Leyi i buku ya nxaxameto wa rixaka ra Yesu Kriste, N'wana Davhida, N'wana Abrahamu: Abrahamu aveleki Izaki, Izaki aveleka Yakobe, Yakobe aveleka Yuda ni vamakwavu, Yuda na Tamara vaveleka Farezi na Zera, Farezi aveleka Esromo, Esromo aveleka Arama. Arama aveleka Aminadaba, Aminadaba aveleka Nasoni, Nasoni aveleka Salmoni, Salmoni na Rahabe vaveleka Bowazi, Bowazi na Ruti vaveleka Obede, Obede aveleka Yese, Yese aveleka hosi Davhida. Davhida ni lweyi aali nsati wa Uriya vaveleka Solomoni; Solomoni aveleka Robuwamu, Robuwamu aveleka Abiya, Abiya aveleka Aza, Aza aveleka Yosafati, Yosafati aveleka Yorama, Yorama aveleka Uziya; Uziya aveleka Yothamu, Yothamu aveleka Akazi, Akazi aveleka Hezekiya. Hezekiya aveleka Manase, Manase aveleka Amosi, Amosi aveleka Yosiya; Yosiya aveleka Yekoniya ni vamakwavu, nkarhini lowu vayisiweke ha wona vukaraweni, Babilona. Loko vayisiwile Babilona, Yekoniya aveleka Salatiyele, Salatiyele aveleka Zerubabele, Zerubabele aveleka Abiyudi, Abiyudi aveleka Eliyakimi, Eliyakimi aveleka Azori; Azori aveleka Sadoki, Sadoki aveleka Akimi, Akimi aveleka Eliyudi, Eliyudi aveleka Eliyazari, Eliyazari aveleka Matani, Matani aveleka Yakobe; Yakobe aveleka Yosefa nuna wa Mariya, lweyi angaveleka Yesu, lweyi ativiwaka hi vito ra ku i Kriste. Hikolaho-ke, kusukela ka Abrahamu kuyafika ka Davhida, tinxaka hinkwatu i khume ni mune; kusukela ka Davhida kuyafika nkarhini wa kuyisiwa Babilona i khume ni mune wa tinxaka; kutani kusukela nkarhini wa kuyisiwa Babilona kuyafika ka Kriste, i khume ni mune wa tinxaka. Kuvelekiwa ka Yesu Kriste kuhumelelile hi ndlela leyi: Loko Mariya mamana wa yena atshembisiwile hi Yosefa, otshuka atikuma na ali ni nyimba hi Moya Lowokwetsima na vangasihlangana. Lesvi Yosefa nuna wa yena aali munhu wolulama, nasvona aangalavi kumukhomisa tingana, ayendla makungu ya kumutshika xihundleni. Loko ahapimisa svosvo, ntsumi ya Hosi yihumelela ka yena hi norho, yiku: “Yosefa n'wana Davhida, ungachavi kutitekela Mariya nsati wa wena, hikuva lesvi anga na svona svihuma ka Moya Lowokwetsima. Ataveleka n'wana wa mufana, kutani wena utamuchula vito ra Yesu, hikuva hi yena lweyi angataponisa vanhu va yena asvijohweni sva vona.” Lesvi hinkwasvu svihumelelile lesvaku kuhetiseka lesvi Hosi ayisvivulile hi muprofeta lweyi angaku: “Masvivo, wanhwanyana atakuma nyimba, ataveleka n'wana wa mufana; vatamuchula vito ra ‘Emanuwele’ (hi lesvaku: ‘Xikwembu xi na hina.’”) Loko Yosefa apfukile hi le vurhongweni, ayendla hilaha ntsumi ya Hosi yingamubzela hakona, atitekela nsati wa yena. Kambe angamutivanga kukondza kuvelekiwa n'wana wa mufana, kutani amuchula vito ra Yesu. Kuteloko Yesu avelekiwile Betlelehema wa Yudeya, nkarhini wa kufuma ka hosi Heroda, tintlhari ta le vuxeni tifika Yerusalema tiku: “Yi kwihi Hosi ya Vayuda leyivelekiweke xana? Hikuva hivonile nyeleti ya yona le vuxeni, kutani hitile kutayigandzela.” Loko hosi Heroda asvitwa, achava ngopfu, na vona vayaki va Yerusalema vachava hinkwavu. Ahlengeleta Vaprista lavakulu hinkwavu ni Vatsali va tiko, avavutisa aku: “Xana Kriste afanele kuvelekiwa kwihi?” Vamubzela vaku: Doropeni ra Betlelehema wa Yudeya, hikuva hi lesvi svingatsaliwa hi muprofeta lweyi angaku: “‘Na wena Betlelehema, tiko ra Yudeya, awu ntsongo xikarhi ka matiko ya Yuda, hikuva ka wena kutahuma murhangeli lweyi angatafambisa tiko ra mina ra Israyele.’” Hi loko Heroda avitana tintlhari xihundleni, ativutisisa nkarhi lowu nyeleti yingahumelela ha wona. Kutani atirhuma Betlelehema, aku: “Fambani, miyavutisisa svinene hi ta xihlangi; kutaku loko mixikumile, mitanitivisa, lesvaku na mina nitayaxigandzela.” Loko titwile marito ya hosi, tisuka tifamba; kutani nyeleti yoleyo tingayivona avuxeni, yitirhangela mahlweni yiyayima henhla ka laha xihlangi axili kona. Loko tivona nyeleti, titsaka hi kutsaka lokukulu ngopfu. Kutani tiyanghena ndlwini, tikuma xihlangi ni mamana wa xona Mariya; kolaho tikhinsama, tixigandzela; kutani titlhantlha mindzhwalu ya tona, tixihumesela tinyiko ta golidi, ni b'aso, ni mafurha ya mira. Kuteloko titivisiwile anorhweni lesvaku tingahahundzi hi le ka Heroda, titlhelela ka le kwavu hi ndlela yin'wana. Kuteloko tintlhari titlhelele ka le kwavu, ntsumi ya Hosi yihumelela ka Yosefa norhweni, yiku: “Pfuka uteka xihlangi ni mamana wa xona, ubaleka uya Gibita uyatshama kona nikondza nikubzela; hikuva Heroda atalava xihlangi lesvaku axidlaya.” Yosefa apfuka, ateka xihlangi ni mamana wa xona nivusiku, aya le Gibita; ayatshama kona, Heroda akondza afa, lesvaku kuhetiseka lesvingavuliwa hi Hosi, hi nomo wa muprofeta lweyi angaku: “Nivitanile n'wananga, ahuma tikweni ra Gibita.” Loko Heroda avona lesvaku akanganyisiwile hi tintlhari, akwata svinene, kutani arhumela vanhu lesvaku vayadlaya svihlangi hinkwasvu svavafana sva le Betlelehema ni le migangeni ya tiko rakona hinkwaru, sva malembe mambirhi ni lesvitlhantamaka, aringanisa nkarhi lowu angavutisisa tintlhari ha wona. Kolaho-ke kuhetiseka lesvivuliweke hi muprofeta Yeremiya, loko aku: “Rito ritwakale Rama, ra nkosi ni ra xirilo lexikulu; i Rahele lweyi arilelaka vana va yena angapfumeli kuchaveleliwa, hikuva avahali kona.” Kuteloko Heroda afile, ntsumi ya Hosi yihumelela ka Yosefa norhweni, kole Gibita, yiku: “Pfuka uteka xihlangi ni mamana wa xona, utlhelela tikweni ra Israyele, hikuva lava avalava kuxidlaya, vafile.” Kutani Yosefa apfuka, ateka xihlangi ni mamana wa xona, atlhelela tikweni ra Israyele. Kambe loko atwa lesvaku Arkelawu wafuma le Yudeya amatshan'weni ya Heroda tatana wa yena, achava kuya kona; kutani loko ativisiwile norhweni, atlhelela tikweni ra Galileya, ayayaka doropeni lerivuliwaka Nazareta, lesvaku kuhetiseka lesvi vaprofeta vangavula svona hi tlhelo ra Mesiya, loko vaku: “Atavuliwa Munazareta.” Nkarhini wolowo kuhumelela Yohani Mukhuvuli, ajondzisa mananga ya Yudeya, aku: “Hundzukani, hikuva Mfumu wa matilo wu le kusuhi.” Yohani hi yena munhu lweyi angavuliwa hi muprofeta Ezaya, loko aku: “Rito ra munhu lweyi ahuwelelaka mananga, rili: ‘Lungiselani ndlela ya Hosi, khulelani svindlelana sva yona.’” Yohani yelweyi aayambala nguvu yolukiwa hi mavoya ya kamela, atikhama xisuti hi bandi ra xikhumba, svakuja sva yena aali tintete ni vulombe bza nhova. Kutani vayaki va Yerusalema ni vayaki hinkwavu va Yudeya ni va muganga hinkwawu lowu wunga kusuhi na Yordani, avahuma vaya ka yena; kutani aavakhuvula nambzeni wa Yordani, na vali karhi vativula svijoho sva vona. Kambe loko avona Vafarisi ni Vasaduki lavotala vata kutakhuvuliwa hi yena, aku ka vona: “Rixaka ra svipshahla, i mani lweyi amibzeleteleke lesvaku mitapona ka vukarhi bza Xikwembu lebzitaka xana? Vekani mihandzu leyifambelanaka ni kuhundzuka ka n'wina. Nasvona mingapimiseni lesvaku: ‘Hi na Abrahamu, anga yena tatana wa hina.’ Hikuva namibzela lesvaku hi maribze lawa, Xikwembu xingapfuxela Abrahamu vana. Ni svosvi xihloka xivekiwile atimintsweni ta nsinya; wun'wana ni wun'wana lowu wungavekiki mihandzu leyinene, wutatsemiwa wuhoxiwa ndzilweni. Loko nili mina, nimikhuvula hi mati hi kuya hi kuhundzuka ka n'wina, kambe lweyi ataka hi le ndzhaku ka mina, wanitlula hi matimba; asvinifaneli kutamela amasandhazi ya yena, hi yena lweyi angatamikhuvula hi Moya Lowokwetsima ni ndzilo. Rihlelo ri le vokweni ra yena; ataphepheta hinkwasvu lesvinga xibulelweni xa yena, kutani atrigu, atarichela tshaleni ra yena; kambe muhungu wona, atawuhisa ndzilweni lowungatimekiki.” Nkarhini wolowo Yesu ahuma Galileya, aya Yordani ka Yohani kuya khuvuliwa hi yena. Kambe Yohani ayala aku: “Hi mina lweyi nifanelaka kukhuvuliwa hi wena, kambe wena uta ka mina!” Yesu amuhlamula, aku: “Nipfumelele svosvi, hikuva svafanela lesvaku hihetisa lesvolulama hinkwasvu hi ndlela leyi.” Kutani Yohani amupfumelela. Kuteloko Yesu akhuvuliwile, ahantlisa ahuma matini; hi nomo-lo matilo mapfuleka, avona Moya wa Xikwembu wuxika kufana ni xituvana, wuxikela henhla ka yena. Kutani kutwakala rito lerihumaka matilweni, riku: “Lweyi i N'wananga lweyi nimurhandzaka, lweyi nimutsakelaka.” Hi loko Yesu ayisiwa mananga hi Moya wa Xikwembu, ayaringiwa hi Diyavulosi. Atshama masiku ya mune wa makume ni vusiku bzakona na angaji nchumu, akondza atwa ndlala. Kutani muringi ata ka yena, ataku: “Loko uli N'wana wa Xikwembu, bzela maribze lawa lesvaku mahundzuka svakuja.” Kambe yena ahlamula, aku: Kutsaliwile lesvi: “‘Munhu angakala angahanyi hi svakuja ntsena, kambe atahanya hi marito hinkwawu lawa mahumaka non'weni wa Xikwembu.’” Kutani Diyavulosi amuyisa doropeni leri rohlawuleka, amuveka axihlungweni xa Tempele, aku ka yena: “Loko uli N'wana wa Xikwembu, jatama, hikuva kutsaliwile lesvi: “‘Xikwembu xitarhumela tintsumi ta xona, kutani titakuqhamukela mavokweni ya tona, lesvaku nenge wa wena wungatshuki wuvavisiwa hi ribze.’” Yesu aku ka yena: “Nakambe kutsaliwile lesvi: ‘Ungatshuki uringa Hosi, Xikwembu xa wena.’” Diyavulosi atlhela amuyisa ntshaveni leyoleha ngopfu, amukomba mimfumu hinkwayu ya misava ni kudzuneka ka yona, kutani aku ka yena: “Svilo lesvi hinkwasvu nitakunyika svona loko unikhinsamela, unigandzela.” Hi loko Yesu aku ka yena: Suka Sathana, hikuva kutsaliwile lesvi: “‘Utagandzela Hosi, Xikwembu xa wena, utirhela xona ntsena.’” Hi loko Diyavulosi amutshika; kutani tintsumi tita ka Yesu, titamutirhela. Loko Yesu atwa lesvaku Yohani akhomiwile, atlhelela Galileya. Kutani asuka Nazareta, ayatshama Kapernawume, doropa leringa kusuhi ni tiva, amakumu ya matiko ya Zebuloni na Naftali, lesvaku kutahetiseka lesvingavuliwa hi muprofeta Ezaya, loko aku: “Wena tiko ra Zebuloni ni ra Naftali, ndleleni yoya ativeni hi tlhelo rin'wana ra Yordani, wena Galileya wa vamatiko! Vanhu lava avatshama munyameni, vavonile kuvonakala lokukulu; lava avatshama tikweni ni le ndzhutini wa rifu, vafikeliwe hi kuvonakala.” Kusukela nkarhini wolowo Yesu asungula kupaluxa Evhangeli, aku: “Hundzukani, hikuva Mfumu wa matilo wu le kusuhi.” Loko ali karhi afamba alulama ni tiva ra Galileya, avona vavanuna vambirhi, Simoni, lweyi anyikiweke vito ra Petrosi, na Andreya makwavu, vali karhi vahoxa tinkoka ativeni, hikuva vali vaphasi va tihlampfi. Kutani aku ka vona: “Nilandzeni, nitamiyendla vaphasi va vanhu.” Hi nomo-lo vasiya tinkoka ta vona, vamulandza. Ahundzela mahlweni, kutani avona vavanuna van'wana vambirhi, anga Yakobe na Yohani vana va Zebedewu; avali bzatsweni ni tatana wa vona, vali karhi varhunga tinkoka ta vona. Avavitana, hi loko vahantla vasiya bzatsu ni tatana wa vona, vamulandza. Yesu arhendzeleka hi tiko hinkwaru ra Galileya, na ali karhi ajondzisa masinagogeni ya vona, apaluxa Evhangeli ya Mfumu, ahanyisa mavabzi hinkwawu, ni kukarhateka hinkwaku loku vanhu avali nakona. Kutani ndhuma ya yena yihangalaka tikweni hinkwaru ra Siriya. Vatisa hinkwavu lavavabzaka hi mavabzi ya tinxakaxaka ni lava vaxanisekaka ngopfu, kukota lava avali ni madimoni, ni lava avali ni rihuhe, ni lava va kulimala, kutani Yesu avahanyisa. Kutani xitshungu lexikulu lexihumaka Galileya ni le Dekapolisi, ni le Yerusalema ni le Yudeya ni le tlhelweni rin'wana ra Yordani, ximulandza. Kuteloko Yesu avona xitshungu, ayakhwela ntshaveni; loko atshamile, vajondzisiwa va yena vamutshinelela. Kutani asungula kuvajondzisa, aku: “Kukatekile svisiwana moyeni, hikuva Mfumu wa matilo i wa svona. Kukatekile lavarilaka, hikuva vatachaveleliwa. Kukatekile lavorhula, hikuva vataja ndzhaka ya misava. Kukatekile lavanga ni ndlala ni torha ra svolulama, hikuva vataxurhisiwa. Kukatekile lavanga ni timpsalu, hikuva vatakombiwa timpsalu. Kukatekile lavanga ni timbilu letibaseke, hikuva vatavona Xikwembu. Kukatekile lavatisaka kurhula, hikuva vatavuliwa vana va Xikwembu. Kukatekile lava vaxanisiwaka hikolaho ka svolulama, hikuva Mfumu wa matilo i wa vona. “Mikatekile loko vamirhuketela, loko vamixanisa ni kumilumbeta hi mavunhwa lawa yotala hikolaho ka mina. Tsakani, mitsakisisa, hikuva hakelo ya n'wina i yikulu matilweni; hikuva vaxanisise xisvosvo vaprofeta lava avali kona, na n'wina mingasivakona.” N'wina mi munyu wa misava; kambe loko munyu wupshama, kunandziha ka wona kutapfuxetiwa hi yini ke? Awahapfuni nchumu, loko kungali kucukumetiwa handle, wukandziyeliwa hi vanhu. N'wina mi kuvonakala ka misava; doropa leriyakiweke ntshaveni aringetumbetiwi. Nasvona, avalumeki rivoni kurimbhonya hi xirhundzu, kambe variveka henhla, kutani rivoninga hinkwavu lava vanga ndlwini. Kuvonakala ka n'wina akuvoningele vanhu hi mukhuva wolowo, lesvaku vatavona mintirho ya n'wina leyosaseka, vadzunisa Tatana wa n'wina lweyi anga matilweni. Mingapimiseni lesvaku nitile kutahelisa Nawu hambi vali Vaprofeta; anitelangakutahelisa, nitele kutawulandza. Nimibzela ntiyiso, nili ka n'wina: Tilo ni misava svingasinyamalala, yota, kumbe xindzhatana, hambi xili xin'we, xingakala xingasusiwi Nawini, kukondza svilo hinkwasvu svitava svihetisekile. Hikolaho, lweyi angatatlula wun'we wa milawu leyitsongo leyi, kutani ajondzisa vanhu kuyendlisa svosvo, atavuliwa lwentsongo Mfun'wini wa matilo. Kambe lweyi angatayihlayisa ni kuyijondzisa, atavuliwa lwenkulu Mfun'wini wa matilo. Hikuva namibzela nili: Loko kululama ka n'wina kungatluli kululama ka Vatsali ni ka Vafarisi, amingangheni Mfun'wini wa matilo. “Misvitwile lesvivuliweke ka lava va khale, loko vaku: ‘Ungatshuki udlaya; lweyi adlayaka, atafanela kuyavanyisiwa.’” “Kambe mina nili ka n'wina: Mani na mani lweyi akarhiyelaka makwavu, atafanela kuyavanyisiwa; lweyi ange ka makwavu: ‘U xiphukuphuku!’ Afanela kuyisiwa ka muyavanyisi; lweyi ange ka yena: ‘Xihunguki ndziwena!’ Afaneliwa hi ndzilo wa Tihele.” Hikolaho, loko uhumesa mhamba ya wena alitarini kutani utsundzuka kolaho lesvaku makwenu a ni mhaka na wena, siya mhamba ya wena kolaho alitarini, kutani urhanga uyarivalelana ni makwenu; hi kona ungatavuya, utahumesa mhamba ya wena. Hantlisa urivalelana ni lweyi unga ni mholova na yena, na mahali ndleleni, akuva munhu lweyi angakunyiketi ka muyavanyisi, muyavanyisi yena akunyiketa ka phoyisa, kutani unghenisiwa jele. Nitiyisile nili ka wena: Ungakala ungahumi kona, loko ungasihumesa male ya wena hinkwayu. “Misvitwile lesvingavuliwa loko vaku: ‘Ungatshuki uwosva.’ ” Kambe mina nili ka n'wina: Mani na mani lweyi alangutaka wansati hi kumunavela, amuwosvile mbilwini ya yena. Hikolaho loko tihlo ra wena ra xinene rikujohisa, rixokole, uricukumeta kule na wena; hikuva svingayampsa loko xirho xin'we xa wena xilova, miri wa wena hinkwawu wungahoxiwi Tiheleni. Loko voko ra wena ra xinene rikujohisa, ritseme, uricukumeta kule na wena, hikuva svingayampsa loko xirho xin'we xa wena xilova, kutlula kuva miri wa wena hinkwawu wuya Tiheleni. “Nasvona kuvuliwile, vaku: ‘Lweyi atshikaka nsati wa yena, aamunyike papela ra kumutshika.’ ” Kambe mina nili ka n'wina: Mani na mani lweyi atshikaka nsati wa yena, loko kungali hi mhaka ya vunghwavana, amuyendla lesvaku ahundzuka muwosvi; kutani mani na mani lweyi atekaka wansati lweyi atshikiweke hi mukhuva wolowo, wawosva. “ Nasvona misvitwile lesvaku kuvuliwile ka lava va khale, vaku: ‘Ungatshuki utlhela ndzhaku akuhlambanyeni ka wena, kambe utayendla lesvi ungahlambanya svona mahlweni ka Hosi.’ ” Kambe mina nili ka n'wina: Mingatshukeni mihlambanya nikutsongo, hambi kuli hi tilo, hikuva i xiluvelo xa Xikwembu, hambi kuli hi misava, hikuva i vunavalatelo bza milenge ya xona, hambi kuli hi Yerusalema, hikuva i doropa ra Hosi leyikulu. Hambi yili nhloko ya wena, ungatshuki uhlambanya hi yona, hikuva ungakala ungasvikoti kuhundzula ni nsisi ni wun'we, kuwuyendla wobasa kumbe wa ntima. “Akuvulavuleni ka n'wina ‘Ina’ aave ‘Ina’, ‘Ahihim’ ava ‘Ahihim’. Lesvi yengeteleliwaka ka svosvo svihuma ka lweyi wobiha.” “Misvitwile lesvingavuliwa loko vaku: ‘Tihlo ririhiwa hi tihlo, tinyo hi tinyo.’ ” Kambe mina nili ka n'wina: Mingatshukeni miyalela lweyi amiyendlelaka lesvobiha; kambe loko munhu akumakala rhama ra xinene, mukangatelele ni lerin'wana. Ni loko munhu alava kukumangalela, akutekela banci, mutshike ateka na rona hembe. Loko akutekela nguvu mutshike ateka na wona nkhancu. Loko munhu akusindzisa kufamba mpfhuka wun'we, famba na yena mimpfhuka mimbirhi. Nyika lweyi akombelaka ka wena, ungafularheli lweyi anavelaka kulomba xanchumu ka wena. “Misvitwile lesvingavuliwa, loko vaku: ‘Utarhandza wa le kwenu, uvenga nala wa wena.’” Kambe mina nili ka n'wina: Rhandzani valala va n'wina, mikhongelela lava vamixanisaka, lesvaku mihundzuka vana va Tatana wa n'wina lweyi anga matilweni, hikuva axisa jambu ra yena henhla ka lavobiha ni lavanene, anisa mpfula henhla ka lavolulama ni lavohomboloka. Loko mirhandza lava vamirhandzaka ntsena, xana mingalangutela hakelo muni ke? Na vona vahakelisi va rhesa avayendlisi svosvo xana? Ni loko mixeweta vamakwenu ntsena, mitlula van'wana ha yini-ke? Na vona vamatiko avayendlisi svosvo xana? Hikolaho-ke, na n'wina mifanele kuhetiseka, kufana ni lesvi Tatana wa n'wina wa le tilweni ahetisekeke. Tivoneleni lesvaku mingayendli timfanelo ta n'wina ta kunyika svisiwana mahlweni ka vanhu na miyendlela kuvoniwa hi vanhu; loko miyendlisa svosvo, amingayikumi hakelo ka Tatana wa n'wina lweyi anga matilweni. Hikolaho-ke, loko unyika svisiwana, ungatshuki uhuwelela kumbe kutivisa hi mhalamhala kufana ni lesvi vakanganyisi vasviyendlaka masinagogeni ni le tindleleni, lesvaku vatadzunisiwa hi vanhu. Nitiyisile nili ka n'wina: Hakelo ya vona vayikumile. Kambe wena, loko unyika svisiwana, voko ra wena ra ximantsi ringatshuki ritiva lesviyendliwaka hi le ra xinene, lesvaku kunyika ka wena kuyendleka xihundleni; kutani Tatana wa wena lweyi avonaka xihundleni, hi yena lweyi angatakuhakela. Nasvona loko mikhongela, mingafaneni ni vakanganyisi; hikuva vona varhandza kukhongela na vayimile masinagogeni ni le mahlanganwini ya tindlela, lesvaku vatavoniwa hi vanhu. Nitiyisile nili ka n'wina: Hakelo ya vona se vayikumile. Kambe wena loko ukhongela, nghena ndlwini ya wena; kutaku loko upfalile xipfalu, khongela Tatana wa wena lweyi anga xihundleni, kutani Tatana wa wena lweyi avonaka xihundleni atakuhakela. “Loko mikhongela, mingaphindhaphindheni marito kufana ni vamatiko, hikuva vapimisa lesvaku hi kutata marito vatayingisiwa.” Mingatshukeni mifana na vona, hikuva Tatana wa n'wina ativa lesvi misvipfumalaka na mingasikombela. N'wina-ke, khongelani hi ndlela leyi, miku: “Tatana wa hina lweyi anga matilweni, vito ra wena arihlawuleke;” “akute kufuma ka wena; kurhandza ka wena akuyendliwe misaveni, tani hi loko kuyendliwa tilweni. Uhinyika namuntlha svakuja sva hina sva siku rin'wana ni rin'wana;” “uhirivalela svijoho sva hina, tani hi loko na hina hirivalela lava vahijohelaka;” ungahitshiki hiwela amiringweni, kambe hiponise ka lesvobiha, [hikuva kufuma, ni matimba, ni kutwala, i sva wena hi masiku ni masiku. Amen.] Loko mirivalela vanhu svijoho sva vona, Tatana wa n'wina wa le tilweni atamirivalela na n'wina; kambe loko mingarivaleli van'wana, Tatana wa n'wina na yena angakala angamirivaleli svijoho sva n'wina. Loko mititsona svakuja, mingasiqeni kufana ni vakanganyisi, lavasiqaka vaku vatavoniwa hi vanhu lesvaku va le kutitsoneni ka svakuja. Nitiyisile nili ka n'wina: Hakelo ya vona vayikumile. Kambe wena, loko utitsona svakuja, tota nhloko ya wena hi mafurha, uhlamba ni nghohe; akuva ungavoneki ka vanhu lesvaku u le kutitsoneni ka svakuja, kambe utavoniwa hi Tatana wa wena lweyi anga kona xihundleni; kutani Tatana wa wena lweyi avonaka xihundleni, atakuhakela. Mingatihlengeleteleni rifuwo misaveni, laha tinsumba ni kukurha svijaka kona, ni laha makamba maboxaka kona, mayiva. Kambe tihlengeleteleni rifuwo tilweni, laha tinsumba ni kukurha svingajiki kona, ni laha makamba mangaboxiki kona mayiva. Hikuva laha rifuwo ra wena ringa kona, hilaha mbilu ya wena na yona yingatava kona. Rivoni ra miri i tihlo; hikolaho, loko mahlo ya wena mali manene, miri wa wena hinkwawu wutava kuvonakaleni. Kambe loko mahlo ya wena mangalulamanga, miri hinkwawu wa wena wutava munyameni. Kutani-ke, loko kuvonakala lokunga ka wena kuli munyama, munyama wakona wutava lowukulu ngopfu! Aku na munhu lweyi angakotaka kutirhela tihosi timbirhi; hikuva atavenga yin'we, arhandza leyin'wana. Mingekoti kutirhela Xikwembu na Mamona. Hikolaho ninge ka n'wina: Mingatshukeni mivilela hi sva vutomi bza n'wina lesvaku mitaja yini kumbe mitanwa yini, hambi kuli kuvilela hi sva miri wa n'wina lesvaku mitayambala yini. Xana vutomi bza n'wina abzitluli svakuja ke? Na wona miri awutluli sviyambalu? Langutani tinyanyana letihahaka mpfhukeni: Atibzali, atitshoveli, atihlengeleti nchumu tshaleni, hikuva Tatana wa n'wina wa le tilweni watiphamela; xana n'wina amititluli ngopfu hi risima ke? Xana i mani ka n'wina lweyi angayengetelaka nkarhinyana wuli wun'we ka ntsengo wa malembe ya yena, kumbe lweyi angayengeteleka xisungunhu xili xin'we ka xiyimu xa yena hi kuvilela ka yena ke? Ni loko svili sviyambalu, mivilela ha yini-ke? Xiyani ndlela leyi sviluva sva nhova lesvi vange i makhon'wa svikulaka ha yona: Asvitirhi, asviluki; kambe namibzela lesvaku hambi ali Solomoni akudzunisekeni ka yena hinkwaku, angayambalanga tani hi xin'wana xa svona. Kutani lesvi Xikwembu xiyambexaka hi ndlela leyi abzanyi bza nhova lebzinga kona namuntlha, kambe mundzuku bzihoxiwa ndzilweni, xana axingemiyambexi kutlulisa svosvo, n'wina vanhu va kupfumela lokutsongo ke? “Hikolaho-ke mingavileleni miku: ‘Xana hitaja yini?’ Kumbe: ‘Hitanwa yini?’ Kumbe: ‘Hitayambala yini ke?’” Hikuva svilo svosvo hinkwasvu svilaviwa hi vamatiko; kutani Tatana wa n'wina wa le tilweni wasvitiva lesvaku svilo lesvo hinkwasvu masvipfumala. Rhangani mitilavela Mfumu wa yena ni kululama ka wona, kutani svosvo hinkwasvu mitayengeteliwa svona. Hikolaho-ke, mingatshukeni mivilela hi sva mundzuku hikuva mundzuku atatikarhatela sva yena. Kukarhateka ka siku rin'wana ni rin'wana kuringana siku rakona. Mingayavanyiseni, lesvaku na n'wina mingatayavanyisiwa; hikuva mitayavanyisiwa hi kuyavanyisa loku miyavanyisaka van'wana hakona; ni mpimo lowu mipimelaka van'wana ha wona, mitapimeliwa ha wona na n'wina. Hikolaho ka yini ulanguta xilavi lexinga tihlweni ra makwenu, kambe ungakoti kuvona ntsandza lowunga tihlweni ra wena, ke? “Kumbe, xana uvulisa kuyini ka makwenu, uku: ‘Nitshike nisusa xilavi atihlweni ra wena’ xana? Kasi, vona, ku ni ntsandza atihlweni ra wena!” Mukanganyisi! Rhanga ususa ntsandza lowunga tihlweni ra wena; hi kona ungatavona khwatsi, kutani ususa xilavi atihlweni ra makwenu. Minganyikeni timbzana svilo lesvihlawulekeke, hikuva tingamihundzukela, timikakatlula; nasvona mingahoxi maperola ya n'wina mahlweni ka makhumba, hikuva matamakandziyela. Kombelani, mitanyikiwa; lavani, mitasvikuma; gongondzani, mitapfuleliwa, hikuva mani na mani lweyi akombelaka, wanyikiwa; lweyi alavaka wasvikuma; kutapfuleliwa lweyi agongondzaka. Xana i mani xikarhi ka n'wina lweyi anganyikaka n'wana wa yena ribze, loko akombela svakuja ke? Kumbe loko akombela hlampfi, angamunyikaka nyoka ke? Kutani-ke, lesvi n'wina minga vanhu vobiha mitivaka kunyika vana va n'wina svilo lesvinene, xana Tatana wa n'wina lweyi anga matilweni, angetlulisi ngopfu kunyika lesvinene ka lavakombelaka ka yena ke? Hikolaho, hinkwasvu lesvi milavaka lesvaku vanhu vamiyendlela svona, vayendlelani svona na n'wina, hikuva hi svona lesvijondzisiwaka hi Nawu ni Vaprofeta. Nghenani hi nyangwa lowu wokhuma, hikuva nyangwa lowuyisaka kuloveni wuyanamile, ni ndlela leyi yiyaka kona, yiyanamile, kutani lavanghenaka hi yona vatele. Kasi nyangwa lowuyisaka vuton'wini wukhumile svinene, ni ndlela leyi yiyaka kona yikamanile svinene, kutani lava vayikumaka avatalanga. Tivoneleni ka vaprofeta va mavunhwa lavataka ka n'wina na vayambalile svikhumba sva tinyempfu, kasi atimbilwini ta vona, i mahlolwa lawa malevaka. Mitavativa hi mintirho ya vona. Xana svichocho sva mawuvha svingakhayiwa amintweni kumbe makuwa asvihaheni xana? Ahihim! Nsinya lowunene wupsala mihandzu leyonandziha, ni nsinya lowobiha wupsala mihandzu leyobiha. Nsinya lowunene awukoti kupsala mihandzu leyobiha, ni nsinya wobiha awukoti kupsala mihandzu leyonandziha. Nsinya wun'wana ni wun'wana lowungapsaliki mihandzu leyonandziha, wotsemiwa, wuhoxiwa ndzilweni. Hikolaho mitavativa hi mintirho ya vona. “Ahi hinkwavu lavango ka mina: ‘Hosi, Hosi’ vangatanghena Mfun'wini wa matilo, kambe kutanghena lavayendlaka kurhandza ka Tatana wa mina lweyi anga matilweni.” “Hi siku lero lavotala vataku ka mina: ‘Hosi, Hosi, xana ahiprofetanga hi vito ra wena ke? Xana ahihlongolanga madimoni hi vito ra wena ke? Xana ahiyendlanga mahlori lawa yotala hi vito ra wena ke?’ ” Nkarhini wolowo nitavabzela rivaleni, niku: Animitivanga, ni siku ni rin'we; sukani ka mina, n'wina lavayendlaka lesvobiha! Hikolaho-ke, mani na mani lweyi ayingisaka marito ya mina lawa, ava afamba ha wona, atafana ni wanuna lweyi wotlhariha lweyi ayakeke yindlo ya yena ribzeni. Kutani mpfula yina, maboboma mata, timheho tihunga, sviba yindlo yoleyo; kambe yingawi, hikuva masungulu ya yona amali ribzeni. “Mani na mani lweyi ayingisaka marito ya mina lawa, kutani angafambi ha wona, atafana ni wanuna wa xiphukuphuku, lweyi ayakeke yindlo ya yena axipfunyeni. Mpfula yina, maboboma mata, timheho tihunga, sviba yindlo yoleyo, kutani yiwa, kuwa ka yona kuva lokukulu.” Kuteloko Yesu ahetile kuvula marito lawa, xitshungu xihlamala hi kujondzisa ka yena; hikuva aaxijondzisa kufana ni lweyi anga ni matimba, kungali kufana ni Vatsali va vona. Loko Yesu axikile hi le ntshaveni, xitshungu lexikulu ximulandzelela. Kutani kuta munhu wa nhlokonho, afika amukhinsamela, aku: “Hosi, loko usvirhandza, unganibasisa.” Yesu atshambuluta voko, amukhumba, aku: “Nasvirhandza, nakubasisa!” Hi nomo-lo, abasa nhlokonho ya yena. Yesu aku ka yena: “Tivonele, ungatshuki ubzela munhu svilo lesvi; kambe famba, uyatikomba ka Muprista, uhumesa mhamba leyingalerisiwa hi Moxe, svitava vumboni ka tiko.” Kakuloko anghena Kapernawume, ndhuna ya dzana ra masochwa yita ka yena, yimukombela hi xichavu lexikulu, yiku: “Hosi, mutirhi wa mina ayo lakahla ndlwini, awome svirho, axaniseka ngopfu.” Yesu aku ka yena: “Nitaya, niyamuhanyisa.” Ndhuna ya dzana ra masochwa yihlamula yiku: “Hosi, asvinifanelanga lesvaku wena utanghena ndlwini ya mina, kambe vula rito ntsena, kutani mutirhi wa mina atahanya; hikuva, mina ninga munhu lweyi afumiwaka hi van'wana, ni ni masochwa hansi ka mina; loko niku ka mun'we wa vona: ‘Famba!’ Wafamba; ni ka mun'wana: ‘Tana!’ Wata; ni le ka mutirhi wa mina: ‘Yendla lesvo karhi!’ Wasviyendla.” Loko Yesu asvitwile, ahlamala, kutani abzela lavamulandzelaka, aku: “Nitiyisile nili ka n'wina: Xikarhi ka Vaisrayele, anikumanga munhu ni mun'we lweyi anga ni kupfumela loku kotanu. Namibzela, nili: Lavotala vatahuma avuxeni ni le vupelajambu, kutani vatatshama svakujeni Mfun'wini wa matilo kun'we na Abrahamu, na Izaki, na Yakobe. Kambe lava Mfumu awuli wa vona, vatacukumetiwa handle, munyameni, laha kungatava ni minkosi ni kuketsela ka matinyo.” Kutani Yesu aku ka ndhuna ya dzana: “Famba, tlhelela kaya! Akuyendleke hilaha upfumeleke hakona.” Kutani mutirhi wa ndhuna ahanyisiwa hi nkarhi wolowo. Loko Yesu afika kaya ka Petrosi, avona mamana wa nkata Petrosi na ayetlele na avabza, miri wa yena wuhiseta. Yesu amukhumba hi voko, kutani kuhiseta ka miri wa yena kunyamalala. Hi loko apfuka, atirhela Yesu. Nimajambu, vatisa lavanyingi lava avali ni madimoni; kutani ahlongola mimoya leyi hi rito ntsena, nasvona ahanyisa hinkwavu lavavabzaka, lesvaku kuyendleka lesvingavuliwa hi muprofeta Ezaya lweyi angaku: “Atekile mahlomulu ya hina, atirhwexa ni mavabzi ya hina.” Loko Yesu avona xitshungu lexi aximurhendzelile, alerisa vajondzisiwa va yena kupelela ka tlhelo rin'wana ra nambu. Kutani mun'we wa mutsali ata ka yena, ataku: “Mujondzisi, nitakulandza hinkwaku lomu uyaka kona.” Yesu amuhlamula aku: “Makhanga ma ni mincele, ni tinyanyana ti ni svisaka, kambe N'wana-wa-Munhu anga na laha angaseketelaka kona nhloko ya yena.” Mun'we wa vajondzisiwa va yena aku ka yena: “Hosi, wanganipfumelela nirhanga hi kuyalahla tatana.” Yesu aku ka yena. “Nilandze, kutani utshika vafi valahla vafi va vona.” Loko anghene bzatswini, vajondzisiwa va yena vamulandza. Kutani kupfuka xidzedze lexikulu tiveni, lakakuva bzatsu rikondza ribiwa hi magandlati; kambe Yesu, yena, aayetlele. Kutani vayamupfuxa, vaku: “Hosi, hiponise, halova!” Aku ka vona: “Hikolaho ka yini mili ni vutoya ke, n'wina vanhu vakupfumela lokutsongo?” Hi loko ayima, atshinya mheho ni tiva, kutani kurhula lokukulu kuva kona. Vanhu vahlamala vaku: “Munhu lweyi i munhu muni xana, lesvi mheho ni tiva svimuyingisaka ke?” Loko afikile ka tlhelo rin'wana ra tiva tikweni ra Vagadala, atlhangavetiwa hi vanhu vambirhi lava avali ni madimoni, vahuma hi le masirheni; avachavisa ngopfu, kuli hava munhu ni mun'we lweyi aatiya kuhundza hi ndlela yoleyo. Kutani vahuwelela, vaku: “Mhaka ya wena na hina hi yihi ke, wena N'wana wa Xikwembu? Xana utele kutahixanisa nkarhi wungasifika ke?” Kulenyana na vona, akuli ni ntlhambi lowukulu wa makhumba lawa amali kujeni. Madimoni mamukombela hi matimba maku: “Loko uhihlongola, hirhumele antlhambini wa makhumba.” Aku ka wona: “Yanani!” Hi loko mahuma mayanghena tinguluveni; kutani ntlhambi hinkwawu wutsutsumela ridongeni wuyatihoxa xiziveni xa tiva wufela kona. Varisi, vona, vabaleka, vaya doropeni, vayarungula hinkwasvu, ni lesvi svihumeleleke ka lava avali ni madimoni. Kutani vanhu va doropa hinkwaru vahuma kuyahlangana na Yesu; loko vamuvonile, vamukombela hi matimba lesvaku asuka tikweni ra vona. Kutani Yesu anghena bzatsweni, atsemakanya aya ridongeni rin'wana ra tiva, aya doropeni laha aahanya kona. Kutani vamutisela munhu wokhwanyala svirho, ayo lakahla arihlakeni. Loko Yesu avona kupfumela ka vona, aku ka lweyi wokhwanyala svirho: “Tiyisa mbilu n'wananga, urivaleliwile svijoho sva wena.” Van'we ka Vatsali vapimisa atimbilwini ta vona, vaku: “Munhu lweyi asandza Xikwembu!” Yesu, hi kutiva mimpimiso ya vona, aku: “Hikolaho ka yini mipimisa lesvobiha atimbilwini ta n'wina? Xana kuvevuka yini, kuvula lesvaku: ‘Urivaleliwile svijoho sva wena’, kumbe kuvula: ‘Pfuka ufamba’ ke? Svosvi-ke tivani lesvaku N'wana-wa-Munhu a ni matimba laha misaveni ya kurivalela vanhu svijoho.” Kutani aku ka lweyi wokhwanyala svirho: “Pfuka, teka rihlaka ra wena umuka.” Hi loko yena apfuka, amuka. Loko xitshungu xivona svosvo, xikhomiwa hi kuchava, kutani xitwalisa Xikwembu lexinganyika matimba lawa yotanu ka vanhu. Loko Yesu asukile kolaho, aya mahlweni, kutani avona munhu lweyi avaku i Matewu na atshamile ndlwini ya kuhakelisa rhesa, aku ka yena: “Nilandze!” Hi loko Matewu asuka ayima amulandza. Kuteloko Yesu atshamile kujeni ndlwini, vahakelisi va rhesa lavotala ni vajohi vafika, vatshama na yena kujeni svin'we ni vajondzisiwa va yena. Loko Vafarisi vasvivona, vaku ka vajondzisiwa va yena: “Xana Mujondzisi wa n'wina ajela yini ni vahakelisi va rhesa ni vajohi ke?” Loko Yesu asvitwa, aku ka vona: “Lavatsakeke mirini, avalavi n'anga, kambe yilaviwa hi lavavabzaka. “Yanani, miyajondza rito leringe: ‘Nitsakela timpsalu, kungali timhamba.’ Hikuva anitelanga kutavitana lavalulameke, kambe vajohi.” Nkarhini wolowo vajondzisiwa va Yohani vata ka yena vaku: “Sviyendlisa kuyini lesvaku hina ni Vafarisi hitolovela kutitsona svakuja; na vajondzisiwa va wena vona, vangatitsoniki ke?” Yesu aku ka vona: “Xana vanghanu vamuteki vangarila loko muteki ahali na vona ke? Kambe masiku matata, lawa muteki angatasusiwa ka vona; hikona vangatatitsona svakuja. Aku na munhu lweyi arhungelaka xiziva xa nguvu xa ximpsha ka nguvu ya khale, hikuva xiziva xakona xitahandzula nguvu, kutani kuhandzuka kakona kutaya kuyengeteleka. Nasvona vanhu avacheli vhinyu lerimpsha atindongeni ta khale hikuva loko vayendlisa svosvo, tindonga titahandzuka, kutani vhinyu ritahalaka, na tona tindonga tiwonheka; kambe vhinyu lerimpsha varichela tindongeni letimpsha, kutani svihlayiseka hi vumbirhi bza svona.” Loko ahavulavula na vona hi timhaka toleto, kufika mun'we wa varhangeli va sinagoga, amukhinsamela aku: “N'wana wa mina wanhwanyana wahakufa svosvi, ahifambe svin'we utamutlhanteka mavoko, kutani atatlhela ahanya.” Hi loko Yesu asuka amulandza, svin'we ni vajondzisiwa va yena. Kambe akuli ni wansati lweyi aavabza hi vuvabzi bza kuhumela ngati, hi mpfhuka wa khume ra malembe ni mambirhi; ata hi kunyanimela hi le ndzhaku ka Yesu, akhumba makumu ya nguvu ya yena; hikuva ate mbilwini ya yena: “Loko ningakhumba nguvu ya yena ntsena, nitahanyisiwa.” Yesu ahundzukula, kutani loko amuvona, aku ka yena: “Tiyisa mbilu n'wananga, kupfumela ka wena kukuhanyisile.” Kusukela nkarhini wolowo, wansati lweyi ava ntomi. Kutani loko Yesu afika kaya ka murhangeli ni loko avona lavachayaka svitiringo ni xitshungu lexibaka huwa aku ka vona: “Sukani, hikuva nhwanyana lweyi angafanga, ayoyetlela.” Kutani vamuhleka. Kambe loko xitshungu xihumesiwe handle, Yesu anghena akhoma nhwanyana hi voko, yena apfuka. Marungula ya mhaka yoleyo matwakala tikweni lero hinkwaru. Loko Yesu asukile kolaho ni kuhundzela mahlweni, svifamahlo svimbirhi svimulandza, svili karhi svihuwelela sviku: “N'wana Davhida, hitwele vusiwana.” Kuteloko anghenile ndlwini, svifamahlo svita ka yena, kutani Yesu aku ka svona: “Xana mapfumela lesvaku ningamipfuna ke?” Sviku ka yena; “Ina Hosi!” Hi loko akhumba mahlo ya svona, aku: “Mitayendleliwa hilaha mipfumelaka hakona.” Kutani mahlo ya svona mapfuleka. Yesu asvilaya svinene, aku: “Tivoneleni lesvaku svingatshuki svitiviwa hi munhu!” Kambe loko svihumile, sviyavulavula hi yena tikweni lero hinkwaru. Loko vali karhi vahuma, kutisiwa munhu wa mbheveve, nasvona aali ni dimoni. Kuteloko dimoni rihlongoliwile, lweyi wa mbheveve avulavula. Kutani xitshungu xihlamala, xiku: “Mhaka leyi, yotanu, ayisivoniwa xikarhi ka Vaisrayele.” Kambe Vafarisi vaku: “Ahlongola madimoni hi matimba ya hosi ya madimoni.” Kutani Yesu arhendzeleka hi madoropa ni svidoropana hinkwasvu, ali karhi ajondzisa masinagogeni ya vona, achumayela Evhangeli ya Mfumu, ahanyisa hinkwavu lava vaxanisiwaka hi mavabzi ya tinxakaxaka. Loko avona xitshungu, axitwela vusiwana, hikuva axikarhele, axitshamile hansi, xifana ni tinyempfu letingaliki ni murisi. Hi loko aku ka vajondzisiwa va yena: “Ntshovelo i wukulu, kambe vatirhi avatalanga. Hikolaho, kombelani ka N'winyi wa ntshovelo, lesvaku arhuma vatirhi kutshoveleni ka yena.” Loko Yesu avitanile vajondzisiwa va yena va khume ni vambirhi, avanyika matimba yohlongola mimoya ya chaka ni matimba ya kuhanyisa hinkwavu lava vaxanisiwaka hi mavabzi ya tinxakaxaka. Mavito ya vapostola lava va khume ni vambirhi hi lawa: Wosungula i Simoni lweyi ativiwaka hi vito ra Petrosi, kulandza Andreya makwavu, na Yakobe n'wana Zebedewu, na Yohani makwavu; Filipi na Bartolomewu; Tomasi na Matewu muhakelisi wa rhesa; Yakobe, n'wana Alfewu, na Tadewu; Simoni wa Kanana, na Yudasi Iskariyota, lweyi angaxenga Yesu. Yesu arhuma lava va khume ni vambirhi, ndzhaku ka loko avalayile aku: Mingatshukeni miya ka vamatiko; nasvona mingangheneni madoropeni ya Vasamariya, kambe yanani ka Vaisrayele, lavalahlekeke kufana ni tinyempfu. “Kutani loko mili karhi mifamba, chumayelani miku: ‘Mfumu wa matilo wu le kusuhi.’” Hanyisani lavavabzaka, mipfuxa vafi, mibasisa va nhlokonho, mihlongola madimoni. Minyikiwile mahala; na n'wina, nyikani mahala. Mingatshukeni miteka male ya golidi kumbe ya silivhere hambi ya koporo asvikhwameni sva n'wina; mingafambeni ni nkwama wa timbuva ta ndlela, male kumbe sviyambalu svoncinca, hambi masandhazi, kumbe nhonga, hikuva mutirhi afaneliwa hi svakuja sva yena. Hinkwaku lomu minghenaka kona, doropeni hambi asvidoropanini, lavani njangu lowu wungamiyamukelaka, kutani mitshama ka wona kukondza misuka. Loko minghena muntini, xewetani. Loko munti wolowo wufanela, kurhula ka n'wina akute henhla ka wona; kambe loko svingawufaneli, kurhula ka n'wina akutlhelele ka n'wina. Kutani loko vangamiyamukeli, kumbe loko vangayingisi marito ya n'wina, muntini wolowo, kumbe doropeni rolero, humani miphuhuna ntsurhi milengeni ya n'wina. Nitiyisile nili ka n'wina: Hi siku ra kuyavanyisa, tiko ra Sodoma na Gomora ritavevukiseliwa kutlula doropa rolero. Vonani, nimirhuma na mifana ni tinyempfu xikarhi ka mahlolwa; hi kolaho ke tlharihani kufana ni tinyoka, miva lavorhula kufana ni svituvana. Tivoneleni, hikuva vanhu vataminyiketa atihubzeni, vamiba hi minkhavi masinagogeni ya vona. Nasvona mitayisiwa mahlweni ka tindhuna ni le mahlweni ka tihosi hikolaho ka mina, lesvaku miveka vumboni ka vona ni ka vamatiko. Kambe siku leri vaminyiketaka ka vona, mingakanakaneni hi lesvi mingatavula svona ni mavulavulela yakona; hikuva svosvo, mitanyikiwa svona nkarhini wolowo. Ahi n'wina mingatavulavula, kambe i Moya wa Tatana wa n'wina lowu wungatavulavula hi n'wina. Makwavu atanyikela mun'wana makwavu lesvaku adlawa, ni tatana atayendlisa svosvo ka n'wana wa yena; vana vatapfukela vapsali va vona, vavadlaya. Mitavengiwa hi vanhu hinkwavu hikolaho ka vito ra mina; kambe lweyi angatatiyisela kufika makumu, hi yena lweyi angataponisiwa. Loko vamixanisa doropeni leri, tsutsumelani ka rin'wana, hikuva nitiyisile nili ka n'wina: N'wana-wa-Munhu atahumelela na mingasitlhanganisa madoropa hinkwawu ya Israyele. Mujondzisiwa ahi nkulu ka mujondzisi wa yena, ni xikarawa ahi nkulukumba ka n'winyi wa xona. Sviringene loko mujondzisiwa angahundzuka lweyi afanaka ni mujondzisi wa yena, ni loko xikarawa xingahundzuka lexi xifanaka ni n'winyi wa xona. Loko n'winyi wa njangu vamuchulile lesvaku i Belzebule, ka va njangu wa yena svitatlula mpimo. Hikolaho mingatshukeni michava vanhu, hikuva aku na xilo lexingafunengetiwa lexingatakala xingafununguliwi, ni xilo xa xihundla lexingatakala xingativiwi. Lesvi nimibzelaka svona axinyameni, svivuleni kuvonakaleni; ni lesvi misvitwaka svihleveteliwa tindleveni, svihuweleleni asvichungweni sva tiyindlo. Mingatshukeni michava lavadlayaka miri, na valihava matimba yodlaya moya; kambe chavani lweyi anga ni matimba yolovisa moya ni miri wa munhu Tiheleni. Xana svindzingiri svimbirhi asvixaviwi hi “sentavhu” yin'we ntsena ke? Kasi akungawi ni xin'we xa svona hansi, handle ka kurhandza ka Tatana wa n'wina. Xilesvo, loko kuli n'wina, hambi yili misisi ya tinhloko ta n'wina yihlayiwile hinkwayu. Hikolaho mingachaveni; n'wina mitlula svindzingiri lesvotala hi risima. Mani na mani lweyi angatanivula mahlweni ka vanhu, na mina nitamuvula mahlweni ka Tatana wa mina lweyi anga matilweni. Kambe mani na mani lweyi angatanilandzula mahlweni ka vanhu, na mina nitamukaneta mahlweni ka Tatana wa mina lweyi anga matilweni. Mingatshukeni mipimisa lesvaku nitile kutisa kurhula misaveni; kambe, nitisa tlhari, kungali kurhula. Hikuva nitile kutahambanisa “‘munhu ni tatana wa yena, nhwanyana ni mamana wa yena, mamanyana ni n'wingi wa yena; ni svirho sva njangu wa munhu svitava valala va yena.’ ” Lweyi arhandzaka tatana wa yena kumbe mamana wa yena kutlula mina, asvimufaneli kuva wa mina; svitano ni lweyi arhandzaka n'wana wa yena waxinuna kumbe waxisati kutlula mina. Nasvona, lweyi angatekiki xihambanu xa yena anilandza anganifaneli. Lweyi alavaka kutihlayisela vutomi bza yena, atalahlekeliwa hi bzona; kambe lweyi alahlekeliwaka hi vutomi bza yena hikolaho ka mina, atabzikuma. Lweyi amiyamukelaka, waniyamukela; ni lweyi aniyamukelaka, ayamukela lweyi anirhumeke. Lweyi ayamukelaka muprofeta hi lesvi anga muprofeta, atakuma hakelo yofana ni ya muprofeta; ni lweyi ayamukelaka lweyi alulameke hi lesvi anga lweyi alulameke, atakuma hakelo yofana ni ya lweyi alulameke. Nitiyisile nili ka n'wina: Mani na mani lweyi anyikaka hambi wuli ndzheko wa mati yotitimela ka mun'we wa lavatsongo lava, hi kutiva lesvaku i mujondzisiwa wa mina, angakala angapfumali hakelo ya yena. Kuteloko Yesu ahetile kukombisana ni vajondzisiwa va yena lava va khume ni vambirhi, asuka kolaho, ayajondzisa ni kuchumayela Evhangeli madoropeni ya vona. Kuteloko Yohani atwa ta mintirho ya Kriste na ali jele arhuma vajondzisiwa va yena kuyavutisa Yesu, vaku: “Xana hi wena lweyi vangate wata, kumbe xana hifanela kurindzela mun'wana ke?” Yesu ahlamula, aku ka vona: “Fambani miyarungulela Yohani lesvi misvitwaka ni lesvi misvivonaka: Svifamahlo svitlhela svivona, svilima svafamba, va nhlokonho vabasisiwa, lavofa tindleve vatwa, vafi vapfuka, svisiwana svibzeliwa Evhangeli. Kutani kukatekile lweyi angatakala angakhunguvanyeki hikolaho ka mina.” Kutani loko varhumiwa vasukile, Yesu asala avulavula hi Yohani, aku ka xitshungu: Amiyile kuyavona yini mananga xana? Arili rihlanga leritsekatsekisiwaka hi moya xana? Ahihim! Loko svilitano, amiyela kuyavona yini ke? Xana aali munhu lweyi ayambakele svosaseka ngopfu ke? Vonani, lavayambaleke lesvosaseka va le tindlwini ta vuhosi. Kutani nibzeleni, amiyela kuyavona yini ke? Aali muprofeta xana? Ina, namibzela, aali yena, ni kutlula ni muprofeta. Lweyi hi yena kungatsaliwa ta yena loko vaku: “ ‘Vona! Nirhuma ntsumi ya mina mahlweni ka wena; yitakurhangela mahlweni, yilungisa ndlela ya wena.’ ” Nitiyisile hakunene nili ka n'wina: Xikarhi ka vanhu lavapsaliweke hi vavasati, akuhumelelanga lweyi atlulaka Yohani Mukhuvuli; kambe lweyi anga lwentsongo Mfun'wini wa matilo i nkulu ka Yohani. Kusukela nkarhini wa Yohani Mukhuvuli kutafika nkarhi wa svosvi, kungheniwa Mfun'wini wa matilo hi kutirhisa tihanyi, kutani va tihanyi hi vona lava vatitekelaka wona. Vaprofeta hinkwavu ni Vatsali va Nawu vaprofetile lesvingatahumelela kukondza kufika Yohani. Kutani loko kunene mipfumela marito lawa, Yohani hi yena Eliya lweyi aafanela kuta. Lweyi anga ni tindleve, aayingise! Hikolaho, vanhu va masiku lawa, ningavafanisa ni yini ke? Vafana ni vatsongwana vohuha, lava vatshameke ndhawini yoxavisela ka yona na vali karhi valengetana vaku: “ ‘Himichayele nanga, kambe amicinanga; hiyimbelelile tinsimu ta mahlomulu, kambe amirilanga.’” “Hi mukhuva lowu Yohani atile; aangaji, anganwi, kutani vaku: ‘A ni dimoni!’ N'wana-wa-Munhu atile aja, anwa, kutani vaku: ‘Langutani, munhu wa makolo hi lweyi, wa xidakwa, lweyi atwananaka ni vahakelisi va rhesa ni vajohi!’ Kambe vutlhari bza Xikwembu bzitikomba na bzilulamile hi mintirho ya bzona.” Nkarhini wolowo Yesu asungula kusola madoropa lawa angayendla mahlori lawa yotala ka wona, hi mhaka ya lesvi mangayala kuhundzuka, aku: U ni khombo wena Korazini, na wena Betisayida, hikuva mahlori lawa mangayendliwa xikarhi ka n'wina, loko amayendliwile le Tiro ni le Sidoni, madoropa lawaya ingi mahundzukile khale, mayambale lesvokhwaxa, matshamile nkumeni. Hambi svilitano, namibzela lesvaku, hi siku ra kuyavanyisa, madoropa ya Tiro na Sidoni matavevukiseliwa kutlula n'wina. Na wena Kapernawume: “ ‘Xana utatlakusiwa kuyafika tilweni ke? Ahihim! Utatsongahatiwa kuyafikela Tiheleni.’ ” “Hakunene, mahlori lawa mayendliweke ka wena, loko amayedliwile Sodoma, doropa leriya ni namuntlha aritava rahali kona. Hambi svilitano nakubzela lesvaku, hi siku ra kuyavanyisa, tiko ra Sodoma ritavevukiseliwa kutlula wena.” Nkarhini wolowo Yesu avulavula aku: Nakukhensa Tatana, Hosi ya tilo ni misava, hikuva timhaka leti, utifihlele lava votlhariha, ni lava va vutivi, kambe utitivisile ka lavatsongo. Ina Tatana, usvilavise svosvo. Tatana avekile svilo hinkwasvu mavokweni ya mina; kutani aku na lweyi ativaka N'wana, loko angali Tatana; nasvona aku na lweyi ativaka Tatana, loko angali N'wana, ni lweyi N'wana alavaka kumutivisa ka yena. “Tanani ka mina, n'wina hinkwenu lavakarhaleke, ni lavatikeliwaka, nitamiwisisa. Rhwalani mpingu wa mina, mijondza ka mina, hikuva ni ni mbilu yorhula ni ya timpsalu; kutani mimoya yitakuma kuwisisiwa; hikuva mpingu wa mina wawolova, ni ndzhwalu wa mina wavevuka.” Nkarhini wolowo Yesu ahundza xikarhi ka masimu ya trigu hi siku ra Savata. Vajondzisiwa va yena avatwa ndlala, kutani vasungula kutshova minchocho ya trigu, vaja. Loko Vafarisi vasvivona, vaku ka yena: “Vona! Vajondzisiwa va wena vayendla lesvingapfumeleliwiki kuyendliwa hi siku ra Savata.” Kambe Yesu aku ka vona: “Xana amijondzanga lesviyendliweke hi Davhida, siku leri angatwa ndlala, yena ni lava avali na yena ke?” Atshama anghena na vona ndlwini ya Xikwembu, vaja xinkwa xa mhamba lexi axingafanelanga kujiwa hi yena ni lava avali na yena, kambe axijiwa hi Vaprista ntsena. Kumbe, amijondzanga Nawini xana lesvaku, hi siku ra Savata, Vaprista vatlula Nawu wa Savata hi kutirha Tempeleni, kambe vangakumi nandzu ke? Namibzela lesvaku ku ni lweyi atlulaka Tempele hi vukulu kola. Loko amitwisisile rito leringo: “ ‘Nitsakela timpsalu, kungali timhamba, n'wina ina mingasolanga lavangaliki na nandzu, hikuva N'wana-wa-Munhu i Hosi ya Savata.’” Loko Yesu asukile kolaho, ayanghena sinagogeni ra vona. Kona kolaho, akuli ni munhu wa kukhwanyala voko. Kutani vavutisa Yesu hi kulava xomunyika nandzu ha xona vaku: “Xana svapfumeleliwa kuhanyisa munhu hi siku ra Savata ke?” Yena aku ka vona: “I mani munhu xikarhi ka n'wina lweyi anga ni nyempfu yin'we ntsena, kaku loko yiwela kheleni hi siku ra Savata, angatakala angayitlakuli, ayihumesa hi siku lero ke? Kasi munhu atlula ngopfu svinene tinyempfu hi risima. Hikolaho, kuyendla lesvinene hi siku ra Savata, svapfumeleliwa.” Kutani aku ka munhu yelweyo: “Tshambuluta voko ra wena!” Aritshambuluta; kutani ritlhela riwololoka rifana ni lerin'wana. Vafarisi vahuma handle, vayaboha makungu mayelanu ni vutomi bza Yesu kuvona hilaha vangamudlayaka hakona. Kambe loko Yesu asvitiva, asuka kolaho. Lavotala vamulandza, kutani avahanyisa hinkwavu. Kambe avatshinyisisa lesvaku vangatshuki vamudumisa vanhwini. Akuli kuhetisa lesvivuliweke hi muprofeta Ezaya, loko aku: “Vonani nandza wa mina lweyi ningatihlawulela yena, murhandziwa wa mina lweyi mbilu ya mina yimutsakelaka. Nitaveka Moya wa mina henhla ka yena, kutani atativisa vamatiko lesvaku kuyavanyisa lokolulama ku kona; angakala angaholovi, angebi huwa, aku na munhu lweyi angatatwa rito ra yena asvitaratwini. Angakala angatshovi rihlanga lerikhinyekeke, nasvona angakala angatimi rivoni leringe ketiketi, akondza ahlulisa kuyavanyisa lokolulama. Kutani vamatiko vatatshemba vito ra yena.” Hi loko vatisa munhu lweyi aali ni dimoni; wa xifamahlo, nasvona ali mbheveve. Yesu amuhanyisa, kutani lweyi wa mbheveve avulavula, nasvona atlhela avona. Kutani xitshungu hinkwaxu xihlamala, xivutisana xiku: “Xana munhu lweyi angava yena N'wana Davhida ke?” Loko Vafarisi vatwa svosvo, vahlamula vaku: “Munhu lweyi angekoti kuhlongola madimoni loko kungali hi Belzebule, hosana ya madimoni.” Kambe Yesu, hi kutiva miyehleketo ya vona, aku ka vona: Mfumu wun'wana ni wun'wana lowuyavaneke hi le xikarhi, wutawa; svitano ni ka doropa rin'wana ni rin'wana, hambi wuli njangu, lowuyavaneke hi le xikarhi, wungakala wungatiyi. Ni loko Sathana ahlongola Sathana, watilwisa; hi kolaho mfumu wa yena wungakala wungatiyi. Ni loko kunene nihlongola madimoni hi Belzebule, xana vana va n'wina vona vamahlongola hi mani ke? Loko svilitano vatava vayavanyisi va n'wina. Kambe loko nihlongola madimoni hi Moya wa Xikwembu, svivula lesvaku Mfumu wa Xikwembu wutile ka n'wina. Kumbe munhu anganghenisa kuyini ndlwini ya nhenha ya matimba aphanga xuma xa yona, loko angasungulanga hi kuboha nhenha yoleyo ke? Hikona angakotaka kuphanga yindlo ya yona. Lweyi angayimiki na mina, alwa na mina; kutani lweyi angahlengeletiki na mina, wahangalasa. Hilaha ninge ka n'wina: Vanhu vatarivaleliwa xijoho xihi ni xihi, hambi kova kusandza Xikwembu; kambe loko vasandza Moya Lowokwetsima, vangakala vangarivaleliwi; mani na mani lweyi angatajohela N'wana-wa-Munhu hi kumusandza, atarivaleliwa; kambe lweyi angatajohela Moya Lowokwetsima hi kuwusandza, angakala angarivaleliwi, hambi kuli nkarhini wa svosvi, hambi kuli nkarhini lowutaka. Vonani: Nsinya lowunene wuveka mihandzu ya wona leyinene. Vonani: Nsinya lowobiha, wuveka mihandzu ya wona leyobiha, hikuva nsinya wutiviwa hi mihandzu ya wona. “N'wina rixaka ra svipshahla, mingasvikotisa kuyini kuhumesa marito lamanene, lesvi minga lavobiha ke? Nomo wuvula lesvi mbilu yitaleke hi svona. Munhu wa munene ahumesa svilo lesvinene xihundleni lexinene xa rifuwo ra yena, kambe munhu lweyi wobiha ahumesa lesvobiha xihundleni xa rifuwo ra yena lerobiha. Hikolaho namibzela lesvaku, hi siku ra kuyavanyisa, vanhu vatatihlamulela ka rito rin'wana ni rin'wana ra hava leri vatshamaka varivula, hikuva wena, utahlayiwa lweyi alulameke hikolaho ka marito ya wena; na svona, utayavanyisiwa hikolaho ka marito ya wena.” Nkarhini wolowo, van'wana va Vatsali ni Vafarisi vaku ka Yesu: “Mujondzisi, hilava kukuvona uyendla mahlori.” Avahlamula, aku: “Rixaka leri ra mona ni ra vuwosvi, rikombela mahlori, kambe ringakala ringanyikiwi wona, loko mangali wona mahlori ya muprofeta Yonasi. Hikuva hilaha Yonasi aheteke hakona masiku manharhu ni vusiku bzakona khwirini ra hlampfi leyikulu, N'wana-wa-Munhu na yena ataheta masiku manharhu ni vusiku bzakona hansi ka misava. Hi siku ra kuyavanyisa, vavanuna va Ninivha vatahumelela svin'we ni rixaka leri, variyavanyisa, hikuva vahundzukile, loko vachumayeliwa hi Yonasi; kutani masvivo, lweyi anga laha i nkulu kutlula Yonasi. Hi siku ra kuyavanyisa, hosinkazi ya le dzongeni yitapfuka kufeni svin'we ni rixaka leri, yiliyavanyisa, hikuva yisukile makun'wini ya misava kutayingisa vutlhari bza Solomoni, kutani masvivo, lweyi angalaha i nkulu kutlula Solomoni. “Loko moya wa chaka wusukile ka munhu, wuya mananga kuyalava kuwisa, kambe wutsandzeka kukukuma; hi loko wuku: ‘Nitatlhelela ndlwini ya mina leyi nihumeke ka yona.’ Kutani loko wufika, wuyikuma yingali na nchumu, yisviyeliwile, yilungisiwile. Hi loko wutlhela wuyateka mimoya yin'wana ya ntlhanu ni yimbirhi leyobiha kutlulisa wona, kutani yinghena, yitshama ndlwini leyi; kutani matshamela yohetelela ya munhu lweyi, matatlula lawa yosungula hi kubiha. Svitava tano ka rixaka leri robiha.” Aku ahavulavula ni xitshungu, kuhumelela mamana wa yena ni vamakwavu, vayima handle, valava kuvulavula na yena. Kutani munhu mun'we aku ka yena: “Vona, mamana wa wena ni vamakwenu, hi lava laha handle, valava kuvulavula na wena.” Kambe Yesu ahlamula lweyi angamutivisa aku: “Mamana i mani xana, ni vamakwerhu i va mani xana?” Kutani akomba vajondzisiwa va yena hi voko, aku: “Mamana ni vamakwerhu hi volava; hikuva mani na mani lweyi ayendlaka kurhandza ka Tatana wa mina lweyi anga matilweni, hi yena makwerhu waxinuna, ni waxisati, na mamana.” Hi siku rolero, Yesu ahuma ndlwini, ayatshama kusuhi ni tiva. Kutani xitshungu lexikulu xihlengeletana xitela yena, akondza anghena bzatswini, atshama ndzeni ka rona; loko xili xitshungu hinkwaxu, xona axiyimile ridongeni. Kutani axibzela timhaka letotala hi svifaniso, aku: “Yingisani! Muhaxi ahumile aya kuhaxeni ka timbewu. Loko ali karhi ahaxa, timbewu tin'we tiwela ndleleni; kutani tinyanyana tita, titaja hinkwatu. Timbewu tin'wana tiwela maribzeni, laha akungali na misava leyotala, kutani tihantla timila, hikuva misava yakona ayingatalanga. Kambe loko jambu ritlhava, svimilwa svivuna, kutani sviwoma hi kupfumala timintsu. Timbewu tin'wana tiwela xikarhi ka mintwa; loko mintwa yikula, yitikamanyeta. Kasi tin'wana tona tiwela misaveni leyinene, tiveka mihandzu, yin'wana yichela dzana (100), yin'wana ntlhanu wa makume ni rin'we (60), yin'wana makume manharhu. Lweyi anga ni tindleve, aayingise!” Vajondzisiwa vata ka Yesu, vaku: “Hikolaho ka yini uvulavula ni vanhu hi svifaniso ke?” Avahlamula, aku: Hi lesvaku n'wina, minyikiwile kutiva svihundla sva Mfumu wa matilo, kambe vona avanyikiwanga. Lweyi anga ni xanchumu, atanyikiwa ni svin'wana, kutani atava ni lesvotala; kambe lweyi angaliki ni nchumu, atatekeliwa ni lexi anga na xona. Lesviyendlekaka hi lesvaku nivulavula na vona hi svifaniso hikusa vavona, kambe avavonisisi; ni kuyingisa, avayingisisi, hambi kusvitwisisa. Kutani kuyendleka ka vona lesvingavuliwa khale hi muprofeta Ezaya, loko aku: “ ‘Kuyingisa mitayingisa hi tindleve, kambe amingayingisisi nikutsongo, nasvona, kuvona hi mahlo mitavona, kambe amingavonisisi! Timbilu ta vanhu lava titlanyalile; vatipfale tindleve ni mahlo, lesvaku vangahavoni, ni kuyingisa vangahayingisi hi tindleve ta vona, hambi kuli kutwisisa hi timbilu ta vona, vangahatwisisi, lesvaku vahundzuka, na mina nivahanyisa.’ ” Kambe makatekile mahlo ya n'wina, hikuva mavona, na tona tindleve ta n'wina, hikuva tayingisa. Nitiyisile hakunene nili ka n'wina: Vaprofeta lavotala ni lava volulama, vanavelile kuvona lesvi n'wina misvivonaka kambe avasvivonanga; hambi kuli kuyingisa lesvi n'wina misviyingisaka kambe avasviyingisanga. “Loko mili n'wina, yingisani xifaniso xa muhaxi mixitwisisa: Mani na mani lweyi atwaka Rito ra Mfumu wa Xikwembu, kambe angaritwisisi, svifana ni loko mbewu yiwile kusuhi ni ndlela. Lweyi wobiha ata, amutekela lesvihaxiweke mbilwini ya yena. Mbewu leyihaxiweke amaribzeni, svifana ni loko munhu atwile Rito, ahantla ariyamukela hi kutsaka; kambe anga na timintsu ndzeni ka yena, atiyisela nkarhinyana ntsena; kutani loko khombo kumbe kuxaniseka svihumelela hikolaho ka Rito, ahantla akhunguvanyeka. Mbewu leyihaxiweke mintweni svifana ni loko munhu atwa Rito; kambe kuvilela hi sva misava ni kukanganyisiwa hi rifuwo svikamanyeta Rito, kutani ritsandzeka kuveka mihandzu. Kambe mbewu leyihaxiweke misaveni leyinene, svifana ni loko munhu atwa Rito aritwisisa; hi yena lweyi avekaka mihandzu leyinene, yin'wana yiveka ka dzana (100), yin'wana yiveka ka ntlhanu wa makume ni rin'we (60), yin'wana yiveka makume manharhu.” Yesu avavekela xifaniso xin'wana, aku: “Mfumu wa matilo wufana ni munhu lweyi abzaleke mbewu leyinene nsin'wini ya yena. Kambe loko vanhu vayetlele, kuta nala wa yena, atabzala mfava xikarhi ka trigu, kutani atifambela. Kuteloko trigu ritlhavile rili khava, na wona mfava wuvonaka. Vatirhi va n'winyi wa munti vata, vaku ka yena: ‘Hosi, ahiku ubzalile mbewu leyinene nsin'wini ya wena; xana mfava lowu wuta hi kwihi ke?’ Aku ka vona: ‘I ntirho wa nala.’ Vatirhi vaku ka yena: ‘Xana ulava lesvaku hiyatsuvula mfava ke?’ Aku ka vona: ‘Ahihim, hikuva loko miyatsuvula mfava, mingatshuka mitsuvula na rona trigu. Svitshikeni svikula svin'we, kukondza kuyafika nkarhi wa kutshovela; hi kona ningataku ka vatshoveli: Rhangani hi mfava miwutsuvula, miwuboha hi tinyandza, mitawuhisa; kambe trigu mirihlengeleta tshaleni ra mina.’” Avavekela xifaniso xin'wana, aku: “Mfumu wa matilo wufana ni mbewu ya nsinapi leyi munhu angayiteka, ayayibzala nsin'wini ya yena. Mbewu yakona hi leyitsongo ka timbewu hinkwatu, kambe loko yimilile, yitlula svimilwa hinkwasvu hi kukula, yihundzuka nsinya, tinyanyana ta tilo, titayaka marhavini ya wona.” Atlhela avabzela xifaniso xin'wana, aku: “Mfumu wa matilo wufana ni comela leri wansati angariteka, aripfuva hi mimpimo yinharhu ya fulahu, yikondza yikukumuka hinkwayu.” Yesu abzelile xitshungu timhaka leti hinkwatu hi svifaniso; angavabzelanga nchumu loko kungali hi svifaniso, lesvaku kutayendleka hilaha rito ra muprofeta ringaku: “Nitavulavula hi svifaniso, nipaluxa timhaka leti atifihliwile, hi mpfhuka misava yitumbuluxiwile.” Kutani Yesu asuka xitshungwini, ayanghena ndlwini; vajondzisiwa va yena vata ka yena, vaku: “Hihlamusele xifaniso xa mfava wa le masin'wini.” Avahlamula, aku: Lweyi abzaleke mbewu leyinene i N'wana-wa-Munhu; nsimu i misava; mbewu leyinene i vana va Mfumu; mfava i vana va Lweyi Wobiha. Nala lweyi abzaleke mfava i Diyavulosi; kutshovela i kuhela ka misava, vatshoveli vona i tintsumi. Kukotisa loko mfava wutsuvuliwile, wuya hisiwa ndzilweni, svitava tano akuheleni ka misava. N'wana-wa-Munhu atarhuma tintsumi ta yena, titahlengeleta handle ka Mfumu wa yena vakhunguvanyisi hinkwavu ni lavayendlaka lesvobiha, titavacukumeta kheleni ra ndzilo, laha minkosi yingatava kona, ni kuketsela ka matinyo. Nkarhini wolowo, lavolulama vatavangama kukotisa jambu, Mfun'wini wa Tatana wa vona. Lweyi anga ni tindleve, aayingise! Mfumu wa matilo wufana ni rifuwo lericeleliweke nsin'wini, kaku loko munhu arithumbhile, angatlhela aricelela, kutani kutsakeni ka yena, ayaxavisa svilo sva yena hinkwasvu, atixavela nsimu yoleyo. Nasvona, Mfumu wa matilo wufana ni muxavi lweyi alavaka tinwarhu leti tinene; kutani loko akumile nwarhu yin'we yodura ngopfu, ayaxavisa svilo sva yena hinkwasvu, atixavela yona. Nasvona: Mfumu wa matilo wufana ni nkukutu lowupetiweke lwandle, wuphasa tihlampfi ta tinxakaxaka. Loko wutele, vaphasi vawukokela ridongeni, vatshama hansi, vakhetela tihlampfi letinene amindzhaveni ya vona, letingapfuniki nchumu vaticukumeta. Svitava tano akuheleni ka misava; tintsumi titahuma, titahlawula lavobiha ka lavolulama, lavobiha titavacukumeta kheleni ra ndzilo, laha minkosi yingatava kona, ni kuketsela ka matinyo. “Xana matitwisisa timhaka leti hinkwatu ke?” Vaku ka yena: “Ina!” Aku ka vona: “Hilaha ninge: Mutsali mun'wana ni mun'wana lweyi ajondzisiweke hi ta Mfumu wa matilo, afana ni n'winyi wa yindlo lweyi ahumesaka vuhosini bza yena svilo lesvimpsha ni lesvi sva khale.” Kuteloko Yesu ahetile kuvula svifaniso svosvo, asuka kolaho; loko afikile tikweni ra le kwavu, ajondzisa vanhu sinagogeni ra vona, vakondza vahlamala, vaku: “Xana vutlhari lebzi ni mintirho leyi ya matimba, asvikume kwihi ke? Xana ahi yena n'wana wa muvatli ke? Mamana wa yena, xana ahi yena lweyi avuliwaka Mariya ke? Ni vamakwavu, xana ahi vona va Yakobe, Yosefa, Simoni, na Yuda ke? Xana vamakwavu vaxisati ahi na vona hinkwavu xikarhi ka hina ke? Nasvona svilo lesvi hinkwasvu asvikuma kwihi xana?” Kutani vakhunguvanyeka svinene hikolaho ka yena. Kambe Yesu aku ka vona: “Muprofeta angasoliwi, loko kungali tikweni ra le kwavu, ni le maxakeni ya yena.” Hikolaho, angayendlanga mahlori lawa yotala kona, hikuva avangalina kupfumela. Nkarhini wolowo, loko ndhuma ya Yesu yifikile tindleveni ta hosi Heroda, aku ka vatirhi va yena: “Munhu lweyi i Yohani Mukhuvuli, ayopfuka kufeni, kutani hi svona lesviyendlaka lesvaku mahlori ya matimba mavoneka ka yena.” Mhaka hi lesvaku Heroda aakhomile Yohani, amuboha, amupfalela jele hikolaho ka Herodiya, nsati wa Filipi, makwavu wa Heroda; hikuva Yohani aatshama abzela Heroda makhambi yotala aku: “Awupfumeleliwi kutekela makwenu nsati wa yena.” Heroda aanavela kumudlaya, kambe aachava vanhu hikuva avaku: “Yohani i muprofeta!” Kambe nkhubzeni wa siku ra kuvelekiwa ka Heroda, n'wana wa Herodiya waxisati acina mahlweni ka vanhu, atsakisa Heroda; hi kolaho, Heroda amutshembisa hi kuhlambanya, aku: “Xihi ni xihi lexi ungataxikombela, nitakunyika xona.” Hi loko lweyi wanhwanyana abzeleteliwa hi mamana wa yena kulanga, aku: “Ninyike nhloko ya Yohani Mukhuvuli svosvi kola, yili nkambaneni.” Hosi yikhunguvanyeka, kambe hikolaho ka kuhlambanya ka yona, ni hikolaho ka lavatshameke na yona kujeni, yilerisa lesvaku nhloko yinyikiwa lweyi wanhwanyana. Kurhumiwa vanhu, vayatsema nhloko ya Yohani jele. Kutani nhloko ya yena yitisiwa na yili nkambaneni, vanyika lweyi wanhwanyana; yena ayiyisa ka mamana wa yena. Kutani vajondzisiwa va Yohani vata, vatateka ntsumbu wa yena, vayawulahla; kutani vayativisa Yesu. Loko Yesu atwile timhaka toleto, asuka kolaho hi bzatsu, apelela aya mananga na ali yexe. Loko xitshungu xisvitivile, xihuma madoropeni, ximulandza hi milenge. Akuhumeni ka yena bzatsweni, avona xitshungu lexikulu, kutani axitwela vusiwana, ahanyisa lavavabzaka xikarhi ka xona. Kuteloko ripelile, vajondzisiwa vata ka yena vaku: “Lomu i mananga, nasvona nkarhi wuhundzile, tlhelisa xitshungu xiya madoropeni, xiyatixavela svakuja.” Kambe Yesu aku ka vona: “Avafanelanga kusuka; vaphameleni n'wina.” Vaku ka yena: “Ahi na nchumu la, loko kungali svinkwa sva ntlhanu ni tihlampfi timbirhi.” Aku: “Svitiseni halenu.” Kutani loko abzelile xitshungu kutshama hansi bzanyini, ateka svinkwa sva ntlhanu ni tihlampfi timbirhi, alanguta henhla tilweni, akhensa. Kutani akhemelela svinkwa svosvo, anyika vajondzisiwa, vona vayavela xitshungu. Hinkwavu vaja vaxurha; kutani varholela matlhantlha lawa mangasala, matata svirhundzu sva khume ni svimbirhi. Kasi lavajeke avali vanhu lavalavaka kuva ntlhanu wa makhulu (5 000), loko kungakontiwi vavasati ni vatsongwana. Ndzhaku ka svosvo, Yesu asindzisa vajondzisiwa lesvaku vanghena bzatsweni, varhanga vaya ka tlhelo lerin'wana ra tiva, loko yena ali karhi asalisana ni xitshungu. Kuteloko asalisanile ni xitshungu lexiya, atlhantukela ntshaveni kuyakhongela ali yexe; kutani apeleliwa hi jambu na ahali kolaho. Bzatsu rona, arifambile mpfhuka lowukulu risukile ribuweni, rili karhi ritsekatsekisiwa hi magandlati, hikuva mheho ayiba yikongoma bzatsu. Hi nkarhi wa mahlambandlopfu, ata ka vona, na afamba henhla ka mati ya tiva. Loko vajondzisiwa vamuvona na afamba henhla ka mati ya tiva, vadzuka ngopfu vaku: “I xipoko!” Kutani vaba nyandha hi kuchava. Kambe Yesu ahantla avulavula na vona, aku: “Tiyisani timbilu, hi mina; mingachaveni!” Petrosi amuhlamula, aku: “Hosi, loko uli wena hakunene, nilerise lesvaku nita kolaho unga kona hi le henhla ka mati.” Yesu aku ka yena: “Tana!” Kutani Petrosi ahuma bzatsweni, afamba henhla ka mati, aya ka Yesu. Kambe loko avona matimba ya mheho, akhomiwa hi kuchava; kutani loko asungula kumbombomela, aba nyandha aku: “Hosi, niponise!” Yesu ahantla atshambuluta voko, amukhoma, aku ka yena: “Munhu wa kupfumela lokutsongo, ukanakanile hikolaho ka yini xana?” Kuteloko vanghenile bzatswini, mheho yirhula. Kutani lava avali bzatswini vakhinsamela Yesu, vaku: “Hakunene, u N'wana wa Xikwembu.” Loko vatsemakanyile tiva, vafika tikweni ra Genezareta. Loko vanhu vakona vativile lesvaku hi yena Yesu, varhumela rito matlhelweni hinkwawu, kutani hinkwavu lavavabzaka vatisiwa ka yena. Vanhu vamukombela lesvaku apfumelela timbabzi kukhumba hambi mali makumu ya sviyambalu sva yena ntsena; kutani hinkwavu lavangamukhumba vahanyisiwa. Nkarhini wolowo, Vafarisi ni Vatsali lavahumaka Yerusalema vata ka Yesu, vaku: “Hikolaho ka yini vajondzisiwa va wena vangalandzi svihena lesvi hisvikumeke ka lava va khale xana? Hikuva vaja na vangahlambanga mavoko.” Avahlamula, aku: Na n'wina, mitlulela yini Nawu wa Xikwembu hi mikhuva ya n'wina ke? “Xikwembu xite: ‘Uva ni xichavu ka tatana wa wena ni ka mamana wa wena.’ Nasvona xite: ‘Lweyi arhuketelaka tatana wa yena kumbe mamana wa yena, aadlayiwe!’” “Kasi n'wina mili, munhu angabzela tatana wa yena kumbe mamana wa yena, aku: ‘Lexi awufanela kuxilondzovota ka mina, i mhamba leyihlawuleliweke Xikwembu.’” Ka n'wina, munhu lweyi angahalina yo mfanelo ya kupfuna tatana wa yena. Kutani-ke miwonha rito ra Xikwembu hi mikhuva ya n'wina. Vakanganyisi, Ezaya aavula n'wina hakunene loko aku: “‘Vanhu lava vanidzunisa hi milomo, kambe timbilu ta vona ti le kule na mina. Vatikarhata mahala hi kunidzunisa, tijondzo leti vatijondzisaka i milawu ya vanhu ntsena.’” Kutani Yesu avitana xitshungu, aku ka xona: “Yingisani, mitwisisa. Lesvinghenaka non'weni, ahi svona lesvinyamisaka munhu, kambe lesvihumaka non'weni, hi svona lesvinyamisaka munhu.” Kutani vajondzisiwa vata ka yena, vaku: “Xana wasvitiva lesvaku Vafarisi vakhunguvanyekile, loko vatwile marito ya wena ke?” Ahlamula, aku: “Nsinya wun'wana ni wun'wana lowu wungabzaliwangiki hi Tatana wa mina wa le tilweni, wutatsuvuliwa. Vatshikeni, hi lava va svifamahlo lavafambisaka svifamahlokulobze. Loko xifamahlo xifambisa xin'wana, svitawela kheleni hi vumbirhi bza svona.” Petrosi amuhlamula aku: “Hihlamusele xifaniso lexi.” Aku: “Xana ni svosvi mahapfumala kutwisisa na n'wina ke? Xana amisvitivi lesvaku hinkwasvu lesvinghenaka non'weni, sviya khwirini, kutani svicukumetiwa nhoveni ke? Kasi lesvihumaka non'weni, svita hi le mbilwini, kutani hi svona lesvinyamisaka munhu. Hikuva miyehleketo leyobiha, kudlayana, vuwosvi, vuphukuphuku, ni kuyiva, vumboni bza mavunhwa ni kurhuketela, hi svona lesvinyamisaka munhu; kambe kuja na ungahlambanga mavoko, ahi svona lesvi svinyamisaka munhu.” Yesu asuka kolaho, aya matlhelweni ya madoropa ya Tiro na Sidoni. Kutani kuhumelela wansati lweyi aata hi le migangeni ya kusuhi na Kanana ahuwelela, aku: “Nitwele vusiwana, Hosi N'wana Davhida! N'wana wa mina wanhwanyana axanisiwa ngopfu hi madimoni.” Kambe Yesu angamuhlamulanga nchumu. Kutani vajondzisiwa va yena vamukombela vaku: “Muhlongole, hikuva ahibela huwa ali karhi ahilandzelela.” Yesu ahlamula aku: “Anirhumiwanga ka van'wana, loko kungali ka Vaisrayele, lavalahlekeke kufana ni tinyempfu.” Hi loko wansati ata, atamukhinsamela, aku: “Hosi, nipfune!” Amuhlamula, aku: “Asvisasekanga kutekela vana svakuja, unyika timbzana.” Yena aku: “Ina Hosi, kambe hambi tili timbzana, tija matlhantlha lawa mawaka hi le mezeni wa n'winyi wa tona.” Kolaho Yesu ahlamula, aku ka yena: “Wansati, kupfumela ka wena i kukulu; akuyendliwe hilaha ukombelaka hakona!” Kutani n'wana wa yena ahanyisiwa hi nkama wolowo. Loko Yesu asukile kolaho, atlhelela kusuhi ni tiva ra Galileya, kutani atlhantukela ntshaveni, afika atshama kona. Xitshungu lexikulu xita ka yena, na xili ni lavakhwitaka, svilima, svifamahlo, timbheveve ni van'wana lavotala; vavaveka milengeni ya Yesu, kutani avahanyisa. Xitshungu xihlamala loko xivona timbheveve tivulavula, svilima svihanyisiwa, lavokhwita vafamba, lavofa mahlo vavona; kutani xidzunisa Xikwembu xa Israyele. Yesu avitana vajondzisiwa va yena, aku ka vona: “Nitwela xitshungu lexi vusiwana, hikuva xixwile masiku manharhu na mina, kutani axahali na svakuja; anilavi kuxitlhelisela makaya na xili ni ndlala, hikuva xingawa ndleleni.” Vajondzisiwa vaku ka yena: “Xana hingasvikuma kwihi kola mananga svakuja svophamela xitshungu xotani, lesvaku xija xixurha ke?” Yesu aku ka vona: “Mi ni svinkwa svingani ke?” Vaku: “Hi ni svinkwa sva ntlhanu ni svimbirhi, ni tihlampfinyana tingali tingani.” Kolaho abzela xitshungu lesvaku xitshama hansi. Kutani ateka svinkwa sva ntlhanu ni svimbirhi ni tihlampfi, akhensa, akhema, anyika vajondzisiwa, vona vayavela xitshungu. Hinkwavu vaja vaxurha, varholela ni matlhantlha lawa mangasala, matata ntlhanu wa svirhundzu ni svimbirhi lesvikulu. Lavangaja, avali vanhu va mune wa makhulu (4 000), loko kungahlayiwi vavasati ni vatsongwana. Kuteloko atlhelisile xitshungu, anghena bzatswini, aya tikweni ra Magadala. Vafarisi ni Vasaduki vata ka Yesu kutamuringa, vakombela lesvaku ayendla xikombiso lexihumaka tilweni. Yena avahlamula, aku: “[Nimajambu, mili: ‘Ritaxa khwatsi, hikuva tilo ripshukile kufana ni ndzilo.’] [Kutani ni mixo mili: ‘Namuntlha yitana, hikuva tilo radzindza, ni kumphuma rimphumile.’ Vakanganyisi, mitiva matshamela ya tilo, kambe mitsandzeka kutiva svikombiso sva minkarhi leyi?] Rixaka leri ra mona, ni vuwosvi, rilava xikombiso, kambe ringakala ringanyikiwi xona, loko xingali xikombiso xa muprofeta Yonasi.” Kutani avasiya, atifambela. Loko vajondzisiwa vatsemakanyile vaya tlhelo rin'wana ra tiva vatsundzuka lesvaku avakhohlwile kuteka svinkwa. Yesu aku ka vona: “Tlharihani, tivoneleni ka comela ra Vafarisi ni ra Vasaduki.” Kutani vakanetana vaku: “Kumbe hi lesvi hingatekangiki svinkwa.” Kuteloko Yesu asvitwile, aku ka vona: “Vanhu vakupfumela lokutsongo, hikolaho ka yini mikanetana hi lesvi mingaliki ni svinkwa xana? Xana amisetwisisa ke? Xana amitsundzuki svinkwa sva ntlhanu lesvingaphamela vanhu va ntlhanu wa makhulu (5 000) ni lesvaku mitatile svirhundzu svingani lesvikulu hi matlhantlha ke? Amitsundzuki ni svinkwa sva ntlhanu ni svimbirhi lesvingaphamela vanhu va mune wa makhulu (4 000) ni lesvaku mitatile svirhundzu svingani hi matlhantlha ke? Hikolaho ka yini mingatwisisi lesvaku aningavulavuli na n'wina hi ta svinkwa xana? Kambe hi lesvaku mitivonela ka comela ra Vafarisi ni ra Vasaduki xana?” Hikona vangatwisisa lesvaku aangavuli kutivonela ka comela ra svinkwa, kambe kutivonela ka tijondzo ta Vafarisi ni ta Vasaduki. Loko Yesu afikile tikweni ra Khezariya wa Filipi, avutisa vajondzisiwa va yena, aku: “Xana vanhu vali, N'wana-wa-Munhu i mani ke?” Vaku: “Van'we vali, u Yohani Mukhuvuli; van'wana vali, hi wena Eliya; van'wana kambe vali, hi wena Yeremiya, kumbe mun'we wa vaprofeta.” Aku ka vona: “N'wina ke, mili ni mani xana?” Kutani Simoni Petrosi ahlamula aku: “U Kriste, N'wana wa Xikwembu lexinyikaka vutomi.” Yesu ahlamula aku: “Ukatekile Simoni n'wana Yona, hikuva ahi munhu wa misava lweyi angakupfuletela svosvo, kambe i Tatana wa mina lweyi anga matilweni. Kolaho-ke nili ka wena: U ‘Petrosi’, kutani henhla ka ribze leri, nitayaka kereke ya mina; kutani hambi wuli ntamu wa rifu wungakala wungayihluli. Nitakunyika makhiya ya Mfumu wa matilo; kutani lexi ungataxiyalela la misaveni, xitayaleliwa ni le tilweni, ni lexi ungataxipfumelela la misaveni, xitapfumeleliwa ni le tilweni.” Kutani abzela vajondzisiwa va yena lesvaku vangatshuki vabzela munhu lesvaku hi yena Mesiya. Kusukela nkarhini wolowo Yesu asungula kubzela vajondzisiwa va yena lesvaku afanele kuya Yerusalema ayatwisiwa kuvava lokukulu hi vakulukumba ni Vaprista lavakulu ni Vatsali, adlawa, atlhela apfuka kufeni hi siku ra vunharhu. Kambe Petrosi amukokela tlhelweni, amukawuka aku: “Xikwembu axingesvipfumeleli lesvi, we Hosi! Svilo lesvi, svingakala svingakuhumeleli.” Hi loko yena ahundzukula, aku ka Petrosi: “Suka ka mina Sathana! U xikhunguvanyiso ka mina, hikuva awuyehleketi sva Xikwembu, uyehleketa sva vanhu ntsena.” Yesu atlhela aku ka vajondzisiwa va yena: Loko munhu alava kunilandza aatitshike, atirhwexa xihambanu xa yena, kutani anilandza, hikuva lweyi arhandzaka kutihlayisela vutomi bza yena, atalahlekeliwa hi bzona; kambe lweyi alahlekeliwaka hi vutomi bza yena hikolaho ka mina, atatlhela abzikuma. Hikolaho loko munhu akota kufuwa misava hinkwayu, kambe alahlekeliwa hi vutomi bza yena, svitava svimupfune yini ke? Kumbe munhu atahumesa yini kuxava vutomi bza yena xana? Hikuva N'wana-wa-Munhu atavuya hi kukwetsima ka Tatana wa yena na ali ni tintsumi ta yena, kutani hi kona angatanyika mani na mani hi kuya hi mintirho ya yena. “Nitiyisile nili ka n'wina: Ku ni van'wana xikarhi ka lavanga kola, lavangatakala vangakhumbiwi hi rifu na vangasivona N'wana-wa-Munhu avuya Mfun'wini wa yena.” Loko kuhundzile masiku ya ntlhanu ni rin'we, Yesu ateka Petrosi na Yakobe na Yohani makwavu wa Yakobe, aya na vona ntshaveni leyoleha na vali voxe. Kutani ahundzuka mahlweni ka vona; nghohe ya yena yivangama kufana ni jambu, nasvona sviyambalu sva yena svihundzuka lesvobasa, svivangama kukotisa kuvonakala. Hi loko Moxe na Eliya vahumelela kolaho, vavulavula na yena. Kutani Petrosi aku ka Yesu: “Hosi, svatsakisa kuva kola; loko usvirhandza, ningayaka mintsonga yinharhu kola, wun'we wa wena, wun'wanyana wa Moxe, wun'wanyana wa Eliya.” Aku ahavulavula, refu lerovangama rihumelela, rivafunengeta; kutani kutwakala rito lerihumaka ka refu, riku: “Lweyi i N'wananga lweyi nimurhandzekaka, lweyi nimutsakelaka, muyingiseni!” Loko vajondzisiwa vatwa rito lero, vawa hi svimombo, hi kuchava. Kambe Yesu avatshinelela, avakhumba aku: “Sukanimiyima, mingachaveni!” Loko vatlakusa mahlo, vavona Yesu na ali yexe, kungali na mun'wana kolaho. Loko vahaxika hi le ntshaveni, Yesu avalerisa aku: “Mingatshukeni mibzela vanhu lesvi misvivoneke, kukondza N'wana-wa-Munhu atava apfukile kufeni.” Kutani vajondzisiwa vamuvutisa, vaku: “Hikolaho ka yini Vatsali vavula lesvaku Eliya afanele kurhanga ata xana?” Avahlamula aku: “Kunene Eliya wata, kutani atatlhela alulamisa hinkwasvu. Kambe mina namibzela lesvaku Eliya atile, kambe avamutivanga; kutani vamuyendlile hinkwasvu lesvi vasvirhandzeke. Hi mukhuva wolowo, vatatwisa na yena N'wana-wa-Munhu kuvava.” Hi loko vajondzisiwa vatwisisa lesvaku aavabzela hi ta Yohani Mukhuvuli. Kuteloko vafikile axitshungwini, munhu ata ka yena, atakhinsama, aku: “Hosi, twela n'wana wa mina vusiwana, hikuva axanisiwa ngopfu hi vuvabzi bza n'weti; hakanyingi awela ndzilweni, ni le matini. Nimutisile ka vajondzisiwa va wena, kambe vatsandzekile kumuhanyisa.” Yesu ahlamula, aku: “Ha! Rixaka leringapfumeliki, lerohomboloka, nitava na n'wina kufika rini xana? Nitamixanisekela kufika kwihi ke? Mutiseni halenu.” Hi loko Yesu akhahla dimoni, kutani dimoni rihuma ka lweyi wajaha; kusukela nkarhi wolowo jaha leriya riva rihanyile. Kutani vajondzisiwa vata ka Yesu hi tlhelo, vaku ka yena: “Xana hina hitsandzekile ha yini kurihlongola ke?” Aku ka vona: “Hikolaho ka kupfumela kutsongo ka n'wina. Nitiyisile nili ka n'wina: Loko mili ni kupfumela loku kuringanaka ni ndzoho ya sinapi, mingaku ka ntshava leyi: ‘Suka laha uya lahaya!’ Kutani yitarhurha; kuhava lexi xingatamitsandza. [Dimoni ra rixaka leri arihumi loko kungali hi kukhongela ni kutitsona svakuja.]” Loko vajondzisiwa vatlhele vahlangana Galileya, Yesu aku ka vona: “N'wana-wa-Munhu atanyiketiwa mavokweni ya vanhu; vatamudlaya, kambe atatlhela apfuka kufeni hi siku ra vunharhu.” Kutani vajondzisiwa vatala hi kuvaviseka lokukulu. Loko Yesu ni vajondzisiwa vafika Kapernawume, vahakelisi va rhesa ra tidrakma timbirhi vata ka Petrosi, vaku: “Xana mujondzisi wa n'wina angahumesi tidrakma timbirhi ke?” Aku: “Ina, wahumesa.” Loko Petrosi anghenile ndlwini, Yesu atekela kumuvutisa, aku: “Xana upimisa yini Simoni? Tihosi ta misava titeka ka mani rhesa ke? Ka vana va tona, kumbe a ka vanhu va le handle xana?” Petrosi aku ka yena: “Ka vanhu va le handle.” Yesu aku ka yena: “Loko svilitano, vana va tona avarhesi. Kambe lesvaku hingavakhunguvanyisi, yana ativeni, uyaringela; kutani hlampfi leyorhanga leyi ungatayiphasa, yikhome, uyipfula nomo; utakuma xitatare kona; xiteke, uvanyika xona, uhumesela mina na wena.” Nkarhini wolowo, vajondzisiwa vata ka Yesu vaku: “Lwenkulu Mfun'wini wa matilo i mani xana?” Yesu avitana ntsongwana, amuyimisa xikarhi ka vona, aku: “Nitiyisile nili ka n'wina: Loko mingahundzuki mifana ni vatsongwana, amingangheni Mfun'wini wa matilo. Hikolaho-ke, lweyi atitsongahataka kufana ni ntsongwana lweyi, hi yena lweyi anga lwenkulu Mfun'wini wa matilo. Nasvona lweyi ayamukelaka ntsongwana wofana ni lweyi hi vito ra mina, ayamukela mina. “Kambe lweyi angatayendla lesvaku mun'we wa lavatsongo lava vapfumelaka ka mina, akhunguvanyeka asvitayampsa loko aboheleliwa ribze ra kusilela ka rona nhan'wini, ahoxiwa xiziveni xa lwandle. Yini khombo misava hikolaho ka svikhunguvanyiso; loko kuli kukhunguvanyisa, kunene kufanele kuva kona, kambe a ni khombo munhu lweyi kukhunguvanyeka kuhumelelaka hikolaho ka yena. Loko voko ra wena kumbe nenge wa wena svikukhunguvanyisa, svitseme, usvicukumeta kule na wena; hikuva svingayampsa loko unghena vuton'wini na uli xilima kumbe na ukhwita, kutlula kuhoxiwa ndzilweni lowungatimekiki na uli ni milenge yimbirhi kumbe mavoko mambirhi. Ni loko tihlo ra wena rikukhunguvanyisa, rixokole, uricukumeta kule na wena; hikuva svingayampsa kunghena vuton'wini na uli ni tihlo rin'we, kutlula kuhoxiwa ndzilweni wa Tihele na uli ni mahlo mambirhi. “Tivoneleni lesvaku mingatshuki michipisa ni mun'we wa lavatsongo lava; hikuva namibzela lesvaku tintsumi ta vona matilweni titshama nkarhi hinkwawu na tivona mombo wa Tatana wa mina lweyi anga matilweni. [ Hikuva N'wana-wa-Munhu atile kutalava ni kutaponisa lesvilahlekeke.] Xana miyanakanya yini hi mhaka leyi ke: Loko munhu ali ni dzana (100) ra tinyempfu, kutani yin'we ya tona yilahleka, xana angakala angasiyi leti ta ntlhanu ni mune wa makume ni ntlhanu ni mune (99) nhoveni, ayalava leyilahlekeke ke? Nitiyisile nili ka n'wina: Loko atshuka ayikumile, atayitsakela ngopfu kutlula leti ta ntlhanu wa makume ni mune leti atingalahlekanga. Hi mukhuva wolowo, ahikurhandza ka Tatana wa n'wina lweyi anga matilweni lesvaku kulahleka ni mun'we wa lavatsongo lava. “Loko makwenu akujohelile, famba uyakombisana na yena kuhoxa ka yena, na mili n'wina vambirhi ntsena; loko akuyingisa, utava uvuyisile makwenu. Kambe loko angakuyingisi, teka munhu mun'we, kumbe vambirhi, lesvaku mhaka hinkwayu yifakaziwa hi milomo ya timboni timbirhi kumbe tinharhu. Loko ayala kuvayingisa, bzela nhlengeletanu ya vakriste; loko ayala kuyingisa na yona nhlengeletanu, ka wena aakotise muhedeni kumbe muhakelisi wa rhesa. “Nitiyisile nili ka n'wina: Hinkwasvu lesvi mingatasviyalela laha misaveni, svitayaleliwa ni le tilweni; ni hinkwasvu lesvi mingatasvipfumelela laha misaveni, svitapfumeleliwa ni le tilweni. Nasvona namibzela kambe, nili ka n'wina: Loko vambirhi xikarhi ka n'wina vatwanana laha misaveni ka mhaka yihi na yihi, kutani vayikombela hi kukhongela, vatanyikiwa yona hi Tatana wa mina lweyi anga matilweni. Hikuva laha vambirhi kumbe vanharhu vahlengeletanaka kona hi vito ra mina, na mina nikona kolaho xikarhi ka vona.” Hi loko Petrosi ata ka Yesu, afika amuvutisa aku: “Hosi, loko makwerhu atshamela kunijohela, xana nitamurivalela kangani ni ke? Kungava ka ntlhanu ni ka mbirhi ke?” Yesu aku ka yena: “Anikubzeli kumurivalela ka ntlhanu ni kambirhi, kambe nili akuve, makume ya ntlhanu ni mambirhi loku kuyandzisiwaka hi ntlhanu ni kambirhi. Hikuva Mfumu wa matilo wufana ni hosi leyinaveleke kukambisisa timale letitameliweke hi vatirhi, va yona. Kuteloko yisungulile kukambisisa, kutisiwa munhu lweyi anga ni xikweneti lexikulu xa male ya khume wa makhulu (10 000) ya titalenta. Kambe lesvi munhu lweyi aapfumala xomuhakela ha xona, n'winyi wa yena atsema mhaka ya lesvaku axavisiwa, yena ni nsati, ni vana ni hinkwasvu lesvi anga nasvo, lesvaku nandzu wa yena wutahela hi mukhuva wolowo. Hi loko mutirhi lweyo awela milengeni ya n'winyi wa yena, akombela aku: ‘Nilehisele mbilu, nitakuhakela hinkwasvu.’ N'winyi wa mutirhi lweyi amutwela vusiwana, amutshunxa ni kumurivalela nandzu wakona. Kambe loko mutirhi lweyi ahuma handle, ahlangana ni mutirhikulobze lweyi aamudevha male ya tidenari ta dzana (100); hi loko amukhoma, amutlimba nkolo, aku: ‘Humesa male ya mina!’ Mutirhikulobze yelweyo awela milengeni ya yena, amukombela aku: ‘Nilehisele mbilu, nitakuhakela hinkwasvu.’ Kambe yena ayala, ayamuhoxa jele kukondza ahakela male hinkwayu. Kutani loko vatirhi lava van'wana vavona lesvihumeleleke, vakhomiwa hi kuvaviseka ngopfu, vayarungulela n'winyi wa vona hinkwasvu lesvihumeleleke. Hi loko n'winyi wa vona avitana mutirhi lwiya, aku ka yena: ‘Mutirhi lweyi wobiha! Nikutsetselelile nandzu wa wena hinkwawu, hi lesvi unganikombela; asvingakufanelanga na wena kutsetselela nakuloni, kufana ni lesvi na mina ningakutsetselela xana?’ Kutani n'winyi wa yena amukarihela, amunyiketa mavokweni ya maphoyisa, mutirhi yelweyo akondza ahakela male hinkwayu. Tatana wa mina wa le matilweni atayendlisa svosvo ka n'wina, loko mani na mani wa n'wina angatsetseleli makwavu hi mbilu ya yena hinkwayu.” Kuteloko Yesu ahetile kuvulavula timhaka leti, asuka Galileya, aya migangeni ya tiko ra Yudeya, hi tlhelo rin'wana ra nambu wa Yordani. Xitshungu lexikulu ximulandza, kutani avahanyisa kolaho. Vafarisi vata ka yena kumuringa, vaku: “Xana munhu wapfumeleliwa kutshika nsati wa yena hi mhaka yihi ni yihi ke?” Yesu avahlamula aku: “Amihlayanga xana marito lawa mange: ‘Kusunguleni Mutumbuluxi ayendlile munhu waxinuna ni munhu waxisati’ xana? Nasvona Mutumbuluxi ate: ‘Hikolaho ka svona wanuna atasuka ka tatana wa yena ni ka mamana wa yena, anamarhela nsati wa yena; kutani lavambirhi vatava nyama yin'we ntsena.’ Svivula lesvaku avahali vambirhi, kambe i nyama yin'we ntsena. Hikolaho-ke lesvi Xikwembu xisvihlanganiseke, svingatshuki svihambanisiwa hi munhu.” Vafarisi vaku ka yena: “Hikolaho ka yini Moxe abzelile vanhu lesvaku wansati anyikiwa papela ra kumutshunxa, kutani atshikiwa ke?” Yena, aku ka vona: “Moxe amipfumelelile kutshika vasati va n'wina hikolaho ka kunonon'hwa ka timbilu ta n'wina; kambe kusunguleni asvingalitano. Mina nili: Mani na mani lweyi atshikaka nsati wa yena, loko kungali hi mhaka ya vunghwavana, kutani ateka mun'wana, wawosva.” Vajondzisiwa va Yesu vaku ka yena: “Loko timhaka tawanuna ni nsati wa yena tili hi matshamela lawa, svayampsa lesvaku munhu atshama angachadi.” Avahlamula aku: “Ahi hinkwavu lava vangayamukelaka mhaka leyi, kambe yingayamukeliwa ntsena hi lava vanyikiweke svona. Ku ni vatsheniwa lavangapsaliwa valitano amakhwirini ya vamamana va vona; ku ni vatsheniwa lavangayendliwa vatsheniwa hi vanhu; nasvona ku ni lavangatithena hi voxe hikolaho ka Mfumu wa matilo. Lweyi akotaka kuyamukela mhaka leyi, aayiyamukele!” Kutani kutisiwa vatsongwana ka Yesu lesvaku avatlhanteka mavoko, avakhongelela; kambe vajondzisiwa vaholovela lavatisaka vatsongwana. Hi loko Yesu aku: “Tshikani vatsongwana, mingatshukeni mivasivela kuta ka mina, hikuva Mfumu wa matilo, i wa lavafanaka na vona.” Kuteloko avatlhantekile mavoko, asuka kolaho. Kutani kuta munhu ka yena aku: “Mujondzisi lwenene, hi svihi lesvinene lesvi nifanelaka kuyendla svona lesvaku nitava ni vutomi lebzingaheliki, xana?” Yesu amuhlamula, aku: “Univutisela yini hi ta lesvinene xana? Lwenene i mun'we ntsena. Kambe loko ulava kunghena vuton'wini, hlayisa Milawu.” Yena aku ka Yesu: “Hi yi hi ke?” Yesu amuhlamula, aku: “Hi le yinge: ‘Ungatshuki udlaya, ungatshuki uwosva, ungatshuki uyiva, ungatshuki uhumesa vumboni bzohemba; uva ni xichavu ka tatana wa wena ni ka mamana wa wena.’ Nasvona: ‘Urhandza munhukuloni kukota loko utirhandza.’” Jaha leri riku ka yena: “Hinkwasvu lesvi nisvihlayisile na nahali ntsongo; xana nahapfumala yini ke?” Yesu aku ka yena: “Loko ulava kuva lweyi ahetisekeke, famba uyaxavisa rifuwo ra wena, unyika svisiwana, kutani utava ni xuma matilweni; hi kona ungatata unilandza.” Kambe loko jaha leri ritwa marito lawa, rifamba na rihlunamile, hikuva arili ni rifuwo lerikulu. Kutani Yesu aku ka vajondzisiwa va yena: “Nitiyisile nili ka n'wina: Svitanonon'hwa ka mufuwi kunghena Mfun'wini wa matilo. Niyengeta nimibzela nili ka n'wina: Svingawolovela kamela kunghena ka tihlo ra nayethi, kutlula kuva mufuwi anghena Mfun'wini wa Xikwembu.” Vajondzisiwa vatwa marito lawa, vahlamala ngopfu, vaku: “Loko svilitano, kungapona mani xana?” Yesu avalangutisisa, aku: “Ka vanhu lesvi asvingekoteki, kambe Xikwembu xona axitsandziwi hi nchumu.” Kutani Petrosi aku ka Yesu: “Wasvivo, hina hitshikile hinkwasvu, hikulandza; xana hitavuyeliwa hi yini?” Yesu aku ka vona: “Nitiyisile nili ka n'wina: Loko svilo hinkwasvu svitava svipfuxetiwile, ni loko N'wana-wa-Munhu atshamisile xiluvelweni xa yena lexokwetsima, n'wina lava minilandzeke, na n'wina mitatshama sviluvelweni sva khume ni svimbirhi, miyavanyisa tinyimba ta Israyele leti ta timbirhi.” Kutani mani na mani lweyi atshikeke tiyindlo ta yena, kumbe vamakwavu vaxinuna ni vaxisati, kumbe tatana wa yena, kumbe mamana wa yena, kumbe nsati, kumbe vana, kumbe masimu, hikolaho ka vito ra mina, atanyikiwa svona ka dzana (100), atlhela aja ndzhaka ya vutomi lebzingaheliki. Kambe vanyingi lavanga va le mahlweni vatava va kugamesa, ni va kugamesa vatava va le mahlweni. Mfumu wa matilo wufana ni n'winyi wa munti lweyi apfukiseke ahuma kuyathola vatirhi, kuyatirha nsin'wini ya yena ya mvhinya. Kuteloko atwananile ni vatirhi lava lesvaku vatakuma denari yin'we, yinga hakelo ya siku, avarhuma vaya nsin'wini ya yena ya mvhinya Atlhela ahuma loko kulava kuva nkarhi wa vunharhu nimixo, avona van'wana lava avali ntsendzeleni wa vuxaviselo bza doropa na vangatirhi nchumu; aku ka vona: “ ‘Na n'wina, yanani nsin'wini ya mvhinya, nitaminyika lesvi svinga svona.’ ” Kutani vaya. Atlhela ahuma loko kulava kuva nkarhi wa vuntlhanu na wun'we ni nkarhi wa vuntlhanu ni mune ayendlisa svosvo. Kuteloko ahumile kambe kusuhi ni nkarhi wa vukhume ni wun'we avona van'wana na vayoyima, kutani aku ka vona: “‘Mitshamela yini siku hinkwaru mingatirhi nchumu xana?’” Vamuhlamula vaku: “ ‘Hitshama, hikuva ahitholiwanga.’ Aku ka vona: ‘Na n'wina, fambani nsin'wini ya mvhinya nitaminyika lesvi svinga svona.’” “Kutani loko svilava kuva vusiku n'winyi wa nsimu ya mvhinya aku ka muhlayisi wa svilo sva yena: ‘Vitana vatirhi, uvanyika hakelo ya vona; utasungula hi lava vangata ndzhaku, ugamesa hi lavangarhanga vatirha.’ Kutani lavangatholiwa kolomu ka nkarhi wa vukhume ni wun'we vata, mun'wana ni mun'wana akuma denari yin'we. Kutani kutafika lavorhanga, vapimisa lesvaku vona vatahakeliwa kutlula van'wana; kambe mun'wana ni mun'wana wa vona akuma denari yin'we; loko vaholile, vangurangurela n'winyi wa munti, vaku: ‘Va le ndzhaku vatirhile wora rin'we ntsena, kambe uvaringanisile na hina hingakhukhumbisana ni siku hinkwaru, na hili karhi hitirha na hipsha hi mumu!’ Kambe yena ahlamula mun'we wa vona, aku: ‘Nakulorhi, anikukanganyisanga. Xana awutwanananga na mina kuhakeliwa denari yin'we ke? Teka muholo wa wena lowu, ufamba; munhu lweyi angatholiwa ndzhaku, nirhandza kumuholela kufana na wena. Xana anipfumeleliwi kuyendla lesvi nisvirhandzaka hi svilo sva mina ke? Kumbe vunene bza mina bzakuvilelisa xana? Kumbe unilanguta hi tihlo ropshuka hikuva mina nili munene xana?’” Yesu atlhela aku: Hi mukhuva wolowo, valendzhaku vatava va le mahlweni, ni va le mahlweni vatava va le ndzhaku. Loko Yesu ali karhi atlhantukela Yerusalema, ateka vajondzisiwa lava va khume ni vambirhi hi tlhelo, avulavula na vona loko vahali ndleleni, aku: “Vonani, hitlhantukela Yerusalema, kutani N'wana-wa-Munhu atanyiketiwa ka Vaprista lavakulu ni ka Vatsali; vatamuyavanyisela rifu; vatamunyiketa ka vamatiko lesvaku vona vatlanga hi yena, vamuba hi timpsika ni kumuvamba xihambanwini; kutani, hi siku ra vunharhu, atapfuka kufeni.” Kutani nsati wa Zebedewu ata ni vana va yena vambirhi vaxinuna, akhinsamela Yesu akombela xanchumu ka yena. Yesu aku ka yena: “Ulava yini xana?” Yena aku ka Yesu: “Tshembisa lesvaku vana lava vambirhi va mina vatatshama Mfun'wini wa wena, mun'we vokweni ra wena ra xinene, mun'wana ka leri ra ximantsi.” Hi loko Yesu ahlamula aku: “Amixitivi lexi mikombelaka xona. Xana mingakota kunwela axinweleni lexi ningatanwela ka xona ke?” Vaku ka yena: “Hingasvikota.” Aku ka vona: “Hakunene mitanwela andzhekweni wa mina, kambe loko kuli kutshama vokweni ra mina ra xinene kumbe ra ximantsi, ahi mina ningaminyikaka svona, kambe i sva lava vangalungiseliwa svona hi Tatana wa mina.” Loko lava va khume vatwa mhaka leyi, vahlundzukela vamakwavu lava vambirhi. Hi loko Yesu avavitanela kusuhi na yena, aku ka vona: “Masvitiva lesvaku tihosi ta vamatiko tivafuma hi ntamu, na vona vakulukumba vavafuma hi matimba; svingatshuki sviva tano xikarhi ka n'wina, kambe mani na mani lweyi anavelaka kuva lwenkulu xikarhi ka n'wina, aave mutirhi wa n'wina; nasvona mani na mani lweyi anavelaka kuva wa le mahlweni xikarhi ka n'wina, aave xikarawa xa n'wina; tani hi lesvi N'wana-wa-Munhu angatelangiki kutirheliwa, kambe kutirhela van'wana ni kunyiketa vutomi bza yena kuponisa lavotala.” Kakuloko vahuma Yeriko, xitshungu lexikulu xilandzelela Yesu. Kutani vanhu vambirhi vasvifamahlo avatshamile kusuhi ni ndlela; loko vatwa lesvaku i Yesu lweyi ahundzaka vahuwelela vaku: “Hosi, N'wana Davhida, hitwele vusiwana!” Xitshungu xivatshinya lesvaku vamiyela, kambe vona vatlhela vahuwelela vaku: “Hosi, N'wana Davhida, hitwele vusiwana!” Yesu ayima, avavitana, aku: “Milava lesvaku nimiyendlela yini xana?” Vaku ka yena: “Hosi, hilava lesvaku uhipfula mahlo!” Hi loko Yesu avatwela vusiwana, akhumba mahlo ya vona; hi nomo-lo vatlhela vavona, kutani vamulandza. Kuteloko vatshinelela Yerusalema, vafika Betfaje, Ntshaveni ya Maolivhera. Kutani Yesu arhuma vajondzisiwa vambirhi, aku ka vona: “Yanani xidoropanini lexivonekaka lahaya, mitahantla mikuma mbongolo ya mpsele leyibohiweke, na yili ni ximbongolwana xa yona; mititshunxa, mita na tona halenu ka mina. Loko munhu amivutisa xokarhi, mitaku: ‘Hosi yatilava.’ Kutani atahantla aminyiketa tona.” Svilo lesvi sviyendliwile lesvaku kuhetiseka rito ra muprofeta lweyi angaku: “Bzelani va le Siyoni, miku: ‘Hosi ya n'wina hi leyi yata!’ Yita na yirhulile, Yigadile mbongolo Leyinga ni ximbongolwana, n'wana wa yona.” Vajondzisiwa vaya, vayayendla hilaha Yesu angavabzela hakona; vatisa mbongolo ni ximbongolwana xakona, vakapeka tinguvu ta vona henhla ka tona, kutani Yesu axigada. Kutani xitshungu lexikulu xiyandlala tinguvu ta xona ndleleni, van'wana vatshova marhavi ya minsinya, vayandlala ndleleni. Xitshungu lexi ximurhangeleke mahlweni ni lexi aximulandzela hi le ndzhaku, xihuwelela xiku: “Hozana ka N'wana Davhida! Akudzunisiwe lweyi ataka hi vito ra Hosi! Hozana matilweni ya le henhlahenhla!” Kuteloko Yesu anghenile Yerusalema, vanhu hinkwavu va doropa vayimayimeka, vaku: “Munhu lweyi, i mani xana?” Kutani xitshungu xihlamula xiku: “Munhu lweyi i Yesu, muprofeta lweyi ahumaka Nazareta wa Galileya.” Kutani Yesu anghena Tempeleni, ahlongola hinkwavu lava vaxavisaka ni lava vaxavaka Tempeleni, vahumela handle; awisetela mimeza ni svitshamu sva lava vaxavisaka svituvana, aku ka vona: “Kutsaliwile lesvi: ‘Yindlo ya mina yitavuliwa yindlo ya xikhongelo’, kasi n'wina miyiyendla mhakwa wotumbela vayivi.” “Svifamahlo ni lavokhwita vata ka Yesu Tempeleni, kutani avahanyisa.” Kambe Vaprista lavakulu ni Vatsali vahlundzuka ngopfu loko vavona mahlori lawa amayendlaka, ni loko vatwa vatsongwana na vali karhi vahuwelela Tempeleni vaku: “Hozana ka N'wana Davhida!” Hi loko vaku ka yena: “Xana wasvitwa lesvi vatsongwana lava vasvivulaka ke?” Yesu aku ka vona: “Ina! Xana amisihlaya rito leringe: ‘Adzunisiwile hi ndlela leyohetiseka hi milomo ya vatsongwana ni ya svihlangi lesvi svahayan'waka’ ke?” Kutani asuka avasiya, ahuma doropeni kuya Betaniya, laha angayetlela kona. Nimixo loko avuyela doropeni, atwa ndlala; kutani avona nkuwa kusuhi ni ndlela; ahambuka aya ka wona, kambe angakumanga nchumu ka wona loko mangali matluka ntsena. Hi loko aku ka wona: “Kungahatshuki kupsaliwa mihandzu ni siku ni rin'we ka wena!” Hi nomo-lo, nkuwa wuwoma. Loko vajondzisiwa vasvivona, vahlamala vaku: “Xana nkuwa utekelise kuyini kuwoma ke?” Yesu avahlamula aku: “Nitiyisile nili ka n'wina: Loko mili ni kupfumela mingakanakani, amingayendli ntsena lesviyendliweke ka nkuwa lowu, kambe ni loko miku ka ntshava leyi: ‘Suka, uyatihoxa lwandle!’ Svitayendleka; na svona, hinkwasvu lesvi misvikombelaka hi kukhongela, loko mili ni kupfumela mitanyikiwa svona.” Kuteloko Yesu afikile Tempeleni, Vaprista lavakulu ni vakulukumba va tiko vata ka yena loko ali karhi ajondzisa, vaku ka yena: “Xana uyendla svilo lesvi hi matimba wahi ke? Nasvona matimba wolawo, unyikiwile hi mani xana?” Yesu avahlamula, aku: “Na mina, nitamivutisa xivutiso xin'we; loko minihlamula xona, hi kona na mina ningatamibzela lomu matimba lawa nitirhaka ha wona mahumaka kona. Xana kukhuvula ka Yohani akuhuma kwihi ke? Akuhuma tilweni, kumbe ka vanhu ke?” Vona vavulavulisana vaku: “Loko hiku: ‘Akuhuma tilweni’, ataku: ‘Loko svilitano, hikolaho ka yini mingapfumelanga ka yena ke?’ Kambe loko hiku: ‘Akuhuma ka vanhu’, hichava xitshungu, hikuva hinkwavu vakholwa lesvaku Yohani aali muprofeta.” Kutani vahlamula Yesu, vaku: “Ahisvitivi!” Hi loko aku ka vona: Na mina, aningamibzeli lomu mahumaka kona matimba lawa nitirhaka ha wona. “Xana mili yini hi mhaka leyi? Munhu aali ni vana vambirhi; aya ka lweyi worhanga, aku: ‘N'wananga, yana uyatirha nsin'wini ya mina ya mvhinya namuntlha.’ N'wana lweyi ahlamula aku: ‘Anilavi!’ Kambe ndzhaku asala atilaya, kutani aya. Tatana wa yena aya ka lweyi mun'wana, amubzelisa svosvo. Yena ahlamula aku: ‘Nitaya tatana!’ Kambe, angayi. Xana ka vona lavambirhi, hi wihi lweyi angayendla kurhandza ka tatana wa yena ke?” Vaku ka yena: “Hilweyi worhanga.” Yesu aku ka vona: Nitiyisile nili ka n'wina: Vahakelisi va rhesa ni tinghwavana vamirhangela kunghena Mfun'wini wa Xikwembu. Hikuva Yohani atile ka n'wina atamitivisa hi ta ndlela ya kululama, kambe amipfumelanga timhaka ta yena; kasi vahakelisi va rhesa ni tinghwavana, vona vapfumelile; kutani n'wina, hambi misvivonile, amitilayanga ni kupfumela amipfumelanga timhaka ta yena. Yingisani xifaniso xin'wana: Akuli ni munumuzana mun'we lweyi aabzalile mvhinya nsin'wini ya yena; ayibiyela hi rithangu, acela ni xikamelo xokamela kona mihandzu, ayaka ni xihondzo; kutani alugarisela varimi vangali vangani, yena ateka riyendzo afamba. Loko nkarhi wakutshovela mihandzu wuli kusuhi, arhuma vatirheli va yena ka valugari, kuyateka mihandzu ya nsimu ya yena. Kutani valugari vakhoma vatirhi lava, vaba mun'we, mun'wana vamudlaya, lweyi mun'wana vamukhandla hi maribze. Atlhela arhuma vatirhi van'wana lava vatlulaka lavorhanga hi kutala, kambe na vona vayendliwa svofana ni lava vorhanga. “Ndzhaku ka svona arhuma n'wana wa yena ka vona, aku: ‘Vatachava n'wana wa mina.’” “Kambe loko valugari vavona n'wana lweyi, vabzelana vaku: ‘Majandzhaka hi lweyi! Tanani hi mudlaya, hiteka rifuwo ra yena.’” Kutani vamukhoma, vamuhumesa handle ka nsimu, kutani vamudlaya. Kutani loko n'winyi wa nsimu avuya, atayendla yini hi “valugari” volavo xana? Vahlamula Yesu vaku: “Atavalovisa vanhu lavobiha vahela hinkwavu; nsimu ya mvhinya, atayilugarisela varimi van'wana lavangatamunyika mihandzu ya nsimu hi nguva yakona.” Yesu aku ka vona: Xana amisitshama mihlaya, Matsalweni, mhaka leyi yinge: “ ‘Ribze leri vayaki vangariyala, hi rona ringayendliwa ribze lerikulu rotiyisa ha rona’, ke? ‘Svilo lesvi sviyendliwile hi Hosi, i mhaka leyihlamalisaka loko hiyivona hi mahlo ya hina!’” Hikolaho namibzela lesvaku mitatekeliwa Mfumu wa Xikwembu; kutani wutanyikiwa tiko rin'wana leringataveka mihandzu ya rona. “[Lweyi angatawela henhla ka ribze lero atapshandlaka; nasvona ritapshandlasa lweyi ringatamuwela henhla.]” Loko Vaprista lavakulu ni Vafarisi vatwa svifaniso lesvi sva Yesu, vativa lesvaku avula vona; kutani valava ndlela yomukhoma ha yona, kambe vachava xitshungu, hikuva axiku: “I muprofeta!” Yesu atlhela avulavula na vona hi svifaniso, aku: Mfumu wa matilo wufana ni hosi leyiyendleleke n'wana wa yona nkhuvo wa vukati. Yirhuma svitirhi sva yona kuyavitana lavangarhambiwa nkhubzeni, kambe vona vayala kuta. Yitlela yirhuma svitirhi svin'wana, yiku: “‘Bzelani lavarhambiweke, miku: Masvivo, nilungisile svakuja; tihomu ni svifuyu sva mina svonona svitlhaviwile; svilo hinkwasvu svilungisiwile, tanani nkhubzini.’” Kambe varhambiwa avakhatalanga ha svona; vatifambela, mun'we masin'wini ya yena, mun'wana kuxaviseni ka svilo sva yena; van'wana vakhoma svitirhi sva hosi, vasviyendlela tihanyi, vasvidlaya. Hi loko hosi yikariha, yirhuma mab'uthu ya yona kuyalovisa vadlayi volavo ni kuhisa doropa ra vona. Kutani yibzela svitirhi sva yona, yiku: “‘Nkhuvu wa vukati wulungisiwile, kambe lavarhambiweke awungavafanelanga. Svosvi yanani mahlanganwini ya tindlela, miyarhamba hinkwavu lava mingatavakuma, vata nkhubzini.’” Kutani svitirhi svosvo svihuma, sviya tindleleni, svihlengeleta hinkwavu lava svivakumeke, lavobiha ni lavolulama, kutani yindlo ya nkhuvu yitala hi vanhu lavarhambiweke. “Kuteloko hosi yinghenile kutavona lavarhambiweke, yivona munhu lweyi aangayambalanga xiyambalu xa muchado; kutani yiku ka yena: ‘Nakulorhi, unghenise kuyini laha, na ungali na xiyambalu xa muchado?’ Yena amiyela aku tititi. Hi loko hosi yiku ka svitirhi: ‘Muboheni milenge ni mavoko, mimucukumeta handle munyameni laha kungatava ni nkosi ni kuketsela ka matinyo.’” Kutani Yesu aku: “Lava vavitaniwaka i vanyingi, kambe lavahlawuliwaka i vatsongo.” Kutani Vafarisi vasuka, vayatshama valuka makungu, kuvona hilaha vangamuphasaka hakona hi marito. Kutani varhuma vajondzisiwa va vona ni va ntlawa wa va ka Heroda, vayaku: “Mujondzisi, hasvitiva lesvaku uvula lesvitiyeke, ni lesvaku ujondzisa ndlela ya Xikwembu mayelanu ni ntiyiso, na ungalandzi mavonela ya vanhu, hikuva awuyi hi nghohe. Hibzele mavonela ya wena mhakeni leyi: Xana svafanela kuhumesela Khezari rhesa, kumbe asvifaneli ke?” Kambe, Yesu hi kutiva vubihi bza vona, aku: “Miniringela yini, n'wina vakanganyisi? Nikombeni male ya rhesa.” Kutani vamutisela male ya nsimbi ya denari. Aku ka vona: “Xifaniso lexi i xa mani ke? Ni vito leri i ra mani ke?” Vamuhlamula vaku: “I sva Khezari.” Kutani aku ka vona: “Nyikani Khezari lesvinga sva Khezari, ni Xikwembu lesvinga sva Xikwembu.” Loko vatwa svosvo, vahlamala, kutani vamusiya vasuka vafamba. Hi siku rolero, van'wana va Vasaduki, vanga vanhu lavavulaka lesvaku vafi avapfuki, vata ka Yesu, vafika vamuvutisa, vaku: “Mujondzisi, Moxe ate: ‘Loko munhu afa angali na vana, makwavu atateka nsati wa mufi, apfuxa njangu wa makwavu.’ Svosvi ku ni mhaka leyi: Akuli ni vamakwavu va ntlhanu ni vambirhi xikarhi ka hina; lweyi wa mativula aatekile nsati, kutani afa, na angali na vana; hikolaho ka svona, ndzisana yisala ni nsati wa yena. Sviyendlisa svosvo ni ka makwavu wa mufi wa vumbirhi, ni ka lweyi wa vunharhu, kuyafika ka lweyi wa vuntlhanu ni vambirhi. Ndzhaku ka vona hinkwavu, lweyi wansati na yena afa. Lesvi lava va ntlhanu ni vambirhi hinkwavu vangava vanuna va lweyi wansati, xana hi siku ra kupfuka kufeni, atava nsati wa mani xikarhi ka vona ke?” Yesu avahlamula, aku: “Milahlekile ngopfu, hikuva amitivi Matsalwa ni matimba ya Xikwembu. Hikuva nkarhini wa kupfuka kufeni, vanhu avahachadi, hambi kuli kutekiwa, kambe vatafana ni tintsumi ta le tilweni. Loko kuli kupfuka ka vafi, xana amihlayanga lesvi Xikwembu xingamitivisa svona, loko xiku: ‘Hi mina Xikwembu xa Abrahamu, ni Xikwembu xa Izaki, ni Xikwembu xa Yakobe.’ Xilesvo, xona ahi Xikwembu xa lavafeke, kambe i Xikwembu xa lavahanyaka.” Loko xitshungu xitwa svosvo, xihlamala ngopfu hi kujondzisa ka yena. Loko Vafarisi vatwile lesvaku Yesu amiyetile Vasaduki, vahlengeletana ndhawini yin'we. Kutani mun'we wa vona lweyi aali mujondzisi wa nawu, aringa Yesu hi kumuvutisa, aku: “Mujondzisi, xana Nawu lowukulu Minaweni hi wihi ke?” Yesu aku ka yena: “Hi lowu wunge: ‘Rhandza Hosi Xikwembu xa wena, hi mbilu ya wena hinkwayu, ni moya wa wena hinkwawu, ni kuyanakanya ka wena hinkwaku.’ Lowu hi wona nawu lowukulu, lowu worhanga; kutani lowu wa vumbirhi, lowufanaka na wona, hi lowu wunge: ‘Rhandza munhukuloni, kukota loko utirhandza.’ Milawu leyimbirhi i tshinya ra Milawu hinkwayu ni marito ya Vaprofeta.” Yesu avutisa Vafarisi lavahlengeletaneke, aku: “Xana mipimisa yini ha Kriste ke? I n'wana wa mani xana?” Vamuhlamula vaku: “I n'wana Davhida.” Aku ka vona: “Loko svilitano, hikolaho ka yini Davhida lweyi avulavulaka hi Moya, amuvitana Hosi, loko aku: “‘Hosi yite ka Hosi ya mina: Tshama vokweni ra mina ra xinene, nikondza niveka valala va wena hansi ka minkondzo ya wena.’” “Hikolaho-ke, loko Davhida amuvitana Hosi, xana angava n'wana wa yena hi ndlela yihi ke?” Akuvanga ni mun'we lweyi atiyeke kumuhlamula rito rili rin'we ntsena; na svona, kusukela nkarhini wolowo, akahavanga ni munhu lweyi angatiya nhlana kumuvutisa xivutiso xili xin'we. Hi loko Yesu abzela xitshungu ni vajondzisiwa va yena, aku: “Vatsali ni Vafarisi vatshamile xitshan'wini xa Moxe; hi kolaho, yendlani hinkwasvu lesvi vamibzelaka svona, misvihlayisa, kambe mingaringiseleni lesvi vasviyendlaka, hikuva vasvivula, kambe avasviyendli. Vaboha mindzhwalu leyotika, vayirhwexa makatleni ya vanhu, kasi vona avalavi ni kuyitsekatsekisa hi ritiho. Mintirho ya vona hinkwayu, vayitirha lesvaku vatavoniwa hi vanhu; hikuva vayanamisa atifilaktera ta vona, valehisa ni makumu ya sviyambalu ya vona; varhandza kutshama lomu kochaviseka aminkhubzeni, vahlawula ni svitshamu lesvinene masinagogeni; vatsakela kuxewetiwa hi vajondzi mintsendzeleni, ni kuvitaniwa hi vanhu vaku: ‘Mujondzisi.’ “Loko mili n'wina, mingatshukeni mitivitanisa hi vito ra ‘Mujondzisi’, hikuva Mujondzisi wa n'wina i mun'we ntsena; n'wina hinkwenu mi vamakwavu. Mingatshukeni mivitana munhu wa laha misaveni, miku, i ‘Tatana wa n'wina’, hikuva Tatana wa n'wina i mun'we ntsena, lweyi anga tilweni. Nasvona mingasindziseni kuvitaniwa ‘Varhangeli’, hikuva Murhangeli wa n'wina i mun'we ntsena, anga yena Kriste. Kambe lwenkulu ka n'wina atava mutirheli wa n'wina, hikuva mani na mani lweyi atikulisaka, atatsongahatiwa; kutani mani na mani lweyi atitsongahataka, atakulisiwa. “Yowee n'wina Vatsali ni Vafarisi, hikuva mi vakanganyisi! Hikuva mipfalela vanhu kunghena Mfun'wini wa matilo. N'wina amingheni ka wona, nasvona lavaringetaka kunghena amivatshiki. [ Yowee n'wina Vatsali ni Vafarisi, hikuva mi vakanganyisi! Mihlasela vafelakazi minjangwini ya vona, na mitivhikhela hi kuyendla svikhongelo lesvoleha; hi kolaho mitayavanyisiwa hi kuyavanyisa loku kukarhataka.] “Yowee, n'wina Vatsali ni Vafarisi, hikuva mi vakanganyisi! Hikuva mirhendzeleka malwandle ni le misaveni, lesvaku mitakuma mujondzisiwa mun'we ntsena; kutani loko mimukumile, mimuyendla lweyi afaneliwaka hi Tihele, kuphindha kambirhi kutlula n'wina. “Yowee n'wina vafambisi lavofa mahlo! Hikuva mili: ‘Loko munhu ahlambanya hi Tempele, asvi na mhaka; kambe loko ahlambanya hi golidi ya Tempele, atibohile hi kuhlambanya ka yena.’ N'wina svihunguki ni lavavofa mahlo! Lexikulu hi xihi xana: i golidi, kumbe i Tempele leyinga yona yikwetsimisaka golidi xana? Nasvona mili: ‘Loko munhu ahlambanya hi alitari, asvi na mhaka; kambe loko ahlambanya hi nyiko leyinga alitarini, atibohile hi kuhlambanya ka yena.’ N'wina svihunguki ni lavofa mahlo! Lexikulu hi xihi xana: i mhamba, kumbe i alitari, leyinga yona yikwetsimisaka mhamba xana? Loko svilitano, lweyi ahlambanyaka hi alitari, ahlambanya ha yona kupatsa ni hinkwasvu lesvinga henhla ka yona; lweyi ahlambanyaka hi Tempele, ahlambanya hi yona kupatsa ni Lweyi atshamaka ka yona; nasvona lweyi ahlambanyaka hi tilo, ahlambanya hi xiluvelo xa Xikwembu kupatsa ni Lweyi atshameke henhla ka xona. “Yowee n'wina Vatsali ni Vafarisi, hikuva mi vakanganyisi! Mihumesa sva vukhume sva ximbowambowana, ni sva aneta, ni sva kumini, kambe ami na mhaka ni lesvikulu, ni sva risima ka Nawu, kunga kululama, ni timpsalu, ni kupfumela; kasi amifanelile kurhanga hi svilo lesvi, na mingasiyanga lesvin'wana. N'wina vafambisi lavanga svifamahlo, miwungula nsuna, kambe miminta kamela! “Yowee n'wina Vatsali ni Vafarisi, hikuva mi vakanganyisi! Mihlampsa ndzheko ni nkambana hi le handle ka svona, kasi ndzeni ka svona svitele hi vuphangi ni vubihi hinkwabzu. Mufarisi wa kufa mahlo! Rhanga hi kuhlampsa ndzheko ni nkambana hi le ndzeni ka svona kubasa, hi kona ni le handle kungatahlampseka kubasa. “Mi ni khombo n'wina Vatsali ni Vafarisi, hikuva mi vakanganyisi! Mifana ni masirha lawa mapendiweke hi muvala wobasa, lawa mavonekaka na masasekile hi le handle, kasi ndzeni ka wona kutele hi marhambu ya vafi ni hinkwasvu sva chaka. Hi mukhuva wolowo vanhu vamivona na mili lava valulameke handle, kasi ndzeni, mitele hi vukanganyisi ni vubihi. “Yowee n'wina Vatsali ni Vafarisi, hikuva mi vakanganyisi! Miyaka masirha ya vaprofeta, misasekisa hi maribze yovatsundzuka ha wona lava volulama, kutani mivula miku: ‘Loko ongi hihanyile minkarhini ya vatatana va hina, ina hingatwanananga na vona kuhalata ngati ya vaprofeta.’ Hi mukhuva wolowo, mitivula ha n'wexe lesvaku mi vana valava vangadlaya vaprofeta. Hikolaho-ke, hetisisani mpimo wa kujoha ka vatatana va n'wina loku vakusunguleke. N'wina tinyoka, rixaka ra svipshahla, xana mitaponisa kuyini kuyavanyiseliwa Tihele ke? “Xilesvo, masvivo, nahamirhumela vaprofeta, tintlhari, ni Vatsali; mitadlaya van'we va vona, van'wana mitava vamba svihambanwini; mitaba van'wana va vona masinagogeni ya n'wina, mivahlongolisa vasuka doropeni rin'we, vaya ka rin'wanyana; lesvaku angati ya lava volulama leyi yingahalatiwa misaveni yiva henhla ka n'wina, kusukela kudlaweni ka Abele lweyi aalulamile, kuyafika kudlaweni ka Zakariya n'wana Barakiya, lweyi mimudlayeke xikarhi ka Tempele ni alitari. Nitiyisile nili ka n'wina: Svilo lesvi hinkwasvu svitawela rixaka leri. “Yerusalema, Yerusalema, wena lweyi udlayaka vaprofeta, lweyi ukhandlaka hi maribze lavarhumiweke ka wena, i kangani ninavelile kuhlengeleta vana va wena, kukotisa huku loko yihlengeleta sviciwana sva yona hansi ka timpapa ta yona, kambe awusvilavanga! Vonani, munti wa n'wina wutasala wuli rhumbi. Nasvona namitivisa lesvaku kusukela svosvi, amingahanivoni, kukondza kufika siku leri mingataku: ‘Akukhensiwe, lweyi ata ka hi vito ra Hosi.’” Loko Yesu ali karhi ahuma hi le Tempeleni afamba, vajondzisiwa vata ka yena vamukomba sviyenge sva Tempele. Kambe Yesu aku ka vona: “Xana masvivona svilo lesvi hinkwasvu? Nitiyisile nili ka n'wina: Akungasali ribze henhla ka ribze rin'wana leri ringatakala ringahirimuxiwi.” Kuteloko atshamile Ntshaveni ya Maolivhera vajondzisiwa vata ka yena tlhelweni, vaku: “Hibzele: Xana timhaka leti titahumelela nkarhi wihi ke? Xana xikombiso xa kuvuya ka wena ni xa kuhela ka minkarhi xitava xihi ke?” Yesu avahlamula aku: Tivoneleni lesvaku mingatshuki mikanganyisiwa hi munhu. “Hikuva lavotala vatata hi vito ra mina, mun'wana ni mun'wana aku: ‘Hi mina Kriste hi ntshima’, kutani vatakanganyisa lavotala.” Mitatwa huwa ya tinyimpi ni mahungundlela ya tinyimpi; tivoneleni lesvaku mingadzukisiwi, hikuva svosvo svifanela kuhumelela, kambe ahi wona makumu. Tiko rin'wana ritapfukela tiko rin'wanyana, mfumu wun'wanyana wutalwa ni mfumu wun'wanyana; kutava ni tindlala, ni kutsekatseka ka misava matlhelweni lawa yotala. Kambe, svilo lesvi hinkwasvu i masungulu ya mahlomulu ntsena. Nkarhini wolowo vataminyiketa akuxanisiweni, vamidlaya; mitavengiwa hi vanhu va matiko hinkwawu hikolaho ka vito ra mina. Nkarhini wolowo, lavotala vatakhunguvanyeka; vatahehlana hi xivona, mun'we atavenga mun'wana. Kutahumelela vaprofeta va mavunhwa lavotala, vatakanganyisa vanhu lavanyingi. Kutani rirhandzu ra lavotala ritasungula kutitimela, hikuva kuhomboloka kutava kuyandzile. Kambe lweyi angatatiyisela kufika makumu, hi yena lweyi angataponisiwa. Kutani Evhangeli leyi ya Mfumu yitachumayeliwa misaveni hinkwayu, tani hi vumboni ka vanhu va matiko hinkwawu; kutani hi kona makumu mangatafika. Xilesvo, loko mivona xilo xa manyala lexiwonhetelaka lexivuliweke hi muprofeta Daniyele, xili ndhawini leyokwetsima, lweyi ahlayaka aatwisise, lavanga Yudeya avatsutsumele tintshaveni; lweyi angahenhla ka yindlo angatshuki axika kuyateka lesvinga ndlwini ya yena nasvona lweyi anga masin'wini, angatshuki atlhelela kaya kuyateka mpahla ya yena. Vatava ni khombo vavasati lavatikeke ni lavanyan'wisaka ka masiku wolawo. Khongelani lesvaku kubaleka ka n'wina kungahumeleli hi vuxika, hambi kuli hi siku ra Savata, hikuva nhlomulu wutava lowukulu nkarhini wolowo; nhlomulu lowotano awusiva kona hi mpfhuka misava yitumbulukile kutafika namuntlha, nasvona awungahavi kona ni siku ni rin'we. Loko masiku wolawo amangahungutiwanga, akungatapona munhu, kambe hikolaho ka vahlawuliwa va Xikwembu, masiku yakona matahunguliwa. “Nkarhini wolowo, loko munhu amibzela aku: ‘Vonani, Kriste hi lweyi!’ Kumbe: ‘Hi lwiya!’ Mingatshukeni mipfumela.” Hikuva kutahumelela va kriste va mavunhwa, ni vaprofeta va mavunhwa, vatayendla mahlori lamakulu ni svihlamaliso, kukanganyisa hambi valivona vahlawuliwa va Xikwembu, loko svikoteka. “Masvivo, nimitlharihisa ka timhaka leti, tingasihumelela; hi kolaho, loko vaku ka n'wina; ‘Vonani, a le mananga le!’ Mingayeneni kona; kumbe loko vaku: ‘Vonani, lomu ndlwini!’ Mingasvipfumeleni svosvo.” Hikuva kukotisa lesvi kuhatima kusukelaka avuxeni kuyafika vupelajambu, N'wana-wa-Munhu atayendlisa xisvosvo akuvuyeni ka yena. Laha ntsumbu wunga kona, hilaha makoti mangatahlengeletana kona. Hi nomo-lo loko nhlomulu wa masiku wolawo wutava wuhelile, “‘jambu ritahundzuka ra ntima, ni n'weti awungahavoningi; tinyeleti titawa hi le tilweni, ni matimba ya le matilweni matatsekatsekisiwa.’” Hikona xikombiso xa N'wana-wa-Munhu xingatavoneka tilweni; vanhu vatinxakaxaka ni svib'ongo hinkwasvu sva la misaveni vataba nkosi, kutani vatavona N'wana-wa-Munhu ata hi marefu ya le tilweni, hi matimba ni kutwala lokukulu. Hi mpfumawulu lowukulu wa mhalamhala, atarhumela tintsumi ta yena; titahlengeleta vahlawuliwa va yena, vahuma matlhelweni ya mune ya misava, kusukela amakun'wini man'wana ya tilo kuyafika ka laman'wana. Jondzani lesvi hi nkuwa: Loko marhavi ya wona masungula kuwolova, ni loko matluka ya wona mahluka, mitiva lesvaku malanga ma le kusuhi. Hi mukhuva wolowo, loko mivona svilo lesvi hinkwasvu, tivani lesvaku nkarhi wu le kusuhi, se wu le nyangweni. Nitiyisile nili ka n'wina: Rixaka leri ringakala ringahundzi, kungasihumelela svilo lesvi hinkwasvu. Tilo ni misava svitahundza, kambe marito ya mina mangakala mangahundzi. Loko rili siku rakona ni nkarhi wakona, aku na lweyi asvitivaka, hambi tili tintsumi ta le matilweni, hambi ali N'wana; kambe, svitiviwa ntsena hi Tatana. Kuvuya ka N'wana-wa-Munhu kutafana ni lesvi svihumeleleke masikwini ya Nowa. Hikuva masikwini wolawo, loko ndhambhi yingasiva kona, vanhu avali kujeni, vanwa, vachada ni kuchadisiwa, kukondza kufika siku leri Nowa angheneke ngalaweni ha rona; avangatwisisi nchumu kukondza ndhambi yifika, kutani yivakhukhuza hinkwavu. Svitava tano ni le kuvuyeni ka N'wana-wa-Munhu. Nkarhini wolowo, ka vanhu vambirhi lavangatava masin'wini, kutatekiwa mun'we, mun'wana asiyiwa; ka vavasati vambirhi lavangatava kusileni, kutatekiwa mun'we, mun'wana asiyiwa. Hitekani ke, hikuva amitivi siku leri Hosi ya n'wina yingatata ha rona. Kambe twisisani lesvi: Loko ongi n'winyi wa munti wawutiva nkarhi wa vusiku lowu muyivi angatata ha wona, aatahiteka, angatshiki munti wa yena wupfhanyiwa. Hikolaho na n'wina, tshamani na milungile, hikuva N'wana-wa-Munhu atata hi nkarhi lowu mingawupimiseliki. Xana i mani mutirhi lweyi atshembekeke, ni kutlhariha, lweyi n'winyi wa yena amuvekeke kuhlayisa vatirhikulobze va munti, avaphamela svakuja hi nkarhi wakona? Kukatekile mutirhi lweyi angatakumiwa na ayendlisa xisvosvo, siku leri n'winyi wa yena angatavuya ha rona. Nitiyisile nili ka n'wina: Atavekiwa kuva mulanguteli wa rifuwo hinkwaru ra n'winyi wa yena. “Kambe loko mutirhi yelweyo ali lweyi wobiha, atapimisa mbilwini ya yena aku: ‘Hosi ya mina yitahlwela kuvuya’, kutani asungula kuba vatirhikulobze, aja, anwa ni svidakwa.” Kasi hosi ya yena yitavuya, hi siku leri mutirhi lweyi angapimisiki lesvaku yitavuya ha rona, ni hi nkarhi lowu angawutiviki; kutani hosi ya mutirhi lweyi yitamuba svinene, yimucukumeta svin'we ni vakanganyisi, laha kungatava ni minkosi, ni kuketsela ka matinyo. “Nkarhini wolowo, Mfumu wa matilo wutafana ni vanhwanyana va khume lavangateka tivoni ta vona kuyahlangana ni muteki. Lava va ntlhanu ka vona avali lavorivala, lavan'wana va ntlhanu avatlharihile. Lavorivala avatekile tivoni ta vona, kambe vangalonganga ni mafurha hi tlhelo; kasi lavotlhariha avalongile asvikutswini mafurha svin'we ni tivoni ta vona. Hikuhlwela ka muteki, vakhomiwa hi vurhongo hinkwavu, vayetlela. Kambe xikarhi ka vusiku lebzikulu kutwakala huwa leyingo: ‘Muteki hi lweyi, humani, miyamutlhangaveta!’ Kutani vanhwanyana vapfuka hinkwavu, valungisa tivoni ta vona. Lavorivala vaku ka lavotlhariha: ‘Hicheleleni mafurhanyana, hikuva tivoni ta hina tatimeka.’ Kambe lavotlhariha vahlamula vaku: ‘Ahihim, mafurha lawa mangakala mangaringani hina na n'wina; yanani miyaxava ya n'wina ka lava vaxavisaka.’ Vaku vahaya kuxaveni, muteki asala afika. Lava avatilungiselile, vanghena na yena nkhubzeni, kutani xipfalu xipfaliwa. Andzhakunyana, vanhwanyana lavan'wana vafika na vona, vaku: ‘Hosi, Hosi, hipfulele!’ Kambe avahlamula, aku: ‘Nitiyisile nili ka n'wina: Animitivi.’” Yesu atlhela aku: “Lavelelani ke, hikuva siku amiritivi, na wona nkarhi amiwutivi.” Hikuva lesvi svifana ni munhu lweyi alavaka kuteka riyendzo. Avitana vatirhi va yena, aveka rifuwo ra yena mavokweni ya vona. Mun'we amunyika titalanta ta ntlhanu, mun'wana amunyika titalanta timbirhi, mun'wana amunyika talanta yin'we; mun'wana ni mun'wana anyikiwa hi kuringana matimba ya yena; kutani n'winyi wa munti ayendzela kule. Lweyi anyikiweke titalanta ta ntlhanu, ahantla ayatibindzulisa, kutani akuma tin'wana ta ntlhanu. Na yena lweyi anyikiweke titalanta timbirhi, ayatibindzulisa, kutani akuma tin'wana timbirhi. Kambe lweyi aanyikiwile talanta yin'we ayacela hansi, acelela male ya n'winyi wa yena. Ndzhaku ka masiku lawa yotala, n'winyi wa vatirhi lava avuya, kutani akamba tikonta na svona. “Lweyi aanyikiwile titalanta ta ntlhanu, atisa tin'wana ta ntlhanu aku: ‘Hosi, uninyikile titalanta ta ntlhanu; vona, nitibindzulisile nikuma tin'wanyana ta ntlhanu.’” “Hosi ya yena yiku ka yena: ‘Hi svona mutirhi lwenene, lweyi atshembekeke; utshembekile ka svilo svingali svingani, nitakuveka kuva mulanguteli wa lesvotala; nghena kutsakeni ka hosi ya wena.’” “Kutani lweyi aanyikiwile titalanta timbirhi, aku: ‘Hosi, uninyikile titalanta timbirhi; vona, nitibindzulisile nikuma tin'wanyana timbirhi.’” “Hosi ya yena yiku ka yena: ‘Hi svona mutirhi lwenene, lweyi atshembekeke; utshembekile ka svilo svingali svingani, nitakuveka kuva mulanguteli wa svilo lesvotala; nghena kutsakeni ka hosi ya wena.’” “Lweyi aanyikiwile talanta yin'we, na yena ata, aku: ‘Hosi, nitivile lesvaku u munhu wa kunonon'hwa; utshovela laha ungabzalangiki, uhlengeleta laha ungabzalangiki mbewu kona; hi kolaho nichavile, kutani niyile niyacelela talanta ya wena misaveni; vona, xahali xisvosvo xilo xa wena.’” Hosi ya yena yimuhlamula yiku: “‘Mutirhi lweyi wa lunya, wololoha, awusvitiva lesvaku nitshovela laha ningabzalangiki kona, ni lesvaku nihlengeleta laha ningahaxangiki mbewu kona!’” Loko svilitano, awufanelile kuva uvekile male ya mina ka vabindzulisi, kutani loko nifika, anitateka xilo xa mina svin'we ni bindzu rakona. Svosvi-ke, mutekeleni talanta, minyika lweyi anga ni titalanta ta khume. Hikuva kutanyikiwa mani na mani lweyi anga ni xanchumu, kutani ava ni lesvotala; kambe lweyi angaliki na nchumu, atatekeliwa ni lexi anga na xona. Loko ali xitirhi lexi, xokala xingapfuni nchumu, xicukumeteni handle munyameni; kona kutava ni minkosi, ni kuketsela ka matinyo. Siku leri N'wana-wa-Munhu angatata hi kutwala ka yena, na tintsumi hinkwatu tili na yena, atatshamisa xiluvelweni xa kutwala ka yena. Kutani vanhu va matiko hinkwawu vatahlengeletiwa mahlweni ka yena; atahlawula van'we asiya van'wana, kufanana ni mubzisi loko ahlawula tinyempfu xikarhi ka timbuti. Ataveka tinyempfu vokweni ra yena ra xinene, timbuti tona ka leri ra ximantsi. Hilaha Hosi yingatabzela lavanga vokweni ra yona ra xinene yiku: “‘Tanani n'wina lavakatekisiweke hi Tatana wa mina, yamukelani Mfumu lowungalungiseliwa n'wina hi mpfhuka misava yitumbuluka; hikuva anili ni ndlala, kutani minifihlutile; anili ni torha, minisiyele ninwa; anili muluveli, minirhurhelile; anipfumala svoyambala, miniyambexile; anivabza, minipfuxelile; anili jele, mitile mitanipfuxela.’” Hikona lavalulameke vangatahlamula, vaku: “‘Hosi, hitshama hikuvona kwihi na uli ni ndlala, kutani hikufihluta, kumbe na uli ni torha, hikunyika mati unwa ke? Hikuvone kwihi na uli muyendzi, hiva hikurhurhela, kumbe na upfumala svoyambala, hikuyambexa ke? Hikuvone kwihi na uvabza, kumbe na uli jele, kutani hita hitakupfuxela ke?’” “Hosi yitavahlamula, yiku: ‘Nitiyisile nili ka n'wina, lokomitshama misviyendla svilo lesvi ka mun'we wa vamakwerhu lavatsongo lava, misviyendlele mina.’” “Kutani Hosi yitabzela lavanga vokweni ra yona ra ximantsi yiku: ‘Sukani ka mina, n'wina lavarhukiweke; miya ndzilweni lowungatimekiki, lowulungiseliweke Diyavulosi ni tintsumi ta yena; hikuva anili ni ndlala, aminifihlutanga; anili ni torha, amininyikanga ninwa; anili muluveli, aminirhurhelanga; anipfumala svoyambala, aminiyambexanga; anili kuvabzeni ni le jele, amitanga mitanipfuxela.’” “Hilaha na vona vangatahlamula, vaku: ‘Hosi, hitshama hikuvona kwihi na uli ni ndlala, kumbe na uvabza, kumbe na uli ni torha, kumbe na wuli muyendzi, kumbe na wupfumala svoyambala, kumbe na uli jele, kutani hingakupfuni ke?’ Kutani Hosi yitavahlamula, yiku: ‘Nitiyisile nili ka n'wina: Loko mingayendlelanga mun'we wa lavatsongo lava, na mina aminiyendlelanga.’ Kutani volavo vataya kukhatisiweni lokungaheliki, kambe lavolulama vataya vuton'wini lebzingaheliki.” Kuteloko Yesu ahetile kuvulavula timhaka toleto hinkwatu, aku ka vajondzisiwa va yena: “Masvitiva lesvaku loko kutava kuhundzile masiku mambirhi, kutava ni nkhuvu wa Paska; kutani N'wana-wa-Munhu atanyiketiwa lesvaku avambiwa xihambanwini.” Nkarhini wolowo Vaprista lavakulu, ni Vatsali ni vakulukumba, vahlengeletana hubzeni ya Muprista lwenkulu lweyi avaku i Kayafasi, kutani vatwanana kuyakhoma Yesu hi maqhinga, vatamudlaya. Kambe avaku: “Svingayendliwi nkhubzeni, hikuva kungatshuka kupfuka mpfilumpfilu xikarhi ka vanhu.” Yesu aali Betaniya, muntini wa Simoni lweyi wa nhlokonho. Kutani kuta wansati lweyi aatamele ximbitana xa alabaxtru, xa kutala hi mafurha yonun'hwela yodura ngopfu, amachela nhlokweni ya Yesu na vali kujeni. Loko vajondzisiwa vasvivona, vakhunguvanyeka svinene, vaku: “Mafurha lawa maxakeliwela yini ke? Amataxavisiwa hi male leyotala, kutani yinyikiwa svisiwana.” Hikuva Yesu ativa kuvilela ka vona, aku ka vona: “Xana wansati lweyi mimukarhatela yini ke? Aniyendlele ntirho lowunene. Hikuva, loko svili svisiwana, mitava na svona hi masiku hinkwawu, kambe mina, ningakala ningavi na n'wina hi masiku hinkwawu. Loko atota miri wa mina hi mafurha lawa, ayendlela siku ra kulahliwa ka mina. Nitiyisile nili ka n'wina: Misaveni hinkwayu laha Evhangeli leyi yingatapaluxixa kona, lesvi asviyendleke svitavuliwa na svona, ayanakanyiwa ha svona.” Kutani mun'we wa lava va khume ni vambirhi lweyi avaku i Yudasi Iskariyota, aya ka Vaprista lavakulu, Aku: “Mitaninyika yini, loko niminyiketa yena ke?” Kutani vamuhumesela male ya silivhere yoringana makume manharhu. Hi loko Yudasi asungula kulava nkarhi lowunene wovanyiketa Yesu ha wona. Hi siku rorhanga ra nkhuvu wa Xinkwa xokala comela, vajondzisiwa vata ka Yesu, vaku: “Xana ulava lesvaku hiyakulungisela kwihi, kuyajela kona Paska?” Yesu avabzela kuya doropeni, ka munhu wokarhi, vafika vaku ka yena: “Mujondzisi ali: ‘Nkarhi wa mina wukusuhi; nitaja nkhuvu wa Paska laha ka wena, svin'we ni vajondzisiwa va mina.’” Vajondzisiwa vayendla hilaha Yesu avabzeleke hakona, kutani valungisa Paska. Loko jambu ripelile, Yesu atshama kujeni, ni lava va khume ni vambirhi. Loko vahaja, aku ka vona: “Nitiyisile nili ka n'wina: Mun'we ka n'wina atanixenga.” Vakhunguvanyeka ngopfu, kutani vasungula kumuvutisa ha mun'we mun'we, vaku: “Hosi, ungava uvula mina xana?” Ahlamula, aku: “Lweyi angatanixenga, hi lweyi apetaka voko na mina nkambaneni. Loko ali N'wana-wa-Munhu, atatifambela hilaha svitsaliweke hakona mayelanu na yena, kambe a ni khombo munhu lweyi N'wana-wa-Munhu axengiwaka ha yena! Asvitayampsa ka munhu lweyi loko ongi angapsaliwanga.” Na yena Yudasi lweyi aali karhi amuxenga aku: “Hosi, ungava uvula mina xana?” Yesu aku ka yena: “Kuvula wena svosvo!” Loko vahali kujeni, Yesu ateka xinkwa, kutani loko axikatekisile, axikhema, anyika vajondzisiwa, aku: “Tekani mija, lowu i miri wa mina.” Kutani ateka ndzheko, awukatekisa, avanyika wona aku: “Nwelani ka wona hinkwenu; hikuva leyi i ngati ya mina, ngati ya ntwananu leyihalateliwaka lava votala lesvaku varivaleliwa svijoho. Kambe nili ka n'wina: Kusukela svosvi, aningahanwi kambe sva mihandzu ya mvhinya, kukondza kufika siku leri ningatasvinwa na n'wina hi ximpsha, Mfun'wini wa Tatana wa mina.” Kuteloko vayimbelelile risimu, vaya Ntshaveni ya Maolivhera. Kutani Yesu aku ka vona: Vusiku lebzi, n'wina hinkwenu mitabaleka minisiya noxe, hikuva kutsaliwile lesvaku: “‘Nitaba mubzisi, kutani tinyempfu ta ntlhambi titahangalaka.’” “Kambe loko nitava nipfukile kufeni, nitamirhangela nifika Galileya.” Kambe Petrosi aku ka yena: “Hambi loko hinkwavu vangabaleka vakusiya, mina ningakala ningakusiyi, ni siku ni rin'we.” Yesu aku ka yena: “Nitiyisile nili ka wena: Vusiku lebzi, nkuku wungasiyimba, utava unilandzulile kanharhu.” Petrosi aku ka yena: “Hambi loko svifanela kufa na wena, ningakala ningakulandzuli!” Vajondzisiwa hinkwavu na vona vavulisa svosvo. Hi loko Yesu afamba ni vajondzisiwa ndhawini leyi yivuliwaka Getsemani, kutani aku ka vona: “Tshamani kola, nahaya lahaya, niyakhongela.” Ateka Petrosi ni vana lavambirhi va Zebedewu afamba na vona; hi loko asungula kuvaviseka ni kukhomiwa hi gome lerikulu. Kutani aku ka vona: “Moya wa mina wukhomiwa hi gome lerikulu, gome royisa kufeni; salanikola, milavelela na mina.” Kutani aya kulenyana, akhinsama, mombo wa yena wukhumba hansi ali karhi akhongela aku: “Tatana, loko svingakoteka, ndzheko lowu wungafambela kule na mina! Ntsena kungayendleki kurhandza ka mina, kambe akuyendleke kurhandza ka wena!” Atlhelela ka vajondzisiwa, avakuma na vayetlele; aku ka Petrosi: “Xana mitsandzekisa kuyini kulavelela na mina hambi ali wora rin'we ntsena ke? Lavelelani na mili karhi mikhongela, lesvaku mingaweli amiringweni, hikuva moya wululamile, kambe nyama yitsanile.” Kutani atlhela aya ka vumbirhi tlhelweni, akhongela aku: “Tatana wa mina, loko svingakoteki lesvaku ndzheko lowu wufambela kule na mina na ninganwelanga ka wona, akuyendliwe kurhandza ka wena!” Kuteloko atlhelela ka vona kambe, avakuma na vayetlele, hikuva mahlo ya vona amatika hi vurhongo. Avasiya, atlhela ayakhongela ka vunharhu tlhelweni, avula marito yofana ni ya kusungula. Kutani avuyela ka vajondzisiwa, aku ka vona: “Xana mahayetlela ni kuhumula ke? Vonani, nkarhi wufikile, N'wana-wa-Munhu anyiketiwa mavokweni ya vajohi. Sukani miyima, ahifambeni! Langutani, lweyi anixengaka a le kusuhi.” Aku ahavulavula, kuhumelela Yudasi, mun'we wa lava va khume ni vambirhi, ata ni xitshungu lexihlomeke matlhari ni tinhonga, xirhumiwile hi Vaprista lavakulu ni vakulukumba. Lweyi amuxengaka aavanyikile xikombiso, aku: “Lweyi ningatamun'qunta, hi yena, mukhomeni!” Hi loko Yudasi ata, ahantla akongoma Yesu, aku: “Xeweni Mufundhisi!” Kutani amuq'unta. Yesu aku ka yena: “Nakulorhi, lesvi ungatela svona, sviyendle.” Hi loko vatshinelela Yesu, vatshambuluta mavoko vamukhoma. Hi nomo-lo mun'we wa lava avali na Yesu, ahlomula ripanga ra yena, axupula ndleve ya mutirhi wa Muprista lwenkulu. Yesu aku ka yena: “Tlhelisela ripanga ra wena ndhawini ya rona, hikuva hinkwavu lavatirhisaka matlhari, vatadlawa hi matlhari. Xana uyehleketa lesvaku ningatsandzeka kukhongela Tatana wa mina, anipfuna svosvisvosvi hi mavandla ya tintsumi lawa matlulaka khume na mambirhi ke? Kambe loko svingavatano, Matsalwa amatayendlekisa kuyini, lesvi mavulaka lesvaku svifanekele kufamba hi ndlela yoleyi ke?” Nkarhini wolowo, Yesu aku ka xitshungu: “Lesvi mihumeke na mili ni matlhari ni tinhonga kutanikhoma, nova xigevenga xana? Masiku hinkwawu anitshama Tempeleni, nili karhi nijondzisa: Aminikhomanga. Hambi svilitano, svilo lesvi hinkwasvu svihumelelile lesvaku kuhetiseka lesvitsaliweke hi vaprofeta.” Hi loko vajondzisiwa hinkwavu vamusiya, vabaleka. Lavangakhoma Yesu vamuyisa ka Kayafasi Muprista lwenkulu, laha Vatsali ni vakulukumba avahlengeletanile kona. Petrosi amulandza hi le kule, anghena rikupakupeni ra yindlo ya Muprista lwenkulu; loko anghenile, atshamisa ni vatirhi, lesvaku atavona kuhela ka svona. Kutani Vaprista lavakulu, ni huvu hinkwayu ya Sinedri, avalava vumboni bza mavunhwa bzohehla Yesu ha bzona, lesvaku vatakuma xomudlaya ha xona; kambe avabzikumanga, hambi loko kuhumelelile timboni ta mavunhwa letotala. Kuheteleleni, kuhumelela timboni timbirhi tiku: “Munhu lweyi ate: ‘Ni ni matimba ya kuhirimuxa Tempele ya Xikwembu, nikutlhela niyipfuxa ndzhaku ka masiku manharhu.’” Hi loko Muprista lwenkulu ayima, aku ka Yesu: “Xana awuhlamuli nchumu ke? Hi yi hi mhaka leyi vakuhehlaka ha yona xana?” Kambe Yesu amiyela. Muprista lwenkulu atlhela, aku ka yena: “Nikuhlambanyisa hi Xikwembu lexi xihanyaka, hibzele loko uli wena Mesiya, N'wana wa Xikwembu.” Yesu amuhlamula aku: Wena se uvulile! Ntsena namibzela nili: “‘Kusukela svosvi, mitavona N'wana-wa-Munhu na atshamile vokweni ra xinene ra Lweyi anga ni matimba hinkwawu, mitamuvona ata hi marefu ya le tilweni.’” Hi loko Muprista lwenkulu ahandzula xiyambalu xa yena, aku: “Asandzile Xikwembu; hahalavela yini timboni ke? Mahakutwa kusandza ka yena svosvi. N'wina mili yini?” Vahlamula, vaku: “Afaneliwa hi rifu.” Kutani vamupshitela marhi nghoheni, vamuba hi svibakela, van'wana vamuba hi timpama, vaku: “Hivhumbhele lweyi akubeke, wena Kriste!” Petrosi aatshamile handle rikupakupeni; kutani mutirhi mun'we waxisati ata ka yena, aku: “Na wena, awuli na Yesu wa Mugaleliya.” Kambe Petrosi akaneta mahlweni ka hinkwavu, aku: “Lesvi usvivulaka, anisvitivi.” Hi loko ahuma, ayayima nyangweni; kutani mun'we wansati amuvona, aku ka lava avali kolaho: “Wanuna lweyi aali na Yesu wa Nazareta.” Petrosi atlhela akaneta aku: “Mina nahlambanya lesvaku munhu lweyi, animutivi.” Andzhakunyana, lava avali kolaho vatshinela, vaku ka Petrosi: “Hakunene, na wena, u mun'we wa vona, hikuva utikomba hi mavulavulela ya wena.” Hi loko asungula kurhuketela ni kuhlambanya hi matimba aku: “Nitiyisile lesvaku munhu lweyi, mina animutivi!” Hi nomo-lo, nkuku wuyimba. Kutani Petrosi atsundzuka rito lerivuliweke hi Yesu, loko aku: “Nkuku wungasiyimba, utava unilandzulile kanharhu.” Hi loko ahumela handle, ayarila hi xiviti. Loko bzixile, Vaprista hinkwavu ni vakulukumba valuka makungu ya kudlaya Yesu. Kuteloko vamubohile, vafamba na yena, vayamunyikela ka hosi Pilato. Loko Yudasi lweyi angamuxenga avona lesvaku Yesu ayavanyisiwile, atitwa nandzu, kutani ayatlhelisa male ya silivhere leyi ya makume manharhu ka Vaprista lavakulu ni ka vakulukumba, aku ka vona: “Nijohile hi kuxenga munhu lweyi angaliki na nandzu.” Vaku ka yena: “Hi ni mhaka muni na svona hina ke? Svitiviwa hi wena svosvo.” Kutani Yudasi ayacukumeta male yakona Tempeleni, kutani asuka, ayatisunga. Vaprista lavakulu vateka male liya, kutani vaku: “Lesvi yinga male ya ngati, asvifanelanga lesvaku yinghenisiwa ka nhlengo wa Tempele.” Kuteloko valukile makungu, vatirhisa male leyi kuxava nsimu ya muvumbi, kulahlela kona valuveli. “Hikolaho ka svosvo nsimu leyi yivuliwa ‘Nsimu ya ngati’ ni namuntlha.” Hilaha kuhetisekeke lesvivuliweke hi muprofeta Yeremiya, loko aku: “Vatekile male ya silivhere yoringana makume manharhu, yinga nhlayo leyi vanhu va Israyele avapimile lesvaku munhu wakona ataxaviwa ha yona, kutani vahumesile male leyi kuxava ‘Nsimu ya muvumbi’, hilaha Hosi yileriseke hakona.” Yesu ayimisiwa mahlweni ka hosi; kutani yona yimuvutisa, yiku: “Xana u hosi ya Vayuda ke?” Yesu aku ka yona: “Uvula svona!” Kambe loko Vaprista lavakulu ni vakulukumba vamuveka nandzu, angahlamulanga nchumu. Hi loko Pilato aku ka yena: “Xana awutitwi timhaka leti totala vakurhwexaka nandzu ha tona ke?” Kambe Yesu angamuhlamulanga nchumu, hosi yikondza yihlamala ngopfu. Hi nkarhi wa nkhuvo, hosi ayitolovela kutshunxa mubohiwa mun'we lweyi tiko rimukombelaka. Nkarhini wolowo akuli ni mubohiwa mun'we wa ndhuma svinene, lweyi avaku i Barabasi. Loko vahlengeletanile, Pilato aku ka vona: “Xana milava lesvaku nimitshunxela wihi: Barabasi, kumbe Yesu lweyi avuliwaka Mesiya ke?” Aavutisisa svosvo hi kutiva lesvaku avanyiketile Yesu hikolaho ka mavondzo. Kuteloko Pilato atshamile xitshan'wini xa kuyavanyisa, nsati wa yena arhumela rito ka yena, aku: “Ungatshuki unghena mhakeni ya munhu yelweyo wolulama, hikuva tolo nixaniseke ngopfu norhweni hikolaho ka yena.” Kambe Vaprista lavakulu ni vakulukumba vahlohlotela xitshungu lesvaku xikombela Barabasi, Yesu yena adlawa. Hosi yiyengeta yivavutisa yiku: “Xana milava lesvaku nimitshunxela wihi ka lavambirhi?” Vaku: “Barabasi!” Pilato aku ka vona: “Loko svilitano, Yesu lweyi avuliwaka Mesiya, nitayendla yini ha yena xana?” Hinkwavu vaku: “Aavambiwe!” Hi loko hosi yiku: “Xana ayendlile yini xobiha ke?” Vona vahuwelela hi matimba, vaku: “Aavambiwe!” Loko Pilato avona lesvaku angahumeleli, kumbe asvipfuni nchumu, ni lesvaku dzolonga riya rikula, ateka mati, ahlamba mavoko mahlweni ka xitshungu, aku: “Ani na nandzu wa rifu ra munhu lweyi, svivoneni mili n'wina.” Tiko hinkwaru rihlamula, riku: “Rifu ra yena arive henhla ka hina ni le henhla ka vana va hina.” Kutani avatshunxela Barabasi; kambe alerisa lesvaku Yesu abiwa, kutani amunyiketa lesvaku avambiwa. Masochwa ya hosi mayisa Yesu ndlwini ya vuhosi, kutani vahlengeleta ntlawa hinkwawu wa masochwa, wumurhendzela. Vamuhlivila xiyambalu, vamuyambexa nchale wopshuka, kutani valuka hari ya mintwa, vamutlhanteka nhlokweni, vamutamelisa rihlanga vokweni ra xinene; kutani vakhinsama mahlweni ka yena, vamutseketsela, vaku: “Xeweni, Hosi ya Vayuda!” Vamupshitela hi marhi; vateka rihlanga, vamuba nhloko hi rona. Kuteloko vamupoyilile, vamuhlivila nchale wakona, vatlhela vamuyambexa sva yena, kutani vafamba na yena vayamuvamba. Loko vali karhi vahuma, vahlangana ni mun'we wa nuna wa Kirene, lweyi avaku i Simoni, vamusindzisa kurhwala xihambanu. Loko vafikile ndhawini leyi vange i Golgota, hi lesvaku “Ndhawu ya Pala”, vamunyika vhinyu leripatsanyisiweke ni nyongwa lesvaku anwa; kambe loko anampsile, ayala kunwa. Loko vamuvambile, vayavelana sviyambalu sva yena hi kuhoxa vuhlolotwana, kutani vatshama hansi kolaho, vamurindza. Henhlanyana ka nhloko ya yena, vanameketa tsalwa ra nandzu wa yena leri ringe: “LWEYI I YESU, HOSI YA VAYUDA.” Kutani vamuvamba svin'we ni svigevenga svimbirhi, xin'we vokweni ra xinene, xin'wana ka ra ximantsi. Vahundzi va ndlela vamurhuketela, vahlakahla tinhloko, vaku: “Wena lweyi uhirimuxaka Tempele, uku utayipfuxa hi masiku manharhu, tiponise ke, uxika laho xihambanwini, loko uli N'wana wa Xikwembu!” Hi mukhuva wolowo, na vona Vaprista lavakulu, svin'we ni Vatsali ni vakulukumba, vamutseketsela, vaku: “Aponisile van'wana, kambe watsandzeka kutiponisa! Ahiku hi yena Hosi ya Israyele. Aaxike svosvi xihambanwini, hitapfumela ka yena. Atshembile Xikwembu, aximuponise svosvi loko ximutsakela, hikuva ate: ‘Ni N'wana wa Xikwembu.’” Ni svigevenga lesvingavambiwa svin'we na yena, asvimurhuketela hi mukhuva wolowo. Kusukela nkarhi wa vuntlhanu na wun'we kuyafika ka nkarhi wa vuntlhanu ni mune munyama wufunengeta tiko hinkwaru. Loko kulavile kuva nkarhi wa vuntlhanu ni mune, Yesu ahuwelela hi rito leritlakukeke, aku: “Eli, Eli, Lama Sama Sabaktani?”, hi lesvaku: “Xikwembu xa mina, Xikwembu xa mina, unitshikele yini?” Van'wana lava avali kona kolaho, loko vamutwa, vaku: “Avitana Eliya.” Hi nomo-lo mun'we wa vona atsutsuma, ayateka xiponjhi, axipeta ka ntsuvi, kutani axitlhoma arihlangeni, amunyika lesvaku anwa. Kambe van'wana vaku: “Mutshike, hitavona loko kunene Eliya ata, atamuponisa.” Hi loko Yesu atlhela ahuwelela hi rito leritlakukeke, kutani anhlala afa. Hi nomo-lo, xisirhelo xa nguvu ndzeni ka Tempele xihandzuka hi le xikarhi, kusukela henhla, kuyafika hansi; misava yitsekatseka, ni maribze mapandzeka. Masirha mapfuleka; vakwetsimi va Xikwembu lavotala lava avayetlele, vapfuka kufeni; Kutani vahuma masirheni, loko Yesu apfukile kufeni, vanghena doropeni leri rohlawuleka, vali karhi vavoniwa hi lavotala. Loko ndhuna ya dzana ra masochwa ni lava avali na yona kurindza Yesu, vavona kutsekatseka ka misava ni lesvihumeleleke, vachava ngopfu, vaku: “Hakunene munhu lweyi aali N'wana wa Xikwembu.” Akuli ni vavasati lavotala kolaho, avahlalela na vali kule. Avali lava avalandzelele Yesu ni kumutirhela loko ahuma Galileya. Xikarhi ka vona, akuli na Mariya wa Magadala, na Mariya mamana wa Yakobe na Yosefa, ni mamana wa vana va Zebedewu. Kuteloko riya kupeleni, kuta mun'we wa mufuwi wa le Arimateya; vito ra yena aali Yosefa, nakona na yena aali mujondzisiwa wa Yesu. Aya ka Pilato, ayakombela ntsumbu wa Yesu; kutani Pilato alerisa lesvaku vamunyika wona. Kuteloko Yosefa awutekile, awuphutsela hi lansoro leri aringasitirhisiwa, kutani aveka ntsumbu sirheni ra yena lerimpsha, leri aarikovotlile ribzeni; kutani avumbuluta ribze lerikulu ropfala nomo wa sirha, kutani atifambela. Mariya wa Magadala na Mariya lweyi mun'wana, avali kolaho, vatshamile valangutene ni sirha. Loko rixa hi siku leritlhantamaka, ringa ra Savata, Vaprista lavakulu ni Vafarisi vahlengeletana ka Pilato, vaku: “Hosi, hahatsundzuka lesvaku muxisi lwiya, loko ahahanya, ate: ‘Ndzhaku ka masiku manharhu, nitapfuka kufeni.’ Hikolaho, lerisa lesvaku sirha rilaveleliwa kukondza kufika siku ra vunharhu, lesvaku vajondzisiwa va yena vangatshuki vayamuyiva, kutani vatabzela vanhu vaku: ‘Apfukile kufeni!’ Vunhwa lero ringatlula lerorhanga hi kubiha.” Pilato aku ka vona: “Mi ni ntlawa wa valaveleli, yanani miyarindza sirha, hilaha misvivonaka hakona.” Kutani vaya, vayatiyisa ribze hi kuveka amfungo wa vona, nasvona vaveka ni varindzi lesvaku vasala varindza. Loko siku ra Savata rihundzile, Mariya wa Magadala, na Mariya lweyi mun'wana, vapfuka na kahali mpundzu wa siku ra Sonto, vayalanguta sirha. Kutani, kuva ni kutsekatseka lokukulu ka misava; hikuva ntsumi ya Hosi ayixikile hi le tilweni, yivumbuluta ribze, yitshamisa henhla ka rona. Ayivangama kufana ni rihati, ni sviyambalu sva yona asvibasile kufana ni gapongo. Varindzi varhurhumele hi kuchava, vavoneka ongi hi loko vafile. Hi loko ntsumi yibzela vavasati yiku: “Mingachaveni, hikuva nasvitiva lesvaku milava Yesu lweyi avambiweke; anga kona laha, hikuva apfukile kufeni, hilaha atshamaka amibzela hakona. Tanani, mitavona laha aalatiwile kona. Svosvi-ke, hantlisani, miyativisa vajondzisiwa va yena miku: ‘Apfukile xikarhi ka vafi; wamirhangela aya Galileya, mitayamuvona kona.’ Hisvosvi nimibzelaka svona.” Vavasati vasuka sirheni hi kuchava ni kutsaka lokukulu, vatsutsuma vayativisa vajondzisiwa va yena. Hi nomo-lo, Yesu avatlhangaveta, aku: “Avuxeni!” Vona vatshinelela vakhoma milenge ya yena vamukhinsamela. Hi loko Yesu aku ka vona: “Mingachaveni, fambani miyabzela vamakwerhu lesvaku vaya Galileya; vatanivona kona.” Kuteloko vasukile, van'we ka valaveleli vaya doropeni, vayativisa Vaprista lavakulu hinkwasvu lesvihumeleleke. Loko Vaprista vahlengeletanile ni vakulukumba, valuka makungu, kutani vanyika masochwa male leyotala, vaku: “Miku: ‘Vajondzisiwa va yena vatile nivusiku, vatamuyiva, na hina hiyetlele.’ Ni loko mhaka leyi yifika tindleveni ta hosi, hina hitayikholwisa, himiyimelela. ” Valaveleli vateka male, vayendla hilaha valerisiweke hakona; kutani mhaka yoleyo yitwakala xikarhi ka Vayuda kufikela ni namuntlha. Vajondzisiwa lava va khume na mun'we vaya Galileya, ntshaveni leyi Yesu avabzeleke yona. Loko vamuvona, vakhinsama, kambe van'wana vakanakana. Kutani Yesu avatshinelela, avulavula na vona, aku: “Ninyikiwile vuhosi hinkwabzu tilweni ni la misaveni; hi kolaho, fambani ka tinxaka hinkwatu, mivayendla vajondzisiwa va mina, mivakhuvula hi vito ra Tatana, ni ra N'wana, ni ra Moya Lowokwetsima, mivajondzisa kuhlayisa hinkwasvu lesvi nimibzeleke svona; kutani vonani, ni na n'wina masiku hinkwawu, kukondza kuhela misava.” Lawa hi wona masungulu ya Evhangeli ya Yesu Kriste, N'wana wa Xikwembu. Tani hilaha kutsaliweke hakona bukwini ya muprofeta Ezaya, loko aku: “Vona, murhumiwa wa mina wata mahlweni ka wena, lweyi angatalungisa ndlela ya wena. Rito ra munhu lweyi ahuwelelaka mananga rili: ‘Lulamisani ndlela ya Hosi, milulamisa ni svindlelana sva yona.’” Yohani Mukhuvuli ahumelelise xisvosvo mananga na ali karhi ahuwelela, abzela vanhu kuhundzuka akuva vatakhuvuliwa, ni lesvaku vatarivaleliwa svijoho sva vona. Kutani vanhu hinkwavu va tiko ra Yudeya ni vayaki hinkwavu va Yerusalema, avaya vayakhuvuliwa hi yena nambzeni wa Yordani, na vali karhi vativula svijoho sva vona. Yohani aayambala sviyambalu svolukiwa hi voya bza kamela, atikhama hi bandi ra xikhumba, aja tintete ni vulombe bza nhova. Aapaluxa mahungu lawa mange: “Wata mun'wana ndzhaku ka mina, lweyi anitlulaka hi matimba, lweyi svinganifaneliki kukorhama ni tlhantlha tingoti ta masandhazi ya yena. Mina ha noxe ni mikhuvulile hi mati, kambe yena atamikhuvula hi Moya Lowokwetsima.” Hi masiku wolawo, Yesu ahuma Nazareta, anga doropa ra Galileya, ayakhuvuliwa hi Yohani nambzeni wa Yordani. Kutani loko ali karhi ahuma matini, avona matilo mapfuleka, ni Moya na wulikarhi wuxika henhla ka yena wufana ni xituvana; kutani rito lerihumaka matilweni riku: “Wena u N'wananga lweyi arhandzekaka, lweyi nimutsakelaka.” Hi nomo-lo Moya wumuyisa mananga; kutani atshama kona masiku ya mune wa makume, na ali karhi aringiwa hi Sathana. Aahanya ni sviharhi sva nhova, kambe tintsumi na tona atimutirhela. Ndzhaku ka loko Yohani anghenisiwile jele, Yesu aya Galileya, apaluxa Evhangeli ya Xikwembu, aku: “Minkarhi yihetisekile, Mfumu wa Xikwembu watshinela kusuhi; hundzukani, mipfumela ka Evhangeli.” Loko ali karhi alulama ni tiva ra Galileya, avona Simoni ni makwavu Andreya, na vali karhi vahoxa tinkoka ta vona ativeni, hikuva avali vaphasi vatihlampfi. Yesu aku ka vona: “Nilandzeni, nitamiyendla vaphasi va vanhu.” Hi loko vatshika tinkoka ta vona, vamulandza. Loko ahundzanyana aya mahlweni, avona vamakwavu ha vambirhi, Yakobe na Yohani vana va Zebedewu na vali bzatsweni, varhunga tinkoka. Kuteloko avavitanile, vasiya tatana wa vona Zebedewu bzatsweni svin'we ni vatirhi, kutani vamulandza. Hikolaho Yesu ni vajondzisiwa va yena vafika Kapernawume; kutani hi siku ra Savata Yesu anghena sinagogeni, ajondzisa. Avahlamala jondzo ya yena, hikuva aavajondzisa kufana ni lweyi anga ni matimba, kungali kufana ni Vatsali. Asinagogeni ra vona akuli ni munhu lweyi angheniweke hi moya wa chaka; wona wuhuwelela, wuku: “Mhaka ya hina na wena hi yihi, wena Yesu wa Nazareta? Xana utele kutahilovisa ke? Nakutiva lesvaku u mani: U Lweyi Wohlawuleka wa Xikwembu.” Yesu awukahla, aku: “Miyela! Huma ka munhu yelweyi!” Kutani moya wa chaka wumurhurhumelisa hi matimba, wuhuwelela hi rito lerikulu, wuhuma ka yena. Kutani hinkwavu vahlamala ngopfu, lakakuva vavutisana vaku: “Hi lesvoyini lesvi? I jondzo leyimpsha! Hikuva alerisa hi matimba mimoya ya chaka, kutani na yona yimuyingisa!” Hi loko ndhuma ya yena yihantla yihangalaka matlhelweni hinkwawu ya Galileya. Loko vahuma sinagogeni, vaye kaya ka Simoni na Andreya na vali na Yakobe na Yohani. Mamana wa nsati wa Simoni, aayetlele ali karhi avabza, miri wa yena awuhiseta; kutani vabzela Yesu. Hi loko atshinela, amukhoma hi voko, amupfuxa; hi nomo-lo, kuhiseta ka miri kuhangalaka, kutani avatirhela. Nimajambu, loko ripela, vamutisela hinkwavu lava avali ni mavabzi ni lava avali ni madimoni. Vayaki hinkwavu va doropa avahlengeletanile nyangweni. Kutani ahanyisa vanhu lavotala, lava avavabza hi mavabzi ya tinxakaxaka, ahlongola ni madimoni layotala. Ntsena yena aangapfumeleli madimoni lawa lesvaku mavulavula, hikuva amamutiva. Yesu apfukisa svinene ahuma doropeni, ayamananga ayakhongela kona. Kambe Simoni ni lava avali na yena vafamba vamulava. Kuteloko vamukumile, vaku ka yena: “Hinkwavu vakulava.” Yena aku ka vona: “Ahiyeni asvidoropanini svin'wana, lesvi svingakusuhi, lesvaku nakona niyapaluxa Evhangeli, hikuva hi lesvi ningatela svona.” Kutani afamba, apaluxa Evhangeli masinagogeni ya vona, tikweni hinkwaru ra Galileya, na ali karhi ahlongola madimoni. Kutani munhu mun'we wa nhlokonho ata ka yena, akhinsama mahlweni ka yena, amukhongela aku: “Loko usvirhandza, unganibasisa.” Yesu amutwela vusiwana, atshabuluta voko, amukhumba, aku ka yena: “Nasvirhandza, nakubasisa!” Kutani hi loko nhlokonho yinyamalala, abasa. Yesu amutlhelisa hi kuhantlisa, amulaya hi matimba akuva ativonela: “Vona, ungatshuki ubzela munhu svilo lesvi, kambe famba, uyatikombisa ka Muprista, uhumesa sva kubasisiwa ka wena lesvilerisiweke hi Moxe, svitava vumboni ka vona.” Kambe loko munhu lwiya asukile kolaho, afambe apaluxa ni kuhangalasa mahungu wolawo, kukondza Yesu ativiwa madoropeni hinkwawu lawa aanghena ka wona; lesvi svingayendla lesvaku angahangheni na atshunxekile ka wona; hi loko ayatitshamela mananga; kutani vanhu vata ka yena, na vahuma matlhelweni hinkwawu. Loko kuhundzile masiku mangali mangani Yesu avuyela Kapernawume, kutani kutwakala lesvaku akona le kaya. Vanhu lavotala vahlengeletana kona, kukondza kupfumaleka ni vutshamo mahlweni ka nyangwa, kutani Yesu avajondzisa Rito ra Xikwembu. Kutani kufika ka yena lavatisaka munhu wa kukhwanyala svirho, arhwaliwile hi mune wa vanhu. Vona hi kutsandzeka kumufikisa ka Yesu hi kutala ka vanhu, vahahlula lwangu ra yindlo leyi aalikayona. Loko varihahlulile, vaxixa rihlaka leri lweyi wa kukhwanyala svirho aayetlelile ka rona. Loko Yesu avona kupfumela ka vona, aku ka lweyi wa kukhwanyala svirho: “N'wananga, urivaleliwile svijoho sva wena.” Kambe vatsali van'wana lava avatshamile kolaho, vavilela atimbilwini ta vona, vaku: “Hikolaho ka yini munhu lweyi avulavulisa xilesvi xana? Asandza Xikwembu! I mani lweyi angarivalelaka svijoho, loko xingali Xikwembu ntsena ke?” Yesu ahantla asvitiva moyeni wa yena lesvi avapimisa svona atimbilwini ta vona, kutani aku ka vona: “Mivilela hikolaho ka yini atimbilwini ta n'wina xana? Kuyampsa yini ke? Loko niku ka lweyi wa kukhwanyala svirho: ‘Urivaleliwile svijoho sva wena’, kumbe loko niku ka yena: ‘Pfuka, uteka rihlaka ra wena, ufamba’ xana? Svosvo ke mitativa lesvaku N'wana-wa-Munhu animatimba la misaveni kurivalela svijoho.” Kutani aku ka lweyi wa kukhwanyala svirho: “Nili ka wena: Pfuka, uteka rihlaka ra wena, umuka.” Hi nomo-lo, yena apfuka, ateka rihlaka, afamba mahlweni ka vanhu hinkwavu; hi loko hinkwavu vahlamala ngopfu, vadzunisa Xikwembu, vaku: “Svilo lesvotano ahisisvivona.” Yesu atlhela asuka, aya matlhelweni ya tiva; xitshungu hinkwaxu xita ka yena, kutani axijondzisa. Loko ahundza, avona Levhi, n'wana Alfewu, atshamile ndlwini ya vurheselo; aku ka yena: “Nilandze!” Kutani Levhi asuka ayima amulandza. Kutani loko Yesu atshamile kujeni kaya ka Levhi, vakanganyisi lavotala ni vajohi vatshama na yena, svin'we ni vajondzisiwa va yena, hikuva vanhu lavotala avamulandza. Kambe loko Vatsali va ntlawa wa Vafarisi vamuvona aja ni vakanganyisi ni vajohi, vaku ka vajondzisiwa va yena: “Xana ajela yini ni vakanganyisi ni vajohi ke?” Loko Yesu atwa svosvo, aku ka vona: “Lava vangavabziki mirini avalavi n'anga, kambe yilaviwa hi lava vavabzaka. Anitanga kutavitana lavalulameke, kambe vona lavajoheke.” Loko vajondzisiwa va Yohani ni Vafarisi vali karhi vatitsona svakuja, kuta vanhu van'wana vatavutisa Yesu, vaku: “Xana vajondzisiwa va Yohani ni vajondzisiwa va Vafarisi vatitsonela yini svakuja, kasi vajondzisiwa va wena vona avatitsoni ke?” Yesu aku ka vona: “Xana varhambiwa va muteki vangatitsona svakuja loko muteki ahali na vona ke? Nkarhi hinkwawu loko muteki ahali kona na vona, vangakala vangatitsoni svakuja. Kambe masiku matata, lawa muteki angatasusiwa ka vona; hi kona vangatatitsona svakuja, hi siku rolero. Aku na munhu lweyi arhungelaka xiziva leximpsha ka nguvu ya khale; hikuva loko ayendlisa svosvo xiziva leximpsha xitahandzula nguvu leyi ya khale, kutani kuhandzuka kakona kutaya kuyengeteleka. Nasvona aku na munhu lweyi achelaka vhinyu lerimpsha atindongeni ta khale, hikuva loko ayendlisa svosvo vhinyu ritahandzula tindonga, rihalaka, na tona titawonheka; kambe vhinyu lerimpsha varichela atindongeni letimpsha.” Hi siku ra Savata loko Yesu ali karhi ahundza xikarhi ka masimu, vajondzisiwa va yena vasungula kutshova minchocho na vali karhi vafamba. Vafarisi vaku ka yena: “Vona! Xana vayendlela yini lesvingapfumeleliwiki hi siku ra Savata?” Yesu aku ka vona: “Xana amisihlaya lesviyendliweke hi Davhida, siku leri apfumaleke svakuja, na akhomiwe hi ndlala, yena ni lava avali na yena ke?” “Anghenile ndlwini ya Xikwembu, masikwini ya Abiyatari, Muprista lwenkulu, aja xinkwa xa mhamba lexingafanelangiki kujiwa hi vanhu van'wana, loko kungali hi vaprista ntsena, atlhela anyika ni lava avali na yena.” Kutani aku ka vona: “Savata riyendleliwe munhu, ahi munhu lweyi angayendleliwa Savata. Hikolaho-ke, N'wana-wa-Munhu i hosi hambi ya siku ra Savata.” Yesu atlhela anghena sinagogeni; kolaho akuli ni munhu wa kukhwanyala voko. Kutani Vafarisi avalangutisisa Yesu kuvona kumbe atahanyisa munhu lweyi hi siku ra Savata, lesvaku vatakota kumunyika nandzu. Hi loko aku ka munhu wa kukhwanyala voko: “Suka, uyima laha xikarhi.” Kutani aku ka vona: “Lesvilulameke kuyendliwa hi Savata hi svihi xana: Kuyendla lesvinene kumbe kuyendla lesvobiha, kuhanyisa munhu kumbe kumudlaya xana?” Kambe vona vamiyela. Yesu avarhalarhala hi mahlo na ahlundzukile, na avavisekile hi kunonon'hwa ka timbilu ta vona, kutani aku ka wanuna lwiya: “Tshabuluta voko ra wena.” Aritshabuluta, kutani voko ra yena ritlhela riwololoka. Kutani Vafarisi vahuma sinagogeni, vayaluka makungu svin'we ni va ntlawa wa Heroda, kuvona hilaha vangamudlayaka hakona. Yesu asuka ayakusuhi ni tiva svin'we ni vajondzisiwa va yena, kutani xitshungu lexikulu ximulandza, na xihuma Galileya, xin'wana xihuma Yudeya, ni le Yerusalema ni le Idumeya ni le ka tlhelo rin'wana ra Yordani ni le matikweni ya Tiro na Sidoni. Avachololoka vaya ka yena hi kutwa lesvikulu lesvi aasviyendla. Kutani abzela vajondzisiwa va yena lesvaku bzatsu ritshama riyimile kusuhi na yena, lesvaku xitshungu xingamukamanyeti. Hinkwavu lava avali ni mavabzi avakamanyetana vaya ka yena lesvaku vatamukhumba, hikuva aahanyisile lavotala. Ni lava avali ni mimoya ya chaka, loko vamuvona, avakhinsama mahlweni ka yena, vahuwelela, vaku: “Wena u N'wana wa Xikwembu!” Hi loko Yesu akhahla madimoni hi matimba lesvaku mangatshuki matwalisa lesvaku yena i mani. Kutani Yesu atlhantukela ntshaveni, ativitanela lava avalaveke; hi loko vata ka yena. Ahlawula khume ni vambirhi lesvaku vava na yena ni lesvaku atavarhuma kupaluxa Evhangeli, avanyika ni matimba ya kuhlongola madimoni. Vapostola va khume ni vambirhi lava angavahlawula hi lava: Simoni (lweyi angamuchula vito ra Petrosi), na Yakobe na Yohani vana va Zebedewu (lava angavachula vito ra Bowanerjesi, hi lesvaku vana vaxingwalangwandza); kulandza Andreya, na Filipi, na Bartolomewu, na Matewu, na Tomasi, na Yakobe n'wana Alfewu, na Tadewu, na Simoni wa Kanana, na Yudasi Iskariyota, lweyi axengeke Yesu. Loko Yesu atlhelele kaya, xitshungu xitlhela xihlengeletana kona, lakakuva yena ni vajondzisiwa va yena vatsandzeka ni kuja svakuja. Loko maxaka ya yena vatwa svosvo, mata, matela kutamukhoma, hikuva avaku: “Ahlangane nhloko.” Na vona Vatsali lavangirimeleke hi le Yerusalema, avaku: “Afumiwa hi Belzebule, nasvona ahlongola madimoni hi hosana ya madimoni.” Kuteloko Yesu avavitanile, avulavula na vona hi svifaniso, aku: “Xana Sathana angasvikotisa kuyini kuhlongola Sathana ke? Nasvona, loko mfumu wuyavana hi le xikarhi, mfumu lowu awukoti kutiya. Ni loko njangu wuyavane hi le xikarhi, njangu wolowo awungatiyi. Na yena Sathana, loko atilwisa, ayavana hi le xikarhi, angakala angatiyi, kutava kuhela ka yena. Aku na munhu lweyi akotaka kunghena ndlwini ya nhenha ya matimba kuyaphanga rifuwo ra yona, na angarhanganga hi kuboha nhenha yoleyo; kuli kona aphangaka sva yindlo ya yona. “Nitiyisile nili ka n'wina: Svijoho hinkwasvu ni svisandzu hinkwasvu sva vana va vanhu svitarivaleliwa; kambe lweyi angatasandza Moya Lowokwetsima angakala angarivaleliwi ni siku ni rin'we; hi lesvaku a ni nandzu wa xijoho lexingaheliki.” Aavulisa svosvo, hikuva avaku: “A ni moya wa chaka.” Mamana wa Yesu ni vamakwavu vata, vayima handle, varhuma munhu ayamuvitana. Kambe xitshungu axitshamile, ximurhendzelile. Kutani vaku ka yena: “Vona, mamana wa wena ni vamakwenu vakona laha handle, vakulava.” Avahlamula aku: “Mamana wa mina ni vamakwerhu i vamani?” Kutani Yesu alanguta vanhu lava avamurhendzelile, aku: “Langutani, mamana wa mina ni vamakwerhu, hi volava; hikuva mani na mani lweyi ayendlaka kurhandza ka Xikwembu, hi yena makwerhu waxinuna ni waxisati na mamana.” Yesu atlhela asungula kujondzisa kusuhi ni tiva. Kutani xitshungu lexikulu xihlengeletana ximutela, kukondza anghena bzatsweni, atshamisa ndzeni ka rona ativeni; loko xili xitshungu hinkwaxu, xona axitshame ridongeni ra tiva. Kutani avajondzisa timhaka letotala hi svifaniso. Akujondziseni ka yena avabzela lesvi: “Yingisani! Muhaxi ahumile aya akuhaxeni. Loko ali karhi ahaxa, timbewu tin'wana tiwela ndleleni, kutani tinyanyana tita, titaja hinkwatu. Tin'wana tiwela amaribzeni, laha akungali na misava leyotala, kutani tihantla timila, hikuva misava ayingatalanga. Kambe loko jambu ritlhava, svimilwa svivuna, kutani sviwoma hi kupfumala timintsu. Timbewu tin'wana tiwela amintweni; loko mintwa yikula, yiti kamanyeta, kutani tingaveki nchumu. Tin'wana kambe tiwela misaveni leyinene, timila, tikula, tiveka timbewu, yin'we yichela makume manharhu, yin'wana ntlhanu wa makume ni rin'we (60), yin'wana dzana (100).” Kutani aku: “Lweyi anga ni tindleve toyingisa, aayingise!” Kuteloko Yesu ayile tlhelweni, lava avali kusuhi na yena, svin'we ni lava va khume ni vambirhi, vamuvutisa hi ta xifaniso. Kutani aku ka vona: “N'wina minyikiwile kutiva svihundla sva Mfumu wa Xikwembu, kasi ka lava vanga handle, hinkwasvu svivuliwa hi svifaniso.” Svinga lesvaku, “‘loko kuli kuvona, vavona, kambe vangavonisisi, hambi kulikutwa, vatwa, kambe vangatwisisi, lesvaku vangatshuki vahundzuka, varivaleliwa svijoho.’” Yesu aku ka vona: “Xana amitwisisi xifaniso lexi ke? Loko svilitano, mitatwisisisa kuyini svifaniso hinkwasvu ke? Lweyi ahaxaka ahaxa Rito. Timbewu letingawela ndleleni i vanhu lava Rito rihaxiweke ka vona; kutani loko varitwile, Sathana ahantlisa ata ka vona, avatekela Rito lerihaxiweke. Timbewu leti tiweleke amaribzeni i vanhu lava loko vatwa Rito, vahantlisaka kuliyamukela hi kutsaka; kambe vangarinyiki nkarhi woveka timintsu, vatiyisela nkarhinyana ntsena; kutani loko khombo, kumbe kuxaniseka svifika hikolaho ka Rito, vahantlisa vakhunguvanyeka. Timbewu letiweleke amintweni, hi lava vatwaka Rito; kambe kuvilela hi sva misava leyi, ni kukanganyisiwa hi rifuwo ni kunavela svilo svin'wana ni svin'wana, svinghena ka vona, svikamanyeta Rito, kutani ritsandzeka kuveka mihandzu. Timbewu letiweleke misaveni leyinene, hi lava vayingisaka Rito, variyamukela, vaveka mihandzu; mbewu yin'we yichela makume manharhu, yin'wana ntlhanu wa makume ni rin'we (60), yin'wana dzana (100).” Avabzela kambe aku: “Xana rivoni ritisiwa lesvaku ritambhonyiwa hi xirhundzu, kumbe kuvekiwa hansi ka mubedo ke? Xana aritisiwi kutavekiwa henhla ke? Aku na xilo lexinga xihundleni, lexingatakala xingapaluxiwi; nakona aku na xilo lexifihliweke lexingatakala xingahumeli rivaleni. Loko munhu ali nitindleve ta kuyingisa, aayingise.” Yesu atlhela avabzela lesvi: “Yingisani svinene lesvi misvitwaka. Mpimo lowu mipimelaka van'wana ha wona, na n'wina, mitapimeliwa ha wona, ni kutlula kolaho. Lweyi anga ni xanchumu, atanyikiwa ni svin'wana, kasi lweyi angaliki na nchumu, atatekeliwa ni lexi anga na xona.” Yesu atlhela aku: “Mfumu wa Xikwembu wufana ni munhu lweyi ahaxeke mbewu misaveni; hambi ayetlele, hambi apfukile, vusiku ni nhlekanhi mbewu yitlhava, yikula, yena angativi lesvi yikulisaka xisvona. Misava hi yoxe yimilisa mbewu, yirhanga yivakhava, yihumesa nchocho, ndzhaku kuhuma tindzhoho totala anchochweni; kutani loko tindzhoho tiwupfile, vahantla vanghenisa sikelo, hikuva kutshovela kufikile.” Atlhela aku: “Mfumu wa Xikwembu wutafanisiwa nayini? Hi xihi xifaniso lexi hingawufanisaka na xona ke? Wufana ni mbewu ya nsinapi leyi yinga yona leyitsongo ka timbewu hinkwatu ta misava loko yibzaliwa. Kambe loko yibzaliwile, yimila, yikula, yitlula minsinya hinkwayu hi kukula, yiva ni marhavi lamakulu, tinyanyana ta tilo tikondza titayaka andzhutini wa wona.” Kutani hi svifaniso lesvotala, Yesu aavula Rito ka vona, hilaha avakota kutwisisa hakona. Angavabzelanga nchumu, loko kungali hi kutirhisa svifaniso; kambe loko vali voxe, ahlamusela hinkwasvu ka vajondzisiwa va yena. Hi siku lero, hi nkarhi wa majambu, Yesu aku ka vona: “Ahipeleleni ka tlhelo rin'wana ra tiva.” Kuteloko vasiyile xitshungu, vafamba na yena hi bzatsu leri aali ka rona, kutani mabzatso man'wana na wona amamupangalata. Kutani kupfuka xidzedze lexikulu; magandlati amanghena bzatsweni, kukondza rilava kutala hi mati. Yena aali nyalwini ayetlele ava aqamela. Vayamupfuxa, vaku ka yena: “Mujondzisi, xana ahi nchumu ka wena loko hilova ke?” Hi loko apfuka, amiyeta mheho, aku ka tiva: “Miyela, uku ntse!” Mheho yiva yimiyela, kuva ni kurhula lokukulu. Kutani aku ka vona: “Hikolaho ka yini mili ni vutoya ke? Amisiva ni kupfumela xana?” Kutani vachava hi kuchava lokukulu, vabzelana vaku: “Xana munhu lweyi i munhu muni ke, lesvi mheho ni tiva svimuyingisaka?” Kutani vafika tlhelweni rin'wana ra tiva, tikweni ra Vagerasi. Loko Yesu ahakuhuma bzatswini, hi nomo-lo munhu mun'we lweyi aali ni moya wa chaka, lweyi aahuma hi le masirheni, ahlangana na yena. Aahanya masirheni, kutani akungali na munhu lweyi aakota kumuboha, hambi kuli hi machini; hakanyingi, aabohiwa mavoko ni milenge, kambe aatsema machini yakona, kutani akungali na munhu lweyi aali ni matimba yomuhlula. Hi masiku hinkwawu, vusiku ni nhlekanhi, aatshama masirheni ni le tintshaveni, na ali karhi ahuwelela, atitsemelela hi maribze. Kuteloko avonile Yesu, ahali kule, atsutsuma, ayamukhinsamela; kutani ahuwelela hi rito leritlakukeke, aku: “Mhaka ya mina na wena hi yihi ke, wena Yesu N'wana wa Xikwembu xa le henhlahenhla? Naku khongela hi vito ra Xikwembu, unganixanisi!” (Aavula svosvo, hikuva Yesu aate ka yena: “Huma ka munhu lweyi, we moya wa chaka!”) Kutani Yesu amuvutisa, aku: “Vito ra wena u mani?” Ahlamula aku: “Vito ra mina ni Vandla, hikuva hitele.” Kutani akhongela Yesu aku: “Ungahihlongoli hihuma tikweni leri!” Kambe akuli ni ntlhambi lowukulu wa makhumba agangeni, lowu awuli kujeni, kutani mimoya yoleyo ya chaka yikhongela Yesu, yiku: “Ungahirhumela amakhumbeni, hiyanghena ka wona.” Yena ayipfumelela. Hi loko mimoya ya chaka yihuma, yinghena amakhumbeni, kutani ntlhambi wolowo wutsutsumela nkoveni, uyatihoxa xiziveni; makhumba amalava kuringana makhulu mambirhi (2 000), kutani manwela kona. Varisi va wona vabaleka, vayarungulela vahanyi va le doropeni ni va le masin'wini, kutani vona vata, vatavona lesvihumeleleke. Kuteloko vafikile ka Yesu, vavona lweyi aangheniwile hi vandla ra madimoni atshamile, ayambalile ali munhu nene, kutani vachava ngopfu. Lava vasvivoneke vavahlamusela lesvihumeleleke ka munhu lweyi wa madimoni, ni le ka makhumba. Hi loko vona vakhongotela Yesu lesvaku asuka tikweni ra vona. Loko Yesu ali karhi anghena bzatswini, munhu lweyi aali ni madimoni akombela svinene lesvaku amupfumelela kunghena atshama na yena bzatsweni. Kambe Yesu angamupfumelelanga, ntsena ate ka yena: “Famba, kaya ka wena ni ka valekwenu, uyatwalisa hinkwasvu lesvi Hosi yikuyendleleke svona ni hilaha yikutweleke vusiwana hakona.” Hi loko yena asuka, aya tikweni ra Dekapolisi, ayatwalisa hinkwasvu lesvi Yesu amuyendleleke svona; kutani hinkwavu vahlamala. Kuteloko Yesu atlhelele ka tlhelo lerin'wana hi bzatsu, xitshungu lexikulu xitahlengeletana ka yena, kusuhi ni tiva. Kutani kufika mun'we wa varhangeli va sinagoga lweyi avaku i Yayiro. Loko amuvona, atiwisa milengeni ya yena, amukhongela ngopfu, aku: “N'wana wa mina wanhwanyana wafa. Nakukombela, tana utamutlhanteka mavoko lesvaku apfuka ahanya.” Kutani Yesu afamba na yena; xitshungu lexikulu ximulandza, na xili karhi ximukamanyeta. Kambe akuli ni wansati lweyi aali ni mavabzi ya kuhumela ngati, aavabza hi xipimu xa malembe ya khume ni mambirhi; aaxanisekile ngopfu mavokweni ya tin'anga letotala; aahetile rifuwo ra yena hinkwaru, kambe asvingamupfunanga nchumu, hikuva mavabzi amaya makula. Loko atwile ndhuma ya Yesu, ata axitshungwini hi le ndzhaku ka Yesu, akhoma xiyambalu xa yena, hikuva yena aatibzelile aku: “Loko ningakhumba xiyambalu xa yena ntsena, nitahanyisiwa.” Kutani hi nomo-lo ngati ya yena yiyima yingahahumi, atitwa lesvaku kuvabza ka yena akuhanyisiwile. Hi nomo-lo Yesu asvitwa lesvaku kuhumile matimba ka yena, kutani Yesu ahundzukula ka xitshungu, aku: “I mani lweyi akhumbeke xiyambalu xa mina?” Vajondzisiwa va yena vaku ka yena: “Waxivona xitshungu lexi xikukamanyetaka; xana uvutisela yini lesvaku: ‘Nikhumbiwe i mani’ ke?” Yena alangutisisa hinkwaku kuvona lweyi asviyendleke. Kutani wansati yelweyo akhomiwa hi kuchava, arhurhumela hi kutiva lesvi svimuhumeleleke, kutani ata, atiwisela hansi mahlweni ka Yesu, amubzela ntiyiso hinkwawu. Yesu aku ka yena: “N'wananga, kupfumela ka wena kukuponisile, famba hi kurhula, nakuhanyisa nhlomulweni wa wena.” Aku ahavulavula, vanhu lavahumaka kaya ka murhangeli wa sinagoga vafika vabzela murhangeli wakona vaku: “N'wana wa wena afile, wahamukarhatela yini Mujondzisi ke?” Kambe Yesu angalandzanga hi marito lawa, kutani aku ka murhangeli wa sinagoga: “Ungachavi, pfumela ntsena.” Kutani angapfumelelanga munhu kumulandza, loko angali Petrosi, na Yakobe, na Yohani makwavu wa Yakobe. Loko vafika muntini wa murhangeli wa sinagoga, Yesu akuma kuli ni huwa leyikulu, van'we varila svinene, van'wana vaba nkalanga. Hi loko anghena, aku ka vona: “Mibela yini nyandha leyi, mirilela yini? Nhwanyana lweyi angafanga, ayoyetlela.” Kutani vamuhleka, kambe Yesu avahumesa handle hinkwavu, ateka tatana wa nhwanyana ni mamana wa yena ni vajondzisiwa lavanharhu, anghena laha nhwanyana aalatiwile kona. Kutani akhoma nhwanyana hi voko, aku ka yena: “Talita, kumi!” Hi lesvaku: “Nhwanyana, nili ka wena: Pfuka!” Hi nomo-lo nhwanyana apfuka, afambafamba (malembe ya yena amaringana khume ni mambirhi); kolaho vanhu vahlamala hi kuhlamala lokukulu. Kambe Yesu avalayisisa lesvaku svingatshuki svitiviwa hi munhu; kutani aku: “Munyikeni svakuja.” Yesu asuka kolaho, atlhelela tikweni ra le kwavu, kutani vajondzisiwa va yena vamulandza. Kuteloko kufikile siku ra Savata asungula kujondzisa sinagogeni, kutani lavotala lava vamuyingisaka, vahlamala vaku: “Xana svilo lesvi asvikume kwihi ke? I vutlhari muni lebzi abzinyikiweke, lesvi ni mahlori akotaka kumayendla hi mavoko ya yena xana? Xana yelweyi ahi yena muvatli, n'wana Mariya, makwavu wa Yakobe, na Yosefa, na Yuda, na Simoni ke? Xana vamakwavu vaxisati ahi na vona kola ke?” Kutani vakhunguvanyeka svinene hikolaho ka yena. Yesu aku ka vona: “Muprofeta angasoliwi, loko kungali tikweni ra yena ni ka le kwavu ni le maxakeni ya yena.” Kutani atsandzeka kuyendla mahlori kona, loko kungali kuhanyisa timbabzi tingali tingani, hi kuvatlhanteka mavoko. Nasvona ahlamala hi kuvona lesvaku avangalina kupfumela. Kutani arhendzeleka hi svidoropana lesvi asvili kusuhi, na ali karhi ajondzisa. Avitana lava va khume na vambirhi, avarhuma ha vambirhivambirhi, avanyika matimba yohlula mimoya ya chaka. Avabzela lesvaku vangatshuki valonga nchumu xa ndlela loko kungali nhonga ntsena; vangateki timbuva ni nkwama, hambi yili male asvikhwameni sva vona; masandhazi wona vangayambala, kambe vangateki sviyambalu svocinca. Aku ka vona: “Loko minghena njangwini wokarhi tshamani kolaho, mikondza misuka ku wona. Hinkwaku lomu vayalaka kumiyamukela ni kumiyingisa, mphumunhani ntshuri hansi ka minkondzo ya n'wina loko mihuma, svitava vumboni ka vona.” Kuteloko vasukile, vajondzisa vanhu rivaleni lesvaku vahundzuka; vahlongola madimoni lawa yotala, vatota timbabzi letotala hi mafurha, vavahanyisa. Hosi Heroda aatwile hi ta Yesu, hikuva vito ra yena aridumile ngopfu, nasvona vanhu avaku: “Yohani Mukhuvuli apfukile kufeni; hi svona lesviyendlaka lesvaku mintirho leyi ya matimba yivoneka ka yena” Van'wana avaku: “I Eliya.” Van'wana avaku: “I muprofeta lweyi afanaka ni mun'we wa vaprofeta va khale.” Kambe Heroda, loko asvitwa, aku: “Hiye Yohani lweyi ningamutsema nhloko. Ayopfuka kufeni.” Heroda hi yena hakunene lweyi aarhumile vanhu kuyakhoma Yohani, ava amupfalela jele. Aayendlile svosvo hikolaho ka Herodiya, nsati wa Filipi makwavu, hikuva aachadile na yena. Hikuva Yohani aabzela Heroda aku: “Awupfumeleliwi kutekela makwenu nsati wa yena. Hikolaho Herodiya ahlundzukela Yohani, anavela kumudlaya, kambe aatsandzeka,” “hikuva Heroda aachava Yohani, hi kutiva lesvaku i munhu wolulama, lweyi ahlawulekeke; kutani aamulwela. Masiku hinkwawu loko atwa Yohani, aakarhateka svinene; hambi svilitano aatsakela kumuyingisa.” Kambe siku rinene rifika, ra loko Heroda ayendlela tihosana ta yena ni tindhuna ta nyimpi ni vakulukumba va Galileya nkhuvo wa siku ra kuvelekiwa ka yena Loko n'wana wa Herodiya waxisati anghena acina, atsakise Heroda ni lavatshameke kujeni na yena. Hosi yiku ka nhwanyana: “Kombela lesvi usvirhandzaka ka mina nitakunyika svona.” Atlhela amuhlambanyela hi matimba, aku: “Lesvi ungatasvikombela ka mina nitakunyika svona, hambi kuli kukupandzela hi le xikarhi tiko leri nirifumaka.” Nhwanyana ahuma, ayavutisa mamana wa yena aku: “Nitakombela yini xana?” Yena aku: “Kombela nhloko ya Yohani Mukhuvuli!” Hi kuhantlisa na ahefemuteka anghena ka hosi, akombela lesvi: “Nilava lesvaku uninyika nhloko ya Yohani Mukhuvuli ankambanini, svosvisvosvi.” Hosi yikhomiwa hi tingana ngopfu, kambe hikolaho ka kuhlambanya ka yona ni hikolaho ka lavatshameke kujeni, ayikotanga kumuyalela. Hosi yihantla yirhuma musochwa wa jele, yilerisa lesvaku kutisiwa nhloko ya Yohani. Musochwa afamba jele ayamutsema nhloko, ayitisa ankambanini, anyika nhwanyana; yena anyika mamana wa yena. Loko vajondzisiwa va Yohani vasvitwa, vayateka ntsumbu wa yena, vayawulata sirheni. Vapostola vayahlangana na Yesu, vamurungulela hinkwasvu lesvi vasviyendleke ni lesvi vasvijondziseke. Kambe avangalina nkarhi wa kuja, hikuva vanhu lavotala avata, vatlhela vafamba. Kutani Yesu aku ka vona: “Tanani hiyatshama na hili hoxe mananga, mitakota kuwisanyana.” Hi loko vajondzisiwa vanghena bzatsweni, vaya laha kunga mananga na vali voxe. Kambe lavotala vavavona loko vafamba, vavativa, kutani vahuma madoropeni hinkwawu, vatsutsumela kole hi milenge, vavarhangela mahlweni. Loko Yesu ahuma bzatsweni, avona xitshungu lexikulu, axitwela vusiwana, hikuva axifana ni tinyempfu letingaliki ni murisi; kutani axijondzisa lesvotala. Lesvi jambu aripelile, vajondzisiwa va yena vamutshinelela, vaku: “Lomu i mananga, nasvona ripelile; vatlhelise, vaya masin'wini ni le svidoropanini lesvi svinga kusuhi na hina, vayatixavela svakuja.” Avahlamula, aku: “Vaphameleni n'wina!” Vaku ka yena: “Xana uli hiyavaxavela svinkwa sva tidenari ta madzana mambirhi (200), hitava phamela svona ke?” Yena aku ka vona: “Mi ni svinkwa svingani ke? Yanani miyalanguta.” Kuteloko vasvikambile, vaku: “I ntlhanu wa svinkwa ni tihlampfi timbirhi.” Hi loko avabzela kutshamisisa vanhu hinkwavu hi mintlawantlawa abzanyini bza rihlaza. Kutani vatshama hi kulongoloka, vayavane hi mintlawa ya dzana (100) ra vanhu ni ya ntlhanu wa makume (50) ya vanhu. Hi loko ateka svinkwa sva ntlhanu ni tihlampfi timbirhi, alanguta henhla tilweni, akhensa, akhemelela svinkwa, asvinyika vajondzisiwa va yena lesvaku vasviveka mahlweni ka vanhu ni tihlampfi timbirhi atiyavela hinkwavu. Vaja hinkwavu, vaxurha. Kutani varholela matlhantlha ya svinkwa ni ya tihlampfi vatata khume ra svirhundzu ni svimbirhi. Lavajeke svinkwa avaringana ntlhanu wa makhulu (5 000) ya vavanuna. Ndzhaku ka svosvo, Yesu abzela vajondzisiwa va yena lesvaku vanghena bzatsweni, vatavakongoma tlhelweni rin'wana, le Betisayida, loko yena hi yexe ali karhi atlhelisa xitshungu. Kuteloko asalisanile ni vanhu, aya ntshaveni kuyakhongela kona. Nimajambu, bzatsu arili xikarhi ka tiva, yena ahali tlhelweni na ali yexe. Kutani avavona na vali karhi vakarhateka ngopfu hi kutluta bzatsu, hikuva moya awuvasivela; kakuloko kulava kuva nkarhi wa mahlambandlopfu, ata ka vona, na ali karhi afamba henhla ka mati, ayendla ingi arhangela mahlweni. Loko vamuvona afamba henhla ka mati, vapimisa lesvaku i xipoko, kutani vaba nyandha; avamuvonile hinkwavu, kutani avachava ngopfu; kambe ahantla avulavula na vona, aku: “Tiyisani timbilu, hi mina, mingachaveni!” Kutani anghena bzatsweni laha avali kona; hi loko moya wumiyela, kutani vahlamala ngopfu, hikuva avangatwisisanga sva hlori ra svinkwa, nasvona timbilu ta vona atili letononon'hwa. Kuteloko vatsemakayile tiva vaya ka tlhelo lerin'wana, vafika tikweni ra Genezareta, kutani vaxikela ridongeni ra tiva. Loko vali karhi vahuma bzatsweni, vanhu vakona vahantla vativa Yesu, kutani vatsutsumatsutsuma ka tiko lero hinkwaru, vatisa hi tinhlaka hinkwavu vanhu lavavabzaka, ovalomu avatwa lesvaku Yesu akona. Hinkwaku laha aanghena kona, madoropeni, svidoropanini kumbe tihandle ta madoropa, vanhu avalata lavavabzaka mintsendzeleni, kutani vamukhongela lesvaku avapfumelela kukhumba hambi mali makumu ya sviyambalu sva yena ntsena; kutani hinkwavu lava avamukhumba, avahanyisiwa. Vafarisi ni Vatsali van'wana lavahumaka Yerusalema, vatahlengeletana laha Yesu aali kona; loko vavona vajondzisiwa van'wana va yena, vaja svakuja hi mavoko lawa machakeke, hi lesvaku lawa mangahlambiwangiki. Mhaka hi lesvaku, hinkwavu Vafarisi ni Vayuda hi nawu wa vona avaji na vangasihlamba mavoko, kutani hi ndlela yoleyo, vahlayisa mikhuva leyi vayiyamukeleke ka lava va khale. Ni loko vavuya hi le kuxaveni, avaji na vangasihlamba, vaha hlayisa ni mikhuva yin'wana leyotala leyi vayitoloveleke, tani hi leyi ya kuhlampsa mindzheko, timbita, svibza sva koporo ni mibedo. Kutani Vafarisi ni Vatsali vamuvutisa, vaku: “Hikolaho ka yini vajondzisiwa va wena vangahanyi mayelanu ni mikhuva ya lava va khale xana; na svona, hikolaho ka yini vaja svakuja na vangahlambanga mavoko?” Avahlamula aku: “Ezaya aavula n'wina hakunene, n'wina vakanganyisi, loko atsalile aku:” “‘Vanhu lava vanixixima hi nomo, kambe timbilu ta vona ti le kule na mina; vatikarhata ntsena hi kunikhinsamela, tijondzo leti vatijondzisaka i milawu ka vanhu ntsena.’” “Mitshika Nawu wa Xikwembu, kambe minamarhela mikhuva leyi miyikumeke ka vanhu ntsena.” Atlhela aku ka vona: “Mi ni tindlela totala totshika ha tona Nawu wa Xikwembu, miyendlela kuhlayisa mikhuva ya n'wina leyi miyitoloveleke. Hikuva Moxe ate: ‘Uva ni xichavu ka tatana wa wena ni ka mamana wa wena.’ Nasvona ate: ‘Lweyi arhuketelaka tatana wa yena, kumbe mamana wa yena, aadlawe!’ Kasin'wina mili, loko munhu aku ka tatana wa yena, kumbe ka mamana wa yena: Lesvi ningakupfunaka hi svona, i korbani (hi lesvaku mhamba leyihlayiseliweke Xikwembu), n'wina amimupfumeleli kuyendlela tatana wa yena kumbe mamana wa yena xanchumu; hi ndlela leyi, miwonha rito ra Xikwembu hi mikhuva ya n'wina leyi minyikaka ni van'wana; miyendla ni svin'wana lesvotala svofana nisvosvo.” Yesu atlhela avitana xitshungu aku ka xona: “Niyingiseni hinkwenu, mitwisisa. Aku na nchumu lexingahandle ka munhu, lexikotaka kumunyamisa loko xinghena ka yena, kambe lexihumaka ka yena, hi xona lexi ximunyamisaka.” [ Lweyi anga ni tindleve ta kuyingisa, aayingise.] Loko asukile axitshungwini, anghena ndlwini, vajondzisiwa va yena vamuvutisa mayelanu ni xifaniso lexi. Aku ka vona: “Kasi na n'wina, amitwisisi xana? Amisvitivi xana lesvaku hinkwasvu sva le handle, loko svinghena ka munhu, asvikoti kumunyamisa, hikuva asvingheni mbilwini ya yena, kambe sviya khwirini, kutani sviyahumela akhwatini ke?” (Hikuvula svosvo Yesu aakomba lesvaku svakuja hinkwasvu svilulamile, kumbe svibasile.) Atlhela aku: “Lesvi humaka ka munhu hi svona lesvi svimunyamisaka, hikuva ndzeni, timbilwini ta vanhu, hi kona kuhumaka miyehleketo leyobiha, vuphukuphuku, vuyivi, vudlayi, vuwosvi, kunavela rifuwo; hi kona kuhumaka lunya, kuxisa, sva tingana, mavondzo, kusandza, kutikulisa ni vuhunguki. Hinkwasvu lesvobiha lesvi, svihuma ndzeni ka mbilu, kutani hi svona lesvinyamisaka munhu.” Loko asuka kolaho, aya tikweni ra Tiro. Kutani anghena ka yin'we ya tiyindlo, hikuva aangalavi lesvaku svitiviwa hi munhu; hambi svilitano angakotangakutifihla. Kutani wansati mun'we lweyi n'wana wa yena wanhwanyana aangheniwile hi moya wa chaka, loko atwile timhaka ta Yesu, ata hi kuhantlisa, akhinsama milengeni ya yena. Wansati lweyi aali wa matiko, wa rixaka ra Vasiro-Fenisa; akombela Yesu lesvaku ahlongola dimoni, rihuma ka n'wana wa yena. Kambe Yesu aku ka yena: “Tshika vana varhanga vaja vaxurha, hikuva asvisasekanga kutekela vana svakuja uhoxela svimbzanyana.” Wansati amuhlamula, aku: “Hosi! Hambi svili svimbzanyana lesvinga hansi ka meza, svaja matlhantlha lawa mawisiwaka hi vana.” Hi loko aku ka yena: “Hikolaho ka rito leri, famba, dimoni rihumile ka n'wana wa wena.” Loko wansati atlhelela kaya, ayakuma n'wana na ayetlele sangwini, ni dimoni rihumile. Loko Yesu avuya hi le tikweni ra Tiro, ahundza hi le Sidoni, akongoma tiva ra Galileya hi kutsemakanya tiko ra Dekapolisi. Kutani vamutisela munhu wa kufa tindleve, wa manghanghamela; vakombela Yesu lesvaku amutlhanteka mavoko. Kuteloko Yesu amususile xitshungwini, amutekela tlhelweni, anghenisa tintiho tindleveni ta yena, apshitela marhi, akhumba ririmi ra yena ha tona; kutani alanguta henhla tilweni, ahefemuteka, aku ka munhu lweyi: “Efata!” Hi lesvaku: “Pfuleka!” Hi loko tindleve ta yena tihantla tipfuleka, na rona ririmi ra yena ritshunxeka, kutani avulavula hi kuwolova. Hi loko Yesu avatshinya lesvaku vangabzeli munhu; kambe, hambi loko avatshinyile makhambi yotala, avasvihangalasa hi matimba. Kutani vanhu vahlamala ngopfu, vaku: “Ayendlile hinkwasvu hi ndlela leyinene; apfula tindleve ta lavangayingisiki ayendla lesvaku na tona timbheveve tikota kuvulavula.” Masikwini wolawo xitshungu lexikulu xitlhela xihlengeletana, kutani axingali na svakuja; hi loko Yesu avitana vajondzisiwa va yena, aku ka vona: “Nitwela vusiwana xitshungu lexi, hikuva sviyendla masiku manharhu na xitshame na mina, kutani axahali na svakuja. Hikolaho loko nixitlhelisela makaya na xili ni ndlala, xitawa ndleleni, hikuva van'we va xona vata hi le kule.” Vajondzisiwa va yena vamuhlamula vaku: “Xingalaveliwa kwihi svakuja lesvi xingajaka xixurha kola mananga ke?” Avavutisa aku: “Mi ni svinkwa svingani ke?” Vaku: “Hi ni ntlhanu wa svinkwa ni svimbirhi.” Hi loko abzela xitshungu lesvaku xitshama hansi, kutani ateka svinkwa lesvi sva ntlhanu ni svimbirhi, akhensa, asvikhemelela, asvinyika vajondzisiwa va yena, lesvaku vayavela xitshungu; hi loko xitshungu xiyaveliwa. Nasvona avali ni svihlampfana svingali svingani; kuteloko akhensile, alerisa lesvaku nasvona sviyaveliwa vanhu. Kutani vaja vaxurha, varholela ni matlhantlha lawa masaleke, matata svirhundzu sva ntlhanu ni svimbirhi; kasi vanhu avalava kuringana mune wa makhulu (4 000) Kutani avatlhelisela makaya. Kutani ahantla anghena bzatsweni ni vajondzisiwa va yena, aya tikweni ra Dalmanuta. Kuhumelela Vafarisi, vasungula kuphikizana na yena, vamuringa hi kukombela xikombiso lexihumaka tilweni. Hi loko Yesu aketa moyeni wa yena aku: “Rixaka leri rikombelela yini xikombiso? Nitiyisile nili ka n'wina: Rixaka leri aringanyikiwi xikombiso!” Kutani avasiya, atlhela anghena bzatsweni, atsemakanya aya ka tlhelo rin'wana. Vajondzisiwa avarivalile kuteka svinkwa, avova ni xinkwa xin'we ntsena bzatsweni. Kutani avalaya, aku: “Tlharihani, michava comela ra Vafarisi, ni comela ra Heroda!” Kutani vaphikizana vaku: “Kumbe hi lesvi hingaliki ni svinkwa.” Kuteloko Yesu asvitwa, aku ka vona: “Hikolaho ka yini miphikizana hi lesvi mingaliki ni svinkwa xana? Amisisvitwa ni kusvitwisisa xana? Xana timbilu ta n'wina taha nonon'hwa ke? Lesvi minga ni mahlo amivoni ke? Lesvi minga ni tindleve, amitwi ha yini-ke? Amitsundzuki xana? Siku leri nikhemeleleke ntlhanu wa svinkwa ninyika lava va ntlhanu wa makhulu (5 000), xana mirhwele svirhundzu svingani lesvi asvitele hi matlhantlha ke?” Vaku ka yena: “Hirhwele khume ni svimbirhi” “Ni siku leri niphameleke lava va mune wa makhulu (4 000) hi ntlhanu wa svinkwa ni svimbirhi, mirhwalile svirhundzu svingani lesvi asvitele hi matlhantlha ke?” Vaku: “Hirhwele ntlhanu ni svimbirhi.” Kutani aku ka vona: “Amisitwisisa ni svosvi-ke?” Vafika Betisayida. Kutani vatisa munhu wa kufa mahlo, vakombela Yesu lesvaku amukhumba. Hi loko akhoma xifamahlo hi voko, axiyisa handle ka xidoropana, axipshitela marhi matihlweni axitlhanteka mavoko, axivutisa aku: “Xana uvona xanchumu ke?” Xona, xitlakusa mahlo, xiku: “Nivona vanhu, nivavona na vafambafamba, vafana ni minsinya.” Yesu atlhela aveka mavoko ya yena matihlweni ya xifamahlo, xona xihonoka kutani xihanyisiwa, xivona svilo hinkwasvu khwatsi. Yesu axibzela lesvaku xifamba, aku: “Ungatshuki utlhelela axidoropanini.” Kutani Yesu asuka ni vajondzisiwa va yena, vaya svidoropanini sva Khezariya wa Filipi. Ndleleni, avutisa vajondzisiwa va yena aku ka vona: “Vanhu vali ni mani xana?” Vona vaku: “Van'wana vali, hi wena Yohani Mukhuvuli; van'wana vali, hi wena Eliya; van'wana vali, u mun'we wa vaprofeta.” Kutani avavutisa aku: “Xana n'wina, mili nimani ke?” Petrosi ahlamula aku ka yena: “Hi wena Kriste.” Hi loko avalaya lesvaku vangatshuki vabzela vanhu, hambi kuvulavula hi yena vanhwini. Kutani Yesu asungula kuvajondzisa aku: “N'wana-wa-Munhu atafanela kutwisiwa kuvaviseka lokukulu, asoliwa hi vakulukumba ni Vaprista lavakulu, ni Vatsali; atadlawa, atlhela apfuka hi siku ra vunharhu.” Avula mhaka leyi rivaleni; kutani Petrosi amutekela tlhelweni, asungula kumutshinya. Kambe Yesu ahundzukula; kuteloko alangutile vajondzisiwa va yena, atshinya Petrosi, aku: “Suka ka mina Sathana, hikuva awuyehleketi sva Xikwembu, uyehleketa sva vanhu ntsena.” Kuteloko avitanile xitshungu ni vajondzisiwa va yena, aku ka vona: “Loko munhu alava kunilandza, aatitshike, atirhwexa xihambanu xa yena, kutani anilandza. Lweyi arhandzaka kutihlayisela vutomi bza yena atalahlekeliwa hi bzona; kambe lweyi alahlekeliwaka hi vutomi bza yena hikolaho ka mina ni hikolaho ka Evhangeli, atabziponisa. Hikolaho, loko munhu akota kufuwa misava hinkwayu, kambe alahlekeliwa hi vutomi bza yena svingamupfuna yini ke? Xana munhu angahumesa yini kuxava vutomi bza yena ke? Lweyi anga ni tingana hikolaho ka mina ni marito ya mina rixakeni leri ra vawosvi ni vajohi, N'wana-wa-Munhu na yena atakhomiwa hi tingana hikolaho ka munhu lweyi siku leri angatavuya akukwetsimeni ka Tatana na ali ni tintsumi letokwetsima.” Atlhela aku ka vona: “Nitiyisile nili ka n'wina: Van'wana ka lava vangakola, ku ni lava vangatakala vangaringi rifu, vangasivona Mfumu wa Xikwembu wufika hi matimba.” Ndzhaku ka ntlhanu wa masiku ni rin'we, Yesu ateka Petrosi na Yakobe na Yohani, aya na vona ntshaveni leyoleha na vali voxe. Kutani avangama mahlweni ka vona; Sviyambalu sva yena svisungula kuvangama, svibasa svinene, kutlula lesvi vahlampsi va laha misaveni vangasvibasisisaka xisvona. Kutani Eliya na Moxe vahumelela ka vona, na vali karhi vavulavula na Yesu. Hi loko Petrosi aku ka Yesu: “Mujondzisi svisasekile loko hili kola; ahiyakeni mintsonga yinharhu, wun'we wa wena, wun'wana wa Moxe, ni wun'wana wa Eliya.” Aangasvitivi lesvaku atavula yini, hikuva avachavile ngopfu. Kutani refu rita ritavafunengeta, kuhuma ni rito arefini leringe: “Lweyi i N'wananga lweyi arhandzekaka; muyingiseni.” Hi nomo-lo, varhalarhala hinkwaku, kambe vangahavoni munhu, loko angali Yesu ntsena. Loko vahaxika hi le ntshaveni, Yesu avalaya aku: “Mingatshukeni mibzela munhu lesvi misvivoneke, N'wana-wa-Munhu angasipfuka kufeni.” Vona vahlayisa mhaka leyi, na vali karhi vavutisana vaku: “Xana i mpsini Kupfuka kufeni?” Kutani vamuvutisa vaku: “Hikolaho ka yini Vatsali vavula lesvaku Eliya afanele kurhanga ata xana?” Avahlamula aku: “Eliya afanele kurhanga ata hakunene, atlhela apfuxeta hinkwasvu; kambe hikolaho ka yini kutsaliwile lesvaku N'wana-wa-Munhu atafanela kutwisiwa kuvaviseka lokukulu, ava asoliwa ke? Ntsena namibzela lesvaku Eliya atile, kutani vamuyendlile hinkwasvu lesvi vasvirhandzeke, hilaha kutsaliweke hakona henhla ka timhaka ta yena.” Kuteloko vafikile ka vajondzisiwa lavan'wana, vakuma xitshungu lexikulu na xivarhendzelile vasala xikarhi, ni Vatsali na vali karhi vaphikizana na vona. Loko xitshungu hinkwaxu xivona Yesu, xihlamala ngopfu, kutani xitsutsuma xiyahlangana na yena, lesvaku xitamuxeweta. Yena axivutisa aku: “I ncini lexi miphikizanaka ni vajondzisiwa ha xona ke?” Mun'we xikarhi ka xitshungu ahlamula aku: “Mujondzisi, nitisile n'wana wa mina ka wena; animoya lowu wumuyendlaka mbheveve. Loko wumukhoma, wamutlatlalata la hansi, atlhutlha khuvi, aphorhela matinyo, kutani awoma svirho; nikombelile vajondzisiwa va wena lesvaku vawuhlongola, kambe vatsandzekile.” Yesu ahlamula, aku: “Ha! Rixaka leringapfumeliki, nitava na n'wina kufika rini? Nitamilehisela mbilu kufika rini ke? Mutiseni halenu!” Kutani vamutisa ka yena. Loko moya wuvona Yesu, wurhurhumelisa n'wana hi matimba, awela hansi, avumbulukela na ali karhi atlhutlha khuvi. Yesu avutisa tatana wa yena, aku: “Xana svimusungulile rini?” Aku: “Kusukela loko ahali ntsongo! Makhambi yotala wumuwisela ndzilweni kumbe matini lesvaku wumudlaya; kambe loko usvikota, hitwele vusiwana uhipfuna.” Yesu aku ka yena: “Uli, ‘loko usvikota’? Hinkwasvu svakoteka ka lweyi apfumelaka.” Tatana wa n'wana ahantla atlakusa rito, aku: “Napfumela! Nipfune kutiyisa vupfumeli bza mina.” Loko Yesu avona lesvaku xitshungu xiya xiyengetelana, akhahla moya wa chaka, aku: “Wena moya lowungavulavuliki, nasvona wungatwiki, nakubzela nilihuma ka n'wana lweyi, ungahatlheli uvuya ka yena ni siku ni rin'we!” Kutani wuhuma na wulikarhi wuhuwelela, wurhurhumelisa n'wana hi matimba, avatani hi lweyi afeke, lavotala vakondza vaku: “Afile.” Kambe Yesu amukhoma hi voko, amupfuxa, kutani ayima. Kuteloko Yesu anghenile ndlwini, vajondzisiwa va yena vamuvutisa na vali tlhelweni vaku: “Xana hina hitsandzekile ha yini kuhlongola moya lowu ke?” Aku ka vona: “Arixaka leri ra moya wotanu arikoti kuhuma loko kungali hi kukhongela ntsena.” Loko vasuka kolaho, vatsemakanya Galileya, kambe Yesu aangalavi lesvaku svitiviwa hi munhu; hikuva aajondzisa vajondzisiwa va yena, kutani aku ka vona: “N'wana-wa-Munhu atanyiketiwa svosvi mavokweni ya vanhu. Vatamudlaya; loko vamudlayile, atapfuka kufeni hi siku ra vunharhu.” Kambe avatwisisanga marito lawa, nasvona avachava kumuvutisa. Vafika Kapernawume. Loko Yesu anghenile ndlwini, avutisa vajondzisiwa aku: “Amiphikizana hi mhaka yihi laha ndleleni xana?” Kambe vamiyela, hikuva ndleleni avaphikizana hi mhaka yaku lweyi nkulu ka vona i mani. Kuteloko Yesu atshamile hansi, avitana lava va khume ni vambirhi, aku ka vona: “Loko mun'we arhandza kuva lweyi worhanga, aave lweyi wogamesa ka hinkwavu, ava xitirhi xa hinkwavu.” Kutani ateka ntsongwana, amuyimisa xikarhi ka vona; kuteloko amuvukarhile mavokweni, aku ka vona: “Lweyi ayamukelaka mun'we wa vatsongwana lava hi vito ra mina, ayamukela mina; ni lweyi aniyamukelaka, angayamukeli mina ntsena, kambe ayamukela ni lweyi anirhumeke.” Kutani Yohani amubzela aku: “Mujondzisi, hivonile mun'we lweyi angaliki wa hina, ahlongola madimoni hi vito ra wena, kutani himutsimbisile hikuva ahi mun'we wa hina.” Kambe Yesu aku: “Mingatshukeni mimusivela, hikuva aku na munhu lweyi angavulaka svobiha hi mina, ni kuyendla mahlori hi vito ra mina. Lweyi angalwiki na hina, ayima na hina. Nitiyisile nili ka n'wina: Munhu lweyi aminyikaka ndzheko wa mati hi lesvi mivuliwaka va ka Kriste, angakala angapfumali hakelo ya yena. “Lweyi akhunguvanyisaka mun'we wa lavatsongo lavapfumelaka ka mina, svingayampsa loko aboheleliwa ribze ra kusilela ka rona nhan'wini, ahoxiwa lwandle. Loko voko ra wena rikukhunguvanyisa, ritseme; svingayampsa loko unghena vuton'wini na uli xilima, kutlula kuya Tiheleni, ndzilweni lowungatimekiki, na uli ni mavoko mambirhi. [ Axivandleni xoxo, ‘xivungwana lexi xivajaka axifi, ni ndzilo awutimeki.’] Ni loko nenge wa wena wuku khunguvanyisa, wutseme; svingayampsa loko unghena vuton'wini na uli karhi ukhwita, kutlula kuhoxiwa Tiheleni na uli ni milenge yimbirhi. Axivandleni xoxo, ‘xivungwana lexi xivajaka axifi, ni ndzilo awutimeki.’ Ni loko tihlo ra wena rikukhunguvanyisa, rixokole; svingayampsa loko unghena Mfun'wini wa Xikwembu ufe tihlo rin'we, kutlula kuhoxiwa Tiheleni na uli ni mahlo mambirhi. Axivandleni xoxo, ‘xivungwana lexi xivajaka axifi, ni ndzilo awutimeki.’ “mun'wana ni mun'wana atalungiwa hi ndzilo, kufana ni timhamba leticheliwaka munyu. “Munyu i xilo lexinandzihaka; kambe loko munyu wupshama, mitawupfuxeta ha yini ke? Vanani munyu ha n'wexe, mihanya hi kurhula ni van'wana.” Loko Yesu asukile kolaho, aya tikweni ra Yudeya ka tlhelo rin'wana ra Yordani. Xitshungu xitlhela xitahlengeletana ka yena; kutani ayamahlweni axijondzisa, hilaha aatolovela kuyendla hakona. Kutani Vafarisi vata ka yena, kutamuvutisa hi kumuringa, vaku: “Xana wanuna wapfumeleliwa kutshika nsati wa yena ke?” Na yena avavutisa aku: “Moxe amibzelile yini xana?” Vaku: “Moxe asvipfumelelile lesvaku kutsaliwa papela ra kumutshika, ni kumuhlongola.” Yesu avahlamula aku: “Moxe amitsalele nawu lowu hikolaho ka kunonon'hwa ka timbilu ta n'wina. Kambe kusunguleni ka ntumbuluku, ‘Xikwembu xiyendlile munhu waxinuna ni waxisati. Hikolaho wanuna atasuka ka tatana wa yena ni ka mamana wa yena, anamarhela nsati wa yena; kutani lavambirhi vatava nyama yin'we ntsena.’ Svivula lesvaku avahali vambirhi kambe i nyama yin'we ntsena. Hikolaho, lesvi Xikwembu xisvihlanganiseke, svingatshuki svihambanyisiwa hi munhu!” Loko vatlhelele ndlwini, vajondzisiwa vatlhela vavutisisa Yesu hi mhaka leyi. Yena aku ka vona: “Lweyi atshikaka nsati wa yena ayateka mun'wana, wawosva, nasvona ajohela nsati wa yena.” Na yena wansati, loko atshika nuna wa yena ayatekiwa hi mun'wana, wawosva. Vanhu van'wana vatisa vatsongwana ka Yesu lesvaku avatlhanteka mavoko; kambe vajondzisiwa vavayalisa. Loko Yesu asvivona, avilela ngopfu, aku ka vona: “Tshikani vatsongwana vata ka mina, mingatshukeni mivasivela, hikuva Mfumu wa Xikwembu i wa lavafanaka na vona. Nitiyisile nili ka n'wina: Lweyi angayamukeliki Mfumu wa Xikwembu tani hi ntsongwana, angakala angangheni ka wona.” Kuteloko avukarhile vatsongwana, avatlhanteka mavoko, avakatekisa. Kuteloko Yesu ahumile ni kukhoma ndlela, munhu mun'wana ata ka yena hi kutsutsuma, afika awa, akhinsama mahlweni ka yena, amuvutisa aku: “Mujondzisi lwenene, ningayendla yini lesvaku nitaja rifuwo ra vutomi lebzingaheliki?” Yesu aku ka yena: “Univitanela yini lwenene xana? Aku na lwenene, loko kungali Xikwembu ntsena. Wena wayitiva Milawu leyinge: ‘Ungatshuki udlaya, ungatshuki uwosva, ungatshuki uyiva, ungatshuki uveka vumboni bzohemba, ungakanganyisi van'wana, uva ni xichavu ka tatana wa wena ni ka mamana wa wena.’” Yena ahlamula, aku ka yena: “Mujondzisi, hinkwasvu lesvi nisvihlayisile kusukela avutsongwanini bza mina.” Kuteloko Yesu amulangutile, amurhandza, kutani aku ka yena: “Wahapfumala xilo xin'we ntsena; famba, uyaxavisa hinkwasvu lesvi unga na svona, unyika svisiwana, kutani utava ni rifuwo tilweni; ndzhaku ka lesvo, tana unilandza.” Kambe jaha leriya riboha mombo hi kutwa marito lawa, rifamba na rikwatile, hikuva ari ni rifuwo lerotala. Kutani Yesu alanguta hinkwaku, aku ka vajondzisiwa va yena: “Svitanonon'hwa ngopfu aka lavanga ni rifuwo kunghena Mfun'wini wa Xikwembu.” Vajondzisiwa vahlamala svinene hi marito ya yena. Kambe Yesu atlhela aku ka vona: “Vanakulorhi, svinonon'hwa ngopfu kunghena Mfun'wini wa Xikwembu. Svavevuka ka kamela kunghena hi mbhovo wa nayithi, kutlula xipfundzi kunghena Mfun'wini wa Xikwembu.” Kutani kuhlamala ka vona kuyengeteleka; vavutisana, vaku: “Loko svilitano, kungapona mani xana?” Yesu avalanguta aku: “Loko vali vanhu svavatsandza, kambe asvitsandzi Xikwembu, hikuva Xikwembu xikota hinkwasvu.” Kutani Petrosi aku ka Yesu: “Wasvivo, hina hitshikile hinkwasvu, hi kulandza.” Yesu aku: “Nitiyisile nili ka n'wina: Mun'wana ni mun'wana lweyi atshikeke munti wa yena, kumbe makwavu waxinuna kumbe waxisati, kumbe mamana wa yena, kumbe tatana wa yena, kumbe vana, kumbe masimu, hikolaho ka mina ni hikolaho ka Evhangeli, atanyikiwa svilo lesvi, ka dzana (100) minkarhini ya svosvi: Hi lesvaku tiyindlo, ni vamakwavu, ni vamamana ni vana ni masimu, svin'we ni kuxaniseka; kutani minkarhini leyitaka, atanyikiwa vutomi lebzingaheliki. Kambe vanyingi lava vanga le mahlweni vatava vakugumesa, ni vakugumesa vatava valemahlweni.” Loko vahali ndleleni, na vali karhi vatlhantukela Yerusalema Yesu aavarhangele mahlweni; vajondzisiwa avahlamala; ni vanhu lava avavalandzelela, na vachava; kutani atlhela avitana lava va khume ni vambirhi hi tlhelo, avativisa lesvingatamuhumelela, aku: “Vonani, hitlhantukela Yerusalema kutani N'wana-wa-Munhu atanyiketiwa ka Vaprista lavakulu ni ka Vatsali; vatamuyavanyisela rifu ni kumunyiketa ka vamatiko; vatatlanga hi yena, vamupshitela, vamuba hi tinhonga, vamudlaya; kutani ndzhaku ka masiku manharhu atapfuka kufeni.” Yakobe na Yohani, vana va Zebedewu, vata ka yena, vaku: “Mujondzisi, hirhandza lesvaku uhiyendlela lesvi hingatakukombela svona.” Aku ka vona: “Milava lesvaku nimiyendlela yini xana?” Vaku ka yena: “Hikombela lesvaku, uhinyika kutshama Mfun'wini wa wena lowokwetsima, mun'we vokweni ra wena ra xinene, mun'wana ka leri ra ximantsi.” Yesu aku ka vona: “Amixitivi lexi mixikombelaka. Xana mingasvikota kunwa andzhekweni lowu ninwelaka ka wona, ni kukhuvuliwa hi nkhuvulo lowu ni khuvuliwaka ha wona ke?” Vaku ka yena: “Hingasvikota.” Yesu aku ka vona: “Kunene mitanwa ka ndzheko lowu ninwelaka ka wona, mitakhuvuliwa hi kukhuvula loku nikhuvuliwaka hakona; kambe loko kuli kutshama vokweni ra mina ra xinene, hambi ka leri ra ximantsi, ahi mina ningaminyikaka svona, kambe svitava sva lava svilungiseliweke vona.” Kutani lava va khume, loko vatwa mhaka leyi, vahlundzukela Yakobe na Yohani. Hi loko Yesu avavitana aku ka vona: “Masvitiva lesvaku lavativulaka tihosi ta matiko vamafuma hi matimba; na vona vakulukumba vamatiko lawa vamafuma hi matimba. Kambe svingatshuki sviva tano xikarhi ka n'wina; mun'wana ni mun'wana lweyi alavaka kuva lwenkulu xikarhi ka n'wina aave xitirhi xa n'wina; na svona, mun'wana ni mun'wana lweyi alavaka kuva wa le mahlweni xikarhi ka n'wina aave xikarawa xa hinkwavu; hikuva na yena N'wana-wa-Munhu, angatelanga kutatirheliwa, kambe kutirhela van'wana ni kunyiketa vutomi bza yena kuponisa lavotala.” Vafika Yeriko. Kaku loko ahuma Yeriko, svin'we ni vajondzisiwa va yena, ni xitshungu lexikulu, Bartimeya wa xifamahlo, mukombeli, n'wana Timewu, aatshamile kusuhi ni ndlela, na ali karhi akombela. Loko atwa lesvaku i Yesu wa Nazareta lweyi ataka, asungula kuhuwelela, aku: “Yesu N'wana Davhida, nitwele vusiwana!” Lavotala vamutshinya lesvaku amiyela; kambe yena atlhela ahuwelela, aku: “N'wana Davhida, nitwele vusiwana!” Kutani Yesu ayima, aku: “Muvitaneni!” Vavitana lweyi wa xifamahlo, vaku ka yena: “Tiyisa mbilu, pfuka uyima, Yesu wakuvitana.” Hi loko acukumeta jansi ra yena atlula, ata ka Yesu. Kutani Yesu amuvutisa aku: “Ulava yini? Ningakupfuna hi yini?” Lweyi wa xifamahlo aku ka yena: “Mufundhisi, ninavela kutlhela nivona!” Yesu aku ka yena: “Famba, kupfumela ka wena kukuhanyisile.” Hi nomo-lo atlhela avona, kutani alandza Yesu. Loko vatshinelela Yerusalema ni le svidoropanini sva Betfaxje na Betaniya, kusuhi ni Ntshava ya Maolivhera, Yesu ahlawula vambirhi xikarhi ka vajondzisiwa va yena, avarhuma, aku: “Yanani axidoropanini lexi xivonekaka lahaya, kutani loko minghena ka xona, mitakuma ximbongolwana lexibohiweke, lexingasiki gadiwa hi munhu; xitlhantlheni, mita na xona halenu. Loko munhu amivutisa aku: ‘Miyendlela yini svosvo?’, mitaku: ‘Hosi yaxilava; yitaxivuyisa svosvi.’” Kutani vafamba, vayakuma ximbongolwana xilihandle, xibohiwile nyangweni kusuhi ni ndlela, kutani vaxitlhantlha. Van'we ka lava avayimile kolaho, vaku ka vona: “Mitlhantlhela yini ximbongolwana xoxo ke?” Vona vavahlamula hilaha Yesu angavula hakona, kutani vavatshika. Vata ni ximbongolwana ka Yesu, kutani vakapeka tinguvu ta vona henhla ka xona, Yesu axigada. Vanhu lavanyingi vayandlala tinguvu ta vona ndleleni, van'wana vatshova svigajani, lesvinga ni matluka sva le nhoveni, vayandlala ndleleni Lava varhangeke mahlweni, ni lavalandzelaka hi le ndzhaku, vahuwelela, vaku: “Hozana! Akudzunisiwe lweyi ataka hi vito ra Hosi! Akudzunisiwe Mfumu wa tatana wa hina Davhida lowutaka ka hina! Hozana matilweni lamanga henhlahenhla!” Yesu afika Yerusalema ayanghena Tempeleni, arhendzeleka na ali karhi avona hinkwasvu; kambe lesvi jambu aripelile, ahuma, aya Betaniya ni lava va khume ni vambirhi. Hi siku leritlhantamaka loko vavuya hi le Betaniya, atwa ndlala. Kutani avona nkuwa lowunga ni matluka na ahali kulenyana; ahambuka kuyakamba kumbexana angakuma xanchumu ka wona, kambe loko afika kona, angakumanga nchumu, loko mangali matluka ntsena, hikuva awungali nkarhi wa makuwa. Kutani aku ka nsinya lowu: “Akungahavi na munhu lweyi angataja mihandzu ya wena ni siku ni rin'we!” Vajondzisiwa va yena avali karhi vasvitwa. Kutani vafika Yerusalema. Kuteloko anghenile Tempeleni, ahlongola lava vaxavisaka ni lava vaxavaka kona, awisetela mimeza ya lavabindzulisaka male, ni svitshamu sva lava vaxavisaka svituvana. Nasvona, angapfumelelanga munhu kutsemakanya Tempeleni, na arhwele xanchumu. Kutani avajondzisa, aku: “Xana akutsaliwanga lesvaku:” “‘Yindlo ya mina yitavuliwa yindlo ya xikhongelo ka matiko hinkwawu’ xana? Kasi n'wina miyiyendlile ‘mhakwa wa vayivi’. ” Vaprista lavakulu ni Vatsali vasvitwa, kutani valava tindlela leti vangamudlayaka ha tona; hikuva avamuchava, hi lesvi xitshungu hinkwaxu axihlamala kujondzisa ka yena. Kutani loko ripelile, Yesu ni vajondzisiwa va yena vahuma doropeni. Nimixo loko vahundza hi kolaho, vavona nkuwa wolowo wuwomile kusukela timintsweni. Petrosi atsundzuka lesvihumeleleke, aku ka Yesu: “Mufundhisi, vona, nkuwa lowu ungawu rhuketela wuwomile.” Yesu avahlamula, aku: “Vanani ni kupfumela ka Xikwembu! Nitiyisile nili ka n'wina: Loko munhu aku ka ntshava leyi: ‘Suka, uyatihoxa lwandle’ na angakanakani mbilwini ya yena, kambe apfumela lesvaku lesvi asvivulaka svitayendleka, atayendleliwa svona. Hikolaho nili ka n'wina: Hinkwasvu lesvi misvikombelaka hi kukhongela, pfumelani lesvaku minyikiwile svona, kutani mitayendleliwa svona. Loko mili karhi mikhongela, rivalelani lweyi mingavaka ni mhaka na yena, lesvaku na yena Tatana wa n'wina lweyi anga matilweni, amirivalela svijoho sva n'wina.” [ “Hikuva loko mingarivaleli van'wana, Tatana wa n'wina lweyi anga matilweni na yena angakala angami rivaleli svijoho sva n'wina!”] Kutani vatlhela vavuyela Yerusalema; kakuloko Yesu ali karhi afambafamba ndzeni ka Tempele, Vaprista lavakulu ni Vatsali ni vakulukumba vata ka yena vaku: “Xana uyendla svilo lesvi hi matimba wahi ke? Xana i mani lweyi angakunyika matimba ya kuyendla svilo lesvi ke?” Yesu avahlamula aku: “Nitamivutisa xivutiso xin'we; loko minihlamula xona, hi kona na mina ningatamibzela lomu mahumaka kona matimba lawa nitirhaka ha wona. Xana ankhuvulo wa Yohani awuhuma tilweni, kumbe ka vanhu ke? Nihlamuleni.” Vona vaphikizana vaku: “Loko hiku: ‘Awuhuma tilweni’, Ataku: ‘Loko svilitano, hikolaho ka yini mingapfumelanga ka yena ke?’ Kambe loko hiku: ‘Awuhuma ka vanhu’... (Hichava xitshungu; hikuva hinkwavu vakholwa lesvaku Yohani aali muprofeta wa xiviri.)” Kutani vahlamula Yesu, vaku: “Ahisvitivi.” Hi loko Yesu aku ka vona: “Na mina aningamibzeli lomu mahumaka kona matimba lawa nitirhaka ha wona.” Yesu avulavula na vona hi svifaniso, aku: “Munhu wokarhi aabzalile mimvhinya nsin'wini ya yena, ayibiyela hi rihlampfu, acela xifukelo xa mawuvha, ayaka ni yindlo ya le henhla yolavelela ka yona; kutani nsimu leyo “ayilugarisa” ka varimi, yena ateka riyendzo afamba.” Hi nkarhi wakona, arhuma mutirhi ka “valugari” va nsimu, lesvaku ayateka mihandzu ya mvhinya ka vona. Kambe vona vamukhoma, vamuba, kutani vamutlhelisa na angali na nchumu. Atlhela arhuma mutirhi mun'wana; lweyi yena, vayomukhehla nhloko, vamurhuketela. Atlhela arhuma mun'wanyana; yena, vamukhoma vamudlaya. Arhuma van'wana lavotala; kubiwa van'we, van'wana vadlawa. Aasale ni mun'we ntsena, anga n'wana wa yena lweyi arhandzekaka; kutani amurhuma kuya ka vona na ali yena wogamesa, aku: “Vatachava n'wana wa mina.” Kambe vatirhi vabzelana vaku: “Majandzhaka hi lweyi; tanani himudlaya, rifuwo ritava ra hina.” Kutani vamukhoma, vamudlaya, vamucukumeta handle ka nsimu ya mimvhinya. Xana n'winyi wa nsimu atayendla yini ke? Atata, atalovisa “valugari” lava, kutani nsimu ya mvhinya, “atayilugarisela” van'wana. Xana amisitshama mihlaya tsalwa leringe: “‘Ribze leri vayaki vangariyala, hi rona leringayendliwa ribze lerikulu rotiyisa ha rona’ ke? ‘Svilo lesvi sviyendliwile hi Hosi, i mhaka leyihlamalisaka loko hiyivona!’” Avanavela kumukhoma, hikuva avasvitwile lesvaku aavula vona hi xifaniso lexi; kambe avachava xitshungu, kutani vamutshika, vahangalaka. Vafarisi ni va ntlawa wa Heroda varhuma van'we va vona ka Yesu, lesvaku vayamuphasa hi xivutiso. Kutani vata, vataku ka yena: “Mujondzisi, hasvitiva lesvaku uvula ntiyiso, ni lesvaku awulandzeleli sva vanhu, hikuva awuyi hi nghohe, kambe ujondzisa ndlela ya Xikwembu hi ntiyiso. Xana svafanela kuhumesela Khezari rhesa, kumbe asvifaneli ke? Xana hihumesa, kumbe hingahumesi ke?” Kambe Yesu, hi kutiva vukanganyisi bza vona, aku ka vona: “Miniringela yini? Ninyiketeni denari nirivona.” Vamunyika. Kutani aku ka vona: “Xifaniso lexi i xa mani ke? Ni vito leri i ra mani ke?” Vona vaku: “I sva Khezari.” Hi loko Yesu aku: “Nyikani Khezari lesvi svinga sva Khezari, ni Xikwembu lesvi svinga sva Xikwembu.” Kutani vahlamala ngopfu hi kuhlamula ka yena. Vasaduki avavula lesvaku aku na kupfuka ka vafi. Siku rin'wana, van'we va vona vata ka Yesu, vafika va muvutisa vaku: “Mujondzisi, Moxe ahitsalele lesvi: ‘Loko munhu afa asiya nsati, kambe angasiva ni n'wana, makwavu atahlayisa nsati wa mufi, apfuxa njangu wa makwavu.’ Kutani mhaka hi leyi: Akuli ni vamakwavu vaxinuna va ntlhanu ni vambirhi; lweyi wa nkulu ka vona ateka nsati, kutani afa, angasiva ni vana. Lweyi wa vumbirhi ahlayisa nsati wa mufi, kutani na yena afa angasiva ni vana; ni lweyi wa vunharhu sviva tano. Hinkwavu va ntlhanu ni vambirhi vafa vangasiva ni vana. Ndzhaku ka vona hinkwavu, lweyi wansati na yena afa. Lesvi lava va ntlhanu ni vambirhi hinkwavu vaveke vanuna va lweyi wansati, xana atava nsati wa mani xikarhi ka vona, loko vapfuka hi siku ra kupfuka ka vafi, ke?” Yesu avahlamula aku: “Milahlekile ngopfu, hikuva amitivi Matsalwa ni matimba ya Xikwembu! Loko vanhu vapfuka kufeni, avahateki, hambi kuli kutekiwa, kambe vafana ni tintsumi ta le matilweni. Loko vali vafi ni kupfuka ka vona, xana amihlayanga ta vona bukwini ra Moxe ke? Loko Xikwembu xivulavule na yena xihlahleni, xite: ‘Hi mina Xikwembu xa Abrahamu, ni Xikwembu xa Izaki, ni Xikwembu xa Yakobe!’ Xona ahi Xikwembu xa vafi, kambe i Xikwembu xa lavahanyaka. Hikolaho milahlekile ngopfu.” Mun'we wa Vatsali atshinela kolaho, avatwa na vali karhi vaphikizana; kutani loko avona lesvaku Yesu avahlamulile khwatsi, amuvutisa aku: “Nawu lowu worhanga ka milawu hinkwayu hi wihi xana?” Yesu amuhlamula, aku: “Nawu lowu worhanga hi lowu unge: ‘Yingisa Israyele, Hosi Xikwembu xa wena i Hosi yili yoxe, aku na yin'wana. Rhandza Hosi Xikwembu xa wena hi mbilu ya wena hinkwayu, ni moya wa wena hinkwawu, ni kuyanakanya ka wena hinkwaku, ni matimba ya wena hinkwawu.’ Nawu wa vumbirhi hi lowu wunge: ‘Rhandza munhukuloni, kufana ni loko utirhandza.’ Aku na Nawu wun'wana lowutlulaka milawu yoleyo.” Mutsali aku ka yena: “Hi svona Mujondzisi, uvule ntiyiso loko uku: ‘Hosi Xikwembu i Hosi yili yoxe’ ni lesvaku: ‘Aku na yin'wana handle ka yona.’ Loko kuli ‘kurhandza Hosi Xikwembu hi mbilu hinkwayu, ni kuyanakanya hinkwaku, ni matimba hinkwawu’, svin'we ni ‘kurhandza munhukuloni, kufana ni loko munhu atirhandza’, svitlula timhamba hinkwatu leti tihisiwaka ni mimphahlo hinkwayu.” Loko Yesu avona lesvaku mutsali ahlamule hi kutlhariha, aku ka yena: “Awule kule ni Mfumu wa Xikwembu.” Kutani akahavanga na munhu lweyi angatiya nhlana kumuvutisa xokarhi. Loko Yesu ali karhi ajondzisa Tempeleni, avutisa vanhu aku: “Vatsali vasvikotisa kuyini kuvula, vaku: ‘Mesiya i n'wana Davhida’ ke?” Kasi yena Davhida avulile hi Moya Lowokwetsima, aku: “‘Hosi Xikwembu xite ka N'winyi wanga: Tana utatshama vokweni ra mina ra xinene, nikondza niveka valala va wena hansi ka minkondzo ya wena.’ “Kutani loko Davhida avula Mesiya aku i N'winyi wa yena, xana angava n'wana wa yena hi ndlela yihi ke?” Kutani xitshungu lexikulu aximuyingisa hi kutsaka. Yesu loko ali karhi avajondzisa, avabzela lesvi: “Tivoneleni ka Vatsali lavarhandzaka kufambafamba, vayambale sviyambalu lesvoleha, varhandza ni kuxewetiwa amitsendzeleni; vahlawula svitshamu lesvinene masinagogeni, vatsakela ni kutshama lomu kochaviseka aminkhubzeni. Hi vona lava vakanganyisaka aminjangweni ya vafelakazi, na vatichavelela hi kuyendla svikhongelo lesvoleha lesvaku vatavoniwa. Vatayavanyisiwa hi kuyavanyisa loku kutlulisaka.” Yesu aatshamile kusuhi ni xibza xanhlengo wa Tempele, alanguta hilaha vanhu vahoxaka male axibzeni hakona; svipfundzi lesvotala asvihoxa male leyotala. Kutani mufelakazi lweyi aali xisiwana, ahoxa svimalana svimbirhi sva nsimbi lesvilavaka kuringana “sentavhu” yin'we ntsena. Yesu avitana vajondzisiwa va yena, aku ka vona: “Nitiyisile nili ka n'wina: Mufelakazi lweyi wa xisiwana ahumesile kutlula hinkwavu lavangahoxa male axibzeni xanhlengo, hikuva hinkwavu vahumesile hi kupambula ka lesvotala sva vona, kasi wansati lweyi ahumesile hinkwasvu lesvi aali na svona avusiwaneni bza yena svinga hinkwasvu lesvi aatatihanyisa ha svona.” Loko Yesu ahakuhuma Tempeleni, mun'we wa vajondzisiwa va yena aku ka yena: “Mujondzisi, languta kukula ni kuhlamalisa ka maribze lawa ni ka svilawu lesvi!” Yesu amuhlamula aku: “Xana wa svivona svilawu lesvikulu lesvi ke? Akungasali ribze henhla ka ribze rin'wana; hinkwawu matahirimuxiwa.” Kuteloko atshamile ntshaveni ya Maolivhera alangutane ni Tempele, Petrosi na Yakobe svin'we na Yohani na Andreya, vamuvutisa tlhelweni vaku: “Hibzele, xana timhaka leti titahumelela rini xana? Ni xikombiso xitava xihi xa lesvaku hinkwasvu lesvi, svi le kusuhi ni kuhumelela ke?” Hi loko Yesu asungula kuvajondzisa aku: “Tivoneleni lesvaku mingatshukeni mixisiwa hi munhu. Lavotala vatata hi vito ra mina, mun'wana ni mun'wana aku: ‘Mina ni yena’, kutani vatakanganyisa lavotala. Kutaku loko mintwa hi tinyimpi ni mahungundlela ya tinyimpi, mingachaveni, hikuva svosvo svifanela kuhumelela; kambe ahi wona makumu. Tiko rin'wana ritapfukela tiko rin'wanyana, mfumu wun'wana wutalwa ni mfumu wun'wanyana; kutsekatseka ka misava kutava kona matlhelweni lawa yotala, ni tindlala titava kona. Svosvo i masungulu ya tinxaniso. “Loko kuli n'wina, tivoneleni; vataminyiketa ka tihuvu ta vuthethisi; mitabiwa masinagogeni, mitayimisiwa mahlweni ka tindhuna ni tihosi hikolaho ka mina, lesvaku mitava timboni ka vona. Kambe Evhangeli yifanele kurhanga yitwalisiwa matikweni hinkwawu. Kutani siku vangatamikhoma, vamiyisa kuthethisiweni, mingatshukeni mivilela hi lesvi mingatavula svona, kambe vulani lesvi mingatanyikiwa svona nkarhini wolowo, hikuva ahi n'wina mingatavulavula, kambe i Moya Lowokwetsima. “Makwavu atanyiketa makwavu kudlaweni, tatana atayendlisa svosvo ka n'wana wa yena; ni vana vatapfukela vapsali va vona, vavadlaya. Mitavengiwa hi vanhu hinkwavu hikolaho ka vito ra mina, kambe lweyi atiyiselaka kufika makumu hi yena lweyi angataponisiwa. “Kutaku loko mivona ‘xilo xa manyala lexiwonhetelaka’ xililaha xingafaneliki kuva kona lweyi ahlayaka aatwisise, nkarhini wolowo, lava vanga Yudeya avatsutsumele tintshaveni; lweyi angahenhla ka yindlo angatshuki axika kuyanghena ndlwini ayateka xanchumu kona; lweyi anga masin'wini, angatshuki atlhelela kaya kuyateka mpahla ya yena. Vatava ni khombo vavasati lavatikeke ni lavanyan'wisaka minkarhini yoleyo. Khongelani lesvaku svilo lesvi svingahumeleli hi vuxika. Hikuva minkarhini yoleyo, kutava ni nhlomulu lowungasiki tshama wuhumelela, kusukela loko Xikwembu xitumbuluxile misava ni hinkwasvu, kutakala namuntlha; nasvona nhlomulu lowu wotanu wungakala wungahavi kona. Loko Hosi ayingahungutanga masiku wolawo, akungatapona munhu ni mun'we; kambe yimahungutile hi mhaka ya vahlawuliwa va yona. “Nkarhini wolowo, loko munhu amibzela aku: ‘Vonani, Kriste hi lweyi’, kumbe: ‘Hilwiya’, mingatshukeni mipfumela; hikuva kutahumelela va Kriste va mavunhwa, ni vaprofeta va mavunhwa; vatayendla mahlori ni svihlamaliso kuhambukisa na vona vahlawuliwa va Xikwembu, loko svikoteka. Kambe loko kuli n'wina, tlharihani! Nimibzelile hinkwasvu svingasina humelela. “Ndzhaku ka masiku wolawo ya nhlomulu, ” “‘jambu ritahundzuka ra ntima, ni n'weti awungahavoningi; tinyeleti titawa hi le tilweni, ni mintamu leyi yinga le tilweni yitatsekatseka.’” “Hikona vangatavona N'wana-wa-Munhu ata hi marefu, na ali ni matimba lamakulu ni kukwetsima. Kutani atarhuma tintsumi ta yena kutahlengeleta vahlawuliwa va yena; vatahuma ka mimoya ya mune wa matlhelo ya misava, kusukela magemetamusi ya misava kuyafika magemetamusi ya tilo. “Jondzani lesvi hi nkuwa: Loko marhavi ya wona masungula kuwolova ni loko matluka ya wona mahluka, mitiva lesvaku malanga malekusuhi. Hi mukhuva wolowo, loko mivona svilo svosvo svihumelela, tivani lesvaku nkarhi wu le kusuhi, wu le nyangweni. Nitiyisile nili ka n'wina: Vanhu va nguva leyi vangakala vangahundzi, kungasihumelela svilo lesvi hinkwasvu. Tilo ni misava svitahundza, kambe marito ya mina mangakala mangahundzi. “Loko rili siku rakona ni nkarhi wakona, aku na lweyi asvitivaka, hambi tili tintsumi ta le tilweni, hambi ali N'wana; svitiviwa hi Tatana ntsena. Tlharihani, lavelelani, hikuva amitivi lesvaku nkarhi wutafika rini. Svifana ni munhu loko ayendza, asuka muntini wa yena, asiyile hinkwasvu mavokweni ya svitirhi sva yena, xin'wana ni xin'wana ntirhweni wa xona, abzela ni murindzi wa nyangwa lesvaku alavelela. Laveleleni ke, hikuva amitivi nkarhi lowu n'winyi wa munti angatata ha wona; kungava nimajambu, kumbe nivusiku lebzikulu, kumbe loko nkuku wuyimba, kumbe ni mixo; lesvaku loko afika hi xitshuketa, angatamikuma na miyetlele. Kutani lesvi nimibzelaka svona, nibzela hinkwenu, nili: Lavelelani!” Akuyosala masiku mambirhi, kungasifika nkhuvu wa Paska ni wa xinkwa xokala comela; kutani Vaprista lavakulu ni Vatsali avalava ndlela yokhoma Yesu ha yona hi vutlhari lesvaku vatamudlaya. Kambe avaku: “Svingayendliwi nkhubzeni, hikuva kungatshuka kupfuka dzolonga xikarhi ka vanhu.” Yesu aali Betaniya, muntini wa Simoni lweyi wa nhlokonho; loko atshamile svakujeni, kuta wansati lweyi aali ni ximbitana xa alabaxtru xotala hi mafurha yonun'hwela yodura ngopfu, lawa mayendliweke hi nsinya wa narda lowunene. Hi loko wansati lweyi afaya ximbitani, achela mafurha nhlokweni ya Yesu. Van'we vavilela svinene vaku: “Mafurha lawa mahalateliwela yini ke? Kuve amataxavisiwa hi tidenari letitlulaka 300; male yakona ayitanyikiwa svisiwana!” Kutani vamuholovela. Kambe Yesu aku: “Mutshikeni, mimukarhatela yini? Aniyendlele ntirho lowunene. Loko svili svisiwana, mina svona masiku hinkwawu, kutani mitakota kusviyendlela lesvinene, siku leri misvirhandzaka; kasi nkarhi wa mina wotshama na n'wina wahela svosvi. Wansati lweyi ayendlile lesvi asvikoteke, atotile miri wa mina hi mafurha ningasilahliwa sirheni. Nitiyisile nili ka n'wina: Misaveni hinkwayu laha Evhangeli leyi yingatatwalisiwa kona, lesvi angasviyendla svitavuliwa na svona, ayanakanyiwa ha svona.” Kutani Yudasi Iskariyota, mun'we wa lava va khume ni vambirhi, aya ka Vaprista lavakulu kuyava nyiketa Yesu. Loko vamuyingisile, vatsaka; vamutshembisa male; kutani alava nkarhi lowunene wa kuvanyiketa yena. Hi siku rorhanga ra nkhuvu wa xinkwa xokala comela, ringa leri vatlhavaka svinyempfana sva Paska ha rona, vajondzisiwa va yena vamuvutisa vaku: “Xana ulava lesvaku hiyakulungisela kwihi, laha ungatajela kona Paska ke?” Hi loko arhuma vajondzisiwa va yena vambirhi, aku ka vona: “Yanani doropeni, mitahlangana ni wanuna lweyi apakatseke khuwana ra mati: Mulandzeni. Laha anghenaka kona, mitaku ka n'winyi wa munti: ‘Mujondzisi ali, xikwihi xilawu lexi angatajela ka xona Paska, na ali ni vajondzisiwa va yena xana?’ Yena atamikomba xilawu lexikulu axitezini lexi xinga ni svigotso, xilulameke; mitalungisela kona.” Kutani vajondzisiwa va yena vasuka, vayafika doropeni, vakuma svili hilaha angavabzela hakona; kutani valungisa Paska. Loko jambu ripelile, Yesu afika ni lava va khume ni vambirhi. Kuteloko vatshamile, vali karhi vaja, Yesu aku: “Nitiyisile nili ka n'wina: Mun'we wa n'wina lweyi ajaka na mina atanixenga.” Kutani vasungula kuxukuvala vamuvutisa ha mun'we mun'we vaku: “Xana angava mina?” Ahlamula aku: “I mun'we wa n'wina va khume ni vambirhi, lweyi ajaka na mina nkambaneni. Loko ali N'wana-wa-Munhu, atatifambela hilaha kutsaliweke hakona mayelanu na yena; kambe a ni khombo munhu lweyi N'wana-wa-Munhu axengiwaka ha yena! Asvitayampsa ka munhu yelweyo loko angapsaliwanga.” Loko vahali kujeni, ateka xinkwa, kutani loko akhensile, akhema, anyika vajondzisiwa, aku: “Tekani; lesvi i miri wa mina.” Kutani ateka ndzheko, akhensa, avanyika; vanwa hinkwavu ha wona. Aku ka vona: Lesvi i ngati ya mina, ngati ya ntwananu, leyihalateliwaka lavotala. “Nitiyisile nili ka n'wina: Aningahanwi kambe sva mihandzu ya mvhinya, kukondza kufika siku leri ningatasvinwa na svili lesvimpsha Mfun'wini wa Xikwembu.” Kuteloko vayimbelelile risimu, vaya Ntshaveni ya Maolivhera. Yesu aku ka vona: “Hinkwenu mitakhunguvanyeka, hikuva kutsaliwile lesvaku: “‘Nitaba murisi, kutani tinyempfu titahangalaka.’” “Kambe loko nitava nipfukile kufeni, nitamirhangela kuya le Galileya.” Petrosi aku ka yena: “Hambi loko vangakhunguvanyeka hinkwavu, svingakala svingahumeleli ka mina.” Yesu aku ka yena: “Nitiyisile nili ka wena: Namuntlha, vusiku bzobzi, nkuku wungasiyimba kambirhi, utava unilandzulile kanharhu.” Kambe Petrosi atlhela atiyisa hi matimba, aku: “Hambi loko svinganifanela kufa na wena, ningakala ningakulandzuli.” Kutani hinkwavu vavulisa svosvo. Hi loko vaya ndhawini leyivuliwaka Getsemani; kutani Yesu aku ka vajondzisiwa va yena: “Tshamani kola, nahaya niyakhongela.” Afamba na Petrosi, na Yakobe, na Yohani, kutani asungula kukarhateka ngopfu ni kuxaniseka svinene; aku ka vona: “Moya wa mina wukhomiwa hi gome lerikulu, gome ra kufa; salani kola, milavelela.” Kutani aya kulenyana, atiwisela hansi, akhongela lesvaku loko svingakoteka, nkarhi lowuya wufambela kule na yena. Aku: “Aba, Tatana! Ka wena hinkwasvu svakoteka; ndzheko lowu wutshinete kule na mina; ntsena kungayendliwi kurhandza ka mina, kambe akuyendliwe kurhandza ka wena.” Kutani atlhelela ka vona, avakuma na vayetlele; aku ka Petrosi: “Simoni, uyetlele xana? Utsandzekile kulavelela wora rili rin'we xana? Lavelelani na mikhongela, lesvaku mingangheni miringweni hikuva moya wasvilava, kambe nyama yitsanile.” Kutani atlhela aya tlhelweni, ayakhongela kufana ni le kusunguleni. Kuteloko atlhelele ka vona, avakuma vayetlele, hikuva mahlo ya vona amatika, nasvona avangativi lesvaku vangamuhlamula yini. Loko avuya ra vunharhu, aku ka vona: “Xana mahayetlela ni kuwisa ke? Sviringene! Nkarhi wufikile, vonani, N'wana-wa-Munhu wanyiketiwa mavokweni ya vajohi. Pfukani, miyima, ahifambeni! Langutani, lweyi anixengaka a le kusuhi.” Hi nomo-lo, na ahavulavula, kuhumelela Yudasi, mun'we wa lava va khume ni vambirhi, ata ni xitshungu lexihlomeke matlhari ni tinhonga, na varhumiwile hi Vaprista lavakulu, ni Vatsali, ni vakulukumba. Lweyi amuxengaka aavanyikile xikombiso aku: “Lweyi ningatamun'qunta, hi yena, mukhomeni mifamba na yena, mimulavelela svinene.” Kuteloko afika, ahantla amukongoma, aku: “Mufundhisi!” Kutani amun'qunta. Vona ke vatshambuluta mavoko, vamukhoma. Hi loko mun'we wa lava avali na Yesu, ahlomula tlhari, avavisa mutirhi wa Muprista lwenkulu, amuxupula ndleve. Kutani Yesu avavutisa aku: “Lesvi mihumeke na mili ni matlhari ni tinhonga kutanikhoma, nova xigevenga ke? Masiku hinkwawu anili na n'wina nili karhi nijondzisa Tempeleni, kutani aminikhomanga; kambe Matsalwa mafanele kuhetiseka!” Hi loko vajondzisiwa hinkwavu vamusiya, vabaleka. Jaha rin'wana arilandza Yesu, na rifunengelile lansoro ntsena; kutani valava kurikhoma; kambe rona richupula risiya lansoro, ritsutsuma ringayambalanga nchumu. Vayisa Yesu ka Muprista lwenkulu, kutani Vaprista lavakulu hinkwavu, ni vakulukumba, ni Vatsali vahlengeletana kolaho. Petrosi na yena amulandza hi le kule, anghena rikupakupeni ra yindlo ya Muprista lwenkulu, atshamisa ni vatirhi, ali karhi aworha ndzilo. Vaprista lavakulu ni huvu hinkwayu avalava vumboni bza kurhwexa Yesu anandzu lesvaku vatamudlaya; kambe avabzikumanga. Lavotala avamuhehla hi mavunhwa, kambe vumboni bza vona abzingahetisekanga. Van'wana avayima vamuhehla hi kuhemba vaku: “Himutwile, aku: ‘Nitahirimuxa Tempele leyi yoyakiwa hi mavoko ya vanhu, kutani ndzhaku ka masiku manharhu nitatlhela niyimisa yin'wana leyingayakiwangiki hi mavoko ya vanhu.’” Hambi svilitano, vumboni bza vona abzingahetisekanga. Hi loko Muprista lwenkulu ayima xikarhi ka vona, avutisa Yesu, aku: “Xana awuhlamuli nchumu ke? Hi yihi mhaka leyi vakuhehlaka ha yona xana?” Kambe Yesu amiyela, angahlamuli nchumu. Muprista lwenkulu atlhela amuvutisa, aku: “Xana hi wena Kriste, N'wana wa Xikwembu lexidzunekaka ke?” Yesu aku: “Mina ni yena!” “‘Kutani mitavona N'wana-wa-Munhu atshamile vokweni ra xinene ra Lweyi anga ni matimba hinkwawu, mitamuvona ata hi marefu ya le tilweni.’” Hi loko Muprista lwenkulu ahandzula sviyambalu sva yena, aku: “Hahalavela yini timboni xana? Mitwile kusandza ka yena; mipimisa yini n'wina ke?” Hinkwavu vamuyavanyisa, vaku: “Afaneliwa hi kufa.” Van'wana vasungula kumupshitela marhi, vamuboha mahlo, vamuba hi svibakela, vaku ka yena: “Vhumbata! I mani lweyi akubeke. Vatirhi na vona vafamba na yena na vali karhi vamuhimetela.” Nkarhini wolowo Petrosi aali le hansi rikupakupeni; kutani kuta mun'we wa vatirhi vaxisati va Muprista lwenkulu; loko avona Petrosi na ali karhi aworha ndzilo, amuhonokela, aku: “Na wena awuli ni Munazareta lwiya vange i Yesu.” Kambe Petrosi akaneta, aku: “Lesvi usvivulaka, anisvitivi; ni kusvitwisisa anisvitwisisi.” Kutani ahuma, ayayima handle kusuhi ni nyangwa. [Hi loko nkuku wuyimba.] Mutirhi lwiya waxisati, loko amuvona, atlhela abzela lava avali kolaho, aku: “Lweyi, i mun'we wa vona.” Kambe Petrosi atlhela akaneta. Ndzhakunyana, lava avali kolaho, vayengeta vaku ka Petrosi: “U mun'we wa vona hakunene, hikuva u Mugalileya na wena.” Hi loko asungula kuhlambanya hi matimba aku: “Munhu lweyi mimuvulaka, mina animutivi!” Nkarhi wolowo nkuku wuyimba ka vumbirhi. Kolaho Petrosi atsundzuka rito leri Yesu amubzeleke rona, loko aku: “Nkuku wungasiyimba ka mbirhi, utava unilandzulile kanharhu.” Hi loko Petrosi atlhaveka ngopfu arila. Loko bzahakuxa, Vaprista lavakulu vahantla valungisa makungu ni vakulukumba, svin'we ni Vatsali ni huvu hinkwayu. Kuteloko vabohile Yesu, vafamba na yena, vayamunyiketa ka Pilato. Pilato yena amuvutisa, aku: “Xana u hosi ya Vayuda ke?” Ahlamula aku ka yena: “Uvula svona.” Hi loko Vaprista lavakulu vamurhwexa nandzu wa timhaka totala. Pilato atlhela amuvutisa, aku: “Xana awuhlamuli nchumu ke? Yingisa timhaka letotala leti vakurhwexaka nandzu hi tona!” Kambe Yesu angahahlamulanga nchumu, Pilato akondza ahlamala. Hi nkarhi wa nkhuvu Pilato aatolovela kutshunxa xib'ochwa xin'we lexi vanhu vaxikombelaka. Kutani akuli ni xin'we lexi axivuliwa Barabasi, lexi axibohiwile ni svin'wana lesvi asvipfuxile dzolonga, svidlaye ni munhu adzolongeni rakona. Loko xitshungu xifambile xiya hubzeni, xikombela lesvaku Pilato ayendla hilaha aatolovela kuvayendlela hakona. Pilato avahlamula, aku: “Xana mirhandza lesvaku nimitshunxela hosi ya Vayuda ke?” Aavula svosvo hi kutiva lesvaku Vaprista lavakulu avanyiketile Yesu hikolaho ka matshoho. Kambe Vaprista lavakulu vahlohlotela xitshungu, lesvaku Pilato avatshunxela Barabasi, kungali Yesu. Pilato atlhela avulavula na vona, aku: “Loko svilitano, mili nitayendla yini hi munhu lweyi mimuvulaka Hosi ya Vayuda ke?” Vona vatlhela vahuwelela, vaku: “Muvambe!” Pilato avavutisa aku: “Xana ajohile yini ke?” Vona vaba huwa leyikulu, vaku: “Muvambe!” Kutani Pilato, hi kurhandza kutsakisa xitshungu, avatshunxela Barabasi; kutani loko alerisile lesvaku Yesu abiwa, amunyiketa lesvaku vayamuvamba. Masochwa mafamba na Yesu, mamuyisa ndlwini ya vuhosi; kutani mavitanana mayakona hinkwawu. Kuteloko vamuyambexile xiyambalu xovangama xaxivunguvungu, valuka hari ya mintwa, vamutlhanteka nhlokweni. Kutani vamuxeweta, vaku: “Xeweni, Hosi ya Vayuda!” Vamuba nhloko hi nhonga, vamupshitela marhi, vawa hi matsolo vamukhinsamela. Kuteloko vamutseketselile, vamuhlivila xiyambalu xovangama xa xivunguvungu, vatlhela vamuyambexa xiyambalu xa yena. Vamuyisa handle ka doropa kuyamuvamba. Vahlangana ni wanuna mun'we lweyi aahundza kolaho na ata hi le masin'wini, kutani vamusindzisa kurhwala xihambanu xa Yesu. Wanuna lweyi aali Simoni wa Kirene, tatana wa Alexandre na Rufo; vayisa Yesu ndhawini leyi vange i Golgota, hi lesvaku “Ndhawu ya Pala”. Vamunyika vhinyu leringapatsanyetiwa ni mira; kambe angayinwanga. Hi loko vamuvamba, vayavelana sviyambalu sva yena hi kuhlahluva, lesvaku vatativa lesvi mun'wana ni mun'wana angatakuma svona. Awuli nkarhi wa vunharhu loko vamuvamba. Papela rotivisa nandzu wa yena aritsaliwe marito lawa: “Hosi ya Vayuda.” Vamuvamba ni svigevenga svimbirhi, xin'we vokweni ra yena ra xinene, xin'wana ka leri ra ximantsi. [ Hi loko kuhetiseka tsalwa leringe: “Ahlayiwile svin'we ni vajohi.”] Vahundzi va ndlela vamurhuketela, vahlakahla tinhloko vaku: “Ha! Wena lweyi uhirimuxaka Tempele, utlhela uyipfuxa hi masiku manharhu, tiponise ke, uxika xihambanwini!” Hi mukhuva wolowo, na vona Vaprista lavakulu svin'we ni Vatsali vamutseketsela vaku: “Munhu lweyi aponisile van'wana, kambe yena watsandzeka kutiponisa! Kriste, Hosi ya Israyele aaxike svosvi xihambanwini, lesvaku hisvivona, hitapfumela ka yena” Lavangavambiwa na yena, na vona avamurhukatela. Loko kufikile nkarhi wa vuntlhanu na wun'we, munyama wufunengeta tiko hinkwaru, kuyafika nkarhi wa vuntlhanu ni mune. Hi nkarhi wolowo wa vuntlhanu ni mune, Yesu ahuwelela hi rito leritlakukeke aku: “Eloyi, Eloyi, Lama Sabaktani?”, hi lesvaku: “Xikwembu xanga, Xikwembu xanga, unitshikela yini?” Van'we ka lava avali kolaho, loko vamutwa vaku: “Yingisani, avitana Eliya.” Mun'we atsutsuma, ayapeta xiponjhi ka ntsuvi, axitlhoma rihlangeni, amunyika lesvaku anwa, aku: “Mutshikeni, hitavona loko hakunene Eliya atata, atamuhawula.” Hi loko Yesu ahuwelela hi rito leritlakukeke, anhlala afa. Kutani xisirhelelo xa nguvu xa Tempele xihandzuka hi le xikarhi, kusukela henhla kuyafika hansi. Loko ndhuna ya dzana ra masochwa leyi ayinyimile mahlweni ka yena, yivonile hilaha angahuwelela ni kufa hakona, yiku: “Hakunene munhu lweyi aali N'wana wa Xikwembu.” Vavasati na vona avali kona, valanguta valikule; xikarhi ka vona akuli na Salome, na Mariya wa Magadala, na Mariya mamana wa va Yakobe lwentsongo na Josi; hi lava avatolovela kulandza Yesu ni kumutirhela loko ahali Galileya. Akuli ni van'wana lavotala lavatlhantukeke na yena loko aya Yerusalema. Jambu ariya kupeleni, kutani siku lero arili ra vuntlhanu, rolungisa sva siku ra Savata. Hikolaho, nkulukumba mun'we wa huvu, lweyi avaku i Yosefa wa Arimateya, doda rochaviseka ngopfu ra huvu, lweyi na yena aalangutela Mfumu wa Xikwembu, ata ka Pilato na akanye mbilu, akombela ntsumbu wa Yesu. Pilato ahlamala kutwa lesvaku Yesu nankhale afile. Hi loko avitana ndhuna ya dzana ra masochwa, ayivutisa aku: “I khale afile xana?” Loko ndhuna ya dzana yitiyise svosvo, apfumelela Yosefa kuyateka ntsumbu. Yosefa ayaxava lansoro rosaseka rolahla ha rona; kutani amuhawula, amuphutsela ha rona, amuveka sirheni lerikovotliweke ribzeni, kutani avumbuluta ribze ripfala nomo wa sirha. Kambe Mariya wa Magadala, na Mariya mamana wa Josi, avalanguta laha avekiwaka kona. Loko siku ra Savata rihundzile, Mariya wa Magadala, na Mariya mamana wa Yakobe, na Salome, vaxava mafurha yonun'hwela kuyamutota ha wona. Nimpundzu wa siku ra kusungula ra vhiki, kuhumeni ka jambu, vaya sirheni. Avalikarhi vavutisana, vaku: “I mani lweyi angatahivumbulutela ribze, arisusa non'weni wa sirha ke?” Kambe loko vatlakusa mahlo, vavona lesvaku ribze rivumbulutiwile, kuve arili lerikulu ngopfu. Loko vanghenile sirheni, vavona jaha leritshameke tlhelweni ra xinene, riyambale sviyambalu svoleha, svobasa; kutani vahlamala. Kambe jaha riku ka vona: “Mingachaveni; Yesu wa Nazareta lweyi avambiweke, lweyi mimulavaka, apfukile, anga kona la; laha avamuvekile kona hi kola. Fambani, miyabzela vajondzisiwa va yena, na Petrosi, lesvaku wa mirhangela kuya Galileya; hi kona laha mingatamuvona kona, hilaha amibzeleke hakona.” Vavasati lavo vahuma sirheni, vatsutsuma na vakhomiwe hi kurhurhumela ni kuhloleliwa; kutani avavulanga nchumu ka munhu ni mun'we hikuva avachava. [ Loko Yesu apfukile kufeni, ni mpundzu wa siku lerosungula ra vhiki, arhanga atikomba ka Mariya wa Magadala, anga wansati lweyi Yesu aahlongolile madimoni ya ntlhanu ni mambirhi ka yena. Mariya ayativisa vajondzisiwa lavan'wana va Yesu lava avali nkosini, na varila; loko vona vatwa lesvaku Yesu wahanya, ni lesvaku avoniwile hi Mariya, avasvikholwanga.] Ndzhaku ka svona, atikombisa hi xivumbeko xin'wana ka vambirhi va vona, loko vali ndleleni yohuma doropeni. Vona vatlhela, vayarungulela lavan'wana, kambe na vona lava avavakholwanga. Kuheteleleni, Yesu atikomba ka lava va khume na mun'we loko vali kujeni; kutani avasola hi lesvi avakala kupfumela ni lesvi avali ni timbilu tononon'hwa, hikuva avangapfumelanga ka lava vamuvoneke loko apfukile kufeni. Kutani aku ka vona: “Fambani misaveni hinkwayu, miyahuwelela Evhangeli ka svivumbiwa hinkwasvu. Lweyi angatapfumela, ava akhuvuliwa, ataponisiwa; kambe lweyi angapfumeliki, atayavanyisiwa. Mahlori lamangatayendliwa hi lavapfumelaka hi lawa: Hi vito ra mina vatahlongola madimoni; vatavulavula tindzimi letimpsha; vatakhoma tinyoka hi mavoko; kutani hambi vanganwa lesvidlayaka, svingakala svingavayendli nchumu; vatatlhanteka mavoko ka lavavabzaka, vavahanyisa.” Kuteloko Hosi Yesu avulavulile na vona, atlakuliwa aya tilweni, ayatshama vokweni ra xinene ra Xikwembu. [Loko vali vona, vasuka vafamba, vayahuwelela Evhangeli hinkwaku, Hosi yilikarhi yitirhisana na vona, yitiyisa marito ya yona hi mahlori lawa amahumelela nkarhini wolowo.] Lava votala se varingetile kutsala marungula ya timhaka letihumeleleke xikarhi ka hina; vatirungulile hilaha na hina hingatitwa hakona ka lava vangava timboni ta tona ni malandza ya rito ra Xikwembu kahali kusunguleni; hi kolaho ke, na mina nikambisisile timhaka leti hinkwatu kusukela masungulweni ya tona, kutani nivonile lesvaku svingasaseka loko nikulongoloxela tona hi kukutsalela, wena Teyofilo lweyi axiximekaka, lesvaku utativa ntiyisiso wa timhaka leti ujondzisiweke tona. Hi masiku ya kufuma ka Heroda hosi ya Yudeya, akuli ni Muprista lweyi vito ra yena avaku i Zakariya, wa ntlawa wa Abiya; nsati wa yena aali wa rixaka ra va ka Aroni, vito ra yena aali Elizabeta. Havambirhi avalulamile mahlweni ka Xikwembu, avafamba minaweni hinkwayu ya Hosi ni ka svileriso sva yona, valihava xo soliwa ha xona. Ntsena avangali na n'wana, hikuva Elizabeta aangaveleki; nasvona hi vumbirhi bza vona, avali svikoxa. Loko Zakariya ali karhi atirha ntirho wa yena wa vuprista mahlweni ka Xikwembu hi masiku ya kutirha ka ntlawa wa yena, aweliwa hi njombo ya kukhetiwa, tani hi ntolovelo wa vuprista, kunghena Tempeleni ya Hosi, ayahisa b'aso. Xitshungu hinkwaxu axilihandle, xili karhi xikhongela hi nkarhi wolowo wa timhamba. Kutani ntsumi ya Hosi yitikomba ka Zakariya, yili tlhelweni ra xinene ra alitari ya b'aso. Loko Zakariya ayivona, adzuka, achava ngopfu. Kambe ntsumi yiku ka yena: “Ungachavi Zakariya, hikuva kukhongela ka wena kuyingisiwile; Elizabeta, nsati wa wena, atakuvelekela n'wana wa mufana, kutani utamuchula vito ra Yohani, atava ni kutsaka ni kutsakisisa, nasvona lavotala vatatsakela kuvelekiwa ka yena, hikuva atava nkulu mahlweni ka Hosi; angakala anganwi vhinyu ni bzala bza ntamu, kambe atatala Moya Lowokwetsima angasi velekiwa. Atayendla lesvaku lavotala xikarhi ka Vaisrayele vatlhelela ka Yehovha Xikwembu xa vona; kutani, atarhanga mahlweni ka Hosi hi moya ni matimba ya Eliya, lesvaku atavuyisela timbilu tava tatana ka vana va vona, avuyisela ni vayeyisi vutlharini bza lava volulama, lesvaku alungisela Hosi vanhu lavalulameke.” Kutani Zakariya aku ka ntsumi: “Xana mhaka leyi nitayitivisa kuyini, lesvi ninga xikoxa, ni nsati wa mina i xikoxa ke?” Ntsumi yimuhlamula, yiku: “Hi mina Gabriyele, lweyi ayimaka mahlweni ka Xikwembu; nirhumiwile kutavulavula na wena ni kukutivisa mahungu lamanene. Svosvi-ke, utahundzuka mbheveve, utahluleka kuvulavula kukondza kufika siku leri svilo lesvi svingatahumelela ha rona, hikuva awupfumelanga marito ya mina, lawa mangatahetiseka hi nkarhi wakona.” Vanhu avalangutela Zakariya kuhuma Tempeleni, kutani vahlamala hi mhaka ya kuhlwela ka yena Loko ahuma, atsandzeka kuvulavula na vona, kutani vativa lesvaku avonile mahlori Tempeleni; na yena akombeta ntsena hi mavoko, hikuva aahundzukile mbheveve. Kuteloko masiku ya kutirha ka yena mahelile, atlhelela kaya. Ndzhaku ka masiku wolawo, Elizabeta nsati wa yena axurha nyimba, kutani atifihla ntlhanu wa tihweti ali karhi aku: “Hakunene Hosi yinipfunile, yinisusa tingana xikarhi ka vanhu.” Hi hweti ya vuntlhanu ni yin'we ntsumi Gabriyele yiyorhumiwa hi Xikwembu ka rin'we ra madoropa ya Galileya leri vange i Nazareta. Yita ka wanhwanyana lweyi aangasitivana ni wanuna lweyi aatshembisiwile hi wanuna lweyi avaku i Yosefa, wa rixaka ra Davhida; vito ra nhwanyana wakona aali Mariya. Ntsumi yifika yiku ka yena: “Xeweni, wena lweyi angakuma timpsalu, Hosi yina wena.” Mariya adzukisiwa hi marito ya ntsumi, ahlamala lesvaku xana kuxeweta ka yona hi loku koyini? Kambe ntsumi yiku ka yena: “Ungachavi we Mariya, hikuva ukumile timpsalu mahlweni ka Xikwembu. Vona, utaxurha nyimba, kutani utaveleka n'wana wa mufana; utamuchula vito ra Yesu. Yena atava nkulu, avuliwa N'wana wa Lweyi anga henhlahenhla; Yehovha Xikwembu xitamunyika xiluvelo xa Davhida tatana wa yena. Atafuma rixaka ra Yakobe hilaha kungaheliki; vuhosi bza yena bzingakala bzingaheli.” Kambe Mariya aku ka ntsumi: “Svingayendlekisa kuyini lesvi ningasikitivana ni wanuna ke?” Ntsumi yimuhlamula, yiku: “Moya Lowokwetsima wutaxikela ka wena, ni matimba ya Lweyi anga henhlahenhla matakufunengeta; hi kolaho n'wana lweyi wohlawuleka lweyi angatapsaliwa, atavuliwa N'wana wa Xikwembu. Kutani tiva lesvaku xaka ra wena Elizabeta na yena axurhile nyimba vukoxeni bza yena; leyi i hweti ya vuntlhanu ni yin'we ka yena lweyi aangaveleki, hikuva aku na xilo ni xin'we lexihlulaka Xikwembu.” Kutani Mariya aku: “Hi svona, ni nandza wa Xikwembu; akuyendliwe ka mina hilaha ungavula hakona.” Kutani ntsumi yisuka yimusiya. Nkarhini wolowo, Mariya asuka hi kuhantlisa aya tintshaveni, doropeni rin'wana ra ka Yuda; anghena ndlwini ya Zakariya, axeweta Elizabeta. Loko Elizabeta atwa kuxewetiwa hi Mariya, n'wana atshukatshuka ndzeni ka yena. Kutani Elizabeta atala Moya Lowokwetsima, atlakusa rito aku: “Ukatekile xikarhi ka vavasati, kukatekile ni n'wana lweyi anga ndzeni ka wena. Sviyendlise kuyini lesvaku mamana wa Hosi yanga ata ka mina xana? Loko kuxeweta ka wena kufikile tindleveni ta mina, n'wana atshukatshukile hi kutsaka ndzeni ka mina. Kukatekile lweyi apfumelaka lesvaku lesvi Hosi yimubzeleke svona, svitayendleka.” Kutani Mariya aku: “Mbilu yanga yidzunisa Hosi, ni moya wa mina wutitsakela ka Xikwembu, Muponisi wanga, hikuva alangutile vusiwana bza mina nandza wa yena, kutani kusukela svosvi, vanhu va minkarhi hinkwayu vataku nikatekile. Lweyi wa matimba hinkwawu aniyendlelile lesvikulu, vito ra yena rihlawulekile, ni timpsalu ta yena i ta minkarhi ni minkarhi ka lavamuchavaka. Atirhile hi matimba hi voko ra yena, ahangalasile lavatikulisaka kuyanakanyeni ka vona. Tihosi ta matimba atisusile svitshan'wini sva tona sva vuhosi, kutani atlakusile lavatitsongahataka. Lavanga ni ndlala, avaphamelile lesvonandziha, vaja vaxurha, kambe lavafuweke avatlhelisile na vangali na nchumu. Alwelile Israyele nandza wa yena, hi kuyanakanya timpsalu ta yena, leti atitshembiseke vatatana va hina, anga Abrahamu ni rixaka ra yena hilaha kungaheliki.” Mariya atshamile na Elizabeta tihweti letilavaka kuringana tinharhu, kutani atlhelela kaya. Loko nkarhi wa Elizabeta wa kuveleka wufikile, aveleka n'wana wa mufana. Lava vayakeke na yena ni maxaka ya yena vatwa lesvaku Hosi yimukatekisile svinene, kutani vatsaka svin'we na yena. Kutani hi siku ra vuntlhanu ni manharhu vayayimbisa xihlangi; van'wana avalava kuxichula vito ra Zakariya tatana wa xona. Kambe mamana wa xona aku: “Ahihim, atachuliwa vito ra Yohani.” Vaku ka yena: “Aku na munhu rixakeni ra ka n'wina lweyi anga ni vito lero.” Kutani vavutisa tatana wa yena hi kuxungameta hi mavoko, lesvaku atavabzela vito leri alavaka kuvitaniwa ha rona. Kuteloko akombelile xileti, atsala lesvi: “Vito ra yena i Yohani.” Kutani hinkwavu vahlamala. Hi nomo-lo, nomo wa yena ni ririmi ra yena svitshunxeka; kutani avulavula, adzunisa Xikwembu. Hi loko vayakelani va yena hinkwavu vakhomiwa hi kuchava, kutani timhaka leti hinkwatu tihangalaka tintshaveni hinkwatu ta tiko ra Yudeya. Hinkwavu lava vatitweke vatihlayisa timbilwini ta vona, vaku: “N'wana lweyi atava lweyi woyini xana?” Voko ra Hosi hakunene arili na yena. Hi loko Zakariya tatana wa yena atala hi Moya Lowokwetsima, aprofeta aku: “Akudzunisiwe Hosi, Xikwembu xa Israyele, hikuva xiyendzelile tiko ra xona, xili kutsulile; xihipfuxele Muponisi wa matimba muntini wa Davhida nandza wa xona; Tani hi loko xivulile kusukela minkameni ya khale hi milomo ya vaprofeta va xona lavohlawuleka; xona xitshembisile kuhiponisa ka valala va hina, ni le mavokweni ya hinkwavu lava vahivengaka. Nikukombisa timpsalu ka vatatana va hina, xitsundzuke ntwanano wa xona lowokwetsima; lowu xingawuboha hi kuhlambanya ka Abrahamu tatana wa hina, lesvaku ahinyika kutshunxeka mavokweni ya valala va hina, akuva hitaxitirhela na hingachavi nchumu, hi kuhlawuleka ni kululama mahlweni ka xona, masiku hinkwawu ya kuhanya ka hina. Kasi wena xihlangi, utavuliwa muprofeta wa Lweyi anga henhlahenhla, hikuva utarhangela mahlweni ka Hosi, kulungisa ndlela ya yona, ni kunyika tiko ra yona kutiva kuponisiwa, ni kurivaleliwa svijoho sva vona. Svitayendleka hikolaho ka timpsalu ta Xikwembu xa hina, hikuva hitayendzeliwa hi kuvonakala ka vurhonga lokuhumaka hi le tilweni, kutavoninga lavatshamaka munyameni ni lendzhutini wa rifu, ni kutafambisa milenge ya hina dleleni ya kurhula.” Kutani n'wana aakula ali karhi azimuka svinene hi matimba ya sva moya; kutani ayatshama tindhaweni letinga mananga kukondza kufika siku leri aafanela kutikombekisa ha rona ka va Israyele. Masikwini wolawo kuhuma nawu wa hosi Khezari Awuguxtu wa lesvaku vanhu va matiko hinkwawu yofumiwa hi yena vayatitsalisa. Kutsalisa loku korhanga kuyendliwile nkarhini lowu Kirinu aafuma Siriya. Kutani hinkwavu avayatitsalisa, mun'wana ni mun'wana doropeni ra yena. Yosefa na yena asuka Galileya doropeni ra Nazareta, aya Yudeya doropeni ra Davhida lerivuliwaka Betlelehema, hikuva aali munhu wa rixaka ra Davhida, ni wa yindlo ya yena. Ayatsalisa vito ra yena kona, ni ra Mariya lweyi aamutshembisile, lweyi aayimela kukuma n'wana. Kuteloko vali koseyo, masiku ya kutshunxeka ka yena mafika. Kutani aveleka n'wana wa yena wa mativula, wa mufana; amuphutsela hi tinguvu, amulata xigovolweni xa svifuyu, hikuva avapfumalile ndhawu ndlwini ya vayendzi. Akuli ni varisi mugangeni wolowo, avatshama nhoveni, vali karhi vahlayisa mintlhambi ya vona nivusiku. Kutani ntsumi ya Hosi yihumelela ka vona, kukwetsima ka Hosi kuvarhendzela, kutani vachava hi kuchava lokukulu. Ntsumi yiku ka vona: “Mingachaveni! Vonani, nimitivisa mahungu lamanene lawa mangatatsakisa svinene tiko hinkwaru; hi lesvaku namuntlha mivelekeliwile Muponisi doropeni ra Davhida; lweyi anga Kriste, Hosi. Xikombiso ka n'wina xitava lexi: Mitakuma xihlangi lexiphutseliweke hi tinguvu, na xilatiwile xigovolweni xa svifuyu.” Hi nomo-lo vunyingi bza mab'uthu ya le tilweni bzihumelela na bzili ni tintsumi, bzidzunisa Xikwembu, bziku: “Kudzuneka akuve ka Xikwembu matilweni ya le henhlahenhla, kurhula akuve misaveni ka vanhu lava xivatsakelaka.” Kuteloko tintsumi tivasiyile, titlhelele tilweni, varisi vabzelana, vaku: “Ahiyeni Betlelehema, hiyavona lesvihumeleleke kona, lesvi Hosi yingahitivisa svona.” Kutani vahantlisa vaya kona, vayakuma Mariya na Yosefa ni xihlangi lexilatiweke xigovolweni. Loko vaxivonile, vavula lesvi vangabzeliwa svona mayelanu ni n'wana. Kutani hinkwavu lavatweke lesvi varisi vangavula svona, vahlamala. Kambe Mariya ahlayisa timhaka leti hinkwatu, atiyanakanya mbilwini ya yena. Kutani varisi vatlhela na vali karhi vadzunisa Xikwembu, vaxitlangela hikolaho ka hinkwasvu lesvi vasvivoneke, ni lesvi vasvitweke; asvivile hilaha avabzeliwile hakona. Loko n'wana atlhanganisile masiku ya ntlhanu ni manharhu, ayimbisiwa, kutani vamuchula vito ra Yesu, hilaha ntsumi yingamuchula hakona, mamana wa yena angasixurha nyimba. Loko kuhundzile masiku ya kutibasisa ka vona hi kulerisa ka Nawu wa Moxe, Yosefa na Mariya vayisa n'wana Yerusalema kuyamunyiketa ka Hosi; hikuva kutsaliwile lesvi Nawini wa Hosi: “N'wana mun'wana ni mun'wana wa xinuna, wa mativula, atahlawuleliwa Hosi.” Nasvona vahumesa timhamba leti tilerisiweke Nawini wa Hosi, svinga svituvana svimbirhi, kumbe mavondlo mambirhi ya svituvana. Le Yerusalema akuli ni munhu lweyi avuliwaka Simiyoni; munhu lweyi aalulamile, achava Xikwembu; aalangutela kuchaveleliwa ka Israyele. Moya Lowokwetsima awuli ka yena. Aakombisiwile hi Moya Lowokwetsima lesvaku angakala angafi angasivona Kriste wa Hosi; kutani aya Tempeleni hi kulerisiwa hi Moya. Loko Yesu n'wana atisiwa hi vapsali va yena kutayendla tani hi kulerisa ka Nawu, Simiyoni amuyamukela mavokweni ya yena, adzunisa Xikwembu, aku: “Svosvi Hosi, ungatshunxa nandza wa wena atifambela hi kurhula hilaha ungavula hakona, hikuva mahlo ya mina mavonile kuponisa ka wena, loku ukulungiseleke mahlweni ka matiko hinkwawu, kunga kuvonakala lokungatavoninga vamatiko, ni kundzuneka ka Israyele tiko ra wena.” Kutani tatana wa yena ni mamana wa yena vahlamala timhaka leti tivuliwaka hikolaho ka yena. Kutani Simiyoni avakatekisa, aku ka Mariya, mamana wa n'wana: “Vona, n'wana lweyi a ni xikongomelo xa lesvaku lavotala vakhunguvanyeka, van'wana vapfuxiwa tikweni ra Israyele. Atava xikombiso lexi lavotala vangatalwa na xona, lesvaku miyanakanyu ya vona yihumela rivaleni. Na wena, nhlomulu wutakutlhava mbilu kukota tlhari.” Akuli na Ana, muprofeta waxisati, n'wana Fanuwele, wa va ka Aseri; aajuhalile ngopfu. Loko atekiwa ahali lwe mumpsha, ahanyile ni nuna wa yena malembe ya ntlhanu ni mambirhi, kutani afeliwa hi nuna. Aali ni malembe ya ntlhanu wa makume ni makume manharhu ni mune (84), aangasuki Tempeleni, kambe aatirhela Hosi hi kutitsona svakuja ni kukhongela vusiku ni nhlekanhi. Otshuka afikile nkarhini wolowo, akhensa Xikwembu, avula hi ta n'wana Yesu ka hinkwavu lavalanguteleke kukutsuliwa ka Yerusalema. Kuteloko vahetile hinkwasvu lesvilerisiweke hi Nawu wa Hosi, vatlhelela Galileya, vaya Nazareta kaya ka vona. Loko ali n'wana, aakula, atiya, atala hi vutlhari, kutani timpsalu ta Xikwembu atili na yena. Vapsali va Yesu avaya Yerusalema lembe rin'wana ni rin'wana nkhubzeni wa Paska. Kutani loko ali ni malembe ya khume ni mambirhi, vatlhantuka na yena nkhubzeni tani hi ntolovelo wa vona. Loko masiku ya nkhuvu mahelile, vatlhelela ka le kwavu, kambe Yesu n'wana asala Yerusalema na vapsali va yena vangasvitivi. Hi kuyehleketa lesvaku a svin'we ni lava valongolokaka na vona, vafamba siku hinkwaru, kutani vasungula kumulava ka maxaka ya vona ni ka lava vativanaka na vona. Loko vangamukumi, vatlhelela Yerusalema na vali karhi vamulava. Ndzhaku ka masiku manharhu vamukuma Tempeleni, atshamile xikarhi ka vajondzisi, avayingisela, ni kuvavekela svivutiso; kutani hinkwavu lava avamutwa vahlamala vutivi bza yena ni tinhlamulu ta yena. Loko vapsali va yena vamuvona kona, vahlamala ngopfu. Kutani mamana wa yena aku ka yena: “N'wananga, hikolaho ka yini uhitirhisile hi ndlela leyi xana? Wasvivo, tatana wa wena na mina ahikulava hili kukarhatekeni svinene.” Yesu avahlamula aku: “Aminilavela yini? Xana amingasvitivi lesvaku nifanela kuva kola ndlwini ya Tatana wa mina ke?” Kambe vona avatwisisanga marito lawa angavahlamula ha wona. Kutani angirimela na vona, aya Nazareta, aatshama avayingisa. Kutani mamana wa yena ahlayisa timhaka leti hinkwatu mbilwini ya yena. Loko ali Yesu, aakula vutlharini, mirini ni le timpsalwini mahlweni ka Xikwembu ni le ka vanhu. Hi lembe ra khume na ntlhanu ra kufuma ka Tiberiyo Khezari, Pontiyo Pilato aafuma Yudeya; Heroda yena aali mun'we ka tihosi leta mune ta Galileya; Filipi makwavu aali mun'wana ka tihosi leto, aafuma Ituriya ni tiko ra Trakonita; Lisaniya yena afuma Abilene; Anasi na Kayafasi avali Vaprista lavakulu; nkarhini wolowo, rito ra Xikwembu rifika ka Yohani n'wana Zakariya, mananga. Kutani asuka, ayarhendzeleka tiko hinkwaru leringa kusuhi na Yordani, ali karhi ajondzisa vanhu ta kuhundzuka vakhuvuliwa, lesvaku Xikwembu xivarivalela svijoho sva vona. Hi svona lesvingatsaliwa bukwini ya muprofeta Ezaya, loko ate: “Rito ra munhu lweyi ahuwelelaka mananga, rili: ‘Lungiselani ndlela ya Hosi, milulamisa asvindlelana sva yona. Minkova hinkwayu yitaseleteliwa, tintshava ni svitsunga hinkwasvu svitahirimuxiwa; lesvigombonyokeke svitalulamisiwa, ni tindlela letinga ni minkova ni maganga titakhuleliwa, kutani vanhu hinkwavu va nyama vatavona kuponisa ka Xikwembu.’” Kutani Yohani abzela xitshungu lexitaka kutakhuvuliwa hi yena, aku: “Rixaka ra tinyoka, i mani lweyi angamitsundzuxa kubaleka vukarhi lebzitaka xana? Vekani mihandzu leyifambelanaka ni kuhundzuka ka n'wina! Mingayanakanyeni miku, hi na Abrahamu, yena tatana wa n'wina, hikuva nili ka n'wina: Xikwembu xingayendlela Abrahamu vana hi maribze lawa. Ni svosvi xihloka xivekiwile timintsweni ta nsinya; nsinya wun'wana ni wun'wana lowungavekiki mihandzu leyinene, wutatsemiwa wuhoxiwa ndzilweni.” Kutani xitshungu ximuvutisa xiku: “Loko svilitano, hitayendla yini ke?” Ahlamula aku ka xona: “Lweyi anga ni mabanci mambirhi, aapambulele lweyi apfumalaka; ni lweyi anga ni svakuja, aayendlise svosvo na yena.” Vahakelisi va rhesa na vona vata kukhuvuliweni, vaku ka yena: “Mujondzisi, hitayendla yini xana?” Aku ka vona: “Mingahakeliseni vanhu kutlula lesvi milerisiweke svona.” Masochwa na wona mamuvutisa maku: “Hina ke, hitayendla yini?” Aku ka vona: “Mingaphangeni svilo sva vanhu, mingavatekeleni svona hi kukanganyisa, kambe mitsaka hi hakelo ya n'wina.” Vanhu avatshama na valangutela, kutani hinkwavu avayehleketa timbilwini ta vona lesvaku kumbexana Yohani angava yena Mesiya. Yohani avahlamula hinkwavu, aku: “Loko nili mina, nimikhuvula hi mati, kambe wata lweyi anitlulaka hi matimba, lweyi svinganifaneliki kutlhantlha tingoti ta masandhazi ya yena; yena atamikhuvula hi Moya Lowokwetsima ni ndzilo. Foxola ri le vokweni ra yena, lesvaku atabasisa svinene lesvinga xibulelweni xa yena: Kutani trigu atarichela tshaleni; kambe muhungu wona, atawuhisa ndzilweni lowungatimekiki.” Kutani atshama avakhongotela hi timhaka tin'wana letotala, ali karhi atwalisa Evhangeli ka vanhu. Kambe hosi Heroda, mun'we ka tihosi leti ta mune, aatekile Herodiya, nsati wa makwavu Filipi, ayendla ni svin'wana lesvotala svobiha. Kutani Yohani aamutshinya timhakeni leti hinkwatu. Kutani Heroda ayengetela vubihi bzakwe hi kupfalela Yohani jele. Loko vanhu hinkwavu vakhuvuliwa, ni loko Yesu na yena akhuvuliwile, matilo mapfuleka ali karhi akhongela; Moya Lowokwetsima wuxikela henhla ka yena, wuli ni xivumbeko lexifanaka ni xituvana; kutani rito rihuma tilweni riku: “U N'wananga lweyi arhandzekaka, lweyi ni mutsakelaka svinene.” Yesu aalikusuhi ni malembe ya makume manharhu loko asungula ntirho wa yena; kutani hi kuyehleketa ka vanhu, aali n'wana Yosefa, n'wana Heli, wa Matati, wa Levhi, wa Meleki, wa Yanayi, wa Yosefa, wa Matatiya, wa Amosi, wa Nahume, wa Esli, wa Nagayi, wa Mate, wa Matatiya, wa Semeyini, wa Yoseke, wa Yoda, wa Yohani, wa Resa, wa Zerubabele, wa Salatiyele, wa Neri, wa Melki, wa Adi, wa Kosama, wa Elmadema, wa Ere, wa Yoxuwa, wa Eliyazari, wa Yorimi, wa Matati, wa Levhi, wa Simiyoni, wa Yuda, wa Yosefa, wa Yonama, wa Eliyakimi, wa Meleya, wa Mena, wa Matati, wa Natani, wa Davhida, wa Yese, wa Obede, wa Bowazi, wa Sala, wa Nasoni, wa Aminadaba, wa Admini, wa Arni, wa Esromo, wa Farezi, wa Yuda, wa Yakobe, wa Izaki, wa Abrahamu, wa Tera, wa Nakori, wa Serugi, wa Ragawu, wa Faleke, wa Ebere, wa Sala, wa Kayinama, wa Arifakisada, wa Seme, wa Nowa, wa Lameke, wa Metuxela, wa Enoke, wa Yarete, wa Maleleyeli, wa Kayinama, wa Enosi, wa Seti, wa Adamu, wa Xikwembu. Yesu asuka Yordani, atale Moya Lowokwetsima, kutani Moya wumuyisa mananga. Kutani aringiwa hi Diyavulosi hi masiku ya mune wa makume, angaji nchumu hi masiku wolawo; kuteloko mahelile, atwa ndlala. Hi loko Diyavulosi aku ka yena: “Loko uli N'wana wa Xikwembu, bzela ribze leri lesvaku rihundzuka svakuja.” Yesu amuhlamula aku: Kutsaliwile lesvi: “‘Munhu angakala angahanyi hi svakuja ntsena.’” Kutani Diyavulosi aya na yena henhla ka ntshava leyoleha, amukomba hi nkamayana wutsongo mimfumu hinkwayu ya misava; kutani aku ka yena: “Nitakunyika vuhosi lebzi hinkwabzu ni kudzuneka ka bzona, hikuva ninyikiwile svona, kutani ninyika munhu hi kurhandza ka mina. Kutani loko wena unikhinsamela, hinkwasvu lesvi svitava sva wena.” Yesu amuhlamula, aku: Kutsaliwile lesvi: “‘Utakhinsamela Hosi, Xikwembu xa wena, ugandzela xona ntsena.’” Kutani Diyavulosi amuyisa Yerusalema amuveka xihlungweni xa Tempele, kutani aku ka yena: Loko uli N'wana wa Xikwembu, tihoxe hansi, hikuva kutsaliwile lesvi: “‘Xikwembu xitarhuma tintsumi ta xona kukuhlayisa.’” Nasvona vate: “‘Titakuqhamukela mavokweni ya tona, lesvaku nenge wa wena ungatshuki uvavisiwa hi ribze.’” Yesu amuhlamula, aku: Kuvuliwile lesvi: “‘Ungatshuki uringa Hosi, Xikwembu xa wena.’” Loko Diyavulosi ahetile kuringa Yesu hi matlhelo hinkwawu, amutshika, anyimela kukuma nkarhi wun'wana lowunene. Yesu atlhelela Galileya hi matimba ya Moya; kutani ndhuma ya yena yihangalaka matlhelweni hinkwawu ya tiko. Kutani ajondzisa masinagogeni ya vona, ali karhi adzunisiwa hi vanhu hinkwavu. Aya ni le Nazareta, laha angakulela kona; kutani hi siku ra Savata tani hi ntolovelo wa yena anghena sinagogeni, kutani asuka ayima kuva ajondza buku. Kutani anyikiwa buku ya muprofeta Ezaya; loko ayipfulile, akuma laha kungatsaliwa marito lawa mange: “Moya wa Hosi wu le henhla ka mina, hikuva yinitotile hi mafurha, yiva yinirhuma kuyabzela svisiwana Evhangeli; kuyativisa lavabohiweke lesvaku vatatshunxiwa, ni svifamahlo lesvaku svitavona; yinirhumile kutshunxa lava vaxanisiwaka, ni kutwalisa lembe lerinene ra Hosi.” Kuteloko apfalile buku, ayinyika mupfuni, atshamisa hansi; kutani hinkwavu lava avali sinagogeni vamulangutisisa. Hi loko asungula kuvajondzisa, aku: “Namuntlha rito leri miritweke, rihetisekile.” Kutani hinkwavu vavula vumboni ha yena, na vali karhi vahlamala marito lawa yosaseka lamahumaka non'weni wa yena, vaku: “Xana munhu lweyi ahi yena n'wana Yosefa ke?” Kutani aku ka vona: “Natshemba lesvaku mitanibzela xihlayahlaya lexingo: ‘N'anga, tihanyise hi wexe!’ Nasvona mitaku: ‘Lesvi hisvitweke sviyendliwa hi wena Kapernawume, sviyendle nikola tikweni ra wena!’” Yesu atlhela aku: “Namibzela lesvaku aku na muprofeta lweyi ayamukeliwaka tikweni ra yena. Nimibzela ntiyiso nili: Vavasati lavotala va vafelakazi avali kona tikweni ra Israyele minkarhini ya Eliya, loko tilo ripfaliwa hi malembe manharhu ni tihweti ta ntlhanu ni yin'we, kutani ndlala leyikulu yiva kona tikweni hinkwaru; kambe Eliya angarhumiwanga ni le ka mun'we wa vona; arhumiwile ntsena ka wansati wa mufelakazi wa le Sarepta wa le Sidoni. Nasvona, akuli ni va nhlokonho lavotala tikweni ra Israyele minkarhini ya muprofeta Elixa, kambe akuvanga ni mun'we wa vona lweyi angabasisiwa, loko angali Namani wa le Siriya.” Kutani hinkwavu lava avali sinagogeni vakwata svinene loko vatwa timhaka leto. Vapfuka vayima, vamuhlongola ahuma handle ka doropa, vamuyisa henhla ka ntshava leyi doropa ra vona ariyakiwe ka yona, kuyamususumetela hansi. Kambe yena ahundza hi le xikarhi ka vona, atifambela. Kutani Yesu angirimela aya Kapernawume, ringa doropa ra Galileya, kutani hi siku ra Savata asungula kujondzisa vanhu. Hi loko vona vahlamala hi kujondzisa ka yena, hikuva marito ya yena amali ya lweyi anga ni vuhosi. Asinagogeni, akuli ni munhu lweyi aali ni moya wa chaka, wa dimoni; wona wuhuwelela hi rito lerikulu, wuku: “Ha! Mhaka ya hina na wena hi yihi ke, wena Yesu wa Nazareta? Xana utele kutahilovisa ke? Nasvitiva lesvaku u mani! U Lweyi Wohlawuleka wa Xikwembu.” Kambe Yesu awutshinya, aku: “Miyela! Huma ka munhu yelweyi!” Hi loko dimoni riwisa munhu lwiya xikarhi ka xitshungu, rihuma ka yena, kambe ringamuvavisanga. Kutani hinkwavu vahlamala, vavutisana vaku: “Rito ra munhu lweyi hi leri ra kuyini, lesvi alerisaka mimoya ya chaka hi vuhosi ni matimba, kutani yihuma ke?” Kutani ndhuma ya yena yihangalaka matlhelo hinkwawu ya tiko lero. Kutani Yesu ahuma sinagogeni, anghena kaya ka Simoni; kambe mamana wa nkata Simoni aakhomiwile hi kuhiseta ka miri, kutani vamukombelela ka Yesu. Hi loko Yesu ayima kusuhi na yena, atshinya kuhiseta ka miri, kutani kusuka; hi loko wansati ahantla apfuka, avatirhela. Loko jambu ripelile, hinkwavu lava avali ni vanhu lavakarhatiwaka hi mavabzi ya tinxakaxaka, vavatisa ka Yesu, kutani atlhanteka mavoko henhla ka mun'wana ni mun'wana wa vona, avahanyisa. Na wona madimoni mahuma ka lava votala, mahuwelela maku: “Wena u N'wana wa Xikwembu.” Kambe Yesu amatshinya, angama pfumeleli kuvulavula, hikuva amativa lesvaku hi yena Kriste. Loko bzixile, ahuma aya mananga, kutani vanhu lavotala vamulava, vakondza vayamukuma, kutani varingeta kumusiveletela lesvaku angahambani na vona. Kambe yena aku ka vona: “Nifanela kuya madoropeni man'wana, lesvaku nakona niyapaluxa Evhangeli ya Mfumu wa Xikwembu, hikuva hi lesvi nirhumeliweke svona.” Kutani ayajondzisa masinagogeni ya Galileya. Siku rin'wana Yesu aanyimile ridongeni ra tiva ra Genezareta, xitshungu xili karhi ximukamanyeta, na xinavela kuyingisa Rito ra Xikwembu. Kutani avona mabzatso mambirhi lawa makokeliweke ribuweni ra tiva; vaphasi avahumile ka wona, vali karhi vahlampsa tinkoka ta vona. Anghena ka rin'wana ra mabzatso, leri arili ra Simoni, kutani akombela Simoni kuli tshineta kulenyana ni ribuwa, kutani ajondzisa xitshungu, na atshamile bzatswini. Loko ahetile kuvulavula, aku ka Simoni: “Tlutelani xiziveni, mipeta tinkoka ta n'wina kona, akuva mitaphasa.” Kambe Simoni ahlamula aku: “Mujondzisi, hitirhile vusiku hinkwabzu, hingaphasi nchumu; kambe hi kuvula ka wena, nitapeta tinkoka.” Vayendlisa svosvo, kutani vaphasa tihlampfi letotala ngopfu, tinkoka ta vona tilava kuhandzuka. Kutani vakoweta vatirhikulobze lava avali bzatswini rin'wana lesvaku vata, vatavapfuna. Vona vata, kutani vatata mabzatso mambirhi wolawo, makondza malava kumbombomela. Loko Simoni Petrosi asvivona, akhinsama milengeni ya Yesu, aku ka yena: “Suka ka mina Hosi, hikuva ni mujohi.” Yena ni hinkwavu lava avali na yena, vahlamala ngopfu hi kutala ka tihlampfi leti vatiphaseke; Svivile tano ni ka Yakobe na Yohani, vana va Zebedewu, vatirhikulobze va Simoni. Kutani Yesu aku ka Simoni: “Ungachavi, kusukela svosvi utava lweyi aphasaka vanhu.” Kuteloko vavuyiselile mabzatso ribuweni, vasiya hinkwasvu vamulandza. Na ahali muntini wun'wana, kuta wanuna lweyi ataleke hi nhlokonho; kutani loko avona Yesu, atiwisa hansi hi mombo, amukhongela, aku: “Hosi, loko usvirhandza, unganibasisa.” Kutani Yesu atshambuluta voko, amukhumba aku: “Nasvirhandza, nakubasisa!” Hi nomo-lo nhlokonho yisuka ka yena Kutani Yesu amubzela aku: “Ungatshuki ubzela munhu svilo lesvi, kambe famba, uyatikomba ka Muprista, uhumesa sva kubasisiwa ka wena, hilaha Moxe aleriseke hakona; svitava vumboni ka vona.” Kutani lesvi asvivuliwa mayelanu na yena, asvihangalaka, ni ndhuma ya Yesu yitwakala ngopfu; xitshungu lexikulu xitatamuyingisa, ni kuhanyisiwa hi yena. Kambe aapfa asuka, ayakhongela ali yexe. Siku rin'wana, Yesu aali kujondziseni. Vafarisi ni vajondzisi va Nawu lavahumeke svidoropanini hinkwasvu sva Galileya, ni sva Yudeya, ni le Yerusalema, avatshamile kolaho, kutani matimba ya Hosi amali na yena ya kuhanyisa timbabzi. Hi loko kuta vavanuna lavarhwaleke munhu wa kukhwanyala svirho, ayetlele arihlakeni; varingeta kumunghenisa ndlwini ni kumuveka mahlweni ka Yesu. Loko vangakumi lomu vangamunghenisaka hi kona, hikolaho ka xitshungu, vakhwela henhla ka yindlo, vahahlula xihlungwe, vamuyehlisa xikarhi ka vanhu ali rihlakeni, avekiwa mahlweni ka Yesu. Loko Yesu avona kupfumela ka vona, aku: “Nakulorhi, urivaleliwile svijoho sva wena!” Kutani Vatsali ni Vafarisi vasungula kuvilela timbilwini ta vona, vaku: “Munhu lweyi asandza Xikwembu! Angava mani ke? Xana i mani lweyi angarivalelaka munhu svijoho, loko xingali Xikwembu ntsena ke?” Kambe loko Yesu ativile kuvilela ka vona, avahlamula aku: “Xana mivilela hikolaho ka yini timbilwini ta n'wina. Xana Kuvevuka yini? Kuvula lesvaku: ‘Urivaleliwile svijoho sva wena’, kumbe kuvula lesvaku: ‘Pfuka ufamba’ xana? Svosvi mitativa lesvaku N'wana-wa-Munhu a ni matimba misaveni ya kurivalela vanhu svijoho.” Hi loko aku ka lweyi wa kukhwanyala svirho: “Nili ka wena: Pfuka uteka rihlaka ra wena umuka.” Hi nomo-lo okakatsuku, mahlweni ka vona, ateka rihlaka leri aayetlele ka rona, atimukela na ali karhi adzunisa Xikwembu. Kutani hinkwavu vahlamala, vadzunisa Xikwembu, vatala hi kuchava vaku: “Namuntlha hi vonile svihlamaliso.” Ndzhaku ka timhaka leto, Yesu ahuma, kutani avona muhakelisi wa rhesa lweyi avaku i Levhi, na atshamile ndlwini ya vurheselo. Aku ka yena: “Nilandze.” Hi loko yena asuka ayima, atshika hinkwasvu amulandza. Ndzaku ka svona Levhi ayendlela Yesu nkhuvu lowukulu kaya ka yena. Akuli ni xitshungu lexotala xa varhesisi ni xa vanhu van'wana lavatshameke kujeni na vona. Vafarisi ni Vatsali va ntlawa wa vona, vasola vaku ka vajondzisiwa va yena: “Xana mijela yini ni vahakelisi va rhesa ni vajohi, minwela yini na vona ke?” Yesu avahlamula aku: “Lavatsakeke mirini avalavi n'anga, kambe yilaviwa hi lavavabzaka. Anitanga kutavitana lavalulameke, kambe kutavita vajohi, lesvaku vatisola. ” Kutani vaku ka yena: “Vajondzisiwa va Yohani vatolovela kutitsona svakuja, vayendla ni svikhongelo; vajondzisiwa va Vafarisi na vona vayendlisa svosvo; kasi lava va wena, vaja vatlhela vanwa!” Yesu aku ka vona: “Xana mingasindzisa varhambiwa vamuteki kutitsona svakuja, loko muteki ahalinavona ke? Masiku mata lawa muteki angatasusiwa ka vona; hi kona vangatatitsona svakuja, masikwini wolawo!” Atlhela avabzela xifaniso aku: “Aku na munhu lweyi ahandzulaka xipandzwa ka banci lerimpsha, kuxiyendla xiziva, axirhungelela ka lera khale, hikuva loko ayendlisa svosvo, atava ahandzulile abanci lerimpsha, kutani xiziva leximpsha axingayelani ni banci ra khale. Aku na munhu lweyi achelaka vhinyu lerimpsha atindongeni ta khale; hikuva loko ayendlisa svosvo, vhinyu lerimpsha ritahandzula tindonga rihalaka, tindonga na tona titava tiwonhakile. Kambe vhinyu lerimpsha richeliwa tindongeni letimpsha. Nasvona aku na munhu lweyi anavelaka vhinyu lerimpsha loko anwile lera khale, hikuva ataku: ‘Kunandziha lera khale.’” Hi siku ra Savata, Yesu ahundza hi le xikarhi ka masimu. Kutani vajondzisiwa va yena vatshova minchocho ya trigu, vasvosva hi mavoko, vaja. Kambe Vafarisi van'wana vaku: “Hikolaho ka yini miyendla lesvingapfumeleliwiki hi siku ra Savata ke?” Yesu avahlamula aku: “Xana amijondzanga lesvingayendliwa hi Davhida, siku leri angatwa ndlala, yena ni lava avali na yena ke? Anghenile ndlwini ya Xikwembu, ateka svinkwa sva mhamba lesvingafanelangiki kujiwa hi vanhu van'wana, loko kungali hi vaprista ntsena, kutani aja, atlhela anyika ni lava avali na yena.” Kutani aku ka vona: “N'wana-wa-Munhu i Hosi ya Savata.” Siku rin'wana ra Savata anghena sinagogeni ajondzisa; kutani akuli ni munhu kona lweyi voko ra yena ra xinene arikhwanyalile. Vatsali ni Vafarisi vaxiya Yesu, kuvona kumbe atahanyisa munhu hi siku ra Savata, lesvaku vatakuma lexi vangatamuhehlaka ha xona. Kambe yena aativa miyehleketo ya vona, kutani aku ka munhu wa kukhwanyala voko: “Suka uyima la xikarhi!” Yena asuka ayima. Yesu aku ka vona: “Namivutisa: Xana lesvilulameke kuyendliwa hi siku ra Savata hi svihi ke: Kuyendla lesvinene kumbe kuyendla lesvobiha, kuponisa munhu kumbe kumulovisa ke?” Avahonolela svinene hinkwavu kutani aku ka munhu lwiya: “Tshambuluta voko ra wena!” Yena aritshambuluta, kutani voko ra yena ritlhela riwololoka. Vatsali ni Vafarisi vahlundzuka, kutani vayatwanana lesvi vangatasviyendla ha Yesu. Masikwini wolawo Yesu asuka aya ntshaveni ayakhongela; kutani atshama vusiku hinkwabzu na ali karhi akhongela Xikwembu. Loko bzixile, avitana vajondzisiwa va yena, kutani xikarhi ka vona ahlawula khume ni vambirhi, avachula vapostola va yena. Lava vahlawuliweke i Simoni lweyi Yesu amuchuleke vito ra Petrosi, kulandza Andreya makwavu, na Yakobe, na Yohani, na Filipi, na Bartolomewu, na Matewu, na Tomasi, na Yakobe n'wana Alfewu, na Simoni lweyi angavuliwa Muhiseki, na Yuda n'wana Yakobe, na Yudasi Iskariyota, lweyi angahundzuka muxengi. Loko Yesu angirimelile na vona hi le ntshaveni, ayayima rivaleni; kutani kuta vunyingi lebzikulu bzavajondzisiwa va yena, ni xitshungu xikulu xa vanhu lavahumaka hinkwaku Yudeya, ni le Yerusalema, ni le ribuweni ra Tiro na Sidoni, vatela kutamuyingisa ni kuhanyisiwa hi yena; lavakarhatiwaka hi mimoya ya chaka, na vona aavahanyisa. Xitshungu hinkwaxu axiringeta kumukhumba, hikuva matimba amahuma ka yena, mavahanyisa hinkwavu. Kutani Yesu alanguta vajondzisiwa va yena, aku: Mikatekile n'wina svisiwana, hikuva Mfumu wa Xikwembu wu le ka n'wina. Mikatekile n'wina mitwaka ndlala svosvi, hikuva mitaja mixurha. Mikatekile n'wina mirilaka svosvi, hikuva mitahlekelela. “Mikatekile loko vanhu vamivenga, loko vamihlongola ni kumirhuketela, ni loko vasola vito ra n'wina onge hi loko ribihile, hikolaho ka N'wana-wa-Munhu.” Sikwini rolero tsakani mitsakisisa, hikuva hakelo ya n'wina yitava leyikulu tilweni; nasvona vatatana va vona vayendlisile svosvo ka vaprofeta. “Kambe mi ni khombo n'wina lavafuweke, hikuva se mikumile kuchaveleliwa ka n'wina. Mi ni khombo n'wina mijaka mixurha svosvi, hikuva mitatwa ndlala. mi ni khombo n'wina mihlekaka svosvi, hikuva mitarila mikolola. “Mi ni khombo n'wina loko vanhu hinkwavu vamidzunisa, hikuva vatatana va vona vayendlisile svosvo ka vaprofeta va mavunhwa.” “Kambe ka n'wina lava miniyingisaka nili: Rhandzani valala va n'wina, miyendla lesvinene ka lava vamivengaka. Katekisani lava vamirhuketelaka, mikhongelela lava vamixanisaka. Loko munhu akuyamasa rhama, mukangatelele ni lerin'wana; lweyi akuwutlelaka jansi, ungamuyaleli ni hembe. Nyika mani na mani lweyi akombelaka ka wena; ni loko munhu akutekela sva wena, ungamulondzi. Lesvi milavaka lesvaku vanhu vamiyendla svona, vayendleleni svona na n'wina, hikuva loko mirhandza lava vamirhandzaka ntsena, mingalangutela kukhensiwa xana? Vajohi na vona varhandza lava vavarhandzaka. Kutani loko miyendla lesvinene ntsena ka lava vamiyendlaka lesvinene, mingalangutela kukhensiwa xana? Vajohi na vona vayendlisa svosvo. Ni loko milomba ntsena lavamitshembaka lesvaku mitatlhela misvikuma ka vona, mingalangutela kukhensiwa xana? Vajohi na vona valomba vajohikulobze lesvaku vatatlhela vakuma svofana ka vona. Kambe n'wina, rhandzani valala va n'wina, miyendlela vanhu lesvinene; lombani mingalanguteli kutlheliseliwa, kutani hakelo ya n'wina yitava leyikulu; mitava vana va Lweyi anga henhlahenhla, hikuva yena anitimpsalu ka lavangativiki kukhensa ni ka lavobiha. Miva ni timpsalu kukota lesvi Tatana wa n'wina na yena anga ni musa. “Mingayavanyisi, kutani amingayavanyisiwi; mingaveki van'wana minandzu, kutani amingavekiwi milandzu; rivalelani, kutani mitarivaleliwa. Nyikani van'wana, na n'wina mitanyikiwa; vataminyika, mpin'wini lowutaleke wutlhela wujinjiwa, wuhlunguhliwa, wuva wuhalakela; hikuva mpimo lowu mipimelaka van'wana ha wona na n'wina, mitapimeliwa ha wona.” Atlhela avabzela xifaniso aku: “Xana axifamahlo xingakota kufambisa xifamahlokulombze ke? Asvingatawela kheleni hi vumbirhi bza svona ke? Mujondzisiwa angatluli mujondzisi wa yena; kambe mujondzisiwa mun'wana ni mun'wana lweyi ajondzeke svinene, atava tani hi mujondzisi wa yena. “Ulangutela yini xilavi lexi xinga tihlweni ra makwenu, na kuve wena unintsandza tihlweni ra wena, lowu ungawu voniki ke? Umubzelisa kuyini makwenu uku: ‘Makwerhu, nitshike nisusa xilavi tihlweni ra wena’, kambe awuvoni ntsandza lowu wunga tihlweni ra wena ke? Mukanganyisi! Rhanga ususa ntsandza lowunga tihlweni ra wena; hi kona ungatakota kuvona svinene kususa xilavi lexinga tihlweni ra makwenu. “Aku na nsinya lowo nandziha lowuvekaka mihandzu leyobiha, nasvona aku na nsinya lowo biha lowuvekaka mihandzu leyonandziha. Kunene nsinya wun'wana ni wun'wana wutiviwa hi mihandzu ya wona. Makuwa mangakala manga khayiwi mintweni, ni xichacha xa mawuvha xingakala xingakhayiwi xihlahleni xa mintwa. Munhu lwenene ahumesa lesvinene xumeni lexinene xa mbilu ya yena, ni munhu lweyi wobiha ahumesa lesvobiha xumeni lexobiha xa mbilu ya yena, hikuva nomo wa munhu wuvula lesvi mbilu ya yena yiteleke hi svona. “Xana minivitela yini: ‘Hosi, Hosi’ ke, na mingayendli lesvi nimibzelaka svona? Mani na mani lweyi ataka ka mina, ayingisa marito ya mina ni kuhanya ha wona, nitamukomba lweyi afanaka na yena. Afana ni munhu lweyi ayakaka yindlo; acelile aya hansi svinene kutani aveka masungulu ribzeni; loko ndhambhi yita, boboma riba yindlo leyi, kambe ritsandzeka kuyitsekatsekisa, hikuva yiyakiwile khwatsi svinene. Kambe lweyi atwaka, kutani angayendli, afana ni munhu lweyi ayakeke yindlo henhla ka sava, yingali na masungulu lawa yotiya: Loko boboma riba yindlo leyi, yihantla yiwa, kutani kuwonheka ka yindlo yakona kuva lokukulu.” Loko Yesu ahetile kujondzisa vanhu svilo lesvi hinkwasvu, anghena Kapernawume. Akuli ni ndhuna ya dzana ra masochwa kona; ayili ni mutirhi lweyi yimurhandzaka ngopfu, kambe mutirhi lweyi aavabza, ali kusuhi ni kufa. Loko ndhuna yitwa ndhuma ya Yesu, yirhuma madoda yokarhi ya Vayuda maya ka yena, mayamukombela lesvaku ata, atahanyisa mutirhi wa yona. Loko mafika ka Yesu, mamukombela svinene, maku: “Svamufanela lesvaku umuyendlela svona, hikuva arhandza va ka hina, nasvona ahiyakele sinagoga.” Kutani Yesu afamba na vona. Loko afikile kusuhi ni kaya ka ndhuna, yona yirhuma vanghanu va yona, vayamubzela, vaku: “Hosi, ungatikarhati utafika la, hikuva asvinifanelanga lesvaku unghena ndlwini ya mina. Na mina ke, anititwanga na nili lweyi nifanelaka kutakuyamukela; kambe vula rito ntsena lesvaku mutirhi wa mina ahanya. Mina ninga munhu lweyi afumiwaka hi van'wana, ni ni masochwa hansi ka mina; loko niku ka rin'we ra wona: ‘Famba!’ Rafamba; ka rin'wana: ‘Tana!’ Rata; ni le ka mutirhi wa mina: ‘Yendla lesvo karhi!’ Wasviyendla.” Loko Yesu atwa marito lawa, ahlamala, kutani ahundzukula alanguta xitshungu lexi aximuheleketa aku: “Namibzela nili: Anisikuma kupfumela lokofana ni loku, hambi kuli xikarhi ka Vaisrayele.” Loko lavarhumiweke vatlhelela kaya, vakuma mutirhi na ahanyile. Ndzhaku ka svosvo, Yesu aya doropeni leri vange i Nayini. Vajondzisiwa va yena ni vanhu lavotala vafamba na yena. Loko afika kusuhi ni nyangwa ya doropa, avona vanhu lavahumaka na varhwalile mufi, lweyi aali n'wana mun'we ka mamana wa yena wa mufelakazi, kutani xitshungu lexotala xa vanhu va doropa axiheleketa mamana lwiya. Loko Hosi Yesu amuvona, amutwela vusiwana, aku ka yena: “Ungarili.” Hi loko atshinela, akhumba nkaxa lowu awuli ni ntsumbu kutani lava va wurhwaleke vayima; kutani aku: “Jaha, nili ka wena: Pfuka!” Kutani mufi apfuka atshama, asungula kuvulavula. Kutani Yesu amuvuyisa ka mamana wa yena. Hinkwavu vakhomiwa hi kuchava, vadzunisa Xikwembu vaku: “Kuhumelele muprofeta lwenkulu xikarhi ka hina.” Nasvona avaku: “Xikwembu xiyendzele tiko ra xona.” Kutani ndhuma ya yena yihangalaka tikweni hinkwaru ra Vayuda ni le matikweni lawa manga kusuhi na rona. Timhaka leti hinkwatu tiyarunguleliwa Yohani hi vajondzisiwa va yena. Kutani Yohani ahlawula vambirhi xikarhi ka vona, avarhuma ka Hosi kuyavutisa vaku: “Xana hi wena lweyi vange wata, kumbe hahalangutela mun'wana ke?” Loko vavanuna lava vafikile ka Yesu, vaku: “Yohani Mukhuvuli ahirhumile ka wena. Ate: ‘Xana hi wena lweyi vange wata, kumbe hahalangutela mun'wana ke?’” Hi nkarhi wolowo Yesu ahanyisa lavotala lava vaxanisiwaka hi mavabzi, ni lavakarhatekaka, ni lavanga ni mimoya leyobiha, ahanyisa ni lavotala lavafeke mahlo. Kutani ahlamula varhumiwa, aku: “Fambani miyarungulela Yohani lesvi misvivoneke ni lesvi misvitweke; svifamahlo sva vona, svilima svafamba, va nhlokonho vabasisiwa, lava vafeke tindleve vatwa, vafi vapfuka, svisiwana svirunguleliwa Evhangeli. Kutani kukatekile lweyi angatakala angakhunguvanyeki hikolaho ka mina.” Kuteloko varhumiwa va Yohani vasukile, Yesu asala avulavula hi Yohani, aku ka xitshungu: “Amiyile kuyahlalela yini mananga xana? Arili rihlanga leritsekatsekisiwaka hi moya ke?” Ahihim! Loko svilitano, amiyela kuyavona yini ke? Xana aali munhu lweyi ayambaleke svosaseka ngopfu ke? Vonani, lavayambalaka khwatsi, ni lavahanyaka vutomi bza maxovo, va le tindlwini ta vuhosi. Nibzeleni, amiyela kuyavona yini ke? Aali muprofeta xana? Ina, aali yena, ni kutlula ni muprofeta. Hi yena lweyi kungatsaliwa ta yena loko vaku: “‘Vona, nirhuma ntsumi ya mina mahlweni ka wena, yitakurhangela mahlweni, yilungisa ndlela ya wena.’ “Nitiyisile nili ka n'wina: Xikarhi ka vanhu lavapsaliweke hi vavasati, aku na lweyi atlulaka Yohani; kambe lwentsongo ka hinkwavu Mfun'wini wa Xikwembu, i nkulu ka Yohani.” Vanhu hinkwavu, kun'we ni vakangayisi, avayingisa Yesu; avayendlile kurhandza lokunene ka Xikwembu hi kukhuvuliwa hi Yohani. Vafarisi ni vajondzisi va Nawu vona avangakhuvuliwanga hi Yohani, hikuva avayala makungu ya Xikwembu henhla ka vona. Yesu atlhela aku: “Vanhu va masiku lawa, ningavafanisa na yini ke? Vafana ni vanhu vahi ke?” Vafana ni svihlangi lesvi svitshameke ntsendzeleni, svilengetana sviku: “‘Himichayele nanga, kambe amicinanga; hiyimbelelile tinsimu ta mahlomulu, kambe amirilanga.’ “Hi ndlela leyi, Yohani Mukhuvuli atile angaji svakuja, anganwi vhinyu, kutani miku: ‘A ni dimoni.’” “N'wana-wa-Munhu atile aja, anwa, kutani miku: ‘Langutani, munhu wa makolo, wa xidakwa, lweyi atwananaka ni vahakelisi va rhesa ni vajohi!’” “Hambi svilitano, hinkwavu lavayamukelaka vutlhari bza Xikwembu, vabzikuma bzilulamile.” Mun'wana wa Vafarisi arhamba Yesu kuta taja na yena. Hi loko anghena ndlwini ya Mufarisi lweyi, atshama kujeni. Akuli ni wansati wa mujohi doropeni rolero; loko atwa lesvaku Yesu atshamile kujeni ndlwini ya Mufarisi, atisa ximbitana xa ribze robasa lexitaleke hi mafurha yonun'hwela. Kutani ata hi le ndzhaku ka Yesu, akhinsama ali karhi arila, atsakamisa ni milenge ya Yesu hi minhloti, ayisula hi misisi ya yena, amun'qunta; ndzhaku ka svosvo ayitota hi mafurha yotola lawa yonun'hwela. Loko Mufarisi lweyi angarhamba Yesu asvivona, avilela mbilwini ya yena aku: “Loko munhu lweyi aali muprofeta, aatava ativile lesvaku wansati lweyi amukhumbaka i mani, ni lesvaku i munhu muni, hikuva i mujohi.” Yesu avulavula na yena aku: “Simoni, ni ni rito ka wena.” Yena aku: “Vulavula, Mujondzisi.” Yesu aku: “Akuli ni vanhu vambirhi lava avali ni nandzu ka munhu wa mabindzu. Mun'we aali ni nandzu wa timale ta ntlhanu wa madzana (500), mun'wana ta ntlhanu wa makume (50). Lesvi avapfumala xo muhakela hi xona, munhu lweyi avarivalela ha vumbirhi bza vona. Xana hi wihi ka vona lweyi angatamurhandza ngopfu ke?” Simoni ahlamula aku: “Natshemba, hi lweyi arivaleliweke nandzu lowukulu.” Yesu aku ka yena: “Kunene, utiyisile.” Kutani ahundzukula alanguta wansati, aku ka Simoni: “Wansati lweyi, wa muvona xana? Ninghene ndlwini ya wena, awuninyikanga mati nihlamba milenge; kambe yena atsakamisile milenge ya mina hi minhloti, atlhela ayisula hi misisi ya yena. Awunin'quntanga; kambe lweyi, kusukela ni nghena laha, angatshikanga kunin'qunta milenge. Awunitotanga mafurha nhlokweni; kambe lweyi atotile milenge ya mina hi mafurha lawa yotola yonun'hwela. Hikolaho nili, lweyi arivaleliweke svijoho lesvotala, rirhandzu ra yena i rikulu, kasi lweyi arivaleliweke lesvitsongo, ni rirhandzu ra yena i ritsongo.” Kutani aku ka wansati: “Svijoho sva wena svirivaleliwile.” Lava vatshameke kujeni svin'we na yena, vasungula kuvilela timbilwini ta vona, vaku: “Lweyi i mani xana, lesvi akotaka ni kurivalela vanhu svijoho sva vona?” Hi loko aku ka wansati: “Kupfumela ka wena kukuponisile, famba hi kurhula.” Ndzhaku ka svosvo, Yesu afamba hi doropa rin'wana ni rin'wana ni xidoropana xin'wana ni xin'wana ali karhi avula Rito, apaluxa Evhangeli ya Mfumu wa Xikwembu; lava va khume ni vambirhi na vona avali na yena, ni vavasati van'wana lavatshunxiweke ka mimoya ya chaka ni leka mavabzi, avali kona. Aali Mariya lweyi avaku i wa Magadala, lweyi kuhlongoliweke ntlhanu wa madimoni ni mambirhi ka yena, na Jowana, nkata Khuza ndhuna ya Heroda, na Suzana, ni vavasati van'wana lavotala lava avatirhisa sva vona kupfuna Yesu ni vajondzisiwa va yena. Vanhu avata ka Yesu vahuma madoropeni layotala, vahlengeletana vakondza vava xitshungu lexikulu, kutani avulavula na vona hi xifaniso aku: “Murimi wokarhi ahumile ayahaxa mbewu; loko ali karhi ahaxa, timbewu tin'we tiwela ndleleni, vanhu vatikandziyela, kutani tinyanyana tita, titatija hinkwatu. Tin'wana tiwela maribzeni, kutani loko timila, svimilwa svivuna hi kupfumala ndzhongo. Timbewu tin'wana kambe tiwela xikarhi ka mintwa, kutani mintwa yimila svin'we na tona, yitikamanyeta tifa. Kambe tin'wana tiwela misaveni leyinene; loko timilile, tichela ka dzana.” Loko avulile svosvo, atlakusa rito aku: “Lweyi anga ni tindleve toyingisa, aayingise.” Kutani vajondzisiwa va Yesu vamuvutisa xifaniso lexi, akuva vativa lesvaku xivula yini. Kutani aku: “N'wina, minyikiwile kutiva svihundla sva Mfumu wa Xikwembu, kambe van'wana vanyikiwa svona hi svifaniso, lesvaku:” “‘Ni loko vavona, vangavonisisi, ni loko vatwa, vangatwisisi.’” “Loko xili xifaniso lexi xivula lesvi: Timbewu i Rito ra Xikwembu. Leti tingawela ndleleni, i vanhu lavatwaka Rito; kutani Diyavulosi ata, arisusa timbilwini ta vona, lesvaku vatakala vangapfumeli, vangaponisiwi. Timbewu letingawela maribzeni, i vanhu lavayamukelaka Rito hi kutsaka siku leri varitwaka, kambe vapfumala timintsu, vatiyisela nkarhinyana ntsena; kutani hi siku ra ndzingo vatlhelela ndzhaku. Timbewu letingawela mintweni, i vanhu lavatweke Rito, kambe loko vali karhi vaya mahlweni, vakamanyetiwa hi kuvilela, ni rifuwo, ni kutitsakisa hi sva vutomi lebzi, kutani vangaveki mihandzu leyiwupfaka. Kambe mbewu leyingawela misaveni leyinene, i vanhu lavayingisaka Rito hi timbilu letolulama, letinene, varihlayisa, vaveka mihandzu hi kutiyisela. “Aku na munhu lweyi alumekaka rivoni, kutani arimbhonya hi mbita, kumbe kuriveka hansi ka mubedo; kambe ariveka henhla, lesvaku lavanghenaka ndlwini vavona kukhanya. Hikuva aku na xilo lexifihliweke lexi xingatakala xingapaluxiwi, aku na xilo lexinga xihundleni lexi xingatakala xingativiwi ni kuhumela rivaleni. Hikolaho, tivoneleni, mihlayisa lesvi misvitwaka. Lweyi anga ni xanchumu, atanyikiwa svin'wana, kasi lweyi angaliki na nchumu, atatekeliwa ni lexi ayehleketaka lesvaku a na xona.” Mamana wa Yesu ni vamakwavu vata ka yena, kambe vatsandzeka kufika kusuhi na yena hikolaho ka xitshungu. Kutani van'wana vamubzela vaku: “Mamana wa wena ni vamakwenu va laha handle, valava kukuvona.” Kambe yena aku: “Mamana ni vamakwerhu, hi lavatwaka Rito ra Xikwembu, vavuya vahanya ha rona.” Siku rin'wana Yesu anghena bzatswini ni vajondzisiwa va yena, kutani aku ka vona: “Ahipeleleni hiya ka tlhelo rin'wana ra tiva.” Hi loko vatluta vafamba. Vate vahapela, Yesu akhomiwa hi vurhongo ayetlela; kutani xidzedze xivafikela tiveni, bzatsu rilava kutala hi mati, kutani vava khombzeni. Vaya mupfuxa vaku: “Hosi, Hosi, halova!” Hi loko apfuka ayima, atshinya moya ni magandlati, sviva svimiyela, kurhula kuva kona. Kutani aku ka vona: “Xana kupfumela ka n'wina ku kwihi ke?” Vona vachava, vahlamala, vavutisana vaku: “Xana i munhu muni lweyi, lesvi alerisaka mheho ni tiva, sviva svimuyingisa ke?” Kutani vapelela tikweni ra Vagerasi lerilangutaneke na Galileya. Loko afikile ribuweni, axika, kutani ahlangana ni mun'we wanuna lweyi aahuma hi le doropeni, ali ni madimoni; akuli khale angahayambali nchumu, ni lendlwini aangahatshami, kambe aatshama masirheni. Loko avona Yesu, ahuwelela, atiwisela hansi mahlweni ka yena, atlakusa rito aku: “Mhaka ya mina na wena hi yihi ke, wena Yesu N'wana wa Xikwembu xa le henhlahenhla? Nakukhongela, unganixanisi.” Aavula svosvo hikuva Yesu aalerisile moya lo wa chaka kuhuma ka munhu yelweyo; moya wakona awutolovela kumukhoma, kutani avamuboha mavoko ni milenge hi machini vamulavelela, kambe yena atsema tinsimbi toleto, ayisiwa mananga hi moya lowa chaka. Yesu amuvutisa aku: “Vito ra wena u mani?” Aku: “Hi vandla.” Hikuva akunghenile ka yena madimoni layotala. Kutani makombela Yesu lesvaku angamabzeli kuhuma maya kheleni ra vafi. Akuli ni ntlhambi lowukulu wa makhumba kolaho, lawa amali kujeni le gangeni. Madimoni makombela svinene ka Yesu lesvaku amapfumelela kuyanghena ka wona. Kutani amapfumelela. Hi loko madimoni mahuma ka munhu yelweyo, mayanghena makhumbeni, kutani hinkwawu matsutsumela nkoveni, maya tihoxa xiziveni xa tiva, mambombomela kona. Loko varisi va wona vavona lesvihumeleleke, vabaleka, vayarungulela vayaki va doropa ni va le masin'wini. Kutani vona vahuma, vayavona lesvihumeleleke. Loko vafika ka Yesu, vakuma munhu lweyi madimoni mangasuka ka yena na atshamile milengeni ya Yesu, ayambalile, ali munhu; kutani vachava ngopfu. Lava vavoneke timhaka leti, vavarungulela hilaha munhu lweyi wa madimoni ahanyisiweke hakona. Kutani vayaki hinkwavu va tiko ra Vagerasi, vakombela Yesu lesvaku asuka tikweni ra vona, hikuva avakhomiwile hi kuchava lokukulu. Hi loko Yesu anghena bzatswini, atlhela. Kutani munhu lweyi madimoni mahumeke ka yena, akombela kufamba na Yesu; kambe Yesu amutlhelisa, aku: “Tlhelela kaya, uyavula lesvikulu lesvi Xikwembu xiku yendleleke svona.” Kutani afamba ayarungula ka doropa hinkwaru svilo lesvikulu lesvi Yesu amuyendleleke svona. Kuteloko Yesu atlhelile, xitshungu ximuyamukela hi kutsaka, hikuva hinkwavu avamurindzile. Kutani kuta wanuna lweyi avaku i Jayiro, lweyi aali murhangeli wa sinagoga; awa milengeni ya Yesu, amukhongela lesvaku anghena muntini wa yena, hikuva aali ni n'wana mun'we ntsena wanhwanyana, wa malembe yolava kuringana khume na mambirhi, lweyi aalikusuhi ni kufa. Loko Yesu asuka ayakona, akamanyetiwa hi xitshungu. Akuli ni wansati kolaho lweyi aali ni mavabzi ya xitlatla lawa amamukarhata hi malembe ya khume ni mambirhi; [aahetile xuma xa yena hinkwaxu tin'angeni,] kungali na munhu lweyi akotaka kumuhanyisa. Ata hi kunyanimela hi le ndzhaku ka Yesu, akhumba makumu ya sviyambalu sva yena, kutani hi nomo-lo, vuvabzi bza yena bza ngati bzihola. Yesu aku: “I mani lweyi anikhumbeke?” Hinkwavu vakaneta, Petrosi aku: “N'winyi wanga, urhendzeliwe hi xitshungu, kutani xakukamanyeta!” Kambe Yesu aku: “Munhu wokarhi anikhumbile hikuva ni svitwile loko kuhuma matimba laha ka mina.” Loko wansati avonile lesvaku akumiwile, ata hi kurhurhumela, awela milengeni ya Yesu, ahlamusela mahlweni ka vanhu hinkwavu lesvi amukhumbeleke svona, ni hilaha ahanyisiweke hakona hi kuhantlisa. Kutani Yesu aku ka yena: “N'wananga, kupfumela ka wena kukuhanyisile, famba hi kurhula.” Aku ahavulavula, kuta mun'we lweyi ahumaka ka murhangeli wa sinagoga, afika ativisa Jayiro aku: “N'wana wa wena afile, ungahakarhati Mujondzisi.” Kambe loko Yesu asvitwa, aku ka Jayiro: “Ungachavi, pfumela ntsena, atahanya.” Loko afikile muntini, angapfumelelanga munhu ni mun'we kunghena na yena ndlwini, loko kungali Petrosi, na Yohani, na Yakobe, ni vapsali va lweyi wanhwanyana. Vanhu hinkwavu avamurila hi xiviti; kutani Yesu aku: “Mingarileni; angafanga, ayoyetlela.” Kutani vamuhleka, hi kutiva lesvaku n'wana afile. Kambe Yesu amukhoma hi voko, amuvitana aku: “Nhwanyana, pfuka!” Moya wutlhelela ka yena, asisimuka, kutani Yesu avalerisa kumunyika svakuja. Vapsali va yena vahlamala ngopfu; kambe avalerisa lesvaku vangabzeli munhu lesvihumeleleke. Yesu ahlengeleta lava va khume ni vambirhi, avanyika matimba ni vuhosi henhla ka madimoni, ni kuhanyisa lavavabzaka. Kutani avarhuma kuyapaluxa Mfumu wa Xikwembu ni kuhanyisa timbabzi. Aku ka vona: “Loko svili sva ndlela, mingatekeni nchumu, hambi yili nhonga, kumbe nkwama, hambi tili timbuva, kumbe male, hambi ali xiyambalu xocinca. Kutani loko vanhu vamiyamukela njangwini wa vona, tshamani na vona, miko misuka muntini wolowo. Kambe loko vangamiyamukeli, humani doropeni rakona, kutani migungundza ntshuri milengeni ya n'wina; svitava vumboni ka vona.” Hi loko vahuma, vafamba hi svidoropana, na vali karhi vapaluxa Evhangeli hinkwaku, vahanyisa timbabzi. Hosi Heroda atwa hinkwasvu lesvihumelelaka, kutani akanakana ngopfu, hikuva van'wana avaku: “Yohani apfukile kufeni.” Van'wana avaku: “Eliya ahumelelile.” Van'wana avaku: “I mun'we wa vaprofeta va khale angapfuka kufeni.” Kambe Heroda aku: “Loko ali Yohani, ni mutsemile nhloko; kutani lweyi nitwaka timhaka ta yena letotano i mani ke?” Kutani aanavela kumuvona. Kuteloko vapostola vavuyile, varungulela Yesu hinkwasvu lesvi vasviyendleke, kutani avateka, aya na vona matlhelweni ya doropa ra Betisayida na vali voxe. Loko xitshungu xisvitivile, ximulandza, kutani axiyamukela, avulavula na xona hi ta Mfumu wa Xikwembu, ahanyisa hinkwavu lava avavilela kuhanyisiwa. Loko jambu rilava kupela, lava va khume ni vambirhi vata ka yena vaku: “Tlhelisa xitshungu lesvaku xiya svidoropanini sva lomu kusuhi nilesvimintaneni, xitayakuma koyetlela ni svakuja kona, hikuva halenu hi le mananga.” Kambe aku ka vona: “Vaphameleni n'wina!” Vona vaku: “Lesvi hinga na svona, asvitluli ntlhanu wa svinkwa ni tihlampfi timbirhi, handle ka loko hingaya xavela vanhu lava hinkwavu svakuja.” (Hikuva vanhu vakona avalava kuringana ntlhanu wa makhulu (5 000).) Kambe Yesu aku ka vajondzisiwa va yena: “Vatshamisiseni hi mintlawa ya vanhu vatlhanu wa makume.” Kutani vayendlisa svosvo, vavatshamisisa hinkwavu. Hi loko Yesu ateka svinkwa sva ntlhanu, ni tihlampfi timbirhi, alanguta henhla tilweni, akhensa, akhemelela, anyika vajondzisiwa lesvaku vayanyika xitshungu. Vaja vaxurha hinkwavu, kutani kurholeliwa matlhantlha lawa vamasiyeke, matata svirhundzu sva khume ni svimbirhi. Siku rin'wana, loko Yesu akhongela tlhelweni, na ali ni vajondzisiwa va yena, avavutisa aku: “Vanhu vali ni mani xana?” Vahlamula vaku: “Van'we vali, u Yohani Mukhuvuli. Van'wana vali, hi wena Eliya. Kambe van'wana vavula lesvaku u mun'we wa vaprofeta va khale angapfuka kufeni.” Aku ka vona: “N'wina ke, mili ni mani xana?” Simoni Petrosi ahlamula aku: “U Mesiya wa Xikwembu.” Kutani avalaya ni kuvalerisa lesvaku vangatshuki vabzela munhu mhaka leyi. Atlhela aku: “N'wana-wa-Munhu atafanela kutwisiwa kuvaviseka lokukulu, asoliwa hi vakulukumba ni Vaprista lavakulu, ni Vatsali; atadlawa, kambe apfuka kufeni hi siku ra vunharhu.” Kutani abzela vanhu hinkwavu aku: “Loko munhu alava kunilandza, aatitshike, atirhwexa xihambanu xa yena siku rin'wana ni rin'wana, kutani anilandza. Hikuva lweyi arhandzaka kutihlayisela vutomi bza yena, atalahlekeliwa hi bzona, kambe lweyi alahlekeliwaka hi vutomi bza yena hikolaho ka mina, atabziponisa. Hikolaho, loko munhu akota kufuwa misava hinkwayu kambe alahlekeliwa, kumbe kulovisa vutomi bza yena, svitamu pfuna yini ke? Lweyi akhomiwaka hi tingana hikolaho ka mina ni marito ya mina, N'wana-wa-Munhu na yena atakhomiwa hi tingana hikolaho ka munhu yelweyo, siku leri angatavuya kukwetsimeni ka yena, na ali ni Tatana wa yena ni tintsumi letokwetsima. Namibzela hakunene nili ka n'wina: Xikarhi ka lavanga kola, ku ni van'wana vangatakala vangakhumbiwi hi rifu na vangasivona Mfumu wa Xikwembu.” Asvilava kufika masiku ya ntlhanu ni manharhu ndzhaku ka loko Yesu avulile marito lawa. Kutani ateka Petrosi, na Yohani, na Yakobe, atlhantukela ntshaveni ayakhongela. Loko ali karhi akhongela, nghohe ya yena yivoneka yihundzukile, xiyambalu xa yena yibasa, yiphatima. Hi nomo-lo, kuhumelela vavanuna vambirhi vavulavula na yena, anga Moxe na Eliya. Vahumelela vali lavakwetsimaka, kutani vavulavula hi ta kuhundza ka yena misaveni, lokungatafanela kuyendleka Yerusalema. Petrosi ni lava avali na yena avakhomiwile hi vurhongo; kambe loko vasisimuka, vavona Yesu na avangama, vavona ni vavanuna vambirhi na vayimile na yena. Loko vavanuna lava vasuka vamusiya, Petrosi aku ka yena: “N'winyi wanga, svisasekile loko hingatshama kola; ahiyakeni mixaxa yinharhu, wun'we wa wena, wun'we wa Moxe, wun'wana wa Eliya.” Aangativi lexi axivulaka. Aku ahavula svosvo, refu rita, ritavafunengeta; loko vali ndzeni ka rona, vajondzisiwa lava vakhomiwa hi kuchava. Kutani rito rihuma refini riku: “Lweyi i N'wananga, lweyi ni muhlawuleke, muyingiseni!” Loko rito rimiyelile, vavona Yesu ali yexe. Vajondzisiwa vatshama hi timhaka toleto nkarhi wolowo, vangarunguleli munhu ni xin'we xa lesvi vasvivoneke. Siku leritlhantamaka, loko vangirimelile hi le ntshaveni, xitshungu lexikulu xihlangana na Yesu. Kutani kutshuka kuhumelela mun'we wanuna hi le xintshungwini aku: “Mujondzisi, na kukhongela, languta n'wana wa mina, hikuva hi yena n'wananga ali yexe. Loko moya wumukhoma, xikan'wekan'we wuhuwelela, wumurhurhumelisa, wumutlhutlhisa khuvi, wumu tlatlalata, kutani loko wumu tshika, wuhuma hi kunonon'hwa. Nikombelile vajondzisiwa va wena lesvaku vawuhlongola, kambe vatsandzekile.” Yesu ahlamula aku: “Ha! Rixaka leringapfumeliki, lerohomboloka, nitava na n'wina ni kumilehisela mbilu kufika rini ke? Tisa n'wana wa wena halenu!” Loko n'wana ahatshinela, dimoni rimutlatlalata, rimurhurhumelisa, kambe Yesu atshinya moya lowu wa chaka, ahanyisa n'wana, amuyisa ka tatana wa yena. Kutani hinkwavu vahlamala vuhosi lebzikulu bza Xikwembu. Loko hinkwavu vaha hlamala hinkwasvu lesvi Yesu asviyendleke, yena abzela vajondzisiwa va yena aku: “Rhiyani tindleve miyingisa svinene. Nili: N'wana-wa-Munhu atanyiketiwa mavokweni ya vanhu.” Kambe vajondzisiwa avatwisisanga marito lawa, amavatumbelelile, lesvaku vangamatwisisi; avachava ni kumuvutisa lesvi mavulaka svona. Kutani kuhumelela kukanetana xikarhi ka vona; avalava kutiva lesvaku lweyi anga lwenkulu ka vona i mani. Kambe Yesu, hi kutiva miyehleketo ya vona, ateka xin'wanana, axinyimisa kusuhi na yena, kutani aku ka vona: “Mani na mani lweyi ayamukelaka xin'wanana lexi hi vito ra mina, waniyamukela, kutani mani na mani lweyi aniyamukelaka, ayamukela ni lweyi anirhumeke. Hikuva lweyi anga lwentsongo xikarhi ka n'wina hinkwenu, hi yena lweyi anga nkulu.” Kutani Yohani atlhela aku: “Mujondzisi, hivonile munhu mun'wana lweyi ahlongolaka madimoni hi Vito ra wena, kutani himutsimbisile, hikuva angakulandzeli na hina.” Yesu aku ka yena: “Mingamutsimbiseni, hikuva lweyi angalwiki na n'wina, ayima na n'wina.” Loko nkarhi wa kususiwa ka yena misaveni wulava kufika, Yesu akanya mbilu, akhoma ndlela yoya Yerusalema Kutani arhuma varhumiwa va yena lesvaku vamurhangela mahlweni; kutani vafamba, vayanghena xidoropanini xa Vasamariya lesvaku vamulungisela koyetlela kona. Vanhu vakona avamuyamukelanga, hikuva aakombisa lesvaku akongoma Yerusalema. Vajondzisiwa va yena Yakobe na Yohani, loko vasvivona vaku: “Hosi, xana wasvilava lesvaku hivitana ndzilo wuxika hi le tilweni wuvahisa ke?” Kambe Yesu ahundzukula, avatshinya, [aku: “Moya lowu minga na wona, amiwutivi. Hikuva N'wana-wa-Munhu angatangakutalovisa vanhu, kambe kutava ponisa.”] Kutani vaya xidoropanini xin'wana. Loko vahali ndleleni, munhu mun'wana aku ka yena: “Nitakulandza hinkwaku lomu uyaka kona.” Yesu amuhlamula aku: “Makhanga mani mincele, ni tinyanyana ti ni svisaka, kambe N'wana-wa-Munhu anga na laha angakhigetelaka nhloko ya yena kona.” Ka mun'wana aku: “Nilandze!” Yelweyo ahlamula aku: “Hosi, wanganipfumelela nirhanga hi kuyalahla tatana.” Yesu aku ka yena: “Tshika vafi, valahla vafi va vona; kambe wena famba uyapaluxa, ta Mfumu wa Xikwembu.” Mun'wana kambe aku: “Hosi, mina ni takulandza, kambe ni pfumelele nirhanga niyasalisa valekaya.” Hi loko Yesu aku ka yena: “Munhu lweyi akhomaka gejo, kutani ahundzukula alanguta ndzhaku, angafaneliwi hi Mfumu wa Xikwembu.” Ndzhaku ka svosvo Hosi yitlhela yirhuma van'wana va ntlhanu wa makume ni makume mambirhi ni vambirhi (72) yivarhuma ha vambirhi-mbirhi, lesvaku varhangela mahlweni, madoropeni hinkwayu ni hinkwaku lomu yiyanakanyaka kuhundza hi kona. Yiku ka vona: “Kutshovela i kukulu, kambe vatirhi avatalanga; hi kolaho, khongelani n'winyi wa ntshovelo lesvaku arhuma vatirhi kutshoveleni ka yena.” Fambani ke; masvivo na mirhuma, mifana ni svinyempfana xikarhi ka mahlolwa. Mingatekeni xinkwamana xa male, kumbe nkwama wa timbuva, kumbe masandhazi; mingaxeweteni munhu ndleleni Muntini wihi ni wihi lowu mingatanghena ka wona, rhangani miku: “Kurhula akuve ni njangu lowu!” Kutani loko munhu worhula ali kona kolaho, kurhula ka n'wina kutava ka yena; kambe loko svingalitano, kutatlhelela ka n'wina. Tshamani muntini wolowo, mija ni kunwa lesvi vaminyikaka svona, hikuva lweyi atirhaka alulameliwe hi hakelo ya yena. Mingafambeni hi munti ni munti. “Loko minghena doropeni, kutani vanhu vakona vamiyamukela, janani lesvi vekiwaka mahlweni ka n'wina;” hanyisani timbabzi takona, miku ka tona: “Mfumu wa Xikwembu wutshinelile ka n'wina.” Kambe loko minghena doropeni rin'wana kutani vangami ya mukeli, loko mili karhi mihuma hi svitaratu sva rona, vulani miku: “‘Hambi ntshuri wa doropa ra n'wina lowu wuhinamarheleke milenge, hawugungundza wusala na n'wina; hambi svilitano, tivani lesvaku Mfumu wa Xikwembu wutshinelile ka n'wina.’” Namibzela lesvaku Sodoma atavevukiseliwa kutlula doropa rolero hi siku ra kuyavanyisa. “U ni khombo, wena Korazini, na wena Betisayida, hikuva mahlori lawa mayendliweke ka n'wina loko onge mayendliwile le Tiro na Sidoni, ingi madoropa lawaya amatava mahundzukile khale, mayambala sviyambalu svokhwaxa, matshama nkumeni.” Ni svosvi madoropa ya Tiro na Sidoni matavevukiseliwa kutlula n'wina hi siku ra kuyavanyisa. Na wena Kapernawume: “‘Xana utatlakusiwa kuyafika tilweni ke? Ahihim, utatsongahatiwa kuyafika Tiheleni.’ “Lweyi ayingisaka n'wina, wa niyingisa mina; ni lweyi amiyalaka, wa niyala. Lweyi aniyalaka, ayala ni Lweyi anirhumeke.” Lava va ntlhanu wa makume ni makume mambirhi ni vambirhi (72) vavuya hi kutsaka, vaku: “Hosi, na wona madimoni mahiyingisa, loko hitirhisa vito ra wena.” Yesu aku ka vona: “Nivonile Sathana, awa hi le tilweni kufana ni rihati. Vonani, ni minyika matimba ya kukandziyela tinyoka ni tihume, ni ya kuhlula ntamu hinkwawu wa Nala; kutani aku na nchumu lowungatamivavisa. hambi svilitano, mingatsakeni hi lesvi mimoya yimiyingisaka; kambe tsakani hi lesvi mavito ya n'wina matsaliweke tilweni.” Nkarhini wolowo Yesu adzunisa hi matimba ya Moya Lowokwetsima, aku: “Naku khensa Tatana, Hosi ya tilo ni misava, hikuva timhaka leti, utifihlile ka tintlhari ni ka lavajondzeke, kambe utikombisa ka svivanana lesvitsongo. Ina, Tatana, hikuva loku kuvile kurhandza ka wena. “Tatana avekile svilo hinkwasvu mavokweni ya mina; kutani aku na lweyi ativaka lesvaku N'wana i mani, loko angali Tatana; nasvona aku na lweyi ativaka Tatana lesvaku i mani, loko angali N'wana, ni lweyi N'wana alavaka kuhlavutela Tatana ka yena.” Kutani ahundzukula alanguta vajondzisiwa va yena, aku ka vona hi le tlhelweni: “Makatekile mahlo lawa mavonaka lesvi misvivonaka! Hikuva namibzela lesvaku vaprofeta lavotala ni tihosi letotala, vanavelile kuvona lesvi misvivonaka, kambe avasvivonanga; hambi kuli kutwa lesvi misvitwaka, avasvitwanga.” Kutani mujondzisi mun'we wa Nawu atatamuringa aku: “Mujondzisi, nitayendla yini kukuma vutomi lebzingaheliki?” Yesu aku ka yena: “Kutsaliwile yini Nawini? Ujondza yini kona?” Ahlamula aku: “‘Rhandza Yehovha Xikwembu xa wena, hi mbilu ya wena hinkwayu, ni moya wa wena hinkwawu, ni matimba ya wena hinkwawu, ni kuyanakanya ka wena hinkwaku.’ Nasvona: ‘Rhandza munhu kuloni kukota loko utirhandza.’” Yesu aku ka yena: “Uhlamule svona, yendla svosvo, utahanya.” Kambe yena, hi kunavela kutiyendla lweyi alulameke, aku ka Yesu: “Munhu kuloni i mani xana?” Kutani Yesu ahlamula, aku: “Munhu wokarhi aangirimela hi le Yerusalema, aya Yeriko, kutani awela mavokweni ya svigevenga, svimuhlivila xiyambalu, svimuba, kutani svisuka svifamba, svimusiya na ali kusuhi ni kufa. Kutani kotshuka kuhumelela Muprista, angirimela hi ndlela yoleyo; loko amuvona, apapalata. Kutafika Mulevhi kolaho, kutani loko amuvona, na yena apapalata. Kambe Musamariya mun'we lweyi na yena aali riyendzweni, afika laha munhu lweyi angawa kona; loko amuvona, amutwela vusiwana, ata kusuhi na yena, amuchela mafurha ni vhinyu timbangeni abohelela, amugadisa ka xifuyu lexi aafamba hi xona, amuyisa ndlwini ya vayendzi, kutani amuhlayisa kona. Nimixo ahumesa madenari mambirhi, anyika n'winyi wa yindlo, aku ka yena: ‘Muhlayise; hinkwasvu lesvi ungatasvihumesa kutlula male leyi, nitakutlhelisela svona, loko nivuya.’ Hi kuvona ka wena, xana i mani, ka lavanharhu lava, lweyi angava munhukulobze wa munhu lweyi aweleke mavokweni ya svigevenga xana?” Yena aku: “Hilweyi amuyendleleke timpsalu.” Yesu aku ka yena: “Famba, uyayendlisa svosvo na wena.” Loko Yesu ali karhi ahundzela mahlweni ni vajondzisiwa, anghena xidoropanini xin'wana, kutani wansati lweyi avaku i Marta, amuyamukela njangwini wa yena. Marta aali ni makwavu, lweyi avaku i Mariya, lweyi angatatshama milengeni ya Hosi, ayingisa marito ya yona. Kambe Marta aakhomekile ngopfu hi mintirho yolungisela vapfhumba; hi loko ata ka Yesu, aku: “Hosi, xana ahi nchumu ka wena loko makwerhu anitshika nitirhela vapfumba nilinoxe ke? Mubzele anipfuna.” Kambe Hosi yimuhlamula, yiku: “Marta, Marta, uvilela ni kutikarhata hi lesvotala; kasi xilo lexilavekaka ngopfu i xin'we ntsena, kutani Mariya atihlawulele kuyaveliwa lokunene, loku angatakala angatekeliwi kona.” Ta Yesu loko aakhongela ndhawini yokarhi; loko ahetile, mun'we wa vajondzisiwa va yena aku ka yena: “Hosi, hijondzise kukhongela, kufana na Yohani ajondziseke vajondzisiwa va yena.” Kutani Yesu aku ka vona: Loko mikhongela, miku: “‘Tatana, vito ra wena arihlawuleke; akute kufuma ka wena; uhinyika masiku hinkwawu svakuja sva hina sva siku rin'wana ni rin'wana; hirivalele svijoho sva hina, hikuva na hina hirivalela mani na mani lweyi anga ni nandzu ka hina; ungahiyisi miringweni.’” Atlhela aku ka vona: “I mani ka n'wina lweyi anga ni munghanu, kutani aya ka yena xikarhi ka vusiku, aku ka yena: ‘Munghanu, nilombe svinkwa svinharhu hikuva munghanu mun'wana lweyi angariyendzweni afikile kola ka mina, kutani ni pfumala lesvi ningamufihlutaka ha svona.’ Kambe yena amuhlamula na alindlwini aku: ‘Unganikarhati, xipfalu xipfaliwile; mina ni vana va mina se hi le kuyetleleni anisvikoti kupfuka, nikunyika.’ Mina nili: Hambi loko angalavi kupfuka amunyika, hi mhaka ya vunghanu bza vona atakondza apfuka, amunyika hinkwasvu lesvi asvilavaka hikuva wa sindzisa. Hikolaho-ke nili ka n'wina: Kombelani, mitanyikiwa; lavani, mitasvikuma; gongondzani, mitapfuleliwa, hikuva mani na mani lweyi akombelaka, wanyikiwa; lweyi alavaka, wasvikuma; kutapfuleliwa lweyi agongondzaka. I mani tatana lweyi xikarhi ka n'wina anganyikaka n'wana wa yena nyoka, loko akombela hlampfi ke? Ni loko akombela tandza, atamunyika ahume xana? Kutani-ke, lesvi n'wina minga vanhu vatihanyi, mitivaka kunyika vana va n'wina svilo lesvinene, xana Tatana wa letilweni angetlulisi ngopfu kunyika Moya Lowokwetsima ka lavakombelaka ka yena ke?” Yesu aali kuhlongoleni ka dimoni leri ariyendle munhu kuva mbheveve; loko rihumile, munhu lweyi wa mbheveve avulavula, kutani xitshungu xihlamala. Van'we xikarhi ka vona vaku: “Ahlongola madimoni hi Belzebule, hosi ya madimoni.” Van'wana kambe vamuringa hi kumukombela xikombiso xo huma tilweni. Kambe yena, hi kutiva miyehleketo ya vona, aku ka vona: “Mfumu wun'wana ni wun'wana lowuyavanaka hi le xikarhi, wuhundzuka wa hava; yindlo yin'wana ni yin'wana leyitiyavanyisaka ha yoxe yitawa. Hikolaho loko Sathana na yena ayavana hi le xikarhi, mfumu wa yena wutatiyisa kuyini lesvi mivulaka lesvaku nihlongola madimoni hi Belzebule? Loko hakunene nihlongola madimoni hi Belzebule, vana va n'wina vamahlongola i mani xana? Hikolaho vatava vayavanyisi va n'wina. Kambe loko nihlongola madimoni hi matimba ya Xikwembu, svivula lesvaku Mfumu wa Xikwembu sewufikile ka n'wina. Loko nhenha ya matimba yihloma matlhari yirindza yindlo ya yona, svilo lesvi yisvifuweke svihlayisekile; kambe loko kuhumelela mun'wana lweyi ayitlulaka hi matimba kutani ayihlula, atayitekela matlhari ya yona hinkwawu lawa ayimatshemba, kutani atayavela vanhu lesvi asviphangeke. Lweyi angayimiki na mina, alwa na mina; kutani lweyi angahlengeletiki na mina, wa hangalasa. “Loko moya wa chaka wusukile ka munhu, wuya mananga kuyalava kohumula kona, loko wutsandzeka kukukuma, wuli: ‘Nitatlhelela ndlwini ya mina leyi nihumeke ka yona.’ Kutani loko wufika, wuyikuma yisviyeliwile, yilungisiwile. Hi loko wutlhela, wuya teka mimoya yin'wana ya ntlhanu ni yimbirhi leyobiha kutlula wona, kutani yinghena, yitshama ndlwini yoleyo, kutani matshamele yohetelela ya munhu lweyi matlula lawa yosungula hi kubiha.” Loko Yesu ahavulavula timhaka toleto, wansati atlakusa rito ali xitshungwini, aku ka yena: “Kukatekile wansati lweyi akuvelekeke, ni kukunyan'wisa!” Yesu aku: “Kukatekile ngopfu lavayingisaka Rito ra Xikwembu, vava varihlayisa!” Loko xitshungu xiya xiyandza, atlhela aku: “Rixaka leri ribihile, rikombela xikombiso, kambe ringakala ringanyikiwi xona, loko angali xikombiso xa Yona. Hikuva hilaha Yona angava xikombiso hakona ka Vaninivha, N'wana-wa-Munhu na yena atava xikombiso ka rixaka leri. Hi siku ra kuyavanyisa, hosi ya xisati ya le dzongeni yitapfuka kufeni svin'we ni vavanuna va rixaka leri, yivayavanyisa, hikuva yisukile makun'wini ya misava kutayingisa vutlhari bza Solomoni, kutani masvivo, lweyi anga kola i nkulu kutlula Solomoni. Hi siku ra kuyavanyisa, vavanuna va Ninivha vatahumelela svin'we ni rixaka leri, variyavanyisa, hikuva vahundzukile loko vakhongoteliwa hi Yona, kutani masvivo, lweyi anga kola i nkulu kutlula Yona. “Aku na munhu lweyi alumekaka rivoni, ariveka laha kufihlekeke, kumbe kurikhubumeta hi xirhundzu; kambe ariveka henhla, lesvaku lavanghenaka vavona kuvonakala. Arivoni ra miri wa wena i tihlo; loko tihlo ra wena ritsakile, miri wa wena hinkwawu wu le kuvonakaleni; kambe loko ringali rinene, miri wa wena na wona wu le munyameni. Hikolaho tivonele lesvaku kuvonakala lokunga ka wena kungavi munyama. Loko kunene miri wa wena hinkwawu wuli kuvonakaleni, kuli hava laha kunga munyama, miri hinkwawu wutavoningiwa, kukota loko rivoni rikuvoninga hi kuvoninga ka rona.” Loko Yesu ahavulavula, Mufarisi mun'we amukombela kuyaja na yena; kutani Yesu anghena, atshama kujeni. Kambe Mufarisi ahlamala loko avona lesvaku angarhanganga hi kuhlamba angasija. Kutani Hosi yiku ka yena: “N'wina Vafarisi, mihlampsa ndzheko ni nkambana handle, kasi ndzeni kutele hi makwanga ni lunya. Svihunguki ndzin'wina! Lweyi angayendla sva le handle, xana angayendlanga ni sva le ndzeni ke? Kambe nyikani svisiwana lesvinga ndzeni ka svibza, hi kona hinkwasvu svingatava svibasile ka n'wina. “Yowee n'wina Vafarisi, hikuva mihumesa vukhume bza ximbowambowana, ni bza mbowa, ni bza matsavu hinkwawu, kasi ami na mhaka ni kululama ni rirhandzu ra Xikwembu! Amifanelile kuyendla svilo lesvi, na mingasiyi svin'wana. “Yowee n'wina Vafarisi, hikuva mirhandza svitshamu sva le mahlweni masinagogeni, ni kuxewetiwa mintsendzeleni. “Yowee n'wina, hikuva mifana ni masirha lawa mangavonakiki, lawa vanhu vamakandziyelaka na vangamativi.” Kutani mun'we wa vajondzisi va Nawu ahlamula aku: “Mujondzisi, loko uvula svosvo, wahisandza na hina.” Kambe Yesu aku: “Yowee na n'wina vajondzisi va Nawu, hikuva mirhwexa vanhu mindzhwalu leyotika, kasi n'wina amikhumbi mindzhwalu yoleyo hi ritiho hambi rili rin'we. “Yowee n'wina, hikuva miyaka masirha ya vaprofeta lavangadlayiwa hi vatatana wa n'wina. Kasi mitimboni ta mintirho ya vatatana wa n'wina, miva miyiseketela, hikuva vona vadlayile vaprofeta, kutani n'wina miyaka masirha ya vaprofeta lavo. Hikolaho vutlhari bza Xikwembu bzivulile, bziku: ‘Nitava rhumela vaprofeta ni vapostola; vatadlaya van'we xikarhi ka vona, vaxanisa van'wana.’ Svivula lesvaku ngati ya vaprofeta hinkwavu leyihalatiweke kusukela loko misava yitumbuluka, yitatlhela yilaviwa ka rixaka leri, kusungula hi ngati ya Abele, kuhetelela hi ngati ya Zakariya, lweyi angadlayiwa xikarhi ka alitari ni Tempele. Ina, namibzela nili: Yitalaviwa ka rixaka leri. “Yowee n'wina vajondzisi va Nawu, hikuva mitekile khiya ra vutivi; kutani n'wina ha n'wexe aminghenanga, kambe n'wina misivelile lava avanghena.” Loko ahuma kolaho, Vatsali ni Vafarisi vasungula kumupfukela svinene, vamuvutisela lesvotala, vamurhiya, na vanavela kumuphasa ka xin'we xa lesvi aatatshuka axivula. Hi nkarhi wolowo, loko vanhu vamadzanadzana vahlengeletana vakondza vakandziyelana, Yesu asungula kubzela vajondzisiwa va yena aku: “Tivoneleni ka comela ra Vafarisi, anga vukanganyisi; hikuva aku na xilo lexifunengetiweke, lexingatakala xingafununguliwi, ni xilo xa xihundla, lexingatakala xingativiwi. Hikolaho hinkwasvu lesvi misvivuleke munyameni, svitahumela kuvonakaleni; ni lesvi mingasvivulavula tindlwini hikuhlevetela, svitahuweleliwa svihlungweni sva tona. “Namibzela n'wina minga vanghanu va mina nili: Mingatshukeni michava lavadlayaka miri, na valihava lesvi vangayengetaka vasviyendla kutlula svosvo. Nitamikomba lweyi mifanelaka kuchava yena; chavani lweyi anga ni matimba yaku, ndzhaku ka kudlaya, anga ni matimba yolovisa munhu, amuhoxa Tiheleni. Ina, nili ka n'wina: Yena yelweyo, muchaveni! “Xana svindzingiri sva ntlhanu asvixaviwi hi tisente timbirhi ke? Kasi aku na xin'we xa svona lexirivaliweke mahlweni ka Xikwembu. Hambi yili misisi ya tinhloko ta n'wina yihlayiwile hinkwayu. Mingachaveni, mitlula svindzingiri lesvotala hi risima. “Namibzela lesvaku mani na mani lweyi anivulaka mahlweni ka vanhu, N'wana-wa-Munhu na yena atamuvula mahlweni ka tintsumi ta Xikwembu. Kambe lweyi aniyalaka mahlweni ka vanhu, atayaliwa mahlweni ka tintsumi ta Xikwembu. “Mani na mani lweyi angatajohela N'wana-wa-Munhu hi kuvulavula rito rokarhi ntsena, atarivaleliwa, kambe lweyi asandzaka Moya Lowokwetsima angakala angarivaleliwi. “Loko vamiyisa masinagogeni, ni ka tindhuna, ni ka tihosi, mingatshukeni mivilela miku: ‘Xana hitatihlamulela hi mukhuva wihi?’, kumbe: ‘hitavula yini ke?’ Hikuva Moya Lowokwetsima wutamijondzisa hi nkarhi wolowo lesvi mifanelaka kusvivula.” Mun'we xikarhi ka xitshungu aku ka Yesu: “Mujondzisi, bzela makwerhu lesvaku hiyavelana rifuwo.” Kambe Yesu aku ka yena: “Wanuna ndziwena! Xana i mani lweyi anganiveka muyavanyisi kumbe muyaveli henhla ka n'wina ke?” Kutani aku ka vona: “Tlharihani mitivonela ka makwanga wahi ni wahi, hikuva vutomi bza munhu abzihumi ka svilo lesvi asvifuweke hambi loko svimutalele ngopfu.” Kutani avabzela xifaniso aku: “Masimu ya munhu wa xipfundzi amapfunile svinene; kutani ayanakanya mbilwini ya yena aku: ‘Nitayendla yini xana, hikuva a ni na ndhawu laha ningahlengeletaka kona antshovelo wa mina?’ Kutani aku: ‘Nitayendla lesvi: Nitahahlula matshala ya mina, ni makulisa, kutani nitahlengeleta ntshovelo wa mina ni rifuwo ra mina hinkwaru kona; kutani nitabzela hika ra mina niku: Hika ra mina kateka, u ni svilo lesvotala, lesvihlengeleteliweke hi malembe layotala; wisa, uja, unwa, utsaka.’ Kambe Xikwembu xiku ka yena: ‘We xihunguki! Vusiku bzobzi, utatekeliwa moya wa wena; kutani lesvi usvilungiseke svitava sva mani xana?’” Yesu aheta hi kuvula lesvi: “Svitano ni ka lweyi atihlengeletelaka xuma, kambe angafuwanga ka Xikwembu.” Kutani Yesu aku ka vajondzisiwa: “Hikolaho ninge ka n'wina: Mingatshukeni mivilela hi sva vutomi bza n'wina lesvaku mitaja yini, hambi kuli kuvilela hi sva miri lesvaku mitayambala yini. Vutomi bzitlula svakuja, ni miri wutlula sviyambalu. Yanakanyani amaqhugwana: Amabzali, amatshoveli, ama na tshala kumbe xihlangala, hikuva Xikwembu xamaphamela. Kutani n'wina, mi ni risima rotlula ngopfu tinyanyana! Xana i mani ka n'wina lweyi angayengetelelaka xisungunhu xin'we ka xiyimu xa yena hi kuvilela ka yena ke? Lesvi ke, mitsandzeka kuyendla svilonyana sva svitsanana, mivilelela yini lesvi svin'wana? Langutani hilaha sviluva svimilaka hakona: Asvitirhi, asviluki; kambe namibzela lesvaku hambi ali Solomoni vukosini bza yena hinkwabzu, angayambalanga tani hi xin'we xa svona. Kutani lesvi Xikwembu xiyambexaka hi ndlela leyi bzanyi lebzi bzingakona namuntlha nhoveni, kasi mundzuku bzitahoxiwa ndzilweni, xana axingemiyambexi kutlulisa svosvo, n'wina vanhu va kupfumela lokutsongo ke? Hikolaho mingavileleni hi lesvi mingataja svona, ni lesvi mingatanwa svona, na svona, mingakanakaneni; hikuva svilo svosvo hinkwasvu svilaviwa hi vamatiko; Tatana wa n'wina wa svitiva lesvaku masvipfumala. Kambe lavani ngopfungopfu Mfumu wa yena, kutani svilo lesvi mitayengeteleliwa svona. “Ungachavi wena ntlhambinyana, hikuva Tatana wa n'wina atsakele kuminyika Mfumu. Xavisani lesvi misvifuweke, minyika svisiwana; tiyendleleni minkwama leyingahlakaliki ni rifuwo leringaheliki matilweni, laha muyivi angatshineliki kusuhi nakona, ni laha tinsumba tingawonhiki kona; hikuva laha rifuwo ra n'wina ringa kona, hilaha timbilu ta n'wina tingatava kona na tona. “Tshamani na mitikhamile svivunu ni tivoni ta n'wina na tilumekiwile, mifana ni vanhu lavalangutelaka n'winyi wa vona, siku leri avuyaka nkhubzeni wa vukati, lesvaku loko afika ni loko agongondza, vatahantlisa vamupfulela. Kukatekile malandza lawa n'winyi wa wona angatamakuma na marindzile, siku leri avuyaka! Nitiyisile nili ka n'wina: Atatikhama, amatshamisisa kujeni, amaphamela. Ni loko afika nivusiku ka murindzo wa vumbirhi kumbe wa vunharhu, kutani amakuma na mahitekise xisvosvo, malandza wolawo matava makatekile. Kambe tivani lesvaku: Loko n'winyi wa munti onge aativile nkarhi lowu muyivi angatata ha wona, ina angatshikanga yindlo ya yena yitlhanyiwa. Na n'wina, tshamani na mitilungisile, hikuva N'wana-wa-Munhu atata hi nkarhi lowu mingawu yehleketiki.” Kolaho Petrosi aku ka yena: “Hosi, xana ukongoma hina hi xifaniso lexi, kumbe xana ukongoma vanhu hinkwavu ke?” Yesu ahlamula aku: “Xana i mani mulanguteli lweyi atshembekeke ni kululama, lweyi Hosi yimuvekeke lesvaku anyika svakuja svoringana ka vatirhi va yona?” Akatekile mutirhi lweyi angatakumiwa hi Hosi na ali karhi ayendla tano. Nitiyisile nili ka n'wina: Atavekiwa kuva mulanguteli wa svilo hinkwasvu sva n'winyi wa yena. Kambe loko mutirhi yelweyo ayehleketa mbilwini ya yena, aku: “N'winyi wa mina wahlwela kufika”, kutani asungula kuba vatirhikulobze vaxinuna ni vaxisati, aja, anwa, adakwa, n'winyi wa yena atavuya, hi siku leri mutirhi angamurindziki ha rona, nasvona hi nkarhi lowu angawutiviki. Kutani n'winyi wa mutirhi lweyi atamuba svinene, amucukumeta svin'we ni lavangatshembekangiki. Mutirhi lweyi ativaka kurhandza ka n'winyi wa yena, kutani angalungisi nchumu, angayendli kurhandza ka n'winyi wa yena, atabiwa ngopfu; kambe lweyi angativiki kurhandza ka n'winyi wa yena, kutani atshuka ayendlile lesvifaneliwaka hi xikhatiso, atabiwa kutsongo. Mani na mani lweyi anyikiweke lesvotala, kutalaviwa lesvotala ka yena; ni lweyi atshembiweke ka lesvotala, kutalaveka lesvotala ngopfu ka yena. “Nitile kutahoxa ndzilo laha misaveni, kutani anitarhandza ngopfu lesvaku wupfurha ni svosvi!” Kambe ni ni nkhuvulo lowu nifanelaka kukhuvuliwa ha wona, kutani ni le kukarhatekeni lokukulu, kukondza nkhuvulo lowu wuhetiseka. Xana miyehleketa lesvaku nitisa kurhula la misaveni ke? Ahihim! Nili: Kungali kurhula kambe kuyavana. Hikuva kusukela svosvi vanhu va ntlhanu va njangu wun'we vatayavana, vanharhu vatalwa ni lavambirhi, lavambirhi valwa ni lavanharhu. “Tatana atayavana ni n'wana wa yena wa xinuna, n'wana waxinuna ayavana ni tatana wa yena; mamana atayavana ni n'wana wa yena wa xisati, ni n'wana waxisati ayavana ni mamana wa yena; mamana wa nuna atayavana ni n'wingi wa yena, n'wingi ayavana ni mamana wa nuna.” Kutani aku ka xitshungu: “Loko mivona refu rihuma mpelajambu, mihantla miku: ‘Mpfula yitana!’ Kutani sviva tano. Ni loko moya wuhunga wuta hi le dzongeni, mili: ‘Kutahisa!’ Kutani sviva tano. Vakanganyisi ndzin'wina! Mitiva kuxiya matshamela ya tilo ni ya misava; xana hikolaho ka yini mingakoti kutwisisa nkarhi lowu minga ka wona ke? “Hikolaho ka yini mingayanakanyi lesvilulameke hi n'wexe xana ke? Loko uya hosini ni nala wa wena, ringeta hi matimba hinkwawu kuheta mhaka na yena na mahali ndleleni; loko svingalitano, atakuyisa ka muyavanyisi, muyavanyisi yena akunyiketa ka phoyisa, kutani phoyisa rikunghenisa jele. Nili ka wena: Ungakala ungahumi kona, loko ungasihakela male hinkwayu.” Loko valikolaho, vanhu van'wana varungulela Yesu ta Vagalileya lava Pilato angapfanganyisa ngati ya vona ni timhamba ta vona. Kutani Yesu avahlamula aku: “Xana miyehleketa lesvaku Vagalileya volavo avali vajohi kutlula Vagalileya van'wana hinkwavu, lesvi vangatwisiwa kuvaviseka lokotano ke? Ahihim, kambe nili ka n'wina: Loko mingahundzuki, mitalovisa xisvosvo hinkwenu. Ni vanhu va khume ni ntlhanu ni vanharhu lava xihondzo xa Silowama xingavawela henhla, xivadlaya, xana miyehleketa lesvaku avali ni nandzu kutlula vayaki hinkwavu va Yerusalema ke? Ahihim, kambe nili ka n'wina: Loko mingahundzuki mitalovisa xisvosvo hinkwenu.” Atlhela avabzela xifaniso lexi aku: “Munhu wokarhi aali ni nkuwa lowusimekiweke nsin'wini ya yena ya mvhinya; ayalava mihandzu ka wona, kutani angayikumi. Hi loko aku ka murimi: ‘Vona, sviyendla malembe manharhu na nili karhi nitatalava mihandzu nkuweni lowu, kutani ningayikumi. Wutseme! Wuwonhela yini misava xana?’ Kambe murimi amuhlamula aku: ‘Hosi, wutshike nan'waka ntsena, lesvaku nikuma nkarhi wa kuwurimela, ni wuchela ni vulongo; kumbexana lembe leritaka wutaveka mihandzu; loko svingalitano, utani rhuma niwutsema.’” Yesu aajondzisa sinagogeni hi siku ra Savata. Akuli ni wansati kolaho lweyi aheteke malembe ya khume na ntlhanu na manharhu na akarhatiwa hi moya lowungamulimata miri; aakorhama kunene loko afamba, atsandzeka hambi kuli kuwololokanyana. Kutani loko Yesu amuvona, amuvitana aku: “Mamana, utshunxiwile kulimaleni ka wena.” Hi loko atlhanteka mavoko ka yena, kutani hi nomo-lo awololoka, adzunisa Xikwembu. Kambe murhangeli wa sinagoga ahlundzuka hi lesvi Yesu ahanyiseke munhu hi siku ra Savata, kutani atlakusa rito, aku ka xitshungu: “Ku ni masiku ya ntlhanu ni rin'we lawa mintirho yifanelaka kutirhiwa ha wona; tanani hi masiku wolawo kutahanyisiwa, kungali hi siku ra Savata.” Kambe Hosi yimuhlamula yiku: “N'wina vakanganyisi, hi siku ra Savata, n'wina hinkwenu amichavi kutlhantla homu ya n'wina kumbe mbongolo ya n'wina, miya na yona matini. Kutani wansati lweyi, wa rixaka ra Abrahamu, lweyi abohiweke hi Sathana hi malembe ya khume ni ntlhanu ni manharhu, xana aangafanelanga kutshunxiwa kubohiweni loku hi siku ra Savata ke?” Marito lawa ya Yesu makhomise tingana ka valala va yena hinkwavu, kutani xitshungu hinkwaxu axitsakela mintirho hinkwayu leyosaseka leyi aayiyendla. Yesu atlhela aku: “Xana Mfumu wa Xikwembu wufana ni yini? Nitawufanisa ni yini ke? Wufana ni mbewu ya sinapi leyi munhu angayiteka, ayayibzala nsin'wini ya yena; kutani yimila, yihundzuka nsinya, kutani tinyanyana tita, titayaka marhavini ya wona.” Atlhela aku: “Xana Mfumu wa Xikwembu nitawufanisa ni yini? Wufana ni comela leri wansati angariteka, aripfuva ni mimpimo yinharhu ya mapa, svikondza svikukumuka hinkwasvu.” Yesu aafamba hi madoropa ni svidoropana, ajondzisa, na akhome ndlela leyi yiyaka Yerusalema. Kutani mun'we aku ka yena: “Hosi, xana lavangataponisiwa, vatava vangatalanga ke?” Ahlamula aku ka vona: “Ringetani hi matimba kunghena hi nyangwa leyokhuma, hikuva namibzela lesvaku lavotala vatanavela kunghena, kambe vatatsandzeka. Loko n'winyi wa munti apfuka, ayapfala nyangwa, n'wina mingayima le handle, mitasungula kugongondza, miku: ‘Hosi, hipfulele!’ Kambe atamihlamula aku: ‘Anitivi lesvaku mihuma kwihi.’ Kutani n'wina mitaku: ‘Ahitshama hija ni kunwa, na wena; ujondzisile mintsendzeleni ya svitaratu sva hina.’ Yena atayengeta amihlamula aku: ‘Anitivi lesvaku mihuma kwihi; sukani ka mina, n'wina hinkwenu lavayendlaka lesvingalulamangiki.’ Laho kutava ni minkosi ni kuketsela ka matinyo, loko mivona Abrahamu, na Izaki, na Yakobe na vatshamile Mfun'wini wa Xikwembu na vali ni vaprofeta hinkwavu, kasi n'wina micukumetiwile handle. Vatahuma vuxeni ni levupelajambu, n'walungwini ni ledzongeni, kutani vatatshama kujeni Mfun'wini wa Xikwembu. Nakona, van'wana lava vanga va le ndzhaku, vatava va le mahlweni, ni van'wana va le mahlweni, vatava va le ndzhaku.” Nkarhini wolowo kuta Vafarisi van'wana ka Yesu vaku: “Suka ufamba uya kun'wana, hikuva Heroda alava kukudlaya.” Yesu ahlamula aku ka vona: “Fambani, miyabzela khanga leriya miku: ‘Svitive lesvaku, nihlongola madimoni ni kuhanyisa vanhu namuntlha ni mundzuku, kutani hi siku ra vunharhu nitaheta ntirho wa mina.’ Kambe nifanele kufamba namuntlha, ni mundzuku, ni mundlwana, hikuva asviyendleki lesvaku muprofeta adlawela handle ka doropa ra Yerusalema. “Yerusalema, Yerusalema, wena lweyi udlayaka vaprofeta, lweyi ukhandlaka hi maribze lavarhumiweke ka wena; i kangani na navelile kuhlengeleta vana va wena, kukotisa huku loko yihlengeleta sviciwana sva yona hansi ka timpapa ta yona, kambe awusvilavanga. Vonani, munti wa n'wina wutasala na wungali na nchumu; nasvona namibzela lesvaku amingahanivoni, kukondza kufika siku leri mingataku: ‘Akudzunisiwe lweyi ata ka hi vito ra Hosi.’” Hi siku ra Savata, Yesu anghena ndlwini ya nkulukumba mun'we wa Vafarisi, kuyaja svakuja kona. Vanhu avamuxiyaxiya svinene. Kutani munhu wovabza hi xitsamba, aali kona kolaho. Yesu avutisa vajondzisi va Nawu ni Vafarisi aku: “Xana svapfumeleliwa kuhanyisa munhu hi siku ra Savata, kumbe asvipfumeleliwi ke?” Vona vamiyela. Hi loko Yesu ateka muvabzi, amuhanyisa, kutani amutshika afamba. Kutani aku ka vona: “Xana i mani ka n'wina lweyi angatakala angahantlisi kuhumesa n'wana wa yena kumbe homu ya yena xihlobzeni xa mati, loko sviwele kona hi siku ra Savata ke?” Kutani vatsandzeka kuhlamula marito lawa. Loko Yesu avona hilaha lavarhambiweke nkhubzeni vatihlawulelaka hakona svitshamu sva le mahlweni, avajondzisa hi xifaniso lexinge: “Loko munhu akurhamba nkhubzeni wa muchado, ungayi uyatshamisa xitshan'wini xa le mahlweni; hikuva svingahumelela lesvaku mun'wana lweyi akutlulaka hi kuchaviseka arhambiwile na yena hi n'winyi wa muchado; kutani lweyi angamirhamba hi vumbirhi bza n'wina, atata, aku ka wena: ‘Nyisela lweyi;’ Kutani utayatshama na uli ni tingana xitshan'wini xa le ndzhaku. Kambe loko urhambiwile, yana uyatshamisa xitshan'wini xa le ndzhaku, lesvaku loko kuta lweyi akurhambeke, ataku ka wena: ‘Nakulorhi, tshinela halenu henhla.’ Hi mukhuva wolowo, utadzunisiwa mahlweni ka hinkwavu lavatshameke svakujeni svin'we na wena. Hakunene mani na mani lweyi atikulisaka, atatsongahatiwa; kambe lweyi atitsongahataka atakulisiwa.” Kutani aku ka lweyi amurhambeke: “Loko uyendla nkhuvu wa xifihlulo kumbe wa xilalelo, ungarhambi vanghanu va wena, kumbe vamakwenu, kumbe maxaka ya wena, kumbe svipfundzi lesvi ugamakaneke na svona ntsena, hikuva na vona vatakurhamba, kutani svihundzuka xikhenso ka wena. Kambe loko uyendla nkhuvu, rhamba svisiwana, ni svilima, ni lava vakhutaka, ni svifamahlo; utakateka, hikuva ava na sva kukutlhelisela vakukhensa ha svona, kutani hi siku ra kupfuka ka lavolulama utatlheliseliwa svona.” Loko mun'we wa lavatshameke svakujeni, atwa timhaka toleto, aku ka Yesu: “Kukatekile lweyi angataja svakuja Mfun'wini wa Xikwembu!” Kambe Yesu aku ka yena: “Munhu wokarhi atshama ayendla nkhuvu lowukulu wa svakuja, arhamba vanhu lavotala ka wona. Kutani hi nkarhi wa kuja arhuma mutirhi wa yena kuyativisa lavarhambiweke aku: ‘Tanani, svilo hinkwasvu svilungisiwile.’ Kambe hinkwavu vava nomo wun'we kutitsetsa. Lweyi wosungula aku ka mutirhi: ‘Nixavile nsimu, kutani nifanele kuyayivona; nikombela lesvaku uyavabzela vanirivalela.’ Mun'wana aku: ‘Nixavile khume ra tinkavi, kutani niyakutiringeteni; nikombela lesvaku uyavabzela vanirivalela.’ Mun'wana aku: ‘Naha kuteka nsati, hi kolaho anikoti kuta.’ Mutirhi atlhela ayativisa n'winyi wa yena timhaka toleto. Hi loko n'winyi wa munti akariha, aku ka mutirhi wa yena: ‘Hantlisa ufamba, uya svitaratwini, ni le svindlelanini sva doropa, utisa halenu svisiwana, ni svilima, ni svifamahlo, ni lava vakhutaka.’ Kutani mutirhi aku: ‘Hosi, kuyendliwile hilaha uleriseke hakona, kambe ndhawu yahali kona.’ Kutani n'winyi aku ka mutirhi: ‘Yana tindleleni, urhendzeleka ni lomu kubiyiweke hi rithangu, usindzisa vanhu kunghena lesvaku yindlo ya mina yitala. Hikuva nili ka n'wina: Aku na munhu ni mun'we wa lavarhambiweke lweyi angatanampsa svakuja sva nkhuvu wa mina.’” Xitshungu lexikulu axifamba na yena, kutani ahundzukula axilanguta, aku: “Loko mun'wana ata ka mina, kambe anga ni rhandzi kutlula tatana wa yena, ni mamana wa yena, ni nsati wa yena, ni vana, ni makwavu, hambi bzili vutomi bza yena, angakala angavi mujondzisiwa wa mina. Kutani lweyi angarhwaliki xihambanu xa yena anilandza, angesvikoti kuva mujondzisiwa wa mina. “Xana i mani xikarhi ka n'wina lweyi angarhangiki hi kutshama hansi loko alava kuyaka xihondzo, akonta lesvi angatahumesa svona, kuvona kumbe male ya yena yitaringana kuheta ntirho ke? Loko angayendlanga svosvo, atayaka masungulu ntsena, kutani sviyamutsandza kuheta; hinkwavu lavangatasvivona vatasungula kumuhleka, vaku: ‘Munhu lweyi asungulile kuyaka, kambe atsandzekile kuheta.’ “Kumbe hi yihi hosi leyihumaka yiya nyimpini kuyalwa ni hosi yin'wana, na yingarhanganga hi kutshama hansi, yivona lesvaku, xana masochwa ya yona ya khume wa makhulu (10 000) mangayalwa ni hosi leyi yitaka na yili ni masochwa ya makume mambirhi ya makhulu (20 000) ke? Loko masochwa ya yona mangaringani, yitarhuma madoda ya yona kuyakombela matshamela ya kurhula ka nala wa yona na ahalikule. Kutani-ke mani na mani xikarhi ka n'wina lweyi angatshikiki lesvi anga na svona, angakala angakoti kuva mujondzisiwa wa mina. “Munyu i xilo lexonandziha, kambe loko wupshama, wutalungiwa hi yini ke? Awahapfuni nchumu, hambi kunonisa misava, kumbe kuhundzuka xiturumu; wucukumetiwa handle. Lweyi anga ni tindleve ta kuyingisa, aayingise!” Kutani varhesisi ni vajohi hinkwavu vamutshinelela kutamuyingisa. Kambe Vafarisi ni Vatsali van'unun'uta vaku: “Munhu lweyi ayamukela vajohi, aja na vona.” Hi loko avabzela xifaniso lexi: “Loko mun'we wa n'wina ali ni dzana (100) ra tinyempfu, kutani alahlekeliwa hi yin'we ya tona, xana angakala angasiyi leti ta ntlhanu ni mune wa makume ni ntlhanu ni mune (99) nhoveni, ayalava leyilahlekeke, akondza ayikuma ke? Kutaku loko ayikumile, ayitlakula, ayipakatsa na atsakile. Loko afika kaya, arhamba vanghanu ni vayakelani, aku ka vona ‘Ahitsakeni svin'we, hikuva nikumile nyempfu ya mina leyi ayilahlekile.’ Namibzela lesvaku hi mukhuva wolowo, kutava ni kutsaka tilweni hikolaho ka mujohi alimun'we lweyi ahundzukaka, kutlula kutsaka lokungatava kona hikolaho ka lavalulameke va ntlhanu ni mune wa makume ni ntlhanu ni mune (99) lavangavileliki kuhundzuka. “Loko wansati ali ni khume ra tidrakma, kutani alahlekeliwa hi yin'we ntsena, xana angakala angalumeki rivoni, asviyela yindlo, alavisisa svinene akondza ayikuma ke? Kutaku loko ayikumile, arhamba vanghanu ni vayakelani va yena, aku ka vona: ‘Ahitsakeni svin'we, hikuva nikumile cheleni ra mina, leri arilahlekile.’ Namibzela lesvaku, hi mukhuva wolowo, tintsumi ta Xikwembu tatsaka svinene loko mujohi hambi alimun'we ahundzuka.” Yesu atlhela aku: “Akuli ni munhu mun'we lweyi aali ni vana vambirhi vaxinuna; lweyi wantsongo aku ka tatana wa yena: ‘Tatana, ninyike xiyenge xa rifuwo leringa ra mina.’ Kutani tatana wa vona avayavela rifuwo ra yena. Kuteloko kuhundzile masiku mangali mangani, n'wana lweyi wantsongo ahlengeleta hinkwasvu, afamba aya tikweni ra le kule, ayahangalasa rifuwo ra yena hinkwaru. Loko ajile hinkwasvu, kuva ni ndlala leyikulu tikweni lero, kutani asungula kupfumala. Kutani afamba ayanamarhela munhu wa tiko rolero; munhu yelweyo amurhuma masin'wini ya yena kuyarisa makhumba. Kutani aanavela kuxurha hi matluka lawa majiwaka hi makhumba, hikuva akungali na munhu lweyi amunyikaka nchumu. “Hi loko atiyehleketa, aku: ‘Svitirhi lesvotala ngopfu sviko na ka tatana, lesvijaka svixurha; kasi mina halenu nafa hi ndlala. Nitapfuka, ni ya ka tatana, nitafika niku ka yena: Tatana, nijohele Tilo na wena, asvahanifaneli kuvuliwa n'wana wa wena; niyendle tani hi mun'we wa svitirhi sva wena.’ Kutani apfuka, aya ka tatana wa yena. “Loko ahali kule, tatana wa yena amuvona, amutwela vusiwana; kutani atsutsuma, ayamuvukarha, amun'qunta. Kutani n'wana aku ka yena: ‘Tatana, ni johele Tilo na wena, asvahanifaneli kuvuliwa n'wana wa wena.’ Kambe tatana wa yena aku ka vatirhi va yena: ‘Hantlisani mitisa xiyambalu lexinene ka hinkwasvu, mimuyambexa ringi ritihweni ra yena ni masandhazi mikondzweni ya yena. Nasvona tisani rhole lerinoneke, miritlhava, hija, hitsaka; hikuva n'wana lweyi wa mina aafile, kambe svosvi wahanya; aalahlekile, kambe svosvi akumiwile.’ Kutani vasungula kutsaka. “Kambe n'wana wa yena lwenkulu aali masin'wini; loko avuya afika kusuhi ni munti, atwa kuyimbelela ni kucina. Avitana mun'we wa malandza, amuvutisa aku: ‘Kuyendleka yini xana?’ Yelweyo amuhlamula aku: ‘Makwenu avuyile, kutani tatana wa wena atlhavile rhole lerinoneke, hikuva amukumile na ahahanya.’ Kambe n'wana lwenkulu akariha, ayala kunghena. “Tatana wa yena ahuma, ayamukhongotela. Yena ahlamula aku ka tatana wa yena: ‘Vona, nikutirhelile malembe layotala ngopfu, ningatluli ni xin'we xa svileriso sva wena, kambe kuhava siku ni rin'we leri utshamaka uninyika ximbutana lesvaku nitsaka ni vanghanu va mina. Kasi n'wana wa wena lweyi, ajile rifuwo ra wena hinkwaru ni tinghwavana, kutani loko avuya, umutlhavela rhole ra kunona!’ Kambe tatana wa yena aku ka yena: ‘N'wananga, utshama na mina masiku hinkwawu; hinkwasvu lesvinga sva mina, i sva wena; kambe hifanela kutsaka, hiba minkulungwana, hikuva makwenu lweyi aafile, svosvi wahanya; aalahlekile, svosvi akumiwile.’” Yesu aku ka vajondzisiwa va yena: “Akuli ni xipfundzi lexi axili ni mulanguteli. Kutani mulanguteli lweyi, vanhu avahamba vamuhleva ka n'winyi wa yena, vaku: ‘Ahangalasa rifuwo ra wena.’ Xipfundzi ximuvitana xiku ka yena: ‘Timhaka ta wena leti nititwaka hitihi ke? Nyika marungula ya vulanguteli bza wena, hikuva awungahapfumeleliwi kuva mulanguteli.’ Yena ayanakanya mbilwini ya yena, aku: ‘Nitayendla yini, lesvi n'winyi wa mina anitekelaka vulanguteli bza mina? Kurima, aninantamu. Kukombela, svikhomisa tingana. Haa! Nasvitiva lesvi ningatayendla svona, lesvaku vanhu vaniyamukela makaya ka vona, loko nitava nitekeliwile vulanguteli bza mina.’ Kutani avitana, ha mun'we mun'we, ka lava avali ni milandzu ka n'winyi wa yena; ka lweyi worhanga aku: ‘Nandzu lowu unga na wona ka n'winyi wa mina i wa mpimo muni xana?’ Yelweyo aku: ‘I dzana ra mimpimo ya mafurha.’ Mulanguteli aku ka yena: ‘Teka papela ra wena ra nandzu, utshama hansi, uhantla utsala ntlhanu wa makume.’ Ka mun'wana aku: ‘Wena ke, nandzu wa wena i wa mpimo muni ke?’ Yena aku: ‘I dzana ra mimpimo ya mavele.’ Kutani aku ka yena ‘Teka papela ra wena, utsala ntlhanu wa makume ni makume manharhu (80).’ Kutani n'winyi adzunisa mulanguteli wokala angatshembekanga, hikuva aayendlile hi vutlhari.” Yesu atlhela aku: “Vanhu va misava leyi vatlharihile kutirhisaneni ni va ka vona kutlula vanhu vakuvonakala. “Hikolaho-ke nili ka n'wina: Tiyendleleni maxaka hi rifuwo ra misava leyi, lesvaku loko mitshuka mipfumalile, vamiyamukela minchancheni leyi yingaliki na kuhela. Lweyi atshembekeke ka lesvitsongo, ni ka lesvikulu atatshembeka; lweyi angatshembekangiki ka lesvitsongo, ni ka lesvikulu angakala angatshembeki. Kutani loko mingatshembekanga ka rifuwo ra laha misaveni leyi, i mani lweyi angatamitshemba ka rifuwo ra ntiyiso xana? Nasvona loko mingavanga lavotshembeka ka svilo sva van'wana, i mani lweyi angataminyika lesvinga sva n'wina xana? “Aku na mutirhi lweyi angakotaka kutirhela tihosi timbirhi, hikuva atavenga yin'we, arhandza leyin'wana; kumbe atanamarhela yin'we afularhela leyin'wana. Mingekoti kutirhela Xikwembu na Mamona.” Vafarisi, vanga vanhu va makwanga ni male, avatwa timhaka toleto hinkwatu, kutani vamusola. Yena aku ka vona: “Loko mili n'wina, mitiyendla lavalulameke mahlweni ka vanhu; kambe Xikwembu xitiva timbilu ta n'wina; hikuva lesvi vanhu vasvitekaka svili sva le henhla, mahlweni ka Xikwembu ahi nchumu. “Nawu ni Vaprofeta hi svona lesvi asvitirha kufika loko Yohani Mukhuvuli ahumelela; kusukela nkarhini wolowo, Evhangeli ya Mfumu wa Xikwembu yikarhi yivuliwa, kutani mun'wana ni mun'wana anghena ka wona hi kutirhisa matimba. “Tilo ni misava svinganyamalala hi kuvevuka, kutlula kususa xindzhatana xin'we ntsena Nawini. “Mani na mani lweyi atshikaka nsati wa yena, atlhela ateka mun'wana, wawosva; nasvona lweyi atekaka lweyi atshikiweke hi nuna wa yena, wawosva. “Akuli ni mufuwi lweyi aayambala xiyambalu xophatima xa xivunguvungu ni xa ntsembzana, atshama kutsakeni atiphina hi masiku hinkwawu. Nasvona, akuli ni xisiwana xa xikombeli lexi avaku i Lazaru; axiyambala kutani xitatavekiwa nyangweni wa xipfundzi. Axitele hi svilondza. Axinavela kuxurha hi matlhantlha lawa mawaka hi le mezeni wa xipfundzi; timbzana na tona atita, titaxinampsela svilondza. Siku rin'wana xikombeli lexiya xifa, kutani tintsumi tixirhwala tixiyisa xifuveni xa Abrahamu. Mufuwi na yena afa, alahliwa sirheni. “Loko ali hadesi, ali karhi axaniseka, atlakusa mahlo, avona Abrahamu hi le kule, na Lazaru xifuveni xa yena. Kutani ahuwelela aku: ‘Tatana Abrahamu, nitwele vusiwana, rhuma Lazaru lesvaku apeta xintihwana xa yena matini, atitimeta ririmi ra mina, hikuva nivaviseka ngopfu malangavini lawa!’ Kambe Abrahamu aku: ‘N'wananga, tsundzuka lesvaku ukumile rifuwo vuton'wini bza wena, kasi Lazaru yena aavaviseka nkarhini wolowo; kambe svosvi wa chaveleliwa halenu, kasi wena utwisiwa kuvaviseka. Handle ka lesvi hinkwasvu, ku ni khele lerikulu rokala makumu, leriyahlameke xikarhi ka hina na n'wina, lesvaku lavanavelaka kusuka halenu, vata koseyo ka n'wina vangasvikoti; na vona lavanga koseyo ka n'wina loko vanavela kuta halenu, vatsandzeka.’ “Kutani aku: ‘Tatana, nakukhongela lesvaku urhuma Lazaru aya muntini wa tatana, hikuva ni ni vamakwerhu va ntlhanu. Ataya valaya, lesvaku vangatshuki vata na vona ndhawini leyi ya kuxaniseka.’ Abrahamu aku ka yena: ‘Vana Moxe ni Vaprofeta, avayingise vona!’ Mufuwi aku: ‘Ahihim, tatana Abrahamu, kambe loko mun'we wa lavafeke atlhelela ka vona, avatahundzuka.’ Abrahamu aku ka yena: ‘Loko vangayingisi Moxe ni Vaprofeta, vangakala vangakholwi, hambi loko mun'we wa vafi apfuka.’” Yesu aku ka vajondzisiwa va yena: “Loko svili svikhunguvanyiso asvingapfumaleki, kambe yowee ka lweyi svikhunguvanyiso svihumelelaka hikolaho ka yena. Svingava svinene loko ribze ra kusila ringaboheleliwa nhan'wini ya yena ahoxiwa lwandle, handle ka kuva akhunguvanyisa mun'we wa lavatsongo. Tivoneleni ke! “Loko makwenu ajohile, mutshinye; loko atisola, murivalele. Ni loko akujohela ka ntlhanu ni kambirhi hi siku rin'we, kutani ata ka wena ka ntlhanu ni kambirhi, aku: ‘Natisola’, murivalele.” Vapostola vaku ka Hosi: “Hiyengetele kupfumela.” Hosi yiku: “Loko mili ni kupfumela loku kuringanaka ni ndzoho ya sinapi, amitaku ka nsinya wa svintimana: mora lowu: ‘Tisimule, uyatisimeka lwandle!’ Kutani awutamiyingisa. “Mun'we wa n'wina angava ni mutirhi lweyi amurimelaka masimu, kumbe lweyi amuriselaka svifuyu. Loko mutirhi lweyi avuya hi le masin'wini, xana n'winyi wa yena ataku ka yena: ‘Hantlisa uta halenu, utatshama kujeni,’ xana? Nikutsongo! Kambe ataku ka yena: ‘Nilungisele svakuja, kutani utikhama, unitirhela loko nija, ni nwa; ndzhaku ka svona, na wena utaja, unwa!’ Xana mutirhi lweyi, atakhensiwa loko ayendlile lesvi angalerisiwa svona ke? Ahihim! Hi mukhuva wolowo, na n'wina, loko mihetile hinkwasvu lesvi milerisiweke svona, vulani miku: ‘Hi malandza lamangafaneliwiki hi kukhensiwa, hiyendlile ntsena lesvi ahifanela kusviyendla.’” Loko Yesu ali karhi akongoma Yerusalema, alulama ni ndzelekano wa matiko ya Samariya na Galileya. Aalikarhi anghena xidoropanini xin'we loko va nhlokonho va khume vahlangana na yena. Avanyimile kulenyana, kutani vahuwelela, vaku: “Yesu, Mujondzisi, hitwele vusiwana!” Loko Yesu avavona, aku ka vona: “Fambani, miyatikomba ka vaprista.” Kakuloko vahaya kona, vabasisiwa. Mun'we wa vona, loko avona lesvaku ahanyisiwile, atlhelela ndzhaku na ali karhi adzunisa Xikwembu hi rito leritlakukeke. Kutani atiwisa hi mombo milengeni ya Yesu, amutlangela. Munhu yelweyo aali Musamariya. Hi loko Yesu avutisa aku: “Xana avabasisiwanga na vali khume ke? Lava va ntlhanu ni mune vakwihi xana? Xana akukumekanga van'wana lavangatlhelela ndzhaku kutadzunisa Xikwembu, handle ka munhu lweyi wa rixaka rin'wana ke?” Kutani aku ka yena: “Pfuka, uyima, utifambela, kupfumela ka wena kukuhanyisile.” Vafarisi vavutisa Yesu, vaku: “Xana Mfumu wa Xikwembu wutata rini ke?” Kutani avahlamula aku: “Mfumu wa Xikwembu awuhumeleli wulikarhi wuvoniwa hi mahlo; akungavuliwi lesvaku: ‘Vonani, hi wolowo!’ Kumbe: ‘Hi lowuya!’ Hikuva Mfumu wa Xikwembu wu kona xikarhi ka n'wina.” Atlhela aku ka vajondzisiwa: “Kutata masiku lawa mingatanavela kuvona rin'we ntsena ra masiku ya N'wana-wa-Munhu, kambe amingarivoni. Vataku ka n'wina: ‘Langutani lahaya!’ Kumbe: ‘Langutani halenu!’ Kambe mingatshukeni miya kona, mingatsutsumeleni kona. Hikuva kukotisa rihati loko rihatima, rivoninga kusukela tlhelweni rin'we ra tilo kuyafika ka lerin'wana, N'wana-wa-Munhu atayendlisa svosvo hi siku ra yena. Kambe kusunguleni afanele kutwisiwa kuvaviseka lokukulu, anyenyiwa hi va nguva leyi. “Hilaha svilo svihumeleleke hakona masikwini ya Nowa, svitahumelelisa xisvosvo masikwini ya N'wana-wa-Munhu. Avaja, vanwa, vachada ni kuchadisiwa, kukondza kufika siku leri Nowa angheneke ngalaweni ha rona, kutani ndhambhi yifika, yivalovisa hinkwavu. Nasvona svihumelelise xisvosvo masikwini ya Loti; avaja, vanwa, vaxava ni kuxavisa, vabzala, vayaka tiyindlo; kambe siku leri Loti ahumeke Sodoma ha rona, ndzilo ni xivavula sviwa hi le tilweni, svivalovisa hinkwavu. Svitava tano hi siku leri N'wana-wa-Munhu angatahumelela ha rona. “Hi siku lero, lweyi angahenhla ka yindlo, na nhundzu ya yena yili ndlwini, angatshuki axika, ayayiteka; ni lweyi anga masin'wini angatshuki avuyela kaya. Tsundzukani ta nsati wa Loti. Mani na mani lweyi angatalava kutihlayisela vutomi bza yena, atalahlekeliwa hi bzona; kambe mani na mani lweyi alahlekeliwaka hi vutomi bza yena, atabziponisa. Namibzela, nili: Hi vusiku bzakona, ka vanhu vambirhi lavangatava vayetlelile ndhawini yin'we, kutatekiwa mun'we, mun'wana asiyiwa. Ka vavasati vambirhi lavangatava na vasila svin'we, kutatekiwa mun'we, mun'wana asiyiwa. [ Ka vanhu vambirhi lavangatava masin'wini, kutatekiwa mun'we, mun'wana asiyiwa.]” Kutani va muvutisa vaku: “Hosi, svitava kwihi ke?” Akuka vona: “Laha ntsumbu wunga kona, hilaha makoti mangatahlengeletana kona.” Yesu abzela vajondzisiwa xifaniso, kukomba lesvaku vanhu vafanele kukhongela minkarhi hinkwayu, vangakarhali, aku: “Doropeni rokarhi akuli ni muyavanyisi lweyi aangachavi Xikwembu hambi vanhu, aangavaxiximi. Doropeni rolero, akuli ni mufelakazi lweyi angaya ka yena, aku: ‘Tsema mhaka xikarhi ka mina ni nala wa mina.’ Svitekile nkarhi lowoleha na yena ahayala. Kambe ndzhaku atiyanakanya, aku: ‘Hambi loko ningachavi Xikwembu, ningaxiximi vanhu, lesvi mufelakazi lweyi anikarhataka, nitamutsemela mhaka ya yena, lesvaku angatshameli kunipandzisa nhloko.’” Kutani Hosi yiku: “Yingisani lesvivuliwaka hi muyavanyisi lweyi wokala angatshembekanga. Ina-ka, xana Xikwembu axingayendli vuyavanyisi lebzinene ka vahlawuliwa va xona, ni kuvalehisela mbilu, vona lavahuwelelaka ka xona vusiku ni nhlekanhi, hambi xihlwela ke? Nili ka n'wina: Xitahantlisa kuvatsemela mhaka ya vona. Kambe loko N'wana-wa-Munhu ata, xana atakuma kupfumela kuli kona misaveni ke?” Yesu atlhela avulavula ni van'we lavatitshembaka lesvaku valulamile kasi vasandza van'wana, avabzela xifaniso lexi: “Vanhu vambirhi avatlhantukelile Tempeleni kuyakhongela; mun'we aali Mufarisi, mun'wana aali muhakelisi wa rhesa. Mufarisi ayima, akhongelisa lesvi mbilwini ya yena: ‘Xikwembu, nakukhensa lesvi ningafaniki ni vanhu van'wana, lavanga ni makwanga, lavangatshembekangiki, lavawosvaka, ni lesvi ningafaniki ni murhesisi lweyi. Nititsona svakuja kambirhi hi vhiki, nihumesa vukhume bza hinkwasvu lesvi ni svikumaka.’ Muhakelisi wa rhesa yena aanyime hi le kule, achava ni kutlakusa mahlo alanguta tilweni, kambe aakomba kuvaviseka, aku: ‘Xikwembu, nitwele vusiwana, mina ninga mujohi.’ “Nili ka n'wina: Murhesisi lweyi atlhelele kaya ka yena na ahlayiwile lweyi alulameke kutlula Mufarisi; hikuva mani na mani lweyi atikulisaka, atatsongahatiwa, ni lweyi atitsongahataka atakulisiwa.” Kutani vanhu van'wana vatisa vana lavatsongo ka Yesu lesvaku avakhumba; loko vajondzisiwa vasvivona, vasola vanhu lava. Kambe Yesu avitana vatsongwana, kutani aku ka vajondzisiwa: “Tshikani vatsongwana vata ka mina, mingatshukeni miva sivela, hikuva Mfumu wa Xikwembu i wa lavafanaka na vona. Nitiyisile nili ka n'wina: Lweyi angayamukeliki Mfumu wa Xikwembu tani hi ntsongwana, angakala angangheni ka wona.” Kutani yin'wana ya tindhuna yimuvutisa, yiku: “Mujondzisi lwenene, xana ningayendla yini kukuma vutomi lebzingaheliki ke?” Yesu aku ka yena: “Univulela yini lwenene xana? Aku na lwenene, loko xingali Xikwembu ntsena. Wena utiva Milawu leyi yinge: ‘Ungatshuki uwosva; ungatshuki udlaya; ungatshuki uyiva; ungatshuki uveka vumboni bzohemba; uva ni xichavu ka tatana wa wena ni ka mamana wa wena.’” Yena aku: “Nihlayisile hinkwasvu lesvi kusukela vumpsheni bza mina.” Loko Yesu atwa svosvo, aku ka yena: “Wahapfumala xilo xin'we: Xavisa hinkwasvu lesvi unga na svona, uyavela svisiwana, hi kona ungatava ni rifuwo matilweni; kutani uta, unilandza.” Loko munhu lwiya atwa svosvo, atlhaveka ngopfu, hikuva aali munhu wa rifuwo lerikulu. Kutani Yesu amulanguta, aku: “Svanonon'hwa ngopfu ka lavanga ni rifuwo kunghena Mfun'wini wa Xikwembu. Hikuva svingawolovela kamela kunghena hi mbhovo ya nayethi kutlula kuva mufuwi anghena Mfun'wini wa Xikwembu.” Lava vatwaka marito lawa, vaku: “Loko svilitano kungapona mani ke?” Yesu aku: “Lesvi tsandzaka vanhu asvitsandzi Xikwembu.” Hi loko Petrosi aku: “Wasvivo, hitshikile svilo sva hina, hikulandza.” Yena aku ka vona: “Nitiyisile nili ka n'wina: Mani na mani lweyi atshikeke munti wa yena, kumbe nsati, kumbe vamakwavu, kumbe vapsali, kumbe vana, hikolaho ka Mfumu wa Xikwembu, atakuma lesvotala kutlula svosvo minkarhini ya svosvi, kutani minkarhini leyitaka, atakuma vutomi lebzingaheliki.” Yesu avitana lava va khume ni vambirhi hi tlhelo, kutani avabzela lesvi: “Vonani, hitlhantukela Yerusalema kutani hinkwasvu lesvitsaliweke hi vaprofeta henhla ka N'wana-wa-Munhu svitahetiseka. Hikuva atanyiketiwa ka vamatiko; vatatlanga hi yena, arhuketeliwa, apshiteliwa marhi; kutani loko vamubile hi tinhonga, vatamudlaya; kambe atapfuka kufeni hi siku ra vunharhu.” Kambe vona avatwisisanga nchumu timhakeni toleto; rito leri arivatumbelelile, kutani avasvitwisisanga lesvi Yesu aavula svona. Loko Yesu afikile kusuhi na Yeriko, ndhawini yoleyo, akuli ni munhu wa xifamahlo, atshamile kusuhi ni ndlela. Aali karhi akombela. Loko atwa xitshungu lexi xihundzaka, avutisa, aku: “Kuhumelela yini xana?” Vamubzela vaku: “I Yesu wa Nazareta lweyi ahundzaka.” Kutani ahuwelela aku: “Yesu, n'wana Davhida, nitwele vusiwana!” Kutani lavarhangeke mahlweni vamutshinya, akuva amiyela; kambe yena atlhela ahuwelela hi matimba, aku: “N'wana Davhida, nitwele vusiwana!” Hi loko Yesu ayima, alerisa lesvaku lweyi wa xifamahlo atisiwa ka yena; loko afikile kusuhi, Yesu amuvutisa aku: “Xana ulava lesvaku ni kuyendlela yini ke?” Yena aku: “Hosi, ninavela kutlhela nivona!” Yesu aku ka yena: “Tlhela uvona! Kupfumela ka wena kukuhanyisile.” Hi nomo-lo, atlhela avona, kutani alandza Yesu na ali karhi adzunisa Xikwembu. Narona tiko hinkwaru, loko risvivonile, ritlangela Xikwembu. Kutani Yesu anghena doropeni ra Yeriko, atsemakanya hi le xikarhi ka rona. Doropeni lero akuli ni munhu lweyi avaku i Zakewu; aali murhangeli wa varhesisi, aafuwe ngopfu. Aanavela kuvona Yesu lesvaku i munhu wa matshamela muni. Kambe aasiveliwa hi xitshungu, hikuva aagomile. Kutani atsutsumela mahlweni, akhwela nsinyeni wa nkuwa, lesvaku atavona Yesu, loko ahundza hi kolaho. Loko Yesu afika kona, alanguta henhla amuvona, kutani aku ka yena: “Zakewu, hantlisa uxika, hikuva nifanela kuyatshama muntini wa wena namuntlha.” Zakewu ahantla axika, amuyamukela hi kutsaka. Kambe loko vanhu vasvivona, vavilela hinkwavu vaku: “Anghenile kaya ka wanuna wa mujohi kuyarhurheliwa kona.” Hi loko Zakewu asuka ayima, aku ka Hosi: “Vona Hosi, nitayavanyisa rifuwo ra mina hi le xikarhi, ninyika svisiwana; ni loko nitekile xilo xa munhu hi kumukanganyisa, nitamutlhelisela xona ka mune.” Ndzhaku ka svosvo, Yesu aku: “Namuntlha kuponisiwa kunghenile muntini lowu, hi lesvi munhu lweyi na yena anga n'wana Abrahamu, hikuva N'wana-wa-Munhu atile kutalava ni kutaponisa lavalahlekeke.” Kakuloko vaha yingisa timhaka toleto, Yesu atlhela avarungulela xifaniso, hikuva aali kusuhi na Yerusalema, kutani vona avapimisa lesvaku Mfumu wa Xikwembu wutahantla wuhumelela. Aku: “Nkulukumba mun'wana atilungisele kuya tikweni ra le kule, ayavekiwa kuva hosi, atatlhela avuya. Kutani avitana malandza ya yena ya khume, anyika mina yin'we ka mun'wana ni mun'wana, wa vona aku ka vona ‘Bindzulani ha yona nikondza nivuya.’ Kambe valekwavo avamuvenga. Loko afambile, vasala varhuma vakombisi, vayavula lesvi: ‘Munhu lweyi, ahilavi kufumiwa hi yena!’ “Siku leri nkulukumba avuyaka, na avekiwe kuva hosi, alerisa lesvaku malandza lawaya angamanyika timina, mavitaniwa, lesvaku atativa lesvi mun'wana ni mun'wana abindzuleke svona. Kufika lweyi worhanga aku: ‘Hosi, mina ya wena yibindzulile khume ra timina.’ Hosi yiku ka yena: ‘Hi svona, mutirhi lwenene; lesvi utshembekeke mhakeni leyitsongo ngopfu, utafuma madoropa ya khume.’ Lweyi wa vumbirhi na yena, ata aku: ‘Mina ya wena hosi, yibindzule ntlhanu wa timina.’ Hosi yiku ka yena: ‘Wena ke, fuma madoropa ya ntlhanu.’ Mun'wana ata, aku: ‘Hosi, mina ya wena hi leyi, niyiphutsele hi faduku; anikuchava, hikuva u munhu wo nonon'hwa, uteka lexi ungaxivekangiki, utshovela lexi ungaxibzalangiki.’ Hosi yihlamula yiku: ‘Wena mutirhi lwewobiha, nitakuyavanyisa hi kuvulavula ka wena. Awusvitiva lesvaku ni munhu wo nonon'hwa, ni lesvaku niteka lexi ningaxivekangiki, ni kutshovela lexi ningaxibzalangiki! Hikolaho ka yini ungavekanga mina ya mina ka vabindzulisi xana? Kuvuyeni ka mina, anitava niyitekile svin'we ni bindzu ra yona.’ Kutani aku ka lava avali kona kolaho: ‘Mutekeleni mina, miyinyika lweyi anga ni timina ta khume.’ [ Vaku ka yena: ‘Kambe, Hosi, anikhume ra timina!’] Yena aku: ‘Namibzela lesvaku kutanyikiwa mani na mani lweyi anga ni xanchumu; kambe lweyi angaliki na nchumu, atatekeliwa ni lexi anga na xona. Loko vali valala va mina lavangalavangiki lesvaku ni vafuma, vatiseni kola, mivadlaya mahlweni ka mina.’” Kuteloko avulavulile timhaka toleto, ahundzela mahlweni, atlhantukela Yerusalema. Loko atshinelela Betfaje na Betaniya, kusuhi ni ntshava leyivuliwaka ya Maolivhera, ahlawula vambirhi xikarhi ka vajondzisiwa va yena aku ka vona “Yanani muntini lowuvonakaka lahaya; loko minghena ka wona, mitakuma ximbongolwana lexibohiweke, lexikalaka xingasigadiwa hi munhu; xitshunxeni, mita na xona halenu. Loko munhu amivutisa aku: ‘Mixitshunxela yini?’, mitaku: ‘Hosi yaxilava.’” Lava varhumiweke vafamba, vayakuma svili hilaha angavabzela hakona. Loko vatshunxa ximbongolwana, vinyi va xona vavavutisa, vaku: “Ximbongolwana xoxo mixitshunxela yini ke?” Vona vaku: “Hosi yaxilava.” Kutani vata na xona ka Yesu; vakapeka tinguvu ta vona henhla ka xona, vagadisa Yesu. Loko ali karhi afamba, vayandlala tinguvu ta vona ndleleni. Kutani loko ali kusuhi ni kungirimela Ntshava ya Maolivhera, xitshungu hinkwaxu xa vajondzisiwa xisungula kutsaka, xidzunisa Xikwembu hi rito leritlakukeke, hikolaho ka mahlori hinkwawu lawa ximavoneke, uku: “Akudzunisiwe Mufumi lweyi ata ka hi vito ra Hosi! Kurhula akuve matilweni, ni kukwetsima matilweni ya le henhlahenhla!” Kutani Vafarisi van'wana, lava avali xitshungwini, vaku ka yena: “Mujondzisi, miyeta vajondzisiwa va wena.” Avahlamula aku: “Namibzela lesvaku, loko vona vamiyela, maribze matahuwelela.” Kuteloko afikile kusuhi ni doropa, arivona, ali rilela, aku: “Yo! Loko ingi na wena awutivile namuntlha timhaka leti tingatisaka kurhula, kambe uyo fihleliwa tona svosvi. Hakunene nkarhi wata, lowu valala va wena vangatayaka rithangu, vakurhendzela ha rona, vakupfalela matlhelo hinkwawu; vatakuhahlula, vahelisa ni lava vayakeke ka wena; kutani valala vangakala vangatshiki ribze henhla ka ribze laha ka wena, hikuva awutivanga nkarhi lowu uyendzeliweke ha wona.” Kuteloko anghenile Tempeleni, ahlongola hinkwavu lava vaxavisaka kona, aku ka vona: “Kutsaliwile lesvaku: ‘Yindlo ya mina yitava yindlo ya xikhongelo’, kasi n'wina miyiyendlile ‘mhakwa wa vayivi’.” Yesu aajondzisa Tempeleni masiku hinkwawu. Kambe Vaprista lavakulu ni Vatsali svin'we ni vakulukumba va tiko, avalava kumudlaya. Ntsena avangativi lexi vangataxiyendla, hikuva vanhu avamuyingisa, vatsakela ngopfu marito ya yena. Siku rin'wana, loko Yesu ajondzisa vanhu Tempeleni ni kupaluxa Evhangeli, Vaprista lavakulu ni Vatsali vafika, svin'we ni vakulukumba va tiko, vaku ka yena: “Hibzele lesvaku xana uyendla svilo lesvi hi matimba wahi ke? Lweyi akunyikeke matimba lawa, i mani xana?” Avahlamula aku: “Na mina nitamivutisa lesvi: Xana akukhuvula ka Yohani akuhuma tilweni, kumbe ka vanhu ke?” Vona vakanetana vaku: “Loko hiku: ‘Akuhuma tilweni’, ataku: ‘Hikolaho ka yini mingapfumelanga ka yena ke?’ Kambe loko hiku: ‘Akuhuma ka vanhu’, vanhu hinkwavu vatahikhandla hi maribze, hikuva hinkwavu vakholwa lesvaku Yohani aali muprofeta.” Kutani vahlamula vaku: “Ahitivi laha akuhuma kona.” Hi loko Yesu aku ka vona: “Na mina, aningamibzeli lomu matimba lawa nitirhaka ha wona, mahumaka kona.” Kutani arungulela vanhu xifaniso lexi, aku: “Munhu wokarhi aabzalile mvhinya nsin'wini ya yena, kutani awuveka mavokweni ya varimi, yena ateka riyendzo ra nkarhi woleha. Hi nguva yakona, arhuma mutirhi ka varimi, lesvaku vayamunyika mihandzu ya mvhinya. Kambe varimi vamuba, vamutlhelisa na angali na nchumu. Atlhela arhuma mutirhi mun'wana; na yena vamuba, vamukhomisa ni tingana, kutani vamutlhelisa na angali na nchumu. Atlhela arhuma wa vunharhu; yelweyo vamuboxa timbanga, vamuhlongola. Ndzhaku ka svona, n'winyi wa mvhinya aku: ‘Nitayendla yini? Nitarhuma n'wana wa mina, lweyi nimurhandzaka; kumbexana loko vamuvona, vatamuchava.’ Kambe varimi, loko vamuvona, vabzelana vaku: ‘Majandzhaka hi lweyi! Ahimudlayeni, lesvaku ndzhaka yitava ya hina.’ Kutani vamuhlongola nsin'wini ya mvhinya, vamudlaya. Xana n'winyi wa mvhinya atayendla yini hi vona ke? Atata, atalovisa vatirhi volavo, anyika nsimu ya mvhinya ka van'wana!” Loko vatwa svosvo, vaku: “Svingatshuki sviva tano.” Kambe Yesu avalanguta aku: “Xana rivula yini tsalwa leringe:” “‘Ribze leri vayaki vangarinyenya, hi rona leringayendliwa ribze lerikulu ra masungulu’ xana? “Mani na mani lweyi angatawela henhla ka ribze leri, atapshandlaka; nasvona ritapshandlasa lweyi ringatamuwela henhla.” Kutani Vaprista lavakulu ni Vatsali avanavela kumukhoma nkarhi wolowo, hikuva avasvitwisisile lesvaku aavula vona hi xifaniso lexi, kambe avachava xitshungu. Hi loko vayimela nkarhi lowunene lowu vangamukhomaka ha wona, kutani varhuma tinhloli leti titiyendleke vanhu lavolulama, lesvaku titamuphasa hi marito ya yena, kutani titamunyiketa mavokweni ya murhangeli wa vuhosi. Vanhu lava vavutisa Yesu vaku: “Mujondzisi, hasvitiva lesvaku uvulavula ni kujondzisa hi kululama; awuyi hi nghohe, nasvona ujondzisa ndlela ya Xikwembu hi ntiyiso. Xana svahifanela kuhumesela Khezari rhesa, kumbe asvihifaneli ke?” Kambe yena, hi kuvona vutlhari bza vona, aku ka vona: “Nikombeni denari. Yi ni xifaniso xa mani ni vito ra mani ke?” Vona vaku: “I sva Khezari.” Hi loko aku ka vona: “Hikolaho, nyikani Khezari lesvinga sva Khezari, ni Xikwembu lesvinga sva Xikwembu.” Kutani vatsandzeka kumuphasa hi marito ya yena mahlweni ka vanhu; vahlamala hi kuhlamula ka yena, vamiyela. Vasaduki avavula lesvaku vafi vangepfuki. Kutani siku rin'wana van'we ka vona vata ka Yesu, vafika vamuvutisa vaku: “Mujondzisi, Moxe ahisiyele matsalwa lawa mange: ‘Loko munhu atekile nsati, kutani afa na angali na vana, makwavu atasala ahlayisa nsati wa mufi, lesvaku apfuxa njangu wa makwavu.’ Kutani mhaka hi leyi: Akuli ni vamakwavu vaxinuna va ntlhanu ni vambirhi; lweyi wa mativula ateka nsati, kutani afa na angali na vana. Wa vumbirhi ahlayisa nsati wa mufi, ni lweyi wa vunharhu ayendlisa svosvo; sviva tano ni ka hinkwavu lava va ntlhanu ni vambirhi; vafa, na vangasiyanga vana. Aku heteleleni, na yena lweyi wansati afa. Lesvi lava va ntlhanu ni vambirhi hinkwavu vaveke vanuna va wansati lweyi, hi siku ra kupfuka kufeni, atava nsati wa mani xikarhi ka vona xana ke?” Yesu avahlamula aku: “Vanhu va misava leyi vachada kumbe kuchadisiwa; kambe lava vangatapfumeleliwa kuvona sva minkarhi leyitaka ni kupfuka ka vafi, avahachadi kumbe kuchadisiwa; avahafi, hikuva vafana ni tintsumi, vahundzuka vana va Xikwembu, hi mhaka ya lesvi vangapfuxiwa kufeni. Loko kuli kupfuka ka vafi, Moxe na yena atiyisile mhaka loko ali kusuhi ni xihlahla, kutani avula lesvaku Hosi i Xikwembu xa Abrahamu, ni Xikwembu xa Izaki, ni Xikwembu xa Yakobe. Hikolaho ahi Xikwembu xa lavafeke, kambe i xa lavahanyaka; hikuva, ka xona, hinkwavu vahanya.” Hi loko Vatsali van'wana vamubzela vaku: “Mujondzisi, uvulavule khwatsi.” Kutani avahatiyanga kumuvutisa mhaka yin'wana. Kutani aku ka vona: “Xana vanhu vavula yini loko vaku: ‘Mesiya i N'wana Davhida’ ke?” Kasi yena Davhida avulile bukwini ya Tipisalma aku: “‘Yehovha Xikwembu xite ka N'winyi wanga: Tana utatshama vokweni ra mina ra xinene, nikondza niveka valala va wena hansi ka minkondzo ya wena.’ “Kutani loko Davhida avula Mesiya aku i N'winyi wa yena, xana anga van'wana wa yena hi ndlela yihi ke?” Loko vanhu hinkwavu vali karhi vamuyingisa, aku ka vajondzisiwa va yena: “Tivoneleni ka Vatsali lavarhandzaka kufambafamba na vayambele xiyambalu lexoleha, varhandza ni kuxewetiwa mintsendzeleni; vahlawula svitshamu lesvinene masinagogeni, vatsakela ni kutshama lomu kochaviseka minkhubzeni. Hi vona vaphangelaka ni kukangayisa vafelakazi ni minjangu ya vona, vayendla ni svikhongelo lesvoleha lesvaku vatavoniwa. Vatayavanyisiwa hi kuyavanyisa loku kutlulisaka!” Loko Yesu atlakusa mahlo, avona vafuwi lesvi vahoxaka svona xibzeni xanhlengo wa Tempele. Avona ni mufelakazi lweyi aali xisiwana, ahoxa svimalana sva tilepta timbirhi ntsena. Kutani aku: “Hakunene nili ka n'wina: Mufelakazi lweyi wa xisiwana ahumesile kutlula hinkwavu; hikuva vanhu lava hinkwavu vahumesile tinyiko leti vatipambuleke xumeni xa vona lexotala, kasi wansati lweyi ahumesile sva vusiwana bza yena, svinga hinkwasvu lesvi aatahanya hi svona.” Van'wana avavulavula hi lesvi Tempele, ayisasekisiwe xisvona hi maribze lawa yosaseka ni tinyiko ta vagandzeli; kutani Yesu aku: “Loko svili lesvi misvivonaka, kutata masiku lawa kungatakala kungahasali ribze henhla ka ribze rin'wana; hinkwawu matahirimuxiwa.” Kutani vavutisa Yesu, vaku: “Mujondzisi, timhaka leti titahumelela nkarhi muni xana? Xana xikombiso xitava xihi xa lesvaku tilava kuhumelela ke?” Kutani Yesu aku: “Tivoneleni lesvaku mingakangayisiwi, hikuva lavotala vatata hi vito ra mina, mun'wana ni mun'wana aku: ‘Mina ni yena’ ni lesvaku ‘nkarhi wufikile’! Mingavalandzeni! Loko mitwa huwa ya tinyimpi ni ya minkitsinkitsi, mingatshukeni michava, hikuva svosvo svifanele kurhanga svihumelela, kambe makumu wona matahlwela kufika.” Yesu atlhela aku ka vona: “Tiko rin'we ritapfukela rin'wana, mfumu wun'we wutalwa ni wun'wana; kutava ni kutsekatseka ka misava; mintungu ni tindlala svitava kona matlhelweni lawa yotala; kutahumelela ni svilo lesvichavisaka ngopfu, ni masingita lamakulu lamahumaka tilweni. “Kambe loko svilo lesvi hinkwasvu svingasivakona, vatamikhoma, vamixanisa, vaminyiketa masinagogeni ni le majele, vamiyisa mahlweni ka tihosi ni ka tindhuna hikolaho ka vito ra mina; wutava wona nkarhi wa n'wina wohumesa vumboni. Hikolaho svivekeni miyehleketweni ya n'wina lesvaku mingatikarhati hi kutilulamisa lesvi mingatahlamulisa xisvona, hikuva mina nitaminyika marito ya vutlhari lawa valala va n'wina hinkwavu vangatatsandzeka kulwa na wona ni kumakaneta. Mitanyiketiwa hi vapsali va n'wina, ni vamakwenu, ni maxaka, ni vanakuloni; vatadlaya van'wana va n'wina; mitavengiwa hi vanhu hinkwavu hikolaho ka vito ra mina. Kambe akungalovi hambi wuli nsisi ni wun'we wa tinhloko ta n'wina; hi kutiyisela ka n'wina mitatikumela vutomi. “Kutaku loko mivona doropa ra Yerusalema rirhendzeliwile hi mab'uthu ya valala, tivani lesvaku kuhahluliwa ka rona kule kusuhi. Hi nkarhi wolowo, lava vanga Yudeya, avatsutsumele tintshaveni; lava vanga doropeni, avahume ka rona; kutani lava vanga handle ka doropa, vangatshuki vanghena ka rona. Masiku wolawo matava masiku ya kukhatisa, lesvaku hinkwasvu lesvinga matsalweni svihetiseka. Yowee ka vavasati lava vangatava vatikile ni lava vangatava na vanyan'wisa minkarhini yoleyo, hikuva kuxaniseka lokukulu kutava kona misaveni, ni mahlundzu ya Xikwembu matawela vanhu volavo. Vatadlawa hi tlhari, vatayisiwa na vali svikarawa matikweni hinkwawu; kutani doropa ra Yerusalema ritakandziyeliwa hi vamatiko kukondza minkarhi ya vona yihetiseka. “Masingita matava kona ka jambu ni n'weti, ni le tinyeletini. Laha misaveni, vahanyi vamatiko vataxaniseka, vakanganyiseka, vatshukisiwa hi kuduma ka lwandle ni ka magandlati ya rona. Vanhu vatatitivala hi kuchava ni kuyehleketa lesvingatahumelela la misaveni, hikuva lesvi sva matimba sva le matilweni svitatsekatsekisiwa. Hikona vangatavona N'wana-wa-Munhu ata hi refu, na ali ni matimba ni kukwetsima lokukulu. Loko svilo svosvo svisungula kuhumelela, wololokani mitlakusa tinhloko ta n'wina, milanguta henhla, hikuva kukutsuliwa ka n'wina kule kusuhi.” Kutani avarungulela xifaniso aku: “Langutani nkuwa ni minsinya hinkwayu; loko miyivona yihluka, masvitiva na n'wina lesvaku malanga male kusuhi. Hi mukhuva wolowo, loko mivona svilo svosvo svihumelela, mitativa lesvaku Mfumu wa Xikwembu wu le kusuhi. Nitiyisile nili ka n'wina: Nguva leyi ya vanhu yingakala yingahundzi, na kungasihumelela svilo lesvi hinkwasvu. Tilo ni misava svitahundza, kambe marito ya mina mangakala mangahundzi. “Tivoneleni lesvaku timbilu ta n'wina tingatikeliwi hi makolo ni vudakwa, ni kuvilela hi sva vutomi lebzi, nasvona tivoneleni lesvaku siku lero ringafiki hi xitshuketa; hikuva, kukotisa ntlhamu, ritawela hinkwavu lavayakeke misaveni hinkwayu. Hitekani ke, mikhongela minkarhi hinkwayu, lesvaku mikuma matimba ya kupona ka svilo hinkwasvu lesvi svingatahumelela, ni kuyima na mitiyile mahlweni ka N'wana-wa-Munhu.” Ni nhlekanhi Yesu aatshama ajondzisa Tempeleni, kambe nimajambu aahuma, ayayetlela ntshaveni leyivuliwaka ya Maolivhera. Loko rixa, vanhu hinkwavu avapfukisa vata ka yena Tempeleni kutamu yingisa. Nkhuvu wa Xinkwa lexokala comela lowuvuliwaka Paska, awuli kusuhi. Kutani Vaprista lavakulu ni Vatsali avalava ndlela yodlaya Yesu, kambe avachava xitshungu. Hi loko Sathana anghena ka Yudasi, lweyi avaku i Iskariyota, mun'we wa lava va khume ni vambirhi; kutani Yudasi aya ka Vaprista lavakulu, ni ka tindhuna ta valanguteli, ayatwanana na vona hilaha angatavanyiketa Yesu hakona. Vona vatsaka, vapfumela kumunyika male. Yudasi akhensa, kutani alava nkarhi lowunene wovanyiketa yena ha wona, na xitshungu xingasvitivi. Kuteloko kufikile siku ra Xinkwa lexokala comela, ringa leri vatlhavaka svinyempfana sva Paska ha rona, Yesu arhuma Petrosi na Yohani, aku ka vona: “Yanani, miyahilungisela nkhuvu wa Paska, hitakota kuyaja.” Vona vaku ka yena: “Hi kwihi laha ulavaka lesvaku hiyakulungisela kona xana?” Aku ka vona: “Loko minghenile doropeni, mitahlangana ni wanuna lweyi arhwaleke khuwana ra mati; mulandzeni ka munti lowu angatanghena ka wona. Kutani mitaku ka n'winyi wa munti: ‘Mujondzisi ahirhumile ka wena, ali: Yi kwihi yindlo leyi angatajela ka yona Paska, ni vajondzisiwa va yena, ke?’ Yena atamikomba yindlo ya xitezi ya yikulu leyi yandlaleliweke; mitalungisela kona.” Hi loko vasuka, vayakuma svili hilaha angavabzela hakona; kutani valungisa Paska. Loko nkarhi wufikile, ayakujeni svin'we ni vapostola. Kutani aku ka vona: “Ninavelile ngopfu kuja Paska leri na n'wina, na ningasitwisiwa kuvaviseka; hikuva nitiyisile nili ka n'wina: Aningahaliji, rikondza rihetiseka Mfun'wini wa Xikwembu.” Hi loko ateka ndzheko, akhensa aku: “Tekani, misiyelisana. Nitiyisile nili ka n'wina: Kusukela svosvi aningahanwi sva mihandzu ya mvhinya, kukondza kufika Mfumu wa Xikwembu.” Ateka ni xinkwa, kutani loko akhensile, axikhema, avanyika aku: “Lowu i miri wa mina, [lowunyiketiwaka hikolaho ka n'wina; yendlani lesvi hi kuniyanakanya.” Hi mukhuva wolowo, ateka ndzheko loko valalelile, aku: “Ndzheko lowu i ntwananu lowumpsha ngatini ya mina, leyihalatiwaka hikolaho ka n'wina.] Kambe vonani, lweyi anixengaka alekujeni svin'we na mina svosvi. Loko ali N'wana-wa-Munhu, atatifambela hilaha svibohiweke hakona; kambe, ani khombo munhu lweyi amuxengaka.” Kutani vasungula kuvutisana, valava kutiva lesvaku angavamani xikarhi ka vona, lweyi angatasviyendla. Kutani kuhumelela kuphikizana xikarhi ka vona kutiva lweyi angatavoniwa na ali lwenkulu ka vona. Kambe Yesu aku ka vona: “Tihosi ta matiko toma fuma, kutani vafumi va wona, vavuliwa ‘vahlayisi va tiko’. Svingatshuki sviva tano ka n'wina; kambe lwenkulu xikarhi ka n'wina aakotise lwentsongo; kutani lweyi afumaka aakotise lweyi atirhelaka van'wana. Hikuva lwenkulu i mani ke? Xana hi lweyi atshamaka kujeni, kumbe hi lweyi atirhaka kuphamela van'wana ke? Masvitiva, lesvaku hi lweyi atshamaka svakujeni. Kambe mina ni le xikarhi ka n'wina na nili lweyi atirhelaka van'wana. Hin'wina lava mitiyiseleke na mina miringweni ya mina. Hilaha Tatana wa mina aninyikeke Mfumu hakona, na mina ni minyika wona; Mfun'wini wa mina, mitaja ni kunwa na mili na mina, kutani mitatshama sviluvelweni, miyavanyisa tinxaka ta Israyele leti ta timbirhi.” Yesu aku ka Petrosi: “Simoni, Simoni, yingisa: Sathana amikombelile kumihlela hinkwenu kufana ni mavele, kambe mina nikukhongelelile, lesvaku kupfumela ka wena kungatshuki kutitivala. Kutani wena, loko utava uhundzukile, utatiyisa vamakwenu.” Kutani yena aku: “Hosi, nilulamele kufamba na wena jele ni le kufeni.” Kambe Yesu aku ka yena: “Petrosi, nakubzela lesvaku namuntlha na nkuku wungasiyimba, utava uvulile kanharhu lesvaku awunitivi.” Kutani aku ka vona: “Nkarhini lowu nimirhumeke na mili hava xipachi xa male, ni nkwama wa timbuva, ni masandhazi, xana mive mipfumala nchumu ke?” Vona vaku: “Ahipfumalanga nchumu.” Aku ka vona: “Kambe svosvi, lweyi anga ni xipachi xa male, aaxiteke, na wona nkwama aawuteke, ni lweyi apfumalaka tlhari, aaxavise mpahla ya yena, atixavela rona, hikuva namibzela lesvaku tsalwa leringe: ‘Ahlayiwile ni vajohi’, rifanela kuhetiseka ka mina. Kunene timhaka letingavuliwa mayelanu na mina, tikarhi tihetiseka.” Kutani vona vaku: “Hosi, matlhari mambirhi hi lawa!” Kutani yena aku ka vona: “Maringana!” Kutani asuka aya Ntshaveni ya Maolivhera, tani hi ntolovelo wa yena; na vona vajondzisiwa vamulandza. Loko afikile kona, aku ka vona: “Khongelani lesvaku mingangheni miringweni.” Kutani asuka aya kulenyana, hi mpfhuka woringana kuhoxa ka ribze, kutani akhinsama hi matsolo, akhongela, aku: “Tatana, loko usvirhandza, ndzheko lowu awutshinele kule na mina! Ntsena kungayendliwi kurhandza ka mina, kambe akuyendliwe kurhandza ka wena.” [ Kutani ntsumi yohuma tilweni yihumelela ka yena, yimutiyisa. Kutani loko ali maxangwini lamakulu, akhongela hi matimba ngopfu, nyuku wa yena wukondza wuxiririka, wufana ni madonakati ya ngati lamanthonelaka misaveni.] Loko ahetile kukhongela, apfuka ayima, ata ka vajondzisiwa, avakuma na vayetlele hikolaho ka gome. Kutani aku ka vona: “Hikolaho ka yini miyetlela xana? Pfukani, mikhongela, lesvaku mingangheni miringweni.” Loko ahavulavula, kuhumelela xitshungu; na yena lweyi avaku i Yudasi, mun'we wa lava va khume ni vambirhi, aaxirhangela mahlweni; atshinelela Yesu kumun'qunta. Kambe Yesu aku ka yena: “Yudasi, xana unyiketa N'wana-wa-Munhu hi kumun'qunta ke?” Lava avali na Yesu, loko vavona lesvilavaka kuhumelela, vaku: “Hosi, xana hifanela kuteka matlhari hilwa ke?” Kutani mun'we wa vona avavisa mutirhi wa Muprista lwenkulu, amuxupula ndleve ya xinene. Kambe Yesu ahlamula aku: “Tshikani! Mingahayengeteni!” Kutani akhumba ndleve ya mutirhi yelweyo, amuhanyisa. Kutani Yesu avulavula ni lavangamutela, vanga Vaprista lavakulu ni tindhuna ta Tempele ni vakulukumba, aku: “Lesvi mihumeke, na mili ni matlhari ni tinhonga, nova xigevenga xana? Anili na n'wina Tempeleni masiku hinkwawu; aminikhomanga. Kambe svosvi, hi wona nkarhi wa n'wina, hikuva kufuma munyama.” Kuteloko vamukhomile, vafamba na yena, vamuyisa ndlwini ya Muprista lwenkulu. Kambe Petrosi aavalandza hi le kule. Loko vatshivelile ndzilo xikarhi ka munti wa vuthethisi, vaworha, Petrosi na yena aatshame na vona. Mutirhi mun'we wa xisati, loko amuvona na atshamile aworha ndzilo, amulangutisisa, aku: “Lweyi na yena, aali na yena.” Kambe Petrosi akaneta, aku: “Wansati ndziwena, animutivi mina munhu lwiya!” andzhakunyana mun'wana amuvona, aku: “Na wena, u mun'we wa vona.” Kambe Petrosi aku: “Munhu ndziwena, ani wa vona mina!” Kuteloko kuhundzile wora rin'we, mun'wana atiyisa, aku: “Hakunene, munhu lweyi, aali na yena; svitiyile hikuva na yena i Mugalileya.” Kambe Petrosi aku: “Munhu ndziwena, anisvitivi lesvi usvivulaka!” Aku na ahavulavula, nkuku wuyimba. Kutani Hosi yihundzukula, yilanguta Petrosi; hi loko Petrosi atsundzuka rito ra Hosi, loko yite ka yena: “Nkuku wungasiyimba, utava unilandzulile kanharhu.” Kutani Petrosi ahumela handle, ayarila hi xiviti. Kutani vavanuna lavakhomeke Yesu, vamutseketsela, vamuba. Kuteloko vamupfalile mahlo, vamuvutisa vaku: “Profeta, i mani lweyi akubeke?” Kutani vamurhuketela na vavula lesvotala svin'wana. Loko bzixile, vakulukumba va xitshungu, vanga Vaprista lavakulu ni Vatsali, vahlengeletana; kutani vayisa Yesu hubzeni ya vona. Vaku ka yena: “Loko uli Mesiya, hibzele!” Yena avahlamula aku: “Hambi nimibzela, amingapfumeli, ni loko ni mivutisa, amingahlamuli. Kusukela ka svosvi, N'wana-wa-Munhu atatshama vokweni ra xinene ra Xikwembu xa matimba hinkwawu.” Hinkwavu vamuhlamula vaku: “Xana svivula lesvaku u N'wana wa Xikwembu ke?” Aku ka vona: “N'wina mivula lesvaku mina ni yena.” Kutani vaku: “Hahalavela yini vumboni xana? Hikuva na hina hisvitwile na svihuma non'weni wa yena.” Kutani vasuka vayima hinkwavu, vayisa Yesu ka Pilato, vasungula kumulumbeta, vaku: “Hikumile munhu lweyi na ali karhi ahlohlotela tiko ra hina, ayalisa vanhu kuhumesela Khezari rhesa; nasvona ativula Kriste, Hosi.” Hi loko Pilato amuvutisa, aku: “Hi wena hosi ya Vayuda ke?” Yesu amuhlamula, aku: “Lweyi avulaka svosvo hi wena!” Hi loko Pilato aku ka Vaprista lavakulu ni ka xitshungu: “Anikumi nandzu ka munhu lweyi.” Kambe vasindzisa, vaku: “Apfilunganyisa tiko hi kujondzisa hinkwaku Yudeya; asungule Galileya, svosvi se atile halenu.” Loko Pilato asvitwa, avavutisa aku: “Xana munhu lweyi i Mugalileya ke?” Loko atwile lesvaku i munhu wa tiko lerifumiwaka hi Heroda, amurhumela ka Heroda, lweyi na yena aali Yerusalema hi masiku wolawo. Kuteloko Heroda avona Yesu, atsaka ngopfu, hikuva akuli khale na anavelile kumuvona, hikolaho ka lesvi aasvitwile mayelanu na yena, kutani aatshemba lesvaku atamuvona na ayendla mahlori. Amuvutisa timhaka totala, kambe Yesu angahlamulanga nchumu. Vaprista lavakulu ni Vatsali avayimile kolaho, vamulumbeta hi matimba svinene. Hi loko Heroda ni masochwa ya yena vamusandza, ni kumutseketsela; kutani vamuyambexa nguvu, kumbe jansi rokala mavoko leri riyambaliwaka henhla ka yovangama, vamutlhelisela ka Pilato. Hi siku rolero Heroda na Pilato vahundzukile vanghanu, kasi khale avavengana. Kuteloko Pilato ahlengeletile Vaprista lavakulu, ni vakulukumba, ni vanhu va tiko, aku ka vona: “Mitisile munhu lweyi ka mina, miku: ‘Ahambukisa tiko.’ Svosvi-ke nikambile mhaka mahlweni ka n'wina kambe anikumanga nandzu ka yena, hambi wuli wun'we ntsena wa lesvi mimulumbetaka ha svona. Svivile tano ni ka Heroda, hikuva amutlhelisele ka hina; svatikomba lesvaku angayendlanga xilo ni xin'we lexi angadlawelaka xona. Hikolaho, nitalerisa lesvaku abiwa, kutani nitamutshunxa.” [ Pilato aafanela kuvatshunxela mubohiwa hi siku ra nkhuvu wa Paska.] Kambe hinkwavu vakanyuluka hi rito rin'we, vaku: “Mususi lweyi, uhitshunxela Barabasi!” (Barabasi aanghenisiwile jele, hikuva aapfuxile dzolonga doropeni, ava adlaya ni munhu.) Pilato atlhela avulavula na vona, hi kulava kutshunxa Yesu. Kambe vatlhela vakanyuluka, vaku: “Muvambe! Muvambe!” Avavutisa khambi ra vunharhu aku: “I xijoho muni lexi axiyendleke xana? Anivoni nandzu lowu afanelaka kufa ha wona; hi kolaho nitalerisa lesvaku abiwa, kutani nitamutshunxa.” Kambe vahuwelela hi marito lawa yotlakuka, vakombela lesvaku avambiwa; kutani kuhuwelela ka vona kuyingisiwa. Pilato atsema mhaka, aku: “Akuyendliwe hilaha mikombelaka hakona!” Kutani avatshunxela lweyi vamukombeleke, lweyi aapfaleliwile hikolaho ka dzolonga ni kudlaya munhu; loko ali Yesu, Pilato amunyiketa ka vona, lesvaku vamuyendla lesvi vasvirhandzaka. Loko vali karhi vafamba na yena, vakhoma mun'we lweyi avaku i Simoni, wa Kirene, lweyi aavuya hi le masin'wini; vamurhwexa xihambanu xa Yesu, kutani Simoni alandza Yesu hi le ndzhaku. Naxona xitshungu lexikulu ni vavasati lava votala avalandza Yesu, na vali karhi vaba nkosi, vamurila. Yesu ahundzukula aku ka vona: “Vavasati va Yerusalema, minganirileleni; kambe tirileleni, n'wina ni vana va n'wina. Hikuva vonani masiku mata, lawa vangataku ‘Kukatekile lava vangavelekiki, ni makhwiri lawa mangavelekangiki ni lava vanganyan'wisangiki.’ “Nkarhini wolowo vataku ka tintshava: ‘Wanani henhla ka hina!’ Ni ka svitsunga: ‘Hifunengeteni!’ Hikuva loko vayendlise lesvi ka rihunyi lerotsakama, kutayendliwa yini ka leri riwomeke xana?” Nasvona avayisa ni vavanuna van'wana vambirhi, kuyadlawa na yena; vona avali svigevenga. Loko vafikile ndhawini leyi vange i “ya Pala”, vamuvamba kona, vavamba ni xigevenga xin'we tlhelweni ra yena ra xinene, xin'wana ka leri ra ximantsi. [Kutani Yesu aku: “Tatana, varivalele, hikuva avasvitivi lesvi vasviyendlaka.”] Kutani vayavelana sviyambalu sva yena hi kuhlahluva. Vanhu avayimile kolaho, na vali karhi valanguta; na vona vakulukumba avamuvungunya, vaku: “Munhu lweyi aponisile van'wana; aatiponise, loko ali Mesiya, Muhlawuliwa wa Xikwembu!” Na wona masochwa amamutseketsela, matshinela kusuhi, mamunyika ntsuvi, maku ka yena: “Loko uli Hosi ya Vayuda, tiponise!” Akuli ni papela henhla ka yena, leringe: “Lweyi i Hosi ya Vayuda.” Xin'we xa svigevenga lexihayekiweke kolaho aximurhuketela, xiku: “Xana ahi wena Kriste ke? Tiponise, na hina uhiponisa!” Kambe lexin'wana ximukawuka, xiku: “Xana awuchavi Xikwembu, lesvi ungayavanyisiwa kufana na yena ke? Loko ali hina, svihifanelile, hikuva hiyamukela lesvifambelanaka ni mintirho ya hina; kambe lweyi, angayendlanga nchumu xobiha.” Xigevenga xitlhela xiku: “Yesu, nitsundzuke, loko ufika Mfun'wini wa wena.” Yesu aku ka xona: “Nitiyisile nili ka wena: Namuntlha utava na mina Paradiseni.” Hi nkarhi lowulavaka kuva wa vuntlhanu na wun'we, munyama wufunengeta tiko hinkwaru, kufika nkarhini wa vuntlhanu ni mune. Jambu riyendla ra ntima, ninguvu ya xisirhelo xa Tempele yipandzeka hi le xikarhi. Kutani Yesu ahuwelela hi rito leritlakukeke, aku: “Tatana, ninyiketa moya wa mina mavokweni ya wena.” Loko avulile svosvo, anhlala afa. Loko ndhuna ya dzana ra masochwa yivonile lesvihumeleleke, yidzunisa Xikwembu, yiku: “Hakunene munhu lweyi aalulamile.” Vanhu lavotala avahlengeletanile vatahlalela. Loko vavonile lesvihumeleleke, vahangalaka vatlhelela makaya na vali karhi vatiba svifuva hi kuvaviseka lokukulu. Hinkwavu lavativaneke na Yesu, ni vavasati lavamulandzeke loko ahuma Galileya, avayimile kule, na vali karhi vavona svilo svosvo. Akuli ni wanuna wokarhi lweyi avuliwaka Yosefa, xirho xa huvu ya Vayuda, aali munhu lwenene wolulama, lweyi aangapfumelanga akungu ra vona ni mintirho ya vona. Aali xipsaliwa xa Arimateya, doropa ra Vayuda, aalangutela Mfumu wa Xikwembu. Kutani aya ka Pilato, ayakombela ntsumbu wa Yesu. Kuteloko awuhawulile, awuphutsela hi lansoro, awuveka sirheni lerikovotliweke ribzeni, laha akungasilahliwa munhu kona. Siku lero, arili ra kutilungisela, akusungula siku ra Savata. Na vona vavasati lavahumeke Galileya na Yesu, vata kusuhi, vavona sirha, ni hi ndlela leyi ntsumbu wa Yesu wuvekiwaka ha yona. Kutani vatlhelela kaya, vayalungisa mafurha ya kunun'hwela; kambe hi siku ra Savata, vahumula hi kulandza nawu wa xiyuda. Hi siku ra Sonto na jambu ringasihuma, vavasati vaya sirheni, na vatamelile mafurha yonun'hwela lawa vamalungiseke. Vakuma ribze na rivumbuluxiwile kule ni sirha. Kambe loko vanghena, avakumanga ntsumbu wa Hosi Yesu. Vaku na vaha hlamala ha svona, vavanuna vambirhi vatshuka vahumelela ka vona, na vali ni sviyambalu sva kuvangama. Loko vavasati vahali kuchaveni lokukulu ni kulanguta hansi hikolaho ka gome, vavanuna vaku ka vona: “Milavela yini lweyi ahanyaka xikarhi ka vafi xana? Angakona laha, yena apfukile kufeni. Tsundzukani hilaha angavulavula na n'wina hakona, loko ahali Galileya, loko aku: ‘N'wana-wa-Munhu afanela kunyiketiwa mavokweni ya vajohi, avambiwa, kutani atapfuka hi siku ra vunharhu.’” Vatsundzuka marito ya yena, kutani vasuka sirheni, vayarungula timhaka leti hinkwatu ka lava va khume na mun'we ni ka van'wana hinkwavu. Vavasati lava, aali Mariya wa Magadala, na Jowana, na Mariya mamana wa Yakobe; ni van'wana lava avali na vona, vatiyisa ka vapostola timhaka leti. Kambe marito lawa avamateka tani hi norho, vangamapfumeli. [ Loko ali yena Petrosi asuka, atsutsumela sirheni; kuteloko akorhamile ahlomela, avona malansoro ntsena, kutani atlhelela kaya, na ali karhi ahlamala hi lesvihumeleleke.] Hi siku lero, vambirhi va vona, avaya xidoropanini lexivuliwaka Emawusi; vukule bza xona na Yerusalema, abziringana mpfhuka wa khume ra makilometru. Avavulavula svin'we hi timhaka hinkwatu letihumeleleke. Vaku vaha vulavula ha tona vavutisana, Yesu hi xiviri avatshinelela, alongoloka na vona. Kambe mahlo ya vona amasiveliwile lesvaku vangamutivi. Kutani aku ka vona: “Hitihi timhaka leti mivulavulaka ha tona ndleleni ke?” Hi loko vona vayima na vali ni gome. Mun'we lweyi avaku i Kleyopasi, ahlamula, aku: “Xikarhi ka lavayendzeleke Yerusalema, xana hi wena uliwexe lweyi angativiki timhaka letihumeleleke kona hi masiku lawa ke?” Aku ka vona: “Hi tihi xana?” Vaku ka yena: “Ta Yesu wa Nazareta, lweyi aali muprofeta wa matimba mintirhweni ni le kuvulavuleni, mahlweni ka Xikwembu ni le mahlweni ka vanhu hinkwavu. Vaprista lavakulu ni vakulukumba va hina vamunyiketile lesvaku ayavanyiseliwa rifu, kutani vamuvambile. Loko ali hina, ahitshembile lesvaku hi yena lweyi angataponisa Israyele; hambi svilitano, namuntlha i siku ra vunharhu na timhaka leti tihumelelile. Kunene vavasati van'wana va ka hina vahihlamalisile ngopfu; vayile sirheni ni mpundzu svinene, kutani avawukumanga ntsumbu wa yena; vavuyile, vavula lesvaku vavonile mahlori ya tintsumi letingate: ‘Wahanya.’ Van'wana va ka hina vayile sirheni, vakumile svilitano, hilaha vavasati vavuleke hakona; kambe yena, avamuvonanga.” Kutani aku ka vona: “Yo! Vanhu lavangatwisisiki, va timbilu letihlwelaka kukholwa hinkwasvu lesvivuliweke hi vaprofeta! Xana asvingafaneli lesvaku Kriste atwisiwa kuvaviseka koloko, atlhela anghena kukwetsimeni ka yena ke?” Kutani avahlamusela hilaha timhaka ta yena tingavuliwa Matsalweni hinkwawu hakona, kusungula hi Moxe kufika ka vaprofeta hinkwavu. Loko vafika kusuhi ni xidoropana lexi vayaka ka xona, yena ayendla ingi ahundzela mahlweni. Kutani vamusindzisa vaku: “Tshama na hina, hikuva riyakupeleni, ni vusiku bzatshinela.” Kutani anghena, ayatshama na vona. Kuteloko vali kujeni, ateka xinkwa, akhensa, kutani akhema, avanyika. Hi loko matihlo ya vona mapfuleka, kutani vamutiva; kambe yena avasiya anyamalala. Kutani vabzelana, vaku: “Xana atingapfurhi timbilu ndzeni ka hina, loko ali karhi avulavula na hina ndleleni, na ahipfuletela Matsalwa?” Kutani hi nkarhi wolowo vasuka, vatlhelela Yerusalema vayakuma lava va khume na mun'we, na vahlengeletanile svin'we nivan'wana, na vali karhi varungulelana vaku: “Hakunene Hosi yipfukile kufeni, nasvona yitikombile ka Simoni.” Kutani na vona va Emawusi varungula lesvi svingavahumelela ndleleni, ni hilaha vamutiveke hakona, kukhemeni ka xinkwa. Vaku na vaha vulavula, Yesu ayima xikarhi ka vona, yena hi xiviri, kutani aku ka vona: “Kurhula akuve na n'wina!” Vakhomiwa hi kuchava lokukulu, vapimisa lesvaku va vona xipoko. Aku ka vona: “Xana michavisiwa ha yini, hikolaho ka yini mili ni kukanakana timbilwini ta n'wina ke? Vonani sviyandla sva mina ni minkondzo ya mina! Hi mina hi xiviri. Nikhomeni, nitseveteleni. Xipoko axi na nyama ni marhambu, kasi mina ni na svona, hilaha misvivonaka hakona.” [ Loko avulile svosvo, atlhela avakomba sviyandla sva yena ni minkondzo ya yena.] Kutani lesvi kutsakeni ni kuhlamaleni ka vona avahakanakana, aku ka vona: “Xana mi ni svakuja kola ke?” Vona vamunyika hamfu ya hlampfi ya kuwoxiwa; ayiyamukela, aja mahlweni ka vona. Kutani aku ka vona: “Hi tona timhaka leti ningamitivisa tona, loko nahali na n'wina, loko nite: ‘Hinkwasvu lesvitsaliweke mayelanu na mina Nawini wa Moxe ni ka Vaprofeta, ni ka Tipisalma, svifanela kuhetiseka.’” Hi loko avapfula miyehleketo lesvaku vatwisisa Matsalwa. Kutani aku ka vona: “Matsalwa mali: ‘Mesiya atatwisiwa kuvaviseka, atlhela apfuka kufeni hi siku ra vunharhu. Kutani, hi vito ra yena, timhaka ta kuhundzuka ni ta kurivaleliwa svijoho titapaluxiwa matikweni hinkwawu, kusungula hilaha Yerusalema.’ N'wina mitimboni ta timhaka leti. Loko ali mina, nitamirhumela lesvi Tatana wa mina amitshembiseke svona. Kambe n'wina tshamani kola doropeni, mikondza mifunengetiwa hi matimba ya le henhla.” Kutani avateka vaya handle ka doropa, ayafika na vona kusuhi na Betaniya, kutani atlakusa mavoko, avakatekisa. Loko ali karhi avakatekisa, ahambana na vona [atlakuliwa, aya tilweni]. Kutani vona [loko vamukhinsamelile], vatlhelela Yerusalema na vali ni kutsaka lokukulu. Kutani avali Tempeleni masiku hinkwawu, na vali karhi vadzunisa Xikwembu. Kusunguleni ka svilo hinkwasvu, Rito arili kona, Rito arili ni Xikwembu, kutani Rito arili Xikwembu. Yena Rito aali Xikwembu kusukela kusunguleni. Svilo hinkwasvu svitumbuluxiwile hi yena, kutani aku na xilo ni xin'we lexi xitumbuluxiweke loko kungali hi yena. Vutomi abzili ka yena, kutani vutomi lebzo abzili kuvonakala ka vanhu. Kuvonakala kutikombisa munyameni, kambe munyama awukotanga kuhlula akuvonakala. Kuhumelela munhu lweyi arhumiweke hi Xikwembu, vito ra yena aali Yohani. Yena atile kutava mboni, kutaveka vumboni henhla ka ta kuvonakala, lesvaku hinkwavu vatapfumela hikolaho ka yena. Yena aa ngali kuvonakala, kambe atile kutaveka vumboni mayelanu ni takuvonakala. Akuvonakala ka ntiyiso, loku kuvoningaka mani na mani, lweyi apsaliwaka laha misaveni. Aali misaveni, kutani misava yitumbuluxiwile hi yena, kambe misava ayimutivanga. Atile ka lesvi asviri sva yena, kambe va yena avamuyamukelanga. Kambe, hinkwavu lava vangamuyamukela, lava vangapfumela ka vito ra yena, avanyikile matimba ya kuyendliwa vana va Xikwembu, vanga lavapfumelaka ka vito ra yena, lava avapsaliwanga hi kurhandza ka ntumbuluku; kungali hi kunavela ka miri, kungali hi kurhandza ka wanuna, kambe hi kurhandza ka Xikwembu. Rito ritihundzule nyama riva ritshama xikarhi ka hina, kutani hiva hivona akukwetsima ka yena lokunga kukwetsima ka N'wana lweyi angapsaliwa hi Tatana ali yexe, angatala hi timpsalu ni ntiyiso. Yohani avekile vumboni henhla ka ta yena, kutani ahuwelela aku: Lweyi hi yena lweyi ningamibzela loko nite: “‘Lweyi ataka ndzhaku ka mina, wanitlula hi vukulu, hikuva avile kona mina ningasiva kona.’” Kutani hina hinkwerhu hiyamukelile hi ntalu atimpsalu, hi kuphindha. Hikuva Nawu wunyikiwile hi Moxe; kambe timpsalu ni ntiyiso svitile ha Yesu Kriste. Aku na munhu lweyi atshamaka avona Xikwembu ni siku ni rin'we. N'wana wa Xikwembu lweyi angapsaliwa ali yexe, lweyi anga xifuveni xa Tatana, hi yena lweyi angayendla lesvaku Xikwembu xitiviwa. Lebzi hi bzona vumboni bza Yohani, loko Vayuda va le Yerusalema varhumile vaprista ni Valevhi kuyamuvutisa, vaku: “Hi wena mani xana?” Angayalanga, ahlambanyile atiyisa svinene aku: “Mina, ahi mina Kriste.” Kutani vamuvutisa vaku: “U mani-ke? Hi wena Eliya xana?” Aku: “Ani yena”. Vaku: “Hi wena Muprofeta xana?” Ahlamula, aku: “Ahihim. ” Kutani vaku ka yena: “Hi wena mani xana? Hilava kutlhela ni nhlamulu ka lava vahirhumeke. Xana wena, utivula lesvaku u mani?” Aku: “Mina ni rito ra munhu lweyi ahuwelelaka mananga aku: ‘Lulamisani ndlela ya Hosi’, hilaha muprofeta Ezaya avuleke hakona.” Lava avarhumiwile avali van'we va Vafarisi; Kutani vatlhela vamuvutisa vaku: “Lesvi ungaliki Kriste, ungaliki Eliya, ungaliki yena Muprofeta, hikolaho ka yini ukhuvula xana?” Yohani avahlamula, aku: “Mina nikhuvula hi mati; xikarhi ka n'wina kuyimile mun'we lweyi n'wina mingamutiviki.” Lweyi hi yena lweyi ata ka hi le ndzhaku ka mina, lweyi hambi mina svinganifaneliki kutlhantlha tingoti ta masandhazi ya yena. Timhaka leti tihumelelile Betaniya ka tlhelo rin'wana ra Yordani, laha Yohani aakhuvula kona. Amundzuku wakona Yohani avona Yesu na ali karhi ata, amukongomile, kutani aku; hi lexi Xinyempfana xa Xikwembu lexisusaka svijoho sva misava! Hi yena lweyi nimibzeleke ta yena loko nite: Andzaku ka mina kuta wanuna lweyi anirhangeleke, hikuva aali kona mahlweni ka mina. Mina aningamuntivi nitile nili lweyi akhuvulaka hi mati, lesvaku yena atakombisiwa Israyeleni. Yohani avekile vumboni aku. Nivonile Moya wuxika hi le tilweni wufana ni xituvana, wutatshama henhla ka yena. Mina aningamutivi, kambe lweyi anirhumeke kukhuvula hi mati, anibzelile aku: Lweyi ungatavona Moya wuxikela ka yena, utshama henhla ka yena, hi yena lweyi akhuvulaka hi Moya Lowokwetsima. “Mina nisvivonile kutani niveka vumboni niku, lweyi hi yena N'wana wa Xikwembu.” Mundzuku wakona, Yohani atlhela ava ka ndhawu yoleyo, ali ni vajondzisiwa va yena vambirhi. Avona Yesu ali karhi ahundza kutani aku: “Vonani! Hi lexi Xinyempfana xa Xikwembu!” Vajondzisiwa va Yohani la vambirhi vatwa lesvi asvivuleke, kutani valandza Yesu. Loko Yesu ahundzukula ndzhaku avavona na vali karhi vamulandza, aku ka vona: “Milava yini xana?” Vaku ka yena: “Mujondzisi utshama kwihi?” Yena aku ka vona: “Tanani mitakuvona.” Hi loko vafamba vayavona laha atshamaka kona, kutani vatshama siku lero na yena, nkarhi awulava kuva wa mune nimajambu. Aali Andreya, makwavu wa Simoni Petrosi, aali mun'we wa lavambirhi lavatweke lesvi Yohani asvivuleke, kutani valandza Yesu. Andreya arhange akuma Simoni makwavu, kutani aku ka yena: “Hikumile Mesiya” ( hi lesvaku Kriste). Kutani amuyisa ka Yesu. Loko Yesu amulangunta aku: “Wena u Simoni n'wana Jonasi; wena utavitaniwa Kefasi” ( lesvivulaku Petrosi, ribze ). Mundzuku wakona, Yesu aalava kuya Galileya, kutani akuma Filipi, aku ka yena: “Nilandze!” Kutani Filipi aali wa le Betisayida, doropa ra Andreya na Petrosi. Filipi akuma Nataniyeli aku ka yena: “Hikumile lweyi Moxe atsaleke timhaka ta yena Naweni; na vona vaprofeta vatitsalile: I Yesu wa le Nazareta n'wana Yosefa.” Nataniyeli aku ka yena: “Xana hi le Nazareta kungata xilo xa xinene ke?” Filipi aku ka yena: “Tana utavona ha wexe.” Yesu avona Nataniyeli ata ka yena, kutani avulavula ha yena aku: Vonani Muisrayele wa ntiyiso, lweyi kungaliki na kukanganyisa ka yena. Nataniyeli aku ka yena: “Unitivele kwihi?” Yesu amuhlamula aku: “Loko Filipi angasikuvitana mina nikuvonile na uli hansi ka nkuwa.” Nataniyeli amuhlamula aku; “Mujondzisi, wena u N'wana wa Xikwembu, wena u Hosi ya Israyele.” Yesu ahlamula aku ka yena: Xana upfumela hi lesvi ningate nikuvonile na uli hansi ka nkuwa ke? Utavona svilo lesvikulu kutlula lesvi. Yesu atlhela aku ka yena: “Nitiyisile nili ka wena: Mitavona tilo ripfulekile ni tintsumi ta Xikwembu na tili karhi titlhantukela ni kuxikela henhla ka N'wana-wa-Munhu.” Hi siku ra vunharhu, kuva ni nkhuvu wa vukati muntini wa Kana Galileya; kutani mamana wa Yesu aali kona. Yesu ni vajondzisiwa va yena, avarhambiwile na vona nkhubzeni wa vukati. Kuteloko vhinyu rihelile, mamana wa Yesu aku ka yena: “Aku na vhinyu.” Yesu aku ka yena: “Wansati, mhaka ya mina na wena hi yihi xana? Nkarhi wa mina awusifika.” Mamana wa yena aku ka vatirhi, “Yendlani hinkwasvu lesvi angatamibzela svona.” Tani hi lesvi Vayuda vatolovelaka kuhlamba vatibasisa vangasija, makhuwani ya ribze ya ntlhanu na rin'we amatikarhetiwile kolaho, rin'wana ni rin'wana alitatiwa hi makhuwana, mambirhi kumbe manharhu. Yesu aku ka vona: “Tatani makhuwana lawa hi mati.” Kutani vamatata makhapa. Aku ka vona: “Svosvi khanani, muyisa ka murhangeli wa nkhuvu.” Kutani vayisa. Kuteloko murhangeli wa nkhuvu aringile mati lawa mahundzukeke vhinyu; ( kambe angativi laha rihumaka kona, asvitiviwa ntsena hi vatirhi lava avakile mati). Kutani murhangeli wa nkhuvu avitana muteki aku ka yena: “Vanhu hinkwavu vatolovela kuhumesa vhinyu leri ronandziha kusunguleni kutani loko kunwiwile svinene, vahumesa leroka ringanandzihi ngopfu; kambe wena uvekile vhinyu leronandziha kufika ni svosvi!” Yesu asungulisa xisvosvo amahlori ya yena Kana wa Galileya, akombisa kukwetsima ka yena; kutani vajondzisiwa va yena vapfumela ka yena. Ndzhaku ka svona angirimela Kapernawume, yena ni mamana wa yena, ni vamakwavu ni vajondzisiwa va yena, vatshama kona masiku matsongo. Nkhuvu wa Paska ya Vayuda awuli kusuhi, kutani Yesu atlhantukela Yerusalema. Le Tempeleni, akuma lava vaxavisaka tihomu ni tinyempfu, ni svituvana ni lavancincisaka timale na vatshamile. Kuteloko ayendlile xisepu xa tingoti, avahlongola hinkwavu vahuma Tempeleni, na tona tihomu ni tinyempfu, ahangalasa ni male ya vancincisi awisetela ni mimeza ya vona. Abzela lava avaxavisa svituvana aku: “Susani svilo lesvi laha, mingateki yindlo ya Tatana wa mina miyiyendla ya kuxavisela ka yona.” Kutani vajondzisiwa va yena vatsundzuka lesvitsaliweke: “Kuhisekela yindlo ya wena kutanija.” Kutani Vayuda vamuhlamula vaku ka yena; ungahikomba xikombiso xihi xa lesvaku u ni matimba yoyendla lesvi xana? Yesu avahlamula aku: “Hahlulani Tempele leyi, kutani mina nitayipfuxa hi masiku manharhu.” Hi loko Vayuda vamuhlamula vaku: “Tempele leyi yitekile malembe ya mune wa makume ni ntlhanu ni rin'we kuyiyaka, kutani wena uli utayipfuxa hi masiku manharhu xana?” Kambe yena aavula tempele ya miri wa yena. Hikolaho loko apfukile kufeni, vajondzisiwa va yena vatsundzuka lesvaku mhaka leyi atshama ayivula; kutani vapfumela Matsalwa ni ka rito leri Yesu arivuleke. Loko ali Yerusalema nkhubzeni wa Paska, vanhu lavotala vapfumela ka yena, hi kuvona mahlori lawa amayendlaka. Kambe Yesu angavatshembanga, hikuva aavativa hinkwavu. Hikuva aangavileli lesvaku munhu aveka vumboni bza mun'wana, hikuva yena aasvitiva lesvi svingakona ka munhu. Akuli ni wanuna xikarhi ka vafarisi lweyi avaku i Nikodema, aali mun'we wa tindhuna ta vayuda. Siku rin'wana aya ka Yesu nivusiku, aku ka yena: “Mujondzisi, hasvitiva khwatsi lesvaku uyena mujondzisi lweyi ata ka hi ka Xikwembu; hikuva aku na munhu lweyi angayendlaka svikombiso lesvi usviyendlaka, loko Xikwembu xingali na yena.” Yesu amuhlamula aku: “Nitiyisile nili ka wena, aku na munhu lweyi angatavona Mfumu wa Xikwembu, loko angatlhelanga apsaliwa ra vumbirhi.” Nikodema aku ka yena: Loko munhu agugile, svingayendlisa kuyini kutlhela apsaliwa xana? Xana angasvikota kuvuyela khwirini ra mamana wa yena, atlhela apsaliwa ra vumbirhi ke? Yesu amuhlamula aku: Kunene, nili ka wena: Loko munhu angapsaliwi hi mati ni Moya angakala angangheni kufumeni ka Xikwembu. Lweyi angapsaliwa hi nyama i wa nyama, lweyi angapsaliwa hi Moya i Moya. Nyama yipsala sva nyama; kambe Moya wupsala sva moya. Ungahlamali loko nite ka wena, svafanela lesvaku utlhela upsaliwa ka vumbirhi. Moya wahungela lomu wurhandzaka kona, kutani utwa mpfumawulu wa wona, kambe awutivi lomu utaka hi kona ni lomu uyaka kona. Svitano ni ka hinkwavu lavapsaliwaka hi Moya. Nikodema amuhlamula aku: Svingayendzisa kuyini svosvo. Yesu amuhlamula aku: Wena uyena mujondzisi wa Israyele, kambe awusvitivi lesvi xana? Nitiyisile nili ka wena, hina hivulavula lesvi hisvitivaka nasvona hiveka vumboni bza lesvi hisvivoneke; kambe amipfumeli vumboni bza hina. Lesvi mingapfumeliki loko nimibzela hi sva laha misaveni, xana mitapfumelisa kuyini loko nimibzela hi sva le matilweni xana? Aku na munhu lweyi atshamaka atlhantukela matilweni, loko angali lweyi axikeke hi le matilweni, yena N'wana-wa-Munhu. Kufana ni lesvi Moxe atshamaka ahayeka nyoka mananga, N'wana-wa-Munhu na yena afanela kuhayekiwa hi mukhuva wolowo. Lesvaku mani na mani lweyi apfumelaka ka yena, angatshuki alova, kambe ava ni vutomi lebzingaheliki. Hikuva Xikwembu xirhandzile misava, lakakuva, xinyikile N'wana wa xona wa mun'we, lesvaku hinkwavu lava vapfumelaka ka yena vangalovi, kambe vava ni vutomi lebzingaheliki. Xikwembu axirhumelanga N'wana wa xona misaveni kutayavanyisa misava, kambe akuli kuyendlela lesvaku misava yitaponisiwa ha yena. Lweyi apfumelaka ka N'wana angayavanyisiwi, kambe lweyi angapfumeliki ayavanyisiwile ni svosvi, hikuva angapfumelanga ka N'wana-wa-Xikwembu lweyi anga mun'we ka xona. Kuyavanyisiwa hi loku: Akuvonakala kutile misaveni, kambe vanhu varhandzile ngopfu munyama kutlula kuvonakala, hikuva mitirho ya vona ayibihile. Hikuva, mani na mani lweyi ayendlaka lesvobiha avenga kuvonakala, hi kolaho angati kuvonakaleni lesvaku mitirho ya yena yingati kuvonakaleni. Kambe lweyi ahanyaka ntiyisweni, wata kuvonakaleni, lesvaku mintirho ya yena mitavoneka yili leyiyendleliweke Xikwembu. Ndzaku ka svosvo, Yesu aya ni vajondzisiwa va yena tikweni ra Yudeya; kutani atshama kona na ali karhi akhuvula. Yohani na yena aakhuvula le Enoni, kusuhi na Salime, hikuva akuli ni mati lawa yotala kona; ni vanhu avayakona lesvaku vakukhuvuliwa. Hikuva Yohani aangasipfaleliwa jele. Kutani kuhumelela kukanetana xikarhi ka vajondzisiwa va Yohani ni Muyuda mun'we mayelanu ni mhaka ya kutibasisa. Hi loko vaya ka Yohani, vaku ka yena: “Mujondzisi, munhu lweyi awuli na yena ntlhatuku wa Yordani, lweyi ungavula vumboni henhla ka yena, wakhuvula na yena, kutani hinkwavu vakhirimana vaya ka yena.” Yohani, ahlamula aku: Amunhu angakala angakumi xanchumu loko anganyikiwanga xona hi le Tilweni. N'wina hi n'wexe mitimboni ta mina lesvaku nite; 'Ahi mina Mesiya, kambe nirhumiwile kumilulamisela ndlela. Lweyi anga ni mutekiwa i muteki; kambe munghanu wa muteki, hi lweyi ayimaka amuyingisa, atsaka hi kutsaka lokukulu, loko atwa rito ra muteki. Xilesvo, kutsaka ka mina loku hi loku kuhetisekeke. Yena afanela kuya akula mina niya nitsongahala. Lweyi ata ka hi le henhla alehenhla ka hinkwavu; lweyi ahumaka misaveni i wa misava, kutani avulavula hi sva misava; lweyi ahumaka tilweni, alehenhla ka hinkwavu. Kutani aveka vumboni bza lesvi asvivoneke ni kusvitwa; kambe aku na munhu lweyi apfumelaka vumboni bza yene. Lweyi apfumelaka vumboni bza yena, atiyisile lesvaku Xikwembu i ntiyiso. Lweyi arhumiwaka hi Xikwembu, avula marito ya Xikwembu, hikuva Xikwembu axipimi loko xinyika Moya wa xona. Tatana arhandza N'wana, hi kolaho asvilo hinkwasvu svinyikiwile mavokweni ya yena. Lweyi apfumelaka ka N'wana a ni vutomi lebzingaheliki; kambe lweyi angapfumeliki ka N'wana angakala angabzivoni vutomi; kambe avukarhi bza Xikwembu bzitshama ka yena. Kuteloko Hosi yitivile lesvaku vafarisi vatwile vanhu vaku: “Yesu atlula Yohani hi kukuma vajondzisiwa ni kukhuvula,” (hambilesvi aa ngali yena Yesu hi ntiyiso lweyi aakhuvula, kambe akukhuvula vajondzisiwa va yena). Loko Yesu atwile svosvo, asuka Yudeya, atlhelela Galileya. Kambe aafanela kutsemakanya hi le tikweni ra Samariya. Kutani afika doropeni ra le Samariya, lomu avaku i Sikari, kusuhi ni nsimu leyi Yakobe aanyikile Yosefa, n'wana wa yena. Xihlovo xa Yakobe axili kona kolaho. Lesvi Yesu aakarhalile hi kufamba, ayahumula ka xihlovo. Asvilava kuva nkarhi wa vuntlhanu na wun'we. Kutani kutafika wansati wa Musamariya ata kukheni ka mati. Yesu aku ka yena: Ninyike mati ninwa. Hikuva vajondzisiwa va yena avayile doropeni kuyaxava svakuja. Wansati wa Musamariya aku ka yena: “Lesvi wena unga Muyuda, ukombelisa kuyini mati ka mina ninga wansati wa Musamariya xana?” ( Mhaka hi lesvaku Vayuda ni Vasamariya avanganwelani mati.) Yesu amuhlamula aku: “Loko onge utivile kunyika ka Xikwembu, ni lweyi ange ka wena; ninyike mati ninwa, awutava ukombela ka yena, kutani aatava akunyikile mati lawa mahanyaka.” Wansati aku ka yena: “Hosi, awu na xikelelo, ni xihlovo xiyentile mati lamahanyaka, ungamakuma kwihi xana? Xana wena ulwenkulu ka Yakobe Tatana wa hina, lweyi ahinyikeke xihlovo lexi, lexi na yena anganwela ka xona, yena ni vana va yena ni svifuwo sva yena ke.” Yesu amuhlamula aku: Mani na mani lweyi anwaka mati lawa, atatlhela atwa torha. Kambe, mani na mani lweyi anwaka mati lawa ni munyikaka, angatatlhela atwa torha, hikuva mati lawa ningatamunyika wona, matayendla xihlovo xa mati lawa mapfelaka hi vutomi lebzingaheliki. Wansati aku ka yena: “Hosi, ninyike mati wolawo, nitakala ningahatwi torha, ningahatlheli nita kola kukheni ka wona.” Yesu aku ka yena: Famba, uyavita nuna wa wena, mita halenu. Wansati amuhlamula aku: Ani na nuna. Yesu aku ka yena: Uhlamule khwatsi: Loko uku a ni na nuna; hikuva uvile ni ntlhanu wa vavanuna, lweyi unga na yena svosvi, ahi nuna wa wena; kolaho utiyisile. Wansati aku ka yena: Hosi, nivona, lesvaku umuprofeta. Vatatana va hina vagandzelile ntshaveni leyi, kambe n'wina mili: “Ndhawu leyi vanhu vafanelaka kugandzela ka yona, hi le Yerusalema.” Yesu aku ka yena: “Wansati, pfumela ka mina. Nkarhi wata lowu mingatakala mingagandzeli Tatana ntshaveni leyi, hambi kuli Yerusalema.” N'wina migandzela lexi mingaxitiviki; hina higandzela lexi hixitivaka; hikuva kuponisiwa kuhuma ka Vayuda. Kambe nkarhi wata, ni svosvi se wutile, lowu vagandzeli va ntiyiso vangatagandzela Tatana hi moya ni ntiyiso, hikuva Tatana alava vagandzeli lavotano. Xikwembu i Moya, kutani lava vaxigandzelaka, vafanela kuxigandzela hi moya ni ntiyiso. Wansati aku ka yena: “Nasvitiva lesvaku Mesiya ( lweyi avuliwaka Kriste), wata; siku ataka, atahitivisa svilo hinkwasvu.” Yesu aku ka yena: “Hi mina, mina nivulavulaka na wena.” Hikamanyana wolowo vajondzisiwa va yena vavuya, kutani vahlamala hi lesvi aavulavula ni wansati; hambi svilitano, akuvanga ni mun'we; lweyi angate: “Uvutisa yini? Kumbe: Ha yini uvulavula na yena xana?” Kutani wansati asiya khuwana ra yena, aya doropeni ayabzela vanhu van'wana aku: “Tanani mitavona wanuna lweyi anganibzela hinkwasvu lesvi nitshamaka nisviyendla; xana ahi yena Kriste ke?” Kutani vahuma doropeni vaya ka Yesu. Nkarhi wolowo vajondzisiwa va yena vamukhongotela, vaku: “Mujondzisi, jana!” Kambe yena aku ka vona: “Svakuja ni na svona, lesvi n'wina mingasvitiviki.” Vajondzisiwa vavutisana vaku: “Xana kungava ni munhu mun'wana lweyi amutiseleke svakuja ke?” Yesu aku ka vona: “Svakuja sva mina i kuyendla kurhandza ka lweyi anirhumeke, ni kuheta ntirho wa yena.” Xana amivuli lesvaku: “Kahasale tihweti ta mune, kutani kutata ntshovelo ke? Vonani, mina nili, tlakusani mahlo milanguta masimu mawupfile kutshoveliwa.” Lweyi atshovelaka akuma hakelo, kutani ahlengeleta timbewu atihlengeletela kukuma vutomi lebzingaheliki; lesvaku lweyi abzalaka ni lweyi atshovelaka vakota kutsaka svin'we. Hikuva i ntiyiso axihlayahlaya lexi xinge: “Mun'we hi lweyi abzalaka, mun'wana hi lweyi atshovelaka. Mina nimirhumile kutshovela lomu n'wina mingatirhangiki kona; van'wana vatirhile, kasi n'wina misvikuma hi kutshovela, sva nyuku wa vona.” Vasamariya lavotala va doropa leriya, vapfumela ka Yesu hikolaho ka lesvivuliweke hi wansati, loko avekile vumboni aku: “Anibzelile hinkwasvu lesvi nisviyendleke.” Hikolaho, loko vasamariya vafikile ka Yesu, vamurhamba lesvaku ayatshama na vona; kutani aheta masiku mambirhi na vona. Kutani lavotala ngopfu vapfumela hikolaho ka marito ya yena; hi loko vabzela lweyi wansati vaku: “Ahahapfumeli hikolaho ka rito ra wena; hikuva na hina hi mutwile, kutani hasvitiva lesvaku lweyi hi yena Kriste hakunene, muponisi wa misava.” Ndzaku ka masiku lawa mambirhi, Yesu asuka lahaya, aya Galileya. Hikuva yena Yesu hi yexe aatiyisile loko ate: Muprofeta angakhensiwi tikweni ra yena. Kuteloko afika le Galileya, Vagalileya vamuyamukela, hikuva na vona avayile nkhubzini le Yerusamela, kutani avavonile hinkwasvu lesvi asviyendleke nkhubzeni wolowo. Hikambi ra vumbirhi Yesu atlhelelela Kana wa Galileya, laha angahundzula mati mayendla vhinyu kona. Akuli ni ndhuna ya Hosi le Kapernawume, leyi ayivabzeliwa hi n'wana wa yona wa jaha. Kuteloko ndhuna ya hosi yitwile lesvaku Yesu afikile Galileya na ata hi le Yudeya, ndhuna yita ka yena, yitamukombela lesvaku angirimela ayahanyisa n'wana wa yona, lweyi aalikusuhi ni kufa. Kutani Yesu aku ka yona: “Loko mingavoni svikombiso ni mahlori amupfumeli.” Ndhuna ya hosi yiku ka Yesu: “Hosi, wangangirimela, xijahana xa mina xingasifa.” Yesu aku ka yena: “Famba, n'wana wa wena wahanya.” Andhuna yipfumela lesvi Yesu ayibzeleke svona, kutani yifamba. Loko ahangirimela kuya kaya, vatirhi va yena vahuma vamutlhangaveta, vamutivisa, vaku: “jaha ra wena rihanyile.” avavutisa nkarhi lowu n'wana angasungula kuyampsa ha wona, kutani vaku ka yena: “Tolo hi nkarhi wa ntlhanu na mambirhi, afebra ka miri wa yena ariyimile.” Atwisisa atatana wa jaha, lesvaku nkarhi lowuya, hi wolowu wa wun'we ni lowu Yesu angate: An'wana wa wena wahanya; Apfumela ka yena, ni njangu wa yena hinkwawu. Yesu ayendlile hlori leri ra vumbirhi loko asuka Yudeya na aya Galileya. Ndzhaku ka svosvo, nkhuvu wa Vayuda wuvakona, kutani Yesu atlhantukela Yerusalema. Le Yerusalema, hi tlhelo ra nyangwa ya tinyempfu, ku ni vuhlambelo leri hi Xiheberu vange i Betesda, rirhendzeliweke hi tinxaxa ta ntlhanu wa timhandze letikulu. Vanhu lavotala ngopfu lavavabzaka, kufana ni lavafeke mahlo, ni svilima, ni lava vawomeke svirho, avatolovela kutshama kona [vayimela kupfindluxiwa ka mati, hikuva, hi nkarhi wun'wana ni wun'wana antsumi ya Hosi ayixikela vuhlambelweni, yitapfindluxa mati; kutani lweyi arhangaka kunghena loko mati mahaku pfindluxiwa, aahanyisiwa, hambi ali ni mavabzi wahi ni wahi.] Kona kolaho, akuli ni munhu lweyi aali ni malembe ya makume manharhu ni ntlhanu ni manharhu, na ali karhi avabza. Loko Yesu amuvona na ayetlele kolaho, ni loko ativile lesvaku avabzile nkarhi lowoleha, aku ka yena: “Xana wasvilava kuhanyisiwa ke?” Muvabzi amuhlamula, aku: “Hosi, a ni na munhu lweyi anga ni petaka vuhlambelweni, loko mati mahaku pfindluxiwa; kutani loko niku niya kona, mun'wana anirhangela, anghena.” Yesu aku ka yena: “Pfuka, uteka sangu ra wena, ufamba.” Hi nomo-lo, munhu lweyi ahanyisiwa, kutani ateka sangu ra yena, afamba. Siku rakona aali Savata. Hikolaho Vayuda vaku ka lweyi ahanyisiweke: “Namunhla i siku ra Savata, kutani utlula Nawu loko urhwala sangu ra wena.” Avahlamula, aku: Lweyi anga ni hanyisa, hi yena lweyi angate ka mina: “‘Teka sangu ra wena, ufamba!’” Vamuvutisa, vaku: “I mani munhu wakona lweyi angete ka wena, riteke ufamba, xana?” Lweyi ahanyisiweke angativanga lesvaku i mani, hikuva Yesu aasukile hikolaho ka xitshungu lexi axiri kona. Ndzhaku ka svosvo Yesu ayamukuma Tempeleni, kutani aku ka yena: “Vona, uhanyisiwile. Loko ungalavi kuweliwa hi khombo lerikulu leritlulaka lerorhanga, tshika kujoha.” Kutani munhu yelweyo ayabzela Vayuda lesvaku lweyi amuhanyiseke i Yesu. Hikolaho ka svona, Vayuda vasungula kuxanisa Yesu, hikuva aayendlile svilo lesvi hi siku ra Savata. Kambe Yesu avabzela aku: “Kufika svosvi, Tatana wa mina angasitshika kutirha, kutani na mina, tani hi yena, natirha.” Hikolaho ka svosvo, Vayuda vahundzisa hi kunavela kumudlaya, hikuva aangatlulanga Nawu wa Savata ntsena, kambe aavulile lesvaku Xikwembu i Tatana wa yena wa ntiyiso, kutani atiyendla lweyi aringanaka ni Xikwembu. Hi loko Yesu aku ka vona: “Nitiyisile nili ka n'wina. N'wana angakala angatisunguleli ayendla xilo hi yexe; ayendla ntsena lexi axivoneke xiyendliwa hi Tatana wa yena; hinkwasvu lesvi Tatana asviyendlaka, na yena N'wana wasviyendla. Hikuva Tatana arhandza N'wana; wamukomba hinkwasvu lesvi asviyendlaka, kutani atamukomba ni mintirho leyikulu leyitlulaka nileyi, kuyendlela lesvaku n'wina mitahlamala. Kukotisa lesvi Tatana apfuxaka vafi, atlhela avanyika vutomi, svitano na yena N'wana, anyika vutomi ka lava arhandzaka kuvanyika bzona. Nasvona Tatana angayavanyisi munhu ni mun'we, kambe anyikile N'wana ntirho hinkwawu woyavanyisa, lesvaku hinkwavu vava ni xichavu ka N'wana, kukotisa lesvi vanga ni xichavu ka Tatana. Mani na mani lweyi angaliki na xichavu ka N'wana anga na xichavu ni ka Tatana lweyi amurhumeke. “Nitiyisile nili ka n'wina lweyi ayingisaka rito ra mina, ava apfumela ka Lweyi anirhumeke, a ni vutomi lebzingaheliki; kutani angakala angayavanyisiwi, kambe ahumile kufeni ayanghena vuton'wini. Nitiyisile nili ka n'wina: Nkarhi wata, ni svosvi wutile, lowu vafi vangatatwa rito ra N'wana wa Xikwembu, kutani lava varitwaka vatahanya. Tani hi lesvi Tatana hi yexe anga xihlovo xa vutomi, hi mukhuva wolowo anyikile N'wana kuva xihlovo xa vutomi na yena. Nasvona, amunyikile matimba ya kuyavanyisa, hikuva i N'wana-wa-Munhu. Mingahlamaleni hi mhaka leyi, hikuva nkarhi wata lowu hinkwavu lavanga masirheni vangatatwa rito ra yena, kutani vatahuma. Lava vayendleke lesvinene vatapfuka vaya vuton'wini lebzingaheliki, lavayendleke lesvobiha vatapfuka vaya kuyavanyisiweni. ” “Ningakala ningatisunguleli niyendla xilo hinoxe; niyavanyisa hilaha nibzeliwaka hakona; hi kolaho, kuyavanyisa ka mina kululamile, hikuva anilavi kuyendla kurhandza ka mina, kambe kurhandza ka lweyi anirhumeke.” “Loko nitivekela vumboni, vumboni bza mina abzi na ntiyiso.” Akona mun'wana lweyi avekaka vumboni henhla ka mina, kutani nitiva lesvaku vumboni lebzi abzivekaka henhla ka mina bzi ni ntiyiso. Mirhumelile vanhu ka Yohani, kutani avekile vumboni henhla ka ntiyiso. Anitiseketeli hi vumboni bzohuma ka munhu, kambe nivula timhaka leti lesvaku mitaponisiwa. Yohani aali ngoti ya rivoni leyipfurhaka ni kuvangama; kutani n'wina misvikhensile, mitsakela hi nkarhinyana kuvonakala ka yena. Kambe vumboni lebzi ninga na bzona bzitlula bza Yohani, hikuva mintirho leyi Tatana aninyikeke lesvaku niyihetisisa, yinga yona mintirho leyi niyiyendlaka, hi yona leyivekaka vumboni henhla ka mina, bza lesvaku nirhumiwile hi Tatana. Nasvona, Tatana lweyi anirhumeke, na yena hi ntiyiso ya yena avekile vumboni henhla ka mina. Amisitwa rito ra yena ni siku ni rin'we, ni nghohe ya yena amisiyivona. Rito ra yena ali yakanga ka n'wina hikuva amipfumeli ka lweyi Tatana amurhumeke. Mikambisisa Matsalwa, hikuva miyanakanya lesvaku, ka wona, mitakuma vutomi lebzingaheliki; kasi hi wona lawa mavekaka vumboni henhla ka mina. Kutani amisvilavi kuta ka mina lesvaku mitakuma vutomi. “Anitiseketeli hi kudzunisiwa loku kuhumaka ka vanhu; kambe namitiva n'wina, ami na rirhandzu ka Xikwembu. Mina nitile hi vito ra Tatana wa mina, kambe aminiyamukeli; kasi loko mun'wana angata hi vito ra yena, n'wina mitamuyamukela. Mingapfumelisa kuyini ke, kasi mitsakela kudzunisana, mun'wana ka mun'wana mingalavi kudzunisiwa loku kuhumaka ntsena ka Xikwembu? Mingapimisi lesvaku mina nitamimangalela mahlweni ka Tatana; lweyi amimangalelaka i Moxe, yena lweyi mingaveka kutshemba ka n'wina ka yena. Loko amipfumelile ka Moxe, na mina amitanipfumela; hikuva yena atsalile mayelanu ha mina. Loko mingapfumeli matsalwa ya yena, mingapfumelisa kuyini marito ya mina xana?” Ndzhaku ka svosvo Yesu asuka apela tiveni ra Galileya, ritiviwaka hiku i tiva ra Tiberiya. Akuli ni xitshungu lexikulu lexi axifamba na yena, hikuva axivonile mahlori lawa amayendleke hi kuhanyisa timbabzi. Kutani Yesu atlhantukela ntshaveni, ayatshama hansi ni vajondzisiwa va yena. Kutani nkhuvu wa Paska ya Vayuda awuli kusuhi. Kuteloko Yesu atlakusa mahlo, ni loko avonile lesvaku ku ni xitshungu xinyingi lexiteke ka yena, aku ka Filipi: “Xana hingaxava kwihi svinkwa kuva vanhu lava vakota kuja ke?” Aavula svosvo na ali kumuringa, hikuva yena n'winyi aativa lesvi angatasviyendla. Filipi amuhlamula, aku: “Svinkwa sva tidenari ta madzana mambirhi, svingakala svingaringani hambi loko mun'wana ni mun'wana angakuma xikhemu lexitsongo ntsena.” Mun'we wa vajondzisiwa va yena, Andreya makwavu wa Simoni Petrosi, aku ka yena: “Ku ni mufana kola, lweyi anga ni svinkwa sva ntlhanu sva maxalana ni svihlampfana svimbirhi; kambe svingaringana mani ka vanhu votalisa xilesvi xana?” Yesu aku: “Bzelani vanhu vatshamisa hansi.” Abzanyi abzitele ngopfu ndhawini yoleyo. Kutani vanhu vatshama hansi; loko vahlayiwa, avanuna avalava kuringana ntlhanu wa makhulu (5 000). Kutani Yesu ateka svinkwa; kuteloko akhensile, aphakela vanhu lava avatshamile; ateka ni svihlampfana, ayendzisa svosvo, hinkwavu vaja vaxurha. Loko vaxurhile, aku ka vajondzisiwa va yena: “Hlengeletani mahlanhla lawa masaleke, lesvaku kungacukumetiwi nchumu.” Vamahlengeleta, kutani mahlanhla ya svinkwa sva ntlhanu sva maxalana, lawa masiyiweke hi lava vajeke, matata svirhundzu sva svimbirhi. Vanhu lavavoneke hlori leri riyendliweke hi Yesu, avaku: “Hakunene, lweyi hi yena Muprofeta lweyi aafanela kuta misaveni.” Kambe Yesu, hi kutiva lesvaku valava kuta vatamusindzisa lesvaku vamuyedla Hosi, atlhelela ntshaveni ali yexe. Nimajambu, vajondzisiwa va yena vangirimela vaya tiveni. Kutani vanghena botini, vatsemakanya tiva vaya Kapernawume; mpima-vayendzi, wuvafikela, Yesu angasivuya. Nasvona tiva arisungula kukarhata, hikuva akuhunga moya lowukulu. Loko vatlutile mpfuka woringana makume mambirhi ni ntlhanu, kumbe makume manharhu, vavona Yesu ali karhi afamba henhla ka mati, ali karhi ata kusuhi ni boti; kutani vachava. Kambe aku ka vona: “Hi mina, mingachaveni.” Avalava kumunghenisa botini kambe hi nomo-lo boti rifika ribuweni laha avaya kona. Loko bzixile, xitshungu lexikulu axisele ntsungeni wa tiva, xivona lesvaku akusele boti rin'we ntsena kolaho, ni lesvaku Yesu aanganghenanga botini leri vajondzisiwa va yena vangheneke ka rona, kambe vajondzisiwa avafambile vali voxe. Hambi svilitano, maboti man'wana lawa mahumaka Tiberiya matile matafika kusuhi ni laha vangajela kona svinkwa, loko Hosi yisvikatekisile. Kuteloko xitshungu xivonile lesvaku Yesu ni vajondzisiwa va yena avangahali kona kolaho, vanghena mabotini wolawo, vapelela Kapernawume, vali karhi valava Yesu. Kuteloko vamukumile ntsungeni wa tiva, vaku ka yena: “Mujondzisi, utile hi nkarhi muni laha ke?” Yesu avahlamula aku: “Nitiyisile hakunene nili ka n'wina: Manilava kungali hi lesvi mingavona svikombiso kambe hi lesvi mingaja svinkwa mixurha. Mingatirheli svakuja lesvibolaka, kambe tirhelani svakuja lesvingaboliki, svinga lesvinyikaka vutomi lebzingaheliki. Svakuja lesvi, mitanyikiwa hi N'wana-wa-Munhu, hikuva hi yena lweyi Xikwembu Tatana ximufungeke hi mfungu wa xona.” Vaku ka yena: “Xana hifanela kuyendla yini kutirha mintirho ya Xikwembu ke?” Yesu avahlamula aku: “Ntirho wa Xikwembu hi lowu: Hi lesvaku mipfumela ka lweyi ximurhumeke.” Kutani vaku ka yena: Loko svilitano, xana uyendla xikombiso xihi hixivona, lesvaku hitapfumela ka wena ke? Uyendla xikombiso xihi wena xana? Vatatana va hina vajile mana mananga, hilaha kutsaliweke vaku: “‘Uvanyikile vusva lebzihumaka tilweni, vaja.’” Yesu aku ka vona: “Nitiyisile, nili ka n'wina: Ahi Moxe lweyi aminyikeke vusva lebzihumaka tilweni, kambe Tatana wa mina hi yena lweyi aminyikeke vusva bza ntiyiso lebzi bzihumaka tilweni. Hikuva vusva bza Xikwembu hi lebzi bzixikaka hi le tilweni, lebzinyikaka misava vutomi.” Vaku ka yena: “Hosi hinyike vusva bzolebzo hi masiku hinkwawu.” Yesu aku ka vona: “Hi mina vusva bza vutomi; lweyi ataka ka mina, angakala angatwi ndlala, ni lweyi apfumelaka ka mina angakala angatwi torha ni siku ni rin'we. Kambe nimibzelile lesvaku, hambilesvi minivoneke, amipfumeli. Hinkwasvu lesvi Tatana aninyikaka svona, svitata ka mina; ni lweyi ataka ka mina, ningakala ningamucukumeti handle. Hikuva nixikile hi le tilweni, kungali kutayendla kurhandza ka mina, kambe kuyendla kurhandza ka lweyi anirhumeke. Kutani kurhandza ka lweyi anirhumeke, hi lesvaku ningalahlekeliwi hi lava aninyikeke vona, kambe nivapfuxa hi siku ra makumu. Tatana wa mina alava lesvaku mani na mani lweyi alangutaka N'wana, ava apfumela ka yena, ava ni vutomi lebzingaheliki, kutani mina nitamupfuxa hi siku ra makumu.” Vayuda vangurangura hikolaho ka yena, hi lesvi angate: “Hi mina vusva lebzixikeke hi le tilweni.” Kutani vaku: Xana lweyi ahi yena Yesu n'wana Yosefa, lweyi hitivaka tatana wa yena ni mamana wa yena ke? Hikolaho ka yini aku: “‘Nixikile hi le tilweni?’” Yesu avahlamula, aku: “Kungavi na kungurangura xikarhi ka n'wina.” Aku na munhu lweyi angataka ka mina, loko angatisiwanga ka mina hi Tatana lweyi anirhumeke, kutani mina nitamupfuxa hi siku ra makumu. Kutsaliwile tibukwini ta vaprofeta, vaku: “‘Hinkwavu vatajondzisiwa hi Xikwembu.’” Mani na mani lweyi atweke Tatana ni kujondza ka yena, wata ka mina. Asvivuli lesvaku ku ni munhu lweyi atshamaka avona Tatana, ahihim. Lweyi ahumaka ka Xikwembu, hi yena ntsena lweyi avoneke Tatana. “Nitiyisile hakunene nili ka n'wina: Lweyi apfumelaka, a ni vutomi lebzingaheliki. Mina hi mina vusva bza vutomi. Vatatana va n'wina vajile mana mananga, kambe vafile. Hi bzolebzi vusva lebzixikeke hi le tilweni lesvaku loko munhu aja bzona angakala angafi. Hi mina vusva lebzi bzihanyaka lebzixikeke hi le tilweni; loko munhu aja vusva bzakona, atahanya hilaha kungaheliki, kutani vusva lebzi ningatabzinyika vanhu, i nyama ya mina; leyi ningatayinyika misava, lesvaku yihanya.” Vayuda vaphikizana hi xivona, vaku: “Xana munhu lweyi angahinyikisa kuyini nyama ya yena lesvaku hiyija ke?” Yesu aku ka vona: “Nitiyisile hakunene, nili ka n'wina: Loko mingaji nyama ya N'wana-wa-Munhu, ni loko minganwi ngati ya yena, amingatava ni vutomi ka n'wina ha n'wexe. Lweyi ajaka nyama ya mina ni kunwa ngati ya mina a ni vutomi lebzingaheliki, kutani mina nitamupfuxa hi siku ra makumu. Hikuva nyama ya mina i svakuja hi ntiyiso yakona, ni ngati ya mina i svakunwa sva ntiyiso. Lweyi ajaka nyama ya mina, ni kunwa ngati ya mina, atshama ka mina, na mina nitshama ka yena. Tani hi lesvi Tatana lweyi ahanyaka anirhumeke, ni lesvi mina nihanyaka hikolaho ka Tatana, hi mukhuva wolowo na yena lweyi anijaka atahanya hikolaho ka mina. Lebzi hi bzona vusva lebzixikeke hi le tilweni; abzifani ni lebzi vatatana va n'wina vabzijeke, hikuva bzona abzivasivelanga kufa; lweyi ajaka vusva lebzi, atahanya hilaha kungaheliki.” Yesu avulile timhaka leti loko ali karhi ajondzisa sinagogeni, le Kapernawume. Loko vajondzisiwa va yena lavotala vatwile lesvi, vaku: “Marito lawa manonon'hwa i mani lweyi angama twisisaka xana?” Kambe Yesu aasvitiva hi le mbilwini lesvaku vajondzisiwa va yena vangurangura hi mhaka leyi, kutani aku ka vona: “Xana mhaka leyi yamukhunguvanyisa ke? Amitavula yini loko amovona N'wana-wa-Munhu loko atlhantukela laha aali kona kusunguleni? Amoya hi wona lowuhanyisaka, nyama ayipfuni nchumu. Marito lawa nimibzelaka wona, i moya ni vutoni. Kambe van'wana xikarhi ka n'wina avapfumeli.” ( Hikuva Yesu asvitivile kahali kusunguleni, lesvaku i vamani lava vangatakala vangapfumeli, ni lesvaku i mani lweyi angatamuxenga.) Kutani atlhela aku: “Hikolaho nimibzeleke niku: Aku na munhu lweyi angataka ka mina, loko angapfumeleliwanga svona hi Tatana.” Kusukela nkarhini wolowo, vajondzisiwa va yena lavotala vatlhelela ndzhaku, vangahafambafambi na yena. Kutani hi loko Yesu, aku ka lava va khume ni vambirhi: “Xana na n'wina milava kufamba ke? Simoni Petrosi ahlamula, aku ka yena: Hosi, hingaya ka mani xana? Wena u ni marito ya vutomi lebzingaheliki. Kutani hina hi ni kupfumela ni kusvitiva lesvaku hi wena Muhlawuliwa wa Xikwembu.” Yesu avahlamula aku: “Xana ahi mina ningamihlawula, n'wina lava va khume ni vambirhi? Kambe mun'we wa n'wina i Diyavulosi.” Aavula Yudasi, n'wana Simoni Iskariyota, hikuva hi yena lweyi aatamuxenga, hambilesvi aalimun'we wa lava va khume ni vambirhi. Ndzhaku ka svosvo Yesu aafambafamba Galileya; angahalavi kufambafamba Yudeya, hikuva Vayuda avalava kumudlaya. Nkhuvu wa Vayuda woyendleliwa minchancheni awuli kusuhi. Kutani vamakwavu va yena vaku ka yena: “Suka laha, uya Yudeya lesvaku vajondzisiwa va wena na vona vatavona mintirho leyi uyiyendlaka. Hikuva aku na munhu lweyi ayendlaka xokarhi ali xihundleni, loko alava kutiviwa matlhelweni hinkwawu; loko svilo lesvi usviyendlaka svili lesvi, tikombi ka misava hinkwayu.” Hikuva, na vona vamakwavu va yena avangali nakupfumela ka yena. Hi loko Yesu aku ka vona: “Nkarhi wa mina awusifika; kambe ka n'wina nkarhi wihi ni wihi wululamile.” Misava yingakala yingamivengi, kambe mina yanivenga, hikuva nivula vumboni bza lesvaku mintirho ya yona yibihile. N'wina tlhantukelani nkhubzeni, wolowo, mina aniyi ka wona, hikuva nkarhi wa mina awusihetiseka. Loko avabzelile svosvo atisalela Galileya. Kambe loko vamakwavu va yena vafambile nkhubzeni na yena atlhantukela kona, kungali kuvonakaleni, kambe xihundleni. Vayuda avamulava nkhubzeni, vaku: “A kwihi munhu wakona xana?” Akuli ni kuhlevahleva ka xitshungu, hi mayelanu na yena. Van'wana avaku: “I munhu wa munene!” Van'wana avaku: “Ahihim, axenga xitshungu.” Hambi svilitano, akuvanga ni munhu lweyi avulavuleke hi yena kuvonakaleni, hikolaho ka kuchava Vayuda. Loko nkhuvu wuli xikarhi, Yesu atlhantukela Tempeleni asungula kujondzisa. Vayuda vahlamala vaku: “Xana munhu lweyi amativisa kuyini maletera kasi angajondzanga?” Yesu avahlamula aku: “Jondzo leyi niyijondzisaka ahi ya mina, kambe i ya lweyi anirhumeke. Loko munhu alava kuyendla sva yena, atasvitiva lesvaku jondzo leyi yihuma ka Xikwembu, kumbe no tivulavulela sva mina ntsena? Lweyi avulavulaka svohuma ka yena atilavela kudzunisiwa, kasi lweyi alavaka kudzunisa lweyi amurhumeke, atshembekile, kutani kuhava kuhomboloka ka yena. Xana Moxe angaminyikanga Nawu ke? Hambi svilitano, kuhava ni mun'we wa n'wina lweyi ahlayisaka Nawu. Hikolaho ka yini milava kunidlaya ke?” Xitshungu xihlamula, xiku: “U ni dimoni wena; xana i mani lweyi alavaka kukudlaya ke?” Yesu avahlamula aku: “Niyenndlile ntirho wun'we, kutani hinkwenu maha hlamala hikolaho ka wona. Moxe aminyikile ntolovelo wa kuyimba ahi lesvaku awuhuma ka Moxe, kambe awuhuma ka vakokwana. kutani n'wina miyimbisa munhu hi siku ra Savata! Loko miyimbisa munhu hi siku ra Savata, miyendlela kuhlayisa Nawu wa Moxe; kutani xana minikarihelela yini, lesvi mina ningahanyisa munhu mirini wa yena hinkwawu hi siku ra Savata ke? Mingayi hi nghohe loko miyavanyisa, kambe yavanyisani hi kululama.” Vayaki van'wana va Yerusalema vaku: “Xana ahi yena lweyi vamulavaka kumudlaya ke? Vonani! Hilweyi, avulavula kuvonakaleni, kambe avavuli nchumu. Xana varhangeli vangava vasvitiva hakunene lesvaku lweyi hi yena Kriste ke? Hambi svilitano, hakutiva lomu lweyi ataka hi kona, kambe loko ali Kriste, siku leri angatata ha rona, kuhava munhu ni mun'we lweyi angatativa lomu ata ka hi kona.” Loko Yesu ali karhi ajondzisa Tempeleni, atlakusa rito, aku: “Manitiva, mitiva ni lomu nihumaka kona; anititisanga, kambe lweyi anirhumeke, yena i ntiyiso hi xiviri xa yena, kutani n'wina amimutivi. Mina namutiva, hikuva, nihuma ka yena, nasvona hi yena lweyi anirhumeke.” Kutani varingeta kumukhoma, kambe akuvanga ni mun'we lweyi angayisa voko ka yena, hikuva nkarhi wa yena awungasifika. Lavotala xikarhi ka xitshungu vapfumela ka yena, vaku: “Loko Kriste ata, xana atayendla mahlori lawa matlulaka lawa mayendliwaka hi munhu lweyi xana?” Vafarisi vatwa lesvi xitshungu xihlevetelaka svona mayelanu na Yesu, kutani Vaprista lavakulu ni Vafarisi varhuma malandza kuyamukhoma. Kutani Yesu aku ka vona: “nahatava na n'wina nkarhinyana, kutani ndzhaku ka svona nitaya ka lweyi anirhumeke. Mitanilava, kambe aminganikumi; ni laha ninga kona, mingakala mingati.” Hi loko Vayuda vavutisana vaku: Alava kuya kwihi munhu lweyi, lomu hingatatsandzeka kumukuma kona xana? Xana alava kuya ka Vayuda lava vahangalakeke xikarhi ka va-Griki, ni nkongometo wa kuyajondzisa va-Griki ke? Rito leri alivulaka rihlamusela kuyini, loko aku: Mitanilava, kambe aminganikumi ni loko aku: “‘Laha ninga kona mingakala mingati?’” Hi siku rogamesa ra nkhuvu, ringa lerikulu, Yesu asuka ayima, kutani atlakusa rito aku: “Loko munhu ali ni torha, aate ka mina atanwa.” Hilaha Tsalwa rivuleke hakona, milambu ya mati lawa mahanyaka yitakhulunga yihuma mbilwini ya lweyi apfumelaka ka mina. Hi kuvula svosvo, aaringanisa Moya lowu lava vangatapfumela ka yena vangatanyikiwa wona. Hikuva kufika nkarhi wolowo, Moya Lowokwetsima awungasinyikiwa, hikuva Yesu aangasitlakusiwa. Hikolaho, lavotala ka xitshungu loko vatwile marito lawa, vaku: “Lweyi hi yena Muprofeta hakunene.” Van'wana vaku: “Lweyi hi yena Kriste.” Kambe van'wana vaku: “Xana Kriste angata hi le Galileya ke? Xana Tsalwa arivulanga lesvaku Kriste atahuma rixakeni ra Davhida, avelekiwa Betlelehema, mugangeni lowu Davhida aatshama ka wona ke?” Hikolaho kupfuka kuyavana xikarhi ka xitshungu hi mhaka ya yena. Van'wana va vona vanavela kumukhoma, kambe akuvanga ni mun'we lweyi angayisa voko ka yena. Kutani malandza mavuyela ka Vaprista lavakulu ni ka Vafarisi; vona vavavutisa, vaku: “Hikolaho ka yini mingavuyanga na yena ke?” Malandza mahlamula, maku: “Akusiva ni munhu ni siku ni rin'we lweyi avulavuleke kufana ni munhu lwiya.” Vafarisi vavahlamula, vaku: “Xana na n'wina mikangayisiwile ke? I mani ka vakulukumba ni le ka vafarisi lweyi angapfumela ka yena xana? Kambe xitshungu lexi xingativiki Nawu, xirhukaniwile.” Mun'wana wanuna, yena Nikodema, ( lweyi angatshama aya ka Yesu, nivusiku), aku ka vona: “Xana Nawu wa hina wayavanyisa munhu angasiyingisiwa, ni lesvi asviyendlaka svingasitiviwa ke?” Vamuhlamula vona vaku: “Xana na wena uhuma Galileya ke? Kambisisa svinene utakuma lesvaku kuhava muprofeta lweyi ahumaka Galileya.” Kutani vahangalaka, mun'wana ni mun'wana aya kaya ka yena. Kutani-ke, Yesu aya ntshaveni ya Maolivhera. Nimixo, apfukisa svinene, awuyela Tempeleni; vanhu hinkwavu vata ka yena, kutani atshama hansi, asungula kuvajondzisa. Vatsali ni vafarisi vatisa wansati lweyi akumiweke avuwosveni. Vamuyimisa xikarhi ka vanhu hinkwavu; kutani vaku ka Yesu: “Mujondzisi, wansati lweyi akumiwile hakunene, ali karhi awosva. Kutani Naweni, Moxe ahilelete lesvaku vavasati votani hifanela kuvakhandla hi maribze; xana wena uliyini ke? ” Avavula svosvo kuli kumuringa, lesvaku vatakuma mhaka leyi vangamuvekelaka nandzu ha yona. Kambe Yesu akorhama, atsalatsala hansi ka misava hi ritiho. Tani hi lesvi avasindzisa kumuvutisisa, a ololoka, aku ka vona: “Lweyi a ngaliki ni xijoho, xikarhi ka n'wina aarhange ahoxa ribze amukhandla.” Atlhela akorhama, atsalatsala hansi ka misava. Loko vatwile svosvo, vasuka hi mun'we mun'we, kusungula hi lavakulu kuyafika ka lava vatsongo; kutani Yesu asala ali yexe, lweyi wansati alikolaho xikarhi. Kuteloko Yesu a ololokile angavoni munhu, handle ka lweyi wansati, aku ka wansati: “Wansati, vakwihi lava vakuhehlaka xana? Xana aku na ni mun'we lweyi akuyavanyiseke ke?” Yena aku: “Ni mun'we anga kona Hosi.” Yesu aku ka yena: “Na mina anikuyavanyisi; famba, kambe ungahatlhele ujoha.” Kutani Yesu atlhela avulavula na vona, aku: “Hi mina kuvonakala ka misava; lweyi anilandzelaka angakala angafambi munyameni ni siku ni rin'we, kambe atava ni kuvonakala ka vutomi.” Vamubzela vafarisi vaku: “Utivekela vumboni ha wexe, vumboni bza wena ahibza ntiyiso” Yesu avahlamula aku: “Ni loko nitihumesela vumboni, vumboni bza mina bzitiyile, hikuva nitiva lomu nihumaka kona, ni lomu niyaka kona; kambe n'wina amikutivi lomu nihumaka kona, ni lomu niyaka kona, amikutivi. N'wina, miyavanyisa mayelanu ni nawu wa vanhu; mina aniyavanyisi munhu. Ni loko hi ntiyiso niyavanyisa, kuyavanyisa ka mina i ka ntiyiso; hikuva aninoxe, kambe Tatana lweyi anirhumeke ana mina. Kutani le Nawini wa n'wina, kutsaliwile lesvaku vumboni bza vanhu vambirhi bza ntiyiso. Hi mina lweyi atihumeselaka vumboni, kutani na yena Tatana, lweyi anirhumeke, ahumesa vumboni henhla ka mina.” Vaku ka yena: “Tatana wa wena akwihi?” Yesu ahlamula, aku: “Aminitivi, hambi ali Tatana wa mina amimuntivi; loko onge minitivile, ina mintivile Tatana wa mina.” Yesu avulile marito lawa loko ali karhi ajondzisa Tempeleni, laha akunhlayisiwa male ya nhlengo; kutani akuvanga ni mun'we lweyi amukhomeke, hikuva nkarhi wa yena awungasifika. Yesu atlhela kambe aku ka vona: “Mina nasuka, nafamba, kutani mitanilava, kambe mitafela kujoheni ka n'wina. Laha mina niyaka kona, mingakala mingayi.” Kutani Vayuda vaku: Xana alava kutidlaya lesvi ango: “Laha niyaka kona, mingakala mingayi ke?” Aku ka vona: N'wina mihuma kola hansi, mina nihuma hi le henhla; n'wina mi va misava leyi; mina ani wa misava leyi. Hikolaho nimibzelaka svona, loko nite: “Mitafela svijonhweni sva n'wina. Hikuva loko mingapfumeli lesvaku Mina yihe Mina, mitafela svijonhweni sva n'wina.” Vaku ka yena: “Hi wena mani?” Yesu aku ka vona: “Svosvi ningamibzela svona kusukela kusunguleni, lesvaku ni yena.” Ni ni lesvotala lesvi nifanelaka kumibzela ni kusviyavanyisa henhla ka n'wina; kambe lweyi anirhumeke i ntiyiso wa xiviri; kutani lesvi nisvitweke ka yena lesvo, nisvivulavula ka misava. Kambe avativanga lesvaku aavabzela hi ta Tatana. Yesu aku ka vona: “Loko mitava mitlakusile N'wana-wa-Munhu, hi kona mingatativa lesvaku mina ni mani, ni lesvaku aniyendli nchumu hi kurhandza ka mina, kambe nivula svilo lesvi Tatana anijondziseke svona. Kutani lweyi anirhumeke, ana mina; Tatana anganitshikanga nili noxe, hikuva masiku hinkwawu niyendla lesvi svimutsakisaka.” Aali karhi avulavula timhaka leti na lavotala vapfumela ka yena. Yesu abzela Vayuda lavapfumeleke ka yena aku ka vona: “Loko mitshama ritweni ra mina, mitava vajondzisiwa va mina hakunene; nasvona mitativa ntiyiso, kutani ntiyiso wutamintshunsa.” Vamuhlamula vaku: “Hi rixaka ra Abrahamu; ahisiva svikarawa sva munhu ni siku ni rin'we. Xana uvula yini loko uku: ‘Mitava lavatshunxekeke’ ke?” Yesu avahlamula aku: “Nitiyisile hakunene nili ka n'wina: Mani na mani lweyi ayendlaka xijoho i xikarawa xa xijoho. Xikarawa axitshami hilaha kungaheliki kaya, kambe lweyi atshamaka hilaha kungaheliki i n'wana wa laha kaya. Hikolaho-ke, loko N'wana amitshunxa, mitava lavatshunxekeke hakunene. Nasvitiva lesvaku mirixaka ra Abrahamu, kambe milava kunidlaya, hikuva rito ra mina arikumi ndhawu ka n'wina.” Mina nivulavula hi lesvi nisvivoneke ka Tatana, kambe n'wina miyendla lesvi misvitweke svihuma ka tatana wa n'wina. Vamuhlamula, vaku: “Tatana wa hina i Abrahamu.” Yesu aku ka vona: “Loko amili vana va Abrahamu, tirhani mintirho ya Abrahamu. Kambe svosvi milava kunidlaya, mina lweyi ningamibzela ntiyiso lowu niwutweke ka Xikwembu! Abrahamu angayendlanga svona lesvi. N'wina miyendla mintirho ya tatana wa n'wina.” Vaku ka yena: “Hina ahipsaliwanga avuwosveni hi ni tatana mun'we ntsena, xinga Xikwembu.” Yesu aku ka vona: “Loko Xikwembu axili tatana wa n'wina, amitanirhandza, hikuva mina nihumile, nasvona nita hi ka Xikwembu; anititisanga, kambe nirhumiwile hi yena. Hikolaho ka yini mingatwisisi lesvi nisvivulaka xana? I mhaka ya lesvi mitsandzekaka kuyingisa rito ra mina. Tatana wa n'wina i Diyavulosi, kutani mitsakela kuyendla kurhandza ka tatana wa n'wina. Aali mudlayi ni le kusunguleni. Angatshamanga ntiyisweni, hikuva kuhava ntiyiso ka yena. Loko avulavula mavunhwa, akombisa lesvi anga svona, hikuva i muhembi, ni tatana wa mavunhwa. Kambe mina nimibzela ntiyiso hi svona sviyendlaka lesvaku mingapfumeli. I mani ka n'wina lweyi angakombaka xijoho xa mina xana? Loko nimibzela ntiyiso, hikolaho ka yini minganipfumeli xana? Lweyi anga wa Xikwembu ayingisa marito ya Xikwembu; kambe n'wina amiyingisi hikuva amihumi ka Xikwembu.” Vayuda vahlamala, vaku ka yena: “Xana hohemba loko hiku wena u Musamariya, ni lesvaku u ni dimoni ke?” Yesu ahlamula, aku: “Mina, a ni na dimoni, kambe nixixima Tatana wa mina, kutani n'wina aminixiximi. Anitilaveli kudzunisiwa; akona lweyi alavaka kunidzunisa, nasvona waniyavanyisaka. Nitiyisile hakunene, nili ka n'wina: Munhu lweyi ahlayisaka rito ra mina, angakala angavoni rifu ni siku ni rin'we.” Vayuda vaku ka yena: “Svosvi hasvitiva lesvaku u ni dimoni; hikuva Abrahamu afile; ni vaprofeta, vafile; kambe, wena uli: ‘Loko munhu ahlayisa rito ra wena, angakala angaringi rifu ni siku ni rin'we!’ ” Xana wena ulwenkulu kutlula Abrahamu tatana wa hina lweyi angafa ke? Nasvona vaprofeta na vona vafile; xana utiyendla mani ke? Yesu ahlamula, aku: “Loko nitidzunisa, kutidzunisa ka mina akupfuni nchumu. Lweyi anidzunisaka i Tatana wa mina, lweyi mingo: ‘ i Xikwembu xa n'wina.’ Kutani n'wina amimuntivi, kambe mina namutiva: Loko mina nivula lesvaku animutivi, nitava nili muhembi kufana na n'wina, kambe namutiva, nasvona nihlayisa rito ra yena. Tatana wa n'wina Abrahamu atsakile ngopfu hi kuvona siku ra mina; arivonile, avuya atsaka.” Kutani Vayuda vaku ka yena: “Awusitlhanganisa ntlhanu wa makume ya malembe, kambe uli uvonile Abrahamu xana?” Yesu aku ka vona: “Nitiyisile, nili ka n'wina: Loko Abrahamu angasipsaliwa, mina se anili ‘lweyi ninga yena.’” Kutani varhola maribze kumukhandla, kambe Yesu atumbela, kutani ahuma Tempeleni. Loko Yesu ali karhi ahundza, avona munhu lweyi angapsaliwa na afile mahlo. Kutani vajondzisiwa va yena vamuvutisa vaku: Mujondzisi, i xijoho xa mani lexiyendleke lesvaku munhu lweyi apsaliwa na angavoni: “I xa yena kumbe i xa vapsali va yena ke?” Yesu ahlamula aku: Akujohanga yena, kumbe vapsali va yena, kambe apsaliwile na afile mahlo lesvaku mintirho ya Xikwembu yitavoneka ha yena. Hifanela kutirha mintirho ya lweyi anirhumeke, jambu ringasipela; vusiku bzata, lebzi munhu angatakala angahakoti kutirha. Loko nahali kona laha misaveni, ni kuvonakala ka misava. Kuteloko avulile svosvo, apshitela hansi, apfuva madaka hi marhi; atota mahlo ya munhu yelweyo hi madaka yakona, kutani aku ka yena: “Famba uyahlamba xihlobzeni xa silowama ( hi lesvaku ‘Xirhumiwa’)”. Kutani ayahlamba, avuya na ali karhi avona. Avayakelani va yena ni lava avatolovela kumuvona na ali mukombeli, vaku: “Xana ahi yena lweyi aatolovela kutshama na ali karhi akombela ke?” Van'wana vaku: “Hi yena.” Van'wana vaku: “Ahihim, ahi yena, kambe ofana na yena.” Yena hi yexe aku: “Hi mina!” Kutani vaku ka yena: “Mahlo ya wena mahanyanyisiwile hi mukhuva wihi xana?” Yena ahlamula, aku: “Wanuna lweyi vango i Yesu, apfuve madaka, anitota mahlo hi wona, kutani ate ka mina: ‘ Famba uyahlamba axihlobzeni xa Silowama.’ Niyile, niyahlamba, kutani nikotile kuvona.” Vaku ka yena: “A kwihi wanuna wakona?” Aku: “Anikutivi.” Vateka munhu lweyi aafile mahlo vamuyisa ka vafarisi. Kutani siku leri Yesu apfuveke madaka ha rona, ahanyisa mahlo ya munhu lwiya, aali Savata. Vafarisi vayengeta vavutisisa munhu lweyi kutiva hilaha ahanyisiweke hakona. Aku ka vona: “Anitotile mahlo hi madaka; niyile niyahlamba, kutani svosvi nikota kuvona.” Van'wana xikarhi ka vafarisi vaku: “Lweyi ayendleke svilo lesvi angahumi ka Xikwembu, hikuva anga na mhaka ni siku ra Savata.” Van'wana vaku: “Xana munhu wa mujohi angasvikotisa kuyini kuyendla mahlori lawa yotanu ke?” Kutani kuva ni kuyavana xikarhi ka vona. Vatlhela vavutisa lweyi aafile mahlo, vaku: “Wena uliyini hi yena, lesvi unge, akuhanyisile mahlo?” Yena aku: “I muprofeta!” Avayuda avapfumelanga loko vabzeliwa lesvaku munhu lwiya khale aafile mahlo, ni lesvaku svosvi ahundzuke lweyi akotaka kuvona; kutani vavitana vapsali va yena, vavavutisa, vaku: “Xana lweyi i n'wana wa n'wina lweyi minge, apsaliwile na afile mahlo ke? Svosvi asvikotisa kuyini kuvona xana?” Vapsali va yena vahlamula vaku: “Hasvitiva lesvaku lweyi i n'wana wa hina, ni lesvaku apsaliwile na afile mahlo; kambe lexi xiyendlaka lesvaku svosvi akota kuvona, ahixitivi, ni lweyi amuhanyiseke mahlo, ahimutivi. Muvutiseni, akulile, atatihlamulela ha yexe.” Vapsali va yena avavula svosvo hi kuchava Vayuda, hikuva Vayuda avatwananile lesvaku, loko munhu mun'we angatshuka aveka vumboni lesvaku Yesu i Kriste, atahlongoliwa sinagogeni. Hikolaho vapsali va yena vangate: “Akulile, muvutiseni.” Vatlhela vavitana kambe munhu lweyi aafile mahlo, vaku ka yena; “Dzunisa Xikwembu! Hina hasvitiva lesvaku munhu lweyi i mujohi.” Yena aku: “Mina anisvitivi loko alimujohi; nhotiva xilo xin'we ntsena, hi lesvaku aningavoni, kasi svosvi se na vona,” vaku ka yena: “Ayendlile yini ka wena? Akuhanyisile mahlo hi mayedlela wahi ke?” Avahlamula, aku: “Nimibzelile khale, kambe amitwisisi; hikolaho ka yini milava kutlhela mintwa mhaka leyi xana? Xana na n'wina milava kuva vajondzisiwa va yena ke?” Kutani vamurhukatela vaku: “‘Hi wena unga mujondzisiwa wa yena; hina hi vajondzisiwa va Moxe.’” Hasvitiva lesvaku Xikwembu xivulavulile na Moxe; kambe wanuna lweyi, ahikutivi lomu ahumaka kona. Lweyi ahanyisiweke avahlamula, aku: “Hiyo mhaka leyihlamalisaka! Amikutivi lomu ahumaka kona, kambe anihanyisile mahlo! Hasvitiva lesvaku Xikwembu axiyingisi vajohi; kambe loko munhu achava Xikwembu, ayendla kurhandza ka xona, Xikwembu xa muyingisa. Ahisisvitwa ni siku ni rin'we, lesvaku munhu lweyi apsaliweke na angavoni, angava ahanyisiwa mahlo hi munhu mun'wana. Loko onge munhu lweyi angahumanga hika Xikwembu, ingi angakotanga kuyendla nchumu.” Vamuhlamula vaku: “Wena upsaliwile chakeni ra svijoho, ungajondzisa hina xana?” Kutani vamuhlongola ahuma handle. Yesu atwa lesvaku vamuhlongolile, kutani loko amukumile, aku ka yena: “Xana wapfumela ka N'wana-wa-Munhu ke?” Ahlamula aku: “I mani Hosi, lesvaku nitakota kupfumela ka yena?” Yesu aku ka yena: “Umuvonile, hi yena lweyi avulavulaka na wena.” Wanuna ahlamula aku: “Hosi, napfumela!” Kutani akhinsama mahlweni ka Yesu amukhongela. Yesu aku: “Nitile misaveni leyi kutayavanyisa vanhu, lesvaku lava vangavoniki vakota kuvona, ni lesvaku lava vavonaka vahundzuka lavo-fa-mahlo.” Vafarisi van'wana lava avali na yena, loko vatwa marito lawa, kutani vaku ka yena: “Xana na hina hifile mahlo ke?” Yesu aku ka vona: Loko amifile mahlo, amingatava ni nandzu; kambe svosvi, lesvi minge: “‘Havona; hi kolaho svijoho sva n'wina svitshama ka n'wina.’” “Nitiyisile nili ka n'wina: Lweyi angangheniki hi nyangwa xib'aleni xa tinyempfu, kambe aphondla hi kun'wana, i muyivi, nasvona i xigevenga.” Kambe mubzisi wa tinyempfu anghena hi nyangwa. Mulaveleli wa nyangwa wamupfulela, kutani tinyempfu titwa rito ra yena; avitana tinyempfu letinga ta yena hi mavito ya tona, atihumesela handle. Loko ahumesile letinga ta yena hinkwatu, atirhangela mahlweni, kutani tinyempfu tamulandzela, hikuva titiva rito ra yena; tingakala tingalandzi munhu lweyi tingamutiviki; titamubaleka, hikuva atitivi rito ra van'wana. Yesu avabzelile xifaniso lexi, kambe vona avatwisisanga lesvi aavabzela svona. Yesu atlhela aku ka vona: “Nitiyisile nili ka n'wina: Hi mina nyangwa ya tinyempfu.” Hinkwavu lava vateke ningasita, i vayivi, nasvona i svigevenga, kambe tinyempfu ativayingisanga. Hi mina nyangwa. Loko munhu anghena ha mina, ataponisiwa; atanghena atlhela ahuma, akuma ni majelo. Muyivi atela ntsena kuyiva, ni kudlaya, ni kuhahlula; mina nitile lesvaku tinyempfu tiva ni vutomi, tibzikuma hi ntalu. “Hi mina mubzisi lwenene. Mubzisi lwenene anyiketa vutomi bza yena afela tinyempfu. Lweyi atirhelaka male, angaliki mubzisi kumbe n'winyi wa tinyempfu, asiya tinyempfu atsutsuma loko avona hlolwa rita; kutani hlolwa ritikhoma ni kutihangalasa. Mhaka hi lesvaku i mutirheli wa male ntsena, angakhatali hi tinyempfu. Hi mina mubzisi lwenene; nitiva leti tinga ta mina, ni leti tinga ta mina tanitiva. Tani hilaha Tatana anitivaka hakona, ni hilaha na mina nitivaka Tatana hakona; kutani ninyiketa vutomi bza mina nifela tinyempfu. Nasvona ni ni tinyempfu tin'wana leti tingaliki ta xib'ala lexi; na tona nifanela kutivuyisa; titayingisa rito ra mina, kutani titayendla ntlhambi wun'we, tiva ni mubzisi mun'we. Hikolaho, Tatana wanirhandza, hikuva ninyiketa vutomi bza mina, lesvaku nitatlhela nibzikuma. Aku na munhu lweyi anitekelaka bzona, kambe nabzinyiketa hi kurhandza ka mina; ni ni matimba ya kubzinyiketa, nasvona ni ni matimba ya kutlhela nibzikuma. Hi svona lesvi Tatana wa mina anibzeleke kuyendla svona.” Kuyavana kutlhela kuva kona xikarhi ka Vayuda hikolaho ka marito wolawo. Lavotala xikarhi ka vona avaku: “A ni dimoni, ahlangane nhloko! Mimuyingisela yini xana?” Kambe van'wana avaku: “Marito lawa ahi ya munhu lweyi anga ni dimoni. Xana dimoni ringapfula mahlo ya lavo vangafa mahlo, ke?” Nkhuvu wa kukhangula tempele awuli kona le Yerusalema, kambe arili vuxika, kutani Yesu aafambafamba ka rikupakupa ra tempele ya Solomoni. Hi loko Vayuda vamurhendzela, vaku ka yena; “Utahikanakanisa kufika rini xana? Loko uli yena Kriste, hibzeli livaleni.” Yesu avahlamula aku: “Nimibzelile, kambe amipfumeli. Mintirho leyi niyiyendlaka hi vito ra Tatana wa mina, yiveka vumboni henhla ka mina.” Kambe amipfumeli, hikuva ami tinyempfu ta mina. Tinyimpfu ta mina tiyingisa rito ra mina; mina natitiva, kutani tanilandzela. Kutani nitinyika vutomi lebzingaheliki; tingakala tingalovi, nasvona aku na munhu lweyi angatativutla vokweni ra mina. Tatana wa mina lweyi aninyikeke tona, i nkulu kutlula hinkwasvu; hi kolaho, aku na munhu ni mun'we lweyi angakotaka kutivutla vokweni ra Tatana wa mina. Mina na Tatana hi mun'we. Vayuda vatlhela varhola maribze valava kumukhandla. Yesu avahlamula aku ka vona: “Nimikombile mintirho leyotala leyinene; leyihumaka ka Tatana; xana, ka yona, hi wihi ntirho lowu minikhandlelaka wona ke?” Vayuda vamuhlamula vaku: “Ahikukhandli hi ntirho lowunene, kambe hi lesvi usandzaka Xikwembu, ni lesvi utiyendlaka Xikwembu, kasi wena u munhu ntsena.” Yesu avahlamula, aku: “Xana akutsaliwanga Naweni wa n'wina lesvaku: Mina nite: ‘N'wina mi svikwembu’ xana?” Hikolaho, loko nawu uvavitile svikwembu lavaya avakongomiwa hi rito ra Xikwembu (kutani amatsalwa mangacinciwi). Kutani-ke, hikolaho ka yini miku: “Asandza Xikwembu hi mhaka ya lesvi ningate: Ni N'wana-wa-Xikwembu xana? Kasi hi mina lweyi Tatana angamukwetsimisa ni kumurhuma misaveni. Loko ningayendli mintirho ya Tatana wa mina minganipfumeli! Kambe loko niyendla yona, hambi minganipfumeli, pfumelani yona mintirho, mitativa ni kutwisisa lesvaku Tatana a le ka mina, na mina ni le ka Tatana.” Hi loko varingeta kambe kumukhoma, kambe apshetemuka mavokweni ya vona. Kutani atlhela atsemakanya nambu wa Yordani, ayalaha Yohani aakhuvula kona kusunguleni, kutani atshama kona. Lavotala vata ka yena vaku: “Yohani angayendlanga xikombiso ni xin'we, kambe hinkwasvu lesvi Yohani angasvi vula henhla ka munhu lweyi, svitiyile.” Kutani lavotala vapfumela ka yena ndhaweni yoleyo. Siku rin'wana, wanuna lweyi avaku i Lazaru wa le Betaniya, aavabza, ali muntini wa vamakwavu Mariya na Marta. (Mariya, hi yena lweyi angatshama atota Hosi hi mafurha lawa yonun'hwela, atlhela amusula milenge hi misisi ya yena; kutani Lazaru lweyi aavabza, aali makwavu wa yena.) Vamakwavu lava vaxisati varhumela rito ka Yesu, vaku ka yena: “Hosi, lweyi umurhandzaka wavabza.” Loko Yesu atwa svosvo, aku: “Kuvabza loku akungayisi kufeni, kambe i ka kudzunisa Xikwembu, ni lesvaku N'wana wa Xikwembu adzunisiwa hi kolaho kakona.” Yesu aarhandza Marta ni makwavu Mariya, arhandza na Lazaru. Loko atwile lesvaku Lazaru wavabza, atshama masiku mambirhi laha aali kona. Kutani ndzhaku ka svosvo aku ka vajondzisiwa: “Ahitlheleleni Yudeya.” Vajondzisiwa vaku ka yena: “Mujondzisi, akuhundzi masiku yotala, loko Vayuda varingete kukukhandla hi maribze. Xana wahalava kutlhelela kona ke?” Yesu ahlamula aku: “Xana siku rin'we ari na mawora ya khume ni mambirhi ke? Loko munhu afamba ninhlekanhi, angakala angawi hikuva avona hi rivoni ra misava leyi; kambe loko munhu afamba nivusiku, wawa hikuva arivoni arikona ka yena.” Loko avulile svosvo, atlhela aku ka vona: “Lazaru murhandziwa wa hina, ayetlele, kambe niya kuyamupfuxa.” Vajondzisiwa vaku ka yena: “Hosi, loko ayetlele, atapfuka.” Yesu aavulavula hi ta kufa ka Lazaru, kambe vona avapimisa lesvaku avulavula hi ta kuyetlela vurhongo rinene. Kutani Yesu avabzela rivaleni, aku: “Lazaru afile, kutani, hikolaho ka n'wina nitsakile hi lesvi aningali kona koseyo, lesvaku mitapfumela. Kambe ahiyeni ka yena!” Tomasi lweyi aavuliwaka “Hahla”, aku ka vajondzisiwakulobze: “Ahiyeni na hina, lesvaku hiyafa na yena.” Kutani loko Yesu afika, akuma lesvaku Lazaru ahetile mune wa masiku na ali sirheni. Doropa ra Betaniya arili kusuhi na Yerusalema; mpfhuka wakona awuli kusuhi ni makilometro manharhu. Kutani Vayuda lavotala avayile ka Marta na Mariya kuyavachavelela hikolaho ka rifu ra makwavu wa vona. Loko Marta atwa lesvaku Yesu wata, aya mutlhangaveta; Mariya yena aatshamile ndlwini. Kutani Marta aku ka Yesu: “Hosi, loko onge awuvile kona, makwerhu ina angafanga. Kambe ni svosvi nasvitiva lesvaku hinkwasvu lesvi usvikombelaka ka Xikwembu, xona xitakunyika svona.” Yesu aku ka yena: “Makwenu atapfuka kufeni.” Marta aku ka yena: “Nasvitiva lesvaku atapfuka kufeni hi siku ra makumu, akupfukeni ka vafi.” Yesu aku ka yena: “Hi mina kupfuka ni vutomi; lweyi apfumelaka ka mina, hambi angafa, atahanya, kutani mani na mani lweyi ahanyaka, ava apfumela ka mina, angakala angafi ni siku ni rin'we. Xana wasvipfumela svosvo ke?” Aku ka yena: “Ina Hosi, napfumela lesvaku hi wena Kriste, N'wana wa Xikwembu, lweyi aafanela kuta laha misaveni.” Loko Marta avulile svosvo, aya, ayavitana Mariya makwavu, amubzela hi kuhlevetela aku: “Mujondzisi akola, wakuvitana.” Loko Mariya atwa svosvo, apfuka hi kuhantlisa, aya ka Yesu. (Yesu aangasinghena xidoropanini, kambe ahali kola Marta angamutlhangaveta kona.) Vayuda lava avali ndlwini na Mariya vali karhi vamuchavelela, loko vamuvona asuka ayima ahuma hi kuhantlisa, vamulandza hi kuyanakanya lesvaku aya le sirheni kuyarila kona. Loko Mariya afika laha Yesu anga kona ni loko amuvona, akhinsama milengeni ya yena, aku ka yena: “We Hosi, loko onge awuvile kona, makwerhu ina angafanga.” Loko Yesu amuvona na ali karhi aba nkosi arila, ni loko avona Vayuda lavamuheleketaka na vona vali karhi vaba nkosi varila, atlhaveka svinene moyeni ni kutwa kuvaviseka lokukulu; kutani aku: “Mimuvekile kwihi xana?” Vaku ka yena: “Hosi, tana utakuvona.” Yesu arila. Kutani Vayuda vaku: “Vonani hilaha aamurhandza hakona!” Van'wana va vona vaku: “Yena lweyi angapfula mahlo ya lava vakufa mahlo hikolaho ka yini angakotanga kuyendla lesvaku munhu lweyi angafi xana?” Yesu atlhela atlhaveka moyeni, ata kusuhi ni sirha. Sirha rakona arili mhakwa, mhakwa yakona ayipfaliwile hi ribze. Yesu aku: “Susani ribze!” Marta makwavu wa mufi aku ka yena: “Kambe Hosi, svosvi kufanele kuva na kunun'hwa, hikuva kuhundzile mune wa masiku na afile.” Yesu aku ka yena: “Xana anikubzelanga lesvaku loko upfumela, utavona kukwetsima ka Xikwembu ke?” Hi loko vasusa ribze, kutani Yesu alanguta tilweni, aku: “Tatana, nakukhensa, hikuva uniyingisile. Mina nisvitivile lesvaku masiku hinkwawu waniyingisa, kambe nivulile svilo lesvi hikolaho ka xitshungu lexi xiyimeke kola, lesvaku xitaza xipfumela lesvaku hi wena lweyi anirhumeke.” Kuteloko avulile svosvo, ahuwelela hi rito leritlakukeke, aku: “Lazaru, humela handle!” Kutani mufi ahuma na atsondziheliwile milenge ni mavoko hi mabandichi ni ximombo xa yena na xibohiwile hi faduku. Yesu aku ka vona: “Mutlhantlheni mimutshika atifambela.” Lavotala xikarhi ka Vayuda lava avatile ka Mariya, loko vavonile lesvi Yesu asviyendleke, vapfumela ka yena Kambe van'wana va vona vaya ka Vafarisi, vayavabzela lesvi Yesu asviyendleke. Hi loko Vaprista lavakulu ni Vafarisi vavitana Huvu ya Sanedri, vaku: “Hitayendla yini xana, lesvi munhu lweyi ayendlaka mahlori layotala? Loko himutshikisa svosvo, hinkwavu vatapfumela ka yena, kutani Varoma vatata vatalovisa ndhawu leyi ya hina, ni kuhiheta hi rixaka.” U n'wana wa vona lweyi vange i Kayafasi, aali Muprista lwenkulu lembe rolero, kutani aku ka vona: “Amitivi nchumu n'wina; xana amivoni lesvaku hi lesvipfunaka hina loko munhu mun'we afela van'wana, handle ka lesvaku rixaka hinkwaru rilova ke?” Marito lawa amangahumi ka yena; amavulile hi lesvi aali Muprista lwenkulu lembe rolero, kutani aprofeta lesvaku Yesu atafanela kufela rixaka; nasvona kungali ntsena kufela rixaka, kambe kuli kuhlengeleta vanhu va Xikwembu lavahangalakeke, avayendla van'we. Kutani kusukela siku lero, Vayuda vaboha makungu ya kudlaya Yesu. Hikolaho Yesu angahafambafambanga rivaleni xikarhi ka Vayuda, kambe asuka kolaho, aya tikweni leringe kusuhi ni mananga, doropeni lerivuliwaka Efrayimi, ayatshama kona ni vajondzisiwa va yena. Nkhuvu wa Paska ya Vayuda awuli kusuhi. Lavotala lavahumaka matikweni, avatlhantukele Yerusalema vayatibasisa, nkhuvu wungasivakona. Avalava Yesu, vavutisana na vayimile Tempeleni, vaku: “Xana miyehleketa yini? Aangati nkhubzeni! Xana atata ke?” Vaprista lavakulu ni Vafarisi avaleletile lesvaku, loko mun'wana ativa laha anga kona, aavativise, lesvaku vatakota kumukhoma. Loko kahasele masiku ya ntlhanu ni rin'we nkhuvu wa Paska wungasivakona, Yesu aya Betaniya. Kona akutshama Lazaru lweyi Yesu aamupfuxile kufeni. Vamulungisela svakuja kona. Marta aaphamela, kutani Lazaru aali mun'wana wa lavatshameke svakujeni na Yesu. Hi loko Mariya ateka xikutsu xa mafurha lawa yonun'hwela yodura ngopfu lamayendliweke hi nsinya wa narda leyinene, atota milenge ya Yesu, kutani amusula milenge hi misisi ya yena, yindlo hinkwayu yitala hi kunun'hwela ka mafurha yakona. Yudasi Iskariyota, mun'wana wa vajondzisiwa va Yesu, lweyi aatamuxenga, avilela aku: “Hikolaho ka yini mafurha lawa mangaxavisiwanga hi tidenari ta madzana manharhu (300), male yinyikiwa svisiwana, xana?” Aavulisa svosvo, kungali hi lesvi aali ni mhaka ni svisiwana, kambe hi lesvi aali muyivi. Aali mutameli wa nkwama wa male, kutani aatolovele kupambula lesvicheliweke kona. Hi loko Yesu aku: “Mutshikeni ahlayisa mafurha lawa, amahlayisela siku ra kulahliwa ka mina. Hikuva svisiwana, mina svona masiku hinkwawu; kambe mina, amingavi na mina masiku hinkwawu.” Xitshungu lexikulu xa Vayuda xitwa lesvaku Yesu akona kolaho, kutani vata, kungali kutavona Yesu ntsena, kambe kuvona na yena Lazaru, lweyi Yesu amupfuxeke kufeni. Hi loko Vaprista lavakulu vaboha makungu ya kudlaya na yena Lazaru; hikuva, hikolaho ka yena, Vayuda lavotala avafularhela vaprista, vapfumela ka Yesu. Siku leritlhantamaka, xitshungu lexikulu xa vanhu lava avatile nkhubzini, xitwa lesvaku Yesu wata Yerusalema; kutani vateka mahanga ya mincindzu, vahuma vayamutlhangaveta na vali karhi vahuwelela, vaku: “Hozana! Akudzunisiwe lweyi ataka hi vito ra Hosi! Akudzunisiwe yena Mufumi wa Israyele!” Yesu akuma mbongolo, kutani ayigada, hilaha Matsalwa mavuleke hakona, loko mate: “Mingachaveni n'wina va le Siyoni! Mufumi wa n'wina hi lweyi, wata, agadile n'wana wa mbongolo.” Vajondzisiwa va yena avatwisisanga mhaka leyi kusunguleni; kambe loko Yesu atlakuliwile, hi kona vangatsundzuka lesvaku mhaka ayitsaliwile mayelanu na yena, ni lesvaku vanhu avayendla svosvo vayendlela yena. Xitshungu lexi axili na Yesu, loko abzela Lazaru kuhuma sirheni amupfuxa kufeni, axiveka vumboni bza timhaka leti. Nasvona vanhu lavotala avayile vayatlhangana na Yesu, hikuva avatwile lesvaku ayendlile mahlori wolawo. Kutani Vafarisi vabzelana vaku: “Masvivona lesvaku amahapfuni nchumu; vonani, vanhu hinkwavu valandza yena.” Xikarhi ka lava vatlhantukele nkhubzini kuyagandzela, akuli ni Vagirika vangali vangani. Vata ka Filipi, lweyi wa le Betisayida tikweni ra Galileya, vataku: “Nkulukumba, hilava kuvona Yesu.” Filipi ayabzela Andreya, kutani Andreya na Filipi vayabzela Yesu. Yesu avahlamula, aku: “Nkarhi wufikile lowu N'wana-wa-Munhu angatatlakuliwa ha wona. Nitiyisisile nili ka n'wina: Loko ndzhoho ya vele yingaweli misaveni yifa, yitotshama yiritano; kambe loko yifa, yitachela ngopfu. Lweyi arhandzaka vutomi bza yena kutlula mina, atalahlekeliwa ha bzona, kambe lweyi abzinyiketaka misaveni leyi, atatihlayisela vutomi lebzingaheliki. Loko munhu anitirhela, aanilandze, kutani laha ninga kona, na yena nandza wa mina atava kona. Loko munhu anitirhela, Tatana atamukomba malwandla. “Svosvi moya wa mina wakarhateka; xana ningavula yini? Xana ningaku, Tatana, niponise ka nkarhi lowu, ke? E-e, kambe lesvi, hi svolesvi ningatela svona, ka nkarhi lowu. Tatana, dzunisa vito ra wena!” Kutani kutwakala rito, rihuma tilweni riku: “Niridzunisile, nitoyengeta niridzunisa.” Xitshungu lexi axiyimile kolaho, xisvitwile, kutani xiku: “Rindzindzile!” Van'wana vaku: “Ntsumi yivulavulile na yena.” Yesu atlhela, aku: “Rito leri aringayendleli mina loko ritwala, kambe riyendlela n'wina. Misava leyi svosvi yikarhi yiyavanyisiwa, kutani hosana ya misava leyi atahlongoliwa svosvi. Kambe mina, loko nitava nitlakuliwile nisuka misaveni, nitakokela vanhu hinkwavu ka mina.” Aavulisa svosvo hi kuringanisa rifu leri aangatofa ha rona. Xitshungu ximuhlamula, xiku: “Hitwile Nawini lesvaku Mesiya atahanya hilaha kungaheliki; uvulisa kuyini wena, lesvi unge: ‘N'wana-wa-Munhu afanele kutlakuliwa’ xana? I mani N'wana-wa-Munhu lweyi ke?” Yesu aku ka vona: “Kuvonakala kahatava kona nkarhinyana na n'wina; fambani loko mahali ni kuvonakala, lesvaku munyama wutakala wungamikumi; kasi lweyi afambaka munyameni angativi laha ayaka kona. Loko mahali ni kuvonakala, pfumelani ka kuvonakala, lesvaku muhundzuka vana vakuvonakala.” Loko Yesu avulile svosvo, asuka ayatumbela kule na vona. Hambilesvi ayendleke mahlori layotala ngopfu mahlweni ka vona, avapfumelanga ka yena, svili lesvaku rito leri muprofeta Ezaya atshamaka arivula rihetiseka, leringe: “We Hosi, i mani lweyi akholweke lesvi hibzeliweke svona xana? Xana akona lweyi avoneke matimba ya Hosi mhakeni leyi, ke?” Avakotanga kupfumela, hi kolaho Ezaya atlhela aku: “Aphumisile mahlo ya vona, ni kutlanyata miyehleketo ya vona, lesvaku vangahavoni, ni kutwisisa vangahatwisisi, ni lesvaku vangahundzuki, na mina ningavahanyisi.” Ezaya avulile lesvi, hikuva avonile kudzuneka ka Yesu, na svona, aavulavula hi ta yena. hambi svilitano, lavotala ni le xikarhi ka tindhuna avapfumela ka yena; kambe, hikolaho ka Vafarisi, avangasvivuli rivaleni hi kuchava kuhlongoliwa sinagogeni. Hakunene varhandzile kudzunisiwa hi vanhu kutlula kudzunisiwa hi Xikwembu. Kutani Yesu atlakusa rito, aku: “Lweyi apfumelaka ka mina, angapfumeli ka mina ntsena kambe apfumela ni le ka lweyi anirhumeke; nasvona lweyi anivonaka, avona lweyi anirhumeke. Mina ni kuvonakala, kutani nitile misaveni lesvaku mani na mani lweyi apfumelaka ka mina, angatshami munyameni. Mun'wana ni mun'wana lweyi atwaka marito ya mina, kambe angamahlayisi, animuyavanyisi, hikuva anitelanga kutayavanyisa misava, kambe kutaponisa misava. Lweyi anifularhelaka, kutani angayamukeli marito ya mina, a ni lweyi amuyavanyisaka; i marito lawa nimavulaka lawa mangatamiyavanyisa hi siku ra makumu. Hikuva anivulavulanga svohuma ka mina, kambe Lweyi anirhumeke, yena Tatana hi xiviri xa yena, anileletile lesvi nifaneleke kusvitivisa ni kusvivula. Nitiva lesvaku kulerisa ka yena i vutomi leringaheliki kutani lesvi nisvivulaka, nisvivula hilaha Tatana anibzeleke hakona.” Nkhuvu wa Paska awungasifika, kambe Yesu aativa lesvaku nkarhi wa yena wufikile wakusuka laha misaveni, aya ka Tatana. Aarhandza vanhu va yena laha misaveni, kutani avarhandzile ngopfu kuyisa kuheteleleni. Diyavulosi akuli khale abohile makungu ya lesvaku Yudasi, n'wana Simoni Iskariyota, ataxenga Yesu. Loko kulikarhi kulaleliwa, Yesu, hi kutiva lesvaku Tatana avekile svilo hinkwasvu mavokweni ya yena, ni lesvaku ahumile ka Xikwembu, nasvona aya ka Xikwembu, asuka ayima kulaleleni, asusa (xifunengelo) xa yena, ateka thawula, atikhama ha rona. Kutani achela mati ka baziya, asungula kuhlambisa vajondzisiwa milenge, ayisula hi thawula leri atikhameke ha rona. Ata ka Simoni Petrosi; kutani Petrosi aku ka yena: “Hosi, xana ulava kunihlampsa milenge wena ke?” Yesu amuhlamula, aku: “Lesvi nisviyendlaka awusisvitiva, kambe utasvitwisisa ndzhaku.” Petrosi aku ka yena: “Ungakala unganihlampsi milenge ni siku ni rin'we!” Yesu amuhlamula, aku: “Loko ningakuhlampsi, awunchumu ka mina.” Simoni Petrosi aku ka yena: “Hosi, kungali milenge ya mina ntsena, kambe na wona mavoko ni nhloko!” Yesu aku ka yena: “Lweyi ahlambeke miri angahafaneli kuyengeta ahlamba, loko yingali milenge ntsena, hikuva hinkwawu miri wa yena wubasile; kutani n'wina, mibasile, kambe kungali hinkwenu.” (Yesu aativa lweyi aali kusuhi nikumuxenga; hi kolaho angavula aku: “Ahi hinkwenu lava mibaseke.”) Loko ahetile kuvahlampsa milenge, ateka xifunengelo xa yena atlhela atshama hansi, aku ka vona: “Xana matwisisa lesvi nimiyendleleke svona ke? Minivula ‘Mujondzisi’ ni ‘Hosi’; mivula, hikuva ni yena. Kutani-ke loko mina, Hosi ya n'wina ni Mujondzisi wa n'wina, nimihlampsile milenge, na n'wina mitafanela kuhlampsana milenge, hikuva nimivekele xikombiso, lesvaku na n'wina miyendlisa lesvi ningayendlisa svona ka n'wina. Nitiyisisile nili ka n'wina: Mutirhi ahinkulu ka n'winyi wa yena, ni murhumiwa ahi nkulu ka lweyi amurhumeke. Loko mitiva svilo lesvi, mitlhela misviyendla, mitava mikatekile. “Anivulavuli nipatsa n'wina hinkwenu; nitiva lava nivahlawuleke; kambe Tsalwa rifanele kuhetiseka, leringe: ‘Lweyi ajaka xinkwa na mina, anihundzukelile, anikhadlanya.’ Nimibzela svosvi mhaka leyi, yingasihumelela, lesvaku siku yihumelelaka, mitapfumela lesvaku ‘Mina, hi ye mina’. Nitiyisisile nili ka n'wina: Lweyi ayamukelaka mani na mani lweyi nimurhumaka, ayamukela mina; ni lweyi aniyamukelaka, ayamukela lweyi anirhumeke.” Loko Yesu avulile timhaka toleto, akarhateka moyeni, kutani aboxa, aku: “Nitiyisisile, nili ka n'wina: Mun'we wa n'wina atanixenga.” Vajondzisiwa valangutana, vakanakana, hikuva avangativi lesvaku avula mani. Mun'we wa vajondzisiwa, lweyi Yesu aamurhandza, aatshamile hi tlhelo ra xinene ra Yesu. Hi loko Simoni Petrosi amukweneta kuvutisa lesvaku avula mani. Mujondzisiwa lweyi akorhamela ka Yesu, ahlevetela aku: “Hosi, i mani xana?” Yesu ahlamula, aku: “Hi lweyi ningatamunyika xinkwa loko nikhemile nipeta nkambaneni.” Kutani apeta xikhemu xa xinkwa, ateka axinyika Yudasi n'wana Simoni Iskariyota. Loko Yudasi axijile, angheniwa hi Sathana. Hi loko Yesu aku ka yena: “Lexi uxiyendlaka, hantlisa uxiyendla.” Akuvanga ni mun'we wa lavatshameke mezeni, lweyi angativa lesvaku Yesu aavulela yini svilo lesvi ka yena Van'wana avayanakanya lesvaku, lesvi Yudasi aali mutameli wa nkwama wa male, Yesu aamubzela kuyaxava sva nkhuvu lesvipfumalekaka, kumbe kuyanyika xanchumu ka svisiwana. Hikolaho, loko Yudasi atekile xikhemu xa xinkwa, ahantlisa ahuma. Nakona se abzili vusiku. Loko Yudasi ahumile, Yesu aku: “Svosvi N'wana-wa-Munhu adzunisiwile, na xona Xikwembu xidzunisiwile ka yena Lesvi xidzunisiweke ka yena, na xona xitamudzunisa mahlweni ka xona; xitahantla xisviyendla. Vana vanga, nahatava na n'wina nkarhinyana; mitanilava, kambe hilaha nibzeleke Vayuda hakona loko nite: ‘Laha niyaka kona mingakala mingati’, na n'wina svosvi namibzela mhaka leyi. Niminyika Nawu lowumpsha nili: Rhandzanani! Kukotisa lesvi mina nimirhandzeke, rhandzanani na n'wina. Hikolaho-ke hinkwavu vatativa lesvaku mi vajondzisiwa va mina, loko mirhandzana.” Simoni Petrosi aku ka yena: “Hosi, xana uyakwihi?” Yesu amuhlamula, aku: “Laha niyaka kona, ungakala unganilandzi svosvi; kambe ndzhaku utani landza.” Petrosi aku ka yena: “Hosi, xana ningatsandzeka kukulandza svosvi hikolaho ka yini ke? Ninganyiketa vutomi bza mina hikolaho ka wena!” Yesu amuhlamula, aku: “Xana unganyiketa vutomi bza wena hikolaho ka mina ke? Nitiyisisile nili ka wena: Nkuku wungasiyimba, utava unikanetile kanharhu.” Timbilu ta n'wina tingakarhateki; pfumelani ka Xikwembu, ni le ka mina mipfumela. Tindhawu titele ndlwini ya Tatana wa mina; loko asvingaritano, anitava nimibzelile; kutani niyamilungisela kona. Loko niyile kuyamilungisela kona, nitavuya; kutani nitamiteka mita ka mina, lesvaku laha ninga kona, miva kona na n'wina. Kutani ndlela yoya laha niyaka kona mayitiva. Tomasi aku ka yena: “Hosi, laha uyaka kona ahikutivi; ni ndlela yakona hingayitivisa kuyini xana?” Yesu aku ka yena: “Hi mina ndlela, ni ntiyiso, ni vutomi; aku na munhu lweyi ataka ka Tatana, loko kungali ha mina. Loko mitiva mina, mitativa ni Tatana wa mina; kusukela svosvi, mamutiva, nasvona mimuvonile.” Filipi aku ka yena: “Hosi, hikombe Tatana, kutani svitava svihiringene.” Yesu aku ka yena: “I khale nili na n'wina, kasi ni svosvi awusinitiva, Filipi? Lweyi anivoneke, avonile Tatana; hikolaho ka yini uku: ‘Hi kombe Tatana’? Xana awupfumeli lesvaku ni le ka Tatana, ni lesvaku Tatana a le ka mina ke? Lesvi nimibzelaka svona asvihumi ka mina. Tatana lweyi anga ka mina, hi yena lweyi atirhaka mintirho leyi ya yena. Nipfumeleni loko niku ni le ka Tatana, ni lesvaku Tatana a le ka mina; loko minganikholwi, pfumelani hikolaho ka yona mintirho. “Nitiyisisile nili ka n'wina: Lweyi apfumelaka ka mina, na yena atayendla mintirho leyi niyiyendlaka; atayendla nileyitlulaka leyi, hikuva niya ka Tatana. Hinkwasvu lesvi misvikombelaka hi vito ra mina, nitasviyendla, lesvaku Tatana adzunisiwa ka N'wana. Loko mikombela ka mina xanchumu hi vito ra mina, nitaxiyendla.” “Loko minirhandza, mitahlayisa milawu ya mina. Nitakombela Tatana, kutani yena ataminyika Muchaveleli mun'wana, lweyi angatava na n'wina hilaha kungaheliki, anga Moya wa ntiyiso. Misava yingakala yingamuyamukeli, hikuva ayimuvoni, ayimutivi. N'wina mamutiva, hikuva atshama na n'wina, nasvona a le ndzeni ka n'wina. “Aningamisiyi mili svirhombe; nitata ka n'wina. Ndzhaku ka nkarhinyana, misava ayingahanivoni, kambe n'wina mitanivona. Lesvi nihanyaka, na n'wina mitahanya. Hi siku rakona, mitativa lesvaku ni le ka Tatana wa mina, ni lesvaku na n'wina mi le ka mina, kukotisa lesvi na mina ninga ka n'wina. Lweyi ayamukeleke milawu ya mina, kutani ayihlayisa, hi yena lweyi anirhandzaka; kutani lweyi anirhandzaka, atarhandziwa hi Tatana wa mina; na mina nitamurhandza, niva nitipfuletela ka yena” Yudasi (angali lweyi wa Iskariyota) aku: “Hi lesvoyini, Hosi, loko uku, utatipfuletela ka hina, kungali ka misava ke?” Yesu amuhlamula, aku: “Loko munhu anirhandza, atahlayisa rito ra mina, kutani Tatana wa mina atamurhandza, kutani hitata ka yena, hitshama na yena. Lweyi anganirhandziki, angahlayisi marito ya mina; kutani rito leri miritwaka, ahi ra mina, kambe i ra Tatana lweyi anirhumeke. “Nimitivisile svilo lesvi nahali na n'wina. Kambe Muchaveleli anga Moya Lowokwetsima lowu Tatana angatawurhuma hi vito ra mina, atamujondzisa hinkwasvu, ni kumutsundzuxa hinkwasvu lesvi nimibzeleke svona. “Nimisiyela kurhula, niminyika kurhula ka mina. Animinyiki hilaha misava yinyikaka hakona. Timbilu ta n'wina tingakarhateki, tingakhomiwi hi kuchava. Minitwile loko nite ka n'wina: ‘Nafamba, kutani nitatlhela nivuya niva na n'wina.’ Loko onge minirhandzile, ingi mitsakile hi lesvi niyaka ka Tatana, hikuva Tatana i nkulu kutlula mina. Nisvosvi, nimibzelile svilo lesvi, svingasihumelela, lesvaku loko svihumelela, mitakota kupfumela. Aningahavulavuli svotala na n'wina, hikuva mufumi wa misava leyi wata; kambe anga na matimba henhla ka mina. Hinkwasvu lesvi, svilava kukomba misava lesvaku nirhandza Tatana, ni lesvaku nitirha hilaha Tatana anileleteke hakona. Sukani miyima, ahifambeni hisuka la! “Hi mina nsinya wa xiviri wa mvhinya; murimi i Tatana wa mina. Rhavi rin'wana ni rin'wana leringa ka mina, leringavekiki mihandzu, warisusa; kambe rin'wana ni rin'wana lerivekaka mihandzu, warichaputela risaseka, lesvaku ritaveka mihandzu yotala. Ni svosvi n'wina misasekisiwile, hikolaho ka rito leri nimibzeleke rona. Tshamani ka mina, kukotisa lesvi na mina nitshamaka ka n'wina. Tani hi lesvi rhavi ringakotiki kuveka ha roxe loko ringanamarhelanga ka nsinya, na n'wina mingesvikoti loko minganinamarhelanga. Hi mina nsinya wa mvhinya; n'wina mimarhavi. lweyi atshamaka ka mina, kukota lesvi na mina nitshamaka ka yena, aveka mihandzu yotala; hikuva handle ka mina mingakala mingakoti kuyendla nchumu. Mani na mani lweyi angatshamiki ka mina, wa cukumetiwa handle tani hi rhavi leriomeke. Marhavi lawa yotanu mahlengeletiwa, kutani mahoxiwa ndzilweni mapsha. Loko mitshama ka mina, ni loko marito ya mina matshama ka n'wina kombelani hinkwasvu lesvi misvirhandzaka, kutani mitayendleliwa svona. Tatana wa mina adzunisiwa hi loko miveka mihandzu leyotala, kukombisa lesvaku mivajondzisiwa va mina va ntiyiso. “Tani hi lesvi Tatana anirhandzeke, na mina nimirhandzile; tshamani arirhandzwini ra mina. Loko mihlayisa milawu ya mina, mitatshama arirhandzwini ra mina, hilaha na mina nihlayiseke milawu ya Tatana wa mina, kutani nitshama arirhandzwini ra yena. “Nimibzelile timhaka leti, lesvaku kutsaka ka mina kuva ka n'wina ni lesvaku kutsaka ka n'wina kuva loku kuhetisekeke. Nawu wa mina hi lowu: Hi lesvaku mirhandzana, kukotisa lesvi na mina nimirhandzeke. Aku na munhu lweyi anga ni rirhandzu leritlulaka ra lweyi anyiketaka vutomi bza yena hikolaho ka vanghanu. Mivanghanu va mina loko miyendla lesvi nimibzelaka svona. Anahamivuli malandza, hikuva nandza angativi lexi n'winyi wa yena axiyendlaka; kambe nimivulile vanghanu, hikuva nimitivisile hinkwasvu lesvi nisvitweke ka Tatana wa mina. Ahi n'wina minihlawuleke; hi mina nimihlawuleke, kutani nimivekile lesvaku miya, miyaveka mihandzu, ni lesvaku mihandzu ya n'wina yiva kona masiku hinkwawu; kutani hinkwasvu lesvi mingatasvikombela ka Tatana hi vito ra mina, ataminyika svona. Lesvi nimibzelaka svona hi lesvaku mirhandzana. “Loko vanhu va misava vamivenga, tivani lesvaku varhangile vavenga mina, vangasivenga n'wina. Loko amili vanhu va misava, misava ayitarhandza sva yona. Kambe lesvi n'wina mingaliki va misava, ni lesvi nimihlawuleke ka yona, vanhu va misava vamivenga. Tsundzukani lesvi nimibzeleke svona, loko nite: ‘Nandza ahinkulu ka n'winyi wa yena.’ Loko vanixanisile, na n'wina vatamixanisa; loko vahlayisile rito ra mina, ni ra n'wina vatarihlayisa. Kambe vatayendla hinkwasvu lesvi ka n'wina hikolaho ka mina, hikuva avamutivi lweyi anirhumeke. Loko aningatanga nitavulavula na vona, avangatava ni nandzu; kambe svosvi ava na lexi vangatiponisaka ha xona nandzwini wa vona. Lweyi anivengaka, avenga na Tatana wa mina. Loko aningayendlanga, xikarhi ka vona, mintirho leyi yingasiki yendliwaka hi munhu ni mun'we, avangatava ni nandzu; kambe vayivonile mintirho ya mina, kutani vahivengile, mina na Tatana. Asvili lesvaku rito leringatsaliwa Nawini wa vona rihetiseka, leringe: ‘Vanivengile ntsena handle ka mhaka.’ “Siku kungatafika Muchaveleli lweyi ningatamurhumela yena ata hi le ka Tatana, anga Moya wa ntiyiso lowuhumaka ka Tatana, ataveka vumboni ha mina; na n'wina mitimboni ta mina, hikuva mive na mina kusukela kusunguleni. “Nimibzelile timhaka leti lesvaku mitakala mingakhunguvanyeki. Vatamihlongola masinagogeni; na svona, kutata nkarhi lowu mani na mini lweyi amidlayaka angatayanakanya lesvaku atirhela Xikwembu. Vatamiyendla svilo lesvi hikuva avahitivanga, hambi Tatana hambi mina. Kambe nimibzelile timhaka leti lesvaku loko nkarhi wa kuhumelela ka tona wufika, mitatsundzuka lesvaku nivulavulile hi tona ka n'wina. “Animibzelanga svilo lesvi kusunguleni, hikuva anahali na n'wina. Kambe svosvi niya ka lweyi anirhumeke, kutani aku na mun'we wa n'wina lweyi anivutisaka, aku: ‘Uya kwihi xana?’ Kambe hi mhaka ya lesvi nimibzeleke svilo lesvi, timbilu ta n'wina titele hi gome. Hambi svilitano, namibzela ntiyiso: Svitava svinene ka n'wina loko nifamba. Hikuva loko ningafambi, Muchaveleli angakala angati ka n'wina; kambe loko nifamba, nitamurhumela ata ka n'wina. Loko ata, atakholwisa misava hi ta kujoha, ni kululama, ni kuyavanyisa: Hi ta kujoha, hikuva avapfumeli ka mina; hi ta kululama, hikuva niya ka Tatana, kutani amingahanivoni; hi ta kuyavanyisa, hikuva mufumi wa misava leyi ayavanyisiwile. “Nahali ni lesvotala lesvi nifanelaka kumibzela svona, kambe svingamitikela svosvi. Kambe loko yena ata, anga Moya wa ntiyiso, atamifambisa ndleleni hinkwayu ya ntiyiso; hikuva angakala angavulavuli svohuma ka yena; kambe xin'wana ni xin'wana lexi axitwaka, ataxivula; nasvona atamitivisa lesvi svingatata. Atanidzunisa, hikuva lesvi amitivisaka svona, atava asvikuma ka mina. Hinkwasvu lesvi Tatana anga na svona, i sva mina; hi kolaho ningavula lesvaku, lesvi amitivisaka svona, atava asvikuma ka mina. “Ndzhaku ka nkarhinyana, amingahanivoni; kutani ndzhaku ka nkarhinyana kambe, mitanivona.” Van'wana xikarhi ka vajondzisiwa va yena vavutisana, vaku: “Xana avula yini, loko aku ka hina: ‘Ndzhaku ka nkarhinyana, aminganivoni, kutani ndzhaku ka nkarhinyana kambe, mitanivona’ ke? Nilesvi ange: ‘Hikuva niya ka Tatana’ ke?” Vayengeta vaku: “Xana avula yini, loko aku: ‘Ndzhaku ka nkarhinyana’, ke? Ahitivi lesvaku avula yini!” Yesu asvitivile lesvaku valava kumuvutisa, kutani aku ka vona: “Xana mivutisana hi letoyini xikarhi ka n'wina? Xana hi lesvi ningate: ‘Ndzhaku ka nkarhinyana, aminganivoni, kutani ndzhaku ka nkarhinyana kambe, mitanivona’ ke? Nitiyisisile nili ka n'wina: Mitarila miva mikolola, kambe misava yona yitatsaka; mitatwa kuvaviseka, kambe kuvaviseka ka n'wina kutahundzuka kutsaka. Loko wansati aveleka, atwa kuvava lokukulu, hikuva nkarhi wa yena wufikile; kambe loko avelekile n'wana, warivala maxangu ya yena hikolaho ka kutsaka, hi lesvi kungavelekiwa munhu misaveni. Svitano na n'wina: Mitwa kuvaviseka svosvi, kambe nitatlhela nimivona, kutani timbilu ta n'wina titatsaka, kutani aku na munhu lweyi angatamitekela kutsaka ka n'wina. “Hi siku rakona, amingahanivutisi nchumu. Nitiyisisile nili ka n'wina: Hinkwasvu lesvi mingatasvikombela ka Tatana hi vito ra mina, ataminyika svona. Kufika svosvi, amisikombela nchumu hi vito ra mina; kombelani, mitanyikiwa, lesvaku kutsaka ka n'wina kuva loku kuhetisekeke. “Nimibzelile timhaka leti hi kuvulavula hi svifaniso; kambe nkarhi wata, lowu ningataka ningahavulavuli na n'wina hi mukhuva lowu; kambe nitamibzela sva Tatana rivaleni ningarhendzeleki. Loko siku rakona rifika, mitakombela hi vito ra mina, kambe anivuli lesvaku nitamikombelela ka Tatana, hikuva Tatana hi yexe wa mirhandza. Amirhandza hikuva minirhandzile, miva mipfumela lesvaku nihuma ka Xikwembu. Nihumile ka Tatana, kutani nitile misaveni; svosvi nitlhela nisuka misaveni, niya ka Tatana.” Vajondzisiwa va yena vaku ka yena: “Aha! Svosvi uvulavula rivaleni ungarhendzeleki; awahavulavuli hi svifaniso. Svosvi hatwisisa lesvaku utiva svilo hinkwasvu, kutani asvifaneli lesvaku munhu akuvutisa nchumu; hikolaho ka svona, hapfumela lesvaku uhuma ka Xikwembu.” Yesu avahlamula, aku: “Svosvi mapfumela xana? Vonani, nkarhi wata, ni svosvi wufikile, lowu mingatahangalaka ha wona, mun'wana ni mun'wana atlhelela kaya ka yena, minisiya nilinoxe; hambi svilitano aninoxe, hikuva Tatana ana mina. Nimibzelile svilo lesvi lesvaku miva ni kurhula ka mina. La misaveni, mitava ni mahlomulu, kambe tiyani timbilu, nihlulile misava.” Yesu avulile timhaka leti. Kutani atlakusa mahlo, alanguta tilweni, aku: “Tatana, nkarhi wufikile; dzunisa N'wana wa wena, lesvaku N'wana akudzunisa. Hakunene, umunyikile vuhosi henhla ka vanhu hinkwavu, lesvaku hinkwavu lava umunyikeke vona, yena avanyika vutomi lebzingaheliki. Kambe vutomi lebzingaheliki, hi lesvaku vakutiva, wena ntsena unga Xikwembu xa ntiyiso, na Yesu Kriste lweyi umurhumeke. “Nikudzunisile laha misaveni, hi kuheta ntirho lowu uninyikeke wona lesvaku niwutirha. Svosvi Tatana, nidzunise mahlweni ka wena hi kudzuneka loku anili nakona ka wena, matilo ni misava svingasivakona. “Nikutivisile ka vanhu lava uninyikeke vona vali lavahlawuliweke misaveni; avali va wena; uninyikile vona, kutani vahlayisile rito ra wena. Svosvi vasvitiva lesvaku hinkwasvu lesvi uninyikeke svona, svihuma ka wena, hikuva nivanyikile marito lawa uninyikeke wona; vamayamukelile, kutani vajondzile hakunene lesvaku nihuma ka wena, kutani vapfumelile lesvaku nirhumiwile hi wena. Navakhongelela; anikhongeleli misava, kambe nikhongelela lava uninyikeke vona, hikuva i va wena. Hinkwasvu lesvinga sva mina, i sva wena; ni sva wena, i sva mina; kutani nidzunisiwile hikolaho ka svona. Anahali misaveni, kambe vona va laha misaveni, kutani nita koseyo ka wena. Tatana lweyi akwetsimeke, vahlayise hi matimba ya vito ra wena, leri uninyikeke rona, lesvaku vava mun'we kufana na hina. Loko nahali na vona, anivahlayisa hi matimba ya vito ra wena leri uninyikeke rona; nivabiyelelile, kutani akuvanga ni mun'we wa vona lweyi aloveke, loko angali munhu lweyi aafanela kulova, lesvaku Matsalwa mahetiseka. Svosvi nita koseyo ka wena, kutani nivula svilo lesvi nili misaveni, lesvaku kutsaka ka mina kuva loku kuhetisekeke ka vona. Nivanyikile rito ra wena, kutani vanhu va misava vavavengile, hikuva ahi va misava, tani hi lesvi na mina ningaliki wa misava. Anikombeli lesvaku uvasusa misaveni, kambe hi lesvaku uvalwela ka lweyi wobiha. Ahi va misava, tani hi lesvi na mina ningaliki wa misava. Vakwetsimisi antiyisweni; rito ra wena i ntiyiso. Tani hi lesvi unirhumeke misaveni, na mina nivarhumile misaveni. Kutani nitikwetsimisa hikolaho ka vona, lesvaku na vona vakwetsimisiwa antiyisweni. “Anikhongeleli vona ntsena, kambe nikhongelela ni lava vangatapfumela ka mina hi rito ra vona; ninavela lesvaku hinkwavu vava mun'we, kufana ni lesvi wena Tatana unga ka mina, na mina ninga ka wena, lesvaku na vona vava ka hina, kutani misava yitapfumela lesvaku unirhumile. Nivanyikile kudzuneka loku uninyikeke kona, lesvaku vava mun'we kufana na hina hinga mun'we: Mina ka vona, na wena ka mina, lesvaku vayendliwa lavahetisekeke, vakondza vava mun'we, kutani vanhu va misava vatativa lesvaku unirhumile, ni lesvaku uvarhandzile kufana ni lesvi unirhandziseke xisvona. Tatana, nilava lesvaku hinkwavu lava uninyikeke vona, vava na mina laha ninga kona; vatahamba vahlalela kukwetsima ka mina loku uninyikeke kona, hikuva unirhandzile misava yingasitumbuluxiwa. Tatana lweyi alulameke, misava ayikutivanga, kambe mina nikutivile, kutani vanhu lava vasvitivile lesvaku nirhumiwile hi wena. Nikutivisile ka vona; nahata kutivisa, lesvaku rirhandzu leri unirhandzeke ha rona, riva ka vona, na mina niva ka vona.” Loko Yesu avulile marito lawa, ahuma ni vajondzisiwa va yena, apelela xinkovanini xa xinambzana xa Kedroni. Akuli ni ntanga kolaho, kutani ayanghena kona ni vajondzisiwa va yena. Yudasi muxengi na yena aativa ndhawu liya, hikuva Yesu aatolovela kuhlengeletana ni vajondzisiwa va yena kona. Yudasi ateka ntlawa wa masochwa, ni valaveleli lava varhumiweke hi Vaprista lavakulu ni Vafarisi, vata ni tivoni ni svisosvani ni matlhari. Yesu, hi kutiva hinkwasvu lesvi svingatamuhumelela, ahuma aya ka vona, aku: “Milava mani xana?” Vamuhlamula, vaku: “Yesu wa Nazareta.” Yesu aku ka vona: “Hi mina lweyi!” Yudasi muxengi, na yena aayimile na vona kolaho. Loko Yesu ate ka vona: “Hi mina lweyi!” Vanhlehla hi xindzhakwandzhakwani, vayawa. Kutani avavutisa ka vumbirhi aku: “Milava mani xana?” Vaku: “Yesu wa Nazareta.” Yesu ahlamula aku: “Nimibzelile niku: ‘Hi mina lweyi.’ Loko kunene milava mina, tshikani lava, vatifambela.” (Asvili lesvaku rito leri angarivula rihetiseka, loko ate: “Anitshikanga ni mun'we wa lava uninyikeke vona, alova.”) Simoni Petrosi lweyi aali ni tlhari arihlomula, atsema mutirhi wa Muprista lwenkulu, amuxupula ndleve ya xinene. Vito ra xikarawa lexi avaku i Malko. Hi loko Yesu aku ka Petrosi: “Tlhelisa mesa wa wena ankotlotweni wa wona; xana aninganweli ndzhekweni lowu Tatana aninyikeke wona xana?” Ntlawa wa masochwa ni ndhuna leyikulu ya wona ni valaveleli va Vayuda, vakhoma Yesu, vamuboha. Kutani varhanga hi kumuyisa ka Anasi. N'wana waxisati wa Anasi aatekiwile hi Kayafasi, Muprista lwenkulu wa lembe lero. Hi yena Kayafasi lweyi angatshama atsundzuxa Vayuda lesvaku asvitayampsa loko munhu mun'we afela vanhu hinkwavu. Simoni Petrosi ni mujondzisiwa mun'we valandza Yesu; mujondzisiwa wakona aativiwa hi Muprista lwenkulu, kutani anghena hubzeni ya yindlo ya Muprista lwenkulu na Yesu. Kambe Petrosi aayimile handle nyangweni. Hi loko mujondzisiwa lweyi mun'wana lweyi ativiwaka hi Muprista lwenkulu, ahuma ayavulavula ni murhangeli waxisati lweyi aali mulanguteli wa nyangwa, kutani anghenisa Petrosi. Hi loko mutirhi lwiya waxisati aku ka Petrosi: “Xana awu mujondzisiwa wa munhu lweyi ke?” Aku: “Ani yena.” Svikarawa ni valaveleli avatshivelile ndzilo wa makhala, hikuva akuli ni xirhami; kutani avali karhi vaworha ndzilo; na yena Petrosi aayimile na vona, aworha ndzilo. Anasi Muprista lwenkulu avutisa Yesu hi ta vajondzisiwa va yena ni ta kujondzisa ka yena. Yesu amuhlamula, aku: “Nivulavulile rivaleni mahlweni ka vanhu hinkwavu. Nijondzisile minkarhi hinkwayu masinagogeni ni le Tempeleni, laha Vayuda hinkwavu vahlengeletanaka kona, anivulanga nchumu xihundleni. Hikolaho ka yini uvutisa mina? Vutisa lava vatweke lesvi ningavabzela svona; vona vasvitiva lesvi nisvivuleke.” Loko Yesu avulile svosvo, mun'wana wa valaveleli lweyi aayimile kolaho, aba Yesu hi mpama, aku: “Xana hi rona hlamulele ra wena ka Muprista lwenkulu ke?” Yesu amuhlamula, aku: “Loko ningavulavulanga khwatsi nikombi xihoxo xa mina, kambe loko nivulavulile hi nawu wakona, unibela yini xana?” Kutani Anasi amurhumela na abohiwile ka Kayafasi, Muprista lwenkulu mun'wana. Simoni Petrosi aayimile na ali karhi aworha ndzilo. Vaku ka yena: “Xana na wena awumun'we wa vajondzisiwa va yena ke?” Yena akaneta, aku: “Ani yena!” Mun'we wa xikarawa xa Muprista lwenkulu, xaka ra lweyi Petrosi amutsemeke ndleve, aku: “Xana anikuvonanga wena antangeni na uli na yena ke?” Petrosi atlhela akaneta; hi nomo-lo, nkuku wuyimba. Kutani vasuka na Yesu ka Kayafasi, vamuyisa ndlwini ya vuhosi. Akahali mpundzu svinene; vona hi voxe avanghenanga ndlwini ya vuhosi, kuyendlela lesvaku vangatinyamisi, vatakota kuja nkhuvu wa Paska. Hikolaho Pilato ahuma, aya ka vona, kutani aku: “Xana mihehla munhu lweyi hi nandzu wihi ke?” Vahlamula vaku ka yena: “Loko munhu lweyi aangajohanga, ahingatamutisa ka wena.” Pilato aku ka vona: “Mutekeni n'wina, miyamuthethisa hi nawu wa ka n'wina.” Vayuda vaku ka yena: “Nawu awuhipfumeleli kudlaya munhu.” (Lesvi akuli kuhetisa rito leri Yesu atshamaka arivula loko afanisa rifu leri angatafanela kufa ha rona.) Pilato atlhela anghena ndlwini ya vuhosi, avitana Yesu, aku ka yena: “Xana hi wena hosi ya Vayuda ke?” Yesu ahlamula, aku: “Xana lesvi usvivulaka, svihuma ka wena, kumbe uyobzeliwa hi van'wana vanhu ke?” Pilato ahlamula aku: “Xana ni Muyuda mina ke? Vanhu va ka wena ni Vaprista lavakulu hi vona vakutiseke ka mina. Uyendlile yini xana?” Yesu ahlamula, aku: “Mfumu wa mina ahi wa misava leyi; loko awuli wa misava leyi, malandza ya mina amatalwa lesvaku ninganyiketiwi ka Vayuda; kambe hilaha svinga hakona, mfumu wa mina ahi wa laha misaveni.” Pilato aku ka yena: “Hikolaho, u hosi, ahi svona ke?” Yesu ahlamula, aku: “Kuvula wena lesvaku ni Hosi. Lesvi nipsaleliweleke svona ni lesvi ningatela svona laha misaveni, i kuta nitaveka vumboni henhla ka ntiyiso. Mani na mani lweyi anga wa ntiyiso, ayingisa rito ra mina.” Pilato aku ka yena: “Ntiyiso i ncini?” Loko avulile svosvo, ahuma kambe aya ka Vayuda, aku ka vona: “Anivoni nandzu ni wun'we ka yena.” “Kambe n'wina mi ni ntolovelo wa kuva nimitshunxela munhu mun'we hi nkarhi wa Paska; xana milava lesvaku nimitshunxela hosi ya Vayuda ke?” Vahlamula hi kuhuwelela, vaku: “Kungave munhu lweyi, kambe Barabasi!” (Kasi Barabasi aali xigevenga.) Kutani Pilato ateka Yesu, amunyiketa lesvaku vamuba. Kutani masochwa maluka hari ya mintwa, mayitlhanteka nhlokweni ya yena, mamuyambexa xiyambalu xovangama xa xivunguvungu; matshinela kusuhi na yena maku: “Xeweni, Hosi ya Vayuda!” Kutani mamuba hi timpama. Pilato atlhela ahuma, aku ka Vayuda: “Vonani, nimihumesela yena, mitativa lesvaku anikumi nandzu niwun'we ka yena” Yesu ahuma, na atlhantekiwile hari ya mintwa nhlokweni, na ayambalile xiyambalu xovangama xa xivunguvungu. Pilato aku ka vona: “Vonani, hi yelweyi munhu wa n'wina!” Loko Vaprista lavakulu ni valaveleli vamuvona, vahuwelela, vaku: “Muvambe! Muvambe!” Pilato aku ka vona: “Mutekeni, n'wina hi n'wexe, miyamuvamba; hikuva mina anikumi nandzu ka yena.” Vayuda vamuhlamula, vaku: “Hi ni nawu, kutani hi nawu wa hina afanele kufa, hikuva atiyendlile N'wana wa Xikwembu.” Loko Pilato atwa mhaka leyi, achava ngopfu, atlhelela ndlwini ya vuhosi, aku ka Yesu: “Uhuma kwihi xana?” Yesu angamuhlamuli. Pilato aku ka yena: “Xana wayala kuvulavula na mina ke? Xana awusvitivi lesvaku ni ni matimba ya kukutshunxa, ni matimba ya kukuvamba ke?” Yesu ahlamula, aku: “Awungatava ni matimba henhla ka mina nikutsongo, loko awungamanyikiwanga hi le henhla. Hikolaho, lweyi anga ni nyiketa ka wena, aninandzu lowukulu ngopfu.” Loko Pilato atwa mhaka leyi, alava ndlela yomutshunxa; kambe Vayuda vahuwelela, vaku: “Loko utshunxa munhu lweyi, awumunghana wa hosi Khezari; mani na mani lweyi atiyendlaka hosi, alwa na Khezari.” Loko Pilato atwa marito wolawo, ahumesa Yesu handle, kutani atshama xitulwini xa kuyavanyisa, ndhawini leyi vange i “Xiyandlala hi maribze” (hi ririmi ra Xiheberu i “Gavata”). Arili siku ra kulungisela Paska, kutani awulava kuva nkarhi wa vuntlhanu na wun'we. Hi loko Pilato aku ka Vayuda: “Vonani, hi leyi Hosi ya n'wina!” Vona vahuwelela, vaku: “Mususe! Mususe! Muvambe!” Pilato aku ka vona: “Xana nitavamba hosi ya n'wina ke?” Vaprista lavakulu vahlamula, vaku: “Ahi na hosi loko angali Khezari ntsena.” Hi loko Pilato avanyiketa Yesu, lesvaku ayavambiwa. Vateka Yesu, kutani ahuma na atirwalele xihambanu xa yena, aya ndhawini leyi avaku i “Ndhawu ya Pala”, leyi hi Xiheberu vange i “Gologota”. Vamuvamba kolaho, na ali ni van'wana vambirhi, mun'we hi tlhelo rin'wana, mun'wana hi tlhelo lerin'wana, Yesu ali xikarhi. Pilato atsala ni papela ra xitiviso, arinameka henhla ka xihambanu. Lesvi asvitsaliwile hi lesvi: “Yesu wa Nazareta, Hosi ya Vayuda.” Vayuda lavotala vajondza papela lero, hikuva ndhawu leyi Yesu angavambiwela ka yona, ayili kusuhi ni doropa; na svona, papela aritsaliwile hi Xiheberu, ni Xilatini, ni Xigirika. Hikolaho Vaprista lavakulu va Vayuda vaku ka Pilato: “Ungatsali svaku: ‘Hosi ya Vayuda’, kambe tsala uku: ‘Hi yena lweyi angate: Ni Hosi ya Vayuda’.” Pilato ahlamula, aku: “Lexi ningaxitsala, nixitsalile!” Loko masochwa mavambile Yesu, vateka sviyambalu sva yena, vasviyavanyisa hi mambutsa ya mune, vaphakana ha wona; vateka ni nkhancu, kambe nkhancu wakona awungarhungiwanga, awulukiwile wuli nguvu yin'we kusukela henhla kufikela hansi. Kutani vabzelana, vaku: “Hingawuhandzuleni, kambe ahihlahluveni hi tinhlolo, hitativa lesvaku wutava wa mani.” Lesvi akuli kuhetisa Tsalwa leringe: “Vayavelane sviyambalu sva mina, vasvihlahluva hi nhlolo.” Hi lesvi masochwa mangayendla svona. Nkarhini wolowo, mamana wa Yesu, ni makwavu Mariya, nsati wa Klopasi, na Mariya wa Magadala, avayimile kusuhi ni xihambanu. Yesu avona mamana wa yena, avona ni mujondzisiwa lweyi aamurhandza na ayimile kusuhi na yena, kutani aku ka mamana wa yena: “Wansati, vona, n'wana wa wena hi lweyi!” Kutani aku ka mujondzisiwa: “Vona, mamana wa wena hi lweyi!” Kusukela nkarhi wolowo, mujondzisiwa lweyi amuyamukela, amurhurhela kaya ka yena. Yesu, hi kutiva lesvaku svilo hinkwasvu svihetisekile, aku: “Ni ni torha”, kuli kuhetisa Matsalwa. Mbita leyi ayitele hi ntsuvi ayivekiwile kolaho, kutani vapeta xiponjhi xitala hi ntsuvi, vaxitlhoma ka rihlanga ra nsinya wa hisopa, vayisa non'weni wa yena. Loko Yesu anwile, akuma lesvaku i ntsuvi, aku: “Svihetisekile.” Kutani akorhamisa nhloko, afa. Arili siku leri rhangelaka Savata. Hikolaho, Vayuda vakombela Pilato lesvaku milenge ya lava vavambiweke yitshoviwa, ni lesvaku mintsumbu yihawuliwa; lesvi akuli kuyendlela lesvaku yingasali xihambanwini hi Savata, hikuva siku rakona ra Savata arili lerikulu. Hi loko masochwa mata, matshova milenge ya lweyi worhanga ni lweyi mun'wana wa vumbirhi. Kutani vata ka Yesu, kambe loko vavona lesvaku afile, avamutshovanga milenge. hambi svilitano, mun'we wa masochwa amutlhava rheve hi tlhari, kutani hi nomo-lo kuhuma ngati ni mati. Lweyi asvivoneke, avula vumboni lesvaku na n'wina mitakota kupfumela. Vumboni bza yena bzitiyile, kutani wasvitiva lesvaku avula ntiyiso. Hakunene timhaka leti tihumelelile lesvaku Tsalwa rihetiseka, leringe: “Aku na rhambu ni rin'we ra yena leringatatshoviwa.” Nakambe Tsalwa rin'wana rili: “Vatahlalela lweyi vamutlhaveke.” Ndzaku ka svosvo, Yosefa wa Arimatiya akombela ka Pilato akumpfumeleliwa kuyahawula ntsumbu wa Yesu. Yosefa lweyi aali mujondzisiwa wa Yesu, kambe xihundleni, hi kuchava Vayuda. Kutani Pilato amupfumelela. Hi loko ayahawula ntsumbu wa Yesu. Nikodema, lweyi atshamaka ata nivusiku ka Yesu, na yena afika atisa mafurha ya mira lawa mapatsanyesiweke ni mhangana, lawa malavaka kuringana makume manharhu ya makilu (30 kg) kutika ka wona. Kutani vateka ntsumbu wa Yesu, vawuphutsela hi malasoro lawa amacheliwile mafurha yonun'hwela, hi mukhuva lowu Vayuda valahlaka ha wona. Akuli ni ntanga ndhawini leyi angavambiwa ka yona, kutani laha ntangeni akuli ni sirha lerimpsha, leri akungasilahliwa munhu ka rona. Valata Yesu kona, hikolaho ka lesvi Vayuda avatilungisela Savata, hikuva sirha arili kusuhi. Ni mpundzu wa siku ra Sonto, loko ka haphumile, Mariya wa Magadala aya sirheni, kutani ayakuma lesvaku ribze risusiwile non'weni wa sirha. Hi loko atsutsuma, aya ka Simoni Petrosi, ni ka mujondzisiwa lweyi mun'wana lweyi aarhandziwa hi Yesu, kutani aku ka vona: “Vasusile Hosi sirheni, kutani ahitivi lomu vangamulata kona.” Hi loko Petrosi ni mujondzisiwa lweyi mun'wana vasuka vakongoma sirheni. Vatsutsuma svin'we ha vambirhi; kambe mujondzisiwa lweyi mun'wana asiya Petrosi hi kutsutsuma, arhanga ayafika sirheni. Akorhama ahlometela, kutani avona malasoro na mali hansi; kambe anganghenanga. Simoni Petrosi lweyi aasale ndzhaku, na yena atafika, kutani anghena sirheni, avona malasoro na mali hansi; kambe faduku leri aritsondzihelile nhloko ya Yesu, aringali svin'we ni malasoro kambe alipetsiwile, rivekiwa hi tlhelo. Ndzhaku ka svosvo mujondzisiwa lweyi mun'wana, lweyi angarhanga afika sirheni, na yena anghena asvivona, kutani apfumela. (Hikuva avangasitwisisa Tsalwa lerivulaka lesvaku Yesu aafanele kupfuka kufeni.) Hi loko vajondzisiwa vatlhelela makaya. Mariya aayimile kusuhi ni sirha handle, arila. Loko akorhama kuhlometela sirheni na ali karhi arila, avona tintsumi timbirhi letiyambaleke svobasa, na titshamili, yin'we hi le tinhlokweni, yin'wana hi le milengeni, laha ntsumbu wa Yesu awulatiwile kona. Tiku ka yena: “Wansati, urilela yini?” Aku ka tona: “Vasusile Hosi ya mina, kutani anitivi lomu vayilateke kona.” Loko avulise svosvo, ahundzuluka, kutani avona Yesu na ayimile, kambe angasvitivanga lesvaku i Yesu. Yesu aku ka yena: “Wansati, urilele yini? Ulava mani xana?” Yena, hi kuyehleketa lesvaku i mutirhi wa laha ntangeni, aku ka yena: “Hosi yanga, loko umususile, nibzele laha umulateke kona, kutani nitaya, niyamuteka.” Yesu aku ka yena: “Mariya!” Yena ahundzukula, aku ka Yesu, hi ririmi ra Xiheberu: “Rabuni!” (Hi lesvaku “Mujondzisi”). Yesu aku ka yena: “Unganikhomi, hikuva anisitlhantukela ka Tatana; kambe yana ka vamakwerhu, uyavativisa lesvaku nitlhantukela ka Tatana wa mina, anga Tatana wa n'wina, ka Xikwembu xa mina, xinga Xikwembu xa n'wina.” Mariya wa Magadala ayabzela vajondzisiwa lesvaku avonile Hosi, ni lesvaku yimubzelile timhaka teto. Nimajambu ya siku lero ra Sonto, svipfalu sva laha vajondzisiwa avahlengeletanile kona asvipfaliwile, hikolaho ka kuchava Vayuda. Yesu afika, ayima xikarhi ka vona, kutani aku ka vona: “Kurhula akuve na n'wina!” Loko avulise svosvo, avakomba sviyandla sva yena ni rheve ra yena. Vajondzisiwa vatsaka ngopfu loko vavona Hosi. Yesu atlhela aku ka vona: “Kurhula akuve na n'wina! Tani hi lesvi Tatana anirhumeke, na mina namirhuma.” Loko avulise svosvo, avahuhutela, aku: “Yamukelani Moya Lowokwetsima. Loko mirivalela vanhu svijoho sva vona, vatarivaleliwa hakunene; loko mingarivaleli vanhu svijoho sva vona, avangarivaleliwi.” Tomasi, lweyi vange i “Hahla”, mun'we wa lava va khume ni vambirhi, aangali na vona loko Yesu atile. Kutani vajondzisiwa lava van'wana vaku ka yena: “Hivonile Hosi.” Yena aku ka vona: “Loko ningavoni timbanga ta svipikirhi sviyandleni sva yena, ni loko ninganghenisi ritiho ra mina timbangeni ta svipikirhi, ninghenisa ni xiyandla rheveni ra yena, ningakala ningapfumeli.” Loko kuhundzile masiku ya ntlhanu ni manharhu, vajondzisiwa vatlhela vava kona ndlwini. Tomasi na yena aali na vona. Yesu ata, svipfalu asvipfaliwile, ayima xikarhi ka vona, aku: “Kurhula akuve na n'wina!” Kutani aku ka Tomasi: “Tisa ritiho ra wena laha, ulanguta ni sviyandla sva mina; tshambuluta xiyandla xa wena, uxinghenisa rheveni ra mina; ungahakanakani, kambe pfumela!” Tomasi amuhlamula, aku: “Hosi yanga ni Xikwembu xanga!” Yesu aku ka yena: “Xana upfumela hi lesvi unganivona ke? Vakatekile lava vapfumelaka, hambi loko vangavonanga.” Yesu ayendlile mahlori man'wana lawa yotala mahlweni ka vajondzisiwa va yena, lawa amatsaliwanga bukwini leyi. Kambe timhaka leti titsaleliwile n'wina, lesvaku mitakota kupfumela lesvaku Yesu i Kriste, N'wana wa Xikwembu, ni lesvaku, hi mhaka ya kupfumela, miva ni vutomi vitweni ra yena. Ndzaku ka svilo lesvi hinkwasvu, Yesu atlhela atikomba ka vajondzisiwa va yena kusuhi ni tiva ra Tiberiya; atikombile hi ndlela leyi: Simoni Petrosi, na Tomasi lweyi vango i “hahla”, na Nataniele wa Kana tikweni ra Galileya, ni vana va Zebedeya, ni vajondzisiwa vambirhi van'wana va Yesu, avali svin'we. Simoni Petrosi aku ka vona: “Niyarhiya tihlampfi.” Vaku ka yena: “Na hina hifamba na wena.” Kutani vasuka, vayanghena botini ra vona, kambe avaphasanga nchumu vusiku lebzo. Loko risungula kuxa, Yesu aayimile ribuweni, kambe vajondzisiwa avativanga lesvaku i Yesu. Kutani Yesu aku ka vona: “Vana vanga, miphasile xana?” Vamuhlamula, vaku: “Ahihim.” Aku ka vona: “Hoxelani rikoka hi tlhelo ra xinene ra boti, mitaphasa.” Hi loko varihoxa, kutani vatsandzeka ni kurikoka hikolaho ka kutala ka tihlampfi. Kutani mujondzisiwa lweyi Yesu aamurhandza aku ka Petrosi: “I Hosi!” Loko Simoni atwile lesvaku i Hosi, ayambala xiyambalu xa yena, hikuva aaxihlivilile, kutani apela tiveni. Kambe vajondzisiwa lava van'wana vata hi boti ra vona, vakoka rikoka leri aritele hi tihlampfi, hikuva avangali kule ni ribuwa; mpfhuka wakona awulava kuringana madzana mambirhi ya mametru (200 m). Loko vahumile vata ribuweni, vavona ndzilo wa makhala, ni tihlampfi letitlhantekiweke henhla ka wona, ni xinkwa. Yesu aku ka vona: “Pambulani tihlampfi tin'wana ka leti mahakuti phasaka svosvi, mitisa halenu.” Simoni Petrosi anghena botini, akokela rikoka ribuweni, na ritele hi tihlampfi letikulu. Atili dzana ni ntlhanu wa makume na manharhu (153) wa tona. Kambe hambilesvi atitele ngopfu, rikoka alihandzukanga. Yesu aku ka vona: “Tanani, mitafihlula.” Kambe akuvanga ni mujondzisiwa ni mun'we lweyi angamutiyela kumuvutisa aku: “U mani?”, hikuva vasvitivile lesvaku hi yena Hosi. Kutani Yesu ata, ateka xinkwa avanyika; ayendlisa xisvosvo ni tihlampfi. Kutikomba loku ka Yesu ka vajondzisiwa va yena, akuli ka vunharhu, ndzhaku ka loko apfukile kufeni. Kuteloko vafihlulile, Yesu aku ka Simoni Petrosi: “Simoni, n'wana Yohani, xana wanirhandza kutlula lava hinkwavu ke?” Aku ka yena: “Ina, Hosi, wa svitiva lesvaku nakurhandza.” Yesu aku ka yena: “Risa svinyempfana sva mina.” Atlhela ra vumbirhi aku ka yena: “Simoni, n'wana Yohani, xana wanirhandza ke?” Aku ka yena: “Ina, Hosi, wa svitiva lesvaku nakurhandza.” Yesu aku ka yena: “Hlayisa tinyempfu ta mina.” Atlhela ra vunharhu aku ka yena: “Simoni, n'wana Yohani, xana wanirhandza ke?” Petrosi akhomiwa hi gome, hi mhaka ya lesvi amuvutiseke ra vunharhu aku: “Xana wanirhandza ke?” Kutani aku ka yena: “Hosi, utiva hinkwasvu, wa svitiva lesvaku nakurhandza.” Yesu aku ka Petrosi: “Risa tinyempfu ta mina. Nitiyisisile hakunene nili ka wena: Nkarhini lowu awahali lweyi mumpsha, awuyambala hi wexe, uya lomu ulavaka kuya kona; kambe loko utava ugugile, utatsandzavuta mavoko ya wena, kutani mun'wana atakuyambexa, akuyisa lomu ungalaviki kuya kona.” Aavulisa svosvo hi kuringanisa rifu leri Petrosi angatadzunisa Xikwembu ha rona. Loko Yesu avulile svosvo, aku ka yena: “Nilandze!” Petrosi ahundzukula, kutani avona mujondzisiwa lweyi aarhandziwa hi Yesu na ali karhi avalandza. (Aali lweyi atshamaka akhigela ka Yesu, loko vali kujeni, ahlevetela aku: “Hosi, i mani lweyi angatakuxenga xana?”) Loko Petrosi amuvonile, aku ka Yesu: “Hosi, svitakuyini hi lweyi ke?” Yesu aku ka yena: “Loko nilava lesvaku atshama nikondza nivuya, svingava yini ka wena ke? Wena, nilandze!” Hikolaho rito leri angalivula rihangalaka xikarhi ka vamakwavu lesvaku mujondzisiwa lwiya, angakala angafi. Kasi Yesu angamubzelanga lesvaku angakala angafi; kambe ate: “Loko nilava lesvaku atshama nikondza nivuya, svingava yini ka wena ke?” Mujondzisi lweyi, hi yena lweyi avulaka vumboni bza timhaka leti, kutani atitsalile. Hasvitiva lesvaku vumboni bza yena bzitiyile. Kahali ni timhaka tin'wana letotala leti Yesu angatiyendla; loko atiyotsaliwa ha yin'we ni yin'we, anitshembi lesvaku misava hinkwayu ayitaringana tibuku leti atitatsaliwa. Ka Tiyofilo! Bukwini ya mina leyakusungula, nitsalile hi ta svilo hinkwasvu lesvi Yesu angasungula kusviyendla ni kusvijondzisa, kuyafika siku leri angatlhantukisiwa ha rona aya tilweni, loko aleletile, hi Moya Wokwetsima, vapostola lava aavahlawulile. Ndzhaku ka loko axanisiwile, atikombile ka vona ali lweyi ahanyaka hi svikombiso lesvotala lesvikholwisaka; avoniwile hi vona, hi masiku ya mune wa makume, na ali karhi avulavula na vona hi ta Mfumu wa Xikwembu. Siku rin'wana, loko ali na vona, avabzela aku: “Mingatshukeni misuka Yerusalema, kambe tshamani kona, milangutela lesvi Tatana amitshembiseke svona, lesvi mingasvitwa nisvihlaya, hikuva Yohani aakhuvula hi mati, kambe n'wina mitakhuvuliwa hi Moya Wokwetsima, ndzhaku ka masiku mangali mangani.” Kutani loko vaha hlengeletanile na vali na Yesu, vamuvutisa vaku: “Hosi, xana hi wona nkama lowu ungatapfuxa mfumu wa Israyele ke?” Yesu aku ka vona: “Asvimifanelanga kutiva tinguva, hambi yili minkama leyi Tatana angatihlawulela yona hi vukulukumba bza yena; kambe mitanyikiwa matimba, siku leri Moya Wokwetsima wungatata henhla ka n'wina; kutani mitava timboni ta mina kola Yerusalema, ni le tikweni hinkwaru ra Yudeya, ni ra Samariya, ni kuyafika magan'wini ya misava.” Loko avulavulile timhaka leto, atlhantukisiwa na vamuvona, kutani refu rimusiva, vangahamuvoni. Navaha tlakusile mahlo valanguta tilweni loko ali karhi atlhantukisiwa, xikan'we kufika vavanuna vambirhi lavayambaleke sva kubasa, vahumelela kola vangakona, vaku: “Vavanuna va Galeliya, miyimela yini na milangutile tilweni ke? Yesu lweyi asusiweke xikarhi ka n'wina ni kutlhantukisiwela tilweni, atatlhela avuya hi ndlela leyi mingamuvona aya tilweni ha yona.” Kutani loko vasuka ntshaveni leyi vange i ya Maolivhera, vatlhelela Yerusalema, mpfhuka wakona wuli wa kolomu ka kilometru rin'we. Kuteloko vanghenile muntini, vakhwela ndlwini ya le henhla, laha avatshama kona. Aku na Petrosi, na Yohani, na Yakobe, na Andreya, na Filipi, na Tomasi, na Bartolomewu, na Matewu, na Yakobe n'wana Alfewu, na Simoni Muhiseki, na Yudasi n'wana Yakobe. Volavo hinkwavu avatiyisela kukhongeleni, hi mbilu yili yin'we, vali ni vavasati van'wana, na Mariya mamana wa Yesu, ni vamakwavu va Yesu. Hi masiku wolawo, Petrosi ayima nhlengeletanweni ya vamakwavu Hosini (lava nhlayo ya vona ayilava kuva dzana ni makume mambirhi (120) ), kutani aku: “N'wina valekwerhu, svafanela lesvaku Tsalwa rihetiseka, leri Moya Wokwetsima wungarivula hi nomo wa Davhida, mayelano na Yudasi lweyi aali mufambisi wa lavakhomeke Yesu. Kasi Yudasi aahlayiwa xikarhi ka hina, nasvona aali mun'we wa hina ntirhweni.” (Yudasi aatixavele nsimu hi male leyi aayikumile hi ndlela yohomboloka; kutani ayile ayawa hinhloko nsin'wini yakona, ahandzuka hi le xikarhi, marhumbu ya yena mahuma hinkwawu. Mhaka leyi yitiviwile hi vanhu hinkwavu lavayakeke Yerusalema; hikokolaho vangachula nsimu leyi vito ra “Hakeldama” hi ririmi ra xiheberu, hi lesvaku “Nsimu ya Ngati”.), Kutani, bukwini ya Tipisalema, kutsaliwile lesvi: “‘Munti wa yena awuhundzuke rhumbi, kungahavi ni munhu lweyi atshamaka kona!’ Nakambe: ‘Mun'wana aateke vulanguteli bza yena.’ “Hikolaho-ke, kulaveka munhu mun'we ka vavanuna lava avali na hina minkameni hinkwayu leyi Hosi Yesu angatshama na hina ni kufambafamba na hina, kusukela nkameni lowu Yohani aakhuvula vanhu, kufikela loko Yesu atlhatukisiwile ayahenhla, asuka xikarhi ka hina; munhu wakona afanele kuva mboni ya kupfuka ka Hosi kufeni, svin'we na hina.” Hi loko vahumesa vambirhi: Yosefa lweyi avaku i Barsaba (rin'wana avaku i Yusto), na Matiyasi. Kutani vakhongela, vaku: “Hosi, wena lweyi ativaka timbilu ta vanhu hinkwavu, kombisa lweyi umuhlawuleke ka lava vambirhi, lesvaku ateka ndhawu ya Yudasi, ntirhweni wa vapostola lowu awutshikeke aya lomu angaya kona.” Kutani vanghenisa mavito lawa mambirhi vahlahluva tinhlolo kukuma musivi, kutani kuhumelela vito ra Matiyasi; kutani ahlayiwa svin'we ni vapostola lava va khume ni mun'we. Loko siku ra Pentekoxta rifikile, vajondzisiwa hinkwavu avahlengeletanile ndhawini yin'we. Kutani hi nomo-lo, kutwakala mpfumawulu lowuhumaka tilweni, wufana ni kuhunga ka xidzedze, wutata yindlo hinkwayu leyi avatshamile ka yona. Kutani vavona lesvifanaka ni malangavi ya ndzilo, sviyavana, svitshama henhla ka mun'wana ni mun'wana wa vona. Hinkwavu vatala hi Moya Wokwetsima, kutani vasungula kuvulavula hi tindzimi tin'wana, hilaha Moya wungavanyika kuvulavula hakona. Akulini Vayuda lavayakeke Yerusalema, vanhu vochava Xikwembu lavahumaka matikweni hinkwawu ya laha misaveni. Loko mpfumawulu lowu wutwakala, ntshungu wuhlengeletana, kutani wuhlamala ngopfu, hikuva mun'wana ni mun'wana aatwa vajondzisiwa vavulavula hi ririmi leringa ra yena. Kutani hinkwavu vatshuka ni kuhlamala vaku: “Xana vanhu lavavulavulaka, ahi Vagalileya hinkwavu ke? Sviyendlisa kuyini loko mun'wana ni mun'wana wa hina avatwa vavulavula hi ririmi leringa ra yena ke? Van'wana va hina, i Vaparta ni Vameda ni Vayelamu; van'wana va hina, vahuma Mesopotamiya, ni le Yudeya ni le Kapadokiya, ni le Ponto ni le Aziya, le Frixjiya ni le Pamfiliya, le Gibita ni le matlhelweni ya Libiya lawa manga kusuhi na Kirene; ku ni vayendzi lavahumaka Roma: Van'wana i Vayuda, van'wana i vamatiko lavayamukeliweke Xiyudeni; van'wana va hina i Vakreta ni Vaarabiya; kambe hinkwerhu hivatwa vavula mintirho leyikulu ya Xikwembu hi tindzimi ta hina!” Kutani hinkwavu vatshuka ni kuhlamala ngopfu, vavutisana vaku: “Mhaka leyi yihiyisa kwihi xana?” Kambe van'wana vahleka vajondzisiwa vaku: “Vanhu lava vadakwile!” Hi loko Petrosi ayima kun'we ni vapostola lavan'wana va khume ni mun'we, atlakusa rito aku ka vona: Vavanuna va Yudeya, na n'wina hinkwenu vayaki va Yerusalema, nilombeni tindleve mitativa lesvi: Vanhu lava avadakwanga, hilaha mipimisaka hakona, hikuva wahali mixo. Kambe i mhaka leyihlayiweke hi muprofeta Yowele, loko aku: “‘Xikwembu xili: Hi masiku ya makumu, nitachela Moya wa mina henhla ka vanhu hinkwavu.’” Vana va n'wina vaxinuna ni vaxisati vatavhumba, vana va n'wina va majaha vatavona svivono, svikoxa sva n'wina svitalorha milorho. Ina, hambi svili svitirhi sva n'wina sva xinuna ni sva xisati, minkameni yoleyo, nitasvichela Moya wa mina, kutani svitaprofeta. Nitayendla svihlamaliso henhla tilweni, ni mahlori hansi misaveni: Ngati, ni ndzilo, ni refu ra musi. Jambu ritahundzuka ra ntima, ni n'weti wutapshuka kufana ni ngati, na siku lerikulu ra kuphatima ra Hosi ringasifika. “Kutani mun'wana ni mun'wana lweyi angatahuwelela ka Hosi, ataponisiwa.” Vavanuna va Israyele, yingisani marito lawa: Yesu wa Nazareta, aali wanuna lweyi Xikwembu xingamikomba yena, hi mintirho ya matimba, ni svihlamaliso, ni mahlori lawa ximayendleke ha yena xikarhi ka n'wina hilaha misvitivaka hakona na n'wina; hi yena lweyi anganyiketiwa, hi makungu lawa matiyeke ya Xikwembu ni kutiva ka xona ka khale; kutani mimudlayile hi mavoko ya vanhu lavokala vangalulamanga lavangamuvamba xihambanwini. Kambe Xikwembu ximupfuxile kufeni, ximutshunxa kuvavisekeni ka rifu, hikuva asvingayendleki lesvaku abohiwa ha rona. Loko Davhida avulavula hi yena, ate: “‘Minkama hinkwayu, nirhangisa Hosi mahlweni ka mina; ningakala ningatsekatseki, hikuva yi le vokweni ra mina ra xinene.’” Hikolaho mbilu ya mina yitsakile, niba nkulungwana, na wona miri wa mina wuhlayisekile, kutani ni ni kulangutela: We Hosi, ungenirivali ndhawini ya vafi, ungetshiki Muhlawuliwa wa wena ahela hi kubola. Unitivisile tindlela ta vutomi, utanitata hi kutsaka, uva na mina. “N'wina vamakwerhu, ningatiyisa nimibzela lesvaku Kokwana Davhida afile, ava alahliwa, kutani sirha ra yena rahali xikarhi ka hina ni namuntlha.” Hambi svilitano, aali muprofeta; nasvona aativa lesvaku Xikwembu ximutshembisile hi kuhlambanya lesvaku xitaveka mun'wana wa rixaka ra yena xiluvelweni xa yena. Hikolaho Davhida, hi kuvona svilo svingasina humelela, ahlayile takupfuka ka Mesiya kufeni, loko aku: “‘Angatshikiwanga ndhawini ya vafi, na wona miri wa yena awuhelanga hi kubola.’” “Hi yena Yesu lweyi Xikwembu xingamupfuxa kufeni, kutani hinkwerhu hi timboni ta mhaka leyi.” Svosvi-ke atlhantukisiwile aya vokweni ra xinene ra Xikwembu; ayamukele Moya Wokwetsima lowutshembisiweke, wunga lowuhumaka ka Tatana, kutani achelile henhla ka hina lesvi misvivonaka ni lesvi misvitwaka. Hikuva Davhida angatlhantukelanga tilweni, kambe hambi svilitano yena ate: Yehovha Xikwembu xite ka N'winyi wa mina: Tshama vokweni ra mina ra xinene, kukondza niveka valala va wena hansi ka minkondzo ya wena. “Hikolaho rixaka hinkwaru ra Vaisrayele rifanele kutiva mhaka leyi svinene lesvaku Yesu lweyi mingamuvamba, hi yena lweyi Xikwembu ximuyendleke Hosi ni Mesiya.” Kuteloko vanhu vayingisile marito lawa, vatlhaveka timbilu; kutani vaku ka Petrosi ni ka vapostola lavan'wana: “N'wina valekwerhu, xana hitayendla yini?” Petrosi aku ka vona: “Hundzukani, kutani mun'wana ni mun'wana wa n'wina akhuvuliwa hi vito ra Yesu Kriste, lesvaku mirivaleliwa svijoho sva n'wina; kutani mitayamukela nyiko, wunga Moya Wokwetsima, hikuva xitshembiso lexi xiyendleliwe n'wina ni vana va n'wina, ni va le kule hinkwavu lavangatavitaniwa hi Yehovha, Xikwembu xa hina.” Petrosi atiyisa vumboni bza yena hi marito man'wana lawa yotala, avakhongotela aku: “Hambanani ni rixaka leri rohomboloka lesvaku mitapona.” Hi loko lavayamukeleke marito ya yena, vakhuvuliwa; kutani sikwini lero, kuyamukeliwa vanhu lavalavaka kuva makhulu manharhu (3 000). Avachivirika tijondzweni ta vapostola, kuhlengeletaneni, akukhemeni ka xinkwa, ni le kukhongeleni. Vapostola avayendla svihlamaliso ni mahlori layo tala, kutani vanhu hinkwavu avavaxixima. Vapfumeli hinkwavu avahamba vahlengeletana, vayavelana svilo sva vona hinkwasvu; avaxavisa lesvi vasvifuweke ni lesvi asvili sva vona, kutani vapambulela mun'wana ni mun'wana hi kuya hi kupfumala ka yena. Masiku hinkwawu avachivirika kukumana Tempeleni, vali mbilu yin'we, nasvona avakumana vakhema xinkwa minjangwini ya vona, vaja svakuja sva vona hi kutsaka lokukulu ni timbilu tobasa, na vali karhi vadzunisa Xikwembu, vatsakeliwa hi tiko hinkwaru. Kutani siku rin'wana ni rin'wana Hosi ayiyengetela nhlengeletanu ya vona hi lava avali karhi vaponisiwa. Siku rin'wana, Petrosi na Yohani avatlhantukela Tempeleni nimajambu, hi nkama wa xikhongelo. Kona Tempeleni, nyangweni leyihlayiwaka “Leyosaseka”, akuli ni munhu lweyi avelekiweke na ali xilema; avatolovela kumurhwala, vamuveka kona masiku hinkwawu, lesvaku atakombela xanchumu ka lava nghenaka Tempeleni. Loko munhu lweyi avona Petrosi na Yohani na vali kusuhi ni kunghena Tempeleni, avakombela xanchumu. Kambe Petrosi na Yohani vamuhonokela, kutani Petrosi aku: “Hi langute.” Munhu lweyi avalanguta svinene, apimisa lesvaku vatamunyika xanchumu. Kambe Petrosi aku ka yena: “Silivhere a ni na yona, hambi nsuku a ni na wona, kambe lexi ninga na xona, nitakunyika xona: Hi vito ra Yesu Kriste wa Nazareta, nili: Famba!” Kutani amukhoma hi voko ra xinene, amuyimisa; hi nomo-lo minkondzo ni mahlakala sva yena svitiya. Kutani o kakatsuku, ava ayima afamba; anghena Tempeleni na ali na vona, afambafamba, atlulatlula, adzunisa Xikwembu, kutani vanhu hinkwavu vamuvona na ali karhi afamba, na adzunisa Xikwembu. Loko vavona lesvaku hi yena lweyi aatshamela kukombela zimole Tempeleni, nyangweni leyivuliwaka “Leyosaseka”, vakhomiwa hi kuchava, vahlamalisiwa svinene hi lesvi svimuhumeleleke. Lesvi munhu lweyi aanamarhela Petrosi na Yohani, vanhu hinkwavu vahlamala, vata ka vona hi kutsutsuma, rikupakupeni leri avaku i ra Solomoni. Loko Petrosi asvivona, aku ka vona: “Vavanuna va Israyele, hikolaho ka yini mihlamala mhaka leyi, mihihonokela hi mukhuva lowu xana, ingi hi loko ali hina hingayendla lesvaku munhu lweyi afamba, hi matimba ya hina kumbe hi vukhongeli bza hina? Xikwembu xa Abrahamu ni xa Izaki ni xa Yakobe, Xikwembu xa vatatana va hina, xidzunisile nandza wa xona Yesu, lweyi mingamunyiketa, mitlhela mimulandzula mahlweni ka Pilato; kambe Pilato yena aahlayile lesvaku atlhantlhiwa. Yesu aali lweyi ahlawulekeke, lweyi alulameke; kambe n'wina mimulandzulile, mikombela kutshunxeliwa mudlayi, kutani midlaya munyiki wa vutomi; kambe Xikwembu ximupfuxile kufeni; hina hi timboni ta svona. Hikolaho, lesvitiyiseke munhu lweyi mimutivaka ni kumuvona, i vito ra Yesu ni kupfumela ka vito leri; kutani kupfumela loku, kuhanyisile munhu lweyi hakunene, hi matimba ya Yesu, hilaha misvivonaka hakona n'wina hinkwenu. “Kutani-ke valekwerhu, nasvitiva lesvaku n'wina ni tihosi ta n'wina, miyendlile svilo lesvo hi kupfumala vutivi, kambe hi mukhuva wolowo, Xikwembu xiyendlile lesvaku kuhetiseka lesvi xingasvitivisa khale hi milomo ya vaprofeta hinkwavu: Hi lesvaku Mesiya wa xona aata xanisiwa. “Loko svilitano, tilayeni, mitlhelela ka Xikwembu, lesvaku svijoho sva n'wina svirivaleliwa, ni lesvaku minkama yotitimela leyihumaka Hosini yisungula, ni lesvaku Hosi yimirhumela Yesu, yena lweyi angavekiwa kuva Mesiya wa n'wina; afanele kutshama tilweni, kukondza kufika minkama ya kupfuxetiwa ka svilo hinkwasvu, leyi Xikwembu xingayivula nikhale, hi milomo ya vaprofeta va xona lavohlawuleka. Hakunene Moxe ahlayile, aku: ‘Yehovha Xikwembu xa n'wina xitamihumesela muprofeta lweyi afanaka na mina, ahuma xikarhi ka va ka n'wina; mitamuyingisa ka hinkwasvu lesvi angatamibzela svona. Kutani mun'wana ni mun'wana lweyi angayingisiki muprofeta lweyi, atasusiwa tikweni.’ Nasvona, vaprofeta hinkwavu lavangavulavula kusukela ka Samuwele ni ka lavateke ndzhaku ka yena, na vona vativisile ta masiku lawa. Hi n'wina valandzeli va vaprofeta, hi n'wina vantwananu lowu Xikwembu xingawuyendla ni vatatana va n'wina, loko xite ka Abrahamu: ‘Hi vatukulu va wena, nitakatekisa tinxaka hinkwatu ta misava.’ Loko Xikwembu xirhumelile nandza wa xona, ximuhumesile hi le ka n'wina kusunguleni lesvaku amikatekisa hi kuhundzula mun'wana ni mun'wana wa n'wina amikhuveni ya yena leyobiha.” Loko Petrosi na Yohani vaha vulavula ni vanhu, kufika vaprista, na vali ni ndhuna ya Tempele ni Vasaduki; avakarhateka hikuva vapostola avajondzisa vanhu ni kuvula ta kupfuka ka vafi hikolaho ka kupfuka ka Yesu kufeni. Hi loko vavakhoma, kutani lesvi aripelile, vavapfalela khotsweni kukondza rixa. Hambi svilitano, lavanyingi xikarhi ka lava vatweke Rito, vapfumela. Nhlayo ya vavanuna nkameni wolowo ayilava kufika ka ntlhanu wa makhulu (5 000). Loko rixa, tihosi ta Vayuda ni vakulukumba ni Vatsali vahlengeletana Yerusalema; avali na Anasi Muprista lwenkulu, na Kayafasi, na Yohani, na Alexandre, ni hinkwavu va rixaka ra Vaprista lavakulu. Kuteloko vayimisile vapostola hubzeni, vavavutisa vaku: “Miyendlile svilo lesvi hi matimba wani kumbe hi vito ra mani xana, n'wina vanhu ndzin'wina?” Hi loko Petrosi atala hi Moya Wokwetsima, aku ka vona: “Tihosi, na n'wina vakulukumba va tiko!” Lesvi hivutisiwaka namuntlha hi mhaka leyinene leyiyendliweke ka munhu lweyi wa xilema, ni kuvutisiwa hi lexi xingamuhanyisa, svitiveni n'wina hinkwenu, ni tiko hinkwaru ra Israyele arisvitive: Munhu lweyi ayimeke mahlweni ka n'wina na awololokile, ahanyisiwile hi vito ra Yesu Kriste wa Nazareta, yena lweyi mingamuvamba xihambanwini, lweyi Xikwembu ximupfuxeke kufeni. Hi yena lweyi anga “‘ribze leri n'wina vayaki mingarinyenya, leri kambe riyendliweke ribze lerikulu ra yinhla.’” “Kutani kuponisiwa aku kumeki ka munhu mun'wana, hikuva vanhu avanyikiwanga vito rin'wana laha misaveni, handle ka vito ra Yesu, leri hifanelaka kuponisiwa ha rona.” Loko vavona kutiya ka Petrosi na Yohani, vahlamala, hikuva avavativa na vali vanhu ntsena, lava ni kujondza avangajondzanga; kambe vasvivonile lesvaku hi lesvi avali vanakulobze va khale va Yesu. Kutani loko vavona munhu lweyi ahanyisiweke na ayimile kolano na vona, vapfumala lexi vangaxikanetaka. Kuteloko vavanyike nawu wa kuhuma hubzeni ya Sanedri, vavutisana, vaku: “Xana hitayendla yini hi vanhu lava xana, hikuva svativeka hinkwaku Yerusalema lesvaku hi vona lavayendleke mahlori lamakulu lawa; ahikoti kusvikaneta. Kambe kuyendlela lesvaku timhaka leti tingayi mahlweni tihangalaka vanhwini, ahivalayeni hivachavisa, lesvaku vangahatshami vavulavula hi vito lero, hambi kuli ka mani na mani.” Kuteloko vavavitanile, vavanyika nawu wa lesvaku vangahatshuki vavulavula hi vito ra Yesu, hambi kuli kujondzisa hi rona. Kambe Petrosi na Yohani vavahlamula, vaku: “Akutseme n'wina: Xana svilulamile mahlweni ka Xikwembu kuyingisa n'wina kutlula xona ke? Loko ali hina, hingakala hingakoti kutshika kuvula lesvi hisvivoneke ni lesvi hisvitweke.” Hi loko vahuvo vavatshunxa, na vatlhela vavalaya ni kuvachavisa; avangavoni hilaha vangavabaka hakona, hikuva vanhu hinkwavu avadzunisa Xikwembu hikolaho ka lesvihumeleleke; nasvona munhu lweyi masingita ya kuhanyisiwa mayendliweke ka yena, aali wa malembe lawa matlulaka mune wa makume. Kuteloko Petrosi na Yohani vatshunxiwile, vatlhelela ka vamakwavu, kutani vavativisa hinkwasvu lesvi Vaprista lavakulu ni vakulukumba vangavabzela svona. Loko vona vasvitwile, vahuwelela ka Xikwembu hi kukhongela na vali mbilu yin'we, vaku: “N'winyi wa hina, wena lweyi ayendleke tilo ni misava ni lwandle, ni hinkwasvu lesvinga ka svona!” Uhlayile hi Moya Wokwetsima, hi nomo wa tatana wa hina Davhida mutirhi wa wena, uku: “‘Xana vamatiko vakwatela yini, ni matiko mabohela yini makungu ya vuhunguki ke? Tihosi ta misava tipfukile, ni vafumi vamatiko vatwananile kulwa ni Hosi ni Mesiya wa yona.’” Hikuva kunene, Heroda na Pontiyo Pilato, ni vamatiko, ni tinxaka ta Israyele, vahlangane doropeni leri kulwa na Yesu nandza wa wena lweyi ahlawulekeke, lweyi ungamuyendla Mesiya; vakumane kuyendla hinkwasvu lesvi usviboheke khale, hi ntamu wa wena ni makungu ya wena, lesvaku svitahumelela. Svosvi-ke Hosi, languta kutshukisa ka vona, unyika malandza ya wena kuvula rito ra wena na vatiyile vangachavi nchumu; tshambuluta voko ra wena kuholisa, uyendla lesvaku mahlori ni svihlamaliso sviva kona hi vito ra Yesu, nandza wa wena lweyi ahlawulekeke. Kuteloko vahetile kukhongela, ndhawu leyi avahlengeletane ka yona yitsekatseka, hinkwavu vatala hi Moya Wokwetsima, kutani vavula rito ra Xikwembu na vatiyile. Nhlengeletanu ya lava vapfumeleke ayili mbilu yin'we ni moya wun'we; akungali na munhu ni mun'we lweyi aavula lesvaku svilo lesvi anga na svona hambi xili xin'we xa svona, i sva yena ntsena; kambe svilo hinkwasvu avaku, i sva vona hinkwavu. Vapostola avatiyisa hi matimba lamakulu vumboni bza kupfuka ka Hosi Yesu kufeni; kutani kukateka lokukulu akutshama henhla ka vona hinkwavu. Akungali na xisiwana xikarhi ka vona, hikuva hinkwavu lava avali ni masimu, kumbe tiyindlo, avasvixavisa, kutani vatisa male ya nxavu, vayiveka mahlweni ka vapostola; kutani vapambulela mun'wana ni mun'wana hi kuya hi kupfumala ka yena. Hi mukhuva lowu Yosefa, Mulevhi lweyi apsaliweke Kipra, lweyi vapostola avaku i Barnaba (hi lesvaku “Lweyi atiyisaka van'wana”), aali ni nsimu. Ayixavisa, kutani atisa nxavu wa yona, awuveka milengeni ya vapostola. Kambe akuli ni wanuna lweyi avaku i Ananiya, ni nsati wa yena Safira; aaxavise nsimu, kutani loko atipambulele male ka nxavu wakona hi kutwanana ni nsati, atisa lesvisaleke, asviveka mahlweni ka vapostola. Hi loko Petrosi aku ka yena: “Ananiya, hikolaho ka yini upfumelela Sathana kunghena mbilwini ya wena, lesvaku uhembela Moya Wokwetsima, ni kutipambulela hi tlhelo ka nxavu wa nsimu xana? Ni loko uyixavisile, xana ntsengo awungali wa wena ke? Mhaka leyi uyipfumelelise kuyini mbilwini ya wena xana? Awuhembelanga vanhu, kambe uhembele Xikwembu.” Loko Ananiya atwa marito wolawo, awela hansi, afa. Kutani hinkwavu lavatweke mhaka leyi vakhomiwa hi kuchava lokukulu. Kutani majaha manghena, mamuphutsela, mamurhwala mahuma na yena, maya mulahla. Loko kulave kuhundza mawora manharhu, nsati wa Ananiya anghena na yena, na angativi lesvihumeleleke. Petrosi amuvutisa, aku: “Nibzele, xana hi wona ntsengo lowu mingaxavisa nsimu ha wona ke?” Aku: “Ina! Hi wona.” Hi loko Petrosi aku ka yena: “Mitwananele yini kuringa Moya wa Hosi xana? Vona, minkondzo ya lavangaya lahla nuna wa wena hi leyi nyangweni; na wena vatakurhwala vahuma na wena.” Hi nomo-lo awela milengeni ya Petrosi, anhlala afa. Loko majaha manghenile, mamukuma na afile, kutani mamurhwala mahuma na yena, maya mulahla kusuhi ni nuna wa yena. Kutani kuchava lokukulu kukhoma kereke hinkwayu ni vanhu hinkwavu lavatweke timhaka leti. Akuyendliwa mahlori layotala ni svihlamaliso lesvotala hi mavoko ya vapostola, xikarhi ka vanhu. Vajondzisiwa hinkwavu avatolovela kuhlengeletana rikupakupeni ra Solomoni, na vali mbilu yin'we. Kambe loko vali vanhu van'wana, ni mun'we angatiyanga nhlana kutinghenisa xikarhi ka vapostola, hambilesvi tiko arivadzunisa ngopfu. hambi svilitano, ntsengo wa vona awuya wuyengeteleka hi vavanuna ni vavasati lavanyingi lavapfumeleke ka Hosi, kukondza kufika laha vavabzi vatisiwaka mintsendzeleni, vavekiwa masangwini ni le tinhlakeni, lesvaku loko Petrosi ahundza, van'wana va vona vatakhumbiwa hambi kuli hi ndzhuti wa yena ntsena. Nasvona, vanhu vamadoropa lawa marhendzeleke Yerusalema, avata na vali vanyingi, vatisa timbabzi, ni lavakarhatiwaka hi mimoya ya chaka; kutani hinkwavu avahanyisiwa. Kuteloko Muprista lwenkulu, ni vaseketeli va yena hinkwavu, lava avali va ntlawa wa Vasaduki ndhawini leyi, vangheneliwa hi vukwele, kutani vakhoma vapostola, vavapfalela jele ra le doropeni. Kambe ntsumi ya Hosi yipfula svipfalu sva jele nivusiku, yivahumesela handle, yiku: “Fambani miyayima Tempeleni, mitivisa vanhu timhaka hinkwatu ta vutomi lebzimpsha lebzi.” Hi loko vona vayingisa, vayanghena Tempeleni loko rilava kuxa, kutani vajondzisa kona. Kambe loko Muprista lwenkulu ni vaseketeli va yena vafika, vavitana huvu ya Sanedri, yinga nhlengeletanu ya vakulukumba hinkwavu va tiko ra Israyele, kutani varhuma vanhu jele kuyateka vapostola. Kambe loko varhumiwa vafika jele, vakuma vapostola na vangali kona; kutani vatlhela, vayabzela huvu vaku: “Hikumile jele na ripfaliwile svinene, ni valanguteli na vayimile tinyangweni; kambe loko hipfula, hikume kungali na munhu.” Loko ndhuna ya Tempele ni Vaprista lavakulu vatwa marito wolawo, vakanakana ngopfu, vangativi lesvaku kungava kuhumelele yini hi vapostola. Kambe kufika munhu mun'we, avabzela mahungu, aku ka vona: “Masvivo, vavanuna lava mivangheniseke jele, va le Tempeleni, vakarhi vajondzisa vanhu.” Hi loko ndhuna ya Tempele ni varhumiwa va huvu vaya vayavakhoma, kambe kungali hi kuvadlidlimbeta, hikuva avachava vanhu lesvaku vangavakhandla hi maribze. Kuteloko vavuyile ni vapostola, vavayimisa hubzeni, kutani Muprista lwenkulu atengisana na vona, aku: “Hi mibzele svinene lesvaku mingatshukeni mijondzisa hi vito lero; kambe langutani ke, mitatile Yerusalema hi jondzo ya n'wina, kutani milava kuhiveka nandzu wa rifu ra munhu lweyi!” Kambe Petrosi ni vapostola lavan'wana vahlamula, vaku: “Hi fanele kuyingisa Xikwembu kutlula vanhu. Xikwembu xa vatatana va hina xipfuxile Yesu kufeni, ndzhaku ka loko mimudlayile hi kumuhayeka mhandzeni. Hi yena lweyi Xikwembu xingamutlakusa, atshama vokweni ra xona ra xinene kuva Murhangeli ni Muponisi, lesvaku atanyika Vaisrayele akuhundzuka ni kurivaleliwa ka svijoho. Kutani hina hi timboni ta timhaka leti, hina svin'we ni Moya Wokwetsima lowu Xikwembu xiwunyikeke lava vaxiyingisaka.” Loko vahuvo vatwa marito lawa, vakariha ngopfu, kutani vatilulamisela kuvadlaya. Kambe Mufarisi mun'we lweyi avaku i Gamaliyele, mujondzisi wa Nawu lweyi aadzunisiwa hi tiko hinkwaru, ayima hubzeni; aleleta lesvaku vapostola vahumesiwa handle hi nkamanyana. Kutani aku ka huvu: “Vavanuna va Israyele, tivoneleni ka lesvi milavaka kusviyendla ka vanhu lava; hikuva ahi khale ngopfu kuhumeleleke Tudasi, lweyi aativula munhu wa matimba; aaseketeliwa hi vanhu lavalavaka kuva mune wa madzana (400), kambe avuye adlayiwa, kutani hinkwavu lava avayima na yena, vahangalasiwa vanyamalala. Ndzhaku ka yena kuhumelele Yudasi wa Galileya, nkameni wa kutsalisiwa ka vanhu, axenga lavotala, vamulandza; kambe na yena alovile, kutani hinkwavu lava avayima na yena, vahangalasiwa. Svosvi-ke nili ka n'wina: Hambanani ni vanhu lava, mivatshika; hikuva loko makungu lawa, kumbe ntirho lowu, wuhuma ka vanhu, wutahela; kambe loko wuhuma ka Xikwembu, mingakala mingavasiveli, kutani mingakumiwa na milwile ni Xikwembu.” Va huvu vamuyingisa. Loko vavitanile vapostola ni kuvanyiketa lesvaku vabiwa hi minkhavi vavaleleta lesvaku vangatshuki vajondzisa hi vito ra Yesu, kutani vavatshunxa. Loko vali vona, vahuma hubzeni na vatsakile, hikuva avakumiwile na vali lavafanelaka kusoliwa hikolaho ka vito ra Yesu. Kutani masiku hinkwawu, avangarhuteli kujondzisa ni kupaluxa Evhangeli Tempeleni ni le minjangwini ya vanhu, vaku: “Kriste, hi yena Yesu.” Hi masiku wolawo, loko vajondzisiwa vayavatala, van'wana va vona lava avavulavula Xigirika vatseketsela lava avavulavula ririmi ra Xiyuda, vaku vafelekazi va ka vona vatsoniwa loko kuphakeliwa sva siku rin'wana ni rin'wana. Kutani lava vambirhi vavitana ntlawa wa vajondzisiwa, vaku: “Asvifanelanga lesvaku hipfa hitshika kuvula rito ra Xikwembu, hiyatirha ntirho wa kuphamela. Loko svilitano vamakwerhu, hlawulani vavanuna va ntlhanu ni vambirhi xikarhi ka n'wina lavativekaka na vali lavateleke hi Moya ni vutlhari, lesvaku hi vaveka kuvona timhaka leti. Loko hili hina, hitaya mahlweni ni svikhongelo, hivula ni Rito.” Marito wolawo mayamukeliwa hi nhlengeletanu hinkwayu; kutani vahlawula Stefano, wanuna lweyi ateleke hi kupfumela ni Moya Wokwetsima; vahlawula na Filipi, na Prokoro, na Nikanoro, na Timoni, na Parmena, na Nikolawu wa Antiyoka, munhu lweyi aarhange ayamukeliwa Xiyudeni. Nhlengeletanu yivatisa ka vapostola; kaku loko vona vakhongelile, vavatlhanteka mavoko. Rito ra Xikwembu riya mahlweni; na yona nhlayo ya vajondzisiwa yiya yitala ngopfu Yerusalema, nasvona vaprista lavotala vatinyiketa kupfumeleni. Stefano aatale hi timpsalu ni matimba, ayendla svihlamaliso lesvikulu ni mahlori lamakulu xikarhi ka tiko. Kambe kuhumelela van'wana vasinagoga leyivuliwaka ya Vatshunxiwa, van'we vali lavahumaka Kirene ni le Alexandriya, van'wana vahuma Kilikiya ni le Aziya; kutani vayima vakanetana na Stefano. Kambe vahluleka kulwa ni vutlhari lebzi Moya wungamunyika kuvulavula ha bzona. Kutani vakucetela vavanuna kuvula lesvi: “Himutwile avulavula timhaka letisandzaka Moxe ni Xikwembu.” Nasvona vapfuxa mpfilumpfilu tikweni, ni ka vakulukumba ni Vatsali, kutani vamuwela henhla, vamukhoma, vamuyisa hubzeni; vahumesa timboni ta mavunhwa, titamuhembela tiku: “Munhu lweyi, angatshiki kuvulavula timhaka letisandzaka ndhawu leyi ya kuhlawuleka, asandza ni Nawu; hikuva hi mutwile loko ahlaya lesvaku Yesu lweyi wa Nazareta atahelisa ndhawu leyi, ahundzuluxa ni mikhuva leyi hinganyikiwa hi Moxe.” Kutani hinkwavu lavatshameke hubzeni, loko vamulangutisa, vavona mombo wa yena wufana ni mombo wa ntsumi. Muprista lwenkulu avutisa Stefano aku: “Timhaka teto titano xana?” Stefano ahlamula, aku: Vavanuna, vamakwerhu na vatatana, niyingiseni! Xikwembu lexikwetsimaka xitikombisile ka tatana wa hina Abrahamu, loko ahali Mesopotamiya, na angasiyaka Harani, xiku ka yena: “Suka tikweni ra lekwenu, ni ka maxaka ya wena, uya tikweni leri ningatakukomba rona.” Hi loko asuka tikweni ra Vakaldeya, ayayaka Harani. Kambe ndzhaku ka kufa ka tatana wa yena, Xikwembu ximurhurhisa, ximutisa tikweni leri miyakeke ka rona svosvi. Aximunyikanga ndzhaka tikweni lero, hambi xili xivandlanyana lexiringanaka kuyanama ka nkondzo; kambe ximutshembisile kumunyika rona, riva ra yena ni ra vatukulu va yena ndzhaku ka yena; kasi, nkarhini wolowo, aangali na n'wana. Kutani Xikwembu ximutivisa lesvi, xiku: Vatukulu va wena vataya luvela tikweni ra van'wana, laha vangatayendliwa svikarawa ni kuxanisiwa kona, kuringana malembe ya mune wa madzana (400). Kambe nitayavanyisa tiko leri rivayendleke svikarawa, kuvula Xikwembu; ndzhaku ka svona vatasuka ka rona, vata, vatanigandzela ndhawini leyi. Kutani Xikwembu xiyendla ntwananu na Abrahamu, lowufungiweke hi kuyimba; hikokolaho, Abrahamu aveleka Izaki, amuyimbisa hi siku ra vuntlhanu ni manharhu, kutani Izaki aveleka Yakobe, Yakobe aveleka vakokwana va hina va vambirhi, vayimbisiwa hinkwavu. Kutani vakokwana vakukwela Yosefa, vamuxavisa, ayisiwa le Gibita; kambe Xikwembu xiva na yena; ximuponisa nhlomulweni wa yena hinkwawu; ximunyika kutsakisa Faro hosi ya Gibita ni kutlhariha mahlweni ka yena; kutani hosi yimuveka kuva mufumi wa Gibita ni wa yindlo ya yona hinkwayu. Kambe kuwa ndlala leyikulu tikweni hinkwaru ra Gibita ni ra Kanana, kuxaniseka kakona kuva lokukulu, kutani vatatana va hina vahluleka kukuma svakuja. Kambe loko Yakobe atwa lesvaku trigu rahali kona le Gibita, arhuma vatatana va hina vaya kona khambi ra kusungula. Kutani loko vaya ra vumbirhi, Yosefa atitivisa ka vamakwavu; na yena Faro akombiwa rixaka ra Yosefa. Kutani Yosefa arhuma vanhu vayateka Yakobe tatana wa yena, ni maxaka ya yena hinkwawu, na vali vanhu va kuringana ntlhanu wa makume ni makume mambirhi na ntlhanu (75). Kutani Yakobe angirimela aya le Gibita; yena ni vatatana va hina vafela kona. Varhwaliwa vayisiwa Sikemi, valahliwa sirheni ra Abrahamu, leri aarixavile hi male ya silivhere ka vana va Hemori, kole Sikemi. Kuteloko kutshinele nkama wa kuhetiseka ka lesvi Xikwembu xisvitshembiseke Abrahamu, rixaka ra hina rikula, riyandza tikweni ra Gibita; kuheteleleni kuhumelela hosi le Gibita leyikalaka yingamutivanga Yosefa. Hosi leyi yiyendla hi maqhinga ka rixaka ra hina, yixanisa vatatana, yilerisa lesvaku vacukumeta vana va vona, vavadlaya. Nkameni lowu, kuvelekiwa Moxe. Aasasekile mahlweni ka Xikwembu; kutani awundliwa tihweti tinharhu ndlwini ya tatana wa yena. Kuteloko acukumetiwile, n'wana Faro waxisati amurhola, amuwundla tani hi loko ali n'wana wa yena. Kutani Moxe ajondzisiwa vutlhari hinkwabzu bza Vagibita, ava munhu wa matimba kuvulavuleni ni le kutirheni. Kuteloko alavile kufika ka malembe ya mune wa makume, ayendla makungu ya kuya yendzela va ka vona, vona Vaisrayele. Kutani avona mun'we wa vona na axanisiwa hi Mugibita; amulamulela, arihisela hi kudlaya Mugibita, apfuna lweyi axanisiwaka. Apimisa lesvaku va ka vona vatatwisisa makungu ya Xikwembu ya kuvaponisa ha yena; kambe avamatwisisanga. Hi siku leritlhantamaka, ayakuma van'wana vambirhi na valwa, kutani aringeta kuvakhongotela lesvaku vangalwi, aku: “Vavanuna, mi vanhu van'we! Mivaviselana yini xana?” Kambe lweyi angarhanga apfuka lweyi mun'wana, abakanya Moxe, aku: I mani lweyi angakuveka kuva hosi ni muthethisi wa hina xana? Xana ulava kunidlaya kukota lesvi ungadlaya Mugibita tolo ke? Loko Moxe atwa svosvo, abaleka, ayaluvela tikweni ra Midiyani; kutani kona kuvelekiwa vana va yena vambirhi vaxinuna. Kuteloko kuhundzile malembe ya mune wa makume, ntsumi yitikomba ka yena malangavini ya ndzilo ya xihlahla lexi axipfurha, mananga kusuhi ni ntshava ya Sinayi. Loko Moxe alanguta, ahlamala hi lesvi asvivonaka; kuteloko atshinelele kulangutisisa, kutwala rito ra Hosi leringe: Hi mina Xikwembu xa vatatana va wena, Xikwembu xa Abrahamu ni xa Izaki ni xa Yakobe. Kutani Moxe arhurhumela, achava ni kulangutisisa. Kutani Hosi yiku ka yena: Hlivila masandhazi milengeni ya wena, hikuva ndhawu leyi uyimeke ka yona, i misava leyihlawulekeke. Nivonile kuxaniseka ka tiko ra mina le Gibita hakunene, ni kurila ka vona ni kutwile, kutani ni xikile kuvaponisa; tana svosvi, nikurhuma le Gibita. Yena Moxe lweyi avamuyalile hi kuvutisa vaku: “I mani lweyi akuvekeke kuva hosi ni muyavanyisi wa hina ke?” Hi yena lweyi angarhumiwa hi Xikwembu lesvaku ava hosi ni muponisi wa vona, hi kupfuniwa hi ntsumi leyi yitikombiseke ka yena xihlahleni. Hi yena Moxe lweyi angavahumesa, hi kuyendla svihlamaliso ni mahlori le Gibita, ni le Lwandle Leropshuka, ni le mananga, hi nkama lowuringanaka malembe ya mune wa makume. Wahali yena Moxe lweyi angate ka Vaisrayele: Xikarhi ka va ka n'wina Xikwembu xitapfuxa muprofeta lweyi afanaka na mina. Minkameni ya kuhlengeletana ka Vaisrayele le mananga, hi yena lweyi angava ni ntsumi leyivulavuleke na yena ntshaveni ya Sinayi, atlhela ava ni vatatana va hina; hi yena nakambe lweyi ayamukeleke marito ya vutomi kuhinyika wona. Kambe vatatana va hina vayalile kumuyingisa; vamubakanyela tlhelo, kutani vanavela hi timbilu kutlhelela le Gibita; hi loko vaku ka Aroni: Hiyendlele svikwembu lesvingatahirhangela mahlweni, hikuva Moxe lweyi angahihumesa tikweni ra Gibita, ahitivi lesvaku ahumeleliwe hi yini. Masikwini wolawo vayendla xifaniso xa rhole; kutani vaxigandzela, vatsakela ntirho wa mavoko ya vona. Hikolaho Xikwembu xivafularhela, xivanyiketa kugandzela mab'uthu ya tilo, hilaha kutsaliweke hakona bukwini ya vaprofeta lavangate: Xana mitlhavele mina svifuyu n'wina Vaisrayele, mihumesele mina timhamba mananga hi malembe yoringana mune wa makume, ke? Ahihim! Amirhwala ntsonga wa Moloko, ni nyeleti ya Rhomfani, xikwembu xa n'wina, svinga svifaniso lesvi mingasviyendla lesvaku misvikhinsamela. Hikolaho nitamirhurhisa kuhundza ni le Babilona. Vatatana va hina avali ni Ntsonga Lowohlawuleka mananga, vaya hi kulerisa ka Xikwembu loko xivulavula na Moxe, ximulerisa kuwuyendla hi xivumbeko lexi axivoneke. Ndzhaku ka svona, vatatana va hina lavayamukeleke ntsonga lowu, vawunghenisa, na vali na Yoxuwa, tikweni ra vamatiko lava Xikwembu axivahlongolile mahlweni ka vona; kutani svifambisa xilesvo kufikela minkameni ya Davhida. Loko ali Davhida, atsakeliwa hi Xikwembu, kutani akombela mpfumelelo wolavela Xikwembu xa Yakobe ndhawu ya kutshama ka yona. Kambe i Solomoni lweyi angaxiyakela yindlo. Hambi svilitano Lweyi anga henhlahenhla angatshami tindlwini letiyendliweke hi mavoko ya vanhu, hilaha muprofeta avulaka hakona, aku: “‘Tilo i xiluvelo xa mina, kuvula Hosi, misava yi le hansi ka minkondzo ya mina; yindlo leyi mingataniyakela yona yingava leyo tani hi kwihi? Ni ndhawu leyi ningatawisa ka yona, yingava yihi ke?’” Xana ahi rona voko ra mina leriyendleke svilo lesvi hinkwasvu ke? “N'wina vatinhamu letononon'hwa, n'wina va timbilu letingapfumeliki ni tindleve letingatwiki! Masiku hinkwawu miyalela Moya Wokwetsima; mifana svinene ni vatatana va n'wina. Hi wihi muprofeta lweyi vatatana va n'wina vakalaka vangamuxanisanga xana? Vadlayile na vona lavangativisa khale timhaka ta kuta ka Lweyi Alulameke, lweyi svosvi mimuxengeke, mitlhela mimudlaya; hi n'wina miyamukeleke Nawu lowutisiweke hi tintsumi, kambe amiwu hlayisanga!” Loko vahuvo vatwa marito lawa ya Stefano, vatala timbilu; kutani vamukarihela vakwata. Kambe Stefano atala hi Moya Wokwetsima, kutani alanguta svinene tilweni, avona kukwetsima ka Xikwembu, na Yesu ayimile vokweni ra xinene ra Xikwembu. Kutani aku: “Langutani! Nivona tilo ripfulekile, ni N'wana-wa-Munhu na ayimile vokweni ra xinene ra Xikwembu.” Kambe vona vahuwelela hi rito leritlakukeke, vatipfala tindleve, kutani hinkwavu vamuwela henhla xikan'we. Kuteloko vamucukumetile handle ka doropa, vamukhandla hi maribze. Timboni ativekile sviyambalu sva tona milengeni ya jaha leri avaku i Sawulo. Kakuloko vali karhi vamukhandla hi maribze, Stefano akhongela, aku: “Hosi Yesu, yamukela moya wa mina!” Kutani akhinsama, ahuwelela hi rito rotlakuka, aku: “Hosi, ungavahlayeli kujoha loku.” Kuteloko ahlayile svosvo, afa. Kasi Sawulo aakhensa kudlayiwa ka Stefano. Nkameni wolowo, kereke ya Yerusalema yisungula kuxanisiwa svinene, vapfumeli hinkwavu vahangalasiwa matikweni ya Yudeya ni ya Samariya; kusala vapostola ntsena. Kutani vavanuna lavachavaka Xikwembu valahla Stefano; vaba nkosi lowukulu vamurila. Kambe Sawulo aali karhi ahlasela kereke, anghena ka munti wun'wana ni wun'wana, akokela vavanuna ni vavasati handle, aya vanghenisa jele. Vapfumeli lava avahangalasiwile, avafambafamba hinkwaku, na vatwalisa Evhangeli. Loko ali Filipi, angirimela aya doropeni rin'wana ra tiko ra Samariya, avula ta Mesiya kona. Loko mintshungu yitwa Filipi, ni loko yivona mahlori lawa aamayendla, yiyingisa svinene lesvi asvivulaka, hikuva mimoya ya chaka ayihuma ka vanhu lavanyingi lava avali na yona, na yilikarhi yihuwelela hi rito leritlakukeke, nasvona lavanyingi lava vakuwoma svirho, ni svilima, avahanyisiwa. Kutani akuli ni kutsaka lokukulu doropeni rolero. Kona kolano, akutshama wanuna mun'we lweyi avaku i Simoni; akuli khalenyana na ahlamalisa vanhu va tiko ra Samariya hi kutirha sva vungoma, ativula munhu lwenkulu. Avamuyingisa hinkwavu, lavakulu ni lavatsongo, vaku: “Hi yena lweyi anga matimba ya Xikwembu lamavuliwaka ‘Lamakulu’.” Avamuyingisa hi mukhuva lowu, hikuva akulikhale na avahlamalisa hi vungoma bza yena. Kambe loko vapfumelile ka Filipi lweyi angavachumayela Evhangeli ya Mfumu wa Xikwembu, ni ka vito ra Yesu Kriste, vakhuvuliwa, vavanuna ni vavasati. Na yena Simoni apfumela, akhuvuliwa, kutani anamarhela Filipi, ahlamala ngopfu hi kuvona mahlori ni lesvohlamalisa lesvikulu lesvi asvihumelela. Loko vapostola lava avali Yerusalema vatwa lesvaku Vasamariya vayamukelile rito ra Xikwembu, vavarhumela Petrosi na Yohani; loko vona vafikile, vakhongelela vapfumeli lesvaku vanyikiwa Moya Wokwetsima, hikuva awungasixika henhla ni ka mun'we wa vona; avakhuvuliwile ntsena hi vito ra Hosi Yesu. Kuteloko vapostola vavatlhanteka mavoko, kutani vayamukela Moya Wokwetsima. Loko Simoni avona lesvaku Moya Wokwetsima wunyikiwa hi kutlhantekiwa mavoko hi vapostola, avatshembisa male, aku: “Na mina ninyikeni matimba lawa, lesvaku mun'wana ni mun'wana lweyi ningatamutlhanteka mavoko, atanyikiwa Moya Wokwetsima.” Kambe Petrosi aku ka yena: “Male ya wena ayilove svin'we na wena, lesvi upimisaka lesvaku ungaxava nyiko ya Xikwembu hi male! Ntirho lowu ahi wa wena, awungheni ka wona, hikuva mbilu ya wena ayilulamanga mahlweni ka Xikwembu. Hikolaho, hundzuka utshika kubiha ka wena loku, ukhongela Hosi lesvaku kumbexana yingakurivalela kuyehleketa loku ungava nakona; hikuva nasvivona lesvaku utele hi nyongwa leyobava, ni lesvaku wahabohiwile hi lesvokala svingalulamanga.” Simoni ahlamula, aku: “Nikhongeleleni mili n'wina ka Hosi, lesvaku ningatshuki nihumeleliwa hi xilo ni xin'we xa lesvi misvivuleke.” Kuteloko vapostola vahetile kuveka vumboni ni kuvula rito ra Hosi, vatlhelela Yerusalema na vali karhi vapaluxa Evhangeli asvidoropanini lesvinyingi sva Vasamariya. Ntsumi ya Hosi yivulavula na Filipi, yiku ka yena: “Suka, uya tlhelo ra dzonga ndleleni leyihumaka Yerusalema, leyingirimelaka yiya Gaza.” ka ndlela yakona akungatoloveli kufamba munhu, hikusa ayikongoma mananga. Kutani Filipi asuka, afamba. Hi loko kuhumelela wanuna wa Muetiyopiya, mutheniwa lweyi aali ndhuna leyikulu ni mulanguteli wa rifuwo hinkwaru ra Kandake, hosi ya wansati ya Etiyopiya; munhu lweyi aatile Yerusalema kutagandzela kona; kutani aatlhelela kaya, na atshamile n'qolweni ya yena, na ali karhi ahlaya buku ya muprofeta Ezaya. Moya wuku ka Filipi: “Famba, utshinelela n'qolo liya.” Filipi aya kona hi kutsutsuma, atwa Muetiyopiya lweyi ahlayaka buku ya muprofeta Ezaya; aku ka yena: “Xana wasvitwisisa lesvi usvihlayaka ke?” Yena aku: “Ningasvikotisa kuyini kusvitwisisa loko ningali na lweyi anihlamuselaka xana?” Kutani akombela lesvaku Filipi akhwela atatshama na yena. Ndzimana ya buku leyi aayihlaya hi leyi: “Aafana ni nyempfu leyiyisiwaka kutlhaviweni, kumbe xinyempfana leximiyelaka loko vaxitsemeta voya: Angapfulanga nomo. Atsongahatiwile, ayaleliwa lesvolulama. I mani lweyi angatavulavula hi vatukulu va yena, lesvi vutomi bza yena misaveni bzifikeke makumu, ke?” Kutani ndhuna yiku ka Filipi: “Unganibzela, xana muprofeta ahlaya mani hi mhaka leyi? Xana watihlaya, kumbe ahlaya mun'wana ke?” Hi loko Filipi asungula kuvulavula. Arhanga hi buku yoleyo, kutani amutivisa Evhangeli ya Yesu. Vaku vahafamba ndleleni, vafika laha akuli ni mati, kutani ndhuna yiku: “Wasvivo, mati hi lawa; kungasivela yini lesvaku nikhuvuliwa xana?” [ Filipi aku: “Loko upfumela hi mbilu ya wena hinkwayu, ungakhuvuliwa.” Ahlamula aku: “Napfumela lesvaku Yesu Kriste i N'wana wa Xikwembu.”] Kuteloko aleletile lesvaku n'qolo yiyima, vangirimela matini hi vumbirhi bza vona, Filipi ni ndhuna; kutani Filipi ayikhuvula. Kuteloko vahumile matini, Moya wa Hosi wususa Filipi. Ndhuna ayaha tlhelanga yimuvona; hambi svilitano, yiyile mahlweni ni riyendzo ra yona, na yitsakile svinene. Loko ali Filipi, atikuma na ali le Azoto; kutani afambafamba madoropeni hinkwawu na ali karhi apaluxa Evhangeli, akondza afika Khezariya. Lesvi Sawulo aahisekela kuchavisa ni kudlaya vajondzisiwa va Hosi, aya ka Muprista lwenkulu, kuyakombela mapapela lawa matsaleliweke masinagoga ya Damaska, lesvaku loko atshuka akuma lavalandzaka Ndlela ya Hosi, vavanuna kumbe vavasati, avayisa Yerusalema na vabohiwile. Loko ahali ndleleni, ali kusuhi na Damaska, hi nomo-lo kuvonakala loku kuhumaka tilweni kumurhendzela. Kutani awela hansi, atwa rito leringe ka yena: “Sawulo, Sawulo! Unixanisela yini?” Yena aku: “U mani, Hosi?” Rito riku: “Hi mina Yesu, lweyi umuxanisaka. Kambe pfuka uyima, unghena doropeni, kutani utabzeliwa lesvi ufanelaka kuyendla svona.” Lava avafamba na yena, vayima vangahlayi nchumu, hikuva avatwa rito, kambe vangavoni munhu. Sawulo asuka ayima, kambe loko apfula mahlo, angahakoti kuvona; kutani vamukhoma hi voko, vamuyisa Damaska. Kutani atshama masiku manharhu, na angavoni, angaji, anganwi nchumu. Akuli ni mujondzisiwa mun'we le Damaska lweyi avaku i Ananiya; Hosi yivulavula na yena hi xivoniso, yiku: “Ananiya!” Yena aku: “Hi mina lweyi, Hosi.” Hosi yiku ka yena: “Suka uyima, uya ndleleni leyihlayiwaka ‘Leyi ya kululama’, kutani ndlwini ya Yuda ulava munhu wa kuhuma Tarso lweyi vange i Sawulo; akarhi akhongela; hi xivoniso, avonile munhu lweyi vange i Ananiya na li karhi anghena, amutlhanteka mavoko lesvaku atlhela avona.” Ananiya ahlamula, aku: “Hosi, nitwile lavotala va vulavula hi munhu lweyi, ni lesvaku ayendlile lesvobiha ngopfu ka vahlawuliwa va wena le Yerusalema. Kutani ni kola, anyikiwile matimba hi Vaprista lavakulu kukhoma vanhu hinkwavu lavakhongelaka vito ra wena.” Hosi yiku ka yena: “Yana, hikuva munhu lweyi i xitirho lexi ningatihlawulela xona kuyapaluxa vito ra mina ka vamatiko, ni ka tihosi, ni ka Vaisrayele; nasvona mina nitamukomba hinkwasvu lesvi afanelaka kuvaviseka ha svona, hikolaho ka vito ra mina.” Ananiya afamba, ayanghena ndlwini, kutani atlhanteka Sawulo mavoko, aku: “Sawulo makwerhu, nirhumiwile hi Hosi, anga yena Yesu lweyi atikombiseke ka wena ndleleni leyi ungata ha yona; anirhumile ka wena lesvaku utlhela uvona, ni lesvaku utala hi Moya Wokwetsima.” Hi nomo-lo, svilo lesvifanaka ni tihakatimba svisuka matihlweni ya Sawulo, kutani atlhela avona, asuka ayima, akhuvuliwa. Kuteloko ajile svakuja, atlhela akuma matimba. Sawulo atshama ni vajondzisiwa va le Damaska masiku mangali mangani. Kutani hi kuhantlisa asungula kupaluxa ta Yesu masinagogeni, aku: “Lweyi hi yena N'wana wa Xikwembu.” Hinkwavu lavamutwaka, vahlamala ngopfu, vaku: “Xana munhu lweyi ahi yena lweyi aaringeta kuhelisa lavakhongelaka vito lero Yerusalema ke? Xana ni halenu angatelanga kutavakhoma, avayisa ka Vaprista lavakulu ke?” Kambe Sawulo aali karhi ayengeteleliwa matimba, amiyeta Vayuda lavayakeke Damaska, hi kuvakombisa lesvaku Yesu i Mesiya. Ndzhaku ka masiku lamanyingi, Vayuda vatwanana kudlaya Sawulo. Kambe yena ativisiwa makungu ya vona. Avamutumbelelile tinyangweni ta doropa, vusiku ni nhlekanhi, lesvaku vatamudlaya; kambe vajondzisiwa va yena vamuteka nivusiku, vamuxikisa rithangwini ra doropa hi kumuxikisa hansi na ali ndzhaveni. Loko Sawulo afikile Yerusalema, aringeta kutihlanganisa ni vajondzisiwa; kambe vamuchava hinkwavu, vangakholwi lesvaku ahundzuke mujondzisiwa. Kutani Barnaba amuteka, amuyisa ka vapostola, avahlamusela hilaha Sawulo avoneke Hosi hakona, loko ali ndleleni, ni lesvaku Hosi yivulavule na yena; ahlamusela ni hilaha angajondzisa hakona hi vito ra Yesu doropeni ra Damaska, na angachavi nchumu. Kutani Sawulo atshama na vona Yerusalema, na ali karhi afambafamba doropeni hinkwaku, ajondzisa hi vito ra Hosi na angachavi nchumu; nasvona avulavula ni kuhlamulana ni Vayuda vakuvulavula Xigirika; kambe vona varingeta kumudlaya. Kuteloko vamakwavu Hosini vasvitwile, vamuyisa Khezariya, kutani vamuhundzisela mahlweni kuya Tarso. Nkameni wolowo, kereke ayili ni kurhula tikweni hinkwaru ra Yudeya, ni ra Galileya, ni ra Samariya, na yili karhi yiyakisiwa ni kuhanya kuxiximeni ka Hosi; kutani ayihandza, yitiyisiwa hi Moya Wokwetsima. Loko Petrosi ali karhi afambafamba hinkwaku, afika ni le ka vahlawuliwa va Hosi lavayakeke Lida. Kolano akuma munhu lweyi avaku i Eniya, lweyi aali xilema, ahetile malembe ya ntlhanu ni manharhu na ayetlele sangwini. Kutani Petrosi aku ka yena: “Eniya! Yesu Kriste wa kuhanyisa; pfuka, utisongela sangu ra wena.” Hi nomo-lo apfuka ayima. Hinkwavu lavayakeke Lida ni le Saroni, vamuvona, kutani vatinyiketa ka Hosi. Doropeni ra Yopa, akuli ni mujondzisiwa wa xisati, lweyi avaku i Tabita (hi Xigirika: Dorkazi, hi lesvaku N'wa-Mhunti); aatolovela kutirha mintirho leyinene, arhandza ni kunyika. Hi masiku wolawo akhomiwa hi vuvabzi, kutani afa. Kuteloko vahlampsile ntsumbu wa yena, vamuveka ndlwini ya le henhla. Doropa ra Yopa arili kusuhi na Lida; hi kolaho, loko vajondzisiwa vatwa lesvaku Petrosi a le Lida, vamurhumela vavanuna vambirhi, vayamukombela lesvaku ata Yopa, angahlweli. Kutani Petrosi asekeleka, afamba na vona. Kuteloko afikile, vamuyisa ndlwini ya le henhla; vafelakazi hinkwavu vamurhendzela, na vali karhi varila, vamukomba tinguvu ni sviyambalu lesvi Dorkazi aasvirhunga loko ahahanya. Kambe Petrosi avahumesela handle hinkwavu; akhinsama hi matsolo, akhongela; kutani ahundzukula ka ntsumbu, aku: “Tabita, pfuka!” Kuteloko Tabita apfula mahlo, loko avona Petrosi, apfuka atshama. Hi loko yena amukhoma hi voko, amuyimisa; kutani loko avitanile vakwetsimi va Hosi ni vafelakazi, asiya Dorkazi a ka vona na se ahanya. Mhaka leyi yitiviwa hi vayaki va doropa hinkwaru ra Yopa; kutani vanhu lavotala vapfumela ka Hosi. Petrosi axwa Yopa masiku lamanyingi, kaya ka wanuna lweyi avaku i Simoni, muchuki wa svikhumba. Doropeni ra Khezariya akuli ni munhu lweyi avaku i Korneliyo; aali ndhuna ya dzana ra masochwa ntlaweni lowuvuliwaka “wa Italiya”; aali munhu wa vukhongeli, achava Xikwembu kun'we ni vamunti wa yena hinkwavu; aapfuna vanhu va tiko hi tinyiko letinyingi, angakarhali kukhongela Xikwembu. Siku rin'wana, loko kulava kuva nkarhi wa vuntlhanu ni mune, otshuka avona ntsumi ya Xikwembu hi xivoniso, na yili karhi yinghena ka yena, yiku: “Korneliyo!” Loko ayilangutisile svinene, akhomiwa hi kuchava, kutani aku: “I mpsini, Hosi?” Yiku ka yena: “Mikhongelo ya wena ni tinyiko ta wena sviyamukeliwile ka Xikwembu, kutani xikutsundzukile. Svosvi-ke rhuma vavanuna le Yopa, vayavitana munhu lweyi vange i Simoni kumbe Petrosi. Arhurheliwile ka Simoni mun'we wa muchuki wa svikhumba, lweyi yindlo ya yena yinga kusuhi ni tiva.” Kuteloko ntsumi leyivulavuleke na yena yisukile, Korneliyo avitana vambirhi xikarhi ka vatirhi va yena, avitana ni sochwa rin'we lerichavaka Xikwembu xikarhi ka masochwa lawa mamutirhelaka. Loko avahlamuselile timhaka hinkwatu, avarhuma Yopa. Siku leritlhantamaka, loko vahali ndleleni, na vali karhi vatshinelela doropa ra Yopa, Petrosi akhwela henhla ka lwangu hi nkarhi wa vuntlhanu na wun'we, ayakhongela. Kutani atwa ndlala, anavela kuja. Loko vaha mulungisela svakuja, angheniwa hi moya. Avona tilo ripfulekile, ni xilo lexifanaka ni lansoro lerikulu na xili karhi xixika, xinembeletiwa misaveni hi tinyihla ta mune; ndzeni ka lansoro akuli ni svivumbiwa hinkwasvu sva misava lesvifambaka hi milenge ni mavoko, ni lesvi kokovaka, ni lesvihahaka mpfhukeni. Kutani rito rifika ka yena, riku: “Petrosi! Suka uyima, udlaya uja!” Kambe Petrosi aku: “Ahihim, Hosi, ningakala ningasviyendli, hikuva anisija xilo lexiyilaka, hambi xili lexikalaka xingabasanga.” Rito ritlhela riku ka yena ka vumbirhi: “Svilo lesvi Xikwembu xingavula lesvaku svibasile, ungahlayi lesvaku svayila.” Svilo lesvi, svihumelela kanharhu, kutani hi nomo-lo, lansoro ritlhela ritlakuleliwa tilweni. Loko Petrosi ahahlamala ngopfu xivoniso lexi axivoneke, lesvaku xingava xivula yini, kuhumelela vavanuna lavarhumiweke hi Korneliyo, vavutisa laha munti wa Simoni wunga kona, kutani vayafika nyangweni. Vavitana vanhu ni kuvutisa lomu Simoni wa kuvuliwa Petrosi angavaka arhurheliwile kona. Loko Petrosi ahayanakanya xivoniso lexi, Moya wuku ka yena: “Vona, ku ni vavanuna vambirhi, lava vakulavaka. Suka uyima, uxika, ufamba na vona ungakanakani, hikuva hi mina nivarhumeke.” Kutani Petrosi axika, aku ka vavanuna lava: “Munhu lweyi mimulavaka hi mina lweyi; mitisiwa hi mhaka yihi ke?” Vaku: “Hirhumiwile hi Korneliyo, ndhuna ya dzana ra masochwa, wanuna wa kululama lweyi achavaka Xikwembu, lweyi akhensiwaka hi tiko hinkwaru ra Vayuda; aleletiwile hi ntsumi leyokwetsima kukuvitana uta muntini wa yena, lesvaku atayingisa lesvi ungatamubzela svona.” Hi loko Petrosi avayamukela, avarhurhela ndlwini. Loko rixa, Petrosi asuka afamba na vona; van'wana vamakwavu Hosini va le Yopa vafamba na yena. Siku leritlhantamaka, anghena Khezariya. Korneliyo aavalangutelile, avitanile ni maxaka ya yena ni vanghanu. Loko Petrosi anghena, Korneliyo aya mutlhangaveta, atiwisela milengeni ya yena, amukhinsamela. Kambe Petrosi amusekelekisa, aku: “Sekeleka uyima, na mina ni munhu ntsena.” Kuteloko Petrosi anghena, na ali karhi avulavula na Korneliyo; kutani akuma vanhu lavanyingi na vahlengeletanile kona. Aku ka vona: “Masvitiva svinene lesvaku svayila ka Muyuda kuyendzela munhu wa rixaka rin'wana kumbe kutshama na yena; kambe Xikwembu xinikombisile lesvaku ningatshuki nibzela munhu lesvaku wayila, kumbe angabasanga. Hikolaho, loko nivitaniwile, nitile na ningakanakani; kutani svosvi nilava kutiva lesvaku xana minivitanele yini ke?” Hi loko Korneliyo ahlamula, aku: “Svosvi kuhundzile masiku manharhu, na nili karhi nikhongela ndlwini ya mina hi nkarhi wa vuntlhanu ni mune; kutani nivona munhu ayimile mahlweni ka mina, na ayambalile sva kuvangama, aku: Korneliyo, kukhongela ka wena kuyingisiwile, ni tinyiko ta wena tiyanakanyiwile mahlweni ka Xikwembu. Svosvi-ke rhuma vanhu vaya Yopa, vayavitana Simoni, lweyi vange i Petrosi; arhurheliwile ndlwini ya Simoni, muchuki wa svikhumba, kusuhi ni tiva. Hikolaho nihantlisile nirhumela vanhu ka wena; kutani uyendlile svona loko utile; svosvi-ke hinkwerhu hitshamile svin'we, laha mahlweni ka Xikwembu, kuyingisa hinkwasvu lesvi Hosi yikuleleteke svona.” Kutani Petrosi asungula kuvulavula aku: “Svosvi natwisisa svinene lesvaku Xikwembu axiyi hi nghohe; kambe, matikweni hinkwawu, lweyi axichavaka avuya ayendla lesvilulameke, xamutsakela. Rito leri xilirhumeleke Vaisrayele, maritiva, ringa rito leripaluxaka mahungu lamanene ya kurhula ha Yesu Kriste, yena Hosi ya vanhu hinkwavu. Mitiva ni timhaka letihumeleleke tikweni hinkwaru ra Yudeya, tinga letisunguleke hi le Galileya, ndzhaku ka nkhuvulo lowutwalisiweke hi Yohani; mitiva ni ta Yesu wa Nazareta, ni hilaha Xikwembu xicheleke hakona Moya Wokwetsima ni matimba henhla ka yena. Aafambafamba hinkwaku, na ali karhi ayendla lesvinene, ahanyisa hinkwavu lava vaxanisiwaka hi Diyavulosi, hikuva Xikwembu axili na yena. Loko hili hina, hi timboni ta hinkwasvu lesvi asviyendleke tikweni ra Vayuda, ni le Yerusalema; hi yena lweyi vamudlayeke hi kumuhayeka mhandzeni. Kambe Xikwembu ximupfuxile kufeni hi siku ra vunharhu, kutani ximukombisile, kungali ka tiko hinkwaru, kambe ka timboni leti xiti hlawuleke ka hali kusunguleni, anga hina lava hingaja na yena, hi nwa na yena, ndzhaku ka loko apfukile kufeni. Kutani ahileletile kupaluxa Evhangeli tikweni, ni kutiyisa vumboni bza lesvaku hi yena lweyi avekiweke hi Xikwembu kuva muyavanyisi wa lavahanyaka ni lavafeke. Hi yena lweyi vaprofeta hinkwavu vahlayeke vumboni henhla ka yena loko vaku: ‘Mun'wana ni mun'wana lweyi apfumelaka ka yena, atakuma kurivaleliwa ka svijoho hi vito ra yena.’” Loko Petrosi ahavulavula hi timhaka toleto, Moya Wokwetsima wuxikela henhla ka hinkwavu lava avayingisaka Rito. Kutani vapfumeli va Vayuda lavateke na Petrosi, vahlamala ngopfu, loko vavona lesvaku nyiko ya Moya Wokwetsima yiyaveliwa na vona vamatiko. Hikuva avavatwa vavulavula hi tindzimi tin'wana, na vali karhi vadzunisa Xikwembu. Kutani Petrosi aku: “I mani lweyi angayalaka svosvi lesvaku vanhu lava vakhuvuliwa hi mati, lesvi vayamukeleke Moya Wokwetsima kufana na hina ke?” Kutani aleleta lesvaku vakhuvuliwa hi vito ra Yesu Kriste. Vona vamukombela lesvaku axwa na vona masiku mangali mangani. Kambe vapostola ni vamakwavu Hosini lavayakeke Yudeya vatwa lesvaku vamatiko na vona vayamukele Rito ra Xikwembu. Kuteloko Petrosi atlhantukele Yerusalema, lava avatsakela sva kuyimba vavulavulisana na yena, vaku: “Wena, unghene ka vavanuna lavangayimbangiki, uja na vona.” Kutani Petrosi asungula kuvabzela timhaka hi kulongoloka ka tona, aku: “Anili doropeni ra Yopa, na nili karhi nikhongela; kutani ningheniwa hi moya, nivona xilo lexifanaka ni lansoro lerikulu, na xili karhi xixika xinembeletiwa hi le tilweni hi tinyihla ta mune, xifika kusuhi na mina. Loko ni langutisisa svinene ndzeni ka xona, nivona svifuyu svofamba hi milenge ni mavoko, ni sviharhi, ni lesvi kokovaka, ni lesvihahaka mpfhukeni. Kutani nitwa rito leringe ka mina: ‘Petrosi, suka uyima, udlaya uja!’ Kutani niku: ‘Ahihim, Hosi, ningakala ningasviyendli, hikuva akusitshama kunghena xilo lexiyilaka kumbe lexikalaka xingabasanga non'weni wa mina, ni siku ni rin'we.’ Rito riyengeta rihuma tilweni, riku: ‘Svilo lesvi Xikwembu xingavula lesvaku svibasile, ungavuli lesvaku svayila.’ Svilo lesvi svihumelela kanharhu. Kutani hinkwasvu svitlhela svitlheliseliwa tilweni. Hi nkama wolowo kutshuka kuhumelela vavanuna vanharhu nyangweni ya yindlo leyi anitshama ka yona; avarhumiwile ka mina, vahuma Khezariya. Kutani Moya wunibzela lesvaku nifamba na vona, na ningakanakani; na vona vamakwerhu va ntlhanu ni mun'we lava, vafamba na mina; kutani hinghena ka Korneliyo yelweyo. Kuteloko ahibzela hilaha avoneke ntsumi ndlwini ya yena, na yiyimile yiku: ‘Rhuma vanhu vaya Yopa, vayavitana Simoni lweyi vange i Petrosi; hi yena lweyi angatakubzela timhaka leti ungataponisiwa ha tona, wena ni va njangu wa wena hinkwawu.’ Loko ni sungula kuvulavula, Moya Wokwetsima wuta henhla ka vona, hi ndlela leyi wungata ha yona ni le henhla ka hina kusunguleni. Kutani ni anakanya rito ra Hosi leringe: ‘Yohani akhuvulile hi mati, kambe n'wina mitakhuvuliwa hi Moya Wokwetsima.’ Kutani-ke, lesvi Xikwembu xivanyikeke nyiko leyifanaka ni leyi hingayikuma hina, hikupfumela ka Hosi Yesu Kriste, xana anili mani mina kuyalela Xikwembu ke?” Loko vatwa timhaka teto, vamiyela vangahavileli; kutani vadzunisa Xikwembu, vaku: “Loko svilitano, na vona vamatiko Xikwembu xivanyikile kuhundzuka loku kuyisaka vuton'wini.” Loko vali lava avahangalasiwile hi kuxanisiwa lokungahumelela nkameni wa kudlayiwa ka Stefano, vahundzela mahlweni kuyafika le Fenisiya, ni le Kipra, ni le Antiyoka, na vali karhi vajondzisa Rito ka Vayuda ntsena. Kambe van'wana va vona, vanga vavanuna lavahumeke Kipra ni le Kirena, loko vafike le Antiyoka, vahlaya Rito ni le ka Vagirika, vavativisa Evhangeli ya Hosi Yesu. Matimba ya Hosi amali na vona; kutani vanhu lavotala vapfumela, vahundzuka ka Hosi. Kuteloko mahungu ya timhaka toleto mayafika tindleveni ta kereke ya le Yerusalema, kurhumiwa Barnaba lesvaku aya Antiyoka. Loko afika kona, ni loko avona lesvi timpsalu ta Xikwembu titirheke svona, atsaka; kutani avakhongotela hinkwavu kunamarhela Hosi ni kuyichivirikela hi mbilu. Barnaba aali wanuna wa munene, lweyi ateleke hi Moya Wokwetsima ni kupfumela; kutani ntshungu lowukulu wuyengeteleka ntlaweni wa Hosi. Hi loko Barnaba aya Tarso kuyalava Sawulo. Kuteloko amukumile, avuya na yena Antiyoka. Vahlengeletana ni kereke lembe hinkwaru, na vali karhi vajondzisa ntshungu lowukulu. Le Antiyoka, hi kona laha vajondzisiwa vangasungula kuvuliwa Vakriste kona. Masikwini walawo, vaprofeta vangirimela hi le Yerusalema, vata Antiyoka. Mun'we wa vona, lweyi avaku i Agabo, asuka ayima, ativisa hi matimba ya Moya lesvaku ndlala leyikulu yitawa misaveni hinkwayu (kunene yihumelele nkameni wa hosi Klawudiyo). Kutani vajondzisiwa vatwanana lesvaku mun'wana ni mun'wana wa vona, atarhumela lesvi asvikotaka akuva vapfuna vamakwavu lavayakeke tikweni ra Yudeya. Kunene vayendlisa svosvo, kutani varhumela tinyiko takona ka vakulukumba, tifamba na Barnaba na Sawulo. Nkameni wolowo, hosi Heroda asungula kuxanisa van'wana va kereke. Adlaya Yakobe makwavu wa Yohani hi tlhari. Kutani loko avona lesvaku svitsakisile Vayuda, atlhela akhoma na Petrosi (amali masiku ya Xinkwa xokala comela). Loko amukhomile, amupfalela jele, kutani aleleta lesvaku vamurindza hi mune wa mintlawa, ntlawa wun'wana ni wun'wana wuli ni mune wa masochwa. Aatilulamisele kuhumesa Petrosi mahlweni ka tiko ndzhaku ka nkhuvu wa Paska. Hikolaho, Petrosi arindziwa na ali jele; kambe kereke ayingatshiki kumukhongelela ka Xikwembu. Loko Heroda ali kusuhi ni kumuhumesa mahlweni ka tiko, hi vusiku bzakona, Petrosi aayetlele xikarhi ka masochwa mambirhi; aabohiwile hi machini mambirhi, nasvona valanguteli va nyangwa avarindza jele. Kutani, hi nomo-lo, ntsumi ya Hosi yihumelela; yindlo yitala hi kuvonakala; ntsumi yihlakahla Petrosi rheveni, yimupfuxa, yiku: “Hantlisa, upfuka.” Kutani machini mawa mavokweni ya yena. Ntsumi yiku ka yena: “Tikhame, uyambala ni masandhazi ya wena.” Ayendlisa xilesvo. Ntsumi yitlhela yiku ka yena: “Yambala ni banci ra wena, unilandza.” Kuteloko Petrosi ahumile, na ayilandza, angativi lesvaku lesviyendliwaka hi ntsumi hi svona hakunene. Aapimisa lesvaku ingava norho. Loko vahundzile ntlawa wa kusungula ni lowa vumbirhi, vafika xipfalwini xa nsimbi lexipfulekelaka doropeni; xitipfula hixoxe mahlweni ka vona, kutani vahuma, vafamba mpfhukanyana hi ndlela yakona; kutani hi nomo-lo, ntsumi yisuka yisiya Petrosi. Loko Petrosi axalamuka, aku: “Svosvi nasvitiva hakunene lesvaku Hosi yirhumile ntsumi ya yona, kutani yiniponisile mavokweni ya Heroda, ni ka hinkwasvu lesvi tiko ra Vayuda aritiyimisele kuniyendla svona.” Loko Petrosi avonile lesvaku timhaka tiyimile hi ndlela leyi, aya kaya ka Mariya, mamana wa Yohani lweyi avaku i Marka, laha vapfumeli lavotala avahlengeletene kona, na vali karhi vakhongela. Petrosi agongondza nyangweni ya le handle, kutani kuta mutirhi waxisati lweyi avaku i Roda, atayingisela. Loko atwile hi rito lesvaku i Petrosi, kutsakeni ka yena angapfulanga xipfalu, kambe atlhelela ndlwini hi kutsutsuma aya vativisa lesvaku Petrosi ayimile le handle nyangweni. Vaku ka yena: “U ni rihuhe wena.” Kambe atiyisa lesvaku angahembi; vona vaku: “I ntsumi ya yena.” Kambe Petrosi atlhela agongondza; kakuloko vapfulile, vamuvona, kutani vahlamala ngopfu. Yena avakwehleta hi voko lesvaku vamiyela; avabzela hilaha Hosi yimuhumeseke jele hakona, kutani aku: “Tivisani Yakobe ni vamakwerhu Hosini timhaka toleto.” Kutani ahuma, afamba aya kun'wana. Loko bzixile, masochwa mapfilungana tinhloko svinene, maku: “Kuhumelele yini ka Petrosi xana?” Loko Heroda amulavile angamukumi, athethisa masochwa hubzeni, kutani aleleta lesvaku madlayiwa. Ndzhaku ka svona, Heroda asuka Yudeya, angirimelela Khezariya, ayatshama kona. Heroda aalava kulwa ni va le Tiro ni va le Sidoni; kambe vona vata ka yena na vali mbilu yin'we; varhanga hi kutwanana na Blasto, mulanguteli wa yindlo ya hosi; hi loko vayakombela kurhula ka tiko, hikuva tiko ra vona arikuma svakuja hikolaho ka tiko ra hosi Heroda. Kutani hi siku lerivekiweke, Heroda ayambala tinguvu ta vuhosi, atshama xitshan'wini xa yena, avulavula na vona. Kutani vanhu vahuwelela, vaku: “Rito leri ahi ra munhu, i ra Tilo!” Hi nomo-lo, ntsumi ya Hosi yiba Heroda, hikuva aangadzunisanga Xikwembu; kutani ajiwa hi svivungu, afa. Rito ra Hosi ariya mahlweni, rikula ngopfu. Kutani loko Barnaba na Sawulo vahetile ntirho wa vona, vasuka Yerusalema, vavuya na vali na Yohani, lweyi avaku i Marka. Akerekeni ya le Antiyoka, akuli ni vaprofeta ni vajondzisi van'wana, vanga Barnaba, na Simiyoni lweyi avaku i Nigere na Lukiyo wa Kirena, na Manaheme lweyi angakula svin'we na hosi Heroda, na Sawulo. Loko vali karhi na vatitsona svakuja vagandzela Hosi, Moya Wokwetsima wuku: “Nihlawuleleni Barnaba na Sawulo, vaya ntirhweni lowu ni vavitaneleke wona.” Kutani loko vatitsonile svakuja ni loko vakhongelile, vavatlhanteka mavoko, kutani vavapfulela tindlela. Vona ke, hi kurhumiwa hi Moya Wokwetsima, vangirimela Selukiya, vanghena ngalaweni vapelela Kipra. Loko vafikile Salamina, vapaluxa Rito ra Xikwembu masinagogeni ya Vayuda. Avali na Yohani, mupfuni wa vona. Kuteloko vatsemakanyile xihlale hinkwaxu vayafika Pafo, vayakuma mungoma mun'we wa muprofeta wa mavunhwa; vito ra yena avaku i Bariyesu; aatshama na Serxjiyu Pawulo, muyimeli wa vuhosi, wanuna wa kutlhariha, lweyi aavitanile Barnaba na Sawulo hikuva aalava kutwa Rito ra Xikwembu. Kambe vasiveliwa hi munhu lweyi wa mungoma, lweyi vito rin'wana ra yena avaku i Elima; aaringeta kuyendla lesvaku muyimeli wa vuhosi angapfumeli. Kambe Sawulo, anga yena Pawulo, atala hi Moya Wokwetsima, kutani ahonokela mungoma lweyi, aku: “Wena n'wana Sathana, lweyi ateleke hi kukanganyisa hinkwaku ni kubiha hinkwaku, wena nala wa hinkwasvu lesvilulameke, xana utatshika rini kuhingakanya tindlela letolulama ta Hosi ke? Vona, svosvi voko ra Hosi ri le henhla ka wena, utafa mahlo, uheta masiku na ungahavoni nchumu.” Hi nomo-lo, mungoma ateliwa hi riphume ni munyama, kutani ayingayinga, alava lweyi angamufambisaka hi voko. Loko muyimeli wa vuhosi avona lesvihumeleleke, apfumela, ahlamalisiwa hi ta Hosi leti ajondzisiweke tona. Pawulo ni lava avali na yena, vasuka Pafo hi ngalawa, vapelela le Perxje, doropa ra Pamfiliya. Kambe Yohani ahambana na vona, atlhelela Yerusalema. Loko valivona, vasuka le Perxje, vayafika doropeni ra Antiyoka wa Pizidiya; kutani vanghena sinagogeni hi siku ra Savata, vatshamisa. Ndzhaku ka loko kuhlayiwile tindzimana ta Nawu ni ta Vaprofeta, vafambisi va sinagoga vavarhumela rito, vaku: “N'wina valekwerhu, loko mili ni rito rokhongotela vanhu, mingavulavula.” Kolaho Pawulo asuka ayima; kutani loko avakwehletile hi voko, aku: Vavanuna va Israyele, na n'wina lavachavaka Xikwembu, yingisani: Xikwembu xa tiko leri ra Vaisrayele xihlawulile vatatana va hina, kutani loko Vaisrayele lava vaha luvelile tikweni ra Gibita, Xikwembu xivakulisa, xivuya xivahumesa kona hi matimba lamakulu. Kutani, lemananga, xivalehisela mbilu hi malembe ya mune wa makume. Kuteloko xihelisile matiko ya ntlhanu ni mambirhi Kanana, xiyavela vatatana tiko rakona, riva rifuwo ra vona. Hinkwasvu lesvi svitekile malembe ya mune wa madzana ni ntlhanu wa makume (450). Ndzhaku ka svona xivanyika vayavanyisi kuyafika nkameni wa muprofeta Samuwele. Kuteloko vakombela hosi; Xikwembu xivanyika Sawulo n'wana Kixi, wanuna wa rixaka ra Benjamini, afuma malembe ya mune wa makume. Loko Xikwembu ximususile, xiveka Davhida kuva hosi ya vona; hi yena lweyi xingahlaya lesvaku wakhenseka, loko xite: Nikumile lesvaku Davhida n'wana Yese, i munhu lweyi anga wa mbilu ya mina, hikuva atayendla hinkwasvu lesvi nisvirhandzaka. Arixakeni ra yena, Xikwembu xinyikile Vaisrayele Muponisi anga Yesu, hilaha axisvitshembisile hakona. Loko Yesu angasihumelela, Yohani arhange apaluxa, tikweni ra Israyele hinkwaru, mahungu ya lesvaku lavahundzukaka vatakhuvuliwa. Kutani loko Yohani alava kuheta ntirho wa yena, ate: Xana mipimisa lesvaku ni mani ke? Aniyena lweyi mimulangutelaka; kambe vonani, wata ndzhaku ka mina lweyi svinganifanelangiki kumuhlivila masandhazi. “N'wina valekwerhu minga rixaka ra Abrahamu, ni van'wana lava vachavaka Xikwembu xikarhi ka n'wina: Mahungu lawa ya kuponisiwa marhumeliwile ka hina.” Lava vayakeke Yerusalema, ni vakulukumba va vona, avativanga lesvaku Yesu i mani, nasvona avatwisisanga marito ya vaprofeta lawa mahlayiwaka siku rin'wana ni rin'wana ra Savata. Kambe vayendlile lesvaku marito lawa mahetiseka, siku leri vathethiseke Yesu. Hambi loko vangakumanga nchumu xobiha ka yena lexi avafanekela kumutsemela rifu ha xona, vakombele ka Pilato lesvaku adlayiwa. Kuteloko vahetisisile timhaka hinkwatu letitsaliweke mayelanu na yena, vamuhawulile mhandzeni, vamulata sirheni. Kambe Xikwembu ximupfuxile xikarhi ka vafi; kutani avoniwile hi masiku lamanyingi hi vajondzisiwa lavangasuka Galileya, vatlhantukela Yerusalema na vali na yena. Namuntlha hi vona vanga timboni ta yena vanhwini. “Na hina ke, ha mitivisa mahungu lamanene ya xitshembiso lexi vatatana va hina vatshembisiweke xona,” hi lesvaku Xikwembu xihetisisile xitshembiso xakona ka hina vana va vona, hi kupfuxa Yesu kufeni; hi svona lesvitsaliweke ka Pisalma ya vumbirhi, leyinge: “‘U n'wananga, namuntlha ni kupsalile.’” Loko yili mhaka ya kumupfuxa xikarhi ka vafi lesvaku angaheli hi kubola, Xikwembu xivulise xilesvi xiku: “‘Nitaminyika minkateko leyokwetsima, yinga leyotiya leyitshembisiweke Davhida.’” Hikolaho xahavula ni kun'wana xiku: Ungetshiki Muhlawuliwa wa wena ahela hi kubola. Loko ali Davhida, ayisile makungu ya Xikwembu mahlweni, nkameni wa kuhanya ka yena, kutani atiyetlelela, alahliwa ni vatatana va yena, ava abola. Kambe lweyi Xikwembu ximupfuxeke kufeni, angahelanga hi kubola. “Svitiveni ke n'wina valekwerhu lesvaku, hikolaho ka munhu lweyi, mitivisiwa ta kurivaleliwa ka svijoho; nasvona tivani lesvaku, ka hinkwasvu lesvi amihluleka kurivaleliwa ka svona hi Nawu wa Moxe,” svosvi mun'wana ni mun'wana lweyi apfumelaka warivaleliwa ka svona ha Yesu. Loko svilitano, tivoneleni lesvaku kungahumeleli lesvingavuliwa hi vaprofeta loko vaku: “‘Langutani n'wina vasandzi, hlamalani, miva milova, hikuva ni le kutirheni minkameni leyi ya n'wina; ntirho wakona amingawukholwi, loko vamitivisa wona.’” Loko Pawulo na Barnaba vahuma sinagogeni, vanhu vavakombela kuta nakambe hi siku ra Savata leritlhantamaka, vatavajondzisa timhaka toleto. Kuteloko nhlengeletanu yihangalakile, Pawulo na Barnaba valandziwa hi Vayuda ni vamatiko lavanyingi vavukhongeli, lavayamukeliweke Xiyudeni; vapostola vavulavula na vona, vavakhongotela kutiyisela timpsalwini ta Xikwembu. Ndzhaku ka vhiki, hi siku ra Savata, vanhu lavanyingi va doropa vahlengeletana akuva vayingisa rito ra Hosi. Kambe loko Vayuda vavona mintshungu, vatala hi vukwele, kutani vakaneta ni kuyala lesvivuliwaka hi Pawulo. Kambe Pawulo na Barnaba vahlamula na vangachavi nchumu, vaku: “Asvifanela lesvaku Rito ra Xikwembu ribzeliwa n'wina kusunguleni; kambe lesvi miricukumetaka, ni lesvi mititsemelaka hi n'wexe, miku amifaneliwi hi vutomi lebzingaheliki, masvivo hina hihundzukela ka vamatiko.” Hikuva Hosi yihi leletile lesvi: “‘Nikuvekile kuva kuvonakala ka vamatiko, ni kuva ndlela ya kuponisiwa matlhelweni hinkwawu ya misava.’” Loko vamatiko vatwa lesvo, vatsaka, vadzunisa Rito ra Hosi; kutani hinkwavu lavahlawuleliweke vutomi lebzingaheliki, vapfumela. Rito ra Hosi rihangalaka tikweni hinkwaru. Kambe Vayuda vahlohlotela vavasati lavakuchaviseka va vukhongeli, ni vakulukumba va doropa; vasungula kuxanisa Pawulo na Barnaba, kutani vavahlongola tikweni ra vona. Kambe vona vaphumunha ntshuri milengeni ya vona, kukomba lesvaku vahambana na vona, kutani vaya doropeni ra Ikoniya. Loko vali vajondzisiwa, vatala hi kutsaka ni Moya Wokwetsima. Loko Pawulo na Barnaba vali le Ikoniya, vanghena sinagogeni ra Vayuda kufana ni le Antiyoka, vajondzisa kona, kukondza kupfumela vunyingi lebzikulu bza Vayuda ni bza Vagirika. Kambe Vayuda vokala vangapfumelanga vahlohlotela vamatiko, vawonha timbilu ta vona kuvalwisa ni vamakwavu Hosini. Hambi svilitano, vapostola vaxwa kona masiku lamanyingi, vavulavula na vangachavi nchumu, vatitshembele Hosi; yona ayitiyisa mahungu ya timpsalu ta yona hi kuyendla mahlori ni svihlamaliso hi mavoko ya vona. Kambe xitshungu xa doropa xiyavana, xin'wana xiyimela Vayuda, xin'wana xiyimela vapostola. Hi loko vamatiko ni Vayuda, svin'we ni tindhuna ta vona, varingeta kuyendlela vapostola lesvobiha, ni kuvakhandla hi maribze; loko vona vasvitwa vatsutsumela Listra ni le Derbe, ringa doropa rin'wana ra tiko ra Likawoniya, vafika ni le svidoropanini svakona. Kutani vapaluxa Evhangeli kona. Akuli ni munhu le Listra lweyi aatolovelile kutshama ndhawini yin'we, hikuva aalimalile milenge; hi mpfhuka avelekiwa, anga zanga afamba ni siku ni rin'we. Aayingisa lesvihlayiwaka hi Pawulo. Yena amulangutisisa, kutani avona lesvaku anikupfumela ka lesvaku angahanyisiwa; hi loko Pawulo atlakusa rito, aku ka yena: “Suka, uyima hi milenge ya wena!” Munhu lweyi okakatsuku, asungula kufambafamba. Loko xitshungu xivona lesvi sviyendliweke hi Pawulo, xitlakusa rito hi ririmi ra Likawoniya, xiku: “Svikwembu svitiyendle svifananiso sva vanhu, kutani svixikele ka hina!” Kutani Barnaba avamuhlaya Zewu; Pawulo yena, avaku i Herme, hikuva aali yena xivulavuli lexikulu. Na yena Muprista wa Zewu, lweyi tempele ya yena ayili handle nyana ka doropa, atisa tihomu ni vuhlalu bza sviluva nyangweni ya doropa, alava kuhumesela vapostola timhamba, na ali ni xitshungu. Kambe loko vapostola Barnaba na Pawulo vatwa svosvo, vahandzula sviyambalu sva vona, vatsutsumela xikarhi ka ntshungu na vali karhi vahuwelela, vaku: “Vavanuna, hikolaho ka yini miyendla lesvo xana? Kuve na hina hi vanhu lava vafanaka na n'wina hi ntumbuluku; mahungu lamanene lawa hi mitiselaka wona hi lesvaku mitshika mintirho leyi ya sva hava, mihundzukela ka Xikwembu lexihanyaka, lexingayendla tilo ni misava, ni lwandle, ni svilo hinkwasvu lesvinga ka svona; minkameni leyihundzeke, xipfumelelile matiko hinkwawu kufamba hi tindlela ta wona. Hambi svilitano, axitshikanga kutikomba lesvi xinga svona, hi kuyendla lesvinene; ximinyikile timpfula tihuma tilweni, ni tinguva ta ntshovelo, ximiyandzisela ni svakuja, xitata timbilu ta n'wina hi kutsaka.” Kambe, hambi loko vapostola vavulise svosvo, asvivavevukelanga kuyendla lesvaku xitshungu xingavahumeseli timhamba. Hi loko kufika Vayuda lavahumaka Antiyoka ni le Ikoniya, vakucetela xitshungu, xikhandla Pawulo hi maribze, kutani vamukokela handle ka doropa, vapimisa lesvaku afile. Kambe loko vajondzisiwa vata vamurhendzela, apfuka, anghena doropeni; kutani hi siku leritlhantamaka asuka aya Derbe, na ali na Barnaba. Kuteloko na vapaluxile Evhangeli doropeni rolero ra Derbe ni kuhundzukisa vanhu lavanyingi lesvaku vava vajondzisiwa, vatlhelela Listra, ni le Ikoniya, ni le Antiyoka, na vali karhi vatiyisa timbilu ta vajondzisiwa, vavakhongotela kutiyisela kupfumeleni, vaku: “Amfun'wini wa Xikwembu, hifanele kunghena hi maxangu lamanyingi.” Vavahlawulela vakulukumba akerekeni yin'wana ni yin'wana; kutani, hi kukhongela ni kutitsona svakuja, vavaveka mavokweni ya Hosi leyi avapfumelile ka yona. Kuteloko vatsemakanya tiko ra Pizidiya, vanghena tikweni ra Pamfiliya. Vajondzisa Rito Perxje, kutani vangirimela vaya Ataliya. Vasuka kona, vatlhelela Antiyoka hi ngalawa, kunga kona laha vakriste avavakombelelile minkateko ya Xikwembu, lesvaku vayatirha ntirho wa xona. Kutani vavuya na vahetile ntirho wakona. Akufikeni ka vona, vahlengeleta kereke, vavarungulela hinkwasvu lesvi Xikwembu xisviyendleke ha vona, ni hilaha xingapfulela vamatiko anyangwa yonghena kupfumeleni. Kutani vatshama kona nkama lowoleha na vali ni vajondzisiwa. Van'wana lavahumeke Yudeya, avajondzisa vamakwavu Hosini, vaku: “Loko mingayimbisiwanga hi kuya hi Nawu wa Moxe, mingakala mingaponisiwi.” Kambe Pawulo na Barnaba vahambana ngopfu na vona mhakeni leyi, vaphikizana na vona hi matimba; kutani valulamisa lesvaku Pawulo na Barnaba vataya Yerusalema ni van'wana va Antiyoka, kuyavutisa mhaka leyi ka vapostola ni ka vakulukumba. Kereke yivalongelela yiku: “Tindlela atibase!” Kutani vatsemakanya matiko ya Fenisiya ni ya Samariya, na vali karhi vahlamusela hilaha vamatiko vahundzukeke hakona; kutani vamakwavu Hosini hinkwavu vatsakisiwa ngopfu hi mhaka leyi. Kuteloko vafikile Yerusalema, vayamukeliwa hi kereke ni vapostola ni vakulukumba; kutani vavarungulela hinkwasvu lesvi Xikwembu xisviyendleke ha vona. Kambe van'wana va ntlawa wa Vafarisi, lava avapfumelile, vayima, vaku: “Svafanela lesvaku vamatiko vayimba, vabzeliwa kuhlayisa Nawu wa Moxe.” Kutani vapostola ni vakulukumba vahlengeletana kukamba mhaka leyi. Kuteloko vayivulavulile nkama wa kuleha, Petrosi ayima, aku ka vona: “Vavanuna valekwerhu, masvitiva lesvaku Xikwembu xinihlawulile xikarhi ka n'wina loko kereke yahakusungula, lesvaku vamatiko vatatwa rito ra Evhangeli hi nomo wa mina, vakondza vapfumela. Kutani Xikwembu lexitivaka timbilu ta vanhu, xikombile lesvaku vayamukeleka ka xona hi kuvanyika Moya Wokwetsima kukotisa hina; xikarhi ka hina na vona, axihlawulanga: Xibasisile timbilu ta vona, hikuva vapfumelile. Svosvi-ke, xana miringela yini Xikwembu hi kutlhanteka ndzhwalu makatleni ya vajondzisiwa, lowu vatatana va hina, hambi hina, hihlulekeke kuwurhwala ke? Kambe loko hi pfumela lesvaku timpsalu ta Hosi Yesu, hi tona tihiponisaka, ni le ka vona svitano.” Nhlengeletanu hinkwayu ayimiyelile, yiyingisa Barnaba na Pawulo loko varungula hilaha Xikwembu xivatirhiseke hakona kuyendla mahlori ni svihlamaliso lesvinyingi xikarhi ka vamatiko. Kuteloko vahetile kuhlamusela, Yakobe avulavula, aku: “N'wina valekwerhu, ni yingiseni; Simoni wa ha kuhlamusela hilaha Xikwembu xingasungula kutikarhata hakona, xitilavela, xikarhi ka vamatiko, vanhu lavangatahlayiwa va xona hakunene.” Kutani marito ya vaprofeta matwanana na svona svosvo, hikuva kutsaliwile lesvi: Hosi yili, ndzhaku ka svosvo nitavuya, ni pfuxa yindlo ya Davhida leyingawa. Nitapfuxa ni marhumbi ya yona, nitlhela niyiyimisa, lesvaku vanhu lavan'wana hinkwavu vatakota kulava Hosi, vona vamatiko hinkwavu lava ningava vitana lesvaku vava vanhu va mina hakunene. Hosi yivula svosvo, yona yitirhaka svilo lesvi, svinga svilo lesvitivisiweke khale. “Hikokolaho, nitsema mhaka hi kuvula lesvaku vamatiko lavahundzukelaka ka Xikwembu, hingatshuki hivakarhata;” “kambe ahivatsaleleni papela, hivabzela kutshika svakuja lesvinyamisiweke hi kuhumeseliwa svikwembu sva hava, vatshika ni vugelegele vangaji lesvi vanhu vasvidlayeke hi kusvitlimba minkolo, ni ngati vangaji”; “hikuva i khale ngopfu milawu ya Moxe yisungulile kujondzisiwa minjangwini hinkwayu, yili karhi yihlayiwa masinagogeni masiku hinkwawu ya Savata.” Hikokolaho vapostola ni vakulukumba, svin'we ni kereke hinkwayu, vatwanana kuhlawula vavanuna van'wana xikarhi ka vona, vavarhumela Antiyoka na Pawulo na Barnaba; kurhumiwa Yuda lweyi avaku i Barsaba, na Silasi, vavanuna lavochaviseka xikarhi ka vamakwavu Hosini. Vafamba ni papela leringe: “Hina vapostola ni vakulukumba, hinga vamakwavu Hosini, ka n'wina vamakwerhu mingavelekiwa na mili vamatiko, n'wina mingale Antiyoka, ni le Siriya, ni le Kilikiya: Xeweni! “Hitwile lesvaku van'wana lavahumaka ka hina vamitshukisile hi kuvulavula ka vona, vamikanakanisa mimoyeni ya n'wina; kasi ahingava leletanga nchumu; hi kokolaho hi twananile hi mbilu yin'we kuhlawula vavanuna, hivarhumela ka n'wina; vata kufana ni varhandziwa va hina Pawulo na Barnaba, vanga vavanuna lava vangachavangiki kunyiketa vutomi bza vona kutirhela Hosi ya hina Yesu Kriste. Nasvona himirhumela Yuda na Silasi lava vangatamitivisa hi nomo timhaka ta papela leri. Hikuva Moya Wokwetsima svin'we na hina, hivonile lesvaku ahingamirhwexi ndzhwalu wun'wana, loko wungali wa timfanelo leti: Hi lesvaku mitshika tinyama letitlhaveliweke svikwembu sva hava, mingajeneni ngati ni lesvi vanhu vasvidlayeke hi kusvitlimba minkolo, mitshika ni vugelegele; Loko mifularhela svilo svesvo, mitava miyendlile lesvinene. “Salani hi kurhula!” Varhumiwa vatshunxiwa vafamba, kutani vangirimela vaya Antiyoka; varhamba nhlengeletanu hinkwayu, kutani va vanyika papela leri. Loko vona varihlayile, vatsakisiwa ngopfu hi marito lawa ya kuvakhongotela. Lesvi Yuda na Silasi avali vaprofeta, vakhongotelile vamakwavu hi marito layotala, vavatiyisa. Loko vaxwile kona masiku, vatshunxiwa hi kurhula hi vamakwavu, lesvaku vatlhelela ka lava vavarhumeke. [ Kambe Silasi ahlawula kusala Antiyoka.] Pawulo na Barnaba, vona, vaxwa Antiyoka nkamanyana, na vali karhi vajondzisa, vapaluxa mahungu lamanene ya rito ra Hosi, na vali ni van'wana lavotala. Loko kuhundzile masiku mangali mangani, Pawulo aku ka Barnaba: “Ahitlhele hi ya yendzela vamakwerhu madoropeni hinkwawu lawa hingapaluxa rito ra Hosi ka wona, hivona hilaha vahanyaka hakona.” Barnaba aanavela lesvaku vateka Yohani, lweyi avaku i Marka, vafamba na yena. Kambe Pawulo avona lesvaku svitava svihoxekile loko vafamba ni munhu lweyi, hikuva aahambene na vona Pamfiliya, angayanga na vona ntirhweni. Kutani kuhumelela kuholovisana xikarhi ka vona, vakondza vayavana; Barnaba ateka Marka, aya Kipra hi ngalawa. Loko ali Pawulo, atihlawulela Silasi, kutani asuka, na akombeleliwe minkateko ya Xikwembu hi vamakwavu. Kutani atsemakanya matiko ya Siriya na Kilikiya, na ali karhi atiyisa tikereke. Pawulo afika Derbe ni le Listra. Kona, akuli ni mujondzisiwa lweyi avaku i Timotewu; mamana wa yena aali muyuda, nasvona aali mupfumeli; kambe tatana wa yena aali mugriki; Timotewu aakhenseka ka vamakwavu va le Listra ni va le Ikoniya. Pawulo aalava kufamba na yena, kutani amuteka, amuyimbisa, hikolaho ka Vayuda lavayakeke matikweni wolawo, hikuva hinkwavu avativa lesvaku tatana wa Timotewu i Mugriki. Kutani loko vapostola vali karhi vahundza madoropeni lawa, vanyiketa vamakwavu milawu leyingavekiwa hi vapostola ni vakulukumba va le Yerusalema, nikukombela lesvaku yihlayisiwa. Hi mukhuva lowu, tikereke titiyisiwa kupfumeleni, tiyandza siku rin'wana ni rin'wana. Vapostola vatsemakanya matiko ya Frixjiya ni ya Galatiya, kutani Moya Wokwetsima wuvasivela kuyavula Rito tikweni ra Aziya. Kuteloko vafikile ndzilekaneni wa tiko ra Misiya, varingeta kunghena tikweni ra Bitiniya, kambe Moya wa Yesu awuvapfumelelanga. Hikolaho vatsemakanya Misiya, kutani vangirimela vaya Trowasi. Xivono xihumelela ka Pawulo nivusiku: Wanuna wa Makedoniya ayima mahlweni ka yena, amukombela, aku: “Pelela Makedoniya, utahipfuna!” Loko Pawulo avonile xivoniso lexi, hihantla hitilungisela kuya Makedoniya hi kutwisisa lesvaku i Xikwembu lexi xihivitaneke kuyapaluxa Evhangeli ka vanhu vakona. Kuteloko hi sukile Trowasi hi ngalawa, hi tsemakanya lwandle kuyafika xihlaleni xa Samotraka, kutani hi siku leritlhantamaka, hiya Neyapolisi; loko hisuka kona, hikongoma Filipi, anga doropa ra xitikwana xosungula xa Makedoniya, leri arili mavokweni ya vanhu vohuma kule. Kutani hi tshama masiku mangali mangani doropeni rolero. Hi siku ra Savata hihuma doropeni, hiya nambzeni, laha hi pimiseke lesvaku kungava ni ndhawu yokhongela ka yona; kuteloko hitshamile, hivulavula ni vavasati lavahlengeletaneke kona. Mun'we wa vona lweyi avaku i Lidiya, muxavisi wa tinguvu tovangama ta xivunguvungu, wa doropa ra Tiyatira, wansati wochava Xikwembu, aali kuyingiseni; kutani Hosi yipfula mbilu ya yena lesvaku atwisisa lesvivuliwaka hi Pawulo. Kuteloko atsakamisiwile svin'we ni va njangu wa yena, ahikombela, aku: “Loko mivona lesvaku ni munhu lweyi apfumeleke ka Hosi hakunene, minga nghena kaya ka mina, mitshama kona.” Kutani ahisindzisa kuya kona. Siku rin'wana loko hiya ndhawini yokhongela ka yona, hihlangana ni wanhwana lweyi aali xikarawa, lweyi aali ni moya wa vungoma, afuwisa vinyi va yena hi kuvhumbha. Kutani ahilandza, hina na Pawulo, na ali karhi ahuwelela, aku: “Vavanuna lava i malandza ya Xikwembu xa le henhlahenhla, lava vamitivisaka tandlela ya kuponisiwa.” Ahamba ayendlisa svosvo hi masiku lawa manyingi kufika laha Pawulo akarhatekeke svinene, kutani ahundzukula, aku ka moya: “Hi vito ra Yesu Kriste nakubzela nili: Huma ka nhwanyana lweyi!” Kutani hi nomo-lo moya wuhuma. Loko vinyi va nhwanyana vavona lesvaku vaheleliwe hi bindzu leri avarilangutelile, vakhoma Pawulo na Silasi, vavakokela vanhwini, mahlweni ka tindhuna ta vuthethisi; vavayisa ka letikulu takona vaku: “Vanhu lava i Vayuda, kutani vapfilunganyisa doropa ra ka hina; vajondzisa mikhuva leyi hingafaneliki kuyiyamukela ni kuyiyendla, hina hinga Varoma.” Na wona ntshungu wuvapfukela hi matimba; tindhuna tihandzula sviyambalu sva Pawulo na Silasi, tileleta lesvaku vabiwa hi tinhonga. Kuteloko vavahumesile mimpfembeti hi kuvaba, vavapfalela jele, valeleta mulanguteli wa jele kuvarindza svinene. Loko yena akumile xileriso xoxo, avanghenisa jele ra le xikarhi, kutani amanya milenge ya vona ni mintsandza. Xikarhi ka vusiku, Pawulo na Silasi avakhongela, vadzunisa Xikwembu hi kuyimbelela tinsimu, kutani vabohiwa lavan'wana va vayingisa. Kambe hi nomo-lo, kuva ni kutsekatseka lokukulu ka misava; kutani masungulu ya jele ma tsekatsekisiwa; hi nomo-lo tinyangwa hinkwatu tipfuleka, kutani machini ya vabohiwa hinkwavu matshunxeka. Mulanguteli wa jele apfuka avurhongweni; hi loko avona svipfalu sva jele na svipfulekile, ahlomula ripanga ra yena, alava kutidlaya, hikuva aapimisa lesvaku vabohiwa vabalekile. Kambe Pawulo ahuwelela hi rito leritlakukeke, aku: “Ungatshuki utivavisa, hikuva hahali kona hinkwerhu.” Mulanguteli akombela tivoni, anghena hi kutsutsuma, atiwisela milengeni ya Pawulo na Silasi, na ali karhi arhurhumela hi kuchava. Kutani loko avahumeselile handle, aku: “Tihosi, xana nifanele kuyendla yini lesvaku niponisiwa?” Vona vaku: “Pfumela ka Hosi Yesu, kutani utaponisiwa, wena ni va njangu wa wena.” Kutani vamubzela rito ra Hosi, na ali ni njangu wa yena hinkwawu. Kutani, nkarhini wolowo wa vusiku, mulanguteli avateka avahlampsa mimpfembeti ya vona; kutani hi nomo-lo akhuvuliwa, yena ni njangu wa yena hinkwawu. Ndzhaku ka svosvo, ayisa Pawulo na Silasi kaya ka yena, avaphamela svakuja, kutani atsaka svin'we ni va njangu wa yena hinkwavu, hi lesvi aapfumelile ka Xikwembu. Loko rixa, tindhuna tirhuma mapholisa kuyaleleta lesvaku vanhu lava vatshunxiwa. Mulanguteli wa jele ativisa Pawulo mhaka leyi, aku: “Tindhuna tirhumele rito lesvaku mitshunxiwa; kutani svosvi, humani, mifamba hi kurhula.” Kambe Pawulo aku ka mapholisa: “Vahibile rivaleni na hingasi yavanyisiwa, hina hinga Varoma, kutani vahinghenisa jele! Xana svosvi vangahitshunxa xihundleni xana? Nikutsongo! Avate vona vinyi, vatahihumesela handle.” Mapholisa mafikisa marito wolawo ka tindhuna; loko tona titwa lesvaku Pawulo na Silasi i Varoma, tichava. Hi loko tita, tikombela kurivaleliwa, tivahumesela handle, tikombela lesvaku vahuma doropeni, vafamba. Kuteloko vahumile jele, vaya kaya ka Lidiya; kona, vavonana ni vamakwavu, vavakhongotela, kutani vatifambela. Pawulo na Silasi vafamba hi ndlela leyihundzaka hi le Amfipolisi ni le Apoloniya, vafika Thesalonika, laha akuli ni sinagoga ra Vayuda. Hi kutolovela ka yena, Pawulo anghena nhlengeletanu na vona; kutani hi masiku manharhu ya Savata ahlamulana na vona hi kulandza Matsalwa, na amahlamusela, ni kuringanisa ha wona lesvaku Mesiya aafanele kutwisiwa kuvaviseka, ni kupfuka kufeni; kutani aku: “Yesu lweyi ni mitivisaka yena, hi yena Mesiya.” Kutani van'wana xikarhi ka vona vapfumela, vanamarhela Pawulo na Silasi, na vali ni nhlayo leyikulu ya Vagirika lavachavaka Xikwembu, ni lavanyingi xikarhi ka vavasati lavochaviseka. Kambe Vayuda vatala hi mavondzo, vateka vavanuna van'wana lavobiha ntsendzeleni wa doropa, kutani vahlengeleta ntshungu, vadzolonganisa doropa; vayarhendzela munti wa Yaso, valava Pawulo na Silasi akuva vavayisa mahlweni ka tiko. Kambe loko vangavakumi, vakokela Yaso ni vamakwavu van'wana mahlweni ka tindhuna ta doropa, vahuwelela, vaku: “Vanhu lavapfilunganyaka misava hinkwayu, vafikile ni halenu, kutani Yaso avarhurhelile; vanhu lava hinkwavu vatlula milawu ya Khezari, hi kuvula lesvaku ku ni hosi yin'wana, leyi vange i Yesu.” Hi marito lawa vapfuxa mpfilumpfilu xikarhi ka tiko ni le xikarhi ka tindhuna ta doropa letingasvitwa. Hambi svilitano, tindhuna tiyamukela xirihanandzu ka Yaso ni van'wana, kutani tivatshika vafamba. Hi vusiku bzakona, vamakwavu vahantlisa varhuma Pawulo na Silasi Bereya. Loko vapostola vafikile kona, vanghena sinagogeni ra Vayuda. Va le Bereya, avatlula va le Thesalonika hi malwandla, vayamukela Rito hi kukhensa lokukulu, vakambisisa Matsalwa masiku hinkwawu, valava kutiva lesvaku xana timhaka titano ke. Kutani lavotala xikarhi ka vona vapfumela, na svona, xikarhi ka Vagirika, kupfumela vavasati lavanyingi lava vachavisekaka, ni vavanuna lavanyingi. Kambe loko Vayuda va le Thesalonika vatwa lesvaku rito ra Xikwembu rivuliwile hi Pawulo ni le Bereya, vaya kona, vakanakanisa ni kupfilunganyisa xitshungu. Hikolaho, vamakwavu vahantlisa vahumesa Pawulo, ayafika ribuweni ra lwandle; kambe Silasi na Timotewu vasala Bereya. Kutani lava avaheleketa Pawulo, vamufikisa Atena; kutani vatlhela loko valeletiwile kubzela Silasi na Timotewu lesvaku vangahlweli kulandza Pawulo. Loko Pawulo ahavalangutela Atena, moya wa yena wutlhaveka svinene, loko avona lesvaku doropa leri ritele hi svifaniso sva svikwembu. Hikolaho, loko ali sinagogeni, ahlamulana ni Vayuda ni lavachavaka Xikwembu; kutani ayendlisa svosvo ni le hubzeni ya doropa masiku hinkwawu, ahlamulana ni lava avali kona. Kambe tintlhari tin'wana ta ntlawa wa Vaepikuro ni wa Svitoyika tikanetana na yena; van'wana vaku: “Xana munhu lweyi wa miharihari alava kuhibzela yini ke?” Van'wana vaku: “Ingi i mujondzisi wa ta svikwembu svin'wana.” Avavula svosvo, hikuva Pawulo aavabzela ta Yesu nitakupfuka kufeni. Kutani vamuteka, vaya na yena hubzeni ya “Areyopago”, vaku: “Xana ungahibzela jondzo leyimpsha leyi uyivulaka, lesvaku hi yihi ke? Ufikisile timhaka letohlamalisa tindleveni ta hina; hi kolaho hilava kutitiva lesvaku hi letoyini.” (Vaatena hinkwavu, ni vanhu vamatiko man'wana lavayendzeke ka vona, avangatirhi nchumu, loko kungali kurungulelana timhaka, kumbe kuyingisa tin'wana letahakuhumelelaka.) Kava loko Pawulo ayima hubzeni ya “Areyopago”, aku: “Vavanuna va Atena, nasvivona lesvaku, ka svilo hinkwasvu, mi vanhu vavukhongeli lebzikulu ngopfu. Hikuva loko nifamba na nili karhi nilanguta tindhawu leti migandzelaka ka tona, nikumile alitari leyi kutsaliweke marito ka yona lawa mange: ‘KA XIKWEMBU LEXINGATIVIWIKI!’ Svosvi-ke, lesvi misvigandzelaka na mingasvitivi, hi svona lesvi nimitivisaka svona. Xikwembu lexingayendla misava ni hinkwasvu lesvinga ka yona, axitshami titempeleni letiyakiweke hi mavoko ya vanhu, lesvi xinga Hosi ya matilo ni misava; nasvona axitirheliwi hi mavoko ya vanhu, ingi hi loko xingapfumala nchumu; hikuva hi xona lexinyikaka mun'wana ni mun'wana vutomi, ni kuhefemula, ni svilo hinkwasvu. Hi munhu mun'we xiyendlile vanhu van'wana hinkwavu lesvaku vayeneta misava hinkwayu; xivavekele tinguva leti xitihlawuleke khale, xiveka ni mindzilekana ya lomu vafanelaka kutshama kona. Asvili lesvaku valava Xikwembu, ni lesvaku kumbe xana vangaxi yambayamba, vaxikuma; hambi svilitano, axile kule ni mun'wana ni mun'wana wa hina; hikuva ka xona, ha hanya, ha tshukatshuka, na svona, hi kona, kukotisa lesvi vatlhokovetseli van'wana va n'wina vangavula vaku: ‘Na hina hi va rixaka ra xona.’ Kutani lesvi hinga va rixaka ra Xikwembu, ahifanelanga kuyehleketa lesvaku vukwembu bzingafana ni svifaniso sva nsuku, kumbe sva silivhere, kumbe sva ribze, svinga svilo lesvivatliwaka hi vutlhari bza vanhu ni miyanakanyu ya vona. Hambi svilitano, Xikwembu xitshikile minkama ya kupfumala kutiva yihundza, kutani svosvi, matikweni hinkwawu xileleta vanhu lesvaku vahundzuka hinkwavu. Hikuva xivekile siku leri xingatayavanyisa misava akululameni, hi wanuna lweyi ximuhlawuleke; kutani xikombisile vanhu hinkwavu kutiya ka mhaka leyi hi kupfuxa munhu lweyi xikarhi ka vafi.” Loko vatwa ta kupfuka ka vafi, van'wana vahleka, kambe van'wana vaku: “Hahatakutwa nakambe mhakeni leyi.” Kutani Pawulo asuka xikarhi ka vona. Kambe vanhu van'wana vamunamarhela, vapfumela; xikarhi ka vona akuli na Diyoniziyo lweyi wa Ariyopago, ni wansati lweyi avaku i Damarisi, ni van'wana. Ndzhaku ka svosvo Pawulo asuka Atena, aya Korinto. Doropeni leri, akuma Muyuda mun'we lweyi avaku i Akila, lweyi avelekiweke Ponto, lweyi aatile hi le Italiya kungali khale, ali na Prisika nsati wa yena; hikuva hosi Klawudiyo ayileletile lesvaku Vayuda hinkwavu vasuka Roma. Pawulo aya ka vona. Kutani lesvi aali wa ntirho lowufanaka ni wa vona, atshama na vona, na ali karhi atirha; hikuva ntirho wa vona awuli wa kurhunga matende. Kutani, masiku hinkwawu ya Savata, Pawulo aahlamulana ni lava avali sinagogeni, aringeta kukholwisa Vayuda ni Vagirika. Loko Silasi na Timotewu vatile hi le Makedoniya, Pawulo atinyiketa kujondzisa Rito ntsena, angahatirhi svin'wana; atiyisa ka Vayuda lesvaku Mesiya, hi yena Yesu. Hi loko vona vamukaneta ni kumuyala, aphumunha ntshuri asviyambalweni sva yena, aku ka vona: “Ngati ya n'wina, ayive henhla ka tinhloko ta n'wina; loko ali mina, nihumile ka wona; kusukela svosvi, nitaya ka vamatiko.” Hi loko ahambana na vona, ayatshama kaya ka wanuna lweyi avaku i Tisiyo Yusto, munhu wo chava Xikwembu, lweyi munti wa yena awuvandzakene ni sinagoga. Kambe Krispo, mufambisi wa sinagoga, apfumela ka Hosi, ni va njangu wa yena hinkwavu; na vona Vakorinto lavanyingi, loko vatwa Rito, vapfumela, vava vakhuvuliwa. Vusiku bzin'wana Hosi yihumelela ka Pawulo hi norho, yiku ka yena: “Ungachavi; kambe vulavula, ungamiyeli, hikuva ni na wena; aku na munhu lweyi angatakupfukela, akuyendla lesvobiha; hikuva ni ni vanhu lavanyingi doropeni leri.” Kutani Pawulo atshama kona lembe rin'we, ni ntlhanu wa tihweti ni yin'we, na ali karhi ajondzisa rito ra Xikwembu xikarhi ka vona. Nkarhini lowu Galiyo aali muyimeli wa vuhosi le Akaya, Vayuda vapfumelelana kupfukela Pawulo, kutani vamuyisa hubzeni, vaku: “Munhu lweyi akholwisa vanhu kugandzela Xikwembu hi ndlela leyihambaneke ni Nawu.” Loko Pawulo ahalava kuhlamula, Galiyo aku ka Vayuda: “N'wina Vayuda, loko ingi hi kamba mhaka ya kukala yingalulamanga leyingayendliwa, kumbe kukanganyisa kun'wana lokobiha ngopfu, asvitaniboha kuyamukela kumangala ka n'wina; kambe lesvi kuvulavuliwaka mhaka ya marito, ni ya mavito, ni ya Nawu wa ka n'wina svivoneni hi n'wexe, hikuva mina anilavi kuva mutsemi wa timhaka letakutano.” Kutani avahlongola hubzeni. Hi loko hinkwavu vakhoma Sostene, mufambisi wa sinagoga, kutani vamuba mahlweni ka huvu; kambe Galiyo aangali na mhaka na svona. Kuteloko Pawulo axwile Korinto masiku lamanyingi, asalisana ni vamakwavu, aya Siriya hi ngalawa, na ali na Prisika na Akila. Asuka Kenikreya na abzevule misisi, hikuva aatibohile hi kufunga. Vayafika le Efesa, laha Pawulo angasiya va Akila kona; kutani anghena sinagogeni, ahlamulana ni Vayuda. Vona vamukombela lesvaku atshama na vona ahlwelanyana, kambe angapfumelanga. Kutani asalisana na vona, aku: “Nitatlhela nivuya kola ka n'wina loko Xikwembu xisvirhandza.” Kutani asuka le Efesa hi ngalawa. Kuteloko afikile Khezariya, atlhantukela Yerusalema, axeweta kereke, kutani angirimela aya Antiyoka. Atshama nkarhinyana kona, kutani asuka, arhendzeleka hinkwaku matikweni ya Galatiya ni ya Frixjiya, na atiyisa vajondzisiwa hinkwavu. Muyuda mun'we lweyi avaku i Apolosi, afika Efesa. Aavelekiwile le Alexandriya, ali wanuna wa matimba kuvulavuleni, lweyi aativa ngopfu Matsalwa. Aajondzisiwile Ndlela ya Hosi; kutani, hi kuhiseka ka yena moyeni, aavula ni kujondzisa timhaka ta Yesu hi ndlela yakona, hambilesvi aativa nkhuvulo wa Yohani ntsena. Asungula kuvulavula sinagogeni, na angachavi nchumu. Kuteloko Priskila na Akila vamutwile, vamurhurhela, vamuhlamusela svinenenene hi ta Ndlela ya Xikwembu. Kambe lesvi aalava kuyafika Akaya, vamakwavu vaseketela makungu ya yena, kutani vatsalela vajondzisiwa, vakombela lesvaku vamuyamukela. Loko afikile ka vona, avapfuna ngopfu lava avapfumelile hi kutsakeliwa hi Xikwembu; hikuva, hi marito ya matimba, aakanetana ni Vayuda rivaleni, na avakomba hi Matsalwa lesvaku Mesiya, hi yena Yesu. Loko Apolosi ali Korinto, Pawulo atsemakanya hi le xikarhi ka tiko ra Aziya, angirimela aya Efesa, laha angakuma vajondzisiwa vangali vangani kona; kutani avavutisa aku: “Xana miyamukelile Moya Wokwetsima siku leri mipfumeleke ke?” Vaku ka yena: “Ahihim, ahisisvitwa lesvaku ku ni Moya Wokwetsima.” “Xana mikhuvuliwile hi nkhuvulo wihi ke?” Kuvutisa Pawulo. Vaku “hi nkhuvulo wa Yohani.” Kutani Pawulo aku: “Hi nkhuvulo wa yena, Yohani akhuvulile lava avahundzukile; aabzela vanhu kupfumela ka lweyi aatata ndzhaku ka yena, hi lesvaku yena Yesu.” Loko vatwa svosvo, vakhuvuliwa hi vito ra Hosi Yesu. Pawulo avatlhanteka mavoko, kutani Moya Wokwetsima wuta henhla ka vona; vavulavula hi tindzimi, na vali karhi vaprofeta. Vavanuna volavo avalava kuva khume ni vambirhi. Pawulo anghena sinagogeni, avulavula na angachavi nchumu; kutani, hi tihweti tinharhu, ahlamulana ni vanhu vakona, avakholwisa timhakeni ta Mfumu wa Xikwembu. Kambe van'wana vasungula kutinonon'hwisa timbilu ni kutiyalisa, vasola Ndlela ya Hosi mahlweni ka nhlengeletanu hinkwayu; hi loko Pawulo ahambana na vona, atitekela vajondzisiwa hi tlhelo; kutani siku rin'wana ni rin'wana ahlamulana ni vanhu axikolweni xa Tirano. Svifambile hi ndlela leyo hi malembe mambirhi, kuyafika loko hinkwavu lavayakeke tikweni ra Aziya, Vayuda ni vamatiko, vatwa rito ra Hosi. Xikwembu axiyendla mintirho ya matimba yohlamalisa ngopfu hi kutirhisa Pawulo; svifika laha vanhu vangayisa ka timbabzi mafaduku ni sviyambalu lesvikhumbeke miri wa yena, kutani timbabzi leti tihanya, ni mimoya leyobiha yihuma ka tona. Kambe Vayuda van'wana lava avafambafamba, na vali karhi vahlongola madimoni, varingeta kutirhisa vito ra Hosi Yesu lesvaku vatahanyisa lavangheniweke hi mimoya leyobiha, kutani vaku: “Hamibzela hi Yesu, yena lweyi Pawulo amuhlayaka.” Lava vayendlaka svosvo, amali majaha ya ntlhanu ni mambirhi ya Muprista lwenkulu wa Muyuda, Muyuda lweyi avaku i Sevha. Kambe moya wa chaka wuvahlamula, wuku: “Yesu, namutiva, nitiva na Pawulo, kambe n'wina mivamani ke?” Kutani munhu lweyi aali ni moya wa chaka, avatlulela, avahlula hinkwavu, avapfinya, vakondza vahuma ndlwini yakona hi kutsutsuma, na vangayambalanga nchumu, nasvona na vavavisiwile. Mhaka leyi yitiviwa hi Vayuda ni Vagirika hinkwavu lavayakeke le Efesa; kuchava lokukulu kuvakhoma hinkwavu, kutani vito ra Hosi Yesu rikulisiwa svinene. Lavanyingi lavangahundzuka vapfumeli, vata, vativula ni kupaluxa lesvi avasviyendla khale. Kutani lavanyingi xikarhi ka lava avatirhile sva masalamusi, vahlengeleta tibuku ta vona, vatihisa mahlweni ka vanhu hinkwavu; kutani loko kuhlayiwa nxavu wa tona, kukumeka lesvaku wuyendla timale ta silivhere toringana ntlhanu wa makume ya makhulu (50 000). Hi ndlela yoleyo rito ra Hosi rihangalaka hi matimba, riya ritiya. Ndzhaku ka loko timhaka leti tihumelelile, Pawulo aboha makungu ya kuya Yerusalema, hi kutsundzuxiwa hi Moya, kuya Yerusalema atarhanga hi kuhundza hi le Makedoniya ni le Akaya; kutani aku: “Loko nitava nivile kona, nifanele kuyavona ni le Roma.” Hi loko arhuma Timotewu na Erasto, vavanuna vambirhi xikarhi ka vapfuni va yena, lesvaku vaya le Makedoniya; kutani yena, axwa masiku mangali mangani tikweni ra Aziya. Kambe nkameni wolowo kuhumelela mpfilumpfilu leyikulu hikolaho ka Ndlela ya Hosi: Mufuli mun'we wa svilo sva silivhere, lweyi avaku i Demetriyo, aayendla svifanisunyana sva silivhere sva tempele ya Artemiza, avuyisela vatirhikulobze bindzu lerikulu svinene. Kutani avahlengeleta svin'we ni lavatirhaka ntirho wofana ni wa vona, aku ka vona: “Vavanuna, masvitiva lesvaku hifuwisiwa svinene hi bindzu leri; kutani masvivona, ni kusvitwa, lesvaku Pawulo lweyi akucetele vanhu lavanyingi, kungali lana Efesa ntsena, kambe alavile kuyeneta ni tiko hinkwaru ra Aziya; wa vahambukisa hi kuvula lesvaku svikwembu lesviyendliweke hi vanhu ahi svikwembu. Kutani kungahumelela khombo ra lesvaku ntirho lowu wa hina lowu, wusungula kusoliwa; kungali svosvo ntsena, kambe na yona tempele ya Artemiza, xikwembukazi lexikulu, yingahundzuka xihlekiso, kutani vukulukumba bza lweyi agandzeliwaka hi tiko ra Aziya hinkwaru ni matiko hinkwawu, bzihantla bzihundzuka sva hava.” Loko vatwa svosvo, vakwata svinene, vahuwelela, vaku: “I nkulu, Artemiza wa Vaefesa!” Kutani doropa hinkwaru riyendla mpfilumpfilu. Vakhoma Gayo na Aristarko, Vamakedoniya vambirhi lava avafambafamba na Pawulo, kutani hinkwavu vatsutsumela na vona ndhawini ya mintlangu. Pawulo aalava kunghena ntshungwini, kambe vajondzisiwa vamusivela; nasvona van'wana xikarhi ka tindhuna ta tiko ra Aziya, lava avali vanghanu va Pawulo, varhumela rito ka yena, vamukombela lesvaku angatshuki ayatikomba ndhawini ya mintlangu. Nkarhini wolowo, van'wana vahuwelela svin'wana, van'wana svin'wanyana, hikuva nhlengeletanu ayipfilunganyisiwe svinene, kutani lavanyingi va vona avangativi lexi vateleke xona. Kambe van'wana xikarhi ka ntshungu vahlamusela mhaka ka Alexandre, munhu lweyi aasusumeteliwile mahlweni hi Vayuda; kutani Alexandre akwehleta hi voko, alava kutihlamulela mahlweni ka tiko. Kambe loko vavonile lesvaku i Muyuda, vaheta kusuhi ni mawora mambirhi, na vali karhi vahuwelela hinkwavu hi rito rin'we, vaku: “I nkulu, Artemiza wa Vaefesa!” Hi loko matsalana wa doropa amiyeta ntshungu, aku: “Vaefesa va ka hina! Xana i mani lweyi angativiki lesvaku doropa ra Vaefesa i muhlayisi wa tempele ya Artemiza lwenkulu ni wa xifaniso xa yena lexiweke hi le tilweni ke? Lesvi timhaka leti tingakanetiwiki, mifanele kutikhoma, mingayendli nchumu hi kuhantlisa; mitisile vavanuna lava, kambe avaphanganga nchumu titempeleni, nasvona avayalanga xikwembu xa hina. Loko Demetriyo ni vatirhikulobze valava kumangalelana ni munhu wokarhi, ku ni masiku lawa huvu yitirhaka ha wona; na svona, vayimeli va vuhosi vakona; avamangalelane kona! Kambe loko milava kuya mahlweni hi mhaka leyi, yitatsemiwa nhlengeletanweni leyingatava yivitaniwile hi nawu. Hikuva hingakumeka nahili nandzwini wa kupfuxa mpfilumpfilu, hikolaho ka nhlengeletanu leyi ya namuntlha; kasi mpfilumpfilu leyi yipfukile ntsena, kutani akungavi na lexi hingatatiyimela ha xona, loko hivutisiwa mayelano na yona.” Kuteloko ahlayile svosvo, ahangalasa nhlengeletanu. Kuteloko mpfilumpfilu yihelile, Pawulo avitana vajondzisiwa, avakhongotela, kutani asalisana na vona asuka, aya Makedoniya. Kuteloko atsemakanyile matiko lawa, ni loko akhongotelile vamakwavu hi marito lamanyingi, ayafika tikweni ra Gresiya; atshama kona tihweti tinharhu; loko ali kusuhi ni kusuka hi ngalawa akuva aya Siriya, Vayuda vamutshama xikungu; hi kokolaho aboha makungu ya kuvuya hi le Makedoniya. Lava avamuheleketa, avali Sopatro n'wana Piro wa le Bereya; ni va le Thesalonika Aristarka na Sekundo; na Gayo wa le Derbe; na Timotewu; na Tikiko na Trofimo lava avahuma tikweni ra Aziya. Vavanuna volavo vahirhangela mahlweni, vaya hirindzela le Trowasi. Loko hili hina, hisuka Filipi hi ngalawa, ndzhaku ka masiku ya nkhuvu wa Xinkwa xokala comela; hifamba ntlhanu wa masiku, hiyavakuma Trowasi; kutani hitshama kona masiku ya ntlhanu ni mambirhi. Hi siku rorhanga ra vhiki, loko hihlengeletene kukhema xinkwa, Pawulo avulavula ni va le Trowasi, alehisa kuvulavula ka yena kuyafika xikarhi ka vusiku, hikuva aalava kufamba ni mixo wakona. Tivoni atitele ndlwini ya le henhla leyi ahihlengeletanile ka yona. Jaha rin'wana leri avaku i Yatiko, aritshamile jineleni; risungula kukhudzehela loko Pawulo aya mahlweni hi kuvulavula; kutani vurhongo bzihlula jaha leri; riwela hansi hi le xitezini xa vunharhu xa le henhla, kutani varitlakula na rifile. Kambe Pawulo axika, akorhama henhla ka rona, ali khumbarheta, aku: “Mingakarhatekeni, hikuva rahahanya.” Kutani atlhela akhandziya, akhema xinkwa, aja, avulavula na vona nkarhi lowo leha, riko rixa, kutani asuka. Vayisa jaha kaya, na rihanyile, kutani vachaveleliwa ngopfu ha svona. Loko ali hina hirhangela Pawulo, hipela lwandle hi ngalawa kuyafika le Aso, laha ahifanele kuhundza hiteka Pawulo kona: Aahileletile svosvo, hikuva aate atafamba hi milenge. Loko hikumanile na yena le Aso, hi mukhandziyisa ngalaweni, hihundzela mahlweni akuva hiya Mitileni. Hisuka kona hi ngalawa, kutani loko rixa, hifika laha kulangutaneke na Kiyo. Ritlhela rixa, hifika Samosi; hi siku leritlhantamaka, hifika Mileto. Pawulo aabohile makungu ya kuhundza ntsena angangheni le Efesa, lesvaku angahundzeliwi hi nkarhi na ahali tikweni ra Aziya; hikuva aaringeta kuhantlisa afika Yerusalema hi siku ra Pentekoxta, loko svikoteka. Loko Pawulo ali Mileto, arhumela rito le Efesa kuyavitana vakulukumba va kereke. Kuteloko vafikile ka yena, aku ka vona: “Masvitiva n'wina hilaha nihanyisaneke na n'wina hakona minkarhi hinkwayu, kusukela siku leri ningasungula kunghena tikweni ra Aziya. Anili karhi nitirhela Hosi hi kutitsongahata lokukulu, ni minhloti, ni miringo leyi yinihumeleleke hi kutshamiwa xikungu hi Vayuda. Masvitiva lesvaku animifihlelanga nchumu xa lesvi svifanelaka kumipfuna, na nili karhi nimipaluxela Rito ni kumijondzisa rivaleni ni le minjangwini ya n'wina. Nitsundzuxile svinene Vayuda ni Vagirika kuhundzukela ka Xikwembu ni kupfumela ka Hosi ya hina Yesu. “Svosvi-ke, minivona na nili lweyi abohiweke hi Moya akuva niya Yerusalema, na ningativi lesvi svingatanihumelela kona; nitiva ntsena lesvaku Moya Wokwetsima wukarhi wunitsundzuxa svinene doropeni rin'wana ni rin'wana, lesvaku kukhomiwa ni maxangu svinirindzelile. Hambi svilitano, nivona lesvaku kulahlekeliwa hi vutomi, asvi na mhaka nikutsongo ka mina, loko ningakota ntsena kuheta lesvi ningarhumiwa kuyendla svona, ni ntirho lowu niwuyamukeleke ka Hosi Yesu, wa kuvula Evhangeli ya timpsalu ta Xikwembu. “Kutani svosvi, nasvitiva lesvaku amingahanivoni, n'wina hinkwenu lava ningafambafamba xikarhi ka n'wina na nipaluxa ta Mfumu wa Xikwembu. Hikolaho, namuntlha, nitiyisa mahlweni ka n'wina lesvaku aningavi na nandzu loko mun'we wa n'wina aya kuloveni, hikuva animifihlelanga makungu ya Xikwembu kambe ni mitivisile wona hinkwawu. Tilanguteleni ke, milangutela ni kereke hinkwayu leyi Moya Wokwetsima wungamiveka kuva vabixopo va yona; risani Kereke ya Xikwembu, leyi xingatikumela yona hi rifu ra N'wana wa xona wa xiviri. Hikuva mina nasvitiva lesvaku, loko nisukile, mitangheneliwa hi mahlolwa lawa yoleva, lawa magatakala mangatsetseleli ntlhambi; na svona, nitiva lesvaku kutahuma van'wana xikarhi ka n'wina lavangatahlaya mavunhwa kutilavela vajondzisiwa. Loko svilitano, lavelelani, mitsundzuka lesvaku, vusiku ni nhlekanhi, anirhutelanga kujondzisa hi minhloti mun'wana ni mun'wana wa n'wina, hi nkarhi woringana malembe manharhu. “Kutani na minyiketa svosvi ka Xikwembu, ni ka rito ra timpsalu ta xona, lerikotaka kumiyakisa ni kuminyika rifuwo xikarhi ka hinkwavu lava xitihlawuleleke vona. Anilavanga male ya silivhere kumbe ya golidi, hambi xili xiyambalu, ka munhu ni mun'we. Masvitiva na n'wina lesvaku mavoko lawa ya mina matirhile kukuma lesvi mina ni lava avali na mina ahisvipfumala. Svilo hinkwasvu ni mikombisile, lesvaku hi kutikarhata hi ndlela leyi, hifanele kupfuna lavatsaneke, nasvona hitsundzuka marito ya Hosi Yesu, lawa angamahlaya hi xiviri xa yena loko aku: ‘Kunyika i nkateko lowutlulaka kunyikiwa.’” Loko Pawulo ahetile kuvula timhaka toleto, akhinsama, akhongela na vona hinkwavu. Kutani hinkwavu vasungula kurila svinene, vavukarha Pawulo, vamun'qunta; avavaviseka ngopfungopfu hi rito ra yena ra lesvaku avangahatlheli vamuvona kambe. Kutani vamuheleketa aya ngalaweni. Kuteloko hihambanile na vona, hinghena ngalaweni, hifamba hingarhendzeleki, hiyafika Kosi; loko rixa, hifika Roda, kutani hihundzela mahlweni hiyafika Patara. Kona hikuma ngalawa leyi ayiya Fenisiya, kutani hinghena ka yona, hisuka. Loko hifika laha kulangutaneke ni xihlale vokweni ra ximatsi, hikongoma Siriya, kutani hifika Tiro, hikuva hi kona laha ngalawa ayifanele kuhumesa mindzhwalu ya yona kona. Kuteloko hikumanile ni vajondzisiwa, hixwa na vona masiku ya ntlhanu ni mambirhi. Vona vatsundzuxa Pawulo hi matimba ya Moya wa Xikwembu lesvaku angatshuki atlhantukela Yerusalema. Loko hihetile masiku wolawo, hisuka hifamba; vajondzisiwa hinkwavu vahiheleketa kuyafika handle ka doropa, na vali ni vavasati ni vana; kutani hikhinsama ribuweni ra lwandle, hikhongela. Kuteloko hisalisanile na vona, hinghena ngalaweni, kutani vona vatlhelela kaya. Loko ali hina hiya mahlweni ni riyendzo ra hina; hisuka Tiro, hiyafika Pitolomayida, laha hi pfuxelaneke ni vamakwerhu kona, hixwa siku rin'we na vona. Hi siku leritlhantamaka, hisuka hiyafika Khezariya; kutani hinghena kaya ka Filipi, muvhangeli, mun'we wa lava va ntlhanu ni vambirhi, hitshama ka yena. Aali ni vana vavanhwanyana va mune lava avaprofeta. Hitshamile kona masiku mangali mangani, loko kutafika muprofeta mun'we lweyi avaku i Agabo, na ahuma Yudeya. Ata ka hina, ateka bandi ra Pawulo, atiboha mavoko ni milenge ha rona, aku: “Moya Wokwetsima wuvula lesvi: Wanuna lweyi bandi leri ringa ra yena, Vayuda vatamubohisa xisvolesvi le Yerusalema, vamunyiketa mavokweni ya vamatiko.” Loko hitwa mhaka leyi, hina ni va njangu wolowo hikhongotela Pawulo lesvaku angatshuki atlhantukela Yerusalema. Kambe Pawulo ahlamula, aku: “Xana miyendla yini loko mirila hi mukhuva lowu niku nitlhava mbilu ke? Kasi mina anitilungiselanga kubohiwa ntsena, kambe ni tilungisele ni kuyafela vito ra Hosi Yesu Yerusalema.” Loko hivona lesvaku angapfumeli kukholwisiwa, hisvitshika, kutani hiku: “Akuyendliwe kurhandza ka Hosi!” Ndzhaku ka masiku wolawo, hilonga, kutani hitlhantukela Yerusalema. Vajondzisiwa van'wana va Khezariya vafamba na hina, vahifikisa njangwini wa Mnasoni, munhu wo huma Kipra, mun'we wa vajondzisiwa lavakurhanga, laha ahiya rhurheliwa kona. Kuteloko hifike Yerusalema, vamakwerhu vahiyamukela hi kutsaka. Hi siku leritlhantamaka, Pawulo aya na hina ka Yakobe, kutani vakulukumba hinkwavu vahlengeletana kona. Pawulo avaxeweta, avarungulela hinkwasvu lesvi Xikwembu xisviyendleke xikarhi ka vamatiko hi kutirha ka yena. Loko vatwa timhaka toleto, vadzunisa Xikwembu; kutani vaku ka Pawulo: “Wasvivona, makwerhu, lesvaku ku ni madzanadzana ya vanhu lavapfumeleke xikarhi ka Vayuda; hinkwavu i vanhu lavahisekelaka Nawu; vabzeliwile ta wena, ni lesvaku ujondzisa Vayuda hinkwavu lavayakeke xikarhi ka vamatiko kutshika Nawu wa Moxe, vangahayimbisi vana va vona, nasvona vangahafambi hi mikhuva yaka hina. Kutani, hitayendla yini xana? Hikuva loko kuli kusvitwa, vatasvitwa lesvaku ufikile. Loko svilitano, yendla lesvi hikubzelaka svona. Hi ni vavanuna vamune kola, lavatiboheke hi kufunga; famba na vona, utibasisa na vona, uvahakelela lesvilavekaka, lesvaku vatakota kubzevuliwa tinhloko; kutani hinkwavu vatativa lesvaku akutiyanga ni mhaka ni yin'we ya leti vangabzeliwa tona hi tlhelo ra wena, kambe vatativa lesvaku na wena ulandza Nawu, ni lesvaku wawu hlayisa. “Loko vali vamatiko lavapfumeleke, hivatsalelile papela kuvabzela lesvi hisviboheke: Hi lesvaku vativonela, vangaji tinyama letitlhaveliweke svikwembu sva hava, vangaji ngati kumbe lesvi vanhu vasvidlayeke hi kusvitlimba minkolo, vatshika ni vugelegele.” Hi loko Pawulo ateka vavanuna volavo; hi siku leritlhantamaka atibasisa na vona, kutani anghena Tempeleni kuyativisa lesvaku masiku ya kutibasisa ka vona matahela rini, ni lesvaku kutahumesiwa rini timhamba ta mun'wana ni mun'wana wa vona. Loko masiku ya ntlhanu ni mambirhi mali kusuhi nikuhela, Vayuda vakuhuma tikweni ra Aziya vavona Pawulo Tempeleni, kutani vapfuxa mpfilumpfilu vanhwini hinkwavu, vamukhoma, vahuwelela, vaku: “Vavanuna Vaisrayele, hipfuneni! Munhu lweyi ajondzisaka vanhu hinkwavu, matikweni hinkwawu, kuyala tiko ni Nawu ni ndhawu leyi, hi yena lweyi! Nasvona anghenisile Vagirika Tempeleni, anyamisa ndhawu leyi ya kuhlawuleka.” Avavula svosvo hikuva avavonile Trofimo wa Efesa doropeni, na ali na Pawulo, kutani avapimisa lesvaku Pawulo amunghenisile Tempeleni. Doropa hinkwaru riyendla mpfilumpfilu, vanhu vata hi kutsutsuma ndhawini yin'we; loko vakhomile Pawulo, vamukokela handle ka Tempele; kutani svipfalu svipfaliwa hi kuhantlisa. Loko vali karhi varingeta kudlaya Pawulo, ndhuna ya nyimpi yitwa lesvaku kupfukile mpfilumpfilu doropeni hinkwaru ra Yerusalema. Hi nomo-lo yiteka ntlawa wa masochwa ni tindhuna ta wona, yita ntshungwini hi kutsutsuma; loko vanhu vavona ndhuna ya nyimpi ni masochwa, vatshika kuba Pawulo. Hi loko ndhuna ya nyimpi yikongoma Pawulo, yimukhoma, yilerisa lesvaku abohiwa hi machini mambirhi; kutani yivutisa yiku: “Munhu lweyi i mani xana? Ayendlile yini ke?” Van'we xikarhi ka ntshungu vaba huwa vavula svin'we, van'wana vavula svin'wana; kutani lesvi ndhuna ayitsandzeka kukuma ntiyiso wakona hikolaho ka pongo, yilerisa lesvaku Pawulo ayisiwa khokholweni. Loko vafikile “svikadeni” sva rona, masochwa marhwala Pawulo, hikuva ntshungu awukwatile ngopfu; vanhu lavanyingi avavalandza hi le ndzhaku, na vahuwelela, vaku: “Mudlaye!” Loko Pawulo ali kusuhi ni kunghenisiwa khokholweni, aku ka ndhuna: “Xana ningava ni rito na wena ke?” Ndhuna yiku: “Kasi utiva ririmi ra Xigirika xana? Xana ahi wena Mugibita lweyi apfuxeke mpfilumpfilu masiku lamahundzeke, ni kuyisa mananga ntlawa wa vadlayi lava avaringana mune wa makhulu (4 000) ke?” Pawulo aku: “Mina ni Muyuda wa le Tarso tikweni ra Kilikiya; ni wa doropa leritivekaka svinene; nikombela lesvaku unipfumelela kuvulavula ni tiko.” Ndhuna yimupfumelela, kutani Pawulo ayima svikadeni, akwehleta vanhu hi voko. Kuteloko vamiyelile vaku ntse, avulavula na vona hi ririmi ra Xiheberu, aku: “N'wina valekwerhu na vatatana, yingisani svosvi kutihlamulela ka mina mahlweni ka n'wina.” Loko vatwa lesvaku avulavula na vona hi ririmi ra Xiheberu, vamiyela kutlula kusunguleni, kutani Pawulo aku: “Mina ni Muyuda; nivelekiwile Tarso wa Kilikiya, kambe ni kulele doropeni leri, na nili mujondzisiwa wa Gamaliyele. Nijondzisiwile Nawu wa vatatana hi mukhuva lowunene, na nili munhu lweyi ahisekelaka Xikwembu, kufana na n'wina hinkwenu namuntlha; nixanisile lavalandzaka Ndlela leyi ya Hosi kufikela laha vadlawaka. Anikhoma vavanuna ni vavasati, nivaghenisa jele. Timboni ta mina hi yena Muprista lwenkulu, ni nhlengeletanu hinkwayu ya vakulukumba. Niyamukelile ka vona mapapela lamatsaleliweke Vayuda va ka hina le Damaska; niyile kona kuyakhoma lavayakeke kona, nivatisa Yerusalema lesvaku vatabiwa svinene. “Kutani loko nahafamba, na nili kusuhi ni le Damaska, hi nkarhi wa nhlekanhi, hi nomo-lo nirhendzeliwa hi kuvonakala lokukulu na kuhuma tilweni. Niwela hansi, kutani nitwa rito leringe ka mina: ‘Sawulo, Sawulo, unixanisela yini?’ Mina nihlamula niku: ‘U mani, Hosi?’ Aku ka mina: ‘Hi mina Yesu wa Nazareta, lweyi umuxanisaka.’ Lava avali na mina avavona kuvonakala, kambe avangatwi rito ra lweyi avulavulaka na mina. Kutani niku: ‘Hosi, nitayendla yini xana?’ Hosi yiku ka mina: ‘Pfuka uyima, uya Damaska; hi kona laha ungatabzeliwa hinkwasvu lesvi ufanelaka kusviyendla.’ Lesvi anihluleka kuvona hikolaho ka kuhatima ka kuvonakala koloko, lava avali na mina vanikhoma hi voko vanikhungisa, vaniyisa Damaska. “Kona kolano, akuli ni munhu lweyi avaku i Ananiya; aali munhu wa vukhongeli, afamba hi Nawu, akhensiwa svinene hi Vayuda hinkwavu lavayakeke Damaska. Ata ka mina, avulavula na ayimile kusuhi na mina, aku: ‘Sawulo makwerhu, tlhela uvona!’ Hi nkarhi wolowo ni tlhela nivona, ni mulanguta. Kutani aku: ‘Xikwembu xa vatatana va hina xikuhlawulile lesvaku utiva kurhandza ka xona, uvona Lweyi alulameke, utwa rito lerihumaka non'weni wa yena; hikuva mahlweni ka vanhu hinkwavu utava mboni ya yena kutiyisa lesvi ungasvivona ni lesvi ungasvitwa. Svosvi-ke, uhlwelela yini? Suka uyima, ukhuvuliwa lesvaku ubasisiwa asvijohweni sva wena, hi kukhongela vito ra yena.’ “Kuteloko nitlhelele Yerusalema, niyakhongela Tempeleni, kutani ningheniwa hi Moya; nivona Hosi na yinibzela, yiku: ‘Hantlisa usuka Yerusalema, ungahlweli, hikuva vanhu vakona avangayamukeli vumboni lebzi ubzivulaka henhla ka mina.’ Kutani niku: ‘Hosi, vasvitiva svinene lesvaku vanhu lavapfumeleke ka wena, vanghenisiwile hi mina jele, nivaba hi tinhonga masinagogeni; ni siku leri kudlayiweke Stefano mboni ya wena, na mina anili kona, na nili karhi nikhensa, nihlayisa sviyambalu sva lava vamudlayaka.’ Hi loko Hosi yiku ka mina: ‘Famba, hikuva nitakurhuma kule, ka vamatiko.’” Vamuyingisela kuyafika loko ahlaya svosvo, kutani vatlakusa rito, vaku: “Munhu lweyo wo tano aasusiwe misaveni, aadlayiwe! Angafaneliwanga hi kuhanya!” Kutani vahuwelela, vadzudza sviyambalu sva vona, vatsutsuxela ntshuri henhla. Hi loko ndhuna ya nyimpi yilerisa lesvaku Pawulo ayisiwa khokholweni, yiku: “Aavutisiwe, abiwa hi tinhonga lesvaku nitativa mhaka leyiyendlaka lesvaku vahuwelela hi ndlela leyi, valwa na yena.” Kuteloko vamubohile lesvaku vatamuba, Pawulo aku ka ndhuna ya dzana ra masochwa leyi ayili kona: “Xana mapfumeleliwa kuba Muroma hi tinhonga, na angasi thethisiwa ke?” Loko ndhuna ya dzana yitwa svosvo, yiyabzela ndhuna ya nyimpi, yiku: “Xana awulava kuyendla yini? Munhu lweyi i Muroma.” Hi loko ndhuna ya nyimpi yita ka Pawulo, yiku ka yena: “Wanganibzela, xana u Muroma ke?” “Ina!” Kuhlamula Pawulo. Ndhuna ya nyimpi yiku: “Vuroma lebzi nibzixavile hi male leyinyingi.” Pawulo aku: “Kasi mina niyopsaliwa ka bzona.” Hi nomo-lo lava avatilungisela kuvutisa Pawulo ni kumuba, vamutshika; loko yili ndhuna ya nyimpi, yichava loko yitwa lesvaku Pawulo i Muroma, hikuva ayimubohile. Hi siku leritlhantamaka, ndhuna yilava kukuma ntiyiso mhakeni ya nandzu lowu Vayuda vamangalelaka Pawulo ha wona; hi kolaho, yimutshunxa, kutani yilerisa lesvaku Vaprista lavakulu vahlengeletana ni huvu hinkwayu ya Sanedri; kutani yitisa Pawulo, yimuyimisa mahlweni ka vona. Pawulo ahonokela huvu, aku: “N'wina valekwerhu, nihanyile na nili lweyi atshunxekeke svinene ripfalweni ra mina ni le mahlweni ka Xikwembu, kufikela siku ra namuntlha.” Hi loko Ananiya Muprista lwenkulu, alerisa lava avali kusuhi na Pawulo lesvaku vamuba nomo. Kambe Pawulo aku ka yena: “Xikwembu xitakuba, wena khumbi leribasisiweke, hikuva utshamile kola akuva unithethisa hi nawu, kasi utlula nawu hi kulerisa lesvaku nibiwa.” Kutani lava avali kusuhi na Pawulo vaku: “Xana usola Muprista lwenkulu wa Xikwembu ke?” Pawulo aku: “Vamakwerhu, aningasvitivi lesvaku i Muprista lwenkulu, hikuva kutsaliwile lesvaku: ‘Ungatshuki usandza hosi ya tiko ra lekwenu.’” Kutani Pawulo, hi kutiva lesvaku van'wana xikarhi ka vona i Vasaduki, kasi van'wana i Vafarisi, atlakusa rito hubzeni aku: “N'wina valekwerhu, ni Mufarisi, n'wana wa Vafarisi, kutani nithethisiwa kola hikuva nilangutelile kupfuka ka vafi.” Loko avulile svosvo, Vafarisi vasungula kuphikizana ni Vasaduki, kutani nhlengeletanu yiyavana hi le xikarhi. (Hikuva Vasaduki vatiyisa vaku: “Vafi avapfuki, nasvona tintsumi ni mimoya asvikona.” Vafarisi vona, vapfumela svosvo hinkwasvu.) Kutani kupfuka guwa lerikulu; Vatsali van'wana va ntlawa wa Vafarisi, vasuka vayima, vatiyisa svinene, vaku: “Ahikumi nandzu niwun'we ka munhu lweyi; xana kungava yini loko kukumeka lesvaku i moya wun'wana kumbe i ntsumi yin'wana leyivulavuleke na yena?” Kuphikizana kuyakukula ngopfu, kutani ndhuna ya nyimpi yichava lesvaku Pawulo angatshuka ahandzuliwile hi vanhu lava, kutani yilerisa lesvaku ntlawa wa masochwa wungirimela, wuya muwutla mavokweni ya vona, wumutlhelisela khokholweni. Avusikwini lebzitlhantamaka, Hosi yitikomba ka Pawulo, yiku: “Tiyisa mbilu Pawulo, hikuva kukotisa lesvi uhumeseke vumboni lebzotiya henhla ka mina kola Yerusalema, svifanele lesvaku uhumesa vumboni lebzotano ni le Roma.” Loko rixa, Vayuda vayendla makungu, vatiboha hi kufunga, vaku: “Hingakala hingaji ni kunwa, loko hingasi dlaya Pawulo.” Lava vaboheke makungu lawa avatlula mune wa makume. Vaya ka Vaprista lavakulu ni ka vakulukumba, vaku: “Hitibohile hi kufunga lokutiyeke lesvaku hingakala hingaji nchumu, na hingasi dlaya Pawulo. Svosvi-ke, n'wina ni vahuvo, yisani rito ka ndhuna ya nyimpi lesvaku yimirhumela Pawulo, miyendla ingi hi loko milava kuya mahlweni ni kukambisisa svin'wana timhakeni ta yena; loko ali hina, hitava hi tilungisele kumudlaya na angasifika.” Kambe ntukulu wa Pawulo atwa lesvaku vamutumbelelile; hi loko afamba, aya khokholweni, ayativisa Pawulo. Pawulo avitana yin'we ya tindhuna ta dzana ra masochwa, aku ka yona: “Famba ni jaha leri ka ndhuna ya nyimpi, hikuva ri ni mhaka leyi ringatayitivisa ka ndhuna.” Kutani ndhuna ya masochwa yifamba ni jaha, yiriyisa ka ndhuna ya nyimpi, yiku: “Mubohiwa Pawulo anivitanile, anikombela lesvaku nita ni jaha leri ka wena; ri ni mhaka leyi ringatakubzela yona.” Ndhuna ya nyimpi yikhoma jaha hi voko, yiya na rona tlhelweni, yirivutisa, yiku: “Xana hi yihi mhaka leyi ulavaka kunitivisa yona ke?” Jaha riku: “Vayuda vatwananile, vaku vatakukombela kutisa Pawulo hubzeni mundzuku, vatayendla ingi hi loko valava kuya mahlweni ni kuvutisisa timhaka ta yena. Ungatshuki uvapfumelela, hikuva vavanuna lavatlulaka mune wa makume vamutumbelelile, vatibohile hi kufunga, vaku: ‘Hingakala hingaji ni kunwa, loko hingasi mudlaya.’ Ni svosvi vatilungisile, vakarhi valangutela lesvaku upfumela.” Hi loko ndhuna ya nyimpi yitlhelisa jaha lero, yirilerisa, yiku: “Ungatshuki ubzela munhu lesvaku unitivisile timhaka leti.” Ndhuna ya nyimpi yivitana tindhuna timbirhi ta dzana ra masochwa, yiku ka tona: “Lungisani masochwa ya madzana mambirhi (200) ni vagadi va mahanchi va ntlhanu wa makume ni makume mambirhi (70) ni vavanuna va madzana mambirhi (200) lavatamelaka matlhari, vaya Khezariya; vatasuka hi nkarhi wa ntlhanu ni mune wa vusiku. Nasvona lungiselani Pawulo svifuyu lesvi angatasvigada, mimufikisa ka hosi Felikisi na ahlayisekile.” Kutani atsala papela leringe: “Klawudiyo Lisiya, ka Felikisi, hosi leyichavisekaka: Xeweni! “Vayuda vakhomile munhu lweyi; avalava kumudlaya, kambe loko nitwile lesvaku i Muroma, nifikile ni masochwa, nimuwutla mavokweni ya vona. Kutani hi kulava kutiva lexi vamumangalelaka ha xona, ni muyisile hubzeni ya ka vona; nikumile lesvaku vamumangalela hi timhaka ta nawu wa vona, na kungali na nandzu lowu afanekeliwaka kutsemeliwa rifu ha wona, kumbe kubohiwa ha wona. Kutani loko nitivisiwile lesvaku Vayuda vatatumbelela munhu lweyi, ni murhumelile ka wena; ni lerisile vamangaleli va yena lesvaku vahlamusela timhaka ta yena mahlweni ka wena.” Masochwa mayendla hilaha ma lerisiweke hakona: Mateka Pawulo, ma muyisa le Antipateri nivusiku. Loko rixa, masiya vagadi va mahanchi kolaho, vahundzela mahlweni na Pawulo; kutani masochwa matlhelela khokholweni. Loko vagadi vafikile Khezariya, vanyika hosi apapela, kutani vatisa Pawulo mahlweni ka yona. Hosi yihlaya papela, kutani yivutisa Pawulo lesvaku i wa tiko rihi. Loko yitwile lesvaku i wa Kilikiya, yiku: “Nitakuyingisa loko vamangaleli va wena vatava vafikile na vona.” Kutani yilerisa lesvaku Pawulo ahlayisiwa ndlwini ya vuhosi ya Heroda. Loko kuhundzile ntlhanu wa masiku, Ananiya Muprista lwenkulu angirimela, ni vakulukumba van'wana ni muyimeli mun'we leyi avaku i Tertulo; kutani vaya ka hosi kuyamangalela Pawulo. Vavitana Pawulo, kutani Tertulo asungula kumumangalela, aku: “Wena Felikisi lweyi achavisekaka! Lesvi hikumeke kurhula loku kuhetisekeke hikolaho ka wena, ni lesvi timhaka ta tiko leri tilulamisiwaka namuntlha hi kutikarhata ka wena, hina hiyamukela svilo lesvi hi kukhensa lokukulu hinkwaku ni minkama hinkwayu. Kambe anilavi kukuhetela nkama; hi kolaho na kukhongela lesvaku, hi vunene bza wena, wanga hi lombanyana tindleve nkamanyana. Hi kumile lesvaku munhu lweyi avanga mpfilumpfilu. Apfuxa madzolonga xikarhi ka Vayuda hinkwavu lavayakeke kwihi na kwihi misaveni; hi yena lweyi anga nhloko ya jondzo leyohambuka ya Vanazareta. Nasvona, aringetile kunyamisa Tempele. Himukhomile, [kutani ahilava kumuthethisa hi nawu wa hina; kambe Lisiya, mufambisi wa masochwa, atile ahiwutlela yena hi matimba lamakulu, kutani alerisile vamangaleli va yena lesvaku vata mahlweni ka wena.] Loko umuvutisisa, utatitwa hi yena, timhaka hinkwatu leti himumangalelaka ha tona.” Na vona Vayuda vayima na Tertulo, vatiyisa, vaku: “Kunene hi svosvo.” Hosi yikoweta Pawulo lesvaku avulavula; kutani yena ahlamula, aku: “Lesvi nitivaka lesvaku ku ni malembe na uli muthethisi wa tiko leri, nitatihlamulela na nitsakile. Ungasvikuma hi wexe: Akusihundza masiku ya khume na mambirhi loko nifikile Yerusalema kutagandzela kona. Vayuda avanikumanga na nili lweyi aphikizanaka ni munhu Tempeleni, kumbe lweyi ahlohlotelaka vanhu masinagogeni ni le madoropeni. Nasvona avakoti kuhumesa vumboni bza timhaka leti vanimangalelaka ha tona svosvi. Anikufihleli lesvaku nitirhela Xikwembu xa vatatana hi ndlela leyi vayivulaka lesvaku yihambukile; kambe nipfumela hinkwasvu lesvitsaliweke Nawini ni ka Vaprofeta. Lesvi nisvilanguteleke ka Xikwembu, hi svona lesvi na vona vasvilanguteleke: Hi lesvaku lavolulama ni lavangalulamangiki vatapfuka kufeni. Hikolaho niringeta hi matimba, masiku hinkwawu, kukumeka na nili lweyi atshunxekeke moyeni wa mina, mahlweni ka Xikwembu ni le mahlweni ka vanhu. “Nivuyile Yerusalema ndzhaku ka malembe lamanyinginyana, kutisa tinyiko ka tiko ra ka hina ni kuhumesa timhamba. Vanikumile Tempeleni na nitirha svilo lesvi, na nili lweyi atibasiseke hi nawu; akungali na ntshungu kona, akungapfukanga dzolonga. Kambe Vayuda van'wana va tiko ra Aziya avali kona. Ingi vatile svosvi mahlweni ka wena kutani mangalela, loko kuli ni mhaka xikarhi ka vona na mina. Na vona lavanga kola avavule xiyendlo lexobiha lexi vaxikumeke ka mina, siku leri niyimeke hubzeni; vangavula xilo xin'we ntsena lexininga huwelela ha xona xikarhi ka vona, loko nite: ‘Nibihisiwa hi n'wina namuntlha hikolaho ka kupfuka ka vafi.’” Lesvi Felikisi aativa lesvotalanyana hi tlhelo ra Ndlela ya Hosi, apfala huvu, aku: “Loko Lisiya, mufambisi wa masochwa, atava angirimelile afika halenu, hi kona ningatakambisisa mhaka ya n'wina.” Kutani alerisa ndhuna ya dzana ra masochwa kuhlayisa Pawulo jele, aku: “Mi munyika kutshunxekanyana, mingasiveli ni mun'we wa vanakulobze kutamupfuna hi svin'wana.” Loko kuhundzile masiku mangali mangani, Felikisi ata na Drusila, nsati wa yena lweyi aali Muyuda; kuteloko avitanile Pawulo, amuyingisela loko avulavula hi ta kupfumela ka Yesu Kriste. Kambe loko Pawulo avulavula hi ta kululama, ni ta kutikhoma, ni ta kuthethisiwa lokungatata, Felikisi akhomiwa hi kuchava, ahlamula, aku: “Namuntlha, famba uyatshama; siku leri ningatakuma nkama, nitatlhela nikuvitana.” Kambe hi tlhelo rin'wana aali ni xitshembo xa lesvaku Pawulo atamunyika male; hi kolaho aatala kurhuma vanhu vayamuvitana, lesvaku atavulavula na yena. Kambe loko kuhundzile malembe mambirhi, Porsiyo Festo avekiwa hosi matshan'wini ya Felikisi; kasi Felikisi aasiyile Pawulo jele, hikuva aanavela kukhensiwa hi Vayuda. Loko Fexto afikile tikweni lero, atshama masiku manharhu Khezariya, kutani asuka, atlhantukela Yerusalema. Kuteloko Vaprista lavakulu ni vakulukumba va Vayuda vata mahlweni ka yena vatamangalela Pawulo; vakhongela Fexto lesvaku avapfuna hi kurhumela Pawulo Yerusalema, kasi avabohile makungu ya kumudlaya ndleleni. Kambe Festo avahlamula aku: “Pawulo a le jele Khezariya; na mina nitahantla ni tlhelela kona.” Atlhela aku: “Hambi svilitano, lavanga vakulukumba xikarhi ka n'wina avangirimele na mina; loko wanuna lweyi akumeka na ali ni nandzu wun'wana, vatamumangalela.” Fexto axwa na vona masiku lawa mangatluliki khume, kumbe ntlhanu ni manharhu, kutani angirimela aya Khezariya. Hi siku leritlhantamaka, atshama hubzeni, kutani alerisa lesvaku Pawulo atisiwa. Loko afikile, Vayuda lavahumaka Yerusalema vamurhendzela, kutani vamulumbeta hi milandzu leyinyingi, leyochavisa, leyi vatsandzekaka ni kuhumesa vumboni bza yona. Kutani Pawulo atihlamulela, aku: “Anijohelanga Nawu wa Vayuda, kumbe Tempele, kumbe Khezari.” Kambe Fexto aanavela kutsakisa Vayuda; hi kolaho ahlamula Pawulo, aku: “Xana ulava kutlhantukela Yerusalema, uyathethisiwa kona mahlweni ka mina hikolaho ka timhaka leti ke?” Pawulo aku: “Niyimile hubzeni ya Khezari; hi kona laha nifanelaka kuthethisiwa kona; loko vali Vayuda, anivajohelanga, hilaha usvitivaka hakona na wena. Hambi svilitano, loko nijohile, kumbe loko niyendlile svin'wana lesvifanekeliwaka hi rifu, aniyali kufa, kambe loko kungali ni ntiyiso milandzwini leyi vanimangalelaka ha yona, aku na munhu lweyi anga ni nyiketaka ka vona; nikombela kuthethisiwa hi Khezari.” Kutani loko Fexto avulavulile mhaka ni huvu, ahlamula aku: “Akombelile kuthethisiwa hi Khezari, ataya le ka Khezari.” Loko kuhundzile masiku mangali mangani, hosi Agripa na Bernike vata Khezariya kutaxeweta Fexto. Loko vaxwile kona masiku lamanyinginyana, Fexto ayandlalela hosi timhaka ta Pawulo, aku: Ku ni munhu kola, lweyi Felikisi angamutshika jele. Loko nili Yerusalema, Vaprista lavakulu ni vakulukumba va Vayuda vamumangalele ka mina, vakombela lesvaku athethisiwa. Nivahlamulile, niku: Ahi ntolovelo wa Varoma kunyiketa munhu lweyi angamangaleliwa, hambi ali mani na mani, loko angasungulanga hi kuhumelela mahlweni ka vamangaleli va yena, anyikiwa nkama wa kutihlamulela ka lesvi vamumangalelaka ha svona. Hikolaho loko vafikile hinkwavu halenu, anihlwelanga, niyile niyatshama hubzeni hi siku leritlhantamaka, kutani nilerisa lesvaku wanuna yelweyo atisiwa. Kutani loko vamangaleli va yena vasuka vayima vavulavula, avahumesanga ni mhaka ni yin'we leyobiha leyi aniyanakanya lesvaku kumbexana vatayihumesa; avakanetana na yena hi ta vukhongeli bza ka vona ni ta kufa ka munhu mun'we lweyi avaku i Yesu, lweyi Pawulo aavula lesvaku wahanya. Lesvi ningavonangiki svinene ndlela yonghena timhakeni leti, nivutisile Pawulo niku: “Xana ulava kuya Yerusalema, uyathethisiwa kona timhakeni leti ke?” Kambe Pawulo akombelile kusala jele arindziwa kona, kufika loko mhaka ya yena yitsemiwa hi hosi leyikulu; hi kolaho nilerisile lesvaku arindziwa jele kufikela siku leri ningatamurhumela ka Khezari ha rona. Kutani Agripa aku ka Fexto: “Na mina anitarhandza kutwa munhu lweyi.” Fexto aku: “Mundzuku kunene utamutwa.” Hi siku leritlhantamaka Agripa na Bernike vata hi vuhosi lebzikulu; vanghena hubzeni ni vafambisi vakulu va masochwa ni vakulukumba va doropa; Fexto alerisa lesvaku Pawulo atisiwa. Hi loko Fexto aku: “Hosi Agripa, na n'wina hinkwenu vavanuna minga na hina kola! Mamuvona, munhu lweyi ntshungu hinkwawu wa Vayuda wungamumangalela ka mina, hambi le Yerusalema, hambi halenu; avahuwelela vaku: ‘Afanela kudlayiwa!’ Loko ali mina, nikumile lesvaku anga na nandzu lowu afanelaka kutsemeliwa rifu ha wona; nasvona yena akombelile kuthethisiwa hi hosi leyikulu; hi kolaho nitsemile mhaka hi kuvula lesvaku afanele kurhumeliwa ka yona. Hambi svilitano, a ni na mhaka ya kutiya leyi ningatsalelaka hosi ha yona; kutani nimutisile ka n'wina ngopfungopfu ka wena hosi Agripa, lesvaku timhaka ta yena tikambisisiwa, niva ni lesvi ningatatsala svona. Hikuva nivona lesvaku asvitwali kurhumela munhu lweyi abohiweke, loko kungahlayiwi timhaka leti amangaleliwaka ha tona.” Kutani Agripa aku ka Pawulo: “Hakupfumelela kuvulavula, uhibzela ta wena hi wexe.” Hi loko Pawulo atlakusa voko, atihlamulela, aku: “Wena hosi Agripa, timhakeni hinkwatu leti nimangaleliwaka hi tona hi Vayuda, nititwa na nikatekile loko nipfumeleliwa kutihlamulela mahlweni ka wena namuntlha; nkateko wakona ngopfungopfu hi lesvaku wena utiva svinene mikhuva hinkwayu ya Vayuda, ni svimhakamhakana sva vona. Hikolaho nikombela hi matimba lesvaku uniyingisa ungaheli mbilu. “Vayuda hinkwavu vativa ta kuhanya ka mina kusukela avutsongwaneni bza mina, vativa ni lesvi ningasviyendla tikweni ra lekwerhu ni le Yerusalema, kusukela kusunguleni. I khale na vanitiva, kutani vangahumesa vumboni, loko vasvilava, lesvaku nihanyile na nili wa ntlawa lowu wungani milawu ya kutiya kutlula mintlawa yin'wana hinkwayu, avukhongelini bza ka hina, hi lesvaku ntlawa wa Vafarisi. Kutani svosvi ni le kuthethisiweni hikuva nilangutela xitshembiso lexi vatatana vanyikiweke xona hi Xikwembu; hi xona xitshembiso lexi rixaka ra ka hina ra khume na timbirhi rilanguteleke kuhetiseka ka xona rili karhi ritiyisela kugandzela Xikwembu vusiku ni nhlekanhi; wena hosi, nimangaleliwa hi Vayuda hikolaho ka kulangutela koloko. N'wina Vayuda, xana mitsandzeka ha yini kupfumela lesvaku Xikwembu xingapfuxa vafi ke? “Na mina khale, anipimisa lesvaku nifanele kulwa svinene ni vito ra Yesu wa Nazareta. Hi svona lesvi ningasviyendla Yerusalema. Hi matimba lawa Vaprista lavakulu avaninyikile wona, ni khomile lavanyingi xikarhi ka vahlawuliwa va Xikwembu, ni vapfalela jele; loko vatsemeliwa rifu, aniyala kuyima na vona. Nivabile kanyingi masinagogeni hinkwawu, niringeta kusindzisa lesvaku vayala ndlela ya vona. Anivanyenya ngopfu, nikondza niyavaxanisa ni le madoropeni ya le handle. “Aniyela svona le Damaska, na nili ni matimba ya Vaprista lavakulu ni svileriso sva vona. Anili ndleleni hi nkarhi wa nhlekanhi, wena hosi, kutani nivona kuvonakala loku kutlulaka ka jambu, kuhuma tilweni, kunirhendzela svin'we ni lava avafamba na mina. Hi wela hansi hinkwerhu; kutani nitwa rito leringe ka mina hi ririmi ra Xiheberu: ‘Sawulo, Sawulo, unixanisela yini? Svanonon'hwa ka wena kukhadlanya xisungunhu.’ Mina niku: ‘U mani, Hosi?’ Hosi yihlamula yiku: ‘Hi mina Yesu, lweyi umuxanisaka. Svosvi pfuka, uyima, utiya hi milenge; nitikombisile ka wena hikuva nitakuveka kuva mutirhi wa mina; utava mboni ya svilo lesvi ukoteke kunivona ha svona, ni ya lesvi nahalavaka kutikomba ka wena hi svona; nitakuponisa mavokweni ya vanhu va tiko leri ni ya vamatiko lava nikurhumelaka ka vona; utapfula mahlo ya vona lesvaku vahuma munyameni, vanghena kuvonakaleni, ni lesvaku vahuma kufumeni ka Sathana vanghena ka Xikwembu; loko vapfumela ka mina, vatakuma kurivaleliwa ka svijoho, kutani vatayaveliwa ndzhaka xikarhi ka vahlawuliwa va Xikwembu.’ “Hikolaho, wena hosi Agripa, aniyalanga kuyingisa mahlori lawa mahumaka tilweni. Nisungulile hi va le Damaska ni va le Yerusalema, ni ya mahlweni tikweni hinkwaru ra Yudeya, ni le ka vamatiko, na nivakhongotela kuhundzuka, vatlhelela ka Xikwembu, kutani vatirha mintirho leyifambelanaka ni kuhundzuka ka vona. Hi tona timhaka leti Vayuda va ni khomeleke tona Tempeleni, varingeta kunidlaya. Kambe nipfuniwile hi Xikwembu kufikela siku ra namuntlha, kutani svosvi niyimile kola na nili karhi nihumesa vumboni ka lavatsongo ni ka lavakulu; anivuli timhaka tin'wana, loko tingali leti Moxe ni Vaprofeta vangavula lesvaku titahumelela: Hi lesvaku Mesiya atatwisiwa kuvaviseka, ni lesvaku, hikuva munhu worhanga lweyi angatapfuka kufeni, atativisa kuvonakala ka tiko leri ni ka vamatiko.” Pawulo aku ahatihlamulela hi timhaka teto, Fexto atlakusa rito, aku: “Wahlanya Pawulo; vutivi lebzikulu bza wena bza kuhlanyisa.” Pawulo aku: “Anihlanyi, wena Fexto lweyi uchavisekaka, kambe marito lawa nimavulaka i marito ya ntiyiso, marito lamatwalaka; hosi yitiva svinene timhaka leti, kutani nitivula mahlweni ka yona na ningachavi nchumu; anikholwi lesvaku ni yin'we ya tona yingava yifihleliwe hosi, hikuva atihumelelanga xihundleni. We hosi Agripa, xana upfumela vaprofeta ke? Nasvitiva lesvaku wa vapfumela.” Agripa aku ka Pawulo: “Uringeta kunikhongotela, hi nkamanyana wungali wungani, lesvaku nihanya xikriste!” Pawulo aku: “Hambi loko nkama wukomile, hambi loko wulehile, nikhongela Xikwembu lesvaku kungavi wena ntsena kambe ni hinkwavu lava vaniyingisaka namuntlha, miva tani hi mina, handle ka machini lawa.” Hi loko hosi yisuka yiyima; na yena Fexto, svin'we na Bernike ni lavatshameke na vona, vasuka vayima. Kutani loko vahumile, vabzelana vaku: “Munhu lweyi angayendlanga nchumu lowufanekeliweke hi rifu kumbe jele.” Kutani Agripa aku ka Fexto: “Munhu lweyi, loko ingi anga kombelanga kuthethisiwa hi Khezari, aatatshunxiwa.” Kuteloko kutsemiwile lesvaku hitaya le Italiya hi ngalawa, vanyiketa Pawulo ni vabohiwa van'wana ka ndhuna ya dzana ra masochwa lweyi avaku i Xjuliyo, wa ntlawa lowuvuliwaka “wa hosi leyikulu”. Kuteloko hi nghenile ngalaweni ya kuhuma Adramita, leyi ayifanela kukongoma matlhelo ya tiko ra Aziya, hisuka na Aristarka wa le Thesalonika, tikweni ra Makedoniya. Hi siku leritlhantamaka, hifika Sidoni; kutani Xjuliyo ayendlela Pawulo timpsalu, amupfumelela kuyavona vanakulobze ni kulongeleliwa hi vona. Xilesvo hisuka kona, hifamba na hisirheleliwa hi xihlale xa Kipra, hikuva ngalawa ayisiveliwa hi moya lowukulu. Kuteloko hipelile lwandle ra Kilikiya ni ra Pamfiliya, hifika Mira, tikweni ra Likiya. Kutani ndhuna yikuma kona ngalawa ya kuhuma le Alexandriya leyi yiyaka le Italiya, kutani ahinghenisa ka yona. Hi masiku lamanyingi hifamba hi kunonoka, kutani svihikarhatela svinene kufika kusuhi na Kinida; lesvi moya wukulu awuhisivela kuya mahlweni tlhelweni lero, higega xihlale xa Kreta hi le hansi, hi tlhelo ra Salmona. Kuteloko hi lulamile ni ribuwa hi kukarhateka svinene, hifika ndhawini leyi vange i “Hlaluko rosaseka”, kusuhi ni doropa ra Laziya. Hi heta masiku layotala kona, kukondza kufika nkama lowu svichavisaka kufamba lwandle, hikuva siku lerikulu ra kutitsona svakuja alihundzile. Hi loko Pawulo avatsundzuxa, aku: “Vavanuna, nasvivona lesvaku riyendzo leri ritava ni mhangu ni kulahleka lokukulu, kungali ka mindzhwalu ni ka ngalawa ntsena, kambe ni ka vutomi bza hina.” Hambi svilitano, ndhuna ya dzana ra masochwa yiyingisa mufambisi wa ngalawa ni n'winyi wa yona kutlula lesvivuliwaka hi Pawulo. Lesvi hlaluko leri aringalulamelanga kuheta vuxika ka rona, lavanyingi va hina vapimisa kusuka kona ni kuringeta kuyaxwa vuxika le Fenikisi, anga hlaluko ra Kreta, lerilangutanake ni vupelajambu wa dzonga ni vupelajambu wa n'walungu. Kuteloko mheho ya le dzongeni yisungulile kuhunga khwatsi, vapimisa lesvaku makungu ya vona matayendleka, kutani vasuka, valulama ni ribuwa ra Kreta. Kambe kungali kungani, kupfuka, xihlaleni, mheho leyi vange i Ewuroakilawu. Ngalawa yikhomiwa hi mheho, yitsandzeka kuyihlula, kutani hiyitshika yikokiwa hi mati. Kuteloko hihundzile dzongeni wa xihlalenyana xin'wana lexi vange i Kawuda, hikoka bzatsu hiringhenisa ngalaweni hi kukarhateka svinene; loko vatluti vayikokile, valungisa bzatsu hi kuriboha hansi hi magoda; kutani hi kuchava kukhinsa saveni ra Siriti, vaphutsa matsanga, kutani hi mukhuva wolowo vatlhela vakokiwa hi magandlati. Loko rixa, ahibiwa ngopfu hi xidzedze; hi kolaho vacukumeta mindzhwalu ya ngalawa lwandle. Kutani hi siku ra vunharhu, hicukumeta svigotso sva ngalawa lwandle, hi mavoko ya hina. Hi masiku lamanyingi jambu aringahavoneki, hambi tinyeleti; xidzedze axiya mahlweni xihiba hi matimba, hingahalanguteli nikutsongo lesvaku hitapona. Lesvi akuli khale na vangajanga nchumu, Pawulo ayima xikarhi ka vona, aku: “Loko aminiyingisile, vavanuna, mingasukanga Kreta, ingi mhangu leyi ni kulahleka loku svingahumelelanga. Kambe svosvi na mikhongotela lesvaku mitiyisa timbilu, hikuva aku na munhu ka n'wina lweyi angatalahlekeliwa hi vutomi bza yena; i ngalawa ntsena leyingatalova. Ntsumi ya Xikwembu lexi ninga nandza wa xona, lexi nixigandzelaka, yitikombisile ka mina vusikwini lebzi, yiku: ‘Pawulo, ungatshuki uchava, hikuva ufanele kuyayima mahlweni ka Khezari; kutani tiva lesvaku Xikwembu xikunyikile vanhu hinkwavu lavafambaka na wena ngalaweni, lesvaku uvaponisa.’ Hikolaho vavanuna, tiyisani timbilu, hikuva ni ni kutshemba ka Xikwembu lesvaku svitava hilaha nibzeliweke hakona. Ntsena hitaya hiyacukumetiwa xihlaleni xin'wana.” Abzili vusiku bza vukhume ni mune, na hidlitadliteka lwandle ra Adriya; xikarhi ka vusiku vatluti vapimisa lesvaku hitshinelelile kusuhi ni ribuwa rin'wana. Loko vapima kuyeta ka mati, vakuma mpimo wa makume mambirhi ya mametru; mahlweninyana vatlhela vapima, vakuma mpimo wa khume ya mametru ni ntlhanu. Kutani hi kuchava kuyaba maribze ya le ribuweni, vahoxa mune wa tinsoma nyalweni; kutani valangutela kuxa. Kambe vatluti vona, varingeta kubaleka vahuma ngalaweni; vayehlisa bzatsu lwandle, vayendla wonge hi loko valava kuyahoxa tinsoma ankondzweni wa ngalawa. Kutani Pawulo aku ka ndhuna ni ka masochwa: “Loko vanhu lava vangatshami ngalaweni, amingaponi.” Hi loko masochwa matsema magoda ya bzatsu, maritshika riwela matini. Kuteloko riya kuxeni, Pawulo avakhongotela hinkwavu kuja svakuja, aku: “Namuntlha i siku ra vukhume ni mune, na mili karhi milangutela ntsena, mititsona mingaji nchumu. Na mikhongotela kuja xanchumu; svalaveka, loko mirhandza kupona; hikuva aku na ni mun'we wa n'wina lweyi angatalahlekeliwa hi nsisi wa nhloko ya yena hambi wuli wun'we.” Loko avulile svosvo, ateka xinkwa, akhensa Xikwembu mahlweni ka vona hinkwavu, akhema, asungula kuja. Kutani hinkwavu vatiyisa timbilu, vaja svakuja na vona. Loko kuhlayiwa hinkwavu lava avali ngalaweni, kukumeka lesvaku ahili vanhu va madzana mambirhi ni ntlhanu wa makume na makume mambirhi ni ntlhanu na mun'we (276). Loko vahetile kuja vaxurhile, vavevukisa ngalawa hi kucukumeta ndzhwalu wa trigu lwandle. Loko bzixile, vatluti avativanga tiko rakona lesvaku hi rihi; kambe loko vavona nsonga lowunga ni ribuwa, valava kuyisa ngalawa kona, loko vasvikota. Kuteloko vatsemile tinsoma, vatitshika tiwela lwandle, na vali karhi vatshunxa machini ya svihendzulu; kutani vagwimba maseyila ya le nkondzweni, varhiya moya, vakongoma ribuweni. Kambe vayaba xidulu xa sava matini, kutani ngalawa yikhisa kona; nkondzo wa yona wukhomiwa hansi, wungahatsekatseki; kambe nyalo yisungula kutshoviwa hi matimba ya magandlati. Hi loko masochwa matilungisela kudlaya vabohiwa, hi kuchava lesvaku mun'we wa vona angatshuka abaleka hi kuhlambela matini. Kambe ndhuna yilava kuponisa Pawulo, kutani yisivela masochwa kuyendla svosvo; yilerisa lesvaku hinkwavu lavativaka kuhlambela, varhanga vatihoxa matini, vayahumelela saveni; van'wana yivabzela kutipfuna hi timhandze, van'wana hi mapulangu ya ngalawa; kutani hi mukhuva wolowo vafika ribuweni na vaponile hinkwavu. Kuteloko hi ponile hi ndlela yoleyo, hibzeliwa lesvaku xihlale xakona xivuliwa Malta. Vayaki va xona vahikomba timpsalu letohlamalisa; vahiyamukela hinkwerhu, vahitshivelela ndzilo lowukulu, hikuva mpfula ayina, nasvona akuli ni xirhami. Pawulo atshovatshova mahlahla, alavakuma hoxa ndzilweni, kambe nyoka yihuma kona hi kutwa kukufumela, yitsondzela voko ra yena. Loko vayaki va xihlale vavona nyoka leyi na yilengalenga vokweni ra Pawulo, vabzelana vaku: “Munhu lweyi i mudlayi hakunene; hambi loko aponile matini, Tilo aringapfumeli lesvaku ahanya.” Kambe Pawulo adzudzela nyoka ndzilweni, na angavavisiwanga nikutsongo. Vona avalangutela lesvaku atapfimba, kumbe ahantla awela hansi, afa; kambe loko valangutelile nkama wa kuleha, vavona lesvaku akuhumeleli nchumu xa kuhlamalisa ka yena, kutani vahundzula kupimiso, vaku: “Munhu lweyi i xikwembu xin'wana.” Kusuhi ni mbangu lowu, akuli ni masimu ya ndhuna ya xihlale, leyi avaku i Publiyo; munhu lweyi ahiyamukela svinene, ahirhurhela ndlwini ya yena masiku manharhu. Kambe kukumeka lesvaku tatana wa Publiyo aayetlelile, miri wa yena wuhisa ni kukhomiwa hi le ndzeni. Pawulo anghena ka yena; akhongela, kutani amutlhanteka mavoko, amuhanyisa. Loko mhaka leyi yihumelelile, timbabzi tin'wana ta xihlale, tita, tihanyisiwa hinkwatu na vona. Vahikhensa hi kuhumesa tinyiko tinyingi; kutani siku leri hisukaka, vahilongelela lesvi hingatasvilava ariyendzweni. Loko kuhundzile tihweti tinharhu, hifamba hi ngalawa ya kuhuma Alexandriya, leyi avaku i “ya svikwembu sva mahahla”; ahihetile vuxika na hili xihlaleni. Kutani loko hifikile Sirakuza, hixwa masiku manharhu kona. Loko hihuma kona, hilulama ni ribuwa hiko hifika Rexjiyo. Hi siku leritlhantamaka moya wa le dzongeni wupfuka, kutani hi masiku mambirhi hiyafika Puteyoli. Kona hikuma vamakwerhu lavakombelaka lesvaku hixwa masiku ya ntlhanu ni mambirhi na vona; kutani hi ndlela leyo hiyafika Roma. Loko vamakwerhu va le Roma vatwa lesvaku hafika, vatatahitlhangaveta ntsendzeleni wa Apiyo, laha kuvuliwaka “svitolo svinharhu”; kuteloko Pawulo avavona, akhensa Xikwembu, atiyisa mbilu. Loko hifikile Roma, Pawulo apfumeleliwa kuva ni yindlo ya yena yexe, atshama ni sochwa leri rimurindzaka. Ndzhaku ka masiku manharhu, Pawulo arhamba lavanga vakulukumba xikarhi ka Vayuda; kuteloko vahlengeletanile, aku ka vona: “Vavanuna valekwerhu, hambi loko ningayendlanga nchumu kujohela tiko kumbe mikhuva ya vatatana, nibohiwile Yerusalema, kutani ninyiketiwile mavokweni ya Varoma. Loko vona vanivutisile, valavile kunitshunxa, hikuva aningayendlanga nchumu lowufanekeliwaka hi rifu. Kambe lesvi Vayuda avayala svosvo, svinibohile kukombela kuyavanyisiwa hi Khezari, hambi loko ningali na lexi ningamangalelaka tiko ra le kwerhu ha xona. Hikolaho ni mivitanile lesvaku nitamivona ni kuvulavula na n'wina, hikuva nibohiwile hi chini leri hikolaho ka lweyi Vaisrayele vamulanguteleke.” Vaku ka yena: “Ahisiyamukela mapapela lamahumaka Yudeya, lamahlamuselaka timhaka ta wena; hambi vali Vayuda va ka hina, ni mun'we wa vona angatanga kutahitivisa kumbe kuvula mhaka yobiha henhla ka wena. Kutani hifanele kutwa miyanakanyu ka wena uyivula hi nomo wa wena, hikuva loko yili jondzo leyi yohambuka, hayitiva lesvaku ya yaliwa hinkwaku.” Vamuvekela siku, kutani vata ka yena na vali vanyinginyana, ka yindlo leyi aatshama ka yona. Pawulo avahlamusela ta Mfumu wa Xikwembu, atitiyisa hi vumboni bza yena; aringeta ni kuvakombisa ta Yesu, hi kuvula Nawini wa Moxe, ni ka vaprofeta, avulavula kusukela ni mixo kuyafika nimajambu. Van'wana vakholwisiwa hi marito ya Pawulo; kambe van'wana vayala kupfumela. Vasuka na vangatwanananga, ndzhaku ka loko Pawulo avabzelile rito rin'we leringe: Moya Wokwetsima wuvulile hakunene, loko wuvulavulile ni vatatana va hina hi nomo wa muprofeta Ezaya, wuku: Famba uyabzela vanhu lava uku: Kutwa mitatwa, kambe amingatwisisi, kuvona mitavona, kambe amingavonisisi! Timbilu ta vanhu lava titlanyalile, vatipfale tindleve ni mahlo, lesvaku vangahavoni, nikutwa vangahatwi, hambi kuli kutwisisa vangahatwisisi, ni lesvaku vangahundzuki, na mina ningavahanyisi. “Loko svilitano, svitiveni lesvaku mahungu ya kuponisiwa hi Xikwembu marhumeliwile ka vamatiko; vona vatamayingisa.” [Kuteloko Pawulo avabzelile svosvo, Vayuda vafamba na vaphikizana hi matimba.] Pawulo ahetile malembe mambirhi Roma, na ali ka yindlo leyi, aahumesa male kutshama ka yona, ayamukela hinkwavu lavataka ka yena; aapaluxa Mfumu wa Xikwembu, ajondzisa ta Hosi Yesu Kriste na angachavi nchumu, nasvona angasiveliwi hi nchumu. Kutsala mina Pawulo, mutirhi wa Kriste Yesu, mupostola lweyi angahlawuliwa ni kuvitaneliwa Evhangeli ya Xikwembu. Evhangeli leyi, hi yona leyi Xikwembu xiyitshembiseke khale, hi vaprofeta va xona, Matsalweni layohlawuleka; yivulavula hi N'wana wa xona, Hosi ya hina Yesu Kriste, lweyi angahuma rixakeni ra Davhida hi tlhelo ra kuva munhu wa nyama; kambe, hi tlhelo ra moya wa yena lowukwetsimaka, svitikombile lesvaku i N'wana wa Xikwembu lweyi anga ni matimba hinkwawu, hi kupfuka ka yena xikarhi ka vafi. Ha yena, hinyikiwile nkateko wa kuva vapostola vitweni ra yena, lesvaku vanhu va matiko hinkwawu vapfumela, vatlhela vayingisa; na n'wina mapatsiwa ka svona, n'wina mingavitaniwa kuva va ka Yesu Kriste. Namixeweta, n'wina hinkwenu lava minga Roma, lavarhandziwaka hi Xikwembu, lavavitaniweke kuva vahlawuliwa va xona, nili: Timpsalu ni kurhula asvive na n'wina, svihuma ka Xikwembu Tatana wa hina, ni ka Hosi Yesu Kriste. Xa kusungula, nikhensa Xikwembu xa mina ha Yesu Kriste hikolaho ka n'wina hinkwenu, hikuva kupfumela ka n'wina kutwakalile misaveni hinkwayu. Xikwembu lexi nixitirhelaka moyeni wa mina hi kuvula Evhangeli ya N'wana wa xona, i mboni ya mina: Animirivali, namikhongelela masiku hinkwawu, na nili karhi nikombela lesvaku, loko kuli kurhandza ka Xikwembu, ni kateka riyendzweni ra mina, nikondza nifika ni le ka n'wina svosvi; hikuva ninavela ngopfu kumivona lesvaku nihlengela na n'wina ka nyiko yin'wana ya Moya, mitatiyisiwa hi yona; kumbe ningaku: Ninavela lesvaku hitiyisana loko nili koseyo ka n'wina, hi kupfumela loku mina na n'wina hinga nakona. Nilava lesvaku mitiva mhaka leyi, vamakwerhu: Minkama leyinyingi, nibohile makungu ya kuta ka n'wina, kutaringeta kuhundzula vanhu vangali vangani va ka n'wina lesvaku vapfumela, kukotisa lesvi nisviyendleke matikweni man'wana; kambe kufika svosvi nisiveliwile hi svin'wana. Nibohekile kutirhela Vagirika ni lavangaliki Vagirika, lavojondza ni lavokala vangajondzanga. Hikolaho nihisekelaka kuvula Evhangeli ni le ka n'wina lava minga seyo Roma. Mhaka hi lesvaku a ni na tingana hi Evhangeli, hikuva i matimba ya Xikwembu yoponisa hinkwavu lavapfumelaka, kusukela ka Vayuda, kuyafika ka vamatiko. Ka yona kuhlavuteliwa hilaha vanhu vayendliwaka lavalulameke hi Xikwembu hakona; lesvi svikumiwa ntsena hi kupfumela, nkama hinkwawu, hilaha Matsalwa mahlayaka hakona maku: “Lweyi ayendliwaka lweyi alulameke hi kupfumela, atahanya.” Svosvi-ke, vukarhi bza Xikwembu bzitavonaka bzihuma hi le tilweni, bziwela henhla ka vubihi ni vuhomboloki hinkwabzu bza vanhu lavasivelaka van'wana kutiva ntiyiso, hikolaho ka kuhomboloka ka vona. Hikuva lesvi svingativiwaka sva Xikwembu svi le rivaleni ka vona: Xikwembu hi xoxe, xivakombisile svona. Hikuva kusukela loko misava yitumbuluka, lesvingavonakiki sva Xikwembu, manga matimba ya xona lawa mangaheliki ni vukwembu bza xona, svavoneka svinene loko kutsundzukiwa mintirho ya xona; hi kolaho, vapfumala xotilandzula ha xona. Hambi loko vativile Xikwembu, avaxidzunisanga vaku i Xikwembu, avaxikhensanga; kambe vapimisile lesvokala svingapfuni nchumu, ni timbilu ta vona letingaliki na kutwisisa tibihisiwile. Vali vatlharihile, kuve vahundzuke sviphukuphuku; kutani vatshikile kukwetsima ka Xikwembu lexingafiki, vatiyendlela svifaniso lesvinga ni xivumbeko xa munhu lweyi afaka, ni xa tinyanyana, ni xa sviharhi, ni xa tinyoka. Hikolaho-ke Xikwembu xivanyiketile chakeni ra kunavela ka timbilu ta vona, kukondza vayendlana svilo sva tingana mirini wa vona. Vatshikile ntiyiso wa Xikwembu, valandza mavunhwa, vagandzela ni kutirhela lesvivumbiweke, matshan'wini ya Muvumbi lweyi afanelaka kudzunisiwa hi masiku ni masiku. Amen! Hikolaho ka svona, Xikwembu xivanyiketile kunaveleni lokukhomisaka tingana; vavasati va vona vatshikile svihena sva vona sva ntumbuluku, hi lesvaku vavanuna vafambelana masangu ni vavanunakulobze; hi mukhuva wolowo, na vona vavanuna, vatshikile kuhanya ni vasati va vona hi nawu wa ntumbuluku, kutani vahanyela kunavelana hi xivona, hi lesvaku vavanuna vafambelana masangu ni vavanunakulobze, kutani vativangela kubiwa loku kuringanaka vuhunguki bza vona. Kutani lesvi vanhu lava vangayala kutiva nchumu hi tlhelo ra Xikwembu, Xikwembu xivanyiketile kupimiseni lokungalavekiki, vakondza vayendla ni lesvingafaneliki. Vatele kuhomboloka hinkwaku, ni lesvobiha, ni kuphanga, ni mona; vatele mavondzo, ni kudlaya, ni kuphikizana, ni kukanganyisa, ni kuxengana; i vahlevi ni valumbeti; i vavengi va Xikwembu, va mona lavatitivaka ni lavatidzunisaka; i vanhu lavasungulaka tindlela letobiha letimpsha, lavangayingisiki vapsali va vona; ava na ripfalu, ava na nomo lowutshembekeke, ava na vunene, ava na timpsalu; vanhu lava, hambi loko vativa kulerisa ka Xikwembu lesvaku lavayendlaka lesvotano valulameliwa hi rifu, avayimi ka svosvo ntsena, kambe vayengetela hi kuseketela lava vasviyendlaka. Loko svilitano, wena munhu lweyi athethisaka van'wana, awu na kutitsetselela, hambi ungava mani na mani, hikuva loko uli karhi uyavanyisa van'wana, na wena watiyavanyisa, hikuva wena muthethisi wa van'wana, uyendla lesvi vona vasviyendlaka. Hasvitiva lesvaku Xikwembu axihoxi loko xithethisa lavayendlaka lesvotano. Wena munhu lweyi athethisaka lavayendlaka lesvotano, wasviyendla na wena! Xana upimisa lesvaku utapona kuthethiseni ka Xikwembu ke? Kumbe, xana usola vunene lebzikulu bza xona, ni bza kutsetselela ka xona, ni bza mbilu ya xona yoleha ngopfu, ungativi lesvaku vunene bza Xikwembu bzikukokela kuhundzukeni, ke? Hi mbilu ya wena leyi ya kunonon'hwa, leyingalaviki kuhundzuka, utiyengetelela vukarhi lebzingatakuwela hi siku lerochavisa, leri kuthethisa loku kululameke ka Xikwembu kungatahumelela ha rona. Hikuva xona xitlhelisela mun'wana ni mun'wana hi kuya hi mintirho ya yena: Lava vatiyiselaka kuyendla lesvinene, na vali karhi vanavela kuva lavakwetsimaka ni lavadzunekaka ni lava vangahafiki, Xikwembu xitavanyika vutomi lebzingaheliki; kambe lavanga ni moya wa kutirhandza, vayalaka ntiyiso, vafambaka hi kuhomboloka, xitavahlundzukela ni kuvakarihela. Kuxaniseka ni vusiwana svitawela vanhu hinkwavu lavayendlaka lesvobiha, kusungula hi Vayuda, kuyafika ni ka vamatiko; kambe kukwetsima, ni kudzuneka, ni kurhula, kutanyikiwa hinkwavu lavayendlaka lesvinene, kusungula hi Vayuda, kuyafika ni ka vamatiko; hikuva Xikwembu axi na xihlawuhlawu. Hinkwavu lavajoheke na vangativi Nawu, vatahelisa xisvosvo, na vangali na Nawu; kambe hinkwavu lavajoheke na vativa Nawu, vatathethisiwa mayelanu ni Nawu. Hikuva ahi vatwi va Nawu lavavoniwaka na vali lavalulameke mahlweni ka Xikwembu, kambe lavafambaka hi kulandza wona, hivona lavangatahlayiwa lesvaku valulamile. Loko vamatiko lavangaliki na Nawu, vayendla mayelanu ni kutumbuluka ka vona lesvi Nawu wuleletaka svona, vativekela nawu hi voxe, hambi loko vangali na Nawu. Vakombisa lesvaku lesvi Nawu wuleletaka svona, svitsaliwile timbilwini ta vona; ripfalu ra vona ritiyisa svosvo, hambi yili miyanakanyu ya vona, loko yiphikizana, yivaveka nandzu kumbe yiyima na vona; svitava tano hi siku leri Xikwembu xingatathethisa svihundla sva vanhu ha Yesu Kriste, hilaha Evhangeli leyi niyijondzisaka yihlayaka hakona. Wena lweyi utivulaka Muyuda, wena utshembeke Nawu, utitlakusaka hi Xikwembu, wena utivaka kurhandza ka xona, utivaka kulavisisa timhaka letitlulaka tin'wana hi vunene, hi lesvi ujondzisiweke hi Nawu, wena ukholwaka lesvaku umufambisi wa lava vafeke mahlo ni kuvonakala ka lava vanga munyameni, wena ukholwaka lesvaku umuleleti wa lava vangativiki nchumu, ni mujondzisi wa svihlangi, hi lesvi unga ni jondzo ya xiviri, ya vutivi ni ya ntiyiso, Nawini, wena lweyi ujondzisaka van'wana, awutijondzisi ke? Wena lweyi uhlayaka lesvaku kungatshuki kuyiviwa, awuyivi ke? Wena lweyi unge: “Kungatshuki kuwosviwa”, awuwosvi xana ke? Wena lweyi unyenyaka svikwembu sva hava, awuyivi sva le titempeleni ke? Wena lweyi utitlakusaka hikolaho ka Nawu, xana awusolisi Xikwembu loko utlula Nawu wolowo ke? Hikuva vito ra Xikwembu risoliwa xikarhi ka vamatiko hinkwavu hikolaho ka n'wina, hilaha Matsalwa mahlayaka hakona. Svatwala lesvaku kuyimba kapfuna, loko uhlayisa Nawu; kambe loko utlula Nawu, kuyimba ka wena kutofana ni loko ungayimbanga. Kambe loko munhu lweyi angayimbangiki ahlayisa svileriso sva Nawu, atahlayiwa lweyi ayimbeke, hambi loko angayimbanga. Kutani loko munhu lweyi angayimbangiki afamba hi Nawu, atakuthethisa wena lweyi utlulaka Nawu, hambi loko uli ni lesvitsaliweke sva Nawu, kumbe hambi uyimbile. Kuva Muyuda wa xiviri, asvitikombi hi le handle ntsena; ni kuyimba ka xiviri, akuvonaki handle, mirini. Kambe Muyuda wa xiviri, hi lweyi anga yena xihundleni xa mbilu, ni kuyimba ka xiviri, i kuyimba ka mbilu, loku kuyendliwaka moyeni, kungali hi lesvitsaliweke sva Nawu; kudzunisiwa ka munhu lweyi akuhumi ka vanhu, kambe kuhuma ka Xikwembu. Loko svilitano, i ncini lexi Muyuda atlulaka van'wana hi xona, kumbe kuyimba kupfuna yini ke? Kapfuna ngopfu, hi matlhelo hinkwawu. Mhaka yosungula hi lesvaku Xikwembu xivekile svitshembiso sva xona mavokweni ya Vayuda. Xana hitahlaya yini, loko van'wana va vona vangatshembekanga ke? Xana kutshembeka ka Xikwembu kungahelisiwa hi mhaka ya kukala vangatshembekanga ke? Nikutsongo! Xikwembu xifanele kutiviwa xili xa ntiyiso, ni loko munhu mun'wana ni mun'wana ali muhembi. Hi svona lesvingatsaliwa, loko vaku: “Hilaha ungatava lweyi alulameke, loko uvulavula, ni kukumiwa na ungali na nandzu, loko uthethisiwa.” Kambe, xana hitakuyini loko kuhomboloka ka hina kuyendla lesvaku kululama ka Xikwembu kukombisiwa rivaleni ke? Xana hitahlaya lesvaku Xikwembu xihombolokile loko xihiba kuhlundzukeni ka xona ke? (Nivulavula hi mukhuva wa vanhu.) Nikutsongo! Hikuva loko Xikwembu axihombolokile, axitathethisisa kuyini misava xana? Kambe, loko kuhemba ka mina kukombisisa svinene lesvaku Xikwembu xi ni ntiyiso, kutwalisa ni kukwetsima ka xona, hikolaho ka yini nahaya mahlweni nithethisiwa tani hi mujohi ke? Nasvona hikolaho ka yini hingayendli lesvobiha, lesvaku kutahumelela lesvosaseka xana? Van'wana vahilumbeta hi mukhuva lowu, vaku hi lesvi hina hihlayaka svona. Kuthethisiwa ka vanhu lavotano, kavafanela! Ihim, loko svilitano, hingahlaya yini ke? Xana hina Vayuda hilulamile kutlula van'wana ke? Ihim, nikutsongo. Hahakukomba nandzu wa Vayuda ni wa vamatiko, ni lesvaku hinkwavu vafumiwa hi kujoha. Matsalwa matiyisa svosvo, maku: “Aku na munhu ni mun'we lweyi alulameke, aku na lweyi atwisisaka, aku na lweyi alavaka Xikwembu. Hinkwavu vatshikile ndlela, vahundzukile lavangapfuniki nchumu, hinkwavu vafana; aku na lweyi ayendlaka lesvinene, ni mun'we anga kona. Minkolo ya vona i masirha lawa mapfuliweke, hi tindzimi ta vona vatolovele kukanganyisa, mahlungu ya tinyoka ma le milon'weni ya vona, milomo ya vona yitele kurhuka ni kubava; milenge ya vona yi ni xihantla xa kuyahalata ngati, tindleleni ta vona ku ni kulahleka ni makhombo, kutani ndlela ya kurhula avayitivanga. Ka vona, kuchava Xikwembu asvikona!” Hasvitiva lesvaku hinkwasvu lesvi Nawu wuhlayaka svona svikongoma lava vativaka Nawu, lesvaku vanhu hinkwavu vapfaliwa milomo, ni lesvaku misava hinkwayu yiyisiwa kuthethisiweni mahlweni ka Xikwembu. Hikuva aku na munhu ni mun'we lweyi angatahlayiwa lweyi alulameke mahlweni ka xona hi mhaka ya lesvi angayendla hi kulerisa ka Nawu; ntiyiso wakona hi lesvaku Nawu wukomba laha kujoha kunga kona. Kambe svosvi ndlela leyi Xikwembu xiyendlaka ha yona lesvaku vanhu vava lavalulameke, yipfuleteliwile, na yingali yotshemba sva Nawu; vumboni bza wona bzi kona matsalweni ya Nawu ni Vaprofeta: Hi lesvaku Xikwembu xiyendla vanhu vava lavolulama hi kupfumela ka vona ka Yesu Kriste; xiyendla lesvi ka hinkwavu lavapfumelaka, hikuva aku na kuhambana: Vanhu hinkwavu vajohile, hi kolaho kukwetsima loku avanyikiwile hi Xikwembu, vakupfumala. Kambe vahlayiwa lavalulameke hi timpsalu ta Xikwembu, hi kunyikiwa, ha Yesu Kriste lweyi avaponiseke. Xikwembu ximuvekile lesvaku hi kufa ka yena, vanhu va rivaleliwa svijoho, loko vapfumela ka yena; xiyendlele kukomba hilaha xiyendlaka vanhu vava lavalulameke hakona, hikuva axirivalele vanhu kujoha ka vona ka khale, minkameni ya kutsetselela ka xona; asvili lesvaku xikomba kululama ka xona minkameni ya svosvi, xiva Xikwembu lexilulameke, xikan'we ni kuva Xikwembu lexiyendlaka munhu kuva lweyi alulameke loko apfumela ka Yesu. Loko svilitano, kutikulisa kungava kwihi ke? Kudlayiwile! Hi mhaka yihi ke? Hi mhaka ya mintirho leyiyendliweke xana? Ihim! Kudlayiwile hi mhaka ya kupfumela. Hikuva hivonile lesvaku munhu ahlayiwa lweyi alulameke hi kupfumela, kungali hi kuyendla lesvitsemiweke hi Nawu. Xana Xikwembu i xa Vayuda ntsena ke? Xana vamatiko vona, ahi xa vona ke? Ina, na vona vamatiko i xa vona, lesvi kunene Xikwembu xinga xin'we; xitayendla va kuyimba vava lavalulameke hi mhaka ya kupfumela, na vona lavokala vangayimbanga hi mhaka leyi ya kupfumela. Loko svilitano, xana hidlaya Nawu hi mhaka ya kupfumela ke? Nikutsongo! Kambe hitiyisa Nawu. Loko svilitano, xana hingahlaya lesvaku Abrahamu, yena lweyi rixaka ra hina rihumaka ka yena, akume yini ke? Loko Abrahamu ahlayiwile lweyi alulameke hikolaho ka mintirho ya yena, a ni sva kutidzunisa ha svona; kambe kungali mahlweni ka Xikwembu. Hikuva Tsalwa rili yini ke? Rili: “Abrahamu apfumelile ka Xikwembu, kutani ximuhlayile lweyi alulameke hikolaho ka svona.” Ka lweyi atirhaka, lesvi akumaka svona i hakelo ya ntirho wa yena; asvihlayiwi lesvaku i nyiko. Kasi munhu lweyi angatirhiki, kambe atshemba Xikwembu lexihundzulaka mubihi ava lweyi alulameke, ahlayiwa lweyi alulameke hikolaho ka kupfumela ka yena. Hi svolesvi Davhida na yena angapimisa svona, loko ahlayile ta kukateka ka munhu lweyi Xikwembu ximuhlayaka lweyi alulameke, kungali hikolaho ka mintirho ya yena; ate: “Kukatekile lavarivaleliweke svijoho sva vona, lava svijoho sva vona svifunengetiweke, kukatekile munhu lweyi Hosi yingamuhlayeliki kujoha ka yena.” Loko svilitano, xana kukateka loku i ka lavoyimba ntsena, kumbe ni lavangayimbangiki i ka vona ke? Hikuva hahakuvula lesvaku Abrahamu ahlayiwile lweyi alulameke hikolaho ka kupfumela ka yena. Xana ahlayiwile rini? Xana hi loko se ayimbile, kumbe hi loko angasiyimba ke? Aangasiyimba, ayimbisiwile ndzhaku. Kutani anyikiwile kuyimba wuli mfungu wotiyisa kululama loku akukumeke hi kupfumela, loko angasiyimba. Asvili lesvaku Abrahamu atava tatana moyeni wa hinkwavu lavapfumelaka, kutani vahlayiwa lavalulameke hambi loko vangayimbanga. Nasvona i tatana ka lava vayimbeke, kungali ntsena hi lesvi vangayimba, kambe hi lesvi vafambaka ndleleni ya kupfumela, leyi tatana wa hina Abrahamu angafamba hi yona, ni loko angasiyimba. Akungali hi mhaka ya kuyingisa Nawu, loko Abrahamu ni vatukulu va yena vatshembisiwile lesvaku misava yitava rifuwo ra vona, kambe akuli hikolaho ka kululama lokunyikiwaka hi mhaka ya kupfumela. Hikuva loko rifuwo rinyikiwa ntsena lavanamarhelaka Nawu, kupfumela akahali nchumu, na xona xitshembiso axahapfuni nchumu; hikuva nawu wuvanga vukarhi, kambe laha nawu wukalaka wungali kona, aku na kuwutlula. Kupfumela i mhaka leyilavekaka, lesvaku hinkwasvu sviva lesvitirhiwaka hi timpsalu ta Xikwembu, ni kuyendlela lesvaku xitshembiso xiva lexitiyeke ka vatukulu hinkwavu va Abrahamu, kungali ntsena ka lava vanamarhelaka Nawu, kambe ni ka lava vanamarhelaka kupfumela loku aali nakona; hi yena lweyi anga tatana wa hina hinkwerhu, hilaha svitsaliweke hakona, loko vaku: “Nikuyendlile tatana wa matiko lawa manyingi.” Abrahamu i tatana wa hina mahlweni ka Xikwembu lexi angapfumela ka xona, xinga Xikwembu lexipfuxaka lavangafa, lexiyendlaka lesvaku svilo lesvingaliki kona svitshuka sviva kona. Abrahamu avile ni kutshemba, ava alangutela laha kungalangutelekiki, kutani ahundzuka tatana wa matiko lawa manyingi, hi kuya hi Matsalwa lawa mange: “Vatukulu va wena vatayengetelanisa xisvosvo.” Angatlhelelanga ndzhaku hi tlhelo ra kupfumela, loko ativona na ahlakele miri tani hi mufi (hikuva malembe ya yena amali kusuhi ni dzana) ni loko avona nsati wa yena Sara lesvaku ahundzeliwe hi nkama. Angakanakananga hi tlhelo ra xitshembiso xa Xikwembu, ni kupfumela ka yena akuhelanga; kambe akumile matimba hi mhaka ya kupfumela, kutani adzunisa Xikwembu. Akholwile svinene lesvaku Xikwembu xi ni matimba kuyendla lesvi xingatshembisa kuyendla svona; hikolaho ka mhaka leyi, ahlayiwile lweyi alulameke hi kupfumela loku. Marito lawa mange: “Ahlayiwile hi kupfumela loku”, amatsaliwanga na makongoma yena ntsena, kambe makongoma na hina; hitahlayiwa svosvo na hina, hi mhaka ya lesvi hipfumelaka ka yena Lweyi apfuxeke Yesu Hosi ya hina xikarhi ka vafi. Hi yena Yesu lweyi anganyiketiwa lesvaku adlayiwa hikolaho ka milandzu ya hina, atlhela apfuxiwa kufeni lesvaku hi ta tshunxiwa ka yona. Loko svilitano, lesvi hingayendliwa lavalulameke hi mhaka ya kupfumela, hi ni kurhula ka Xikwembu, hi Hosi ya hina Yesu Kriste; nasvona hi kupfumela, hikotile kukuma ha yena timpsalu leti hiyimeke ka tona svosvi, kutani hitikulisa kulanguteleni ka hina ka kuyaveliwa kukwetsima ka Xikwembu. Kungali svosvo ntsena, kambe hitikulisa ni le kuxanisekeni ka hina, hi kutiva lesvaku kuxaniseka kupsala kutiyisela, kutiyisela kupsala kuhlula miringo, ni kuhlula miringo kupsala kulangutela; kutani kulangutela akuhikhomisi tingana, hikuva Xikwembu xichelile rirhandzu ra xona timbilwini ta hina hi Moya Lowokwetsima lowu hinyikiweke wona. Loko hahali ni gome, Kriste afele lavohomboloka, hi nkama lowuvekiweke hi Xikwembu. Svingakarhata ka munhu kufela munhu mun'wana lweyi alulameke; kumbexana mun'wana aatatiyisa mbilu afela munhu lwenene. Kambe Xikwembu xikombisa rivaleni rirhandzu ra xona ka hina, hi lesvi Kriste angahifela loko hahali vajohi. Loko svilitano, lesvi hingayendliwa lavalulameke svosvi, hi mhaka ya rifu ra yena, ngopfungopfu hitaponisiwa ha yena ka mahlundzu ya Xikwembu. Loko hahali valala ka Xikwembu, hiyendliwile lavavuyelelaneke na xona hi kufa ka N'wana wa xona; kutani, lesvi hingavuyelelana na xona, ngopfungopfu hitaponisiwa hi mhaka ya vutomi bza Kriste. Kungali svosvo ntsena, kambe hatitlakusa ka Xikwembu ha Hosi ya hina Yesu Kriste, lweyi svosvi hiyamukeleke kuvuyelelana loku ha yena. Kutani-ke, kufana ni lesvi kujoha kungheneke misaveni hi munhu ali mun'we, na rona rifu ringhenile hikolaho ka kujoha, hi mukhuva wolowo rifu ritlulele vanhu hinkwavu, hikuva hinkwavu vajohile. Kujoha akuli kona misaveni kukondza kufika Nawu, hambilesvi kujoha kungavuliwiki lesvaku i kujoha, loko kungasiva ni Nawu. hambi svilitano, rifu rive kona kusukela ka Adamu kuyafika ka Moxe, rifumile ni lavavokala vangajohanga hi kutlula svileriso sva Xikwembu kukota Adamu. Kutani Adamu aafanisa munhu lweyi aahali ndleleni. Kambe ntirho wa timpsalu lowutirhiweke hi Xikwembu awupimanisiwi ni nandzu lowungayendliwa hi Adamu; hikuva, loko nandzu wa munhu mun'we ntsena wudlayisile vanhu lavanyingi, timpsalu ta Xikwembu ni nyiko ya timpsalu leyiteke hi munhu mun'we ntsena anga Yesu Kriste, svitlulisile ngopfungopfu hi kutala ka vanhu lavanyingi. Ku ni kuhambana xikarhi ka nyiko ya Xikwembu ni lesvivangiweke hi kujoha ka munhu mun'we lweyi; hikuva kuthethisa loku kuyendliweke hikolaho ka nandzu wun'we, kutisile kubiwa, kasi ntirho wa timpsalu lowuyendliweke ni loko milandzu yili leyinyingi, wutisile kutshunxiwa. Rifu rifumile hi mhaka ya nandzu wa munhu mun'we ntsena; hi ndlela yoleyo, lava vayamukelaka ntalu wa timpsalu ni nkateko wa kuyendliwa lavalulameke, vatatlulisa ngopfungopfu hi kufuma vuton'wini, hi mhaka ya munhu mun'we anga Yesu Kriste. Kutani-ke, kufana ni lesvi nandzu wun'we wudlayiseke vanhu hinkwavu lesvaku vabiwa, na wona ntirho wun'we wolulama wuyendla lesvaku vanhu hinkwavu vatshunxiwa, vakuma vutomi. Nasvona, kufana ni lesvi lavanyingi vahundzuliweke vajohi hikolaho ka munhu mun'we lweyi akalaka angayingisanga, hi mukhuva wolowo, hi kuyingisa ka munhu mun'we, vanhu lavanyingi vatahundzuliwa vava lavalulameke. Nawu wunghenile lesvaku vubihi bziyandza; kambe laha kujoha kutaleke kona, ntalu wa timpsalu wuvile kona hi kutlulisa; asvili lesvaku, kukotisa lesvi kujoha kufumeke hi rifu, timpsalu na tona titafumisa xisvosvo hi kululama loku kuyisaka vuton'wini lebzingaheliki, ha Yesu Kriste Hosi ya hina. Loko svilitano, xana hitakuyini? Xana hitaya mahlweni hijoha lesvaku timpsalu titala ke? Nikutsongo! Hina hifeke hi tlhelo ra kujoha, xana hingahahanyela yini kujoheni ke? Xana amisvitivi lesvaku hina hinkwerhu lavakhuvuliweke ka Yesu Kriste, hikhuvuleliwe kufeni ka yena ke? Loko svilitano, hikhuvuleliwa kufa ka yena, hilahliwile na yena, lesvaku kukotisa lesvi Kriste apfuxiweke xikarhi ka vafi, hi matimba ya kukwetsima ya Tatana, na hina hitahanya hi ndlela leyimpsha. Hikuva loko hihlanganisiwile na yena hi kufa hi rifu lerifanaka ni ra yena, nakona hitava tano loko hipfuka kufeni hi kupfuka loku kufanaka ni kupfuka ka yena. Lesvi hisvitivaka hi lesvaku munhu wa hina wa khale avambiwile na Kriste xihambanwini lesvaku matimba ya munhu lweyi wa kujoha mahelisiwa, ni lesvaku hitakala hingahavi svitirhi sva kujoha. Hikuva munhu lweyi afeke atshunxiwile matimbeni ya kujoha. Loko hifile na Kriste, hipfumela lesvaku hitahanya na yena; nasvona hitiva lesvaku, lesvi Kriste apfukeke xikarhi ka vafi, angakala angahafi kambe, ni rifu arahali na matimba henhla ka yena. Kufa ka yena akuli kufa hi tlhelo ra kujoha, kan'we sviva svihelile; kutani vutomi lebzi ahanyaka bzona svosvi ahanyela Xikwembu. Hi mukhuva wolowo, na n'wina tivoneni na mili lavafeke hi tlhelo ra kujoha, kutani na mili lavahanyelaka Xikwembu ha Yesu Kriste. Loko svilitano, kujoha kungahatshuki kufuma mirini wa n'wina lowufaka, lesvaku mingahayi hi kunavela ka wona; mingahanyiketeni svirho sva n'wina kujoheni, mingahasvitirhiseni kuyendla lesvohomboloka; kambe tinyiketeni ka Xikwembu tani hi vanhu lavahanyaka, lavahumeke xikarhi ka vafi. Kutani minyiketa svirho sva n'wina ka Xikwembu, misvitirhisa kuyendla lesvolulama. Kujoha kungahamifumi, hikuva amili hansi ka Nawu, kambe svosvi mi le hansi ka timpsalu. Kutani-ke? Xana hitajoha, hi lesvi hingaliki hansi ka Nawu, kambe hinga hansi ka timpsalu ke? Nikutsongo! Xana amisvitivi lesvaku, loko mitinyiketa kutirhela mun'wana ni kumuyingisa, misvikarawa sva lweyi mimuyingisaka ke? Hambisvitirhi sva kujoha loku kuyisaka kufeni, hambi svikarawa svakuyingisa loku kuyisaka kululameni. Kambe akukhensiwe Xikwembu, hikuva n'wina lava va khale amili svikarawa sva kujoha, svosvi miyingisile hi mbilu hinkwayu ntiyiso wa jondzo leyi miyikumeke. Kutani mitshunxiwile kujoheni, miva mihundzuka svitirhi sva kululama. Nitirhisa mavulavulela ya vanhu, hikuva, hi ntumbuluku, mi vanhu lavanga ni gome. Kufana ni lesvi khale aminyiketile svirho sva n'wina kuva svitirhi sva chaka ni sva kuhomboloka, lesvaku miyendla lesvohomboloka ha svona, svosvi nyiketani svirho sva n'wina kuva svitirhi sva kululama, lesvaku miyendla lesvitengeke ha svona. Hikuva loko mahali svitirhi sva kujoha, amitshunxiwile hi tlhelo ra kululama. Xana amitshovela yini minkameni yoleyo, hi kuyendla svilo lesvi svosvi svimikhomisaka tingana, ke? Hikuva makumu ya svona i rifu. Kambe svosvi, mitshunxiwile kujoheni, mihundzukile vatirhi va Xikwembu, kutani mihandzu leyi miyitshovelaka svosvi yimiyisa kutengeni; kuheteleleni, mitakuma vutomi lebzingaheliki. Hikuva hakelo ra xijoho i rifu, kambe nyiko leyinyikiwaka ntsena, leyihumaka ka Xikwembu, i vutomi lebzingaheliki, ha Yesu Kriste Hosi ya hina. Xana amisvitivi, vamakwerhu (nivulavula ni lavativaka nawu), lesvaku nawu wufuma munhu hi nkama lowu ahanyaka ke? Svifana ni wansati lweyi atekiweke: Abohekile ka nuna wa yena hi nawu, loko nuna ahahanya; kambe loko nuna afile, wansati lweyi atshunxiwile nawini lowu awumuboha ka nuna wa yena. Hikolaho, loko atekana ni wanuna mun'wana, kasi nuna wa yena wahahanya, atahlayiwa muwosvi; kambe loko nuna wa yena afile, atshunxekile nawini; svihlaya lesvaku loko atekana ni wanuna mun'wana, angakala angavuliwi muwosvi. Svivulaka lesvi vamakwerhu: Na n'wina mifile hi tlhelo ra Nawu, hikuva miyendla miri wun'we na Kriste; svihlaya lesvaku miva mun'wana, anga yena lweyi apfuxiweke xikarhi ka vafi lesvaku hiveka mihandzu leyitsakisaka Xikwembu. Hikuva, loko hahahanyela sva ntumbuluku wa hina, kunavela lokunga ni kujoha, loku akupfuxiwa hi mhaka ya Nawu, akutirha ka svirho sva hina, kutani mihandzu yakona akuli kufa. Kambe svosvi hitshunxiwile Nawini, lesvi hingafa hi tlhelo ra lesvi ahibohiwile hi svona khale; hi kolaho ke, hitirhela Xikwembu hi ndlela leyimpsha ya Moya, kungali hi leyi ya khale ya lesvitsaliweke Nawini. Loko svilitano, ahitavula yini ke? Xana Nawu i kujoha ke? Nikutsongo! Hambi svilitano, aningatativa lesvi kujoha kunga xisvona, loko Nawu awungavanga kona; hikuva aningatativa lesvi kunavela lokobiha kunga xisvona, loko Nawu awungahlayanga wuku: “Ungatshuki unavela!” Kambe kujoha kukumile ndlela hi mhaka ya xileriso, kutani kupfuxile kunavela ka tinxakaxaka ndzeni ka mina; hikuva handle ka Nawu, kujoha kufile. Khale, anili lweyi ahanyaka na angali hansi ka Nawu; kambe hi kuta ka xileriso, kujoha kupfuka kuhanya, kutani mina nifa. Kukumeka lesvaku xileriso lexi axili xonihanyisa, xihundzukile xonilovisa. Hikuva kujoha kukumile ndlela hi mhaka ya xileriso, kutani kunikanganyisile, ni kunidlaya hikolaho ka xileriso lexi. Hikolaho-ke, nawu hi woxe wuhlawulekile, na xona xileriso xihlawulekile, xilulamile, hi lexinene. Loko svilitano, xana xilo lexinene, hi xona lexinganivangela rifu ke? Nikutsongo! Kambe i kujoha, lesvaku kujoha loku kutikomba lesvi kunga svona; kutani kunivangele rifu hi kutirhisa xilo lexinene; asvili lesvaku, hi mhaka ya xileriso, kujoha kukombisisa svinene kubiha kakona. Hasvitiva lesvaku Nawu i wa Moya; kasi mina, ni munhu wa miri ntsena, nixavisiwile kuva xikarawa xa kujoha. Mhaka hi lesvaku mina n'winyi anitwisisi lesvi nisviyendlaka, hikuva aniyendli lesvi ninavelaka kusviyendla, kambe niyendla lesvi nisvivengaka. Svosvi-ke, loko niyendla lesvi ninganaveliki kusviyendla, nitwanana ni Nawu lesvaku wululamile. Hikolaho-ke angahali mina lweyi avangaka svona, kambe i kujoha loku kuyakeke ka mina. Hikuva nasvitiva lesvaku lesvinene asviyakanga ka mina, hi lesvaku mirini wa mina avunene abziyakanga; hilesvo-ke kunavela kuyendla lesvolulama ku kona ka mina; kambe kusviyendla aku kona. Hikuva lesvinene lesvi ninavelaka kusviyendla, anisviyendli, kambe lesvobiha lesvi ninganaveliki kusviyendla, nasviyendla. Svikomba lesvaku loko niyendla lesvi ninganaveliki kusviyendla, angahali mina hi nexe lweyi asviyendlaka, kambe i kujoha loku kuyakeke ka mina. Hikolaho, nikuma lesvi ka mina: Loko ninavela kuyendla lesvolulama, lesvobiha nasvona sviko na ka mina. Moyeni wa mina nitsakela Nawu wa Xikwembu; kambe ka svirho sva mina nikuma nawu wun'wana, lowulwaka ni nawu lowu wufambisaka miyanakanyu ya mina; wuniyendla mubohiwa nawini wa kujoha lowufumaka svirho sva mina. Yo! Mina munhu wa khombo lerikulu! I mani lweyi angatanitshunxa mirini lowu wuniyisaka kufeni xana? Akukhensiwe Xikwembu ha Yesu Kriste, Hosi ya hina! Kuhetisela mhakeni leyi, ningaku: Mina, hi miyanakanyu ya mina, hambi nitirhela Nawu wa Xikwembu, hi miri wa mina nitirhela nawu wa kujoha. Kutani svosvi akahali na kuyavanyisiwa ka lava vanga ka Kriste Yesu. Hikuva Nawu wa Moya lowunyikaka vutomi ha Yesu Kriste, wunitshunxile ka nawu wa kujoha ni wa rifu. Lesvi Nawu wuhlulekeke kusviyendla, hi mhaka ya gome mirini wa laha misaveni, Xikwembu xisvikotile: Xiyavanyisile kujoha mirini hi kurhumela N'wana wa xona hi yexe, na ali ni miri lowufanaka ni miri wa hina wofumiwa hi kujoha, lesvaku atakota kuyavanyisa xijoho mirini. Xikwembu xiyendlile lesvi, lesvaku hina hihanyaka kungali hi kulandza sva miri kambe hi kulandza sva Moya, hikota kuyingisa hi kuhetiseka svileriso lesvolulama sva Nawu. Hikuva lavahanyaka hi kuyingisa miri, va ni miyanakanyu leyifumiwaka hi sva miri lowu; kambe lavahanyaka hi kuyingisa Moya, va ni miyanakanyu leyifumiwaka hi sva Moya. Kunavela sva miri i rifu, kambe kunavela sva Moya i vutomi ni kurhula. Hikolaho, kunavela lokufumiwaka hi miri kulwa ni Xikwembu, hikuva akulandzi Nawu wa Xikwembu; nasvona kungakala kungasvikoti. Hi ndlela leyo, lavafumiwaka hi miri, vangakala vangatsakisi Xikwembu. Kasi loko mili n'wina, amifumiwi hi miri, kambe mifumiwa hi Moya, loko hakunene Moya wa Xikwembu wuyakile ka n'wina. Loko munhu angali na Moya wa Kriste, ahi munhu wa yena. Loko Kriste ali ka n'wina, hambi loko miri wa n'wina wufile hi mhaka ya xijoho, Moya wa hanya ka n'wina hi mhaka ya lesvi mingayendliwa lavalulameke hi Xikwembu. Kutani loko Moya wa Xikwembu lexingapfuxa Yesu xikarhi ka vafi wuyakile ka n'wina, yena lweyi apfuxeke Kriste xikarhi ka vafi, atahanyisa miri wa n'wina lowufaka, hi Moya wa yena lowuyakeke ka n'wina. Hikolaho, vamakwerhu, haboheka akuva hingahanyi hi kuyingisa miri. Loko mihanya hi kuyingisa miri wa n'wina, mitafa; kambe loko midlaya mikhuva leyobiha ya miri hi matimba ya Moya, mitahanya. Vanhu hinkwavu lavafambisiwaka hi Moya wa Xikwembu i vana va Xikwembu. Hikuva Moya lowu minganyikiwa wona, awumiyendli svikarawa ni kutlhela wumivangela kuchava, kambe miyamukele moya lowu wumiyendlaka vana; lowu hihuwelelaka ha wona hiku: “Aba, Tatana!” Moya, lowu wuyima ni mimoya ya hina kutiyisa lesvaku hi vana va Xikwembu. Loko hili vana, svivula lesvaku hi vinyi va ndzhaka ya Xikwembu, nivaji va ndzhaka svin'we na Kriste; lesvi kunene hixanisekaka na yena, svivula lesvaku hitakwetsimisiwa na yena. Hikolaho-ke, nitshemba lesvaku kuxaniseka ka nkama wa svosvi akufaneli kuringanisiwa ni kukwetsima loku hingatakombiwa kona. Hikuva svivumbiwa hinkwasvu svilangutela, hi kunavela lokukulu, lesvaku Xikwembu xikombisa rivaleni vana va xona. Lesvivumbiweke svinyiketiwe ka sva hava, kungali hi kurhandza ka svona, kambe hi kurhandza ka Lweyi asvinyiketeke. Kambe kulangutela ku kona ka lesvaku svivumbiwa svosvo svitatshusiwa na svona vukaraweni bza lesvobola, sviyisiwa kutshunxekeni lokokwetsima lokunga ka vana va Xikwembu. Hikuva hitiva lesvaku, kutafika namuntlha, svivumbiwa hinkwasvu svakonya hi kuvaviseka loku kufanaka ni kuvaviseka ka kuveleka. Akukonyi svivumbiwa ntsena, kambe na hina hingayamukela mihandzu yorhanga ya Moya Lowokwetsima, hakonya ndzeni ka hina, na hili karhi hilangutela kuyendliwa vana, kunga kuponisiwa ka miri wa hina. Hi ponisiwile nahili ni kulangutela loku; kasi lesvilanguteliwaka, loko svivonaka, asvahalanguteliwi. Xana munhu angalangutela lesvi asvivonaka ke? Kambe loko hilangutela lesvi hingasvivoniki, hisvilangutela hi kutiyisela. Hi mukhuva wolowo Moya na wona wahipfuna gomeni ra hina; hikuva ahitivi lesvi hinga svikombelaka ni ndlela leyi hifanelaka kukhongela ha yona, kambe Moya, wona ha woxe, wukhongela Xikwembu matshan'wini ya hina, loko hina hikonya kunene hingahumesi marito. Kutani Xikwembu lexikambaka timbilu, xitiva lesvi Moya wusvilavaka; xitiva lesvaku Moya wufanela kukhongelela vahlawuliwa va xona. Nakona hitiva lesvaku, svilo hinkwasvu svihlengela kun'we kutiyisa, lesvinene ka lava vaxirhandzaka, vanga lava xivavitaneke, hi kuya hi sviboho sva makungu ya xona. Hikuva lava xivativeke kahali kusunguleni, xilulamisile kahali khale lesvaku vatavonaka na vali lavafanaka ni N'wana wa xona, ni lesvaku ava yena wa mativula xikarhi ka vamakwavu lavanyingi. Kutani lava xingalulamisa ta vona khale, xitlhele xivavitana; ni lava xivavitaneke, xitlhele xivayendla vava lavalulameke; ni lava xingavayendla lavalulameke, xitlhele xivakwetsimisa. Loko svilitano, xana hingahavula yini timhakeni toleto ke? Loko Xikwembu xiyima na hina, i mani lweyi angalwaka na hina xana ke? Xona, lexingatsetselelangiki N'wana wa xona wa xiviri kambe ximunyiketa hikolaho ka hina hinkwerhu, xana xingatsandzekisa kuyini kuhinyika svilo hinkwasvu mahala ke, kasi xihinyikile ni N'wana wa xona? I mani lweyi angamangalelaka lava Xikwembu xivahlawuleke xana? Xikwembu hi xona lexi xivanyikaka kululama. I mani lweyi angavavekaka nandzu xana? Yesu Kriste lweyi afeke, kumbe hingaku, yena lweyi apfuxiweke kufeni, anga yena lweyi atshameke vokweni ra xinene ra Xikwembu, kutani hi yena lweyi ahikhongelelaka. I mani lweyi angatahihambanisa ni rirhandzu ra Kriste? Xana mangava maxangu, kumbe nhlomulu, kumbe kuxanisiwa, kumbe ndlala, kumbe vusveti, kumbe makhombo, kumbe matlhari ke? Kukotisa lesvitsaliweke vaku: “Siku hinkwaru hadlayiwa hikolaho ka wena, hifanisiwa ni tinyempfu letiyaka kutlhaviweni.” Kambe, ka svosvo hinkwasvu, hihlula hiva hihlulisisa hikolaho ka yena lweyi angahirhandza. Hikuva nakholwisisa lesvaku, hambi ringava rifu kumbe vutomi, hambi tingava tintsumi kumbe matimba ya madimoni, hambi svingava lesvinga kona svosvi, kumbe lesvingatata, hambi yingava mimoya ya matimba leyinga henhla mpfhukeni kumbe leyinga hansi ka misava, hambi xingava xivumbiwa xihi ni xihi, nili: Axi kona lexingatakota kuhihambanisa ni rirhandzu ra Xikwembu leri ringa kona ka Kriste Yesu, Hosi ya hina. Nivula ntiyiso, ni wa Kriste, anihembi; ni ripfalu ra mina, hi kupfuniwa hi Moya Lowokwetsima, ritiyisa svona: Hi lesvaku ni ni kuvaviseka lokukulu mbilwini ni vusiwana lebzingaheliki, hikolaho ka vamakwerhu. Hikuva anitanavela, mina hi xiviri xa mina, kuva lweyi acukumetiwaka, nihambanisiwa na Kriste hikolaho ka vona lava vanga va rixaka ra ka hina hi kuvelekiwa. Nivula Vaisrayele, vona lava vangayendliwa vana va Xikwembu, vanyikiweke kukwetsima ka xona, ni mintwananu, ni Nawu, ni vukhongeli bza xiviri, ni svitshembiso. Vakokwana va hina i va vona; na yena Kriste ahuma rixakeni ra vona, hi tlhelo ra kuvelekiwa. Xikwembu lexinga henhla ka svilo hinkwasvu, axivongiwe hilaha kungaheliki. Amen! Asvivuli lesvaku rito ra Xikwembu ritsandzekile. Hikuva ahi hinkwavu lavahumaka ka Israyele lavanga Vaisrayele va xiviri; na svona, ahi hinkwavu va rixaka ra Abrahamu lavangavuliwaka lesvaku i vana va yena va xiviri, hikuva Xikwembu xite: “Lava vahumaka ka Izaki hi vona lavangatavuliwa va rixaka ra wena.” Svihlaya lesvaku ahi vona lavanga vana hi tlhelo ra sva ntumbuluku, lavanga vana va Xikwembu; kambe vana lavangavelekiwa hikolaho ka xitshembiso xa xona, hivona lavahlayiwaka lesvaku i va rixaka ra xiviri. Hikuva rito ra xitshembiso hi leri ringe: “Nitavuya hi nkama lowuvekiweke, kutani Sara atava ni n'wana wamufana.” Ahi svosvo ntsena, kambe Rabeka na yena, avelekile vana hi nuna mun'we ntsena, tatana wa hina Izaki. Kutani loko vana lava vangasivelekiwa, ni loko vangasiyendla xosaseka kumbe xobiha, Rabeka abzeliwile lesvaku: “Lweyi nkulu atatirhela lweyi ntsongo.” Akuli kuyendlela lesvaku makungu ya Xikwembu ya kutihlawulela lweyi ximulavaka, mayisiwa mahlweni, kungali hi kuvona mintirho ya munhu, kambe hikolaho ka kuvitana ka Xikwembu. Svafana ni lesvitsaliweke vaku: “Nirhandzile Yakobe, kambe nivengile Esawu.” Loko svilitano, xana hitakuyini ke? Xana Xikwembu xitirha hi kuhomboloka ke? Nikutsongo! Hikuva xibzela Moxe xiku: “Nitatsetselela lweyi nirhandzaka kumutsetselela; lweyi nirhandzaka kumutwela vusiwana, nitamutwela vusiwana.” Hikolaho-ke, ahi mhaka leyihumaka kurhandzeni ka munhu kumbe kutikarhateni ka yena, kambe yihuma ka Xikwembu, xinga xona xitsetselelaka. Hikuva tsalwa ribzela Faro riku: “Loko nikukulisa, aniyendlela kukomba matimba ya mina hi wena, ni lesvaku vito ra mina ritwalisiwa misaveni hinkwayu.” Loko svilitano ke, Xikwembu xitsetselela lweyi xirhandzaka kumutsetselela; kutani xinonon'hwisa lweyi xirhandzaka kumunonon'hwisa. Loko svilitano, utaku ka mina: “Xana xahavilela ha yini? Hikuva i mani lweyi angayalaka lesvi xona xisvirhandzaka?” Kasi u mani, wena munhu, kukanetana ni Xikwembu? Xana lexivumbiwaka xingahundzuka xivutisa muvumbi wa xona xiku: “Univumbisele yini xilesvi” ke? Hi tlhelo rin'wana, xana muvumbi anga na wona matimba henhla ka vumba ra yena, akuva hi vumba ro ra rin'we, avumba xibza xin'we xa risima ni xin'wana xosoleka ke? Kambe, hingakuyini ka svona, loko Xikwembu lexi axinavela kukomba kukariha ka xona ni kuyendla lesvaku ntamu wa xona wutiviwa, xivile ni mbilu leyoleha ngopfu, xilehisela svibza lesvi asvivumbeliwile kukarhateliwa ni kudlayeteliwa, xana? Kumbe, kuyini ka svona, loko xiyendlele kutivisa vukulu bza kukwetsima ka xona, henhla ka svibza lesvi asvivumbeliwile kutsetseleliwa, svinga svibza lesvi xisvilungiseke kahali kusunguleni lesvaku svitanyikiwa kukwetsima ka xona, ke? Svibza lesvi, hi hina lava xihivitaneke, hina hihumaka kungali xikarhi ka Vayuda ntsena, kambe ni le xikarhi ka vamatiko. Xihlayise svosvo bukwini ya Hozeya, loko xiku: “Lava avangali vanhu va mina, nitavavula vanhu va mina; ni wansati lweyi aangarhandziwi, nitamuvula murhandziwa. Kutani lava vangativisiwa lesvaku: ‘Ami vanhu va mina’, kona kolaho vatahlayiwa vana va Xikwembu lexihanyaka.” Na yena Ezaya wahuwelela hi ta Israyele, aku: “Hambi loko ntsengo wa Vaisrayele wukotisa sava ra lwandle, kutaponisiwa lava vasaleke ntsena; hikuva Hosi yitahetisa mhaka ya yona misaveni, yiyitsema hi kuhantlisa.” Svifana ni lesvi Ezaya angarhanga asvivula, loko aku: “Loko Hosi ya matimba hinkwawu ayingahisiyelanga vatukulu, ahitava hihundzukile hifana na Sodoma, ahitava hiringanisiwile na Gomora.” Hitakuyini ke? Hitaku: Vamatiko lava avangalandzi nawu wa kululama, vakume kululama koloko, hi mhaka ya kupfumela; Kasi Vaisrayele lava avalava kululama loku kukumiwaka hi kuyingisa Nawu, avasvikotanga kuhetisisa Nawu lowu. Hikolaho ka yini ke? Hikuva kulaveni ka vona, avangali na kupfumela, kambe avatshemba mintirho ya vona; vawele henhla ka ribze leriwisaka vanhu, hilaha kutsaliweke hakona vaku: “Vona, niveka Siyoni ribze leri khunguvanyisaka vanhu, ni ribze leriwisaka; kambe lweyi apfumelaka ka yena lweyi anga ribze leri, angakala angakhomiwi hi tingana.” Vamakwerhu, kunavela ka mbilu ya mina ni xikhongelo lexi nikhongelelaka Vaisrayele ha xona ka Xikwembu, hi lesvaku vaponisiwa. Ningava mboni ya vona lesvaku vahisekela Xikwembu, kambe vahiseka na vangali na vutlhari; hikuva lesvi vangativiki kululama loku kunyikiwaka hi Xikwembu, kutani valavaka kululama loku vatiyendlelaka hi voxe, avativeki hansi ka kululama lokunyikiwaka hi Xikwembu. Hikuva makumu ya Nawu i Kriste, akuva mun'wana ni mun'wana lweyi apfumelaka ayendliwa lweyi alulameke. Moxe atsalile lesvaku munhu lweyi alavaka kululama loku kuhumaka Nawini, atahanya hakona. Kambe kululama lokuhumaka kupfumeleni, kuvula lesvi: “Ungatshuki utivutisa lesvaku xana lweyi angatatlhantukela tilweni i mani, hikuva kuvula lesvo i kuxikisa Kriste.” Nasvona ungavutisi lesvaku xana lweyi angataxikela ndhawini ya vafi i mani, hikuva kuvula lesvo i kuhumesa Kriste xikarhi ka lava vafeke. Kasi kululama kuvula lesvi: “Rito ri le kusuhi na wena, ri le non'weni wa wena ni le mbilwini ya wena.” Hi rona rito ra kupfumela leri hirichumayelaka hiku: Loko uvula hi nomo wa wena lesvaku Yesu i Hosi, ni loko upfumela mbilwini ya wena lesvaku Xikwembu ximupfuxile xikarhi ka vafi, utaponisiwa. Hikuva munhu apfumela hi mbilu, kutani svosvo svimuyendla ava lweyi alulameke; ativula svijoho sva yena hi nomo, kutani svosvo svimuyendla ava lweyi aponisiwaka. Tsalwa rite: “Mun'wana ni mun'wana lweyi apfumelaka ka yena, angakala angakhomisiwi tingana.” Aku na kuhambana xikarhi ka Muyuda ni wamatiko, hikuva hinkwavu va ni Hosi yin'we, leyi minkateko ya yona yitalelaka hinkwavu lava vayikhongelaka. Hikuva, “mun'wana ni mun'wana lweyi akhongelaka vito ra Hosi, ataponisiwa.” Kambe vatakhongelisa kuyini ka lweyi vangasikipfumela ka yena xana? Vatapfumelisa kuyini ka lweyi avangasitwa ta yena ke? Vatasvitwisa kuyini, loko vangali na lweyi avachumayelaka xana? Kutani vatavachumayelisa kuyini, loko vangarhumiwanga ke? Hilaha kutsaliweke hakona vaku: “Ahikutsakisa ka svona kuvona lavataka, vapaluxa Evhangeli!” Kambe ahi hinkwavu lavayamukeleke Evhangeli, hikuva Ezaya ate: “Hosi, xana i mani lweyi akholweke lesvi hibzeliweke svona ke?” Hikolaho-ke, kupfumela kuta hi kutwa, ni kutwa kuta hi kubzeliwa rito ra Kriste. Kambe navutisa nili: Xana vangava vangaritwanga ke? Hakunene varitwile, hikuva: “mpfumawulu wa marito ya vona wutwakele misaveni hinkwayu, ni marito ya vona mafikile makun'wini ya misava.” Kambe nitlhela nivutisa: Xana Vaisrayele vangava vangasvitivanga ke? Kurhanga Moxe ahlamula aku: “Nitayendla lesvaku miva ni vukwele ka tiko leringaliki nchumu; nitayendla lesvaku miva ni mahlundzu ka tiko leringaliki na kutwisisa.” Kutani Ezaya atiyisa ni kuyengetelela, aku: “Nikumiwile hi lava avanganilavi, nihumelele ka lava avangavutisi nchumu ha mina.” Kambe loko akongoma Vaisrayele, ali: “Masiku hinkwawu nitshambulutile mavoko ya mina, nivitana vanhu lavatiyalisaka, vanga vakaneti ka lavalwaka na mina.” Svosvi navutisa nili: Xana Xikwembu xicukumetile tiko ra xona ke? Nikutsongo! Hikuva na mina ni Muisrayele, wa rixaka ra Abrahamu, wa nyimba ya Benjamini. Xikwembu axicukumetanga tiko ra xona leri xiritiveke ni le kusunguleni. Xana amisvitivi lesvi Tsalwa rihlayaka svona mayelanu na Eliya ke? Avilelile mahlweni ka Xikwembu hikolaho ka Vaisrayele, aku: “Hosi, vadlayile vaprofeta va wena, vambundzumuxile tialitari ta wena; kuyosala mina ntsena, kutani valava kunidlaya!” Kambe Xikwembu ximuhlamulile yini xana? Xite: “Nitihlayisele vavanuna va ntlhanu wa makhulu ni makhulu mambirhi (7 000), lavakalaka vangakhinsamelanga Bahali.” Svahali tano ni namuntlha: Ku ni nsalu wa vanhu va Xikwembu lava xivahlawuleke hi timpsalu. Xilesvo-ke, loko sviya hi timpsalu, asvihumi mintirhweni; hikuva loko kuli hi mintirho, timpsalu tingahundzuka tingahali timpsalu. Xana hingahlaya yini ke? Lesvi Vaisrayele avasvilava, avasvikumanga, kambe lavahlawuliweke hi Xikwembu vasvikumile. Lavan'wana vatiyelisiwile, vanono'hwisiwile hilaha kutsaliweke hakona, vaku: “Xikwembu xivanyikile moya wokhudzehela, ni mahlo lamangakotiki kuvona, ni tindleve letingakotiki kutwa, kufikela siku ra namuntlha.” Davhida na yena ate: “Minkhuvu ya vona ayivahundzukele mintlhamu ni vurimba, yiva maphariyeta ni xikhatiso! Mahlo ya vona amahundzuke munyama, lesvaku mangahakoti kuvona, ni minhlana ya vona, ayitshame na yigovekile!” Niyengeta nivutisa niku: Xana Vaisrayele vatiphariyetile kuwela makumu ke? Nikutsongo! Kambe hikolaho ka kuwa ka vona, akupona kufikela vamatiko, lesvaku Vaisrayele vatava ni vukwele. Kutani lesvi nandzu wa kuwa ka vona wuyendleke lesvaku minkateko yitala misaveni, ni lesvi kutsandzeka ka vona kuyendleke lesvaku minkateko yitalela vamatiko, ngopfungopfu kuvuya ka Vaisrayele hi ntalu, kutatisa minkateko leyikulu! Kutani svosvi nivulavula na n'wina vamatiko, nili: Loko nahali mupostola wa vamatiko, nitadzunisa ntirho wa mina lesvaku kumbexana ningayendla va rixaka ra ka mina vava ni kunavela, lesvaku nitaponisa van'wana va vona. Hikuva loko kucukumetiwa ka vona kuyendlile lesvaku misava yivuyelelana ni Xikwembu, kuyamukeliwa ka vona hi Xikwembu kutavula yini, loko kungali kuhanya ka lava avafile, xana? Loko lesvorhanga sva tindzoho svihumeseliwile Xikwembu, mbila hinkwayu i ya xona; ni loko rimintsu rinyikiwile Xikwembu, marhavi na wona i ya xona. Kambe lesvi marhavi man'wana maphatluliweke, ni lesvi wena olivhera wa le nhoveni unamarhetiweke matshan'wini ya vona, utlhela uphameliwa nhome ya rimintsu ra olivhera wa le kaya, ungatshuki utikukumuxa, usandza marhavi lawa maphatluliweke; wotikukumuxa mahala, ahi wena lweyi arhwalaka rimintsu, kambe i rimintsu leri rikurhwalaka. Kumbexana utaku: “Marhavi maphatluliwile, lesvaku mina ni namarhetiwa matshan'wini ya wona.” Hi svona; maphatluliwile hikolaho ka kukala kupfumela; kutani wena uyima na utiyile hikolaho ka kupfumela. Ungatshuki utikulisa ha svona, kambe chava! Hikuva loko Xikwembu xingatsetselelanga marhavi ya xiviri, na wena axingakutsetseleli. Hikolaho, lavisisa vunene bza Xikwembu, ni nhonga ya xona; nhonga henhla ka lavaweke, ni vunene henhla ka wena, loko utiyisela vuneneni bza xona; kambe loko ungatiyiseli, na wena utatsemiwa. Kambe na vona Vaisrayele, loko vangayi mahlweni hi kuyala kupfumela, vatatlhela vanamarhetiwa ka olivhera hikuva Xikwembu xasvikota kutlhela xivanamarheta. Lesvi wena uphatluliweke ka olivhera wa nhova lowu ungatumbuluka na wuli wa rona, kutani unamarhetiwa, hi mukhuva lowu wungaliki wa ntumbuluku, ka olivhera lewurimeliwaka wa laha kaya, ngopfungopfu marhavi lawa maphatluliweke ya nsinya wa laha kaya, matahantla mamilelana, loko manamarhetiwa ka olivhera lowu wunga ra wona. Kutani vamakwerhu, kuyendlela lesvaku mingatitshuka mititiva ngopfu, nilava lesvaku mitiva xihundla lexi: Hi lesvaku, hi tlhelo rin'wana, Vaisrayele vanonon'hwisiwile, kukondza vamatiko vanghena hinkwavu ka Xikwembu. Hi mukhuva wolowo tiko hinkwaru ra Israyele ritaponisiwa, hilaha kutsaliweke hakona vaku: “Muponisi atahuma Siyoni, ayendla lesvaku Yakobe atshika tindlela ta yena tofularhela Xikwembu. Kutani hi wona ntwananu lowu ningatawuyendla na vona, loko nisusa svijoho sva vona.” Lesvi Vaisrayele vangayala Mahungu Lamanene, i valala va Xikwembu hikolaho ka n'wina vamatiko; kambe lesvi vangahlawuliwa hi xona, i varhandziwa va xona hikolaho ka vakokwana va vona; hikuva tinyiko ta Xikwembu ni kuvitana ka xona asvihundzuki. Na n'wina vamatiko, amingayingisi Xikwembu khale, kambe svosvi, hikolaho ka Vaisrayele lavangayingisangiki, mitsetseleliwile. Hi mukhuva wolowo, hikolaho ka timpsalu leti mitikumeke, na vona Vaisrayele svosvi avayingisi Xikwembu, kambe sviyendlela lesvaku vatakuma kutsetseleliwa na vona, svosvi. Hikuva Xikwembu xiyendlile lesvaku vanhu hinkwavu vatsandzeka kuyingisa, lesvaku xitakota kuvatsetselela hinkwavu. Vukosi bza Xikwembu, ni vutlhari bza xona, ni vutivi bza xona, ahikuyeta ka svona! Makungu ya xona mangapimisiwa kuyini, ni tindlela ta xona tingatwisisiwa kuyini xana? Hikuva: “I mani lweyi angativa miyanakanyu ya Hosi xana? Mutsundzuxi wa yena avile mani ke? I mani lweyi angarhanga amunyika xanchumu, lexi angatalava kutlheliseliwa xona?” Hikuva svilo hinkwasvu svihuma ka yena, sviko na hikolaho ka yena, svikongoma yena. Ka yena akuve kudzuneka hilaha kungaheliki! Amen! Loko svilitano vamakwerhu, na mikhongotela hikolaho ka timpsalu ta Xikwembu, lesvaku minyiketa miri wa n'wina hinkwawu, wuva mhamba leyihanyaka, leyihlawulekeke, leyitsakisaka Xikwembu; hi wona magandzelela ya n'wina ya ntiyiso. Mingalandzeni hanyela ra nguva leyi, kambe mipfumela kuhundzuka miva vampsha kupimiseni ka n'wina, mitakota kutwisisa lesvi kurhandza lokunene ka Xikwembu, lokukhensekaka ni kuhetiseka, kunga svona. Hikuva, hikolaho ka timpsalu leti ninganyikiwa tona, nibzela mani na mani wa n'wina, niku: Mingatshukeni mitikulisa hi vutlhari bza n'wina; kambe mifanele kutitsongahata, miya hi mpimo wa kupfumela loku Xikwembu xiyaveleke mun'wana ni mun'wana wa n'wina. Hikuva kukota lesvi hinga ni svirho lesvinyingi mirini wuli wun'we, nasvona svingaliki na ntirho wun'we, hi ndlela yoleyo, na hina, hambi hili vanyingi, hi miri wun'we ka Kriste, kutani mani na mani wa hina i xirho ka mun'wana. Hikolaho, lesvi hinga ni tinyiko letihambaneke, hi kuya hi lesvi Xikwembu xihinyikeke svona, hikokolaho loko hili ni nyiko ya kuprofeta, ahiyitirhiseni hi mpimo wa kupfumela ka hina; loko hili ni nyiko ya kutirhela van'wana, ahivatirheleni. Lweyi anga ni nyiko ya kujondzisa, aajondzise; lweyi anga ni nyiko ya kukhongotela, aakhongotele; lweyi anyikaka, aanyike hi mbilu leyobasa; lweyi afambisaka van'wana, aavafambise hi kutivonela; lweyi ayendlaka mintirho ya timpsalu, aayiyendle hi kutsaka. Rirhandzu ringatshuki riva ni kukanganyisa. Vengani lesvi sva kubiha, minamarhela lesvinene. Tolovelanani, mirhandzana tani hi vamakwavu, mitlula van'wana hi kuxiximana. Mingaloloheni akutikarhateni ka n'wina, mingatsaneni kuhlayisaneni, hisekani moyeni, mitirhela Hosi. Tsakani kulanguteleni, tiyiselani maxangwini, hitekani kukhongeleni. Pambulelani vahlawuliwa va Xikwembu loko vapfumala, migingiriteka kuyamukeleni ka vayendzi. Katekisani lava vamixanisaka; katekisani, mingarhuketeleni. Tsakani ni lavatsakaka, mirila ni lavarilaka. Hanyisanani hi moya wun'we; mingatshukeni minavela lesvitlakukeke, kambe mitolovelana ni lavatitsongahataka; mingativoneni na mili lava vatlhariheke. Mingarihiseleni svobiha hi lesvobiha. Ringetani kuyendla lesvinene ka vanhu hinkwavu. Yendlani hinkwasvu lesvi misvikotaka, hi tlhelo ra n'wina, kuhanyisana ni vanhu hinkwavu hi kurhula. Varhandziwa, mingatshukeni mitirihisela mili n'wina; kambe tshikelani vukarhi bza Xikwembu, hikuva kutsaliwile vaku: “Kurihisa i ka mina; hi mina lweyi ningatarihisela, kuvula Hosi.” Hikolaho: “Loko nala wa wena ali ni ndlala, muphamele; loko ali ni torha, musiyele anwa; hikuva loko uyendlisa svosvo, utamuhlengeletela mpfundze nhlokweni ya yena.” Ungatshuki uhluliwa hi lesvobiha, kambe hlula lesvobiha hi lesvinene. Munhu mun'wana ni mun'wana aativeke hansi ka vuhosi, hikuva aku na vuhosi lebzingahumiki ka Xikwembu; kutani vuhosi lebzinga kona, bzivekiwile hi Xikwembu. Hikolaho lweyi ayeyisaka vuhosi, ayeyisa kulerisa ka Xikwembu; kutani lavayeyisaka, vativangela kuyavanyisiwa. Tihosi i valala kungali ka lavayendlaka lesvinene, kambe ka lavayendlaka lesvobiha. Xana ulava kuhanya na ungachavi mahlweni ka hosi ke? Yendla lesvinene, yitakukhensa; hikuva hosi i nandza wa Xikwembu kukupfuna. Kambe loko uyendla lesvobiha, ufanele kuchava, hikuva hosi ayitameli tlhari mahala; yirhumiwile hi Xikwembu kuva mukhatisi wa lweyi anga mujohi. Hikolaho svafanela lesvaku munhu ativeka hansi ka vuhosi, kungali ntsena hikolaho ka kuchava kubiwa, kambe kuli hikolaho ka ripfalu. Nakambe hi svona lesviyendlaka lesvaku mihumesa rhesa; hikuva tihosi i vatirhi va Xikwembu, lavatinyiketaka kutirha ntirho wolowo. Nyikani hinkwavu timfanelo ta vona; lweyi afanelaka kuyamukela rhesa, aanyikiwe; lweyi afanelaka nyiko, aanyikiwe, lweyi afanelaka kuxiximiwa, aaxiximewe; lweyi afanelaka kuchaviwa, aachaviwe. Mingatshukeni miva ni nandzu ka munhu ni mun'we, loko wungali wa kurhandzana; hikuva, lweyi arhandzaka wa le kwavu, ahetisisile Nawu. Hakunene milawu leyinge: “Ungatshuki uwosva, ungatshuki udlaya, ungatshuki uyiva, ungatshuki unavela sva van'wana”, hambi yili milawu yin'wana hinkwayu, yikatsiwa ka rito leringe: “Rhandza munhukuloni kufana ni loko utirhandza.” Lweyi anga ni rirhandzu, angayendleli munhukulobze svobiha. Hikolaho, rirhandzu rihetisisa Nawu. Yendlani lesvi, hikuva nitiva lesvaku i nkarhi wihi svosvi: Hi wona nkama wa n'wina wa kupfuka vurhongweni; hikuva namuntlha, kuponisiwa ku kusuhi kutlula siku leri hipfumeleke ha rona. Vusiku bzihundzile, vuxa bzitshinele. Hikolaho, ahicukumeteni mintirho ya munyama, kutani hitamela matlhari ya kuvonakala. Ahifambeni kuvonakeleni, kufana ni vanhu lavafambaka ninhlekanhi, kungali hi minkhuvu ni kupopsa, kungali hi lesvobiha ni vunghwavana, kungali hi kuholova ni vukwele; kambe miyambala Hosi Yesu Kriste, kutani mingatsetseleleni sva nyama ya n'wina, hi kuyikolwisa kunaveleni ka yona. Lweyi anga ni kupfumela kutsongo, muyamukeleni, kambe mingakanetaneni na yena loko mihambana kuyehleketeni. Munhu lweyi anga ni kupfumela ali aja hinkwasvu; kambe lweyi anga ni kupfumela kutsongo aja matsavu ntsena. Lweyi ajaka hinkwasvu angatshuki asola lweyi angajiki; ni lweyi angajiki hinkwasvu angatshuki athethisa lweyi ajaka, hikuva i Xikwembu lexi ximuyamukeleke. Xana u mani wena uthethisaka mutirhi wa munhu mun'wana? Hambi ayima kumbe kuwa, svosvo svitiviwa hi n'winyi wa yena; kambe atayima, hikuva Hosi yasvikota kumupfuxa ayima. Mun'wana apimanisa lesvaku siku rin'wana ritlula lerin'wana; kasi mun'wana apimanisa lesvaku masiku hinkwawu mafana. Mun'wana ni mun'wana afanele kutipimanisela svinene hi yexe miyanakanyweni ya yena. Lweyi ahlawulekisaka siku, arihlawulekisela Hosi; ni lweyi ajaka hinkwasvu, ajela Hosi, hikuva akhensa Xikwembu ha svona. Na yena lweyi angajiki hinkwasvu, ajela Hosi, kutani akhensa Xikwembu. Hikuva anga kona ni mun'we wa hina lweyi atihanyelaka, nasvona anga kona lweyi atifelaka; loko hihanya, hihanyela Hosi; loko hifa, hifela Hosi; hikolaho, hambi hihanya, hambi hifa, hi va Hosi. Hikuva Kriste afile, atlhela apfuka ahanya, lesvaku atava Hosi ya lavafeke ni ya lava vahanyaka. Xana wena uyavanyisela yini makwenu ke? Nasvona umosolela yini? Kasi hinkwerhu hitahumelela mahlweni ka xiluvelo xa Xikwembu lesvaku hithethisiwa. Hikuva Matsalweni Hosi yili: “Mina nahanya, hikolaho vanhu hinkwavu vatanikhinsamela, hinkwavu vataku ni Xikwembu.” Hi ndlela yoleyo, mun'wana ni mun'wana wa hina atatihlamulela hi yexe mahlweni ka Xikwembu. Loko svilitano, ahitshikeni kuyavanyisana. Matshan'wini ya svona, tiboheni lesvaku mingaveki ndleleni ya makwenu xomuphariyeta kumbe kumuwisa. Nasvitiva ni kukholwa svinene, hikolaho ka Hosi Yesu, lesvaku axi kona xilo ni xin'we lexi, hi xoxe, xibiheke; kambe xilo xibihile ntsena ka yena lweyi apimisaka lesvaku xibihile. Loko makwenu atwa kuvaviseka hi mhaka ya lesvi wena usvijaka, awahafambi hi rirhandzu. Ungatshuki ulovisa lweyi angafeliwa hi Kriste hi mhaka ya lesvi wena usvijaka. Mingapfumeleni lesvaku lesvinga svinene ka n'wina svisoliwa. Hikuva Mfumu wa Xikwembu ahi kuja, ahi kunwa; kambe i kululama ni kurhula ni kutsaka, hi matimba ya Moya Lowokwetsima. Lweyi atirhelaka Kriste hi mukhuva wolowo, atsakisa Xikwembu, nasvona akhensiwa hi vanhu. Loko svilitano ke, ahilaveni lesvihipfunaka kuhanya hi kurhula, ni kuyakisana. Ungahahluli ntirho wa Xikwembu hikolaho ka svakuja. Svilo hinkwasvu svibasile; kambe i kuhoxa loko munhu, hi kuja ka yena, akhunguvanyisa van'wana. Svisasekile loko ungaji nyama kumbe unganwi vhinyu, ni loko utitsona xilo xihi ni xihi lexingakhunguvanyisaka makwenu. Lesvi usvikholwaka wena mbilwini ya wena, ayive mhaka ya wena ni Xikwembu xa wena. Kukatekile munhu lweyi angatitwiki kuhoxa ka svilo lesvi avonaka lesvaku svibasile. Kambe lweyi akanakanaka, wathethisiwa loko aja, hikuva angayendli hi kukholwa; kutani xin'wana ni xin'wana lexingayendliwiki hi kukholwa, i xijoho. Hina lava hinga ni matimba, hifanele kurhwala kuhluleka ka lava vanga ni gome, kungali kutitsakisa hina vinyi. Mun'wana ni mun'wana wa hina aatsakise munhukulobze, amunavelela lesvinene lesvimuyakaka. Hikuva hambi ali Kriste, angatitsakisanga, kambe, hilaha kutsaliweke hakona: “Kusandza ka lavakusandzaka kuniwele henhla.” Hinkwasvu lesvi svitsaliweke hi lava va khale, svitsaliwile lesvaku hijondza ha svona, ni lesvaku hiva ni kulangutela, hikolaho ka kutiyisela ni kuchaveleliwa loku hikukumaka Matsalweni. Ingi Xikwembu lexi kutiyisela ni kuchaveleliwa svihumaka ka xona, xingaminyika n'wina hinkwenu kuyehleketa loku kufanaka, hi kulandza kululama ka Yesu Kriste, kuyendlela lesvaku hinkwenu miva mbilu yin'we ni nomo wun'we, midzunisa Xikwembu, Tatana wa Hosi ya hina Yesu Kriste. Hikolaho, yamukelanani, kukotisa lesvi Kriste na yena amiyamukeleke, kudzuniseni ka Xikwembu. Hikuva namibzela lesvaku Kriste ave mutirhi ka Vayuda, kukombisa kutshembeka ka Xikwembu, ni kuyendla lesvaku svitshembiso lesvinganyikiwa vakokwana svihetiseka, ni lesvaku vamatiko vatakota kudzunisa Xikwembu hikolaho ka timpsalu ta xona, hilaha svitsaliweke hakona aku: “Hikolaho, nitakudzunisa xikarhi ka vamatiko, nitayimbelela nitwalisa vito ra wena.” Atlhela, aku: “N'wina vamatiko, tsakani, svin'we ni vanhu va Xikwembu.” Nakambe, vaku: “N'wina vamatiko hinkwenu, dzunisani Hosi, vanhu hinkwavu avayidzunise.” Kambe, Ezaya aku: “Hluke ra Yese ritahuma, yena lweyi ahumelelaka kutafuma matiko; ka yena, vamatiko vatava ni kulangutela.” Ingi Xikwembu lexi kulangutela kuhumaka ka xona xingamitata hi kutsaka hinkwaku ni kurhula hinkwaku kupfumeleni, lesvaku, hi matimba ya Moya Lowokwetsima, kulangutela kumitalela, kuva kuhalakela. Loko nili mina, vamakwerhu, natshemba lesvaku na n'wina mitaleliwile hi vunene, ni lesvaku mi ni vutivi lebzinyingi bza tinxakaxaka; masvikota ni kutsundzuxana. Hambi svilitano, nitinyikile matimba kumitsalela hi timhaka tin'wana, kutamitsundzuxa ha tona; niyendlile svosvo hikolaho ka timpsalu leti Xikwembu xininyikeke tona, kuva mutirhi wa Yesu Kriste xikarhi ka vamatiko. Mina, kufana ni Muprista, nivula Mahungu Lamanene ya Xikwembu lesvaku vamatiko vava mhamba leyiyamukelekaka ka xona, leyihlawulekisiweke hi Moya Lowokwetsima. Loko svilitano, hikolaho ka Yesu Kriste, natidzunisa hi ntirho wa mina wotirhela Xikwembu; hikuva ningakala ningatiyi nhlana wa kuvula nchumu, handle ka lesvi Kriste angasviyendla ha mina, kutisa vamatiko kuyingiseni, hi marito ni mintirho, hi matimba ya mahlori ni svihlamaliso, ni matimba ya Moya; hi ndlela yoleyo, nihaxile Evhangeli ya Kriste matlhelweni hinkwawu, kusukela le Yerusalema, kuyafika le Ilirika; akuli kunavela ka mina lokukulu kuvula Evhangeli lomu vito ra Kriste aringasitiviwa kona, lesvaku ningatshuki niyaka masungulweni lawa mavekiweke hi munhu mun'wana. Hilaha kutsaliweke hakona, “Lavakalaka vangabzeliwanga ta yena, vatavona; ni lavakalaka vangatitwanga ta yena, vatatwisisa.” Hi yona mhaka leyi hakanyingi yinisiveleke kuta le ka n'wina. Kambe svosvi anahali na ntirho tikweni leri; kutani lesvi kunga ni malembe lawa yotala na ninavela kumiyendzela, nitata ka n'wina loko ni ya le Xipanya, hikuva nitshemba lesvaku nitahundza nimivona; na svona, hi n'wina mingatanipfuna kuhundzela mahlweni, loko nitava nitiphinilenyana hi kutshama na n'wina. Kambe svosvi, nahaya le Yerusalema, niyatirhela vahlawuliwa va Xikwembu kona; hikuva va le Makedoniya ni va le Akaya vatibohile hi kutsaka kuhlenga svopfuna svisiwana lesvinga kona xikarhi ka vahlawuliwa va le Yerusalema. Vatibohile hi ndlela yoleyo, kambe nasvona va ni timfanelo ka va le Yerusalema. Hikuva lesvi vamatiko vayaveliweke minkateko ya Moya leyinga ya Vayuda, na vona vafanele kutirhela Vayuda hi minkateko ya vona ya sva misava. Kutani-ke loko nitava nihetile svosvo, ni loko nitava nivekile male hinkwayu mavokweni ya vona, nitahundza hi le ka n'wina, loko ni ya le Xipanya. Nasvitiva lesvaku, loko nifika ka n'wina, nitamitisela minkateko hinkwayu ya Kriste. Kutani na mikhongotela, vamakwerhu, hi Hosi ya hina Yesu Kriste ni rirhandzu ra Moya, lesvaku miniseketela hi matimba, mikhongelweni ya n'wina leyi minikhongelelaka ha yona ka Xikwembu lesvaku nipona ka lava vangapfumeliki va le Yudeya, ni lesvaku ntirho lowu ningatawutirha le Yerusalema wuyamukeleka ka vakwetsimi va Xikwembu; hi ndlela leyi nitakota kumiyendzela hi kutsaka, loko Xikwembu xisvirhandza, kutani nikuma kuwisa na nili na n'wina. Xikwembu lexinyikaka kurhula axive na n'wina hinkwenu! Amen! Nimitivisa Mamana Febe, makwerhu Hosini lweyi atirhelaka kereke ya le Kenikreya; Muyamukeleni hi vito ra Hosi, hilaha vakwetsimi va Xikwembu vafanelaka kuyamukeliwa hakona; kutani mimupfuna hi xin'wana ni xin'wana lexi angakombelaka lesvaku mimupfuna ha xona, hikuva apfunile lavanyingi, na mina anipfunile. Nirunguleleni Prisikila na Akila, vatirhikulorhi ntirhweni wa Yesu Kriste, lavanyiketeke vutomi bza vona kuniponisa. Ahi mina ntsena lweyi avakhensaka, kambe na tona tikereke hinkwatu ta vamatiko tavakhensa. Nirunguleleni na yona kereke leyihlanganaka ndlwini ya vona. Nirunguleleni na Epayineto, murhandziwa wa mina, anga yena wa kusungula kupfumela ka Kriste le Aziya. Nirunguleleni Mariya lweyi atirheke ngopfu xikarhi ka n'wina. Nirunguleleni Androniko na Yuniya, vanga Vayuda va ka hina lava anili na vona jele; vativeka svinene xikarhi ka vapostola, nasvona vanirhangelile kuva vava ka Kriste. Nirunguleleni Ampliyato, murhandziwa wa mina Hosini. Nirunguleleni Urbano, mutirhikulorhi ntirhweni wa Kriste, na Stako, murhandziwa wa mina. Nirunguleleni Apele, munhu lweyi atshembekeke vukristeni. Nirunguleleni va njangu wa Aristobulo. Nirunguleleni Herodiyoni, Muyuda wa ka hina. Nirunguleleni lavanga vakriste njangwini wa Narsizo. Nirunguleleni Trifena na Trifoza, vamamana lavatirhelaka Hosi. Nirunguleleni Persida, mamana lweyi arhandziwaka, lweyi atirheleke Hosi hi lesvinyingi. Nirunguleleni Rufo, mukriste lweyi ativekaka svinene, mirungula ni mamana wa yena, lweyi anga mamana ni le ka mina. Nirunguleleni Asinkrito na Filego, na Herme, na Patroba, na Hermasi, ni vamakwavu Hosini lavanga na vona. Nirunguleleni Filologo, na Juliya, na Neriya, ni makwavu waxisati, na Olimpa, ni vahlawuliwa va Xikwembu hinkwavu lavanga na vona. Xewetanani hi kun'quntana ka vukwavu. Tikereke hinkwatu ta Kriste ta mirungula. Namikhongelela vamakwerhu, nili: Mitivonela ka lavapfuxaka kuhambana, ni kukwatisana, lava vamihambukisaka tijondzweni leti mitikumeke; hambanani na vona; hikuva lavotano avatirheli Hosi ya hina Kriste, kambe vatirhela kunavela ka vona ntsena; hi kunandzihisa marito ni kusasekisa mavulavulela, vahambukisa kuyehleketa ka lava vangativiki nchumu. Kuyingisa ka n'wina kutwakale ka vanhu hinkwavu; nitsaka hi n'wina mhakeni leyi; kambe nilava lesvaku miva lavatlhariheke hi tlhelo ra lesvinene, ni lava vangativiki nchumu hi tlhelo ra lesvobiha. Xikwembu lexinyikaka kurhula, xitahantla xipfotlosela Sathana hansi ka milenge ya n'wina. Timpsalu ta Hosi ya hina Yesu, ative na n'wina! Mutirhikulorhi Timotewu, wamirungula; na vona Vayuda va ka hina va Lusiyo na Yazoni na Sozipatro, vamirungula. Mina Tersiyo, mutsali wa papela leri, na mirungula hi vito ra Hosi. Gayo, lweyi angatshama ayamukela mina ni kereke hinkwayu, wamirungula. Erasto, mutameli wa nkwama wa doropa, na Kwarto makwerhu, vamirungula. [ Timpsalu ta Hosi ya hina Yesu Kriste ative na n'wina hinkwenu. Amen!] Ka yena lweyi akotaka kumitiyisa, hi kuya hi Evhangeli leyi niyijondzisaka, manga mahungu ya Yesu Kriste, nasvona hi kuya hi xihundla lexingahlavuteliwa, xinga xihundla lexi axifihlekile hi malembe ni malembe, kambe svosvi xihumeseliweke rivaleni hi Matsalwa ya vaprofeta, hi kulandza kulerisa ka Xikwembu lexingaheliki, xona xihundla lexi xingativisiwa vamatiko hinkwavu, lesvaku vanhu vapfumela, vatlhela vayingisa. Ka Xikwembu xili xoxe xa vutlhari, akuve kudzuneka ha Yesu Kriste, hi minkama ni minkama, Amen! Mina Pawulo lweyi avitaniweke hi kurhandza ka Xikwembu kuva mupostola wa Yesu Kriste, na Sostene makwerhu, ka kereke ya Xikwembu leyinga Korinto, vanga lavavitaniweke kuva vahlawuliwa va Xikwembu hi kubasisiwa ha Kriste Yesu; ka hinkwavu lavanga matikweni hinkwawu, lavakhongelaka vito ra Hosi ya hina Kriste Yesu, yinga Hosi ya vona ni ya hina, hili: Timpsalu ni kurhula asvive na n'wina, svihuma ka Xikwembu Tatana wa hina, ni ka Hosi Kriste Yesu! Masiku hinkwawu nikhensa Xikwembu xa mina hikolaho ka n'wina. Nixikhensa hikolaho ka timpsalu ta xona leti mitikumeke ha Yesu Kriste. Ha yena miyendliwile lavafuweke hi matlhelo hinkwawu, kuvulavuleni hinkwaku, ni le kutiveni hinkwaku, hikuva vumboni bza hina ha Kriste bzitiyisiwile mahlweni ka n'wina; hi kolaho amipfumali nyiko ni yin'we ya Moya, loko mili karhi milangutela kuhlavuteliwa ka Hosi ya hina Yesu Kriste, lweyi angatamitiyisa kuyisa kuheteleleni, miva lava vangasolekiki hi siku ra Hosi ya hina Yesu Kriste. Xikwembu xatshembeka, xona lexi ximivitaneleke kuva miva ni kuhlangana ni N'wana wa xona Yesu Kriste, Hosi ya hina. Namikhongotela vamakwerhu, hi vito ra Hosi ya hina Yesu Kriste, nili: Twananani hinkwenu kuvulavuleni. Kungatshuki kuva ni kuhambana xikarhi ka n'wina, kambe mihlangana miva van'we kupimiseni ni le makungwini ya n'wina; hikuva, vamakwerhu, nibzeliwile ta n'wina hi va ka Klowe, vaku kuphikizana ku kona xikarhi ka n'wina. Nivula lesvi hikuva mun'we wa n'wina ali: “Mina, ni wa ka Pawulo”, mun'wana aku: “Mina ni wa ka Apolosi”, mun'wana aku: “Mina ni wa ka Kefasi”, kasi mun'wana aku: “Mina ni wa ka Kriste.” Xana Kriste ayavanile ke? Xana Pawulo atshama avambiwela n'wina ke? Kumbe xana mikhuvuliwile hi vito ra Pawulo ke? Nakhensa, hikuva anikhuvulanga ni mun'we wa n'wina, loko angali Krispo na Gayo. Hikolaho, aku na lweyi angavulaka lesvaku akhuvuliwile hi vito ra mina. (Nikhuvulile ni njangu wa va ka Stefanasi. Handle ka svosvo anahatsundzuki kumbe ningava nikhuvulile mun'wana.) Kriste anirhumile, kungali kutakhuvula, kambe kupaluxa Evhangeli; na svona, kungali hi vutlhari kuvulavuleni, lesvaku xihambanu xa Kriste xingatshuki xihundzuka sva hava. Jondzo ya xihambanu i vuhunguki ka lavalovaka; kambe ka hina lavaponisiwaka i matimba ya Xikwembu. Hikuva kutsaliwile lesvaku: “Nitawonha vutlhari bza tintlhari, nibakanya vutivi bza tintivi.” Yi kwihi ntlhari ke? A kwihi mutsali xana? Lweyi atsakelaka kuphikizana ni van'wana hi sva misava leyi, a kwihi ke? Xana Xikwembu axikombanga lesvaku vutlhari bza misava leyi i vuhunguki ke? Hikuva, vutlharini bza xona, Xikwembu xiyendlile lesvaku vanhu va misava, hi vutlhari bza vona, vatsandzeka kuxitiva. Kutani svitsakisile Xikwembu kuponisa lavapfumelaka, hi kutirhisa lesvi vanhu vango i “vuhunguki”, loko hipaluxa Rito. Vayuda vakombela mahlori, Vagirika vona valava vutlhari, kambe loko ali hina hitwalisa Kriste lweyi avambiweke, lweyi anga xikhunguvanyiso ka Vayuda ni vuhunguki ka vamatiko; kambe ka lavavitaniweke, hambi vali Vayuda, hambi vali Vagirika, Kriste i matimba ya Xikwembu ni vutlhari bza xona. Hikuva lesvi vanhu vango i “vuhunguki bza Xikwembu”, svi ni vutlhari kutlula vutlhari bza vanhu, ni lesvi vango i “kutsana ka Xikwembu”, svi ni matimba kutlula matimba ya vanhu. Hikolaho vamakwerhu, yanakanyani lesvi amili xisvona loko mivitaniwa. Hi kuvona ka vanhu, lavatlhariheke, ni lavatiyeke, ni lavachavisekaka, avangatalanga xikarhi ka n'wina; kambe Xikwembu xihlawulile lesvi misava yisvivonaka svili “sva vuhunguki”, kukhomisa tingana tintlhari. Xikwembu xihlawulile lesvi misava yisvivonaka svili ni gome, kukhomisa tingana lesvinga ni matimba. Xikwembu xihlawulile lesvi misava yisvilangutelaka hansi ni kusvisola, lesvi ni kuva kona svingaliki kona, kuhelisa lesvinga kona, lesvaku kungavi na munhu ni mun'we lweyi atidzunisaka mahlweni ka xona. Hi kuyendla ka xona, mi le ka Kriste Yesu, kutani hi xona Xikwembu lexingayendla lesvaku Kriste ava vutlhari ka hina; ha yena hiyendliwa lavalulameke, hihundzuka vakwetsimi va Xikwembu, hiva ni kukutsuliwa. Hikolaho Matsalwa mahlayaka lesvaku: “Lweyi alavaka kutidzunisa, aatidzunisele Hosini.” Hikolaho vamakwerhu, mina loko nitile ka n'wina, anitanga hi kutiyendla lweyi ahlamalisaka hi kuvulavula kumbe hi vutlhari, nkarhi lowu nimitiviseke xihundla xa makungu ya Xikwembu; kambe nitilulamisile lesvaku, loko nili xikarhi ka n'wina, ningalavi kutiva svin'wana loko angali Yesu Kriste, yena Kriste lweyi avambiweke. Loko nitile ka n'wina, anili lweyi anga ni gome, ni kuchava, ni kurhurhumela ngopfu. Anitirhisanga marito lawa makholwisaka ya vutlhari bza vanhu, kuvulavuleni ka mina ni loko nichumayela Rito. Kambe nivekile xikombiso xa Moya ni xa matimba ya Xikwembu, lesvaku kupfumela ka n'wina kungayakiwi henhla ka vutlhari bza vanhu, kambe kuyakiwa henhla ka matimba ya Xikwembu. Hambi svilitano, hivulavula hi sva vutlhari xikarhi ka lavakuleke moyeni, bzingali vutlhari bza minkama leyi, kumbe bza tihosi ta minkama leyi, hikuva va le kuhelisiweni; kambe hivulavula hi sva vutlhari bza Xikwembu, bzinga bza xihundla, vutlhari lebzi bzifihliweke, lebzi Xikwembu xibzilungiseke kahali kusunguleni, bzintahinyika kudzuneka. Aku na ni mun'we wa tihosi ta minkama leyi, lweyi abzitwisiseke; loko avabzitwisisile, ingi vangavambanga Hosi ya kudzuneka. Kambe hilaha kutsaliweke hakona vaku: “Lesvi ni tihlo ni rin'we rikalaka ringasvivonanga, lesvi ni ndleve ni yin'we yikalaka yingasvitwanga, lesvingasikitshama svinghena ka miyanakanyu ya munhu, hi svona lesvi Xikwembu xisvilungiseleke lava vaxirhandzaka.” Kambe Xikwembu xihipfuletele svilo lesvi hi Moya; hikuva Moya wulavisisa hinkwasvu, hambi svili svihundla lesviyenteke sva Xikwembu. I mani lweyi angativaka miyanakanyu ya munhu, loko wungali moya wa munhu yelweyo, lowunga ndzeni ka yena xana? Hi ndlela yoleyo, aku na munhu lweyi angativaka miyanakanyu ya Xikwembu, loko wungali Moya wa Xikwembu. Hina ahiyamukelanga moya wa misava leyi, kambe hiyamukelile Moya lowuhumaka ka Xikwembu, lesvaku hitativa hinkwasvu lesvi hinyikiweke svona hi Xikwembu. Lesvi, hi svona lesvi hivulavulaka hi svona, kungali hi marito lawa majondzisiweke hi vutlhari bza vanhu, kambe hi marito lawa majondzisiweke hi Moya, na hili karhi hihlamusela sva Moya ka lava vanga ni Moya. Munhu lweyi angaliki na Moya wa Xikwembu, angayamukeli sva Moya Lowokwetsima, hikuva ka yena i vuhunguki; kutani wahluleka kusvitwisisa, hikuva svifanele kuyanakanyiwa hi Moya. Kambe lweyi anga ni Moya, aayavanyise hinkwasvu, kambe yena angayavanyisiwi hi munhu. Hikuva i mani lweyi ativaka miyanakanyu ya Hosi, lesvaku atayijondzisa ke? Loko ali hina hi ni miyanakanyu ya Kriste. Hikolaho vamakwerhu, mina nihlulekile kuvulavula na n'wina kufana ni loko nivulavula ni lavanga va Moya; kambe ni vulavulile na n'wina kufana ni loko mili vanhu va misava ntsena, lavafanaka ni vatsongwana ka Kriste. Nimiwundlile hi ntswamba, kungali hi svakuja lesvitiyeke, hikuva amingasisvikota kusviminta; ni svosvi amisisvikota, hikuva mahali va nyama ntsena. Hikuva, loko mavondzo ni kuholova svili kona xikarhi ka n'wina, xana amifani ni vanhu ntsena ke? Xana amihanyi kufana na vona ke? Loko mun'we aku: “Mina, ni wa ka Pawulo” ni loko mun'wana aku: “Mina, ni wa ka Apolosi”, xana ami va nyama ke? Apolosi i mani? Na Pawulo i mani? I malandza ntsena lawa mipfumeleke hi mhaka ya wona; mun'wana ni mun'wana wa hina aatirha lesvi Hosi yimunyikeke kusvitirha. Mina nibzalile, Apolosi acheletelile; kambe Xikwembu hi xona ximiliseke. Hikolaho, lweyi abzalaka ahi nchumu, hambi lweyi acheletelaka, kambe i Xikwembu, hikuva hi xona xikulisaka. Lweyi abzalaka ni lweyi acheletelaka varingana, hambilesvi mun'wana ni mun'wana angatayamukela hakelo ya yena hi mpimo wa ntirho wa yena. Hikuva hina hi vatirhikulobze ni Xikwembu, n'wina mi nsimu ya Xikwembu, mi yindlo ya Xikwembu. Hi timpsalu leti Xikwembu xiniyaveleke tona, mina nivekile masungulu kukota muyaki lowotlhariha; svosvo mun'wana ayaka henhla ka wona. Mun'wana ni mun'wana aayake henhla ka wona hi kuxiyaxiya. Aku na munhu lweyi angavekaka masungulu man'wana handle ka lawa mangavekiwa, anga yena Yesu Kriste. Kambe loko munhu ayaka henhla ka masungulu wolawo hi golidi, kumbe hi silivhere, hambi kuli hi maribze ya nxavu wa risima, kumbe timhandze, kumbe bzanyi, kumbe tinhlanga, ntirho wa munhu lweyi wutavoneka; hikuva siku ra Hosi ritafika na rili ni ndzilo, ritakomba lesvi ntirho wa mun'wana ni mun'wana wunga svona, kutani ndzilo wutaringeta kutiya ka ntirho wakona. Loko lesviyakiweke hi munhu lweyi svitiyile, atakuma hakelo. Kambe loko ntirho wakona wupsha, atapfumala hakelo; loko ali yena, ataponisiwa, kambe svitayendla ingi na yena ahundzile hi le ndzilweni. Xana amisvitivi lesvaku mi tempele ya Xikwembu, ni lesvaku Moya wa Xikwembu wuyakile ka n'wina ke? Loko munhu awonha tempele ya Xikwembu, Xikwembu xitamuwonha na yena; hikuva tempele ya Xikwembu yihlawulekile, kutani n'wina mi tempele yoleyo. Munhu angatshuki atixisa. Loko mun'we xikarhi ka n'wina ativona na ali lweyi atlhariheke hi kuya hi sva minkama leyi, aahundzuke xihunguki, lesvaku atava lweyi wotlhariha. Hikuva vutlhari bza misava leyi i vuhunguki mahlweni ka Xikwembu. Kutsaliwile lesvi: “Xikwembu xiphasa tintlhari ka maqhinga ya tona.” Vayengeta vaku: “Hosi yitiva miyanakanyu ya lavotlhariha, yitiva lesvaku ahi ya nchumu.” Loko svilitano, kungavi ni lweyi atidzunisaka hi vanhu, hikuva hinkwasvu i sva n'wina; hambi ali Pawulo, hambi ali Apolosi, hambi ali Kefasi, hambi yili misava, hambi bzili vutomi, hambi rili rifu, hambi svili sva svosvi, hambi svili lesvingatata: Hinkwasvu i sva n'wina, na n'wina miva Kriste, na Kriste i wa Xikwembu. Loko svilitano, mifanele kuhivona tani malandza ya Kriste, ni vahendleleti va svihundla sva Xikwembu. Svosvi-ke, lesvilavekaka ka vahendleleti hi lesvaku munhu akumeka na ali lweyi atshembekeke. Ka mina i mhaka leyitsongo ngopfu kuyavanyisiwa hi n'wina, kumbe hi huvu ya vanhu; nasvona hambi ali mina anitiyavanyisi hi noxe. Anititwi na nili ni nandzu wa nchumu; kambe lesvi hi svona lesvi sviniyendlaka lweyi alulameke; lweyi aniyavanyisaka i Hosi. Hikolaho mingayavanyiseleni nchumu makumu, na nkama wungasifika. Rindzelani Hosi yikondza yivuya; hi yona leyingatahumesela rivaleni svilo sva munyama lesvifihliweke, ni kupaluxa makungu ya timbilu ta vanhu; kutani hi kona mun'wana ni mun'wana angatakuma kudzunisiwa ka yena loku kuhumaka ka Xikwembu. Hikolaho ka n'wina, vamakwerhu Hosini, lesvi hinkwasvu nisvitekile svili lesvikongomaka mina na Apolosi lesvaku hiva svikombiso, mitajondza lesvi marito lawa mahlayaka svona lawa mange: “Ungatluli lesvitsaliweke.” Nakona kungavi na mun'we wa n'wina lweyi atikulisaka hi kutsakela mun'we anyenya mun'wana. Hikuva i mani lweyi akutlakuseke kutlula van'wana xana? Xana u na yini lexi unganyikiwangiki ke? Kutani loko unyikiwile, hikolaho ka yini utidzunisa, wonge hi loko ungasvikumanga hi kunyikiwa xana? Anili, mili mi ni hinkwasvu lesvilavekaka! Anili, mili mihundzukile svipfundzi! Ingaku, mihundzukile tihosi hi n'wexe na mingali na hina! Mawaku loko onge mihundzukile tihosi hakunene, lesvaku na hina hitava tihosi svin'we na n'wina. Mina nivona onge Xikwembu xivekile hina vapostola akuva hiyima hi le ndzhaku, hifana ni vanhu lava vatsemeliweke rifu, mahlweni ka tintsumi ni le ka vanhu. Anili, mili hi svihunguki hina hikolaho ka Kriste, kambe n'wina mi vanhu va vutlhari ka Kriste! Anili, mili hina ahi na ntamu, n'wina mi na wona; anili, mili n'wina machaviseka ngopfu, hina hasoleka! Kufika svosvi hitwa ndlala ni torha, hisvelile, habukuteliwa, ahi na kaya; hitihlakata hi kutirha hi mavoko ya hina. Loko hirhukiwa, hakatekisa; loko hixanisiwa, hilehisa mbilu; loko hilumbetiwa, hihlamula hi marito ya timpsalu. Hihundzukile chaka ra misava ni tala ra hinkwasvu lesvicukumetiwaka, kufika namuntlha. Nitsala timhaka leti, kungali kumikhomisa tingana kambe kumitsundzuxa, tani vana va mina lavarhandzekaka. Hikuva hambi mingava ni vajondzisi va madzanadzana ka Kriste, ami na vatatana lavanyingi; hikuva, ka Yesu Kriste, nihundzukile tatana wa n'wina hi kumitivisa Evhangeli. Hikolaho, namikhongotela lesvaku mitekelela mina. Hi svona lesviyendlaka lesvaku nimirhumela Timotewu, n'wana wa mina lweyi nimurhandzaka, lweyi atshembekeke Hosini; atamitsundzuxa mahanyela ya mina ka Yesu Kriste, hilaha nijondzisaka hakona ka kereke yin'wana ni yin'wana. Van'wana va n'wina vatikulisa ongi hi loko nitokala ningahati seyo ka n'wina; kasi nitata ka n'wina hi kuhantlisa, loko Hosi yisvirhandza; kutani hi kona ningatakuma lesvi vatikulisaka ha svona vanhu volavo kuvulavuleni ka vona, hambi ni ntamu lowu vanga na wona. Hikuva Mfumu wa Xikwembu ahi mhaka ya marito, i mhaka ya ntamu. Xana milanga yini ke? Xana nifanele kuta ka n'wina ni rimpsika, kumbe hi rirhandzu ni moya wa musa ke? Mhaka leyi hiyitwaka, hi lesvaku ku ni vunghwavana xikarhi ka n'wina, lebzi hambi xikarhi ka vamatiko bzingaliki kona, lebzi bzifikaka laha munhu ahanyaka ni nsati wa tatana wa yena. Kutani mahali ni kutikulisa! Matshan'wini ya svona, hikolaho ka yini mingakarhatekanga, lesvaku lweyi ayendleke svilo lesvi asusiwa xikarhi ka n'wina, xana? Loko ali mina, hambilesvi hi xiviri ninga kule na n'wina, hi moya nikona; kutani nive ni kuyavanyisa munhu lweyi ayendleke mhaka leyochavisa leyi, kufana ni loko nili kona koseyo. Ahihlanganeni hi vito ra Hosi ya hina Yesu, mina na n'wina, mina niva kona hi moya; kutani, hi matimba ya Hosi ya hina Yesu, nili: Munhu wotanu aanyiketiwe ka Sathana, lesvaku miri wa yena wuhelisiwa, ni lesvaku moya wa yena wuponisiwa hi siku ra Hosi. Kutidzunisa ka n'wina akululamanga! Xana amisvitivi lesvaku comelanyana leritsongo rikukumukisa mbila hinkwayu ke? Cukumetani comela ra khale, lesvaku mitava mbila leyimpsha. Mhaka yakona hi lesvaku amahali na comela, hikuva Kriste, lweyi anga Xinyempfana xa hina xa Paska, atlhaviwile. Hikolaho, ahiyendleni nkhuvu kungali hi comela ra khale, kungali hi comela ra vujoho ni kuhomboloka, kambe kuli hi xinkwa xokala comela, xotenga ni xa ntiyiso. Nimitsalelile papeleni lesvaku mingatolovelani ni vawosvi; aningavuli nikutsongo kuhambana ni vanhu va misava leyi lavanga vawosvi, kumbe lavanga ni makwanga, kumbe vayivi, kumbe lavagandzelaka svikwembu sva hava; ihim, hikuva loko miyendla svosvo, asvitahlaya lesvaku mirhurha misaveni leyi. Lesvi animitsalela svona hi lesvaku mingatolovelani ni lweyi avuliwaka “makwerhu” kasi i muwosvi, kumbe i munhu wophanga ni makolo, kumbe i mugandzeli wa svikwembu sva hava, kumbe i murhuketeli, kumbe i xidakwa, kumbe i muyivi; munhu wofana ni lweyo, hambi kuli kuja, mingajeneni na yena. Hikuva xana i ntirho wa mina kuthethisa va le handle ke? Vatathethisiwa hi Xikwembu. N'wina hi n'wexe mithethisa lavanga ndzeni ka kereke; amiyendlisi svosvo xana? Hlongolani lweyi wa kubiha mahlweni ka n'wina. Loko mun'we wa n'wina ali ni mhaka ya kuphikizana ni mun'wana, hikolaho ka yini angachavi kuyisa mhaka ya yena ka vamatiko lesvaku vayitsema, matshan'wini ya kuyiyisa ka vakwetsimi va Xikwembu xana? Xana amisvitivi lesvaku vakwetsimi va Xikwembu vatayavanyisa misava ke? Kutani loko misava yiyavanyisiwa hi n'wina, xana asvimilulamelanga kuyavanyisa mintengonyana leyitsongo ke? Xana amisvitivi lesvaku hitayavanyisa tintsumi ke? Svakuyavanyisa timhaka ta siku rin'wana ni rin'wana svona ahahahlayi. Loko mili ni mintengo leyikongomaka ta vutomi bza siku rin'wana ni rin'wana, xana mitahlawula vayavanyisi lavangaliki nchumu kerekeni ke? Nivulisa svosvo kumikhomisa tingana. Xana hakunene aku na mun'we wotlhariha xikarhi ka n'wina, lweyi akotaka kuyavanyisela munhu ni makwavu Hosini timhaka ta vona ke? Xana hakunene munhu angayamangalela makwavu, nasvona sviyendliwa mahlweni ka lava vangaliki vapfumeli ke? Mhaka yakona hi lesvaku kumangalelana ka n'wina kukomba kuhluleka ka n'wina ni svosvi. Matshan'wini ya svona, hikolaho ka yini mingapfumeli kuwonheliwa? Ha yini mingapfumeli kukanganyisiwa ke? Kasi hi n'wina miwonhelaka van'wana, hi n'wina mikanganyisaka, kutani svosvo misviyendla ni le ka vamakwenu Hosini! Xana amisvitivi lesvaku lavohomboloka vangakala vangaji ndzhaka ya Mfumu wa Xikwembu, ke? Mingatshukeni mitikanganyisa: Loko ali lavobiha, ni lavagandzelaka svikwembu svokala svingali svona, ni vunghwavana, ni vavanuna lavayendlaka sva tingana ni vavanunakulobze, ni vayivi, ni vaphangi, ni svidakwa, ni va kurhuketela, ni vakanganyisi, vangakala vangaji ndzhaka ya Mfumu wa Xikwembu. Hi lesvi van'wana va n'wina amili svona; kambe svosvi mibasisiwile, nasvona miyendliwile lavahlawulekeke ni lavalulameke, hi vito ra Hosi Yesu Kriste ni Moya wa Xikwembu xa hina. q Munhu angaku: “Svilo hinkwasvu ka mina svapfumeleleka.” Ina, kambe ahi hinkwasvu lesvipfunaka. “Svilo hinkwasvu ka mina svapfumeleleka”, kambe ningakala ningafumiwi hi xin'we xa svona. Mun'wana angaku: “Svakuja i sva khwiri, kutani khwiri i ra svakuja.” Ina, kambe Xikwembu xitasvihelisa hi vumbirhi bza svona. Miri awuvumbeliwanga vunghwavana, kambe wuvumbeliwe Hosi, ni Hosi i hosi ya miri. Xikwembu xipfuxile Hosi kufeni, na hina xitahipfuxa hi matimba ya xona. Xana amisvitivi lesvaku, miri wa n'wina, i svirho sva miri wa Kriste ke? Xana ningateka svirho sva miri wa Kriste, nisviyendla svirho sva nghwavana ke? Ihim, nikutsongo! Xana amisvitivi lesvaku lweyi atihlanganisaka ni nghwavana atiyendla miri wun'we na yona ke? Hikuva tsalwa rite: “Lavambirhi vatava nyama yin'we ntsena.” Kambe lweyi atihlanganisaka ni Hosi, ayendla moya wun'we na yona. Chavani vunghwavana! Xijoho xin'wana ni xin'wana lexi munhu axiyendlaka xi le handle ka miri wa yena; kambe lweyi awosvaka ajohela miri wa yena. Xana amisvitivi lesvaku miri wa n'wina i tempele ya Moya Lowokwetsima lowu minga na wona, lowu Xikwembu ximinyikeke wona, ni lesvaku amitifumi, ke? Mixaviwile hi nxavu lowukulu; hi kolaho, dzunisani Xikwembu hi miri wa n'wina. Loko tili timhaka leti minganitsalela tona ningaku: Svilulamile loko wanuna angativani ni wansati. Kambe hikolaho ka kutala ka vuwosvi, wanuna mun'wana ni mun'wana aave ni nsati lweyi anga wa yena, ni wansati mun'wana ni mun'wana aave ni nuna lweyi anga wa yena. Nuna aanyike nsati lesvi svinga mfanelo ya yena, na yena nsati asvive tano ka nuna wa yena. Nsati anga na matimba ya kufuma miri wa yena, kambe matimba ma le ka nuna. Na yena wa nuna, anga na matimba ya kufuma miri wa yena, matimba ma le ka nsati. Mingatshukeni miyalelana, kungava loko kuli hi kupfumelelana, kumbexana mingayalelana nkamanyana, kuli hi kutwanana, loko milava kutinyiketa kukhongeleni kutani ndzhaku mitlhela mivuyelelana. Sathana angatshuki amiringa hikolaho ka kutsandzeka ka n'wina kutikhoma. Nihlaya lesvi hi kulava kumivevukisela, wungali nawu. Anitanavela lesvaku hinkwavu vanhu vangafana na mina! Kambe mun'wana ni mun'wana a ni nyiko leyi yinga ya yena, leyihumaka ka Xikwembu, mun'wana hi ndlela leyi, mun'wana hi ndlela liya. Nibzela lava vangasitekaka kumbe kutekiwa, ni vafelakazi, lesvaku svingava svisasekile ka vona loko vatitshamela ntsena kukotisa mina. Kambe loko vatsandzeka kutikhoma, avateke kumbe kutekiwa, hikuva svayampsa kuteka kumbe kutekiwa, kutlula kuhanya hi kuhisiwa hi kunavela. Kambe lavatekaneke, na valerisa, kungali mina, kambe yili Hosi, nili: Nsati angatshuki ahambana ni nuna. Hambi svilitano loko atshuka ahambana ni nuna, aatshamise svosvo angahatekiwi, kumbe aatlhele avuyelelana ni nuna wa yena; nuna na yena angatshuki atshika nsati. Loko vali lavan'wana, mina kungali Hosi nili: Loko mun'we ka vamakwerhu Hosini ali ni nsati lweyi angaliki mupfumeli, kutani loko nsati lweyi apfumela kuya mahlweni ahanya na yena, nuna wakona angamutshiki; ni loko wansati ali ni nuna lweyi angaliki mupfumeli, kutani nuna lweyi apfumela kuya mahlweni ahanya na yena, nsati wakona angatshiki nuna. Hikuva nuna lweyi angaliki mupfumeli ayendliwa mukwetsimi wa Xikwembu hikolaho ka nsati, ni nsati lweyi angaliki mupfumeli ayendliwa mukwetsimi wa Xikwembu hi lesvi nuna wa yena anga mukriste. Loko svingali tano, avana va n'wina avatava vanyamile, kasi svosvi vakwetsimile. hambi svilitano, loko lweyi angaliki mupfumeli alava kuhambana ni lweyi anga mupfumeli, aahambane na yena: Mukriste waxinuna kumbe waxisati, angabohekanga loko timhaka tifamba hi ndlela leyo. Kambe loko mili n'wina, Xikwembu ximivitanile kuhanya hi kurhula. Hikuva wena nsati, usvitivisa kuyini, kumbexana ungaponisisa nuna wa wena ke? Na wena wa nuna, usvitivisa kuyini, kumbexana ungaponisisa nsati wa wena ke? Mun'wana ni mun'wana aahanye hilaha Hosi yimunyikeke hakona, ni le ka xiyimu lexi aali ka xona loko Xikwembu ximuvitana. Nilerisa tikereke hinkwatu. Xana munhu avitaniwile na ayimbile ke? Aatshamisise xisvolesvo. Xana avitaniwile na angayimbanga? Angatshuki ayimba. Kuyimba, ni kuva munhu angayimbanga, ahi nchumu, svafana; mhaka i kuhlayisa milawu ya Xikwembu. Mun'wana ni mun'wana aayime xiyin'weni lexi aali ka xona loko avitaniwa. Xana awuli xikarawa loko uvitaniwa? Ungavileli hi svona; kambe loko utshuka ukuma nkateko wotlhantlhiwa, wutirhise. Hikuva lweyi avitaniweke kuva wa Hosi na ali xikarawa, i mutlhantlhiwa wa Hosi; ni lweyi avitaniweke na ali mutlhantlhiwa i xikarawa xa Kriste. Mixaviwile hi nxavu lowukulu; mingaveni svikarawa sva vanhu. Vamakwerhu, munhu mun'wana ni mun'wana aayime na ali ni Xikwembu matshameleni lawa aali ka wona loko avitaniwa. Hi tlhelo ra lava vangasikiteka kumbe kutekiwa; a ni na Nawu wohuma ka Hosi, kambe nihlaya ntsena mavonela ya mina, hikuva nili munhu lweyi ayamukeleke timpsalu ta Hosi kuva lweyi wa kutshembeka. Kutani niyanakanya lesvaku, hikolaho ka maxangu ya minkama leyi, svingava svilulamile loko munhu atshama na ali svolesvi anga xisvona. Xana utekile nsati? Ungalavi kutintlhantlha ka yena. Xana awu na nsati? Ungalavi nsati. Hambi svilitano, loko uteka, awujohi; ni nhwanyana, loko atekiwa, angajohi; kambe volavo vataxaniseka misaveni, kutani mina nilava kumilamulela ka svosvo. Nimibzela mhaka leyi, vamakwerhu: Nkama lowusaleke wukomile. Kusukela svosvi, lava vanga ni vasati vafanele kuyendla ingi hi loko vangali na vona; lavarilaka vafanele kuyendla ingi hi loko vangarili; ni lavatsakeke, ingi hi loko vangatsakanga; ni lava vaxavaka, ingi hi loko vangali na nchumu; ni lavatirhisanaka ni sva misava leyi avave kufana ni loko vangatirhisani na svona; hikuva misava leyi ni sva yona hinkwasvu svahundza. Nilava lesvaku mingavi na svivilelo. Lweyi akalaka angatekanga atikarhatela sva Hosi, kuvona hilaha angatsakisaka Hosi hakona; kambe lweyi atekeke atikarhatela sva misava, kuvona hilaha angatsakisaka nsati wa yena hakona, kutani akokeliwa hala ni hala. Wansati lweyi akalaka angatekiwanga, kumbe nhwanyana, atikarhatela sva Hosi, lesvaku miri ni moya wa yena sviva lesvihlawulekeke; kambe wansati lweyi atekiweke atikarhatela sva misava leyi, kuvona hilaha angatsakisaka nuna wa yena hakona. Nivula lesvi kumipfuna, kungali kumisivelasivela, kambe kuyendlela lesvaku svilo hinkwasvu svifamba khwatsi, mitinyiketa kutirhela Hosi, mingayanakanyi svin'wana. Loko munhu ayanakanya lesvaku angahanyi hi ndlela yakona ni nhwanyana wa yena, ni loko kunavela ka yena kuli lokukulu, aayendle hilaha arhandzaka hakona loko svifanele kuva tano. Avatekani, aku kona kujoha ka svona. Kambe loko wanuna ayima atiyile mbilwini ya yena, angali na lexi ximusindzisaka kambe akota kutikhoma hi yexe, atava ayendla svona loko atiboha mbilwini ya yena kutshamisa xisvosvo angateki nhwanyana wa yena. Hikolaho, lweyi atekisaka n'wana wa yena wanhwanyana, ayendla svona; kambe lweyi angamutekisiki, ayendla svona lesvitlulisaka. Wansati abohiwile ka nuna wa yena loko nuna ahahanya; kambe loko nuna wa yena afa, atshunxekile, angahatekiwa hi lweyi alavaka kutekiwa hi yena, ntsena asvifambe hilaha Hosi yisvi rhandzaka hakona. Hambi svilitano, asvitayampsa ka yena loko atitshamela ntsena angatekiwi; svosvo i miyanakanyu ya mina, nasvona nakholwa lesvaku na mina ni ni Moya wa Xikwembu. Hi mhaka ya svakuja lesvihumeseliwaka svikwembu sva hava, hitala kuvula lesvaku hi ni vutivi hinkwerhu. Kambe vutivi bzotano bzinyika munhu kutikulisa, kasi rirhandzu rayaka. Loko munhu ayanakanya lesvaku ativa xanchumu, angasitiva nchumu hilaha afanelaka kutiva hakona. Kambe loko munhu arhandza Xikwembu, ativiwa hi xona. Loko kuli kuja lesvihumeseliweke svikwembu sva hava, hitiva lesvaku “xikwembu xa hava ahi xilo xanchumu misaveni” ni lesvaku “ku ni Xikwembu xili xin'we ntsena, axi kona xin'wana.” Hambi loko svilo svohlayiwa “svikwembu”, svili kona tilweni kumbe misaveni kufana ni lesvi kunene svikwembu svingatala ni tihosi tingatala kambe ka hina ku ni Xikwembu xin'we ntsena, Tatana lweyi svilo hinkwasvu svihumaka ka yena, na hina hihanyelaka yena; nasvona ku ni Hosi yin'we ntsena, Yesu Kriste lweyi hinkwasvu svitumbulukaka hi le ka yena, na hina hihanyaka hikolaho ka yena. Ahi hinkwavu lava vanga ni vutivi lebzi; lesvi vanhu van'wana vahatoloveleke svikwembu sva hava, vaja svakuja sva vona kufana ni loko svili lesvihumeseliweke svikwembu lesvi, kutani ripfalu ra vona richakile hikolaho ka gome ra vona. Svakuja asvingahitshineti kusuhi ni Xikwembu; hambi loko hingaji, ahilahlekeliwi hi nchumu, hambi loko hija, ahibindzuli nchumu. Kambe tivoneleni lesvaku vutshunxeki bza n'wina lebzi, bzingahundzuki xikhunguvanyiso ka lava vanga ni gome. Hikuva loko munhu lweyi anga ni gome akuvona wena lweyi unga ni vutivi, na uli karhi uja sva svikwembu sva hava atempeleni ya svona, xana munhu lweyi angakala angatiyisiwi ripfalwini ra yena, kuja lesvihumeseliweke svikwembu svosvo ke? Kutani makwenu lweyi anga ni gome, lweyi Kriste amufeleke, wawonhaka hi mhaka ya vutivi bza wena. Loko mijohela vamakwenu hi ndlela leyi, ni kuwonha mapfalu ya vona lawa manga ni gome, mijohela Kriste. Hikolaho, loko svakuja svikhunguvanyisa makwerhu, ningakala ningahaji nyama ni siku ni rin'we, lesvaku ningatshuki nivangela makwerhu kukhunguvanyeka. Xana anitshunxekanga ke? Xana ani mupostola ke? Anivonanga Yesu Hosi ya hina xana? Xana ahi n'wina mihandzu ya ntirho wa mina Hosini ke? Hambi loko ka van'wana ningali mupostola, ka n'wina ni yena, hikuva mi xikombiso xa vupostola bza mina Hosini. Kutihlamulela ka mina ka lava vanithethisaka hi loku: Xana ahi na mfanelo ya kuja ni kunwa? Xana ahi na mfanelo ya kufambafamba na hili ni nsati lweyi anga makwerhu Hosini, tani hi lesvi vapostola van'wana vayendlisaka svona, ni vamakwavu va Hosi, na Petrosi ke? Xana hi hina ntsena, mina na Barnabasi, lava hikalaka mfanelo yotshika kutirha ke? I mani lweyi atshamaka aya nyimpini hi kutihakelela hi yexe xana? I mani lweyi abzalaka mvhinya, kutani angaji mihandzu ya wona ke? I mani lweyi abzisaka ntlhambi, anganwi ntswamba wa wona xana? Xana nihlaya lesvi hi mpfumelelo wa vanhu ke? Xana Nawu awuhlayi svosvo na wona ke? Nawini wa Moxe kutsaliwile lesvi: “Ungatshuki usiva nomo wa homu loko yili karhi yihula”. Xana Xikwembu xikhatalela tihomu ke? Xana axihlayi timhaka leti ngopfungopfu hikolaho ka hina ke? Ina, titsaliwile hikolaho ka hina, hikuva murimi afanele kurima na ali ni kulangutela, ni muhuli afanele kuhula na ali ni kulangutela lesvaku atayaveliwa sva yena. Xana loko himibzalela mbewu ya moya, xana i mhaka leyikulu loko hitshovela sva misava leyi ka n'wina ke? Loko vanhu van'wana vakuma timfanelo ka n'wina, xana hina ahi na kutikuma kutlula vona ke? Hambi svilitano, ahitirhisanga timfanelo leti. Hisviyamukelile hinkwasvu, lesvaku hingatshuka hihingakanya ndlela ya Evhangeli ya Kriste. Xana amisvitivi lesvaku lavatirhaka sva mintirho ya Tempele vaja svakuja sva le Tempeleni, ni lesvaku lavatisaka timhamba alitarini vayaveliwa sva tona ke? Hi ndlela leyo, Hosi yilerisile lavapaluxaka Evhangeli lesvaku vakuma svotihanyisa hi ntirho lowu wopaluxa Evhangeli. Kambe mina anitirhisanga ni yin'we ya timfanelo leti. Nasvona anitsali lesvi kuyendlela lesvaku nititirhisa; hikuva ka mina svingayampsa kufa, kutlula kuyendlisa svona; mhakeni leyi, aku na munhu lweyi anganitekelaka kutidzunisa ka mina. Loko nipaluxa Mahungu Lamanene, ahi lesvi ningatidzunisaka ha svona, hikuva svaniboha kumapaluxa; i khombo ka mina loko ningatwalisi Evhangeli! Loko ingi nitirha ntirho lowu hi kutihlawulela, nikuma hakelo ka wona; kambe lesvi niwutirhaka na ningatihlawulelanga, svihlaya lesvaku niyorhwexiwa wona. Kutani-ke, hakelo ya mina hi yihi ke? I kupaluxa Evhangeli ka vanhu, na ningalavi hakelo; i kutsika hi nexe mfanelo ya mina yohakeliwa ntirhweni lowu wopaluxa Evhangeli. Hambi loko ningali xikarawa xa munhu ni mun'we, nitiyendlile xikarawa xa hinkwavu, lesvaku nitakota kukoka lavanyingi xikarhi ka vona. Ka Vayuda ni tiyendlile Muyuda, lesvaku nitakota kukoka Vayuda. Ka lava vanga hansi ka Nawu ni tiyendlile lweyi anga hansi ka wona, hambilesvi mina hi nexe ningaliki hansi ka Nawu, lesvaku nitakota kukoka lava vangahansi ka Nawu. Ka lava vanga handle ka Nawu, nitiyendlile lweyi anga handle ka wona, lesvaku nitakota kukoka lava vanga handle ka Nawu (hambilesvi ningaliki handle ka Nawu wa Xikwembu, kambe ninga nawini wa Kriste). Ka lavanga ni gome, nitiyendlile lweyi anga ni gome, lesvaku nitakota kukoka lava vanga ni gome. Kutani-ke, nitiyendlile hinkwasvu ka hinkwavu, lesvaku hi tindlela hinkwatu nitakota kuponisa van'wana. Niyendla hinkwasvu lesvi hikolaho ka Mahungu Lamanene, lesvaku nikota kuyaveliwa minkateko ya wona. Xana amisvitivi lesvaku, hambi loko lavaphikizanaka hi kutsutsuma rivaleni ra mintlangu vatsutsuma hinkwavu, kambe lweyi akumaka hakelo i mun'we ntsena ke? Tsutsumani hi ndlela leyi yingatamipfuna kukuma hakelo yakona. Hinkwavu lavaphikizanaka mintlangwini, vatikhoma hi matlhelo hinkwawu. Vayendla svosvo lesvaku vatakuma hari leyiwonhekaka; kambe hina hilava leyi yingawonhekiki. Hikolaho, mina anitsutsumi muhulahula; anibi xibakela tani hi munhu lweyi abaka moya ntsena; kambe nixanisa miri wa mina, niwuyendla xikarawa, lesvaku ningakumeki na nili lweyi atsandzekaka, ndzhaku ka loko mina nitava nijondzisile van'wana. Vamakwerhu, nilava lesvaku mitwisisa lesvihumeleleke ka vatatana va hina: Hinkwavu avasirheleliwa hi refu, hinkwavu vapelile lwandle Leropshuka. Apapeni ni le lwandle vakhuvuliwile hinkwavu xinakulobzeni xa Moxe, hinkwavu vajile svakuja sva moya sva kufana, lesvihumeke tilweni; hinkwavu vanwile svakunwa svofana sva moya, hikuva avahamba vanwa ribzeni ra sva moya leri arivapangalata; ribze rakona aali Kriste. Hambi svilitano, lavanyingi mahlweni ka vona avatsakisanga Xikwembu; hi kolaho vafile mananga. Svilo lesvi svihundzukile xitsundzuxu ka hina, kuhichavisa lesvaku hinganaveli lesvobiha, kufana ni lesvi vona vangayendlisa svona. Mingaveni vanhu lavagandzelaka svikwembu sva hava, kukotisa van'wana va vona. Hilaha Tsalwa rivulaka hakona riku: “Vanhu vatshamile hansi vaja ni kunwa, kutani vasungula kucina.” Hingatshukeni hinghena vuwosvini, kufana ni lesvi van'wana va vona vayendliseke svona, kutani hi siku rin'we kulovile vanhu va makume mambirhi ya makhulu na manharhu (23 000). Hingatshukeni hiringa Kriste, kufana ni lesvi van'wana va vona vayendliseke svona; kutani vahelisiwile hi tinyoka. Mingangurangureni kufana ni lesvi van'wana va vona vayendliseke svona; kutani valovisiwile hi Ntsumi ya vuhelisi. Svilo lesvi svivahumelelile lesvaku sviva xitsundzuxu; nasvona svitsaliwile lesvaku na hina hitsundzuxiwa hi svona, hina lava hinga minkarhini ya makumu. Hikolaho, lweyi ayanakanyaka lesvaku wahayimile, aativonele lesvaku angawi. Amisihumeleliwa hi ndzingo lowutlulaka matimba ya munhu. Xikwembu xatshembeka, xingakala xingapfumeli lesvaku mihlangana ni ndzingo lowu wumihlulaka; loko wutshuka wumitela, xona xitaminyika matimba ya kutiyisela, mikondza mihuma ka wona. Hikolaho, vamakwerhu lavarhandzekaka, chavani kugandzela svikwembu sva hava. Nivulavula na n'wina kufana ni loko mili vanhu lava vanga ni kutwisisa; ringanisani hi n'wexe lesvi nisvivulaka. Ndzheko wa minkateko lowu hiwukhensaka, xana awuvuli lesvaku hi ni kuhlangana svin'we ni ngati ya Kriste ke? Ni xinkwa lexi hikhemelanaka, xana axihlayi lesvaku hi ni kuhlangana svin'we ni miri wa Kriste ke? Lesvi xinkwa xinga xin'we, hina lava hinga lavanyingi, hi miri wun'we; hikuva hinkwerhu hiyaveliwa xinkwa xin'we. Yanakanyani mayendlela ya Vaisrayele. Xana lavajaka timhamba letihumeseliweke Xikwembu, avahlanganisiwi ni Xikwembu alitarini rakona ke? Xana hi marito lawa, nilava kuvula yini ke? Xana nili svakuja lesvihumeseliweke svikwembu sva hava svi ni nchumu wun'wana ka svona ke? Hambi svili svikwembu svakona, xana svi ni nchumu wun'wana ka svona ke? Ihim, anivuli svona! Kambe nili: Loko vamatiko vagandzela, vagandzela madimoni, avagandzeli Xikwembu. Kutani anilavi lesvaku miva ni vunakulobze ni madimoni. Asviyendleki lesvaku minwela ndzhekweni wa Hosi ni le ndzhekweni wa madimoni. Asviyendleki lesvaku mija mezeni wa Hosi ni le mezeni wa madimoni. Xana hilava kutshohokisa Hosi ke? Xana hayitlula hi matimba ke? Mili: “Hinkwasvu svapfumeleleka.” Svatwala, kambe ahi hinkwasvu lesvipfunaka. Mili: “Hinkwasvu svapfumeleleka.” Kambe ahi hinkwasvu lesviyakisaka. Munhu angatshuki atilavela lesvinga sva yena ntsena, kambe aayanakanyi ni sva van'wana. Nyama leyixaviweke lomu yixavisiwaka kona, janani yona hi ripfalu leritshunxekeke, mingavutisi lomu yihumaka kona, hikuva misava ni hinkwasvu lesvi svinga ka yona i sva Hosi. Loko mirhambiwa svakujeni hi munhu lweyi angaliki mupfumeli, kutani misvitsakela kuya kona, janani hinkwasvu lesvi vamiphamelaka svona, hi mbilu leyitshunxekeke, na mingavutisanga lomu svihumaka kona. Kambe loko mun'we amibzela lesvi: “Svakuja lesvi, svihumeseliwile svikwembu sva hava”, mingasvijeni, hikolaho ka lweyi amitsundzuxeke, na ali ni mbilu yokala yingatshunxekanga; loko niku “ripfalu”, anihlayi ra n'wina, kambe nihlaya ra lweyi akutsundzuxeke. Mitaku: “Hikolaho ka yini kutshunxeka ka mina kuyavanyisiwa hi ripfalu ra mun'wana xana? Loko nija svakuja na nili karhi nikhensa, hikolaho ka yini nisoliwa hi mhaka ya svakuja lesvi nisvikhenseke xana?” Nhlamulu hi leyi: Hambi mija, hambi minwa, hambi miyendla yini na yini, yendlani hinkwasvu kudzunisa Xikwembu. Mingakunguvayisi Vayuda, hambi Vagirika, hambi kereke ya Xikwembu. Tekelelani mina, hikuva nitsakisa vanhu hinkwavu hi tindlela hinkwatu, na ningatilaveli lesvipfunaka mina ntsena, kambe nilava lesvipfunaka lavanyingi, lesvaku vataponisiwa. Tekelani mina, kukotisa lesvi na mina nitekeleke Kriste. Namikhensa, hikuva manitsundzuka minkama hinkwayu, nasvona mihlayisa milawu hilaha ningamijondzisa yona hakona. Kambe nilava lesvaku mitiva lesvi: Kriste i nhloko ya wanuna mun'wana ni mun'wana, xilesvo wanuna i nhloko ya wansati, Xikwembu i nhloko ya Kriste. Wanuna mun'wana ni mun'wana lweyi akhongelaka, kumbe lweyi aprofetaka na atifunengetile nhloko, asolisa Kriste lweyi anga nhloko ya yena. Kambe wansati mun'wana ni mun'wana lweyi akhongelaka, kumbe lweyi aprofetaka na angafunengelanga nchumu nhlokweni, asolisa nuna wa yena, lweyi anga nhloko ya yena; svifana ni loko onge atsemetiwile misisi. Loko wansati angafunengeli nchumu nhlokweni, aatsemete ni misisi ya yena. Kambe loko svikhomisa tingana ka wansati kubzevula misisi, aafunengele xanchumu nhlokweni! Wanuna angafanelanga kutifunengeta nhloko, hikuva yena i xifaniso xa Xikwembu ni kudzuneka ka xona, kasi wansati i kudzuneka ka wanuna. Wanuna angahumesiwanga ka wansati, kambe i wansati lweyi ahumesiweke ka wanuna; nasvona wanuna angavumbeliwanga wansati, kambe i wansati lweyi avumbeliweke wanuna. Loko svilitano, hikolaho ka tintsumi, wansati afanele kuva ni xikombiso nhlokweni, xa ntikelo wa yena. Kambe hi tlhelo rin'wana, mahlweni ka Hosi wansati angatshunxekanga handle ka wanuna, na yena wanuna angatshunxekanga handle ka wansati. Hikuva kukota lesvi wansati ahumesiweke ka wanuna, hi ndlela yoleyo na yena wanuna avelekiwa hi wansati, kambe hinkwasvu svihuma ka Xikwembu. Tsemani hi n'wexe: Xana svafanela lesvaku wansati akhongela Xikwembu na angafunengelanga nchumu nhlokweni ke? Xana na wona ntumbuluku awumijondzisi lesvaku loko wanuna ali ni misisi yoleha, svimunyika xisolo ke? Kasi wansati loko ali ni misisi yoleha, xana asvimunyiki ndzhuti ke? Hikuva anyikiwile misisi yoleha kuva xifunengelo xa yena. Hambi loko munhu alava kuphika hi svona, hina ahitolovelanga lesvo, na tona tikereke ta Xikwembu atisvitolovelanga. Loko nili karhi niminyika svileriso lesvi, ku ni lesvi svinivilelisaka: Hi lesvaku tinhlengeletanu ta n'wina tawonha kutlula kululamisa. Xorhanga: Nitwa lesvaku ku ni kuhambana xikarhi ka n'wina loko minghena tinhlengeletanu ta n'wina; mhaka leyi, hi tlhelo rin'wana nikholwa lesvaku yingava yona. (Svatwala, mintlawa yifanele kuva kona xikarhi ka n'wina, lesvaku lava vanga va ntiyiso xikarhi ka n'wina na vona vavonaka.) Kutani-ke, loko minghena tinhlengeletanu ta n'wina, lexi mixijaka axahali Xilalelo xa Hosi; hikuva loko mita kujeni, mun'wana ni mun'wana atsutsumela kuja svakuja sva yena, kutani van'wana vakiyela, kasi van'wana vanwa vakondza vadakwa. Xana ami na makaya yojela ni kunwela ka wona ke? Xana mitasandza kereke ya Xikwembu, mikhomisa svisiwana tingana ke? Nitakuyini ka n'wina? Xana ningamikhensa ke? Ihim, mhakeni leyi animikhensi. Timhaka leti nitihundziseleke ka n'wina hi leti tihumeke ka Hosi hi xiviri xa yona: Hi lesvaku, hi vusiku lebzi anyiketiweke ha bzona, Hosi Yesu atekile xinkwa, akhensa, axikhema, aku: “Lesvi i miri wa mina, lowunyiketiwaka hikolaho ka n'wina; yendlani svosvo hi kuniyanakanya.” Hi ndlela yoleyo, ndzhaku ka loko valalelile, ateka ni ndzheko, aku: “Ndzheko lowu i ntwananu lowumpsha lowuyendliwaka hi ngati ya mina. Minkama hinkwayu loko minwela ka wona, sviyendleni hi kuniyanakanya.” Hikuva minkama hinkwayu loko mija xinkwa lexi, ni loko minwela ndzhekweni lowu, mitwalisa rifu ra Hosi, yikondza yivuya. Hikolaho, mun'wana ni mun'wana lweyi ajaka xinkwa lexi, kumbe lweyi anwelaka ndzhekweni wa Hosi hi ndlela leyingalulamangiki, atava ni nandzu wojohela miri ni ngati ya Hosi. Munhu afanele kurhanga hi kutikamba, kuva kona angataja xinkwa lexi ni kunwela ndzhekweni lowu; hikuva loko munhu aja ni kunwa na ali karhi angativisisanga svinene ta miri wa Hosi, aja ni kunwa kuyavanyisiwa ka yena. Hikolaho, ku ni lavanyingi xikarhi ka n'wina lavanga ni gome ni lava vavabzaka, na svona, van'wana vafile. Loko onge hatikambisisa, ahingatayavanyisiwa; kambe lesvi hiyavanyisiwaka hi Hosi, holayiwa lesvaku hitakala hingayavanyiseliwi makumu svin'we ni vanhu va misava. Hikolaho, vamakwerhu, loko mihlengeletana akuva mija Xilalelo, yimelanani; loko mun'wana ali ni ndlala, aaje kaya, lesvaku kuhlengeletana ka n'wina kungamuyisi kuyavanyisiweni. Loko tili timhaka tin'wana, nitatamilerisa tona loko nitata. Amhakeni ya tinyiko ta Moya, vamakwerhu, nilava lesvaku mitiva lesvinga svona. Masvitiva lesvaku, loko mahali vamatiko, amiyisiwa hala ni hala, mikokeliwa ka svikwembu sva hava lesvingavulavuliki. Hikolaho, namitsundzuxa nili, munhu lweyi afambisiwaka hi Moya wa Xikwembu, angakala angavuli aku: “Yesu aarhukiwe!” Nasvona aku na munhu lweyi angavulaka aku: “Yesu i Hosi!” Loko angali lweyi afambisiwaka hi Moya Lowokwetsima. Ku ni tinyiko ta tinxakaxaka ta moya, kambe Moya wakona i wun'we; ku ni tindlela ta tinxakaxaka totirhela vanhu, kambe Hosi yakona i yin'we; matimba ya Xikwembu matirha hi tindlela ta tinxakaxaka, kambe i Xikwembu xin'we lexitirhaka hinkwasvu ka vanhu hinkwavu. Munhu mun'wana ni mun'wana apfuleteliwa svin'wana hi Moya, lesvaku svitapfuna hinkwavu. Mun'we anyikiwa hi Moya kuvulavula sva vutlhari, mun'wana anyikiwa kuvulavula sva vutivi, hi kuya hi Moya wolowo; mun'wana anyikiwa kupfumela hi Moya lowu, mun'wana kambe akuma nyiko ya kuhanyisa vanhu hi Moya wo wa wun'we; mun'wana anyikiwa matimba ya kuyendla mahlori, mun'wana matimba ya kuprofeta; mun'wana akota kuvona kuhambana mahlweni ka mimoya; mun'wana anyikiwa kuvulavula hi tindzimi letingativiwiki ta tinxakaxaka, mun'wana matimba ya kuhlamusela tindzimi leti. Kambe hinkwasvu lesvi i ntirho wa Moya wowawun'we, lowuyavelaka tinyiko tohambana ka munhu mun'wana ni mun'wana hilaha wurhandzaka hakona. Kutani-ke, miri i wun'we, hambilesvi wunga ni svirho lesvinyingi; na svona svirho, akutaleni ka svona, sviyendla miri wun'we ntsena. Kutani na wona miri wa Kriste, wutano. Hinkwerhu, hambi hili Vayuda kumbe Vagirika, svikarawa kumbe lavatifumaka, hihundzukile miri wun'we, hi kutsakamisiwa ka hina Moyeni wun'we; hinkwerhu hinyikiwile kunwa Moya wun'we ntsena. Miri awu na xirho xin'we ntsena, kambe wu ni svirho lesvinyingi. Loko nenge wungaku: “Lesvi ningaliki voko, ani wa miri”, xana hakunene awungavi wa miri, hambi loko wuvulavulisa lesvi ke? Ihim! Ni loko ndleve yingaku: “Lesvi ningaliki tihlo, ani wa miri”, xana hakunene ayingavi ya miri, hambi loko yivulavulisa lesvi ke? Ihim! Loko miri hinkwawu awuli tihlo, kutwa ka tindleve akutava kwihi ke? Loko miri hinkwawu awuli ndleve, kunun'huta ka tinhompfu akutava kwihi ke? Kambe hilaha svinga hakona, Xikwembu xivekile svirho mirini, xin'wana ni xin'wana hilaha xirhandzeke hakona. Loko svirho hinkwasvu asviyendla xirho xin'we, miri awutava kwihi ke? Hilaha svinga hakona, svirho i svinyingi, kambe miri i wun'we. Tihlo ringakala ringabzeli voko riku: “Ani na mhaka na wena.” Kumbe nhloko yingakala yingabzeli milenge, yiku: “Ani na mhaka na n'wina.” Ihim! Kambe svirho sva miri lesvivonekaka na svitsanile kutlula svin'wana, hi svona lesvi svilavekaka. Svirho sva miri lesvi hipimisaka lesvaku asvi na risima rikulu, hi svona lesvi hisvinyikaka risima lerikulu; lesvi sva tingana, hi svona lesvi hisvifunengetaka hi risima ngopfu. Kasi svirho sva hina lesvidzunekaka, svona asvilavi hinkwasvu lesvi. Kambe Xikwembu xivumbile miri, na xili karhi xinyika kudzuneka lokukulu ka svirho lesvi asvipfumala kudzuneka. Xiyendle lesvaku kungavi na kuyavana mirini, kambe svirho hinkwasvu svitirhelana. Loko xirho xin'we xitwa kuvava, svirho hinkwasvu svitwa kuvava svin'we na xona; ni loko xirho xin'wana xidzunisiwa, svirho hinkwasvu svitsaka na xona. Xilesvo-ke, n'wina mi miri wa Kriste; kutani mun'wana ni mun'wana wa n'wina i xirho xa wona. Kutani kusunguleni Xikwembu xivekile vapostola kerekeni, ndzhaku kuta vaprofeta, kutlhantama vajondzisi; kutani kuta lavayendlaka mahlori, ni lava vanga ni nyiko ya kuhanyisa vanhu, ni lavatirhaka svopfuna van'wana, ni lavanyikiweke kufambisa mintirho, ni kuvulavula hi tindzimi letingativiwiki ta tinxakaxaka. Xana hinkwavu i vapostola ke? Xana hinkwavu i vaprofeta ke? Xana hinkwavu i vajondzisi ke? Xana hinkwavu hi lavayendlaka mahlori ke, kumbe lava vanga ni nyiko yohanyisa, kumbe lavavulavulaka hi tindzimi letingativiwiki ke? Xana hinkwavu hi lavahlamuselaka tindzimi leti ke? Chivirikelani tinyiko ta Moya letitlulaka tin'wana hi kusaseka. Kutani svosvi nitamikomba ndlela leyi yisasekeke kutlulisa hinkwatu. Hambi ningavulavula tindzimi ta vanhu ni ta tintsumi, kambe ningali na rirhandzu, nifana ni nsimbi leyipfumaka, kumbe sviphambati sva nsimbi loko svibananisiwa. Ni loko kumbe nili ni nyiko ya kuprofeta, nili ni kutwisisa svihundla hinkwasvu ni vutivi hinkwabzu, ni loko nili ni kupfumela hinkwaku, nikondza nikunula tintshava, kambe ningali na rirhandzu, ani nchumu. Hambi ningateka rifuwo ra mina hinkwarhu ninyika vanhu, ni loko ninganyiketa miri wa mina lesvaku wuhisiwa, kambe ningali na rirhandzu, asvinipfuni nchumu. Rirhandzu ratiyisela, nasvona ri ni timpsalu; rirhandzu ari na mavondzo, aritinyungubzisi, aritikulisi; rirhandzu arihanyi hi ndlela yosoleka, aritilaveli lesvi svinga sva rona ntsena, ari na xitsukutswana; rirhandzu ari na xiveketela xa lesvobiha; rirhandzu aritsakeli kuhomboloka, kambe ritsakisiwa hi ntiyiso. Riyamukela hinkwasvu, ripfumela hinkwasvu, rilangutela hinkwasvu, ritiyisela ka hinkwasvu. Rirhandzu ariheli ni siku ni rin'we. Loko bzili vuprofeta bzitahundza; na tona tindzimi titahela; hambi bzili bzona vutivi bzitahundza. Hikuva vutivi bza hina abzihetisekanga, ni matimba ya hina ya kuprofeta amahetisekanga; kambe loko kutafika lesvihetisekeke, lesvi svingahetisekangiki svitahundza. Loko nahali xihlangi, anivulavula kufana ni xihlangi, nititwa kufana ni xihlangi; kambe svosvi ningahundzuka wanuna, nitshikile sva vuhlangi. Svosvi hivona hi riphume tani hi le ka xivonivoni; kambe nkameni wolowo, hitalangutana hi mahlo; svosvi vutivi bza mina abzihetisekanga, kambe nkameni wolowo nitativa hi kuhetiseka, tani hi lesvi Xikwembu na xona xinitivaka hi kuhetiseka. Svosvi-ke, kutiyile svilo svinharhu: Kupfumela, kulangutela ni rirhandzu; kambe lexikulu ngopfu ka svona i rirhandzu. Tikarhateleni kuva ni rirhandzu, kambe nasvona michivirikela tinyiko ta Moya, ngopfungopfu nyiko ya kuprofeta. Lweyi avulavulaka hi ririmi leringativiwiki, angavulavuli ni vanhu, kambe avulavula ni Xikwembu, hikuva aku na munhu lweyi amutwisisaka; avulavula svihundla hi kupfuleteliwa. Kasi lweyi aprofetaka, abzela vanhu marito lawa mayakisaka, ni lawa matiyisaka, ni lawa machavelelaka. Lweyi avulavulaka hi ririmi leringatwisisiwiki watiyaka yena n'winyi; kasi lweyi aprofetaka ayakisa nhlengeletanu. Nasvilava lesvaku hinkwenu mivulavula hi tindzimi letingatwisisiwiki, kambe ngopfungopfu nilava lesvaku miprofeta. Lweyi aprofetaka, atlula lweyi avulavulaka hi tindzimi (handle ka loko kuli ni kuhlamusela, lesvaku nhlengeletanu yitakuma lesvi sviyiyakisaka). Hikolaho-ke, vamakwerhu, loko nita ka n'wina, nifika nivulavula hi tindzimi letingatwisisiwiki, nitamipfunisa kuyini xana? Aningamipfuni, handle ka loko ningatirhisa mavulavulela lawa mahlavutelaka svin'wana, kumbe ya vutivi, kumbe ya kuprofeta, kumbe ya kujondzisa. Svifana ni ka svilo lesvingahefemuliki, kufana ni nanga kumbe haripa: Loko svichayiwa kutani svingahumesi mimpfumawulu ya kuhambanahambana, xana risimu ra svona ringativiwa hi ndlela yihi, lesvaku hi leroyini ke? Ni loko mhalamhala yingapfumi svinene, i mani lweyi angatahloma matlhari ya nyimpi ke? Svitano na n'wina, loko mivulavula hi ririmi leringativiwiki. Handle ka loko mihumesa rito leritwalaka, xana vanhu vatativisa kuyini lesvi misvivulaka ke? Mitava mivulavula lesvihahaka ni moya. Natshemba lesvaku ku ni tinxakaxaka ta mimpfumawulu leyotala ngopfu laha misaveni; kambe aku na ni wun'we wa yona lowu wungahava lexi wuhlayaka xona. Kutani loko ningativi lesvaku mpfumawulu wakona wuhlaya yini, nitava munhu wa le handle ka lweyi avulavulaka; na yena munhu muvulavuli atava munhu wa le handle ka mina. Svitano na n'wina: Lesvi minavelaka kuchivirikela tinyiko ta Moya, yendlani hi matimba kutirhisa letipfunaka kuyaka svirho sva nhlengeletanu. Hikolaho, lweyi avulavulaka hi ririmi leringativiwiki, aakhongele lesvaku akota kurihlamusela. Hikuva loko nikhongela hi ririmi lero, i moya wa mina lowukhongelaka, kambe miyanakanyu ya mina ayitirhi nchumu. Loko svili lesvo, kungayendliwa yini xana? Nifanele kukhongela hi moya wa mina, kambe nakona nifanele kukhongela hi miyanakanyu ya mina. Nifanele kuyimbelela hi moya wa mina, kambe nakona nifanele kuyimbelela hi miyanakanyu ya mina. Hikuva loko ukhensa hi moya wa wena na uli wexe, xana munhu lweyi anga nhlengeletanweni atavulisa kuyini “Amen!” Kuhlamula xikhongelo xa wena xa kukhensa, lesvi angativiki lexi uxihlayaka ke? Xikhongelo xa wena xokhensa xingava lexinene ngopfu, kambe ka munhu lweyi mun'wana, aximuyakanga. Nikhensa Xikwembu, hikuva nivulavula hi tindzimi letingativiwiki kutlula n'wina hinkwenu; kambe, nhlengeletanweni, nitsakela kuvula marito ya ntlhanu hi kutirhisa miyanakanyu ya mina, lesvaku nitajondzisa ni lava van'wana, kutlula kuvulavula marito ya madzanadzana hi ririmi leringativiwiki. Vamakwerhu, mingafaneni ni vatsongwana kuyanakanyeni ka n'wina. Loko kuli ka lesvobiha mifanele kufana ni svihlangi kambe miva lavakuleke kuyanakanyeni. Kutsaliwile Nawini, vaku: “Nitavulavula ni vanhu lava hi milomo ya vanhu va tindzimi tin'wana ni vamatiko man'wana; kambe hambi svilitano, avanganiyingisi, kuvula Hosi.” Hikolaho, kuvulavula hi tindzimi letingativiwiki i xikombiso kungali ka vapfumeli, kambe ka lava vangaliki vapfumeli; kasi kuprofeta i xikombiso, kungali ka lava vangaliki vapfumeli, kambe ka vapfumeli. Loko nhlengeletanu hinkwayu yita ndhawini yin'we, ni loko hinkwavu vavulavula hi tindzimi letingativiwiki, kutani kutshuka kunghena vanhu lava vangaliki vapfumeli, xana avangavuli vaku: “Mi ni rihuhe, ke?” Kambe loko mun'wana ni mun'wana aprofeta, kutani kutanghena munhu lweyi angaliki mupfumeli, marito ya hinkwavu matamukholwisa lesvaku i mujohi, kutani hinkwavu vamuyavanyisa; svihundla sva mbilu ya yena svitahumelela rivaleni, kutani atawa hi mombo, agandzela Xikwembu, kutani atavula aku: “Hakunene Xikwembu xi kona la xikarhi ka n'wina.” Vamakwerhu, loko svili lesvo kungayendliwa yini? Loko mihlengeletana, mun'we angava ni Tipisalma, mun'wana angava ni jondzo, kumbe mhaka leyi akombisiweke yona hi Xikwembu, kumbe nyiko yovulavula hi ririmi leringativiwiki, kumbe nyiko yohlamusela lesvivulavuliweke; kambe hinkwasvu asvive lesviyakisaka nhlengeletanu. Loko kuvulavuliwa hi ririmi leringativiwiki, akuvulavule vambirhi kumbe vanharhu ntsena, sviyima kolaho; avanyikane nkama, kuli ni lweyi ahlamuselaka. Loko kungali na muhlamuseli, lweyi alavaka kuvulavula hi tindzimi letingativiwiki aamiyele angavulavuli nhlengeletanweni; aavulavulele mbilwini ya yena, ni kuvulavula ni Xikwembu. Loko vali vaprofeta akuvulavule vambirhi kumbe vanharhu, kutani van'wana avakambisise marito ya vaprofeta lava. Loko mun'we ali kuvulavuleni, kutani mun'wanyana wa lava vanga kona akombisiwa mhaka hi Xikwembu, lweyi avulavulaka aamiyele. Hinkwenu mitawukuma nkama wa kuprofeta, mun'wana ni mun'wana wa n'wina, lesvaku hinkwavu vatajondza, ni lesvaku hinkwavu vatatiyisiwa. Amimoya ya vaprofeta yifumiwa hi vaprofeta. Hikuva Xikwembu ahi Xikwembu xa mpfilumpfilu, kambe i xa kurhula. Lesvi svinga ntolovelo tikerekeni hinkwatu ta vahlawuliwa va Xikwembu, hi lesvaku vavasati vafanele kumiyela tinhlengeletanwini, hikuva avapfumeleliwi kuvulavula; vavasati vafanele kutitsongahata, hilaha Nawu na wona wuvulaka hakona. Loko valava kutiva svin'wana, avavutise vanuna va vona kaya, hikuva svikhomisa tingana loko wansati avulavula nhlengeletanweni. Mili yini? Xana Rito ra Xikwembu ritile hi le ka n'wina, kumbe riyotela n'wina ntsena ke? Loko mun'we ativona na ali muprofeta, kumbe ali lweyi anga ni tinyiko ta Moya, aative lesvaku timhaka leti nimitsalelaka tona, i milawu ya Hosi. Loko mun'we angali na mhaka na svona, na n'wina mingavi na mhaka na yena. Hikolaho vamakwerhu, chivirikelani kuva ni nyiko ya kuprofeta, nasvona mingasiveleni lavavulavulaka hi tindzimi letingatwisisiwiki. Ntsena, hinkwasvu asviyendliwe khwatsi ni hi nawu wakona. Svosvi vamakwerhu, nilava kumitsundzuxa hi ta Evhangeli leyi ni yipaluxeke ka n'wina, miyiyamukela miva mitiyisela; nasvona matiyisela ka yona; mikarhi miponisiwa hi yona, loko kunene mihlayisa vumboni bza mina ka yona, ni loko kupfumela ka n'wina, ka yona kungavanga ka hava. Nimihundzisele lesvi na mina nisviyamukeleke, svinga lesvikulu ka hinkwasvu: Hi lesvaku Yesu afele svijoho sva hina, hilaha Matsalwa mavulaka hakona; ni lesvaku alahliwile sirheni ava apfuxiwa kufeni hi siku ra vunharhu, hilaha Matsalwa mavulaka hakona; ni lesvaku ahumelele ka Kefasi, ndzhaku ahumelela ka lava vakhume na vambirhi. Atlhele ahumelela hi nkama wun'we ka vamakwavu lavatlulaka ntlhanu wa madzana (500); lavanyingi va vona vahali kona ni svosvi, kambe van'wana se vayetlele. Ndzhaku ka svosvo, ahumelele ka Yakobe, atlhela ahumelela ka vapostola hinkwavu. Kuheteleleni ka lesvi hinkwasvu, ahumelelile ni ka mina, mina nifanaka ni n'wana wovelekiwa nkama wungasifika. Ni lwentsongo ka vapostola, asvinifanelanga kuhlayiwa mupostola, hikuva nixanisile kereke ya Xikwembu. Kambe ni lesvi ningaxisvona hi timpsalu ta Xikwembu, kutani timpsalu takona, leti Xikwembu xinikombeke tona, atiwelanga hansi. Ntiyiso wakona hi lesvaku nitirhile ngopfu kuvatlula hinkwavu; hambi svilitano, akutirhanga mina, kambe kutirhile timpsalu ta Xikwembu leti tinga ka mina. Hikolaho, hambi ali mina, hambi ali vona, mahungu ya hina hi wolawo, kutani hi wona lawa mimapfumeleke. Loko kujondzisiwa lesvaku Kriste apfuxiwile kufeni, xana sviyendlisa kuyini lesvaku van'wana xikarhi ka n'wina vaku vafi avapfuki? Loko vafi vangapfuki, Kriste hi xiviri na yena angapfuxiwanga. Kutani loko Kriste angapfuxiwanga kufeni, kujondzisa ka hina akuhlayi nchumu ni kupfumela ka n'wina i ka hava. Kuhundzisa lesvo: Hingakumiwa na hili lavanyikeke vumboni bza mavunhwa hi ta Xikwembu, hikuva hivulile nahitiyisa lesvaku i Xikwembu lexipfuxeke Kriste kufeni, kasi aximupfuxanga, loko hakunene vafi vangapfuxiwi kufeni. Hikuva loko vafi vangapfuxiwi, Kriste na yena angapfuxiwanga. Kutani loko Kriste angapfuxiwanga, kupfumela ka n'wina i ka hava, kutani mahali svijohweni sva n'wina. Kutani-ke, na vona lavafeleke ka Kriste valovele makumu. Loko ka Kriste hingalanguteli svin'wana, kambe holangutela sva vutomi lebzi ntsena, hi vanhu lavanga ni khombo leritlulaka ra vanhu hinkwavu. Kambe lexitiyeke hi lesvaku Kriste apfuxiwile xikarhi ka vafi. Hi svona lesvitshembisaka lesvaku lava vafeke na vona vatapfuxiwa. Hikuva lesvi rifu ringavangiwa hi munhu mun'we, kupfuka ka vafi nakona kutisiwile hi munhu mun'we. Kukotisa lesvi hinkwavu vafaka hikolaho ka Adamu, hi ndlela yoleyo, hinkwavu vatatlhela vapfuxiwa hikolaho ka Kriste. Kambe mun'wana ni mun'wana atapfuxiwa hi nkama wa yena: Worhanga i Kriste xinga xo xitshembiso; kutani loko Kriste ata, lava vangava va yena vatalandza. Ndzhaku, kutafika makumu, siku leri anyiketaka Mfumu ka Xikwembu Tatana, loko atava ahelisile vuhosi hinkwabzu, ni kufuma hinkwaku, ni matimba hinkwawu. Hikuva Kriste afanele kufuma, kukondza Xikwembu xiveka valala hinkwavu hansi ka minkondzo ya yena. Kutani nala lweyi wohetelela lweyi angatahelisiwa i rifu; tani hi kuvula ka Matsalwa: “Xikwembu xivekile hinkwasvu hansi ka minkondzo ya yena.” Kutani loko Matsalwa mahlaya lesvaku: “Hinkwasvu svivekiwile hansi ka yena”, svatwala lesvaku akukatsiwi Xikwembu, hikuva hi xona xivekeke svilo hinkwasvu hansi ka Kriste. Loko hinkwasvu svivekiwile hansi ka yena N'wana, na yena hi xiviri atavekiwa hansi ka Xikwembu lexi xivekeke hinkwasvu hansi ka yena, lesvaku Xikwembu xiva lexifumaka henhla ka hinkwasvunkwasvu. Xana vanhu valava yini, loko vatsakamisiwa hikolaho ka lavafeke ke? Loko vafi vangapfuki nikutsongo, svipfuna yini kutsakamisiwa hikolawo ka vona ke? Na hina, xana svihipfuna yini kutiyisela makhombzeni minkama hinkwayu ke? Hakunene, masiku hinkwawu nilangutane ni rifu! Nivula na nitiyisile vamakwerhu, hikuva nitidzunisa hi n'wina hikolaho ka Yesu Kriste Hosi ya hina. Loko ongi nilwile ni svivandzana le Efesa na nili munhu ntsena lweyi afaka, asvitava svinipfunile yini ke? Loko vafi vangapfuxiwi, “ahijeni hinwa, hikuva mundzuku hitafa!”, hi kuvula ka Matsalwa. Mingapfumeleni kuxengiwa: “Vanghanu lava vobiha vawonha mikhuva leyinene.” Xalamukani, mitshika kujoha. Van'wana va n'wina avativi Xikwembu; nivula lesvi kumikhomisa tingana. Kumbe mun'wana ataku: “Vafi vapfuxiwa hi mukhuva wihi ke? Vatava ni miri wa lixaka muni ke?” I kuvutisa ka xihunguki koloko! Lexi wena uxibzalaka, xifanele kurhanga xifa, loko xilava kutlhela xihanya. Lexi uxibzalaka, axisiva miri wa lexi xingatahuma, kambe i ndzhoho ntsena leyikhumuzeliweke; kumbe i ya mavele, kumbe i ya timbewu tin'wana. Xikwembu xinyika ndzhoho leyi amiri hilaha xirhandzaka hakona; xinyika mbewu yin'wana ni yin'wana miri lowu wunga wa yona. Nyama hinkwayu ayifanani; nyama ya vanhu i ya rixaka rin'wana; ya sviharhi i yin'wana, ni ya tinyanyana i yin'wana, ni ya tihlampfi i yin'wana. Ku ni miri wa le tilweni, ku ni miri wa laha misaveni; kambe miri wa le tilweni wu ni kusaseka kun'wana, wa laha misaveni wu ni kun'wana. Jambu ri ni kusaseka kun'wana, ni n'weti yi ni kun'wana, ni tinyeleti ti ni kun'wana; nyeleti yin'we yitlula yin'wanyana hi kuphatima. Kupfuka ka vafi ku tano nakona: Kufana ni mbewu, miri wulahliwa na wuli lowuhantlaka kuwonheka, wupfuxiwa na wuli lowu wungahawonhekiki; wulahliwa na wuli wosoleka, wupfuxiwa na wuli ni matimba; wulahliwa na wuhelile matimba, wupfuxiwa na wutele matimba; wulahliwa na wuli miri wa nyama, wupfuxiwa na wuli miri wa moya. Ku ni miri wa nyama, kambe wa moya na wona wu kona. Hikolaho kutsaliwile, vaku: “Munhu wa kusungula Adamu, ayendliwile xivumbiwa lexihanyaka.” Kambe Adamu lweyi wohetelela ayendliwile moya lowuhanyisaka. Hambi svilitano, lesvirhangaka ahi svona sva moya, i sva ntumbuluku, kutani ndzhaku kuta sva moya. Munhu wa kusungula ahumile misaveni, na ali lweyi ayendliweke hi ntshuri wa misava; munhu lweyi wa vumbirhi ahuma tilweni. Vanhu lavavumbiweke hi ntshuri vafana ni munhu lweyi wa ntshuri; ni vanhu va le tilweni vafana ni munhu lweyi wa le tilweni. Kukotisa lesvi hingayambala xivumbeko xa munhu wa ntshuri, hi ndlela yoleyo hitayambala xivumbeko xa munhu wa le tilweni. Lesvi nihlayaka svona, vamakwerhu, hi lesvi: Nyama ni ngati svingakala svingaji ndzhaka ya Mfumu wa Xikwembu, nasvona lesvihantlaka kuwonheka svingakala svingaji ndzhaka ya lesvi svingawonhekiki. Yingisani, nimibzela xihundla: Ahingafi hinkwerhu, kambe hinkwerhu hitahundzuliwa, hi nkamanyana, hi kutsopeta ka tihlo, kuyibeni ka mhalamhala ya makumu; mhalamhala yitatwala, kutani vafi vatapfuxiwa vahambaniseliwa makumu ni kuwonheka, kutani hina hitahundzuliwa. Hikuva lexibolaka xifanele kufunengela lexingaboliki, ni lexi xifaka xifanele kufunengela lexingafiki. Kutani loko lexibolaka xitava xifunengele lexingaboliki, ni loko lexifaka xitava xifunengele lexingafiki, hi kona rito leritsaliweke ringatahetiseka, leringe: “Rifu rimitiwile, rihluliwele makumu.” “Wena rifu, kuhlula ka wena ku kwihi ke? Wena rifu, ndzhombo wa wena wu kwihi ke?” Ndzhombo wa rifu i xijoho, kutani matimba ya xijoho i Nawu. Kambe akukhensiwe Xikwembu lexi xihinyikaka kuhlula hi Hosi ya hina Yesu Kriste. Hikolaho, vamakwerhu lavarhandzekaka, tiyani svinene mingatsekatsekeni; tiyiselani svinene, mitirhela Hosi masiku hinkwawu, na mili karhi misvitiva lesvaku mintirho ya n'wina Hosini ayingaweli hansi. Loko wuli nhlengo lowuhumeseliwaka vahlawuliwa va Xikwembu, na n'wina mitayendla hilaha ni leleteke tikereke ta Galatiya hakona. Hi siku rosungula ra vhiki, mun'wana ni mun'wana wa n'wina aaveke xanchumu hi tlhelo, ka lesvi asvibindzuliseke, lesvaku nhlengo wungahayendliwi siku leri nitaka. Hlawulani van'we xikarhi ka n'wina, kutani loko nifika, nitavanyika mapapela, nivarhuma lesvaku vaheleketa nyiko ya n'wina Yerusalema. Loko svifanela lesvaku na mina niya kona, nitafamba na vona. Nitata le ka n'wina, kambe nitahundza hi le Makedoniya, hikuva ni ni makungu ya kuya kona. Kumbexana nitatshama na n'wina, hambi kuli kuheta vuxika hinkwabzu na n'wina, akuva minipfuna kuhundzela kun'wana lomu ninganavelaka kuya kona. Hikuva svosvi anilavi kumiyendzela na nili muhundzi wa ndlela ntsena; ni ni kutshemba ka lesvaku nitatshama nkama woleha ka n'wina, loko Hosi yisvirhandza. Nahatatshama kola Efesa kufika nkama wa Pentekoxta. Nipfuleliwe xipfalu xa ntirho lowu wosaseka, kambe lava vaniyalelaka vatele. Loko Timotewu ata, vonani lesvaku atitwa na atshunxekile loko ali ka n'wina; atirha ntirho wa Hosi kufana na mina. Loko svilitano, kungavi na munhu lweyi amusolaka; mupfuneni kuhundzela mahlweni hi kurhula, atavuya laha ka mina; mina ni vamakwerhu hi mulangutelile. Loko ali makwerhu Apolosi, nimukhongotele ngopfu lesvaku ata le ka n'wina ni vamakwerhu; aangasvilavi ngopfu kuta svosvi, kambe atata siku leri angatasvikota. Hitekani, mitiya svinene kupfumeleni, miva vavanuna, mitinyika matimba. Hinkwasvu lesvi misviyendlaka, asviyendliwe hi rirhandzu. Nahali ni xitsundzuxu, vamakwerhu: Mavativa vanhu va ka Stefanasi, ni lesvaku hi vona vapfumeli lavorhanga lavahumeke tikweni ra Akaya, ni lesvaku vatinyiketile kutirhela vahlawuliwa va Xikwembu. Namikhongotela svinene kutiveka hansi ka vanhu lava, ni ka mun'wana ni mun'wana lweyi atinyiketeke kutirha ntirho wolowo, atikarhatela wona. Nitsakile ngopfu hi kuta ka Stefanasi, na Fortunato, na Akayiko, hikuva vanitiselile lesvi n'wina mitsandzekeke kusviyendla, hikuva mili kule. Vanirhulise mbilu, na n'wina vamirhulise timbilu hi kuyendla svosvo. Vanhu lavotano, vafanela kukhensiwa! Tikereke ta le Aziya tamirungula. Akila na Prisika, svin'we ni kereke leyihlengeletanaka muntini wa vona, vamirungula svinene Hosini. Vamakwerhu hinkwavu vamirungula. Xewetanani hi kun'quntana kokwetsima. Hi xiyandla xa mina nitsala lesvi nili; “Namirungula. Hi mina Pawulo.” Loko munhu angarhandzi Hosi, aave xirhukweni! “Maranatha! Tana, Hosi!” Timpsalu ta Hosi Yesu ative na n'wina! Rirhandzu ra mina arive na n'wina hinkwenu, ka Yesu Kriste. Mina Pawulo, mupostola wa Kriste Yesu hi kurhandza ka Xikwembu, na Timotewu makwerhu, ka kereke ya Xikwembu leyinga Korinto, ni vakwetsimi va Xikwembu hinkwavu lavanga tikweni hinkwaru ra Akaya, hili: Timpsalu ni kurhula asvive na n'wina, svihuma ka Xikwembu Tatana wa hina, ni le ka Hosi Yesu Kriste! Akukhensiwe Xikwembu Tatana wa Hosi ya hina Yesu Kriste, Tatana wa timpsalu, Xikwembu lexi kuchavelela hinkwaku kuhumaka ka xona; xahichavelela maxangwini hinkwawu ya hina; hi kolaho, na hina hikota kuchavelela lavanga maxangwini ya tinxakaxaka, hivachavelela hi kuchavelela loku na hina hinyikiweke kona hi Xikwembu. Hikuva kukotisa lesvi mahlomulu ya Kriste mahitaleleke, nakona ha Kriste hikuma kuchaveleliwa hi ntalu. Hikolaho, loko hixaniseka, sviyendlela lesvaku n'wina miva ni kuchaveleliwa ni kuponisiwa; loko hichaveleliwa, sviyendlela lesvaku na n'wina miva ni kuchaveleliwa, kutani minyikiwa matimba yotiyisela mahlomulweni lawa mafanaka ni mahlomulu lawa mahixanisaka. Kutani kulangutela ka hina henhla ka n'wina kutiyile svinene, hikuva hitiva lesvaku, lesvi miyaveliwaka kuxaniseka kun'we na hina, mitayaveliwa nakona kuchaveleliwa loku hinga nakona. Vamakwerhu, hilava lesvaku mitiva kuxaniseka loku kuhihumeleleke tikweni ra Aziya. Hitshikeleliwile ngopfu svinene, kutlula matimba ya hina, kukondza hihela mbilu, hingahatshembi lesvaku hitahanya. Hakunene, ahititwa na hili lavayavanyiseliweke rifu; lesvi sviyendlile lesvaku hingahatitshembi, kambe hiveka kutshemba ka hina ka Xikwembu lexipfuxaka vafi. Xihiponisile makhombzeni lawa yotanu lawa mavangaka rifu, kutani xitayengeta xihiponisa ka wona. Hivekile kutshemba ka hina ka xona, kutani xahatahiponisa, loko na n'wina mihipfuna hi kuhikhongelela, kutani kutava ni lavotala lavangatakhensa Xikwembu hikolaho ka hina, hi mhaka ya ntirho wa xona wa timpsalu lowu xihiyendleleke wona. Kutidzunisa ka hina hi loku: Ripfalu ra hina rihibzela lesvaku hihanyile xikarhi ka vanhu hi kululama ni kutenga loku kuhumaka ka Xikwembu, ngopfungopfu loko hitirhisana na n'wina. Hihanyile kungali hi vutlhari bza misava leyi, kambe hi timpsalu ta Xikwembu. Hikuva ahimitsaleli svin'wana, loko svingali lesvi mikotaka kusvihlaya ni kusvitwisisa. Kutani natshemba lesvaku mitatwisisa svinene svilo lesvi, hambi loko namuntlha mingasvitwisisi ngopfu; hi kolaho, mitatidzunisa hi hina sikwini ra Hosi Yesu, hilaha na hina hingatatidzunisa hakona hi n'wina. Hi kutiva kutiya ka svona svosvo, aninavelile kurhanga ni ta ka n'wina, lesvaku mitakateka kambirhi; aninavelile kumiyendzela loko ni ya Makedoniya, ni kutlhela nimiyendzela loko nivuya hi kona, lesvaku mitanipfuna riyendzweni ra mina roya Yudeya. Xana anotlanga loko ninavelile kuyendla svosvo ke? Xana aniyendla makungu ya mina kufana ni vanhu van'wana, niku: “Ina, ina!” “Ihim, ihim!” hi nomo wun'we ke? Kukotisa lesvi Xikwembu xitshembekaka, xitshembiso xa hina ka n'wina axivanga “ina na ihim!” hikuva N'wana wa Xikwembu Yesu Kriste lweyi himupaluxeke xikarhi ka n'wina, mina na Silvhano na Timotewu, aangali “ina na ihim!” Kambe ka yena kuvuliwa “ina!” masiku hinkwawu. Hikuva, ka yena Xikwembu xitiyisa kutshembisa ka xona, xiku: “Ina!” Hikolaho hivulaka hiku: “Amen!” hi mhaka ya yena, kudzuniseni ka Xikwembu. Kambe i Xikwembu lexinyikaka hina na n'wina kutshemba lokutiyeke ka Kriste; hi xona lexihirhwexeke ntirho lowu. Xihifungile, xivekile Moya wa xona timbilwini ta hina, wuva xitiyiso xa lesvi svahataka. Nivitana Xikwembu kuva mboni ya mina hikuva xitiva mbilu ya mina: Akuli kumitsetselela, loko ningatlhelanga nita Korinto. Ahi lesvaku hina hifuma kupfumela ka n'wina, kambe hitirhisana na n'wina lesvaku mitakuma kutsaka, hikuva mitiyile kupfumeleni. Hikolaho nitibohile lesvaku aningati ka n'wina nitisa timhaka leti timivavisaka timbilu, hikuva loko nimitlhava timbilu, i vamani lavangatanisusa gome loko vangali volavo nivatlhaveke timbilu xana? Leyi hi yona mhaka leyiyendleke lesvaku nimitsalela: Hi lesvaku loko nitava nifikile, ningatlhaviwi mbilu hi vanhu lava avatafanela kunitsakisa; hikuva namitshemba hinkwenu; nitiva lesvaku loko nitsakile, na n'wina hinkwenu mitsakile. Nimitsalelile, na nitwa kuvava ngopfu, nikuvaviseka svinene, ni hi kurila; akungali kumitlhava timbilu, kambe akuli kuyendlela lesvaku mitiva rirhandzu lerikulu ngopfu leri nimirhandzaka ha rona. Loko kuli ni lweyi avangeke lesvitlhavaka timbilu, angatlhavanga mina, kambe hi tlhelo rin'wana, ningaku (hambi loko ningalavi kusvikulisa ngopfu): atlhavile n'wina hinkwenu. Lesvi munhu wotanu angalayiwa hi lavotala va n'wina hi ndlela leyi, sviringanile; svosvi amitafanela kumurivalela, mimuchavelela, lesvaku angahluliwi hi gome kutlula mpimo. Hikolaho, namikhongotela lesvaku mitlhela mimukomba rirhandzu. Hikuva loko nimitsalelile papela, akuli kumiringa, ni kuvona hilaha miniyingisaka hakona ka svilo hinkwasvu. Munhu mun'wana ni mun'wana lweyi mimurivalelaka, namurivalela na mina; hikuva lexi ningaxirivalela, loko hakunene nirivalele xijoho xin'we, hi kumirhandza, nisviyendlele n'wina, mahlweni ka Kriste, lesvaku Sathana angatshuki ahihlula hi maqhinga, hikuva hitiva makungu ya yena. Loko nifikile Trowasi kuchumayela kona Evhangeli ya Kriste, yena anipfulelile nyangwa wotirha ntirho wa yena. Kambe aningatshunxekanga moyeni, hikuva Tito makwerhu animukumanga; hi kolaho, nivasalisile, kutani ni ya Makedoniya. Kambe akukhensiwe Xikwembu lexi ka Kriste xihiyisaka kutsakeni, hi kutirhisa hina minkama hinkwayu; xihangalasa hinkwaku kunun'hwela loku kunandzihaka ka kutiva Kriste. Hikuva hi hina hinga kunun'hwela loku kunandzihaka ka Kriste hi xiviri, loku kuhangalakaka hi vito ra Xikwembu xikarhi ka lavaponisiwaka ni ka lavalovaka; ka lavalovaka i sema ra rifu; kambe ka lavaponisiwaka, i kunun'hwela ka vutomi. Xana i mani lweyi afaneliwaka hi ntirho hinkwawu lowu ke? Hikuva ahifani ni lavotala, lavayendlaka bindzu leri ra kubiha hi Rito ra Xikwembu; kambe hivulavula kufana ni vanhu va timbilu ta kutenga, kufana ni lavarhumiweke hi Xikwembu; hivulavula mahlweni ka Xikwembu na hili va ka Kriste. Xana hotlhela hisungula kutitivisa ke? Xana hifanela kukuma mapapela lawa mahitivisaka ka n'wina, kumbe lawa mahumaka ka n'wina kufana ni lesvi van'wana vayendlisaka svona ke? Ihim! Hi n'wina minga papela ra hina, leritsaliweke timbilwini ta hina, leritiviwaka ni lerihlayiwaka hi vanhu hinkwavu. Svavoneka lesvaku n'wina mipapela ra Kriste, lerihumesiweke hi hina, leritsaliweke kungali hi tinta kambe hi Moya wa Xikwembu lexihanyaka; aritsaliwanga sviphepherheleni sva maribze, kambe ritsaliwile timbilwini ta vanhu. Hingavula svosvo hikuva hi ni kutshemba koloko mahlweni ka Xikwembu hikolaho ka Kriste. Hina hi hexe ahi na matimba yotirha ntirho lowu; hingakala hingahlayi lesvaku hi ni lexi xihumaka ka hina, kambe matimba ya hina mahuma ka Xikwembu. Hi xona lexi xihinyikeke hinkwasvu lesvi ahisvipfumala, loko xihiyendlile malandza ya ntwananu lowumpsha, lowunga wa Moya, wungali wa milawu ya kutsaliwa; hikuva milawu ya kutsaliwa yadlaya, kambe Moya wona wahanyisa. Nawu lowu maletera ya wona makovotliweke ribzeni, wuvangile rifu; hambi svilitano wutile hi kuphatima lokukulu ngopfu, Vaisrayele vakondza vatsandzeka ni kulanguta mombo wa Moxe, hikolaho ka kuphatima ka wona, hambilesvi kuphatima kakona akuli loku kunyamalalaka. Loko svilitano, kuvangama loku kutisiwaka hi Moya, xana akungavi lokukulu kutlulisa ke? Hikuva loko Nawu lowuvangaka kuyavanyisiwa wutile hi kuphatima, xana Moya lowu wuhitiselaka kululama mahlweni ka Xikwembu, awungaphatimi kutlulisa ke? Hakunene, lexitshamaka xita, na xili ni kuphatima, svosvi axahali nakona; ndhawu ya xona yitekiwile hi kuphatima lokukulu loku kutlulisaka. Hikuva lesvi xilo lexi xihundzaka xiteke na xili ni kuphatima, lexinga kona hilaha kungaheliki xitava ni kuphatima lokukulu kutlulisa. Hikolaho, lesvi hinga ni kulangutela lokotano, hivulavula na hitiyile nhlana svinene. Ahifani na Moxe lweyi angatimbhonya mombo hi nguvu, lesvaku Vaisrayele vangavoni khwatsi kuphatima loku kuhundzaka kuhelela makumu. Miyehleketo ya vona ayiyononon'hwisiwa; hikuva kutafika ni namuntlha loko kuhlayiwa matsalwa ya ntwananu wa khale, anguvu yoleyo yahali kona, ayisuki, hikuva yingasusiwa ntsena loko munhu ali ka Kriste. Ina, kutafika ni namuntlha, nkama wihi ni wihi loko kuhlayiwa matsalwa ya Moxe, onge hi loko anguvu yoleyo yahafunengeta miyehleketo ya vona. Kasi, “nkama wihi na wihi loko munhu ahundzukela ka Hosi, anguvu yasusiwa”, hilaha Matsalwa mahlayaka hakona. Loko vaku “Hosi”, vahlaya Moya, kutani laha Moya wa Hosi wunga kona, kutshunxeka ku kona. Hina hinkwerhu lava hinga ni tinghohe tofununguliwa, hikombaka kuphatima ka Hosi kufana ni xib'uku, hihundzukile lavafanaka na yena hi kuphatima loku kungangamukaka kuya mahlweni. Hosi yiyendlile svosvo, yona yinga Moya. Hikolaho lesvi Xikwembu, hi timpsalu ta xona, xingahirhuma kutirha ntirho wolowo, ahiheli mbilu. Hitshikile mintirho hinkwayu ya munyama ni ya tingana; ahihanyi hi kukanganyisa vanhu; ahihambukisi Rito ra Xikwembu; kambe hihumelelisa ntiyiso rivaleni, kutani hitikomba na hili lavakhensekaka aripfalwini ra mun'wana ni mun'wana, ni le mahlweni ka Xikwembu. Hikuva loko Evhangeli ya hina yifihlekile, yifihlekile ntsena ka lava vayaka kuloveni; Xikwembu xa misava leyi xipfalile miyehleketo ya vanhu lava vangapfumeliki; xivasive mahlo lesvaku vangavoni kuvonakala ka Evhangeli leyi yitwalisaka kukwetsima ka Kriste, yena lweyi anga xifaniso xa Xikwembu. Hina ahititwalisi, kambe hitwalisa Yesu Kriste, hiku: I Hosi! Kutani hina hitihlaya malandza ya n'wina hikolaho ka Yesu. Hikuva hi xona Xikwembu lexi nga te: “Kuvonakala akuvoninge munyameni!” Hi xona lexingavonakalisa kuvonakala atimbilwini ta hina, hitativa kukwetsima ka xona loku kuvonakalaka nghoheni ya Kriste. Kambe hina lava hinyikiweke kurhwala xuma lexi, hifana ni timbita ta vumba; svikomba lesvaku matimba lamakulu lawa, lawa matlulaka hinkwasvu, mahuma ka Xikwembu, amahumi ka hina. Hi kamanyetiwa hi matlhelo hinkwawu, kambe ahimanyiwanga; hi le kukanakaneni, kambe ahiheli mbilu; hahlotiwa, kambe ahitshikiwanga khombzeni; hatlumbiwa, kambe ahihelisiwi; minkama hinkwayu hirhwala rifu ra Yesu mirini wa hina, lesvaku vutomi bza Yesu na bzona bzivonaka mirini wa hina. Hikuva hina, hambilesvi hinga lavahanyaka, hinyiketiwa kudlayiweni minkama hinkwayu hikolaho ka Yesu, lesvaku vutomi bza Yesu bzivonaka ntumbulukwini wa hina lowufaka. Kutani-ke, rifu ratirha ka hina, kambe vutomi bzatirha ka n'wina. Lesvi hinga ni Moya wa kupfumela, lowufanaka ni wa lweyi angatsala aku: “Nipfumelile, hi kolaho nivulavulile”, na hina hapfumela, kutani hikolaho ka svona havulavula; hikuva hasvitiva lesvaku Xikwembu lexi xipfuxeke Hosi Yesu kufeni, xitahipfuxa na hina svin'we na Yesu, kutani xitahihumelelisa svin'we mahlweni ka xona, hina na n'wina. Hinkwasvu lesvi sviyendliwile hikolaho ka n'wina, lesvaku loko timpsalu ta Xikwembu tili karhi titala, titalisa ni ntsengo wa lava vangatakhensa vavuyelela, kudzuniseni ka Xikwembu. Hikolaho ahiheli mbilu; hambilesvi hihlakalaka hi tlhelo ra munhu wa hina wa le handle, hi tlhelo ra munhu wa hina wa le ndzeni, hihundzuka lavampsha siku rin'wana ni rin'wana. Hikuva maxangu lawa mangaliki na kutika ngopfu, lawa manga ya nkamanyana ntsena, mahitisela kukwetsima loku kunga ni ntikelo svinene, lokungaheliki, lokutlulaka ngopfu mpimo hinkwawu. Kutani hikongomisa mahlo ya hina kungali ka lesvivoniwaka, kambe ka lesvingavoniwiki; hikuva lesvivoniwaka i sva nkamanyana ntsena, kasi lesvi svingavoniwiki i sva minkama hinkwayu. Hasvitiva lesvaku, loko ntsonga lowu hinga ka wona, wunga miri wa hina wa la misaveni, wuhahluka, hi ni yindlo leyi Xikwembu xihilungiseleke yona, yinga yindlo leyingayakiwangiki hi mavoko, leyingahahlukiki, ya le matilweni. Hakunene, loko hahali ntsongeni lowu, hakonya na hili karhi hinavela ngopfu kuyambala yindlo ya hina ya le tilweni, lesvaku loko hiyambalile yona, hingakumiwi na hingayambalanga nchumu. Hikuva loko hahali ntsongeni lowu wa hina, hakonya hi kutikeliwa: Ahilavi kulahlekeliwa hi miri lowu wa khale, kambe hilava kuyambala lowumpsha, lesvaku lesvi svifaka, svimintiwa hi vutomi. Kutani Xikwembu hi xoxe xihivumbele svona svosvo, kutani xihinyikile xitiyiso xa Moya. Hikolaho hitiya nhlana minkama hinkwayu. Hitiva lesvaku, loko kaya ka hina kahali mirini lowu, hi le kule ni Hosi. Hihanya hi kupfumela, kungali hi kusvivona, kutani nili, hitiya nhlana, nasvona ahitatsakela kurhurha mirini lowu, lesvaku hitava kaya Hosini. Hikolaho, hambi loko kaya ka hina kuli halenu mirini, kumbe hambi loko hirhurha ka wona, kunavela ka hina lokukulu i kutsakisa Hosi. Hikuva hinkwerhu hitafanela kuyima mahlweni ka Xitshamu xa kuyavanyisa xa Kriste, lesvaku mun'wana ni mun'wana atayamukela hakelo ya lesvi asviyendleke loko ahali mirini, hambi lesvosaseka kumbe lesvobiha. Hikolaho, hikholwisaka vanhu hi kuvakhongotela hikuva hasvitiva lesvaku, kuva ni xichavu ka Hosi, svivula yini; kambe Xikwembu xitiva svinene lesvi hinga xisvona, kutani natshemba lesvaku na n'wina mihitiva hi mukhuva wolowo mapfalwini ya n'wina. Ahititivisi ka vumbirhi ka n'wina, kambe hominyika nkama wa kutidzunisa ha hina, mitativa kuhlamula lava vatidzunisaka hi sva le handle, kungali hi sva le mbilwini. Loko hihlanganile nhloko, hiyendlela kutirhela Xikwembu; loko hiku hihanya khwatsi nhlokweni, hiyendlela kutirhela n'wina. Rirhandzu ra Kriste rahifambisa, hikuva hifikile laha hitivaka svinene lesvaku munhu mun'we afele hinkwavu; loko svilitano, hinkwavu vafile. Afele vanhu hinkwavu, lesvaku lavahanyaka vangahatihanyeli, kambe vahanyela lweyi afeke atlhela apfuxiwa kufeni hikolaho ka vona. Hikolaho, kusukela svosvi ahahativi munhu hi kuya hi sva le handle; hambi loko hitivile Kriste hi kuya hi sva le handle, svosvi ahahamutivi hi mukhuva wolowo. Loko munhu ali ka Kriste, i xivumbiwa leximpsha. Hinkwasvu lesvi svihuma ka Xikwembu, lexingayendla lesvaku hivuyelelana na xona ha Kriste; kutani xihinyikile ntirho woyendla lesvaku vanhu vavuyelelana na xona. Ntirho lowu wukomba hilaha Xikwembu xiyendlaka hakona lesvaku misava yivuyelelana na xona ha Kriste. Axihlayeli vanhu svijoho sva vona, kutani xihirhwexile Mahungu lawa ya kuvuyelelana ka xona ni vanhu. Hikolaho, hi varhumiwa va Kriste; Xikwembu hi xoxe xamikhongotela ha hina; hamikhongotela hi matimba hikolaho ka Kriste, hili: “Vuyelelanani ni Xikwembu!” Kriste lweyi angativangiki xijoho, Xikwembu ximuyendlile lesvaku ava xijoho hikolaho ka hina, lesvaku hikolaho ka yena, hiyendliwa lavalulameke mahlweni ka Xikwembu. Hina hitirhisanaka ni Xikwembu, ha mikhongotela nakambe, hili: Lesvi miyamukeleke timpsalu ta Xikwembu, mingatitshikeni tiwa! Hikuva Xikwembu xite: “Nikuyingisile nkameni lowu pfumelekaka, sikwini ra mina ra kuponisa, nikupfunile.” Vonani, nkama lowunene wa kutsetseleliwa wufikile, namuntlha hi rona siku ra kuponisiwa. Ahiveki xikhunguvanyiso ni xin'we ndleleni ya munhu ni mun'we, lesvaku ntirho wa hina wutakala wungasandziwi. Timhakeni hinkwatu hitikombile na hili malandza ya Xikwembu hi kutiyisela ka hina lokukulu kuxanisekeni, ni le vusiwanini, ni le makhombzeni; akubiweni, ni le majele, ni le madzolongeni; mintirhweni leyotika, ni le kupfumaleni ka vurhongo, ni le kutitsoneni ka svakuja. Hi kutenga, ni vutivi, ni kuleha mbilu, ni timpsalu, hitiyiselile hi matimba ya Moya Lowokwetsima, ni rirhandzu leringaliki na kukanganyisa, na hivulavula ntiyiso, na hili ni matimba ya Xikwembu. Matlhari ya hina i kululama, himatamela hi voko ra xinene ni leri ra ximatsi. Hi kuxiximiwa ni kusandziwa; halumbetiwa ni kudzunisiwa. Hivoniwa na hili vakangayisi, kasi hi va ntiyiso; hivoniwa na hili lavangativiwiki, kasi hativiwa svinene; wonge hafa, kasi hahanya. Hakhatisiwa, hambi svilitano ahidlayiwi; havavisiwa, hambi svilitano hitsakile masiku hinkwawu; wonge hisvisiwana, kasi hifuwisa lavotala; wonge ahi na nchumu, kasi hi ni svilo hinkwasvu. N'wina Vakorinto, hivulavula na n'wina na hitshunxekile; ni timbilu ta hina tipfulekile svinene; ahimipfaleli timbilu, hi n'wina mingahipfalela timbilu ta n'wina. Nivulavula kufana ni tatana ka vana va yena, nili: Hiyendleleni lesvi hingamiyendlela svona, mihipfulela timbilu ta n'wina. Mingarhwaleni mpingu wun'we ni lava vangaliki vapfumeli; hikuva wun'we bzikwihi xikarhi ka kululama ni kuhomboloka ke? Kumbe kuvonakala ku ni kuhlangana kwihi ni munyama ke? Xana Kriste na belial, vangatwanana ke? Kumbe mupfumeli angafambelana hi mukhuva wihi ni lweyi angaliki mupfumeli xana? Tempele ya Xikwembu yi ni vunakulobze bzihi ni svikwembu sva hava ke? Hikuva tempele ya Xikwembu lexihanyaka hi hina, kufana ni lesvi Xikwembu xingate: “Nitayaka xikarhi ka vona, nifambafamba ka vona, nitava Xikwembu xa vona, kutani vona vatava tiko ra mina.” Hikolaho, Hosi yili: “Humani xikarhi ka vona, mihambana na vona; mingatshukeni mikhumba lesvinyameke, kutani nitamiyamukela. Nitava tatana wa n'wina, na n'wina miva vana va mina vaxinuna ni vaxisati.” Hosi ya matimba hinkwawu yihlaya svosvo. Varhandziwa, svitshembiso lesvi svinyikiwile hina. Hikolaho, hifanele kutibasisa, hisusa chaka hinkwaru ra miri ni ra moya, hihetiseka vutowini lebzohlawuleka, na hili karhi hichava Xikwembu. Hiyamukeleni timbilwini ta n'wina. Ahiyendlelanga munhu ni mun'we lesvobiha; ahinghenisanga munhu ni mun'we khombzeni; ahikangayisanga munhu ni mun'we. Anihlayi lesvo hi kulava kumiyavanyisa, hikuva nihlayile ni le kusunguleni lesvaku mi le timbilwini ta hina; akuva hiva svin'we kufeni ni le kuhanyeni. Nivulavula na n'wina, na nili karhi nimitshemba ngopfu; nitikulisa ngopfu hi n'wina; nitala hi kuchaveleliwa; kuxanisekeni hinkwaku ka hina, natsaka nitsakisisa. Svitiyile lesvaku, loko nifikile Makedoniya, anikumanga kuwisa nikutsongo; anili kuxanisekeni matlhelo hinkwawu: Anirhendzeliwe hi kuxaniseka matlhelo hinkwawu, kutani anili ni kuchava mbilwini. Kambe Xikwembu lexichavelelaka lavaheleke matimba, xinichavelelile hi kufika ka Tito; kungali ntsena hi kufika ka yena, kambe nakona hi kuchavelela loku mimukombeke kona. Anibzelile hilaha minavelaka ngopfu hakona kunivona, ni hilaha mitweke kuvava hakona, ni hilaha michivirikaka hakona kuniseketela; lesvi sviyengetelile kutsaka ka mina. Hambi loko nimivavisile hi papela ra mina, anitilayi hikolaho ka rona (nasvivona lesvaku papela rakona rimivavisile, kambe svivile sva nkamanyana ntsena). Kambe, hambi ningava nitilayile, svosvi nitsakile, kungali hi lesvi mivavisiweke, kambe hi lesvi kuvavisiwa ka n'wina kungamiyisa kuhundzukeni; mirhwele kuvaviseka ka n'wina hi mukhuva lowutsakeliwaka hi Xikwembu, kutani svosvi sviyendlile lesvaku hingamivangeli kulahlekeliwa. Loko kuvaviseka kurhwaliwa hi ndlela leyitsakeliwaka hi Xikwembu, kutisa kuhundzuka, kutani kuhundzuka loku kuyisa kuponisiweni, akukhomisi tingana; kasi kuvaviseka hi mhaka ya sva misava, kuvanga rifu. Vonani hinkwasvu lesvi kuvaviseka ka n'wina hi mukhuva lowutsakeliwaka hi Xikwembu kungatisa svona xikarhi ka n'wina: Mingavona kuhiseka ka n'wina, ni kunavela ka n'wina ka kutihlamulela, ni kukarhateka ka n'wina moyeni, ni kuchava ka n'wina, ni kutitwa ka n'wina, ni kuchivirika ka n'wina, ni kunavela ka n'wina ka kutshinya xijoho! Hi matlhelo hinkwawu mitikombile na mili lavangaliki na nandzu mhakeni leyi. Hikolaho, hambi loko nimitsalelile, anisviyendlanga hikolaho ka lweyi ajoheke, kumbe hikolaho ka lweyi ajoheliweke; nisviyendlile lesvaku nimikomba, mahlweni ka Xikwembu, hilaha mihisekelaka kuhipfuna hakona. Hi svona lesvi svihitiyisaka. Kambe, kuyengetela kutiyisiwa ka hina, hitsakisiwile ngopfungopfu hi kutsaka ka Tito, hikuva akumile matimba lamampsha moyeni hikolaho ka n'wina hinkwenu. Hambi loko nitidzunisile mahlweni ka yena hi mhaka ya n'wina, aminikhomisanga tingana. Ahimibzelanga nchumu wun'wana, loko wungali ntiyiso ntsena. Hi mukhuva wolowo kutidzunisa ka hina mahlweni ka Tito, kukumekile na kuli ntiyiso. Hikolaho, rirhandzu ra yena ka n'wina riyile rikula loko ayanakanya hilaha miyingiseke hakona, n'wina hinkwenu, ni hilaha mimuyamukeleke hakona, hi xichavu ni kurhurhumela. Natsaka, hikuva nasvikota kumitshemba matlhelo hinkwawu. Vamakwerhu, hilava lesvaku mitiva lesvi timpsalu ta Xikwembu tisviyendleke tikerekeni ta Makedoniya. Varingiwile ngopfu hi maxangu, kambe xikarhi ka svona hinkwasvu, kutsaka ka vona kuyile kuyengeteleka. Kutani hambilesvi avali avusiwaneni lebzikulu, vanyikelile rifuwo ra vona hi kunyika loku kutlulisaka mpimo. Ningamibzela lesvaku vahlengile hi kuya hi lesvi avali na svona, ni kuhundzisa kolaho; hi kurhandza ka vona, vakombelile hi matimba lesvaku hivakatekisa hi kuvapfumelela kuveka xiyandla xa vona ntirhweni lowu wa kupfuna vahlawuliwa va Xikwembu. I mhaka leyi hina ahingayilangutelanga, hikuva varhangile hi kutinyiketa ka Hosi, kutani hi kurhandza ka Xikwembu vatlhele vatinyiketa ka hina. Hikolaho hikhongotelile Tito, lweyi asunguleke ntirho wolowo, kuya mahlweni na wona, amipfuna kuhetisa nyiko leyi ya timpsalu. Mi vafuwi ka hinkwasvu lesvi minga na svona, kupfumeleni, kuvulavuleni, vutivini, ni le kuhisekeni hinkwaku, ni le rirhandzwini leri hiripfuxeke ka n'wina; hi ndlela yoleyo, kombani lesvaku mi vafuwi kuhumeseni ka nyiko yoleyo ya timpsalu. Animirhumi, kambe nimibzela ntsena hilaha van'wana vahisekelaka kupfuna hakona, nitativa kutiya ka rirhandzu ra n'wina. Matitiva timpsalu ta Hosi ya hina Yesu Kriste: Aafuwile, hambi svilitano ahundzukile xisiwana hikolaho ka n'wina, lesvaku miyendliwa vafuwi hi vusiwana bza yena. Hikolaho, mhakeni leyi, nitamikomba miyehleketo ya mina: Lembe lerihundzeke hi n'wina amili lavorhanga lavangatiyimisela kupfuna, ni kusviyendla misviyendlile; svosvi amitafanela kuhetisa ntirho lowu miwusunguleke. Aminavela svinene kupfuna, mitivekisela svona; hi ndlela yoleyo, svosvi hetisani ntirho wakona hi kuya hi lesvi minga na svona. Hikuva loko munhu anavela kunyika hi mbilu, svapfumeleleka mayelanu ni lesvi anganasvona, kugali lesvi asvipfumalaka. Lesvi asvihlayi lesvaku van'wana vafanele kuvevukeliwa, kutani n'wina mitikeliwa, ihim! Kambe asviyendliwe hi kuringana. Kutani lesvi misvipfuneke svosvi, svifanela kuva xipfunu vusiwaneni bza vona; siku rin'wana kupfuna ka vona kutava xipfunu vusiwaneni bza n'wina. Kutani svosvo svitayendla lesvaku kuva ni kuringana ka n'wina na vona, kukotisa lesvi Tsalwa rivulaka svona, leringe: “Lweyi aahlengeletile ngopfu angavanga ni lesvotala, ni lweyi aahlengeletile svitsongo angapfumalanga nchumu.” Akukhensiwe Xikwembu lexiyendlaka lesvaku Tito ahiseka kufana na hina kumipfuna. Himukombelile kuta koseyo ka n'wina, kutani akhensile, kambe aatiyimisele kuta koseyo ka n'wina, hi kurhandza ka yena. Himurhuma ata ni makwerhu mun'we lweyi adzunisiwaka tikerekeni hinkwatu hi mhaka ya ntirho wa yena wofambisa Evhangeli. Ahilesvi ntsena, kambe nasvona ahlawuliwile hi tikereke kufamba na hina ntirhweni lowu wa timpsalu; nyiko yakona hiyitamela kudzuniseni ka Hosi hi xiviri xa yona, ni kuva xikombiso xa lesvaku hinavela svinene kupfuna. Hiringeta kuyendla lesvaku hingasoliwi hi munhu ni mun'we mhakeni ya nyiko leyi hiyitamelaka, leyihumesiweke hi mbilu ya kutshunxeka. Hinavela kuyendla lesvisasekeke kungali mahlweni ka Hosi ntsena, kambe ni le mahlweni ka vanhu. Hi varhumela vata kun'we ni makwerhu mun'wana lweyi hingamuxiyaxiya minkama leyotala, hikuma na ali lweyi ahisekaka ka lesvotala, lweyi ni svosvi kuhiseka ka yena kungaya kuyengeteleka, hi mhaka ya lesvi amitshembaka ngopfu. Loko ali Tito, i nakulorhi lweyi nitirhisanaka na yena kumipfuna; loko vali vamakwerhu lavan'wana, i varhumiwa va tikereke, lava Kriste achavisekaka hi mhaka ya vona. Loko svilitano, vakombeni rivaleni, mahlweni ka tikereke, lesvaku mavarhandza, ni lesvaku ahihoxi loko hitidzunisa ha n'wina. Hi tlhelo ra xipfunu lexihumeseliwaka vahlawuliwa va Xikwembu, kungava kuheta nkama loko nimitsalela hi ta xona. Nitiva lesvaku minavela svinene kupfuna; kutani nitidzunisile ka va le Makedoniya hikolaho ka kunavela ka n'wina loku; nivabzelile lesvaku va le Akaya avali karhi vatilungisela kupfuna kusukela n'wexemu. Kutani kutikarhata ka n'wina kunyikile matimba lavotala va vona. Nirhumela vamakwerhu, vatavona ha voxe lesvaku kutidzunisa ka mina hikolaho ka n'wina mhakeni leyi ahi mahungundlela, i ntiyiso. Nilava lesvaku mitshama na mitilungisile, kufana ni lesvi ningahlaya lesvaku milungile. Hikuva loko van'wana va le Makedoniya vangatshuka vatile na mina, kutani vakuma lesvaku amitilungisanga, ahi hina ntsena lavangatakhomiwa hi tingana, kambe na n'wina mitava ni tingana, hi mhaka ya kutitshemba kutlula mpimo. Hikolaho niyanakanyile lesvaku svafanela kukombela vamakwerhu kuta koseyo, vanirhangela mahlweni, vatalungisa hi nkama nyiko yohuma timbilwini ta n'wina, leyi miyitshembiseke. Nilava lesvaku yitshama yilungisiwile, yili leyihumaka mbilwini, yingali leyihumesiwaka hi kuvilela. Yanakanyani lesvi: Lweyi abzalaka svitsongo, atatshovela svitsongo; kambe lweyi abzalaka svinyingi, atatshovela svinyingi. Mun'wana ni mun'wana aanyike hilaha ativekiseleke hakona mbilwini ya yena, ahumesa hi kutshunxeka, kungali hi kuvilela, hikuva Xikwembu xirhandza lweyi anyikaka na atsakile. Xikwembu xi ni matimba ya kuminyika hinkwasvu lesvi misvipfumalaka, ni kutlula kolaho, mitakota kupfuna ntirhweni wihi ni wihi lowunene, hikuva minkama hinkwayu mikuma lesvi svimiringanaka hi matlhelo hinkwawu, hilaha Tsalwa rihlayaka hakona riku: “Ahaxile, anyikile svisiwana, kululama ka yena kungakala kungaheli.” Lweyi anyikaka mbewu ka mubzali, ni svakuja, atamilavela mbewu atlhela ayimilisa; atamiyandzisela ntshovelo wa kunyika ka n'wina; atamifuwisa hinkwasvu, lesvaku mitativa kunyika hi tindlela hinkwatu, kutani lesvi sviyendla lesvaku van'wana vakhensa Xikwembu hikolaho ka lesvi misviyendlaka. Hikuva ntirho wolowo hi wutirhaka awupfuni ntsena kunyika vahlawuliwa lesvi vasvipfumalaka, kambe nasvona wuyandzisa ngopfu mikhenso leyi vakhensaka Xikwembu ha yona. Ntirho lowu i xikombiso xa kupfumela ka n'wina, kutani vadzunisa Xikwembu hikolaho ka svona: Evhangeli ya Kriste, miyipaluxile, mitlhela miyendla lesvi yihlayaka svona, loko mili karhi miyavelana ni vahlawuliwa hinkwasvu lesvi minga na svona, miyavela ni vanhu van'wana, hi kunyika lokukulu. Vanhu lava vatavona vunene lebzohlamalisa lebzi Xikwembu ximiyendlelaka bzona, kutani vatamikhongelela, hi kuminavelela lesvosaseka atimbilwini ta vona. Akukhensiwe Xikwembu hikolaho ka nyiko ya xona, yinga nyiko leyi kupfumalekaka marito ya kuyihlamusela. Mina Pawulo hanoxe, na mikhongotela hi musa ni vunene bza Kriste, mina Pawulo lweyi minge ni ntsongo loko nili xikarhi ka n'wina, kasi loko nili kule na n'wina mili ni nhenha! Namikombela, minganisindziseni kumikomba vunhenha lebzi, loko ni ta, hi kutitshemba loku niyanakanyaka lesvaku ningava nakona, ka lava vayanakanyaka lesvaku hihanya hi kulandza sva misava leyi. Hakunene hihanya kola misaveni, kambe nyimpi leyi hiyilwaka ahiyakulwela sva misava. Hikuva matlhari lawa hilwaka ha wona, ahilawa matirhisiwaka hi vanhu va misava, kambe mani matimba ya Xikwembu ya kuhirimuxa makhokholo; hihelisa ni svihingakanyo hinkwasvu lesvi svitlakukeke, lesvi svisivelaka vanhu kutiva Xikwembu. Hikoka miyanakanyu hinkwayu kuyingiseni ka Kriste. Kutani loko mitava mitinyiketile ka yena mimuyingisa, hina hitiyimisele kulwa ni hinkwavu lavatiyalisaka. Langutani lesvinga rivaleni, mahlweni ka n'wina. Xana ku ni mun'wana ka n'wina lweyi akholwaka lesvaku yena i wa ka Kriste ke? Svilulamile! Kambe munhu lweyi aatiyanakanye lesvaku na hina, kufana na yena, hi va ka Kriste. Kumbexana nitlula mpimo loko nitidzunisa hi matimba lawa ninga na wona, lawa Hosi yininyikeke wona (manga matimba yomiwundla, mangali yomihahlula), kambe ningakala ningakhomiwi hi tingana! Anilavi kuvonaka wonge niringeta kumichavisa ntsena, hi mapapela ya mina. Mun'wana angavula aku: “Mapapela ya Pawulo matika, matlhava, kambe loko alixikarhi ka hina himuvona asolekile, nasvona asvitikombi lesvaku angava muvulavuli.” Lweyi anga ni miyehleketo yotanu, aative lesvi, aku na kuhambana xikarhi ka lesvi hisvitsalaka mapapeleni ya hina, loko hili kule na n'wina, ni lesvi hingatasviyendla loko hitata koseyo ka n'wina. Svile rivaleni: Ahilavi kutiringanisa kumbe kutifananisa ni van'wana lavativonaka na vali lavakulu. Vanhu lava vatipima hi mpimo wa lesvi vangaxisvona, ni kutiringanisa hi xiyimu xa vona vinyi; i vanhu lavangaliki na kutwisisa! Loko ali hina, ahingatidzunisi hi mintirho leyitirhiweke handle ka laha hingakombiwa kona, kambe hitatidzunisa hi lesvi hingasvitirha lomu Xikwembu xingahikomba kona, kukatsa ni laha ka n'wina. Hi hina vosungula kuta ka n'wina na hili ni Evhangeli ya Kriste; hi kolaho ahitlulanga laha hingakombiwa kona, onge hi loko ndhawu yakona yingamikatsi. Ahitidzunisi hi mintirho leyitirhiwaka hi van'wana, handle ka laha hingakombiwa kona; hinikulangutela lesvaku, loko kupfumela ka n'wina kuyakukula, kukhensiwa ka hina xikarhi ka n'wina kutayandzisiwa svinene, ndzeni ka tindhawu leti Xikwembu xingahikomba tona kutirha ka tona. Kutani hitakota kutwalisa Evhangeli matikweni man'wana kuhundza ni le ka n'wina; hi ndlela yoleyo, akungavi na mhaka ya lesvaku hitidzunisa hi lesvitirhiweke hi van'wana, laha vona vangakombiwa kona. Lweyi atidzunisaka, aatidzunisele Hosini. Hikuva lweyi adzunisiwaka, ahi yena lweyi ativonaka ali lwenkulu, kambe hi yena lweyi Hosi yimuvonaka ali lwenkulu. Nikombela lesvaku minilehisela mbilu, hikuva nilava kuvulavulanyana kufana ni xiphukuphuku! Kunene mikarhi minilehisela mbilu ni svosvi. Namihisekela kukota lesvi Xikwembu na xona ximihisekelisaka xisvona. Niminyiketile ka Kriste kukota nhwanyana atengeke, lesvaku ava ni nuna mun'we ntsena anga Kriste. Kambe, kufana ni lesvi nyoka yikanganyiseke Evha hi maqhinga ya yona, nachava lesvaku hi tindlela tin'wana miyanakanyu ya n'wina yingawonhiwa, kutani mingahasvikoti kulandzela Kriste hi kutinyiketa ni kutenga. Hikuva loko kufika mun'wana, amijondzisa ta Yesu mun'wana, angali yena lweyi himijondziseke ta yena, kumbe loko miyamukela moya wun'wana, wungali wona lowu miwuyamukeleke, kumbe evhangeli yin'wana, yingali yona leyi miyiyamukeleke ka hina, mitwanana na svona hi ndlela yohlamalisa. Niringanisa lesvaku ani lweyi ntsongo ka lava vangavona “vapostola lavakulu”. Ningava lweyi angaliki xivulavuli xotlhariha, kambe vutivi ni na bzona; himitivisile svilo lesvi hinkwasvu hi matlhelo hinkwawu, hilaha hi svikoteke hakona. Xana akuli kujoha ke, loko nititsongahatile lesvaku n'wina mitlakusiwa, ni loko nitwalisile Evhangeli ya Xikwembu ka n'wina, na ningakombelanga hakelo ke? Nitekile sva mphamo wa mina wohuma ka tikereke tin'wana, ni mitirhela ha svona; xana akuli kuvakanganyisa ke? Nasvona, loko nili le ka n'wina, hambilesvi anili kupfumaleni, anitikiselanga munhu ni mun'we; hikuva loko vamakwerhu lavahumaka Makedoniya vafikile, vanipfunile hi lesvotala lesvi anisvipfumala. Niringetile hi matimba kuvona lesvaku ningamitikiseli, kutani nahaya mahlweni ni yendlisa svosvo. Hi ntiyiso wa Kriste lowunga ka mina, ningesiveliwi hi nchumu kutidzunisa mhakeni leyi, matikweni hinkwawu ya Akaya. Hikolaho ka yini ke? Xana hi lesvi ningamirhandziki? Rirhandzu ra mina ka n'wina ritiva hi Xikwembu. Hambi svilitano, nahataya mahlweni niyendla lesvi nisviyendlaka svosvi, lesvaku nitakala ninganyiki nkama ka lavalavaka kutidzunisa hi kuvula lesvaku va ni ntirho wofana ni wa hina. Vanhu lavotano, i vapostola va mavunhwa, i vatirhi lavaxisaka, lavatiyendlaka onge i vapostola va Kriste. Kutani asvihlamalisi, hikuva na yena Sathana, atiyendla onge i ntsumi ya kuvonakala. Loko svilitano, asvihlamalisi loko malandza ya yena na wona matiyendla onge i malandza ya lesvolulama; kambe kuheteleleni, vatakuma lesviyelanaka ni mintirho ya vona. Nitlhela nihlaya kambe, nili: Munhu angatshuki ayanakanya lesvaku ni xiphukuphuku; hambi svilitano, loko miyanakanya svosvo, niyamukeleni ni loko nili xiphukuphuku xoxo; nitshikeni nitidzunisanyana. Lesvi nisvihlayaka svosvi, hi kutitshemba ni kutidzunisa hi ndlela leyi, ahimavulavulele ya xikriste, kambe i vuphukuphuku ntsena. Lesvi vanhu lavotala vatidzunisaka hi sva vona sva laha misaveni, na mina nitatidzunisa. Misvitsakela ngopfu kulehisela sviphukuphuku timbilu; mitlharihile svinene n'wina! Loko munhu amiyendla svikarawa, ni loko amikanganyisa, ni loko aphanga sva n'wina, ni loko amilangutela hansi, ni loko amiyamasa, misviyamukela hinkwasvu. Nivulavula na nili ni tingana, hikuva mina nive lweyi awolovaka. Kambe Loko munhu mun'wana atiya nhlana, atidzunisa hi xilo xin'wana (nihlaya svosvo kufana ni xiphukuphuku ), na mina ningatiya nhlana ni sviyendla. Xana i Vaheberu? Na mina ni Muheberu. Xana i Vaisrayele? Na mina ni Muisrayele. Xana i vatukulu va Abrahamu? Na mina ni ntukulu wa yena. Xana i malandza ya Kriste? Na mina ni nandza wa yena, kutlula vona (nivulavula tani hi loko nili munhu wa rihuhe). Nixanisekile kuvatlula, hi kutirha svononon'hwa, ni kupfaleliwa majele, ni kubiwa kutlulisa mpimo, ni kuva kusuhi ni kudlayiwa minkama yotala. Nibiwile ka ntlhanu hi Vayuda, kuba kun'wana ni kun'wana kuli hi tinhonga ta makume manharhu ni ntlhanu ni mune. Nibiwile kanharhu hi tinhonga; ni khandliwile kan'we hi maribze; kanharhu nihahlukeliwe hi tingalawa leti anili ka tona; nihetile vusiku hinkwabzu ni nhlekanhi hinkwawu na nili xiziveni xa lwandle. Tiyendzweni ta mina letotala, nilave kujiwa hi milambu; nilave kudlayiwa hi svigevenga; nilave kudlayiwa hi valekwerhu; nilave kudlayiwa hi vamatiko; nilave kudlayiwa matini ni le mananga; nilave kujiwa hi mati ya lwandle; nilave kudlayiwa xikarhi ka vamakwerhu va mavunhwa; nitikarhatile ni kutivavisa hi mintirho; hakanyingi nipfumale vurhongo, nitwe ndlala ni torha, hakanyingi nipfumalile svakuja, nikhomiwa hi xirhami, nipfumala ni sviyambalu. Handle ka svin'wana lesvi ningasvihlayiki, na tikeliwa masiku hinkwawu ni kukarhateka moyeni, loko niyanakanya tikereke hinkwatu. Loko mun'we atsanile, xana anitsananga na mina ke? Loko mun'wana awisiwa, xana na mina anitwi kuvava ngopfu ke? Loko nifanele kutidzunisa, nitatidzunisa hi mhaka ya kutsana ka mina. Xikwembu, Tatana wa Hosi Yesu, xinga xona lexifanelaka kudzunisiwa hilaha kungaheliki, xasvitiva lesvaku anihembi. Le Damaska, ndhunankulu ya hosi Areta, yirindzile nyangwa wa munti wa Damaska, yilava kunikhoma; kambe vanixixa hi xjinela rithangwini, na nili ndzeni ka ndzhava, kutani nipona mavokweni ya yena hi ndlela yoleyo. Anifanele kutidzunisa. Hambilesvi sviganifaneliki, nitavulavula hi mhaka ya svivono ni tinhlavutelo tohuma ka Hosi. Nitiva munhu wa ka Kriste lweyi atlakuliweke ayisiwa tilweni ra vunharhu, kuhundze malembe ya khume na mune svosvi (kumbe aali mirini wa yena, kumbe aangali ka wona, anisvitivi, svotivawa hi Xikwembu). Nitiva lesvaku munhu wakona (kumbe aali mirini wa yena, kumbe aangali ka wona, anisvitivi, svotivawa hi Xikwembu), atlakuleliwile Paradiseni, atwa marito lamangahlayekiki, lawa munhu angapfumeleliwiki kumahlaya. Nitatidzunisa hi munhu lweyi wotanu; kambe ningakala ningatidzunisi ha nexe, loko kungali ntsena hi takutsana ka mina. Loko anilavile kutidzunisa, abzingatava vuphukuphuku, hikuva anitava nihlaya ntiyiso; kambe lesvi aningasviyendli, hikuva munhu mun'wana angatshuka ayanakanya lesvikulu ngopfu ha mina, kutlula lesvi asvivonaka, kumbe asvitwaka ka mina. Kutani kuyendlela lesvaku ningatikulisi ngopfu hikolaho ka kusaseka lokukulu ka lesvi Xikwembu xingasvihlavutela ka mina, ninghenisiwile muntwa nyameni, yinga ntsumi ya Sathana, lesvaku yinihimetela. Nikhongelile Hosi kanharhu hi mhaka ya xilo xoxo, lesvaku xisuka ka mina. Kambe Hosi yite ka mina: “Timpsalu ta mina ka wena tiringene; hikuva matimba ya mina mahetiseka laha kunga ni kutsana kona.” Hikolaho nitatsaka ngopfu kutidzunisa hi ta kutsana ka mina, lesvaku matimba ya Kriste matayaka ka mina. Hikolaho niyamukela hi kutsaka kutsana, ni maxangu, ni kukarhateka, ni kuxanisiwa, ni mahlomulu, hikolaho ka Kriste; hikuva loko nitsanile, hi kona ninga ni matimba. Nitidzunisile, nive xiphukuphuku! Hi n'wina minisindziseke, kasi amitava mifanele kunidzunisa, hikuva hambi loko ningali nchumu, avanitlulanga ha nchumu, volavo vange i “vapostola lavakulu”. Niminyikile vumboni bza lesvaku ni mupostola wa xiviri, hi kumilehisela mbilu svinene, ni kuyendla mahlori, ni svihlamaliso, ni mintirho ya matimba mahlweni ka n'wina. Xana mitshama mitluliwa hi tikereke tin'wana? Hi yini ke, loko kungali ntsena hi lesvi ningamurhwexangiki ndzhwalu wonihlayisa? Nikhomeleni ka xihoxo xoxo! Nitilungisele kuta ka vunharhu le ka n'wina; aningamitikiseli, hikuva anilavi svilo sva n'wina, kambe nilava n'wina vinyi; hikuva vana ahi vona lavafanelaka kuhlayisela vapsali axuma, kambe i vapsali lavafanelaka kuhlayisela vana. Loko nilimina, nitanyiketa sva mina hi kutsaka, nasvona nitatinyiketa hi xiviri xa mina kumipfuna; lesvi nimirhandzaka kutlula mpimo, xana mina nifanele kurhandziwanyana ntsena ke? Svatwala, animitikiselanga; kambe, hi kuvula ka n'wina, mili ni munhu wa maqhinga, kutani nimikanganyisile! Xana nimijelelile hi mun'we wa lava nivarhumeke ka n'wina ke? Nikhongotelile Tito kuta le ka n'wina; kutani nirhumile makwerhu mun'wana lesvaku amuheleketa. Xana Tito amijelelile ke? Xana yena na mina ahifambanga hi moya wun'we, ni le mintileni yin'we ke? Nkarhi hinkwawu lowu, mipimisa lesvaku hi ringeta kutisasekisa mahlweni ka n'wina. Ahi svona! Hivulavula mahlweni ka Xikwembu, na hili va ka Kriste. Hinkwasvu lesvi, varhandziwa, i sva kumiyaka. Nichava lesvaku, loko ni ta, nitamikuma na mingahafani ni lesvi nisvilavisaka xisvona, ni lesvaku na mina, mitanikuma na ningahafani ni lesvi misvilavisaka svona. Nichava lesvaku loko ni ta, nitakuma timholova, ni mavondzo, ni vumpsaka, ni kutirhandza, ni kurhuketelana, ni mahlevo, ni kutikukumuxa, ni madzolonga Nichava lesvaku loko ni ta le ka n'wina, Xikwembu xa mina xingatlhela xinitsongahata mahlweni ka n'wina, kutani narila hikolaho ka lavotala lavajoheke khale, lavangahundzukangiki timhakeni ta vona letokala tingabasanga, ni ta vuwosvi, ni ta manyala, leti vangatiyendla. Leri i khambi ra vunharhu ka n'wina. Mhaka yin'wana ni yin'wana yitatiyisiwa hi milomo ya timboni timbirhi kumbe tinharhu. Loko ni miyendzelile ka vumbirhi, ni svosvi hambi loko nilikule na n'wina, ni tsundzuxile lavajoheke khale, ni lavan'wana hinkwavu, kutani nahavatsundzuxa: Loko nitlhela ni ta, aningavatsetseleli, lesvi milavaka xikombiso xa lesvaku Kriste avulavula ha mina. Yena angatsananga loko atirha xikarhi ka n'wina, matimba ya yena matirha xikarhi ka n'wina. Aatsanile loko avambiwa xihambanwini, kambe svosvi, hi matimba ya Xikwembu, wahanya. Na hina, hatsana svin'we na yena, kambe matimba ya Xikwembu matahinyika vutomi bza yena, lesvaku hikota kutirha xikarhi ka n'wina. Yanani mahlweni mitikamba, kuvona loko mahali kupfumeleni. Tiyanakanyeni! Xana amisvivoni lesvaku Yesu Kriste a le ka n'wina ke? Nkama wun'wana, mingatsandzeka kutiyanakanya! Loko hili hina, natshemba lesvaku mitasvivona: Ahitsandzekanga! Hikhongela Xikwembu lesvaku mingayendli xobiha ni xin'we; nkongometo, ahikukomba lesvaku hina hasvikota svosvo, kambe i kukomba lesvaku n'wina masvikota, hambi loko hina hingavonaka na hili vatsandzeki. Hakunene hingakala hingalwi ni ntiyiso, kambe hitayima ntiyisweni. Hitsakile loko hitsanile, ni loko n'wina mitiyile; kutani lesvi hisvikombelaka, hi lesvaku n'wina miva lavahetisekeke. Lesviyendlaka lesvaku nitsala timhaka leti na ningasita le ka n'wina, hi lesvaku siku leri nifikaka ningatshuki nitirha na n'wina hi kunonon'hwa, hi matimba lawa Hosi yininyikeke wona. Hosi yininyikile wona kuyakisa, kungali kuhahlula. Svosvi-ke, vamakwerhu, nili: Salani! Vanani lavahetisekeke; yamukelani kuchaveleliwa; miva ni kuyanakanya kun'we; mihanya hi kurhula; kutani Xikwembu xa rirhandzu ni xa kurhula xitava na n'wina. Xewetanani hi kun'quntana kohlawuleka. Vahlawuliwa va Xikwembu hinkwavu vamirungula. Timpsalu ta Hosi Yesu Kriste, ni rirhandzu ra Xikwembu, ni kuhlangana kun'we ni Moya Lowokwetsima, asvive na n'wina hinkwenu! Mina Pawulo ninga mupostola, kungali hi kuhlawuliwa hi vanhu kumbe kurhumiwa hi munhu, kambe hi kurhumiwa hi Yesu Kriste ni Xikwembu Tatana lweyi amupfuxeke xikarhi ka vafi, nitsala na nili ni vamakwerhu hinkwavu lavanga na mina halenu, hitsalela tikereke ta Galatiya, hili: Timpsalu ni kurhula asvive na n'wina, svihuma ka Xikwembu Tatana wa hina, ni ka Hosi Yesu Kriste, yena lweyi atinyiketeke hikolaho ka svijoho sva hina, lesvaku atahiponisa ka nguva leyobiha ya masiku lawa. Ayendle svosvo hi kuyingisa kurhandza ka Xikwembu Tatana wa hina; Ka xona akuve kudzuneka hilaha kungaheliki! Amen. Manihlamalisa: Hi nkamanyana wutsongo, mifularhele lweyi amivitaneke hi timpsalu ta Kriste, kutani mitsutsumela ka evhangeli yin'wana. Kasi Evhangeli yin'wana ayikona. Nihlaya lesvi hikuva ku ni van'wana lava vamipfilunganyisaka tinhloko, lavaringetaka kujikisa Evhangeli ya Kriste. Kambe hambi loko hina kumbe ntsumi yohuma tilweni, hingatshuka himijondzisa Evhangeli yin'wana handle ka leyi hitshamaka himijondzisa yona, mujondzisi wotanu aarhukiwe! Kufana ni lesvi hitshamaka himibzela, ni svosvi nitlhela nakambe niku: Loko mun'wana amijondzisa Evhangeli yin'wana handle ka leyi miyiyamukeleke, aarhukiwe! Xana svosvi svikomba lesvaku ninavela kukhensiwa hi vanhu kumbe hi Xikwembu ke? Xana ni vonaka na nili lweyi aringetaka kutsakisa vanhu ke? Loko onge naharingeta kuyendla svosvo, aningatava mutirhi wa Kriste. Namitsundzuxa, vamakwerhu, lesvaku Evhangeli leyi nimijondziseke yona, ayihumanga ka vanhu. Aniyikumanga ka munhu ni mun'we, anga kona ni mun'we lweyi anijondziseke yona. Yesu Kriste hi xiviri xa yena, hi yena lweyi angayihlavutela ka mina. Mitwile lesvi anihanyisa svona khale, loko na ha hanya Xiyuda. Mitiva hilaha ningaxanisa ni kuhelisa kereke ya Xikwembu hakona, ningatsetseleli munhu. Hikuhanya Xiyuda, anitlula lavotala vatintanga ta mina xikarhi ka va ka hina, nili karhi nihisekela ngopfu mikhuva ya vatatana va hina. Kambe Xikwembu lexi xinihlawuleke na ningasi velekiwa, xinivitanile hi timpsalu ta xona; xisvitsakelile kuhlavutela N'wana wa xona ka mina, lesvaku nitamutwalisa ndzeni ka vamatiko. Nkameni wolowo, anivutisanga munhu, na svona, anitlhantukelanga Yerusalema ka lava vanganirhangela kuva vapostola, kambe niyile xikan'we le Arabiya, ndzhaku nivuyela Damaska. Kutani, ndzhaku ka malembe manharhu, hi kona ni tlhantukeleke Yerusalema kuyavonana na Petrosi, kutani nixwe na yena masiku ya khume na ntlhanu. Kambe anivonananga na mun'we wa vapostola lavan'wana, handle ka Yakobe makwavu wa Hosi. Timhaka leti nimitsalelaka tona titiyile, nihlaya svosvo mahlweni ka Xikwembu, anihembi. Ndzhaku ka svona niyile matlhelweni ya Siriya na Kilikiya. Kambe nkameni wolowo, tikereke ta Kriste letinga Yudeya, atingasinivona hi mahlo; ntsena atitwile van'wana loko vaku: “Munhu lweyi khale aahixanisa ni kuringeta kuhelisa ta kupfumela, svosvi ajondzisa tona.” Kutani atidzunisa Xikwembu hikolaho ka mina. Ndzhaku ka malembe ya khume ni mune, nitlhele ni tlhantukela Yerusalema na nili na Barnaba, kutani niteka na Tito. Nitlhantukele kona hi kuhlavuteliwa hi Xikwembu. Nivonanile ni vafambisi vakona hi tlhelo, kutani nivahlayela Evhangeli leyi niyitwaliseke ndzeni ka vamatiko. Aningalavi lesvaku lesvi nisvitirheke, ni lesvi nisvitirhaka svosvi, svihundzuka ntirho wa mahala. Na Tito lweyi anili na yena, hambilesvi anga Mugriki, angasindzisiwanga kuyimba. Mhaka yipfuxiwile hikolaho ka vanhu van'wana lavatiyendlaka vakriste, vangalava ngheneke xikarhi ka hina hi kukanganyisa, valava kuvona kutshunxeka loku hinga nakona ka Yesu Kriste; avalava kuhiyendla svikarawa; ahipfumelanga ni siku ni rin'we kutiveka hansi ka vona, kambe hilavile lesvaku ntiyiso wa Evhangeli wuhlayiseliwa n'wina svinene. Kambe lava avavoneka onge hi vona vafambisi kumbe avali vona, kumbe avangali vona, ka mina ahi mhaka, Xikwembu axiyi hi nghohe, nili: Vafambisi vakona avayengetelanga nchumu ka mina. Matshan'wini ya svosvo, vasvivonile lesvaku ni rhwexiwile ntirho wojondzisa Evhangeli ka lavangayimbangiki, tani hi Petrosi ka lavayimbeke. Hikuva Xikwembu lexinyikeke Petrosi matimba ya kuva mupostola ka lavayimbeke, na mina xininyikile matimba ya kuva mupostola ka vamatiko. Hikolaho, Yakobe, na Petrosi, na Yohani, lavalangutiwaka vali vona vafambisi va kereke, vawuvonile nkateko lowu Xikwembu xininyikeke wona, kutani vahikhome hi xiyandla, mina na Barnaba, kufunga kutirhisana ka vona na hina: Hina hitaya ka vamatiko, vona vaya ka lavayimbeke. Ntsena vahikhongotele lesvaku hiyanakanya svisiwana, kutani hi svolesvi na mina anihisekela kuyendla svona. Kambe loko Petrosi atile le Antiyoka, nimukongomile, nimulaya hikuva aahoxile. Hikuva loko kungasifika van'wana lavarhumiweke hi Yakobe, aaja ni vamatiko; kambe loko varhumiwa lava vafika, asuka, ayatshama tlhelweni, hi kuchava kuvoniwa hi ntlawa wa lavayimbeke. Vayuda van'wana lava avali kona, na vona vatluleliwile hi vukanganyisi bza Petrosi, Barnaba akondza akokiwa na yena hi kukanganyisa koloko. Kambe loko nivonile lesvaku lesvi avasviyendla asvingafambelani ni ntiyiso wa Evhangeli, nibzelile Petrosi mahlweni ka vona hinkwavu, niku: “U Muyuda wena hi kuvelekiwa, kambe uhanya hi mukhuva wa vamatiko, kungali wa Vayuda; hikolaho ka yini usindzisa vamatiko kuhanya hi mukhuva wa Vayuda ke?” Hina hi Vayuda hi kuvelekiwa, ahi vamatiko vanga “vajohi”. Hambi svilitano, hitiva lesvaku munhu angayendliwi lweyi alulameke mahlweni ka Xikwembu hi kuhlayisa Nawu, kambe kuli ntsena hi kupfumela ka Yesu Kriste; kutani hina hipfumelile ka Yesu Kriste, lesvaku hiyendliwa lavalulameke hi kupfumela ka yena, kungali hi kuhlayisa Nawu; hikuva kutsaliwile lesvi: “Aku na munhu ni mun'we lweyi angatayendliwa lweyi alulameke hi kuhlayisa Nawu.” Kambe, hi kuringeta ka hina kuyendliwa lavalulameke ka Kriste, hikumiwa na hili “vajohi” na hina, xana svihlaya lesvaku Kriste aseketela kujoha ke? Nikutsongo! Loko nitlhela nipfuxa mikhuva leyi aniyihahlulelile, hi kona ningatatikomba na nili muhoxi hakunene. Loko ali mina, Nawu wunidlayile. Hi tlhelo ra Nawu mina anifile, lesvaku nitahanyela Xikwembu. Kriste avambiwile kutani nivambiwile na yena; hi kolaho, angahali mina lweyi ahanyaka, kambe i Kriste lweyi ahanyaka ka mina. Svosvi, loko nihanya mirini, nihanya hi kupfumela, kunga kupfumela ka N'wana wa Xikwembu lweyi anirhandzeke, ava atinyiketa hikolaho ka mina. Anifularheli timpsalu ta Xikwembu, hikuva loko vanhu vangayendliwa lavalulameke hi mhaka ya kuhlayisa Nawu, svihlaya lesvaku kufa ka Kriste akupfunanga nchumu. Yo! Vagalatiya, sviphukuphuku ndzin'wina! Mixengiwile hi mani xana, n'wina lava mihlamuseliweke svinene ta kuvambiwa ka Yesu Kriste xihambanwini, onge hi loko svihumelelile na misvivona hi mahlo? Nibzeleni mhaka yili yin'we ntsena: Xana minyikiwile Moya hi lesvi mihlayiseke Nawu ke, kumbe xana hi lesvi mipfumeleke Evhangeli, siku leri mingayitwa ke? Xana mingava sviphukuphuku hi ndlela leyi ke? Lesvi misunguleke hi sva Moya, milava kuyahetelela hi sva misava ke? Xana lesvikulu lesvi svimihumeleleke, svingava svihundzukile sva hava ke? Hakunene asvivanga sva hava! Xana lweyi amiyavelaka Moya, atlhela ayendla svihlamaliso xikarhi ka n'wina, asviyendla hi mhaka ya lesvi mihlayisaka Nawu, kumbe hi lesvi mipfumeleke Evhangeli, siku leri mingayitwa, ke? Tsalwa rili: “Abrahamu apfumelile ka Xikwembu, kutani hikolaho ka svosvo, Xikwembu ximuhlayile lweyi wolulama.” Kutani-ke, masvivona lesvaku lavanga ni kupfumela, hi vona vanga vana va Abrahamu va xiviri. Matsalwa mahlayile khale lesvaku Xikwembu axilava kuyendla vamatiko vava lavalulameke hi kupfumela; hi kolaho, Abrahamu ativisiwile Evhangeli loko svahali kule, hi marito lamange: “Tinxaka hinkwatu ta misava titakatekisiwa hikolaho ka wena.” Hikolaho, lavanga ni kupfumela vakuma nkateko wun'we na Abrahamu mupfumeli. Hinkwavu lavatitshembaka hi lesvi vahlayisaka Nawu, va le kurhukiweni, hikuva Matsalwa mali: “Mun'wana ni mun'wana lweyi atsandzekaka kuhlayisa ni kuyendla hinkwasvu lesvitsaliweke bukwini ya Nawu, a le kurhukiweni.” Loko svilitano, svi le rivaleni lesvaku aku na munhu ni mun'we lweyi angayendliwaka wolulama mahlweni ka Xikwembu hi mhaka ya lesvi ahlayisaka Nawu; hikuva kuhlayiwile lesvi: “Lweyi ayendliwaka wolulama hi kupfumela, atahanya.” Kambe Nawu ni kupfumela asvifambelani, hikuva Nawu wute: “Munhu ahanya hi kuyendla lesvi Nawu wuleletaka svona.” Kriste ahiponisile khombzeni ra xirhuko xa Nawu, hi kutiyendla lweyi arhukiweke hikolaho ka hina, hikuva Matsalwa mali: “Akurhukiwe mun'wana ni mun'wana lweyi ahayekiweke mhandzeni.” Hi svolesvi Kriste asviyendleke, lesvaku nkateko lowu Xikwembu xiwunyikeke Abrahamu wufika ka vamatiko ha Yesu Kriste, ni lesvaku, hi kupfumela, hiyamukela nyiko ya Moya leyi hitshembisiweke yona. Vamakwerhu, nitamifananisela hi lesvihumelelaka vanhwini siku rin'wana ni rin'wana: Loko ntwananu wutiyisiwile, hambi kuli xikarhi ka vanhu, aku na lweyi angawu helisaka, kumbe kuyengetela svin'wana ka wona. Svosvi-ke, svitshembiso svinyikiwile Abrahamu ni wa rixaka ra yena; akuhlayiwanga “ni va tixaka”, wonge hi loko kuvuliwa lavotala; kambe kuhlayiwile “ni wa rixaka ra yena”, hi lesvaku munhu mun'we anga Kriste. Lesvi nihlayaka svona hi lesvi: Nawu lowu wungata ndzhaku ka malembe ya mune wa madzana ni makume manharhu (430), awuhelisi ntwananu lowutiyisiweke khale hi Xikwembu, ni xitshembiso xa xona axicukumetiwi. Hikuva loko ndzhaka yinyikiwa hi mhaka yohlayisa Nawu, ayahanyikiwi hikolaho ka xitshembiso; kasi Xikwembu xinyikile Abrahamu ndzhaka hi xitshembiso ntsena. Loko svilitano, xana Nawu wutirhile yini ke? Wutisiwile ndzhaku, kukomba lesvi kujoha kunga svona, kukondza kuhumelela lweyi “wa rixaka”, lweyi xitshembiso xiyendleliweke yena. Nawu wutisiwile hi tintsumi, tiwunyika muhlanganisi hi voko. Loko kuli ni muhlanganisi, svihlaya lesvaku munhu ahi mun'we mhakeni, kasi Xikwembu xona i xin'we. Loko svilitano, xana Nawu wulwa ni svitshembiso sva Xikwembu ke? Nisvitsongo! Hikuva loko onge kuvekiwile Nawu lowu wukotaka kunyika vanhu vutomi, vanhu avatayendliwa lavalulameke hi kuhlayisa Nawu; kambe Matsalwa mahlaya lesvaku hinkwasvu svifumiwa hi vujohi, lesvaku xitshembiso lexifambelanaka ni kupfumela ka Yesu Kriste, xinyikiwa ntsena lavapfumelaka. Loko kupfumela kungasita, ahibohiwile hi Nawu, hifumiwa hi wona, kufikela loko kupfumela loku akufanela kuta, kuhlavuteliwile. Hikolaho, Nawu awuli mufambisi wa hina kufikela loko Kriste atile, lesvaku hitayendliwa lavalulameke hi mhaka ya kupfumela. Kambe svosvi, lesvi kupfumela kufikeke, ahahali hansi ka mufambisi wakona. Hikuva ka Yesu Kriste hinkwenu mi vana va Xikwembu hi mhaka ya kupfumela. Hinkwenu lava mingatsakamisiwa ka Kriste, miyambalile Kriste. Hikolaho, aku na Muyuda kumbe Mugriki, aku na xikarawa kumbe mutshunxeki, aku na wanuna kumbe wansati, hikuva hinkwenu miwun'we ka Yesu Kriste. Kutani, loko mili va ka Kriste, svihlaya lesvaku mi rixaka ra Abrahamu, mivaji va ndzhaka hikolaho ka xitshembiso. Lesvi ni svihlayaka hi lesvi: Loko, maja ndzhaka ahali xihlangi, angatluli xikarawa, hambilesvi anga yena n'winyi wa ndzhaka hinkwayu; alehansi ka vahlayisi va yena ni valanguteli va rifuwo ra yena, kukondza kufika siku lerivekiweke hi tatana wa yena. Svixitanu na hina: Loko hingasikula Moyeni, ahili svikarawa sva mimoya leyifumaka misava leyi. Kambe loko nkama wufikile hi ndlela leyi yihetisekeke, Xikwembu xirhumile N'wana wa xona, lweyi avelekiweke hi wansati, avelekiwa na ali hansi ka Nawu, lesvaku atakutsula lava avali hansi ka Nawu, ni lesvaku hitayamukela xiyimu xa vana va Xikwembu. Kukomba lesvaku mi vana va xona, Xikwembu xichelile Moya wa N'wana wa xona timbilwini ta hina, wunga Moya lowuhuwelelaka wuku: “Aba, Tatana!” Hikolaho wena awahali xikarawa, kambe n'wana; kutani lesvi unga n'wana, u mujandzhaka hi kurhandza ka Xikwembu. Khale, loko mingasitiva Xikwembu, amili svikarawa mitirhela svikwembu lesvi hi ntumbuluku svinga sva hava. Kambe lesvi namuntlha mitivaka Xikwembu (kumbe ningaku, lesvi namuntlha Xikwembu ximitivaka), xana sviyendlisa kuyini lesvaku mitlhelela ka mimoya leyi ya khale, leyitsaneke ya misava leyi ke? Hikolaho ka yini milava kutlhela mihundzuka svikarawa sva yona ke? Mitiva kuvekisa masiku man'wana, ni tihweti, ni tinguva, ni malembe! Manichavisa, onge hi loko lesvi ningatikarhata nimiyendlela svona svingapfunanga nchumu. Na mikombela vamakwerhu, hundzukani lavafanaka na mina, hikuva na mina nihundzukile lweyi afanaka na n'wina. Aminihoxelanga ha nchumu; matsundzuka lesvaku i kuvabza ka mina lokunganinyika nkama womijondzisa Evhangeli kusunguleni. Hambi svilitano, aminisolanga kumbe kuninyenya hi mhaka ya vuvabzi bza mina, lebzi abzili ndzingo ka n'wina; kambe miniyamukelile tani hi loko nili ntsumi ya Xikwembu, tani hi loko miyamukela Yesu Kriste. Kuyohumelela yini, lesvi khale amitshama na mitsakile? Hikuva ningatiyisa lesvaku, loko onge kahali khale ka n'wina, amitava mitixokole ni mahlo mininyika wona loko svikoteka. Xana svosvi nihundzukile nala wa n'wina hi kumibzela ntiyiso ke? Vanhu lavaya van'wana vatikarhatela n'wina, kambe ava na moya lowunene; valava ntsena kumihambanisa na mina, lesvaku mitatikarhatela vona. Asvibihanga kutikarhatela van'wana masiku hinkwawu, loko moya wuli lowunene, nasvona kungali ntsena hi loko nili na n'wina. Vana vanga, kufana ni mamana lweyi alun'waka, nitwa kuvava nakambe hikolaho ka n'wina, kufikela loko xivumbeko xa Kriste xivonake xikarhi ka n'wina. Anitanavela ngopfu kuva xikarhi ka n'wina svosvi, nitavulavula na n'wina hi ndlela yin'wana, hikuva ni le kukarhatekeni hi tlhelo ra n'wina. Minganibzela, n'wina lavatsakelaka kuva hansi ka Nawu: Xana amisvitwi lesvi Nawu wuhlayaka svona ke? Hikuva Matsalwa mahlaya lesvaku Abrahamu aali ni vana vambirhi vaxinuna, mun'we avelekiwile hi nsati wa yena wa xikarawa, mun'wana hi nsati lweyi atekiweke wokala angali xikarawa. Kambe n'wana wansati lweyi wa xikarawa, avelekiwile kufana ni vanhu hinkwavu; kasi n'wana wansati lweyi wa kutekiwa avelekiwile hikolaho ka xitshembiso. Timhaka leti i kupimanisa: Vavasati lavambirhi i mintwananu mimbirhi; mun'we, anga yena Agar, ahuma ntshaveni ya Sinayi, vana va yena vavelekeliwe vukarawa; Agar i ntshava ya Sinayi, tikweni ra Arabiya, kutani afanisa doropa ra svosvi ra Yerusalema, hikuva ri le vukaraweni svin'we ni vana va rona. Kambe Yerusalema wa le tilweni atshunxekile, kutani hi yena mamana wa hina. Hikuva kutsaliwile lesvi: “Tsaka wena mhika, lweyi angavelekiki svihlangi, bana nkulungwana lowukulu, wena lweyi ungatwiki kulumiwa ka kuveleka; hikuva wansati lweyi angatshikiwa, atava ni vana votala kutlula wansati lweyi anga ni nuna.” Svosvi-ke, n'wina vamakwerhu, mi vana va xitshembiso kufana na Izaki. Nasvona, kufana ni lesvi, nkameni wolowo, n'wana wa kuvelekiwa kukota vanhu hinkwavu angaxanisa n'wana wa kuvelekiwa hi matimba ya Moya, ni svosvi svahalitano. Kambe Matsalwa mali yini ke? Mali: “Hlongola nsati lweyi wa xikarawa ni n'wana wa yena, hikuva n'wana wa xikarawa angakala angayaveliwi ndzhaka svin'we ni n'wana wansati wa kutekiwa lweyi angaliki xikarawa.” Hikolaho, vamakwerhu, hina ahi vana va xikarawa, kambe hi vana va nsati wa kutekiwa, lweyi angaliki xikarawa. Hi tshunxiwile hi lesvi Kriste ahitshunxeke. Hikolaho, yimani mitiya, mingahatlheleni mitiveka hansi ka ndzhwalu wa vukarawa. Masvivo, mina Pawulo ni mibzela lesvi: Loko mipfumela kuyimbisiwa, svihlaya lesvaku Kriste angamipfuni nchumu nikutsongo. Nilava kuyengeta nitiyisa kambe, ka mun'wana ni mun'wana lweyi apfumelaka kuyimbisiwa, lesvaku afanela kuyendla hinkwasvu lesvi Nawu wuleletaka svona. Mitihambanisile na Kriste, n'wina hinkwenu lavarhandzaka kuyendliwa lavalulameke mahlweni ka Xikwembu hi mhaka ya kuhlayisa Nawu; miwele kule ni timpsalu ta Xikwembu. Loko ali hina, hi ni kutshemba ka lesvaku Xikwembu xitahiyendla lavalulameke mahlweni ka xona, kutani hi svona lesvi hisvilangutelaka, hi matimba ya Moya lowutirhaka ka hina, hi kupfumela loku hinga nakona. Hikuva ka Yesu Kriste, kuyimba kumbe kuva munhu wokala angayimbanga, asvivuli nchumu, kambe lexinga xona i kupfumela loku kutirhaka hi rirhandzu. Amilikarhi mitsutsuma svinene! I mani lweyi angamisivela kuyingisa ntiyiso? Kuxisiwa loku akuhumi ka Xikwembu lexi ximivitaneke. “Comela ritsongo rikukumuxa mbila hinkwayu”, hilaha svivuliwaka hakona. Mina ni ni kutshemba ka lesvaku, lesvi hinga va Hosi hinkwerhu, amingavi ni miyanakanyu yohambana ni ya mina, ni lesvaku lweyi amipfilunganyisaka, atakuma kuyavanyisiwa ka yena, hambi angava mani na mani. Kambe loko mina nahajondzisa hi ta kuyimba, vamakwerhu, xana nahaxanisiwa hikolaho ka yini? Hikuva, loko svilitano, kujondzisa ka mina hi ta xihambanu akungatakwatisa munhu. Asvitava svona loko vanhu lava vamipfilunganyisaka, vangayimi kolaho, kambe vatitshena xikan'we. Loko ali n'wina vamakwerhu, mivitaniwile lesvaku miva lavatshunxekeke; kambe mingateki kutshunxeka ka n'wina, mikuhundzula mpfumelelo wo yendla lesvi ntumbuluku wa n'wina wa laha misaveni wusvinavelaka; matshan'wini ya svosvo, tirhelanani hi rirhandzu. Hikuva Nawu hinkwawu wuhlanganisiwa hi kulerisa lokunge: “Rhandza munhukuloni kufana ni loko utirhandza.” Kambe loko milumana ni kukakatlulana, tivoneleni lesvaku mingahetani hi rixaka. Lesvi nisvihlayaka hi lesvi: Fambani hi Moya, kutani mingakala mingakolwisi kunavela ka ntumbuluku wa n'wina wa nyama; hikuva kunavela ka nyama kulwa ni Moya; nasvona kunavela ka Moya kulwa ni nyama. Svilo lesvi svimbirhi svalwetana, kutani mahluleka kuyendla lesvi milavaka kusviyendla. Kambe loko mifambisiwa hi Moya, amile hansi ka Nawu. Mintirho ya ntumbuluku wa nyama yi le rivaleni: I kuwosva ni mikhuva ya chaka ni manyala, ni kuphahla svikwembu sva hava ni xiloyiloyi ni rivengo ni timholova ni vukwele ni kukariha ni vutirhandzi ni kuyavana ni kulwetana, ni mavondzo ni vudakwa ni magolo ni svofana ni svosvo. Namitsundzuxa, hilaha nitshamaka nimitsundzuxa hakona, lesvaku lavayendlaka svofana ni lesvo, vangakala vangavi na kuyaveliwa kufumeni ka Xikwembu. Kasi mihandzu ya Moya i rirhandzu ni kutsaka ni kurhula ni kuleha mbilu ni vunene ni kunyika ni kutshembeka ni timpsalu ni kutikhoma. Awukona Nawu lowulwaka ni svofana ni lesvo. Lavanga va ka Kriste Yesu va vambile nyama ni sva yona, svifa; avahasvihisekeli, avahasvinaveli. Lesvi Moya uhinyikeke vutomi, ahihanyeni hi kulerisa ka wona. Hingatshukeni hitilavela kutidzunisa ka hava; ahichaveni kupfukana ni kutshohokana. Vamakwerhu, loko mun'wana akumiwa na ali karhi ayendla xihoxo, n'wina lava minga va Moya, muvuyiseni hi moya wa musa. Ka mun'wana ni mun'wana wa n'wina, nili, tivonele lesvaku na wena ungaringiwi. Rhwalelanani mindzhwalu, kutani, hi kuyendlisa svosvo, mitava mihetisa Nawu wa Kriste. Hikuva loko mun'wana ayanakanya lesvaku yena xanchumu, kasi ahi nchumu, watikanganyisa. Mun'wana ni mun'wana aakambisise ntirho wa yena, kuli kona angakotaka kutidzunisa hi sva yena, kungali hi sva mun'wana; hikuva mun'wana ni mun'wana atarhwala ndzhwalu wa yena. Lweyi ajondzisiwaka Rito, aapambulele mujondzisi wa yena svilo svosaseka hinkwasvu lesvi anga na svona. Mingatshukeni mitixisa: Xikwembu axivungunyiwi; xin'wana ni xin'wana lexi munhu axibzalaka, atatshovela xona; lweyi abzalaka sva kutsakisa ntumbulukwini wa yena wa nyama, atatshovela sva kubola lesvihumaka ka ntumbuluku wa yena wolowo; kambe lweyi abzalaka svakutsakisa Moya, atatshovela lesvihumaka ka Moya, bzinga vutomi lebzingaheliki. Loko hili karhi hiyendla lesvinene, hingakarhaleni, hikuva hitatshovela hi nkama wakona, loko hingaheli mbilu. Hikolaho, minkama hinkwayu loko svikoteka, ahiyendleleni vanhu hinkwavu lesvinene, ngopfungopfu va njangu wa lavapfumeleke. Vonani maletera makulu lawa ni mitsalelaka hi wona! Kutsala mina hi nexe, hi voko ra mina. Hinkwavu lavaringetaka kutikomba vali lavanene ni kutidzunisa hi svilo sva laha misaveni, hi vona lava vamisindzisaka kuyimba; vayendlela ntsena lesvaku vatakala vangaxanisiwi hikolaho ka xihambanu xa Kriste; hikuva hambi valilava vasindzisaka sva kuyimba, avahlayisi Nawu, kambe vanavela ntsena lesvaku miyimba, vatakota kutidzunisa hi kuvula lesvaku mi ni mfungu wakona mirini wa n'wina. Loko ali mina, asvive kule na mina kutidzunisa, loko kungali hi xihambanu xa Hosi ya hina Yesu Kriste, hikuva hikolaho ka xihambanu xa yena, sva misava ka mina svivambiwile svifa, na mina nifile hi tlhelo ra sva misava. Hikuva, hambi munhu ayimbile kumbe angayimbanga, asvihlayi nchumu. Mhaka leyikulu i kuva xivumbiwa leximpsha. Kurhula ni kutsetseleliwa asvive henhla ka hinkwavu lavafambaka hi nawu lowu, ni ka vanhu hinkwavu va Xikwembu. Kusukela svosvi, aningahakarhatiwi hi munhu hikuva svivati lesvi ninga na svona mirini, i mfungu wa lesvaku ni xikarawa xa Yesu. Timpsalu ta Hosi ya hina Yesu Kriste ative ni mimoya ya n'wina vamakwerhu. Amen! Mina Pawulo, mupostola wa Kriste Yesu hi kurhandza ka Xikwembu, nitsalela vakwetsimi va Xikwembu [lavanga le Efesa], lavatshembekaka ka Yesu Kriste, nili: Timpsalu ni kurhula asvive na n'wina, svihuma ka Xikwembu Tatana wa hina, ni le ka Hosi Yesu Kriste. Akudzunisiwe Xikwembu, Tatana wa Hosi ya hina Yesu Kriste, lexingahikatekisa ka Kriste hi minkateko ya moya wa kuhambanahambana, henhla matilweni: Ni loko misava yingasitumbuluxiwa, Xikwembu axihihlawulile ka Kriste, lesvaku hitava lavahlawulekeke ni kupfumala nandzu mahlweni ka xona. Hikolaho ka rirhandzu ra xona, xilulamisile khale lesvaku, ha Yesu Kriste, xitahitshineta kusuhi na xona, xihiyendla vana va xona. Lesvi, akuli kurhandza ka xona ni makungu ya xona, kuyendlela lesvaku hixidzunisa ni kuxitwalisa hi mhaka ya timpsalu ta xona, leti xihinyikeke ka N'wana wa xona lweyi arhandzekaka. Hikuva, hi kufa ka Kriste, haponisiwa, hirivaleliwa svijoho sva hina. Timpsalu ta Xikwembu i tikulu ngopfu, tinga leti xingahichululela tona! Hi vutlhari hinkwabzu bza xona ni kuyanakanya hinkwaku ka xona, Xikwembu xiyendlile lesvi kusukela khale axilava kusviyendla ha Kriste: Xihitivisile kurhandza ka xona loku akufihliwile, loku axilava kukuyisa mahlweni, minkama yakona yikondza yihetiseka. Kurhandza ka xona i kuhlanganisa svivumbiwa hinkwasvu, sva le matilweni ni sva laha misaveni, nhloko ya svona ava Kriste. Hakunene Xikwembu xiyendla hinkwasvu hilaha xirhandzaka hakona ni hilaha xipimaka hakona, kutani xihlawule hina Vayuda kuva vamajandzhaka va xona ka Kriste, hi kutilulamisela ka xona ka khale, kuyendlela lesvaku hina hinga lavosungula kuva ni kutshemba ka Kriste, hidzunisa kutwala ka xona Xikwembu. Asvili tano na n'wina vamatiko, loko mitwile Rito ra ntiyiso, anga Evhangeli ya kuponisiwa ka n'wina: Mipfumelile ka Kriste, kutani Xikwembu ximifungile hi Moya Lowokwetsima lowu axitshembisile kuminyika wona. Moya lowu i xitshembiso xa ndzhaka ya hina leyi hingatayikuma, leyi Xikwembu xinyikaka kutshunxeka loku kuhetisekeke ka lavanga va xona, kuyendlela lesvaku vadzunisa kutwala ka xona. Hikolaho na mina, kusukela loko nitwile ta kupfumela ka n'wina ka Hosi Yesu, ni ta rirhandzu ra n'wina ka vahlawuliwa va Xikwembu hinkwavu, anitshikanga kukhensa hikolaho ka n'wina. Namiyanakanya mikhongelweni ya mina; nikombela lesvaku Xikwembu xa Hosi ya hina Yesu Kriste, Tatana lweyi adzunekaka, ximinyika Moya wa vutlhari, xitipfuletela ha wona ka n'wina, lesvaku mitaxitiva svinene na mahlo ya timbilu ta n'wina mavoningiwile, mitativa lesvaku kulangutela loku ximivitanelaka kona hi loku koyini, ni lesvaku kutala ka ndzhaka ya xona leyosaseka ngopfu leyitshembisiwaka vahlawuliwa va xona, hi leyoyini, mitativa ni vukulu lebzingapimekiki bza matimba ya xona lamatirhaka xikarhi ka hina lavapfumelaka. Matimba lamakulu lawa, mahali wona lawa ximatirhiseke ngopfu, loko xipfuxile Kriste kufeni, xiva ximuveka vokweni ra xona ra xinene henhla matilweni. Kriste wafuma kona, henhla ka hinkwasvu lesvinga ni vukulukumba, ni kufuma, ni matimba, ni vuhosi; na svona, a le henhla ka mavito hinkwawu lawa mangavuliwaka, kungali minkameni leyi ntsena, kambe ni ka minkama leyingatata. Kutani Xikwembu xivekile hinkwasvu hansi ka minkondzo ya Kriste, xitlhela ximuveka Kerekeni, kuva nhloko ya hinkwasvu. Kereke i miri wa yena, yihetiseka hikolaho ka yena lweyi ahetisisaka svilo hinkwasvu hi matlhelo hinkwawu. Khale amifile moyeni hikolaho ka milandzu ya n'wina ni svijoho sva n'wina. Minkameni yoleyo, amihanya ka svona, loko mahalandza svihena lesvobiha sva misava leyi. Amili hansi ka hosana leyifumaka mimoya ya le henhla mpfhukeni, wunga moya lowutirhaka ni svosvi xikarhi ka vanhu lavangayingisiki Xikwembu. Na hina hinkwerhu khale ahifana na vona, hihanya hi kunavela ka nyama ya hina ya laha misaveni, hiyendla hinkwasvu lesvitsakisaka miri ni kuyehleketa ka hina; kutani na hina, hi kutumbuluka, ahifaneliwile hi vukarhi bza Xikwembu, kufana ni vanhu van'wana. Kambe Xikwembu xi ni timpsalu svinene, hikolaho ka rirhandzu lerikulu leri xingahirhandza ha rona. Hikolaho, hambilesvi ahifile hi mhaka ya milandzu ya hina, xihivuyisile vuton'wini svin'we na Kriste. I timpsalu ta Xikwembu leti timiponiseke. Hi kuhihlanganisa na Kriste Yesu, xihipfuxile kufeni svin'we na yena, ni kuhiyendla lavafumaka na yena henhla matilweni. Xiyendlile lesvi kukomba minkarhi leyitaka, kutala lokungapimekiki ka timpsalu ta xona, hi vunene lebzi xihiyendleleke bzona ha Yesu Kriste. Hikuva hi tona timpsalu ta Xikwembu leti timiponiseke, hikolaho ka kupfumela; kutani lesvi asvihumi ka n'wina, kambe i nyiko ya Xikwembu. Aku na xotikulisa ha xona mhakeni leyi, hikuva asvihumi kutikarhateni ka n'wina. Hikuva hina hivumbiwile hi Xikwembu, kutani, ka Yesu Kriste, Xikwembu xihivumbele kutirha mintirho leyinene, leyi xihilungiseleke yona khale, lesvaku hitayendla yona. N'wina vamatiko, lava va khale hi kuvelekiwa amihlayiwa “lavokala vangayimbanga” hi Vayuda lavatihlayaka “lavoyimba”, hikolaho ka kuyimba lokuyendliwaka hi mavoko ya vanhu mirini wa vona, tsundzukani lesvi amili xisvona. Minkameni yoleyo, amihambene na Kriste, amingahlayiwi nchumu xikarhi ka Vaisrayele, amingali na kuyaveliwa ka mintwananu ya xitshembiso. Amihanya misaveni leyi na mingali na kulangutela, nasvona mingali na Xikwembu. Kambe svosvi, ka Yesu Kriste, n'wina lava va khale amili kule ni Xikwembu, mitshinetiwile kusuhi na xona hi kufa ka Kriste. Kriste hi xiviri, hi yena kurhula ka hina, hikuva ayendlile lesvaku Vayuda ni vamatiko vava vanhu van'we. Hi kunyiketa miri wa yena, ahirimuxile khumbi leri arivahambanisa ni kuvavenganisa. Ahelisile Nawu lowunga ni svileriso ni svinawanawana; ayendlile lesvi lesvaku, hi tinxaka leti timbirhi, atavumba vanhu van'we lavampsha lavahlanganaka ka yena, kutani svitisa kurhula. Hi kufa ka yena xihambanwini, Kriste ahelisile rivengo, kutani, hi xihambanu, ahlanganisile tinxaka leti timbirhi tiva vanhu van'we, avavuyisa ka Xikwembu. Atile atapaluxa Evhangeli ya kurhula ka n'wina vamatiko lava amili kule ni Xikwembu, ni ka Vayuda lava avali kusuhi na xona. Hi yena lweyi ayendleke lesvaku hina hinkwerhu, Vayuda ni vamatiko, hikota kuta hi Moya wun'we mahlweni ka Xikwembu. Hikolaho-ke, n'wina vamatiko amahali va le handle ni vanhu van'wanyana, kambe mi va munti wun'we ni vahlawuliwa va Xikwembu, mi va njangu wa xona. Na n'wina miyakiwa henhla ka masungulu lamavekiweke hi vapostola ni vaprofeta, ribze lerikulu ra masungulu na ali yena Yesu Kriste hi xiviri. Hikolaho ka yena, yindlo hinkwayu yihlangana yitiya, yikula svin'we yiyendla tempele leyohlawuleka Hosini; ka yena na n'wina miyakiwa kun'we ni van'wana, miyendla yindlo laha Xikwembu xitshamaka kona hi Moya wa xona. Mina Pawulo, mubohiwa avutirheleni bza Kriste Yesu, namikhongelela n'wina vamatiko. Mitava mitwile hilaha Xikwembu, hi timpsalu ta xona, xininyikeke hakona ntirho lowu lesvaku nimipfuna, hikuva xitivisile xihundla xa makungu ya xona ka mina, nitsalile mhaka leyi hi kukomisa, kutani loko mihlaya lesvi nisvitsaleke, mingavona hilaha ni twisisaka xihundla xa Kriste hakona. Minkameni leyihundzeke, vanhu avabzeliwanga xihundla xoxo hi ndlela leyi Moya wungaxihlavutela ha yona svosvi, ka vapostola va Xikwembu lavohlawuleka ni ka vaprofeta. Xihundla hi lexi: Hi mhaka ya Evhangeli, vamatiko vayaveliwa ndzhaka svin'we na hina Vayuda, vayendla svirho svin'we na hina mirini wun'we, nasvona vayaveliwa xitshembiso xin'we na hina ka Yesu Kriste. Ninyikiwile kuva nandza wa Evhangeli leyi hi timpsalu ta Xikwembu, leti nitikumeke hi matimba ya xona lamatirheke ka mina. Mina, ninga lwentsongo ngopfu ka vahlawuliwa va Xikwembu hinkwavu, ninyikiwile nkateko lowu wa kufikisa ka vamatiko Evhangeli ya rifuwo leringakontekiki ra Kriste, ni kuyendla lesvaku vanhu hinkwavu vativa hilaha xihundla xa makungu ya Xikwembu xiyendlekaka hakona. Xikwembu, lexinga mutumbuluxi wa hinkwasvu, xitlhotile xihundla lexi minkameni hinkwayu leyihundzeke, lesvaku minkameni ya svosvi, hi kutirhisa kereke, xitativisa vutlhari bza xona hi matlhelo hinkwawu ya bzona ka mimoya ya tihosana ni ya matimba henhla matilweni. Xikwembu xiyendlile lesvi hi kulandza kutilulamisela ka xona ka khale, loku xikuhetisiseke ha Yesu Kriste, Hosi ya hina. Hi kuhlangana na yena, ni kupfumela ka yena, hi tshunxekile kuta mahlweni ka Xikwembu na hingali na kukanakana. Hikolaho nakombela nili: Mingaheleni mbilu, loko mivona lesvaku nixaniseka hikolaho ka n'wina; hinkwasvu lesvi svipfuna n'wina. Hikolaho ka svosvo, nikhinsama hi matsolo mahlweni ka Tatana, lweyi njangu, wun'wana ni wun'wana, matilweni ni la misaveni, wuhlayiwaka hikolaho ka yena. Nikombela Xikwembu lesvaku ntalwini wa kudzuneka ka xona, ximinyika matimba, hi Moya wa xona, kutiya ka munhu wa n'wina wa le ndzeni, ni lesvaku Kriste ayaka timbilwini ta n'wina hi kupfumela. Nikhongela lesvaku mimila timintsu rirhandzwini ni kuveka masungulu ya n'wina henhla ka rona, ni lesvaku, svin'we ni vahlawuliwa hinkwavu va Xikwembu, mikuma matimba ya kutwisisa kuyanama, ni kuleha, ni kutlakuka, ni kuyeta ka rirhandzu ra Kriste. Mawaku loko ingi mingativa rirhandzu ra yena, hambi loko svingayendleki kuritiva hi kuhetiseka kutani, mitatala hi vukona bza Xikwembu matlelo hinkwawu. Ka yena lweyi akotaka kuyendla, hi matimba lamatirhaka ka hina, kutlula ngopfu svinene hinkwasvu lesvi hingasvikombelaka, kumbe lesvi hingasvipimisaka, ka yena akuve kudzuneka kerekeni ni le ka Yesu Kriste, hi minkama ni minkama hilaha kungaheliki. Amen! Hikolaho-ke, mina ninga mubohiwa ntirhweni wa Hosi, na mikhongotela kuhanya hi ndlela leyifambelanaka ni kuvitaniwa ka n'wina. Masiku hinkwawu, titsongahateni, miva ni musa, milehisa mbilu; kombani rirhandzu ra n'wina hi kuyingiselana. Yendlani hi matimba kuhlayisa vun'we lebzinyikiwaka hi Moya, mihanyisana hi kurhula. Ku ni miri wun'we, ni Moya wun'we, tani hi lesvi kunga ni kulangutela kun'we loku Xikwembu xingaminyika kona, siku leri ximivitaneke; ku ni Hosi yin'we, ni kupfumela kun'we, ni ntsakamiso wun'we; ku ni Xikwembu xin'we, Tatana wa vanhu hinkwavu, lexi xivafumaka hinkwavu, lexitirhaka hi vona ni kutshama ka vona hinkwavu. Hambi svilitano, hi timpsalu mun'wana ni mun'wana wa hina anyikiwile nyiko leyinga ya yena, leyi angayaveliwa yona hi Kriste, hikuva Matsalwa mali: “Siku leri atlhantukeleke henhla, afambile ni van'wana vakhomiwa lavotala, anyikile vanhu tinyiko.” Xana marito lamange: “Atlhantukele henhla”, makomba yini ke? Makomba lesvaku aaxikile hansi, ayafika ni le hansi ka misava. Lweyi axikeke, wahali yena lweyi atlhantukeleke henhla, kuhundza ni matilo hinkwawu, lesvaku atata matilo ni misava hi vukona bza yena. Nasvona, hi yena “lweyi anyikeke vanhu tinyiko”, van'we kuva vapostola, van'wana kuva vaprofeta, van'wana kuva vavuli va Evhangeli, van'wana kuva vafundhisi ni vajondzisi. Ntirho wa vona i kupfuna vahlawuliwa va Xikwembu lesvaku vatakota kutirhela van'wana, vayaka miri wa Kriste. Kutani kuheteleleni, hitahlangana svin'we hinkwerhu ka vun'we lebzitisiwaka hi kupfumela ka N'wana wa Xikwembu ni kumutiva, kutani hihundzuka vanhu lavawupfeke, hikula ni kufika ka xiyimu lexihetisekeke xa Kriste. Kutani ahingahavi vatsongwana lavatsekatsekisiwaka, nasvona ahingehepengwisiwi hi jondzo yokala yingali yona, hi kuxengiwa hi vanhu lavakanganyisaka van'wana ni kuvahambukisa hi maqhinga ya vona. Matshan'wini ya svosvo, hitahanya ntiyisweni hi moya wa rirhandzu, hikula hi matlhelo hinkwawu ka Kriste, yena lweyi anganhloko. Miri hinkwawu wutiyisiwa hi yena, na svirho hinkwasvu sva wona svili karhi svihlanganisiwa ni kukhomana svinene, sviyendla xilo xin'we. Kutani loko xirho xin'wana ni xin'wana xitirha ntirho wa xona hi mfanelo, miri hinkwawu wukula, wuyakiwa rirhandzwini. Hikolaho, nivula lesvi ni kusvitiyisa hi vito ra Hosi, nili: Mingahahanyeni kufana ni lesvi vamatiko vahanyisaka xisvona, hi kuyanakanya ka vona lokungapfuniki nchumu. Miyanakanyu ya vona yi le munyameni; ava na kuyaveliwa vuton'wini bza Xikwembu, hikuva ka vona vutivi abzikona, nasvona timbilu ta vona titlanyalile, kutani avahali na tingana; vatinyiketile ka mikhuva ya manyala, vayendla sva nsila hinkwasvu, vangakoti kutikhoma. Kambe loko mili n'wina, ahi svona lesvi misvijondzeke hi tlhelo ra Kriste; timhaka ta yena mititwile, kutani lesvi minga vanhu va yena Yesu, mijondzisiwile ntiyiso lowu wunga ka yena. Hikolaho, tshikani mahanyela ya n'wina ya khale, mihlivila munhu wa khale lweyi aawonhiwa hi mhaka ya kunavela ka yena loku kukanganyisaka. Mimoya ya n'wina ni kuyehleketa ka n'wina asvihundzuke sviva lesvimpsha. Yambalani munhu lwe mumpsha lweyi avumbiweke hi xifaniso xa Xikwembu, lweyi atikombaka hi kululama ka yena ni kuhlawuleka lokunga ni ntiyiso. Hikolaho-ke, tshikani mavunhwa; mun'wana ni mun'wana aavulavuli ntiyiso ka munhukulobze, hikuva hinkwerhu hi svirho sva miri wun'we. Loko mitshuka mihlundzuka, mingaweli kujoheni; jambu ringatshuki ripela na mahahlundzukile, nasvona minganyiki Diyavulosi nkama. Lweyi aatolovela kuyiva, angahayi mahlweni ayiva; kambe aatikarhate atirha hi mavoko ya yena, atirhela sva kutipfuna ha svona, lesvaku atakota kupambulela lweyi apfumalaka. Akuvulavuleni ka n'wina mingatshukeni mitirhisa marito ya tingana, kambe tirhisani ntsena marito lamapfunaka, lawa mayakisaka ni kuhlamula lesvilavekaka, kutani kuvulavula ka n'wina kutatisa kukateka ka lava vamiyingisaka. Mingakhomisini tingana Moya Lowokwetsima wa Xikwembu, hikuva i mfungu wa Xikwembu wukomba lesvaku mi vanhu va xona, ni lesvaku siku rata, leri xingatamiponisa ha rona. Lesvi sva kubava hinkwasvu, ni mahlundzu hinkwawu, ni kukariha hinkwaku, asvisusiwe xikarhi ka n'wina; tshikani kuholova ni kurhuketelana, misusa mona hinkwawu. Matshan'wini ya svona, twelanani vusiwana, mitsetselelana, mirivalelana, kufana ni lesvi Xikwembu na xona ximirivaleleke ka Kriste. Lesvi minga vana va Xikwembu lavarhandzekaka, ringetani kuva lava vafanaka na xona. Hanyani hi moya wa rirhandzu, tani hi Kriste lweyi ahirhandzeke ni kutinyiketa hikolaho ka hina ahumesela Xikwembu nyiko ni mhamba ya risima, leyi yixitsakisaka. Mi vahlawuliwa va Xikwembu, kutani vuwosvi, ni sva chaka hinkwasvu, ni makwanga, asvilaveki xikarhi ka n'wina, ni kukumbuka svingakumbukiwi. Mingatirhiseni marito ya kurhuketela, ni ya vuphukuphuku, ni ya mafenya, hikuva amalaveki; tirhisani ntsena marito lamakhensaka Xikwembu! Tivani mhaka leyi: Aku na munhu ni mun'we lweyi angatayaveliwa ndzhaka Mfun'wini wa Kriste ni wa Xikwembu, loko ahahanya hi vuwosvi, kumbe lweyi ayendlaka sva nsila, kumbe lweyi anga ni makwanga, hambi lweyi agandzelaka svikwembu sva hava. Kungavi na munhu lweyi amikanganyisaka hi marito lamangapfuniki nchumu: Svijoho lesvi, hi svona lesviyendlaka lesvaku vukarhi bza Xikwembu bziwela vanhu lavangayingisiki. Hikolaho mingatshukeni mitolovelana ni vanhu lavotano. Hikuva khale n'wina hi n'wexe amili munyameni, kambe svosvi, lesvi mingahundzuka vanhu va Hosi, mi le kuvonakaleni. Hanyani kufana ni vanhu va kuvonakala, hikuva kuvonakala hi kona loku kuvekaka mihandzu leyotala, yinga ya vunene ni kululama ni ntiyiso. Kambisisani, mivona lesvitsakisaka Hosi. Mingatshukeni mitolovelana ni lavayendlaka lesvokala svingapfuni nchumu sva munyama; svisoleni rivaleni, hikuva hambi kuli kuvula ntsena lesvi vasviyendlaka xihundleni, svikhomisa tingana. Loko svilo lesvi hinkwasvu svisoliwa rivaleni, kuvonakala kutakomba lesvi svinga svona, hikuva xin'wana ni xin'wana lexikombiwaka lesvi xinga xisvona, xihundzuka kuvonakala. Hikolaho vange: “Pfuka wena lweyi uyetleleke, pfuka xikarhi ka vafi, kutani Kriste atakuvoninga.” Loko svilitano, kambisisani svinene mahanyela ya n'wina; mingahanyeni tani hi vanhu lavangatwisisiki nchumu, kambe hanyani kufana ni lavatlhariheke. Londzovotani nkama lowu minga na wona, hikuva masiku lawa hinga ka wona mabihile. Hikolaho, mingaveneni sviphukuphuku, kambe ringetani kutwisisa lesvi Hosi yirhandzaka svona. Minganweneni vhinyu rimidakwa, hikuva rivanga timholova, kambe matshan'wini ya svosvo mitala hi Moya. Khongotelanani hi tipisalema ni tinsimu, miyimbelela sva Moya; twalisani Hosi hi tinsimu ni tipisalma, miyidzunisa hi timbilu ta n'wina hinkwatu. Masiku hinkwawu, khensani Xikwembu Tatana hikolaho ka svilo hinkwasvu, hi vito ra Hosi ya hina Yesu Kriste. Titsongahateni, van'we ka van'wana, hikolaho ka xichavu lexi minga na xona ka Kriste. N'wina vavasati, titsongahateni ka vanuna va n'wina, kukota loko mititsongahata ka Hosi. Hikuva nuna i nhloko ya nsati wa yena, kukota lesvi Kriste na yena anga nhloko ya Kereke, nasvona Kriste i muponisi wa Kereke, yinga miri wa yena; kutani, kufana ni lesvi Kereke yititsongahataka ka Kriste, vavasati na vona avatitsongahate ka vanuna va vona, timhakeni hinkwatu. N'wina vavanuna, rhandzani vasati va n'wina kukota lesvi Kriste na yena angarhandza Kereke, kutani anyiketa vutomi bza yena hikolaho ka yona. Ayendlile lesvi lesvaku atayihlawulekisa hi rito ra yena, ayiyendla leyitengeke hi kuyikhuvula hi mati. Anavelile kuyimisa Kereke mahlweni ka yena, hi kusaseka ka yona hinkwaku, na yingali na xivati kumbe minkonya, kumbe xin'wana lexifanaka na svona, kambe yili leyihlawulekeke, leyingaliki ni xisandzu. Hi ndlela yoleyo, vavanuna na vona vafanela kurhandza vasati va vona, hilaha varhandzaka miri wa vona hakona. Lweyi arhandzaka nsati wa yena, watirhandza, hikuva akusitshama kuva ni munhu lweyi avengaka nyama ya yena, kambe wayifihluta, wayikufumeta, tani hi lesvi Kriste na yena ayendlelaka Kereke, hikuva hina hi svirho sva miri wa yena. Matsalwa mahlaya svosvo, mali: “Hikolaho, wanuna atasukela tatana wa yena ni mamana wa yena, ayanamarhela nsati wa yena, kutani lavambirhi vatava nyama yin'we ntsena.” Xihundla lexi i xikulu, kambe ni vulavulisa svosvi hi kufananisa Kriste ni Kereke. Kutani asvive tano ka n'wina hinkwenu: Wanuna aarhandze nsati wa yena, kukota loko atirhandza; na yena wansati aave ni xichavu ka nuna wa yena. Vana, yingisani vapsali va n'wina, hikuva hi svona lesvilulameke mahlweni ka Hosi. Matsalwa mali: “Uxixima tatana wa wena ni mamana wa wena” (hi wona Nawu loworhanga lowunga ni xitshembiso), “akuva ukateka, ni lesvaku uhanya masiku layotala misaveni leyi.” Na n'wina vatatana, mingaxaniseni vana va n'wina, kambe mivawundla, hi kuvalaya ni kuvajondzisa ta Hosi. N'wina svikarawa, yingisani vinyi va n'wina va laha misaveni, hi xichavu ni kurhurhumela, misviyendla hi mbilu leyibaseke, kufana ni loko mitirhela Kriste hi xiviri; na svona, kungali ntsena loko vamilangutile, wonge hi loko milava kutsakisa vanhu, kambe, lesvi minga svitirhi sva Kriste, yendlani kurhandza ka Xikwembu hi mbilu hinkwayu. Tirhani ntirho wa n'wina hi kutsaka, kufana ni loko mitirhela Hosi, kungali vanhu; tsundzukani lesvaku Hosi yitanyika mun'wana ni mun'wana, hambi xikarawa, hambi lweyi angaliki xikarawa, hi kuya hi lesvinene lesvi asviyendleke. Na n'wina vinyi, yendlisani svosvo ka svikarawa sva n'wina: Tshikani kukho misviholovela, na mili karhi mitiva lesvaku n'wina ni svikarawa sva n'wina mi ni n'winyi wun'we matilweni, ni lesvaku angayi hi nghohe. Kuheteleleni nili, tiyani svinene, minamarhela Hosi, mitiseketela hi ntamu wa yona lowungatsandziwiki hi nchumu. Yambalani svisirhelelo ni matlhari hinkwawu lawa Xikwembu ximinyikaka wona, lesvaku mitakota kuyima milwa ni mindzingo yobiha ya Diyavulosi. Hikuva ahilwi ni vanhu va misava leyi, kambe hilwa ni mimoya leyobiha leyinga mpfhukeni: Hilwa ni vafumi, ni vuhosi, ni vakhinyavezi va misava leyi ya munyama, ni mimoya yobiha leyi hanyaka pfukeni. Hikolaho tamelani svisirhelelo ni matlhari hinkwawu ya Xikwembu na wahali nkama, lesvaku mitakota kutilwela hi siku ra khombo; kutani loko mitava milwile kuyafika makumu, mitatikuma na mahatiyile. Loko svilitano, tshamani na mitilulamisile. Tikhameni hi ntiyiso wuva bandi ra n'wina. Yambalani kululama xiva xisirhelelo xa n'wina xa le xifuveni, ni kuhisekela kupaluxa Evhangeli ya kurhula kuva masandhazi ya n'wina. Minkama hinkwayu, rhwalani kupfumela, xiva xisirhelelo xa n'wina, kutani mitakota kutimela ha xona mimpaxwa hinkwayu leyipfurhaka ya nala. Yamukelani kuponisiwa, xiva xigqoko xa n'wina xa le nhlokweni, kutani Rito ra Xikwembu riva tlhari ra n'wina leri Moya wuminyikaka rona. Yendlani hinkwasvu lesvi hi kukhongela, mikombela kupfuniwa hi Xikwembu; khongelani minkama hinkwayu hilaha Moya wumiletelaka hakona. Hikolaho, tshamani na mihiteka, mingakarhali kukhongelela vahlawuliwa va Xikwembu hinkwavu. Na mina minikhongelela, lesvaku Xikwembu xinipfula xifuva loko nilava kujondzisa, nitakota kuvulavula na ningachavi nchumu, ni kutivisa vanhu xihundla xa Evhangeli. Nimuyimeli wa Evhangeli leyi, hambi loko nipfaleliwile jele, hi kolaho khongelani lesvaku nitiya nhlana, niyihlaya hilaha nifanelaka kuyihlaya hakona. Tikiko, makwerhu lweyi arhandzekaka ni mupfuni lweyi atshembekeke ntirhweni wa Hosi, atamitivisa mahungu hinkwawu ya mina, lesvaku na n'wina mitativa hinkwasvu sva kuhanya ka mina ni lesvi nisviyendlaka. Hi svona lesviyendlaka lesvaku ni murhumela ka n'wina, mitativa hilaha hipfukeke hakona, nasvona atakota kumitiyisa timbilu. Kurhula ni rirhandzu leringa ni kupfumela, asvive ni vamakwerhu, svihuma ka Xikwembu Tatana, ni ka Hosi Yesu Kriste. Timpsalu ative ni hinkwavu lavarhandzaka Hosi ya hina Yesu Kriste hi rirhandzu leringawonhakiki! Mina Pawulo, nandza wa Kriste Yesu, na Timotewu nandzakulorhi, hitsalela vakwetsimi va Xikwembu hinkwavu lavatshamaka Filipi, lavanga va ka Yesu Kriste, svin'we ni vabixopo va kereke ni vadiyakoni, hili: Timpsalu ni kurhula asvive na n'wina, svihuma ka Xikwembu Tatana wa hina, ni le ka Hosi Yesu Kriste. Nikhensa Xikwembu xa mina minkama hinkwayu, loko nimiyanakanya. Nkama wun'wana ni wun'wana loko ni mikhongelela n'wina hinkwenu, nikhongela hi kutsaka, hikolaho ka ndlela leyi minipfuneke ha yona ntirhweni wa Evhangeli, kusukela siku rosungula kufikela namuntlha. Ni ni kutshemba svinene ka lesvaku Xikwembu lexisunguleke ntirho lowosaseka xikarhi ka n'wina, xitawuyisa mahlweni kuyafika makumu ya wona, hi siku ra Yesu Kriste. Hikolaho, nikuma na svinilulamelile kuyanakanya hi ndlela leyi henhla ka n'wina hinkwenu, hikuva mi le mbilwini ya mina, ingava kubohiweni kumbe kuhlamuleni ka mina ni le kutiyiseni ka Evhangeli, kutani n'wina hinkwenu miyaveliwile nkateko wun'we na mina. Xikwembu i mboni ya mina ya lesvaku nilava ngopfu kuva na n'wina hinkwenu, hi kunavela loku kuhumaka ka Kriste Yesu. Xikhongelo xa mina hi lexi: Nikhongela lesvaku rirhandzu ra n'wina riya mahlweni rikula masiku hinkwawu, riva ni vutivi ni kutwisisa loku kuhetisekeke, na mitakota kuhlawula lesvinga svinene kutlula svin'wana; hi ndlela yoleyo, mitava lavatengeke, mingahali na nandzu kufikela sikwini ra Kriste; vutomi bza n'wina bzitatala hi mihandzu ya lesvolulama, leyitisiwaka ha Yesu Kriste, lesvaku Xikwembu xidzunisiwa ni kutwalisiwa ha yona. Nilava lesvaku mitiva lesvi, vamakwerhu: Lesvi svinihumeleleke svipfunile kuyisa Evhangeli mahlweni hakunene. Svifike laha valanguteli hinkwavu va yindlo ya vuhosi ni lavan'wana hinkwavu vasvivoneke lesvaku nibohiwa hikolaho ka Kriste. Kubohiwa ka mina kuyendlile lesvaku vamakwerhu lavotala vaveka kutshemba ka vona ka Hosi, vava vakanya timbilu vavula Rito na vangachavi nchumu. Van'wana kunene vatwalisa Kriste hi moya wa mavondzo ni vumpsaka; kambe van'wana vasviyendla hi timbilu letibaseke; vona lava vayendla hi kunirhandza, hi kutiva lesvaku Xikwembu xininyikile ntirho wa kulwela Evhangeli. Kambe lavan'wana vatwalisa Kriste hi moya wa kuphikizana, na svingahumi timbilwini ta vona; vapimisa lesvaku vangayengetela kunixanisa, lesvi nahabohiweke. Asvi na mhaka svosvo. Hi tindlela leti hinkwatu, hambi kuli hi kukanganyisa, hambi kuli hi ntiyiso, Kriste watwalisiwa, kutani hi svona lesvi svinitsakisaka. Mina nahatatsaka ha svona, hikuva nitiva lesvaku lesvi hinkwasvu svitapfuna lesvaku nitshunxiwa, hikolaho ka mikhongelo ya n'wina ni kuseketeliwa hi Moya wa Yesu Kriste. Kulangutela ka mina ni kutshemba ka mina, hi lesvaku aningakhomiwi hi tingana nikutsongo, kambe hi kutiya ka mina ningachavi nchumu, svosvi kukota minkama hinkwayu, nitatwalisa vukulu bza Kriste mirini wa mina, hambi hi kuhanya kumbe hi kufa ka mina. Hikuva ka mina, kuhanya i Kriste, ni kufa i kuvuyeliwa. Loko svifanela lesvaku nihanya laha misaveni, ka mina svitanipfuna kutirha lesvivekaka mihandzu. Kambe lexi nifanelaka kuhlawula xona, anixitivi. Nisusumetiwa hala ni hala: Kunavela ka mina i kurhurha niyatshama na Kriste, hikuva hi svona lesvisasekeke ngopfu; kambe hikolaho ka n'wina lesviyampsaka hi loko ni ya mahlweni nihanya laha misaveni. Hi kukholwa svinene mhaka leyi, nitiva lesvaku nitaxwa na n'wina ni kuheta masiku na nili na n'wina hinkwenu, lesvaku nimipfuna kuya mahlweni na mili karhi mitsaka kupfumeleni. Hikolaho, loko nitlhela nita hitatshama na n'wina, mitakota kutidzunisa ha Yesu Kriste kutlula ni khale, hikolaho ka mina. Ntsena, mahanyela ya n'wina mafanela kufambelana ni Evhangeli ya Kriste, lesvaku hambi ni ta nitatamivona, hambi ni ngati, nitatwa lesvaku mahayimile na mitiyile moyeni wun'we, milwa svin'we hi mbilu yin'we, milwela kupfumela loku kutisiwaka hi Evhangeli. Nasvona mingachavisiwi nikutsongo hi lavalwaka na n'wina; hi ndlela leyi vatasvivona lesvaku vatsandzeka, ni lesvaku n'wina mahlula, kutani svosvo svihuma ka Xikwembu. Hikuva minyikiwile nkateko wotirhela Kriste, kungali ntsena hi lesvi mipfumeleke ka yena, kambe hi lesvi mixanisekaka hikolaho ka yena. Svosvi, n'wina na mina hilwa nyimpi yin'we leyi minivoneke nilwa yona, leyi mitwaka lesvaku nahalwa yona ni svosvi. Lesvi mikumeke kukhongoteleka ka Kriste, lesvi misusumetiwaka hi rirhandzu ra yena ni kuhlanganisiwa hi Moya, nasvona lesvi mitwelanaka vusiwana ni kukombana timpsalu, hetisisani kutsaka ka mina hikuva ni miyehleketo yofana, ni rirhandzu rofana, ni moya wun'we, ni kuyanakanya kun'we. Mingayendleni nchumu hi moya wa kutirhandza, kumbe hi kutidzunisa hi sva hava, kambe mun'wana ni mun'wana aatitsongahate ka van'wana, angayanakanyi lesvaku wavatlula hi vunene. Mun'wana ni mun'wana wa n'wina angatshuki atikarhatela lesvi svinga sva yena ntsena, kambe aatikarhatele ni lesvi svinga sva van'wana. Kuhanyisana ka n'wina akuve loku mikukumaka ka Yesu Kriste: Aali ni xiyimu xin'we ni Xikwembu, kambe angatiringanisanga ni Xikwembu, kambe atitshikile hi kuteka xiyimu xa xikarawa, avelekiwa na ali lweyi afanaka ni vanhu. Loko avoniwile na ali lweyi afanaka ni munhu, atitsongahatile, ava lweyi ayingisaka kufika kufeni, afa hi rifu ra xihambanu. Hikolaho Xikwembu ximutlakusile svinene, kutani ximunyikile vito leringa henhla ka mavito hinkwawu, lesvaku, avitweni ra Yesu, matsolo hinkwawu makhinsama matilweni, ni laha misaveni, ni le hansi ka misava, ni tindzimi hinkwatu tivula lesvaku Yesu Kriste i Hosi, akudzuniseni ka Xikwembu Tatana. Varhandziwa, kufana ni lesvi miniyingiseke masiku hinkwawu, ni svosvi, kungali ntsena loko nili na n'wina kambe ngopfungopfu loko ningali na n'wina, tirhelani kuponisiwa ka n'wina hi kuchava ni kurhurhumela; hikuva i Xikwembu lexitirhaka ka n'wina lexiyendlaka lesvaku mitsakela ni kuyingisa kurhandza ka xona. Yendlani svilo hinkwasvu handle ka kuvulavulela matlhelweni ni kuphikizana, lesvaku mitapfumala nandzu, miva lavabaseke, miva vana va Xikwembu lavangaliki na xisandzu xikarhi ka rixaka lerohomboloka, leritiyalisaka; mifanela kuphatima xikarhi ka rona kufana ni tinyeleti, laha misaveni, na mili karhi minamarhela Rito ra vutomi, kutani sikwini ra Kriste, nitakota kutidzunisa loko nikuma lesvaku kutikarhata ka mina ntirhweni wa mina akuvanga ka mahala. Hambi loko nifanela kutlhantekela vutomi bza mina henhla ka mhamba ya n'wina ya kupfumela, leyi migandzelaka Xikwembu ha yona, nitsakile ni kutlangela svin'we na n'wina hinkwenu. Svitano na n'wina: Tsakani, mitlangela svin'we na mina. Ni ni kutshemba ka Hosi Yesu lesvaku kungali khale nitarhuma Timotewu ata le ka n'wina, lesvaku na mina nitiyisiwa hi kukuma mahungu ya kuhuma ka n'wina. Ani na mun'wana lweyi afanaka na yena, lweyi ahisekelaka kumipfuna hi mbilu hinkwayu ya yena. Lavan'wana hinkwavu vatikarhatela ntsena lesvinga sva vona, kungali sva Yesu Kriste. Kambe kutshembeka ka Timotewu makutiva, ni hilaha angatirhisana na mina hakona ntirhweni wa Evhangeli, afana ni n'wana lweyi atirhaka svin'we ni tatana wa yena. Hikolaho, natshemba lesvaku nitamurhuma, hi xihantla loko nivona hilaha svilo sva mina svingatafamba hakona. Kutani ni ni kutshemba ka Hosi lesvaku kungali khale, na mina hi xiviri nitata le ka n'wina. Nasvona niyanakanya lesvaku svafanela kumitlhelisela Epafrodito makwerhu, lweyi anganipfuna mintirhweni ni le kulweni ka mina, lweyi amimurhumile kutanipfuna ka lesvi anipfumala svona. Aanavela ngopfu kutlhela amivona hinkwenu, nasvona asvimukanakanisa ngopfu kutiva lesvaku mitwile ta kuvabza ka yena. Hakunene avabzile; aali kusuhi ni kufa, kambe Xikwembu ximutsetselelile, nasvona kungali yena ntsena, na mina xinitsetselelile, lesvaku ningatwi kuvaviseka henhla ka kuvaviseka. Hikolaho, ninavela kuhantla nimurhuma ka n'wina lesvaku loko mitlhela mimuvona, mitatsaka, ni mbilu ya mina yitahungula kuvaviseka. Loko svilitano, muyamukeleni hi kutsaka hinkwaku kukota makwenu Hosini. Xiximani vanhu lavotano, hikuva aali kusuhi ni kufa, afela ntirho wa Kriste, na ali karhi apfumela kunyiketa vutomi bza yena, lesvaku atahetisa ntirho wa kunipfuna lowu awufanele kutirhiwa hi n'wina. Kutani svosvi vamakwerhu, titsakeleni Hosini. Asvinikarhati kutlhela nimitsalela svofana, nasvona svipfuna kumitiyisa. Chavani timbzana, chavani vatirhi lavobiha, chavani kuyimba lokobiha hikuva hi hina hingayamukela kuyimba ka xiviri, hina lava higandzelaka Xikwembu hi Moya wa xona, hina lavatidzunisaka ha Yesu Kriste, hingavekiki kutshemba ka hina ka lesviyendliwaka hi vanhu ntsena. Svatwala lesvaku ningaveka kutshemba ka mina ka lesva miri. Loko munhu mun'wana ayanakanya lesvaku angatshemba miri, mina nitlula yena: Niyimbisiwile na nahali n'wana wa masiku ya ntlhanu ni manharhu ntsena; ni wa rixaka ra Israyele, wa nyimba ya Benjamini; ni Muheberu n'wana wa Vaheberu; hi tlhelo ra kuhlayisa Nawu, anili Mufarisi. Loko kuli kuhiseka, hi mina ningaxanisa kereke; hi tlhelo ra kuva munhu wolulama hi kuhlayisa Nawu, aningali na xisandzu. Kambe lesvi anitiseketela ngopfu hi svona, nisvilangutile svili lesvi svingahapfuniki nchumu ka mina hikolaho ka Kriste. Kungali svona ntsena: Nitekile hinkwasvu svili lesvingahapfuniki nchumu, loko sviringanisiwa ni risima leritlulaka hinkwasvu, ra kutiva Yesu Kriste Hosi ya mina. Hikolaho ka yena, nifularhele hinkwasvu ni svivona na svili nsila ntsena, lesvaku nitakuma Kriste, ni kukumiwa na nili xilo xin'we na yena, ningahali na kululama lokunga ka mina, loku nikukumaka hi kuhlayisa Nawu, kambe nili ni kululama loku kunyikiwaka hi kupfumela ka Kriste, kululama loku kuhumaka ka Xikwembu, loku kuyimaka henhla ka kupfumela. Ninavela ntsena kutiva Kriste, ni matimba ya kupfuka ka yena kufeni, nikota ni kuhlangana na yena kuvavisekeni ka yena, niyendliwa lweyi afanaka na yena kufeni, hi kutshemba lesvaku loko sviyendleka, na mina nitakuma kupfuka xikarhi ka vafi. Anivuli lesvaku nisvikumile svosvo, kumbe lesvaku nihetisekile, ihim; kambe niringeta kutikarhata lesvaku nisvikuma sviva sva mina, hikuva Yesu Kriste anikumile aniyendla wa yena. Vamakwerhu, loko ali mina, aniyanakanyi lesvaku nisvikumile, kambe niyendla xilo xin'we ntsena: Nirivala sva le ndzhaku, ni kuringeta hi matimba kuyafika ka lesvinga le mahlweni; kutani nitsutsuma na nikongomile sva le mahlweni lesvaku nitakuma hakelo, kunga kuvitana ka Xikwembu ha Yesu Kriste, loku hakona xihivitanelaka vutomi bza le henhla. Hina hinkwerhu lava hihetisekeke moyeni, hifanele kuva ni miyanakanyu leyotano; kambe loko, ka svin'wana, miyanakanya hi ndlela yin'wana, Xikwembu xitasvihlavutela ka n'wina. Ntsena ahikhomeni svitiya ka lesvi hingafika ka svona. Vamakwerhu, tekelani mina n'wina hinkwenu. Himipfulele ndlela leyinene, hi kolaho langutani lavafambaka ha yona. Nitshama nimibzela mhaka leyi hakanyingi, kutani svosvi nitlhela nimibzela yona na nirila: Ku ni lavotala lava kuhanyeni ka vona vanga valala va xihambanu xa Kriste. Makumu ya vona i kulova; xikwembu xa vona i khwiri ra vona; vatidzunisa hi lesvi avatafanela kuva ni tingana ha svona; vayanakanya sva misava leyi ntsena. Kambe ra hina kaya ri le matilweni, kutani hi langutela hi mbilu hinkwayu Muponisi wa hina lweyi angatata na ahuma kona, anga Hosi Yesu Kriste. Atahundzula miri wa hina lowusolekaka, awuyendla lowufanaka ni miri wa yena lowokwetsima, hi matimba lawa ha wona akotaka kuveka hinkwasvu hansi ka mfumu wa yena. Hikolaho vamakwerhu, n'wina lava nimirhandzaka ni kunavela kumivona, n'wina lava minga kutsaka ka mina ni hari ya nhloko ya mina, yimani na mitiyile Hosini hi ndlela yoleyo, varhandziwa vanga. Nikhongotela Evhodiya, nikhongotela na Sintika, lesvaku lesvi vanga va Hosi, vafanele kutwanana. Nakukombela na wena mutirhikulorhi lweyi atshembekaka: Pfuna vamamana lava; vaniseketelile svinene ntirhweni wa Evhangeli, na vali na Klemente, ni vatirhikulorhi lavan'wana, lava mavito ya vona matsaliweke bukwini ya vutomi. Titsakeleni Hosini masiku hinkwawu; nitlhela nivulisa svosvo, nili: Titsakeleni! Vunene bza n'wina abzitiviwe hi vanhu hinkwavu; Hosi yi le kusuhi. Mingavileli ha nchumu; kambe timhakeni hinkwatu, khongelani, mitivisa Xikwembu lesvi misvipfumalaka, mikombela na mili karhi mikhensa; kutani kurhula ka Xikwembu lokutlulaka kutwisisa hinkwaku, kutahlayisa timbilu ta n'wina ni miyanakanyu ya n'wina ka Yesu Kriste. Kuheteleleni vamakwerhu, hinkwasvu lesvinga ntiyiso, hinkwasvu lesvichavisekaka, hinkwasvu lesvilulameke, hinkwasvu lesvibaseke, hinkwasvu lesvitsakisaka, hinkwasvu lesvikhensekaka, ni loko kuli ni svin'wana lesvinga ni vunene kumbe kudzuneka, svilo lesvi hinkwasvu, tshamani na mili karhi misviyanakanya. Lesvi misvijondzeke ni kusvikuma, lesvi misvitweke ni kusvivona ka mina, sviyendleni, kutani Xikwembu xa kurhula xitava na n'wina. Nitsakisiwile ngopfu Hosini hi mhaka ya lesvi, ndzhaku ka nkama lowo hundzeke, mipfuxeteke torha ra n'wina ra kunipfuna; torha leri amili na rona hakunene, ntsena amingali na yona ndlela yonikomba rona. Anihlayi svosvo hi kutitwa na nili mupfumali, hikuva nijondzile kutsaka hi lesvi nitikumaka na nili ka svona. Nitiva kupfumala, nitiva ni kutaleliwa. Hinkwaku, minkameni hinkwayu, nijondzile xihundla xa kuyamukela kutaleliwa ni ndlala, kutaleliwa ni vusiwana, na ningavileli. Ningayendla hinkwasvu hi matimba ya Lweyi anitiyisaka. Hambi svilitano, miyendlile hi timpsalu, loko minipfunile kurhwala maxangu ya mina. N'wina Vafilipiya, masvitiva hi n'wexe lesvaku, masungulweni ya ntirho wa Evhangeli, loko nisukile Makedoniya, akuvanga ni kereke ni yin'we leyingapfunetana na mina, handle ka n'wina ntsena; hivile xilo xin'we akutaleliweni ni le vusiwaneni. Hikuva, hambi kuli le Thesalonika, minirhumelile sva kunipfuna ka lesvi anisvipfumala, nasvona kungali kan'we ntsena. Ahi lesvaku nilava kukuma tinyiko, kambe nilava lesvaku n'wina mikuma mihandzu leyi yingatayandza yimitwalisa. Nikumile hakelo hinkwayu, ni kutlula. Ni ni lesvotala, hikuva Epafrodito anitisele tinyiko letihumaka ka n'wina. Tinyiko leti tifana ni mhamba leyinun'hwelaka, leyi yamukelekaka ka Xikwembu, yixitsakisa. Kutani Xikwembu xa mina xitaminyika hi ntalu hinkwasvu lesvi misvipfumalaka, hi kuya hi rifuwo ra xona ni kudzuneka ka xona ka Yesu Kriste. Ka Xikwembu Tatana wa hina, akuve kudzuneka hi masiku ni masiku! Amen! Rungulani vahlawuliwa lavanga ka Yesu Kriste. Vamakwerhu lava ninga na vona halenu vamirungula. Vahlawuliwa hinkwavu vamirungula, ngopfu va munti wa Khezari. Timpsalu ta Hosi Yesu Kriste ative ni mimoya ya n'wina! Mina Pawulo, mupostola wa Kriste Yesu hi kurhandza ka Xikwembu, na Timotewu makwerhu, hitsalela vakwetsimi va Xikwembu lavanga le Kolosa, vamakwerhu lavatshembekaka ka Kriste, hili: Timpsalu ni kurhula asvive na n'wina, svihuma ka Xikwembu Tatana wa hina. Masiku hinkwawu, hikhensa Xikwembu Tatana wa Hosi ya hina Yesu Kriste, mikhongelweni leyi himikhongelelaka ha yona, hikuva hitwile ta kupfumela ka n'wina ka Yesu Kriste, ni ta rirhandzu ra n'wina ka vahlawuliwa va Xikwembu hinkwavu, hikolaho ka kulangutela loku kuhlayiseliweke n'wina matilweni. Kutshemba loku, mirhange mikutwa ritweni ra ntiyiso, yinga Evhangeli, leyifikeke ka n'wina kukota lesvi yifikeke matikweni hinkwawu; yikarhi yiveka mihandzu ni kukula, kukota lesvi yiyendlisaka xisvona ka n'wina, kusukela siku leri mitweke ni kutwisisa timpsalu ta Xikwembu hi ntiyiso wa tona. Mijondzisiwile svona hi Epafrasi, mutirhi-kulorhi lweyi arhandzekaka, lweyi atirhelaka Kriste hi kutshembeka matshan'wini ya hina. Hi yena lweyi angahitivisa ta rirhandzu leri minganyikiwa rona hi Moya. Hikolaho, kusukela siku leri hisvitweke, ahitshikanga kumikhongelela, nikukombela Xikwembu lesvaku ximitata hi vutivi bza kurhandza ka xona, vutlharini hinkwabzu ni le kutwisiseni hinkwaku loku kunyikiwaka hi Moya; hi ndlela leyi, mitahanya vutomi lebzi bzifanelaka Hosi, miyitsakisa timhakeni hinkwatu, miveka mihandzu hi kutirha mintirho leyinene ya tinxakaxaka, miya mikula hi tlhelo ra kutiva Xikwembu. Mawaku loko mingatiyisiwa svinene hi matimba, hi kuya hi ntamu wa xona wotwakala, mikota kutiyisela svinene, ni kuleha mbilu na mitsakile. Nasvona, khensani Tatana, lweyi ayendleke lesvaku na n'wina miyaveliwa ndzhaka ya vahlawuliwa, kufumeni ka kuvonakala. Ahihumesile matimbeni ya munyama, ahirhurhisela kufumeni ka N'wana wa yena lweyi arhandzekaka, lweyi ka yena hinga ni kurivaleliwa ka svijoho ni kuponisiwa. Kriste i xifaniso xa Xikwembu lexingavoniwiki, mativula ya hinkwasvu lesvitumbuluxiweke. Ha yena, Xikwembu xitumbuluxile svilo hinkwasvu, matilweni ni laha misaveni, svilo lesvivonekaka ni lesvingavonekiki, kukota sviluvelo kumbe lesvinga ni vuhosana, ni lesvinga ni vufumi kumbe matimba yofuma. Hinkwasvu svitumbuluxiwile hi yena, nasvona svitumbuluxeliwe yena. Arhangele svilo hinkwasvu, kutani ka yena svilo hinkwasvu svikhomane svin'we. Hi yena nhloko ya miri, hi lesvaku ya Kereke. Hi yena masungulu ya hinkwasvu ni lweyi arhangeke apfuka xikarhi ka vafi, lesvaku ava loworhanga ka svilo hinkwasvu. Hikuva svitsakisile Xikwembu lesvaku kuhetiseka hinkwaku ka xona kutshama ka yena, ni kuyendla lesvaku, ha yena, svilo hinkwasvu svivuyelelana na xona, hikuva hi yena Kriste lweyi atiseke kurhula hi kufa ka yena xihambanwini; hinkwasvu, hambi laha misaveni, hambi le matilweni, svivuyelelana ni Xikwembu ha yena. Na n'wina lava va khale amili kule ni Xikwembu, amili valala va xona hi miyanakanyu ya n'wina ni mintirho ya n'wina leyobiha; kambe svosvi, Xikwembu xiyendlile lesvaku mivuyelelana na xona, hi N'wana wa xona lweyi angahanya na ali munhu, atlhela afa lesvaku mitisiwa ka Xikwembu na mili vakwetsimi, mingali na xisandzu kumbe kusoleka mahlweni ka xona. Kambe mifanele kutiya kupfumeleni, na miyimile masungulweni yakona mingatsekatseki, na mingahambani ni kulangutela loku mikukumeke hi kutwa Evhangeli. Evhangeli leyi yitwalisiwile ka svivumbiwa hinkwasvu lesvinga hansi ka tilo, kutani mina Pawulo, ni yendliwile mutirhi wa yona. Svosvi-ke, nitsaka hi lesvi nixanisiwaka hikolaho ka n'wina; kutani, hi kuxaniseka ka mina mirini, nihetisa lesvipfumalekeke maxangwini ya Kriste, hikolaho ka miri wa yena, yinga Kereke. Niyendliwile mutirhi wa Kereke hi makungu ya Xikwembu lexinganinyika ntirho lowu hikolaho ka n'wina. Ntirho wakona i kujondzisa Rito ra Xikwembu, xinga xihundla lexi axitumbelile malembe ni malembe, ka tinxaka hinkwatu, kambe svosvi xipfuleteliweke ka vahlawuliwa va Xikwembu. Ka vona Xikwembu xirhandzile kutivisa rifuwo ra xihundla lexi, ni kutwala ka xona xikarhi ka vamatiko; xihundla xakona hi lesvaku Kriste a le ka n'wina, kutani ha yena milangutela kutwala ka Xikwembu lokutaka. Hi yena lweyi hi mutwalisaka, na hili karhi hi tsundzuxa ni kujondzisa vanhu hinkwavu, hi vutlhari hinkwabzu; hi yendlela kutisa vanhu hinkwavu ka Xikwembu na vali lavahetisekeke ka Kriste. Hi svona lesvi nitikarhatelaka svona, na nili karhi nilwa hi ntamu wa yena, lowu awupfuxaka hi matimba ndzeni ka mina. Nilava lesvaku mitiva nyimpi leyikulu leyi niyilwaka hikolaho ka n'wina va le Lawudokiya, ni hikolaho ka hinkwavu lava vanganitiviki hi nghohe. Nilava lesvaku timbilu ta vona titiyisiwa, ni lesvaku vakhomana svin'we hi rirhandzu, kutani vatachaveleliwa hi matlhelo hinkwawu hi kunyikiwa kutwisisa loku kuhetisekeke, lesvaku vativa xihundla xa Xikwembu, anga Kriste. Ka yena kutumbetiwile rifuwo hinkwaru ra vutlhari ni ra vutivi. Nihlaya lesvi lesvaku kungavi na lweyi amikanganyisaka hi marito lamaringetaka kumikholwisa. Hikuva hambi ningali kona hi miri, hi moya ni na n'wina, na nili karhi nitsakela kuvona mahanyela ya n'wina layolulama, ni kutiya ka n'wina kupfumeleni ka Kriste. Kutani-ke, lesvi miyamukeleke Yesu Kriste kuva Hosi ya n'wina, hanyani hikuva xilo xin'we na yena, na midzimile timintsu ni kuveka masungulu ya n'wina ka yena; tiyani kupfumeleni, hilaha mijondzisiweke hakona, na mili karhi mikhensa hi kuphindhaphindha. Tivoneleni lesvaku munhu angamiphasi hi tijondzo ta vutlhari, hi marito ya mavunhwa lawa mangapfuniki nchumu, lawa mahumaka ka mintolovelo ya vanhu ni ka mimoya leyifumaka misava leyi, kungali ka Kriste. Hikuva vukwembu hinkwabzu bziyakile hi ntalu mirini wa yena, kutani n'wina mikumile vutomi lebzotala ka yena; hi yena lweyi anga nhloko ya vuhosi hinkwabzu ni kufuma hinkwaku. Ka yena miyimbisiwile, kungali hi mavoko ya vanhu, kambe hi kuyimbisiwa ka Kriste, loku kuhitshunxaka ka miri lowu wa vujohi. Hi kukhuvuliwa, milahliwile sirheni svin'we na yena, mitlhela mipfuxiwa kufeni svin'we na yena, hi kupfumela lesvaku i matimba ya Xikwembu lamangamipfuxa xikarhi ka vafi. Khale, amili lavafeke hikolaho ka milandzu ya n'wina, hi lesvi amili vamatiko lavangayimbangiki, kutani Xikwembu ximihanyisile svin'we na Kriste. Xihirivalelile milandzu ya hina hinkwayu, xihelisa tsalwa leri khale arihirhwexa nandzu, rihimangalela hi milawu ya rona, kutani xiyisusele tlhelo, xirigongondzela xihambanwini. Kriste ahetile matimba ya mimoya ya tihosana ni ya tihosi, ayiyendla xisolo rivaleni, hi kuyihlulela makumu hi xihambanu. Hikolaho, munhu angatshuki amiyavanyisa mhakeni ya svakuja ni ya svakunwa, hambi kuli mhakeni ya minkhuvu yotsakela svin'wana, kumbe ya kutsakela kuhuma ka n'weti, kumbe siku ra Savata: Hinkwasvu lesvi i ndzhuti wa lesvi svitaka, kambe nsinya wa svona i Kriste hi xivirhi. Munhu angatshuki amitekela hakelo ya n'wina hi kutitsongahata, kukanganyisa ni kugandzela tintsumi, na ali karhi apfumela ngopfu sva milorho ya yena, atikulisa hi sva hava, hi miyehleketo ya yena ya sva nyama; munhu wotanu anganamarheli nhloko leyi ha yona miri hinkwawu wuphameliwaka ni kuhlanganisiwa svinene, hi minsiha ni tinyama ta wona, kutani wukula hi kukula loku kuhumaka ka Xikwembu. Loko mifile na Kriste ni kuhambana ni mimoya leyifumaka misava leyi, hikolaho ka yini mahahanya kufana ni loko mahali va misava xana? Hikolaho ka yini mahativeka hansi ka svileriso lesvinge: “Ungatshuki ukhomakhoma, ungatshuki unampsa, ungatshuki ukhumba, xana?” Kasi vahlaya svilo lesvilovaka hinkwasvu, loko svili karhi svitirhisiwa. Svileriso svakona sviya hi kulerisa ka vanhu, hi tijondzo ta vona. Svitinyika vito ra “vutlhari”, hikuva sviseketela vukhongeli bza mavunhwa, ni moya wotitsongahata kokanganyisa ni wa kutixanisa mirini, kambe asvisivela kunavela ka miri. Hikolaho loko mipfuxiwile kufeni na Kriste, lavani svilo lesvinga henhla laha Kriste atshameke kona, vokweni ra xinene ra Xikwembu. Tsundzukani svilo lesvinga henhla, kungali svilo sva laha misaveni. Hikuva mifile, kutani vutomi bza n'wina bzitumbetiwile na Kriste ka Xikwembu. Vutomi bza n'wina bza xiviri i Kriste, kutani loko ahumelela, na n'wina mitahumelela na yena kukwetsimeni. Loko svilitano, dlayani lesvi svinga sva misava ka n'wina, hi lesvaku vuwosvi, ni sva nsila, ni kuhisekela sva tingana, ni kunavela lokobiha, ni makwanga, kunga kugandzela svikwembu sva hava. Hikolaho ka svona vukarhi bza Xikwembu bzita [henhla ka lavatiyalisaka]. Hi svona lesvi khale amihanya ka svona, loko mahafumiwa hi svona. Kambe svosvi, svicukumeteni hinkwasvu, kunga kukarhata, ni kuleva, ni tihanyi. Kulumbeta, ni mavulavulela ya nsila, svingatshuki svihuma milon'wini ya n'wina. Mingahembelaneni, lesvi mihlivileke mahanyela ya n'wina ya khale ni mintirho ya wona; hikuva miyambalile munhu wa mahanyela lamampsha lweyi apfuxetiwaka minkama hinkwayu, lesvaku mikota kutiva hi kuhetiseka Xikwembu lexi ximitumbuluxeke hi xifaniso xa xona. Laha aku na Mugirika ni Muyuda, aku na lweyi ayimbeke ni lweyi angayimbangiki, aku na munhu wa matiko ni munhu wa hava, aku na xikarawa ni mutshunxeki, kambe i Kriste lweyi anga hinkwasvu ka hinkwavu. Hikolaho, lesvi mingavitaniwa hi Xikwembu kuva vahlawuliwa va xona lavarhandziwaka, yambalani moya wa timpsalu, ni vunene, ni kutitsongahata, ni kurhula, ni kuleha mbilu. Yamukelanani, kutani loko mun'we asola mun'wana, avarivalelane. Kufana ni lesvi Hosi yimirivaleleke, na n'wina rivalelanani. Kutani henhla ka lesvi hinkwasvu, kulaveka rirhandzu, ringarona leri ribohaka svilo hinkwasvu svitwanana hi kuhetiseka. Kutani yendlani lesvaku kurhula ka Kriste kufuma timbilwini ta n'wina, kunga kurhula loku mivitaneliweke kona, mirini wun'we ntsena. Nasvona jondzani kukhensa. Rito ra Kriste aritshame ka n'wina, riyandza. Jondzisanani, mikhongotelana hi vutlhari hinkwabzu, mitwalisa Xikwembu hi kuyimbelela tipisalma, ni tinsimu, ni kuyimbelela sva Moya, na mili karhi mikhensa timbilwini ta n'wina. Kutani xin'wana ni xin'wana lexi mixiyendlaka, hi kuvulavula kumbe hi kutirha, xiyendleni hi vito ra Hosi Yesu, na mili karhi mikhensa Xikwembu Tatana ha yena. Vavasati, titsongahateni ka vanuna va n'wina, hilaha svifanelaka hakona Hosini. Vavanuna, rhandzani vasati va n'wina, mingatshameni hi kukho mivaholovela. Vana, yingisani vapsali va n'wina timhakeni hinkwatu, hikuva hi svona lesvitsakisaka Hosi. Vatatana, mingaxaniseni vana va n'wina, lesvaku vangaheli mbilu. Vatirhi, yingisani vinyi va n'wina va laha misaveni timhakeni hinkwatu, kungali ntsena loko vamilangutile, onge hi loko milava kutsakisa vanhu, kambe hi timbilu letinene, na mili karhi michava Hosi. Xin'wana ni xin'wana lexi mixiyendlaka, xiyendleni hi mbilu hinkwayu, kufana ni loko mitirhela Hosi, kungali vanhu; hikuva masvitiva lesvaku mitanyikiwa rifuwo hi Hosi, yili hakelo ya n'wina. Mi le kutirheleni ka Hosi ya hina Kriste. Loko ali muyendli wa lesvohomboloka, atatlheliseliwa lesvohomboloka lesvi asviyendleke; Xikwembu axiyi hi nghohe ya munhu. Vinyi, hanyani ni svikarawa sva n'wina hi ndlela ya kululama, hi mfanelo, na mili karhi mitiva lesvaku na n'wina mi ni n'winyi matilweni. Yanani mahlweni mitiyisela mikhongelweni, mihitekela kona mili karhi mikhensa; na hina mihikhongelela, lesvaku Xikwembu xihipfulela nyangwa yojondzisa Rito ra xona, lesvaku hitavula rivaleni xihundla xa Kriste, lexi ninga jele hikolaho ka xona. Kombelani lesvaku nixihlamusela hilaha svifanelaka hakona, loko nixitwalisa. Tirhisanani ni va le handle hi kutlhariha, na mili karhi milondzovota nkama lowu minga na wona. Kuvulavula ka n'wina akuve lokunene, loku kunandzihaka masiku hinkwawu, mitativa hilaha mifanelaka kuhlamula mun'wana ni mun'wana hakona. Tikiko, makwerhu lweyi arhandzekaka, mutirhi lweyi atshembekeke ni mutirhikulorhi ntirhweni wa Hosi, atamitivisa timhaka hinkwatu ta mina, hilaha tiyimeke hakona. Nimurhuma ata ka n'wina hikolaho ka svosvo, lesvaku mitativa hilaha hihanyaka hakona, ni lesvaku atatiyisa timbilu ta n'wina. Ana Onezimo, makwerhu lweyi atshembekeke, lweyi arhandzekaka, lweyi anga mun'we wa n'wina; vatamitivisa hinkwasvu lesvihumeleleke halenu. Arixtarko, lweyi anga jele svin'we na mina, wamirungula; svafana na Marka makwavu wa Barnaba, lweyi nimileleteke lesvaku mimuyamukela, loko ata koseno. Na yena Yesu lweyi avuliwaka Yusto, wamirungula. Hi vona ntsena, xikarhi ka Vayuda lavapfumeleke, lavangatirha na mina ntirhweni wa Mfumu wa Xikwembu; vanitiyisile svinene. Epafrasi, lweyi anga mun'we wa n'wina, mutirhi wa Yesu Kriste, wamirungula; wa mitsundzuka svinene masiku hinkwawu mikhongelweni ya yena, akombela lesvaku miva lavahetisekeke ni lavatiyeke, kuyendleni ka hinkwasvu lesvi Xikwembu xisvirhandzaka. Ni mboni ya lesvaku atikarhatela n'wina svinene, n'wina ni lava vanga le Lawudokiya, ni le Hiyerapolisi. Luka, dokodela lweyi arhandzekaka, wamirungula svin'we na Demasi. Rungulani vamakwerhu lava vanga le Lawudokiya, na mamana Nimfa, ni kereke leyihlengeletanaka ndlwini ya yena. Kutani loko papela leri rihlayiwile xikarhi ka n'wina, vonani lesvaku rihlayiwa ni le kerekeni ya Lawudokiya, ni lesvaku na n'wina mihlaya papela leri rihumaka le Lawudokiya. Nasvona bzelani Arkipo, miku: “Vona lesvaku timfanelo leti unyikiweke tona ntirhweni wa Hosi utihetisisa svinene.” Nitsala lesvi hi xiyandla xa mina, nili: Hi mina Pawulo! Mingarivaleni lesvaku ni le jele. Timpsalu ta Xikwembu ative na n'wina! Mina Pawulo na Silvhano na Timotewu ka va kereke ya le Thesalonika, lavanga vanhu va Xikwembu Tatana, ni va Hosi Yesu Kriste, hili: Timpsalu ni kurhula asvive na n'wina! Hikhensa Xikwembu masiku hinkwawu hikolaho ka n'wina hinkwenu, na hili karhi hi mitsundzuka ka mikhongelo ya hina. Mahlweni ka Xikwembu Tatana wa hina, hitsundzuka hilaha kupfumela ka n'wina kutikombeke hakona hi sviyendlo, ni lesvaku michivirika kulanguteleni ka Hosi ya hina Yesu Kriste, hi rirhandzu ni kutikarhata. Hasvitiva, vamakwerhu, lesvaku Xikwembu xa mirhandza, ni lesvaku ximihlawulile. Hikuva Evhangeli ya hina, ayifikanga ka n'wina hi marito ntsena, kambe hi matimba, ni Moya Lowokwetsima, ni kukholwisa ka yona loku kuhetisekeke, tani hilaha mitivaka hakona lesvi hihanyisaniseke xisvona na n'wina. Kutani na n'wina milandzile tindlela ta hina ni ta Hosi, hikuva, hambilesvi mingaxaniseka ngopfu, miyamukelile Rito ra Xikwembu hi kutsaka loku kunyikiwaka hi Moya Lowokwetsima. Hi mukhuva wolowo, mihundzukile xikombiso ka hinkwavu lavapfumeleke le Makedoniya ni le Akaya. Hikusa Rito ra Hosi lerihumeke ka n'wina aritwalanga ntsena Makedoniya ni le Akaya, kambe nakona kupfumela ka n'wina ka Xikwembu kutwalile hinkwaku; hi kolaho asvifaneli lesvaku hingahahlaya xanchumu. Vanhu lava hinkwavu varungula hilaha mihiyamukeleke hakona xikarhi ka n'wina, ni hilaha mingahundzuka hakona ka Xikwembu, mifularhela svikwembu sva hava, lesvaku mitirhela Xikwembu lexihanyaka, xa ntiyiso. Nasvona milangutela kuta ka N'wana wa xona Yesu hi le matilweni, lweyi ximupfuxeke xikarhi ka vafi, lweyi ahiponisaka kuyavanyiseni ka xona loku kutaka. Na n'wina vamakwerhu, masvitiva lesvaku kuyamukeliwa ka hina hi n'wina akuvanga ka mahala. Hambi loko hirhange hi xanisiwa ni kurhuketeliwa le Filipi, hilaha misvitivaka hakona, Xikwembu xa hina xihinyikile matimba ya kumitivisa Evhangeli leyihumaka ka xona, hambilesvi lavotala avali karhi valwa na yona. Hikuva kukhutaza ka hina ahi loku kuhumaka kutikanganyiseni, kumbe ka miyanakanyu yobiha, nasvona ahitirhisi makungu yokanganyisa munhu; kambe, tani hi lesvi Xikwembu xihivoneke na hili lavafanelaka kutamelisiwa ntirho wa Evhangeli, hayipaluxa, kungali kutsakisa vanhu, kambe kutsakisa Xikwembu lexikambelaka timbilu ta hina. Masvitiva svinene lesvaku ahiringetanga, ni siku ni rin'we, kumitsakisa kumbe kumikanganyisa hi marito, hambi kuli kufihla kunavela kuphanga. Xikwembu i mboni ya hina! Ahilavanga kudzunisiwa lokuhumaka ka vanhu, hambi kuli ka n'wina kumbe ka van'wana; hambilesvi ahitava hisvikotile kumitikisela hi svikombelo sva hina, hi mhaka ya kuva vapostola va Kriste, hihanyisane na n'wina hi moya wa timpsalu, kukotisa mamana lweyi ahlayisaka svinene vana va yena. Hikolaho, hi kunavela ngopfu kumikomba rirhandzu, hitilungiselile kuhlengela na n'wina kungali ntsena Evhangeli ya Xikwembu, kambe nabzona vutomi bza hina, hikuva mihundzukile varhandziwa va hina hi kutlulisa. Vamakwerhu, matsundzuka kutikarhata ni kukarhateka ka hina ntirhweni lowu: Hitirhile vusiku ni nhlekanhi lesvaku hingatikiseli na mun'we wa n'wina, loko hili karhi himipaluxela Evhangeli ya Xikwembu. Mi timboni ta hina, na xona Xikwembu i mboni: Mahanyela ya hina ka n'wina lavapfumeleke, amali lawa ya kubasa ni lawa ya kululama, mangali na xisandzu. Masvitiva lesvaku hihlayisile mun'wana ni mun'wana wa n'wina kufana ni loko tatana ahlayisa vana va yena; hi mikhutazile, hi mitiyisile ni kumisusumeta lesvaku mihanya hi ndlela leyitsakisaka Xikwembu lexi ximivitanelaka kuyaveliwa kufuma ka xona ni kutwala ka xona. Kutani mhaka leyi yihisusumetaka kukhensa Xikwembu masiku hinkwawu, hi leyi: Loko himitisele rito ra Xikwembu, miriyingisile ni kuriyamukela, kungali kukota mahungu ya kuhuma ka vanhu, kambe tani hi mahungu ya kuhuma ka Xikwembu. Hakunene mahungu lawa mahuma ka xona, hikuva hi xona xitirhaka hi matimba xikarhi ka n'wina lavapfumeleke. Loko mili n'wina vamakwerhu, mikumane ni miringo leyingatshama yihumelela xikarhi ka vanhu va ka Yesu Kriste tikerekeni ta Yudeya: Vayuda vavaxanise kufana ni lesvi vanhu va ka n'wina vangamiyendla svona. Vayuda hi vona lavadlayeke Hosi Yesu ni vaprofeta, kutani na hina vahixanisile; avatsakisi Xikwembu, nasvona valwa ni vanhu hinkwavu. Varingetile ni kuhisivela kuchumayela ka vamatiko mahungu lawa amatavaponisa, kutani hi mukhuva lowu vakulisile nandzu wa svijoho sva vona masiku hinkwawu; kambe svosvi, kuheteleleni, kukariha ka Xikwembu kuvawele henhla. Loko hili hina vamakwerhu, hikalanile na n'wina nkamanyana hi lesvi ahingavonani hi mahlo, kambe hi timbilu ahili karhi hivonana, kutani hinavelile hi kunavela lokukulu kutlhela hivonana na n'wina. Hikolaho hinavelile kutlhelela ka n'wina. Mina Pawulo niringetile makhambi mambirhi, kambe Sathana ahisivelile. Xana hi kwihi kulangutela ka hina ni kutsaka ka hina, hi yihi hari ya kuhlula leyi hingatatidzunisa ha yona mahlweni ka Hosi ya hina Yesu, siku avuyaka ke? Xana ahi n'wina ke? Hakunene, hi n'wina minga kudzuneka, ni kutsaka ka hina. Hi kuvona lesvaku ahingahakoti kutiyisela, hitihlawulele kusala hili hexe le Atena. Kutani hi mirhumele Timotewu makwerhu, lweyi atirhelaka Xikwembu kufana na mina ntirhweni wa Evhangeli ya Kriste; lesvaku atamitiyisa ni kumikhutaza kupfumeleni ka n'wina; ni lesvaku kungavi na mun'we lweyi atsekatsekisiwaka hi kuxaniseka loku; hikuva masvitiva na n'wina lesvaku hi svona lesvi hiyaveliweke svona. Hikuva loko hahali le ka n'wina hi mitivisile na svingasihumelela lesvaku hitavona maxangu. Kutani svifambise svosvo, hilaha mitivaka hakona. Hikolaho, hi kuvona lesvaku aningahakoti kutiyisela, nirhumelile rito, lesvaku nitatwa ta kupfumela ka n'wina. Anichava lesvaku kumbexana muringi angava amiringile, ni lesvaku kutikarhata ka hina kungava ka hava. Kambe svosvi Timotewu wahakuvuya hi le ka n'wina kutani ahitisele mahungu lamanene ya kupfumela ka n'wina ni ya rirhandzu ra n'wina; ahitivisile lesvaku mahaya mahlweni mihiyanakanya hi moya lowunene masiku hinkwawu, minavela kuhivona kufana ni lesvi na hina hinavelaka kumivona. Hikolaho, vamakwerhu, maxangwini ni le mahlomulweni hinkwawu ya hina, hikumile kuchaveleliwa hi kupfumela ka n'wina; hikuva svosvi hihanya hi lesvi miyimeke na mitiyile Hosini. Xana kukhensa ka hina ka Xikwembu hikolaho ka n'wina kungava loku koyini, kutsakeni hinkwaku loku hikutwaka mahlweni ka Xikwembu xa hina hikolaho ka n'wina? Hikhongela xona hi matimba vusiku ni nhlekanhi, na hili karhi hikombela kuvonana na n'wina hi mahlo, lesvaku hita tatisa lesvipfumalekaka kupfumeleni ka n'wina. Mawaku loko hingapfuleliwa ndlela ya kuta koseyo ka n'wina hi Xikwembu Tatana wa hina hi xiviri, svin'we ni Hosi ya hina Yesu. Ingi Hosi yingakulisa ni kuyandzisa rirhandzu leri mirhandzanaka ha rona ni kurhandza van'wana, kufana ni lesvi na hina himirhandzisaka xisvona; hi ndlela yoleyo, yitatiyisa timbilu ta n'wina, kutani mitapfumala xisolo, miva lavahlawulekeke mahlweni ka Xikwembu Tatana wa hina, siku leri Hosi ya hina Yesu angatavuya hi rona, svin'we ni vahlawuliwa va yena hinkwavu. Kutani-ke, vamakwerhu, mijondzile ka hina hilaha mifanelaka kuhanya hakona lesvaku mitsakisa Xikwembu, kutani mihanyile hi ndlela yoleyo. Hikolaho, ha mikombela hi matimba ni kumikhutaza hi vito ra Hosi Yesu, lesvaku miya mikula, na mili karhi mihanyisa svosvo. Hikuva mitiva lesvi hingamileleta svona hi matimba ya Hosi Yesu; nasvona kurhandza ka Xikwembu hi loku: Hi lesvaku miyendliwa lavabaseke, hi kuhambana ni vuwosvi hinkwabzu. Mun'wana ni mun'wana wa n'wina aative kuhlayisa miri wa yena hi ndlela leyobasa ni leyolulama, kungali hi kunavela lokobiha, kufana ni vamatiko lavangativiki Xikwembu. Amhakeni leyi, kungavi ni lweyi ajohelaka makwavu, kumbe kumukanganyisa, hikuva Hosi i murihiseli wa svilo lesvi hinkwasvu, hilaha hingamibzela khale ni kumitsundzuxa svinene hakona. Hikuva Xikwembu axihivitanelanga kuhanya kutshakeni, kambe kubaseni. Hikolaho, lweyi ayalaka xitsundzuxu lexi, angasoli munhu, kambe asola Xikwembu lexi ximunyikaka Moya wa xona Lowokwetsima. Loko tili ta kurhandzana ni vamakwenu Hosini, amifaneli kutsaleliwa nchumu hi tona; hikuva i Xikwembu lexi ximijondziseke kurhandzana; kutani hi svona lesvi misviyendlaka ka vamakwerhu hinkwavu lavanga tikweni hinkwaru ra Makedoniya. Hambi svilitano, hamikhutaza vamakwerhu, lesvaku miya mahlweni, mikula rirhandzwini lero. Kunavela ka n'wina lokukulu akuve kuhanya hi kurhula, mitikarhatela sva n'wina, mitirha hi mavoko ya n'wina, hilaha hingarhanga hi mitsundzuxa hakona. Hi mukhuva lowu, mitaxiximiwa hi va le handle, mingahatikiseli munhu ni mun'we. Vamakwerhu, nilava lesvaku mitiva ntiyiso hi tlhelo ra lava vayetleleke vurhongo bza rifu, mitakala mingavaviseki kukota van'wana lavangaliki ni kulangutela. Hikuva lesvi hipfumelaka lesvaku Yesu afile, atlhela apfuka kufeni, hi ndlela yoleyo, hi pfumela lesvaku lavatiyetleleleke, Xikwembu xitavapfuxa na Yesu kufeni, xivavuyisa svin'we na yena. Lesvi himibzelaka svona hi vito ra Hosi, hi lesvi: Hina hingatava hahahanya loko Hosi yivuya, hingakala hingarhangeli lavatiyetleleleke; hikuva Hosi hi yoxe yitaxika hi le tilweni, hi mpfumawulu wa rito ra kulerisa, hi kuhuwelela ka ntsuminkulu, ni kuba ka mhalamhala ya Xikwembu, kutani lavafeleke ka Kriste, vatarhanga vapfuka kufeni; kutani hina lava hingatava hahahanya, hitatlakuliwa hiya henhla marefini svin'we na vona, hiyakumana ni Hosi mpfhukeni. Kutani hi ndlela yoleyo, hitava ni Hosi hilaha kungaheliki. Hikolaho mifanela kutiyisana hi marito wolawo. Loko tili ta minkama ni tinguva takona, vamakwerhu, amifaneli kutsaleliwa nchumu hi svona. Hikuva n'wina hi xiviri, masvitiva svinene lesvaku siku ra Hosi ritafika kufana ni muyivi lweyi ataka nivusiku. Siku leri vanhu vangataku: “Kurhulile, aku na xa kukarhata”, hi wona nkama lowu kuwonheka kungatavawela henhla hi xitshuketa, kufana ni kulun'wa ka wansati lweyi angakusuhi ni kuveleka n'wana; vangakala vangaponi. Kambe n'wina vamakwerhu, ami le munyameni; hi kolaho, siku rakona aringamitshuketi kufana ni muyivi. Hikuva hinkwenu mi vana vakuvonakala, mi vana va nhlekanhi. Ahi va vusiku hina, kumbe va munyama. Hikolaho hingatshuki hiyetlela kukota lesvi van'wana vayendlisaka svona, kambe ahihitekeni, hitikhoma. Hikuva lavayetlelaka, vayetlela ni vusiku, ni lavadakwaka, vadakwa ni vusiku. Kambe lesvi hina hinga va nhlekanhi, ahitikhomeni, hiyambala kupfumela ni rirhandzu xiva xitlhangu xa hina xifuveni, kutani nhlokweni hiyambala kulangutela ka kuponisiwa, xiva xigqoko xa hina. Xikwembu axihihlawulanga lesvaku xitahihlundzukela, kambe kuhinyika kuponisiwa hi Hosi ya hina Yesu Kriste. Ahifelile lesvaku, hambi hihanya, kumbe hiyetlela, hitakuma vutomi svin'we na yena. Hikolaho, tiyisanani miyakisana, hilaha misviyendlaka hakona ni svosvi. Vamakwerhu, ha mikombela hi matimba lesvaku mixixima lavatirhaka xikarhi ka n'wina lava vamirhangelaka ndleleni ya Hosi, ni kumitsundzuxa; mivaxixima svinene hi rirhandzu, hikolaho ka ntirho wa vona. Hanyani svin'we hi kurhula. Kutani hamikhutaza vamakwerhu, hili: Layani malolo, mitiyisa lavahelaka matimba; pfunani lavanga ni gome, milehisela hinkwavu mbilu. Vonani lesvaku kungavi ni lweyi atlheliselaka svobiha hi lesvobiha; kambe hi masiku hinkwawu, ringetani kuyendlelana lesvinene, misviyendla ni le ka hinkwavu. Tshamani na mitsakile masiku hinkwawu. Mingatshikeni kukhongela. Ka hinkwasvu, khensani; hikuva hi kona kurhandza ka Xikwembu henhla ka n'wina ha Yesu Kriste. Mingatimeni Moya. Mingasandzeni vuprofeta, kambe kambisisani hinkwasvu, mitiya ka lesvinene. Hambanani ni hinkwasvu lesvobiha sva tinxakaxaka. Ingi Xikwembu xa kurhula, xona ha xoxe, xingamiyendla lavahlawulekeke hi matlhelo hinkwawu. Ingi mimoya ya n'wina, ni timbilu ta n'wina, ni miri wa n'wina, svingatshama na svibasile, na svingali ni nandzu siku leri Hosi ya hina Yesu Kriste angatavuya. Lweyi amivitanaka watshembeka, kutani atasviyendla. Vamakwerhu, hikhongeleleni na hina. Rungulani vamakwerhu hinkwavu hi kun'quntana kokwetsima. Na mikombela svinene, hi matimba ya Hosi, lesvaku papela leri rihlayeliwa vamakwerhu hinkwavu. Timpsalu ta Hosi ya hina Yesu Kriste ative na n'wina! Mina Pawulo na Silvhano na Timotewu ka va kereke ya le Thesalonika, lavanga vanhu va Xikwembu Tatana wa hina, ni va Hosi Yesu Kriste, hili: Timpsalu ni kurhula asvive na n'wina, svihuma ka Xikwembu Tatana, ni ka Hosi Yesu Kriste! Svahifanela kukhensa Xikwembu masiku hinkwawu hikolaho ka n'wina, vamakwerhu. Hakunene svafanela svosvo, hikuva kupfumela ka n'wina kuya mahlweni kukula ngopfu, ni kurhandzana ka n'wina hinkwenu kuya kuyengeteleka. Hikolaho, hina hi hexe, hi tikulisa ha n'wina tikerekeni ta Xikwembu, hi mhaka ya kutiyisela ka n'wina ni kupfumela ka n'wina, xikarhi ka maxangu ni mahlomulu hinkwawu lawa mimavonaka. Lesvi i xikombiso xa kululama ka Xikwembu loko xiyavanyisa, hikuva svitayendla lesvaku miva lavalulameliweke hi Mfumu wa xona, lowu mixanisiwaka hikolaho ka wona. Xikwembu xitayendla lesvilulameke: Xitaba lava vamixanisaka, xivavangela kuxaniseka, kutani xitaminyika kuhumula svin'we na hina, n'wina mixanisiwaka; xitayendla svosvo siku leri Hosi Yesu ahumelelaka hi le tilweni, svin'we ni tintsumi ta yena ta matimba malangavini ya ndzilo. Xitaba lava vangaxitiviki, vanga lava vangayingisiki Evhangeli ya Hosi ya hina Yesu. Vanhu lava vatayavanyisiwa hi kuyisiwa kuwonhekeni lokungaheliki, ni nghohe ya Hosi avangayivoni, hambi mali matimba ya yona layokwetsima. Hi siku rakona, loko Hosi yitela kutadzunisiwa xikarhi ka vahlawuliwa va yona, ni kuvoniwa hi vapfumeli hinkwavu, na n'wina mitava kona, hikuva vumboni lebzi mibzikumeke ka hina, mibzitwisisile. Hikolaho, ha mikhongelela nkama hinkwavu; hikombela lesvaku Xikwembu xa hina ximiyendla lavafaneliwaka hi vutomi lebzi xingamivitanela bzona, xihetisa, hi matimba ya xona, makungu hinkwawu ya n'wina lamanene, ni mintirho hinkwayu ya kupfumela ka n'wina. Hi ndlela leyi, vito ra Hosi ya hina Yesu ritadzunisiwa ka n'wina, na n'wina ka yena, hi timpsalu ta Xikwembu xa hina, ni ta Hosi Yesu Kriste. Loko tili ta kuvuya ka Hosi ya hina Yesu Kriste, ni ta kuhlengeletana ka hina, hiya ka yena, hamikombela hi matimba vamakwerhu: Mingatshukeni mikanakanisiwa timbilwini ta n'wina, ni kutshukisiwa, hambi kuli hi moya wun'wana, kumbe hi kuvulavula kun'wana, kumbe hi papela rin'wana leri ringavuliwaka lesvaku rihuma ka hina, kutiyisa lesvaku siku ra Hosi rifikile svosvi. Mingakanganyisiweni hi munhu nikutsongo, hikuva siku rakona aringati, loko kungasita kulahleka lokukulu, ni loko kungasihumeseliwa rivaleni munhu lweyi wohomboloka, n'wana wa kulahleka. Munhu lweyi alwa ni hinkwasvu lesvihlayiwaka lesvaku svi ni vukwembu, kumbe lesvigandzeliwaka, kutani atikulisa henhla ka svona, akondza ayatshama Tempeleni ya Xikwembu, na ali karhi atihlaya lesvaku yena hi yena Xikwembu. Xana amitsundzuki lesvaku, loko nahali na n'wina, anitala kumibzela timhaka leto ke? Kutani mitiva lexi xisivelaka munhu lweyi wohomboloka kuta svosvi, kuyendlela lesvaku ahumeseliwa rivaleni, loko nkama wa yena wutava wufikile. Hakunene, kuhomboloka loku kutifihlaka ku le kutirheni ni svosvi; kambe lweyi akusivelaka kutikomba ataya mahlweni akusivela, kukondza asusiwa. Kutani hi kona munhu lweyi wohomboloka angatahumeseliwa rivaleni, kutani Hosi Yesu atamudlaya hi moya lowuhumaka non'weni wa yena, amuhelisa hi kukwetsima ka yena, siku leri avuyaka. Loko munhu lweyi wohomboloka ahumelela hi matimba ya Sathana, atayendla masingita ya tinxakaxaka, ni svikombiso sva mavunhwa, ni svihlamaliso; atatirhisa tindlela hinkwatu letobiha ta vukanganyisi henhla ka lavayaka kulahlekeni, vanga lava vangayamukelangiki ntiyiso hikuva avangawurhandzi, vayala ni kuponisiwa. Hikolaho, Xikwembu xivarhumela moya wa kutikanganyisa lokukulu, lesvaku vapfumela lesvi svinga mavunhwa. Kuhela ka svona hi lesvaku hinkwavu lavakalaka vangayamukelanga ntiyiso, vanga lava vatsakeleke tindlela letobiha, vatayavanyisiwa. Svahifanela kukhensa Xikwembu masiku hinkwawu hikolaho ka n'wina vamakwerhu, n'wina lava Hosi yimirhandzaka, hikuva Xikwembu ximihlawulile lesvaku miva lavorhanga kuponisiwa, hi Moya lowumiyendlaka lavabaseke, ni kupfumela ka n'wina ka ntiyiso. Xikwembu ximivitanele svona hi Evhangeli leyi himitiviseke yona, lesvaku miyaveliwa kukwetsima ka Hosi ya hina Yesu Kriste. Hikolaho, vamakwerhu, yimani mitiya, minamarhela timhaka leti himijondziseke tona hi nomo, kumbe hi papela. Svosvi-ke, ingi Hosi ya hina Yesu Kriste hi yoxe, ni Xikwembu Tatana wa hina lweyi angahirhandza, lweyi angahinyika, hi timpsalu ta yena, kuchavelela lokungaheliki ni kulangutela lokunene, vangatiyisa timbilu ta n'wina, vaminyika matimba ya kuyendla ni kuvulavula hinkwasvu lesvinga svinene. Kuheteleleni vamakwerhu, hikhongeleleni, lesvaku Rito ra Hosi rihangalaka hi kuhantlisa, ritsakeliwa, kukotisa lesvi riyendliseke svona le ka n'wina; lesvaku hilamuleliwa ka vanhu lavobiha, lavokala vangalulamanga; hikuva ahi hinkwavu lavanga ni kupfumela. Kambe Hosi yatshembeka: Yitamitiyisa ni kumisirhelela ka lweyi wobiha. Kutani Hosi yihinyika kutshemba hi tlhelo ra n'wina, lesvaku svilo lesvi himibzeleke svona, mikarhi misviyendla, ni lesvaku mahatasviyendla. Ingi Hosi yingasusumeta timbilu ta n'wina, lesvaku mixirhandza, ni lesvaku michivirikela Kriste. Hamileleta vamakwerhu, hi vito ra Hosi Yesu Kriste, lesvaku mihambana ni makwenu wihi ni wihi lweyi angalaviki kutirha, lweyi angafambiki hi tijondzo leti himinyikeke tona. Hikuva n'wina hi n'wexe masvitiva svinene lesvaku mifanele kutekelela mahanyela ya hina; ahitshamanga hi mavoko, loko hili xikarhi ka n'wina; na svona, ahijanga svakuja sva munhu mahala, kambe hitirhile vusiku ni nhlekanhi, hibalha nyuku ni kutikarhata, lesvaku hingatikiseli munhu ni mun'we xikarhi ka n'wina. Asvihlayi lesvaku ahipfumala matimba ya kumikombela kuhipfuna, kambe akuli kumikomba ndlela leyi mifaneleke kufamba hi yona. Hikuva loko hahali na n'wina, himinyikile xileriso lexinge: “Mun'wana ni mun'wana lweyi angalaviki kutirha, ni kuja angaji!” Hihlaya lesvi hikuva hitwile lesvaku ku ni van'wana xikarhi ka n'wina lavahanyaka hi vulolo, vangalaviki kutirha, kambe vanghenelela timhaka ta van'wana. Kutani vanhu va kufana ni lavo havarhuma ni kuvatsundzuxa hi vito ra Hosi Yesu Kriste, lesvaku vatirha ntirho wa vona hi kurhula, vatakota kuja svakuja lesvinga sva vona. Kambe n'wina vamakwerhu, loko mili karhi miyendla lesvinene, mingakarhaleni. Loko kuli ni mun'we lweyi ayalaka kuyingisa marito lawa hi mirhumelaka wona hi papela leri, mulangutiseni, kutani mingaveneni ni mhaka na yena, lesvaku atakhomiwa hi tingana. Hambi svilitano, mingamulanguteni tani hi nala, kambe mulayeni tani hi makwenu. Svosvi-ke, Hosi ya kurhula, hi yoxe, ayiminyike kurhula minkama hinkwayu ni le matlhelweni hinkwawu. Hosi ayive na n'wina hinkwenu! Hi xiyandla xa mina nitsala lesvi nili: “Namirungula. Hi mina Pawulo.” Hi wona mfungu wa mina apapeleni rin'wana ni rin'wana ra mina; hi svona lesvi nitsalisaka svona. Timpsalu ta Hosi ya hina Yesu Kriste, ative na n'wina hinkwenu! Mina Pawulo, mupostola wa Kriste Yesu hi kulerisa ka Xikwembu Muponisi wa hina ni ka Kriste Yesu kulangutela ka hina, nitsalela Timotewu, n'wananga wa ntiyiso kupfumeleni, nili: Timpsalu ni vunene, ni kurhula, asvive na wena, svihuma ka Xikwembu Tatana ni ka Kriste Yesu Hosi ya hina. Loko nahaya le Makedoniya, nikukhutazile kutshama le Efesa; ni svosvi nahahlaya svosvo, hikuva ku ni van'wana le Efesa lavajondzisaka mavunhwa; vabzele kuva vamatshika, vangaheti nkama wa vona hi minkaringana, ni kulongoloxela tinxaka tokala tingaheli, lesvivangaka kukanetana, matshan'wini ya kuseketela makungu ya Xikwembu lawa matirhaka hi kupfumela. Kasi, laha xitsundzuxu xa hina xikongomeke kona, i kupfuxa rirhandzu lerihumaka mbilwini leyobasa ni le ripfalwini lerinene, ni le kupfumeleni ka ntiyiso. Van'wana, hi mhaka ya kutshika svilo lesvi, vapepetsekile vayanghena kuvulavuleni lokungapfuniki nchumu; vanavela kuva vajondzisi va nawu, kambe vangatwisisi lesvi vasvihlayaka kumbe timhaka leti vahlayaka lesvaku vatiyile ka tona. Hina hasvitiva lesvaku nawu i wunene loko munhu awutirhisa hi ndlela yakona, na ali karhi atwisisa lesvaku milawu ayivekeliwanga lavalulameke, kambe yivekeliwile lavohomboloka ni lava vatiyalisaka; yiyendleliwile lavangachaviki Xikwembu ni lavajohaka, ni lavangakhongeliki, ni lavasandzaka lesvohlawuleka, ni lavadlayaka vatatana va vona kumbe vamamana va vona; milawu leyi yiyavanyisa svigevenga, ni vawosvi ni vavanuna lavativanaka hi xinuna kulobze, ni lavayivaka vanhu, ni vahembi, ni lava vokala vangavulavuli ntiyiso, ni lavayendlaka hinkwasvu lesvihambaneke ni jondzo leyinga yona ya ntiyiso. Jondzo yakona yiyelana ni Evhangeli leyivekiweke mavokweni ya mina, leyitwalisaka kukwetsima ka Xikwembu, xihlovo xa minkateko. Nikhensa lweyi aninyikeke matimba yotirha ntirho lowu, Hosi ya hina, Kriste Yesu; hikuva anivonile na nili lweyi atshembekeke, hi kuniveka ntirhweni wa yena, hambilesvi khale nitshamaka nimusandza, ni kumuxanisa, ni kumupfukela. Kambe nitsetseleliwile, hikuva aniyendla hi kupfumala vutivi, ningali na kupfumela. Kambe timpsalu ta Hosi ya hina tinitalelile, svin'we ni kupfumela ni rirhandzu, svinga lesvinga ka Kriste Yesu. Rito leri ritiyile, rifanele kuyamukeliwa hi mandla mambirhi, leringe: “Kriste Yesu atile misaveni kutaponisa vajohi.” Kutani ka vajohi lava, mina ni lweyi worhanga hi vubihi. Kambe ni tsetseleliwile, kuyendlela lesvaku mina lweyi ninga mujohi worhanga hi vubihi, Kriste Yesu atasvikota kukomba kuleha ka mbilu ya yena lokuhetisekeke, kutani xiva xikombiso ka lavangatapfumela ka yena, vakuma vutomi lebzingaheliki. Ka Hosi ya minkama hinkwayu, leyingaliki ni kufa, leyingavoniwiki, xona Xikwembu xili xoxe, akuve kuchaviseka ni kudzuneka, hilaha kungaheliki! Amen. Timotewu n'wananga, niveka milawu leyi mavokweni ya wena, hikuva utsundzuka lesvaku ku ni lavangaprofeta lesvi ungatava svona; marito lawa amakutiyise, utakota kulwa nyimpi leyinene, uhlayisa kupfumela hi ripfalu leritshunxekeke. Hi kudlaya mapfalu ya vona, van'wana valahlekeliwile hi kupfumela. Xikarhi ka vona, ku na Imenewu na Alexandre, lava nivanyiketeke ka Sathana, lesvaku vakhatisiwa akuva vangahasandzi Xikwembu. Loko svilitano, xosungula, ninavela hi matimba lesvaku kukombela, ni kukhongela, ni kukhongelela, ni kukhensa, sviyendleliwa vanhu hinkwavu, sviyendleliwa ni tihosi ni hinkwavu lavanga svitshan'wini sva le henhla, lesvaku hikota kuhanya vutomi bza kurhula ni kutsaka, lebzinga bza vukhongeli ni lebzi bzixiximekaka hi matlhelo hinkwawu. Lesvi i svinene, svayamukeleka mahlweni ka Xikwembu muponisi wa hina, lexinavelaka lesvaku vanhu hinkwavu vaponisiwa, vafika laha vakotaka kutiva lesvi svinga ntiyiso. Hikuva ku ni Xikwembu xin'we, nasvona ku ni Muyimeli mun'we lweyi ahlanganisaka Xikwembu ni vanhu, yena Kriste Yesu munhu wa ntiyiso, lweyi atinyiketeke kuva muponisi wa vanhu hinkwavu; hi bzona vumboni bza makungu ya Xikwembu, lebzingahumelela hi nkama lowufanekelaka. Kutani, hi svona lesvingayendla lesvaku nivekiwa kuva muchumayeli wa Rito ni mupostola (nivula lesvi svitiyeke, anihembi), nijondzisa vamatiko ta kupfumela ni ta ntiyiso. Hikolaho, ninavela lesvaku, tindhawini hinkwatu, vavanuna vakhongela na vatlakusile mavoko lawa mabaseke, kuli hava kukariha kumbe madzolonga. Hi ndlela yoleyo na vona vavasati avayambale lesvingakhomisiki tingana, vatisasekisa hi mpimo, kumbe kutibombisa hi misisi leyihorhiweke, kumbe hi vuhlalu bza risima, kumbe hi sviyambalu svodura ngopfu; kambe avatibombise hi mintirho leyinene, hilaha svifanelaka hakona vavasati lavativulaka va vukhongeli. Wansati aajondze na amiyelile, ava lweyi ayingisetaka hi kuhetiseka. Anipfumeleli wansati kujondzisa kumbe kufambisa wanuna; afanele kutshama na amiyelile. Hikuva kurhangile Adamu avumbiwa, kulandza Evha. Nasvona, ahi Adamu lweyi akanganyisiweke, kambe i wansati lweyi akanganyisiweke, kutani awela kujoheni. Hambi svilitano, wansati ataponisiwa hi lesvi avelekaka vana, loko atiyisela kupfumeleni ni le rirhandzwini ni le kubaseni, na ali ni kutikhoma. Rito leri ritiyile, leringe: Loko munhu anavela kuva murisi wa kereke, anavela ntirho lowunene. Hikolaho, bixopo afanele kuva munhu lweyi angaliki na xisandzu, aave wanuna wa nsati mun'we, atikhoma, axiximeka, atsakela vayendzi, akota kujondzisa. Angatinyiketi kunwa bzala, kumbe munhu wa tinyimpi, kambe aave lweyi wa kurhula, angavi ni vumpsaka, nasvona angavi lweyi arhandzaka ngopfu male. Afanela kufambisa khwatsi njangu wa yena, avona lesvaku vana va yena vajondzisiwa kuyingisa, vava ni xichavu hi kuhetiseka. Hikuva loko munhu angakoti kufambisa njangu wa yena, atasvikotisa kuyini kufambisa kereke ya Xikwembu xana? Angavi munhu lweyi ahakupfumelaka, hikuva angatshuka ateliwa hi kutikulisa atikukumuxa, kutani ayavanyisiwa kufana na Diyavulosi. Nasvona afanela kuva lweyi vanhu va le handle vamuxiximaka, hikuva nkama wun'wana angawela kusandziweni ni le ntlhan'wini wa Diyavulosi. Vadiyakoni kerekeni na vona vafanele kuva lava vaxiximekaka, vavulavula ntiyiso, vangatinyiketi bzaleni, vangavi lavanavelaka bindzu robiha; vafanele kuhlayisa xihundla xa vupfumeli hi ripfalu leribaseke. Nasvona, avarhange hi kukambiwa, kutani loko vatikomba lesvaku ava na xisandzu, vangatirha ntirho wa vona wa vudiyakoni kerekeni. Hi ndlela yoleyo vadiyakoni va xisati avaxiximeke, vangavi valumbeti, kambe vatshembeka ka svilo hinkwasvu. Vadiyakoni kerekeni avave ni nsati mun'we, vafambisa khwatsi vana va vona ni minjangu ya vona. Hikuva vadiyakoni lavayendlaka ntirho wa vona kerekeni hi nawu wakona, vatinyika xiyimu lexinene, nasvona vatiyisiwa svinene kupfumeleni ka vona ka Kriste Yesu. Natshemba lesvaku nitata koseno ka wena kungali khale, kambe ni kutsalela timhaka leti, lesvaku loko nitshuka nihlwela, utasvikota kutiva hilaha munhu angahanyaka hakona loko ali njangwini wa Xikwembu, yinga kereke ya Xikwembu lexihanyaka, mhandze leyikulu ni xiseketelo xa lesvinga ntiyiso. Hakunene, hingatiyisa lesvaku xihundla xa vukhongeli bza hina i xikulu: “Ahumelelile tani hi munhu, ahlayiwile lweyi alulameke moyeni, avoniwile hi tintsumi; apaluxiwile matikweni, apfumeliwile laha misaveni, atekeliwa henhla kukwetsimeni.” Kutani-ke, Moya wuhlaya wutiyisile lesvaku masikwini lamataka, van'wana vatahambana ni vupfumeli, hi mhaka ya kulandza mimoya leyikanganyisaka ni tijondzo ta madimoni, ni hikolaho ka kukanganyisiwa hi vahembi lava vafeke mapfalu. Vakanganyisi lava vayalisa kutekana, valerisa lesvaku kutshikiwa svakuja lesvi Xikwembu xisvitumbuluxeke lesvaku sviyamukeliwa hi kukhensa hi lava vapfumelaka ni kutiva ntiyiso. Hikuva hinkwasvu lesvi svitumbuluxiweke hi Xikwembu i svinene, kutani aku na lexi xifanelaka kunyenyiwa, loko xiyamukeliwa hi kukhensa, hikuva svihlawulekisiwile hi rito ra Xikwembu ni xikhongelo. Loko uyandlala timhaka leti mahlweni ka vamakwerhu, utava nandza lwenene wa Kriste Yesu, utava lweyi awundliweke maritweni ya vupfumeli ni ya tijondzo letinene leti ufambeke ha tona. Ungavi ni mhaka ni minkaringana ya vuphukuphuku leyingaliki ni vukhongeli. Titolovete kuva mukhongeli, hikuva hambi loko kuchukachukisa miri kuli loku kupfunaka hi matlhelo man'wana, vukhongeli bzipfuna hi matlhelo hinkwawu, nasvona bzitshembisa vutomi bza nkama lowu, ni bza lowutaka. Rito leri ritiyile, rifanela kuyamukeliwa hi mandla mambirhi. Hitirha svinene ni kutikarhatela svona, hikuva hivekile kutshemba ka hina ka Xikwembu lexihanyaka, lexinga muponisi wa vanhu hinkwavu, ngopfungopfu wa lavapfumelaka. Leleta ni kujondzisa svilo lesvi. Kungavi ni lweyi achipisaka vumpsha bza wena, kambe vana xikombiso xikarhi ka vapfumeli hi mavulavulela ni mahanyela ya wena, hi rirhandzu ni kupfumela ni kutenga. Tinyikete kuhlayela vanhu Matsalwa, ukhongotela ni kujondzisa, nikondza nifika. Ungatlangi hi nyiko leyi unga na yona, leyi uyikumeke siku leri vakulukumba vakutlhantekeke mavoko, vaprofeta lesvi ungatava svona. Yendla timfanelo leti, na utinyiketela ka tona, lesvaku hinkwavu vatavona hilaha uyaka mahlweni hakona. Tikambisise hi wexe, ni jondzo leyi uyijondzisaka. Tiya ka svona, hikuva loko uyendlisa svosvo, utatiponisa ni kuponisa vayingisi va wena. Ungaholoveli xijuhati, kambe xikhutaze kufana ni tatana wa wena; ka majaha ufanele kumakhoma kufana ni vamakwenu vaxinuna. Vavasati lavajuhaleke uvalanguta kufana ni vamamana, ni vanhwanyana kufana ni vamakwenu vaxisati, hi ndlela ya kubasa matlhelo hinkwawu. Xixima vafelakazi lavanga vona hi ntiyiso. Loko wansati wa mufelakazi ali ni vana kumbe vatukulu, avarhange vajondza timfanelo ta vona ta vukhongeli hi tlhelo ra njangu wa ka vona, ni kutiva svin'wana kukhensa vapsali va vona, hikuva hi svona lesviyamukelekaka mahlweni ka Xikwembu. Wansati wa mufelakazi lweyi anga wa ntiyiso, loko asale ali yexe, na avekile kutshemba ka yena ka Xikwembu, kutani atshama na ali karhi akombela ka xona ni kukhongela vusiku ni nhlekanhi. Kasi lweyi anavelaka kutiphina ntsena, afile hambi loko ahahanya. Leleta timhaka leti, lesvaku vatapfumala xisandzu. Loko munhu angapfuni maxaka ya yena, ngopfungopfu lavanga va njangu wa yena wa ntiyiso, ayalile vupfumeli, kutani abihile kutlula ni lweyi angapfumeliki. Wansati wa mufelakazi, aatsalisiwe ntsena loko ali ni malembe ya ntlhanu wa makume ni rin'we (60), nasvona lweyi aatekiwile hi nuna mun'we ntsena; nakona afanele kuva ni vumboni lebzitwalaka hi tlhelo ra mintirho leyinene ya yena, kufana ni kuwundla vana hi ndlela yakona, ni kutsakela vayendzi, ni kuhlampsa milenge ya vahlawuliwa va Xikwembu, ni kupfuna lava vaxanisekaka, ni kutshama na ali karhi ayendla lesvinene hi matlhelo hinkwawu. Kambe yala kutsala mavito ya vavasati va vafelakazi lavampsha; hikuva loko vangheniwa hi kunavela, valava kutekiwa, kutani vafularhela Kriste. Svosvo svivavangela kuyavanyisiwa, hikuva vatlulile kutiboha ka vona kosungula. Nasvona, vavasati va vafelakazi lavampsha vajondza kuloloha; varhendzeleka hi minjangu ya van'wana, kungali hi mhaka ya kuloloha ntsena, kambe vahundzuka vahlevi ni vavangi va timholova hi kufamba vavulavula lesvi vangafaneliki kusvivula. Mina anitatsakela lesvaku vavasati va vafelakazi lavampsha vatekiwa, vakuma vana, vahlayisa minjangu ya vona, vanganyiki nala nkama wa kuhleva. Hikuva ni svosvi van'wana vahambukile ndleleni, valandzelela Sathana. Loko mupfumeli waxisati ali ni maxaka lawa manga vafelakazi, aavapfune; kereke yingatshuki yitikeliwa, lesvaku yitakota kupfuna lavanga vafelakazi va ntiyiso. Yendla lesvaku vakulukumba lavatirhaka khwatsi ntirho wa vufambisi vaxiximiwa svinene, ngopfungopfu lavatikarhatelaka Rito ni kujondzisa, hikuva Matsalwa mali: “Ungatshuki upfala nomo wa homu, loko uli karhi uhula ha yona!” Nasvona, “Mutirhi alulameliwile hi hakelo ya yena.” Ungayamukeli mhaka ya kumangalela mukulukumba, handle ka vumboni bza vanhu vambirhi kumbe vanharhu. Loko kuli ni vakulukumba lava vaphikelelaka kujoha, vatshinye rivaleni, lesvaku lavan'wana vatachava. Mahlweni ka Xikwembu ni ka Kriste Yesu ni ka tintsumi letohlawuleka, nakukhongotela svinene kuhlayisa timfanelo leti, ungatekeli kuyavanyisa, nakona ungayi hi nghohe. Ungatsutsumeli kutlhanteka munhu mavoko, nasvona ungatinghenisi svijohweni sva mun'wana munhu. Tihlayise, utshama na ubasile. Ungahanwi mati ntsena, kambe nwana vhinyunyana, hi lesvi ukarhatekaka hi le ndzeni, ni hikolaho ka mavabzi ya wena ya nkarhi ni nkarhi. Svijoho sva vanhu van'wana svi le rivaleni, svivayisa kuyavanyisiweni, kambe svijoho sva van'wana svivoneka ndzhaku ka nkama ntsena. Hi ndlela yoleyo, na yona mintirho leyinene yi le rivaleni, kambe hambi loko yin'wana yingavoneki, yingakala yingatshami na yifihlekile. Lava varhwexiweke mpingu wa vukarawa, avateke vinyi va vona tani lavafanelaka kuxiximiwa, lesvaku vito ra Xikwembu ni lesvi hisvijondzisaka, svingatshuki svisoliwa. Lavanga ni vinyi va vapfumeli, vangavayeyisi hi kuvona lesvaku i vamakwavu Hosini; kambe vafanele kuvatirhela hi malwandla, hi kutiva lesvaku vinyi lava vapfuniwaka hi kutirheliwa hi ndlela leyi, i vapfumeli lavarhandzekaka. Jondzisa vanhu timfanelo leto, uvaleleta tona. Loko munhu mun'wana ajondzisa svotiviwa hi yena, lesvihambaneke ni marito lawa mahanyaka ya ntiyiso ya Hosi ya hina Kriste Yesu, ni jondzo leyifambelanaka ni vukhongeli, munhu yelweyo wa kutikulisa ni kutikukumuxa, angativi nchumu. Afa hi kunavela kuphikizana ni madzolonga henhla ka marito ntsena, svinga lesvivangaka mavondzo, ni madzolonga, ni kurhuketelana, ni kulumbetana; nasvona svivanga kuholova xikarhi ka vanhu lavaboleke miyanakanyu ni kulahlekeliwa hi ntiyiso, lavayanakanyaka lesvaku vukhongeli i ndlela yokuma rifuwo. Hakunene vukhongeli lebzinga ni kutsaka ka mbilu i rifuwo lerikulu. Hikuva ahitanga ni nchumu misaveni, nasvona hingakala hingafambi ni nchumu, loko hisuka kola misaveni. Hikolaho, loko hili ni svakuja ni sviyambalu, hitakolwa hi svona. Kambe lavanavelaka rifuwo, vawela ndzingweni, mintlhan'wini ya kunavela lesvotala lesvingapfuniki nchumu, kunga kunavela loku kudlayisaka vanhu, ni kuvapeta khombzeni ni le kuloveni. Hikuva kurhandza ngopfu male i rimintsu ra lesvobiha hinkwasvu; hi yo mhaka ya kunavela male ngopfu leyi yingahambukisa van'wana, vatshika vupfumeli, kutani timbilu ta vona tingheniwa hi svivilelo lesvotala. Kambe loko ali wena, munhu wa Xikwembu, fambela kule ni svilo lesvi hinkwasvu. Kongoma kululama, ni vukhongeli, ni kupfumela, ni rirhandzu, ni kutiyisela, ni timpsalu. Lwana nyimpi leyinene ya kupfumela; khoma svitiya, vutomi lebzingaheliki, lebzi ungavitaniwa hikolaho ka bzona ni kuveka vumboni lebzinene henhla ka bzona, mahlweni ka vanhu lavotala lavangakutwa. Mahlweni ka Xikwembu lexinyikaka vutomi ka svilo hinkwasvu, ni le mahlweni ka Kriste Yesu lweyi avekeke vumboni lebzinene mahlweni ka Pontiyo Pilato, nakubzela nili: Hlayisa minawu, ungavi ni xivati ni xisandzu, kuyafika loko Hosi ya hina Kriste Yesu ahumelela. Kuhumelela loku kutakombisiwa rivaleni hi nkama wakona, hi lweyi akatekeke, lweyi anga ni matimba ali yexe, Hosi ya tihosi ni Mufumi wa vafumi. Hi yena ntsena lweyi angaliki ni kufa, lweyi ayakeke kuvonakaleni lokungatshineleliwiki; kuhava munhu ni mun'we lweyi atshamaka amuvona, kumbe lweyi akotaka kumuvona. Ka yena akuve kuchaviseka ni kufuma, hilaha kungaheliki. Amen. Kambe loko vali lava vanga ni rifuwo ra misava leyi, vabzele lesvaku vangatikulisi, kumbe kuveka kulangutela ka vona rifuweni leringatiyangiki, kambe vaveka kulangutela ka vona ka Xikwembu: Hi xona xihinyikaka hi ntalu svilo hinkwasvu, lesvaku hitiphina ha svona. Vabzele kuyendla lesvinene, vatala rifuwo ra mintirho leyinene, vanyika, vativa ni kupambulela van'wana. Hi ndlela leyi vatihlengeletela xuma lexinene, lexitiyeke, xa minkama leyitaka, lesvaku vatayamukela vutomi bza ntiyiso. Wena Timotewu, hlayisa lesvivekiweke mandleni ya wena. Fambela kule ni kuvulavula sva hava lesvingaliki na vukhongeli, ni kukanetana hi lesvihlayiwaka “vutivi”, kasi ahi bzona. Van'wana hi kusvilandzelela, valahlekeliwile hi vupfumeli. Timpsalu ative na n'wina. Mina Pawulo, mupostola wa Kriste Yesu hi kurhandza ka Xikwembu, hikolaho ka kutshembisiwa ka vutomi lebzinga kona ka Kriste Yesu, nitsalela Timotewu n'wananga lweyi arhandzekaka, nili: Timpsalu, ni vunene, ni kurhula, asvive na wena, svihuma ka Xikwembu Tatana, ni le ka Kriste Yesu Hosi ya hina. Nikhensa Xikwembu, xona lexi nixitirhelaka hi ripfalu leribaseke kufana ni vakokwana, na ningatshiki kukukhongelela vusiku ni nhlekanhi. Loko niyanakanya minhloti ya wena, ninavela ngopfu kukuvona, lesvaku nitatsaka ngopfu; nitsundzuka ta kupfumela ka wena lokutiyeke, kunga kupfumela lokungarhanga kuyaka ka kokwana wa wena Loyisi ni mamana wa wena Ewunise, kutani svosvi nitshemba svinene lesvaku kuyakile ni le ka wena. Hikolaho nakutsundzuxa kupfuxeta nyiko ya Xikwembu, leyinga ka wena, leyi uyikumeke siku leri nikutlhantekeke mavoko. Hikuva Xikwembu axihinyikanga moya wa vutoya, kambe xihinyikile moya wa matimba, ni wa rirhandzu, ni wa kutikhoma. Hikolaho, ungavi ni tingana kuveka vumboni hi tlhelo ra Hosi ya hina, hambilesvi mina ninga mubohiwa hikolaho ka yona. Na wena, khensa kuxanisekela Evhangeli, hi kupfuniwa hi matimba ya Xikwembu. Xihiponisile ni kuhivitana hi vitaniwo rokwetsima kuva vanhu va xona, kungali hikolaho ka mintirho ya hina, kambe kuli hikolaho ka makungu ya xona ntsena ni hikolaho ka timpsalu leti xihinyikeke tona ka Kriste Yesu na minkama yingasiva kona. Kutani svosvi timpsalu leti tatikomba rivaleni, hi kuta ka muponisi wa hina Kriste Yesu, yena lweyi aheliseke rifu, ahumesela rivaleni vutomi lebzingawonhekiki, hi matimba ya Evhangeli. Mina nivekiwile kuva muchumayeli wa Rito ni mupostola ni mujondzisi hikolaho ka Evhangeli leyi. Kutani nixaniseka hi ndlela leyi hikolaho ka svona; kambe a ni na tingana, hikuva nitiva lweyi nipfumeleke ka yena, kutani nitshemba svinene lesvaku wasvikota kuhlayisa lesvi asvivekeke mavokweni ya mina, kuyafika siku lerikulu. Tshama amaritweni lamatiyeke ya ntiyiso, lawa umatweke ka mina, kupfumeleni ni le rirhandzwini leringa ka Kriste Yesu. Hlayisa lesvinene lesvivekiweke mavokweni ya wena, hi kupfuniwa hi Moya Lowokwetsima lowuyakeke xikarhi ka hina. Wasvitiva lesvaku hinkwavu lavanga le tikweni ra Aziya vanisukelile, xikarhi ka vona ku na Fixjelo na Hermoxjene. Ingi Hosi yingatsetselela njangu wa ka Oneziforo, hikuva makhambi yotala anirhulisile mbilu; na svona, kubohiwa ka mina hi machini akumukhomisanga tingana. Kambe loko afikile le Roma anilavile hinkwaku hi matimba akondza anikuma. Ingi Hosi yingayendla lesvaku akuma kutsetseleliwa mahlweni ka yona sikwini lerikulu. Na wena wayitiva svinene mintirho leyi aniyendleleke le Efesa. Hikolaho n'wananga, tiya timpsalwini letinga ka Kriste Yesu. Kutani lesvi usvitweke ka mina mahlweni ka timboni letotala, svihundzisele ka vanhu lavotshembeka, lava na vona vangatakota kujondzisa van'wana. Na wena, yamukela kuxaniseka tani nhenha leyinene ya Kriste Yesu. Loko nyimpi yahalwiwa, aku na nhenha leyi yiyaka yiyatirha sva le kaya, hikuva kunavela ka yona lokukulu i kutsakisa lweyi ayirhambeke kuyalwa nyimpi yakona. Mutlangi wa mintlangu angatlhantekiwi hari, loko angalandzi milawu yakona. Mutirhi lweyi atirheke hi matimba masin'wini, hi yena lweyi afanelaka kurhanga akuma mihandzu yakona. Yanakanya lesvi nisvihlayaka, hikuva Hosi yitakunyika kutwisisa timhakeni hinkwatu. Tsundzuka Kriste Yesu, wa rixaka ra Davhida, lweyi apfukeke kufeni, hilaha Evhangeli ya mina yihlayaka hakona. Evhangeli yakona yinivangele kuxaniseka, nikondza nibohiwa hi machini kukota xigevenga, kambe Rito ra Xikwembu rona aribohiwanga, kutani, timhakeni hinkwatu, nitiyisela hikolaho ka vahlawuliwa va Xikwembu, lesvaku na vona vatakuma kuponisiwa loku kuhumaka ka Kriste Yesu, vakuma ni kukwetsima lokungaheliki. Rito leri ritiyile, leringe: “Loko hifile na yena, nakona hitahanya na yena; loko hitiyisela, nakona hitafuma na yena; loko himulandzula, na yena atahilandzula; loko hingatshembeki, Yena watshembeka masiku hinkwawu, hikuva angakala angatilandzuli.” Tsundzuxa vakriste timhaka leti, uvabzela svinene mahlweni ka Xikwembu lesvaku vangaphikizani hi marito, yinga mhaka leyingapfuniki nchumu, loko kungali ntsena kulovisa lavasviyingisaka. Yendla hi matimba kuvoneka na uli lweyi akhensekaka mahlweni ka Xikwembu, na ungali na tingana hi ntirho wa wena, ujondzisa Rito ra ntiyiso hi ndlela leyinene. Chava kuvulavula sva hava lesvingaliki na vukhongeli, hikuva lavayendlaka svosvo vatshamela kusandza Xikwembu, kutani kuvulavula ka vona, kutafana ni xilondza xa muzoko lexibolisaka miri. Xikarhi ka vona ku na va Imenewu na Fileto, lavatshikeke ntiyiso, hi kuvula lesvaku sva kupfuka kufeni svihundzeliwe hi nkama, kutani vahambukisa van'wana kupfumeleni. Hambi svilitano, masungulu layotiya lamavekiweke hi Xikwembu amatsekatseki; matiyisiwa hi rito leringe: “Hosi yitiva lavanga va yona.” Nasvona: “Mani na mani lweyi avulaka vito ra Hosi, aahambane ni lesvohomboloka.” Ndlwini leyikulu, aku na svibza sva golidi ni sva silivhere ntsena, kambe ni svovatliwa hi svigodo ni sva vumba sviko na, kutani svin'we svi ni ntirho lowukulu wodzuneka, svin'wana lowutsongo wokala wungadzuneki. Hikolaho, loko munhu atibasisa ka svilo lesvitsongo, atava xibza xotirha lesvikulu svodzuneka, lexihlawulekeke ni kupfuna n'winyi wa yindlo, xiyimela kutirha ntirho wihi ni wihi lowunene. Chava kuhluliwa hi kunavela loku kutelaka lavampsha, ulandza kululama, ni kupfumela, ni rirhandzu, ni kurhula, svin'we ni lavakhongelaka Hosi hi timbilu letitengeke. Ungavi ni mhaka ni kukanetana ka vuphukuphuku lokungapfuniki nchumu; wasvitiva lesvaku svipsala timholova. Nandza wa Hosi angafaneli kuva munhu wa timholova, kambe aave ni timpsalu ka munhu mun'wana ni mun'wana, ativa kujondzisa, alehisa mbilu, alaya khwatsi vakaneti va yena; hikuva kumbexana Xikwembu xingayendla lesvaku vatisola vahundzuka, vafika laha vangativaka lesvinga ntiyiso. Kutani vangakota kupona ntlhan'wini wa Sathana, lweyi avakhomeke kuva vayendla kurhandza ka yena. Tiva lesvaku masikwini ya makumu, kutafika minkama ya kukarhata. Hikuva vanhu vatava lavatirhandzaka, lavarhandzaka ngopfu male, ni kutidzunisa, ni kutikukumuxa, ni kurhukana; vatava lavangayingisiki vapsele, lavangaliki na kukhensa, vokala xichavu; vatava vanhu lavapfumalaka rirhandzu, lavangaliki ni kutsetselela, valumbeti, lavangatikotiki, lavokarhata, lavavengaka lesvolulama; vatava vakanganyisi, vanhu vamagugu, lavabohiweke hi kutikulisa, lavarhandzaka kutiphina kutlula kurhandza Xikwembu. Vatatiyendla ongi hi loko vali ni vukhongeli, kambe vatayala matimba ya bzona. Fambela kule ni vanhu lavotano hikuva xikarhi ka vona, ku ni lavanghenaka minjangwini ya vanhu, vaphasa vavasati lavangatiyangiki, lavahluliwaka hi svijoho, lavayisiwaka hala ni hala hi kunavela kohambanahambana; vayingisa mani na mani, kutani vangakala vangafiki ni siku ni rin'we kutiveni ka ntiyiso. Vanhu lava vakaneta ntiyiso, kufana na Yani na Yambri, lavangakanetana na Moxe. I vanhu lavaboleke miyanakanyu, i vapfumeli va nomo ntsena. Kambe avangayi kule, hikuva vuphukuphuku bza vona bzitahumela rivaleni mahlweni ka vanhu hinkwavu, tani hi lesvi svingayendlisa svona ka vavanuna lavaya vambirhi. Svosvi-ke, ulandzelelile kujondzisa ka mina ni mahanyela ya mina, makungu ya vutomi bza mina ni vupfumeli bza mina, kulehisa ka mina mbilu, ni rirhandzu ra mina ni kutiyisela ka mina. Uvonile kuxanisiwa ka mina ni mahlomulu ya mina; utiva hinkwasvu lesvi svinihumeleleke le Antiyoka ni le Ikoniya ni le Listra, ni kuxaniseka lokukulu loku nikuvoneke. Hambi svilitano, Hosi yinilamulelile kuxanisekeni loku hinkwaku. Hakunene, hinkwavu lavanavelaka kuhanya vutomi bza vukhongeli ka Kriste Yesu, vataxanisiwa; nasvona vanhu lavobiha ni vakanganyisi vataya mahlweni vayengeteleka kubiha, na vali karhi vakanganyisa, na vona vakanganyisiwa. Kambe loko ali wena, yana mahlweni ni lesvi usvijondzeke, svinga lesvi ungapfumela ni kutiya ka svona, hikuva utiva lweyi usvijondzeke ka yena; nasvona utiva lesvaku kusukela vutsongwanini bza wena, utolovelile Matsalwa Layohlawuleka, lamakotaka kukunyendla ntivi, makuponisa hi kupfumela ka Kriste Yesu. Matsalwa lawa hinkwawu mahuhuteliwile hi Xikwembu, mapfuna kujondzisa, ni kulaya, ni kululeka, ni kutolovetisa lesvolulama, lesvaku mutirheli wa Xikwembu ava lweyi ahetisekeke, atilulamisela kuyendla ntirho wini na wini lowunene. Mahlweni ka Xikwembu ni le ka Kriste Yesu lweyi angatayavanyisa lavahanyaka ni lavafeke, ni hikolaho ka kuhumelela ka Yesu ni Mfumu wa yena, na kukhongotela svinene nili: Chumayela Rito, uhiseka hi nkama wakona, hambi kuli handle ka nkama; kholwisa, ulaya ni kukhutaza; ungatsandzeki hi tlhelo ra kulehisa mbilu ni le kujondziseni. Hikuva nkama wata, lowu vanhu vangatakala vangayamukeli jondzo leyinga yona ya ntiyiso; kambe lesvi tindleve ta vona tinwayisaka, vatatihlengeletela vajondzisi lavangatavajondzisa lesvi vasvitsakelaka. Kutani vatafularhela ntiyiso, vangahawuyingisi, vapepetsekela ka minkaringana ya hava. Kambe loko ali wena, tiya minkama hinkwayu, yamukela kuxaniseka, tirha ntirho wa kuhiteka wa kuvula evhangeli, hetisa timfanelo ta ntirho wa wena. Loko ali mina, nikotisa mhamba leyihumesiwaka alitarini; kutani nkama wa mina wu le kusuhi. Nilwile nyimpi leyinene, nihetile mpfhuka wa mina wa kutsutsuma, nihlayisile kupfumela. Lesvisaleke hi lesvaku hari ya vahluli yinirindzelile, kunga kululama loku Hosi, muyavanyisi lweyi wolulama, yingataninyika hi siku lerikulu; kutani ayinganyiki mina ntsena, kambe yitanyika ni hinkwavu lavatsakeleke kuhumelela ka yona. Yendla hi matimba lesvaku uta halenu ka mina svosvisvosvi. Hikuva Demasi, hi kurhandza ngopfu sva misava leyi, anibalekile aya Thesalonika. Kreskene ayile Galatiya, na Tito ayile Dalmasiya. I Luka ntsena lweyi asaleke na mina. Tana na Marka halenu, hikuva asvikota ngopfu kunitirhela. Tikiko nimurhumele le Efesa. Loko uta, tana ni jansi leri ningarisiya na Karpo le Trowasi, ni tibuku, ngopfungopfu letosonga, ta svikhumba. Alexandre mufuli wa sva koporo aniwonhelile ngopfu; Hosi yitamutlhelisela hi lesvi aniyendleke svona. Na wena utivonela ka yena, hikuva alwile ngopfu ni jondzo ya hina. Kusunguleni ka kutihlamulela ka mina hubzeni, kupfumalekile ni mun'we wa kuyima na mina; hinkwavu vanibalekile. Vangavekiwi nandzu ka svona. Kambe Hosi yiyimile na mina yinitiyisa, lesvaku nikota kuchumayela Rito niheta, ni lesvaku vamatiko hinkwavu vatakota kuritwa. Nasvona niwutliwile non'weni wa nghonyama; Hosi yitaniwutla ni le kubiheni hinkwaku, yiniponisa lesvaku nitakuma Mfumu wa yona wa le matilweni, ka yona akuve kudzuneka hilaha kungaheliki. Amen. Rungula Priskila na Akila ni va njangu wa ka Oneziforo. Eraxto asele Korinto. Trofimo nimusiyile na avabza le Mileto. Yendla hi matimba lesvaku uta halenu na vuxika bzingasifika. Yubulo wakurungula; svitano na Pude na Lino na Klawudiya, ni vamakwerhu hinkwavu. Hosi ayive ni moya wa wena. Timpsalu ative na n'wina. Amen! Mina Pawulo, nandza wa Xikwembu ni mupostola wa Yesu Kriste, nirhumiwile kuseketela kupfumela ka vanhu lavahlawuliweke hi Xikwembu, ni kuvapfuna kutiva ntiyiso lowujondzisiwaka hi vukhongeli bza hina, bzinga lebziyakiweke henhla ka kulangutela vutomi lebzingaheliki. Xikwembu lexingaliki na kuhemba xihitshembisile vutomi lebzi, na minkarhi yingasiva kona; kutani xibzihumesile rivaleni hi dlela ya kuchumayela, loko nkarhi lowunene wufikile, hikuva ninyikiwile mahungu lawa, hi kulerisa ka Xikwembu Muponisi wa hina. Nitsalela Tito, n'wananga wa xiviri, kupfumeleni loku hinga nakona svin'we, nili: Timpsalu ni kurhula, asvive na wena, svihuma ka Xikwembu Tatana, ni ka Yesu Kriste Muponisi wa hina! Mhaka leyiyendleke lesvaku nikusiya le Kreta, aniyendlela lesvaku usala uhetisa lesvi asvahalava kululamisiwa, nasvona uhlawula vakulukumba va kereke doropeni rin'wana ni rin'wana. Tsundzuka lesvi nikuleriseke svona: Mukulukumba afanela kuva munhu lweyi angaliki na xisandzu, anga ni nsati mun'we ntsena; vana va yena vafanela kuva vapfumeli, lavangasoliwiki hikolaho ka mahanyela ya vona ya mpfilumpfilu, ni kutiyalisa ka vona, hikuva bixopo wa kereke afanela kuva munhu wopfumala xisandzu, lesvi anga mulanguteli wa ntirho wa Xikwembu. Angatshuki ava munhu lweyi atikulisaka, kumbe munhu wa xikwatisana. Angavi lweyi atinyiketaka bzaleni, kumbe munhu wa vukarhi, hambi kunavela sva van'wana; kambe afanela kuva munhu lweyi atsakelaka kuyamukela vayendzi, lweyi arhandzaka svilo lesvinene, lweyi atikhomaka, lweyi alulameke, lweyi ahlawulekeke, lweyi akotaka kutikhoma mahanyeleni ya yena; aave munhu lweyi anamarhelaka Rito leritshembekeke, lerifambelanaka ni lesvi svijondzisiwaka, atakota kutiyisa van'wana hi jondzo leyinga ya ntiyiso, nikukomba kuhoxa ka lava valwaka na yona. Hikuva vatele lavatiyalisaka, ni kukanganyisa van'wana hi kuvulavula ka vona ka hava, ngopfungopfu xikarhi ka vapfumeli lavahumaka xiyudeni. Svafanela lesvaku volavo vamiyetiwa, hikuva vakokela kule vanhu hinkwavu va minjangu yin'wana, vajondzisa lesvi vangafanelangiki kusvijondzisa, hi kunavela rifuwo rohomboloka. Ku ni Mukreta, mun'we wa vaprofeta wa vona, lweyi angatshama aku: “Vakreta i vanhu va mavunhwa; i sviharhi lesvobiha, ni malolo lawa manga ni makolo.” Kunene lesvi asvivuleke svitiyile. Hikolaho wena ufanela kuvatshinya hi matimba, lesvaku vatava ni kupfumela loku kuhanyaka, vatakala vangayingisi minkaringana ya xiyuda, ni kulerisa ka vanhu lavafularheleke ntiyiso. Svilo hinkwasvu svitengile ka lava vatengeke; kambe aku na lexitengeke ka lavanyameke, ni ka lava vangapfumeliki, hikuva miyehleketo ya vona ni mapfalu ya vona svinyamisiwile. Hi milomo ya vona, vavula lesvaku vativa Xikwembu, kambe hi mintirho ya vona vaxilandzula. Hikolaho vanyenyentsa, vayala kuyingisa, avakoti kuyendla ntirho ni wun'we lowunene. Kambe wena, ufanela kujondzisa lesvi jondzo leyinga yona ya ntiyiso yilavaka svona. Vavanuna lava vajuhaleke vafanela kutiva kutikhoma vava lava vaxiximekaka, vava ni kuyehleketa lokunene, vava ni rirhandzu ni kupfumela loku kuhanyaka ni kulehisa mbilu. Na vona vavasati lavajuhaleke avave ni matshamela lawa makhensekaka, vangali ni mahlevo, kumbe lavatinyiketaka bzaleni; vava vajondzisi va lesvi sva kululama, lesvaku vatajondzisa vavasati lavampsha kurhandza vanuna va vona ni vana va vona, vakota kutikhoma ni kutenga, vava lavahlayisaka minjangu ya vona hi mfanelo, vava ni timpsalu, vayingisa vanuna va vona, lesvaku Rito ra Xikwembu ritakala ringasandziwi hi munhu. Hi mukhuva wolowo, khutaza majaha lesvaku makota kutikhoma. Rhanga wena uva xikombiso xa mintirho leyinene hi matlhelo hinkwawu. Kujondzisa ka wena akuve loku kubaseke ni kutshembeka; tirhisa marito lawa manga wona ya ntiyiso, lawa mangasolekiki, lesvaku lweyi alwaka na wena atakhomiwa hi tingana hi kupfumala svobiha lesvi angasvivulaka ha hina. Svikarawa svifanela kuyingisa vinyi va svona, svivanyika kutsaka timhakeni hinkwatu. Svingaphikizani na vona, kumbe kuvayivela, handle ka lesvo avakombise lesvaku valulamile ni kutshembeka masiku hinkwawu, kutani ka hinkwasvu lesvi vasviyendlaka vatakomba kusaseka ka lesvijondzisiwaka hi tlhelo ra Xikwembu Muponisi wa hina. Hakunene timpsalu ta Xikwembu ta kuponisa vanhu hinkwavu, tihumeseliwe rivaleni; tihijondzisa kutshika kusandza sva Xikwembu ni kunavela sva misava, kutani hihanya misaveni leyi hi kutikhoma, ni kululama, ni vukhongeli, na hili karhi hilangutela minkateko leyi hitshembisiweke yona, siku leri kungatahumelela kukwetsima ka Xikwembu Nkulukumba, ni Muponisi wa hina Yesu Kriste. Hi yena lweyi atinyiketeke hikolaho ka hina, lesvaku ahikutsula kuhombolokeni hinkwaku, ahiyendla vanhu lavatengeke, lava vanga va yena ntsena, ni lava vachivirikelaka kuyendla lesvinene. Jondzisa timhaka leti, utirhisa matimba hinkwawu lawa unganyikiwa wona kukhutaza ni kutshinya van'wana. Ungachipisiwi hi munhu. Tsundzuxa lava uvajondzisaka kutitsongahata ka vafumi ni ka tihosi, ni kutiyingisa, vatshama vatilungiselile kutirha mintirho hinkwayu leyinene; vangatshuki vavulavula svobiha hi van'wana, kambe vava lavorhula, vava ni vuxaka masiku hinkwawu, vava ni musa ni vanhu hinkwavu. Na hina khale ahili sviphukuphuku, hihumile ndleleni, hiyala kuyingisa; ahili svikarawa sva kunavela, ni sva kutitsakisa kohambanahambana; ahili lavahanyaka hi mona ni mavondzo; ahivengiwa, na hina hivengana. Kambe siku leri musa wa Xikwembu Muponisi wa hina, ni rirhandzu ra xona, svihumeleleke, xihiponisile. Kungali hi mhaka ya mintirho leyolulama leyi hina hi hoxe hiyiyendleke, kambe xihiponisile hi timpsalu ta xona, hi kuhlampsiwa loku kuyendlaka lesvaku Moya Lowokwetsima wuhinyika kupsaliwa ra vumbirhi, ni vutomi lebzimpsha. Xikwembu xichelile Moya lowu hi ntalu henhla ka hina ha Yesu Kriste Muponisi wa hina, lesvaku, hi timpsalu ta xona, hitayendliwa lavalulameke mahlweni ka xona, ni kuyamukela ndzhaka ya vutomi lebzingaheliki, lebzi hibzilangutelaka. Mhaka leyi yitiyile. Kutani nilava lesvaku utiyisa timhaka leti svinene, lesvaku lava vapfumeleke ka Xikwembu, valava tindlela ta kutinyiketa, vatirha mintirho leyinene. Hi svona lesvinga svinene, lesvipfunaka vanhu. Fularhela kuphikizana hi sva vuphukuphuku kumbe madzolonga, utshika ni timholova, ni kukanetana hi ta nawu; svilo lesvi asvipfuni nchumu, i sva hava. Munhu lweyi avangaka kuyavana ka vanhu, mutshinye kan'we, kumbe kambirhi ntsena, kutani ungahavi ni mhaka na yena, hikuva wasvitiva lesvaku munhu lweyi wotanu awonhekile, kutani svijoho sva yena svikomba lesvaku ahumile ndleleni. Loko nirhumela Artema kumbe Tikiko kuta ka wena, wena ringeta hi matimba kuta ka mina le Nikopoli, hikuva nitilungisele kuyatshama kona vuxika hinkwabzu. Yendla hi matimba kupfuna hi kulongelela Zena ntivamilawu, na Apolosi, lesvaku vakhoma riyendzo ra vona na vangapfumali nchumu. Valekwerhu avajondze kuchivirikela mintirho leyinene, vatapfuna lomu kupfumaliwaka ngopfu; vangatshuki vahanya vutomi lebzingapfuniki nchumu. Hinkwavu lava ninga na vona laha, vakurungula. Rungula vanghanu va hina kupfumeleni. Timpsalu ta Xikwembu ative na n'wina hinkwenu! Pawulo mubohiwa hikolaho ka Kriste Yesu, ni makwerhu Timotewu, ka Filimoni lweyi arhandzekaka ni mupfuni wa hina, na yena makwerhu Afiya na Arkipo, mutirhikulorhi kulweni, ni ka Kereke leyi yinga muntini wa wena, timpsalu ni kurhula asvive ka n'wina hinkwenu hi tlhelo ra Xikwembu, Tatana wa hina ni ra Hosi Yesu Kriste. Nikhensa ka Xikwembu xa mina, na nili karhi nikuyanakanya nkarhi hinkwawu mikhongelweni ya mina, na nili karhi nitiyile hi ta rirhandzu ni kupfumela loku unga nakona ka Hosi Yesu ni ka vakwetsimi hinkwavu, lesvaku kupfumela ni vuhlengeli bza wena na hina bziva lebzi bzihetisekeke kutiveni ka hinkwasvu lesvi svinga svinene ka hina mayelanu na Kriste. Hikuva makwerhu, nivile ni kutsaka svinene ni kukufumela hikolaho ka rirhandzu ra wena, hikuva atimbilu ta vakwetsimi tipfuxiwile hikolaho ka wena. Hikolaho, hambi loko mina nititwa na nitshunxekile hikolaho ka Kriste akuva nikurhuma lesvi svifanelaka, svayampsa akuva nikukombela hikolaho ka rirhandzu, ni lesvi ninga xikoxa, nasvona ninga mubohiwa ka Yesu Kriste. Ina, nikukombela hi vito ra n'wana wa mina Onezimo lweyi ningahundzuka tatana wa yena, svosvi ninga jele, yena lweyi le ndzhaku aangapfuni nchumu; kambe svosvi anga xipfunu ka mina na wena. Mina nimutlhelisela ka wena, tani hi mbilu ya mina hinkwayu. Mina anilava kutshama na yena lesvaku anitirhela laha jele ninga kona, asiva wena na nili karhi nibohiwile hikolaho ka Evhangeli. Hambi svilitano kuhava lexi ningaxiyendlaka na ningatwanananga na wena lesvaku akurhandza ka wena kungahundzuki ingi hi loko wosindzisiwa, kambe kuva hi kurhandza ka wena. Hikuva nikholwa lesvaku yena asukile ka wena hi nkarhinyana, lesvaku utamuyamukela hilaha kungaheliki, Kungali kufana ni xikarawa; kambe kutlula xikarawa, muyamukele kufana ni makwerhu lweyi arhandzekaka, ngopfungopfu ka mina hi ntiyiso, ni ka wena, angava hi vumunhu, angava Hosini. Loko unixixima kufana ni mutirhikuloni muyamukele, kufana ni loko uyamukela mina ha noxe. Loko akuyivelile svokarhi, kumbe loko a ni xikweneti xokarhi svitsale, hinkwasvu ka nandzu wa mina. Mina Pawulo, hi xiyandla xa mina ha noxe nakutsalela, nili: “Nitakuhakela!” Akuva ningakulumbeti lesvaku wena hi wexe, u ni xikweneti na mina. Ina makwerhu, aniyamukele ntsakiso ka wena ni ka Hosi. Nyika kutsaka ka mbilu ya mina ha Kriste. Hikuva natshemba lesvaku wayingisa, mina nakutsalela, na nili karhi nisvitiva lesvaku utayendla hi kuhundzisa ka lesvi nikukombelaka svona. Nasvona, nilungisele yindlo yotshama ka yona, hikuva ni ni kulangutela ka lesvaku hikolaho ka mikhongelo ya n'wina nitatshunxiwa nivuyela ka n'wina. Wakurungula Epafrasi, mubohiwa svin'we na mina ka Yesu Kriste; svitano na Marka, Arixtarko, na Demasi, na Luka, vatirhikulorhi: Na vona vakurungula. Atimpsalu ta Hosi Yesu Kriste ative ni mimoya ya n'wina. Hi minkarhi leyotala ni tindlela letotala, Xikwembu xivulavulile khale ni vatatana va hina, hi milomo ya vaprofeta. Kambe masikwini lawa yohetelela, xivulavulile na hina hi N'wana, lweyi ximuvekeke kuva maja ndzhaka wa svilo hinkwasvu, lweyi na svona xitumbuluxeke tilo ni misava ha yena. Hi yena lweyi kukwetsima ka Xikwembu kutikombaka ka yena, kutani atekelele lesvi Xikwembu xinga svona hi xiviri xa xona; nasvona atamele ntumbuluku hinkwawu hi rito ra yena ra matimba. Loko ahlampsile svijoho sva vanhu, atshamile vokweni ra xinene ra Lweyi anga ni vukulu hinkwabzu, henhla matilweni, ahundzuke lweyi atlulaka ngopfu tintsumi hi vukulu, tani hi lesvi akumeke vito leritlulaka mavito ya tona hi vukulu. Xana hi yihi ntsumi leyi Xikwembu xitshamaka xiku ka yona: “U n'wananga, namuntlha nikuvelekile”; kumbe kuyengeta xiku: “Nitava tatana ka yena, yena ava n'wana ka mina” ke? Ka vumbirhi, loko xitisa N'wana wa xona wa mativula misaveni, xite: “Hinkwatu tintsumi ta Xikwembu atimukhinsamele!” Hi tlhelo ra tintsumi, xite: “Xikwembu xiyendla tintsumi ta xona mimoya, ni malandza ya xona malangavi ya ndzilo.” Kambe hi tlhelo ra N'wana, xite: “Xiluvelo xa wena, we Xikwembu, i xa minkarhi ni minkarhi, nhonga ya wena ya vuhosi i nhonga ya kululama. Arhandzile kululama, avengile kuhomboloka. Hikolaho Xikwembu, Xikwembu xa wena, xikuchelile mafurha ya ntsako lowukulu kutlula vanakuloni.” Nasvona xite: “Wena Hosi, uvekile masungulu ya misava kusunguleni, ni matilo i ntirho wa mavoko ya wena; matalova, kambe wena ukona hi masiku hinkwawu; matahlakala hinkwawu kufana ni sviyambalu, utamapetsa kufana ni xifunengelo, kutani utamacinca kufana ni sviyambalu. Kambe wena wahali svosvi unga xisvona, ni malembe ya wena amangeheli.” Xana Xikwembu xitshama xibzela yihi ka tintsumi xiku: “Tshama vokweni ra mina ra xinene, nikondza niveka valala va wena hansi ka minkondzo ya wena” ke? Xana tintsumi hinkwatu ahi mimoya leyitirhelaka Xikwembu, leyirhumiweke kupfuna vanhu lavafanelaka kukuma kuponisiwa ke? Hikolaho, hifanela kuhlayisa svinene timhaka leti hititweke, lesvaku hitakala hingahambuki ndleleni ya tona. Hikuva loko mhaka leyivuliweke hi tintsumi yitiyisiwile, ni loko kutlula ka milawu ni kutiyalisa hinkwaku kukumile kukhatisiwa loku kufanelaka, xana hina hingapona hi ndlela yihi, loko hinyenya kuponisiwa lokukulu kotanu ke? Hosi yivulile ta kuponisiwa loku, na kahali kusunguleni, kutani kutlhela kutiyisiwa ka hina hi lava vatweke timhaka takona. Xikwembu na xona axilikarhi xitiyisa vumboni bzakona hi kuyendla svikombiso ni svihlamaliso ni mahlori ya tinxakaxaka, ni kuyavela tinyiko ta Moya Lowokwetsima hi kurhandza ka xona. Hikuva misava leyimpsha leyi yingatata, yona leyi hivulavulaka hi yona, Xikwembu axiyivekanga mavokweni ya tintsumi. Kambe ndhawini yin'wana kuvuliwile vumboni lebzinge: “Munhu i ncini lesvaku uva ni mhaka na yena, kumbe n'wana-wa-munhu lesvaku utikarhatela yena xana? Umuvekile ava hansinyana ka tintsumi, umutlhantekile hari ya kutwala ni kuchaviseka nhlokweni. uvekile hinkwasvu sviva hansi ka minkondzo ya yena.” Kutani-ke, loko Xikwembu xivekile hinkwasvu hansi ka minkondzo ya yena, svivula lesvaku axisiyanga xilo ni xin'we lexingaliki hansi ka yena, kambe, hilaha timhaka tiyimeke hakona, hina ahisvikoti kuvona svilo hinkwasvu lesvi svinga hansi ka matimba ya yena. Kambe hivona Yesu, lweyi angayendliwa kuva hansi ka tintsumi nkarhinyana, svosvi anganyikiwa kukwetsima ni kutwala sviva hari ya vuhosi nhlokweni ya yena, hi mhaka ya kutwisiwa kuvaviseka ka rifu; na svili lesvaku, hi timpsalu ta Xikwembu, atwa nhlomulu wa rifu hikolaho ka munhu mun'wana ni mun'wana. Hikuva asvifanela lesvaku Xikwembu, lexi svilo hinkwasvu svihanyelaka xona ni kuhlayisiwa hi xona, loko xifikisa vana va xona lavotala kukwetsimeni, xiyendla lesvaku murhangeli wa kuponisiwa ka vona ava lweyi ahetisekeke, hi mhaka ya kuvaviseka ka yena Hambi ali Yesu lweyi abasisaka vanhu svijohweni, hambi vali lavabasisiwaka, hinkwavu vahuma ka Tatana mun'we. Hi yona mhaka leyi yendlaka lesvaku Yesu anga khomiwi hi tingana nikuvavula vamakwavu, aku ka Xikwembu: “Nitatwalisa vito ra wena ka vamakwerhu, nitakudzunisa hi tinsimu xikarhi ka nhlengeletanu.” Atlhela aku: “Nitaveka kutshemba ka mina ka xona.” Nasvona aku: “Hi mina lweyi, svin'we nivana lava Xikwembu xininyikeke vona.” Hikolaho, lesvi vana vanga va nyama ni ngati yin'we hinkwavu, svitano na yena: I wa ntumbuluku mun'we na vona lesvaku, hi rifu ra yena, atakota kuhelisa lweyi anga ni matimba ya rifu, anga yena Diyavulosi, kutani atshunxa hinkwavu lava avali vukaraweni vutomi bza vona hinkwabzu, hi mhaka ya kuchava rifu. Hikuva, hakunene, ahi tintsumi leti apfunaka tona, kambe apfuna vatukulu va Abrahamu. Hikolaho asvifanela lesvaku ayendliwa lweyi afanaka ni vamakwavu hi matlhelo hinkwawu, lesvaku atava Muprista lwenkulu wa timpsalu ni lweyi atshembekeke ntirhweni wa Xikwembu, lesvaku asusa svijoho sva vanhu. Hikuva lesvi na yena angatwa kuvaviseka ni kuringiwa, wasvikota kupfuna lavaringiwaka. Loko svilitano, vamakwerhu lavakwetsimaka, lava na n'wina miyaveliwaka kuvitaniwa ka le tilweni, yanakanyani Yesu, murhumiwa wa Xikwembu ni Muprista lwenkulu wa vukhongeli bza hina. Atshembekile ka Lweyi amuhlawuleke, tani hi Moxe lweyi na yena aatshembekile ndlwini hinkwayu ya Xikwembu. Hambi svilitano, Yesu avuliwa lweyi kudzuneka kumufanelaka ngopfu kutlula Moxe, tani hi lesvi muyaki wa yindlo adzunisiwaka kutlula yindlo yakona. Hikuva yindlo yin'wana ni yin'wana yiyakiwile hi munhu, kambe muyaki wa svilo hinkwasvu i Xikwembu. Kutani-ke, Moxe aatshembekile ndlwini hinkwayu ya Xikwembu tani hi nandza, lesvaku aveka vumboni bza svilo lesvi asvahatavuliwa masikwini lawa mataka. Kambe Kriste, atshembekile tani hi n'wana lweyi anga n'winyi ndlwini ya Xikwembu. Kutani hina hi yindlo ya xona, loko hikhoma hitiya, kutshembeni ni le kutlangeleni ka hina hi tlhelo ra svilo lesvi hisvilangutelaka. Hikolaho, svifana ni lesvivuliwaka hi Moya Lowokwetsima loko wuku: “Namuntlha, loko mitwa rito ra Xikwembu, minganonon'hwiseni timbilu ta n'wina, kukotisa lesvi mitshamaka misviyendla loko mixi pfukelile, siku leri mingaxiringa ha rona mananga. Vatatana va n'wina varingetile kuniringa kona, kuvula Xikwembu, kutani vavonile mintirho ya mina hi xipimo xa mune wa makume ya malembe. Hikolaho ka svona, nihlundzukela vanhu va rixaka lero, niku: ‘Timbilu ta vona tihambuka ndleleni masiku hinkwawu, avativanga tindlela ta mina.’ Xilesvo, nihlambanyile vukarhini bza mina, lesvaku vangakala vangangheni kuwiseni ka mina.” Vamakwerhu, tivoneleni lesvaku kungavi na mun'we xikarhi ka n'wina lweyi anga ni mbilu leyobiha, leyingaliki na kupfumela, kutani ahambukela kule ni Xikwembu lexihanyaka. Kambe khongotelanani masiku hinkwawu, loko mahatwa rito leringe “namuntlha”, lesvaku kungavi na mun'we xikarhi ka n'wina lweyi atinonon'hwisaka hi kuxisiwa hi vujohi. Hikuva hi ni kuyaveliwa ka Kriste ntsena loko hikhoma hitiya kuyisa makumu, kutshembeni ka hina loku kosungula, nkarhini lowu kahavuliwaka marito lawa mange: “Namuntlha, loko mitwa rito ra Xikwembu, minganonon'hwiseni timbilu ta n'wina, kukotisa lesvi mitshamaka misviyendla loko mixipfukelile.” Xana i vamani lavatweke marito lawa, kambe vavuya vaxipfukela, ke? Xana avangali hinkwavu lavasukeke le Gibita, na vafambisiwa hi Moxe, ke? Kutani avali vamani lava xingavahlundzukela hi malembe ya mune wa makume ke? Xana ahi lava vajoheke, lava mintsumbu ya vona yiweke yisala mananga ke? Kutani Xikwembu xihlambanyele vamani lesvaku “vangakala vangangheni kuwiseni ka xona” xana? Xana axingavuli vona lava avatiyalisa ke? Hikolaho, hasvivona lesvaku vatsandzekile kunghena kuwiseni, hi mhaka ya kukala kupfumela. Hikolaho, loko xitshembiso xa kunghena kuwiseni ka Xikwembu xahali kona, ahichaveni lesvaku kumbe mun'wana wa n'wina angatshuka akumiwa na asale ndzhaku. Hikuva Evhangeli yitile ka hina kufana svinene ni lesvi yingata ka vona; kambe Evhangeli leyi vayitweke ayivapfunanga nchumu, hikuva ayikumananga ni kupfumela ka vona lava vayitweke. Hina lava hipfumeleke, hi hina hinghenaka kuwiseni koloko, hilaha Xikwembu xingate: “Nihlambanyile kuhlundzukeni ka mina niku: ‘Vangakala vangangheni kuwiseni ka mina!’” Xivulile svosvo hambilesvi mintirho ya xona ayihetisekile hi mpfhuka misava yitumbuluxiwa. Hikuva kun'wana Matsalweni kuvulavuliwa hi ta siku ra vuntlhanu ni mambirhi hi ndlela leyi: “Hi siku ra vuntlhanu ni mambirhi, Xikwembu xiwisile mintirhweni ya xona hinkwayu.” Mhaka yoleyo yivuliwa kambe vaku: “Vangakala vangangheni kuwiseni ka mina.” Hikolaho, lesvi svahatiyeke lesvaku van'wana vatanghena kona, ni lesvi lavakumeke Evhangeli kusunguleni vatsandzekeke kunghena hi mhaka ya kutiyalisa ka vona, Xikwembu xiyengeta xiveka rin'wana siku, xiku: “Namuntlha!” Xirivula hi nomo wa Davhida ndzhaku ka nkarhi woleha svinene, hi marito lawa mahakuvuliwaka, lawa mangate: “Namuntlha, loko mitwa rito ra xona, minganonon'hwiseni timbilu ta n'wina.” Hikuva loko onge Joxuwa aavanyikile kuwisa, ina Xikwembu xingavulavulanga hi ta siku rin'wana ndzhaku ka svosvo. Hikolaho, kuwisa kahali kona ka vanhu va Xikwembu. Hikuva lweyi anghenaka kuwiseni ka Xikwembu, na yena wawisa mintirhweni ya yena, kukota lesvi Xikwembu xiwiseke mintirhweni ya xona. Loko svilitano, ahiringeteni hi matimba kunghena kuwiseni koloko, lesvaku ni mun'we angawi hi kutiyalisa lokufanaka ni ka vona. Hikuva Rito ra Xikwembu rahanya, nasvona ratirha, rikariha kutlula tlhari lerilotiweke matlhelo ha mambirhi, ritlhava rikondza rihambanyisa ahefemulo ni moya, ni marhambu ni mongo, hi rona leri yavanyisaka miyanakanyu ni makungu ya mbilu. Emahlweni ka Xikwembu, kuhava xivumbiwa ni xin'we lexitumbeleke. Hinkwasvu sviyo tlandlala, rivaleni, mahlweni ka Lweyi hifanelaka kutihlamulela ka yena. Loko svilitano, lesvi hinga ni Muprista lwenkulu svinene lweyi atsemakanyeke matilo, anga yena Yesu N'wana wa Xikwembu, ahikhomeni svitiya ka vumboni bza kupfumela ka hina. Hikuva Muprista lwenkulu lweyi hinga na yena ahi lweyi atsandzekaka kuhitwela vusiwana minkarhalweni ya hina, kambe hi lweyi aringiweke hi matlhelo hinkwawu kufana na hina, ntsena yena angajohanga. Hikolaho, ahitshineleni kusuhi ni xiluvelo xa timpsalu, na hili ni kutshemba ka lesvaku hitatsetseleliwa ni kukuma timpsalu letingata hi pfuna minkarhini ya kupfumala. Muprista lwenkulu mun'wana ni mun'wana, lesvi ahlawuliweke xikarhi ka vanhu, avekiwile lesvaku atayimela vanhu kuhlanganeni ka vona ni Xikwembu, ni lesvaku ahumesa tinyiko ni timhamba hikolaho ka svijoho sva vona. Angakota kutirha hi vunene ka lavangativiki nchumu ni ka lavahambukaka ndleleni, lesvi na yena arhendzeliweke hi minkarhalo. Xilesvo wa boheka kutihumesela timhamba hikolaho ka svijoho sva yena, svin'we ni kuhumesela vanhu. Nasvona, munhu angatihlawuleli ntirho lowu wo dzuneka, kambe avitaniwa hi Xikwembu, kukota lesvi svingayendliwa ka Aroni. Svive tano na yena Kriste: Angatitlakusanga kuyendliwa Muprista lwenkulu, kambe ayo vekiwa hi Xikwembu, lexi xingate ka yena: “U n'wananga, namuntlha ni kuvelekile.” Kun'wana xitlhele xivula xiku: “U Muprista hilaha kungaheliki, hi lesvi unga wa rixaka rin'we na Melkisedeke.” Masikwini ya yena ya kuhanya laha misaveni, Yesu akhongelile nikukombela hi kutitsongahata, ahuwelela hi matimba ni kurila minhloti, ka lweyi anga ni matimba ya kumuponisa kufeni, kutani ayingisiwile hikolaho ka xichavu xa yena. Hambilesvi aali N'wana wa Xikwembu, ajondzile kuyingisa hi mhaka ya kuxaniseka ka yena. Kutani loko ayendliwile lweyi ahetisekeke, ahundzukile xihlovo xa kuponisiwa lokungaheliki ka hinkwavu lava vamuyingisaka, hikuva avekiwile Muprista lwenkulu hi Xikwembu, hi lesvi anga wa rixaka rin'we na Melkisedeke. Ka mhaka leyi, hi ni lesvotala lesvi hingasvivulaka, lesvi svinonon'hwaka kusvitlhamusela, hikuva tindleve ta n'wina ti ni vulolo bza kuyingisa. Hikuva hambilesvi svosvi amifanela kuva vajondzisi, mahalava kujondzisiwa, atijondzo tosungula mayelanu ni Rito ra Xikwembu, hi munhu mun'wana. Mahalava ntswamba, kungali svakuja lesvitiyeke. Mani na mani lweyi ahanyaka hi ntswamba, angasikuma jondzo ya lesvolulama, hikuva i xihlangi. Kambe svakuja lesvitiyeke i sva lava vakuleke, i sva lava miyehleketo ya vona yitoloveleke kuyehleketa, lavatoloveleke kuhlawula lesvinene ka lesvobiha. Hikolaho, ahitshikeni kuyima ka tijondzo letosungula ta vukriste, kambe hikongoma kuhetisekeni, hingahatlheleni hijondzisa hi ta masungulu, tinga ta kuhundzuka ka mintirho leyifeke, ni ta kupfumela ka Xikwembu, jondzo henhla ka ta kukhuvula, nitakutlhanteka vanhu mavoko, ni ta kupfuka ka vafi, ni ta siku ra kuyavanyisiwa ka makumu. Kutani svosvo, hitasviyendla loko Xikwembu xipfumela. Asvinge koteki ka lava vatshamaka vavoningiwa hi Xikwembu, lavanampseke nyiko ya le tilweni, lavayaveliweke Moya Lowokwetsima, lavanganampsa kunandziha ka Rito ra Xikwembu ni matimba ya sva minkarhi leyitaka, loko kutani vatlhelela ndzhaku, asviyendleki kuvavuyisela kambe kuhundzukeni; vatlhela vavamba N'wana wa Xikwembu, vamuhundzula xihlekiso. Loko misava yinwile mati ya mpfula leyitalaka ku na henhla ka yona, ni loko yimilisa svimilwa lesvipfunaka lava vayirimaka, yikuma minkateko leyihumaka ka Xikwembu. Kambe loko yimilisa mintwa ni svihlehlwana, ayipfuni nchumu, kutani yilekusuhi ni kurhukiwa; makumu ya yona i kuhisiwa. Ni loko hivulavulisa svosvo, ahikanakani hi tlhelo ra n'wina, varhandziwa, hikuva mitiva lesvinga svinene kutlula svin'wana, lesvi svingamifikisaka kuponisiweni. Hikuva Xikwembu axi na mona, xingakala xingarivali ntirho wa n'wina ni rirhandzu leri mirikombeke hi vito ra xona, hi kutirhela vahlawuliwa va xona, hilaha misviyendlaka hakona ni svosvi. Kutani hinavela ngopfu lesvaku mun'wana ni mun'wana wa n'wina akomba kuchivirika koloko kuyafika makumu, kukondza kuhetiseka kulangutela ka n'wina. Ahilavi lesvaku mihundzuka lava vololoha, kambe hilava lesvaku mifana ni vanhu lava svosvi vakumaka lesvi vatshembisiweke svona, hi mhaka ya kupfumela ka vona hi kulehisa mbilu. Loko Xikwembu xitshembisile Abrahamu, lesvi akuli hava mun'wana lweyi anga mukulukumba ka xona lweyi axitahlambanya hi vito ra yena, xiyo tihlambanyela hi xoxe, xiku: “Hakunene nitakukatekisa, nasvona nitakunyika vana votala.” Hi ndlela yoleyo Abrahamu, hi kulehisa mbilu, akumile lesvi atshembisiweke svona. Loko vanhu vahlambanya, vahlambanya hi lweyi anga nkulu ka vona, kutani kuhlambanya kutiyisa lesvi svivuliweke nasvona kuhelisa kuphikizana hinkwaku ka vona. Hikolaho, loko Xikwembu xinavelile kukombisa hi ndlela leyikholwisaka, ka lava avali vamajandzhaka vaxitshembiso, lesvaku xingakala xingatlheleli ndzhaku makungwini ya xona, xisvitiyisile hi kuhlambanya. Lesvaku, hi svilo svimbirhi lesvingacinciki, lesvi ka svona svingayendlekiki lesvaku Xikwembu xikumeka na xili muhembi. Kutani hina lava hitsutsumeleke kuyatumbela ka xona, hitiya nhlana svinene, hiyamukela hi mandla mambirhi kulangutela loku kuvekiweke mahlweni ka hina. Kulangutela loku kufana ni nsoma ya hefemulo leyitiyeke ni kutshembeka; yinghena kuyafika ni le ndzeni ka nguvu ya xisirhelelo. Yesu anghenile kona kuva murhangeli hikolaho ka hina, yena lweyi avekiweke Muprista lwenkulu hilaha kungaheliki, hi lesvi anga wa rixaka rin'we na Melkisedeke. Melkisedeke lweyi aali hosi ya Salema ni Muprista wa Xikwembu xa le henhlahenhla, loko Abrahamu avuya hi le kudlayeni ka tihosi. Melkisedeke ahlangane na yena, amukatekisa; kutani Abrahamu amupambulela sva vukhume bza hinkwasvu lesviphangiweke. Xosungula, vito ra ku “Melkisedeke” loko rihlamuseliwa, rivula “hosi ya kululama”; xa vumbirhi, i “hosi ya Salema”, hi lesvaku “hosi ya kurhula”. Tatana wa yena angativiwi, hambi ali mamana wa yena, kumbe longoloko wa rixaka ra yena. Masiku ya yena amana masungulu, hambi bzili vutomi bza yena, abzi na makumu. Afana ni N'wana wa Xikwembu, kutani aya mahlweni ali Muprista hilaha kungaheliki. Vonani hilaha anga nkulu hakona! Abrahamu, yena kokwana wa hina, amunyikile sva vukhume bza lesvi asviphangeke nyimpini. Kutani vatukulu va Levhi lavanyikiweke ntirho wa vuprista, vapfumeleliwa hi Nawu kuyamukela sva vukhume lebzi bzihumesiwaka hi vanhu, hi lesvaku lebzi bzihumesiwaka hi vamakwavu, kasi na vona vamakwavu lava i vatukulu va Abrahamu. Kambe munhu lweyi, hambilesvi angaliki wa rixaka ra Valevhi, ayamukele sva vukhume bzohuma ka Abrahamu, atlhela akatekisa Abrahamu lweyi aali ni svitshembiso. Kuhava kukaneta lesvaku lwentsongo akatekisiwa hi lwenkulu. Hi tlhelo rin'wana, sva vukhume sviyamukeliwa hi vanhu lavafaka; kasi hi tlhelo lerin'wana, sviyamukeliwa hi munhu lweyi Matsalwa mavulaka lesvaku wahanya. Nasvona, munhu angavula lesvaku Levhi hi yexe, lweyi ayamukelaka sva vukhume, abzihumesile loko Abrahamu ali karhi abzihumesa, hikuva ahali ndzeni ka kokwana wa yena Abrahamu loko Melkisedeke atlhangana na yena. Kutani-ke, loko onge kuhetiseka ka vanhu kuyendlekile hi mhaka ya vuprista bza va ka Levhi (hikuva hansi ka bzona vanhu vanyikiwile Nawu), xana akahalaveka yini, ka Muprista mun'wana “wa rixaka rin'we na Melkisedeke” ahumelela, matshan'wini ya kuva ni lweyi avuliwaka “wa rixaka rin'we na Aroni” ke? Hikuva loko vuprista bzicinca, na wona Nawu svafanela lesvaku wucinca. Munhu lweyi svilo lesvi svivuliwaka henhla ka yena, aali wa rixaka rin'wana, nasvona ka bzona akusihuma ni mun'we lweyi atshamaka atirha le altarini. Hikuva svi le rivaleni lesvaku Hosi ya hina yihumile rixakeni ra va ka Yuda, kutani Moxe angavulanga nchumu henhla ka rona hi tlhelo ra vaprista. Mhaka yakona yi le rivaleni ni kutlula kolaho, hi lesvi kuhumeleleke Muprista mun'wana lweyi afanaka na Melkisedeke, lweyi angava Muprista, kungali hi kulandza milawu ni svileriso sva vanhu, kambe kuli hi matimba ya vutomi lebzingawonhekiki. Hikuva Matsalwa mavekile vumboni henhla ka yena, maku: “U Muprista hilaha kungaheliki, hi lesvi unga wa rixaka rin'we na Melkisedeke.” Hi tlhelo, Nawu wa khale wuhelisiwile, hikuva awupfumala matimba, nasvona awungapfuni nchumu (hikuva Nawu awuyendlanga xilo ni xin'we xiva lexihetisekeke); hi tlhelo rin'wana kutisiwile kulangutela lokumpsha, loku hakona hitshinelelaka Xikwembu. Nasvona, lesvi asviyendliwanga handle ka kuhlambanya. Lavangavekiwa vaprista khale, vavekiwile ntirhweni wa vona na kungavanga ni kuhlambanya, kambe Yesu avekiwile kuva Muprista hi kuhlambanya ka Xikwembu, lexingate ka yena: “Hosi yihlambanyile, kutani ayingatlheleli ndzhaku; yite: ‘U muprista hilaha kungaheliki.’” Lesvi sviyendla lesvaku Yesu ava mutiyisi wa ntwananu wa risima. Vaprista va khale avatele, hi mhaka ya rifu, avatsandzeka kuya mahlweni ni ntirho wa vona. Kasi ntirho wa yena wa vuprista, Yesu awukhomela makumu, hikuva ahanya hi masiku ni masiku. Hikolaho, wasvikota minkarhi hinkwayu kuponisa lavatshinelelaka Xikwembu ha yena, lesvi ahanyaka hi masiku hinkwawu ni kuvakhongelela. Asvifanela lesvaku hiva ni Muprista lwenkulu wotanu, wokwetsima, wopfumala nandzu, wokala xivati, wohambana ni vajohi, lweyi atlakusiweke henhla ka matilo. Ahambanile ni Vaprista lavakulu lavaya. Angaboheki kurhanga atihumesela timhamba toriha svijoho sva yena masiku hinkwawu na angasihumesela vanhu van'wana timhamba toriha svijoho sva vona. Ahihim! Lesvi, asviyendlile kan'we loko atinyiketile hi yexe. Hakunene Nawu wuveka vanhu lesvaku vava Vaprista lavakulu, hambilesvi vangaliki na matimba; kambe rito ra kuhlambanya leriteke ndzhaku ka Nawu, riveka N'wana kuva Muprista, yena lweyi ahetisekeke hilaha kungaheliki. Kutani-ke, nhlokomhaka ya lesvi hisvivulaka hi leyi: Hi ni Muprista lwenkulu wofana na yena, lweyi atshameke tlhelweni ra xinene ra xiluvelo xa vuhosi matilweni, lweyi atirhaka tempeleni leyokwetsima ni le tabernakeleni ya xiviri, leyi yimisiweke kungali hi munhu kambe hi Hosi. Hikuva Vaprista lavakulu hinkwavu vavekiwile lesvaku vahumesa tinyiko ni timhamba; hi ndlela yoleyo svafanela lesvaku Muprista wakona na yena ava ni svin'wana lesvi asvihumesaka. Loko ingi ahali laha misaveni, aangatava Muprista nikutsongo, hikuva vaprista lavahumesaka tinyiko hi kulerisa ka Nawu, vakona; vatirha ntirho lowunga xifaniso ni ndzhuti wa lesvitirhiwaka matilweni. Svifana na Moxe: Loko alavile kuyaka tabernakele, alerisiwile hi Xikwembu, lexingate: “Uvona lesvaku uyendla hinkwasvu hi kulandza lesvi ukombiweke svona ntshaveni.” Kambe hilaha timhaka tiyimeke hakona, Kriste akumile vutirheli lebzitlulaka ngopfu lebza khale hi kusaseka, hikuva ntwananu lowu anga muyimeli wa wona wutlakukile kutlula lowa khale, hikuva lowumpsha wubohiwile hi svitshembiso lesvitlakukeke. Loko ingi ntwananu wolowo wa kusungula awungavanga ni svihoxo, akungatalaveka wun'wana wa vumbirhi. Hikuva Xikwembu xivona kuhoxa ka vanhu va xona, loko xiku: “Masiku mata, kuvula Hosi, lawa ningatayendla ntwananu lowumpsha ni Vaisrayele, hambi vali va ka Yuda. Wona wungakala wungafani ni lowu niwuyendleke khale ni vatatana va vona, siku leri nivakhomeke hi voko, nivahumesa tikweni ra Gibita. Ntwananu wa mina lowu, vawutshovile, hi kolaho anaha tikarhatelanga vona, kuvula Hosi. Lowu hi wona ntwananu lowu ningatawuyendla ni Vaisrayele, ndzhaku ka masiku wolawo, kuvula Hosi: Nitanghenisa milawu ya mina miyehleketweni ya vona, niyitsala timbilwini ta vona, kutani nitava Xikwembu xa vona, vona vava vanhu va mina. Akungahavi na lweyi ajondzisaka muyakelani kumbe makwavu, aku: ‘Tiva Hosi!’ Hikuva vanhu hinkwavu vatanitiva, kusukela ka lwentsongo kuyafika ka lwenkulu. Nitava rivalela kuhomboloka ka vona, svijoho sva vona aningahasvitsundzuki.” Loko Xikwembu xivulavula hi “ntwananu lowumpsha”, xiteka lowosungula wuva lowungahatirhiki; kutani lesvi svingahatirhiki, lesvihlakalaka, svi le kusuhi ni kunyamalala. Svosvi-ke, hambi wuli ntwananu lowu wa kusungula awuli ni milawu ya magandzelela ni Tempele yokwetsima leyi yiyakiweke misaveni. Hikuva akulungisiwile tabernakele, laha axilawu xorhanga axili ni xitlhoma tivoni, ni meza ni svinkwa svohumesela Xikwembu; akuvitaniwa “Ndhawu yoHlawuleka”. Le ndzhaku ka nguvu leyi ya vumbirhi ya xisirhelelo, akuli ni tabernakele leyivuliwaka “Ndhawu yokwetsimisisa ngopfu”. Ayili ni alitari ya golidi ni b'aso, ni areka ya ntwananu leyinamekiweke hinkwayu hi golidi; ndzeni ka areka akuli ni nkambana wa golidi wohlayisa mana, ni nhonga ya Aroni leyihlukeke matluka, ni maribze ya ntwananu. Henhla ka areka ya ntwananu akuli ni tikerubi letovangama leti andzhuti wa tona awufunengeta ndhawu ya vurivalelo ya svijoho. Kambe hingakala hingahlayi svilo lesvi ha xin'we xin'we. Kutani loko svilo svakona svilungisiwe hi ndlela leyi, vaprista vanghena masiku hinkwawu ka tabernakele yorhanga ya le handle, vayendla ntirho wa vona wa timhamba. Kasi ka xilawu xa vumbirhi xa le mpfungwe, kunghena ntsena Muprista lwenkulu, anghena kan'we ntsena hi lembe, na ali ni ngati leyi atihumeselaka timhamba ta yena, ni kuhumesa hikolaho ka svijoho lesvi tiko risviyendleke kungali ha vomu. Hi mukhuva lowu, Moya Lowokwetsima wukomba lesvaku ndlela ya kuyanghena xivandleni lexihlawulekeke ayisipfuleka, loko tabernakele ya le handle yaha yimile. Lexi i xifananiso ka nguva leyi, lexi xikombisaka lesvaku atinyiko ni timhamba leti tihumesiwaka atisvikotanga kuhlampsa ripfalu ra lweyi atirhaka, kambe svotirha ka svakuja, ni sva kunwa, ni mikhuva leyotala ya kutibasisa, ni milawu ya sva miri leyivekiweke, kukondza kufika nkarhi wa kupfuxeta hinkwasvu. Kambe Kriste atile na ali Muprista lwenkulu wa svilo lesvinene lesvihumeleleke, kutani atirha sva vuprista tabernakeleni leyitlulaka matabernakele man'wana hi vukulu ni kuhetiseka, leyingayakiwangiki hi mavoko, hi lesvaku yingaliki ya laha misaveni. Anghenile kan'we ntsena ndhawini yokwetsimisisa svinene ngopfu, kutani angatekanga ngati ya timbuti ni ya marhole kuyagandzela ha yona, kambe agandzelile hi ngati ya yena, akuva ha yona kuva ni kukutsula hilaha kungaheliki. Hikuva, lesvi vanhu lavokala vangatenganga vakwetsimisiwaka hi kukuma kubasisiwa mirini wa vona, loko van'watsekiwa hi ngati ya sviphongo, ni ya maduna, kumbe hi nkuma wa thokazi lerihisiweke, ngati ya Kriste yitava leyitlulisaka ngopfu hi matimba; hikuva Kriste atinyiketile hi yexe, hi Moya lowungaheliki, na angali na xisandzu mahlweni ka Xikwembu, kutani ngati ya yena yibasisa mapfalu ya hina mintirhweni leyifeke, lesvaku hitirhela Xikwembu lexihanyaka. Hikolaho, hi yena muyimeli wa papela lerimpsha ra ndzhaka, lesvaku lavavitaniweke, vatakota kuyamukela ndzhaka leyingaheliki leyi vatshembisiweke yona; hikuva kuhumelele rifu leri rivakutsulaka minandzweni leyi avali na yona, hansi ka ntwananu loworhanga. Laha kunga ni ntwananu wa ndzhaka, svifanela kukombisiwa svinene lesvaku mutsali wa wona afile. Hikuva ntwananu wa ndzhaka wotirha ntsena loko mufungi wa wona afile, hikuva loko ahahanya, ntwananu awu na matimba. Hikolaho, hambi ali ntwananu loworhanga wa ndzhaka, awusungulanga kutirha handle ka ngati: Hikuva loko xileriso xin'wana ni xin'wana xa Nawu xitivisiwile hi Moxe ka vanhu hinkwavu, atekile ngati ya marhole ni mati, ateka ni voya ropshuka ni xiphundla xa hisopa, an'watsekela buku ya Nawu hasvona ni vanhu hinkwavu, aku: “Leyi i ngati ya ntwananu lowu Xikwembu ximileriseke wona kuwuhlayisa.” Hi mukhuva wolowo, an'watsekela hi ngati yakona tabernakele ni svibza hinkwasvu lesvitirhisiwaka kugandzeleni. Hikuva hakunene, hansi ka Nawu, hingaku hinkwasvu svibasisiwa hi kucheliwa ngati, kutani handle ka kuhalatiwa ka ngati kuhava kurivaleliwa ka svijoho. Loko svilitano, asvifanelile lesvaku svilo lesvi svifanaka kunene ni sva le tilweni, svibasisiwa hi ndlela leyi; kambe svilo sva le tilweni hi svoxe, asvifanele kubasisiwa hi timhamba letitlulaka toleto. Hikuva Kriste anganghenanga xivandleni lexohlawuleka xoyendliwa hi mavoko, lexinga xifaniso ntsena xa leti ta xiviri, kambe anghenile tilweni hikoxe, lesvaku atahumelela svosvi mahlweni ka Xikwembu kuhiyimela. Nasvona, anganghenanga kona kutatinyiketa hi kuphindhaphindha ava mhamba, kukota Muprista lwenkulu loko anghena ndhawini leyokwetsima svinene ngopfu lembe rin'wana ni rin'wana, na ali ni ngati leyi yingaliki ya yena ya xiviri. Hikuva loko svilitano, Kriste aatava afanela kutwisiwa kuvaviseka hi kuphindhaphindha, kusukela loko misava yitumbulukile. Kasi, hilaha svingahakona, ahumelele kan'we ntsena svihela kolaho, svosvi kungafika minkarhi ya makumu, ayendlela kususa xijoho hi kutinyiketa ka yena ava mhamba. Tanihilesvi kuyimisiweke lesvaku vanhu vafa kan'we, kutani ndzhaku ka svona kuta kuyavanyisiwa, svafana na Kriste: Anyiketiwile kan'we kurhwala svijoho sva lavotala; hi kolaho, atahumelela ka vumbirhi, kungali kutasusa svijoho, kambe kutaponisa lava vamulanguteleke hi kuhiteka. Lesvi Nawu wunga ndzhuti ntsena wa lesvosaseka lesvingatahumelela, ahi ntiyiso wa xiviri wa svilo svakona, xilesvo svingakala svingasvikoti, kuva timhamba tin'we ni leti tihumesiwaka hi kuphindhaphindha malembe hinkwawu, kuyendla lesvaku lavatshinelelaka Xikwembu vava lavahetisekeke. Loko Nawu awusvikotile, timhamba ingi tingayimanga kuhumesiwa xana? Hikuva lavagandzelaka Xikwembu, loko ingi vabasisiwile hi kuhetiseka, avatatitwa na vangahali na svijoho! Kasi, hi kuhumesa timhamba leti, vanhu avatsundzuxiwa hi ta svijoho sva vona, lembe rin'wana ni rin'wana. Hikuva svingakala svingayendleki lesvaku ngati ya maduna ni ya sviphongo yisusa svijoho. Hikolaho ka svona, loko Kriste atile laha misaveni, ate: “Awunavelanga timhamba ni tinyiko, kambe univumbele miri. Timhamba letihisiwaka ni timhamba tosusa svijoho, awusvitsakelanga. Kutani nite: ‘Hi mina lweyi, we Xikwembu, nitile kutayendla kurhandza ka wena, hilaha svingatsaliwa hakona henhla ka mina bukwini ya Nawu.’” Kusunguleni, ate: “Awunavelanga ni kutsakela timhamba ni tinyiko, kumbe timhamba letihisiwaka ni timhamba letisusaka svijoho.” Avulile svosvo hambi loko svilo lesvi svihumesiwa hi kulandza Nawu. Kutani atlhela aku: “Vona, nitile kutayendla kurhandza ka wena.” Hikolaho, Yesu Kriste ahelisa lesvosungula lesvaku atanghenisa sva vumbirhi. Kutani, lesvi ayendleke kurhandza loku ka Xikwembu, hina hiyendliwile lavahlawulekeke hi miri wa Yesu Kriste, lowu awunyiketeke kuva mhamba kan'we ntsena sviva svihela kolaho. Nasvona, Muprista mun'wana ni mun'wana ayima atirha ntirho wa yena masiku hinkwawu, ahumesa hi kuphindhaphindha timhamba tofana, letingakotiki kususa svijoho ni siku ni rin'we. Kasi Kriste ahumesile kan'we mhamba yin'we yosusa svijoho, kutani atshame vokweni ra xinene ra Xikwembu. Kusukela kolaho ayimela lesvaku Xikwembu xiveka valala va yena hansi ka minkondzo yakwe. Hikuva, hi kuhumesa mhamba kan'we ntsena, ayendlile lesvaku lavangakwetsimisiwa, vakuma kuhetiseka lokungaheliki. Moya Lowokwetsima na wona wuveka vumboni bza svona ka hina; hikuva wurhange wuku: “Lowu hi wona ntwananu, lowu ningatawuyendla na vona, ndzhaku ka masiku wolawo, kuvula Hosi: Nitanghenisa milawu ya mina timbilwini ta vona, niyitsala miyehleketweni ya vona.” Kutani wuyengeta wuku: “Aningahatsundzuki kambe svijoho sva vona, ni mintirho ya vona leyohomboloka.” Hikolaho, laha kunga ni kurivalela ka svilo lesvi, timhamba tosusa svijoho atahalaveki. Kutani-ke, vamakwerhu, lesvi hinga ni kutshemba lokutiyeke kunghena xivandleni xohlawuleka hikolaho ka ngati ya Yesu, hi ndlela leyimpsha, leyihanyaka, leyi ahipfuleleke yona yihundza hi le xikarhi ka nguvu ya xisirhelelo, wunga miri wa yena, na svona, lesvi hinga ni Muprista wa matimba lweyi afumaka yindlo ya Xikwembu, ahitshineleleni Xikwembu hi mbilu leyinamarhelaka ntiyiso ni kupfumela lokuhetisekeke; timbilu ta hina leti n'watsekiweke, atibase tihambana ni ripfalu lerobiha, ni miri wa hina wuva lowuhlampsiweke hi mati lawa yotenga. Ahikhomeni svitiya kulanguteleni loku hikutwalisaka, na hingakanakani, hikuva lweyi ahitshembiseke watshembeka. Ahilaveni tindlela topfuxana, hikombana rirhandzu ni mintirho leyinene. Hingatshukeni hitshika kuhlengeletana, kufana ni lesvi van'wana vatoloveleke kuyendla svona, kambe hi khongotelana, ngopfu ngopfu lesvi mivonaka lesvaku siku ra Hosi riya ritshunela. Loko hiya mahlweni hijoha ha vomu ndzhaku ka loko hinyikiwile kutiva ntiyiso, akahali na mhamba yin'wana yosusa svijoho, kambe kuyo sala ntsena kulangutela lokuchavisaka ka kuyavanyisiwa, ni vukarhi lebzipfurhaka lebzingatahelisa valala va Xikwembu. Munhu lweyi atlulaka Nawu wa Moxe adlayiwa na angatsetseleliwanga, loko vumboni bza vanhu vambirhi kumbe vanharhu bzihumesiwile. Kutani-ke, miyehleketa yini hi munhu lweyi akandziyeleke milengeni ya N'wana wa Xikwembu, lweyi anyamiseke ngati ya ntwananu leyi angakwetsimisiwa ha yona, atlhela arhuketela Moya wa timpsalu, xana? Xana munhu lweyi atabiwa hi nhonga leyovavisa kufika kwihi ke? Hikuva hamutiva lweyi anga te: “Kurihisa i ka mina, hi mina ningataba vajohi.” Atlhela aku: “Hosi yitayavanyisa tiko ra yona.” I mhaka leyichavisaka kuwela mavokweni ya Xikwembu lexihanyaka. Yanakanyani masiku lawa mahundzeke, kaku loko mivoningiwile, mingatiyisela kulweni lokukulu ni le kuvavisekeni. Nkarhi wun'wana amiyimisiwa mahlweni ka vanhu mirhuketeliwa ni kuxanisiwa; nkarhi wun'wana amiyima ni lava avaxanisiwa hi ndlela yoleyo. Mikombile timpsalu ka lava vapfaleliweke jele; nasvona misvitekile hi moya wa kutsaka loko svilo sva n'wina sviphangiwa, hikuva amitiva lesvaku mi ni rifuwo leritlulaka svosvo, leringatava kona hilaha kungaheliki. Hikolaho, mingaheleni mbilu, hikuva kutiyisela ku ni hakelo leyikulu. Svafanela lesvaku mitiyisela, akuva mitakota kuyendla kurhandza ka Xikwembu, mitayamukela lesvi xingamitshembisa svona. Hikuva, hilaha Matsalwa mavulaka hakona, “kahasale nkarhinyana ntsena, kutani lweyi ataka atafika, angakala angahlweli. Kambe mululami wa mina, atahanya hi kupfumela, kutani loko atlhelela ndzhaku, moya wa mina awungamutsakeli.” Kutani hina ahi va ntlawa wa lavatlhelelaka ndzhaku vayakuloveni, kambe hi va ntlawa wa lavanga ni kupfumela, lesvaku hihlayisa mimoya ya hina. Kutani-ke, kupfumela i kutshemba lokutiyeke henhla ka svilo lesvilanguteliwaka, ni kukholwa svinene hi tlhelo ra svilo lesvingavoniwiki. Hikuva hakona, vanhu va khale vakumile vumboni bzinene. Hi kupfumela, hitwisisa lesvaku tilo ni misava svitumbuluxiwile hi rito ra Xikwembu, hi lesvaku lesvivoniwaka sviyendliwile svihuma ka lesvingavoniwiki. Hi kupfumela, Abele ahumesele Xikwembu timhamba letiyamukelekeke kutlula ta Kayini, kutani hikolaho ka svona akumile vumboni bzinene avuliwa lweyi alulameke, Xikwembu na xili karhi xitiyisa svosvo hi kuyamukela tinyiko ta yena. Afile, kambe hi mhaka ya kupfumela ka yena, wahavulavula. Hi kupfumela, Enoki atlakuliwile aya henhla, lesvaku atakala angavoni rifu; kutani angahavoniwanga, hikuva Xikwembu aximutekile. Aali ni kupfumela, hikuva loko angasitlakuliwa aya henhla, akumile vumboni bza lesvaku “aatsakisile Xikwembu”, kutani handle ka kupfumela asvikoteki kutsakisa Xikwembu. Mani na mani lweyi alavaka kutshinelela Xikwembu afanele kupfumela lesvaku xiko na, ni lesvaku xihakela lava vaxilavaka. Hi kupfumela, Nowa ayingisile svinene loko Xikwembu ximutivisa lesvi asvingasivoneka; kutani ayaka ngalawa kutaponisa va njangu wa yena; hi kuyendla svosvo, ayavanyisile misava, ava ayamukela kululama loku kunyikiwaka hi mhaka ya kupfumela. Hi kupfumela, Abrahamu, siku leri avitaniweke ha rona kurhurha aya tikweni leri Xikwembu aximutshembisile rona, ayingisile, arhurha hambilesvi aangakutivi lomu ayakakona. Hi kupfumela, atshamile tikweni leri atshembisiweke rona afana ni muluveli tikweni ra van'wana, ahanya matendeni na ali na Izaki na Yakobe, vajandzhaka va xitshembiso xin'we ni xa yena. Mhaka hi lesvaku aalangutela doropa leringa ni masungulu lamanene, leri muyaki ni muyendli wa rona xinga Xikwembu. Hi kupfumela, Sara hi xiviri asvikotile kuxurha nyimba hambilesvi aali mhika, na ahundzeliwile hi nkarhi, hikuva ativile lesvaku lweyi amutshembiseke watshembeka. Hikolaho, ka munhu mun'we lweyi asvofana ni loko afile, kuhumile vatukulu lavotala vafanaka ni tinyeleti ta tilo ni misava ya ribuwa ra lwandle. Vanhu lava hinkwavu vafele kupfumeleni, na vangakumanga lesvi avatshembisiwile svona, kambe vasvivonile ni kusvitsakela hi le kule, na vali karhi vativula valuveli ni vayendzi misaveni. Vanhu lava vavulavulisaka lesvi, vakombisa svinene lesvaku valava tiko leringa ra vona. Loko ingi vatsundzukile tiko leriya vahumeke ka rona, avatava vakumile nkarhi wa kutlhelela ka rona. Kambe, hilaha svinga hakona, vanavela tiko lerinene kutlula leriya, anga lesvaku ra le tilweni; hi kolaho Xikwembu axi na tingana hi vona, ni loko vaxivula Xikwembu xa vona, hikuva xivalungiselile doropa. Hi kupfumela, Abrahamu, siku leri aringiweke ha rona, anyiketile Izaki alitarini. Abrahamu aanyikiwile svitshembiso, kambe atiya ahumesa mhamba hi n'wana wa yena yelweyi wa mun'we; kasi Xikwembu axite ka yena: “Vatukulu va wena vatahuma ka Izaki.” Ayehleketile lesvaku Xikwembu xasvikota ni kupfuxa vanhu kufeni; hi kolaho, loko hivulavula tani hi xikombiso atlhele ayamukela Izaki ingi ohuma hi le kufeni. Hi kupfumela, Izaki akatekisile Yakobe na Esawu mayelanu ni lesvi asvahatahumelela mahlweni. Hi kupfumela, Yakobe, loko ali karhi afa, akatekisile mun'wana ni mun'wana wa vana va Yosefa, akhongela na atiseketelile henhla ka nhonga ya yena. Hi kupfumela, Yosefa, kuheteleleni ka vutomi bza yena, avulile ta kuhuma ka Vaisrayele tikweni ra Gibita, kutani alerisa lesvi vafanelaka kuyendla svona hi marhambu ya yena. Hi kupfumela, loko Moxe apsaliwile, vapsali va yena vamutumbetile nkarhi woringana tihweti tinharhu, hi kuvona kusaseka ka n'wana, kutani avachavanga svileriso sva hosi. Hi kupfumela, Moxe, loko akulile, ayalile kuvuliwa n'wana wa n'wana waxisati wa Faro. Matshan'wini ya svosvo, atihlawulele kuxaniseka svin'we ni vanhu va Xikwembu, handle ka kutitsakisa nkarhinyana hi kuhanya kujoheni. Ayehleketile lesvaku kurhuketeliwa hikolaho ka Mesiya i rifuwo leritlulaka vukosi hinkwabzu bza Gibita, hikuva aalangutela hakelo leyi yahataka. Hi kupfumela, Moxe asukile tikweni ra Gibita na angachavi vukarhi bza hosi, hikuva atiyiselile ingi hi loko ali karhi avona lweyi angavoniwiki. Hi kupfumela, alungisile Paska, an'watsekela asvipfalu hi ngati lesvaku Mudlayi wa mativula angakhumbi mativula ya Vaisrayele. Hi kupfumela, Vaisrayele vatsemakanyile Lwandle Ropshuka kufana ni laha kuwomeke. Kambe loko Vagibita varingetile kuyendla svosvo, vamintiwile hi mati. Hi kupfumela, rithangu ra doropa ra Yeriko rihirimuxiwile, ndzhaku ka loko rirhendzeliwile hi masiku ya ntlhanu ni mambirhi. Hi kupfumela, Rahabi lweyi wa nghwavana angalovanga ni lava vangayala kuyingisa, hikuva ayamukelile vahloli hi malwandla. Kutani ningahavula yini svin'wana? Hikuva nkarhi wunganihelela loko ningamibzela hi ta Gidiyoni, na Baraka, na Samisoni, na Jefta, ni ta Davhida na Samuwele, ni ta vaprofeta. Vanhu lava, hi mhaka ya kupfumela, vahlulile matiko; vayavanyisile hi kululama, vakumile lesvi avatshembisiwile svona; vapfalile milomo ya tinghonyama. Vatimile ndzilo wa matimba makulu, vapona kutlhaviwa hi matlhari, vakuma matimba na vali lavatsaneke, vahundzuka tinghwazi ta matimba kulweni, vabalekisa tinyimpi ta valala. Vavasati vatlhele vayamukela vafi va vona lavapfuxiweke kufeni. Van'wana vaxanisiwile ngopfu mirini, kambe vayala kutshunxiwa, lesvaku vatapfukela vuton'wini lebzinene. Van'wana vaxanisiwile ni kutseketseliwa ni kubiwa, hambi kuli kubohiwa hi machini, vanghenisiwa jele. Vakhandliwe hi maribze, vasahiwa hi le xikarhi, vadlayiwile hi matlhari vafambafamba hinkwaku na vayambele svikhumba sva tinyempfu ni sva timbuti, vasvelile, vali maxangwini, vatwisiwa kuvaviseka, vona lava misava ayingavafanelanga! Vatsendzelekile mananga ni le tintshaveni, ni le timhakweni, ni le makheleni ya laha misaveni. Kutani vanhu lava hinkwavu, hambi loko kupfumela ka vona kutikombile svinene, avakumanga lesvi avatshembisiwile svona. Hikuva Xikwembu axili ni makungu man'wana lamanene hi tlhelo ra hina, lesvaku vangayendliwi lavahetisekeke loko hina hingali kona. Hikolaho, lesvi hirhendzeliweke hi refu lerikulu ra timboni, na hina ahitshikeni hinkwasvu lesvi svihisivelaka, ni vujoho lebzihantlaka kuhinamarhela, hitsutsuma na hili ni kutiyisela kutsutsumeni ka mpfhuka lowu hi vekeliweke wona. Ahilanguteni Yesu, musunguli ni muhetisisi wa kupfumela ka hina, lweyi angachavangiki kurhwala xihambanu, angavuli nchumu hi tingana takona, hikolaho ka kutsaka loku kuvekiweke mahlweni ka yena; kutani svosvi atshamile vokweni ra xinene xiluvelweni xa Xikwembu. Yanakanyani yena lweyi angatiyisela hi ndlela leyotano, loko vajohi valwa na yena, lesvaku mingakarhali kumbe kuhela mbilu. Akulweni ka n'wina ni vujoho, amisilwa mikondza mihalata ngati. Nasvona, mirivale marito ya kukhongotela, lawa ha wona mivuliwaka vana, lawa mange: “N'wananga, ungateki kulayiwa hi Hosi ukuyendla mhaka leyitsongo, nasvona ungaheli mbilu loko utshinyiwa hi yona. Hikuva Hosi yilaya lweyi yimurhandzaka, yiba n'wana mun'wana ni mun'wana lweyi yimuyamukelaka.” Mifanela kutiyisela kulayiweni; Xikwembu ximilanguta kufana ni vana; hikuva hi wihi n'wana lweyi angalayiwiki hi tatana wa yena xana? Loko mitshikiwa mingalayiwi, hi kulaya loku van'wana hinkwavu valayiweke hakona, svivula lesvaku mi vana vopsaliwa handle, amivana va laha kaya. Handle ka svona, hivile ni vatatana va nyama lava avahilaya, kutani hivaxiximile. Xana ahinge titsongahati ngopfu kutlula svosvo ka Tatana wa hina moyeni, lesvaku hihanya xana? Vatatana va hina vahilayile hi nkarhinyana, hi kurhandza ka vona, kambe yona Hosi yihilayela kuhipfuna, lesvaku hihlengela vukwetsimi bza yona. Hikuva kulaya hinkwaku, kuvoneka na kuvavisa hi nkarhinyana wolowo, lokungatsakisiki, kambe ndzhaku, kuveka mihandzu ya kurhula ya vutomi lebzolulama, ka lava vajondzisiweke hi kona. Hikolaho, tiyisani mavoko ya n'wina lawa maheleke matimba, ni matsolo ya n'wina lawa mangundlangundlaka. Mifanela kululamisela milenge ya n'wina tindlela letolulama, lesvaku xirho lexilimaleke xingasuleki, kambe xihanyisiwa. Ringetani hi matimba kuhanya hi kurhula ni vanhu hinkwavu, miringeta ni kukwetsima, hikuva handle ka kukwetsima aku na munhu ni mun'we lweyi angatavona Hosi. Mitivonela ka lesvaku kungavi ni mun'we lweyi atsandzekaka kukuma minkateko ya Hosi; tivoneleni xikarhi ka n'wina kungatshuki kumila “rimintsu ra kubava” lerivangaka kukarhateka, ni kunyamisa lavotala. Kungavi ni mun'we lweyi ahundzukaka muwosvi kumbe lweyi angaliki na mhaka ni vukhongeli, kufana na Esawu lweyi anga xavisa timfanelo ta vumativula bza yena hi mhaka ya mpandzwanyana wa svakuja. Masvitiva lesvaku, ndzhaku ka svona, loko anavelile kukuma minkateko, ayaliwile hikuva angakumanga ndlela yohundzuluxa lesvi aasviyendlile, hambi loko asvilavile hi minhloti. Amitshinelelanga ntshava leyikhumbekaka, leyipfurhaka ndzilo, ni munyama, ni hunguva, ni xidzedze, kukota Vaisrayele. Amitwanga mpfumawulu wa nanga, ni huwa ya marito: Lava vangatwa marito yakona vakombelile hi matimba lesvaku kungahayengeti kuvuliwa marito man'wana ka vona, hikuva avangakoti kurhwala xileriso lexi avanyikiwile xona, lexinge: “Hambi loko xova xifuyu, loko xokhumba ntshava, xitakhandliwa hi maribze.” Hakunene lesvi vasvivoneke, asvichavisa ngopfu, kukondza Moxe aku: “Narhurhumela hi kuchava.” Kambe n'wina, mitshinelele ntshava ya Siyoni ni doropa ra Xikwembu lexihanyaka, Yerusalema wa le tilweni, ni le ka tintsumi letingakontekiki hi kutala. Mitile nkhubzini wa kutsaka, ni le nhlengeletanweni ya vanhu va mativula lava mavito ya vona matsaliweke tilweni, ni le ka Muyavanyisi lweyi anga Xikwembu xa vanhu hinkwavu, ni le ka mimoya ya vanhu lavolulama lavanyikiweke kuhetiseka; mitile ka Yesu, muyimeli wa ntwananu lowumpsha, ni le ngatini leyin'watsekiweke, leyivulavulaka lesvikulu kutlula ngati ya Abele. Tivoneleni lesvaku mingayaleli lweyi avulavulaka. Lava vayaleke kuyingisa mutsundzuxi wa vona laha misaveni, avaponanga. Hikolaho, xana hina hingaponisa kuyini, loko hiyala kuyingisa lweyi ahitsundzuxaka na ali matilweni xana? Nkarhini wolowo rito ra yena ritsekatsekisile misava, kambe svosvi atshembisile aku: “Nahatatsekatsekisa, kungali misava ntsena, kambe na rona tilo.” Marito lawa mange: “Nahatatsekatsekisa”, mavula lesvaku svilo lesvivumbiweke, svitatsekatsekisiwa ni kususiwa, lesvaku lesvingatsekatsekiki svitasala. Hikolaho, ahikhenseni, lesvi hikumeke mfumu lowungatsekatsekiki, kutani hi mukhuva lowu, ahigandzeleni Xikwembu hi ndlela leyiyamukelekaka, hi kutitsongahata ni hi xichavu. Hikuva Xikwembu xa hina i ndzilo lowuhelisaka. Yanani mahlweni mirhandzana kukota vamakwavu. Mingarivaleni kuyamukela vapfumba, hikuva hi kuyendla svosvo van'wana vayamukelile tintsumi na vangasvitivi. Yanakanyani lavanga majele, kufana ni loko ingi na n'wina mi le jele na vona; kutani ni lava vaxanisiwaka, mifanele kutitwa na mili na vona, hikuva na n'wina mi ni miri. Muchado akuve lowu xiximiwaka hi vanhu hinkwavu, mubedo wa vatekani wunganyamisiwi, hikuva Xikwembu xitayavanyisa tinghwavana ni vawosvi. Mingafumiweni hi male kuhanyeni ka n'wina kambe tsakani hi lesvi minga na svona, hikuva Xikwembu xite: “Ningakala ningakutshiki, kumbe kukucukumeta, ni siku ni rin'we.” Hikolaho hingavula nahitiyile, hiku: “Hosi i mupfuni wa mina, aningachavi nchumu; munhu anganiyendla yini xana?” Yanakanyani vafambisi va n'wina, lavangamijondzisa rito ra Xikwembu; yehleketani vutomi bza vona ni makumu ya bzona, milandza ntila wa kupfumela ka vona. Yesu Kriste wahali yena tolo ni namuntlha ni hilaha kungaheliki. Mingakanganyisiweni hi tijondzo ta tinxakaxaka letingatwisisekiki. Svilulamile loko mbilu yitiyisiwa hi timpsalu ta Xikwembu, kungali hi milawu hi tlhelo ra svakuja, lesvingapfuniki nchumu ka lava vasvilandzelelaka. Hi ni alitari leyi vaprista lavatirhaka ka tabernakele vangaliki na mfanelo ya kuja svakuja svakona. Hikuva ngati ya svifuyu leyitisiwaka ndhawini leyokwetsimisisa hi Muprista lwenkulu kutakhongelela svijoho, anyama ya svona yihiseliwa handle ka vugovelo. Hi mukhuva wolowo, na yena Yesu atwisiwe kuvaviseka na ali handle ka nyangwa ya doropa, lesvaku atabasisa vanhu vakwetsimisiwa hi ngati ya yena ya xiviri. Hikolaho, ahihumeni hiya le ka yena handle ka vugovelo, nahirhwele kurhuketeliwa ka yena. Hikuva laha misaveni, ahi na doropa leritiyeke, kambe hilava doropa leri rahataka. Loko svilitano, ahihumeseni timhamba masiku hinkwawu ha yena Yesu, hidzunisa Xikwembu ha tona, na hili karhi hikhensa vito ra xona hi marito lawa mahumaka milon'weni ya hina. Mingarivaleni kuyendla lesvinene ni kupambulelana lesvi minga na svona, hikuva timhamba leti hi tona letitsakisaka Xikwembu. Yingisani varhangeli va n'wina, mititsongahata ka vona, hikuva vahitekela mimoya ya n'wina, kufana ni vanhu lavangatavutisiwa henhla ka yona. Mivona lesvaku valandza ntirho wa vona hi kutsaka, vangawuyendli hi kuvilela, hikuva loko vavilela, asvingamipfuni nchumu n'wina. Hikhongeleleni, hikuva hitshemba svinene lesvaku hi ni ripfalu leritengeke, na hili karhi hinavela kuyendla lesvilulameke minkarhi hinkwayu. Nimikhongotela kuyendlisa svosvo, hi mbilu hinkwayu ya n'wina, minikhongelela lesvaku nitakota kuhantla ni vuyiseliwa ka n'wina. Svosvi-ke, Xikwembu xa kurhula lexipfuxeke Hosi ya hina Yesu xikarhi ka vafi, yena lweyi anga Murisi Lwenkulu wa tinyempfu, lweyi angafunga ntwananu lowungaheliki hi ngati ya yena, ingi xingamilongisa hinkwasvu lesvinene lesvingatamipfuna kuyendla kurhandza ka xona, na xili karhi xitirha ka hina lesvi xisvitsakelaka, ha Yesu Kriste. Ka xona akuve kudzuneka hi masiku ni masiku. Amen! N'wina vamakwerhu, na mikhongotela svinene, yamukelani marito ya mina, hambilesvi nimitsalelaka apapela rokoma. Mifanela kutwisisa lesvaku Timotewu makwerhu ahumesiwile jele; loko ahantla afika, nitatamivona na nili na yena. Rungulani varhangeli va n'wina hinkwavu ni vahlawuliwa va Xikwembu hinkwavu. Lava vahumaka tikweni ra Italiya vamirungula. Timpsalu ta Xikwembu ative na n'wina hinkwenu. Mina Yakobe, nandza wa Xikwembu ni wa Hosi Yesu Kriste, nitsalela khume ra tinxaka ni timbirhi, vanga vakriste lavahangalakeke matikweni hinkwawu, nili: Xeweni! Vamakwerhu, loko mihlangana ni miringo ya tinxakaxaka, yitekeni na yili mhaka ya kutsakisa svinene, hikuva masvitiva lesvaku loko kupfumela ka n'wina kutiya kuringiweni, svipsala kutiyisela. Kambe kutiyisela ka n'wina kufanele kutirha ntirho lowuhetisekeke, lesvaku miva lavohetiseka ni kululama hi matlhelo hinkwawu, mingapfumali nchumu. Loko mun'we wa n'wina apfumala vutlhari, aakombele ka Xikwembu, lexinyikaka vanhu hinkwavu hi timpsalu, kungali ni kuvilela, kutani atanyikiwa bzona. Ntsena, aakombele hi kupfumela, na angakanakani, hikuva lweyi akanakanaka, afana ni gandlati ra lwandle leribiwaka riyisiwa hala ni hala hi mheho. Munhu lweyi wotanu angatshuki ayehleketa lesvaku atanyikiwa nchumu hi Xikwembu, hikuva i munhu wa miyehleketo yimbirhi, lweyi akanakanaka tindleleni ta yena hinkwatu. Makwerhu lweyi anga vusiwaneni, afanela kutsaka loko atlakusiwa; na yena mufuwi, afanela kutsaka loko atsongahatiwa, hikuva kufana ni xiluva xa nhova, xitahundza. Jambu rihuma na rili ni kuhisa ka rona, rivunisa bzanyi; sviluva sviwela hansi, ni kusaseka ka svona kawonheka. Hi mukhuva wolowo, mufuwi na yena atavuna ahelisiwa, na ali karhi alandzelela svilo sva yena. Kukatekile munhu lweyi atiyiselaka kuringiweni, hikuva loko ahlulile miringo, atanyikiwa hari ya vutomi leyi Xikwembu xiyitshembiseke lava vaxirhandzaka. Kungavi ni munhu lweyi, loko aringiwa, ango: “Niringiwa hi Xikwembu.” hikuva Xikwembu xingakala xingaringiwi hi lesvobiha; na svona, xona hi xoxe, axiringi munhu ni mun'we. Kambe munhu mun'wana ni mun'wana waringiwa loko akokiwa ni kuphasiwa hi kunavela ka yena n'winyi. Kutani loko kunavela kukolwile, kupsala xijoho; xijoho xona, loko xihetisekile, xipsala rifu. Mingatshukeni mitikanganyisa, vamakwerhu lavarhandzekaka. Nyiko yin'wana ni yin'wana leyosaseka ni minkateko hinkwayu leyihetisekeke svita hi le henhla, svixika hi le ka Muvumbi wa lesvivoningaka, lweyi kungahava kucincacinca ka yena, kumbe kufularhela munhu asala xinyameni. Hi kurhandza ka yena, ahivelekile hi rito ra ntiyiso, lesvaku hiva lavavuliwaka mativula ya svivumbiwa sva yena. Vamakwerhu lavarhandzekaka, Tivani lesvi: Munhu mun'wana ni mun'wana aahantlise kutwa, ahlwela kuvulavula, ahlwela kukariha. Hikuva mahlundzu ya munhu amahumesi kululama ka Xikwembu. Hikolaho, susani chaka hinkwaru ni vubihi hinkwabzu lebzihantlaka kumila, kutani miyamukela hi kutitsongahata rito leribzaliwaka timbilwini ta n'wina, lerikotaka kumiponisa. Miva vayendli va rito, mingavi vatwi ntsena lava vatikanganyisaka. Hikuva loko munhu ali mutwi wa rito, angali muyendli, afana ni munhu lweyi alangutaka nghohe ya yena ya ntumbuluku ka xib'uku; hikuva wa tinyanga ava asuka afamba, kambe ahantla arivala lesvi ativoneke na ali xisvona. Kambe lweyi akambisisaka Nawu lowuhetisekeke wa kutshunxeka, atiyisela ka wona na angali mutwi lweyi arivalaka, kambe ali muyendli lweyi atirhaka, atakateka ka lesvi asviyendlaka. Loko munhu ayanakanya lesvaku a ni vukhongeli, kambe angafumi ririmi ra yena, munhu lweyi watikanganyisa, vukhongeli bza yena abzipfuni nchumu. Vukhongeli lebzitengeke, lebzingasolekiki mahlweni ka Xikwembu Tatana, hi lebzi: Kuyendzela lavafeliweke hi vapsele, ni kuyendzela vafelakazi maxangwini ya vona, ni kutikhoma ka vuherheki bza misava leyi. Vamakwerhu, lesvi minga ni kupfumela ka Hosi ya hina Yesu Kriste, Hosi ya kukwetsima, mingayeneni hi nghohe. Hikuva siku rin'wana, sinagogeni ya n'wina, kunga nghena munhu lweyi anga ni ringi ya golidi ritihweni, lweyi ayambaleke xiyambalu xa risima, kutani kunghena ni lweyi ayambaleke xiyambalu xa chaka; kambe n'wina mixixima lweyi angayambala xiyambalu xa risima miku: “Ahikombela lesvaku mitatshama halenu”, kasi ka lweyi anga xisiwana miku: “Yima koseyo”, kumbe: “Tshama hansi laha milengeni ya mina!” Hakunene, loko miyendlisa svosvo, miya hi nghohe, mikomba kuhambana xikarhi ka n'wina kutani mihundzuka vayavanyisi lavanga ni miyehleketo leyobiha. Yingisani, vamakwerhu lavarhandzekaka: Xana Xikwembu axihlawulanga lavanga svisiwana misaveni leyi lesvaku vava lavafuweke hi tlhelo ra kupfumela ke? Xana axivahlawulelanga kuja ndzhaka ya Mfumu lowu xiwutshembiseke lava vaxirhandzaka ke? Kambe n'wina michipisa svisiwana! Xana ahi vafuwi lava vamixanisaka ke? Xana ahi vona lava vamirhurhuvulelaka tihubzeni ke? Xana ahi vona lavarhuketelaka vito lerohlawuleka leri michuliweke rona ke? Loko hakunene mihetisa Nawu lowunga wukulu ka hinkwayu, hi kulandza Tsalwa leringe: “Utarhandza munhukuloni kukota loko utirhandza”, miyendla lesvinga svinene. Kambe loko miya hi nghohe, majoha, kutani Nawu wumurhwexa nandzu hi lesvi minga vatluli va wona. Mhaka hi lesvaku mun'wana ni mun'wana lweyi aringetaka kuhlayisa milawu hinkwayu kambe atsandzeka ka wun'we wa yona ntsena, ayitlulile hinkwayu. Hikuva lweyi angate: “Ungatshuki uwosva”, hi yena kambe lweyi angate: “Ungatshuki udlaya.” Loko ungawosvi kambe udlaya, utlula Nawu hinkwawu. Hikolaho, kuvulavuleni ka n'wina ni le mintirhweni ya n'wina, tikombeni lesvaku mi lava vangatayavanyisiwa na vali hansi ka Nawu lowunyikaka tshunxeko. Hakunene kuyavanyisa kungakala kungatweli vusiwana munhu lweyi angatweliki vusiwana van'wana. Kambe kutwela vusiwana kutahlula sikwini ra kuyavanyisa. Svipfuna yini, vamakwerhu, loko munhu aku a ni kupfumela, kambe angali na mintirho? Xana kupfumela ka yena kungamuponisa ke? Loko vamakwenu, vaxinuna kumbe vaxisati, vasvelile ni kupfumala svakuja sva siku rin'wana ni rin'wana, kutani mun'wana wa n'wina aku ka vona: “Fambani hi kurhula, mikufumela, mixurha.”, na angavanyikanga lesvilavekaka sva miri wa vona, xana svingapfuna yini svosvo ke? Hikolaho loko kupfumela kuli koxe, kungali na mintirho, kufile. Kambe munhu angavula aku: “Wena u ni kupfumela; Mina ni ni mintirho.” “Nikombe kupfumela ka wena lokungaliki ni mintirho, kutani mina hi mintirho ya mina nitakukomba kupfumela ka mina!” Wena upfumela lesvaku ku ni Xikwembu xin'we ntsena. Uyendla svona. Hambi mali madimoni mapfumela svosvo, na mali karhi marhurhumela. Wena xihunguki ndziwena, xana ulava kukombiwa lesvaku kupfumela lokungatikombiki hi mintirho akupfuni nchumu ke? Xana Abrahamu tatana wa hina angayendliwanga lweyi alulameke mahlweni ka Xikwembu hi mhaka ya mintirho ke, loko anyiketile Izaki n'wana wa yena alitarini? Wasvivona lesvaku kupfumela ka yena akuseketeliwa hi mintirho ya yena, kutani kupfumela kuyendliwile loku kuhetisekeke hi mintirho. Nasvona Matsalwa mahetisekile lawa mange: “Abrahamu apfumelile ka Xikwembu, kutani ximuhlayile lweyi alulameke hikolaho ka svona.” Kutani avuliwile nakulobze wa Xikwembu. Wasvivona lesvaku munhu ayendliwa lweyi alulameke mahlweni ka Xikwembu hi mhaka ya mintirho, kungali hi kupfumela ntsena. Hi ndlela yoleyo, xana Rahabe lweyi wa nghwavana, lweyi arhurheleke tinhloli ni kukomba vavanuna volavo ndlela yobaleka ha yona, angayendliwanga lweyi alulameke hi mhaka ya mintirho xana? Hikolaho, tani hi lesvi miri lowungahava moya wufeke, kupfumela nakona lokungahava mintirho kufile. Vamakwerhu, asvifanelanga lesvaku lavotala xikarhi ka n'wina vahundzuka vajondzisi, hikuva masvitiva lesvaku kuyavanyisiwa ka hina vajondzisi, kutatika kutlula kuyavanyisiwa ka vanhu lavan'wana. Hina hinkwerhu hi ni svihoxo lesvotala, kambe loko munhu angahoxi kuvulavuleni ka yena, munhu yelweyo ahetisekile, wasvikota kufuma miri wa yena hinkwawu. Loko hiveka matomu milon'weni ya mahanchi lesvaku matahiyingisa, hasvikota kukongomisa miri wa wona hinkwawu lomu hikurhandzaka. Langutani svitimela sva mati tani hi xikombiso: Hambilesvi svinga svikulu svinene ni kususumetiwa hi mimoya ya matimba, svifambisiwa hi xihendzulo lexitsongo ngopfu, sviya laha mufambisi wa svona alavaka kuya kona. Hi mukhuva wolowo, ririmi i xirho lexitsongo, kambe ritidzunisa ngopfu hi lesvikulu. Vonani hilaha xihlahla lexikulu xingahisiwaka hakona hi ndzilo lowutsongo! Ririmi na rona i ndzilo, kuhomboloka ka rona kuringana ni tiko hi vukulu. Ri le xikarhi ka svirho sva hina, kutani rinyamisa miri hinkwawu, nasvona ritshivela ndlela hinkwayu ya ntumbuluku; kambe rona ritshiveliwa hi ndzilo wa le Tiheleni. Tinxaka hinkwatu ta sviharhi, svinyanyana, svikokovi ni sva le lwandle, svajondzisiwa sviva svifuyiwa hi rixaka ra vanhu. Kambe aku na munhu lweyi angakotaka kufuma ririmi; i kubiha loku kungarhuteliki, ritele hi mahlungu lawa madlayaka. Ha rona hidzunisa Hosi, lweyi anga Tatana; nasvona ha rona hirhuketela vanhu lavayendliweke hi xifaniso xa Xikwembu. Non'weni wun'we kuhuma kudzunisa ni kurhuka. Vamakwerhu, lesvi asvifaneli kuva tano. Xana xihlovo xingahumesa mati yonandziha ni lawa yodzuma ke? Vamakwerhu, nibzeleni, xana nkuwa wungapsala maolivha, kumbe mvhinya wungapsala makuwa ke? Asviyendleki lesvaku xihlovo xa mati lawa manga ni munyu ngopfu xipfelela mati yonandziha. Xikarhi ka n'wina i mani lweyi atlhariheke, lweyi anga ni vutivi xana? Aakombise mintirho ya yena hi mahanyela lamanene, lawa manga ni vutlhari ni kutitsongahata. Kambe loko timbilu ta n'wina titale hi mavondzo ni moya wotirhandza, mingatshukeni mitikulisa mihembela ntiyiso. Vutlhari bzotano ahi bzona bzota hi le henhla, kambe i bza misava, bza vuhari ni bza madimoni. Hikuva laha mavondzo ni moya wotirhandza svinga kona, ku ni mpfilumpfilu, ni mayendlela hinkwawu yohomboloka. Kambe vutlhari bzota hi le henhla, bzi ni kurhula, ni kuwolova, ni kuyingiseta, bzitele musa ni mihandzu leyinene; kambe ngopfungopfu bzitengile; abziyi hi nghohe, kumbe kukanganyisa. Kutani mihandzu ya mahanyela lamalulameke yihuma ka mbewu leyingabzaliwa hi kurhula, hi vanhu lavatirhaka mintirho ya kurhula. Tinyimpi tivangiwa hi yini, ni kulwa xikarhi ka n'wina kuvangiwa hi yini? Xana asvivangiwi hi kunavela ka n'wina ka kutitsakisa, lokupfuxaka tinyimpi svirhweni sva n'wina, xana? Manavela, kambe amikumi nchumu, hi kolaho madlaya. Nasvona, mi ni timbilu, kambe amikoti kusvikuma, hi kolaho malwa, mivanga tinyimpi. Amisvikumi, hikuva amikombeli. Nasvona loko mikombela, mahoxa, hikuva mitilavela ntsena svotitsakisa ha svona. N'wina vanhu va vuwosvi, xana amisvitivi lesvaku kurhandza sva misava svivula kulwa na Xikwembu xana? Hikolaho, lweyi atinyiketaka kurhandzeni ka sva misava, atiyendla nala wa Xikwembu. Kumbe, xana miyehleketa lesvaku Tsalwa rivula sva hava, loko riku: “Xikwembu xivavisekela ngopfu moya lowu xiwuyendleke lesvaku wuyaka ka n'wina” xana? Hambi svilitano, xihikomba timpsalu letinga tikulu kutlula svosvo, hikuva Tsalwa rili: “Xikwembu xiyalela vatikulisi, kambe xitsetselela lavatitsongahataka.” Hikolaho, titsongahateni mahlweni ka Xikwembu. Yalelani Diyavulosi, kutani atamibaleka. Tshinelani kusuhi ni Xikwembu kutani xitatshinela kusuhi na n'wina. Hlambani mandla ya n'wina, n'wina vajohi, mibasisa timbilu ta n'wina, n'wina vanhu va miyehleketo yimbirhi. Vavisekani, miba nkosi, mirila. Kuhleka ka n'wina akuhundzuke xirilo, kutsaka ka n'wina akuhundzuke gome. Titsongahateni mahlweni ka Hosi, kutani yona yitamitlakusa. Vamakwerhu, Mingahlevaneni. Lweyi ahlevaka makwavu, kumbe kuyavanyisa makwavu, ahleva ni kuyavanyisa Nawu. Kutani loko munhu ayavanyisa Nawu, angawulandzi, i muyavanyisi. Munyiki wa Nawu ni Muyavanyisi i mun'we ntsena, yena lweyi akotaka kuponisa kumbe kulovisa. Kambe, wova mani wena, lesvi uyavanyisaka munhukuloni xana? Twanani ke, n'wina lava minge: “Namuntlha kumbe mundzuku hitaya doropeni leri ni leriya, hiyaxwa lembe hili karhi hixava ni kuxavisa, hiyendla bindzu kona!” Kasi sva mundzuku amisvitivi! Vutomi bza n'wina i ncini ke? Hikuva mi hunguva leyihumelelaka nkarhinyana, kutani yihangalaka. Handle ka svotano amifanela kuvula miku: “Loko Hosi yisvirhandza, hitapfuka hiyayendla lesvi kumbe lesviya.” Kambe n'wina matidzunisa, hi mhaka ya kutitiva ngopfu. Kutidzunisa hinkwaku loku kotanu kubihile. Hikolaho, munhu lweyi ativaka lesvolulama lesvi afanelaka kusviyendla, kambe angasviyendli, i mujohi. Twanani ke, n'wina lavafuweke: Mifanela kurila mikolola hikolaho ka mahlomulu lawa mangatamihumelela. Rifuwo ra n'wina ribolile, ni sviyambalu sva n'wina svijiwile hi tinsumba. Golidi ni silivhere ya n'wina svikurhile, kutani kukurha ka svona kutaveka vumboni lebzingatalwa na n'wina, nikuja nyama ya n'wina kufana ni ndzilo. Mihlengeletile rifuwo nkarhini lowu masiku ya makumu mafikeke. Vonani! Ahakelo ya vatirhi lavatshoveleke masin'wini ya n'wina, leyi mingavakanganyisa, yahuwelela; nasvona svirilo sva vatshoveli svifikile tindleveni ta Hosi ya matimba hinkwawu. Misaveni, mihanyile vutomi bzotsakisa na mili karhi mitiphina; kambe minonisile ntsena timbilu ta n'wina, milungisela siku ra kudlayiwa ka n'wina. Miyavanyisile ni kudlaya munhu lweyi wolulama, kambe yena angatilwelanga. Loko svilitano, vamakwerhu, lehisani timbilu, Hosi yikondza yita. Vonani, murimi arindzela mihandzu leyinene ya misava, ayilehisela mbilu yikondza yikuma mpfula yosungula ni leyi yohetelela. Na n'wina, lehisani mbilu mitiyisela, hikuva kuta ka Hosi ku kusuhi. Vamakwerhu, mingamangalelaneni, lesvaku mitakala mingayavanyisiwi. Vonani, muyavanyisi ayimile nyangweni. Loko milava xikombiso xa kulehisa mbilu maxangwini, vamakwerhu, landzani svikombiso sva vaprofeta lavavulavuleke hi vito ra Hosi. Langutani, lava hivulaka lesvaku vakatekile, hi lava vatiyiseleke. Mitwile ta kutiyisela ka Yobe, nasvona mivonile lesvi Hosi ayikongomile svona, ni hilaha Hosi yitaleke musa ni timpsalu hakona. Kambe, henhla ka svona hinkwasvu, vamakwerhu, mingahlambanyeni hi tilo, hambi hi misava, kumbe hi mahlambanyela man'wana ni man'wana. Kambe loko miku: “Ina”, aave “Ina” ni loko miku: “Ahihim”, aave “Ahihim”, lesvaku mingaweli kuyavanyisiweni. Xana ku ni mun'we ka n'wina lweyi axanisekaka? Aakhongele. Xana ku ni lweyi atsakeke? Aayimbelele tinsimu ta kudzunisa. Xana ku ni lweyi avabzaka xikarhi ka n'wina? Aavitane vakulukumba va kereke lesvaku vatamukhongelela, vamutota mafurha hi vito ra Hosi; kutani xikhongelo lexiyendliwaka hi kupfumela xitahanyisa muvabzi; Hosi yitamupfuxa, kutani loko ali ni svijoho lesvi asviyendleke, atarivaleliwa svona. Hikolaho, tivuleni kujoha ka n'wina mun'we ka mun'wana, mikhongelelana mun'we ka mun'wana lesvaku mitahanya. Xikhongelo xa munhu wolulama xi ni matimba ngopfu, xatirha. Eliya aali munhu kufana na hina, aali ni kutwa kofana, kambe akhongelile hi kuhiseka lesvaku mpfula yingani, kutani hi malembe manharhu ni tihweti ta ntlhanu ni yin'we, mpfula ayinanga misaveni. Ndzhaku atlhela akhongela kambe, kutani tilo rinisa mpfula, ni misava yihumesa mihandzu ya yona. Vamakwerhu, loko mun'we ka n'wina ahuma ntiyisweni, kutani mun'wana amuvuyisela ndleleni leyinene, tsundzukani lesvi: Mani na mani lweyi avuyiselaka ndleleni mujohi lweyi aalahlekile, ataponisa moya wa munhu lweyo kufeni, kutani atafunengeta svijoho lesvotala. Mina Petrosi, mupostola wa Yesu Kriste, nitsalela lavarhurhisiweke ni kuhangalasiwa matikweni ya Ponto, na Galatiya, na Kapadokiya, na Aziya, na Bitiniya, vanga lavahlawuliweke khale hi vutivi bza Xikwembu Tatana, vahlawulekisiwa hi Moya lesvaku vayingisa Yesu Kriste ni kuxuviwa hi ngati ya yena, nili: Timpsalu ni kurhula asvive na n'wina hi ntalu. Akukhensiwe Xikwembu, Tatana wa Hosi ya hina Yesu Kriste! Hi timpsalu ta yena letikulu, ahivelekile ra vumbirhi, lesvaku hiva ni kulangutela loku kuhanyaka, hikolaho ka kupfuka ka Yesu Kriste xikarhi ka vafi, ni lesvaku hinyikiwa ndzhaka leyingaboliki, leyinganyamisiwangiki, leyingavuniki. Mivekeliwile yona matilweni, n'wina lava mipfumeleke, kutani mihlayisiwa hi matimba ya Xikwembu, lesvaku mitakuma kuponisiwa loku kuyimeleke kukombisiwa nkameni wa makumu. Mhaka leyi yamitsakisa, hambi loko svosvi mahafanela kutwa kuvava nkarhinyana, hikolaho ka miringo ya tinxakaxaka. Miringo leyi yiyendla lesvaku kupfumela ka n'wina, loku kutlulaka golidi hi risima, kuvoneka na kutiyile. Golidi, hambilesvi riringetiwaka hi ndzilo, rawonheka; kambe kupfumela ka n'wina, lokutiyeke, kutadzunisiwa, kutwalisiwa, siku leri Yesu Kriste angatahumelela. Ni loko mingasimuvona, mamu rhandza; hambi ni svosvi mingamuvoniki, mapfumela ka yena, kutani mitsaka hi kutsaka loku kuhlamalisaka, lokungahlayekiki, na mili karhi mikuma mihandzu ya kupfumela ka n'wina, kunga kuponisiwa ka mimoya ya n'wina. Vaprofeta lavativiseke sva timpsalu leti atifanele kukombiwa n'wina, valavisisile ni kukambisisa ta kuponisiwa loku; vakambisisile hi kulava kutiva lesvaku xana Moya wa Kriste lowu avali na wona, awukomba mani kumbe nkama wihi ke, loko wuli karhi wutivisa ta mahlomulu ya Kriste lweyi, ni kudzunisiwa loku akutalandzela ndzhaku. Vakombisiwile hi kuhlavuteliwa lesvaku avangatitirheli, kambe avatirhela n'wana, ka svilo lesvi mitivisiweke svona svosvi. Mitivisiwile svilo svakona hi lava vapaluxeke Evhangeli ka n'wina, hi Moya Lowokwetsima lowurhumeliweke hi le tilweni. Svilo svakona, tintsumi na tona tanavela kusvihlometela. Hikolaho, pfukani miyehleketweni! Tikhomeni! Vekani kutshemba ka n'wina hinkwaku henhla ka timpsalu leti mingatakombiwa tona, siku leri Yesu Kriste angatahumelela. Kufana ni vana lavanga ni kuyingisa, mingalandzeni kunavela ka n'wina lokobiha loku amili nakona na mingasitiva nchumu. Kambe, lesvi lweyi angamivitana akwetsimeke, kwetsimani na n'wina mahanyeleni hinkwawu ya n'wina. Hikuva kutsaliwile lesvi: “Kwetsimani, hikuva mina nikwetsimile.” Loko mikhongela, mimuhlaya “Tatana”, yena lweyi ayavanyisaka munhu mun'wana ni mun'wana, na angayi hi nghohe kambe hi mintirho ya munhu; hi kolaho, hanyani hi xichavu, nkameni hinkwawu wa kuhanya ka n'wina laha misaveni. Masvitiva lesvaku miponisiwile ka tindlela letingapfuniki nchumu, leti mitikumeke ka vatatana va n'wina; miponisiwile kungali hi svilo lesviwonhekaka kufana ni silivhere kumbe golidi, kambe hi ngati ya risima ya Kriste, leyifanaka ni ya xinyempfana lexingaliki na vulema kumbe xivati. Lweyi angativiwa hi Xikwembu, na misava yingasitumbuluka, akombisiwa hikolaho ka n'wina, minkameni leyi ya makumu. Hikolaho ka yena, mi ni kutshemba ka Xikwembu, lexi ximipfuxeke xikarhi ka vafi, xinyika kudzuneka, kuyendlela lesvaku kupfumela ka n'wina ni kulangutela ka n'wina sviva ka Xikwembu. Lesvi mibasiseke mimoya ya n'wina hi kuyingisa ntiyiso ni kurhandza vamakwenu hi rirhandzu ra ntiyiso, rhandzananani svinene hi timbilu ta n'wina hinkwatu. Mipsaliwile ra vumbirhi, kungali hi mbewu leyibolaka, kambe hi leyingaboliki, ringa Rito ra Xikwembu lerihanyaka, leritshamaka hi masiku hinkwawu. Hikuva, “Nyama hinkwayu yifana ni bzanyi, ni kusaseka ka yona kufana ni xiluva xa nhova. Bzanyi bzavuna, ni xiluva xiwela hansi, kambe Rito ra Hosi ritshama hilaha kungaheliki.” Rito lero i Evhangeli leyi mijondzisiweke yona. Hikolaho, tshikani mona hinkwawu, ni vubihi hinkwabzu, ni vukanganyisi, ni mavondzo, ni kulumbeta hinkwaku. Kufana ni vatsongwana lava vahakuvelekiwaka, mifanele kunavela ntswamba lowubaseke wa moya, lesvaku ha wona mitakota kukula miya kuponisiweni, hikuva minampsile vunene bza Hosi. Tanani ka yena, hikuva yena i ribze lerihanyaka, lerinyenyiweke hi vanhu, kasi mahlweni ka Xikwembu hi lerihlawuliweke, ra risima. Kutani, kufana ni maribze lamahanyaka, na n'wina mifanele kuyakiwa miyendla yindlo ya moya, lesvaku mitava vaprista lavahlawulekeke, mihumesa timhamba ta moya letiyamukelekaka ka Xikwembu ha Yesu Kriste. Hikuva ka Matsalwa, ku ni lesvinge: “Vonani, niveka ribze le Siyoni, ribze ra yinhla lerihlawuliweke, ra risima; kutani lweyi apfumelaka ka rona, angakala angakhomiwi hi tingana.” Hikolaho, ka n'wina mipfumelaka, i ra risima, kambe ka lavangapfumeliki, “Ribze leri vayaki vangarinyenya, hi rona ringayendliwa ribze lerikulu ra yinhla.” Nasvona, “I ribze leringatakhunguvanyisa vanhu, i ribze leringatavawisa.” Vakhunguvanyisiwa vawa, hikuva vayala kuyingisa Rito, hilaha svingabohiwa hakona khale, lesvaku vatayendla svona. Kambe n'wina, mi rixaka lerihlawuliweke, mi vaprista va Hosi, mi tiko lerihlawulekeke, vanhu lavanga va Xikwembu hi ntiyiso, lesvaku mitakota kutwalisa mintirho leyosaseka ya lweyi amivitaneke kuhuma munyameni, mitanghena kuvonakaleni ka yena loku kuhlamalisaka. Khale amingali tiko, kambe svosvi mi tiko ra Xikwembu; khale amingatsetseleliwi, kambe svosvi mikumile kutsetseleliwa. Varhandziwa, lesvi minga vatshami ni vayendzi misaveni, namikhongotela hi matimba lesvaku mihambana ni kunavela ka miri, lokulwaka ni mimoya ya n'wina. Hanyani hi mukhuva lowolulama xikarhi ka vamatiko, lesvaku loko vatshuka vamilumbeta, vaku mivajohi, vatavona mintirho ya n'wina leyosaseka, vadzunisa Xikwembu, hi siku leri xingatata ha rona. Hikolaho ka Hosi, titsongahateni ka lavafambisaka tihuvu ta tiko, kufana ni hosi leyikulu ya tiko leyinga henhla ka tin'wana tihosi, hambi tili tindhuna letirhumiweke hi yona kukhatisa lavayendlaka lesvobiha ni kudzunisa lavayendlaka lesvolulama. Hikuva i kurhandza ka Xikwembu lesvaku, hi kuyendla lesvolulama, mitamiyeta lavangativiki nchumu, hi mhaka ya vuphukuphuku bza vona. Hanyani kufana ni vanhu lavatshunxekeke; mingatekeni kutshunxeka ka n'wina yili ndlela yokanganyisa ha yona, yoyendla lesvobiha, kambe hanyani kufana ni vatirhi va Xikwembu. Xiximani vanhu hinkwavu. Rhandzani nhlengeletanu ya vamakwenu. Chavani Xikwembu. Xiximani hosi leyikulu ya tiko. N'wina vatirhi, titsongahateni ka vinyi va n'wina hi xichavu lexilavekaka, kungali ntsena ka lavanga ni timpsalu ni vunene, kambe ni lava vokarhata. Hikuva wakhenseka munhu lweyi avekaka Xikwembu mbilwini, kutani atiyisela mahlomulweni na ali karhi atwa kuvaviseka na angawonhanga nchumu. Xana loko mibiwa hikolaho ka kujoha ka n'wina, kutani mitiyisela, svi ni kudzunisiwa svosvo ke? Kasi, loko miyendla lesvilulameke, kutani mitiyisela na mili karhi mitwisiwa kuvava hikolaho ka svona, svosvo svakhenseka ka Xikwembu. Mivitaneliwe svona, hikuva Kriste na yena atwile kuvaviseka hikolaho ka n'wina, amiboxela ndlela lesvaku mitamulandzelela. Angajohanga nchumu, angavulanga svokanganyisa van'wana. Loko arhuketeliwa, angatlheliselanga hi kurhuketela; loko vamuxanisa, angahlayanga lesvaku atatirihisela, kambe asvitshikele mavokweni ya lweyi ayavanyisaka hi kululama. Yena hi yexe, arhwele svijoho sva hina mirini wa yena le xihambanwini, lesvaku na hina hifa hi tlhelo ra kujoha, hihanyela kululama. Miholisiwile hi svilondza sva yena. Khale, amipepetseka kufana ni tinyempfu, kambe svosvi mivuyile ka bixopo ni mulanguteli wa mimoya ya n'wina. Hi svosvo, n'wina vavasati lavatekiweke: Titsongahateni ka vanuna va n'wina, lesvaku van'wana vakokiwa hi mahanyela ya n'wina vasati va vona, hambi loko vangayingisi Rito avangabzeliwi hi munhu, hikuva vatavona xichavu xa n'wina ni kutenga ka n'wina. Xa n'wina, kungavi kutibombisa hi sva le handle, hi misisi leyisasekisiweke, ni kutisasekisa hi svilo sva golidi, ni kuyambala tinguvu ta risima. Kutibombisa ka n'wina, akuve ka vumunhu bza n'wina lebzinga xihundleni xa mbilu; akuve ka moya lowungawonhekiki wa kunabzala ni kurhula, lowunga ni risima lerikulu mahlweni ka Xikwembu. Khale, vavasati lavohlawuleka lava avatshembile Xikwembu, avatolovela kutibombisa hi mukhuva lowu, kutani avatitsongahata ka vanuna va vona. Svivile tano na Sara, lweyi ayingiseke Abrahamu, amuvula “hosi yanga”. Kutani svosvi, mi vana va yena loko miyendla lesvolulama, na mingachavisiwi ha nchumu. Hi ndlela yoleyo, na n'wina vavanuna, hanyisanani ni vasati va n'wina hi kutwisisana, hikuva vafana ni svibza lesvingatiyangiki, nasvona mivaxixima, hikuva vataja ndzhaka ya timpsalu ni vutomi svin'we na n'wina. Vaxiximeni lesvaku mikhongelo ya n'wina yitakala yingasiveliwi. Kuheteleleni: N'wina hinkwenu mifanele kuva ni moya wun'we, mitwelana vusiwana, miva ni rirhandzu ka vamakwenu, miva ni mbilu ya vumunhu ni miyehleketo ya kutitsongahata. Mingatlheliseleni vubihi hi vubihi, kumbe kurhuka hi kurhuka, kambe matshan'wini ya svosvo, katekisani, hikuva hi lesvi mingavitaneliwa kuyendla svona, lesvaku mitakuma nkateko na n'wina. Hikuva, hilaha Matsalwa mahlayaka hakona, “Lweyi anavelaka kuhanya vutomi lebzitsakisaka, ni kuvona masiku lamanene, aafume ririmi ra yena richava sva kubiha, ni nomo wa yena wungavulavuli mavunhwa; aatshike lesvohomboloka ayendla sva kululama; aalave kurhula atiyisela ndleleni yakona. Hikuva mahlo ya Hosi matsakela lavolulama, ni tindleve ta yona tipfulekele svikhongelo sva vona, kambe Hosi yifularhela lavayendlaka sva kubiha.” Hi svosvo ke, xana i mani lweyi angamiyendlaka lesvobiha, loko n'wina mihisekela kuyendla lesvilulameke ke? Kambe ni loko mixanisiwa hikolaho ka lesvolulama, mikatekile; mingachaveni vanhu, nasvona mingakarhatekeni. Timbilwini ta n'wina, kombisani xichavu ka Kriste, lesvi anga Hosi; masiku hinkwawu tilungiseleni kutihlamulela ka mun'wana ni mun'wana lweyi amivutisisaka henhla ka kulangutela loku minga nakona, kambe misviyendla hi moya wa kutenga. Nasvona, mitshama na mili ni ripfalu leribaseke, lesvaku loko mihembeliwa, lavasandzaka mahanyela ya n'wina layolulama ka kriste, vatakhomiwa hi tingana. Hikuva svayampsa kutwa kuvaviseka hi mhaka ya kuyendla lesvolulama, loko svosvo svili lesvi Xikwembu xisvirhandzaka, kutlula kutwa kuvaviseka hi mhaka ya kuyendla lesvingalulamangiki. Kriste na yena afele svijoho kan'we, afela n'wina; yena munhu lowolulama afele lavangalulamangiki, lesvaku atamifikisa ka Xikwembu; adlayiwile hi tlhelo ra miri, kambe ayendliwile lweyi ahanyaka hi tlhelo ra moya. Hi moya, ayile ayatwalisa rito ka mimoya leyinga jele, leyi kusunguleni yikalaka yingayingisanga Xikwembu loko xilehisa mbilu xiyima xingayendli nchumu, nkameni lowu Nowa angayaka ha wona ngalawa. Ngalaweni leyi kunghenile vangali vangani, hi lesvaku vanhu va ntlhanu ni vanharhu, lavaponisiweke ha yona matini. Ntsakamiso wuyelana ni mhaka leyi; svosvi wa miponisa, kungali hi kususa nsila mirini, kambe hi kuyendla lesvaku mikombela ripfalu leribaseke ka Xikwembu. Ntsakamiso wa miponisa hi mhaka ya kupfuka ka Yesu Kriste kufeni, yena lweyi ayeke tilweni, kutani svosvi anga vokweni ra xinene ra Xikwembu, na tintsumi ni vafumi ni lesvi sva matimba svili hansi ka yena. Hikolaho, lesvi Kriste atweke kuvava nyameni, na n'wina hlomani matlhari ni miyanakanyu yofana ni ya yena, hikuva mun'wana ni mun'wana lweyi angatwa kuvava nyameni, atshikile kujoha. Kutani nkameni wa n'wina lowusaleke wa kuhanya laha misaveni, mingahafambisiweni hi kunavela kutitsakisa, kukota vanhu van'wana, kambe mifambisiwa hi lesvi Xikwembu xirhandzaka svona. Tshikani kuyendla lesvitsakeliwaka hi vamatiko, hikuva sviringene loko misviyendlile minkameni leyihundzeke. Khale amihanya hi kuyendla sva kubiha, hi kunavela kutitsakisa, hi kudakwa, ni makolo, ni kuhanya mabzaleni, ni kugandzela svikwembu sva hava lesvingalavekiki. Vahlamala loko vamivona svosvi na mingahafambi na vona, kuwonhekeni loku kutlulisaka mpimo, kutani vamisandza. Kambe vanhu lava vatatihlamulela mahlweni ka lweyi atilungiseleke kuyavanyisa lavahanyaka ni lavafeke. Hi svona lesvingayendla lesvaku Evhangeli yipaluxiwa ni ka lavafeke: Vona lava vayavanyisiweke kufana ni vanhu van'wana, na vahali misaveni, svosvi vahanya moyeni kufana ni Xikwembu. Kuhela ka svilo hinkwasvu kule kusuhi. Hikolaho, tlharihani mitikhoma, mitakota kukhongela. Kutlula lesvi hinkwasvu, tiyani kurhandzaneni, hikuva rirhandzu rifunengeta svijoho lesvotala. Titoloveteni kuyamukela vayendzi, mirhurhelana, handle ka kutseketsela. Lesvi mun'wana ni mun'wana anyikiweke nyiko ya yena, tirhisani tinyiko leti, mipfunana ha tona, miva valanguteli lavanene va tinyiko ta Xikwembu ta tinxakaxaka. Loko mun'wana anyikiwile kuvulavula, aavulavule hi kulandza marito ya Xikwembu; loko mun'wana anyikiwile kutirhela vanhu, aasviyendle kufana ni lweyi asvitirhaka hi matimba lawa Xikwembu ximunyikaka wona, lesvaku ka svilo hinkwasvu Xikwembu xidzunisiwa ha Yesu Kriste. Kudzuneka ni matimba svi le ka xona hilaha kungaheliki. Amen. Varhandziwa, mingahlamaleni loko miweliwa hi miringo leyipfurhaka kufana ni ndzilo kutaringa kutiya ka n'wina, onge hi loko mihumeleliwa hi lesvohlamalisa. Kambe tsakani hi lesvi miyaveliwaka kuvaviseka ka Kriste, lesvaku siku leri ahumelelaka kukwetsimeni ka yena, na n'wina mitatsaka mitsakisisa. Loko misoliwa hikolaho ka vito ra Kriste, mikatekile, hikuva Moya lowukwetsimaka, lowunga wa Xikwembu, wu le ka n'wina. Ntsena kungavi na mun'we wa n'wina lweyi atwisiwaka kuvava hi lesvi anga mudlayi, kumbe muyivi, kumbe xigevenga, kumbe lweyi anghenelaka timhaka ta van'wana. Kambe loko munhu atwisiwa kuvava hikolaho ka lesvi anga mukriste, angatshuki akhomiwa hi tingana, kambe aadzunise Xikwembu, hi mhaka ya vito leri ra “mukriste”. Hikuva nkama wufikile wa kuyavanyisiwa lokungatasungula hi va yindlo ya Xikwembu. Kutani, loko kusungula hi hina, xana makumu ya lavangayingisiki Evhangeli ya Xikwembu matava lawa yoyini ke? Nasvona, vate: “Loko munhu wolulama apona hi kunonon'hwa, xana lavasandzaka Xikwembu ni lavajohaka, vatakumeka na vali ka xiyimu xihi ke?” Hikolaho, lavatwisiwaka kuvava hilaha Xikwembu xirhandzaka hakona, avayendle lesvi sva kululama, kutani vaveka mimoya ya vona mavokweni ya Muvumbi lweyi atshembekaka. Svosvi-ke, ni khongotela vakulukumba lavanga mahlweni ka n'wina, lesvi na mina ninga mun'we wa vona; ningamboni ya kuvaviseka ka Kriste, ni lweyi atshembaka kuyaveliwa kukwetsima lokungatahumelela, kutani nili: Risani ntlhambi wa Xikwembu lowunga xikarhi ka n'wina, miwuhlayisa kungali hi kusindzisiwa, kambe kuli hi kusvirhandza, hilaha Xikwembu xisvilavaka hakona, nasvona kungali hi kulangutela bindzu lerikhomisaka tingana, kambe hi kuhiseka. Mingatshukeni mifuma lava minganyikiwa vona kuvarisa, kambe miva svikombiso lesvinene ka ntlhambi. Kutani siku leri murisi lwenkulu angatahumelela, mitakuma hari leyo ya kudzuneka, leyingaliki na kuwonheka. Svixitanu na n'wina lavampsha: Titsongahateni ka lavakulu. Hinkwenu yambalani kutitsongahata, mitiveka hansi, van'we ka van'wana, hikuva va khale vate: “Xikwembu xiyalela lavatikulisaka, kambe xitsetselela lavatitsongahataka.” Hikolaho, titsongahateni hansi ka voko ra matimba ra Xikwembu, lesvaku hi nkama wakona xitamitlakusa. Rhulani kukarhateka hinkwaku ka n'wina ka xona, hikuva xitikarhatela n'wina. Tikhomeni mihiteka. Nala wa n'wina anga Sathana, warhendzelekarhendzeleka kufana ni nghonyama leyibongaka, yilava lweyi yingamujaka. Muyaleleni, mitiya kupfumeleni ka n'wina, hi kutiva lesvaku vamakwenu misaveni hinkwayu vahlangana ni kuxaniseka kofana ni loku minga nakona. Kutani ndzhaku ka loko mitava mixanisiwile nkamanyana. Xikwembu xa timpsalu hinkwatu lexi ximivitaneke kunghena kukwetsimeni ka xona lokungaheliki, ka Kriste, xona hi xoxe xitamipfuxa, ximiyaka ni kumitiyisa, mingatsekatseki. Matimba amave ka xona hi masiku ni masiku. Amen. Nimitsalela hi kukomisa, hi xiyandla xa Silvhano, makwerhu lweyi hi kuvona ka mina anga lweyi atshembekeke; namikhongotela, ni kutiyisa lesvaku timpsalu ta ntiyiso ta Xikwembu hi tona leti! Tiyani ka tona. Kereke leyinga Babilona, ya lavahlawuliweke kufana na n'wina, yamirungula, ni n'wana wa mina Marka wamirungula. Xewetanani hi kun'quntana hi rirhandzu ra vukwavu. Kurhula akuve ka n'wina hinkwenu va ka Kriste. Mina Simoni Petrosi, nandza ni mupostola wa Yesu Kriste, nitsalela lavanyikiweke kupfumela loku hi risima leriringanaka ni kupfumela ka hina, hi kululama ka lweyi anga Xikwembu ni muponisi wa hina Yesu Kriste, nili: Timpsalu ni kurhula asvive na n'wina svimitalela, kutiveni ka Xikwembu ni ka Yesu Hosi ya hina. Hi matimba ya vukwembu bza yena, Kriste ahinyikile svilo hinkwasvu lesvi svihipfunaka kuhanya vutomi bza vukhongeli, hi mhaka ya kutiva lweyi ahivitaneleke kukwetsimeni ka yena ni le kudzunekeni ka ntiyiso. Hi ndlela leyi hinyikiwile svitshembiso sva Hosi lesvikulu ngopfu, sva risima, lesvaku ha svona mitakota kupona kuwonhekeni lokunga kona misaveni hikolaho ka kunavela lokobiha, mihundzuka lavayaveliweke vutomi lebzi bzihumaka ka Xikwembu. Hikolaho ka svona svosvo, yendlani hi matimba hinkwawu kuseketela kupfumela ka n'wina hi vunene, vunene bzona mibziseketela hi vutivi, miseketela vutivi hi kutikhoma, ni kutikhoma hi kutiyisela, ni kutiyisela hi vukhongeli, ni vukhongeli hi kutsakelana ka vuxaka, ni kutsakelana ka vuxaka hi rirhandzu. Hikuva loko mili ni svilo lesvi, ni loko svimitalela svikula, svitayendla lesvaku mingalolohi kumbe kupfumala mihandzu, kutani svitamifikisa kutiveni loku kuhetisekeke ka Hosi ya hina Yesu Kriste. Hikuva lweyi apfumalaka svilo lesvi, afile mahlo, angavoni kule, nasvona wakohlwa lesvaku asusiwile svijoho sva yena sva khale. Hikolaho, vamakwerhu, hisekelani ngopfungopfu kutiyisa kuvitaniwa ni kuhlawuliwa ka n'wina, hikuva loko miyendla svosvo amingaphariyetiwi miwa ni siku ni rin'we. Hi ndlela yoleyo, mitanyikiwa mfanelo hinkwayu ya kunghena Mfun'wini lowungaheliki wa Hosi ni muponisi wa hina Yesu Kriste. Hikolaho, hi masiku hinkwawu, ninavela kutshama na nili karhi ni mitsundzuxa timhaka leti, hambilesvi mititivaka ni kutiyisela ntiyisweni lowu minga na wona. Niyanakanya lesvaku svilulamile kumipfuxa hi kumitsundzuxa svilo lesvi, loko nahali mirini lowu. Hikuva nasvitiva lesvaku kurhurha ka mina mirini lowu wa mina kule kusuhi, hilaha Hosi ya hina Yesu Kriste anikombeke hakona. Kutani niringeta kuyendla lesvaku mitsundzuka timhaka leti minkama hinkwayu; mitatiyanakanya ni loko nitava nifambile. Ahilandzanga svihitana svoyendliwa hi vutlhari, loko himitivisile ta kuhumelela ka Hosi ya hina Yesu Kriste hi matimba; hina hi timboni ta vukulukumba bza yena, lebzi hingabzivona hi mahlo. Hikuva siku leri anganyikiwa kudzuneka ni kutwala hi Xikwembu Tatana, rito rifikile ka yena rita hi kukwetsima loku kuhlamalisaka, riku: “Lweyi i N'wananga, lweyi nimurhandzaka, lweyi ni mutsakelaka.” Kutani hina hiritwile rito leri, loko rihuma tilweni, hikuva ahili na yena ntshaveni Leyokwetsima. Hikolaho, rito ra vaprofeta, hina hirikuma ritiyile kutlula ni khale. Mitava miyendla svona loko mihlayisa svinene rito lero, kufana ni rivoni lerivoningaka lomu kunga ni munyama, kufikela loko vurhonga bzitsuvuka, ni loko nyeleti ya mixo yihumelela timbilwini ta n'wina. Henhla ka hinkwasvu, mifanela kutwisisa lesvaku kuhava marito ya vaprofeta Matsalweni lawa munhu angamahlamuselaka hi kutisungulela. Hikuva kuhava rito ni rin'we ra vaprofeta leriteke hi kutitwa ka munhu, kambe vanhu lavahuhuteliweke hi Moya Lowokwetsima, vavulile lesvihumaka ka Xikwembu. Khale, vaprofeta va mavunhwa na vona vavekona xikarhi ka vanhu, kufana ni lesvi kungatava ni vajondzisi va mavunhwa xikarhi ka n'wina, lavangatanghenisa hi le xihundleni tijondzo tohambuka letiwonhaka; vatalandzula hambi ali Hosi leyivakutsuleke, vativangela kulahleka lokungatahantla kuvawela. Vanhu lavotala vatalandza sva manyala lesvi vasviyendlaka, nasvona ndlela ya ntiyiso yitasandziwa hi mhaka ya vona. Kutani, hikolaho ka makolo ya vona, vatamidelela hi marito ya vona ya vukanganyisi. Kusukela khale, kuyavanyisiwa ka vona akuyimanga, ni kulova ka vona akuyetlelanga. Xikwembu axitsetselelanga tintsumi loko tijohile, kambe xiticukumetile Tiheleni, ni kutinghenisa na tibohiwile axivandleni xa vafi, laha tipfaleliweke kona kuyafika siku ra kuyavanyisa, axitsetselelanga misava ya khale, kambe xihlayisile Nowa mujondzisi wa lesvovululama, svin'we ni vanhu van'wana va ntlhanu ni vambirhi, nkameni lowu xingavanga ndhambhi misaveni ka vanhu lava avangali na mhaka na xona; xiyendlile lesvaku madoropa ya Sodoma na Gomora, mahundzuka nkuma mayavanyiseliwa kulova, ximayendla xitsundzuxu ka lava vangatakala vangali na mhaka na xona. Nasvona xiponisile Loti munhu wolulama, loko yena atwile kuvava hi mhaka ya svilo sva tingana lesvi asviyendliwa hi vanhu lavobiha; hikuva svilo lesvi munhu lweyi wolulama asvivoneke ni kusvitwa loko ali karhi ahanya xikarhi ka vona, svimukarhatile ngopfu moyeni wa yena masiku hinkwawu, akarhateka hi mhaka ya mahanyela ya vona layohomboloka. Lesvi svihlaya lesvaku Hosi yasvitiva kuponisa vanhu va vukhongeli kukarhatekeni ka vona, ni kutshika vanhu lavohomboloka na vali kubiweni kufikela siku ra kuyavanyisa, ngopfungopfu lavalandzaka sva nyama, vanavela kutitsakisa hi svilo sva chaka, vasandza ni vuhosi bza Xikwembu. Vanhu lava vatitshemba ngopfu, nasvona vatitiva; avachavi kusandza sva le henhla lesvikwetsimeke. Kasi tintsumi, hambilesvi tivatlulaka hi vukulu ni matimba, atihumesi marito ya kuvayavanyisa hi kuvasandza mahlweni ka Hosi. Kambe vanhu lava vafana ni sviharhi lesvipfumalaka kuyanakanya, sviharhi sva nhova svopsaleliwa kukhomiwa ni kudlayiwa ntsena; vasandza timhakeni leti vangativiki nchumu ka tona, kutani vatahelisiwa hi kuhelisiwa loku kufanaka ni ka sviharhi. Vatayamukela hakelo yobiha, hilaha vangayendla svobiha hakona. Vakuma svivatsakisa vona kucina mintlangu, vanwa nhlekanhi hinkwawu. I svivati, ni svisandzu vanhwini. Ni loko vali na n'wina minkhubzini, vona vatsakela kucina ni kunwa ngopfu. Va ni mahlo lawa mataleke hi vunghwavana, lawa manga ni torha ra svijoho. Varhiya mimoya leyingatiyangiki. Va ni timbilu leti toloveleke makolo. I vanhu lavarhukiweke hi Xikwembu. Vatshikile ndlela leyinene, valandza ndlela ya Balamu n'wana Beyori, lweyi arhandzeke bindzu hi kuyendla lesvohomboloka. Kambe aholoveliwile hikolaho ka xijoho xa yena n'winyi; mbongolo leyingakotiki kuvulavula yivulavulile hi rito rofana ni ra munhu, yisivela muprofeta kuhlanyeni ka yena. Vanhu lava i svihlovo svopfumala mati; i hunguva leyifambisiwaka hi xidzedze; munyama lowukulu ngopfu wuvayimelile. Vatlakusa rito ni kutidzunisa ngopfu hi svilo sva hava; hi kunavela lokobiha ka sva manyala sva laha misaveni, vaphasa vanhu lava vaha kuponaka mavokweni ya valahleki. Vavatshembisa kutshunxeka, kambe vona hi voxe i svikarawa sva lesvibolaka; hikuva munhu i xikarawa xa xilo xihi ni xihi lexi ximuhlulaka. Hikuva, loko vanhu vapona chakeni ra misava hi kutiva Hosi ya hina ni Muponisi Yesu Kriste, kutani vatlhela vaphasiwa ni kuhluliwa hi svona, xiyimu xa vona xohetelela xibihile kutlula lexosungula. Asvitava sviyampsile ka vona loko vangativanga ndlela ya kululama, handle ka loko vayitivile kutani vatlhelela ndzhaku vatshika Nawu lowohlawuleka lowu vanyikiweke wona. Svivahumelele hilaha xihlayahlaya xa ntiyiso xihlayeke hakona, loko xiku: “Mbzana yivuyela mahlanteni ya yona.” Nasvona: “Khumba, loko rihlampsiwile, ritlhela ripuluvundza madakeni!” Varhandziwa leri i papela ra vumbirhi leri nimitsalelaka rona svosvi, kutani ka wona lawa mambirhi nipfuxa miyanakanyu ya n'wina leyinga ni kutwisisa, hi kumitsundzuxa. Aniyendlela kumitsundzuxa marito lamangahlayiwa khale hi vaprofeta lavohlawuleka, ni milawu ya Hosi ni Muponisi, leyiteke hi milomo ya vapostola va n'wina. Xosungula, mifanela kutwisisa lesvaku, masikwini yohetelela, kutahumelela vasandzi lavafambisiwaka hi kunavela ka vona lokobiha; vaku: “Svihelele kwihi, sva lweyi kungatshembisiwa lesvaku atavuya, xana? Hi mpfhuka vatatana vangatiyetlelela, svilo hinkwasvu svahaya mahlweni hilaha asvifamba hakona, kusukela loko misava yitumbuluka.” Vanhu lava vavula ha vomu, hi kurivala mhaka leyi: Hi lesvaku matilo amali kona khale ni khale, ni lesvaku misava yivumbiwile hi rito ra Xikwembu yihuma matini, na yili xikarhi ka mati. Hi rito lero, misava leyi ayili kona nkameni wolowo, yijiwile hi mati ya ndhambhi, yifunengetiwa. Kambe hi ro rito lero, matilo ni misava ya svosvi, svihlayiseliwe kupsha hi ndzilo, sviyimele siku ra kuyavanyisiwa ni ra kuhelisiwa ka vanhu lavangaliki na mhaka ni Xikwembu. Kambe mingakhohlweni mhaka yin'we leyi, varhandziwa: Mahlweni ka Hosi, siku rin'we rikotisa malembe ya khulu (1 000) ni malembe ya khulu (1 000) ma kotisa siku rin'we. Hosi ayihlweli kuyendla lesvi yingatshembisa svona, hilaha van'wana vatwisisaka “kuhlwela” hakona, kambe yilehisa mbilu hikolaho ka n'wina; ayilavi lesvaku ni mun'we wa n'wina alahleka, kambe yilava lesvaku hinkwavu vata kuhundzukeni. Kambe siku ra Hosi ritata kufana ni muyivi, kutani matilo matahundza hi huwa leyikulu; hinkwasvu sva ntumbuluku svitapsha hi ndzilo svihela, kutani misava ni mintirho leyinga ka yona svitahisiwa. Lesvi kungatapsha svilo lesvi hinkwasvu svihela hi ndlela leyi, mifanele kuva ni vutomi lebzohlawuleka bza vukhongeli, na mili karhi milangutela siku ra Xikwembu, miyendla lesvaku rihantla rifika, ringa siku leri ha rona kungatapsha matilo mahela, ni hinkwasvu sva ntumbuluku svingatanyunguluka, hi ndzilo. Kambe, hi kuya hi kutshembisa ka Hosi, hilangutele matilo lamampsha ni misava leyimpsha, laha kungatava ni kululama. Hikolaho varhandziwa, lesvi milanguteleke svilo lesvi, tikarhateni lesvaku Xikwembu ximikuma na mingali na xivati ni xisandzu, kambe ximikuma na mili ni kurhula. Kutani, twisisani lesvaku loko Hosi ya hina yilehisa mbilu, yiyendlela kuhiponisa. Makwerhu Pawulo murhandziwa wa hina, na yena amitsalele hi yona ndlela leyi, hi kulandza vutlhari lebzi anyikiweke bzona. Hi svona lesvi atoloveleke kusvivula mapapeleni ya yena hinkwawu, loko akhumba timhaka leti. Mapapeleni yakona ku ni svilo svin'wana lesvi svikarhataka kusvitwisisa; lavapfumalaka vutivi ni lavangatiyangiki vasvihombolokisa, hilaha vayendlaka hakona ka matsalwa laman'wana, kutani svivalovisa. Hikolaho n'wina varhandziwa, lesvi mitivaka mhaka leyi hi nkama, tivoneleni, hikuva mingatshuka mihumile ndleleni hi kuxengiwa hi lavohomboloka, kutani milahlekeliwa hi kutiya ka n'wina. Kambe kulani, na mili timpsalwini ni le kutiveni ka Yesu Kriste, Hosi ya hina ni Muponisi wa hina. Ka yena akuve kutwala svosvi, ni kuyafika sikwini leringaheliki. Amen! Lesvi asvili svona kusukela kusunguleni, lesvi hisvitweke, lesvi hisvivoneke hi mahlo ya nyama, lesvi hisvihlaleleke, ni lesvi mavoko ya hina masvikhomeke, kutani hi lesvi himitivisaka svona mayelanu ni Rito ra Vutomi; hikuva vutomi bzitikombisile, hina hibzivonile, hi timboni ta bzona, himibzela hi ta vutomi lebzingaheliki, lebzi abzili na Tatana, lebzi bzitikombiseke ka hina. Lesvi hisvivoneke ni lesvi hisvitweke, himitivisa svona na n'wina, lesvaku miva ni vuhlengeli svin'we na hina; avuhlengeli bzi kona xikarhi ka hina na Tatana, na yena N'wana wa yena Yesu Kriste. Asvilo lesvi hinkwasvu himitsalela lesvaku akutsaka ka n'wina kuhetiseka. Leri hi rona rungula leri hingaritwa ka N'wana, hi rona leri himibzelaka rona; lesvaku Xikwembu i kuvonakala, aku na munyama ni vutsongo ka xona. Loko hiku hi ni vuhlengeli na xona, kambe hifamba munyameni, hahemba, ahihanyi hi kulandza ntiyiso. Loko hifamba kuvonakaleni, kufana na xona xinga kuvonakaleni, hi ni vuhlengeli, kutani angati ya Yesu Kriste N'wana wa xona yahibasisa ka svijoho hinkwasvu. Loko hiku ahi na vujoho hatikanganyisa ha hoxe, kutani ntiyiso awu kona ka hina. Kambe loko hitisola svijoho sva hina, xona xitshembekile, nasvona xilulamile akuva xihirivalela svijoho sva hina, ni kuhibasisa xihisusela kuhomboloka hinkwaku. Loko hivula lesvaku ahijohanga, hixiyendla muhembi, kutani Rito ra xona ari kona ka hina. Vananga, nimitsalela timhaka leti hinkwatu akuva mingajohi; kambe loko munhu atshuka ajoha, hina yena muyimeli ka Tatana, anga Yesu Kriste, lweyi alulameke; Hi yena mhamba hikolaho ka svijoho sva hina, svingali sva hina ntsena, kambe na svona sva misava hinkwayu. Hi timhaka leti, hikholwa lesvaku hamutiva; loko hihlayisa milawu ya yena. Lweyi avulaka lesvaku: “Mina namutiva”, kambe angahlayisi milawu ya yena, wahemba, ka yena ntiyiso awu kona. Kambe, mani na mani, lweyi ahlayisaka rito ra yena, rirhandzu ra Xikwembu ri kona ka yena, nasvona rihetisekile hakunene. Xilesvo hitiva lesvaku hina hi le ka xona. Lweyi ange atshama ka xona, nasvona afanela kufamba tani hi lesvi Yesu afambiseke xisvona. Varhandziwa: Animitsaleli Nawu lowumpsha, kambe Nawu wa khale lowu mingava na wona kusukela kusunguleni; Nawu wa khale i rito leri kusukela kusunguleni miritweke. Hambi svilitano namitsalela Nawu lowumpsha, lowu wunga wa ntiyiso ka yena ni ka hina: Hikuva munyama wahundza, svosvi akuvonakala ka ntiyiso kavoninga. Lweyi avulaka aku a le kuvonakaleni, kambe avenga makwavu, kufika ni svosvi a le munyameni. Lweyi arhandzaka makwavu a le kuvonakaleni, ka yena aku na kukhunguvanyeka. Kambe lweyi avengaka makwavu, ale munyameni, afamba munyameni, angasvitivi lesvaku afanela kuya kwihi: Hikuva munyama wumudlaye mahlo. Nitsalela n'wina, vananga, hikuva svijoho sva n'wina svitsetseleliwile hikolaho ka vito ra yena. Nitsalela n'wina, vatatana, hikuva mitivile lweyi anga yena kusukela kusunguleni. Nitsalela n'wina lavampsha hikuva mihlulile lweyi wobiha. Nitsalela n'wina vananga, hikuva mitivile Tatana. Nitsalela n'wina vatatana, hikuva mitiva lweyi anga kona kusukela kusunguleni. Nitsalela n'wina lavampsha, hikuva mi ni matimba, ni rito ra Xikwembu ritshame ka n'wina, nasvona mihlulile lweyi wobiha. Mingarhandzeni misava, hambi svilo lesvi svinga misaveni. Loko munhu arhandza misava, rirhandzu ra Tatana ari kona ka yena. Hikuva hinkwasvu lesvi svinga kona misaveni, kunavela ka nyama, ni kunavela ka mahlo, ni kutikulisa hi sva vutomi lebzi, hinkwasvu lesvi asviti hi le ka Tatana, kambe svita hi le ka misava. Kambe misava yahundza ni kunavela ka yona, lweyi ayendlaka kurhandza ka Xikwembu atshama hilaha kungaheliki. Vananga, lowu hi wona nkarhi wa makumu, tani hi loko misvitwile lesvaku Antikriste wata, ni svosvi valala va Kriste lavotala vahumelelile; xilesvo hitiva lesvaku i nkarhi wa makumu. Vahumile ka hina, kambe avangali va hina; hikuva loko avali va hina avatatshama na hina ni svosvi, kambe lesvi svihumelelile akuva kutavoneka lesvaku ahi hinkwavu vanga va ka hina. Kambe n'wina mi ni kutotiwa loku kutaka hi le ka lweyi wokwetsima, kutani n'wina hinkwenu masvitiva. Animitsalelanga hi kuva mingawutiviki ntiyiso, kambe hikuva mawutiva ni lesvaku aku na mavunhwa lawa mataka hi le ka ntiyiso. I mani muhembi loko angali yena lweyi ayalaka lesvaku Yesu hi yena Kriste? Munhu wotanu, hi yena Antikriste, lweyi akanetaka Tatana ni N'wana. Mani na mani lweyi ayalaka N'wana anga na yena hambi Tatana. Lweyi apfumelaka N'wana hambi Tatana ana yena. Hikolaho lesvi mingasvitwa kusukela kusunguleni asvitshame ka n'wina. Loko lesvi mingasvitwa kusukela kusunguleni svitshama ka n'wina, na n'wina mitshama ka N'wana ni ka Tatana. Lexi i xitshembiso lexi angahitshembisa xona; anga vutomi lebzingaheliki. Nimitsalela svilo lesvi hinkwasvu hikolaho ka lava vamikanganyisaka. Kambe kutotiwa loku mikuyamukeleke ka yena kutshama ka n'wina, xilesvo amivileli kuva munhu amijondzisa wona; kambe moya wa yena lowu mingatotiwa wona wa mijondzisa hinkwasvu, wu ni ntiyiso, awuhembi, tani hi lesvi wumijondziseke, xilesvo tshamani ka yena. Kutani svosvi, vananga, tshamani ka yena, lesvaku loko yena ahumelela, hitava ni ntshembo hingavi ni tingana loko yena avuya. Loko misvitiva lesvaku yena i munene, masvitiva lesvaku mani na mani lweyi ayendlaka lesvolulama apsaliwa hi yena. Vonani rirhandzu leronghasi leri Tatana ahinyikeke rona, lesvaku hivuliwa vana va Xikwembu. Hikolaho, misava ayihitivi; hikuva ayimutivanga yena. Varhandziwa, svosvi hi vana va Xikwembu, asvisitikomba lesvi hingatava svona. Kambe hasvitiva lesvaku, loko yena atatikombisa ka hina, hitafana na yena, hikuva hitamuvona tani hi lesvi anga xisvona. Kutani mani na mani lweyi amulangutelaka, watihlampsa yena hi yexe, kufana ni lesvi yena angatenga. Mani na mani lweyi ayendlaka xijoho nasvona ayendla lesvi svinga handle ka nawu, hikuva xijoho i kuyendla lesvinga handle ka nawu. Kambe masvitiva lesvaku yena atikombisile lesvaku asusa svijoho, nasvona ka yena aku na kujoha. Mani na mani lweyi atshamaka ka yena angajohi; mani na mani lweyi ajohaka angamuvonanga, nasvona angamutivanga. Vananga, mingakanganyisiweni hi munhu. Lweyi ayendlaka lesvilulameke alulamile, kufana ni lesvi yena alulameke. Lweyi ajohaka i wa Diyavulosi, hikuva Diyavulosi i mujohi kusukela kusunguleni. Hi svolesvi sviyendleke lesvaku N'wana wa Xikwembu atikombisa lesvaku mitshunxiwa ka mintirho ya Diyavulosi. Mani na mani lweyi apsaliwaka hi Xikwembu angayendli xijoho; hikuva mbewu ya xona yitshama na yena, angakala angajohi, hikuva apsaliwa hi Xikwembu. Hikolaho, kuvonekaka lava vanga vana va Xikwembu ni lava vanga vana va Diyavulosi: Mani na mani lweyi angayendliki lesvinene, lweyi angarhandziki makwavu ahi wa Xikwembu. Hikuva leri hi rona rungula leri mingaritwa kusukela kusunguleni; lesvaku hifanela kurhandzana. Hingafaneni na Kayini lweyi aali wa lweyi wobiha, kutani adlaya makwavu. Xana amudlayile hi mhaka muni ke? Hikuva mintirho ya yena ayili leyobiha, kambe ya makwavu ayili leyolulama. Vamakwerhu, mingahlamaleni loko misava yimivenga. Hina hasvitiva lesvaku hihumile kufeni, hinghena vuton'wini, hikuva hirhandza vamakwerhu. Lweyi angarhandziki makwavu atshama kufeni. Mani na mani lweyi ahambulaka makwavu i mudlayi. N'wina masvitiva lesvaku aku na mudlayi lweyi vutomi lebzingaheliki bzitshamaka ka yena. Hitiva rirhandzu lesvi ringa svona loko hitiva yena lweyi anyiketeke vutomi bza yena hikolaho ka hina. Xilesvo na hina hifanela kunyiketa vutomi bza hina ka vamakwerhu. Lweyi anga ni svilo sva misava leyi, kambe avona makwavu na ali kupfumaleni, kambe anonon'hwisa mbilu ya yena angamupfuni, xana rirhandzu rorhandza Xikwembu ringatshamisa kuyini ka yena ke? Vananga, hingarhandzaneni hi marito, kumbe hi kuvulavula ntsena, kambe akuve hi mintirho ni ntiyiso. Kutani, hitiva hakona lesvaku hi ni ntiyiso, xilesvo le mahlweni ka yena hirhulisa timbilu; na hili karhi hitiva lesvaku loko timbilu ta hina tihiyavanyisa, Xikwembu i xikulu kutlula timbilu ta hina, nasvona xitiva svilo hinkwasvu. Varhandziwa, loko timbilu ta hina tingahiyavanyisi, hi ni kutshembeka loku kutiyeke ka Xikwembu. Kutani hinkwasvu lesvi hisvikombelaka ka xona, hitanyikiwa svona; hikuva hihlayisa milawu ya xona, hiyendla lesvi svitsakisaka mahlweni ka xona. Kutani Nawu wa xona hi lowu: Hi lesvaku hifanela kupfumela ka Vito ra N'wana wa xona Yesu Kriste, ni lesvaku hifanela kurhandzana tani hilaha xihibzeleke hakona. Lweyi ahlayisaka milawu ya xona atshama ka xona, na xona ka yena. Xilesvo hitiva lesvaku xitshama ka hina; hikolaho ka Moya lowu xihinyikeke wona. Varhandziwa, mingapfumeleni ka mimoya hinkwayu, kambe kambisisani mimoya kutiva lesvaku hakunene i ya Xikwembu; hikuva vaprofeta va mavunhwa vahangalakile misaveni. Mitativa Moya wa Xikwembu hi ndlela leyi: Moya wun'wana ni wun'wana lowuvulaka lesvaku Yesu atile misaveni tani hi munhu i wa Xikwembu. Kambe moya wun'wana ni wun'wana lowu wungapfumeliki lesvaku Yesu Kriste atile tani hi munhu ahi wa Xikwembu, kambe lowo i moya wa Antikriste, lowu mitweke ta wona lesvaku wata; kutani ni svosvi wu kona laha misaveni. Vananga, n'wina mi va Xikwembu, kutani mivahlulile va mavunhwa; hikuva Moya lowunga ka n'wina wutlula hi vukulu moya lowu wunga misaveni. Vona i va misava, hi kolaho vavulavula hi sva laha misaveni, kutani va laha misaveni vavayingisa. Hina hi va Xikwembu. Mani na mani lweyi ativaka Xikwembu wahiyingisa, kambe lweyi angaliki wa Xikwembu, angahiyingisi. Hikolaho hina hawutiva Moya wa ntiyiso ni moya wa mavunhwa. Varhandziwa, ahirhandzaneni, hikuva rirhandzu i ra Xikwembu; hi kolaho mani na mani lweyi anga ni rirhandzu apsaliwile hi Xikwembu, nasvona ativa Xikwembu. Lweyi angaliki na rirhandzu, angaxitivi Xikwembu, hikuva Xikwembu i rirhandzu. Xilesvo, rirhandzu ra Xikwembu ritikomba ka hina hi ndlela leyi: Hi lesvaku Xikwembu xirhume N'wana wa xona lweyi angapsaliwa ali yexe kuta laha misaveni, lesvaku hitakota kuhanya hikolaho ka yena. Leri hi rona rirhandzu ra ntiyiso, hikuva ahi hina hingarhandza Xikwembu, kambe hi xona xihirhandzeke, kutani xirhumela N'wana wa xona lesvaku ava mukutsuli wa svijoho sva hina. Varhandziwa, lesvi Xikwembu xihirhandzeke hi ndlela leyi, na hina hifanela kurhandzana. Aku na munhu ni mun'we lweyi atshamaka avona Xikwembu; loko hina hirhandza Xikwembu, xona xi le ka hina, kutani rirhandzu ra xona rihetisekile ka hina. Lesvi svihiyendla hitiva lesvaku hi le ka xona, na xona ka hina, hikuva xihinyikile Moya wa xona. Kutani na hina hisvivonile, hiva hiveka vumboni, lesvaku Tatana arhumele N'wana kuva Muponisi wa misava. Mani na mani lweyi avulaka lesvaku Yesu i N'wana wa Xikwembu, Xikwembu xi le ka yena, na yena a le ka Xikwembu. Hikolaho, hina hasvitiva, nasvona hapfumela ka rirhandzu leri Xikwembu xinganarona ka hina. Xikwembu i rirhandzu, lweyi atshamaka rirhandzwini atshama ka Xikwembu, ni Xikwembu xi le ka yena. Xilesvo loko rirhandzu rihetisekile ka hina, hi tatiya nhlana lesvaku ka siku ra kuyavanyisa hitava hitshembekile; hikuva lesvi Kriste anga xisvona na hina hi va svona misaveni leyi. Ka rirhandzu aku na kuchava. Kambe, rirhandzu lerihetisekeke rihlongola nchavo, hikuva rirhandzu lerihetisekeke risusa kuchava; hikuva kuchava kufambelana ni xikhatiso, kutani lweyi achavaka angahetisekanga rirhandzwini. Hina hamurhandza, hikuva hi yena arhangeke ahirhandza kusungula. Loko munhu aku: “Mina nirhandza Xikwembu”, kambe ahambula makwavu, i muhembi; hikuva lweyi angarhandziki makwavu lweyi amuvonaka hi mahlo, angakoti kurhandza Xikwembu lexi angaxivoniki. Kutani Nawu lowu xihinyikeke wona, hi lesvaku lweyi arhandzaka Xikwembu, afanela nasvona kurhandza makwavu. Mani na mani lweyi apfumelaka lesvaku Yesu hi yena Kriste apsaliwa hi Xikwembu, kutani mani na mani lweyi arhandzaka mupsali wa Kriste nasvona arhandza ni mupsaliwa wa yena. Hikohaho hitivaka lesvaku hirhandza vana va Xikwembu, loko hirhandza Xikwembu ni loko hihlayisa milawu ya xona. Hikuva lesvi i rirhandzu ra Xikwembu, xilesvo ahihlayiseni Milawu ya xona, hikuva Milawu ya xona ayitiki. Hikuva mani na mani lweyi apsaliweke hi Xikwembu, ahlula misava, kutani kuhlula loku, hi loku kuhlulaka misava, angakupfumela ka hina. I mani lweyi ahlulaka misava xana? Ntsena lweyi apfumelaka lesvaku Yesu i N'wana wa Xikwembu. Lweyi hi yena lweyi angata hi mati ni ngati,Yesu Kriste, kungali hi mati ntsena, kambe hi mati ni ngati. Kutani Moya hi wona mboni, hikuva Moya i ntiyiso. Hikuva ku ni timboni tinharhu; moya ni mati ni ngati, kutani vunharhu lebzi i xilo xin'we. Loko hipfumela vumboni bza vanhu va misava, ahitiveni lesvaku vumboni bza Xikwembu i bzikulu ngopfu, hikuva vumboni bza Xikwembu hi lebzi xibzinyikeke mayelanu ni N'wana wa xona. Lweyi apfumelaka ka N'wana wa Xikwembu, a ni vumboni le mbilwini, lweyi angapfumeliki ka Xikwembu axiyendla muhembi, hikuva angapfumelanga vumboni lebzi Xikwembu xibzinyikeke mayelanu ni N'wana wa xona. Kutani-ke, vumboni bzakona hi lebzi: Hi lesvaku Xikwembu xihinyikile vutomi lebzingaheliki, kutani, vutomi lebzi bzi le ka N'wana wa xona. Lweyi anga ni N'wana a ni vutomi; lweyi angaliki na N'wana wa Xikwembu anga na vutomi. Nimitsalela svilo lesvi hinkwasvu, n'wina lava mipfumelaka ka N'wana wa Xikwembu, akuva mitativa lesvaku mi ni vutomi lebzingaheliki. Loku hi kona kutshemba loku hinga nakona ka yena, hi lesvaku loko hikombela xokarhi mayelanu ni kurhandza ka yena, yena wahiyingisa. Kutani-ke, loko hitiva lesvaku wahiyingisa ka hinkwasvu lesvi hikombelaka svona hasvitiva lesvaku hikumile lesvi hisvikombelaka ka yena. Loko munhu avona makwavu na ali karhi ayendla xijoho lexi xingayisiki kufeni, afanela kukhongela, kutani Xikwembu xitanyika vutomi ka lava vangajohangiki xijoho xoyisa kufeni. Svijoho sviko na lesvi sviyisaka kufeni, kutani anivuli lesvaku kukhongeleliwa svona. Hinkwaku kubiha i xijoho, kambe ku ni xijoho lexi xingayisiki kufeni. Hasvitiva lesvaku mani na mani lweyi apsaliweke hi Xikwembu, angajohi; kambe lweyi apsaliweke hi Xikwembu watihlayisa, xilesvo lweyi wobiha angamukhumbi. Hasvitiva lesvaku hi va Xikwembu, ni lesvaku misava hinkwayu yi le ka lweyi wobiha. Nasvona, hasvitiva lesvaku N'wana wa Xikwembu se atile, ni lesvaku ahinyikile kutwisisa lesvaku hitativa yena lweyi anga wa ntiyiso; kutani hi le ka lweyi anga ntiyiso, yena N'wana wa xona Yesu Kriste. Lweyi hi yena Xikwembu hi ntiyiso, ni vutomi lebzingaheliki. Vananga, fularhelani svikwembu sva hava. Mina mukulukumba nitsalela muhlawuliwa waxisati, ni vana va yena, lava mina nivarhandzaka hi ntiyiso, ingali mina ntsena, kambe ni hinkwavu lava vativaka ntiyiso. Hikolaho ka ntiyiso lowu wutshamaka na hina, lowu wungatatshama na hina hilaha kungaheliki. Timpsalu ni musa ni kurhula, asvive na n'wina, svihuma ka Xikwembu Tatana ni ka Hosi Yesu Kriste, N'wana wa Tatana, asvive na hina hi ntiyiso ni rirhandzu. Nitsakile ngopfu loko nikuma lesvaku vana van'wana va wena vafamba ntiyisweni, tani hi lesvi hiyamukeleke milawu ya Tatana hakona. Svosvi-ke muhlawuliwa waxisati na kukombela, anikutsaleli Nawu lowumpsha, kambe wolowu hinga na wona kusukela kusunguleni: Lesvaku hirhandzana. Kutani rirhandzu rakona hi leri: Hifanela kuhanya mayelanu ni milawu ya yena. Lowu hi wona Nawu, tani hilaha misvitweke hakona kusukela kusunguleni. Lesvaku mihanya ha wona. Hikuva vakanganyisi lava votala se vanghenile misaveni, lava vangapfumeliki lesvaku Yesu Kriste atile tani hi munhu. Lweyi avulaka svosvo i mukanganyisi nasvona i Antikriste. Hikolaho tivoneleni n'wina ha n'wexe, lesvaku mingalahlekeliwi hi lesvi mingatikarhatela svona, kambe mikota kukuma hakelo leyi yimifanelaka. Mani na mani lweyi ayaka mahlweni hi kutsandzeka, angatiyiseli jondzweni ya Kriste, anga Xikwembu; lweyi atiyiselaka jondzweni ya Kriste, lweyo ana Tatana ni N'wana. Loko munhu wokarhi ata ka n'wina, kambe angatisi jondzo leyi, mingatshukeni mimuyamukela mintini ya n'wina, nasvona mingatshukeni mimuxeweta. Hikuva lweyi axewetaka munhu wotanu atwanana ni mintirho ya yena leyobiha. Ni ni lesvotala kumitsalela, ntsena anilavanga kusviyendla hi papela ni tinta; kambe nilangutela kuta koseyo, nitavulavula na n'wina hi nomo, na hili karhi hivonana, lesvaku kutsaka ka hina kuva loku kuhetisekeke. Avana va makwenu, lweyi anga muhlawuliwa waxisati, vakurungula. Mina mukulukumba nitsalela wena Gayo murhandziwa, lweyi mina nimurhandzaka hi ntiyiso. Murhandziwa, ninavela kuva ukateka timhakeni hinkwatu, nasvona uva ni vutomi, uva lweyi atsakeke svinene mirini; nasvitiva lesvaku moya wa wena wutsakile. Hakunene nitsakile ngopfu loko vamakwerhu lava vateke koseyo vavekile vumboni henhla ka ntiyiso wa wena ni lesvi uhanyisaka xisvona ntiyisweni. Loko nitwa lesvaku vana va mina vahanya ntiyisweni, ka mina aku na kutsaka kun'wana loku kutlulaka koloko. Murhandziwa, ukomba kutshembeka ka wena ka hinkwasvu lesvi usviyendlaka, loko upfuna vamakwenu, ngopfungopfu ni lava ungavativiki. Vapfhumba lava hi vona vavuleke vumboni bza rirhandzu ra wena mahlweni ka vanhu va kereke. Utava uyendla svona loko uvalongelela timbuva ta vona, hilaha svifanelaka hakona mahlweni ka Xikwembu. Hikuva hi vito ra xona vahumile makaya ya vona, na vangatekanga nchumu ka vamatiko. Hikolaho, svahifanela kuyamukela vanhu votanu, lesvaku hitava lava hitirhisanaka na vona ntiyisweni. Nitsalela kereke timhaka tin'wana, kambe Diyotrefa, lweyi arhandzisaka kuva worhanga xikarhi ka vona, angahiyamukeli. Hikolaho, loko nita, nitapaluxa lesvi asviyendlaka, hikuva wahihleva hi timhaka tobiha. Handle ka svona svosvo, ayala ni kuyamukela vamakwerhu, atlhela asivela lava vanavelaka kuvayamukela, avahlongola ni le kerekeni. Murhandziwa, ungatekeleli mikhuva leyi yobiha, kambe tekelela leyi yosaseka. Lweyi ayendlaka lesvinene i wa Xikwembu; kambe lweyi ayendlaka lesvobiha angavonanga Xikwembu. Vanhu hinkwavu vanyika vumboni lebzinene ha Demetriyo; kunene svosvo i ntiyiso hi xiviri; na hina hiveka vumboni bza svona kutani wasvitiva lesvaku vumboni bza hina i bza ntiyiso. Anili ni svinyingi svokutsalela, ntsena anilavi kukutsalela na nitirhisa tinta ni risiva. Kambe, nitshemba lesvaku nitahantla nikuvona kungali khale, kutani hitavulavula hi milomo, na hi vonana. Kurhula akuve na wena.Vanakulorhi hinkwavu vakurungula. Rungula vanakulorhi hinkwavu hi mavito ya vona. Mina Yuda, nandza wa Yesu Kriste ni makwavu wa Yakobe, nitsalela lava Xikwembu Tatana xivavitaneke, lavahanyaka rirhandzwini ra xona, na vali karhi vahlayisiwa hi Yesu Kriste, nili: Musa, ni kurhula, ni rirhandzu, asvive na n'wina hi ntalu. Varhandziwa, aninavela ngopfu kumitsalela timhaka ta kuponisiwa lokunga ka hina hinkwerhu, kambe nikumile lesvaku svanifanela kumitsalela nimikhongotela kulwela vupfumeli lebzi Xikwembu xibzinyikeke kan'we vahlawuliwa va xona. Hikuva vanhu van'wana vangungumelile vanghena xikarhi ka hina; kuyavanyisiwa ka vona kulungisiwe khale. I vanhu lavangaliki na mhaka ni vukhongeli; vahundzula timpsalu ta Xikwembu xa hina, vayendla sva manyala ha tona, nasvona valandzula Yesu Kriste, yena N'winyi wa hinkwasvu ni Hosi ya hina. Hambilesvi mitivaka svinene timhaka leti, ninavela kumitsundzuxa lesvaku Hosi yiponisile Vaisrayele, yivahumesa tikweni ra Gibita, kambe ndzhaku ka svosvo, yihelisile lava vangapfumelangiki. Nasvona ku ni tintsumi letingahlayisangiki xiyimu xa tona, kambe tisukile laha akuli kaya ka tona; hi kolaho, Xikwembu xibohile tintsumi takona hi machini, xitipfalela hilaha kungaheliki xinyameni lexichavisaka, tirindzela siku lerikulu ra kuyavanyisiwa. Svahafana na Sodoma na Gomora, ni madoropa lawa amali kusuhi na wona, lawa amahanya vuwosvini kufana ni tintsumi letiya ni kutinyiketa kunaveleni ka sva manyala: Madoropa lawaya svosvi mahundzuke xitsundzuxu hi kubiwa mahisiwa hi ndzilo lowungaheliki. Na vona vanhu lava, vahanyisa xisvosvo: Vanyamisa miri wa vona hi milorho ya vona. Ava na mhaka ni vuhosi bza Xikwembu, vasandza ni matimba ya svivumbiwa sva le tilweni. Kasi Mikayele ntsuminkulu, loko alwetana na Diyavulosi vaphikizana hi ntsumbu wa Moxe, achavile kuyavanyisa Diyavulosi ni kuhumesa marito ya kumusandza, kambe ate: “AHosi ayikutshinye!” Kambe vanhu lava vasandza xihi na xihi lexi vangaxitwisisiki, kutani vayendla svilo lesvi vasvitivaka hi ntumbuluku kufana ni sviharhi sva nhova; hi svona lesvi svivalovisaka. Vabuyagwana! Hikuva vakhomile ndlela ya Kayini; hi kunavela bindzu, vatinyiketa mintirhweni leyohomboloka ya Balamu, vatilovisa hi vupfukeli bzofana ni bza Kora. Vanhu lava i svivati minkhubzeni ya n'wina ya rirhandzu, loko vali karhi vacina vanwa ngopfu na vangali na tingana, vatiphina voxe. I marefu lawa mangahava mpfula, lawa mayisiwaka hala ni hala hi kuhunga ka mimoya; i minsinya ya vuxika yopfumala mihandzu, leyidlayiweke kambirhi hi kutsuvuliwa ni timintsu; i magandlati yoleva ya lwandle, lawa matlhutlhaka khuvi ra tingana ta vona; i tinyeleti totsendzeleka letihlayiseliweke munyama lowukulu ngopfu, hilaha kungaheliki. Avile Enoke, munhu wa rixaka ra vuntlhanu kusukela ka Adamu, lweyi aprofeteke mayelanu ni vanhu volavo aku: “Vonani, Hosi yifikile ni vakwetsimi va yona va madzanadzana, kutayavanyisa hinkwavu, ni kukholwisa hinkwavu va ka vona lavangaliki ni vukhongeli henhla ka mintirho ya vona hinkwayu leyi vayiyendleke hi kusandza, ni le henhla ka marito hinkwawu ya vusandzi lawa vajohi lavangaliki ni vukhongeli vamavuleke henhla ka yona.” Lava i vanhu votshamela kungurangura ni kuvilela, lavasusumetiwaka hi kunavela ka vona lokobiha, vanhu vamanyunyu lavatikulisaka, lavakanganyisaka van'wana hi kuvabumabumela, kasi valava kuvuyeliwa. Kambe n'wina varhandziwa, mifanele kutsundzuka lesvivuliweke khale hi vapostola va Hosi ya hina Yesu Kriste; vamibzelile vaku: “Minkarhini leyohetelela, kutahumelela vasandzi lavasusumetiwaka hi kunavela ka vona lokobiha vangachavi Xikwembu.” Hi vona vavangaka kuyavana ka vanhu; hikuva i vanhu lavafambisiwaka hi kunavela ka nyama, ava na Moya. Kambe n'wina, varhandziwa, tiyakeni kupfumeleni ka n'wina lokokwetsima ngopfu, Khongelani hi matimba ni Moya Lowokwetsima. Tshamani rirhandzwini ra Xikwembu. Langutelani musa wa Hosi ya hina Yesu Kriste lowuyisaka vuton'wini lebzingaheliki. Twelani vusiwana lavakanakanaka. Ponisani van'wana hi kuvawutla ndzilweni; van'wana mivatsetselela na mili ni kutivonela: Mifanela kunyenya hambi ali sviyambalu sva vona svinene, lesvinyamisiweke hi sva misava leyi. Eka yena lweyi anga ni matimba ya kumihlayisa lesvaku mingakhunguvanyeki miwa, ka yena lweyi akwetsimaka, lweyi akotaka kumiyimisa mahlweni ka yena na mingali na xivati, na mitsakile svinene kutwalisiweni ka yena. Ka xona Xikwembu xili xin'we, muponisi wa hina ha Yesu Kriste Hosi ya hina, ku ni kutwala, ni vukulukumba, ni kufuma, ni matimba, kusukela minkarhini hinkwayu leyihundzeke, ni svosvi, ni hilaha kungaheliki. Amen. Loku i kuhlavutela ka Yesu Kriste, loku Xikwembu ximunyikeke kona, lesvaku atakomba malandza ya yena svilo lesvi svifanelaka kuhumelela kungali khale. Kriste asvitivisile hi kurhumela ntsumi ya yena ka Yohani nandza wakwe. Hi kurungula hinkwasvu lesvi asvivoneke, Yohani aveka vumboni henhla ka Rito lerihumaka ka Xikwembu, ni le henhla ka ntiyiso ya lesvivuliwaka hi Yesu Kriste. Kukatekile munhu lweyi ahlayaka mahungu ya vuprofeta lebzi, kukatekile ni lava vamayingisaka, ni kulandza lesvitsaliweke bukwini leyi; hikuva nkarhi wa kuhumelela ka svona wu le kusuhi. Mina Yohani nitsalela tikereke ta ntlhanu ni timbirhi letinga tikweni ra Aziya, nili: Timpsalu ni kurhula asvive na n'wina, svihuma ka lweyi anga kona, lweyi aali kona, lweyi angatata; svihuma ni le ka mimoya ya ntlhanu ni yimbirhi leyinga mahlweni ka xiluvelo xa yena, ni le ka Yesu Kriste, mboni leyotshembeka, mativula ya lavafeke ni mufumi wa tihosi ta misava. Ka lweyi ahirhandzaka, lweyi ahitshunxeke svijohweni sva hina hi ngati ya yena, ahiyendla tiko, ni kuva vaprista lavatirhelaka Xikwembu Tatana wa yena, ka yena Kriste akuve kudzuneka ni matimba, hilaha kungaheliki! Amen. Vonani, wata ni marefu! Mahlo hinkwawu matamuvona, hambi lava vamutlhaveke. Tinxaka hinkwatu ta vanhu va misava titaba nkosi tirila hikolaho ka yena, hakunenenene! Amen. “Hi mina Alfa na Omega”, wosungula ni wa makumu, kuvula Hosi Xikwembu “lweyi anga kona, lweyi aali kona, lweyi angatata, lweyi wa matimba hinkwawu.” Mina Yohani, ninga makwenu ni nakuloni maxangweni, ni le Mfun'wini, ni le kulehiseni ka mbilu ka Yesu Kriste, anili xihlaleni lexivuliwaka Patmosi, hi mhaka ya Rito ra Xikwembu ni kutiyisa vumboni bza Yesu. Kutani, hi siku ra Hosi, anikumeka Moyeni, ni twa rito lerihuwelelaka hi le ndzhaku ka mina, ripfuma kufana ni mhalamhala, riku: “Tsala bukwini lesvi usvivonaka, kutani uyirhumela tikerekeni leti ta ntlhanu ni timbirhi: Kereke ya le Efesa ni ya le Smirna ni ya le Pergamo ni ya le Tiyatira ni ya le Sarda ni ya le Filadelfiya ni ya le Lawudokiya.” Kutani nihundzukula, nilava kuvona lweyi avulavulaka na mina. Loko nihundzukulile, nivona svitlhomativoni sva ntlhanu ni svimbirhi sva golidi, ni mun'we wofana ni N'wana-wa-Munhu na ayimile xikarhi ka svona, ayambale xiyambalu lexifikaka milengeni ya yena, na ali ni bandi ra golidi xifuveni xa yena. Misisi ni nhloko ya yena ayibasile kufana ni voya bza tinyempfu, yifana ni gapongo. Matihlo ya yena amafana ni malangavi ya ndzilo. Minkondzo ya yena ayifana ni koporo leyihundzeke hi le ndzilweni yitlhela yipolichiwa, yivangama. Rito ra yena arifana ni mpfumawulu wa mati lawa yotala. Vokweni ra yena ra xinene aatamelile tinyeleti ta ntlhanu ni timbirhi; non'weni wa yena akuhuma tlhari lerilotiweke ka matlhelo ha mambirhi; nghohe ya yena ayifana ni jambu loko rivangama ninhlekanhi. Loko nimuvona, niwela milengeni ya yena, nifana ni munhu lweyi afeke. Kambe yena atlhanteka voko ra xinene henhla ka mina, aku: Ungachavi! Ni lweyi wosungula ni lweyi wogamesa, ni lweyi ahanyaka. Anifile, kambe vona, svosvi ni lweyi ahanyaka hilaha kungaheliki. Ni ni makhiya ya rifu ni ya hayidisi. Hikolaho, tsala lesvi usvivonaka, svinga lesvinga kona svosvi ni lesvingatahumelela ndzhaku ka svona. Xihundla xa tinyeleti leti ta ntlhanu ni timbirhi leti utivoneke vokweni ra mina ra xinene, ni xihundla xa svitlhomativoni sva ntlhanu ni timbirhi ta golidi, hi lexi: Tinyeleti ta ntlhanu ni timbirhi i tintsumi ta tikereke ta ntlhanu ni timbirhi, kutani svitlhomativoni sva ntlhanu ni timbirhi i tikereke takona ta ntlhanu ni timbirhi. Tsalela ntsumi ya kereke ya le Efesa, uku: Marito ya lweyi atamelaka tinyeleti ta ntlhanu ni timbirhi vokweni ra yena ra xinene, lweyi afambaka xikarhi ka svitlhomativoni sva ntlhanu ni svimbirhi sva golidi, hi lawa: Nitiva mintirho ya wena, ni kutikarhata ka wena, ni kutiyisela ka wena. Nitiva lesvaku awukoti kutwanana ni vanhu lavohomboloka; nasvona uxiyaxiyile svinene lavativulaka vapostola, na vangali vona, kutani usvivonile lesvaku vahemba. Nasvona waxaniseka kambe watiyisela; utwisiwe kuvaviseka hikolaho ka vito ra mina, kambe awukarhalanga. Hambi svilitano, ku ni lexi univilelisaka ha xona: Hi lesvaku utshikile rirhandzu leri awuli na rona kusunguleni. Hikolaho-ke, tsundzuka laha ungawa kona, kutani hundzuka uvuyela mintirhweni leyi awuyiyendla kusunguleni. Loko svingalitano, nitata ka wena, nitasusa xitlhomativoni xa wena laha xinga kona, loko ungahundzuki. Hambi svilitano, lesvinene lesvi unga na svona hi lesvi: Uvenga mintirho ya Vanikolayiti, leyi na mina niyivengaka. Lweyi anga ni tindleve aayingise lesvi Moya wusvibzelaka tikereke. Lweyi angatahlula, nitamunyika kuja mihandzu ya nsinya wa vutomi lowunga Paradiseni ya Xikwembu. Tsalela ni ntsumi ya kereke ya le Smirna, uku: Marito ya lweyi wosungula ni lweyi wogamesa, lweyi afeke atlhela apfuka, hi lawa: Nitiva maxangu ya wena ni vusiwana bza wena (kambe u xipfundzi), nitiva ni kusandziwa ka wena hi lava vativulaka Vayuda, na vangali vona, kambe na vali va Sinagoga ya Sathana. Ungachavi lesvinga kusuhi ni kukutwisa kuvava. Vona, Diyavulosi alava kuhoxa van'wana va n'wina jele, lesvaku mitaringiwa, kutani mitava ni kuxaniseka loku kungataheta khume ra masiku. Vana lweyi atshembekaka kufika kufeni, kutani mina nitakunyika hari ya vutomi. Lweyi anga ni tindleve aayingise lesvi Moya wusvibzelaka tikereke. Lweyi ahlulaka, angakala angavavisiwi hi rifu ra vumbirhi. Tsalela ni ntsumi ya kereke ya le Pergamo, uku: Marito ya lweyi anga ni tlhari lerilotiweke hi matlhelo ha mambirhi, hi lawa: Nitiva laha uyakeke kona, laha xiluvelo xa Sathana xinga kona, ukhome svitiya vitweni ra mina, nasvona awulandzulanga kupfumela ka wena ka mina, hambi masikwini ya kudlayiwa ka Antipasi, mboni ya mina leyotshembeka leyidlayiweke xikarhi ka n'wina, laha Sathana ayakeke kona. Kambe, ku ni svilo svingali svingani lesvi univilelisaka hi svona: Hi lesvaku ku ni van'wana lava unga na vona kolaho, lavakhomeleleke jondzweni ya Balamu, lweyi akuceteleke Balaka kurhiya mintlhamu mahlweni ka Vaisrayele, lesvaku vaja svakuja sva timhamba lesvihumeseliweke svikwembu sva hava, vayendla ni vuwosvi. Hi mukhuva wolowo na wena u ni van'wana lava valandzelaka jondzo ya Vanikolayiti. Hundzuka ke! Loko ungahundzuki, nitahantla nikutela koseyo, nitalwa ni vanhu vakona hi tlhari ra nomo wa mina. Lweyi anga ni tindleve, aayingise lesvi Moya wusvibzelaka tikereke. Lweyi angatahlula, nitamunyika kuja amana leyifihliweke; nasvona nitamunyika ribze lerobasa, leri vito lerimpsha ritsaliweke henhla ka rona, vito leri kungaliki na lweyi aritivaka handle ka lweyi anyikiwaka rona. Tsalela ni ntsumi ya kereke ya le Tiyatira, uku: Marito ya N'wana wa Xikwembu, lweyi anga ni mahlo lawa mafanaka ni malangavi ya ndzilo, lweyi minkondzo ya yena yifanaka ni koporo leyipolichiweke, hi lawa: Nitiva mintirho ya wena, rirhandzu ra wena ni kutshembeka ka wena, ni migingiriko ya wena, ni kutiyisela ka wena, ni lesvaku mintirho ya wena ya svosvi yitlula leyosungula. Kambe ku ni lexi univilelisaka hi xona: Hi lesvaku utshika Jezabele, wansati lweyi ativulaka muprofeta, aya mahlweni ni mintirho ya yena, kasi ajondzisa ni kukanganyisa malandza ya mina kuyendla vuwosvi ni kuja svakuja lesvihumeseliweke svikwembu sva hava. Nimunyikile nkarhi lesvaku ahundzuka, kambe wayala kuhundzuka atshika vuwosvi bza yena. Vona, nitamuwisela sangwini ra mavabzi, kutani lavayendlaka vuwosvi na yena nitavavangela maxangu lamakulu, loko vangahundzuki vatshika kuyendla lesvi vasviyendlaka. Nitadlaya vana va yena, kutani tikereke hinkwatu titativa lesvaku hi mina lweyi akambisisaka miyanakanyu ni timbilu. Kutani nitayavanyisa mun'wana ni mun'wana hi kuya hi mintirho ya n'wina. Kambe n'wina ni van'wana va le Tiyatira, lavangafambiki mayelanu ni jondzo leyi, n'wina mingajondzangiki lesvi van'wana vasvivulaka svihundla sva kuyeta sva Sathana, nili ka n'wina: Anahamirhwexi ndzhwalu wun'wana. Ntsena khomani svitiya ka lesvi minga na svona, kukondza nita. Lweyi ahlulaka ni kuhlayisa mintirho ya mina kufikela makumu, nitamunyika matimba yofuma matiko, kutani atamarisa hi nhonga ya nsimbi, amafayetela kukota timbita ta vumba, kufana ni lesvi na mina hi xiviri ninyikiweke matimba ya kufuma hi Tatana wa mina. Kutani nitamunyika nyeleti ya mixo. Lweyi anga ni tindleve aayingise lesvi Moya wusvibzelaka tikereke. “Tsalela ni ntsumi ya kereke ya le Sarda, uku: “‘Marito ya lweyi anga ni mimoya ya ntlhanu ni yimbirhi ya Xikwembu ni tinyeleti ta ntlhanu ni timbirhi, hi lawa: Nitiva mintirho ya wena: U ni vito ra lesvaku wahanya, kuve ufile. Pfuka uhiteka, utiyisa lesvisaleke, lesvinga kusuhi ni kufa, hikuva anikumanga mintirho ya wena na yihetisekile mahlweni ka Xikwembu. Svosvi-ke, tsundzuka lesvi usviyamukeleke ni kusvitwa; svihlayise, uva uhundzuka. Loko ungapfuki uhiteka, nitata kufana ni muyivi, kutani awungatawutiva nkarhi lowu ningatata ka wena ha wona. Nasvona, wahasele ni mavito ya vanhu vangali vangani le Sarda, lava vanganyamisangiki sviyambalu sva vona. Kutani vatafamba na mina na vayambalile sva kubasa, hikuva svivalulamelile. Lweyi angatahlula, atayambexiwa hi mukhuva wolowo, anyikiwa sviyambalu lesvobasa. Aningasusi vito ra yena bukwini ya vutomi, nitativisa vito rakona mahlweni ka Tatana wa mina ni le mahlweni ka tintsumi ta yena. “‘Lweyi anga ni tindleve aayingise lesvi Moya wusvibzelaka tikereke.’ “Tsalela ni ntsumi ya kereke ya le Filadelfiya, uku: “‘Lweyi akwetsimeke, lweyi anga wa ntiyiso, lweyi atameleke khiya ra Davhida, lweyi apfulaka kungapfali munhu, lweyi apfalaka kungapfuli munhu, avula svosvo ali: Nitiva mintirho ya wena. Vona, nivekile mahlweni ka wena xipfalu lexipfulekeke, lexi kungaliki na mun'we lweyi angakotaka kuxipfala. Nasvitiva lesvaku matimba ya wena i matsongo, kambe rito ra mina urihlayisile, ni vito ra mina awuriyalanga. Vona, loko vali va ntlawa wa ka Sathana, vahembi lavativulaka Vayuda kuve ahi vona, nitayendla lesvaku vata, vatakhinsama mahlweni ka wena vakugandzela; vatativa lesvaku nikurhandzile. Lesvi ungahlayisa rito ra mina ra lesvaku ufanela kutiyisela, na mina nitakusirhelela nkarhini wa ndzingo lowu wungatata misaveni hinkwayu, kutaringa vayaki va misava. Nitata kungali khale. Hlayisa lesvi unga na svona, lesvaku kungavi na lweyi angatakutekela hari ya wena. Lweyi angatahlula, nitamuyendla nsika leyikulu Tempeleni ya Xikwembu xa mina, kutani angakala angahumesiwi ka yona. Nitatsala henhla ka yena vito ra Xikwembu xa mina, ni Vito ra doropa ra Xikwembu xa mina, anga Yerusalema lwemumpsha leri rixikaka hi le tilweni rihuma ka Xikwembu xa mina; nitatsala ni vito lerimpsha ra mina henhla ka yena. “‘Lweyi anga ni tindleve, aayingise lesvi Moya wusvibzelaka tikereke.’ “Tsalela ni ntsumi ya kereke ya le Lawudokiya, uku: “‘Marito ya lweyi anga Amen, mboni leyitshembekeke ya ntiyiso, masungulu ya lesvitumbuluxiweke hi Xikwembu, hi lawa: Nitiva mintirho ya wena, ni lesvaku awutitimeli, nasvona awuhisi. Asvitayampsa loko awutitimela, kumbe uhisa. Kambe lesvi ukufumelaka, ungahisiki, nasvona ungatitimeliki, nitakukampfula non'weni wa mina. Uvula lesvaku ufuwile, nakona u mufuwi, awupfumali nchumu, kasi awusvitivi lesvaku u mutsandzeki ni muxaniseki ni xisiwana ni xifamahlo ni lesvaku awuyambalanga nchumu! Loko svilitano, nakukhutaza lesvaku uxava ka mina golidi leyi yibasisiweke yiva yisasekisiwa hi ndzilo, lesvaku uva xipfundzi; xava ni sviyambalu svobasa lesvaku usviyambala, ufunengeta tingana ta vusveti bza wena lesvaku bzingavoneki; xava ni murhi wotota mahlo ya wena lesvaku utakota kuvona. Nitshinya ni kukhatisa lava nivarhandzaka; hikolaho, tikarhate uhundzuka! Vona, niyimile nyangweni, nagongondza. Loko munhu atwa rito ra mina apfula xipfalu, nitanghena kaya ka yena nija na yena, na yena ataja na mina. Lweyi ahlulaka, nitamunyika kutshama na mina xiluvelweni xa mina, kukotisa lesvi na mina hi xiviri nihluleke, kutani nitshamaka ni Tatana wa mina xiluvelweni xa yena. “‘Lweyi anga ni tindleve, aayingise lesvi Moya wusvibzelaka tikereke.’” Ndzhaku ka svosvo, nilangutile, kutani nivona xipfalu lexipfulekeke le tilweni. Kutani rito leri ningaritwa kusunguleni loko rivulavula na mina, na rifana ni mhalamhala, riyengeta riku: “Tlhantuka uta halenu, kutani nitakukomba lesvifanelaka kuhumelela ndzhaku ka lesvi.” Hi nomo-lo nitala hi Moya, kutani nivona xiluvelo na xivekiwile tilweni. Akutshamile munhu xiluvelweni. Lweyi aatshamile ka xona aalanguteka kufana ni ribze ra nkoka ra “xjaxpe” ni ra “sardoni”, kutani xiluvelo axirhendzeliwile hi nkwangulatilo lowu wulangutekaka kufana ni “exmeralda”. Xiluvelo axirhendzeliwile hi sviluvelo svin'wana sva makume mambirhi ni mune, na kutshamile vakulukumba va makume mambirhi ni mune ka svona, lava avayambele sviyambalu lesvobasa, na vali ni tihari ta golidi tinhlokweni. Xiluvelweni akuhuma kuhatimahatima ni kudzindza ka tilo; kutani mahlweni ka xiluvelo akupfurha ndzilo ka tivoni ta ntlhanu ni timbirhi, yinga mimoya ya ntlhanu ni yimbirhi ya Xikwembu. Nakona mahlweni ka xiluvelo, akuli ni lesvifanaka ni lwandle ra nghilazi, rovangama tani hi “krixtali”. Xiluvelo axirhendzeliwile hi svivumbiwa lesvihanyaka sva mune, lesvi asvili ni mahlo lawa yotala mahlweni ni le ndzhaku. Xivumbiwa xohanya lexosungula axifana ni nghonyama; xa vumbirhi axifana ni rhole; xa vunharhu axili ni nghohe yofana ni ya munhu; kutani xa vumune axifana ni gama lerihahaka. Xivumbiwa xin'wana ni xin'wana xa lesvihanyaka sva mune, axili ni timpapa ta ntlhanu na rin'we letingatala hi mahlo hinkwaku, ndzeni ni le handle. Kutani asviyimbelela vusiku ni nhlekanhi na svingamiyeli, sviku: “Wakwetsima, wakwetsima, wakwetsima, lweyi anga Hosi Xikwembu xa matimba hinkwawu, lweyi aali kona, lweyi anga kona, lweyi angatata.” Nkarhi wihi ni wihi loko svivumbiwa lesvihanyaka svili karhi sviyimbelela tinsimu totwalisa, ni kudzunisa, ni kukhensa lweyi atshameke xiluvelweni, anga lweyi ahanyaka hilaha kungaheliki, vakulukumba lava va makume mambirhi ni mune avakhinsama mahlweni ka lweyi atshameke xiluvelweni, vagandzela yena lweyi ahanyaka hilaha kungaheliki, vahoxa tihari ta vona mahlweni ka xiluvelo, vayimbelela vaku: “Svakufanela we Hosi, Xikwembu xa hina, kuyamukela kutwala, ni kudzunisiwa, ni matimba, hikuva hi wena Muyendli wa svilo hinkwasvu, kutani hi kurhandza ka wena svitumbulukile, svikuma kuhanya.” Kutani nivona buku vokweni ra xinene ra yena lweyi atshameke xiluvelweni; ayitsaliwile ndzeni ni le handle, yilemiwile hi mimfungu ya ntlhanu ni yimbirhi. Nivona ni ntsumi leyi ya matimba, leyihuwelelaka i rito leritlakukeke yiku: “Xana i mani lweyi afanekeliwaka hi kunamula mimfungu, apfula buku ke?” Kambe akuvanga na mun'we tilweni, hambi misaveni, kumbe hansi ka misava, lweyi akoteke kupfula buku alanguta ndzeni ka yona. Kutani nirila hi xiviti hi mhaka ya lesvi kungapfumaleka ni mun'we lweyi afanekeliwaka hi kupfula buku kumbe kulanguta ndzeni ka yona. Hi loko mun'we wa vakulukumba aku ka mina: “Ungarili. Vona, Nghonyama ya rixaka ra ka Yuda, Rimintsu ra Davhida, yihlulile, akuva yikota kupfula buku ni mimfungu ya rona ya ntlhanu ni yimbirhi.” Kutani nivona Xinyempfana na xiyimile xiluvelweni, xirhendzeliwile hi svivumbiwa lesvihanyaka sva mune ni vakulukumba, na xona xili xikarhi. Xinyempfana axivoneka onge hi loko xitshama xidlayiwa; axili ni timhondzo ta ntlhanu ni timbirhi, ni mahlo ya ntlhanu ni mambirhi, lawa manga mimoya ya ntlhanu ni yimbirhi ya Xikwembu leyirhumeliweke misaveni hinkwayu. Xinyempfana lexi, xiya xiyateka buku leyi ayili vokweni ra xinene ra lweyi atshameke xiluvelweni. Loko xitekile buku, svivumbiwa lesvihanyaka sva mune ni vakulukumba va makume mambirhi ni mune vakhinsama mahlweni ka Xinyempfana. Mun'wana ni mun'wana wa vona aali ni harpa, ni mindzheko ya golidi leyitaleke hi b'aso ronun'hwela, yinga mikhongelo ya vakwetsimi. Vayimbelela risimu lerimpsha vaku: “Afanekeliwa hi kuteka buku ni kupfula mimfungu ya yona, hikuva aadlayiwile, kutani hi ngati ya yena, axavile vanhu avaxavela Xikwembu, vahuma tinxakeni hinkwatu, na vali va tindzimi hinkwatu ni svib'ongo hinkwasvu ni va matiko hinkwawu.” “Avayendlile tiko, ni kuva vaprista lavatirhelaka Xikwembu xa hina, kutani vatafuma misaveni.” Hi loko nilanguta, kutani nitwa rito ra tintsumi letotala, ta magidigidi, tirhendzele xiluvelo ni svivumbiwa lesvihanyaka sva mune ni vakulukumba. Atihuwelela hi rito leritlakukeke tiku: “Xinyempfana lexitshamaka xidlayiwa, xafaneliwa hi kunyikiwa matimba ni vuhosi ni vutlhari ni ntamu ni kudzuneka ni kutwala, ni kukhensiwa.” Kutani nitwa svivumbiwa lesvinga tilweni ni la misaveni ni le hansi ka misava ni le lwandle, svinga svivumbiwa hinkwasvu sva ntumbuluku hinkwawu, svili karhi svikhensa sviku: “Ka lweyi atshameke xiluvelweni ni le ka Xinyempfana, akuve kukhensiwa ni kudzuneka ni kutwala ni matimba, hilaha kungaheliki.” Svivumbiwa lesvihanyaka sva mune svihlamula sviku: “Amen!” Kutani vakulukumba vakhinsama vagandzela. Kutani nivona Xinyempfana loko xili karhi xipfula mfungu wosungula ka leyi ya ntlhanu ni yimbirhi, kutani nitwa xin'we ka svivumbiwa lesvihanyaka sva mune xivula hi rito leridzindzaka kufana ni tilo, xiku: “Tana!” Nilanguta, kutani nivona hanchi lerobasa. Lweyi agadeke rona aakhomile vurha, anyikiwile ni hari ya vuhosi, ahuma kukota nhenha leyiyaka kuhluleni. Loko Xinyempfana xipfulile mfungu wa vumbirhi, nitwa xivumbiwa lexihanyaka xa vumbirhi xiku: “Tana!” Kutani hanchi rin'wana rihuma. Arili ropshuka; mugadi wa rona aanyikiwile matimba yopfuxa tinyimpi misaveni, lesvaku vanhu vadlayana; aanyikiwile ni ripanga lerikulu. Loko Xinyempfana xipfulile mfungu wa vunharhu, nitwa xivumbiwa lexihanyaka xa vunharhu xiku: “Tana!” Nilanguta, kutani nivona hanchi ra ntima. Mugadi wa rona aatamele xikalu xa kupima vokweni ra yena. Kutani nitwa xofana ni rito lerihumaka ka svivumbiwa lesvihanyaka sva mune, riku: “Mpimo wa trigu utaxaviwa hi denari rin'we ntsena; ni mimpimo yinharhu ya maxalana yitaxaviwa hi denari rin'we ntsena; kambe ungawonhi mafurha ya maolivha ni vhinyu.” Loko Xinyempfana xipfulile mfungu wa vumune, nitwa xivumbiwa lexihanyaka xa vumune xiku: “Tana!” Nilanguta, kutani nivona hanchi ra halandi. Mugadi wa rona aavuliwa “Rifu” ni lweyi vange i “Tihele” aamulandzelela. Avanyikiwile matimba henhla ka sva xikhemu xin'we xa vumune xa misava, kusvidlaya hi tlhari ni jandza ni ntungu ni hi sviharhi sva nhova. Loko Xinyempfana xipfulile mfungu wa vuntlhanu, nivona hansi ka alitari mimoya ya lava avadlayiwile hi mhaka ya kutwalisa Rito ra Xikwembu ni hikolaho ka kuveka vumboni bza vona. Avahuwelela hi rito leritlakukeke vaku: “Wena Hosi ya matimba hinkwawu, wena wokwetsima, wa ntiyiso, svahatateka nkarhi muni kufika laha ungatalondza ni kuyavanyisa vayaki va misava hi mhaka ya ngati ya hina xana?” Kutani mun'wana ni mun'wana wa vona anyikiwa xiyambalu xoleha lexobasa; vabzeliwa kuya mahlweni ni kuhumula nkarhinyana kambe, kukondza kuhetiseka ntsengo wa malandzakulobze ni vamakwavu, lava vangatadlawa kufana na vona. Kutani nilanguta loko Xinyempfana xipfula mfungu wa vuntlhanu ni wun'we. Kuva ni kutsekatseka lokukulu ka misava; jambu rihundzuka ra ntima, rifana ni saka rokhwaxa, n'weti wuhundzuka wopshuka kufana ni ngati. Tinyeleti ta tilo tiwela misaveni tifana ni makuwa ya mambisi loko majujiwa hi moya wa matimba lowu wuhlakahlaka nkuwa wakona. Kutani tilo risusiwa kufana ni buku loko risongiwa. Loko risongiwile tintshava hinkwatu ni svihlale hinkwasvu svisusiwa tindhawini ta svona. Hi loko tihosi ta misava ni tindhuna ni vafambisi vatinyimpi ni vafumi ni vanhu va matimba, ni lavan'wana hinkwavu, svikarawa kumbe lavatshunxekeke, vatumbela timhakweni ni le hansi ka maribze ya tintshava. Vabzela tintshava ni maribze vaku: “Hiweleni henhla, mihifunengeta lesvaku lweyi atshameke xiluvelweni atakala angahivoni, ni vukarhi bza Xinyempfana bzitakala bzingahifikeli. Hikuva siku lerikulu ra vukarhi bza vona rifikile, kutani i mani lweyi angaritiyelaka xana?” Ndzhaku ka svosvo nivona mune wa tintsumi na tiyimile makhoneni ya mune ya misava, na tisivela mimoya ya mune ya misava, lesvaku ni wun'we wa yona wungahungi misaveni, kumbe lwandle, kumbe nsinyeni ni wun'we. Kutani nivona ntsumi yin'wana yitlhantuka hi tlhelo ra vuxa na yitamele mfungu wa Xikwembu lexi xihanyaka. Yivitana, hi rito leritlakukeke, tintsumi leti ta mune leti Xikwembu xitinyikeke matimba yowonha misava ni lwandle. Ntsumi yiku: “Mingawonheni misava, kumbe lwandle, kumbe minsinya, kukondza hiheta kufunga mimombo ya malandza ya Xikwembu xa hina.” Kutani nitwa ntsengo wa lavafungiweke: Avaringana dzana ni mune wa makume ni mune wa makhulu (144 000), wa vafungiwa lavahumaka tinyimbeni hinkwatu ta Vaisrayele. Rixaka ra ka Yuda, lavafungiweke avaringana khume wa makhulu ni makhulu mambirhi (12 000); rixaka ra ka Rubeni avaringana khume wa makhulu ni makhulu mambirhi (12 000); rixaka ra ka Gadi, khume wa makhulu ni makhulu mambirhi (12 000); rixaka ra ka Asere, khume wa makhulu ni makhulu mambirhi (12 000); rixaka ra ka Neftali, khume wa makhulu ni makhulu mambirhi (12 000); va ka Manase, khume wa makhulu ni makhulu mambirhi (12 000); va ka Simiyoni, khume wa makhulu ni makhulu mambirhi (12 000); va ka Levhi, khume wa makhulu ni makhulu mambirhi (12 000); va ka Isakara, khume wa makhulu ni makhulu mambirhi (12 000); va ka Zabuloni, khume wa makhulu ni makhulu mambirhi (12 000); va ka Yosefa, khume wa makhulu ni makhulu mambirhi (12 000); na vona va nyimba yaka Benjamini lavafungiweke, avaringana khume wa makhulu ni makhulu mambirhi (12 000). Ndzhaku ka svosvo, nilanguta, kutani nivona xitshungu lexikulu xa vanhu. Akungali na munhu lweyi akotaka kuvakonta. Avahuma matikweni hinkwawu, ni le tinxakeni hinkwatu, na vali va svib'ongo hinkwasvu ni va tindzimi hinkwatu. Avayimile mahlweni ka xiluvelo ni le mahlweni ka Xinyempfana na vayambale sviyambalu svoleha lesvobasa, na vatamele mincindzu mavokweni ya vona. Avahuwelela hi rito leritlakukeke vaku: “Kuponisiwa kuhuma ka Xikwembu xa hina lexitshameke xiluvelweni, ni le ka Xinyempfana!” Kutani tintsumi hinkwatu tiyima na tirhendzele xiluvelo ni vakulukumba ni svivumbiwa lesvihanyaka sva mune, tikhinsama tikorhama mahlweni ka xiluvelo, tigandzela Xikwembu, tiku: “Amen! Kuvongiwa, ni kutwala, ni vutlhari, ni kukhensiwa, ni kudzuneka, ni matimba, ni ntamu, asvive ka Xikwembu xa hina, hilaha kungaheliki! Amen.” Kutani mun'we wa vakulukumba anivutisa aku: “I vamani lava vayambaleke sviyambalu svoleha svakubasa xana? Nakona vahuma kwihi ke?” Niku ka yena: “Svotiviwa hi wena, Hosi yanga.” Hi loko aku ka mina: “Lava, hi lava vataka hi le kuxanisekeni lokukulu; vahlampseke sviyambalu sva vona, vasvibasisa sviva ni muhlovo wa ku svibasa hi ngati ya Xinyempfana.” “Hikolaho, va le mahlweni ka xiluvelo xa Xikwembu, vaxitirhela vusiku ni nhlekanhi atempeleni ya xona. Kutani lweyi atshameke xitshan'wini xa vuhosi, atayanamisa tabernakele ya yena ava kusuhi na vona avasirhelela. Avangahatwi ndlala kumbe torha, avangahahisiwi hi jambu hambi hi mumu, hikuva Xinyempfana lexinga Xitshan'wini xa Vuhosi xitava murisi wa vona; xitavayisa svihlobzeni sva mati ya vutomi, kutani Xikwembu xitasula minhloti hinkwayu ka mahlo ya vona.” Loko Xinyempfana xipfulile mfungu wa vuntlhanu ni yimbirhi, kumiyeliwa kuku zwee, letilweni, hi nkarhi lowulavaka kuringana hamfu ya wora. Hi loko nivona tintsumi ta ntlhanu ni timbirhi letiyimeke mahlweni ka Xikwembu, tinyikiwa timhalamhala ta ntlhanu ni timbirhi. Kutani ntsumi yin'wana yita yitayima kusuhi ni alitari, na yili ni ximbitana xa golidi; yinyikiwa b'aso rinyingi ronun'hwela, lesvaku yirihumesa svin'we ni svikhongelo hinkwasvu sva vakwetsimi, henhla ka alitari ya golidi leringa mahlweni ka Xitshamu xa Vuhosi. Musi wa b'aso ronun'hwela wutuvika wuya henhla svin'we ni svikhongelo sva vakwetsimi, kusukela vokweni ra ntsumi kuyafika mahlweni ka Xikwembu. Kutani ntsumi yiteka ximbitana xakona yixitata hi ndzilo lowuhumaka alitarini, kutani yixihoxa misaveni. Hi loko kuva ni kudzindza ka tilo, ni marito, ni kuhatimahatima, ni kutsekatseka ka misava. Kutani tintsumi leta ntlhanu ni timbirhi leti atili ni timhalamhala ta ntlhanu ni timbirhi, titilungisela kutichaya. Ntsumi yosungula yiba mhalamhala ya yona, kutani kuva ni marhalana ni ndzilo, na svipatsiwe ni ngati, sviwela misaveni; xikhemu xin'we ka svinharhu xa misava xipsha, ni xa vunharhu xa minsinya xipsha, ni bzanyi hinkwabzu bza rihlaza bzipsha. Ntsumi ya vumbirhi yiba mhalamhala ya yona, kutani xilo xokarhi lexifanaka ni ntshava leyikulu leyipfurhaka ndzilo, xihoxiwa lwandle. Kutani xikhemu xin'we xa vunharhu xa lwandle xihundzuka ngati. Kufa xikhemu xin'we xa vunharhu xa svivumbiwa lesvihanyaka sva le lwandle, kuwonheka ni xa vunharhu xa tingalawa. Ntsumi ya vunharhu yiba mhalamhala ya yona, kutani nyeleti leyikulu yiwa hi le tilweni yivuvumela kufana ni xisa xa ndzilo, yiwela henhla ka xikhemu xin'we xa vunharhu xa milambu, ni le svihlobzeni sva mati. Vito ra nyeleti yakona avaku i “Manono”, kutani xikhemu xin'we xa vunharhu xa mati xihundzuka manono, kutani vanhu lavotala vafa hi mati wolawo, hikuva amahundzukile lawa mabavaka svinene. Ntsumi ya vumune yiba mhalamhala ya yona, kutani xikhemu xin'we xa vunharhu xa jambu xitimeka, ni xa vunharhu xa n'weti, ni xa vunharhu xa tinyeleti, lesvaku xikhemu xin'we xa vunharhu xa kuvonakala ka svona xihundzuka xa ntima. Xikhemu xin'we xa vunharhu xa nhlekanhi xingahavoningi, sviva tano ni xa vunharhu xa vusiku. Loko nilanguta, nivona ni kutwa gama rihaha na riyimba hi rito leritlakukeke tilweni, riku: “Yowee! Yowee! Yowee ka vayaki va misava, loko timhalamhala letin'wana titachayiwa hi tintsumi letinharhu leti tahasaleke.” Ntsumi ya vuntlhanu yiba mhalamhala ya yona, kutani nivona nyeleti leyiweke hi le tilweni yiwela misaveni. Yinyikiwa khiya ra nomo wa khele royenta svinene rokala makumu, kutani yipfula nomo wa khele rakona, kuhuma musi lowufanaka ni wa xihogo lexikulu xa ndzilo. Jambu ni mpfhuka svisiviwa hi musi lowutuvikaka hi le non'weni wa khele. Kutani kuhuma tinjiya hi le ximusini tita misaveni, na tinyikiwile matimba yofana ni ya svipame sva laha misaveni. Tibzeliwile lesvaku tingawonhi bzanyi bza laha misaveni, hambi xihi na xihi lexi xinga xa rihlaza, kumbe nsinya wihi na wihi, kambe tifanela kuyela vanhu lavangaliki ni mfungu wa Xikwembu mimombzeni ya vona. Tipfumeleliwe kuvaxanisa hi kuvaluma ntlhanu wa tihweti, kambe tingavadlayi, kufehla ka vuhlungu bzakona bzifana ni kufehla ka xipame loko xiluma munhu. Masikwini walawo vanhu vatalava rifu, kambe avangarikumi; vatanavela kufa, kambe rifu ritavabaleka ritsutsuma rivasiya. Tinjiya takona ativonaka na tifana ni mahanchi lawa malungiseliweke kuya nyimpini. Tinhlokweni ta tona akuli ni svofana ni tihari, tivoneka tonge i ta golidi; xivumbeko xa nghohe ya tona axifana ni nghohe ya munhu. Misisi ya tona ayifana ni misisi ya vavasati, kasi matinyo ya tona amafana ni matinyo ya nghonyama. Atili ni lesvifanaka ni svisirhelelo sva nsimbi svifuveni sva tona, kutani mpfumawulu wa timpapa ta tona awufana ni mpfumawulu wa tin'qolo letotala ta mahanchi letitsutsumelaka nyimpini. Mincila ya tinjiya ayifana ni ya svipame na yili ni mindzhombo, kutani matimba ya tona, lawa amali mincileni ya tinjiya, amali ya kuvavisa vanhu hi ntlhanu wa tihweti. Atili ni hosi leyi yitifumaka, yinga ntsumi ya khele leri royenta svinene rokala makumu; vito ra yona hi Xiheberu i Abadoni, hi Xigirika vaku i Apoliyoni. Kuhundzile khombo rosungula, kambe vonani, kahata ra vumbirhi. Kutani ntsumi ya vuntlhanu ni yin'we yiba mhalamhala ya yona. Nitwa rito lerihumaka hi le timhondzweni ta mune ta alitari ya golidi leringa mahlweni ka Xikwembu. Yibzela ntsumi ya vuntlhanu ni yin'we leyinga ni mhalamhala, yiku: “Tshunxa tintsumi leti ta mune letibohiweke nambzeni lowukulu wa Ewufrata!” Kutani tintsumi leti ta mune leti atitilulamiselile na tirindzela nkarhi ni siku ni hweti ni lembe, titshunxiwa lesvaku tidlaya xikhemu xin'we xa vunharhu xa vanhu va misava. Ntsengo wa mab'uthu lawa amagadile mahanchi awuringana madzana mambirhi ya magidi (200 000 000); ntsengo wakona niwutwile hi tindleve. Hi svona lesvi ningasvivonisa xisvona sva mahanchi, ka xivono xa mina: Vagadi va wona avayambale svisirhelelo svifuveni lesvi asvifana ni ndzilo hi kupshuka, svili sva rihlaza kukota “xjasinto” ni xivavula. Tinhloko ta mahanchi atifana ni ta tinghonyama; milon'weni ya tona akuhuma ndzilo ni musi ni xivavula. Xiyenge xin'we xa vunharhu xa vanhu xidlayiwa hi mintungu leyi yinharhu; xidlayiwa hi ndzilo ni musi ni xivavula, svinga lesvi asvihuma milon'weni ya mahanchi. Matimba ya mahanchi amali milon'weni ya wona ni le mincileni ya wona, hikuva mincila yoleyo ayifana ni tinyoka, yili ni tinhloko, kutani mahanchi amakota kuluma hi yona. Vanhu hinkwavu lavangapona kudlayiwa hi mintungu leyi, avafularhelanga lesviyendliweke hi mavoko ya vona: Avatshikanga kugandzela madimoni ni svikwembu sva hava sva golidi ni sva silivhere ni sva koporo ni sva maribze ni sva mintsandza, lesvingavoniki, svingatwiki, hambi kuli kufamba svingafambiki. Avahundzukanga ka vudlayi, hambi ka vuloyi bza vona, hambi ka vuwosvi hambi ka vuyivi bza vona. Kutani nivona ntsumi yin'wana ya matimba yixika hi le tilweni na yiyambale refu, yili ni nkwangulatilo henhla ka nhloko ya yona; nghohe ya yona ayifana ni jambu, milenge ya yona ayifana ni timhandze ta ndzilo. Vokweni ra yona ayili ni xibukwana lexipfuliweke. Kutani yiveka nenge wa yona wa xinene ka lwandle, lowu wa ximantsi yiwuveka laha ka misava, yihuwelela hi rito leritlakukeke kufana ni loko nghonyama yibonga. Loko yihuwelelile, kutwakala kudzindza ka matilo ka ntlhanu ni ka mbirhi. Kuteloko matilo ya ntlhanu ni mambirhi madzindzile, ni tilulamisela kutsala, kambe nitwa rito lerihumaka tilweni riku: “Pfala hi mfungu lesvivuliweke hi kudzindza ka svingwalangwandza lesvi sva ntlhanu ni svimbirhi, kambe ungasvitsali.” Kutani ntsumi leyi niyivoneke na yiyimile lwandle ni ka misava, yitlakusela voko ra yona ra xinene tilweni, yihlambanya hi vito ra Lweyi ahanyaka hilaha kungaheliki, lweyi atumbuluxeke tilo ni lesvinga ka rona, ni misava ni lesvinga ka yona, ni lwandle ni lesvinga ka rona, kutani ntsumi yiku: “Akungahavi na kuhlwela, kambe masikwini ya rito ra ntsumi ya vuntlhanu ni timbirhi, loko yitachaya mhalamhala, xihundla xa Xikwembu lexi axifihliwile, lexi xixibzeleke vaprofeta, malandza ya xona, xitahetiseka.” Kutani rito leri niritweke rihuma tilweni, ritlhela rivulavula na mina riku: “Famba uyateka buku leyipfuliweke, vokweni ra ntsumi leyiyimeke lwandle ni laha misaveni.” Hi loko niya ka ntsumi niyakombela lesvaku yininyika xibukwana lexinga vokweni ra yona. Ntsumi yiku ka mina: “Xiteke uxija; khwirini ra wena xitabava, kambe non'weni xitatsokombela kufana ni vulombe.” Hi loko niteka xibukwana vokweni ra ntsumi, nixija. Axitsokombela kufana ni vulombe non'weni, kambe loko nixijile, nitwa kubava khwirini ra mina. Kutani yinibzela lesvinge: “Wahafaneliwa hi kuyaprofeta kambe ka vanhu va svib'ongo svohambanahambana, ni vamatiko layotala, ni va tindzimi tohambanahambana, ni ka tihosi letotala.” Kutani ninyikiwa rihlanga ropima ha rona, rofana ni nhonga, nibzeliwa marito lawa mange: “Pfuka upima Tempele ya Xikwembu ni alitari ni ntsengo wa lavagandzelaka kona. Kambe ungapimi rithangu ra Tempele ra le handle, ritshike, hikuva rinyikiwile vamatiko, kutani vatakandziyela doropa lerokwetsima hi xipimo xoringana tihweti ta mune wa makume ni timbirhi. Nitanyika timboni ta mina ta timbirhi matimba, kutani titaprofeta hi xipimo xa khulu ni madzana mambirhi ni ntlhanu wa makume ni rin'we (1260) wa masiku, na tiyambale sviyambalu sva masaka.” Timboni leti i minsinya yimbirhi ya maolivha ni svitlhomativoni svimbirhi, lesvi svinga mahlweni ka Hosi ya misava. Loko munhu aringeta kuvayendla svobiha, kutahuma ndzilo hi le milon'weni ya vona, wuhelisa valala va vona; hi mukhuva wolowo mani na mani lweyi angataringeta kuvayendla svobiha, afanela kudlayiwa. Lava va ni matimba yopfala tilo lesvaku mpfula yingani, masikwini ya kuprofeta ka vona; nasvona va ni matimba henhla ka mati kumahundzula mayendla ngati; vanyikiwile ni matimba ya kuba misava hi mintungu ya tinxakaxaka, makhambi lawa vamalavaka. Loko vaheta kuvula vumboni bza vona, xivandzana lexihumaka hi le kheleni leroyenta svinene rokala makumu, xitalwa na vona, xivahlula, xiva xivadlaya. Kutani mintsumbu ya vona yiku chanjala ntsendzeleni wa doropa lerikulu, laha Hosi ya vona yingavambiwa kona xihambanwini, doropa leri loko vafanisa vange, i Sodoma ni Gibita. Kuhundze masiku manharhu ni hamfu na mintsumbu leyi yili karhi yihlaleliwa hi vanhu va svib'ongo lesvotala, va tinxaka ni tindzimi letotala, lavahumaka matikweni lawa yotala, kutani vangapfumeli lesvaku mintsumbu leyi yilahliwa sirheni. Lava vayakeke misaveni vatatsaka hi kudlayiwa ka vona, vacina, vanyikana ni svihiwa, hikuva vaprofeta lava vambirhi avaxanisile svinene vayaki va misava. Kambe ndzhaku ka masiku lawo ya manharhu ni hamfu, amoya wa vutomi lowuhumaka hi le ka Xikwembu, wunghenile ka vona, kutani vasuka vayima hi milenge ya vona. Hinkwavu lava vavavoneke vakhomiwa hi kuchava lokukulu. Kutani vatwa rito leritlakukeke na rihuma tilweni rivabzela lesvi: “Tlhantukani mita halenu!” Hi loko vatlhantukela tilweni hi refu, na valala va vona vali karhi vavavona. Hi nkarhi wolowo kuva ni kutsekatseka lokukulu ka misava, kutani xikhemu xin'we xa vukhume xa doropa xihirimuka, kufa vanhu va ntlhanu wa makhulu ni makhulu mambirhi (7 000) na vadlawa hi kutsekatseka loku. Lava vasaleke vakhomiwa hi kuchava lokukulu, kutani vadzunisa Xikwembu xa le tilweni. Kuhundzile yowee wa vumbirhi. Kambe vonani, yowee wa vunharhu wata kungali kangani. Hi loko ntsumi ya vuntlhanu ni timbirhi yiba mhalamhala ya yona, kutani kutwakala marito lamatlakukeke ya le tilweni maku: “Matimba ya mimfumu ya misava, svosvi manyikiwile Hosi ya hina na Kriste wa yona, kutani atafuma hilaha kungaheliki.” Kutani vakulukumba va makume mambirhi ni mune lava vatshameke sviluvelweni sva vona mahlweni ka Xikwembu, vakhinsama vakorhamisa tinhloko, vagandzela Xikwembu, vaku: “We Hosi, Xikwembu xa matimba hinkwawu, wena lweyi anga kona, lweyi aali kona, hakukhensa, hikuva utirhisile matimba lamakulu ya wena, kutani svosvi usungulile kufuma. Matiko ya misava mahlundzuka svinene, kambe siku ra vukarhi bza wena rifikile; i nkarhi wa kuyavanyisa lavafeke. I nkarhi wa kunyika hakelo ka vaprofeta, malandza ya wena, ni ka vahlawuliwa va wena hinkwawu, ni ka hinkwavu lava vakuchavaka, lavakulu ni lavatsongo. I nkarhi wa kuhelisa lavahahlulaka misava.” Hi loko kupfuliwa Tempele ya Xikwembu leyinga tilweni, kutani Areka ya Ntwananu yivonaka Tempeleni leyi ya xona. Kutani kuva ni kuhatimahatima, ni kudzindza ka tilo, kutwakala ka marito, misava yitsekatseka, kuwa ni marhalana lamakulu. Kutani kuhumelela singita lerikulu tilweni, ra wansati lweyi ayambaleke jambu, n'weti ayili hansi ka minkondzo ya yena, aali ni hari nhlokweni ya yena, ya tinyeleti ta khume ni timbirhi. Yena aalun'wa, ali kusuhi ni kuveleka, kutani aba nyandha hi kutwa kuvava ka kulun'wa ka kuveleka. Kuhumelela singita rin'wana tilweni ra dragona lerikulu ropshuka, ra tinhloko ta ntlhanu ni timbirhi ni timhondzo ta khume, ni hari ya vuhosi henhla ka nhloko yin'wana ni yin'wana ya yona. Ncila wa rona dragona wuhawula xikhemu xin'we xa vunharhu xa tinyeleti ta le mpfhukeni, wuticukumetela misaveni. Kutani dragona riyayima mahlweni ka wansati lweyi aali kusuhi ni kuveleka, lesvaku ritatekela kuminta n'wana loko ahakuvelekiwa. Wansati aveleka n'wana wa mufana, lweyi angatafuma matiko hinkwawu hi nhonga ya nsimbi. Kambe n'wana awutliwa, ayisiwa henhla ka Xikwembu ni le Xitshan'wini xa Vuhosi. Kutani wansati ayatumbela mananga, laha Xikwembu ximulungiseleke ndhawu kona, laha angatahlayisiwa aphameliwa kona, hi masiku lawa maringanaka khulu ni madzana mambirhi ni ntlhanu wa makume ni rin'we (1260). Kutani kupfuka nyimpi tilweni, ya Mikayele ni tintsumi ta yena loko valwa ni dragona; na rona dragona rilwa na rili ni tintsumi ta rona. Kambe dragona rihluliwa, ringahapfumeleliwi kutshama tilweni, rona ni tintsumi ta rona. Hi loko dragona lerikulu ricukumetiwa riyawela hansi, rona nyoka ya khale leyivuliwaka Diyavulosi kumbe Sathana, Mukanganyisi wa misava hinkwayu; ricukumetiwa riyawela hansi misaveni, tintsumi ta rona na tona ticukumetiwa kun'we na rona. Kutani nitwa rito leritlakukeke tilweni riku: “Svosvi, kuhlayiseka ka Xikwembu xa hina ni matimba ya xona, ni Mfumu wa xona, ni vuhosi bza Kriste wa xona, svifikile, hikuva lweyi ahehlaka vamakwerhu, muhehli lweyi avamangalelaka vusiku ni nhlekanhi mahlweni ka Xikwembu xa hina, acukumetiwile ayawela hansi. Vamakwerhu vamuhlulile hi ngati ya Xinyempfana, ni vumboni lebzi vabzihumeseke, kutani avarhandzanga vutomi bza vona kuyafika kufeni. Hikolaho, tsakani n'wina matilo, na n'wina lavayakeke ka wona; kambe yowee, n'wina vayaki va misava ni va lwandle, hikuva Diyavulosi axikele ka n'wina; akarihile ngopfu hi kutiva lesvaku nkarhi wa yena wukomile.” Loko dragona rivona lesvaku ricukumetiwile riyawela hansi misaveni, rihlongolisa wansati lweyi angaveleka n'wana wamufana. Kambe wansati anyikiwa timpapa timbirhi ta gama lerikulu lesvaku ahahela mananga, kuyatumbela kona, ndhawini leyi angatahlayisiwa aphameliwa ka yona hi xipimo xa nkarhi, ni minkarhi, ni hamfu ya nkarhi kule ni nyoka. Hi loko dragona rihlanta mati hi nomo wa rona, mafana ni nambu hi kutala, malandza wansati lesvaku mamukoka. Kambe misava yilamulela wansati hi kuyahlamisa nomo wa yona, yiminta nambu lowu dragona riwuhlanteke hi nomo wa rona. Dragona rikariha svinene hikolaho ka wansati lweyi, risuka riyalwa ni va rixaka ra yena lavasaleke, lavahlayisaka milawu ya Xikwembu ni kuveka vumboni bza Yesu. Kutani riyayima ribuweni ra lwandle. Kutani nivona xivandzana na xihuma hi le lwandle. Axili ni khume ra timhondzo ni tinhloko ta ntlhanu ni timbirhi, ni hari ya vuhosi rimhondzweni rin'wana ni rin'wana ra xona, ni vito lerisandzaka Xikwembu na ritsaliwile tinhlokweni ta xona. Xivandzana lexi nixivoneke, axifana ni yingwe, milenge ya xona ayifana ni ya berhe ni nomo wa xona awufana ni nomo wa nghonyama. Kutani dragona rinyika ntamu wa rona ka xivandzana lexi, nasvona riva rinyikela ni xiluvelo xa rona ni matimba lamakulu. Yi'nwe ka tinhloko ta xivandzana yivoneka na yili ni muzoko lowuyisaka kufeni, kambe muzoko wakona wuhola, kutani misava hinkwayu yilandza xivandzana lexi, yixihlamala. Vanhu vagandzela dragona hikuva rinyikile xivandzana matimba ya rona, vagandzela xivandzana vaku: “Lweyi afanaka ni xivandzana i mani, nasvona, xana i mani lweyi angalwaka na xona?” Kutani xivandzana xinyikiwa nomo wohumesa marito yotikulisa ni yosandza, xipfumeleliwa kutirha kuringana tihweti ta mune wa makume ni timbirhi. Hi loko xipfula nomo wa xona xisandza Xikwembu ni kusandza vito ra xona ni tabernakele ya xona ni kusandza lavayakeke tilweni. Nasvona, xipfumeleliwa kulwa ni vahlawuliwa va Xikwembu ni kuvahlula. Xinyikiwa ni matimba henhla ka vanhu vatinxaka hinkwatu, ni vasvivongo hinkwasvu, ni vatindzimi hinkwatu, ni va matiko hinkwawu. Kutani vayaki hinkwavu va laha misaveni vataxigandzela; vanga lava mavito ya vona mangatsaliwangiki ka Buku ya Xinyempfana lexi xingadlawa kusukela kutumbulukeni ka matilo ni misava. “Lweyi anga ni tindleve, aayingise: Lweyi kukhomiwa svimukongomeke, atakhomiwa hakunene; ni lweyi kudlayiwa hi tlhari svimukongomeke, atadlayiwa hi tlhari hakunene.” Lesvi svivula lesvaku vahlawuliwa va Xikwembu vafanele kutiyisela, vava ni kupfumela. Kutani nivona xivandzana xin'wana lexihumaka hi le misaveni, na xili ni timhondzo timbirhi kufana ni Xinyempfana, kambe xivulavula kukota dragona. Ka xivandzana lexorhanga, lexavumbirhi xi ni matimba hinkwawu yotirha, kukota lexorhanga; xisindzisa misava ni vayaki va yona kugandzela xivandzana lexorhanga lexi muzoko wa xona woyisa kufeni wungahola. Xiyendla masingita lamakulu, hambi wuli ndzilo xiwuxikisa hi le tilweni, wuwela misaveni na vanhu vali karhi vasvivona. Kutani hi masingita lawa xipfumeleliwaka kumayendla mahlweni ka xivandzana lexorhanga, xikanganyisa vayaki va misava, xivabzela kuyendla xifaniso vayendlela xivandzana lexi axitsemiwile hi banga kambe xiya mahlweni xihanya. Kutani xivandzana xavumbirhi xipfumeleliwa kunghenisa kuhefemula ka xifaniso xa xivandzana lexorhanga, lesvaku xifaniso xakona xikota ni kuvulavula, ni kuyendla lesvaku lavayalaka kuxigandzela vadlawa. Nasvona, xivandzana lexi xilerisa lesvaku vanhu hinkwavu, lavakulu ni lavatsongo, vafuwi ni svisiwana, vatshunxeki ni svikarawa, vafungiwa vokweni ra xinene kumbe ka ximombo, kuyendlela lesvaku kungavi na mun'we lweyi akotaka kuxava kumbe kuxavisa, loko angali na mfungu, hi lesvaku vito ra xivandzana, kumbe nhlayo leyivulaka vito ra xona. Lesvi svilava vutlhari: Lweyi anga ni kutwisisa aakume nhlayo yoleyo ya xivandzana, hikuva i nhlayo leyivulaka vito ra munhu. Nhlayo yakona i ntlhanu wa madzana ni rin'we ni ntlhanu wa makume ni rin'we ni ntlhanu na xin'we (666). Nilanguta, kutani nivona Xinyempfana na xiyimile ntshaveni ya Siyoni, na xili ni vanhu va dzana ni mune wa makume ni mune wa makhulu (144 000) lava mimombo ya vona yitsaliweke vito ra xona ni ra Tatana wa xona. Kutani nitwa rito rihuma tilweni rifana ni mpfumawulu wa mati layotala, ni mpfumawulu wa kudzindza lokukulu; rito leri niritweke arifana ni mpfumawulu wa tiharipa loko tichayiwa hi vachayi va tona. Vayimbelela lesvifanaka ni risimu lerimpsha, na vali mahlweni ka xiluvelo ni le mahlweni ka svivumbiwa lesvihanyaka sva mune, ni le mahlweni ka vakulukumba. Akuli hava ni mun'we lweyi akotaka kujondza risimu rakona handle ka lava va dzana ni mune wa makume ni mune wa makhulu (144 000), lavakutsuliweke misaveni. Lava, hi lava vangatinyamisangiki hi vavasati, hikuva vatengile. Hi lava valandzelelaka Xinyempfana hinkwaku lomu xiyaka kona. Lava hi lava vakutsuliweke xikarhi ka vanhu lesvaku vava mihandzu yorhanga ya ntshovelo, vahumeseliwa Xikwembu ni Xinyempfana. Akuhumanga vunhwa milon'wini ya vona ni siku ni rin'we; vahava xivati. Kutani nivona ntsumi yin'wana na yili karhi yihaha hi le xikarhi ka tilo, na yili ni Evhangeli leyingaheliki, lesvaku yitayipaluxa ka lava vayakeke misaveni, ka vanhu va matiko hinkwawu, ni va tinxaka hinkwatu, ni va tindzimi hinkwatu, ni va svib'ongo hinkwasvu. Kutani yitlakusa rito yiku: “Chavani Xikwembu, mixidzunisa, hikuva nkarhi wa xona wa kuyavanyisa wufikile. Mugandzeleni, yena muyendli wa tilo ni misava ni wa lwandle ni svihlovo sva mati.” Kulandza ntsumi yin'wana ya vumbirhi, yiku: “Awile, awile Babilona, doropa lerikulu, rona leri ringanwisa vanhu va matiko hinkwawu vhinyu lerobava ra vuwosvi bza rona!” Kutani kulandza ntsumi yin'wana ya vunharhu, yitlakusa rito yiku: “Mun'wana ni mun'wana lweyi agandzelaka xivandzana ni xifaniso xa xona, atlhela akuma ni mfungu mombzeni wa yena kumbe vokweni ra yena, na yena atanwa vhinyu ra vukarhi bza Xikwembu, leringatacheliwa xinwelweni xa kukariha loku ka xona, na ringatimuliwanga; kutani ataxanisiwa hi ndzilo ni xivavula, mahlweni ka tintsumi letokwetsima ni le mahlweni ka Xinyempfana. Kutani musi wa ndzilo lowu wuvaxanisaka wutuvikela henhla hilaha kungaheliki; lavagandzelaka xivandzana ni xifaniso xa xona, svin'we ni hinkwavu lava vayamukeleke mfungu wa vito ra xona, avakumi kuwisa, vaxaniseka vusiku ni nhlekanhi.” Lesvi svilava lesvaku vahlawuliwa va Xikwembu vatiyisela, na vali karhi vahlayisa milawu ya xona, ni kupfumela ka vona ka Yesu. Kutani nitwa rito rihuma tilweni riku: “Tsala lesvi: Kukatekile vafi lava kusukela svosvi vafelaka Hosini!” Moya na wona wuli: “Ina, vakatekile, hikuva vatahumula minkarhalweni ya vona, kutani mintirho ya vona yitavalandzela.” Nilanguta kutani nivona refu lerobasa; henhla ka rona akutshamile lweyi afanaka ni N'wana-wa-Munhu, na ali ni hari ya golidi nhlokweni ni sikelo lerokariha vokweni. Kutani ntsumi yin'wana yihuma hi le Tempeleni, yihuwelela hi rito leritlakukeke, yiku ka lweyi atshameke henhla ka rifu “Nghenisa sikelo ra wena utshovela, hikuva nkarhi wa kutshovela wufikile, nasvona ntshovelo wa misava wuwupfile svinene, wuwupfele kutshoveliwa.” Hi loko lweyi atshameke henhla ka refu andzuwetela sikelo ra yena misaveni, kutani misava yitshoveliwa. Kutani ntsumi yin'wana yita na yihuma hi le Tempeleni ya le tilweni, na yona yili ni sikelo lerokariha. Hi loko ntsumi yin'wanyana leyinga ni matimba henhla ka ndzilo, yita hi le alitarini, kutani yihuwelela hi rito leritlakukeke, yibzela lweyi atameleke sikelo lerokariha yiku: “Nghenisa sikelo ra wena leri, uhlengeleta svichocho sva mimvhinya ya laha misaveni, hikuva mihandzu yakona yiwupfile!” Hi loko ntsumi yindzuwetela sikelo ra yona misaveni yihlengeleta mawuvha ya mimvhinya ya laha misaveni, yihoxa xikamelweni xa vukarhi lebzikulu bza Xikwembu. Kutani mihandzu yipshanyeliwa xikamelweni handle ka doropa, kutani ngati yihuma xikamelweni, yikhuluka mpfhuka wa madzana manharhu ya makilometru (300 km), yiyendla nambu woyenta kolomu ka metru ni hamfu. Kutani nivona tilweni xikombiso xin'wana lexikulu, xohlamalisa, xa tintsumi ta ntlhanu ni timbirhi letinga ni mintungu ya ntlhanu ni mimbirhi. Leyi i mintungu yohetelela, hikuva hi wona makumu ya vukarhi bza Xikwembu. Kutani nivona xilo xin'wana lexifanaka ni lwandle ra nghilazi leripatsaneke ni ndzilo, nivona ni lavangahlula xivandzana ni xifaniso xa xona, na vahlulile ni nhlayo leyivulaka vito ra xona. Avayimile kusuhi ni lwandle ra nghilazi na vatamele tiharipa leti Xikwembu xivanyikeke tona, vayimbelela risimu ra Moxe nandza wa Xikwembu, ni risimu ra Xinyempfana, vaku: “Wena Hosi, Xikwembu xa matimba hinkwawu, ahi kukula ni kuhlamalisa ka mintirho ya wena; wena Mufumi wa matiko hinkwawu, ahi kululama ni kutshembeka ka tindlela ta wena! I mani lweyi angatakala angakuchavi, wena Hosi, i mani lweyi angatayala kutwalisa vito ra wena ke? Hi wena ntsena lweyi akwetsimeke, kutani vamatiko hinkwavu vatata vatakhinsama mahlweni ka wena, hikuva mintirho ya wena leyolulama yi le rivaleni!” Ndzhaku ka svosvo, nivona Tempele na yipfuliwile tilweni, na yili ni tabernakele ya vumboni ndzeni ka yona. Tintsumi ta ntlhanu na timbirhi leti atili ni mintungu ya ntlhanu ni mimbirhi, tihuma Tempeleni, na tiyambele sviyambalu sva ntsembzana wunene wa kubasa, titibohe svifuva hi mabandhi ya golidi. Kutani xin'we xa svivumbiwa sva mune lesvihanyaka, xinyika tintsumi leti ta ntlhanu ni timbirhi mindzheko ya golidi ya ntlhanu ni yimbirhi, leyitaleke hi vukarhi bza Xikwembu lexihanyaka hilaha kungaheliki. Tempele yitala hi musi lowutisiwaka hi kukwetsima ni matimba ya Xikwembu. Aangali kona ni mun'we lweyi aakota kunghena Tempeleni, kukondza kuhela mintungu ya ntlhanu ni yimbirhi leyi yitisiweke hi tintsumi ta ntlhanu ni timbirhi. Kutani nitwa rito leritlakukeke na rihuma Tempeleni, riku ka tintsumi leti ta ntlhanu ni timbirhi: “Yanani, miyachulula misaveni lesvi svinga ka mindzheko leyi ya ntlhanu ni yimbirhi ya vukarhi bza Xikwembu.” Ntsumi yorhanga yiyachulula lesvi asvili ndzhekweni wa yona misaveni. Kutani vanhu lavanga ni mfungu wa xivandzana, vanga lavagandzelaka xifaniso xa xona, vahuma svilondza lesvonyenyentsa, svovavisa ngopfu. Ntsumi ya vumbirhi yichulula lesvi asvili ndzhekweni wa yona lwandle, kutani lwandle rihundzuka rifana ni ngati ya munhu lweyi afeke; kutani hinkwasvu lesvihanyaka lwandle svifa. Ntsumi ya vunharhu yichulula lesvi asvili ndzhekweni wa yona minambzeni ni le svihlobzeni sva mati, kutani svihundzuka ngati. Hi loko nitwa ntsumi leyinga ni matimba henhla ka sva mati yiku: “Ululamile kuyavanyiseni ka wena, wena lweyi akwetsimeke, wena lweyi anga kona, lweyi aali kona. Hikuva vanhu lava vahalatile ngati ya vahlawuliwa va wena ni ya vaprofeta, kutani uvanyikile ngati vanwa. I hakelo ya vona.” Kutani nitwa rito lerihumaka hi le alitarini riku: “Ina, we Hosi Xikwembu xa matimba hinkwawu, kuyavanyisa ka wena katshembeka, kululamile.” Ntsumi ya vumune yichulula lesvi asvili ndzhekweni wa yona ka jambu, kutani jambu ripfumeleliwa kuhisa vanhu hi ndzilo. Vanhu vapsha hi kuhisa loku kuchavisaka ngopfu, kutani varhuketela vito ra Xikwembu lexinga ni matimba henhla ka mintungu leyi, kambe avahundzukanga, ni kuxidzunisa avaxidzunisanga. Ntsumi ya vuntlhanu yichulula lesvi asvili ndzhekweni wa yona xiluvelweni xa xivandzana. Hi loko mfumu wa xona wufunengetiwa hi munyama, kutani vanhu vatiluma tindzimi hikolaho ka kuvaviseka; varhuketela Xikwembu xa le matilweni, hi mhaka ya kutwa kuvava ni kuxaniseka hi svilondza, kambe avahundzukanga mintirhweni ya vona. Ntsumi ya vuntlhanu ni yin'we yichulula lesvi asvili ndzhekweni wa yona nambzeni lowukulu wa Ewufrata, kutani mati ya wona mapsha lesvaku ndlela ya tihosi letitaka hi le vuxeni yipfuleka. Hi loko nivona mimoya yinharhu leyi ya chaka yofana ni makhele, na yihuma hi le non'weni wa dragona, ni le non'weni wa xivandzana, ni le non'weni wa muprofeta wa mavunhwa. Leyi i mimoya ya madimoni leyiyendlaka masingita, leyirhendzelekaka ka tihosi ta misava hinkwayu, yirhamba nyimpi, kuyalwa ni Xikwembu xa matimba hinkwawu hi siku lerikulu leritaka. (“Languta, nata kufana ni muyivi. Kukatekile lweyi ahitekaka, lweyi ahlayisaka sviyambalu sva yena, lesvaku angafambi na angayambalanga, kutani kuvoneka tingana takwe!”) Kutani mimoya yihlengeleta tihosi ndhawini leyi vange i Armaxjedoni hi ririmi ra Xiheberu. Ntsumi ya vuntlhanu ni timbirhi yichulula lesvi asvili ndzhekweni wa yona mpfhukeni, kutani kutwala rito lerotlakuka, na rihuma hi le Xitshan'wini xa Vuhosi Tempeleni ya tilo, riku: “Sviyendlekile!” Kutani kuva ni kudzindza ni kuhatimahatima ni marito ni kutsekatseka lokukulu ka misava, loku akutshukanga kuva kona kusukela loko vanhu vavile kona laha misaveni; kutsekatseka loko kuvile ka matimba ni lokukulu svinene. Kutani, doropa lerikulu rikhemeka kuhuma svikhemu svinharhu, kutani madoropa ya vamatiko mahirimuka. Hi loko Xikwembu xitsundzuka Babilona, doropa lerikulu, kulinwisa ndzheko wa vhinyu ra vukarhi lebzikulu bza xona. Svihlale hinkwasvu svinyamalala, ni tintshava tingahali kona. Hi loko ku na mpfula ya marhalana lamakulu ngopfu, maribze yakona amali ya mpimo wa mune wa makume ya makilu, mawa hi le tilweni, mawela vanhu vakondza varhuketela Xikwembu hi mhaka ya ntungu wa marhalana. Hikuva, ntungu wakona awuli wukulu nasvona awuchavisa ngopfu. Kutani yin'we ka tintsumi leta ntlhanu ni timbirhi leti atili ni mindzheko ya ntlhanu ni yimbirhi, yita yiku ka mina: “Tana, nitakukomba hilaha muwosvi lwenkulu, lweyi atshameke henhla ka mati layotala, angatayavanyisiwa hakona, lweyi tihosi ta misava tiwosvaneke na yena, lweyi angadakwisa vayaki va laha misaveni hi vhinyu ra vuwosvi bza yena.” Hi loko ntsumi yiniteka, yiniyisa mananga hi Moya. Kutani nivona wansati na atshamile henhla ka xivandzana xopshuka lexi axitele hinkwaku hi mavito yosandza Xikwembu; xivandzana xakona axili ni tinhloko ta ntlhanu ni timbirhi ni timhondzo ta khume. Wansati lweyi aayambale sviyambalu svovangama sva xivunguvungu ni lesvopshuka, nasvona aatisasekisile hi golidi, ni maribze ya risima ngopfu, ni tinwarhu ta nxavu wa kudura; vokweni ra yena aatamele ndzheko woyendliwa hi golidi lowutaleke hi svilo sva manyala ni chaka ra vuwosvi bza yena. Mombzeni wa yena akutsaliwile vito leri nhlamuselo ya rona wunga wa xihundla, lowunge: “BABILONA LWENKULU, MAMANA WA TINGHWAVANA NI WA LAVAYENDLAKA SVA MANYALA LAHA MISAVENI.” Kutani nivona wansati lweyi, aadakwisiwile hi ngati ya vahlawuliwa va Xikwembu ni ngati ya lavadlayiweke hi mhaka ya kulandza Yesu. Loko nimuvona, nihlamala ngopfu. Kambe ntsumi yiku ka mina: “Uhlamalela yini? Nitakubzela xihundla xa wansati lweyi, ni xa xivandzana lexi atshameke henhla ka xona, xa tinhloko ta ntlhanu ni timbirhi ni timhondzo ta khume. Xivandzana lexi uxivoneke, axili kona, kutani axahali kona, kambe xitafanela kutlhantuka xihuma hi le kheleni leroyenta svinene rokala makumu, xiya kuloveni. Kutani vayaki va laha misaveni, lava mavito ya vona makalaka mangatsaliwanga bukwini ya vutomi khale, na misava yingasitumbuluka, vatahlamala kuvona xivandzana, hikuva axili kona, kutani axahali kona, kambe xitafanela kutlhela xiva kona. “Lesvi svilava miyanakanyu ya vutlhari. Tinhloko leti ta ntlhanu ni timbirhi i tintshava ta ntlhanu ni timbirhi leti wansati atshameke henhla ka tona. Nasvona, i tihosi ta ntlhanu ni timbirhi; ntlhanu wa tona tiwile, yin'wana yi kona, leyi yin'wana ayisita, kambe loko yita, yitafanela kuva kona nkarhinyana ntsena. Loko xili xivandzana lexi axili kona, lexi svosvi xingahaliki kona, i hosi ya vuntlhanu ni tinharhu, kambe i yin'we ni letosungula ta ntlhanu ni timbirhi, kutani xivandzana xexo xiya kuloveni. “Timhondzo ta khume leti utivoneke i tihosi ta khume; atisinyikiwa kufuma, kambe titanyikiwa matimba ya vuhosi kuringana nkarhinyana ntsena, na tili ni xivandzana. Tihosi leti ti ni kupimisa kofana, kutani tinyika ntamu wa tona ni matimba ya tona ka xivandzana. Titalwa ni Xinyempfana, kambe Xinyempfana xitatihlula, hikuva i Hosi ya tihosi, ni Mufumi wa vafumi; ni malandza ya xona lawa mavitaniweke, lawa mahlawuliweke ni lawa matshembekaka, xitamanyika kuhlula.” Kutani ntsumi yitlhela yiku ka mina: “Mati lawa umavoneke, laha kungatshama wansati lweyi wa muwosvi, i vanhu va svib'ongo lesvotala ni xitshungu lexikulu, i vanhu vamatiko layotala ni tindzimi letotala. Timhondzo ta khume leti utivoneke, ka xivandzana, hi tona tingatavenga ni kukwatisa wansati lweyi wa muwosvi, titayendla lesvaku ava xisiwana ni kusala na angayambalanga nchumu, titaja nyama ya yena, timuhisa hi ndzilo. Hikuva Xikwembu xinghenisile timbilwini ta tona lesvaku tiyisa mahlweni makungu ya tona: Hi kutwanana ka tona, titanyika matimba ya vuhosi bza tona ka xivandzana, kukondza marito ya Xikwembu mahetiseka. “Loko ali wansati lweyi umuvoneke, i doropa lerikulu, lerifumaka tihosi ta misava.” Ndzhaku ka svosvo nivona ntsumi yin'wana yixika hi le tilweni, na yili ni matimba lamakulu, ni misava yivoningiwa hi kuvangama ka yona. Yihuwelela hi rito lerikulu yiku: “Awile, awile, Babilona lwenkulu, ahundzukile kaya ka madimoni, ni vuchavelo bza mimoya ya chaka ya tinxakaxaka, ni tinyanyana ta tinxakaxaka letingatengangiki, tonyenyentsa, tovengeka. Vanhu va matiko hinkwawu vanwile vhinyu robava ra vuwosvi bza yena; tihosi ta misava tiwosvane na yena, ni van'wamabindzu va misava leyi vafuwisiwile hi vuhunguki bza yena lebzochavisa.” Kutani nitwa rito rin'wana lerihumaka tilweni riku: “N'wina vanhu va mina, humani mimusiya, lesvaku mitakala mingangheni svijohweni sva yena, mitakala mingaweliwi hi maxangu ya yena, hikuva svijoho sva yena svintlhantakanyane kuyafika henhla tilweni, kutani Xikwembu xitsundzukile kuhomboloka ka yena. Muyendleni lesvi amiyendleke svona, mimunyika ha kambirhi hakelo ya lesvi asviyendleke; andzhekweni lowu angachela svonwa ka wona, mucheleleni ka wona ka mbirhi. Mukombeni maxangu ni mahlomulu, hi kuya hi mpimo wa kutidzunisa ka yena ni wa kuhunguka ka yena, hikuva mbilwini ya yena avula lesvi: ‘Nitshama laha, mina Nkosikazi! Ani wansati wa mufelakazi, aningagami hi kuvona mahlomulu!’ Hikolaho ka svona, mintungu hinkwayu yitamuwela henhla hi siku rin'we, akuma mavabzi yochavisa, ni mahlomulu ni ndlala, kutani atahisiwa hi ndzilo, hikuva Hosi Xikwembu, muyavanyisi wa yena, a ni matimba lamakulu.” Tihosi ta misava letinga wosvana na yena ni kuhanya vuhunguki bza yena, titarila tiba nkosi hikolaho ka yena, loko titavona musi wa kupsha ka yena. Titava kule hi kuchava maxangu ya yena, tiku: “Yowee! Yowee! Wena doropa lerikulu, wena Babilona doropa ra matimba, kuyavanyisiwa kukufikelile hi nkarhinyana ntsena.” Van'wamabindzu va laha misaveni varila ni kuba nkosi hikolaho ka yena, lesvi nhundzu ya vona svosvi yingahava lweyi angayixavaka. Kuhava ni mun'we lweyi axavaka golidi ya vona, ni silivhere, ni maribze ya nkoka, ni tinwarhu ta nxavu wo dura; sviyambalu sva vona sva ntshembzana wa risima, lesvovangama sva xivunguvungu ni sva silika ni lesvopshuka; tinxakaxaka ta mapulangu layonun'hwela ni svibza sva mihlovohlovo lesvingavatliwa hi matinyo ya tindlopfu ni lesvi svinga sva mapulangu ya risima rikulu ni sva koporo, ni sva nsimbi, ni sva maribze lawa ya kurhetemuka; sinamoni, ni svin'wana svonandzihisa svakuja; b'aso ra alitari, ni mafurha ya “mira” ni minsinya yin'wana yonun'hwela; vhinyu ni mafurha ya maolivha, mapa ya mavele, ni fulahu, tihomu ni tinyempfu, mahanchi ni tin'qolo, ni svikarawa, hambi yili mimoya ya vanhu. Vataku: “Svilo lesvosaseka lesvi awunavela kuva na svona, svinyamalalile, hinkwaru rifuwo ra wena ni kuvangama ka wena svifambile, ungakala ungahasvikumi nakambe.” Van'wamabindzu va svilo lesvi, lavangafuma hi kubindzulisa doropeni rolero, vatayimela kule, hi kuchava maxangu ya yena. Vatarila ni kuba nkosi, vaku: “Yowee! Yowee! Doropa lerikulu, leri ariyambale sviyambalu sva ntshembzana wa risima, svovangama sva xivunguvungu ni lesvopshuka; awutisasekisile hi golidi, ni maribze ya nkoka, ni tinwarhu. Kambe hi nkarhinyana ntsena rifuwo leri hinkwaru rihelisiwile!” Kutani hinkwavu vinyi va tingalawa, ni vakhandziyi va tona, ni vatluti, ni hinkwavu lavabindzulisaka hi kutirha le lwandle, vanyime kule, vahuwelela svinene loko vavona musi wa kupsha ka doropa lerikulu, vaku: “Hi rihi doropa leritshamaka rifana ni doropa leri hi vukulu xana?” Kutani vaticheletela ntshuri tinhlokweni, na vali karhi varila vaba nkosi, vahuwelela vaku: “Yowee! Yowee! Doropa lerikulu, leri hinkwavu lava avali ni tingalawa lwandle vakanganyisiwa hi rifuwo ra rona: Hi nkarhinyana ntsena, rihelisiwile. Tsaka hi mhaka ya rona, wena tilo; na n'wina vahlawuliwa va Xikwembu, ni vapostola, ni vaprofeta, tsakani, hikuva Xikwembu xiriyavanyisile, ximirihisela.” Kutani ntsumi ya matimba yitlakula ribze lerifanaka ni ribze ra kusila hi kukula, yirihoxa lwandle, yiku: “Hi svolesvi ungatayendliwa svona, wena Babilona, doropa lerikulu: Utawiseliwa hansi hi nsele, kutani awungahavi kona nakambe. Mpfumawulu wa vachayi va tiharipa ni wa vayimbeleli ni wa vachayi va svitiringo ni va timhalamhala, awungahatwali nakambe laha ka wena. Mutirhi wa svilo svihi ni svihi sva mavoko angakala angahavi kona nakambe laha ka wena; ni mpfumawulu wa xigayu awungahatwali nakambe laha ka wena. Kuvoninga ka rivoni, akungahavonaki nakambe laha ka wena, ni marito ya muteki ni ya mutekiwa amangahatwali nakambe laha ka wena; hikuva van'wamabindzu va wena avali vafuwi va laha misaveni, kutani vanhu va matiko hinkwawu vakanganyisiwile hi vungoma bza wena.” Ka doropa leri, kukumiwe ngati ya vaprofeta ni ya vahlawuliwa va Xikwembu ni ya hinkwavu lavangadlawa laha misaveni. Ndzhaku ka svosvo, nitwa lesvifanaka ni rito ra matimba, ra xitshungu lexikulu le tilweni, rihuwelela riku: “Haleluya! Kuhlayiseka ni kukwetsima ni matimba i sva Xikwembu xa hina, hikuva kuyavanyisa ka xona katshembeka, kululamile minkarhi hinkwayu. Xiyavanyisile muwosvi lwenkulu lweyi aboliseke misava hi vuwosvi bza yena, kutani xirihiselile ngati ya malandza ya xona henhla ka yena.” Xiyengeta xihuwelela xiku: “Haleluya! Musi wa kupsha ka yena wutuvikela henhla hilaha kungaheliki.” Kutani vakulukumba lava va makume mambirhi ni mune, vakhinsama vakorhama, vagandzela Xikwembu lexitshameke Xitshan'wini xa Vuhosi na vali ni svivumbiwa lesvihanyaka sva mune, vaku: “Amen, Haleluya!” Kutani kuhuma rito hi le Xitshan'wini xa Vuhosi riku: “Dzunisani Xikwembu xa hina, n'wina hinkwenu malandza ya xona na n'wina lava mixichavaka, lavakulu ni lavatsongo.” Kutani nitwa lesvifanaka ni rito ra xitshungu lexikulu kumbe mpfumawulu wa mati layotala, svifana ni mpfumawulu wa kudzindza lokukulu ka tilo, sviku: “Haleluya! Kufuma i ka Hosi, Xikwembu xa hina lexinga ni matimba hinkwawu. Ahitsakeni hitsakisisa, hixidzunisa, hikuva nkhuvu wa vukati bza Xinyempfana wufikile, ni mutekiwa wa xona atilulamisile; anyikiwile kuyambala sva ntshembzana wa risima, wovangama ni wa nkoka.” Lesvi sva “ntshembzana wa risima”, svivula mintirho yolulama ya vahlawuliwa va Xikwembu. Kutani ntsumi yiku ka mina: “Tsala lesvi: Kukatekile lavarhambiweke kutalalela nkhubzini wa vukati bza Xinyempfana.” Kutani yitlhela yiku ka mina: “Lawa i marito lawa matiyeke ya Xikwembu.” Kutani nikhinsama nikorhama milengeni ya yona kutayigandzela, kambe yiku ka mina: “Ungatshuki uyendla svosvo, mina ni nandza ntsena, kukota wena ni vamakwenu lavahlayisaka vumboni lebzihumesiweke hi Yesu Gandzela Xikwembu!” Vumboni lebzi bzihumesiweke hi Yesu, hi bzona mongo wa vuprofeta. Ndzhaku ka svona, nivona tilo ripfuliwile, kan'wekan'we, kuvoneka hanchi robasa. Lweyi agadeke rona, mavito ya yena vali i “Mutshembeki” ni “Ntiyiso”. Ayavanyisa ni kulwa hi kululama. Mahlo ya yena mafana ni langavi ra ndzilo; nhlokweni ya yena ku ni tihari ta vuhosi letotala, nasvona atsaliwile vito leri kungaliki na munhu lweyi aritivaka, loko angali yena n'winyi wa rona ntsena. Ayambele sviyambalu lesvipetiweke angatini, kutani vito leri vamuchuleke rona i “Rito ra Xikwembu”. Kutani mab'uthu ya le tilweni lawa mayambaleke sviyambalu sva ntshembzana wa risima, lowobasa ni wa nkoka, mamulandzelela na magadile mahanchi yobasa. Anon'weni wa yena kuhuma tlhari lerokariha, leri angatatsema matiko ha rona, kutani atamafuma hi nhonga ya nsimbi. Atakandziyela xikamelweni xa vhinyu ra vukarhi lebzochavisa bza Xikwembu lexinga ni matimba hinkwawu. Ka jansi ra yena ni le nyongeni ya yena, kutsaliwile vito leringe: “Mufumi wa vafumi ni Hosi ya tihosi.” Kutani nivona ntsumi na yiyimile ka jambu. Yivitana, hi rito leritlakukeke, tinyanyana hinkwatu letihahaka xibakabakeni xa tilo, yiku: “Tanani, mitahlengeletana, milalela nkhubzini lowukulu wa Xikwembu; mitaja nyama ya tihosi, ni nyama ya tindhuna ta tinyimpi, ni nyama ya tinhenha, ni nyama ya mahanchi ni ya vagadi va wona, ni nyama ya vanhu hinkwavu, vatshunxeki ni svikarawa, lavakulu ni lavatsongo.” Kutani nivona xivandzana ni tihosi ta misava ni mab'uthu ya tona, titlhangene kulwa ni lweyi atshameke henhla ka hanchi, tilwa ni mab'uthu ya yena. Xivandzana xikhomiwa, kukhomiwa ni muprofeta wa mavunhwa lweyi aayendla masingita mahlweni ka xona hi masingita lawa, aaxisa lava avali ni mfungu wa xivandzana ni lava avagandzela xifaniso xa xona. Kutani xivandzana ni muprofeta wa mavunhwa vahoxiwa svin'we na vahahanya tiveni ra ndzilo lowupfurhaka na wuli ni xivavula. Lava van'wana vadlawa hi tlhari ra lweyi atshameke henhla ka hanchi, tlhari leri rihumaka non'weni wa yena, kutani tinyanyana hinkwatu tija tixurha hi nyama ya vona. Kutani nivona ntsumi leyixikaka hi le tilweni, na yitamele khiya ra khele leroyenta rokala makumu, yitamele ni chini lerikulu. Kutani yikhoma dragona, nyoka leyi ya khale yiriboha nkarhi woringana malembe ya khulu (1 000). Yirihoxa kheleni, yipfala, yilema ndzeni, yiveka ni mfungu lesvaku ringahayi mahlweni hi kukanganyisa vanhu vamatiko, kukondza kuhundza malembe ya khulu (1 000). Ndzhaku ka svona, rifanela kutshunxiwa nkarhinyana. Kutani nivona svitshamu sva vuhosi; lavatshameke ka svona, vanyikiwa matimba ya kuyavanyisa. Nasvona, nivona mimoya ya lava vatsemiweke tinhloko hi mhaka ya kupaluxa vumboni bza vona ha Yesu ni kuvula Rito ra Xikwembu. Avagandzelanga xivandzana kumbe xifaniso xa xona, avafungiwanga hi mfungu wa xona mimombzeni ya vona, kumbe mavokweni ya vona. Kutani hi loko vatlhela vahanya, vafuma na Kriste malembe ya khulu (1 000). Kambe, vafi van'wana avatlhelanga vahanya, kukondza kuhundza malembe ya khulu (1 000). Xilesvo, loku i kupfuka korhanga kufeni. Munhu lweyi avonaka kupfuka kufeni lokorhanga, akatekile, nasvona akwetsimile. Rifu ra vumbirhi ari na matimba henhla ka vanhu lavotano, kambe vatava vaprista va Xikwembu ni va Kriste, kutani vatafuma svin'we na Kriste malembe ya khulu (1 000). Loko malembe ya khulu (1 000) matava mahelile, Sathana atatshunxiwa jele lomu apfaleliweke kona, kutani atahuma akanganyisa vamatiko lavayakeke matlhelweni hinkwawu ya misava, vanga vona va ka Goge na Magoge. Sathana atahuma nyimpi na vona, na vafana ni misava ya lwandle hi kutala. Kutani vahuma vahangalaka misaveni hinkwayu, varhendzela magovela ya vahlawuliwa va Xikwembu svin'we ni doropa lerirhandzekaka; kambe ndzilo wuxika hi le tilweni wuvahisa vaku mbii. Diyavulosi lweyi aavakanganyisa ahoxiwa tiveni ra ndzilo ni xivavula, laha xivandzana ni muprofeta wa mavunhwa vanga kona, kutani vataxanisiwa vusiku ni nhlekanhi hilaha kungaheliki. Kutani nivona Xitshamu xa Vuhosi lexikulu xobasa, na yena lweyi atshameke ka xona; loko tilo ni misava svimuvona, svibaleka sviya kule, kutani ndhawu ya svona ayahavanga kona. Nasvona, nivona vafi, lavakulu ni lavatsongo, na vayimile mahlweni ka Xitshamu xa Vuhosi, kutani tibuku tipfuliwa. Kupfuliwa ni buku yin'wanyana, yinga buku ya vutomi. Vafi vayavanyisiwa mayelanu ni lesvi svingatsaliwa tibukwini, hi kuya hi lesvi vasviyendleke. Lwandle ritlhelisa lavafeleke ka rona. Rifu ni Tihele svitlhelisa vafi lava avali ka svona, kutani hinkwavu vayavanyisiwa mayelanu ni lesvi vasviyendleke. Rifu ni Tihele svihoxiwa tiveni ra ndzilo, ringa rona rifu ra vumbirhi. Loko vito ra munhu ringakumiwi na ritsaliwile bukwini ya vutomi, munhu yelweyo ahoxiwa tiveni ra ndzilo. Kutani nivona tilo lerimpsha ni misava leyimpsha, hikuva tilo lerosungula ni misava leyosungula asvihundzile, ni lwandle aringahali kona. Kutani nivona doropa Lerokwetsima ra Yerusalema Lwemumpsha, na rixika hi le tilweni rihuma ka Xikwembu, na ritilulamiselile tani hi mutekiwa loko atisasekiselela nuna wa yena. Nitwa ni rito lerikulu lerihumaka Xitshan'weni xa Vuhosi riku: “Vonani, tabernakele ya Xikwembu ni vanhu va xona, hikuva, xitayaka ka vona. Kutani vatava vanhu va xona; Xikwembu hi xoxe xitatshama na vona, xiva Xikwembu xa vona. Hikolaho Xikwembu xitasula minhloti hinkwayu matihlweni ya vona, ni rifu aringahatava kona; hambi mali mahlomulu kumbe kurila kumbe kuvaviseka asvingahatava kona, hikuva lesvosungula se svihundzile.” Kutani lweyi atshameke Xitshan'weni xa Vuhosi aku: “Vonani, niyendla svilo hinkwasvu sviva lesvimpsha.” Atlhela aku: “Tsala, hikuva marito lawa i ya ntiyiso, matshembeka.” Kutani aku ka mina: “Sviyendlekile! Hi mina Alfa na Omega, wosungula ni wohetelela. Lweyi anga ni torha, nitamunyika mati mahala angahakeli nchumu, mahuma xihlobzeni xa mati ya vutomi. Lweyi angatahlula, atakuma ndzhaka ya svilo lesvi, kutani nitava Xikwembu xa yena, na yena ava n'wana wa mina.” Kambe loko mali matoya ni lavayalaka kupfumela ni lavayendlaka sva manyala, ni vadlayi ni vawosvi ni valoyi ni lavagandzelaka svikwembu sva hava ni vahembi hinkwavu, makumu ya vona kutava kuhoxiwa tiveni leripfurhaka ndzilo ni xivavula, ringa rona rifu ra vumbirhi. Kutani kufika yin'we ka tintsumi leti ta ntlhanu ni timbirhi letinga ni mindzheko ya ntlhanu ni yimbirhi, leyiteleke hi mintungu leyohetelela; ntsumi yivulavula na mina yiku: “Tana, nitakokumba Mutekiwa, nsati wa Xinyempfana.” Moya wuniteka, kutani ntsumi yiniyisa ntshaveni leyikulu leyotlakuka; yinikomba doropa Lerokwetsima ra Yerusalema, na rili karhi rixika hi le tilweni rihuma ka Xikwembu, rili ni kukwetsima ka Xikwembu. Kuvangama ka rona, akutsunya mahlo kufana ni ribze ra nkoka lowukulu, nasvona ariphatima kukotisa ribze ra “xjaxpe” rovangama kukotisa “krixtali”. Arili ni rithangu lerikulu rotlakuka, ra svipfalu sva khume ni svimbirhi, kuli ni tintsumi ta khume ni timbirhi svipfalwini, kutani svipfalu svakona asvikevetliwile mavito ya svib'ongo sva khume ni svimbirhi sva Vaisrayele. Hi tlhelo ra vuxa, akuli ni svipfalu svinharhu; n'walungwini, svipfalu svinharhu; dzongeni, svipfalu svinharhu; ni le vupelajambu, svipfalu svinharhu. Kutani rithangu ra doropa arili ni maribze ya masungulu ya khume ni mambirhi, na ka wona kuli ni mavito ya khume ni mambirhi ya vapostola lava va khume ni vambirhi va Xinyempfana. Kutani lweyi avulavuleke na mina, aali ni rihlanga ra golidi ropima ha rona, lesvaku atapima doropa ni svipfalu sva rona ni rithangu ra rona. Doropa arili ni matlhelo ya mune yoringana; mupimi apima hi rihlanga ra yena, akuma mpimo wa khume wa makhulu ni makhulu mambirhi (12 000) ya makilometro, matlhelo hinkwawu, hambi kuli kuya henhla. Apima ni kuyanama ka rithangu kuya ndzeni, akuma mpimo wa “svisungunhu” sva dzana ni mune wa makume ni mune (144) hipimela ra hina vanhu, ringa ra ntsumi. Rithangu ariyakiwile hi “xjaxpe”, kasi loko rili doropa rona ariyakiwile hi golidi leyotenga, yofana ni nghilazi hi kuvonekela. Masungulu ya rithangu ra doropa amasasekisiwile hi mihlovo hinkwayu ya maribze ya nkoka. Rosungula arili ra “xjaxpe”, kulandza “safira”, ra vunharhu “agata”, ra vumune “exmeralda”, ra vuntlhanu “onikisi”, ra vuntlhanu ni rin'we “sardiyo”, ra vuntlhanu ni mambirhi “krizolita”, ra vuntlhanu ni manharhu “berilo”, ra vuntlhanu ni mune “topazi”, ra vukhume “krizopurazo”, ra vukhume ni rin'we “xjasinto”, ra vukhume ni mambirhi “ametixta”. Kutani svipfalu lesvi sva khume ni svimbirhi asviyendliwe hi vuhlalu bza nkoka bza “tinwarhu” ta khume ni timbirhi. Xipfalu xin'wana ni xin'wana axiyendliwile hi “dayimani” yin'we. Ntsendzele wa doropa awuli wa golidi leyotenga, yofana ni nghilazi leyivonekelaka. Tempele aniyivonanga doropeni, hikuva Tempele ya rona, i Hosi Xikwembu xa matimba hinkwawu, ni Xinyempfana. Doropa arilavi jambu kumbe n'weti kurivoninga, hikuva rivoningiwa hi kukwetsima ka Xikwembu, kutani Xinyempfana i rivoni ra rona. Vanhu va matiko hinkwawu vatafamba kuvonakaleni ka rona, kutani tihosi ta misava titaritisela rifuwo ra tona. Ninhlekanhi, svipfalu sva rona asvingatapfaliwa, nasvona vusiku abzingahatava kona ka rona. Vukosi ni kudzuneka ka matiko hinkwawu svitatisiwa ka rona. Kambe akungangheni xilo ni xin'we xa chaka kona, hambi ali lweyi ahanyaka hi sva manyala ni mavunhwa; kutanghena ntsena lava mavito ya vona matsaliweke bukwini ya vutomi ya Xinyempfana. Kutani ntsumi yinikomba nambu wa mati ya vutomi lowuvangamaka kufana ni “krixtali”, wukhuluka wuhuma Xitshan'wini xa Vuhosi xa Xikwembu ni xa Xinyempfana. Xikarhi ka ntsendzele wa doropa ni le matlhelweni ya nambu seni ni seniya, akuli ni nsinya wa vutomi lowupsalaka khume ra mihandzu ni yimbirhi, wupsala mihandzu yakona hweti yin'wana ni yin'wana; nasvona matluka ya nsinya wakona matirhela kujaha vanhu va matiko hinkwawu. Akungahavi na nchumu lexingarhukiwa kona. Xitshamu xa Vuhosi xa Xikwembu ni xa Xinyempfana xitava ndzeni ka doropa, kutani malandza ya xona mataxitirhela. Vatavona nghohe ya xona, ni vito ra xona ritava mimombzeni ya vona. Vusiku abzingahavi kona, avangahavileli rivoni kumbe jambu, hikuva Hosi Xikwembu xitava kuvonakala ka vona, kutani vatafuma hilaha kungaheliki. Kutani ntsumi yiku ka mina: “Marito lawa matshembeka, ma ni ntiyiso. Hosi Xikwembu, xona lexinyikaka vaprofeta Moya wa xona, xirhumele ntsumi ya xona kukomba malandza ya xona svilo lesvi svifanelaka kuhumelela kungali khale.” Yesu ali: “Vonani, nata svosvisvosvi. Kukatekile lweyi ahlayisaka marito ya vuprofeta bza buku leyi.” Hi mina Yohani hi xiviri ningatwa ni kuvona svilo lesvi. Kutani loko nisvitwile ni kusvivona, niwa hi matsolo, kugandzela milengeni ya ntsumi leyi yinikombeke svona. Kambe yiku ka mina: “Ungatshuki uyendla svosvo! Mina ni nandza ntsena, kukota wena ni vamakwenu, vanga vaprofeta ni hinkwavu lavahlayisaka marito ya buku leyi. Gandzela Xikwembu!” Yitlhela yiku ka mina: “Ungalemi marito ya vuprofeta bza buku leyi, hikuva nkarhi wukusuhi. Lweyi ayendlaka lesvobiha aaye mahlweni ayendla lesvobiha, wa chaka aaye mahlweni na rona, lweyi alulameke, aaye mahlweni ayendla lesvolulama, ni lweyi akwetsimeke aaye mahlweni atikwetsimisa nakambe.” Yesu ali: “Vonani, nata svosvisvosvi, nita ni hakelo ya mina, kutahakela mun'wana ni mun'wana hi kuya hi lesvi asviyendleke. Hi mina Alfa na Omega, lweyi worhanga ni lweyi wohetelela, kusungula ni kuhela.” Kukatekile lavahlampsaka sviyambalu sva vona, lesvaku vatava ni matimba ya kuja nsinya wa vutomi, ni kunghena doropeni hi minyangwa ya rona. Lava vasalaka handle ka doropa hi lava vayendlaka lesvobiha, ni valoyi, ni vawosvi, ni vadlayi, ni lavagandzelaka svikwembu sva hava, ni hinkwavu lavatsakelaka vunhwa ni kuhanya ha rona. Yesu ali: “Nirhumile ntsumi ya mina tikerekeni lesvaku yimitivisa ntiyiso wa svilo lesvi. Hi mina rimintsu ra Davhida, ni wa rixaka ra yena, nyeleti leyovangama ya mixo.” Moya ni Mutekiwa vali: “Tana! Ni lweyi asvitwaka aavule aku: ‘Tana!’ Lweyi anga ni torha aate; ni lweyi asvinavelaka aanwe mati ya vutomi mahala, angahakeli.” Mina Yohani nitivisa mani na mani lweyi atwaka marito ya vuprofeta bza buku leyi, nili: Loko munhu ayengetela svin'wana ka wona, Xikwembu xitayengetela ka yena mintungu leyitsaliweke bukwini leyi. Ni loko mun'wana angasusa svin'wana ka marito ya vuprofeta bza buku leyi, Xikwembu xitamusivela kuja mihandzu ya nsinya wa vutomi, ni kutshama doropeni Lerokwetsima, svinga svilo lesvihlamuseliweke bukwini leyi. Yena lweyi ativisaka ntiyiso wa timhaka leti, ali: “Hakunene, nata svosvisvosvi.” Amen, tana Hosi Yesu! Timpsalu ta Hosi Yesu ative ni hinkwavu!