafalese tutu tuajila bia kudia misangu ya bungi, kadi bayidi bebe kabatu bajila bia kudia bualu kai? Yesu wakabambila ne, Balunda ba mubaki wa mukashi badi bamanye mua kudila muadi hatshidi mubaki wa mukashi nʼabo, anyi? Kadi matuku nealue abanyengabo mubaki wa mukashi, nebajile bia kudia matuku au. Bantu kabatu batelelula tshihesa tshia tshilulu tshidi katshi tshifuatalale ha tshivualu tshikulukulu; nunku tshihesa tshiakamba kubuikila disoso netshidibalulule, nunku netshidivundishe. Nunku kabidi bantu kabatu bela maluvu mahia-mahia mu milondo ya biseba bikulukulu; bienzabo nunku, biseba nebihandike, maluvu neaye hanshi, ne biseba nebifue; kadi bantu batu heta maluvu mahia-mahia mu biseba bihia-bihia, ne bubidi buabi nebishale. Hakadi Yesu ubambila mei â, mukelenge wa nsunagoga wakalua, wakamukukuila ne, Muanʼanyi mukashi ukadi mufue; kadi ulue biebe, umulenge tshianza tshiebe, neikale ne muoyo. Yesu wakabika, biandi, wakamulonda ne bayidi bandi. Monai, mukashi wakalua ku nyima kua Yesu, wakadi ne disama dia mashi ahatuka bidimu dikumi ne bibidi, wakalenga tshianza tshiandi ku mubangu wa tshivualu tshia Yesu; mukashi wakadi wamba munda ne, Binalenga ku tshivualu tshiandi, nenkoleshibue. Yesu wakatshinguluka, wakamumona, wakamuambila ne, Muanʼanyi, kolesha mutshima webe, kuitabusha kuebe kuakukusungila. Ha diba adi mene mukashi au wakakoleshibua. Hakaya Yesu mu nsubu wa mukelenge, hakamoneye bena nshiba ne tshisumbu tshia bantu bateka mutoyi, yeye wakamba ne, Shiai mpunga, muana kena mufue, udi mulale tulu. Bakamuseka. Hakumushabo tshisumbu tshia bantu, Yesu wakabuela, wakamukuata ku tshianza, muana wakabi. Lumu lua bualu abu luakatangadika mu luseke alu luonso. Hakadi Yesu umukaku, bafofo babidi bakamulonda bela dî diabo ne, Wewe muana wa Davidi, utufue luse. Hakalueye mu nsubu, bafofo bakatua kudiye, Yesu wakabambila ne, Nudi nuitabusha ne, Meme udi mumanye mua kuenza bualu ebu, anyi? Bakamuandamuna ne, E, Mukelenge. Hashishe, wakabalenga ku mesu abo, wakamba ne, Bualu bunuenzekele bu mudi ditabusha dienu. Mesu abo akabuluka. Yesu wakabakandika ne, Muntu mukuabo kamanyi bualu ebu. Kadi bobo bakaluhuka, bakatangalasha lumu luandi mu luseke alu luonso. Hakadibo baluhuka, bakalua kudiye ne kamama kakuatshike ne demon. Hakumusheye demon, kamama kakakula; bantu bakakema ne, Diambedi kabakanza kutangila bualu nunku mu Isalele. Kadi Bafalese bakamba ne, Yeye udi umusha bademon ne bukole bua mukelenge wa bademon. Yesu wakendakana mu bimenga bionso ne mu misoko mikese, uyisha bantu mu nsunagoga yabo, ubambila bualu bua lumu luimpe lua bukelenge bua mu diulu, ukolesha bantu bakadi ne mabedi ne matekete onso. Kadi hakatangileye bisumbu bia bantu, wakadi nʼabo luse, bualu bua bobo bakadi batata, bakadi bamuangalake bu mikoko idi kayi ne mulami. Yeye wakambila bayidi bandi ne, Bulelela, bintu bia kunowa bidi bia bungi, kadi bena mudimu badi banya-banya. Nunku, nulombe Mukelenge wa bintu bia kunowa, atume biandi bena mudimu mu kunowa kuandi. Yeye wakabikila bayidi bandi dikumi ne babidi, wakabaha bukole bua kuhitabo nʼabu nyuma ya bukoya, ne bua kuyumushabo munda mua bantu, ne bua kukoleshabo nʼabu bantu bakadi ne masama ne matekete a mishindu yonso. Mena a bapostolo dikumi ne babidi adi nunku: Wa kumudilu Simona, udibo babikila ne, Petelo, ne muanʼabo Andele; Yakobo muana wa Zebedayo, ne muanʼabo Yone; Filipo, ne Bâtolomayo; Toma, ne Matayo wakadi musangishi wa mulambu; Yakobo muana wa Alafayo, ne Tadayo; Simona, Muena Kananayo, ne Yudasa Isakaliote, wakamutungila tshitungu. Yesu wakamuangalasha bantu aba dikumi ne babidi, wakalayangana nʼabo ne, Kanuyi mu nshila wa ku bisamba bia bende, kanubuedi mu musoko wa Bena Samalea; kadi nuye kudi mikoko idi mijimine ya nsubu wa Isalele. Hanutshidi nuya, nubambile ne, Bukelenge bua mu diulu budi hehi. Nukoleshe badi ne mabedi, mibishe bafue, nulengeshe bena nsudi, numushe bademon; nuakuangata bualu ebu tshianana, nubahebu tshianana. Kanuditekedi ngolo ne tshiamu tshia argent ne tshiamu tshia mitaku mu mikaba yenu. Kanuangatshi tshibombo tshia kuya nʼatshi mu nshila, kanuangatshi bikowelu bibidi ne bisabata bikuabo ne tshihangu, bualu bua muena mudimu udi ne buakane bua kuheta bidia biandi. Hanuabuela mu tshimenga anyi mu musoko mukese, nukebe bantu bimpe badimu, nushikamemu tô ne hanumukamu. Hanutshidi nubuela mu nsubu, nuele bena nsubu muoyo. Bikala nsubu muimpe, ditalala dienu diluemu; kadi bikala nsubu kai muimpe, ditalala dienu dihingane kunudi. Muntu udi kai unuitabusha, udi kai unvua mei enu, hantshidi nuluhuka mu nsubu au anyi mu musoko au, nututule nsenga idi mu makasa enu. Bulelela, ndi nuambila ne, Halua dituku dia kulumbulula, bujitu bua dikenga dia musoko au nebutambe bua buloba bua Sodoma ne Amola. Monai, ndi nutuma bu mikoko idi munkatshi mua nkashama; nuikale ne budimu bu bua nyoka ne bu nyunyu ya nkutshi idi kayi iluishangana. Nudimukile bantu; bualu bua bobo nebanuele kudi balumbuludi babo, nebanukume mu nsunagoga yabo; bulelela, nebaye nʼenu ku mesu kua bangovena ne ku mesu kua banfumu bua bualu buanyi, nenuikale bu tshimanyishilu ku mesu kuabo ne ku mesu kua bisamba bia bende. Kadi hanufilabo nunku, kanulambi kuelangana meshi ne, Netuambe munyi? Netuambe tshinyi? Nebanuhe buakuamba ha diba adi. Bualu bua nuenu kanuena nuamba, Nyuma wa Tatu wenu udi wamba munda muenu. Muanʼabo ne mutu neafile muanʼabo ku lufu, tatu neafile muanʼandi, bana nebatombokele batatuʼabo ne bamamuʼabo, nebabashiheshe. Bantu bonso nebikale nʼenu lukuna bua dina dianyi; kadi wananukila tô ne kunshikidilu neasungidibue. Kadi hanukengeshabo mu musoko eu, nunyemene ku mukuabo; bulelela, ndi nuambila ne, Muana wa mutu nealue diambedi kanui banze kuenda mu misoko yonso ya Isalele. Muyidi kena ku mpala kua muyishi wandi, muhika kena ku mpala kua nfumu wandi. Mbimpe bia muyidi ikale bu mudi muyishi wandi, ne muhika ikale bu mudi nfumu waudi. Bikalabo babikile muena nsubu ne, Belezebula, nebatambe kubikila ba mu nsubu muandi muomumue. Nunku kanubatshinyi; bualu bua bintu bionso bidi bibuikila nebibuluibue; bidi bisokoka nebisokoloke. Nuambe mu munya malu andi nuambila mu mîdima; nuambe ha mitu ha nsubu malu anudi nunvua mu matshu. Kanutshinyi badi bashiha mubidi, kadi kabena bamanye mua kushiha muoyo; kadi nutshine udi mumanye mua kujimisha muoyo ne mubidi kabidi mu Ngena. Kabatu bahana mishamisha ibidi ku dikuta dikese, anyi? Mushamusha umue kawena uhona hanshi, anu hitabusha Tatu wenu. Nsuki ya ku mitu yenu mene mene idi mibala yonso. Nunku kanutshinyi, mushinga wenu udi mutambe wa mishamisha ya bungi. Muntu yonso wangitabusha ku mesu kua bantu, meme nemuitabushe kabidi ku mesu kua Tatu wanyi udi mu diulu. Kadi muntu yonso wampidia ku mesu kua bantu, meme nennuhidie kabidi ku mesu kua Tatu wanyi udi mu diulu. Kanuedianganyi meshi ne, Meme nakuluila bua kutuma ditalala ha buloba, tshiakuluila bua kutuma ditalala, nakuluila bua kutuma muele wa nvita. Nakuluila bua kuelesha muntu ne tatu wandi mpata, ne muana mukashi ne mamuʼandi mpata, ne mukashi wa muanʼandi ne mamuʼandi-muenu mpata. Badi mu nsubu nebikale ne muena nsubu lukuna. Muntu udi ne tatu wandi anyi baba wandi dinanga ditambe didiye nʼadi kundi meme kena ukumbana bua kuikaleye muyidi wanyi; muntu udi ne muanʼandi mulume anyi muanʼandi mukashi dinanga ditambe didiye nʼadi kundi meme kena ukumbana bua kuikaleye muyidi wanyi. Muntu udi kai wangata mutshi wandi mutshiamakane, udi kai undonda meme, kena ukumbana bua kuikaleye muyidi wanyi. Muntu udi uheta muoyo wandi neaujimishe; muntu udi ujimisha muoyo wandi bua bualu buanyi neauhete. Wanuitabusha udi ungitabusha meme, wangitabusha meme udi witabusha wakuntuma. Witabusha muprofete mu dina dia muprofete, neahete difutu dia muprofete; witabusha muntu muakane mu dina dia muntu muakane neahete difutu dia muntu muakane. Muntu yonso wahesha umue wa mu bantu aba bahuekele nasha dikoho dia mai matalala a kunua mu dina dia muyidi, bulelela, ndi nuambila ne, Yeye kena uhanga difutu diandi. Hakashikisha Yesu kuyisha bayidi bandi dikumi ne babidi mikenshi yandi, yeye wakumukaku bualu bua kuyisheye bantu mu misoko yabo ne bua kubambileye bualu bua Nzambi. Hakunvua Yone mu nsubu wa lukanu lumu lua malu akadi Kilisto wenza, wakutuma bayidi bandi bua kumukonka ne, Wewe nyeye ulualua, anyi tuindile mukuabo? Yesu wakabandamuna ne, Yai bienu, nuambile Yone malu anudi nunyua ne anudi numona; bafofo badi batabala, balema badi benda, bena nsudi badi balengeshibue, bena mahaha badi bunvua, bafue badi babishibua ku lufu, badi bambila bahele lumu luimpe lua Nzambi, Muntu yonso udi kai ulenduka bua bualu buanyi udi ne disanka. Hakaya bayidi ba Yone, Yesu wakabanga kuambila bisumbu bia bantu bualu bua Yone ne, Nuakuyila mu tshihela bua kutangila tshintu kai? Bua kutangila disele didibo banyungisha kudi luhehele, anyi? Nuakuyila bua kutangila tshintu kai? Bua kutangila muntu muluate bilulu binefuke, anyi? Badi baluata bilulu binefuke batu bikala mu nsubu ya banfumu. Kadi nuakuyila tshinyi? Bua kutangila muprofete, anyi? E, ndi nuambila ne, Yeye udi mutambe muprofete. Eu nyeye wakafundabo ne, Monai, ndi ntuma mukenshi wanyi ku mpala kuebe, Yeye nealongolole nshila webe ku mpala kuebe. Bulelela, ndi nuambila ne, Munkatshi mua bakalelabo kudi bakashi kamuakubika mukuabo mutambe Yone Mubanji; kadi udi mutambe bonso bukese mu bukelenge bua mu diulu udi mumutambe yeye. Ku matuku a Yone Mubanji tô ne katataka bukelenge bua mu diulu budi bubuedibua ku bukole, banyengi badi babunyenga ku bukole. Baprofete ne mikenshi ya Mose biakamba malu adi kâi manze kulua tô ne hakalua Yone. Binuasua kumuitabusha, eu udi Eliya, ukadi ha kulua biandi. Udi ne matshu unvue biandi. Nenfuanyikishe bantu ba tshikondo etshi bu tshinyi? Badi bu bana bakese badi bashikama mu bisalu, badi babikila balunda babo ne, Tuakunuelela nshiba, kanuena baje, tuakudila, kamina badikume mu biadi. Yone wakalua kai udia bidia, kai unua matuvu; badi bamba ne, Udi ne demon munda. Muana wa muntu wakulua udia bidia, unua maluvu; badi bamba ne, Yeye udi muena mudi, udi mukuatshiki wa maluvu, udi mulunda wa basangishi ba mulambu ne wa bantu babi. Bienzedi bia lungenyi bidi bilujadika. Yesu wakabanga kuela misoko yakadiye wenza malu andi a bungi a kukema mulau, bualu bua bena misoko kabakukudimuna mitshima yabo. Wewe Kolazina, mulau ulualua kûdi! Wewe Bete-saïda, mulau ulualua kûdi! Bualu bua bu malu a kukema akenjibua munkatshi muenu, menjibue mu Tulo ne mu Sidona, bakadi kukudimuna mitshima yabo kale, baluate bilulu bikayabala, balale mu butue. Kadi ndi nuambila ne, Halua dituku dia kulumbulula, bujitu bua dikenga dienu nebutambe bua Tulo ne bua Sidona. Ne wewe Kapênuma, nebakubandishe mu diulu, anyi? Neuhueke biebe mu Muaba wa Bafue; bualu bua bu malu a kukema akenjibua munkatshi muebe, menjibue mu Sodoma, wakadi kushala tô ne katataka. Kadi ndi nuambila ne, Halua dituku dia kulumbulula, bujitu bua dikenga diebe nebutambe bua dikenga dia buloba bua Sodoma. Dituku adi Yesu wakandamuna dî, wakamba ne, Tatu Wanyi, Mukelenge wa diulu ne wa buloba, ndi nkusakidila bualu bua wewe wakusokoka bena meshi ne bena budimu malu â, wakuasokolola kudi bana bakese; bulelela, Tatu, bua bualu ebu buakadi buimpe ku mesu kuebe. Tatu wanyi wakafila bintu bionso mu bianza bianyi; kakuena muntu udi mumanye Muana, anu Tatu; kakuena muntu udi mumanye Tatu, anu Muana ne udi Muana musue kulesha Tatu. Luai kundi, bonso badi ne mu dimu mukole, badi ne bujitu bunene, meme nenuhe dikisha. Angatai mutshi wanyi wa tshikokedi ha nshingu yenu, nuyile malu kundi; bualu bua meme ndi ne kalolo ne kanemu mu mutshima wanyi; nunku nenusangane dikisha mu mitshima yenu. Bualu bua mutshi wanyi wa tshikokedi udi muakane ne bujitu buanyi budi buhehele. Mu matuku au Yesu wakadi uhitshila mu madimi a blé, dituku dia Lumingu lua Bayuda; bayidi bandi bakadi ne nsala, bakabanga kutshibula miehu yai, bakadia. Kadi Bafalese, hakatangilabo bualu ebu, bakamuambila ne, Tangila, bayidi bebe batshidi benza bualu budi bujila dituku dia Lumingu. Kadi yeye wakabambila ne, Kanuakubala bualu buakenza Davidi, hakadiye ne nsala, ne bakuabo bakadi nʼandi, anyi? Bualu bua yeye wakabuela mu nsubu wa mbi, wakadia bidia bilesha biakadi tshijila kudiye ne kudi bakuabo bakadi nʼandi, anu bakuidi ba Nzambi bakadi babidia. Kanuakubala kabidi mu luseke lua mikenshi ya Mose, anyi, ne bakuidi ba Nzambi badi bashiha tshijila tshia dituku dia Lumingu mu ntempelo, kaba! ne dihila? Kadi meme ndi nuambila ne, Udi mutambe ntempelo udi aha. Bu nuenu bamanye dî edi ne, Ndi musue luse, tshiena nsua nyama minshihela, kanuakadi kuhisha badi kaba! ne dihila. Bualu bua Muana wa muntu udi mukelenge wa dituku dia Lumingu. Yeye wakumukaku, wakabuela mu nsunagoga wabo; monai, muntu wakadi ne tshianza tshiume. Bakakonka Yesu ne, Kuondaha bantu dituku dia Lumingu kudi kushiha mukenshi, anyi? Bakasua kumubanda. Yeye wakabambila ne, Muntu kai wa munkatshi muenu, udi ne mukoko umue, biahonau mu dina dituku dia Lumingu, kena ûkuata bua kûhatula? Mushinga wa muntu udi mutambe wa mukoko misangu bungi munyi? Nunku kuenza kua bualu buimpe dituku dia Lumingu kakuena kushiha mukenshi. Hashishe, yeye wakambila muntu ne, Olola tshianza tshiebe. Yeye wakatshiolola; tshiakadi tshiakane kabidi bu tshinga tshianza. Kadi Bafalese bakumuka, bakamuelela tshifufu bua kumushiha. Hakamanya Yesu bualu ebu, wakumukaku; bantu ba bungi bakamulonda; yeye wakabakolesha bonso, wakabambila bikole ne, Kanunmanyishi kudi bantu; bua dî diakambabo kudi muprofete Yeshaya dishikishibue ne, Tangila, muntu wanyi unakusungula; Wanyi munanga udi usankisha mutshima wanyi; Nenteke Nyuma wanyi hamʼbidi handi; Yeye neambile bisamba bia bende malu mimpe. Yeye kena utanda, kena wela mbila, Muntu kena unvua dî diandi mu misesu. Yeye kena utshibula disele didi diamba kukoseka, Kena ujima kalulu ka muinda kadi kafuima muinshi Tô ne hatumeye malu andi mimpe bua kuhita malu mabi. Bisamba bia bende nebitekemene dina diandi. Bakalua kudi Yesu ne muntu mukuatshike ne demon, wakadi mufofo ne kamama kabidi; yeye wakamuondaha, nunku kamama kakadia, kakatabala. Bisumbu bionso biakakema, biakamba ne, Eu ke muana wa Davidi, anyi? Kadi hakunvua Bafalese dî edi, bakamba ne, Muntu eu kena udiumushila bademon, anu mu dina dia Belezebula, mukelenge wa bademon. Yeye wakamanya meshi abo, wakabambila ne, Bukelenge buonso budi buhanduluke nebufue; musoko wonso ne nsubu yonso udi uhanduluka kabiena bijalama. Bikala Satana umusha Satana, yeye udi muhanduluke; bukelenge buandi budi bumanye mua kujalama munyi? Bingikala ngumusha bademon mu dina dia Belezebula, bana benu badi babumusha mu dina dia nganyi? Nunku bobo nebikale balumbuludi benu, Kadi bingikala ngumu sha bademon mu dina dia Nyuma wa Nzambi, bukelenge bua Nzambi buakumana kulua kunudi. Muntu kai udi mumanye mua kubuela mu nsubu wa muena bukole bua kuhaula bintu biandi kai muanze kusuika muena bukole? Hashishe, neahaule bia mu nsubu wandi. Udi kai nʼanyi udi umpidia; udi kai usangisha nʼanyi bintu, udi ubitangalasha. Ebu budi bualu bundi nuambila ne, Nebajimishile bantu mibi yabo yonso ne bihendu biabo bidibo bahenda nʼabi Nzambi, kadi kabena babajimishila bihendu bidibo bahenda nʼabi Nyuma. Muntu yonso wahetula Muana wa muntu, nebamujimishile bubi buandi; kadi wahetula Nyuma Muimpe kabena bamujimishila bubi buandi nasha mu tshikondo etshi nasha mu tshikondo tshialua. Nasha nuamba ne mutshi udi muimpe ne mamuma au adi mimpe, nasha nuamba ne mutshi udi mubi ne mamuma au adi mabi; bua mamuma adi amanyisha mudi mutshi wau. Nuenu bana ba nyoka, nudi babi, nudi bamanye mua kuamba mei mimpe munyi? Bua mukana mudi muamba anu malu adi matambe kuvulangana mu mutshima. Muntu muimpe udi uhatula bintu bimpe mu tshibutshilu tshiandi tshimpe; muntu mubi udi uhatula bintu bibi mu tshibutshilu tshiandi tshibi. Ndi nuambila ne, Halua dituku dia kulumbulula, nebalumbuluishe bantu bua mei onso a tshianana akadibo bamba. Mei ebe neakubingishe, mei ebe kabidi neakuhishe. Bafundi bakuabo ne Bafalese bakamuandamuna ne, Muyishi, tudi basue kutangila tshimanyinu tshia bualu buebe. Kadi yeye wakabandamuna ne, Ba mu tshikondo tshibi ne tshia masandi, badi bakeba tshimanyinu; kabena babaha tshimanyinu tshikuabo anu tshia muprofete Yona. Bu muakadi Yona munda mua munyinyi mimene wa mu mai minya isatu ne mafuku asatu, nunku Muana wa muntu neikale munda mua buloba minya isatu ne mafuku asatu. Mu dituku dia kulumbulula, Bena Ninewe nebimane ne bantu ba tshikondo etshi, nebabahishe; bua bobo bakakudimuna mitshima yabo, hakuvuabo mei a Yona; monai, udi mutambe Yona udi aha. Mu dituku dia kulumbulula mukelenge mukashi wa ku sude neabike ne bantu ba tshikondo etshi, neabahishe; bua yeye wakalua biandi kunfudilu kua buloba bua kunvua lungenyi lua Solomo; monai, udi mutambe Solomo udi aha. Haluhuka nyuma wa bukoya munda mua muntu, nyuma udi wendakana mu miaba idi kayi mai, ukeba ha kuikisha, kena ubamona. Hashishe, yeye udi wamba munda munda ne, Nempingane mu nsubu wanyi unakuluhuka; halueye, udi usangana nsubu hatuhu, mukomba, mulengesha. Hashishe, yeye udi uya biandi, udi wangata minga nyuma mibi muanda mutekete idi mimutambe yeye bubi, idi ibuelamuidi ishikama; malu a muntu au a hashishe adi atamba a diambedi bubi. Bualu ebu nunku nebulue kudi bantu ba tshikondo tshibi etshi. Hakatshidiye wambila bisumbu bia bantu mei andi, mamuʼandi ne bana babo bakadi bimane ha mbelu, bakeba kumuambila dî. Muntu wakamuambila ne, Mamuʼebe ne bana benu badi bimane ku mbelu, bakeba kukuambila dî. Kadi yeye wakakonka wakumumanyisha ne, Mamu wanyi nganyi? Bana betu mbanganyi? Wakoluela bayidi bandi tshianza, wakamba ne, Monai mamu wanyi ne bana betu! Muntu yonso wenza bu mudi Tatu wanyi wa mu diulu musue yeye udi muanʼetu mulume ne muanʼetu mukashi ne mamu wanyi. Dituku adi Yesu wakaluhuka mu nsubu, wakashikama ku muelelu wa dishiba. Bisumbu binene bia bantu biakamunguila, nunku yeye wakabuela mu buatu, wakashikama; bantu bonso bakimana ku muelelu wa mai. Yeye wakabambila malu a bungi mu nsumuinu ne, Mumiaminyi wakaya bua kumiamina maminu; hakadiye umiamina, maminu makuabo akamata kukala kua nshila, nyunyu yakalua, yakâzokola; makuabo akamata ha buloba buakadi ha mutu ha mabue, kâkadihu ne buloba bua bungi; tshituha tshihi akatoloka bua kâkadi ne buloba bule; hakabanda diba, akababuka, akafubidila bualu bua kâkadi ne miji. Makuabo akamata mu mionshi ya meba; mionshi yakadiunda, yakânye-ngela: makuabo akamata ha buloba buimpe, akavudisha maminu; makuabo lukama lukama, makuabo makumi asambombo asambombo, makuabo makumi asatu asatu. Udi ne matshu unvue biandi. Bayidi bakalua, bakamukonka ne, Udi ubambidila malu mu nsumuinu tshinyi? Yeye wakabandamuna ne, Bakanuha bienu lungenyi lua kumanya malu a bukelenge bua mu diulu adi masokoka, kadi kabakabahalu. Bualu bua muntu yonso udi ne bintu, nebamuhe binga, neikale ne bia bungi; kadi muntu yonso udi kai ne tshintu, nebamunyenge tshidiye nʼatshi. Ebu budi bualu bundi mbambila malu mu nsumuinu; bua kumona badi bamona kadi kabena bamona bimpe; kunvua badi bunvua kadi kabena bunvua bimpe, kabena bajingulula bualu. Bobo bakushikisha mayisha a muprofete Yeshaya akambeye ne, Kunyua nenunvue, kanuena bamanye; kumona nenumone, Kanuena numone bimpe; Mitshima ya bantu aba yakulua manyi a bungi, Badi mpudi matshu, Bakubikila mesu abo; Nunku kabamonyi ne mesu abo, Kabunvu ne matshu abo, Kabamanyi mu mitshima yabo. Kabakudimunyi mitshima yabo Bua meme mbondahe. Kadi mesu enu adi ne disanka, bua adi amona; matshu enu adi ne disanka kabidi, bua adi unvua Bulelela, ndi nuambila ne, Baprofete ba bungi ne bantu bakane bakajinga kumona malu anudi numona, kabakâmona; bakajinga kunyua malu anudi nunyua, kabakaunvua. Nunku unvuai bualu bua lusumuinu lua mumiaminyi. Hunvua muntu dî dia bukelenge bua mu diulu kai mudijingile, hashishe, mubi udi ulua, udi unyenga bualu buakumiaminabo mu mutshima wandi. Kayeyʼeu wakumiaminabo kukala kua nshila. Yeye wakadi mumiamina ha buloba buakadi ha mutu ha mabue udi unvua dî dia Nzambi, udi uditabusha lubilu ne disanka; kadi yeye kena ne muji munda muandi, udi ushala tshituha tshihi; halua dikenga anyi lutatu bualu bua dî dia Nzambi, yeye udi ulenduka lubilu. Yeye wakadi mumiamina mu mionshi ya meba udi unvua dî dia Nzambi, kadi meshi a malu a ha buloba ne mashimi a biuma bidi binyengela dî, yeye udi wikala kai ne maminu. Yeye wakadi mumiamina ha buloba buimpe udi unvua dî dia Nzambi, udi udijingulula; yeye mene udi uvudisha maminu; manga adi avulangana lukama lukama, manga makumi asambombo asambombo, manga makumi asatu asatu. Yeye wakabelela lusumuinu lukuabo ne, Bukelenge bua mu diulu budi bu muntu wakela biandi maminu mimpe mu budimi buandi; kadi hakadi bantu balale tulu, wakadi nʼandi lukuna wakalua, wakela ntete ya luhela muakamanabo kuela mponda, wakaya biandi. Kadi hakatolokabi, hakatoyabi, luhela luakamueneka. Bahika ba muena budimi bakalua, bakamukonka ne, Mukelenge, wewe kuakuela maminu mimpe mu budimi buebe, anyi? Budi ne luhela munyi? Yeye wakabambila ne, Muntu udi nʼanyi lukuna nguakuenza bualu ebu. Bahika bandi bakamukonka ne, Udi musue tuye kusunguila luhela, anyi? Yeye wakamba ne, Nasha! Bualu bua hanuikala usungulula luhela, nenutule mponda hohamue. Bubidi buabi bidiunde hohamue tô ne halua dia kunowa; halua dia kunowa, nengambile banowi ne, Diambedi nusungulule luhela nulusuike mu bisumbu bua kuluosha; hadi nusangishe mponda mu diyeba dianyi. Yeye wakabelela lusumuinu lukuabo ne, Bukelenge bua mu diulu budi bu lutete lua mutada luakangata muntu bua kukuna mu budimi buandi; ludi lutamba ntete yonso bukese; kadi hadiundalu, ludi lutamba midioko yonso bunene, ludi ludiunda mutshi munene, nyunyu ya mulu idi ilua kuikila ha matamba au. Yeye wakabelela lusumuinu lukuabo ne, Bukelenge bua mu diulu budi bu luevene luakangata mukashi, wakalusokoka mu bihikilu bisatu bia bukula tô ne hakenduluka luevene mu bukula buonso. Yesu wakambila bantu malu â onso mu nsumuinu, yeye kakabambila malu tshianana, anu mu nsumuinu; bua dî diakambabo kudi muprofete dishikishibue ne, Hanabulula mukana muanyi, nengambe mei mu nsumuinu; Nengambe malu akadi masokoka ku tshibangidilu tshia buloba tô ne katataka. Hashishe, Yesu wakashîa bisumbu bia bantu ku nyima, wakabuela mu nsubu; bayidi bandi bakalua kudiye, bakamuambila ne, Utujinguluile lusumuinu lua luhela luakadi mu budimi. Yeye wakandamuna ne, Udi ukuna maminu mimpe udi Muana wa muntu; budimi budi bantu ba ha buloba; maminu mimpe adi bana ba mu bukelenge bua Nzambi, ntete ya luhela idi bana ba mubi; muena lukuna wakaikuna ndiabolo; dituku dia kunowa nkunshikidilu kua tshikondo etshi; banowi mbanjelo. Bu mudi bantu basangisha luhela bua kuluosha, bualu nebuikale nunku kunshikidilu kua tshikondo etshi. Muana wa muntu neatume banjelo bandi, nebasungule mu bukelenge buandi benji ba malu mabi ne bintu bionso bidi bilenduisha bantu, nebabiele mu tshikutu tshia kahia; muadi newikalemu ne kusumakana menu, Dituku diadia bantu bakane nebakenke bu diba mu bukelenge bua Tatu wabo. Udi ne matshu unvue biandi. Bukelenge bua mu diulu kabidi budi bu biuma biakadi bisokoka mu budimi; hakabisangana muntu, yeye wakabisokoka kabidi; mu disanka diandi, wakaya, wakahana bintu biandi bionso, wakasumba budimi abu. Bukelenge bua mu diulu kabidi budi bu muntu udi biandi muendi wa mushinga, udi ukeba mabue mimpe a mushinga mukole; hakasanganeye dibue dia mushinga mutambe bukole, wakaya, wakahana bintu biandi bionso, wakadisumba. Bukelenge bua mu diulu kabidi budi bu kahamba kakadi kela mu dishiha, kakakungisha mishiha ya mishindu yonso; hakûla kahamba tente, bakakakoka ku mpata; bakashikama, bakasangisha biakadi bimpe mu bihanza, bakimasha biakadi bibi. Bualu nebuikale nunku kunshikidilu kua tshikondo etshi; banjelo nebalue, nebumushe bantu babi bakadi munkatshi mua bantu bakane, nebabele mu tshikutu tshia kahia, muadi newikalemu ne kusumakana menu. Yesu wakabakonka ne, Nuakunyua malu â onso, anyi? Bakamuitaba ne, E. Yeye wakabambila ne, Mufundi yonso wakuvui-shabo muyidi mu bukelenge bua mu diulu udi bu muena nsubu udi uhatula bintu bihia-bihia ne bikulukulu mu tshibutshilu tshiandi. Hakashikisha Yesu nsumuinu ei, wakumukaku. Hakayeye mu luseke luandi, wakayisha bantu mu nsunagoga wabo, nunku bakakema ne, Muntu eu wakangata lungenyi elu ne malu â a kukema kudi kunyi? Yeye kena muana wa muena mabaya, anyi? Kabena babikila mamuʼandi ne, Malia, anyi? Bana babo ba balume Yakobo ne Yosefe ne Simona ne Yuda; ne bana babo ba bakashi, kabena munkatshi muetu, buonso buabo, anyi? Nunku muntu eu wakangata malu â onso kudi kunyi? Bakalenduka bua bualu buandi. Kadi Yesu wakabambila ne, Muprofete udi ne butumbi mu miaba yonso, kadi kena nʼabu ku luseke luabo ne mu nsubu wandi. Yeye kakenzamu malu a kukema a bungi bualu bua buhidia buabo. Mu matuku au muloho Helede wakunvua lumu lua Yesu, wakambila bantu bandi ne, Au nYone Mubanji, wakubika ku lufu, bua bualu ebu malu a kukema adi enjibua kudiye. Helode wakamana kukuata Yone, wakamusuika, wakamubuesha mu nsubu wa lukanu bualu bua Helodia, mukashi wa muanʼabo Filipo. Bualu bua Yone wakamuambila ne, Kambiakane bua wewe wikale nʼandi. Hakasua Helode kumushiha, yeye wakatshina bantu, bualu bua bobo bakamubala bu muprofete. Kadi hakafikila dituku dia kuledibua kua Helode, muana mukashi wa Helodia wakadi uja maja ku mpala kuabo, wakasankisha mutshima wa Helode. Yeye wakaditshiha, wakamulaya ne, Nenkuhe tshionso tshiwalomba. Muana mukashi muenzesha kudi mamuʼandi wakambila Helode ne, Umpe mutu wa Yone Mubanji ha dilonga. Mutshima wa mukelenge wakanyingalala; kadi bualu bua mitshihu yandi ne bua bakadi badia nʼandi bidia yeye wakamba ne, Bamuheu. Yeye wakatuma dî, wakakosesha Yone mutu mu nsubu wa lukanu. Bakalua ne mutu wandi ha dilonga, bakauha nsongakashi; ne yeye wakalua nʼau kudi mamuʼandi. Bayidi ba Yone bakalua bakambula tshitalu tshiandi, bakatshijika, bakaya kumanyisha Yesu. Hakunvua Yesu bualu bua lufu lua Yone, wakumukaku mu buatu, wakaya mu tshihela mu muaba muhengame; hakunvua bisumbu bia bantu bualu abu, bakumuka mu misoko, bakamulonda ku makasa. Yeye wakumuka mu buatu, wakatangila tshisumbu tshinene tshia bantu, wakadi nʼabo luse, wakakolesha bahedi babo. Hakamba diba kuhueka, bayidi bandi bakalua kudiye, bakamba ne, Muaba eu udi tshihela, diba diakumana kuya, utume bisumbu bia bantu, baye mu misoko mikese bua kudisumbila bia kudia. Kadi Yesu wakabambila ne, Kabena ne bualu bua kuya, nuenu nubahe bia kudia. Bakamuambila ne, Tudi ne mitanda ya bidia anu itanu ne mishiha ibidi. Yeye wakamba ne, Nulue nʼabi kundi. Wakambila bisumbu bia bantu ne, Shikamai ha mashinde; wakamema mitanda itanu ne mishiha ibidi; hakatangileye mulu, wakatendelela Nzambi, wakabitshibiha, wakabifila mu bianza bia bayidi, bayidi bakaha bisumbu bia bantu. Buonso buabo bakadia, bakûkuta; bakangula bihesa bia bidia biakushala bisaka dikumi ne bibidi biule tente. Bantu bonso bakadia bakadi balume binunu bitanu, ne bakashi ne bana. Yesu wakabuesha bayidi bandi mu buatu lubilu, badianjile dishia ku mpala kuandi, yeye ashale kutuma bisumbu bia bantu kuabo. Hakatumeye bisumbu bia bantu kuabo, wakaya mu mukuna nkayandi bua kutendelela Nzambi; hakabuela diba yeye wakadimu nkayandi. Kadi buatu buakadi mu bunene bua dishiba, butatshisha kudi mavuala, bualu bua tshihehele tshiakadi tshibuhingisha. Hakadi diba bu ha inai hatshiatshia, Yesu wakalua kudibo, wenda ha mutu ha mai. Hakamumona bayidi bandi wenda ha mutu ha mai, bakatshina, bakamba ne, Mukishi; buowa buakabakuata, bakahandalala. Kadi Yesu wakabambila ne, Nukoleshe mitshima yenu; nmeme, kanutshinyi. Petelo wakamuebesha ne, Biwikala wewe, ungambile bua meme kulua kûdi ha mutu ha mai. Yeye wakamba ne, Lua. Petelo wakahatuka mu buatu, wakenda ha mutu ha mai bua kuya kudi Yesu. Kadi hakamoneye tshihehele, wakatshina; hakabangeye kudina mu mai, wakadila ne, Mukelenge, unsungile. Yesu wakolola tshianza lukasa, wakamukuata, wakamuambila ne, Wewe udi ne ditabusha dikese, wakuelela mpata munda tshinyi? Hakabandabo mu buatu, tshihehele tshiakahatama. Bakadi mu buatu bakamukukuila, bakamba ne, Bulelela, wewe udi Muana wa Nzambi. Hakasabukabo, bakaya ha mpata, ku buloba bua Genesaleta. Hakamumanya bantu ba ku muaba au, bakatuma dî ku luseke alu luonso, bakahia ne bena mabedi bonso kudiye; bakamutendekena bua kulengabo ku mubangu wa tshivualu tshiandi; bakalenga mbobo bakakoleshibua. Bafalese ne bafundi ba ku Yelushalema bakalua kudi Yesu, bakamuebesha ne, Bayidi bebe badi babengela kutumikila bilele bia bankambua betu tshinyi? Ha kudia kabena bowa bianza. Yeye wakabandamuna ne, Nuenu kabidi nudi nubengela kutumikila mukenshi wa Nzambi bualu bua bilele bienu tshinyi? Nzambi wakamba ne, Unemeke tatuʼebe ne mamuʼebe; yeye wakamba kabidi ne, Udi wamba mei mabi bua tatuʼandi anyi mamuʼandi afue biandi bulelela. Kadi nuenu nudi nuamba ne, Muntu yonso udi wambila tatuʼandi anyi mamuʼandi ne, Tshintu tshiwakadi kuangata tshidi tshiha Nzambi, kena unemeka tatuʼandi. Nuenu nuakuona dî dia Nzambi bualu bua bilele bienu, Nuenu bena lubombo, bulelela, Yeshaya wakamba bualu buenu ne, Bantu aba badi bannemeka ne mishiku yabo, Kadi mitshima yabo kayena kundi, idi kule. Badi bantendelela tshianana, Badi bayisha bantu diyisha dia mikenshi ya bantu. Yeye wakabikila tshisumbu tshia bantu kudiye, wakabambila ne, Unvuai, mimanye bimpe. Tshintu tshidi tshibuela mukana mua muntu katshiena tshimubihisha, tshidi tshiluhuka mukana muandi ntshidi tshimubihisha. Hashishe, bayidi bandi bakalua kudiye, bakamuebesha ne, Kuena mumanye biebe ne, Bafalese bakulenduka, hakunvuabo dî edi, anyi? Kadi yeye wakandamuna ne, Nebajule mutshi wonso udi kawi mutentula kudi Tatu wanyi udi mu diulu. Nubalekele, badi balombodi bafofo, Bialombola mufofo munga mufofo, bubidi buabo nebahone mu dina. Petelo wakamuandamuna ne, Utujingulula lusumuinu elu. Yesu wakabakonka ne, Nuenu kanuena bajingulule tô ne katataka, anyi? Kanuena bamanye ne, Tshidi tshibuela mukana tshiyaya munda, nebatshiuhe, anyi? Kadi bintu bidi bihatuka mukana biakufuma mu mutshima, mbiobi bidi bibihisha muntu. Bualu bua meshi mabi ne kushiha kua bantu ne masandi ne tshiendenda ne buibi ne mashimi ne kuhenda Nzambi bidi biluhuka mu mutshima; malu â adi abihisha muntu; kudi kudia bidia ne bianza bidi kabi biowa kakuena kubihisha muntu. Yesu wakumukaku, wakaya mu nseke ya Tulo ne Sidona. Monai, mukashi Muena Kanâna wakaluhuka mu luseke elu, wakela dî bikole ne, Mukelenge, muana wa Davidi, unfue luse, muana wanyi wa bakashi udi ukenga bikole bualu bua demon udi munda. Kadi Yesu kakamukudimuna dî. Bayidi bandi bakalua kudiye, bakamutendekena ne, Umuhingashe, bualu bua yeye udi utulonda wela dî diandi bikole. Yeye wakandamuna ne, Nakutumibua anu kudi mikoko mijimine ya nsubu wa Isalele. Kadi mukashi wakalua, wakamukukuila ne, Mukelenge unkuatshishe, Yeye wakandamuna ne, Kambimpe bia kuangata bidia bia bana kubielela mbua. Mukashi wakamba ne, Bulelela, Mukelenge, kadi mbua itu yadia nkototo idi imata munshi mua mesa a banfumu bai. Yesu wakamuandamuna ne, Wewe mukashi, ditabusha diebe didi dinene; nebakuenzele bualu bûdi musue. Ne muanʼandi wa bakashi wakakoleshibua ha diba adi mene. Yesu wakumukaku, wakalua hehi ne dishiba dia Galela, wakabanda ku mukuna, wakashikama. Bisumbu binene bia bantu biakalua kudiye, bakadi ne balema babo ne bafofo ne tumama ne batshibuke ne bakuabo ba bungi, bakabateka ku makasa andi, yeye wakabakolesha; nunku bantu bakakema, hakamonabo tumama tuakula, ne batshibuke balulama, balema benda, ne bafofo batabala, bakatumbisha Nzambi wa Isalele. Yesu wakabikila bayidi bandi, wakabambila ne, Ndi ne bantu luse, bualu bua bobo bakusomba nʼanyi matuku asatu, kabena ne tshia kudia; tshiena musue kubatuma ne nsala, kabayi kuhanga mu nshila. Bayidi bandi bakamukonka ne, Mu muaba eu wa tshihela netuhete mitanda ya bidia ya bungi ya kûkutshisha bantu bungi nunku kudi kunyi? Yesu wakabakonka ne, Nudi ne mitanda bungi munyi? Bakamba ne, Idi muanda mutekete, ne tushiha tukese. Yeye wakambila bantu ne, Shikamai hanshi; wakamema mitanda muanda mutekete ne mishiha; wakatendelela Nzambi, wakabitshibula, wakabifila mu bianza bia bayidi, bayidi bakaha bantu. Buonso buabo bakadia, bakûkuta; bakangula bihesa bia bidia biakashala bisaka muanda mutekete biule tente. Bantu bonso bakadia bakadi balume binunu binai, ne bakashi ne bana. Wakatuma bantu kuabo; wakabuela mu buatu, wakalua mu nseke ya Magadana. Bafalese ne Basadoke bakalua, bakamuteta munda, bakamuambila ne, Utuleshe tshimanyinu tshia mu diulu. Kadi yeye wakabandamuna ne, Mu dilolo nutu nuamba ne, Nvula kena ulua, bualu bua diulu didi dikunze; mu dinda nutu nuamba ne, Lelu nvula nealue, bualu bua diulu didi dikunze kunzu, nvula udi mufinde. Nudi bamanye mua kujingulula mpala wa diulu, kadi kanuena bamanye mua kujingulula bimanyinu bia bikondo. Ba mu tshikondo tshibi ne tshia masandi badi bakeba tshimanyinu! kabena babaha tshimanyinu tshikuabo anu tshia Yona. Yeye wakahashîa, wakaya biandi. Bayidi ba Yesu bakalua dishia dia dishiba, muoyo wakabahua bua kuangata mitanda ya bidia. Yesu wakabambila ne, Tangilai bimpe, nudimukile luevene lua Bafalese ne lua Basadoke. Bobo bakambilangana ne, Buakuambileye nunku mbua tuetu katuakangata mitanda ya bidia. Hakamanya Yesu lungenyi luabo, wakamba ne, Nuenu nudi ne ditabusha dikese, nudi nuambidilangana ne, Katuena ne mitanda ya bidia, tshinyi? Kanuena bamanye, kanuena bavuluke bua mitanda itanu ya bantu binunu bitanu ne bungi bua bisaka binuakuangula? Kanuena bavuluke mitanda muanda mutekete ya bantu binunu binai ne bungi bua bisaka binuakuangula? Bualu kai nuenu kanuena bamanye ne, Tshiakunuambila bua mitanda ya bidia? Nakunuambila bua kudimukila luevene lua Bafalese ne lua Basadoke. Hashishe, bakajingulula ne, Yeye kakutuambila bua kudimukila luevene lua mitanda ya bidia, wakutuambila bua kudimukila diyisha dia Bafalese ne dia Basadoke. Hakalua Yesu mu luseke lua Kaisalia wa Filipoi, wakakonka bayidi bandi ne, Bantu badi bamba Muana wa muntu ne, Nganyi? Bakamba ne, Bakuabo badi bamba ne, Yeye udi Yone Mubatiji, bakuabo ne, Yeye udi Eliya; bakuabo ne, Yeye udi Yelemiya anyi muprofete mukuabo. Yeye wakabakonka ne, Kadi nuenu nudi nungamba ne, Meme ndi nganyi? Simona Petelo wakandamuna ne, Wewe udi Kilisto, Muana wa Nzambi udi ne muoyo. Yesu wakamuandamuna ne, Simona Bâ-yona, wewe udi ne disanka; bantu kabakukubuluila bualu ebu, anu Tatu wanyi wa mu diulu. Ndi nkuambila kabidi ne, Wewe udi Petelo, ha dibue edi nengibake ekelesia wanyi; bibi bia ku mbelu kua Muaba wa Bafue kabiena bimuhita bukole. Nenkuhe nvungula ya bukelenge bua mu diulu, mu diulu nebasuike tshiwasuika ha buloba; mu diulu nebasuike tshiwasulula ha buloba. Hashishe, yeye wakambila bayidi bandi bikole ne, Kanuambidi muntu ne, Yeye udi Kilisto. Ku tshikondo atshi Yesu wakabanga kulesha bayidi bandi ne, Bundi nʼabu mbua kuya ku Yelushalema, ne bua kukengeshibua makenga a bungi kudi bakulu ne kudi bakuidi banene ba Nzambi ne kudi bafundi, ne bua kushihibua, ne bua kubishibua hahita matuku asatu. Petelo wakaya ne Yesu, wakabanga kumubela ne, Nzambi akufue luse, Mukelenge; bualu ebu kabuena bulua kûdi. Kadi yeye wakatshinguluka, wakambila Petelo ne, Satana, yila ku nyima kuanyi, wewe udi tshilenduishi tshianyi, bualu bua wewe kuena welangana meshi a malu a Nzambi, udi welangana meshi anu a malu a bantu. Yesu wakambila bayidi bandi ne, Biasua muntu kundonda, adihidie, ambule mutshi wandi mutshiamakane, alonde. Bua wasua kusungila muoyo wandi neaujimishe, wajimisha muoyo wandi bua bualu buanyi neauhete. Biasumba muntu buloba buonso ku muoyo wandi, mushinga wandi muimpe udi hanyi? Anyi, muntu udi ne tshintu kai tshia kushintakasheye bua kuangateye muoyo wandi kabidi? Muana wa muntu nealue mu butumbi bua Tatu wandi ne banjelo bandi; dituku adi neafute muntu yonso bu muakenzenzeye. Bulelela, ndi nuambila ne, Bakuabo badi bimana aha kabena bafua tô ne hamonabo Muana wa muntu ulua mu bukelenge buandi. Hakahita matuku asambombo, Yesu wakangata Petelo ne Yakobo ne muanʼabo Yone, wakabanda nʼabo ku mukuna mule, bobo nkayabo. Yeye wakakudimuka ku mesu kuabo; mpala wandi wakaditemena bu diba, bilulu biandi biakatoka bu munya. Monai, Mose ne Eliya bakamueneka kudibo bayikila nʼandi. Petelo wakambila Yesu ne, Mukelenge, hatudi kunoko mbimpe; biwasua, nengase bitanda bisatu, tshikuabo ntshiebe, tshinga ntshia Mose, tshikuabo ntshia Eliya. Hakatshidiye wamba nunku, monai, ditutu diengelela diakababuikila; dî diakaluhuka mu ditutu ne, Eu udi Muanʼanyi munanga, yeye udi unsankisha bimpe, munvuilai. Hakunvua bayidi dî adi, bakatua mpala hanshi, bakatamba kutshina. Yesu wakalua, wakabalenga tshianza, wakamba ne, Bikai, kanutshinyi. Hakabandulukabo, kabakamona muntu mukuabo, anu Yesu. Hakadibo bahueka ha mukuna, Yesu wakabambila ne, Kanuambidi muntu mukuabo bualu bunuakumona tô ne habika Muana wa muntu ku lufu. Bayidi bakamukonka ne, Bafundi batu bambila tshinyi ne, Budi Eliya nʼabu mbua kudianjileye kulua ku mpala? Yeye wakandamuna ne, Bulelela, Eliya udi ulua, nealongolole bintu bionso bu muakadibi diambedi; kadi meme ndi nuambila ne, Eliya wakamana kulua, kabakamumanya, bakamuenzela bualu buakasuabo. Nunku nebakengeshe Muana wa muntu kabidi. Hashishe bayidi bakamanya ne, Yeye udi utuambila Yone Mubatiji. Hakafikabo hakadi tshisumbu tshia bantu, muntu wakalua kudiye, wakamutuila binu hanshi, wakamba ne, Mukelenge ufuile muanʼanyi wa balume luse, yeye udi ne tshiseke, udi ukenga bikole; misangu ya bungi yeye udi uhona mu kahia ne mu mai. Nakalua nʼandi kudi bayidi bebe, bobo kabakamanya mua kushikisha disama diandi. Yesu wakandamuna ne, Nuenu ba tshikondo etshi tshia buhidia ne tshitshu, nenshale nʼenu musangu bule munyi? Nentate nʼenu musangu bule munyi? Luai nʼandi kundi. Yesu wakabela demon, wakumuka munda mua muana; ha diba adi mene muana wakadi mukoleshibue. Hashishe, bayidi bakalua kudi Yesu nkayabo, bakamukonka ne, Munyi tuetu katuakamanya mua kumumusha? Yeye wakabambila ne, Bualu bua ditabusha dienu diakadi dikese. Bulelela, ndi nuambila ne, Binuikala ne ditabusha bunene bua lutete lua mutada, nenuambile mukuna eu ne, Umukaku, ya kuakua, neumuke; kakuena bualu budi mua kunukolela. [ ]. Hakadibo badisangisha mu Galela, Yesu wakabambila ne, Nebafile Muana wa muntu mu bianza bia bantu; nebamushihe, neabishibue hahita matuku asatu. Mitshima yabo yakatamba kunyingalala. Hakaluabo ku Kapênuma, basangishi ba mulambu wa ntempelo bakalua kudi Petelo, bakamukonka ne, Muyishi wenu kena ufuta tshituha tshibidi tshia nshekela, anyi? Yeye wakitaba ne, E, udi ufuta. Hakabueleye mu nsubu, Yesu wakadianjila kumukonka ne, Simona, udi welangana meshi munyi; banfumu ba ha buloba batu babalambula kudi bana babo balela, anyi kudi bantu ba bende? Hakandamuneye ne, Kudi bantu ba bende, Yesu wakamuambila ne, Nunku bana balela badi badishikamine, Kadi katubalenduishi, uye biebe ku dishiba, wele ndoho mu mai, wangate mushiha wadianjila kulua; hawabuela mukana muau, neusangane nshekela; umuangate, ubaheye bua wanyi ne webe. Ha diba adi bayidi bakalua kudi Yesu, bakamuebesha ne, Mu bukelenge bua mu diulu udi mutambe bakuabo nganyi? Yeye wakabikila muana mukese, wakamuteka munkatshi muabo, wakamba ne, Bulelela, ndi nuambila ne, Binuikala kanui nukudimuna mitshima yenu, binuikala kanui nulua bu bana bakese, kanuena nubuela mu bukelenge bua mu diulu bulelela. Wadihuekesha bu muana eu mukese, yeye udi mutambe bakuabo mu bukelenge bua mu diulu. Witabusha muana mukese nunku mu dina dianyi udi ungitabusha meme; kadi bialenduisha muntu umue wabo wa mu bantu aba bahuekele badi bangitabusha, biakadi bimpe kumusuika dibue dinene dia kuhela nʼadi mu nshingu muandi, kumuina mu bunene bua mai manene. Dikenga dilualua kudi bantu bualu bua malu adi abalenduisha. Bushua, malu adi alenduisha bantu adi alua, kadi mulau neulue kudi mulenduishi. Biakulenduisha tshianza tshiebe, anyi dikasa diebe, watshikosa, watshimasha; bua wewe kubuela mu muoyo ne tshilema ne kuzobela kudi kutamba bua wewe kuimashibua mu kahia ka tshiendelele ne bianza bibidi ne makasa abidi. Biakulenduisha disu diebe, waditula, wadimasha; bua wewe kubuela mu muoyo ne disu dimue kudi kutamba bua wewe kuimashibua mu Ngena wa kahia ne mesu abidi. Nudimuke, kanulenguludi muana umue wa mu bana aba bakese; ndi nuambila ne, Mu diulu matuku onso banjelo babo batu batangila Tatu wanyi udi mu diulu ku mesu. Nudi nuelangana meshi a tshinyi? Bikala muntu ne lukama lua mikoko, hajimina mukuabo, yeye kena ushîa minga makumi tshitema ne tshitema, kena uya mu mikuna bua kukebeye udi muhambuke, anyi? Biaumoneye, bulelela, ndi nuambila ne, Disanka diandi kudi wakadi muhambuke neditambe disanka diandi kudi makumi tshitema ne tshitema yakadi kayi mihambuke. Nunku Tatu wenu wa mu diulu kena musue muana umue wa mu bana aba bakese afue. Bakuenzela muanʼenu bibi, uye biebe, umuleshe bubi buandi, wewe ne yeye nkayenu; bitabusheye dî diebe, wewe wakamuvuisha muanʼenu kabidi. Biahidieye kunvua dî diebe, uye ne muntu umue anyi bantu babidi, nunku mei onso neajalame kudi bamonyi babidi anyi basatu. Biahidieye kunvua mei abo, ambila bena ekelesia bualu ebu; biahidieye kunyua mei a bena ekelesia, ikale biandi ku mesu kuebe bu muntu wa bende anyi musangishi wa mulambu. Bulelela, ndi nuambila ne, Mu diulu nebasuike tshinuasuika ha buloba, mu diulu nebasuike tshinuasulula ha buloba, Bualu bukuabo, ndi nuambila ne, Bikala babidi benu basangisha dî diabo bua tshintu tshionso tshialombabo Tatu wanyi wa mu diulu neabenzele mualombabo. Ndi bianyi munkatshi mua bantu babidi anyi basatu badi badisangisha mu dina dianyi. Hashishe, Petelo wakalua, wakakonka Yesu ne, Mukelenge, muanʼetu neangenzele bibi misangu bungi munyi inamulekela bubi buandi? Misangu muanda mutekete, anyi? Yesu wakamuambila ne, Tshiena nkuambila ne, Tô ne ku misangu muanda mutekete, ndi nkuambila ne, Tô ne ku makumi muanda mutekete misangu muanda mutekete. Ke mudi bukelenge bua mu diulu bufuana mukelenge mukuabo wakasua kubadika bintu biandi biakadi mu bianza bia bahika bandi. Hakabangeye kubala bintu, bakalua ne mukuabo wakadi ne dibanza dia lubombo lua ntalanta. Kadi bualu bua yeye kakadi ne bia kumana nʼabi dibanza, mukelenge wandi wakamba ne, Bamuhane ne mukashi wandi ne bana bandi ne bintu biandi bionso, bua kumana dibanza. Bua bualu ebu muhika wakadishinda mukudimane, wakamukukuila ne, Mukelenge, kungenzedi bualu lukasa, nenkufute dibanza dionso. Mukelenge wandi wakadi ne luse, wakamulekela, wakamulekelela dibanza. Kadi muhika au wakaluhuka mu nsubu, wakasangana muhika nʼandi wakadi nʼandi dibanza dia lukama lua ndenalio; wakamukuata, wakamufiekela mu nshingu ne, Futa dibanza dianyi katataka. Muhika nʼandi wakadishinda mukudimane, wakamusengelela ne, Kungenzedi bualu lukasa, nenkufute. Kadi yeye wakahidia, wakaya, wakamuela mu nsubu wa lukanu ne, Ashalemu tô ne hafuteye dibanza. Hakamona banga bahika nʼandi bualu buakenzeye, mitshima yabo yakanyingalala bikole, bakalua, bakamanyisha mukelenge wabo malu onso akenjibua. Hashishe, mukelenge wandi wakamubikila ne, Wewe udi muhika mubi, nakukulekela dibanza adi dionso, bualu bua wewe wakuntendekena; munyi wewe kabidi kufu muhika nʼebe luse bu munakukufua wewe luse? Mukelenge wandi wakadi ne tshishi; wakamufila mu bianza bia bakengeshi ne, Ashalemu tô ne hafuteye dibanza dionso. Tatu wanyi wa mu diulu neanuenzele muomumue kabidi, binuikala kanui nulekelela mukuenu yonso mibi yandi mu mitshima yenu. Hakashikisha Yesu kuamba mei â, wakumuka mu Galela, wakalua mu luseke lua Yudaya ludi dishia dia Yadene; bisumbu binene bia bantu biakamulonda, yeye wakabakolesha. Bafalese bakalua kudiye, bakamuteta munda ne, Biumusha muntu mukashi wandi bua malu onso, neashihe mukenshi, anyi? Yeye wakandamuna ne, Nuenu kanuakubala ne, Ku tshibangidilu mufuki wakabafuka mulume ne mukashi, mufuki wakamba biandi ne, Bua bualu ebu mulume neashîe tatu wandi ne baba wandi, nealamate kudi mukashi wandi; bubidi buabo nebalue mubidi umue? Nunku kabena bantu babidi kabidi, badi mubidi umue. Bua bualu ebu muntu kahanduludi tshidi tshibumbakanya kudi Nzambi. Bakamukonka kabidi ne, Bualu kai Mose wakamba ne, Bamuhe mukanda wa kushiha dibaka, bamumushe? Yeye wakabambila ne, Bualu bua bukole bua mitshima yenu Mose wakitabusha bua nuenu numushe bakashi benu; kadi ku tshibangidilu kakuakadi nunku. Ndi nuambila kabidi ne, Wumusha mukashi wandi kabui bua masandi, habakeye mukashi mukuabo, yeye udi wenda masandi; biabaka mulume mukashi mumusha nunku, yeye udi wenda masandi. Bayidi bandi bakamuambila ne, Bikala bualu bua mulume ne mukashi wandi nunku, kubaka mukashi kakuena kuimpe. Kadi yeye wakabambila ne, Bantu bonso kabena bamanye mua kuitabusha dî adi, anu bantu badi bahebue bukole bua kuditabusha. Batungu bakuabo badiku, bamamuʼabo bakabalela nunku; batungula bakuabo badiku, bantu bakabatungula; batungula bakuabo badiku, bakaditungula bualu bua bukelenge bua mu diulu. Udi mumanye mua kuitabusha dî adi aditabushe. Bakalua ne bana bakese kudiye bua yeye kubalenga tshianza tshiandi ne bua kubalombeleye Nzambi; kadi bayidi bakabasamina. Yesu wakamba ne, Nuitabushe bua bana bakese kulua kundi, kanubakandi; bualu bua bukelenge bua mu diulu mbua badi bu bana. Yeye wakabalenga bianza; wakumukaku. Muntu wakalua kudiye, wakamba ne, Muyishi, nengenze bualu buimpe kai, mpete muoyo wa tshiendelele? Yesu wakamuambila ne, Udi unkonkela bua bualu buimpe tshinyi? Umue udiku udi muimpe; kadi biwasua kubuela mu muoyo, enza mikenshi ya Nzambi. Yeye wakakonka Yesu ne, Mikenshi kai? Yesu wakamba ne, Kushihi muntu, kuendi masandi, kuibi, kudingidi muntu, unemeke tatuʼebe ne mamuʼebe, Sua mukuenu bu mûdi mudisue. Nsongalume wakamuambila ne, Nakenzenza malu â onso; bualu kai budi hunshala? Yesu wakamuambila ne, Biwasua kuikala muimpe, ya biebe, uhane biudi nʼabi, ubihe bantu bahele, newikale ne bintu mu tshibutshilu tshia mu diulu, ulue kundonda. Kadi hakunvua nsongalume dî edi, wakaya biandi mubungame, bualu bua yeye wakadi ne bintu bia bungi. Yesu wakambila bayidi bandi ne, Bulelela, ndi nuambila ne, Ha kubuela kua muntu mubanshi mu bukelenge bua mu diulu mbualu bukole. Ndi nuambila kabidi ne, Kubuela kua kamelu mu disu dia kashingi kudi kutamba kubuela kua muntu mubanshi mu bukelenge bua Nzambi butekete. Hakunvua bayidi dî edi, bakatamba kukema, bakamukonka ne, Ahu udi mumanye mua kusungidibua nganyi? Yesu wakabajosha talalâ, wakabambila ne, Bantu kabena bamanye mua kuenza bualu ebu, kadi Nzambi udi mumanye mua kuenza malu onso. Petelo wakamuandamuna ne, Ahu tuetu, tuakushia malu etu onso, tuakukulonda, tuetu netuhete tshinyi? Yesu wakabambila ne, Bulelela, ndi nuambila ne, Mu dituku dialedibua bintu bionso tshiakabidi, hashikama Muana wa muntu mu nkuasa wa butumbi buandi, nuenu kabidi bakundonda, nenushikame mu nkuasa dikumi ne ibidi, nulumbuluisha bisamba dikumi ne bibidi bia Isalele. Muntu yonso wakushia nsubu yandi, anyi bana babo balume anyi bana babo bakashi, anyi tatuʼandi, anyi baba wandi, anyi bana bandi, anyi madimi andi, bualu bua dina dianyi yeye neahete masanka misangu lukama matambe a diambedi, neahiane muoyo wa tshiendelele kabidi. Kadi ba bungi badi ku mpala katataka nebikale ku nyima, badi ku nyima katataka nebikale ku mpala. Bukelenge bua mu diulu budi bu muena budimi, wakaya dinda bua kukeba bena mudimu bua kumudimina budimi buandi bua mamuma a nvinyo. Yeye wakasangisha nʼabo dî bua kubafuta muntu ndenalio umue muntu ndenalio umue ku dituku ku dituku, wakabatuma mu budimi buandi. Yeye wakaya kabidi, hakafika diba ha tshitema, wakamona bakuabo bimane tshianana mu tshisalu; yeye wakabambila ne, Yai bienu kabidi mu budimi, nenuhe tshidi tshiakane. Bakaya. Hakafika diba ha dikumi ne ibidi, wakaya kabidi; ne bakafika diba ha isatu, Wakenza muomumue. Hakafika diba ha itanu, wakaya biandi, wakasangana bantu bakuabo bimane; wakabakonka ne, Nuenu nudi nuimanyina aha diba dionso tshianana tshinyi? Bakamuambila ne, Bualu bua muntu kena mutubueshe ku mudimu. Yeye wakabambila ne, Nuenu kabidi nuye mu budimi. Hakamba diba kubuela, muena budimi wakambila mulami wa bintu biandi ne, Bikila bena mudimu, ubahe difutu diabo, uhangile kudi ba kunshikidilu tô ne kudi ba diambedi. Hakalua bena diba ha itanu, bakangata ndenalio umue. Hakalua ba diambedi, bakelangana meshi ne, Tuetu netuangate bintu bikuabo ha mutu; kadi bobo kabidi bakangata ndenalio umue. Hakangatabo difutu diabo, bakajiana muena budimi ne, Aba ba kunshikidilu bakakuata mudimu anu tshituha tshimue tshia diba, wewe wakubenda muomumue nʼetu, tuetu bakusala mudimu dituku dijima mu munya mukole. Yeye wakandamuna umue wabo ne, Mulunda wanyi, tshiena nkuenzela bibi; wewe kuakusangisha nʼanyi dî bua ndenalio umue, anyi? Angata tshidi tshiebe, uye biebe; mutshima wanyi udi musue kuha eu wa kunshikidilu bu mundi nkuha wewe. Tshiena mumanye mua kuenza ne bintu bianyi bu mundi musue, anyi? Disu diebe didi dibi bualu bua meme ndi muimpe, anyi? Nunku ba kunshikidilu nebikale ba diambedi, ba diambedi nebikale ba kunshikidilu. Yesu wakadi ubanda ku Yelushalema, mu nshila yeye wakangata bayidi bandi nkayabo, wakabambila ne, Unvuai, tudi tubanda ku Yelushalema; nebafile Muana wa muntu mu bianza bia bakuidi banene ba Nzambi ne bia bafundi; bobo nebamuhishe ne lufu, nebamufile mu bianza bia bantu ba mu bisamba bia bende, bamuseke, bamukume, bamushihe ku mutshi mutshiamakane; kadi hahita matuku asatu yeye neabishibue. Hashishe, mamu wa bana ba Zebedayo wakalua ne bana bandi kudiye, wakamukukuila, wakamulomba bualu. Yesu wakamukonka ne, Udi musue tshinyi? Yeye wakamba ne, Wele mukenshi wa bana banyi aba babidi kushikamabo, mukuabo ku tshianza tshiebe tshia balume, mukuabo ku tshianza tshiebe tshia bakashi, mu bukelenge buebe. Yesu wakandamuna ne, Kanuena bamanye tshinudi nulomba. Nudi bamanye mua kunua luhanza lunkadi ha kunua, anyi? Bakamuitaba ne, Tudi bamanye. Yeye wakabambila ne, Nenunue luhanza luanyi bulelela; kadi kushikama ku tshianza tshianyi tshia balume ne ku tshianza tshianyi tshia bakashi kambualu buanyi bua kuha muntu; kushikama nunku kudi bualu bua bantu bakabulongoluelabo kudi Tatu wanyi. Hakunvua bayidi dikumi bualu ebu, bakadi ne bena kuabo babidi tshishi. Kadi Yesu wakababikila, wakabambila ne, Nudi bamanye ne, Banfumu ba bisamba bia bende badi babalongolola ne diambu, bantu babo badi banene badi babakokesha. Bualu buenu kabuena nunku; wasua kulua munene munkatshi muenu neikale muena mudimu wenu; wasua kuikala ha mutu henu neikale muhika wenu; nunku kabidi Muana wa muntu kakuluila bua bantu bamukuatshile mudimu, wakuluila bua kubakuatshila mudimu ne bua kufila muoyo wandi bua kuhikula nʼau bantu ba bungi. Hakadibo baluhuka mu Yeleko, bantu ba bungi bakamulonda. Balume babidi bafofo bakadi bashikame kukala kua nshila; hakunvuabo ne, Udi uhita nYesu, bakela mbila ne, Mukelenge, muana wa Davidi, utufue luse. Bantu bakabakanda ne, Huai; kadi bobo bakatamba kuela mbila ne, Mukelenge, muana wa Davidi, utufue luse. Yesu wakimana, wakababikila, wakabakonka ne, Nudi basue meme nuenzele tshinyi? Bakamuambila ne, Mukelenge, mesu etu atabale. Luse luakakuata Yesu, wakabalenga ha mesu abo; bakatabala lukasa, bakamulonda. Hakafikabo ha buihi ne Yelushalema ku Bete-fage, ku Mukuna wa Oleve, Yesu wakatuma bayidi bandi babidi, wakabambila ne, Yai mu musoko udi buludiludi bunudi batangile, nenumone nyama wa mpunda musuika ne muanʼandi. Nuisulule, nulue nʼai kunoko. Bianukonka muntu dî, numuambile ne, Mukelenge udi nʼai bualu; yeye neaitume lubilu. Bualu ebu buakulua bua kushikisha dî diakambabo kudi muprofete ne, Nuambile muana mukashi wa Siona ne, Monai, Mukelenge webe ulualua kûdi, Udi ne kalolo, udi wenda ha nyima ha nyama wa mpunda. Bayidi bakaya, bakenza bu muakabambila Yesu, bakalua ne nyama wa mpunda ne muana, bakateka bivualu biabo ha nyima hai; Yesu wakashikama ha mutu habi. Bantu ba bungi ba mu tshisumbu bakâdisha bivualu biabo mu nshila; bakuabo bakakosa bisala bia mitshi, bakabiadisha mu nshila. Bisumbu bia bantu bakadi baya ku mpala kuandi ne bakadi bamulonda ku nyima bakela mbila ne, Hosana ikale kudi muana wa Davidi; udi ulua mu dina dia Mukelenge atumbishibue; Hosana mu diulu. Hakabueleye mu Yelushalema, bantu bonso ba mu musoko bakakema, bakakonka ne, Eu nganyi? Bantu ba mu bisumbu bakamba ne, Eu mmuprofete Yesu, wa ku Nazaleta wa Galela. Yesu wakabuela mu ntempelo wa Nzambi, wakihata bonso bakadi bahana bintu ne bakadi basumba bintu mu ntempelo, wakatonkola mesa a bashintakashi ba mpalata ne nkuasa ya basumbishi ba nyunyu ya nkutshi; yeye wakabambila ne, Bakafunda ma Mukanda wa Nzambi ne, Nebabikile nsubu wanyi ne, Nsubu wa kutendelelamu Nzambi, kadi nuenu nuakumuvuisha bu muaba wa banyengi. Bafofo ne balema bakalua kudiye mu ntempelo, yeye wakabakolesha. Kadi hakamona bakuidi banene ba Nzambi ne bafundi malu a kukema akenzeye, hakamonabo kabidi bana bakadi bela mbila mu ntempelo ne, Hosana ikale kudi muana wa Davidi, bakadi ne tshishi, bakamukonka ne, Udi unvua mei adi bana aba bamba, anyi? Yesu wakabambila ne, E, udi ngunvua, kadi nuenu kanuakubala dî ne, Wewe wakajadika butumbi buebe mukana mua bana bakese ne mua badi bâmua mabele? Yeye wakabashia, wakaluhuka mu musoko, wakaya ku Betania, wakalalaku. Hakadiye uhingana mu musoko dinda, wakadi ne nsala. Hakamoneye mutshi wa nfigi kukala kua nshila, wakaluaku, wakasangana mutshi mutuhu, anu mabeshi; yeye wakambila mutshi ne, Wewe kukuami mamuma tshiendelele. Mutshi wa nfigi wakafuba lukasa. Hakamona bayidi bandi bualu ebu, bakakema ne, Mutshi wa nfigi wakafuba lubilu nunku munyi? Yesu wakandamuna ne, Bulelela, ndi nuambila ne, Binuikala ne ditabusha, kanui ne mpata, nenuenze bu muakuenzelabo mutshi wa nfigi; ne bualu bukuabo kabidi, binuambila mukuna eu ne, Ubishibue, wedibue mu mai manene, bualu nebulue bu munuakuamba. Binuitabusha, nenuangate bintu bionso binualomba mu kutendelela kuenu. Hakabuela Yesu mu ntempelo, bakuidi banene ba Nzambi ne bakulu ba bantu bakatua kudiye, hakadiye uyisha bantu, bakamukonka ne, Wewe udi wenza malu â ne bukokeshi kai? Wakukuha bukokeshi ebu nganyi? Yesu wakabandamuna ne, Meme kabidi nenukonke bualu bumue; binuangambila bualu ebu, nenuambile bualu bua bukokeshi bundi ngenza nʼabu malu â. Dibatiza dia Yone diakafuma kudi kunyi? Mu diulu, anyi kudi bantu? Bobo bakelangana meshi munda munda ne, Bituamba ne, Mu diulu, yeye neatuebeshe ne, Bualu kai kanuakamuitabusha? Kadi bituamba ne, Kudi bantu, tudi tutshina bantu; bualu bua bantu bonso badi bitabusha Yone ne, Udi muprofete. Bakakudimuna Yesu di ne, Katuena bamanye. Yeye wakabambila ne, Meme kabidi tshiena nuambila bualu bua bukokeshi bundi ngenza nʼabu malu â. Nudi nuamba tshinyi? Muntu wakadi ne bana balume balela babidi; wakalua kudi wa kumudilu, wakamba ne, Muanʼanyi, ya biebe lelu wenze mudimu mu budimi bua mamuma a nvinyo. Yeye wakandamuna ne, Tshiena musue; kadi ku nyima yeye wakakudimuna mutshima wandi, wakaya. Tatu wabo wakalua kudi wa ku nyima, wakamuambila muomumue. Yeye wakandamuna ne, Nenye, tatu, kadi yeye kakaya. Bubidi buabo, muana kai wakenza bu muakamba tatu wandi? Bakandamuna ne, Wa kumudilu. Yesu wakabambila ne, Bulelela, ndi nuambila ne, Basangishi ba mulambu ne bakashi ba masandi badi badianjila kubuela mu bukelenge bua Nzambi ku mpala kuenu. Yone wakalua kunudi mu nshila wa buakane, kanuakamuitabusha; kadi basangishi ba mulambu ne bakashi ba masandi bakamuitabusha. Hanuakatangila bualu abu, kanuakakudimuna mitshima yenu ku nyima bualu bua kumuitabusha. Unvuai lusumuinu lukuabo: Muena budimi wakadiku, wakatentula mionshi ya mamuma a nvinyo mu budimi buandi, wakelela budimi luhangu lua mitshi idi isasa, wakimbamu dina dia kukamina mamuma, wakasa nsubu wa batentekedi mule, wakabushia mu bianza bia ba bidime, wakaya biandi ku luseke lukuabo kule. Hakalua tshidimu tshia mamuma ha buihi, yeye wakatuma bantu bandi kudi ba bidime bua kuangata mamuma andi. Kadi ba bidime bakakuata bantu bandi, bakakuma mukuabo, bakashiha mukuabo, munga bakakuma ne mabue. Wakatuma kabidi banga bantu bandi batambe ba diambedi; ba bidime bakabenzela muomumue. Hashishe, wakabatumina muanʼandi, wakamba ne, Nebanemeke muanʼanyi. Kadi ba bidime, hakamonabo muana, bakambilangana ne, Eu udi muhianyi; tuyai kumushiha, netuangate buhianyi buandi. Bakamukuata, bakamumusha mu budimi, bakamushiha. Halua umena budimi, nenzele ba bidime aba tshinyi? Bobo bakamba ne, Yeye neashihe bantu aba babi, neashie budimi buandi mu bianza bia binga bidime, nebifile mamuma mu bianza biandi halua bidimu biau. Yesu wakabakonka ne, Kanuena banze kubala mu Mukanda wa Nzambi anyi, ne, Dibue diakahidiabo kudi bibaki ba nsubu Bakaditeka ku mutu kua ditumba; Eu mudimu wa Mukelenge, Udi bu bualu bua kukema ku mesu kuetu? Ndi nuambila ne, Nebanunyenge bukelenge bua Nzambi, nebabuhe tshisamba tshidi tshikuama mamuma abu. Wahona ha dibue edi neatshibuke; biahonenadi muntu, nedimutangadishe bu luhuishi. Hakunvua bakuidi banene ba Nzambi ne bafalese nsumuinu yandi, bakamanya ne, Yeye udi utuamba tuetu. Hakasuabo kumukuata, bakatshina bantu, bualu bua bobo bakamuitabusha ne, Udi muprofete. Yesu wakabandamuna, wakabelela nsumuinu kabidi, wakamba ne, Bukelenge bua mu diulu budi bu mukelenge wakalambishila muanʼandi bidia bia dibanji; wakatuma bantu bandi bua kubikila bakalayileye diambedi bua disanka dia dibanji; bakahidia kulua. Yeye wakatuma bantu bandi bakuabo kabidi ne, Nuambile bantu banakalayila diambedi ne, Nakulongolola bidia, ngombe yanyi idi mishiha ne bana ba ngombe ba manyi, bintu, bionso biakuhua, luai ku disanka dia dibanji. Kadi bobo bakalengulula di diandi, bakaya ku malu abo, mukuabo ku budimi buandi, mukuabo ku kuenda mushinga; banga bakakuata bantu ba mukelenge, bakabenzela bibi, bakabashiha. Mukelenge wakadi ne tshishi, wakatuma masalayi andi, wakashiha batahianganyi aba, wakosha musoko wabo. Hashishe, yeye wakambila bantu bandi ne, Bintu bia dibanji bidi bilongolola, kadi bantu banakulayila kabena bimpe. Yai bienu mu masanga a misesu, nubikile banuamona ku disanka dia dibanji. Bantu bandi bakaya mu misesu, bakasangisha bantu bonso bakamonabo, babi ne bimpe; mu nsubu wa disanka dia dibanji muakadi benyi tente. Kadi hakabuela mukelenge bua kumona benyi, wakamonamu muntu wakadi kai ne tshilulu tshia dibanji. Mukelenge wakamukonka ne, Ka, mulunda, wakubuela munomo, kui ne tshilulu tshia dibanji? Muntu wakahua. Mukelenge wakambila bantu bandi ne, Numusuike ku bianza ne ku makasa, numuimashe ha bula mu midima. Muadi newikalemu ne kusumakana menu. Bualu bua bantu ba bungi badi babikidibua, kadi banya-banya badi basungudibua. Hashishe, Bafalese bakaya, bakasangisha mei abo ne, Netumukuate ku mei andi munyi? Bakatuma bayidi babo kudiye ne Bena Helode, bakamuambila ne, Muyishi, tudi bamanye ne, Wewe udi muena bushua, udi uyisha bantu nshila wa Nzambi bulelela, wewe kuena utshina bantu, bualu bua kuena ne bualu ne muntu; utuambile mûdi wamba munda muebe: Mbimpe kuha Kaisa mulambu, anyi? Kadi Yesu wakamanya budimu buabo, wakabakonka ne, Nuenu bena lubombo, nudi nuntetshila munda tshinyi? Nundeshe tshidibo balambula nʼatshi. Bakalua ne ndenalio. Yeye wakabakonka ne, Tshindidimbi etshi ne mei â adi mafundahu mbia nganyi? Bakamuambila ne, Mbia Kaisa. Yeye wakabambila ne, Nuhe Kaisa bintu bia Kaisa, nuhe Nzambi bintu bia Nzambi. Hakunvuabo dî edi, bakakema, bakamushîa, bakaya. Dituku adi Basadoke bakalua kudi Yesu, badi bamba ne, Dibika dia ku lufu kadienaku; bakamukonka ne, Muyishi, Mose wakamba ne, Biafua mulume, kai ne bana, muanʼabo abake mukashi wandi, alelele muanʼabo wakufua bana. Munkatshi muetu muakadi balume muanda mutekete ba difu dimue; wa kumudilu wakabaka mukashi, wakafua biandi, kakadi ne bana, wakashîa mukashi wandi mu bianza bia muanʼabo; muibidi wakadi nʼandi nunku, ne muisatu tô ne wa muanda mutekete. Hakafua buonso buabo, mukashi wakafua. Balume bakadi muanda mutekete; yeye neikale mukashi wa mulume kai, halua dibika dia ku lufu? Bualu bua bakadi nʼandi buonso buabo. Kadi Yesu wakabandamuna ne, Nudi nuhambuka, kanuena bamanye Mukanda wa Nzambi ne bukole buandi. Halua dibika dia ku lufu, kabena babaka, kabena babakibua, badi bu banjelo ba mu diulu. Bualu bua dibika dia bafue ku lufu nuenu kanuakabala dî diakanuambila Nzambi, anyi, ne, Ndi bianyi Nzambi wa Abalahama, ne Nzambi wa Isaka, ne Nzambi wa Yakoba? Nzambi kena wa bafue, udi wa badi ne muoyo. Hakunvua bisumbu bia bantu dî edi, diyisha diandi diakabakemesha. Hakunvua Bafalese ne, Yesu wakahuisha Basadoke, bakadisangisha hamue. Munkatshi muabo muakadi mumanyi wa mikenshi, yeye wakakonka Yesu bua kumuteta munda ne, Muyishi, mukenshi kai udi mutambe mikuabo yonso? Yesu wakamuambila ne, Sua Mukelenge Nzambi webe ne mutshima webe wonso ne muoyo webe wonso ne lungenyi luebe luonso. Ke mukenshi munene, udi wa kumudilu. Muibidi udi mufuanangane nʼau ne, Sua mukuenu bu mûdi mudisue. Mikenshi yonso ya Mose ne mei a baprofete bidi bikudika ku mikenshi ei ibidi. Hakadi Bafalese badisangisha nunku, Yesu wakabakonka ne, Nudi nuamba munda muenu ne, Kilisto udi nganyi? Yeye udi muana wa nganyi? Bakamuambila ne, Yeye udi muana wa Davidi. Yesu wakabakonka kabidi ne, Davidi udi umubikila mu Nyuma Muimpe ne, Mukelenge, munyi? Wakamba ne, Mukelenge wakambila Mukelenge wanyi ne, Shikama ku tshianza tshianyi tshia balume Tô ne hanateka badi nʼebe lukuna munshi mua makasa ebe. Biamubikila Davidi ne, Mukelenge, yeye udi muanʼandi munyi? Kakuakadi muntu wakamanya mua kumukudimuna dî, dituku adi tô tshiendelele muntu kakadi ne bukitu bua kumukonka bualu. Hashishe, Yesu wakambila bisumbu bia bantu ne bayidi bandi ne, Bafundi ne Bafalese badi bashikama mu nkuasa wa Mose; nuenze, nutumikile malu onso adibo banuambila; kadi kanuenji malu adibo benza; bualu bua bobo batu bamba, kadi kabatu benza. Bulelela, badi basuika majitu manene, bâteka ha maha a bantu, kabena babakuatshisha ne munu umue. Badi benza malu abo onso anu bualu bua bantu babamone; badi badiundisha nfulakatelio yabo badi badiundisha mibanga ya bikowelu biabo, hayabo ku bidia bia disanka, badi basue muaba munene, badi basue nkuasa minene mu nsunagoga, badi basue bantu babasekelele mu bisalu, badi basue bantu bababikile ne, Labi. Kadi nuenu kanubikidibu ne, Labi, bualu bua nuenu nudi ne muyishi umue, buonso buenu nudi bana ba muntu umue. Kanubikidi muntu wa ha buloba ne, Tatu wetu, bualu bua nuenu nudi ne Tatu umue, yeye udi mu diulu. Kanubikidibu ne, Bakelenge, bualu bua mukelenge wenu udi umue, Kilisto mene. Udi mutambe bunene munkatshi muenu neikale muena mudimu wenu. Wadibandisha nebamuhuekeshe, wadihuekesha nebamubandishe. Nuenu bafundi ne Bafalese, nudi bena lubombo, mulau ulualua kunudi, bualu bua nuenu nudi nuinshidila bantu tshibi tshia bukelenge bua mu diulu; nuenu kanuena nubuelamu, kanuena nuitabusha bua bakuabo badi basue kubuela babuele! Nuenu bafundi ne Bafalese, nudi bena lubombo, mulau ulualua kunudi, bualu bua nuenu nudi nunyunguluka mai manene ne buloba bua kuitabushisha nasha muntu umue bualu buenu; kadi bitabusheye, nudi numuvuisha muana wa mu Ngena munutambe nuenu bubi misangu ibidi! Nuenu balombodi bafofo, mulau ulualua kunudi! Nudi nuamba ne, Muntu udi uditshiha mutshihu ne, Ntempelo, kena musuika, kadi muntu udi uditshiha mutshihu ne, Ngolo wa mu ntempelo, udi musuikibue ku mutshihu wandi. Nuenu nudi bafofo bahote, tshintu kai tshidi tshitambe tshikuabo, ngolo anyi ntempelo ngudi uvuisha ngolo wa tshijila? Biaditshiha muntu mutshihu ne, Tshishihelu, kambualu; kadi biaditshiha muntu mutshihu ne, Tshidi tshifila ha tshishihelu, udi musuikibue ku mutshihu wandi, Nuenu bafofo, tshintu kai tshidi tshitambe tshikuabo, tshidi tshifila anyi tshishihelu tshidi tshivuisha tshidi tshifila tshia tshijila? Waditshiha mutshihu kudi tshishihelu udi uditshiha mutshihu kudi tshishihelu ne kudi bintu bionso bidihu. Waditshiha mutshihu kudi ntempelo udi uditshiha mutshihu kudi ntempelo ne kudi utu wikalamu. Waditshiha mutshihu kudi diulu udi uditshiha mutshihu kudi nkuasa wa Nzambi ne kudi utu washikamahu. Nuenu bafundi ne Bafalese, nudi bena lubombo! Mulau ulualua kunudi; bualu bua nuenu nutu nuafila tshia dikumi tshia luenyi, ne tshia tshidibiʼa luenyi, ne tshia tshikote, kadi nuakulekela kuenza malu makole a mikenshi ya Nzambi, bulelela ne luse ne ditabusha; biakadi bimpe bia nuenu kuenza malu â a ku nyima, kambimpe nulengulule mua kuenza malu au a ku mpala kabidi. Nuenu balombodi bafofo, nudi numusha kishi kakese mu maluvu, nudi numina kamelu! Nuenu bafundi ne Bafalese, nudi bena lubombo! Mulau ulualua kunudi; bualu bua nuenu nutu nûvua ha nyima ha luhanza ne dilonga, kadi munda muabi mudi bunyengi ne mudi. Wewe Mufalese mufofo, diambedi uvua munda mua luhanza ne dilonga, nunku ha nyima hadi kabidi nehikale hatoke. Nuenu bafundi ne Bafalese, nudi bena lubombo, mulau ulualua kunudi! Nudi bu nkita mitokesha ha nyima, ha nyima hadi himpe ku mesu, kadi munda muai mudi mule tente ne mifuba ya bafue ne bukoya bua mishindu yonso. Nunku nuenu nudi bakane ku mesu kua bantu, kadi munda muenu mudi mûle tente ne lubombo ne tshishiku. Nuenu bafundi ne Bafalese, nudi bena lubombo! Mulau ulualua kunudi; bualu bua nuenu nutu mubaka nkita ya baprofete, nutu nulengesha nkita ya bantu bakane, nutu nuamba ne, Bu tuetu bikale mu matuku a bankambua betu, katuakadi kubuelakana nʼabo bua kushiha baprofete. Nudi nudituisha ne, Tudi bana ba bashihi ba baprofete. Ushai bienu tshihimu tshia bankambua benu ne malu mabi. Nuenu nyoka, ne bana ba nyoka, nudi bamanye mua kuhanduka dihila dia mu Ngena munyi? Meme ndi nutumina baprofete ne bena meshi ne bafundi: nuenu nenushihe bakuabo tshianana, bakuabo ha mitshi mitshiamakane; nenukume bakuabo mu nsunagoga yenu, nenubalonde bua kubakengesha ku musoko ne ku musoko; nunku mashi onso a bantu bakane akumata hanshi nealue ha bianza bienu, mashi a Ebele muntu muakane tô ne mashi a Zekâya, muana wa Balakia, unuakashihela hankatshi ha ntempelo ne tshishihelu. Bulelela, ndi nuambila ne, Malu â onso nealue kudi bantu ba tshikondo etshi. Wewe Yelushalema, Yelushalema, udi ushiha baprofete, udi ukuma bakukutuminabo mabue! Misangu ya bungi nakasua kusangisha bana bebe bu mudi nsolo usangisha bana bandi mu mahuahua andi, kadi nuenu nuakuhidia. Nsubu wenu udi mushale hatuhu. Ndi nuambila ne, Kanuena nuntangila tô ne hanuamba ne, Udi ulua mu dina dia Mukelenge udi ne disanka. Yesu wakumuka mu ntempelo, wakadi uya mu nshila, bayidi bandi bakalua kudiye bualu bua kumulesha nsubu ya ntempelo. Kadi yeye wakabambila ne, Nudi nutangila bintu ebi bionso, anyi? Bulelela, ndi nuambila ne, Kabena bashîa dibue dimue ha mutu ha dikuabo, nebâsasule buonso buau. Hakadiye ushikama ku mukuna wa Oleve, bayidi bakalua kudiye nkayabo, bakamukonka ne, Utuambile dituku dialua malu â; utuambile tshimanyinu tshia hawalua tshiakabidi; ne tshia kunshikidilu kua tshikondo etshi. Yesu wakabandamuna ne, Nuende badimuke, muntu kanuhambuishi. Bualu bua ba bungi nebalue mu dina dianyi, bamba ne, Meme ndi Kilisto; nebahambuishe bantu ba bungi. Nenuamue bualu bua nvita ne ngumu ya nvita; dimukai, kanuhampakanyi: malu au nealue bulelela, kadi nshikidilu kena muanze kulua. Tshisamba tshikuabo netshiluangane ne tshinga, bukelenge bukuabo nebuluangane ne bunga biole nebikaleku ne buloba nebukanke ku nseke ne ku nseke. Kadi malu â adi tshibangidilu tshia kanyinganyinga. Nebanufile mu dikenga, nebanushihe; bisamba bionso nebikale nʼenu lukuna bua dina dianyi. Hashishe, ba bungi nebalenduke, nebafilangane ku bilumbu, nebikalangane ne lukuna. Baprofete badi ne mashimi ba bungi nebabike, nebahambuishe ba bungi, Dinanga dia ba bungi nedikehe, bualu bua tshishiku tshiakudiunda munda muabo. Kadi wananukila tô ne kunshikidilu neasungidibue. Nebambile bantu bonso ba ha buloba lumu luimpe elu lua bukelenge buanyi, neluikale tshimanyishilu ku bisamba bionso; hashishe, nshikidilu nealue. Nunku hanuamona tshinyanga tshia dibutuka, tshiakambabo kudi muprofete Danyele, tshimane mu muaba wa tshijila (udi ubala bualu ebu amanye biandi), ku tshikondo atshi badi mu Yudaya banyemena ku mikuna; udi ha mutu ha nsubu katulukl bua kumusha bidi mu nsubu; udi mu budimi kahinganyi bua kuangata tshvualu tshiandi. Kadi dikenga dikole nedikale kudi badi ne mafu ne kudi badi bâmusha bana mabele mu matuku au. Nulombe Nzambi ne, Kunyema kuetu kakulu mu tshidimu tshia mashika ne mu dituku dia Lumingu; hualu bua ku tshikondo etshi dikenga dinene nedilue; ku tshibangidilu tshia buloba tô ne katataka kakuakadi dikenga bu adi nunku, kadiena dilua kabidi tshiendelele. Bu matuku au kâi makeheshibue kudi Nzambi, nasha muntu wakadi kuhanduka; kadi Yeye neateheshe matuku au bualu bua badibo basungula kudi Nzambi. Bianuambila muntu ne, Kilisto udi aha, anyi, haha; kanumuitabushi. Bualu bua ba-Kilisto ba mashimi nebalue, ne baprofete ba mashimi, nebaleshe bantu bimanyinu binene ne malu a kukema bualu bua kuhambuisha badi basungula kadi Nzambi mene mene; biamanyabo mua kuenza nunku. Unvuai! nakunuambila diambedi. Bianuambilabo ne, Yeye udi mu tshihela, kanuyi; anyi ne, Yeye udi mu tusubu tua tshisokomenu, kanuitabushi. Bu muele wa nvula udi uhenya ku esete, ne udi umueneka ku wesete; kulua kua Muana wa muntu nekuikale nunku. Bikololo bitu biadisangisha hadi tshintu tshibole. Hashika dikenga dia matuku au, diba nedifikuluke, ngondo kena ukenka, mitoto neituke mûlu, neihone, nebanyukule bukole buakadi buendesha bintu ebi mu diulu; hashishe, tshimanyinu tshia Muana wa muntu netshimueneke mu diulu; bisamba bionso bia ha buloba nebidile, nebimone Muana wa muntu ulua ha matutu a mu diulu ne bukole buandi ne butumbi buandi bunene. Yeye neatume banjelo bandi ne mpungi wa dî dikole, nebasangishe bakusunguleye ba ku mpehele inai, kunfudilu kukuabo kua diulu tô ne kukuabo. Nuyile lusumuinu lua mutshi wa nfigi; hatoloka lutonga luau lutekete, hasampila mabeshi alu, nenumanye ne, Tshidimu tshia mayowa tshidi ha buihi; nunku nuenu kabidi, hanuamona malu â onso, nenumanye ne, Yeye udi ha buihi, udi ku mbelu mene mene. Bulelela, ndi nuambila ne, Bantu ba tshikondo etshi kabena bashika tô ne hashika malu â onso. Diulu ne buloba nebijimine, kadi mei anyi kêna ajimina. Kadi bua dituku adi ne ha diba adi kakuena muntu udi mumanye, banjelo mene mene ba mu diulu kabena bamanye, Muana kena mumanye, anu Tatu udi mumanye. Kulua kua Muana wa muntu nekuikale bu muakadi ha matuku a Noa. Ha matuku au, nvula ya bungi kayi mianze kulua, bantu bakadi badia, bakadi banua, bakadi babaka, bakadi babakibua tô ne hakalua dituku diakabuela Noa mu buatu bunene, kabakamanya bualu tô ne hakalua nvula ya bungi kubabutula; kulua kua Muana wa muntu nekuikale nunku. Dituku adi balume babidi nebikale mu budimi; nebangate mukuabo, nebashie mukuabo; bakashi babidi nebikale bahela, nebangate mukuabo, nebashîe mukuabo. Dimukai, bualu bua kanuena bamanye dituku dialua Mukelenge wenu. Nudi bamanye ne, Bu muena nsubu mumanye diba dialua muibi butuku, wakadi kutabala, nsubu wandi kakadi kutubuka disoso. Nunku nuenu kabidi nudilongolole, bualu bua Muana wa muntu nealue ha diba dinudi kanui belangane meshi. Muhika kai udi ulamata nfumu wandi, udi ne meshi? Nfumu wandi wakamuteka ha mutu ha bantu bandi bualu bua kubaha bia kudia halua dituku diabi. Muhika au neikale ne disanka, hahingana nfumu wandi, hamusanganeye wenza nunku. Bulelela, ndi nuambila ne, Yeye neamuteke ha mutu ha bintu biandi bionso. Kadi biamba muhika au mubi munda munda ne, Nfumu wanyi kena ulua katataka; biabangeye kukuma bahika nʼandi, biadieye bidia, bianueye mitutu hohamue ne badi bakuatshike maluvu, nfumu wa muhika au nealue dituku didiye kai mutekemene ne ha diba didiye kai mumanye, neamukose hankatshi, neamuteke mu luseke lua bena lubombo; muadi newikalemu ne kusumakana menu. Dituku adi bukelenge bua mu diulu nebuikale bu mishikankunde dikumi, yakangata minda yai, yakaya kuakidila mubaki wa mukashi. Mishikankunde itanu yakadi mihote, minga itanu yakadi ne meshi. Hakangata mihote minda yai, kayakaya ne manyi makuabo; yakadi ne meshi yakaya ne manyi mu mpanza, ne minda. Mubaki wa mukashi kakalua lubilu, mishikankunde yonso yakadi ibunga tulu, yakalala. Hakalua mundankulu, bakela mbila ne, Tangilai, mubaki wa mukashi! Luai kumuakidila. Mishikankunde ai yonso yakabika, yakalongolola minda. Mihote yakambila yakadi ne meshi ne, Nutuheku manyi bualu bua minda yetu ikadi ijima. Kadi yakadi ne meshi yakandamuna ne, Tudi tuela meshi ne, Manyi kêna akumbana bualu buetu ne buenu; nudi mua kuya kudi bahanyi, nudisumbile. Hakayai bua kusumba manyi, mubaki wa mukashi wakalua; yakadi ne bintu biai bilongolola yakabuela nʼandi ku disanka dia dibanji; bakinshila tshibi. Hashishe, mishikankunde mikuabo yakalua, yakamba ne, Mukelenge, Mukelenge, utunzuluile. Kadi yeye wakandamuna ne, Bulelela, ndi nuambila ne, Tshiena munumanye. Dimukai, kanuena bamanye dituku ne ha diba. Bukelenge bua mu diulu budi bu muntu wakamba kuya ku luseke lukuabo, wakabikila bantu bandi, wakafila bintu biandi mu bianza biabo. Yeye wakaha mukuabo ntalanta itanu, mukuabo ntalanta ibidi, mukuabo ntalanta umue, muntu bu mu lungenyi luandi muntu bu mu lungenyi luandi; wakaya ku luendu. Wakadi ne ntalanta itanu wakaya lukasa, wakenda nʼai mushinga, wakaheta minga ntalanta itanu. Nunku wakadi ne ntalanta ibidi wakaheta minga ibidi. Kadi wakadi ne ntalanta umue wakaya biandi, wakimba dina mu buloba, wakasokoka ntalanta wa mukelenge wandi. Hakaleha musangu mule, mukelenge wa bantu aba wakalua, wakabala nʼabo bintu. Wakadi muangate ntalanta itanu wakalua, wakatuala ntalanta itanu mikuabo, wakamba ne, Mukelenge, wewe wakampa ntalanta itanu, mona, nakuheta minga itanu. Mukelenge wandi wakamuambila ne, Bimpe, muana wanyi muimpe ne muntumikidi, wewe wakadi untumikila hawakadi ha mutu ha bintu bikese, nenkuteke ha mutu ha bintu bia bungi, buela mu disanka dia mukelenge webe. Wakadi muangate ntalanta ibidi wakalua, wakamba ne, Mukelenge, wewe wakampa ntalanta ibidi, mona, nakuheta minga ibidi. Mukelenge wandi wakamuambila ne, Bimpe, muana wanyi muimpe ne muntumikidi, wewe wakadi untumina hawakadi ha mutu ha bintu bikese, nenkuteke ha mutu ha bintu bia bungi, buela mu disanka dia mukelenge webe. Wakadi muangate ntalanta umue wakalua, wakamba ne, Mukelenge, nakamanya ne, Wewe udi muena tshinyangu, utu wahuola biudi kui mukune, utu wasangisha biudi kui mutangadishe; nakatshina, nakaya, nakasokoka ntalanta webe mu buloba, tshintu tshiebe katshitshi. Mukelenge wandi wakamuandamuna ne, Wewe udi muhika mubi, udi mufuba, wewe udi mumanye ne, Meme ntu ngahuola bindi tshi mukune, ntu ngasangisha bindi tshî mutangadishe; biakadi bimpe bia wewe kufila mpalata wanyi mu bianza bia basombeshanganyi, nunku hanakulua, nakadi kuangata ntalanta wanyi ne tshia kasombela. Numunyenge ntalanta, nuhe udi ne ntalanta dikumi. Udi ne bintu nebamuhe binga bintu, neikale ne bia bungi; udi kai ne tshintu nebamunyenge tshidiye nʼatshi. Imashai muhika mulembakane mu mîdima, muadi newikalemu ne kusumakana menu. Halua Muana wa muntu mu butumbi buandi ne banjelo bonso, neashikame mu nkuasa wa butumbi buandi; bisamba bionso nebisangakane ku mpala kuandi, yeye neabatahulule bu mudi mulami utahulula mikoko ne mbushi; neateke mikoko ku tshianza tshiandi tshia balume ne mbushi ku tshianza tshiandi tshia bakashi. Hashishe, Mukelenge neambile badi ku tshianza tshiandi tshia balume ne, Luai, nudi nusankishibua kudi Tatu wanyi, nuhiane bukelenge buakunulongoluelabo ku tshibangidilu tshia buloba; bualu bua nakadi ne nsala, nuakampa bia kudia; nakadi ne nyota, nuakampa bia kunua; nakadi bianyi muenyi, nuakambuesha mu nsubu; nakadi butaka, nuakanduatshisha; nakadi nsama, nuakalua kunsombesha; nakadi mu nsubu wa lukanu, nuakalua kundi. Hashikisheye kubambila nunku, bantu bakane nebamukonke ne, Mukelenge, dituku kai dituakakutangila ne nsala, tuakudisha? Ne nyota, tuakunuisha? Dituku kai dituakakutangila mulue muenyi, tuakubuesha mu nsubu? Ne butaka, tuakuluatshisha? Dituku kai dituakakutangila usama ne mu nsubu wa lukanu, tualua kûdi? Mukelenge neabambile ne, Bulelela, ndi nuambila ne, Bualu bua nuenu nuakenzela umue wa mu bana betu badi batambe kuhuekela nunku, nuakangenzela meme. Yeye neambile kabidi badi ku tshianza tshia bakashi ne, Umukai kundi, nudi ne mulau, nuye mu kahia ka tshiendelele kadi katemeshela diabolo ne banjelo bandi; nakadi ne nsala, kanuakampa tshia kudia; nakadi ne nyota, kanuakampa tshia kunua; nakadi bianyi muenyi, kanuakambuesha mu nsubu; nakadi butaka, kanuakanduatshisha; nakadi nsama, nakadi mu nsubu wa lukanu, kanuakalua kunsombesha. Bobo kabidi nebamukonke ne, Mukelenge, dituku kai dituakakutangila ne nsala ne nyota ne buenyi ne butaka ne disama ne mu nsubu wa lukanu, tuahanga kukukuatshisha? Yeye neabambile ne, Bulelela, ndi nuambila ne, Bualu bua nuenu kanuakenzela umue wa mu bantu aba badi batambe kuhuekela nunku, kanuakangenzela meme. Bantu aba nebaye mu dikenga dia tshiendelele, kadi bantu bakane nebaye mu muoyo wa tshiendelele. Hakashikisha Yesu kuamba mei â onso, wakambila bayidi bandi ne, Nudi bamanye ne, Hahita matuku abidi, Kuhita kua Yehowa nekulue, nebafile Muana wa muntu bua kumushihabo ku mutshi mutshiamakane. Dituku adi bakuidi banene ba Nzambi ne bakulu ba bantu bakadisangisha mu nsubu wa muakuidi munene, dina diandi Kayafa; bakasangisha dî diabo bua kukuata Yesu mu busokoko, ne bua kumushiha. Kadi bakamba ne, Kabenji nunku mu matuku a disanka dia kuhita kua Yehowa, bua diyoyo kadijuki munkatshi mua bantu. Hakadi Yesu mu Betania, mu nsubu wa Simona muena nsudi, mukashi wakalua kudiye ne mulondo wa alabasta, mu mulondo muakadi mananashi a mushinga mutambe bukole, wakamuelau ha mutu handi, hakadiye mushikame udia bidia. Hakamona bayidi bualu ebu, bakadi ne tshishi, bakamba ne, Bakunyangila mananashi nunku bua tshinyi? Bakadi kunjiana ku bintu bia bungi bia kuha bantu bahele. Hakamanya Yesu dî edi diakambabo, yeye wakabambila ne, Nudi nutatshishila mukashi tshinyi? Yeye wakungenzela bimpe. Nudi ne bahele matuku onso munkatshi muenu, kadi kanuena nʼanyi meme matuku onso. Yeye wakungela mananashi â hamʼbidi hanyi, Wakenza nunku bua kundongolola ha kunjikabo. Bulelela, ndi nuambila ne, Mu miaba yonso ya ha buloba buonso yambabo lumu elu luimpe, nebambe kabidi bualu buakuenza mukashi eu, buikale tshivulukidi tshiandi. Mukuabo wa bayidi dikumi ne babidi, dina diandi Yudasa Isakaliote, wakaya kudi bakuidi banene ba Nzambi, wakamba ne, Nenumpe tshinyi, nmufile mu bianza bienu? Bakidikisha bujitu bua bituha bia mpalata makumi asatu, bakamuhabi. Ku dituku adi yeye wakakebakeba mua kumufila mu bianza biabo. Hakalua dituku dia kumudilu dia disanka dia bidia bidi kabi biela luevene, bayidi bakahia kudi Yesu, bakamukonka ne, Udi musue tulongolole ha wewe kudila Kuhita kua Yehowa kudi kunyi? Yeye wakamba ne, Yai mu tshimenga kudi mulume unuasangila nʼandi, numuambile ne, Muyishi udi wamba ne, Dituku dianyi diakulua, nendile bidia bia Kuhita kua Yehowa mu nsubu muebe ne bayidi banyi. Bayidi bakenza bu muakabambila Yesu; bakalongolola Kuhita kua Yehowa. Hakabuela diba, Yesu wakadi mushikame udia bidia ne bayidi bandi dikumi ne babidi; hakadibo badia, yeye wakamba ne, Bulelela, ndi nuambila ne, Muanʼenu mukuabo neantungile tshitungu! Mitshima yabo yakatamba kunyingalala, bakabanga kumukonka ku muntu ku muntu ne, Mukelenge, mmeme, anyi? Yeye wakandamuna ne, Wakutua nʼanyi bidia mu dilonga dimue neantungile tshitungu. Muana wa muntu udi uya bu muakamufundabo; kadi mulau neulue kudi udi utungila Muana wa muntu tshitungu; biakadi bimpe bu muntu eu kai muledibue. Yudasa, mumutungidi, wakamukonka ne, Labi, mmeme, anyi? Yesu wakamuambila ne, Nguewe wakuamba. Hakadibo badia, Yesu wakamema bidia, wakatendelela Nzambi, wakabitshibula, wakaha bayidi bandi, wakamba ne, Angatai, diai bienu; ebi bidi mubidi wanyi. Wakamena luhanza, wakasakidila Nzambi, wakabaha ne, Nuai buonso buenu; bualu bua elu ludi mashi anyi a dihungila, akamatshila bantu ba bungi bualu bua kubajimishila mibi yabo. Ndi nuambila ne, Tshiena nua maluvu kabidi tô ne halua dituku dinanua nʼenu maluvu mahia-mahia mu bukelenge bua Tatu wanyi. Hakimbabo musambu, bakaluhuka, bakaya ku mukuna wa Oleve. Yesu wakabambila ne, Buonso buenu nenulenduke bua bualu buanyi butuku ebu: bua bakafunda ne, Nenshihe mulami wa mikoko, tshisumbu tshiai netshitangadike. Kadi hanabika, nenye ku mpala kuenu mu Galela. Petelo wakamuandamuna ne, Bialenduka bakuabo bonso, meme tshiena ndenduka tshiendelele, Yesu wakamuambila ne, Bulelela, ndi nkuambila ne, Butuku ebu mene, tshitala katshi tshianze kusama, wewe neumpidie misangu isatu. Petelo wakamuambila ne, Bikala bualu bunkuata bua kufua nʼebe, tshiena nkuhidia. Bayidi bonso bakamba muomumue. Hashishe, Yesu wakalua nʼabo mu muaba wakadibo babikila ne, Getesemane, yeye wakambila bayidi bandi ne, Shikamai aha, meme nenye eku bua kutendelela Nzambi. Wakaya biandi ne Petelo ne bana babidi ba Zebedayo, wakabanga kunyingalala mutshima, mutshima wandi wakatamba kunema. Yeye wakabambila ne, Mutshima wanyi udi utamba kunyingalala, lufu nduntonda; nushale aha, nuikale nʼanyi tshitabala. Wakaya biandi ku mpala tshituha, wakatua mpala hanshi, wakatendelela Nzambi, wakamba ne, Tatu wanyi, biwamanya mua kuenza nunku, luhanza elu lûmuke kundi; kadi bualu buenjibua bu mûdi musue, kabuenjibu bu mundi musue, Wakalua kudi bayidi, wakabasangana balale tulu, wakambila Petelo ne, Nuenu kanuakumanya mua kuikala nʼanyi tshitabala tshituha tshimue tshia diba bualu kai? Nudimuke, nutendelela Nzambi; nunku kanuhonyi mu mateyi; mutshima udi musue nunku, kadi mubidi udi mutekete. Wakaya tshiakabidi, wakatendelela Nzambi, wakamba ne, Tatu wanyi, bikala luhanza elu kalui lumanya mua kumuka kundi, bikala bualu bunkuata bua kulunua, bualu buenjibue bu mûdi musue. Yeye wakalua kabidi, wakabasangana balale tulu, bualu bua mesu abo akadi maneme ne tulu. Yeye wakabashîa kabidi, wakaya, wakatendelela Nzambi tshiakasatu, wakadi wamba mei momumue. Hashishe, yeye wakalua kudi bayidi, wakabambila ne, Nudi nulala nuikisha! Diba diakufika, Muana wa muntu udi mufila mu bianza bia bantu babi. Bikai, tuye; tangilai, muntungidi udiku. Hakatshidiye wamba nunku, Yudasa, mukuabo wa mu ba dikumi ne babidi, wakalua ne tshisumbu tshinene tshia bantu, bakadi ne miele ne bibonge, bafume kudi bakuidi banene ne bakulu ba bantu. Mutungidi wa Yesu wakabaha tshimanyinu ne, Unatuangana nʼandi mishiku, nyeye; numukuate. Yeye wakalua lukasa kudi Yesu, wakamuambila ne, Labi, muoyo; wakatuangana nʼandi mishiku. Yesu wakamuambila ne, Mulunda wanyi, enza bualu buwakuluila. Hashishe, bakahia, bakalenga Yesu bianza, bakamukuata. Mukuabo wa bakadi ne Yesu wakolola tshianza, wakatula muele, wakataha muntu wa muakuidi munene, wakamukosa ditshu. Yesu wakamuambila ne, Hingasha muele webe mu muaba wau; bualu bua bonso badi bangata muele nebashihibue ku muele. Udi welangana meshi ne, Meme tshiena mumanye mua kulomba Tatu wanyi, yeye ampe banjelo batambe binunu makumi muanda mutekete ne bibidi, anyi? Mei a mu Mukanda wa Nzambi ne, Bualu ebu nebulue, ahu neashike bishi? Hashishe, Yesu wakakonka tshisumbu tshia bantu ne, Nuakulua ne miele ne bibonge bua kunkuata bu mudibo bakuata munyengi munyi? Nakadi nshikama ku dituku ne ku dituku mu ntempelo, nyisha bantu, kanuakantuala. Kadi malu â onso akulua bua kushikisha mei akafunda baprofete mu Mukanda wandi. Hashishe, bayidi bandi bonso bakamushia, bakanyema. Bakuatshi ba Yesu bakaya nʼandi kua Kayafa, muakuidi wa Nzambi munene, bafundi ne bakulu ba bantu bakadi badisangisheku. Kadi Petelo wakamulonda ha bule ha bule tô ne ku luhangu lua muakuidi munene, wakabuelamu, wakashikama hamue ne tuhalai, bua kutangila hashikidila bualu. Bakuidi banene ne balumbuludi bonso bakakeba bamonyi ba mashimi, bua kubandabo Yesu bua kumushiha; bamonyi ba bungi bakalua, kadi kabakasangana Yesu ne bualu. Kadi ku nyima babidi bakalua, bakamba ne, Muntu eu wakamba ne, Ndi mumanye mua kubumbula ntempelo wa Nzambi ne mua kumuihata kabidi matuku asatu. Muakuidi munene wakimana, wakambila Yesu ne, Wewe kuena wamba dî? Bualu ebu budi munyi budi bamonyi aba bakubanda? Kadi Yesu wakahua. Muakuidi munene wakamuambila ne, Ndi nkutshihisha mu dina dia Nzambi udi ne muoyo, udi biebe Kilisto Muana wa Nzambi, anyi? Yesu wakamuambila ne, Muomu; kadi ndi numanyisha ne, Ku dituku adi nenumone Muana wa muntu mushikame ku tshianza tshia balume tshia Bukole, ulua biandi ha matutu a mu diulu. Hashishe, muakuidi munene wakadihandila bilulu biandi, wakamba ne, Yeye wakuamba dî dia kuhenda Nzambi; ludi ne bualu bua bamanyi kabidi kudi kunyi? Nuakunvua tshihendu tshiandi; nudi nuamba tshinyi? Bakandamuna ne, Mbimpe bamushihe. Hashishe, bakamutuila mate mu mesu, bakamukuma bisusu, bakuabo bakamukuma mikumu, bakamuebesha ne, Wewe Kilisto, utuambile wakukukuma nganyi? Petelo wakadi mushikame ku bula mu luhangu; mukashi muenji wa mudimu wakalua kudiye, wakamuambila ne, Wewe kabidi wakadi ne Yesu, Muena Galela. Kadi yeye wakayila ku mesu kua buonso buabo ne, Tshiena mumanye tshiudi wamba. Hakayeye ku mbelu kua luhangu, mukashi mukuabo muenji wa mudimu wakamumona, wakambila bakadi bashikameku ne, Muntu eu wakadi ne Yesu wa mu Nazaleta. Yeye wakayila kabidi, wakaditshiha ne. Tshiena mumanye muntu eu. Hakahita tshituha tshihi, bakadi bimane ha buihi bakalua, bakambila Petelo ne, Bulelela, wewe udi wabo, bualu bua muaku webe udi ukusokolola. Yeye wakabanga kudiela milau ne kuditshiha ne, Tshiena mumanye muntu eu. Hakambeye dî edi, tshilala tshiakasama. Petelo wakavuluka di diakamba Yesu ne, Tshilala katshi tshianze kusama, wewe neumpidie misangu isatu. Yeye wakaluhuka, wakadila bikole. Hakatshia butuku, bakuidi banene bonso ne bakulu ba bantu bakasangisha dî diabo ne, Tushihai Yesu; bakamusuika, bakaya nʼandi, bakamufila mu bianza bia ngovena Pilato. Hashishe, mutshima wa Yudasa, mumutungidi, wakatamba kunyingalala, hakamoneye ne, Bakumuhisha, wakahingana ne bituha bia mpalata makumi asatu kudi bakuidi banene ne kudi bakulu, wakamba ne, Nakuenza bibi bualu bua nakutungila muntu tshitungu udi kai ne bualu. Kadi bobo bakamuambila ne, Ebu mbualu buetu, anyi? Mbualu buebe. Wakimasha bituha bia mpalata hanshi mu ntempelo, wakumuka biandi, wakaya wakadiowa. Bakuidi banene bakangata bituha bia mpalata, bakamba ne, Kuteka bintu ebi mu tshibutshilu tshia Nzambi kudi kushiha mukenshi, bualu bua bidi mushinga wa mashi. Bakasangisha di diabo, bakasumba nʼabi muaba wakadi wa mufumbi wa bifuadi bualu bua kujikahu bantu ba bende. Ebu mbualu budibo babikila muaba au ne, Muaba wa mashi, tô ne katataka. Nunku bakashikisha dî diakambabo kudi muprofete Yelemiya ne, Bakangata bituha bia mpalata makumi asatu, muakatuabo mushinga wandi, bu mushinga wandi wakatuabo kudi Bena Isalele; bakabifila bua kusumba muaba wakadi wa mufumbi wa bifuadi, bu muakadi dî dia Mukelenge. Yesu wakimana ku mpala kua ngovena Pilato; ngovena wakamukonka ne, Wewe udi Mukelenge wa Bena Yuda, anyi? Yesu wakamuambila ne, Bûdi wamba mbulelela. Hakamubanda bakuidi banene ba Nzambi ne bakulu, yeye kakabandamuna dî. Pilato wakamukonka ne, Kuena unvua malu a bungi adibo bakubanda, anyi? Yeye kakamuandamuna nasha di dimue; ngovena wakatamba kukema. Mu disanka dia Kuhita kua Yehowa ngovena wakadi ne tshilele tshia kulekelela bantu muena lukanu umue wakulombabo. Matuku au bakadi ne muena lukanu wa lumu lunene, dina diandi Balaba. Hakadisangishabo hohamue, Pilato wakabakonka ne, Nudi basue meme nulekelele nganyi? Balaba, anyi Yesu udibo babikila ne, Kilisto? Yeye wakamanya ne, Bobo bakumufila bualu bua mukau. Hakadiye ushikama mu nkuasa wa bulumbuludi, mukashi wandi wakamutumina dî ne, Kubuedi mu bualu bua muntu muakane eu; lelu nakutamba kukenga mu tshilota bua bualu buandi. Bakuidi banene ba Nzambi ne bakulu bakenzesha bisumbu bia bantu ne, Nulombe Balaba, nushihe Yesu. Kadi ngovena wakabakonka ne, Badi babidi, nudi basue meme nulekelele nganyi? Bobo bakitaba ne, Balaba. Pilato wakabakonka ne, Ngenzele Yesu, udibo babikila ne, Kilisto, tshinyi? Bonso bakitaba ne, Bamushihe ku mutshi mutshiamakane. Wakabakonka ne, Kadi yeye wakuenza bualu bubi kai? Bakatamba kuela mbila ne, Bamushihe ku mutshi mutshiamakane. Hakatangila Pilato ne, Nakushikila, diyoyo dikadi ha kujuka, yeye wakangata mai, wakuha bianza ku mesu kua bantu bonso, wakamba ne, Tshiena ne mashi a muntu muakane eu bualu, mbualu buenu. Bantu bonso bakandamuna ne, Mashi andi ikale hamʼbidi hetu ne ha bana betu. Hashishe, yeye wakabalekela Balaba; kadi yeye wakakuma Yesu, wakamufila bua kumushihabo ku mutshi mutshiamakane. Hashishe, masalayi a ngovena akaya ne Yesu mu nsubu munene wa ngovena, akadisangisha tshisumbu tshiau tshionso kuakadi Yesu. Akamuvula bilulu, akamuluatshisha tshikowelu tshikunze. Akaluka tshifulu tshia meba tshia bukelenge, akamuasatshi ku mutu, akateka mulangala mu tshianza tshiandi tshia balume; akatua binu hanshi ku mpala kuandi, akamuseka ne, Muoyo, Mukelenge wa Bena Yuda. Akamutuila lute, akangata mulangala, akamukuma nʼau mu mutu wandi. Hakashikishau kuseka Yesu, akamuvula tshikowelu tshikunze, akamuluatshisha bilulu biandi, akaya nʼandi bua kumushiha ku mutshi mutshiamakane. Hakaluhukau akasangana Muena Kule ne, dina diandi Simona, akamuenzesha ku bukole bua kutualeye mutshi mutshiamakane wa Yesu. Hakaluabo ku muaba, dina diau Gologota, kukudimuna kua muaku ne, Muaba wa Kabalubalu ka Mutu, bakamuha nvinyo musangisha ne bintu bia bululu ne, Unue; hakamulabuleye, wakahidia mua kunua. Hakamukuminabo milonda mu bianza ne ku makasa ku mutshi mutshiamakane, bakabanyangana bilulu biandi, bela nʼabi nshobo; bakashikama, bakamulamaku. Bakateka ha mutu handi bubandi buakamabandabo bufunda ne: Eu udi Yesu mukelenge wa Bena Yuda. Hashishe, bakakumina diakamue nʼandi banyengi babidi milonda mu bianza ne ku makasa ku mitshi mitshiamakane, mukuabo ku tshianza tshiandi tshia balume, munga ku tshianza tshiandi tshia bakashi. Bahitshi ba mu nshila bakamuhenda, bakakuha mitu yabo, bakamba ne, Wewe muhudi wa ntempelo ne mumuibaki wa matuku asatu udisungile: biwikala Muana wa Nzambi, utuluke ku mutshi mutshiamakane. Bakuidi banene ba Nzambi ne bafundi ne bakulu bakamuseka nunku, bakamba ne, Yeye wakadi usungila bakuabo, kena mumanye mua kudisungila. Yeye udi Mukelenge wa Isalele; atuluke biandi ku mutshi mutshiamakane, netumuitabushe. Yeye udi weyemena Nzambi; Nzambi amusungile, bikaleye mumusue; hualu bua yeye wakamba ne, Ndi Muana wa Nzambi. Ne banyengi kabidi bakadi nʼandi ha mitshi mitshiamakane bakamuhenda nunku. Mîdima yakadi ha buloba buonso munda munya tô ne diba ha isatu. Hakafika diba ha isatu, Yesu wakela dî diandi bikole ne, Eloi, Eloi, lama sabakatani? Kukudimuna kua muaku ne, Nzambi wanyi, Nzambi wanyi, wakundekela tshinyi? Bakuabo bakadi bimaneku, hakunvuabo dî edi, bakamba ne, Muntu eu udi Ubikila Eliya. Mukuabo wakaya lukasa, wakangata musukulampampa, wakaûisha tente ne nvinyo wakadi ne buanji, wakaubuesha ku mulangala, wakaha Yesu ne, Nua. Bakuabo bakamba ne, Lekela, tumone Eliya ne walua bua kumusungila. Yesu wakela dî diandi bikole kabidi, wakahuola muoyo wandi. Monai, tshilulu tshiakadi tshikudika mu ntempelo tshiakahandika bihesa bibidi ku mutu kuatshi tô ne kunshi, buloba buakakanka; mabue akahandika; nkita yakabuluka; mibidi ya bungi ya bantu ba tshijila bakadi balale tulu mu lufu yakabishibua; hakabika Yesu bakaluhuka mu nkita, bakabuela mu musoko wa tshijila, bakamueneka kudi ba bungi. Kapitene ka masalayi lukama ne bakadi nʼandi balama Yesu, hakamonabo buloba bukanka ne malu makuabo akenjibua, bakatamba kutshina, bakamba ne, Bulelela, eu wakadi Muana wa Nzambi. Bakashi ba bungi bakadiku, bakadi batangidile ha bule, bobo bakadi Bena Galela, bakalua balonda Yesu bua kumukuatshisha; munkatshi mua bakashi aba muakadi Maha wa ku Magadala, ne Malia mamu wa Yakobo ne Yose, ne mamu wa bana ba Zebedayo. Hakamba diba kuhueka, muntu mubanshi wa ku Alimataya, dina diandi Yosefe, wakalua, yeye kabidi wakadi muyidi wa Yesu. Muntu eu wakaya kudi Pilato, wakalomba tshitalu tshia Yesu. Pilato wakamba dî diandi ne, Bamuhetshi. Yosefe wakangata tshitalu, wakatshinyengela ne tshilulu tshitoke tshia line, wakatshiladika mu lukita luandi luhia-luhia, luakadiye mumane kumbula mu dibue; wakabungulusha dibue dinene, wakaditeka ku mushiku wa mbelu wa lukita, wakaya biandi. Malia wa ku Magadala wakadiku, ne Malia mukuabo, bakadi bashikame batangile buludiludi bua lukita. Hakatshiabu, dituku dia ku mpala kua Dilongolola, bakuidi banene ba Nzambi ne Bafalese bakadisangisha kudi Pilato, bakamba ne, Mukelenge, tudi bavuluke di dia muena mashimi au hakadiye ne muoyo ne, Hahita matuku asatu, nembike kabidi. Wewe amba di diebe ne, Balame lukita bimpe tô ne ku dituku disatu, nunku bayidi bandi kabalu kumuiba, bambila bantu ne, Yeye wakubika ku lufu; bienzabo nunku, dihanga dia ku mpala neditambe dia ku nyima bunene. Pilato wakabambila ne, Nuenu nudi ne balami, yai bienu, milulame ne lungenyi luonso lunudi nʼalu. Bakaya biabo, bakalama lukita bimpe, bakateka tshimanyishilu ku dibue, balami bakadi nʼabo. Dituku diabo dia kuikisha diakamba kushika; hakabanga butuku kutshia bua dituku dia kumudilu dia lumingu, Malia wa ku Magadala ne Malia mukuabo bakalua kutangila lukita. Monai, buloba buakakanka bikole; muanjelo wa Mukelenge wakahueka hanshi mufume mu diulu, wakalua, wakumusha dibue, wakashikamahu. Mpala wandi wakadi bu muele wa nvula, bilulu biandi biakadi bitoke tô bu neje; balami bakamutshina, bakazakala, bakalua bu bantu bafue. Muanjelo wakandamuna bakashi ne, Kanuntshinyi; ndi mumanye ne, Nudi nukeba Yesu, wakashihabo ku mutshi mutshiamakane. Yeye kena kunoko, wakubika bu muakambeye. Luai, numone muakadiye mulale. Yai bienu lubilu, nuambile bayidi bandi ne, Yeye wakubika ku lufu; monai, neadianjile ku mpala kuenu mu Galela, nenumumoneku; nakunuambila bualu ebu. Bakumuka lukasa ku lukita ne buowa ne disanka dinene, bakaya lubilu bua kumanyisha bayidi bandi. Yesu wakasangila nʼabo, wakabela muoyo. Bakalua kudiye, bakamukuata ku makasa, bakamukukuila. Hashishe, Yesu wakabambila ne, Kanutshinyi; yai bienu, nuambile bana betu ne, Yai mu Galela, nenunmoneku. Hakadibo baya, balami bakuabo bakalua mu musoko, bakambila bakuidi banene malu onso. Hakasangishabo ne bakulu, hakahungabo dî, bakaha masalayi mpalata ya bungi, bakambila ne, Nuambe ne, Hatuakadi balale tulu, bayidi bandi bakalua butuku, bakamuiba. Biunvua ngovena tshilumbu etshi, netumuitabushishe, neanusungile, kawena ne bualu. Masalayi akangata mpalata, akenza bu muakâmbilabo; lumu elu, bakalutangadisha munkatshi mua Bena Yuda tô ne katataka. Bayidi dikumi ne umue bakaya mu Galela, ku mukuna wakabambila Yesu. Hakamumonabo, bakaulukukuila; kadi bakuabo bakela mpata. Yesu wakalua kudibo, wakabambila ne, Bakumana kumpa bukokeshi buonso mu diulu ne ha buloba. Bualu bua meme ndi ne bukokeshi ebu, yai bienu, nuvuishe ba bisamba bionso bayidi, nubabatize mu dina dia Tatu ne mu dia Muana ne mu dia Nyuma Muimpe; nubayishe mua kuenza malu onso anakanuambila; ne monai, ndi nʼenu matuku onso tô ne kunshikidilu kua tshikondo etshi. Tshibangidilu tshia lumu luimpe lua Yesu Kilisto, Muana wa Nzambi. Bu mudi muprofete Yeshaya mufunde ne, Ndi ntuma mukenshi wanyi ku mpala kuebe, Yeye nealongolole nshila webe; Di dia muntu udi wela lubila mu tshihela ne, Longololai nshila wa Mukelenge, Nululamishe nshila yandi; Yone wakalua, wakadi ubatiza mu tshihela wambila bantu bualu bua dibanza dia kukudimuna kua mitshima ne mibi yabo ijimishibue. Bantu ba mu luseke luonso ma Yudaya ne bonso ba mu Yelushalema bakumuka, bakaya kudiye; bakabatijibua kudiye mu musulu wa Yadene, batonda mibi yabo. Yone wakadi muluate tshilulu tshia mioso ya kamelu, wakadi ne mukaba wa tshiseba mu tshimono tshiandi, wakadi udia mikumbi ne buitshi. Yeye wakamba bualu bua Nzambi ne, Udi ulua ku nyima kuanyi udi muntambe meme, tshiena ne buakane bua kuzonzama mua kusulula mionshi ya bisabata biandi. Nakunubatiza mu mai, kadi yeye neanubatize mu Nyuma Muimpe. Matuku au Yesu wakafuma ku Nazaleta wa Galela, wakabatijibua kudi Yone mu musulu wa Yadene. Hakumukeye mu mai, wakamona diulu dibululuka, ne Nyuma bu nyunyu wa nkutshi umutulukila; dî diakafuma mu diulu ne, Wewe udi Muana wanyi munanga, wewe udi unsankisha bimpe. Ha diba adi Nyuma wakamutuma mu tshihela. Yeye wakadi mu tshihela matuku makumi anai, bamuteya kudi Satana; yeye wakadi ne nyama ya mu tshisuku; banjelo bakadi bamukuatshisha ne biakadiye nʼabi bualu. Hakakuatabo Yone, Yesu wakalua mu Galela, wenda wambila bantu lumu luimpe lua Nzambi, wakamba ne, Matuku akukumbana, bukelenge bua Nzambi budi hehi; kudimunai mitshima yenu, nuitabushe lumu luimpe. Hakadi Yesu uhitshila ha buihi ne dishiba dia Galela, yeye wakamona Simona ne Andele muanʼabo ne Simona, bela kahamba mu mai, bualu bua bobo bakadi bilembi. Yesu wakabambila ne, Luai ku nyima kuanyi, nenuvuishe bilembi bia bantu. Bakashîa tuhamba hanshi lukasa, bakamulonda. Hakayeye tshituha, wakamona Yakobo muana wa Zebedayo, ne muanʼabo Yone, bakadi mu buatu balukulula tuhamba tuabo. Ha diba adi yeye wakababikila; bakashîa tatuʼabo Zebedayo mu buatu ne bena mu dimu; bakamulonda. Bakaya mu Kapênuma; dituka dia Lumingu lua Bayuda yeye wakabuela mu nsunagoga, wakabayisha Diyisha diandi diakabakemesha, bualu bua yeye wakabayisha bu muena mei, kakadi bu bafundi. Mu nsunagoga wabo muakadi muntu muikale ne nyuma wa bukoya munda; wakela dî dikole ne, Wewe Yesu Muena Nazaleta, budi nʼebe bualu kai? Wewe wakulua bua kutushiha, anyi? Ndi mukumanye, wewe udi Wa Tshijila wa Nzambi. Yesu wakamubela ne, Hua, Umuka munda muandi. Nyuma wa bukoya wakamuhaluisha, wakela dî diandi bikole, wakahatuka munda muandi. Bakakema bonso, bakakonkangana ne, Etshi ntshinyi? Diyisha dihia-dihia; yeye udi ne bukole bua kuela nyuma ya bukoya dî, imunvuile. Lumu luandi luakaya mu luseke luonso lua Galela ne ku nyima kualu. Hakaluhukabo mu nsunagoga, bakabuela mu nsubu wa Simona ne Andele; Yakobo ne Yone bakadi nʼabo. Muku wa Simona mukashi wakadi mulale hanshi ne disama dia mubidi kahia; bakambila Yesu bualu buandi; wakalua biandi, wakamukuata ku tshianza, wakamubisha; disama dia mubidi kahia diakamulekela, wakabalongoluela bia kudia. Hakabuela diba, bakatua kudiye ne babedi bonso ne bakadi bakuatshike ne bademon. Bantu bonso ba musoko bakunguila ku tshibi. Wakashikisha masama a ba bungi bakadi ne mabedi mangi, wakumusha bademon ba bungi; yeye kakitabusha bademon bakule, bualu bua bobo bakamumanya. Hatshiatshia, butuku kabui buanze kutshia, yeye wakabika, wakaluhuka, wakaya mu tshihela, wakatendelelaku Nzambi. Simona ne bakuabo bakadi nʼandi bakamulonda ku nyima; bakamusangana, bakamuambila ne, Bantu bonso badi bakukeba. Yeye wakabambila ne, Tuyai bietu kukuabo mu minga misoko idi ha buihi, mbambileku bualu bua Nzambi; nakuluila bualu ebu. Yeye wakaya mu nsunagoga yabo ya mu luseke luonso lua Galela, ubambila bualu bua Nzambi, umusha bademon. Muena nsudi wakalua kudiye, wakamutendekena, wakamutuila binu, wakamuambila ne, Biwasua kuenza nunku, udi mumanye mua kundengesha. Luse luakamukuata, wakolola tshianza, wakamulenga, wakamuambila ne, Ndi musue, wikale mulengeshibue. Nsudi yakamulekela lukasa, wakalengeshibua. Yesu wakamukandika, wakamuhatula lukasa, wakamuambila ne, Kuambidi muntu bualu ebu; uye biebe, udileshe kudi muakuidi, ufile biakamba Mose bu tshimanyishilu ku mesu kua bantu bualu bua kulengeshibua kuebe. Kadi yeye wakaluhuka, wakabanga kumanyisha bantu, wakatangalasha bualu ebu; nunku Yesu kakamanya mua kubuela mu musoko bamumone kudi bantu, yeye wakadi anu mu bihela; bantu ba nseke yonso bakalua kudiye. Hakahita matuku makese, yeye wakahingana ku Kapênuma; bakatangalasha lumu ne, Yeye udi mu nsubu. Ba bungi bakunguila, kamuakadi muaba, ne ku mbelu kabidi kuakadi nunku; yeye wakabambila dî diandi. Bakalua batuale muntu muikale ne disama dia kaneke kudiye, mutuala kudi bantu banai. Hakahangabo mua kufika nʼandi ha buihi bualu bua tshisumbu tshia bantu, bakabulula tshimanu tshia musaka buludiludi buakadiye. Hakasthibululabo nunku, bakatekesha bulalu buakadi umena kaneke ulala. Hakamona Yesu ditabusha diabo, yeye wakambila umena kaneke ne, Muanʼanyi, mibi yebe yakujimishibua. Kadi bafundi bakuabo bakadi bashikamemu, bakadi badikonka munda munda ne, Muntu eu udi wakuila nunku, tshinyi. Yeye udi uhenda Nzambi; muntu kai udi mumanye mua kujimisha mibi, anu Nzambi nkayandi? Hakamanya Yesu munda muandi ne, Badi badikonka munda nunku, yeye wakabakonka ne, Nudi nudikonkela munda muenu nunku tshinyi? Tshidi tshitamba butekete ntshinyi, kuambila muena kaneke ne, Mibi yebe yakujimishibua, anyi kumuambila ne, Bika, ambula bulalu buebe, ya? Kadi bua nuenu mimanye ne, Muana wa muntu udi ne bukole hatshidiye ha buloba bua kujimisha mibi (yeye wakambila muena kaneke ne), Ndi nkuambila ne, Bika, ambula bulalu buebe, ya ku nsubu kuebe. Yeye wakabika, wakambula bulalu buandi lukasa, wakumuka ku mpala kua bonso; bantu bonso bakakema bua bualu ebu, bakatumbisha Nzambi, bakamba ne, Katuena banze kumona bualu bu ebu diambedi. Yesu wakaya kabidi ku muelelu wa dishiba; tshisumbu tshionso tshia bantu tshiakalua kudiye, yeye wakabayisha. Hakadiye uhita, wakamona Lewi muana wa Alafayo mushikame ku tshilambuidi, wakamuambila ne, Undonde. Yeye wakabika, wakamulonda. Yeye wakadi mushikame mu nsubu wa Lewi udia bidia; basangishi ba mulambu ba bungi ne bantu babi bakadi bashikame ne Yesu ne bayidi bandi, bakadi ba bungi, benda bamulonda. Hakamumona bafundi ba Bafalese udia ne bantu babi ne basangishi ba mulambu nunku, bakakonka bayidi bandi ne, Munyi mudiye udia unua ne basangishi ba mulambu ne bantu babi? Hakunvua Yesu dî diabo, wakabambila ne, Badi ne bukole kabena ne muondahi bualu, anu badi ne mabedi meme tshiakuluila bua kubikila badi bakane, nakuluila bua kubikila badi babi. Bayidi ba Yone ne Bafalese bakadi bajila bia kudia, bakahia kudi Yesu, bakamukonka ne, Bayidi ba Yone ne bayidi ba Bafalese batu bajila bia kudia, kadi bayidi bebe kabatu bajila bi kudia bualu kai? Yesu wakabambila ne, Balunda ba mubaki wa mukashi badi bamanye mua kujila bia kudia hatshidi mubaki wa mukashi nʼabo, anyi? Hatshidibo ne mubaki wa mukashi, kabena bamanye mua kujila bia kudia. Kadi matuku nealue abanyengabo mubaki wa mukashi, nebajile bia kudia dituku adi. Bantu kabatu batelelula tshihesa tua tshilulu tshidi katshi tshifuatalale ha tshmialu tshikulukulu, bualu bua tshihesa tshihia-tshihia netshîlamune tshikulukulu, nunku disoso nedivunde. Nunku kabidi bantu kabatu bela maluvu mahia-mahia mu milondo ya biseba bikulukulu; bienzabo nunku, malulu neahande biseba, maluvu ne biseba nebibutuke; kadi bantu batu bela malulu mahia-mahia mu biseba bihia-bihia. Yesu wakadi uhitshila mu madimi a blé dituku dia Lumingu lua Bayuda; hakadi bayidi bandi baya mu nshila, bakabanga kutshibula miehu yai. Bafalese bakamukonka ne, Tangila, bayidi bebe badi benzela bualu budi bujila dituku dia Lumingu tshinyi? Yeye wakabakonka ne, Nuenu kanuakubala bualu buakenza Davidi, hakadiye utata ne hakadiye ne nsala, yeye ne bakuabo bakadi nʼandi, anyi? Yeye wakabuela mu nsubu wa Nzambi hakadi Ebeyata muakuidi mimene, wakadia bidia bilesha, biakadi tshijila, anu bakuidi ba Nzambi mbakadi badia, yeye kabidi wakahaku bakadi nʼandi. Yesu wakabambila ne, Bakenzela bantu dituku dia Lumingu, kabakenzela dituku dia Lumingu bantu; nunku Muana wa muntu udi mukelenge wa dituku dia Lumingu. Yesu wakabuela kabidi mu nsunagoga; muntu wakadiku ne tshianza tshiandi tshiume. Bakamutentekela ne, Neangondahe dituku dia Lumingu, anyi? Bakasua kumubanda. Wakambila muntu wakadi ne tshianza tshiume ne, Bika, imana munkatshi muabo. Yeye wakabakonka ne, Tshidi tshimpe ntshinyi, kuenza malu mimpe dituku dia Lumingu, anyi kuenza malu mabi; kusungila muoyo anyi kûshiha? Bobo bakahua. Mutshima wandi wakanyingalala bualu bua mitshima yabo yakadi mikole; wakabatangila ne tshishi, wakambila muntu ne, Olola tshianza. Yeye wakatshiolola, tshianza tshiandi tshiakakana kabidi. Bafalese bakaluhuka, bobo ne bena Helode bakamuelela tshifufu bua kumushiha. Yesu wakaya ne bayidi bandi ku dishiba; bantu ba bungi ba mu Galela bakamulonda; bakuabo kabidi ba bungi ba mu Yudaya, ne ba mu Yelushalema, ne ba mu Edome, ne ba dishia dia Yadene, ne ba mu luseke lua Tulo ne Sidona, hakunvuabo malu manene akadiye wenza, bakalua kudiye. Yeye wakambila bayidi bandi ne, Buatu bukese bungindile, bua tshisumbu tshia bantu katshimusakidi; bualu bua yeye wakadi mumane kushikisha masama a ba bungi. Buonso buabo bakadi ne mabedi makole bakamûnguila bualu bua kubalengeye bianza. Hakamumona nyuma ya bukoya, yakadishinda ku mpala kuandi, yakela dî bikole ne, Wewe udi Muana wa Nzambi. Yeye wakabela ne, Kanunsokolodi. Yesu wakabanda ku mukuna, wakabikila bakasueye; bakaya kudiye. Yeye wakasungula dikumi ne babidi, bua kuikalabo nʼandi ne bua kubatumeye bua kuambila bantu bualu bua Nzambi, ne bua kuikalabo ne bukole bua kumusha bademon. Yeye wakidika Simona ne, Petelo; ne Yakobo muana wa Zebedayo ne Yone muanʼabo ne Yakobo, yeye wakabidika ne, Boanêge, kukudimuna kua muaku ne, Bana ba mukungulu wa nvula; ne Andele, ne Filipo, ne Bâtolomayo, ne Matayo, ne Toma, ne Yakobo muana wa Alafayo, ne Tadaya, ne Simona Muena Kananayo, ne Yudasa Isakaliote, wakamutungila tshitungu. Yeye wakabuela mu nsubu. Bantu ba bungi bakunguila kabidi, kabakamanya mua kudia bidia. Hakunvua balunda bandi bualu ebu, bakaya bua kumuangata, bakamba ne, Yeye udi mubale. Bafalese bakadi bafume ku Yelushalema bakamba ne, Yeye udi ne Belezebula, udi umusha bademon mu dina dia mukelenge wa bademon. Yeye wakababikila, wakabelela nsumuinu ne, Satana udi mumanye mua kumusha Satana munyi? Biahanduluka bukelenge, bukelenge abu kabuena bumanye mua kuikala. Hahanduluka nsubu, nsubu au kena mumanye mua kuikala. Biadiluilangana Satana, biahandulukeye, kena mumanye mua kuikala, bualu ouandi nebushikile. Muntu kena mumanye mua kubuela mu nsubu wa muena bukole bua kuhaula bintu biandi, bikaleye kai musuike muena bukole diambedi; hamusuikeye, hashishe neahaule bia mu nsubu wandi. Bulelela, ndi nuambila ne, Mibi yonso ya bana ba bantu neijimishibue ne bihendu biahendabo nʼabi Nzambi, kadi kabena bajimisha bubi bua muntu wahenda Nyuma Muimpe tshiendelele, yeye neikale ne bubi buandi tshiendelele. Yeye wakabambila nunku, bualu bua bobo bakamba ne, Yeye udi ne nyuma wa bukoya munda. Mamu wandi ne bana babo bakalua, bakadi bimane ku bula, bakamutumina dî, bakamubikila. Bantu ba bungi bakadi bashikame bamunyunguluke; bakamuambila ne, Tangila, mamuʼebe ne bana benu badi ku bula bakukeba. Yeye wakabakonka ne, Mamuʼanyi nganyi? Bana betu mbanganyi? Hakatangileye bakadi bashikame bamunyunguluke, wakamba ne, Mamuʼanyi ne bana betu kababa! Muntu yonso wenza bu mudi Nzambi musue udi muanʼetu mulume ne muanʼetu mukashi ne mamuʼanyi. Yesu wakabanga kabidi kuyisha bantu ku muelelu wa dishiba. Bantu batambe bungi bakamunguila, nunku yeye wakabuela mu buatu buakadi mu mai, wakashikama; bantu bonso bakadi ku mpata ku muelelu wa mai. Yeye wakabayisha malu a bungi mu nsumuinu, wakabambila mu diyisha diandi ne, Unvuai, mumiaminyi wakaya kumiamina maminu; hakadiye umiamina, maminu makuabo akamata kukala kua nshila, nyunyu yakalua, yakâzokola. Makuabo akamata ha buloba buakadi ha mutu ha mabue, kâkadihu ne buloba bua bungi; tshituha tshihi akatoloka bua kâkadi ne buloba bule; hakabanda diba, akababuka, akafubidila bualu bua kâkadi ne miji. Makuabo akamata mu mionshi ya meba, mionshi yakadiunda, yakânyengela, kâkalua maminu. Makuabo akamata ha buloba buimpe, akavudisha maminu, akaleha, akadiunda; makuabo akavudisha makumi asatu asatu, makuabo makumi asambombo asambombo, makuabo lukama lukama. Yeye wakamba ne, Udi ne matshu unvue biandi. Hakadiye nkayandi, bakadi ha buihi nʼandi ne ba dikumi ne babidi bakamukonka bualu bua nsumuinu. Yeye wakabambila ne, Badi banuha nuenu malu a bukelenge bua Nzambi adi masokoka, kadi badi bambila bantu ba bende malu onso mu nsumuinu; kumona nebamone, kadi kabena bamanye; kunvua nebunvue, kadi kabena bajingulula; nunku kabakudimunyi mitshima yabo bua mibi yabo ijimishibue. Yeye wakabakonka ne, Kanuena bamanye lusumuinu elu, anyi? Nenumanye nsumuinu yonso munyi? Mumiaminyi udi umiamina dî dia Nzambi. Kabobo aba ba kukala kua nshila kuakumiaminabo dî; hakunvuabo dî, Satana ulualua lukasa, udi unyenga dî diakadi dimiamina munda muabo. Kabobo aba kabidi bakadi bamiamina ha miaba ya mabue; hakunvuabo dî, badi baditabusha lukasa ne disanka; kadi bobo kabena ne miji munda muabo, badi bikala tshituha tshihi; hashishe, halua dikenga anyi lutatu bualu bua dî dia Nzambi, nebalenduke lubilu. Bakuabo badi bantu bakadi bamiamina mu mionshi ya meba; bobo bakunvua dî, kadi meshi a malu a ha buloba ne mashimi a biuma ne lukuka lua malu makuabo bidi bibuela munda, bidi binyengela dî, kadiena dimanye mua kuvuidisha maminu makuabo. Kabobo aba bakadi bamiamina ha buloba buimpe; bobo badi bunvua dî, badi baditabusha, badi bavudisha maminu, bakuabo makumi asatu asatu, bakuabo makumi asambombo asambombo! bakuabo lukama lukama. Yesu wakabakonka ne, Bantu batu balua ne muinda bua kûteka munshi mua mushete, anyi munshi mua bulalu, anyi? Batu bauteka ha mutu ha mesa a muinda, nasha? Kakuena bualu busokoka buahanga kusokolodibua; kakuena bualu bubuikila buahanga kubuluibua. Bikala muntu ne matshu a kunyua, unvue biandi. Yeye wakabambila ne, Dimukai bua bualu bunudi nunyua; nebanuidikishile bintu ne luidi lunudi nubidikishila nʼalu kabidi; nebanuhe binga bintu ba mutu. Bualu bua muntu udi ne bintu nebamuhe binga; kadi muntu udi kai ne tshintu nebamunyenge tshidiye nʼatshi. Yeye wakamba ne, Bukelenge bua Nzambi budi bu mudi muntu mukune maminu mu buloba; udi ulala tulu, udi ubika butuku ne munya; maminu adi atoloka, adi aleha, kadi yeye kena mumanye mudiû adienzela. Buloba budi budivuishila maminu nkayabu; diambedi mutoloko, ku nyima muehu, hashishe maminu manene ku muehu. Kadi hûma maminu, yeye neatume bena miele, bualu bua matuku a kunowa akufika. Yeye wakakonka ne, Netufuanyikishe bukelenge bua Nzambi munyi? Netubufuanyikishe ne lusumuinu kai? Budi bu lutete lua mutada, ludi lutambe ntete yonso ya ha buloba bukese; kadi halukunabo mu buloba, ludi Bileha, ludi lutambe midioko yonso bunene, ludi bela matamba manene; nunku nyunyu ya mu diulu idi mimanye mua kuikila mu dileshi diau. Nunku mu nsumuinu ya bungi yeye wakabambila dî dia Nzambi diakamanyabo mua kunyua; yeye kakadi ubambila malu tshianana, anu mu nsumuinu; kadi wakajinguluila bayidi bandi malu au onso ha nkayabo. Dituku adi mene, hakamba diba kuhueka, wakambila bayidi bandi ne, Tuyai dishia. Bakashia bantu ba bungi, bakaya nʼandi mu buatu, anu bu muakadiye. Matu makuabo akadi nʼandi. Tshihuhu tshikole tshiakaha, mavuala akabuela mu buatu, buatu buakadi bûla tente ne mai. Yeye wakadi ku tshitaku tshia buatu, musame ha musamu, mulale tulu; bakamubisha, bakamukonka ne, Muyishi, udi witabusha tufue, anyi? Yeye wakabika, wakabuikila luhehele, wakambila dishiha ne, Hua, talala talalâ. Luhehele luakalekela, muaba au wakatalala talalâ. Yeye wakabakonka ne, Nudi nutshinyina tshinyi? Kanuena ne ditabusha tô ne katataka? Bakatamba kutshina, bakambilangana ne, Eu muntu kai? Luhehele ne mai a dishiha bidi bimunvuila. Bakafika dishia dia dishiba mu luseke lua Bena Gelasa. Hakumukeye mu buatu, katataka muntu mukuatshike ne nyuma wa bukoya, ulua mu majambu, wakasangila ne Yesu, wakadi wikala mu majambu; kakuakadi muntu mumanye mua kumusuika ne tshintu, bintu bionso biakahanga, ne lukanu mene; bakamusuika misangu ya bungi ne nkata ne nkanu, yeye wakatshibula nkanu, wakatula nkata; kakuakadi muntu mumanye mua kumukokesha. Matuku onso, butuku ne munya, mu majambu ne mu mikuna, yeye wakadi wela bila, wakadi uditaha ne mabue. Hakatangileye Yesu kuakua, wakaya lubilu, wakamukukuila; wakela dî diandi bikole ne, Wewe, Yesu, Muana wa Nzambi Mutambe Bunene wa mu diulu, ndi nʼebe bualu kai? Ndi nkutshihisha mu dina dia Nzambi ne, Kunkengeshi; bua Yesu wakamana kumuela dî ne, Hatuka munda mua muntu eu, wewe nyuma wa bukoya. Yesu wakamukonka ne, Dina diebe nganyi? Wakamuambila ne, Dina dianyi didi Legona, bualu bua tudi ba bungi. Yeye wakatendekena Yesu ne, Kutuihatshi mu luseke elu. Tshisumbu tshinene tshia ngulube tshiakadi mu tshibandabanda tshia mukuna, yakadi idia mashinde. Bakamutendekena ne, Ututume munda mua ngulube, tubuelemu. Yeye wakitabusha. Nyuma ya bukoya yakaluhuka, yakabuela munda mua ngulube; tshisumbu tshiai tshiakanyemena lubilu ku tshibungubungu, tshiakahona mu dishiba; yakadi bu binunu bibidi; yakafua mu mai. Badishi ba ngulube bakanyema, bakambila bantu ba mu musoko ne ba mu luseke alu bualu abu. Bakalua kutangila bualu buakenjibua nunku. Bakalua kudi Yesu, bakamona muntu wakadi mukuatshike ne bademon mushikame, muluate bilulu, muikale ne lungenyi luimpe, yeye mene nguakadi ne legona; bakatshina. Bamonyi ba bualu abu bakabamanyisha malu onso akalua kudi wakadi mukuatshike ne bademon, ne malu onso akalua kudi ngulube. Bobo bakabanga kumutendekena ne, Umuka mu luseke luetu. Hakadiye ubuela mu buatu, wakadi mukuatshike ne bademon wakamutendekena ne, Ndi musue kuikala nʼebe. Kadi yeye kakitabusha, wakamuambila ne, Uye biebe kuebe kudi balunda bebe, ubamanyishe malu manene akukuenzela Mukelenge ne luse luakukufueye. Yeye wakaya biandi, wakabanga kumanyisha bantu ba mu Dekapoli malu manene akamuenzela Yesu; bantu bonso bakakema. Hakasabuka Yesu dishia kabidi, bantu ba bungi bakadisangisha kudiye, yeye wakadi ha buihi ne dishiba. Mukelenge mukuabo wa nsunagoga wakalua, dina diandi Yailo; hakamoneye Yesu, wakadiela ku makasa andi, wakamutendekena bikole ne, Muanʼanyi mukese wa bakashi ukadi ufua; ulue biebe, umulenge bianza, akoleshibue, ikale ne muoyo. Yesu wakaya nʼandi; bantu ba bungi bakamulonda, bakamunguila. Mukashi wakadiku, wakadi ne disama dia mashi ahatuka bidimu dikumi ne bibidi, banganga buka ba bungi bakatamba kumukengesha, wakanyanga bintu biandi bionso, kakasangala, kadi disama diandi diakatamba; yeye wakunvua bualu bua Yesu, wakalua mu tshisumbu tshia bantu ku nyima kuandi, wakalenga ku tshmialu tshiandi. Wakamba munda munda ne, Binalenga anu ku tshmialu tshiandi, nenkoleshibue. Muaba wakadi mashi ahatuka wakakama katataka, yeye wakadiunvua mu mubidi wandi ne, Disama dianyi dikole diakuhua. Yesu wakadiunvua munda munda ne, Bukole buanyi buakuhatuka, yeye wakatshinguluka munkatshi mua bantu, wakakonka ne, Wakundenga ku mmalu tshianyi nganyi? Bayidi bandi bakamuambila ne, Wewe udi utangila bantu ba bungi bakunguila, udi ukenkela nunku tshinyi ne, Wakundenga nganyi? Yeye wakakenzakana bua kumona wakenza bualu ebu. Hakamanya mukashi bualu buakamuenzeleye, wakatshina, wakazakala, wakalua, wakatua binu ku mpala kuandi, wakamuambila malu onso bulelela. Yeye wakamuambila ne, Muanʼanyi, ditabusha diebe diakukusungila; uye biebe talalâ, wikale musangale ku disama diebe. Hakatshidiye wamba nunku, bakafuma kua mukelenge wa nsunagona, bakamba ne, Muanʼebe udi mufue; udi utatshishila Muyishi tô tshinyi? Hakunvua Yesu dî diakambabo, wakambila mukelenge wa nsunagoga ne, Kutshinyi, itabusha anu kuitabusha. Yeye kakitabusha bua muntu mukuabo amulonde, anu Petelo ne Yakobo ne Yone muanʼabo ne Yakobo. Bakalua ku nsubu kua mukelenge wa nsunagoga; wakasangana mutoyi, ba bungi bakadi badila bashikunka. Hakabueleye, wakabambila ne, Nudi nutekela mutoyi tshinyi? Nudi nudidila tshinyi? Muana kena mufue, yeye udi mulale tulu. Bakamuseka. Hakabumusheye buonso buabo, wakangata tatu wa muana ne baba wandi ne bakalueye nʼabo, wakabuela muakadi muana. Wakakuata ku tshianza tshia muana, wakamuambila ne, Talita kumi, kukudimuna kua muaku ne, Muanʼanyi mukashi, bika. Muana wakabika lukasa, wakuenda; bualu bua yeye wakadi wa bidimu dikumi ne bibidi. Bantu bakatamba kukema. Yeye wakabakanda ne, Muntu mukuabo kamanyi bualu ebu. Yeye wakamba ne, Muhai bia kudia. Wakumuka aku, wakalua mu luseke luandi, bayidi bakamulonda. Hakalua dituku dia Lumingu lua Bayuda, wakabanga kuyisha bantu mu nsunagoga; bantu ba bungi bakakema, hakunvuabo mei andi, bakakonka ne, Muntu eu wakuangata malu â kudi kunyi? Lungenyi kai luakuhabo muntu eu? Malu a kukema adiye wenza adi munyi? Yeye kena muena mabaya, anyi? Kena muana wa Malia, anyi? Kena muanʼabo ne Yakobo ne Yose ne Yuda ne Simona, anyi? Bana babo ba bakashi kabena munkatshi muetu, anyi? Bakalenduka bua bualu buandi. Yesu wakabambila ne, Muprofete udi ne butumbi mu miaba yonso, kadi kena nʼabu ku luseke luabo ne munkatshi mua bana babo ne mu nsubu wandi. Yeye kakamanya mua kuenzaku bualu bua kukema, wakakolesha anu bantu banya-banya bakadi ne mabedi bakalengeye bianza. Wakakema bualu bua huhidia buabo. Yeye wakendakana mu misoko ubayisha. Yeye wakabikila bayidi bandi dikumi ne babidi, wakabanga kubatuma ku babidi ku babidi; wakabaha bukole bua kuhita nyuma ya bukoya; wakabambila bikole ne, Kanuangatshi tshintu tshia kuya nʼatshi mu luendu, anu bibangu; kanuyi ne bidia ne bibombo ne tshiamu tshia mitaku mu mikaba; nubueshe bisabata ku makasa; kanuluatshi bikowelu bibidi. Yeye wakabambila ne, Hanuabuela mu nsubu, nuikalemu tô ne hanumukamu. Luseke luonso luahidia kunuitabusha, kabai bunvua mei enu, hanumukamu, nututule nsenga idi mu makasa enu bu tshimanyishilu ku mesu kuabo. Bakaya, bakambila bantu bualu bua Nzambi ne, Kudimunai mitshima yenu. Bakumusha bademon ba bungi, bakela manyi ha ba bungi bakadi ne mabedi, bakabakolesha. Mukelenge Helode wakunvua lumu lua Yesu, bualu bua dina diandi diakamanyibua; wakamba biandi ne, Yone Mubatiji wakubika ku lufu, bua bualu ebu malu a kukema adi enjibua kudiye. Kadi bakuabo bakamba ne, Yeye udi Eliya. Bakuabo bakamba ne, Yeye udi muprofete, anyi bu muprofete. Kadî Helode, hakunvueye lumu luandi, wakamba ne, Yone unakukosa mutu wakubika ku lufu. Bualu bua Helode nkayandi nguakadi mutume bantu bandi, mumukuate, wakamusuika mu nsubu wa lukanu bualu bua Helodia mukashi wa muanʼabo Filipo, wakadi Helode mubake. Yone wakadi mumane kuambila Helode ne, Wewe kuena mumanye mua kuikala ne mukashi wa muanʼenu. Helodia wakadi ne Yone lukuna, wakasua kumushiha, kadi yeye kakamanya mua kuenza nunku; bualu bua Helode wakadi Utshina Yone, wakamanya ne, Yeye udi muntu muakane ne wa tshijila, wakamulama bimpe. Hakunvua Helode mei a Yone, wakalubakana, wakunvua mei andi ne disanka. Hakafikila dituku diakane, dia kuedibua kua Helode, yeye wakalambishila miloho yandi ne tumanda tuandi tua masalayi ne banfumu banene ba mu Galela bidia; hakabuela muana mukashi wa Helodia, yeye wakaja maja, wakasankisha mutshima wa Helode ne ya bakadi bashikame nʼandi ku mesa; mukelenge wakambila muana mukashi ne, Undombe tshintu tshionso tshiudi musue, nenkuhetshi. Wakaditshiha kudiye ne, Tshintu tshionso tshiwandomba, nenkuhetshi, tô ne ku tshituha tshia hankatshi ha bukelenge buanyi. Yeye wakumuka, wakakonka mamuʼandi ne, Nemulombe tshinyi? Yeye wakamba ne, Ulombe mutu wa Yone Mubatiji. Wakabuela lubilu muakadi mukelenge, wakamulomba ne, Ndi musue umpe mutu wa Yone Mubatiji katataka ha dilonga. Mutshima wa mukelenge wakatamba kunyingalala; kadi bualu bua mitshihu yandi ne bua bakadi badia nʼandi bidia, yeye kakasua kuhidia kumuha. Mukelenge wakatuma disalayi diakadi sentedi, wakadiambila ne, Ulue ne mutu wandi; diakaya biadi, diakamukosa mutu mu nsubu wa lukanu, diakalua ne mutu wandi ha dilonga, diakauha nsongakashi, nsongakashi wakauha mamuʼandi. Hakunvua bayidi ba Yone bualu ebu, bakalua, bakangata tshitalu tshiandi, bakatshijika mu lukita. Batangadiki ba Yesu bakadisangisha kudiye, bakamuambila malu onso akadibo benza ne malu onso akadibo bayisha bantu. Yeye wakabambila ne, Luai bienu nkayenu mu muaba wa hatuhu, nuikishe tshituha. Kabakamanya mua kudia bidia talalâ, bualu bua bantu ba bungi bakadi bahitakana. Bakaya nkayabo mu buatu ku muaba wa hatuhu. Bantu bakabamona baya, ba bungi bakabamanya, bantu ba mu misoko yonso bakayaku lubilu ku makasa, bakadianjila kufika. Hakumukeye mu buatu, wakatangila tshisumbu tshinene tshia bantu, wakadi nʼabo luse, bualu bua bobo bakadi bu mikoko yakadi kayi ne mulami; yeye wakabanga kubayisha malu a bungi. Hakamba diba kubuela, bayidi bandi bakalua kudiye, bakamba ne, Muaba eu udi tshihela, diba diakumana kuya; ubatume, baye mu luseke elu ne mu misoko idi ha buihi, badisumbile bia kudia. Yeye wakabandamuna ne, Nuenu nubahe bia kudia. Bakamukonka ne, Netuye kusumba bidia bia ndenalio nkama ibidi, tulue kubaha, badie, anyi? Yeye wakabakonka ne, Nudi ne mitanda ya bidia bungi munyi? Yai nutangile. Hakamanyabo, bakamuambila ne, Mitanda itanu ne mishiha ibidi. Yeye wakabambila ne, Bonso bashikame, ku tshisumbu ku tshisumbu, mu mashinde. Bakashikama mu milongo, bantu lukama lukama ne bantu makumi atanu makumi atanu. Yeye wakamema mitanda itanu ne mishiha ibidi, wakatangila mulu, wakatendelela Nzambi, wakatshibula mitanda, wakaifila mu bianza bia bayidi bua kubitekabo ku mpala kua bantu; yeye wakababanyina buonso buabo mishiha ibidi. Buonso buabo bakadia, bakukuta. Bakangula bihesa bia bidia biakashala bisaka dikumi ne bibidi biule tente, ne bia mishiha kabidi. Bakadia mitanda nunku bakadi balume binunu bitanu. Yesu wakabuesha bayidi bandi mu buatu lubilu, badianjile dishia ku mpala kuandi mu Bete-saida, hakatumeye bantu kuabo. Hakabalayeye, wakaya mu mukuna bua kutendelela Nzambi. Hakalua butuku, buatu buakadi mu bunene bua dishiba, yeye wakadi mu mpata nkayandi. Yesu wakabamona batata ne kuita, bualu bua tshihehele tshiakadi tshibahingisha; hakadi diba bu ha inai hatshiatshia, yeye wakalua kudibo, wenda ha mutu ha mai; yeye wakamba kubasesuka; kadi bobo, hakamumonabo wenda ha mutu ha mai, bakela meshi ne, Mukishi, bakahandalala ne mei makole, buonso buabo bakamumona, bakatshina. Kadi yeye wakabela dî, wakamba ne, Nukoleshe mitshima yenu, mmeme, kanutshinyi. Wakabuela mu buatu muakadibo, tshihehele tshiakabatama; bobo bakatamba kukema; bualu bua kabakajingulula bualu bua mitanda bimpe; mitshima yabo yakadi mikole. Hakasabukabo, bakalua ku dilobo dia Genesaleta, bakasuika buatu. Hakumukabo mu buatu, bantu bakamumanya lukasa, bakendakana lubilu mu luseke alu luonso, bakatuala bena mabedi ha malalu abo, bakaya kuakunvuabo ne, Yeye udi eku. Kuonso kuakayeye, mu misoko mikese ne mu bimenga ne mu mpata, bakateka bena mabedi mu bisalu bakamutendekena bua kulengabo ku mubangu wa tshivualu tshiandi; bakadi bamulenga mbobo bakakoleshibua. Bafalese ne bafundi bakuabo, bafume ku Yelushalema, bakunguila kuakadi Yesu, bakamona bayidi bandi badia bidia ne bianza kabi biowa mai. Bualu bua Bafalese ne Bena Yuda bonso, bikalabo kabai buvue bianza ne mai bikole, kabena badia bidia, badi ne tshilele tshia bankambua babo nunku; hafumabo ku tshisalu, kabena badia, anu howabo; badi bitabusha kabidi bilele bikuabo bia bungi, bu kuvua kua mpanza ne ngesu ne bintu bidi bienjibua ne tshiamu tshia mitaku. Bafalese ne bafundi bakamukonka ne, Bayidi bebe batu badia bidia ne bianza bidi ne manyanu munyi, bobo kabatu benda mu tshilele tshia bankambua betu munyi? Yeye wakabambila ne, Nuenu bena lubombo, bulelela, Yeshaya wakamba bualu buenu, wakafunda dî ne, Bantu aba badi bannemeka ne mishiku yabo, Kadi mitshima yabo kayena kundi, idi kule. Badi bantendelela tshianana, Badi bayisha bantu diyisha dia mikenshi ya bantu. Nudi nulekela mukenshi wa Nzambi, nudi nulonda tshilele tshia bantu. Yeye wakabambila ne, Bulelela, nuakuvuisha mukenshi wa Nzambi bu wa hatuhu, bualu bua nuenu kulonda tshilele tshienu. Mose wakamba ne, Unemeke tatuʼebe ne mamuʼebe; yeye wakamba kabidi ne, Udi uhetula tatuʼandi anyi mamuʼandi afue biandi bulelela. Kadi nuenu nudi nuamba ne, Biambila muntu tatuʼandi anyi mamuʼandi ne, Tshintu tshiwakadi kuangata tshidi Kôbana, kukudimuna kua muaku ne, Ntshidi tshiha Nzambi, kanuena nuitabusha bua yeye kukuatshisha tatuʼandi anyi mamuʼandi; nunku nudi nuona dî dia Nzambi bualu bua tshilele tshienu tshinuakuyisha bantu; nuenu nutu nuenza malu makuabo a bungi bu bualu ebu. Yesu wakabikila tshisumbu tshia bantu kabidi, wakabambila ne, Buonso buenu unvuai, numanye bimpe; tshintu tshionso tshidi anu hamʼbidi ha muntu, biabuelatshi munda muandi, katshiena tshimanye mua kumubihisha; kadi malu adi aluhuka munda mua muntu ngadi amubihisha. [ ] Yesu wakashîa bantu ku mbelu, wakabuela mu nsubu, bayidi bandi bakamuebesha bualu bua lusumuinu elu. Yeye wakabakonka ne, Nuenu kabidi kanuena bamanye bualu ebu, anyi? Kanuena bamanye ne, Tshintu tshionso tshidi hamʼbidi handi, biabuelatshi munda mua muntu, katshiena tshimanye mua kumubihisha? Bualu bua katshiena tshiya mu mutshima, tshidi tshiya mu difu, tshidi tshiubibua. Bualu bua wakamba dî edi, yeye wakalengesha bintu bionso bia kudia. Wakamba kabidi ne, Tshidi tshiluhuka munda mua muntu ntshidi tshimubihisha. Mu mitshima ya bantu mudi muluhuka meshi mabi ne tshiendenda ne buibi ne kushiha kua bantu ne masandi ne lukuka lua biuma ne malu mabi ne mashimi ne bulobo ne disu dibi ne bihendu ne diambu ne buhote; malu mabi â onso adi aluhuka munda mua muntu, ngadi amubihisha. Yesu wakumukaku, wakaya mu nseke ya Tulo ne Sidona. Wakabuela mu nsubu, kakasua muntu amanye ne, Udimu; kadi yeye kakamanya mua kusokoma. Mukashi wakadiku, muanʼandi mukese wa bakashi wakadi ne nyuma wa bukoya munda; hakunvua mukashi lumu lua Yesu, wakalua, wakadiela ku makasa andi. Mukashi au wakadi muntu wa tshisamba tshia bende tshia Bena Suliafoinike. Wakamutendekena ne, Umusha demon munda mua muanʼanyi. Yesu wakamuambila ne, Bana bûkute diambedi; bualu bua kambimpe bia kuangata bidia bia bana kuelela mbua. Kadi mukashi wakandamuna ne, Bulelela, Mukelenge; kadi mbua idi munshi mua mesa itu yadia nkototo idi bana bamatshisha hanshi. Yeye wakamuambila ne, Bualu bua dî edi ya biebe, demon wakumana kumuka munda mua muanʼebe. Wakaya kuandi, wakasangana muana muladika ha bulalu, demon mumane kuluhuka. Yesu wakumuka mu nseke ya Tulo, wakahitshila mu Sidona ne mu nseke ya Dekapoli, wakafika ku dishiba dia Galela. Bakalua kudiye ne muntu wakadi ne mahaha, wakadi kabidi ne tshikukumina; bakamutendekena ne, Umulenge tshianza. Yesu wakaya nʼandi ha nkayandi, bantu bakuabo bakashala, wakabuesha minu mu matshu andi, wakatuila lute, wakamulenga ku ludimi; wakatangila mulu, wakahumuna, wakamuambila ne, Efata, udi bu Ikale majibuke. Matshu andi akajikuka lukasa, tshiakadi tshisuika ludimi luandi tshiakusuluka lukasa, wakakula bimpe. Wakabambila bikole ne, Kanuambidi muntu; kadi hakabambilambileye bikole nunku, bobo bakatamba kutangalasha lumu. Bakatamba kukema ne, Wakenza malu onso bimpe, yeye wakunvuisha bakadi ne mahaha, wakakuisha bakadi tumama. Mu matuku au tshisumbu tshinene tshia bantu tshiakadiku kabidi, kabakadi ne tshia kudia; Yesu wakabikila bayidi bandi, wakabambila ne, Ndi ne bantu aba luse, bualu bua bobo bakusomba nʼanyi matuku asatu, kabena ne tshia kudia; binabatuma kuabo ne nsala, nebahange mu nshila; bakuabo mbafume kule. Bayidi bandi bakamukonka ne, Muntu udi mumanye mua kukutshisha bantu aba mu muaba eu wa tshihela kudi kunyi? Yeye wakabakonka ne, Nudi ne mitanda bungi munyi? Bakamba ne, Muanda mutekete. Yeye wakambila tshisumbu tshia bantu ne, Shikamai hanshi; wakamema mitanda muanda mutekete, wakatendelela Nzambi, wakatshibula, wakaifila mu bianza bia bayidi bualu bua kuitekabo ku mpala kua bantu; bakateka ku mpala kua bantu. Bakadi kabidi ne tushiha tukese; hakatendeleleye Nzambi, wakamba ne, Nututeke ku mpala kua bantu. Bakadia, bakûkuta; bakangula bihesa bia bidia biakashala bisaka muanda mutekete biule tente. Bakadi bu binunu binai; wakabatuma kuabo. Wakabuela ne bayidi bandi mu buatu, wakalua mu nseke ya Dalamanuta. Bafalese bakalua, bakabanga kumukonka malu, bamuteta munda ne, Utuleshe tshimanyinu tshia mu diulu. Yeye wakahumuna munda munda, wakamba ne, Ba mu tshikondo etshi badi bakebela tshimanyinu tshinyi? Bulelela, ndi nuambila ne, Kabena baha ba mu tshikondo etshi tshimanyinu. Yeye wakabashia, wakabuela mu buatu kabidi, wakaya dishia. Muoyo wakabahua bua kuangata mitanda ya bidia; bakadi mu buatu anu ne mutanda umue. Yeye wakabambila bikole ne, Tangilai bimpe, nudimukile luevene lua Bafalese ne lua Helode. Bobo bakambilangana ne, Buakuambileye nunku mbua tuetu katuakangata mitanda ya bidia, Hakamanya Yesu bualu ebu, wakabakonka ne, Nudi nuambidilangana ne, Mbua tuetu katuakangata mitanda ya bidia, tshinyi? Kanuena bunvue bimpe tô ne katataka, anyi? Kanuena bamanye? Mitshima yenu idi mikole, anyi? Nudi ne mesu, kamina numona? Nudi ne matshu, kanuena nunvua? Kanuena nuvuluka? Hanakatshibuila bantu binunu bitanu mitanda itanu, nuakangula bisaka bungi munyi biule tente ne bihesa? Bakamuambila ne, Dikumi ne bibidi. Hanakatshibuila bantu binunu binai mitanda muanda mutekete, nuakangula bisaka bungi munyi biule tente ne bihesa? Bakamuambila ne, Muanda mutekete. Yeye wakabakonka ne, Kanuena nujingulula bimpe tô ne katataka, anyi? Bakalua ku Bete-saîda. Bakalua kudiye ne mufofo, bakamutendekena ne, Umulenge tshianza. Wakakuata mufofo ku tshianza tshiandi, wakaluhuka nʼandi mu musoko; hakamutuileye lute mu mesu andi, wakamulenga bianza, wakamukonka ne, Udi umona tshintu, anyi? Hakatangila mufofo mulu, wakamba ne, Ndi ntangila bantu; ndi mbamona benda bu mitshi. Wakamulenga bianza ku mesu andi tshiakabidi; mufofo wakatangila talalâ, wakatabala kabidi, wakamona bintu bionso bimpe. Yesu wakamutuma kuandi ne, Kubuedi mu musoko. Yesu ne bayidi bandi bakaya mu misoko ya Kaisalia wa Filipoi; yeye wakakonka bayidi bandi mu nshila ne, Bantu badi hangamba meme ne, Nganyi? Bakamuambila ne, Bakuabo badi bamba ne, Yeye udi Yone Mubatiji; bakuabo ne, Yeye udi Eliya; bakuabo ne, Yeye udi muprofete. Wakabakonka ne, Kadi nuenu nudi nungamba ne, Meme ndi nganyi? Petelo wakamuandamuna ne, Wewe udi Kilisto. Yeye wakabambila bikole ne, Kanungambi kudi muntu mukuabo. Yeye wakabanga kumanyisha bayidi bandi ne, Budi Muana wa muntu nʼabu mbua kukengeshibua makenga a bungi, ne bua kuedibua kudi bakulu ne kudi bakuidi banene ba Nzambi ne kudi bafundi, ne bua kushihibua, ne bua kubika hahita matuku asatu. Yeye wakajukuila bantu bonso dî edi. Petelo wakaya ne Yesu, wakabanga kumubela. Kadi Yesu wakatshinguluka; hakamoneye bayidi bandi, wakabela Petelo ne, Satana, yila ku nyima kuanyi, bualu bua wewe kuena welangana meshi a malu a Nzambi, udi welangana meshi anu a malu a bantu. Yesu wakabikila tshisumbu tshia bantu ne bayidi bandi, wakabambila ne, Biasua muntu kundonda, adihidie, ambule mutshi wandi mutshiamakane, andonde. Bualu bua wasua kusungila muoyo wandi neaujimishe; wajimisha muoyo wandi bua bualu buanyi ne bua lumu luimpe neausungile. Biasumba muntu buloba buonso ku muoyo wandi, mushinga wandi muimpe udi hanyi? Muntu udi ne tshintu kai tshia kushintakasheye bua kuangateye muoyo wandi kabidi? Muntu yonso udi unfua meme ne mei anyi bundu mu tshikondo etshi tshia masandi ne tshia malu mabi, Muana wa muntu neamufue yeye bundu, halueye ne banjelo ba tshijila mu butumbi bua Tatu wandi. Yesu wakabambila ne, Bulelela, ndi nuambila ne, Bakuabo badi bimana aha kabena bafua tô ne hamonabo bukelenge bua Nzambi bulua ne bukole buabu. Hakahita matuku asambombo, Yesu wakangata Petelo ne Yakobo ne muanʼabo Yone, wakabanda nʼabo ku mukuna mule, bobo nkayabo; yeye wakakudimuka ku mesu kuabo; bilulu biandi biakengelela, biakadi bitoke tô, buvu ba bilulu bonso ba ha buloba kabena bamanye mua kubitokesha nunku. Eliya ne Mose bakamueneka kudibo; bakadi bayikila ne Yesu. Petelo wakandamuna Yesu ne, Labi, hatudi kunoko mbimpe, tuenzai bitanda bisatu, tshikuabo ntshiebe, tshinga ntshia Mose, tshikuabo ntshia Eliya. Yeye kakamanya dî dia kubakudimuna, bualu bua bobo bakadi batshina. Ditutu diakalua, diakababuikila, dî diakaluhuka mu ditutu ne, Eu udi Muanʼanyi munanga, munvuilai. Hakakenzakanabo lukasa, kabakamona muntu mukuabo, anu Yesu nguakadi nʼabo. Hakadibo bahueka ha mukuna, yeye wakabambila bikole ne, nuambidi muntu mukuabo bualu bunuakumona tô ne habika Muana wa muntu ku lufu. Bakateka di edi munda muabo, bakadi bakonkangana ne, Kubika ku lufu kudi munyi? Bakamukonka ne, Bafundi batu bambila tshinyi ne, Budi Eliya nʼabu mbua kudianjileye kutua diambedi? Yesu wakabambila ne, Bulelela, Eliya udi ulua diambedi, udi ulongolola bintu bionso bu muakadibi diambedi; bakafundila Muana wa muntu tshinyi ne, Neakenge makenga a bungi, nebamuhetule? Kadi meme ndi nuambila ne, Eliya wakumana kulua, bakumuenzela bualu buakasuabo, ba muakadibo bamufundile. Hakaluabo kudi bayidi, bakatangila tshisumbu tshinene tshia bantu tshibunguile ne bafundi babakonka malu. Hakamumona bantu, bakatamba kukema, bakaya kudiye lukasa, bakamuela muoyo. Yeye wakabebesha ne, Nudi nubakonka tshinyi? Muntu wa mu tshisumbu wakamuandamuna ne, Muyishi, nakulua kûdi ne muanʼanyi mulume, yeye udi ne nyuma mubi wa kamama; kuonso kudiye umuendesha utu wamututa hanshi; muana utu wahatuka lututu ku mishiku, utu wasumakana mena, udi unyanganyanga; nakulomba bayidi bebe mua kumushabo nyuma, kadi bobo kabakamanya mua kumumusha. Yesu wakabandamuna ne, Nuenu ba tshikondo etshi tshia buhidia, nenshale nʼenu musangu bule munyi? Nentate nʼenu musangu bule munyi? Luai nʼandi kundi. Bakalua nʼandi kudiye; hakamumoneye, nyuma mubi wakamuhaluisha bikole; muana wakadikuma hanshi, wakabunguluka, wakahatuka lututu ku mishiku. Yesu wakakonka tatu wandi ne, Bualu ebu buakulua kudi muana musangu bule munyi? Yeye wakandamuna ne, Hakadiye muana. Misangu ya bungi budi bumuela mu kahia ne mu mai bua kumushiha; kadi biwamanya mua kuenza bualu, utufue luse, utukuatshishe. Yesu wakamuambila ne, Binamanya mua kuenza bualu! Bitabusha muntu, malu onso adi mua kumuenzekela. Tatu wa muana wakela dî diandi lukasa ne, Ndi ngitabusha; unkuatshishe, umane mpata yanyi. Hakamona Yesu bantu ba bungi bunguila lukasa, wakabela nyuma wa bukoya, wakamuambila ne, Wewe nyuma wa kamama ne wa mahaha, ndi nku buluila ne, Umuka munda muandi, kubuedimu kabidi. Nyuma wakela dî bikole, wakahaluisha muana bikole, wakumuka munda muandi; muana wakadi bu muntu mufue; bantu ba bungi bakamba ne, Wafu. Kadi Yesu wakamukuata ku tshianza, wakamubisha, wakabika. Hakabueleye mu nsubu, bayidi bandi bakamukonka nkayabo ne, Kadi tuetu tuakuhangila mua kumumusha bua tshinyi? Yeye wakabambila ne, Mushindu eu udi mumanye mua kumuka anu ku ditendelela. Bakumukaku, bakahitshila mu Galela. Yesu kakasua bantu bamanye bualu ebu. Yeye wakadi uyisha bayidi bandi ne, Nebafile Muana wa muntu mu bianza bia bantu, nebamushihe; hamushihabo, yeye neabike kabidi, hahita matuku asatu. Kadi bobo kabakamanya mei au, bakatshina mua kumukonka. Bakalua ku Kapênuma; hakadiye mu nsubu, wakabakonka ne, Hanuakadi mu nshila, nuakuelangana mpata ya tshinyi? Bakahua, bualu bua bobo bakadi belangana mpata mu nshila ne, Udi mutambe bakuabo nganyi? Yeye wakashikama, wakabikila bayidi dikumi ne babidi, wakabambila ne, Biasua muntu kuhita ku mpala, yeye neashale ku nyima kua bonso, neikale muena mudimu wa buonso buabo. Yeye wakangata muana mukese, wakamushikika munkatshi muabo, wakamuambula mu maboko andi, wakabambila ne, Witabusha muana mukese nunku mu dina dianyi udi ungitabusha meme; wangitabusha meme, kena ungitabusha meme nkayanyi, udi witabusha udi muntume. Yone wakambila Yesu ne, Muyishi, tuakutangila muntu umusha bademon munda mua bantu mu dina diebe; tuakumukanda bualu bua yeye kakadi utulonda. Kadi Yesu wakamba ne, Kanumukandi; bienza muntu bualu bua kukema mu dina dianyi, yeye kena mumanye mua kumpetula lukasa. Udi kai utuhidia udi nʼetu. Wanuha luhanza lua mai a kunua, bualu bua nuenu nudi ba Kilisto, bulelela, ndi nuambila ne, Kena uhanga kuangata difutu diandi. Kadi bialenduisha muntu umue wa mu bantu aba bahuekele, biakadi kutamba buimpe kumusuika dibue dinene dia kuhela nʼadi mu nshinga muandi, kumuela mu mai manene. Biakulenduisha tshianza tshiebe, watshikosa; bua wewe kubuela mu muoyo ne tshilema kudi kutamba bua wewe kuya mu Ngena ne bianza biebe bibidi, mu kahia kadi kakai kajima tshiendelele. [ ] Biakulenduisha dikasa diebe, wadikosa; bua wewe kubuela mu muoyo uzobela kudi kutamba bua wewe kuedibua mu Ngena ne makasa ebe abidi. [ ] Biakulenduisha disu diebe, wadimasha; bua wewe kubuela mu bukelenge bua Nzambi ne disu dimue kudi kutamba bua wewe kuimashibua mu Ngena ne mesu abidi; amu tshikusu tshiabo katshiena tshitua, kahia kakena kajima. Bu mudibo batuisha bintu ne lueho, nunku muntu yonso neatuishibue ne kahia. Lueho ludi luimpe; kadi hatshihala lueho kutua kualu, nenulutuishe kabidi ne tshinyi? Ikalai ne lueho munda muenu, ikalanganai talalâ. Yesu wakabikaku, wakalua mu nseke ya Yudaya ne dishia dia Yadene; bantu ba bungi bakalua kudiye kabidi: yeye wakabayisha bu muakadiye wenza matuku onso. Bafalese bakalua kudiye, bakamukonka ne, Biahidia mulume mukashi wandi neashihe mukenshi wa Nzambi, anyi? Bakamuteta munda nunku. Yeye wakabandamuna, wakabakonka ne, Mose wakanuambila tshinyi? Bakamba ne, Mose wakitabusha bualu bua kufunda mukanda wa kushiha dibaka, ne bua kumumusha. Kadi Yesu wakabambila ne, Yeye wakanufundila mukenshi eu bualu bua bukole bua mitshima yenu. Kadi ku tshibangidilu tshia bufuki Nzambi wakabafuka mulume ne mukashi. Bua bualu ebu mulume neumuke kudi tatuʼandi ne kudi mamuʼandi, nealamate mukashi wandi; bubidi buabo nebalue mubidi umue; nunku kabena bantu babidi kabidi, badi mubidi umue. Muntu kahanduludi tshidi tshibumbakanya kudi Nzambi. Hakayabo mu nsubu, bayidi bandi bakamukonka bualu ebu kabidi. Yeye wakabambila ne, Wumusha mukashi wandi, habakeye mukuabo, yeye udi wenda masandi, nunku udi wenzela mukashi wandi bibi; biahidia mukashi bayandi, biayeye ku dibaka dikuabo, mukashi eu udi wenda masandi. Bakadi balua ne bana bakese kudiye bua yeye kubalenga tshianza tshiandi; kadi bayidi bakabasamina. Hakamona Yesu bualu ebu, wakadi ne tshishi, wakabambila ne, Nuitabushe bua bana bakese kulua kundi, kanubakandi; bualu bua bukelenge bua Nzambi mbua badi bu bana. Bulelela, ndi nuambila ne, Muntu yonso udi kai witabusha bukelenge bua Nzambi bu muana mukese, kena ubuelamu. Yeye wakabambula mu maboko andi, wakabasankisha, wakabalenga bianza. Hakadiye uya mu nshila, muntu wakalua lubilu kudiye, wakamutuila binu hanshi, wakamukonka ne, Muyishi muimpe, nengenze tshinyi mua kuhiana muoyo wa tshiendelele? Yesu wakamuambila ne, Udi umbikidila meme ne, Muimpe, tshinyi? Kakuena munga muimpe anu Nzambi. Wewe udi mumanye mikenshi ya Nzambi ne, Kushihi muntu, kuendi masandi, kuibi, kudingidi muntu, kunyengi tshintu tshia muntu, unemeke tatuʼebe ne mamuʼebe. Nsongalume wakamuambila ne, Muyishi, nakenzenza malu â onso, hanakadi muana mukese tô ne katataka. Yesu wakamutangila talalâ, wakamunanga, wakamuambila ne, Bualu bumue mbukushala; ya biebe, uhane biudi nʼabi bionso, ubihe bantu bahele, newikale ne bintu mu tshibutshilu mu diulu, ulue kundonda meme. Hakunvueye dî edi, wakabungama, wakaya unyingalala; bualu bua yeye wakadi ne bintu bia bungi. Hakakenzakana Yesu, wakambila bayidi bandi ne, Ha kubuela kua bantu badi ne bintu bia bungi mu bukelenge bua Nzambi mbualu bukole. Dî edi nunku diakakemesha bayidi bandi. Kadi Yesu wakabandamuna ne, Bana banyi, ha kubuela kua bantu badi beyemene biuma mu bukelenge bua Nzambi mbualu bukole. Kubuela kua kamelu mu disu dia kashingi kudi kutamba kubuela kua muntu mubanshi mu bukelenge bua Nzambi butekete. Bakatamba kukema, bakamukonka ne, Ahu udi mumanye mua kusungidibua nganyi? Yesu wakabajosha talalâ, wakabambila ne, Bantu kabena bamanye mua kuenza bualu ebu, kadi Nzambi udi mumanye mua kuenza malu onso. Petelo wakabanga kumuambila ne, Ahu tuetu tuakushia malu etu onso, tuakukulonda. Yesu wakamba ne, Bulelela, ndi nuabila ne, Muntu yondo wakushila nsubu wandi, anyi nana babo balume, anyi bana babo bakashi, anyi mamuʼandi, anyi bana babo bana bandi, anyi madimi andi, bua bualu buanyi ne bua lumu luimpe, katataka yeye neahete bintu misangu lukama bitambe bia diambedi mu tshikondo etshi, nsubu ne bana babo balume ne bana babo bakashi ne bamamu ne bana ne madimi, ne makenga kabidi; halua tshikondo tshikuabo, neahete muoyo wa tshiendelele. Kadi ba bungi badi ku mpala katataka nebikale ku nyima; badi ku nyima katataka nebikale ku mpala. Bakadi mu nshila babanda ku Yelushalema; Yesu wakadi uya ku mpala kuabo; bakadi bakema; bakuabo bakadi balonda ku nyima bakatshina. Hakadiye ne bayidi dikumi ne babidi nkayabo, wakabanga kubamanyisha malu alua kudiye, wakabambila ne, Unvuai, tudi tubanda ku Yelushalema; nebafile Muana wa muntu mu bianza bia bakuidi banene ba Nzambi ne bafundi; bobo nebamuhishe ne lufu, nebamufile mu bianza bia bisamba bia bende; bamuseke, bamutuile mate, bamukume, bamushihe: kadi hahita matuku asatu, yeye neabike kabidi. Yakobo ne Yone, bana ba Zebedayo, bakalua kudi Yesu, bakamba ne, Muyishi, tudi basue wewe utuenzele malu onso atuakulomba. Yeye wakabakonka ne, Nudi basue meme nuenzele tshinyi? Bakamuambila ne, Witabushe bua tuetu kushikama nʼebe mu butumbi buebe, mukuabo ku tshianza tshiebe tshia balume ne mukuabo ku tshianza tshiebe tshia babashi. Kadi Yesu wakabambila ne, Kanu enu bamanye tshinudi nulomba. Nudi bamanye mua kunua luhanza lundi nua, anyi? Ne mua kubatijibua ne dibatiza diambatizabo nʼadi, anyi? Bobo bakandamuna ne, Tudi bamanye. Yesu wakabambila ne, Luhanza lundi nua, nenulunue kabidi; nebanubatize ne dibatiza didibo bambatiza nʼadi; kadi kushikama ku tshianza tshianyi tshia balume anyi ku tshianza tshianyi tshia bakashi kambualu buanyi bua kuha muntu; kushikama nunku kudi bua bakabulongoluelabo kudi Nzambi. Hakunvua bayidi diku mi bualu ebu, bakadi ne Yakobo ne Yone tshishi. Yesu wakababikila, wakabambila ne, Nudi bamanye ne, Bakusungudibua bua kulumbulula malu a bantu ba bisamba bia bende badi babalongoluela malu abo ne diambu, bantu babo badi banene badi babakokesha. Kadi bualu buenu kabuena nunku; wasua kulua munene munkatshi muenu neikale muena mudimu wenu; wasua kuikala ha mutu henu neikale muhika wa buonso buenu. Muana wa muntu kabidi kakuluila bua bantu bamukuatshile mudimu, wakuluila bua kubakuatshila mudimu, ne bua kufila muoyo wandi bua kuhikula nʼau bantu ba bungi. Bakalua ku Yeleko; hakadiye uluhuka mu Yeleko ne bayidi bandi ne bantu bakuabo ba bungi, muana wa Timayo, dina diandi Bâtimayo, mufofo mulombi, wakadi ushikama kukala kua nshila. Hakunvueye ne, Udi Yesu, muena Nazaleta, yeye wakela dî diandi bikole ne, Yesu, muana wa Davidi, unfue luse. Bantu ba bungi bakamukanda ne, Hua; kadi yeye wakatamba kuela dî diandi bikole ne, Wewe muana wa Davidi, unfue luse. Yesu wakimana, wakamba ne, Numubikile, Bakabikila muntu mufofo, bakamuambila ne, Kolesha mutshima webe, bika, yeye udi ukubikila. Wakimasha tshilulu tshiandi, wakabika lubilu, wakalua kudi Yesu. Yesu wakamukonka ne, Udi musue meme nkuenzele tshinyi? Muntu mufofo wakamuambila ne, Muyishi wanyi, mesu anyi atabale. Yesu wakamuambila ne, Ya biebe; ditabusha diebe diakukusungila. Wakatabala lukasa, wakamulonda mu nshila. Hakafikabo ha buihi ne Yelushalema, ku Bete-fage ne Betania, ku Mukuna wa Oleve, Yesu wakatuma bayidi bandi babidi, wakabambila ne, Yai mu musoko udi buludiludi bunudi batangile; hanuabuelamu, nenumone muana wa nyama wa mpunda musuika, muntu kena muanze kushikama ha nyima handi; numusulule, nulue nʼandi. Bianukonka muntu ne, Nudi nuenzela nunku tshinyi? Numuambile ne, Mukelenge udi nʼandi bualu; yeye neamuhingishe lubilu. Bakaya, bakasangana muana wa mpunda musuika mu musesu ku mbelu kua nsubu; bakamusulula. Bakuabo bakadi bimana aha bakabakonka ne, Nudi nusuluila muana wa mpunda tshinyi? Bakabambila bu muakamba Yesu; bakitabusha ne, Yai bienu. Bakalua ne muana wa mpunda kudi Yesu, bakateka bivualu biabo ha nyima handi, Yesu wakashikama ha nyima handi. Bantu ba bungi bakâdisha bivualu biabo mu nshila, bakuabo bakâdisha bisala bia mitshi biakakosabo mu madimi. Bakadi baya ku mpala kuandi ne bakadi bamulonda ku nyima kuandi bakela mbila ne, Hosana, udi ulua mu dina dia Mukelenge atumbishibue; bukelenge budi bulua butumbishibue, bukelenge bua tatu wetu Davidi; Hosana mu diulu! Yesu wakabuela mu Yelushalema, mu ntempelo mene; hakatangileye malu onso akadimu, bualu bua diba diakamba kubuela, yeye wakaluhuka, wakaya ne bayidi dikumi ne babidi ku Betania. Hakatshiabu, bakaluhuka mu Betania, Yesu wakadi ne nsala. Hakamoneye mutshi wa nfigi kuakua muikale ne mabeshi, wakalua kudiu ne, Mpete mamuma; hakalueye, wakasangana mutshi mutuhu, anu mabeshi, bualu bua katshiakadi tshikondo tshia nfigi. Yeye wakambila mutshi ne, Muntu kadî dimuma diebe tô tshiendelele. Bayidi bandi bakunvua dî edi. Bakalua ku Yelushalema, Yesu wakabuela mu ntempelo, wakabanga kuihata bakadi bahana bintu ne bakadi basumba bintu mu ntempelo, wakatokola mesa a bashintakashi ba mpalata, ne nkuasa ya basumbishi ba nyunyu ya nkutshi; yeye kakitabusha bua mu ntu ahitshile ne tshintu mu ntempelo. Wakabayisha ne, Kabakafunda mu Mukanda wa Nzambi ne, Nebabikile nsubu wanyi ne, Nsubu wa tshitendelelu tshia bisamba bionso, anyi? Kadi nuenu nuakumuvuisha muaba wa banyengi. Bakuidi banene ba Nzambi ne bafundi bakunvua dî edi, bakakeba mua kumushiha; bakamutshina, bualu bua diyisha diandi diakakemesha bantu bonso. Ku dituku ku dituku wakadi uhatuka mu musoko, hakamba diba kubuela. Hakadibo bahita mu nshila dinda, bakamona mutshi wa nfigi mufubidile tô ne ku miji yau. Hakuvuluka Petelo, wakambila Yesu ne, Labi, ahu mutshi wa nfigi, uwakuela mulau wakufuba. Yesu wakabandamuna ne, Nuitabushe Nzambi mene. Bulelela, ndi nuambila ne, Muntu yonso wambila mukuna eu ne, Ubishibue, wedibue mu mai manene, yeye neikale ne bualu buakulombeye bikaleye kai ne mpata munda, bikaleye witabusha ne, Bualu bundi ndomba nebulue. Nunku ndi nuambila ne, Hanuatendelela Nzambi, binuamulomba tshintu tshionso, nenutshiangate, binuikala bitabushe ne, Tuakumana kutshiangata. Hanuimana nutendelela Nzambi, nujimishile mualu bubi buandi, binuikala nʼandi tshilumbu; nunku Tatu wenu udi mu diulu neanujimishile mibi yenu. [ ] Bakalua mu Yelushalema kabidi; hakadiye utambakana mu ntempelo, bakuidi banene ba Nzambi ne bafundi ne bakulu bakalua kudiye; bakamukonka ne, Wewe udi wenza malu â ne bukokeshi kai? Wakukuha bukokeshi ebu bua kuenza nʼabu malu â nganyi? Yesu wakabambila ne, Meme kabidi nenukonke bualu bumue; binuangandamuna bimpe, nenuambile bualu bua bukokeshi bundi ngenza nʼabu malu â. Dibatiza dia Yone diakafuma kudi kunyi; mu diulu anyi kudi bantu? Nungandamune. Bobo bakelangana meshi munda munda ne, Bituamba ne, Mu diulu, yeye neatuebeshe ne, Munyi kanuakamuitabusha? Kadi bituamba ne, Kudi bantu,—bakatshina bantu, bua bantu bonso bakitabusha Yone ne, Udi muprofete. Bakandamuna Yesu ne, Katuena bamanye. Yesu wakabambila ne, Meme kabidi tshiena nuambila bua bukokeshi bundi ngenza nʼabu malu â. Yesu wakabanga kubambila malu mu nsumuinu. Muntu wakatentula mionshi ya mamuma a nvinyo mu budimi buandi, wakelela budimi luhangu lua mitshi idi isasa, wakimbamu dinu dia kukamina mamuma, wakasa nsubu wa batentekedi mule, wakabushîa mu bianza bia ba bidime, wakaya biandi ku luseke lukuabo kule. Hakalua tshidimu tshia mamuma, wakatuma muntu wandi kudi ba bidime bua kuangata mamuma a mu budimi buandi kudi ba bidime. Kadi bobo bakamukuata, bakamukuma, bakamuhingisha hatuhu. Wakatuma muntu wandi mukuabo kudibo; bakamutaha mu mutu, bakamuenzela bibi. Wakatuma mukuabo; bakamushiha; wakatuma bakuabo ba bungi; kadi ba bidime bakakuma bakuabo, bakashiha bakuabo. Yeye wakadi ne muanʼandi umue mulela, wakadiye munange; wakamutuma kudibo kunshikidilu, wakamba ne, Nebanemeke muanʼanyi. Kadi ba bidime aba bakambilangana ne, Eu udi muhianyi; tuyai, tumushihe, buhianyi nebuikale buetu. Bakamukuata, bakamushiha, bakamuimasha mu budimi. Bua bobo bakenza nunku, muena budimi nenze tshinyi? Yeye nealue kushiha ba bidime, neahe bakuabo budimi buandi. Kanuakubala dî dia mu Mukanda wa Nzambi, anyi, ne, Dibue diakahidiabo kudi bibaki ba nsubu Bakaditeka ku mutu kua ditumba; Eu mudimu wa Mukelenge, Udi bu bualu bua kukema ku mesu kuetu? Hakunvuabo dî idi dia Yesu, bakasua kumukuata, kadi bakatshina bantu; bakamanya ne, Buakueleleye lusumuinu etu mbualu buetu; bakamushia, bakaya. Bakatuma Bafalese bakuabo ne Bena Helode kudiye bua kumukuata ku mei. Hakaluabo, bakamuambila ne, Muyishi, tudi bamanye ne, Wewe kuena utshina muntu, bualu bua kuena ne bualu ne muntu, wewe udi uyisha bantu nshila wa Nzambi bulelela. Mbimpe kuha Kaisa mulambu, anyi? Netumuhe mulambu, anyi katumuhi? Kadi yeye wakamanya lubombo luabo, wakabambila ne, Nudi nuntetshila munda tshinyi? Luai ne ndenalio kunoko, nmutangile. Bakalua nʼandi. Yeye wakabakonka ne, Tshindidimbi etshi ne mei â adi mafundahu mbia nganyi? Bakamuambila ne, Mbia Kaisa. Yesu wakabambila ne, Nuhe Kaisa bintu bia Kaisa, nuhe Nzambi bintu bia Nzambi. Hakunvuabo dî edi, bakatamba kumukema. Basadoke bakahia kudiye, badi bamba ne, Dibika dia ku lufu kadienaku; bakamukonka ne, Muyishi, Mose wakafundila ne, Biafua muanʼabo ne muntu, biashîeye mukashi wandi kai ne muana, muanʼabo angate mukashi wandi, alelele muanʼabo wakafua bana. Balume ba difu dimue muanda mutekete bakadiku. Muanʼa bute wakabaka mukashi, wakafua biandi, kakashila muana; muibidi wakangata mukashi, yeye wakafua, kakashila muana; ne muisatu kabidi wakenza nunku; buonso buabo muanda mutekete kabakasua bana. Ku nyima kua bonso, mukashi wakafua kabidi. Halua dibika dia bantu ku lufu, yeye neikale mukashi wa nganyi? Wakadi mukashi wa buonso buabo muanda mutekete. Yesu wakabambila ne, Ebu mbualu bunudi nuhambukila mu nshila, kanuena bamanye Mukanda wa Nzambi ne tukole buandi. Habika bantu ku lufu kabena babaka, kabena babakibua; badi bu banjelo ba mu diulu. Kadi bualu bua bantu bafue ne bua dibisha diabo ku lufu, kanuakubala mukanda wa Mose mu luseke lua bualu bua Katshi, anyi? Nzambi wakamuambila ne, Ndi bianyi Nzambi wa Abalahama, ne Nzambi wa Isaka, ne Nzambi wa Yakoba. Yeye kena Nzambi wa bafue, udi Nzambi wa badi ne muoyo; nuenu nuakutamba kuhambuka. Mufundi mukuabo wakalua, wakuntua muakadibo bakonkangana; hakamanyeye ne, Yesu wakubandamuna bimpe, wakamukonka ne, Mukenshi kai udi mutambe mikuabo yonso? Yesu wakandamuna ne, Mukenshi wa kumudilu udi nunku: Unvua, Isalele, Mukelenge Nzambi wetu, Mukelenge udi umue; sua Mukelenge Nzambi webe ne mutshima webe wonso ne muoyo webe wonso ne lungenyi luebe luonso ne bukole buebe buonso. Mukenshi muibidi udi nunku: Sua mukuenu bu mûdi mudisue. Kakuena mukenshi mukuabo udi mutambe ei. Mufundi wakamuambila ne, Bulelela, Muyishi, wewe wakuamba bimpe ne, Yeye udi umue; yeye udiku nkayandi; kumusua ne mutshima wonso ne lungenyi luonso ne bukole tuonso, kusua kabidi mukuabo bu mudiye mudisue kudi kutamba milambu yonso ya kuosha ne nyama mishiha. Hakamanya Yesu ne, Yeye wakuandamuna dî dia lungenyi, Yesu wakamuambila ne, Wewe udi ha buihi ne bukelenge bua Nzambi. Hakashika bualu ebu, kakuakadi muntu wakadi ne bukitu bua kumukonka bualu. Hakadi Yesu uyisha bantu mu ntempelo, yeye wakabakonka ne, Bafundi badi bamba ne, Kilisto udi muana wa Davidi, munyi? Davidi mene wakamba mu Nyuma Muimpe ne, Mukelenge wakambila Mukelenge wanyi ne, Shikama ku tshianza tshianyi tshia balume Tô ne hanateka badi nʼebe lukuna munshi mua makasa ebe. Davidi wakamubikila ne, Mukelenge, yeye udi muanʼandi munyi? Kadi bantu ba tshianana ba bungi bakadi bunvua mei andi ne disanka. Hakadiye ubayisha, wakabambila ne, Nudimukile bafundi, bobo badi basue kuendakana baluate bikowelu bile, badi basue bantu babasekelele mu bisalu, badi basue nkuasa minene mu nsunagoga, badi basue miaba minene hayabo ku bidia bia disanka; bobo kabidi batu banyenga nsubu ya bakashi ba mu lufuila; batu batendelela Nzambi musangu mule anu bualu bua lubombo luabo; kuhila kuabo nekutambe bunene. Yesu wakashikama buludiludi ne tshibutshilu, wakadi utangila bu muakadi bantu bela mpalata mu tshibutshilu; bantu babanshi ba bungi bakela mpalata ya bungi. Mukashi muhele wa mu lufuila wakalua, wakelamu tukuta tubidi, tuakadi bu nsantima ibidi. Yesu wakabikila bayidi bandi, wakabambila ne, Bulelela, ndi nuambila ne, Bintu biakuela mukashi eu muhele wa mu lufuila bidi bitambe bidi bakuabo bonso bela mu tshibutshilu; buonso buabo bakuela bintu biakadibo kabai nʼabi bualu, bia ha mutu; kadi mukashi eu wakuela bintu biakadiye nʼabi bualu, bintu biandi bionso bia kudia mene mene. Hakadi Yesu uluhuka mu ntempelo, muyidi wandi mukuabo wakamuambila ne, Muyishi, mona mabue â manene ne bunene bua nsubu ya ntempelo: Yesu wakamuambila ne, Udi umona nsubu ei minene, anyi? Kabena bashîa dibue dimue ha mutu ha dikuabo, nebâsasule buonso buau. Hakadiye ushikama ku mukuna wa Oleve buludiludi ne ntempelo, Petelo ne Yakobo ne Yone ne Andele bakamukonka nkayabo ne, Utuambile bualu, malu â nealue dituku kai? Tshimanyinu tshia malu â ne akadi ha kulua ntshinyi? Yesu wakabanga kubambila ne, Nuende badimuke, muntu kanuhambuishi. Ba bungi nebalue mu dina dianyi, bamba ne, Meme nyeye mene; nebahambuishe bantu ba bungi. Hanunvua bualu bua nvita ne ngumu ya nvita, kanuhampakanyi; malu au nealue, kadi nshikidilu kena muanze kulua. Tshisamba tshikuabo netshiluangane ne tshinga, bukelenge bukuabo nebuluangane ne bunga, buloba nebukanke ku nseke ne ku nseke, biole nebikaleku; malu au adi tshibangidilu tshia kanyinganyinga kakole. Nuende badimuke, bualu bua bantu nebanufile kudi balumbuludi babo, nebanukume mu nsunagoga yabo, nenuimane ku mesu kua ba-ngovena ne ku mesu kua banfumu bua bualu buanyi, nenuikale bu tshimanyishilu ku mesu kuabo. Nebambile bisamba bionso lumu luimpe diambedi. Hayabo nʼenu ku tshilumbuluidi, hanufilabo, kanutambi kuelangana meshi diambedi ne, Netuambe tshinyi? Nuambe bualu buanuhabo kudi Nyuma Muimpe diba adi; nuenu kanuena nuamba, Nyuma Muimpe udi wamba. Muanʼabo ne muntu neafile muanʼabo ku lufu, tatu neafile muanʼandi, bana nebatombokele batatuʼabo ne bamamuʼabo, nebabashiheshe. Bantu bonso nebikale nʼenu lukuna bua dina dianyi; kudi wananukila tô ne kunshikidilu neasungidibue. Kadi hanuamona tshinyanga tshia dibutuka tshimane mu muaba Udi kawi watshi (udi ubala bualu ebu amanye biandi), ha diba adi badi mu Yudaya banyemene ku mikuna; udi ha mutu ha nsubu katuluki mu nsubu muandi bua kuangata bintu bidimu; udi mu budimi kahinganyi bua kuangata tshikowelu tshiandi. Kadi dikenga dikole nedikale kudi badi ne mafu ne kudi badi bâmusha bana mabele mu matuku au. Nulombe Nzambi ne, Bualu ebu kabutu mu tshidimu tshia mashika. Matuku au neikale dikenga dikole, ku tshibangidilu tshia bufuki buakafuka Nzambi tô ne katataka kakuakadi dikenga bu edi, kadiena dilua kabidi tshiendelele. Bu Mukelenge kai mukeheshe matuku au, muntu umue kakadi kuhanduka; kadi yeye wakukehesha matuku au bualu bua bantu bandi bakusunguleye. Bianuambila muntu ne, Kilisto udi aha, anyi, Udi kuakua, kanumuitabushi; bualu bua ba-Kilisto ba mashimi nebalue, ne baprofete ba mashimi, nebaleshe bantu bimanyinu ne malu a kukema bua kuhambuisha badibo basungula kudi Nzambi mene, biamanyabo mua kuenza nunku. Dimukai bienu, nakunuambila malu onso diambedi. Mu matuku au, hashika dikenga, diba nedifikuluke, ngondo kena ukenka, mitoto neituke mulu, neihone, nebanyukule bukole buakadi buendesha bintu ebi mu diulu. Hashishe, nebamone muana wa muntu ulua mu matutu ne bukole buandi bunene ne butumbi buandi. Hashishe kabidi, yeye neatume banjelo bandi, neasangishe bakusunguleye ba ku mpehele inai, kunfudilu kua buloba tô ne kunfudilu kua diulu. Nuyile lusumuinu lua mutshi wa nfigi: hatoloka lutonga luau, hasampila mabeshi alu, nenumanye ne, Tshidimu tshia mayowa tshidi ha buihi; nunku nuenu kabidi hanuamona malu â onso alua, nenumanye ne, Yeye udi ha buihi, udi ku mbelu mene mene. Bulelela, ndi nuambila ne, Bantu ba tshikondo etshi kabena bashika tô ne hashika malu â onso. Diulu ne buloba nebijimine, kadi mei anyi kêna ajimina. Kadi bua dituku adi ne ha diba adi kakuena muntu udi mumanye, banjelo mene mene ba mu diulu kabena bamanye, Muana kena mumanye, anu Tatu udi mumanye. Dimukai, nutabale bimpe, nutendelele Nzambi; bua kanuena bamanye dituku adi haluadi. Bualu ebu budi bu muntu wakaya ku luendu ku luseke lukuabo; wakashîa nsubu wandi, wakabanyina bantu bandi bukokeshi, muntu mudimu wandi muntu mudimu wandi, wakambila kabidi mulami wa ku tshibi ne, Udimuke. Nuenu nudimuke; bua kanuena bamanye dituku dialua muena nsubu, ne ndilolo, ne mundankulu, ne mpasama tshitala tshiambedi, ne ndinda; bialueye lukasa, kalu kunusangana balale tulu. Ndi ngambila bantu bonso dî dinakunuambila ne, Dimukai. Hakahita matuku abidi, disanka dia Kuhita kua Yehowa ne dia bidia bidi kabi ne luevene diakalua; bakuidi banene ba Nzambi ne bafundi bakakeba bua kumukuata mu busokoko ne mua kumushiha; bakamba ne, Katuenji nunku mu matuku a disanka dia Kuhita kua Yehowa, diyoyo dia bantu nedijuke. Yesu wakadi mu Betania, mu nsubu wa Simona muena nsudi, hakadiye mushikame udia bidia, mukashi wakalua ne mulonda wa alabasta, mu mulondo muakadi mananashi a mushinga mutambe bukole, luenza ne nâdo mulelela; wakatshibula mulondo, wakamuela mananashi ha mutu handi. Kadi bakuabo bakadi ne tshishi, bakamba ne, Bakunyangila mananashi nunku bua tshinyi? Bakadi kuhana mananashi au ku mushinga udi mutambe ndenalio nkama isatu ya kuha bantu bahele. Bakamujiana nunku. Kadi Yesu wakamba ne, Numulekele; nudi numutatshishila tshinyi? Yeye wakungenzela bimpe. Nudi ne bahele matuku onso munkatshi muenu; nudi bamanye mua kubenzela bimpe dituku dionso dinuasua; kadi kanuena nʼanyi meme matuku onso. Mukashi eu wakuenza bu muakumanyeye mua kuenza; yeye wakungela mananashi hamʼbidi hanyi kabai banze kunjika. Bulelela, ndi nuambila ne, Mu miaha yonso ya ha buloba buonso yambabo lumu ela luimpe, nebambe kabidi bualu buakuenza mukashi eu, buikale bu tshivulukidi tshiandi. Yudasa Isakaliote wa mu bayidi dikumi ne babidi wakaya kudi bakuidi banene ba Nzambi bua kumufila kudibo. Hakunvuabo bualu abu, mitshima yabo yakasanka, bakamulaya mpalata. Nunku yeye wakakeba tshikondo tshiakane tshia kumufila mu bianza biabo. Hakalua dituku dia kumudilu dia disanka dia bidia bidi kabi biela luevene, diakashihashihabo bana ba mikoko ya Kuhita kua Yehowa, bayidi ba Yesu bakalua kudiye, bakamuebesha ne, Udi musue tuye kulongolola ha wewe kudila Kuhita kua Yehowa kudi kunyi? Yeye wakatuma bayidi bandi babidi, wakabambila ne, Yai mu tshimenga, nenusangile ne mulume utuala mulondo wa mai; numulonde; nsubu wabueleye nuambile muena nsubu ne, Muyishi udi ukonka ne, Nsubu wanyi wa buenyi unadila bidia bia Kuhita kua Yehowa ne bayidi banyi udi hanyi? Yeye neanuleshe nsubu munene wa mulu nuimana kulongolola bintu bionso; nuenu nutulongoluelemu. Bayidi babidi bakaya, bakalua mu tshimenga, bakasangana bu muakabambileye; bakalongolola Kuhita kua Yehowa. Hakabuela diba, Yesu wakalua ne bayidi bandi dikumi ne babidi. Hakadibo bashikame badia, Yesu wakamba ne, Bulelela, ndi nuambila ne, Muanʼenu mukuabo neantungile tshitungu, yeye mene udi udia nʼanyi. Mitshima yabo yakabanga kunyingalala, bakamukonka ku muntu ku muntu ne, Meme, anyi? Yeye wakabambila ne, Udi biandi wa ba dikumi ne babidi, udi utua nʼanyi tshianza mu dilonga. Bualu bua Muana wa muntu udi uya bu muakamufundabo, kadi mulau neulue kudi wakutungila Muana wa muntu tshitungu; biakadi bimpe bu muntu eu kai muledibue. Hakadibo badia, yeye wakamema mutanda wa bidia; hakatendeleleye Nzambi, wakautshibula, wakabaha, wakamba ne, Angatai bienu, etshi tshidi mubidi wanyi Wakamema luhanza; hakasakidileye Nzambi, wakabahalu; buonso buabo bakanua. Yeye wakabambila ne, Etshi tshidi mashi anyi a dihungila, akamatshila bantu ba bungi. Bulelela, ndi nuambila ne, Tshiena nua maluvu kabidi tô ne halua dituku dinanua maluvu mahia-mahia mu bukelenge bua Nzambi. Hakimbabo musambu, bakaluhuka, bakaya mu mukuna wa Oleve. Yesu wakabambila ne, Buonso buenu nenulenduke; bua bakafunda ne, Nenshihe mulami wa mikoko, mikoko neitangadike. Kadi hanabika, nenye ku mpala kuenu mu Galela. Kadi Petelo wakamuambila ne, Bialenduka bakuabo bonso, meme tshiena ndenduka. Yesu wakamuambila ne, Bulelela, ndi nkuambila ne, Lelu, butuku ebu mene, tshitala katshi tshianze kusama misangu ibidi, wewe neumpidie misangu isatu. Kadi Petelo wakamba ne bulobo ne, Bikala bualu bunkuata bua kufua nʼebe, tshiena nkuhidia. Buonso buabo bakamba nunku kabidi. Bakalua mu muaba wakadibo babikila ne, Getesemane; yeye wakambila bayidi bandi ne, Shikamai aha, hanatendelela Nzambi. Wakaya biandi ne Petelo ne Yakobo ne Yone, wakabanga kukema bikole, mutshima wandi wakatamba kunema. Yeye wakabambila ne, Mutshima wanyi udi utamba kunyingalala, lufu ludi luntonda; nushale aha, nutabale. Wakaya biandi ku mpala tshituha, wakadikuma hanshi, wakatendelela Nzambi, wakamba ne, Biwamanya mua kuenza nunku, tshituha etshi tshia diba tshimpite. Wakamba kabidi ne, Aba, Tatu, wewe udi mumanye mua kuenza malu onso; ungumushile luhanza elu; kadi bualu buenjibue bu mûdi musue, kabuenjibu bu mundi musue. Wakalua, wakabasangana balale tulu, wakakonka Petelo ne, Simona, udi mulale tulu? Wewe kuakumanya mua kutabala tshituha tshimue tshia diba? Nudimuke, nutendelele Nzambi; nunku kanuhonyi mu mateyi; mutshima udi musue nunku, kadi mubidi udi mutekete. Wakaya tshiakabidi, wakatendelela Nzambi, wakadi wamba mei momumue. Wakalua kabidi, wakabasangana balale tulu, bualu bua mesu abo akadi maneme ne tulu; kabakamanya mua kumukudimuna dî. Wakalua biandi musangu muisatu, wakabambila ne, Nudi nulala nuikisha! Kuakushika; diba diakufika! Muana wa muntu udi mufila mu bianza bia bantu babi. Bikai, tuye; tangilai, muntungidi udi ha buihi. Hakatshidi Yesu wamba nunku, Yudasa, mukuabo wabo wa ba dikumi ne babidi, wakalua ne tshisumbu tshinene tshia bantu, bakadi ne miele ne bibonge bafume kudi bakuidi banene ba Nzambi ne bafundi ne bakulu. Mutungidi wa Yesu wakabaha tshimanyinu ne, Unatuangana nʼandi mishiku, nyeye; numukuate, nuye nʼandi bimpe. Hakalueye, wakaya kudi Yesu lukasa, wakamba ne, Labi; wakatuangana nʼandi mishiku. Bakamulenga bianza, bakamukuata. Kadi mukuabo wa bakadi bimane ha buihi wakatula muele wandi; wakataha muntu wa muakuidi munene, wakamukosa ditshu. Yesu wakabakonka ne, Nuakulua ne miele ne bibonge bua kunkuata bu mudibo bakuata munyengi munyi? Nakadi nʼenu mu ntempelo ku dituku ku dituku, nyisha bantu, kanuakankuata; kadi malu â akulua bua kushikisha mei adi mafunda mu Mukanda wa Nzambi. Bayidi bandi bonso bakamushia, bakanyema. Nsongalume mukuabo wakamulonda, mudiele tshilulu tshia line ha makaya, mubidi wakadi mutuhu; bakamukuata; kadi yeye wakashîa tshilulu tshiandi tshia line, wakanyema butaka. Bakaya ne Yesu kudi muakuidi munene; bakuidi banene ne bakulu ne bafundi bakalua kusangisha nʼandi. Petelo wakadi ulonda Yesu ha bule ha bule, wakabuela mu luhangu lua muakuidi munene; yeye wakadi ushikama hamue ne tuhalai, ku dinkenka dia kahia, wota. Bakuidi banene ne balumbuludi bonso bakakeba bualu bua kubandabo Yesu bua kumushihesha; kabakabumona. Ba bungi bakamudingila, kadi mei abo kâkakanangana. Bakuabo bakimana, bakamudingila ne, Tuakunvua wamba ne, Nembumbule ntempelo eu udi muasa ne bianza; nengibake mukuabo udi kai muasa ne bianza matuku asatu. Mei abo kâkakanangana kabidi. Muakuidi munene wakimana munkatshi muabo, wakakonka Yesu ne, Wewe kuena witaba dî? Bualu ebu budi munyi budi bamonyi aba bakubanda? Kadi yeye wakahua, kakamba dî. Muakuidi munene wakamukonka ne, Wewe udi Kilisto, Muana wa Mutumbe, anyi? Yesu wakamba ne, Nmeme; nenumone Muana wa muntu mushikame ku tshianza tshia balume tshia Bukole, ulua biandi ne matutu a mu diulu. Muakuidi munene wakadihandila bilulu biandi, wakamba ne, Tudi ne bualu bua bamanyi kabidi kudi kunyi? Nuakunvua bihendu bidiye uhenda nʼabi Nzambi; nudi nuamba tshinyi? Buonso buabo bakumuhisha ne, Mbimpe bamushihe. Bakuabo bakabanga kumutuila mate, bakamubuikila ku mesu, bakamukuma bisusu, bakamuambila ne, Amba bualu bûdi umona; tuhalai tuakamuangata, tuakamukuma mikumu. Hakadi Petelo mu luhangu, umue wabo wa bakashi benji ba mudimu wa muakuidi munene wakalua; hakamoneye Petelo wota kahia wakamujosha talalâ, wakamuambila ne, Wewe kabidi wakadi ne Yesu, Muena Nazaleta. Kadi yeye wakayila ne, Tshiena mumanye bualu, tshiena ngunvua mûdi wamba: yeye wakaluhuka, wakaya ha mbelu; tshitala tshiakasama. Mukashi muenji wa mudimu wakamumona, wakabanga kuambila bakadi bimane ne, Eu nguabo. Kadi yeye wakayila kabidi. Hakahita tshituha tshihi kabidi, bakadi bimane ha buihi bakambila Petelo ne, Bulelela, wewe udi wabo, bualu bua wewe udi Muena Galela. Yeye wakabanga kudiela mulau ne kuditshiha ne, Tshiena mumanye muntu eu unudi nuamba. Hakambeye di edi, tshitala tshiakasama tshiakabidi. Petelo wakavuluka dî diakamuambila Yesu ne, Tshitala katshi tshianze kusama misangu ibidi, wewe neumpidie misangu isatu. Hakelanganeye meshi a bualu ebu, wakabanga kudila bikole. Hakatshia butuku, bakuidi banene ne bakulu ne bafundi ne balumbuludi bonso bakasangisha dî diabo, bakasuika Yesu, bakaya nʼandi, bakamufila mu bianza bia Pilato. Pilato wakamukonka ne, Wewe udi Mukelenge wa Bena Yuda, anyi? Yesu wakamuambila ne, Bûdi wamba mbulelela. Bakuidi banene bakamubanda malu a bungi. Pilato wakamukonka kabidi ne, Kuena witaba di? Unvua mudibo bakubanda malu a bungi. Kadi Yesu kakitaba kabidi dî dikuabo; Pilato wakakema. Mu disanka dia Kuhita kua Yehowa Pilato wakadi ne tshilele tshia kulekelela bantu muena lukanu umue wakalombabo. Muntu wakadi mu nsubu wa lukanu, dina diandi Balaba, musuika ne batomboke nʼandi; mu batomboki buabo bakadi bashihangane. Bantu ba bungi bakaya kudi Pilato, bakamuambila ne, Utuenzele bu mudi tshilele tshiebe. Pilato wakabakonka ne, Nudi basue meme nulekelele Mukelenge wa Bena Yuda, anyi? Yeye wakamanya ne, Bakuidi banene bakumufila bualu bua mukau. Kadi bakuidi banene bakenzesha tshisumbu tshia bantu ne, Utulekelele Balaba. Pilato wakabakonka kabidi ne, Nengenzele unudi nubikila ne, Mukelenge wa Bena Yuda, tshinyi? Bakela mbila kabidi ne, Umushihe ku mutshi mutshiamakane. Pilato wakabakonka ne, Kadi wakenza bubi kai? Bobo bakatamba kuela mbila ne, Umushihe ku mutshi mutshiamakane. Pilato wakasua kuenzela tshisumbu tshia bantu biakane, wakabalekelela Balaba; hakakumeye Yesu, wakamufila bua kumushihabo ku mutshi mutshiamakane. Masalayi akaya ne Yesu mu luhangu—luolo luakadi nsubu manene wa mukelenge; akabikilangana tshisumbu tshiau tshionso. Akamuluatshisha tshikowelu tshikunze; hakalukau tshifulu tshia meba tshia bukelenge, akamuasatshi ku mutu; akabanga kumunemekela ne, Muoyo, Mukelenge wa Bena Yuda! Akamukuma ne mulangala ku mutu, akamutuila lute, akatua binu hanshi, akamukukuila. Hakashikishau kumuseka, akamuvula tshikowelu tshikunze, akamuluatshisha bilulu biandi. Akaya nʼandi bua kumushiha ku mutshi mutshiamakane. Muntu dina diandi Simona, Muena Kulene, tatu wa Alesandelo ne Lufo, wakadi ufuma ku mpata; hakasangileye nʼabo, masalayi akamuenzesha ku bukole bua kuyeye nʼabo, mutuale mutshi mutshiamakane wa Yesu. Bakalua nʼandi ku muaba, dina diau Gologota, kukudimuna kua muaku ne, Muaba wa Kabalubalu ka mutu. Bakamuha nvinyo musangisha ne mula; kadi yeye wakabenga. Bakamukumina milonda mu bianza ne makasa ku mutshi mutshiamakane; bakabanyangana bilulu biandi, bakabielela nshobo bua kumanyabo tshiangata muntu ne muntu. Bakamukumina milonda ku mutshi mutshiamakane dinda ha tshitema. Bakafunda bubandi buakamubandabo ha mutu handi ne: Mukelenge wa Bena Yuda. Bakakumina nʼandi banyengi babidi milonda mu bianza ne ku makasa ku mitshi mitshiamakane, mukuabo ku tshianza tshiandi tshia balume, munga ku tshianza tshiandi tshia bakashi. [ ] Bahitshi ba mu nshila bakamuhenda, bakakuha mitu yabo, bakamba ne, Ka kia! Wewe muhudi wa ntempelo ne mumuibaki wa matuku asatu, udisungile, utuluke ku mutshi mutshiamakane. Bakuidi banene ne bafundi bakamuseka nunku kabidi, bakamba ne, Yeye wakadi usungila bakuabo, kena mumanye mua kudisungila. Kilisto, Mukelenge wa Isalele, atuluke biandi ku mutshi mutshiamakane, bua tuetu tumone, tumuitabushe. Bakadi nʼandi ha mitshi mitshiamakane bakamuhenda. Midima yakadi ha buloba buonso munda munya tô ne diba ha isatu. Hakafika diba ha isatu, Yesu wakela dî diandi bikole ne, Eloi, Eloi, lama sabakatani? Kukudimuna kua muaku ne, Nzambi wanyi, Nzambi wanyi, wakundekela tshinyi? Bakuabo bakadi bimaneku, hakunvuabo dî edi, bakamba ne, Yeye udi Ubikila Eliya. Mukuabo wakaya lukasa, wakûsha musukulampampa tente ne nvinega, wakaubuesha ku mulangala, wakaha Yesu ne, Nua; wakamba ne, Lekela, tumone Eliya ne walua bua kumutulula hanshi. Yesu wakela dî diandi bikole, wakahuola muoyo wandi. Tshilulu tshiakadi tshikudika mu ntempelo tshiakahandika bihesa bibidi ku mutu kuatshi tô ne kunshi; kapitene ka masalayi lukama wakadi wimana ha buihi ne Yesu; hakamoneye ne, Yesu wakuhuola muoyo, wakamba ne, Bulelela, muntu eu wakadi Muana wa Nzambi. Bakashi bakadiku kabidi, batangidile ha bule; munkatshi mua bakashi aba muakadi Malia wa ku Magadala, ne Malia mamu wa Yakobo mukese ne wa Yose, ne Salome. Hakadiye mu Galela, bakashi aba bakadi bamulonda, bamukuatshisha; bakashi bakuabo ba bungi bakadiku, bakabanda nʼandi ku Yelushalema. Hakamba diba kubuela, bualu bua dituku adi diakadi Dilongolola, diakadi ku nyima kua Lumingu lua Bayuda, Yosefe wa ku Alimataya wakalua; yeye wakadi mulumbuludi wa butumbi, wakadi mutekemene bukelenge bua Nzambi; wakaya kudi Pilato ne dikima mu mutshima, wakamulomba tshitalu tshia Yesu. Pilato wakakema ne, Ukadi mufue katataka; wakabikila kapitene ka masalayi lukama, wakamukonka ne, Ukadi mufue musangu mule, anyi? Hakamumanyisha kapitene ka masalayi bualu abu, yeye wakafila tshitalu kudi Yosefe. Yeye wakasumba tshilulu tshia line; hakamutululeye hanshi, wakamujingila tshilulu, wakamuladika mu lukita lumbula mu dibue; wakabunguluisha dibue dinene, wakadijibika ku mushiku wa mbelu wa lukita. Malia wa ku Magadala ne Malia mamu wa Yose bakamona hakamuladikabo. Hakahita dituku diabo dia kuikisha, Malia wa ku Magadala ne Malia mamu wa Yakobo ne Salome bakasumba bintu bia muhuya muimpe bualu bua kulua kumulababi. Dituku dia kumudilu dia lumingu hatshiatshia bakalua ku lukita, diba dimane kuhatuka. Bakadi bakonkangana ne, Watubunguluishila dibue didi ku lukita nganyi? Hakabandulukabo, bakamona dibue dimana kubunguluisha; diakadi ditambe bunene. Hakabuelabo mu lukita, bakamona nsongalume mushikame ku luseke lua tshianza tshia balume, muluate tshilulu tshitoke; bakakema bikole. Yeye wakabambila ne, Kanukemi; nudi nukeba Yesu Muena Nazaleta, wakashihabo ku mutshi mutshiamakane; yeye wakubika ku lufu; kena munemu; monai muaba wakadibo bamuladike! Kadi ya! bienu, nuambile bayidi bandi ne Petelo ne, Yeye neadianjile ku mpala kuenu mu Galela, nenumumoneku bu muakunuambileye. Bakumuka mu lukita, bakanyema, bualu bua lukanku ne buowa biakabakuata; kabakambila muntu dî, bua bakadi batshina. Hakabika Yesu ku lufu dinda dia dituku dia kumudilu dia lumingu, wakamueneka diambedi kudi Malia wa ku Magadala, wakumusheye bademon muanda mutekete. Yeye wakaya, wakamanyisha bakadi bikale ne Yesu, hakadibo bajinga badila. Hakunvuabo ne, Yeye udi ne muoyo, wakumueneka kudi Malia, kabakitabusha. Hakashika malu â, yeye wakamueneka mukudimuka ne munga mubidi kudi bakuabo babidi, hakadibo baya mu mpata. Bobo bakaya, bakambila bakuabo bualu ebu; kudi kabakitabusha dî diabo. Hashishe yeye wakamueneka kudi bayidi dikumi ne umue ha nkayabo, hakadibo bashikame badia bidia; yeye wakababela bualu bua buhidia buabo ne bukole bua mitshima yabo, bua bobo bakahidia kuitabusha dî dia bakamumona, hakabikeye ku lufu. Yeye wakabambila ne, Yai bienu ha buloba buonso, nuambile bionso biakafukibua lumu luimpe. Witabusha, wabatijibua, nebamusungile; wahidia, nebamuhishe. Bimanyinu ebi nebifile badi bitabushe: nebumushe bademon munda mua bantu mu dina dianyi; nebakule miaku mihia-mihia; nebakuate nyoka ne bianza, bianuabo tshintu tshia lufu, katshiena tshibasamisha; bialengabo badi ne masama bianza, nebasangale. Hakabambila Mukelenge Yesu nunku, wakangatshibua mu diulu, wakashikama ku tshianza tshikole tshia Nzambi. Bakaya, bakamba bualu bua Nzambi kuonso; Mukelenge wakabenzesha, wakajadika dî ne bimanyinu biakabalonda. Amen. Bualu bua bantu ba bungi bakabanga kufunda malu au akenjibua munkatshi muetu, akatuambilabo kudi bamonyi ne benji badi, nakuelangana meshi munda, Mukelenge Teofilo, ne, Mbimpe bia meme kabidi kukufundila malu au malondolola biakane, bualu bua meme nakualonda bimpe ku tshibangidilu tshiau tô ne katataka; bua wewe umanye ne, Malu akukumanyishabo adi malelela. Mu matuku a Helode, mukelenge wa Yudaya, muakuidi wa Nzambi wakadiku, dina diandi Zakâya, wakadi wa mu mulongo wa Abiya; mukashi wandi wakadi wa mu bana bakashi ba Alona, dina diandi Elisabeta. Bubidi buabo bakadi bakane ku mesu kua Nzambi, bakadi balonda mikenshi yonso ya Mukelenge ne mei andi, kabakadi ne bualu. Kabakadi ne muana, bualu bua Elisabeta wakadi nkumba, bubidi buabo bakadi banunu. Nunku hakadiye wenza mudimu wandi wa buakuidi ku mesu kua Nzambi mu mulongo wandi, bu muakadi tshilele tshia mudimu wa bakuidi, yeye wakasungudibua bua kubueleye mu ntempelo wa Mukelenge bua kuosha musenga wa mananashi. Hakafika diba dia kuosha musenga wa mananashi, tshisumbu tshionso tshia bantu tshiakadi tshitendelela Nzambi ku mbelu kua ntempelo. Muanjelo wa Mukelenge wakamueneka kudiye, muimane ku tshianza tshia balume tshia tshioshelu tshia mananashi. Mutshima wa Zakâya wakahandika hakamumoneye, buowa buakamukuata. Kadi muanjelo wakamuambila ne, Zakâya, kutshinyi, bualu bua bakunvua kulomba kuebe, mukashi webe Elisabeta neakulelele muana, neumuidike ne, Yone. Wewe newikale ne diese ne disanka; bantu ba bungi nebasanke bualu bua kuledibua kuandi. Yeye neikale muntu munene ku mesu kua Mukelenge; kanu biandi nvinyo ne bintu bidi bikuatangana; yeye neûshibue tente ne Nyuma Muimpe diambedi mamu wandi kai muanze kumulela. Yeye neakudimushe mitshima ya bana ba Isalele ba bungi kudi Mukelenge Nzambi wabo. Yeye neaye ku mpala kuandi ne nyuma ne bukole bia Eliya, bualu bua kuhingisha mitshima ya batatu kudi bana, ne bua kualukisha bena buhidia ku meshi a badi bakane; ne bua kulongoluela Mukelenge bantu badi ne mitshima yabo mimana kulongolola. Zakâya wakakonka muanjelo ne, Nemanye bualu ebu munyi? Bualu bua meme ndi muntu mununu, ne mukashi wanyi udi ne bidimu bia bungi. Muanjelo wakamuandamuna ne, Ndi bianyi Gabaliele, ntu ngimana ku mesu kua Nzambi; nakutumibua bua kuakula nʼebe ne bua kukuluila ne lumu luimpe. Tangila, wewe neuhue, kuena umanya mua kuakula tô ne halua dituku dialua malu â, bualu bua wewe kuakuitabusha mei anyi, neajalame dituku dialua malu au. Bantu bakadi bindila Zakâya, bakakema bualu bua yeye wakanenga musangu mule mu ntempelo. Hakaluhukeye, kakamanya mua kuakula nʼabo; bakamanya ye, Yeye wakumona tshikena kumona mu ntempelo; wakadi wakula nʼabo ne bianza biandi, wakashala kamama, Hakashika matuku a mudimu wandi, wakaya kuandi. Hakahita matuku â, Elisabeta wakimita difu; yeye wakadisokoka ngondo itanu, wakamba ne, Mukelenge wakungenzela bimpe nunku, mu matuku akadiye untangila, bualu bua kumusha bundu buanyi munkatshi mua bantu. Mu ngondo muisambombo muanjelo Gabaliele wakatumibua kudi Nzambi mu musoko wa Galela, dina diau Nazaleta, kudi mukashi wakatshidi kamama, mubangila kudi mulume, dina diandi Yosefe, wa mu tshiota tshia Davidi; dina dia mukashi au Malia. Muanjelo wakalua kudiye, wakamba ne, Muoyo, bakukufuila luse lua bungi, Mukelenge udi nʼebe. Kadi yeye wakatamba kutshina bualu bua dî edi, wakelangana meshi munda ne, Eu muoyo mungelela tshinyi? Muanjelo wakamuambila ne, Malia, kutshinyi; wewe wakusangana luse kudi Nzambi. Mona, wewe newimite difu, neulele muana mulume, neumuidike ne, Yesu; yeye neikale munene, nebamuidike dina ne, Muana wa Udi Mutambe Bunene wa mu diulu; Mukelenge Nzambi neamuhe nkuasa wa butumbi wa tatu wandi Davidi; neikale mukelenge wa nsubu wa Yakoba tshiendelele; bukelenge buandi kabuena ne tshishikidilu. Malia wakakonka muanjelo ne, Bualu ebu nebulue munyi, meme tshi muanze kumanya mulume? Muanjelo wakamuandamuna ne, Nyuma Muimpe nealue kûdi, ne bukole bua Udi Mutambe Bunene wa mu diulu nebukubuikile bu ditutu; nebidike muana wa tshijila uwalela ne, Muana wa Nzambi. Mona, Elisabeta, mukashi wa mu tshiota tshienu, yeye kabidi, wakuimita difu dia muana mulume ku bununu buandi; bakadi bamuamba ne, Udi nkumba, kadi ngondo eu nguandi muisambombo. Bualu bua kakuena dî dimue dia Nzambi didi kadî ne bukole. Malia wakamba ne, Mona, mukashi muhika wa Mukelenge; bangenzele bu muwakuamba. Muanjelo wakamushîa, wakaya biandi. Mu matuku â Malia wakabika, wakaya lukasa mu buloba bua mikuna, mu musoko wa Yuda; wakabuela mu nsubu wa Zakâya, wakela Elisabeta muoyo. Hakunvua Elisabeta muoyo wakamuela Malia, muana wakatabuluka mu difu diandi; Elisabeta wakûshibua tente ne Nyuma Muimpe; wakela dî diandi bikole, wakamba ne, Wewe udi mukashi mutambe kusankishibua, muana udi munda muebe udi muvudishila disanka. Bualu ebu buakulua kundi munyi, bua mamu wa Mukelenge wanyi wakulua kundi? Hakubuela dî dia muoyo uwakungela mu matshu anyi, muana wakutabuluka mu difu dianyi bualu bua disanka. Mukashi wakitabusha udi ne disanka, bua nebashikishe malu onso akamuambilabo kudi Mukelenge. Malia wakamba ne, Muoyo wanyi udi utumbisha Mukelenge, Mutshima wanyi wakutamba kusanka mu Nzambi, Musungidi wanyi. Yeye wakatangila buhuekele bua mukashi muhika wandi; Milongo yonso ya bantu tô ne tshiendelele neimbikile ne, Udi ne disanka. Bualu bua udi ne bukole wakungenzela malu manene; Dina diandi ndia tshijila. Luse luandi ludi ku milongo ne ku milongo Ya bantu badi bamutshina. Wakenza malu makole ne diboko diandi; Wakatangalasha badi badisua bua meshi mabi akadi mu mitshima yabo. Wakahuekesha banfumu bakadi mu nkuasa ya butumbi, Wakabandisha bantu bahuekele, Bakadi ne nsala wakabukutshisha ne bintu bimpe; Babanshi wakabahingisha hatuhu. Wakukuatshisha muntu wandi Isalele Wakubutuka bua kufuila Abalahama ne bana bandi luse tshiendelele, Bu mu akambileye bankambua betu. Malia wakasomba nʼandi bu ngondo isatu, wakahingana kuabo. Ngondo ya Elisabeta yakakumbana ya kuleleye, yeye wakalela muana mulume. Bakuandi ne bena tshiota tshiandi bakunvua ne, Nzambi wakumuvudishila luse luandi: bakasanka nʼandi. Hakalua dituku dia muanda mukulu, bakalua kutengula muana; bakamba kumuidika ne, Zakâya, bu dina dia tatuʼandi. Mamuʼandi wakandamuna ne, Nasha, bamuidike ne, Yone. Bakamuambila ne, Kakuena umena tshiota tshienu udi muidika dinu edi. Bakidikishila tatuʼandi bianza ne, Udi musue bamuidike dina kai? Yeye wakalomba mukanda wa kufundahu, wakafunda ne, Dina diandi Yone. Buonso buabo bakakema. Mukana muandi muakabuluka lubilu, ludimi luandi luakambuluka, wakakula utumbisha Nzambi. Buowa buakakuata bantu bonso bakadi ha buihi nʼabo; malu â onso akadi enda ambibua mu buloba buonso bua mikuna ya Yudaya. Bantu bonso bakaunvua bakâteka mu mitshima yabo, bakakonka ne, Eu muana neikale muana kai? Bualu bua tshianza tshia Mukelenge tshiakadi nʼandi. Tatuʼandi Zakâya, mûshibue tente ne Nyuma Muimpe, wakamba malu akadi kâi manze kulua ne, Batumbishe Mukelenge, Nzambi wa Isalele, Bua yeye wakulua kutangila bantu bandi, wakubahidia, Yeye wakutubishila lusengu lua luhandu Mu tshiota tshia muanʼandi Davidi, (Bu muakambeye mukana mua baprofete bandi ba tshijila ba kale), Luhandu luakutuhandisheye kudi badi nʼetu lukuna ne mu bianza bia bonso badi batukina. Yeye wakalesha bankambua betu luse, Wakavuluka dihungila diandi dia tshijila, Mutshihu wakatshihileye Abalahama tatu wetu Ne, Hanuasungidibua mu bianza bia badi nʼenu lukuna, Nenutendelele mu buimpe ne mu Buakane ku mpala kuanyi matuku enu onso, kanui ntshina. Ne wewe muana, nebakubikile ne Muprofete wa Udi Mutambe Bunene wa mu diulu, Bua wewe neuye ku mpala kua Mukelenge bua kumulongoluela nshila yandi, Ne bua kumanyisha bantu bandi Luhandu lua kubabuikidila mibi yabo, Bualu bua mutshima wa luse wa Nzambi wetu; nunku hatshiatshia ha kulu nehatuluile, Bua kutokeshela badi bashikame mu mîdima ne mu dileshi dia lufu, Ne bua kuendesha makasa etu mu nshila wa ditalala. Muana wakadiunda, wakakola mu mutshima wandi, wakadi biandi mu bihela tô ne ku dituku diakamuenekeye kudi Isalele. Mu matuku au Kaisa Augusto wakela mukenshi ne, Bafundishe mena a ba ha buloba bonso. Eku kuakadi kuindisha kua kumudia kuakenzabo, hakadi Kulenio ngovena wa Sulia. Bantu bonso bakaya bua kufundishabo mena abo, mutu kuabo mutu kuabo. Yosefe, kabidi, wakumuka mu Galela, mu musoko wa Nazaleta, wakabanda mu Yudaya, ku musoko wa Bayidi, udibo babikila ne, Beteleheme, bualu bua yeye wakadi wa mu nsubu wa Davidi ne wa tshiota tshiandi; wakaya nunku bua kufundishabo dina diandi ne dia Malia, wakadiye mubaka, wakadi biandi ne difu. Hakadibo aku, matuku akakumbana a kuleleye. Wakalela muanʼandi mulume, muanʼa bute, yeye wakamujingila tshilulu, wakamuladika mu tshidilu tshia nyama, bualu bua mu nsubu wa tshilala benyi kamuakadi muaba. Mu luseke alu muakadi balami ba mikoko, balala mu mpata, balama mikoko yabo mu butuku. Muanjelo wa Mukelenge wakimana ha buihi nʼabo, butumbi bua Mukelenge buakabatemena; bakatamba kutshina. Muanjelo wakabambila ne, Kanutshinyi, bualu bua nakunusua ne lumu luimpe lua disanka dinene, nedikale kudi bantu bonso; lelu bakunulelela Musungidi mu musoko wa Davidi, yeye udi Kilisto Mukelenge. Etshi ntshimanyinu kunudi ne, Nenusangane muana mujingila tshilulu, mulale mu tshidilu tshia nyama. Tshisumbu tshia masalayi a mu diulu tshiakadisangisha lukasa ne muanjelo, batumbisha Nzambi, bamba ne, Butumbi buikale kudi Nzambi mu diulu, Ditalala dikale hanshi ha buloba munkatshi mua bantu badi basankisha Nzambi. Banjelo bakabashia, bakaya mu diulu; balami ba mikoko bakambilangana ne, Tuyai ku Beteleheme tukatangile bualu ebu buakulua buakutumanyisha Mukelenge. Bakalua lukasa, bakasangana Malia ne Yosefe, ne muana mulale mu tshidilu tshia nyama. Hakamonabo bualu ebu, bakasokolola dî diakabambilabo bua muana eu. Bantu bonso bakunvua malu akabambilabo kudi balami bakakema. Kadi Malia wakalama mei â onso, wakadi wela meshi munda munda. Balami bakahingana, batumbisha Nzambi bamutendelela, bualu bua malu anso akunvuabo ne akamonabo, bu muakabambilabo. Hakakumbana matuku muanda mukulu bua kumutengulabo, bakamuidika ne, Yesu, bu muakamuidikabo kudi muanjelo kabai banze kumuimita. Hakakumbana matuku a kudiuvua kuabo, bu mudi mukenshi wa Mose wamba, bakalua nʼandi ku Yelushalema bua kumufila kudi Mukelenge (bu muakafundabo mu mikenshi ya Mukelenge ne, Nebabikile muana mulume yonso udi ubulula difu dia mukashi ne, Wa tshijila wa Mukelenge), ne bua kufila mulambu mushihela Yehowa bu muakambabo mu mikenshi ya Mukelenge ne, Nyunyu ya nkutshi ibidi, anyi bana babidi ba nyunyu ya nkudimba. Muntu mulume wakadi mu Yelushalema, dina diandi Shimeona; muntu eu wakadi muakane, wakadi kabidi mutumikidi wa mei, wakadi utekemena disamba dia Isalele; Nyuma Muimpe wakadi nʼandi. Nyuma Muimpe wakamana kumumanyisha ne, Wewe kuena ufua tô ne hawamona Kilisto wa Mukelenge. Yeye wakalua mu ntempelo mu Nyuma Muimpe; hakabuelamu baledi ba Yesu ne muana bua kumuenzela bu muakadi tshilele tshia mikenshi ya Mose, Shimeona wakamuambula mu maboko, wakatumbisha Nzambi, wakamba ne, Mukelenge, mpindiu wewe udi ulekela muhika webe aye biandi Talalâ bu muwakuamba; Bualu bua mesu anyi akumona luhandu luebe Luwakulongolola ku mesu kua bantu bonso; Munya wamueneka kudi bisamba bia bende Ne butumbi bua Isalele, bantu bebe. Tatuʼandi ne mamuʼandi bakakema bualu bua malu akamuambabo; Shimeona wakabasankisha, wakambila Malia mamu wandi ne, Muana eu udi mutekela bualu bua kuhona ne bua kubika kua bantu ba bungi mu Isalele, ne bualu bua tshimanyinu tshiahetulabo; muele wa nvita neutubule muoyo webe, nunku meshi a mu mitshima ya ba bungi neamueneke. Muprofete mukashi, dina diandi Ana wakadiku, yeye wakadi muana wa Fanuele wa tshisamba tshia Ashê, wakadi mununu be, bayandi wakamubaka hakatshidiye kamama, wakashala nʼandi bidimu muanda mutekete, wakashala mu lufuila bidimu makumi muanda mukulu ne binai; yeye kakumuka mu ntempelo, wakatendelela Nzambi butuku ne munya, ujila bia kudia, umulomba. Yeye wakalua ha diba adi, wakasakidila Nzambi, wakambila bonso bakadi batekemene buhikudi bua Yelushalema bualu buandi. Hakashikishabo malu onso a mu mikenshi ya Mukelenge, bakahingana mu Galela, ku musoko wabo Nazaleta. Muana wakadiunda biandi, wakakola, wakadi, mûle tente ne lungenyi; luse lua Nzambi luakadi nʼandi. Ku tshidimu ku tshidimu baledi ba Yesu bakaya ku Yelushalema ku disanka dia Kuhita kua Yehowa. Hakadiye bidimu dikumi ne bibidi, bakabanda ku Yelushalema bu mudi tshilele tshia disanka; hakashika matuku, hakadibo bahingana, Yesu wakadi tshitende wakashala ku nyima mu Yelushalema; baledi bandi kabakamanya bualu ebu; bakadi bamanye ne, Yeye udi mu tshisumbu tshia batudi nʼabo mu nshila; bakaya mu nshila dituku dijima; bakamukeba mu bana babo ne mu bantu bakadibo bamanye; hakahangabo kumumona, bakahingana ku Yelushalema bamukeba. Hakahita matuku asatu, bakamusangana mu ntempelo, mushikame munkatshi mua bayishi, unvua mei abo, ubakonka malu; bantu bonso bakadi bunvua mei andi bakakema bualu bua lungenyi luandi ne bualu bua mei akabandamuneye. Hakamumonabo, bakakema; baba wandi wakamukonka ne, Muanʼanyi, wakatuenzela nunku tshinyi? Tatu webe ne meme kabidi tuakukukeba tunyingalala. Yeye wakabakonka ne, Nuakadi nunkebela tshinyi? Kanuena bamanye ne, Bundi nʼabu mbua kuikala mu malu a Tatu wanyi? Bobo kabakajingulula dî diakabambileye. Yeye wakahueka nʼabo, wakaya ku Nazaleta; wakadi utumikila mei abo; baba wandi wakalama malu â onso mu mutshima wandi. Yesu wakadiunda mu lungenyi ne mu kuleha ne mu diakalengele kudi Nzambi ne kudi bantu. Mu tshidimu tshia dikumi ne itanu tshia bunfumu bua Tibelio Kaisa, hakadi Ponto Pilato ngovena wa Yudaya, ne hakadi Helode muloho wa Galela, ne hakadi muanʼabo Filipo muloho wa luseke lua Itulaya ne Takoniti, ne hakadi Lusania muloho wa Abilene, ne hakadi Ana ne Kayafa bakuidi banene, dî dia Nzambi diakalua kudi Yone, muana wa Zakâya, mu tshihete. Yeye wakalua mu luseke luonso luakadi ha buihi ne Yadene, wenda wambila bantu bualu bua dibatiza dia kukudimuna kua mitshima bua mibi yabo ijimishibue; bu muakafundabo mu mukanda wa mei a Yeshaya muprofete ne, Dî dia muntu udi wela lubila mu tshihela ne, Longololai nshila wa Mukelenge, Nululamishe nshila yandi. Nebalandakashe mpongo yonso, Nebabatamishe mikuna yonso, minene ne mikese, Nebaludike nshila mikonyangale, Nebaseneshe nshila idi bizakala bizakala; Bantu bonso nebamone luhandu lua Nzambi. Yeye wakakonka bisumbu bia bantu biakalua kudiye bua yeye kubabatiza ne, Nuenu bana ba nyoka, wakunudimusha bua kunyema ku mulau ulualua kunudi nganyi? Nukuame mamuma adi makanangane ne dikudimuna dia mitshima yenu, kanuhangi kudiamba mu mitshima yenu ne, Tuetu tudi ne Abalahama tatu wetu; meme ndi nuambila ne, Nzambi udi mumanye mua kubisha mabue â alue bana ba Abalahama. Katataka tshisui tshidi tshiladika ha muji wa mutshi wonso; mutshi wonso udi kawi ukuama mamuma mimpe nebaushimbule, nebawele mu kahia. Bantu bakamukonka ne, Ahu netuenze tshinyi? Wakabambila ne, Udi ne bikowelu bibidi aheshe udi kai nʼatshi tshinga; udi ne bia kudia enze muomumue. Basangishi ba mulambu kabidi bakatua kubatijibua, bakamukonka ne, Muyishi, tuetu netuenze tshinyi? Yeye wakabambila ne, Kanuangatshi mulambu mutambe wakunuambilabo. Masalayi kabidi akamukonka ne, Ne tuetu, netuenze tshinyi? Yeye wakambila ne, Kanunyengi tshintu tshia muntu ku bukole, kanusonguedi muntu tshianana; nuitabusha difutu dienu ne disanka. Hakadibo batekemena bualu, ne hakadibo buonso buabo belangana meshi a Yone mu mitshima yabo ne, Yeye udi Kilisto, anyi? Yone wakabandamuna buonso buabo ne, Bulelela, ndi nubatiza ne mai, kadi udi muntambe meme ulualua, tshiena ne buakane bua kusulula mionshi ya bisabata biandi; yeye neanubatize mu Nyuma Muimpe ne mu kahia; tshihehudi tshiandi tshidi mu tshianza, yeye neatokeshe tshituilu tshiandi bimpe, neasangishe mponda mu mudiba wandi, kadi yeye neoshe bisote mu kahia kadi kakai kajima tshiendelele. Yeye wakambila bantu lumu luimpe ukoleshe mitshima yabo ne mei makuabo a bungi; kadi muloho Helode wakadiye mubele bualu bua Helodia, mukashi wa muanʼabo, ne bualu bua malu mabi onso akenza Helode; yeye wakatentekesha bualu ebu bukuabo ha mutu ha malu au onso: wakabuesha Yone mu nsubu wa lukanu. Hakabatizabo bantu bonso ne Yesu kabidi, hakadiye utendelela Nzambi, diulu diakabuluka, ne Nyuma Muimpe wakahueka hamʼbidi handi ne mubidi bu wa nyunyu wa nkutshi; di diakafuma mu diulu ne, Wewe udi Muana wanyi munanga, udi unsankisha bimpe. Hakabanga Yesu mene kuyisha bantu, yeye wakadi bu bidimu makumi asatu, bantu bakadi belangana meshi ne, yeye udi muana wa Yosefe, muana wa Heli, muana wa Matata, muana wa Lewi, muana wa Meleki, muana wa Yana, muana wa Yosefe, muana wa Matana, muana wa Amosa, muana wa Nahuma, muana wa Eseli, muana wa Nagai, muana wa Mâta, muana wa Matatia, muana wa Semei, muana wa Yoseke, muana wa Yoda, muana wa Yoanana, muana wa Lesa, muana wa Zelubabela, muana wa Shalatiele, muana wa Neli, muana wa Meleki, muana wa Adi, muana wa Kosama, muana wa Elemadama, muana wa Ele, muana wa Yesu, muana wa Eliezê, muana wa Yolima, muana wa Matata, muana wa Lewi, muana wa Shimeona, muana wa Yuda, muana wa Yosefe, muana wa Yonama, muana wa Eleyakima, muana wa Melea, muana wa Mena, muana wa Matata, muana wa Natana, muana wa Davidi, muana wa Yishai, muana wa Obeda, muana wa Boaza, muana wa Salamona, muana wa Nashona, muana wa Aminadaba, muana wa Ani, muana wa Heselona, muana wa Pelese, muana wa Yuda, muana wa Yakoba, muana wa Isaka, muana wa Abalahama, muana wa Tela, muana wa Nahô, muana wa Seluga, muana wa Leu, muana wa Pelege, muana wa Ebê, muana wa Shela, muana wa Kenana, muana wa Afashada, muana wa Sheme, muana wa Noa, muana wa Lemeke, muana wa Metushela, muana wa Hanoka, muana wa Yalede, muana wa Mahalalêle, muana wa Kenana, muana wa Enosha, muana wa Shete, muana wa Adama, muana wa Nzambi. Yesu wakadi mûle tente ne Nyuma Muimpe, wakafuma ku Yadene, Nyuma wakamulombola mu tshihela tô matuku makumi anai, Diabolo wakadi umuteya. Kakadia tshintu matuku au; hakashikau, yeye wakadi ne nsala. Diabolo wakamuambila ne, Biwikala Muana wa Nzambi, amba dibue edi diandamuke mutanda wa bidia. Yesu wakamuandamuna ne, Bakafunda dî ne, Muntu kikadi biandi ne muoyo bualu bua bidia nkayabi. Diabolo wakabanda nʼandi, wakamulesha makelenge onso a ha buloba tshikondo tshimue. Diabolo wakamuambila ne, Nenkuhe bukokeshi ebu buonso ne butumbi bua makelenge au; bakamana kubumpa; muntu yonso undi musue kumuhabu, nemuhebu. Biwankukuila, nebuikale buebe. Yesu wakamuandamuna ne, Bakafunda dî ne, Kukuila Mukelenge Nzambi webe, umuenzele yeye nkayandi mudimu. Diabolo wakaya ngandi ku Yelushalema, wakamushikika ha musonga wa ntempelo, wakamuambila ne, Biwikala Muana wa Nzambi, udiele hanshi, bualu bua bakafunda ne, Yeye neakufile mu bianza bia banjelo bandi, bakulame; Ne dî dikuabo ne, Nebakutuale mu bianza biabo, Bua wewe kukumi dikasa diebe ku dibue. Yesu wakamuandamuna ne. Bakamba ne, Kuteyi Mukelenge Nzambi webe. Hakashikisha diabolo mateyi onso, wakamusha tô ne ku tshikondo tshikuabo. Yesu wakahingana mu Galela ne bukole bua Nyuma; lumu luandi luakatangadika mu luseke elu luonso. Yeye wakabayisha mu bitendelelu biabo, buonso buabo bakadi bamutumbisha. Yeye wakalua ku Nazaleta kuakakoleleye; wakabuela mu nsunagoga dituku dia Lumingu lua Bayuda bu muakadi tshilele tshiandi, wakimana bua kubala mukanda. Bakamulesha mukanda wa muprofete Yeshaya. Yeye wakavungulula mukanda, wakamona muaba wakafundabo ne, Nyuma wa Nzambi udi hamʼbidi hanyi, Bualu bua yeye wakangela manyi ha mutu ne, Ambila bantu bahele lumu luimpe; Yeye wakuntuma ne, Ambila bena lukanu bualu bua dikohoka diabo, Ne bafofo bualu bua kutabasha kua mesu abo, Uhe badi batata budishikaminyi, Ambila bantu bualu bua tshidimu tshiakitabusha Mukelenge. Yeye wakavunga mukanda, wakauhingisha mu bianza bia mulami wau, wakashikama; bonso bakadi mu nsunagoga bakamutangila talalâ. Yeye wakabanga kubambila ne, Lelu bualu ebu buakafundabo buakujalama mu matshu enu. Bantu bonso bakamuvidila, bakakema bualu bua mei a luse akaluhuka mukana muandi, bakakonka ne, Yeye ke muana wa Yosefe, anyi? Yeye wakabambila ne, Bulelela, nenungelele lusumuinu ne, Wewe muena buanga, udiondahe, enza biebe kuenu malu atuakunvua wenza ku Kapênuma. Yeye wakamba ne, Bulelela, udi nuambila ne, Kabatu bitabusha muprofete kudi ba ku luseke luabo. Bulelela, ndi nuambila ne, Bakashi ba mu lufuila ba bungi bakadi mu Isalele mu matuku a Eliya, hakadi diulu dibuikila bidimu bisatu ne ngondo isambombo, ha kalua tshiole tshinene ha buloba bu onso; kadi Eliya kakatumibu a kudi bakuabo, anu ku Salefata mu boloba bua Sidona, kudi mukashi wakadi mu lufuila. Bena nsudi ba bungi bakadi mu Isalele mu matuku a muprofete Elisha; kadi bakuabo kabakalengeshibua, anu Nâmana Muena Sulia. Bantu bonso bakadi mu nsunagoga bakûlangana ne tshishi, hakunvuabo malu â. Bakabika, bakamuihata mu musoko, bakalua nʼandi ku mutu kua mukuna wakadibo base musoko bua kumukuha ma luhongo mutu muinyika munshi. Yeye wakahita munkatshi muabo, wakaya biandi. Wakahueka ku Kapênuma, musoko wa Galela. Wakabayisha dituku dia Lumingu lua Bayuda; diyisha diandi diakabakemesha, bualu bua dî diandi diakadi ne bukole. Mu nsunagoga muakadi muntu wakadi ne nyuma wa demon wa bukoya, wakela dî diandi bikole ne, Ei! Wewe Yesu, Muena Nazaleta, tudi nʼebe bualu kai? Wewe wakulua bua kutushiha, anyi? Ndi mukumanye, wewe udi Wa Tshijila wa Nzambi. Yesu wakamusamina ne, Hua, Umuka munda muandi. Hakamuela demon hanshi munkatshi muabo, wakumuka munda muandi, kai mumuenzele bibi. Buowa buakabakuata bonso, bakakonkangana ne, Edi ndî kai? Yeye udi ne bukokeshi ne bukole bua kuela nyuma ya bukoya dî, yumuke munda mua bantu. Lumu luandi luakaya mu miaba yonso ya luseke alu. Wakabika mu nsunagoga, wakabuela mu nsubu wa Simona. Muku wa Petelo mukashi wakadi ne mubidi wandi mukuatshike kahia ka bungi; bakasengelela Yesu bua disama diandi. Yeye wakimana mumuinangile, wakakandika disama dia kahia; diakamulekela; yeye wakabika lukasa, wakabalongoluela bia kudia. Hakamba diba kubuela, bonso bakadi ne bakuatshike mabedi a bungi bakalua nʼabo kudiye; wakabalenga bianza buonso buabo, wakabakolesha. Bademon bakumuka munda mua bantu ba bungi, bela dî bikole ne, Wewe udi Muana wa Nzambi. Yeye wakabasamina, kakitabusha bua bobo kuakula, bualu bua bobo bakamanya ne, Yeye udi Kilisto. Hakatshia butuku, wakaluhuka, wakaya mu tshihela; bantu ba bungi bakamukeba, bakalua kudiye, bakakeba kumuhumbisha ne, Kumuki munkatshi muetu. Kadi yeye wakabambila ne, Bundi nʼabu mbua kuambila misoko mikuabo lumu luimpe lua bukelenge bua Nzambi; buakantuminabo mbualu ebu. Yeye wakadi wamba bualu bua Nzambi mu nsunagoga ya mu Galela. Hakadiye muimane ku muelelu wa dishiba dia Genesaleta, bantu ba bungi bakamunguila bua kunvua dî dia Nzambi; wakatangila matu abidi kukala kua mai, kadi bilembi biakadi bimane kuluhuka, biakadi biuvua tuhamba tuabi. Wakabuela mu buatu bukuabo, buakadi bua Simona, wakamuambila ne, Semesha buatu tshituha tshibi mu mai. Wakashikama mu buatu, wakayisha bisumbu bia bantu. Hakalekeleye kuakula, wakambila Simona ne, Semesha buabi ku mai male, nuhuekeshe tuhamba, nukuate minyinyi. Simona wakandamuna ne, Mukelenge, tuakadi ne mudimu butuku tô, katuakukuata tshintu; kadi nempuekeshe tuhamba bualu bua dî diebe. Hakenzabo nunku, bakakunguisha minyinyi ya bungi; tuhamba tuabo tuakamba kutuanyika; bakaloba ba bilembi nʼabo bakadi mu buatu bukuabo ne, Luai nutukuatshishe. Bakalua, bakûsha matu abidi tente, akamba kudina. Hakamona Simona Petelo bualu ebu, wakadihonena hanshi ku binu bia Yesu, wakamba ne, Mukelenge, Umuka kundi, bualu bua meme ndi muntu bubi. Wakakema ne bonso bakadi nʼandi bualu bua bungi bua minyinyi yakakuatabo; Yakobo ne Yone, bana ba Zebedayo, ba bilembi ne Simona, bakakema kabidi Yesu wakambila Simona ne, Kutshinyi, katataka tô ne tshiendelele wewe neukuate bantu. Hakaluabo ne matu abo ku mpata, bakâshla, bakamulonda. Hakadiye mu musoko mukuabo, muntu wakadiku, wakadi ne disama dia nsudi dia bungi; hakamoneye Yesu, wakatua mpala hanshi, wakamutendekena, wakamba ne, Mukelenge, biwasua, udi mumanye mua kundengesha. Yetu wakuolola tshianza tshiandi, wakamulenga ne, Ndi musue, wikale mulengeshibue. Nsudi yakamulekela lukasa. Yesu wakamuambila bikole ne, Kuambidi muntu bualu ebu; uye biebe, udimueneshe kudi muakuidi wa Nzambi, udie biakamba Mose bu tshimanyishilu ku mesu kua bantu bualu bua kulengeshibua kuebe. Kadi lumu luandi tuakatamba kumuangalaka; bantu ba bungi bakahia bua kunvua dî diandi, ne bua kubakolesheye ku matekete abo. Kadi yeye wakaya biandi mu bihela, wakatendelela Nzambi. Dituku dikuabo yeye wakadi uyisha bantu; Bafalese ne bayishi ba mikenshi ya Mose bakadi bashikame ha buihi, bafume ku misoko yonso ya Galela ne ya Yudaya ne ku Yelushalema; bukole bua Mukelenge buakadi nʼandi bua kuondaheye nʼabu bantu. Bakalua ne muntu wakadi ne kaneke mulale mu bulalu; bakakeba kubuela nʼandi mu nsubu bua kumuladika ku mpala kua Yesu. Hakahangabo mua kubuela nʼandi bualu bua tshisumbu tshia bantu, bakabanda ha mutu ha nsubu, bakalamuna mampana akadi ku musaka, bakamuhuekesha ne bulalu buandi hankatshinkatshi ku mpala kua Yesu. Hakamoneye ditabusha diabo, wakamba ne, Mulumiana, mibi yebe idi mijimishibue. Bafundi ne Bafalese bakabanga kukonkangana ne, Muntu eu udi uhenda Nzambi nganyi? Muntu kai udi mumanye mua kujimisha mibi, anu Nzambi nkayandi? Hakamanya Yesu dikonkangana diabo, yeye wakabandamuna ne, Nudi nukonkelangana nunku munda muenu tshinyi? Tshidi tshitambe butekete ntshinyi, kuambila umena kaneke ne, Mibi yebe idi mijimishibue; anyi kumuambila ne, Bika, enda biebe? Kadi bua nuenu mimanye ne, Muana wa muntu udi ne bukole, hatshidiye ha buloba, bua kujimisha mibi (yeye wakambila muena kaneke ne), Ndi nkuambila ne, Bika biebe, ambula bulalu buebe, ya ku nsubu kuebe. Wakabika lukasa ku mesu kuabo, wakambula tshiakadiye mulale, wakaya ku nsubu kuandi, utumbisha Nzambi. Buonso buabo bakakema, bakatumbisha Nzambi; buowa buakabakuata, bakamba ne, Lelu tuakutangila malu a kukema. Hakashika malu â, yeye wakumukaku, wakamona musangishi wa mulambu, dina diandi Lewi, mushikame ku tshilambuidi, wakamuambila ne, Undonde. Wakashîa bintu bionso, wakabika, wakamulonda. Lewi wakamulambishila bidia bia bungi mu nsubu muandi; basangishi ba mulambu ba bungi ne bantu bakuabo kabidi bakadi bashikame nʼabo ku mesa. Bafalese ne bafundi babo bakajiana bayidi ba Yesu, bakabakonka ne, Nudi nudila, nudi nunuina ne basangishi ba mulambu ne bantu babi tshinyi? Yesu wakabandamuna ne, Badi ne bukole kabena ne muondahi bualu, anu badi ne mabedi. Tshiakuluila bua kubikila badi bakane bua kukudimunabo mitshima yabo, nakuluila bua kubikila anu badi babi. Bakamuambila ne, Bayidi ba Yone batu bajila bia kudia misangu ya bungi, batu balomba Nzambi, bayidi ba Bafalese batu benza nunku kabidi; kadi bebe batu badia, batu banua. Yesu wakabakonka ne, Nudi bamanye mua kujidisha balunda ba mubaki wa mukashi bia kudia, hatshidi mubaki wa mukashi nʼabo, anyi? Kadi matuku makuabo nealue; habanyengabo mubaki wa mukashi, nebajile bia kudia matuku au. Yeye wakabelela lusumuinu ne, Bantu kabatu bahanda tshihesa tshia tshmialu tshihia-tshihia bualu bua kutshitelalula ha tshmialu tshikulukulu; bienzabo nunku, nebabande tshivualu tshihia-tshihia, ne tshihesa tshiatshi kabidi katshiena tshiakanangane ne tshikulukulu. Bantu kabatu bela maluvu mahia-mahia mu milondo ya biseba bikulukulu; bienzabo nunku, malulu neahande biseba, neaye hanshi, ne biseba nebifue. Kadi bidi bimpe bia kuelabo maluvu mahia-mahia mu milondo ya biseba bihia-bihia. Bikala muntu munue maluvu makulukulu, yeye kena musue mahia-mahia; bualu bua yeye neambe ne, A kale adi matambe. Yesu wakadi uhitshila mu madimi a blé dituku dia Lumingu lua Bayuda, bayidi bandi bakatshibula miehu yai, benda baivinga mu bianza, badia. Kadi Bafalese bakuabo bakabakonka ne, Nuenu nudi nuenzela bualu budi bujila dituku dia Lumingu tshinyi? Yesu wakabakonka ne, Nuenu kanuakubala bualu buakenza Davidi, hakadiye ne nsala, yeye ne bakuabo bakadi nʼandi, anyi? Bualu bua yeye wakabuela mu nsubu wa Nzambi, wakangata bidia bilesha, wakahidia, wakahaku bakadi nʼandi; biakadi tshijila, anu bakuidi ba Nzambi bakadi badia. Yeye wakabambila ne, Muana wa muntu udi mukelenge wa dituku dia Lumingu. Hakalua Lumingu lukuabo lua Bayuda, yeye wakabuela mu nsunagoga, wakayisha bantu; muntu wakadiku ne tshianza tshiandi tshia balume tshiume. Bafundi ne Bafalese bakamutentekela ne, Yeye neondahe bantu dituku dia Lumingu, anyi? Bakakeba mua kumubanda. Kadi yeye wakamanya meshi abo, wakambila muntu wakadi ne tshianza tshiandi tshiume ne, Bika, Imana hankatshinkatshi. Wakabika, wakimana. Yesu wakabambila ne, Ndi musue kunukonka bualu: Tshidi tshimpe ntshinyi, kuenza malu mimpe dituku dia Lumingu, anyi kuenza malu mabi; kusungila muoyo, anyi kûshiha? Yeye wakabatangila buonso buabo, wakamuambila ne, Olola tshianza. Yeye Wakenza nunku, tshianza tshiandi tshiakakana kabidi. Bakafuna bulobo, bakela tshifufu tshiabo ne, Netuenzele Yesu tshinyi? Mu matuku â yeye wakaya ku mukuna bua kutendelela Nzambi; wakamutendelela tô butuku buonso. Hakatshia butuku, wakabikila bayidi bandi; wakasungula biandi dikumi ne babidi, wakabidika ne, Bapostolo; Simona, wakidikeye dina dikuabo ne, Petelo, ne muanʼabo Andele, ne Yakobo ne Yone, ne Filipo ne Bâtolomayo, ne Matayo, ne Toma, ne Yakobo muana wa Alafayo, ne Simona wakadibo babikila ne, Muena Lukunukunu, ne Yuda muana wa Yakobo, ne Yudasa Isakaliote, yeye wakalua mumutungidi. Yeye wakahueka nʼabo, wakimana ha muaba mubatame ne tshisumbu tshinene tshia bayidi bandi ne bantu ba bungi ba mu luseke luonso lua Yudaya ne ba mu Yelushalema ne ba mu luseke lua Tulo ne Sidona kukala kua mai manene, bakalua bua kunyua di diandi, ne bua yeye kushikisha mabedi abo; bakadi batatshishibua kudi nyuma ya bukoya bakalengesha. Bantu bonso bakasua kumulenga bianza, bualu bua bukole buakadi bufuma munda muandi, bakashikisha masama a buonso buabo. Yesu wakajosha bayidi bandi, wakamba ne, Nuenu bahele nudi ne disanka, bua bukelenge bua Nzambi budi buenu. Nuenu badi ne nsala katataka nudi ne disanka, bua nuenu nenukute. Nuenu badi badila katataka nudi ne disanka, bua nuenu nenuseke. Hikala bantu nʼenu lukuna, hanumushabo munkatshi muabo, hanuhendabo, hahetulabo dina dienu ne, Ndibi, bua bualu bua Muana wa muntu, nenuikale ne disanka. Dituku adi nusanke, nutuhike bua disanka, bualu bua difutu dienu didi dinene mu diulu; bualu bua bankambua babo bakenzela baprofete nunku kabidi. Kadi nuenu badi babanshi, mulau ulualua kunudi, bua nuenu nuakumana kuangata disamba dienu! Nuenu badi bûkute katataka, mulau ulualua Kunudi, bua nenuikale ne nsala! Nuenu badi baseka katataka, mulau ulualua kunudi, bua nenujinge, nenudile! Nuenu badi batumbisha kudi bantu bonso, mulau ulualua kunudi, bualu bua bankambua babo bakenzela baprofete bakadi ne mashimi nunku kabidi! Kadi ndi nuambila nuenu badi batelesha ne, Suai badi nʼenu lukuna, nuenzele badi nʼenu tshishi malu mimpe, nusankishe badi banuela mulau, lombelai badi banukengesha Nzambi. Biakutaha muntu dihi ku ditama, umuandamuine dinga ditama; bianyenga muntu kazaku kebe, kuhidi mua kumuha nshemise webe kabidi. Uhe bonso badi bakulomba; bianyenga muntu bintu biebe, kumulombibi kabidi. Nuenzele bantu malu onso anudi basue banuenzele. Binuasua anu badi banusue, nenuikale ne disakidila kai? Bualu bua bantu babi badi basue badi babasue. Binuenzela anu badi banuenzela bimpe malu mimpe, nenuikale ne disakidila kai? Bualu bua bantu babi batu benza nunku. Binuasombesha bintu anu kudi banudi nutekemena ne, Nebatuhingishile tshia kasombela kabidi, nenuikale ne disakidila kai? Bantu babi mene badi basombesha badi babi bintu ne, Netubiangate bionso kabidi. Kadi nuenu suai badi nʼenu lukuna, nubenzele bimpe, nubasombeshe bintu, kanui nubitekemena kabidi; nunku difutu dienu nedikale dinene, nenuikale bana ba Udi Mutambe Bunene wa mu diulu, bualu bua yeye udi wenzela badi kabai bamusakidila ne badi babi malu mimpe. Nufuile bantu luse bu mudi Tatu wenu ufuila bantu luse. Kanulumbuiudi malu adi munda mua bantu bakuabo, nunku bobo kabena balumbulula malu adi munda muenu; kanubishi bantu bakuabo, nunku bobo kabena banuhisha; nulekele bantu, nunku nebandekele kabidi; nuhe bantu bintu, nunku nebanuhe bintu kabidi; nebafile mu biadi bienu tshihikilu tshiakane, tshishindika, tshisekenkesha, tshihongoloka. Bualu bua nebanuhikile bintu ne tshihikilu tshinudi nubahikila nʼatshi kabidi. Yeye wakabelela lusumuinu ne, Mufofo udi mumanye mua kulombela munga mufofo munyi? Bubidi buabo kabena bahona mu dina, anyi? Muyidi kena mutambe muyishi wandi; kadi muntu yonso wakumana kuyishibua neikale bu muyishi wandi. Ntshinyi tshiudi utangidila kasosa kadi mu disu dia muanʼenu, kui utangila mutshi mimene udi mu disu diebe? Munyi mûdi mumanye mua kuambila muanʼenu ne, Muanʼetu, nkûmushe kasosa kadi mu disu diebe, kui utangile mutshi munene udi mu diebe disu? Wewe udi muena lubombo, diambedi umushe mutshi mimene udi mu disu diebe, nunku neumone mua kûmusha kasosa kadi mu disu dia muanʼenu. Kakuena mutshi muimpe udi ukuama mamuma mabi; kakuena kabidi mutshi mubi udi ukuama mamuma mimpe. Mutshi wonso udi mumanyibue ku mamuma au. Bualu bua bantu kabatu bahuola nfigi ku mionshi ya meba, kabatu bahuola mamuma a nvinyo ku mingonga. Muntu muimpe udi uhatula tshintu tshimpe mu tshibutshilu tshimpe tshia mutshima wandi; muntu mubi udi uhatula tshintu tshibi mu tshibutshilu tshibi; bua mukana muandi mudi muamba anu malu adi matambe kuvulangana mu mutshima wandi. Ntshinyi tshinudi numbikidila meme ne, Mukelenge, Mukelenge, kanui nuenza bu mundi ngamba? Muntu yonso udi ulua kundi, udi unvua mei anyi, udi wenza, nenuleshe udiye mufuanangane nʼandi; yeye udi mufuanangane ne muntu wakadi muibake nsubu, wakimba mutubu mule, wakateka bishimikidi ha mutu ha dibue dinene; hakûla musulu, wakakuma ku nsubu, kawakamanya mua kumutshikisha, bualu bua wakadi muibaka bimpe. Kadi muntu yonso udi unvua mei, kai wênza, udi bu muntu wakibaka nsubu wandi ha buloba butekete, kakadi ne bishimikidi; musulu wakakuma ku nsubu, wakashimbuka lukasa; diuhuka dia nsubu au diakadi dinene. Hakashikisheye kuambila bantu mei andi onso mu matshu abo, wakabuela mu Kapênuma. Muntu wa kapitene kakuabo ka masalayi lukama wakadi munanga kudi nfumu wandi, lufu luakadi lumutonde. Hakunvueye lumu lua Yesu, wakatuma bakulu ba Bena Yuda kudiye, bua kumusengelela bua kulua kuhandisheye muntu wandi. Hakaluabo kudi Yesu, bakamutendekena bikole, bakamba ne, Yeye udi ne buimpe bua wewe kumuenzela bualu ebu, yeye udi munange tshisamba tshietu, wakatulukila nsunagoga wetu. Yesu wakaya nʼabo. Hakadiye ha buihi ne nsubu, kapitene kakatuma balunda baku kudiye bua kumuambila ne, Mukelenge, kuditatshishi, meme tshiena muntu mukumbane bua wewe kubuela mu nsubu muanyi; bua bualu ebu mbunakelela meshi ne, Tshiena bianyi muakane bua meme kumueneka kûdi; kadi wambe anu dî diebe, muntu wanyi neasangale. Meme kabidi ndi ku nyima kua bakuabo, ndi ne masalayi ku nyima kuanyi; adi ngambila disalayi edi ne, Ya, diodio diaya; ndi ngambila dikuabo ne, Lua, diodio dialua; ndi ngambila muntu wanyi ne, Enza bualu ebu, yeye wenza. Hakunvua Yesu mei â, wakakema, wakatshinguluka, wakambila tshisumbu tshia bantu tshiakadi tshimulonda ne, Ndi nuambila ne, Munkatshi mua Bena Isalele mene mene tshiena musanganemu ditabusha dinene nunku. Bakadi batumibua bakahingana ku nsubu, bakasangana muntu wa kapitene mumane kusanguluka. Hakahita tshituha tshihi, yeye wakaya mu musoko, dina diau Naina; bayidi bandi bakaya nʼandi ne tshisumbu tshinene tshia bantu. Hakafikeye ha buihi ne tshibuelelu tshia mu musoko, hakadi baluhuka ne muntu mufue, wakadi biandi muana umuehele mulela kudi mamu wandi, mamu wandi wakadi wa mu lufuila; bantu ba bungi ba mu musoko bakadi nʼandi. Hakamutangila Mukelenge, yeye wakamufua luse, wakamuambila ne, Kudidi. Wakalua ha buihi, wakalenga tshituadilu tshia tshitalu tshianza; batuadi batshi bakimana. Yesu wakamba ne, Nsongalume, ndi nkuambila ne, Bika. Wakadi mufue wakabika, wakashikama, wakabanga kuakula, Yesu wakamufila kudi mamu wandi. Buowa buakabakuata buonso buabo; bakatumbisha Nzambi bamba ne, Muprofete munene wakumueneka munkatshi muetu, Nzambi wakulua kutangila bantu bandi. Lumu luandi elu luakamuangalaka mu luseke luonso lua Yudaya ne ku matshika onso. Bayidi ba Yone bakamuambila malu â onso. Yone wakabikila bayidi bandi bakuabo babidi, wakabatuma kudi Mukelenge bua kumukonka ne, Wewe nyeye ulualua, anyi tutekemene mukuabo? Hakaluabo kudiye, bakamuambila ne, Yone Mubatiji wakututuma bua kukukonka ne, Wewe nyeye ulualua, anyi tutekemene mukuabo? Ha diba adi mene Yesu wakadi wondaha bantu ba bungi mabedi abo ne masama abo makole, wakadi ubumushila nyuma mibi; wakadi utabasha mesu a ba bungi bakadi bafofo. Yeye wakabakudimuna di ne, Yai bienu, nuambile Yone malu anuakumona ne anuakunvua ne, Bafofo badi batabala, balema badi benda, bena nsudi badi balengeshibue, bena mahaha badi bunvue, bafue badi babishibue ku lufu, badi bambila bahele lumu luimpe lua Nzambi. Muntu yonso udi kai ulenduka bua bualu buanyi udi ne disanka. Hakahingana bena mukenshi ba Yone, Yesu wakabanga kuambila bantu bualu bua Yone ne, Nuakuyila mu tshihela bua kutangila tshinyi? Bua kutangila disele didibo banyungisha kudi luhehele, anyi? Nuakuyila bua kutangila tshinyi? Bua kutangila muntu muluate bilulu binefuke, anyi? Bantu badi ne bilulu bilengele, badi mu buneme buabo, batu bikala mu nsubu ya banfumu. Kadi nuakuyila bua kutangila tshinyi? Muprofete, anyi? E, ndi nuambila ne, Yeye udi mutambe muprofete. Eu nyeye wakafundabo ne, Monai, ndi ntuma mukenshi wanyi ku mpala kuebe, Yeye nealongolole nshila webe ku mpala kuebe. Ndi nuambila ne, Munkatshi mua bakalelabo kudi bakashi kamuakadi mukuabo mutambe Yone; kadi udi mutambe bonso bukese mu bukelenge bua mu diulu udi mumutambe yeye. Hakunvua bantu bonso malu au, ne basangishi ba mulambu kabidi, bakabingisha Nzambi, bakadi bamane kubatijibua ne dibatiza dia Yone. Kadi Bafalese ne bamanyi ba mikenshi bakahidia lungenyi lua Nzambi, bakadi kabai babatijibue kudiye. Nenfuanyikishe bantu ba tshikondo etshi bu tshinyi? Badi bu tshinyi? Badi bu bana bakese badi bashikama mu tshisalu, badi babikilangana, badi bamba ne, Tuakunuelela nshiba, kanuena baje; tuakujinga, kanuena badile. Bualu bua Yone Mubatiji wakulua kai udia bidia kai unua maluvu; nudi nuamba ne, Yeye udi ne demon munda. Muana wa muntu wakulua udia bidia ne unua maluvu; nudi nuamba ne, Yeye udi muena mudi, udi mukuatshiki wa maluvu, udi mulunda wa basangishi ba mulambu ne wa bantu babi. Bana bonso ba lungenyi badi balujadika. Mufalese mukuabo wakasua Yesu adie ngandi bidia. Yeye wakabuela mu nsubu wa Mufalese, wakashikama ku mesa. Mu musoko muakadi mukashi mubi; hakamanyeye ne, Yesu udi ushikama ku mesa mu nsubu wa Mufalese, wakalua ne mulondo wa alabasta, mu mulondo muakadi mananashi; hakadiye muimane ku makasa a Yesu ku nyima kuandi udila, wakabanga kubolesha makasa andi ne binsonshi biandi, wakâkuhula ne nsuki yandi, wakatua mishiku ku makasa a Yesu, wakaela mananashi. Hakamona Mufalese wakamubikila bua kudia bualu abu, wakamba munda munda ne, Bu muntu eu muikale muprofete, yeye wakadi kumanya mudi mukashi eu wakumulenga bianza ne, Udi mubi. Yesu wakamuandamuna ne, Simona, ndi ne dî dia kukuambila. Yeye wakamba ne, Muyishi, ambaku. Musombeshanganyi wakadiku, wakadi ne bena mabanza andi babidi; mukuabo wakadi ne dibanza dia ndenalio nkama itanu, mukuabo wakadi ne dibanza dia ndenalio makumi atanu. Hakahangabo bintu bia kumufuta, yeye wakabalekelela mabanza bubidi buabo. Bubidi buabo watamba kumusua nganyi? Simona wakamuandamuna ne, Ndi ngela meshi ne, Muena dibanza dinene wakalekeleleye. Yesu wakamuambila ne, Wakujingulula bimpe. Hakatshingulukeye kudi mukashi, wakambila Simona ne, Udi utangila mukashi eu? Nakubuela mu nsubu webe kuakumpa mai a makasa anyi, kadi yeye wakubolesha makasa anyi ne binsonshi biandi, wakuakuhula ne nsuki yandi. Wewe kuakutuangana nʼanyi mishiku, kadi hanakubuela tô ne katataka yeye kena ulekela kutua mishiku yandi ku makasa anyi. Wewe kuakungela manyi ha mutu, kadi yeye wakangela mananashi ha makasa anyi. Bua bualu ebu ndi nkuambila ne, Mibi yandi idi ya bungi, yakujimishibua; bualu bua yeye wakadi ne dinanga dia bungi; walekelelabo malu makese udi ne dinanga dikese. Yeye wakambila mukashi ne, Mibi yebe yakujimishibua. Bakadi bashikame nʼandi ku mesa bakabanga kukonkangana ne, Eu udi ujimishilangana mibi nganyi? Yeye wakambila mukashi ne, Ditabusha diebe diakukusungila, ya biebe talalâ. Hakahita tshituha tshihi, Yesu wakendakana mu bimenga ne mu misoko mikese, wambila bantu bualu bua Nzambi, wenda ne lumu luimpe lua bukelenge bua Nzambi; bayidi bandi dikumi ne babidi bakadi nʼandi, ne bakashi bakuabo bakumushileye nyuma mibi munda, bakashikisheye matekete abo: Malia wakadibo babikila ne Muena Magadala, bademon muanda mutekete bakumuka munda muandi, ne Yoana mukashi wa Kuza mulami wa bintu wa Helode, ne Susana ne bakuabo ba bungi, bakadi babakuatshisha ne bintu biabo. Bakunguila tshisumbu tshinene tshia bantu, kakalua ba mu misoko yonso kudiye, wakela lusumuinu ne, Mumiaminyi wakaya bua kumiamina maminu andi; hakadiye umiamina, maminu makuabo akamata kukala kua nshila; bantu bakâdiata mu makasa, nyunyu ya mu diulu yakâzokola. Makuabo akamata ha dibue; hakatolokau, akafubidila, bualu bua kâkadi ne tshitelela. Makuabo akamata mu mionshi ya meba, mionshi yakadiunda nʼau, yakânyengela. Makuabo akamata mu buloba buimpe, akadiunda, akavudisha maminu makuabo lukama. Hakambeye malu â, wakela dî diandi bikole ne, Udi ne matshu unvue biandi. Bayidi bandi bakamukonka bualu bua lusumuinu elu. Yeye wakamba ne, Bakunuha bienu lungenyi lua kumanya malu a bukelenge bua Nzambi adi masokoka; kadi badi bambila bakuabo malu anu mu nsumuinu; nunku hamonabo, kabena bamona bimpe; hunvuabo, kabena bajingulula. Lusumuinu elu ludi nunku: Maminu adi dî dia Nzambi. Ba kukala kua nshila badi bantu bakunvua dî; hashishe, diabolo ulualua, udi unyenga dî mu mitshima yabo ne, Kabitabushi, kabasungidibu. Ba ha dibue badi bu bantu badi bitabusha dî ne disanka, hakudiunvuabo; kadi Bobo kabena ne miji, badi bitabusha tshituha, ku dituku dia diteta dia munda badi basesuka. Au akamata mu mionshi ya meba adi bu bantu bakumpua dî; hatshidibo baya mu nshila, meshi abo ne biuma ne masanka a muoyo udibo nʼau katataka bidi bibafiekela mu nshingu, kabena bakuama maminu aboba. Au a mu buloba buimpe adi bu bantu bakunvua dî mu mitshima mimpe ne ya kalolo, badi badilama bikole, badi bavudisha maminu bua dinanukila diabo. Hatemesha muntu muinda, yeye kena ûbuikila ne mushete, kena ûteka munshi mua bulalu; kadi yeye udi ûteka ha mesa a muinda, bua bonso badi babuela bamone dinkenka diau. Kakuena bualu busokoka buahanga kusokolodibua; kakuena bualu bua mu musokoko buahanga kumanyibua ne kumueneka. Dimukai munudi nunvua; bua udi ne bintu nebamuhe binga, kadi udi kai ne tshintu nebamunyenge tshidiye wela meshi ne, Ndi nʼatshi. Mamu wandi ne bana babo bakalua kudiye, kabakamanya mua kulua ha buihi nʼandi bualu bua tshisumbu tshia bantu. Bakamuambila ne, Mamu webe ne bana benu badi bimane ku bula, badi basue kukutangila. Kadi yeye wakabandamuna ne, Mamuʼanyi ne bana betu badi anu bantu batu batelesha dî dia Nzambi, batu badienza. Dituku dikuabo yeye wakabuela mu buatu, yeye ne bayidi bandi; wakabambila ne, Tusabukai dishia dia dishiha; bakasemesha buatu mu mai. Hakadibo baya, yeye wakalala tulu; tshihuhu tshikole tshiakahueka ha dishiba; buatu buakamba kûla ne mai, bakamba kufua. Bakalua kudiye, bakamubisha ku tulu, bakamba ne, Mukelenge, Mukelenge, tudi tufua. Yeye wakabika, wakabuikila luhehele ne mavuala; biakalekela, muaba au wakatalala talalâ. Yeye wakabakonka ne, Ditabusha dienu didi kudi kunyi? Bakadi ne buowa, bakakema, bakakonkangana ne, Ahu eu udi nganyi? Yeye udi wela mpehele ne mai dî diandi, bidi bimunvuila. Ku Gelasa Yesu udi umusha bademon munda mua mufitu Bakafika ku luseke lua Bena Gelasa, luakadi buludiludi ne Galela. Hakasabukeye ku mpata, muntu wa mu musoko wakasangila nʼandi, wakadi ne bademon munda; tô musangu mule yeye kakadi uluata bilulu, kakadi ulala mu nsubu, anu mu majambu. Hakamoneye Yesu, wakela dî diandi bikole, wakadihonena ku mpala kuandi, wakela dî diandi bikole ne, Ndi nʼebe bualu kai, wewe Yesu, Muana wa Nzambi Mutambe Bunene wa mu diulu? Ndi nkutendekena ne, Kunkengeshi; bua wakadi wela mulamatshi dî ne, Hatuka munda mua muntu eu. Nyuma wa bukoya wakadi umukuata misangu ya bungi; bakadi bamusuika ne nkanu ne nkata; hakatshibuleye nkanu, demon wakadi umuihata mu bihela. Yesu wakamukonka ne, Dina diebe nganyi? Wakamba ne, Legona, bualu bua bademon ba bungi bakadi munda muandi. Bakamutendekena ne, Kutuambidi bua tuetu kuya mu dina didi kadî ne tshishikidilu. Tshisumbu tshia ngulube ya bungi tshiakadiku idia mashinde ku mukuna; bakamutendekena ne, Itabusha bua tuetu kubuela munda muai. Yeye wakitabusha. Bademon bakaluhuka munda mua muntu, bakabuela munda mua ngulube; tshisumbu tshiai tshiakanyemena lubilu ku tshibungubungu, yakahona mu dishiba, yakafua mu mai. Hakamona badishi bai bualu ebu, bakanyema, bakamba bualu ebu ku musoko ne mu luseke alu. Bakahatuka mu musoko bua kutangila bualu buakalua; bakalua kudi Yesu, bakasangana muntu wakahatuka bademon munda muandi mushikame ku makasa a Yesu, muluate bilulu, muikale ne lungenyi luimpe; bakatshina. Bamonyi ba bualu abu bakabamanyisha muakusungilabo wakadi mukuatshike ne bademon. Bantu bonso ba mu luseke lua Bena Gelasa bakamuambila ne, Umuka kutudi; bualu bua buowa bunene buakabakuata; wakabuela mu buatu, wakahingana. Kadi muntu wakahatuka bademon munda muandi wakamutendekena ne, Ndi musue kuikala nʼebe; kadi Yesu wakamutuma ne, Uhingane ku nsubu kuebe, ubambile malu manene akukuenzela Nzambi. Yeye wakaya, wakamba malu manene akamuenzela Yesu mu musoko wonso. Hakahingana Yesu, bantu ba bungi bakamusankidila, bualu bua bakadi bamuindile. Muntu wakalua, dina diandi Yailo, yeye wakadi mukelenge wa nsunagoga; wakadiela ku makasa a Yesu, wakamutendekena ne, Ulue mu nsubu wanyi; bualu bua wakadi ne muana mukashi umuehele, wakadi bu bidimu dikumi ne bibidi; yeye wakamba kufua. Hakadiye wenda, bantu ba bungi bakamunguila. Mukashi wakadiku, wakadi ne disama dia mashi ahatuka bidimu dikumi ne bibidi, wakafuta banganga buka bintu biandi bionso, kakuakadi muntu wakamanya mua kushikisha disama diandi; yeye wakalua ku nyima kua Yesu, wakalenga ku mubangu wa kazaku kandi; ha diba adi mene dihatuka dia mashi diakushika. Yesu wakakonka ne, Wakundenga tshianza nganyi? Bakavila buonso buabo, Petelo ne bakuabo bakadi nʼandi bakamba ne, Mukelenge, bisumbu bia bantu bidi bikunguile, bidi bikutshintshimika. Kadi Yesu wakamba ne, Muntu wakundenga tshianza; bualu bua nakudiunvua munda munda ne, Bukole buakuhatuka munda muanyi. Hakamanya mukashi ne, Tshiena musokoma, wakalua uzakala, wakadiela ku mpala kuandi, wakamba ku mesu kua bantu bonso tshiakamulengeleye ne muakashika disama diandi ha diba adi mene. Yesu wakamuambila ne, Muanʼanyi, ditabusha diebe diakukuhandisha, ya biebe talalâ. Hakadiye wamba nunku, muntu wakafuma ku nsubu wa mukelenge wa nsunagoga, wakamba ne, Muanʼebe udi mufue, kutatshishi Muyishi. Hakunvua Yesu dî diabo, wakamuambila ne, Kutshinyi, itabusha anu kuitabusha, nebamusungile. Hakalueye ku nsubu, kakitabusha bua muntu mukuabo abuele nʼandi anu Petelo ne Yone ne Yakobo ne tatu wa muana ne mamu wandi. Bonso bakadi badila, bakadi bamujinga; kadi yeye wakamba ne, Kanudidi; bualu bua yeye kena mufue, udi mulale tulu. Bakamuseka, bakamanya ne, Yeye udi mufue. Kadi yeye wakamukuata ku tshianza, wakamubikila ne, Muana, bika. Muoyo wandi wakahingana, wakabika lukasa; Yesu wakamba ne, Bamuhe bia kudia. Bamuledi bandi bakakema; kadi yeye wakabambila bikole ne, Kanuambidi muntu bualu buakuenjibua. Yeye wakabikila bayidi bandi dikumi ne babidi, wakabaha bukole ne bukokeshi bua kuleshabo bademon bonso, ne bua kukoleshabo bakadi ne mabedi. Yeye wakabatuma bua kuambilabo bantu bualu bua bukelenge bua Nzambi, ne bua kukoleshabo bena mabedi. Yeye wakabambila ne, Kanuangatshi bintu bia kuya nʼabi mu luendu, anyi tshibangu, anyi tshibombo, anyi bidia, anyi mpalata, anyi bikowelu bibidi. Hanuabuela mu nsubu, nushalemu tô ne hanumuka. Bantu badi kabai banuitabusha, hanutshidi nuluhuka mu musoko au, nututule nsenga idi mu makasa enu bu tshimanyinu tshia dibenga diabo. Bakamuangalaka, bakaya mu misoko mikese tô, benda bamba lumu luimpe, bashikisha masama a bantu kuonso kuakayabo. Muloho Helode wakunvua lumu lua malu au onso akenzabo; wakatamba kulubakana, bualu bua bantu bakuabo bakadi bamba ne, Yone wakubika ku lufu; banga ne, Eliya wakumueneka; banga ne, Muprofete wa kale wakubika kabidi. Helode wakamba ne, Nakukosa Yone mutu; ahu au undi ngunvua lumu luandi nganyi? Wakakeba mua kumumona. Hakahingana bapostolo, bakambila Yesu malu akenzabo. Wakabangata, wakaya nʼabo nkayabo mu musoko, dina diau Bete-saîda. Kadi bantu ba bungi, hakatangilabo bualu ebu, bakamulonda; yeye wakabakidila, wakabambila bualu bua bukelenge bua Nzambi, wakakolesha bakadi ne mabedi. Diba diakamba kubuela, bayidi bandi dikumi ne babidi bakalua, bakamuambila ne, Umuangalashe bantu, baye mu misoko ne mu luseke elu bua kulala ne bua kuangata bia kudia: bualu bua kunoko tudi mu tshihela. Kadi yeye wakabambila ne, Nuenu nubahe bia kudia. Bakamba ne, Katuena ne bia kudia bihite mitanda itanu ne mishiha ibidi, anu bituaya kusumba bia kudia bia bantu aba bantu. Bakadi balume bu binunu bitanu. Yeye wakambila bayidi bandi ne, Nubashikike hanshi, ku tshisumbu bu makumi atanu, ku tshisumbu bu makumi atanu. Bakenza nunku, bakabashikika buonso buabo. Yeye wakamema mitanda itanu ne mishiha ibidi, wakatangila mulu, wakabivuidishila disanka, wakabitshibula, wakabifila mu bianza bia bayidi bua kubitekabo ku mpala kua bantu. Bakadia, bakukuta buonso buabo; bakangula bihesa bia bidia biakadi bishala bisaka dikumi ne bibidi. Hakadiye utendelela Nzambi ha nkayandi, bayidi bakadi ha buihi nʼandi; yeye wakabakonka ne, Bantu badi bangamba meme ne, Nganyi? Bakamuandamuna ne, Yone Mubatiji; kadi bakuabo badi bamba ne, Eliya; bakuabo ne, Muprofete wa kale wakubika kabidi. Yeye wakabakonka ne, Kadi nuenu nudi nungamba ne, Nganyi? Petelo wakamuandamuna ne, Kilisto wa Nzambi. Yeye wakabambila bikole ne, Kanuambidi muetu bualu ebu; wakabambila ne, Budi Muana wa muntu nʼabu mbua kukengeshibua makenga a bungi, ne bua kuhidibua kudi bakulu ne kudi bakuidi banene ba Nzambi ne kudi bafundi, ne bua kushihibua, ne bua kubishibua hahita matuku asatu. Yeye wakabambila buonso buabo ne, Biasua muntu kundonda, adihidie, atuale mutshi wandi mutshiamakane ku ditutu ku dituku, andonde. Bualu bua wasua kusungila muoyo wandi neaujimishe; kadi wajimisha muoyo wandi bua bualu buanyi neausungile. Biaheta muntu buloba buonso, ne bua bualu ebu udi udijimisha anyi udi unyanga muoyo wandi, mushinga wandi muimpe udi hanyi? Muntu yonso udi unfua meme ne mei anyi bundu, Muana wa muntu neamufue yeye bundu, halueye ne butumbi buandi ne bua Tatu ne bua banjelo ba tshijila. Ndi nuambila bulelela ne, Bakuabo badi bimana aha kabena bafua tô ne hamonabo bukelenge bua Nzambi. Yesu wakashikisha kuamba malu â; hakahita matuku bu muanda mukulu, yeye wakangata Petelo ne Yone ne Yakobo, wakabanda nʼabo ku mukuna bua kutendelela Nzambi. Hakadiye utendelela Nzambi, mpala wandi wakakudimuka, bilulu biandi biakalua bitoke, biakengelela. Monai, balume babidi bakadi bayikila nʼandi, Mose ne Eliya; bakamueneka mu butumbi, bakadi bamba bualu bua lufu luandi luakambeye kushikisha ku Yelushalema. Mesu a Petelo ne a bakuabo bakadi nʼandi akadi maneme ne tulu; kadi hakatabalabo, bakatangila butumbi buandi, ne balume babidi bimane nʼandi. Hakadi balume aba bumuka kudiye, Petelo wakambila Yesu ne, Mukelenge, hatudi kunoko mbimpe, tuasai bitanda bisatu, tshikuabo ntshiebe, tshinga ntshia Mose, tshikuabo ntshia Eliya; Petelo kakamanya tshiakadiye wamba. Hakadiye wamba dî edi, ditutu diakalua, diakababuikila; hakadibo babuela mu ditutu, bakadi ne buowa. Dî diakaluhuka mu ditutu ne, Eu udi Muanʼanyi musungula, munvuilai. Hakakosa dî, bakasangana Yesu nkayandi. Bakahua, mu matuku au ka bakamanyisha muntu malu akamonabo. Hakatshiabu, bakahueka ku mukuna, tshisumbu tshinene tshia bantu tshiakasangila nʼandi. Muntu wa mu tshisumbu wakela dî diandi bikole ne, Muyishi, ndi nkutendekena, ulue kutangila muanʼanyi mulume; bualu bua udi muana wanyi umuehele mulela; monai, nyuma mubi udi umukuata, yeye udi utayika ne miadi; nyuma mubi udi umuhaluisha tô lututu luhatuka ku mishiku, kena umulekela lukasa, udi umukuma mikumu. Nakutendekena bayidi bebe ne, Bamumushe; bakuhanga. Yesu wakandamuna ne, Nuenu ba tshikondo etshi tshia buhidia ne tshitshu, nenshale nʼenu musangu bule munyi? Nentate nʼenu musangu bule munyi? Lua ne muanʼebe. Hakadiye ulue, demon wakamukuma hanshi, wakamuhaluisha bibi. Kadi Yesu wakabela nyuma wa bukoya, wakashikisha disama dia muana, wakamuhingisha mu bianza bia tatuʼandi. Buonso buabo bakakema bualu bua butumbi bunene bua bukelenge bua Nzambi. Hakadi bantu bonso bakema bua malu onso akadiye wenza, yeye wakambila bayidi bandi ne, Mei â abuele mu matshu enu, bualu bua nebafile Muana wa muntu mu bianza bia bantu. Kadi bobo kabakamanya dî edi, diakadi dibasokoka bua kabadijinguludi; bakatshina mua kumuebesha dî edi. Bayidi bakadi belangana mpata ne, Udi mutambe bakuabo nganyi? Kadi hakamanya Yesu mpata yakadi mu mitshima yabo, wakangata muana mukese, wakamushikika ha buihi nʼandi, wakabambila ne, Witabusha muana mukese eu mu dina dianyi udi ungitabusha meme; wangitabusha meme udi witabusha udi muntume; bua udi mutambe bukese munkatshi muenu nyeye udi mimene. Yone wakamuandamuna ne, Mukelenge, tuakutangila muntu umusha bademon munda mua bantu mu dina diebe; tuakumukanda bualu bua yeye kena nkulonda nʼetu. Kadi Yesu wakamuambila ne, Kanumukandi, bualu bua udi kai unuhidia udi nʼenu. Hakamba matuku a kumubandishabo mulu kukumbana, yeye wakambula mpala wandi mutangisha ku Yelushalema bua kuyeye kuakua, wakatuma bena mukenshi ku mpala kuandi; bakaya, bakabuela mu musoko wa Bena Samalea, bualu bua kumulongoluela malu. Kadi Bena Samalea bakamuhidia, bualu bua mpala wandi wakadi mutangile ku Yelushalema. Bayidi bandi Yakobo ne Yone, hakamonabo bualu ebu, bakakonka ne, Mukelenge, udi musue tuetu tulombe kahia kalue mu diulu bua kubosha, anyi? Kadi yeye wakatshinguluka, wakababela. Bakaya ku musoko mukuabo. Hakadibo baya mu nshila, muntu wakamuambila ne, Nenkulonde kuonso kuwaya. Yesu wakamuambila ne, Mibuabua idi ne mena ai, nyunyu ya mulu idi ne masua ai; kadi Muana wa muntu kena ne ha kuladika mutu wandi. Yesu wakambila muntu mukuabo ne, Undonde. Kadi yeye wakakudimuna dî ne, Mukelenge, witabushe bua meme nganje kuya diambedi bua kujika tatu wanyi. Kadi yeye wakamuambila ne, Shîa bafue bajike bafue babo; kadi wewe ya biebe, umanyishe bantu bualu bua bukelenge bua Nzambi. Mukuabo kabidi wakamuambila ne, Mukelenge, nenkulonde; kadi witabushe bua meme nganje kuya diambedi kulaya badi mu nsubu muanyi. Kadi Yesu wakamuambila ne, Muntu mumane kukuata ku lukasu ludi ludima nʼalu tubalu, biatangileye ku nyima, yeye kena muakanangane ne bukelenge bua Nzambi. Hakashika malu â, Mukelenge wakasungula banga bayidi kabidi makumi muanda mutekete, wakabatuma ku mpala kuandi ku babidi ku babidi mu misoko yonso ne mu miaba yonso, yakadiye wamba kuya. Yeye wakabambila ne, Bulelela, bintu bia kunowa bidi bia bungi, kadi bena mudimu badi banya-banya. Nunku nulombe mukelenge wa bintu bia kunowa, atume bena mudimu mu kunowa kuandi. Yai bienu; monai, ndi nutuma bu bana ba mikoko badi munkatshi mua nkashama, Kanuyi ne tshibombo tshia mpalata ne nsahu wa bintu bikuabo, anyi bisabata bikuabo; kanuedi muntu muoyo musangu mule mu nshila. Hanuabuela mu nsubu, nudianjile kuamba ne, Ditalala dikale mu nsubu eu. Bikalamu muana wa ditalala, ditalala dienu nedikale nʼandi; kadi bikaleye kaimu, nedihingane kunudi kabidi. Nushale mu nsubu amu mene, nudie nunue bidibo banuha; bualu bua muena mudimu udi muakanyine bua kuangateye difutu diandi. Kanutambakanyi ku nsubu ne ku nsubu. Binuabuela mu musoko, bianuitabushabo, nudie biatekabo ku mpala kuenu; nuondahe bena mabedi badimu, nubambile ne, Bukelenge bua Nzambi buakulua ha buihi nʼenu. Kadi hanuabuela mu musoko, biabenga bena musoko kunuitabusha, yai mu misesu yau, nuambe ne, Nsenga ya musoko wenu idi milamate mu makasa etu, tudi tunukuhuilai; kadi numanye bienu ne, Bukelenge bua Nzambi buakulua ha buihi. Ndi nuambila ne, Halua dituku diadia, bujitu bua dikenga dia musoko au nebutambe bua Sodoma. Wewe Kolazina, mulau ulualua kûdi! Wewe Bete-saîda, mulau ulualua kûdi! Bu malu a kukema akenjibua munkatshi muenu, menjibue mu Tulo ne mu Sidona, bakadi kukudimuna mitshima yabo kale, bashikame mu bilulu bikayabala ne mu butue. Halua dituku dia kulumbulula, bujitu bua dikenga dienu nebutambe bua Tulo ne bua Sidona. Ne wewe Kapênuma, nebakubandishe mu diulu, anyi? Nebakuhuekeshe mu Muaba wa Bafue. Wanunvuila udi ungunvuila meme, wanuhidia udi umpidia meme; wampidia meme udi uhidia wakuntuma. Bayidi makumi muanda mutekete bakahingana ne disanka, bakamba ne, Mukelenge, bademon mene badi batumikila dî dietu mu dina diebe. Yeye wakabambila ne, Nakadi nmona Satana mukuluke mu diulu muhone bu muele wa nvula. Nakunuha bukole bua kudiata nyoka ne tuminyiminyi, ne bua kuhita bukole buonso bua muena lukuna; tshintu katshiena tshinuenzela bibi. Kadi kanusanki bua nyuma mibi idi itumikila dî dienu, kadi nusanke bua mena enu adi mafunda mu diulu. Ha diba adi mene yeye wakasanka mu Nyuma Muimpe, wakamba ne, Tatu wanyi, Mukelenge wa diulu ne wa buloba, ndi nkusakidila bua wewe wakusokoka bena meshi ne bena budimu malu â, wakuasokolola kudi bana bakese; bulelela, Tatu, bua bualu ebu buakadi buimpe ku mesu kuebe. Tatu wanyi wakufila bintu bionso mu bianza bianyi; kakuena muntu udi mumanye Muana, anu Tatu; kakuena muntu udi mumanye Tatu, anu Muana ne udi Muana musue kulesha Tatu. Wakatshinguluka kudi bayidi bandi, wakabambila ha nkayabo ne, Mesu adi amona malu anudi numona adi ne disanka; ndi nuambila ne, Baprofete ba bungi ne banfumu bakasua kumona malu anudi numona, kabakâmona; bakasua kunvua malu anudi nunvua, kabakaûnvua. Mumanyi wa mikenshi wakimana, wakateta Yesu munda ne, Muyishi, nengenze tshinyi bua kuhiana muoyo wa tshiendelele? Yesu wakamukonka ne, Bakafunda tshinyi mu mikenshi ya Mose? Udi ubala munyi? Yeye wakakudimuna dî ne, Sua Mukelenge Nzambi webe ne mutshima webe wonso ne muoyo webe wonso ne bukole buebe buonso ne lungenyi luebe luonso; ne sua mukuenu bu mûdi mudisue. Yesu wakamuambila ne, Wewe wakuandamuna banue; enza biebe nunku, newikale ne muoyo. Kadi yeye wakasua kudibingisha, wakakonka Yesu ne, Mukuetu nganyi? Yesu wakamukudimuna dî ne, Muntu wakabika mu Yelushalema, wakadi uhueka ku Yeleko; wakatukidila mu bianza bia banyengi, bakamuvula bilulu biandi, bakamukuma, bakaya, bakamushîa ne tshioyoyo. Muakuidi wa Nzambi wakadi uhueka mu nshila au; hakamoneye muntu, wakahitshila ku luseke lukuabo. Muena Lewi muomumue, hakalueye ku muaba au, hakamumoneye, wakahitshila ku luseke lukuabo kabidi. Kadi Muena Samalea wakadi ulua mu nshila, wakalua kudiye; hakamumoneye, luse luakamukuata, wakalua kudiye, wakamujingila tshilulu ha mputa, wakelabu manyi ne nvinyo; wakamushikika ha nyima ha nyama wandi, wakalua nʼandi ku nsubu wa tshilala benyi, wakamulama bimpe. Hakatshiabu wakahatula ndenalio ibidi, wakaha umena nsubu wa tshilala benyi, wakamuambila ne, Umulame bimpe; hanahingana, nenkuhingishile binga bintu biwahana. Bantu aba basatu, wewe udi wela meshi ne, Muena kuabo ne wakatukidila mu bianza bia banyengi nganyi? Yeye wakakudimuna di ne, Wakamufua luse. Yesu wakamuambila ne, Ya biebe wenze muomumue. Hakadibo baya mu nshila, Yesu wakafika ku musoko mukuabo; mukashi wakadimu, dina diandi Mâta, wakamubuesha mu nsubu muandi. Wakadi ne muakunyiʼandi mukashi dina diandi Malia, yeye wakadi mushikame ku makasa a Mukelenge, ulelesha dî diandi. Kadi Mâta wakadi utata ne mudimu wa bungi wa mu nsubu; yeye wakalua kudi Yesu, wakamukonka ne, Mukelenge, kuena ubenga bua muakunyiʼanyi anshile mudimu nkayanyi, anyi? Umuambile alue kunkuatshisha. Mukelenge wakamuandamuna ne, Mâta, Mâta, wewe udi utamba kuela meshi a malu a bungi adi akutatshisha; tudi anu ne tshintu tshimue bualu; Malia wakusungula luseke ludi luimpe, kabena bamanye mua kumunyengalu. Yeye wakadi utendelela Nzambi mu muaba mukuabo; hakalekeleye, muyidi wandi mukuabo wakamuambila ne, Mukelenge, utuyishe bietu mua kutendelela Nzambi bu muakayisha Yone bayidi bandi. Yeye wakabambila ne, Hanuatendelela Nzambi, nuambe ne, Tatu, banemeke dina diebe. Bukelenge buebe bulue. Utuhe tshituha tshia bidia bietu bia buatshia-buatshia. Utujimishile mibi yetu, bualu bua tuetu tudi tulekelele muntu yonso udi nʼetu dibanza. Kutufikishi hadi mateyi. Yeye wakabakonka ne, Muntu kai wa munkatshi muenu udi ne mulunda wandi? Biayeye kudi mulunda wandi mundankulu ne, Mulunda, unsombeshe mitanda isatu; bualu bua mulunda wanyi wakulua ku luendu, tshiena ne tshia kuteka ku mpala kuandi; yeye udi mu nsubu neandamune ne, Lekela kuntatshisha; tshibi tshidi tshinshila, hana banyi ne meme tudi mu bulalu; tshiena mumanye mua kubika bua kukuha tshintu. Ndi nuambila ne, Bulelela, yeye kena ubika bua kumuha tshintu bua yeye udi mulunda wandi, kadi bualu bua dinanukila diandi yeye neabike, neamuhe bintu bionso bidiye nʼabi bualu. Ndi nuambila ne, Nulombe, nebanuhe; nukebe, nenumone; nukokole, nebanunzuluile. Bualu bua muntu yonso udi ulomba, neahete; udi ukeba, neamone; udi ukokola, nebamunzuluile. Tatu kai wa munkatshi muenu, biamulomba muanʼandi mutanda, neamuhe dibue, anyi? Biamulombeye mushiha, neamuhe nyoka, anyi? Muomumue, biamulombeye dikela, neamuhe kaminyiminyi, anyi? Nunku nuenu bantu babi, binuamanya mua kuha bana benu bintu bimpe, Tatu wenu wa mu diulu kena uha batu bamulomba Nyuma Muimpe, anyi? Yeye wakadi umusha demon wa kamama munda mua muntu Hakumuka demon, kamama kakakula; bantu bakakema. Kadi bakuabo bakamba ne, Yeye udi umusha bademon mu dina dia Belezebula, mukelenge wa bademon. Bakuabo bakamuteta munda, bakamulomba tshimanyinu tshia mu diulu. Kadi yeye wakamanya meshi abo, wakabambila ne, Bukelenge buonso budi buhanduluke nebufue, nsubu kabidi udi muhanduluke neuhukile ha munga. Ne Satana kabidi biahandulukeye, bukelenge buandi budi bumanye mua kujalama munyi? Bua nuenu nudi nungamba ne, Udi umusha bademon mu dina dia Belezebula. Bingikala ngumusha bademon mu dina dia Belezebula, bana benu badi babumusha mu dina dia nganyi? Nunku bobo nebikale balumbuludi benu. Kadi bingikala ngumusha bademon ne munu wa Nzambi, bukelenge bua Nzambi buakumana kulua kunudi. Bialama muena bukole luhangu luandi, muikale ne bintu bionso bia nvita, biuma biandi nebikale talalâ; kadi biamutukidila mukuabo udi mumutambe bukole, neamutshimune, neamunyenge bintu biandi bionso bia nvita biakueyemeneye, neabanyine bakuabo bintu biakunyengeye. Udi kai nʼanyi udi umpidia; udi kai usangisha nʼanyi bintu udi ubitangalasha. Haluhuka nyuma wa bukoya munda mua muntu, nyuma udi wendakana mu miaba idi kayi mai, ukeba ha kuikisha; biahangeye mua kuhamona, yeye udi wamba munda munda ne, Nempingane mu nsubu wanyi unakuluhuka. Halueye, udi usangana nsubu mukomba, mulengesha. Hashishe, yeye udi uya biandi, udi wangata minga nyuma muanda mutekete idi imutamba yeye bubi, idi ibuelamu, idi ishikama; malu a muntu au a hashishe adi atamba a diambedi bubi. Hakadiye wamba malu â, mukashi wa mu tshisumbu tshia bantu wakela dî diandi, wakamba ne, Difu diakukutuala didi ne disanka ne mabele awakuamua. Kadi yeye wakamba ne, Nasha, badi batelesha dî dia Nzambi, badi badilama, badi ne disanka. Hakamunguila bisumbu bia bantu, wakabanga kubambila ne, Ba tshikondo etshi badi babi, badi bakeba tshimanyinu; kabena babaha tshimanyinu tshikuabo anu tshia Yona. Bu muakadi Yona tshimanyinu ku mesu kua Bena Ninewe, Muana wa muntu neikale nunku kabidi ku mesu kua ba tshikondo etshi. Mu dituku dia kulumbulula, mukelenge mukashi wa ku sude neabike ne bantu ba tshikondo etshi, neabahishe; bua yeye wakalua biandi kunfudilu kua buloba bualu bua kunvua lungenyi lua Solomo; ne monai, udi mutambe Solomo udi aha. Mu dituku dia kulumbulula, Bena Ninewe nebimane ne bantu ba tshikondo etshi, nebabahishe; bua bobo bakakudimuna mitshima yabo, hakuluabo mei a Yona; ne monai, udi mutambe Yona udi aha. Hatemesha muntu muinda, yeye kena ûteka mu tshisokomenu, anyi munshi mua mushete, udi ûteka ha mesa a muinda, bua bonso babuela bamone dinkenka diau. Disu diebe didi muinda wa mubidi webe; bikala disu diebe dimona tshintu bimpe, mubidi webe wonso neuteme ne munya; bikaladi dibi, mubidi webe wonso neufike ne mîdima. Udimuke ne munya udi munda muebe kawikadi mîdima. Bikala mubidi webe wonso utoka ne munya, kawi ne luseke lukuabo lufike, wonso neutoke ne munya, bu mudi muinda ukutemena ne dinkenka diau. Hakadiye wakula, Mufalese wakamubikila ne, Udie nʼanyi bidia bia dinda; wakabuela mu nsubu, wakashikama ku mesa. Hakamona Mufalese bualu abu, wakakema bua yeye kakowa diambedi. Mukelenge wakamuambila ne, Ahu nuenu Bafalese nutu nûvua ha nyima ba luhanza ne dilonga, kadi munda muenu mudi mûle tente ne bunyengi ne malu mabi. Nuenu bahote, muenji wa munda kena muenji wa ha nyima kabidi, anyi? Nuhe bantu bintu bia luse binudi nʼabi munda; nunku bintu bionso nebitoke ku mesu kuenu. Kadi nuenu Bafalese, mulau ulualua kunudi, bualu bua nuenu nutu nuafila tshia dikumi tshia luenyi ne tshia tshikote ne tshia midioko yonso, kadi nudi nuhetula dilumbulula dijalame ne luse bia Nzambi; biakadi bimpe bia nuenu kuenza malu â a itu nyima, kambimpe nuhidie kuenza malu au a ku mpala kabidi. Nuenu Bafalese, mulau ulualua kunudi, bualu bua nudi basue nkuasa minene mu nsunagoga, nudi basue kabidi bantu banusekelele mu bisalu! Mulau ulualua kunudi, bualu hua nuenu nudi bu nkita idi kayi imueneka, bantu batu batambakenahu kabena baimanye! Mumanyi wa mikenshi mukuabo wakakudimuna dî, wakamba ne, Muyishi, hawakuamba dî edi, udi utuhenda bietu kabidi. Yesu wakamba ne, Nuenu bamanyi ba mikenshi, mulau ulualua kunudi kabidi, bua nuenu nutu nuateka hamʼbidi ha bantu majitu adi bualu bukole ha kuatuala, kadi nuenu kanutu nuâlenga munu! Mulau ulualua kunudi, bua nuenu nutu nuibaka nkita ya baprofete, bakashihabo kudi bankambua benu! Nunku nudi nudibanda, nudi nuitabusha malu akenza bankambua benu; bobo bakabashiha, nuenu kabidi nutu nuibaka nkita yabo. Ebu mbuakamba lungenyi lua Nzambi kabidi ne, Nembatumine baprofete ne bapostolo; nebashihe bakuabo, nebabakengeshe; nunku nebalombe mashi a baprofete bonso akamatshishabo hanshi ku tshibangidilu tshia buloba tô ne katataka bu dibanza dia bantu ba tshikondo etshi: mashi a Ebele tô ne ku mashi a Zakâya, wakafuila hankatshi ha tshishihelu ne ntempelo; bulelela, ndi nuambila ne, Neikale bu dibanza dia bantu ba tshikondo etshi. Nuenu bamanyi ba mikenshi, mulau ulualua kunudi, bua nuenu nuakunyenga luvungula lua ku lungenyi; kanuakubuelamu, nuakuhumbisha kabidi bakadi babuela! Hakaluhukeye, bafundi ne Bafalese bakabanga kumunguila ne bukole, bamuambishe malu makuabo; bakadi bamualamine bua kukuatabo dî diahatuka mukana muandi. Ha diba adi mene, bantu mbombo ne mbombo bakadisangisha, bakadiatangana ha makasa; yeye wakabanga kuambila bayidi bandi diambedi ne, Nudimukile luevene lua Bafalese, ludi lubombo. Kadi kakuena tshintu tshibuikila tshiahanga kubuluibua, kakuena tshintu tshisokoka tshiahanga kumanyibua. Nunku malu onso anuakamba mu midima nebaûnvue mu munya; malu onso anuakakula mu ditshu mu bisokomenu nebâmbe ha mitu ya nsubu. Ndi nuambila nuenu balunda banyi ne, Kanutshinyi badi bashiha mubidi, kadi ku nyima kabena bamanye mua kuenza bunga bualu. Meme nenudimushe bua wa nuenu kutshina: Nutshine udi ne bukole bua kuela bantu mu Ngena; bulelela, ndi nuambila ne, Numutshine yeye. Kabatu bahana mishamisha itanu ku makuta makese abidi, anyi? Mushamusha umue kawena muhua muoyo ku mesu kua Nzambi. Nsuki ya ku mitu yenu mene mene idi mibala yonso. Kanutshinyi, mushinga wenu udi mutambe wa mishamisha ya bungi. Ndi nuambila ne, Muntu yonso wangitabusha ku mesu kua bantu, Muana wa muntu neamuitabushe kabidi ku mesu kua banjelo ba Nzambi; kadi muntu yonso wampidia ku mesu kua bantu neahidibue ku mesu kua banjelo ba Nzambi. Muntu yonso watela Muana wa muntu dî dibi nebamujimishile bubi buandi; kadi kabena bajimisha bubi bua wahenda Nyuma Muimpe. Haluabo nʼenu ku mpala kua badi ku mutu kua nsunagoga, ne kua balumbuludi, ne kua banfumu, kanutambi kuelangana meshi ne, Netubakudimune dî kai? Netuambe tshinyi? Nyuma Muimpe neanuyishe mua kuamba ha diba adi. Muntu wa mu tshisumbu tshia bantu wakamuambila ne, Muyishi, ambila muanʼetu antahuluile buhianyi. Kadi Yesu wakamukonka ne, Mulumiana, wakunteka meme mulumbuludi wenu ne munutahuluidi nganyi? Yeye wakabambila ne, Nudimuke, kanukumi mitshima ku biuma; bua muntu kena ne muoyo bualu bua bungi bua bintu bidiye nʼabi. Yeye wakabelela lusumuinu ne, Budimi bua muntu mubanshi buakakuama bintu bia bungi; wakelangana meshi munda ne, Ngenze tshinyi? Tshiena ne ha kusangishila bintu bianyi. Wakamba ne, Nengenze nunku, nensasule mayeba anyi, nengase makuabo matambe a diambedi bunene, nensangishilemu maminu anyi onso ne biuma bianyi. Nengambile mutshima wanyi ne, Mutshima, wewe udi ne bintu bia bungi bibuta bia bidimu bingi; wikishe, udie, unue, usanke biebe. Kadi Nzambi wakamuambila ne, Wewe udi muhote, butuku ebu mene badi balomba muoyo webe; bintu biwakulongolola nebikale kudi nganyi? Muntu udi udibutshila bintu biandi, kai mubanshi ku mesu kua Nzambi, udi nunku. Yeye wakambila bayidi bandi ne, Ebu mbundi nuambila ne, Kanutambi kuelangana meshi a muoyo wenu ne, Netudie tshinyi? Ne a mibidi yenu ne, Netuluate tshinyi? Bua muoyo udi mutambe bia kudia, mubidi udi mutambe bilulu, Monai bikololo; kabitu biakuna maminu, kabiena ne bibutshilu ne mayeba; kadi Nzambi utu waidisha; mushinga wenu udi mutambe wa nyunyu misangu bungi munyi? Muntu kai wa munkatshi muenu, bikaleye utamba kuelangana meshi, udi mumanye mua kulunga ku bule buandi nkubita umue? Binuikala kanui bamanye mua kuenza bualu butambe bukese, nudi nuelelangana meshi a malu makuabo tshinyi? Monai bilongo bia mu mpata mudibi bileha; kabitu biakuata mudimu, kabitu biasala buanda; kadi ndi nuambila ne, Solomo wakadi ne butumbi buandi bunene, kadi kabakamuluatshisha bu tshilongo etshi. Bisosa bia mu mpata bidiku lelu, hatshiabu nebibueshibue mu matshua; nuenu bena ditabusha dikese, bialuatshisha Nzambi bisosa nunku, yeye kena utamba kunuluatshisha, anyi? Nuenu, kanukebi bia kudia ne bia kunua, mitshima yenu kailubakanyi. Bisamba bia ha buloba bidi bikeba bintu ebi bionso; kadi Tatu wenu udi mumanye ne, Nuenu nudi ne bintu ebi bionso bualu. Kadi kebai bukelenge buandi, nebanuhe bintu ebi. Nuenu tshisumbu tshikese tshia mikoko, kanutshinyi; bua Tatu wenu udi musue kunuha bukelenge. Nuhane binudi nʼabi, nubihe bantu bahele ku luse; nudienzele bibombo bidi kabi bikulukasha, bintu bia mu tshibutshilu tshia mu diulu bidi kabi bishika tshiendelele, mudi muibi kai ulua ha buihi, mudi tshishi katshi tshinyanga. Mitshima yenu kabidi idi kudi bintu bia mu tshibutshilu tshienu. Nuele mikaya yenu, minda yenu ikale itema; nuenu kabidi nuikale bu bantu badi batekemena nfumu wabo, udi ufuma kuakudieye bidia bia dibanji; hafikeye, hakokoleye ku tshibi, nebamunzuluile lubilu. Bahika aba, biabasangana nfumu wabo bamutekemena, nebikale ne disanka; bulelela, ndi nuambila ne, Yeye neasuike mukaba, neabashikike ku mesa, neabenzele mudimu. Bialueye nasha mundankulu, nasha hasama tshitala tshiaʼmbedi, biabasanganeye benza nunku, bobo nebikale ne disanka. Nudi bamanye ne, Bu muena nsubu mumanye ha diba dialua muibi, wakadi kulala tshitabala, kakadi kukuitabusha batubule nsubu wandi disoso. Nuenu kabidi nudilongolole, bualu bua Muana wa muetu nealue ha diba dinudi kanui belangana meshi. Petelo wakamukonka ne, Mukelenge, tuetu nkayetu mbûdi welela lusumuinu elu, anyi udi welela bantu bonso? Mukelenge wakamba ne, Nganyi mulami wa bintu udi ulamata nfumu wandi ne dinanukila, ne udi muntu wa lungenyi? Nfumu wandi neamuteke ha mutu ha bantu bandi bua yeye kubaha bidia biabo, halua dituku diabi. Muhika au neikale ne disanka, hahingana nfumu wandi, hamusanganeye wenza nunku. Bulelela, ndi nuambila ne, Yeye neamuteke ha mutu ha bintu biandi bionso. Kadi biamba muhika au munda munda ne, Nfumu wanyi kena ulua katataka, biabangeye kukuma bahika bakuabo, balume ne bakashi, biadieye, bianueye, biabangeye kukuatshika maiuvu, nfumu wa muhika au nealue dituku didiye kai mumutekemene ne ha diba didiye kai mumanye, neamukume bibi, neamuteke ku luseke lua bena buhidia. Nunku muhika wakadi mumanye muakadi nfumu wandi musue, kadi yeye kakalongolola malu andi, kakenza bu muakasueye, nebamukume bikole; kadi wakadi kai mumanye bualu, Wakenza malu a kukumibua, nebamukume bikese. Muntu yonso udi uheshibua bia bungi nebamulombe bia bungi; biatekabo bia bungi mu bianza bia muntu, nebamulombe bikuabo ha mutu. Nakuluila bua kutuma kahia ha buloba; nakadi musue kateme! Ndi ne dibatiza diambatizabo nʼadi, ndi mu bualu bukole tô ne hashikadi! Nudi nuelangana meshi munda ne, Nakuluila bua kuha bantu ditalala ha buloba, anyi? Ndi nuambila ne, Nasha, nakuluila bua kuabulula bantu; mu nsubu umue nemuikale bantu batanu bâbuluke; basatu nebikale ne babidi mpata, babidi nebikale ne basatu mpata. Nebâbuluke; tatu neikale ne muanʼandi mulume mpata, muana mulume-neikale ne tatuʼandi mpata; mamu neikale ne muanʼandi mukashi mpata, muana mukashi neikale ne mamuʼandi mpata; mamuʼandi-muenu neikale ne mukashiʼa muanʼandi mpata, mukashiʼa muana neikale ne mamuʼandi-muenu mpata. Yeye wakambila bisumbu bia bantu kabidi ne, Hanuatangila ditutu dibanda ku wesete, nudi nuamba lubilu ne, Nvula ukadi ulua; bulelela, nealue. Hanuatangila luhehele lulua ku sude, nudi nuamba ne, Munya mukole ukadi ulua; bulelela, neulue. Nuenu bena lubombo, nudi bamanye mua kujingulula mpala wa buloba ne wa diulu, munyi kanuena bamanye mua kujingulula malu a tshikondo etshi? Munyi kanuena nudisunguile bualu budi buakane? Hautshidi uya ne udi nʼebe lukuna kudi mukelenge, mu nshila mene umusengelele bikole akulekele; biwikala kui wenza nunku, yeye neakukoke kudi mulumbuludi, mulumbuludi neakufile mu bianza bia mpolushe, mpolushe nenkuele mu nsubu wa lukanu. Ndi nkuambila ne, Kuena uluhukamu tô ne hawafuta dibanza dionso, nasha kakuta kakese kushala. Bantu bakadiku dituku adi, bakambila Yesu bualu bua Bena Galela, bakadi Pilato mukasangishe mashi abo ne a nyama yakadi mishihela Nzambi. Yeye wakabakonka ne, Nudi nuelangana meshi ne, Bena Galela aba bakadi batambe Bena Galela bonso bubi, bua bobo bakakenga nunku; anyi? Ndi nuambila ne, Nasha; badi binuikala kanui nukudimuna mitshima yenu, buonso buenu nenufue muomumue. Ne bualu bukuabo, bantu aba dikumi ne muanda mukulu, bakuhukilabo kudi tshibunda tshia tushola mu Siloama, tshiakabashiha, nudi nuelangana meshi ne, Bobo bakadi batambe bonso ba mu Yelushalema bubi, anyi? Ndi nuambila ne, Nasha; kadi binuikala kanui nukudimuna mitshima yenu, buonso buenu nenufue muomumue. Yeye wakela lusumuinu elu ne, Muntu wakadi ne mutshi wa nfigi mukuna mu budimi buandi bua mamuma a nvinyo; yeye wakalua kukebaku mamuma, kakâsangana. Wakambila mulami wa budimi ne, Tangila, nakalua bidimu ebi bisatu bua kukeba mamuma ku mutshi eu wa nfigi, nakûsangana hatuhu; ûtahe; udi wonena buloba tshinyi? Kadi yeye wakandamuna dî ne, Mukelenge, ûlekele tshidimu etshi; nenguihile, nenguele tunvi; biakuamau mamuma, mbimpe; kadi bikalau kawi mukuame, ûtahe. Yeye wakadi uyisha bantu mu nsunagoga dituku dia Lumingu lua Bayuda. Mukashi wakadiku, wakadi ne nyuma wa butekete bidimu dikumi ne muanda mukulu, mubidi wandi wakadi mukonyame, kakadi ne bukole bua kudiolola. Nakamumona Yesu, wakamubikila, wakamuambila ne, Mukashiana, matekete ebe akulekele. Wakamulenga bianza, mubidi wandi wakololoka katataka, yeye wakatumbisha Nzambi. Mukelenge wa nsunagoga wakadi ne tshishi bualu bua Yesu wakondaha muntu dituku dia Lumingu, wakambila bantu ne, Matuku asambombo adiku adibo ne bua kukuata mudimu wabo; mu matuku au nulue bua kuondahibua, kanulu dituku dia Lumingu. Kadi Mukelenge wakamukudimuna dî ne, Nuenu bena lubombo, mukuabo wenu kai udi kai usulula ngombe wandi anyi nyama wa mpunda ku tshidilu bua kuyeye kumunuisha mai dituku dia Lumingu? Mukashi eu udi muana wa Abalahama, wakadi musuika kudi Satana bidimu ebi dikumi ne muanda mukulu; kabiakadi bimpe bia kumusulula dituku dia Lumingu, anyi? Hakambeye dî edi, bonso bakadi nʼandi lukuna bakakuatshika bundu ku mesu; bantu ba tshisumbu tshionso bakasanka bua malu onso a butumbi akenzeye. Yeye wakamba ne, Bukelenge bua Nzambi budi bu tshinyi? Nembufuanyikishe bu tshinyi? Budi bu lutete lua mutada luakangata muntu bua kukuneye mu budimi buandi; luakuleha, luakulua mutshi munene; nyunyu ya mu diulu yakuikila mu matamba au. Yeye wakamba kabidi ne, Nenfuanyikishe bukelenge bua Nzambi bu tshinyi? Budi bu luevene luakangata mukashi, wakalusokoka mu bihikilu bisatu bia bukula tô ne hakenduluka luevene mu bukula buonso. Yesu wakahitshila mu bimenga ne mu misoko mikese, wenda uyisha bantu, uya ku Yelushalema. Muntu wakamukonka ne, Mukelenge, bantu banya-banya nebasungidibue, anyi? Yeye wakabambila ne, Nuidikishe mua kubuela ku mushiku wa mbelu mubumbakane; ndi nuambila ne, Ba bungi nebakebe kubuelaku, nebahange. Habika muena nsubu, hinshileye tshibi, nuenu nenubange kuimana ku bula nukokola ku tshibi ne, Mukelenge, utunzuluile; yeye neanuandamune ne, Tshiena mumanye kunuakufuma; hashishe nenubange kuamba ne, Tuakadi tudia nʼebe, tunua nʼebe, wewe kabidi wakadi uyisha bantu mu misesu yetu; yeye neambe ne, Ndi nuambila ne, Tshiena mumanye kunuakufuma, buonso buenu benji ba malu mabi, umukai kundi. Muadi newikalemu ne kusumakana menu, hanuatangila Abalahama ne Isaka ne Yakoba ne baprofete bonso bashikame ku mesa mu bukelenge bua Nzambi, ne hanuaditangila bahatula ku bula. Nebafume ku esete ne ku wesete ne ku node ne ku sude, nebashikame ku mesa mu bukelenge bua Nzambi. Banga badi ku nyima katataka nebikale ku mpala, banga badi ku mpala katataka nebikale ku nyima. Ha diba adi mene Bafalese bakuabo bakalua, bakamuambila ne, Umuka eku, ya biebe, bualu bua Helode udi musue kukushiha. Yeye wakabambila ne, Yai bienu nuambile nyama au wa budimu ne, Lelu ne makelela ndi ngumusha bademon munda mua bantu, ndi nmana masama a bantu, maihi nenshikishe mudimu wanyi. Kadi bundi nʼabu mbua kuya mu nshila lelu ne makelela ne maihi; bualu bua muprofete kena mumanye mua kufuila kukuabo anu mu Yelushalema. Wewe Yelushalema, Yelushalema, utu washiha baprofete, utu wakuma bakukutuminabo mabue! Misangu ya bungi nakasua kusangisha bana bebe bu mudi nsolo usangisha bana bandi mu mahuahua andi, kadi nuenu nuakuhidia. Tangilai, nsubu wenu udi mushale hatuhu; ndi nuambila ne, Kanuena nuntangila tô ne hanuamba ne, Udi ulua mu dina dia Mukelenge atumbishibue. Hakabueleye mu nsubu wa muntu munene wa Bafalese dituku dia Lumingu lua Bayuda bua kudia bidia, bakadi bamutentekela. Muntu wakalua ku mpala kuandi, wakadi ne disama dia munana. Yesu wakakonka bamanyi ba mikenshi ne Bafalese ne, Kuondaha kua bantu dituku dia Lumingu kudi kushiha mukenshi, anyi? Kadi bobo bakahua. Yesu wakamuangata, wakashikisha disama diandi, wakamulekela. Wakabamhila ne, Mukuabo wenu kai, bikaleye ne nyama wa mpunda anyi ngombe muhone mu dina dia mai, kena umusabula lubilu difuku dia Lumingu? Kabakamanya mua kumukudimuna dî. Yeye wakelela bakabikilabo ku bidia lusumuinu, hakabatangileye badisunguila nkuasa minene, wakabambila ne, Biakubikilabo bua kudia bidia bia dibanji, kudishikaminyi mu nkuasa munene; bikalabo babikile mukuabo udi mukutambe, wakumbikila nʼandi nealue, neakuambile ne, Ushile muntu eu muaba; wewe neubange kuangata muaba mutambe bukese. Kadi hakubikilabo, ya biebe ushikame ha muaba udi mutambe bukese; hashishe halua wakukubikila, neakuambile ne, Mulunda, bandila biebe; wewe newikale ne butumbi ku mesu kua bantu bonso badi bashikame nʼebe ku mesa. Bualu bua wadibandisha nebamuhuekeshe, wadihuekesha nebamubandishe. Yesu wakambila wakamubikila bua kudia ne, Hawalambishila bantu bidia bia munda munya anyi bia dilolo, kubikidi balunda bebe anyi bana benu anyi ba tshiota tshienu anyi babanshi badi ha buihi nʼebe; biakubikilabo wewe kabidi, nebakuhingishile bintu biebe. Kadi hawalambishila bantu bidia, ubikile bahele ne bataha ne balema ne bafofo; nebakutumbishe, bua bobo kabena ne bia kukuhingishila kabidi; nebakuhingishilebi, halua dibika dia bantu bakane ku lufu. Mukuabo wa bakadi badia nʼandi bidia, hakunvueye mei a Yesu, wakamuambila ne, Wadia bidia mu bukelenge bua Nzambi udi ne disanka. Kadi Yesu wakamuambila ne, Muntu wakadiku, wakalamba bidia bia dilolo bia bungi, wakabikila bantu ba bungi. Hakafika diba dia kudia, wakatuma muntu wandi bua kuambila bakadiye mubikile diambedi ne, Luai, bualu bua bintu bionso bidi bilongolola. Buonso buabo bakabanga kumulayidila bu dî dimana kuhunga. Wa kumudilu wakamuambila ne, Nakûla budimi, bundi nʼabu mbua kuya kubumona; udi nkusengelela bua kundayidila. Mukuabo wakamba ne, Nakûla ngombe dikumi, ibidi ku mutshi wa tshikokedi ibidi ku mutshi wa tshikokedi, nenye kuiteta. Ndi nkusengelela bua kundayidila. Mukuabo wakamba ne, Nakubaka mukashi, nunku tshiena mumanye mua kuya. Muntu wakalua, wakambila nfumu wandi malu â. Muena nsubu wakadi ne tshishi, wakambila muntu wandi ne, Ya biebe lubilu mu misesu ya musoko ne mu tushila tukese, ulue ne bahele ne bataha ne bafofo ne balema. Muntu wandi wakamba ne, Nfumu wanyi, bakuenza bu muwakuamba, kadi miaba mikuabo idi mishale. Nfumu wakambila muntu wandi ne, Ya biebe mu misesu ne ha buihi ne mpangu, ubabueshe mu nsubu, ûle tente. Ndi nuambila ne, Banakubikila diambedi, kakuena umue wabo udi mua kulabula bidia bianyi. Bantu ba bungi bakadi baya nʼandi, yeye wakatshinguluka, wakabambila ne, Bialua muntu kundi kai ne tatu wandi lukuna ne baba wandi ne mukashi wandi ne bana bandi ne bana babo balume ne bana babo bakashi, ne muoyo wandi mene kabidi, kena mumanye mua kuikala muyidi wanyi. Muntu yonso udi kai utuala mutshi wandi mutshiamakane, undonda, kena mumanye mua kuikala muyidi wanyi. Mukuabo wenu kai, biasueye kuibaka tshibumba tshia tushola, kai mushikame diambedi mubale mushinga watshi ne, Ndi ne bia kutshishikisha nʼabi, anyi? Bikaleye kai muenze nunku, bonso bamona bualu ebu nebabange kumuseka, halongeye tushola tua kunshi nkayatu, kai mumanye mua kutshishikisha tshionso, nebambe ne, Muntu eu wakubanga kuibaka tshibumba, kai mumanye mua kutshishikisha. Anyi, nfumu kai, biayeye bua kuluangana ne nfumu mukuabo, kai mushikame diambedi muelangane meshi ne, Ndi mua kuluangana ne udi ulua ne masalayi mbombo ibidi bishi, kadi meme ndi ne anu lubombo lumue? Anyi, hatshidi mukuabo kule, neamutumine miloho bua kuebeshai bualu bua kuikalabo talalâ. Nunku muntu yonso wa munkatshi muenu udi kai uhidia bintu bionso bidiye nʼabi kena mumanye mua kuikala muyidi wanyi. Lueho ludi luimpe, kadi biatshihala lueho kutua kualu, nebalutuishe kabidi ne tshinyi? Kaluena luimpe bua kuluelabo mu budimi, anyi ha diala; nebaluimashe tshianana. Udi ne matshu unvue biandi. Basangishi ba mulambu bonso ne bantu habi bakadi balua ha buihi nʼandi bua kunvua muakadiye wamba. Kadi Bafalese ne bafundi bakajiana ne, Muntu eu udi witabusha bantu babi, udi udia nʼabo. Yeye wakabelela lusumuinu elu ne, Muntu kai wa munkatshi muenu, bikaleye ne lukama lua mikoko, hajimisheye mukuabo, kena ushîa minga makumi tshitema ne tshitema mu tshihela wenda ukeba udi mujimine tô ne haumoneye? Haumoneye, neawambule ha diaha ne mutshima usanka. Hahinganeye kuandi, neabikile balunda bandi ne bena mutumba nʼandi neabambile ne, Nusanke nʼanyi, bua nakumona mukoko wanyi wakadi munjimine. Ndi nuambila ne, Nunku kabidi disanka dia mu diulu bua muntu umue mubi wakukudimuna mutshima wandi neditambe disanka bua bantu bakane makumi tshitema ne tshitema badi kabai ne bua kukudimuna mitshima yabo. Mukashi kai, bikaleye ne mpalata dikumi, hajimisheye umue, kena Utemesha muinda, akombe mu nsubu, akebe bimpe tô ne hamumoneye? Hamumoneye, neabikile balunda bandi ne bena mutumba nʼandi, neabambile ne, Nusanke nʼanyi, bua nakumona mpalata wakadi mujimine. Ndi nuambila ne, Nunku kabidi disanka didi ku mesu kua banjelo ba Nzambi bualu bua muntu umue mubi wakukudimuna mutshima wandi. Yesu wakamba ne, Muntu wakadiku, wakadi ne bana balume babidi. Muana muakunyi wakambila tatu wandi ne, Tatu, umpe luanyi luseke lua biuma lualua kundi. Yeye wakabatahuluila bintu biandi bionso. Hakahita matuku makese, muana muakunyi wakasangisha bintu biandi bionso, wakaya mu luendu kule ku luseke lukuabo; wakatangadishaku bintu biandi bionso ku malu mabi akenzenzeye. Hakamaneye bintu bionso, tshiole tshinene tshiakalua ku luseke alu; wakabanga kukengela bintu. Wakaya, wakadilamika kudi muntu wa ku luseke alu; muntu au wakamutuma mu madimi andi bua kudisheye ngulube. Yeye wakasua kûsha difu diandi tente ne bihusu biakadi ngulube idia. Kakuakadi muntu wakamuha tshintu. Hakakatamuteye, wakadikonka munda ne, Bena mudimu ba tatu wanyi hadi bungi munyi badi ne bia kudia bia bungi ne bintu bikuabo bisambuke ha mutu kabidi, kadi meme ndi nfua ne nsala kunoko? Nembike, nenye kudi tatu wanyi, nemuambile ne, Tatu, nakuenzela diulu bibi, nakuenza bibi ku mesu kuebe kabidi. Tshiena bianyi muimpe kabidi bua kumbikilabo ne, Muanʼebe, umbueshe mu mudimu bu bena mudimu bebe bakuabo. Yeye wakabika, wakalua kudi tatu wandi. Hakadiye kuakua, tatu wandi wakamumona, luse luakamukuata, wakanyema lubilu, wakamuela tshituha ku nshingu, wakamutuatua mishiku. Muana wakamuambila ne, Tatu, nakuenzela diulu bibi, nakuenza bibi ku mesu kuebe kabidi; tshiena bianyi muimpe kabidi bua kumbikilabo ne, Muanʼebe. Kadi tatu wandi wakambila bantu bandi ne, Nulue lubilu ne tshilulu tshidi tshitambe buimpe, munuluatshishetshi; numuele kakanu ku munu ne bisabata ku makasa. Nulue ne muana wa ngombe udi ne manyi, numushihe, tudie bietu, tusanke bietu, bualu bua muana wanyi eu wakadi mufue, udi ne muoyo kabidi; wakadi mujimine, wakamueneka. Bakabanga kusanka. Kadi muanʼandi muanʼa bute wakadi mu budimi; hakadiye ulua, ukadi ufika hehi ne nsubu, wakunvua mutoyi wa biombelu ne maja. Yeye wakabikila muena mudimu, wakamuebesha ne, Abu mbualu tshinyi? Wakamuambila ne, Muanʼenu wakulua; tatu webe wakushiha muana wa ngombe wa manyi, hua yeye wakumuangata mukole. Kadi yeye wakadi ne tshishi, wakahidia kubuela mu nsubu; tatu wandi wakaluhuka, wakamusengelela. Yeye wakandamuna tatu wandi ne, Ahu bidimu ebi bia bungi bindi mukukuatshile mudimu webe, tshiena muhidie di diebe; kadi wewe kuena mumpe kana ka mukoko bua meme kusanka ne balunda banyi; kadi bakulua muana webe eu, wakutangadisha bintu biebe kudi bakashi ba masandi, wewe wakumushihela muana wa ngombe wa manyi. Tatu wandi wakamuambila ne, Muanʼanyi, wewe udi nʼanyi tshiendelele, bintu bianyi bionso mbiebe. Biakadi bimpe bia kusaba ne kusanka, bualu bua muanʼenu eu wakadi mufue, udi ne muoyo kabidi; wakadi mujimine, wakumueneka. Yesu wakambila bayidi bandi kabidi ne, Muntu mubanshi wakadiku, wakadi ne mulami wa bintu biandi; bakamubanda ku mesu kua mukelenge wandi ne, Yeye utu watangalasha bintu biebe. Wakamubikila, wakamukonka ne, Bualu buebe bunakunvua budi tshinyi? Umpeshe mukanda wa bulami buebe, bualu bua wewe kuena mumanye mua kushala mulami kabidi. Mulami wa bintu wakadikonka ne, Mukelenge wanyi ukadi ha kunyenga bulami buanyi, nengenze tshinyi? Tshiena ne bukole bua kudima nʼabu, bundu nebunkuate bua kulombalomba bantu bintu tshianana. Ndi mumanye bualu bua meme kuenza; hangumushabo mu bulami, bantu bangitabushe bua meme kubuela mu nsubu yabo. Wakabikila bena mabanza a mukelenge wandi bonso, wakebesha wa kumudilu ne, Udi ne dibanza dia mukelenge wanyi bungi munyi? Yeye wakamba ne, Didi dia bihikilu bia manyi lukama. Wakamuambila ne, Angata mukanda webe, ushikame lubilu, ufunde makumi atanu. Hashishe wakebesha mukuabo ne, Dibanza diebe didi munyi? Wakamba ne, Bihikilu bia blé lukama. Wakamuambila ne, Angata mukanda webe, ufunde makumi muanda mukulu. Mukelenge wakunyisha mulami mubi bualu bua yeye Wakenza budimu; bualu bua bana ba mu tshikondo etshi munkatshi mua ba mu mulongo wabo badi batambe bana ba munya budimu. Ndi nuambila ne, Nudiangatshile balunda ku mamona a malu mabi; hashikau, nebanuitabushe bua nuenu kubuela mu nsubu ya tshiendelele. Muntu udi mua kueyemenyibua hadiye ne bintu bikese neikale mua kueyemenyibua kabidi hikaleye ne bintu bia bungi; muntu udi mubi hadiye ne bintu bikese neikale mubi kabidi hikaleye ne bintu bia bungi. Binuikala kanui bikale mua kueyemenyibua hanuakadi ne mamona mabi, wateka biuma bilelela mu bianza bienu nganyi? Binuikala kanui bikale mua kueyemenyibua hanuakadi ne bintu bia muntu mukuabo, wanuha bidi bienu nganyi? Muena mudimu kena mumanye mua kukuatshila banfumu babidi mudimu diakamue; yeye neikale ne mukuabo lukuna ne mukuabo dinanga, anyi nealamate mukuabo neahidie mukuabo. Kanuena bamanye mua kukuatshila Nzambi mudimu ne Mamona diakamue. Bafalese bakadi ne lukuka lua biuma bakunvua mei â onso, bakamubuidia. Yeye wakabambila ne, Nuenu nutu nuadibingisha ku mesu kua bantu, kadi Nzambi udi mumanye mitshima yenu; tshintu tshidi tshitumba ku mesu kua bantu tshidi tshinyanguka ku mesu kua Nzambi. Mikenshi ya Mose ne baprofete biakadiku tô ne hakalua Yone; bakalueye tô ne mpindiu badi bambila bantu lumu luimpe lua bukelenge bua Nzambi, bantu bonso badi babuelamu ku bukole. Kujimina kua diulu ne buloba mbualu bukese, kadi kuhona kua katoba kamue ka mikenshi ya Mose mbualu bunene. Wahidia mukashi wandi, wabaka mukuabo, udi muena masandi; wabaka mukashi muhidia kudi mulume wandi nunku udi muena masandi. Muntu mubanshi wakadiku uluata bilulu bikunze ne bia mushinga mukole, wakadi ne disanka diandi ne butumbi ku dituku ku dituku. Mulombi wa bintu wakadiku, dina diandi Lazalo, bakamuladika ku tshibi tshiandi, mubidi wandi wonso wakadi ne mputa; wakasua bamudishe nkototo yakadi imata hanshi ku mesa a muntu mubanshi; mbua mene mene yakalua, yakalaka mputa yandi. Hashishe mulombi wakafua, banjelo bakaya nʼandi mu tshiadi tshia Abalahama; muntu mubanshi kabidi wakafua, bakamujika. Mu Muaba wa Bafue yeye wakatangila mulu, hakadiye mu makenga, wakamona Abalahama kuakua ne Lazalo mu tshiadi tshiandi. Wakela dî diandi bikole ne, Tatu Abalahama, unfue luse, utume Lazalo, atue lusongo lua munu mu mai, antalashe ludimi luanyi, bualu bua meme ndi ne dikenga mu kahia aka. Kadi Abalahama wakamba ne, Muanʼanyi, uvuluke ne, Wewe, hawakadi ne muoyo, wakadi ne bintu biebe bimpe, Lazalo kabidi wakadi ne bintu bibi; kadi katataka kunoko yeye udi usanka ne wewe udi ukenga. Bualu bukuabo kabidi, hankatshi hetu nʼenu hadi luhongo lunene ludi luikale tshiendelele, bua badi basue kumuka kutudi bua kuya kunudi, anyi badi basue kumuka kunudi bua kusambuka kulua kutudi, kabamanyi mua kuenza nunku. Yeye wakamba ne, Tatu, ndi nkusengelela, umutume ku nsubu wa tatu wanyi; meme ndi ne bana betu batanu; abambile, kabalu mu muaba eu wa dikenga. Kadi Abalahama wakamba ne, Badi ne Mose ne baprofete, bunvue mei abo. Yeye wakamba kabidi ne, Nasha, tatu Abalahama, biaya muntu wa mu bafue, nebakudimune mitshima yabo. Yeye wakamuambila ne, Bikalabo kabai bunvua mei a Mose ne a baprofete, kabena bitabusha biabika muntu wa mu bafue. Yeye wakambila bayidi bandi ne, Malu adi alenduisha bantu kêna ahanga kulua, kadi mulau ulualua kudi udi wavuisha. Biakadi bimpe kumusuika dibue dia kuhela nʼadi mu nshingu, kumuela mu mai manene, diambedi kai muanze kulenduisha umue wabo wa mu bantu aba bahuekele. Nudilame bimpe; bienza muanʼenu bibi, umubele; biakudimuneye mutshima wandi, umujimishile bubi buandi. Biakuenzeye bibi misangu muanda mutekete dituku dimue, biahinganeye kûdi misangu muanda mutekete wamba ne, Nakukudimuna mutshima, wewe umujimishile bubi buandi. Bapostolo bakambila Mukelenge ne, Udiundishe ditabusha dietu. Mukelenge wakamba ne, Bu nuenu bikale ne ditabusha bunene bua lutete lua mutada, nuakadi kuambila mutshi eu wa sukamina ne, Ujudibue, ukunyibue mu dishiba; wowo wakadi kutumikila dî dienu. Umue wenu kai, bikaleye ne muhika wandi udima anyi ulama mikoko, hafumeye ku budimi, neamuambile ne, Lua katataka, ushikame ku mesa? Nasha, neamuambile ne, Undongoluele bia meme kudia, usuike mukaba, umpeshe meme bidia tô ne hanashikisha kudia ne kunua; hashishe wewe neudie, neunue. Yeye neasakidile muhika wandi bua yeye wakuenza malu akumuambileye, anyi? Nuenu kabidi nudi nunku; hanuashikisha kuenza malu onso akunuambilabo, nuambe ne, Tudi bahika ba tshianana, tuakuenza anu malu atuakadi nʼau bua kuenza. Hakadibo baya mu nshila wa ku Yelushalema, wakahitshila mu nseke ya Samalea ne Galela. Hakambeye kubuela mu musoko mukuabo, bena nsudi dikumi bakasangila nʼandi, bakadi bimane ha bule. Bakela mbila ne, Mukelenge Yesu, utufue luse. Hakabamoneye, wakabambila ne, Yai, nudimueneshe kudi bakuidi ba Nzambi, Hakadibo baya, bakalengeshibua. Mukuabo, hakamoneye ne, Nakulengeshibua, wakahingana utumbisha Nzambi ne dî dikole; wakadihonena, wakatua mpala wandi hanshi ku makasa a Yesu, wakamusakidila; yeye wakadi Muena Samalea. Yesu wakakonka ne, Bantu dikumi kabena balengeshibue, anyi? Ahu tshitema tshidi hanyi? Munyi kabakutangila muntu mukuabo muhingane bua kutumbisha Nzambi, anu muntu eu wa bende? Wakamuambila ne, Bika, ya biebe; ditabusha diebe diakukusungila. Bafalese bakamukonka ne, Bukelenge bua Nzambi nebulue dituku kai? Yeye wakabakudimuna dî ne, Bukelenge bua Nzambi kabuena bulua ku mesu kua bantu babutangile; kabena bamba kabidi ne, Kabuobu aha! Anyi, Kabuobu kuakua! Monai, bukelenge bua Nzambi budi munda muenu. Yesu wakambila bayidi bandi ne, Matuku nealue anuasua kutangila dituku dimue dia mu matuku a Muana wa muntu, kadi kanuena nuditangila, Nebanuambile ne, Kayeu kuakua! Kayeu aha! Kanuyi, kanubalondi. Bu mudi muele wa nvula uhenya ku luseke lukuabo lua diulu, ukenkela ku lunga luseke lua diulu, Muana wa muntu neikale nunku halua dituku diandi. Kadi diambedi budiye nʼabu mbua kukengeye makenga a bungi ne bua kumuhidiabo kudi bantu ba tshikondo etshi. Bualu bua matuku a Muana wa muntu nebuikale bu muakadibu mu matuku a Noa. Bakadi badia, bakadi banua, bakadi babaka, bakadi babakibua tô ne hakalua ditutu diakabuela Noa mu buntu bunene, hakalua mai a bungi, hakafuabo buonso buabo. Bualu buakadi nunku kabidi mu matuku a Lota; bakadi badia, bakadi banua, bakadi basumba, bakadi bahana, bakadi bakuna, bakadi bibaka; kadi dituku diakahatuka Lota mu Sodoma, kahia ne soufre biakafuma mulu, biakabashiha bonso; bualu nebuikale nunku halua dituku diamueneka Muana wa muntu. Dituku adi udi ha mutu ha nsubu, ne bintu biandi bidi mu nsubu, katuluki bua kuyeye nʼabi; udi mu budimi muomumue, kahinganyi. Vulukai ha mukashi wa Lota. Wasua kuangata muoyo wandi neaujimishe, wajimisha muoyo wandi neausungile. Ndi nuambila ne, Butuku abu balume babidi nebikale mu bulalu; nebangate munga, nebashie mukuabo. Bakashi babidi nebikale bahela; nebangate munga, nebashie mukuabo. [ ] Bayidi bakamuebesha ne, Mukelenge, kudi kunyi? Yeye wakabambila ne, Bikololo bitu biadisangisha hadi tshintu tshibole. Yeye wakabelela lusumuinu bua kubamanyisha ne, Mbimpe bia nuenu kutendelela Nzambi matuku onso, kanuhangi; wakamba ne, Mu musoko mukuabo muakadi njuji, yeye kakadi utshina Nzambi, kakadi unemeka bantu; mu musoko au kabidi muakadi mukashi wa mu lufuila; wakalua kudiye misangu ya bungi, wakamuambila ne, Unsombuele kudi udi nʼanyi lukuna. Yeye kakasua kubuenza musangu mule, kadi ku nyima wakamba munda munda ne, Bulelela, tshiena ntshina Nzambi, tshiena nemeka bantu, kadi bualu bua mukashi eu wa mu lufuila udi untatshisha, nemusombuele; bialueye misangu ya bungi, neasunsule. Mukelenge wakamba ne, Unvuai muakamba njuji mubi. Nzambi mene kena usombuela bakasunguleye, batu badila kudiye butuku ne munya, nasha bialehesheye musangu mule bua kubakuatshisha, anyi? Ndi nuambila ne, Neabasombuele lubilu. Kadi halua Muana wa muntu, neasangane ditabusha ha buloba, anyi? Bantu bakuabo bakadi badieyemena ne, Tudi bakane, bakadi bahetula bantu bakuabo, Yesu wakabelela lusumuinu ne, Bantu babidi bakabanda mu ntempelo bua kutendelela Nzambi; munga wakadi Mufalese, mukuabo wakadi musangishi wa mulambu. Mufalese wakimana, wakatendelela Nzambi munda munda ne, Nzambi, ndi nkusakidila bua meme tshiena bu bantu bakuabo, bobo badi banyengi, badi babi, badi bena masandi, tshiena kabidi bu musangishi wa mulambu eu. Ntu ngajila bia kudia lumingu lumue misangu ibidi; ntu ngafila tshia dikumi tshia bintu bionso bintu ngaheta. Kadi musangishi wa mulambu wakimana ha bule, kakasua kuambula mpala mulu, wakadikuma mu tshiadi, wakamba ne, Nzambi, ndi muntu mubi, unfue luse. Ndi nuambila ne, Muntu au wakuhueka ku nsubu kuandi mubinge, mukuabo muhile; bualu bua wadibandisha nebamuhuekeshe, wadihuekesha nebamubandishe. Bakadi balua ne bana bakese kudiye bua yeye kubalenga tshianza tshiandi; kadi hakamona bayidi bualu ebu, bakabasamina. Kadi Yesu wakababikila wakamba ne, Nuitabushe bua bana bakese kulua kundi, kanubakandi; bualu bua bukelenge bua Nzambi mbua badi bu bana. Bulelela, ndi nuambila ne, Muntu yonso udi kai witabusha bukelenge bua Nzambi bu muana mukese, kena ubuelamu. Mukelenge mukuabo wakamukonka ne, Muyishi Muimpe, nengenze tshinyi bua kuhiana muoyo wa tshiendelele? Yesu wakamuambila ne. Udi umbikidila meme ne, Muimpe, tshinyi? Kakuena muntu muimpe anu umue, Nzambi. Wewe udi mumanye mikenshi ya Nzambi ne, Kuendi masandi, kushihi muntu, kuibi, kudingidi muntu, unemeke tatuʼebe ne mamuʼebe. Nsongalume wakamba ne, Nakenzenza malu â onso, hanakadi muana mukese tô ne katataka. Hakunvua Yesu dî adi, wakamuambila ne, Bualu bumue mbukushala; uhane biudi nʼabi bionso, ubiabanyine bantu bahele, newikale ne bintu mu tshibutshilu mu diulu; ulue kundonda meme. Kadi hakunvueye mei â, mutshima wandi wakatamba kunyingalala, bualu bua yeye wakadi ne bubanshi buhite. Hakamumona Yesu, wakamba ne, Ha kubuela kua bantu badi ne bintu bia bungi mu bukelenge bua Nzambi mbualu bukole. Kubuela kua kamelu mu disu dia kashingi kudi kutambe kubuela kua muntu mubanshi mu bukelenge bua Nzambi kuteketa. Bantu bakunvua dî adi bakamukonka ne, Ahu udi mumanye mua kusungidibua nganyi? Yeye wakamba ne, Malu adi bantu kabai bamanye mua kuenza Nzambi udi mua kuênza. Petelo wakamba ne, Ahu tuetu tuakushia bintu bietu, tuakukulonda. Yeye wakabambila ne, Bulelela, ndi nuambila ne, Kakuena muntu wakashia nsubu wandi, anyi mukashi wandi, anyi bana babo, anyi bamuledi, anyi bana bandi, bualu bua bukelenge bua Nzambi, udi kai uheta bintu bikuabo bitambe bia diambedi misangu ya bungi mu tshikondo etshi; halua tshikondo tshikuabo, neahete muoyo wa tshiendelele. Hakadiye uya ne bayidi nkayabo dikumi ne babidi, wakabambila ne, Unvuai, tudi tubanda ku Yelushalema, nebenzele Muana wa muntu malu onso akafundabo kudi baprofete. Nebamufile mu bianza bia bantu ba bisamba bia bende, nebamuseke, nebamuhende, nebamutuile mate; nebamukume, nebamushihe; kadi hahita matuku asatu, neabike kabidi. Bayidi kabakajingulula malu â; di edi diakabasokoma, kabakamanya malu akambeye. Hakafikeye hehi ne Yeleko, mufofo wakadi ushikama kukala kua nshila ulomba. Hakunvueye tshisumbu tshia bantu tshihita, wakakonka ne, Ntshinyi? Bakamuambila ne, Yesu wa ku Nazaleta udi uhita. Wakela dî diandi bikole ne, Yesu, muana wa Davidi, unfue luse. Bakadi baya ku mpala bakamukanda ne, Hua; kadi yeye wakatamba kuela dî diandi bikole ne, Wewe muana wa Davidi, unfue luse. Yesu wakimana, wakamba ne, Balue nʼandi; hakalueye ha buihi, wakamukonka ne, Udi musue meme nkuenzele tshinyi? Wakamba ne, Mukelenge, mesu anyi atabale. Yesu wakamuambila ne, Tabala, ditabusha diebe diakukusungila. Wakatabala lukasa, wakamulonda utumbisha Nzambi; bantu bonso, hakatangilabo bualu ebu, bakatumbisha Nzambi. Yesu wakafika mu Yeleko, wakadi uhita. Muntu wakadimu, dina diandi Zakayo; wakadi muntu munene wa basangishi ba mulambu, wakadi mubanshi. Wakakeba mua kutangila Yesu ne, Udi nganyi? Yeye kakadi mumanye mua kumutangila bualu bua tshisumbu tshia bantu ne bualu bua yeye wakadi wa tshituha. Wakanyema ku mpala, wakabanda ku mutshi wa sukomo bua kumutangila, bualu bua yeye wakamba kuhitshilaku. Hakafika Yesu ha muaba au, wakatangila kulu, wakamuambila ne, Zakayo, tuluka lukasa, bundi nʼabu mbua kuikala mu nsubu muebe lelu. Wakatuluka lukasa, wakamubuesha mu nsubu usanka. Hakamonabo bualu ebu, bakajiana ne, Wakuya kulala mu nsubu wa muntu mubi. Zakayo wakimana, wakambila Mukelenge ne, Mukelenge, unvua, nempe bahele tshituha tshia hankatshi ha bintu bianyi; ne bingikala muangate tshintu tshia muntu mukuabo ku mashimi anyi, nemuhingishile bintu binai. Yesu wakamuambila ne, Lelu luhandu luakulua ku nsubu eu, bualu bua yeye kabidi udi muana wa Abalahama. Bualu bua muana wa muntu wakuluila bua kukeba ne bua kusungila tshidi tshijimine. Hakunvuabo mei â, yeye wakatenteka dî dikuabo, wakela lusumuinu, bualu bua yeye wakadi hehi ne Yelushalema, ne bualu bua bobo bakadi belangana meshi ne, Bukelenge bua Nzambi bukadi ha kulua katataka. Wakamba ne, Muntu munene wakadiku, wakaya ku luseke lukuabo kule bua kuangata bukelenge buandi, ne bua kuhingana kabidi. Wakabikila bahika bandi dikumi, wakabaha mpalata dikumi, wakabambila ne, Nuenduluke nʼai mushinga tô ne hanalua. Kadi bantu bandi bakadi nʼandi lukuna, bakatuma miloho bua kumulonda ne, Katuena basue muntu eu ikale mukelenge wetu. Hakangateye bukelenge, hakahinganeye, wakabikila bahika bakaheye mpalata bua kumanyeye bintu biakuhetabo ku mushinga. Wa kumudilu wakalua ku mesu kuandi, wakamba ne, Mukelenge, mpalata webe wakuheta minga mpalata dikumi. Wakamuambila ne, Bimpe, wewe udi muhika muimpe: bualu bua wewe wakadi mutumikile hawakadi ne tshintu tshikese, wikale biebe nfumu wa misoko dikumi. Muibidi wakalua, wakamba ne, Mukelenge, mpalata webe wakuheta mpalata itanu. Wakamuambila kabidi ne, Wewe wikale nfumu wa misoko itanu. Mukuabo wakalua, wakamba ne, Mukelenge, mpalata webe kayeu, unakadi musuike mu dituaya; nakukutshina, bua wewe udi amena tshinyangu, utu wambula tshiudi kui muteke, utu wahuola biudi kui mukune. Wakamuambila ne, Wewe udi muhika mubi, nenkuleshe bua mei akuhatuka mukana muebe. Wewe wakamanya ne, Meme ndi muena tshinyangu, ntu ngambula tshindi tshi muteke, ntu ngahuola tshindi tshi mukune; munyi kufidi mpalata wanyi mu bianza bia basombeshanganyi? Nunku hanakulua, nakadi kumuangata ne tshia kasombelu. Wakambila bakadi bimane ha buihi nʼandi ne, Numunyenge mpalata, nuhe udi ne mpalata dikumi. Bakamuambila ne Mukelenge, yeye udi ne mpalata dikumi. Ndi nuambila ne, Muntu yonso udi ne bintu, nebamuhe binga; kadi muntu yonso udi kai ne tshintu nebamunyenge tshidiye nʼatshi. Kadi bantu aba badi nʼanyi lukuna, bakadi kabai basue meme ngikale mukelenge wabo, nulue nʼabo kunoko, nubashihe ku mesu kuanyi. Hakashikisheye kuamba dî edi, wakatungununa ku mpala kuabo, uya ku Yelushalema. Hakafikabo ha buihi ne Bete-fage ne Betania, ku mukuna udibo babikila ne Oleve, wakatuma bayidi babidi ne, Yai bienu mu musoko udi buludiludi bunudi batangile; hanuabuelamu, nenusangane muana wa nyama wa mpunda musuika, muntu kena muanze kushikama ha nyima handi; numusulule, nulue nʼandi. Bianukonka muntu ne, Nudi numusuluila tshinyi? Numuambile ne, Mukelenge udi nʼandi bualu. Bakadi batumibue bakasangana bu muakabambileye. Hakatshidibo basulula muana wa mpunda, banfumuʼandi bakabakonka ne, Nudi nusuluila muana wa mpunda tshinyi? Bakamba ne, Mukelenge udi nʼandi bualu. Bakalua nʼandi kudi Yesu; bakateka bikowelu ha nyima handi, bakashikikahu Yesu. Hakadiye uya, bakâdisha bikowelu biabo mu nshila. Hakafikeye kunshi kua mukuna wa Oleve, tshisumbu tshionso tshia bayidi bakabanga kusanka ne kutumbisha Nzambi ne dî dikole bua malu onso a kukema akumonamonabo, bakamba ne, Mukelenge udi ulua mu dina dia Nzambi atumbishibue; ditalala dikale mulu ne butumbi mu diulu. Bafalese bakuabo bakadi mu tshisumbu tshia bantu bakamuambila ne, Muyishi, ubele bayidi bebe. Yeye wakabakudimuna dî ne, Biahuabo, mabue nêle mbila. Hakafikeye ha buihi, wakatangila musoko, wakajinga, wakamba ne, Bu wewe mumanye mu dituku edi malu adi akuhesha ditalala! Kadi bakukusokokau ku mesu kuebe. Bualu bua matuku nealue adi badi nʼebe lukuna babuelela luhangu, nebatunyunguluke, nebakutshintshimike ku nseke yonso, nebakukume hanshi ne bana badi nʼebe; kabena bashîa dibue dimue ha mutu ha dikuabo, bualu bua wewe kuakumanya dituku diakalua Nzambi kûdi. Yeye wakabuela mu ntempelo, wakabanga kuihata bahanyi ba bintu, wakabambila ne, Bakafunda mu Mukanda wa Nzambi ne, Nsubu wanyi neikale nsubu wa kutendelelamu Nzambi, kadi nuenu nuakumuvuisha muaba wa banyengi. Wakadi ubayisha mu ntempelo ku dituku ku dituku. Kadi bakuidi banene ba Nzambi ne bafundi ba bantu bakakeba mua kumushiha; kabakamanya mua kuenza bualu, bua bantu bakadi bamunguile, batelesha mei andi. Dituku dikuabo, hakadiye uyisha bantu mu ntempelo, hakadiye ubambila bualu bua lumu luimpe, bakuidi banene ba Nzambi ne bafundi ne bakulu bakamutukidila; bakamukonka ne, Utuambile, udi wenza malu â ne bukokeshi kai? Wakukuha bukokeshi ebu nganyi? Yeye wakabakudimuna dî, wakabakonka ne, Meme kabidi nenukonke dî dimue, nungambile, Dibatiza dia Yone diakufuma kudi kunyi? Mu diulu, anyi kudi bantu? Bobo bakelangana meshi munda munda ne, Bituamba ne, Mu diulu, yeye neatuebeshe ne, Munyi kanuakamuitabusha? Kadi bituamba ne, Kudi bantu, bantu bonso nebanshihe ne mabue, bua bobo badi bitabusha ne, Yone udi muprofete. Bakakudimuna Yesu dî ne, Katuena bamanye kuakufumadi. Yesu wakabambila ne, Meme kabidi tshiena numanyisha bualu bua bukokeshi bundi ngenza nʼabu malu â. Yeye wakabanga kuelela bantu lusumuinu elu ne, Muntu wakatentula mionshi ya mamuma a nvinyo mu budimi buandi, wakabushîa mu bianza bia ba bidime, wakaya ku luseke lukuabo kule bua kushikamaku musangu mule. Hakalua tshidimu tshia mamuma, wakatuma muntu wandi kudi ba bidime ne, Bampe mamuma a mu budimi. Kadi ba bidime bakamukuma, bakamuhingisha hatuhu. Wakatuma muntu wandi mukuabo; bakamukuma yeye kabidi, bakamuenzela bibi, bakamuhingisha hatuhu. Wakatuma muisatu; bakamutaha mputa, bakamuihata. Muena budimi wakadikonka ne, Ngenze tshinyi? Nentume muana wanyi munanga; bumue nebamunemeke. Kadi hakamumona ba bidime, bakambilangana ne, Eu udi muhianyi; tumushihai, buhianyi buikale buetu. Bakamuihata mu budimi, bakamushiha. Muena budimi neabenzele tshinyi? Nealue kushiha ba bidime aba, neahe bakuabo budimi buandi. Hakunvuabo dî edi dia Yesu, bakamba ne, Bualu kabulu nunku. Kadi yeye wakabajosha, wakabakonka ne, Edi ndî kai diakafundabo mu Mukunda wa Nzambi ne, Dibue diakahidiabo kudi bibaki ba nsubu Bakaditeka ku mutu kua ditumba? Wahona ha dibue adi neatshibuke bituha; biahonenadi muntu, nedimuboteshe, nedimutangadishe bu luhuishi. Bafundi ne bakuidi banene ba Nzambi bakasua kumukuata ha diba adi mene, kadi bakatshina bantu; bakamanya ne, Buakueleleye lusumuinu elu mbualu buetu. Bakamutentekela, bakatuma batentekedi bua kumukuatabo ku mei, bobo bakadi badinga ne, Tudi bantu bakane, bakasua kumufila mu bianza bia ngovena, muena bukokeshi. Bakamukonka ne, Muyishi, tudi bamanye ne malu audi wamba ne audi uyisha adi mimpe, kuena ne muntu bualu, wewe udi uyisha bantu nshila wa Nzambi bulelela. Mbimpe tuetu kuha Kaisa mulambu, anyi? Kadi yeye wakamanya budimu buabo, wakabambila ne. Nundeshe ndenalio. Udi ne tshindidimbi tshia nganyi, ne mei mafundahu nga nganyi? Bakamba ne, Mbia Kaisa. Yeye wakabambila ne, Nuhe Kaisa bintu bia Kaisa, nuhe Nzambi bintu bia Nzambi. Kabakamanya mua kumukuata ku mei ku mesu kua bantu; bakakema bua dî diakakudimuneye, bakahua. Basadoke bakuabo bakalua kudiye, aba mbadi bamba ne, Dibika dia ku lufu kadienaku; bakamukonka ne, Muyishi, Mose wakatufundila ne, Biafua muanʼabo ne muntu, biashîeye mukashi wandi kai ne muana, muanʼabo angate mukashi wandi, alelele muanʼabo wakafua bana. Balume ba difu dimue muanda mutekete bakadiku. Muanʼa bute wakabaka mukashi, wakafua biandi, kakashia muana: ne muibidi wakenza muomumue; ne muisatu wakangata mukashi; nunku buonso buabo muanda mutekete kabakasua bana, bakafua. Ku nyima mukashi wakafua biandi. Halua dibika dia bantu ku lufu, yeye neikale mukashi wa nganyi? Yeye wakadi mukashi wa buonso buabo muanda mutekete. Yesu wakabambila ne, Bana ba tshikondo etshi batu babaka, batu babakibua; kadi bantu bakasungulabo ne, Badi bakane bua kufikila ku tshikondo tshiatshia ne ku dibika dia bantu ku lulu, kabena babaka, kabena babakibua; kabena bamanye mua kufua kabidi, badi muomumue ne banjelo; badi bana ba Nzambi, badi bana ba dibika dia ku lufu. Mose mene mene wakatumanyisha bua dibika dia bafue mu luseke ludi luamba bualu bua Katshi, yeye udi Ubikila Mukelenge ne, Nzambi wa Abalahama ne Nzambi wa Isaka ne Nzambi wa Yakoba. Yeye kena Nzambi wa bafue, udi Nzambi wa badi ne muoyo; bualu bua bonso badi ne muoyo bua bualu buandi. Bafundi bakuabo bakamuandamuna ne, Muyishi, wakuamba bimpe. Bualu bua kabakadi ne bukitu bua kumukonka bualu kabidi. Yeye wakabebesha ne, Badi mua kuamba ne, Kilisto udi muana wa Davidi, munyi? Davidi mene mene udi wamba mu Mukanda wa Misambu ne, Mukelenge wakambila Mukelenge wanyi ne, Shikama ku tshianza tshianyi tshia balume Tô ne hanateka badi nʼebe lukuna munshi mua makasa ebe. Nunku Davidi wakamubikila ne, Mukelenge; yeye udi muanʼandi munyi? Yeye wakambila bayidi bandi, bantu bonso bunvue, ne, Nudimukile bafundi, bobo badi basue kuendakana baluate bikowelu bile, badi basue bantu babasekelele mu bisalu, badi basue nkuasa minene mu nsunagoga, badi basue miaba minene hayabo ku bidia bia disanka; bobo kabidi batu banyenga nsubu ya bakashi ba mu lufuila; batu batendelela Nzambi musangu mule anu bualu bua lubombo luabo; kuhila kuabo nekutambe bunene. Yeye wakabanduluka, wakamona bantu babanshi bela diha diabo mu tshibutshilu. Wakamona mukashi muhele wa mu lufuila wela tukuta tubidi. Yeye wakamba ne, Bulelela, ndi nuambila ne, Bintu biakuela mukashi eu muhele wa mu lufuila bidi bitambe biakuela bakuabo bonso, bualu bua buonso buabo bakuela bintu mu mushete wa Nzambi biakadibo kabai nʼabi bualu, bia ha mutu; kadi mukashi eu wakuela bintu biakadiye nʼabi bualu, bintu biandi bionso ma kudia mene meme. Hakadi bakuabo bamba bua ntempelo ne, Udi mulengesha ne mabue mimpe ne bintu bifila kudi bantu, Yesu wakamba ne, Nudi nutangila bintu ebi, kadi matuku nealue ikalabo kabai bashîa dibue dimue ha mutu ha dikuabo, nebâsasule buonso buau. Bakamukonka ne, Muyishi, malu â nealue dituku kai? Tshimanyinu tshia malu â ne akadi ha kulua ntshinyi? Yeye wakamba ne, Nuende badimuke, muntu kanuhambuishi; ba bungi nebalue mu dina dianyi, bamba ne, Meme nyeye mene; bamba kabidi ne, Dituku diakulua; kanubalondi. Hanunvua bualu bua nvita ne mayoyo kanutshinyi; budi malu â nʼabu mbua kulua diambedi, kadi nshikidilu kena ulua lukasa. Yeye wakabambila ne, Tshisamba tshikuabo netshiluangane ne tshinga, bukelenge bukuabo nebuluangane ne bunga, buloba nebutambe kutaka, biole ne bihuhu nebikale ku nseke ne ku nseke, malu a buowa ne bimanyinu binene nebifume mulu. Kadi malu â onso kâi manze kulua, nebanukuate, nebanukengeshe, nebanufile mu nsunagoga ne mu nsubu ya lukanu, nebalue nʼenu ku mesu kua banfumu ne bangovena bua dina dianyi. Malu au nealue kunudi bu tshimanyishilu. Nukoleshe mitshima yenu ne, Katuedianganyi meshi diambedi a dî ditudi basue kubakudimuna; meme nenuhe mukana ne lungenyi bidi badi nʼenu lukuna kabai bamanye mua kutantamana ne mua kukudimuna dî. Nebanutungile tshitungu kudi baledi benu mene ne bana benu ne ba tshiota tshienu ne balunda benu; nebashihe bakuabo benu. Bantu bonso nebikale nʼenu lukuna bua dina dianyi. Lusuki lumue lua ku mitu yenu kaluena lujimina. Nenudiangatshile mioyo yenu bualu bua dinanukila dienu. Hanuatangila bena nvita banyunguluke musoko wa Yelushalema, mimanye ne dibutuka diau diakulua. Badi mu Yudaya mu tshikondo atshi banyemene ku mikuna; badi mu musoko bahatuke; badi mu ntshiamba kabahinganyi mu musoko. Bualu bua â adi matuku a disombuela, bua kushikisha malu onso akafundibua mu Mukanda wa Nzambi. Kadi mulau mukole newikale kudi badi ne mafu ne kudi badi bâmuisha bana mabele mu matuku au; bualu bua dikenga dikole nedikale ha buloba, lukuna neluikale kudi bantu aba. Nebahone ku muele wa nvita, nebaye nʼabo bakuata mu bisamba bionso; bantu ba bisamba bia bende nebadiate Yelushalema munshi mua makasa abo tô ne hashika tshikondo tshia bantu ba bisamba bia bende. Bimanyinu nebikale mu diba ne mu ngondo ne mu mitoto; ha buloba nehikale dikenga dikole dia bantu, nebatshine tshiona tshinene tshia mai manene ne tshia mavuala; bantu nebafue tshihuka bua buowa ne bua ditekemena dia malu alua ha buloba; bualu bua nebanyukule makole a mu diulu. Hashishe nebamone Muana wa muntu ulua mu ditutu ne bukole ne butumbi bunene. Habanga malu â kulua, nubanduluke, nutangile mulu, bualu bua bunuhikudi buenu budi ha buihi. Yeye wakabelela lusumuinu ne, Tangilai mutshi wa nfigi ne mitshi yonso; hasampilai, hanuamona bualu ebu, nenumanye ne, Tshidimu tshia mayowa tshidi ha buihi. Nuenu kabidi, hanuatangila malu â alua, mimanye bienu ne, Bukelenge bua Nzambi budi ha buihi. Bulelela, ndi nuambila ne, Bantu ba tshikondo etshi kabena bashika tô ne hashika malu â onso. Diulu ne buloba nebijimine, kadi mei anyi kêna ajimina. Nudilame bimpe, bua mitshima yenu kainemi ne mudiu ne dibuluka dia maluvu ne malu a ha buloba, ne bua dituku adi kadilu kunudi lukasa bu buteyi? Bualu bua dituka adi nedilue kudi bonso badi bashikame ha buloba buonso. Tabalai misangu yonso, nutendelele Nzambi mua kuikala ne bukole bua kuhanduka mu malu â onso alua, ne bua kuimana ku mesu kua Muana wa muntu. Yeye wakadi uyisha bantu mu ntempelo ku dituku ku dituku; butuku wakalubuka, wakalala mu mukuna udibo babikila ne, Oleve. Bantu bonso bakadi balua mu ntempelo dinda bua kunvua dî diandi. Disanka dia bidia bidi kabi ne luevene diakadi ba buibi, badi badibikila ne, Kuhita kua Yehowa. Bakuidi banene ba Nzambi ne bafundi bakakeba mua kumushiha, bua bobo bakadi batshina bantu. Satana wakahuela munda mua Yudasa, wakadibo babikila ne Isakaliote, yeye wakadi wabo wa ba dikumi ne babidi. Wakumuka biandi wakasangisha dî ne bakuidi banene ne tuhita tua balami ba ntempelo bualu bua kumufileye mu bianza biabo. Bakadi ne disanka, bakamulaya ne, Netukuhe mpalata. Yeye wakitabusha, wakakeba mua kumufila mu bianza biabo tshisumbu tshia bantu katshîhu. Dituku dia usanka dia bidia kabî biela luevene diakafika, diakadibo ne bualu bua kushiha bana ba mikoko ya Kuhita kua Yehowa. Yeye wakatuma Petelo ne Yone ne, Yai nutulongoluele Kuhita kua Yehowa bua tuetu kudia. Bakamukonka ne, Udi musue tuetu tulongoluela kudi kunyi? Yeye wakabambila ne, Hanuabuela mu musoko, nenusangile ne mulume mutuale mulondo wa mai; numulonde mu nsubu wabueleye. Nuambile muena nsubu ne, Muyishi udi ukukonka ne, Nsubu wa buenyi unadila bidia bia Kuhita kua Yehowa ne bayidi banyi udi hanyi? Yeye neanuleshe nsubu mimene wa mulu mmuana kulongolola bintu bionso; nulongololemu. Bakaya, bakamona bi muakabambileye: bakalongolola Kuhita kua Yehowa. Hakafika diba wakashikama ku mesa ne bapostolo. Wakabambila ne, Nakutamba kusua bua kudia nʼenu bidia ebi bia Kuhita kua Yehowa, diambedi tshi muanze kukenga; ndi nuambila ne, Tshiona ndia bintu ebi kabidi tô ne hashikishabo malu onso mu bukelenge bua Nzambi. Bakamuhesha luhanza; hakasakidileye Nzambi, wakamba ne, Angatai, nuabanyangane; ndi nuambila ne, Tshiena nua mai a mamuma a nvinyo kabidi tô ne halua bukelenge bua Nzambi. Yeye wakamema mutanda wa bidia; hakasakidileye Nzambi, wakautshibula, wakaha bayidi bandi, wakamba ne, Eu udi mubidi wanyi udi unuhebua; enzai nunku bua kunvuluka. Hakashikishabo kudia, yeye wakamema luhanza muomumue kabidi, wakamba ne, Luhanza elu ludi dihungila dihia-dihia dia mu mashi anyi akunumatshishilabo hanshi. Kadi, tangilai, tshianza tshia udi untungila tshitungu tshidi nʼanyi ha mesa. Bulelela, Muana wa muntu udi uya bu muakasungulabo, kadi mulau neulue kudi wakumutungila tshitungu. Bobo bakabanga kukonkangana ne, Nganyi nenze bualu ebu? Bakadi belangana mpata ne, Bakusungula nganyi bua yeye kutamba bakuabo? Yeye wakabambila ne, Banfumu ba bantu ba bisamba bia bende badi babakokesha ne diambu, ne banfumu babo badi babikidibua ne, Benji ba bilengelele. Kadi nuenu, kanuikadi nunku; udi mutambe bakuabo munkatshi muenu alue biandi muakunyi; udi biandi nfumu alue muena mudimu. Udi mutambe mukuabo nganyi, udi mushikame ku mesa, anyi udi umuhetesha bia kudia? Udi mushikame ku mesa kena mutambe, anyi? Kadi meme udi munkatshi muenu bu muena mudimu. Kadi nuenu mbakunanukila nʼanyi mu makenga anyi; ndi nuha bukelenge bu muakumpa Tatu wanyi bukelenge, bua nuenu kudia ne kunua ku mesa anyi mu bukelenge buanyi; nenushikame mu nkuasa ya butumbi nulumbuluisha bisamba dikumi ne bibidi bia Isalele. Yesu wakamba ne, Simona, Simona, mona, Satana wakalomba mua kunuangata bualu bua kunusengeye bu ntete; kadi nakukulombela wewe Nzambi bua ditabusha diebe kadihangi; wewe, hawakudimuka, ukoleshe mitshima ya bana benu. Petelo wakamuambila ne, Mukelenge, ndi ne dikima dia mua kuya nʼebe ne mu nsubu wa lukanu ne ku lufu. Yeye wakamba ne, Petelo, ndi nkuambila ne, Tshitala katshî tshianze kusama lelu wewe neuvile misangu isatu ne, Tshiena mumumanye. Yeye wakabambila ne, Hanakanutuma kanui ne mukaba ne tshibombo ne bisabata, nuakuhanga tshintu, anyi? Bakamba ne, Nasha. Yeye wakabambila ne, Kadi katataka, udi ne mukaba awangate ne tshibombo kabidi; udi kai ne muele wa nvita ahane kazaku kandi, ausumbe. Bualu bua ndi nuambila ne, Budibo nʼabu mbua kushikisha kundi di edi didi difunda ne, Bakamubala hohamue ne bantu babi; bualu bua nebashikishe mei onso akafundabo bualu buanyi. Bakamba ne, Mukelenge, tangila, miele ya nvita ibidi kayiyi. Yeye wakabambila ne, Kuakushika. Yeye wakaluhuka, wakaya ku mukuna wa Oleve, bu muakadi tshilele tshiandi; bayidi bakamulonda. Hakafikeye ku muaba au, wakabambila ne, Nutendelele Nzambi bua nuenu kanuhonyi mu mateyi. Yeye wakadi nkayandi bu ntanta wa kuela dibue diafika; wakatua binu hanshi, wakatendelela Nzambi, wakamba ne, Tatu, biwasua, ungumushile luhanza elu; kadi bualu buenjibue bu mûdi musue, kabuenjibu bu mundi musue. Muanjelo wa mu diulu wakamueneka kudiye, wakamukolesha. Wakatamba kukenga ne kanyinganyinga, wakatendelela Nzambi bikole; luanga luakahatuka mamata manene hamʼbidi handi bu mashi amata hanshi. Hakajukeye ku kutendelela kuandi, wakalua kudi bayidi, wakabasangana balale tulu bualu bua kanyinganyinga, wakabebesha ne, Nudi baladile tulu tshinyi? Jukai, nutendelele Nzambi bua kanuhonyi mu mateyi. Hakadiye wamba nunku, monai, tshisumbu tshia bantu tshiakalua, mukuabo wabo wa ba dikumi ne babidi, dina diandi Yudasa, wakalua ku mpala kuabo; wakalua ha buihi ne Yesu bua kutuangana nʼandi mishiku. Kadi Yesu wakamuebesha ne, Yudasa, udi utungila Muana wa muntu tshitungu ku kutuangana kua mishiku, anyi? Bakadi ha buihi ne Yesu, hakamonabo ne bualu buakadi ha kulua, bakamuebesha ne, Mukelenge, tubatahe ne muele, anyi? Mukuabo wakataha muntu wa muakuidi munene, wakamukosa ditshu dia tshianza tshia bukole. Kadi Yesu wakandamuna ne, Nubalekele, benze. Wakalenga tshianza ku ditshu diandi, wakamuhingishiladi. Yesu wakakonka bakuidi banene ne tuhita tua balami ba ntempelo ne bakulu bakadi bamuluile ne, Nuakulua ne miele ne bibonge bu mudibo bakuata munyengi munyi? Hanakadi nʼenu mu ntempelo ku dituku ku dituku, kanuakandenga bianza; kadi edi diba ndienu, ne bukokeshi bua mîdima. Bakamukuata, bakaluhuka nʼandi, bakalua nʼandi mu nsubu wa muakuidi munene. Petelo wakaha londa ha bule ha bule. Hakatemeshabo kahia nu bunene bua luhangu, hakashikamabo hohamue, Petelo wakadi mushikame munkatshi muabo. Mukashi muenji wa mudimu wakamutangila hakadiye mushikame ku dinkenka dia kahia, wakamutangila talala, wakamba ne, Muntu eu kabidi wakadi ne Yesu. Yeye wakavila ne, Mukashiana, tshiena mumumanye. Hakaleha tshituha, mukuabo wakamutangila, wakamuambila ne, Wewe kabidi udi umue wabo. Petelo wakamba ne, Nasha, mulumiana, tshiena wabo. Hakahita bu tshituha tshia diba, mukuabo wakamba ne, Bulelela, muntu eu wakadi ne Yesu, bualu bua yeye udi Muena Galela. Kadi Petelo wakamba ne, Mulumiana, tshiena mumanye tshiudi wamba. Hakadiye wakula nunku, tshitala tshiakasama. Mukelenge wakatshinguluka, wakatangila Petelo talala. Petelo wakavuluka dî dia Mukelenge diakamuambileye ne, Tshitala katshi tshianze kusama lelu, wewe neumpidie misangu isatu. Wakaluhuka biandi, wakadila bikole. Bakadi bakuata Yesu, bakamuseka, bakamukuma bisusu. Bakamubuikila tshitambala ku mesu, bakamuambila ne, Amba bualu bûdi umona, wakukukuma nganyi? Bakamuambila malu makuabo a bungi bamuhenda. Hakatshia butuku, tshisumbu tshia bakulu ba bantu tshiakudisangisha, bakuidi banene ne bafundi; bakaya nʼandi ku tshilumbuluidi tshiabo, bakamuambila ne, Biwikala Kilisto, utuambile. Kadi yeye wakabambila ne, Binanuambila, kanuena nuitabusha; bianukonka bualu, kanuena nunkudimuna. Kadi ha dituku edi tô ne tshiendelele Muana wa muntu neashikame ku tshianza tshia balume tshia bukole bua Nzambi. Buonso buabo bakamukosa ne, Wewe udi Muana wa Nzambi, anyi? Yeye wakabakudimuna dî ne, Nudi nuamba mundi yeye. Bakamba ne, Tudi ne bualu bua bamanyi kabidi kudi kunyi? Tuetu tuakudiunvuila mei a mukana muandi mene. Buonso buabo bakabika, bakalua nʼandi ku mpala kua Pilato. Bakabanga kumubanda ne, Tuakusangana muntu eu utombosha tshisamba tshietu uhidisha bantu ne, Kanulambudi Kaisa, wamba kabidi ne, Meme ndi Kilisto, Mukelenge. Pilato wakamukonka ne, Wewe udi Mukelenge wa Bena Yuda, anyi? Wakamukudimuna dî ne, Bûdi wamba mbulelela. Pilato wakambila bakuidi banene ne bisumbu bia bantu ne, Tshiena musangane muntu eu ne bualu. Kadi bobo bakakolesha dî diabo ne, Yeye udi usonsola bantu, wenda ubambila mu luseke lua Yudaya, mubangile ku Galela tô ne kunoko. Hakunvua Pilato dî edi, wakakonka ne, Muntu eu udi Muena Galela, anyi? Hakamanyeye ne, Ngua ku nyima kua Helode, wakamutuma kudi Helode, wakadi biandi mu Yelushalema matuku â. Helode wakasanka hakamoneye Yesu, bualu bua musangu mule wakadi musue kumutangila, wakadi mumane kunyua lumu luandi; wakasua kutangila bualu bua kukema buenzeye. Helode wakamukonka malu a bungi; kadi Yesu kakamukudimuna di. Bakuidi banene ne bafundi bakimana, bakamubanda bikole. Helode ne masalayi andi bakamutshimbisha, bakamuseka, bakamuluatshisha tshilulu tshitoke tô, bakamuhingisha kudi Pilato. Dituku adi mene Helode ne Pilato bakakuatangana bulunda kabidi, diambedi bakadi bikalangane lukuna. Pilato wakabikila bakuidi banene ne miloho ne bantu, wakabambila ne, Nuakulua ne muntu eu kundi ne, Yeye udi utombosha bantu; hanakumulumbuluisha malu andi ku mesu kuenu, tshiena mumusangane ne bualu bunudi bamubande; ne Helode kabidi kena mumusangane nʼabu, yeye wakamuhingisha kutudi; yeye kena muenze bualu buafuileye. Nemukume, nemulekele. [ ] Buonso buabo bakela dî diabo diakamue ne, Umusha muntu eu, utulekelele Balaba; yeye wakadi mubueshibue mu nsubu wa lukanu bualu bua ditomboka diakadi mu musoko ne bua dishihangana. Pilato wakakula nʼabo kabidi, wakasua kulekela Yesu; kadi bobo bakela mbila ne, Umushihe ku mutshi mutshiamakane, umushihe ku mutshi mutshiamakane. Yeye wakabakonka tshiakasatu ne, Bualu kai? Muntu eu wakuenza bualu bubi kai? Tshiena mumusangane ne bualu buafuileye; nenukume, nemulekele. Kadi bobo bakakolesha mei abo, bakamulomba ne, Bamushihe ku mutshi mutshiamakane. Mei abo akamutekesha. Pilato wakakosa tshilumbu, wakamba ne. Bualu buakulombabo buenjibue. Pilato wakalekela wakadi mubuesha mu nsubu wa lukanu bualu bua ditomboka ne bua dishihangana, wakamulombabo; kadi yeye wakafila Yesu mu bianza biabo bua kuenzabo bu muakadibo basue. Hakadibo baya nʼandi, bakakuata muntu dina diandi Simona, Muena Kulene, wakadi ufuma mu ntshiamba, bakateka mutshi mutshiamakane ha diaha diandi, autuale ku nyima kua Yesu. Tshisumbu tshinene tshia bantu tshiakamulonda ne tshia bakashi bakadi badila bamujinga. Yesu wakatshinguluka, wakamba ne, Bana bakashi ba Yelushalema, kanunjingi, nudijinge, nujinge bana benu. Tangilai, matuku alualua amba bantu ne, Bakashi badi nkumba badi ne disanka ne mafu adi kâi manze kulela bana ne mabele adi kâi mâmushe. Hashishe nebabange kuambila mikuna minene ne, Nutubuikile; ne mikuna mikese ne, Nutubuikile. Bienzabo malu â hatshidi mutshi ne muoyo, nebenze tshinyi humau? Bakadi baya ne bantu bakuabo babidi, benji ba malu mabi, bua kubashiha nʼandi. Hakafikabo ku muaba udibo babikila ne, Kabalubalu ka Mutu, bakamukumina milonda mu bianza ne ku makasa ku mutshi mutshiamakane, bakenzela bantu babidi nunku kabidi, mukuabo ku tshianza tshia balume, mukuabo ku tshianza tshia bakashi. Yesu wakamba ne, Tatu, ubabuikidile bubi buabo, kabena bamanye bualu budibo benza. Bakabanyangana bilulu biandi, bela nʼabi nshobo. Bantu bakadi bimane batangila. Miloho yakamuseka ne, Yeye wakasungila bakuabo, adisungile bikaleye Kilisto wa Nzambi musungula kudiye. Masalayi kabidi akamuseka, akalua kudiye, akamuha nvinega, akamba ne, Biwikala Mukelenge wa Bena Yuda, udisungile. Bakafunda ha mutu handi ne: Eu udi Mukelenge wa Bena Yuda. Bantu babi babidi bakadi bahohela, mukuabo wakahenda Yesu ne, Wewe kuena Kilisto, anyi? Udisungile, utusungile. Kadi mukuabo wakamubela ne, Wewe kuena utshina Nzambi, anyi? Wewe udi mu dihila diodimue. Bakakosa tshilumbu tshietu bimpe; tuetu tudi tuangata difutu bu mutuakenza, kadi muntu eu kena muenze bualu bubi. Yeye wakamba ne, Yesu, hawabuela mu bukelenge buebe, unvuluke. Yesu wakamuambila ne, Bulelela, ndi nkuambila ne, Lelu wewe newikale nʼanyi mu Paladiso. Hakafika diba munda munya, mîdima yakadi ha buloba buonso tô ne hakafika diba ha isatu; diba diakahanga kutema; tshilulu tshikudika mu ntempelo tshiakahandika hankatshi. Yesu wakela dî dikole ne, Tatu, ndi nteka muoyo wanyi mu bianza biebe; hakambeye nunku, wakahuola muoyo. Hakatangila kapitene ka masalayi bualu ebu, wakatumbisha Nzambi ne, Bulelela, eu wakadi muntu muakane. Bantu bonso bakadi balue kutangila malu â bakahingana badikuma mu biadi, hakamonabo malu akenjibue. Bonso bakamanyeye ne bakashi bakadi bafume ku Galela bamulonda bakadi bimanyine ha bule, batangile malu â. Muntu wakadiku, dina diandi Yosefe, yeye wakadi mulumbuludi, wakadi muntu muimpe kai ne kansungunsungu, (yeye kakitabusha dî diabo ne bualu buakenzabo) wakadi muntu wa ku Alimataya, musoko wa Bena Yuda, wakadi mutekemene bukelenge bua Nzambi; muntu au wakaya kudi Pilato, wakamulomba tshitalu tshia Yesu. Wakatshitulula, wakatshijingila tshilulu tshia line, wakamuladika mu lukita lumbula mu dibue, muakadi kamui tshitalu diambedi. Dituku adi diakadi dia Dilongolola, Lumingu lua Bayuda luakadi ha buihi. Bakashi bakadi bafume nʼandi ku Galela bamulonda ku nyima, bakatangila lukita ne muakaladikabo tshitalu tshiandi. Bakahingana, bakalongolola bintu bia muhuya muimpe ne manyi a mananashi. Dituku dia Lumingu lua Bayuda bakikisha bu mudi mukenshi wa Nzambi. Kadi hakatshia butuku dituku dia kumudilu dia lumingu, bakashi bakalua ku lukita ne bintu bia muhuya muimpe biakalongololabo. Bakasangana dibue diumusha ku mushiku wa lukita. Bakabuelamu, kabakasangana tshitalu tshia Mukelenge Yesu. Hakadibo balubakana bua bualu ebu, monai, balume babidi bakadi bimane ha buihi nʼabo baluate bilulu biengelela. Hakatshinabo, hakatuabo mpala hanshi, balume bakabakonka ne, Nudi nukebela udi ne muoyo munkatshi mua bafue tshinyi? Yeye kena kunoko, wakubika; numiluke bu muakanuambileye hakadiye mu Galela ne, Budi Muana wa muntu nʼabu mbua kumufilabo mu bianza bia bantu babi ne bua kumushihabo ku mutshi mutshiamakane ne bua kubikeye kabidi hahita matuku asatu. Bakavuluka mei andi, bakumuka ku lukita, bakahiana, bakambila bayidi dikumi ne umue ne bakuabo bonso malu â onso. Bakashi aba bakadi Malia wa ku Magadala ne Yoana ne Malia mamu wa Yakobo; bakashi bakuabo kabidi bakadi nʼabo bakambila bapostolo malu â. Kadi mei â akadi bu biakulakula ku matshu abo, kabakitabusha muakambabo. Kadi Petelo wakabika, wakaya lubilu ku lukita; wakinangila, wakatangilamu, wakamona bilulu bia line ha buabi; wakahingana kuandi ukema bua malu au. Dituku adi mene babidi babo bakadi baya ku musoko dina diau Emau, ku Yelushalema ne ku musoko au kuakadi ntanta bu kilometa dikumi ne umue. Bakadi bayikila bua malu â onso akalua. Hakadibo bayikila bakonkangana, Yesu mene wakalua nʼabo ha buihi, wakenda nʼabo. Kadi mesu abo akadi bitayitayi, kabakamumanya. Yeye wakabakonka ne, Nudi nuenda nuyikidila tshinyi? Bobo bakimana babungame. Mukuabo, dina diandi Keleopa, wakamukonka kabidi ne, Ahu wewe udi muenyi udi usomba ha nkayebe mu Yelushalema kui mumanye malu akulua matuku â? Yeye wakabakonka ne, Malu kai? Bakamuambila ne, Malu a Yesu, Muena Nazaleta, wakadi biandi muprofete mukole mu bienzedi ne mu mei ku mpala kua Nzambi ne kua bantu bonso; bakuidi banene ne miloho yetu bakamufila bua kumuhishabo ne lufu, ne bua kumushihabo ku mutshi mutshiamakane. Kadi tuetu tuakadi bamutekemene ne, Nyeye wahikula Isalele! Ne bualu bukuabo kabidi, matuku asatu akuhita akalua malu â. Ne bualu bukuabo bakashi bakuabo ba mu tshisumbu tshietu bakadi ku lukita dindadinda bakatukemesha; hakahangabo kumona tshitalu tshiandi, bakahingana, bakamba ne, Tuakumona bikena kumona bu banjelo bakatuambila ne, Yeye udi ne muoyo. Bakuabo bakadi nʼetu bakaya ku lukita, bakasangana bualu bu muakamba bakashi; kadi kabakamumona. Yesu wakabambila ne, Nuenu bantu kabai ne lungenyi, nudi nunenga ha kuitabusha mei onso akamba baprofete! Kabiakadi bimpe bia Kilisto kukengeye mu malu â ne bua kubueleye mu butumbi buandi, anyi? Wakabangila ku Mose ne ku baprofete bonso, wakabajinguluila malu akafundabo mu Mukanda wa Nzambi wonso bualu buandi. Hakafikabo ha buihi ne musoko wakadibo baya, yeye wakamba kuhita. Bakamusengelela bikole ne, Ulale nʼetu kunoko; bualu bua diba dikadi dibuela, munya ukadi ushika. Yeye wakaya kulala nʼabo. Hakashikameye nʼabo ku mesa, wakamema mutanda wa bidia, wakatendelela Nzambi: hakautshibuleye bituha, wakabahabi. Mesu abo akabuluka, bakamumanya; yeye wakabajimina ku mesu kuabo. Bakambilangana ne, Mitshima yetu kayakadi itema munda muetu, anyi, hakadiye utuambila malu mu nshila, hakadiye utujinguluila Mukanda wa Nzambi? Bakabika ha diba adi mene, bakahingana mu Yelushalema, bakasangana bayidi dikumi ne umue badisangishe hohamue ne bakuabo bakadi nʼabo, bakamba ne, Mukelenge wakubika ku lufu bulelela, wakumueneka kudi Simona. Bakabalondela malu akanjibua mu nshila ne muakadiye mumanyibue kudibo mu kutshibula kua bidia. Hakadibo bamba mei â, yeye mene wakimana munkatshi muabo, wakabambila ne, Nuikale talala. Kadi mitshima yabo yakabandika, bakatshina, bakelangana meshi ne, Tudi lutangila mukishi. Yeye wakabakonka ne, Nudi nutshinyina tshinyi? Makonka adi ajuka mu mitshima yenu bua tshinyi? Monai bianza bianyi ne makasa anyi ne, Meme muine; nundenge bianza, nutangile, bualu bua mukishi kena ne munyinyi ne mifuba binudi nuntangila nʼabi. Hakabambileye dî edi, wakabalesha bianza biandi ne makasa andi. Hakadibo kabai banze kuitabusha bualu bua disanka diabo, hakadibo bakema, yeye wakabakonka ne, Nudi ne tshintu tshia kudia kunoko, anyi? Bakamuhesha tshihesa tshia mushiha mukanga. Yeye wakatshiangata, wakatshidia ku mesu kuabo. Wakabambila ne, Â adi mei anyi anakanuambila hanakadi nʼenu, ne, Budibo nʼabu mbua kushikisha malu onso akafundabo bualu buanyi mu mikenshi ya Mose ne mu luseke lua baprofete ne mu misambu. Hashishe yeye wakabulula mitshima yabo bua kujingululabo Mukanda wa Nzambi. Yeye wakabambila ne, Bakafunda ne, Mbimpe bia Kilisto kukengeye ne kubikeye ku lufu hahita matuku asatu; mbimpe kabidi bia kuambilabo bisamba bionso bualu bua kukudimuna kua mitshima ne bua kujimishibua kua mibi yabo mu dina diandi, babangile ku Yelushalema. Nuenu nudi bamanyi ba malu â. Monai, ndi nutumina mulayi wa Tatu wanyi; kadi nushale mu musoko eu tô ne hanuluatshishabo bukole bua mu diulu. Yesu wakabalombola tô ne ku muaba wakadi buludiludi ne Betania; wakabisha bianza biandi, wakabasankisha. Hakadiye ubasankisha nunku, wakumuka kudibo, wakatuadibua mu diulu. Bakamutendelela, bakahingana ku musoko ne disanka dinene; bakadi mu ntempelo ku dituku ne ku dituku batumbisha Nzambi. Ku tshibangidilu Dî diakadiku, Dî diakadi ne Nzambi, Dî diakadi Nzambi. Diodi diakadi ne Nzambi ku tshibangidilu. Bintu bionso biakafukibua kudiye; kakuena tshintu tshiakafukibua kudi mukuabo, anu kudiye. Munda muandi muakadi muoyo; muoyo au wakadi munya wa bantu. Munya udi utema mu midima, kadi mîdima kayakautamba bukole. Muntu wakalua, mutuma kudi Nzambi, dina diandi Yone. Yeye wakalua bu mumanyi wa bualu bua kumanyisheye bantu bua munya, bua buonso buabo bitabushile bua dî diandi. Yeye kakadi munya mene, wakaluila anu bua kumanyisha bantu bualu bua munya. Munya mulelela wakadiku, wakadi ulua ha buloba, utemena bantu bonso. Yeye wakadi ha buloba, buloba buakafukibua kudiye, kadi ba ha buloba kabakamumanya. Wakalua kudi bintu biandi, kadi bantu bandi mene kabakamuitabusha. Yeye wakaha bonso bakamuitabusha bukole bua kuluabo bana ba Nzambi, bobo mene badi bitabusha dina diandi; bakadi kabai baledibue kudi mashi, anyi kudi disua dia mubidi, anyi kudi disungula dia muntu, kadi bakaledibua kudi Nzambi. Dî diakakudimuka muntu, diakuikala munkatshi muetu tshituha, diakadi diule tente ne ngasa ne bulelela; tuakumona butumbi buandi, buakadi bu bua muana umuehele udi mulela kudi Tatu wandi. Yone wakambila bantu bualu buandi, wakela dî bikole ne, Kayeu unakuamba ne, Ulualua ku nyima kuanyi udi muntambe, bua yeye wakadiku ku mpala kuanyi. Buonso buetu tuakuangata tshiuwidi tshiandi, ne ngasa ha mutu ha ngasa. Mose wakatuha mikenshi, kadi ngasa ne bulelela biakafuma kudi Yesu Kilisto. Kakuena muntu wakuanza kutangila Nzambi; Muana umuehele mulela udi mu tshiadi tshia Tatu, yeye wakamuamba. Edi ndî dia Yone hakatuma Bena Yuda ba mu Yelushalema bakuidi ba Nzambi ne Bena Lewi kudiye bua kumuebesha ne, Wewe nganyi? Wakitabusha, kakavila, wakitabusha ne, Meme tshiena Kilisto. Bakamukonka ne, Ahu udi nganyi? Wewe udi Eliya, anyi? Wakamba ne, Tshiena yeye. Bakamukonka kabidi ne, Wewe mmuprofete au, anyi? Wakamba ne, Nasha. Bakamukonka ne, Wewe nganyi, bua tuhingashe di kudi bakututuma? Wewe udi udiamba nganyi? Wakamba ne, Ndi bianyi di dia muntu udi wela lubila mu tshihela ne, Nululamishe nshila wa Mukelenge, bu muakamba muprofete Yeshaya. Bakatumibua kudi Bafalese. Bakamuebesha ne, Biwikala kui Kilisto, kui Eliya, kui muprofete au, tshiudi ubatijila bantu ntshinyi? Yone wakabakudimuna di ne, Ndi mbatiza bantu mu mai; munkatshi muenu mudi muimane unudi kanui bamanye, yeye mene ulualua ku nyima kuanyi, tshiena ne buakane bua kusulula mionshi ya bisabata biandi. Malu â akadi enjibua mu Betania dishia dia Yadene, muakadi Yone ubatiza. Hakatshiabu, yeye wakamona Yesu ulua kudiye, wakamba ne, Tangilai, Muanʼa mukoko wa Nzambi, udi umusha bubi bua ba ha buloba! Kayeyʼeu unakuamba ne, Ku nyima kuanyi kulualua muntu udi muntambe, bualu bua yeye wakadiku ku mpala kuanyi. Meme tshiakumumanya; kadi nakuluila mbatiza bantu mu mai bualu bua kumumuenesha kudi Isalele. Yone wakamba ne, Nakumona Nyuma uhueka mu diulu bu nyunyu wa nkutshi, wakumuikila. Tshiakumumanya; kadi wakantuma bua kubatiza bantu mu mai wakungambila ne, Muntu uwatangila Nyuma uhuekela hamʼbidi handi, mumuikile, yeye nguabatiza bantu mu Nyuma Muimpe. Nakumona bualu ebu, ne nakumanyisha bantu ne, Eu udi Muana wa Nzambi. Hakatshiabu kabidi, Yone wakadi muimane ne bayidi bandi babidi. Wakatangila Yesu talala, hakadiye wenda, wakamba ne, Tangilai, Muanʼa mukoko wa Nzambi: Bayidi babidi bakunvua dî diakambeye, bakalonda Yesu. Yesu wakatshinguluka, wakabamona bamulonda, wakabakonka ne, Nudi nukeba tshinyi? Bakamuebesha ne, Labi (kukudimuna kua muaku ne, Muyishi), wewe udi wikala kudi kunyi? Yeye wakabambila ne, Luai numone. Bakaya, bakamona kuakadiye mutule. Bobo bakashala nʼandi difuku adi; diba diakadi bu ha inai. Babidi bakunvua dî dia Yone, bakalonda Yesu, mukuabo wakadi Andele, muanʼabo ne Simona Petelo. Yeye wakasangana muanʼabo Simona diambedi, wakamuambila ne, Tuakumona Mashiya (kukudimuna kua muaku ne, Kilisto). Wakalua nʼandi kudi Yesu. Yesu wakamumona wakamuambila ne, Wewe udi Simona, muana wa Yona; nebakuidike dina ne, Kefa (kukudimuna kua muaku ne, Petelo). Hakatshiabu, wakamba kuya mu Galela, wakasangana Filipo. Yesu wakamuambila ne, Undonde. Filipo wakadi Muena Bete-saiîa, musoko wa Andele ne Petelo. Filipo wakasangana Natanaele, wakamuambila ne, Tuakumona wakafunda Mose mu mikenshi, ne baprofete, Yesu wa ku Nazaleta, muana wa Yosefe. Natanaele wakamuebesha ne, Tshintu tshimpe tshidi tshimanye mua kufuma mu Nazaleta, anyi? Filipo wakamuambila ne, Lua umone. Yesu wakatangila Natanaele ulua kudiye, wakamuamba ne, Tangilai, yeye udi Muena Isalele bulelela, udi kai ne lubombo. Natanaele wakamukonka ne, Wewe udi munmanye meme kudi kunyi? Yesu wakamuandamuna ne, Diambedi Filipo kai muanze kukubikila, hawakadi munshi mua mutshi wa nfigi, nakukutangila. Natanaele wakamuandamuna ne, Labi, wewe udi Muana wa Nzambi, wewe udi Mukelenge wa Isalele. Yesu wakamukonka ne, Wewe udi witabusha bualu bua nakukuambila ne, Nakukutangila munshi mua mutshi wa nfigi, anyi? Neumone malu ahita abu. Wakamuambila ne, Bulelela, bulelela, ndi nuambila ne, Nenumone diulu dibulula ne banjelo babanda bahueka ha Muana wa muntu. Hakahita matuku asatu, dibaka diakadi mu Kana wa Galela; mamu wa Yesu wakadiku; bakabikila Yesu ne bayidi bandi ku dibanji. Hakashika nyinyo, mamu wa Yesu wakamuambila ne, Kabena ne nvinyo. Yesu wakamuambila ne, Mukashi, ndi nʼebe bualu kai? Diba dianyi kadiena dianze kulua. Mamu wandi wakambila bena mudimu ne, Enzai muanuambileye. Milondo isambombo ya mai misonga ya mabue yakadi nutekela bua mai a kuowa bu mudi tshilele tshia Bena Yuda, mulondo lita makumi tshitema, mulondo lita makumi tshitema. Yesu wakabambila ne, Nûshe milondo tente ne mai. Bakayûsha tô ne ku mibangu yai. Yeye wakabambila ne, Nutunte, nuye nʼandi kudi udi ha mutu ha dibanji. Bakaya nʼandi. Hakalabula wakadi ha mutu ha dibanji mai akukudimuka nvinyo, hakadiye kai mumanye kuakufumeye (kadi bena mudimu bakatuma mai bakamanya), wakadi ha mutu ha dibanji wakabikila mubaki wa mukashi, wakamuambila ne, Bantu bonso batu bafila nvinyo muimpe diambedi; hanuabo wa bungi, nebafile udi kai muimpe ku nyima; kadi wewe wakuteka nvinyo muimpe tô ne katataka. Bualu ebu buakenza Yesu mu Kana wa Galela buakadi bua kumudilu bua bimanyinu biandi, wakalesha bantu butumbi buandi; bayidi bandi bakamuitabusha. Hakashika malu â, wakaya ne mamuʼandi, ne bana babo, ne bayidi bandi ku Kapênuma; kabakashalamu matuku a bungi. Disanka dia Kuhita kua Yehowa dia Bena Yuda diakadi ha buihi, Yesu wakabanda ku Yelushalema. Wakasangana mu ntempelo bahanyi ba ngombe ne mikoko ne nyunyu ya nkutshi, ne bashintakashi ba mpalata bashikame; yeye wakasuikakasha muonshi ne tuonshi tukese wakîhata buonso buai mu ntempelo ne mikoko ne ngombe, wakitshikisha mpalata ya bashintakashi, wakatokola mesa abo; wakambila bahanyi ba nyunyu ya nkutshi ne, Umushai bintu ebi; kanuvuishi nsubu wa Tatu wanyi bu wa bendi ba mushinga. Bayidi bandi bakavuluka dî didi difunda mu Mukanda wa Nzambi ne, Lukunukuna lua ku nsubu webe nelundie. Bena Yuda bakamuebesha ne, Bualu bua wewe udi wenza nunku, udi utulesha tshimanyinu kai? Yesu wakabakudimuna dî ne, Bumbulai ntempelo eu, nemubishe kabidi matuku asatu. Bena Yuda bakamba ne, Bakibaka ntempelo eu bidimu makumi anai ne bisambombo, wewe neumuibake kabidi matuku asatu, anyi? Kadi yeye wakadi wamba bua ntempelo wa mubidi wandi. Hakabikeye ku lufu, bayidi bandi bakavuluka dî edi diakambeye, bakitabusha malu akadi mafunda ma Mukanda wa Nzambi ne dî diakamba Yesu. Hakadiye mu Yelushalema ku Kuhita kua Yehowa, mu matuku a disanka, bantu ba bungi bakitabusha dina diandi, hakamonabo bimanyinu biandi biakenzeye. Kadi Yesu kakaditeka mu bianza biabo, bualu bua yeye wakamanya bantu bonso, ne bua yeye kakadi ne bualu bua muntu amuambile malu a bantu; yeye mene wakadi mumanye malu a munda mua bantu. Muntu wa ku Bafalese wakadiku dina diandi Nikodemo, yeye wakadi muloho wa Bena Yuda; yeye wakalua kudi Yesu butuku, wakamuambila ne, Labi, tudi bamanye ne, Wewe udi muyishi mufume kudi Nzambi, bualu bua kakuena muntu udi mumanye mua kuenza bimanyinu ebi biudi wenza, bikala Nzambi kai nʼandi. Yesu wakamuandamuna ne, Bulelela, bulelela, adi nkuambila ne, Bikala muntu kai muledibue tshiakabidi, kena mumanye mua kutangila bukelenge bua Nzambi. Nikodemo wakamukonka ne, Hakulumpa muntu, yeye udi mumanye mua kuledibua tshiakabidi munyi? Udi mumanye mua kubuela munda mua mamu wandi tshiakabidi, amulele, anyi? Yesu wakamuandamuna ne, Bulelela, bulelela, ndi nkuambila ne, Bikala muntu kai muledibue kudi mai ne kudi Nyuma, yeye kena mumanye mua kubuela mu bukelenge bua Nzambi. Wakaledibua kudi mubidi udi mubidi; wakaledibua kudi Nyuma udi nyuma. Kukemi bua dî dinakukuambila ne, Bunudi nʼabu mbua kuledibua tshiakabidi. Luhehele ludi luheha kudilu lusue, wewe udi unvua tshiona tshialu, kadi kuena mumanye kudilu lufuma ne kudilu luya; muntu yonso udi muledibue kudi Nyuma udi nunku. Nikodemo wakamuebesha ne, Malu â adi mamanye mua kuikala nunku munyi? Yesu wakamukonka ne, Wewe udi muyishi wa Isalele, kuena mumanye malu â? Bulelela, bulelela, ndi nkuambila ne, Tudi tuamba butudi bamanye, tudi tuambila bantu butuakumona; nuenu kanuena nuitabusha butuakunuambila. Binuahidia kuitabusha malu a ha buloba anakunuambila, nudi bamanye mua kuitabusha binanuambila malu a mu diulu munyi? Kakuena muntu wakubanda mu diulu anu yeye wakufuma mu diulu, Muana wa muntu mene, udi biandi mu diulu. Bu muakabisha Mose nyoka mu tshihela, nunku budi Muana wa muntu nʼabu mbua kubishibua muomumue; bua muntu yonso witabusha ikale ne muoyo wa tshiendelele bualu buandi. Bualu bua Nzambi wakatamba kusua ba ha buloba, yeye wakabaha Muanʼandi umuehele mulela bua muntu yonso wamuitabusha kafu biandi, kadi ikale ne muoyo wa tshiendelele. Nzambi kakatuma Muana wandi ha buloba bua kulumbuluisha ba ha buloba, kadi bua ba ha buloba basungidibue kudiye. Kabena balumbuluisha wamuitabusha, kadi bakumana kulumbuluisha wahidia kuitabusha, bualu bua kakitabusha dina dia Muana umuehele mulela wa Nzambi. Etshi ntshilumbu tshia bantu ne, Munya wakalua ha buloba, kadi bantu bakasua midima, kabakasua munya, bua bienzedi biabo biakadi bibi. Muntu yonso utu wenza malu mabi katu wasua munya, kena ulua mu munya bua bienzedi biandi kabimanyibu. Kadi muntu yonso utu wenza malu mimpe udi ulua mu munya bua bienzedi biandi bimueneke, bualu bua biakenjibua mu Nzambi. Hakashika malu â, Yesu ne bayidi bandi bakalua mu luseke lua Yudaya; wakashalaku tshituha ubatiza bantu. Yone kabidi wakadi ubatiza bantu mu Ainona hehi ne Salima, bualu bua mpokolo ya mai yakadiku ya bungi; bantu bakalua, bakabatijibua. Kabakadi banze kuela Yone mu nsubu wa lukanu. Bayidi ba Yone bakadi ne Muena Yuda mpata bua kudiuvua. Bakalua kudi Yone, bakamuambila ne, Labi, uwakadi nʼandi dishia dia Yadene, uwakambila bantu, udi ubatiza bantu, bantu bonso balualua kudiye. Yone wakandamuna ne, Muntu kena mumanye mua kudiangatshila tshintu, kabai bamuhetshi tshifume mu diulu. Nuenu nudi bamanyi banyi ne nakamba ne, Tshiena Kilisto, kadi nakutumibua ku mpala kuandi. Udi ne mukashi udi biandi mubaki wa mukashi; kadi mulunda wa mubaki, himaneye nʼandi, hatelesheye dî diandi, neatambe kusanka bualu bua dî dia mubaki; ka disanka dianyi didi dikumbane. Budiye nʼabu mbua kutumba, bundi nʼabu mbua kuhueka. Udi mufume mulu ngudi mutambe bonso; wa ha buloba udi wa ha buloba, udi wamba malu a ha buloba; udi mufume mulu udi mutambe bonso. Yeye udi wamba malu akamoneye ne akunvueye; kakuena muntu udi witabusha malu akambeye. Wakuitabusha malu akambeye wakuteka tshimanyishilu tshiandi tshilesha ne, Nzambi udi mulelela. Udi mutuma kudi Nzambi udi wamba mei a Nzambi; bualu bua yeye kena umulobela Nyuma. Tatu udi musue Muana wandi, wakafila bintu bionso mu bianza biandi. Udi witabusha Muana udi ne muoyo wa tshiendelele; kadi udi uhidia Muana kena umona muoyo, tshishi tshia Nzambi tshidi tshishala ngandi. Hakamanya Mukelenge ne, Bafalese bakunvua ne, Yesu udi mutambe Yone kuvuisha bantu bayidi ne kubabatiza (kadi Yesu mene kakadi ubabatiza, bayidi bandi bakadi bababatiza), yeye wakumuka mu Yudaya, wakahingana mu Galela kabidi. Buakadiye nʼabu mbua kuhitshila mu Samalea. Yeye wakalua ku musoko wa Samalea, dina diau Suka, hehi ne muaba wakadi Yakoba muhe muanʼandi Yosefe. Dina dia mai dia Yakoba diakadihu. Luendu luakatonda Yesu, yeye wakashikama nunku kukala kua dina. Diba diakadi munda munya. Mukashi wa mu Samalea wakalua kusuna mai. Yesu wakamuambila ne, Umpe mai a kunua. Bayidi bandi bakadi bamane kuya mu musoko bua kusumba bia kudia. Mukashi wa mu Samalea wakamukonka ne, Wewe Muena Yuda udi undombela meme Muena Samalea mai a kunua tshinyi? (Bualu bua Bena Yuda kabena babuelakana ne Bena Samalea.) Yesu wakamuandamuna ne, Bu wewe mumanye diha dia Nzambi ne wakukulomba ne, Umpe mai a kunua, wewe wakadi kumulomba ne yeye wakadi kukuha mai a muoyo. Mukashi wakamuambila ne, Mukelenge, wewe kuena ne tshia kukoka nʼatshi mai, dina didi dile, wewe udi ne mai a muoyo kudi kunyi? Wewe udi mutambe tatu wetu Yakoba, anyi? Yeye wakatuha dina, wakânuaku ne bana bandi ne bimuna biandi. Yesu wakamuandamuna ne, Wanua mai â neikale ne nyota kabidi, kadi wanua mai anamuha kena wikala ne nyota kabidi tshiendelele; mai anamuha neikale munda muandi bu mushimi wa mai abanda mu muoyo wa tshiendelele. Mukashi wakamuambila ne, Mukelenge, Umpe mai â, tshikadi ne nyota, tshilu tô kunoko bua kusuna. Yesu wakamuambila ne, Ya ubikile mulume webe, ulue biebe kunoko. Mukashi wakamuandamuna ne, Tshiena ne mulume. Yesu wakamuambila ne, Wakuamba bulelela ne, Tshiena ne mulume; bualu bua wewe wakadi ne balume batanu, ûdi nʼandi katataka kena mulume webe; wewe wakuamba bulelela. Mukashi wakamuambila ne, Mukelenge, ndi njingulula ne, Wewe udi muprofete. Bankambua betu bakadi batendelela Tatu ku mukuna eu; kadi nuenu nudi nuamba ne, Mu Yelushalema mudi muaba udi bantu ne bua kutendelelamu Tatu. Yesu wakamuambila ne, Mukashi, witabushe dî dianyi, diba nedilue dikala bantu kabai batendelela Tatu ku mukuna eu anyi mu Yelushalema. Nudi nutendelela tshinudi kanui bamanye; tuetu tudi tutendelela tshitudi bamanye; bualu bua luhandu ludi lufuma kudi Bena Yuda. Kadi diba nedilue, didiku katataka mene, ditendelela batendeledi balelela Nzambi mu nyuma ne mu bulelela; Tatu udi ukeba bantu ba nunku bamutendelela. Nzambi udi Nyuma; budi bamutendeledi nʼabu mbua kumutendelela mu nyuma ne mu bulelela. Mukashi wakamuambila ne, Ndi mumanye ne, Mashiya ulualua (udibo babikila ne, Kilisto); halueye, neatumanyishe malu onso. Yesu wakamuambila ne, Meme udi wakula nʼebe nyeye. Bayidi bandi bakalua ha diba adi mene; bakakema bualu bua yeye wakadi wakula ne mukashi; kadi muntu kakamufuka ne, Udi ukeba tshinyi? Udi wakuila nʼandi tshinyi? Mukashi wakashia mulondo wandi wa mai, wakaya ku musoko, wakambila bantu ne, Luai numone muntu wakungambila malu onso anakenzenza; nyeye Kilisto, anyi? Bakaluhuka mu musoko, bakadi balua kudiye. Hakadibo benza nunku, bayidi bakamusengelela ne, Labi, diaku. Kadi yeye wakabambila ne, Ndi ne bia kudia binudi kanui bamanye. Bayidi bakakonkangana ne, Bakulua ne bia kudia kudiye, anyi? Yesu wakabambila ne, Bidia bianyi bidi kuenza bu mudi wakuntuma musue ne kushikisha mudimu wandi. Kanutu nuamba ne, Hahua ngondo inai, kunowa nekulue, anyi? Ndi nuambila ne, Bandulukai, numone madimi, adi matoke katataka bua kunowabo. Udi unowa udi wangata difutu, udi usangisha bintu bia ku muoyo wa tshiendelele; bua mukunyi ne munowi basanke hohamue. Dî edi ndilelela ne, Munga udi ukuna, munga udi unowa. Nakunutuma bua kunowa bintu binuakadi kanui bakuatshile mudimu; bakuabo bakakuata mudimu, nuenu nuakuhingana mu mudimu wabo. Bena Samalea ba bungi ba mu musoko au bakamuitabusha bualu bua dî dia mukashi diakambeye ne, Yeye wakungambila malu onso anakenzela. Hakalua Bena Samalea kudiye, bakamusengelela ne, Shala nʼetu; yeye wakalalamu matuku abidi. Bakuabo ba bungi kabidi bakitabusha bualu bua dî diandi; bakambila mukashi ne, Tuakuitabusha katataka, kambualu bua dî diebe, tuakudiunvuila, tudi bamanye ne, Bulelela, eu udi Musungidi wa ba ha buloba. Hakahita matuku abidi, wakumukamu, wakaya mu Galela. Yesu mene wakamba ne, Muprofete kena ne butumbi mu luseke luabo. Hakalueye mu Galela nunku, Bena Galela bakamuitabusha, bua bobo bakatangila malu onso akenzeye mu Yelushalema ku disanka dia Kuhita kua Yehowa; bobo kabidi bakadi baye ku disanka. Yeye wakalua kabidi ku Kana wa Galela kuakakudimuneye mai nvinyo. Muloho wa mukelenge wakadi ne muanʼandi usama mu Kapênuma. Hakunvueye lumu ne, Yesu wakumuka mu Yudaya, wakulua mu Galela, wakaya kudiye, wakamutendekena ne, Uhueke, wondahe muanʼanyi; bualu bua lufu luakadi lumutonde. Yesu wakamuambila ne, Binuikala kanui numona bimanyinu ne malu a kukema, kanuena nuitabusha, nasha kakese. Muloho wa mukelenge wakamuambila ne, Mukelenge, hueka diambedi muanʼanyi kai muanze kufua. Yesu wakamuambila ne, Ya biebe, muanʼebe udi ne muoyo, Muntu au wakitabusha dî diakamuambila Yesu, wakaya biandi. Hakadiye uya mu nshila, bantu bandi bakasangila nʼandi, bakamuambila ne, Muanʼebe udi ne muoyo. Yeye wakabakonka diba diakabangeye kusangala. Bakamuambila ne, Makelela, hakadi diba ha umue, mubidi kahia wakamulekela, Nunku tatu wakamanya ne, Mpa diba adi mene diakungambila Yesu ne, Muanʼebe udi ne muoyo. Yeye wakitabusha ne ba mu nsubu wandi bonso. Etshi ntshimanyinu tshibidi tshiakenza Yesu hakumukeye mu Yudaya, bakalueye mu Galela. Hakashika malu â, disanka dia Bena Yuda diakadiku; Yesu wakaya ku Yelushalema. Mu Yelushalema, hehi ne tshibuelelu tshia mikoko, mudi mpokolo wa mai a kuowa, udi Bena Yuda babikila ne, Beteseda, wakadi ne bitanda bitanu. Mu bitanda amu muakadi mulale tshisumbu tshia bakadi batekete ne bafofo ne balema ne banyane. [ ] Muntu wakadimu ne disama dia matekete bidimu makumi asatu ne muanda mukulu. Hakamumona Yesu mulale, hakamanyeye ne, Yeye wakadi mu bualu ebu musangu mule, wakamukonka ne, Udi musue kuondahibua, anyi? Muntu musame wakamuandamuna ne, Mukelenge, havuandululabo mai, tshiena ne muntu wa kumbuesha mu mpokolo; hantshidi nya, munga udi umpita ku mpala. Yesu wakamuambila ne, Bika, ambula bulalu buebe, endaku. Muntu wakakoleshibua lukasa, wakambula bulalu, wakenda. Dituku adi diakadi dia Lumingu lua Bayuda. Bena Yuda bakambila wakondahibua ne, Lelu ndituku dia Lumingu, kutuala bulalu buebe kudi kushiha mukenshi. Kadi yeye wakabandamuna ne, Wakungondaha wakungambila ne, Ambula bulalu buebe, endaku. Bakamukonka ne, Nganyi wakukuambila ne, Ambula bulalu buebe, endaku? Wakondahibua kakamanya wakamukolesha; bualu bua Yesu wakumukaku, tshisumbu tshia bantu tshikala ha muaba au. Hashishe Yesu wakamusangana mu ntempelo, wakamuambila ne, Mona, wakukola; kuenji bualu bubi kabidi, bua dikenga ditambe kadilu kûdi. Muntu au wakumuka, wakambila Bena Yuda ne, Wakankolesha udi Yesu. Bua bualu ebu Bena Yuda bakatatshisha Yesu, bua yeye wakenza malu â dituku dia Lumingu. Kadi Yesu wakabandamuna ne, Tatu wanyi udi ukuata mudimu tô ne katataka, ne meme kabidi ndi ngukuata. Bua bualu ebu Bena Yuda bakatamba kukeba mua kumushihabo, bua yeye wakashiha mukenshi wa Lumingu, ne bua wakubikila Nzambi ne, Ntatu wanyi, udivuisha muomumue ne Nzambi. Yesu wakabakudimuna dî ne, Bulelela, bulelela, ndi nuambila ne, Muana kena mumanye mua kudienzela bualu, utu wenza anu budiye umona Tatu wandi wenza; malu onso adi Tatu wenza Muana utu wênza muomumue. Bualu bua Tatu udi musue Muana, udi umulesha malu onso atshidiye wenza; yeye neamuleshe malu a kukema matambe â, bua nuenu kukema. Bu mudi Tatu ubisha bafue, ubaha muoyo; nunku kabidi Muana udi uha badiye musue muoyo. Tatu kena ulumbuluisha muntu, kadi yeye wakuha Muana bulumbuluishi buonso, bua bantu bonso batumbishe Muana bu mudibo batumbisha Tatu. Udi kai utumbisha Muana kena utumbisha Tatu wakamutuma. Bulelela, bulelela, ndi nuambila ne, Unvua dî dianyi, witabusha wakuntuma, udi ne muoyo wa tshiendelele, kena ulua ku tshilumbu, wakumuka mu lufu, wakubuela mu muoyo. Bulelela, bulelela, ndi nuambila ne, Diba nedilue, didiku katataka mene, diunvua bafue dî dia Muana wa Nzambi; badi bunvua nebikale ne muoyo. Bu mudi Tatu ne muoyo munda muandi, nunku yeye wakaha Muana kabidi bua kuikaleye ne muoyo munda muandi; yeye wakamuha bukokeshi bua kulumbuluisha, bualu bua yeye udi muana wa muntu. Kanukemi bua bualu ebu; bualu bua diba nedilue diunvua bonso badi mu nkita dî diandi, nebajuke; bakenzenza bimpe nebajuke mu dibika dia muoyo, bakenzenza bibi nebajuke mu dibika dia dihila. Meme nkayanyi tshiena mumanye mua kuenza bualu; ndi ndumbulula bu mundi ngunvua; ndi ndumbulula biakane, bua tshiena nkeba kuenza bu mundi musue, ndi nkeba kuenza bu mudi wakuntuma musue. Binadiamba, dî dianyi kadiena dijalama. Udi ungamba nmukuabo; ndi mumanye ne, Budiye ungamba mbulelela. Nuenu nuakatuma bantu kudi Yone, ne yeye wakujadika bualu bulelela ne kuamba kuandi. Tshiena ngangata dijadika dia bualu buanyi kudi muntu; kadi ndi ngamba malu â bua nuenu kusungidibua. Yeye wakadi muinda utema ukenka; nuenu nuakitabusha bua kusanka mu dinkenka diandi musangu. Kadi tshimanyinu tshindi nʼatshi tshidi tshitambe dî dia Yone, bualu bua malu a kukema akumpa Tatu bua meme kuenza, malu antshidi ngenza mene, adi angamba ne, Tatu wakuntuma. Tatu wakantuma waku ngamba kabidi. Kanuena banze kunvua dî diandi tshikondo tshimue, kanuena banze kutangila mubidi wandi. Kanuena ne dî diandi dishala munda muenu, bualu bua kanuena nuitabusha wakatumeye. Nudi nukeba kujingulula malu adi mafunda mu Mukunda wa Nzambi, bua nudi nuelangana meshi ne, Mu malu â tudi ne muoyo wa tshiendelele; malu au kabidi adi angamba; kanuena basue kulua kundi bua nuenu kuikala ne muoyo. Tshiena nkeba kuangata butumbi kudi bantu. Kadi ndi munumanye ne, Kanuena ne luse lua Nzambi munda muenu. Nakulua mu dina dia Tatu wanyi, kanuena nungitabusha; biadiluila mukuabo mu diandi dina, nenumuitabushe. Nuenu, badi batumbishangana, badi kabai bakeba butumbi budi bufuma kudi Nzambi nkayandi, nudi bamanye mua kuitabusha munyi? Kanuedianganyi meshi ne, Meme nenubande ku mesu kua Tatu; mukuabo udiku, Mose mene, unudi beyemene, yeye neanubande. Bu nuenu bitabushe Mose, nuakadi kungitabusha meme, bua yeye wakafunda bualu buanyi. Binuikala kanui nuitabusha malu akafundeye, nenuitabushe mei anyi munyi? Hakashika malu â, Yesu wakaya dishia dia dishiba dia Galela, didi dishiba dia Tibelia. Bantu ba bungi bakamulonda, bualu bua bakatangila bimanyinu biakenzeleye bena mabedi. Yesu wakabanda ku mukuna, wakashikamaku ne bayidi bandi. Kuhita kua Yehowa, disanka dia Bena Yuda, kuakadi ha buihi. Yesu wakabanduluka, wakamona bantu ba bungi balua kudiye, wakakonka Filipo ne, Netusumbe mitanda ya bidia kudi kunyi, bantu aba badie? Wakamukonka nunku bua kumuteta munda, bua yeye wakadi mumanye bualu buakadiye ha kuenza. Filipo wakamuandamuna ne, Bidia bia mushinga wa ndenalio nkama ibidi kabiena bibakumbana bua muntu ne muntu kuangata anu bikese. Muyidi wandi mukuabo, Andele, muanʼabo ne Simona Petelo, wakamuambila ne, Nsongalume mukese udi aha, udi ne mitanda itanu ya bidia bia seola ne mishiha ibidi; kadi bintu ebi ntshinyi tshienzelabi bantu bungi nunku? Yesu wakamba ne, Shikamishai bantu. Mashinde a bungi akadihu. Nunku balume bakashikama, bakadi bu binunu bitanu. Yesu wakamema mitanda; hakatendeleleye Nzambi, wakayabanyina bakadi bashikame, ne mishiha kabidi bungi buakadibo basue. Hakûkutabo, wakambila bayidi ne, Angula! bihesa bia bidia bidi bishale, tshintu katshijiminyi. Bakabiangula nunku, bakûsha bisaka dikumi ne bibidi tente ne bihesa bia mitanda itanu ya bidia bia seola biakadibo bashîa kudi bakadia. Hakamona bantu tshimanyinu etshi tshiakenzeye, bakamba ne, Bulelela, eu udi muprofete ulualua ha buloba. Hakamanya Yesu ne, Badi bamba kunkuata ku bukole bua kumbuesha mu bukelenge, wakaya ku mukuna kabidi, yeye nkayandi. Hakabuela diba, bayidi bandi bakahueka ku dishiba; bakabuela mu buatu, bakadi baya dishia ku Kapênuma. Butuku buakila, Yesu kakanza kulua kudibo. Mai akadi ajuka mavuala bualu bua tshihehele tshikole tshiakadi tshiheha. Hakitabo bualu ntanta bu ya kilometa inai anyi itanu, bakatangila Yesu wenda ha mutu ha mai, ulua hehi ne bualu; bakatshina. Kadi yeye wakabambila ne, Nmeme, kanutshinyi. Nunku bakitabusha bua kumubuesha mu buabi; buatu buakafika lukasa ku mpata kuakadibo baya. Hakatshiabu, bantu bakadi bimane dishia dia dishiba bakamona anu buatu bumue; bakamanya kabidi ne, Yesu kena mubuele mu buatu ne bayidi bandi, anu bobo nkayabo bakuya, (kadi matu mafume ku Tibelia akalua hehi ne muaba wakadiabo bidia, hakatendelela Mukelenge Nzambi); hakamanya bantu ne, Yesu kena kunoko ne bayidi bandi, bakabuela mu matu, bakalua ku Kapênuma, bakeba Yesu. Hakamumonabo dishia dia dishiba, bakamukonka ne, Labi, wakulua kunoko diba henyi? Yesu wakabandamuna ne, Bulelela, bulelela, udi nuambila ne, Kanuena nunkeba bua bimanyinu binuakutangila, nudi nunkebela bua nuakudia mitanda, nuakûkuta. Kanukuatshi mudimu bua bia kudia bitu biafua, kadi nûkuate bua bidi bishala tô ne ku muoyo wa tshiendelele, bianuha Muana wa muntu; bualu bua Tatu, Nzambi mene, wakamuteka tshimanyishilu. Bakamukonka ne, Netuenze tshinyi bua tuetu kuenza midimu ya Nzambi? Yesu wakabandamuna ne, Mudimu wa Nzambi udi nunku: nuitabushe wakatumeye. Bakamukonka ne, Udi wenza tshimanyinu kai bua tuetu tumone, tuitabushe dî diebe? Tshiudi wenza ntshinyi? Bankambua betu bakadia mana mu tshihela, bu muakafundabo ne, Yeye wakabaha bidia bia mu diulu. Yesu wakabambila ne. Bulelela, bulelela, udi nuambila ne, Mose kakanuha bidia bia mu diulu, Tatu wanyi udi unuha bidia bilelela bia mu diulu. Bua bidia bia Nzambi mbiobio bîdi bifuma mu diulu, bidi biha ba ha buloba muoyo. Bakamuambila ne, Mukelenge, Utuhe bidia ebi matuku onso. Yesu wakabambila ne, Ndi bianyi bidia bia muoyo; walua kundi kena wikala ne nsala, wangitabusha kena wikala ne nyota. Kadi nakunuambila ne, Nuakutangila, kanuena nuitabusha. Bonso badi Tatu umpa nebalue kundi; tshiena ngihata walua kundi. Tshiakufika mu diulu bua kuenza bu mundi musue, anu bu mudi wakuntuma musue. Edi ndisua dia wakuntuma ne tshijimishi muntu umue wa mu bantu bakampeye, yeye udi musue mbabishe dituku dia kunshikidilu. Tatu wanyi udi musue muntu yonso udi utangila Muana, udi umuitabusha, ikale ne muoyo wa tshiendelele; ne meme nemubishe dituku dia kunshikidilu. Bena Yuda bakamujiana, bualu bua yeye wakamba ne, Ndi bianyi bidia biakafuma mu diulu. Bakakonka ne, Eu kena Yesu, muana wa Yosefe utudi bamanye tatuʼandi ne mamuʼandi, anyi? Ahu munyi mudiye wamba ne, Ndi mufume mu diulu? Yesu wakabandamuna ne, Kanuikadi ne tshimanu munkatshi muenu. Kakuena muntu udi mumanye mua kudivuila kundi, hikala Tatu wakuntuma kai mumukoke; ne meme nemubishe dituku dia kunshikidilu. Baprofete bakafunda ne, Nzambi neabayishe bonso. Muntu yonso wakunvua mei a Tatu, wakuayila, ulualua kundi. Kakuena muntu wakumona Tatu, anu yeye udi mufume kudi Nzambi, yeye wakumona Tatu. Bulelela, bulelela, ndi nuambila ne, Udi witabusha udi ne muoyo wa tshiendelele. Ndi bianyi bidia bia muoyo. Bankambua benu bakadia mana mu tshihela, bakafua. Ebi mbidia bitu biafuma mu diulu, bua muntu kudia biandi, kafu. Ndi bianyi bidia bidi ne muoyo biakafuma mu diulu; biadia muntu bidia ebi, neikale ne muoyo tshiendelele; bulelela, bidia binafila ku muoyo wa ba ha buloba nmubidi wanyi. Bua dî edi Bena Yuda bakelangana mpata ne, Muntu eu udi mumanye mua kutuha mubidi wandi, tudie, munyi? Nunku Yesu wakabambila ne, Bulelela, bulelela, ndi nuambila ne, Binuikala kanui nudia mubidi wa Muana wa muntu, binuikala kanui nunua mashi andi, kanuena ne muoyo munda muenu. Udi udia mubidi wanyi, udi unua mashi anyi, udi ne muoyo wa tshiendelele, nemubishe dituku dia kunshikidilu. Mubidi wanyi udi bidia bilelela, mashi anyi adi bia kunua bilelela. Udi udia mubidi wanyi, udi unua mashi anyi, udi wikala munda muanyi ne meme munda muandi. Bu muakantuma Tatu udi ne muoyo, ne bu mundi ne muoyo bualu bua Tatu, nunku wandia meme neikale ne muoyo bualu buanyi. Ebi mbidia biakufuma mu diulu; kabiena bu wakadia bankambua betu, bakafua; wadia bidia ebi neikale ne muoyo tshiendelele. Yeye wakamba malu â mu nsunagoga hakadiye uyisha bantu mu Kapênuma. Bayidi bandi ba bungi, hakunvuabo dî edi, bakamba ne, Dî edi didi dikole, udi mumanye mua kuditabusha nganyi? Hakamanya Yesu munda munda ne, Bayidi banyi badi bajiana bua dî edi, wakabakonka ne, Bualu ebu budi bunulenduisha, anyi? Ahu binuatangila Muana wa muntu ubanda kuakadiye diambedi? Nyuma ngudi uha muoyo, mubidi kawena wenza bualu; mei anakunuambila adi nyuma ne muoyo. Kadi bakuabo benu kabena bitabusha. Ku tshibangidilu Yesu wakadi mumanye bakadi kabai bitabushe, wakadi mumanye wamutungila tshitungu. Wakamba ne, Bua bualu ebu nakunuambila ne, Kakuena muntu ndi mumanye mua kudivuila kundi, bikalabo kabai bamuhebu kudi Tatu. Bayidi bandi ba bungi bakahingana ku malu a diambedi bualu bua dî edi, kabakenda nʼandi kabidi. Yesu wakakonka bayidi dikumi ne babidi ne, Nuenu kabidi, kanuena basue kuya, anyi? Simona Petelo wakamukudimuna ne, Mukelenge, netuye kudi nganyi? Wewe udi ne mei a muoyo wa tshiendelele. Tuakuitabusha, tudi bamanye ne, Wewe udi Wa Tshijila wa Nzambi. Yesu wakabakonka ne, Tshiakunusungula dikumi ne babidi, anyi? Kadi umue wenu udi wa diabolo. Yeye wakadi wamba bua Yudasa, muana wa Simona Isakaliote, bualu bua yeye nguakadi ha kumutungila tshitungu, yeye wakadi umue wabo wa ba dikumi ne babidi. Hakashika malu â, Yesu wakadi wendakana mu Galela; kakadi wendakana mu Yudaya, bualu bua Bena Yuda bakadi bakeba mua kumushiha. Disanka dia Bena Yuda, Disanka dia Bisambusambu, diakadi ha buihi. Bana babo ba difu dimue bakamuambila ne, Umuka kunoko, ya mu Yudaya bua bayidi bebe kabidi bamone malu a kukema audi wenza. Kakuena muntu udi wenza bualu mu busokoko biasueye kumanyibua kudi bantu. Biwenza malu â, udimueneshe kudi ba ha buloba. Bualu bua bana babo ba difu dimue kabakamuitabusha. Yesu wakabambila ne, Diba dianyi kadiena dianze kufika, kadi diba dienu didiku matuku onso. Ba ha buloba kabena bamanye mua kuikala nʼenu lukuna; kadi badi nʼanyi lukuna, bualu bua ndi mbamba ne, Malu adibo benza nmabi. Yai bienu ku disanka, tshiena nya katataka ku disanka edi, bua diba dianyi kadiena dianze kukumbana. Hakabambileye dî edi, wakashala mu Galela. Hakaya bana babo ne Yesu ku disanka, yeye kabidi wakaya mu musokoko, bantu kabai bamanye. Bena Yuda bakamukeba ku disanka, bakebeshangana ne, Udi hanyi? Bantu bakatamba kuelangana mpata ya bualu buandi mu musokoko; bakuabo bakamba ne, Udi muntu muimpe; bakuabo ne, Nasha, yeye udi uhambuisha bantu. Kadi kakuakadi muntu wakamuamba ku mesu kua bantu, bua bakatshina Bena Yuda. Kadi hankatshi ba matuku a disanka, Yesu wakalua mu ntempelo, wakayisha bantu. Bena Yuda bakakema ne, Muntu eu udi mumanye mikanda, kai muanze kuiyila, munyi? Yesu wakabakudimuna dî ne, Diyisha dianyi kandianyi, ndia udi muntume. Bitabusha muntu kuenza bu mudi Nzambi musue, yeye neamanye diyisha edi, ne ndia Nzambi, anyi ndi ndiambila nkayanyi. Wadiambila udi ukeba butumbi buandi; kadi wakeba butumbi bua wakumutuma udi biandi muntu mulelela, kena ne bualu bubi munda. Mose kakanuha mikenshi, anyi? Kadi kakuena umue wenu udi uyenza. Nudi nukebela kushihela tshinyi? Bantu bakamukudimuna dî ne, Udi ne demon munda, udi ukeba kukushiha nganyi? Yesu wakabandamuna ne, Nakuenza bualu bumue bua kukema, buonso buenu nudi nukema bualu ebu. Mose wakanuha bualu bua ditengula (kadiakafuma kudi Mose, diakafuma kudi bankambua); nutu nuatengula muntu dituku dia Lumingu. Biatengulabo muntu dituku dia Lumingu, bua kabashihi mukenshi wa Mose; nudi nʼanyi lukuna, bua nakahingisha bukole mu mubidi wa muntu wonso mujima difuku dia Lumingu, anyi? Kanulumbuluishi muntu tshilumbu ku bimuenu biandi, nulumbulule ne kulumbulula kuakane. Bakuabo ba mu Yelushalema bakakonka ne, Eu kanyeye udibo bakeba kushiha, anyi? Kadi monai, yeye udi wamba malu ku mesu kua bantu bonso, kabena bamuambila bualu. Bakelenge badi bamanye bulelela ne, Yeye udi Kilisto, anyi? Kadi tuetu tudî bamanye muntu eu kuakufumeye; halua Kilisto, kakuena muntu wamanya kuafumeye. Yesu wakela dî diandi bikole mu ntempelo, uyisha bantu ne, Nudi banmanye, nudi bamanye kunakufuma; tshiakudivuila, wakuntuma udi mulelela, unudi kanui bamanye. Meme ndi mumumanye, bualu bua nakufuma kudiye, yeye wakuntuma. Bakakeba mua kumukuata; kadi muntu kakamulenga tshianza, bualu bua diba diandi kadiakadi dianze kulua. Bantu ba bungi ba mu tshisumbu bakamuitabusha, bakakonka ne, Halua Kilisto, nenze bimanyinu bitambe ebi bidi muntu eu wenza, anyi? Bafalese bakunvua bantu belangana mpata ya bualu buandi; bakuidi banene ne Bafalese bakatuma tuhalai bua kumukuata. Yesu wakamba ne, Nengikale nʼenu tshituha tshihi, hashishe nenye kudi wakuntuma. Nenunkebe, kanuena nunmona; kanuena bamanye mua kulua kungikala. Bena Yuda bakakonkangana ne, Muntu eu neaye, kudi kunyi kutudi katu! bamanye mua kumumona? Neaye kudi bena tshimuangi munkatshi mua Bena Gelika, neayishe Bena Gelika, anyi? Edi ndî kai diakambeye ne, Nenunkebe, kanuena nunmona; kanuena bamanye mua kulua kungikala? Hakalua dituku dia kunshikidilu dia disanka, diakadi dituku dinene, Yesu wakimana, wakela dî diandi bikole ne, Bikala muntu ne nyota, alue kundi, anue. Misulu ya mai a muoyo nebatuke munda mua wangitabusha, bu muakamba Mukanda wa Nzambi. Yeye wakadi Wamba bua Nyuma wangatabo kudi bakumuitabusha; Nyuma kakadi muanze kulua, bua Yesu kakanza kutumbishibua. Bantu bakuabo, hakunvuabo mei â, bakamba ne, Bulelela, yeye udi muprofete au wa Nzambi. Bakuabo bakamba ne, Yeye udi Kilisto. Kadi bakuabo bakakonka ne, Ahu Kilisto udi ufuma mu Galela, anyi? Mukanda wa Nzambi kawena wamba ne, Kilisto neikale kankanunuina ka Davidi, neafume ku Beteleheme, kuakadi Davidi, anyi? Ditahuluka diakadiku munkatshi mua bantu bua bualu buandi. Bakuabo bakasua kumukuata, kadi muntu kakamulenga tshianza. Tuhalai tuakahingana kudi bakuidi banene ne Bafalese; bobo bakabakonka ne, Munyi kanuakulua nʼandi? Tuhalai tuakabakudimuna ne, Kakuakadi muntu kale tô ne katataka wakakula bu mudi muntu eu wakula. Bafalese bakabandamuna ne, Nuenu kabidi, bakanuhambuisha, anyi? Bantu betu banene anyi Bafalese bakumuitabusha, anyi? Bantu ba tshisumbu etshi badi kabai bamanye mikenshi ya Nzambi badi bedibua mulau. Nikodemo, muntu wakalua kudiye diambedi, umue wabo wa Bafalese, wakabambila ne, Mukenshi wetu udi ukosa tshilumbu tshia muntu diambedi kabai banze kunvua dî diandi, kabai banze kumanya bualu buakuenzeye, anyi? Bakamukonka ne, Wewe kabidi udi muena Galela, anyi? Ujingulule, Umanye ne, Muprofete katu watuma ku Galela. [ Muntu ne muntu wakahingana kuandi. Kadi Yesu wakaya ku mukuna wa Oleve. Dinda yeye wakalua mu ntempelo kabidi, bantu bonso bakalua kudiye; wakashikama, wakabayisha: Bafundi ne Bafalese bakalua ne mukashi mukuata wenda masandi; hakamutekabo munkatshi, bakambila Yesu ne, Muyishi, bakukuata mukashi eu wenda masandi, mpa bualu mene. Mu mikenshi ya Mose yeye wakutuambila ne, Nukume bantu badi benza nunku mabue; ahu wewe udi umuamba tshinyi? Bakamba nunku, bamuteta munda bua kuikalabo ne tshibandidi tshia kumubanda batshi. Kadi Yesu wakazonzama, wakadi ufunda hanshi ne munu wandi. Kadi hakadibo bamukonkakonka, wakabanduluka, wakabambila ne, Udi munkatshi muenu udi kai ne bualu bubi, adianjile kumuela dibue. Wakazonzama kabidi, wakafunda hanshi ne munu wandi. Hakunvuabo dî edi, bakumuka ku umue ku umue balondangane, babange ku wakadi mubatambe bukulu tô ne ku wa kunshikidilu; bakashîa Yesu nkayandi ne mukashi hankatshi hakadiye muimane. Yesu wakabanduluka, wakakonka mukashi ne, Mukashiana, badi hanyi? Kakuena udi mukubande, anyi? Yeye wakamba ne, Mukelenge, kakuena muntu. Yesu wakamba ne, Meme kabidi tshiena nkubanda, ya biebe, kuenji bualu bubi kabidi tshiendelele.] Yesu wakabambila kabidi ne, Ndi munya wa ba ha buloba; wandonda kena wendakana mu mîdima, kadi neikale ne munya wa muoyo. Ahu Bafalese bakamuambila ne, Wewe udi udiamba, dî diebe kadiena dilelela. Yesu wakabakudimuna ne, Binadiamba, dî dianyi didi dilelela; bualu bua ndi mumanye kunakufuma ne kunaya; kadi nuenu kanuena bamanye kunakufuma ne kunaya. Nuenu nudi nulumbuluisha bantu bu mudi mubidi, meme tshiena ndumbuluisha muntu. Kadi bialumbuluisha muntu, bulumbuluishi buanyi budi bulelela; bualu bua meme tshiena nkayanyi, meme ndiku ne Tatu wakuntuma. Ne mu mikenshi yenu bakafunda ne, Dî dia bantu babidi didi dilelela. Meme ndi ndiamba, ne Tatu wakuntuma udi untamba. Bakamukonka ne, Tatu webe udi hanyi? Yesu wakandamuna ne, Kanuena banmanye, kanuena bamanye Tatu wanyi; bu nuenu banmanye meme, nuakadi kumanya Tatu wanyi kabidi. Yeye wakamba mei â mu muaba wa tshibutshilu tshia mu ntempelo, hakadiye uyisha bantu mu ntempelo; muntu kakamukuata, bualu bua diba diandi kadiakadi dianze kulua. Yeye wakabambila kabidi ne, Nengumuke bianyi, nenunkebe, nenufue mu bubi buenu; kanuena bamanye mua kulua kunaya. Bena Yuda bakakonka ne, Yeye udi wamba ne, Kanuena bamanye mua kulua kunaya, neadishihe, anyi? Yeye wakabambila ne, Nuenu nuakufuma hanshi, meme nakufuma mulu; nuenu nudi ba ha buloba ebu, meme tshiena wa ha buloba ebu. Ebu mbualu bunakunuambila ne, Nenufue mu mibi yenu; binuikala kanui nungitabusha, nenufue mu mibi yenu. Bakamukonka ne, Wewe nganyi? Yesu wakabambila ne, Ndi yeye unakunuambila ku tshibangidilu tô ne katataka. Ndi ne malu a bungi a kuamba bualu buenu ne a kunulumbuluisha; kadi wakuntuma udi mulelela; ndi ngambila ba ha buloba malu anakusua kudiye. Kabakamanya ne, Yeye udi utuambila bualu bua Tatu. Yesu wakamba ne, Hanuabisha Muana wa muntu, nenumanye ne, Meme nyeye, ne tshitu ngadienzela bualu, kadi ntu ngamba anu malu akunyisha Tatu. Wakuntuma udi neanyi; kakunshia nkayanyi, bualu bua matuku onso ntu ngenza malu adi amusankisha. Hakambeye mei â, ba bungi bakamuitabusha. Yesu wakambila Bena Yuda bakuitabusha dî diandi ne, Binuashala mu di dianyi, nudi bayidi banyi bulelela; nenumanye kabidi bualu bulelela, ne bualu bulelela nebunuhe budishikaminyi. Bakamukudimuna ne, Tudi bana ba Abalahama, katuakadi bahika ba muntu tô ne katataka; udi wamba ne, Nebanuhe budishikaminyi, munyi? Yesu wakabakudimuna ne, Bulelela, bulelela, ndi nuambila ne, Muntu yonso utu wenza bubi udi muhika wa bubi. Muhika kena ushikama mu nsubu wa nfumu wandi tshiendelele; muana udi ushikamamu tshiendelele. Bianuha Muana budishikaminyi, nenuikale badishikamine bulelela. Ndi mumanye ne, Nudi bana ba Abalahama; kadi nudi nukeba mua kunshiha, bua di dianyi kadiena ne muaba munda muenu. Meme ntu ngamba malu anakutangila kudi Tatu wanyi, nuenu kabidi nutu nuenza malu anuakunvua kudi tatu wenu. Bakamukudimuna ne, Abalahama ntatu wetu, Yesu wakabambila ne, Bu nuenu bikale bana ba Abalahama, nuakadi kuenza bienzedi bia Abalahama. Kadi katataka nudi nukeba mua kunshiha, meme muntu wakunuambila bualu bulelela bunakunvua kudi Nzambi; Abalahama kakenza nunku. Nutu nuenza bienzedi bia tatu wenu. Bakamuambila kabidi ne, Katuena baledibue mu masandi; tudi ne Tatu umue, Nzambi mene. Yesu wakabambila ne, Bu Nzambi muikale Tatu wenu, nuakadi kunsua meme; bualu bua nakufuma kudi Nzambi, ndi mulueku; tshiakudivuila, kadi yeye wakuntuma. Munyi kanuena numanya mundi ngamba? Bualu bua kanuena bamanye mua kunvua dî dianyi, Nuenu nudi bana ba diabolo, tatu wenu, nudi basue kuenza bu mudi nkuka ya tatu wenu. Ku tshibangidilu yeye wakadi mushihianganyi, katu wimana mu bualu bulelela, bua yeye kena ne bualu bulelela munda muandi. Hambeye dî dia mashimi, udi wamba malu andi mene; bua yeye udi muena mashimi, ne udi tatu wau. Kadî bualu bua meme ntu ngamba bualu bulelela, kanuena nungitabusha. Nganyi wenu udi umpisha bua bualu bubi? Bingamba bualu bulelela, munyi kanuena nungitabusha? Wa Nzambi udi unvua mei a Nzambi; ebu mbualu bunudi kanui nûnvuila, bua kanuena ba Nzambi. Bena Yuda bakamuebesha ne, Katuena tuamba bulelela ne, Wewe udi Muena Samalea, udi ne demon munda, anyi? Yesu wakandamuna ne, Tshiena ne demon munda, ndi ntumbisha Tatu wanyi, nuenu nudi numpetula. Kadi meme tshiena nkeba butumbi buanyi; wabukeba udihu, yeye nealumbuluishe bantu. Bulelela, bulelela, ndi nuambila ne, Biatumikila muntu dî dianyi, yeye kena umona lufu tô tshiendelele. Bena Yuda bakamuambila ne, Tudi bamanye katataka ne, Wewe udi ne demon munda. Abalahama wakafua ne baprofete, kadi wewe udi wamba ne, Biatumikila muntu dî dianyi, kena ulabula lufu tô tshiendelele. Udi mutambe tatu wetu Abalahama wakafua, anyi? Baprofete kabidi bakafua, wewe udi udivuisha nganyi? Yesu wakabakudimuna ne, Binaditumbisha, butumbi buanyi budi tshianana; udi untumbisha nTatu wanyi; nuenu nudi numuamba ne, Yeye udi Nzambi wetu; nuenu kanuakumumanya, kadi meme ndi mumumanye; binamba ne, Tshiena mumumanye, nengikale muena mashimi bu nuenu; meme ndi mumumanye, ntu ngatumikila dî diandi. Tatu wenu Abalahama wakatamba kusanka bua kutangila dituku dianyi; wakadimona, wakasanka. Bena Yuda bakamukonka ne, Bidimu biebe kabiena bikumbane makumi atanu, wewe wakumona Abalahama, anyi? Yesu wakabambila ne, Bulelela, bulelela, ndi nuambila ne, Diambedi kabai banze kulela Abalahama, meme ndiku. Bua bualu ebu bakangula mabue bua kumuela; kadi Yesu wakasokoma, wakumuka mu ntempelo. Hakadiye uhita, wakamona muntu mulela mufofo. Bayidi bandi bakamukonka ne, Labi, wakuenza bualu bubi nganyi, muntu eu, anyi bamuledi, bua yeye udi muledibue mufofo? Yesu wakabandamuna ne, Kabakuenza bualu bubi kudi muntu eu anyi kudi bamuledi; bualu ebu buakulua bua malu adi Nzambi wenza amueneke bualu bua muntu au. Butudi nʼabu mbua kuenza malu a wakuntuma hatshidi munya; butuku bulualua budi muntu kai mumanye mua kuenza mudimu. Hantshidi ha buloba, ndi munya wa ba ha buloba. Hakambeye edi, wakatuila lute hanshi, wakasohakanya nʼalu buloba, wakamulababu ku mesu, wakamuambila ne, Ya wowe mu tshina tshia mai a kuowa dina diatshi Siloama (kukudimuna kua muaku ne, Mutumibue). Wakaya biandi, wakowa, wakahingana mutabale. Bena kuabo ne bakamumona diambedi ne, Mulombi, bakakonka ne, Eu kanyeye wakadi ushikama ulomba, anyi? Bakuabo bakamba ne, Nyeye; bakuabo ne, Nasha, kadi udi mumufuane. Kadi yeye wakamba ne, Ndi yeye mene. Bakamuebesha ne, Mesu ebe adi matabale munyi? Yeye wakabakudimuna ne, Muntu udibo babikila ne, Yesu, wakasohakanya buloba, wakabundaba ku mesu, wakangambila ne, Ya ku Siloama, wowe; nunku nakuya, nakuowa, nakutabala. Bakamukonka ne, Yeye udi hanyi? Wakamba ne, Tshiena mumanye. Bakalua ne wakadi mufofo kudi Bafalese. Dituku diakasohakanya Yesu buloba, diakabululeye mesu andi diakadi dia Lumingu lua Bayuda. Bafalese kabidi bakamukonka ne, Wakutabala munyi? Wakabambila ne, Yeye wakulaba buloba busohakanya ku mesu anyi, nakuowa, nakashala. Bafalese bakuabo bakamba ne, Muntu eu kena mufume kudi Nzambi, bualu bua yeye katu wajila dituku dia Lumingu. Kadi bakuabo bakakonka ne, Muntu udi mubi udi mumanye mua kuenza bimanyinu ebi munyi? Nunku bakatahuluka munkatshi muabo. Bakakonka muntu wakadi mufofo kabidi ne, Yeye wakutabasha mesu ebe, ahu wewe udi umuamba munyi? Wakabakudimuna ne, Yeye udi muprofete. Bena Yuda kabakitabusha ne yeye wakadi mufofo ne wakutabala, anu hakabikilabo baledi ba wakatabala, bakabakonka ne, Eu udi muana wenu unudi nuamba ne, Mulela mufofo, anyi? Wakutabala katataka munyi? Bamuledi bakandamuna ne, Tudi bamanye ne, Eu udi muana wetu, wakadi mulela mufofo; kadi katuena bamanye muakutabaleye katataka, katuena bamanye wakumutabasha mesu; numukonke; yeye nmuntu mukole; neadiambile. Bamuledi bakamba nunku, bua bakadi batshina Bena Yuda; Bena Yuda bakadi bamane kusangisha dî ne, Wamujukula ne, Kilisto, nebamumushe mu nsunagoga. Ebu mbualu buakamba bamuledi ne, Yeye nmuntu mukole, numukonke yeye. Bakabikila wakadi mulela mufofo tshiakabidi, bakamuambila ne, Utumbishe Nzambi; iudi bamanye ne muntu eu udi mubi. Yeye wakabakudimuna ne, Ne udi muntu mubi, tshiena mumanye; udi mumanye anu bualu bumue ne, Nakadi mufofo, katataka ndi mona. Bakamukonka ne, Yeye wakakuenzela tshinyi? Wakatabasha mesu ebe munyi? Wakabakudimuna ne, Nakunuambila katataka, kanuena bunvue; nudi nusuila kunvua tshiakabidi tshinyi? Nudi basue kulua bayidi bandi, anyi? Bakamutandisha ne, Wewe udi muyidi wandi, tuetu tudi bayidi ba Mose. Tudi bamanye ne, Nzambi wakakula ne Mose, kadi muntu eu, katuena bamanye kuakufumeye. Yeye wakabakudimuna ne, Ahu ebu mbualu bua kukema, bua nuenu kanuena bamanye kuakafumeye, yeye wakatabasha mesu anyi. Tudi bamanye ne, Nzambi kena unvua dî dia bantu babi; watendelela Nzambi, wenza bu mudiye musue, neunvue dî diandi. Ku tshibangidilu tshia buloba tô ne katataka kabena banze kunvua bualu bua muntu utabasha mesu a muntu mulela mufofo. Bu muntu eu kai mufume kudi Nzambi, kakadi kumanya mua kuenza bualu. Bakamukudimuna ne, Wakuledibua mu malu mabi bulelela, wewe udi utuyisha tuetu, anyi? Bakamuihata. Yesu wakunvua ne, Bakumuihata. Hakamumoneye, wakamukonka ne, Udi witabusha Muana wa Nzambi, anyi? Wakamukudimuna ne, Mukelenge, yeye udi nganyi, nmuitabushe? Yesu wakamuambila ne, Wewe wakumumona, udi wakula nʼebe nyeye mene. Muntu au wakamba ne, Mukelenge, ndi ngitabusha. Wakamukukuila. Yesu wakamba ne, Nakuluila ha buloba bua kulumbuluisha bantu, badi kabai bamona bamone, badi bamona balue bafofo. Bafalese bakuabo bakadi nʼandi, hakunvuabo mei â, bakamukonka ne, Tuetu kabidi, tudi bafofo, anyi? Yesu wakabakudimuna ne, Bu nuenu bikale bafofo, kanuakadi kuikala ne bubi; kadi katataka nudi nudiamba ne, Tudi tumona; bubi buenu budi bushala. Bulelela, bulelela, udi nuambila ne, Udi kai ubuelela ku mbelu wa luhangu lua mikoko, udi ubandila kukuabo, yeye udi muibi ne munyengi: kadi wabuelela ku mbelu udi mulami wa mikoko. Mulami wa ku mbelu udi umunzuluila; mikoko idi yunvua dî diandi; udi Ubikila mikoko yandi ku mena ai, udi uhatuka wilombola. Hashikisheye kumusha yandi yonso, udi uya ku mpala kuai, mikoko idi imulonda, bualu bua idi mimanye dî diandi. Kadi kayena ilonda muntu wa bende, neimunyeme, bualu bua kayena mimanye dî dia bantu ba bende. Yesu wakabelela lusumuinu elu; kadi kabakajingulula malu akabambileye. Yesu wakabambila kabidi ne, Bulelela, bulelela, ndi nuambila ne, Meme ndi mushiku wa mbelu wa mikoko. Bonso bakalua ku mpala kuanyi badi bibi ne banyengi; kadi mikoko kayakunvua dî diabo. Meme ndi mushiku wa mbelu; wabuela kundi, neasungidibue, neabuele, neahatuke, neahete mashinde. Muibi udi uluila anu bua kuiba ne bua kushiha ne bua kubutula; meme nakuluila bua bantu bahete muoyo, bauhete muvule. Ndi mulami muimpe wa mikoko; mulami muimpe udi ufuila mikoko. Muena mudimu wa difutu, kai mulami wa mikoko mene, kai muena mikoko, hamoneye nkashama ulua, udi ushîa mikoko, udi unyema, nkashama udi wikuata, udi witangadisha; yeye udi unyema bualu bua yeye udi muena mudimu wa difutu, mikoko kayena bu bualu kudiye. Ndi mulami muimpe wa mikoko; ndi mumanye yanyi, yanyi idi minmanye, bu mudi Tatu munmanye, meme kabidi ndi mumanye Tatu: ndi nfuila mikoko. Ndi ne mikoko mikuabo idi kayi ya mu luhangu elu; bundi nʼabu mbua kulua nʼai, neyunvue dî dianyi; neilue tshisumbu tshimue, ne mulami umue. Ebu mbualu budi Tatu wanyi mutuile, ndi nteka muoyo wanyi hanshi bua meme kûangata kabidi. Kakuena mukuabo udi ûnyenga, ndi nditekelau hanshi nkayanyi. Ndi ne bukole bua kuteka hanshi, ndi ne bukole bua kûangata kabidi. Nakuangata mukenshi eu kudi Tatu wanyi. Ditahuluka diakalua kabidi munkatshi mua Bena Yuda bua mei â. Ba bungi bakamba ne, Udi ne demon munda, udi muhale; nudi nunvuila dî diandi tshinyi? Bakuabo bakamba ne, Â kêna mei a muntu mukuatshike ne demon. Demon udi mumanye mua kutabasha mesu a bafofo, anyi? Disanka dia dijidila dia ntempelo diakadi ku Yelushalema; yakadi ngondo ya mashika; Yesu wakadi wendakana mu ntempelo mu mbalanda wakadi muidika ne, Wa Solomo. Bena Yuda bakamunguila, bakamukonka ne, Wewe neutushie ne mioyo yetu kulu-kulu musangu bûle munyi? Biwikala Kilisto, utuambile hatoke. Yesu wakabakudimuna ne, Nakunuambila, kadi kanuena nuitabusha; malu antshidi ngenza mu dina dia Tatu wanyi adi angamba. Kadi nuenu kanuena nuitabusha, bualu bua kanuena ba mu mikoko yanyi. Mikoko yanyi idi yunvua dî dianyi, ndi muimanye, idi indonda; ndi nyiha muoyo wa tshiendelele; kayena ifua tshiendelele, kakuena mukuabo udi winyenga mu tshianza tshianyi. Tatu wakuimpa udi mutambe bonso bukole, kakuena wainyenga mu tshianza tshia Tatu. Meme ne Tatu tudi bamue. Bena Yuda bakamema mabue kabidi bua kumuela. Yesu wakabandamuna ne, Nakunulesha malu mimpe a bungi a Tatu anakuenza, nudi nungelela mabue bua muanda kai unakuenza? Bena Yuda bakamukudimuna ne, Katuena tukuelela mabue bua muanda muimpe uwakuenza, anu bua bihendu biudi uhenda nʼabi Nzambi, ne bua wewe muntu udi udivuisha Nzambi. Yesu wakabakonka ne, Kabena bafunde mu mikenshi yenu ne, Nakuamba ne, Nuenu nudi banzambi, anyi? Bikaleye mubabikile ne banzambi, aba bakatuminabo dî dia Nzambi (ne dî dia mu Mukanda wa Nzambi kadiena mua kumushibua), bua yeye wakajidilabo kudi Nzambi ne wakatumeye ha buloba, munyi nudi nuamba ne, Udi uhenda Nzambi, bua nakuamba ne, Ndi Muana wa Nzambi? Bingikala tshî ngenza malu a Tatu wanyi, kanuitabushi dî dianyi. Kadi bingikala ngenza malu au, nasha numbenga meme, nuitabushe malu au; bua nuenu kumanya ne kujingulula ne, Tatu udi munda muanyi, ne meme ndi munda mua Tatu. Bakakeba kabidi mua kumukuata, kadi yeye wakumuka mu bianza biabo. Wakaya kabidi dishia dia Yadene ku muaba wakadi Yone ubatiza bantu diambedi, wakashikamaku. Ba bungi bakatua kudiye; bakamba ne, Bulelela, Yone kakenza tshimanyinu, kadi malu onso akamba Yone bua muntu eu akadi malelela. Ba bungi bakamuitabushaku. Muntu wakadiku, wakadi usama, dina diandi Lazalo wa mu Betania, musoko wa Malia ne muanʼabo Mâta. Au Malia wakela Mukelenge mananashi, wakamukuhula makasa andi ne nsuki, muanʼabo Lazalo nguakadi usama. Bana babo ba bakashi bakatumina Yesu dî ne, Mukelenge, ûdi musue udi usama. Hakunvua Yesu dî edi, wakamba ne, Edi kadiena disama dia lufu, kadi didi bualu bua butumbi bua Nzambi ne bua Muana wa Nzambi kutumbishibueye. Yesu wakasua Mâta, ne muanʼabo wa bakashi, ne Lazalo. Hakunvueye bualu bua disama diandi, wakashikama kuakadiye matuku abidi. Hashishe wakambila bayidi bandi ne, Tuyai mu Yudaya kabidi. Bayidi bakamuambila ne, Labi, Bena Yuda bakadi bakeba kukukuma mabue anu katataka, wewe uyayaku kabidi, anyi? Yesu wakabakudimuna ne, Munya mujima kawena ne bituha bia diba dikumi ne bibidi, anyi? Biendakana muntu mu munya, yeye kena ulenduka, bua yeye udi utangila munya wa buloba ebu. Kadi biendakana muntu mu butuku, udi ulenduka, bua munya kawena munda muandi. Hakambeye malu â, wakabambila ne, Mulunda wetu Lazalo udi mulale tulu; kadi ndi nya kumubisha mu tulu. Bayidi bakamuambila ne, Mukelenge, bikaleye mulale tulu, neasangale. Yesu wakadi wamba bua lufu luandi; kadi bobo bakadi bela meshi ne, Budiye wamba anu bua tulu. Hashishe Yesu wakabajukuila ne, Lazalo udi mufue; ne ndi nsanka bua bualu buenu bualu bua tshiakadiku, bua nuenu kungitabusha; tuyai kudiye. Toma, udibo babikila ne, Didumo, wakambila bayidi nʼandi ne, Tuyai kabidi, bua tuetu tufue nʼandi. Hakalua Yesu, wakamusangana mumane kulala mu lukita matuku anai. Betania wakadi hehi ne Yelushalema, ntanta bu ya kilometa isatu; Bena Yuda ba bungi bakadi balue kudi Mâta ne Malia bua kubasamba bua muanʼabo. Hakunvua Mâta ne, Yesu ulualua, wakaya kumuakidila; kadi Malia wakashala mushikame mu nsubu. Mâta wakambila Yesu ne, Mukelenge, bu wewe muikale kunoko, muanʼetu kakadi kufua. Ne katataka mene ndi mumanye ne, Tshionso tshiwalomba Nzambi, Nzambi neakuhetshi. Yesu wakamuambila ne, Muanʼenu neabike kabidi. Mâta wakamuambila ne, Ndi mumanye ne, Yeye neabike dituku dia kunshikidilu diabika bantu bonso kabidi. Yesu wakamuambila ne, Meme ndi bianyi dibisha, ndi bianyi muoyo; udi ungitabusha, nasha biafueye, neikale ne muoyo kabidi; muntu yonso udi ne muoyo, udi ungitabusha, kena ufua tshiendelele. Wewe udi witabusha dî edi, anyi? Yeye wakamuambila ne, Bulelela, Mukelenge, nakuitabusha ne, Wewe udi Kilisto, Muana wa Nzambi, nyeye ulualua ha buloba. Hakambeye nunku, wakaya, wakabikila muanʼabo Malia mu busokoko, wakamuambila ne, Muyishi wakulua, udi ukubikila. Hakunvueye dî edi, wakabika lubilu, wakaya kudiye. Yesu kakanza kulua mu musoko, wakatshidi kuakasangila ngandi Mâta. Bena Yuda bakadi nʼandi mu nsubu bamusamba, hakamonabo Malia ubika lubilu uluhuka, bakamulonda bamanye ne, Yeye Uyaya ku lukita bua kudilaku. Hakalua Malia kudi Yesu, hakamumoneye, wakahonena ku makasa andi, wakamuambila ne, Mukelenge, bu wewe muikale kunoko, muanʼetu kakadi kufua. Hakamutangila Yesu udila ne Bena Yuda bakalua nʼandi badila, tshishi tshiakûla munda muandi tente, mubidi wandi wakakanka, wakakonka ne, Nuakumujika kudi kunyi? Bakamuambila ne, Mukelenge, lua umone. Yesu wakashikunka. Bena Yuda bakamba ne, Tangilai muakumusueye. Kadi bakuabo bakamba ne, Muntu eu wakatabasha mesu a wakadi mufofo, kakamanya mua kusungila muntu eu, kafu biandi, munyi? Yesu wakalua ku lukita ne tshishi tshiule munda muandi tente kabidi. Luakadi lua lubuebue, dibue diakadi dibuikilaku. Yesu wakamba ne, Umushai dibue. Kadi Mâta, muanʼabo ne mufue wakamuambila ne, Mukelenge, yeye ukadi ununka katataka, ukadimu matuku anai. Yesu wakamukonka ne, Tshiakukuambila ne, Biwitabusha, neumone butumbi bua Nzambi, anyi? Bakumusha dibue. Yesu wakabandisha mesu mulu, wakamba ne, Tatu, ndi nkusakidila bua wewe wakunvua dî dianyi. Nakumanya ne, Wewe udi unvua mei anyi matuku onso; kadi nakuamba dî edi bualu bua bantu badi bimane banyunguluke bitabushe ne, Wewe udi muntume. Hakambeye nunku, wakela dî diandi bikole ne, Lazalo, luhuka. Wakadi mufue wakaluhuka, munyengela bilulu ku bianza ne ku makasa. Ku mpala kuandi kuakadi kunyengela tshitambala. Yesu wakabambila ne, Numujingulule, aye biandi. Bena Yuda ba bungi, bakadi balue kudi Malia, bakamuitabusha, hakamonabo bualu buakenzeye. Kadi bakuabo bakaya kudi Bafalese, bakabambila malu akenza Yesu. Nunku bakuidi banene ne Bafalese bakadisangisha mu tshifufu, bakakonkangana ne, Muntu eu udi wenza bimanyinu bia bungi, neluenze tshinyi? Bituamulekela hatuhu, bantu bonso nebamuitabushe; Bena Lomo nebalue, nebanyenge muaba wetu ne tshisamba tshietu. Kadi umue wabo, dina diandi Kayafa, wakadi ha mutu ha bakuabo tshidimu atshi, wakabambila ne, Nuenu kanuena bamanye bualu, kanuena nuela meshi ne, Mbualu buakane kunudi bua muntu umue afuile bantu, ne tshisamba tshionso katshifu. Yeye kakadiambila dî edi; kadi bualu bua yeye wakadi ha mutu ha bakuidi tshidimu atshi, wakamba bualu buakadi kabui buanze kulua ne, Yesu neafuile tshisamba tshietu; yeye kakafuila anu tshisamba tshimue, kadi wakafuila bua kusangisha mu tshisumbu tshimue bana ba Nzambi bakadi batangadike. Ku dituku adi tô bakadi basangisha dî diabo bua kumushiha. Bua bualu ebu Yesu kakendakana munkatshi mua Bena Yuda kabidi; wakumukaku, wakaya mu luseke luakadi hehi ne tshihela, ku musoko dina diau Efelayima; wakalalaku ne bayidi. Disanka dia Kuhita kua Yehowa dia Bena Yuda diakadi ha buihi; ba bungi bakumuka mu nseke yabo, bakaya ku Yelushalema diambedi Kuhita kua Yehowa kakui buanze kufika, bua kudiuvuabo. Bakadi bakeba Yesu; hakadibo bimane mu ntempelo, bakakonkangana ne, Nudi nuelangana meshi munyi? Kena ulua ku disanka edi, anyi? Bakuidi banene ne Bafalese bakamana kuela mukenshi ne, Hamanya muntu kudiye, aleshe kudiye, bamukuate. Yesu wakalua ku Betania, kuakadi Lazalo wakabisheye ku lufu; wakalalaku matuku asambombo diambedi Kuhita kua Yehowa kakui kuanze kulua. Bakamulambishila bidia bia butuku; Mata wakadi ubakuatshisha, kadi Lazalo wakadi mukuabo wa bakadi bashikame nʼandi ku mesa. Malia wakangata tshituha tshia kilogama tshia mananashi a mushinga mutambe bukole, menza ne nâdo mulelela, wakamuela mananashi ku makasa a Yesu, wakâkuhula ne nsuki yandi, nsubu wakadi mule tente ne muhuya wa mananashi. Kadi muyidi wandi mukuabo, Yudasa Isakaliote, wakadi ha kumutungila tshitungu, wakakonka ne, Munyi kabakahana mananashi â ku ndenalio nkama isatu, bua kuha bantu bahele? Yeye kakamba dî edi bua wakadi ne bahele luse, anu bua wakadi muibi; bualu bua yeye wakadi ne tshibutshilu, wakadi udiangatshila biakadi bitekamu. Yesu wakamba ne, Mulekelai, nuitabushe ne, Yeye wakadi mualame tô ne dianjikabo. Nudi ne bahele matuku onso munkatshi muenu, kadi kanuena nʼanyi meme matuku onso. Bantu ba bungi ba Bena Yuda bakunvua lumu ne, Yeye udi eku; kabakaluila bua Yesu nkayandi, bakaluila kabidi bua kutangila Lazalo wakabisheye ku lufu. Kadi bakuidi banene bakasangisha dî diabo bua kushiha Lazalo kabidi, bua Bena Yuda ba bungi bakadi bumuka bitabushila Yesu bua bualu buandi. Hakatshiabu, bantu ba bungi bakadi balue ku disanka, hakunvuabo ne, Yesu ulualua ku Yelushalema, bakangata malala a mabue, bakaluhuka bua kusangila nʼandi, bakela mbila ne, Hosana; udi ulua mu dina dia Mukelenge, Mukelenge wa Isalele mene, udi ne disanka. Hakasangana Yesu muana wa mpunda, wakashikama ha nyima handi, bu muakafundabo ne, Muana mukashi wa Siona, kutshinyi; mona, Mukelenge webe ulualua mushikame ha nyima ha muana wa mpunda. Diambedi bayidi bandi kabakamanya malu â; kadi hakatumbishibua Yesu, bakavuluka malu akamufundabo ne akamuenzelabo. Bantu tshisumbu tshinene bakadi nʼandi hakabikileye Lazalo mu lukita ne hakamubisheye ku lufu, bakadi bamanyishangana bualu ebu. Bantu bakaya kusangila nʼandi, bua bakunvua bualu bua tshimanyinu etshi tshiakenzeye. Bafalese bakambilangana ne, Nudi numona ne kanuena nuheta bualu; monai, ba ha buloba bonso badi bamulonda. Bena Gelika bakuabo bakadi munkatshi mua bakaya kutendelela Nzambi ku disanka. Bobo bakahia kudi Filipo, muena Bete-saîda wa Galela, bakamuambila ne, Mukelenge, tudi basue kutangila Yesu. Filipo wakaya, wakambila Andele; Andele ne Filipo bakaya, bakambila Yesu. Yesu wakabambila ne, Diba diakufika bua Muana wa muntu kutumbishibua. Bulelela, bulelela, ndi nuambila ne, Bikala lutete lua blé kalui luhone mu buloba, kalui lufue, nelushale nkayalu; kadi biafualu, nelukuamishe maminu makuabo a bungi. Wasua muoyo wandi neaujimishe; wikala ne muoyo wandi udiye nʼau ha buloba lukuna neaulame tô ne ku muoyo wa tshiendelele. Biangenzela muntu mudimu, andonde; muena mudimi wanyi neikale kundi ngikala; biangenzela muntu mudimu, Tatu neamutumbishe. Katataka mutshima wanyi udi utata, nengambe tshinyi? Tatu, unsungile mu dikenga dia diba edi. Kadi nakuluila ku diba edi bua bualu ebu. Tatu, utumbishe dina diebe. Di diakafuma mu diulu ne, Nakaditumbisha, nenditumbishe kabidi. Bantu bakadi bimane ha buihi bakunvua di edi, bakamba ne, Mukungulu wa nvula; bakuabo bakamba ne, Muanjelo wakuakula nʼandi. Yesu wakandamuna ne, Dî edi kadiakuluila bua bualu buanyi, diakuluila bua bualu buenu. Katataka dihila dia buloba ebu didiku; nebihate mukokeshi wa buloba ebu. Ne meme, biambishabo ha buloba, nenkoke bantu bonso kundi. Yeye wakamba nunku bua kubamanyisha bua lufu luafueye nʼalu. Bantu bakamukonka ne, Tuakunvua mu mikenshi ya Nzambi ne, Kilisto udi wikala tshiendelele; ahu munyi mûdi wamba ne, Budi nʼabu Muana wa muntu mbua kubishibua? Eu Muana wa muntu nganyi? Yesu wakabambila ne, Nenuikale ne munya munkatshi muenu anu tshituha tshihi. Endakanai hanutshidi ne munya, butuku kabunuididi; wendakana mu mîdima kena mumanye kudiye uya. Hanutshidi ne munya, nuitabushe munya, nunku nenuikale bana ba munya. Yesu wakamba malu â, wakumukaku, wakabasokoma. Yeye wakenza bimanyinu bia bungi ku mesu kuabo, kadi kabakamuitabusha; bua dî diakamba muprofete Yeshaya dishike ne, Mukelenge, wakitabusha dî dietu nganyi? Diboko dia Mukelenge diakamueneka kudi nganyi? Bua bualu ebu kabakamanya mua kuitabusha, bua Yeshaya wakamba kabidi ne, Yeye wakafofomesha mesu abo, wakakolesha mitshima yabo; Nunku mesu abo kâmonyi, kabamanyi mu mitshima yabo, Kabakudimunyi mitshima yabo Bua meme kubondaha. Yeshaya wakamba malu â, bualu bua yeye wakatangila butumbi buandi; yeye wakamuamba nunku, Kadi ba munkatshi mua bakokeshi mene ba bungi bakamuitabusha; kadi bualu bua Bafalese kabakajukula muanda eu, batshina ne, Nebatumbile mu nsunagoga. Kusua kuabo kua butumbi bua bantu kuakatamba kusua kuabo kua butumbi bua Nzambi. Yesu wakela dî diandi bikole ne, Udi ungitabusha meme kena ungitabusha meme nkayanyi, udi witabusha ne wakuntuma kabidi. Udi untangila meme udi utangila ne wakuntuma kabidi. Nakulua ha buloba bu munya, bua yonso wangitabusha kashadi biandi mu midima. Biunvua muntu mei anyi, biahidieye kuênza, meme tshiena mulumbuluisha; bualu bua tshiakuluila bua kulumbuluisha ba ha buloba, nakuluila bua kubasungila. Wampidia meme ne wahidia mei anyi udi ne mumulumbuluishi; dî diakamba nedimulumbuluishe dituku dia kunshikidilu. Tshiena ndiambila nkayanyi; Tatu wakantuma wakampa mukenshi wa malu anamba ne bu munâmba. Ndi mumanye ne, Mukenshi wandi udi muoyo wa tshiendelele; nunku malu andi ngamba ndi ngamba bu mudi Tatu ungambila. Diambedi disanka dia Kuhita kua Yehowa kadi dianze kulua, Yesu wakamanya ne, Diba dianyi dia kumuka ha buloba bua kuya kudi Tatu diakufika, yeye mumane kusua bandi mene bakadi ha buloba, wakabasua tô ne kunshikidilu. Hakadibo badia, diabolo mumane kubuesha munda mua Yudasa Isakaliote, muana wa Simona bualu bua kutungila Yesu tshitungu; hakamanya Yesu ne, Tatu wanyi wakufila bintu bionso mu bianza bianyi, nakufuma kudi Nzambi, nempingane kudi Nzambi; Yesu wakabika ku mesa, wakavula bivualu biandi, wakangata dituaya, wakadijingiladi. Hashishe yeye wakela mai mu dilonga, wakabanga kuowesha bayidi makasa ne kuakuhula ne dituaya diakadiye mudijingile. Nunku yeye wakalua kudi Simona Petelo. Petelo wakamukonka ne, Mukelenge, wewe udi ungowesha meme makasa, anyi? Yesu wakamukudimuna ne, Wewe kuena mumanye bundi ngenza katataka, kudi neujingulule ku nyima. Petelo wakamuambila ne, Nasha, tô ne tshiendelele wewe kungoweshi makasa. Yesu wakamuandamuna ne, Bingikala tshî mukuoweshe, kuena nʼanyi luseke lumue. Simona Petelo wakamuambila ne, Mukelenge, kungoweshi anu makasa anyi nkayau, ungoweshe kabidi bianza ne mutu. Yesu wakamuambila ne, Udi mumane kuowa hamʼbidi, udi anu ne bua kuowa ku makasa, mubidi wonso udi mutoke; nuenu nudi batoke, kadi buonso buenu kanuena nunku. Yeye wakamanya wamutungila tshitungu; ebu mbualu buakuambidileye ne, Buonso buenu kanuena batoke. Hakashikisheye kubowesha, wakambula bivualu biandi, wakashikama ku mesa kabidi, wakabakonka ne, Nudi bamanye bunakunuenzela? Nudi numbikila ne, Muyishi ne Mukelenge; nudi nuamba bimpe, bua meme ndi nunku. Meme Mukelenge ne Muyishi, bingikala munuoweshe makasa, mbimpe nuenu nuoweshangane makasa. Nakunuha tshifuanyikishi etshi bua nuenu kuenza bu munakunuenzela. Bulelela, bulelela, ndi nuambila ne, Muhika kena mutambe nfumu wandi, wakutumibua kena mutambe wakumutuma. Binuamanya malu â, nenuikale ne disanka binuâenza. Tshiena nuamba buonso buenu; ndi mumanye banakusungula, kadi bualu ebu buakulua bua kushikisha dî diakafundabo ne, Utu wadia bidia bianyi wakuntua museba. Katataka ndi mbanga kunuambila bualu budi kabui buanze kulua, bua, haluabu, nuenu nuitabushe ne, Meme nyeye. Bulelela, bulelela, ndi nuambila ne, Witabusha unatuma neangitabushe meme; wangitabusha meme neitabushe wakuntuma. Hakamba Yesu nunku, mutshima wandi wakanema bujitu, wakamba ne, Bulelela, bulelela, ndi nuambila ne, Umue wenu neantungile tshitungu. Bayidi bakatangilangana, bela mpata munda ne, Udiye wamba nganyi? Muyidi mukuabo, wakadi Yesu musue, wakadi nʼandi ku mesa, mumueyemene mu tshiadi. Nunku Simona Petelo wakamuloba, wakamuambila ne, Utuambile udiye wamba. Bualu bua yeye wakadi ha buihi nunku, wakeyema tshianyima mu tshiadi, wakamukonka ne, Mukelenge, yeye nganyi? Yesu wakamukudimuna ne, Unasabidila tshihesa tshia bidia unaha, nyeye. Nunku hakuvukuleye tshihesa, wakatshiangata, wakatshiha Yudasa, muana wa Simona Isakaliote. Hakangateye tshihesa, Satana wakabuela munda muandi. Yesu wakamuambila ne, Enza bûdi wenza lukasa. Kakuakadi muntu wa bakadi ku mesa wakamanya buakamuambidileye dî edi. Bualu bua Yudasa wakadi ne tshibutshilu, bakuabo bakela meshi ne, Yesu wakamuambila ne, Usumbe bintu bitudi nʼabi bualu bua disanka, anyi ne, Uhe bahele tshintu. Hakangateye tshihesa, wakumuka lukasa; buakadi butuku. Hakumuka Yudasa, Yesu wakamba ne, Katataka Muana wa muntu udi mutumbishibue, ne Nzambi udi mutumbishibue bua bualu buandi; Nzambi neatumbishe Muana munda muandi kabidi, neamutumbishe lukasa. Bana banyi bakese, nengikale nʼenu tshituha tshihi. Nenunkebe, hadi bu munakambila Bena Yuda ne, Kanuena bamanye mua kulua kunaya; katataka udi nuambila nuenu muomumue. Ndi nuelela mukenshi muhia-muhia ne, Nusuangane; nusuangane bu munakunusua. Bua bualu ebu bantu bonso nebamanye ne, Nudi bayidi banyi, binuasuangana nunku. Simona Petelo wakamukonka ne, Neuye kudi kunyi? Yesu wakamukudimuna ne, Katataka kuena mumanye mua kundonda kunaya, kadi hashishe neundonde. Petelo wakamukonka ne, Mukelenge, munyi mundi tshi mumanye mua kukulonda katataka? Nenkufuile. Yesu wakamukonka ne, Wewe neunfuile, anyi? Bulelela, bulelela, ndi nkuambila ne, Tshitala katshi tshianze kusama, wewe neumpidie misangu isatu. Mitshima yenu kaizakadi; nuitabushe Nzambi, nungitabushe meme kabidi. Mu nsubu wa Tatu wanyi mudi miaba ya bungi ya kuikala; bu bualu ebu kabui bulelela, nakadi kunuambila; nenye kunulongoluela muaba. Binaya ne binanulongoluela muaba, nempingane kabidi, nenuangate kundi meme muine, bua kundi ngikala, nuenu nenuikaleku kabidi. Nudi bamanye nshila wa kundi nya. Toma wakamukonka ne, Mukelenge, katuena bamanye kuwaya, tudi bamanye nshila kudi kunyi? Yesu wakamuambila ne, Meme udi bianyi nshila ne bulelela ne muoyo; kakuena muntu udi ulua kudi Tatu, kai muanze kulua kundi diambedi. Bu nuenu banmanye meme, nuakadi kumanya Tatu wanyi kabidi; nudi bamumanye katataka ne tshiendelele, nuakumumona. Filipo wakamuambila ne, Mukelenge, utuleshe Tatu, ebu mbualu butudi basue. Yesu wakamukonka ne, Filipo, nakadi nʼenu musangu bulo nunku, wewe kuena nummanye, anyi? Wakuntangila meme wakatangila Tatu; abu munyi mûdi wamba ne, Utuleshe Tatu? Kuena witabusha ne, Meme ndi munda mua Tatu, Tatu udi munda muanyi, anyi? Tshiena ndiambila mei andi nuambila; Tatu udi muikale munda muanyi utu wenza malu andi. Nungitabushe ne, Meme ndi munda mua Tatu, Tatu udi munda muanyi; binuikala kanui nuenza nunku, nungitabushile bua malu mene antshidi ngenza. Bulelela, bulelela, ndi nuambila ne, Wangitabusha nenze biandi kabidi malu antshidi ngenza; nenze biandi malu adi mahite andi ngenza, bualu bua meme ndi nya kudi Tatu. Nengenze malu onso anualomba mu dina dianyi, bua Tatu atumbishibue bua Muana. Binualomba bualu buonso mu dina dianyi, nembuenze. Binuansua, nenuenze mikenshi yanyi. Nendombe Tatu, yeye neanuhe Musambi mukuabo, ikale nʼenu tshiendelele, Nyuma wa bulelela mene udi ba ha buloba kabai bamanye mua kuangata, bua bobo kabena bamumona, kabena bamumanye; nuenu nudi bamumanye bua yeye utu wikala nʼenu, neikale munda muenu. Tshiena nushîa bana ba nshîe, nempingane kunudi. Tshituha tshihi ba ha buloba kabena bantangila kabidi; kadi nuenu nudi nuntangila; bualu bua meme ndi ne muoyo, muenu kabidi nenuikale ne muoyo. Mu ditutu adi nenumanye ne, Meme ndi munda mua Tatu wanyi, nuenu nudi munda muanyi, meme ndi munda muenu. Udi ne mikenshi yanyi, udi uyenza, ngudi munsue; Tatu wanyi neasue wansua, meme nemusue kabidi, nendimueneshe kudiye. Yudasa (ka Isakaliote nasha) wakamukonka ne, Mukelenge, bualu kai buakulua buwadimuenesha kutudi, kui udimuenesha kudi ba ha buloba? Yesu wakamukudimuna ne, Biansua muntu, nenze dî dianyi; Tatu wanyi neamusue, tuetu netulue kudiye, netuikale ngandi. Udi kai munsue kena wenza mei anyi; dî dinudi nunvua kandianyi, ndia Tatu wakantuma. Nakunuambila malu â hantshidi nʼenu. Kadi Musambi, Nyuma Muimpe mene, watumabo kudi Tatu mu dina dianyi, yeye neanuyishe malu onso, neanuvuluishe mei onso anakunuambila. Ndi nushila ditalala, ndi nuha ditalala dianyi; tshiena nuhadi bu mudi ba ha buloba banuhadi. Mitshima yenu kaizakadi, kaitshinyi. Nuakunyua dî dinakunuambila ne, Ndi nya, nempingane kunudi. Bu nuenu bansue, nuakadi, kusanka, bualu bua meme ndi nya kudi Tatu, bua Tatu udi muntambe meme. Nakunuambila bualu ebu diambedi kabui buanze kulua bua nuenu nuitabushe, haluabu. Tshiena nuambila malu makuabo a bungi, bualu bua mukokeshi wa buloba ulualua, yeye kena nʼanyi bualu munda muanyi; kadi bua ba ha buloba bamanye ne, Ndi musue Tatu, ne bu muakampa Tatu mukenshi, nunku mundi ngenza. Bikai, tuye. Meme ndi muonshi mimene mulelela wa mamuma a nvinyo, Tatu wanyi udi mulami wau. Ditamba dianyi dionso didi kadî dikuama mamuma, yeye neadiumushe, kadi ditamba dionso didi dikuama mamuma yeye neadilengeshe bua kukuamadi mamuma makuabo. Katataka nudi balengeshibue bualu bua dî dinakunuambila. Nuenu nuikale munda muanyi, meme nengikale munda muenu. Bu mudi ditamba kadi dimanye mua kudikuamina mamuma, anu hikaladi ku muonshi mimene; nunku nuenu kabidi kanuena bamanye mua kukuama mamuma, binuikala kanui nushala munda muanyi. Meme ndi muonshi munene, nuenu nudi matamba; wikala munda muanyi, meme muikale munda muandi, yeye neakuame mamuma a bungi; binuikala kanui nʼanyi, kanuena bamanye mua kuenza bualu. Bikala muntu kai ushala munda muanyi, nebamumushe bu ditamba, neafube; badi bunguisha matamba, baêla mu kahia, adi ahla. Binuikala munda muanyi, bikala mei anyi munda muenu, nulombe tshionso tshinuasua, nebanuenzeletshi. Tatu wanyi udi utumbishibua mu bualu ebu ne, Nudi nukuama mamuma a bungi; nunku nenuikale bayidi banyi. Nakunusua bu muakunsua Tatu, Shalai mu dinanga dianyi. Binuatumikila mikenshi yanyi, nenushale mu dinanga dianyi, bu munakutumikila mikenshi ya Tatu wanyi, ne mundi nshala mu dinanga diandi. Nakunuambila malu â bua disanka dianyi kuikaladi munda muenu, ne bua disanka dienu kukumbanadi. Eu udi mukenshi wanyi ne, Nusuangane bu munakunusua. Kakuena muntu udi ne dinanga didi ditambe edi, dia muntu udi ufuila balunda bandi. Nenuikale balunda banyi, binuenza bu mundi nuambila. Tshiena nubikila kabidi bahika; bualu bua muhika kena mumanye budi mukelenge wandi wenza; kadi nakunubikila balunda; bualu bua nakunumanyisha malu onso anakunvua kudi Tatu wanyi. Nuenu kanuakunsungula, nakunusungula, nakunujadika bua nuenu kuya kukuama mamuma ne bua mamuma enu ikale tshiendelele, bua tshintu tshionso tshinualomba Tatu mu dina dianyi yeye anuhetshi. Nakunuambila malu â bua nuenu kusuangana. Bikala ba ha buloba nʼenu lukuna, nudi bamanye ne, Bakadi nʼanyi lukuna diambedi. Bu nuenu bikale ba ha buloba, ba ha buloba bakadi kusua bantu babo; kadi bualu bua nuenu kanuena ba ha buloba, nakunusungulula mu ba ha buloba, nunku ba ha buloba badi nʼenu lukuna. Nuvuluke dî dinakunuambila ne, Muhika kena mutambe nfumu wandi. Biankengeshabo, nebanukengeshe kabidi; bienzabo dî dianyi, nebenze dî dienu kabidi. Nebanuenzele malu â onso bualu bua dina dianyi, bua bobo kabena bamanye wakuntuma. Bu meme tshî mulue, tshî mubambile bualu, kabakadi kuikala ne bubi; kadi katataka kabena ne tshilayidilu tshia bubi buabo. Udi nʼanyi lukuna udi ne Tatu wanyi kabidi lukuna. Bu meme tshi muenze munkatshi muabo malu akadi muntu mukuabo kai muenze, bobo kabakadi kuikala ne bubi; kadi katataka bakuntangila ne Tatu wanyi, bakadi ne bubidi buetu lukuna. Nunku bakushikisha dî diakadi difunda mu mikenshi yabo ne, Bakadi nʼanyi lukuna tshianana. Kadi halua Musambi unanutumina, Nyuma wa bulelela mene mene, wafuma kudi Tatu, yeye neangambe; nuenu kabidi nudi nungamba, bualu bua nuakadi nʼanyi ku tshibangidilu tô ne katataka. Nakunuambila malu â bua nuenu kanulenduki. Nebanuhatule mu nsunagoga; bulelela, diba nedilue diela munushihi meshi ne, Ndi ngenzela Nzambi mudimu. Nebenze malu â bualu bua kabakamanya Tatu, kabakanmanya meme kabidi. Nakunuambila malu â bua nuenu kuavuluka, halua diba diau ne, Nakumana kunuambilau. Tshiakanuambila malu â ku tshibangidilu, bualu bua nakadi nʼenu. Kadi katataka ndi nya kudi wakuntuma; kakuena umue wenu udi unkonka ne, Uyaya kudi kunyi? Bualu bua nakunuambila malu â, mitshima yenu idi miule tente ne kanyinganyinga. Kadi ndi nuambila bulelela ne, Meme muye mbimpe bienu; bingikala tshî nya, Musambi kena ulua kunudi; kadi binaya, nenutumineye. Halueye, neatuishe ba ha buloba bua bubi, ne bua buakane, ne bua dihila; bua bubi, bualu bua bobo kabena bangitabusha; bua buakane, bualu bua meme ndi nya kudi Tatu, kanuena nuntangila kabidi; bua dihila, bualu bua mukokeshi wa buloba ebu wakumana kuhila. Ntshidi ne malu makuabo a bungi a kunuambila, kadi nuenu kanuena bamanye mua kuatuala katataka. Kadi halua Nyuma wa bulelela, yeye neanulombole mu malu malelela onso; bua yeye kena udiambila, kadi neambe anu malu ûnvueye, neanuambile malu alualua. Neantumbishe meme; bualu bua neangate malu anyi, neanuambileu. Malu onso a Tatu ngânyi; ebu mbualu bunakuambila ne, Yeye neangate malu anyi, neanuambileu. Haleha tshituha tshihi kanuena nuntangila, haleha tshituha tshihi kabidi nenuntangile. Bayidi bandi bakuabo bakakonkangana ne, Edi ndî kai didiye utuambila ne, Haleha tshituha tshihi kanuena nuntangila, ne haleha tshituha tshihi kabidi nenuntangile, ne dî dikuabo ne, Bualu bua meme ndi nya kudi Tatu? Bakadi bakonkangana nunku ne, Edi ndî kai ne, Haleha tshituha tshihi? Katuena bamanye tshidiye wamba. Hakamanya Yesu ne, Badi basue kunkonka bualu ebu, yeye wakabakonka kabidi ne, Nudi nuebeshangana bua dî dinakuamba ne, Haleha tshituha tshihi kanuena nuntangila, ne haleha tshituha tshihi kabidi nenuntangile? Bulelela, bulelela, ndi nuambila ne, Nenudile, nenujinge, kadi ba ha buloba nebasanke; nenuikale ne kanyinganyinga, kadi kanyinganyinga kenu nekakudimuke disanka. Hatshidi mukashi mukuatshike ha kulela, udi ne kanyinganyinga, bua diba diandi diakufika; kadi haleleye muana, kena uvuluka kabidi kanyinganyinga, bualu bua disanka diandi ne, Muntu wakuledibua ha buloba. Nunku katataka nudi ne kanyinganyinga; kadi nenumone kabidi, mitshima yenu neisanke, muntu kena ununyenga disanka dienu. Dituku adi kanuena nunkonka bualu. Bulelela, bulelela, ndi nuambila ne, Binualomba Tatu tshintu, yeye neanuhetshi mu dina dianyi. Tô ne katataka kanuakanza kulomba tshintu mu dina dianyi; nulombe, nenuangate, bua disanka dienu dikumbane. Nakunuambila malu â mu nsumuinu; kadi diba nedilue dingikala tshi nuambila malu mu nsumuinu kabidi, nenujukuile bualu bua Tatu. Dituku adi nenulombe mu dina dianyi; tshiena nuambila ne, Nenulombele Tatu; bua Tatu mene udi munusue, bualu bua nuenu nuakunsua meme, nuakuitabusha ne, Nakafuma kudi Tatu. Nakafuma kudi Tatu, nakulua ha buloba; ndi ngumuka ha buloba kabidi, nempingane kudi Tatu. Bayidi bandi bakamba ne, Katataka wewe udi utujukuila bualu, kuena ubuamba mu lusumuinu. Katataka tudi bamanye ne, Wewe udi mudimanyine malu onso, kuena ne bualu bua muntu kukukonka; bua bualu ebu tudi tuitabusha ne, Wewe wakafuma kudi Nzambi. Yesu wakabakudimuna ne, Nudi nuitabusha mpindiu, anyi? Unvuai, diba nedilue, diakumana kufika mene mene, dianumuangalashabo, muntu kuandi, muntu kuandi; nenunshîe meme nkayanyi; kadi tshiena nkayanyi bualu bua Tatu udi neanyi. Nakunuambila malu â bua nuenu nuikale ne ditalala munda muanyi. Ha buloba nudi ne dikenga; kadi nukoleshe mitshima yenu; nakuhita ba ka buloba bukole. Hakamba Yesu malu â, wakatangila mulu, wakamba ne, Tatu, diba diakufika; utumbishe Muanʼebe, bua Muana akutumbishe; bu muwakumuha bukole bua kukokesha bantu bonso bua kuheye bonso bawakumuha muoyo wa tshiendelele. Eu udi muoyo wa tshiendelele, bua bobo bakumanye wewe, Nzambi umuehele mulelela, ne yeye uwakatuma, Yesu Kilisto mene. Nakukutumbisha ha buloba, nakushikisha mudimu uwakumpa. Tatu, katataka untumbisha diatshimue nʼebe ne butumbi butuakadi nʼabu nʼebe diambedi buloba kabuihu. Ba mu ba ha buloba bawakumpa nakubalesha dina diebe; bakadi bebe, wewe wakubampa; bakutumikila dî diebe. Katataka badi bamanye ne, Malu onso awakumpa akafuma kûdi; bualu bua mei awakumpa nakubahau; bakuitabusha, bakumanya bulelela ne, Nakufuma kûdi; bakuitabusha kabidi ne, Wewe wakuntuma. Ndi mbalombela; tshiena ndombela ba ha buloba, ndi ndombela anu bawakumpa; bualu bua bobo badi banyi; bintu bionso bidi bianyi mbiebe, biebe mbianyi kabidi; ndi ntumbishibua munda muabo. Meme tshiena ngikala ha buloba kabidi, kadi aba badi ha buloba, meme ndi ndua kûdi. Tatu wanyi wa tshijila, ubalame mu dina diebe diwakumpa, bua bobo kuikala bamue bu mutudi bietu bamue. Hanakadi nʼabo, nakubalama mu dina diebe diwakumpa; ne nakabalama, ne kakuakadi umue wakujimina anu muana wa dibutuka, bua kushikisha dî diakadi difunda mu Mukanda wa Nzambi. Kadi katataka udi ndua kûdi; udi ngamba malu â ha buloba bua disanka dianyi kukumbanadi munda muabo. Nakubaha dî diebe, ba ha buloba badi nʼabo lukuna, bualu bua bobo kabena ba ha buloba, bu mundi meme tshî wa ba buloba. Tshiena nkulomba ne, Ubumushe ha buloba; ndi nkulomba ne, Ubasungile kudi bubi. Bobo kabena ba ha buloba, bu mundi meme tshi wa ha buloba. Ubajidile mu bulelela: dî diebe mbulelela. Bu muwakuntuma munkatshi mua ba ha buloba, mbu munakubatuma munkatshi mua ba ha buloba kabidi. Ndi ndijidila bua bualu buabo, bua bobo kabidi bikale bajidila mu bulelela. Tshiena ndombela aba nkayabo, kadi ndi ndombela kabidi badi bangitabusha bua dî diabo; bua buonso buabo bikale bamue; Tatu, bu mûdi munda muanyi ne meme munda muebe, bobo kabidi bikale munda muetu, bua ba ha buloba bitabushe ne, Wewe wakantuma. Nakabaha butumbi buwakampa bua kuikalabo bamue bu mutudi bietu bamue; meme munda muabo, wewe munda muanyi bua bobo kuikala bamue bulelela; bua ba ha buloba bamanye ne, Wewe wakantuma; wewe udi mubasue bu mûdi munsue meme. Tatu, ndi musue bawakumpa bikale kundi bua kutangilabo butumbi buwakumpa, bualu bua wewe wakansua meme diambedi kabai banze kufuka buloba. Tatu wanyi muakane, ba ha buloba kabakakumanya, kadi meme nakakumanya; aba kabidi bakamanya ne, Wewe wakuntuma; nakubamanyisha dina diebe, nembamanyishedi kabidi, bua dinanga diwakunnanga nʼadi meme kuikaladi munda muabo, ne meme munda muabo. Hakamba Yesu mei â, wakaya ne bayidi bandi dishia dia kasulu ka Kidilona diakadi muaba wa mitshi ya mamuma, wakabuelamu ne bayidi bandi. Yudasa kabidi, mumutungidi, wakadi mumanye muaba au; bualu bua Yesu wakadi uyaku misangu ya bungi ne bayidi bandi. Nunku hakangata Yudasa tshisumbu tshia masalayi ne tuhalai tua bakuidi banene ne Bafalese, wakaluamu ne minda ne bimunyi ne bintu bia nvita. Nunku Yesu wakamanya matu onso akadi alua kudiye, wakaya kudibo, wakabakonka ne, Nudi nukeba nganyi? Bakamukudimuna ne, Yesu wa ku Nazaleta. Yesu wakabambila ne, Mmeme. Yudasa, mumutungidi, wakadi muimane nʼabo. Hakabambileye ne, Mmeme, bakahingana tshianyima, bakadishinda. Yeye wakabakonka tshiakabidi ne, Nudi nukeba nganyi? Bakamba ne, Yesu wa ku Nazaleta. Yesu wakamba ne, Nakunuambila ne, Mmeme; binuikala nunkeba meme, lekelai aba baye; bua kushikishabo dî diandi diakambeye ne, Bawakampa tshiakujimisha umue. Simona Petelo wakadi ne muele wa nvita, wakatula, wakataha muntu wa muakuidi munene, wakamukosa ditshu dia ku tshianza tshia bukole. Muntu au dina diandi mMalako. Yesu wakambila Petelo ne, Hingasha muele webe mu luhaha; tshiena nua luhanza luakumpa Tatu, anyi? Masalayi ne kapitene ne tuhalai tua Bena Yuda bakakuata Yesu, bakamusuika, bakaya nʼandi diambedi kudi Ana, bualu bua yeye wakadi tatuʼandi-muenu wa Kayafa, nguakadi ha mutu ha bakuidi bakuabo tshidimu atshi. Kayafa nguakaha Bena Yuda lungenyi ne, Mbimpe bia muntu umue kufuila bantu. Simona Petelo wakalonda Yesu, ne muyidi mukuabo. Muyidi au wakamanyibua kudi muakuidi munene, wakabuela ne Yesu mu nsubu wa muakuidi; kadi Petelo wakadi muimane ku tshibi ku bula. Muyidi wakadi mumanyibue kudi muakuidi munene wakaluhuka, wakakula ne mukashi wakadi ulama ku tshibi, wakabuela ne Petelo. Mukashi muenji wa mudimu wakadi ulama ku tshibi, wakakonka Petelo ne, Wewe kabidi udi mukuabo wa bayidi ba muntu eu, nasha? Yeye wakamba ne, Tshiena wabo. Bena mudimu ne tuhalai bakadi bimaneku, bamane kutemesha kahia ka makala, bualu bua mashika; bakadi bota, kahia; Petelo kabidi wakadi nʼabo, muimane wota kahia. Muakuidi mimene wakakonka Yesu bua bayidi bandi ne bua diyisha diandi. Yesu wakamukudimuna ne, Nakujukuila bantu dî dianyi hatoke; matuku onso nakadi uyisha mu nsunagoga ne mu ntempelo, muakadi Bena Yuda bonso bunguile; tshiakamba bualu bumue mu busokoko. Udi unkonkela meme tshinyi? Ukonke bakunva mei anyi bua malu anakabambila; monai, aba badi bamanye malu anakamba. Hakambeye dî edi, kahalai kakuabo kakadi kimane nʼandi ha buihi kakamukuma, kakamba ne, Wakukudimuina muakuidi wa Nzambi dî nunku tshinyi? Yesu wakamuambila ne, Bingikala muambe bualu bubi, ubilambe; bingikala muambe bimpe, udi unkumina tshinyi? Ana wakamutuma musuika kudi Kayafa, muakuidi munene. Simona Petelo wakadi muimane wota kahia. Bakamukonka ne, Wewe kabidi udi mukuabo wa bayidi bandi, nasha? Yeye wakavila, wakamba ne, Tshiena wabo. Mukuabo wa bantu ba muakuidi munene, muanʼabo ne wakakosabo ditshu kudi Petelo, wakamukonka ne, Tshiakukutangila nʼandi mu muaba wa mitshi ya mamuma, anyi? Petelo wakayila kabidi. Tshitala tshiakasama. Bakumuka ne Yesu kua Kayafa, bakaya nʼandi mu nsubu munene wa mukelenge; hakadi hatshiatshia; kadi bobo bine kabakabuela mu nsubu munene bua kabakasua kubiha, nunku kabakadi kumanya mua kudia Kuhita kua Yehowa. Pilato wakaya kudibo, wakabakonka ne, Nudi mibanda muntu eu ne bualu kai? Bakamukudimuna ne, Bu muntu eu kai muenze bualu bubi, katuakadi kumufila mu bianza biebe. Pilato wakabambila ne, Nuenu numuangate, nulumbulule tshilumbu tshiandi bu mudi mukenshi wenu. Bena Yuda bakamuambila ne, Katuena ne bukokeshi bua kushiha muntu. Nunku bakashikisha dî dia Yesu diakambeye hakadiye wamba bualu bua lufu luafueye nʼalu. Pilato wakabuela mu nsubu munene wa mukelenge kabidi, wakabikila Yesu, wakamukonka ne, Wewe udi Mukelenge wa Bena Yuda, anyi? Yesu wakamukonka ne, Wewe udi udikonkela dî edi, anyi bakuabo bakungamba kûdi? Pilato wakamukudimuna ne, Meme ndi Muena Yuda, anyi? Bantu ba tshisamba tshienu ne bakuidi banene bakukufila mu bianza bianyi, wakuenza tshinyi? Yesu wakamukudimuna ne, Bukelenge buanyi kabuena bua ha buloba ebu; bu bukelenge buanyi buikale bua ha buloba ebu, bantu banyi bakadi kuluangana, tshifidibu mu bianza bia Bena Yuda; kadi katataka bukelenge buanyi kabuena bua kunoko. Pilato wakamukonka ne, Ahu wewe mukelenge, anyi? Yesu wakamba ne, Bûdi Wamba mbulelela, ndi Mukelenge. Nakuledibua bua bualu ebu, nakuluila ha buloba bualu ebu, ne bua kuamba malu malelela. Muntu yonso wa bulelela udi unvua dî dianyi. Pilato wakamukonka ne, Bulelela ntshinyi? Hakamukonkeye dî edi, wakaluhuka, wakaya kudi Bena Yuda, wakabambila ne, Tshiena mumusangane ne bualu. Nudi ne tshilele tshienu tshia meme kunulekelela muntu umue ha Kuhita kua Yehowa; nudi basue nnulekelele Mukelenge wa Bena Yuda, anyi? Kadi bobo bakela mbila kabidi ne, Muntu eu nasha, anu Balaba. Balaba wakadi munyengi wa bintu. Hashishe Pilato wakangata Yesu, wakamukuma. Masalayi akaluka tshifulu tshia bukelenge tshia meba akamubuesha ku mutu, akamuluatshisha tshikowelu tshikunze; akalua kudiye, akamuambila ne, Muoyo, Mukelenge wa Bena Yuda. Akamukuma. Pilato wakaluhuka, wakalua kudibo kabidi, wakabambila ne, Tangilai, nakulua nʼandi kunudi bua nuenu mimanye ne, Tshiena mumusangane ne dihila. Yesu wakaluhuka muluate tshifulu tshia meba ne tshikowelu tshikunze. Pilato wakabambila ne, Monai, muntu eu kayeu! Hakamumona bakuidi banene ne tuhalai, bakela mbila ne, Umushihe ku mutshi mutshiamakane, umushihe ku mutshi mutshiamakane. Pilato wakabambila ne, Nuenu nudiangatshileye, numushihe; meme tshiena mumusangane ne dihila. Bena Yuda bakamukudimuna ne, Tudi ne mukenshi wetu, mbimpe bia yeye afue biandi bu mudi mukenshi wetu, bua yeye wakudivuisha bu Muana wa Nzambi. Hakunvua Pilato dî edi, wakatamba kutshina; wakabuela kabidi mu nsubu munene wa mukelenge, wakakonka Yesu ne, Wewe Wakufuma kudi kunyi? Kadi Yesu kakamukudimuna dî. Pilato wakamuambila ne, Kuena ungambila dî? Kuena munmanye ne, Meme ndi ne bukokeshi bua kukulekela, ndi ne bukokeshi kabidi bua kukushiha ku mutshi mutshiamakane? Yesu wakamuandamuna ne, Bu bukokeshi kabui bukuhebue kudi wa mu diulu, wewe kuakadi kuikala nʼabu bua kungenzela bualu; bua bualu ebu nunku wakunfila mu bianza biebe ngudi ne bualu butambe bubi. Ha diba adi Pilato wakakeba mua kumulekela; kadi Bena Yuda bakela mei abo bikole ne, Biwalekela muntu eu, kuena mulunda wa Kaisa; muntu yonso udi udivuisha bu mukelenge udi utombokela Kaisa. Hakunvua Pilato mei â, wakaluhuka ne Yesu, wakashikama mu nkuasa wa bulumbuludi ha muaba wakadibo babikila ne, Wa Mabue Malongolola Hanshi, kadi mu Buena Yuda ne, Gabata. Dilongolola dia Kuhita kua Yehowa diakafika, diba diakadi bu munda munya. Yeye wakambila Bena Yuda ne, Monai Mukelenge wenu! Bakela mei abo bikole ne, Umumushe, umumushe, umushihe ku mutshi mutshiamakane! Pilato wakabakonka ne, Nshihe Mukelenge wenu, anyi? Bakuidi banene bakamukudimuna ne, Katuena ne mukelenge mukuabo, anu Kaisa. Hashishe yeye wakamufila mu bianza biabo bua kumushihabo ku mutshi mutshiamakane. Bakangata Yesu; yeye wakaluhuka mudituadile mutshi wandi mutshiamakane, wakaya ku muaba udibo babikila ne, Muaba wa Kabalubalu ka Mutu, mu Buena Yuda ne, Gologota. Bakamukuminaku milonda mu bianza ne ku makasa ku mutshi mutshiamakane, bakenzela bakuabo babidi muomumue, mukuabo eku, munga eku, Yesu hankatshi. Pilato wakafunda makanda, wakauteka ku mutshi mutshiamakane. Wakafunda ne: Yesu wa mu Nazaleta, Mukelenge wa Bena Yuda. Bena Yuda ba bungi bakabala mukanda eu, bualu bua muaba wakashihabo Yesu wakadi hehi ne musoko; mukanda wakadi mufunda mu muaku wa Bena Yuda ne wa Bena Lomo ne wa Bena Gelika. Kadi bakuidi banene ba Bena Yuda bakambila Pilato ne, Kufundi ne, Mukelenge wa Bena Yuda; ufunde ne, Yeye wakamba ne, Ndi Mukelenge wa Bena Yuda. Pilato wakabambila ne, Nakuenda munakufunda. Masalayi, hakamukuminau milonda mu bianza ne ku makasa ku mutshi mutshiamakane, akangata bilulu biandi akabanyangana anai, disalayi biadi, disalayi biadi; ne tshikowelu tshiandi kabidi, kadi tshikowelu katshiakadi ne mitelu, tshiakadi tshikuma tshijima kulu tô ne hanshi. Bakambilangana ne, Katutshihandi, tutshielele nshobo ne tshikala tshia nganyi; nunku bakashikisha dî diakafundabo mu Mukanda wa Nzambi ne, Bakabanyangana bilulu bianyi, Bakelela tshikowelu tshianyi nshobo. Masalayi akenza nunku. Kadi mamu wandi, ne muanʼabo ne mamu wandi mukashi, ne Malia mukashi wa Kelopa, ne Malia wa ku Magadala, bakadi bimane hehi ne mutshi mutshiamakane wa Yesu. Hakamona Yesu mamu wandi ne muyidi wakadiye musue muimahe ha buihi, wakambila mamu wandi ne, Mukashi, muanʼebe kayau. Wakambila muyidi ne, Mamu webe kayau. Ha diba adi mene muyidi au wakaya ngandi ku nsubu kuandi. Hashishe Yesu wakamanya ne, Malu onso akushika; bualu bua kushikisha dî diakadi difunda mu Mukanda wa Nzambi, yeye wakamba biandi ne, Ndi ne nyota. Dilonga diakadihu diule tente ne nvinega; bakateka musukulampampa mûsha tente ne nvinega ku mutshi wa hisopa, bakauteka ku mishiku yandi. Hakangateye nvinega, wakamba ne, Bualu buakushika; wakinyika mutu, wakahuola muoyo. Dituku adi diakadi dia Dilongolola; bualu bua bitalu kabishadî ku mitshi mitshiamakane dia Lumingu (Lumingu alu luakadi dituku dinene), Bena Yuda bakalomba Pilato bua kubitshibulabo bibelu ne kubiumusha. Masalayi akalua, akutshibula bibelu bia wa kumudia, ne bia mukuabo wakabashihabo nʼandi ku mutshi mutshiamakane; kadi hakalau kudi Yesu, akamusangana mumane kufua, kâkatshibula bibelu biandi. Kadi dinga disalayi diakamutua difuma mu lubadi, mashi ne mai biakahatuka. Wakatangila bualu abu nguakabuamba, dî diandi ndelela; udi mumanye biandi, ne, Dî dianyi ndilelela, bua nuenu kabidi nuitabushe. Malu â akulua bua kushikisha dî diakafundabo mu Mukanda wa Nzambi ne, Kabena batshibula mukuha wandi. Dinga dî didi mu Mukanda wa Nzambi kabidi ne, Nebatangile wakutuabo difuma. Hakashika malu â, Yosefe wa ku Alimataya, wakadi muyidi wa Yesu mu musokoko bualu bua wakadi utshina Bena Yuda, wakalomba Pilato bua kuangata tshitalu tshia Yesu; Pilato wakitabusha. Nunku yeye wakalua, wakangata tshitalu tshiandi. Nikodemo, nguakalua kudi Yesu butuku diambedi, wakalua ne mula ne alo bisangisha, biakadi ne bujitu bua kilogama bu makumi anai. Bakangata tshitalu tshia Yesu, bakatshinyengela ne bintu ebi bia muhuya muimpe mu bilulu bia line, bu mudi tshilele tshia Bena Yuda ha kujikabo bantu. Kuakashihelabo Yesu kuakadi muaba wa mitshi ya mamuma; mu muaba au muakadi lukita luhia-luhia, muakadi tshitalu katshi tshianze kujikibuamu diambedi. Bualu bua Dilongolola dia Bena Yuda, ne bua lukita luakadi ha buihi, bakajikamu Yesu. Dituku dia kumudilu dia lumingu, Malia wa ku Magadala wakalua ku lukita hatshiatshia, butuku kabui buanze kutshia, wakamona dibue dimana kumusha ku lukita. Wakanyema lubilu, wakaya kudi Simona Petelo ne kudi muyidi mukuabo wakadi musuibue kudi Yesu, wakabambila ne, Bakumusha Mukelenge mu lukita, katuena bamanye kuakumuladikabo. Petelo wakaluhuka ne muyidi au, bua kuyabo ku lukita. Bubidi buabo bakaya lubilu, kadi muyidi mukuabo wakahita Petelo lubilu, Wakafika ku lukita diambedi; wakinangila, wakatangilamu, wakamona bilulu bia line hanshi, kadi yeye kakabuelamu. Simona Petelo wakalua umulonda ku nyima, wakabuela mu lukita, wakamona bilulu bia line hanshi, kadi tshitambala tshiakadi ku mutu kua Yesu katshiakadi ha bilulu bia line, tshiakadi tshianga ha buatshi. Hashishe, muyidi wakadianjila kufika ku lukita, wakabuela, wakatangila, wakitabusha. Diambedi kabakadi banze kumanya dî dia mu Mukanda wa Nzambi ne, Budiye nʼabu mbua kubika ku lufu. Bayidi bakahingana ku nsubu kuabo kabidi. Malia wakadi muimane ku lukita udila; hakadiye udila nunku, wakinangila, wakatangila mu lukita; wakamona banjelo babidi bashikame baluate bilulu bitoke tô, munga ku mutu, mukuabo ku makasa, hakadi tshitalu tshia Yesu tshiladika. Bakamukonka ne, Mukashi, udi udidila tshinyi? Yeye wakabambila ne, Bua bakuya ne Mukelenge wanyi, tshiena mumanye kuakumuladikabo. Hakambeye nunku, wakatshinguluka, wakamona Yesu muimane, kakamumanya ne, Yesu. Yesu wakamukonka ne, Mukashi, udi udidila tshinyi? Udi ukeba nganyi? Wakela meshi ne, Muena mudimu wa mu muaba au, wakamuambila ne, Mukelenge, biwikala mumumushe kunoko, ungambile kuwakumuladika, nemuangate. Yesu wakamba ne, Malia. Hakatshingulukeye, wakamuambila mu Buena Yuda ne, Laboni, kukudimuna kua muaku ne, Muyishi. Yesu wakamuambila ne, Kundengi tshianza, bualu bua tshiena muanze kuya kulu kudi Tatu; ya kudi bana betu, ubambile ne, Ndi nya kulu kudi Tatu wanyi ne Tatu wenu, kudi Nzambi wanyi ne Nzambi wenu. Malia wa ku Magadala wakalua, wakambila bayidi ne, Nakumona Mukelenge, yeye wakungambila malu â. Dituku adi dia kumudilu dia lumingu, diba dimane kubuela, bayidi bakadi mu nsubu ne bibi binshila bualu bua bakatshina Bena Yuda, Yesu wakalua, wakimana munkatshi muabo, wakabambila ne, Ditalala dikale kunudi. Hakambeye dî edi, wakabalesha bianza biandi ne lubadi luandi. Mitshima ya bayidi yakasanka, hakatangilabo Mukelenge. Yesu wakabambila kabidi ne, Ditalala dikale kunudi; bu muakantuma Tatu, nunku mundi nutuma. Hakambeye dî edi, wakabela muhuya, wakabambila ne, Nuangate Nyuma Muimpe; muetu yonso unuajimishila mibi yandi, neijimishibue; muntu yonso unudi kanui nujimishila, neashale kudiye, Kadi Toma, mukuabo wa bayidi dikumi ne babidi, dina diandi dikuabo ne, Didumo, kakadi nʼabo, hakalua Yesu. Bayidi bakuabo bakamuambila ne, Tuakumona Mukelenge. Kadi yeye wakabambila ne, Bingikala tshi ntangila bibangu bia milonda bidi mu bianza biandi, tshî mbuesha munu mu bibangu bia milonda, tshî mbuesha tshianza mu lubadi, tshiena ngitabusha. Hakahita matuku muanda mukulu kabidi, bayidi bandi bakadi mu nsubu, Toma wakadi nʼabo. Bibi biakadi binshila, Yesu wakalua, wakimana munkatshi muabo, wakamba ne, Ditalala dikale kunudi. Yeye wakambila Toma ne, Tuma munu webe kunoko, umone bianza bianyi; tuma tshianza tshiebe, utshibueshe mu lubadi luanyi; kuikadi ne mpata, witabushe. Toma wakamuandamuna ne, Mukelenge wanyi ne Nzambi wanyi. Yesu wakamuambila ne, Bualu bua wewe wakuntangila, wakuitabusha; bakungitabusha, kabai banze kuntangila, badi ne disanka. Yesu wakenza bimanyinu bikuabo bia bungi ku mesu kua bayidi, bidi kabi bifundibue mu mukanda eu; kadi malu â adi mafundibue bua nuenu nuitabushe ne, Yesu udi Kilisto, Muana wa Nzambi; ne bua nuenu nuikale ne muoyo mu dina diandi, hanuitabusha. Hakashika malu â, Yesu wakamueneka kabidi kudi bayidi bandi ku dishiba dia Tibelia; wakamueneka nunku: Simona Petelo, ne Toma udibo babikila ne, Didumo, ne Natanaele wa Kana wa mu Galela, ne bana ba Zebedayo, ne bayidi bandi bakuabo babidi bakadi hohamue. Simona Petelo wakambila bakuabo ne, Ndi nya kukuata minyinyi ya mu mai. Bakamuambila ne, Tuetu tuyaya nʼebe. Bakaya, bakabuela mu buatu; butuku abu kabakakuata tshintu. Kadi hakamba hanshi kutoka, Yesu wakadi muimane ku muelelu wa mai; kadi bayidi kabakamumanya ne, NYesu. Yesu wakabakonka ne, Bana, nudi ne tshia kudia, anyi? Bakamukudimuna ne, Nasha. Yeye wakabambila ne, Elai tuhamba ku tshianza tshia balume, nenuhete minyinyi. Bakatula, tshituha tshihi kabakamanya mua kutukoka bualu bua bungi bua minyinyi. Muyidi, wakadi Yesu musue, wakambila Petelo ne, Mukelenge. Hakunvua Petelo ne, Mukelenge, wakadijingila tshivualu tshiandi bua wakadi mutshivule, wakadiela mu mai. Kadi banga bayidi bakalua mu buatu bukese, benda bakoka tuhamba tûle tente ne minyinyi, bualu bua ku mpata kuakadi ha buihi, ntanta bu wa metu lukama. Hakafikabo ku mpata, bakamona makala a kahia akenka ne munyinyi wa mu mai muteka ha kahia ne mutanda wa bidia. Yesu wakabambila ne, Luai no minyinyi mikuabo inuakukuata katataka. Simona Petelo wakabuela mu buatu, wakakoka tuhamba ku mpata, tûle tente ne minyinyi minene lukama ne makumi atanu ne isatu; minyinyi yakadi bungi nunku, kadi tuhamba katuakadi tuhandike. Yesu wakabambila ne, Luai nudie. Kakuakadi muyidi wakadi ne dikima dia kumuebesha ne, Wewe nganyi? Bakadi bamumanye ne, Mukelenge. Yesu wakalua, wakamema mutanda wa bidia, wakabahau ne munyinyi kabidi. Eu wakadi musangu muisatu wakamueneka Yesu kudi bayidi, hakabikeye ku lufu. Hakashikishabo kudia, Yesu wakakonka Simona Petelo ne, Simona wa Yona, wewe udi mutambe aba bakuabo kunnanga, anyi? Yeye wakamuambila ne, Bulelela, Mukelenge, wewe udi mumanye ne, Ndi mukusue. Yesu wakamuambila ne, Udishe bana banyi ba mikoko. Wakamukonka tshiakabidi ne, Simona wa Yona, udi munnange, anyi? Yeye wakamuambila ne, Bulelela, Mukelenge, wewe udi mumanye ne, Ndi mukusue. Yesu wakamuambila ne, Ulame mikoko yanyi. Wakamukonka tshiakasatu ne, Simona wa Yona, udi munsue, anyi? Mutshima wa Petelo wakanyingalala bua yeye wakamukonka tshiakasatu ne, Udi munsue, anyi? Wakamuambila ne, Mukelenge, wewe udi mumanye malu onso; udi mumanye ne, Ndi mukusue. Yesu wakamuambila ne, Udishe mikoko yanyi. Bulelela, bulelela, ndi nkuambila ne, Hawakadi nsongalume, wakadi udisuika mukaba, wakadi wendakana kuonso kuwakasua; kadi hawakulumpa, wewe newolole bianza biebe, mukuabo neakusuike mukaba, neakutuale kudi kui musue. Yesu wakamba dî edi bua kumumanyisha lufu luatumbisheye nʼalu Nzambi. Hakambeye nunku, wakamuambila ne, Undonde. Petelo wakatshinguluka, wakamona muyidi wakadi Yesu munange, ulonda, nguakadi mumueyemene tshianyima mu tshiadi hakadibo badia bidia butuku, nguakamukonka ne, Wakutungila tshitungu nganyi? Hakamumona Petelo nunku, yeye wakakonka Yesu ne, Mukelenge, ahu muntu eu nenze tshinyi? Yesu wakamuambila ne, Binasua bua ashale ne muoyo tô ne hanalua, mbualu buebe, anyi? Wewe undonde. Dî edi diakatangadika munkatshi mua bana babo ba mu Kilisto ne, Muyidi eu kena ufua; kadi Yesu kakamba ne, Yeye kena ufua; wakamba ne, Binasua bua ashale ne muoyo tô ne hanalua, mbualu buebe, anyi? Muyidi eu mene wakamba malu â, wakâfunda; tudi bamanye ne, Dî diandi ndilelela. Malu makuabo a bungi adiku kabidi akenza Yesu; biâfundabo onso, ndi ngamba ne, Buloba bujima mene kabuena bukumbana miaba ya kuteka mikanda yafundabo. Teofilo, mu mukanda wa diambedi nakafunda malu onso akabanga Yesu kuenza ne kuyisha bantu tô ne ku dituku diakangatshibueye mu diulu, hakamaneye kuambika bapostolo bakasunguleye mikenshi yandi kudi Nyuma Muimpe. Hakamaneye kukenga, wakamueneka kudibo ne muoyo, bimanyinu bia buala ebu biakadi bia bungi, wakamuenekamueneka kudibo nunku matuku makumi anai Wamba malu a bukelenge bua Nzambi. Hakadisangisheye nʼabo, wakabambila bikole ne, Kanumuki mu Yelushalema, kadi nujidile mulayi wa Tatu unuakunvua kundi. Bulelela, Yone wakabatiza bantu ne mai, kadi matuku kêna mashale a bungi anuabatijibua mu Nyuma Muimpe. Hakadisangishabo nunku, bakadi ukonka ne, Mukelenge, wewe neuhingishe Isalele bukelenge katataka, anyi? Yeye wakabambila ne, Kumanya kua bikondo ne bidimu biakusungula Tatu mu bukokeshi buandi kambualu buenu. Kadi nuenu nenuangate bukole, hanuhuekela Nyuma Muimpe hamʼbidi henu; nenuikale bamanyi banyi mu Yelushalema ne mu Yudaya yonso ne Samalea ne kunfudilu kua buloba. Hakambeye dî edi, hakadibo bamutangila, wakangatshibua mu diulu; ditutu diakamuangata, kabakamumona kabidi. Hakadiye uya, bakatangila mu diulu talala; monai, balume babidi bimane ha buihi nʼabo baluate bilulu bitoke tô; ne bakamba ne, Nuenu Bena Galela, nudi bimane nutangidila mu diulu tshinyi? Yesu eu wakadi nʼenu wakubandishibua mu diulu, nealue kabidi bu munuakumumona ubanda mu diulu. Hashishe bakahingana mu Yelushalema bafuma ku mukuna udibo babikila ne, Oleve, udi biau hehi ne Yelushalema, bu ntanta wa luendu lua dituku dia Lumingu tua Bayuda. Hakahinganabo, bakabanda mu nsubu wa mulu, muakadi muikale Petelo ne Yone ne Yakobo ne Andele ne Filipo ne Toma ne Bâtolomayo ne Matayo ne Yakobo muana wa Alafayo ne Simona muena Lukunukunu ne Yuda wa Yakobo. Buonso buabo bakadi ne mitshima muomumue, bakananukila kutendelela Nzambi, ne bakashi, ne Malia mamu wa Yesu, ne bana babo ne Yesu. Mu matuku â Petelo wakimana munkatshi mua bana babo ba mu Kilisto, bakadi badisangishe nunku bu lukama ne makumi abidi, yeye wakamba ne, Bana betu, buakadibo nʼabo mbua kushikisha dî didi difunda mu Mukanda wa Nzambi, diakambabo bua Yudasa diambedi kudi Nyuma Muimpe mukana mua Davidi, yeye wakadi mulombodi wa bakuatshi ba Yesu. Bakadi bamubala nʼetu, wakadi mumane kuangata luandi luseke lua mudimu eu. (Muntu eu wakasumba muaba ku difutu dia bubi buandi; wakahona mutu munshi, wakahandika hankatshi, mala andi onso akahatuka. Bena Yelushalema bonso bakamanya bualu ebu; ebu mbualu buakabikidilabo muaba au ne, Akeledama, kukudimuna kua muaku ne, Muaba wa Mashi.) Bakafunda mu Mukanda wa Misambu ne, Nsubu wandi ashale hatuhu, Muntu kikadimu; ne, Mukuabo angate butangidi buandi. Balume bakuabo bakadi bendakana nʼetu matuku onso akadi Mukelenge Yesu utambakana munkatshi muetu, babangile ku dibatiza diandi kudi Yone tô ne ku dituku diakangatshibueye kutudi bua kaya mu diulu; budi umue wabo nʼabo mbua kusungudibua bua kuikaleye mumanyi nʼetu wa dibika diandi ku lufu. Bakimanyika babidi, Yosefe wakadibo babikila ne, Bâsaba, wakadi biandi ne dinga dina ne, Yusto, ne Matia. Bakatendelela Nzambi bambe ne, Wewe, Mukelenge, ngudi mumanye mitshima ya bantu bonso, utuleshe wa babidi aba umue uwakusungula, bua kuangateye muaba mu mudimu eu ne mu bupostolo muakahonena Yudasa bua kuyeye ku muaba wandi muine. Bakabelela nshobo, nshobo yakakuata Matia; bakamubala ne bapostolo dikumi ne umue. Hakalua dituta dia Pentekoste, buonso buabo bakadi hohamue mu muaba umue. Tshiona tshiakafuma lubilu mulu bu tshihehele tshikole tshihita, tshiakûsha mu nsubu muonso muakadibo bashikame tente. Ndimi mihanduluke yakamueneka kudibo, yakadi bu kahia, kakashikama ha mutu ha muntu ne muntu. Buonso buabo bakadi bûle tente ne Nyuma Muimpe, bakabanga kuakula miaku mikuabo bu muakabaha Nyuma dî dia kuambabo. Mu Yelushalema muakadi mushikame Bena Yuda bakadi bananukila kutendelela Nzambi, ba mu bisamba bionso bia ha buloba. Hakuluabo tshiona etshi, bantu ba bungi bakunguila hamue, bakakema, bualu bua muntu ne muntu wakunvua bakula muaku wandi. Bakadi balubakana, bakadi batamba kukema ne, Tangilai, bantu aba badi bakula nunku kaBena Galela, anyi? Tudi tunvua, muntu ne muntu, muaku wandi wa kuakatulabo munyi? Bena Pâtia ne Bena Madai ne Bena Elama, ne badi bashikame mu Mesopotamia, ne mu Yudaya ne mu Kapadokia, ne mu Ponto ne mu Asia, ne mu Fugia ne mu Pampulia, ne mu Ejipitu ne mu nseke ya Libue ne Kulene, ne ba ku Lomo badi basomba kunoko, ne Bena Yuda ne ba bende bakitabusha bualu bua Bena Yuda, ne Bena Kulete ne Bena Alaba, tudi tunvua bantu aba bamba mianda minene ya Nzambi mu miaku yetu. Buonso buabo bakadi batamba kukema, mitshima yabo yakalubakana, bakakonkangana ne, Bualu ebu budi munyi? Kadi bakuabo bakaseka, bakamba ne, Badi bakuatshike maluvu mahia-mahia. Kadi Petelo wakimana ne bapostolo dikumi ne umue, wakabandisha dî diandi, wakabambila ne, Nuenu Bena Yudaya ne buonso buenu badi bashikama mu Yelushalema, numanye bienu bualu ebu, nunvue mei anyi. Bantu aba kabena bakuatshike maluvi bu munudi nuamba bienu, bualu bua diba didi anu ha tshitema; kadi ebu mbualu buakambabo kudi muprofete Yoele ne, Nzambi udi wamba ne, Halua matuku a kunshikidilu, Nengitshikishile bantu bonso Nyuma wanyi, Bana benu balume ne bana benu bakashi nebambe malu adi kâi manze kulua, Bansongalume benu nebamone bikena kumona, Bakulumpe benu nebalote bilota, E, halua matuku au nengitshikishile bahika banyi balume ne bahika banyi bakashi Nyuma wanyi, nebambe malu adi kâi manze kulua. Nendeshe bantu malu a kukema mu diulu Ne bimanyinu ha buloba, Mashi, ne kahia, ne dibungibungi dia muinshi. Diba nedikudimunyibue midima, Ne ngondo mashi, Diambedi dituku dia Mukelenge kadî dianze kulua, Adi ndituku dinene dia kukema. Halua bualu ebu, watela dina dia Mukelenge neasungidibue. Nuenu Bena Isalele, unvuai mei â: Yesu wa ku Nazaleta, muntu mujadikibue kudi Nzambi ku mesu kuenu bua malu makole akenzeye ne malu a kukema ne bimanyinu biakamuenzesha Nzambi munkatshi muenu, bu munudi bamanye; yeye wakadi mufila bu muakadi meshi akasungula Nzambi ne bu muakadi budianjidi kumanya buandi, nuenu nuakuenzesha bianza bia bantu babi bua kumutekabo ku mutshi mutshiamakane ne bua kumushihabo. Nzambi wakamubisha, mumane kusulula nkanu ya lufu, bualu bua kakadi mua kusuikibua kudilu tshiendelele. Bualu bua Davidi udi wamba bualu buandi ne, Nakumona Mukelenge ku mesu kuanyi matuku onso; Bualu bua yeye udi ku tshianza tshianyi tshia balume bua meme tshî muzakale. Nunku mutshima wanyi wakusanka, ludimi luanyi luakuamba disanka dianyi; Ne bualu bukuabo, mubidi wanyi neulale ne ditekemena, Bua wewe kuena ushîa muoyo wanyi mu Muaba wa Bafue, Kuena ufila Webe wa Tshijila bua kuboleye. Wewe wakunmanyisha nshila ya muoyo; Neungûshe tente ne disanka ku mesu kuebe. Bana betu, ndi mua kunujukuila bualu bua nkambua wetu Davidi ne, Yeye wakafua, bakamujika, lukita luandi ludi munkatshi muetu tô ne katataka. Yeye wakadi muprofete, wakamanya biandi ne, Nzambi wakaditshiha ne, Nenshikike kankanunuina ka munda muebe ha nkuasa webe wa butumbi; bua yeye wakadianjila kutangila bualu ebu diambedi, wakamba bua dibika dia Kilisto ku lufu ne, Kabakamushîa mu Muaba wa Bafue, mubidi wandi kawakabola. Yesu eu, Nzambi wakamubisha ku lufu, buonso buetu tudi bamanyi ba bualu ebu. Yeye, mumane kubandishibua ku tshianza tshia balume tshia Nzambi, mumane kuangata mulayi wa Nyuma Muimpe kudi Tatu, wakuitshikisha bualu ebu bunudi numona ne bunudi nunvua. Bualu bua Davidi kakabanda mu diulu, hadi yeye mene wakamba ne, Mukelenge wakambila Mukelenge wanyi ne, Shikama ku tshianza tshianyi tshia balume Tô ne hanavuisha badi nʼebe lukuna tshitekelu tshia munshi mua makasa ebe. Ka Bena Isalele bonso bamanye bushua ne, Nzambi wakuvuisha Yesu eu unuakushiha ku mutshi mutshiamakane Mukelenge ne Kilisto kabidi. Hakunvuabo dî edi, mitshima yabo yakanyingalala, bakakonka Petelo ne bapostolo bakuabo ne, Bana betu, netuenze tshinyi? Petelo wakabambila ne, Kudimunai mitshima yenu, nubatijibue buonso buenu mu dina dia Yesu Kilisto bualu bua kunujimishilabo mibi yenu; nunku nenuangate kuha kua Nyuma Muimpe. Mulayi wa bualu ebu udi kunudi ne kudi bana benu balela ne kudi bonso badi kule, kudi bonso mene babikila Mukelenge Nzambi wetu kudiye. Yeye wakabambila mei makuabo a bungi, wakabadimusha ne, Disungilai kudi ba mu tshikondo etshi tshia tshitshu. Bakitabusha dî diandi bakabatijibua. Dituku adi kantu bu binunu bisatu bakadikungisha nʼabo. Bobo bakananukila kuikala mu dilengesha dia bapostolo ne mu buobumue, ne mu kutshibula kua bidia ne mu kutendelela kua Nzambi. Buowa buakabakuata buonso buabo; bapostolo bakenza malu a kukema a bungi ne bimanyinu. Bena kuitabusha bonso bakadi ne mitshima muomumue, bakasangisha bintu biabo hohamue; bakahana madimi abo ne bintu, bakabiabanyina bantu bonso bu muakadi muntu yonso nʼabi bualu. Ku dituku ku dituku bakadi bananukila kudisangisha mu ntempelo, ne mutshima umue, ku nsubu yabo bakadi batshibula bidia, bakadi badia bidia biabo ne disanka ne mitshima ya kanemu, bakadi batumbisha Nzambi, bakadi ne diakalengele kudi bantu bonso. Ku dituku ku dituku Mukelenge wakadi usangisha kudibo bakuabo bakadi basungidibua. Petelo ne Yone bakadi babanda ku ntempelo hakadi diba dia kutendelela Nzambi, diba ha Isatu. Muntu mulume mulela njeku wakadi mutuala kudi bantu, bakadi bamuteke ku dituku ku dituku ku tshibi tshia ntempelo tshidibo babikila ne, Tshimpe, bua kulombeye bakadi babuela mu ntempelo bintu. Hakamoneye Petelo ne Yone bamba kubuela mu ntempelo, wakabalomba tshintu. Petelo wakamutangila talala, ne Yone kabidi, wakamba ne, Ututangile. Yeye wakabunvuila, utekemena ne, Nebampe tshintu. Kadi Petelo wakamba ne, Tshiena ne argent ne ngolo, kadi tshindi nʼatshi, nenkuhetshi. Mu dina dia Yesu Kilisto wa ku Nazaleta, enda biebe. Wakamukuata ku tshianza tshia balume, wakamubisha; makasa andi ne tuhombo biakakola lubilu. Wakajuka lukasa, wakimana, wakabanga kuenda, wakabuela nʼabo mu ntempelo, wenda, utuhika, utumbisha Nzambi. Bantu bonso bakamumona wenda utumbisha Nzambi; bakamumanya ne, Nyeye wakadi ushikama ku Tshibi Tshimpe tshia ntempelo ulomba bintu; bakatamba kukema bua bualu buakalua kudiye. Hakadi ujeka uhukila Petelo ne Yone, bantu bonso bakabunguila mu mbalanda udibo babikila ne, Wa Solomo, batamba kukema, Hakamona Petelo bualu ebu, wakambila bantu ne, Nuenu Bena Isalele, bualu ebu budi bunukemesha munyi? Nudi nututangidila talala tshinyi, bu tuetu mbakuendesha muntu eu ku bukole buetu anyi ku buimpe buetu? Nzambi wa Abalahama ne wa Isaka ne wa Yakoba, Nzambi wa bankambua betu, yeye wakatumbisha Muana wandi Yesu, unuakufila, ne unuakuhidia ku mesu kua Pilato, hakasueye kumulekela. Nuenu nuakuhidia Udi wa Tshijila ne Muakane, nuakulomba bua kunuhabo muntu mushihianganyi; nuakushiha Mukelenge wa muoyo, wakabishabo ku lufu kudi Nzambi, tuetu tudi bamanyi ba bualu ebu. Bualu bua ditabusha dia mu dina diandi, dina diandi diakukolesha muntu eu unudi nutangila ne unudi bamanye; bulelela, ditabusha diakufuma kudiye ndiakumuha bukole ku mesu kua buonso buenu. Bana betu, ndi mumanye ne, Nuenu nuakuenza bualu ebu mu dituhakana dienu, bu inuakuenza badi ku mutu kuenu. Kadi malu akamba Nzambi diambedi mukana mua baprofete bandi bonso ne, Kilisto wanyi neakenge, yeye wakashikisha nunku. Kudimunai mitshima yenu, andamukai kabidi, bua mibi yenu Ijimishibue; bua bikondo bia kunukankamasha bifume ku mesu kua Mukelenge, ne bua yeye atume Kilisto wakunusunguileye, Yesu mene. Budiye nʼabu mbua kushala mu diulu tô ne halua bikondo bia kujadikabo tshiakabidi malu onso akamba Nzambi mukana mua baprofete bandi ba tshijila kale kale tô ne katataka. Mose mene wakamba ne, Mukelenge Nzambi neanubishile muprofete wa munkatshi mua bana benu, bu muakambisheye meme; nenutumikile mei andi onso anuambileye. Muntu yonso wahidia kutumikila mei a muprofete au nebamubutule munkatshi mua bantu. Bulelela, baprofete bonso, ku Samuele tô ne ku bakamulonda, bungi buabo bakadi bamba, bakamba bua matuku â kabidi. Nuenu nudi bana ba baprofete, ne ba dihungila dia Nzambi diakahungeye ne bankambua benu, wambila Abalahama ne, Bisamba bionso bia ha buloba nebisanke bualu bua tunkanuniuna tuebe. Nzambi mumane kubisha Muana wandi diambedi, wakamutuma kunudi bua kunusankisheye, hanumusheye muntu ne muntu ku mibi yandi. Hakadibo bambila bantu dî edi, bakuidi banene ne kahita ka ntempelo ne Basadoke bakahia kudibo; bakadi ne tshishi bualu bua bakadi bayisha bantu, bakadi bamba bua dibika dia ku lufu bualu bua Yesu wakabika. Bakabakuata, bakababuesha mu nsubu wa lukanu tô ne hakatshiabu, bualu bua diba diakamba kubuela. Kadi ba bungi bakunvua dî bakitabusha; bungi bua balume buakakumbana bu binunu bitanu. Hakatshiabu, bakokeshi babo ne bakulu ne bafundi bakadisangisha mu Yelushalema; Ana, muakuidi munene wakadika, ne Kayafa, ne Yone, ne Alesandelo, ne ba mu tshiota tshionso tshia muakuidi munene. Hakimanyikabo Petelo ne Yone munkatshi muabo, bakabakonka ne, Nuakuenza bualu ebu ne bukole kai, anyi mu dina dia nganyi? Petelo mûle tente ne Nyuma Muimpe, wakabambila ne, Nuenu bakokeshi ba bantu, ne bakulu, biatulumbuluishabo lelu bua bualu buimpe biakuenzelabo muntu wa mubidi mutekete mudiye mukoleshibue; buonso buenu ne Bena Isalele bonso numanye ne, Mu dina dia Yesu Kilisto wa ku Nazaleta, unuakashiha ku mutshi mutshiamakane, wakabisha Nzambi ku lufu, mu dina edi mene mudi muntu eu, udi muimane ku mpala kuenu, mukoleshibue. Yesu udi dibue diakahidiabo kunudi nuenu bibaki ba nsubu, kadi diakatekabo ku mutu kua ditumba. Mu munga muntu yonso kamuena luhandu, bualu bua kakuena dinga dina munshi mua diulu, diba bantu, didi dimanye mua kutusungila. Hakamonabo dikima dia Petelo ne Yone, hakamanyabo ne, Kabena bamanye mikanda, badi bantu hatuhu, bakakema; bakabamanya ne, Mbakadi ne Yesu. Hakamonabo muntu mukoleshibue muimane nʼabo, kabakamanya mua kuamba dî. Hakabambilabo ne, Umukai ba tshilumbuluidi, bakadi bebeshangana ne, Netuenzele bantu aba tshinyi? Bulelela, bonso badi bashikama mu Yelushalema badi bamanye ne, Bantu aba bakuenza tshimanyinu tshidi tshimanyibua; katuena bamanye mua kutshivila. Kadi bua bualu ebu kabutangadiki munkatshi mua bantu, tubakanyinai ne, Kanuambidi muntu bualu mu dina edi kabidi tshiendelele. Bakababikila, bakabambila bikole ne, Kanuambidi bantu bualu mu dina dia Yesu, kanubayishi. Kadi Petelo ne Yone bakabakudimuna ne, Nusungule budi buakane ku mesu kua Nzambi, kutumikila di dienu anyi dî dia Nzambi; bualu bua katuena bamanye mua kuenza bualu bukuabo, anu kuambila bantu malu atuakumona ne atuakunvua. Hakabakanyinabo kabidi bikole, bakababela, kabakamona bualu bua kubakengesha, bakatshina bantu; bualu bua bantu bonso bakadi batumbisha Nzambi bua muanda wakenjibua. Muntu wakenzelabo tshimanyinu etshi tshia kuondahibua wakadi bidimu makumi anai bisambuke. Hakabalekelabo, bakahingana kudi bana babo, bakabamanyisha malu onso akabambila bakuidi banene ne bakulu. Hakunvuabo dî edi, bakatumbisha Nzambi ne mutshima umue, bakamba ne, Mukelenge wetu, wewe wakafuka diulu ne buloba ne mai manene ne bintu bionso bidimu; wewe wakamba kudi Nyuma Muimpe mukana mua tatu wetu Davidi, muntu webe ne, Bisamba bia bende biakufunyina bulobo tshinyi? Bantu bakuelela meshi a malu a hatuhu tshinyi? Bakelenge ba ha buloba bakutantamana bua kuluangana, Banfumu bakudisangisha bua Kuelela Mukelenge ne Kilisto wandi tshifufu. Bulelela, mu musoko eu, Helode ne Pontio Pilato ne bisamba bia bende ne Bena Isalele bakadisangisha bua kuelela Muana webe wa tshijila Yesu, uwakela manyi ha mutu, tshifufu, ne bua kuenza malu onso akasungula tshianza tshiebe ne mutshima webe diambedi ne, Alue. Mukelenge, bua malu a mpindiu, utangile dikanyina diabo; uhe bantu bebe mitshima ya kuamba dî diebe ne dikima dikole, hautshidi wolola tshianza tshiebe bua kuondaha bantu; bimanyinu ne malu a kukema Menjibue mu dina dia Muana webe wa tshijila Yesu. Hakatendelelabo Nzambi nunku, muaba wakadibo badisangisha wakakankishibua; buonso buabo bakadi bûle tente ne Nyuma Muimpe, bakamba dî dia Nzambi ne dikima. Tshisumbu tshia bakadi bitabusha tshiakadi ne mutshima ne musûke umue; kakuakadi muntu umue wakamba ne, Bintu bindi nʼabi mbianyi nkayanyi; kadi bakasangisha bintu bionso hohamue. Bapostolo bakadi bamba ne bukole bua bungi bua dibika dia Mukelenge Yesu ku lufu, ngasa wa bungi wakadi nʼabo bonso. Munkatshi muabo kamuakadi muntu wakadi ukengela tshintu; bualu bua bakadi ne madimi anyi nsubu, bakabihana, bakadi balua ne mushinga wa biakahanabo, bakadi bauteka ku makasa a bapostolo; bakadi babanyangana muntu ne muntu bu muakadiye nʼatshi bualu. Muntu wakadiku, dina diandi Yosefe, bapostolo bakamuidika dinga dina ne, Bânaba (kukudimuna kua muaku ne, Muana wa Busambi), Muena Lewi, mulela ku Kupulio; wakadi ne budimi, wakabuhana, wakalua ne mushinga, wakauteka ku makasa a bapostolo. Muntu wakadiku, dina diandi Anania, ne mukashi wandi Sapila, wakahana tshintu tshiakadiye nʼatshi, wakasokoka tshituha tshia mushinga, mukashi wandi wakadi mumanye bualu ebu; Anania wakalua ne tshinga tshituha, wakatshiteka ku makasa a bapostolo. Kadi Petelo wakamba ne, Anania, bualu kai Satana wakûsha mutshima webe tente bua wewe kudinga Nyuma Muimpe ne bua kusokoka tshituha tshia mushinga wa budimi? Hakadi budimi mu tshianza tshiebe, kabuakadi buebe, anyi? Hawakubuhana mushinga wabu kawakadi webe, anyi? Wakuelelangana meshi a bualu ebu mu mutshima webe munyi? Kuakudinga bantu, wakudinga Nzambi. Hakunvua Anania mei â, wakahona hanshi, wakahuola, muoyo wandi; buowa bunene buakakuata bantu bonso bakunvua bualu ebu. Bansongalume bakabika, bakamunyengela bilulu, bakaluhuka ngandi, bakamujika. Hakahita diba bu mpola Isatu, mukashi wandi wakabuela, kai mumanye bualu. Petelo wakamukonka ne, Ungambile, nuenu nuakuhana budimi ku mushinga bungi kampanda, anyi? Yeye wakamba ne, Bulelela, ku mushinga bungi nunku. Kadi Petelo wakamukonka ne, Nuakusangishila mei enu bua kuteta Nyuma wa Mukelenge munda tshinyi? Tangila, makasa a bakujika bayebe adi ku mbelu, nebaluhuke nʼebe. Yeye wakahona hanshi lukasa ku makasa andi, wakahuola muoyo wandi; bansongalume bakabuela, bakamusangana mufue, bakaluhuka nʼandi, bakamujika hehi ne bayandi. Buowa bunene buakakuata bena ekelesia bonso; buakakuata bonso bakutuma malu â kabidi. Ku bianza bia bapostolo bimanyinu bia bungi ne malu a kukema biakadi bienjibua munkatshi mua bantu; buonso buabo bakadi badisangisha mu mbalanda wa Solomo ne mutshima umue. Kakuakadi muntu wa bakadi bashale wakadi ne bukitu bua kudisangisha nʼabo; kadi bantu bakadi babatumbisha; bena kuitabusha bakasangishibua kudi Mukelenge, bisumbu bia balume ne bia bakashi, batambe ba diambedi bungi. Bua bualu ebu bantu bakalua ne basame mu misesu ya musoko, bakabaladika ha malalu ne ha biata ne, Hahita Petelo, mundidimbi wandi ubuikile nasha mukuabo wabo. Bantu ba bungi bafume ku misoko yakadi hehi ne Yelushalema bakadi badiunguisha, batuale basame ne bakadi batatshisha kudi nyuma ya bukoya; masama a buonso buabo akashika. Kadi muakuidi mimene wakabika ne bonso bakadi nʼandi (mba luseke lua Basadoke), bakadi bûle tente ne mukau; bakakuata bapostolo, bakababuesha mu nsubu wa lukanu. Kadi mu butuku muanjelo wa Mukelenge wakunzulula bibi bia nsubu wa lukanu, wakaluhuka nʼabo, wakabambila ne, Yai bienu, nuimane mu ntempelo, nuambile bantu mei onso a Muoyo eu. Hakunvuabo dî edi, bakabuela mu ntempelo hatshiatshia, bakabanga kuyisha bantu. Kadi muakuidi mimene wakalua ne bakadi nʼandi, wakabikila balumbuludi ne bakulu bonso ba bana ba Isalele, wakatuma dî ku nsubu wa lukanu bua kuluabo nʼabo. Kadi baka lua tuhalai, katuakabasangana mu nsubu wa lukanu; tuakahingana, tuakamba ne, Tuakusangana nsubu wa lukanu muinshila bimpe ne balami bimane ku bibi; kadi hatuakunzulula, katuakusanganamu muntu. Hakunvua kahita ka balami ba ntempelo ne bakuidi banene mei â, mitshima yabo yakalubakana ne, Bualu ebu nebuikale munyi? Muntu wakalua, wakabambila ne, Tangilai, banuakubuesha mu nsubu wa lukanu badi bimane mu ntempelo bayisha bantu. Hashishe kahita ka bulami ba ntempelo ne tuhalai bakaya, bakalua nʼabo, kabai babakoka ku bukole, bua bakadi batshina bantu ne, Nebatukume mabue. Hakaluabo nʼabo, bakabateka ku mpala kua balumbuludi. Muakuidi munene wakabakonka ne, Tuakunukandika bikole ne, Kanuyishi bantu mu dina edi; ne tangilai, nuenu nuakûsha Yelushalema tente ne diyisha dienu, nudi basue kuteka mashi a muntu eu hamʼbidi hetu. Kadi Petelo ne bapostolo bakandamuna ne, Butudi nʼabu mbua kutumikila mei a Nzambi ku mpala kua mei a bantu. Nzambi wa bankambua betu wakabisha Yesu unuakashiha mukudika ku mutshi mutshiamakane. Nzambi wakamubisha ne tshianza tshiandi tshîa balume bua kuikaleye Mukelenge ne Musungidi, ne bua kuheye Isalele kukudimuna kua mitshima ne kujimisha kua mibi. Tuetu tudi bamanyi ba malu â, ne Nyuma Muimpe kabidi, udi Nzambi muhe badi batumikila mei andi. Hakunvuabo dî edi, tshishi tshikole tshiakabakuata; bakasua kushiha bapostolo. Kadi muetu mukuabo, Mufalese, dinu diandi Gamaliele, muyishi wa mikenshi ya Mose, mutumbishibue kudi bantu bonso, wakimana mu tshilumbuluidi; wakamba ne, Bahatule bantu aba tshituha. Wakamba biandi ne, Nuenu Bena Isalele, nudimuke bua bualu bunukadi ha kuenzela bantu aba. Bualu bua ku mpala kua matuku â Teuda wakabika biandi, wakamba ne, Meme ndi muntu munene; bantu bu nkama inai bakadisangisha nʼandi; kadi yeye wakashihebua; bonso bakadi bamutumikila bakatangadishibua, bualu buabo buakalua tshianana. Ku nyima kua bualu ebu Yuda wa mu Galela wakabika mu matuku akadibo bafunda mena a bantu, wakalohesha bantu bakuabo ku nyima kuandi; yeye kabidi wakafua, bonso bakadi bamutumikila bakatangadishibua. Katataka ndi nuambila ne, Ehukai kudi bantu aba, kanubenzedi bualu; bualu bua bikala lungenyi elu anyi mudimu eu bia bantu, nebijimine; kadi bikala bualu ebu bua Nzambi, kanuena bamanye mua kubuhumbisha; nunku nebansangane nuluisha Nzambi nvita. Bakitabusha dî diandi; hakabikilabo bapostolo, bakabakuma, bakabakandika ne, Kanuambi bualu mu dina dia Yesu, bakabalekela. Bakumuka ku mpala kua bena tshilumbuluidi basanka bualu bua bakabadibua ne, Mbakane bua kufuishibuabo bundu bualu bua Dina dia Yesu. Ku dituku ku dituku, mu ntempelo ne mu nsubu yabo, kabakalekela kuyisha bantu ne kubambila lumu luimpe ne, Yesu udi Kilisto. Mu matuku â, hakadi bayidi bakumbane ba bungi, Bena Yuda bakadi bakula muaku wa Bena Gelika bakajiana Bena Ebelu ne, Ha kuabanyangana kua bintu ku dituku ku dituku, badi bahua muoyo bua bakashi betu ba mu lufuila. Bapostolo dikumi ne babidi bakabikila tshisumbu tshionso tshia bayidi, bakamba ne, Kambimpe bia tuetu kulekela dî dia Nzambi bua kuenza mudimu wa mesa. Bana betu, nukebe balume muanda mutekete munkatshi muenu badi ne lumu luimpe, badi bûle tente ne Nyuma ne lungenyi, netubateke ha mutu ha bualu ebu. Kadi tuetu netunanukile mu kutendelela kua Nzambi ne mu kuenza kua mudimu wa dî diandi. Di edi diakabasankisha buonso buabo; bakasungula Stefano, mule tente ne ditabusha ne Nyuma Muimpe; ne Filipo, ne Polokolo, ne Nikanô, ne Timono, ne Pâmena, ne Nikolao wa ku Antiokia wakadi muitabushi wa bualu bua Bena Yuda. Bakabateka ku mpala kua bapostolo; hakatendelelabo Nzambi, bakabatentekesha bianza ha mitu yabo. Di dia Nzambi diakadiundadiunda, bayidi bakadi bavulangana ba bungi mu Yelushalema; bakuidi ba bungi bakadi bitabusha lumu luimpe. Stefano, mûle tente ne ngasa ne bukole, wakenzenza malu a kukema ne bimanyinu binene munkatshi mua bantu. Kadi bakuabo ba mu nsunagoga udibo babikila ne, Ngua Bena Budishikaminyi, ne wa Bena Kulene, ne wa Bena Alesandelia, ne wa Bena Kilikia ne Bena Asia bakabika, bakela mpata ne Stefano. Kabakamanya mua kuhita lungenyi luandi ne Nyuma wakadi umuakuisha. Bakabueshela bantu bakuabo, bobo bakamba ne, Tuakunvua muntu eu uhenda Mose ne Nzambi. Bakahila bantu ne bakulu ne bafundi, bakalua kudiye, bakamukuata, bakalua nʼandi ku tshilumbuluidi, bakatua ne bamanyi ba mashimi, bobo bakamba ne, Muntu eu kena ulekela kuhetula muaba eu wa tshijila, ne mikenshi ya Mose; tuakumunvua wamba ne, Yesu eu wa mu Nazaleta neabutuishe muaba eu, neakudimune bilele biakatuha Mose. Bonso bakadi ha tshilumbuluidi bakamutangila talala, bakamona mpala wandi mukudimuke bu wa muanjelo. Muakuidi munene wakamukonka ne, Malu â adi malelela, anyi? Stefano wakamba ne, Bana betu ne batatu, unvuai; Nzambi wa butumbi wakamueneka kudi tatu wetu Abalahama, hakadiye mu Mesopotamia, diambedi yeye kai muanze kushikama mu Halana, wakamuambila ne, Umuke mu buloba buebe ne munkatshi mua bena kuenu, ulue mu buloba bundualua kukulesha. Yeye wakumuka mu buloba bua Bena Kasada, wakashikama mu Halana; hakafua tatu wandi, Nzambi wakamumushaku, wakamuteka mu buloba ebu bunudi bashikamemu katataka; kadi yeye kakamuhamu buhianyi, nasha kaba kakese ka kudiateye makasa; Nzambi wakamulaya ne, Nenkuhe buloba ebu tshiendelele ne tunkanunuina tuebe, yeye kai muanze kulela muana. Nzambi wakamba nunku ne, Tunkanunuina tuandi netuikale mu buloba bua bende, bobo nebababueshe mu buhika, nebabenzele bibi bidimu nkama inai. Nzambi wakamba ne, Nendumbuluishe tshisamba tshia bantu tshikalabo bahika babo; hashishe nebaluhuke, nebankuatshile mudimu mu muaba eu. Nzambi wakamuha dihungila dia ditengula; nunku Abalahama wakalela Isaka, wakamutengula hakakumbana matuku muanda mukulu; Isaka wakalela Yakoba, Yakoba wakalela bankambua betu dikumi ne babidi. Bankambua betu bakadi ne Yosefe mukau, bakamuhana mu Ejipitu; kadi Nzambi wakadi nʼandi, wakamusungila mu makenga andi onso, wakamuha diakalengele ne lungenyi ku mesu kua Palô, mukelenge wa Ejipitu; wakamuteka ngovena wa Ejipitu ne wa nsubu wandi yonso. Tshiole tshiakalua mu buloba buonso bua Ejipitu ne bua Kanâna, ne dikenga dikole; bankambua betu kabakamona bia kudia. Hakunvua Yakoba ne, Mu Ejipitu mudi bia kudia, wakatumamu bankambua betu musangu wa kumudilu. Hakayabo musangu muibidi, Yosefe wakadimanyisha kudi bana babo, ne tshisamba tshia Yosefe tshiakamanyibua kudi Palô. Yosefe wakatuma dî, wakabikila tatu wandi Yakoba ne bena kuabo bonso, bakadi bantu makumi muanda mutekete ne batanu. Yakoba wakahueka mu Ejipitu; wakafua biandi ne bankambua betu bonso; bakaya nʼabo ku Shekeme, bakabajika mu lukita luakasumba Abalahama ku mushinga wa argent kudi bana ba Hamô mu Shekeme. Hakafikila tshikondo tshia kushikishabo mulayi wakalaya Nzambi Abalahama ha buihi, bantu bakavulangana, bakakumbana ba bungi mu Ejipitu tô ne hakabika mukuabo mukelenge wa Ejipitu wakadi kai mumanye Yosefe. Yeye wakafukila tshisamba tshietu budimu, wakenzela bankambua betu bibi, bua bobo bele bana babo bakese balela ha mbelu, bua kabashadi ne muoyo. Mu tshikondo etshi bakalela Mose, yeye wakadi muana muimpe be ku mesu kua Nzambi; bakamudisha ngondo isatu mu nsubu wa tatu wandi; hakamumushabo mu nsubu, muana mukashi wa Palô wakamuangula, wakamudisha bu muanʼandi. Bakayisha Mose lungenyi luonso lua Bena Ejipitu; yeye wakadi mukole mu mei andi ne mu bienzedi biandi. Hakadiye bidimu bu makumi anai, bualu buakalua mu mutshima wandi bua kuyeye kutangila bana babo, bana ba Isalele. Hakamoneye umena kuabo ukengeshibua, wakaya kumuluila nvita, wakasombuela wakadi ukenga, wakashi Muena Ejipitu. Yeye wakelangana meshi ne, Bena kuetu nebajingulule ne, Nzambi udi ubasungila ne tshianza tshianyi; kadi bobo kabakajingulula bualu ebu. Hakatshiabu, wakatukidila bakuabo baluangana, yeye wakateta bua kubasunga, wakamba ne, Balumiana, nudi bana ba muntu umue; nudi nuenzelangana bibi tshinyi? Kadi wakadi wenzela umena kuabo bibi wakamusekila ne, Wakukuvuisha mukelenge wetu ne mulumbuludi wetu nganyi? Udi musue kunshiha bu muwakashiha Muena Ejipitu makelela, anyi? Hakunvua Mose dî edi, wakanyema, wakalua bu muenyi mu buloba bua Midiyana, kuakaleleleye bana balume babidi. Hakakumbana bidimu makumi anai, muanjelo wakamueneka kudiye mu tshihela tshia mukuna wa Sinai mu ludimi lua kahia luakadi mu katshi. Hakamona Mose bualu ebu, wakakema; hakayeye ha buihi bua kubumona, dî dia Mukelenge diakalua ne, Ndi bianyi Nzambi wa bankambua bebe, Nzambi wa Abalahama ne wa Isaka ne wa Yakoba. Mose wakazakala, yeye kakadi ne bukitu bua kubumona. Mukelenge wakamuambila ne, Umusha bisabata ku makasa, bualu bua muaba ûdi muimane udi buloba bua tshijila. Bulelela, nakatangila dikenga dia bantu banyi badi mu Ejipitu, nakunvua mikemu yabo, nakuhueka bua kubasungila; luaku katataka, nenkutume mu Ejipitu. Mose eu nguakahidiabo ne, Wakuvuisha mukelenge ne mulumbuludi nganyi? Nzambi wakamutuma bu mukelenge ne musungidi ne tshianza tshia muanjelo wakamueneka kudiye mu katshi. Muntu eu wakabalombola, mumane kuenza malu a kukema ne bimanyinu mu Ejipitu, ne mu Mai Makunze, ne mu tshihela bidimu makumi anai. Yeye Mose eu mene wakambila bana ba Isalele ne, Nzambi neanubishile muprofete wa munkatshi mua bana benu, bu muakambisheye meme. Yeye nguakadi mu ekelesia wa mu tshihela ne muanjelo wakadi wakula nʼandi ku mukuna wa Sinai, wakadi kabidi ne bankambua betu; yeye wakangata mei a muoyo a kutuha bietu; bankambua betu kabakamutumikila, bakamusekila, bakahingisha mitshima yabo mu Ejipitu; bakambila Alona ne, Utuenzele nzambi ya kuya ku mpala kuetu, bualu bua katuena bamanye bualu buakukuata Mose eu wakutuluhula mu buloba bua Ejipitu. Mu matuku au bakenza muana wa ngombe, bakashihela luhingu nyama, bakasanka bua bintu biakenzabo ne bianza biabo. Kadi Nzambi wakabakoma nyima, wakabalekela bua kutendelelabo tshisumbu tshia bidi mulu; bu muakafundabo mu mukanda wa baprofete ne, Nuakafila nyama mishiha ne milambu kundi meme Bidimu makumi anai mu tshihela, anyi, nuenu ba mu nsubu wa Isalele? Nuakambula nsubu wa tshilulu wa Moleke, Ne mutoto wa nzambi wenu Lefana, Bifuanyikishi binuakenza bua kubikukuila; Ne meme nenuteke ku nyima kua Babulona. Bankambua betu bakadi ne nsubu wa tshilulu wa tshimanyishilu mu tshihela bu muakalongolola wakadi wakula ne Mose ne, Umuenze bu tshifuanyikishi tshiwakutangila, Bankambua bakamuhiana, bakalua nʼandi ne Yoshua, hakabuelabo mu buloba bua bisamba bia bende bakumushabo kudi Nzambi ku mesu kua bankambua betu, wakadika tô ne mu matuku a Davidi. Davidi wakadi ne diakalengele kudi Nzambi, wakamulomba ne, Nkebele Nzambi wa Yakoba nsubu; kadi Solomo wakamuibakila nsubu. Kadi Udi Mutambe Bunene wa mu diulu kena usomba mu nsubu mibaka ne bianza; bu muakamba muprofete ne, Diulu didi nkuasa wanyi wa butumbi, Buloba budi tshitekelu tshia munshi mua makasa anyi; Mukelenge udi wamba ne, Nenungibakile nsubu kai? Nengikale ne tshikishilu mu muaha kai? Tshianza tshianyi katshiakenza bintu ebi bionso, anyi? Nuenu bena tshishiku, badi kabai batengudibue mu mitshima ne mu matshu, matuku onso nudi nuhidia Nyuma Muimpe; nudi nuenza bu muakenza bankambua benu. Muprofete kai wakadi bankambua benu kabai bamukengeshe? Bakashiha bakadi badianjila kuamba diambedi ne, Muakane ulualua; katataka nuenu nuakulua bamutungidi bandi ne bamushihi; nuenu bakangata mikenshi ya Mose mihebue kudi banjelo, kanuakatumikila. Hakunvuabo mei â, tshishi tshikole tshiakabakuata, bakamudiangena ku menu. Kadi yeye, mûle tente ne Nyuma Muimpe, wakatangila mulu talala, wakamona butumbi bua Nzambi, ne Yesu muimane ku tshianza tshia bukole tshia Nzambi, wakamba ne, Monai, ndi ntangila diulu dibululuke, ne Muana wa muntu muimane ku tshianza tshia bukole tshia Nzambi. Kadi bakela bila, bakajibika mu matshu abo, bakamunguila, bakamukuata buonso buabo hamue; bakamuhatula mu musoko, bakamukuma mabue. Bamonyi ba bualu ebu bakateka bivualu biabo ku makasa a nsongalume dina diandi Shaula. Bakadi bakuma Stefano mabue ulomba Mukelenge wamba ne, Mukelenge Yesu, angata muoyo wanyi, Wakatua binu hanshi, wakela dî dikole ne, Mukelenge, kubatekedi bubi ebu. Hakambeye dî edi, wakalala tulu. Shaula wakadi witabusha bua Stefano kufueye. Dituku adi mene dikenga dikole diakakuata bena ekelesia ba mu Yelushalema, buonso buabo bakatangadika mu nseke ya Yudaya ne ya Samalea, anu bapostolo bakadi bashale. Batendeledi bakane bakajika Stefano, bakamuashila madilu makole. Kadi Shaula wakabutula bena ekelesia, wakabuela mu nsubu yonso, wakakoka balume ne bakashi, wakababuesha mu nsubu wa lukanu. Nunku bakadi batangadike bakendakana bamba dî dia lumu luimpe. Filipo wakahueka ku musoko wa Samalea, wakabanga kubambila bua Kilisto. Bantu ba bungi bakitabusha malu akabambila Filipo ne mutshima umue, hakunvuabo, ne hakamonabo bimanyinu biakenzenzeye. Bualu bua nyuma ya bukoya yakadi munda mua bantu ba bungi, yakaluhuka yela mei ai bikole; ba bungi bakadi ne tuneke ne bakadi balema bakakoleshibua. Ma musoko au muakadi disanka dinene. Mu musoko muakadi muntu, dina diandi Simona, diambedi wakadi mutempeshanganyi wa mbuku, wakukemesha Bena Samalea, udiamba ne, Ndi muntu mimene. Bantu bonso bakunvuila dî diandi, banene ne ba tshianana, bakamba ne, Muntu eu udi Bukole bua Nzambi budibo babikila ne, Bunene. Bakunvuila dî diandi bualu bua yeye wakabakemesha ne mbuku yandi tô musangu mule. Hakitabushabo Filipo ubambila lumu luimpe lua bukelenge bua Nzambi ne lua dina dia Yesu Kilisto, bakabatijibua, balume ne bakashi. Simona mene wakitabusha kabidi; hakamubatizabo, yeye wakalamata kudi Filipo; hakatangileye bimanyinu ne malu manene a kukema biakenjibua, wakakema biandi. Hakunvua bapostolo bakadi mu Yelushalema ne, Bena Samalea bakuitabusha dî dia Nzambi, bakabatumina Petelo ne Yone. Hakahuekabo, bakabalombela Nzambi bua kuangatabo Nyuma Muimpe; bualu bua yeye kakadi muanze kuhonena nasha umue wabo; bakadi anu babatijibue mu dina dia Mukelenge Yesu. Hakabatentekeshabo bianza, bakangata Nyuma Muimpe. Hakamona Simona ne, Nyuma Muimpe udi uheshibua kuditentekesha dia bianza bia bapostolo, wakabalesha bintu, wamba ne, Numpe meme kabidi bukole ebu, bua muntu unatentekesha bianza bianyi angate biandi Nyuma Muimpe. Kadi Petelo wakamuambila ne, Argent yebe ifue nʼebe, bualu bua wewe wakulangana meshi ne, Nengangate diha dia Nzambi ku bintu. Wewe kuena ne tshituha anyi luseke mu bualu ebu, bua mutshima webe kawena muimpe ku mesu kua Nzambi. Nunku kudimuna mutshima webe, ulekele bubi buebe ebu, ulombe Nzambi ne bumue neakubuikidile meshi adi munda muebe. Ndi mona ne wewe utshidi mu nyongangandu wa bululu ne mu lukanu lua bualu bubi. Simona wakakudimuna dî ne, Nundombele Mukelenge bua nasha bumue bua malu anuakuamba kabufiki kundi. Hakamanyisha bapostolo bantu bualu buabo, hakabambilabo dî dia Mukelenge, bakahingana ku Yelushalema, bambila misoko ya bungi ya Bena Samalea lumu luimpe. Muanjelo wa Mukelenge wakambila Filipo ne, Bika, ya ku luseke lua ku sude mu nshila udi mumuke ku Yelushalema muye ku Aza; nshila au wa mu tshihela. Yeye wakabika, wakaya. Tangilai, Muena Atiopa, muntu mutungula wa bukokeshi bunene ku nyima kua Kandake, nfumu mukashi wa Bena Atiopa, muikale ku mutu kua tshibutshilu tshiandi tshionso, wakadi mulue ku Yelushalema bua kutendelela Nzambi; wakadi uhingana mushikame mu dikalu diandi ubala mukunda wa muprofete Yeshaya. Nyuma wakambila Filipo ne, Ya ha buihi, ulamate ku dikalu edi. Filipo wakaya lubilu kudiye, wakamunvua ubala mukanda wa muprofete Yeshaya, wakamukonka ne, Udi mujingulule bualu bûdi ubala, anyi? Yeye wakamukudimuna ne, Ndi mua kujingulula munyi, bikala muntu kai mundeshe? Yeye wakasengelela Filipo bua kubandeye ne bua kushikameye nʼandi. Luseke lua Mukanda wa Nzambi luakadiye ubala luakadi luamba ne, Bakalua nʼandi ku tshishihelu bu mukoko; Bu muana wa mukoko udi uhua ku mpala kua mukoshi wa miosa, Nunku yeye kena ubulula mukana muandi; Mu kudihuekesha kuandi bakanyanga tshilumbu tshiandi; Nganyi neambe bua mulongo wandi? Bakamunyenga muoyo wandi ha buloba. Muntu mutungula wakakonka Filipo ne, Muprofete udi wamba nganyi? Udi udiamba, anyi udi wamba muntu mukuabo? Filipo wakabulula mukana muandi, wakabanga ku dî edi mu Mukanda wa Nzambi, wakamuambila lumu luimpe lua Yesu. Hakadibo baya mu nshila, bakajika ku mai; muntu mutungula wakamba ne, Ahu ka mai â tshidi tshimpumbisha bua kubatijibua ntshinyi? [ ] Yeye wakamba ne, Dikalu dimane. Bubidi buabo bakaya mu mai, Filipo ne muntu mutungula, Filipo wakamubatiza. Hakaluhukabo mu mai, Nyuma wa Mukelenge wakangata Filipo, wakaya nʼandi; muntu mutungula kakamutangila kabidi, wakaya biandi mu nshila usanka. Kadi Filipo wakamueneka ku Azoto; wakahitshila mu misoko yonso tô ne ku Kaisalia, wenda ubambila lumu luimpe. Shaula wakatshidi ufunyina bayidi ba Mukelenge bua kubashiheye, wakaya kudi muakuidi munene. Wakamulomba mikanda ya kuya nʼai mu nsunagoga ya mu Damaseke bua kusuika basanganeye mu Nshila eu wa Nzambi, nasha balume nasha bakashi, ne bua kulueye nʼabo ku Yelushalema. Hakadiye uya mu nshila, Wakafika hehi ne Damaseke, munya mukole wa mu diulu wakamutemena lukasa; wakahona hanshi, wakunvua dî dimuambila ne, Shaula, Shaula, udi unkengeshila meme tshinyi? Yeye wakakonka ne, Mukelenge, wewe udi nganyi? Wakamukudimuna ne, Ndi bianyi Yesu ûdi ukengesha; kadi bika, ubuele mu musoko, nebakuambile bualu bûdi nʼabu mbua kuenza. Bakadi benda nʼandi bakimana bahue; bakuama dî, kadi kabakamona muntu. Shaula wakabika hanshi; hakabululuka mesu andi, kakadi utangila tshintu; bakamukuata ku tshianza, bakamulombola tô ne ku Damaseke. Yeye wakadi kai umona tô matuku asatu, kakadia, kakanua. Mu Damaseke muakadi muyidi mukuabo, dina diandi Anania; Mukelenge wakamuambila mu tshilota ne, Anania. Yeye wakitaba ne, Ndiku, Mukelenge. Mukelenge wakamuambila ne, Bika biebe, uye ku nshila wa musoko udibo babikila ne, Mululame, ku nsubu wa Yuda, ukonkeku muntu, dina diandi Shaula, udi biandi Muena Tâso, bua tangila, yeye udi utendelela Nzambi; yeye kabidi wakamona muntu, dina diandi Anania, ubuela kudiye ma tshikena kumona, umulenga tshianza bua kutabaleye. Kadi Anania wakandamuna ne, Mukelenge, nakunvua kudi bantu ba bungi lumu lua muntu eu, ne bu mudi malu mabi a bungi akenzeleye basanto bebe ba mu Yelushalema; kunu kabidi, udi ne bukole buakuangateye kudi bakuidi banene bua kusuikeye bonso badi batendelela dina diebe. Kadi Mukelenge wakamuambila ne, Ya biebe, bualu bua yeye udi bu luhanza lunakasungula bua kutuala dina dianyi ku mesu kua bisamba bia bende, ne kua banfumu, ne kua bana ba Isalele; bualu bua neamuleshe bungi bua malu adiye ne bua kukengela bua dina dianyi. Anania wakaya biandi, wakabuela mu nsubu, wakamulenga tshianza, wakamuambila ne, Muanʼetu Shaula, Mukelenge Yesu mene wakumueneka kûdi hawakadi ulua mu nshila, wakuntuma bua wewe kutabala ne bua wewe kûla tente ne Nyuma Muimpe. Bintu bu bilamulamu biakalamuka ku mesu andi lubilu, wakamona; wakabika, bakamubatiza. Wakadia biandi, wakakankamana. Wakashala ne bayidi ba mu Damaseke matuku. Ha diba adi mene wakabanga kuambila bantu bualu bua Yesu mu nsunagoga ne, Yeye udi Muana wa Nzambi. Bonso bakunvua dî diandi bakadi bakema, bakabanga kukonka ne, Eu kanyeye wakabutula bakadi batendelela dina edi mu Yelushalema, anyi? Yeye wakadi muluile bualu ebu kunoko bua kuyeye nʼabo basuika ku mesu kua bakuidi banene. Shaula wakadiundadiunda mu bukole, wakadi utshiudisha Bena Yuda bakadi mu Damaseke, wakabaluisha ne, Eu udi Kilisto. Hakahita matuku a bungi, Bena Yuda bakasangisha dî diabo bua kumushiha; kadi Shaula wakamanya tshifufu tshiabo. Bakadi batentekela ku bibi bia musoko butuku ne munya bua kumushihabo: kadi bayidi bandi bakamuangata butuku, bakamutuluila ha disoso dia lumbu, bamuhuekesha mu tshisaka. Hakayeye ku Yelushalema, wakasua kulamata kudi bayidi; kadi bobo bakamutshina, kabakitabusha ne, Udi muyidi. Kadi Bânaba wakamuangata, wakaya nʼandi kudi bapostolo, wakabambila bu mu akamoneye Mukelenge mu nshila, ne bu muakakula Mukelenge nʼandi ne bu muakajukuileye bantu dî mu dina dia Yesu mu Damaseke. Wakadi mu Yelushalema, wakadi ubuela nʼabo, uluhuka nʼabo, wakadi ubajukuila dî mu dina dia Mukelenge; wakadi wakula ne Bena Yuda bakadi bakula muaku wa Bena Gelika, wakadi welangana nʼabo mpata; kadi bakadi bakeba kumushiha. Hakamanya bana babo ba mu Kilisto bualu ebu, bakalua nʼandi ku Kaisalia, bakamutuma ku Tâso. Nunku bena ekelesia ba mu Yudaya yonso ne ba mu Galela ne ba mu Samalea bakadi ne ditalala, bakadi badiunda mu bualu bua Nzambi; bakadi benda mu dishina dia Mukelenge ne mu disamba dia Nyuma Muimpe; bakadi bavulangana ba bungi. Hakadi Petelo wendakana mu nseke yonso, wakahueka kudi basanto bakadi ku Luda. Wakasanganaku muntu, dina diandi Ainea, wakadi mulale ha bulalu buandi bidimu muanda mukulu, bua wakadi ne disama dia kaneke. Petelo wakamuambila ne, Ainea, Yesu Kilisto udi ukukolesha; bika, udilongoluele bulalu buebe. Yeye wakabika lubilu. Bonso ba mu Luda ne ba mu Shalona bakamumona, bakakudimuna mitshima yabo kudi Mukelenge. Mu Yopa muakadi muyidi mukashi, dina diandi Tabita, kukudimuna mu muaku wa Bena Gelika ne, Dôka. Mukashi eu wakadi ne midimu mimpe ya bungi ne luse biakenzelenzeleye bantu, Matuku au disama diakamukuata, wakafua. Hakoweshabo tshitalu tshiandi, bakatshiteka mu nsubu wa ha mutu. Luda wakadi ha buihi ne Yopa; hakunvua bayidi ne, Petelo udi eku, bakamutumina bantu babidi bamusengelela ne, Kushanguluki bua kulua kutudi. Petelo wakabika, wakaya nʼabo. Hakalueye, bakaya nʼandi mu nsubu wa ha mutu. Bakashi bonso ba mu lufuila bakadi bimane ha buihi nʼandi, badila, baleshangana mitelu ne bivualu biakatela Dôka hakadiye nʼabo. Kadi Petelo wakabumusha buonso buabo, wakatua binu hanshi, wakatendelela Nzambi; wakatshinguluka kudi tshitalu, wakamba ne, Tabita, bika. Mukashi wakabulula mesu; hakamoneye Petelo, wakashikama. Petelo wakamukuata ne tshianza, wakamubisha. Hakabikileye basanto ne bakashi ba mu lufuila, wakabalesheye ne muoyo. Bualu ebu buakamanyibua mu musoko wonso wa Yopa, ba bungi bakitabusha Mukelenge. Yeye wakalala matuku a bungi mu Yopa mu nsubu wa mukuonyi wa biseba, dina diandi Simona. Mu Kaisalia muakadi muntu, dina diandi Kônelio, yeye wakadi kapitene ka tshisumbu tshia masalayi lukama, tshiakadibo babikila ne, Tshia Bena Italia. Yeye wakadi mutendeledi muakane, wakadi utshina Nzambi ne ba mu nsubu wandi bonso, wakadi uha bantu bintu bia luse bia bungi, wakadi utendelela Nzambi matuku onso. Hakadi diba bu ha Isatu dilolo, yeye wakamona mu tshikena kumona ku buntu muanjelo wa Nzambi ubuela mudiye, umuambila ne, Kônelio. Hakamujosheye, wakatshina, wakakonka ne, Mukelenge, ntshinyi? Wakamukudimuna ne, Mitendelelu yebe ne bintu biebe bia luse Mutu wahangana diakabanda ku mesu kua Nzambi bu tshivulukidi. Katataka utume bantu ku Yopa, balue ne Simona, dinga dina Petelo; yeye udi ulala mu nsubu wa Simona, mukuonyi wa biseba, nsubu wandi udi kukala kua mai. Hakumuka muanjelo wakadi wakula nʼandi, wakabikila bena mudimu bandi babidi ba mu nsubu ne disalayi dimpe dia bakadi bamukuatshila mudimu matuku onso; hakabalondaleye malu â onso, wakabatuma ku Yopa. Hakatshiabu, hakadibo baya mu nshila, hakambabo kufika ha buihi ne musoko, Petelo wakabanda ha mutu ha nsubu bua kutendelela Nzambi, diba diamba kufika munda munya. Nsala yakamukuata, wakasua kudia; hakadibo balongolola bidia, wakalotakana, wakamona diulu dibuluke ne tshintu bu tshilulu tshinene tshihueka hanshi tshikuata ku nzemba yatshi inai; munda muatshi muakadi nyama yonso ya makama anai ne bintu bidi bidikoka hanshi ne nyunyu ya mulu. Dî diakalua kudiye ne, Petelo, bika, shiha, udie. Kadi Petelo wakamba ne, Nasha, Mukelenge; ku kale tô ne katataka tshiena muanze kudia bintu bia tshianana ne bidi tshijila. Dî diakalua kudiye tshiakabidi ne, Kubikidi tshiakulengeshabo kudi Nzambi ne, Ntshia tshianana. Bakenza nunku misangu isatu, tshintu bu tshilulu tshiakahingana lubilu mulu kabidi. Hakadi Petelo ulubakana mu mutshima wandi, ukeba kumanya bua tshikena kumona tshiakamoneye, tangila, bantu batumibue kudi Kônelio bakadi bimane ku tshibi, bamane kukonka nsubu wa Simona; bebesha ne, Simona, udibo babikila ne, Petelo, udi emu, anyi? Hakadi Petelo welangana meshi a tshikena kumona, Nyuma wakamuambila ne, Tangila, bantu basatu badi bakukeba. Bika, hueka munshi, uye nʼabo; kuedi mpata, bualu bua nakubatuma. Petelo wakahueka munshi muakadibo, wakabambila ne, Meme eu unudi nukeba, nudi baluile tshinyi? Bakamba ne, Kônelio, kapitene ka masalayi lukama, udi muntu muakane udi utshina Nzambi, lumu luandi ludi luimpe ku tshisamba tshionso tshia Bena Yuda; Nzambi wakamudimusha kudi muanjelo wa tshijila bua kukubikileye ulue mu nsubu muandi ne bua kunvueye mei ebe. Nunku wakababikila mu nsubu, wakabalesha ha kulala. Hakatshiabu, wakabika, wakaya nʼabo; bana babo bakuabo ba mu Kilisto ba mu Yopa bakaya kumufila. Bakalala mu nshila; hakatshiabu, bakafika ku Kaisalia. Kônelio wakadi mubatekemene, mumane kubikila ba mu tshiota tshiandi ne balunda bandi. Hakabuela Petelo mu nsubu, Kônelio wakamuakidila, wakadihonena ku makasa andi, wakamukukuila. Kadi Petelo wakamubisha ne, Bika biebe, meme muine ndi anu muntu. Hakadiye wakula nʼandi, wakabuela munda mua nsubu, wakasanganamu bantu ba bungi badisangishe. Wakabambila ne, Nuenu nudi bamanye ne, Bualu bua Muena Yuda kusomba ne muntu wa tshisamba tshikuabo anyi kulueye ha buihi nʼandi budi tshijila; kadi Nzambi wakundesha ne, Kubikidi muntu mukuabo ne, Ngua tshianana, anyi ngua tshijila; ebu mbualu bunakuluila; hakumbikilabo, tshiakuela mpata. Ndi nukonka bunuakumbikidila. Kônelio wakamukudimuna ne, Kuakuata matuku anai, mpa diba edi mene ha isatu, nakadi utendelela Nzambi mu nsubu muanyi; tangila, muntu wakimana ku mpala kuanyi muluate bilulu biengelela, yeye wakangambila ne, Kônelio, bakunvua kutendelela kuebe, Nzambi udi uvuluka bua bintu bia luse biutu wahangana. Tuma dî ku Yopa, ubikile Simona udibo babikila ne, Petelo; yeye udi ulala mu nsubu wa Simona mukuonyi wa biseba udi hehi ne mai. Nunku nakukutumina dî lubilu; wakulua, wakuenza bimpe. Katataka buonso buetu tudi munemu ku mesu kua Nzambi bua kunvua malu onso akukuambila Mukelenge. Petelo wakabulula mukana muandi, wakamba ne, Bulelela, ndi njingulula ne, Nzambi kena ne kansungunsungu, kadi yeye udi witabusha wa mu tshisamba tshionso udi umutshina, udi wenza malu makane. Yeye kabidi wakatumina bana ba Isalele dî, wakabambidila lumu luimpe lua ditalala kudi Yesu Kilisto (yeye udi Mukelenge wa bantu bonso); nuenu mene nudi bamanye dî edi, diakutangalashabo mu nseke yonso ya Yudaya dibangila ku Galela ku nyima kua dibatiza diakambabo kudi Yone; nudi bamanye kabidi bualu bua Yesu wa mu Nazaleta bu muakamuela Nzambi Nyuma Muimpe ne bukole; yeye wakendakana wenza malu mimpe, wondaha ukolesha bonso bakadi bakengeshibua kudi diabolo, bua Nzambi wakadi nʼandi. Tuetu tudi bamanyi ba malu onso akenzeye mu luseke lua Bena Yuda ne mu Yelushalema; bakamushiha mukudika ku mutshi mutshiamakane. Nzambi wakamubisha hakahita matuku asatu; kakamumuenesha kudi bantu bonso, kadi wakamumuenesha anu kudi bamanyi bakasungula Nzambi diambedi, batuetu aba, mbakadia nʼandi, mbakanua nʼandi hakabikeye ku lufu. Yesu wakatuambila bikole ne, Nuambile bantu bualu ebu, nubamanyishe ne, Eu nyeye wakusungudibua kudi Nzambi bua kuikala Mulumbuludi wa badi ne muoyo ne wa bafue. Baprofete bonso badi bamba bualu buandi ne, Muntu yonso wamuitabusha neangate dijimisha dia dibi mu dina diandi. Hakatshidi Petelo wamba mei â, Nyuma Muimpe wakahuekela bonso bakunvua dî. Bena kuitabusha batengula bakadi balue ne Petelo bakakema, bualu bua bakuitshikishila bisamba bia bende kabidi kuha kua Nyuma Muimpe. Bakabunvua bakula mu miaku mikuabo, batumbisha Nzambi. Petelo wakakonka ne, Muntu kai udi mumanye mua kuhidia mai bua kubatijibuabo, bobo bamane kuangata Nyuma Muimpe bu mutudi bangate? Yeye wakamba ne, Babatijibue mu dina dia Yesu Kilisto. Hashishe bakamusengelela bua yeye kushala nʼabo matuku makuabo. Bapostolo ne bana babo ba mu Kilisto bakadi mu Yudaya bakunvua ne, Bisamba bia bende kabidi biakuangata dî dia Nzambi. Hakalua Petelo ku Yelushalema, bakadi batengula bakela nʼandi mpata ne, Wewe wakubuelakana ne bantu bakadi kabai batengula, wakadia nʼabo. Petelo wakabanga kubalondoluela ne, Nakadi mu musoko wa Yopa ntendelela Nzambi; mu kulotakana nakumona tshikena kumona, ntshintu tshihueka bu tshilulu tshinene tshifuma mulu tshikuata ku nzemba yatshi inai, tshiakuhuekela kundi mene. Hanakutshitangila, nakutshijingulula bimpe, nakumona nyama ya makama anai ya ha buloba ne nyama ya mu tshisuku ne bintu bidi bidikoka hanshi ne nyunyu ya mulu. Nakunvua kabidi dî diakungambila ne, Petelo, bika, shiha, udie. Kadi nakuamba ne, Nasha, Mukelenge; tshintu tshia tshianana anyi tshia tshijila katshiena tshianze kubuela mukana muanyi. Kadi dî diakufuma mulu tshiakabidi ne, Kivuishi tshidi tshilengesha kudi Nzambi ne, Ntshianana. Bakenza nunku misangu isatu, bakakoka bintu bionso mulu kabidi. Ha diba adi mene bantu basatu bakadi bimane ku mpala kua nsubu utuakadi, buntumina ku Kaisalia. Nyuma wakungambila ne, Ya nʼabo, kuedi mpata. Bana betu aba to mu Kilisto basambombo bakuya kunfila, luakubuela mu nsubu wa muntu au. Yeye wakutuambila bu muakamoneye muanjelo muimane mu nsubu muandi, umuambila ne, Tuma bantu ku Yopa, balue ne Simona, dinga dina Petelo, yeye neakuambile mei a kukusungila nʼau ne ba mu nsubu webe bonso. Hanakubanga kuakula, Nyuma Muimpe wakabahuekela bu muakutuhuekeleye ku tshibangidilu. Nakuvuluka dî dia Mukelenge diakambeye ne, Bulelela, Yone wakabatiza bantu ne mai, kadi nuenu nenubatijibue mu Nyuma Muimpe. Bikala Nzambi mubahe kuha kuakutuheye hatuakuitabusha Mukelenge Yesu Kilisto, ahu meme nakadi nganyi wa kufuilangana ne Nzambi? Hakunvuabo malu â, bakahua, bakatumbisha Nzambi ne, Nzambi wakuha bisamba bia bendekabidi kukudimuna kua mutshima bua kuikalabo ne muoyo. Bakadi batangadike bualu bua dikenga diakajuka bua lufu lua Stefano bakaya tô ne ku Foinike ne ku Kupulio ne ku Antiokia, bambila anu Bena Yuda dî. Kadi bakuabo bakadi Bena Kupulio ne Bena Kulene, hakafikabo ku Antiokia, bakabanga kuambila Bena Gelika kabidi lumu luimpe lua Mukelenge Yesu. Tshianza tshia Nzambi tshiakadi nʼabo; bantu ba bungi bakitabusha, bakakudimuna mitshima yabo kudi Mukelenge. Lumu luabo luakafika ku matshu a bena ekelesia ba mu Yelushalema; bakatuma Bânaba tô ne ku Antiokia. Hakafikeye, hakamoneye ngasa wa Nzambi, wakasanka; wakakolesha mitshima ya buonso buabo ne, Nunanukile kushala hehi ne Mukelenge ne disuminyina mu mitshima. Bualu bua yeye wakadi muntu muimpe, wakadi mûle tente ne Nyuma Muimpe ne ditabusha; ba bungi bakasangishibua kudi Mukelenge. Bânaba wakaya ku Tâso bua kukeba Shaula. Hakamumoneye, wakalua nʼandi ku Antiokia. Bakadi badisangisha ne bena ekelesia tô tshidimu tshijima, bakayisha bantu ba bungi; mu Antiokia muakabangabo kubikila bayidi ne, Bena Kilisto. Mu matuku â baprofete ba ku Yelushalema bakalua ku Antiokia. Mukuabo, dina diandi Agabo, wakabika biandi, Nyuma mumane kumumanyisha, wakamba ne, Tshiole tshinene netshilue ha buloba buonso. Bulelela, tshiakalua hakadi Kulaudio mu bukelenge. Bayidi bonso, muntu ne tshiakadiye nʼatshi muntu ne tshiakadiye batshi, bakahangidisha bua kukuatshisha nʼabi bana babo ba mu Kilisto ba mu Yudaya; bakenza nunku, bakabituma kudi bakulu mu bianza bia Bânaba ne Shaula. Mu matuku au mukelenge Helode wakakuata bena ekelesia bakuabo bua kubakengesha. Wakashiha Yakobo, muanʼabo ne Yone, ne muele. Hakamoneye ne, Bualu ebu budi busankisha Bena Yuda, wakakuata Petelo kabidi. Matuku au akadi a bidia bidi kabi biela luevene. Hakamukuateye, wakamuela mu nsubu wa lukanu, wakamufila mu bianza bia masalayi dikumi ne asambombo, bua kumulamau; wakasua kulua nʼandi ku mesu kua bantu hashika Kuhita kua Yehowa. Nunku bakalama Petelo mu nsubu wa lukanu, kadi bena ekelesia bakamulombela Nzambi bikole. Hakadi Helode wamba kulua nʼandi, butuku abu mene Petelo wakadi mulale hankatshi ha masalayi abidi, musuika ne nkanu ibidi; ku tshibi kuakadi balami balama nsubu wa lukanu. Tangila, muanjelo wa Mukelenge wakimana ha buihi nʼandi, dinkenka diakatema mu nsubu; wakatuta Petelo ha mbale, wakamubisha ku tulu, wakamba ne, Juka lukasa. Nkanu yakadikohokela ku bianza. Muanjelo wakamuambila ne, Suika mukaba webe, buesha bisabata. Petelo wakenza nunku. Wakamuambila kabidi ne, Ela tshivualu tshiebe hamʼbidi, undonde. Wakaluhuka, wakamulonda; kakamanya ne, Budi muanjelo wenza mbulelela, wakelangana meshi ne, Tshinakumona ntshikena kumona. Hakahitshilabo mu nsubu wa kumudilu ne mu nsubu muibidi, bakafika ku tshibi tshia tshiamu tshia ku mushiku wa mbelu wa nshila wa kuhatuka ku musoko, tshiakadiunzulukila; bakaluhuka; hakayilabo mu musesu umue, muanjelo wakamushîa lukasa. Hakamanya Petelo bualu ebu bimpe, wakamba ne, Bulelela, ndi mumanye katataka ne, Mukelenge wakutuma muanjelo wandi, wakunsungila mu bianza bia Helode ne mu malu onso akatekemena bantu ba Bena Yuda. Hakadiye welangana meshi a bualu ebu, Wakafika ku nsubu wa Malia, mamu wa Yone, wakadi ne dinga dine Mâko; mu nsubu muakadi ba bungi badisangishe, bakadi batendelela Nzambi. Hakakokoleye ku tshibi tshia ku mbelu, mukashi muenji wa mudimu, dina diandi Loda, wakaya kuitaba. Hakunvueye dî dia Petelo, kakunzulula tshibi bualu bua disanka, kadi wakanyema lubilu mu nsubu, wakamba ne, Petelo udi muimane ku tshibi. Bakamuambila ne, Wewe udi muhale. Kadi yeye wakabambila bikole ne, Mbulelela. Bakamba ne, Udi muanjelo wandi. Kadi Petelo wakadi ukokolakokola ku tshibi; hakunzululabo, bakamumona, bakakema. Kadi yeye wakabahoha tshianza ne, Huai; wakabambila bu muakamumusha Mukelenge mu nsubu wa lukanu. Wakamba ne, Nuambile Yakobo ne bana betu ba mu Kilisto malu â. Wakumuka biandi, wakaya ku muaba mukuabo. Hakatshiabu, masalayi akadi ahampakana bikole ne, Petelo udi hanyi? Helode wakamukeba; hakahangeye kumumona, wakebesha balami, wakabalumbuluisha ne, Baye nʼabo bua kubashiha. Yeye wakumuka mu Yudaya, wakahueka ku Kaisalia, wakashikamaku. Bena Tulo ne Bena Sidona bakafikisha Helode munda bikole; hakakuatabo bulunda ne Bulasto, mulami wa bintu bia mukelenge, bakalua kudi Helode ne mutshima umue bua kulengesha nʼandi, bualu bua luseke lua mukelenge luakadi ludisha luseke luabo. Hakafikila dituku diakasungulabo, Helode wakaluata bilulu bia bukelenge, wakashikama ha nkuasa wa butumbi, wakadi ubambila mei mimpe. Bantu bakela mbila ne, Ndi dia nzambi, kandia muntu. Muanjelo wa Mukelenge wakamukuma lukasa, bualu bua yeye kakadi utumbisha Nzambi; tuishi tuakamudia, wakahuola muoyo wandi. Kadi dî dia Nzambi diakadiunda, diakavulangana. Hakashikishabo kufila bintu, Bânaba ne Shaula bakahingana, bafume ku Yelushalema; bakalua ne Yone, dinga dina Mâko. Munkatshi mua bena ekelesia ba mu Antiokia muakadi baprofete ne bayishi, mena abo akadi Bânaba, ne Shimeona muidika ne, Nigê, ne Lukio wa ku Kulene, ne Manaene wakakola ne muloho Helode, ne Shaula. Hakadibo benzela Mukelenge mudimu, hakadibo bajila bia kudia, Nyuma Muimpe wakamba ne, Nungumushile Bânaba ne Shaula ka tshisumbu tshienu bua mudimu unakubabikidila. Hakajilabo bia kudia, hakatendelelabo Nzambi, hakabatentekeshabo bianza ha mitu habo, bakabatuma. Bakahueka ku Seleukia, batumibue kudi Nyuma Muimpe. Bakumukaku, bakasabuka ku tshisanga tshia Kupulio. Hakadibo mu Salami, bakambila bantu dî dia Nzambi mu nsunagoga ya Bena Yuda. Bakadi ne Yone bu mubakuatshishi. Hakahitshilabo mu tshisanga tshionso tô ne ku Pafo, bakasanganamu Muena Yuda, wakadi mutempeshanganyi wa mbuku, dina diandi Bâ-yesu, wakadi muprofete wa mashimi. Wakadi mushikame ne muloho munene, dina diandi Sêgio Paulo, muntu wa lungenyi. Sêgio Paulo wakabikila Bânaba ne Shaula, wakakeba bua kunyua dî dia Nzambi. Kadi Eluma, mutempeshanganyi wa mbuku, bua badi bakudimuna dina diandi nunku, wakabatantamena, wakasua kusesuisha muloho munene ku ditabusha. Kadi Shaula, udi ne dinga dina Paulo, mûle tente ne Nyuma Muimpe, wakamutangila talala, wakamba ne, Wewe, mûle tente ne mashimi ne budimu, muana wa diabolo, udi ne malu makane onso lukuna, kuena ulekela kunyanga nshila milulame ya Mukelenge, anyi? Katataka mona, tshianza tshia Mukelenge tshidi hamʼbidi hebe, newikale mufofo tshituha, kui mumanye mua kutangila diba. Tshibungibungi ne mîdima biakamuhonena lukasa, wakendakana ukeba muntu wa kumulombola ku tshianza. Hakatangila muloho munene bualu ebu, wakitabusha, diyisha dia Mukelenge diakamukemesha. Paulo ne bakadi nʼandi bakumuka ku Pafo, bakasabuka ku Pêge wa mu Pampulia. Kadi Yone wakabalekela, wakahingana ku Yelushalema. Kadi bobo bakumuka ku Pêge bakaya tô ne ku Antiokia wa mu Pisidia; hakalua dituku dia Lumingu lua Bayuda, bakabuela mu nsunagoga, bakashikama. Hakashikishabo kubala mikenshi ya Mose ne mei a baprofete, bakelenge ba mu nsunagoga bakatumina Paulo ne bakadi nʼandi dî ne, Bana betu, binuikala ne dî dia kukolesha nʼadi mitshima ya bantu, ambai. Paulo wakabika, wakabahoha tshianza, wakamba ne, Nuenu, bantu ba Isalele, ne badi batshina Nzambi, unvuai: Nzambi wa tshisamba etshi tshia Isalele wakasungula bankambua betu, wakabisha bantu hakadibo bashikame mu buloba bua Ejipitu, wakabumushamu ne diboko dikole. Bu bidimu makumi anai yeye wakabatuala mu tshihela bu tatu muledi. Hakabutuleye bisamba muanda mutekete mu buloba bua Kanâna, wakabaha buloba buabo bu buhianyi tô bidimu bu nkama inai ne makumi atanu. Hashishe wakabaha balumbuludi tô ne ku muprofete Samuele. Hashishe bakalomba mukelenge; Nzambi wakabaha Shaula, muana wa Kishi, muntu wa mu tshisamba tshia Benyamina, tô bidimu makumi anai. Hakamumusheye, wakabisha Davidi bua kuikaleye nfumu wabo, wakambeye ne, Nakusangana Davidi, muana wa Yishai, muntu udi mutshima wanyi musue, yeye nenze malu onso andi musue. Nzambi wakasungula kankanunuina ka muntu eu, wakakabishila Isalele bu Musungidi, Yesu mene, bu muakabalayeye. Yesu kai muanze kulua, Yone wakadianjila kuambila bantu bonso ba Isalele bualu bua kubatiza kua kukudimuna kua mitshima. Hakamba Yone kushikisha mudimu wandi, wakamba ne, Nudi nuelangana meshi ne, Meme ndi nganyi? Tshiena yeye; kadi tangila, munga ulualua ku nyima kuanyi ngundi tshi ne buakane bua kusulula mionshi ya bisabata biandi. Bana betu, tunkanunuina tua Abalahama, ne ba munkatshi muenu badi batshina Nzambi, bakatutumina tuetu dî dia luhandu elu. Badi mu Yelushalema ne bakelenge habo, bualu bua bobo kabakamumanya, ne kabakamanya mei a baprofete adibo babala Mbingu yonso, bakashikisha mei â hakamuhishabo. Kabakamusangana ne bualu bua kufueye, kadi bakalomba Pilato ne, Bamushihe. Hakashikishabo malu onso akadibo bamufunde, bakamutulula ku mutshi, bakamuladika mu lukita. Kadi Nzambi wakamubisha ku bafue. Bakamumonamona matuku a bungi, bumuka nʼandi mu Galela, baya nʼandi ku Yelushalema, mbobo badi bamanyi bandi katataka ku mesu kua bantu. Tudi tunumanyisha lumu luimpe lua mulayi wakalayabo bankambua betu, ne Nzambi wakashikishila bana betu mulayi eu, hakabisheye Yesu ku lufu; bu muakafundabo mu musambu muibidi ne, Wewe udi Muana wanyi, nakukulela lelu. Ne bua dibisha diandi ku lufu, kai uhingana kashidi bua kuboleye, Nzambi wakamba ne, Nenuhe masanka makane ne a bushua a Davidi. Bualu bua yeye udi wamba mu musambu mukuabo kabidi ne, Kuena ufila Webe wa Tshijila bua kubeleye. Hakashikisha Davidi kuenza mu tshikondo tshiandi malu akasua Nzambi, wakafua, wakajikibua ne bankambua bandi, wakabola; kadi yeye wakabishabo kudi Nzambi kakabola. Nunku bana betu, mimanye bimpe ne, Badi banuambila bua dijimisha dia mibi yenu kudi muntu eu Yesu; ne bua bualu buandi, muntu yonso wamuitabusha udi ubingishibua ku malu onso, akadi mikenshi ya Mose kayi mimanye mua kunubingisha. Dimukai bua bualu buakambabo kudi baprofete kabulu kunudi ne, Nuenu bena dihetu, tangilai, nukeme, nubutuke; Bualu bua ndi ngenza mudimu mu matuku enu, Bianuambila muntu bualu buau, kanuena nuitabusha. Hakadibo baluhuka, bakabatendekena ne, Nutuambile mei â kabidi Lumingu lualua. Hakamuangalaka bantu, Bena Yuda ba bungi ne bitabushi bimpe ba bualu bua Bena Yuda bakalonda Paulo ne Bânaba; bobo bakabambila ne, Nunanukile mu ngasa wa Nzambi. Hakalua Lumingu lukuabo lua Bayuda, bantu bonso ba mu musoko bakadisangisha bua kunvua dî dia Nzambi, anu bakese bakashala. Hakamona Bena Yuda bisumbu bia bantu nunku, bakûlangana tente ne mukau, bakadila mei akadi Paulo wamba, bakamuhenda. Paulo ne Bânaba bakajukuila bantu, bakamba ne, Butuakadi nʼabu mbua kunuambila nuenu dî dia Nzambi diambedi. Kadi bualu bua nuenu nudi nuhidia dî edi, ne nudi nudilumbuluila bualu buenu ne, Katuena bantu bakane ba kuangata muoyo wa tshiendelele, tuetu netuye kudi bantu ba bisamba bia bende. Nunku Mukelenge wakatulela mikenshi ne, Nakukuteka bu munya wa kutemena bantu ba bisamba bia bende, Bua wewe wikale bua luhandu lua bantu tô ne kunfudilu kua buloba. Hakunvua bantu ba bende dî edi, bakasanka, bakatumbisha di dia Nzambi; bakadi basungidibue bua kubahabo muoyo wa tshiendelele bakitabusha. Bakatangalasha dî dia Mukelenge mu luseke alu luonso. Kadi Bena Yuda bakakabila bakashi bimpe bakadi ne butumbi ne bantu banene ba mu musoko, bakabishila Paulo ne Bânaba dikenga, bakabumusha mu luseke luabo. Kadi Ponto ne Bânaba bakabatutuila nsenga ya buloba yakadi mu makasa abo, kakalua ku Ikonio. Bayidi bakadi bûle tente ne disanka ne Nyuma Muimpe. Mu Ikonio bakabuela diakamue mu nsunagoga wa Bena Yuda, bakambila bantu dî diakitabushisha ba bungi, Bena Yuda ne Bena Gelika. Kadi Bena Yuda bakadi bahidia bakavundulula mitshima ya bantu ba bisamba bia bende, bakaivuisha mifike kudi bena kuitabusha. Bakashalamu musangu mule, bakajukuila bantu dî mu Mukelenge, yeye wakajadika dî dia ngasa wandi, hakabaheye bimanyinu ne malu a kukema akenzelabo ne bianza biabo. Kadi bantu ba mu musoko bakadi batahuluke; bakuabo bakadi ku luseke lua Bena Yuda, bakuabo ku luseke lua bapostolo. Hakadisangisha bantu ba bisamba bia bende ne Bena Yuda ne bakelenge babo bua kubenzela bibi ne bua kubakuma mabue, bakamanya bualu abu, bakanyemena ku misoko ya mu Lukaonia, mena ai Luseta ne Dêbe, ne ku luseke alu; bakambaku lumu luimpe. Mu Luseta muakadi mushikame muntu ne makasa andi matekete, mamuʼandi wakamulela mulema nunku, kakanza kuenda. Yeye wakunvua Paulo wakula; Paulo wakamutangila talala; hakamanyeye ne, Yeye udi ne ditabusha dia kukoleshibua, wakela di diandi bikole ne, Imana ne makasa ebe Wakabika lukasa, wakenda. Hakatangila bantu bualu buakenza Paulo, bakela mbila, bamba mu muaku wabo wa luseke lua Lukaonia ne, Nzambi yakuhueka kutudi mifuane bantu. Bakidika Bânaba ne, Yupita; Paulo ne, Mêkulio, bua yeye wakadi muakuidi wa malu. Tshitendelelu tshia Yupita tshiakadi ku mpala kua musoko, mubuki wa Yupita wakalua ne ngombe ne bilongo ku bibi bia musoko, yeye ne bantu bonso bakasua kubashihela nyama ai. Kadi bapostolo Bânaba ne Paulo, hakunvuabo bualu abu, bakadihanda bivualu, bakaya lubilu munkatshi mua tshisumbu tshia bantu, bela dî bikole ne, Balumiana, nudi nuenzela nunku tshinyi? Tuetu tudi bantu bafukibue bu nuenu, tudi banuvuile ne lumu luimpe, bua nuenu nulekele malu â a hatuhu, nulonde Nzambi wa muoyo, wakafuka diulu ne buloba ne mai manene ne bintu bionso bidimu; mu bikondo bia ku nyima yeye wakitabusha bua bisamba bionso bia bende biende mu nshila yakadi mitshima yabo misue. Kadi yeye kakashala kai ne ntemu; wakanuenzela bimpe, wakanuha nvula ne bidimu bia kuvudisha bia kudia bifume mu diulu, wakûsha mitshima yenu tente ne bidia ne disanka. Hakashikishabo mei â, bualu buakadi bukole kudibo bua kukanda bantu ne, Kanutushihedi nyama. Kadi Bena Yuda ba ku Antiokia ne Ikonio bakalua ka Luseta, bakashikila bantu, bakakuma Paulo ne mabue, bakamukoka bamuimasha kukala kua musoko, bela meshi ne, Udi mufue. Kadi hakadi bayidi bimane bamunguile, wakabika, wakaya mu musoko; hakatshiabu, wakaya ne Bânaba ku Dêbe. Hakambilabo bena musoko au bualu bua lumu luimpe, hakavuishabo bantu ba bungi bayidi, bakahingana ku Luseta ne ku Ikonio ne ku Antiokia, benda bakolesha mioyo ya bayidi, babasengelela ne, Nushale mu ditabusha dienu; bua tuetu kubuela mu bukelenge bua Nzambi, anu hawahitshila mu makenga a bungi. Hakasungula Paulo ne Bânaba ekelesia ne ekelesia bakulu, hakatendelelabo Nzambi ne dijila dia bia kudia, bakabashia mu bianza bia Mukelenge wakitabushabo. Bakahitshila mu Pisidia, bakafika mu Pampulia. Hakashikishabo kuamba di mu Pêge, bakahueka ku Atalia. Bakumukaku mu bualu, bakasabuka ku Antiokia, kuakafidibuabo mu ngasa wa Nzambi bua mudimu wakushikishabo. Hakaluabo, hakasangishabo bena ekelesia, bakabalondela malu onso akenza nʼabo Nzambi, ne bua yeye wakunzuluila bisamba bia bende tshibi tshia ditabusha. Bakashalamu musangu mule ne bayidi. Bantu bakuabo bakadi bafume mu Yudaya bakalua, bakadi bayisha bana betu ba mu Kilisto ne, Binuikala kanui batengula bu mu tshilele tshia Mose, kanuena bamanye mua kusungidibua. Hakadi Paulo ne Bânaba nʼabo mpata ne dikonka musangu mule, bana babo ba mu Kilisto bakasungula Paulo ne Bânaba ne bakuabo babo bua kuyabo ku Yelushalema kudi bapostolo ne bakulu bua dikonka edi. Bena ekelesia bakabashindikila, bakahitshila mu Foineke ne Samalea, benda bambila bantu bua kukudimuna kua mitshima kua bisamba bia bende; bakatamba kusankisha mitshima ya bana babo bonso ba mu Kilisto. Hakafikabo ku Yelushalema, bakabitabusha kudi bena ekelesia ne kudi bapostolo ne bakulu; Paulo ne Bânaba bakabambila malu onso akenza nʼabo Nzambi. Kadi bakuabo ba mu luseke lua Bafalese, bakadi bamane kuitabusha, bakabika bamba ne, Butudi nʼabu mbua kutengula ba bisamba bia bende, ne bua kubambila bua kuenzabo mikenshi ya Mose. Bapostolo ne bakulu bakadisangisha bua kulondabo bualu ebu, Hakadibo ne mpata ya bungi, Petelo wakabika, wakabambila ne, Bana betu, nudi bamanye ne, Mu matuku a kai e Nzambi wakasungula munkatshi muenu bua bisamba bia bende biunvue dî dia lumu luimpe mukana muanyi, bitabushe. Nzambi mumanyi wa mu mitshima, wakabavidila, wakabaha Nyuma Muimpe bu muakutuheye bietu: kakatahulula hankatshi hetu nʼabo, wakuvua mitshima yabo ku ditabusha. Katataka nudi nutetshila Nzambi munda tshinyi, bua nudi basue kuteka tshikokedi ha nshingu ya bayidi tshiakadi bankambua betu kabai bamanye mua kutshituala ne tuetu kabidi? Kadi tuetu tudi tuitabusha ne, Tudi tusungidibua ku ngasa wa Mukelenge Yesu muomumue nʼabo. Buonso buabo bakahua, bakatelesha muakadi Bânaba ne Paulo bamba bua bimanyinu ne malu a kukema biakenza nʼabo Nzambi munkatshi mua bisamba bia bende. Hakayabo, Yakobo wakamba ne, Bana betu, teleshai dî dianyi; Simona wakalonda bu muakadianjila Nzambi kumueneka kudi bisamba bia bende bua kusungula munkatshi muabo bantu bua kuikalabo ne dina diandi. Mei a baprofete adi makanangane ne bualu ebu, bu muakafundabo ne, Hashika malu â, nempingane, Nengibake kabidi nsubu wa tshilulu wa Davidi udi muhuke, Nengibake kabidi bituha biandi bidi binyanguke, Nemuimanyike kabidi; Nengenzele nunka bua bantu badi bashale bakebe Mukelenge, Ne bisamba bionso bia bende kabidi badi babikidibua ku dina dianyi; Mukelenge udi Wamba nunku udi umanyisha malu â kale. Bua bualu ebu udi ngamba ne, Katutatshishi ba bisamba bia bende badi bakudimuna mitshima yabo kudi Nzambi; kadi tubafundile mukanda bua kutekelabo bintu bidi bibihisha kudi mpingu, ne bua kutekelabo masandi, ne nyama mifiekela mu nshingu ha kuishiha, ne mashi. Bualu bua Mose kale tô ne katataka udi ne bambi ba malu andi mu nsunagoga ya misoko yonso, badi babala mei andi nunku ku Lumingu ku Lumingu. Hashishe bapostolo ne bakulu ne bena ekelesia bonso bakelangana meshi ne, Mbimpe tusungule ba mu tshisumbu tshietu, tubatume ne Paulo ne Bânaba ku Antiokia; bakatuma nunku Yuda, udi ne dina dikuabo ne, Bâsaba, ne Sila, hakadi bantu banene ba munkatshi mua bana babo ba mu Kilisto. Bakabaha mukanda mufunda nunku ne, Bapostolo ne bana betu badi bakulu badi batumina bana betu ba mu bisamba bia bende mu Antiokia ne mu Sulia ne mu Kilikia muoyo. Bualu bua tuakulua lumu ne, Bakuabo ba munkatshi muetu bakuya kunudi, bakunutatshisha ne mei abo, badi bamba kuona mioyo yenu; tuetu katuakubatuma ne mukenshi kunudi; hatuakuhunga dî dimue, tuakula meshi ne, Mbimpe tusungule bantu, tubatume kunudi ne bana betu bananga, Bânaba ne Paulo, bobo mene bakafila mioyo yabo bualu bua dina dia Mukelenge wetu Yesu Kilisto. Nunku tuakutuma Yuda ne Sila, bobo kabidi nebanuambile mei momumue mukana muabo. Bualu bua Nyuma Muimpe wakamona, ne tuetu kabidi, ne, Kembimpe bia kunutekela bunga bujitu, anu malu atudi nʼau bualu: nulekele bintu bidi bishihela mpingu, nulekele kabidi mashi ne nyama mifiekela mu nshingu ha kuishiha, ne masandi; binualekela malu â, nenuenze bimpe. Nushale ne bukole. Nunku hakalayanganabo nʼabo, bakahueka ku Antiokia, hakasangishabo bantu, bakabaha mubanda. Hakaubalabo, mitshima yabo yakasanka bua disamba diakabasambabo nʼadi. Bualu bua Yuda ne Sila bakadi baprofete, bakambila bantu mei a bungi, bakakolesha mitshima yabo. Hakalelabo kuakua musangu, bana babo ba mu Kilisto bakabahingisha talalâ kudi bakabatuma. [ ] Kadi Paulo ne Bânaba bakashala mu Antiokia, bayisha ne bambila bantu dî dia Mukelenge; bakuabo ba bungi bakadi nʼabo kabidi. Hakahita matuku makuabo, Paulo wakambila Bânaba ne, Tuhingane bua kutangila bana betu ba mu Kilisto ba mu misoko yonso ituakadi tuambila dî dia Mukelenge, tumone ne badi munyi. Bânaba wakasua kuya kabidi ne Yone wakadibo babikila ne, Mâko. Kadi Paulo wakelangana meshi ne, Kembimpe bia kuya ne muntu wakumuka watushîa mu Pampulia, kai muye nʼetu ku mudimu. Hakadibo ne mpata mikole, nunku bakahanduluka, Bânaba wakangata Mâko, wakasabuka nʼandi ku Kupulio. Kadi Paulo wakasungula Sila, wakaya, hakamufilabo mu ngasa wa Mukelenge kudi bana babo ba mu Kilisto. Wakahitshila mu Sulia ne Kilikia wenda ukolesha mitshima ya bena ekelesia. Yeye wakalua kabidi ku Dêbe ne Luseta. Mu Luseta muakadi muyidi, dina diandi Timote, muana wa Muena Yuda mukashi wakadi muena kuitabusha, kadi tatu wandi wakadi Muena Gelika. Yeye mene wakadi ne lumu luimpe lumanyibua kudi bana babo ba mu Kilisto ba mu Luseta ne mu Ikonio. Paulo wakasua aye nʼandi. Wakamuangata, wakamutengula, bualu bua Bena Yuda bakadi mu nseke ai; bua bantu bonso bakamanya ne, Tatu wandi wakadi Muena Gelika. Hakadibo bendakana mu misoko, bakafila mikenshi yakelabo kudi bapostolo ne bakulu ba mu Yelushalema bua kuitumikilabo. Nunku ekelesia yakakoleshibua mu ditabusha, yakadi ivulangana ku dituku ku dituku. Hakabakanda Nyuma Muimpe bua kuamba di dia Nzambi mu Asia, bakahitshila mu luseke lua Fugia ne Galatia. Hakafikabo ha buihi ne Musia, bakakeba kuya mu Bitunia, kadi Nyuma wa Yesu kakitabusha. Hakahitalu hehi ne Musia, bakahueka ku Toa. Tshikena kumona tshiakamueneka kudi Paulo butuku: Muntu wa ku Makedonia wakadi muimane, umutendekena ne, Lua biebe mu Makedonia, utukuatshishe. Hakamoneye tshikena kumona, ha diba adi tuakakeba kuya mu Makedonia, tuelangana meshi ne, Nzambi wakumbikila bua tuetu kubambila lumu luimpe. Hatuakumuka mu Toa, tuakasabuka, baye balulame ku Samotaka; hakatshiabu, tuakafika ku Neapoli; tuakajukamu, tuakaya ku Filipoi, musoko wakadi muhite yonso mikuabo ya mu luseke alu lua Makedonia; musoko eu wakadi nkolonyi wa Bena Lomo; tuakadi tulala mu musoko au matuku. Hakalua dituku dia Lumingu tua Bayuda, tuakahatukila ku tshibuelelu tshia musoko, tuakaya ku muelelu wa musulu, ha muaba utuakela meshi ne, Ngua kutendelela; tuakashikama hanshi, tuakayikila ne bakashi bakadi badisangisheku. Mukashi wakadiku, dina diandi Ludia, wakadi biandi musumbishi wa bilulu bikunze wa ku musoko wa Tuatila, yeye wakadi mutendeledi wa Nzambi, wakunvua dî dietu; Nzambi wakabulula mutshima wandi bua kutumikileye malu akambabo kudi Paulo. Hakamubatizabo ne bakadi mu nsubu muandi, yeye wakatendekena ne, Binuanjingulula ne, Meme udi muena ditabusha mulelela wa Mukelenge, nulue mu nsubu muanyi nushalemu. Wakatuenzesha ne disengelela diandi. Hatuakadi tuya ku muaba wa kutendelela, nsongakashi muhika wakasangakana nʼetu, wakadi ne nyuma mubi wakadi umubukisha, wakamuenesha banfumuʼandi bintu bia bungi bualu bua lubuku luandi. Wakatulonda, tuetu ne Paulo, wela mbila ne, Balume aba mbahika ba Nzambi Mutambe Bunene wa mu diulu, badi banuambila bua nshila wa luhandu. Wakadi wenza nunku matuku a bungi. Kadi hakatata Paulo bikole, wakatshinguluka, wakambila nyuma mubi ne, Ndi nkuambila mu dina dia Yesu Kilisto, umuke munda muandi. Ha diba adi mene wakaluhuka. Kadi hakatangila banfumuʼandi ne, Ditekemena dia luhetu luetu diakumuka, bakakuata Paulo ne Sila, bakakakoka mu tshisalu kudi bantu banene ba musoko. Hakaluabo nʼabo kudi balumbuludi, bakamba ne, Bantu aba mBena Yuda, badi babisha diyoyo dia bungi mu musoko wetu, badi bambila bantu bilele bitudi katu! bamanye mua kuitabusha anyi kuenza, bua tudi Bena Lomo. Tshisumbu tshiabo tshionso tshiakabahungulukila, balumbuludi bakabavula bilulu biabo, bakamba ne, Bubakume ne nkodi. Hakabakumabo mikumu ya bungi, bakababuesha mu nsubu wa lukanu, bakambila mulami bikole ne, Ubalame bimpe. Hakunvueye muakamuambilabo nunku, wakababuesha mu nsubu wakadi munda mua nsubu munene, wakabuesha makasa abo mu miomba. Kadi bakalua bu mundankulu, Paulo ne Sila bakadi batendelela, bakadi bambila Nzambi misambu, bena lukanu bakadi batelesha; buloba buakakanka bikole, bishimikidi bia nsubu wa lukanu biakanyunga, bibi bionso biakunzuluka lukasa, nkanu ya bantu bonso yakadibo babasuike nʼai yakasuluka. Mulami wa nsubu wakatabala; hakamoneye bibi bia nsubu biunzuluke, wakatula muele wandi, wakamba kudishiha, wela meshi ne, Bena lukanu bakunyema. Kadi Paulo wakela dî diandi bikole ne, Kudienzedi bibi, buonso buetu tudiku. Mulami wakalombesha minda, wakabuela mu nsubu uzakala ne buowa, wakahona ku mpala kua Paulo ne Sila, wakabaluhula, wakamba ne, Bakelenge, bundi nʼabu mbua kuenza tshinyi bua kusungidibua? Bakamba ne, Itabusha Mukelenge Yesu, neusungidibue ne ba mu nsubu muebe. Bakamuambila dî dia Mukelenge ne bonso bakadi mu nsubu muandi. Yeye wakabangata ha diba adi mene butuku, wakabuvua ha mibundabunda yabo; bakamubatiza lukasa ne bantu bandi bonso. Wakabanda nʼabo mu nsubu muandi, wakabalongoluela mesa, wakatamba kusanka ne nsubu wandi yonso, bamane kuitabusha Nzambi. Hakatshiabu, balumbuludi bakatuma mpoloto ne dî ne, Balekele bantu aba. Mulami wa nsubu wa lukanu wakamanyisha Paulo mei â ne, Balumbuludi bakutuma bua kunulekela; nunku nuluhuke mpindiu, nuye talala. Kadi Paulo wakabambila ne, Bakatukuma, tuetu Bena Lomo, ku mesu kua bantu; kabai banze kutuhisha mu tshilumbu, bakutubuesha mu nsubu wa lukanu; ne katataka badi basue kutumusha mu busokoko, anyi? Nasha kakese; bobo nkayabo badiluile bua kutuluhula. Mpoloto yakambila balumbuludi mei â; bakatshina, hakunvuabo ne, Badi Bena Lomo; bakalua, bakabatendekena; hakabaluhulabo, bakabasengelela bua kumukabo mu musoko. Hakaluhukabo mu nsubu wa lukanu, bakabuela mu nsubu wa Ludia. Hakamonabo bana babo ba mu Kilisto, bakabakolesha mitshima, bakaya. Hakahitshilabo mu Amfipoli ne Apolonia, bakafika ku Tesalonike, kuakadi nsunagoga wa Bena Yuda. Paulo, bu mu tshilele tshiandi, wakabuelamu nʼabo; Mbingu isatu ya Bayuda wakakulangana nʼabo malu a mu Mukunda wa Nzambi, wakabajinguluilau, wakabambila ne, Buakadi Kilisto nʼabu mbua kukengeye ne kubikeye ku bafue; Yesu eu undi nuambila nKilisto mene. Bakuabo bakitabusha, bakadisangisha ne Paulo ne Sila; tshisumbu tshinene tshia Bena Gelika bakadi batshina Nzambi ne bakashi ba butumbi ba bungi bakenza nunka kabidi. Kadi Bena Yuda bakakuatshika mukau, bakasangisha bena bufuba babi ba ku tshisalu, bakunguisha tshisumbu tshinene tshia bantu, bakabanga kubishisha diyoyo dinene mu musoko, bakabuela mu nsubu wa Yasona ku bukole bakeba kuluhulabo Paulo ne Sila bua kubafilabo kudi bantu. Hakahangabo kubasanganamu, bakakoka Yasona ne bana babo bakuabo ba mu Kilisto ku mpala kua bakelenge ba musoko, bakela mbila ne, Bantu aba bakamana kutombuesha bonso ba ha buloba bakufika kunoko kabidi; Yasona wakababuesha mu nsubu muandi; bantu aba bonso batu benza malu adi ashiha mikenshi ya Kaisa, bamba ne, Mukelenge mukuabo udiku, dina diandi Yesu. Nunku bakalubakasha mitshima ya bantu ne ya bakelenge ba musoko hakuluabo malu â. Hakangatabo tshieya tshia Yasona ne tshia bakuabo, bakabalekela. Bana babo ba mu Kilisto bakatuma Paulo ne Sila lubilu ku Beloya butuku. Hakafikabo aku, bakabuela mu nsunagoga wa Bena Yuda. Kadi bantu aba bakatamba ba mu Tesalonike buimpe, bua bakitabusha dî ne mitshima mimane kulongolola; bakadi badikebela mu Mukanda wa Nzambi ku dituku ku dituku ne, Malu â adi malelela, anyi? Nunku ba bungi bakitabusha, ne Bena Gelika bakashi bakadi ne butumbi, ne balume ba bungi kabidi. Hakamanya Bena Yuda ba mu Tesalonike ne, Paulo udi wamba dî dia Nzambi ku Beloya kabidi, bakaluaku kabidi, bakakankisha bantu, bakabalubakasha. Hashishe bana babo ba ma Kilisto bakatuma Paulo lubilu bua kuyeye tô ne ku mai manene, kadi Sila ne Timote bakashalamu. Bafidi ba Paulo bakamulombola tô ne ku Atena; hakangatabo dî dia Paulo diakatumineye Sila ne Timote bua bobo balue kudiye lukasa, bakaya. Hakadi Paulo muindile ku Atena, mutshima wandi wakatamba kunyingalala hakatangileye musoko mûle tente ne mpingu. Yeye wakasangana ne Bena Yuda ne batendeledi bakane mu nsunagoga, wakasomba ne bakasangakana ngandi mu tshisalu ku dituku ku dituku. Bakuabo ba munkatshi mua bena meshi ba Epikuleo ne ba Stoiko ba alua kuelangana nʼandi mpata. Bakuabo bakakonka ne, Muena tshiakulakula au neambe tshinyi? Bakuabo kabidi bakamba ne, Yeye udi bu muambi wa malu a nzambi ya bende, bualu bua yeye wakadi wamba bua Yesu ne bua dibika dia ku lufu. Bakamukuata ku tshianza, bakamulombola ku Aleopago, bakamukonka ne, Tumanye bietu diyisha edi dihia-dihia diudi wamba, anyi? Bua wewe udi utuambila malu adi mahia-mahia ku matshu etu; ka tudi basue kumanya dijingulula dia malu â. (Bena Atena bonso ne benyi bakadi bashikamemu kabakadi ne diba dia kuenza bualu bukuabo anu bua kuamba anyi bua kunyua bualu buhia-buhia.) Paulo wakimana munkatshi mua Aleopago, wakamba ne, Nuenu Bena Atena, ndi ntangila ne, Mu malu onso nudi nutamba kutshina nzambi yenu. Bualu bua hanakadi mpita mu nshila, ntangila bintu binudi nutendelela, nakasangana kabidi tshioshelu tshiakadi ne dî difundaku ne, Kudi Nzambi udi kai Mumanyibue. Unudi nutendelela kanui bamumanye bimpe, nyeye undi numanyisha. Nzambi wakafuka buloba ne bintu bionso bidihu, bualu bua yeye udi Mukelenge wa diulu ne buloba, katu wikala mu bitendelelu bidi bibaka ku bianza bia bantu. Bianza bia bantu kabiena bimukuatshila mudimu, bu hadiye ne tshintu bualu, bualu bua yeye mene utu waha bantu bonso muoyo ne muhuya ne bintu bionso. Yeye kabidi wakafuka bisamba bionso bia bantu, bafuma mu muntu umue, bua kuikalabo ha buloba buonso; wakatahulula bikondo biabo bidianjile kulongolola diambedi, ne mikalu ya miaba yabo yashikamabo. Wakenza nunku bua bakebe Nzambi, benda babubuta bua kumumonabo, kadi yeye kena nʼetu kule kudi muntu ne muntu. Bualu bua mu Nzambi tudi ne muoyo, tudi tuendakana, tudi luikala; bu muakafunda bafundi benu bakuabo ne, Tuetu kabidi tudi bana bandi. Bua tuetu tudi bana ba Nzambi nunku, kambimpe bia tuetu kuelangana meshi ne, Nzambi udi bu ngolo, anyi argent, anyi dibue, tshidi tshisonga ne lungenyi ne meshi bia bantu. Diambedi Nzambi wakahitshishila bantu bikondo bia buhote buabo hatuhu, kadi katataka yeye udi wela mukenshi ne, Bantu bonso badi kuonso bakudimune mitshima yabo; bua yeye wakasungula dituku didiye ulumbuluisha ba ba buloba mu buakane kudi muntu wakasunguleye. Yeye kabidi wakaha bantu bonso ditabusha dia bualu ebu, bua yeye wakamubisha ku lufu. Hakinvuabo bua dibika dia bafue, bakuabo bakaseka; kadi banga bakamba ne, Netunvue dî diebe kabidi bua bualu ebu. Hashishe, Paulo wakumuka munkatshi muabo. Kadi banga balume bakamulamata, bakitabusha; munkatshi muabo kabidi muakadi Dionusio, umena Aleopago, ne mukashi, dina diandi Damali, ne bakuabo nʼabo. Hakashika malu â, wakumuka mu Atena wakalua ku Kolinto. Wakasanganamu Muena Yuda mukuabo, dina diandi Akula, mulela ku luseke lua Ponto, mufume tshituha tshihi ku Italia, ne mukashi wandi Pisikila, bua Kulaudio wakela mukenshi ne, Bena Yuda bonso bumuke mu Lomo. Paulo wakaya kudibo. Bualu bua mudimu wandi ne wabo wakadi muomumue, wakadi ushikama nʼabo, bakadi benza mudimu, bua bakadi benji ba nsubu ya bilulu. Yeye wakakulangana ne bantu mu nsunagoga ku Lumingu ne ku Lumingu lua Bayuda, wakakeba kuitabushisha Bena Yuda ne Bena Gelika. Hakahueka Sila ne Timote, bafume ku Makedonia, Paulo wakadi wenzeshibua bikole mu kuamba kua dî dia Nzambi, wambila Bena Yuda ne, Yesu udi Kilisto. Hakamutantamenabo ne hakamuhendabo, yeye wakabanyukuila bilulu, wakabambila ne, Mashi enu ikale ha mitu henu, meme tshiena ne bualu; katataka tô ne tshiendelele nenye kudi bisamba bia bende. Wakumukaku, wakabuela mu nsubu wa muntu dina diandi Titio Yusto, wakadi biandi mutendeledi wa Nzambi, nsubu wandi wakadi hehi ne nsunagoga. Kulisipo wakadi ha mutu ha nsunagoga, wakitabusha Mukelenge ne ba mu nsubu wandi bonso; Bena Kolinto ba bungi, hakunvuabo, bakitabusha, bakabatijibua. Mukelenge wakambila Paulo mu tshikena kumona butuku ne, Kutshinyi; kadi amba, kuhû: bualu bua meme udi nʼebe, kakuena muntu wakulenga tshianza bua kukuenzela bibi; bua meme adi ne bantu ba bungi mu musoko eu. Yeye wakashikamaku talala tshidimu tshijima ne ngondo isambombo, uyisha dî dia Nzambi munkatshi muabo. Hakadi Galio muloho munene mu luseke lua Akaya, Bena Yuda bakabika diatshimue, bakatantamena Paulo, bakalua nʼandi ku tshilumbuluidi, bakamba ne, Muntu eu udi witabushisha bantu bua kutendelelabo Nzambi ne tshitendeledi tshidi mikenshi ikanda. Hakamba Paulo kubulula mukana, Galio wakambila Bena Yuda ne, Nuenu Bena Yuda, bu bualu ebu buikale bua bubi anyi bua dikamakama, nakadi kumanya mua kunyua dî dienu; kadi bikala malu â makonka a mei ne a mena ne a mikenshi yenu nkayenu, nuenu mene nuditangidileu; tshiena musue kuikala mulumbuludi wa malu â. Yeye wakabihata ha tshilumbuluidi. Buonso buabo babakuata Sosetene, wakadi ha mutu ha nsunagoga, bakamukumina ku mpala kua tshilumbuluidi. Kadi Galio kakabatshuka bua malu â onso. Hakamana Paulo kulala matuku makuabo a bungi ku nyima kua bualu ebu, wakalayangana ne bana babo ba ma Kilisto, wakumuka ne Pisikila ne Akula, wakabanga kusabuka ku Sulia, mumane kubeya nsuki yandi ku Kenekelea, bua yeye wakadi muditshihe. Bakalua ku Efeso, Paulo wakabashîaku; kadi yeye wakabuela mu nsunagoga, wakakusangana ne Bena Yuda. Hakamulombabo bua kushaleye nʼabo tshinga tshituha, kakitabusha. Kadi hakasanganeye nʼabo, hakambeye ne, Nempingane kunudi kabidi biasua Nzambi, wakumuka ne buatu mu Efeso. Hakafikeye ku Kaisalia, wakabanda ka Yelushalema, wakela bena ekelesia muoyo, wakahueka ku Antiokia. Hakashikameyemu musangu, wakumuka, wakahitshila luseke lua Galatia ne lua Fugia ku nyima, ukolesha mitshima ya bayidi bonso. Muena Yuda mukuabo wakadiku, dina diandi Apolo, mulela ku Alesandelo, wakadi ne ludimi luhehele, yeye wakalua ku Efeso; wakadi ne bukole bua mu Mukanda wa Nzambi. Muntu eu wakadi mulongeshibue bua nshila wa Mukelenge, ne bualu bua mutshima wandi wakadi musankedile, yeye wakadi wamba ne uyisha malu a Yesu bimpe, mumanye anu bua dibatiza dia Yone; wakabanga kuamba dî mu nsunagoga ne dikima. Kadi hakunvua Pisikila ne Akula kuamba kuandi, bakaya nʼandi kuabo, bakamujinguluila bua nshila wa Nzambi biakane. Hakasueye kuya mu Akaya, bana babo ba mu Kilisto bakakolesha mutshima wandi, bakafundila bayidi mukanda bua kumuitabushabo. Hakafikeye, wakatamba kukuatshisha bantu bakadi bamane kuitabusha bua ngasa wa Nzambi; bualu bua wakadi utuisha Bena Yuda bikole ku mesu kua bantu, ubalesha mu Mukanda wa Nzambi ne, Yesu udi Kilisto. Hakadi Apolo mu Kolinto, Paulo wakalua ku Efeso, mumane kuhita mu nseke ya ku mikuna, wakasanganamu bayidi bakuabo; wakabakonka ne, Nuakangata Nyuma Muimpe hanuakitabusha, anyi? Bakamuambila ne, Nasha, katuakunvua ne, Nyuma Muimpe udiku. Yeye wakabakonka kabidi ne, Bakanubatiza mu dibatiza kai? Bakamba ne, Mu dibatiza dia Yone. Paulo wakamba ne, Yone wakadi ubatiza bantu ne dibatiza dia kukudimuna kua mitshima wambila bantu ne, Mbimpe bia nuenu kuitabusha ulualua ku nyima kuanyi, au udi Yesu mene. Hakunvuabo dî edi, bakabatijibua mu dina dia Mukelenge Yesu. Hakabatentekesha Paulo bianza ha mitu habo, Nyuma Muimpe wakabahuekela; bakabanga kuakula mu miaku mikuabo, bamba bualu bua Nzambi. Bantu aba bonso bakadi bu dikumi ne babidi. Paulo wakabuela mu nsunagoga, wakadi ujukuila bantu dî ngondo isatu, wakulangana nʼabo bua kubitabushisha malu a bukelenge bua Nzambi. Kadi bakakolesha bakuabo mitshima yabo, hakahidiabo, bamba mei mabi bua Nshila wa Nzambi ku mesu kua bantu, wakumuka kudibo, wakumusha bayidi munkatshi muabo, wakadi uyisha ku dituku ku difuku mu ekola wa Tulano. Bualu ebu buakenjibua tô bidimu bibidi, nunku bonso bakadi bashikama mu Asia bakunvua dî dia Mukelenge, Bena Yuda ne Bena Gelika. Nzambi wakenza malu makole a kukema ku bianza bia Paulo; nunku bakatuadila basame matuaya ne bitambala biakadiye nʼabi hamʼbidi, mabedi akumuka kudibo, ne nyuma mibi yakumuka munda muabo. Kadi bakuabo bendakanyi ba Bena Yuda, batempeshanganyi ba mbuku, bakatela kabidi mua kubikilabo dina dia Mukelenge Yesu ha bakadi ne nyuma mibi munda, bamba ne, Ndi nkutshihisha mu dina dia Yesu udi Paulo wamba. Bana muanda matekete ba Muena Yuda dina diandi Sekua, muakuidi mimene wa Nzambi, mbakadi benza nunku. Nyuma mubi wakabakudimuna ne, Ndi mumanye Yesu, ndi mumanye bua Paulo kadi nuenu mbanganyi? Muntu wakadi ne nyuma mubi munda wakabuhukila, wakubatamba bubidi buabo, wakabatekesha; bakanyema mu nsubu muakadibo, butaka ne batahika mputa hamʼbidi. Bualu ebu buakadi bumanyibua kudi bonso, ne Bena Yuda ne Bena Gelika, bakadi bashikama mu Efeso; buowa buakakuata buonso buabo, dina dia Mukelenge Yesu diakadi ditumbishibua. Ba bungi kabidi bakadi bitabushe diambedi bakadi balua, batonda basokolola malu abo. Bena matempu ba bungi bakasangisha mikanda yabo, bakayosha ku mesu kua bantu bonso. Bakabala mushinga wai, bakausangana muikale bituha bia argent mbombo itanu. Nunku dî dia Nzambi diakadiundadiunda bikole, diakatamba. Hakashika malu â, Paulo wakahangidisha bua kuhitshila mu Makedonia ne Akaya bua kuyeye ku Yelushalema, wamba ne, Hangikalaku, bundi nʼabu mbua kuya kumona Lomo kabidi. Hakatumeye babidi ba mu bakadi bamukuatshisha, Timote ne Elasto, ku Makedonia, yeye nkayandi wakashala mu Asia tshituha. Mu matuku au diyoyo dia bungi diakabika bualu bua Nshila wa Nzambi. Muntu mukuabo wakadiku, dina diandi Demetelio, wakadi biandi mutudi wa biamu bia argent, yeye wakadi wenza tusubu tua argent tufuanyikisha bu tshitendelelu tshia Atemise, wakadi uha batudi bakuabo mudimu wa bungi. Yeye wakabasangisha ne bakuabo bakadi ne mudimu wabo muomumue, wakabambila ne, Bana betu, nudi bamanye ne, Ku mudimu eu nkutudi tuhetela biuma bietu. Nudi nutangila, nudi nunvua ne, Nasha mu Efeso nkayamu, kadi mu luseke luonso lua Asia, anu tuaba tukese tudi tushala, Paulo eu wakitabushisha bantu ba bungi wakabakudimusha mitshima yabo, wamba ne, Nzambi idi nuenza ne bianza kayena Nzambi. Kakuena anu bualu ebu bua kutshina ne, Lumu lua mudimu wetu ludi luamba kulua lubi nkayalu, kadi bua ntempelo wa nzambi mukashi munene Atemise neabadibue ne, Ntshianana, ne bua yeye neumushibue ku butumbi buandi, ngudi bantu bonso ba mu Asia ne ba ha buloba bonso batendelela. Hakunvuabo dî adi, bakûlangana ne tshishi, bakadi bela mbila ne, Atemise wa Bena Efeso ke udi munene! Musoko wakûla tente ne diyoyo; hakakuatabo Gayo ne Alistâko, bantu ba ku Makedonia, bafidi ba Paulo ku luendu luandi, bakanyemena hohamue mu muaba wa tshitangidilu tshia malu. Hakasua Paulo kubuela muakadi bantu aba, bayidi kabakitabusha. Bantu banene bakuabo ba mu Asia, balunda bandi, bakamutumina dî bakadi bamusengelela ne, Kudibueledi mu muaba au wa tshitangidilu. Bakuabo bakadi bela dî dikuabo, bakuabo dî dikuabo; musumba wonso wakadi anu diyoyo; ba bungi kabakamanya bualu buakadibo bunguila. Bakasungula Alesandelo mu musumba wabo, Bena Yuda bakamutuma ku mpala. Alesandelo wakabahoha tshianza, wakamba kudividila ku mesu kua bantu. Kadi hakamanyabo ne, Yeye udi Muena Yuda, buonso buabo bakela mbila ne di dimue tô bituha bia diba bibidi ne, Atemise wa Bena Efeso ke udi munene! Hakuholesha mufundi wa musoko musumba wa bantu, wakabambila ne, Nuenu Bena Efeso, muntu kai udiku udi kai mumanye ne, Musoko wa Bena Efeso udi mulami wa tshitendelelu tshia Atemise munene, ne wa tshifuanyikishi tshiandi tshiakahona tshifume kudi Yupita? Bua bantu kabena bamanye mua kudiula dî edi, mbimpe bia nuenu nushikame talala, kanuenji bualu lubilu. Nuenu nuakulua kunoko ne bantu aba, kabai banze kunyenga bintu bia mu bitemielelu, kabai banze kuhenda nzambi wetu mukashi. Nunku Demetelio ne bena mudimu nʼandi, bikalabo ne muntu tshilumbu, matuku a kulumbulula adiku ne balumbuludi badiku, baye kubandanganaku. Kadi binuakeba bunga bualu, nebabushikishe mu disangisha didi dijalama ne mikenshi. Bulelela, tudi mua kubandibua bua diyoyo dia lelu, bua kadi ne bualu buadi, katuena bamanye mua kuamba budi musumba eu mungele. Hakambeye nunku, wakamuangalasha disangisha. Hakashika diyoyo, Paulo wakabikila bayidi, wakakolesha mitshima yabo, wakabalaya, wakumuka bua kuya mu Makedonia. Hakahitshileye mu nseke ai, hakakolesheye mitshima yabo ne mei a bungi, wakalua mu Gelika. Hakalaleyeku ngondo isatu, ne Bena Yuda bamane kumuelela tshifufu hakadiye wamba kusabuka ku Sulia, yeye wakadisunguila bua buhingana ku Makedonia. Bakadi bamufila ku Asia bakadi Sopato wa ku Beloya, muana wa Pulo; ne Bena Tesalonike, Alistâko ne Sekundo; ne Gayo wa ku Dêbe; ne Timote; ne Tukiko ne Tofimo ba ku Asia. Bantu aba bakadianjila kuya ku mpala, bakadi batuindila mu Toa. Hakashika matuku a bidia bidi kabi biela luevene, tuakumuka mu Filipoi, tuakabuela mu buatu; hakahita matuku atanu, tuakafika ku Toa kuakadibo; tuakalalaku matuku muanda mutekete. Hakalua dituka dia kumudilu dia lumingu, hatuakadisangisha bua kutshibula bidia, Paulo wakadi wakulangana nʼabo; buala bua wakasua kumuka hatshiabu, wakadi ulehesha mei andi tô ne mundankulu. Minda ya bungi yakadi mu nsubu wa mulu mutuakadi basangishile. Nsongalume, dina diandi Eutuko, wakadi mushikamine ha madidishi, wakadi ubunga tulu; bualu bua Paulo wakadi wakula musangu mule, tulu tukole tuakamukuata, wakahona hanshi mu nsubu muisatu mulungakasha, bakamuambula mufue. Paulo wakatuluka munshi, wakadiela hamʼbidi handi, wakamûhukila, wakamba ne, Kanuteki diyoyo, udi ne muoyo munda. Hakabandeye mulu kabidi, hakatshibuleye bidia, hakadieye, hakakuleye musangu mule tô ne hakatshiabu, wakumuka. Bakalua ne nsongalume muikale ne muoyo, mitshima yabo yakatamba kusanka. Tuetu tuakadianjila ku buabi, tuakaya ku Aso, tuela meshi ne, Netuheteku Paulo, bua yeye wakadi muambe nunku, yoyo wakasua kuyilaku ku makasa. Hakatusanganeye ku Aso, bakamubuesha mu buatu, tuakalua ku Mitulene. Tua kumukaku mu buatu; hakatshiabu, tuakafika hehi ne Kio; hakatshiabu kabidi, tuakafika ku Samo; hakatshia dinga difuku, tuakalua ku Mileto. Kadi Paulo wakamana kudisunguila bua kuhita Efeso, bua kakasua kulehesha matuku mu Asia; wakadi uya lukasa ne, Binamanya mua kufika ku Yelushalema ha dituku dia Pentekoste. Hakadi Paulo mu Mileto, wakatuma dî ku Efeso, wakabikila bakulu ba ekelesia. Hakaluabo kudiye, wakabambila ne, Nuenu nudi bamanye bienzedi bianyi binakadi nʼabi munkatshi muenu matuku onso, ku difuku dia kumudilu dinakadiata makasa anyi mu Asia tô ne katataka, nakadi nkuatshila Mukelenge mudimu wandi ne buhuekele buonso ne binsonshi ku mesu ne makenga akalua kundi bualu bua bifufu bia Bena Yuda. Nudi bamanye ne, Tshiakatshina bua kunuambila malu onso akamanya mua kunukuatshisha ne bua kunuyisha hadi bantu bunguile, ne ku nsubu ne ku nsubu, ngambila Bena Yuda ne Bena Gelika bua kukudimunabo mitshima kudi Nzambi ne bua kuitabushabo Mukelenge wetu Yesu Kilisto. Katataka nyaya ne mutshima wanyi musuika ku Yelushalema, tshi mumanye malu aluaku kundi, kadi Nyuma Muimpe udi unmanyisha mu misoko yonso ne, Nkanu ne makenga bidi bikuindila. Kadi tshiena mbala muoyo wanyi bu tshintu tshia mushinga mukole kundi, binamanya mua kushikisha tshidikishilu tshianyi tshia lubilu ne mudimu unakuangata kudi Mukelenge Yesu wa kumanyisha bantu lumu luimpe lua ngasa wa Nzambi. Katataka, monai, ndi mumanye ne, Buonso buenu banakadi ngendakana ngambila bualu bua bukelenge bua Nzambi kanuena nutangila mpala wanyi kabidi. Nunku bua bualu ebu ndi nuambila lelu ne, Ndi mbingishibua ku mashi a bantu bonso. Tshiakatshina bua kunuambila malu onso adi Nzambi musue. Nuditangile bienu bimpe, ne tshisumbu tshionso tshiakanutekelabo batangidi kudi Nyuma Muimpe, nudishe ekelesia wa Mukelenge wakasumbeye ku mashi andi. Ndi mumanye ne, Hanumuka bianyi, nkashama idi ne luonji neilue munkatshi muenu, neyone tshisumbu tshia mikoko; bantu nebabike munkatshi muenu mene, bambila bantu malu adi kâi malelela bua kukokabo bayidi ku nyima kuabo. Nunku dimukai, neuluke bu munakadi tshi mulekele tô bidimu bisatu bua kunudimusha muntu ne muntu butuku ne munya ne binsonshi ku mesu. Katataka ndi nufila mu bianza bia Nzambi ne mu dî dia ngasa wandi didi dimanye mua kunudiundisha ne mua kunuha buhianyi munkatshi mua bonso badi balengeshibue. Mutshima wanyi kawakukuma ku argent wa muntu, anyi ku ngolo wandi, anyi ku bilulu biandi. Nuenu nudi bamanye ne, Bianza bianyi ebi biakankuatshisha ne bakadi nʼanyi bua bintu bituakadi nʼabi bualu. Mu malu onso nakunulesha tshifuanyikishi bu munudi mua kuenza mudimu bua kukuatshisha badi batekete, ne bua nuenu kuvuluka mei a Mukelenge Yesu akambeye ne, Kuha kudi kutamba kuangata kusankisha muntu. Hakambeye nunku, wakatua binu hanshi, wakatendelela Nzambi ne buonso buabo, Buonso buabo bakadila bikole, bakela Paulo bituha ku nshingu, bakamutua mishiku, mitshima yabo yakatamba kunyingalala bua dî diakambeye ne, Kanuena nutangila mpala wanyi kabidi. Bakamushindikila ku buatu. Hatuakumuka ne buatu, bamane kuhanduluka nʼabo, tuakaya balulame tô ne ku Kosa; hakatshiabu, nakafika ku Lodo; tuakumukamu, nakuya ku Palala. Hatuakasangana buatu bukuabo bukadi ha kusabuka ku Foinike, nakabuelamu, nakaya. Hatuakatangila Kupulio, tuakamushîa ku tshianza tshia luboko; tuakasabuka ku Sulia, nakahueka ku Tulo bua bena buatu bakasua kuhatulaku bintu. Hatuakamona bayidi, tuakalalamu matuku muanda mutekete. Bantu aba, bamane kumanyishibua kudi Nyuma, bakambila Paulo ne, Kubandi ku Yelushalema. Hatuakashikisha kulalamu matuku, nakumuka, tuakaya ku luendu luetu; buonso buabo, ne bakashi ne bana, bakatushindikila tô ne hatuakahatuka mu musoko; hatuakatua binu kukala kua mai, nakatendelela Nzambi, tuakalayangana nʼabo. Tuakabuela mu buatu, kadi bobo bakahingana kuabo. Hatuakashikisha luendu lutuakafuma nʼalu ku Tulo, tuakafika ku Tolemai, nakelangana ne bana betu muoyo, tuakalala nʼabo difuku dimue. Hakatshiabu, tuakumuka tuakalua ku Kaisalia. Hatuakabuela mu nsubu wa Filipo, muambi wa Lumu Luimpe umue wabo wa bulami muanda mutekete, tuakalala kuandi. Yeye wakadi ne bana bakashi banai bakatshidi tumama, bakadi bamba malu akadi kâi manze kulua. Hatuakadi balalemu matuku makuabo, muprofete, dina diandi Agabo, mufume ku Yudaya, wakahueka ku Kaisalia. Hakalueye kutudi, wakangata mukaba wa Paulo, wakadisuika nʼau ku makasa ne ku bianza, wakamba ne, Nyuma Muimpe udi wamba ne, Bena Yuda ba mu Yelushalema nebasuike muena mukaba eu nunku, nebamufile mu bianza bia bantu ba bende. Hatuakunvua malu â, tuetu ne bena ha muaba au tuakadi tumusengelela ne, Kubandi ku Yelushalema. Kadi Paulo wakatuebesha ne, Nudi nuenzela nunku tshinyi, nudila numpandisha mutshima wanyi? Ndi mumane kudilongolola, kembua kusuikibua nkayaku, kadi bua kufua kabidi ku Yelushalema bua dina dia Mukelenge Yesu. Hakahidieye kuitabusha, tuakalekela, tuakamba ne, Bualu budi Mukelenge musue buenjibue. Hakashika matuku â, tuakalongolola bintu bietu, tuakabanda ku Yelushalema. Ba munkatshi mua bayidi ba mu Kaisalia bakabanda nʼetu, balue ne Nasona, Muena Kupulio, muyidi wa kale, muena kuandi kutuaya kulala. Hatuakafika mu Yelushalema, bana betu la mu Kilisto bakatusankidila. Hakatshiabu, Paulo wakaya nʼetu kudi Yakobo; bakulu bonso bakadiku. Hakabeleye muoyo, wakabalondela bualu ne bualu akenza Nzambi munkatshi mua bisamba bia bende ku mudimu wandi. Hakunvuabo bualu abu, bakatumbisha Nzambi, bakamuambila ne, Muanʼetu, wewe udi utangila bungi bua mbombo ya ba munkatshi mua Bena Yuda badi bamane kuitabusha; kadi buonso buabo badi ne lukunukunu lua mikenshi ya Mose. Bakunvua lumu luebe ne, Wewe udi uyisha Bena Yuda bonso badi munkatshi mua bisamba bia bende bua kulekelabo Mose; udi ubambila ne, Kanutengudi bana benu, kanuenji bilele bia diambedi. Nunku netuenze tshinyi? Nebunvue bulelela ne, Wewe wakulua. Ka, enza bualu ebu bu mutudi tukuambila: Tudi ne balume banai badi baditshiha; ubangate, udilengesha nʼabo, ubafutshile bua bobo bamanye mua kubeya nsuki yabo; nunku, bonso nebamanye ne, Malu atuakunvua bua bualu buebe kêna malelela, kadi wewe udi wenda mululame, udi wenza mikenshi ya Mose. Kadi bualu bua bantu ba bisamba bia bende bakamana kuitabusha, tuakabatumina mukanda, bahunge dî dietu ne, Nulekele bintu bidi bishihela mpingu, nulekele kabidi mashi, ne nyama mifiekela mu nshingu ha kuishiha, ne masandi. Hashishe Paulo wakangata bantu aba, hakatshiabu wakadilengesha nʼabo, wakabuela mu ntempelo, umanyisha bakuidi ba Nzambi bua dishika dia matuku a kudilengesha kuabo; wakashalamu tô ne hakafilabo mulambu wa muntu ne muntu. Hakamba matuku au muanda mutekete kushika, Bena Yuda ba mu Asia, hakamumonabo mu ntempelo, bakashikila tshisumbu tshionso tshia bantu, bakamukuata, bela mbila ne, Bena Isalele, nutukuatshishe, kayeu muntu udi uyisha bantu bonso kuonso bua kuhidiabo tshisamba tshietu ne mikenshi ya Mose ne muaba eu; bualu bukuabo, yeye wakulua ne Bena Gelika mu ntempelo, wakona muaba eu wa tshijila. Bualu bua bakumumona diambedi wenda mu musoko ne Tofimo, muena Efeso, bakela meshi ne, Paulo wakulua nʼandi mu ntempelo. Diyoyo diakadi mu musoko mujima, bantu bakunguila, bakakuata Paulo, bakabanga kumumusha ku bukole mu ntempelo, bibi biakinshidibua lukasa. Hakadibo bakeba kumushiha, lumu luakafika kudi kamanda ka tshisumbu tshia masalayi ne. Musoko mujima wa Yelushalema udi mujikuka ne mutoyi. Yeye wakangata masalayi ne tupitene lubilu, wakanyema kudibo. Hakamonabo kamanda ne masalayi, bakalekela kukuma Paulo. Hashishe kamanda wakasemena hehi, wakamukuata, wakamba bua kumusuikabo ne nkanu ibidi, wakabanga kubebesha ne, Udi nganyi? Wakuenza tshinyi? Bakuabo ba mu tshisumbu bakela mbila, mukuabo dî dikuabo mukuabo dî dikuabo; hakahangeye kujingulula bimpe bualu bua diyoyo, wakamba bua kuluabo nʼandi mu nsubu wa masalayi. Hakafikeye ha tshibandilu, masalayi akamuambula, bualu bua luonji lua bantu, bua tshisumbu tshia bantu bakadi babalonda bela mbila ne, Bamumushe. Hakambabo kubuela mu nsubu wa masalayi ne Paulo, yeye wakebesha kamanda ne, Nkuambile dî, anyi? Kamanda wakamukonka ne, Ahu udi mumanye muaku wa Bena Gelika, anyi? Wewe ke Muena Ejipitu wakajudisha ditomboka mu matuku a diambedi, mulombole bantu binunu binai ba Batahianganyi mu tshihela, anyi? Kadi Paulo wakamba ne, Ndi Muena Yuda wa ku Tâso wa mu Kilikia, ndi bianyi wa musoko udi kawi wa hatuhu. Ndi nkutendekena bua meme kuambila bantu aba dî. Hakitabusheye, Paulo wakimana ha tshibandilu, wakahoha bantu tshianza; hakahuabo talala, yeye wakabambila di mu muaku wa Bena Ebelu, wakamba ne, Bana betu ne batatu, unvuai divila dianyi dindi musue kunuambila katataka. Hakamunvuabo ubambila dî mu muaku wa Bena Ebelu, bakatamba kuhua talala. Yeye wakamba ne, Ndi bianyi Muena Yuda, nakaledibua mu Tâso wa mu Kilikia, kadi nakakolela mu musoko eu, ku makasa a Gamaliele; bakanyisha bu mudi tshilele mene tshia mikenshi ya bankambua betu, muikale ne lukunukunu lua bualu bua Nzambi bu munudi nʼalu buonso buenu lelu. Nakakengesha Nshila eu tô ne ku lufu, nsuika balume ne bakashi, mbabuesha mu nsubu ya lukanu. Muakuidi munene wa Nzambi udi udidila ne bakulu bonso; nakangata mikanda kudibo mitumine bana betu, nakadi ngenda mu nshila wa ku Damaseke bua kusuika bakadiku mu nkanu, ne bua kulua nʼabo ku Yelushalema bua kubakengeshabo. Hanakadi ngenda nunku, hanakafika ha buihi ne Damaseke, hakadi diba munda munya, munya mukole wa mu diulu wakantemena lukasa. Nakahona hanshi, nakunvua dî dingambila ne, Shaula, Shaula, udi unkengesha meme tshinyi? Nakamukudimuna dî ne, Mukelenge, wewe udi nganyi? Yeye wakungambila ne, Ndi bianyi Yesu wa ku Nazaleta ûdi ukengesha. Bakadi nʼanyi bakatangila munya bulelela, kadi kabakajingulula dî dia wakadi wakula nʼanyi. Nakamukonka ne, Mukelenge, nengenze tshinyi? Mukelenge wakangambila ne, Bika, uye mu Damaseke, nebakuambilemu malu onso akukusunguilabo bua wewe kuenza. Hanakadi tshi mumanye mua kutangila bualu bua bukole hua munya au, bakadi nʼanyi bakankuata ku tshianza balombola, nunku nakafika ku Damaseke. Muntu mukuabo wakadimu, dina diandi Anania, wakadi mutendeledi muakane utumikile mikenshi ya Mose, lumu luandi luakadi luimpe munkatshi mua Bena Yuda bonso bakadi bashikamemu; yeye wakalua kundi, wakimana ba buihi nʼanyi, wakangambila ne, Muanʼetu Shaula, tabala. Ha diba adi mene nakatabala, nakamumona. Yeye wakamba ne, Nzambi wa bankambua betu wakakusungula bua wewe kumanya budiye musue, ne bua wewe kutangila Udi Muakane, ne bua wewe kunvua dî dia mukana muandi. Bua wewe newikale mumanyishi wandi kudi bantu bonso wa malu awakutangila ne awakunvua. Udi ushangulukila katataka tshinyi? Bika ubatijibua, uvuibue ku mibi yebe, Ubikila dina diandi. Hanakahingana ku Yelushalema, hanakadi ntendelela Nzambi mu ntempelo, nakalotakana, nakamumona ungambila ne, Umuka mu Yelushalema lubilu, bua kabena bitabusha dî diudi wamba bua bualu buanyi. Nakamba ne, Mukelenge, bobo badi bamanye munakadi mbuesha bakakuitabusha mu nsubu wa lukanu ne munakadi mbakuma mu nsunagoga yonso; hakadibo bamatshisha mashi a Stefano, mumanyishi wa bualu buebe, meme kabidi nakadi ngimana ba buihi, ngitabusha buala ebu, ndama bivualu bia bamushiha Yeye wakangambila ne, Umuke munemu, bualu bua nenkutume kuakua kule kudi bisamba bia bende. Bakadi bamutelesha tô ne hakambeye dî edi; hashishe bakabandisha mei ne, Bumusha muntu eu ha buloba, kabiakadi bimpe bia yeye kuikala ne muoyo. Hakadibo bela mbila bikole, bakavula bivalu, bakela buloba mulu. Hakadibo benza nunku, kamanda ka masalayi wakamba bua kuluabo nʼandi mu nsubu wa masalayi, wakamba kabidi bua kumukumabo alonde bua kumanyeye buakamuelelabo mbila nunku. Hakamusuikabo mionshi, Paulo wakebesha kapitene ka masalayi lukama wakadi muimane ha buihi ne, Nudi ne bukole bua kukuma muntu udi Muena Lomo, kabai banze kumuhisha, anyi? Hakunvua kapitene dî edi, wakaya kudi kamanda, wakamuambila ne, Udi wamba kuenza tshinyi? Muntu eu udi Muena Lomo. Kamanda wakalua, wakamukonka ne, Ungambile, udi Muena Lomo, anyi? Yeye wakitaba ne, E. Kamanda wakamuambila ne, Nakasumba budishikaminyi ebu ku mushinga mukole. Paulo wakamuambila ne, Biadi meme nakaledibua Muena Lomo. Bakadi bamba kumutondesha ku kukole bakumuka kudiye lubilu; ne kamanda kabidi wakatshina hakamumanyeye ne, Udi Muena Lomo, ne bua hakadiye mumusuike. Kadi hakatshiabu, bualu bua wakasua kumanya bimpe tshiakamubandilabo kudi Bena Yuda, kamanda wakamusulula, wakamba bua bakuidi banene ba Nzambi ne balumbuludi bonso kudisangishabo, wakahueka ne Paulo, wakamushikika ku mpala kuabo. Paulo wakatangila balumbuludi talala, wakamba ne Bana betu, nakadi muikale ne mutshima muakane ku mesu kua Nzambi tô ne ku dituku edi. Muakuidi mimene wa Nzambi, dinu diandi Anania, wakambila bakadi bimane ha buihi ngandi bua kumukumabo ku mishiku. Hashishe, Paulo wakamuambila ne, Nzambi neakukume, wewe tshimanu tshia nsubu tshidi tshitokesha; udi mushikame undumbuluisha bu mudi mukenshi, kadi wewe wakubangila bua kunkumabo bu mudi kamui mukenshi, munyi? Bakadi bimane ha buihi ne Paulo bakamuebesha ne, Udi uhenda muakuidi mimene wa Nzambi, anyi? Paulo wakamba ne, Bana betu, tshiakamanya ne, Yeye udi muakuidi manene wa Nzambi, bua bakafunda ne, Kuhendi mukokeshi wa tshisamba tshiebe. Kadi hakamanya Paulo ne, Bakuabo mBasadoke, bakuabo mBafalese, wakela dî dikole ha tshilumbuluidi ne, Bana betu, Edi bianyi Mufalese, udi muana wa Mufalese; badi bandumbuluishila bua ditekemena ne bua dibika dia befue. Hakambeye nunku, mpata yakajuka hankatshi ha Bafalese ne Basadoke, tshisumbu tshiabo tshiakatahuluka, bualu bua Basadoke batu bamba ne, Kakuena dibika dia bafue anyi muanjelo anyi nyuma; kadi Bafalese badi bitabusha ne, Malu â onso adiku. Diyoyo dia bungi diakajuka; bafundi bakuabo ba ku luseke lua Bafalese bakadi batayika bikole ne, Katuena bamone muntu eu ne bualu, ne nyuma wakumuambila dî, anyi ne muanjelo? Hakajuka mpata minene nunku, kamanda wakatshina ne, Paulo neatuanyibue, wakambila masalayi bua kuyau kumumusha munkatshi muabo ku bukole ne bua kuluau nʼandi mu nsubu wa masalayi. Hakila butuku, Mukelenge wakimana ha buihi nʼandi, wakamba ne, Kolesha mutshima webe; bu muwakuamba bualu buanyi mu Yelushalema, nunku bûdi nʼabu mbua kubuamba mu Lomo kabidi. Hakatshiabu, Bena Yuda bakasangisha dî diabo, bakadiela mulau ne, Katuena tudia, katuena tunua, tô ne hatuashiha Paulo. Bakadi bele tshifufu nunku bakadi batambe ha makumi anai. Bakalua kudi bakuidi banene ba Nzambi ne kudi bakulu, bakamba ne, Tuakusangisha dî dietu, badiele mulau mukole, ne, Katuena tulabula tshintu, tô ne hatuashiha Paulo. Katataka nuenu ne balumbuludi nuambile kamanda bua yeye kulua nʼandi kunudi, bu badi basue kumanya bualu buandi bimpe; tuetu tudi bamane kudilongolola bua kumushiha diambedi yeye kai muanze kulua ha buihi. Kadi muana mulume wa muanʼabo ne Paulo mukashi wakunvua bualu bua kualamina kuabo, wakalua, wakabuela mu nsubu wa masalayi, wakambila Paulo. Paulo wakabikila kapitene kakuabo kudiye, wakamuambila ne, Ya ne nsongalume eu kudi kamanda, bua yeye udi ne dî dia kumuambila. Nunku kapitene wakamuangata, wakaya nʼandi kudi kamanda, wakamuambila ne, Paulo, muena lukanu, wakumbikila kudiye, wakungambila bua kulua ne nsongalume eu kûdi, udi ne dî dia kukuambila. Kamanda wakamukuata ku tshianza, wakaya nʼandi ha nkayandi, wakabanga kumuebesha mu busokoko ne, Udi ne dî kai dia kungambila? Yeye wakamba ne, Bena Yuda bakasangisha dî diabo bua kukuebesha bua wewe kulua ne Paulo makelela ha tshilumbuluidi, bu wewe udi musue kumuebesha bualu buandi kabidi bimpe. Kuitabushi dî diabo, bua balume batambe makumi anai ba munkatshi muabo badi bamualamine, bamane kusangisha dî ne kudiela mulau ne, Katuena tudia, katuena tunua, to ne hatuamushiha; katataka badi badilongolole, batekemene dî diebe. Nunku kamanda wakatuma nsongalume, wakamuambila ne, Kuambidi muntu mukuabo bu muwakunsokoluela malu â. Kamanda wakabikila tupitene tubidi, wakabambila ne, Nulongolole masalayi nkama ibidi bua kuyau tô ne ku Kaisalia, abike butuku ebu diba ha tshitema, ne masalayi adi enda ha tubalu makumi muanda mutekete, ne bena mafuma nkama ibidi; wakabambila kabidi bua kuangatabo tubalu tua kushikikahu Paulo bamufikishe bimpe kudi ngovena Felika. Yeye wakafunda mukanda, nunku ne, Kulaudio Lusia udi utumina ngovena wa butumbi Felika muoyo. Bena Yuda bakakuata muntu eu, bakamba kumushiha; kadi nakalua kudibo ne masalayi, nakamusungila, mumane kunvua ne, Udi Muena Lomo. Bualu bua nakasua kumanya bimpe tshiakamubandilabo, nakaya nʼandi ku tshilumbuluidi tshiabo. Nakamusangana mubandibue anu bua makonka a mikenshi yabo, kadi dibanda diandi kadiakadi dia mua kumushiha anyi kumuela mu lukanu. Hakandeshabo ne, Badi belela muntu eu tshifufu, nakumutuma kûdi lubilu; nakambila bamubandi kabidi bua kuyabo kumubandila ku mesu kuebe. Nunku masalayi akangata Paulo, bu muakâmbilabo, akalua nʼandi mu butuku tô ne ku Antipati. Kadi hakatshiabu, akashîa masalayi akadi ha tubalu bua kuyau nʼandi, akahingana ku nsubu wau. Hakalukau ku Kaisalia, Hakaluau mukanda kudi ngovena, akateka Paulo ku mesu kuandi. Hakaubaleye, wakakonka luseke luakadiye; hakamanyeye ne, Ngua ku Kilikia, wakamuambila ne, Nengunvue tshilumbu tshiebe bimpe, halua bakubanda wakamba bua kumulamabo mu nsubu munene wa Helode. Hakahita matuku atanu, muakuidi munene wa Nzambi, dina diandi Anania, wakahueka ne bakulu bakuabo ne mubakuidi, dina diandi Têtulo, bakabanda Paulo ku mesu kua ngovena. Hakabikilabo Paulo, Têtulo wakabanga kumubanda ne, Bualu bua tuetu tudi tusanka bua ditalala ditudi nʼadi bua bualu buebe, ne bua lungenyi luebe batshidi balengesha malu mabi adi mu tshisamba etshi, tudi tuitabusha bualu ebu mu malu onso ne mu miaba yonso, ne disakidila dionso, mukelenge wa butumbi Felika. Bua meme tshikuhumbishi musangu mule, ndi nkutendekena bua wewe kutelesha mei makese atudi nʼau bua lutulu luebe. Tuakusangana muntu eu mutatshishi wa bantu, ne mutomboshi wa Bena Yuda bonso ba ha buloba, udi biandi tshilobo tshia tshisumbu tshia Bena Nazaleta; yeye wakakeba kuona ntempelo, buakamukuata; [ ] hawamukonka nkayebe, nêumanye mua kujingulula malu â onso atudi tumubanda. Bena Yuda kabidi bakamubanda, bamba ne, Malu â adi malelela. Hakamana ngovena kumushukuila mutu bua kuakuleye, Paulo wakandamuna ne, Bualu bua ndi mumanye ne, Wewe wakamana kuikala mulumbuludi wa tshisamba etshi bidimu bia bungi, ndi ndividila ne mutshima musanke; bua wewe udi mua kujingulula ne, Matuku kêna manze kuhita dikumi ne abidi hanakabanda ku Yelushalema bua kutendelela Nzambi; kabakansangana mu ntempelo ngela mpata ne muntu mukuabo anyi ntombosha bantu, nasha mu nsunagoga, nasha mu musoko. Kabena bamanye mua kushikika ku mesu kuebe malu adibo bambanda katataka. Kadi ndi ntonda kûdi ne, Ntu ngakuatshila Nzambi wa bankambua betu mudimu mu Nshila udibo babikila ne, Ngua batahuluki, ndi ngitabusha malu onso adi mu mikenshi ya Nzambi ne akafunda baprofete; ndi ne ditekemena kudi Nzambi didi bantu aba bitabusha kabidi ne, Dibika dia bafue nedikaleku, ne dia bakane ne dia babi. Bua bualu ebu ndi ndienzesha matuku onso bua kuikala bianyi ne mutshima udi kawi ne tshilema kudi Nzambi ne kudi bantu. Hakahita binga bidimu, nakalua ne bintu bia luse bua kubiha tshisamba tshianyi, ne bia kufila kudi Nzambi. Hanakadi ngenza nunku, bakansangana mumane kulengeshibua mu ntempelo, tshi ne tshisumbu tshia bantu, tshi ne diyoyo; kadi Bena Yuda ba mu Asia bakadimu; bu bobo bikale nʼanyi tshilumbu, bakadi kulua ku mesu kuebe ne kumbanda. Bantu aba mene kabidi bambe bualu bubi buakansanganabo nʼabu hanakimana ku mpala kua balumbuludi, anu dî edi dimue dinakela hanakimana munkatshi muabo ne, Badi bandumbuluisha ku mesu kuenu lelu bualu bua dibika dia bafue. Kadi Felika, wakadi mumanye bualu bua Nshila bimpe, wakabalaya ne, Hahueka kamanda Lusia, nendonde bualu buenu bimpe. Yeye wakambila kapitene bua kumutumeye ne bila kumulesheye luse ne bua kahidishi balunda bandi bua kuluabo kumukuatshisha. Hakahita matuku, Felika wakalua ne mukashi wandi Dusila, wakadi biandi Muena Yuda, wakabikila Paulo, wakunvua dî diandi bualu bua ditabusha dia mu Kilisto Yesu. Hakadiye wakulangana abo bualu bua buakane, ne bua didikanda, ne bua tshilumbuluidi tshilualua, Felika wakatshina bikole, wakamba ne, Ya biebe katataka; hanaheta tshikondo tshiakane, nenkubikile kundi. Yeye wakadi utekemena ne, Paulo neampe biuma. Ebu mbualu buakadiye numbikidila misangu ne misangu bua kuakula nʼandi. Kadi hakahita bidimu bibidi, Pokio Festo wakahingana ha muaba wa Felika; kadi bualu bua wakasua kuikala ne diakalengele kudi Bena Yuda, Felika wakashia Paulo mu lukanu. Nunku hakabuela Festo mu luseke luandi, hakahita matuku asatu, wakumuka mu Kaisalia, wakabanda ku Yelushalema. Bakuidi banene ba Nzambi ne bantu banene ba Bena Yuda bakabanda Paulo ku mesu kuandi; bakabanga kumutendekena, bakamulomba diakalengele kudibo, diakabi kudi Paulo, ne, Utume dî bua kumubikila ku Yelushalema; bamane kuela tshifufu bua kumushihela mu nshila. Kadi Festo wakandamuna ne, Badi balama Paulo ku Kaisalia, nkadi ha kuyaku tshituha tshihi; badi ne bukokeshi munkatshi muenu bahueke nʼanyi; bikala muntu au ne bualu bubi, bamubande. Hakalaleye munkatshi muabo matuku kâi mahite ha muanda mukulu anyi dikumi, wakahueka ku Kaisalia; hakatshiabu, wakashikama ha tshilumbuluidi, wakamba bua kuluabo ne Paulo. Hakalueye, Bena Yuda bakadi bafume ku Yelushalema bakimana bamunyungulule, bakamubanda malu makole a bungi akadibo kabai bamanye mua kuashikika. Kadi Paulo wakadividila ne, Tshiakenza bualu bubi bumue, nasha bua mikenshi ya Bena Yuda, nasha bua ntempelo, nasha bua Kaisa. Bualu bua Festo wakasua kuikala ne diakalengele kudi Bena Yuda, yeye wakebesha Paulo ne, Wewe newitabushe bua kuya ku Yelushalema bua kukulumbuluishilaku bua malu â ku mesu kuanyi, anyi? Kadi Paulo wakamba ne, Ndi muimane ku tshilumbuluidi tshia Kaisa, bundi nʼabu bua kulumbuluishibuaku; tshiakuenzela Bena Yuda bibi, bu mûdi wewe mene mumanye bimpe kabidi. Bingikala muenji wa bualu bubi, ne bingikala muenze bualu bua lufu, tshiena mpidia kufua; kadi hikala malu au onso adi bantu aba bambande kâi malelela, kakuena muntu udi mumanye mua kunfila kudibo bua kubasankisha. Ndi ndayidila kudi Kaisa. Hashishe, Festo wakasangisha dî ne bamukuatshishi ba bilumbu, wakamukudimuna ne, Wewe wakujidila kudi Kaisa, neuye kudi Kaisa. Hakahita manga matuku, mukelenge Agipa ne Bênike bakalua ku Kaisalia bua kuela Festo muoyo. Hakadibo balalaku matuku a bungi, Festo wakalesha mukelenge tshilumbu tshia Paulo ne, Muena lukanu mukuabo udiku, mushîa kudi Felika: hanakadi ku Yelushalema, bakuidi banene ne bakulu ba Bena Yuda bakanmanyisha bualu buandi; bakandomba ne, Umuhishe. Nakabakudimuna ne, Bena Lomo kabena ne tshilele tshia kufila muntu tshianana diambedi mubanda kai muanze kuikala ne bamubandi ku mpala kuandi, kai muanze kuikala ne tshikondo tshia kudividila bua bualu buakamubandabo. Nunku hakadisangishabo kunoko, tshiakashanguluka; hakatshiabu, nakashikama ha tshilumbuluidi, nakamba bua kuluabo ne muntu eu. Hakimana bamubandi, kabakadi bamubanda bualu bumue bua malu mabi anakadi ngela meshi; kadi bakadi bamubanda bua malu makuabo a tshitendeledi tshiabo, ne bua kampanda au Yesu, wakamana kufua, kadi Paulo wakadi ukolesha dî diandi ne, Udi ne muoyo. Bualu bua nakadi ndubakana mua kukonka bua malu â, tshiakamanya mua kukosa tshilumbu etshi, nakamukonka ne, Wewe newitabushe bua kuya ku Yelushalema bua bakulumbuluishileku bua malu â, anyi? Kadi bakalomba Paulo bua kumulamabo tô ne ku dikosa dia tshilumbu tshiandi kudi Augusto, nakabambila bua kumulamabo tô ne hanamanya mua kumutuma kudi Kaisa. Agipa wakambila Festo ne, Meme kabidi nakadi musue kunvua dî dia muntu au. Festo wakamba ne, Makelela neunvue dî diandi. Hakatshiabu, Agipa ne Bênike bakahia ne kudilesha kunene, bakabuela mu muaba wa kunyua bilumbu, ne tumanda ne bantu banene ba musoko; hakamba Festo dî, bakalua ne Paulo. Festo wakamba ne, Mukelenge Agipa ne bonso badi nʼetu kunoko, nudi nutangila muntu eu wakabandabo kudi tshisumbu tshionso tshia Bena Yuda ku mesu kuanyi, ku Yelushalema ne kunoko kabidi, bela mbila ne, Kambimpe bia yeye ikale ne muoyo kabidi. Kadi meme nakamusangana kai muenze bualu bua kufueye; bua yeye nkayandi wakalayidila kudi Augusto, nakasungula bua kumutuma. Kadi tshiena ne dî dilelela dia bualu buandi dia kufundila mukelenge wanyi. Ebu mbualu bunakumubikidila ku mpala kuenu, ne kudi wewe mene, mukelenge Agipa, hakonkibueye tshilumbu tshiandi, nemmanye dî dia kufunda, bualu bua ndi mona ne, Kendungenyi luakane bua kutuma muena lukanu, tshi muambe tshiakamubandabo. Agipa wakambila Paulo ne, Udi mua kudiambila bualu buebe. Paulo wakolola tshianza, wakabanga kudividila ne, Mukelenge Agipa, ndi ne disanka bualu bua lelu ndi ngamba kudividila ku mesu kuebe bua malu onso anakubandibua kudi Bena Yuda; ndi ntamba kusanka bua wewe udi mumanye bilele bia Bena Yuda ne malu abo bimpe; ndi nkutendekena bua wewe kutelesha dî dianyi ne lutulu. Tshikadilu tshia muoyo wanyi ku buana buanyi, tshinakadi nʼatshi ku tshibangidilu munkatshi mua tshisamba tshianyi mene, ne ku Yelushalema, tshidi tshimanyibue kudi Bena Yuda bonso; biasuabo kuamba dî dilelela badi banmanye ku tshibangidilu, bu munakadi Mufalese wa tshisumbu tshia bakatamba kulamata tshitendeledi tshietu. Katataka udi muimane aha bua kulumbuluishibua bua ditekemena dia mulayi wakalaya Nzambi bankambua betu; bisamba bietu dikumi ne bibidi bidi bitendelela Nzambi bikole butuku ne munya, bidi bitekemena ne, Netuhete mulayi au. Mukelenge, Bena Yuda badi bambandila bualu bua ditekemena edi. Bimbisha Nzambi bafue, nudi numona bualu ebu bu bualu budi kabui bua kuitabushibua munyi? Bulelela, meme kabidi nakadi ngelangana meshi ne, Bundi nʼabu mbua kuenza malu a bungi adi abihisha dina dia Yesu wa ku Nazaleta. Nakenzenza bualu ebu kabidi mu Yelushalema; hanakangata bukole kudi bakuidi banene ba Nzambi, nakabuesha basanto ba bungi mu nsubu ya lukanu; hakimbabo kubashiha, nakitabusha. Misangu ya bungi nakadi mbakengesha mu nsunagoga yonso, nakakeba bua kubahendesha Nzambi; bualu bua nakadi nʼabo lukuna lutambe, nakabakengesha tô ne ku misoko ya bisamba bikuabo. Hanakadi ngenza nunku, nakadi ngenda mu nshila wa ku Damaseke ne bukole ne dî bia bakuidi banene; bakafika diba munda munyi mukelenge, nakatangila munya mukole ufuma mu diulu mutambe dinkenka dia diba, wakuntemena meme ne bakadi benda nʼanyi. Buonso buetu hatuakahona hanshi, nakunvua dî dingambila mu muaku wa Bena Ebelu ne, Shaula, Shaula, udi unkengesha meme tshinyi? Wewe udi udikengesha hautshidi usuba mikolo ku mutshi musonga. Nakamukonka ne, Mukelenge, wewe udi nganyi? Mukelenge wakankudimuna ne, Ndi bianyi Yesu ûdi ukengesha; kadi bika, wimane, bua bualu ebu nakumuenekela kûdi bua kukusungula bu muenji wa mudimu wanyi ne bu mumanyishi wa malu awakumona ne wa malu anamuenekela kûdi; nenkusungile mu bianza bia bantu ne bia bisamba bia bende, bandi nkutuma kudibo, bua wewe kubulula mesu abo, bakome nyima ku midima batangile ku munya, bakoma nyima ku bukole bua Satana batangile kudi Nzambi, bua bobo bahete dijimisha dia mibi yabo ne buhianyi munkatshi mua badi balengeshibue ku ditabusha didibo bangitabusha nʼadi. Nunku, mukelenge Agipa, tshiakahidia kutumikila tshikena kumona tshia mu diulu, kadi nakambila ba mu Damaseke diambedi, ne ba mu Yelushalema, ne ba mu luseke luonso lua Yudaya, ne ba bisamba bia bende kabidi, bua kukudimunabo mitshima yabo, batshinguluke kudi Nzambi, benze malu adi makanangane ne dikudimuna dia mitshima yabo. Bua bualu ebu mbuakankuatshila Bena Yuda mu ntempelo, bakeba kunshiha. Bualu bua nakaheta dikuatshisha dia kudi Nzambi, ndi muimane tô ne lelu eu, nmanyisha bakese ne banene, tshi ngamba manga malu, anu akambabo kudi baprofete ne kudi Mose ne, Alualua. Ndi mbalesha bu mudi Kilisto mumanye mua kukenga, ne bu mudiye, wa kumudilu wa ku dibika dia bafue, wamba kumanyisha bantu ne bisamba bia bende bualu bua munya. Hakadiye udividila nunku, Festo wakela dî diandi bikole ne, Paulo wewe udi muhale, lungenyi luebe lua bungi ludi lukuhadisha. Kadi Paulo wakamba ne, Mukelenge Festo, tshiena muhale, kadi ndi ngamba mei a bushua ne a meshi. Mukelenge Agipa udi mumanye bua malu â; ndi muambilau ne dikima; bualu bua ndi ngitabusha ne, Kakuena bualu bumue bua mu malu â budi bumusokome, bua bualu ebu kabuakenjibua mu ditumba dia nsubu. Mukelenge Agipa, wewe udi witabusha mei a baprofete, anyi? Ndi mumanye ne, Udi muitabushe. Agipa wakambila Paulo ne, Wewe udi ukeba kungitabushisha ndue Muena Kilisto anu ne kalu kakese. Paulo wakamba ne, Nasha ne kalu kakese nasha ne bualu bunene, ndi ndomba Nzambi kambua wewe nkayebe kadi bua bonso badi bunvua mei anyi lelu kabidi, balue bu mundi emu, anu nkanu ei idishadile. Mukelenge wakabika ne ngovena no Bênike ne bakadi bashikame nʼabo. Hakumukabo, bakambilangana ne, Muntu eu kena wenza bualu bua lufu anyi bua lukanu. Agipa wakambila Festo ne, Bu muntu eu kai mulayidile kudi Kaisa, bakadi kumanya mua kumulekela. Hakasungulabo bua tuetu kuya mu bualu ku Italia bakafila Paulo ne bakuabo bakadi mu nsubu wa lukanu mu bianza bia Yulio, kapitene ka mu tshisumbu tshia masalayi tshiakadibo babikila ne, Tshia Augusto. Hatuakabuela mu buatu bua ku Adulamutiona buakadi buamba kuya ku miaba yakadi kukala kua mai a luseke lua Asia, tuakaya; Alistâko, Muena Makedonia wa ku Tesalonike wakadi nʼetu. Hakatshiabu, tuakafika ku Sidona; Yulio wakenzela Paulo bimpe, wakitabusha bua yeye kuya kudi balunda bandi bamukuatshishe. Hatuakumukaku, tuakayila ku nyima kua Kupulio, bualu bua luhehele luakadi lutuhingisha. Hatuakasabuka mai akadi hehi ne Kilikia ne Pampulia, tuakafika ku Mula, musoko wa mu luseke lua Lukia. Kapitene wakasanganaku buatu bua Alesandelia buakadi buya ku Italia, wakatubueshamu. Hatuakadi tuya matuku a bungi bitulu bitulu, tuakafika ha buihi ne Kinido, benda ne ditata dikole; bua luhehele luakadi lutuhumbisha bua kufikaku, tuakayila ku nyima kua Kulete hehi ne Salamone. Hatuakahitshilaku ne ditata dikole, tuakafika ku muaba udibo babikila ne, Dilobo Dimpe; musoko wa Lasaya wakadi ha buihi. Hakahita matuku a bungi, luendu lumane kutukuata buowa, bualu bua matuku a Dijila dia bia kudia akamana, kuhita, Paulo wakabanga kubadimusha: wakabambila ne, Balumiana, udi mona ne, Luendu elu neluikale ne dibuluka ne dijimina dikole, kendia bintu ne buatu nkayabi, kadi ndia mioyo yetu kabidi. Kadi kapitene ka masalayi wakatamba kuitabusha dî dia muena yende ne dia muena buatu ku mpala kua mei akamba Paulo. Bualu bua dilobo adi kadiakadi diakane dia kushikishilaku ngondo ya mashika, bakadi batambe bungi bakamba ne, Tumukai kunoko, ne tuamanya mua kufika ku Foinike bua kushikishilaku ngondo ya mashika, aku kudi dilobo dikuabo dia Kulete, didi ditangila ku node-esete ne ku sude-esete. Hakaheha luhehele lua ku Sude bitulu bitulu, bakelangana meshi ne, Tuakuheta butudi basue, bakabisha luongo, bakadi bayila ku muelelu wa mai wa Kulete. Kadi hakahita tshituha tshihi, tshihuhu tshikole tshidibo babikila ne, Eulakulo, tshifuma ku mpata, tshiakatukuma. Hakatutatshi ku buatu, kabuakamanya mua kutulama kuakadi kuvuila tshihuhu, tuakalekela kuita, luhehele luakatuendesha. Hatuakafika ku nyima kua tshisenga tshikese, dina diatshi Kauda, tuakadi ne bualu bukole bua kuambula buatu bukese; hakabubandishabu, bakanyengela buatu bunene mionshi ha nyima bua kubukuatakasha. Hakatshinabo ne, Luhehele nelutuele ha lusenga lua ku Suti, bakatulula tshilulu tshiakadi tshiendesha buatu, luhehele luakatuendesha. Hatuakatata bikole ne tshihuhu, hakatshiabu, bakabanga kuela biakadibo batuala mu buatu mu mai; hakafika dituku disatu, bakela bintu bikuabo bia mu buatu mu mai ne bianza biabo, Diba ne mitoto kabiakatutemena matuku a bungi, tshihuhu tshitambe bukole tshiakatukuata, katuakadi ne ditekemena kabidi ne, Netusungidibue. Hakadibo kabai badie musangu mule, Paulo wakimana munkatshi muabo, wakamba ne, Balumiana, biakadi bimpe bia nuenu kunvua dî dianyi; bu nuenu benze nunku, kanuakadi kumuka ku Kuleta, kanuakadi kuikala ne bualu bukole ebu ne bua dibutuisha dia bintu. Katataka ndi nusengelela ne, Koleshai mitshima yenu, bualu bua muoyo wa muntu umue wa munkatshi muenu kawena ujimina, anu buatu. Bualu bua muanjelo wa Nzambi wanyi, undi nkuatshila mudimu, wakuimana ha buihi nʼanyi butuku ebu; wakungambila ne, Paulo, kutshinyi; bûdi nʼabu mbua kuimana ku mpala kua Kaisa; ne mona, Nzambi wakukuha bonso badi benda nʼebe mu buatu. Nunku, bana betu, nukoleshe mitshima yenu; ndi ngitabusha Nzambi ne, Bualu nebuenjibue bu muakangambileye. Kadi butudi nʼabu mbua kuedibua mu tshianga. Hakalua butuku bua dikumi ne anai, hakadi luhehele lututambakasha mu mai manene a Adulia, mundankulu bena buatu bakelangana meshi ne, Tukadi ha kufika ha buihi ne buloba. Bakateta bule bua mai, bakabusangana maboko makumi abidi; bakayabo tshituha, bakabuteta kabidi, bakabusangana maboko dikumi ne atanu. Hakatshinabo ne, Netuedibue ha mabue, bakela luongo inai mu mai ku tshitaku tshia buatu, bakadi bajinga ne, Buatshiahu. Bena buatu bakamba kunyema, bakadi batulula buatu bukese mu mai, badinga ne, Tudi basue kuela luongo mikuabo ku mpala kua buatu. Kadi Paulo, wakambila kapitene ka masalayi ne masalayi mene ne, Bikala bantu aba kabai bashale mu buatu, kanuena mua kusungidibua. Hashishe masalayi akakosa mionshi ya buatu bukese, buakahona mu mai. Paulo wakadi ubasengelela buonso buabo tô ne hakamba butuku kutshia, bua kudiabo, wamba ne, Edi ndituku dia dikumi ne anai anuakadi bashale, bajile bia kudia kanui badie tshintu. Nunku ndi nusengelela bua nuenu kudia, bualu ebu nduhandu luenu, bualu bua lusuki lua ku mutu kua umue wenu kaluena lujimina. Hakambeye nunku, wakangata mutanda wa bidia, wakasakidila Nzambi ku mesu kua buonso buabo, wakautshibula, wakabanga kudia. Buonso buabo bakakolesha mitshima yabo, ne bobo bine bakangata bia kudia. Buonso buetu tuakadi mu buatu bantu nkama ibidi ne makumi muanda mutekete ne basambombo. Hakûkutabo, bakabanga kuhehesha buatu, bakela blé mu mai. Hakatshiabu, kabakadi bamanye buloba abu; bakatangila tshinkonya tshia mai tshiakadi ne lusenga, bakasangisha dî ne, Ne tuamanya mua kutuma buatu mu muaba wawa. Bakakosa, mionshi ya luongo, bakahisha mu mai ne mionshi; ha diba adi mene bakasulula mionshi ya bidimba; bakabandisha tshilulu tshia ku mpala bua kukuata tshi luhehele, bakabanga kuya balulame ku muelelu wa mai. Kadi hakafikabo ha nsangilu ibidi ya mai, bakatua buatu ku lusenga; mpala wa buatu wakatua ku lusenga, wakashindama, kadi tshitaku tshiabu tshiakabanga kutshibuka bualu bua bukole bua mambuanka. Lungenyi lua masalayi luakadi lua kushiha bena lukanu, bua umue wabo kombedi, kanyemi. Kadi bualu bua kapitene kau wakasua kusungila Paulo, wakâkesha; wakamba ne, Badi bamanye mua kuombela badiele mu mai, badianjile ku mpata, bakuabo bangate mabaya anyi bintu bikuabo bia mu buatu, baye ha mutu habi. Nunku buonso buabo bakafika ku mpata, bakahanduka. Hatuakahanduka, tuakamanya ne, Tshisenga etshi ntshidibo babikila ne, Melita. Basenshi bakadi batutua luse lua bungi: bakatutemena kahia, bakatubikila buonso buetu, bualu bua nvula wakadi muloke ne bua mashika akadiku. Hakatshiabu Paulo tshisumbu tshia nkunyi, hakatshieleye mu kahia, nyoka wakahatukamu bualu bua luiya lua kahia, wakalamata ku tshianza tshiandi. Hakatangila basenshi nyoka mubi mulembelele ku tshianza tshiandi, bakambilangana ne, Bulelela, muntu eu udi mutahianganyi; wakuhanduka mu mai, kadi dilumbulula dilelela kadiena ditabusha bua yeye kuikala ne muoyo. Kadi yeye wakakuha nyoka mu kahia, kakunvua disama. Bobo bakadi batekemena ne, Neûle, anyi neahone hanshi lukasa mufue; kadi hakatekemenabo nunku musangu mule, hakadibo kabai bamone bualu bulue kudiye, bakakudimuna meshi abo bamba ne, Yeye udi nzambi. Ha buihi ne muaba au hakadi madimi a muntu mimene, mukelenge wa tshisenga, dina diandi Popolio, wakatubuesha mu nsubu muandi, wakatuenzela bimpe matuku asatu. Kadi tatu wa Popolio wakadi mulale musame mubidi kahia ne munda mashi; Paulo wakaya kudiye, wakatendelela Nzambi, wakamulenga bianza, wakashikisha masama andi. Hakenzeye nunku, bakuabo ba mu tshisenga bakadi ne mabedi bakadi balua kudiye, bakadi bukoleshibua; bobo bakatamba tutu tumbisha; hatuakamba kumuka, bakabuesha bintu bitu akadi nʼabi bualu mu bualu. Hakahita ngondo isatu, tuakabuha mu buatu bua ku Alesandelia buakadi bulale ku tshisenga bua ngondo ya mashika, tshimanyinu tshiabu ne, Diosokuli. Hatuakafika ku Sulakusa, tuakalalaku matuku asatu. Hatuakumukaku, tuakatshinguluka, yakafika ku Legio. Hakahita dituku, luhelele lua ku Sude luakajuka, yakafika ku Potiolo dituku dibidi. Tuakasanganamu bana betu ba Nzambi, bobo bakatusengelela bua kushala nʼabo matuku muanda mutekete. Nunku tuakalua ku Lomo. Kadi hakunvua bana betu ba Nzambi ba mu Lomo lumu luetu, bakalua kutuakidila ku Tshisalu tshia Apio ne ha Nsubu Isatu ya Tshilala Benyi; bakabamona Paulo, wakasakidila Nzambi, mutshima wandi wakakankamana. Hatuakabuela mu Lomo, bakitabusha bua Paulo ashikame ha nkayandi ne disalayi dimulame. Hakahita matuku asatu, Paulo wakabikila bakadi ku mutu kua Bena Yuda; hakunguilabo, wakabambila ne, Bana betu, tshiakenza bibi kudi bantu anyi ku bilele bia bankambua betu, kadi mu Yelushalema bakaufila musuika mu bianza bia Bena Lomo. Hakankonkabo bualu, bakasua kundekela, bualu bua kabakasangana ne bualu bua meme kufuila. Kadi hakahidia Bena Yuda kuitabusha dî diabo, bunakadi nʼabu mbua kulayidila kudi Kaisa; tshiakadi ne bualu bua kubanda nʼabu tshisamba tshianyi. Bua bualu ebu nunku bunakunubikidila bua kulua kuntangila ne bua kuakula nʼanyi; ndi musuikibue ne lukanu elu bualu bua ditekemena dia Isalele Bakamuambila ne, Tuetu katuakangata mikanda mifume ku Yudaya bua bualu buebe, kakuena umue wa bana betu wakalua kunoko utuambila lumu, anyi ukutela ne bualu bubi. Tudi basue kunvua bualu bûdi wela meshi; bualu bua tshisumbu etshi, tudi bamanye ne, Badi batshibanda kuonso. Hakamusunguilabo dituku, bakalua ba bungi mu nsubu muandi; yeye wakabalondoluela malu, wakabayisha bua bukelenge bua Nzambi, wakateta bua kubitabushisha Yesu, ne ku mikenshi ya Mose ne ku mei a baprofete, dinda tô ne ku dilolo. Bakuabo bakadi bitabusha malu akambeye, bakuabo bakadi bâhidia. Hakabangabo kuhunga mei munkatshi muabo, bakumuka, hakamana Paulo kubambila anu dî dimue ne, Nyuma Muimpe wakambidila bankambua benu bimpe kudi muprofete Yeshaya ne, Ya biebe kudi bantu aba ubambile ne, Kunvua nenunvue, kanuena nujingulula; Kumona nenumone, kanuena numona bimpe; Bua mitshima ya bantu aba yakulua manyi a bungi. Badi mpudi matshu, Bakubuikila mesu abo; Nunku kabamonyi ne mesu abo, Kabunvu ne matshu abo, Kabamanyi ne mitshima yabo, Kabakudimunyi mitshima yabo Bua meme neondahe. Numanye bienu ne, Luhandu ebi luakutumibua kudi bantu ba bende, bobo kabidi nebumate. [ ] Paulo wakalalamu bidimu bibidi, wakadi mu wandi nsubu ufuta muena nsubu, wakadi witabusha bantu bonso bakahia kudiye, ubambila bua bukelenge bua Nzambi, ubayisha malu a Mukelenge Yesu Kilisto ne dikima dionso, muntu kakamukanda. Paulo, muhika wa Yesu Kilisto, wakabikidibua bua bakola mupostolo; wakafidibua ku lumu luimpe lua Nzambi, luakatulayeye diambedi kudi baprofete bandi mu mifundu ya tshijila, bualu bua Muana wandi Mulume, wakaledibua bu mudi buntu buandi kudi tunkanuniuna tua Davidi, wakamanyishibua Muana wa Nzambi ne bukole ku dibika diandi dia ku bafue, bu mudi nyuma wandi wa tshijila; Yesu Kilisto, Mukelenge wetu. Tuakuangata ngasa kudiye ne bupostolo, bua kuvudisha ditumikila dia ditabusha munkatshi mua bisamba bia bende bionso, bualu bua dina diandi. Munkatshi muabo mudi nuenu kabidi, babikidibue bua kuikala ba Yesu Kilisto. Ndi nfunda kudi bonso ba mu Lomo, banangibue kudi Nzambi, babikidibue bua kuikala basanto. Ngasa kunudi ne ditalala bia kudi Nzambi, udi kabidi Tatu wetu, ne kudi Mukelenge Yesu Kilisto. Bualu bua kumudilu, udi nsakidila Nzambi wanyi mu Yesu Kilisto bua buonso buenu, bualu bua ditabusha dienu didi dimanyishibue ba buloba buonso. Bualu bua Nzambi, undi nkuatshila mudimu mu nyuma wanyi mu lumu luimpe lua Muana Wandi, udi mumanyi wanyi bu mundi tshî ndekela kunutela misangu yonso mu mitendelelu yanyi, ndomba bianyi ne, Bikala bualu mua kuikala nunku, mpindiu, musangu mumane kuleha, nempete dikasa dimpe ku disua dia Nzambi bua kulua kunudi. Bualu bua udi njinga bua kunumona bua kunuhesha kuha kukuabo kua Nyuma, bua nuenu nujadikibue. Bualu budi muiku, bua meme ne nuenu kusambibua munkatshi muenu, muntu ne muitu ku ditabusha dia mukuabo, ne dienu ne dianyi. Bana betu, tshiena musue nuhange kumanya ne, Misangu ya bungi nakadisunguila bua kulua kunudi (ne nakuhumbishibua tô ne katataka), bua meme kuangata mamuma munkatshi muenu kabidi bu munakuângata munkatshi mua bisamba bikuabo bia bende. Ndi amena dibanza wa Bena Gelika ne wa Basenshi kabidi, ne wa bena lungenyi ne wa bahote kabidi. Nunku, bu mundi mua kuenza, ndi mudilongolole bua kuamba lumu luimpe kudi nuenu kabidi badi mu Lomo. Bualu bua tshiena nfua bundu bua lumu luimpe; bua ludi bukole bua Nzambi ku luhandu kudi muntu yonso udi witabusha, kudi Muena Yuda diambedi, ne kudi Muena Gelika kabidi. Bualu bua buakane bua Nzambi buakubuluibuamu ku ditabusha ne ku ditabusha; bu muakafundabo ne, Muntu muakane neikale ne muoyo ku ditabusha. Bualu bua tshishi tshia Nzambi tshidi tshibuluibua mu diulu ha malu onso adi kâi a Nzambi ne adi kâi makane a bantu, badi bakanda bushua ku malu mabi. Bualu bua mianda ya Nzambi idi mimanyibue kudi bantu idi imueneka munda muabo, bualu bua Nzambi wakaimuenesha kudibo. Bua malu andi akadi kâi mua kumueneka katshia buloba buafukibua, bukole buandi bua tshiendelele mene ne bunzambi buandi, adi amueneka bimpe, bualu bua adi ajinguluka ku bintu biakafukibua; nunku kabena ne tshia kudibingisha nʼatshi. Bualu bua hakamanyabo Nzambi, kabakamutumbisha bu Nzambi, kabakamusakidila; kadi meshi akelabo akalua a hatuhu, ne mitshima yabo mijibale yakalua mîdima. Hakadiambabo ne, Tudi bena lungenyi, bakalua bahote. Bakandamana butumbi bua Nzambi udi kai unyanguka ku tshifuanyikishi tshia mubidi wa muntu udi unyanguka, ne tshia nyunyu, ne tshia nyama ya mikonu inai, ne tshia bintu bidi bidikoka hanshi. Ke Nzambi kabidi wakabafila ku bukoya kudi nkuka ya mitshima yabo, bua kunyanganganabo mibidi yabo ne malu a bundu munkatshi muabo; bualu bua bakandamuna bushua bua Nzambi ku mashimi, ne bakatendelela tshintu tshifukibua ne bakatshikuatshishila mudimu ku mpala kua Mufuki watshi; udi biandi mutumbishibue tshiendelele. Amen. Bua bualu ebu Nzambi wakabafila ku nkuka ya bundu; bualu bua bakashi babo bakashintakasha tshilele tshiabo ku tshilele tshidi katshî tshiabo; muomumue balume kabidi, bakalekela tshilele tshiabo ne bakashi, bakasaminangana mioyo bua nkuka ya mibidi yabo, balume ne balume bakenzelangana malu a bundu; nunku bakadiangatshila difutu dia kuluhakana kuabo diakadi ne bua kulua kudibo. Bu muakahidiabo kuikala ne Nzambi mu meshi abo, nunku Nzambi wakabafila ku meshi a hatuhu akahidleye, bua kuenzabo malu adi kâi makanangane ne lungenyi. Bakadi bûle tente ne malu onso adi kâi makane, ne malu mabi, ne kusaminangana kua mioyo, ne lukinu; bakadi bûle tente ne mukau, kushibangana, kutandangana, lubombo, lukuna; bena minunganu, bena bunsonge, bena lukuna ne Nzambi, bena dikamakama, badisu, bafunyifunyi, babangi ba malu mabi mahia-mahia, bahidi ba mei a baledi babo, bantu bakadi kabai ne meshi, bakadi kabai balama mei akahungabo, bakadi kabai ne dinanga bu dia bantu, bakadi kabai ne mitshima ya luse. Bantu aba, hakamanyabo mukenshi wa Nzambi ne, Bantu badi benza malu â badi bakanangane ne lufu, bobo bine batshidi bênza, ne badi bikalangana kabidi ne dî dimue ne bantu badi bênza. Nunku, wewe kampanda, utu walumbuluisha bakuabo, kuena ne tshia kudibingisha nʼatshi; udi udihisha biebe ne dilumbulula diudi ulumbuluisha nʼadi mukuabo; bualu bua hawalumbuluisha mukuabo, wewe utu wenza malu momumue. Tudi bamanye ne, Dilumbulula dia Nzambi didiye ulumbuluisha nʼadi batu benza malu a nunku didi dia bushua. Ne wewe kampanda, utu walumbuluisha batu benza malu a nunku, ne utu wenza biebe muomumue, udi welangana meshi ne, Meme nempanduke mu dilumbuluisha dia Nzambi, anyi? Anyi udi uhetula bubanshi bua buimpe bua Nzambi ne lutulu luandi ne luse lua musangu mule; kuena mumanye ne luse lua Nzambi ludi lukukoka ku dikudimuna dia mutshima, anyi? Bualu bua tshitshu tshiebe ne mutshima webe wa buhidia, wewe udi udibutshila tshishi tô ne ku dituku dia tshishi ne dia dibuluibua dia kulumbulula kuakane kua Nzambi. Udi uhesha muntu yonso difutu bu mudi midimu yandi. Badi bakeba butumbi ne buneme ne malu adi kâl manyanguka, ku dinanukila diabo mu mudimu muimpe, neabafute muoyo wa tshiendelele. Kadi badi ne matandu, badi kabai batumikila malu a bushua, badi batumikila malu mabi, yeye neabafute tshishi ne difika dia munda. Dikenga ne kanyinganyinga nebikale kudi muntu yonso udi wenzenza malu mabi, kudi Muena Yuda diambedi ne kudi Muena Gelika kabidi. Kadi butumbi ne buneme ne ditalala nebikale kudi muntu yonso udi wenza malu mimpe, kudi Muena Yuda diambedi ne kudi Muena Gelika kabidi. Bualu bua kakuena kansungunsungu. Bualu bua bonso bakadi benza malu mabi kabai ne mikenshi nebafue bu badi kabai ne mikenshi; ne bonso bakadi ne mikenshi bakadi benza malu mabi nebalumbuluishibue ku mikenshi. Badi bakane ku mesu kua Nzambi kembunvu ba mikenshi, kadi benji ba mikenshi nebabingishibue. Bualu bua henza bisamba bia bende bidi kabi ne mikenshi bilele bidi mikenshi nuambe, bobo, kabai ne mikenshi, badi badielela mikenshi. Badi balesha mudimu wa mikenshi mufunda mu mitshima yabo, muoyo-mukese wabo udi umanyishangana nʼai ne meshi abo adi abahisha, ababingisha. Nunku nebalumbuluishibue ku dituku didi Nzambi ulumbulula malu masokome a bantu kudi Yesu Kilisto, bu mudi lumu luimpe luanyi luamba. Kadi biwikala muidike ne, Muena Yuda, udi weyemena mikenshi, udi uditumbisha bua Nzambi, udi mumanye disua diandi, udi wanyisha malu adi mahitangane buakane, udi muyishibue mikenshi, wewe udi uditekemena ne, Ndi bianyi mulombodi wa bafofo, ndi munya wa badi mu midima, ndi mulengeshi wa bahote, ndi muyishi wa bana batekete, bualu bua ndi ne tshileshilu tshia lungenyi ne tshia malu malelela mu mikenshi; nunku wewe udi uyisha mukuabo, kuena udiyisha, anyi? Wewe udi wamba ne, Kanuibi, udi wiba, anyi? Wewe udi ubambila ne, kanuendi masandi, udi wenda masandi, anyi? Wewe udi ukenuka mpingu, udi uhaula bia mu ntempelo, anyi? Wewe udi uditumbisha bua mikenshi, udi ufuisha Nzambi bundu bua bushihi buebe bua mikenshi, anyi? Bualu bua dina dia Nzambi didi dihendibua bualu buenu munkatshi mua bisamba bia bende, bu muakafundabo. Bua ditengula didi dikukuatshisha biwikala wenza mikenshi; kadi biwikala mushihi wa mikenshi, ditengula diebe diakulua bu kadi ditengula. Bikala muntu kai mutengula ulama mei a mikenshi, kabena babala muntu eu udi kai ne ditengula bu mutengula, anyi? Udi kai mutengula bu mu tshilele, bienzeye mikenshi, kena ukuhisha wewe, udi mushihi wa mikenshi ne mei a mikenshi ne ditengula, anyi? Bua muntu kena Muena Yuda anu bua mubidi wandi; ditengula dia mubidi nkayau kadiena ditengula dilelela. Kadi yeye udi Muena Yuda bua malu adi munda muandi; ne ditengula didi dia mu mutshima didi mu nyuma, kadiena mu mikenshi mifunda; udi ne butumbi buandi kabui bufuma kudi bantu, kadi budi bufuma kudi Nzambi. Nunku ditamba kai didi Muena Yuda nʼadi, anyi dikuatshisha dia ditengula didi ku tshinyi? Adi a bungi mu malu onso. Bualu bua kumudilu, bakafila mei a Nzambi mu bianza biabo. Kadi bikala bakuabo kabai bitabusha, dihanga diabo dia kuikala ne ditabusha nedivuishe dieyemenyibua dia Nzambi ne hatuhu, anyi? Nasha kakese! Nzambi ikale amena bulelela, kadi muntu yonso ikale nmona mashimi, bu muakafundabo ne, Bua wewe ubingishibue mu mei ebe, Ne bua wewe utambe mu dilumbulula diebe. Bikala bubi buetu buladika buakane bua Nzambi, netuambe tshinyi? Nzambi udi uvuisha tshishi udi mubi, anyi? (Ndi ngakula bu mudi bantu bakula.) Nasha kakese! Bikaleye kai wenza nunku, Nzambi nealumbuluishe ba ha buloba munyi? Bikala bushua bua Nzambi bukumbasha butumbi buandi bualu bua mashimi anyi, munyi mutshidibo bampisha kabidi bu muntu mubi? Munyi katuambi ne, Tuenze malu mabi bua kuvuisha malu mimpe (bu mudibo batushiminyina ne bu mudi bakuabo bamuangalasha lumu ne, Badi bamba)? Dihila diabo nedikale dijalama. Nunku tumanye bishi? Tudi tubatamba buimpe, anyi? Nasha kakese. Bualu bua tuakudianjila kubanda Bena Yuda ne Bena Gelika kabidi ne, Buonso buenu nudi munshi mua bukokeshi bua bubi; bu muakafundabo ne, Kakuena muntu udi muakane, nasha umue. Kakuena muntu udi ujingulula buakane bua Nzambi, Kakuena muntu udi ukeba Nzambi; Bonso bakahambuka, bakalua ba tshianana bonso; Kakuena muntu udi wenza malu mimpe, nasha tunue. Muminu wabo udi bu lukita lubulula: Bakashimangana ne ndimi yabo; Lulengu lua nyoka ya ntoka ludi ku mishiku yabo; Mukana muabo mudi mûle tente ne milau ne bululu; Makasa abo adi aya lubilu bua kumatshisha mashi; Dibutula ne kanyinganyinga bidi mu nshila yabo; Kabena bamanye nshila wa ditalala. Ditshina dia Nzambi kadiena ku mesu kuabo. Tudi bamanye ne, Mei onso adi mikenshi yamba, idi yâmbila badi munshi mua mikenshi, bua kubuikila mukana muonso, ne bua ba ha buloba bonso babueshibue munshi mua dilumbuluisha dia Nzambi. Bualu bua kakuena muntu wabingishibua ku mesu kuandi bua kuenza kua mikenshi. Bualu bua ku mikenshi kudi kufuma dijingulula dia bubi. Kadi katataka buakane bua Nzambi buakumueneshibua butahuluke ku mikenshi, bu mudibo babuamba mu mikenshi ne kudi baprofete. Buakane mene bua Nzambi bua ku ditabusha dia mu Yesu Kilisto kudi bonso badi bamuitabusha; bualu bua kakuena ditahuluka. Bualu bua bonso bakenza malu mabi, ne badi bahanga kuheta butumbi kudi Nzambi. Badi babingishibua anu hatuhu ku ngasa wandi bualu bua dihikula didi mu Kilisto Yesu. Nzambi wakamuladika ku mesu kua bantu bua kuikaleye mulambu wa kubuikila nʼau malu mabi a bantu, ku ditabusha dia mu mashi andi, bualu bua kulesha buakane buandi mu dihita diandi dia malu mabi akenzabo diambedi, bua lutulu lua Nzambi. Wakenza nunka bua kulesha buakane buandi mu tshikondo etshi, bua yeye kuikala muakane ne mubingishi wa muntu yonso udi witabusha Yesu. Nunku kuditumbisha kudi hanyi? Kuakûmushibua. Ku mukenshi wa mushindu kai? Ngua bienzedi, anyi? Nasha, kadi anu ku mukenshi wa ditabusha. Nunku tudi tuamba ne, Muntu udi ubingishibua ku ditabusha, kenku kuenza kua mikenshi. Nzambi udi anu Nzambi wa Bena Yuda nkayabo, anyi? Yeye kena Nzambi wa bisamba bia bende kabidi, anyi? E, udi Nzambi wa bisamba bia bende kabidi; hikala Nzambi umue, ne yeye neabingishe mutengula ku ditabusha ne udi kai mutengula bua ditabusha. Nunku tudi tivuisha mikenshi ne, Nya tshianana bua ditabusha, anyi? Nasha kakese! Tudi kujadika mikenshi. Nunku netuimbe ne, Abalahama, nkambua wetu, wakasangana tshinyi bua mubidi wandi? bualu bua bikala Abalahama mubingishibue ku bienzedi, udi ne tshia kuditumbisha nʼatshi, kadi kenku mesu kua Nzambi. Mukunda wa Nzambi udi wamba tshinyi? Ne, Abalahama wakitabusha Nzambi, ne ditabusha diandi diakabadibua bu buakane. Bukenshi kabuena bubadibua kudi muntu udi wenza mudimu bu bua ngasa, kadi budi bubadibua bua dibanza. Kudi muntu udi kai wenza mudimu wa mikenshi, kadi udi witabusha Nzambi udi ubingisha badi kabai benza malu andi, ditabusha diandi didi dibadibua bu buakane. Bu mudi Davidi wamba disanka dia muntu kudi Nzambi ubala buakane budi kabui bua mudimu, ne, Bobo badi basankishibua badi ne huhidia buabo bulekedibue, Mbadi ne malu mabi abo mabuikidibue. Muntu udi usankishibua ngudi Mukelenge kai ubala bubi buandi. Nunku disanka edi didi anu kudi batengula, anyi kudi badi kabai batengula kabidi? Bualu bua tudi tuamba ne, Bakabala ditabusha dia Abalahama kudiye bu buakane. Bakamubadiladi munyi? Hakadiye mutengula, anyi hakadiye kai mutengula? Kabakamubadiladi hakadiye mutengula, kadi bakamubadiladi hakadiye kai mutengula. Wakangata tshimanyinu tshia ditengula bu tshimanyishilu tshia buakane bua ku ditabusha diakadiye nʼadi hakadiye kai mutengula, bua yeye kuikala nkambua wa bonso badi bitabusha, nasha bobo kabai batengula kabidi, bua buakane bubadibue kudibo; ne nkambua wa batengula kudibo, kengua anu kudi badi batengula, kadi kudi badi balonda mu makasa a ditabusha diakadi nʼadi nkambua wetu Abalahama hakadiye kai mutengula. Bualu bua mulayi wa kuhianeye buloba kawakadi kudi Abalahama anyi kudi tunkanunuina tuandi bualu bua mikenshi; kadi wakadika bua buakane bua ku ditabusha. Bikala bena mikenshi bahianyi, ditabusha didi divuishibua hatuhu, ne mulayi kawena ne bualu. Mikenshi idi yenzesha tshishi, kadi kudi kakui mikenshi, kakuena kushiha kua mikenshi. Bua bualu ebu bahianyi budi bufuma ku ditabusha, bua kuikalabu bua ngasa. Buakadi nunku bua kujadikabo mulayi kudi tunkanunuina tuonso; kenkudi badi ne mikenshi nkayabo, kadi kudi badi ne ditabusha dia Abalahama kabidi, udi biandi nkambua wa buonso buetu, (bu muakafundabo ne, Nakakuvuisha nkambua wa bisamba bia bungi). Mulayi wakajadikibua ku mpala kua wakuitabusheye, Nzambi mene, udi uha badi bafue muoyo, udi Ubikila bidi kabihu bu bidi bikalehu. Bualu bua Abalahama, wakitabusha ne ditekemena, kai ne bualu bua kutekemena, bua kulueye nkambua wa bisamba bia bungi, bu mudi dî diakambabo ne, Ke muikale tunkanuniuna tuebe. Yeye kakateketa mu ditabusha diandi bakamanyeye ne, Mubidi wanyi mumane kufua (yeye wakadi bu bidimu lukama), ne Sala muikale nkumba. Bua yeye wakatangila ku mulayi wa Nzambi, kakalenduka mu huhidia, kadi wakakola mu ditabusha, mutumbishe Nzambi, ne mûshibue tente ne dimanya ne, Nzambi udi mua kuenza bu muakandayeye kabidi. Bua bualu ebu ditabusha diandi diakabadibua kudiye bu buakane. Nunku dî edi kadiakafundibua bua bualu buandi nkayandi ne, Ditabusha diandi diakabadibua kudiye, kadi diakafundibua bua bualu buetu kabidi kudibo bamba kubadila ditabusha, badi bitabusha wakabisha Yesu Mukelenge wetu ku bafue, wakafidibua ka lufu bua malu mabi etu, wakabishibua bua dibingishibua dietu. Nunku bualu bua tuakabingishibua ku ditabusha, tuikale ne ditalala ne Nzambi bua Mukelenge wetu Yesu Kilisto. Bua bualu buandi kabidi tudi ne tshibueledi tshietu bua ditabusha mu ngasa emu mutudi bashindame; tutumbile bietu bua ditekemena dia butumbi bua Nzambi. Bualu bukuabo kabidi, tutumbile bietu mu ntatu, tumanye ne, Ntatu idi yenzesha ditantamana, ne ditantamana didi dienzesha dijadikibua, ne dijadikibua didi dienzesha ditekemena. Ne ditekemena kadiena difuisha bundu, bualu bua luse lua Nzambi luakitshikila mu mitshima yetu kudi Nyuma Muimpe wakafukeye. Bualu bua hatutshivua batekete, mu tshikondo tshiakane Kilisto wakafuila bantu babi. Budi bualu bukole bua muntu kufuila anu muntu mubingishibue, kadi bumue mukuabo neitabushe kufuila muntu muimpe wa bushua. Kadi Nzambi wakatamba kulesha luse luandi kutudi mu muanda eu ne, Hatutshivua bantu babi, Kilisto wakatufuka. Ke bualu budi butambe nunku ne, Hantshidi tubingishibua mpindiu ku mashi andi, netusungidibue ku tshishi tshia Nzambi kudiye. Bualu bua, biwikala balengesha ne Nzambi ku lufu lua Muana wandi, hatuakadi bena lukuna nʼandi, nunku netutambe kusungidibua ku muoyo wandi hatuakamana kulengesha nʼandi. Kemuanda eu nkayau, kadi tudi tutumbila kabidi mu Nzambi bua Mukelenge wetu Yesu Kilisto, kutudi bahete dilengesha kudiye mpindiu. Nunku, bu muakulua bubi ha buloba bualu bua muntu umue, ne bu muakalua lufu bua bubi abu, nunku lufu luakafika kudi bantu bonso, bua bonso bakenza malu mabi. Bualu bua bubi buakadi ha buloba tô ne hakalua mikenshi ya Mose, kadi bubi kabuena bubadibua kudi muntu hadiku kakui mikenshi. Kadi lufu luakukokesha ku Adama tô ne ku Mose, ne ku bobo bine bakadi kabai benze malu mabi mafuane buhidia bua Adama: yeye ntshifuanyikishi tshia wakadi ha kulua. Kadi bushihi bua mikenshi kabuena bu diha dia luse dia Nzambi. Bua bikala bantu bangi bakafua bua bushihi bua mikenshi bua muntu umue, ngasa wa Nzambi ne diha dia ku ngasa wa kudi muntu umue, Yesu Kilisto mene, biakatamba kukumbanyina bantu bangi. Diha dia luse kadiena dilua bu mudi bubi buakenza muntu umue; bualu bua dilumbuluisha diakalua bua muntu umue ku dihila, kadi diha dituhesha hatuhu diakalua bua malu mabi a bungi ku dibingishibua. Bualu bua bikala lufu luakakokesha bua muntu umue bualu bua bushihi bua mikenshi bua muntu umue, bantu badi bangata kuhumukila kua ngasa ne kua diha dia buakane nebatambe kukokesha mu muoyo kudi umue, Yesu Kilisto. Ke mudi bualu bubi bumue baakavuisha dihila kudi bantu bonso, nunku kabidi bualu buakane bumue buakuvuisha dibingishibua dia muoyo kudi bantu bonse. Ne bu muakavuishibua ba bungi bantu babi bua buhidia bua muntu umue, nunku ba bungi nebavuishibue bantu bakane bua kutumikila kua muntu umue. Mikenshi yakabuela kabidi bua bushihi bua mikenshi buvulangane. Kadi hakavulangana bubi, ngasa wakatamba kusangana. Bualu bua bu muakakokesha bubi bantu ku lufu, muomumue muamanya ngasa mua kukokesha bantu bua buakane ku muoyo wa tshiendelele kudi Yesu Kilisto Mukelenge wetu. Ahu netuambe tshinyi? Netushale mu dienzenza dia bubi bua ngasa asangane, anyi? Nasha kakese! Tuetu bakafua ku bubi, munyi mutuikalemu kabidi? Kanuena bamanye ne, Tuetu bonso bakabatijibua mu Kilisto Yesu, tuakabatijibua mu lufu luandi? Ke tuakajikibua nʼandi ku dibatiza mu lufu, bualu bua bu mudi Kilisto mubishibue ku bafue bua butumbi bua Tatu, muomumue kabidi butudi nʼabu mbua kuenda mu muoyo muhia-muhia. Bituikala babumbakasha nʼandi mu tshifuanyikishi tshia lufu luandi, netuikale babumbakasha nʼandi kabidi mu tshifuanyikishi tshia dibika diandi dia ku lufu. Tudi bamanye bualu ebu ne, Muoyo wetu mukulukulu wakashihibua nʼandi ku mutshi mutshiamakane, bua mubidi wetu wa bubi kujimishibua; bua tuetu katuikadi mu buhika bua bubi kabidi. Bua muntu udi mufue udi mubingishibue ku bubi. Bituikala bamane kufua ne Kilisto, tudi tuitabusha ne, Netuikale nʼandi ne muoyo kabidi. Tudi bamanye ne, Kilisto wakabishibua ku lufu kena ufua kabidi; lufu kaluena mua kumukokesha kabidi. Bualu bua hakafueye, yeye wakafua ku bubi musangu umue tshiendelele; kadi muoyo udiye nʼau, udi nʼau kudi Nzambi. Muomumue nuenu kabidi, nudibale ne, Tudi bafue ku bubi, kadi tudi ne muoyo kudi Nzambi mu Kilisto Yesu. Nunku kanuitabushi bua bubi bukokeshe mu mibidi yenu ifuafua, bua nuenu nutumikile nkuka yai. Kanufidi bituha bia mibidi yenu ku bubi, bu bielelu bia nvita bia malu mabi; hadi nudifile kudi Nzambi bu bantu bakubika ku lufu, nufile bituha bia mibidi yenu kabidi bu bielelu bia nvita bia buakane kudi Nzambi. Bualu bua bubi kabuena bunukokesha; bua kanuena munshi mua mikenshi, nudi munshi mua ngasa. Tuenze tshinyi? Tuenze malu mabi bualu bua katuena munshi mua mikenshi ne bua tudi munshi mua ngasa, anyi? Nasha kakese! Kanuena bamanye ne, Unudi midifila kudiye bu bahika bua kumutungila, nudi hahika ba unudi nutumikila; ne ba bubi tô ne ku lufu, ne ba ditumikila tô ne ku buakane? Tuasakidila kudi Nzambi, ne, Nuenu nuakadi bahika ba bubi, kadi nuakatumikila mu mitshima yenu mushindu wa diyisha diakanubueshabomu. Hanuakahikudibua ku bubi, nuakavuishibua bahika ba buakane. (Ndi ngakula ne tshiakuidi tshia bantu bualu bua butekete bua mibidi yenu.) Bu munuakafila bituha bia mibidi yenu bu bahika ba bukoya ne malu mabi ha mutu ha malu mabi, nunku katataka filai bituha bia mibidi yenu bu bahika ba buakane bua kudijidila. Bualu bua hanuakadi bahika ba bubi, nuakadi ne budishikaminyi ku buakane. Nunku mu tshikondo atshi nuakadi ne mamuma kai mu malu adi anufuisha bundu katataka? Bua kunshikidilu kua malu au ndufu. Kadi katataka hanuakahikudibua ku bubi, ne hanuakavuishibua bahika ba Nzambi, nudi ne mamuma enu a ku dijidila dienu, kunshikidilu kua malu au mmuoyo wa tshiendelele. Bualu bua difutu dia bubi ndufu, kadi diha dia luse dia Nzambi mmuoyo wa tshiendelele mu Kilisto Yesu Mukelenge wetu. Kanuena bamanye, bana betu (ndi ngambila bantu badi bamanye mikenshi) ne, Mikenshi idi ikokesha muntu matuku onso atshidiye ne muoyo? Mukashi udi ne bayandi, udi musuikibue kudi bayandi ne mikenshi hatshidiye ne muoyo; kadi biafua bayandi, mukashi udi musuluibue ku mukenshi wa bayandi. Nunku, hatshidi bayandi ne muoyo, biabakibua mukashi kudi munga mulume, nebamuidike ne, Muena masandi; kadi biafua bayandi, mukashi udi umushibua ku mukenshi wa bayandi, ne kena amena masandi biabakibueye kudi mulume mukuabo. Nunku, bana betu, nuenu kabidi nuakashihibua ku mikenshi bua mubidi wa Kilisto, bua nuenu kuikala kudi mukuabo, yeye mene wakabishibua ku lufu, bua tuetu tukuamine Nzambi mamuma. Bualu bua hatuakadi mu malu a mubidi, nkuka ya malu mabi yakadiku bualu bua mikenshi, yakenzesha bituha bia mibidi yetu bua kukuambila mamuma a lufu. Kadi katataka tuakamana kumushibua ku mikenshi hatuakafua ku muanda utuakadi basuikamu; nunku tudi tukuatshila Nzambi mudimu mu malu mahia-mahia a Nyuma, katuena tumukuatshilau mu malu makulukulu a maleta a mikenshi. Netuambe tshinyi? Mikenshi idi bualu bubi, anyi? Nasha kakese! Kadi, tshiakadi kumanya bubi tshi mubumanye ku mikenshi; bualu bua tshiakadi kumanya disamba muoyo bu mikenshi kayi mimane kuamba ne, Kusaminyi bintu bia mukuenu muoyo; kadi bubi, bualu bua buakaheta tshikondo tshiakane, buakenzesha munda muanyi mishindu yonso ya disamina muoyo; bualu bua kudi kakui mikenshi, bubi budi butue. Tshikondo tshikuabo nakuikala ne muoyo tshi ne mikenshi; kadi hakalua mukenshi, bubi buakatabuluka, ne meme nakafua. Mukenshi, wakadi ku muoyo, eu nakasangana muikale ku lufu. Bualu bua bubi buakaheta tshikondo tshiakane, buakanteya ku mukenshi, buakanshiha nʼau. Nunku mikenshi idi ya tshijila, ne mukenshi au udi wa tshijila ne udi muakane ne udi muimpe. Nunku muanda wakadi muimpe wakalua lufu kundi, anyi? Nasha kakese! Kadi bubi, bua buobuo bimueneshibue ne, Mbubi, mu kuenzesha kua lufu kundi ku muanda udi muimpe; bua bubi bulue bubi butamba bunene bua mukenshi. Tudi bamanye ne, Mikenshi idi ya nyuma, kadi meme ndi ne mutshima wa kulonda malu mabi a mubidi, ndi muhanyibue ku bubi. Bualu bua tshiena njingulula bualu bundi ngenza; tshitu ngenza bualu bundi musue kuenza, kadi ndi ngenza bualu bundi nkina. Bingenza bualu ebu bundi tshi musue, ndi ngitabusha mikenshi ne, Idi mimpe. Nunku kameme kabidi udi wenza bualu ebu, kadi mbubi budi buikala munda muanyi budi kubuenza. Ndi mumanye ne, Munda muanyi, mu mubidi wanyi mene, kamuena muikale bualu buimpe; bualu bua disua dia kuenza bimpe didi kundi, kudi bakole bua mua kuenza nʼabu bimpe kabuenaku. Bualu bua muanda muimpe undi musue kuenza, tshiena ngenza, kadi muanda mubi undi tshi musue kuenza, eu ngundi ngenza. Kadi bingenza muanda undi tshi musue kuenza, kameme kabidi udi wenza, kadi bubi budi buikala munda muanyi budi bungenzesha. Nunku ndi nsangana mukenshi eu kundi meme ne, Handi musue kuenza bimpe, bubi budi nʼanyi. Ndi nsanka munda muanyi bua mikenshi ya Nzambi, kadi ndi mona mukenshi mukuabo mu mubidi wanyi udi uluangana ne mukenshi wa mu meshi anyi, ne udi umbuesha mu buhika bua mukenshi wa bubi udi mu mubidi wanyi. Ka meme muena majia! Wansulula ku mubidi wa lufu elu, nganyi? Ndi nsakidila Nzambi bua Yesu Kilisto Mukelenge wetu! Nunku meme hanyi ku meshi anyi ndi nkuatshila mikenshi ya Nzambi mudimu, kadi ku mubidi wanyi adi nkuatshila mukenshi wa bubi mudima. Nunku kakuena dihila mpindiu kudi badi mu Kilisto Yesu. Bualu bua mukenshi wa Nyuma wa muoyo wa mu Kilisto Yesu wakampikula ku mukenshi wa bubi ne wa lufu. Bualu bua malu akadi mikenshi kayi ne kukole bua kuenza bua yakadi mitekete bua mibidi ya bantu, Nzambi, hakatumeye Muana wandi mene ne mubidi mufuane wa malu mabi, ne bua bualu bua bubi, wakahisha bubi mu mubidi; bua buakane budi mikenshi yamba bushikishibue munda muetu, badi kabai benda mu malu a mubidi, kadi badi benda mu malu a Nyuma. Bualu bua badi balonda malu a mubidi badi bateka meshi abo ku malu a mubidi; badi balonda Nyuma badi bateka meshi abo ku malu a Nyuma. Bualu bua meshi mateka ku malu a mubidi adi lufu, kadi meshi mateka kudi Nyuma adi muoyo ne ditalala. Bua meshi mateka ku malu a mubidi adi ne Nzambi lukuna, kêna manze kudihuekesha munshi mua mikenshi ya Nzambi; bualu bukuabo kabidi, kêna ne bukole bua kuenza nunku. Badi bikala mu malu a mubidi kabena bamanye mua kusankisha Nzambi. Kadi nuenu kanuena nuikala mu malu a mubidi, nudi nuikala mu malu a Nyuma, bikala Nyuma wa Nzambi munda muenu. Ne bikala muntu kai ne Nyuma wa Kilisto, kena wa Kilisto nasha. Bikala Kilisto munda muenu, mubidi udi mufue bualu bua bubi, kadi nyuma udi ne muoyo bualu bua buakane. Bikala Nyuma wa yeye wakabisha Yesu ku bafue muikale munda muenu, yeye wakabisha Kilisto Yesu ku bafue neahe kabidi mibidi yenu ifuafua muoyo, bualu bua Nyuma wandi udi usomba munda muenu. Nunku, bana betu, tudi bena dibanza, kendia mubidi bua kulonda malu a mubidi. Bua binualonda malu a mubidi, nudi ne bualu bua kufua; kadi binuafuisha bienzedi bia mubidi kudi Nyuma, nenuikale ne muoyo. Bonso badi balombodibua kudi Nyuma wa Nzambi, bobo badi bana ba Nzambi. Bua kanuakuangata nyuma wa buhika tshiakabidi bua kutshina; kadi nuakuangata nyuma wa buhianyi bua bana utudi tubikila nʼandi Nzambi ne, Aba, Tatu. Nyuma Muimpe muine udi mumanyishangane ne nyuma yetu ne, Tuetu tudi bana ba Nzambi. Ne bituikala bana, tudi bahianyi kabidi; bahianyi ba Nzambi, ne bahianyi tshiahamue ne Kilisto: bituakenga nʼandi, mbua tuetu tutumbishibue nʼandi. Bualu bua ndi mbala makenga a mu tshikondo etshi ne, Kêna makumbane bua kuelekeshibua ne butumbi budi buamba kumueneshibua kutudi. Bualu bua ditekemena dikole dia bifukibua didi dindila dimueneshibua dia bana ba Nzambi. Bualu bua bifukibua biakatekibua ku nyima kua malu a hatuhu, kembualu bua kudisunguila kuabi, kadi bua Nzambi, wakabiteka muiku mu ditekemena edi ne, Bifukibua mene nebihikudibue kabidi ku buhika bua dibola diabi, nebibueshibue mu budishikaminyi bua butumbi bua bana ba Nzambi. Bualu bua tudi bamanye ne. Bifukibua bionso bidi bitua mikemu hohamue ne bidi bidinyenga hohamue tô ne katataka. Kambiobio nkayabi bidi bienza nunku, hadi tuetu kabidi badi ne mamuma a kumudilu a Nyuma Muimpe, tuetu bine tudi tufua mikemu munda muetu, hatudi tuindila buhianyi buetu bua bana, mbuhikudibu bua mibidi yetu mene. Bua tuakasungidibua mu ditekemena; kadi ditekemena didibo bamona ku mesu kanditekemena; bualu bua muntu kai udi utekemena bidiye umona ku mesu? Kadi bituatekemena bitudi katu! tumona ku mesu, tudi tuindila ne ditantamana. Muomumue kabidi, Nyuma Muimpe kabidi udi ukuatshishangana nʼetu mu butekete buetu; bua katuena bamanye mua kulomba Nzambi bu mutudi nʼabu mbua kumulomba, kadi Nyuma muine udi utuakuila ne mikemu idi kayi mua kuambibua. Nzambi, udi ukeba mu mitshima ya bantu, udi mumanye meshi a Nyuma ne, Udi Wakuila basanto bu mudi Nzambi musue. Tudi bamanye kabidi ne, Malu onso adi akuatshishangana bua kumusha diakalengele kudi bantu badi bananga Nzambi, kudi badi babikidibue bu mudi disungula diandi. Bua bantu bakadianjileye kumanya diambedi yeye wakadianjila kubasungila kabidi, bua kuikalabo bafuanyikishibue ku tshifuanyikishi tshia Muana wandi, bua yeye ikale muanʼa bute munkatshi mua bana babo ba bungi. Bakadianjileye kusungula, yeye wakababikila kabidi; ne bakabikileye, yeye wakababingisha kabidi; ne bakabingisheye, yeye wakabatumbisha kabidi. Netuambe tshinyi bua malu â? Bikala Nzambi nʼetu, nganyi udi mumanye mua kutuhumbisha? Yeye kakimina Muana wandi mene, kadi wakamufila bua buonso buetu, munyi muahidieye kutuha nʼandi kabidi bintu bionso hatuhu? Udi mua kubanda basungudibue kudi Nzambi nganyi? Udi ubabingisha nNzambi. Udi ubahisha nganyi? NKilisto Yesu mene wakafua, E, bulelela, wakabishibua ku lufu, udi ku tshianza tshikole tshia Nzambi, udi utuakuila kabidi. Udi mua kutuhandulula ku dinanga dia Kilisto nganyi? Ntatu idi mua kuenza nunka, anyi kanyinganyinga, anyi tshinyangu, anyi tshiole, anyi butaka, anyi njû, anyi muele wa nvita? Mbu muakafundabo ne, Bua bualu buebe tudi tushihibua dinda tô ne ku dilolo; Tudi tubadibua bu mikoko ya kushihibua. Nasha; mu malu â onso tudi tutamba kuhita bualu bua bukole bua Yesu wakatunanga. Bualu bua ndi ngitabushishibua ne, Kakuena lufu, kakuena muoyo, kakuena banjelo, kakuena bakokeshi, kakuena malu atshidiku, kakuena malu atshilualua, kakuena makelenge, kakuena bule, kakuena ndondo, kakuena tshintu tshionso tshikuabo tshifukibua tshidi ne bukole bua kutuhandulula ku dinanga dia Nzambi didi mu Kilisto Yesu Mukelenge wetu. Ndi ngamba bualu bulelela mu Kilisto, tshiena nshima; muoyomukese wanyi udi umanyishangana nʼanyi mu Nyuma Muimpe ne, Meme ndi ne kanyinganyinga kanene ne majia adi kaî ashika mu mutshima wanyi. Nakadi kusua kuedibua mulau wa kumushibua hanyi kudi Kilisto, bualu bua bana betu, badi bakuetu ba mubidi. Badi Bena Isalele mene, badi ne buhianyi bua bana, ne butumbi, ne mahungila, ne kuhebua kua mikenshi, ne mitendelelu, ne milayi. Bankambua betu mbabo, kudibo nkudi Kilisto mufume mu buntu buandi, udi biandi ku mutu kua bonso, Nzambi mene, mutumbishibue tshiendelele. Amen. Kadi bualu ebu kabuena bulesha ne, Dî dia Nzambi diakuhanga. Bualu bua bonso ba mu Isalele kabena Bena Isalele bulelela, ne buonso buabo kabena bana bandi: bualu bua badi tunkanunuina tua Abalahama; kadi mbu muakafundabo ne, Mu Isaka tunkanunuma tuebe, netubikidibue. Nunku, kembana badi baledibua ku mubidi badi bana ba Nzambi, kadi bana ba mulayi badi babadibua bu tunkanunuma. Bua edi ndî dia mulayi ne, Halua tshikondo etshi, nendue, ne Sala nealele muana mulume. Kembualu ebu nkayabu, kadi Lebeka wakimita difu kudi nkambua wetu, Isaka; ne diambedi bana kabai banze kuledibua, kabai banze kuenza bualu buimpe anyi bualu bubi, bualu bua disua dia Nzambi dikale dijalama bu mudi disungula diandi, kambua kuenza kua mikenshi, kadi bua yeye udi ubabikila, Nzambi wakamuambila ne, Mukulu neakuatshile muakunyi mudimu. Mbu muakafundabo ne, Nakananga Yakoba, kadi nakakina Esau. Nunku netuambe tshinyi? Malu mabi adi kudi Nzambi, anyi? Nasha kakese! Nzambi wakambila Mose ne, Nenfuile bantu luse bandi musue kufuila luse, nendeshe bantu dinanga bandi musue kulesha dinanga. Nunku luse ebi kambua disua dia muntu, anyi bua bienzedi bia muntu, kadi anu bua Nzambi udi ufua luse. Mukanda wa Nzambi udi Wambila Palô ne, Bua bualu ebu nakakubishila, bua kulesha bukole buanyi munda muebe, ne bua dina dianyi ditedibue ha buloba buonso. Nunku udi ufuila badiye musue luse, udi ukolesha mitshima ya badiye musue. Nunku neungambile ne, Nzambi utshidi utandishila bantu bualu kai? Bualu bua wakuanza kufunyina Nzambi ku disua diandi nganyi? Nasha, kadi wewe, muntu udi nganyi udi wela Nzambi mpata? Tshintu tshifukibua netshikenke mufuki watshi ne, Wakunfuka nunku bualu kai, anyi? Mufumbi kena ne bukokeshi bua dima bua kufumba ne dibulu diodiumue tshifuadi tshimue tshia mudimu wa butumbi ne tshinga tshia mudimu wa hatuhu, anyi? Bikala Nzambi, hakasueye kulesha bantu tshishi tshiandi, ne kubamanyisha bukole buandi, wakatukisha ne lutulu lunene bifuadi bitekela tshishi tshiandi bilongolodibua bua dibutuka, ne bua kumanyisha bantu bua bubanshi bua butumbi buandi ku bifuadi bilesha luse biakadianjileye kulongolola ku butumbi, tuetu mene, bakabikileye kabidi, kamba munkatshi mua Bayuda nkayabo, kadi ba munkatshi mua bisamba bia bende kabidi; ebu mbualu bukole, anyi? Bu mudiye muambe kabidi mu Hoshea ne, Nembikile bakadi kabai bantu banyi ne, Mbantu banyi; Nembikile wakadi kai munangibue ne, Munanga. Bualu ebu nebuikaleku kabidi ne, Mu muaba muakadibo bamba ne, Kanuena bantu banyi, muamua nebabikidibue ne, Bana ba Nzambi wa muoyo. Yeshaya wakela dî dikole ne, Bikala bungi bua Bena Isalele bu nsenga ya kukala kua mai manene, difuka didi dishala nedisungidibue. Bualu bua Mukelenge nenze dî diandi ha buloba; neadishikishe, neadikose. Mbu muakamba Yeshaya diambedi ne, Bu Mukelenge wa Misumba Yonso kai mutushile diminu dia bantu, Tuakadi kulua bu Sodoma, tuakadi kufuishibua bu Amola. Ahu, netuambe tshinyi? Netuambe ne, Bantu ba bisamba bia bende, bakadi kabai balonda buakane, bakaheta buakane, buakane mene budi bua ku ditabusha. Kadi Isalele, wakadi ulonda mukenshi wa buakane, kakafika ku mukenshi eu. Bualu kai? Bualu bua bakabakeba kenku ditabusha, hadi bu mudibo babukeba ku kuenza kua mikenshi. Bakalenduka ku dibue dia tshilenduishi, bu muakafundabo ne, Tangila, ndi nteka mu Siona dibue dia tshilenduishi, ne dibue dia buteyi; Ne weyemena kudidi kena ufuishibua bundu. Bana betu, disua dia mu mutshima wanyi ne dilomba dianyi kudi Nzambi bua bualu buabo bidi bua bobo bahete luhandu. Bua ndi mumanyi wa bualu buabo ne, Badi ne lukunukunu kudi Nzambi, kadi kandua lungenyi lulelela. Bualu bua hakahangabo kumanya buakane bua Nzambi, ne hakadibo bakeba kujadika buakane buabo mene, kabakadikokesha ku buakane bua Nzambi. Bualu bua Kilisto udi kundekelu kua mikenshi tô ne ku buakane kudi yonso udi witabusha. Mose wakafunda ne, Muntu udi wenza buakane bua ku mikenshi neikale ne muoyo bualu buabu. Kadi buakane bua ku ditabusha budi buamba nunku ne, Kudiambi munda muebe ne, Wabanda mu diulu nganyi? (bualu ebu budi bu kuhuekesha Kilisto ha buloba); anyi, Wahueka mu muaba wa bafue nganyi? (bualu ebu budi bu kubisha Kilisto ku bafue). Kadi buakane bua ka ditabusha budi buamba tshinyi? Dî edi didi ba buihi nʼebe, didi mukana muebe mene ne mu mutshima webe; edi ndî dia ditabusha ditudi tuambila bantu. Biwajukula ne mukana muebe ne, Yesu udi Mukelenge, ne biwitabusha mu mutshima webe ne, Nzambi wakamubisha ku bafue, neusungidibue. Bualu bua bantu badi bitabusha ne mutshima bua kuheta buakane, badi bajukula ne mukana bua kuheta luhandu. Mukanda wa Nzambi udi wamba ne, Wamuitabusha kena ufuishibua bundu. Bualu bua kakuena ditahuluka hankatshi ha Muena Yuda ne Muena Gelika, bualu bua umue udi Mukelenge wa bonso, udi ne bubanshi bua luse kudi bonso badi bamutendekena. Bualu bua muntu yonso watendekena dina dia Mukelenge neasungidibue. Munyi muamutendekenabo kabai banze kumuitabusha? Munyi muamuitabushabo kabai banze kunvua lumu hiandi? Munyi munvuabo lumu luandi kabai ne muambidi. Munyi muabambilabo kabai batumibua? Mbu muakafundabo ne, Makasa malengele nga bantu badi balua ne Lumu luimpe lua malu mimpe. Kadi bonso kabakatelesha ku lumu luimpe. Bua Yeshaya udi wamba ne, Mukelenge, wakuitabusha muwakuamba nganyi? Nunku ditabusha didi difuma ku diunvua, ne diunvua didi bua dî dia Kilisto. Kadi ndi ngamba ne, Kabakunvua, anyi? E, bulelela, bakunvua, ne, Dî diabo diakamuangalaka ha buloba buonso, Ne mei abo akambibua kunfudilu kua buloba. Kadi ndi nkonka ne, Bena Isalele kabakamanya, anyi? Diambedi Mose udi wamba ne, Meme neufuishe mukau kudi badi kabai bu tshisamba; Nenukuatshishe tshishi kudi tshisamba tshia bantu bahote. Ne Yeshaya udi ne dikima dikole, udi wamba ne, Nakasanganyibua kudi bakadi kabai bankeba; Nakamueneka kudi badi kabai bangebesha. Kadi bua Bena Isalele udi wamba ne, Dituku dijima nakolola bianza bianyi kudi bantu badi ne buhidia ne butontolodi. Nunku ndi ngamba ne, Nzambi wakumusha bantu bandi, anyi? Nasha kakese! Bualu bua meme kabidi, ndi Muena Isalele, kankanunuina ka Abalahama ka mu tshisamba tshia Benyamina. Nzambi kakumusha bantu bandi bakadianjileye kumanya. Anyi kanuena bamanye dî didi Mukanda wa Nzambi wamba bualu bua Eliya, anyi? Mbu mudiye usengelela Nzambi bua kukengesheye Isalele ne, Mukelenge, bakashiha baprofete bebe, bakabutula bioshelu biebe, ne meme ndi mushale nkayanyi, ne badi bakeba muoyo wanyi. Kadi diandamuna dia Nzambi didi dimuambila tshinyi? Udi Wamba ne, Bua bualu buanyi nakadishila balume binunu muanda mutekete badi kabai batue binu hanshi kudi Bâla. Nunku muomumue mu tshikondo etshi difuka dikese didiku bua disungula dia ngasa. Kadi bikaladi bualu bua ngasa, kendia kuenza kua mikenshi kabidi; bua bikaladi nunku, ngasa kena kabidi ngasa. Nunku ntshinyi? Bualu budi Isalele ukeba, mbudiye kai uheta; kadi basungudibue kudi Nzambi bakabuheta, ne bakuabo bakakoleshibua mu mitshima. Mbu muakafundabo ne, Nzambi wakabaha nyuma wa kubabungisha tulu, mesu bua kâmonyi, ne matshu bua kâunvu, tô ne ku dituku edi mene. Ne Davidi udi wamba ne, Mesa a bia kudia alue bukuondo ne buteyi Ne tshilenduishi, ne difutu dihingana kudibo; Mesu abo ikale mîdima bua kabamonyi, Ukobemeshe nyima yabo matuku onso. Nunku ndi ngamba ne, Bakadilenduisha bua kuhonabo, anyi? Nasha kakese! Kadi bua kuhona kuabo luhandu luakulua kudi bisamba bia bende bua kufuisha Bena Isalele mukau. Ahu bikala kuhona kuabo kuakulua bubanshi bua ba ha buloba, ne bikala dihanga diabo diakulua bubanshi bua bisamba bia bende, divulangana dia dihingana diabo neditambe kuvuisha disanka misangu bungi munyi? Ndi nuambila dî, nuenu ba bisamba bia bende. Bualu bua meme ndi mupostolo kudi bisamba bia bende, ndi ntumbisha mudimu wanyi; ne binamanya mua kufuisha ba tshisamba tshianyi mukau ku muanda wonso, ne kusungila bakuabo ba munkatshi muabo. Bua bikata kumushibua kuabo kuakulua dilengesha dia ba ha buloba ne Nzambi, ditabushibua diabo nedilue tshinyi tshikuabo, anu muoyo wa ku bafue mene? Bikala bintu bia kunowa bia kumudilu bia tshijila, bionso nebikale bia tshijila; bikala muji wa tshijila, matamba adi muomumue kabidi. Bikala matamba makuabo akuahudibua, ne wewe, mutshi wa oleve wa tshisuku wakalamakashibua munkatshi muau, ne wakalua muangatshi nʼau wa bukole bua muji wa mafuta wa mutshi muimpe wa oleve; kuditumbishi ku matamba â. Kadi biwaditumbisha, uvuluke ne, Kenguewe udi ukolesha muji, kadi mmuji udi ukukolesha wewe. Nunku newambe ne, Bakuahula matamba bua meme kulamakashibuamu. Bimpe; bakuâhula bua huhidia buau, kadi wewe udi ujalamamu bua ditabusha diebe. Kuedi meshi a kudilesha, kadi utshine biebe. Bua bikala Nzambi kai mubange kuahula matamba malelela, kena ubenga kuahula wewe kabidi. Ka, mona buimpe ne mutshima mukole bia Nzambi,—mutshima mukole kudi bakahona, ne buimpe bua Nzambi kudi wewe, biwananukila mu buimpe buandi; kadi biwahanga kunanukila, wewe neukoshibue kabidi. Ne bobo kabidi, bikalabo kabai bananukila mu buhidia buabo, nebalamakashibue ka mutshi kabidi; bualu bua Nzambi udi ne bukole bua kubalamakashaku kabidi. Bua bikala wewe mukoshibue ku mutshi wa oleve udi udiunda mu tshisuku bu mudi tshilele tshiau, ne biwikala mulamakashibue ku mutshi muimpe wa oleve bu mudi kamui tshilele; bualu budi butamba bua wowo, adi matamba malelela, alamakashibue ku mutshi wau mene. Bana betu, tshiena musue nuhange kumanya bualu ebu busokoka, bua nuenu kanuditekemenyi bu munudi bena meshi, ne, Bukole bua mutshima buakakuata Bena Isalele tshituha tshihi, tô ne hafika dikumbana dia bisamba bia bende mu lumu luimpe. Nunku Bena Isalele bonso nebasungidibue, bu muakafundabo ne, Musungidi neahatuke mu Siona; Neatshinguluile Yakoba malu adi kâi a Nzambi; Ne etshi ntshihungidi tshianyi tshindi mpunga nʼabo, Hanumusha malu mabi abo. Mu bualu bua lumu luimpe, Bena Isalele badi bena lukuna ba Nzambi bua bualu buenu; kadi mu bualu bua disungula dia Nzambi badi banangibua kudiye bua bualu bua bankambua babo. Bua Nzambi kena ukudimuna mutshima bua maha andi ne dibikila diandi kudi Isalele. Bu munuakadi ne buhidia kudi Nzambi mu bikondo biakashala ku nyima, kadi mpindiu nnakuheta luse ku buhidia buabo; muomumue bobo kabidi badi ne buhidia katataka kudi Nzambi, bua kuhetabo luse katataka ku luse luakanulesheye. Bua Nzambi wakinshidila bantu bonso mu buhidia, bua kulesha bantu bonso luse. Monai ndondo wa bubanshi bua meshi ne lungenyi bua Nzambi! Monai mutudi katui mua kujingulula bilumbuluidi biandi, mutudi katui mua kulonda nshila yandi! Bua wakamanya meshi a Mukelenge nganyi? Anyi wakamuha meshi nganyi? Anyi muntu kai wakadianjila kuha Mukelenge tshintu, ne nebamuhingashiletshi kabidi? Bualu bua bintu bionso biakafuma kudiye, bidiku bua bualu buandi, bidi bikala anu kudiye. Butumbi buikale kudiye tshiendelele! Amen. Nunku, bana betu, ndi nusengelela, bua luse lua Nzambi, bua nufile mibidi yenu bu mulambu udi ne muoyo, wa tshijila, udi usankisha Nzambi bimpe; bualu ebu budi kutendelela kuenu kudi ne meshi. Kanudifuanyikishi ku malu a mu tshikondo etshi, kadi miandamuke ku dikudimuna dia meshi enu to meshi mahia-mahia bua nuenu nujingulule mudi disua dia Nzambi didi dimpe, didi dimusankisha, ne didi diakane tshishiki. Bua ndi ngambila muntu yonso udi munkatshi muenu, ku ngasa wakumpabo ne, Katambi kudielangana meshi mahite adiye ne bua kuela, kadi bua kuela meshi ne meshi adi malulame, bu mudi Nzambi muidikishile muntu yonso tshidikishilu tshia ditabusha. Bua, bu mutudi ne bituha bia bungi mu mubidi umue, ne bituha bionso kabiena ne mudimu muomumue, nunku, tuetu, bantu ba bungi, tudi mubidi umue musangila mu Kilisto, ne kudi muntu ne muntu, tudi tuikalangana bu bituha bia bakuabo. Bualu bua tudi ne bihedi bitahuluka bu mudi ngasa wakatuhabo, bitu ikala ne mudimu wa buambi, tuambe bietu bu mudi tshidikishilu tshia ditabusha dietu; anyi, bituikala ne mudimu wa mukuatshishi, tuenze mudimu wetu bimpe; ne udi uyisha alamate kudi buyishi buandi. Musengeledi alamate kudi disengelela diandi, muntu udi ufila bintu, abifile ne mutshima mulelela; udi ukokesha, akokeshe ne disuminyina; udi ulesha luse, aluleshe ne disanka. Luse luikale kalui ne lubombo. Nukine malu adi mabi; nulamate malu adi mimpe. Mu dinanga dia bana benu ba mu Kilisto nunangangane, muntu ne muntu; mu buneme muntu ne muntu ateke mukuabo ku mpala. Mu disuminyina kanuikadi bashanguluki; nuikale ne lukunukunu mu mitshima yenu; nukuatshile Nzambi mudimu. Nusanke mu ditekemena dienu, nuikale ne ditantamana mu makenga; nunanukile mu kutendelela. Nukuatshishe basanto ne bintu bidibo bakengela; nusankidile benyi misangu yonso. Nusankishe badi banukengesha; nubasankishe, kanubedi mulau. Nusanke ne badi basanka; nudile ne badi badila. Nuikalangane ne meshi amue, muntu ne muntu; kanuteki meshi enu ku malu mahite, kadi nudihuekeshe ku malu adi mahuekela. Kanuditekemenyi bu munudi bena meshi. Kualukishidi muntu bubi ku bubi buandi. Nudianjile kuela meshi bua kuikala ne malu mimpe ku mesu bua bantu bonso. Binuamanya mua kuenza nunku mu bienzedi bienu, nuikale ne bantu bonso ditalala. Kanudisombuedi, bana betu banangibue, kadi nushile tshishi tshia Nzambi muaba; bualu bua bakafunda ne, Busombuedi mbuanyi, meme nenfute; mudi muamba Mukelenge. Kadi bikala muena lukuna webe ne nsala, umuhe bia kudia; bikaleye ne nyota, umuhe bia kunua; bualu bua biwenza nunku, neutentekeshe makala a kahia ha mutu handi. Lekela kuhitshibua kudi malu mabi; kadi wikale uhite malu mabi ku malu mimpe. Muntu yonso aditeke ku nyima kua bakokeshi badi ku mutu kuandi. Bua kakuena bukokeshi budi kabui bulua kudi Nzambi; ne makokeshi adiku akajadikibua kudi Nzambi. Nunku muntu udi uhidia kudikokela kudi bukokeshi udi uhidia mei majadikibue kudi Nzambi. Badi bahidia nunku nebadiangatshile dilumbuluisha. Bualu bua bakokeshi kabena bavuisha buowa kudi benji ba malu mimpe, kadi anu kudi benji ba malu mabi. Wewe udi musue kuikala kui ne buowa kudi bukokeshi, anyi? Wenze malu mimpe ne wewe newikale ne butumbi kudibu. Bualu bua makokeshi yonso udi muena mudimu wa Nzambi kûdi bua kukuvuishila buimpe. Kadi biwenza bibi, utshine; bua yeye kena utuala muele wa nvita hatuhu. Udi biandi muena mudimu wa Nzambi, udi musombuedi wandi bua kuvuisha tshishi kudi udi wenza bibi. Nunku bunudi nʼabu mbua kuditeka ku nyima kuabo, kenganu bualu bua tshishi atshi, kadi bua muoyo-mukese wenu kabidi. Bua bualu ebu nudi nulambula kabidi; bua bobo badi bakuatshi ba mudimu ba Nzambi balamata ku muanda eu mene. Nualukishile bantu bonso mabanza abo: mulambu kudi muenu mulambu, mpunga kudi unudi mua kuhunga, buowa kudi unudi mua kutekela buowa, buneme kudi unudi mua kunemeka. Kanuikadi ne muntu dinga dibanza anu dia kunangangana; bua wananga mukuabo wakushikisha mikenshi. Bualu bua mikenshi ei ne, Kuendi masandi, kushihi muntu, kuibi, kukumi mutshima kudi bintu bia makuabo, ne bikalaku mukenshi wonso mukuabo, wowo udi musungulula mu dî edi ne, Sua mukuenu bu mûdi mudisue. Luse kaluena luenzela mukuabo bubi; nunku luse ludi tshiuwidi tshia mikenshi. Nuenze malu â, bualu bua nudi bamanye tshikondo etshi ne, Diba diakumana kufika bua nuenu kubishibua ku tulu; bua katataka luhandu luetu ludi lutamba dituku dia dianjila kuitabusha kuikala ha buihi. Butuku budi buamba kutshia, munya wakusemena ha buihi, nunku tuvule bienzedi bia midima, tuluate bintu bia nvita bia munya. Tuendakana! bietu bilengele, bu mutudi tuenda mu munya; katuendi mu manaya a tshianana ne mu bukuatshiki bua malulu, mu malu a bundu ne a bienzenza bia masandi, mu kutandangana ne mukau. Kadi nudiluatshishe ne Mukelenge Yesu Kilisto; kanulongoluedi mibidi malu bua kumana nkuka yai. Nuitabushe muntu udi mutekete mu ditabusha diandi bu muanʼenu, kadi kembua kuelangana nʼandi mpata. Munga muntu udi ne ditabusha dia mua kudia bintu bionso, kadi mukuabo udi mutekete ma ditabusha udi udia midioko. Muntu udi udia bintu bionso kahetudi udi kai ubidia; ne udi kai ubidia balumbuluishi udi ubidia; bualu bua Nzambi mene wakamuitabusha. Wewe udi nganyi udi ulumbuluisha umena mudimu wa mu nsubu wa mukuabo? Yeye udi wimana anyi udi uhona bua mukelenge wandi mene. Yeye neimane, bualu bua Mukelenge udi ne bukole bua kumuimanyika. Mukuabo udi utumbisha dituku ha mutu ha dikuabo; kadi mukuabo udi utumbisha matuku onso muomumue. Muntu ne muntu ikale ne dijingulula dijalame bua buala budi buhita buimpe. Udi uteka meshi andi ku dituku udi wateka nunku bua Mukelenge; ne udiadia, udiadia bua Mukelenge, bualu bua udi usakidila Nzambi. Ne udi kai udia, kena udia bua Mukelenge, ne udi Nzambi. Bua kakuena muntu munkatshi muetu udi ne muoyo ha nkayandi, ne kakuena muntu udi udifuila ha nkayandi. Bua bituikala ne muoyo, tudi ne muoyo bua Mukelenge; bituafua, tufuafua bua Mukelenge; nunku, bituikala ne muoyo, anyi bituafua, tudi ba Mukelenge. Bua bualu ebu Kilisto wakafua, ne wakadi ne muoyo kabidi, bua yeye ikale Mukelenge wa bafue ne wa badi ne muoyo kabidi. Abu wewe, udi ulumbuluisha muanʼenu bua tshinyi? Anyi wewe kabidi, udi uhetula muanʼenu bua tshinyi? Bua buonso buetu netuimane ku mpala kua tshilumbuluidi tshia Nzambi. Bua badi bafunda ne, Mukelenge udi wamba ne, Bu mundi ne muoyo, muntu yonso neantuile binu hanshi, Ne ludimi luonso nelutumbishe Nzambi. Nunku, buonso buetu, muntu ne muntu, neabadile malu andi kudi Nzambi. Katulumbuluishanganyi kabidi; kadi mbimpe dilumbulula dienu dikale bua muntu kateki buteyi anyi tshilenduishi mu nshila wa muanʼetu wa mu Kilisto. Ndi mumanye ne ndi neitabushishibue mu Mukelenge Yesu ne, Kakuena tshintu tshidi tshibi nkayatshi; anu kudi muntu udi utshibala bu tshintu tshibi, tshidi tshibi kudiye. Bikala muanʼenu wa mu Kilisto unyingalala mutshima bua bia kudia, wewe kuena wenda kabidi mu nshila wa dinanga. Kushihi muoyo wa muntu wakafuilabo kudi Kilisto ku bia kudia biebe. Nunku bantu kabahendi bualu buebe buimpe. Bua bukelenge bua Nzambi kabuena bualu bua kudia ne bua kunua, kadi mbua buakane ne ditalala ne disanka bia mu Nyuma Muimpe. Bualu bua wakuatshila Kilisto mudimu mu malu â udi usankisha Nzambi ne udi utumbishibua kudi bantu. Nunku tulonde bietu malu adi avuisha ditalala ne malu atudi mua kudiundishangana nʼau. Kushihi mudimu wa Nzambi bualu bua bia kudia. Bionso bidi bimpe bulelela, kadi bidi bibi kudi muntu udi ulenduisha mukuabo habidieye. Bidi bimpe bua muntu kadî munyinyi anyi kanu maluvu anyi kenji bualu luonso budi muanʼenu wa mu Kilisto ulenduka nʼabu. Ahu wewe, ditabusha diudi nʼadi, udilaminedi nkayebe ku mesu kua Nzambi. Udi usanka ngudi kai udilumbuluisha mu malu adiye uteta ne, Adi mimpe. Kadi udi wela mpata udi uhila hadieye, bualu bua kena udia ne ditabusha; bualu buonso budi kabui bufuma ku ditabusha budi bubi. Butudi nʼabu, tuetu bantu bakole, mbua kutuala matekete a badi batekete, kembua kudisankisha nkayetu. Muntu ne muntu wa munkatshi muetu asankishe muena mutumba nʼandi bua kuvuisha malu mimpe kudiye adi mua kumudiundisha. Bua Kilisto kabidi kakadisankisha, kadi bu muakafundabo ne, Bihendu bia bakadi bakuhenda, biakahona hamʼbidi hanyi. Bua malu onso akafundabo diambedi akafundibua bua kutuyisha, bua tuetu tuikale ne ditekemena bua ditantamana dietu ne bua busambi bua mu Mukanda wa Nzambi. Nzambi wa ditantamana ne wa busambi anuhe bualu ebu mene,—bua kuikalangana ne meshi amue bu mudi Kilisto Yesu, bua nuenu nutumbishe Nzambi Tatu ne Mukelenge wetu Yesu Kilisto ne mutshima umue ne dî dimue. Nunku nuitabushangane bu muakanuitabusha Kilisto bua kuyuisha butumbi kudi Nzambi. Bualu bua ndi ngamba ne, Kilisto wakavuishibua muena mudimu wa batengula bua bushua bua Nzambi, bua yeye ajadike milayi yakalaya Nzambi bankambua betu, ne bua ba bisamba bia bende batumbishe Nzambi bua luse luandi, bu muakafundabo ne, Bua bualu ebu nenkuhe butumbi munkatshi mua bisamba bia bende, Nengimbile dina diebe misambu. Udi Wamba kabidi ne, Nuenu, bisamba bia bende, nusanke ne bantu bandi. Udi wamba kabidi ne, Nuenu, bisamba bionso bia bende, nutumbishe Mukelenge, Bantu bonso bamutumbishe. Yeshaya udi wamba kabidi ne, Muji wa Yishai newikaleku, Ne udi ubika bua kukokesha bisamba bia bende neikaleku, Bisamba bia bende nebimutekemene. Nzambi wa ditekemena anûshe tente ne disanka ne ditalala dia mu ditabusha dienu, bua nuenu nukumbane mu ditekemena mu bukole bua Nyuma Muimpe. Ne meme bianyi kabidi, bana betu, ndi ngitabushishibua ne, Nuenu mene nudi bûle tente ne buimpe, bûshibua tente ne lungenyi luonso, nudi bamanye mua kudimushangana. Kadi mu manga malu ndi nufundila mei anyi ne dikima dihita, bua kunvuluisha tshiakabidi, bualu bua ngasa wakampabo kudi Nzambi, bua meme kuikala mukuatshishi wa mudimu wa Kilisto Yesu mutumibue kudi bisamba bia bende, ngenza mudimu wa muakuidi wa mu lumu luimpe lua Nzambi, bua kufila kuanyi kua bisamba bia bende kuvuishibue mulambu udi Nzambi musue, mujidibue kudi Nyuma Muimpe. Nunku udi ne kundi ntumbila mu Kilisto Yesu mu malu adi a Nzambi. Bua tshiena ne dikamakama dia kuamba bua malu makuabo, anu bua malu akenza nʼanyi Kilisto bua ditumikila dia bisamba bia bende, ku dî ne ku bienzedi, mu bukole bua bimanyinu ne bua malu a kukema ne mu bukole bua Nyuma Muimpe. Nunku nakuvudisha kuamba kuanyi kua lumu luimpe lua Kilisto ku Yelushalema ne ku nseke idi miunyunguluke tô ne ku Iluliko. Nunku ma buala ebu ndi ntshinta bua kuamba lumu luimpe ku nseke kudi dina dia Kilisto kadi dianze kutedibua, bua meme tshiashi ha bishimikidi biakatekabo kudi munga muntu. Mbu muakafundabo ne, Nebamone kudi kakui lumu luandi kulua kudibo, Ne badi kabai banze kunyua nebajingulule. Bua bualu ebu kabidi nakahumbishibua kudi malu a bungi bua kulua kunudi. Kadi katataka, bualu bua tshiena ne muaba mu nseke ei, ne bualu bua bidimu ebi bia bungi nakajinga bua kulua kunudi, hanaya ku Esepanya, bualu bua ndi ntekemena bua kuntangila mu luendu luanyi, ne bua nuenu mufile ku mpala mu nshila wanyi, binasankishibua nʼenu tshituha diambedi. Kadi katataka nyaya ku Yelushalema bua kukuatshisha basanto. Bua Bena Makedonia ne Bena Akaya bakasanka bua kusangisha bintu bikuabo bua kukuatshisha nʼabi bahele ba munkatshi mua basanto ba mu Yelushalema. Bushua bakadi ne disanka, ne bakadi bena dibanza diabo. Bualu bua bikala bisamba bia bende bangatshi nʼabo ba malu a Nyuma, badi ne bualu bua kubakuatshisha kabidi ne bintu bidi mubidi ukengela. Nunku hanakamana kushikisha bualu ebu, ne hanakamana kufila kudibo dimuma edi, nempitshile munkatshi muenu tô ne ku Esepanya. Ndi mumanye ne, Hanalua kunudi, nendue mu tshiuwidi tshia disanka dia Kilisto. Bana betu, ndi nusengelela bua Mukelenge Yesu Kilisto ne bua dinanga dia Nyuma Muimpe, ne, Nudienzeshe nʼanyi bikole mu dilomba dienu dia bualu buanyi kudi Nzambi, bua meme mpanduke mu bianza bia bena tshitshu ba mu Yudaya, ne bua dikuatshisha dinyana nʼadi mu Yelushalema dikale bu mudi basanto basue, ne bua meme nfike kunudi ne disanka bua disua dia Nzambi, ne bua kusangana nʼenu dikisha. Nzambi wa ditalala ikale ne buonso buenu. Amen. Ndi numanyisha bua Foibe, muanʼetu mukashi wa ma Kilisto, udi mulami wa mu ekelesia udi ku Kenekelea, bua nuenu numuitabushe mu Mukelenge bu mudi basanto ne bualu bua kuenza, ne bua kumukuatshisha ne bualu buonso budiye ukengela kunudi; bualu bua yeye wakumana kulua mukuatshishi wa ba bungi, ne wa meme muine. Nuele Pisikila ne Akula, benji nʼanyi ba mudimu ba mu Kilisto Yesu muoyo. Bobo mene bakafila nshingu yabo bua kuikosabo bua muoyo wanyi; kudibo kutudi tubasakidila, kememe nkayanyi, kadi bena ekelesia bonso ba mu bisamba bia bende. Nuele bena ekelesia ba mu nsubu muabo muoyo. Nuele Epaineto, munanga wanyi, muoyo; yeye udi dimuma dia kumudilu dia mu Asia diakukuamishabo kudi Kilisto. Nuele Malia muoyo; yeye wakanukuatshisha ne mudimu wa bungi. Nuele Andaloniko ne Yunia muoyo; mbana betu ne bena mu lukanu neanyi, bakadi ne lumu lunene munkatshi mua bapostolo; bakadi kabidi mu Kilisto tshi muanze kuikala munda muandi. Nuele Ampuliato, munanga wanyi mu Mukelenge, muoyo. Nuele Ubano, umena mudimu nʼetu mu Kilisto, ne Staku, munanga wanyi, muoyo. Nuele Apele, wakumana kutetshibua ne, Muimpe mu Kilisto, muoyo. Nuele ba mu nsubu wa Alistobulo muoyo. Nuele Helodio, muanʼetu, muoyo. Nuele ba mu nsubu wa Nâkiso badi mu Mukelenge muoyo. Nuele Tufaina ne Tufoso, badi benza mudimu wa Mukelenge, muoyo. Nuele Pêsi, munanga, wakuenzela Mukelenge mudimu wa bungi, muoyo. Nuele Lufo, musungudibue mu Mukelenge, ne mamu wandi ne wanyi, muoyo. Nuele Asunkulito, Filegone, Hême, Pateloba, Hôma, ne bana betu ba mu Kilisto badi nʼabo, muoyo. Nuele Filogogo ne Yulia, Neleo ne muanʼabo mukashi, ne Olumpa, ne basanto bonso badi nʼabo muoyo. Nuelangane muoyo ne dituangana dia mishiku dia tshijila. Bena ekelesia yonso ya Kilisto badi banuela muoyo. Bana betu, ndi nusengelela ne, Dimukai bua badi bavuisha matahuluka ne malenduisha munkatshi muenu, adi kâi bu diyisha dinuakayila; nubakome nyima. Bua badi benza nunku kabena bakuatshila Mukelenge wetu Kilisto mudimu, kadi badi bakuatshila anu mafu abo mudimu; ne bua mei abo a lubombo ne a kutumbisha nʼau bantu hatuhu badi badinga mitshima ya badi kabai badimuke. Bua lumu lua ditumikila dienu luakafika kudi bantu bonso. Nunku ndi nsanka bua bualu buenu, kadi ndi musue nuenu nuikale bena meshi ku malu mimpe ne badi ne mitshima mitoke ku malu mabi. Nzambi wa ditalala neadiatshishe Satana munshi mua makasa enu tshituha tshihi. Ngasa wa Mukelenge wetu Yesu Kilisto ikale nʼenu. Timote, muena mudimu nʼanyi, ne Lukio ne Yasona ne Sosipato, bana betu, badi banuela muoyo, Meme Têtio, munufundidi wa mukunda eu, ndi nuela muoyo mu Mukelenge. Gayo, muena nsubu undi mushikame ne muena ku nsubu kudi bena ekelesia bonso basangishilamu, udi unuela muoyo. Elasto, mulami wa bintu bia mu musoko, ne Kuâto, muanʼetu wa ma Kilisto, badi banuela muoyo. [ ] Butumbi buikale kudi Nzambi, udi ne bukole bua kunujadika bu mudi lumu luimpe luanyi ne kuamba kuanyi kua Yesu Kilisto, bu mudi dibuluibua dia bualu busokoko buakadi buhuwishibue ku bikondo bia tshiendelele; kadi katataka buakamueneshibua mu mifundu ya baprofete bu mudi mukenshi wa Nzambi wa tshiendelele; buakumanyishibua ku bisamba bionso bua ditumikila diabo mu ditabusha. Butumbi ebu buikale tshiendelele kudi Nzambi umuehele wa lungenyi, bualu bua Yesu Kilisto. Amen. Paulo, mubikidibue mupostolo wa Yesu Kilisto bua disua dia Nzambi, ne Sosetene, muanʼetu wa mu Kilisto, tudi tufunda mei kudi bena ekelesia ba Nzambi badi mu Kolinto, bajidibue mu Kilisto Yesu, babikidibue bua kuikalabo basanto, ne kudi bonso badi babikila dina dia Mukelenge Yesu Kilisto mu muaba wonso, Mukelenge wabo ne wetu kabidi. Ngasa kunudi ne ditalala bia kudi Nzambi Tatu wetu ne kudi Mukelenge Yesu. Kilisto. Ndi nsakidila Nzambi misangu yonso bua bualu buenu, bua ngasa wa Nzambi wakanuhebua mu Kilisto Yesu, bua nuakavuishibua babanshi mu malu onso munda muandi, mu dî dionso ne mu lungenyi luonso; bu muakajadikibua tshimanyishilu tshia Kilisto munda muenu. Nunku kanuena nuhanga mu tshihedi tshimue; nudi nuindila dimueneka dia Mukelenge wetu Yesu Kilisto. Yeye kabidi neanujadike tô ne kunshikidilu, bua kanuikadi ne tshia kunubandabo nʼatshi mu dituku dia Mukelenge wetu Yesu Kilisto. Nzambi udi wa kueyemena, yeye nguakanubikila mu buobumue bua Muana wandi Yesu Kilisto Mukelenge wetu. Bana betu, ndi nusengelela bua dina dia Mukelenge Yesu Kilisto, bua buonso buenu nuambe dî diodiumue, ne bua kakuikadi matahuluka munkatshi muenu; kadi bua nuenu nuikale bâkashibue tshishiki mu meshi amue ne mu lungenyi lumue. Bualu bua bakanmanyisha bua bualu buenu, bana betu, kudi ba mu nsubu wa Kaloe ne, Kutandangana kudi munkatshi muenu. Ndi ngamba nunku ne, Muntu ne muntu wa munkatshi muenu udi wamba ne, Meme ndi wa Paulo; meme ndi wa Apolo; meme ndi wa Kefa; meme ndi wa Kilisto. Kilisto udi mutahuluka, anyi? Paulo wakanufuila ha mutshi mutshiamakane, anyi? Nuakabatijibua mu dina dia Paulo, anyi? Ndi nsakidila Nzambi ne tshiakabatiza umue wenu anu Kulisipo ne Gayo; bua muntu kambi biandi ne, Bakanubatiza mu dina diandi. Nakabatiza ba mu nsubu wa Stefana kabidi; bua munga muntu, tshiena mumanye ne nakabatiza mukuabo anyi. Bualu bua Kilisto kakantuma bua kubatiza, kadi wakantuma bua kuamba lumu luimpe; kembua kuamba mu lungenyi lua mei, bua mutshi mutshiamakane wa Kilisto kauvuishibu bu tshintu tshia hatuhu. Bualu bua kuamba bua mutshi mutshiamakane kudi bualu buhote kudi bantu batshidi bajimina; kadi kudi bukole bua Nzambi kudi tuetu batshidi basungidibua. Bua bakafunda ne, Nenjimishe meshi a bena meshi, Nensesuishe lungenyi lua bena lungenyi. Muena meshi udi hanyi? Mufundi udi hanyi? Muena mpata wa mu tshikondo etshi udi hanyi? Nzambi kakavuisha meshi a ba ha buloba mahote, anyi? Bualu bua mu meshi a Nzambi hakahanga ba ha buloba kumanya Nzambi mu meshi abo, Nzambi wakasanka bua kusungila badi bamuitabusha ku buhote bua kuamba kua dî diandi. Bualu bua Bena Yuda badi balomba bimanyinu, ne Bena Gelika badi bakeba meshi; kadi tuetu tudi tuamba Kilisto wakashihabo ku mutshi mutshiamakane, ntshilenduishi kudi Bena Yuda ne mbuhote kudi bisamba bia bende; kadi kudi badi babikidibue, ne Bena Yuda ne Bena Gelika, Kilisto mbukole bua Nzambi ne meshi a Nzambi. Bualu bua buhote bua Nzambi budi buhita meshi a bantu, ne butekete bua Nzambi budi buhita bukole bua bantu. Bana betu, tangilai dibikidibua dienu ne, Kakuena ba bungi babikidibue badi bena meshi mu buntu buabo, kakuena ba bungi badi bakole, kakuena ba bungi badi baledibue bena butumbi. Kadi Nzambi wakasungula malu mahote a ha buloba bua kufuisheye nʼau bena meshi bundu; ne Nzambi wakasungula bintu bitekete bia ha buloba bua kufuisheye nʼabi bintu bikole bundu; ne Nzambi wakasungula malu mahuekela a ha buloba, ne malu adibo bahetula, ne bintu bidi kabîku, bua kuvuisheye nʼabi bintu bidiku ne ntshianana; bua kakuikadi wa mu mubidi udi mua kutumba ku mesu kua Nzambi. Kadi bua bualu buandi nuenu nudi mu Kilisto Yesu, wakayuishibua meshi a kudi Nzambi kutudi: ne buakane ne bujidibu ne buhikudi. Bualu bua mbu muakafundabo ne, Muntu udi utumba, atumbile mu Mukelenge. Ne meme, bana betu, hanakalua kunudi, tshiakalua ne bulengele bua mei anyi bua meshi, hanakadi nuambila bualu busokoka bua Nzambi. Bualu bua nakadisungula munda bua meme tshimunyi bunga bualu munkatshi muenu, anu Yesu Kilisto, ne yeye mushihibue ku mutshi mutshiamakane. Nakadi nʼenu mu butekete ne mu ditshina ne mu kuzakala kua bungi. Dî dianyi ne kuamba kuanyi kabiakadi mu mei a meshi a kuitabushisha nʼau bantu, kadi biakadi mu dimuenesha dia Nyuma Muimpe ne dia bukole; bua ditabusha dienu kadikadi mu meshi a bantu, kadi dikale mu bukole bua Nzambi. Tudi tuamba mei a meshi munkatshi mua bantu bakamana kukola mu bualu bua Nzambi, kadi kemeshi a tshikondo etshi anyi a bakokeshi ba tshikondo etshi balualua ba hatuhu. Kadi tudi tuamba meshi a Nzambi mu bualu busokoka, meshi mene akadi masokoka, akadianjila Nzambi kusungula ku mpala kua bikondo bionso bua butumbi buetu. Kakuakadi umue wa bakokeshi ba tshikondo etshi wakuamanya; bua bu bobo bâmanye, kabakadi kushiha Mukelenge wa butumbi ku mutshi mutshiamakane. Kadi bu muakafundabo ne, Malu adi disu kadi dianze kutangila, ne ditshu kadi dianze kunvua, Adi kâi manze kubuela mu mutshima wa muntu, Malu onso akalongoluela Nzambi badi bamunanga. Kadi Nzambi wakatubuluila malu â mu Nyuma Muimpe; bualu bua Nyuma udi ukebakeba malu onso, tô ne ku malu male a Nzambi. Bualu bua munkatshi mua bantu nganyi udi mumanye malu a muntu? Anu nyuma wa muntu udi munda muandi udi muamanye. Nunku kakuena mukuabo udi mumanye malu a Nzambi, anu Nyuma wa Nzambi udi muamanye. Kadi tuetu tuakangata nyuma, kengua ha buloba, kadi Nyuma wa kudi Nzambi, bua tuetu tumanye masanka akatuabo tshianana kudi Nzambi. Tudi tuamba malu â, kemu mei adi meshi a bantu atuyisha, kadi mu mei adi Nyuma Muimpe utuyisha; tudi tujingulula malu a Nyuma ne mei a Nyuma. Muntu wa ha buloba kena witabusha malu a Nyuma wa Nzambi, bualu bua malu â adi mahote kudiye; yeye kena mua kudimanyinau, bualu bua malu â adi ajinguludibua kudi Nyuma. Muntu udi ne Nyuma udi ujingulula malu onso, kadi muntu eu mene kabena bamujinguluila kudi mukuabo. Muntu kai udi mumanye meshi a Mukelenge bua kumuyisha yeye? Kadi tuetu iudi ne meshi a Kilisto. Meme, bana betu, tshiakamanya mua kuakula nʼenu bu mundi ngakula kudi bantu badi balonda Nyuma, kadi anu bu kudi bantu badi balonda malu a mubidi, bu kudi bana batekete ba mu Kilisto. Nakanuha mabele a kunua, tshiakanuha bia kudia bikole; bua kanuakamanya mua kubidia, ne katataka mene kanuena mua kubidia; bualu bua nutshidi nulonda malu a mubidi. Bualu bua hatshidi mukau ne kutandangana munkatshi muenu, kanuena nulonda malu a mubidi, anyi? Kanuena nuenda bu mudi tshilele tshia bantu, anyi? Bua hamba mukuabo ne, Meme ndi wa Paulo; ne mukuabo ne, Meme ndi wa Apolo; kanuena bu bantu, anyi? Nunku Apolo udi bu tshinyi? Paulo udi bu tshinyi? Badi bakuatshi ba mudimu ne nuenu nuakitabusha bua bualu buabo, bu muakabaha Mukelenge bukole muntu ne muntu. Meme nakakuna bintu, Apolo wakabimiamina mai, kadi Nzambi wakabidiundisha. Nunku muntu udi ukuna bintu kena bualu bunene, anyi udi ubimiamina mai, kadi anu Nzambi udi ubidiundisha. Udi ukune ne udi umiamina mai badi umue; kadi muntu ne muntu neangate difutu bu mudi mudimu wandi mene. Bua tudi benzeshanganyi ba mudimu ne Nzambi; nuenu nudi budimi bua Nzambi, nudi nsubu wa Nzambi. Bu mudi ngasa wa Nzambi mumpeshibue bu muibaki udi ne meshi, meme nakajadika bishimikidi bia nsubu, kadi mukuabo udi wasa ha mutu habi. Kadi muntu ne muntu adimuke biandi bu mudiye wasahu. Kakuena muntu udi mua kujadika bishimikidi bikuabo, anu biobio biakamana kujadikibua, bidi Yesu Kilisto mene. Biasa muntu ha bishimikidi ebi ngolo, argent, mabue a mushinga mukole, mitshi, bisosa, anyi bidi hisasa, mudimu wa muntu ne muntu neumueneshibue; bua difuku dilualua nediumueneshe, bualu bua didi dibuluibua mu kahia; ne kahia nekatete mudimu wa muntu ne muntu ne udi wa mushindu kai. Biashala mudimu wa muetu wakaseye ha mutu hatshi, yeye neangate difutu. Biahia mudimu wa muntu, neajimishe mudimu eu wonso, kadi yeye mene neasungidibue, kadi anu bu muntu musambuke kahia. Kanuena bamanye ne nuenu nudi ntempelo wa Nzambi, ne Nyuma wa Nzambi udi wikala munda muenu? Biashiha muntu ntempelo wa Nzambi, Nzambi neamushihe yeye; bualu bua ntempelo wa Nzambi udi wa tshijila, nuenu nudi muomumue kabidi. Muntu kadidingi. Biela muntu meshi ne, Meme ndi muena meshi munkatshi muenu wa mu tshikondo etshi, alue biandi muhote bua kuikaleye muena meshi. Bualu hua meshi a ha buloba ebu adi maho, te ku mesu kua Nzambi. Bua bakafunda ne, Yeye udi ukuata bena meshi mu budimu buabo. Bakafunda kabidi ne, Mukelenge udi mumanye meshi a bena meshi ne, Adi hatuhu. Nunku muntu katumbidi mu bantu. Bualu bua bintu bionso mbienu; ne Paulo ne Apolo ne Kefa ne buloba ne muoyo ne lufu ne bintu bidiku ne bintu bilualua: bionso mbienu; ne nuenu nudi ba Kilisto, ne Kilisto udi wa Nzambi. Muntu atubale tuetu bu bakuatshi ba mudimu ba Kilisto ne balami ba malu masokoka a Nzambi. Mu bualu ebu kabidi badi bakeba munkatshi mua balami bua kusangana mulami yonso muikale muntu udibo mua kueyemena. Budi bualu butamba bukese kundi bua meme kulumbuluishibua kunudi, anyi kudi tshilumbuluidi tshia tshikondo etshi tshia bantu; bulelela, tshiena ndilumbuluisha kabidi. Bua tshiena munvue munda tshindi mua kudihisha nʼatshi, kadi tshiena mbingishibua bua bualu ebu; kadi udi undumbuluisha udi Mukelenge. Nunku nulekele kulumbulula malu ku mpala kua tshikondo atshi, tô ne halua Mukelenge, neasokolole biandi malu masokoka a midima hatoke, neamueneshe biandi meshi a mu mitshima; hashishe butumbi bua kudi Nzambi nebuikale kudi muntu ne muntu. Bana betu, nakanukudimuina malu anyi ne a Apolo ne tshifuanyikishi bua bualu buenu; bua nuenu nuayila kutudi diyisha edi ne, Kanuhitshi ku mpala kua malu akafundabo, bua umue wenu kikadi ne diambu bua kutumbisha mukuabo ku mpala kua mukuabo. Udi ukutahulula kudi bakuabo nganyi? Udi ne tshintu kai tshiudi kui muangate kudi mukuabo? Biwikala mutshiangate kadi mukuabo, munyi mûdi uditumbisha bu mûdi kui mutshiangate? Nuakumana kukuta, nuakumana kulua babanshi, nuakalua bakokeshi kanui nʼetu. Bulelela, nakadi musue bua nuenu nuikale bakokeshi, bua tuetu tuikale bakokeshi nʼenu. Bua udi ngela meshi ne, Nzambi wakatuteka tuetu bapostolo kunshikidilu kua bantu bonso bu bantu bakahishabo bua kufua; bua tuetu tuakavuishibua tshimuenenu kudi ba ha buloba, ne kudi banjelo ne kudi bantu. Tuetu tudi bahote bualu bua Kilisto, kadi nuenu nudi bena lungenyi mu Kilisto; tuetu tudi batekete, kadi nuenu nudi bakole, nuenu nudi ne butumbi, kadi tuetu tudi bahetudibua. Tô ne ku diba edi tudi ne nsala, tudi ne nyota, tudi ne butaka, tudi tukumibua, katuena ne muaba wa kushindama; tudi tuenza mudimu mukole, tûenza ne bianza bietu; hatuhendabo, tudi tubavuidishila disanka; hatuikala ne makenga, tudi tudikankamika; hatuvuishilabo lumu lubi, tudi tubasengelela; bakatuvuisha bu manyanu a ba buloba ne bilu bia bintu bionso tô ne katataka. Tshiena nfunda malu â bua kunufuisha bundu, kadi bua kunudimusha bu bana banyi bananga. Bua binuikala ne bayishi lubombo mu Kilisto, kanuena ne batatu ba bungi; bualu bua mu Kilisto Yesu nakanuela ku lumu luimpe. Nunku ndi nusengelela bua kuikala bidikishi banyi. Bua bualu ebu nakanutumina Timote, udi muana wanyi munanga ne wa kueyemena mu Mukelenge; yeye neanuvuluishe bua bienzedi bianyi bia mu Kilisto, bu mundi nyisha bantu kuonso mu ekelesia yonso. Bakuabo bakadisua bu mundi tshi ndua kunudi. Kadi meme nendue kunudi tshituha tshihi, biasua Mukelenge; ne hanalua, nemanye, kendî dia badi badisue, kadi nemanye bukole buabo. Bualu bua bukelenge bua Nzambi kabuena mu dî, kadi budi mu bukole. Nudi basue tshinyi? Ndue kunudi ne mulangala, anyi mu dinanga ne mu nyuma wa kalolo? Badi bunvua kuonso ne, Masandi adi munkatshi muenu, masandi a bu nunku mene adi kâi munkatshi mua bisamba bia bende, ne, Umue wenu udi ne mukashi wa tatu wandi. Ne nuenu nuakadisua, ne kanuakadila bu muakadibi kuikala bimpe, bua yeye wakenza bualu ebu umushibue munkatshi muenu, anyi? Bua meme, tshî munkatshi muenu mu mubidi, kadi muikale nʼenu mu nyuma wanyi, nakumana kulumbuluisha muntu wakenza bualu ebu nunku, bu mundi muikaleku. Nakamalumbaluisha mu dinu dia Mukelenge Yesu, hanuakadisangishaku ne nyuma wanyi nʼenu, mu bukole bua Mukelenge wetu Yesu, bua kufila muntu wa nunku kudi Satana bua kushihesha malu a mubidi, bua nyuma wandi asungidibue mu dituku dia Mukelenge Yesu. Kuditumbisha kuenu kakuena kuimpe. Kanuena bamanye ne luevene lukese ludi lumuangalaka mu mutanda wa bidia mujima, anyi? Umushai luevene lukulukulu bua nuenu nuikale bu mutanda muhia-muhia, bu munudi kanui ne luevene. Bualu bua mulambu wetu wa Kuhita kua Yehowa wakashihibua, Kilisto mene. Nunku tuikale tudie bidia bia disanka edi; katudidî ne luevene lukulukulu, anyi luevene lua meshi mabi ne lua malu mabi, kadi tudie disanka ne bidia bidi kabi ne luevene, bia malu a hatoke ne a bushua. Nakanufundila mu mutanda wanyi ne, Kanubuelakanyi ne bena masandi; tshiakamba dî nasha kakese bua bena masandi ba ha buloba ebu, anyi bena lukuka lua bintu, anyi banyengi ba bintu, anyi bena mpingu; nunku nuakadi kuikala ne bualu bua kumuka mu buloba ebu. Kadi mpindiu ndi nufundila ne, Kanubuelakanyi ne muntu udi ne dina dia muanʼenu wa ma Kilisto bikaleye muena masandi, anyi muena lukuka lua bintu, anyi muena mpingu, anyi muhendanganyi, anyi mukuatshiki wa maluvu, anyi munyengi wa bintu; kanudî mene ne muntu wa nunku. Bua ndi ne bualu bua kulumbuluisha badi kabai mu ekelesia kudi kunyi? Nuenu kanuena nulumbuluisha badi mu ekelesia, anyi? Kadi badi kabai mu ekelesia, Nzambi nkayandi udi ubalumbuluisha. Umushai muntu mubi au munkatshi muenu. Muntu kai wa munkatshi muenu, bikaleye ne muena Kilisto mukuabo tshilumbu, udi ne dikamakama dia kutshilumbulula ku mpala kua bantu babi, ne kena uya nʼatshi kudi basanto? Kanuena bamanye ne, Basanto nebalumbuluishe ba ha buloba, anyi? Ne bikala ba ha buloba balumbuluishibua kunudi, nuenu kanuena bakanangane ne bilumbuluidi ebi bidi bihita bukese, anyi? Kanuena bamanye ne, Tuetu netulumbuluishe banjelo, anyi? Nunku bualu budi butamba kutukuata bua kulumbulula malu a mu muoyo utudi nʼau. Nunku binuikala ne bilumbuluidi bia malu a mu muoyo utudi nʼau, nudi nuteka ha mutu habi bantu ba hatuhu ba mu ekelesia, anyi? Ndi ngamba bualu ebu bua kunufuisha bundu. Kakuena muena meshi umue munkatshi muenu udi mua kulumbuluila bana benu ba mu Kilisto bilumbu biabo, anyi? Kadi muanʼenu wa ma Kilisto udi ufunda mukuabo ku tshilumbuluidi, ne udi wenza nunku ku mpala kua badi kabai ne ditabusha, anyi? Bulelela, bualu ebu buakumana kulua dihanga dinene munkatshi muenu ne, Nudi nuikalangana ne bilumbu. Bualu budi butamba buimpe bua nuenu nuitabushe banuenzele bibi, nasha? Budi butamba buimpe bua nuenu nuitabushe banunyenge bintu, nasha? Kadi nuenu mene nudi nuenza bibi, nudi nunyenga bintu; nudi nuenzela bana benu ba mu Kilisto bualu ebu. Kanuena bamanye ne, Bantu babi kabena bahiana bukelenge bua Nzambi, anyi? Kanudingibu; bena tshiendenda, anyi bena mpingu, anyi bena masandi, anyi badileshi bu bakashi, anyi balume badi benzelangana malu a bundu, anyi bibi, anyi bena lukuka lua bintu, anyi bakuatshiki ba maluvu, anyi bahendanganyi, anyi banyengi ba bintu, kabena bahiana bukelenge bua Nzambi. Bakuabo benu bakadi nunku; kadi nuakuvuibua, nuakajidibua, nuakabingishibua mu dina dia Mukelenge Yesu Kilisto, ne mu Nyuma wa Nzambi wetu. Meme ndi ne bukole bua kuenza malu onso, kadi malu onso kêna ankuatshisha. Ndi ne bukole bua kuenza malu onso, kadi tshiena nkokeshibua munshi mua bualu bumue. Bia kudia bidiku bua difu, ne difu didiku bua bia kudia, kadi Nzambi neavuishe diodio ne biobio bu bintu bia tshianana. Mubidi kawenaku bua masandi, kadi udiku bua Mukelenge; ne Mukelenge udiku bua mubidi. Nzambi wakabisha Mukelenge ku lufu, neatubishe tuetu kabidi ku bukole buandi. Kanuena bamanye ne mibidi yenu idi bituha bia mubidi wa Kilisto, anyi? Nunku nengumushe bituha bia Kilisto bua kubivuisha bituha bia mukashi wa masandi, anyi? Nasha kakese! Anyi kanuena bamanye ne, Walamata kudi mukashi wa masandi udi nʼandi mubidi umue, anyi? Bua Nzambi udi wamba ne, Bubidi buabo nebalue mubidi umue. Walamata kudi Mukelenge udi nʼandi nyuma umue. Nyemai masandi. Bubi buonso budi muntu wenza kabuena bua mu mubidi, kadi udi wenda masandi udi wenzela mubidi wandi mene bibi. Anyi, kanuena bamanye ne mubidi wenu udi ntempelo wa Nyuma Muimpe udi munda muenu, unudi nuangata kudi Nzambi, anyi? Kanuena bena mioyo yenu. Bualu bua nuakasumbibua ku mushinga mukole; nunku nutumbishe Nzambi mu mubidi wenu. Bua malu anuakanfundila ndi ngamba ne, Bidi bimpe bua muntu kikadi ne mukashi. Kadi bua kuehuka ku masandi, mulume ne mulume ikale ne mukashi wandi, ne mukashi ne mukashi ikale ne mulume wandi. Mulume enzele mukashi wandi budiye nʼabu bualu; ne mukashi kabidi enzele mulume wandi budiye nʼabu bualu. Mukashi wa muntu kena ne bukokeshi bua mubidi wandi, anu mulume wandi udi nʼabu; muomumue kabidi, mulume kena ne bukokeshi bua mubidi wandi, anu mukashi wandi udi nʼabu. Kanuedianganyi, anu hanuahunga dî bua tshikondo, bua kuikala ne musangu wa kutendelela Nzambi, ne bua kudisangisha kabidi, bua Satana kanuteyi bua dihanga dia kudikanda kuenu. Ndi nuambila bualu ebu bu mundi mua kuitabusha, kembu mukenshi. Kadi nakadi kusua balume bonso bikale bu meme. Kadi muntu ne muntu udi ne tshihedi tshiandi kudi Nzambi, mukuabo nunku mukuabo nunku. Kadi ndi ngambila batshidi bajike ne bakashi ba mu lufuila ne, Bidi bimpe biashalabo bu meme mene. Kadi bikalabo kabai mua kudikanda, babake biabo, bualu bua kubaka kudi kutamba kusamina muoyo buimpe. Ndi ngambila bena dibaka di, kememe udi wamba kadi mMukelenge udi ubambila ne, Mukashi kumuki kudi mulume wandi, (kadi biumukeye kudiye, ashale biandi mujike, anyi alengeshe ne mulume wandi) ne mulume kalekedi mukashi wandi. Kadi kudi bakuabo ndi mbambila nkayanyi, ke Mukelenge udi wamba, ne, Bikala muanʼenu wa ma Kilisto ne mukashi udi kai mmena ditabusha, ne mukashi eu udi usanka bua kuikala nʼandi, mulume kamulekedi nasha. Ne mukashi udi ne mulume udi kai muena ditabusha, ne mulume eu udi usanka bua kuikala nʼandi, mukashi kalekedi mulume wandi nasha. Bualu bua mulume udi kai muena ditabusha udi mujidila mu mukashi wandi, ne mukashi udi kai muena ditabusha udi mujidila mu mulume wandi udi muena ditabusha; bikala bualu ebu kabui nunku, bana benu batshidi babiha; kadi katataka badi ba tshijila. Kadi biumuka muntu udi kai muena ditabusha, umuke biandi; bualu bua muanʼenu mulume anyi muanʼenu mukashi wa ma Kilisto kena ushala mu buhika mu malu a nunku; Nzambi wakanubikila bua nuenu nuikale mu ditalala. Bua wewe, mukashi, udi mumanye munyi, ne kuena mua kusungila mulume webe anyi? Anyi wewe, mulume, udi mumanye munyi, ne kuena mua kusungila mukashi webe anyi? Kadi, bu mudi Mukelenge mutahuluile muntu ne muntu tshikadilu, bu mudi Nzambi mubikile muntu ne muntu, ende biandi nunku. Au mukenshi undi ngela mu ekelesia yonso. Muntu wakabikidibua hakadiye mutengula, anyi? Kavuishibu bu udi kai mutengula. Muntu wakabikidibua hakadiye kai mutengula, anyi? Kabamutengudi. Kuikala mutengula kakuena bualu; kuikala kai mutengula kakuena bualu; kadi anu kutumikila kua mikenshi ya Nzambi kudi bualu bunene. Muntu ne muntu ashale mu tshikadilu mene tshiakadiye nʼatshi hakabikidibueye. Wewe wakadi muhika hawakabikidibua, anyi? Bualu ebu kabukutatshishi. Kadi biwamanya mua kuheta budishikaminyi, wenza nunku. Bualu bua muntu mubikidibue mu Mukelenge hakadiye muhika udi muena budishikaminyi wa Mukelenge; nunku muntu mubikidibue hakadiye muena budishikaminyi udi muhika wa Kilisto. Bakanusumba ku mushinga mukole; kanulu bahika ba bantu. Bana betu, muntu ne muntu ashale ne Nzambi mu tshikadilu tshiakadiye nʼatshi hakabikidibueye. Tshiena ne mukenshi wa kudi Mukelenge bualu bua bakashi batshidi tumama; kadi meme nkayanyi nakahangidisha bualu ebu bu muntu wakamana kuangata luse kudi Mukelenge bua kuikala muntu unudi mua kutekemena. Nunku ndi ngela meshi ne, Bualu bua kanyinganyinga katudi nʼaku katataka bidi bimpe bua mulume ashale bu mudiye. Wewe udi muhumbakasha kudi mukashi, anyi? Kukebi mua kusululuka kudiye. Wewe udi musulula kudi mukashi, anyi? Kukebi mukashi. Kadi biwikala mubake, kuakuenza bualu bubi; ne biabakibua mukashi utshidi kamama, yeye kakuenza, bualu bubi. Kadi bantu aba nebikale ne kanyinganyinga mu mibidi yabo; ne meme udi musue kunusungila ku bualu ebu. Kadi, bana betu, ndi nuambila ne, Musangu udi mukeha bua mu tshikondo tshilualua bantu badi ne bakashi bikale bu badi kabai ne bakashi; ne bantu badi badila bikale bu badi kabai badila; ne badi basanka bikale bu badi kabai basanka; ne badi basumba bintu bikale bu badi kabai ne bintu; ne bantu badi balonda malu a ha buloba bikale bu bantu badi kabai bukuta nʼau; bualu bua tshimuenekelu tshia malu a ba buloba ebu netshijimine. Ne tshiena musue nuenu nuikale ne ntatu. Muntu udi mujike udi uditatshila bua bintu bia Mukelenge, bu mudiye mumanye mua kusankisha Mukelenge; kadi muntu udi ne mukashi udi uditatshila bua bintu bia ha buloha, bu mudiye mumanye mua kusankisha mukashi wandi, ne yeye udi mutahulula mu nseke ibidi. Nunku mukashi udi kai ne mulume ne mukashi utshidi kamama badi baditatshila bua bintu bia Mukelenge, bua bobo bikale ba tshijila mu mubidi ne mu nyuma kabidi; kadi mukashi udi ne mulume udi uditatshila bua bintu bia ha buloba, bu mudiye mumanye mua kusankisha mulume wandi. Ndi ngamba bualu ebu bua kunukuatshisha; kambualu bua kunuela buteyi, kadi anu bualu bua nuenu nuikale ne malu adi makanangane ne bena Kilisto, ne bua nuenu mimanye mua kukuatshila Mukelenge mudimu kanui ne ntatu. Biela muntu meshi ne, Ndi ngenzela muanʼanyi mukashi utshidi kamama bibi; ne bikala mukashi muhite tshikondo tshiandi tshia dibaka, ne bikaleye ne bualu bua kuenza nunku, tatu enze bualu bu mudiye musue; yeye kena wenza bibi; babake biabo. Kadi muntu udi utantamana mu mutshima wandi, kai ne bualu budi bumuenzesha, kadi udi ne bukole bua kuenza bu mudiye musue, ne wakamana kudisunguila bualu ebu mu mutshima wandi bua kulama muanʼandi mukashi utshidi kamama, yeye nenze bimpe. Nunku muntu udi ufila muanʼandi mukashi utshidi kamama ku dibaka udi wenza bimpe; ne muntu udi kai umufila ku dibaka udi utamba kuenza bimpe. Mukashi udi mubumbakasha kudi mulume wandi hatshidi mulume ne muoyo, kadi biafua mulume wandi, yeye udi mumanye mua kuya ku dibaka kudiye musue, kadi anu mu Mukelenge. Kadi yeye udi utamba kusanka biashaleye bu mudiye, emu bu mundi muhangidishe; udi ngela meshi ne meme ndi ne Nyuma wa Nzambi kabidi. Bualu bua bintu bidibo batendelela nʼabi mpingu: Tudi bamanye ne buonso buetu tudi ne lungenyi lua bualu ebu. Lungenyi ludi luvuisha muntu kudisua, kadi dinanga didi dimudiandisha. Muntu udi wela meshi ne, Ndi mumanye bualu, yeye kena muanze kumanye bu mudiye ne bualu bua kumanya; kadi biananga muntu Nzambi, yeye udi mumanyibue kudi Nzambi. Ne bualu bua kudia kua bintu bia kutendelelabo nʼabi mpingu, tudi bamanye ne, Kakuena luhingu ludi ne bualu ha buloba, ne kakuena Nzambi mukuabo anu umue. Bikala bintu bidibo babikila nzambi bidiku, nasha mu diulu nasha hanshi ha buloba; bu mudi nzambi ya bungi ne bakelenge ba bungi; kadi ku mesu kuetu Nzambi umue udiku, Tatu mene; bintu bionso biakafuma kudiye, ne tuetu tudiku bua bualu buandi; ne Mukelenge umue, Yesu Kilisto, bintu bionso mbua bualu buandi ne tuetu tudi bua bualu buandi kabidi. Kadi lungenyi elu kaluena munda mua bantu bonso; kadi bakuabo bakadi ne tshilele tshia kutendelela mpingu tô ne katataka, badi badia bintu ebi bu bintu bia kutendelelabo nʼabi mpingu; ne bualu bua muoyo-mukese wabo udi mutekete, udi ulua mubiha. Bia kudia kabiena bi-tusemesha ha buihi ne Nzambi; bituikala katui tudia, katuena tuhanga tshintu, anyi bituadia, katuena tutamba kutshiheta. Kadi nudimuke bua bukole buenu kabuikadi tshilenduishi kudi badi batekete. Biakumona muntu, wewe muena lungenyi, ushikama bua kudia mu ntempelo wa luhingu, bikaleye mutekete, muoyo-mukese wandi kawena ukoleshibua bua kudieye bintu bia kutendelelabo nʼabi mpingu, anyi? Bualu bua ku lungenyi luebe, muntu mutekete udi ujimina, muanʼenu mene, wakafuilabo kudi Kilisto. Nunku binuenzela bana benu ba mu Kilisto bibi, binuasamisha muoyo-mukese wabo hatshidiu mutekete, nudi nuenzela Kilisto bibi. Nunku bialenduisha bia kudia muanʼetu wa mu Kilisto, tshiena ndia munyinyi tô ne tshiendelele, bua tshilenduishi muanʼetu. Tshiena ne budishikaminyi, anyi? Tshiena mupostolo, anyi? Tshiakutangila Yesu, Mukelenge wetu, anyi? Nuenu kanuena bu mudimu wanyi mu Mukelenge, anyi? Bingikala tshî mupostolo kudi bakuabo, ndi mupostolo kudi nuenu bine; bitalu bua nuenu nudi bu tshimanyishilu tshia bupostolo buanyi mu Mukelenge. Eku nkudividila kuanyi kudi bantu badi bandumbuluisha. Katuena ne bukole bua kudia ne bua kunua, anyi? Katuena ne bukole bua kuya ku luendu muntu ne muntu ne mukashi wandi udi muena ditabusha, bu mudibo benza kudi bapostolo bakuabo, ne kudi bana babo ne Mukelenge, ne kudi Kefa, anyi? Anyi, meme nkayanyi ne Bânaba, katuena ne bukole bua kuhidia kuenza mudimu wa bianza, anyi? Muntu udi wenza mudimu wa busalayi udi udifuta bua mudimu wandi musangu kai? Muntu kai udi ukuna mionshi ya nvinyo ne kena udia mamuma ai? Anyi, muntu kai udi udisha tshisumbu tshia bimuna ne kena unua mabele a tshisumbu tshiabi? Ndi ngamba malu â bu mudi bantu bamba, anyi mikenshi kayena yamba malu â kabidi, anyi? Bua bakafunda mu mikenshi ya Mose ne, Kusuiki nkata ku mishiku ya ngombe udi udiata ntete bua kuishihula. Nzambi udi wela meshi bua ngombe, anyi udi wamba nunku anu bua bualu buetu? Bua bualu buetu bakafunda dî edi, bua muntu udi udima udi ne bualu bua kudima ne ditekemena, muntu udi ushihula udi ne bualu bua kushihula ne ditekemena dia kuangata bia kudia. Bituikala tuakakuna bintu bia Nyuma munkatshi muenu, budi bualu bunene bituahuola bintu bienu bia ha buloba, anyi? Biangata bakuabo bukole ebu ha mutu henu, tuetu katuena tutamba kubuangata, anyi? Kadi katuakanuenzesha ne bukole ebu; kadi tudi tudikankamika mu malu onso, bua tuetu kaluishi dihumbisha dimue ku lumu luimpe lua Kilisto. Kanuena bamanye ne badi benza mudimu ne bintu bia tshijila, badi badia bintu bia mu ntempelo; ne badi bakuata mudimu wa tshioshelu badi bangata tshituha tshiabo ku tshioshelu, anyi? Nunku Mukelenge wakela mukenshi ne, Badi bambila bakuabo lumu luimpe bikale ne muoyo ku lumu luimpe. Kadi meme tshiakuenza bualu ne tshintu tshimue tshia bintu ebi nasha; ne tshiena nfundila malu â bua bualu ebu buenjibue nunku kundi; bualu bua meme kufua kudi kutamba bua muntu kuvuisha kutumba kuanyi hatuhu. Bua bingambila bantu lumu luimpe, tshiena ne tshia kutumbila nʼatshi; bua bualu budi bunkuata bua kuluamba, bua ndi ne mulau bingikala tshî ngambila bantu lumu luimpe. Bua bingenza nunku bua kudisunguila kuanyi, ndi ne difutu; kadi bingikala tshî ngenza nunku bua kudisunguila kuanyi, ndi ne bulami butekibue mu bianza bianyi. Nunku difutu dianyi didi tshinyi? Didi nunku; ne, Bua hangambila bantu lumu luimpe, ndi mua kuyuisha lumu luimpe kalui bua mushinga kudibo, bua meme tshienzeshi bantu ne bukokeshi buanyi buonso bua mu lumu luimpe. Bua nakadi ne budishikaminyi kudi bantu bonso, kadi nakadivuisha muhika wa bonso, bua meme kuheta mioyo ya bakuabo ba bungi. Kudi Bayuda nakalua Muyuda, bua meme kuheta mioyo ya Bayuda; kudi bakadi ku nyima kua mikenshi nakalua ku nyima kua mikenshi, meme hanyi tshî muikale ku nyima kua mikenshi, bua meme kuheta mioyo ya bakadi ku nyima kua mikenshi. Kudi bakadi kabai ne mikenshi nakalua muntu udi kai ne mikenshi, meme tshî muikale muntu udi kai ne mikenshi ya Nzambi kadi bu muntu udi ne mikenshi ya Kilisto, bua meme kuheta mioyo ya bakadi kabai ne mikenshi. Kudi batekete nakalua mutekete, bua meme kuheta mioyo ya batekete; kudi bonso nakulua muena malu onso, bua meme kumanya mua kusungila bakuabo ne ngenyi yonso. Ne ndi ngenza malu onso bualu bua lumu luimpe, bua kulua bianyi muluabanyanganyi nʼabo. Kanuena bamanye, anyi, ne, Bantu badi batumbila lubilu mu tshilumbilu badi balumbila bonso, kadi umue wabo udi wangata bukenshi? Lumbilai bienu nunku, bua nuenu nuangate bukenshi. Muntu yonso udi utetangana bukole ne bakuabo mu manaya udi udikanda mu malu onso. Bobo badi benza nunku bua kuangata tshifulu tshia butumbi tshidi tshisunsuke, kadi tuetu mbua kuangata tshidi katshi tshisunsuke. Meme ndi ndumbila nunku, tshi usesuka mu nshila; ndi nduangana ne mbata tshî bu muntu udi widikisha. Kadi ndi udikuma tô ne hanavuisha mubidi wanyi mabuba, ndi ngubuesha mu buhika; bua bumue, hanamana kuambila bakuabo bualu bua Nzambi, meme tshikadi mubengibue. Bua tshiena musue nuenu nuhange kumanya, bana betu, ne, Bankambua betu bonso bakadi munshi mua ditutu, buonso buabo bakahita munkatshi mua mai manene; buonso buabo bakabatijibua mu bulombodi bua Mose mu ditutu ne mu mai manene; buonso buabo bakadia bia kudia biobiumue bia Nyuma; buonso buabo bakanua bia kunua biobiumue bia Nyuma; bua bakanua ku dibue dia Nyuma diakabalonda, ne dibue edi diakadi Kilisto. Kadi Nzambi kakasanka ne bakuabo babo bakadi bahita bungi; bua bakahoneshibua bafue mu tshihela. Malu â akalua bifuanyikishi bia malu etu, bua katukumi mitshima yetu ku malu mabi bu muakakumabo mitshima yabo. Lekelai kuikala batendeledi ba mpingu, bu muakadi bakuabo babo; bu muakafundabo ne, Bantu bakashikama bua kudia ne bua kunua, bakabika bua kunaya. Tulekelai kuenda masandi bu muakenda bakuabo babo, bakafua biabo mbombo ibidi ne binunu bisatu dituku dimue. Tulekelai kuteta Mukelenge bu muakamuteta bakuabo babo, bakashihibua kudi nyoka. Lekelai kutontolola, bu muakatontolola bakuabo babo, bakashihibua kudi mushihi. Malu â akadi abakuata bu bifuanyikishi, akafundibua bua kutudimusha, kutudi mene kuakufika nshikidilu wa bikondo. Nunku muntu udi wela meshi ne, Ndi muimane, adimuke bua kahonyi biandi. Kakuena diteta diakunukuata didi kadi dikuata muntu yonso; kadi Nzambi udi mua kueyemenyibua, ngudi kai witabusha bua nuenu nutetshibue ne diteta didi dinuhita bukole; kadi halua diteta, yeye neanuenzele nshila wa kuhandukila, bua nuenu mimanye mua kutantamana mu diteta. Nunku, bananga banyi, nyemai kutendelela kua mpingu. Ndi ngamba bu mundi ngambila bena meshi, nuenu jingululai bu mundi ngamba. Luhanza lua disanka lutudi tuvuidishila disanka kaluena buobumue buetu mu mashi a Kilisto, anyi? Ne mutanda wa bidia utudi tutshibula kawena buobumue buetu mu mubidi wa Kilisto, anyi? Bualu bua mutanda wa bidia udi umue, tuetu ba bungi tudi mubidi umue; bualu bua buonso buetu tudi tudisanga ku mutanda umue. Tangilai badi Bena Isalele mu buntu buabo; bantu badi badia milambu ya ha tshioshelu kabena ne buobumue ne tshioshelu, anyi? Nunku ndi ngamba tshinyi? Ndi ngamba ne, Tshintu tshidibo bashihela mpingu tshidi ne bualu, anyi luhingu ludi ne bualu, anyi? Kadi ndi ngamba ne, Bintu bidi bantu ba bisamba bia bende bashiha bu mulambu badi babishihela bademon, kabena babishihela Nzambi; tshiena musue nuenu nuikale ne buobumue ne bademon. Kanuena mua kunua luhanza lua Mukelenge ne luhanza lua bademon hohamue; kanuena mua kudisanga ku mesa a Mukelenge ne ku mesa a bademon hohamue. Anyi, tudi tufuisha Mukelenge mukau, anyi? Tudi tumutamba bukole, anyi? Malu onso adi mimpe a kuenza, kadi malu onso kêna atukuatshisha; malu onso adi mimpe a kuenza, kadi malu onso kêna atudiundisha. Muntu kakebi mua kudisankisha, kadi akebe mua kusankisha mukuabo. Tshintu tshionso tshidibo bahana ku tshisalu, nutshidie, kanukonkanganyi dikonka bualu bua muoyo-mukese; bualu bua buloba mbua Mukelenge ne tshiuwidi tshiabu. Biakulayidila umue wabo udi kai muena ditabusha, ne binuasua kuya, tshintu tshionso tshidibo bateka ku mpala kuenu, nutshidie; kanukonkanganyi dikonka bualu bua muoyo-mukese. Kadi biamu atu bila muntu ne, Tshintu etshi ntshishihela mpingu; kanutshidî, bua bualu buandi wakanumanyisha bualu ebu, ne bua muoyo-mukese kabidi. Tshiena ngamba bua muoyo-mukese webe, kadi bua muoyo-mukese wa mukuabo; bua budishikaminyi buanyi budi bulumbuluishi bua kudi muoyo-mukese wa mukuabo bualu kai? Bingadia tshintu ne disakidila, badi bampendela bualu kai, bua tshintu tshindi nsakidila nʼatshi Nzambi bualu buatshi? Nunku binuadia anyi binuanua, anyi malu onso anudi nuenza, nuenze malu onso bua kutumbisha Nzambi. Kanuikadi balenduishi anyi kudi Bena Yuda anyi kudi Bena Gelika anyi kudi ekelesia wa Nzambi; bu mundi nsankisha bantu bonso mu malu onso, tshi ndikebela dikuatshisha dianyi, kadi ndi nkeba dia bantu ba bungi, bua bobo basungidibue. Nuikale bidikishi banyi, bu mundi meme kabidi muidikishi wa Kilisto. Meme ndi nutumbisha bualu bua nudi nunvuluka mu malu onso, ne nudi nulamata bilele bu munakanuheshabi. Kadi ndi musue nuenu numanye ne, Mutu wa mulume yonso udi Kilisto, ne mutu wa mukashi udi mulume, ne mutu wa Kilisto udi Nzambi. Mulume yonso udi utendelela anyi udi wambila bakuabo dî dia Nzambi ne mutu wandi mubuikila, udi uhuekesha butumbi bua mutu wandi. Kadi mukashi yonso udi utendelela anyi udi wambila bakuabo dî dia Nzambi ne mutu wandi kawi mubuikila, udi uhuekesha butumbi bua mutu wandi; bualu ebu budi muomumue ne yeye muikale ne mutu wandi mubeya. Bikala mukashi kai ne tshilulu tshibuikila ku mutu, bakose nsuki yandi kabidi; kadi bikala bundu bukuata mukashi bua dikosa anyi dibeya dia nsuki yandi, abuikile tshilulu ku mutu. Bualu bua kembimpe bua mulume mene kubuikila tshilulu ku mutu kuandi, bualu bua yeye udi tshifuanyikishi ne butumbi bua Nzambi; kadi mukashi udi butumbi bua mulume. Bualu bua mulume kakafuma kudi mukashi, kadi mukashi wakafuma kudi mulume; bua mulume kakafukibua bualu bua mukashi, kadi mukashi wakafukibua bualu bua mulume. Bua bualu ebu budi mukashi nʼabu mbua kuikala ne tshimanyinu tshia bukokeshi ku mutu kuandi, bualu bua banjelo. Kadi mu Mukelenge kamuena mua kuikala bakashi kamui balume, ne kamuena mua kuikala balume kamui bakashi. Bualu bua bu muakafuma mukashi kudi mulume, nunku mulume udi uledibua kudi mukashi; kadi bintu bionso bidi bifuma kudi Nzambi. Nudilumbuluile bualu munda muenu ne, Bidi bimpe bua mukashi atendelele Nzambi kai ne tshilulu tshibuikila ku mutu kuandi, anyi? Malu nkayau adi munda mua bantu kêna anuyisha ne, Bikala mulume ne nsuki yandi mile, bualu ebu budi bundu kudiye, anyi? Kadi bikala mukashi ne nsuki yandi mile, ebu mbutumbi kudiye; bua nsuki yakamuhebua bu tshibuikilu. Kadi biasua muntu kutandangana bua buala ebu, katuena ne tshilele tshia nunku, ne ekelesia ya Nzambi kayena nʼatshi kabidi. Hananuambila dî edi, tshiena nutumbisha, bualu bua nudi nudisangisha kambualu bua kuvudisha malu mimpe kadi malu mabi. Bualu bua kumudilu, hanuadisangisha mu ekelesia, ndi ngunvua ne matahuluka adi munkatshi muenu; ndi ngitabusha lumu elu tshituha. Bua bunudi nʼabu mbua kutahuluka mu bisumbu, bua badi bajalama bamueneshibue munkatshi muenu. Nunku hanuadisangisha, kanuena bamanye mua kudia bidia bia Mukelenge; bualu bua hanuadia, muntu ne muntu udi udianjila kudia bidia biandi ku mpala kua bakuabo; ne mukuabo udi ne nsala, ne mukuabo udi mukuatshike maluvu. Kanuena ne nsubu bua nuenu kudiamu ne bua nuenu kunuamu, anyi? Nudi nuhetula ekelesia wa Nzambi ne nudi basue kufuisha badi kabai ne bia kudia bundu, anyi? Ndi nuambila tshinyi? Nenutumbishe, anyi? Tshiena nutumbisha bua bualu ebu. Bua nakangata kudi Mukelenge bualu bunakanuha ne, Butuku buakamufilabo, Mukelenge Yesu wakamema bidia; hakasakidileye Nzambi, wakabitshibula, wakamba ne, Ebi bidi mubidi wanyi wakanuhebua bualu buenu; enzai nunku bua kubuluka. Muomumue kabidi, hakashikishabo kudia, yeye wakamema luhanza, wamba ne, Luhanza elu ludi dihungila dihia-dihia dia mu mashi anyi; misangu yonso inualunua, enzai nunku bua kunvuluka. Bua misangu yonso inuadia bidia ebi ne inuanua luhanza elu, nudi nuambila bantu bua lufu lua Mukelenge tô ne halueye. Nunku wadia bidia ebi ne wanua luhanza lua Mukelenge ne budiavi, neahile bua mubidi ne mashi bia Mukelenge. Kadi muntu aditete munda diambedi, nunku adie biandi bidia ebi, anue luhanza elu. Bua wadia bidia ebi ne wanua luhanza elu udi udia dihila, udi unua dihila, bikaleye kai ujingulula mubidi wa Mukelenge. Bua bualu ebu ba bungi ba munkatshi muenu badi batekete, badi ne mabedi, ne bakuabo bakumbana badi balala tulu mu lufu. Bituikala badijingulule munda muetu, kabakadi ne bualu bua kulumbuluisha. Kadi hatulumbuluishabo, tudi tukengeshibua kudi Mukelenge bu bana bandi, bua tuetu katuhishibu hohamue ne ba ha buloba. Nunku, bana betu, hanuadisangisha bua kudia, nuindilangane. Bikala muntu ne nsala, adie biandi kuandi, bua kanudisangishi bua kulumbuluishibua. Ne meme nendongolole malu makuabo hanalua. Bana betu, tshiena musue nuenu nuhange kumanya bualu bua bihedi bia kudi Nyuma. Nudi bamanye ne, Hanuakadi ba mu bisamba bia bende, nuakasesuishibua kudi mpingu ya tumama, bu muakamanyabo mua kunulombola. Nunku ndi numanyisha ne, Kakuena muntu udi wakula mu Nyuma wa Nzambi, udi wamba ne, Yesu udi muedibue mulau; ne kakuena muntu udi mua kuamba ne, Yesu udi Mukelenge, bikaleye kai mu Nyuma Muimpe. Mishindu ya bihedi idiku, kadi Nyuma udi anu muomumue. Mishindu ya midimu idiku kabidi, kadi Mukelenge udi anu muomumue. Mishindu ya bienzelu idiku, kadi Nzambi udi muomumue, udi wenzesha malu onso mu bantu bonso. Kadi muntu ne muntu udi uheshibua dimueneka dia Nyuma bua kukuatshishangana. Bua mukuabo udi uhebua dî dia meshi kudi Nyuma; mukuabo, dî dia lungenyi kudi Nyuma muomumue; munga muntu udi uhebua ditabusha mu Nyuma muomumue, mukuabo udi uhebua tshihedi tshia kuondaha mabedi mu Nyuma umue; mukuabo udi uhebua mua kuenza malu a kukema; mukuabo udi uhebua mua kuambila bantu bualu bua Nzambi; mukuabo udi uhebua mua kujingulula nyuma; mukuabo udi uhebua mua kuakula miaku ya bungi; ne mukuabo udi uhebua mua kujinguluila bantu miaku; kadi Nyuma umue muomumue udi wenzesha malu â onso, udi utahuluila muntu ne muntu tshihedi tshiandi bu mudiye musue. Bualu bua bu mudi mubidi umue, ne udi ne bituha bia bungi, ne bituha bionso bia mu mubidi bidi bia bungi kadi bidi mu mubidi umue; nunku mudi Kilisto kabidi. Bualu bua mu Nyuma umue buonso buetu tuakabatijibua mu mubidi umue, ne tudi Bena Yuda anyi Bena Gelika, anyi bahika anyi badishikamine; bakatunuisha Nyuma umue. Bua mubidi kawena tshituha tshimue, kadi udi bituha bia bungi. Biamba dikasa ne, Bualu bua tshiena tshianza, tshiena wa mubidi; bualu ebu kabuena budivuisha ne kadiena dia mubidi. Biamba ditshu ne, Bualu bua tshiena disu, tshiena wa mubidi; bualu ebu kabuena budivuisha ne kadiena dia mubidi. Bikala mubidi mujima anu disu, kunvua kudi hanyi? Bikala mubidi mujima anu kunyua, kununkila kudi hanyi? Kadi katataka Nzambi wakalongolola bituha mu mubidi, tshituha ne tshituha, bu muakasueye. Bu bituha ebi bionso bikale anu tshituha tshimue, mubidi wakadi kuikala kudi kunyi? Kadi katataka bituha bidi bia bungi, kadi mubidi udi umue. Disu kadiena dimanye mua kuambila tshianza ne, Tshiena nʼebe bualu; ne mutu kabidi kawena mumanye mua kuambila makasa ne, Tshiena nʼenu bualu. Nasha; kadi bituha bia mubidi bidi bimueneka bu bituha bitamba butekete bidi ne bualu bukole; ne bituha bia mubidi bitudi tuela meshi ne, Kabiena bitamba butumbi, tudi tuluatshisha biobio ne butumbi butamba bunene; ne bituha bietu bia mubidi bidi kabi bilengele ku mesu bidi bitamba bulengele; kadi bituha bietu bidi bilengele kabiena ne bualu. Kadi Nzambi wakasangakasha bituha bia mubidi, wakahesha butumbi butamba bunene kudi tshituha tshiakadi katshi nʼabu, bua mu mubidi kamuikadi ditahuluka, kadi bua bituha biambuluishangane muomumue. Bikala tshituha tshimue ne dikenga, bituha bionso bidi bikenga nʼatshi; ne bikala tshituha tshimue tshitumbishibua, bituha bionso bidi bisanka nʼatshi. Nunku nuenu nudi mubidi wa Kilisto, muntu tshituha tshiau, muntu tshituha tshiau. Ne Nzambi wakateka bakuabo mu ekelesia: ba kumudilu bapostolo, bibidi baprofete, bisatu bayishi, hashishe, malu a kukema, ne bihedi bia kuondaha, ne bakuatshishi, ne bakokeshi ba bantu bandi, ne lungenyi lua kuakula miaku ya bungi. Bonso badi bapostolo, anyi? Bonso badi baprofete, anyi? Bonso badi bayishi, anyi? Bonso badi benji ba malu a kukema, anyi? Bonso badi ne bihedi bia kuondaha, anyi? Bonso badi bakula miaku mikuabo, anyi? Bonso badi bajingulula bantu miaku, anyi? Nanukilai kusua bihedi bitamba bunene. Biakula ne ndimi ya bantu ne ya banjelo, kadi bingikala tshi ne luse, nakulua bu tshiamu tshia mitaku tshidibo bakuma, anyi bu dikasa didi diakula. Ne bingikala ne tshihedi tshia kuambila bantu dî dia Nzambi, ne binamanya malu onso atshidi masokoka ne lungenyi luonso, ne bingikala ne ditabusha dionso dindi mua kumusha nʼadi mikuna, kadi bingikala tshi ne luse, ndi tshianana. Binahesha bintu bianyi bionso bua kudishabo nʼabi bahele, ne binafila mubidi bua kungoshabo, kadi bingikala tshi ne luse, malu â kena ankuatshisha nasha. Luse ludi lukenga musangu mule, ludi luenzela bakuabo bimpe; luse kaluena ne mukau; luse kaluena lufunafuna, kaluena ludisua; luse kaluena luenza malu a dikamakama, kaluena ludikebela bintu, kaluena lukuata tshishi lubilu, kaluena lubala malu mabi adibo baluenzela; kaluena lusanka bua malu mabi, ludi lusanka bua kuikala ne malu a bushua; ludi tutuala malu onso, ludi luitabusha malu onso, ludi lutekemena malu onso, ludi ludikankamika mu malu onso. Luse kaluena luhanga tshiendelele; kadi bikala mayisha a baprofete adiku, neashike; bikala miaku ya bantu idiku, neihue; bikala lungenyi ludiku, nelushikile. Bua tudi bamanye anu tshituha tshia malu, tudi tuamba anu tshituha tshia mei a Nzambi; kadi halua dikumbana dia malu onso, malu adi a tshituha neâshikile. Hanakadi muana, nakadi ngakula bu muana, nakadi ngela meshi bu muana, nakadi njingulula malu bu muana; katataka hanakulua muntu mukole, nakulekela malu a buana. Katataka tudi tutangila mu ludimuenu bu dijimbu; kadi dituku diadia netutangilangane mpala ha mpala; katataka ndi mumanye anu tshituha tshia malu; kadi dituku diadia nenmanye malu onso, bu munakamanyibua mu malu onso. Katataka ditabusha ne ditekemena ne luse bidi bishala, busatu buabi; kadi tshidi tshihita buonso buabi hunene nduse. Nulonde luse, nanukilai kukeba bihedi bia Nyuma, kadi nulambe kubikeba bua nuenu mimanye mua kuambila bantu dî dia Nzambi. Bualu bua muntu udi wakula muaku udi bantu kabai bamanye, kena wakula kudi bantu kadi udi wakula kudi Nzambi; bualu bua kakuena muntu udi unvua dî diandi; kadi mu nyuma wandi yeye udi wamba malu atshidi masokoka. Kadi muntu udi wambila bantu dî dia Nzambi udi wakula nʼabo bua kubadiundisha, bua kubasamba, ne bua kubakolesha mitshima. Muntu udi wambila bantu dî mu muaku udibo kabai bamanye udi udidiundisha; kadi muntu udi wambila bantu dî dia Nzambi udi udiundisha ekelesia. Ndi musue buonso buenu numanye mua kuakula miaku, kadi ndi ntamba kusua bua nuenu numanye mua kuambila bantu dî dia Nzambi; muntu udi wambila bantu dî dia Nzambi udi utamba muntu udi ubambila dî mu muaku udibo kabai bamanye, bikaleye kai utujinguluila muaku, bua ekelesia adiundishibue. Kadi bana betu, binalua kunudi ngakula miaku mudi kanui bamanye, nenukuatshishe munyi, bingikala tshî ngakula nʼenu malu adi masokolola, anyi a lungenyi, anyi a mayisha a baprofete, anyi a diyisha? Kadi bintu bidi kabi ne muoyo ne bidi biakula, nasha lushiba nasha tshisanji, bikala muadi wabi kawi mutahuluke, nebamanye munyi, tshidibo bela anyi tshidibo bimba? Bua biadila mpungi ne dî didi kadî dijinguluka, muntu kai wadilongolola bua kuluangana? Nunku nuenu kabidi, binuikala kanui nuakula ne ludimi dî didi diunvuika bimpe, nebamanye dî diudi wakula munyi? Bualu bua nenuele mei mu luhehele. Bumue mishindu ya bungi ya miaku idi ha buloba, ne kakuena umue udi kawi ne dijinguluka. Bingikala tshi mumanye dijingulula dia muaku, nengikale musenshi kudi mualu udi uwakula, ne yeye udi uwakula neikale musenshi kundi. Nunku nuenu kabidi, bualu bua nudi nutamba kunanukila kukeba bihedi bia Nyuma, nukebe mua kukumbanamu bualu bua kudiundisha kua ekelesia. Nunku muntu udi wakula muaku udi bantu kabai bamanye, alombe Nzambi bua yeye amanye mua kubajinguluila muaku. Binatendelela mu muaku undi tshî mumanye, nyuma wanyi udi utendelela, kadi meshi anyi kêna wenza bualu. Nunku ntshinyi? Nentendelele ne nyuma, nentendelele ne meshi kabidi; nengimbe ne nyuma, nengimbe ne meshi kabidi. Anyi, biwatendelela Nzambi anu ne nyuma, muntu udi munkatshi mua badi kabai ne bihedi bia Nyuma udi mumanye mua kuamba ne, Amen, munyi, hawasakidila Nzambi, hadiye kai mumanye dî diudi wamba? Bua wewe udi usakidila Nzambi bimpe bulelela, kadi mukuabo kena udiundishibua. Ndi nsakidila Nzambi; ndi nutamba buonso buenu kuakula miaku; kadi mu ekelesia ndi ntamba kusua kuakula mei atanu ne meshi anyi, bua kuyisha bakuabo kabidi, ku mpala kua kuakula mei lubombo mu muaku udibo kabai bamanye. Bana betu, lekelai kuikala bana mu meshi enu, kadi nuikale tuana tukese mu malu mabi, nuikale bantu bakole mu meshi enu. Bakafunda mu mikenshi ne, Nengakule ne bantu aba mu miaku ya bende ne ku mishiku ya bantu ba bende; kadi Mukelenge udi wamba ne, Bua malu â mene, kabena bangunvuila. Nunku miaku idi bu tshimanyinu, kenkudi badi bitabusha, kadi kudi badi kabai bena ditabusha; kadi mayisha a baprofete adi bu tshimanyinu, kenkudi badi kabai bena ditabusha, kadi kudi badi bitabusha. Nunku biadisangisha bena ekelesia bonso mu muaba umue, ne biakulabo buonso buabo mu miaku mikuabo, ne biabuela bantu badi kabai bamanye miaku anyi badi kabai bena ditabusha, bobo kabena bamba ne, Badi bahale, anyi? Kadi biamba buonso buabo dî dia Nzambi, ne biabuela muntu udi kai muena ditabusha anyi udi kai mumanye miaku, yeye udi ubedibua kudi buonso buabo, udi ulumbuluishibua kudi buonso buabo; ne malu adi masokoka mu mutshima wandi neikale masokolola; ne yeye neatue mpala hanshi, neakukuile Nzambi, neambe ne, Nzambi udi munkatshi muabo bulelela. Nunku ntshinyi, bana betu? Hanuadisangisha, muntu ne muntu udi ne musambu, udi ne diyisha, udi ne bualu buakabuluibua kudiye, udi ne muaku udibo kabai bamanye, udi ne kujingulula kua muaku. Malu onso enjibue bua kunudiundisha. Biakula muntu muaku unudi kanui bamanye, bakule nunka kudi babidi, kabahitshi ha basatu, balondangane muntu ne muntu, ne umue wenu abajinguluile muaku kadi bikalaku kakui mubajinguluidi, muena muaku ahue biandi mu ekelesia, adiakuile munda munda, akule kudi Nzambi kabidi. Baprofete babidi anyi basatu bakule, ne bakuabo bajingulule mei abo. Kadi bikala bualu bubuluibua kudi mukuabo udi ushikamamu, muntu wa kumudilu ahue biandi. Bualu bua buonso buenu nudi bamanye mua kuamba dî dia Nzambi ku muntu ku muntu, bua buonso buenu nuyile, ne bua buonso buenu nusambibue. Nyuma ya baprofete idi ikokeshibua kudi baprofete; bualu bua Nzambi kena Nzambi wa malu mabuelakane, kadi udi Nzambi wa ditalala. Bu mudi bualu mu ekelesia yonso ya basanto, bakashi bahue mu ekelesia; bualu bua kabena bitabusha bua bakashi bakulemu, kadi bikale ku nyima kua balume bu mudi mikenshi yamba. Biasuabo kuyila bualu, bakonke balume babo ku nsubu yabo; bua budi bualu bua bundu bua mukashi kuakula mu ekelesia. Dî dia Nzambi diakafuma kunudi, anyi? Anyi, dî dia Nzambi diakafika kunudi nkayenu, anyi? Biela muntu meshi ne, Meme ndi muprofete, anyi, Meme ndi muena bihedi bia Nyuma, amanye mei andi nufundila ne, Adi mukenshi wa Mukelenge. Bikala muntu mujibale, ashale biandi mujibale. Nunku, bana betu, nunanukile kukeba tshihedi tshia kuamba kua dî dia Nzambi, ne kanubidi kuakula kua miaku. Kadi malu onso enjibue bilengele, ne alondangane biakane. Bana betu, katataka ndi numanyisha lumu luimpe lunakanuambila, lunuakitabusha kabidi, lunudi nuimanamu kabidi, kudilu kunudi nusungidibua binuananukila kulonda dî dinakanuambila, binuikala kanui bitabushe hatuhu. Bua nakafila kunudi ku mpala kua malu onso bualu bunakangata kabidi ne, Kilisto wakafuila bua malu mabi etu, bu mudi Mukanda wa Nzambi wamba; wakajikibua, wakubishibua ku lufu hakahita matuku asatu, bu mudi Mukanda wa Nzambi wamba; wakamueneka kudi Kefa, ne ku nyima kudi bapostolo dikumi ne babidi; hashishe, wakamueneka kudi bantu batambe nkama itanu tshikondo tshimue; bakuabo babo ba bungi batshidi ne muoyo tô ne katataka, kadi bakuabo babo bakalala tulu mu lufu; hashishe, wakamueneka kudi Yakobo, hashishe, kudi bapostolo bonso; ne kunshikidilu kua bonso wakamueneka kundi, meme muana wa kabishi. Bualu bua meme ndi muntu mutambe kuhuekela munkatshi mua bapostolo, udi tshi ne buimpe bua kumbikilabo mupostolo, bualu bua nakakengesha ekelesia wa Nzambi. Kadi bualu bua ngasa wa Nzambi ndi bu mundi emu; ne ngasa wandi kundi kakalua hatuhu, bualu bua meme nakatamba buonso buabo kuenza mudimu; kadi kememe nkayanyi, kadi ngasa wa Nzambi wakadi nʼanyi. Nunku ne meme ne bobo, mbu mutudi tuamba dî dia Nzambi, ne mbu munuakitabusha. Bianuambilabo bualu bua Kilisto ne, Yeye wakabishibua ku bafue, munyi mudi bakuabo ba munkatshi muenu bamba ne, Kakuena dibika dia bafue? Bikalaku kakui dibika dia bafue, Kilisto kena muanze kubishibua kabidi; ne bikala Kilisto kai muanze kubishibua ku bafue, nunku kuamba kuetu kua dî dia Nzambi kudi hatuhu, ne ditabusha dienu didi hatuhu kabidi. Badi batusangana kabidi bamanyishi ba bualu bua Nzambi badi ne mashimi, bualu bua tuakamanyisha bua Nzambi ne, Wakabisha Kilisto ku bafue, udiye kai mubishe ka bafue, bikala bantu bafue kabai babishibue ku lufu. Bikala bantu bafue kabai babishibue ku lufu, Kilisto kena muanze kubishibua ku bafue; ne bikala Kilisto kai mubishibue ku bafue, ditabusha dienu didi hatuhu, ne nutshidi mu malu mabi enu. Ne bantu aba kabidi bakamana kulala tulu mu Kilisto bakajimina. Bituikala batekemene Kilisto anu mu muoyo eu nkayau, tudi tutamba bantu bonso kukengela luse. Kadi katataka Kilisto wakumana kubishibua ku bafue, bu mamuma a kukuama diambedi a bantu bakulala tulu mu lufu. Bualu bua lufu luakalua bualu bua muntu, nunku dibika dia bantu bafue diakalua bua muntu kabidi. Bua bu mudi bonso bafua mu Adama, nunku mu Kilisto kabidi bonso nebavuishibue muoyo. Kadi muntu ne muntu nebabike mu mulongo wandi: Kilisto, mamuma a kukuama diambedi; ne hashishe, bantu ba Kilisto nebabike halueye. Hashishe, kunshikidilu kulualua, hafileye bukelenge kudi Nzambi, Tatu mene, hajimisheye makelenge onso makuabo ne bukokeshi buonso ne bukole. Budiye nʼabu mbua kukokesha tô ne hatekeye bena lukuna nʼandi bonso munshi mua makasa andi. Muena lukuna wa kunshikidilu udiye ujimisha ndufu. Bualu bua yeye wakateka bintu bionso munshi mua makasa andi. Kadi hambeye ne, Bintu bionso biakukokeshibua munshi muandi, tudi bamanye ne, Yeye kena wamba bua Tatu wakamulekela bintu bionso munshi muandi. Ne hatekabo bintu bionso munshi muandi, hashishe, Muana muine kabidi neatekibue munshi mua Tatu wakateka bintu bionso munshi muandi, bua Nzambi kuikala ku mutu kua bionso ne mu bintu bionso. Bikala bualu ebu kabui bulelela, badi babatijibua bua bantu bafue nebenze tshinyi? Bikala bantu bafue kabai babishibua ku lufu, badi babatijibua bualu buabo bua tshinyi? Ne tuetu kabidi tudi tuamba kufua diba dionso bua tshinyi? Ndi nditshiha, bana betu, kudi butumbi buadi nʼabu kunudi mu Kilisto Yesu Mukelenge wetu ne, Ndi munangile ku lufu ku dituku ne ku dituku. Bingikala muluangane ne nyama ku Efeso bu mudi tshilele tshia bantu, bualu ebu budi bunkuatshisha munyi? Bikala bantu bafue kabai babishibua ku lufu, tudie bietu, tunue bietu, bualu bua makelela tufuafua. Kanudingibu; malunda mabi adi anyanga malu makane a bantu. Nutabale biakane, nulekele kuenza malu mabi; bualu bua bakuabo kabena bamanye Nzambi. Ndi ngamba nuaku bua kunufuisha bundu. Kadi mukuabo neakonke ne, Bantu bafue nebabike ku lufu munyi? Nebalue ne mibidi kai? Wewe, muhange meshi, bintu biudi ukuna biebe kabiena bitoloka ne muoyo bikalabi kabi bifue; ne bintu biudi ukuna kuena ukuna mubidi udi uhuola, kadi anu maminu nkayau, nasha a blé nasha a mushindu mukuabo; kadi Nzambi udi uha maminu onso mubidi bu mudiye musue, ne udi uha diminu ne diminu mubidi wadi. Munyinyi wonso kawena muomumue nasha; kadi munyinyi wa bantu udiku, ne munyinyi mukuabo wa nyama, ne munyinyi mukuabo wa nyunyu, ne munyinyi mukuabo wa mishiha. Mibidi ya bintu bia mu diulu idiku ne mibidi ya bintu bia ha buloba; kadi butumbi bua mibidi ya mu diulu budi ha buabu, ne butumbi bua mibidi ya bia ha buloba budi ha buabu. Bunga butumbi mbua diba, ne bunga butumbi mbua ngondo, bunga butumbi mbua mitoto, bua munga mutoto udi utahuluka kudi munga mutoto mu butumbi buau. Dibika dia bantu bafue didi nunku kabidi. Mubidi udi ukunyibua mubole, udi ubishibua kawi mubole; udi ukunyibua kawi ne butumbi, udi ubishibua ne butumbi; udi ukunyibua ne butekete, udi ubishibua ne bukole; udi ukunyibua mubidi wa bantu, udi ubishibua mubidi wa nyuma. Bikalaku mubidi wa bantu, mubidi wa nyuma udiku kabidi. Bu muakafundabo ne, Muntu wa kumudilu, Adama, wakalua musûke udi ne muoyo. Ne Adama wa kunshikidilu wakalua nyuma udi uhesha bantu muoyo. Kadi bintu bia nyuma kabiena bia kumudilu, anu bintu bia mubidi; hashishe, bintu bia nyuma bidi bilonda. Muntu wa kumudilu udi mufukibue ne dinfuenkenya dia buloba; muntu muibidi udi muntu wa mu diulu. Bu mudi wakafukibua ne dinfuenkenya, nunku kabidi mudi bobo badi bafukibua ne dinfuenkenya; ne bu mudi wa mu diulu, nunku kabidi mudi bobo badi ba mu diulu. Bu mutuakatuala tshifuanyikishi tshia wakafukibua ne dinfuenkenya, neatuale kabidi tshifuanyikishi tshia wa mu diulu. Ndi ngamba bualu ebu, bana betu, ne, Munyinyi ne mashi kabiena bimanye mua kuhiana bukelenge bua Nzambi. Ne bintu bidi bibole kabiena bihiana bintu bidi kabi bibole. Monai, ndi nuambila bualu busokoka: Buonso buetu katuena tulala tulu mu lufu, kadi buonso buetu netuandamuke, mu diba dikese, mu kuvinya kua disu, helabo mpungi wa kunshikidilu; bualu bua nebele mpungi ne bantu bafue nebabike ne mibidi idi kayi mibole, ne tuetu netuandamuke. Bualu bua mubidi eu mubole udi ne bualu bua kuluata udi kawi mubole, ne mubidi eu udi ufua udi ne bualu bua kuluata udi kawi ufua tshiendelele. Hamana mubidi eu mubole kuluata udi kawi mubole, ne hamana mubidi eu udi ufua kuluata udi kawi ufua tshiendelele, hashishe, dî diakafundabo nedishike ne, Lufu luakaminyibua mu kulutamba kua Kilisto. Lufu, kutamba kuebe kudi hanyi? Lufu, kalonda kebe kadi hanyi? Kalonda ka lufu kadi bubi, ne bukole bua bubi budi mikenshi; kadi tuasakidila kudi Nzambi, udi utuha kutamba kua lufu bualu bua Mukelenge wetu Yesu Kilisto. Nunku, bana betu bananga, nuikale bakole, nutantamane, nukumbashe mudimu wa Mukelenge misangu yonso, bualu bua nudi bamanye ne, Mudimu unudi nuenza mu Mukelenge kawena hatuhu. Bualu bua disangisha dia bintu bia kufila kudi basanto, bu munakela di kudi ekelesia wa mu Galatia, enzai bienu muomumue kabidi. Ku dituku dia kumudilu dia Lumingu ne Lumingu, muntu ne muntu wa munkatshi muenu adibutshile bintu, bu muakabiheteye, bua kakuikadi masangisha a bintu hanalua. Ne hanafika, nentume bantu banuakajadika ne mikanda yenu, bua kuyabo ne bintu bienu bia luse ku Yelushalema; ne hikala bualu bunkumbana bua meme kuya kabidi, bobo nebaye nʼanyi. Nendue kunudi hanahitshila mu Makedonia; bualu bua nempitshile mu Makedonia; kadi bumue nenshikame nʼenu musangu, anyi tshidimu tshia mashika tshijima mene, bua nuenu kuntuma ku luendu kunaya. Bua tshiena musue kunutangila katataka mu dihita dianyi dia mu nshila, bua ndi ntekemena bua kushala nʼenu musangu, bitabusha Mukelenge. Kadi nenshale ku Efeso tô ne ku dituku dia Pentekoste; bua bakumana kungunzuluila tshibi tshinene ne tshia kuenza mudimu mukole, ne bahumbishi ba bungi badiku. Bialua Timote kunudi, nuamanya bua yeye kuikala nʼenu kai ne ditshina, bualu bua yeye udi wenzela Mukelenge mudimu bu mundi ngenza; nunku muntu kamuhetudi nasha. Kadi numutume ku luendu luandi talala, bua yeye alue kundi; bualu bua meme ndi mutekemena ne bana betu bakuabo ba mu Kilisto. Bualu bua Apolo, muanʼetu wa mu Kilisto, nakamusengelela tô bua yeye alue kunudi ne bana betu bakuabo ba mu Kilisto; ne yeye kakasua kulua katataka, nasha kakese; kadi yeye nealue kunudi haheteye tshikondo. Nutabale, nutantamane mu ditabusha, nuikale balume mene, nukuatshibue bikole. Malu enu onso enjibue mu luse. Bana betu, ndi nusengelela (nudi bamanye ba mu nsubu wa Stefana ne badi bu mamuma a kukuama diambedi mu Akaya, ne bakadifila bua kukuatshila basanto mudimu) bua nuenu nuditeke munshi mua bantu ba nunku, ne munshi mua muntu yonso udi ukuatsihahangana nʼetu ne udi wenza mudimu wa Nzambi. Nakasanka kabidi bua difika dia Stefana ne Fôtunato ne Akaiko; bualu bua bobo bakakumbasha malu anuakahanga. Bualu bua bobo bakakankamisha nyuma wanyi ne nyuma yenu kabidi; nunku nuitabushe bantu ba nunku. Bena ekelesia ba mu Asia badi banutumina muoyo. Akula ne Pisikila ne bena ekelesia ba mu nsubu wabo badi banutumina muoyo wa bungi mu Mukelenge. Bana betu bonso ba mu Kilisto badi banutumina muoyo. Nuelangane muoyo ne dituangana dia mishiku dia tshijila. Meme Paulo, udi nutumina muoyo, mufunde ne tshianza tshianyi. Bikala muntu kai musue Mukelenge, edibue biandi mulau. Mukelenge alue biandi. Ngasa wa Mukelenge Yesu Kilisto ikale nʼenu. Dinanga dianyi dikale ne buonso buenu mu Kilisto Yesu. Amen. Paulo, mupostolo wa Kilisto Yesu, bua disua dia Nzambi, ne Timote, muanʼetu wa mu Kilisto, tudi tufunda mei kudi bena ekelesia wa Nzambi ba mu Kolinto ne kudi basanto bonso ba mu buloba buonso bua Akaya. Ngasa kunudi ne ditalala bia kudi Nzambi Tatu wetu ne kudi Mukelenge Yesu Kilisto. Nzambi Tatu wa Mukelenge wetu Yesu Kilisto, Tatu wa luse ne Nzambi wa busambi buonso, atumbishibue; utu watusamba mu makenga etu onso, bua tuetu tumanye mua kusamba bakuabo mu makenga abo onso ne busambi butudi tusambibua kudi Nzambi. Bu mudi makenga a Kilisto akumbana kutudi, nunku bua Kilisto busambi buetu budi bukumbana kabidi. Bituakengeshibua, bualu ebu mbua busambi buenu ne luhandu luenu; anyi bituasambibua, bualu ebu mbua busambi buenu budi bunuenzesha mu dikankamana dia mu makenga momumue atudi tukenga nʼau. Ne ditekemena dietu bua bualu buenu didi dijalama; bua tudi bamanye ne, Bu munudi babanyanganyi nʼetu ba makenga, nunku nudi babanyanganyi nʼetu ba busambi kabidi. Bana betu, katuena basue nuenu nuhange kumanya bua makenga akatukuata mu Asia, bu muakatamba bujitu kutunemena, buhita bukole buetu, tô ne hatuakamanya ne. Netufue; kadi tuetu tuakadi ne dihila dia lufu hamʼbidi hetu bua tuetu katuditekemenyi, kadi bua tuetu tutekemene Nzambi udi ubisha bafue; wakatusungila ku lufu lunene nunku, neatusungileku kabidi; utudi tueyemena mu ditekemena dietu ne, Yeye neatusungile kabidi; nuenu kabidi nudi nukuatshishangana bua bualu buetu ne disengelela dienu, bua bantu ha bungi basakidile Nzambi bua bualu buetu, bua kuha kuakatuhabo ku kutendelela kua bantu ba bungi. Bualu bua ditumba dietu didi bualu ebu, tshimanyishilu tshia muoyo-mukese wetu ne, Tuetu tuakenda munkatshi mua ba ha buloba ne bienzedi bia tshijila ne bia hatoke bia Nzambi, kemu meshi a bantu kadi mu ngasa wa Nzambi, ne tuakatamba kuenda nunku munkatshi muenu. Katuena tunufundila malu makuabo anu malu anudi mibala ne anudi bamanye mene; ndi musue nuenu mimanye malu au tô ne kunshikidilu; bu munuakatumanya tshituha ne, Tuetu tudi butumbi buenu, bu munudi butumbi buetu, mu dituku dia Mukelenge wetu Yesu. Ne mu ditekemena edi nakasua kulua kunudi diambedi bua nuenu kuikala ne ngasa tshiakabidi; nakasua kuhitshila munkatshi muenu ku Makedonia, ne kuhingana kunudi ku Makedonia kabidi, bua nuenu kuntuma ku mpala mu luendu luanyi lua ku Yudaya. Hanakadi ngelangana meshi nunku, nakadi ne kutatakana, anyi? Malu andi musue kuenza, ndi musue anu bu ba ha buloba, badi bamba ne, E, E, ne Nasha, Nasha, anyi? Bu mudi Nzambi mua kueyemenyibua, dî dietu kunudi kadiena E ne Nasha. Bualu bua Muana wa Nzambi, Yesu Kilisto, wakanuambidibua munkatshi muenu kutudi, kudi meme ne Siluano ne Timote, kakadi ne E ne Nasha; kadi munda muandi mudi anu E. Bualu bua bu mudi bungi bua milayi ya Nzambi, munda muandi mudi anu E; nunku kabidi bua bualu buandi kudi Amen, bua Nzambi atumbishibue bua bualu buetu. Wakatujadika nʼenu mu Kilisto, wakatuela manyi ha mutu, nNzambi; wakatutekela tshimanyishilu tshiandi ne wakatuha tshieya tshia Nyuma Muimpe mu mitshima yetu kabidi. Ndi mbikila Nzambi bu mumanyi wa bualu ne mutshima wanyi ne, Nakahidia mua kulua ku Kolinto bua kunusungila ku ditandangana dietu. Kembua tudi ne bukokeshi ku ditabusha dienu, kadi tudi bakuatshishanganyi nʼenu mu disanka dienu; bualu bua nudi nujalama mu ditabusha. Kadi nakadisunguila bualu ebu munda muanyi bua meme tshilu kunudi kabidi ne kanyinganyinga. Bua binanyingalasha mitshima yenu, muntu kai udi unsankisha, anu muntu udi ne mutshima wandi munyingalashibue kundi? Nakanufundila bualu ebu mene bua meme, hanalua, tshikadi ne kanyinganyinga kudi bantu bandi ne bua kuikala ne disanka kudibo; ndi ne ditekemena kunudi bonso ne, Disanka dianyi didi dia buonso buenu. Nakanufundila ne kanyinganyinga ka bungi ne mutshima munemu bujitu bua bungi ne binsonshi bia bungi ku mesu; kembua mitshima yenu inyingalashibue, kadi bua nuenu mimanye dinanga dindi ntamba kukumbasha kunudi. Kadi bikala muntu mumane kunyingalasha mitshima, yeye kakanyingalasha mutshima wanyi (tshiena musue kutamba kukolesha bualu), kadi wakanyingalasha mitshima ya buonso buenu tshituha. Dikenga diakangateye kudi bungi buenu didi dikumbana kudi muntu wa nunku; kadi nudi ne bualu bua kumulekelela bubi buandi ne kumusamba, bua bumue muntu wa nunku katambi bu ku kanyinganyinga kakole. Nunku ndi nusengelela bua nuenu nûjadike luse luenu kudiye. Bua bualu ebu kabidi nakunufundila bua meme kumanya bu mudi dijadikibua dienu, ne nudi ne ditumikila mu malu onso, anyi? Kadi kudi muntu unudi nulekelela bualu buonso, meme nemulekelelebu kabidi; bua bualu bunakunulekelela kabidi, bingikala munulekelele bualu buonso, nakunulekelelabu bua bualu buenu ku mesu kua Kilisto; bua Satana kikadi ne muaba wa kutuhitshila budimu; bualu bua tuetu katuena tuhanga kumanya madimu andi. Hanakalua ku Toa bualu bua lumu luimpe lua Kilisto ne hakadi tshibi tshinene tshingunzuluila mu Mukelenge; tshiakadi ne dikisha mu mutshima wanyi, bualu bua tshiakasangana Tito, muanʼetu wa ma Kilisto; kadi nakalayangana nʼabo, nakaya ku Makedonia. Kadi tuasakidila kudi Nzambi udi utulombola misangu yonso bu bantu batambibue mu Kilisto, udi ununkishila dihembu dia lungenyi luandi mu bianza bietu ku miaba yonso. Bualu bua tudi bu dihembu dimpe dia Kilisto mu Nzambi kudi bantu badi basungidibua ne kudi bantu badi bajimishibua; kudi bakuabo tudi bu dihembu dia lufu ku lufu, ne kudi bakuabo tudi bu dihembu dia muoyo ku muoyo. Muntu kai udi ukumbana malu â? Bualu bua tuetu katuena bu ba bungi badi banyanga dî dia Nzambi! kadi mu Kilisto tudi tuamba dî ne mitshima mitoke bu mutudi ba kudi Nzambi ne ku mesu kua Nzambi. Tudi tubanga tshiakabidi kuditumbisha, anyi? Tuetu tudi ne bualu, bu mudi bakuabo benza, bua kulua ne mikanda ya kudimanyisha nʼai kunudi, anyi? Anyi tudi ne bualu bua kunulomba mikanda ya kudimanyisha nʼai kudi bakuabo, anyi? Nuenu nudi mukanda wetu, mufundibue mu mitshima yetu, mumanyibue ne mubadibue kudi bantu bonso; budi bumueneshibua ne, Nuenu nudi mukanda wa Kilisto, muenjibue kutudi, wakafundibua kene mai a mikanda, kadi ne Nyuma wa Nzambi udi ne muoyo; kempa mabue, kadi mu mitshima ya bantu. Edi nditekemena ditudi nʼadi kudi Nzambi bualu bua Kilisto; kembua tuetu tudi tukumbana nkayetu bua kudibadila bualu bu mudibu bufuma kutudi, kadi dikumbana dietu didi difuma kudi Nzambi; yeye wakatukumbasha kabidi bu bena mudimu ba dihungila dihia-dihia; kendia maleta a mikenshi mafunda, kadi dia nyuma: bualu bua maleta mafunda adi avuisha lufu, kadi nyuma udi uvuisha muoyo. Kadi bikala mudimu wa lufu muenjibue ne maleta mafundibue ha mabue wakalua ne butumbi, ne bua nunku Bena Isalele kabakamanya mua kutangilatangila mpala wa Mose bualu bua butumbi bua mpala wandi, butumbi abu buakadi bujiminajimina; mudimu wa nyuma kawena utamba kuikala ne butumbi, anyi? Bualu bua bikala mudimu wa kuhisha bantu ne butumbi, mudimu wa kuvuisha buakane udi utamba butumbi. Bua bulelela, bualu buakavuishibua butumbi diambedi kabuena buvuishibua butumbi nunku katataka, bualu bua butumbi budi butamba budiku. Bualu bua bikala bualu budi bujiminajimina ne butumbi, bualu budi bushala budi butamba butumbi. Bualu bua tudi ne ditekemena dia nunku, tudi tuamba dî dietu ne dikima dikole; ne katuena bu Mose wakateka tshilulu tshikudika ha mpala wandi bua Bena Isalele kabatangidi kunshikidilu kua butumbi buakadi bujiminajimina; kadi meshi abo akakoleshibua, bualu bua tô ne ku dituku edi, habalabo dihungila dikulukulu, tshilulu tshikudika tshiotshimue tshitshidi tshishala, bualu ebu kabuena buanze kubuluibua kudibo ne, Tshidi tshiumushibua mu Kilisto. Kadi tô ne ku dituku edi habalabo mei a Mose, tshilulu tshikudika tshidi tshilala ku mitshima yabo. Kadi biakudimuka mitshima yabo kudi Mukelenge, tshilulu tshikudika tshidi tshiumushibua. Mukelenge udi Nyuma, ne hadi Nyuma wa Mukelenge hadi budishikaminyi. Kadi buonso buetu, katui ne tshilulu tshikudika ha mpala, tudi tutangila bu mu ludimuenu butumbi bua Mukelenge, tudi tuandamushibua mu tshifuanyikishi tshiotshimue ku butumbi ne ku butumbi; bu mudi kudi Mukelenge Nyuma. Bua bualu ebu tuetu tudi ne mudimu eu, bu mutuakaheta luse, katuena tuhanga; kadi tuakahidia malu masokome a bundu, katuena tuendakana ne budimu, katuena tudinga bantu ne dî dia Nzambi, kadi tudi tudianyisha ku dimuenesha dia bushua ku muoyo-mukese wa muntu yonso ku mesu kua Nzambi. Bikala lumu luimpe luetu ne tshilulu tshikudika, ludi nʼatshi anu kudi batshidi bajimina; bakafofomishabo mesu a meshi a badi kabai bitabusha kudi nzambi wa tshikondo etshi, bua dinkenka dia lumu luimpe lua butumbi bua Kilisto, udi tshifuanyikishi tshia Nzambi, kaditemi kudibo. Bualu bua katuena tudiamba, kadi tudi tuamba Kilisto Yesu bu Mukelenge; ne tuetu bu bahika benu bualu bua Yesu. Bualu bua Nzambi nguakamba ne, Munya neuteme mu mîdima; yeye wakatema mu mitshima yetu bua kutuha dinkenka dia lungenyi lua butumbi bua Nzambi ha mpala ha Yesu Kilisto. Kadi tudi ne bualu ebu bua mushinga mukole mu bintu biakafumbabo ne buloba, bua bulengele butambe bua bukole buikale bua Nzambi, kabufumi kutudi; bakatutshintshimika ku nseke yonso, kadi katuena mu muaba mubumbakane; tudi tulubakana, kadi katuena banze kuteketa; tuakuihatshibua, kadi katuena tulekedibua ha nkayetu; tuakukumibua hanshi, kadi katuena tushihibua; misangu yonso tudi tutuala dishihibua dia Yesu mu mibidi yetu, bua muoyo wa Yesu umueneshibue kabidi mu mibidi yetu. Bualu bua tuetu badi ne muoyo tudi tufidibua ku lufu misangu yonso bualu bua Yesu, bua muoyo wa Yesu kabidi umueneshibue mu mibidi yetu ifuafua. Nunku lufu ludi luenzesha munda muetu, kadi muoyo udi wenzesha munda muenu. Kadi bualu bua tudi ne nyuma muomumue wa ditabusha bu mudi dî difundibue ne, Nakitabusha, nunku nakakula; tuetu tudi tuitabusha kabidi, nunku tudi tuakula kabidi: tudi bamanye ne, Wakabisha Mukelenge Yesu ku lufu neatubishe kabidi ne Yesu, neatumueneshe nʼenu ka mesu kuandi. Bua malu onso adi bua bualu buenu, bua ngasa, udi uvulangana kudi badi batamba bungi, akumbashe disakidila ku butumbi bua Nzambi. Nunku katuena tuhanga; kadi bikala mibidi yetu ifuafua ifuafua, mioyo yetu idi ivuishibua mihia-mihia ku dituku ku dituku. Bualu bua dikenga dietu dikese dia tshituha tshihi didi ditamba kutuenzeshela bujitu bua butumbi bua tshiendelele musangu ne musangu; hatudi katui tutangila bintu bidi bimueneka ku mesu, kadi tudi tutangila bintu bidi kabi bimueneka ku mesu; bualu bua bintu bidi bimueneka ku mesu bidi bia tshituha tshihi, kadi bintu bidi kabi bimueneka ku mesu bidi bia tshiendelele. Tudi bamanye ne, Bikala nsubu wa ha buloba wa mubidi wetu muhuke, tudi ne nsubu mufume kudi Nzambi, nsubu udi kai muasa ne bianza, udi mu diulu tshiendelele. Bulelela, mu nsubu eu tudi tufua mikemu, bualu bua tudi tujinga bua kuluatshishibua ne nsubu wetu udi ufuma mu diulu; nunku kabidi, bitualuatshishibua, kabena batusangana butaka. Bulelela, tuetu badi mu nsubu eu tudi tufua mikemu banemena kudi bujitu; kembua tudi basue kuvula bintu bitudi tuluata, kadi tudi basue kuluatshishibua, bua tshidi ne bua kufua tshiminyibue kudi muoyo. Nguakatuenza bua bualu ebu mene nNzambi, wakatuha kabidi tshieya tshia Nyuma. Nunku bualu bua tudi ne dikima misangu yonso ne bualu bua tudi bamanye ne, Hatuikala kunu mu mubidi, katuena tuikala kua Mukelenge (bualu bua tudi tuenda bua ditabusha, kembua bintu bidi bimueneka ku mesu); bua malu â tudi ne dikima, mundi ngamba, ne tudi tutamba kusua kumuka ku mubidi bua kuikala kua Mukelenge. Nunku bualu butudi tukeba kabidi ne, Bituikala mu mubidi anyi katui mu mubidi, mbua kumusankisha. Bualu bua butudi nʼabu mbua kumueneshibua buonso buetu ku mpala kua tshilumbuluidi tshia Kilisto, bua muntu ne muntu kuangateye bintu bia mu mubidi wandi bu muakenzenzeye, nasha malu mimpe nasha malu mabi. Bualu bua tuetu tudi bamanye ditshina dia Mukelenge, tudi tuitabushisha bantu; kadi tudi tumueneshibua ku mpala kua Nzambi, ne ndi ntekemena ne, Tudi tumueneshibua ku muoyo-mukese wenu kabidi. Katuena tudimanyisha kunudi tshiakabidi, kadi tudi tunuha bua kuditumbisha nʼabu bua bualu buetu, bua nuenu numanye mua kuitaba kudi bantu badi batumba mu malu adi amueneka ku mesu, kenga mu mutshima. Bituikala ne meshi matshimbakane, budi bua Nzambi; anyi bituikala ne mitshima mihole, budi bua bualu buenu. Bualu bua dinanga dia Kilisto didi dituenzesha; bua tuakujingulula bualu ebu ne, Bualu bua umue wakafuila bonso, nunku bonso bakafua; ne yeye wakafuila bonso bua badi ne muoyo kabikadi nʼau bua bualu buabo nkayabo, kadi bikale nʼau kudi yeye wakafua ne wakabika ku lufu kabidi bua bualu buabo. Nunku mu malu atshidi ku mpala katuena bamanye bantu ku mibidi yabo; bituamana kumanya Kilisto ku mubidi wandi diambedi, katataka katuena bamumanye nunku kabidi. Nunku bikala muntu mu Kilisto, yeye udi mufukibue muhia-muhia; malu makulukulu akaya, monai, akalua mahia-mahia. Kadi malu onso adi afuma kudi Nzambi, wakatulengesha kudiye bualu bua Kilisto wakatuha mudimu wa kulengeshisha bakuabo kudiye: ne. Nzambi munda mua Kilisto wakadi ulengesha ba ha buloba kudiye, kakababadila malu mabi abo, ne wakateka munda muetu dî dia kulengeshisha bakuabo kudiye. Nunku tudi miloho bua bualu bua Kilisto, bu mudi Nzambi munusengelele ne dî dietu, nunku tuetu tudi tunusengelela bua bualu bua Kilisto ne, Nulengeshibue ne Nzambi. Yeye nguakadi kai mumanye bubi, Nzambi wakamuvuisha bubi bua bualu buetu; bua tuetu tuikale buakane bua Nzambi munda muandi. Tuetu, benji ba mudimu ne Nzambi, tudi tunusengelela kabidi ne, Kanuangatshi ngasa wa Nzambi bu bualu bua hatuhu; bua yeye udi wamba ne, Nakakunvuila mu tshikondo tshimpe, Mu dituku dia luhandu nakakukuatshisha; monai, katataka ntshikondo tshimpe, monai, katataka ndituku dia luhandu. Katuena tulenduisha muntu mu bualu, bua mudimu wetu kaubandibu. Kadi mu malu onso tudi tudimanyisha bu bena mudimu ba Nzambi, mu ditantamana dia bungi, ne mu makenga, ne mu malu adi atukolela, ne mu tunyinganyinga; ne mu mibundabunda, ne mu nsubu ya lukanu, ne mu mayoyo, ne mu midimu mikole, ne mu kutentekela, ne mu kujila kua bia kudia; ne mu butoke bua mitshima, ne mu lungenyi, ne mu lutulu, ne mu luse, ne mu Nyuma Muimpe, ne mu dinanga didi kadi ne lubombo; ne mu dî dia bushua, ne mu bukole bua Nzambi; ne ku bintu bia nvita bia buakane bikuata ku tshianza tshia balume ne ku tshianza tshia bakashi, ku butumbi ne mu dihetula, ku lumu lubi ne ku lumu luimpe; bu bena mashimi, kadi tudi bena mei malelela; bu bantu badi kabai bamanyibua, kadi tudi bamanyibua bimpe; bu bantu bafuafua, kadi monai, tudi ne muoyo; bu bakengeshibua, kadi katuena tushihibua; bu badi ne kanyinganyinga ka mutshima, kadi tutu tuasanka misangu yonso; bu bahele, kadi tudi tuvuisha ba bungi babanshi; bu badi kabai ne bintu, kadi tudi ne bintu bionso. Bena Kolinto, mukana muetu mudi mubulule kunudi, mitshima yetu idi midiundishibue. Kanuena nukeheshibua munda muetu, kadi nudi nukeheshibua mu mitshima yenu nuenu. Bua difutu diodiumue dihingana katudi, (udi nuambila bu bana) nuenu kabidi nudiundishibue ma mitshima yenu. Lekelai kulamakashibua ne badi kabai bena ditabusha bu badi kabai bakanangane; bua buakane budi ne bulunda kai ne bualu bubi; anyi munya udi ne buobumue kai ne midima? Ne Kilisto udi ne di dimue ne Beliyala kudi kunyi; anyi muena ditabusha udi ne tshituha kai ne udi kai ne ditabusha? Ntempelo wa Nzambi udi uhunga di kai ne mpingu? Bualu bua tuetu tudi bu ntempelo wa Nzambi udi ne muoyo; bu muakamba Nzambi ne, Nengikale munda muabo, nengendakane munda muabo; Nengikale Nzambi wabo ne bobo nebikale bantu banyi. Nunku umukai munkatshi muabo, nuikale batahuluke, bu mudi Mukelenge wamba; Kanulengi tshintu tshibiha, ne meme nenuitabushe, Nengikale kunudi bu Tatu, ne nuenu nenuikale kundi bu bana balume ne bana bakashi, Mudi muamba Nzambi wa Bukole Buonso. Bana betu, bualu bua tuetu tudi ne milayi ei, tudilengeshe ku manyanu onso a mubidi ne a nyuma, tukumbashe tshijila tshietu mu ditshina dia Nzambi. Nutushile muaba mu mitshima yenu; katuakenzela muntu bibi, katuakanyanga muntu, katuakatamba muntu mukuabo budimu. Tshiena ngamba bualu ebu bua kunuhisha; bua nakanuambila diambedi ne, Nuenu nudi mu mitshima yetu bua tuetu tufue hohamue ne tuikale ne muoyo hohamue. Dikima dia mei anyi didi dinene kunudi, kutumba kuanyi kudi kunene bua bualu buenu; nakûshibua tente ne busambi, disanka dianyi didi dihongoloka mu dikenga dietu dionso. Hatuakalua mu Makedonia mene, mibidi yetu kayakadi ne dikisha, kadi tuakadi tutatshishibua ku nseke yonso; nvita yakadi hamʼbidi, ne ditshina diakadi munda muetu. Kadi Nzambi, udi usamba bantu buhuekela, wakatusamba mu kulua kua Tito; tuakasambibua kembua kulua kuandi nkayaku, kadi bua busambi buakasambibueye nʼabu bua bualu buenu hakatuambileye bualu bua dijinga dienu ne kudila kuenu ne lukunukunu luenu bia bualu buanyi; nunku nakatamba kusanka. Nakanyingalasha mitshima yenu ne mukanda wanyi, kadi tshiena ne dibungama katataka bua buala abu; kadi nakadi ne dibungama (bua ndi ntangila ne mukanda au wakanyingalasha mitshima yenu, kadi anu bua musangu muihi), katataka ndi ne disanka, kambualu bua nuakanyingalashibua, kadi bualu bua nuakanyingalashibua tô ne ku dikudimuna dia mitshima yenu; bualu bua nuakanyingalashibua bu mudi Nzambi musue, bua nuenu kanujimishi tshintu tshimue bua bualu buetu. Bualu bua kanyinganyinga kadi Nzambi musue kadi kenzesha dikudimuna dia mutshima tô ne ku luhandu ludi kalui luvuisha dibungama; kadi kanyinganyinga ka ha buloba ebu kadi kavuisha lufu. Monai, bualu ebu mene bua kunyingalashibua kuenu bu mudi Nzambi musue, buakenzesha disuminyina munda muenu, ne didibingisha, ne difika munda, ne ditshina, ne dijinga, ne lukunukunu, ne disombuela. Mu malu onso nuakadimuenesha bu badi ne mitshima mitoke mu bualu ebu. Nunku nakanufundila, kadi kembua muntu wakenza bualu bubi abu, anyi bualu bua muntu wakenzelabo bibi; kadi bua disuminyina dienu bua bualu buetu dimueneshibue kunudi ku mesu kua Nzambi. Nunku tuetu tuakasambibua; ne mu busambi buetu tuakatamba kusanka bualu bua disanka dia Tito, bualu bua nyuma wandi wakakankamishibua kudi buonso buenu. Bua bingikala mutumbe kudiye mu muanda mukuabo bua bualu buenu, tshiakafuishibua bundu; kadi bu mutuakanuambila malu onso mu bushua, nunku kabidi ditumbila dietu kudi Tito diakalua dilelela. Dinanga diandi didi ditamba kunudi havulukeye ditumikila dia buonso buenu, ne bu munuakamuitabusha ne ditshina ne kuzakala. Ndi ne disanka bualu bua mu mianda yonso ndi ne ditekemena dimpe bua bualu buenu. Bana betu, tudi tunumanyisha bua ngasa wa Nzambi wakaheshibua munkatshi mua ekelesia ya mu Makedonia, ne, Mu kuteta kua bungi kua mu makenga, dikumbana dia disanka diabo ne buhele buabo bua bungi biakavudisha bubanshi bua kuha kuabo. Bakajila bintu bu muakadi bukole buabo, ndi mumanyi wa bualu ne, tô ne hakahitabo bukole buabo; bakabifila bu muakasua mitshima yabo, Bakatusengelela ne disengelela dia bungi bua ngasa eu ne buobumue bia mu kukuatshishangana kua basanto; ne kabakenza anu bu mutuakatekemena, kadi bakadianjila kudifila kudi Mukelenge, ne kutudi, bu mu disua dia Nzambi. Ne bua bualu ebu tuakasengelela Tito, bua yeye, bu muakabangeye mudimu eu diambedi, nunku akebe biandi kukumbasha ngasa eu munda muenu kabidi. Bu munuakamana kukumbana mu malu onso, ne mu ditabusha, ne mu kuamba, ne mu lungenyi, ne mu disuminyina dionso, ne mu dinanga dienu kutudi, nukebe mua kukumbana mu ngasa eu kabidi. Ndi ngamba, kembu mukenshi, kadi bua kujadika bushua bua dinanga dienu ku disuminyina dia bakuabo. Nudi bamanye ngasa wa Mukelenge wetu Yesu Kilisto ne, Yeye wakadi mubanshi, kadi wakalua muhele bua bualu buenu, bua nuenu nulue babanshi ku buhele buandi. Kadi mu bualu ebu ndi nuha dijingulula dianyi: ebu mbualu bunudi nʼabu, nuenu mbakabanga bualu ebu tshidimu tshia ku mpala, kembua kuenza nkayaku, kadi mbua kusua kuenza kabidi. Katataka nushikishe kuenza kuabu kabidi; bu munuakadi badilongolole bua kusua, nunku nuikale ne dishikisha dia bualu kabidi bu munudi mua kuenza. Bikala kudilongolola kudiku, bidi bitabushibua bu mudi muntu nʼabi, kembu mudiye kai nʼabi. Tshiena nuambila dî edi bua bakuabo batalale ne bua nuenu nuikale ne bujitu, kadi bualu bua kukelemesha majitu; dikumbana dia bintu bienu dikale dikuatshisha dia dikeha dia bintu biabo mu tshikondo tshia mpindiu, ne dikumbana diabo kabidi dikale dikuatshisha dia dikeha dia bintu bienu; nunku majitu enu neakelemeshibue; bu muakafundabo ne, Muntu wakasangisha bia bungi kakadi ne bia ha mutu; ne muntu wakasangisha bikese kakakengela bintu. Kadi tuasakidila kudi Nzambi utu wateka mutshima muomumue wa disuminyina bua bualu buenu munda mua Tito. Bua yeye wakitabusha disengelela dietu; kadi bualu bua yeye muine wakadi ne disuminyina dikole, wakadiluila kunudi. Tuakutuma muanʼetu wa mu Kilisto udi ne butumbi buandi mu lumu luimpe butangadike munkatshi mua bena ekelesia yonso hohamue nʼandi; kembualu ebu nkayabu, kadi yeye wakadi musungudibue kabidi kudi bena ekelesia bua kuendakana nʼetu mu muanda wa ngasa eu utudi tukuatshila mudimu bua butumbi bua Mukelenge, ne bua kulesha kudilongolola kuetu; tudi tuehuka ku bualu ebu bua muntu katubandi bua bungi bua bintu ebu bitudi tukuatshisha nʼabi bakuabo. Tudi tulongolola malu adi mimpe, kenku mesu kua Mukelenge nkayandi, kadi ku mesu kua bantu kabidi. Tuakatuma muanʼetu wa ma Kilisto nʼabo, utuakajadika ne, Udi ne disuminyina mu malu a bungi misangu ya bungi, kadi katataka udi utamba kusuminyina bualu bua ditekemena dinene didiye nʼadi kunudi. Bianukonkabo bua Tito, yeye adi muabanyanganyi nʼanyi, ne udi muena mudimu nʼanyi, bua bualu buenu; anyi bianukonkabo bualu bua bana betu ba mu Kilisto, bobo badi batumibue ba ekelesia, badi butumbi bua Kilisto. Nuleshe kujalama kua dinanga dienu ne kua ditumba dietu bua bualu buenu ku mesu kua ekelesia. Bualu bua kukuatshishangana kua basanto, tshiena ne bualu bua kunufundila. Bua ndi mumanye kudilongolola kuenu kunakatumbisha bua bualu buenu kudi ba mu Makedonia ne, Bena Akaya bakadianjila kulongolola kufila kuabo tshidimu tshia ku mpala; ne lukunukunu luenu luakasonsola mitshima ya bantu ba bungi. Kadi nakanutumina bana betu ba mu Kilisto bua ditumba dietu bua bualu buenu kadivuishibu dia hatuhu mu muanda eu; bua nuenu nuikale balongolole bu munakamba; bua, bialua bakuabo ba mu Makedonia nʼanyi banusangane kanui balongolole, bualu ebu kabutufuishi tuetu bundu (tshi ngamba buenu mene). Nunku nakela meshi ne, Bundi nʼabu mbua kusengelela bana betu bua bobo badianjila kulua kunudi, bua kusangisha bintu bia luse ku mpala binuakadianjila kulaya; bua bintu ebi bikale bu bintu bia luse mene, kabikadi bu bintu binyenga ku bukole. Kadi ndi nuambila bualu ebu ne, Udi ukuna maminu mabalê neahuole mabalê; ne udi ukuna maminu a bungi neahuole a bungi. Nunku muntu ne muntu afile bintu bu muakadisunguileye mu mutshima wandi; kafidi ne kanyinganyinga, anyi bu muenzesha ku bukole; bualu bua Nzambi udi musue muena kuha udi ufila ne disanka. Nzambi udi mumanye mua kukumbasha ngasa yonso kunudi; bua nuenu, bua misangu yonso nudi ne dikumbana dionso mu muanda wonso, nukumbane mu mudimu muimpe wonso; bu muakafundabo ne, Yeye wakatangalasha bintu, wakaha bahele bintu, Buakane buandi budi bushala tshiendelele. Nzambi, utu waha mukunyi maminu ne bidia bia kudia, neanuhe maminu enu a kukuna, neanuvudishileu, neanukuamishile mamuma a buakane buenu. Nudi nuvuishibua babanshi mu tshintu tshionso bua kuha kuonso, kudi kuenzesha disakidila kudi Nzambi bua bualu buetu. Kukuatshilangana kua mudimu eu kakuena anu kûshila kua basanto bintu bidibo nʼabi bualu, kadi kudi kukumbana kabidi mu masakidila a bungi kudi Nzambi; bualu bua kujalama kuenu kua mu mudimu eu, bobo badi batumbisha Nzambi bua ditumikila dia kujukula kuenu kua mu lumu luimpe lua Kilisto, ne bua bunene bua kuha kuenu kudibo ne kudi bonso; bobo kabidi, ne disengelela bua bualu buenu, badi banujinga bikole bua ngasa mutambe bunene wa Nzambi udi munda muenu. Tuasakidila kudi Nzambi bua kuha kuandi kudi kakui mua kuambibua. Meme Paulo, ndi nusengelela bua kalolo ne lutulu bia Kilisto, meme hangikala ku mesu kuenu, ndi muhuekele munkatshi muenu, hangikala tshi nʼenu, ndi ne dikima kunudi; bulelela, ndi nusengelela, bua meme, hangikala nʼenu, tshikadi ne bualu bua kunulesha dikima ne ditekemena dindi mbala bua kuikala nʼadi kudi bakuabo badi batubala bu bantu badi bendakana mu malu a mubidi. Bua hatudi tuendakana mu mubidi, katuena tusangana bu mudi nvita ya mubidi, bualu bua bintu bietu bia nvita kabiena bia mubidi, kadi bidi bikole ku mesu kua Nzambi bia kushimbula nʼabi ngumbu ya nvita; bidi bishimbula meshi onso ne tshintu tshionso tshidi tshileha mulu tshidi tshibandishibua bua kuhumbisha nʼatshi lungenyi lua Nzambi, bidi bivuisha meshi onso mu buhika bua kutumikilau Kilisto; tudi badilongolole bua kukengesha bena buhidia buonso, hûshibua ditumikila dienu. Nuenu nutu nuatangila bintu bidi ku mesu kuenu. Biaditekemena muntu ne, Ndi wa Kilisto, yeye ajingulule bualu ebu kabidi munda muandi ne, Bingikala wa Kilisto, tuetu kabidi tudi ba Kilisto. Binatamba kutumba tshituha bua bukokeshi buetu buakatuha Mukelenge bua kunudiundisha nʼabu, kembua kunushimbula nʼabu, tshiena nfuishibua bundu; bua meme tshikadi bu udi unutshinyisha ne mikanda yanyi. Bualu bua batu bamba ne, Mikanda yandi idi ne bujitu ne idi ne bukole; kadi kumueneka kua mubidi wandi kudi kutekete, ne dî diandi didi dia hatuhu. Muntu au amanye bualu ebu ne, Bu mutudi mu mei a mu mikanda hatudi katuiku, netuikale nunku kabidi mu bienzedi hatuikala nʼenu. Katuena ne dikima bua kudibala anyi bua kudielekesha ne bantu aba bakuabo badi baditumbisha; kadi bobo nkayabo, badi bidikishangana ne badi belekeshangana, kabena ne lungenyi, Kadi katuena tuditumbisha ku mutu kua luelekeshi luetu, kadi netudielekeshe ku kuelekesha kua luidi luakatutekela Nzambi bu luidi, bua kufikalu tô ne kunudi. Katuena tutamba kuobokela, bu mutuakadi katui bafike kunudi; kadi tuetu tuakadianjila kufika tô ne kunudi ne lumu luimpe lua Kilisto. Katuakahita luelekeshi lua kutumba kuetu bua mudimu wa bakuabo; kadi tudi tutekemena ne, Bu mudi ditabusha dienu didiundisha, tuetu netutumbishibue munkatshi muenu bu mudi luidi luetu lua ku dikumbana dia mudimu wetu, bua tuetu kuambila bantu ba ku nseke idi ku mpala kuenu lumu luimpe; ne bua tuetu katutumbi mu mukalu wa muntu mukuabo bua mudimu nuimana kulongolola. Kadi muntu udi utumba, atumbile biandi mu Mukelenge. Kenyeye udi udianyisha udi witabushibua, kadi yeye udi Mukelenge wanyisha. Ndi musue bua nuenu mimanye mua kuikala nʼanyi lutulu mu kutshimbakana kukese; kadi bulelela, nudi nuikala nʼanyi lutulu. Ndi ne mukau bua bualu buenu bu mudi mukau wa Nzambi; nakanubangisha kudi mulume umue bua meme nmanye mua kunufila bu mukashi utshidi kamama kudi Kilisto. Kadi ndi ntshina ne, Bu muakadi nyoka udinga Eva ne budimu buandi, bumue meshi enu neahambuishibue ku dilamata diau ne butoke buau bidi kudi Kilisto. Bikala muntu ulualua wamba Yesu mukuabo, utudi katui bambe; anyi binuangata nyuma mukuabo, unudi kanui bangate diambedi, anyi lumu luimpe lukuabo lunudi kanui bitabushe diambedi; bidi bimpe bua nuenu kuikala nʼandi lutulu. Ndi ntshinka ne, Meme tshiena nshala kaba kakese ku nyima kua bapostolo badi batambe bonso bunene. Bingikala ne matuhakana mu kuamba kuanyi, tshiena nʼau mu lungenyi luanyi; bulelela, mu nshila yonso tuakanulesha bualu ebu mu malu onso. Meme nakenza bualu bubi hanakadihuekesha bua nuenu nubandishibue, bualu bua nakanuambila lumu luimpe lua Nzambi tshi ne difutu, anyi? Nakatamba kuangata bintu bia ekelesia mikuabo, muangate difutu kudibo, bua meme kumanya mua kunukuatshisha. Ne hanakadi nʼenu nkengela bintu, tshiakadi bu bujitu hamʼbidi ba muntu; bualu bua bana betu ba ma Kilisto, hakafumabo ku Makedonia, bakankuatshisha bu muakadi dikenga dianyi; nakadilamununa mu malu onso bua meme tshikadi bu bujitu hamʼbidi henu; nendilamunune nunku kabidi. Bu mudi bushua bua Kilisto munda muanyi, kakuena muntu udi mua kunkanda mu bualu bundi ntumbila mu nseke ya Akaya. Bualu kai? Bualu bua tshiena munusue, anyi? Nzambi udi mumanye. Kadi bualu bundi ngenza nembuenze kabidi, bua meme kuhumbisha bantu badi bakeba ha kutumbilaho; nunku mu malu adibo batumbila nebabasangane muomumue nʼetu. Bantu aba nunku badi bapostolo badingi, bena mudimu ba mashimi, badi badiandamuna bu bapostolo ba Kilisto. Ne kembualu bua kukema nasha; bualu bua Satana mene udi udiandamuna bu muanjelo wa munya. Nunku kembualu bua kuanyina bikala bakuatshishi bandi badiandamuna bu bakuatshishi ba malu makane; kunshikidilu kuabo nekuikale bu mudi bienzedi biabo. Ndi ngamba tshiakabidi ne, Muntu kambadi meme bu muena kutshimbakana; kadi binuenza nunku, nungitabushe bu muena kutshimbakana bua meme kabidi kumanya mua kuditumbisha kakese. Dî dindi ngamba, tshiena ndiamba bu dia Mukelenge mudingambile, kadi bu mu tshiakulakula, muditekemene mu kuditumbisha kuanyi, Bualu bua bantu ba bungi badi baditumbisha mu malu a mubidi, meme kabidi nenditumbishe. Bualu bua nuenu, bena lungenyi, nudi nusanka bua kulesha batshimbakanyi lutulu. Bualu bua nudi nulesha muntu lutulu, bianuvuisheye bahika, biadieye bintu bienu, bianukuateye lukole, biadibandisheye, bianukumeye ku mesu. Bundu budi bunkuata hangamba ne, Tuakadi batekete. Kadi mu bualu buonso budi muntu ne dikima, (ndi ngakula tshiakulakula) ndi ne dikima kabidi. Bobo badi Bena Ebelu, anyi? Meme ndi Muena Ebelu kabidi. Bobo badi Bena Isalele, anyi? Meme ndi Muena Isalele kabidi. Bobo badi tunkanunuina tua Abalahama, anyi? Meme ndi kankanunuina kandi kabidi. Bobo badi bena mudimu ba Kilisto, anyi? (Ndi ngakula bu muena kutshimbakana.) Meme ndi mubatambe; mu midimu mihite yabo bungi, mu nkanu misangu mitambe yabo bungi, mu mibundabunda mivule; nakadi hehi ne lufu misangu ya bungi. Misangu itanu nakangata mikumu kudi Bena Yuda makumi anai bumushe umue. Misangu isatu bakankuma milangala; musangu umue bakankuma mabue; misangu isatu nakamba kufua ne majita akadina mu mai; nakadi mu mai manene munya tô ne hakantshila butuku. Nakadi mu ngendu bihungu bia bungi; nakadi ne njû mu misulu, ne njû kudi banyengi, ne njû kudi bena tshisamba tshianyi, ne njû kudi bisamba bia bende, ne njû mu bimenga, ne njû mu tshihela, ne njû mu ma! manene, ne njû kudi bantu bakadinga ne, Tudi bana benu. Nakadi mu mudimu mukole ne mu ntatu, nakadi ne tshitabala misangu ya bungi; nakadi ne nsala ne nyota; nakajila bia kudia misangu ya bungi, mashika akantonda, nakadi ne butaka. Ha mutu ha malu au onso adi hamʼbidi, ku dituku ku dituku mutshima wanyi udi unema bujitu bua ntatu ya bena ekelesia bonso. Muntu kai udi mutekete, ne tshiena mutekete nʼandi? Muntu kai udi mulenduishibue, ne tshishi tshianyi katshi tshitema? Bingikala ne bualu bua kuditumbisha, nenditumbishe bua malu a butekete buanyi. Nzambi, Tatu wa Mukelenge Yesu, nyeye udi mutumbishibue tô ne bikondo bionso, udi mumanye ne tshiena nshima. Mu Damaseke muloho wa mukelenge Aleta wakadi ulama musoko wa Damaseke bualu bua kunkuata; bakantuluila mu tshisaka hanshi ha disoso dia mu lumbu lua musoko, nakahanduka mu bianza biandi. Ndi ne bualu bua kuditumbisha, kadi bualu ebu kabuena bunkuatshisha; kadi nenuambile bua bikena kumona ne kubuluibua kua malu a Mukelenge. Ndi mumanye muntu mu Kilisto bidimu dikumi ne binai bimane kuhita (wakadi mu mubidi, tshiena mumanye; anyi kakadi mu mubidi, tshiena mumanye; Nzambi udi mumanye); muntu eu wakabandishibua tô ne mu diulu disatu. Ndi mumanye muntu au (ne wakadi mu mubidi anyi kakadi mu mubidi, meme tshiena mumanye, kadi Nzambi udi mumanye) ne, Wakabandishibua mu Paladiso, wakunvua mei adi bantu kabai bamanye mua kuamba, adi mikenshi ikanda muntu bua kuâmbeye. Bua muntu eu nunku nenditumbishe, kadi bua meme nkayanyi tshiena nditumbisha, anu mu matekete anyi. Binasua kuditumbisha, tshiena ntshimbakana; bualu bua nengambe anu mei malelela. Kadi ndi mbenga kuenza nunku bua muntu kambadi ku mutu kua malu anyi akatangileye anyi akunvueye kundi. Bua meme tshitambi kuanyishibua bua bunene bua kubuluibua kua malu kundi, nakahebua tshintu bu dieba mu mubidi wanyi bu muanjelo wa Satana bua kunkengeshakengesha, bua meme tshitambi kuanyishibua. Bua tshintu etshi nakalomba Mukelenge misangu isatu ne, Tshiumuke kundi. Ne yeye wakangambila ne, Ngasa wanyi udi ukukumbana, bua bukole buanyi budi bukumbashibua tshishiki mu butekete buebe. Nunku ndi ne disanka ha kuditumbisha mu matekete anyi, bua bukole bua Kilisto buikale munda muanyi. Nunku ndi ne disanka mu matekete ne mu bihendu ne mu malu adi angenzesha ku bukole ne mu makenga ne mu kanyinganyinga bua bualu bua Kilisto; bua hangikala mutekete, mpandi ne bukole. Nakulua mutshimbakanyi; nuenu nuakungenzeshaku ku bukole; nakadi ne bualu bua kuanyishibua kunudi, bua tshiakadi ku nyima kua bapostolo bakatamba bunene nasha kaba kakese: nasha meme bianyi ngikala tshianana. Bulelela, bimanyinu bia mupostolo biakuenjibua munkatshi muenu ne dinanukila dikole, ku bimanyinu, ne malu a kukema, ne malu menjibue ne bukole. Bakanuvuisha ku nyima kua ekelesia mikuabo mu malu kai? Anu mu bualu ebu, ne meme tshikadi bu bujitu hamʼbidi henu. Nundekelele bubi ebu. Monai musangu eu muisatu undi ndilongolola bua kulua kunudi; tshiena ngikala bujitu hamʼbidi henu, bualu bua tshiena nkeba bintu bienu, kadi ndi nukeba nuenu. Bana kabena ne bualu bua kubushila batatu ne bamamu bintu; kadi batatu ne bamamu badi babutshila bana bintu. Nengikale ne disanka dia bungi bua kunyanga bintu bianyi bionso ne bua kudinyanga bua mioyo yenu. Havula dinanga dianyi kunudi, dinanga dienu kundi didi dikeha, anyi? Budi nunku; tshiakanunemeshela bujitu; kadi bualu bua nakadi mudimuke nakanukuata ne budimu. Nakakeba kunutekela budimu kudi mukuabo wa banakanutumina, anyi? Nakasengelela Tito bua kuya, nakatuma muanʼetu wa mu Kilisto nʼandi, Tito wakakeba kunutekela budimu, anyi? Katuakendakana mu Nyuma muomumue, anyi? Katuakalondangana mu makasa, anyi? Musangu mule eu nudi nuelangana meshi ne tudi tudibingisha kunudi. Ku mesu kua Nzambi tudi tuamba mu Kilisto. Kadi malu onso, bana betu bananga, adi bua kunudiundisha. Ndi ntshina ne hanalua kunudi, bumue tshiena nusangana bu mundi musue kunusangana; ne nuenu kanuena nusangana bu munudi basue kunsangana; tshiena musue kusangana ditandangana ne mukau ne tshishi ne matahuluka ne bunsonge ne mikoso ne kudisua ne mitoyo; bua hanalua kunudi tshiakabidi, Nzambi wanyi kantamunyi ku mpala kuenu, ne mutshima wanyi kunyingaladi bua bantu bangi bakenza malu mabi diambedi ne kabena banze kukudimuna mitshima yabo ku meshi mabi ne tshiendenda tshia malunda mabi ne masandi biakenzabo. Eu musangu muisatu undualua kunudi. Mukana mua bamanyi babidi anyi basatu dî dionso nedijadikibue. Nakadianjila kunuambila hanakadi nʼenu musangu muibidi, ne katataka kabidi hangikala tshi munkatshi muenu, ndi ndianjila kuambila bantu bakenza malu mabi diambedi ne bantu bonso bakuabo ne, Binalua tshiakabidi, tshiena mbafuila luse. Bualu bua nudi nukeba dijadikibua dia Kilisto udi wakula munda muanyi, udi kai mutekete kunudi kadi udi mukole munda muenu. Yeye wakashihibua ku mutshi mutshiamakane bua butekete bua mubidi, kadi udi ne muoyo bua bukole bua Nzambi. Tuetu tudi batekete nʼandi, kadi netuikale nʼandi ne muoyo bualu bua bukole bua Nzambi kunudi. Nuditete munda muenu ne nudi ne ditabusha anyi; nudijadike bienu. Kanuena badimanye ne Yesu Kilisto udi munda muenu, anyi? Udimu binuikala kanui babengibue. Kadi ndi ntekemena ne nenumanye ne tuetu katuena babengibue. Tudi tutendekena Nzambi bua nuenu kanuenji bualu bubi; kembua tuetu kumueneka bu bantu badibo bitabusha ne, Mbakane, kadi bua nuenu nuenze malu malengele; nasha tuetu bikala bu babengibue. Katuena bamanye mua kuhumbisha malu malelela, anu mua kuakuatshisha. Bualu bua tudi ne disanka hatuikala batekete ne hanuikala bakole; tudi tunulombela Nzambi bualu ebu kabidi, bua nuenu nuikale balengeshibue tshishiki. Bua bualu ebu ndi munufundile malu â hangikala tshi munkatshi muenu, bua meme tshinuenzeshi ne disu dikole hangikala nʼenu, bu mudi bukokeshi buakumpabo kudi Mukelenge bua kujadika ne kembua kushimbula. Tshiashadidi mpindiu, bana betu muoyo wenʼau. Nulengeshibue tshishiki, nusambibue, nuikale ne meshi amue, nuikalangane talala; ne Nzambi wa dinanga ne ditalala neikale nʼenu. Nuelangane muoyo ne dituangana dia mishiku dia tshijila. Basanto bonso badi banutumina muoyo. Ngasa wa Mukelenge Yesu Kilisto ne dinanga dia Nzambi ne buobumue ne Nyuma Muimpe bikale ne buonso buenu. Paulo, mupostolo, tshi mufume kudi bantu, tshî mutumibue kudi muntu, kadi anu kudi Yesu Kilisto ne kudi Nzambi Tatu wakamubisha ku lufu, ne bana betu bonso ba ma Kilisto badi nʼanyi, kudi bena ekelesia ba mu Galatia: Ngasa kunudi ne ditalala bia kudi Nzambi Tatu ne kudi Mukelenge wetu Yesu Kilisto, wakadifila bua malu mabi etu bua yeye atusungile munkatshi mua tshikondo etshi tshibi bu mudi disua dia Nzambi Tatu wetu; butumbi buikale kudiye tshiendelele. Amen. Ndi nkema bua nudi nulekela wakanubikila mu ngasa wa Kilisto lubilu nunku bua nuenu nuitabushe lumu lukuabo ludi kalui lumu luimpe. Kadi bakuabo badiku badi banutatshisha, badi bakeba kusesuisha lumu luimpe lua Kilisto. Kadi bikata tuetu anyi muanjelo wa mu diulu tunuambila lumu lukuabo ludi kalui lumu luimpe lutuakanuambila, ikale biandi ne mulau. Bu mutuakamba diambedi tudi tunuambilamu tshiakabidi ne, Bianuambila muntu lumu lukuabo ludi kalui lumu luimpe lunuakangata, ikale biandi ne mulau. Katataka ndi nkeba diakalengele kudi bantu anyi kudi Nzambi? Ndi nkeba mua kusankisha bantu, anyi? Bu meme ntshidi nkeba kusankisha bantu, tshiakadi kuikala muhika wa Kilisto. Bana betu, ndi numanyisha bua lumu luimpe lunakanuambila; kaluena lufuma kudi muntu. Bualu bua tshiakaluangata kudi muntu; kabakalunyisha; luakalua kundi mu dibuluibua dia Yesu Kilisto. Bualu bua nuakamana kunvua lumu lua bienzedi bianyi mu bualu bua Bena Yuda bu munakatamba kukengesha bena ekelesia wa Nzambi, bu munakababutula; ne bu munakadi mpita ku mpala kua bena mulongo wanyi ba bungi ba mu tshisamba tshietu mu bualu bua Bena Yuda bualu bua lukunukunu lukole lunakadi nʼalu bua bilele bia bankambua betu. Kadi hakasua Nzambi nguakansungula munda mua baba wanyi ne nguakambikila ku ngasa wandi, kubulula Muana wandi munda muanyi bua meme kuambila ba mu bisamba bia bende lumu luimpe luandi; tshikondo atshi tshiakahunga dî ne bantu. Tshiakabanda ku Yelushalema kudi bantu bakadianjila kubuela mu bupostolo; kadi nakaya ku Alaba; nakahingana ku Damaseke kabidi. Hakashika bidimu bisatu, nakaya ku Yelushalema bua kumanyangana ne Kefa, nakashala nʼandi matuku dikumi ne atanu. Tshiakamona mukuabo wa bapostolo, anu Yakobo muanʼabo ne Mukelenge. Ku mesu kua Nzambi tshiena nshima bua malu andi munufundile. Hashishe nakalua ku nseke ya Sulia ne ya Kilikia. Kabakanza kumanya mpala wanyi kudi bena ekelesia ba mu Kilisto ba mu Yudaya; kadi bakadi anu bunvua ne, Yeyʼau wakadi utukengesha diambedi udi wambila bantu mpindiu bua ditabusha diakakebeye kubutula; ne bakadi batumbisha Nzambi bua bualu buanyi. Hakashika bidimu dikumi ne binai, nakaya ku Yelushalema tshiakabidi ne Bânaba; tuakaya ne Tito kabidi. Nakabandaku bianyi bua bualu buakabuluibua kundi; nakalondela bakadi ne butumbi munkatshi mua bapostolo lumu luimpe lundi ngambila ba mu bisamba bia bende; kadi nakabalondelalu mu musokoko, bua meme tshikadi bu muntu utshidi welekesha lubilu, anyi wakadi welekesha lubilu hatuhu. Tito wakadi nʼanyi, yeye muena Gelika mene, kadi kabakamuenzesha bua kutengudibueye. Kadi bualu bua bakuabo bakadivuisha bu bana betu, bakadibuesha munkatshi muetu mu musokoko bua kutentekela budishikaminyi butudi nʼabu mu Kilisto Yesu; bakasua kutuvuisha bahika. Kadi katuakabakokela nasha tshituha tshimue tshia diba; bualu bua bushua bua lumu luimpe buikale nʼenu. Kadi bantu aba bakadi ne butumbi munkatshi muabo (ne bakadi banganyi diambedi kembualu kundi; Nzambi kena ubala mpala wa muntu) ndi ngamba ne, Bantu aba bakadi ne butumbi kabakanyisha bualu. Kadi hakamanyabo ne nakahebua lumu luimpe lua kudi badi kabai batengula, bu muakahebua Petelo lua kudi badi batengula; (bualu bua yeye nguakenzesha Petelo mu mudimu wa bupostolo bua batengula, nguakangenzesha kabidi mu mudimu wa bupostolo kudi bisamba bia bende); ne hakamonabo ngasa wakumpabo kudi Nzambi, Yakobo ne Kefa ne Yone bakadi bu makunshi mu ekelesia, bakatuha meme ne Bânaba tshianza tshia, bukole tshia buobumue buetu mu Kilisto, bua tuetu tuye kudi bisamba bia bende, ne bua bobo baye kudi batengula. Kadi bakasua kabidi tuetu tuvuluke bahele; bualu mene bunakadi ne disuminyina dia kuenza. Kadi hakalua Kefa ku Antiokia, nakabengangana nʼandi ku mei ku mesu kuandi bualu bua yeye wakadihishisha. Bualu bua diambedi bantu bakuabo kabai banze kulua, bafume kudi Yakobo, wakadi udia ne bantu ba mu bisamba bia bende; kadi hakaluabo, wakumuka kudibo, wakadilamununa kudibo; bualu bua wakatshina bakadi ba batengula. Ne Bena Yuda bakuabo bonso bakumuka nʼandi mu lubombo; ne Bânaba mene wakahambuishibua ku lubombo luabo. Kadi hanakatangila ne kabakenda bajalama bu mudi lumu luimpe lua bushua luamba, nakambila Kefa ku mesu kua buonso buabo ne, Wewe, Muena Yuda, biwenza bu mudi bantu ba mu bisamba bia bende benza, kui wenza bu mudi Bena Yuda benza, munyi mûdi musue kuenzesha bantu ba mu bisamba bia bende bua bobo benza bu mudi Bena Yuda benza? Tuetu tuakaledibua Bena Yuda, katui bu bantu babi ba mu bisamba bia bende; kadi ludi bamanye ne kakuena muntu wabingishibua bua kuenza kua mikenshi kadi anu ku ditabusha dia mu Yesu Kilisto; tuetu kabidi tuakitabusha Kilisto Yesu bua kubingishibua ku ditabusha dia mu Kilisto, kenku kuenza kua mikenshi, bualu bua kakuena muntu wabingishibua ku kuenza kua mikenshi. Kadi bikalabo batusangane bu bantu babi hatuakadi tukeba mua kubingishibua mu Kilisto, Kilisto udi muena mudimu wa bubi, anyi? Nasha kakese! Bua bingibaka bintu tshiakabidi binakasasula diambedi, ndi ndijadika bu mushihi wa mikenshi. Bualu bua mikenshi nakamana kufua ku mikenshi, bua meme ngikale ne muoyo kudi Nzambi. Nakashihibua ku mutshi mutshiamakane ne Kilisto; nunku kememe kabidi udi ne muoyo, kadi Kilisto ngudi muoyo munda muanyi; ne muoyo undi nʼau mu mubidi katataka ndi nʼau mu ditabusha dia mu Muana wa Nzambi, wakannanga, wakadifila bua bualu buanyi. Tshiena nvuisha ngasa wa Nzambi ne, Ntshianana; bualu bua bialua buakane ku kutumikila kua mikenshi, nunku Kilisto wakafua tshianana. Nuenu Bena Galatia bahote, ku mesu kuenu kuakatekabo Yesu Kilisto mushihibue ku mutshi mutshiamakane hatoke, wakanuhambuisha nganyi? Ndi musue kunukonka anu bualu bumue, Nuakangata Nyuma bua kuenza kua mikenshi anyi bua kunvua kua lumu luimpe ne ditabusha? Ebu mbuhote buenu, anyi? Nuakuhanga ne Nyuma, mpindiu nudi nushikisha ne malu a mubidi, anyi? Nuakakenga mu malu a bungi nunku tshianana, anyi? (Binuikala bakenge tshianana bulelela.) Wakanuha Nyuma ne udi wenza malu a kukema munkatshi muenu, yeye udi wenza nunku bua kuenza kua mikenshi anyi bua kunvua kua lumu luimpe ne ditabusha? Mbu muakitabusha Abalahama Nzambi, ne bakamubadila ditabusha edi bu buakane. Numanye bienu ne, Bantu badi ba ditabusha mbobo badi bana ba Abalahama. Bualu bua Mukanda wa Nzambi wakadianjila kumona ne, Nzambi neabingishe bantu ba bisamba bia bende ku ditabusha, wakadianjila kuambila Abalahama lumu luimpe ne, Bisamba bionso nebivudishibue disanka bua bualu buebe. Nunku badi ba ditabusha badi bavudishibua disanka ne Abalahama, muena ditabusha. Bonso badi beyemena kuenza kua mikenshi badi munshi mua mulau; bu muakafundabo ne, Muntu yonso udi kai ulonda malu onso adi mafunda mu mukanda wa mikenshi bua kuênza udi ne mulau. Nunku bualu ebu budi bumanyibua hatoke ne, Kakuena muntu udi ubingishibua bua mikenshi ku mesu kua Nzambi; bualu bua bakamba ne, Muntu muakane neikale ne muoyo ku ditabusha. Ne mikenshi kayena ku ditabusha, kadi, Wayenza neikale ne muoyo bua bualu buai. Kilisto wakatuhikula ku mulau wa mikenshi, wakadivuisha bu mulau bua bualu buetu; bu muakafundabo ne, Muntu yonso udi mukudika ku mutshi udi ne mulau; bua disanka dia Abalahama dilue kudi bisamba bia bende mu Kilisto Yesu; bua tuetu kuangata mulayi wa Nyuma bua ditabusha. Bana betu, ndi ngakula bu mudi bantu bakula. Nasha tshihungidi tshikala anu hankatshi ha bantu, hamanabo kutshijadika, kakuena muntu udi utshivuisha tshia hatuhu, anyi udi utentekesha malu makuabo ha mutu hatshi. Milayi yakalayidibua Abalahama ne kankanunuina kandi; kayakalayidibua tunkanunuma tua bungi, kadi anu muntu umue, kankanunuina kebe, Kilisto mene. Ndi ngamba dî edi ne, Mikenshi, yakalua hakaleha bidimu nkama inai ne makumi asatu, kayena mimanye mua kumusha tshihungidi tshiakadianjila kujadikibua kudi Nzambi bua kuvuishai mulayi ne, Ntshianana. Bikala buhianyi bufume ku mikenshi, kabuena bufuma ku mulayi; kadi Nzambi wakabuha Abalahama bua mulayi. Nunku mikenshi Idi bua tshinyi? Mikenshi yakatentekeshibua ha mutu bualu bua malu mabi a bantu, tô ne hakalua kankanunuina ka Abalahama kakalayidilabo mulayi; wakalongolodibua kudi banjelo ku tshianza tshia mutuanganyi wa tshihungidi. Mutuanganyi kena mutuanganyi wa umue; kadi Nzambi udi umue. Mikenshi idi ifuilangana ne milayi ya Nzambi, anyi? Nasha kakese! Bu Nzambi mutuhe mikenshi yakamanya mua kutuhesha muoyo, bulelela, buakane buakadi kufuma ku mikenshi. Mukanda wa Nzambi wakinshidila malu onso munshi mua bubi, bua kuha bantu badi bitabusha mulayi ku ditabusha dia mu Yesu Kilisto. Diambedi ditabusha kadî dianze kulua, buonso buetu tuakadi balamibue munshi mua mikenshi, tuakadi binshidila ku ditabusha diakadi ha kubuluibua. Nunku mikenshi yakalua ndeshi wetu wa kutufikisha kudi Kilisto, bua tuetu tubingishibue ku ditabusha. Kadi bualu bua ditabusha diakumana kulua, katuena mu bulombodi bua ndeshi kabidi. Bua buonso buetu tudi bana ba Nzambi bua ditabusha dia mu Kilisto Yesu. Bualu bua nuenu bonso bakabatijibua mu Kilisto, nuakaluata Kilisto. Kakuena Muena Yuda anyi Muena Gelika; kakuena muhika anyi mudishikamine; kakuena mulume anyi mukashi; bualu bua buonso buenu nudi muntu umue mu Kilisto Yesu. Binuikala ba Kilisto, nunku nudi tunkanunuina tua Abalahama, nudi bahianyi bandi bu mudi mulayi wamba. Ndi ngamba ne, Hatshidi muhianyi muana mutekete, kena utahuluka kudi muhika, nasha bikaleye mukelenge wa bintu bionso; kadi yeye udi ku nyima kua bakuatshishi ne balami tô ne halua dituku diakasungula tatu wandi. Nunku tuetu kabidi hatuakadi bana batekete, bakatuvuisha bahika ba mayisha a kumudilu a ha buloba. Kadi hakakumbana tshikondo, Nzambi wakatuma Muana wandi, muledibue kudi mukashi, muledibue munshi mua mikenshi, bua yeye amanye mua kuhikula badi munshi mua mikenshi, bua tuetu tuangate buhianyi bua bana ba Nzambi. Ne bualu bua nudi bana, Nzambi wakatuma Nyuma wa Muana wandi mu mitshima yetu, wela di diandi ne, Aba, Tatu. Nunku wewe kuena muhika kabidi, kadi udi muana mulela; ne biwikala muana mulela, nunku udi muhianyi bua bualu bua Nzambi. Kadi ku tshikondo atshi, bualu bua kanuakamanya Nzambi, nuakadi mu buhika bua bintu bidi kabi nzambi mu tshikadilu tshiabi; kadi katataka, bualu bua nuakumana kumanya Nzambi ne nudi bamanyibue kudi Nzambi, munyi munudi basue kuhingana ku mayisha matekete a kumudilu ne a hatuhu a ha buloba bua kudivuisha bahika kabidi? Nudi nuj idila matuku ne ngondo ne bikondo ne bidimu. Ndi ntshina bua bualu buenu ne, Bumue nakanuenzela mudimu hatuhu. Bana betu, ndi nusengelela bua nuenu nulue bu meme, bualu bua meme nakulua bu nuenu. Kanuakangenzela bibi; nudi bamanye ne bualu bua butekete bua mubidi wanyi nakanuambila lumu luimpe musangu wa kumudilu. Kanuakampetula, kanuakampidia bualu bua butekete bua mubidi wanyi buakadi bu buteyi kunudi; kadi nuakangitabusha bu muanjelo wa Nzambi, bu Kilisto Yesu mene. Kudisankisha kuenu kuakuya hanyi? Ndi mumanyi wa bualu ne, Bu nuenu bamanye mua kuenza nunku, nuakadi kuntudila mesu enu bua kuampa. Nunku nakulua muena lukuna wenu bualu bua ndi nuambila bualu bulelela, anyi? Badi banukeba ne lukunukunu, kembua kunuenzela bimpe, kadi badi basue kunusesuisha kutudi, bua nuenu nubakebe bobo. Kuikala ne lukunukunu mu malu makane bikondo bionso kudi kuimpe, hangikala nʼenu, ne hangikala tshi nʼenu. Bana banyi bakese, bandi mukuatshikile didinyenga dia ha kulela kabidi bua bualu buenu tô ne bamueneka Kilisto munda muenu, nakadi musue kuikala nʼenu katataka bua kukudimuna dî dianyi; bualu bua mutshima wanyi udi uhampakana bua bualu buenu. Nungambile bienu, nuenu badi basue kuikala munshi mua mikenshi, kanuena nunyua mikenshi, anyi? Bualu bua bakafunda ne, Abalahama wakadi ne bana balume babidi, wakalela umue kudi mukashi muhika, ne mukuabo kudi mukashi, muena budishikaminyi. Muana wa mukashi muhika wakaledibua bu mudibo balela bana bonso, kadi muana wa mukashi, muena budishikaminyi, wakaledibua bua mulayi. Malu â nunku adi lusumuinu: bakashi aba badi bu bihungidi bibidi; umue wabo wa ku mukuna wa Sinai udi ulela bana bua kuikalabo bahika, yeye udi Haga. Haga eu udi mukuna wa Sinai wa mu Alaba udi mu mulongo umue ne Yelushalema wa katataka; bualu bua yeye udi mu buhika ne bana bandi. Kadi Yelushalema wa mu diulu udi muena budishikaminyi, udi baba wetu. Bua bakafunda ne, Mukashi wa nkumba udi kai mulele, usanke biebe; Ne mukashi udi kai ne didinyenga dia ha kulela, uhandishe dî diebe, udile biebe; Bualu bua bana ba mukashi muhidibue badi batambe bana ba mukashi wakashala ne mulume bungi. Tuetu, bana betu, tudi bana ba mulayi bu muakadi Isaka. Bu muakadi bualu hale, budi nunku katataka; yeye uvua muledibue bu mudibo balela bana bonso wakadi ukengesha uvua muledibue bu mudi kulela kua Nyuma. Kadi Mukanda wa Nzambi udi wamba tshinyi? Udi wamba ne, Ihata mukashi muhika ne muanʼandi mulume: bualu bua muana wa mukashi muhika kena mua kuhiana bintu ne muana wa mukashi, muena budishikaminyi. Nunku bana betu, katuena bana ba mukashi muhika, kadi tudi bana ba mukashi, muena budishikaminyi. Kilisto wakatuhikula bua tuetu tuikale ne budishikaminyi; nunku nudijadike, kanudibueshi munshi mua tshikokedi tshia buhika kabidi. Monai, meme Paulo ndi nuambila ne, Binuitabusha ditengula, Kilisto kena unukuatshisha. Ndi manyisha muntu yonso tshiakabidi udi witabusha ditengula ne yeye udi muena dibanza bua kuenzeye mikenshi yonso nkonkonko. Nudi batahuluke kudi Kilisto, nuenu badi bakeba kudibingisha ku mikenshi; nuakumuka mu ngasa, Tuetu, bualu bua Nyuma udi utukuatshisha, ku ditabusha tudi tuindila buakane butudi tutekemena, Bualu bua mu Kilisto Yesu, bikala muntu mutengula anyi bikaleye kai mutengula, kakuena bualu, kadi anu ditabusha didi dienza malu mu luse. Nuakadi nuenda bimpe; wakanuhumbisha nganyi bua nuenu kanutumikidi bualu bulelela? Meshi â kakafuma kudi Nzambi wakanubikila. Luevene lukese ludi lutuntumusha mutanda mujima. Meme ndi ne ditekemena edi kunudi mu Mukelenge ne, Kanuena nuikala ne meshi makuabo; kadi udi unutatshisha neadituadile dihila diandi, ne udi nganyi ne nganyi. Kadi meme, bana betu, bingikala ntshidi nuambila bualu bua ditengula, ntshidi nkengeshibua bua tshinyi? Nunku dilenduisha dia mutshi mutshiamakane diakumushibua. Nakadi kusua ne badi banutombuesha baditungule kabidi. Bualu bua nuenu, bana betu, nuakabikidibua bua budishikaminyi; kadi nudimuke ne budishikaminyi buenu kabulu tshia kusankisha nʼatshi mubidi, kadi bualu bua dinanga dienu nukuatshilangane mudimu. Bualu bua mikenshi yonso idi misangisha mu dî dimue, ndî edi ne, Sua mukuenu bu mûdi mudisue. Kadi binuasumangana, binuadiangana, nudimuke ne kanubutudianganyi. Ndi nuambila ne, Endai mu Nyuma Muimpe, nunku kanuena nulonda lukuka lua mubidi. Bualu bua dijinga dia malu a mubidi didi difuilangana ne dijinga dia malu a Nyuma, ne dijinga dia malu a Nyuma didi difuilangana ne dijinga dia malu a mubidi; bua malu â adi mimanyinangane, bua nuenu kanuenji malu anudi basue kuenza. Kadi binuikala balombodibua kudi Nyuma, kanuena munshi mua mikenshi. Malu mabi adi mubidi wenza adi amueneka ne, Tshiendenda tshia malunda mabi, meshi mabi, masandi, ditendelela dia mpingu, kubaka kua manga, lukuna, kutandangana, mukau, tshishi, kutahuluka, mpata, diyoyo, mutshiaudi, bukuatshiki bua maluvu, manaya a bundu ne malu â onso; edi ndianjila kunudimusha bu munakamana kunudimusha diambedi ne, Bantu batu benza malu â kabena bahiana bukelenge bua Nzambi. Kadi mamuma a Nyuma adi dinanga, disanka, ditalala, lutulu, luse, buimpe, bunanukidi bua lulamatu, kudihuekesha, kudikanda; kakuena mukandu ku malu â. Badi mu Kilisto Yesu bakamana kushiha mubidi ne milou yau ne nkuka yau ku mutshi mutshiamakane. Bituikala ne muoyo bua Nyuma, tuende bietu bua Nyuma kabidi. Tulekele kuditumbishatumbisha hatuhu ne kufikishangana munda ne kuvuishangana mukau. Bana betu, bikala muntu mutulukile ku bualu bubi, nuenu badi ne Nyuma, numuhingishe kudi Nzambi ne mutshima wa kalolo; udimuke biebe, bua wewe buteyi bu. Nuambuishangane majitu enu, nunku nutumikile mikenshi ya Kilisto. Bikala muntu udiela meshi ne, Ndi muntu mimene, hatshidiye muntu wa tshianana, yeye udi udidinga. Kadi muntu ne muntu adijadikile mudimu wandi, nunku neamanye mua kuditumbisha bua bualu buandi, kembualu bua mukuabo. Bualu bua muntu ne muntu neadianjile bujitu buandi. Muntu udi uyishibua bualu bua Nzambi akuatshishe muyishi wandi ne bintu bimpe bionso. Kanudidingi; Nzambi kena usekibua; bualu bua tshintu tshionso tshidi muntu ukuna, ntshiotshi tshiahuoleye. Muntu udi ukunyina mubidi wandi bintu, neahuolele mubidi wandi bintu bibole; kadi muntu udi ukunyina Nyuma bintu, neahuole muoyo wa tshiendelele bua Nyuma. Katuhangi mu kuenza kua malu mimpe; bualu bua halua tshikondo tshia kuahuola netuahuole bituikala katui tubanga. Nunku hatudi bamanye mua kuenza, tuenzelai bantu bonso bimpe, kadi tutambe kuenzela bena diku dia bena kuitabusha bimpe. Monai maleta manene andi munufundile nʼau ne tshianza tshianyi tshine. Bonso badi basue didilesha dimpe mu malu a mubidi, badi banuenzesha bua kutengudibua; anu bua kababakengeshi bualu bua mutshi mutshiamakane wa Kilisto. Kadi bobo mene badi batengudibua kabena batumikila mikenshi; kadi badi basue nuenu nutengudibue, bua kutumbilabo ku malu a mu mibidi yenu. Kadi meme tshitumbidi ku muanda mukuabo; ntumbile bianyi anu bualu bua mutshi mutshiamakane wa Mukelenge Yesu Kilisto, kuakanshihelabo malu a ha buloba, ne kunakashihibua ku malu a ha buloba kabidi. Bualu bua bikala muntu mutengula, anyi bikaleye kai mutengula, kakuena bualu; kadi kuikala muntu muhia-muhia kudi bualu. Bonso badi basue kuenda bu mudi tshidikishilu etshi, ditalala ne luse bikale kudibo ne kudi Bena Isalele ba Nzambi. Nunku muntu kantatshishi kabidi; bualu bua ndi utuala bimanyinu bia Yesu, bibangu bangosha hamʼbidi hanyi. Bana betu, ngasa wa Mukelenge wetu Yesu Kilisto ikale ne nyuma wenu. Amen. Paulo, mupostolo wa Kilisto Yesu, bua disua dia Nzambi, kudi basanto badi mu Efeso ne kudi badi mua kueyemenyibua mu Kilisto Yesu; ngasa kunudi ne ditalala bia kudi Nzambi Tatu wetu ne kudi Mukelenge Yesu Kilisto. Nzambi, Tatu wa Mukelenge wetu Yesu Kilisto atumbishibue, wakatuvuidishila masanka onso a Nyuma mu miaba ya mu diulu mu Kilisto; bu muakatusunguleye munda muandi diambedi yeye kai muanze kufuka buloba, bua tuetu tuikale bantu ba tshijila badi kabai mua kubandibua ku mesu kuandi mu luse. Wakadianjila kutusungula bua kuikala ne buhianyi kudiye bu bana bua Yesu Kilisto, bu mudi disanka dimpe dia disua diandi, ku dianyisha dia butumbi bua ngasa wandi wakatuheye hatuhu mu Muana wandi Munanga. Tudi ne kuhikudibua kuetu kudiye bua mashi andi, ne kubuikidibua kua malu mabi etu bu mudi bubanshi bua ngasa wandi, wakakumbashileye kutudi mu meshi onso ne lungenyi. Wakatumanyisha bualu busokoka bua mu disua diandi bu mudi disanka diandi dimpe diakasunguleye munda muandi, tô, ne halua tshikondo tshia dikumbana dia bihungu, bua kusangisha bintu bionso mu Kilisto, ne bidi mu diulu ne bidi hanshi ha buloba. Mu Kilisto Yesu mutuakavuishibua buhianyi, hatuakadianjila kusungudibua bu muvueye muhangidishe, nyeye udi wenzesha malu onso bu mudi kudijingulula kua disua diandi; bua tuetu tuikale banyishi ba butumbi buandi, tuetu mene, bakadianjila kuikala ne ditekemena mu Kilisto. Nuenu kabidi, hanuakamana kunvua dî dia bushua kudiye, lumu luimpe lua luhandu luenu, hanuakamuitabusha kabidi, nuakuangata tshimanyishilu tshia Nyuma Muimpe mulayibue, udi tshieya tshia buhianyi buetu, tô ne ku kuhikudibua kua bantu ba Nzambi muenʼabo, bua dianyisha dia butumbi buandi. Bua muanda eu meme kabidi, hanakunvua lumu lua ditabusha dia mu Mukelenge Yesu didi munkatshi muenu, ne lua dinanga dinudi nulesha basanto bonso, tshiena ndekela kusakidila Nzambi bua bualu buenu, ntu ngatela mena enu mu kutendelela kuanyi, bua Nzambi wa Mukelenge wetu Yesu Kilisto, Tatu wa butumbi, anuhe nyuma wa meshi ne wa dibuluila mu dimumanya dienu; ne bua yeye anumunyikile mesu a mu mitshima yenu, bua nuenu kumanya didi ditekemena dia kunubikila kuandi, ne budi bubanshi bua butumbi bua buhianyi buandi mu basanto, ne bua nuenu kumanya budi bunene buhite bua bukole buandi kutudi tuetu badi bamuitabusha. Wakatulesha bu mudi kuenzesha kua bukole buandi bunene buakenzeye mu Kilisto hakamubisheye ku bafue ne hakamushikikeye ku tshianza tshiandi tshia bukole mu miaba ya mu diulu, kule ku mutu kua bunfumu buonso ne bukokeshi buongo ne bukole buonso ne bukelenge buonso ne dina dionso diedibua, kenganu mu tshikondo etshi kadi mu tshikondo tshilualua kabidi. Wakavuisha bintu bionso munshi mua makasa andi, wakamuha bua kuikaleye mutu wa malu onso a mu ekelesia, udi mubidi wandi, tshiuwidi tshia udi ûsha bintu bionso tente. Ne Nzambi wakanuvuisha ne muoyo hanuakadi bafue bua kushiha kuenu kua mikenshi ne bua malu mabi enu, anuakendamu diambedi bu mudi tshikondo tshia buloba ebu, bu mudi mukelenge wa bukokeshi bua mu luhehele, wa nyuma udi wenzesha katataka munkatshi mua bana ba buhidia. Tuetu kabidi tuakikala munkatshi muabo diambedi, tuakalonda nkuka ya mibidi yetu, tuakalonda malu akadi mibidi yetu ne meshi etu bisue, bakaledibua bena lukuna bu mudi bakuabo. Kadi Nzambi, udi mubanshi mu luse, bualu bua dinanga diandi dinene diakatunangeye nʼadi, hatuakadi bafue bualu bua kushiha kuetu kua mikenshi, wakatuvuisha ne muoyo hamue ne Kilisto (nuakusungidibua ku ngasa), wakatuisha nʼandi hamue, wakatushikika nʼandi hamue mu miaba ya mu diulu mu Kilisto Yesu; bua mu bikondo bilualua yeye aleshe bubanshi butambe bua ngasa wandi mu luse ludiye nʼalu kutudi mu Kilisto Yesu. Bualu bua nudi basungidibue ku ngasa bua ditabusha; ne diodi kadiena difuma kunudi, ndiha dia Nzambi; kadiena difuma ku midimu, bua muntu kaditumbishi, Tuetu iudi mudimu wandi wakenzeye, tuakafukibua mu Kilisto Yesu bua tuetu tuenze midimu mimpe yakadianjila Nzambi kulongolola bua tuetu kuendamu. Nunku nuvuluke ne diambedi nuenu, bantu ba bisamba bia bende mu kuledibua kuenu, badi babikidibua ne, Kabena batengula, kudi bantu badi babikidibua ne, Batengula ne ditengula dia mubidi dienza ne bianza; numiluke ne, Ku tshikondo atshi nuakadi kanui ne Kilisto, nuakadi bantu ba bende kudi tshisamba tshia Isalele, nuakadi benyi ku bihungidi bua mulayi wa Nzambi, kanui ne ditekemena, kanui no Nzambi mu buloba ebu. Kadi katataka mu Kilisto Yesu nuenu bakadi kule diambedi nuakavuishibua ha buihi mu mashi a Kilisto. Bualu bua yeye udi ditalala dietu, wakatuvuisha bubidi buetu bu muntu umue, wakashimbula lumbu lua hankatshinkatshi luakadi lutuhandulula hakamaneye njia ne lufu lua mubidi wandi, njia mene ya mu mikenshi yakadi ne mikandu ne mayisha; bua kufukeye ne bubidi buabo munda muandi muntu umue muhia-muhia; nunku wakabavuishila ditalala; bua yeye abalengeshishe bubidi buabo ne Nzambi mu mubidi umue bua mutshi wandi mutshiamakane, kuakashiheye nʼau njia. Ne yeye wakalua, wakanuambila bakadi kule ne bakadi ha buihi lumu lua ditalala; bua bualu buandi bubidi buetu tudi ne ha kubuelela kudi Tatu mu Nyuma umue. Nunku kanuena bantu ba bende ne benyi kabidi, kadi nudi bena kuabo ne basanto ne ba mu tshiota tshia Nzambi. Tudi tuibakibua ha mutu ha bapostolo ne baprofete, bu bishimikidi bia nsubu; Kilisto Yesu nkayandi udi dibue dinene dia ku ditumba dia nsubu; bituha bionso bia nsubu bilungakasha bimpe bidi bidiundadiunda tô ne haluabi ntempelo wa tshijila mu Mukelenge; munudi bibakibue hohamue kabidi, munda muandi, bua kuikala nsubu wa Nzambi mu Nyuma. Bua muanda eu, meme Paulo, udi muena lukanu wa Kilisto Yesu bua bualu buenu, nuenu ba mu bisamba bia bende. Bumue nuakunvua bua diabanyangana dia ngasa wa Nzambi wakumpabo bua bualu buenu; ne bu muakambuluilabo bualu buakadi busokoka, bu munakadianjila kunufundila ne mei makese. Nunku hanuâbala nudi mua kumanya dijingulula dianyi dia bualu bua Kilisto busokoka; kabuakadi bumanyishibua bukua bantu mu bikondo bikuabo, kadi katataka buakabuluidibua bapostolo bandi ba tshijila ne baprofete mu Nyuma Muimpe; bualu ebu busokoka ne, Ba bisamba bia bende badi bahianyi nʼetu, ne badi bituha nʼetu bia mubidi umue, ne badi bangatshi nʼetu ba mulayi mu Kilisto Yesu bualu bua lumu luimpe, luakunvuishabo muena mudimu walu bua diha dia ngasa wa Nzambi wakueleye bu mu dienzesha dia bukole buandi. Kundi meme, udi mutambe basanto bonso kuhuekela, bakampa ngasa eu bua meme kuambila ba bisamba bia bende bua bubanshi bua Kilisto budibo kabai bamanye mua kubuidikisha; ne bua kumuenesha kumesu kua bantu bonso dilonga dia bualu buakadi busokoka tô bikondo bia bungi munda mua Nzambi wakafuka bintu bionso; bua ekelesia amanyishe bakelenge ne bakokeshi badi mu miaba ya mu diulu meshi mavula a Nzambi; bu mudi didisunguila diandi dia tshiendelele diakasunguleye mu Kilisto Yesu Mukelenge wetu; bua bualu buandi tudi ne dikima ne ha kubuelela kudiye ne ditekemena, bua ditabusha ditudi tumuitabushe nʼadi. Nunku ndi ndomba ne, Mitshima yenu kaiteketshi bua makenga andi nʼau bua bualu buenu, adi butumbi buenu. Bua muanda eu ndi ntua binu hanshi ku mpala kua Tatu, ngudi tshiota tshionso tshia mu diulu ne tshia ba buloba tshidika dina diandi, bua yeye anuhe bu mudi bubanshi bua butumbi buandi mua kukoleshibua munda muenu ne bukole kudi Nyuma wandi; ne bua Kilisto ikale mu mitshima yenu bua ditabusha; bua muanda eu, ne nuenu, bamane kuela miji ne bashibue mu dinanga, nuikale ne bukole bua kumanya nʼabu, hamue ne basanto bonso, mudi butshia ne bule ne bule bua mulu ne ndondo, ne bua kumanya mudi dinanga dia Kilisto didi ditamba lungenyi lua bantu kudimanya, bua nuenu nûla tente ne tshiuwidi tshionso tshia Nzambi. Kudi Nzambi, udi ne bukole bua kuenza malu matambe atudi katui bamanye mua kumulomba ne mua kuelangana meshi, bu mudi bukole budi butusonsola munda muetu, butumbi buikale kudiye mu ekelesia ne mu Kilisto Yesu tô: bikondo ne bikondo tshiendelele. Amen. Nunku meme, amena lukanu wa Mukelenge, ndi nusengelela ne, Enda! bakanangane ne dibikila diakanubikilabo nʼadi, mu kudihuekesha kuonso, mu kalolo, mu lutulu ne mu kuikalangana ne luse; nunanukile mua kulama buobumue buenu bua mu Nyuma Muimpe mu tshisuikidi tshia ditalala. Mubidi udi umue ne Nyuma udi umue, bu munuakabikidibua kabidi mu ditekemena dimue dia dibikidibua dienu. Mukelenge umue udiku, ditabusha dimue, dibatiza dimue, Nzambi umue, Tatu wa bonso, udi ku mutu kua bonso, udi wenzesha bonso, udi munda mua bonso. Muntu ne muntu wa munkatshi muetu wakahebua ngasa bu mudi tshidikishilu tshia diha dia Kilisto. Nunku Mukanda wa Nzambi udi wamba ne, Hakabandeye mu diulu, wakaya ne bakatambeye bukole mu buhika, Wakaha bantu maha abo (Ne bua dî edi ne, Wakabanda ma diulu, didi diamba tshinyi bikaladi kadî diamba ne, Wakadianjila kuhueka tô ne mu miaba ya munshi mua buloba? Yeye wakahueka udi muomumue ne yeye wakabanda kule ha mutu ha mûlu onso bua kûsheye bintu bionso tente). Wakaha bakuabo bua kuikala bapostolo, ne bakuabo bua kuikala baprofete, ne bakuabo bua kuikala batangadiki, ne bakuabo bua kuikala bampasata, ne bakuabo bua kuikala bayishi; bua kulengeshabo basanto tshishiki bua bobo benze mudimu wa kukuatshisha bakuabo, bua kudiundishabo ekelesia udi mubidi wa Kilisto; tô ne hatuaheta buonso buetu buobumue bua ditabusha ne bua kumanya kua Muana wa Nzambi, tô ne hatuafika ku mulongo wa muntu mukole, tô ne ku luidi lua dikola didi mu tshiuwidi tshia Kilisto. Wakenza nunku bua tuetu katuikadi bu bana kabidi badi batshikishibua eku ne eku ne badi batambakashibua ku luhehele luonso lua diyisha, ku majimbu a bantu, ku budimu budibo balonda mu mashimi abo; kadi bua tuetu, hatuamba mei malelela mu luse, tudiunde kudiye mu malu onso, udi mutu, Kilisto mene. Bituha bionso bia mubidi bidi biakashangana ne bidi bilamakashangana kudiye bua dikuatshishangana dia manungu onso, bu mudi mudimu wa tshituha tshionso, bidi bidiundisha mubidi mujima, tô ne hatentamabi bu nsubu mu dinanga. Nunku ndi nuambila dî edi, ndi numanyishadi kabidi mu Mukelenge ne, Kanuendi kabidi bu mudi bantu ba bisamba bia bende benda mu meshi abo a hatuhu; bakafikishibua mu meshi abo badi bavuishibua benyi ku muoyo wa Nzambi, bualu bua dihanga dia lungenyi munda muabo, bua dikoleshibua dia mitshima yabo. Kabena bamanye mua kufua bundu kabidi, bakadifila ku masandi bua kuenzabo malu a bundu onso ne lukuka lukole. Kadi nuenu kanuakayila ne Kilisto udi nunku; binuikala bamunvuile ne binuikala bayishibue mu Kilisto bu mudi bushua bua mu Yesu; numushe bienu muntu au wa kale, bu muakadi tshikadilu tshienu tshia diambedi, udi unyangukanyanguka bua nkuka idi imudinga. Nuvuishibue bahia-bahia mu nyuma wa meshi enu. Nudijadike muntu muhia-muhia wakafukibua mu tshifuanyikishi tshia Nzambi ne buakane ne tshijila bidi bifuma ku malu malelela. Nunku nulekele mashimi, muntu ne muntu nuambilangane ne muena mutumba nʼenu mei malelela; bualu bua tuetu tudi bituha bia mubidi tunue ne bakuabo. Nuikale ne tshishi kadi kanuenji bualu bubi; diba kadibueledi tshishi tshienu; kanushidi diabolo muaba mu mitshima yenu. Muntu wakuiba, alekele kuiba; kadi akuate mudimu, enze budi buimpe ne bianza biandi, bua yeye ikale ne tshia kuheye udi utshikengela. Dî dibi kadihatuki mukana muenu; kadi ambai anu mei mimpe adi mua kudiundisha bantu bua kuvuidishila bantu badi baunvua disanka. Kanunyingalashi Nyuma Muimpe wa Nzambi, nuakahebua tshimanyishilu kudiye munda muenu tshidiku tô ne halua dituku dia buhikudi. Difika dia munda ne tshishi ne lukuna ne diyoyo ne dihendangana ne lukinu luonso biumushibue kunudi; nuleshangane kalolo, nuikalangane ne mitshima ya luse, nulekelangane malu mabi enu bu muakanulekelela Nzambi malu mabi enu mu Kilisto. Nunku mudihishe kuenza mudi Nzambi wenza, bu bana bandi bananga. Nuende bienu mu luse bu muakanusua Kilisto, wakadifila bua bualu buetu bu mulambu ne tshintu tshishiha bua kuikaleye muhuya wa dihembu dimpe kudi Nzambi. Tshiendenda tshia malunda mabi ne malu a bundu ne dikuma dia mutshima kabitedibu mene munkatshi muenu; ebu budi buimpe bua basanto benze. Kanuikadi ne mei mabi ne tshiakulakula ne mmeku ya bundu bidi kabi biakane; kadi nusakidile Nzambi. Nudi bamanye bienu bulelela ne, Kakuena muena masandi anyi muena mutshima mubi anyi muena lukuka lua biuma udi mutendeledi wa mpingu, udi ne buhianyi mu bukelenge bua Kilisto ne bua Nzambi. Muntu kanudingi ne mei a hatuhu; bualu bua malu â tshishi tshia Nzambi tshilualua kudi bana ba buhidia. Nunku kanuikadi batshiangatshi nʼabo. Diambedi nuakadi midima, kadi katataka nudi munya mu Mukelenge; endai bienu bu bana ba munya (mamuma a munya adi malu mimpe onso ne malu makane ne malu malelela), nutete budi Mukelenge muanyishe. Kanuikadi ne buobumue ne midimu mienza mu midima idi kayi ikuama mamuma mimpe; kadi nubatuishe bua mianda ei. Bualu bua malu adibo benza mu musokoko adi atufuisha bundu bituâmba. Malu onso, habatuishabo bua malu â, adi amueneshibua ku munya; bualu bua bualu buonso budi bumueneshibua budi bulua munya. Bua bualu ebu Nzambi udi wamba ne, Tabala, wewe udi mulale tulu, Bika ku lufu, Ne Kilisto neakutemene. Nunku nudimuke bienu bu munudi nuenda; kanuendi bu badi kabai ne meshi, kadi nuende bu bena meshi; nudisumbile tshikondo batshiditshiku tshia kuenzamu malu mimpe, bualu bua matuku adi mabi. Nunku kanuikadi bu bahote, kadi nujingulule mudi disua dia Mukelenge. Kanukuatshiki maluvu, mudi dinyanguka dia muoyo munda muau, kadi nûshibue tente ne Nyuma Muimpe. Nusombeshangane ne misambu ya bena kuitabusha ba bale ne ya bena Kilisto ne ya Nyuma; nuimbile Mukelenge misambu, numutumbishe ne biombelu bia mitshima yenu. Misangu yonso nusakidile Nzambi Tatu bua bintu bionso mu dina dia Mukelenge wetu Yesu Kilisto. Nukokelangane mu ditshina dia Kilisto. Bakashi, nukokele babayenu bu munudi nukokela Mukelenge. Bualu bua mulume udi ku mutu kua mukashi bu mudi Kilisto ku mutu kua ekelesia, yeye musungidi wa ekelesia, mubidi wandi mene. Kadi bu mudi ekelesia ukokela Kilisto, nunku bakashi bakokele babayabo mu malu onso. Balume, suai bakashi benu bu muakasua Kilisto ekelesia kabidi, wakadifila bua bualu buandi; bua yeye amujidile, mumane kumulengesha ne kuvua kua mai ne dî diandi; bua yeye aditekele ekelesia ku mpala kuandi bu wa butumbi, kai ne ditoba ne mufudi anyi tshintu tshikuabo tshia nunku; kadi bua ekelesia ikale wa tshijila ne kai muhishibue. Nunku budi balume nʼabu mbua kusua bakashi babo mene bu mudibo basue mibidi yabo. Muntu udi unanga mukashi wandi udi udinanga; bualu bua kakuena kuanza kuikala muntu udi ne mubidi wandi lukuna; kadi udi udisha mubidi wandi, udi ûlama, bu mudi Kilisto ulama ekelesia; bualu bua tuetu tudi bituha bia mubidi wandi. Bua muanda eu muntu nealekele tatu wandi ne mamu wandi, nealamate mukashi wandi, bubidi buabo nebalue mubidi umue. Bualu ebu busokoka budi bunene; kadi ndi ngamba bualu bua Kilisto ne ekelesia. Kadi nuenu kabidi, mulume ne mulume, anange mukashi wandi bu mudiye udi nanga; ne mukashi anemeke bayandi. Bana, tumikilai baledi benu mu Mukelenge; bua bualu ebu budi buakane. Unemeke tatu webe ne mamu webe (eu udi mukenshi wa kumudilu udi ne mulayi), bua wewe wikale ne dikasa dimpe ne wikale ne muoyo musangu mule ha buloba. Ne nuenu batatu, kanufuishi bana benu balela tshishi; nubadiundishe bimpe ne dihela ne didimusha bia Mukelenge. Nuenu bahika, tumikilai dî dia badi banfumu benu ba mu malu a ha buloba ne kutshina ne kuzakala ne mutshima umue, bu munudi nutumikila Kilisto. Kanuenji mudimu bu bahika ba mesu, badi bu basankishi ba bantu; kadi bu bahika ba Kilisto, nuenze bu mudi disua dia Nzambi ne mitshima yenu; nuenze mudimu ne disanka bu munudi nuenzela Mukelenge mudimu, kembu munudi nuenzela bantu. Nudi bamanye bienu ne, Bualu buonso buimpe budi muntu ne muntu wenza, buobuo mene mbudiye wangata kabidi kudi Mukelenge, bikaleye muhika anyi mudishikamine. Ne nuenu banfumu, nubenzele muomumue, nuhidie kubakanyina; mimanye ne, Mukelenge wabo ne wenu kabidi udi mu diulu, ne kakuena kansungunsungu kudiye. Ku ndekelu, nudikoleshe mu Mukelenge ne mu bukole buandi bunene. Luatai bintu bionso bia nvita bia Nzambi, bua nuenu numanye mua kuimana bakandamana ku mpala kua mateyi a diabolo. Bualu bua diluangana dietu dia bibula kadiena dia kufuilangana ne munyinyi ne mashi, kadi ndia kufuilangana ne makelenge ne makokeshi ne banfumu ba midima ba buloba ebu, ne bisumbu bia nyuma mibi bidi mu miaba ya mu diulu. Bua muanda eu angatai bintu bionso bia nvita bia Nzambi, bua nuenu numanye mua kudimanyika bimpe halua dituku dibi, ne, hanuashikisha kuenza malu onso, nudi mua kuimana. Nunku imanai bienu, bamane kusuika bulelela mu bifuka bienu bu mukaba, bamane kuteka buakane bu tshibuikilu tshia ha tshiadi; bamane kubuesha makasa enu mu bisabata bia kudilongolola kua lumu luimpe lua ditalala. Ha mutu ha bintu bionso nuambule ngabu wa ditabusha, unudi mua kuehela nʼandi miketa yonso ya Satana idi ne kahia kasuikaku. Nuangate tshifulu tshia luhandu, ne muele wa Nyuma udi dî dia Nzambi; nutendelele Nzambi misangu yonso ne kulomba kuonso ne disengelela dionso mu Nyuma Mumpe; nuikale batabale mu dinanukila dionso ne disengelela bua basanto bonso, ne bua bualu buanyi kabidi, bua meme kuheshibua mua kuakula hanabulula mukana muanyi ne bua meme kumanyisha bantu ne dikima bualu bua lumu luimpe busokoka. Bua bualu ebu ndi muloho wa Nzambi mu nkanu, bua meme kuambila bantu bualu ne dikima bu mundi nʼabu bua kubambila. Bua nuenu kabidi numanye malu andi nʼau ne mundi ngenza, Tukiko, muanʼetu munanga wa mu Kilisto, muena mudimu wa lulamatu mu Mukelenge, nennumanyishe malu onso; unakanutumina bua muanda eu mene, bua nuenu numanye bu mutudi emu, ne bua kusambeye mitshima yenu. Ditalala dikale kudi bana betu ba mu Kilisto, ne dinanga disangisha ne ditabusha bia kudi Nzambi Tatu ne kudi Mukelenge Yesu Kilisto. Ngasa ikale ne bantu bonso badi bananga Mukelenge wetu Yesu Kilisto ne dinanga didi kadi mua kuhanga. Paulo ne Timote, bahika ba Kilisto Yesu, kudi basanto bonso ba mu Kilisto Yesu badi ku Filipoi, ne bakulu batangidi ne bulami; ngasa kunudi ne ditalala bia kudi Nzambi Tatu wetu ne kudi Mukelenge Yesu Kilisto. Ndi nsakidila Nzambi wanyi bua dinuvuluka dianyi dionso; ntu nganulombela Nzambi ne disanka misangu yonso mu disengelela dianyi dionso bua bualu buenu bualu bua buobumue buenu nʼanyi mu kutangalasha kua lumu luimpe ku dituku dia kumudilu dinuakalunvua tô ne katataka. Ndi mumanye bualu ebu mene ne, Yeye nguakabanga mudimu muimpe munda muenu neaushikishe tô ne halua dituku dia Yesu Kilisto; bu mudibi bimpe bua meme kuikala ne meshi â munda muanyi bua bualu buenu, bualu bua ndi nʼenu mu mutshima wanyi; bualu bua mu nkanu yanyi ne mu kuvidila ne mu kujadika kua lumu luimpe, buonso buenu nudi bangatshi nʼanyi ba ngasa. Nzambi udi mumanyi wanyi bu mundi nujinga ne dinanga didi munda mua Kilisto Yesu. Ndi ndomba bualu ebu ne, Luse luenu lutambe kudiundadiunda mu dimanya ne mu dijingulula dia malu onso; bua nuenu mimanye mua kujadika malu adi makane; ne bua nuenu nuikale ne mitshima mitoke, kanui balenduishi ba bakuabo, tô ne halua dituku dia Kilisto; ne bua nuenu nûshibue tente ne mamuma a buakane adi afuma kudi Yesu Kilisto bua butumbi ne kutumbishibua bia Nzambi. Bana betu ba mu Kilisto, ndi musue nuenu mimanye ne, Malu akunkuata akuandamuka bua kudiundisha lumu luimpe; nunku nkanu yanyi bua Kilisto yakamanyibua munkatshi mua masalayi onso a mu nsubu wa lukanu ne munkatshi mua bantu bonso bakuabo kabidi. Ne batambe bungi ba munkatshi mua bana betu ba mu Mukelenge bakakolesha mitshima yabo bualu bua nkanu yanyi, badi bamba dî dia Nzambi ne dikima ditambe, kabai batshina. Bulelela, bakuabo badi bamba Kilisto bualu bua mukau ne kutandangana; ne bakuabo kabidi badi bamuamba bualu bua disanka dimpe; aba badi bamuamba bua luse, bamanye ne ndi mutekibue bua kuvidia kua lumu luimpe; kadi bakuabo badi bamba Kilisto bua ditahuluka, kabai ne mitshima mitoke, bela meshi bua kunjudila makenga mu nkanu yanyi. Nunku ntshinyi? Anu bualu ebu ne, Mu tshiambilu tshionso, bikalatshi mu lubombo anyi mu bushua, Kilisto udi wambibua; ne mu bualu ebu ndi nsanka, E, bulelela, nensankemu kabidi. Bua ndi mumanye ne bualu ebu nebuandamuke bu luhandu luanyi bualu bua disengelela dienu ne bua dikumbasha dia Nyuma wa Yesu Kilisto. Mbu mudi dialamina dianyi dikole ne ditekemena dianyi ne, tshiena nfuishibua bundu nasha mu bualu bumue; kadi bu munakamana kuenza misangu yonso ne dikima dionso, nunku katataka Kilisto neatumbishibue mu mubidi wanyi, nasha buikala ku muoyo Bau, nasha buikala ku lufu luau. Bualu bua kudi meme eu kuikala ne muoyo nKilisto, ne kufua kudi kuhita mushinga muimpe. Bingikala ne bualu bua kuikala ne muoyo mu mubidi,—ne bikala bualu ebu mamuma a mudimu wanyi, tshiena mumanye bualu bunasungula. Kadi adi mujikila hankatshi ha malu â abidi: ndi njinga bua kumuka hanu bua kuikala ne Kilisto; bua bualu ebu budi butamba buimpe; kadi kushala mu mubidi mbualu bunudi nutamba kukengela. Bualu bua ndi ngitabushishibua bualu ebu, ndi mumanye ne nenshaleku mu mubidi, E, bulelela, nenshale nʼenu bonso bua kudiunda kuenu ne kusanka kuenu bia mu ditabusha; bua ditumbisha dienu dikumbane mu Kilisto Yesu mu bualu buanyi bua dikala dianyi nʼenu tshiakabidi. Anu bualu ebu, bikadilu bienu bikale biakanangane ne lumu luimpe lua Kilisto; bua binalua kunumona anyi bingikala kukuabo, ngunvue bianyi lumu lua malu enu ne, Badi bajalama mu nyuma tunue, ne badi batshinta hohamue ne mutshima umue bua ditabusha dia lumu luimpe, ne kabena batshinyishibua nasha ku bualu bumue kudi bena lukuna. Bualu ebu budi tshileshilu tshia dibutuka diabo, kadi ntshia luhandu kunudi, ne luolu ludi lufuma kudi Nzambi; bualu bua nuakahebua ngasa bua bualu bua Kilisto, kena anu bua kumuitabusha, kadi bua kukenga bua bualu buandi kabidi; nudi ne diluangana diodiumue dinuakatangila munda muanyi, ne dinudi nunyua katataka ne didi munda muanyi. Nunku bikalaku ditendekena dia mu Kilisto, bikalaku disengelela dia mu dinanga, bikalaku buobumue bua Nyuma, bikalaku mitshima ya luse ne malu a dinanga, nunvudishile disanka dianyi, bua nuenu nuele meshi muomumue, nuikale bienu ne dinanga diodiumue ne mutshima muomumue ne meshi amue. Kanuenji muanda bua ditahuluka anyi bua kuditumbisha kua hatuhu; kadi mu mitshima mihuekela muntu ne muntu abale mukuabo bu muntu udi umutamba yeye buimpe. Muntu ne muntu katangidi malu andi nkayau, kadi muntu ne muntu atangile kabidi malu a bakuabo. Nuikale ne meshi â munda muenu akadi kabidi munda mua Kilisto Yesu. Yeye wakadi muikale ne Bunzambi mene, kadi kakabala buobumue buandi ne Nzambi bu tshintu tshia kulaminyina bikole; kadi yeye wakadiumushila bimanyinu bia butumbi buandi, hakangateye mubidi wa muhika, hakalueye mu tshifuanyikishi tshia muntu. Ne hakamuenekeye mu tshifuanyikishi tshia muntu, yeye wakadihuekesha, wakalua mutumikidi tô ne ku lufu, ku lufu mene lua ha mutshi mutshiamakane. Ne bua bualu ebu Nzambi wakamubandisha kulu kulê, wakamuha dina didi ha mutu ha dina dionso; ne bua mu dina dia Yesu binu bionso bitue hanshi, ne bia bintu bia mu diulu ne bintu bia ha buloba ne bintu bia munshi mua buloba, ne bua ndimi yonso yambe hatoke ne Yesu Kilisto udi Mukelenge, tô ne ku butumbi bua Nzambi Tatu. Nunku bananga banyi, bu munuakatumikila misangu yonso, kembua kuikala kuanyi munkatshi muenu nkayaku, kadi mpindiu nudi nutamba kuenza nunku handi tshîku, nudienzeshe bua kushikisha luhandu luenu ne ditshina ne dizakala, bualu bua Nzambi ngudi wenzesha munda muenu bua kusua ne bua kuenza kabidi bualu bua disua diandi dimpe. Nuenze malu onso kanui ne ditontolola ne dielangana dia mpata; bua nuenu nulue bantu badi kabai ne bualu ne badi ne mitshima mitoke, bu bana ba Nzambi badi kabai ne tshilema munkatshi mua bena tshikondo tshikonyangala ne tshia tshishiku; banudi numueneka munkatshi muabo du minda ya ha buloba, nuboluele dî dia muoyo; bua meme kuikala ne bua mua kutumbila nʼabu mu dituta dia Kilisto ne, Tshiakidikisha lubilu tshianana ne tshiakenza mudimu wanyi hatuhu. E, bulelela, binahongolodibua ha mulambu ne ha ditendelela dia ditabusha dienu, ndi nsanka bianyi, ne ndi nsanka ne buonso buenu; muomumue nuenu nusanke bienu, nusanke nʼanyi kabidi. Ndi ntekemena mu Mukelenge Yesu bua kunutumina Timote tshituha tshihi bua meme kuikala ne busambi buimpe hanamanya malu enu. Bua tshiena ne mukuabo udi ne mutshima bu wandi wadielesha meshi bulelela bua malu enu. Bualu bua buonso buabo badi badikebela malu abo, kabena bakeba malu a Yesu Kilisto. Kadi nudi bamanye bujalami buandi ne, bu mudi muana ne tatu wandi, nunku yeye wakakuata nʼanyi mudimu wa mu lumu luimpe. Nunku ndi ntekemena kumutuma yeye ku tshikondo tshindi ntangila muyaya malu anyi. Kadi ndi ne ditekemena mu Mukelenge kabidi ne meme nkayanyi nendue tshituha tshihi. Kadi nakuelangana meshi ne, Bualu buakunkuata bua kunutumina Epafodito, muanʼetu wa mu Kilisto ne muena mudimu nʼanyi ne disalayi nʼanyi ne musheshe wenu ne mukuatshishi wanyi ne bintu bindi nkengela. Bualu bua yeye wakanujinga buonso buenu, ne wakabungama bikole bua nuenu nuakunsua lumu ne, Yeye udi usama. Ne bulelela, yeye wakadi usama, hehi ne lufu; kudi Nzambi wakamufua luse, kakamufuilalu yeye nkayandi kadi wakanfuilalu meme kabidi, bua meme tshikadi ne kanyinganyinga ha mutu ha kanyinganyinga. Nunku nakumutuma ne disuminyina ditambe, bua nuenu nusanke hanuamonangana nʼandi kabidi, ne bua meme ngikale ne kanyinganyinga kakehe. Nunku numusankidile mu Mukelenge ne disanka dionso; ne nutumbishe bantu badi nunku; bualu bua yeye wakalua ha buihi ne lufu bualu bua mudimu wa Kilisto, yeye wakahana muoyo wandi ku lufu bua kunkumbashila bintu biakadi bishala ku dikuatshisha dienu kundi. Tshiashadidi mpindiu, bana betu, nusanke mu Mukelenge. Kunufundila malu momumue kakuena kuntonda, kadi kudi kunukuatshisha nuenu. Nudimuke kudi mbua, nudimuke kudi benji babi ba mudimu, nudimuke kudi baditahi ba mubidi. Bualu bua tuetu tudi batengula badi batendelela ku Nyuma wa Nzambi ne badi batumbila mu Kilisto Yesu, ne badi kabai ne dieyemena dia malu a mubidi, nasha meme nkayanyi ngeyemena malu mene a mubidi. Bikala muntu mukuabo wela meshi bua kuikala ne dieyemena dia malu a mubidi, meme ndi mua kumutamba kuikala nʼadi. Bakantengula dituta dia muanda mukulu; nakadi Muena Isalele, wa tshisamba tshia Benyamina, Muena Ebelu wa Bena Ebelu; mu bualu bua mikenshi nakadi Mufalese; mu bualu bua lukunukunu nakadi nkengesha bena ekelesia; ne mu bualu bua buakane bua mu mikenshi, nakalua muntu udi kai ne bualu. Kadi malu akadi a mushinga muimpe kundi, nguou au nakabala bu tshintu tshijimina bua Kilisto. E, bulelela mene, ndi mbala bintu bionso bu tshintu tshijimina bualu bua bulengele butambe bua kumanya kua Kilisto Yesu, Mukelenge wanyi; unakajimishila bintu bionso bua bualu buandi, ne ndi mbibala bu bintu bia kuela ku diala bua meme mpete Kilisto, ne bua kunsanganabo munda muandi, tshi ne buakane buanyi budi bufume ku mikenshi, kadi ngikale ne buobu abu budi bua ditabusha dia mu Kilisto, buakane mene budi bufuma kudi Nzambi hangitabusha. Mbua meme kumumanya yeye, ne bukole bua dibika diandi ku lufu, ne buobumue nʼandi mu makenga andi, muikale mufuanyikishibue nʼandi mu lufu luandi; binamanya mua kufika ku dibika dia munkatshi mua bafue. Kembua nakamana kuheta buala ebu, anyi bua nakumana kuakashibua; kadi ndi ntshinta bikole, binamanya mua kukuata bualu buakunkuatshilabo kabidi kudi Kilisto Yesu bualu buabu. Bana betu, tshiena ndibala bu muntu wakamana kubukuata; kadi ndi ngenza bualu bumue: Handi mpua muoyo bua malu a ku nyima, handi ndobelela ku malu adi ku mpala, ndi ntshinta bua kufika ku ndekelu wa nshila bua kuangata bukenshi bua dibikila dia mulu dia Nzambi mu Kilisto Yesu. Nunku buonso buetu bakamana kukola mu bualu bua Nzambi tuikale ne meshi momumue; ne binuikala ne meshi makuabo mu bualu bukuabo, Nzambi neanubuluile bualu ebu kabidi; kadi kutuakamana kufika, tuende bietu mu nshila muomumue. Bana betu, nulue bienu bangidikishi banyi hohamue; nutangile bantu badi benda nunku bu munudi nʼetu bu tshidikishilu. Bualu bua ba bungi badi benda, banakanuambila malu abo misangu ya bungi, ne bandi nuambila katataka ne binsonshi ku mesu ne, Badi bena lukuna lua mutshi mutshiamakane wa Kilisto; kunshikidilu kuabo didi dibutuka, nzambi wabo ndifu diabo, butumbi buabo budi mu bundu buabo; badi belangana meshi a malu a ha buloba. Bualu bua kuetu mene kudi mu diulu, kutudi tuindila kabidi Musungidi, Mukelenge Yesu Kilisto; yeye neakudimune mibidi ya buhuekele buetu bua kufuananganai ne mubidi wandi wa butumbi, bu mudi kuenza kuandi kudiye mumanye mua kuvuisha nʼaku bintu bionso ku nyima kuandi. Nunku bana betu bananga ne bajingibua, disanka dianyi ne tshifulu tshianyi tshia butumbi, nuimane bajalame mu Mukelenge, bananga banyi. Ndi nsengelela Ewodia ne ndi nsengelela Suntuke bua kuikalabo ne meshi amue mu Mukelenge. E, ndi ndomba wewe kabidi, muenu nʼanyi ku mutshi wa tshikokedi wa bushua, bua wewe ukuatshishangane ne bakashi aba, bualu bua bobo bakenza nʼanyi mudimu wa lumu luimpe, ne Kulemento kabidi ne bakuabo benji nʼanyi ba mudimu, badi ne mena abo mafunda mu mukanda wa muoyo. Nusanke mu Mukelenge misangu yonso, nengambe tshiakabidi ne, Nusanke. Buhole buenu bumanyishibue kudi bantu bonso. Mukelenge udi ha buihi. Lekelai kudiatshisha ku bualu bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu, nedilame mitshima yenu ne meshi enu mu Kilisto Yesu. Bana betu, tshiashadidi mpindiu, ne, Malu onso adi malelela, ne malu onso adi a buneme, ne malu onso adi makane, ne malu onso adi a butoke bua mutshima, ne malu onso adi malengele a dinanga, ne malu onso adi ne lumu luimpe; bikalaku buimpe ne bikalaku butumbi, nuelangane meshi a malu â. Malu â kabidi anuakayila ne anuakangata ne anuakunvua ne anuakatangila kundi, nuikale nuenze malu â; ne Nzambi wa ditalala neikale nʼenu. Nakusanka bikole mu Mukelenge bua mpindiu, musangu walehi, nuakasangisha meshi enu a bualu buanyi; bulelela, nuakadi nuela meshi a bualu buanyi, kadi kanuakadi ne tshikondo tshimpe. Tshiena ngakula bua dikengela dia bintu; bualu bua nakuyila mua kuikala ne mutshima muhole mu malu onso andi nʼau. Ndi mumanye mua kuhuekeshibua, ndi mumanye mua kuikala ne bintu bitamba; mu bualu buonso ne mu mianda yonso nakumana kuyila bualu busokoka bua kuikala ne difu diukute, ne mua kuikala ne nsala, ne mua kuikala ne bintu bitambe bungi, ne bua kuikala ne bintu bitambe kukeha. Ndi mumanye mua kuenza malu onso mu Mukelenge udi unkolesha. Kadi nuenu nuakenza bimpe hanuakadi nʼanyi ne buobumue mu dikenga dianyi. Nuenu mene, Bena Filipoi, nudi bamanye kabidi ne, Ku tshibangidilu tshia kuamba kuanyi kua lumu luimpe, hanakumuka ku Makedonia, kakuakadi ekelesia mukuabo wakadi ne buobumue nʼanyi mu bualu bua kuha ne kuangata kua bintu, anu nuenu nkayenu. Bualu bua hanakadi mu Tesalonike, nuakantumina bintu binakadi nʼabi bualu misangu ne misangu. Kembua ndi nkeba kuha kuenu, kadi ndi nkeba mamuma adi avulangana ku dibadibua dienu. Kadi ndi ne bintu bionso ne bitamba; nakukuta bualu bua nakangata bintu kudi Epafodito biakafuma kunudi, muhuya wa dihembu dimpe, mulambu muitabushibue, udi usankisha Nzambi. Ne Nzambi wanyi neanukumbashile bintu bionso binudi nʼabi bualu bu mudi bubanshi buandi bua mu butumbi mu Kilisto Yesu. Butumbi buikale kudi Nzambi wetu Tatu ku bikondo ne ku bikondo. Amen. Nuele basanto bonso ba mu Kilisto Yesu muoyo. Bana betu ba mu Kilisto badi nʼanyi badi banuela muoyo. Basanto bonso badi banuela muoyo, ne ba mu nsubu wa Kaisa badi batamba kusua kunuela muoyo. Ngasa wa Mukelenge Yesu Kilisto ikale ne nyuma wenu. Paulo, mupostolo wa Kilisto Yesu bua disua dia Nzambi, ne Timote, muanʼetu wa mu Kilisto, kudi badi mu Kolosai, basanto ne bana betu bananukidi ba mu Kilisto. Ngasa ikale kunudi ne ditalala bia kudi Nzambi Tatu wetu. Tudi tusakidila Nzambi, Tatu wa Mukelenge wetu Yesu Kilisto, tudi tunulombela Nzambi misangu yonso. Tuakulua lumu lua ditabusha dienu dia mu Kilisto Yesu ne bua dinanga dinudi nʼadi kudi basanto bonso, bualu bua ditekemena didi dinutekedibue mu diulu, dinuakadianjila kunyua lumu luadi mu di dia bushua dia lumu luimpe ludi lulua kunudi. Mbu mudilu mu buloba buonso kabidi lukuama mamuma ne ludiundadiunda bu mudilu luenza munda muenu kabidi, katshia ku dituku dinuakunvua ne dinuakamanya ngasa wa Nzambi mu bushua. Ebu mbu munuakamanya kudi Epafa, muhika nʼetu munanga, udi biandi muena mudimu munanukidi wa Kilisto bua bualu buetu. Yeye kabidi wakatulesha dinanga dienu dia mu Nyuma Muimpe. Bua muanda eu, tuetu kabidi, katshia ku dituku dituakunvua lumu etu, katuena tulekela kutendelela Nzambi bua bualu buenu, ne kumulomba bua nuenu nûshibue tente ne kumanya kua disua diandi mu meshi onso ne dijingulula bia mu Nyuma; ne bua nuenu nuende mu bienzedi bidi biakanangane ne Mukelenge ku dimusankisha dionso, ne bua nuenu nukuame mamuma mu mudimu wonso muimpe, ne bua nuenu nudiundadiunde mu kumanya kuenu kua Nzambi; ne bua nuenu mikoleshibue ne bukole buonso, bu mudi bukole bua butumbi buandi, tô ne ku dinanukila dionso ne ku lutulu lusangisha ne disanka. Nusakidile Tatu, wakatuvuisha bantu badi mua kuikala babanyanganyi ba buhianyi bua basanto bua mu munya. Nyeye wakatuhandisha ku bukokeshi bua mîdima, wakatubuesha mu bukelenge bua Muana wa dinanga diandi, utudi ne kuhikudibua kuetu munda muandi, nkujimisha kua mibi yetu. Yeye udi tshifuanyikishi tshia Nzambi udi kai mua kumuenebua, muanʼa bute wa bifukibua bionso; bualu bua munda muandi muakafukibua bintu bionso bia mu diulu ne bia ha buloba, ne bintu bidi bimuenebua ne bintu bidi kabi bimuenebua, ne bidi nkuasa ya butumbi anyi makelenge anyi manfumu anyi makokeshi; bintu bionso biakafukibua ku bukole buandi ne bua bualu buandi. Ne yeye udi ku mpala kua bintu bionso ne bintu bionso bidi bikuatakasha munda muandi. Ne yeye udi mutu wa mubidi, ngekelesia mene: udi biandi tshibangidilu, muanʼa bute wa munkatshi mua bafue, bua yeye ikale ku mpala mu malu onso. Bualu bua Tatu wakasanka bua tshiuwidi tshionso tshia Bunzambi tshikale munda muandi; ne bua kulengeshisheye bintu bionso kudiye bua bualu buandi, yeye mumane kuvuisha ditalala ku mashi a ku mutshi wandi mutshiamakane; bua bualu buandi bua kulengeshisheye bintu bionso kudiye, ne bidi ha buloba ne bidi mu diulu. Ne nuenu, bakadi diambedimbedi ba bende ne bena lukuna nʼandi mu meshi enu bua bienzedi bienu bibi, katataka yeye wakulengeshangana nʼenu mu mubidi wandi wa ha buloba bualu bua lufu luandi, bua kunuteka ku mesu kuandi bu bantu ba tshijila, badi kabai ne tshilema ne badi kabai mua kubandibua ku mpala kuandi; binuananukila mu ditabusha, bajadikibua ne bashindikibue bikole, ne kanui basesuishibue ku ditekemena dia lumu luimpe lunuakunvua, luakambibua munkatshi mua bifukibua bionso munshi mua diulu; lunakavuishibua, meme Paulo, muena mudimu walu. Mpindiu ndi nsanka mu makenga andi nʼau bua bualu buenu, ne ku luanyi luseke ndi nkumbasha mu muhidi wanyi makenga a Kilisto atshidi mashale bua mubidi wandi, ekelesia mene. Nakavuishibua muena mudimu wa ekelesia bu mudi bulami bua kudi Nzambi buakampeye bua bualu buenu, bua meme kukumbasha dî dia Nzambi mu kuamba kuanyi; didi bualu buakadi busokoka tô bidimu ne bikondo, kadi katataka buakumueneshibua kudi basanto bandi, kudibo kuakasua Nzambi kubamanyisha budi bubanshi hua butumbi hua hualu ebu busokoka munkatshi mua bisamba bia bende, budi Kilisto munda muenu, ditekemena dia butumbi. Nyeye utudi tuamba, tudimusha muntu yonso ne tuyisha muntu yonso mu meshi onso, bua tuetu tumanye mua kumuenesha muntu yonso muakane tshishiki mu Kilisto. Bua bualu ebu kabidi ndi ngenza mudimu bikole, ndi ntshinta bikole bu mudi kuenzesha kuandi kudi kuenza munda muanyi mu bukole. Bualu bua ndi musue nuenu mimanye bunene bua bukole bundi ntshinta nʼabu bua bualu buenu, ne bua badi mu Laodikiya, ne bua bonso badi kabai banze kuntangila ku mesu; bua mitshima yabo isambibue, bobo basuikakasha ku luse tô ne ku bubanshi buonso bua kumanya kujalama kua dijingulula diabo, bua bobo bamanye bimpe bualu bua Nzambi buakadi busokoka, nKilisto mene. Munda muandi mudi musokoka bibutshidibue bionso bia meshi ne bia lungenyi. Ndi ngamba bualu ebu bua muntu kanudingi ne mei a kunubomba nʼau. Bua bingikala tshi nʼenu mu mubidi wanyi, ntshidi nʼenu mu nyuma wanyi; ndi nsanka, ndi mona kudilongolola kuenu ne kutantamana kua ditabusha dienu dia mu Kilisto. Nunku, bu munuakitabusha Kilisto Yesu Mukelenge, nuikale nuende mu Kilisto; nuikale ne miji yenu miedibue munda muandi, nuikale nuashibue munda muandi, ne nuikale nujadikibue mu ditabusha dienu, bu munuakayishibua; nukumbane mu disakidila. Nudimuke bua muntu kikadiku udi mua kununyanga ne nkindi yandi ne lubombo lua hatuhu, bu mudi bilele biamba kudi bantu, bu mudi mayisha a kumudilu a ha buloba, ne kembu mudi Kilisto mutuyiske. Bualu bua munda mua Kilisto nkayandi mudi muikale tshiuwidi tshijima tshia Bunzambi mu tshikadilu tshia mubidi. Ne nuenu nudi nûshibua tente munda muandi udi mutu wa makelenge onso ne makokeshi onso, unuakatengudibua munda muandi kabidi ne ditengula didi kadî dienjibua ne bianza mu diumusha dia malu a mubidi wa ha buloba, mu ditengula dia mu Kilisto. Nuakajikibua nʼandi mu dibatiza, munuakabishibua nʼandi munda muadi kabidi, bualu bua ditabusha dienu dia mu kuenza kua Nzambi wakamubisha munkatshi mua bafue. Nuenu kabidi, hanuakadi bafue bualu bua mibi yenu, ne hanuakadi kanui ne ditengula dia mibidi yenu, Nzambi wakunuvuisha muoyo hohamue nʼandi, yeye mumane kutubuikidila mibi yetu yonso; hakakuhuleye dibanda diakatufundilabo bua mikenshi, diakadi dituhisha, wakadiumusha munkatshi muetu, wakadikumina diodio ne milonda ku mutshi mutshiamakane. Hakadiumushileye makelenge ne makokeshi, wakamuenesha hatoke to, wakâkoka bu muatambi ku mutshi wandi mutshiamakane. Nunku muntu kanulumbuluishi bualu bua bia kudia, anyi bua bia kunua, anyi bua dituku dia disanka dia bidia, anyi bua dituku diabala ngondo, anyi bua dituku dia Lumingu lua Bayuda; malu â adi mundidimbi wa malu alualua, kadi mubidi wau udi wa Kilisto. Muntu kanunyengi bukenshi buenu bualu bua kudihuekesha kuandi kudiye udisunguila, ne kukukuila kuandi kua banjelo, ne dilamata diandi dia mu bikena kumona, mûshibue hatuhu ku meshi andi a mubidi, udi kai ulamata Mutu, kudi mubidi wonso, mukoleshibue ne musuikakasha ku manungu ne mijilu, udiundaku ne kudiunda kua kudi Nzambi. Binuikala bafue ne Kilisto ku mayisha a kumudilu a ha buloba, ntshinyi tshinudi nuditekela ku nyima kua mikenshi ei bu munutshidi ne mioyo yenu mu buloba: ne, Kukuatshi, kulabudi, kulengi; (bintu ebi bionso nebijimine ne mudimu wabi) bu mudi mikenshi ne mayisha bia bantu? Bulelela, malu â adi ne tshileshilu tshia meshi mu ditendelela dia ku disua dia bantu, ne mu kudihuekesha ne mu kudikengesha kua mubidi; kadi kêna ne buimpe bua kukanda disankisha dia mubidi. Nunku binuikala babishibue hohamue ne Kilisto ku lufu, nukebe malu a mu diulu, mudi Kilisto, mushikame ku tshianza tshikole tshia Nzambi. Nuteke meshi enu ku malu a mu diulu, kanuateki ku malu a ha buloba. Bualu bua nuakafua, ne muoyo wenu udi musokoka ne Kilisto mu Nzambi. Hamueneshibua Kilisto udi muoyo wetu, hashishe nuenu kabidi nenumueneshibue nʼandi mu butumbi. Nunku nufuishe bituha bia mibidi yenu ya ha buloba: masandi, malu a bukoya, nkuka ya mubidi, disamina dibi dia mutshima, ne dikuma dia mutshima ku bintu didi kutendelela kua mpingu mene; bua malu â tshishi tshia Nzambi tshidi tshilua kudi bana ba buhidia; anuakendamu kabidi diambedi hanuakikala ne muoyo munkatshi mua malu â. Kadi katataka nudiumushile bienu kabidi malu â onso: lukuna, tshishi, lukinu, bihendu, mei a bundu mukana muenu. Kanushimianganyi, bualu bua nuakamana kuvula muntu mukulukulu ne bienzedi biandi, nuakaluata muntu muhia-muhia udi uvuishibua muhia-muhia mu dimanya dilelela, bu mudi tshifuanyikishi tshia Mumufuki. Nunku kakuena mua kuikala Muena Gelika ne Muena Yuda, Muena ditengula ne udi kai muena ditengula, musenshi, Muena Sekutia, muhika ne mudishikamine; kadi Kilisto udi malu onso ne udi mu malu onso. Nunku, bu munudi bantu basungula kudi Nzambi, ba tshijila ne bananga, luatai mutshima wa luse, ne wa dikuatshisha, ne wa kudihuekesha, ne wa kalolo, ne wa lutulu. Nuleshangane lutulu, nulekelelangane mibi yenu, hikala muntu ne mukuabo tshilumbu; bu muakanubuikidila Mukelenge mibi yenu; nuenu nuenze muomumue kabidi. Ha mutu ha malu â onso nuluate dinanga, didi tshisuikidi tshia malu onso a buakane buonso. Ne ditalala dia Kilisto dinukokeshe mu mitshima yenu; dinuakabikidibuamu kabidi mu mubidi umue; ne nuikale nusakidile Nzambi. Dî dia Kilisto dikale munda muenu ne bubanshi buadi; mu meshi onso nuyishangane ne nudimushangane ne misambu ya bena kuitabusha ba kale ne ya bena Kilisto ne ya Nyuma; nuimbile Nzambi misambu ne ngasa mu mitshima yenu. Ne malu onso anudi nuenza, ne mu mei ne mu bienzedi, enzai onso mu dina dia Mukelenge Yesu; nusakidile Nzambi Tatu bua bualu buandi. Nuenu bakashi, nukokele babayenu, ke budi buakane mu Mukelenge. Nuenu balume, suai bakashi benu, ne lekelai kuikala ne mitshima ya luonji kudibo. Nuenu bana, nutumikile baledi benu mu malu onso, bua bualu ebu budi buanyishibua mu Mukelenge. Nuenu batatu, kanufikishi munda mua bana benu, bua mitshima yabo kaibungami. Nuenu bahika, mu malu onso nutumikile badi banfumu benu ba mu malu a ha buloba; kanuenji mudimu bu bahika ba mesu, bu basankishi ba bantu; kadi nunyeme ne mitshima mitoke nutshine Mukelenge. Malu onso anudi nuenza, nuenze ne mitshima yenu bu munudi nuenzela Mukelenge; kembu munudi nuenzela bantu; bualu bua nudi bamanye ne, Netuangate difutu dia buhianyi kudi Mukelenge. Nudi nukuatshila Mukelenge Kilisto mudimu. Bualu bua muntu udi wenza bualu bubi neangate kabidi bualu bubi buakenzeye bu difutu diandi; ne kakuena kansungunsungu kudi Nzambi. Nuenu banfumu, nuenzele bahika benu malu adi makane ne adi kâi ne kansungunsungu; bualu bua nudi bamanye ne nuenu kabidi nudi ne Mukelenge mu diulu. Nunanukile mu ditendelela dienu nutabalamu ne disakidila; nutulombele kabidi mu tshikondo tshiotshimue bua Nzambi atunzuluile tshibi tshia dî bua tuetu kuamba bualu busokoka bua Kilisto, buakunsuikilabo mu nkanu kabidi, bua meme kubumanyisha bantu, bu mundi nʼabu mbua kubambila. Nuende mu meshi ku mesu kua bantu badi kabai munkatshi mua bena ditabusha; nudisumbile tshikondo hatshiditshiku tshia kuenza bimpe. Mei enu ikale ne ngasa misangu yonso, matue bu lueho, bua nuenu mimanye mua kuandamuna muntu ne muntu dî. Tukiko, muanʼetu munanga wa mu Kilisto, muena mudimu wa lulamatu ne muhika nʼanyi mu Mukelenge, neanumanyishe malu anyi onso; unakatuma kunudi bua bualu ebu mene, bua nuenu kumanya malu etu ne bua yeye asambe mitshima yenu. Nakatuma Onesimo ngandi, udi muanʼetu wa mu Kilisto wa lulamatu ne munanga, udi muena kuenu. Nebanumanyishe malu onso a kunoko. Alistâko, muena lukanu nʼanyi, udi unuela muoyo, ne Mâko, muanʼabo ne Bânaba (nuakamana kuangata mikenshi ya bualu buandi; bialueye kunudi, numuitabushe) ne Yesu, udibo babikila ne Yusto, badi ku luseke lua batengula; anu bobo nkayabo badi benzeshanganyi nʼanyi ba mudimu bua bukelenge bua Nzambi, bobo mene bakuikala basambi kundi. Epafa, udi umue wenu ne muhika wa Kilisto Yesu, udi unutumina muoyo, udi utshinta bikole misangu yonso bua bualu buenu mu mitendelelu yandi, bua nuenu mijalame bakane tshishiki, ne bamanyishibue bimpe mu disua dionso dia Nzambi. Bualu bua ndi mumanyi wa bualu buandi ne, Yeye udi utamba kuikala ne mudimu wa bungi bua bualu buenu ne bua badi mu Laodikiya ne bua badi mu Hielapoli. Luka, nganga buka munanga, ne Dema badi banutumina muoyo. Nuele muoyo kudi bana betu ba mu Kilisto ba mu Laodikiya, ne kudi Numpa ne bena ekelesia ba mu nsubu wandi. Ne hamanabo kubala mukanda eu munkatshi muenu, nûbadishe bena ekelesia ba mu Laodikiya kabidi; ne nuenu kabidi nubale mukanda wanyi udi ufuma ku Laodikiya. Nuambile Âkipo kabidi ne, Udimuke bua mudimu uwakangata mu Mukelenge, bua wewe ûshikishe. Diela dia muoyo dia kudi meme Paulo difunda ne tshianza tshianyi. Neuluke nkanu yanyi. Ngasa ikale nʼenu. Paulo ne Siluano ne Timote kudi ekelesia wa bena Tesalonike wa mu Nzambi Tatu ne wa mu Mukelenge Yesu Kilisto. Ngasa ne ditalala bikale nʼenu. Tudi tusakidila Nzambi misangu yonso bua buonso buenu tutela mena enu mu milombu yetu, katui tulekela kuvuluka mudimu wenu wa ditabusha ne mudimu wenu mukole wa dinanga ne dinanukila dienu dia mu ditekemena dia Mukelenge wetu Yesu Kilisto, ku mesu kua Nzambi udi kabidi Tatu wetu. Bana betu banangibue kudi Nzambi, tudi bamanye kusungudibua kuenu; bualu bua lumu luimpe lutudi tuamba kaluakalua kunudi anu mu dî nkayadi, kadi luakalua mu bukole ne mu Nyuma Muimpe ne mu kumanya kujalama; bu munudi bamanye mushindu wa bantu utuakadivuisha munkatshi muenu bua bualu buenu. Ne nuenu nuakalua bidikishi betu ne ba Mukelenge; nuakitabusha di mu dikenga dikole hohamue ne disanka dia mu Nyuma Muimpe; bua bualu ebu nuakalua tshidikishilu kudi bonso badi bitabusha mu Makedonia ne mu Akaya. Bua dî dia Mukelenge diakambibua kunudi diakunvuibua, kenganu mu Makedonia ne mu Akaya, kadi mu miaba yonso ditabusha dinudi nʼadi kudi Nzambi diakamuangalaka; nunku tuetu katuena ne bualu bua kuamba d! kabidi. Bua bobo nkayabo batu bamba bua bualu buetu, bu muakadi tshibueledi tshietu kunudi, ne bu munuakakudimuka kudi Nzambi hanuakalekela mpingu bua kukuatshila Nzambi wa muoyo ne wa bushua mudimu, ne bua kuindila Muana wandi ulualua mu diulu; wakabisheye munkatshi mua bafue, Yesu mene, udi utuhandisha ku tshishi tshilualua. Bua nuenu mene, bana betu, nudi bamanye bua dibuela dietu kunudi ne kadiakulua dia hatuhu; kadi hatuakadianjila kukenga, ne hakatuenzelabo bibi ku Filipoi, bu munudi bamanye, tuakakolesha mitshima mu Nzambi wetu bua kunuambila lumu luimpe lua Nzambi mu kuluangana kua bungi. Bua dinusengelela dietu kadiena dia mashimi anyi dia bukoya bua mutshima anyi dia lubombo; kadi bu muakatujadikabo kudi Nzambi bila kutekeye lumu luimpe mu bianza bietu, ke mutudi tuamba; kembu mutudi tusankisha bantu, kadi bu mutudi tusankisha Nzambi udi uteta mitshima yetu ne idi mimpe. Bualu bua kabakatusangana nasha tshikondo tshimue ne mei a tshianyishanyisha, bu munudi bamanye, anyi ne tshia kubuikila nʼatshi lukuka; Nzambi udi mumanyi wa bualu ebu; anyi bakebi ba butumbi kudi bantu, nasha kunudi nasha kudi bantu bakuabo; nasha tuetu tuakadi mua kuikala bujitu kunudi bu bapostolo ba Kilisto. Kadi tuakikala bu bana batekete munkatshi muenu, bu mudi ndeshi ukuongoluela bana bandi balela. Nunku muomumue, bualu bua tuakatamba kumusua, tuakadi ne disanka dimpe bua kunuha, kendumu luimpe lua Nzambi nkayalu, kadi mioyo yetu kabidi, bualu bua nuakalua banangibue kutudi. Bualu bua nudi nuvuluka, bana betu, mudimu wetu mukole ne lutatu luetu; butuku ne munya tuakenza mudimu bua katudivuishi bujitu hamʼbidi ha nasha umue wenu; nunku Nakanuambila lumu luimpe lua Nzambi. Nuenu nudi bamanyi ne Nzambi udi mumanyi kabidi bu mutuakanuenzela nuenu badi bitabusha malu a tshijila ne adi makane ne adi kâi mua kubandibua; bu munudi bamanye mutuakanuenzela muntu ne muntu wa munkatshi muenu, bu mudi tatu wenza ne bana bandi balela, hatuakanusengelela, hatuakanukolesha mitshima, hatuakanuambila dî, bua nuenu nuende bakanangane ne Nzambi, udi unubikila bua nuenu kubuela mu bukelenge buandi ne mu butumbi buandi. Bua muanda eu kabidi katuena tulekela kusakidila Nzambi ne, Hanuakangata dî dinuakunvua kutudi, dia Nzambi mene, nuakaditabusha, kembu dî dia bantu, kadi bu mudidi bushua, dî dia Nzambi mene, didi dienzesha munda muenu badi bitabusha. Bualu bua nuenu, bana betu, nuakalua bidikishi ba bena ekelesia ya Nzambi ya mu Yudaya mu Kilisto Yesu; bualu bua nuenu kabidi nuakakenga makenga muomumue kudi bena tshisamba tshienu, bu muakâkenga ba mu Yudaya kudi Bena Yuda. Bobo bakashiha Mukelenge Yesu ne baprofete, bakatuihata tuetu kabidi, kabena basankisha Nzambi, ne badi banyoka bantu bonso; badi batukanda bua tuetu katuakudi ne ba bisamba bia bende bua bobo basungidibue; nunku bobo badi bakumbasha mibi yabo misangu yonso; kadi hashishe tshishi tshiakafika kudibo. Kadi tuetu, bana betu, hatuakalekelangana nʼenu musangu muibi, tuakalua bu bana ba nshîa mu mubidi kadi kemu mutshima; tuakatamba kukeba kumonangana nʼenu ku mesu ne dijinga dikole. Bualu bua tuakasua kulua kunudi kudi meme Paulo misangu ne misangu, kadi Satana wakatuhumbisha. Bua ditekemena dietu didi tshinyi, anyi disanka dietu, anyi tshifulu tshia butumbi? Kabiena nuenu nkayenu, anyi, ku mpala kua Mukelenge wetu Yesu ku dilua diandi? Bualu bua nuenu nudi butumbi buetu ne disanka dietu. Nunku hatuakadi katui mua kudikanda kabidi, Nakamona ne, Mbimpe batushîe ku nyima ha nkayetu ku Atena; ne Nakatuma Timote, muanʼetu wa ma Kilisto ne muenu mudimu wa Nzambi mu lumu luimpe lua Kilisto, bua kunujadikeye ne bua kunusambeye mu bualu bua ditabusha dienu; bua muntu katekeshibu mu makenga â; bua nuenu nkayenu nudi bamanye ne Ndi tutekibua ku makenga â. Bulelela, hatuakadi nʼenu, tuakadianjila kunuambila ne, Tudi tuamba kuikala ne makenga; mbu muakaluau, ne nudi bamanye bualu ebu. Bua muanda eu meme kabidi, hanakadi tshi mua kudikanda, nakatuma Timote bua meme kumanya mudi ditabusha dienu; bua bumue muteyi wakanuteya, ne mudimu wetu mukole wakalua hatuhu. Kadi mpindiu hakalua Timote kutudi mufume kunudi, ne hakatuambileye lumu lutusankisha lua ditabusha dienu ne lua dinanga dienu, ne hakatuambileye ne nudi ne dituvuluka dimpe misangu yonso, ne nudi nujinga bua kutumona, bu mutudi tujinga bua kunumona nuenu kabidi; bua bualu ebu, bana betu, tuakasambibua bua bualu buenu mu makenga etu onso ne mu ntatu yetu bualu bua ditabusha dienu; bualu bua katataka tudi ne muoyo, binuashala bajalame mu Mukelenge. Bua tudi bamanye mua kuhingishila Nzambi kabidi disakidila kai bua bualu buenu, bua disanka dionso ditudi tusanka nʼadi bua bualu buenu ku mpala kua Nzambi wetu? Butuku ne munya tudi tutamba kulomba Nzambi bikole bua tuetu kunumona ku mesu, ne bua tuetu kukumbasha malu anudi nuhanga kuikala nʼau mu ditabusha dienu. Nzambi muine udi kabidi Tatu wetu, ne Mukelenge wetu Yesu, atulongoluele nshila wetu wa kufika kunudi; ne Mukelenge anudiundishe ne anukumbashe mu dinanga dinudi nʼadi munkatshi muenu muntu ne muntu, ne kudi bantu bonso, bu mutudi nʼadi kabidi kunudi; bua yeye ajadike mitshima yenu kayi ne bualu mu malu a tshijila ku mpala kua Nzambi udi kabidi Tatu wetu, ku dilua dia Mukelenge wetu Yesu Kilisto ne basanto bandi bonso. Nunku bana betu, tshiashadidi mpindiu, tudi tunulomba ne tudi tunusengelela mu Mukelenge Yesu ne, Bu munuakangata diyisha kutudi dinulesha bu munudi ne bua kuenda ne bua kusankisha Nzambi, mbu munudi nuenda kabidi,—bua nuenu mitambe kukumbanakumbana ma malu â. Bualu bua nudi bamanye mei â atuakanudimusha nʼau mu Mukelenge Yesu. Bua bualu ebu budi disua dia Nzambi, tshijila tshienu mene, bua nuenu nudikande ku masandi; muntu ne muntu wa munkatshi muenu amanye mua kukubeye mubidi wandi mu tshijila ne mu kunemeka; kikadi nʼau mu nkuka ya disamina dibi dia mutshima, bu mudi ba bisamba bia bende benza badi kabai bamanye Nzambi. Ndi ngamba bua muntu kasambuki mikalu ne kenzedi muanʼabo wa mu Kilisto bibi mu bualu ebu; bualu bua Mukelenge udi musombuedi mu malu â onso, bu mutuakadianjila kunudimusha kabidi ne mutuakanumanyisha. Bualu bua Nzambi kakatubikila bua kuikala ne bukoya bua mutshima, kadi wakatubikidila mu malu a tshijila. Nunku wahetula kena uhetula muntu kadi udi uhetula Nzambi udi unuha Nyuma Muimpe wandi. Kadi bualu bua dinangangana dia bana babo ba mu Kilisto, kanuedi ne bualu bua muntu anufundile dî; bualu bua nuenu nudi bayishibue kudi Nzambi bua kunangangana. Bulelela, nudi nuenzela bana benu bonso nunku badi mu buloba buonso bua Makedonia. Kadi tudi tunusengelela, bana betu, bua nuenu mitambe kukumbanakumbana ma malu â; ne bua nuenu nukebe bikole bua kuikala talala, ne bua kuenza malu enu nkayau, ne bua kuenza mudimu ne bianza bienu bu mutuakanuambila; nuenze nunku bua nuenu nuende ne bimuenenu biakane ku mesu kua bantu badi kabai bena ditabusha nʼetu; ne bua kanuikadi ne dikengela dia tshintu. Bana betu, katuena basue nuenu nuhange kumanya bualu bua badi balala tulu mu lufu, bua nuenu kanunyingalashi mitshima yenu, bu mudi bakuabo benza badi kabai ne ditekemena. Bualu bua bituitabusha ne Yesu wakafua, ne wakabika ku lufu kabidi, muomumue Nzambi nealue ne bantu aba nʼandi kabidi bakalala tulu ma lufu bualu bua Yesu. Bua tudi tunuambila bualu ebu ku dî dia Mukelenge ne, Tuetu, batshidi ne muoyo, ne badibo bashîe tô ne ku dilua dia Mukelenge, katuena tudianjila kuya ku mpala kua badi balala tulu ma lufu. Bualu bua Mukelenge muine neahueke mu diulu wela dî dikole, ne dî dia muanjelo mutambe bakuabo bunene, ne dî dia mpungi wa Nzambi; ne bantu bafue mu Kilisto nebabike diambedi; ne hasnishe tuetu batshidi ne muoyo badibo bashîa netuangatshibue nʼabo hohamue mu matutu, bua kusangila ne Mukelenge mu luhehele; nunku netuikale ne Mukelenge tshiendelele. Bua mianda ei nusambangane ne mei â. Kadi bana betu, bua bikondo ne bidimu kanuena ne bualu bua muanda wabi ufundibue kunudi. Bualu bua nuenu nkayenu nudi bamanye bimpe ne, Dituku dia Mukelenge dilualua bu mudi muibi ulua butuku. Hatshidibo bamba ne, Tudi ne ditalala, katui ne bualu; ahu dibutuka dia tshintuluntulu dilualua kudibo, bu mudi kanyinganyinga kalua kudi mukashi udi ne difu; ne bobo kabena bahanduka nasha kakese. Kadi nuenu bana betu, kanuena mu midima bua dituku adi dinukuate bu muibi; bua buonso buenu nudi bana ba munya ne bana ba dituku, katuena ba butuku anyi ba midima. Nunku katuladi tulu bu mudi bakuabo benza; kadi tutabale, tuikale ne meshi mahole. Bua badi balala tulu badi balala tulu butuku; ne badi bakuatshika maluvu badi bakuatshika butuku. Kadi tuetu, bualu bua tudi ba dituku, tuikale ne meshi mahole; tuluate tshibuikilu tshia ha tshiadi tshia ditabusha ne tshia dinanga, tuluate ditekemena dia luhandu bu tshifulu ku mutu. Bualu bua Nzambi kakatusungula bua kutulekela tshishi, kadi bua tuetu kuheta luhandu bualu bua Mukelenge wetu Yesu Kilisto, wakatufuka, bua tuetu, nasha batabale nasha balale tulu, tuikale ne muoyo hohamue nʼandi. Nunku nusambangane, nudiundishangane muntu ne muntu, bu munudi nuenza kabidi. Kadi tudi tunulomba, bana betu, bua nuenu mimanye badi benza mudimu munkatshi muenu ne badi ku mutu kuenu mu Mukelenge ne badi banudimusha; bua nuenu nubabale bu banudi nutamba kutumbisha mu dinanga bua mudimu wabo. Nuikalangane ne ditalala munkatshi muenu. Bana betu, tudi tunusengelela ne, Nudimushe batshimbakanyi, nukoleshe badi ne mitshima yamba kuhanga, nukuatshishe badi batekete, nuikale ne lutulu kudi bantu bonso. Numone ne muntu kahingishidi mukuabo bubi ku bubi buandi; kadi misangu yonso nulondelangane malu adi mimpe muntu ne muntu, ne kudi bonso. Nusanke misangu yonso; nuikale nutendelelatendelele; mu malu onso nusakidile Nzambi, bua edi ndisua dia Nzambi mu Kilisto Yesu bua bualu buenu. Kanujimi Nyuma Muimpe. Kanuhetudi mayisha a baprofete. Nujingulule malu onso; nulamate malu adi mimpe; nuehuke ku malu mabi a mushindu wonso. Nzambi wa ditalala nkayandi anujidile tshishiki; ne nyuma yenu ne misûke yenu ne mibidi yenu ilamibue mu buakane buonso, kanui ne kudiu, mu dilu? dia Mukelenge wetu Yesu Kilisto. Yeye udi unubikila udi mua kueyemenyibua, yeye kabidi nênze buala budiye munubikidile. Bana betu, nundombele Nzambi. Nuele bana betu bonso ba mu Kilisto muoyo ne kutuangana kua mishiku kua tshijila. Ndi nutshihisha mu Mukelenge bua babadile bana betu bonso ba mu Kilisto mutanda eu. Ngasa wa Mukelenge wetu Yesu Kilisto ikale nʼenu. Paulo ne Siluano ne Timote kudi ekelesia wa bena Tesalonike wa mu Nzambi Tatu wetu ne mu Mukelenge Yesu Kilisto. Ngasa kunudi ne ditalala bia kudi Nzambi Tatu ne Mukelenge Yesu Kilisto. Bana betu, butudi nʼabu mbua kusakidila Nzambi misangu yonso bua bualu buenu, bu mudibu buakane, bua ditabusha dienu didi ditamba kudiunda, ne dinanga dia buonso buenu muntu ne muntu dinudi nunangangana nʼadi didi divulangana; bua muanda eu tuetu tudi tutumbila bua bualu buenu mu ekelesia ya Nzambi bualu bua ditantamana dienu ne bua ditabusha dienu mu makenga enu onso ne mu matata onso anudi nuikala nʼau. Malu â adi tshimanyinu tshia dilumbulula diakane dia Nzambi; bua nuenu nubadibue bakanangane ne bukelenge bua Nzambi bunudi nukengela bualu buabu kabidi; bikalahu buakane bua Nzambi kuhingisha makenga kudi badi banukengesha; ne bua kunuheye nuenu badi bakengeshibua dikisha hohamue nʼetu, ku dibuluibua dia Mukelenge Yesu halueye mu diulu ne banjelo ba bukole buandi mu kahia kadi kakenka. Neadisombuele kudi bantu badi kabai bamanye Nzambi ne kudi badi kabai batumikila lumu luimpe lua Mukelenge wetu Yesu; bobo aba nebahete dikenga, dibutuka dia tshiendelele mene, dia ku mesu kua Mukelenge ne ku butumbi bua bukole buandi, halueye bua kutumbishibua mu basanto bandi, ne bua kukemibua mu dituku diadia kudi bantu bonso bamane kumuitabusha (bualu bua bumanyishi buetu kunudi buakitabushibua). Bua bualu ebu tudi tunulombela kabidi misangu yonso bua Nzambi wetu anubale bakanangane ne dibikidibua dienu, ne bua yeye akumbashe ne bukole buandi disua dienu dionso dia buimpe ne mudimu wenu wa ditabusha; bua dina dia Mukelenge wetu Yesu ditumbishibue munda muenu, ne nuenu nutumbishibue munda muandi, bu mudi ngasa wa Nzambi wetu ne wa Mukelenge Yesu Kilisto. Bana betu, tudi tunusengelela bua dilua dia Mukelenge wetu Yesu Kilisto ne bua kusangishibua kuetu kudiye; bua nuenu kanuzakashibu lubilu mu meshi enu, ne kanutshinyishibu, nasha bua nyuma nasha bua dî nasha bua mukanda udibo badingila ne ngua kutudi ne, Dituku dia Mukelenge dikadi aha. Muntu kanudingi muanda wonso; bua dituku adi kadiena dilua anu bialua ditombokela dia Nzambi diambedi, ne anu biabuluibua muntu wa buhidia, muana wa dibutuka mene. Yeye ngudi udimanyika ne udi udibandisha ku mpala kua bionso bidi bidikibua ne, Nzambi, anyi bionso bidi bantu batendelela; nunku yeye udi ushikama mu ntempelo wa Nzambi udilesha kudi bantu ne, Meme ndi Nzambi. Kanuena nuvuluka ne nakadi nuambila malu â hanakatshidi munkatshi muenu, anyi? Katataka nudi bamanye bualu budi bumukanda bua yeye abuluibue mu tshikondo tshiandi tshine. Bua bualu busokoka bua buhidia butshidi buenza mudimu wabu, kadi mukuabo udiku udi mmukanda katataka tô ne humushibueye. Hashishe muntu wa buhidia neabuluibue, udi Mukelenge Yesu ulua kushiha ne muhuya wa mukana muandi, neamuvuishe bu tshintu tshia tshianana ku dimueneka dia kulua kuandi. Kulua kuandi kudi bu mudi kuenzesha kua Satana, ne bukole buonso, ne bimanyinu, ne malu a kukema a mashimi, ne kudinga kuonso kua malu mabi kudi batshidi bajimina mu lufu; bualu bua kabakitabusha dinanga dia bualu bulelela bua bobo basungidibue. Bua bualu ebu Nzambi udi ubatumina dienzesha dia dihambuka, bua bobo bitabushe mashimi; bua bonso balumbuluishibue badi kabai bitabusha malu a bushua, kadi badi ne disanka mu malu mabi. Kadi butudi nʼabu mbua kusakidila Nzambi misangu yonso bua bualu buenu, bana betu banangibua kudi Mukelenge, bualu bua Nzambi wakadianjila kunusungula ku tshibangidilu bua kunuha luhandu mu kujidila kua Nyuma Muimpe ne mu kuitabusha kua malu a bushua; wakanubikilamu bua lumu luimpe lutuakunuambila, bua nuenu nuhete butumbi bua Mukelenge wetu Yesu Kilisto. Nunku bana betu, nudijadike bimpe, nulamate ku bilele biamba kudi bantu biakanuyishabo, nasha ku mei etu nasha ku mukanda wetu. Mukelenge wetu Yesu Kilisto muine ne Nzambi Tatu wetu, wakatunanga ne wakatuha busambi bua tshiendelele ne ditekemena dimpe bua ngasa, anusambe mitshima yenu, aijadike mu mudimu muimpe wonso ne mu dî dimpe dionso. Tshiashadidi mpindiu, bana betu, nutulombele Nzambi, bua dî dia Mukelenge diendakane ne ditumbishibue, bu mudidi munkatshi muenu kabidi; ne bua tuetu tuhanduke mu bianza bia bena tshinyangu ne bantu babi; bualu bua bonso kabena ne ditabusha. Kadi Mukelenge udi mua kueyemenyibua, yeye neanujadike, neanulame ku bubi. Tudi ne ditekemena mu Mukelenge bua bualu buenu ne, Nudi nuenza, ne nenuenze malu atudi tunuelela mikenshi. Ne Mukelenge alombole mitshima yenu mu dinanga dia Nzambi ne mu dinanukila diakadi Kilisto nʼadi. Bana betu, tudi Umuelela mukenshi mu dina dia Mukelenge Yesu Kilisto bua nuenu nudilamune kudi muanʼenu yonso wa mu Kilisto udi wenda utshimbakana, ne udi kai wenda bu mudi bilele biambibua kutudi binuakangata. Bua nuenu bine nudi bamanye bu munudi ne bualu bua kuidikisha, bua katuakenda tutshimbakana munkatshi muenu; ne katuakadia bidia bia muntu mukuabo hatuhu, kadi mu mudimu mukole ne mu lutatu, tuakenza mudimu ne bianza bufuku ne munya, bua katuikadi bujitu hamʼbidi ha umue wenu. Kembua katui ne bukokeshi bua kunulomba dikuatshisha, kadi bua kudivuisha tshifuanyikishi kunudi bua nuenu kutuidikisha. Bua hatuakadi munkatshi muenu mene, tuakanuelela mukenshi eu ne, Bikala muntu kai witabusha kuenza mudimu, kadi biandi tshintu. Bua tudi tunvua lumu lua banga badi benda batshimbakana munkatshi muenu, kabai benza mudimu nasha kakese, kadi badi bena bienzenza. Tudi tuelela bantu aba ba nunku mukenshi ne tudi tubasengelela mu Mukelenge Yesu Kilisto ne, Benze mudimu wabo talala, ne badidile bidia biabo. Kadi nuenu, bana betu, kabiteketshi mu kuenza kua malu mimpe. Bikala muntu mukuabo kai utumikila dî dietu dia ku mukanda eu, mimanye muntu au bua kanubuelakanyi nʼandi, bua ku-fuishibueye bundu ku mesu. Ne kanumubadi bu muena lukuna, kadi numudimushe bu muanʼenu wa mu Kilisto. Mukelenge wa ditalala anuhe ditalala misangu yonso mu mianda yonso. Mukelenge ikale ne buonso buenu. Diela dia muoyo dia kudi meme Paulo difunda ne tshianza tshianyi, ntshimanyinu mu mukanda wonso; nunku mundi nfunda. Ngasa wa Mukelenge wetu Yesu Kilisto ikale ne buonso buenu. Paulo, mupostolo wa Kilisto Yesu bu mudi mukenshi wa Nzambi Musungidi wetu, ne wa Kilisto Yesu ditekemena dietu, kudi Timote, muanʼanyi wa bushua mu ditabusha: Ngasa, luse, ditalala bia kudi Nzambi Tatu ne kudi Kilisto Yesu Mukelenge wetu. Bu munakakusengelela bua wewe kushala mu Efeso, hanakadi nya ku Makedonia, bua wewe kuelela bakuabo mukenshi ne, Kanuyishi bantu diyisha dikuabo, ne kanulamatshi ku nsumuinu ya tshianana, anyi ku mena a hankambua malongolola adi kâl ne ndekelu; malu â adi avuisha dikonkangana, kêna avuisha kudiunda kua mudimu wa Nzambi kudi ditabusha: udi nkusengelela muomumue katataka. Kadi tshidi mukenshi eu ukeba kuheta ndinanga dia mu mutshima mutoke ne dia mu muoyomukese muimpe ne dia mu ditabusha didi kadi ne lubombo. Ku malu â bantu bakuabo bamane kuhambuka bakasesuka bua kulonda biakulakula; badi basue kuikala bayishi ba mikenshi ya Nzambi, kadi kabena bajingulula tshidibo bamba anyi tshidibo bakeba kujadika ne, Ntshilelela. Kadi tudi bamanye ne, Mikenshi idi mimpe bikala muntu wilonda ne kutumikila. Tudi bamanye ne, Mikenshi kayena mielela muntu muakane, kadi idi mielela badi kabai baitabusha ne bena buhidia ne badi kabai banemekela Nzambi ne badi babi ne badi kabai ba tshijila ne bahendi ha Nzambi ne bashihi ba batatu ne bamamu ne bashihianganyi ne bena masandi, balume badi benzelangana malu a bundu, banyengi ba bantu, bena mashimi, bena mitshihu ya mashimi, anyi bikalaku tshinga tshintu tshidi tshifuilangana ne diyisha dimpe; bu mudi lumu luimpe lua butumbi bua Nzambi udibo batumbisha, luakatekibua mu bianza bianyi. Ndi musakidile Kilisto Yesu Mukelenge wetu mene, wakampa bukole bualu bua yeye wakambala bu muntu udi mua kueyemenyibua, wakanteka ku mudimu wandi; diambedi nakadi muhendi wa Nzambi ne mukengeshi wa bantu bandi ne muena luonji kudibo; kadi nakafuidibua luse bualu bua nakabienza mu buhidia buanyi tshi mumanye: ne ngasa wa Mukelenge wetu wakatamba kuvulangana diatshimue ne ditabusha ne dinanga dia mu Kilisto Yesu. Dî edi didi mua kueyemenyibua ndidi bonso bamanye mua kuitabusha ne, Kilisto Yesu wakaluila ha buloba bua kusungileye bantu babi, bandi ku mpala kuabo ku bubi. Kadi bua bualu ebu nakafuidibua luse, bua munda muanyi bu muntu mubi muhite bakuabo, Yesu Kilisto amueneshe lutulu luandi luonso, bu tshileshilu kudi bantu balua kumuitabusha tô ne ku muoyo wa tshiendelele. Kudi Mukelenge wa kashidi, udi kai mua kufua, udi kai mua kumuenebua ku mesu, Nzambi umue, buneme ne butumbi bikale kudiye ku bikondo ne ku bikondo. Amen. Ndi nkutekela mukenshi eu, muanʼanyi Timote, bu mudi mei a baprofete akadianjilabo kuamba bua bualu buebe, bua wewe uluangane nvita mimpe ne dikuatshisha diau. Ulamate ditabusha ne muoyo-mukese muimpe; bakuabo bakumusha malu â kudibo, bakanyanguka mu ditabusha diabo bu mudi majua matshibuke mu mai. Munkatshi muabo mudi Humenayo ne Alesandelo; banakafila kudi Satana, bua bayishibue ne, Kanuhendi Nzambi. Nunku ku mpala kua malu onso, ndi nkusengelela bua milombu ne mitendelelu ne mitendekenu ne masakidila bikale bienzele bantu bonso. Ulombele banfumu bonso ne badi ne bukokeshi, bua tuetu tuikale ne muoyo muhola holâ ne mutalala talalâ mu buimpe buonso ne mu buneme buonso. Bualu ebu budi buimpe ne mbudi Nzambi Musungidi wetu witabusha, udi musue bantu bonso basungidibue, bafike ku dimanya dia malu malelela. Bualu bua Nzambi udi umue, ne mutuanganyi umue udiku hankatshi ha Nzambi ne bantu, nyeye muntu mene, Kilisto Yesu; wakadifila bu tshintu tshia kuhikula nʼatshi bantu bonso; bumanyishi bua muanda eu budi ne bua kumanyishibua mu bikondo biabu mene. Bua bualu ebu nakatekibua muambi ne mupostolo (ndi ngamba dî dilelela, tshiena nshima nasha) muyishi wa ba bisamba bia bende mu ditabusha ne mu malu malelela. Nunku ndi musue balume batendelele Nzambi mu miaba yonso, babishe bianza bia tshijila, kabai ne tshishi ne dielangana dia mpata. Muomumue bakashi kabidi badilengeshe ne bilulu bidi bibakanyina; bikale ne kalolo ne buhuekele; kabaluki nsuki yabo bihia; kabaluatshi ngolo ne mabue ne bilulu bia mushinga muhite bungi; kadi badilengeshe ne bienzedi bimpe, bu mudi buakane bua bakashi badi bamba ne, Tudi tutshina Nzambi. Mukashi ayile ne ditalala ne dikokela dionso. Kadi tshiena ngitabusha mukashi ayishe, anyi ikale ne bukokeshi ku mutu kua muteme; kadi ikale biandi talala. Bualu bua Adama wakafukibua diambedi, ne hashishe Eva; ne Adama kakateyibua, kadi mukashi hakamaneye kuteyibua, wakahona mu bubi. Kadi yeye neasungidibue mu kulela kuandi kua bana, bikala bakashi bananukila mu ditabusha ne mu dinanga ne mu malu a tshijila adi ne buhuekele. Dî edi didi mua kueyemenyibua ne, Biasua muntu kuangata mudimu wa mukulu-mutangidi, yeye udi usua mudimu muimpe. Nunku budi mukulu-mutangidi nʼabu mbua kuikala kai ne bilumbu; ikale biandi muena mukashi umue; ikale biandi muena meshi mahola ne buhuekele; amanye mua kulongolola malu andi bimpe; ikale musankididi wa benyi; ikale muakane wa kuyisha bakuabo. Kikadi ne diyoyo bua malulu; kikadi mukumianganyi ne bakuabo; kadi ikale muena buhele; kasu biandi mayoyo; kateki mutshima wandi ku biuma. Akokeshe ba mu nsubu wandi bimpe, ikale ne bana bamukokela bimpe ne buneme buongo. Kadi bikala muntu kai mumanye mua kukokesha ba mu nsubu wandi, nealame ekelesia wa Nzambi munyi? Kikadi biandi muntu muhia-muhia mu bualu bua Nzambi; anyi hadisueye, neahone mu dilumbuluishibua dia diabolo. Bualu bukuabo, budiye nʼabu mbua kuikala ne lumu luimpe kudi badi kabai munkatshi mua bena ditabusha; bua kahonyi biandi mu malu adi avuisha bihendu ne mu buteyi bua diabolo. Muomumue balami ba bintu bikale ne kanemu; kabikadi ne mei abidi; kabadidi ku maluvu a bungi; kabakumi mitshima yabo ku biuma bidi bifume ku nshila mibi; balame bualu busokoka bua ditabusha mu muoyo-mukese mutoke. Badianjile kubateta bobo aba kabidi, hashishe benze mudimu wa balami, bikalabo kabai mua kubandibua. Muomumue bakashi bikale ne kanemu, kabikadi bena bunsonge; bikale ne meshi mahole ne mua kueyemenyibua mu malu onso. Balami ba bintu bikale bena mukashi umue, bakokeshe bana babo ne ba mu nsubu yabo bimpe, bualu bua bobo bakenza mudimu bimpe bu balami badi badiangatshila muaba mubandila ne dikima dikole mu ditabusha dia mu Kilisto Yesu. Butumbi bua Kilisto mu ekelesia Ndi nkufundila malu â handi ntekemena bua kulua kûdi tshituha tshihi; kadi binashala musangu mule, udi nkufundila mukanda eu bua wewe umanye bu mudibo ne bua kuenza mu nsubu wa Nzambi, udi muaba wa tshijila wa ekelesia wa Nzambi udi ne muoyo, udi bu dikunshi ne tshishindamenu bia malu malelela. Ne kakuena mpata ya bunene bua bualu busokoka bua buimpe bua Nzambi: Nyeye wakamueneshibua mu mubidi wa muntu, Wakabingishibua mu nyuma, Wakamuenebua kudi banjelo, Wakambibua munkatshi mua bisamba bia bende, Wakitabushibua ha buloba, Wakangatshibua mulu ne butumbi. Kadi Nyuma udi wamba batoke ne, Halua bikondo bia kunshikidilu ha buihi, bantu bakuabo nebalekele ditabusha diabo, balamata ku nyuma idi ihambuisha ne ku mayisha a bademon; bualu bua lubombo lua bantu badi bamba mei a mashimi, badi boshibua mu muoyo-mukese wabo ne tshiamu tshibia ne kadilu. Bobo badi bakanda bantu dibaka, badi babelela mukenshi ne, Jilai bia kudia bikuabo, biakafuka Nzambi bua bantu badi ne ditabusha ne badi bamanye bualu bulelela badie ne kusakidila. Bifukibua bionso bia Nzambi bidi bimpe, ne bantu kabena ne bua kubimasha bikalabo babitabusha ne kusakidila; bualu bua biobi bidi bijidibua ne dî dia Nzambi ne kutendelela. Biwavuluisha bana benu ba mu Kilisto malu â, wewe newikale muena mudimu muimpe wa Kilisto Yesu, mudiundisha mu mei a ditabusha ne mu diyisha dimpe diwakulonda tô ne katataka. Kadi uhidie nsumuinu ya malu a hatuhu a bakashi bakulukashi. Udienzeshe bua kuheta malu a buimpe bua Nzambi. Bualu bua dikolesha dia mubidi didi ne mushinga muimpe kakese; kadi buimpe bua Nzambi budi ne mushinga muimpe mu malu onso, budi ne mulayi wa muoyo wa mpindiu ne wa muoyo ukadi ha kulua. Di edi didi mua kueyemenyibua ndidi bonso bamanye mua kuitabusha. Bua bualu ebu tudi tuenza mudimu mukole ne tudi tutshinta, bua tuakutekemena Nzambi udi ne muoyo, udi Musungidi wa bantu bonso, kadi mutambe kuikala Musungidi wa badi bamuitabusha. Elela bantu mukenshi bua malu â, ubayisheu. Muntu kakulenguludi bua bunsongalume buebe; kadi wikale tshileshilu kudi bena ditabusha mu mei ne mu tshikadilu tshiebe ne mu dinanga ne mu ditabusha ne mu butoke bua mutshima. Tô ne hanalua, ulamate ku dibala dia Mukanda wa Nzambi, ku disengelela, ne ku diyisha. Kulekedi kulama tshihedi tshidi munda muebe, tshiakakuhebua ku mei a baprofete ne hakatentekesha bakulu bianza ha mutu hebe. Unanukile kuikala mu malu â, udiele ne mutshima webe wonso kudiu, bua kudiunda kuebe kumueneke kudi bonso. Wikale mudimuke ku malu ebe ne ku diyisha diebe. Unanukile kushala mu malu â; bua bawenza nunku, neudisungile wewe ne bobo kabidi badi bunvue mei ebe. Kubedi muntu mununu, kadi umutendekene bu tatu webe mukuledi; usengelele bansongalume bu bena mulongo webe; usengelele bakashi banunu bu bamamu bakuidi; usengelele bansongakashi bu bana benu ba tatu umue mu butoke buonso bua mutshima. Unemeke bakashi ba mu lufuila badi ne lufuila lua bushua. Kadi bikala mukashi wa mu lufuila ne bana bandi balela anyi bikilu bandi, bobo badianjile kuyila mua kunemeka ba mu diku diabo ne mua kuhingishila baledi babo bintu bia kubakuatshisha nʼabi; bua bualu ebu mbudi Nzambi witabusha. Mukashi udi ne lufuila lua bushua ne udi ha nkayandi, udi utekemena Nzambi, ne udi unanukila mu kusengelela ne mu kulomba kuandi butuku ne munya Kadi yeye wa mu lufuila udi ukeba anu bua kudisankisha udi mufue hatshidiye ne muoyo. Ubelele mukenshi bua malu â kabidi, bua kabikadi ne bilumbu. Kadi bikala muntu kai usubula badi bandi ne ba mu nsubu muandi mene, yeye wakadiula ditabusha diandi ne udi mutambe muntu udi uhidia kuitabusha bubi. Kabafuidi mukashi wa mu lufuila mu mulongo wa ba mu lufuila bikaleye kai muanze kufika ku bidimu makumi asambombo, yeye mumane kuikala mukashi wa anu muntu umue; udi ne lumu luimpe lua bienzedi biandi bimpe, bikaleye mudiundishe bana bandi, bikaleye musangele benyi, bikaleye mume makasa a basanto, bikaleye mukuatshishe bena makenga, bikaleye munanukile kulonda midimu mimpe yonso. Kadi uhidie kuteka bansongakashi ba mu lufuila mu mulongo eu; bualu bua hamanabo kusamina muoyo kudi balume, nebabenge mudimu wa Kilisto, nebasue kuya ku dibaka kabidi; nunku badi ne dihila bualu bua bakahidia mutshihu wabo wa diambedi. Bunga bualu, badi bayila kabidi mua kuikala bafuba, bendakana ku nsubu ne ku nsubu; ne kabena bayila mua kuikala anu ne bufuba nkayabu, kadi mua kuikala bena mukoso ne bena bienzenza, bakula mei adi kâi mimpe bua kuakula. Nunku ndi musue bansongakashi ba mu lufuila baye ku dibaka, balele bana, bakokeshe ba mu nsubu yabo, kabaheshi muhumbishi kaba ka kubendeye bena ekelesia; bualu bua bakuabo bakumana kuhambuishibua bua kulonda Satana. Mukashi muena ditabusha bikaleye ne ba mu lufuila badi bamueyemena, yeye abakuatshishe, ne katekedi ekelesia bujitu ebu; bua ekelesia akuatshishe ba mu lufuila lua bushua. Bakulu badi bakokesha bimpe babadibue habo bakanangane ne bua kunemeshibua tshiakabidi, kadi batambe kunemeka bobo badi benza mudimu mukole wa kuamba ne wa kuyisha dt dia Nzambi. Bua Mukanda wa Nzambi udi wamba ne, Kusuiki nkata ku mishiku ya ngombe udi udiata ntete bua kuishihula; ne, Muena mudimu udi muakanyine bua kuangateye difutu diandi. Kuitabushi babande mukulu, anu biamubandabo mukana mua bamanyi babidi anyi basatu. Bobo badi benza bualu bubi, ubabele ku mesu kua bonso, bila bakuabo badi bashale bikale ne ditshina. Ndi akolesha buabo, ebu bikole ku mesu kua Nzambi ne kua Kilisto Yesu ne kua banjelo bandi basungula, bua wewe kutumikila malu â kui mudianjile kukosa bualu munda muebe ne kui ne kansungunsungu. Kutentekeshi bianza lubilu ha mutu ha muntu; kuikadi ne buobumue ne bantu bakuabo mu malu mabi abo; ulame butoke bua mutshima webe. Lekela kuikala munu wa anu mai nkayau; kadi unue tuluvu tukese bua kuondaha munda muebe ne bua matekete audi nʼau misangu ya bungi. Mibi ya bantu bakuabo idi imueneka hatoke, idi iya ku mpala kuabo tô ne ku dihila; ne mibi ya bakuabo kabidi idi ibalonda ku nyima. Muomumue kabidi, bienzedi bimpe bidiku bidi bimueneka hatoke, ne bidi kabi nunku kabiena mua kusokokibua. Bonso badi bahika munshi mua mutshi wa tshikokedi babale banfumu babo ne mbakanyine buneme buonso; bua dina dia Nzambi ne diyisha dia buala buandi kabihendibu. Ne bobo badi ne banfumu bena kuitabusha kababahetudi, bualu bua badi bana babo ba ma Kilisto; kadi, kudi kutamba buimpe, babakuatshile mudimu, bualu bua badi banulubuluila bintu badi bena kuitabusha ne badi banangibua. Uyishe bantu malu â, ubasengelela nʼau. Biayisha muntu diyisha dikuabo dia bualu bua Nzambi, ne bikaleye kai witabusha mei adi malenge, nga Mukelenge wetu Yesu Kilisto mene, ne kai witabusha diyisha dia bu mudi buimpe bua Nzambi; yeye udi mûshibue ne diambu, kai mumanye muanda, kadi udi usama muoyo bua kukonkangana ne bua kuelangana mpata, kudi kufuma mutshiaudi ne matandu ne bihendu ne blesheshi bibi, ne kutandangana kua bantu badi ne meshi abo moneka, ne bualu bulelela bumushibua munda muabo, badi batshinka ne, Buimpe bua Nzambi ntshihetelu tshia luhetu. Kadi luhetu ludi lutamba bulengele ludi buimpe bua Nzambi busangisha ne mutshima muhole; bua katuakalua ne tshintu ha buloba ebu, ne katuena bamanye mua kumukahu ne tshintu; hadi hatuikala ne bia kudia ne bia kuluata, netuikale ne mitshima mihole ne bintu ebi. Kadi bobo badi basue kuikala babanshi badi bahona mu kutetshibua kua munda ne mu buteyi ne mu nkuka ya bungi Idi mihote ne idi ibanyanga, bu yoyo mene idi inyisha bantu mu dibashihesha ne mu dibutuka. Bualu bua lukuka lua biuma ludi muji wa malu mabi a mishindu yonso; bidi bantu bakuabo badikebela ne bakasesuishibua mu nshila wa ditabusha, bakadisunsula mubidi wonso ne tunyinganyinga tua bungi. Kadi wewe, muntu wa Nzambi, nyema malu â; londa malu makane ne a buimpe bua Nzambi ne ditabusha ne dinanga ne ditantamana ne kalolo. Uluangane nvita mimpe ya ditabusha, ulamate ku muoyo wa tshiendelele, kuwakabikidibua ne kuwakitabushila Yesu ne dijukula dimpe ku mesu kua bamanyi ba bungi. Ndi nkuambila bikole ku mesu kua Nzambi udi uhesha bintu bionso muoyo, ne kua Kilisto Yesu wakajukula bualu buandi bimpe ku mesu kua Pontio Pilato; bua wewe utumikile mukenshi eu kui ne katoba, kui ne bilumbu tô ne ku dimueneka dia Mukelenge wetu Yesu Kilisto, didiye ulua kulesha mu bikondo biadi mene. Yeye udi Muena Bukole umuehele mutumbishibue, udi biandi Mukelenge wa bakelenge ne Nfumu wa banfumu; anu yeye udi kai mua kufua, udi wikala mu munya udi bantu kabai bamanye mua kufika kudiu, udi muntu kai muanze kuimona, ne udiye kai mumanye mua kumona kabidi; yeye ikale biandi ne buneme ne bukole bua tshiendelele. Amen. Udimushe bantu badi babanshi mu tshikondo tshia mpindiu, bua bobo kabadisu, kabateki ditekemena diabo kudi bubanshi budi mua kujimina tshituha tshihi; kadi batekemena Nzambi, udi utuha bintu bionso bivula bua tuetu kusanka nʼabi. Bobo benzele bakuabo bimpe, bikale ne bubanshi bua bienzedi bimpe; badilongolole bua kuhangana bintu; basue kuikala ne bakuabo luse; badibutshile bidi bitekibua bimpe bua matuku alualua, bua bobo balamate muoyo udi muoyo wa bushua mene. Wewe Timote, ulame tshiakakuhebua; ehuka ku biakulakula bia hatuhu ne ku mpata ya bantu badi ne lungenyi ludibo batuhakana ne, Ndulelela; bakuabo hakitabushabo lungenyi elu, bakahambuka bualu bua ditabusha. Ngasa ikale nʼenu. Paulo, mupostolo wa Kilisto Yesu, bua disua dia Nzambi, bu mudi mulayi wa muoyo wa mu Kilisto Yesu, kudi Timote, muanʼanyi munanga: Ngasa, luse, ditalala bia kudi Nzambi Tatu ne kudi Kilisto Yesu Mukelenge wetu. Ndi nsakidila Nzambi, undi nkuatshila mudimu mu muoyo-mukese mutoke, bu muakenza bankambua banyi, mundi nkuvuluka tshi ne ndekelu mu kulomba kuanyi, butuku ne munya njinga kukutangila, nvuluka binsonshi biebe, bua meme kûshibua ne disanka. Ndi nvuluka ditabusha didi munda muebe didi kadi ne lubombo, diakadianjila kuikala munda mua kaku webe Loi ne mua mamu webe Eunike; ndi ngitabushishibua ne didi munda muebe kabidi. Bua bualu ebu adi musue kukuvuluisha bua wewe usonsole tshihedi tshia Nzambi, tshidi munda muebe bua kukutentekesha kua bianza bianyi. Bua Nzambi kakatuha nyuma wa buowa; kadi wakatuha nyuma wa bukole ne wa dinanga ne wa kudikanda. Nunku kufuishibu bundu ku mesu bua bumanyishi bua Mukelenge wetu, anyi bua bualu buanyi, meme muena lukanu wandi; kadi ukenge nʼanyi bua lumu luimpe bu mudi bukole bua Nzambi; wakatusungila, wakatubikila ne dibikila dia tshijila, kembu mudi midimu yetu mimpe, kadi bu mudi disungula diandi mene ne ngasa, wakatuheye mu Kilisto Yesu diambedi bikondo bia tshiendelele kabi bianze kuikalaku. Kadi katataka wakamueneshibua bualu bua dimueneka dia Musungidi wetu Kilisto Yesu, wakajimisha lufu, wakamuenesha muoyo wa tshiendelele ne udi kawi mua kunyanguka mu munya, bualu bua lumu luimpe, luakantekabo musambi ne mupostolo ne muyishi bualu bualu. Bua muanda eu ndi nkenga makenga â kabidi, kadi bundu kabuena bunkuata ku mesu; bua ndi mumumanye yeye unakuitabusha, ne nakuitabushishibua ne yeye udi ne bukole bua kulama tshintu tshianyi tshiteka tô ne dituku diadia. Ulamate tshidikishilu tshia mei malenge awakuamua kundi mu ditabusha ne mu dinanga dia mu Kilisto Yesu. Tshiotshi tshimpe tshîakatekibua utshilame bimpe ne dikuatshisha dia Nyuma Muimpe udi muikale munda muetu. Udi mumanye bualu ebu ne, Bantu bonso ba mu Asia bakumuka kundi; Fugelo ne Hêmogene badi munkatshi muabo. Mukelenge afue ba mu nsubu wa Onesifolo luse, bualu bua yeye wakasangasha muoyo wanyi misangu ya bungi, ne kakafua bundu bua lukanu luanyi; kadi hakadiye mu Lomo, wakankeba ne disuminyina, wakanmona (Mukelenge amuhe mua kuheteye luse kudi Mukelenge dituku diadia); ne bua bungi bua bintu biakankuatshisheye nʼabi ku Efeso, wewe udi mumanye bimpe. Nunku wewe muanʼanyi, ukoleshibue mu ngasa wa mu Kilisto Yesu. Malu awakunvua kundi munkatshi mua bamanyi ba bungi, malu â wafile kudi bantu badi mua kueyemenyibua, balua kukumbana mua kuyisha bakuabo kabidi. Ukenge nʼanyi bu mudi disalayi dimpe dia Kilisto Yesu. Kakuena disalayi didi dijingila ne malu a muoyo wa ha buloba henzadi mudimu wadi, bua kusankishadi wakadibuesha mu busalayi. Ne bikala muntu widikisha bualu mu manaya kabidi, kabena bamuasa tshifulu tshia buhitshi bikaleye kai muidikishe mu bualu bu mudi mikenshi ya manaya yamba. Tshidime udi wenza mudimu mukole wa mu budimi ngudi ne bua kudia bia mu budimi ku mpala kua bakuabo. Welangane meshi a malu andi nkuambila; bua Mukelenge neakuhe dijingulula mu malu onso. Uvuluke Yesu Kilisto, mubishibue ku lufu, kankanunuina ka Davidi, bu mudi lumu luimpe lunakakuambila, ne bua muanda walu ndi nkengeshibua makenga mabi a kudi bantu bu muenji wa bibi, tô ne mu nkanu minsuika; kadi dî dia Nzambi kadiena disuika. Nunku ndi nkankamana mu malu makole onso bua muanda wa bantu basungula, bua bobo bangate luhandu lua mu Kilisto Yesu ne butumbi bua tshiendelele. Dî edi didi mua kueyemenyibua ne, Bituikala bamane kufua nʼandi, netuikale ne muoyo hohamue ngandi. Bituikala tuditantamika, netukokeshe nʼandi kabidi; bituamuvila, yeye neatuvile kabidi; bituikala katui bena lulamatu, yeye udi ushala muena lulamatu, yeye kena mumanye mua kudivila. Uvuluishe bantu malu â, ubambila bikole ku mesu kua Mukelenge bua bobo kabatandanganyi bualu bua mei adi kâi ne mudimu ne adi ahambuisha bantu badi baunvua. Unanukile bua kudifila mujalame, bu muena mudimu udi kai ne bua kufua bundu, uludikile bantu nshila mululame mu dî dia Nzambi dia bushua. Kadi ehuka ku biakulakula bia hatuhu; bualu bua benʼabi nebatambe kudiunda mu malu adi kâi anemekela Nzambi; ne mei abo neavulangane bu mputu wa lubangu; Humenayo ne Fileto badi munkatshi muabo; bobo bakamana kuhambuka mu nshila wa mei malelela, bamba ne, Kubika kua bantu ku lufu kuakumana kulua, ne badi banyanga ditabusha dia bakuabo. Kadi bishimikidi bikole biakateka Nzambi bidi bijalama, bidi ne tshimanyishilu etshi ne, Mukelenge udi mumanye badi bandi; ne, Muntu yonso udi utela dina dia Mukelenge ûmuke biandi ku malu mabi. Mu nsubu munene kamuena anu bitekelu bia ngolo ne bia argent, kadi mudi bia mitshi ne bia buloba kabidi; bikuabo biteka bua buneme ne bikuabo biteka kabi bua buneme. Nunku biumusha muntu malu mabi â munda muandi, yeye neikale bu tshitekelu tshiteka bua buneme, tshia tshijila, tshikumbane mudimu wa mukelenge, tshilongolola bua mudimu muimpe wonso. Kadi unyeme nkuka ya bansongalume; londa ku nyima kua buakane, ditabusha, dinanga, ditalala, hohamue ne badi babikila dinu dia Mukelenge ne mitshima mitoke. Kadi uhidie dikonkangana dia malu mahote ne a badi kabai bayishibua, Umanye ne adi alela matandu. Muhika wa Mukelenge kena ne bua kutandangana, kadi ikale biandi ne kalolo kudi bantu bonso, ikale muakane mua kuyisha bantu, ikale ne lutulu; adimushe badi badimanyika bu baluisha ne mutshima wandi muhuekele; ne bumue Nzambi neakudimune mitshima yabo ku dimanya dia bualu bulelela; ne bobo nebahingane ku meshi mahole, bamane kudiluhula mu mateyi a diabolo, bakadi bakuatshibua kudiye bua kuenza bu mu disua diandi. Kadi umanye bualu ebu ne, Halua matuku a kunshikidilu, malu makole nealue. Bantu nebikale badisui, banangi ba biuma, baditumbishi, badileshi, bahendi ba Nzambi, kabai batumikila mei a baledi babo, kabai ne kusakidila, kabai ne tshijila, kabai banangi ba bana babo, bashihi ba bihungidi, bena bunsonge, kabai mua kudikanda, bena luonji, kabai basue malu mimpe, nebikale batungidianganyi, bena lukuluku, bûshibui ne diamba, banangi ba masanka, kabai banangi ba Nzambi; nebikale ne tshimuenekelu tshia buimpe bua Nzambi, kadi bamane kudiula bukole buabu; umuke biebe kudi bantu aba kabidi. Bua munkatshi mua bantu aba mudi badi babombelela mu nsubu bua babueshe bakashi bahote mu buhika badi bûle tente ne malu mabi, badi bahambuishibua ku mibi ya mishindu yonso; badi bayilayila misangu yonso, kadi tshiendelele kabena bamanye mua kufika ku dimanya dia bualu bulelela. Bu mudi Yane ne Yambele bakatantamena Mose, nunku bobo kabidi badi batantamena bualu bulelela; mbantu mene badi ne meshi abo moneka, kabai bajadikibua mu ditabusha diabo. Kadi bobo kabena mua kuhita ku mpala; bualu bua buhote buabo nebumueneke ku mesu kua bonso, bu muakamueneka buhote bua bantu aba bakuabo. Kadi wewe wakalonda diyisha dianyi, bienzedi bianyi, bualu bunakahangidisha, ditabusha dianyi, lutulu luanyi, dinanga dianyi, kutantamana kuanyi, makengeshibua anyi ne makenga anyi; ne wakalonda malu akankuata ku Antiokia ne ku Ikonio ne ku Luseta, ne makengesha anakakenga ne mutshima wa dikima; ne Mukelenge wakampandisha munkatshi mua buonso buau. Ne bantu bonso badi basue kuikala bena kanemu mu Kilisto Yesu nebakengeshibue. Kadi bantu babi ne badingi ba bakuabo nebadiundadiunde mu malu mabi abo matuku onso, badingangana, badingila. Kadi wewe wikale mu malu awakayila ne awakeyemena ne, Nga bushua; umanya biebe bantu bakakuyishau; ku buana buebe wewe wakamanya Mukanda wa Nzambi, udi mumanye mua kukuvuisha muena meshi tô ne ku luhandu luakulua bua ditabusha dia mu Kilisto Yesu. Dî dionso dia mu Mukanda wa Nzambi didi difume munda mua Nzambi bu muhuya wandi, ne didi ne mudimu muimpe wa kuyisha bantu, ne wa kubabela, ne wa kubadimusha, ne wa kubalongesha mu buakane bua Nzambi; bua muntu wa Nzambi ikale mukumbashibue, mulongolola tshishiki bua midimu yonso mimpe. Ndi nkuambila bikole ku mesu kua Nzambi ne kua Kilisto Yesu, ulualua kulumbuluisha badi ne muoyo ne badi bafue, bua dimueneka diandi ne bua bukelenge buandi: Ambila bantu dî dia Nzambi mene; nanukila kubambila misangu miakane ne misangu idi kayi miakane; ubakande ku malu abo, ubabele, ubasengelele ne lutulu luonso ne diyisha. Bualu bua tshikondo netshilue hikalabo kabai bunvua diyisha dilenge ne lutulu; kadi bualu bua matshu abo adi asasakana, bobo nebadikebele bayishi ba bungi bu mudi disamina dibi dia mitshima yabo; nebumushe matshu abo ku malu malelela, nebasesukile ku nsumuinu. Kadi wikale ne meshi mahole mu malu onso, witabushe makenga, wenze mudimu wa butangadiki, ukumbashe mudimu webe wa Nzambi. Bualu bila ntshidi mpongolodibua bu mulambu wa bia kunua, ne tshikondo tshia tshimuangi tshianyi tshiafiki. Nakuluangana nvita mimpe, nakushikisha tshidikishilu tshia lubilu, nakulamata ditabusha; tshidi ku mpala mpindiu ntshifulu tshia butumbi tshia buakane bua Nzambi tshintekela, tshialua Mukelenge mulumbuludi muakane kumpa ditutu diadia; kena utshîmpa anu meme, kadi neashihe bonso kabidi badi basue dimueneka diandi. Wendeshe lukasa bua kulua kundi; bualu bua Dema wakandekela mumane kusua malu a ha buloba, wakaya ku Tesalonike; Kulesekene wakaya ku Galatia; Tito wakaya ku Dalamatia. Anu Luka nkayandi udi nʼanyi. Wangata Mâko, ulue nʼandi, bua yeye udi mukumbane mua kunkuatshisha mu mudimu wa Nzambi. Nakatuma Tukiko ku Efeso. Tshikutu, tshinakashîa ku Toa mu bianza bia Kâpo, ulue nʼatshi hawalua, ne mikanda kabidi, tshitambe mbiseba bidi ne mei mafundahu. Alesandelo, mutudi wa tshiamu tshikunze, wakatamba kungenzela bibi; Mukelenge neamufute bu mudi midimu yandi; wewe kabidi wikale mudimuke kudiye, bualu bua yeye wakatantamena mei etu bikole. Ku kudividila kuanyi kua kumudilu kakuakadi muntu wakimana nʼanyi hamue, kadi bonso bakandekela; bualu ebu kabubadibu kudibo. Kadî Mukelenge wakimana nʼanyi, wakankolesha; bua dî dia Nzambi dimanyishibue kuonso bua bualu buanyi, ne bua bonso ba bisamba bia bende badiunvue; nakabandishibua mukana mua nyama wa ntambue. Mukelenge neampandishe ku midimu yabo yonso idi mibi, neansungile tô ne ku bukelenge buandi bua mu diulu; butumbi buikale kudiye ku bikondo ne ku bikondo. Amen. Ela Pisikila ne Akula ne ba mu nsubu wa Onesifolo muoyo. Elasto wakashala ku Kolinto; kadi nakashîa Tofimo ku Melita ne disama. Wendeshe mua kulua kundi tshidimu tshia mashika katshi tshianze kulua. Eubulo ne Pude ne Lino ne Kulaudio ne bana betu bonso ba mu Kilisto badi bakutumina muoyo. Mukelenge ikale ne nyuma webe. Ngasa ikale nʼenu. Meme Paulo, udi muhika wa Nzambi ne mupostolo wa Yesu Kilisto, bualu bua kuitabushisha bantu bakasungulabo kudi Nzambi, ne bua dimanya dia tshishiki dia bualu bulelela bua mu buimpe bua Nzambi, mu ditekemena dia muoyo wa tshiendelele, udi Nzambi, udi kai mua kudinga, mulaye diambedi bikondo bia tshiendelele kabi bianze kuikalaku. Kadi mu bikondo biandi mene yeye wakamuenesha dî diandi mu kuamba kua di kuakafidibua kundi bu mudi mukenshi wa Nzambi Musungidi wetu. Mukanda eu udi mufundila Tito, muana wanyi wa bushua mu ditabusha dimue dia bonso. Ngasa ne ditalala bia kudi Nzambi Tatu ne bia kudi Kilisto Yesu, Musungidi wetu, bikale nʼebe. Bua bualu ebu nakakushîa mu Kulete, bua wewe kulongolola malu akadi mashale, ne bua wewe kusunguisha bakulu ku musoko ne ku musoko bu munakakuambila; bikalaku muntu udi kai mua kubandibua, udi ne mukashi umue, udi ne bana bandi badi bena ditabusha, badi kabai babandibua bua dinyanguka dia muoyo anyi bua huhidia. Bualu bua budi mukulu-mutangidi nʼabu mbua kuikala kai mua kubandibua, bu mudi mulami muteka kudi Nzambi; kikadi biandi muena tshitshu; kukuatshi tshishi lubilu; kikadi muena diyoyo bua malulu; kikadi mukumianganyi ne bakuabo; kikadi ne lukuka lua biuma. Kadi ikale biandi musankididi wa benyi; anange malu mimpe; ikale ne meshi mahole; enzele bantu bonso biakane; ikale muntu wa tshijila; adikande biandi; alamate dî didi mua kueyemenyibua didi bu mudi diyisha dia Nzambi, bua yeye amanye mua kusengelela bantu ne diyisha dilenge, ne mua kutuisha bena mpata. Bualu bua bena buhidia ba bungi ne bena biakulakula, ne bena mashimi badiku; mba munkatshi mua bena ditengula badi batambe kuikala nunku; budibo nʼabu mbua kubuikidishibua mishiku yabo; bobo badi bona ditabusha dia bena nsubu mijima, bayisha bantu malu adibo kabai ne bualu bua kubayisha, hua kuhetabo biuma bibihe. Umue wabo, muprofete wabo mene, wakamba ne, Bena Kulete badi bena mashimi misangu yonso, mbu nyama mibi, mbafuba ba lumpukusu. Bumanyishi ebu mbulelela. Bua muanda eu ubabele bikole, bua bobo bikale balenge mu ditabusha; kabitabushi nsumuinu ya Bena Yuda ne mikenshi ya bantu badi bumuka ku bualu bulelela. Bintu bionso bidi biakane kudi bantu badi ne mitshima mitoke; kadi kudi badi babike, badi kabai ne ditabusha, kakuena tshintu tshidi tshiakane; kadi meshi abo ne muoyo-mukese wabo mbioneka. Bobo badi bamba ne, Tudi bamanye Nzambi; kadi badi bamudiula ne bienzedi biabo; mbena tshinyangu, mbena buhidia, babengibue kadi Nzambi bua kuenza mudimu muimpe wonso. Kadi wewe wambe malu adi makanangane ne diyisha dilenge; ne balume bakulumpe bikale ne meshi mahole; bikale ne kanemu; bikale ne meshi mahuekele; bikale balenge mu ditabusha ne mu dinanga ne mu ditantamana. Muomumue bakashi bakulumpe bikale ne mitshima ya kanemu; kabikadi bena tshibandabanda anyi bahika ba maluvu; bikale bayishi ba malu adi mimpe; bua bobo balengeshe bansongakashi bua kunangabo babayabo ne bana bakalelabo; bua kuikala ne meshi mahuekele; bua kuikala kabai ne meshi a tshiendenda; bua kusala mudimu wa mu nsubu yabo; bua kuikala bimpe; kukokela babayabo, bualu bua dî dia Nzambi kadihendibu. Muomumue usengelele bansongalume bua kuikalabo ne meshi mahuekele. Wewe udileshe kudibo bu tshifuanyikishi mu midimu mimpe yonso; mu diyisha diebe kaikadi muoneke, wikale mudiholeshe, wikale ne mei malenge adi kâi mua kuhishibua; bua yeye udi ku luseke lua batuhumbishi afuishibue bundu, kai ne mua kuamba dî dibi bualu buetu. Usengelele bahika bua bobo bikale bakokele banfumu babo, ne babasankishe mu malu onso; kabikadi ne mpata; kabibi; kadi bikale ne lulamatu luimpe mu malu onso; bua bobo batumbishe diyisha dia Nzambi, Musungidi wetu, mu malu onso. Hualu bua ngasa wa Nzambi wakamueneka, mutuadile bantu bonso luhandu; utuyisha ne, Hatuahidia malu adi kâi a Nzambi ne nkuka ya ha buloba, tuikale ne meshi mahuekele ne makane ne a Nzambi hatutshidi ha buloba ebu, hatudi tuindila ditekemena dietu dia disanka, ne dimueneka dia butumbi bua Nzambi munene ne Musungidi wetu, Yesu Kilisto. Yeye wakadifila bua bualu buetu, bua kutuhikula ku malu mabi onso, ne bua kudilengeshila bantu badi mua kuikala bandi bine, bikala ne lukunukunu lua kuenza midimu mimpe. Wewe wambile bantu malu â onso, ubasengelele, ubabele ne bukokeshi buonso. Muntu kakuhetudi. Ubavuluishe bua kukokelabo banfumu ne bakokeshi, batumikile dî diabo, bikale balongolodibue bua mudimu muimpe wonso; kabakudi mei mabi bua muntu; kabikadi ne kutandangana: bikale ne buhole, baleshe bantu bonso kalolo konso. Bualu bua tuetu tuakadi bahote diambedi, tuakadi ne buhidia, tuakadi badingishibua, tuakadi tulonda nkuka ne masanka bia mishindu ya bungi; tuakadi tuikala ne lukinu ne mukau; tuakadi tukinyibua, tuakadi tukinangana. Kadi hakamueneka buimpe bua Nzambi, Musungidi wetu, ne dinanga diandi kudi bantu bonso; kembua midimu ya mu buakane ituakenza nkayetu, kadi bu mudi luse luandi wakatusungila, bualu bua diuvua dia kuedibua kua tshiakabidi ne bua mitshima mihia-mihia yakatuhabo kudi Nyuma Muimpe, wakatuitshikishila Nyuma Muimpe muvula bua Yesu Kilisto Musungidi wetu; bua hatuabingishibua bua ngasa wandi, tuetu tumanye mua kuvuishibua bahianyi bu mudi ditekemena dia muoyo wa tshiendelele. Dî edi didi mua kueyemenyibua; ne bua malu â ndi musue wewe kuâmba, mumanye ne, Nga bushua, hua bantu bakumana kuitabusha Nzambi bananukile mu midimu mimpe. Malu â adi mimpe ne adi avuishila bantu mushinga muimpe; kadi ehuka ku kuebeshangana kua malu mahote, ne ku mena a bankambua malongolola, ne ku kutandangana, ne ku kufuilangana bua mikenshi; malu â kena mamanye mua kuvuishila muntu mushinga muimpe, adi hatuhu. Muntu udi muedi wa mukoso, hawamudimusha musangu umue anyi misangu ibidi, umuhidie; mumanye biebe ne muntu wa mushindu eu wakahambuka mu nshila muimpe ne udi wenza malu mabi, muikale biandi mudihishe. Hanatuma Âtema anyi Tukiko kûdi, ndi musue wewe wambuluishe bua kulua kundi ku Nikopoli; bua nakudisunguila bua kushalaku tshidimu tshia mashika. Utume Zena, mumanyi wa mikenshi, ne Apolo ku mpala ku luendu luabo lubilu; bua kabahangi tshintu tshimue tshidibo nʼatshi bualu. Bantu betu bayile kabidi mua kunanukila mu midimu mimpe bua kuhetabo bintu bidibo nʼabi bualu; bua kabikadi bu bantu badi kabai bakuama mamuma. Bonso badi neanyi badi bakuela muoyo. Ela bonso badi batunanga mu ditabusha muoyo. Ngasa ikale ne buonso buenu. Paulo, umena lukanu wa Kilisto Yesu, ne Timote muanʼetu wa mu Kilisto, kudi Filemona munangibue ne muenu mudimu nʼetu, ne kudi Apia, muanʼetu mukashi wa mu Kilisto, ne kudi Âkipo, disalayi nʼetu dia Yesu, ne kudi ekelesia wa mu nsubu wandi: Ngasa ikale nʼenu ne ditalala bia kudi Nzambi Tatu wetu ne kudi Mukelenge Yesu Kilisto. Ndi nsakidila Nzambi misangu yonso, ntela dina diebe mu milombu yanyi; bualu bua nakunua lumu lua dinanga diebe, ne lua ditabusha diudi nʼadi mu Mukelenge Yesu ne kudi basanto bonso; bua buobumue buetu nʼebe mu ditabusha buenzeshe dimanya dilelela dia malu mimpe onso adi munda muenu, bualu bua Kilisto, Bua nakadi ne disanka dinene ne busambi bua dinanga diebe, bualu ba mitshima ya basanto yakakankauashibua bua bualu buebe, muanʼetm. Nunku, nasha meme ngikala ne dikima dia mu Kilisto bua kukuelela mukenshi wa bualu budi bukuakanyina, kedi udi ntamba kusua kukusengelela bualu bua dinanga; udi wamba bualu ebu mmeme Paulo, muetu mununu, ne katataka muena lukanu kabidi wa Kilisto Yesu. Ndi nkusengelela bua muanʼanyi wa mu Kilisto Onesimo unakuela mu lukanu luanyi. Diambedi yeye wakadi bu tshintu tshidi katshi tshilubuluka kûdi, kadi katataka udi bu tshintu tshidi tshilubuluka kûdi wewe ne kundi meme kabidi; nakamuhingisha kûdi, yeye muine, udi bu mutshima wanyi mene. Nakasua yeye ashale kundi, bua yeye angenzelenzele mudimu bua bualu buebe mu lukanu mundi bua lumu luimpe; kadi tshiakasua kuenza bualu tshi muanze kumanya mûdi wela meshi, bua buimpe buebe kabuikadi bua ku bukole, kadi bua mu disua diebe. Bumue bua bualu ebu mbuakamumushilabo kûdi tshituha, bua wewe wikale nʼandi tshiendelele; kembu muhika, kadi muhite muhika buimpe, muanʼenu munanga wa mu Kilisto, munangibue kundi tshishiki, kadi mutambe kunangibua kûdi, ne mu mubidi ne mu Mukelenge. Nunku biwambala bu mukuatshishanganyi nʼebe, umuitabushe bu mûdi ungitabusha meme. Kadi bikaleye mukuenzele bibi, anyi muikale nʼebe dibanza, udibale bu dianyi; meme Paulo nakufunda dî edi ne tshianza tshianyi: nenkufute; bua tshikuambidi bu mûdi wewe muine nʼanyi dibanza, muoyo webe mene. Bulelela, muanʼetu, mpeteku disanka dikumbana kûdi mu Mukelenge; ukankamasha mutshima wanyi mu Kilisto. Bualu bua adi ntekemena ditumikila diebe, nakukufundila nunku, adi mumanye ne wewe newenze malu matambe andi nkuambila. Kadi bualu bukuabo, undongoluele muaba wa kulala kabidi, ndi ntekemena bua kufikishibua kunudi bualu bua kulomba kuenu. Epafa, udi muenu lukanu nʼanyi mu Kilisto Yesu, udi nkutumina muoyo; ne Mâko ne Alistâko ne Dema ne Luka, benji nʼanyi ba mumudi badi bakutumina muoyo kabidi. Ngasa wa Mukelenge wetu Yesu Kilisto ikale ne nyuma wenu. Amen. Nzambi, mumane kuambila batatu mei andi kudi baprofete bandi kale mu bituha bia bungi ne mu biambidi bia bungi, kunshikidilu kua matuku â wakatuambila bietu dî kudi Muana wakatekeye muhianyi wa bintu bionso, wakafukeye nʼandi buloba kabidi. Yeye udi dinkenka dikole dia butumbi bua Tatu ne tshifuanyikishi mene tshia Bunzambi buandi, ne udi wimanyika bintu bionso ku dî dia bukole buandi; hakamaneye kuhetela bantu diuvua dia ku malu mabi abo, wakashikama ku tshianza tshia bukole tshia Mutambe Bunene wa mulu. Bua malu au onso Yesu wakulua mutambi wa banjelo buimpe, bualu bua wakahiana dina didi ditamba mena abo kutumba. Bualu bua Nzambi wakambila mukuabo kai wa banjelo bandi ne, Wewe udi Muana wanyi, Lelu eu nakukulela? Ne kabidi: Nengikale Tatu kudiye, Ne yeye neikale Muana kundi? Ne kabidi, hakalueye ne muanʼa bute ha buloba, yeye udi wamba ne, Banjelo bonso ba Nzambi bamutendelele. Yeye udi wamba bua banjelo ne, Udi ufuisha banjelo bandi mpehele, Ne bakuatshishi bandi ba mudimu ndimi ya kahia. Kadi bua Muana yeye adi wamba ne, Nzambi, nkuasa webe wa bukelenge udiku tô bikondo ne bikondo, Ne dikombo dia buakane ndikombo dia bukelenge buebe. Wewe wakusua malu makane ne udi ne malu mabi tshishi; Bua bualu ebu Nzambi, Nzambi webe mene, Wakuela manyi a disanka ba mutu hebe Ne diela dia manyi ditamba diakeleye bakuebe. Wakuamba kabidi ne, Wewe, Mukelenge, wakajadika bishimikidi bia buloba ku tshibangidilu, Ne bintu bia mu diulu bidi bienzedi bia bianza biebe. Bintu ebi nebijimine, kadi wewe udi ushala tshiendelele; Ne bionso nebikulukashe bu tshivualu; Ne wewe neubange bu tshilamba tshia kudibuikila, Bu tshibalu, ne nebikudimuke; Kadi wewe udi muomumue, Ne bidimu biebe kabiena bishika. Ne kudi mukuabo kai wa banjelo bandi wakuambeye munga musangu ne, Shikama biebe ku tshianza tshianyi tshia bukole, Tô ne hanuvuisha bena lukuna bebe Bu ditanda dia munshi mua makasa ebe? Banjelo bonso kabena nyuma mukuatshishi mitumibue bua kukuatshilabo badi bamba kuhiana luhandu mudimu, anyi? Bua bualu ebu butudi nʼabu mbua kutamba kudimuka ku malu atuakunvua bua bumue katulu kuhambuka. Bua bikala dî diakambibua kudi banjelo diakajadikibua, ne bikala bualu buonso bua dihambuka ne buhidia buonso biakahetela benji babi difutu diakanangane ne bubi, tuetu mene netuhanduke munyi, bituahetula luhandu bunene nunku, luakadianjila kuambibua kudi Mukelenge, luakajadika bua kutudi kudi bakalunvua kudiye? Nzambi kabidi wakamanyishangana nʼabo ne ku bimanyinu ne ku malu a kukema ne ku bienzedi bia bukole bia bungi ne ku bihedi bia Nyuma Muimpe biakababanyinabo, bu mudi disua diandi. Yeye kakateka buloba bua bantu bulualua, butudi tuamba bualu buabu, munshi mua banjelo. Kadi mukuabo wakatumanyisha mu muaba mukuabo, wamba ne, Muntu udi tshinyi, bua wewe udi umuvuluka, Anyi muana wa muntu, bua wewe udi umulama? Wakamukehesha kakese kudi banjelo, Wakamuasa tshifulu tshia butumbi ne buneme, Ne wakamuteka ku mutu kua midimu ya bianza biebe, Wakateka bintu bionso munshi mua makasa andi. Bualu bua mu dimutekela dia bintu bionso munshi muandi, kakashîa tshintu tshimue tshidi katshî tshitekibila munshi muandi. Kadi katataka katuena banze kutangila bintu bionso bitekibua munshi muandi. Kadi tudi tumutangila yeye wakakeheshibua kakese kudi Banjelo, Yesu mene, bualu bua dikenga dia lufu muashibue tshifulu tshia butumbi ne buneme, bua ku ngasa wa Nzambi alabuile muntu yonso lufu. Bua bualu buakadi buakane kudiye, bua bualu buandi bintu bionso bidiku, ne bintu bionso bidi bifukibua ku bukole buandi, hakalomboleye bana ba bungi ku butumbi, bua kuvuisha kapitene ka luhandu luabo mu buakane buonso ku makenga. Bualu bua yeye udi ujidila ne bobo badi bajidibua kabidi, bonso badi ba Tatu umue: bua bualu ebu kena ufua bundu bua kubabikila ne, Bana betu, wamba ne, Nengambile bana betu dina diebe, Munkatshi mua bena ekelesia nengimbe misambu ya kukutumbisha nʼai. Ne udi wamba kabidi ne, Meme nengikale mu eyemena. Ne udi wamba kabidi ne, Ke meme eu ne bana bakumpabo kudi Nzambi. Bualu bua bana bakuabanyangana mubidi ne mashi, yeye muine kabidi wakadiangatshila bintu binʼebe muomumue; bua ku lufu luandi yeye amuvuishe tshianana udi ne bukole bua lufu, ndiabolo mene; ne bua yeye ahikule bonso aba bakadi bakuatshibue mu buhika matuku onso a muoyo wabo bua ditshina diabo dia lufu. Bua bulelela, kena ukuatshisha banjelo, kadi udi ukuatshisha tunkanuniuna tua Abalahama. Nunku buakadiye nʼabu mbua kufuanyishibua bu bana babo mu malu onso, bua yeye alue muakuidi munene wa luse ne wa kueyemenyibua mu malu adi a Nzambi, bua kufileye milambu ya kubuikidila nʼai bantu mibi yabo. Bualu bua yeye nkayandi wakakenga hakateyibueye, yeye udi mumanye mua kukuatshisha badi bateyibua. Nunku, bana betu ba tshijila, babanyanganyi ba dibikila dia mu diulu, nuelangane meshi bua Mupostolo ne Muakuidi Munene wa dijukula dia ditabusha dietu, Yesu mene; wakadi wa kueyemenyibua kudi wakamuteka mu mudimu, bu muakadi Mose kabidi mu nsubu mua Nzambi muonso. Bualu bua yeye wakubadibua muakanangane ne butumbi butambe bua Mose, bualu bua wakibaka nsubu udi ne butumbi butambe butumbi bua nsubu. Bualu bua nsubu yonso udi muibakibue kudi mukuabo, kadi wakibaka bintu bionso nNzambi. Bulelela, Mose wakadi wa kueyemenyibua mu nsubu wa Nzambi muonso bu muena mudimu, bua kuikaleye tshimanyishilu tshia malu akadi amba kuambibua ka nyima; kadi Kilisto wakadi wa kueyemenyibua bu Muana ku mutu kua nsubu wa Nzambi; tuetu tudi nsubu wandi, bitualamata ku dikima dietu ne ku kutumbila kua ditekemena dietu bikole tô ne kunshikidilu. Bua bualu ebu, bu mudi Nyuma Muimpe wamba ne, Lelu eu, binunvua dî diandi, Kanukoleshi mitshima yenu, bu muakenzabo mu dinfikisha dia munda, Bu muakadi dituku dia ditetshibua diabo mu tshihela, Kuakantetaku batatu benu bua kumanya mudi bujalame buanyi, Ne bakamona midimu yanyi bidimu makumi anai. Ka nakadi ne ba mu tshikondo etshi tshishi Ne nakamba ne, Badi bahambuka mu mitshima yabo misangu yonso, Ne kabakamanya nshila yanyi; Bu munakaditshiha mu tshishi tshianyi ne, Kabena babuela mu dikisha dianyi. Bana betu, nudimuke bua bumue kakulu kuikala umue wenu udi ne mutshima mubi wa buhidia munda muandi, mu dilekela diandi dia Nzambi wa muoyo; kadi nukoleshangane mitshima yenu ku dituku ku dituku hatshidibi bikidibua ne, Lelu, bua mukuabo wenu kakoleshibu ku kudinga kua bubi. Bua tuetu tuakulua babanyanganyi ne Kilisto, bitualamata ku tshibangidilu tshia dieyemena dietu tô ne kunshikidilu; hambabo ne, Lelu, binunvua dî diandi, Kanukoleshi mitshima yenu, bu muakenzabo mu dinfikisha dia munda. Bua banganyi, hakunvuabo dî dia Nzambi, bakafikisha munda muandi? Kabobo bonso bakaluhuka mu Ejipitu ne Mose kabakenza nunku, anyi? Ne yeye wakadi ne banganyi tshishi bidimu makumi anai? Katshiakadi kudi bantu aba bakenza bibi, bena mibidi yabo yakahona hanshi mu tshihela, anyi? Ne yeye wakaditshiha kudi banganyi ne, Kanuena nubuela mu dikisha dianyi, anu kudi bantu aba bakadi ne buhidia, nasha? Ne tudi tutangila ne, Bobo kabakamanya mua kubuelamu bualu bua buhidia buabo. Nunku, tutshine bietu, bakavua bamane kutushila mulayi wa tuetu kubuela mu dikisha diandi, bumue umue wenu kalu kumueneka bu mudiye kai mufikeku. Bulelela, tuakadi ne lumu luimpe luambibue kutudi bu muakadibo nʼalu lubambila kabidi; kadi dî diakunvuabo kadiakabakuatshisha, bualu bua kadiakusangishibua ku ditabusha ne bantu bakadiunvua. Bualu bua tuetu bakitabusha tudi tubuela mu dikisha, bu muakuambeye ne, Bu munakaditshihisha mu tshishi tshianyi ne, Bobo kabena babuela mu dikisha dianyi, nasha midimu yandi mishikishibue ku tshibangidilu tshia buloba. Bua yeye wakuamba mu muaba mukuabo buala bua dituku dia muanda mutekete nunku ne, Nzambi wakikisha kabidi dituku dia muanda mutekete ku midimu yandi yonso, ne mu muaba au kabidi ne, Kabena babuela mu dikisha dianyi. Nunku kutshidi kushala bua bakuabo babuelemu, ne bua bantu bakadi ne lumu luimpe luambibua kudibo diambedi kabakabuelamu bua buhidia buabo, yeye udi Usungula dituku dikuabo ne, Lelu, Wamba mu Misambu ya Davidi musangu mumane kuleha mule nunku (bu muakambibua diambedi) ne, Lelu binunvua dî diandi, Kanukoleshi mitshima yenu. Bualu bua bu Yoshua mubahe dikisha, kakadi kuamba ku nyima bua dituku dikuabo. Nunku kudi kushala dikisha dia Lumingu dia bantu ba Nzambi. Bualu bua wakamana kubuela mu dikisha diandi, yeye muine wakikisha kabidi ku midimu yandi bu muakikisha Nzambi ku midima yandi yeye. Nunku tutshintai bietu bua kubuela mu dikisha adi, bua muntu kahonyi mu kulonda kua tshifuanyikishi tshiotshimue tshia buhidia. Bualu bua dî dia Nzambi didi ne muoyo ne bukole, didi dihita muele wonso musakisha nseke ibidi kutua, didi ditubula tô ne ku dihandulula dia muoyo ne nyuma, ne dia manungu ne buongo bua mikuha, didi dijingulula lukasa meshi ne mata adi mutshima musue kuenza. Ne kakuena tshintu tshifukibua tshidi katshi tshimueneshibua ku mesu kuandi, kadi bintu bionso bidi butaka ne bibuluka ku mesu kua utudi nʼandi ne bualu. Bualu bua tuetu tudi ne muakuidi munene wakuhita mulu onso, Yesu Muana wa Nzambi mene, tulamate dijukula dia ditabusha dietu. Bualu bua katuena ne muakuidi mimene udi kai mumanye mua kukenga nʼetu mu matekete etu, kadi tudi ne umue wakuteyibua mu mata onso muomumue atudi tuteyibua nʼau, kai ne bubi. Nunku, tusemene ne dikima hehi ne nkuasa wa butumbi wa ngasa, bua tuetu tuhete luse ne bua tusangane ngasa bua kutukuatshisha mu tshikondo tshia dikengela dietu. Bualu bua muakuidi mimene yonso, muangatshibue munkatshi mua bantu, udi ubueshibua mu mudimu bua kukuatshisha bantu mu malu a kudi Nzambi bua yeye afile bintu bihebua ne milambu mishiha bua mibi, udi mumanye mua kuikala ne lutulu kudi bahote ne kudi bahambuki, bualu bua yeye muine udi musuikibue ku butekete; ne bua bualu ebu yeye udi ne bualu bua kufila milambu bua mibi yandi kabidi muomumue ne ya bantu. Muntu kena udiangatshila buneme ebu nkayandi, kadi udi ubuangata hakabikidibueye kudi Nzambi bu muakabikidibua Alona kabidi. Nunku, Kilisto kabidi, kakaditumbisha bua kuvuishibua muakuidi munene, kadi wakamutumbisha nyeye wakamuambila ne, Wewe udi Muana wanyi, Nakukulela lelu eu; bu mudiye wamba kabidi mu muaba mukuabo ne, Wewe udi muakuidi tshiendelele Wa ku mulongo wa Melekisedeke. Nyeye mu matuku a mubidi wandi wa ha buloba, hakatendeleleye ne mitendelelu ne misengelelu misangisha ne muadi mukole ne binsonshi kudi yeye wakadi ne bukole bua kumusungila ku lufu, ne hakamunvuilabo bua ditshina diandi dia Nzambi; nasha yeye muikale Muana, wakayila ditumikila ku malu akakengeye nʼau. Hakavuishibueye ne buakane buonso, yeye wakalua muenzeshi wa luhandu lua tshiendelele kudi bonso badi bamutumikila; wakidikibua kudi Nzambi muakuidi mimene wa ku mulongo wa Melekisedeke. Bua bualu buandi tudi ne malu a bungi a kuamba ne malu makole ha kunujinguluila, bualu bua nuenu nuakulua ne mahaha. Bualu bua musangu wakamana kuleha unuakadi kuikala bayishi, kadi nudi ne bualu kabidi bua bakuabo banuyishe nuenu mayisha a kumudilu a tshibangidilu tshia mei mamba kudi Nzambi; ne nuakulua bu badi ne mabele bualu, kanuena bu badi ne bia kudia bikole bualu. Bualu bua muntu yonso udi wamua mabele kena muanze kujalama mu dî dia buakane, bualu bua utshidi muana mukese. Bia kudia bikole bidi bua bantu bakole, bia bobo mene badi ne meshi abo mibidila a kujingulula nʼau tshidi tshimpe ne tshidi tshibi, bualu bua bakalonda malu makane. Nunku, tushîe diyisha dia malu a tshibangidilu a Kilisto ku nyima, tuyai tô ne ku buakane bua tshishiki; katuteki tshiakabidi bishimikidi bia kukudimuna kua mutshima ku midimu mifue, ne bia ditabusha dia kudi Nzambi, ne bia diyisha dia kubatiza, ne bia ditentekesha dia bianza, ne bia dibika dia bafue, ne bia dilumbuluisha dia tshiendelele. Netuenze bualu ebu, bitabusha Nzambi. Bua muanda wa bantu aba bakatokeshibua mu munya wa Nzambi musangu umue tshiendelele ne bakalabula diha dia mu diulu, bakavuishibua babanyanganyi ba Nyuma Muimpe, bakambula dî dimpe dia Nzambi ne makole a tshikondo tshilualua, ne hashishe bakalekela malu â, kubahingasha tshiakabidi kudi dikudimuna dia mutshima kakuena mua kuenjibua tshiendelele, bualu bua badi badishihela kabidi Muana wa Nzambi ku mutshi mutshiamakane, ne badi bamufuisha bundu ku mesu kua bantu. Bualu bua buloba buakamana kumina nvula wakaloka ha mutu habu misangu ya bungi ne budi bumenesha midioko idi ikuatshisha bantu badibo babudimina, budi buangata disanka kudi Nzambi; kadi bikala buloba bumenesha meba ne nyinyʼa tshisonga, budi buhidibua ne budi hehi ne mulau; kunshikidilu kuabu nkuhia. Kadi, bananga betu, tudi tuitabushishibua malu mahite buimpe bua bualu buenu, malu adi alondangana ne luhandu, nasha tuetu tuamba nunku. Bualu bua Nzambi kena uhanga buakane bua kuhueye muoyo wa mudimu wenu ne wa dinanga dinuakalesha bua dina diandi, hanuakakuatshila basanto mudimu ne hanutshidi nubakuatshishau. Tudi basue muntu ne muntu wa munkatshi muenu aleshe disuminyina diodiumue bua kuheta tshiuwidi tshia ditekemena tô ne kunshikidilu; bua kanulu bienu bahungidi, kadi nulue bidikishi ba badi bahiana milayi bua ditabusha ne lutulu. Hakalaya Nzambi Abalahama mulayi wandi, hualu bua yeye kakadi ne mukuabo mumuhite bunene bua kuditshiheye kudiye, wakaditshiha mu dina diandi yeye, wamba ne, Bulelela, hanasankisha, nenkusankishe wewe; hanavudisha, nenkuvudishe wewe. Nunku, bualu bua yeye wakananukila kuikala ne lutulu, wakaheta mulayi. Bua bantu badi baditshiha kudi udi mubahite bunene, ne mu matandu abo onso mutshihu wabo udi ujadika bualu tshiendelele. Nunku, Nzambi, hakasueye kutamba kulesha bahianyi ha milayi disua diandi didi kadi mua kukudimuka, wakateka kuditshiha kuandi hankatshi habo; bua ku malu abidi adi kâi mua kukudimuka, adi Nzambi kai mumanye mua kushimamu, tuikale ne ditantamika dikole dia mutshima, tuetu mene bakanyema bua kulamata ditekemena diakatekabo ku mpala kuetu. Nditekemena ditudi nʼadi bu luongo lua muoyo wetu, didi dikuata bikole, didi dishindama, didi dibuela tô ne munda mua muaba udi ku nyima kua tshilulu tshikudika, kuakabuela Yesu bu mudianjidi bua bualu buetu, mumane kulua muakuidi mimene tshiendelele wa ku mulongo wa Melekisedeke. Bualu bua Melekisedeke eu, mukelenge wa Salema, muakuidi wa Nzambi Mutambe Bunene wa mu diulu, wakasangakana ne Abalahama hakadiye uhingana ku kushiha kuandi kua bakelenge, ne wakamusankisha. Kudiye kabidi, Abalahama wakabanyangana nʼandi tshia dikumi tshia bintu bionso (diambedi muikale mukudimuna dina ne, Mukelenge wa buakane; hashishe kabidi, udi biandi Mukelenge wa Salema, kuamba ne, Mukelenge wa ditalala; kai tatu, kai mamu, kai bankambua, kai tshibangidilu tshia matuku anyi nshikidilu wa muoyo, kadi muvuishibue bu Muana wa Nzambi) udi muikale muakuidi tshiendelele. Nuelangane meshi bu muakadi bunene bua muntu eu, wakadi Abalahama, nkambua wetu, muhe tshia dikumi tshia mu bintu bitambe buimpe biakanyengeye mu nvita. Ne bobo mene ba ku bana ba Lewi badi bangata mudimu wa muakuidi badi ne mukenshi wa kuangatabo bia dikumi kudi bantu bu mudi mikenshi nuambe, kudi bana babo mene, nasha bobo bine bafume ku tshimono tshia Abalahama; kadi yeye udi kai ne bankambua bandi babadibua kudi Bena Lewi, wakangata tshia dikumi tshia bintu kudi Abalahama, ne wakasankisha udi ne milayi. Kadi kakuena mpata bua udi utamba bukese udi usankishibua kudi udi umutamba bunene. Kunoko badi bafua badi bangata bia dikumi, kadi kuakua umue udi ubiangata udibo batuambila ne, Utshidi ne muoyo. Ne, bua kuamba nunku, Lewi mene udi wangata bia dikumi, wakabifila mu difila dia Abalahama; bualu bua wakatshidi mu tshimono tshia tatu wandi, hakamusangana Melekisedeke. Nunku, bu buakane bujalame buikaleku bua buakuidi bua Bena Lewi (bua munshi muabu bantu bakuangata mikenshi) munyi muakadibo kukengela bua muakuidi mukuabo abike wa ku mulongo wa Melekisedeke, ne kabadibu wa ku mulongo wa Alona? Bualu bua bakakudimuka buakuidi, buakadiku mbua kukudimuna mikenshi kabidi. Bua yeye muena malu â adibo bamba, udi muena tshisamba tshikuabo, kuditshi kakuakadi muntu wakukuata mudimu wa ku tshioshelu. Bualu budi bumanyishibua ne, Mukelenge wetu wakuledibua mu tshisamba tshia Yuda, tshisamba tshivua Mose kai muambile bua bakuidi. Ne budi butamba kumanyishibua ne, Bikala munga muakuidi ubika mufuanangane ne Melekisedeke, wakavuishabo muakuidi, kembua mikenshi ya bantu ba ha buloba, kadi bua bukole bua muoyo udi kawi ujimina; bualu bua badi bamba ne, Wewe udi muakuidi tshiendelele, Wa ku mulongo wa Melekisedeke. Bualu bua diumusha dia mukenshi wa diambedi didiku bua butekete buau ne bua dihanga diau dia kutukuatshisha, (bua mikenshi kayakavuisha tshintu tshimue tshiakane tshishiki), ne dibueshibua ha muaba wau dia ditekemena ditamba buimpe didiku, ditudi tusemena nʼadi ha buihi ne Nzambi. Ne bualu bua buakuidi kabuenaku kabui ne kuditshiha, bulelela, Bena Lewi bakavuishibua bakuidi kabai ne kuditshiha; kadi Yesu wakavuishibua muakuidi ne kuditshiha kudi Yeye udi wamba bua bualu buandi ne, Mukelenge wakaditshiha, ne kena ukudimuna dî diandi, ne, Wewe udi muakuidi tshiendelele; nunku bua malu â kabidi, Yesu wakulua tshieya tshia dihungila didi ditamba buimpe. Ne bobo mene bakuvuishibua bakuidi ba bungi, bualu bua lufu ludi lubahumbisha bua kushalabo mu mudimu; kadi yeye, bualu bua udi ushala tshiendelele, udi ne buakuidi budi kabui bushintuluka. Nunku yeye udi ne bukole bua kusungila ne luhandu lujima badi basemena ha buihi ne Nzambi bua bualu buandi, yeye muikale ne muoyo tshiendelele bualu bua kubakuila. Bua muakuidi munene wa nunku wakadi mutukumbane, wa tshijila, kai ne bubi, kai mubiha, mutahuluke kudi bantu babi, muvuishibue ha mutu ha mulu; udi kai ne bualu, bu muakadi nʼabu bakuidi banene aba, bua kufila milambu ku dituku ne ku dituku, diambedi bua mibi yandi yeye, hashishe bua mibi ya bantu; bua yeye wakenza bualu ebu musangu umue tshiendelele hakadifileye. Bua mikenshi idi iteka bantu mu buakuidi bunene, bobo bikale ne butekete; kadi dî dia kuditshiha, diakadi ku nyima kua mikenshi, didi diteka Muana, udi mufuishibue muakane mujalame tshiendelele. Mu malu atudi tuamba ebu mbualu butamba bunene, Tudi ne muakuidi wa nunku wakashikama ku tshianza tshikole tshia nkuasa wa butumbi wa Mutambe Bunene wa mulu, udi muena mudimu wa muaba mutambe tshijila ne wa tshitendelelu tshilelela tshiakashimikabo kudi Nzambi, katshiakashimikibua kudi muntu. Bua muakuidi munene yonso udi musungudibue bua kufileye bintu bihebua ne milambu mishiha; nunku budi muakuidi munene eu nʼabu mbua kuikala ne bintu bia kufileye. Nunku, bu yeye muikale ha buloba, yeye kakadi kuikala muakuidi, nasha wa mushindu wonso; bualu bua bakuabo badiku badi bafila milambu bu mudi mikenshi yamba; badi benza mudimu wabo mu bintu bidi tshidikishilu ne mundidimbi bia bintu bia mu diulu; bu muakadi Mose mudimushibue hakambeye kuasa tshitendelelu, Nzambi wakamuambila ne, Tangila bua wewe wenza bintu bionso bu mudi tshidikishilu tshinakukulesha mu mukuna. Kadi mpindiu Kilisto wakuheta mudimu udi utamba butumbi, mûhete nunku bualu bua yeye udi mubatuanganyi wa tshihungidi tshidi tshitamba buimpe, tshiakahungabo ha milayi mitambe buimpe. Bualu bua bu tshihungidi tshia kumudia tshikale tshijalame katshi ne bualu, kabakadi kukeba muaba wa kuhunga tshibidi. Bualu bua Nzambi wakabadiula, udi wamba ne, Mukelenge udi wamba ne, Mona matuku adi alua Andi njadika tshihungidi tshihia-tshihia ne nsubu wa Isalele ne nsubu wa Yuda kabidi. Katshiena bu tshihungidi tshinakahunga ne batatu babo Mu dituku dinakabakuata ku tshianza bua kuluhuka nʼabo mu buloba bua Ejipitu; Bualu bua kabakashala mu tshihungidi tshianyi, Ne tshiakabatshuka, Mukelenge udi wamba. Bualu bua etshi ntshihungidi tshindualua kuhunga ne nsubu wa Isalele, Ku nyima kua matuku â, Mukelenge udi wamba, Nenteke mikenshi yanyi mu meshi abo, Nenyifunde kabidi ha mitshima yabo; Nengikale Nzambi wabo, Ne bobo nebikale bantu banyi. Ne kabena bayîshangana muntu ne muntu ne mukuandi, Ne muntu ne muntu ne muanʼabo, bamba ne, Umanye biebe Mukelenge; Bua bonso nebanmanye, Kudi udi mutambe kuhuekela tô ne kudi udi mutambe bunene munkatshi muabo. Bualu bua nengikale nʼabo luse mu malu mabi abo, Tshiena nvuluka mibi yabo kabidi. Mu kuamba kuandi ne, Tshihia-tshihia, wakavuisha tshihungidi tshia kunfudilu ne, Ntshikulukulu. Kadi tshintu tshidi tshilua tshia hale ne tshidi tshikulukasha tshidi ha buihi ne kujimina. Tshihungidi tshia kumudilu mene tshiakadi ne mikenshi ya kulonda mu kutendelela kuabo ne tshitendelelu tshiatshi, tshiakadi tshitendelela tshia ha buloba ebu. Bua tshitendelelu tshiakadi tshilongolola; mu muaba watshi wa kumudilu muakadi tshitekelu tshia muinda ne mesa ne mitanda ya mampa yakatekabohu; muaba udibo babikila ne, Wa Tshijila. Ne ku nyima kua tshilulu tshikudika tshibidi kuakadi muaba wa mu tshitendelelu udibo babikila ne, Muaba mutambe tshijila; wakadi ne tshioshelu tshia mananashi tshia ngolo, ne mushete wa tshihungidi mulamika ne ngolo ku nseke yonso; munda muau muakadi tshifuadi tshia ngolo tshitekelamu mana, ne mulangala wa Alona wakela ntonga, ne mabue akadi ne mei a tshihungidi mafundahu; ne ha mutu hau bakeluba ba butumbi bavuisha dileshi ha mutu ha muaba wa kubuikidila mibi; bua bintu ebi kakuena bualu bua kuamba katataka mudi tshintu ne tshintu. Hakadi bintu ebi bilongolola nunku, bakuidi badi babuela misangu yonso mu muaba wa kumudilu, benza mudimu wabo; kadi muakuidi munene udi ubuela mu muaba muibidi, yeye nkayandi, musangu umue ku tshidimu ku tshidimu; kena ubuela kai ne mashi adiye ufila bua bualu buandi ne bua matuhakana a bantu. Nyuma Muimpe udi ulesha bualu ebu hatoke ne, Nshila wa ku muaba mutambe wa tshijila kena muanze kuleshibua hatshidi tshitendelelu tshia kumudilu ne mudimu. Etshi ntshifuanyikishi tshia ku tshikondo etshi, tshidibo balonda hafilabo bintu bihebua ne milambu mishiha bidi kabi bimanye mua kuyuisha mutendeledi muakane mujalame, mu malu a muoyo-mukese; bualu bua bidi anu mikenshi ya ba ha buloba, mu malu a bia kudia ne bia kunua ne bia kuvua kua mishindu ne mishindu, yakatekabo tô ne ku tshikondo tshia kubilongolola. Kadi Kilisto, mumane kulua muakuidi munene wa mu bintu bimpe bilualua, bualu bua tshitendelelu tshitamba bunene ne buakane, katshî tshiasa ne bianza, tshidi bu kuamba ne, Katshiena tshia bifukibua ebi, kembua mashi a mbushi ne a bana ba ngombe, kadi bua mashi andi mene, wakabuela mu muaba mutambe tshijila musangu umue tshiendelele, mumane kuangatshila bantu dihikula dia tshiendelele. Bua bikala mashi a mbushi ne a balume ba ngombe, ne butue bua muana wa ngombe mukashi bumiamina ha bantu bakunyanguka, bibajidile tô ne ku dilengesha dia mubidi wa ha buloba, mashi a Kilisto, wakadifila kudi Nzambi kai ne ditoba, bua Nyuma wa Tshiendelele, neatambe misangu bungi munyi kulengesha muoyomukese webe ku midimu mifue bua kukuatshila Nzambi udi ne muoyo mudimu? Bua bualu ebu yeye udi mutuanganyi wa tshihungidi tshihia-tshihia, bua lufu lumane kulua bua dihikula diabo dia ku malu masambuka mikenshi adi munshi mua tshihungidi tshia kumudilu, babo bakubutidibua badi mua kuangata mulabi wa buhianyi bua tshiendelele. Bua hikalaku tshihungidi, budibo nʼabu mbua kulesha lufu lua mutshihungi. Bualu bua tshihungidi tshidi ne bukole bikalaku lufu lua muenʼatshi; katshiena ne bukole mu matuku atshidi mutshihungi ne muoyo. Nunku, tshihungidi tshia kumudia ka tshiakujadikibua katshî ne mashi. Bualu bua hakambilabo bantu bonso mukenshi wonso kudi Mose, bu mudi mikenshi yamba, wakangata mashi a bana ba ngombe ne a mbushi bohamue ne mai ne miosa mikunze ne hisopa, ne wakamiamina mukanda muine, ne bantu bonso, wamba ne, Au adi mashi a tshihungidi tshiakanuelela Nzambi mukenshi bualu buatshi. Wakamiamina tshitendelelu kabidi ne mashi muomumue, ne bintu bionso biakakuatabo nʼabi mudimu wa kutendelela. Ndi mua kuamba ne, Bintu bionso bidi bilengeshibua ne mashi, bu mudi mikenshi yamba, anu bikese bishala, ne bikalaku kakui kumatshisha kua mashi hanshi, kakuena kubuikidila kua mibi nasha. Nunku, buakadibo nʼabo mbua kulengesha bifuanyikishi bia bintu bia mu diulu ne bintu abi binakutela; kadi bintu mene bia mu diulu biakalengeshibua ne milambu mihite ei buimpe. Bualu bua Kilisto kakabuela mu muaba wa tshijila muasa ne bianza, mufuanangane ne muaba mulelela; kadi wakabuela mu diulu muine, bua kumuenekeye mpindiu ku mpala kua Nzambi bua bualu buetu; ne kena ne bualu bua kudifila ku musangu ne ku musangu, bu mudi muakuidi munene ubuela mu muaba mutambe tshijila ku tshidimu ku tshidimu ne mashi adi kâi andi; anyi buakadiye nʼabu mbua kukenga ku musangu ne ku musangu katshia buloba buajadikibua; kadi katataka musangu umue kunshikidilu kua bikondo, wakumueneshibua bua kujimisheye bubi ku kudifila kuandi bu mulambu. Bualu bua budi busunguila bantu bua kufuabo musangu umue, ne ku nyima kua hualu ebu kulumbulula kudiku; nunku, Kilisto kabidi, hakafidibueye musangu umue hua kutualeye mibi ya bantu ba bungi, neamueneke musangu muibidi mutahuluke ku bubi, kudi bantu badi bamuindila tô ne ku luhandu luabo. Bualu bua mikenshi ya Mose mikale ne mindidimbi ya bintu bimpe bilualua, kayi mikale tshifuanyikishi mene tshia bintu ebi, tshiendelele kayena mua kuvuisha badi basemena ba buibi ne Nzambi bakane tshishiki ne milambu ya muomumue ya ku tshidimu ku tshidimu, idibo bafila misangu yonso. Bu milambu ai mibavuishe bakane tshishiki, kabakadi kulekela kuifila, anyi? Bualu bua batendeledi balengeshibue musangu umue kabakadi ne dimuma dia mibi kabidi. Kadi mu milambu yaya mudi tshivulukidi tshia mibi ku tshidimu ku tshidimu. Bua mashi a ngombe ne a mbushi kêna mua kumusha mibi. Nunku, halueye ba buloba, Kilisto udi wamba ne, Kuakasua nyama mishiha ne bintu bifila, Kadi wakalongoluela mubidi, Kuakusanka mu milambu ya kuosha mijima ne ya kubuikidila nʼal bubi; Hashishe nakamba ne, Mana, na kulua, (Mu makanda muvunga udi ufundibua bua bualu buanyi), Bua kuenza disua diebe, Nzambi. Hambeye ku mutu aku ne, Kuakasua nyama mishiha ne bintu bifila ne milambu ya kuosha mijima, anyi ya kubuikidila nʼai bubi, ne kuakasankamu (bintu ebi bidi bifidibua bu mudi mikenshi yamba), hashishe yeye wakuamba ne, Nakulua bua kuenza bu mu disua diebe. Udi umusha bualu bua kumudilu bua kujadika buibidi. Mu disua edi tuetu tuakujidikibua bualu bua kufila kua mubidi wa Yesu Kilisto musangu umue tshiendelele. Muakuidi yonso udi wimana bulelela ku dituku ku dituku wenza mudimu wandi ne ufila ku musangu ku musangu milambu ya muomumue, yoyo mene idi kayi mua kumusha mibi tshiendelele; kadi yeye hakafueye mulambu umue bua mibi tshiendelele, wakashikama ku tshianza tshikole tshia Nzambi; ku musangu eu windila tô ne haluabo kuvuisha badi nʼandi lukuna ditanda dia munshi mua makasa andi. Bualu bua ku mulambu umue yeye wakuvuisha bantu badi bajidibua bakane tshishiki tshiendelele. Nyuma Muimpe udi utumanyisha bualu ebu kabidi, bua hakamaneye kuamha ne, Etshi ntshihungidi tshinahunga nʼabo; Ku nyima kua matuku â, Mukelenge udi wamba, Nenteke mikenshi yanyi mu mitshima yabo, Nenyifunde ha meshi abo kabidi, hashishe udi wamba ne, Tshiena nvuluka kabidi mibi yabo ne malu mabi abo. Kadi bikalaku kumusha kua mibi, kakuena kabidi kufila kua milambu bua bubi. Nunku, bana betu, bualu bua tudi ne dikima dia kubuela mu muaba wa tshijila bua mashi a Yesu, mu nshila wakatujidileye, nshila muhia-muhia ne wa muoyo, kuhita tshilulu tshikudika, kutshiamba ne, Mubidi wandi; ne bualu bua tudi ne muakuidi mutambe ku mutu kua nsubu wa Nzambi; tusemene bietu ha buihi nʼandi ne mutshima mulelela mu dimanya dijalame dia ditabusha, ne mitshima yetu mimiamina bua kulengesha kua muoyo-mukese mubi, ne mibidi yetu miuvue ne mai mimpe. Tulamate dijukula dia ditekemena dietu bua kaditshimbakanyi, bualu bua wakatuha mulayi udi wa kueyemenyibua. Tudielelangane meshi muntu ne muntu bua kuenzeshangana ku dinanga ne ku dienza dia bienzedi bimpe, katui tulekela bietu disangisha dietu bamue, bu mudi tshilele tshia bakuabo, kadi tukoleshangana mitshima, tutamba kuenza nunku bualu bua nudi numona dituku dia Mukelenge disemena ha buihi. Bua bituenza malu mabi bua disungula dia mutshima hatuakamana kuangata dimanya dia bushua, kakuena kushala kabidi munga mulambu bua kubuikidila nʼau mibi, kadi kudi kushala kuindila kukuabo kua dilumbulula kudi kukuatshisha buowa, ne kahia kakole nekoshe bahitshi bandi. Muntu wakuhetula mikenshi ya Mose udi ufua, kai mufuidibue luse, ku dî dia bamanyi babidi anyi basatu; nudi nuela meshi ne muntu neabadibue muakanyine dikenga ditambe misangu bungi munyi, nyeye wakudiata Muana wa Nzambi munshi mua makasa andi, ne wakubala mashi a tshihungidi akadiye ujidibua nʼau bu tshintu tshia tshianana ne wakuhenda Nyuma wa ngasa? Bua tudi bamumanye yeye wakamba ne, Kusombuela mbualu buanyi, nempingishile bantu difutu diabo, wakamba kabidi ne, Mukelenge nealumbuluishe bantu bandi. Mbualu bua buowa bua kuhona mu bianza bia Nzambi udi ne muoyo. Kadi nuvuluke matuku a diambedi munkatshi muau munuakatantamana mu diluangana dikole dia mu makenga, hanuakamana kutokeshibua mu munya; tshituha tshia makenga mbualu bua nuakavuishibua bu tshintu tshia kutangilatangilabo bua bihendu ne makenga; ne tshituha tshikuabo bualu bua nuakalua babanyanganyi ne bantu bakadi benjibua nunku. Bualu bua nuakafuila bakadi mu lukanu luse, ne nuakitabusha ne disanka dihaula dia bintu bienu, bualu bua nudi bamanye ne, Tudi ne tshintu tshitamba buimpe ne tshidi tshishala tshiendelele. Nunku, kanuimashi dikima dienu, didi dinuhingishila difutu dinene. Bualu bua nudi ne bualu bua kuikala ne didikankamika bua, hanuenza bu mu disua dia Nzambi, nudi mua kuangata mulayi. Bualu bua haleba musangu muihi. Yeye udi ulua nealue, kena unenga. Kadi muakane wanyi neikale ne muoyo bua ditabusha; Ne blalukeye tshia nyima, muoyo wanyi kawena usanka mu bualu buandi. Kadi tuetu katuena ba munkatshi mua badi baluka tshia nyima tô ne ku dibutuka, kadi tudi munkatshi mua badi ne ditabusha tô ne ku diheta dia muoyo. Ditabusha didi dimanya dia malu atudi tutekemena ne didi dijadika dia malu atudi katui bamone. Bua muanda wadi bakulu bakadi ne bualu buabo buambibua. Bua ditabusha tudi tujingulula ne buloba buakalongolodibua ku dî dia Nzambi, bua nunku bitudi tumona ku mesu kabiakufukibua ku bintu bidi bimueneka ku mesu. Bua ditabusha Ebele wakafila kudi Nzambi mulambu muhite wa Kana buimpe, bua bualu buau yeye wakadi ne bualu buandi buambibua ne, Yeye wakadi muakane, Nzambi wamba bua kuha kuandi, ne bua bualu buaku yeye mufue utshidi wakula. Bua ditabusha Hanoka wakumushibua ha buloba, wakatekibua ma diulu bua yeye katangidi lufu, ne kabakamusangana bualu bua Nzambi wakamuteka ma diulu; bualu bua ku mpala kua diumushibua diandi wakadi ne bualu buandi buambibua ne, Yeye wakasankisha Nzambi. Ne bikalaku kakui ditabusha, muntu kena mua kumusankisha; bualu bua muntu udi ulua kudi Nzambi budiye nʼabu mbua kuitabusha ne, Yeye udiku, ne udi mufutshi wa badi bamukeba. Bua ditabusha Noa, hakadiye mudimushibue bua malu akadi kâi manze kumuenebua, muenzeshibue ku dishina dia Nzambi, wakalongolola bualu bua kusungila nʼabu ba mu nsubu muandi; bua bualu ebu wakahisha ba ha buloba, wakalua muhianyi wa buakane budi bua ku ditabusha. Bua ditabusha Abalahama, hakabikidibueye wakatumikila bua kuyeye ku muaba wakadiye wamba kuangata bu buhianyi; wakaluhuka, kai mumanye kuakadiye uya. Bua ditabusha wakashikama mu buloba bua mulayi; bu adi ma buloba bua bende, wakashikama biandi mu nsubu wa bilulu, ne Isaka ne Yakoba, bahianyi nʼandi ba mulayi muomumue; bualu bua wakatekemena musoko udi ne bishimikidi, mulongolodi wau ne muibaki wau nNzambi. Bua ditabusha Sala muine kabidi wakangata bukole bua kuimiteye difu bidimu bia lulelu bimane kuhita, bualu bua wakabala wakamulaya dî edi ne, Udi wa kueyemenyibua. Nunku kabidi, kudi muntu umue, ne yeye bu mufile mene, bana bakaledibua bu mitoto ya mu diulu mu bungi buabo, ne bu nsenga ya ku muelelu wa mai manene idibo kabai bamanye mua kubala. Bantu aba bonso bakafua mu ditabusha kabai banze kuangata biakabalayabo, kadi bamane kubitangila ne kubinemekela ha bule, ne bamane kuitabusha ne, Tudi benyi ne bena luendu ha buloba ebu. Bua badi bamba malu a nunku badi balesha ne badi bakeba muaba udi wabo mene. Bu bobo bele meshi bua muaba wakumukabo, bakadi kuikala ne tshikondo tshia kuhinganaku, kadi katataka badi bajinga muaba mutambe buimpe, udi muaba mene wa mu diulu; nunku Nzambi kena ufua bundu bua bualu buabo bua kumubikilabo Nzambi wabo, bualu bua wakabalongoluela musoko. Bua ditabusha Abalahama, hakamutetabo, wakafila Isaka bu mulambu; yeye wakamana kuitabusha milayi ne disanka, wakadi ufila muanʼandi umuehele mulela; nyeye wakambibua bualu buandi ne, Nebabikile tunkanunuina tuebe mu Isaka; wakamanya ne, Nzambi udi ne bukole bua kumubisha munkatshi mua bafue mene, kuakamuangateye kabidi mu tshifuanyikishi. Bua ditabusha Isaka wakasankisha Yakoba ne Esau bua malu adi kâi manze kulua. Bua ditabusha Yakoba, hakadiye wamba kufua, wakasankisha muana ne muana ba Yosefe ne wakatendelela mueyemene ha dikombo diandi. Bua ditabusha Yosefe, hakalua lufu luandi ha buihi, wakamba bua dihatuka dia bana ba Isalele, wakela mukenshi kabidi bua bualu bua mifuba yandi. Bua ditabusha Mose, hakaledibueye, wakasokikibua kudi baledi bandi ngondo isatu, bualu bua bakamutangila muana mulengele ne kabakatshina mukenshi wa mukelenge. Bua ditabusha Mose, hakakoleye, wakahidia kubikidibua muana wa muana mukashi wa Palô; musungula kukengeshibua hamue ne bantu ba Nzambi ku mpala kua masanka a malu mabi a tshituha tshihi; ubala bihendu bidi bua Kilisto bu bubanshi bunene buhita bibutshidibue bia mu Ejipitu, bualu bua wakatangila tô ne ku dihingishila dia difutu. Bua ditabusha wakumuka mu Ejipitu kai utshina tshishi tshia mukelenge; bua yeye wakatantamana bu muakadiye utangila yeye udi kai umueneka ku mesu. Bua ditabusha yeye wakuenza kuhita kua Yehowa, ne kumiamina kua mashi, bua mushihi wa banʼa bute kabalengi. Bua ditabusha bakahita mu Mai Manene Makunze bu mudi ha buloba bume; hakateta Bena Ejipitu kuenza nunku, bakaminyibua mu mai. Bua ditabusha ngumbu ya Yeleko yakashimbuka hakamanabo kuinyunguluka matuku muanda mutekete. Bua ditabusha Lahaba, mukashi wa masandi, kakashihibua ne bakadi ne buhidia, bualu bua wakabuesha batentekedi mu nsubu ne ditalala. Nengambe tshinyi kabidi? Bua musangu neunkebe ha kulonda bua Gideona, Balaka, Shimishona, Yefeta, Davidi, ne Samuele ne bua baprofete. Bua ditabusha diabo bobo bakatekesha makelenge, bakenza malu makane, bakaheta milayi, bakabuikila mukana mua nyama ya ntambue; bakajima bakole bua kahia, bakahanduka ku ditua dia muele wa nvita, mu butekete bakandamuka bakole, bakalua bakole mu nvita, bakihata bisumbu bia bena nvita ha bende. Bakashi bakangata hafue babo ku dibisha dia ku lufu; bakuabo bakashihibua ne mikumu, kabai bitabusha luhandu; bua bamanye mua kuangata dibisha dia ku lufu didi ditamba buimpe. Bakuabo bakangata diteta dia tuseku ne mikumu, ne dia nkanu ne nsubu ya nkanu ha mutu. Bakakumibua mabue, bakakoshibua hankatshi ne nsele, bakateyibua, bakashihibua ne muele wa nvita, bakendakana baluate biseba bia mikoko ne biseba bia mbushi, bakengela bintu, bakengeshibua, benjibue bibi, (bakadi ba ha buloba kabai babakanyine) bendakana mu bihela ne mu mikuna ne mu nyongola ne mu mena a mu buloba. Ne bantu aba bonso, bamane kuikala ne bualu buabo buambibua bua ditabusha diabo, kabakangata mulayi; Nzambi wakalongolola tshintu tshitamba buimpe bua bualu buetu, bua bobo kabavuishibu bakane tshishiki kabai nʼetu. Nunku, tuetu kabidi, bualu bua tudi tunyungulukibua ne tshisumbu tshinene nunku tshia bamanyi, tumushai bujitu buonso, ne malu mabi adi bualu butekete bua kutulenduisha, tuidikishe ne kutantamana tshidikishilu tshietu tshia lubilu tshidi tshitekibua ku mpala kuetu, batangila kudi Yesu, mubandi ne mushikishi wa ditabusha dietu, yeye, bua disanka diakatekibua ku mpala kuandi, wakakankamana hakakengeye ka mutshi mutshiamakane, wakalengulula bundu, ne wakushikama ku tshianza tshikole tshia nkuasa wa butumbi wa Nzambi. Bua nuelangane meshi bua yeye wakukankamana mu ditontolola dia nunku dia bantu babi diakamutontololabo nʼadi, bua nuenu kanuhungidi, hikala batekete mu mitshima yenu. Nuenu kanuena banze kudimanyika mu nvita tô ne hahatuka mashi hanudi nuluangana ne malu mabi, ne nuakuhua muoyo bua disengelela, didi diyikilangana nʼenu bu bana balume ne, Muanʼanyi, kumonyi dikengesha dia Mukelenge bu bualu butekete, Ne kuikadi ne mutshima mutekete hakubeleye; Bualu bua Mukelenge udi ukengesha udiye munange, Udi ututa muana mulume yonso udiye witabusha. Nudi nudikankamika bua dikenga, Nzambi udi unuenzela bu bana bandi balela; bua muana kai udiku udi tatu wandi kai ukengesha? Binuikala kanui ne dikenga, didi bonso bavuishibue badiangatshi, nunku nudi bana ba masandi, kanuena bana balela. Buala bukuabo kabidi, tuakadi ne batatu ba mibidi yetu bua kutukengesha, ne tuakabanemeka; nunku katuena mua kutamba kukokela Tatu wa nyuma yetu, kuikala ne muoyo, anyi? Bulelela, bobo bakatukengesha matuku makese, bu muakuelabo meshi ne, Mbimpe; kadi yeye wakatukengesha bua kutukuatshisha, hua tuetu tuikale bangatshi ba tshijila tshiandi. Makenga onso, hatshidiuku, kêna amueneka kutudi bu disanka, kadi adi anu bu kanyinganyinga; kadi ku nyima adi akuamisha bantu badi benzeshibua kudiu mamuma a ditalala, mamuma a buakane mene. Nunku, nukoleshe bianza biakateketa ne binu bidi ne kaneke; nulongoluele makasa enu nshila milulame, bua mulema kakueyiboki, kadi asangale biandi. Nukebe kuheta ditalala ne bantu bonso, ne kujidibua kudi muntu kai nʼaku kena mumanye mua kutangila Mukelenge. Nutangile bimpe bua muntu kikadiku udi uhanga ngasa wa Nzambi, ne bua muji wa bululu mutoloka kaunutatshishi, ne bua bualu buau bantu ba bungi neboneke; ne bua kakuikadi muena masandi anyi muena tshikama bu Esau, wakahana bintu bia buanʼa bute ku katuha ka bia kudia. Bua nudi bamanye ne ku nyima hakasueye kuhiana disanka, bakamuhidia; bua kakasangana kaba ka kukudimuna nʼaku mutshima wa tatu wandi, nasha yeye munanukile kukukeba ne binsonshi ku mesu. Bua kanuakulua ku mukana udibo bamanye mua kulenga tshianza, wakatema kahia, anyi ku bufike ne ku midima ne ku tshihehele tshikole, ne ku dî dia mpungi ne ku tshiona tshia mei makole. Hakunvua bantu mei â, bakasengelela bua kabambidi dî dikuabo. Bualu bua bobo kabakadi batuala mukenshi wakabelelabo ne, Biadiata nyama mene mukuna, nebamushihe ne mabue; bumueneki ebu buakatamba kuikala ne buowa tô ne bakamba Mose ne, Ndi ntamba kutshina ne kuzakala. Kadi nuenu nuakulua ku mukuna wa Siona ne ku musoko wa Nzambi udi ne muoyo, Yelushalema wa mu diulu, ne ku misumba ya banjelo idi kayi mua kubadibua, ne ku disangisha dinene ne ekelesia bia banʼa bute badi ne mena abo mafunda mu diulu, ne kudi Nzambi, Mulumbuludi wa bonso, ne ku nyuma ya bantu bakane bakvuishabo bakane tshishiki, ne kudi Yesu, mutuanganyi wa tshihungidi tshihia-tshihia, ne ku mashi adibo bamiamina adi atamba mashi a Ebele kuakula bimpe. Nudimuke bua nuenu kanubidi udi wakula nʼenu. Bikalabo kabai bahanduke, hakahidiabo wakabadimusha ha buloba, kudi kutamba kumueneka ne tuetu katuena tuhanduka, badi bumuka kudi udi utudimusha mu diulu. Dî diandi diakazakasha buloba tshikondo atshi, kadi katataka wakutulaya wamba ne, Musangu umue mukuabo kabidi meme nenzakashe, kembuloba nkayabu, kadi diulu kabidi. Dî edi, Musangu umue mukuabo, didi ditulesha diumusha dia bintu bidi bizakashibua bu bintu bienjibua, bua bintu bidi kabi bizakashibua bishale. Nunku, bualu bua tuetu tudi tuangata bukelenge budi kabui bumanye mua kuzakashibua, tuikale bietu ne disakidila, ditudi bamanye mua kukuatshila Nzambi udi unsankisha mudimu ne kunemekela ne ditshina; bualu bua Nzambi wetu udi kahia kadi kashidisha. Dinangangana dia bana babo ba ma Kilisto dikaleku. Kanuhu muoyo bua kulesha benyi luse, bua bualu ebu bakuabo bakasangila banjelo, kabai babamanye. Nuvuluke badi mu nkanu, bu munudi basuika nʼabo; nuvuluke badibo benzela bibi, bua nuenu nutshidi mu mibidi. Dibaka dikale dinemekibua munkatshi mua bantu bonso, bulalu kabunyanguki; Nzambi nealumbuluishe bena masandi bajike ne bena masandi babake. Mioyo yenu kaikadi ne lukuka lua biuma, nuikale ne disanka ne bintu binudi nʼabi, bualu bua Nzambi muine wakuamba ne, Tshiena nkulekela, nasha kakese, tshiena nkushîa tshianana. Nunku, tudi tuamba ne dikima ne, Mukelenge udi mukuatshishi wanyi; tshiena ntshina; Muntu neangenzele tshinyi? Nuvuluke bantu bakanukokesha, bakanuambila dî dia Nzambi; nuela meshi a nshikidilu wa tshikadilu tshimpe tshia mioyo yabo, nuidikishe ditabusha diabo. Yesu Kilisto udi muomumue makelela ne lelu ne tshiendelele. Kanusesuishibu ku mayisha a bungi ne a bende; budi buimpe bua mutshima ujadikibue ku ngasa, kenku bia kudia biakadi kabi bikuatshisha bakadi benda nʼabi. Tudi ne tshioshelu, tshidi badi bakuata mudimu mu tshitendelelu kabai bamanye mua kudiaku. Bualu bua mibidi ya nyama, miena mashi adi muakuidi mimene ulua nʼau mu muaba wa tshijila bu mulambu wa kubuikidila nʼau mibi ya bantu idi yoshibua ku butshika kua tshitudilu. Nunku, Yesu kabidi, bua kujidileye bantu ne mashi andi, wakakenga ha bule ha tshibi tshia musoko. Nunku, tuye bietu kudiye kukala kua tshitudilu, batuala bihendu bia bualu buandi. Bua katuena ne musoko kunoku udi wikalaku tshiendelele, kadi tudi tukeba musoko ulualua. Nunku bua bualu buandi, tufilafile kudi Nzambi mulambu wa kumutumbisha nʼau, udi biau mamuma a mishiku idi ijukula ditabusha dia dina diandi. Kadi kanuhu muoyo bua kuenzelangana bimpe ne bua kukuatshishangana; bua Nzambi udi usanka ne milambu ya nunku. Nutumikile badi banukokesha, nubakokele; bua bobo badi bikale ne tshitabala bua mioyo yenu, bu bantu balua kubadila Nzambi bintu; bua bobo benze bualu ebu ne disanka, kabai ne manunganyi, bua bualu ebu kabuena bamukuatshisha. Nutulombele Nzambi; bua tudi tuitabushishibua ne tudi ne mioyomikese mimpe, tudi basue kuenda bimpe mu malu onso. Ndi nusengelela bua nuenu kutamba kuenza bualu ebu, bua meme mpingishibue kunudi lubilu. Nzambi wa ditalala wakabisha mulami munene wa mikoko munkatshi mua bafue kabidi ku mashi a dihungila dia tshiendelele, Mukelenge wetu Yesu mene, anuvuishe bakane tshishiki mu bualu buimpe buonso bua kuenza bu mu disua diandi, wenza munda muetu bualu budi buimpe ku mesu kuandi bita Yesu Kilisto; butumbi buikale kudiye ku bikondo ne ku bikondo. Amen. Bana betu, ndi nusengelela bua kunvua dî edi dia disengelela ne lutulu; bualu bua nakunufundila mei makese. Numanye bienu ne muanʼetu wa mu Kilisto Timote wakulekedibua mu lukanu; ne bialueye lubilu, nendue nʼandi kunumona. Nuele bonso badi banukokesha muoyo, ne basanto bonso kabidi. Ba mu Italia badi banutumina muoyo. Ngasa ikale ne buonso buenu. Amen. Yakobo, muhika wa Nzambi ne wa Mukelenge Yesu Kilisto, kudi ba bisamba dikumi ne bibidi badi bena tshimuangi, ndi nuela muoyo. Bana betu, nububale bu disanka dionso hanuahona mu mateta a mishindu ya bungi; bualu bua nudi bamanye ne diteta dia ditabusha dienu didi dienzesha ditantamana. Ditantamana dikale ne mudimu wadi muimpe tshishiki, bua nuenu nuikale bakane tshishiki, bakumbane mu malu onso, kanui nuhanga mu bualu bumue. Kadi biahanga mukuabo wenu meshi, âlombe kudi Nzambi udi uha bonso ne mutshima mutoke kai ubatobolola; neamuhebue. Kadi alombe biandi ne ditabusha, kai ne mpata; bualu bua udi wela mpata udi ufuana divuala dia mai manene diendeshibua kudi luhehele ne diedibua mulu. Bua muntu au kedi meshi ne, Nengangate tshintu kudi Mukelenge; mmuntu wa mitshima Ibidi udi utatakana mu nshila yandi yonso. Muanʼetu wa mu Kilisto udi muhuekele atumbile mu dibandishibua diandi; ne mubanshi atumbile mu dihuekeshihua diandi; bualu bua yeye neajimine bu tshilongo tshia mu tshisuku. Bualu bua diba didi dibanda hohamue ne luhehele lua luiya lukole ne bidi bifubisha bisosa; ne tshilongo tshiabi tshidi tshimata hanshi ne bulengele bua mu mpala muatshi budi bujimina; muomumue kabidi, muntu mubanshi neajimisbibue mu nshila yandi. Muntu udi utantamana mu mateyi udi ne disanka; bualu bua hakamanabo kumujadika, neangate tshifulu tshia butumbi tshia muoyo tshiakalaya Mukelenge badi bamunanga. Muntu kambi biandi bamuteyabo ne, Ndi muteyibue kudi Nzambi; bualu bua Nzambi kena mumanye mua kuteyibua ne malu mabi, ne yeye muine kena uteya muntu; kudi muntu yonso udi uteyibua kudi lukuka luandi bamukokalu ne hamulobeshalu. Hashishe lukuka, himitalu, ludi lulela bubi: ne bubi, hakolabu budi bulela lufu. Bana betu bananga, kanudingibu. Kuha kuonso kuimpe ne diha dionso diakane tshishiki bidi bifuma mu diulu, bahueka hanshi bilua kudi Tatu wa munya, kudi kakui ne dikudimuka anyi mundidimbi wa tshintu tshidi tshinyunguluka. Bua mu disua diandi yeye wakatufuka ne dî dia bulelela, bua tuetu tuikale mamuma makuabo a kumudilu a bifukibua biandi. Bana betu bananga, mimanye bienu bualu ebu. Muntu yonso unvue biandi lubilu, atukishe kai muanze kuakula, kakuatshi tshishi lubilu; bualu bua tshishi tshia muntu katshiena tshienza malu makane a Nzambi. Nunku umushai bukoya buonso ne divulangana dia malu mabi, nuitabushe dî ne kalolo didi dikunyibua munda muenu, didi dimanye mua kusungila mioyo yenu. Kadi nuikale benji ba di, kanuikadi anu bunvui badi, bua nunku nudi nudidinga. Bualu bua bikala muntu munvui wa dî, kai muenji wadi, yeye udi bu muntu udi utangila mpala wandi mene mu ludimuenu; bua yeye udi uditangila, udi uya biandi, udi uhua muoyo lukasa bua mushindu wakadiye. Kadi udi utangilatangila mikenshi miakane tshishiki ya budishikaminyi, ne udi ushalamu, kai muikale munvui udi uhua muoyo, kadi muikale muenji wa mudimu udi uwenza, muntu eu neikale ne disanka mu kuenza kuandi. Biela muntu meshi ne, Ndi ndonda malu a Nzambi, hadiye kai ukanda ludimi luandi, kadi udi udinga mutshima wandi, bualu bua Nzambi bua muntu eu budi tshianana. Bualu bua Nzambi bua bushua ne budi kabui bunyanguka ku mesu kua Nzambi Tatu budi nunku, bua kuya kutangila bana ba nshîa ne bakashi ba mu lufuila mu dikenga diabo, ne bua kudilama kai ne ditoba dia ku malu a ha buloba. Bana betu, kanuikadi ne ditabusha dia Mukelenge wetu Yesu Kilisto, Mukelenge wa butumbi, ne kansungunsungu kudi bantu. Bua biabuela muntu mu disangisha dienu ne tukanu tua ngolo ku minu yandi muluate bilulu bimpe; ne biabuela muntu muhele kabidi muluate bilulu bibi; binuatangila anu kudi muntu udi muluate bilulu bimpe, nuamba ne, Shikama biebe aha mu muaba muimpe; ne binuambila muntu muhele ne, Imanyina biebe aku, anyi, Shikama hanshi hehi ne tshitekelu tshianyi tshia makasa; kanuakutahulukangana munkatshi muenu, ne kanuakulua balumbuludi badi ne meshi mabi, anyi? Unvuai, bana betu bananga; Nzambi kakasungula bahele ba mu bintu bia ha buloba bua kuikalabo babanshi mu ditabusha ne bahianyi ba bukelenge buakalayeye badi bamunanga, anyi? Kadi nuenu nuakuhetula muntu muhele. Bantu babanshi kabena banuenzesha ku bukole, bobo bine kabena banukoka ku bilumbuluidi, anyi? Bobo kabena bahenda dina dia butumbi didibo banuidika, anyi? Kadi binuenza mukenshi wa butumbi, udi mufunda mu Mukanda wa Nzambi ne, Sua mukuenu bu mûdi mudisue, nudi nuenza bimpe; kadi binuikala ne kansungunsungu kudi bantu, nudi nuenza bualu bubi, nuakuhishibua bu bashihi ba mikenshi kudi mikenshi nkayai. Bua muntu yonso udi utumikila mikenshi ei mijima, bialendukeye ku mukenshi umue, wakulua mushihi wa mikemu yonso. Bualu bua nyeye wakuamba ne, Kuendi masandi, wakuamba kabidi ne, Kushihi muntu. Nunku biwikala kui muende masandi, kadi biwashiha muntu, wewe wakulua mushihi wa mikenshi yonso. Nuikale nuambe ne nuikale nuenze bu bantu badi bamba kulumbuluishibua kudi mukenshi wa budishikaminyi. Bualu bua dilumbulula kadiena ne luse kudi muntu udi kai muleshe bakuabo luse; luse ludi lutamba dilumbulula kutumba. Bana betu, dikuatshisha kai didi kudi muatu, biambeye ne, Ndi ne ditabusha, kadi yeye kena ne kuenza? Ditabusha adi didi dimanye mua kumusungila, anyi? Bikala muanʼetu mulume wa mu Kilisto anyi muanʼetu mukashi butaka ne bakengela bia kudia bia buatshia-buatshia, biabambila umue wenu ne, Yai bienu talala, nuote kahia, nûkute; kadi nuenu kanui nubaha bintu bidi mibidi yabo ikengela; dikuatshisha kai didiku? Nunku ditabusha kabidi, bikaladi kadi ne kuenza, didi didifuila. Bulelela, mukuabo neambe ne, Wewe udi ne ditabusha, ne meme ndi ne kuenza; undeshe ditabusha diebe ditahuluka ku kuenza ne meme nenkuleshe ditabusha dianyi ku kuenza kuanyi. Wewe udi witabusha ne, Nzambi udi umue; udi wenza bimpe; bademon badi bitabusha kabidi, badi bazakala. Kadi wewe, muntu wa hatuhu, udi musue kumanya ne, Ditabusha ditahuluka ku kuenza didi diatuka, anyi? Tatu wetu Abalahama kakabingishibua ku kuenza kuandi hakafileye muana wandi Isaka ku tshioshelu, anyi? Wewe udi utangila ne, Ditabusha diakenza mudimu hohamue ne kuenza kuandi: ne ditabusha diandi diakavuishibua diakane tshishiki ku kuenza kuandi. Ne dî dia mu Makanda wa Nzambi diakashikishibua ne, Abalahama wakitabusha Nzambi ne bakamubadila ditabusha diandi bu buakane buandi; bakamuidika, Mulunda wa Nzambi. Nudi nutangila ne, Muntu udi ubingishibua ku kuenza kuandi, kena ubingishibua anu ku ditabusha. Muomumue kabidi, Lahaba, mukashi wa masandi, kakabingishibua ku kuenza kuandi, bualu bua yeye wakangata bamisheshe, wakabatuma mu nshila mukuabo, anyi? Bu mudi mubidi mutahuluka ku nyuma wau udi mufue, nunku kabidi, ditabusha didi ditahuluka ku kuenza didi difue. Bana betu, kanulu bayishi ba bungi, bualu bua nudi bamanye ne, Netuangate dihila ditamba bunene. Bualu bua buonso buetu tudi tulenduka mu malu a bungi. Bikala mukuabo kai ulenduka ku dî diandi eu udi muntu muakane tshishiki, udi mumanye mua kukanda mubidi wandi wonso. Bituabuesha nkanu ya kuendesha nʼai tubalu mukana muatu, bua tuotu tututumikile, tudi tutshungulula mibidi yatu yonso. Tangilai matu kabidi, nasha wowo manene be, adi endeshibua ku bihehele bikole, kadi adi atshunguludibua ku tshidimba tshitamba bukese, kuonso kudi mutshima wa muena yenda musue. Nunku ludimi ludi tshituha tshikese, ludi lufunafuna malu manene. Tangilai mudi kahia kakese katemesha nkunyi ya bungi be! Ne ludimi ludi kahia; ludimi ludi buloba bujima bua malu mabi munkatshi mua bituha bietu bia mibidi; ludi lunyanga mubidi wonso ludi lutemesha matuku onso a muoyo kahia, iudi lutemeshibua ne kahia ka ku Ngena. Bualu bua mushindu wonso wa nyama ne wa nyunyu ne wa bintu bidi bidikoka hanshi ne wa bintu bia mu mai manene bidi bibidishibua hanu, biakumana kuibidishibua hanu kudi bantu; kadi kakuena muntu udi mumanye mua kuibidisha ludimi hanu aha; ludi tshintu tshidibo kabai mua kukanda, ludi lûle tente ne lulengu lua lufu. Tudi tutumbisha nʼalu Mukelenge ne Tatu; tudi tuela nʼalu bantu bakafukibua ne tshifuanyikishi tshia Nzambi mulau. Ditumbisha ne mulau bidi bihatuka mukana mumue. Bana betu, kambimpe malu â ikaleku. Mushimi wa mai udi uhatula mai mimpe ne mai a bululu mu mushiku umue, anyi? Bana betu, mutshi wa nfigi udi mumanye mua kukuama oleve, anyi? Muonshi wa tumuma udi mamanye mua kukuama nfigi, anyi? Nunku mai a lueho kêna mamanye mua kuhatula mai mimpe. Muntu kai udi ne meshi ne lungenyi munkatshi muenu? Ku muoyo wandi muimpe aleshe bantu bienzedi biandi mu kalolo kadi ne meshi. Kadi binuikala ne mukau wa luonji ne difuilangana mu mitshima yenu, kanuditumbishi ne kanudingi ku malu malelela. Lungenyi elu kenduoluo ludi lufuma mu diulu, kadi ludi lua ha buloba, iudi lua mutshima wa ha buloba, ludi lua bademon. Bualu bua hadi mukau ne difuilangana hadi diyoyo ne malu mabi onso. Kadi meshi adi afuma mu diulu diambedi adi mimpe, hashishe adi ditalala, adi buhote, budi bualu butekete bua kuasengelela, adi mûle tente ne luse ne mamuma mimpe, kêna ne mpata, kêna ne lubombo. Mamuma a buakane adi akunyibua mu ditalala kudi bantu badi benzesha ditalala. Nvita ne difuilangana bia munkatshi muenu biakulua kudi kunyi? Kabiena bilua ku nkuka idi iluangana mu bituha bia mibidi yenu, anyi? Nudi ne lukuka lua bintu, ne kanuena nʼabi; nudi nushihangana; nudi nukuma mitshima ku bintu bia bakuabo, kamuena mua kubiangata; nudi nufuilangane, nudi nuluangana nvita; kamuena ne bintu, bualu bua kamuena nubilonde. Nudi nulomba ne kamuena nuangata bintu, bualu bua nudi nabilomba bibi, anu bualu bua kubimuangalasha ku masanka enu. Nuenu, bena masandi. Kanuena bamanye ne, Bulunda bua malu a ha buloba budi ne Nzambi lukuna, anyi? Nunku muntu yonso wasua kuikala mulunda wa malu a ha buloba, udi udivuisha nmona lukuna kudi Nzambi. Nudi nuela meshi ne, Mukanda wa Nzambi udi wamba hatuhu ne, Nyuma wakatutekeleye munda muetu udi ujinga tô ne ku mukau, anyi? Kadi yeye udi utuha ngasa muhite. Nunku Makanda wa Nzambi udi wamba ne, Nzambi udi uhidia badi badisue, kadi udi uha badi badihuekesha ngasa. Nunku nudikokeshe kudi Nzambi; kadi nukandamene diabolo ne yeye neanunyeme. Semenai ha buihi ne Nzambi ne yeye neasemene ha buihi ntemu. Nulengeshe bianza bienu, nuenu bantu babi, nutokeshe mitshima yenu, nuenu bena mitshima ibidi. Nunyingalashe mitshima yenu, nujinge, nudile muadi; kuseka kuenu kuandamuke kanyinganyinga, ne disanka dienu diandamuke majie. Nudihuekeshe ku mesu kua Mukelenge, ne yeye neanubandishe. Kanusonguelanganyi, bana betu. Muntu udi usonguela muanʼabo wa ma Kilisto, anyi udi ulumbuluisha muanʼabo wa mu Kilisto, yeye udi usonguela mikenshi, udi ulumbuluisha mikenshi, kadi biwalumbuluisha mikenshi, wewe kuena muenji wa mikenshi kadi udi mulumbuluishi wai. Anu umue udi muedi wa mikenshi ne mulumbuluisha nyeye udi ne bukole bua kue sungila ne bua kushiha. Kadi wewudi nganyi bua wewe udi ulumbuluisha mukuenu? Ahu nuenu badi bamba ne, Lelu anyi makelela netuye ku musoko mukuabo, netuikaleku tshidimu tshijima, netuendulule mushinga, netuhete bintu; kadi kanuena bamanye malu kai neikaleku makelela. Muoyo wenu udi tshinyi? Nudi bu dibungi, didiku tshituha tshihi, hashishe didi dijimine. Nuakadi kuamba ne, Biasua Mukelenge, netuikale ne muoyo, netuenze kabidi bualu ebu anyi bualu abu. Biadi katataka nudi nuditumbisha mu kufunafuna kuenu; kuditumbisha kuonso kua nunku kudi kubi. Nunku muntu udi mumanye mua kuenza bualu buimpe ne udi kai ubuenza, bualu ebu budi bubi kudiye. Ahu nuenu, bantu babanshi, nudile bienu, nuele mbila bualu bua makenga akadi ba kulua kunudi. Bubanshi buenu buakoneka, bivualu bienu biakudibua kudi bishi. Ngolo yenu ne argent yenu yakukuatshibua mamoma; mamoma ai neikale tshimanyishilu kunudi, neadie mibidi yenu bu kahia. Nuakudibutshila bintu mu matuku a kunshikidilu. Monai, difutu dia bena mudimu bakanunowela madimi enu, dinutshidi nushala nʼadi ku buibi, didi diela dî dikole; ne muadi wa bahuodi wakubuela mu matshu a Mukelenge wa Misumba Yonso. Nuakushikama mu buneme ha buloba, nuakudisankisha ne masanka enu; nuakudiundisha mitshima yenu ilue manyi a bungi bua dituku didibo bashiha. Nuakuhisha, nuakushiha muntu muakane; yeye kena ufuilangana nʼenu. Nunku, bana betu, nuikale ne lutulu tô ne halua Mukelenge. Monai tshidime udi windila mamuma a mushinga mukole a ha buloba, muikale ne lutulu bua bualu buau tô ne halokelau nvula ya diambedi ne yalua ku nyima. Nuikale ne lutulu kabidi, nujadike mitshima yenu, bualu bua dimueneka dia Mukelenge diakulua ha buihi. Bana betu, kanutontolodianganyi, bua nuenu kanulumbuluishibu; tangilai, mulumbuluishi udi muimane ku mpala kua tshibi. Bana betu, nutangile baprofete bakamba mu dina dia Mukelenge bu tshimanyinu tshia ditantamana dia mu makenga ne tshia lutulu. Monai, tudi tuidika bantu bakadikankamika ne, Badi ne disanka; nuakunyua lumu lua kudikankamika kua Yobo, nuakutangila bu muakumuenzela Mukelenge kunshikidilu, ne bu mudi Mukelenge mûle tente ne luse ne dinanga. Ku mpala kua malu onso, bana betu, kanuditshihi nasha kudi diulu, nasha kudi buloba, nasha ne mutshihu mukuabo; kadi E wenu ikale E ne Nasha wenu ikale Nasha, bua nuenu kanudibueshi mu dihila. Muntu udi ne dikenga munkatshi muenu, anyi? Alombe biandi Nzambi. Muntu udi ne disanka, anyi? Imbe biandi misambu. Muntu udi ne disama munkatshi muenu, anyi? Abikile biandi bakulu ba ekelesia; bobo bamulombele Nzambi, bamuele manyi mu dina dia Mukelenge; ne kulomba kudi ne ditabusha neasungile muena disama, ne Mukelenge neamubishe; ne bikaleye muenze bualu bubi, Nzambi neamubuikidile bubi buandi. Nunku nutondelangane mibi yenu, nulombelangane Nzambi, bua nuenu mikoleshibue. Disengelela dia muntu muakane didi ne bukole bua bungi mu kuenza kuadi. Eliya wakadi muntu wa mutshima muomumue nʼetu, ne yeye wakalomba Nzambi ne kulomba kukole bua nvula kailoki; ne nvula kayakaloka ha buloba tô bidimu bisatu ne ngondo isambombo. Yeye wakalomba Nzambi kabidi; ne diulu diakatuma nvula ne buloba buakamenesha mamuma abu. Bana betu, hikala mukuabo wa munkatshi muenu uhambuka mu nshila wa bushua, ne mukuabo umuandamuna; amanye biandi ne, Muntu udi wandamuna muntu mubi ku dihambuka dia mu nshila wandi, yeye neasungile muoyo wa muntu ku lufu, neabuikile malu mabi a bungi. Petelo, mupostolo wa Yesu Kilisto, kudi bantu basungudibue kudi Nzambi, badi benyi bena tshimuangi, ba mu Ponto, Galatia, Kapadokia, Asia ne mu Bitunia, badi basungudibue bu mudi budianjidi kumanya bua Nzambi Tatu mu kujidibua kua Nyuma Muimpe, bua kuikalabo ne ditumikila ne kumiamina kua mashi a Yesu Kilisto; ngasa kunudi ne ditalala bivulangane. Batumbishe Nzambi udi kabidi Tatu wa Mukelenge wetu Yesu Kilisto, nyeye wakatulela tshiakabidi bu mudi luse luandi lunene, bua kutuheye ditekemena didi ne muoyo bua dibika dia Yesu Kilisto dia ku bafue; bua tuikale ne buhianyi budi kabui bubola, budi kabui bunyanguka, budi kabui bufubidila, buakutekibua mu diulu bua bualu buenu, nuenu mbadi balamibua ku bukole bua Nzambi bua ditabusha tô ne ku luhandu tulongolola bubuluibua mu tshikondo tshia kunshikidilu. Bua muanda eu nudi nutamba kusanka, nasha bikalaku bualu bua nuenu kunyingalashibua tshituha tshihi mu mateta a mishindu ya bungi; bualu bua kuteta kua ditabusha dienu, nasha ditetshibua ne kahia, didi ditamba ngolo udi ujimina mushinga mukole, nekusanganyibue ne butumbi ne dinemekibua ne buneme halua dibuluibua dia Yesu Kilisto. Yeye, unuakadi kanui batangile ku mesu, nyeye unudi nunanga; kadi nudi numuitabusha, kanui numutangila katataka, ne nudi nusanka bikole ne disanka didi hadi mua kuambibua ne didi diûle tente ne butumbi; nudi nuangata nshikidilu wa ditabusha dienu, nduhandu lua mioyo yenu. Bua luhandu elu baprofete bakakeba ne bakalukesha bikole, bamba bua ngasa wakadi ha kulua kunudi; bakebakeba tshikondo kai ne mushindu kai wa tshikondo tshiakabalesha Nyuma wa Kilisto wakadi munda muabo, hakadianjileye kubambila bua makenga a Kilisto ne bua butumbi buakadi ha kualonda. Buakabuluibua kudibo, ne kabakadikuatshila, bobo bine, malu â mudimu, kudi bakanakuatshilau nuenu mudimu, malu mene akanumanyishabo katataka kudi bantu bakanuambila lumu luimpe mu Nyuma Muimpe wakanutuminabo mufume mu diulu; malu adi banjelo basue kutangilatangila. Nunku nuele bimono bia meshi enu mikaya, nuikale talala, nujadike ditekemena dienu tshishiki mu ngasa udibo balua nʼandi kunudi ku dibuluibua dia Yesu Kilisto. Nuikale bana batumikidi, kanudifuanyikishi bu munuakadi mu nkuka yenu ya diambedi, mu buhote buenu; bu mudi yeye wakanubikila udi wa tshijila, nunku nuenu kabidi nulue ba tshijila mu malu onso a muoyo wenu; bualu bua dî didi difundibua ne, Nuenu nenuikale ba tshijila, bualu bua meme ndi wa tshijila. Binuamubikila bu Tatu udi ulumbuluisha muntu yonso bu mudi bienzedi biandi kai ne kansungunsungu, nuhitshishe tshikondo tshia buenyi buenu mu ditshina. Bualu bua nudi bamanye ne, Tuakahikudibua, kenku bintu bidi bijimina, ku argent anyi ku ngolo, mu malu a hatuhu a muoyo wenu akanushilabo kudi batatuʼenu; kadi nuakahikudibua ku mashi a mushinga mukole, bu a muana wa mukoko kai ne tshilema ne kai ne ditoba, ku mashi a Kilisto mene; wakadianjila kumanyibua bulelela ku mpala kua tshibangidilu tshia buloba, kadi wakamueneshibua kunshikidilu kua bikondo bua bualu buenu. Bua bualu buandi nudi bena kuitabusha ba Nzambi wakamubisha ku bafue, wakamuha butumbi; bua ditabusha dienu ne ditekemena dienu bikale mu Nzambi. Bualu bua nuenu nuakulengesha mitshima yenu mu kutumikila kuenu kua malu a bushua bua kuikala ne dinanga dia bana benu ba mu Kilisto didi kadî ne lubombo, nunku nunangangane mu mitshima yenu bikole; bualu bua nuakaledibua tshiakabidi, kenku bintu bidi bijimina, kadi ku bintu bidi kabi bijimina, ku dî dia Nzambi udi ne muoyo ne udiku tshiendelele. Bualu bua bakafunda ne, Ba ha buloba bonso badi bu bisosa, Ne butumbi buabo buonso budi bu tshilongo tshia bisosa. Bisosa bidi bifubidila, Ne tshilongo tshidi tshimata hanshi; Kadi dî dia Mukelenge didiku tshiendelele. Edi udi dia lumu luimpe diakanuambilabo. Nunku hanumusha malu mabi onso, ne kudinga kuonso, ne lubombo, ne mukau, ne njianu yonso; bu bana balela katataka, nujinge mabele a meshi adi kâi ne kudinga, bua nuenu nudiundeku tô ne ku luhandu; binuikala balabule ne Mukelenge udi muimpe; nulue kudiye ndibue didi ne muoyo, diakahidiabo kudi bantu, kadi didi disungula kudi Nzambi, ndia mushinga mukole; nunku nuenu kabidi, bu mabue adi ne muoyo, nuakashibua nsubu wa Nyuma, bua kuikala bakuidi ba tshijila; bua nuenu kufila milambu idi ya nyuma mitabushibue kudi Nzambi bualu bua Yesu Kilisto. Bualu bua dî didi mu Mukanda wa Nzambi ne, Tangilai, udi nteka mu Siona dibue dinene dia mu ditumba dia nsubu, disungula ne dia mushinga mukole; Weyemena kudidi kena ufuishibua bundu. Nunku mushinga mukole wadi udi kunudi badi bamuitabusha; kadi kudi badi kabai bamuitabusha, udi dibue diakahidiabo kudi bibaki ba nsubu, diodio diakavuishibua mutu wa ditumba; ne dibue dia kukumabo dikasa, ne mutunda wa dibue wa kubalenduisha: bobo badi balenduka ku dî dia Nzambi bualu bua buhidia buabo; bakatekibua ku bualu ebu kabidi. Kadi nuenu nudi tshisamba tshisungudibua, ne bakuidi ba bukelenge, ne tshisamba tshia tshijila, bantu badi bikale ba Nzambi muine, bua nuenu nuambe bua buimpe bua Nzambi wakanubikila bua kunuhatula mu mîdima bua kunubuesha mu munya wandi wa dikema. Mu tshikondo tshia diambedi kanuakadi bantu, kadi katataka nudi bantu ba Nzambi; kanuakafuidibua luse, kadi katataka nuakufuidibua luse. Bananga, udi nutendekena bu benyi ne bena luendu ba ha buloba ne, Nuehuke ku nkuka ya mibidi idi iluangana ne mioyo yenu; nuikale ne bienzedi bienu bimpe munkatshi mua bisamba bia bende, bualu bua, mu mianda idibo banusonguela nuenu bu benji ba malu mabi, bobo batumbishe Nzambi mu dituku dialueye, bua midimu yenu mimpe idibo bamona. Nudikokesha ku bukokeshi buonso bua bantu bualu bua Mukelenge; nasha kudi nfumu munene udi ku mutu; nasha kudi bangovena bu batumibua kudiye bua kudisombuela kudi benji ba malu mabi, ne bua kutumbisha benji ba malu mimpe. Bualu bua disua dia Nzambi didi nunku, bua nuenu nuhuishe buhote bua bantu batshimbakane ku kuenza kuenu kua malu mimpe; bu badishikamine, kadi kembu badi bangata budishikaminyi buabo bu tshibuikilu tshia malu mabi; kadi mikale bu bahika ba Nzambi. Nunemeke bantu bonso. Nunange bana benu ba ma Kilisto. Nutshine Nzambi. Nunemeke nfumu munene. Bena mudimu, nudikokeshe kudi bakelenge benu ne ditshina dionso; kenganu kudi badi bimpe ne badi ne buhole, kadi kudi badi ne tshinyangu kabidi. Bua muanda eu udi wa kusakidila, bikala muntu udikankamika mu kanyinganyinga bualu bua muoyo-mukese wandi kudi Nzambi hakengeye kai ne bualu. Butumbi budi hanyi binuadikankamika hanuenza bualu bubi ne badi banukuma? Kadi binuadikankamika hanuenza bualu buimpe ne nudi mikenga, bualu ebu budi bua kusakidila ku mesu kua Nzambi. Bua nuakabikidibua bua muanda eu, bualu bua Kilisto wakakenga bua bualu buenu, wakanushila tshileshilu bua nuenu numulonde mu makasa andi. Yeye kakenza bualu bubi, kabakamusangana ne didinga mukana muandi; hakamuhendabo, yeye kakabahenda kabidi; hakakengeye, yeye kakabakanyina, kadi wakadifila mu bianza bia udi ulumbulula biakane. Yeye muine wakututuadila malu mabi etu mu mubidi wandi ku mutshi mutshiamakane, bua tuetu, bamane kufua ku malu mabi, tuikale ne muoyo wa ku buakane; kunuakuondahibua ku mibundabunda yandi. Bualu bua nuakadi nuhambuka bu mikoko, kadi katataka nuakuhingana kudi Mulami ne Mutangidi wa mioyo yenu. Muomumue, nuenu bakashi, nukokele babayenu; nunku bikala bakuabo kabai bitabusha dî dia Nzambi, nebahetebue mu bualu bua Nzambi kabai ne dî dia Nzambi, ku bienzedi bia bakashi babo: hatangilabo bienzedi bienu bilengele bidi ne ditshina. Didilengesha diabo kadikadi dia hamʼbidi dia kuluka kua nsuki, anyi dia kuela kua bilenge bia ngolo, anyi dia kuluata kua bivualu; kadi dikale dia muntu musokoma wa mu mutshima, mu bivualu bidi kabi binyanguka bia mutshima wa kalolo ne ditalala, bidi bia mushinga mukole ku mesu kua Nzambi. Muomumue kabidi, bakashi ba tshijila ba kale bakadi batekemena Nzambi, bakadi badilengesha, bakadi bakokela babayabo; bu muakatumikila Sala Abalahama, mumubikile Mukelenge; unuakulua bana bandi katataka, binuenza bimpe, ne binuikala kanui nutshinyishibua ku buowa buonso. Nuenu balume muomumue, nuikale ne bakashi benu bu mudi lungenyi luimpe, bu mudibo banutambe mubidi butekete, bu mudibo bahianyi nʼenu ba ngasa wa muoyo; bua kutendelela kuenu kakuhumbishibu. Di dia kundekelu ne, Nuikale buonso buenu ne mutshima umue, nusambangane, nunangangane bu bana babo ba mu Kilisto, nuikale ne mitshima ya luse ne mitshima mihuekela; kanushintakashi bubi ku bubi anyi tshihendu ku tshihendu; kadi nushintakashangane nʼabo disanka; bua nuakabikidibua bua muanda eu, bua nuenu kuhiana disanka. Bualu bua, Wasua kunanga muoyo ne kumona matuku mimpe, Akande ludimi luandi ku bubi ne mishiku yandi bua kaidingi. Adimuke biandi ku malu mabi. Enze malu mimpe; Akebe biandi ditalala, adiunde. Bualu bua mesu a Mukelenge adi kudi bakane, Ne matshu andi adi buashi ku milombu yabo; Kadi mpala wa Mukelenge udi mutangisha kudi benji ba malu mabi. Ne nganyi wanuenzela bibi, binuaya bena lukunukunu ba malu mimpe? Kadi binuakenga bualu bua buakane, nudi ne disanka; kanutshinyi kutshinyisha kuabo, kanulubakashibu mitshima yenu; kadi nujidile Kilisto mu mitshima yenu bu Mukelenge; nuikale badilongolola misangu yonso, bua kukudimuna dî kudi muntu yonso udi unukonka bua muanda wa ditekemena didi munda muenu; kadi nuenze nunka ne kalolo ne dishina. Nuikale ne muoyomukese muimpe, bua, mu bualu budibo banusonguela, bobo badi bahenda bienzedi bienu bimpe binudi nʼabi mu Kilisto bafuishibue bundu. Bua budi butambe buimpe, bikaladi disua dia Nzambi, bua mena nukenge bu benji ba malu mimpe, ne kanukengi bu benji ba malu mabi. Bualu bua Kilisto wakafua musangu umue bua malu mabi, muntu muakane wakafuila bantu babi, bua kulua nʼetu kudi Nzambi; wakashihibua mubidi wandi, kadi wakavuishibua muoyo mu nyuma wandi; muakayeye mu nyuma wandi kabidi, ne wakambila nyuma ya ba mu nsubu wa lukanu wa lufu bualu bua Nzambi. Bantu aba bakadi ne buhidia diambedi, hakadi lutulu lua Nzambi luindila mu matuku a Noa, hakadi kuatu bunene bilongolodibua, muakasungidibua bantu banya-banya, bantu muanda mukulu mene, mu mai: mai â kabidi adi tshifuanyikishi tshia adi atusungila katataka, nkubatiza mene, kembua diuvua dia manyanu a mubidi, kadi bua dikeba dia muoyo-mukese muimpe kudi Nzambi, bua dibika dia Yesu Kilisto ku lufu; udi ku tshianza tshia bukole tshia Nzambi, mumane kubuela mu diulu; banjelo ne makokeshi ne makole biakavuishibua ku nyima kuandi. Nunku, bualu bua Kilisto wakakenga mu mubidi, nuenu nudiluatshishe ne meshi momumue; bua wakakenga mu mubidi wakumana kulekela malu mabi, bua nuenu kanuikadi ne muoyo kabidi mu nkuka ya bantu matuku enu atshidi mashale mu mubidi, kadi nuikale ne muoyo bu mudi disua dia Nzambi. Bualu bua matuku mahite akakumbana bua nuenu nulonde disua dia bisamba bia bende, ne bua nuenu nuende mu tshienzenza tshia masandi, mu nkuka, mu kukuatshika kua malulu, mu manaya a bundu, mu tshingu tshia banu ba malulu, ne mu kutendelela kua mpingu mibi. Mu malu â badi bakema bualu bua nuenu kanuena nuenda nʼabo tô ne ku dihitshibua diodiumue dia malu manyanguka, badi banuhenda; bobo nebababadile malu abo kudiye udi udilongolola bua kulumbuluisha badi ne muoyo ne badi bafue. Bua muanda eu kabidi bakambila bafue mene lumu luimpe, bua bobo balumbuluishibue bu mudibo balumbuluisha bantu badi ne mibidi, kadi bua kuikalabo ne muoyo mu nyuma bu mudi Nzambi musue. Kadi kunshikidilu kua malu onso kudi ha buihi; nunku nuikale ne meshi majalama, ne nuikale bahole mu mitendelelu; ku mutu kua malu onso nuikalangane ne dinanga dikole munkatshi muenu, bualu bua dinanga didi dibuikila malu mabi a bungi; nusankidilangane ne benyi kanui ne kutontolola; bu muakangata muntu ne muntu tshihedi, nukuatshishangane nkatshi munkatshi muenu, bu balami bimpe ba ngasa muvulangane wa Nzambi. Biakula muntu, akule mei bu mudiu mamba kudi Nzambi; biakuata muntu mudimu, enze bu mudi bukole buakamuha Nzambi; enze biandi bua Nzambi atumbishibue mu malu onso bua Yesu Kilisto; kudiye kuikale butumbi ne bukokeshi tô ne ku bikondo bia bikondo. Amen. Bananga, kanukemi bua dikenga didi bu kahia munkatshi muenu diakaluila kunudi bu diteta, bu bualu buhia-buhia buakanukuata; kadi bualu bua nudi babanyanganyi ba makenga a Kilisto, nusanke; bua nuenu nusanke kabidi ne disanka dinene ku dibuluibua dia butumbi buandi. Bianuhendabo bua dina dia Kilisto, nudi ne disanka; bualu bua Nyuma wa butumbi ne Nyuma wa Nzambi udi unuikila hamʼbidi henu. Kadi umue wenu kakengeshibu bu mushihianganyi, anyi bu muibi, anyi bu muenji wa malu mabi, anyi bu mudibueshi wa mu malu a bantu bakuabo; kadi biakenga muntu bu umena Kilisto, kikadi biandi ne bundu, kadi atumbisha biandi Nzambi bua dina edi. Bualu bua tshikondo tshia dilumbuluisha kubangadi ku ba mu nsubu wa Nzambi tshiakulua, ne biadianjiladi kubanga kutudi, kunshikidilu kua badi kabai batumikila lumu luimpe lua Nzambi nekuikale tshinyi? Ne biasungidibua muntu muakane anu ne bualu bukole, muntu udi kai wa Nzambi ne udi mubi neamueneke kudi kunyi? Nunku bantu badi bakenga bu mu disua dia Nzambi bafile mioyo yabo mu kuenza kua malu mimpe kudi Mufuki udi wa kueyemenyibua. Nunku ndi nsengelela bakulu badi munkatshi muenu, ndi bianyi mukulu nʼabo, ne mumanyi wa makenga a Kilisto, ne muangatshi wa butumbi budi buamba kubuluibua, ne, Nulame tshisumbu tshia mikoko ya Nzambi tshidi munkatshi muenu, nubalame, kanui benzeshibue ku bukole, kadi ne mitshima ya disanka bu mu disua dia Nzambi; kambualu bua kukeba biuma, kadi nuikale ne mutshima mulongolola bimpe; kanuikadi bu bakokeshi ba badi ku nyima kuenu, kadi nudivuishe bifuanyikishi bimpe kudi mikoko. Ne hamueneshibue Mulami Munene, nenuangate tshifulu tshia butumbi tshidi katshi tshifubidila. Muomumue, nuenu bansongalume, nukokele bakulumpe. E, buonso buenu nudiluatshishe ne buhuekele, bua kukuatshishangana; bualu bua Nzambi udi uhidia badi badisue, kadi udi uha badi badihuekesha ngasa. Nunku nudihuekeshe kunshi kua tshianza tshikole tshia Nzambi, bua yeye anubandishe mu tshikondo tshiasunguleye; nuteke ntatu yenu yonso kudiye, bualu bua yeye udi unulubulula. Nuikale bahote, nutabale; umena lukuna wenu, diabolo mene, udi wendakana bu nyama wa ntambue udi ukungula, ukeba bantu ba kudieye; numutantamene bajalame mu ditabusha dienu; bualu bua nudi bamanye ne makenga momumue adi makumbashibue mu bana benu ba mu Kilisto badi ha buloba ebu. Ne Nzambi wa ngasa yonso, wakanubikila mu butumbi buandi bua tshiendelele bua mu Kilisto, hanuamana kukenga musangu muihi, yeye muine neanuakashe tshishiki, neanujadike, neanukoleshe. Bukokeshi buikale kudiye tô ne ku bikondo bia bikondo. Amen. Nakunufundila mei makese mu bianza bia Siluano, undi mbala bu muanʼetu wa mu Kilisto udi mua kueyemenyibua, bua kunusengelela ne bua kunumanyisha ne, Eu udi ngasa mulelela wa Nzambi; nujalamemu bikole. Wa mu Babulona, musungula nʼenu, udi unuela muoyo, ne muanʼanyi Mâko udi unuela muoyo kabidi. Nuelangane muoyo ne kutuangana kua mishiku kua dinanga. Ditalala dikale kudi buonso buena badi mu Kilisto. Simona Petelo, muhika ne mupostolo wa Yesu Kilisto kudi bantu bakuangata ditabusha dia mushinga mukole muomumue ne ditudi nʼadi mu buakane bua Nzambi wetu ne bua Musungidi Yesu Kilisto. Ngasa ikale kunudi ne ditalala divulangana mu dimanya dijalama dia Nzambi ne dia Yesu, Mukelenge wetu. Mbu mudi bukole bua bunzambi buandi, buakatuha bintu bionso bidi bua muoyo ne bua buimpe bua Nzambi, bualu bua kumanya kuetu kua yeye wakambikila bua butumbi buandi buine ne bua buimpe buandi. Mu malu â yeye wakutuha milayi yandi ya mushinga mukole ne mitambe bunene; bua ku milayi ei nuenu nulue babanyanganyi nʼandi ba muoyo wa bunzambi, bamane kuhanduka ku malu mabole adi mu buloba bualu bua nkuka mibi. Ne bua bualu ebu, nuenu mene, hanuavudisha disuminyina dionso, ku ditabusha dienu utentekashe buimpe; ne ku buimpe buenu nutentekashe lungenyi; ne ku lungenyi luenu nutentekashe didikanda; ne ku didikanda dienu nutentekashe didikankamika; ne ku didikankamika dienu nutentekashe buimpe bua Nzambi; ne ku buimpe bua Nzambi buenu nutentekashe dinangangana dia bana benu; ne ku dinangangana dienu dia bana benu nutentekashe luse. Bikala malu â ngenu ne biavulanganau, adi anuvuisha kanui batuke ne kanui nuhanga mamuma tô ne ku dinanga dijalama dia Mukelenge wetu Yesu Kilisto. Kadi muntu udi kai ne malu â udi mufofo, utangila anu bidi ha buihi, muikale ne tshihua muoyo bua dilengesha dia ku malu mabi andi a diambedi. Nunku, bana betu, mitambe kunanukila bua kujadika dibikidibua dienu ne disungula dienu; bua binuenza malu â, kanuena nulenduka tshiendelele; bua nunku nebatambe kunukumbashila ha kubuelela mu bukelenge bua tshiendelele bua Mukelenge wetu, udi kabidi Musungidi Yesu Kilisto. Nunku nengikale mudilongolole misangu yonso bua kunuvuluisha malu â, nasha nuenu bamanye, ne nasha nuenu bajalame mu malu malelela anudi nʼau. Ne ndi ngela meshi ne, Bidi bimpe, hantshidi mu nsubu eu wa mubidi bua meme kutabuluisha mitshima yenu ku dinuvuluisha dianyi; mumanye bianyi ne diumusha dia nsubu wanyi eu wa mubidi dilualua lubilu bu muakandesha Mukelenge wetu Yesu Kilisto. E, nenanukile bua nuenu mimanye mua kuvuluka malu â misangu yonso hangikala mumane kufua. Bualu bua tuetu katuakalonda nsumuinu yakambabo ku budimu bua bantu hatuakanumanyisha bua bukole ne bua dilua bia Mukelenge wetu Yesu Kilisto, kadi tuetu tuakadi bamonyi ba butumbi buandi ku mesu etu. Bualu bua yeye wakangata buneme ne butumbi kudi Nzambi Tatu hakalua dî dia nunku kudiye munkatshi mua Butumbi bua Buneme ne, Eu udi Muana wanyi munanga, disanka dianyi dionso didi kudiye; ne tuetu tuakunvua di edi difuma mu diulu hatuakadi nʼandi ku mukuna au wa tshijila. Ne tudi ne di diakamba baprofete ditamba kujadikibua; nunku nudi nuenza bimpe binuadimuka bienu, bu mudibu kudi muinda udi utema mu muaba wa midima, tô ne hatshia butuku ne habanda mutoto wa nkesha mu mitshima yenu; numanye bualu ebu diambedi ne, Kakuena diyisha dia baprofete dia mu Mukanda wa Nzambi didi difuma ku dijingulula dia muntu. Bualu bua kakuena diyisha dia baprofete diakanza kulua ku disua dia muntu; badi bantu bakamba dî dia kudi Nzambi benzesha kudi Nyuma Muimpe. Kadi baprofete ba mashimi bakabika munkatshi mua bantu kabidi, bu mudi bayishi ba mashimi balua kubika munkatshi muenu, nebalue mu musokoko ne malu manutahulule ku dibutuke, bavila Mukelenge wakabahikula, badivuishila dibutuka dia lukasa. Bantu ba bungi nebalonde bienzenza biabo bia masandi; bua bualu buabo nshila wa bushua neahendibue. Bualu bua lukuka lua biuma bobo nebendulule nʼenu mushinga ne mei a mashimi; dihila diabo diakabahishabo nʼadi kale kadiena dishanguluka, ne dibutuke diabo kadiena dilala tulu. Bualu bua bikala Nzambi kai muengeleke banjelo hakenzabo bibi, kadi yeye wakabela mu Ngena ne wakabafila mu nyongola ya mîdima, bua balamibuemu tô ne ku dilumbuluisha diabo; ne bikalaye kai muengeleke ba ha buloba ba kale, kadi wakalama Noa, muambi wa malu mimpe ne bantu bakuabo muanda mutekete hakatumeye mai manene ha buloba bua bantu babi; ne hakandamusheye misoko ya Sodoma ne Amola butue bua kahia, wakaihisha ne dibutuka, wakaivuisha bu tshifuanyikishi kudi bantu balualua kuhidia Nzambi; ne wakahandisha Lota, muntu muakane hakadiye mutatshishibue ku bienzedi bia bundu bia bashihi ba mikenshi; (bualu bua muntu eu muakane mushikame munkatshi muabo, mu dimona diandi ne mu diunvua diandi wakadi unyingalasha mutshima wandi muakane ku dituku ku dituku ne bienzedi bia bantombueshi); Mukelenge udi mumanye mua kuhandisha bantu bandi bimpe mu mateyi abo, ne mua kulama bantu babi mu dikenga tô ne halua dituku dia kulumbulula; yeye udi utamba kukengesha bantu badi balonda malu a mubidi mu lukuka ludi lubabihisha, ne badi bahetula bukokeshi. Badi bena dikamakama ne badisu, kabena bazakala hakahendabo badi ne butumbi; kadi banjelo, badi babahita bunene ne bukole, kabena balua ne dihisha didi dibahenda ku mpala kua Mukelenge. Kadi bayishi aba, bu badi kabai ne meshi, baledibua bu nyama mene, bua kuikuatabo ne bua kuishihabo, badi bahendi mu malu adibo kabai bamanye, mu dijimisha diabo nebajimishibue bulelela, badi bakengeshibua bu difutu dia kuenza kua malu mabi abo; bantu badi babala kutamba kudia kuabo ne kunua kuabo kua mu munya bu disanka; badi matobe ne bilema, batamba kudia ne kunua ku bidia bia dinanga hadiabo nʼenu; badi ne mesu mûle tente ne masandi, ne adi kâi mamanye mua kulekela malu mabi; badi balekesha badi ne mitshima mitekete; badi ne mitshima yabo mibidila mu lukuka; badi bana badi ne mulau. Hakalekelabo nshila mululame, bakahambuka, bamane kulonda nshila wa Belama, muana wa Beo, wakasua difutu dia bienzedi bibi; kadi yeye wakadi mubedibue bua malu mabi andi; mpundu wakadi kamama wakakula mukana bu muatu, kakakanda buhote bua muprofete. Aba badi mishimi kayi ne mai; badi bu dibungi dihata kudi tshihehele tshikole; kudibo babatekela bufike bua mîdima. Bualu bua hadibo bakula mei manene a diambu, ku bienzedi biabo bia masandi, badi balobesha bakuabo mu nkuka ya mubidi, mbobo badi bamba kuhanduka kudi badi balonda dihambuka; badi babalaya budishikaminyi, hadi bobo bine bahika ba malu mabole; bualu bua muntu udi mubuesha mu buhika kudi tshidiye mutambibue buhole. Bualu bua, hakamanabo kuhanduka mu malu a ha buloba, kumanya kuabo kua Mukelenge ne Musungidi, Yesu Kilisto, biakuatshibuabo mu malu â kabidi ne biatambibuabo bukole, tshikadilu tshiabo tshia kunshikidilu tshidi tshitamba tshia kumudilu bubi. Biakadi bitamba buimpe bua bobo kabai banze kumanya nshila wa buakane, ne hakamumanyabo, bua bobo kuela nyima ku mukenshi wa tshijila wakabelelabo. Bualu buakulua kudibo bu mudi lusumuinu lulelela luamba ne, Mbua muhingane ku bilushi biandi kabidi, ne ngulube mumane kuowa wakahingana kudibonda mu bitahikidi. Bananga, eu mukanda muibidi katataka undi nufundila; mu bubidi buai udi ntabulusha mitshima yenu miakane bua kunufuisha bua nuenu kuvuluka mei akambibua diambedi kudi baprofete ba tshijila, ne mukenshi wa Mukelenge ne Musungidi wakanuambileye kudi bapostolo benu; mimanye bienu bualu ebu ku mpala ne, Halua kunshikidilu kua matuku, baseki nebalue ne tuseku tuabo, benda bu mudi nkuka yabo mene, bamba kabidi ne, Mulayi wa dilua diandi udi hanyi? Bualu bua katshia batatu balala tulu, malu onso adi ashala momumue bu muakadiu ku tshibangidilu tshia bufuki. Bua bobo badi basue kuhua muoyo bua bualu ebu ne, Diulu diakadiku kale, ne buloba huakakuatakashibua bua mu mai bufume mu mai bua dî dia Nzambi; bualu bua mai â, buloba abu buakadiku mu tshikondo atshi buakabuikidibua ne mai, buakajimina. Kadi bua dî diodiumue diulu didiku katataka ne buloba kabidi biakabutshidibua bua kuhia ne kahia bilamibue tô ne ku dituku dia dilumbulula ne dia dibutuka dia bantu badi babenga Nzambi. Kadi bananga, kanuhu muoyo bua bualu ebu bumue ne, Dituku dimue kudi Mukelenge didi bu bidimu tshinunu, ne bidimu tshinunu bidi bu dituku dimue. Mukelenge kena ushanguluka bua kushikisheye milayi yandi, bu mudi bakuabo babala dishanguluka; kadi udi nʼenu lutulu, kena musue umue wenu ajimine, kadi udi musue bonso balue kukudimuna mitshima yabo. Kadi dituku dia Mukelenge dilualua bu mudi muibi; mu dituku adi diulu nedijimine ne diyoyo dinene, ne bintu bia mu diulu nebifingutuke ne kahia kakole, ne buloba ne bintu bidimu nebihie. Bualu bua bintu ebi bionso bidi bijimina nunku, bunudi nʼabu mbua kuikala bantu ba mushindu kai mu bienzedi bia tshijila ne bia Nzambi, hanudi nutekemena ne hanudi nuendeshe lukasa dilua dia dituku dia Nzambi? Bua bualu buadi diulu diakukuata kahia nedijimine ne bintu bidimu nebienguluke ne kahia kakole. Kadi bu mudi mulayi wandi tudi tutekemena diulu dihia-dihia ne buloba buhia-buhia mudi buakane buikalemu. Nunku, bananga, bualu bua nudi nutekemena malu â, nanukilai bua banusangane mu ditalala kanui ne katobe, kanui ne kadiu kudiye. Numanye ne, Lutulu lua Mukelenge wetu nduhandu; bu mudi muanʼetu munanga Paulo kabidi, bua lungenyi luakamuhabo, wakanufundila; bu mudiye wenza kabidi mu mikanda yandi yonso wambamu bua malu â, munda muai mudi manga malu adi makole ha kuajingulula, adi bantu badi kabai bayishibue ne ba mitshima mitekete bakonyangasha mei, bu mudibo benzela mei makuabo mu Mukanda wa Nzambi, bua dibutuka diabo. Nunku, nuenu bananga, bualu bua nudi nudianjila kumanya malu â, dimukai bua, hanuahambuishibua ku mashimi a bantu babi, kanulamuki ku dijadikibua dienu dine. Kadi nudiunde mu ngasa ne mu dimanya bia Mukelenge wetu ne Musungidi Yesu Kilisto. Butumbi buikale kudiye katataka tô ne ku dituku dia tshiendelele. Amen. Malu akadiku ku tshibangidilu, atuakunvua, atuakutangila ne mesu etu, atuakamona, abale nga bianza bietu, bua Di dia muoyo (muoyo eu kabidi wakamueneshibua, ne tuakutangila ne tudi tunumanyisha ne tudi tunuambila bualu bua muoyo, muoyo wa tshiendelele, wakadi kudi Tatu ne wakamueneshibua kutudi); malu atuakutangila ne atuakunvua, tudi tunuambila kabidi, bua nuenu nuangate buobumue nʼetu; bulelela, buobumue buetu budi ne Nzambi ne Muana wandi Yesu Kilisto, Tudi tunufundila malu â bua disanka dietu divulangane. Edi ndî dituakunvua kudiye ne ditudi tunuambila ne, Nzambi udi munya ne munda muandi kamuena mîdima nasha kakese. Bituamba ne, Tudi ne buobumue nʼandi, hatutshidi tuenda mu midima, tudi tushima, ne katuena tuenza bualu bulelela; kadi bituenda mu munya, bu mudiye mu munya, tudi tuikalangana ne buobumue, ne mashi a Yesu, Muanʼandi, adi atulengesha ku mibi yonso. Bituamba ne, Katuena ne mibi, tudi tudidinga, ne bushua kabuena munda muetu. Bituatonda mibi yetu, yeye udi wa kueyemenyibua ne udi ne buakane bua kubuikidila mibi yetu, ne bua kutulengesha ku malu mabi onso. Bituamba ne, Katuakuenza bibi, tudi tumuvuisha ne, Muena mashimi, ne dî diandi kadiena munda muetu. Bana banyi bakese, ndi nufundila malu â bua nuenu kanuenji bibi. Bienza muntu mukuabo bibi, tudi ne Muakuidi kudi Tatu, Yesu Kilisto udi muakane; ne yeye udi bu mulambu wa kubuikila nʼau mibi yetu; kengua mibi yetu nkayai, kadi wa mibi, ya bonso ba ha buloba kabidi. Mu bualu ebu tudi bamanye ne, Tudi bamumanye, bitualama mikenshi yandi. Yeye udi wamba ne, Ndi mumumanye, kadi yeye katu walama mikenshi yandi, udi muena mashimi ne bualu bulelela kabuena munda muandi. Kadi muntu utu walama dî diandi, bulelela, dinanga dia Nzambi diakumana kukumbana munda muandi tshishiki. Mu bualu ebu tudi bamanye ne, Tudi munda muandi; yeye udi wamba ne, Ndi muikale munda muandi, budiye nʼabu mbua kuenda bu muakendeye mene. Bananga, tshiena nufundila mukenshi muhia-muhia, kadi mukenshi mukulukulu unuakadi nʼau ku tshibangidilu, mukenshi eu mukulukulu udi dî dinuakunvua. Ndi nufundila mukenshi muhia-muhia kabidi, budi bualu bulelela munda muandi ne munda muenu; bualu bua butuku butshiatshia, ne munya mulelela wakumana kutema. Yeye udi wamba ne, Ndi mu munya, hatshidiye ne muanʼabo lukuna, yeye utshidi mu midima tô ne katataka. Yeye udi musue muanʼabo udi muikale mu munya, ne tshilenduishi katshiena munda muandi. Kadi muntu udi ne muanʼabo lukuna, yeye utshidi mu midima, udi wenda mu midima, kena mumanye kudiye uya, bualu bua midima yakufofomesha mesu andi. Bana banyi bakese, ndi nufundila mukunda, bualu bua mibi yenu yakabuikidibua bua dina diandi. Batatu, udi nufundila mukanda, bualu bua nudi bamanye Yesu udi wa ku tshibangidilu. Bansongalume, ndi nufundila makanda, bualu bua nuakuhita mubi bukole. Bana banyi, nakunufundila makanda, bualu bua nudi bamanye Tatu. Batatu, nakunufundila mukanda, bualu bua nudi bamanye Yesu udi wa ku tshibangidilu. Bansongalume, nakanufundila mukanda, bualu bua nudi bakole, ne bualu bua dî dia Nzambi didi dikale munda muenu, ne bualu bua nuakuhita mubi bukole. Kanusu malu a ba ha buloba, anyi bintu bia ha buloba. Biasua muntu malu a ba ha buloba, dinanga dia Tatu kadiena munda muandi. Bualu bua malu onso a ha buloba, lukuka lua mubidi, ne lukuka lua mesu, ne kudisua kua muoyo, kena mafume kudi Tatu, kadi adi mafume ku buloba. Buloba budi bujimina ne lukuka luabu kabidi; kudi yeye udi wenza mudi disua dia Nzambi udi ushalaku tshiendelele. Bana banyi, didi diba dia kunshikidilu; ne mbu munuakunvua ne, Mufuilakanyi ne Kilisto ukadi ha kulua, ne katataka bafuilakanyi ne Kilisto bakumana kulua ba bungi; bua malu â tudi bamanye ne, Didi diba dia kunshikidilu. Bobo bakumuka munkatshi muetu, kadi kabakadi betu mene; bu bobo bikale betu, bakadi kuikala nʼetu; kadi bakumuka bua bobo bamueneshibue ne, Buonso buabo kabakadi betu mene. Ne nudi ne diedibua dia manyi ha mutu henu kudi Wa Tshijila, ne buonso buenu nudi bamanye buala ebu, Tshiakanufundila bualu bua nuenu kanuakamanya bualu bulelela, kadi bualu bua nuenu nudi babumanye, ne bualu bua kakuena mashimi kudi bualu bulelela. Nganyi udi muena mashimi, anu yeye udi uvila ne, Yesu kena Kilisto? Yeye udi uvila Tatu ne Muana, eu udi mufuilakanyi ne Kilisto. Muntu yonso udi uvila Muana, yeye kena ne Tatu; kadi muntu udi ujukula Muana udi ne Tatu kabidi. Nuenu bienu, bualu bunuakunvua ku tshibangidilu buikale munda muenu. Bikala bualu bunuakunvua buikala munda muenu, nuenu kabidi nenuikale munda mua Muana, ne munda mua Tatu. Eu udi mulayi wakatulayeye ne, Muoyo wa tshiendelele mene. Nakunufundila malu â bua bobo badi basue kunuhambuisha. Ne nuenu bienu, diedibua dia manyi dinuakuangata kudiye didi dikale munda muenu, nunku kanuena ne bualu bua muntu anuyishe; kadi bu mudi diela diandi dia manyi dinuyisha bua malu onso, didi dilelela kabidi ne kadiena mashimi, bu muakanuyishadi, nushale munda muandi. Ne katataka, bana bakese, nushale munda muandi, bua, biamueneshibueye, tuetu tuikale ne dikima, ne katuikadi ne bundu ku mesu kuandi mu dilua diandi. Binuamanya ne, Yeye udi muakane, nudi bamanye ne, Muntu yonso kabidi utu wenza malu makane wakuledibua kudiye. Tangilai mushindu wa dinanga diakamba Tatu bua tuetu tubikidibue ne Bana ba Nzambi; ne tud nunku. Bua bualu ebu ba ha buloba kabena batumanye, bualu bua kabakamumanya. Bananga, katataka tudi bana ba Nzambi; kadi kabuena buanze kumanyibua mutuikala. Tudi bamanye ne, Biamueneshibueye, netuikale bafuanangane nʼandi; bualu bua netumumone bu mudiye. Muntu yonso udi ne ditekemena edi kudiye udi udilengesha bu mudiye mulengele. Muntu yonso udi wenza bubi udi ushiha mikenshi kabidi, bualu bua bubi budi kushiha kua mikenshi. Nudi bamanye ne, Yeye wakamueneshibua bua kumusheye mibi; ne kamuena bubi munda muandi. Muntu yonso utu wikala munda muandi katu wenza bibi; muntu yonso utu wenza bibi kena muanze kumumona, kena mumumanye. Bana bakese, muntu kanuhambuishi; muntu utu wenza malu makane udi muakane bu mudiye Yeye muakane; yeye utu wenza bibi udi wa diabolo; bualu bua diabolo udi muenze bibi ku tshibangidilu. Bua bualu ebu Muana wa Nzambi wakamueneshibua bua kubutuleye midimu ya diabolo. Muntu yonso udi muledibue kudi Nzambi, katu wenza bibi, bualu bua diminu diandi dia muoyo ditu dikala munda muandi; yeye kena mumanye mua kuenzenza bibi bualu bua yeye udi muledibue kudi Nzambi. Mu muanda eu bana ba Nzambi ne bana ba diabolo badi bajinguluka; muntu yonso udi kai wenza malu makane kena wa Nzambi; ne yeye udi kai unanga muanʼabo kabidi. Bua edi ndi dinuakunvua ku tshibangidilu bua tuetu tunangangane; kembua kuikala bu Kana, wakadi wa mubi, wakashiha muanʼabo. Ne yeye wakamushihela tshinyi? Bualu bua midimu yandi yakadi mibi ne ya muanʼabo yakadi miakane. Bana betu, kanukemi bikala ba ha buloba nʼenu lukuna. Tudi bamanye ne, Tuakumuka ku lufu, tuakubuela mu muoyo, bualu bua tudi tunanga bana betu. Yeye udi kai ne dinanga udi muikale mu lufu. Muntu yonso udi ne muanʼabo lukuna udi mushihianganyi; ne nudi bamanye ne, Kakuena mushihianganyi udi ne muoyo wa tshiendelele muikale munda muandi. Mu muanda eu tudi bamanye dinanga, bualu bua Yesu wakateka muoyo wandi hanshi bua bualu buetu; ne tuetu tudi ne bualu bua kuteka mioyo yetu hanshi bualu bua bana betu. Kadi bikala muntu ne bintu bia ha buloba, ne yeye udi utangila muanʼabo ubikengela, ne yeye udi ukanda luse luandi kudiye, munyi mudi mua kuikala dinanga dia Nzambi munda muandi? Bana bakese, katunanganganyi ku mei anyi ku ndimi; kadi tunangangane mu bienzedi ne mu bulelela. Mu muanda eu netumanye ne, Tudi ba bulelela, netuholeshe mitshima yetu ku mesu kuandi; bua hikala mitshima yetu ituhisha, Nzambi udi uhita mitshima yetu bunene, ne udi mumanye malu onso. Bananga, hikala mitshima yetu kayi ituhisha, tudi ne dikima ku mesu kua Nzambi; ne bintu bionso bitudi tumulomba, tudi tshiangata kudiye, bualu bua tudi tulama mikenshi yandi, tudi tuenza malu adi avuisha disanka ku mesu kuandi. Eu mukenshi wandi bua tuetu tuitabushe dina dia Muana wandi Yesu Kilisto, ne bua tuetu tunangaʼngane, bu muakatuheye mukenshi. Yeye udi ulama mikenshi yandi, utu wikala munda muandi, ne Yeye kabidi utu wikala munda muandi. Ne mu muanda eu tudi bamanye ne, Yeye utu wikala munda muetu, bua Nyuma wakatuheye. Bananga, kanuitabushi nyuma yonso, kadi nutete nyuma ne, Idi ya Nzambi, anyi; bualu bua baprofete ba bungi ba mashimi bakamuangalaka ha buloba. Mu muanda eu nudi bamanye Nyuma wa Nzambi; nyuma yonso udi ujukula ne, Yesu Kilisto wakulua mu mubidi, udi wa kudi Nzambi: ne nyuma yonso udi kai ujukula Yesu, kena wa kudi Nzambi; eu udi nyama wa mufuilakanyi ne Kilisto, unuakunvua lumu luandi ne. Yeye ulualua; ne katataka wakumana kulua ha buloba. Bana bakese, nudi ba Nzambi, nuakubahita bukole; bualu bua yeye udi munda muenu udi uhita yeye udi wa mu buloba bunene. Bobo badi ba ku buloba; bua bualu ebu badi bakula bu ba ku buloba, ne ba ha buloba badi babunvuila. Tuetu tudi bana ba kudi Nzambi, udi mumanye Nzambi udi utunvuila; udi kai wa kudi Nzambi kena utunvuila. Mu bualu ebu tudi bamanye nyuma wa bulelela, ne nyuma wa mashimi. Bananga, tunangangane, bualu bua dinanga didi difume kudi Nzambi; muntu yonso udi ne dinanga udi muledibue kudi Nzambi ne udi mumanye Nzambi. Muntu udi kai ne dinanga kena muanze kumanya Nzambi; bualu bua Nzambi udi dinanga. Mu muanda eu dinanga dia Nzambi diakamueneshibua bua bualu buetu, bualu bua Nzambi wakatuma Muana wandi umuehele ha buloba bua tuetu tuikale ne muoyo bua bualu buandi. Mu muanda eu mudi dinanga, kembua tuetu tuakunanga Nzambi, kadi bua yeye wakatunanga, wakatuma Muana wandi bu mulambu wa kubuikila nʼau mibi yetu. Bananga, bikata Nzambi mutunange nunku, tuetu kabidi, butudi nʼabu mbua kunangangana. Kakuena muntu wakanza kutangila Nzambi; bituanangangana, Nzambi utu wikala munda muetu, ne dinanga diandi didi dikumbashibua munda muetu tshishiki. Mu muanda eu tudi bamanye ne tuetu tutu tuikala munda muandi, ne yeye utu wikala munda muetu, bualu bua wakutuha diha dia Nyuma wandi. Tuetu tuakutangila ne tudi tunumanyisha ne, Tatu wakutuma Muana wandi bua kuikaleye Musungidi wa ba ha buloba. Muntu yonso udi ujukula ne, Yesu udi Muana wa Nzambi, Nzambi utu wikala munda muandi, ne yeye utu wikala munda mua Nzambi. Ne tuetu tudi bamanye ne tuakuitabusha dinanga didi Nzambi nʼadi bua bualu buetu. Nzambi udi dinanga; ne utu wikala mu dinanga utu wikala mu Nzambi, ne Nzambi utu wikala munda muandi. Mu muanda eu dinanga diakukumbashibua kutudi tshishiki, bua tuetu tuikale ne dikima halua dituku dia dilumbulula; bualu bua bu mudiye emu, tuetu tudi emu kabidi ha buloba ebu. Kamuena ditshina mu dinanga; kadi dinanga diakane tshishiki didi dihata ditshina, bualu bua ditshina didi ne dikengesha; ne yeye udi utshina kena muanze kuvuishibua muakane tshishiki mu dinanga. Tuetu tudi ne dinanga, bualu bua yeye wakadianjila kutunanga. Biamba muntu ne, Ndi nanga Nzambi, ne yeye udi ne muanʼabo lukuna, yeye udi muena mashimi; bualu bua udi kai unanga muanʼabo wakutangileye, kena mumanye mua kunanga Nzambi udiye kai mutangile. Tudi tuangata mukenshi eu kudiye ne, Muntu udi unanga Nzambi anange muanʼabo kabidi. Muntu yonso udi witabusha ne, Yesu udi Kilisto udi muledibue kudi Nzambi; ne muntu yonso udi unanga wakamulela udi unanga kabidi wakuledibua kudiye. Mu muanda eu tudi bamanye ne tudi tunanga bana ba Nzambi hatuananga Nzambi ne hatuenza mikenshi yandi. Bua edi ndinanga dia Nzambi, bua tuetu tutumikile mikenshi yandi; ne mikenshi yandi kayena itunemena bujitu. Bualu bua muanda wonso udi muledibue kudi Nzambi udi uhita malu a ha buloba bukole; ne edi ndihita diakuhita malu a ha buloba bukole, nditabusha dietu. Nganyi muntu udi uhita malu a ha buloba bukole? Anu yeye udi witabusha ne, Yesu udi Muana wa Nzambi. Nyeyʼeu wakalua ne mai ne mashi, Yesu Kilisto mene; kene mai nkayau, kadi ne mai ne mashi. Nyuma Muimpe ngudi umanyisha, bualu bua Nyuma udi bulelela. Basatu badiku badi bamanyisha, Nyuma ne mai ne mashi: basatu aba badi bamanyisha bualu bumue. Bituitabusha bumanyishi bua bantu, bumanyishi bua Nzambi budi butambe bunene, bualu bua ebu mbumanyishi bua Nzambi ne, Wakutumanyisha bualu bua Muana wandi. Muntu udi witabusha Muana wa Nzambi, udi ne bumanyishi munda muandi; muntu udi kai witabusha Nzambi wakamuvuisha muenu mashimi, bualu bua kakuitabusha bumanyishi budi Nzambi umanyisha bualu bua Muana wandi. Ne ebu mbumanyishi ne, Nzambi wakatuha muoyo wa tshiendelele, ne muoyo eu udi munda mua Muana wandi. Udi ne Muana udi ne muoyo; udi kai ne Muana wa Nzambi kena ne muoyo. Nakufunda malu â kunudi, bua nuenu mimanye ne, Tudi ne muoyo wa tshiendelele, kunudi nuenu badi bitabusha dina dia Muana wa Nzambi. Edi ndikima ditudi nʼadi kudiye ne, Bituamulomba tshintu tshionso bu mu disua diandi, yeye udi utunvuila. Biwamanya ne, Yeye udi utungila bituamulomba tshintu tshionso, nunku tudi bamanye ne, Tudi ne milombu ituakamulomba. Biamona muntu muanʼabo wenza bualu bubi budi kabui bua lufu, nealombe Nzambi, yeye neamuhe mioyo ya badi benza bualu bubi budi kabui bua lufu. Bualu bubi budiku budi bua lufu; tshiena ngamba ne, Yeye amulombele Nzambi bua bualu abu. Bualu buonso budi kabui buakane budi bualu bubi; ne bualu bubi budiku budi kabui bua lufu. Tudi bamanye ne, Muntu yonso udi muledibue kudi Nzambi katu wenza malu mabi; kadi yeye udi muledibue kudi Nzambi udi udilama, ne mubi kena umulenga. Tudi bamanye ne, Tuetu tudi ba Nzambi, ne ba ha buloba bonso badi balala mu bubi. Tudi bamanye ne, Muana wa Nzambi wakumana kulua wakutuha meshi bua tuetu tumumanye yeye udi wa bushua; ne tuetu tudi munda mua udi wa bushua, munda mua Muana wandi Yesu Kilisto mene. Eu udi Nzambi wa bushua, ne udi muoyo wa tshiendelele. Bana bakese, nudilame kudi mpingu. Meme mukulu, udi mufundile mukashi musungula kudi Nzambi ne bana bandi bandi nanga mu bushua; ne kememe nkayanyi udi munanga, kadi mbonso kabidi badi bamanye bualu bulelela; bua bualu bua bushua budi buikale munda muetu, nebuikale nʼetu tshiendelele. Ngasa, luse, ne ditalala bia kudi Nzambi Tatu ne kudi Yesu Kilisto, Muana wa Tatu, nebikale nʼetu mu bushua ne mu dinanga. Nakasanka bikole bualu bua nakusangana bana bebe bakuabo benda mu bushua, bu mutuakangata mukenshi kudi Tatu. Katataka, mukashi musungula, ndi nkusengelela, kembu munakakufundila mukenshi muhia-muhia, kadi anu mukenshi utuakadi nʼau ku tshibangidilu, bua tuetu tunangangane. Edi ndinanga, bua tuetu tuende bu mudi mikenshi yandi. Eu udi mukenshi, bu munuakunvua ku tshibangidilu, bua nuenu nuendemu. Bualu bua bena mashimi ba bungi bakamuangalaka ha buloba, kabai bajukula ne, Yesu Kilisto udi mulue mu mubidi. Eu udi muena mashimi ne mufuilakanyi ne Kilisto. Nudilame bua kanujimishi midima ituakenza, kadi bua nuenu nuangate difutu dikumbane, Muntu yonso udi uya ku mpala ne udi kai muikale mu diyisha dia Kilisto kena ne Nzambi; kadi utu wikala mu diyisha dia Kilisto, yeye udi ne Tatu ne Muana kabidi. Bialua muntu kunudi kai ulua ne diyisha edi, kanumuitabushi mu nsubu, kanumuedi muoyo; bualu bua udi umuela muoyo udi muabanyanganyi nʼandi wa midimu yandi mibi. Bualu bua ndi ne malu a bungi a kunufundila, tshiakasua kunufundila ha mabeshi ne mai a mikanda; kadi ndi ntekemena bua kulua kunudi, ne bua kuakula nʼenu ku mesu, bua disanka dienu dikumbashibue. Bana ba muanʼenu mukashi musungula badi bakuela muoyo. Meme mukulu, kudi Gayo munanga, undi nanga mu bushua. Munanga, ndi ndomba Nzambi bua wewe wikale ne diakalengele mu malu onso ne bukole bua mubidi, bu mudi muoyo webe ne diakalengele. Bualu bua nakasanka bikole hakalua bana betu banmanyisha bua bushua buebe, ne bu mûdi wenda mu bushua. Tshiena ne disanka didi dihita edi bunene, bua meme kunvua ne, Bana banyi badi benda mu bushua. Munanga, wewe udi wenza mudimu wa lulamatu mu bualu buonso bûdi wenzela badi bana betu ba mu Kilisto ne benyi kabidi; bobo badi bamanyishi ba dinanga diebe ku mpala kua ekelesia; bua bualu buabo newenze bimpe biwabatuma ku mpala ku luendu luabo biakanangane ne Nzambi. Bua muanda wa Dina dia Kilisto bobo bakamuangalaka, kabai bangate tshintu kudi ba bisamba bia bende. Nunku butudi nʼabu mbua kusankidila bantu ba nunku, bua tuetu tulue benji nʼabo ba mudimu mu bualu bua bushua. Nakufundila ekelesia malu makuabo, kadi Diotelefe udi musue kuikala ku mpala munkatshi muabo, kena utuitabusha. Nunku binalua, nenuvuluishe midimu idiye wenza, utubanda ne mei mabi; kai mudiholeshe ne malu â, kena witabusha bana betu ba mu Kilisto, ne udi uhidisha bantu badi basue kubakuatshisha, udi ubumusha mu ekelesia. Munanga, kuidikishi bualu budi bubi, kadi idikisha bualu budi buimpe. Muntu utu wenza bimpe udi wa Nzambi; muntu utu wenza bibi, kena muanze kumona Nzambi. Demetelio udi ne bumanyishi kudi bonso ne kudi bushua buine; tuetu kabidi tudi tumanyisha bualu buandi; ne wewe udi mumanye ne, Bumanyishi buetu budi bulelela. Nakadi ne malu a bungi a kukufundila, kadi tshiena musue kukufundilau ne mai a mukanda ne mutshi wa mai; kadi ndi ntekemena bua kukutangila tshituha tshihi, ne tuetu netuakulangane ku mesu. Ditalala dikale kûdi. Balunda bebe badi bakuela muoyo. Wewe wele balunda muoyo, muntu ne dina diandi muntu ne dina diandi. Yuda, muhika wa Yesu Kilisto, ne muanʼabo ne Yakobo, kudi bantu badi babikidibue, bananga mu Nzambi Tatu, ne balamibue bua Yesu Kilisto; luse kunudi ne ditalala ne dinanga bivulangane. Bananga, hanakadi ndienzesha ne disuminyina dionso bua kunufundila bua luhandu luolumue lutudi nʼalu, bualu buakunkuata kunufundila bua kukolesha mitshima yenu, bua nuenu nutshinte bikole bua ditabusha diakahabo basanto musangu umue tshiendelele. Bualu bua bantu bakuabo bakabombelela munkatshi muenu mu musokoko; bobo bakadi ne malu abo mafundibue diambedi ku dihila edi; badi kabai ba Nzambi, bandamuna ngasa wa Nzambi wetu ku malu a masandi, badi babenga Nfumu wetu umue umuehele, udi kabidi Mukelenge wetu, Yesu Kilisto. Nasha nuenu bamanye malu onso musangu umue tshiendelele, ndi musue kunuvuluishau kabidi ne, Mukelenge mumane kusungila bantu bandi mu buloba bua Ejipitu, ku nyima yeye wakashiha bantu bakadi kabai ne ditabusha. Ne banjelo bakadi kabai balamate bukelenge buabo, kadi bakashia muaba wabo mene wa kuikalamu, yeye wakubalama mu nkanu ya tshiendelele mu midima tô ne halua dituku dinene dia dilumbuluisha. Bu mudi bena Sodoma ne Amola ne ba mu misoko ya ha buihi nʼabo, hakadilabo muomumue nʼabo mu masandi, bamane kulonda malu a mubidi adi kâi makanangane ne tshilele tshia bantu, badi batekibua bu tshileshilu, bakenga ne dikenga dia kahia ka tshiendelele. Kadi muomumue kabidi bantu aba badi bona mibidi yabo mu bilotolota, badi bavuisha bukokeshi tshianana, badi bahenda matumba Kadi Mikaele, muanjelo mutambe bakuabo bunene, hakadiye ufuilakana ne diabolo muelangane nʼandi mpata bua mubidi wa Mose, kakadi ne dikima dia kulua ne bihendu bia kumuhisha nʼabi, kadi wakamba ne, Mukelenge akubele. Kadi bantu aba badi bahenda malu onso adibo kabai bamanye; ne malu adibo bajingulula mu buntu buabo, bu mudi nyama idi kayi ne meshi yajingulula, badi badiona mu malu â. Mulau wikale kudibo; bualu bua bakaya mu nshila wa Kana, bakadiela lukasa mu dihambuka dia Belama bua difutu, bakajimina mu ditomboka dia Kola. Aba mbobo badi mabue masokome mu masanka a bidia bia dinanga hadiabo nʼenu; badi balami ba mikoko badi badidisha kabai ne ditshina; badi matutu adi kâi ne nvula matuala ku mpala kudi tshihehele; badi mitshi ya mu mushihu idi kayi ne mamuma, mifue misangu ibidi mijudibue ne miji; badi mavuala makole a mu mai manene adi enza ntutu ya malu abo mine a bundu; badi mitoto idi yendakana mulu, yakatekelabo bufike bua mîdima tshiendelele. Ne Hanoka, muntu wa muanda mutekete ku nyima kua Adama wakamba mei kudibo kabidi, wamba ne, Tangilai, Mukelenge wakalua ne mbombo ya bantu bandi ba tshijila, bua kuenzesheye dihisha kudi bonso, ne bua kutuisheye bonso badi kabai ba Nzambi bua midimu yabo yonso idi ibenga Nzambi, yakenzabo mu buhidia buabo bua Nzambi, ne bua malu onso makole adi bantu babi babengi ba Nzambi bamudiule nʼau. Bantu aba badi batontolodi, bajianyi, benda bu mudi nkuka yabo (mishiku yabo idi yakula mei manene a diambu), badi banyisha bantu bua kuangata difutu. Kadi nuenu, bananga, nutuhike mei akadianjilabo kuamba kudi bapostolo ba Mukelenge wetu Yesu Kilisto; ne bakanuambila ne, Mu tshikondo tshia kunshikidilu bena tuseku nebikaleku, benda bu mudi nkuka yabo idi ibenga Nzambi. Aba badi bavuisha matahuluka, badi balonda malu a mitshima ya ha buloba, kabena ne Nyuma. Kadi nuenu, bananga, nudibake ha ditabusha dienu ditambe dia tshijila, nutendelele mu Nyuma Muimpe, nudilame mu dinanga dia Nzambi, nutekemene luse lua Mukelenge wetu Yesu Kilisto tô ne ku muoyo wa tshiendelele. Nufuila bakuabo luse helanganabo nʼenu mpata; nusungile bakuabo, nubahatule mu kahia; nufuile bakuabo luse ne ditshina; kadi nuikale ne tshilulu tshidi ne matobe a malu mabi a mubidi lukuna. Katataka kudi yeye udi mumanye mua kunulama bua nuenu kanulenduki, ne udi mua kunuteka ku mpala kua butumbi buandi ne disanka ditamba bunene, kanui ne tshilema; kudi Nzambi umue umuehele, Musungidi wetu, bua Yesu Kilisto Mukelenge wetu, kuikale butumbi ne buneme ne bukokeshi ne bukole, ku mpala kua bikondo bionso ne katataka ne tshiendelele. Amen. Buakabuluibua bua Yesu Kilisto buakamuha Nzambi bua kulesheye bahika bandi, malu mene adi ne bua kulua tshituha tshihi. Wakabutuma ne wakabumanyishila muhika wandi Yone kudi muanjelo wandi; nyeye wakamanyisha bantu di dia Nzambi ne dimanyisha dia Yesu Kilisto, malu onso akamoneye. Muntu udi ubala, ne badi bunvua mei a buambi ebu, ne badi balama malu adi mafundamu, badi ne disanka; bua tshikondo tshidi ha buihi. Yone kudi ekelesia muanda mutekete idi mu Asia, ngasa ikale kunudi ne ditalala, bia kudi Yeye udiku ne wakadiku ne udi ulua; ne kudi Nyuma muanda mutekete idi ku mpala kua nkuasa wandi wa butumbi; ne kudi Yesu Kilisto, mumanyishi wa kueyemena, muledibue diambedi wa ku bafue, ne mukokeshi wa bakelenge ba ha buloba. Kudi yeye udi utunanga, ne wakatuvua ku mibi yetu mu mashi andi mene; ne wakatuvuidisha bukelenge ne bakuidi kudi Nzambi wandi udi kabidi Tatu; kudi yeye mene kuikale butumbi ne bukokeshi tô ne tshiendelele. Amen. Tangilai, yeye udi ulua ne matutu; ne disu dionso nedimumone, ne bobo bine bakamutua difuma nebamumone; ne bisamba bionso bia ha buloba nebidile muadi bua bualu buandi. Bulelela. Amen. Mukelenge Nzambi udi wamba ne, Meme ndi A ne Z, ne udiku, ne wakadiku, ne udi ulua, Wa Bukole Buonso. Meme, Yone, muanʼenu wa ma Kilisto, ne muabanyanganyi nʼenu wa mu dikenga ne bukelenge ne ditantamana bidi mu Yesu, nakadi mu tshisanga tshidibo babikila ne Patemo, bualu bua dî dia Nzambi ne bua dimanyisha dia Yesu. Nakadi mu Nyuma dituku dia Mukelenge, ne nakunvua dî dikole ku nyima kuanyi, bu dia mpungi, diamba ne, Bualu bûdi utangila, ubufunde mu mukanda, ûtume kudi ekelesia muanda mutekete: ku Efeso, ne ku Semuna, ne ku Pêgamo, ne ku Tuatila, ne ku Sâdi, ne ku Filadelefia, ne ku Laodikiya. Nakatshinguluka bua kutangila dî diakakula nʼanyi. Hanakatshinguluka, nakamona bitekelu bia minda bia ngolo muanda mutekete; ne munkatshi mua bitekelu bia minda nakamona mukuabo mufuana muana wa muntu, muluate tshilulu tshifika tô ne ku makasa, ne munyungulula ne mukaba wa ngolo ha tshiadi tshiandi. Ne mutu wandi ne nsuki yandi yakadi mitoke tô bu miosa mitoke ya mikoko, bu neje mene; ne mesu andi akadi bu ludimi lua kahia; ne makasa andi akafuana tshiamu tshia mitaku tshibalakana, bu muditshi tshilengeshibua mu tshikutu; ne dî diandi diakadi bu tshiona tshia mai a bungi. Wakadi ne mitoto muanda mutekete mu tshianza tshiandi tshia balume, ne mukana muandi muakahatuka muele wa nvita mutue mutuisha nseke ibidi; ne mpala wandi wakadi bu diba hatemadi ne bukole buadi. Ne hanakamutangila, nakahona ku makasa andi bu mufue. Ne yeye wakateka tshianza tshiandi tshia balume hamʼbidi hanyi, wamba ne, Kutshinyi; meme ndi wa kumudilu ne wa kunshikidilu, ne Udi ne muoyo; nakadi mufue, ne mona, ndi ne muoyo tshiendelele, ne ndi ne nvungula ya lufu ne ya Muaba wa Bafue. Nunku, ufunde malu awakatangila, ne malu adiku, ne malu adi amba kulua ku nyima kuau: bualu busokoka bua mitoto muanda mutekete iwakatangila mu tshianza tshianyi tshia balume, ne bua bitekelu bia minda ya ngolo muanda mutekete. Mitoto muanda mutekete idi banjelo ba ekelesia muanda mutekete, ne bitekelu bia minda muanda mutekete bidi ekelesia muanda mutekete. Fundila muanjelo wa ekelesia wa ku Efeso ne, Udi ukuata mitoto muanda mutekete mu tshianza tshiandi tshia balume, udi wenda munkatshi mua bitekelu bia minda muanda mutekete, udi wamba malu â ne, Ndi mumanye bienzedi biebe, ne mudimu webe mukole, ne ditantamana diebe, ne kuena mua kuitabusha bantu babi, ne wakateta badi badiamba ne, Tudi bapostolo, kadi kabena bapostolo, ne wakabasangana bena mashimi. Ne udi ne ditantamana, ne wakatuala majitu bua dina dianyi, ne kuakuhungila. Kadi ndi nʼebe bualu ebu ne, wakalekela dinanga diebe dia kumudilu. Nunku, uvuiuke kuwakuhona, ukudimune mutshima webe, ne enza midimu ya kumudilu, anyi nendue kûdi, nengumushe tshitekelu tshiebe tshia muinda mu muaba watshi, biwikala kui ukudimuna mutshima webe. Kadi udi ne bualu ebu, bua udi ne bienzedi bia Bena Nikalao lukuna, bindi nʼabi lukuna kabidi. Udi ne matshu unvue budi Nyuma wambila ekelesia. Kudi udi uhita bukole, kudi yeye mene, nemuhe bua kudieye mutshi wa muoyo udi mu Paladiso wa Nzambi. Fundila muanjelo wa ekelesia wa ku Semuna ne, Wa Kumudilu ne Wa Kunshikidilu, wakadi mufue ne udi muikale ne muoyo kabidi, udi wamba malu â ne, Ndi mumanye dikenga diebe ne buhele buebe (kadi wewe udi mubanshi) ne bihendu bia badi badiamba ne, Tudi Bena Yuda, ne kabena Bena Yuda; kadi badi nsunagoga wa Satana. Kutshinyi malu audi wamba kukenga nʼau. Mona, diabolo udi wamba kuela bakuabo ba munkatshi muenu mu lukanu bua nuenu nutetshibue, ne nenuikale ne dikenga dia matuku dikumi. Wikale biebe ne dieyemena tô ne ku lufu, nunku nenkuhe tshifulu tshia butumbi tshia muoyo. Udi ne matshu unvue budi Nyuma wambila ekelesia. Udi uhita bukole kena ukengeshibua ku lufu luibidi. Fundila muanjelo wa ekelesia wa ku Pêgamo ne, Udi ne muele wa nyiha mutue mutuisha nseke ibidi udi wamba malu â ne, Ndi mumanye kûdi wikala, kudi nkuasa mene wa bukelenge bua Satana; ne udi ulama dina dianyi bikole, ne kuakahidia ditabusha dianyi, nasha mu matuku a Antipa, mumanyishi wanyi, wanyi wa kueyemena, wakashihibua munkatshi muenu, kudi Satana wikala. Kadi ndi nʼebe malu manya-manya, bualu bua udi ne bakuabo aha badi balamata diyisha dia Belama, wakayisha Balaka bua kutekeye tshilenduishi ku mpala kua Bena Isalele, bua kudiabo bintu bishihela mpingu ne bua kuendabo masandi. Nunku kabidi, udi ne bakuabo badi balamata diyisha dia Bena Nikalao muomumue. Nunku, ukudimune mutshima webe; anyi nendue kûdi lubilu, ne nenduangane nʼabo nvita ne muele wa nvita wa mukana muanyi. Udi ne matshu unvue budi Nyuma wambila ekelesia. Kudi udi uhita bukole, nemuhe tshituha tshia mana masokoka, ne nemuhe dibue ditoke, ne ha dibue dina dihia-dihia difundahu didi muntu kai mudimanye, anu yeye udi udiangata. Fundila muanjelo wa ekelesia wa ku Tuatila ne, Muana wa Nzambi udi ne mesu andi mafuana ludimi lua kahia, ne makasa andi adi bu tshiamu tshia mitaku tshidi tshibalakana, udi wamba malu â ne, Ndi mumanye midimu yebe, ne dinanga diebe ne ditabusha diebe, ne dikuatshilangana diebe dia mudimu, ne ditantamana diebe, ne midimu yebe ya kunshikidilu idi ihita ya diambedi bungi. Kadi ndi nʼebe bualu ebu ne, udi witabusha mukashi au Izebele, udi udibikila muprofete mukashi; ne udi uyisha ne udi uhambuisha bahika banyi bua kuendabo masandi ne bua kudiabo bintu bishihela mpingu. Nakamuha musangu bua kukudimuneye mutshima wandi, ne kena musue kukudimuna mutshima bua masandi andi. Tangila, ndi muela mu bulalu, ne ndi ngela badi benda nʼandi masandi mu dikenga dikole, bikalabo kabai bakudimuna mitshima yabo bua bienzedi biabo. Nenfuishe bana bandi ne lufu, ne ekelesia yonso neimanye ne meme nyeye udi uteta meshi ne mitshima; ne nempe kudi muntu ne muntu wa munkatshi muenu difutu bu mudi midimu yandi. Kadi ndi ngambila nuenu, badi bashala mu Tuatila, kudi bungi buenu badi kabai ne diyisha edi, badi kabai bamanye malu male a Satana, mbu mudibo bamba ne, Tshiena nteka bujitu bukuabo hamʼbidi henu. Kadi tshinudi nʼatshi, nutshikuate bikole tô ne hanalua. Udi uhita bukole ne udi ulama midimu yanyi tô ne kunshikidilu, nemuhe bukokeshi ha mutu ha bisamba bia bende; ne yeye neabakokeshe ne dikombo dia tshiamu tshifike, bu mudi bifuadi bia mufumbi bidi bitshibuluka bihesa bihesa; bu munakangata kabidi bukokeshi kudi Tatu wanyi. Ne nemuhe mutoto wa nkesha. Udi ne matshu unvue budi Nyuma wambila ekelesia. Fundila muanjelo wa ekelesia wa ku Sâdi ne, Yeye udi ne Nyuma ya Nzambi muanda mutekete ne mitoto muanda mutekete udi wamba malu â ne, Ndi mumanye midimu yebe ne bu mûdi ne dina dia udi ne muoyo, ne udi mufue. Wikale mutabale, ujadike bintu bidi bishala, biakamba kufua, bualu bua tshiakasangana midimu yebe mikale miakane tshishiki ku mesu kua Nzambi wanyi. Nunku, uvuluke bu muwakuangata ne muwakulua; ulame bûdi nʼabu, ukudimune mutshima webe. Nunku, biwikala kui utabala, nendue bu muibi, ne kuena umanya diba dindi ndua kûdi. Kadi udi ne mena manya-manya mu Sâdi a bakadi kabai banyanga bilulu biabo; nebende nʼanyi mu bilulu bitoke; bualu bua badi bakanangane bua kuenza nunku. Udi uhita bukole nealuatshishibue nunku ne bilulu bitoke, ne meme tshiena njimisha dina diandi mu mukanda wa muoyo nasha kakese, ne nenjukule dina diandi ku mpala kua Tatu wanyi, ne ku mpala kua banjelo bandi. Udi ne matshu unvue budi Nyuma wambila ekelesia. Fundila muanjelo wa ekelesia wa ku Filadelefia ne, Udi wa tshijila, udi wa bulelela, udi ne luvungula lua Davidi, udi unzulula ne kakuena udi winshila, udi winshila ne kakuena udi unzulula, udi wamba malu â ne, Ndi mumanye midimu yebe (tangila, nakuteka tshibi tshiunzulula ku mpala kuebe, tshidi mukuabo kai mua kutshinshila) ne, Wewe udi ne bukole bukese, ne wakalama dî dianyi, ne kuakahidia dina dianyi. Mona, ndi nkuha ba mu nsunagoga wa Satana, ba munkatshi mua badi badiamba ne, Tudi Bena Yuda, ne kabena nunku, kadi badi bashima; mona, nembavuishe bua kuluabo ne bua kukukuilabo ku makasa ebe, ne bua kumanyabo ne nakukusua. Bualu bua wakalama dî dia kutantamana kuanyi, nenkulame kabidi ku diba dia kuteta, diodio didi diamba kulua kudi ba ha buloba bonso, bua kuteta badi bikala ha buloba. Ndualua lubilu, ukuate bikole tshiudi nʼatshi, bua muntu kanyengi tshifulu tshiebe tshia butumbi. Udi uhita bukole, nemuvuishe dikunshi mu ntempelo wa Nzambi wanyi, ne kena uluhukamu kabidi; ne neufunde dina dia Nzambi wanyi hamʼbidi handi, ne dina dia tshimenga tshia Nzambi wanyi, Yelushalema muhia-muhia mene, tshidi tshihueka hanshi, tshifuma mu diulu kudi Nzambi wanyi, ne dina dianyi meme dihia-dihia. Udi ne matshu unvue budi Nyuma wambila ekelesia. Fundila muanjelo wa ekelesia wa ku Laodikiya ne, Udi Amen, mumanyishi wa kueyemena ne mulelela, tshibangidilu tshia bufuki bua Nzambi ne, Ndi mumanye midimu yebe, ne kuena nasha ku mashika nasha ku kahia. Nakadi kusua ne wikale nasha ku mashika anyi ku kahia. Nunku, bualu bua udi tshiuyuya, kui nasha ku mashika nasha ku kahia, nenkutuile mukana muanyi. Bualu bua udi wamba ne, Ndi mubanshi; ne, Nakuheta biuma; ne, Tshiena nkengela tshintu; ne kuena mumanye ne udi muena dikenga ne mukengedi wa luse, ne muhele ne mufofo ne butaka. Ndi nkulesha lungenyi lua kusumba ngolo kundi udi mulengeshibue mu kahia bua wewe ulue mubanshi, ne bivualu bitoke bua kudiluatshisha nʼabi bua bundu bua butaka buebe kabumueneki, ne buanga bua kulaba ku mesu ebe bua wewe umanye mua kutangila. Bungi bua bandi munange, ndi mbabela, ndi mbakengesha; nunku, wikale ne lukunukunu ne ukudimune mutshima webe. Tangila, ndi mudimanyike ku tshibi, ndi nkokelaku. Biunvua muntu dî dianyi, ne udi ungunzuluila tshibi, nembuele kudiye, nendie nʼandi bidia, ne yeye neadie nʼanyi. Udi uhita bukole nemuhe bua kushikameye nʼanyi mu nkuasa wa butumbi, bu munakatamba bukole ne munakashikama ne Tatu wanyi mu nkuasa wandi wa butumbi. Udi ne matshu unvue budi Nyuma wambila ekelesia. Ku nyima kua malu â nakatangila, ne mona, tshibi tshiakadi tshiunzuluke mu diulu, ne dî dia kumudilu dinakunvua diakadi bu dia mpungi diakula neanyi, diamba ne, Ubande biebe kunu, ne nenkuleshe malu adi ne bua kulua ku nyima kua malu â. Mu diba adi mene nakadi mu Nyuma, ne mona, nkuasa wa butumbi wakashikikibua mu diulu, ne mukuabo wakadi mushikame ha nkuasa wa butumbi. Ne wakadi mushikamehu, mumueneke ku mesu bu dibue dia yasape ne dia sardoine, ne muanzankongolo wakadiku, munyunguluke nkuasa wa butumbi, mumueneke ku mesu bu émeraude. Nkuasa makumi abidi ne inai yakanyunguluka nkuasa wawa wa butumbi; ne ha nkuasa ya butumbi hakadi bakulu makumi abidi ne banai bashikamahu, baluatshishibue ne bivualu bitoke; ne ha mitu habo hakadi bifulu bia butumbi bia ngolo. Ne ku nkuasa wa butumbi kudi kuhatuka miele ya nvula, ne mei, ne mikungulu ya nvula. Minda muanda mutekete ya kahia idi itema ku mpala kua nkuasa wa butumbi, idi Nyuma ya Nzambi muanda mutekete. Ku mpala kua nkuasa wa butumbi kuakamueneka bu mai manene a ntalatala mafuane dibue ditoke tô; ne munkatshi mua nkuasa wa butumbi ne munyunguluka nkuasa wa butumbi muakadi bifukibue binai bidi ne muoyo biûle tente ne mesu ku mpala ne ku nyima. Tshifukibue tshia kumudilu tshiakadi bu nyama wa ntambue, tshifukibue tshibidi tshiakadi bu muana mulume wa ngombe, ne tshifukibue tshisatu tshiakadi ne mpala bu wa muntu, ne tshifukibue tshinai tshiakadi bu nyunyu wa mukanku wakadi uhahala. Ne bifukibue binai bidi ne muoyo, ku tshintu ne ku tshintu, bidi ne mahuahua asambombo, bidi biûle tente ne mesu mabinyunguluka bam bidi ne munda; kabiena ne dikisha munya ne butuku, biamba ne, Wa Tshijila, Wa Tshijila, Wa Tshijila udi Mukelenge Nzambi wa Bukole Buonso, wakadiku ne udiku ne udi ulua. Ne hafila bifukibue bidi ne muoyo butumbi ne buneme ne disakidila kudi yeye udi ushikama ba nkuasa wa butumbi, kudi yeye udi ne muoyo tshiendelele, bakulu makumi abidi ne banai nebahone ku mpala kua yeye udi ushikama ha nkuasa wa butumbi, nebatendelele yeye udi ne muoyo tshiendelele, nebele bifulu biabo bia butumbi ku mpala kua nkuasa wa butumbi, bamba ne Wewe, Mukelenge wetu ne Nzambi wetu, udi muakane bua kuangata butumbi ne buneme ne bukole; bualu bua wewe wakafuka bintu bionso, ne bualu bua disua diebe biakadiku, ne biakafukibua. Mu tshianza tshia balume tshia yeye wakadi ushikama ha nkuasa wa butumbi, nakatangila mukanda mufunda munda ne ha nyima hau, mulamika bikole ne bimanyishilu muanda mutekete. Nakatangila muanjelo mukole wela lubila ne dî dikole ne, Nganyi udi muakane bua kubulula mukanda, ne bua kulamuneye bimanyishilu biau? Ne kakuakadi umue, nasha mu diulu, nasha ha buloba, nasha munshi mua buloba, wakamanya mua kubulula mukanda anyi kûtangilabu. Ne nakatamba kudila bualu bua kabakasangana umue muikale ne buakane bua kubutuleye mukanda, nasha kutangilahu. Ne umue wa bakulu udi ungambila ne, Kudidi nasha; tangila, Nyama wa Ntambue udi wa mu tshisamba tshia Yuda, Muji wa Davidi, wakatamba bukole bua kubululeye mukanda ne bimanyishilu biau muanda mutekete. Nakatangila munkatshi mua nkuasa wa butumbi ne mua bifukibue bidi ne muoyo, ne mua bakulu, muana wa mukoko wakadi muimane bu mumane kushihibua, muikale ne nsengu muanda mutekete ne mesu muanda mutekete, bidi Nyuma ya Nzambi muanda mutekete idibo batuma ha buloba buonso. Wakalua, wakawangata mu tshianza tshia balume tshia yeye wakadi ushikama ha nkuasa wa butumbi. Ne hakangateye mukunda, bifukibue bidi ne muoyo ne bakulu makumi abidi ne banai bakahona ku mpala kua Muana wa Mukoko, muntu ne muntu muikale ne lunkombe, ne mpanza ya ngolo miûle tente ne mananashi a kuosha adi mitendelelu ya basanto. Badi bimba musambu muhia-muhia, bamba ne, Wewe udi ne buakane bua kuangata mukunda ne bua kulamuna bimanyishilu biau. Bualu bua wewe wakashihibua ne wakasumbila Nzambi ba mu tshisamba tshionso, ne ba mu muaku wonso, ne ba munkatshi mua bantu bonso, ne ba munkatshi mua ditunga dionso, ku mashi ebe. Ne wakabayuisha bukelenge ne bakuidi kudi Nzambi wetu; ne bobo badi bakokesha ha buloba. Nakatangila kabidi, ne nakunua dî dia banjelo ba bungi banyunguluka nkuasa wa butumbi ne dia bifukibue bidi ne muoyo, ne dia bakulu, ne bungi buabo bakadi lubombo misangu lubombo, ne binunu bia binunu; bamba ne dî dikole ne, Muana wa Mukoko wakushihibua udi ne buakane bua kuangata bukole ne bubanshi ne meshi, ne bukole ne buneme ne butumbi ne disankisha. Nakunvua tshintu tshionso tshifukibue tshidi mu diulu, ne tshidi ha buloba, ne tshidi munshi mua buloba, ne tshidi ha mai manene, ne bintu bionso bidimu biamba ne, Disanka ne buneme ne butumbi ne bukokeshi bikale kudi udi ushikama ha nkuasa wa butumbi, ne kudi Muana wa Mukoko, tô ne tshiendelele. Ne bifukibue binai bidi ne musyo biakamba ne, Amen. Ne bakulu bakahona hanshi, bakakukuila. Nakamona bakalamuna Muana wa Mukoko tshimue tshia bimanyishilu muanda mutekete, ne nakunvua umue wa bifukibue binai bidi ne muoyo wamba dî dia bu mukungulu wa nvula ne, Lua. Nakatangila ne, mona, kabalu katoke, ne wakadi ushikama ha nyima haku wakadi ne buta, ne bakamuhesha tshifulu tshia butumbi; ne wakahatuka, muikale mutambi, ne bua kutambeye bakuabo bukole. Hakalamuneye tshimanyishilu tshibidi, nakunvua tshifukibue tshibidi tshidi ne muoyo tshiamba ne, Lua. Ne kabalu kakuabo kakaluhuka, kabalu kakunze mene; ne bakamuha yeye wakadi ushikama ha nyima haku bukole bua kumusheye ditalala ha buloba, ne bua bantu bashihangane; ne bakamuhesha muele wa nvita munene. Hakalamuneye tshimanyishilu tshisatu, nakunvua tshifukibue tshisatu tshidi ne muoyo tshiamba ne, Lua. Nakatangila, ne mona, kabalu kafike; ne wakadi ushikama ha nyima haku wakadi ne tshiamu tshia kuidikisha nʼatshi bujitu mu tshianza tshiandi. Nakunvua dî bu dia munkatshi mua bifukibue binai bidi ne muoyo diamba ne, Uhane tshihikilu tshikese tshia bié ku ndenalio, ne bihikilu bikese bisatu bia seola ku ndenalio; ne kunyangi manyi ne nvinyo. Hakalamuneye tshimanyishilu tshinai, nakunvua dî dia tshifukibue tshinai tshidi ne muoyo tshiamba ne, Lua. Nakatangila, ne mona, kabalu ka tshitoketoke; ne dina dia wakadi ushikama ha nyima haku diakadi Lufu; ne Muaba wa Bafue wakalonda ku nyima kuandi. Ne bakabaha bukokeshi ha mutu ha tshituha tshinai tshia ba ha buloba, bua kubashiha ne muele wa nvita, ne tshiole, ne lufu, ne kudi nyama ya luonji ya ha buloba. Hakalamuneye tshimanyishilu tshitanu, nakatangila munshi mua tshioshelu mioyo ya bantu bakashihibua bua dî dia Nzambi, ne bua bumanyishi buakadibo nʼabu; ne bakadila ne dî dikole, bamba ne, O Mukelenge wa tshijila ne mulelela, udi windisha musangu bule munyi bua kulumbuluisha ne bua kutusombuela bua mashi etu kudi badi bikala ha buloba? Bakabahesha, muntu ne muntu, diyeka ditoke; ne bakabambila bua kuanza kuikisha tshituha tshihi tô ne hakumbashibua bahika nʼabo, ne bana babo ba mu Kilisto, badi balua kushihibua bu bobo. Nakatangila hakalamuneye tshimanyishilu tshisambombo, ne dikanka dinene dia buloba diakadiku; ne diba diakalua difike bu mudi tshilulu tshifike tshia miosa; ne ngondo mujima wakalua bu mashi; ne mitoto ya mu diulu yakahona hanshi ha buloba, bu mudi mutshi wa nfigi uhôka nfigi yau mibishi, haunyungushabo kudi tshihehele tshikole. Ne diulu diakûmushibua ku mukanda muvunga hauvungabo; ne mukuna munene wonso, ne tshisanga tshionso biakumushibua ha miaba yabi. Ne bakelenge ba ha buloba ne bakelenge bana ne tupitene tunene tua masalayi, ne babanshi, ne bakole, ne muhika yonso, ne mudishikamine yonso, bakadisokoka mu nyongolo ne mu mabue a mikuna minene. Ne badi bambila mikuna ne mabue ne, Nutuhukile, nutusokoke ku mesu kua udi ushikama ha nkuasa wa butumbi, ne ku tshishi tshia Muana wa Mukoko; bualu bua dituku dinene dia tshishi tshiabo diakulua, ne nganyi udi mua kushindama? Ku nyima kua bualu ebu nakatangila banjelo banai bimana ku matengu anai a buloba, bakuate mpehele mai ya buloba, bua luhehele kaluhehi ha buloba, anyi ha mai manene, anyi ha mutshi. Nakatangila muanjelo mukuabo ubanda mulu, ufuma kudi kubanda diba, muikale ne tshimanyishilu tshia Nzambi udi ne muoyo; ne wakela dî dikole kudi banjelo banai bakadi baheshibua bukole bua kunyangabo buloba ne mai manene, wamba ne, Kanunyangi buloba, nasha mai manene, nasha mitshi, tô ne hatuamana kuteka tshimanyishilu ha mpala ha bahika ba Nzambi wetu. Nakunvua bungi bua bakatekabo tshimanyishilu, tshishikula tshimue ne mbombo mai ne binunu binai, bakatekabo tshimanyishilu ba mu tshisamba tshionso tahia bana ba Isalele. Ba mu tshisamba tshia Yuda, bantu lubombo ne binunu bibidi bakatekibua tshimanyishilu; Ba mu tshisamba tshia Lubena, lubombo ne binunu bibidi; Ba mu tshisamba tshia Gada, lubombo ne binunu bibidi; Ba mu tshisamba tshia Ashê, lubombo ne binunu bibidi: Ba mu tshisamba tshia Nafatale, lubombo ne binunu bibidi; Ba mu tshisamba tshia Manashe, lubombo ne binunu bibidi; Ba mu tshisamba tshia Simeona, lubombo ne binunu bibidi; Ba mu tshisamba tshia Lewi, lubombo ne binunu bibidi; Ba mu tshisamba tshia Yisakâ, lubombo ne binunu bibidi; Ba mu tshisamba tshia Zebulona, lubombo ne binunu bibidi; Ba mu tshisamba tshia Yosefe, lubombo ne binunu bibidi; Ba mu tshisamba tshia Benyamina, lubombo ne binunu bibidi bakatekibua tshimanyishilu. Ku nyima kua malu a nakatangila, ne mona, tshisumbu tshinene tshia bantu tshiakadi muntu kai mua kubala, munkatshi mua ditunga dionso, ne munkatshi mua bisamba bionso, ne bantu bonso, ne miaku yonso, bimana ku mpala kua nkuasa wa butumbi ne ku mpala kua Muana wa Mukoko, baluatshishibue maye, ka matoke, bikale ne malala a mabue mu bianza biabo. Ne badi bela di dikole, bamba ne, Luhandu ndua kudi Nzambi wetu udi ushikama mu nkuasa wa butumbi, ne kudi Muana wa Mukoko. Ne banjelo bonso bakadi bimana banyunguluka nkuasa wa butumbi, ne bakulu ne bifukibue binai bidi ne muoyo; ne bakahona ku mpala kua nkuasa wa butumbi ha mpala habo, ne bakatendelela Nzambi, bamba ne, Amen, disanka ne butumbi ne meshi ne disakidila ne buneme ne bukokeshi ne bukole bikale kudi Nzambi wetu tô ne tshiendelele; Amen. Ne umue wa bakulu wakangandamuna dî ungambila ne, Aba badi baluatshisha ne mayeka matoke badi banganyi ne bakafuma kudi kunyi? Nakamuambila ne, Mukelenge wanyi, wewe udi mumanye. Wakangambila kabidi ne, Aba mbantu badi bumuka mu dikenga dinene, ne bakuvua mayeka abo, ne bakâtokesha mu mashi a Muana wa Mukoko. Bua bualu ebu badi ku mpala kua nkuasa wa butumbi wa Nzambi, ne badi bamukuatshila mudimu mu nya ne butuku mu ntempelo wandi; ne udi ushikama mu nkuasa wandi wa butumbi neashimike nsubu wandi wa tshilulu ha mutu habo. Kabena hikala ne nsala kabidi, kabena bikala ne nyota kabidi, ne diba kadiena dibosha, nasha luiya lukese; bualu bua Muana wa Mukoko udi munkatshi mua nkuasa wa butumbi neikale mulami wabo, ne neabalombole ku mishimi ya mai a muoyo; ne Nzambi neakuhule tshinsonshi tshionso ku mesu kuabo. Hakasululeye tshimanyishilu tshia muanda mutekete, ditalala diakadi mu diulu bu tshituha tshia hankatshi tshia luhola lua diba. Ne nakatangila banjelo muanda mutekete batu bimana ku mpala kua Nzambi; ne bakabalesha mpungi muanda mutekete. Ne muanjelo mukuabo wakalua ne wakimana ku tshioshelu, wakadi ne tshikuhilu tshia ngolo tshia kuoshamu mananashi; ne bakamulesha mananashi a bungi bua kuasangisheye ne mitendelelu ya basanto bonso ha tshioshelu tshia ngolo tshiakadi ku mpala kua nkuasa wa butumbi. Ne muinshi wa mananashi au musangisha ne mitendelelu ya basanto, biakabanda ku mpala kua Nzambi, bihatuka mu tshianza tshia muanjelo. Ne muanjelo wakuangata tshibuhilu tshia kuoshamu mananashi; wakatshûsha tente ne kahia ka ha tshioshelu, wakatshiela ha buloba, ne mikungulu ne mei ne miele ya nvula ne kukanka kua buloba biakadiku. Ne banjelo muanda mutekete bakadi ne mpungi muanda mutekete bakadilongolola bua kuyela. Wa kumudilu wakela mpungi, ne mabue a nvula ne kahia bisangisha ne mashi biakadiku, biakedibua ha buloba, ne tshituha tshisatu tshia buloba tshiakoshibua, ne tshituha tshisatu tshia mitshi tshiakoshibua, ne mashinde mabishi onso akoshibua. Ne muanjelo muibidi wakela mpungi, ne kuakadi bu mukuna mimene mutemeshibue ne kahia wakedibua mu mai manene, ne tshituha tshisatu tshia mai manene tshiakalua mashi; ne tshituha tshisatu tshia bifukibue biakadi mu mai manene, biakadi ne muoyo mene, biakafua; ne tshituha tshisatu tshia matu tshiakabutudibua. Muanjelo muisatu wakela mpungi ne mu diulu muakahona mutoto munene mutema bu tshimunyi, wakahona ha tshituha tshisatu tshia misulu, ne ha mishimi ya mai; ne dina dia mutoto didi Bululu, ne tshituha tshisatu tshia mai tshiakalua bululu; ne bantu ba bungi bakafua bualu bua mai, bualu bua akavuishibua bululu. Muanjelo muinai wakela mpungi, ne tshituha tshisatu tshia diba tshiakakuambila, ne tshituha tshisatu tshia ngondo, ne tshituha tshisatu tshia mitoto; bua tshituha tshiabi tshisatu tshikale midima, ne bua munya wa dituku kautemi bu tshituha tshiadi tshisatu, ne butuku muomumue. Nakatangila, ne nakunvua nyunyu wa mukanku umuehele uhahala munkatshi mua diulu, wamba ne dî dikole ne, Mulau, mulau, mulau, kudi badi bikala ha buloba, bualu bua mei makuabo a mpungi ya banjelo basatu badi balua kuela. Muanjelo muitanu wakela mpungi, ne nakamona mutoto mufuma mu diulu muhone ha buloba; ne bakamuha luvungula lua buina bua tshina tshidi katshi ne nshikidilu. Ne yeye wakunzulula buina bua tshina tshidi katshi ne nshikidilu; ne muinshi wa ku buina wakahatuka bu muinshi wa tshikutu tshinene; ne diba ne luhehele biakafikishibua ku muinshi wa ku buina. Ne mikumbi yakabatuka mu muinshi ha buloba; bakuiha bukole bu mudi tuminyiminyi tua ha buloba ne bukole. Bakayela mukenshi bua kainyangi mashinde a ha buloba, nasha tshintu tshidi tshiashi, nasha mutshi, kadi bua kunyangai anu bantu badi kabai ne tshimanyishilu tshia Nzambi ha mpala habo. Ne bukole buakuihebua kembua kubashiha, kadi bua bobo bakengeshibue ngondo itanu, ne dikenga diabo dikole diakadi bu dikenga didi kaminyiminyi kakengesha nʼadi muntu hamusumaku. Ne mu matuku au bantu nebakebe lufu, ne kabena balusangana nasha kakese; nebasue kufua, ne lufu ludi lubaityema. Bifuanyikishi bia mikumbi biakadi bu tubalu tulongolola bua nvita; ne ha mitu hai hakadi bu mudi bifulu bia butumbi bifuana ngolo, ne mpala yai yakadi bu mpala ya bantu. Yakadi ne nsuki bu nsuki ya bakashi, ne menu ai akadi bu menu a nyama wa ntambue. Ne yakadi ne bibuikilu bia ha tshiadi bu bibuikilu bia tshiamu; ne tshiona tshia mahuahua ai tshiakadi bu tshiona tshia makalu a nvita, tshia tubalu tua bungi hanyematu lubilu bua kuya mu nvita. Yakadi ne mikila bu ya tuminyiminyi, ne tulonda; ne mu mikila yai mudi bukole buai bua kukengesha nʼabu bantu ngondo itanu. Idi ne mukelenge ha mutu hai, udi muanjelo wa tshina tshidi katshi ne nshikidilu; dina diandi mu muaku wa Bena Ebelu didi Abadona, ne mu muaku wa Bena Gelika didi Apoluona. Mulau wa kumudilu wakuhita; tangila, milau ibidi itshidi ilua ku nyima kua malu â. Ne muanjelo muisambombo wakela mpungi, ne nakunvua dî dia ku nsengu ya tshioshelu tshia ngolo tshidi ku mpala kua Nzambi, mukuabo wamba kudi muanjelo muisambombo, wakadi ne mpungi ne, Sulula banjelo banai badi basuika ku musulu mimene Pelata. Ne banjelo banai bakasuludibua bakadi balongolodibua bua luhola ne dituku ne ngondo ne tshidimu, bua kushiha tshituha tshisatu tshia bantu. Ne bungi bua misumba ya bena nvita ba ha tubalu buakadi mbombo ibidi misangu lubombo; nakunvua bungi buabo. Nunku, nakamona tubalu mu tshikena kumona, ne bakadi bashikama ha nyima hatu, bikala ne bibuikilu bia ha tshiadi bikunzubile, ne bia lubidibidi lua soufre; ne mitu ya tubalu idi bu mitu ya nyama ya ntambue, ne mukana muatu mudi muhatuka kahia ne muinshi ne soufre. Tshituha tshisatu tshia bantu tshiakashihibua ku bihuhu ebi, ku kahia ne ku muinshi ne ku soufre biakadi bihatuka mukana muatu. Bua bukole bua tubalu budi mukana muatu, ne mu mikila yatu; bua mikila yatu idi ifuana nyoka, ne idi ne mitu; ne tudi tukengesha nʼai bantu. Ne bantu bonso bakuabo bakashala kabai bashihibue mu bihuhu ebi, kabakakudimuna mitshima yabo bua midimu ya bianza biabo, bua kabakukuidi bademon, ne mpingu ya ngolo ne ya argent ne ya tshiamu tshia mitaku ne ya dibue ne ya mitshi, idi kayi mimanye mua kutangila, anyi kunvua, anyi kuenda; ne kabakakudimuna mitshima yabo bua mashihangana abo, nasha bua muhongo wabo, nasha bua masandi abo, nasha bua buibi buabo. Nakatangila muanjelo mukuabo mukole uhueka mu diulu, muluatshisha ne ditutu; ne muanzankongolo wakadi ha mutu handi, ne mpala wandi wakadi bu diba, ne makasa andi akadi bu ndimi ya kahia; ne wakadi ne mukanda mukese mubulula mu tshianza tshiandi, ne wakateka dikasa diandi dia tshianza tshia balume ha mai manene, ne dia tshianza tshia bakashi ha buloba, ne wakela dî dikole, bu muadi wa nyama wa ntambue; ne hakeleye dî diandi, mikungulu muanda mutekete yakakula mei ai. Ne hakakula mikungulu muanda mutekete, nakadi ngamba kufunda, ne nakunvua dî difuma mu diulu diamba ne, Teka tshimanyishilu ku malu akamba mikungulu muanda mutekete, kuafundi nasha. Ne muanjelo unakatangila muimane ha mai manene ne ha buloba, wakabisha tshianza tshiandi tshia bukole mulu; wakaditshiha kudi udi ne muoyo tshiendelele, wakafuka diulu ne bintu bidimu, ne buloba ne bintu bidihu, ne mai manene ne bintu bidimu, ne, Kakuena dishanguluka kabidi; kadi mu matuku a dî dia muanjelo wa muanda mutekete, hadiye wamba kuela mpungi, mpadi bualu busokoka bua Nzambi bushika, bu mudi lumu luimpe luakambileye bahika bandi, baprofete. Ne dî dinakunvua difuma mu diulu, mkadiunvua kabidi diakula nʼanyi ne dingambila ne, Ya wangate mukanda udi mubulula mu tshianza tshia muanjelo udi wimana ha mai manene ne ha buloba. Nakaya kudi muanjelo tunuambila bua kumpeye mukanda mukese. Ne wakangambila ne, Uwangate, ûdie; neuvuishe difu diebe bululu, kadi mukana muebe nemuikale mushemakane bu buitshi. Nakuangata mukanda mukese mu tshianza tshia muanjelo, nakûdia; wakadi ushemakana mukana muanyi bu buitshi; ne hanakaudia, difu dianyi diakavuishibua bululu, Badi bangambila ne, Bûdi nʼabu mbua kuamba dî dia Nzambi kabidi bua bantu ba bungi ne bisamba ne miaku ne bakelenge. Ne bakumpa dilenga bu tshibangu, bangambila ne, Bika, widikishe ntempelo wa Nzambi ne tshioshelu, ne badi batendelelamu. Tshiendelu tshidi ha bule ha ntempelo, utshishîe ha bule, kutshîdikishi nasha; bualu bua bakutshiba bisamba bia bende; ne bobo nebadiate musoko wa tshijila munshi mua makasa abo ngondo makumi anai ne ibidi. Nempe bamanyishi banyi babidi bukole, ne nebambe dî dia Nzambi matuku tshinunu ne nkama ibidi ne makumi asambombo, baluatshisha bilulu bia miosa. Bobo badi mitshi ibidi ya oleve ne bitekelu bia minda bibidi, bidi bimana ku mpala kua Mukelenge wa buloba. Ne biasua muntu kubenzela bibi, kahia kadi kahatuka mukana muabo, kadi kashidisha badi nʼabo lukuna; ne biasua muntu kubenzela bibi, budiye nʼabu mbua kushihibua nunku, Bobo badi ne bukole bua kuinshila diulu, bua nvula kailoki mu matuku a mayisha abo a baprofete, ne badi ne bukole ha mutu ha mai bua kuândamuna mashi ne bua kukuma buloba ne bihuhu misangu yonso yasuabo. Ne hamanabo kushikisha bumanyishi buabo, nyama wa luonji udi uhatuka mu tshina tshidi katshi ne nshikidilu nealuangane nʼabo nvita, neabahite bukole, neabashihe. Ne bitalu biabo nebilale mu musesu wa musoko mimene, udibo babikila mu meshi a nyuma Sodoma ne Ejipitu, kuakadi kabidi Mukelenge wabo mushihibue ku mutshi mutshiamakane. Ne ba munkatshi mua bantu ne bisamba ne miaku ne matunga badi batangila bitalu biabo matuku asatu ne tshituha tshia hankatshi ha dituku, ne kabena bitabusha bua bitalu biabo biladikibue mu lukita. Ne badi bikala ha buloba badi basanka bua bualu buabo, ne badi banaya; nebatuminangane bintu bia disanka, bualu bua baprofete aba babidi bakakengesha badi bikala ha buloba. Ne ku nyima kua matuku asatu ne tshituha tshia hankatshi ha dituku, muhuya wa muoyo wa kudi Nzambi wakabuela munda muabo, ne bobo bakimana ne makasa abo; ne buowa bunene buakakuata bantu bakabatangila. Ne bakunvua dî dikole difuma mu diulu dibambila ne, Luai bienu kunoku. Ne bakabanda mu diulu mu ditutu; ne bakadi nʼabo lukuna bakabatangila. Mu diba adi dikanka dinene dia buloba diakadiku, ne tshituha tshia dikumi tshia musoko tshiakûhuka; ne bantu binunu muanda mutekete bakafua mu dikanka dia buloba; bakuabo bonso bakadi bashale bakatshinyishibua, bakatumbisha Nzambi wa mu diulu. Mulau muibidi wakahita, imona, mulau muisatu ulualua lubilu. Muanjelo wa muanda mutekete wakela mpungi; ne mei makole a mu diulu akalua, amba ne, Bukelenge bua ha buloba buakulua bukelenge bua Mukelenge wetu, ne bua Kilisto wandi, ne yeye neakokeshe tô ne tshiendelele. Ne bakulu makumi abidi ne banai, badi bashikama ku mpala kua Nzambi ha nkuasa yabo ya butumbi, bakahona ba mpala habo, bakatendelela Nzambi, bamba ne, Tudi tukusakidila, Mukelenge Nzambi wa Bukole Buonso, udiku ne wakadiku; bualu bua wewe wakuangata bukole buebe bunene, ne wakakokesha. Ne ba mu bisamba bakadi ne tshishi, ne tshishi tshiebe tshiakalua, ne tshikondo tshia kulumbuluisha bafue tshiakalua, ne tshikondo tshia kufila bukenshi kudi bahika bebe, baprofete, ne kudi basanto, ne kudi badi batshina dina diebe, bakese ne banene; ne tshia kubutula badi babutula buloba. Ne ntempelo wa Nzambi udi mu diulu wakunzuludibua; ne mushete wa tshihungidi tshiandi mu ntempelo wandi wakamuenebua; ne miele ya nvula, ne mei, ne mikungulu, ne kukanka kua buloba, ne mabue a nvula, biakalua. Tshimanyinu tshinene tshiakamuenebua mu diulu, mukashi muluatshisha ne diba, ne ngondo munshi mua makasa andi, ne tshifulu tshia butumbi tshia mitoto dikumi ne ibidi ha mutu handi. Ne yeye wakadi ne difu, wakadi udila, muikale ne didinyenga dia kuleleye, ne mu dikenga dia kumuleleshabo. Ne tshimanyinu tshikuabo tshiakamuenebua mu diulu; ne mona, dragon mukunze, muikale ne mitu muanda mutekete ne nsengu dikumi, ne bifulu bia butumbi muanda mutekete ha mitu handi. Mukila wandi wakakoka tshituha tshisatu tshia mitoto ya mu diulu, ne wakayela ha buloba; ne dragon wakimana ku mpala kua mukashi wakadi wamba kulela, bua kudieye muana wandi hamuleleye. Yeye wakalela muana, muana mulume mene, udi ne bualu bua kukokesha bisamba bionso ne dikombo dia tshiamu; ne muana wandi wakakuatshibua mu diulu kudi Nzambi ne ku nkuasa wandi wa butumbi. Ne mukashi wakanyema mu tshihela, mudiye ne muaba mumulongoluela kudi Nzambi, bua kumudishaboku matuku tshinunu ne nkama ibidi ne makumi asambombo. Nvita minene yakadi mu diulu; Mikaele ne banjelo bandi bakaya kuluangana nvita ne dragon; ne dragon ne banjelo bandi bakaluangana nʼabo; ne kabakabahita bukole, ne kabakasangana muaba wabo mu diulu. Dragon munene wakedibua hanshi, nyoka au wa kale, yeye udi muidikibue ne, Diabolo ne Satana, mudingi wa ba ha buloba bonso; wakedibua hanshi ha buloba, ne banjelo bandi bakedibua nʼandi hanshi. Ne nakunvua dî dikole mu diulu, diamba ne, Katataka luhandu ne bukole ne bukelenge bia Nzambi wetu ne bukokeshi bua Kilisto wandi biakulua; bualu bua mubandi wa bana betu ba mu Kilisto, udi ubabanda ku mpala kua Nzambi wetu munya ne butuku udi wedibua hanshi. Ne bobo bakamuhita bukole bualu bua mashi a Muana wa Mukoko, ne bualu bua dî dia bumanyishi buabo; ne bobo kabakasua mioyo yabo tô ne ku lufu. Nunku, sankai bienu, mûlu ne nuenu badi bashikamamu. Mulau wikale ha buloba, ne kudi mai manene, bualu bua diabolo wakuhueka kunudi, muikale ne tshishi tshikole, mumanye ne, Udi ne musangu muihi. Hakatangila dragon ne, Nakuedibua ha buloba, wakakengesha mukashi wakalela muana mulume. Bakuhesha mukashi mahuahua abidi a nyunyu wa mukanku munene bua yeye ahahale mu tshihela ku muaba wandi, kudibo bamudisha tshikondo, ne bikondo, ne tshituha tshia hankatshi ha tshikondo bua kumukeye ku mpala kua nyoka. Ne nyoka wakela mai bu musulu mahatuke mukana muandi ku nyima kua mukashi, bua kumukokela ha musulu. Ne buloba buakakuatshisha mukashi, ne buloba buakabulula mukana muabu ne buakamina musulu wakatula dragon mukana muandi. Ne dragon wakafikila mukashi munda, wakaya kuluangana nvita ne tunkanunuina tuandi tuakashala, tudi tutumikila mikenshi ya Nzambi, ne tudi ne bumanyishi bua Yesu: Ne wakimana ha lusenga lua ku mai manene. Nakatangila nyama wa luonji uhatuka mu mai manene, wakadi ne nsengu dikumi ne mitu muanda mutekete, ne wakadi ne bifulu bia butumbi dikumi ha nsengu yandi, ne ha mitu handi mena a kuhenda nʼau Nzambi. Ne nyama nuakatangila wakafuana nyama wa nkashama, ne makama andi akadi bu akama a nyama wa ours, ne mukana muandi muakadi bu mukana mua nyama wa ntambue; ne dragon wakamuhesha bukole buandi, ne nkuasa wandi wa butumbi, ne bukokeshi bunene. Nakatangila umue wa mitu yandi bu mudiu mutaha mputa wa lufu; ne mputa wandi wa lufu wakuma; ne ba ha buloba buonso bakakema ku nyima kua nyama, wa luonji; ne bakakukuila dragon bualu bua yeye wakahesha nyama wa luonji bukokeshi buandi, ne bakakukuila nyama wa luonji, bamba ne, Udi bu nyama wa luonji nganyi? Udi mua kuluangana nʼandi nganyi? Bakamuhesha mukana muambe malu manene ne bihendu bia kuhenda nʼabi Nzambi, ne bakamuhesha bukokeshi bua kuenzeye malu andi ngondo makumi anai ne ibidi. Ne wakabulula mukana muandi bua kubendeye Nzambi bihendu; bua kuhendeye dina diandi ne nsubu wandi wa tshilulu, bobo mene badi bikala mu diulu. Bakamuhesha bukole bua kuluanganeye ne basanto ne bua kubatambeye; bakamuhesha bukokeshi ha mutu ha tshisamba tshionso, bantu bonso, muaku wonso, ne ditunga dionso. Ne bonso badi bikala ha buloba nebamukukuile, muntu yonso udi kai ne dina difunda ku tshibangidilu tshia buloba mu mukanda wa muoyo wa Muana wa Mukoko udi mushihibue. Bikala muntu ne matshu, unvue biandi. Bikala muntu ubuesha bakuabo mu buhika, Uyaya mu buhika; bikala muntu ushiha bakuabo ne muele wa nvita, budiye nʼabu mbua kushihibua ne muele. Eku kudi ditantamana, ne ditabusha dia basanto. Nakatangila nyama wa luonji mukuabo uhatuka mu buloba, wakadi ne nsengu ibidi mifuane ya muana wa mukoko, ne wakakula bu dragon. Yeye udi wenzesha bukokeshi buonso bua nyama wa kumudilu ku mesu kuandi. Ne udi wenzesha buloba ne bonso badi bikalahu bua kukukuilabo nyama wa luonji wa kumudilu, wakadi ne mputa wa lufu mûme. Ne udi wenza bimanyinu binene, bua kuenzesha kahia mene bua kuhatukaku mu diulu ne kuhuekaku ha buloba ku mesu kua bantu. Yeye udi udinga bantu badi bikala ha buloba bualu bua bimanyinu biakadiye uheshibua bua kuenza ku mesu kua nyama wa luonji, wambila badi bikala ha buloba bua kuenzabo tshifuanyikishi tshia nyama wa luonji wakadi ne mputa wa muele wa nvita ne wakushala ne muoyo. Bakamuha bukole bua kutshihesheye muhuya, tshifuanyikishi mene tshia nyama wa luonji, ne bua tshifuanyikishi tshia nyama wa luonji tshiakule, ne bua kushihisheye bonso badi kabai bakukuna tshifuanyikishi tshia nyama wa luonji. Ne udi wenzesha bonso, ne bakese ne banene, ne babanshi ne bahele, ne badishikamine ne bahika, bua babahe tshimanyinu ha tshianza tshiabo tshia balume anyi ha mpala habo; bua kakuikadi muntu udi mua kusumba, nasha kuhana, anu udi ne tshimanyinu, dina mene dia nyama wa luonji, anyi nomba wa dina diandi. Eku kudi meshi. Udi ne dijingulula, abale biandi nomba wa nyama wa luonji; bualu bua udi nomba wa muntu; ne nomba wandi udi nkama isambombo ne makumi asambombo ne isambombo. Nakatangila, ne mona, Muana wa Mukoko muimane ha Mukuna wa Siona, ne bantu tshishikula tshimue ne mbombo inai ne binunu binai bakadi ngandi, bikale ne dina diandi, ne dina dia Tatu wandi, mafunda ha mpala habo. Nakunvua dî difuma mu diulu, bu dî dia mai a muenji a bungi ne bu dî dia mukungulu munene; ne dî dinakunvua diakadi bu dia bimbi ba nkombe bimba ne nkombe yabo; ne badi bimba bu musambu muhia-muhia ku mpala kua nkuasa wa butumbi, ne ku mpala kua bifukibue binai bidi ne muoyo ne bakulu; ne kakuakadi muntu wakamanya mua kuyila musambu eu, anu bantu aba tshishikula tshimue ne mbombo inai ne binunu binai, bobo mene bakasumbibua mu ba ha buloba. Aba mbantu bakadi kabai banyanguka ne bakashi, bualu bua bobo badi mishikankunde ya tumama. Aba mbantu badi balonda Muana wa Mukoko kuonso kudiye uya. Bobo bakasumbibua munkatshi mua bantu, bua kuikala mamuma a kuhuola diambedi kudi Nzambi ne kudi Muana wa Mukoko. Ne mukana muabo kamuakasanganyibua mashimi; kabena ne tshilema. Nakatangila muanjelo mukuabo uhahala munkatshi mua diulu, wakadi ne lumu luimpe lua tshiendelele lua kuambileye badi bikala ha buloba, ne kudi ditunga dionso ne tshisamba tshionso ne muaku wonso ne bantu honso, udi wamba ne dî dikole ne, Nutshine Nzambi, numutumbishe, bualu bua diba dia dilumbuluisha diandi diakulua; nukukuile yeye wakafuka diulu ne buloba ne mai manene ne mishimi ya mai. Ne muanjelo mukuabo, muibidi wakalonda, wamba ne, Babulona munene wakuhuka, wakuhuka, wakunuisha bisamba bionso nvinyo wa tshishi tshia masandi andi. Muanjelo mukuabo, muisatu wakabalonda, wamba ne dî dikole ne, Biakukuila muntu nyama wa luonji ne tshifuanyikishi tshiandi, ne biangateye tshimanyinu ha mpala handi, anyi ha tshianza tshiandi, yeye kabidi, neanue nvinyo wa tshishi tshia Nzambi wakalongolodibua kai musangisha ne tshinga tshintu mu luhanza lua tshishi tshiandi; ne neakengeshibue mu kahia ne soufre ku mpala kua banjelo ba tshijila ne ku mpala kua Muana wa Mukoko. Ne muinshi wa kahia ka dikenga diabo udi ubanda tshiendelele; ne kabena ne dikisha munya ne butuku, bobo badi bakukuna nyama wa luonji ne tshifuanyikishi tshiandi, ne yonso udi wangata tshimanymu tshia dina diandi. Eku nkutantamana kua basanto, badi batumikila mikenshi ya Nzambi, ne ditabusha dia Yesu. Nakunvua dî difuma mu diulu diamba ne, Funda ne, Bafue badi bafua mu Mukelenge badi ne disanka katataka tô ne tshiendelele. Nyuma udi wamba ne, E, bua bobo bikishe ku midimu yabo, bienzedi biabo bidi biya nʼabo. Nakatangila ne, mona, ditutu ditoke; ne nakatangila mukuabo mafuane muana wa muntu ushikama ha ditutu, muikale ne tshifulu tshia butumbi tshia ngolo ha mutu handi, ne muele mutuisha wa kunowa nʼau mu tshianza tshiandi. Muanjelo mukuabo wakaluhuka mu ntempelo, wela dî dikole kudi yeye wakadi ushikama ha mutu ha ditutu ne, Utume muele webe, unowe; bualu bua diba dia kunowa diakulua, bualu bua bintu bia ha buloba bia kunowa biakulua. Ne wakadi ushikama ha ditutu wakela muele wandi ha buloba, ne bintu bia ha buloba biakanowibua. Ne muanjelo mukuabo wakaluhuka mu ntempelo udi mu diulu, yeye kabidi, muikale ne muele mutuisha wa kunowa nʼau. Ne muanjelo mukuabo wakaluhuka mu tshioshelu, nyeye udi ne bukokeshi ha mutu ha kahia; ne wakela dî dikole kudi wakadi ne muele mutuisha wa kunowa nʼau, ne, Utume muele webe mutuisha wa kunowa nʼau, usangishe bisumbu bia tumuma tua nvinyo tua ku muonshi wa ha buloba; bualu bua tumuma tuabu tuakulua bimpe. Muanjelo wakela muele wandi wa kunowa nʼau ha buloba, wakahuola tumuma tua nvinyo tua ku muonshi wa ha buloba, wakatuela mu tshikaminu, tshikaminu, tshinene mene tshia tshishi tshia Nzambi. Bakadiata tumuma mu tshikaminu ha nyima ha musoko, ne mashi akahatuka mu tshikaminu, akabanda tô ne ku mionshi ya ku mbanga ya tubalu, ku ntanta wa kilometa nkama isatu. Nakatangila tshimanyinu tshikuabo mu diulu, tshinene ne tshia dikema: banjelo muanda mutekete bikale ne makenga muanda mutekete, adi a kunshikidilu, bualu bua kudiu kudi tshishi tshia Nzambi tshishika. Nakatangila bu mai manene a ntalatala masangisha ne kahia; ne nakatangila badi bahita nyama wa luonji, ne tshifuanyikishi tshiandi, ne nomba wa dina diandi bukole, bimane biabo ha mai manene a ntalatala, bikale ne nkombe ya Nzambi. Badi bimba musambu wa Mose, muhika wa Nzambi, ne musambu wa Muana wa Mukoko, bamba ne, Mukelenge Nzambi wa Bukole Buonso, midimu yebe idi minene ne ya dikema. Wewe, Mukelenge wa bikondo, nshila yebe idi miakane ne ya bulelela. Mukelenge, nganyi udi kai utshina, udi kai utumbisha dina diebe? Bualu bua wewe nkayebe udi wa tshijila; bualu bua ba mu bisamba bionso nebalue ne nebakukuile ku mpala kuebe; bualu bua bienzedi biebe biakane biakumueneshibua. Ku nyima kua malu â nakatangila, ne ntempelo wa nsubu wa tshilulu wa bumanyishi wa mu diulu wakunzuludibua. Ne banjelo muanda mutekete bakadi ne makenga muanda mutekete bakaluhuka mu ntempelo, baluatshishibue mabue a mushinga mukole, matoke ne makenka, banyungulule ne mikaba ya ngolo ha biadi biabo. Ne tshimue tshia bifukibue binai bidi ne muoyo tshiakahesha banjelo muanda mutekete mpanza ya ngolo muanda mutekete miûle tente ne tshishi tshia Nzambi udi ne muoyo tshiendelele. Ne ntempelo wakûshibua tente ne muinshi wa ku butumbi bua Nzambi ne ku bukole buandi; ne nasha umue wakamanya mua kubuela munda mua ntempelo, tô ne hashika makenga muanda mutekete a banjelo muanda mutekete. Nakunvua dî dikole difuma ku ntempelo diambila banjelo muanda mutekete ne, Yai bienu nuhongolole mpanza muanda mutekete ya tshishi tshia Nzambi ha buloba. Wa kumudilu wakaya, wakahongolola luhanza luandi ha buloba; ne mputa mibi idi isamisha bantu yakakuata bakadi ne tshimanyinu tshia nyama wa luonji ne bakadi bakukuila tshifuanyikishi tshiandi. Muibidi wakahongolola luhanza luandi ha mai manene, ne akalua mashi bu a muntu mufue, ne tshionso tshiakadi ne muoyo tshiakafua, bintu mene biakadi mu mai manene. Muisatu wakahongolola luhanza luandi ha misulu ne ha mishimi ya mai, ne mai akalua mashi. Nakunvua muanjelo wa mai wamba ne, Wewe udi muakane, udiku ne wakadiku, Wewe wa Tshijila, bualu bua wakalumbulula nunku. Bualu bua bakahongolola mashi a basanto ne a baprofete, ne wewe wakabahesha mashi bua kunua; badi bâkanyine. Nakunvua tshioshelu tshiamba ne, E, Mukelenge Nzambi, Wa Bukole Buonso, malumbuluisha ebe adi malelela ne makane. Muinai wakahongolola luhanza luandi ha diba, ne bakadihesha bakole bua kuoshadi bantu ne kahia. Ne bantu bakoshila ne luiya lukole; bakahenda dina dia Nzambi udi ne bukokeshi ha mutu ha makenga â; ne kabakukudimuna mitshima yabo bua kumutumbisha. Muitanu wakahongolola luhanza luandi ha mutu ha nkuasa wa butumbi wa nyama wa luonji; ne bukelenge buandi buakalua mîdima; ne bakadiangana ndimi yabo bualu bua dikenga, bakahenda Nzambi wa mu diulu bualu bua makenga abo ne bua mputa yabo; ne kabakakudimuna mitshima yabo bua bienzedi biabo. Muisambombo wakahongolola luhanza luandi ha musulu munene, Pelata; ne mai akadimu akûma bua nshila alongolodibue bua bakelenge badi bafuma kudi kuhatuka diba. Ne nakatangila nyuma ya bukoya isatu yakadi bu biula ihatuka mukana mua dragon ne mua nyama wa luonji ne mua muprofete wa mashimi. Bualu bua idi nyuma ya bademon idi yenza bimanyinu, idi iya kudi bakelenge ba ha buloba buonso, bua kubasangisha ku nvita ya dituku dinene dia Nzambi wa Bukole Buonso. (Tangila, ndi ndua bu muibi, Disanka didi kudi udi mutabale ne udi ulama bivualu biandi, hua yeye kendakanyi butaka ne bua kabatangidi bundu buandi.) Bakabasangisha mu muaba udibo babikila mu muaku wa Buena Ebelu ne, Ha-Megido. Wa muanda mutekete wakahongolola luhanza luandi mu luhehele, ne dî dikole diakahatuka mu ntempelo, difuma ku nkuasa wa butumbi, diamba ne, Buakuenjibua; ne miele ya nvula, ne mei, ne mikungulu biakadiku, ne dikanka dinene dia buloba diakadiku; kakuakadi dikanka bu nunku katshia bantu bikala ha buloba, dikanka dia bunene nunku ne dia bukole nunku. Ne musoko munene wakatahuluka mu bituha bisatu, ne misoko ya bisamba bia bende yakuhuka; ne Babulona munene wakavulukibua ku mesu kua Nzambi bua kumuhesha luhanza lua nvinyo ya bukole bua tshishi tshiandi. Ne tshisanga tshionso tshiakanyema, ne mikuna kayakasanganyibua. Ne mabue a nvula manene a bujitu bua ntalanta adi afuma mu diulu adi ahonena bantu; ne bantu bakahenda Nzambi bualu bua dikenga dia mabue a nvula; bualu bua dikenga diau diakatamba bunene. Umue wa banjelo muanda mutekete bakadi ne mpanza muanda mutekete wakalua, wakakula nʼanyi, wamba ne, Lua biebe kunoku, nenkuleshe dilumbuluisha dia mukashi wa masandi munene udi ushikama ha mutu ha mai a bungi, udi bakelenge ba ha buloba benda nʼandi masandi, ne badi bikala ha buloba bakakuatshishibua ne nvinyo wa masandi andi. Yeye wakantuala mu nyuma ku tshihela: nakatangila mukashi mushikame ha nyima ha nyama wa luonji mukunzekunzu, mûle tente ne mena a kuhenda nʼau Nzambi, muikale ne mitu muanda mutekete ne nsengu dikumi. Mukashi wakadi muluatshisha ne bilulu bikunzubile ne bikunzekunzu, mulengeshibue ne ngolo ne mabue a mushinga mukole ne a perle, muikale ne luhanza lua ngolo mu tshianza tshiandi lûle tente ne malu a bukoya bua masandi andi. Ne ha mpala handi hakadi dina difunda ne, Bualu Busokoka, Babulona Munene, Mamu wa Bakashi ba Masandi, ne wa Binyangu bia ha Buloba. Ne nakatangila mukashi mukuatshike ne mashi a basanto, ne mashi a bamanyishi ba Yesu. Hanakamutangila, nakakema ne dikema dikole. Muanjelo wakangambila ne, Wakakema bua tshinyi? Nenkuambile bualu busokoka bua mukashi ne bua nyama wa luonji udi umutuala, udi ne mitu muanda mutekete ne nsengu dikumi. Nyama uwakatangila wakadiku ne kenaku, ne udi wamba kuluhuka mu dina didi kadi ne tshishikidilu, udi uya mu dibutuka. Ne badi bikala ha buloba nebakeme, badi kabai ne dina difunda mu mukanda wa muoyo ku tshibangidilu tshia buloba, nebakeme hatangilabo nyama wa luonji, bu muakadiyeku ne kenaku, ne neikaleku. Eku kudi dijingulula didi ne meshi: mitu muanda mutekete idi mikuna minene muanda mutekete, hadi mukashi ushikama; ne bakelenge muanda mutekete badiku; batanu bakumana kuhona, umue udiku, ne mukuabo kena muanze kulua; ne halueye, budiye nʼabu mbua kushala tshituha tshihi. Ne nyama wakadiku, ne kenaku, udi biandi mukelenge wa muanda mukulu, ne udi wa mu ba-muanda mutekete; ne udi uya mu dibutuka. Ne nsengu dikumi iwakutangila idi bakelenge dikumi badi kabai banze kuangata bukelenge, kadi badi bangata bukokeshi bu bakelenge, hohamue ne nyama wa luonji, luhola lumue. Bobo badi ne meshi amue, ne badi bahesha bukole buabo ne bukokeshi buabo kudi nyama wa luonji. Ne bobo nebaluangane nvita ne Muana wa Mukoko, ne Muana wa Mukoko neabahite bukole, bualu bua yeye udi Mukelenge wa bakelenge ne Nfumu wa banfumu; ne bantu badi nʼandi, babikidibue, ne basungidibue, ne ba kueyemena, nebahite bukole kabidi. Yeye wakungambila ne, Mai awakatangila, kudi mukashi wa masandi ushikama, adi bantu ne bisumbu bia bantu, ne bisamba, ne miaku. Ne nsengu dikumi iwakatangila, ne nyama wa luonji, nebikale ne mukashi wa masandi lukuna, nebimuvuishe bu tshintu tshia hatuhu ne butaka, nebidie munyinyi wandi, nebimushidishe ne kahia. Bualu bua Nzambi wakabuesha bualu ebu mu mitshima yabo bua kuenzabo mudiye wela meshi, ne bua kuikalabo ne meshi amue, ne bua kufilabo bukelenge buabo kudi nyama wa luonji tô ne hashika mei a Nzambi. Ne mukashi uwakatangila udi musoko munene udi ukokesha ku mutu kua bakelenge ba ha buloba. Ku nyima kua malu â nakatangila muanjelo mukuabo uhueka, uluhuka mu diulu, muikale ne bukokeshi bunene, ne buloba buakatemibua ne butumbi buandi. Wakela dî dikole, wamba ne, Babulona munene wakuhuka, wakuhuka, wakulua muaba wa bademon ne nsubu wa lukanu wa nyuma yonso wa bukoya, ne nsubu wa lukanu wa nyunyu yonso wa bukoya ne udi wa kukina. Bualu bua bisamba bionso biakuhuka ku nvinyo wa tshishi tshia masandi andi, ne bakelenge ba ha buloba bakenda nʼandi masandi, ne bangendʼa mushinga ba ha buloba bakalua babanshi ku bukole bua buneme buandi. Nakunvua dî dikuabo difuma mu diulu diamba ne, Bantu banyi, nuluhuke munkatshi muandi, bua nuenu kanuikadi ne buobumue nʼandi mu malu mabi andi, bua kanuangatshi makenga andi, bualu bua malu andi mabi akalungakana tô ne mu diulu, ne Nzambi wakuvuluka bienzedi biandi bibi. Numuheshe bu muakahesheye bakuabo, ne numuhitshishile dikenga diandi misangu ibidi bu mudi bienzedi biandi; mu luhanza muakasangishileye bakuabo makenga numusangishile makenga misangu ibidi. Bu muakaditumbisheye ne muakadinemesheye, bu nunku kabidi munuhe makenga ne madilu; bualu bua yeye udi udiamba mu mutshima wandi ne, Ndi mushikame mukelenge mukashi, tshiena mukashi wa mu lufuila, ne tshiena ntangila madilu tô kashidi. Bua bualu ebu makenga andi nealue dituku dimue, lufu ne madilu ne tshiole; nebamushidishe mu kahia, bua Mukelenge Nzambi udi umulumbuluisha udi mukole. Ne bakelenge ba ha buloba bakadi benda nʼandi masandi, ne bakadi banemeshangana nʼandi nebikale ne binsonshi, nebadile muadi bualu buandi, hatangilabo muinshi wa ku kuhia kuandi; nebimane ha bule bualu bua ditshina dia dikenga diandi, bamba ne, Mulau, mulau, musoko munene, Babulona, musoko mukole! Bualu bua dihisha diebe diakulua mu luhola lumue. Ne bangendʼa mushinga ba ha buloba badi ne binsonshi ne badi ne madilu bua bualu buau; bualu bua kakuena muntu udi usumba bintu biabo bia bungenda kabidi; bintu bia ngolo, bia argent, mabue a mushinga mukole, ne mabue a perle, ne bilulu bimpe bia line, ne bikunzubile bia soie, ne bikunzekunzu; ne mitshi ya mushindu wonso wa muhuya muimpe, ne luvu luonso lusonga lua mibanga, ne luvu luonso lusonga lua mitshi ya mushinga mutamba bukole, ne lua tshiamu tshia mitaku, ne lua tshiamu tshifike, ne lua marbre; ne kinamona, ne amomuma, ne musenga wa mananashi, ne manyi a mananashi, ne kamonyi ka muhuya muimpe, ne nvinyo, ne manyi a oleve, ne bukula bubotakana, ne blé, ne nyama idi ituala bujitu, ne mikoko; ne tubalu ne makalu ne bahika, ne mioyo ya bantu. Ne mamuma akasamina muoyo webe akasemena kule, ne bintu bionso biakadi bilengele ne bia buneme biakujimina kûdi, ne kabena babisangana kabidi tô tshiendelelele. Ne bangendʼa mushinga ba bintu ebi, bakavuishibua babanshi kudiu, nebimane ha bule bualu bua ditshina dia dikenga diau, bikale ne binsonshi ne badile muadi; bamba ne, Mulau, mulau, musoko munene, wakadi muluatshishe bilulu bia line bimpe, ne bikunzubile ne bikunzekunzu, mulengesha ne ngolo ne mabue a mushinga mukole ne mabue a perle! Bualu bua mu luhola lumue bubanshi bunene nunku budi bubutudibua. Ne kapitene konso ka buatu, ne muntu yonso udi wenda mu buatu mu muaba wonso, ne bendeshi ba matu, ne bonso badi baheta bidibo nʼabi bualu ku mudimu wa ha mai manene, bakimana ha bule, bakela mbila hakatangilabo muinshi wa kuhia kuau, bamba ne, Musoko kai udi bu musoko eu mimene? Bakela luhuishi ha mutu habo, ne bakela mbila, bikale ne binsonshi ne badila muadi, bamba ne, Mulau, mulau, musoko munene, muakadi bonso bakadi ne matu abo ha mai manene bavuishibue babanshi bualu bua mushinga wau mukole! Bualu bua mu luhola lumue wakubutudibua. Nusanke bua bualu buau, wewe diulu, ne nuenu basanto, ne nuenu bapostolo, ne nuenu baprofete; bualu bua Nzambi wakamulumbuluisha ne dilumbuluisha dienu. Muanjelo mukuabo mukole wakambula dibue bu dibue dinene dia kubela nʼadi, wakadiela mu mai manene, wamba ne, Nunku Babulona, musoko mimene, newedibue hanshi ne dihona dinene, ne kawena usanganyibua kabidi tshiendelele. Kabena bunvua dî dia bimbi ba nkombe ne dia bena misambu ne dia bedi ba nshiba ne ba mpungi munkatshi muebe kabidi tshiendelele; kabena basangana nsende, nasha wa mushindu wonso, munkatshi muebe kabidi tshiendelele; kabena bunvua tshiona tshia mpelu munkatshi muebe kabidi tshiendelele, ne dinkenka dia muinda kadiena ditema munkatshi muebe kabidi tshiendelele; kabena bunvua dî dia mubaki ne dia mubakibue munkatshi muebe kabidi tshiendelele; bualu bua bangendʼa mushinga bebe bakadi bakelenge bana ha j buloba; bualu bua ba mu bisamba bionso bakadingibua ku muhongo webe. Bakasangana mashi a baprofete ne a basanto ne a bonso bakashihibua ha buloba munkatshi muau. Ku nyima kua malu â nakunvua dî bu dî dikole dia tshisumbu tshinene tshia ba mu diulu bamba ne, Aleluya; Luhandu, ne butumbi ne bukole, mbia Nzambi wetu; bualu bua dilumbulula diandi didi dilelela ne diakane; bualu bua wakulumbuluisha mukashi wa masandi mimene, yeye wakanyanga buloba ne masandi andi, ne wakasombuela mashi a bahika bandi mualombe ku tshianza tshiandi. Bakuamba musangu muibidi ne, Aleluya. Ne muinshi wa kahia kuandi udi ubanda tô tshiendelele. Ne bakulu makumi abidi ne banai ne bifukibue binai bidi ne muoyo bakahona hanshi, bakatendelela Nzambi udi ushikama mu nkuasa wa butumbi, bamba ne, Amen; Aleluya. Dî diakahatuka ku nkuasa wa butumbi, diamba ne, Nutumbishe Nzambi wetu, nuenu, bahika bandi bonso, badi bamutshina, bakese ne banene. Nakwmia dî bu dî dia tshisumbu tshinene tshia bantu, ne bu dî dia mai a bungi ne bu dî dia mikungulu mikole diamba ne, Aleluya, bualu bua Mukelenge Nzambi wetu, wa Bukole Buonso, udi ukokesha. Tusanke, tuikale ne disanka dinene, tumuhe butumbi, bualu bua dibaka dia Muana wa Mukoko diakulua, ne mukashi wandi wakudilongolola. Bakaha mukashi bua kudiluatshisheye ne tshilulu tshia line tshilengele, tshidi tshikenka ne tshitoke; bualu bua tshilulu tshia line tshilengele tshidi bienzedi biakane bia basanto. Yeye udi ungambila ne, Funda ne, Badi babikidibua ku bidia bia dibanji bia Muana wa Mukoko badi ne disanka. Yeye udi ungambila kabidi ne, Â adi mei malelela a Nzambi. Nakahona ku makasa andi bua kumukukuila. Yeye udi ungambila ne, Tangila bua wewe kuenji nunku nasha. Meme udi muhika nʼebe ne wa bana benu ba mu Kilisto badi ne bumanyishi bua Yesu; ukukuile Nzambi; bualu bua bumanyishi bua Yesu budi nyuma wa mei a baprofete. Nakatangila diulu dibululuke; ne mona, kabalu katoke, ne wakadi ushikama ba nyima haku wakabikidibua ne, Wa Kueyemena ne Mulelela; ne mu buakane buandi udi ulumbuluisha ne udi uluangana nvita. Mesu andi adi ludimi lua kahia, ne ha mutu bandi hadi bifulu bia butumbi bia bungi; ne udi ne dinu difunda, didi muntu kai mudimanye, anu yeye nkayandi. Udi muluatshisha tshivualu tshidi tshimiamina mashi; dinu diandi didi dibikidibua ne, Dî dia Nzambi. Bena nvita ba mu diulu bakamulonda ba nyima ha tubalu tutoke, baluatshisha bilulu bia line bitoke ne bilengele. Muele wa nvita mutuisha udi uhatuka mukana muandi, bua kutaheye nʼau bisamba bia bantu, ne yeye neabakokeshe ne dikombo dia tshiamu; ne yeye udi udiata tshikaminu tshia bukole bua tshishi tshia Nzambi wa Bukole Buonso. Yeye udi ne dina difunda ha tshmialu ne ha tshibelu tshiandi ne, Nfumu wa Banfumu, ne Mukelenge wa Bakelenge. Nakatangila muanjelo umue muimane mu diba; ne wakela di dikole, wambila nyunyu yonso idi ihahala munkatshi mua diulu ne, Luai nudisangishe ku bidia binene bia Nzambi; bua nuenu kudia munyinyi wa bakelenge ne munyinyi wa tumanda tua masalayi, ne munyinyi wa bantu bonso, badishikamine ne bahika, ne bakese ne banene. Nakatangila nyama wa luonji ne bakelenge ba ha buloba, ne bena nvita babo, badisangisha bua kuluanganabo ne yeye wakadi ushikama ha nyima ba kabalu, ne kudi bena nvita bandi. Nyama wa luonji wakakuatshibua, ne bakamukuata ne muprofete wa mashimi wakenza bimanyinu ku mpala kuandi biakadingeye nʼabi bantu bakangata tshimanyinu tshia nyama wa luonji ne bakakukuila tshifuanyikishi tshiandi, bubidi buabo bakedibua ne muoyo mu dishiba dia kahia kadi katema ne soufre. Bonso bakashala bakashihibua ne muele wa nvita wa yeye wakadi ushikama ha nyima ha kabalu, ne muele mene wakahatuka mukana muandi; ne nyunyu yonso yakukutshishibua ne minyinyi yabo. Nakatangila muanjelo uhueka hanshi ufuma mu diulu, muikale ne luvungula lua ku dina didi kadî ne tshishikidilu, ne lukanu lunene mu tshianza tshiandi. Yeye wakakuata dragon, nyoka au wa kale, udi diabolo ne Satana, wakamusuika bidimu tshinunu, ne wakamuela mu dina didi kadî ne tshishikidilu, ne wakadînshila, ne wakamutekelahu tshimanyishilu ha mutu handi, bua yeye kadingi bisamba bia bantu kabidi, tô ne hashika bidimu tshinunu; ku nyima kua bualu ebu budiye nʼabu mbua kusuludibua tshituha tshihi. Nakatangila nkuasa ya butumbi, ne bakashikamahu, ne bakabaha bukole bua kulumbuluisha; ne nakatangila mioyo ya bakoshibua mitu bualu bua bumanyishi buabo bua Yesu, ne bualu bua dî dia Nzambi, ne bobo bakadi kabai bakukuna nyama wa luonji, anyi tshifuanyikishi tshiandi, ne hakadi kabai bangata tshimanymu ha mpala habo ne ha tshianza tshiabo; bobo bakikala ne muoyo, ne bakakokesha ne Kilisto bidimu tshinunu. Bafue bakuabo kabakikala ne muoyo anu hakashika bidimu tshinunu. Edi ndibika dia kumudilu dia ku lufu. Udi ne luseke luandi mu dibika dia ku lufu dia kumudilu udi ne disanka ne udi wa tshijila; lufu luibidi kaluena ne bukokeshi ku mutu kuabo; kadi nebikale bakuidi ba Nzambi ne ba Kilisto, ne nebakokeshe nʼandi bidimu tshinunu. Hashika bidimu tshinunu, Satana nealekedibue mu nsubu wandi wa lukanu, nealuhuke bua kudingeye bisamba bia ku matengu anai a buloba, Goga ne Magoga, bua kubisangisha hamue ku nvita, bungi buabo budi bu nsengu ya ku mai manene. Bakabanda ha buloba buonso, bakanyunguluka tshitudilu tshia basanto ne musoko munangibue; ne kahia kakahueka, kafuma mu diulu, ne kakabashidisha. Ne diabolo wakadi ubadinga wakedibua mu dishiba dia kahia ne soufre, kudi nyama wa luonji ne muprofete wa mashimi kabidi, nebakengeshibue munya ne bufuku tshiendelele. Nakatangila nkuasa wa butumbi mimene mutoke, ne wakadi ushikamahu, wakanyemabo kudi buloba ne diulu ku mpala kuandi, ne kabakabisangena muaba kabidi. Nakatangila bafue, banene ne bakese, bimane ku mpala kua nkuasa wa butumbi; ne mikanda yakabuluibua, mukanda mukuabo wakabulula kabidi, udi wa muoyo; bakalumbuluisha bafue ku malu akadi mafunda mu mukanda, bu muakadi bienzedi biabo. Mai manene kabidi, akahatula bafue bakadimu, ne lufu ne Muaba wa Bafue biakahatula bafue bakadimu, ne bakalumbuluisha muntu yonso bu muakadi bienzedi biandi. Bakela lufu ne Muaba wa Bafue mu dishiha dia kahia. Elu ndufu luibidi, dishiba dia kahia mene. Bikala muntu kai musanganyibue mufunda mu mukunda wa muoyo, wakedibua mu dishiba dia kahia. Nakatangila diulu dihia-dihia ne buloba buhia-buhia; bualu bua diulu dia kumudilu ne buloba bua kumudilu biakumuka; ne mai manene kenaku kabidi. Nakatangila musoko wa tshijila, Yelushalema muhia-muhia, uhueka muluhuke mu diulu kudi Nzambi, muikale mulongolola bimpe bu mukashi mulengeshela mulume wandi. Nakinama dî dikole difuma mu nkuasa wa butumbi diamba ne, Tangilai, nsubu wa tshilulu wa Nzambi udi munkatshi mua bantu, ne yeye neikale nʼabo, ne bobo nebikale bantu bandi; ne Nzambi mume neikale nʼabo, neikale Nzambi wabo. Yeye neakuhule tshinsonshi tshionso ku mesu kuabo; ne lufu kaluena luikalaku kabidi; madilu kêna ikalaku kabidi, nasha muadi, nasha kanyinganyinga kabidi; malu a kumudilu akumuka. Yeye udi ushikama ha nkuasa wa butumbi, wakamba ne, Mona, ndi nvuisha bintu bionso bihia-bihia. Yeye wakuamba ne, Funda; bualu bua mei â adi mei a kueyemena ne malelela. Yeye wakangambila ne, Akuenjibua. Meme ndi A ne Z, tshibangidilu ne nshikidilu. Nempe udi ne nyota mai a ku mushimi wa muoyo tshianana. Udi uhita bukole neahiane bintu ebi; meme nengikale Nzambi wandi, ne yeye neikale muana wanyi. Kadi bua badi ne buowa, ne badi kabai ne ditabusha, ne bena tshikama, ne bashihianganyi, ne bena masandi, ne bena muhongo, ne batendeledi ba mpingu, ne bena mashimi bonso, luseke luabo neluikale mu dishiba didi ditema ne kahia ne soufre; didi lufu luibidi. Umue wa banjelo muanda mutekete bakadi ne mpanza muanda mutekete miûle tente ne makenga muanda mutekete a kunshikidilu, wakalua, wakakula nʼanyi, wamba ne, Lua biebe, nenkuleshe mukashi musela, mukashi wa Muana wa Mukoko. Wakaya nʼanyi mu Nyuma ku mukuna mimene ne mule, wakandesha musoko wa tshijila, Yelushalema, uhueka hanshi, uluhuka mu diulu kudi Nzambi, muikale ne butumbi bua Nzambi; ne dinkenka diau diakafuana dibue dia mushinga mutambe bukole, bu dibue dia yasape, ditoke tô bu ntalatala. Wakadi ne lumbu lunene ne lule; wakadi ne bibi dikumi ne bibidi, ne ku bibi banjelo dikumi ne babidi; ne mena mafundahu, adi mena a bisamba dikumi ne bibidi bia bana ba Isalele; ku esete kuakadi bibi bisatu; ne ku node, bibi bisatu; ku sude, bibi bisatu; ne ku wesete, bibi bisatu. Lumbu lua musoko luakadi ne bishimikidi dikumi ne bibidi, ne hamʼbidi habi hakadi mena dikumi ne abidi a bapostolo dikumi ne babidi ba Muana wa Mukoko. Wakadi wiyikila nʼanyi wakadi ne dilenga dia ngolo bu luidi lua kuidikisheye nʼalu musoko, ne bibi biau, ne lumbu luau. Musoko udi muibaka muakanangane ku matumba anai, ne bule buau budi muomumue ne butshia; ne wakidikisha musoko ne dilenga, kilometa binunu bibidi, nkama ibidi, makumi anai. Buludi ne butshia ne bule buau bidi muomumue. Wakidikisha lumbu luau, nkubita lukama ne makumi anai ne inai, luidikishilu lua muntu, ludi lua muanjelo. Bintu biakibakabo nʼabi lumbu luau biakadi bia yasape; musoko wakadi wa ngolo muimpe, mufuanangane ne ntalatala. Ne bishimikidi bia lumbu lua musoko biakalengeshibua ne mabue a mushinga mukole a mishindu yonso. Tshishimikidi tshia kumudilu tshiakadi tshia yasape; tshibidi tshiakadi tshia saphir; tshisatu tshiakadi tshia calcedoine; tshinai tshiakadi tshia émeraude; tshitanu tshiakadi tshia sardony; tshisambombo tshiakadi tshia sardoine; tshia muanda mutekete tshiakadi tshia chrysolite; tshia muanda mukulu tshiakadi tshia beryle; tshia tshitema tshiakadi tshia topaze; tshia dikumi tshiakadi tshia chrysoprase; tshia dikumi ne umue tshiakadi tshia byacinthe; tshia dikumi ne ibidi tshiakadi tshia amethyste. Bibi dikumi ne bibidi biakadi bia mabue a perle dikumi ne abidi; tshibi ne tshibi tshiakadi dibue dimue dia perle; ne musesu wa musoko wakadi wa ngolo muimpe bu ntalatala mutoke tô. Tshiakatangilamu ntempelo; bualu bua Mukelenge Nzambi wa Bukole Buonso, ne Muana wa Mukoko badi ntempelo wau. Musoko kawena ukengela diba, anyi ngondo bikenkamu; bualu bua butumbi bua Nzambi budi bûtemenamu, ne Muana wa Mukoko udi muinda wau. Ne ba ma bisamba nebendakane mu dinkenka diau; ne bakelenge ba ha buloba badi baluamu ne butumbi buabo. Ne bibi biau kabiena buhidibua mu munya, nasha kakese (bualu bua butuku kabuena buikalaku); nebaluemu ne butumbi ne buneme bua bisamba. Kakuena tshintu tshia tshianana tshidi tshibuelamu, nasha kakese; nasha muntu udi wenza bualu bubi ne mashimi; kadi anu badi ne mena abo mafunda mu mukanda wa muoyo wa Muana wa Mukoko nebabuelemu. Wakandesha musulu wa mai a muoyo, matoke tô bu ntalatala, uluhuka mu nkuasa wa butumbi wa Nzambi ne wa Muana wa Mukoko munkatshi mua musesu wa musoko. Ku muelelu eu wa musulu ne ku muelelu wawa kuakadi mutshi wa muoyo, ukuama mamuma nsanzu dikumi ne abidi, ukuama mamuma au ku ngondo ku ngondo; mabeshi a mutshi akadi bua kuondaha nʼau bisamba. Mulau kawena wikalaku kabidi; nkuasa wa butumbi wa Nzambi ne wa Muana wa Mukoko neikalemu; ne bahika bandi nebamukuatshile mudimu; ne nebamone mpala wandi; ne dina diandi nedikale ha mpala habo. Kakuena kuikala butuku kabidi; ne kabena bakengela dinkenka dia muinda, nasha munya wa diba; bualu bua Mukelenge Nzambi neabatemene; ne bobo nebakokeshe tshiendelele. Yeye wakangambila ne, Mei â adi a kueyemena ne malelela; Mukelenge, Nzambi wa nyuma ya baprofete, wakatuma muanjelo wandi bua kulesheye bahika bandi malu adi ne bua kulua tshituha tshihi. Tangila, adi ndua lubilu. Muntu udi ulama mei a buambi bua mu mukanda eu udi ne disanka. Meme Yone nyeye wakunua ne wakatangila malu â. Ne hanakunvua ne hanakâtangila, nakahona bua kukukuila ku makasa a muanjelo wakandesha malu â. Yeye wakangambila ne, Tangila bua wewe kuenji nunku; meme ndi muhika nʼebe ne wa bana benu baprofete, ne wa badi balama mei a mu mukanda eu; ukukuile Nzambi. Yeye wakangambila ne, Kuteki tshimanyishilu ku mei a buambi bua mu mukanda eu; bualu bua tshikondo tshidi ha buihi. Udi kai ne buakane ikale kabidi ne malu adi kâi makane; udi mubiha avuishibue biandi kabidi mubiha; udi muakane ikale biandi kabidi ne malu makane; udi wa tshijila avuishibue biandi kabidi wa tshijila. Tangila, ndi ndua lubilu; ne difutu dianyi didi nʼanyi, dia kuhingishila kudi muntu ne muntu, bu mudi mudimu wandi. Meme ndi A ne Z, wa kumudilu ne wa kunshikidilu, tshibangidilu ne kunshikidilu. Disanka didi kudi badi buvua mayeka abo, bua bobo bikale ne bukokeshi bua kuluabo ku mutshi wa muoyo, ne bua kubuela ku bibi munda mua musoko. Ha bule hau hadi mbua, ne bena muhongo, ne bena masandi, ne bashihianganyi, ne batendeledi ba mpingu, ne muntu yonso udi musue ne udi ushima mashimi. Meme Yesu nakutuma muanjelo wanyi bua kunumanyisha malu â bua bualu bua ekelesia. Ndi muji ne kankanunuina bia Davidi, mutoto udi ukenka, wa nkesha. Nyuma ne mukashi musela badi bamba ne, Lua. Udi unvua, ambe biandi ne, Lua. Ne udi ne nyota, alue biandi; udi musue, angate mai a muoyo tshianana. Ndi manyisha muntu yonso udi unvua mei a buambi bua mu mukanda eu ne, Bikala muntu usangisha mei makuabo ha mutu hau, Nzambi neamusangishile makenga adi mafunda mu mukanda eu; ne bikala muntu umusha mei makuabo ku mei a mukanda wa buambi ebu, Nzambi neamumushile tshituha tshiandi ku mutshi wa muoyo ne ku musoko wa tshijila, ne ku malu mene adi mafunda mu mukanda eu. Yeye udi umanyisha malu â udi wamba ne, E, ndi ndua lubilu. Amen; lua, Mukelenge Yesu. Ngasa wa Mukelenge Yesu ikale ne basanto. Amen.