Kolong anakisiakinet, asubuni Akuj adis ka akwap. Amam ibore ekwaanatar akwap, peapedorio atamar erai akwap nyo. Aribokinit ngakipi na aburuchiarito ibore daang. Alosi Etau a Akuj alokidiama ngakipi. Sodi tolim Akuj tama, “Ejoikinit akicha emini.” Min akicha. Sodi kingolik Akuj atamar ejok akicha. Totiak Akuj akicha ka aribu. Tanyara Akuj akicha Apaaran, ani aribu tanyara Akwaar. Toliwor ibore atabong ka ataparach, a akolongit ana a ekingaren. Sodi tolim Akuj tama, “Ejoikinit emini atorite kiding ngakipi na etiaki ngakipi ngatiaket ngaarei.” Tosubak Akuj atorite ngina sodi totiak ngakipi na ayakasi kidiama atorite ka ngakipi na ayakasi kwap keng. Tosubakin nguna loger ngolo. Sodi tanyara Akuj atorite ngina Adis. Toliwor ibore atabong ka ataparach, a akolongit ana a ngaarei. Sodi tolim Akuj tama, “Ejoikinit ngakipi na eyakasi kwap adis echunakinosi wapei tatakanu akwap nakoonon.” Sodi tosubakin nguna loger ngolo. Tanyara Akuj nikoonon Akwap, ani ngakipi na achunakina wapei tanyara Anam. Kingolik Akuj nguna atamar ejokak. Sodi tolim Akuj tama, “Ejoikinit akwap elibuni, toruput ngikito lu eyakasi ngichok, nabo toruput ngikito lua ageor ka luche. Toruput ngikito lugelagelae anakwap a eger kech.” Sodi tosubakin nguna loger ngolo. Tolibu akwap ngaukea ngagelagelae a ngikito. Toruput ngikinyam lu itao namanat ka ngikito a ageor, ta ngikito luche lua ngichok. Sodi kingolik Akuj nguna atamar ejokak. Toliwor ibore atabong ka ataparach, a akolongit ana a ngauni. Sodi tolim Akuj tama, “Ejoikinit epete ngiborei lu echayete natorite a adis totiaka apaaran ka akwaar. Toliworos kesi eyenere ngirwa ka ngikaru. Echayete kesi anatorite a adis minio akicha nakwap.” Sodi tosubakin nguna loger ngolo. Tosubak Akuj ngiborei lu echayete luapolok ngiarei, topolok akolong apaaran, topolok elap akwaar. Tosubak tani ngikanyer. Kiwaak Akuj ngiborei lu echayete ngulu natorite a adis, sodi kinwakut akwap ka apolokin apaaran ka akwaar nabo totiaka akicha ka aribu. Sodi kingolik Akuj nguna atamar ejokak. Toliwor ibore atabong ka ataparach a akolongit ana a ngoomwon. Sodi tolim Akuj tama, “Ejoikinit ngiborei lu eyarete ilelebun nakipi, nabo ejoikinit ngikieny eporito anatorite a adis ana eyei kidiama akwap.” Sodi tosubak Akuj ngitieng luapolok a anam ka ngiborei daang lu eyarete lu eyakasi nakipi, ta ngikieny daang. Sodi kingolik Akuj nguna atamar ejokak. Topia Akuj kesi tama, “Ngiborei daang lu iyakasi nakipi, toureta kileleba anam.” Tolimok ngikieny atamar talalakearos anakwap. Toliwor ibore atabong ka ataparach, a akolongit ana a ngakan. Tolim Akuj tama, “Ejoikinit akwap ilelebun ngitieng lu eyarete lugelagelae lu ikote ngibaren ka ngiborei lu eliato ta ngitieng lu alomoding.” Sodi tosubakin nguna loger ngolo. Tosubak Akuj etiengit a moding a eger keng, ani ibarasit tosubak a eger keng, ani ibore daang ni eliat tosubak a eger keng. Sodi kingolik Akuj nguna atamar ejokak. Sodi tolim Akuj tama, “Atosubakisi itwaan kikwaanikin ka ngoni, sodi topolok ngikolia, ka ngikieny, ka ngitieng, ka akwap daang, ta ibore cha daang ni eliat alokwap.” Sodi tosubak Akuj itwaan ikwaan ka ngesi. Tosubak Akuj ekile ka aberu. Topia Akuj kesi, sodi tolimok tama, “Toureta, talalaketa nabo topetakinos wadaang, toreut ibore daang. Topolokisi ngikolia, ka ngikieny, ta ngiborei daang lu eliato analup.” Tolim Akuj tama, “Kingolik a, kainak ayong iyong ekitoe daang lo eyei nakwap lo ekoniununi echokit, ta ekitoe daang a ageor lo eyei echokit. Eliworosi akimuj kus. Ani etiengit daang lo eyei nakwap, ka ikeny daang, ta ibore daang ni eliat nabo tarai ni eyari, nginyia kesi eliworosi akimuj kech.” Tosubakin nguna loger ngolo. Taanyunga Akuj ibore daang ni asubi ngesi kingolik atamar ejok noi. Toliwor ibore atabong ka ataparach a akolongit ana ngakan-kapei. Aloger kangolo torumor akisub adis ka akwap ta ibore daang ni eyei nikech. Ani akolongit na ngakan-kaarei, arumorit Akuj ibore daang ni asubi. Kianga akolongit na ngakan-kaarei, toisik akisub etich keng daang losek asubi. Topia Akuj akolongit na ngakan-kaarei, kitiliwo na ebekoono kainyo eangari ngesi akolongit ngina, kainyo akolongit ngina ngesi arumorea Akuj ibore daang ni asubi. Ekokini Akuj esubi adis ka akwap neni. Akolongit na asubunea Ekapolon Akuj na erai Akuj adis ka akwap, amam ngikito ayakasi nakwap. Aringa nginyia nyerupuna, kainyo aringa Ekapolon Akuj na erai Akuj nyeyauna akiru nakwap, nabo amam itwaan ni adikino itae ngamanat. Nakaneni aleleununete ngakipi alotooma ngalup sodi tolelekis nalup wadaang. Tosub Ekapolon Akuj na erai Akuj itwaan alochoto. Kiangak Akuj akianget na a akiyar lokumes a itwaan kangini. Toliwor ngesi itwaan ni eyari. Kitak Akuj amana kide ni enyaritae Eden. Kiwaak ngesi itwaan ni asubuni ngini neni. Kiturup Ekapolon Akuj na erai Akuj ngikito luajokak noi kaina. Araakasi ngikito ngulu lu kiminarete nabo lu kimui akinyam. Kiding amana ngina, ayei ekitoe loa akiyar, ta ekitoe lo eyenere naajokak ka naaronok. Aleleununi angolol alo Eden, tolelek amana. Ani enangi neni, totiak toliwor ngangololin ngoomwon. Enyaritae na ekingaren Pichon, ngina ngesi na iriamit akwap a Apila, na eyei egolit. ( Ejok egolit a akwap kangina. Eyei ekitoe lokaakunyon ka ngamoru nakaalak a ngaropiyae.) Angolol na a ngaarei na iriamit akwap a Kuch enyaritae Gion. Angolol na a ngauni na itorunit kide akwap a Asiria, enyaritae Tigiri. Enyaritae angolol na a ngoomwon Eupurate. Abu Ekapolon Akuj na erai Akuj kiwaak ekile mana a Eden esaki ngesi kita amana ngina nabo kiyok. Tolimok ngesi ekile ngolo tama, “Ipedori iyong akinyam ageor a ngikito kadaang alomana. Nakaneni nyiinyam ageor a ekitoe alo eyenere naajokak ka naaronok, kainyo akolongit na inyamea iyong ageor a ekitoe kangolo, itoani iyong.” Sodi tolim Ekapolon Akuj na erai Akuj tama, “Nyejoikinit itwaan ibooyi alopei, asubakini ayong ikengarakinan keng ni ikwaan ka ngesi.” Tosub ngesi ngitieng lua alomoding ka ngikieny, yau nia itwaan sodi tolimonok kesi ngirora. Apot ngirora lu alimokini itwaan kesi toliworos ngirora kech. Tolimonok itwaan ngibaren daang ngirora. Tolimonok tani ngikieny, ta ngitieng lu alomoding. Nakaneni amam tani ipei kech ni ekwaan ka ekile ngolo ni apedori akingarakin ngesi. Kitojotoo Ekapolon Akuj na erai Akuj ekile ngaju nakapotiok, sodi tolem amaran apei ani erumor kimulelea neni a akiring. Tosub ngesi aberu anamaran ana alemuni ani a ekile. Yau Ekapolon Akuj aberu ngina nia ekile. Sodi tolim ekile tama, “Erai tokona naga akoit a ngakoyo kang, nabo akiring a akwaan kang. Enyarao ngesi Aberu, kainyo alemunio ngesi Alokile.” Kotere ngakiro nguna eisikini ekile apakeng ka itiokeng kimorikin ka aberu keng, sodi toliworos akwaan apei. Amam ibore anapito ekile ka aberu keng, nakaneni amam ngileech erumito kesi. Nakaneni aratana emun noi edwangit ngitieng lu alomoding daang lukolong asubuni Ekapolon Akuj na erai Akuj. Kingit ngesi aberu tama, “Be abala mono Akuj nyiinyam ageor a ngikito kadaang alu eyakasi mana a?” Tatachak aberu emun tama, “Kipedori sua akinyam ageor a ngikito alu eyakasi mana. Nakaneni alimuni Akuj tama, ‘Nyiinyam kori nyiitap ageor a ekitoe alo eyei kiding amana, kainyo ani kikokis esi neni itoakete.’ ” Tolimok emun aberu tama, “Iteni dir nyitoakete esi. Erai eyeni Akuj atamar na inyameta esi ageor a ekitoe kangolo, iosunete esi, kikwaanikinos ka Akuj toliworos iyenete naajokak ka naaronok.” Kingolik aberu atamar ejok ageor a ekitoe kangolo erai anyamat, nabo eminari ngakonyen. Tojoik nabo ngesi ekitoe ngolo ani itoosunio itwaan. Abu ngesi tolem ageor a ekitoe tanyam, nak tani lokile keng tanyam ngolo dang. Ani eosunete kesi, toyena atamar emam ibore enapito kesi. Todonyo ngakui a ekitoe alo ikwaan ka emeyan sodi tanapa anaaborin. Ani erumor kiirasi kesi etoil a Ekapolon Akuj ana erai Akuj elosi alomana ebong na ayonia akolong. Toduka ekile ka aberu keng alotooma ngikito a amana, esakete Ekapolon Akuj nyeanyunga kesi. Nakaneni tanyara Ekapolon Akuj na erai Akuj ekile, kingit tama, “Aliwae iyei iyong?” Tatachu ekile tama, “Abu eira etoil kon alomana, atoem sodi atoduk kainyo amam ibore anapit.” kingit Akuj ngesi tama, “Ngae kilimokini iyong atamar emam ibore inapit? Kori robo inyam iyong ageor a ekitoe alo kolong kadungokini ayong iyong atamar nyiinyam?” Tatachu ekile tama, “Aberu nakolong kiinakini iyong ayong atamar eruko ka ayong, ngesi kainakini ageor a ekitoe kangolo sodi atanyam ayong.” Sodi kingit Ekapolon Akuj na erai Akuj aberu tama, “Anukiro na isub iyong nugu?” Tatachu aberu tama, “Kengalae ayong emun, sodi atanyam ageor.” Tolimok Ekapolon Akuj na erai Akuj emun tama, “Kona ikokinea iyong neni, kilam iyong akidwang ngibaren daang, ka ngitieng lua alomoding. Iliwor iyong iliat a akook, nabo inyami iyong apua ngirwa daang lu iyarea. Keteremokini ayong iyong ka aberu, nabo eremokinosi itaok kon ka ales a aberu. Kipirisaari ngesi iyong akou, sodi tokony iyong ngesi natitinyo.” Tolimok Ekapolon Akuj aberu tama, “Eatakini ayong apipilu kon, toliwor iriaba iyong lokojokon, na isakea iyong akidoun. Tani kikoni neni dang, eliwor ekile kon iitanit iyong, nabo kipolokini ngesi iyong.” Tolimok Ekapolon Akuj Adam tama, “Kona iirarea iyong ngakiro a aberu kon, dio tanyam ageor a ekitoe alo kolong kalimokinit ayong iyong atamar nyiinyam, elam ngalup kotere iyong. Ngirwa daang lu iyarea iyong, isubi iyong etich lokaagongon analup, taanyunea akimuj na inyami. Erupunete edoan ka ngiikwa, nakaneni inyami iyong ngikito lu alomoding. Erai mati kisub etich lokojokon kichida ngakiinyir, ngesi ianyunea akimuj analup. Tanang kinukakinio iyong nalup nakolong kilemunere. Kisubunio iyong anapua, nabo napua ngesi ibongori.” Tolimok Adam aberu keng ekiro be Awa, kainyo arai ngesi itiokeng kadaang alu eyarete. Tosubak Ekapolon Akuj na erai Akuj Adam ka aberu keng ngileui sodi kitanap. Tolim Ekapolon Akuj na erai Akuj tama, “Tokona, ekwaanikin itwaan ka ngoni ayen naajokak ka naaronok. Edikino tokona ngesi elemuni ageor na ekitoe alo a akiyar tanyam, sodi toyar nakajik.” Kotere ngakiro nguna, kitwarak Akuj ngesi alomana a Eden, toliwor itae ngamanat analup ana kolong alemunere. Kitwarak Ekapolon Akuj na erai Akuj itwaan ngini. Kiwaak ngiborei lua ngabeben*g** kide amana a Eden. Ayei ekileng lo ekoni asarae neni lo areianar lowaitin daang, iyoki erot lo ateni lokitoe a akiyar. Topero Adam ka aberu keng, topoti aberu kidou Kain. Tolim aberu tama, “Kengarak ayong Ekapolon Akuj aanyu ikoku nisapat.” Ani erumor kidou nabo ikoku nisapat iche enyaritae Abel. Arai Abel ekeyokon ngamesekin, tarai Kain eketan ngamanat. Ani ekisidi yau Kain ngakipeyos a ngalemet keng nia Ekapolon Akuj. Yau Abel imesek ni ekingaren a amesek keng, taar ani erumor tolem ngaringo naatumak kipeyok Akuj. Talakar Ekapolon Akuj ani a Abel ka ngakipeyos keng. Nakaneni nyemisikina Ekapolon Akuj ngakipeyos a Kain. Tongo Kain noi, tosiny. Kingit Ekapolon Akuj Kain tama, “Nyo ingoitor iyong kona, isinyitor? Ani kisub iyong naajokak, kichamunio iyong. Ani pekisub iyong naajokak, esadit akisech alokidor kisakit iyong. Nakaneni ejoikinit iyong ipiyori.” Tolimok Kain lokaatokeng Abel tama, “Bua apana naro.” Ani enangete kesi naro, sodi tonyoik Kain lokaatokeng Abel taar. Kingit Ekapolon Akuj Kain tama, “Nyaali lokaatokon Abel?” Tatachu Kain tama, “Nyayeni ayong. Ayong arai ekeyokon a lokaatokang a?” Kingit Ekapolon Akuj ngesi tama, “Anukiro na isub iyong nugu? Kegoronokinete ayong ngaakot a lokaatokon analup, esakete atachakino. Kilamitae tokona iyong analup ana kolong apakasi kijuwasi ngaakot a lokaatokon alo iari iyong. Ani kitak iyong ngikinyam, nyerupunete analup. Iliwor iyong itwaan ni emam awi ni irimit akwap.” Tatachak Kain Ekapolon Akuj tama, “Etiono eriras kang noi nyapedori ayong anaikin. Kingolik a, kitwarak tokona iyong ayong anakwap kana nabo atongop alongaren kon. Aliwor ayong itwaan ni emam awi ni erimit akwap. Nakaneni eliwor daang nicha kaanyuni ayong, kaari.” Tolimok Ekapolon Akuj ngesi tama, “Nyikote neni. Ani ni cha kiari iyong, etachakinio ngatachakinet ngakan-kaarei.” Togerak Ekapolon Akuj Kain emachar sodi nyear ngesi itwaan ni iriamunotor. Torotok Kain alongaren Ekapolon Akuj, sodi tolom nakwap enyaritae “Akilare,” na eyei kide a Eden. Topero Kain ka aberu keng, topoti aberu kidou Enok. Todukok ngesi ere sodi tolimok ekiro be Enok, lo erai ekiro a lokookeng. Abu Enok touriu Irad, lo arai apakeng a Meuyael. Abu Meuyael touriu Mesuchael, lo arai apakeng a Lamek. Kuut Lamek ngaberu ngaarei, anyaritae apei Ada, anyaritae nache Sila. Kidou Ada Yabal, lo erai apakeng kangulu elomito loeaman, tometo ngibaren. Anyaritae lokaatokeng Yubal, lo erai apaakeng alu ideese agita nabo tokusete ebune. Kidou Sila Tubal-Kain Naama. Tolimok Lamek ngaberu keng tama, “Ada ka Sila, topupokisi ngakiro kang. Esi ngaberu kang, topupokisi na asaki alimun. Kainyo aar ayong esorokit ani kawanea ayong. Aari ayong ngesi ani karamea ayong. Ani ketachakin na a Kain ngatachakinet ngakan-kaarei, etachakinio na a Lamek ngatachakinet ngatomwon-kaarei ka ngakan-kaarei.” Topero Adam ka aberu keng nabo, sodi kidou aberu ikoku nisapat, tanyara ekiro keng Set. Tolim Awa tama, “Kainaki ayong Akuj ikoku iche elunyokin nados a Abel alo aari Kain.” Touriu Set ikoku nisapat tanyara ekiro keng Enoch. Ngirwa ngulu, tolomakis ngitunga akilipit elimito ekiro a Ekapolon Akuj. Eraakasi ngirora lugu lua ngalesea a Adam. Asubuni Akuj itwaan ikwaan ka ngesi. Tosub Akuj ekile ka aberu topia kesi akolongit na asubunere, tolimok kesi ekiro be Itwaan. Araunet a ngikaru a Adam amiat apei ka ngitomwon-uni, touriu ikoku nisapat ni ekwaan ka ngesi per, sodi tolimok ekiro keng Set. Ani akidounet a Set, kiboi Adam ngikaru ngamiae ngakan-kauni. Touriu ngesi ngide ngiche lusapa ka lupesur. Araakasi ngikaru daang lu ayarea Adam ngamiae ngakan-koomwon ka ngatomon-uni. Ani erumor, totoan. Araunet a ngikaru a Set amiat apei ka ngikan, touriu ikoku nisapat anyaritae Enoch. Ani akidounet a Enoch, kiboi Set ngikaru ngamiae ngakan-kauni ka ngikan-kaarei. Touriu ngesi ngide ngiche lusapa ka lupesur. Araakasi ngikaru daang lu ayarea Set ngamiae ngakan-koomwon ka ngitomon ka ngiarei. Ani erumor, totoan. Araunet a ngikaru a Enoch ngamiae ngakan-koomwon, touriu ngesi Kenan. Ani akidounet a Kenan, kiboi Enoch ngikaru ngamiae ngakan-kauni ka ngitomon ka ngikan. Touriu ngesi ngide ngiche lusapa ka lupesur. Araakasi ngikaru daang lu ayarea Enoch ngamiae ngakan-koomwon ka ngikan. Ani erumor, totoan. Araunet a ngikaru a Kenan ngitomwon-kaarei, touriu Maalalel. Ani akidounet a Maalalel, kiboi Kenan ngikaru ngamiae ngakan-kauni ka ngitomwon-omwon. Touriu ngesi ngide ngiche lusapa ka lupesur. Araakasi ngikaru daang lu ayarea Kenan ngamiae ngakan-koomwon ka ngitomon. Ani erumor, totoan. Araunet a ngikaru a Maalalel ngitomwon-kapei ka ngikan, touriu Yared. Ani akidounet a Yared, kiboi Maalalel ngikaru ngamiae ngakan-kauni ka ngitomwon-uni. Touriu ngesi ngide ngiche lusapa ka lupesur. Araakasi ngikaru daang lu ayarea Maalalel ngamiae ngakan-kauni ka ngitomwon-koomwon ka ngikan. Ani erumor, totoan. Araunet a ngikaru a Yared amiat apei ka ngitomwon-kapei ka ngiarei, touriu Enok. Ani akidounet a Enok, kiboi Yared ngikaru ngamiae ngakan-kauni. Touriu ngesi ngide ngiche lusapa ka lupesur. Araakasi ngikaru daang lu ayarea Yared ngamiae ngakan-koomwon ka ngitomwon-kapei ka ngiarei. Ani erumor, totoan. Araunet a ngikaru a Enok ngitomwon-kapei ka ngikan, touriu Metusela. Ani akidounet a Metusela, kiruko Enok ka Akuj a ngikaru a ngamiae a ngauni. Touriu ngesi ngide ngiche lusapa ka lupesur. Araakasi ngikaru daang lu ayarea Enok ngamiae ngauni ka ngitomwon-kapei ka ngikan. Kiboi Enok erukito ka Akuj, ani erumor topuripuriakin, ani alemarea Akuj. Araunet a ngikaru a Metusela amiat apei ka ngitomwon-kauni ka ngikan-kaarei, touriu Lamek. Ani akidounet a Lamek, kiboi Metusela ngikaru ngamiae ngakan-kaarei ka ngitomwon-kauni ka ngiarei. Touriu ngesi ngide ngiche lusapa ka lupesur. Araakasi ngikaru daang lu ayarea Metusela ngamiae ngakan-koomwon ka ngitomwon-kapei ka ngikan-koomwon. Ani erumor, totoan. Araunet a ngikaru a Lamek amiat apei ka ngitomwon-kauni ka ngiarei, touriu ikoku nisapat. Sodi tanyara ekiro keng Noa. Tolim Lamek tama, “Kisianguni ngoni logo alotich alokaagongon a ngalup ana kolong elami Ekapolon Akuj.” Ani akidounet a Noa, kiboi Lamek ngikaru ngamiae ngakan ka ngatomwon-koomwon ka ngikan. Touriu ngesi ngide ngiche lusapa ka lupesur. Araakasi ngikaru daang lu ayarea Lamek ngamiae ngakan-kaarei ka ngatomwon-kaarei ka ngikan-kaarei. Ani erumor, totoan. Araunet a ngikaru a Noa ngamiae ngakan, touriu Chem, ka Ham, ta Yapes. Na alalakearotor ngitunga anakwap sodi touriunae ngapesur, kingolikis talokookeng a ngakujo atamar eraakasi tanakookeng a ngitunga nakebuseak. Sodi toliworos kesi iusete daang na cha asakete akuut. Tolim Ekapolon Akuj tama, “Nyibooyi Etau kang anitwaan nakajik, kainyo etoaneene itwaan. Napei tokona jik, eliworosi ngirwa keng ngikaru amiat apei ka ngitomwon-arei.” Ngirwa ngulu ka ekisidi a ngirwa kangulu, ayakasi ngitunga lulangir-kooyak noi nakwap. Araakasi kesi ngide lu auriunete talokookeng a ngakujo na euseta tanakookeng a ngitunga. Araakasi ngitunga ngulu ngikiliok lukolong ekilenikinit, nabo ayenikinitae. Kingolik Ekapolon Akuj atamar alalaar akisech a itwaan anakwap, nabo erubakinito ngakiro na itami ngesi eroko jik. Toronik Ekapolon Akuj nikolong asubunea ngesi itwaan anakwap. Sodi kialolong Ekapolon Akuj noi. Tolim tama, “Amunyari ngitunga lukolong asubuni tongopiyasi anakwap. Amunyari ngitunga ka ngitieng, ka ngiborei lu eliato, ta ngikieny, kainyo karonikis ayong ngakiro nakolong asubunea kesi.” Nakaneni tojoik Ekapolon Akuj Noa. Eraakasi nugu ngalesea a Noa. Arai Noa itwaan ni atenoono eboyor, ni amam ibore asechit ngirwa lu ayarea. Arukito Noa ka Akuj. Touriu Noa ngide lusapa nguuni lu anyaritae Chem, ka Ham, ta Yapes. Kinyasun akwap alongaren Akuj, kilelebun ekurikur. Kingolik Akuj akwap toyen atamar aroner, kainyo arono eboyor a ngitunga kadaang. Tolimok Akuj Noa tama, “Asaki ayong amunyar ngitunga daang, kainyo eleleba kesi ekurikur nakwap. Enyasuni ayong kesi ka akwap aapei. Tosub atubwa naapolon alokitoe aloajokon. Todukok ngakais tooma natubwa ngina sodi kilalak elaam tooma ka nikalapatan a atubwa. Ikokini iyong isubakini nege, eliwor awoyau na alokwap ngamitae amiat apei ka ngatomwon-uni ka nguuni. Eliwor aurianut ngamitae ngatomwon-arei ka ngaarei. Eliwor awoyau na alokidiama ngamitae ngatomon ka ngauni. Tobur ewae lo alokidiama a atubwa sodi kimiek ngasentimitae ngatomwon-omwon ka ngoomwon anakidingos a ewae alo alokidiama ka ngikwaasea. Todukok ngiwaitin nguuni tooma atubwa, ewae lo alokwap, ka loa alokiding, ta loa alokidiama. Ani erumor, todukok ekidor lokwaas. Kingolik a, ameuni ayong akaale nakwap tomunya ibore ni eyari daang. Etoani ibore daang ni eyei nakwap. Nakaneni eyakasi ngakiro nakichamakin ayong ka iyong. Ilomarete iyong ka aberu kon, ka talokookon, ta ngaberu a talokookon tooma natubwa. Aloborei kadaang alu eyarete, kilomak tooma natubwa, nikile ka niberu, sodi toyareta. Kilomak ngikieny ngigelagelae, ka ngitieng ngigelagelae, ta ngiborei lu eliato ngigelagelae natubwa, sodi toyara. Anauk a apei, toliworos ngiarei make elomarete. Tolema tani ngamuja daang na enyamio sodi kiwaak natubwa, toliworos kesi inyamete esi ka ngiborei ngulu.” Tosubak Noa daang na adungokinit Akuj. Tolimok Ekapolon Akuj Noa tama, “Tolomasi iyong ka ngitunga a awi kon daang natubwa kainyo engolik ayong atamar alotunga alu a ngirwa kalu, iyong irai itwaan ni itenoono. Alotieng alu italeunitoe, tolema ngaukia ngakan-kaarei, erai auk apei nikile ka niberu. Sodi tolem auki apei alotieng alu nyitaleunitoe. Tolem tani ngaukia ngakan-kaarei a ngikieny a ngigelagelae, nikile ka niberu, sodi toureta kesi torubakis eyakasi nakwap. Kainyo adaunet a ngirwa a ngikan-kaarei, ameuni ayong akiru nakwap taram a ngirwa a ngitomwon-omwon, akwaar ka apaaran, sodi atomunyarea ayong ngiborei daang lu eyarete lu kolong asubuni ayong.” Sodi tosubak Noa daang na adungokinit Akuj. Araakasi ngikaru a Noa ngamiae ngakan-kapei na abunio akaale nakwap. Toloma Noa natubwa kirukosi ka aberu keng, ka talokookeng, ta ngaberu a talokookeng, sodi toyuunotor anakaale. Tani ngitieng lu italeunitoe, ka lu nyitaleunitoe, ka ngikieny, ta daang lu eliato alokwap, tolomasi tooma natubwa na ayei Noa, a ngiarei-rei, nikile ka niberu, loger lo adungokinitor Akuj Noa. Ani adaunet a ngirwa a ngikan-kaarei, taram akiru akwap. Akolongit na a ngatomon ka ngakan-kaarei, elap loa ngiarei, ngirwa lu araakatar ngikaru a Noa ngamiae ngakan-kapei, toporo ngakipi aloleleae a akwap, nabo tangaaros ngipukei a adis. Sodi totep akiru akwap a ngirwa a ngitomwon-omwon, akwaar ka apaaran. Akolongit napei ngina, tolomasi Noa ka aberu keng natubwa naapolon ka talokookech luuni lu anyaritae Chem, ka Ham, ta Yapes, erukito ka ngaberu kech. Tolomasi natubwa aapei ka ngitieng lu alomoding ngigelagelae, ka ngibaren ngigelagelae, ka ngiborei lu eliato ngigelagelae, ka ngiborei lu eporito ngigelagelae, ta ngikieny ngigelagelae. Toloma Noa natubwa, tolomasi tani ngiborei daang lu eyarete, eraakasi ngiarei-rei. Toloma ibore daang natubwa, nikile ka niberu, loger lo adungokinitor Akuj Noa. Sodi togolok Ekapolon Akuj ngesi tooma. Min akaale ngina nakwap a ngirwa a ngitomwon-omwon. Kiatakinos ngakipi kilebulebuun atubwa ngina, kikear kidiama noi anakwap. Kiatakinos ngakipi talalaketa noi alokidiama akwap, sodi kilebileb atubwa alokidiama ngakipi. Talalaketa ngakipi noi toburuchiasi ngimoru daang anakwap. Kikearos ngakipi ngamitae ngakan-kaarei alokidiama ngimoru. Totoan ibore daang nipalem ilat anakwap. Totoaka ngikieny, ka ngibaren, ka ngitieng a moding, ka ibore daang ni eliat alokwap, ta ngitunga. Totoan ibore daang ni ianga a ngikumes anakwap. Tomunya Ekapolon Akuj ibore daang ni eyari anakwap. Tomunya ngitunga ka ngibaren, ka ngiborei lu eliato, ta ngikieny, anakwap. Kidong Noa bon ka ngulu arukito ka ngesi anatubwa anaapolon. Toburuchiasi ngakipi akwap a ngirwa a amiat a apei ka ngitomwon-kan. Nakaneni nyimuriakina Akuj Noa, ka ngiborei, ta ngibaren daang lu ayakasi natubwa naapolon. Kitukut Akuj ekuwam anakwap, sodi kijuwasi ngakipi. Togoloi ngileleae ka ngipukei a adis, sodi kikwaa akiru. Toliworos ngakipi ijiete wadio. Ani adaunet a ngirwa a amiat a apei ka ngitomwon-kan, tadaunos ngakipi. Ani akolongit na a ngatomon ka ngakan-kaarei, elap loa ngikan-kaarei, towo atubwa naapolon alomoru a Ararat. Torubakis ngakipi ijiete, ani akolongit na ekingaren a elap alo a ngitomon, tatakanuut ngaitae a ngimoru. Ani adaunet a ngirwa a ngitomwon-omwon, tangaa Noa epuke a atubwa, sodi kipudo ekuruk nikalapatan. Toliwor ekuruk eporit irimit akwap tanang na aokioto ngakipi anakwap. Ani erumor, kipudo ngesi akuuri esaki kingolik kedauna ngakipi anakwap. Ani kona angopikinea akuuri ni edoe ani aringaakatar ngakipi eburuchiarito akwap, tobongo natubwa. Sodi kirum Noa ngesi kilomak natubwa. Kidaradarak ngesi nabo a ngirwa a ngikan-kaarei, ani erumor kipudo nabo akuuri nikalapatan. Ani enangi ebong, tobongu akuuri nikeng ekodit akuyen a ekitoe a akimiet a akituk. Sodi toyen Noa atamar ejiwasi ngakipi anakwap. Kidaradarak ngesi nabo a ngirwa a ngikan-kaarei, ani erumor kipudo akuuri nikalapatan. Nakaneni nyebonguno akuuri ngina. Akolongit na ekingaren a elap alo a ekingaren, na arauneta ngikaru a Noa ngamiae ngakan-kapei ka epei, toon akwap. Tolema Noa ibore ni aburit atubwa naapolon, sodi kingolik atamar keono akwap. Toon akwap akolongit na a ngatomwon-arei ka ngakan-kaarei a elap alo a ngiarei. Tolimok Akuj Noa tama, “Topudosi anatubwa, iyong ka aberu kon, ka talokookon, ta ngaberu a talokookon. Topudutu ka ngiborei daang lu eyarete, keraakasi ngikieny kori ngitieng, kori ibore cha daang ni eliat alokwap. Sodi toureta, kilelebun akwap.” Topudo Noa anatubwa kangina, kirukosi ka aberu keng, ka talokookeng, ta ngaberu a talokookeng. Etiengit daang, ka ibore daang ni eliat, ka ikeny daang, ta ibore daang ni elosi alokwap, topudut anatubwa anaapolon a angalooso a ngagelagelae. Todukok Noa ekeno a ngakipeyos. Sodi tolem etiengit ka ikeny daang ni italeunitoe, sodi kipeyo alokeno alo ipeyonokinere Akuj. Ani na enguunio Ekapolon Akuj akukuny ngina, tolimokin ngesi bon tama, “Nyeringa nabo elami akwap kotere itwaan en, kainyo eroko ngakiro na itami itwaan napei eringa edit. Nyeringa tani enyasuni ibore daang ni eyari loger lobeen enyasunea. Ani eringa akwap eyei, epete ngirwa lu itaare, ka lu elemere ngamanat. Emini nikaalimon ka nikamonan, akamu ka akiporo, apaaran ka akwaar.” Topia Akuj Noa ka talokookeng tolimok tama, “Toureta talalaketa, sodi kilelebunos nakwap. Kikerete esi ngitieng daang, ka ngikieny daang, ka ibore daang ni eliat, ta ngikolia. Ipolokinete esi kesi daang. Tanyama ibore daang ni elosi ka ngikito luuchik aapei, kainak ayong esi kesi daang toliworos akimuj kus. Nakaneni nyiinyam akiring na eyakasi ngaakot, kainyo eyei akiyar naakot. Ani kear itwaan niche, irirao. Eario etiengit daang kori itwaan ni eari itwaan niche. Itwaan ni ebukori ngaakot aniche, ebukorio nakeng dang. Asubunio kolong itwaan ikwaan ka Akuj. Toureta sodi kieatakinos, talalaketa noi anakwap.” Tolimok Akuj Noa ka talokookeng tama, “Kingolikisi a, kichamakin tokona ayong ka esi ta ngalesea kus. Kichamakin tani ka ibore daang, ka ngikieny, ka ngibaren, ta etiengit daang lo ipudunete ka esi anatubwa. Kichikakin ayong ka esi atamar, nyeringa nabo jik amunyari ngiborei lu eyarete a akaale, kori nyemini nabo akaale na inyasuni akwap.” Tolim Akuj tama, “Ibore en ngesi idodiuni atamar kichamakin ayong ka esi ta ngiborei lu eyarete daang, napei tokona jik tanang monan. Ewaakini ayong alokakinet lodowon, toliwor ngesi idodiuni atamar kichamakin ayong ka akwap. Eliwor na apetakinea ayong ngidowon kidiama nadis, sodi min alokakinet lodowon, etamuni ayong achamunet nakichamakinor ayong ka esi, ta ibore daang ni eyari. Nakaneni nyeliworosi nabo ngakipi akaale na emunyari ngiborei lu eyarete. Ani etakanuuni alokakinet ngina alodowon, ataanyunga ayong, etamuni ayong achamunet nakajik nakichamakin ayong ka ibore daang ni eyari ni eyei nakwap.” Tolimok Akuj Noa tama, “Ibore ngini ngesi idodiuni achamunet nakichamakin ayong ka ngiborei daang lu eyarete lu eyakasi nakwap.” Talokookeng a Noa lu apudorete anatubwa anaapolon kesi Chem, ka Ham, ta Yapes. (Arai Ham apakeng a Kanaan.) Araakasi luuni lugu talokookeng a Noa. Erai nikech kesi etorunete ngitunga daang lua akwap. Noa lo arai eketan, ngesi itwaan ni ekingaren etakini ngikito lu enyaritae ngimusabib. Tamat ngesi emuna lo epuritoe, sodi kiraka. Toper aloeam keng emuner. Sodi Ham lo erai apakeng a Kanaan taanyunga apakeng eperi emuner, tolot tolimok talokaatokeng luarei ayakasi nikalapatan. Sodi tolemut Chem ka Yapes eworu, toriongakis losegeta. Toloto akamaluwot sodi tolomasi loeam kimuko apakech. Engoliarito kesi wache, nyeanyungara apakech emuner. Ani ebwanga emuna anakou a Noa, toyen na asubea ngesi lokookeng loochi, tolim tama, “Ilamam Kanaan, eliwor ngesi ekedalan a ngikaitotoi keng.” Tolim nabo tama, “Epiari Ekapolon Akuj kang Chem, nakaneni eliwor Kanaan ekedalan keng. Kimiek topia Akuj Yapes, talalaketa ngalesea keng, kimiekisi ngalesea keng kiboikinos ka ngitunga a Chem, sodi toliwor Kanaan ekedalan keng.” Adaunet a akaale, kiboi Noa ngikaru ngamiae ngauni ka ngitomwon-kan. Araakasi ngirwa daang a Noa ngikaru ngamiae ngakan-koomwon ka ngitomwon-kan. Ani erumor, totoan. Eraakasi ngirora lu ngika ngalesea a talokookeng a Noa alu anyaritae Chem, ka Ham, ta Yapes. Auriunete kesi ngide lusapa, adaunet a akaale. Ngirora a talokookeng a Yapes kesi Gomer ka Magog, ka Madai, ka Yapan, ka Tubal, ka Mechek, ta Tiras. Ngirora a talokookeng a Gomer kesi Achikenas, ka Ripas, ta Togama. Ngirora a talokookeng a Yapan kesi Elicha, ka Sipania ka Kupuro, ta Rode. Araakasi kesi taapaakech a ngitunga alu alomito lokwaas a anam. Eraakasi kesi ngalesea a Yapes, lu elomito a ngitela a ngigelagelae nakwapea nguna, ianete ngabukui ngagelagelae. Ngirora a talokookeng a Ham kesi Kuch, ka Misiri, ka Libia, ta Kanaan. Ngirora a talokookeng a Kuch kesi Seba, ka Apila, ka Sabita, ka Raama, ta Sabiteka. Ngirora a talokookeng a Raama kesi Cheba ka Dedan. Touriu Kuch Nimurod lo arai itwaan ni ekingaren anakwap ni ekileenikinit ajwono. Arai ngesi alongaren Akuj itwaan ni ayenikinitae kotere akirikare ngitieng. Sodi toliworos ngitunga ebalasi, “Kimiek Ekapolon Akuj kitoyen erika loger a Nimurod alo eyenikinitae alongaren Akuj kotere akirikare ngitieng.” Esiauni mono ngesi topolok Babilon, ka Erek, ta Akadi, lu eyakasi nakwap a Babilonia. Ani erotokini anakwap kangina, tolot Asiria ni adukokini ngesi ngirerea lu enyaritae Ninewi, ka Reobos-iri, ta Kala. Sodi todukok nabo ere a Resen, lo ayei kiding Ninewi ka ere loapolon enyaritae Kala. Touriu Misiri Ludim, ka Anamim, ka Leabim, ka Napituim, ka Pasirus, ka Kasilui, ta Kirete lu eraakasi nikech etorunete Ngipilisti ka Ngikapitori. Touriu Kanaan Sidon lo erai lokookeng lo ekingaren, ta Hes. Erai nabo Kanaan apaakeng a Ngiebus, ka Ngiamor, ka Ngigirigach, ka Ngiipi, ka Ngiarik, ka Ngisin, ka Ngiaripad, ka Ngisemar, ta Ngiamas. Topetaros ngalesea a Kanaan ekisidi. Napei alo Sidon toten Gerar, anangit akwap a Kanaan ni enyaritae Gasa. Ani alowae alo a kide, anangit akwap a Kanaan Sodom, ka Gomora, ka Adima, ta Seboim, diyete Lacha. Eraakasi ngulu ngalesea a Ham, lu elomito a ngitela a ngigelagelae nakwapea nguna, ianete ngabukui ngagelagelae. Chem lo arai lokaatokeng a Yapes loapolon ngesi auriuni ngalesea a Ngieburaniae daang. Talokookeng a Chem kesi Elam, ka Asiria, ka Aripakichad, ka Ludi, ta Aram. Talokookeng a Aram kesi Us, ka Uli, ka Geser, ta Machi. Touriu Aripakichad Chela, touriu Chela Eber. Touriu Eber ngide lusapa ngiarei. Tanyarae ekiro alo a ekingaren Peleg, kainyo atiakio akwap ngirwa lu edounere ngesi. Anyaritae lokaatokeng Yokitan. Touriu Yokitan Alimodad, ka Chelepu, ka Asarimawesi, ka Yera, ka Adoram, ka Usali, ka Dikila, ka Obali, ka Abimael, ka Cheba, ka Opiri, ka Apila, ta Yobab. Araakasi ngulu daang talokookeng a Yokitan. Esiakini akwap na ebooyoto kesi alo Mecha tanang lomukur lu ibakito alo kide lu enyaritae Separi. Eraakasi ngulu daang talokookeng a Chem, lu elomito a ngitela a ngigelagelae nakwapea nagelagelae, ianete ngabukui ngagelagelae. Eraakasi ngitunga ngulu ngiyenet a Noa, idodiunitae nabo eger lo apetakinotor kesi nakwapea adaunet a akaale. Eanete ngitunga a akwap kadaang ngabukui ngapei nabo araakasi ngakiro ngapei. Ani na awotuneta ngitunga alo kide, apotu tanangut naroatin a akwap a Babilonia. Sodi toloma kesi neni. Tolimonokinos kesi make tamasi, “Potu atoyata echoto, sodi enoma lokojokon.” Kitiliwosi kesi echoto lo enomete ngamoru, sodi tokonyakis a elaam. Tolimut tamasi, “Potu atodukokisi ere lo enangi aita keng nadis, sodi kitoyenikinere ngoni, nyikipetakin nakwapea daang.” Totiyaun Ekapolon Akuj aanyun ere ka adukuoru na adukete ngitunga. Sodi tolim Akuj tama, “Kingolikisi a, eraakasi kesi ebukut epei, nabo erai ngabukui kech ngapei. Erai ibore en akisiakinet a ngakiro ana esubete kesi. Nakaneni emam tokona ibore ni esakete kesi akisub ni ekuruwori kesi. Potu atotiyaaros sodi echoliakisi ngabukui kech, nyeepedoreta kesi make apupo a ngakiro ana iruorosi.” Sodi topeta Ekapolon Akuj kesi kaneni, kialakin akwap wadaang. Kimiekis kesi akiduk ere ngolo. Kotere ngakiro nguna, tanyarae ere ngolo Babilon, kainyo neni ngesi echoliakinea Ekapolon Akuj ngabukui a ngitunga kadaang, nabo neni ngesi apetakinea Akuj kesi nakwap wadaang. Eraakasi ngirora lugu ngika ngalesea a Chem. Ani enangete ngikaru a Chem amiat apei, touriu Aripakichad, ngikaru ngiarei adaunet a akaale. Ani akidounet a Aripakichad, kiboi Chem ngikaru ngamiae ngakan. Touriu ngesi ngide ngiche lusapa ka lupesur. Araunet a ngikaru a Aripakichad ngitomwon-uni ka ngikan, touriu Sela. Ani akidounet a Sela, kiboi Aripakichad ngikaru ngamiae ngoomwon ka nguuni. Touriu ngide ngiche lusapa ka lupesur. Araunet a ngikaru a Sela ngitomwon-uni, touriu Eber. Ani akidounet a Eber, kiboi Sela ngikaru ngamiae ngoomwon ka nguuni. Touriu ngide ngiche lusapa ka lupesur. Araunet a ngikaru a Eber ngitomwon-uni ka nguomwon, touriu Peleg. Ani akidounet a Peleg, kiboi Eber ngikaru ngamiae ngoomwon ka ngitomwon-uni. Touriu ngide ngiche lusapa ka lupesur. Araunet a ngikaru a Peleg ngitomwon-uni, touriu Reu. Ani akidounet a Reu, kiboi Peleg ngikaru ngamiae ngaarei ka ngikan-koomwon. Touriu ngide ngiche lusapa ka lupesur. Araunet a ngikaru a Reu ngitomwon-uni ka ngiarei, touriu Serug. Ani akidounet a Serug, kiboi Reu ngikaru ngamiae ngaarei ka ngikan-kaarei. Touriu ngide ngiche lusapa ka lupesur. Araunet a ngikaru a Serug ngitomwon-uni, touriu Naor. Ani akidounet a Naor, kiboi Serug ngikaru ngamiae ngaarei. Touriu ngide ngiche lusapa ka lupesur. Araunet a ngikaru a Naor ngitomwon-arei ka ngikan-koomwon, touriu Tera. Ani akidounet a Tera, kiboi Naor ngikaru amiat apei ka ngitomon ka ngikan-koomwon. Touriu ngide ngiche lusapa ka lupesur. Araunet a ngikaru a Tera ngitomwon-kaarei, touriu Aburam, ka Naor, ta Aran. Eraakasi ngirora lugu ngika ngalesea a Tera. Auriuni Tera Aburam, ka Naor, ta Aran. Touriu Aran Loti. Kisiau Aran totoan eringa apakeng Tera nyetoana. Atoani ngesi alore alo kolong edounere alo enyaritae Ur, alo eyei nakwap a Babilonia. Kuutasi Aburam ka Naor. Anyaritae aberu a Aburam Sarai. Anyaritae aberu a Naor Milika. Arai Milika nakookeng a Aran alo arai apakeng a Isika. Nakaneni akolupana Sarai, amam ikoku. Toriko Tera Aburam lo arai lokookeng, ka Loti lo arai lokookeng a Aran, alo arai lokookeng a Tera. Toriko tani Sarai na arai aberu a Aburam, alo arai lokookeng. Torotokis kesi alo Ur Anakwap a Babilonia, toloto nakwap a Kanaan. Ani enangete Aran, toloma neni. Ani eraunete ngikaru a Tera ngamiae ngaarei ka ngikan, sodi totoan Tera alo Aran. Tolimok Ekapolon Akuj Aburam tama, “Tonyou anakwap kon, ana eyakasi ngiyenet kon, ka ngitunga a awi a apakon, tolot nakwap nakedodikini ayong iyong. Ketiliwori ayong iyong ebukut loapolon. Kapiari ayong iyong, etiliwo ekiro kon lo eyenikinitae nabo a ekiro kon eraunete luche lu epiaritae. Apiari ayong ngulu kipiarete iyong, ani ngini kilami iyong, elami ayong. Apiari ayong ngibukui daang kotere iyong.” Sodi torotok Aburam loger lo alimokinitor Ekapolon Akuj ngesi, apot kirukosi ka Loti. Araakasi ngikaru a Aburam ngitomwon-kaarei ka ngikan na arotokinio alo Aran. Toriko Aburam Sarai na arai aberu keng, ka Loti lo arai lokookeng a lokaatokeng, tolemasi tani ebari daang lo apot kesi taanyut. Toriko tani ngikedalak lu aanyunete kesi alo Aran, toloto nakwap a Kanaan. Kitor Aburam kiding akwap ngina tanang Chekem ni ayei echoke lo italeunitoe ani enyaritae More. (Aringa ngitunga a akwap a Kanaan eyakasi neni ngirwa ngulu.) Tatakanu Ekapolon Akuj ani a Aburam tolimok tama, “Ainakini ayong ngalesea kon akwap naga.” Sodi todukok ngesi neni ekeno a ngakipeyos a Ekapolon Akuj ana atakanuuni anikeng. Ani erumor towosia moru lo ayei kide a Besel. Todukok ngesi eam neni. Ayei Besel lowae loa lotoo, toyei Ai lowae loa lokide. Todukok ngesi ekeno a ngakipeyos neni, sodi kilip enyarit ekiro a Ekapolon Akuj. Sodi torubak awesit a Aburam elosi ngaren, eteni lowae loa Negeb. Nakaneni min eron a akoro nakwap a Kanaan. Towosia Aburam nakwap a Misiri akiboi kaina kainyo arono akoro ngina noi. Ani enangete kesi diyete Misiri, tolimok Aburam aberu keng Sarai tama, “Ayeni ayong atamar irai iyong aberu nakebusean. Nakianyungareta iyong Ngimisiri, etamarete irai iyong aberu kang, sodi kataara ayong kimiekis iyong. Tolimok iyong kesi atamar irai iyong nakaatokang, sodi katosubere ayong naajokak, nabo atoyuun ayong kotere iyong.” Ani enangi Aburam Misiri, kingolikis Ngimisiri atamar ibus aberu keng noi. Ani eanyungarete ngikapolok a arieng a Parao, alo arai ekapolon a Misiri aberu ngina, toloto tolimokis Parao atamar ibus ngesi noi. Torikoroe aberu ngina kai a Parao. Tosubea ekapolon Parao Aburam ngakiro naajokak kotere Sarai. Nak Parao Aburam ngamesekin, ka ngaanei, ka ngaatuk, ka ngisikiria, ka ngikedalak, ta ngikaala. Nakaneni kitoting Ekapolon Akuj Parao ka ngitunga a awi keng ngidekesinei luaronok noi ani alemarea Parao Sarai na arai aberu a Aburam. Sodi tanyarau Parao Aburam kingit tama, “Anukiro nugu kisubea iyong ayong? Nyo pekilimokinea iyong ayong atamar erai Sarai aberu kon? Nyoni ibalar iyong erai nakaatokon, sodi kimiek iyong ayong alemari ngesi toliwor aberu kang? Kingolik a, aberu kon naga, toriko tonyou tolot kane.” Kisuruor ekapolon ngolo ngitunga keng ngakiro a Aburam. Kitwarakis ngitunga ngulu Aburam anakwap kech. Kirukosi Aburam ka aberu keng, ta ibore daang ni arai ikeng. Sodi tonyout Aburam ka aberu keng alo Misiri, tolemasi ibore daang ni arai ikech. Kirukosi kesi ka Loti tananga Negeb. Abarit Aburam ngibaren, ka ngaropiyae, ta egolit. Towot ngesi alo Negeb tanang Besel, kiding Besel ka Ai, nikolong sek adukokinit ngesi eam keng, ka ekeno a ngakipeyos. Kilip Aburam kaneni enyarit ekiro a Akuj. Ayakasi Loti dang lo arukito ka Aburam ngisipaan a ngaatuk, ka ngamesekin. Ayakasi ngesi tani ngieaman. Nakaneni todidinger akwap ngina, tongop kesi kona iboikinosi wapei ani alalaketa ngibaren kech. Tongolopa ngikeyokok a Aburam ka ngikeyokok a Loti. (Ngirwa ngulu, aringa Ngikanaan ka Ngiperes elomito nakwap.) Sodi tolimok Aburam Loti tama, “Nyejoikinit iyong ka ayong, kori ngikeyokok yok engolopasi, kainyo kirai ngoni ngitunga lu kiyana. Aloger kangolo, atotiakas. Toseu ewae lo kijoikinit iyong. Ani kilot iyong lowae loa loteten, alosi ayong lowae loa lokedieny.” Kingolia Loti taanyunga adipo a Yorudan eyakasi ngakipi wadaang loger a amana ana a Ekapolon Akuj. Ekwaan nabo ka akwap a Misiri, ewae lo etenere Soar. Araakasi ngirwa ngulu lu aringaakar Ekapolon Akuj nyinyasuna ngirerea a Sodom ka Gomora. Sodi toseu Loti adipo na a Yorudan. Towot Loti toten kide. Ekokinete kesi etiakasi neni. Tolom Aburam nakwap a Kanaan, sodi tolom Loti lorerea lu ayakasi nadipo, diyete Sodom. Aroko ngitunga a Sodom. Asubete ngasechesea naaronok ani a Ekapolon Akuj. Ani kerotoki Loti kerumor, tolimok Ekapolon Akuj Aburam tama, “Kingolia lowaitin daang, ani iyei iyong kaneni. Kainyo akwap na itee iyong ngina, kainakini ayong iyong ka ngalesea kon jik. Elalakearosi ngalesea kon totiata ngalup, sodi ani kepedori itwaan akimarun ngalup, epedori tani akimarun ngalesea kon. Tonyou tokona tolot kiseme akwap etiae lo etia, kainyo kainakini ayong iyong.” Sodi toyata Aburam eam keng, tolot tolom lochokei lu italeunitoe lu eyakasi Mamure, nakwap a Eburon. Todukok ngesi ekeno a ngakipeyos inaa. Anyounete ngikapolok nguomwon lu anyaritae Amurapel loa akwap a Babilonia, ka Ariok loa akwap a Elasar, ka Keroriloama loa akwap a Elam, ta Tidal loa akwap a Goim. Toloto akitojwore ngikapolok ngikan lu anyaritae Bera loa akwap a Sodom, ka Biricha loa akwap a Gomora, ka Chinab loa akwap a Adima, ka Chemeber loa akwap a Seboim, ta ekapolon a akwap a Bela (ana enyaritae ekiro keng eche Soar). Kiriamariama ngajorei a ngikapolok alukan kangulu nadipo a Sidimu (ana enyaritae a ekiro a eche anam a Amakat). Apolokinit Kedoriloama kesi a ngikaru a ngitomon ka ngiarei. Ani enangi ekaru loa ngitomon ka nguuni, tongero kesi ngesi. Ani ekaru loa ngitomon ka nguomwon, pot Kedoriloama ka ngikapolok lu arukito ka ngesi kidwanga Ngirepai alo Achitaros-karinaim, kidwanga Ngisus alo Ham, kidwanga Ngiemim alo Chawe-kiriyasaim. Sodi kidwanga Ngiori alomor kech enyaritae Edom, tanang Eliparan lo eyei lokwaas a ariet. Ani erumor tobongut kesi tanangut Eminisipat (ni enyaritae a ekiro a eche Kadech). Kidwanga kesi ngitunga daang a akwap a Ngiamalek, kidwanga tani Ngiamor lu alomito Asason-tamar. Sodi tonyou ekapolon a Sodom, ka ekapolon a Gomora, ka ekapolon a Adima, ka ekapolon a Seboim, ta ekapolon a Bela (ana enyaritae a ekiro a eche Soar). Kiriamariama ngajorei kech daang nadipo a Sidimu. Kitojwoto kesi Kedoriloama lo arai ekapolon a Elam, ka Tidal lo arai ekapolon a Goim, ka Amurapel lo arai ekapolon a Babilonia, ta Arioko lo arai ekapolon a Elasar. Kitojwoto ngikapolok nguomwon ngikapolok ngikan. Eleleba ngaduon na ebokere elaam nadipo a Sidimu. Ani ematarosi ngikapolok a Sodom ka Gomora, tadakakinos epewae kech naduon nguna, tamataros luche lomor. Tolemasi ngikapolok luomwon ngiboro daang lu ayakasi Sodom ka Gomora. Tolemasi tani akimuj torotokis. Torikosi tani Loti lo arai lokookeng a lokaatokeng a Aburam, losek alomit Sodom. Tolemasi tani ngiboro keng. Nakaneni tobuchun itwaan alojie kangolo tolot tolimok Aburam lo arai Eburaniait ngakiro a ejie. Alomit Aburam lochokei lu italeunitoe a Mamure alo erai Eamorit. Arai Mamure lokaatokeng a Echikol ka Aner, alu ebakito ka Aburam aapei. Ani iirari Aburam atamar arikor lochien keng, tochunak ngesi ngikiliok lukajwok a awi keng. Araakasi daang ngamiae ngauni ka ngitomon ka ngikan-kauni. Sodi kiwapa ngikapolok luomwon ngulu tananga ni enyaritae Dan. Ani enangete neni, totiak ngesi ngitunga keng a ngajorei, kitojwoto ngimoe nakwaare, sodi kidwang. Kirita ngesi kesi tananga Oba lo eyei kwap a Damasko. Sodi tobuu ngesi ngiboro daang, tobuu tani lochien keng Loti ka ngiboro keng daang, ta ngaberu ka ngitunga luche. Ani ebonguni Aburam ani edwangea Kedoriloama ka ngikapolok luche, tolot ekapolon a Sodom akisiriam ngesi anadipo a Chewa (ana enyaritae a ekiro a eche Adipo a Ekapolon). Yau Melikisedeki lo arai ekapolon a Salem amugati ka emuna lo epuritoe. Arai ngesi tani emuron a Akuj ana Epol Noi. Sodi topia ngesi Aburam tolim tama, “Epiari Akuj na Epol Noi Aburam, Akuj nakolong asubuni adis ka akwap. Kipuroe Akuj na Epol Noi, na erai ngesi idwangea iyong ngimoe kon.” Sodi tolemik Aburam Melikisedeki alemunet apei anatomon a ibore kadaang ani atingit ngesi. Tolimok ekapolon a Sodom Aburam tama, “Nakinae ayong ngitunga, sodi tolema iyong ngiboro.” Nakaneni tolimok Aburam ekapolon a Sodom tama, “Ekong ayong alongaren Ekapolon Akuj Namerikanyer, nakolong asubuni adis ka akwap, atamar nyalemari ayong arukan kori emasanit kori ibore cha daang ni erai ikon, sodi nyiitamarea iyong etabar Aburam. Emam ibore achamuni ayong, mati akimuj na anyamete ngisorok ka ibore ni einakinio ngitunga lu kirukitor ayong. Kimiekisi Aner, ka Echikol, ta Mamure tolemasi ibore ni erai ikech.” Ani ekisidi taanyunga Aburam akisingolikinet a Akuj sodi kiira Ekapolon Akuj elimokini ngesi ebala, “Aburam, wara nyikibul. Arai ayong aupwal kon. Epoloor ebachit kon noi.” Nakaneni tolim Aburam tama, “Ee, Ekapolon lo irai Ekapolon Akuj, nyoni kiinakini iyong ayong atorubakinite ayong emam ikoku. Nakaneni Elieser loa akwap a Damasko ngesi erai ekeruman a awi kang.” Tolim Aburam tama, “Kingolik a, emam ikoku kiinak iyong ayong, nakaneni ekedalan lo idounitoe anawi kang ngesi eliwor ekeruman a awi kang.” Sodi kiira ngesi Ekapolon Akuj elimokini ngesi ebala, “Nyirumi itwaan en awi kon, lokookon ngesi irumi awi kon.” Kipudo Ekapolon Akuj Aburam nikalapatan tolimok tama, “Kingolia nadis, sodi kimaru ngikanyer, erai kipedori iyong akiyen ekimar kech.” Sodi tolimok Ekapolon Akuj ngesi tama, “Etiauni alalau a ngalesea kon neni.” Kigienokin ngesi Ekapolon Akuj kotere ngakiro nguna, talakar Ekapolon Akuj kimaru atamar etenoono eboyor keng. Tolimok Ekapolon Akuj Aburam tama, “Ayong ngesi Ekapolon Akuj nakolong karikuni iyong alo Ur alo a akwap a Babilonia, kainak ayong iyong akwap naga toliwor akon.” Nakaneni kingis Aburam tama, “Ekapolon lo irai Ekapolon Akuj, ekokini ayong ayeni atamar eliwor akwap naga akang ai?” Tatachak Ekapolon Akuj ngesi tama, “Yau ataok, ka akale, ta emesek loochi, lu enangito ngikaru kech nguuni. Yau tani akuuri ka itaok a kidomelio.” Inu Aburam Akuj ngitieng ngulu, tapak ngaarei, kiwaak kesi lowaitin ngiarei isibakit. Nakaneni nyepaka ngikieny ngaarei. Ani epote ngataruk akinyam ngitieng lukatoak ngulu, kitwarak Aburam. Ani elosi akolong adooyor, kilurut Aburam ngaju naapotiok tojotoor, sodi tobul Aburam noi kotere ngakiro na erujae. Tolimok Ekapolon Akuj Aburam tama, “Toyen dir atamar eliworosi ngalesea kon ngipeyok anakwap a ache. Eliworosi kesi ngikedalak sodi toboliare a ngikaru a ngamiae a ngoomwon. Nakaneni erirae ayong ngibukui lu esubete kesi etich kech. Ani erumor, erotokinete ngalesea kon ebarito. Ani eliwor iyong, iboi iyong tomojong, totoan akaalimon, sodi kitonuk. Ebongunete kesi nege enangi ales na a ngoomwon, kainyo nyetwarakini ayong Ngiamor mati mono kerokearosi kesi noi.” Ani edooyori akolong sodi toribok akwap, abu ekeno lo apurui ka akinwaket na anoki kitoro kiding ngitieng lu apakak ngaarei. Akolongit ngina kaneni jik, tachamakin Ekapolon Akuj ka Aburam tolimok tama, “Ainakini ayong ngalesea kon akwap naga napei anangolol a Nili alo Misiri, tanang nangolol naapolon na enyaritae Eupurate. Ainakini tani akwap a Ngiken, ka na a Ngikenis, ka na a Ngikadimon, ka na a Ngiiti, ka na a Ngiperes, ka na a Ngirepai, ka na a Ngiamor, ka na a Ngikanaan, ka na a Ngigirigach, ta na a Ngiebus.” Emam ngide abu aberu a Aburam Sarai kidou. Ayei akedalan kech anyaritae Agar na abunit anakwap a Misiri. Sodi tolimok Sarai Aburam tama, “Kingolik a, kemik ayong Ekapolon Akuj ngide. Topero ka akedalan kang atopedorea ayong aanyun ngide anikeng.” Kiira Aburam ngakiro na alimokini Sarai. Ani adaunet a ngikaru a ngitomon na alomitor Aburam nakwap a Kanaan, kipoto Sarai akedalan keng na anyaritae Agar na abunit anakwap a Misiri, nak Aburam kitiliwo aberu keng. Topero Aburam ka Agar, topoti Agar. Ani na engolikinea Agar atamar apoti ngesi, kimenya Sarai. Sodi tolimok Sarai Aburam tama, “Iyong kapaikinit ayong ngakiro nakemenyaritor ayong Agar. Ayong kolong epotori ngesi kainak iyong. Ani ingolikini ngesi atamar apoti, kemenya ngesi ayong. Kimiekisi Ekapolon Akuj totiaku atamar ngae aniyok esechit, iyong kori ayong.” Nakaneni tolimok Aburam Sarai tama, “Kingolik a, eraakasi ngakiro a akedalan kon ngaka akiding kon, tosubea iyong ngesi ngakiro na isakit iyong asubea.” Sodi toboliar Sarai Agar niaronon, todok Agar. Torukau emalaikat a Ekapolon Akuj ngesi alolelea a ngakipi alo eyei nariet. Erai elelea ngolo lo ayei lorot lo etenere Chur. Kingit emalaikat a Ekapolon Akuj Agar tama, “Agar na irai akedalan a Sarai, aliwae ibunio iyong, ani aliwae ilosi iyong?” Tatachu ngesi tama, “Adokinit ayong ani eyei akapolon kang Sarai.” Tolimok emalaikat a Ekapolon Akuj ngesi tama, “Tobongo ni eyei akapolon kon, sodi kiwap ngakiro keng.” Tolimok nabo emalaikat a Ekapolon Akuj Agar tama, “Etalalae ayong ngalesea kon tongop kona imarunio. Kingolik a, ipoti iyong, nakaneni idouni ikoku nisapat. Inyarae iyong ekiro keng Ichimael, kainyo eira Ekapolon Akuj akigoro nakiboliare iyong. Nakaneni ikokini lokookon asikiria nakaturonon. Eremokin ngesi ngitunga daang, nabo eremokinosi ngitunga daang ngesi. Ipakar ngesi ani eyakasi ngiyenet keng daang.” Sodi tolimok Agar Ekapolon Akuj na eruorosi ka ngesi ekiro be, “Akuj Na Itee.” Etami ngesi bon ebala, “Ekoe, tokona ibore en, aanyunga ayong Akuj edong ayari a?” Ngakiro nguna kesi enyaritotor ngitunga akar na eyei kiding Kadech ka Bered a ekiro be Beer-laai-roi. Kidou Agar ikoku a Aburam nisapat. Tolimok Aburam ikoku nisapat ngini ekiro be Ichimael. Araakasi ngikaru a Aburam ngitomwon-kauni ka ngikan-kapei na edounio Agar Ichimael. Ani enangete ngikaru a Aburam ngitomwon-koomwon ka ngikan-koomwon, bu Ekapolon Akuj tolimok ngesi tama, “Ayong arai Akuj Naationon. Kiwap ngakiro kang sodi tosubeene na eteniyete. Kichamakin ayong ka iyong sodi etalala ngalesea kon noi.” Tadakakin Aburam kwap tatap ereet ngalup. Tolimok Akuj ngesi tama, “Kingolik a, kichamakin ayong ka iyong, sodi toliwor iyong apaakeng a ngibukui alukaalak. Nyeringa nabo ekiro kon erai Aburam, nakaneni eliwor Aburaam kainyo ketiliwo ayong iyong apaakeng a ngibukui alukaalak. Etalalae ayong ngalesea kon lokojokon, toliworos ngibukui. Epote ngikapolok anikon. Nakaneni erichakini ayong achamunet nakichamakin ayong ka iyong toliwor aka iteni jik. Aliwor ayong Akuj kon, ka Akuj a ngalesea kon. Kainakini ayong iyong ka ngalesea kon akwap na tokona ipeyonitor iyong naga. Eliwor akwap a Kanaan daang aka ngalesea kon jik nakaneni aliwor ayong Akuj kech.” Tolimok Akuj Aburaam tama, “Ejoikinit iyong ichamuni akirichakin achamunet kang. Kirichakisi iyong ka ngalesea kon jik. Achamunet kang naga, na ejoikinit iyong irichakini. Anikang ka iyong, ta ngalesea kon daang na isidiunosi, ejoikinit ikoku nisapat daang ilengerio. Kilengerio esi ani etuborere amuny na alo kidiama, nakaneni eliwor ibore ngini emachar a achamunet ana kichamakin ayong ka esi. Ilengerio ikoku nisapat anikus ni eraakasi ngirwa keng ngikan-kauni. Ikoku nisapat daang analesea kus, kerai ni idounitoe anawi kus kori ni egielunitae a ngaropiyae, tarai nyerai ales kon. Ejoikinit ilengerio ngini idounitoe anawi kon ka ngini igielunit iyong a ngaropiyae kon. Nakaneni emini achamunet kang nawat kus, toliwor achamunet nakajik. Ani ekile lo nyilengeritae, ipakario alotunga keng, asech ngesi achamunet kang.” Tolimok Akuj Aburaam tama, “Nyiinyara nabo aberu kon Sarai. Napei tokona jik, eliwor ekiro keng Sara. Apiari ayong ngesi, nakaneni kainakini ayong iyong ikoku kidou ngesi. Apiari ayong ngesi toliwor itiokeng a ngibukui. Epote ngikapolok lu epolokinete ngitunga analesea keng.” Sodi tadakakin Aburaam kwap, tatap ereet keng ngalup, sodi tokieni. Kitama bon ebala, “Ekoe, epedori itwaan auriun ikoku kerata ngikaru keng amiat apei a? Epedori Sara na eraakasi ngikaru keng ngitomwon-koomwon akidoun a?” Kingit Aburaam Akuj tama, “Nyo peimiekinea iyong Ichimael toliwor ngesi irumi awi kang?” Tolim Akuj tama, “Mam. Idouni aberu kon Sara ikoku nisapat, sodi tolimok iyong ngesi ekiro be Isaka. Erichakini ayong achamunet nakichamakin ayong ka ngesi toliwor akajik ani eyei ngesi ka ngalesea keng. Ani anakiro a Ichimael, eira ayong ngakiro kon. Apiari ayong ngesi eatak ngalesea keng talalaketa. Eliwor ngesi apakeng a ngikapolok a ngitomon ka ngiarei nabo eliworosi ngalesea keng ngibukui lu eyenikinitae. Nakaneni erichakini ayong achamunet kang ani eyei lokookon Isaka, lo idouni Sara ekaru lo moi, ngirwa lu ikote lu tokona lugu.” Ani na eruorotor Akuj ka Aburaam torumor, torotok Akuj. Tolem Aburaam lokookeng Ichimael ka ngikedalak daang lu edounio anawi keng, ka lu agielunio a ngaropiyae, ta itwaan daang ni arai ikile anawi a Aburaam, sodi kilenger kesi loger lo adungokinitor Akuj. Araakasi ngikaru a Aburaam ngitomwon-koomwon ka ngikan-koomwon na elengerere. Araakasi ngikaru a Ichimael alo arai lokookeng ngitomon ka nguuni na elengerere. Akolongit napei ngina, kilengerae Aburaam ka lokookeng Ichimael. Kilengerae tani ngitunga daang a awi a Aburaam, lu edounitoe anawi keng, ka lu agielunitae a ngaropiyae. Tatakanu Ekapolon Akuj ani a Aburaam alochokei alu italeunitoe eyakasi Mamure. Esaa ngolo ebooyi Aburaam alokidor a eam keng naparan erirae akolong noi. Kingolia ngesi taanyunga ngikiliok nguuni ewaasi. Ani napei aanyungarea ngesi kesi, kikomak ngesi aloeam tolot akisiriam kesi, sodi kijuuru toriedik. Tolim tama, “Ngikapolok kang, ani kijoikinito esi ngakiro kang, tolomutu kare nawi kang kainyo arai ayong ekasuban etich kus. Kimiekisi ayau ngakipi ngadi kilotareta ngakejen kus, kiangasi alokwap ekitoe logo. Kainuni ayong esi tani akimuj adio, na inyamete esi taanyuneta ngikilinga lu ilooso ngaren. Alakara ayong ani iponeta nawi kang.” Sodi tolimut kesi tamasi, “Tosub nguna loger lo ilimu.” Kikirikiraar Aburaam loeam ni ayei Sara tolimok tama, “Kitemu ngakitemiet ngauni a ngakiria anaajokak tomunak sodi kidorok ngamugati atipei.” Tamatar Aburaam nia ayakasi ngibaren, kirum itaok nikanakunan, nak ekasuban etich keng tolimok atamar tosubak. Tolem ngesi akimiet ka ngakile, ta akiring sodi nak ngikiliok ngulu. Toliwor ngesi ekoranakini kesi akimuj alokwap ekitoe tanyama. Kingita kesi ngesi tamasi, “Nyaani aberu kon Sara?” Tatachak ngesi tama, “Eyei tooma loeam.” Tolimok epei kech ngesi tama, “Adaunet a ngilapio a ngikan-koomwon napei tokona, abonguni ayong, nakaneni idouni aberu kon ikoku nisapat.” Ayei Sara lokidor a eam, naabor a Aburaam, apupi ngakiro nguna. Amojongito Aburaam ka Sara lokojokon. Anangito ngikaru a Sara lu esalunea tojongo akidounun. Sodi tokieni Sara kitama bon ebala, “Ekoe, na tokona kimojongea ayong ka lokile kang kona, epedori akiper ka ekile kang ajoikin ayong a?” Kingit Ekapolon Akuj Aburaam tama, “Nyoni akienia Sara, nabo tolim atamar be apedori akidoun ikoku, na tokona amojongea kona a? Eyei ibore etiono ani a Ekapolon Akuj a? Ani enangi ngirwa ngulu, abonguni ayong adaunet a ngilapio a ngikan-koomwon napei tokona, nakaneni idouni Sara ikoku nisapat.” Ani kona abulitor Sara, topeg tama, “Nyekiena ayong.” Tolim Ekapolon Akuj tama, “Alioko, abe ikiena bo iyong.” Torotokis ngikiliok ngulu kaneni tananga ni arouneta Sodom. Kirukosi Aburaam ka kesi itenarit alorot. Tolimokin Ekapolon Akuj bon tama, “Nyedai ayong ani a Aburaam ngakiro na asaki asubakin, kainyo eliwor ngesi ebukut lo eyenikinitae, tarai lo ikileenikinit. Apiari ayong ngibukui daang anakwap kotere ngesi. Aseu ayong ngesi asaki atamar todungok ngide keng ka ngalesea keng akiwap ngakiro kang ka akisub ngakiro na iyookino ka na eteniyete. Ani kesub ngesi kongina, asubakinea ayong ngesi ngakiro daang na echikak.” Sodi tolimok Ekapolon Akuj Aburaam tama, “Kona eyakatar ngakiro nakaalak ititakinitere ngitunga a Sodom ka Gomora, nabo erono akisech kech noi, alosi ayong aanyun kesubito kesi ngakiro naaronok noi loger lo eirarea ayong kori kemam.” Toreas ngikiliok luarei kaneni, toloto Sodom, sodi kidong Ekapolon Akuj erukito ka Aburaam. Taapu Aburaam diyete Ekapolon Akuj kingit tama, “Ipedori iyong dir akinyasun lu nyesechito aapei ka lu esechito a? Ani ejok toya ngitomwon-kan lu nyesechito lu eyakasi lore ngolo, ipedori iyong akinyasun ere ngolo, nakaneni nyiyuu lutomwon-kan nyesechito eyakasi neni a? Ekoe, nyipedori robo cha iyong akisub ngakiro na ikote neni, taar lu nyesechito aapei ka lu esechito. Ekoe nyikokini robo cha iyong nguna. Abe ejoikinit bo ekeriran a akwap kadaang etenoono eriras keng.” Tolim Ekapolon Akuj tama, “Ani karukau ayong ngitunga ngitomwon-kan alo Sodom lu nyesechito, emiekini ayong ere daang kotere kesi.” Tatachu Aburaam tama, “Torimakinae kare Ekapolon ani arubakinitor ayong kesuruori iyong ekoni bo ayong apua ka ekuron. Ani bo keraakasi ngitunga lu nyesechito ngitomwon-omwon ka ngikan, meere ngitomwon-kan, inyasuni iyong ere daang na eraakar ngitunga ngikan iituno a?” Tolim Ekapolon Akuj tama, “Nyenyasuni ayong erai karukau ngitomwon-omwon ka ngikan kaneni.” Kingit Aburaam Ekapolon Akuj tama, “Ani bo keyakasi ngitomwon-omwon neni?” Tolim Ekapolon Akuj tama, “Nyenyasuni ayong kotere lutomwon-omwon.” Tolim Aburaam tama, “Nyiingo kare Ekapolon, kimiekinae eruorik. Ani bo keyakasi ngitomwon-uni neni?” Tatachu Ekapolon Akuj tama, “Nyenyasuni ayong karukau ngitomwon-uni kaneni.” Tolim Aburaam tama, “Torimakinae kare ayong Ekapolon ani arubakinea kesuruori iyong. Ani bo keyakasi ngitomwon-arei neni?” Tatachu Ekapolon Akuj tama, “Nyenyasuni ayong karukau ngitomwon-arei.” Tolim Aburaam tama, “Nyiingo kare Ekapolon, kimiekinae eruorik akiruorikinet naga bon. Ani bo keyakasi ngitomon neni?” Tatachu Ekapolon Akuj tama, “Nyenyasuni ayong karukau ngitomon kaneni.” Ani erumori Ekapolon Akuj akiruoro ka Aburaam, tolot nisek alosi, tobongo Aburaam dang nawi keng. Tanangut ngimalaikae luarei ngulu lore a Sodom ebong. Nakaneni ebooyi Loti alokidor a ere. Ani eanyungari Loti kesi, tonyou tolot akisiriamiar, sodi toriedik kijuuru alongaren kech. Tolim tama, “Ngikapolok kang, tolomutu kare nawi a ekasuban etich kus, kilotasi ngakejen kus sodi topero. Ani erumor tonyout nataparach toloto ni iloose.” Tatachut kesi tamasi, “Mam, kiperi sua nikalapatan a ere.” Nakaneni kimaima ngesi kesi lokojokon, sodi tachamut alomar nawi keng. Kisumuj ngesi kesi. Tolimok Loti ngikasubak etich atamar kidorokis ngamugati napadok, sodi tanyama kesi. Ani eringa ngipeyok nyepero, kiriama ngitunga a Sodom awi. Ayakasi ngitunga daang a ere kangolo neni, lusorok ka lumojong. Tanyarata Loti sodi kingita tamasi, “Nyaalu ngitunga lu apote akiper nawi kon akolongit naga? Kipud nikalapatan nege kainyo kisaki sua etopero kesi.” Topudo Loti nikalapatan sodi togolok ekidor. Tolimok kesi tama, “Talopae kang, kemaimai ayong esi atamar nyiisuba kare ngakiro naaronok ikote nguna. Kingolikisi a, eyakasi tanakookang ngaarei na eringa nyepero ka ngikiliok a ache. Kimiekisi kepudok ayong esi, sodi tosubeta ngakiro nguna isakete asubea. Nakaneni warasi nyiisubeta ngitunga lugu ngakiro ngadi kainyo alomut kesi nawi kang.” Nakaneni tatachut kesi tamasi, “Kiyotok kane! Abuni ngoon logo nege erai epeyonon, nakaneni esaki tokona aliwor ngesi kidodenakini ngoni ngakiro na ejoikinit kisubi a? Kisubea tokona sua iyong ngakiro naaronok noi na idwangito nakusubea kesi.” Kijukasi kesi Loti, sodi kiyotut diyete ekidor esakete akibwang. Nakaneni kiriyasi ngitunga luarei ngulu Loti tooma kai, sodi togolo ekidor. Ani erumor kitumudukana ngitunga daang lu ayakasi nikalapatan, luuchik ka luapolok, sodi tongopik kesi ekidor. Tolimokis ngitunga luarei ngulu Loti tamasi, “Ani keyakasi ngitunga kon ngiche nege lu eraakasi talokookon, ka tanakookon, ka talokamuran kon, kori ngiyenet kon, lu elomito lore logo, kipudo kesi atipei, kainyo kisaki sua akinyasun ere logo. Eira Ekapolon Akuj ngakiro naaronok na esubete ngitunga lugu nakaneni kimeu sua akinyasun Sodom.” Sodi tolot Loti lokiliok lu adikino iusete tanakookeng tolimok tama, “Tonyoutu torotokisi kane kainyo edikino Ekapolon Akuj inyasuni ere logo.” Nakaneni tamasi ngikamurak keng kori ebolia ngesi. Ani iwalari, kibunyakis ngimalaikae Loti ebalasi, “Tonyou toriko aberu kon ka tanakookon naarei eyakasi nege, sodi nyikimunyar esi na inyasunere ere.” Totinenik Loti anyoun. Nakaneni torwakinos ngitunga luarei ngulu Loti ka aberu keng, ka tanakookeng naarei ani esienitor Ekapolon Akuj Loti. Totinga ngakan sodi torikosi kesi tanang nikalapatan a ere. Sodi tolim emalaikat epei tama, “Tamatar toyar! Wara nyiingoliu naabor kori nyiiwo a wadio anadipo. Tamataros lomukur sodi nyikinyasun.” Nakaneni tatachak Loti ngesi tama, “Mam kare ekapolon kang, kingolik a, kisubeta esi ayong naajokak ani kiyuuneta, nakaneni nyamatar ayong lomukur kainyo eloka. Kadolete ayong ngakiro ngache naaronok alorot sodi atotoan eringa nyenanga inaa. Itee iyong nyire nidiochichi ia? Eapi nyire ngini. Kimiekinae ayong atolot inaa. Itee iyong atamar erai nyire nidiochichi. Ayari ayong kaneni.” Tatachak emalaikat ngesi tama, “Awaa, achamu ayong. Nyenyasuni ayong nyire ngini. Tamatar atipei! Emam ibore asubakini ayong eringa iyong nyenanga inaa.” Ani kona abalar Loti edit nyire ngini, tolimokinae ekiro a ere kangolo Soar. Epiripirunit akolong na anangea Loti Soar. Sodi tomeu Ekapolon Akuj akim nakariran anadis totep Sodom ka Gomora, kinyasu ngirerea ngulu daang ta adipo ngina daang. Tomunya ngitunga daang a ngirerea kangulu ka ibore daang ni arupunit kaneni. Nakaneni kingolia aberu a Loti naabor sodi kibelei toliwor amoru a amakat. Kiswakak Aburaam nataparach elilim tolot nisek awaatar ngesi ka Ekapolon Akuj. Kingolia ngesi lowae a Sodom ka Gomora, ta akwap daang na ayei nadipo. Kingolik ngesi apuru idaaui anakwap kangina, ekoni apuru ngina na ebunit anadui ana erirae. Nakaneni na enyasunea Akuj ngirerea a adipo ana alomit Loti, kitamu Akuj Aburaam sodi kimiek Loti ebuchar toyar. Taramak Loti alo Soar, tolot toloma ka tanakookeng naarei lomukur, kainyo aemit ngesi akiboi alo Soar. Sodi toloma ngesi ka tanakookeng naarei naburibur. Tolimok nakookeng naapolon naachi tama, “Amojong apayok, nakaneni emam ngikiliok anakwap kana lu kiusete ngoni sodi edoutu ngide. Kimiekisi etamata apayok emuna lo epuritoe, sodi atopero ka ngesi, ataanyuneta ngide.” Kitamata kesi apakech emuna nakwaare a akolongit kangina, sodi toloma naapolon topero ka apakeng. Ani kona erakaritor apakeng emuna noi, nyeyena ngesi atamar anukiro asubi. Ani akwaar nache, tolimok naapolon naachi tama, “Kingolik a, kiperi been ayong ka apakang, kimiek etamata nabo ngesi emuna lo epuritoe akwaar naga, sodi toloma iyong topero ka ngesi, taanyunea ipei yok daang ikoku ani ka apayok.” Kitamata kesi nabo apakech emuna lo epuritoe nakwaare a akolongit kangina. Tonyou naachi toloma topero ka ngesi, ani kona erakaritor apakeng emuna noi, nyeyena nabo ngesi atamar anukiro asubi. Sodi topotiut tanakookeng a Loti naarei nguna ngide lu aurikini apakech. Kidou naapolon ikoku nisapat, tolimok ekiro be Moab. Ngesi erai apaakech a Ngimoab tanang akolongit naga. Kidou naachi dang ikoku nisapat, tanyara ekiro keng Benami, ngesi erai apaakech a Ngiamon tanang akolongit naga. Taramak Aburaam alo Mamure toten lowae loa Negeb. Tolom ngesi nakidingos a Kadech ka Chur. Ani na alomitor ngesi Gerar, tolim Aburaam atamar erai aberu keng nakaatokeng. Sodi tolim Abimelek lo erai ekapolon a Gerar atamar katorikokin ngesi Sara. Nakwaare a akolongit a apei, bu Akuj nia Abimelek kisuruja tolimok tama, “Itoani iyong, kainyo ilema iyong aberu naga tarai iusitae sek.” Nakaneni aringa Abimelek nyepero ka Sara, sodi tolim ngesi tama, “Ekapolon, ipedori iyong akiar ngitunga lu nyesechito a? Aburaam elope ngesi alimuni atamar erai Sara nakaatokeng, nabo tama Sara dang erai Aburaam lokaatokeng. Asubi ayong nugu a etau aloajokon, nakaneni emam ibore asechit ayong.” Tatachak Akuj ngesi isurujae tama, “Ee, ayeni ayong atamar isub iyong nugu a etau aloajokon, nakaneni ayong ngesi keratakini iyong nyikisubakinea ayong naaronok, Ngakiro nguna kesi pekachamakinea ayong iyong itapi ngesi. Tobuak tokona ekile ngolo aberu keng kainyo erai ngesi ekadwaran a Akuj. Kilipakini ngesi iyong sodi nyiitoana. Nakaneni ani pekibua iyong aberu ngina, itoakete iyong ka ngitunga kon daang.” Sodi tonyou Abimelek nataparach elilim tanyarau ngikasubak etich keng daang wapei, tolimok ngakiro nguna daang. Tobul ngitunga ngulu daang noi. Sodi tanyarau Abimelek Aburaam kingit tama, “Anukiro kisubea iyong sua? Anukiro aronok kasubakinea ayong iyong sodi yaunea iyong akisech naaronon ikoni naga nikang ka akwap kang? Kisubea iyong ayong ngakiro na nyechamit kasubere.” Kingit Abimelek Aburaam tama, “Anukiro itamit iyong isubea kona?” Tatachu Aburaam tama, “Abala ayong kori emam itwaan ekerit Akuj kane, abala nabo kori kaarete kesi ayong tolemasi aberu kang. Erai ngesi nakaatokang dir. Erai nakookeng a apakang, nakaneni meere itiokang idounit, sodi eut ayong ngesi. Ani naketonyounio ayong Akuj anawi a apakang toliwor elat anakwapea anache, atolimok ayong ngesi atama, ‘Tosubere ayong ngakiro naajokak a erot kalo, wadaang nicha kilosi ngoni, tolim iyong atamar arai ayong lokaatokon.’ ” Sodi tobuak Abimelek Aburaam aberu keng, nak nabo tani ngamesekin, ka ngaatuk, ta ngikedalak. Tolimok ngesi Aburaam tama, “Erai akwap naga daang akang, tolom nicha isaki iyong akilom.” Tolimok Abimelek Sara tama, “Kingolik a, ainak ayong lokaatokon ngaropiyae abunget apei sodi toyenea itwaan daang ni irukito ka iyong atamar nyisechit iyong. Eyenuni itwaan daang atamar emam ibore isechit iyong.” Sodi kilip Aburaam Ekapolon Akuj, kitojok Akuj Abimelek, kitojok tani aberu keng ka ngikedalak keng kidout ngide. Kainyo agolit sek Ekapolon Akuj ngakookies a ngaberu kadaang ana ayakasi nawi a Abimelek, peedoununete kotere Sara, na arai aberu a Aburaam. Topia Ekapolon Akuj Sara loger losek echikakinitor. Abu Sara topoti, sodi kidou ikoku nisapat ngirwa lu amojongitor Aburaam. Kidounoe idia ngini ngirwa lusek abalar Akuj idounere. Tolimok Aburaam ekiro keng Isaka. Ani enangete ngirwa a Isaka ngikan-kauni, kilenger Aburaam ngesi, loger lo adungokinitor Akuj. Araakasi ngikaru a Aburaam amiat apei na edounere Isaka. Tolim Sara tama, “Kainu Akuj ayong alakara ka akiena, itwaan daang ni iirari ngakiro nugu, kikieni ka ayong.” Kiatak ngesi tama, “Kerai ngae epedori alimokin Aburaam atamar itanaki Sara ngide? Nakaneni edou ayong ikoku nisapat ngirwa lu amojongea ngesi.” Topolou ikoku, sodi kitapalikinae akitanak ngisikin. Tosubak Aburaam akimuj nakaalan akolongit na etapalikinere Isaka akinak. Akolongit apei taanyunga Sara idia ni aurikini Aburaam Agar Namisirit eboliasi ka Isaka lo arai lokookeng. Tolimok Sara Aburaam tama, “Kitwarak aberu nakedalan naga ka lokookeng, kainyo nyirumete lokookeng a aberu anakedalan kana ngibaren aapei ka lokookang Isaka.” Kialolong Aburaam noi kotere ngakiro nguna, kainyo arai Ichimael dang lokookeng. Nakaneni tolimok Akuj Aburaam tama, “Wara nyiialolong kotere idia ka akedalan kon Agar. Tosub ngakiro daang nakilimokini iyong Sara, kainyo nia Isaka ngesi ianyunea iyong ngalesea nakechikak ayong iyong. Ani ikoni dang, ainakini ayong tani lokookeng a aberu anakedalan ngide lukaalak, sodi toliworos kesi ngibukui. Erai ngesi dang lokookon.” Sodi tonyou Aburaam nataparach elilim, tolem amugati ka echue a ngakipi nak Agar. Kitanap Aburaam Agar idia sodi kitwarak. Torotok Agar tolot akilare anariet a Beer-cheba. Ani na adaunotor ngakipi na ayakasi lochue, kimiek ngesi idia alotooma amoni, tolot ngesi kiboikin ni erai aoyau keng ngamitae amiat apei. Kitamana ngesi ebala, “Nyanaikini ayong akitere ikoku kang etoani.” Ani na ebooyo ngesi kaneni, tolomak ikoku akigoro lokojokon. Kiira Akuj idia igoro, sodi kiruorik emalaikat anadis tolimok Agar tama, “Agar, nyo ialolongio iyong? Wara nyikibul. Eira Akuj idia igoro. Tonyou, tolot sodi tadaku ngesi kisililing. Etiliwori ayong ngalesea keng ngibukui lu eyenikinitae.” Sodi tangaa Akuj ngakonyen a Agar, taanyunga ngesi akar. Tolot ngesi kilelebik echue lo atingit ngakipi, sodi nak idia ngakipi. Arukito Akuj ka idia na apolounio, kiboi ngesi anariet a Paran, toliwor irikae a ngimalea a amod. Tasakak itiokeng ngesi aberu anakwap a Misiri. Ngirwa ngulu, toloto Abimelek ka ekarikon a ngasigerea keng lo anyaritae Pikol, tolimokis Aburaam tamasi, “Irukito iyong ka Akuj anakiro kadaang ana isubi. Nakaneni kikong tokona ani a Akuj atamar nyikimodi iyong ayong, ka ngide kang, ta ngalesea kang. Kona kolong kasubea ayong iyong ngakiro naajokak, kikong atamar kisubea iyong ayong dang ka akwap na tokona ilomit iyong naga ngakiro naajokak.” Tolim Aburaam tama, “Ekongi ayong.” Ani na engisea Aburaam Abimelek ngakiro a akar ana alemarete ngikasubak etich a Abimelek, tolim Abimelek tama, “Nyayeni ayong itwaan ni kesubi ngakiro nugu. Nyelimokina iyong ayong ngakiro nguna, erai akolongit daang eirarea ayong ngesi naga.” Sodi tomek Aburaam Abimelek ngamesekin ka ngaatuk, tachamunos kesi. Kitegelia Aburaam ngamesekin naberu ngakan-kaarei totiak ka nache. Kingit Abimelek Aburaam tama, “Nyo tokona eger a ngamesekin anakan-kaarei itegelia iyong kanu?” Tatachu Aburaam tama, “Kainakini ayong iyong ngamesekin nakan-kaarei nugu, toliwor iyong ngesi itwaan ni ianyuni atamar ayong ngesi aboki akar naga.” Sodi tolimokinae neni ekiro be Beer-cheba, kainyo neni ngesi ekongioto kesi. Tachamakin kesi alo Beer-cheba. Sodi tonyout Abimelek ka ekapolon a ngasigerea keng enyaritae Pikol tobongosi nakwap a Ngipilisti. Kitak Aburaam epeduru nakwap enyaritae Beer-cheba, sodi kilip ngesi elimit ekiro a Ekapolon Akuj, ana erai Akuj nakajik. Tolom Aburaam nakwap a Ngipilisti nikooyen. Ani adaunet a ngakiro kanguna, kining Akuj Aburaam tanyara tama, “Aburaam.” Kiki ngesi tama, “Ayong lo.” Tolimok Akuj ngesi tama, “Tolem lokookon lo erai epei bon Isaka, lo imina iyong, tolot nakwap a Moria, kipeye iyong ngesi kaina alomoru alo kedodikini ayong.” Tonyou Aburaam nataparach elilim tobilu ngakito na ipeyoore akipeyos, toen esikiria keng, toriko Isaka ta ngikasubak etich keng ngiarei. Tonyout kesi toloto nisek alimokini ngesi Akuj atamar toloto. Ani akolongit na a ngauni, kingolik Aburaam akwap ngina elona. Tolimok Aburaam ngikasubak etich keng lu arukitotor tama, “Kidongo ka esikiria nege. Kilosi ayong ka edia ama elipa, ani erumor atobongutu ni iyakasi esi nege.” Kitadak Aburaam Isaka ngakito na ipeyoore akipeyos. Toting Aburaam elope ekileng ka akim. Kirukosi kesi aapei. Tanyara Isaka apakeng tama, “Apa.” Kiki Aburaam tama, “Ayong lo, lokoku.” Kingit Isaka apakeng tama, “Abe akim bo naga nabo ngakito nugu, nakaneni nyaani imesek ni ipeyeo.” Tolim Aburaam tama, “Lokookang, elemuni Akuj alope imesek ni ipeyeo.” Apot kesi kirukosi aapei. Ani enangunete kesi ni alimokinit Akuj, tosubak Aburaam ekeno a ngakipeyos kaneni kinapak ngakito kidiama ekeno. Toen ngesi lokookeng Isaka ani erumor kiperik kidiama ngakito na ayakasi lokeno. Tolem ngesi ekileng esaki akiar Isaka. Nakaneni tanyara emalaikat a Ekapolon Akuj ngesi anadis tama, “Aburaam, Aburaam.” Kiki ngesi tama, “Ayong lo.” Tolimok emalaikat ngesi tama, “Wara nyiitap idia kori nyiiwan, kainyo ayen tokona atamar ikerit iyong Akuj, ngesi pekimikea iyong ayong lokookon lo erai epei bon.” Kikeu Aburaam akou taanyunga emesek lo angichakina ngaamwar keng namoni. Tolot Aburaam kirum emesek ngolo, tolem toliwor akipeyos, kilunyokin nados a lokookeng. Tolimok Aburaam neni ekiro be, “Kiinakini Akuj.”* Tani akolongit napei naga, ebalasi ngitunga, “Alomoru a Akuj, kiinakini ngesi.” Tanyara emalaikat a Ekapolon Akuj Aburaam na a ngaarei anadis tama, “Ebala Ekapolon Akuj, ekong ayong alimunit ekiro kang atamar kapiari iyong ani isubea ngakiro nugu, nyimika iyong ayong lokookon lo erai epei bon. Kapiari ayong iyong dir, sodi etalala ngalesea kon loger a alalau a ngikanyer alu eyakasi nadis, ka asinyen na eyei lokwaas a anam. Idwangete ngalesea kon ngimoe kech. Etamarete ngibukui a akwap daang topiarae kesi loger lo apiarea ayong ngalesea kon. Ikokinete nguna neni ani iwapitor iyong ngakiro kang.” Tobongo Aburaam ni ayakasi ngikasubak etich, tonyout kesi daang toloto Beer-cheba ni alomit Aburaam. Ani ekisidi kiira Aburaam atamar edou Milika ngide a lokaatokeng alo anyaritae Naor ngikan-kauni. Anyaritae lo ekingaren Us. Anyaritae lokaatokeng Bus. Anyaritae eche Kemuel, apakeng a Aram. Ngirora aluche kesi Kesed, ka Aso, ka Pilidach, ka Yidilapu, ka Besuel lo arai apakeng a Rebeka. Kidou Milika talokookeng a Naor ngikan-kauni. Arai Naor lokaatokeng a Aburaam. Kidou apese a ngabwes a Naor na anyaritae Reuma ngide lu anyaritae Teba, ka Gaam, ka Taach, ta Maaka. Kiboi Sara tarata ngikaru keng amiat apei ka ngitomwon-arei ka ngikan-kaarei. Totoan ngesi ani enyaritae Eburon, ani ayei nakwap a Kanaan, sodi kialolong Aburaam kotere akitu a Sara. Tonyou Aburaam ani aperio akwaan a aberu keng tolot tolimok Ngiiti tama, “Arai ayong epeyonon lo kilomit ka esi nege. Togielakinae ayong wadio sodi atonukak aberu kang.” Tatachakis Ngiiti Aburaam tamasi, “Topupok ngakiro kosi ekapolon. Kiyen sua atamar irai iyong ekarikon lo kiyenikinitae. Tonukak aberu kon naliel cha daang nakijoikini iyong. Emam sua itwaan tani ipei nikimiki iyong aliel na inukakini aberu kon.” Toriedik Aburaam alongaren kech a arimatoi sodi tama, “Ani kichamito esi ayong anukakini aberu kang nege, tolimokisi kare cha Epiron lokookeng a Soar kainak ayong aburibur na enyaritae Makipela atogiel. Eyei aburibur ngina lokwaas a amana keng. Tolimokisi ngesi atamar asaki ayong akigiel a ngaropiyae ana itemokino iteete esi daang toliwor akang, sodi etiliwo ngalielin.” Arukito Epiron ka Ngiiti lu eriamiriamito lokidor a ere. Tolimok Epiron Aburaam ngakiro epupete Ngiiti daang lu ayakasi neni tama, “Ekapolon, topupok mono iyong. Kainakini ayong iyong amana daang ka aburibur na eyei mana ngina. Kainakini ayong iyong iteete ngitunga a akwap kang daang, sodi tonukak aberu kon.” Toriedik Aburaam alongaren Ngiiti a arimatoi tolimok Epiron epupete ngitunga a akwap keng daang tama, “Kemaimai kare atamar topupok ngakiro kang. Kainakini ayong iyong ngaropiyae na itemokino agielea amana kon. Kemaimai iyong atamar tolema kare ngaropiyae nguna, sodi atonukak ayong aberu kang neni.” Tatachak Epiron Aburaam tama, “Ekapolon, topupok mono iyong ngakiro kang. Ani kang ka iyong a, nyo sek amana na eraakasi ngaropiyae keng ngamiae ngoomwon? Tonukak aberu kon neni.” Tachamakin Aburaam ka Epiron. Kitemok Aburaam ngesi ngaropiyae na alimuni ngesi epupete Ngiiti daang. Araakasi ngaropiyae nguna ngamiae ngoomwon, itemem ka egielit lo agieleta ngimuchurus ngirwa ngulu. Eger ngolo ngesi aliworor amana a Epiron na eyei Makipela, kide a Mamure, aka Aburaam. Toliwor amana, ka aburibur na ayei mana, ta ngikito daang lu ayakasi mana ngina, toliworos ngika Aburaam. Toyena Ngiiti daang lu eriamiriamito neni atamar eraakasi ngika Aburaam. Tonukak Aburaam aberu keng Sara naburibur na ayei nakwap a Kanaan. Toliwor amana ka aburibur na ayei mana na Ngiiti ngina, aka Aburaam, kitiliwo ngesi ngalielin. Abu Aburaam tomojong lokojokon, nakaneni apiarit ngesi Ekapolon Akuj anakiro kadaang. Tolimok Aburaam ekasuban etich keng lo amojongit akidwang luche daang, nabo ngesi aweikinit ngakiro a awi a Aburaam daang, tama, “Tongichak akan kon kiding ngakalokidingo kang, kikong. Asaki ayong iyong kikong ilimit ekiro a Ekapolon Akuj, ana erai adis ka akwap ngakeng, atamar nyisekini iyong lokookang aberu alotunga a akwap a Kanaan ana alomit ayong kana. Ejoikinit iyong ilosi nakwap nakolong kedounere ayong sodi toseu aberu na eliwor aka lokookang Isaka, alotunga alu kiyana ka ayong.” Nakaneni kingit ekasuban etich keng ngesi tama, “Anijok bo towou apese anakwap kech tama nyikirukuni ka ayong nakwap naga? Arikori ayong lokookon nakwap nakolong ibunio iyong a?” Tolimok Aburaam ngesi tama, “Tochoite ibuari lokookang inaa! Ekapolon Akuj lo eyei nadis, ngesi kolong karikuni ayong anawi a apakang ka akwap a ngitunga kang. Ekongi ngesi atamar ainakini ngalesea kang akwap naga. Emeari ngesi emalaikat keng kingarenik iyong, sodi toseu iyong aberu a lokookang kaina. Nakaneni ani kewou apese ngina akirukun ka iyong, kilachakinio iyong anakikongiet kana. Wara nyiibua lokookang inaa.” Sodi tongichak ekasuban etich ngolo akan keng kiding ngakalokidingo a Aburaam alo arai ekapolon keng, ani erumor kikong atamar asubakini ngakiro na alimokini ngesi Aburaam. Ani erumor kipaku ekasuban etich a Aburaam ngikaala ngitomon, sodi anyoun etingit ngiboro luajokak lu ainakini ngesi ekapolon keng esaki tolot kipotono ani eteni. Tolot ngesi lore losek alomit Naor, lo ayei nakwap a Mesopotamia. Na anangea ngesi neni, tokudok ngikaala diyete akar na ayei nikalapatan a ere. Arai esaa ngolo lo ebong, lo eloseeneto ngaberu akuok ngakipi. Kilip ngesi tama, “Ekapolon Akuj, Akuj a ekapolon kang Aburaam, kingarakinae akolongit naga nabo tosubak ngakiro na ichikakini iyong ekapolon kang. Ayong tokona logo ayei kare na epote ngapesur a ere kalo aokio ngakipi. Alimokini ayong apei kech atamar totiyau atubwa keng sodi kainak ayong ngakipi atamat. Ani kainaki ngesi ayong ngakipi namatan ani erumor kitamat ngikaala kang, kimiek apese ngina toliwor ngesi iseu iyong toliwor aka ekasuban etich kon Isaka. Kedodikini akiroit ngina ayong atamar iyook iyong ngakiro na ichikakini iyong ekapolon kang.” Ani eringa ngesi nyerumoro akilip, todolu Rebeka eriongakinit atubwa loseget. Arai ngesi nakookeng a Besuel alo edouni aberu a Naor na anyaritae Milika. Arai Naor lokaatokeng a Aburaam. Arai apese ngina nakebusean na aringa nyepero ka ekile a ache. Toloma ngesi kare kilelebik ngakipi natubwa keng sodi todoku alokare. Tamatar ekasuban etich ngolo kisiriamia ngesi tama, “Nakinae kare ngakipi na eyakasi natubwa kon atamat.” Tolim ngesi tama, “Tamat ekapolon,” sodi totiyau ngesi atubwa a ngakan keng, nak ekasuban etich ngolo ngakipi tamat. Ani kemat ngolo ngakipi kerumor, tolim apese ngina tama, “Aokokini ayong tani ngikaala kon ngakipi, tamata toupa.” Sodi tolem ngesi ngakipi na ayakasi nakiruet tobukok nateger atipei, ani erumor tamatar kare aokun ngakipi ngache, sodi kitamat ngikaala daang. Toliwor itwaan ngini iseme ngesi ekiilingat, esaki akiyen kingarakinit ngesi ekapolon Akuj analotoru keng. Na aupeta ngikaala ngakipi, tolem itwaan ngini ekababaat a egolit lo arai apotis keng anus a akilo. Tolem nabo ngasua a ngakan ngaarei na araakasi apotis kech ngakiloi ngatomon, nak apese ngina. Asubunitae ngasua nguna a egolit. Kingit tama, “Tolimokinae ayong atamar irai iyong nakookeng a ngae? Eyei wadio kiperi sua anawi kus a?” Tatachak Rebeka tama, “Arai ayong nakookeng a Besuel, alo edouni aberu a Naor na enyaritae Milika. Eyei amelu nakaalan nabo eyakasi nginyia lukaalak nawi kosi. Eyei tani ni epereenete ngipeyok.” Sodi kijuuru itwaan ngini kilip Ekapolon Akuj, tolim tama, “Ekiro a Ekapolon Akuj kipuroe, Akuj na a ekapolon kang Aburaam, na eyook iteni dir ngakiro na echikakini ngesi ekapolon kang. Karik ayong Ekapolon Akuj eyoun lotunga luyenet a ekapolon kang.” Tamatar apese ngina kai a itiokeng, tolimok ngitunga daang ngakiro na asubakinosi. Ayei lokaatokeng a Rebeka lo anyaritae Laban. Tamatar ngesi kare ni ayei itwaan ngini. Ani ingolikini Laban ekababaat ka ngasua na ayakasi nakan a nakaatokeng, nabo kiira ngakiro a itwaan kangini na alimokini Rebeka kesi, tolot ngesi ni ayei itwaan ngini. Awei itwaan ngini alo diyete ngikaala keng lu ayakasi diyete akar. Tolimok Laban ngesi tama, “Tolomu tooma iyong lo kipiarit Ekapolon Akuj. Nyoni iwaar anikalapatan? Asubak ayong akai na iperi iyong ka ni eperete ngikaala.” Sodi toloma itwaan ngini kai. Talachak Laban ngikaala nak kesi nginyia ka amelu. Ani erumor inu Laban ekasuban etich a Aburaam ngakipi na ilotareta ngesi ka ngitunga lu arukitotor ngakejen kech. Ani eyaunio akimuj, tolim itwaan ngini tama, “Nyemuji ayong eringa nyelimuno ngakiro na asaki alimun.” Tolimok Laban ngesi tama, “Awaa, kasio tolim.” Tolim itwaan ngini tama, “Arai ayong ekasuban etich a Aburaam. Erai ekapolon kang lo apia Ekapolon Akuj noi lo etiliwo ekabaran. Erai ngesi itwaan ni eyenikinitae. Ainaki Ekapolon Akuj ngesi ngamesekin, ka ngaatuk, ka ngaropiyae, ka egolit, ka ngikasubak etich lukiliok ka luberu, ka ngikaala, ta ngisikiria. Sodi kidou Sara na arai aberu a ekapolon kang idia. Edouni Sara emojongit. Nakaneni ainaki ekapolon kang edia ngolo ngibaren keng daang. Kesikongi kolong ekapolon kang ayong tama, ‘Nyiiseu apese na iusi lokookang anapesur a ngitunga a akwap a Kanaan alu alomit ayong nakwap kech. Nakaneni tolot nakwap kang, ni eyakasi ngiyenet kang, sodi tasakak lokookang Isaka aberu.’ Engit ayong ekapolon kang atama, ‘Anijok bo towou apese anakwap kech tama nyikirukuni ka ayong nakwap naga?’ Nakaneni tatachu ngesi tama, ‘Ekapolon Akuj lo erai ngesi akerit ayong, emeari emalaikat keng sodi kirukosi ka iyong kingarak iyong analotoru kon. Toseu iyong aberu a lokookang alotunga alu kiyana ka ayong, alu eraakasi ngitunga a awi a apakang. Ani kilot iyong lotunga lu kiyana ka ayong towout ainakin iyong apese, kilachakinio iyong anakikonget kana.’ “Ani ananguni ayong kare akolongit naga, abu elip atama, ‘Ee Ekapolon Akuj, Akuj a ekapolon kang Aburaam, kelipit atamar kingarak akolongit naga nabo tosubak ngakiro na esaki ekapolon kang. Ayong tokona logo awei alo diyete akar, kimiek toliwor apese na ebuni akuok ngakipi, ani atamari ayong nakinae kare ngakipi ngadikidio anatubwa kon atamat, ani kechamu ngesi tookok tani ngikaala kang ngakipi tamata, kimiek ngina toliwor apese na iseu iyong kotere lokookeng a ekapolon kang.’ Ani eringa ayong nyerumoro akilip, todolu Rebeka eriongakinit atubwa keng a ngakipi loseget, toloma kare tooku ngakipi. Atolimok ayong ngesi atama, ‘Nakinae kare ngakipi namatan.’ Totiyau ngesi atubwa keng aloseget atipei, sodi tama, ‘Tamat, nakaneni aokokini ayong tani ngikaala kon ngakipi tamata.’ Abu ayong atamat, sodi tookok ngesi ngikaala ngakipi tamata. Engit ayong ngesi atama, ‘Tolimokinae ayong atamar irai iyong nakookeng a ngae?’ Katatachak ngesi ayong tama, ‘Arai ayong nakookeng a Besuel, alo edouni aberu a Naor na anyaritae Milika.’ Abu ayong ewaak ekababaat lokume keng, sodi atobutok ngasua nakan keng. Ejuuru ayong elip Ekapolon Akuj epuruunit, Akuj na a ekapolon kang, nakariki ayong keyoo nia nakookech a ngitunga alu eyanasi ka ekapolon kang, sodi atoseu ayong apese a lokookeng a ekapolon kang. Tokona bocha, ani kisubakineta esi ekapolon kang ngakiro naajokak na eteniyete, tolimokinae. Ani pekisubakineta nguna, tolimokinae sodi atotiaku ayong na asubakini.” Ani iirarete kesi nguna, tatachut Laban ka Besuel tamasi, “Kona ebunitor akiroit naga ani a Ekapolon Akuj, emam akiroit kitiakuni sua. Rebeka naga kane, toriko tolot. Toliwor ngesi aberu a lokookeng a ekapolon kon, loger lo alimunio Ekapolon Akuj.” Ani iirari ekasuban etich a Aburaam ngakiro nguna, kijuuru toriedik sodi kilip Ekapolon Akuj. Ani erumor tolem ngesi ngiboro lu esubitae a akwangat ana elalak ngaropiyae, ka egolit, ta ngiworui, nak Rebeka. Kipoto nabo dang ngiboro lu elalak ngaropiyae nak lokaatokeng a Rebeka ka itiokeng. Apot ekasuban etich a Aburaam ka ngitunga lu arukitotor kimuja akimuj ka akimat emuna lo epuritoe, ani erumor topero neni. Ani enyounete nataparach tolim ngesi tama, “Kimiekinae ayong atobongo ni eyei ekapolon kang.” Nakaneni tolimut lokaatokeng a Rebeka ka itiokeng tamasi, “Kimiek apese eruko mono ka sua wadio, kerai bo a ngirwa a ngitomon dang, ani erumor tolot ngesi.” Nakaneni tolim itwaan ngini tama, “Nyikisibooyoto kare nikooyen, kona kengarakinea ayong Ekapolon Akuj analotoru kang, kimiekinae atobongo ni eyei ekapolon kang.” Tamasi kesi, “Kimiekisi atanyarautu apese engita.” Apot kesi tanyaraut Rebeka kingita ebalasi, “Irukorete iyong ka itwaan en a?” Tatachu ngesi tama, “Kirukori.” Sodi kimiekis kesi Rebeka ka akasuban etich keng, irukorete ka ekasuban etich a Aburaam, ta ngitunga keng. Topiasi kesi Rebeka ebalasi, “Iyong nakaatokosi, iliwor iyong itiokeng a ngabunge anakaalak noi, kiruma ngalesea kon ngirerea a ngimoe kech!” Ani erumor, tonyout Rebeka ka ngakasubak etich keng, todokasi lokaala esakete akirukor ka ekasuban etich a Aburaam. Apot kesi daang tonyout toloto. Kebu Isaka towotu alo Beer-laai-roi sodi tolom nakwap a Negeb. Na ayakar Isaka namanat ebong ilipit, kingolia ngesi, taanyunga ngikaala eponito. Ani ingoliari Rebeka taanyunga Isaka, todoku alokaal. Kingit ekasuban etich a Aburaam tama, “Ngae yee elosi alomana ebunit akisiriam ngoni?” Tatachu ekasuban etich ngolo tama, “Erai ekapolon kang.” Sodi tolem Rebeka awaru keng kimukokin. Kisisak ekasuban etich ngolo Isaka ngakiro daang na asubi ngesi. Sodi toriko Isaka Rebeka tooma eam losek ebooyo itiokeng toliwor aberu keng. Tominak Isaka ngesi. Topwatun etau a Isaka anisek ealolongio itiokeng na atoani. Kuut Aburaam aberu ache na anyaritae Ketura. Kidoik Ketura Aburaam ngide lu anyaritae Simuran, ka Yokichan, ka Medan, ka Midian, ka Ichibak, ta Chua. Touriu Yokichan Cheba ka Dedan. Ngalesea a Dedan kesi Ngiachurim, ka Ngiletuch, ta Ngileum. Ngalesea a Midian kesi ta Epa, ka Eper, ka Anok, ka Abida, ta Elidaa. Araakasi ngulu daang ngalesea a Ketura. Kimiekinea Aburaam Isaka ngiboro keng daang. Nakaneni inanak Aburaam talokookeng a ngapesur keng ana a ngabwes ngainakinet. Ani ngirwa lu aringaakar ngesi eyari, kitwarak kesi totena nakwap na ayei kide, tachadaros ani ayei lokookeng lo anyaritae Isaka. Araakasi ngikaru lu ayarea Aburaam amiat apei ka ngitomwon-kaarei ka ngikan. Totoan Aburaam akitu ajokon, erai ekasukout lo amojongit noi. Apot talokookeng a Aburaam lu anyaritae Isaka ka Ichimael, tonukakis apakech naburibur a Makipela, na ayei mana a Epiron alo arai lokookeng a Soar alo arai eka ekitela a Ngiiti. Arai neni kide a Mamure. Amana ngina ngesi nasek agieluni Aburaam alotunga a Ngiiti. Neni ngesi anukakinio Aburaam ka aberu keng na anyaritae Sara. Ani ketoana Aburaam kerumor, topia Akuj Isaka lo arai lokookeng a Aburaam. Alomit Isaka Beer-laai-roi Ichimael lo edoikini Agar Namisirit na arai akasuban etich a Sara, kidoik Aburaam, ayakasi talokookeng. Ngirora a talokookeng a Ichimael kesi lugu, iwapap a eger alo kolong edounere kesi. Anyaritae lo ekingaren Nebayos. Ngirora aluche kesi ta Kedar, ka Adibeel, ka Mibisam, ka Michima, ka Duma, ka Masa, ka Adad, ka Tema, ka Yetur, ka Napich, ta Kedema. Eraakasi ngulu talokookeng a Ichimael, lu erai nikech etorunete ngitela lutomon ka ngiarei, anyaritae ngirerea kech ka ngadakarin, a ngirora kech. Araakasi ngikaru a Ichimael amiat apei ka ngitomwon-uni ka ngikan-kaarei na atoanea. Alomito ngalesea a Ichimael nakwap na ayei nakidingos a Apila ka Chur, kide a Misiri, lowae lo etenere Asiria. Tachadaros kesi toloma nikalonan ani eyakasi ngalesea a Aburaam nache. Eraakasi nugu ngakiro a Isaka, alo erai lokookeng a Aburaam. Araakasi ngikaru a Isaka ngitomwon-omwon na eusea ngesi Rebeka, na arai nakookeng a Besuel, alo arai Emaramit a akwap a Mesopotamia. Arai Rebeka nakaatokeng a Laban. Kotere ni araakar Rebeka akolup, kilip Isaka Ekapolon Akuj. Kiik Ekapolon Akuj akilip keng, sodi topoti Rebeka. Topotiu ngesi ngimuu. Tobolokin ngide anakook keng, tolim ngesi tama, “Ani kikote ngakiro nege a, nyoni ayarea ayong?” Sodi tolot ngesi akingit Ekapolon Akuj eger a ngakiro kanguna. Tolimok Ekapolon Akuj ngesi tama, “Eyakasi ngibukui ngiarei nakook kon, ngitela ngiarei lu idouni iyong, etiakasi. Eliwor epei lokajwon noi akidwang loche. Eliwor loapolon ekasuban etich aloochi.” Ani enangi ngirwa keng lu idounio, kidou Rebeka ngide lusapa lumuu. Areng lo ekingaren, ekoni akwaan keng eleu lo eyakasi ngajul, sodi tolimokinae ekiro keng Esau. Kidounoe loa ngiarei etingit atitinyo a Esau, sodi tolimokinae ekiro keng Yakobo. Araakasi ngikaru a Isaka ngitomwon-kapei na edounere Esau ka Yakobo. Topolout ngide lusapa ngulu. Toliwor Esau lo ayenikinitae kotere akirikare ngitieng, lo amina eboyor loa lomoding. Tarai Yakobo itwaan nikelilingan, ni amina akiboi anawi. Sodi tominak Isaka Esau ani aminar akinyam ngitieng lu aareene ngesi alorika, nakaneni tominak Rebeka Yakobo. Akolongit apei, esaa lo epoo Yakobo ngimare, tobongu Esau nawi ebunit alorika. Anyamit Esau akoro lokojokon noi. Sodi tolimok ngesi Yakobo tama, “Kanyam akoro atoana, toodokinoe kare akimuj naarengan ngina adio.” (Ngakiro nguna kesi alimokinere ekiro keng Edom. ) Tatachak Yakobo ngesi tama, “Tajalakinae iyong ayong mono apolou na iraakar iyong ikoku ni ekingaren.” Tolim Esau tama, “Mam ngakiro. Edikino tokona ayong atoani, nyoni ketaanyuni apolou kang na araakar ikoku ni ekingaren?” Tolimok Yakobo ngesi tama, “Kikong mono atamar kijalakini iyong ayong apolou na iraakar iyong ikoku ni ekingaren.” Abu Esau kikong, tajalak Yakobo apolou na araakar ngesi ikoku ni ekingaren. Sodi nak Yakobo Esau amugati ka ngimare epewae. Kimuj Esau nabo tamat ngakipi, ani erumor, tonyou tolot. Kikok Esau imenyari apolou na araakar ikoku ni ekingaren neni. Sodi min eron a akoro nabo eche nakwap. Egela eron ngolo meere lokolong a ekingaren ayei ngirwa lu ayarea Aburaam. Tolot Isaka nakwap a Gerar ni ayei ekapolon a Ngipilisti lo anyaritae Abimelek. Sodi bu Ekapolon Akuj nia Isaka tolimok tama, “Nyiilot Misiri, kiboikin nakwap nakalimokini ayong iyong atamar kiboikin. Tolom nakwap ngina eruko ayong ka iyong katopia. Eyookini ayong akikong nakolong ekongi ani eyei apakon Aburaam, kainyo kainakini ayong iyong ka ngalesea kon akwap naga daang. Etalalae ayong ngalesea kon loger a alalau a ngikanyer alu eyakasi nadis, sodi ainak akwap naga daang. Etamarete ngibukui a akwap daang topiarae kesi loger lo apiarea ayong ngalesea kon. Kapiari ayong iyong ani iwapea ngakiro nakechikakini ayong iyong, nabo irichak ngitalio kang daang ka ngakiro nakadungokini.” Sodi tolom Isaka Gerar. Ani ingisete ngitunga kaina ngesi ngakiro a aberu keng, tolim ngesi atamar erai nakaatokeng, kainyo akerit ngesi alimor atamar erai aberu keng, sodi nyeareta ngesi ngitunga ngulu tolemasi Rebeka, ani araakar aberu nakebusean. Ani kibooyoto kesi kaneni nikooyen kerumor, kingolia ekapolon a Ngipilisti lo anyaritae Abimelek alopuke a akai keng, taanyunga Isaka enuakinit Rebeka. Abu Abimelek tanyarau Isaka kingit tama, “Ikwa erai naga aberu kon a! Nyo bo ibalar iyong erai nakaatokon?” Tatachu Isaka tama, “Akeri ayong atama nyakaar kotere ngesi.” Kingit Abimelek ngesi tama, “Anukiro nugu kisubea iyong sua? Arai topero itwaan idio a akwap kang ka aberu kon, kilomakinit iyong sua losech.” Sodi kichikichik Abimelek ngitunga daang tama, “Itwaan cha daang ni eboliar itwaan en kori aberu keng, eario.” Kitak Isaka ngikinyam nakwap ngina, sodi tolem ngikinyam amiat apei ani eyakasi lukolong etakini ngesi, kainyo apiarit ngesi Ekapolon Akuj. Apot ngiboro keng kiatakin talalaketa, toliwor ekabaran. Ani kona ayakatar ngesi ngisipaan a ngamesekin, ka ngaatuk nakaalak, ta ngikasubak etich lukaalak, toting Ngipilisti etereku kotere ngesi. Apot kesi tonuka ngakare daang nakolong abokete ngikasubak etich a Aburaam alo arai apakeng a Isaka, ngirwa lu aringaakar Aburaam eyari. Sodi tolimok Abimelek Isaka tama, “Taramak anakwap kosi. Iliwor iyong lokajwon noi kidwang sua.” Sodi taramak Isaka kaina, todukok adakar keng nadipo a Gerar, tolom neni. Toboka nabo Isaka ngakare nakolong abokio ngirwa lu ayarea apakeng Aburaam. Apot sek Ngipilisti tonuka ngakare nguna na atoanea Aburaam. Tanyara Isaka ngakare nguna a ngirora alupei kolong anyaritor apakeng. Tobokasi ngikasubak etich a Isaka akar anadipo a Gerar, sodi toleleut ngakipi nakaalak noi anakar kangina. Tongolopa ngikeyokok lusek alomito neni ka ngikeyokok a Isaka ebalasi, “Ngakosi ngakipi nugu.” Sodi tanyara Isaka ekiro a akar kangina Esek, kainyo angolopasi ngesi ka kesi. Tobokasi kesi akar ache, tongolopa kesi kotere akar ngina dang. Sodi tanyara Isaka ekiro a akar kangina Sitina. Ani erumor towot Isaka kaneni tolot wache tobokak akar neni, nakaneni nyengolopa kesi kotere akar ngina. Kotere ngakiro nguna, tanyara Isaka akar ngina Reobos ebala, “Kitaanyu tokona ngoni Ekapolon Akuj nikaaloman, nakaneni kiatakin ngoni atalalaketa anakwap kana.” Taramak Isaka kaina tolot Beer-cheba. Nakwaare a akolongit anapei kangina, bu Ekapolon Akuj nikeng tolimok tama, “Ayong ngesi Akuj a apakon Aburaam. Wara nyikibul kainyo kirukit ayong ka iyong, kapiari ayong iyong sodi etalala ngalesea kon kotere Aburaam ekasuban etich kang.” Sodi todukok Isaka ekeno a ngakipeyos neni kilip Ekapolon Akuj. Tolom ngesi neni, tobokakis tani ngikasubak etich keng akar neni. Tonyou Abimelek alo Gerar erukito ka Ausas lo arai ekesuruoron keng, ta Pikol lo arai ekarikon a ngasigerea keng, toloto nia Isaka. Kingit Isaka kesi tama, “Nyo iponitotor esi nikang tarai kiremokino esi ayong kitwarakinete kolong ani iyakasi esi?” Tatachut kesi tamasi, “Kingolik dir atamar irukito iyong ka Ekapolon Akuj. Ngakiro nguna kesi kingolikinitor sua atamar ejok kikongi ka iyong sodi atachamakin. Kisaki sua iyong kichikak sua atamar nyikiwani iyong sua loger lo nyewana sua iyong. Emam naaronok kipot sua atosubeta iyong, pearai kipot sua emiekisi iyong ilosi akaalimon. Kipia tokona iyong Ekapolon Akuj.” Kidorok Isaka akimuj nakaalan, tanyama kesi nabo tamata emuna lo epuritoe. Ani iwalari, tonyout kesi nataparach elilim kikongo. Kitena Isaka kesi, ani erumor totiakas niajokon. Akolongit napei ngina, pot ngikasubak etich a Isaka tolimokis ngesi ngakiro a ngakare ana abokete kesi tamasi, “Kianyu sua ngakipi.” Tanyara Isaka ekiro a akar kangina Chiba. Kotere ngakiro nguna, enyaritae ekiro a ere kangolo Beer-cheba tani nakwaar na. Ani enangete ngikaru a Esau ngitomwon-omwon, kuut ngaberu na araakasi Ngaiti ngaarei. Anyaritae apei Yudis nakookeng a Beer, anyaritae nache Basemas nakookeng a Elon. Kisialolongo ngaberu nguna Isaka ka Rebeka. Na amojongea Isaka tojongoto ngakonyen keng akitere akwap, tanyara ngesi Esau lo arai lokookeng loapolon tama, “Lokoku,” kiki ngesi tama, “Ayong lo.” Tolim Isaka tama, “Kingolik a, amojong ayong, nakaneni nyayeni akolongit na atoanea. Tokona bocha, tolem ngiboro kon lukirikaet, lu eraakasi ngimalea a amod ka akau, tolot erika naroatin, kitaarak etiengit. Ani erumor tosubak akimuj nakaabon napalem amina ayong, kiinu atanyam sodi katopia eringa ayong nyetoana.” Esaa lo esuruorea Isaka lokookeng Esau, apupi Rebeka ngakiro nguna. Sodi ani elosi Esau naroatin akirikare, tolimok Rebeka lokookeng Yakobo tama, “Eirari ayong apakon elimokini lokaatokon Esau atamar tolot taar etiengit sodi tosubak akimuj nakaabon, sodi tanyam ngesi topiarea Esau alongaren Ekapolon Akuj eringa ngesi nyetoana. Tokona lokookang, kiira ngakiro kang sodi kiwap nakalimokini. Kape losipanit a ngaanei kitorikok ngikaalei ngiarei lu ejokak, atosubak apakon akimuj nakaabon napalem emina ngesi. Sodi inaa iyong apakon tanyam, kitopiarea eringa ngesi nyetoana.” Nakaneni tolimok Yakobo itiokeng tama, “Elalak lokaatokang Esau ngajul anakwaan nakaneni emam ayong na eyakasi. Ani bo jok katatap ayong apakang toyen atamar engalae ayong ngesi, aliwor ayong lo aanyuni ngilam, meere apiaro.” Tolimok itiokeng ngesi tama, “Kimiek ngilam kon toliworos ngikang, tosubak iyong nakalimokinit ayong iyong. Kape torikokinae ayong ngikaalei ngulu.” Sodi tolot Yakobo kirum ngikaalei ngiarei toriku nia itiokeng. Kidorok itiokeng akimuj nakaabon, napalem emina Isaka. Ani erumor tolem Rebeka ngiworui luajokak ayakasi kai, lu araakasi ngika lokookeng aloapolon anyaritae Esau, kitanap lokookeng loochi lobe Yakobo. Kitanap tani ngileui a ngikaalei kangulu anakan, ka nisulut a emosiring a Yakobo. Sodi nak ngesi Yakobo akimuj nakaabon ngina ka ngamugati na asubakini ngesi. Sodi toloma Yakobo ni ayei apakeng tanyara tama, “Apa.” Kiki apakeng tama, “Ayong lo. Iyong ngesi ngae lokoku?” Tatachak Yakobo apakeng tama, “Arai ayong Esau, lokookon lo ekingaren. Asubak ayong natete kilimokini. Tonyou kare apa tanyam akiring a etiengit alo aari ayong alorika sodi kitopia ayong.” Kingit ngesi Isaka tama, “Ikokini iyong iari etiengit atipei kona ai, lokoku?” Tatachu Yakobo tama, “Erai nikengarakinea ayong Ekapolon Akuj, na erai Akuj kon.” Tolimok Isaka Yakobo tama, “Lokookang, taapuu chene nege katatap sodi atoyenea kirai iyong dir Esau.” Taapia Yakobo ni ayei apakeng, tatap apakeng ngesi sodi tama, “Ikwaan etoil ka loa Yakobo, nakaneni ikwaan ngakan ka na Esau.” Nyeyena ngesi Yakobo kainyo ayakasi ngesi ngajul nakaalak nakan keng loger ana a Esau, kotere ngakiro nguna, abu topia. Kingit nabo tama, “Iyong dir irai lokookang Esau a?” Tatachu ngesi tama, “Ee, ayong lo.” Sodi tolim apakeng tama, “Inunae robo akiring, atanyam etiengit lo aari lokookang, alorika ani erumor katopia.” Sodi inu Yakobo ngesi akimuj tanyam, inu tani emuna lo epuritoe, tamat. Ani erumor tolimok Isaka lo arai apakeng ngesi tama, “Taapuu diyete lokookang, kitonuu.” Ani eapiyari Yakobo diyete apakeng anuakin, kinguu apakeng akukuny a ngiworui keng topia ngesi. Tolim tama, “Enguu ayong akukuny a lokookang, ikwaan ka akukuny a amana ana apia Ekapolon Akuj. Kimiek Akuj kiinak iyong ngakop a adis, ka ngalup naketurupunak ngikinyam, ta alalau a akimuj, ka emuna lo epuritoe. Kimiek ngibukui tosuba etich kon, nabo toriediko ngitunga anikon, a arimatoi. Toliwor iyong ekapolon a talokaatokon. Kimiek ngalesea a itiokon toriediko a arimatoi anikon. Itwaan daang nikilami iyong, ilamio ngesi dang, ani itwaan daang nikipiari iyong, epiario ngesi dang.” Ani napei arumorea Isaka apiar Yakobo, napei arotokinio Yakobo, tobongu Esau lo arai lokaatokeng a Yakobo alorika. Kidorok Esau dang akimuj nakaabon, inaa apakeng tolimok tama, “Tonyou robo apa tanyam akiring a etiengit alo aari ayong lokookon alorika, sodi kitopia!” Kingit Isaka ngesi tama, “Ngae iyong?” Tatachu tama, “Arai ayong lokookon Esau, lo arai lokookon lo ekingaren.” Tamaranik Isaka lokojokon noi, sodi kingis ebala, “Ani ngae ngini tete aari etiengit sodi kainu ayong akiring atanyam? Anyam tete ayong akiring ngina eringa iyong nyebuno. Apia ayong ngesi arumor, aliwor ngesi lo epiaritae jik!” Ani iirari Esau ngakiro a apakeng, kikalou iute tokuniikinite, ani erumor tolimok ngesi apakeng tama, “Topiarae kare ayong dang apa!” Tolim apakeng tama, “Abuni lokaatokon kengal ayong, nakaneni alema ngesi apiaro kon.” Tolim Esau tama, “Ngakiro nguna kesi enyaritere ngesi Yakobo! Kamod ngesi ayong ngamodet ngaarei. Esiauni kolong ngesi tolema apolou kang na araakar ikoku ni ekingaren. Nakaneni alema tokona apiaro kang.” Ani erumor kingit ngesi apakeng tama, “Emam tokona apiaro adio kidekinit iyong ayong a?” Tatachak Isaka tama, “Etiliwo ayong Yakobo ekapolon kon arumor, nakaneni ainak ayong ngesi ngikaitotoi keng daang toliworos ngikasubak etich keng. Ainak ayong ngesi akimuj ka emuna lo epuritoe. Nyo tokona asubakini ayong anikon lokookang?” Tolimok Esau apakeng tama, “Apa, apiaro apei bon kolong eyei iyong a? Topiarae kare ayong dang apa!” Sodi kikalou Esau kiute. Sodi apakeng tolimok tama, “Ilonikinosi iyong ka ngalup naketurupunak ngikinyam, eloner tani anakop ana eponito anadis. Iyari iyong a ekileng kon, nakaneni isubi iyong etich a lokaatokon, ani kianyu iyong alolomu na ingerio ngakiro keng, ingedi ibore ni eenitor ngesi eluute kon.” Toremokin Esau Yakobo kotere apiaro na apiari apakeng Yakobo. Kitam Esau ebala, “Aapuut ngirwa lu igorore apakang etoani tosutonokinae. Ani erumor, aari ayong Yakobo lo erai lokaatokang.” Ani iirari Rebeka ngakiro a Esau alo arai lokookeng lo ekingaren, tomea itwaan anyarare Yakobo lo arai lokookeng loochi, sodi tolim Rebeka tama, “Etukit lokaatokon Esau akiar iyong sodi kiangunea ngesi. Tokona bocha lokookang, kiwap ngakiro kang, todok tolot ni eyei lokaatokang Laban lo eyei nakwap a Aran, kibooyoto ka ngesi kaina tanang ngirwa lu edaunor anyunyura a lokaatokon. Ani edaun angoit a lokaatokon kimuriakis ngesi ngakiro nakolong isubea iyong ngesi, ameuni ayong itwaan kitobuu iyong. Nyo niti bore etoaketa talokookang daang kwasiarei akolongit apei en?” Sodi tolimok Rebeka Isaka tama, “Ketuburut ayong ngaberu a Esau na eraakasi Ngaiti nugu. Ani kuut Yakobo dang aberu alotunga alu a Ngiiti kalu, nyo ibore iche eringa ayong ayarea?” Tanyarau Isaka Yakobo topia. Kichikichik tama, “Wara nyiut aberu anakwap a Kanaan. Tonyou tolot Mesopotamia nawi a apaakon Besuel, kuut nakookeng a Laban alo erai amae kon. Kipiari iyong Akuj Naationon sodi touriu ngide lukaalak, toliworos esi asepich a ngitunga. Kipiari iyong Akuj ka ngalesea kon loger lokolong apiarea Aburaam, sodi kirumea iyong akwap na ilomit iyong irai epeyonon naga, akwap nakolong ainakini Akuj Aburaam!” Tomea Isaka Yakobo tolot ngesi Mesopotamia nia Laban, lo arai lokookeng a Besuel alo arai Emaramit. Arai Laban lokaatokeng a Rebeka, ana arai itiokech a Yakobo ka Esau. Toyen Esau atamar apiari Isaka Yakobo ani erumor tolimok atamar tolot Mesopotamia, kuuta kaina. Toyen nabo atamar na apiarea Isaka ngesi, abu kitonger ngesi akuut aberu alo Kanaan. Toyen nabo atamar abu Yakobo kiwap ngakiro a itiokeng ka apakeng tolot Mesopotamia. Abu Esau toyen atamar nyejoikinito apakeng ngaberu na akwap a Kanaan. Kotere ngakiro nguna, tolot ngesi nia Ichimael lo arai lokookeng a Aburaam, kuut nakookeng na anyaritae Maalas, na arai nakaatokeng a Nebayos, kimorik ka ngaberu nache. Tonyou Yakobo alo Beer-cheba toten Aran. Ani enangi wache, kinapakin neni kainyo adooyorit akolong. Tolem ngesi amoru apei kaneni kicholong, sodi tojotoor. Kiruja ngesi, anakirujare kangina, taanyunga ngesi adoket na etoweitae analup tanangite ewae lo alokidiama nadis. Adokanarete ngimalaikae a Akuj kidiama ka atiyaun anadoket kangina. Awei Ekapolon Akuj alokidiama adoket ngina. Tolim tama, “Ayong ngesi Ekapolon Akuj, Akuj a apakon Aburaam ka Isaka. Kainakini ayong iyong ka ngalesea kon akwap na iperio iyong naga. Elalakearosi ngalesea kon kikokis apua analup, kialar lowaitin a akwap daang. Apiari ayong ngibukui daang kotere iyong ka ngalesea kon. Kiruki ayong ka iyong awadaang ani ilosi, ani erumor katobuu nakwap naga. Nyakaisikini ayong iyong tanang na asubakinea ngakiro nakechikak ayong iyong.” Abu Yakobo tokienyu tolim tama, “Iteni dir eyei Ekapolon Akuj nege, nakaneni peayeni ayong!” Tobul Yakobo tolim tama, “Abe kitubuli akwap naga noi! Erai nege dir akai a Akuj, erai tokona ngon ekidor lo engaaror adis ngesi logo.” Tonyou Yakobo nataparach elilim, sodi tolem amoru na echolongit kitowo erai akisitamunet, ani erumor kitiliwo abekot kiwasak akimiet kidiama. Tolimok ngesi akwap ngina ekiro be Besel. (Anyaritae kolong sek ekiro a ere kangolo Lus.) Ani erumor kikong Yakobo ani Ekapolon Akuj tama, “Ani kiruk ayong ka iyong, sodi kiyok iyong ayong analotoru kang, kiinak akimuj ka ngiworui lu anapi, sodi atobongu nawi a apakang niajokon, iyong Ekapolon Akuj ngesi iliwor Akuj kang. Ani amoru na etowo ayong kane erai akisitamunet, eliwor nikilipitere iyong, toliwor kainanakini ayong iyong alemunet apei anatomon a ibore kadaang ani kiinakini iyong ayong.” Tonyou Yakobo tolot nisek alosi, tanang nakwap a ngitunga alu alo kide. Ani ingoliari ngesi, taanyunga akar anacharait, eurenete ngisipaan nguuni a ngamesekin alo diyete. Etamasio ngamesekin alokare kangina. Aburit amoru natiapolon akituk a akar kangina. Arai na achunakinotor ngisipaan a ngamesekin daang neni, kijukasi ngikeyokok aapei amoru anakituk a akar sodi kitamata ngamesekin. Ani kitamat ngamesekin kerumor, tobura nabo akar a amoru kangina. Kingit Yakobo ngikeyokok tama, “Ngikaitotoi kang, aliwae iponeta esi?” Tatachut tamasi, “Kiponi alo Aran.” Kingit nabo ngesi kesi tama, “Iyenete esi Laban lokookeng a Naor a?” Tatachut tamasi, “Kiyeni.” Kingit nabo tama, “Iboi ngesi niajokon a?” Tatachut kesi tamasi, “Iboi niajokon, Rael na erai nakookeng dang ngin erujunit ngamesekin keng!” Tolim Yakobo tama, “Engolikinit ayong atamar eringa apaaran, meere esaa lo echunere ngamesekin. Kitamata robo ngamesekin ani erumor taramasi lonyia.” Tolimokis kesi ngesi tamasi, “Nyikikokini sua neni mati mono kechunakin ngisipaan a ngamesekin daang wapei sodi kijukarae amoru anakituk a akar, ngesi kitamasea sua ngamesekin.” Ani eringa Yakobo iruorosi ka ngikeyokok ngulu, todolut Rael ka ngamesekin a apakeng, kainyo arai Rael akeyokon a ngamesekin kanguna. Ani eanyungari Yakobo Rael na arai nakookeng a Laban emeat ngamesekin, tolot ngesi kijuka amoru anakituk a akar, kitamat ngamesekin. Arai Laban amae keng a Yakobo. Ani erumor tonuak Rael, sodi toowanik kikalou kotere alakara. Tolimok Yakobo Rael atamar eyanasi ngesi ka apakeng a Rael, nabo arai Rebeka idounit ngesi. Tamatar Rael tolimok apakeng ngakiro nguna. Ani iirari Laban ngakiro a lochien keng alo anyaritae Yakobo, kikomak tolot akisiriam ngesi. Kilogak ngesi ngakan tonuak, sodi kipeyou nawi keng. Kisisak Yakobo Laban ngakiro daang na asubakinosi. Tolim Laban tama, “Iteni dir irai iyong akoit ka ngaakot kang!” Sodi kiruko kesi elap epei. Tolimok Laban Yakobo tama, “Nyejoikinit kitamari isubi iyong etich kang pas ani iraakar lochien kang. Tolimokinae ayong ibore ni isaki iyong katatach ayong iyong.” Ayakasi Laban tanakookeng ngaarei, anyaritae naapolon Lea, tanyaritetei naachi Rael. Asechech ngakonyen a Lea, nakaneni arai Rael nakebusean ajokon a akwaan. Kona aminar Yakobo Rael, tolim tama, “Asubi ayong etich kon a ngikaru a ngikan-kaarei kotere nakookon naachi enyaritae Rael.” Tatachu Laban tama, “Ejoikinit ayong epotori Rael kainak iyong akidwang ainakin itwaan nigela. Kiboikin eruko ka ayong.” Tosub Yakobo etich a ngikaru a ngikan-kaarei kotere Rael, nakaneni tosubut ngikaru ngulu anikeng ngidikidio ani aminar ngesi Rael. Sodi Yakobo tolimok Laban tama, “Nakinae ayong aberu kang kainyo etemokin ngirwa lu ipotorere.” Apon kidorokinoe akimuj nakaalan anawi a Laban, tochunun ngitunga daang lu kaneni. Ani enangi nakwaare, toriko Laban Lea na arai nakookeng naapolon, torikok Yakobo, sodi topero Yakobo ka Lea na arai aberu keng. ( Kipoto Laban akasuban etich keng anyaritae Silipa nak Lea toliwor akasuban etich keng.) Ani enangi nataparach, toyen Yakobo atamar ikwa erai Lea. Sodi kingit Yakobo Laban tama, “Anukiro nakisubea iyong ayong nugu? Abe asubi bo kolong ayong etich kon sodi ataanyunea Rael. Nyo tokona kimodea iyong ayong kona?” Tatachak Laban tama, “Alotal a akwap kosi, nyejok ipotorio apese naachi eringa naapolon. Kiruko mono ka Lea a ngirwa a ngikan-kaarei, sodi ainakisi sua iyong Rael dang, erai kicham iyong akisub etich kosi a ngikaru a ngikan-kaarei a ngiche.” Tacham Yakobo, ani akiruket ka Lea a ngirwa a ngikan-kaarei kerumor, kipoto Laban nakookeng naachi anyaritae Rael nak Yakobo toliwor aberu keng. ( Kipoto Laban akasuban etich keng na anyaritae Bilia nak Rael toliwor akasuban etich keng.) Sodi topero Yakobo ka Rael na arai aberu keng. Tominak ngesi Rael akidwang Lea, tosub etich a Laban a ngikaru ngikan-kaarei a ngiche. Ani na engolikinea Ekapolon Akuj atamar eminae Rael akidwang Lea, kitojok ngesi akook a Lea touri ngide, nakaneni kitokolupan Rael. Topoti Lea, kidou ikoku nisapat, tolimok ekiro keng Reuben, ebala, “Aanyunga Ekapolon Akuj aboliaro nakaboliare ayong, iteni dir kaminakini tokona ayong lokile kang.” Topoti Lea nabo kidou ikoku nisapat, tolimok ekiro keng Simeon, ebala, “Kainaki ayong Ekapolon Akuj ikoku iche nisapat kainyo eira ngesi eger lokaremitere ayong.” Topoti nabo ngesi kidou ikoku nisapat, tolimok ekiro keng Lawi, ebala, “Kimorikin tokona ayong ka lokile kang kainyo edou ayong ngide keng lusapa nguuni.” Topoti Lea nabo, kidou ikoku nisapat, tolimok ekiro keng Yuda, ebala, “Epuruuni tokona ayong Ekapolon Akuj.” Ani erumor tojongo Lea akidounun. Ani ingolikini Rael atamar emam ngide a Yakobo edou ngesi, toting etereku kotere nakaatokeng, sodi tolimok Yakobo tama, “Nakinae ayong ngide ani kemam atoani ayong.” Tongoik Yakobo Rael sodi kingit tama, “Elunyokin ayong nados a Akuj ana kimik iyong ngide a?” Tatachu Rael tama, “Eyei akasuban etich kang Bilia. Toperioneto ka ngesi toliwor idoununi ngide lu adikino ayong edoununi, sodi ataanyunea ayong dang ngide anikeng.” Sodi nak Rael Yakobo akasuban etich keng, topero Yakobo ka ngesi. Topoti Bilia kidou ikoku nisapat a Yakobo. Tolim Rael tama, “Kasubakinea ayong Akuj na eriyan, eira akigoro kang sodi kainak ayong ikoku nisapat.” Tolimok ikoku ngini ekiro be Dan. Topoti Bilia nabo na arai akasuban etich a Rael sodi kidou ikoku nisapat a Yakobo nia ngiarei. Sodi tolim Rael tama, “Kilek ayong ka nakaatokang ekilek lokationon, nakaneni edwang ayong ngesi.” Kotere ngakiro nguna, tolimok ngesi ikoku ngini ekiro keng Naputal. Ani ingolikini Lea atamar ajong ngesi akidore ngide, kipoto akasuban etich keng anyaritae Silipa sodi nak Yakobo kitarau aberu keng. Kidou Silipa ikoku nisapat a Yakobo. Tolim Lea tama, “Ekeny ajokon.” Kotere ngakiro nguna, tolimok ngesi ikoku ngini ekiro keng Gad. Kidou Silipa na arai akasuban etich a Lea ikoku nisapat nia ngiarei ni arai ika Yakobo. Tolim Lea tama, “Alakara ayong noi! Etamarete tokona ngaberu alakara ayong.” Kotere ngakiro nguna, tolimok ngesi ikoku ngini ekiro be Acher. Ani ngirwa lu alemere ngakanoi, tolot Reuben mana sodi taanyu ngigilae kaina, inu Lea na arai itiokeng. Tolimok Rael Lea tama, “Nakinae kare ngigilae a lokookon ngidi.” Nakaneni tatachak Lea ngesi tama, “Inyiagaunit nabo iyong ngakiro nangoon nakiriworea ayong ekile a? Isaki tokona dang alemar ngigilae a lokookang a?” Tatachu Rael tama, “Ani kiinak iyong ayong ngigilae a lokookon, iperete iyong ka Yakobo akwaar naga.” Sodi ani ebong esaa lo abongunio Yakobo alomana, tolot Lea akisiriamiar, tolimok tama, “Akwaar naga ibuni iyong nikang kainyo kagielu ayong iyong a ngigilae a lokookang.” Sodi topero Yakobo ka Lea akwaar ngina. Kiira Akuj ngakiro a Lea, topoti ngesi sodi kidoik Yakobo ikoku nisapat nia ngikan. Tolim Lea tama, “Kainaki Akuj ayong ebachit kang, ani epotorea ayong akasuban etich kang ainak lokile kang.” Kotere ngakiro nguna, tolimok ngesi ikoku ngini ekiro be Isakar. Topoti Lea nabo sodi kidoik Yakobo ikoku nia ngikan-kapei. Tolim tama, “Kainaki ayong Akuj ainakinet naajokon. Eliwor tokona ekile kang lo karima ayong ani edounio ayong ngide keng ngikan-kapei lusapa.” Kotere ngakiro nguna, tolimok ngesi ikoku ngini ekiro be Sebulun. Ani ekisidi kidou ikoku nipese, tolimok ekiro keng Dina. Sodi kitamu Akuj Rael, kiira ngakiro keng, kitojok akook keng touri ngide. Topoti Rael kidou ikoku nisapat, ebala, “Alema Akuj ngileech kang.” Kotere ngakiro nguna, tolimok ngesi ikoku ngini ekiro be Yosep, ebala, “Kimiek Ekapolon Akuj kainak ayong ikoku nisapat iche.” Ani kidou Rael Yosep kerumor, tolimok Yakobo Laban tama, “Kimiekinae ayong atobong nakwap kang na eyei awi kosi. Kimiekinae atoloto ka ngaberu kang, ta ngide kang aapei, lu eraakasi kesi asubea ayong etich loger lo iyenea iyong dang.” Nakaneni tolimok Laban ngesi tama, “Kimiekinae ayong dang atolim ngakiro na asaki alimun. Adwari ayong nabo ayen atamar erai iyong ngesi kapiaritor ayong Ekapolon Akuj. Tolim ibore ni isaki iyong katatachak ayong iyong, sodi katatachak.” Tolimok Yakobo ngesi tama, “Iyeni iyong elope eger lo asubea ayong etich kon, ka eger lo erichakinitor ayong ngibaren kon. Kolong eringa ayong nyebuno, akidioko ngibaren kon. Nakaneni napei kolong abunio ayong, alalaketa ngibaren kon noi. Kipia iyong Ekapolon Akuj awadaang ani alosi ayong. Nakaneni tokona, achoikini ayong ngitunga a awi kang ori?” Kingit Laban ngesi tama, “Nyoni isaki iyong kainak ayong iyong?” Tatachak Yakobo tama, “Emam ibore ejoikinit iyong kiinakini ayong, pearai asaki ayong arubakin eyoki ngibaren kon erai kisubakinea iyong ayong akiroit napei naga. Kimiekinae ayong etor kiding ngibaren kon daang akolongit naga, atotiaku anamesekin amesek daang nameri ka nakori. Nguna kesi eliworosi ibore nikitachit iyong ayong. Sodi ani ngirwa lu isidiunosi, kileereu dir ateneanut kang namoi ibunio iyong aanyun ibore nikitachakini iyong ayong. Ibarasit daang ni nyemeriana, kori nyekoriana, kori nyiriono, ani keyei lobaren kang, eliwor ni ekokounitae.” Tolim Laban tama, “Itemokino. Kimiek kikokis loger lo ilimunio iyong.” Akolongit napei ngina, tolot Laban kipaka ngikora daang lukoliyek ka lukoriyek, ka ngaanei namee daang nameriyek ka nakoriyek, (ka ibarasit daang ni ayei ni akwaan nakwaan) ta amesek daang nakirion. Sodi kisiyok talokookeng. Towot Laban ani ayei Yakobo, tolom ni eperio ngauni lorot na enyounere. Kidong Yakobo iyoki ngibaren a Laban lu edongete. Sodi tolem Yakobo ngakito nakaapalak a ngikito alu enyaritae elubina, ka ekitoe lo ikwaan ka engoomo ta eramon. Tobolochia sodi tatakanuunea niakwaan eyei tooma nakito nguna. Kiwaak ngesi ngakito nguna ngaren ngategerin na amaasa ngibaren. Kiwaak ngesi kesi kainyo asupitosi ngibaren esaa lo amaseta ngakipi. Takapeeneta kesi alongaren ngakito nguna. Kotere ngakiro nguna toureta kesi ngimesekin ka ngikaalei lukoliyek, ka lumeriyek, ta lukoriyek. Totiak Yakobo ngamesekin ka ngaanei ani erumor kisingolia lowae lo ayakasi ngibaren a Laban lukoliyek ka lukirionok. Kotere erot ngolo, kirau Yakobo ngibaren keng sodi totiak ka lua Laban. Toliwor nacha enangea ngirwa lu esupieto ngibaren luatumak kiliok tosupo luberu, kiwaak Yakobo ngakito nakaapalak nguna ngaren ngategerin na amaasa kesi, sodi takapeta ani ayakasi ngakito nguna. Nakaneni peekoanakini ngesi neni ngirwa lu esupotor ngibaren lua erogo. Ngirwa lupei ngulu toliworos ngibaren lua Laban lu erogo, toliworos lu atumito ngika Yakobo. Sodi tabar Yakobo lokojokon noi, pena ngisipaan lukaalak a ngibaren, ka ngikasubak etich luberu ka lukiliok, ka ngikaala, ta ngisikiria. Kiira Yakobo talokookeng a Laban ebalasi, “Alema Yakobo ngibaren daang lukolong araakasi ngika apayok. Eraakasi ngibaren a apayok ngesi abarea ngesi.” Kingolik ngesi tani atamar nyemina Laban ngesi loger lokolong aminar. Sodi tolimok Ekapolon Akuj Yakobo tama, “Tobongo nakwap a taapakon na erai aka ngiyenet kon, nakaneni kiruki ayong ka iyong.” Kotere ngakiro nguna tomea Yakobo ngitunga ni ayakasi Rael ka Lea tolimok atamar pot naro na eyokio ngesi ngibaren. Tolimok kesi tama, “Engolik ayong atamar, nyeringa apakus kamina ayong loger lokolong sek kaminar. Nakaneni kiruki ayong ka Akuj a apakang. Iyenete esi atamar asub ayong etich a apakus a ngikilinga kang kadaang. Tani kikoni neni, kengal ayong apakus kiloch ibore nikatachakini ayong ngakilochiet ngatomon, nakaneni nyechamakina Akuj kawani ngesi ayong. Arai na elimunio ngesi tama, ‘Eliworosi ngibaren lukoriyek katachakinit ayong iyong,’ sodi toureta ngibaren daang ngimesekin ka ngikaalei lukoriyek. Ani na alimunio ngesi tama, ‘Ngibaren lukoliyek kesi katachakinit ayong iyong,’ sodi toureta ngibaren daang ngimesekin ka ngikaalei lukoliyek. Eger ngolo ngesi alemunea Akuj ngibaren ani ka apakus kainak ayong. “Ngirwa lu akapeta ngibaren, eruja ayong. Anakirujare kangina, engolik ayong ngikora daang lu asupito ngaanei eraakasi lukoliyek, ka lukoriyek, ta lumeriyek. Kesuruor ayong emalaikat a Akuj anakirujare kangina katanyar tama, ‘Yakobo,’ sodi ekii ayong atama, ‘Ayong lo.’ Katolimok ngesi ayong tama, ‘Kingolia, nakaneni ingolikini iyong atamar eraakasi ngikora daang lu esupito ngaanei lukoliyek, ka lukoriyek, ta lumeriyek. Ikote nguna daang neni kainyo aanyunga ayong daang nakisubea iyong Laban. Ayong ngesi Akuj nakolong atakanuuni anikon na iyakar iyong Besel, na itowea iyong amoru erai akisitamunet, sodi kitiliwo naitaleuno ani idokakinea akimiet kidiama, ani erumor kikong anikang. Tonyou tokona tobongo nakwap nakolong kidounere iyong.’ ” Tatachakis Rael ka Lea Yakobo tamasi, “Eyei ibore iche ni idongit nawi a apakosi ni ejoikinit sua kirumi a? Kitisibit ngesi sua ngipeyok. Kigiela ngesi sua nakaneni erika ngesi ngibaren daang lukolong kigielere sua. Eraakasi ngibaren daang lu alema Akuj ani ka apakosi ngikosi ka ngide kosi. Kotere ngakiro nguna, tosubak daang nakilimok iyong Akuj.” Sodi tonyou Yakobo, kidokok ngide keng ka ngaberu keng lokaala, ani erumor toruja ngibaren keng daang, nabo tolema ngiboro daang lu aanyuni ngesi anakwap a Mesopotamia. Tolot ngesi tobongo nakwap a Kanaan ni ayei apakeng lo anyaritae Isaka. Alosit Laban akitub ngamesekin keng ngajul. Sodi taanyu Rael alolom na ekokoea ngakujo nasubuna na arai ngaka apakeng. Kingala Yakobo Laban lo arai Emaramit ani pealimokinea atamar anyounit ngesi alosit. Tolema Yakobo ibore keng daang, torotok atipei. Todoka ngesi anangolol enyaritae Eupurate, sodi kidira nakwap a ngimukur enyaritae Gilead. Adaunet a ngirwa a nguuni, tolimokinae Laban atamar alot Yakobo. Kirukosi Laban ka ngikaitotoi keng, sodi kiwapakis Yakobo a ngirwa a ngikan-kaarei. Todoloi Yakobo alomukur a akwap enyaritae Gilead. Nakaneni bu Akuj nia Laban alo arai Emaramit nakwaare irujae, tolimok tama, “Tochoite nyiilimok Yakobo akiroit adio, kerai naajokon kori naaronon.” Tanang Laban ni ayei Yakobo. Alomit adakar a Yakobo moru. Toloma Laban dang ka ngikaitotoi keng lomukur lu enyaritae Gilead. Kingit Laban Yakobo tama, “Anukiro nugu isub iyong? Nyo kingalaa iyong ayong torik tanakookang ikwa ngirikon lu erikunitoe alojie? Nyoni kingalaa iyong ayong torotok ekiilingat? Arai kitelimok iyong ayong, kitiakak ngoni elakara ngitunga imariteteete, ka aeo, ideese ngatamburin ka ngagitae. Nyoni pekimiekinea iyong ayong atonuak ngide a tanakookang atalimok atamar toloto niajokon. Abangaanut ngakiro na isubak iyong nguna! Apedori ayong akiwan iyong, nakaneni kesuruori been ayong Akuj a apakon nakwaare kechikichik tama, Tochoite iwani Yakobo tani wadiochichi. Ayeni ayong atamar irotokini iyong ani kimuitor abongor nawi a apakon. Nakaneni a, nyo ikokoyarea iyong ngakujo kang nasubuna?” Tatachak Yakobo Laban tama, “Aemit ayong kainyo esibit edikino iyong kidemari ayong tanakookon. Nakaneni ani kianyu cha iyong itwaan idio ni etingit ngakujo kon nasubuna kane, eario itwaan ngini. Kidodiu tokona ibore ni erai ikon atingit ayong, tolema iteete ngitunga luyenet yok lugu.” Peayeni Yakobo atamar akokoit Rael ngakujo nasubuna a Laban. Sodi tasak Laban ngakujo keng nasubuna loeam a Yakobo, tasak tani loeam a Lea ka eam a ngakasubak etich anaarei, nakaneni nyeanyuna. Topudo ngesi aloeam a Lea toloma loeam a Rael. Alemari sek Rael ngakujo nasubuna nguna kidaa alokwap echue lo apetakinitae kidiama ekaal, sodi kiboikin kicholong. Tasak Laban ngakujo nasubuna nguna loeam keng, nakaneni nyeanyuna. Tolimok Rael apakeng tama “Nyiingo kare ekapolon kang, nyanyouni ayong itee iyong kainyo ayei ayong lolap eboi.” Sodi tasak Laban ngakujo keng nasubuna wadaang, nakaneni nyeanyuna. Sodi tongo Yakobo kitongolop Laban ebala, “Nyoni asechit ayong? Alital asechit ayong kirisitor iyong ayong niaronon kona? Ikur tokona iyong ngiboro kang daang, nyoni iborosit ni ianyu iyong ni erai ikon? Kiwaak nege taanyungasi ngiyenet kon ka ngiyenet kang, sodi kitotiak kesi ngoni! Ngikaru lutomwon-arei kirukitor ayong ka iyong lugu daang, emam ngamesekin kori ngaanei kon na apot kiyecha, nabo emam emesek anyam ayong alosipanit kon. Tani ibarasit ni enyamete ngibuin, nyeyauna ayong nikon asaki atamar nyikipaik iyong ayong, arai amicha a ibarasit kangini akang. Kilimokinit iyong ayong atamar atatacheene ibarasit ni ekokoyario naparan kori nakwaare. Ekoni eboyor kang neni, kanomit akolong naparan, ani nakwaare katanyam akatorot, tongop kona ajotoor. Ebooyi ayong ngikaru lutomwon-arei lugu daang anawi kon. Asubi ayong etich kon a ngikaru a ngitomon ka nguomwon kotere tanakookon naarei, eyok ngibaren kon a ngikaru a ngikan-kapei. Ani tani ikoni neni, kiloch iyong ibore nikitachakini ayong ngakilochiet ngatomon. Arai nyeyei Akuj a apaakang Aburaam, na elipit tani apakang Isaka, kimiekinit iyong ayong alosi a ngakan anikirion. Nakaneni engolik Akuj ngichan kang ka etich lo asub ayong, ngesi been kichikichikea iyong nakwaare.” Sodi tatachak Laban Yakobo tama, “Eraakasi ngade nugu tanakookang, eraakasi ngide kech ngide kang, eraakasi ngibaren lugu ngibaren kang, nabo erai ibore ni itee iyong ikang. Ani kona emamakar ibore asubakinea ayong tanakookang ka ngide kech, asaki tokona ayong atachamakin ka iyong atosenokisi ngamoru toliwor ibore ngini kisitamuni ngoni achamakin yok.” Sodi tolem Yakobo amoru kitowo. Tolimok Yakobo ngiyenet keng atamar tochunakis ngamoru. Tochunakis kesi ngamoru sodi tosenokis. Ani erumor kimuja alo diyete ngamoru na asenokino nguna. Tolimok Laban ngamoru na asenokino nguna ekiro be Yegar-saadusa, nakaneni tolimok Yakobo ngamoru na asenokino nguna ekiro be Galeed. Tolim Laban tama, “Eraakasi ngamoru na esenokino nugu idodiunito achamakin kang ka iyong akolongit naga.” Ngakiro nguna kesi alimokinere neni ekiro be Galeed. Tolimok Laban amoru na etowei kaneni ekiro be Misipa ebala, “Kiyok Ekapolon Akuj iyong ka ayong nakitiakar. Ani kiboliar iyong tanakookang, kori kuut ngaberu ngache kimorik ka tanakookang, tani pekayeni ayong, toyen atamar eyeni Akuj achamakin nakichamakin ayong ka iyong.” Tolimok nabo Laban Yakobo tama, “Kingolik ngamoru na esenokino nugu ka amoru na etowo ayong alokiding kang ka iyong. Eraakasi ngamoru na esenokino nugu ka amoru naga kesi idodiunete atamar nyekalami ayong ngamoru na esenokino nugu, abu ni iyei iyong asaki akiwan iyong, kori nyikalami iyong ngamoru na esenokino nugu bu ni ayei ayong isaki akiwan ayong. Kimiekisi Akuj a Aburaam ka Naor, na erai Akuj a apakech, toliwor akatiakan yok.” Sodi kikong Yakobo elimit ekiro a Akuj ana erai ngesi ilipit apakeng Isaka. Ani erumor taar Yakobo ibarasit ni arai akipeyos alomoru, tanyarau ngiyenet keng kimuja. Ani kimuja kerumor, kibooyoto alomoru akwaar kiiya kiwala. Ani nataparach elilim, tonyou Laban tonuak ngide a tanakookeng, ka tanakookeng, sodi topia. Ani erumor tonyou tobongo nawi. Abu Yakobo analosit keng, kiriamunos ka ngimalaikae a Akuj lorot. Ani eannyungari ngesi kesi, tolim tama, “Erai ibore en ajore a Akuj!” Sodi tolimok ngesi neni ekiro be Maanaim. Tomea Yakobo ngitunga ni ayei lokaatokeng Esau lo alomit nakwap na enyaritae Edom. Kichikichik ngesi kesi ebala, “Tolimokisi ekapolon kang Esau kona: Ebala ekasuban etich kon Yakobo kona, ‘Eboi ayong apeyonit anawi a Laban tanang tokona. Ameat ayong ngaatuk, ka ngisikiria, ka ngisipaan a ngamesekin, ta ngikasubak etich lukiliok ka luberu. Ameunit tokona ayong ngitunga nikon ekapolon, etamit atamar kipeyouni iyong ayong.’ ” Ani ebongunete ngitunga ngulu ni ayei Yakobo, tamasi, “Kinang sua ni eyei lokaatokon Esau, nakaneni ebunit ngesi alorot akisiriam iyong, erukito ka ngitunga ngamiae ngoomwon.” Tobul Yakobo noi kialolong. Totiak ngesi ngitunga lu arukitotor ngatiaket ngaarei. Totiak tani ngamesekin, ka ngibaren luche, ta ngikaala, itami ebala, “Ani kiriama Esau ka atiaket apei tomunya, ebuchar atiaket nache.” Kilip Yakobo Akuj ebala, “Ee, Akuj a apaakang Aburaam, ka apakang Isaka. Ekapolon Akuj nakolong kilimokini ayong atamar atobong nakwap kang ni eyakasi ngiyenet kang, nabo kichikak atamar kisubea ayong naajokak. Ketimit ayong tani eger lo kidodikinea iyong ayong lo arai ekasuban etich kon atamar irai iyong loajokon lo kimunoi. Adoki kolong ayong angolol a Yorudan erai aburo bon atingit, nakaneni eraakasi tokona ngajorei kang ngaarei. Kelipit tokona atamar kitoyuu ani eyei lokaatokang Esau. Kabulit ayong esibit abuni ngesi kitaar sua daang aapei ka ngaberu ta ngide. Nakaneni kichikakini kolong iyong ayong atamar kisubea naajokak, sodi kitalala ngalesea kang loger a alalau a asinyen ana eyei lokwaas a anam, ana emam kona imarunio ani elalaa.” Sodi toper Yakobo neni nakwaare a akolongit kangina. Ani erumor kipaku epewae a ngibaren keng tomek lokaatokeng Esau. Kipaku ngaanei naberu ngamiae ngaarei ka ngikora ngitomwon-arei, ka ngamesekin ngamiae ngaarei ka ngimesekin ngitomwon-arei, ka ngakaala ngatomwon-uni namanang erukito ka ngita ngikaala kech, ka ngaatuk naberu ngatomwon-omwon ka ngimongin ngitomon, ta ngasikiria ngatomwon-arei, ka ngisikiria lukiliok ngitomon. Nak ngikasubak etich keng ngibaren ngulu, toliwor erujit epei esipanit epei. Tolimok kesi tama, “Kapesi kingarenikisi, totiaka esipanit lo ingareni ka esipanit loche.” Kichikichik lo ingareni tama, “Ani kiriamunosi iyong ka lokaatokang Esau sodi kingit iyong tama, ‘Irai iyong ekasuban etich a ngae? Aliwae ilosi iyong? Ngika ngae ngibaren lugu?’ Itachakini iyong ngesi tama, ‘Eraakasi ngibaren lugu ngika ekasuban etich kon Yakobo, lu kimiekinit ngesi iyong ekapolon keng Esau. Isidiuno Yakobo elope anaabor.’ ” Kichikak ngesi ngikasubak etich lu arujito ngisipaan lua ngiarei ka lua nguuni, ta luche daang ebala, “Tolimokisi Esau ngakiro napei nguna na iriamunotor ka esi, ani eyakasi nguna daang, tolimokisi ibalasi, ‘Isidiuno Yakobo elope anaabor.’ ” Asubi ngesi kongina itami ebala, “Kimiekinae mono esisil a ngibaren alu amekinit ayong ngesi alu engarenikis, ani ekisidi, eriamunos ayong ka ngesi. Esibit cha ani kekok neni, ketopeyoni ngesi ayong.” Sodi kisingarenik ngesi ngibaren keng, nakaneni toper ngesi nadakar ngina. Nakwaare a akolongit anapei kangina, tokienyu Yakobo. Kirukosi ngesi ka ngaberu keng naarei, ka ngakasubak etich keng naarei, ta ngide keng lutomon ka epei, sodi todokasi anangolol enyaritae Yabok. Kidoka Yakobo kesi ekwakaye angolol, ka ngibaren keng daang. Sodi kidong Yakobo neni bon alopei. Bu itwaan kileka ka ngesi napei nakwaare tanang echili nanyang. Ani ingolikini itwaan ngini atamar kakuruwo akidwang Yakobo, tatap akidotunet a ekalokot a Yakobo, toriangakin akidotunet a ekalokot keng ilekasi. Ani erumor tolimok itwaan ngini Yakobo tama, “Kimiekinae ayong atolot kainyo ewala.” Nakaneni tolimok Yakobo ngesi tama, “Nyekemiekini ayong iyong ilosi mati kipia iyong ayong.” Kingit itwaan ngini ngesi tama, “Ngae ekiro kon?” Tatachak ngesi tama, “Kanyaritae ayong Yakobo.” Tolimok itwaan ngini ngesi tama, “Nyikinyarao iyong nabo Yakobo jik, eliwor ekiro kon Isirael, kainyo ilekasi iyong ka Akuj ta ngitunga kidwang.” Sodi tolimok Yakobo ngesi tama, “Tolimokinae kare ekiro kon.” Nakaneni tolimok itwaan ngini ngesi tama, “Nyoni kingisitor iyong ayong ekiro kang?” Sodi topia itwaan ngini Yakobo kaneni. Sodi tolimok Yakobo neni ekiro be Peniel, ebala, “Aanyunga ayong Akuj nakaneni ayar ayong.” Epiripirunit akolong na arotokinio Yakobo alo Penuel, echodonokini ngesi elosi kotere ekalokot keng. Ngakiro nguna kesi nyenyameta Ngisirael amoriit na a ekalokot, kainyo erai amoriit ngina kolong atapi itwaan ngini ani a Yakobo. Kingolia Yakobo sodi taanyunga Esau ebunit, erukito ka ngitunga ngamiae ngoomwon. Totiak ngesi ngide totiakak Lea, ka Rael ta ngakasubak etich naarei. Kiwaak ngakasubak etich ka ngide kech ngaren, ani erumor totupakis Lea ka ngide keng. Ani esal kadaang, totupuut Rael ka lokookeng Yosep anaabor. Kingarenik Yakobo elope kesi daang. Tolot toriedik ngariediket ngakan-kaarei, tanang ni aapiyarea diyete lokaatokeng. Abu Esau tamatar akisiriamiar Yakobo, kilogak ngakan keng lomosiring a Yakobo, tonuak. Kikalout kesi daang kotere alakara. Ani ingoliari Esau, taanyunga ngaberu ka ngide, kingit ngesi tama, “Tangae lugu irukito ka iyong?” Tatachak Yakobo tama, “Eraakasi lugu ngide lu kainaki ayong Akuj kotere ajokis keng.” Ani erumor taapuut ngakasubak etich diyete ka ngide kech, toriediko. Taapuut tani Lea ka ngide keng sodi toriediko. Ani ekisidi, taapuut Rael ka lokookeng Yosep, sodi toriediko. Abu Esau kingis tama, “Aka inyo ajore nakiriamun ka ayong lorot?” Tatachak Yakobo tama, “Asaki atamar kesisil iyong kitachamunea ayong, ekapolon kang.” Nakaneni tolim Esau tama, “Elalak ayong ngibaren lokaatokang. Kiratak iyong lu imeat.” Tolimok Yakobo ngesi tama “Meere kongina, kemaimai ayong iyong atamar ani kichamunit akipeyoun, tacham ibore nikalemikinit ayong iyong. Iteni dir ikoni aanyungar ereet kon, ikoni aanyungar ereet a Akuj. Kemaimai atamar tacham kare ibore nikainunit ayong iyong kainyo kasubea ayong dang Akuj naajokak, nakaneni abarit ayong noi.” Sodi kimaima Yakobo Esau, tacham Esau alemar. Tolim Esau tama, “Potu robo apana, kengarenikini ayong esi.” Nakaneni tolimok Yakobo ngesi tama, “Iyeni iyong ekapolon kang atamar edisiak ngide, nabo ejoikinit ayong achoikini ngibaren lu itanakete. Ani kipuk kesi a akolongit a apei, etoakete daang. Kingarenik kare cha iyong, sodi eapunos ayong ka ngibaren ta ngide, tanang abuni ayong ni iyei iyong alo Edom.” Tolim Esau tama, “Kimiek robo katoisikinea ngitunga lu kirukitor ayong ngiche.” Nakaneni tolim Yakobo tama, “Anukiro echamit iyong isubea kongina? Ibore ni asaki ayong ngesi atamar esila ngoni.” Sodi tonyou Esau akolongit ngina tolot Edom. Nakaneni tonyou Yakobo tolot Sukos, sodi toduk ngesi akai keng ka nganokin a ngibaren keng. Ngakiro nguna kesi alimokinere neni ekiro be Sukos. Bu Yakobo alo Mesopotamia tanangu lore a Chekem lo ayei nakwap a Kanaan niajokon. Tolom ngesi diyete ere ngolo. Agieli ngesi ni alomi analesea a Amor, alo erai apakeng a Chekem, togiel a ngaropiyae a amiat a apei. Tosubak ngesi ekeno a ngakipeyos neni, tolimok ekiro be El-Eloe-Isirael. Akolongit apei, anyouni Dina na arai nakookeng a Yakobo na edouni aberu na anyaritae Lea, tolot aanyun ka ngaberu a akwap kangina. Chekem lokookeng a Amor lo arai Eipit, na aanyungarea Dina, toruakin totikoono, kisurum ngileech a eger kangolo. Arai Chekem ekapolon a akwap kangina. Nakaneni tomina ngesi Dina nakookeng a Yakobo tolomak akimaima. Kotere ngakiro nguna tolimok Chekem apakeng lo anyaritae Amor tama, “Asaki ayong tolotou apese naga eut.” Kiira Yakobo atamar enyasu Chekem nakookeng na anyaritae Dina. Ani kona aringaakatar talokookeng eyakasi nachokor, emam ngakiro asubaki ngesi tanang abongunet kech. Tolot Amor apakeng a Chekem nia Yakobo esaki ekian ka ngesi, esaa lopei ngolo ngesi abongunioto ngide a Yakobo anachokor, pot nawi. Ani iirarete kesi ngakiro nguna, tolemasi noi nabo tongoa ani asubakinea Chekem Ngisirael ngakiro naaronok noi ani atikoonorea nakookeng a Yakobo, tarai nyechamit akiroit na ikoni ngina esubakinio. Nakaneni tolimok ngesi Amor tama, “Emina lokookang lo enyaritae Chekem nakookus noi. Kemaimai esi atamar kimiekisi ngesi kuut nakookus. Atachamakin atamar iutanakinosi ngitunga kus ka lukosi. Ani kikok ngoni neni, irukete esi ka sua, toloma wadaang ni cha isakete esi akilom anakwap kana. Kiboikinos toliworos ngimuchurus, taanyut ngibaren.” Tolimok nabo Chekem apakeng a Dina ka talokaatokeng tama, “Tachamakinae kare cha esi ayong sodi kainak ayong esi ibore cha daang ni isakete esi. Tolimokinae esi ayong ngainakinet na isakete esi, sodi kitalalata noi ngibaren lu iutare. Kainakini ayong esi ibore ni isakete, erai cha kichamakis esi ayong eusi apese naga.” Ani kona enyasunitor Chekem nakaatokech Dina, tatachakis talokookeng a Yakobo Chekem ka apakeng lo anyaritae Amor ngakiro emodito. Tolimokis tamasi, “Nyikipotori sua nakaatokosi kuut itwaan ni nyilengeritae. Erai akikokin neni ngileech anikosi. Kichamakin sua ka esi erai kichamut esi atamar ikwaanikinosi esi ka sua ani ilengereta itwaan nikile anikus. Mati kikokis esi neni ngesi iuseta esi ngide kosi, euta sua ngide kus. Kiboikin sua ka esi atarata ngitunga ngipei. Ani pekichamut esi ngakiro kosi kilengeras, kirikori sua nakaatokosi, atorotokisi.” Tojoikis Amor ka lokookeng Chekem ngakiro kech. Nyemamakina edia ngolo asubakin ngakiro nguna kainyo amina ngesi nakookeng a Yakobo noi. Kanguna kadaang, arai Chekem lo arimasi ngitunga noi akidwang ngitunga a awi kech daang. Sodi toloto Amor ka lokookeng Chekem nipalem iriamiriameeneo alokidor a ere, kiruoro ka ngikiliok a ere kangolo tolimokis tamasi, “Eraakasi ngitunga lugu ngipaalon yok. Atachamakisi kesi elomete nakwap naga toliworos ngimuchurus, kainyo elolom akwap naga kitemokin ngoni ka kesi dang. Ani erumor euta ngoni ngide kech lupesur, epotosi ngoni luyok kuuta kesi. Nakaneni echamunete kesi akiruk ka ngoni atarata ngitunga ngipei erai kilenger itwaan nikile daang aniyok loger kech. Ikwa nyeliworosi ngibaren kech ka ibore ni etingito kesi daang iyok a? Atachamakin tokona ka kesi sodi eruko ngoni ka kesi.” Topupokin ngikiliok daang lu ayakasi lore ngolo ka Amor, ta lokookeng Chekem. Sodi kilengerae ngikiliok daang. Ani akolongit na a ngauni eringa ngitunga lu elengerio eriabasi lokojokon, tolemut talokookeng a Yakobo ngiarei lu anyaritae Simeon ka Lawi ngilengea kech toremo ere itumosi ngitunga, taara ngikiliok daang. Araakasi Simeon ka Lawi talokaatokeng a Dina. Kichuma kesi Amor ka lokookeng Chekem a ngilengea taara. Torikosi Dina anawi a Chekem torotokis. Ani kear ngitunga ngulu kerumor, toremo talokookeng a Yakobo luche ere, kotere ni enyasunere nakaatokech. Toremo kesi ngamesekin ka ngaanei, ka ngaatuk, ka ngisikiria, ta ibore cha daang ni ayei lore ka namanat. Toremo kesi ngibaren kech daang ka ngide, ka ngaberu, ta ibore cha daang ni ayei nakais kech. Tolimok Yakobo Simeon ka Lawi tama, “Kiinut esi ayong ngichan. Karemokinosi tokona ayong Ngikanaan ka Ngiperes, lu eraakasi ngitunga a akwap kana. Ani ketuko kesi tamasi karemete ayong, emunyarete kesi ngitunga a awi yok daang, kainyo ekidioko ngitunga kang.” Nakaneni tatachakis kesi ngesi tamasi, “Nyikimiekini sua nakaatokosi itusubunio amalaat.” Tolimok Akuj Yakobo tama, “Tonyou tolot Besel sodi tolom inaa. Ani inangi inaa, todukokinae ayong ekeno a ngakipeyos, ayong Akuj kon nakolong atakanuuni anikon na ipungaror iyong ani eyei lokaatokon Esau.” Tolimok Yakobo ngitunga a awi keng ka ngitunga daang lu arukitotor tama, “Tachakasi ngakisikwaanet a ngakujo ana nyeraakasi ngakus itingito esi. Kitosegas sodi kilocho ngiworui kus. Ani erumor atoloto Besel ni adukokini ayong ekeno a ngakipeyos nakolong kengarakini ayong na aanyunitor ngichan, nabo kirukit ka ayong awadaang ani cha alosi ayong.” Sodi nakis kesi Yakobo ngakisikwaanet a ngakujo daang na atingito kesi, ka ngamaritoi na anapito anaki kech. Sodi kidaa Yakobo ngakujo nguna alokwap echoke lo ayei diyete Chekem. Ani enyounete kesi alosit, kitubul Akuj ngitunga a ngirerea kadaang alu ayakasi neni, nyiwapakina kesi awosit a Yakobo. Tanang Yakobo Lus, ni erai ngesi enyaritae Besel, ni eyei nakwap a Kanaan. Tanangut ngesi ka ngitunga daang lu arukitotor neni. Todukok ngesi ekeno a ngakipeyos neni, tolimok ekiro be El Besel kainyo neni kolong atakanuunea Akuj ani a Yakobo nakolong epungaror ani eyei lokaatokeng. Totoan Debora na arai ngesi kolong etanuni Rebeka, sodi tonukakinae tooma lochoke lo lo ayei kuju a Besel. Kotere ngakiro nguna tolimok ngesi ekitoe ngolo ekiro be Alon-Bakusi. Abongunet a Yakobo alo Mesopotamia, tatakanu Akuj anikeng nabo topia. Tolimok Akuj tama, “Ekiro kon ngesi Yakobo, nakaneni nyikinyarao nabo iyong Yakobo, pearai eliwor tokona ekiro kon Isirael.” Sodi tolimokinae ekiro a Yakobo Isirael. Tolimok nabo Akuj ngesi tama, “Ayong ngesi arai Akuj Naationon. Taanyu ngide lukaalak. Epote ngibukui lukaalak anikon, nabo epote tani ngikapolok anikon. Kainakini ayong iyong ka ngalesea kon nakitupuunete iyong akwap nakolong ainakini ayong Aburaam ka Isaka.” Torotok Akuj ani eruorotor ka ngesi toten kidiama. Kitowo Yakobo amoru ani eruorotor ngesi ka Akuj toliwor akisitamunet, ani erumor kitiliwo na italeuno ani abukokinea emuna lo epuritoe ka akimiet. Tolimok Yakobo ni eruorotor ngesi ka Akuj ekiro be Besel. Torotokis Yakobo ka ngitunga a awi keng daang alo Besel. Ani eapuunete diyete Epirasa, kisiak Rael ariaba. Toriabakin ngesi lokojokon noi. Ani na ariabar ngesi lokojokon noi kongina, tolim aberu na asaki akisidoun ngesi tama, “Wara nyiem, ianyu iyong ikoku iche nisapat.” Nakaneni aapikinit Rael akitu. Ani eringa nyetoana, tolimok idia ngini ekiro be Benoni. Nakaneni tolimok Yakobo idia ngini ekiro keng Benjamen. Ani etoani Rael, tonukakinae lokwaas a erot alo etenere Epirasa, ni tokona enyaritae Betleem. Kitowo Yakobo amoru na arai akisitamunet analiel a Rael, eringa amoru ngina eyei neni tani tokona. Towot Yakobo tolot, kitor nasenon enyaritae Eder, sodi tolom lowae loche kayaaye. Ani eringa Yakobo elomit nakwap ngina, topero lokookeng lo anyaritae Reuben ka aberu a apakeng na arai apese a ngabwes anyaritae Bilia. Kiira Yakobo ngakiro nguna, sodi tongo. Araakasi talokookeng a Yakobo ngitomon ka ngiarei. Talokookeng a Lea kesi Reuben, lo arai lokookeng a Yakobo loapolon, ka Simeon, ka Lawi, ka Yuda, ka Isakar, ta Sebulun. Talokookeng a Rael kesi Yosep ka Benjamen. Ngide lusapa edouni Bilia na arai akasuban etich a Rael kesi Dan ka Naputal. Ngide lusapa edouni Silipa na arai akasuban etich a Lea, kesi Gad ka Acher. Eraakasi ngulu talokookeng a Yakobo lu auriuni ngesi na ayakar Mesopotamia. Tolot Yakobo ni ayei apakeng alo Mamure, diyete ere a Ariba, ngesi atamar Eburon. Neni ngesi nikolong alomito Aburaam ka Isaka eraakasi ngipeyok. Eraakasi ngikaru lu ayarea Isaka amiat apei ka ngitomwon-kauni. Totoan Isaka akaalimon, emojongit noi, tonuka ngesi talokookeng Esau ka Yakobo. Eraakasi lugu ngalesea a Esau, alo arai ekiro eche Edom. Eusi Esau ngapesur alotunga a akwap a Kanaan na araakasi Ada nakookeng a Elon lo arai itwaan a Ngiiti, ka Olibama nakookeng a Ana alo arai ales a Sibeon, alo arai Eipit. Anyaritae aberu keng na a ngauni Basemas, na arai nakookeng a Ichimael, na arai nakaatokeng a Nebayos. Kidou aberu a Esau na anyaritae Ada ikoku ni anyaritae Elipas. Kidou na anyaritae Basemas ikoku ni anyaritae Reuel. Kidou na anyaritae Olibama ngide lu anyaritae Yeuch, ka Yalam, ta Kora. Eraakasi lugu talokookeng a Esau lu edounete ngaberu keng na alomitor ngesi nakwap a Kanaan. Ani erumor, torik Esau ngaberu keng, ka ngide keng, ta ngitunga daang a awi keng. Toruja ngaatuk keng ka ngibaren luche daang, tolema ibore keng daang nikolong aanyuni ngesi anakwap a Kanaan. Towot ngesi nakwap ache na elona ani ayei lokaatokeng Yakobo. Awosi ngesi ani adidingea akwap na alomito ngesi ka Yakobo, tongop kesi kona elomete wapei kainyo alalak ngibaren kech noi. Sodi tolom Esau nakwap na ngimukur na anyaritae Edom. Erai ekiro a Esau eche Edom. Eraakasi lugu ngirora a ngalesea a Esau, alo arai apaakech a ngitunga alu enyaritae Ngiedomae. Ngirora a talokookeng a Esau kesi Elipas, lo edouni aberu keng na anyaritae Ada, ka Reuel, lo edouni aberu keng nache anyaritae Basemas. Talokookeng a Elipas kesi ta Teman, ka Omar, ka Sepo, ka Gatam, ta Kenas. Edouni aberu a Esau na anyaritae Ada kidou Elipas. Arikit Elipas apese a ngabwes na anyaritae Timuna, kidou Timuna ikoku a Elipas ni anyaritae Amalek. Kidou aberu a Esau na anyaritae Basemas ikoku ni anyaritae Reuel. Anyaritae talokookeng a Reuel Naas, ka Sera, ka Chama, ta Misa. Kidou aberu a Esau na anyaritae Olibama, na arai nakookeng a Ana alo arai ales a Sibeon, kidou talokookeng a Esau nguuni lu anyaritae Yeuch, ka Yalam, ta Kora. Eraakasi lugu ngirora a ngikapolok a ngitela alu etorunete nia Esau. Elipas lo arai lokookeng a Esau loapolon auriuni Teman, ka Omar, ka Sepo, ka Kenas, ka Kora, ka Gatam, ta Amalek. Apolokinit epei kech daang ekitela keng. Eraakasi ngulu daang talokookeng a Elipas lu edounio anakwap a Edom, kidou aberu a Esau na anyaritae Ada. Touriu lokookeng a Esau lo anyaritae Reuel, talokookeng lu anyaritae Naas, ka Sera, ka Chama, ta Misa. Apolokinit epei kech daang ekitela keng. Eraakasi ngulu daang talokookeng a Reuel lu edounio anakwap a Edom, kidou kesi daang aberu a Esau na anyaritae Basemas. Talokookeng a aberu a Esau ana anyaritae Olibama kesi Yeuch, ka Yalam, ta Kora. Apolokinit epei kech daang ekitela keng. Eraakasi ngulu daang talokookeng a aberu a Esau ana anyaritae Olibama na arai nakookeng a Ana. Eraakasi lugu daang ngalesea a Esau, alo erai ekiro eche Edom, apolokinit epei kech daang ekitela keng. Eraakasi lugu ngalesea a Seir, alo arai Eorit, itwaan a akwap kangina. Anyaritae kesi Lotan, ka Chobal, ka Sibeon, ka Ana, ka Dichon, ka Eser, ta Dichan. Apolokinit epei kech daang ekitela keng ani ayakasi Ngiori lu eraakasi ngalesea a Seir, anakwap a Edom. Talokookeng a Lotan kesi Ori ka Eman. Anyaritae nakaatokeng a Lotan Timuna. Talokookeng a Chobal kesi Aliwan, ka Manaas, ka Ebal, ka Chepo, ta Onam. Talokookeng a Sibeon kesi Aia ka Ana. Ana ngesi lokolong aanyungari ngichwae lukamonak a ngakipi anariet, na eyokio ngisikiria a apakeng alo anyaritae Sibeon. Ngide a Ana kesi Dichon ka ikoku nipese ipei anyaritae Olibama. Talokookeng a Dichon kesi Emidan, ka Echiban, ka Isiran, ta Keran. Talokookeng a Eser kesi Bilian, ka Saawan, ta Akan. Arai Dichan apakeng a Us ka Aran. Ngirora a ngikapolok a Ngiori kesi ta Lotan, ka Chobal, ka Sibeon, ka Ana, ka Dichon, ka Eser, ta Dichan. Apolokinit epei kech daang emachar keng anakwap a Edom. Lugu kesi eraakasi ngikapolok lu apolokinito akwap enyaritae Edom, eringa Ngisirael nyemino ekapolon lo apolokinit. Arai Bela lokookeng a Beor ekapolon a akwap a Edom, ayei ere keng loapolon ni anyaritae Diniaba Ani etoani Bela, toliwor Yobab lokookeng a Sera ekapolon. Arai Yobab eka ere enyaritae Bosira. Ani etoani Yobab, toliwor Ucham loa akwap a Ngiteman ekapolon Ani etoani Ucham, toliwor Adad lokookeng a Bedad ekapolon. Anyaritae ere keng loapolon Apis. Adad ngesi kolong etiji Ngimidian anakwap a Moab kidwang. Ani etoani Adad, toliwor Samula loa ere a Masireka ekapolon. Ani etoani Samula, toliwor Chaul lo abunit alore anyaritae Reobos, lo ayei lowae a angolol, toliwor ekapolon. Ani etoani Chaul, toliwor Baalinan lokookeng a Akibo ekapolon. Ani etoani Baalinan lokookeng a Akibor, toliwor Adad ekapolon. Anyaritae ere keng loapolon Pau. Anyaritae ekiro a aberu a Adad Meetabel. Ngikapolok a ngitela alu apote ani a Esau, imarunitae a ekitela kech ka nia alomito kesi, eraakasi Timuna, ka Aliwa, ka Yesesi, ka Olibama, ka Ela, ka Pinon, ka Kenas, ka Teman, ka Mibisar, ka Magidiel, ta Iram. Lugu kesi eraakasi ngikapolok a ngitela alu apote ani a Edom, alo arai ekiro keng eche Esau. Elimokinitae kesi ngirora ani kolong alomito kesi ka nikolong apolokinito kesi. Tolom Yakobo nakwap a Kanaan nakolong alomit apakeng erai epeyonon. Eraakasi ngakiro na isisaunitae nugu na a ngalesea a Yakobo. Ani eliwor Yosep edia loa ngikaru a ngitomon ka ngikan-kaarei, kiyoko ka talokaatokeng ngamesekin ka ngaanei. Araakasi talokaatokeng ngulu talokookeng a Bilia ka Silipa, ana araakasi ngaberu a Yakobo alo arai apakeng. Bu Yosep kisisak apakeng ngakiro naaronok asubete talokaatokeng. Amina Yakobo Yosep noi akidwang ngide luche daang kainyo edounio Yosep ngirwa lu amojongitor ngesi. Kotere ngakiro nguna, todonyok ngesi Yosep eworu lokooyen towoyak ngakan. Ani ingolikinete talokaatokeng atamar emina apakech Yosep akidwang kesi, toremokinos kesi Yosep tojongoto akisuruor a ekisil. Akwaar apei kiruja Yosep. Ani isisakini ngesi talokaatokeng ngakiro nguna, toremokinos kesi ngesi noi. Tolimok kesi tama, “Topupokisi ngakiro na erujae ayong. Erujae ayong kiya ngoni daang mana kieni ngasiina a ngakanoi. Ani nipei bore ngini, tonyou asiinait nakang towo. Tochunakinos ngasiina nakus kiriama nakang, sodi toriedikokis.” Kingita talokaatokeng ngesi tamasi, “Ikwa tokona ibore en, iliwor iyong ekapolon kitopolok sua?” Sodi toremokinos kesi ngesi noi kotere akirujare keng ka ngakiro na eruoro ngesi. Kiruja nabo Yosep sodi kisisak talokaatokeng ebala, “Topupokisi, eruja nabo ayong sodi engolik akolong ka elap, ta ngikanyer ngitomon ka apei kariedikokinito ayong.” Nakaneni ani isisakini ngesi apakeng ka talokaatokeng ngakiro nguna, kikilak apakeng ngesi ebala, “Nyo eger a akirujare irujae iyong kana? Esibit iyong dir epedori itiokon, ka talokaatokon, ta ayong aponere atoriedikokisi iyong a?” Toting talokaatokeng a Yosep etereku kotere Yosep, nakaneni toliwor apakeng itamanari ngakiro nguna. Akolongit apei aloose talokaatokeng a Yosep akiyok ngibaren a apakech alo diyete Chekem. Tolimok Yakobo Yosep tama, “Iyeni iyong atamar iyokiyete talokaatokon ngibaren kaama alo Chekem. Nakaneni asaki ayong amear iyong ni eyakasi kesi.” Tatachak Yosep tama, “Anyou ayong.” Tolimok apakeng tama, “Kape taanyu talokaatokon ka ngibaren keyakasi niajokon sodi tobongu kitolimok ngakiro kech.” Sodi tomea Yakobo Yosep anadipo a Eburon. Torotok Yosep tanang Chekem. Toriam itwaan iche ngesi irimit ngachara kingit tama, “Nyoni isaki iyong?” Tatachak ngesi tama, “Asaki ayong talokaatokang. Tolimokinae kare ni iyokiyete kesi ngibaren.” Tolimok itwaan ngini ngesi tama, “Ayeni ayong atamar kewoto kesi, kainyo eirari ayong kesi ebalasi kilosi Dosan.” Sodi kiwap Yosep talokaatokeng torukau alo Dosan. Ani eanyungarete talokaatokeng ngesi ebunit anikalonan, totuko kesi akiar ngesi. Tolimokin make tamasi, “Abu ekerujan. Kimiekisi ataara sodi atachakakisi nadui adio. Ani erumor atamasi anyam ngesi etiengit a moding. Sodi ataanyungasi chene atamar ikokinete ngakiro a akirujare keng ai!” Ani iirari Reuben ngakiro nguna, tasak ayuun Yosep nyear. Tolimok kesi tama, “Nyiiar kare. Nyikibuko ngaakot. Echamit kichakakini ngesi nadui naga kane anariet, nakaneni nyikiwan.” Esuruori ngesi kesi kongina kainyo asaki ayuun Yosep nyear, sodi ani ekisidi tobua ni ayei apakeng. Ani enangi Yosep ni ayakasi talokaatokeng, talachasi kesi eworu keng lokooyen, lo awoyak ngakan. Ani erumor kirumut ngesi tachakakis nadui. Nakaneni amam ngakipi ayakasi nadui ngina. Ani iboikinosi kesi akimuj, taanyungasi alotoru a Ngichimael eponito alo Gilead eloose Misiri. Ewokito ngikaala kech ngikito lu itukukunyete akimuj ka ngikito lukaakunyok lu iwasae. Sodi tolimok Yuda talokaatokeng tama, “Nyoni ibore ajokon kianyuni ngoni erai kiar lokaatoyok sodi emunono ngakiro a akitu keng? Kimiekisi atogielakisi Ngichimael lugu, nakaneni nyikiwan ngoni ngesi kainyo erai lokaatoyok, erai akiring a akwaan keng apei ka nayok.” Tachamut talokaatokeng ngakiro na alimuni ngesi. Ani enangunete ngimuchurus a akwap a Midian neni, kiriut talokaatokeng a Yosep ngesi anadui togielakis Ngichimael a ngaropiyae a ngatomwon-arei. Torikosi Ngichimael Yosep Misiri. Ani ebongori Reuben nadui torukau Yosep emam anadui, tochilichili ngiworui keng, kialolong. Tolot ni ayakasi talokaatokeng tolimok tama, “Emam edia anadui! Aliwae tokona alosi ayong?” Sodi taara kesi akine, tolemut eworu lokooyen a Yosep kilumokis naakot a akine kangina. Ani erumor yaasi kesi eworu lokooyen ngolo, lo aoyak ngakan, yaasi nika apakech, tolimokis tamasi, “Kirapuni sua eworu logo. Toyen chene kerai loa lokookon kori meere.” Toyen apakech eworu ngolo tama, “Erai eka lokookang! Kear ngesi etiengit a moding kenyam. Iteni dir, kenyilinyilaar Yosep.” Sodi tochilichili Yakobo ngiworui keng ani ealolongio, tanap egunia anaabor. Kigor ngesi kotere lokookeng a ngirwa alukaalak. Pot talokookeng ka tanakookeng nikeng esakete akisililing ngesi, nakaneni tonger ngesi akisililingo ebala, “Kimiekinae, alosi ayong ni eyei lokookang alokatoak egoro.” Sodi torubak ngesi igoro kotere lokookeng Yosep. Ngirwa lupei ngulu, togielasi Ngimidian Yosep alo Misiri togielakis itwaan ipei anyaritae Potipa. Arai Potipa epei a ngikapolok alu apolokinit Parao, arai ngesi ekarikon a ngasigerea ana eyokiyete akwap. Ngirwa lupei ngulu, torotok Yuda ani ayakasi talokaatokeng sodi tolot kibooyoto ka itwaan anyaritae Ira. Anyaritae ere a itwaan kangini Adulam. Na ayakar Yuda inaa, kiriamun ka apese a akwap a Kanaan na arai nakookeng a itwaan anyaritae Chua. Kuut ngesi apese ngina, sodi kidou ikoku nisapat tolimok Yuda ekiro be Eri. Topoti nabo ngesi kidou ikoku nisapat sodi tolimok ekiro be Onan. Ani erumor topoti nabo sodi kidou ikoku nisapat, tolimok ekiro be Chela. Ayei Yuda Kesibu na edounere Chela. Kisuuta Yuda lokookeng lo ekingaren anyaritae Eri, kisuuta aberu na anyaritae Tamar. Nakaneni ani kona aronia Eri lo arai lokookeng a Yuda loapolon, taar Ekapolon Akuj ngesi. Tolimok Yuda Onan tama, “Toliwor ekeruman a aberu a lokaatokon alokasian, kainyo ejoikinit iyong ikokini neni, sodi touriu ngide a lokaatokon.” Nakaneni ani kona ayenea Onan atamar nyeliworosi ngide lu idounio ngikeng, toliwor na eperioto ka Tamar, talangak nalup ani peasakea auriun ngide lu eliworosi ngika lokaatokeng. Toronikis Ekapolon Akuj ngakiro nguna, taar Onan. Tolimok Yuda Tamar na arai aberu a lokookeng tama, “Tobongo nawi a apakon kiboi irai apuserut tanang ngirwa lu epolounio lokookang Chela.” Alimuni ngesi kongina kainyo aemit abala kori edikino Chela dang etoani loger a talokaatokeng. Sodi tobongo Tamar nawi a apakeng. Adaunet a ngirwa a ngiche, totoan aberu a Yuda na arai nakookeng a Chua. Ani adaunet a ngirwa alu egoror Yuda, tonyout ka lopae keng anyaritae Ira, loa ere anyaritae Adulam. Toloto Timuna ni ayakasi ngitunga lu etubete ngajul a ngamesekin a Yuda. Ani iirari Tamar atamar elosi apaakeng alorot eteni Timuna akitub ngajul a ngamesekin keng, talacha ngesi ngiboro keng lu eraakar apuserut, sodi kimuk ereet a awaru nyeeyenere. Ani erumor tolot kiboikin lokidor a ere enyaritae Enaim, alo ayei lorot lo etenere Timuna. Asubi Tamar kongina kainyo engolikini atamar apolou Chela, nakaneni awoun akitiliwor ngesi aberu a Chela. Ani erukauni Yuda ngesi kaneni, tama kori erai amalaat kainyo emukit ereet keng. Sodi tolot ngesi ni ayei Tamar alokwaas a erot tolimok atamar asaki atopero ka ngesi. Peayeni Yuda atamar erai ngesi aberu a lokookeng. Kingit tama, “Nyoni kiinakini iyong ayong kacham?” Tatachak Yuda tama, “Karikokini ayong iyong ikale nikile anaanei kang.” Tolimok Tamar ngesi tama, “Nakinae ayong ibore ni idodiuni atamar kirikokini iyong ayong ikale nikile ngini.” Kingit Yuda ngesi tama, “Nyoni isaki iyong kainaki ayong iyong?” Tatachak Tamar tama, “Ekababaat kon, ka auno, ta aburo na itingit iyong anakan.” Sodi nak Yuda ngesi ngiboro ngulu daang topero ka ngesi. Topoti Tamar. Ani erumor, tonyou Tamar tolot nawi. Talacha awaru na emukitor ngesi ereet, sodi tanap nabo ngiboro lu araakar ngesi apuserut. Ani emeari Yuda lopae keng lo anyaritae Ira, loa ere alo anyaritae Adulam ebala inaa Tamar ikale nikile sodi tobuu ngiboro lukolong aisikinea ngesi aberu ngina idodiunitere atamar eyauni ngesi ikale nikile, tongop Tamar. Sodi kingit ngesi ngitunga a akwap kangina tama, “Nyaani amalaat nakolong ebooyi alokwaas a erot alo a Enaim?” Tatachakis ngitunga ngesi tamasi, “Emam amalaat ayei nege.” Sodi tobongo lopae keng a Yuda ngolo kisisak ngesi atamar kangopiki aberu ngina, nabo ebalasi ngitunga a akwap kangina emam amalaat eyei inaa. Tolim Yuda tama, “Kimiekisi toting ngiboro ngulu tarata ngikeng sodi nyikikianare. Ingolik cha iyong dang eger lo ainaritor ayong ngesi ikale nikile en nakaneni kitongopik ngesi iyong.” Ani adaunet a ngilapio a nguuni, tolimok itwaan iche Yuda atamar kebu aberu a lokookeng toliwor amalaat, nakaneni epoti. Sodi tolim Yuda tama, “Kipudutu kinomae!” Ani eringa ngesi ipudunitoe, tomea itwaan ni ayei apakeng a lokile keng tama, “Itwaan nia ngiboro kalu ngesi kaurikini ayong. Nakaneni kemaimai iyong atamar toyen itwaan nia ekababaat kalo, ka auno, ta aburo naga.” Tacham Yuda atamar eraakasi ngiboro ngulu ngikeng. Tolim tama, “Etenoono naga noi kedwangit ayong kainyo nyipotoro ayong ngesi ainak Chela atama kirum toliwor aberu keng.” Napei kwaar ngina jik, nyepero nabo Yuda ka Tamar. Ani enangi ngirwa lu idounio Tamar, toyenae atamar idouni ngesi ngide lumuu. Ani na ariabar ngesi esaki akidoun, kipud ikoku ipei akan nikalapatan. Toinik aberu na esidouni Tamar nyiuno niarengan nakan a ikoku kangini, ebala, “En ngesi edounio ekingaren.” Nakaneni ani ebuari ikoku ngini akan tooma, kingareniu lokaatokeng. Tolim aberu na esidouni Tamar tama, “Ikwa ijukun iyong loger logo a?” Kotere ngakiro nguna tolimok ngesi ekiro be Peres. Ani ekisidi kidounoe lokaatokeng lo ainikina nyiuno niarengan nakan. Tolimokinae ekiro kangolo Sera. Ani enangi Yosep Misiri, togiel itwaan a akwap a Misiri anyaritae Potipa ngesi. Arai itwaan ngini ekapolon a ngasigerea ana eyokiyete akwap a ekapolon anyaritae Parao. Agielunio Yosep ani a Ngichimael alu arikunete ngesi Misiri. Nakaneni arukito Yosep ka Ekapolon Akuj sodi topia ngesi noi. Kiboi Yosep anawi a ekapolon keng, alo a akwap a Misiri. Toyen ekapolon keng atamar arukito Ekapolon Akuj ka Yosep nabo ngesi apiarit ibore daang ni asubi Yosep. Sodi tominak Potipa Yosep, kitiliwo ekasuban etich keng a elope. Kitiliwo Potipa Yosep ngesi epolokinit awi keng ka ibore keng daang. Napei alorwa alu etiliworea Potipa Yosep ekapolon a awi keng ka ibore keng daang, topia Ekapolon Akuj awi a itwaan ani a Misiri kangini kotere Yosep. Topia Akuj ibore keng daang anawi ka namanat. Kotere ngakiro nguna, kimiekinea Potipa Yosep ngakiro daang ka ibore keng daang toliwor ngesi iyoki. Toliwor Potipa nyemisit ngakiro a ibore a iche, mati akimuj na anyami ngesi. Arai Yosep edia lokebusean tojok akwaan. Sodi ani ekisidi tasak aberu a Potipa atamar atopero ka Yosep abu tolimok ngesi atamar atopero. Nakaneni towou Yosep. Tolimok ngesi aberu a ekapolon keng tama, “Kingolik a, nyemisit ekapolon kang ngakiro a ibore a iche kanege anawi ani ayakar ayong nege. Ketiliwo ngesi ayong ekapolon a ibore keng kadaang. Emam itwaan iche epolot anawi kana akidwang ayong. Nabo emam ibore ketengerit ngesi ayong, mati iyong na irai aberu keng. Ekokini tokona ayong asubi akisech naaronon noi naga atosechak Akuj ai?” Arubakinit aberu ngina imaimai Yosep ngirwa daang, nakaneni towou Yosep akiper ka ngesi kori akiruor ka ngesi. Nakaneni ani akolongit apei, na alomarea Yosep kai akisub etich keng loger lopalem, tamam ngikasubak etich luche alokai, toruakin aberu a Potipa eworu keng lo anikalapatan esaki atamar atopero ka Yosep. Nakaneni tamatar Yosep nikalapatan kimiek eworu keng anakan a aberu a Potipa. Ani ingolikini aberu ngina atamar emiek Yosep eworu anakan keng amatar nikalapatan, tanyarau ngikasubak etich a awi keng tolimok tama, “Kingolikisi a, kiinun ngoni Eburaniait logo abu arasit ngoni. Abunit ngesi atikoonor ayong sodi erema ayong lokojokon. Ani iirari ngesi ayong eremari, toisik eworu keng ani ayei ayong tamatar nikalapatan.” Sodi kikachak aberu ngina eworu ngolo tanang ebonguni ekile keng nawi. Kisisak ngesi lokile keng ngakiro nguna tama, “Asaki ekasuban etich lo erai Eburaniait lokolong irikuni iyong nege lo akirat ayong. Nakaneni ani napei eremarea ayong, toisik ngesi eworu keng ani ayei ayong sodi tamatar nikalapatan.” Ani iirari ekapolon a Yosep ngakiro a aberu keng na ebala, “Ngakiro na ikote nguna kesi kasubea ayong ekasuban etich kon,” tongo Potipa noi. Tolim Potipa atamar yaarae Yosep toinikinae nipalem eananakinio ngitunga a ekapolon lu eeneeneo. Kiboi Yosep kaneni. Nakaneni arukito Ekapolon Akuj ka Yosep topia ngesi, sodi tominak ekapolon a ejela Yosep. Kitiliwo ekapolon a ejela Yosep ekapolon a ngitunga kadaang alu aenitae alojela. Toliwor nyekachit ekapolon a ejela ngakiro a ibore kadaang ani apolokinit Yosep, kainyo arukito Ekapolon Akuj ka Yosep topia ibore daang ni asubi ngesi. Ani adaunet a ngirwa a ngiche, abu itwaan ni apolokinit emuna lo epuritoe a Parao, alo erai ekapolon a akwap a Misiri, ka itwaan ni apolokinit akipore ngamugati a ekapolon kangolo, tosechakis ekapolon kech. Sodi tongoik Parao ngikapolok luarei ngulu, lu araakasi ekapolon a emuna alo epuritoe ka ekapolon a ngamugati. Toinik ngesi kesi lojela lo ainikinitae Yosep, arai neni akai a ekapolon alo a ngasigerea ana eyokiyete Parao. Toseu ekapolon a ngasigerea Yosep toliwor ngesi ingarakinit kesi. Kibooyoto kesi alojela ngirwa lukaalak. Ani nakwaare a akolongit a apei alotooma ejela, apot ngitunga luarei ngulu kirujata, ekapolon a emuna alo epuritoe ka ekapolon lokepon ngamugati. Kiruja ipei kech daang nakaneni agelagela eger a ngakiro ana erujaate kesi. Ani elosi Yosep aanyun kesi nataparach, torukau kesi ialolongete. Sodi kingit Yosep kesi tama, “Nyo ialolongioto esi akolongit naga?” Tatachakis kesi ngesi tamasi, “Kirujae sua daang, nakaneni emam itwaan epedori akisisaun eger a ngakiro ana kirujae sua.” Tolimok Yosep kesi tama, “Akuj ngesi eyei agogongu na itenunere ngakiro na irujao. Tolimokinae chene ayong ngakiro na irujaate esi.” Kisisak ekapolon a emuna alo epuritoe Yosep ngakiro na erujae ngesi ebala, “Anakirujare ana erujae ayong, engolikini emusabib alongaren kang. Ayakasi ngaten ngauni lomusabib ngolo. Ani napei arupuneta ngakui, toturout ngatur, sodi tokoko ngamusabib. Atingit ayong ekopo a Parao a akan, sodi atolem ayong amusabib, atochik lokopo ngolo, aina Parao, sodi kidiau Parao.” Tolimok Yosep ekasuban etich ngolo tama, “Eger a ngakiro ana irujae iyong ngesi logo, eraakasi ngaten nauni ngirwa nguuni. Ani adaunet a ngirwa a nguuni, kipuduni iyong Parao alojela sodi kitobuak lotich lopalem kon. Iliwor iyong iinanari Parao ekopo loger lokolong sek iinanakinea na iraakar itwaan ni ipolokinit emuna lo epuritoe. Nakaneni ani ianyuni ngakiro naajokak nguna, kemaimai iyong atamar tolimok kare Parao ngakiro kang, kingarak atopud kane alojela. Kainyo kakokounio kolong ayong anakwap a Ngieburaniae. Ani tani kane alo Misiri, emam ibore ni asechit ayong nikaenitere alojela.” Ani ingolikini itwaan ni apolokinit ngamugati atamar ejokak ngakiro na etenun nguna, tolimok Yosep tama, “Erujae ayong dang! Erujae ayong ewokit ngakikapea ngauni a ngamugati a akou. Tooma akikap na ayei kidiama, ayakasi ngamugati ngagelagelae naajokak na araakasi ngaka Parao. Nakaneni anyamete ngikieny ngamuja nguna!” Tolimok Yosep ngesi tama, “Eger a akirujare ana irujae iyong ngesi logo. Eraakasi ngakikapea nauni ngirwa nguuni. Adaunet a ngirwa a nguuni, etubori Parao akou kon, kinenek iyong lokitoe, sodi tanyama ngikieny akiring kon.” Ani enangi akolongit na a ngauni na etamunitere akwaar nakolong edounere Parao, sodi ngesi atamar kidorokinoe akimuj nakaalan kotere ngikasubak etich keng daang. Talachak ngesi alojela itwaan ni apolokinit emuna keng lo epuritoe, ta itwaan ni apolokinit ngamugati, torikunoe ngaren ngikasubak etich keng. Tobuak ngesi lo apolokinit emuna lo epuritoe lotich keng, toliwor einanakini Parao ekopo. Nakaneni kinenek ngesi lo apolokinit ngamugati lokitoe, loger lo etenikinea Yosep kesi ngakiro na erujaate. Nakaneni nyitamuna itwaan ni apolokinit emuna lo epuritoe ngakiro a Yosep apot kimuriakis jik. Ani adaunet a ngikaru a ngiarei, kiruja Parao niti ewei alokwaas a angolol ana enyaritae Nili. Ani eyei neni kingolik ngaatuk ngakan-kaarei naajokak totumito edokunete anangolol sodi tolomakis adaka nginyia kaneni. Todokut nabo ngaatuk ngache ngakan-kaarei anangolol naaronok kikarite. Pot kesi towaa alo diyete naajokak totumito na ayakasi lokwaas a angolol. Tanyama ngaatuk naaronok kikarite ngaatuk nache nakan-kaarei naajokak totumito. Tokienyu Parao. Ani nabo ejotoor, kiruja na a ngaarei. Taanyunga ngakies a ngimomwa ngakan-kaarei naapolok nabo tojokak erupunito anakasirimait a apei. Toruput nabo ngakies a ngimomwa ngache ngakan-kaarei na ejutarit kitowoniyorite ekuwan lokariran a ariet. Kilikosi ngakies a ngimomwa nakan-kaarei na ejutarit nache nakan-kaarei naapolok tojokak. Ani ekienyuni Parao, toyen atamar erujae ngesi. Ani iwalari, kialolong Parao. Tolim ngesi atamar tanyaraunae ngimurok daang ka ngitunga lukoosok daang eyakasi Misiri. Kisisak ngesi kesi ngakiro na erujae ngesi, nakaneni emam tani ipei ni abu kitenik ngesi eger a ngakiro ana erujae ngesi. Itwaan ni apolokinit emuna lo epuritoe, abu tolimok Parao tama, “Etam ayong tokona ngakiro na asechit ayong! Ngirwa lukolong kitongoitor sua ngikasubak etich kon iyong, kitoinik iyong ayong ka itwaan ni apolokinit ngamugati lojela alokai a ekapolon a ngasigerea, kipot sua erujata akolongit apei nakwaare, kiruja ipei kosi daang ngakiro nagelayek. Kirukit sua ka edia lo arai Eburaniait, arai ngesi ekasuban etich a ekapolon a ngasigerea. Ani kisisakini sua ngesi ngakiro nakirujae, kitenik ngesi ipei kosi daang ngakiro nguna itemem ka ngakiro na erujae ngesi. Tosubakin ngakiro nguna loger lo etenunitor ngesi. Kitobuak iyong ayong lotich kang, sodi kinenek ekapolon a ngamugati lokitoe.” Tolim Parao atamar torikunoe Yosep. Torikunoe ngesi alojela atipei, ani kebany ngitim kiloch ngiworui torumor, bu ngesi nia Parao. Tolimok Parao Yosep tama, “Eruja ayong nakaneni emam itwaan ketenikini eger a ngakiro kanguna. Eira ayong atamar ipedori iyong akitenun eger a ngakiro ana irujao erai kisisakin.” Tatachak Yosep Parao tama, “Meere ayong eyei agogongu ngina, nakaneni kiinakini Akuj iyong akiroit naajokon.” Sodi tolimok Parao Yosep tama, “Erujae ayong awei alokipetet a angolol enyaritae Nili. Engolik ayong ngaatuk ngakan-kaarei naajokak totumito edokunete anangolol sodi tolomakis adaka nginyia kaneni. Todokut nabo ngaatuk ngache ngakan-kaarei na ejiwaikinit. Aroko kesi ekarit noi, nabo nyeanyungara ayong ngaatuk na ikarit loger ngolo alowae a eche alo Misiri. Ngaatuk naaronok a erogo, apot tanyama ngaatuk naatumak. Nakaneni ani tani kenyam nache kerumor, kemam itwaan epedori akiyen atamar enyamito ngaatuk nache, kainyo aringa eroko ikote nisek a ekingaren. Sodi atokienyu ayong. Ani nabo anakirujare a ache, engolik ngakies a ngimomwa ngakan-kaarei naapolok nabo tojokak erupunito anakasirimait a apei. Toruput nabo ngakies a ngimomwa ngache ngakan-kaarei naaronok na ejutarit kitowoniyorite ekuwam lokariran a ariet. Apot ngakies a ngimomwa nakan-kaarei naaronok kilikosi naajokak. Esisak ayong ngimurok nakaneni emam itwaan apedori akitenun.” Sodi tolimok Yosep Parao tama, “Ngakiro naarei irujae iyong nguna, erai eger kech epei. Kidodik iyong Akuj ngakiro na edikino ngesi esubakini. Eraakasi ngaatuk naajokak nakan-kaarei ngikaru ngikan-kaarei, nabo eraakasi ngakes a ngimomwa nakan-kaarei naajokak ngikaru ngikan-kaarei. Eraakasi ngakiro na irujae iyong ngapei. Ngaatuk nakan-kaarei naaronok kikarite na atupuunete nache, eraakasi ngikaru a eron ngikan-kaarei. Ani ngakies a ngimomwa nakan-kaarei ejutarit kitowoniyorite ekuwam loa akamu a ariet, eraakasi nabo ngikaru a eron a akoro ngikan-kaarei. Tokona bocha Parao, ikote nguna eger lota kalimokinitor atamar kidodik iyong Akuj ngakiro na edikino esubakini. Epete ngikaru ngikan-kaarei a akimwonut nakwap daang a Misiri. Nakaneni isidiunosi ngikaru ngikan-kaarei a eron a akoro sodi kimuriakis ngitunga tani ngakiro a akimwonut kangina. Inyasuni eron a akoro kangina akwap naga. Imuriakinete ngitunga ngakiro a akimwonut kangina kainyo eroner noi akoro na isidiun. Idodiunit ibore ni irujae iyong ngakirujaet ngaarei atamar Akuj ngesi atiaku ngakiro na edikino esubakini. “Ejoikinit tokona iyong Parao iseuni itwaan nikachwaan toos, sodi kitiliwo ngesi eweikinit ngakiro a akwap kadaang a Misiri. Ejoikinit nabo iyong iseuni ngikapolok ngiche kane anakwap lu ilimokini iyong atamar kidiatut alemunet apei anakan a ngalemet kadaang a akwap a Misiri a ngikaru alukan-kaarei a akimwonut. Todungok iyong kesi atamar kidiatut akimuj daang a ngikaru alukan-kaarei eminio akimwonut nakwap. Tolimok iyong kesi atamar kidiatut akimuj alorerea kadaang sodi kiyoko akimuj ngina. Eliwor akimuj ngina na itegeliaritae idaritere eron, toyuunere akwap naga sodi nyeemunyar ngitunga kotere akoro ngina isidiun.” Tojoikis Parao ka ngikasubak etich keng daang ngakiro nguna. Sodi kingit Parao ngikasubak etich keng tama, “Aliwae kianyunea itwaan iche ni ikoni en, ni eyei Etau a Akuj?” Ani erumor tolimok Parao Yosep tama, “Ani kona kidodikinea iyong Akuj ngakiro nugu daang, emam iche nikachoan toos loger kon. Iyong ngesi iweikini akwap kang, nakaneni iwapete ngitunga daang ngakiro na idunguni iyong. Ani alowae a apolou, ayong bon kengareni iyong.” Tolimok Parao Yosep tama, “Napei tokona jik, kaseu ayong iyong toliwor ekapolon anakwap kadaang a Misiri!” Tobut Parao ekababaat lo ayei emachar keng alokimoin, tobutok lokimoin a Yosep. Kitanap ngiworui lukaanikak ajokak, kitanap nabo erikot lo egolit alomosiring. Kitome Parao Yosep aurukuk keng na a ngaarei na irito ngangolei. Kingarenikis ngasigerea na iremasi ebalasi, “Toriediko! Toriediko!” Sodi kitiliwo Parao Yosep lo epolokinit akwap a Misiri daang. Ani eyakasi nguna daang, tolimok Parao Yosep tama, “Adungunit ayong Parao atamar, emam itwaan tani ipei anakwap kadaang a Misiri ni ikeuni akan kori akeju eringa iyong nyechamakina.” Tolimok Parao Yosep ekiro a akwap a Misiri lo anyaritae Sapenas-panea. Kisuut ngesi Asenas na arai nakookeng a Potipera alo arai emuron a akuj anasubuna a ere alo enyaritae Eliopolis, toliwor aberu keng. Sodi kirim Yosep akwap daang a Misiri. Araakasi ngikaru a Yosep ngitomwon-uni na esiakinea akisub etich a Parao. Torotok Yosep ani ayei Parao tolot kirim ngiwaitin daang a akwap a Misiri. Tokoniut ngamanat a akwap a Misiri akimuj nakaalan noi a ngikaru alukan-kaarei a akimwonut. Kidiatu Yosep akimuj daang alorerea kadaang a Misiri, a ngikaru alukan-kaarei a akimwonut. Alore kadaang, kidiatak ngesi akimuj na alemio anamanat ana ayakasi diyete ere ngolo. Kidiatak Yosep akimuj nakaalan noi, na elal noi etia asinyen na anam, tongop tani kona itemio. Ani eringa ngikaru lua akoro nyisiakina, touriu Yosep ngide lusapa ngiarei ani ayei Asenas na arai nakookeng a Potipera, alo arai emuron a akuj anasubuna a ere alo enyaritae Eliopolis. Tolimok Yosep lokookeng lo ekingaren ekiro be Manase, ebala, “Kesimuriak ayong Akuj ngichan kang daang ka ngitunga a awi a apakang daang.” Sodi tolimok ngesi lokookeng loa ngiarei ekiro be Epiraim ebala, “Kainaki ayong Akuj ikoku anakwap ana kaboliare.” Tadaunos ngikaru lukan-kaarei a akimwonut anakwap a Misiri. Kisiakis ngikaru lukan-kaarei a eron a akoro, loger losek alimunitor Yosep. Min eron a akoro nakwapea nache daang, nakaneni ayei akimuj lowaitin daang a akwap a Misiri. Ani enyami ngitunga a Misiri akoro, kikaloikis Parao ebalasi kisaki akimuj. Nakaneni tolimok Parao kesi tama, “Kapesi nia Yosep tosuba ngakiro nakilimokini ngesi esi.” Toroner akoro tokeikin akwap wadaang. Sodi tangaa Yosep ngikerui daang, kitogiel ngitunga a Misiri akimuj. Pot tani ngitunga a ngakwapea anache Misiri ni ayei Yosep akigiel akimuj kainyo abu akoro toroner anakwapea kadaang. Ani iirari Yakobo atamar eyei akimuj nakwap a Misiri, tolimok talokookeng tama, “Nyo ibooyoto esi ikienyanakinotor? Eira ayong atamar eyei akimuj Misiri. Kapesi togiela akimuj kaina nyikimunya akoro.” Sodi toloto talokaatokeng a Yosep ngitomon akigiel akimuj alo Misiri. Nakaneni kiratak Yakobo Benjamen, lo edounitoe ka Yosep anakook a apei nyiirukosi ka talokaatokeng. Akerit ngesi atamar epedori Benjamen aanyun ka ngakiro naaronok. Sodi tananga talokookeng a Yakobo Misiri erukito ka ngikagielak luche, kainyo ayei eron a akoro tani nakwap a Kanaan. Ngirwa ngulu arai Yosep ekapolon anakwap a Misiri. Arai ngesi aweikinit akimuj na agielete ngitunga. Pot talokaatokeng a Yosep toriediko alongaren keng, tatapa ngireetin ngalup. Toyen Yosep talokaatokeng na engolikinea, nakaneni kitusubun nyeyeni kesi, kisuruor kesi elemarit. Kingit kesi tama, “Aliwae iponitotor esi?” Tatachakis tamasi, “Kiponit alo Kanaan, kiponit akigiel akimuj.” Toyen Yosep talokaatokeng, nakaneni nyeyena kesi ngesi. Kitam ngesi ngakiro nakolong erujae kotere kesi sodi tama, “Iraakasi esi ngirototin iponito akireb akwap kosi toyena ni iboi kongin.” Tatachakis kesi ngesi tamasi, “Meere kongina ekapolon kosi. Kiponit sua ngikasubak etich kon akigiel akimuj. Kirai sua talokookeng a ekile a epei, meere sua ngirototin.” Tolimok Yosep kesi tama, “Meere kongina! Iponito esi nege akireb akwap toyena ni iboi kongin.” Tolimut kesi tamasi, “Kirai sua ngikasubak etich kon, ngikaitotoi ngitomon ka ngiarei, nabo kirai talokookeng a ekile a epei alo elomit Kanaan. Idongit lokaatokosi loochi ka apakosi nawi, nakaneni atoana kolong lokaatokosi epei.” Tolimok Yosep kesi tama, “Ikote nguna eger lotete kalimokinitor, iraakasi esi ngirototin. Kiroyo esi a eger kalo: Ekongi ayong a ekiro a Parao atamar nyirotokinete esi kane mati kebu lokaatokus loochi. Tomeasi epei kus min toriku lokaatokus loochi, kitoinikin esi lojela kidarut kaneni. Eger ngolo ngesi eyenere keraakasi ngakiro kus ngaka iteni dir. Ani pekikokis neni, ekongi ayong a ekiro a Parao atamar iraakasi esi ngirototin.” Sodi toinik ngesi kesi lojela a ngirwa a nguuni. Tolimok Yosep kesi akolongit na a ngauni tama, “Kona araakar ayong itwaan ni akerit Akuj, kikokisi nege sodi toyareta, ani kiraakasi esi dir ngitunga lu iteniyete, kimiekisi epei kus kidong lojela sodi yaasi luche akimuj ni eyakasi ngiyenet kus lu enyamit akoro. Ani erumor torikut lokaatokus loochi ni ayei ayong. Idodiuni ibore ngini atamar eraakasi ngakiro kus ngaka iteni dir, nakaneni nyikiario esi.” Sodi tachamut kesi akikokin neni. Ani erumor tolimonokin kesi make ebalasi, “Kisechakini kolong ngoni dir lokaatoyok. Kitee ngoni atamar ealolongi ngesi noi. Ani tani nakimaimaea ngesi ngoni, kipot ngoni nyikimisik ngakiro keng. Ngakiro nguna kesi kianyunitor ngoni ngichan lugu daang.” Tatachak Reuben kesi tama, “Kalimokinit kolong ayong esi atamar nyikisubea idia ngakiro naaronok, nakaneni towout esi akiirar ngakiro kang. Kianyunit tokona ngoni ngichan kotere ni atoanea ngesi.” Peayenete kesi atamar epupi Yosep ngakiro na eruorosi kesi kainyo ayei itwaan ni ekobi ngakiro na eruorotor kesi ka Yosep. Tachadar Yosep ani ayakasi kesi kikalou. Ani kililing kerumor, tobongu akisurour kesi. Toseu ngesi Simeon, toen iteete luche. Todung Yosep atamar kilelebae ngichuei kech akimuj. Ani erumor kinyiakakinae ngaropiyae a itwaan kadaang lochue keng, ka ainakin kesi akimuj na enyamete alorot. Tosubere kesi ngakiro nguna daang. Kidokokis kesi ngamuja kech losikiria, torotokis. Ani enangete ni aperete alorot, tangaa epei kech echue keng esaki akisumuj esikiria keng, sodi torukau ngaropiyae eyakasi nakituk a echue. Tolimok ngesi talokaatokeng tama, “Enyakun ngaropiyae kang. Nyenu eyakasi nakituk a echue!” Ani iirarete ngakiro nguna, tosuros ngitai. Tokienyanakinos emaranete, kingitas ebalasi, “Anukiro nugu kisubea ngoni Akuj?” Ani enangete nakwap a Kanaan ni ayei awi a apakech Yakobo, kisisakis ngesi ngakiro daang na asubakinosi, tamasi, “Kisuruori sua ekapolon a akwap kangina elemarit, sodi tama kori kirai sua ngirototin kirebi akwap keng. Nakaneni atolimokisi sua ngesi atamar kirai sua lu kitenooko, meere ngirototin. Esisakisi sua ngesi atamar kirai sua ngikaitotoi ngitomon ka ngiarei lu kiuriunit ekile epei. Esisakisi nabo atamar atoana kolong lokaatokosi epei, nakaneni eyei loochi Kanaan erukito ka apakosi anawi. Sodi kitolimok sua ekapolon ngolo tama, ‘Ekokini ayong ayeni dir kiraakasi esi ngitunga lu itenooko nege, kimiekinere ayong lokaatokus epei, yaasi luche akimuj ni eyakasi ngiyenet kus lu enyamit akoro anawi. Ani erumor torikut lokaatokus loochi ni ayei ayong, sodi atoyen ayong atamar nyiraakasi esi ngirototin, nakaneni iraakasi ngitunga lu itenooko. Ani kikokis esi neni, alachakini ayong lokaatokus, kitachamakin esi iliworosi ngimuchurus anakwap kana.’ ” Ani ebukete kesi ngichuei kech, tatalasi kesi ngakiro na arukauneta ngitokolei a ngaropiyae kech alochuei a akimuj kech. Ani eanyungarete ngaropiyae, toema kesi daang ka apakech aapei. Tolimok apakech Yakobo kesi tama, “Abe isakete esi amunyar ngide kang daang! Emam Yosep tamam Simeon, tasakete tokona esi arikor Benjamen. Ayong bon ngesi aanyunit ngichan.” Sodi tolimok Reuben apakeng tama, “Ani pekabuu ayong Benjamen, taar talokookang luarei. Nakinae ayong Benjamen sodi eyok ayong ngesi atobuu ni iyei iyong.” Nakaneni tatachak apakeng ngesi tama, “Nyirukorete lokookang ka esi, atoani kolong lokaatokeng nakaneni ngesi bon idongit. Ani keanyu ngesi dang naaronok analotoru ana isakete esi alosit, kaarete ayong ngakiro nakesialolongete arai ekasukout lomojong kona.” Toroner akoro noi anakwap a Kanaan. Ani adaunet a akimuj ana kolong agielunete kesi alo Misiri, tolimok Yakobo talokookeng tama, “Tobongosi Misiri kitogielakis akimuj nadiochichi.” Nakaneni tolimok Yuda apakeng tama, “Kichikichiki kolong sua itwaan ngini elemarit ebala, ‘Nyikianyungarete esi ayong erai pekirukut ka lokaatokus loochi.’ Ani kichamak iyong lokaatokosi erukosi ka sua, kilosi sua atogiela akimuj. Nakaneni ani pekichamak iyong ngesi kirukori ka sua, nyikilosi sua inaa kainyo kilimokini kolong itwaan ngini sua ngakiro na ilereete ebala, ‘Nyikianyungarete esi ayong nabo mati kirukut ka lokaatokus loochi.’ ” Tolim Yakobo tama, “Nyoni kitaanyuneta esi ayong ngichan kona, ani ilimokineta itwaan ngini atamar eyei esi lokaatokus eche?” Tatachakis tamasi, “Kingitanari itwaan ngini sua ngakiro a ngitunga a awi yok lokojokon. Kingit ngesi sua tama, ‘Abala ayong esi a, eringa apakus eyari a? Abala ayong esi a, eyei esi lokaatokus eche a?’ Sodi atatacha sua ngakiro nakingisit ngesi sua. Ekoe, adikino sua kiyeni kwaai atamar kilimokini ngesi sua tama, ‘Torikutu lokaatokus?’ ” Tolimok Yuda apakeng Yakobo tama, “Tachamakinae ayong kirukori ka ngesi sodi atorotokisi atipei, atoloto atogiela akimuj, sodi nyikimunya sua akoro ka iyong aapei, ta ngide kosi. Aliwor ayong ekaweikinan keng, kimichae iyong ayong. Ani pekabuu ayong ngesi taanyunga iyong a ngakonyen kon a ilope, tapaikinae ayong ngakiro keng jik. Arai kolong nyikimamak kane, kilosit kolong ka abongun na a ngaarei.” Sodi tolimok apakech Yakobo kesi tama, “Ani kikote ngakiro neni, yaasi robo ageor ka ngiboro luajokak a akwap yok inasi ekapolon ngolo ebachit. Inasi ngesi ekitoe lokaakunyon lo iwasae lodiochichi, ka akimiet a ao nadiochichi, ka ekitoe lo itukukunyi akimuj lodiochichi, ta ageor na ikwaan ka ngakalalio ka na ikwaan ka engoomo. Yaasi ngaropiyae ngatiaket ngaarei, kainyo ejoikinit inyiakarete ngaropiyae nakolong ewaakinio lochuei kus, ejok kolong kiwaakinitetei neni emam itwaan esaki akiwaakin. Torikosi tani lokaatokus toloto ni eyei itwaan ngini. Kimiekisi Akuj Naationon kisieni esi ani eyei itwaan ngini sodi talachak ngesi lokaatokus loche, ta Benjamen. Ani eliwor ayong, ani kejoikinit ngide kang daang edaunosi, kimiekisi tadaunos!” Sodi yaasi kesi ebachit ngolo, yaasi ngaropiyae nakaalak na idwangito nakolong a ekingaren, kirukosi ka Benjamen lo arai lokaatokech. Tonyout kesi toloto Misiri. Ani enangete, toloto ni ayei Yosep. Ani eanyungari Yosep Benjamen erukito ka kesi, tolimok itwaan ni aweikinit awi keng tama, “Toriko ngitunga lugu nawi tongol ibarasit kidorok, kainyo kimuj ayong ka kesi akimuj na a apaaran.” Tosub itwaan ngini ngakiro na alimokinitae, toriko ngipeyok ngulu nawi a Yosep. Ani ingolikinete kesi atamar kirikor kesi nawi a Yosep tobul, kingitanaros make ebalasi, “Kirikun ngoni nege kotere ngakiro a ngaropiyae ana kinyiakakinio ngoni analotoru ana kolong yok a ekingaren, tatakanuunea ibore nikititakinea ngesi ngoni atipei, kitedemarea ngoni ngisikiria yok, ani erumor kitiliwo ngikedalak keng.” Kotere ngakiro nguna, toloto kesi ni ayei itwaan ni aweikinit awi a Yosep kisuruoro ngesi alokidor a akai, ebalasi, “Torimakinae kare ekapolon, kiponit kolong sua nege akigiel akimuj. Ani kinangi nikiperi alorot, tangaa ipei kosi daang echue keng, atorukautu sua ngaropiyae kosi kadaang eyakasi nakituk a ngichuei emam itwaan kelema. Kibuu sua ngaropiyae nguna. Kiyau sua tani ngaropiyae ngache nagielet akimuj. Nyikiyeni sua atamar ngae enyiakakini ngaropiyae lochuei kosi.” Tatachak ekaweikinan a akai ngolo tama, “Warasi nyialolong kori nyieam. Akuj kus, na erai Akuj a apakus ngesi enyiakakini ngaropiyae lochuei kus. Ayong ngesi ediauni ngaropiyae kus.” Ani erumor toriku ngesi Simeon ni ayakasi talokaatokeng. Kipeyou ekaweikinan a akai ngolo kesi nawi a Yosep nak ngakipi na ilotareta ngakejen, sodi nak ngisikiria kech akimuj. Tolemut talokaatokeng a Yosep ebachit lo asakete ainakin Yosep kainyo eirarito atamar imujete kesi ka ngesi. Ani ebonguni Yosep nawi, inut kesi ngesi ebachit losek ainunito sodi toriediko tatapa ngireetin ngalup. Kingit Yosep kesi ngakiro a eboyor kech, ani erumor kingit kesi tama, “Kisisakinito kolong esi ayong ngakiro a apakus, ikoni tokona ngesi ai?” Tatachakis tamasi, “Iboi ekasuban etich kon apakosi niajokon, eringa eyari.” Ani erumor kijuuruoto kesi idodiunito arimatoi. Ani ingoliari Yosep, taanyunga lokaatokeng Benjamen, lokolong edounio ka ngesi anakook aapei, tolim tama, “Erai logo lokaatokus loochi lokolong kisisakinete esi ayong ngakiro keng a? Kitopia iyong Akuj lokookang!” Torotok Yosep kaneni atipei kainyo akot akikaloun ani asuruor etau kotere lokaatokeng. Toloma ngesi namaniyat a akai ana epereene sodi kikalou ngakiyo cholae. Ani kilota ereet keng kerumor, tolom kaneni etitinyikinit, tolim atamar yaunae akimuj. Tokorakinae Yosep akimuj ipakara epewae, tokorakinae kesi nakech ipakara wache. Tani ngitunga a Misiri lu emujete ka ngesi, tokorakinae akimuj ipakara epewae, kainyo etaleo Ngimisiri akimuj aapei ka Ngieburaniae. Kiboikinos talokaatokeng a Yosep lowae lo engoliarit Yosep torekinos ibooyete ani eyei loapolon tanang ni eyei loochi. Ani ingolikinete kesi eger lo arekinotor, toliworos ekienyanakinosi eiliilikinito ngakiro na ebooyoto kesi kongina. Toliwor akimuj elemuununio alomeesa a Yosep inunae kesi, nakaneni nakinae Benjamen ngainakinet ngakan akidwang na ainakinio talokaatokeng. Sodi tamata kesi ka Yosep talakaros aapei. Todungok Yosep itwaan ni aweikinit akai keng tama, “Kilelebik ngichuei a ngitunga kalu akimuj etiae lo epedorete kesi akiwok. Ani erumor, kiwaak ngaropiyae a ipei kech kadaang nakituk a echue keng. Ani echue a edia aloochi, kiwaak ekopo kang lo esubunitae a akwangat, nabo tobuak ngaropiyae keng.” Tosuba ekaweikinan a akai ngolo ngakiro nguna alimokinitae. Ani nataparach elilim, tachamakinae kesi erotokinete ka ngisikiria kech. Ani eringa kesi eloose alo diyete ere, tolimok Yosep itwaan ni aweikinit akai keng tama, “Tonyou atipei kiwapak ngitunga lutete, ani iditari, kingit tama, ‘Nyo itacheta esi ngakiro naajokak anaaronok? Nyo ikokoyareta esi ekopo a ekapolon kang lo esubunitae a akwangat? Ikwa nyiyenete esi atamar emaseenea ekapolon kang ekopo ngolo, nabo ngesi edwarea ngesi ngakiro a? Isechito esi noi ani isubeta kongina.’ ” Ani editari ekaweikinan a akai ngolo kesi, tolimok ngakiro nguna. Nakaneni kingita kesi ngesi tamasi, “Ekapolon, nyo kilimokinitor iyong sua ngakiro na ikote nguna? Kikokini sua ngikasubak etich kon kisubi ngakiro na ikote nguna ai? Iyeni iyong atamar ngaropiyae nakirukauni sua anakituk a ngichuei, kipot sua atobuutu anakwap a Kanaan. Kikokini tokona sua kikokoyari ngaropiyae kori egolit anawi a ekapolon kosi ai? Tokona bocha ekapolon, ani keyei itwaan anikosi ni eriamunio etingit ekopo ngolo, echamit eario. Kiliwor sua luche daang ngikedalak kon.” Tolim itwaan ngini tama, “Itemokino. Kimiekisi kikokis eger lo tokona ilimunioto esi. Itwaan ni erukaunio etingit ekopo ngolo, ngesi eliwor ekasuban etich kang, nakaneni kimiekinio esi luche daang.” Sodi totiyau ipei kech daang echue keng kwap atipei, tangaa. Kiseme itwaan ngini ngichuei kech daang, kisiak ani eyei loapolon, tanang ni eyei loochi. Taanyunae ekopo alochue a Benjamen. Tochilichileta kesi ngiworui kech. Kidokok ipei kech daang ngiboro keng losikiria, tobongosi lore. Ani ebongorete Yuda ka talokaatokeng nawi a Yosep, torukaut Yosep eringa eyei nawi. Toloto kesi toriediko alongaren keng. Kingit Yosep kesi tama, “Abala ayong esi a, anukiro nugu kisubeta esi ayong? Ikwa nyiyenete esi atamar epedori itwaan ni ikoni ayong akiyen ngakiro kotere akidwar a?” Tatachak Yuda tama, “Anukiro kilimokini sua iyong ekapolon? Kitamari ai? Kikokini sua kitamari nyikisechit ai? Esileereu Akuj akisech kosi alu kirai ngikasubak etich kon. Kirai tokona sua daang ngikedalak kon, aapei ka lotete aanyunio ekopo anikeng.” Nakaneni tolim Yosep tama, “Nyapedori ayong akikokin neni! Ngolo aanyunio ekopo kang anikeng ngesi bon eliwor ekedalan kang. Tobongosi esi luche daang nika apakus a ekisil.” Sodi tolot Yuda ni ayei Yosep tolimok tama, “Ekapolon, kemaimai iyong atamar kimiekinae katolimok ngakiro ngadikidio, nabo kemaimai atamar nyiingo kainyo ikoni iyong Parao elope. Ekapolon, kingisi kolong iyong sua tama, ‘Eyei esi apakus ka lokaatokus eche a?’ Atatachakisi sua iyong atamasi, ‘Eyei sua apakosi lo emojongit ka lokaatokosi loochi lo edounio emojongit apakosi. Atoana kolong lokaatokeng loapolon, edong erai ngesi bon eyari alokol kech. Emina apakosi ngesi noi.’ Ekapolon, kilimokini kolong iyong sua atamar atorikutu ngesi nege sodi taanyu iyong. Kipot sua atolimokisi iyong atamar nyepedori ngesi atiaka ka apakeng kainyo ani kikok neni etoani apakeng. Sodi ibu iyong kitolimok sua tama, ‘Ani pekirukut esi ka lokaatokus loochi, nyikianyungarete ayong nabo.’ Ani kibongori sua ni eyei ekasuban etich kon apakosi, esisakisi sua ngesi ngakiro nakilimokini iyong sua. Ani kilimokini ngesi sua atamar atobongutu nege atogiela akimuj nadiochichi, atolimokisi sua ngesi atamasi, ‘Nyikilosi sua. Ani kiruko sua ka lokaatokosi loochi, kilosi, kainyo nyikianyungari sua itwaan ngini erai pekiruko ka ngesi.’ Kitolimok sua apakosi lo erai ekasuban etich kon tama, ‘Iyenete esi atamar edouni kolong Rael na arai aberu kang ngide lusapa ngiarei. Kaisiki kolong ayong epei, sodi atama ayong anyilinyilaa kolong ngesi etiengit a moding, nakaneni nyeanyungara ayong ngesi nabo. Ani kirikosi esi logo dang anikang, taanyun ka ngakiro naaronok, kaarete ayong ngakiro nakesialolongete arai ekasukout lomojong kona.’ Tokona bocha ekapolon, ani kabongo ayong ni eyei apakang, lo erai ekasuban etich kon pekirukit ka edia logo, tarai eyarea apakang ni eyakar edia logo, ani kingolik ngesi atamar nyikirukit sua ka edia, etoani! Nakaneni earete ngesi ngakiro nakisialolongio sua ngikasubak etich kon ngesi erai ekasukout lomojong. Ani eyakasi nguna daang, aweikini kolong ayong elope edia abala, ‘Ani pekabuu ayong Benjamen ni iyei iyong, tapaikinae ayong ngakiro keng jik.’ Tokona bocha ekapolon, kemaimai ayong ekasuban etich kon iyong abala, kimiekinae ayong elunyokin nados a edia kalo. Kimiek iyong ngesi tobongosi ka talokaatokeng nawi. Ekokini ayong abongori ni eyei apakang pekirukit ka edia logo ai? Nyatitinyikini ayong akitere apakang eanyuni ngakiro naaronok.” Tongopik Yosep kona etitinyikini ngakiro alongaren ngitunga lu awaasi alo diyete keng, tolim tama, “Kipudosi ngitunga daang nikalapatan!” Nakaneni amam itwaan iche ayei neni na eteyanar Yosep talokaatokeng. Kikalou ngesi irema kiirasi tani Ngimisiri, ka ngiyenet a Parao. Tolimok Yosep talokaatokeng tama, “Arai ayong Yosep Eringa apakang eyari a?” Nakaneni tobul talokaatokeng kililinga chek, tongop tani kona etachakinete ngesi ngakiro. Tolimok Yosep talokaatokeng tama, “Taapuutu kare diyete kang nege.” Ani eapuunete kesi, tolimok tama, “Arai ayong lokaatokus lokolong kigielarete esi abu Misiri. Nakaneni nyiialolongo tokona kori nyiingoikinosi ani kolong kigielareta. Erai Akuj kolong kayauni ayong nege kengareniu esi, atoyuunea ngitunga. Kainyo erai tokona ekaru logo loa ngiarei eyakar akoro nakwap, nakaneni epote ngikaru ngiche ngikan lu emamakar ngamanat itao kori ngalemet elemio. Kayauni kolong ayong Akuj nege kengareniu esi sodi eteyarea ngalesea kus anakwap, katoyuu esi a erot alo kitalari. Kotere nguna, meere esi kolong kiyaunete ayong nege, erai Akuj. Ketiliwo Akuj ayong ekapolon lo atupit Parao, lo aweikinit ibore daang, nabo ayong apolokinit akwap a Misiri daang. “Tobongosi tokona atipei ni eyei apakang tolimokis tamasi, ‘Ebala lokookon Yosep kona, ketiliwo ayong Akuj ekapolon a akwap kadaang a Misiri. Bua ni ayei ayong, nyiitinenik. Ilomi iyong ni enyaritae Gochen ni eyei diyete kang. Neni ngesi ilomete iyong ka talokookon, ka ngide a ngide kon, ka ngibaren kon daang, ta ibore kon daang. Ketani ayong iyong na ilomea Gochen. Etani tani ngitunga a awi kon ka ngibaren kech sodi nyeemunya akoro kainyo eringa ngikaru ngikan a akoro idongito.’ ” Torubak Yosep ebala, “Ingolikis tokona esi ngikulepek nabo engolik tani lokaatokang Benjamen atamar ayong Yosep ngesi kiruoro ka esi. Tolimokisi apakang ngakiro a ajakaanut kang kanege alo Misiri, tolimokisi tani ibore daang ni ingolikis esi. Kapesi tokona atipei torikut apakang nege.” Ani erumor tonuak ngesi lokaatokeng Benjamen kikalou kotere alakara. Kikalou Benjamen dang enuakinit ngesi. Tonuak Yosep talokaatokeng daang igoro, ani erumor kiana ka kesi. Ani iirarete ngitunga a awi a Parao atamar apot talokaatokeng a Yosep, talakaros Parao ka ngikasubak etich keng noi. Sodi tolimok Parao Yosep tama, “Tolimok talokaatokon kidokokis ngiboro losikiria tobongosi nakwap a Kanaan. Ani erumor torikut apakech ka ngitunga a ngawiyei kech daang, sodi ainak ayong kesi akwap na ejok noi anakwap a Misiri, sodi tanyama kesi akimuj nakaalan noi na eyareta anakwap kana. Tolimok kesi tani atamar torujasi ngaurukukui na irito ngangolei kanege alo Misiri kotere ngide luuchik ka ngaberu kech, sodi kirukut ka apakech. Tolimok kesi atamar nyiialolongo kotere ngakiro a ngibaren kech kainyo ekech tokona ewae lo ejok noi alo Misiri.” Sodi tosubakis talokookeng a Yakobo ngakiro na alimokinitae. Nak Yosep kesi ngaurukukui na irito ngangolei ka akimuj na enyamete alorot, loger lo adungokinitor Parao. Nak ngesi ipei kech daang ngiworui lu ilochioto luche, nakaneni nak Benjamen ngaropiyae ngamiae ngauni, ka ngiworui ngikan lu ilocheene. Ngiboro lu ameari ngesi ni eyei apakeng kesi ngisikiria ngitomon lu esiwokitae ngiboro luajokak a Misiri, ka ngasikiria ngatomon na esiwokitae akimuj, ka ngamugati, ta ngamuja nache na enyami apakeng alorot. Sodi tolimok Yosep talokaatokeng atamar toloto niajokon, ani enyounete, kichikichik ebala, “Nyiiburata alorot iloose!” Tonyout kesi alo Misiri tobongosi Kanaan ni ayei awi a Yakobo alo arai apakech. Tolimokis apakech tamasi, “Eringa Yosep eyari! Ngesi erai ekapolon a akwap kadaang a Misiri!” Toriangakin apakech noi nabo nyenupa ngesi ngakiro kech. Nakaneni ani isisakinio ngesi ngakiro daang a Yosep na alimokini kesi, nabo taanyunga ngaurukukui daang na irito ngangolei na ameuni Yosep akiwok ngesi, abu kikwaru. Tolim Yakobo tama, “Etemokin! Eringa lokookang Yosep eyari! Alosi ayong ataanyu ngesi eringa ayong nyetoana.” Sodi tonyou Yakobo etingit ngiboro keng daang torotok. Ani enangi Beer-cheba, kipeyok Akuj a apakeng Isaka ngakipeyos. Kisuruor Akuj ngesi anakisingolikinet nakwaare tanyara tama, “Yakobo! Yakobo!” Kiki Yakobo tama, “Ayong lo.” Tolimok Akuj ngesi tama, “Ayong arai Akuj, Akuj a apakon. Nyiiker alosit Misiri, kainyo etiliwori ayong ngalesea kon kaina na eyenikinitae. Kirukori ayong alope ka iyong kabuuni iyong nege. Itoani iyong irukito ka Yosep.” Tonyou Yakobo alo Beer-cheba. Kidokokis talokookeng ngesi, ka ngide luuchik, ta ngaberu kech, kidokokis naurukuk na irito ngangolei na ainakini kesi Parao kiwokuneta Yakobo. Taramasi tani ngibaren kech ka alemar ngiboro daang lu aanyunete kesi anakwap a Kanaan, toloto Misiri. Toriko Yakobo ngalesea keng daang, lu araakasi talokookeng, ka ngide a ngide keng, ka tanakookeng, toriko daang Misiri. Ngalesea a Yakobo na erukorete ka ngesi Misiri, kesi Reuben lo arai lokookeng loapolon, ka talokookeng a Reuben lu anyaritae Anok, ka Palu, ka Esiron, ta Karimi. Simeon ka talokookeng lu anyaritae Yemuel, ka Yamin, ka Oadi, ka Yakin, ka Soaar, ta Chaul lo edouni aberu a akwap a Kanaan. Lawi ka talokookeng lu anyaritae Gerichon, ka Koas, ta Merari. Yuda ka talokookeng lu anyaritae Eri, ka Onan, ka Chela, ka Peres, ta Sera. (Nakaneni totoaka Eri ka Onan anakwap a Kanaan.) Talokookeng a Peres kesi Esiron ka Amul. Isakar ka talokookeng lu anyaritae Tola, ka Pupa, ka Yachub, ta Chimuron. Sebulun ka talokookeng lu anyaritae Sered, ka Elon, ta Yaaleel. Eraakasi ngulu talokookeng a Yakobo ka Dina na arai nakookeng. Edouni Lea kesi na alomitere Mesopotamia. Talokookeng, ka tanakookeng, ta ngide a ngide keng, araakasi ngitunga ngitomwon-uni ka nguuni. Gad ka talokookeng lu anyaritae Sipion, ka Agi, ka Chuni, ka Esibon, ka Eri, ka Arod, ta Areli. Acher ka talokookeng lu anyaritae Imuna, ka Ichipa, ka Ichipi, ka Beria, ta nakaatokech na anyaritae Sera. Beria ka talokookeng lu anyaritae Eberi ka Malikiel. Eraakasi lutomon ka ngikan-kapei lugu talokookeng a Yakobo lu edouni Silipa na arai akasuban etich a Lea na ainakini ngesi apakeng lo anyaritae Laban. Kidou Rael talokookeng a Yakobo ngiarei lu anyaritae Yosep ka Benjamen. Ani alo Misiri, kidou Asenas na arai nakookeng a Potipera alo arai emuron a akuj anasubuna a ere alo anyaritae Eliopolis, kidou talokookeng a Yosep ngiarei lu anyaritae Manase ka Epiraim. Talokookeng a Benjamen kesi Bela, ka Beker, ka Achibel, ka Gera, ka Naaman, ka Eei, ka Roch, ka Mupim, ka Upim, ta Arid. Eraakasi ngitunga lutomon ka nguomwon lugu talokookeng a Yakobo lu edouni Rael. Dan ka lokookeng lo anyaritae Uchim. Naputal ka talokookeng lu anyaritae Yaaseel, ka Guni, ka Yeser, ta Chilem. Eraakasi lukan-kaarei lugu talokookeng a Yakobo lu edouni Bilia, akasuban etich na ainakini Laban Rael. Ekimar a talokookeng a Yakobo kadaang alu erukorete ka ngesi Misiri, emam itwaan imarit ngaberu a talokookeng, araakasi ngitunga ngitomwon-kapei ka ngikan-kapei. Aurit Yosep ngide lusapa ngiarei alo Misiri. Nakaneni araakasi ngitunga daang a awi a Yakobo lu alomarete Misiri ngitomwon-kaarei. Tomea Yakobo Yuda kingarenik ni ayei Yosep esaki atamar eriamun ka ngesi Gochen, sodi tananga kesi ni anyaritae Gochen. Tosubak Yosep aurukuk keng na irit angole, tolot akisiriamiar apakeng Yakobo alo Gochen. Ani enangi ngesi ni ayei apakeng, kilogak ngesi ngakan keng lomosiring a apakeng, kikalou nikooyen kotere alakara. Tolimok Yakobo Yosep tama, “Tani katoana tokona, emam ngakiro kainyo engolik ayong ereet kon nabo ayen atamar eringa iyong iyari!” Tolimok Yosep talokaatokeng ka ngitunga a awi a apakeng daang tama, “Alosi ayong atolimok Parao atamar apot talokaatokang ka ngitunga daang a awi a apakang lukolong alomito Kanaan, apot ni ayei ayong. Alimokini ayong ngesi atamar iraakasi esi ngikeyokok a ngibaren, nabo ipot esi emeto ngamesekin, ka ngaatuk, ta ngibaren kus daang. Ani kinyarau esi Parao kingit tama, ‘Nyonite etich kus?’ Tolimokisi tamasi, ‘Ekapolon, kirai sua ngikasubak etich kon ngikeyokok ngibaren napei kolong a ekiditeu tanang akolongit naga, kainyo arai kolong etich a taapaakosi ngolo.’ Ani kilimut esi kongina, kimiekinio esi toloma ni enyaritae Gochen.” Alimuni Yosep kongina kainyo akadakinito ngitunga a Misiri ngikeyokok. Sodi tolot Yosep nia Parao tolimok tama, “Apot apakang ka talokaatokang anakwap a Kanaan emeto ngamesekin, ka ngaatuk, ta ngibaren kech daang. Eyakasi tokona ama Gochen.” Toriko ngesi talokaatokeng ngikan nia Parao. Kingit Parao kesi tama, “Nyonite etich kus?” Tatachakis kesi ngesi tamasi, “Ekapolon, kirai sua ngikasubak etich kon ngikeyokok loger lokolong a taapaakosi.” Ani erumor tolimokis Parao tamasi, “Kiponit sua ngikasubak etich kon akilom nakwap naga kirai ngipeyok, kainyo erono akoro noi anakwap a Kanaan nabo emam nginyia edakasi ngibaren kosi. Kotere nguna ekapolon, kimaimai sua iyong kibala kimiek sua atoloma lowae loa Gochen.” Tolimok Parao Yosep tama, “Apot apakon ka talokaatokon ni iyei iyong. Erai akwap a Misiri akon, nak apakon ka talokaatokon ewae loajokon noi toloma. Epedorete akilom lowae loa Gochen, ani keyakasi kesi lu iyokoko, toseu toliworos kesi iyokiyete ngibaren kang.” Ani erumor, toriku Yosep apakeng Yakobo aanyun ka Parao. Topia Yakobo Parao. Kingit Parao Yakobo tama, “Eraakasi ngikaru kon ngiai?” Tatachak Yakobo Parao tama, “Eraakasi ngikaru kang lu elator ayong amiat apei ka ngitomwon-uni. Eraakasi ngikaru ngulu ngidikidio lu elalak ngichan, nyikote ngikaru lukaalak elatotor taapaakang.” Topia Yakobo Parao, sodi torotok. Sodi Yosep nak apakeng ka talokaatokeng ewae loa ere a Rameses lo ejok noi anakwap a Misiri, toliwor ni elomete. Toloma kesi neni loger lo adungunitor Parao. Toliwor Yosep itani apakeng ka talokaatokeng, ta ngitunga a awi a apakeng daang, imarunitae tani niichi. Toroner eron a akoro noi tongop akimuj awadaang. Kikar ngitunga a akwap a Misiri ka lua akwap a Kanaan ani anyamitor akoro. Kidiaunu Yosep ngaropiyae daang a ngitunga a Misiri ka Kanaan na agieleta ngitunga akimuj, yaa kai a Parao alo arai ekapolon. Ani edaunosi ngaropiyae a ngitunga kadaang a ngakwapea a Misiri ka Kanaan, pot Ngimisiri daang nia Yosep tolimokis tamasi, “Nakinae akimuj! Kikokini sua kiari akoro kitee iyong ai? Kingolik a, adaun tokona ngaropiyae kosi daang!” Tolimok Yosep kesi tama, “Ani kedauna ngaropiyae kus, nakinae ayong ngibaren kus kainak ayong esi akimuj.” Sodi inut kesi Yosep ngibaren kech daang lu eraakasi ngangolei, ka ngaatuk, ka ngamesekin, ka ngaanei, ka ngisikiria, nak ngesi kesi akimuj. Ekaru ngolo, kitan a akimuj ana elokonyio a ngibaren kech. Ani ekaru lo atupit ngolo, pot nabo kesi ni ayei ngesi tolimokis tamasi, “Ekapolon, nyikimunoni sua iyong atamar adaunosi ngaropiyae kosi daang nabo aliworosi ngibaren kosi ngikon. Tokona bocha ekapolon, emam ibore iche idongit nikiinakini sua ngikasubak etich kon iyong, mati ngawat kosi ka ngamanat kosi. Nyikimiek sua kitoaki sodi kinyasun ngamanat kosi itee iyong. Togielae sua ka ngamanat kosi atoliworos ngikedalak a Parao, sodi kiinak iyong sua akimuj. Nakinae akimuj nakiyarea, sodi nyiidong akwap iboi pas.” Togiel Yosep ngalup daang a Misiri toliwor aka Parao. Togiela itwaan daang a akwap a Misiri amana keng kotere eron a akoro. Toliwor akwap daang aka Parao. Kitiliwo Yosep ngitunga ngikedalak, napei alowae a epei a Misiri tanang lowae loche. Ngalup na nyegiela Yosep kesi na a ngimurok. Nyegielara kesi ngalup kech kainyo etanio kesi a ngakiria ana ainanakini Parao kesi. Tolimok Yosep ngitunga tama, “Kagiel tokona ayong esi daang ka ngamanat kus toliworos ngika Parao. Kiinakinio esi ngikinyam kitakis namanat kus. Ani ilemete esi ngamanat, iinakinete esi Parao alemunet apei ani eyakasi nakan. Ani ngalemet naomwon idongete, eliworosi ngikinyam kus ka akimuj kus, ta na a ngitunga a ngawiyei kus.” Tatachakis ngesi tamasi, “Ekapolon, kiyuu iyong sua! Kibuakinit iyong alakara ani kichamunea sua, kiliwor sua ngikasubak etich a Parao.” Sodi kiwaak Yosep etal nakwap a Misiri toliwor elemuununi itwaan daang alemunet apei ani eyakasi nakan a ngalemet keng nak Parao. Iwapitae etal ngolo tani tokona. Ngalup na ngimurok make nyerauna ngaka Parao. Tolom Yakobo nakwap a Misiri lowae a Gochen. Na ayakatar inaa, tabara ngibaren lukaalak. Toureta kesi ngide talalaketa noi. Tolom Yakobo nakwap a Misiri a ngikaru a ngitomon ka ngikan-kaarei. Ani eapuunete ngirwa lu etoanea ngesi, tanyara lokookeng Yosep tolimok tama, “Ani kichamunit iyong ngakiro kang, tongichak akan kon kiding ngakalokidingo kang sodi kikong atamar kisubea ayong ngakiro na etenooko. Nyikinukak ayong Misiri, nakaneni tonukakinae ni eperioto taapaakang. Kiwokoe ayong alo Misiri kitonukak ni enukakinitae kesi.” Tatachak Yosep ngesi tama, “Asubakini ayong nguna loger lo ibalar iyong.” Tolim Yakobo tama, “Kikong!” Kikong Yosep. Sodi kijuuru Yakobo anakou a ekitanda keng elakara. Ani ekisidi kanguna, tolimokinae Yosep atamar edeak apakeng. Abu ngesi toriko talokookeng luarei lu anyaritae Manase ka Epiraim toloto ni ayei apakeng. Ani elimokinio Yakobo atamar abu lokookeng Yosep aanyun ngesi, kitingak akwaan anyoun, kiboikin lokitanda keng. Tolimok Yakobo Yosep tama, “Akuj Naationon, abuni kolong nikang ayei ni enyaritae Lus anakwap a Kanaan, katopia ngesi ayong ebala, ‘Kingolik a, kainakini ayong iyong ngalesea nakaalak. Epote ngibukui lukaalak anikon, nakaneni ainakini ayong ngalesea kon akwap naga toliwor kesi irumete jik.’ Talokookon luarei lukolong iuriuni iyong kane alo Misiri eringa ayong nyebuno, eraakasi talokookang, eraakasi Epiraim ka Manase ngikang loger a Reuben ka Simeon. Ani ngulu iuriuni iyong ekisidi, eraakasi ngikon. Etupete ngulu Epiraim ka Manase anibore ani irumete. Asubi ayong nguna kotere itiokon. Ariangakin ayong na atoanea ngesi anakwap a Kanaan, alo diyete Epirasa, na abongunitor ayong alo Mesopotamia. Atonukak ayong lokwaas a erot alo etenere Epirasa.” (Enyaritae Epirasa tokona Betleem.) Na aanyungarea Yakobo talokookeng a Yosep kingis tama, “Tangae lugu?” Tatachak Yosep apakeng tama, “Eraakasi lugu talokookang lu kainakini Akuj ayong ayei nege.” Tolim Yakobo tama, “Toriku kare diyete sodi atopia.” Peetee Yakobo akwap lokojokon ani amojongitor. Sodi kitaapia Yosep talokookeng diyete apakeng, sodi tonuak apakeng kesi. Ani erumor tolimok Yakobo Yosep tama, “Pekolong etamit ayong atamar aanyungari ereet kon, nakaneni ketaanyu ayong Akuj tani ngide kon!” Sodi tolema Yosep talokookeng anakungin a apakeng, ani erumor toriedik tatap ereet ngalup. Toriko Yosep talokookeng luarei, Epiraim lo arikit ngesi a akan ana aloteten, kisibak anakan ana alokiedieny a apakeng. Kisiyotoo ngesi kesi diyete apakeng. Nakaneni tolunyak Yakobo ngakan keng, kidokok akan na aloteten nakou a Epiraim alo arai echichi, ani akan keng na alokiedieny kidokok nakou a Manase alo epolot. Sodi topia ngesi Yosep tama, “Kimiekisi Akuj nakolong ewapito taapaakang, Aburaam ka Isaka ngakiro keng, Akuj na erai ngesi keyoki ayong tanang tokona, ka emalaikat lo kayuuni ayong anaaronok kadaang, topia ngide lugu! Ekiro kang ka ngirora kata apaakang Aburaam ka Isaka, toliworos elimitoe kotere ngide lugu sodi talalaketa kesi noi anakwap.” Ani ingolikini Yosep atamar edokok apakeng akan keng na aloteten nakou a Epiraim, nyeejoikis ngesi ngakiro nguna. Sodi toting ngesi akan esaki alemun anakou a Epiraim kiwaak nakou a Manase. Tolimok ngesi apakeng tama, “Nyikote neni apa! Logo ngesi epol. Kidokok kare akan kon na aloteten nakou keng.” Nakaneni towou apakeng tolimok tama, “Ayeni, ayeni ayong lokookang. Eliworosi ngalesea a Manase daang ebukut lo epol, nabo eliwor lo eyenikinitae. Tani kikoni neni, eliwor lokaatokeng loochi lo epol noi akidwang ngesi, nabo eliworosi ngalesea keng ngibukui lukaalak.” Sodi topia Yakobo kesi akolongit ngina ebala, “Ngirora kus kesi epianareta Ngisirael ngitunga ebalasi, ‘Kisikok Akuj esi Epiraim ka Manase.’ ” Aloger kangolo, kitiliwo Yakobo Epiraim epol ani a Manase. Tolimok Yakobo Yosep tama, “Itee tokona iyong dang atamar edikino ayong atoani, nakaneni irukete esi ka Akuj, sodi kitobua ngesi esi nakwap a taapaakus. Eyakasi nguna daang, kainak ayong iyong, meere talokaatokon, ewae lo enyaritae Chekem. Erai neni akwap na eyakasi ngalup naketurupak ngikinyam. Ademuni kolong ayong Ngiamor ewae ngolo a ekileng ka akau kang.” Tanyarau Yakobo talokookeng tolimok tama, “Tochunakinos wapei katolimok ngakiro na esubakinosi anikus ngirwa lu isidiuno. “Tochunakinos kiirasi, esi talokookeng a Yakobo. Topupokisi ngakiro kang, ayong Yakobo, lo arai apakus. “Reuben, lokookang loapolon, irai iyong agogongu kang, nabo irai ikoku ni ekingaren a ekileenu kang, iwogana iyong nabo igogong noi akidwang talokaatokon daang. Ikoni iyong akaale na emam kona iratakinio. Nakaneni nyiliwor iyong lo kiyenikinitae noi, kainyo iperete iyong ka aberu kang, na arai apese a ngabwes, sodi kinyasu ekitanda a apakon. “Eraakasi Simeon ka Lawi ngikaitotoi. Elemunete kesi ngiboro kech a ejie sodi tosubeta naaronok. Nyewapi ayong ngakiro na etukosi kesi imunonito. Kori nyalosi ayong lokiriam kech. Kainyo aarete kesi ngitunga engoito. Kingwala ngimongin kotere amera. Kilamae angoit kech kainyo erono noi. Kilamae anyunyura kech kainyo emoitana noi. Ealari ayong kesi anakwap a Yakobo. Apetakini ayong kesi nakwap a Isirael. “Yuda, kipuruunete iyong talokaatokon, itingi iyong ngimoe kon ngimosiringan. Eriedikete talokaatokon alongaren kon. Ikoni Yuda itaok a engatuny, ni ebongori naburibur na irumunea ibore ninyamat. Ekudokin ngesi loger a engatuny sodi kinapakin kwap. Loger a angatuny anaberu, ngae epedori akiteriangakin? Yuda iliwor iyong ekapolon jiik. Eliworosi ngalesea kon ngikapolok jik. Eyaunete ngibukui lu nyerai Ngiyaudi, ngaropiyae a echur nikon jiik. Toriediko alongaren kon idodiunito arimatoi. Einikini ngesi esikiria keng lokitoe enyaritae emusabib. Ani itasikiria keng toinik lomusabib lo ejok noi. Ilotanari ngesi ngiworui keng a emuna alo epuritoe, alo arengan puu. Ereng ngakonyen keng puu, ani emasea emuna lo epuritoe. Ekwangak ngikel keng kea, ani emasea ngakile. “Elomi Sebulun lokwaas a anam. Eliwor neni edoket a ngatubwae. Enangi ekwaas a akwap keng Sidon. “Ikoni Isakar esikiria lokaagongon, lo eperi alokiding ngasaaja keng. Engolikini ngesi atamar ejok ni eangarea, nabo kingolik atamar ejok akwap. Totiyak ngesi egur keng kwap esaki akiwok eegos. Kitusubae ngesi etich loger a ekedalan. “Eliwor Dan ekatubon ngakiro a ngitunga keng, erai ekitela epei a Ngisirael. Ikokini Dan emun alorot, emun a akisierit alokwaas a erot, lo ekonyi ngitobolae a angole, sodi tachakun ekamean angole kwap kidedear. “Edarit ayong ayuuno kon Ekapolon Akuj. “Eremi ajore a ngirukooi Gad, nakaneni itiji ngesi kesi kirita. “Ekoniunete ngalup a Acher akimuj nakaalan. Ekoniuni akimuj na itemokin ekapolon. “Ikoni Naputal agete na alachakin, Eurinuni ngesi ngitak luajokak. “Ikoni Yosep ekitoe lo ekoneene, ekitoe lo eyei lokwaas a angolol, enangito ngaten keng lokipetet a angolol. Agumete ngirukooi lokojokon a ngimalea a amod. Toguma kesi ngesi kisibuusikis. Nakaneni eringa akau keng eyari, itogogongio ngakan keng, a agogongu a Akuj a Yakobo Namerikanyer, a ekiro a ekeyokon, Ataaba a Ngisirael. Akuj a apakon ngesi kingarakini iyong, Akuj Naationon kipiari iyong, a apiaro a akiru ana ebunit anadis, ka ngakipi na eponito alokwap ngalup, ka apiaro a ngaatuk anakaalak, ta ngide. Apiaro a apakon egogong noi, akidwang apiaro a ngimoru alu a kanuan ta ajokis a ngimoru alukajik. Min apiaro ngina nia Yosep, loreet alo kolong atiakasi ka talokaatokeng. “Ikoni Benjamen epeot lokaadengan. Enyami ngesi nataparach ibore ni earit, ani ebong totiakatiaka ibore ni aari.” Eraakasi lugu daang ngitela lutomon ka ngiarei a Ngisirael. Eraakasi ngakiro nguna na alimokini kesi apakech na apiarea ipei kech daang a apiaro ana itemokino ngesi. Sodi kichikichik Yakobo talokookeng tama, “Edikino tokona ayong atoani atolot emorikin ka ngitunga kang alokatoak. Echamit esi kinukete ayong aapei ka taapaakang anaburibur ana eyei mana a Epiron alo erai Eitit. Enyaritae aburibur ngina Makipela, na eyei kide a Mamure, nakwap a Kanaan. Agieli Aburaam amana ngina ka aburibur ani eyei Epiron, toliwor ni enukanakinio ngikatoak. Neni kolong anukakinio Aburaam ka aberu keng Sara. Neni kolong anukakinio Isaka ka aberu keng Rebeka. Erai nabo neni kolong anukakini ayong Lea. Amana ka aburibur na eyei neni, agielunio ani a Ngiiti.” Ani erumori Yakobo akichikichik talokookeng, tokudok ngakejen keng alokitanda, kirogak totoan. Tadakakin Yosep kidiama akwaan a apakeng tonuak. Ani erumor, todungok ngesi ngimurok atamar kiwasakis akwaan a apakeng ekitoe lo nyitobosi, kikokis ngulu neni. Araakasi ngirwa ngitomwon-omwon erikanari ekitoe ngolo anakwaan a itwaan. Kigoro Ngimisiri kotere akitu a Yakobo a ngirwa a ngitomwon-kaarei. Ani adaunet a ngirwa alu egorore, tolimok Yosep ngitunga a awi a Parao tama, “Ani kijoikinito esi ngakiro kang, kisuruorikinae kare Parao tolimokis atamar kesikongi kolong ayong apakang ebala, ‘Edikino ayong atoani. Echamit iyong kinukakini ayong naliel nakolong aboki ayong anakwap a Kanaan. Kemaimai tokona iyong asaki atamar kitachamak atolot atonuk apakang, ani erumor atobongu.’ ” Tatachak Parao ngesi tama, “Kape tonuk apakon loger lokolong kisikongio iyong.” Sodi tolot Yosep akinuk apakeng. Kirukosi ngesi ka ngikapolok luche daang a Parao, ka ngikasukou a atuk a Parao, ta ngikasukou daang a Misiri. Kirukosi Yosep tani ka ngitunga a awi keng daang, ka ngikaitotoi keng, ta ngitunga a awi a apakeng daang. Ngide make ka ngamesekin, ka ngaanei, ta ngaatuk kesi edongete ni enyaritae Gochen. Kirukosi ngesi ka ngaurukukui na irito ngangolei, ka ngangolei, ta ngikameak ngangolei. Alal alotoru ngina lokojokon. Ani enangete kesi naro na enyaritae Atad na erai adaet ngalemet, na ayei kide angolol Yorudan, kigoro lokojokon tosutonokis. Topunya Yosep apakeng a ngirwa a ngikan-kaarei. Ani eanyungarete ngitunga a akwap kangina lu eraakasi Ngikanaan akigoro ka asutonokin na egorore anaro ana enyaritae Atad ana edayere ngalemet, tamasi, “Etiono asutonokin na igorotor Ngimisiri naga!” Sodi tolimokinae neni ekiro be Abel Misiraim, eyei neni ekwakaye a angolol a Yorudan. Sodi tosubeta talokookeng a Yakobo apakech ngakiro na adungokinit ngesi kesi. Apot kesi kiwokosi ngesi tanang nakwap a Kanaan sodi tonukakis naburibur a Makipela, na ayei kide Mamure. Tonukakinae ngesi mana nakolong agieluni Aburaam ani Eyei Epiron, lo erai Eitit, toliwor ni enukanakinio ngikatoak. Ani kenuk ngesi apakeng kerumor, tobongosi Yosep ka talokaatokeng, ta ngitunga daang lu erukoritotor akinuk apakeng. Tobongosi kesi daang Misiri. Ani ketoana apakech kerumor, tolimonokinos talokaatokeng a Yosep make tamasi, “Kori robo edikino Yosep kiremokin ngoni sodi tatachak ngakiro naaronok nakolong kisubea ngoni ngesi?” Sodi tomeasi kesi itwaan nia Yosep ebalasi tolimok Yosep tama, “Kolong eringa apayok nyetoana, kidungokini sua tama, ‘Tolimokisi Yosep atamar emaimai ayong ngesi asaki torimak talokaatokeng kotere ngakiro naaronok ka akisech nakolong asubeta ngesi, kainyo asubeta kesi ngesi ngakiro naaronok.’ Kimaimai tokona sua iyong atamar torimakinae kare cha sua ngikasubak etich a Akuj a apakon kotere naaronok kolong kisubea iyong.” Kikalou Yosep naeirarea ngakiro nguna. Ani erumor pot talokaatokeng nikeng toriediko tatapa ngireetin ngalup, sodi tamasi, “Kingolik a, kirai sua ngikasubak etich kon.” Nakaneni tolimok Yosep kesi tama, “Nyieam! Esibit esi elunyokin ayong nados a Akuj a? Kitukitotor kolong esi ayong ngakiro naaronok, nakaneni kibele Akuj toliworos naajokak, sodi toyareta ngitunga lukaalak loger lo tokona iteeto esi akolongit naga. Warasi nyikibul. Ketani ayong esi aapei ka ngide kus.” Sodi kisian Yosep kesi niajokon totikok ngitai kech. Torubak Yosep elomit nakwap a Misiri, arukito ngesi ka ngitunga a awi a apakeng daang. Araakasi ngikaru lu ayarea ngesi amiat apei ka ngitomon. Kiboi Yosep taanyunga tani ngide a ngide a Epiraim alo arai lokookeng. Kidounoe tani ngide a Makir alo arai lokookeng a Manase, eringa Yosep eyei. Tolimok Yosep talokaatokeng tama, “Edikino tokona ayong atoani. Nakaneni ebuni Akuj ni iyakasi esi kipudo kane kiyaa nakwap nakolong echikakini Aburaam, ka Isaka, ta Yakobo.” Ani erumor kisikong Yosep ngitunga keng tama, “Ani ebuni Akuj nikus kitoyuu, tolemasi ngakoyo kang kane kiwoko.” Sodi totoan Yosep eraakasi ngikaru keng amiat ka ngitomon. Kiwasakis kesi akwaan keng ngikito lu nyitobosete, sodi kiwaakis nasaduku eringa eyakasi nakwap a Misiri. Ngirora a talokookeng a Yakobo alu erukorete ka Yakobo Misiri, erukito epei kech daang ka ngitunga a awi keng, kesi ta Reuben, ka Simeon, ka Lawi, ka Yuda, ka Isakar, ka Sebulun, ka Benjamen, ka Dan, ka Naputal, ka Gad, ta Acher. Araakasi ngalesea daang a Yakobo ngitunga ngitomwon-kaarei. Esiaunit sek lokookeng Yosep Misiri. Ani ekisidi, totoaka Yosep ka talokaatokeng daang, ta ngitunga a ales kangina daang. Nakaneni toureta ngalesea a Ngisirael talalaketa noi, sodi kilelebunos kesi nakwap. Abu ekapolon eche lo peayeni Yosep topolok akwap a Misiri. Tolimok ngesi ngitunga keng tama, “Elalak Ngisirael lugu noi nabo ejwoko kidwangito ngoni. Ejoikinit kisakuni erot lo kiratakinea nyiatakinos talalaketa nabo noi. Toliwor ani na kiremere ngoni, kimorikinos kesi ka ngimoe yok kitijwoto ngoni sodi tosiwa anakwap.” Sodi toseut Ngimisiri ngikasubak etich toweikis Ngisirael toliwor isilelenyete kesi a etich aloationon. Toduko Ngisirael ngirerea a Pisom ka Rameses toliworos kesi ikachanakinio akimuj a ekapolon a Misiri. Nakaneni tani na echekiyaritotor Ngimisiri Ngisirael kongina, apot Ngisirael talalaketa noi topetakin akwap wadaang. Toema Ngimisiri Ngisirael. Sodi kitusuba kesi Ngisirael etich a eger aloationon. Kitorono eboyor kech ani etusubeta etich loationon a ematapar. Alotich kadaang, alo asubete kesi, kitusubae a ationis. Kisuruor ekapolon a Misiri ngaberu ngaarei, anyaritae apei Chipira, tanyaritetei nache Pua. Araakasi ngaberu nguna na esidouniyete ngaberu a Ngieburaniae. Tolimok ekapolon kesi tama, “Ani isidounete ngaberu a Ngieburaniae, taara ikoku nisapat, kimiekis nipese toyar.” Nakaneni akerito ngaberu na isidouniyete nache nguna Akuj, nyiwapa kesi ngakiro a ekapolon. Apot kesi kimiekis ngide lusapa eyarete. Sodi tanyara ekapolon ngaberu na esidouniyete nache nguna kingit tama, “Nyo isubeta esi kona? Nyo imiekineta esi ngide lusapa eyarete?” Tatachakis ngaberu nguna ngesi tamasi, “Nyetiono akidoun a ngaberu a Ngieburaniae loger ana a Ngimisiri, idouniyete eringa sua nyenanga ni eyakasi kesi.” Sodi kingarak Akuj ngaberu na esidouniyete nache niajokon. Talalaketa Ngisirael toliworos lukajwok. Ani kona akeritotor ngaberu na esidouniyete nache Akuj, kitaanyu Akuj kesi ngide ka ngawiyei na eraakasi ngakech a ngakulepek. Sodi todungok ekapolon a Misiri ngitunga daang a akwap keng tama, “Ikoku nisapat nia Ngieburaniae daang idounio, tachakakisi nangolol a Nili, nakaneni kimiekisi lupesur toyara.” Ngirwa ngulu, kiut itwaan a ekitela a Lawi aberu a ekitela keng. Topoti aberu ngina kidou ikoku nisapat. Ani ingolikini ngesi atamar arai ikoku niajokon, kidaa a ngilapio a nguuni. Ani engopikini kona idai ngesi nabo, tolem akikap na asubunitae a ngataagor sodi kilalak elaam tongop ngakipi kona elomarete tooma. Kiwaak ngesi ikoku nakikap, sodi kirepak tooma lonyia lukooyak ayakasi lokwaas a angolol. Towo nakaatokeng a ikoku echadakina, esaki akiyen atamar anukiro esubakinosi anikoku. Bu nakookeng a ekapolon a Misiri akilotar anangolol, esaa lo alooso ngakasubak etich keng alokwaas a angolol. Taanyunga ngesi akikap alonyia, tomea akedalan keng alemun. Tangaa nakookeng a ekapolon a Misiri akikap sodi taanyunga ikoku nisapat ni egoro. Kisieni ngesi ikoku ngini tolim tama, “Erai ikoku en ipei a ngide a Ngieburaniae.” Sodi Tolimok nakaatokeng a ikoku kangini ngesi tama, “Kimiek atolot atanyarau aberu Naeburaniait toliwor akadakan ngesi.” Tatachak nakookeng a ekapolon ngesi tama, “Kape kare tanyarau.” Sodi tolot apese ngina toriku itiokeng a ikoku kangini. Tolimok nakookeng a ekapolon aberu ngina tama, “Tadaka ikoku nikang en kitan, nakaneni ketanyami ayong iyong ngaropiyae.” Sodi tadaka aberu ngina ikoku kitan. Ani ekisidi epolouni ikoku, toriko ngesi nia nakookeng a ekapolon, tadaka ngina ikoku toliwor lokookeng. Tolim ngesi tama, “Eriuni kolong ayong ngesi anakipi, kotere ngakiro nguna, alimokini ayong ngesi ekiro be Musa.” Ani na apolounio Musa, tolot ngesi aanyun ngitunga keng lu araakasi Ngieburaniae. Taanyunga ngesi eger lo etingakinitere kesi akisub etich loationon. Taanyunga ngesi tani epei a Ngimisiri ibungae Eburaniait lo arai epei a ngitunga a Musa. Tongolengolek Musa ani eyenuni atamar emam itwaan ketee, taar Emisirit sodi kidaik akwaan keng nalup. Ani akolongit na a ngaarei, tobongo ngesi torukau Ngieburaniae lukiliok ngiarei ejiete. Kingit ngesi lo asechit tama, “Nyo itijio iyong Eburaniait lo erai erukitos kon?” Kingit ekile ngolo ngesi tama, “Ngae kitiliwori iyong ekapolon ka ekatubon ngakiro kosi? Isaki iyong akiar ayong loger lobeen iarea Emisirit a?” Sodi toem Musa tolim tama, “Keyan ngitunga ngakiro nabeen asubi ayong.” Ani na eirarea ekapolon a Misiri ngakiro nguna, tasak akiar Musa. Sodi todok Musa ani ayei ekapolon a Misiri, tolot akilom nakwap enyaritae Midian. Akolongit apei na ebooyo ngesi alodiyete akar, pot tanakookeng a Yesiro alo arai emuron a ngakujo a akwap a Midian. Araakasi tanakookeng a Yesiro ngakan-kaarei. Tookut kesi ngakipi kilelebikis nategerin tamata ngamesekin ka ngaanei a apakech. Nakaneni kiritasi ngikeyokok ngiche tanakookeng a Yesiro. Sodi tolot Musa toyuu kesi tookok ngibaren kech ngakipi. Ani ebongorete kesi ni ayei apakech, kingit ngesi kesi tama, “Nyo ibongunioto esi akolongit naga atipei kona?” Tatachakis kesi ngesi tamasi, “Emisirit ngesi kiyuuni sua ani eyakasi ngikeyokok, sodi kitookok ngesi sua ka ngibaren kosi ngakipi.” Kingit ngesi tanakookeng tama, “Nyaali tokona ngesi? Nyo imiekineta esi itwaan ngini ewei anikalapatan? Kapesi tanyarautu ngesi bu emuja ka ngoni.” Tacham Musa akiboi ka itwaan ngini. Kipoto Yesiro nakookeng na enyaritae Sipora nak Musa kiut. Kidou Sipora ikoku nisapat. Tolim Musa tama, “Arai ayong itwaan ni nyerai akwap naga akang, aloger kangolo, alimokini ayong ngesi ekiro be Gerichom.” Ani adaunet a ngikaru a ngikaalak, totoan ekapolon a Misiri. Nakaneni aringa Ngisirael eriabasi kotere etich loationon edesikinitae kesi. Egorosi kesi esakete ayuuno. Tanang akigoro kech nia Akuj. Sodi kiira Akuj akigoro kech kitam achamunet na achamakin ngesi ka Aburaam, ka Isaka, ta Yakobo. Taanyunga Akuj eger lo aboliare Ngisirael, toliwor itee kesi. Akolongit apei, eyoki Musa ngamesekin ka ngaanei alokamuran alo keng anyaritae Yesiro. Arai Yesiro emuron a ngakujo a akwap enyaritae Midian. Toruja Musa ngibaren kitoro nariet, tananga moru a Akuj enyaritae Sinai. Bu emalaikat a Ekapolon Akuj nikeng ikoni asarae a akim na anoki alotooma amoni. Etee Musa akim enomit amoni nakaneni nyenomiara. Tolim Musa tama, “Abe kitalarete ngakiro nugu. Nyoni peenomiarea amoni naga? Erudar chene diyete engolik.” Ani ingolikini Ekapolon Akuj atamar erudun Musa diye, kiruorik alotooma amoni tanyara Musa tama, “Musa! Musa!” Kiki Musa tama, “Ayong lo.” Tolimok Akuj ngesi tama, “Tochoite iruduni nabo. Tobuto ngamuk kon kainyo iwei iyong analup ana italeunitoe. Ayong ngesi Akuj kata apaakon. Arai ayong Akuj a Aburaam, ka Isaka, ta Yakobo.” Sodi tarap Musa ereet keng, kainyo akerit ngesi aanyungar Akuj. Tolim Ekapolon Akuj tama, “Aanyunga ayong eger lo eboliare ngitunga kang alo Misiri. Eira ayong kesi igorosi, esakete kitoyuun alokasubak etich alu eweikinito kesi alotich. Ayeni ayong ngichan kech daang. Nakaneni abu ayong ayuun kesi ani eyakasi Ngimisiri, sodi epud kesi alo Misiri, elomak nakwap naajokon tololom. Akwap na ileleba ngakile ka akimiet a ao. Akwap a Ngikanaan, ka Ngiiti, ka Ngiamor, ka Ngiperes, ka Ngiipi, ta Ngiebus. Eira tokona ayong akigoro a ngitunga kang, nabo engolik ayong eger lo eboliatar Ngimisiri kesi. Kameari tokona ayong iyong nakwap a ekapolon a Misiri, sodi kipud iyong ngitunga kang anakwap keng.” Nakaneni tolimok Musa Akuj tama, “Arai ayong dang ichetwaan a? Ekokini ayong alosi lokapolon a Misiri ai?” Tatachak Akuj tama, “Kiruki ayong ka iyong, ani na ipudunio iyong ngitunga alo Misiri, kipeyoote esi ayong alomoru kalo. Nguna kesi idodiunete atamar ayong kamearit iyong.” Nakaneni tatachak Musa tama, “Na alosio ayong nia Ngisirael atolimok atama, ‘Akuj na kata apaakus kameuni ayong nikus’, kengisete kesi ayong tamasi, ‘Ngae ekiro keng?’ Alimokini ayong kesi atama ai?” Tolim Akuj tama, “Arai Ayong na arai Ayong. Ilimokini kesi ngakiro nugu, ‘Ngolo enyaritae Ayong ngesi kameu ayong nikus.’ ” Tolimok nabo Akuj Musa tama, “Tolimok Ngisirael atamar Ekapolon Akuj na erai Akuj kata apaakech, Aburaam, ka Isaka, ta Yakobo, ngesi kimeunit iyong nikech. Ekiro kang logo jik, kanyaraate ayong ngalesea daang na isidiunosi a ekiro kangolo. Kape tochunak ngikarikok daang a Ngisirael wapei tolimok atamar Ekapolon Akuj na erai Akuj kata apaakech, Aburaam, ka Isaka, ta Yakobo ngesi abuni nikon. Tolimok kesi atamar abu ayong nakaneni aanyunga na esubeta kesi Ngimisiri. Atiaku ayong atamar epuduni kesi alo Misiri, ani eboliare. Ayaari ayong kesi nakwap a Ngikanaan, ka Ngiiti, ka Ngiamor, ka Ngiperes, ka Ngiipi, ta Ngiebus. Akwap na ileleba ngakile ka akimiet a ao. “Iirarete ngitunga kang ngakiro na ilimokini iyong kesi. Sodi kirukosi iyong ka ngikarikok a Ngisirael nia ekapolon a Misiri, tolimokis tamasi, ‘Ekapolon Akuj, na erai Akuj a Ngieburaniae, ngesi edodiun anikosi. Kimiekinae tokona sua atoloto a ngirwa a nguuni nariet akipeyore Ekapolon Akuj, na erai Akuj kosi.’ Ayeni ayong atamar nyikimiekini esi ekapolon a Misiri toloto mati kitingakin atamar kimiek toloto. Nakaneni kotere agogongu kang, erirae ayong ngitunga a akwap a Misiri atosub ngakitoodikinet nakailiilok kaina. Ani ekisidi kanguna, kimiekini ngesi esi toloto. “Etiliwori ayong Ngimisiri lu kikerito esi sodi ani na erotokinioto ngitunga kang, nyeerotokis a ngakan anikirion. Aberu daang na erai Asiraelit, elosi ni eyakasi ngakidunyet keng Namisiri, ka aberu cha daang Namisirit na ibooyete ka ngesi anawi keng, sodi kilip ngiworui, ka ngiboro a egolit, ta asir a ngasua. Itanapete Ngisirael ngide kech lusapa ka lupesur ngiboro ngulu sodi tolemasi ebari a Ngimisiri.” Sodi tatachak Musa Ekapolon Akuj tama, “Ani ejok bo nyeenupa Ngisirael ngakiro kang sodi towout akiirar ngakiro na alimokini ayong. Ekokini ayong ai erai ketamasi kesi nyebuno iyong nikang?” Sodi kingit Ekapolon Akuj ngesi tama, “Nyoni ngini itingit iyong?” Tatachak Musa tama, “Aburo.” Tolim Ekapolon Akuj tama, “Tachakak kwap.” Ani echakakini Musa aburo kwap, kiloch toliwor emun, sodi kipungar Musa kaneni. Abu Ekapolon Akuj tolimok Musa tama, “Tokudokin sodi kirum ekosim.” Abu Musa tokudokin kirum ekosim a emun toliwor emun aburo nabo. Tolim Ekapolon Akuj tama, “Tosub nugu kidodikinea Ngisirael atamar Ekapolon Akuj na erai Akuj kata apaakech, Akuj a Aburaam, ka Isaka, ta Yakobo, ngesi abuni nikon.” Tolimok nabo Ekapolon Akuj Musa tama, “Kirepak akan tooma loworu kon.” Kirepak Musa akan tooma loworu, ani eutuni, torukau keting enomokere, ekwang kea. Sodi tolim Ekapolon Akuj tama, “Kirepak akan kon tooma loworu kon nabo.” Kirepak ngesi akan keng loworu, ani eutuni, torukau ejok ikoni akwaan niche. Tolim Ekapolon Akuj tama, “Ani pekenupa kesi ngakiro kon, kori ani pekenupa kotere akitoodikinet nakailiilon na ekingaren, enupete kotere naga. Ani pekenupa kesi ngakiro kon kotere ngakitoodikinet naarei nugu, nabo towout akiirar ngakiro na ilimokini iyong, tooku ngakipi anangolol a Nili sodi tobukok nalup. Ilochosi ngakipi toliworos ngaakot.” Nakaneni tolim Musa tama, “Wae, Ekapolon, nyikimea ayong. Nyeruorono ayong, nabo eringa ayong nyeyenuna ekiruor napei kolong isiakinea iyong akisuruor ayong. Kakuruworit ayong ekiruor nabo eyagayaga eruoro.” Kingit Ekapolon Akuj ngesi tama, “Ngae asubi akituk a itwaan? Ngae itikinimani ngesi kori peisuruorikini? Ngae isitee ngesi akwap kori itumudukani? Ikwa meere ayong Ekapolon Akuj a? Kape tokona! Kengarakini ayong iyong kiruorik, nabo kalimokini ayong iyong ngakiro na ilimuni.” Nakaneni tatachu Musa tama, “Emam kare Ekapolon, tomea kare itwaan iche.” Kotere ngakiro nguna, tongoik Ekapolon Akuj Musa tolim tama, “Ani bo lokaatokon Aron loa ekitela a Lawi? Ayeni ayong atamar iruorono ngesi. Tani tokona dang ebunit ngesi akisiriam iyong nabo elakar kianyungari iyong. Kisuruor iyong ngesi sodi tolimok ngakiro na elimuni. Kengarakini ayong esi luarei daang kiruorikineta, sodi katolimok esi luarei daang nguna isubete. Eliwor ngesi iruoro ngakiro kon kisuruor ngitunga. Sodi kikok iyong Akuj, tolimonok ngesi ngakiro na elimuni. Toting aburo naga, kainyo aburo naga ngesi isubea iyong ngakitoodikinet nakailiilok.” Sodi tobongo Musa nia lokamuran keng alo anyaritae Yesiro tolimok tama, “Kimiekinae kare ayong atobongo Misiri ataanyu ngiyenet kang keringa eyarete.” Tacham Yesiro tolimok ngesi atamar tolot niajokon. Ani eringa Musa eyei nakwap a Midian, tolimok Ekapolon Akuj ngesi tama, “Tobongo Misiri kainyo atoaka daang lu kolong asakete akiar iyong.” Sodi kitonyou Musa aberu keng ka talokookeng kidokok kidiama esikiria, kirukosi ka ngesi Misiri. Atingit ngesi aburo na alimokini ngesi Akuj atamar toting. Sodi tolimok Ekapolon Akuj Musa tama, “Ani ibongi Misiri, tosub alongaren ekapolon a Misiri ngakitoodikinet nakailiilok daang nguna kainak ayong iyong agogongu atamar tosub. Nakaneni etiliwori ayong ekapolon lo ichanana noi, sodi nyiimiek ngesi ngitunga toloto. Ejoikinit ilimokini iyong ngesi atamar, ebala Ekapolon Akuj kona, ‘Erai Isirael lokookang lo ekingaren. Kalimokini ayong iyong atamar kimiek lokookang tolot akipeyokin ayong nakaneni towou iyong. Aari tokona ayong lokookon lo ekingaren.’ ” Ani enangi ni aperi ngesi alorot elosi Misiri, kiriamun Ekapolon Akuj ka Musa tasak akiar. Sodi tolem aberu keng Sipora amoru nakakwanan kilengerea lokookeng, sodi tolem amuny ngina tatapea ngakejen a Musa ebala, “Irai iyong ekile loa ngaakot anikang!” Sodi kimiek Ekapolon Akuj Musa. Sodi tamarae abala Sipora, “Irai iyong ekile loa ngaakot anikang”, kotere akilengero. Tolimok Ekapolon Akuj Aron tama, “Kape nariet kiriama ka Musa.” Sodi tolot Aron kiriama ka Musa alomoru a Akuj. Ani na eriameta ngesi ka Musa, tonuak. Abu Musa tolimok Aron ngakiro daang na alimuni Ekapolon Akuj na abalar ngesi tobongo Misiri. Tolimok ngesi tani ngakiro a ngakitoodikinet anakailiilok ana adungokini ngesi Ekapolon Akuj atamar tosub. Sodi toloto Musa ka Aron Misiri tochunakis ngikarikok a Ngisirael daang wapei. Tolimok Aron kesi ngakiro daang na alimokini Ekapolon Akuj Musa. Sodi tosub Musa ngakitoodikinet nakailiilok daang alongaren ngitunga. Tonupa ngitunga, ani iirarete atamar abu Ekapolon Akuj nikech engolik eger lo eboliare kesi niaronon, kijuuruoto kesi sodi kilipa. Ani ekisidi toloto Musa ka Aron nia ekapolon a Misiri tamasi, “Ebala Ekapolon Akuj na erai Akuj a Isirael kona, ‘Kimiek ngitunga kang toloto nariet tosuba esukukuu lo karimatar ayong.’ ” Kingis ekapolon ngolo tama, “Ngae erai Ekapolon Akuj? Nyo eirarea ayong ngakiro keng emiek Ngisirael toloto? Nyayeni ayong Ekapolon Akuj, kotere ngakiro nguna, nyemiekini ayong Ngisirael toloto.” Tatachut Musa ka Aron tamasi, “Akuj a Ngieburaniae edodiun anikosi. Kimiekinae sua atoloto a ngirwa a nguuni nariet akipeyore Ekapolon Akuj, na erai Akuj kosi. Ani pekikok sua neni, kiari ngesi sua a edeke kori alojie.” Kingit ekapolon a Misiri Musa ka Aron tama, “Nyo isaketa esi ngitunga kipasakis etich kech? Kimiekisi ngikedalak ngulu tosuba etich! Ilalaketa esi noi idwang Ngimisiri. Nakaneni isakete tokona esi apalikin etich!” Akolongit napei ngina, todungok ekapolon a Misiri ngikasubak etich lu araakasi Ngimisiri ta Ngisirael lu aweikinito etich tama, “Tojongoto ainanakin ngitunga nginyia lu esubeta ematapar. Kimiekisi kesi ngikulepek toloto tasakut. Nakaneni kitusuba kesi ngimataparea lu eriyan ka lusek esubete, nyiitun tani epei. Emam kesi etich lo esubete, ngakiro nguna kesi ebalatar ayong emiek kesi toloto kipeyokis Akuj kech ngakipeyos! Kitusuba ngitunga lugu etich loationon kitumo kesi, sodi tongopik kona epupete ngakiro na eraakasi alioko.” Toloto ngikasubak etich lu araakasi Ngimisiri ka Ngisirael lu aweikinito etich sodi tolimokis Ngisirael tamasi, “Ebala ekapolon nyeringa kainakini esi nginyia. Ebala ngesi kapesi esi ngikulepek tasakut ani cha ianyuneta, nakaneni isubete esi ngimataparea lu eriyan ka lusek isubete.” Sodi toloto ngitunga lowaitin daang a Misiri esakete nginyia. Kitinganakis ngikasubak etich lu aweikinito etich kesi akisub akolongit daang ngimataparea lu eriyan ka lusek asubeenete kesi ngirwa lu ainanakinere nginyia. Kibungata Ngimisiri lu aweikinito etich Ngisirael lu erumunito kesi aweikin etich. Kingita ebalasi, “Nyo peesubeta ngitunga kus ngimataparea lu eriyan ka lusek esubeenete?” Sodi toloto Ngisirael lu aweikinito etich nia ekapolon kingitas tamasi, “Nyo kisubea iyong sua ngakiro na ikote nege ekapolon? Emam nginyia kiinanakinio sua, nakaneni eringa sua kidesikinitae akisub ngimataparea! Kidesio tokona sua tarai ngitunga kon esechito.” Tatachak ekapolon kesi tama, “Ikalanyaka esi nyisakete akisub etich, ngakiro nguna kesi ibalatar esi ayong kemiek esi toloto akipeyore Ekapolon Akuj. Tobongosi tokona akisub etich! Nyikiinakinio esi nginyia, nakaneni isubete esi ngimataparea lu eriyan ka lusek isubete.” Toyena Ngisirael lu aweikinito etich atamar kiya kesi lochan na alimokinere atamar tosuba akolongit daang ngimataparea lu eriyan ka lusek esubete. Ani erotokinete kesi, torukaut Musa ka Aron ewaasi alorot idarito kesi. Tolimokis kesi Musa ka Aron tamasi, “Engolik Ekapolon Akuj na isubete esi nakaneni kirirae esi ani kiteremokinioto esi sua ekapolon ka ngikasubak etich keng. Ipwatakis tokona esi kesi erot lo kiareta sua.” Sodi tobongo Musa nia Ekapolon Akuj nabo tama, “Ekapolon Akuj, nyo iboliar iyong ngitunga kon? Nyo kolong tani kimeunea iyong ayong nege? Napei ngoon alosio ayong akisuruor ekapolon a Misiri ngakiro kon, aboliar ngesi ngitunga niaronon. Nakaneni iwou iyong ayuun kesi jik!” Sodi tolimok Ekapolon Akuj Musa tama, “Ingolikini tokona iyong ibore ni asubakinea ayong ekapolon a Misiri. Etingakini ayong ngesi kimiek ngitunga kang toloto. Etingakini ayong ngesi kitwarak kesi anakwap keng.” Kisuruor Akuj Musa tolimok tama, “Arai ayong Ekapolon Akuj. Abuni kolong ayong nia Aburaam, ka Isaka, ta Yakobo arai Akuj Naationon, nakaneni abu ayong nyeeteyen kesi a ekiro kang alo erai Ekapolon Akuj. Eyook ayong tani achamunet nakichamakin ka kesi, echikak kesi atamar ainakini akwap a Kanaan, akwap nakolong ebooyoto kesi peerai akech. Eira tokona ayong akunua na igorotor Ngisirael, alu etiliwosi Ngimisiri ngikedalak, nabo etamu ayong achamunet kang. Tolimok Ngisirael atamar abala ayong kona, ‘Arai ayong Ekapolon Akuj. Kayuuni ayong esi sodi katalachak ani eyakasi Ngimisiri alu kitiliworito esi ngikedalak. Kayuuni ayong esi a eger aloationon noi ka eriras loapolon. Ketiliwori ayong esi ngitunga kang a alope, sodi atoliwor ayong Akuj kus. Iyenunete esi atamar arai ayong Ekapolon Akuj na arai Akuj kus nakalachakinea esi alo Misiri ani iraakatar ngikedalak. Kayauni ayong esi nakwap nakolong ekongi echikichika atamar ainakini Aburaam, ka Isaka, ta Yakobo. Kainakini ayong esi toliwor akus. Arai ayong Ekapolon Akuj.’ ” Tolimok Musa Ngisirael ngakiro nguna, nakaneni towout kesi akiirar ngakiro keng, kainyo ealolongete kesi kotere eger lo aboliare niaronon. Abu Ekapolon Akuj tolimok Musa tama, “Kape tolimok ekapolon a Misiri kimiek Ngisirael torotokis anakwap keng.” Nakaneni tatachak Musa Ekapolon Akuj tama, “Ani kewounito tani Ngisirael akiirar ngakiro kang, ikokini ekapolon a Misiri iirari ai? Kakuruworit ayong ekiruor.” Todungok Ekapolon Akuj Musa ka Aron tama, “Tolimokisi Ngisirael ka ekapolon a Misiri atamar kadungok ayong esi arikor Ngisirael topudosi alo Misiri.” Reuben lo arai lokookeng a Yakobo lo ekingaren, ayakasi talokookeng nguomwon lu anyaritae Anok, ka Palu, ka Esiron, ta Karimi. Araakasi kesi taapaakech a ngimacharin alu elimokinitae ngirora kech. Ayakasi Simeon talokookeng ngikan-kapei lu anyaritae Yemuel, ka Yamin, ka Oadi, ka Yakin, ka Soaar, ta Chaul lo arai lokookeng a aberu ana arai Akanaanit. Araakasi kesi taapaakech a ngimacharin alu elimokinitae ngirora kech. Ayakasi Lawi talokookeng nguuni lu anyaritae Gerichon, ka Koas, ta Merari. Araakasi kesi taapaakech a ngimacharin alu elimokinitae ngirora kech. Araakasi ngikaru a Lawi lu ayarea amiat apei ka ngitomwon-uni ka ngikan-kaarei. Ayakasi Gerichon talokookeng ngiarei lu anyaritae Libini ka Chimei. Nakaneni ayakasi kesi ngalesea nakaalak. Ayakasi Koas talokookeng nguomwon anyaritae Amuram, ka Ichar, ka Eburon, ta Usiel. Araakasi ngikaru lu ayarea Koas amiat apei ka ngitomwon-uni ka nguuni. Ayakasi Merari talokookeng ngiarei lu anyaritae Mali ka Muchi. Araakasi kesi ngimacharin a Lawi ka ngalesea kech. Kiut Amuram nakaatokeng a apakeng na anyaritae Yokebed. Kidou Yokebed Aron ka Musa. Araakasi ngikaru a Amuram lu ayarea amiat apei ka ngitomwon-uni ka ngikan-kaarei. Ayakasi Ichar talokookeng nguuni lu anyaritae Kora ka Nepeg, ta Sikiri. Ayakasi Usiel dang talokookeng nguuni lu anyaritae Michael, ka Elisapan, ta Sisiri. Kiut Aron Elicheba, nakookeng a Aminadab, tarai nakaatokeng a Nachon. Kidou Elicheba Nadab, ka Abiu, ka Eleasar, ta Isamar. Ayakasi Kora talokookeng nguuni lu anyaritae Asiri, ka Elikana, ta Abiasap. Araakasi kesi taapaakech a ngawiyei a ekitela a Kora. Kiut lokookeng a Aron lo anyaritae Eleasar nakookeng a Putiel. Kidou ngesi Pineas. Eraakasi lugu ngikapolok a ngawiyei ka ngadakarin a ekitela a Lawi. Aron ka Musa kesi lu alimokini Ekapolon Akuj tama, “Torikosi ngitela a Ngisirael topudosi alo Misiri.” Kesi lu alimokinete ekapolon a Misiri atamar talachak Ngisirael. Na esuruorea Ekapolon Akuj Musa anakwap a Misiri, tolimok tama, “Arai ayong Ekapolon Akuj. Tolimok ekapolon a Misiri ngakiro daang nguna kalimokini ayong iyong.” Nakaneni tatachu Musa tama, “Iyeni iyong atamar kakuruworit ayong ekiruor. Ikokini ekapolon a Misiri iirari ngakiro kang ai?” Tolimok Ekapolon Akuj Musa tama, “Kesikokini ayong iyong Akuj ani a ekapolon a Misiri. Nakaneni isuruori lokaatokon Aron ngesi loger a ekadwaran kon. Tolimok Aron ngakiro daang nakadungok ayong iyong, sodi tolimok ngesi ekapolon atamar kimiek Ngisirael torotokis anakwap keng. Nakaneni etiliwori ayong ekapolon lo ichanana noi. Ewouni ngesi akiirar ngakiro kus tani kisuba esi ngakitoodikinet naketubulok alo Misiri. Nakaneni ayauni ayong eriras loaronon lotunga a akwap a Misiri, sodi epud ngitela a ngitunga kang anakwap kangina. Eyenunete nabo Ngimisiri atamar arai ayong Ekapolon Akuj, na asubakinea ayong Ngimisiri ngakiro naaronok epud Ngisirael anakwap kech.” Tosuba Musa ka Aron na adungokinit Ekapolon Akuj. Ngirwa lu eruorotor kesi ka ekapolon a Misiri, araakasi ngikaru a Musa ngitomwon-kauni, taraakas ngikaru a Aron ngitomwon-kauni ka nguuni. Tolimok Ekapolon Akuj Musa ka Aron tama, “Ani kesaki ekapolon tosuba esi ngakitoodikinet nakailiilok kidodiunotor anikeng, tolimok Aron tolem aburo keng tachakak kwap ngaren ekapolon, nakaneni ilocho aburo toliwor emun.” Sodi toloto Musa ka Aron nia ekapolon tosuba loger lo adungokinitor Ekapolon Akuj. Tachakak Aron aburo keng kwap ngaren ekapolon a Misiri ka ngikasubak etich keng, sodi kilochokin aburo toliwor emun. Tanyarau ekapolon ngitunga lukoosok ka ngikasubak, apot ngimurok a Misiri dang tomuroto tosuba ngakiro napei nguna. Tachakakis kesi ngaburoi kech kwap sodi kilochos ngaburoi toliworos ngimunio. Nakaneni kiliko aburo na Aron nakech. Sodi torubak ekapolon ichanana noi, towou akiirar ngakiro, loger losek alimokinitor Ekapolon Akuj Musa ka Aron. Ngaakot Sodi tolimok Ekapolon Akuj Musa tama, “Ichanana ekapolon a Misiri noi, ewounit akimiekin ngitunga toloto. Kape nia ekapolon nataparach na elosio ngesi nangolol a Nili. Tolem aburo na elochio toliwor emun, sodi towo iyong alokipetot kidaru ngesi. Tolimok ekapolon kona, ‘Ekapolon Akuj, na erai Akuj a Ngieburaniae, ngesi kameu ayong alimokin iyong atamar kimiek ngitunga keng toloto akipeyore ngesi anariet. Nakaneni iwou iyong akiirar ngakiro keng tani tokona. Tokona bocha ekapolon, ebala Ekapolon Akuj iyenuni iyong atamar arai ngesi ngae kotere ngakiro na esubakini ngesi. Kingolik a, arami ayong ngakipi a aburo kana, nakaneni ilochosi ngakipi toliworos ngaakot. Etoakete ngikolia, sodi tobos angolol tul tongop Ngimisiri kona emaase ngakipi.’ ” Tolimok Ekapolon Akuj Musa tama, “Tolimok Aron tolema aburo keng sodi kikea alo kidiama ngangololin, ka ngiporotoi a ngangololin, ta ngabwelin na eyakasi Misiri. Eliworosi ngakipi ngaakot. Epete ngaakot lowaitin daang a akwap. Epete tani loboro lu esubitae a ngakito ka lu esubitae a ngamoru.” Apot Musa ka Aron tosuba ngakiro na adungokinit Ekapolon Akuj. Kikea Aron aburo keng taram ngakipi a angolol alongaren ekapolon ka ngikasubak etich keng. Kilochos ngakipi daang toliworos ngaakot. Totoaka ngikolia daang anangolol, sodi tobos angolol tul tongop Ngimisiri kona emaase ngakipi. Pena ngaakot lowaitin daang a Misiri. Tosuba ngimurok dang ngakiro napei nguna kotere amuronot kech. Nakaneni kichananer ekapolon a Misiri noi. Towou ngesi akiirar ngakiro, loger losek alimokinitor Ekapolon Akuj Musa ka Aron. Abu ngesi torei tobongo kai keng, nyekachikina ngakiro nguna. Toboka Ngimisiri daang ekwaas a ekipetot esakete ngakipi namatan, kainyo peapedorete kesi akimat ngakipi a angolol. Tadaunos ngirwa ngikan-kaarei na aramea Ekapolon Akuj ngakipi a angolol. Abu Ekapolon Akuj tolimok Musa tama, “Kape nia ekapolon a Misiri tolimok kona, ‘Kimiek ngitunga kang toloto akipeyore ayong. Ani kiwou iyong, erirae ayong akwap kon atoburuchia a ngakidodoka. Ilelebunosi ngakidodoka nangolol a Nili. Epote ngakidodoka nguna tolomasi kai kon, ka namaniat na iperi iyong, ta lokitanda kon. Elomarete tani nakais a ngikasubak etich kon ka ngitunga kon, ta lokenoi ka ngapalaranga na imaare ngamugati. Kiporokinosi iyong ka ngitunga kon, ta ngikasubak etich kon daang.’ ” Tolimok Ekapolon Akuj Musa tama, “Tolimok Aron kikea aburo keng alokidiama ngangololin, ka ngiporotoi a ngangoloni ta ngabwelin, sodi pot ngakidodoka toburuchiasi akwap a Misiri.” Kikea Aron aburo alokidiama ngakipi daang, pot ngakidodoka toburuchiasi akwap. Nakaneni tomuroto ngimurok sodi topedosi kesi dang ayaun ngakidodoka nakwap. Tanyarau ekapolon a Misiri Musa ka Aron tolimok tama, “Kilipa Ekapolon Akuj tolema ngakidodoka nugu, nakaneni emiekini ayong ngitunga toloto kipeyokis Ekapolon Akuj.” Tatachu Musa tama, “Alakar ayong kelipakini iyong. Tolim iyong esaa lo kelipakinea ayong iyong, ka ngikasubak etich kon, ta ngitunga kon. Nakaneni itwarakinio ngakidodoka, mam na idongete mati na eyakasi nangolol a Nili.” Tatachak ekapolon tama, “Kilipakinae ayong moi.” Tolim Musa tama, “Asubakini ayong loger lo ibalar iyong, sodi toyenea iyong atamar emam akuj ikwaan ka Ekapolon Akuj, na erai Akuj kosi. Itwarakinio ngakidodoka anikon ka ngikasubak etich kon. Emam na idongete mati na eyakasi nangolol a Nili.” Torotokis Musa ka Aron ani ayei ekapolon a Misiri. Sodi kilip Musa Ekapolon Akuj tolimok atamar tolema ngakidodoka na ayauni ngesi nia ekapolon. Tosub Ekapolon Akuj loger lo alimokinitor Musa. Totoaka ngakidodoka na ayakasi nakais, ka nalaarin, ta na ayakasi naroatin. Tosenokis Ngimisiri kesi wapei totukokinos, sodi tobos akwap tul. Ani ingolikini ekapolon a Misiri atamar atoaka ngakidodoka, kichananer ngesi nabo noi. Towou ngesi akiirar ngakiro, loger losek alimokinitor Akuj Musa ka Aron. Ngikatuur Tolimok Ekapolon Akuj Musa tama, “Tolimok Aron taram ngalup a aburo keng, nakaneni ibelo apua daang anakwap a Misiri toliwor ngikatuur.” Taram Aron ngalup a aburo keng, sodi kibelei apua daang anakwap a Misiri toliwor ngikatuur, lu aburuchiarete ngitunga ka ngibaren. Tomuroto ngimurok esakete ngikatuur pot, nakaneni tokuruwo. Ayakasi ngikatuur wadaang. Tolimokis ngimurok ekapolon tamasi, “Akuj asub nugu!” Nakaneni kichananer ekapolon noi towou ngesi akiirar ngakiro, loger losek alimokinitor Ekapolon Akuj Musa ka Aron. Ngichuch Tolimok Ekapolon Akuj Musa tama, “Kape moi nataparach elilim kidaru ekapolon elosi nangolol, tolimok ngesi atamar ebala Ekapolon Akuj kona, ‘Kimiek ngitunga kang toloto kepeyonokis ayong. Kechikichiki iyong atamar ani kiwou iyong, kerirae ayong iyong atomeu ngichuch nikon ka ngikasubak etich kon, ta ngitunga kon. Ilelebunosi ngichuch nakais a Ngimisiri, nabo eburuchiarete ngalup. Nakaneni emiekini ayong ni enyaritae Gochen ni elomito ngitunga kang, nyepete ngichuch inaa. Asubakini ayong nguna sodi toyenea iyong atamar ayong Ekapolon Akuj, asubi etich anakwap kana. Atiaki ayong ngitunga kang ka lukon. Esubakin akitoodikinet nakailiilon naga moi.’ ” Tomea Ekapolon Akuj asepich a ngichuch kai a ekapolon ta ngakais a ngikasubak etich keng. Kinyasut ngichuch akwap a Misiri daang. Sodi tanyarau ekapolon Musa ka Aron tolimok tama, “Kipeyonokisi Akuj kus ngakipeyos anakwap kana.” Tatachu Musa tama, “Nyejoikina kikokini neni kainyo engoyete Ngimisiri na ingolikineta ngibaren lu kipeyoo sua Ekapolon Akuj, na erai Akuj kosi. Ani kilemu sua ngibaren ngulu epeyoto ani kiteeto Ngimisiri, engoyete kesi kimasa sua a ngamoru kitaar. Kimiekinae sua atoloto a ngirwa a nguuni nariet akipeyore Ekapolon Akuj, na erai Akuj kosi, loger lo kidungokinitor ngesi sua.” Tolim ekapolon tama, “Kemiekini ayong esi toloto akipeyore Ekapolon Akuj, na erai Akuj kus anariet, arai pekilot esi nikalonan. Kilipakinae ayong.” Tatachak Musa ngesi tama, “Napei tokona arotokinio ayong, elipi Ekapolon Akuj torotokis ngichuch anikon, ka ngikasubak etich kon, ta ngitunga kon. Nakaneni nyikingal sua nabo sodi kiratak ngitunga nyeelot akipeyore Ekapolon Akuj.” Torotok Musa ani a ekapolon a Misiri sodi kilip Ekapolon Akuj. Tosubak Ekapolon Akuj ngakiro na elipi ngesi. Torotokis ngichuch ani a ekapolon, ka ngikasubak etich keng, ta ngitunga keng. Emam tani eechut epei abu kidong. Nakaneni tani esaa ngolo dang, kichananer ekapolon noi. Towou ngesi akimiekin ngitunga toloto. Tolimok Ekapolon Akuj Musa tama, “Kape nia ekapolon tolimok atamar Ekapolon Akuj na erai Akuj a Ngieburaniae ebala kona, ‘Kimiek ngitunga kang toloto kepeyonokis ayong. Ani kiwou nabo iyong akimiekin kesi toloto, kerirae ayong Ekapolon Akuj iyong ayau edeke loaronon lobaren kon lu eraakasi ngangolei, ka ngisikiria, ka ngikaala, ka ngaatuk, ka ngamesekin, ta ngaanei. Atiaki ayong ngibaren a Ngisirael ka lua Ngimisiri. Emam ibarasit ni erai ika Ngisirael ni etoani. Atiaku ayong Ekapolon Akuj atamar moi asubea ngakiro nguna.’ ” Ani enangi akolongit na a ngaarei, tosubak Ekapolon Akuj ngakiro na alimunit atamar asubakini. Totoaka ngibaren daang a Ngimisiri, nakaneni emam ibarasit a Ngisirael tani ipei ni abu totoan. Kingis ekapolon a Misiri ngakiro na asubakinosi, sodi tolimokinae ngesi atamar emam ngibaren lua Ngisirael tani ipei ni abu totoan. Nakaneni kichananer ekapolon noi towou akimiekin ngitunga toloto. Ngilepunae Sodi tolimok Ekapolon Akuj Musa ka Aron tama, “Tomudutu ekuron anadui ana erirae ngamudunet ngadi ileleba ngakan. Kiala Musa kidiama alongaren ekapolon. Epetakin ekuron ngolo akwap a Misiri wadaang loger a apua. Iturupuni ekuron ngolo ngilepunae lu ebulete toliworos ngajemei alotunga ka ngibaren.” Sodi tolemut kesi ekuron towaa alongaren ekapolon. Kiala Musa ekuron kidiama, toruput ngilepunae lu aliworosi ngajemei alotunga ka ngibaren. Peapedorete ngimurok akiwo alongaren Musa, kainyo abutakina kesi ngilepunae, loger a Ngimisiri aluche. Nakaneni kitiliwo Ekapolon Akuj ekapolon a Misiri lo ichanana noi sodi towou akiirar ngakiro, loger losek alimokinitor Ekapolon Akuj Musa ka Aron. Ngamoru a akiru Sodi tolimok Ekapolon Akuj Musa tama, “Kape moi nataparach elilim taanyu ekapolon a Misiri tolimok atamar ebala Akuj a Ngieburaniae kona, ‘Kimiek ngitunga kang toloto akipeyonokin ayong. Nyerirae tokona ayong ngikasubak etich kon ka ngitunga kon make, nakaneni kerirae ayong iyong dang sodi toyenunea iyong atamar emam itwaan iche ikoni ayong anakwap kadaang. Arai kolong ekea ayong akan kang ayau edeke nikon, ka ngitunga kon, kimunyara esi. Nakaneni ani kona asakea ayong akidodikin iyong agogongu kang, abu ayong kemiek iyong toyar sodi topetakinor ekipur kang nakwap daang. Nakaneni eringa iyong iwoga nabo iwounit akimiekin ngitunga kang toloto. Ani moi enangi esaa lo ikoni lo tokona logo, ayauni ayong ekuwam ka akiru na ngamoru nakaalan. Nyerama akiru na ikoni ngina nakwap a Misiri nakanuan. Tolim tokona atamar ngibaren kon daang ka ibore daang ni eyei nikalapatan, kilomakinae kai. Echakakinosi ngamoru a akiru lotunga ka ngibaren lu imiekinitae anikalapatan nyilomuna tooma, nakaneni etoakete kesi.’ ” Toema ngikasubak etich a ekapolon a Misiri ngiche kotere ngakiro na alimuni Ekapolon Akuj. Kilomakis kesi ngikedalak kech ka ngibaren tooma nakais. Nakaneni apot ngiche nyeekachikis ngakiro na echikichikar Ekapolon Akuj, sodi kimiekis ngikedalak kech ka ngibaren anikalapatan. Tolimok Ekapolon Akuj Musa tama, “Kikea akan kon kidiama sodi tachakun ngamoru a akiru kidiama akwap a Misiri wadaang. Echakakinosi lotunga ka ngibaren, ta ibore daang ni erupunit alokwap.” Sodi kikea Musa aburo keng kidiama, yau Ekapolon Akuj agiro ka akiru na ngamoru, kimileu akwap. Yau Ekapolon Akuj ekuwam ka ngamoru a akiru nakaalak, kimileu wadaang. Emam ekuwam loaronon ikoni ngolo lo amin Misiri nakanuan. Kimasakinos ngamoru a akiru nibore daang ni ayei nikalapatan anakwap a Misiri, napei alotunga tanang lobaren. Kimasa ngamoru a akiru nginyia daang anaroatin ka aukor ngikito daang. Ewae loa Gochen bon lo alomito Ngisirael ngesi nyerama akiru na ngamoru. Tomea ekapolon itwaan tanyara Musa ka Aron tolimok kesi tama, “Asechit tokona ayong nyeesechite Ekapolon Akuj. Kisechit ayong ka ngitunga kang. Kilipa Ekapolon Akuj! Kibela sua agiro naga ka akiru na ngamoru. Kalimokinit ayong esi atamar kemiekini toloto, nyeringa nabo esi iboikinosi nege.” Tolimok Musa ngesi tama, “Napei apudorea ayong alore, ekeari ayong ngakan kidiama elip Ekapolon Akuj. Edaun agiro ka akiru na ngamoru, sodi toyenea iyong atamar erai akwap aka Ekapolon Akuj. Nakaneni ayeni ayong atamar nyikerito iyong ka ngikasubak etich kon Ekapolon Akuj na erai Akuj.” Kinyasun ngikito lu edonyuunere ngiworui ka ngimomwa kainyo akokito ngimomwa, toturoote ngikito lu edonyuunere ngiworui. Nakaneni nyinyasuna ngakanoi kainyo ekokeenete ekisidi. Torotok Musa ani a ekapolon topudo alore, sodi kikea ngakan keng kidiama ilipit Ekapolon Akuj. Tadaun agiro, ka ngamoru a akiru, ta akiru. Ani ingolikini Ekapolon a Misiri na asubakinosi, tosech nabo. Toliworos ngesi ka ngikasubak etich keng lu ichanaka kona palem sek. Towou ekapolon a Misiri akimiekin Ngisirael toloto, loger losek alimokinitor Ekapolon Akuj Musa. Sodi tolimok Ekapolon Akuj Musa tama, “Kape taanyu ekapolon. Etiliwo ayong ngesi ka ngikasubak etich keng lu ichanaka noi, sodi atosubea ngakitoodikinet nakailiilok nugu anikech, sodi tolimokineta esi ngide kus ka ngitatae kus eger lo etabangaaniarea ayong Ngimisiri na asubea ngakitoodikinet nakailiilok. Iyenunete esi daang atamar arai ayong Ekapolon Akuj.” Sodi toloto Musa ka Aron nia ekapolon tolimokis tamasi, “Ebala Ekapolon Akuj, na erai Akuj a Ngieburaniae kona, ‘Irubakini iyong iwounit akitiditeun anikeng tanang ori? Kimiek ngitunga kang toloto kepeyokis ayong. Ani kirubak iyong iwounit, ayauni ayong emaase nakwap kon moi. Elalakearosi kesi noi toburuchiasi ngalup. Enyamete kesi ibore daang ni nyinyasuna ngamoru a akiru, tani ngikito lu idongito. Ilelebunosi kesi nakais kon ka nakais a ngikasubak etich kon kadaang, ta ngitunga kon daang. Erokearosi kesi noi akidwang ibore daang ni aanyungasi taapakon nakanuan.’ ” Sodi torei Musa torotok. Apot ngikasubak etich a ekapolon a Misiri tolimokis ekapolon tamasi, “Kichani itwaan en ngoni tanang ori? Kimiek Ngisirael toloto kipeyonokis Ekapolon Akuj, na erai Akuj kech. Nyeyena iyong atamar enyasun akwap a Misiri a?” Sodi tobuunae Musa ka Aron nia ekapolon, tolimok ngesi kesi tama, “Kapesi kipeyonokisi Ekapolon Akuj, na erai Akuj kus. Alutunga mono eloose?” Tatachak Musa tama, “Kilosi sua daang, ka ngide kosi, aapei ta ngitunga lumojong. Kirukori ka talokookosi ka tanakookosi, atorujasi ngamesekin, ka ngaanei, ta ngaatuk, kainyo kilosi sua akisub esukukuu lo kirimar Ekapolon Akuj.” Tolim ekapolon tama, “Ekongi ayong alimit Ekapolon Akuj atamar nyekemiekini ayong esi irukorete ka ngaberu kus ta ngide! Idodiunit ibore ngini atamar eyakasi ngakiro naaronok isakete esi asubakin. Mam! Toloto ngikiliok make akipeyonokin Ekapolon Akuj kerai ibore ni isakete esi ngini.” Sodi kitwarakinae Musa ka Aron ani a ekapolon. Tolimok Ekapolon Akuj Musa tama, “Kikea akan kon kidiama bu emaase nakwap a Misiri. Epote kesi tadaka ibore daang ni erupunit, ibore daang ni abuchun anamoru a akiru.” Sodi kikea Musa aburo keng, yau Ekapolon Akuj ekuwam alo kide tokutak akwap apaaran juui towar, ta akwaar kiiya kiwala. Ani enangi nataparach, torukaunae ekuwam keyau emaase. Pot kesi a ngasepicho topetakin akwap wadaang. Arai asepich a emaase nakaalan noi nakolong nyeanyungara a ache kori nyeanyungario nabo. Toburuchia amaase akwap toribok ngalup. Kirika emaase ibore daang ni aisikinete ngamoru a akiru, kirika tani ageor na ayei lokito. Emam ibore nikaliban ni abu kidong lokitoe tani epei kori emam enyait edongit nakwap daang a Misiri. Sodi tanyarau ekapolon Musa atipei tolimok tama, “Asechakinit ayong Ekapolon Akuj, na erai Akuj kus, ka esi dang. Torimakisi tokona akisech kang arimakinet naga bon, sodi kilipa Ekapolon Akuj, na erai Akuj kus tolema eriras lokaaran logo anikang.” Torotok Musa ani a ekapolon tolot kilip Ekapolon Akuj. Nakaneni kibele Akuj ekuwam loa akide toliwor ekuwam lotiapolon a atoo, lo akutari emaase tachaka nanam a Chamu. Emam tani emaase epei abu kidong nakwap a Misiri. Nakaneni kitiliwo Ekapolon Akuj ekapolon a Misiri lo ichanana noi, towou akimiekin Ngisirael toloto. Aribu Tolimok Ekapolon Akuj Musa tama, “Kikea akan kon kidiama, ebuni aribu nakirion chuch toburuchia akwap daang a Misiri.” Kikea Musa akan keng kidiama, sodi toribok akwap daang a Misiri chuch a ngirwa a nguuni. Tongop ngitunga a Misiri kona eanyungarete luche, emam itwaan abu torotok alokai keng esaa ngolo. Nakaneni ayei akicha ni alomito Ngisirael. Tanyarau ekapolon a Misiri Musa tolimok tama, “Kapesi kipeyoto Ekapolon Akuj. Kirukosi tani ka ngide kus, ta ngaberu kus. Nakaneni idongete ngamesekin kus, ka ngaanei, ta ngaatuk.” Tatachak Musa tama, “Nakinae robo iyong sua ngibaren lu kipeyoo Ekapolon Akuj, na erai Akuj kosi. Kiramari sua ngibaren kosi, emam tani ipei ni idongi. Kiseuni sua ngikulepek ngibaren lu kipeyoo Ekapolon Akuj, na erai Akuj kosi. Nakaneni ani eringa sua nyenanga inaa, nyikiyeni atamar alubaren kipeyoo Akuj.” Kitiliwo Ekapolon Akuj ekapolon a Misiri lo ichanana noi, towou akimiekin kesi toloto. Tolimok ekapolon Musa tama, “Kape kane! Tochoite kisingolikin ayong nabo! Akolongit nakengolikinea ayong iyong, itoani iyong!” Tatachak Musa tama, “Iyook iyong nguna. Nyikianyungari iyong ayong nabo.” Tolimok Ekapolon Akuj Musa tama, “Ameuni ayong eriras epei bon ni eyei ekapolon a Misiri ka ngitunga keng. Ani erumor kimiek ngesi esi toloto. Kitwarakini ngesi esi daang kane. Kape tokona kiruoro ka Ngisirael tolimok kesi atamar toloto nia ngikidunyet kech kiliput asir a ngasua ka na egolit.” Kitiliwo Ekapolon Akuj Ngimisiri lu idodiunito arimatoi ani a Ngisirael. Engolikinito ngikasubak etich a ekapolon a Misiri ka ngitunga daang atamar arai Musa itwaan ni eyenikinitae noi. Sodi tolimok Musa ekapolon tama, “Ebala Ekapolon Akuj kona, ‘Kiding akwaar, etori ayong kiding akwap a Misiri. Etoani ikoku nisapat daang ni ekingaren anakwap a Misiri, napei ani eyei lokookeng a ekapolon a Misiri lo irumi apolou, tanang nia lokookeng a aberu anakedalan erai akerian ngikinyam. Tani ibarasit ni erai ika ekingaren euriunio, etoani. Emini akigoro naaronon nakwap daang a Misiri, nyemino akigoro na ikoni ngina a ache kori nyemini nabo jik. Nakaneni nyikomokini tani nyiingok ani eyakasi Ngisirael kori nyerukinete tani ngibaren kech. Sodi toyeneta esi atamar atiakit ayong Ekapolon Akuj Ngimisiri ka Ngisirael.’ ” Tolim Musa ngakiro narumoret tama, “Epote ngikasubak etich kon daang kijuuruoto alongaren kang, sodi kemaima ayong esakete atoriko ngitunga kang daang atolot. Ani ekisidi kanguna, anyouni ayong atolot.” Sodi torotok Musa ani a ekapolon a Misiri engoit noi. Alimokini sek Ekapolon Akuj Musa tama, “Erubakini ekapolon ewounit akiirar ngakiro kus, sodi atosubea ayong ngakitoodikinet nakailiilok nakaalak alo Misiri.” Tosuba Musa ka Aron ngakitoodikinet nakailiilok alongaren ekapolon, nakaneni kitiliwo Ekapolon Akuj ekapolon a Misiri lo ichanana noi, sodi towou ngesi akimiekin Ngisirael torotokis anakwap keng. Esuruori Ekapolon Akuj Musa ka Aron alo Misiri tolimok tama, “Erai elap logo elap lo ekingaren a ngilapio a ekaru kus. Tolimokisi Ngisirael daang atamar, akolongit na ngatomon a elap kalo, elemuni itwaan daang imesek nikile kori ikale kotere ngitunga a awi keng. Ani kekidioko ngitunga a awi a apei, pekepedorete akirikar ibarasit ipei, tolemut ngesi ka ekidunyet keng ibarasit, tomora itemem ka ekimar a ngitunga ka etiae lo epedori itwaan daang akinyam. Iseuni iyong anamesekin kori anaanei, nakaneni ejoikinit erai ni ekaru a epei, nikile ni emam ni ichwangakina. Ani nakwaare a akolongit ana ngatomon ka ngoomwon a elap, earete Ngisirael daang ngibaren. Elemunete ngitunga ngaakot ngache kiwasakis lowaitin ngiarei a ngidorin ka ewae lo alokidiama a ngidorin a akai ana enyameta kesi akiring a ngibaren. Akolongit ngina nakwaare, epeyo akiring tanyamae aapei ka ngikito luadwarak ta ngamugati na emam ekitoe lo itubui. Tochoito inyamete tani nadiochichi ejon kori ipotoi, nakaneni topeo daang imorikina aapei ka akou, ka ngakejen, ta ngiboro a akook. Nyiimiekis tani nadiochichi eperi kiwalak. Ani keyei na eperi kiwalak ejoikinit inomio. Ejoikinit esi inyamete ikirikirasi, tanapa ngiworui ka ngamuk na inyounitotor alosit, ka akiting aburo, kainyo erai akolongit ngina esukukuu a Adeparet kang, nakarimare ayong, Ekapolon Akuj. “Akolongit ngina nakwaare, etori ayong kiding akwap a Misiri, aari iuriuna ni ekingaren daang ni erai ikile, alotunga ka ngibaren. Nakaneni erirae ayong ngakujo daang a akwap a Misiri. Arai ayong Ekapolon Akuj. Eliworosi ngaakot na iwasakinio lowaitin luarei a ngidorin emachar lo idodiuni ngakais na iyakasi esi. Na aanyungarea ayong ngaakot, kadepari ayong esi nyakawan na eriraa Ngimisiri. Ejoikinit esi itamununete akolongit naga toliwor akolongit a esukukuu a Ekapolon Akuj. Toliworos itamununete jiik.” Tolim Ekapolon Akuj tama, “A ngirwa a ngikan-kaarei, inyamete esi ngamugati na emam ekitoe lo itubui. Akolongit na ekingaren, tolemasi ekitoe lo itubui ngamugati anakais kus. Ani kenyam itwaan ngamugati na eyei ekitoe lo itubui, ngirwa lukan-kaarei ngulu, nyeringa itwaan ngini imarunitae atamar erai itwaan kang. Akolongit na ekingaren ka na ngakan-kaarei, ejoikinit esi iriameenete kipeyonokis Akuj. Emam etich esubio ngirwa ngulu, nakaneni ipedorete esi akipore na erai akimuj. Kirichakisi esukukuu a ngamugati anapadok kainyo erai akwaar ngina ngesi kolong epudunio ayong ngitela kus anakwap a Misiri. Kitamuunutu akwaar naga jiik toliwor akwaar a esukukuu. Atabong a akolongit ana ngatomon ka ngoomwon a elap alo ekingaren tanang ebong a akolongit ana ngatomwon-arei ka apei, nyiinyam ngamugati na eyei ekitoe lo itubui. A ngirwa a ngikan-kaarei, tolemasi ekitoe lo itubui ngamugati anakais kus, kainyo ani kenyam itwaan ngamugati na eyei ekitoe lo itubui, nyeringa itwaan ngini imarunitae atamar erai ipei a ngitunga kang alu eraakasi Ngisirael, tani kerai ngesi itwaan ni nyerai akwap ngina akeng, kori kerai ika akwap kangina. Nyiinyam ibore ni iwaakinitae ekitoe lo itubui. Anakais kus kadaang, tanyama ngamugati na emam ekitoe lo itubui.” Tanyarau Musa ngikarikok a Ngisirael daang sodi tolimok tama, “Toseu ipei kus daang imesek kori ikale taar, sodi tanyameta ngitunga a ngawiyei kus esukukuu a Adeparet. Tolemutu akuyen a ekitoe enyaritae isopo,*g** kirepakis natubwa nachukul na eyakasi ngaakot a ibarasit, sodi kiwasakis ngaakot lowaitin luarei a ngidorin ka ewae loa alokidiama a ekidor a akai. Nyeerotok itwaan tani ipei anikus tanang nataparach. Ani itori Ekapolon Akuj kiding akwap a Misiri taar Ngimisiri, ingolikini ngesi ngaakot alokidiama ngidorin ka ngiwaitin luarei a ngidorin, sodi nyiimiek ngesi emalaikat a akitu elomari nakais kus sodi kitaar esi. Ejoikinit esi ka ngide kus iwapete ngitalio lugu jik. Ani ilomarete esi nakwap nakichikak esi Ekapolon Akuj atamar kiinakini, ejoikinit esi irichakinete etal ngolo. Ani kingita esi ngide kus tamasi, ‘Nyo eger a ngakiro kanu?’ Itachakinete esi kesi tamasi, ‘Erai akipeyos a Adeparet na erimare Ekapolon Akuj, kainyo adepari kolong ngesi ngakais a Ngisirael alo Misiri. Aari ngesi Ngimisiri kimiek sua.’ ” Toriediko Ngisirael kilipa. Sodi toloto kesi akisub na adungokini Ekapolon Akuj Musa ka Aron. Ani enangi kiding akwaar, taar Ekapolon Akuj ngide lusapa daang lu ekingaren a Ngimisiri. Napei ani eyei lokookeng a ekapolon a Misiri, alo arai ekeruman apolou, tanang ni ayei lokookeng a itwaan ani aenitae alojela. Taarae tani ngiuriuna lu ekingaren a ngibaren kadaang. Akolongit ngina nakwaare, tokienyut ekapolon ka ngikasubak etich keng. Ayei echale a akigoro lowaitin daang a Misiri, kainyo amam akai tani apei napeatoanitor ikoku nisapat. Akolongit ngina nakwaare, tanyarau ekapolon a Misiri Musa ka Aron tolimok tama, “Kapesi esi ka Ngisirael kus! Torotokisi anakwap kang, toloto kipeyonokis Ekapolon Akuj, loger lokolong ibalatar esi. Torujasi ngamesekin, ka ngaanei, ta ngaatuk, sodi toloto. Kilipakinae ayong dang katopiar.” Kibunyakis Ngimisiri ngitunga esakete torotokis alo Misiri, tamasi, “Kitoaki sua daang erai pekirotokis esi.” Sodi kilelebikis ngitunga ngamugati na emam ekitoe lo itubui, kiwaakis napalaranga na imaare ngamugati, kilukakis loworui, sodi toriongakis losegeta. Kepot Ngisirael tosuba ngakiro nasek alimokini Musa. Kiliput kesi Ngimisiri asir a ngasua ka na egolit, ta ngiworui. Kitiliwo Ekapolon Akuj Ngimisiri lu idodiunito arimatoi ani a Ngisirael, sodi nakis kesi ngiboro lu asakete. Tolemasi Ngisirael ebari a Ngimisiri a eger kangolo. Torotokis Ngisirael a ngakejen alo Rameses tananga Sukos. Araakasi kesi ngikiliok ngabunge ngamiae ngakan-kapei, peimarunitae ngaberu ka ngide. Kirukosi kesi ka ngitunga luche lukaalak, emeto ngamesekin, ka ngaanei, ta ngaatuk dang. Kimata kesi a akim ngamugati na emam ekitoe lo itubui, a ngakiria ana ayaunete kesi alo Misiri, kainyo etwarakinio kesi alo Misiri atipei tongopik kona esubakinete akimuj kech ka akidorokin ngamugati na eyei ekitoe lo itubui. Alomito Ngisirael Misiri a ngikaru a ngamiae a ngoomwon ka ngitomwon-uni. Ani akolongit na adaunotor ngikaru ngamiae ngoomwon ka ngitomwon-uni, torotokis ngitela daang a ngitunga a Ekapolon Akuj alo Misiri. Akolongit ngina nakwaare, ngesi achoikinea Ekapolon Akuj Ngisirael kipud alo Misiri. Itiliworitae akwaar a akolongit kangina aka Ekapolon Akuj jik, na erai ekienyeneta Ngisirael. Tolimok Ekapolon Akuj Musa ka Aron tama, “Ngitalio a esukukuu a Adeparet lugu, emam itwaan ni nyerai ika akwap kus ni enyami akimuj a Adeparet. Nakaneni enyami ekedalan daang lo igielunete esi erai kilengera esi ngesi mono. Nyenyami ekaloton kori ekasuban etich akimuj ngina. Enyamio akimuj ngina daang alokai ana ipoore, nyenyamio anikalapatan. Nyebelio ngakoyo a ibarasit. Enyamete Ngisirael daang akimuj a esukukuu kangolo. Nakaneni nyenyami ekile lo nyilengeritae. Ani keyei itwaan ni nyerai ika akwap kus ni alom nakwap kus tasaki akinyam akimuj a esukukuu a Adeparet idodikinitor Ekapolon Akuj arimatoi, ejoikinit esi ilengerete mono ngikiliok lu eyakasi nawi keng. Sodi kisikokinae ngesi itwaan ni idounitoe erai Esiraelit, toliwor enyameene akimuj a esukukuu a Adeparet. Iwapete Ngisirael ngikulepek ka ngitunga lu nyerai ngika akwap kus lu elomete nakwap kus, ngitalio ngulu.” Kiwapa Ngisirael daang ka akisub ngakiro na adungokinit Ekapolon Akuj Musa ka Aron. Akwaar ngina, kipud Ekapolon Akuj ngitela a Ngisirael anakwap a Misiri. Tolimok Ekapolon Akuj Musa tama, “Kitaleu ngiuriuna lukiliok idounio ekingaren daang toliworos ngikang. Ikoku nisapat daang idounio ekingaren alo Isirael, ka ibarasit nikile euriunio ekingaren daang, erai ikang.” Tolimok Musa ngitunga tama, “Kitamutu akolongit naga. Erai akolongit naga nakolong irotokinioto esi alo Misiri, na erai akwap nakolong iraakatar esi ngikedalak. Akolongit naga ngesi nakolong kipudunio esi Ekapolon Akuj a agogongu anaationon. Nyiinyam ngamugati na eyei ekitoe lo itubui. Irotokinete esi alo Misiri akolongit naga, alolap alo ekingaren enyaritae Abib kalo. Ekongi kolong Ekapolon Akuj kichikak taapa kus atamar kiinakini esi akwap a Ngikanaan, ka Ngiiti, ka Ngiamor, ka Ngiipi, ta Ngiebus. Nakiyaunea ngesi esi nakwap na ileleba ngakile ka akimiet a ao, ejoikinit esi inyamete akimuj a esukukuu kangolo elap lo ekingaren a ekaru kadaang. Inyamete esi ngamugati napadok a ngirwa a ngikan-kaarei, ani akolongit na ngakan-kaarei, emini esukukuu lo idodikinere Ekapolon Akuj arimatoi. A ngirwa a ngikan-kaarei, nyiinyam ngamugati na iwaakinitae ekitoe lo itubui. Nyejoikinit ekitoe lo itubui ngamugati kori ngamugati na eyei ekitoe lo itubui epete nakwap kus. Ani isiakini esukukuu, kisisak talokookon atamar isubi iyong nguna daang kotere ngakiro nakisubea iyong Ekapolon Akuj na irotokinio iyong alo Misiri. Eliworosi ngakiro na iwapi iyong nguna emachar lo eenikinitae nakan kon kori loreet kon. Kisitamuni iyong torubak isomae ka alimit etal a Ekapolon Akuj, kainyo kipuduni kolong ngesi iyong alo Misiri a agogongu anaationon. Tanyameene esukukuu ngolo ekaru daang, a esaa alo eseunitae. “Kiyauni Ekapolon Akuj iyong nakwap a Ngikanaan nakolong ekongi ngesi nabo kichikak taapakon. Nakiinakinea ngesi iyong, ejoikinit iyong italeuni iuriuna ni ekingaren nikile toliwor ika Ekapolon Akuj. Ibarasit nikile daang ni euriunio ekingaren erai ika Ekapolon Akuj. Nakaneni ejoikinit iyong ilokonyuuni ani a Ekapolon Akuj itasikiria nikile ni ekingaren kilokony a imesek anikile. Ani pekisaki iyong akilokonyuun itasikiria, tobil emosiring keng. Ejoikinit iyong ilokonyuuni ikoku nisapat daang ni ekingaren. Ani monan kingit iyong lokookon atamar nyoni iwapitere ngakiro nugu, itachakini iyong ngesi tama, ‘Kipuduni ngoni Ekapolon Akuj alo Misiri a agogongu anaationon. Kirai kolong ngoni ngikedalak anakwap kangina. Ani na aliworor ekapolon a Misiri lo ichanana noi, towou akimiekin ngoni atoloto, taar Ekapolon Akuj iuriuna nikile ni ekingaren daang anakwap a Misiri napei anitwaan tanang nibarasit. Ngakiro nguna kesi kilemanakinea ngoni Ekapolon Akuj ibarasit nikile ni euriunio ekingaren, sodi elokonyuutu ngide yok lusapa. Eliworosi ngakiro na kiwapi ngoni nguna emachar lo eenikinitae nakan yok ka loreetin yok. Kisitamuni ngoni atamar kipuduni kolong ngoni Ekapolon Akuj alo Misiri a agogongu anaationon.’ ” Ani imiekini ekapolon a Misiri ngitunga toloto, abu Akuj nyiisitor kesi lorot lo itori lokwaas a anam a akwap a Ngipilisti, lo arai erot louriyen. Etamit Akuj kona, “Nyasaki ayong ngitunga kibeleto ngitamen kech sodi tobongosi Misiri na ingolikineta atamar kilomakini kesi ejie.” Nakaneni abu Akuj kisilod kesi kitoro lorot lo itori nariet na eteni nanam a Chamu. Atingito Ngisirael ngiboro a ejie. Toting Musa akwaan a Yosep loger lokolong esikongio Yosep Ngisirael ichikichiki atamar kikokis neni. Alimuni Yosep tama, “Nakiyuunea esi Akuj, ejoikinit itingete akwaan kang tolemasi kane.” Torotokis Ngisirael alo Sukos toloma nasalunet a ariet ni enyaritae Esam. Ani naparan, kingarenik Ekapolon Akuj kesi eyei napir a edou, kidodik kesi erot. Ani nakwaare, kingarenik Ekapolon Akuj kesi eyei napir a akim, nak kesi akicha. Asubi Ekapolon Akuj kongina sodi tolooso kesi naparan ka nakwaare. Ayei apir a edou jiik ngaren ngitunga naparan, min apir a akim ngaren kech nakwaare. Sodi tolimok Ekapolon Akuj Musa tama, “Tolimok Ngisirael tobongosi toloma ngaren Piairos, nakidingos a Migidol ka anam a Chamu, diyete ni enyaritae Baal Sepon. Etamari ekapolon a Misiri kori ewowooto Ngisirael anakwap, eratak ariet. Etiliwori ayong ekapolon lo ichanana noi, sodi kiwapu esi. Nakaneni aanyuni ayong ekipur na edwangea ekapolon ka ngasigerea keng. Sodi toyenut Ngimisiri atamar ayong arai Ekapolon Akuj.” Tosubakis Ngisirael ngakiro nguna loger lo alimokinitere. Ani elimokinio ekapolon a Misiri atamar asiiwakis ngitunga, kibeleto ngesi ka ngitunga keng ngitamen kech tamasi, “Anukiro kisubak ngoni? Kimiek ngoni Ngisirael esiyete, nakaneni nyeringa tokona kesi eraakasi ngikedalak yok nabo!” Kitonyou ekapolon aurukuk keng a ejie na irit angole, ta ngasigerea keng. Kirukosi ngesi ka ngaurukukui keng daang na irito ngangolei, imorikina aapei ka ngaurukukui naajokak erito ngangolei na araakasi ngamiae ngakan-kapei na ameto ngikarikok a ngasigerea. Kitiliwo Ekapolon Akuj ekapolon a Misiri lo ichanana noi, sodi kiwap Ngisirael lu aloose ikileenikinit. Ngasigerea a Ngimisiri daang, ka ngangolei kech, ka ngaurukukui na irito ngangolei, ta ngikameak ngangolei, kiwapa kesi todolo ani alomito alokwaas a anam a Chamu, alo diyete Piairos ka Baal Sepon. Ani ingolikinete Ngisirael ekapolon a Misiri ka ngasigerea keng iwapuunito kesi, tobul kesi noi sodi kikaloikis Ekapolon Akuj esakete kingarak kesi. Kingita Musa tamasi, “Amam kolong ngalielin alo Misiri a? Nyo kiyaunea iyong sua nege atotoaka anariet? Kingolik tokona ngakiro na isub iyong ani kipudunio sua alo Misiri! Pekilimokinit kolong sua iyong eringa nyerotokino atamar esubakinosi nugu a? Kilimokinit sua iyong atamar kimiek sua ebooyoto alo Misiri kirai ngikedalak a Ngimisiri. Ejok aliwor ngikedalak kaina akidwang atoakere kane anariet.” Tatachak Musa kesi tama, “Warasi nyikibul! Toweikisi sodi taanyungasi ngakiro na esubakini Ekapolon Akuj kitoyuunea esi akolongit naga. Nyianyungarete esi Ngimisiri lugu nabo jiik. Ekapolon Akuj ngesi eji alowae kus, nabo emam ibore isubakinete esi.” Tolimok Ekapolon Akuj Musa tama, “Nyo kigoronokinio iyong ayong? Tolimok Ngisirael toloto ngaren. Tolem aburo kon sodi kikea min kidiama anam. Epakasi ngakipi sodi kitoro Ngisirael nikoonon alokiding anam. Etiliwori ayong Ngimisiri lu ichanaka noi kiwapakis Ngisirael. Nakaneni aanyuni ayong ekipur ani edwangea ekapolon a Misiri, ka ngasigerea keng, ka ngaurukukui keng na irito ngangolei, ta ngikameak a ngaurukukui ana irito ngangolei. Ani na edwangea ayong kesi, eyenunete Ngimisiri atamar arai ayong Ekapolon Akuj.” Abu emalaikat a Akuj losek engareni ajore a Ngisirael, tobongo naabor kech. Torotok apir a edou dang alongaren kech, tamana naabor kech, min nakidingos a Ngimisiri ka Ngisirael. Kitiribok edou ewae loa Ngimisiri, nakaneni kiwaak akicha lowae loa Ngisirael. Nakaneni akwaar daang kiiya kiwala, nyeapikina ngajorei a ngasigerea a Ngimisiri ka na Ngisirael. Kikea Musa akan keng min kidiama anam, sodi kitukut Ekapolon Akuj ekuwam loapolon alo kide kijuka ngakipi a anam naabor. Tokut ekuwam ngolo kiiya kiwala, sodi kibele anam toliwor ngalup nakoonok. Tapakas ngakipi, kitoro Ngisirael nalup nakoonok alokiding anam, kibakito ngitoroi a ngakipi alowaitin kadaang. Kiwapakis Ngimisiri Ngisirael sodi tolomasi nanam aapei ka ngangolei kech, ka ngaurukukui na irito ngangolei, ta ngikameak a ngaurukukui ana irito ngangolei. Ani eapikini akwap akiwalar, kingoliu Ekapolon Akuj anapir a akim ka apir a edou, tokienyik ajore a ngasigerea a Ngimisiri sodi kitubul kesi. Kisipok ngesi ngaurukukui kech na irito ngangolei, toliwor epotikinit kesi alosit. Tolimut Ngimisiri tamasi, “Ibakit Ekapolon Akuj alowae a Ngisirael kitiji ngoni. Atorotokisi kane!” Tolimok Ekapolon Akuj Musa tama, “Kikea akan kon min kidiama anam, tobongut ngakipi ni eyakasi Ngimisiri ka ngaurukukui kech na irito ngangolei, ta ngikameak a ngaurukukui ana irito ngangolei.” Sodi kikea Musa akan keng min kidiama anam, ani echili nanyang tobongosi ngakipi nisek ayakasi. Tasaka Ngimisiri amatar kilanya ngakipi, nakaneni tachakak Ekapolon Akuj kesi daang nanam. Tobongut ngakipi toburuchiasi ngaurukukui na irito ngangolei, ka ngikameak ngaurukukui na irito ngangolei, ta ngasigerea daang a Ngimisiri na ewapete Ngisirael tolomasi nanam. Emam tani ipei kech ni abu kidong. Nakaneni kitoro Ngisirael nalup nakoonok na ayakasi kiding anam, kibakito ngitoroi a ngakipi alowaitin kadaang. Akwaar ngina, toyuu Ekapolon Akuj Ngisirael ani a Ngimisiri, taanyungasi Ngisirael kesi eperete alokwaas a anam etoakito. Ani ingolikinete Ngisirael agogongu naationon edwangea Ekapolon Akuj Ngimisiri, tokera kesi Ekapolon Akuj. Tonupa kesi ngakiro a Ekapolon Akuj ka Musa lo arai ekasuban etich keng. Sodi toeokis Musa ka Ngisirael Ekapolon Akuj eeos logo ebalasi, “Aeokini ayong Ekapolon Akuj, kainyo asubaki ngesi na ipuroi noi edwang ngimoe. Achakaki ngesi ngangolei ka ngikameak kech tooma nanam. Ekapolon Akuj erai agogongu kang, ngesi ekusi ayong, ngesi kayuu ayong. Erai ngesi Akuj kang, epuruuni ayong ngesi, Akuj a apakang, aeo ayong ngakiro a apolou keng. Erai Ekapolon Akuj akajwon, Ekapolon Akuj ngesi erai ekiro keng. “Achakakini ngesi ngasigerea a Misiri ka ngaurukukui na irito ngangolei tooma nanam. Ngikarikok a ngasigerea kech nakajwok, tanyam anam a Chamu. Toburuchiasi kesi ngakipi a anam natuluk. Kilikosi kesi ngakipi tananga kwap loger a amoru. “Ekapolon Akuj, akan kon na aloteten, eyei apolou nakitimi. Ebilibilaari emoit kinyada. Idwangeene iyong ngimoe kon a apolou anaationon noi. Iniapanari angoit kon tonom kesi loger a nginyia. Ikutakini iyong anam sodi kiliirakin ngakipi. Towaa kiteneneto loger a awas. Togogonger ewae a anam lotuluk. Tolim emoit tama, ‘Ewapi ayong kesi erum. Atiaki ayong ebari kech, atolema daang lo asaki. Atingi ayong ekileng kang, sodi atomunya kesi.’ Nakaneni Ekapolon Akuj, na ikutakinea iyong akutakinet apei bon, tanyam Ngimisiri daang anam. Tolomasi kesi nakipi natuluk, loger a asuat anaapotion. “Ee Ekapolon Akuj, anikuj mono ikwaanatar iyong anakujo? Ngae ejok akitaleun keng, loger kon? Ngae asubi ngakitoodikinet nakailiilok, ka nakatalarak loger kon? Itorwaari iyong akan kon na aloteten, sodi kilikosi ngalup ngimoe kosi. Iyookini iyong akichikakinet kon, torik ngitunga lu iyuuni iyong. Iriki iyong kesi a agogongu kon, tananga nakwap kon na italeuno. Eirasi ngibukui, aema kesi amaranikis. Abul Ngipilisti. Abul ngikapolok a akwap a Edom. Emaranete ngikiliok lukajwok a akwap a Moab. Alilimiyosi ngitunga a Kanaan daang. Amin ebuloi ka akurianu nikech. Ekapolon Akuj, iteete kesi agogongu kon, nakaneni ewaasi eemito emam ibore esubakinete, tanang ngitunga kon, Ekapolon Akuj, epote kitorut neni. Ngitunga kon lu ilachakini iyong anaenanot. Iyauni iyong kesi kiwaak moru kon. Neni iseu iyong Ekapolon Akuj, aliwor awi kon. Akai na idukok iyong alope. Ekapolon Akuj, iliwor iyong ekapolon lokajik.” Etorete Ngisirael nikoonon alokiding anam. Nakaneni ani elomarete ngaurukukui na irito ngangolei ka ngangolei kech ta ngikameak ngangolei tooma nanam, tobuu Ekapolon Akuj ngakipi sodi toburuchiasi kesi daang. Tolem akadwaran a Akuj na anyaritae Miriam, na arai nakaatokeng a Aron aekiek, sodi kiwapakis ngesi ngaberu daang ideese ngaekieke, kidongaate. Toeok Miriam kimaranak ebala, “Toeonokisi Ekapolon Akuj, kainyo edwang ngesi ngimoe niajokon. Achakaki ngesi ngangolei, ka ngikameak kech tooma nanam.” Abu Musa toriko Ngisirael nanam a Chamu tananga nariet na enyaritae Chur. Toloto kesi anariet ngirwa nguuni, nakaneni tongopikis ngakipi. Tanangut kesi ni enyaritae Mara. Nyemata kesi ngakipi na ayakasi Mara kainyo adwarak tel. Ngakiro nguna enyaritere neni Mara. Kisuburata ngitunga Musa kingita tamasi, “Nyoni kimasi sua?” Kilip Musa Ekapolon Akuj kikaloik, sodi kidodik Ekapolon Akuj ngesi akitoe na achakakini ngesi nakipi, sodi tojoketa ngakipi toliworos namatan. Nak Ekapolon Akuj kesi kaneni ngitalio lu iwapete, sodi nabo kining ngesi kesi kaneni. Tolim ngesi tama, “Ani kiwap esi ngakiro kang lokojokon tosuba na abala ayong iyookino ka akirichun ngitalio kang, nyekerirae ayong esi a ngidekesinei alu ayauni ayong nia Ngimisiri. Arai ayong Ekapolon Akuj naketedeki esi tangalekis.” Ani erumor tanangut kesi ni enyaritae Elim. Ayakasi neni ngileleae ngitomon ka ngiarei ta ngingolea ngitomwon-kaarei. Toloma kesi diyete ngakipi kaneni. Torotokis Ngisirael daang ani enyaritae Elim. Ani enangi akolongit na ngatomon ka ngakan a elap alo a ngiarei arotokinioto kesi alo Misiri, tananga kesi nariet enyaritae Sin, na ayei nakidingos a Elim ka Sinai. Kisuburata kesi daang Musa ka Aron anariet kangina tolimokis tamasi, “Arai bo kolong kitaar sua Ekapolon Akuj alo Misiri dang. Kibooyi sua kaina kinyami akiring ka akimuj cha daang nakisakit sua. Nakaneni kiyau tokona iyong sua daang nariet naga kitaar akoro.” Tolimok Ekapolon Akuj Musa tama, “Emiekini tokona ayong akimuj totep anadis loger a akiru kotere esi daang. Ejoikinit ngitunga eloseenete akolongit daang kideput akimuj na akolongit kangina. Aroi ayong kesi a erot kangolo atoyen kiwapete etal kang. Ani akolongit na ngakan-kapei, kideput akimuj ngakidepunet ngaarei ana etia napalem, tosubakis.” Sodi tolimokis Musa ka Aron Ngisirael daang tamasi, “Atabong naga, iyenunete esi atamar Ekapolon Akuj kolong kipuduni esi alo Misiri. Ianyungarete esi nataparach akicha naakwaan kea alongaren Ekapolon Akuj. Eira ngesi ngakiro na isuburaata esi ngesi. Erai ngesi isuburaate esi kainyo kiwapit sua dang ngakiro keng.” Sodi tolim Musa tama, “Ekapolon Akuj ngesi kiinakini esi akiring na inyamete ebong ka akimuj na isakete esi nataparach, kainyo eira ngesi eburas lo isuburaata esi ngesi. Nakisuburaata esi sua, erai Ekapolon Akuj isuburaate esi.” Tolimok Musa Aron tama, “Tolimok ngitunga daang pot towaa alongaren Ekapolon Akuj, kainyo eira ngesi eburas kech.” Ani na esuruorea Aron ngitunga daang, kingoliasi kesi nariet. Tatakanu akwangis naakwaan kea a Ekapolon Akuj atipei alodou. Tolimok Ekapolon Akuj Musa tama, “Eira ayong eburas a Ngisirael. Tolimok kesi atamar ani ipiripiruuni, eanyunete kesi akiring na enyamete. Ani enangi ebong, eanyunete kesi akimuj daang na esakete. Sodi toyena kesi atamar ayong Ekapolon Akuj ngesi arai Akuj kech.” Ani enangi ebong, toporut ngalurui nakaalak toburuchiasi ni alomitae neni. Ayakasi ngakop wadaang a adakar na anangea nataparach. Ani na akutareta ngakop, min ibore nikawarawaran tononok kidiama ngalup anariet. Awariwari ngesi loger a eloch. Ani eanyungarete Ngisirael, peayenete atamar erai nyo, sodi kingitanaros make tamasi, “Nyoni en?” Tolimok Musa kesi tama, “Akimuj naga ngesi kiinak esi Ekapolon Akuj tanyama. Adungu Ekapolon Akuj atamar kidepu ipei kus daang etiae lo esaki ngesi, ngakitemiet ngaarei kotere itwaan ipei a awi a apei.” Tosuba Ngisirael kongina. Kideput ngiche nakaalak, kideput ngiche nadikidio. Ani itemio, ngulu edepunito nakaalak, pealalak nakech noi. Ani ngulu edepunito nadikidio, peakidioko nakech noi. Edepunit itwaan daang na etemokino. Tolimok Musa kesi tama, “Nyejoikinit itwaan imiekini akimuj eperi kiwalak.” Nakaneni towout ngiche akiirar ngakiro na alimuni Musa, kikachakis akimuj ache kimiekis eperi kiwalak. Pena ngikur nakimuj ngina tobos, sodi tongoik Musa kesi. Ataparach daang, kidepu itwaan daang akimuj na etemokino, ani erirauni akolong, tokeia akimuj na edongit nalup. Ani akolongit na a ngakan-kapei, kideput kesi akimuj ngakidepunet ngaarei ana etia nache palem, toliworos ngakitemiet a itwaan a ipei ngoomwon. Pot ngikarikok daang a ngitunga tolimokis Musa ngakiro nguna. Tolimok Musa kesi tama, “Adungu Ekapolon Akuj atamar erai akolongit nakamoi na italeuno iangarere, na erai akwaar na italeunitoe a Ekapolon Akuj. Kitaatana a akim akolongit naga ibore ni isakete akitaatan, kipoto ni isakete akipore. Ani ibore daang ni idongi, ejoikinit ikachakinio toliwor ika moi.” Kikachakis kesi akimuj na edongi kiwalak loger lo adungokinitor Musa. Nyebosa akimuj ngina kori nyepena ngikur. Tolim Musa tama, “Tanyama naga akolongit naga, kainyo erai tokona akolongit naga na enyaritae Sabato, na erai akolongit a Ekapolon Akuj nakitaleuno, na emamakar akimuj ianyunete esi anikalapatan a adakar. Ejoikinit esi idepunete akimuj a ngirwa a ngikan-kapei. Nakaneni ani akolongit nakiangaret engopi akimuj.” Ani akolongit na ngakan-kaarei toloto ngitunga ngiche akidepun akimuj, nakaneni tongopik kesi akimuj. Sodi kingit Ekapolon Akuj Musa tama, “Ewounete ngitunga lugu akiwap ngitalio kang tanang ori? Toyena atamar kainak ayong Ekapolon Akuj esi akolongit nakiangaret. Ngakiro nguna kesi eraakar ani enangi akolongit na ngakan-kapei, kainakini ayong esi jiik akimuj nakitemokin a ngirwa a ngiarei. Ejoikinit itwaan daang iboikin ni ibooyo akolongit na ngakan-kaarei, nyeerotok anawi keng.” Apot ngitunga kiangasi akolongit na ngakan-kaarei. Tanyarata Ngisirael akimuj ngina manna. Ekwaan akimuj ngina ka ekinyamit loakwaan, tobob loger a ngabisikutio ana iwaakinitae akimiet a ao. Tolim Musa tama, “Edungunit Ekapolon Akuj atamar kingadaasi manna ache kotere ngalesea yok, sodi taanyungareta kesi akimuj nakiinakini ngesi ngoni atanyama anariet nakipudunio ngesi ngoni alo Misiri.” Tolimok Musa Aron tama, “Tolem amot kitemok ngakitemiet ngaarei a manna tooma, sodi kiwaak ngaren Ekapolon Akuj toliwor ingadaaritae kotere ngalesea yok.” Kiwaak Aron ngaren asaduku a Achamunet toliwor ingadakinitae neni, loger lo kolong adungokinea Ekapolon Akuj Musa. Tanyama Ngisirael manna a ngikaru a ngitomwon-omwon, tanang na anangeta nakwap a Kanaan ni alomete kesi. ( Arai akitemiet napalem sek itemeenere na eriyan ka ngalitae ngatomwon-arei.) Torotokis Ngisirael daang anariet ana enyaritae Sin. Toliworos kesi ewoose awapei toloto wache, loger lo adungokinitor Ekapolon Akuj. Toloma kesi ni enyaritae Repidim, nakaneni tongopikis ngakipi kaneni namatan. Kisuburata kesi Musa tolimokis tamasi, “Nakinae sua ngakipi atamata.” Tatachak Musa kesi tama, “Nyo iburaata esi? Nyo iningitotor esi Ekapolon Akuj?” Nakaneni anyamit ngitunga akure noi, sodi torubakis isuburaate Musa kingita tamasi, “Nyo ngoon kipudunio iyong sua alo Misiri? Isaki iyong akure kitaar sua, ka ngide kosi, ta ngibaren kosi a?” Kilip Musa kikaloik Ekapolon Akuj tama, “Ekokini ayong ngitunga lugu ai? Ekoto kesi akimas ayong a ngamoru.” Tolimok Ekapolon Akuj Musa tama, “Toriko ngikarikok a Ngisirael ngiche, kingarenikis ngitunga. Toting aburo nakolong iramea iyong ngakipi anangolol a Nili. Awei ayong alongaren kon anataaba ana eyei moru lo enyaritae Sinai. Taram ataaba, nakaneni elomunete ngakipi kaneni na emaase ngitunga.” Tosubak Musa ngakiro nguna alongaren ngikarikok daang a Ngisirael. Tanyarae neni Masa ka Meriba, kainyo eburaate Ngisirael kiningo Ekapolon Akuj na engitatar ebalasi, “Kirukit sua ka Ekapolon Akuj kori emam?” Pot Ngiamalek sodi toremo Ngisirael alo Repidim. Tolimok Musa Yochua tama, “Toseu ngikiliok ngidi toloto tojwoto ka Ngiamalek moi. Awei ayong alokidiama emukura atingit aburo nakalimokini Akuj atamar toting.” Kiwapak Yochua ngakiro na alimokini Musa tolot akitijwore Ngiamalek. Toloto Musa ka Aron, ta Ur todokasi kidiama emukura. Esaa daang lo ekearitor Musa ngakan keng, kidwanga Ngisirael Ngiamalek. Ani esaa lo etiyaunea Musa ngakan keng kwap, kidwanga Ngiamalek Ngisirael. Ani eburuni ngakan a Musa, yaut Aron ka Ur amoru na icholongi Musa, towo epei alokedieny, towo loche aloteten, kiganga ngakan keng, tanang na adooyorea akolong. Kotere ni ekoneta kesi neni, kidwang Yochua Ngiamalek jik. Sodi tolimok Ekapolon Akuj Musa tama, “Kigir ngakiro a ejie alo idwangeta esi Ngiamalek kalo, toliwor itamuununio. Tolimok Yochua atamar enyasuni ayong Ngiamalek jik.” Todukok Musa ekeno a ngakipeyos sodi tanyara ekiro keng “Ekapolon Akuj erai abendera kang.” Tolim ngesi tama, “Kikea abendera a Ekapolon Akuj! Erubakini Ekapolon Akuj itiji Ngiamalek jik!” Kiira lokamuran a Musa lo anyaritae Yesiro ngakiro na asubea Akuj Musa ka Ngisirael na epudunio Musa kesi alo Misiri. Arai Yesiro emuron a ngakujo a akwap a Midian. Sodi bu ngesi nia Musa erikunit Sipora na arai aberu a Musa, nasek edongit, ka talokookeng luarei lu anyaritae Gerichom ka Elieser. (Alimuni sek Musa tama, “Arai ayong itwaan a akwap a ache ni ayei nakwap nagela.” Sodi tolimok ngesi edia epei ekiro keng Gerichom. Tolim nabo ngesi tama, “Kengarakini ayong Akuj a apakang sodi katoyuu ayong nyakaar ekapolon a Misiri.” Sodi tolimok ngesi edia loche ekiro keng Elieser. ) Pot Yesiro ka aberu a Musa ka talokookeng a Musa luarei tanangut nariet ni alomit Musa alomoru a Akuj. Amearit sek ngesi itwaan nia Musa alimokin atamar eponito kesi. Sodi tolot Musa akisiriam ngesi, kijuuru alongaren keng, kimala ngesi tonuak. Kianakis ngakiro a eboyor kech, ani erumor tolomasi loeam a Musa. Tolimok Musa Yesiro ngakiro daang na asubea Ekapolon Akuj ekapolon a Misiri ka ngitunga keng, toyuunea Ngisirael. Tolimok ngesi tani ngichan lu aanyunete ngitunga alorot ka eger lo ayuunea Ekapolon Akuj kesi. Ani iirari Yesiro ngakiro nguna daang, talakar sodi tama, “Kipuroe Ekapolon Akuj na kiyuuni esi ani a ekapolon a Misiri ka ngitunga a akwap keng! Kipuroe Ekapolon Akuj na ayuuni ngitunga keng ani araakatar ngikedalak! Ayen tokona ayong atamar epolot Ekapolon Akuj noi idwangit ngakujo daang, kainyo asubi ngesi ngakiro nugu ngirwa lu emenyaritotor Ngimisiri Ngisirael.” Sodi yau Yesiro akipeyos kipeyoe nginerin daang, ta ngakipeyos ngache na epeyokinio Akuj. Sodi kirukosi Aron ka ngikarikok a Ngisirael toloto akinyam ka Yesiro akimuj na italeunitoe, na epeyokinitere Akuj. Ani iwalari akolongit nache, totub Musa ngikesio a ngitunga napei iwalari tanang nakwaare. Ani eanyungari Yesiro ibore daang ni asubi Musa, kingit ngesi tama, “Anukiro nugu isubea iyong ngitunga? Nyoni isubea iyong nugu daang alopei, towaas ngitunga kane napei nataparach tanang ebong esakete aanyun iyong?” Tatachak Musa ngesi tama, “Asubi ayong kona ani eponeeneta ngitunga aanyun ngakiro na echamit Akuj. Na engolopatar ngitunga ngiarei, pot nikang sodi atotiaku ayong atamar ngae anikech esechit, nabo atolimok ayong kesi ngakiro na edungunit Akuj ka ngitalio keng.” Sodi tolim Yesiro tama, “Nyejok ngakiro na isubi iyong. Kiburuni iyong ka ngitunga lugu aapei. Elal etich logo noi nyisubi iyong bon. Kimiek tokona katolimok iyong ngakiro naajokak na ejoikinit iyong iwapi, nabo irukete iyong ka Akuj. Ejoikinit erai iyong iweikinit ngitunga ani Akuj sodi yau ngikesio kech nikeng. Ejoikinit iyong itatami kesi ngakiro na edungunit Akuj nabo kisisak kesi eger lo ejoikinit ibooyoto ka ngakiro na ejoikinit esubete. Ani ikoni neni dang, ejoikinit iyong iseuni ngitunga lu epedorete akisub etich kitiliwo kesi ngikarikok a ngitunga. Toliworos kesi ngikarikok a ngitunga alu eraakasi ngabunge, ka ngamiae, ka ngitomwon-kan, ta ngitomon. Ejoikinit kesi eraakasi ngitunga lu ekerito Akuj, tarai lu emunoi nabo nyepedorio akidiak nakinae ibore. Kimiek kesi toliworos etubeenete ngikesio a ngitunga jiik. Toliworos eyaununete ngikesio luationok make nikon, nakaneni totubo kesi ngikesio lu nyetioko daang. Nyetioner etich ngolo anikon nakingarakineta kesi iyong. Ani kisub iyong nguna kona edungunitor Akuj, nyikiburuni iyong noi, nabo eloose ngitunga lugu daang nawiyei ketub ngikesio kech kerumor.” Kiwapak Musa ngakiro a Yesiro sodi toseu ngitunga lu epedorete akisub etich ani eyakasi Ngisirael daang. Kitiliwo kesi ngikarikok a ngitunga alu eraakasi ngabunge, ka ngamiae, ka ngitomwon-kan, ta ngitomon. Toliworos kesi etubeenete ngikesio a ngitunga jiik. Yaunut ngikesio luationok nia Musa, nakaneni totubo kesi ngikesio lupeatioko make. Sodi tolimok Musa lokamuran keng atamar tolot niajokon. Abu lokamuran keng tobong nakwap keng. Ani enangi akolongit na ekingaren a elap alo a nguuni alo arotokinioto Ngisirael alo Misiri, apot tanangut nariet enyaritae Sinai. Ani enyounete kesi alo Repidim enangunete nariet a Sinai, toloma kesi nakeju a emoru a Sinai. Todoka Musa kidiama emoru aanyun ka Akuj. Tanyara Ekapolon Akuj ngesi alomoru tolimok atamar tolimok Ngisirael lu araakasi ngalesea a Yakobo tama, “Ingolikis esi ngakiro na asubea ayong Ekapolon Akuj Ngimisiri, ka eger lo kewokea ayong esi loger lo iwokea egole ngitak keng a ngabeben keng. Abu ayong kayau esi nikang nege. Ani tokona kiwap esi ngakiro kang kirichakis achamunet kang, iliworosi esi ngitunga kang a alope. Erai akwap daang akang, nakaneni iliworosi esi ngitunga kang luseuna, ngitunga kang lu aliworosi lu italeunitoe, lu esubete etich eraakasi ngimurok kang.” Sodi totiyaar Musa tanyarau ngikarikok daang a ngitunga tochunak wapei tolimok kesi ngakiro daang na adungokini ngesi Ekapolon Akuj. Sodi tatachut ngitunga daang aapei tamasi, “Kisubi sua ngakiro daang na alimu Ekapolon Akuj.” Tolimok Musa Ekapolon Akuj ngakiro nguna alimunete ngitunga. Tolimok Ekapolon Akuj Musa tama, “Abuni ayong nikon ayei lodou loapolon, sodi kiirasi ngitunga kiruoro ayong ka iyong, tonupeta ngakiro kon napei tokona jik.” Tolimok Musa Ekapolon Akuj ngakiro na alimunete ngitunga. Tolimok Ekapolon Akuj ngesi tama, “Kape tolimok ngitunga atamar kitaleunos akolongit naga ka moi sodi katolemikis ayong Ekapolon Akuj ngakipeyos. Ejoikinit kesi ilotarete ngiworui kech, toliworos lu arumosi asubakin enangi akolongit na etupit namoi. Akolongit ngina, atiyaun ayong moru a Sinai nikaanyungareta ngitunga daang. Kiwaak ekukuor lo iriami emoru toliwor nyikalamete ngitunga neni. Tolimok ngitunga atamar nyeedokasi kidiama emoru kori nyeapiyasi diyete. Ani kichiak itwaan emoru, eario. Echamit imasio itwaan ngini a ngamoru kori egumio a ngimalea a amod, nyeetap itwaan ngesi. Ngitunga ka ngibaren esubere ngakiro nguna, ejoikinit daang eario. Nakaneni ani na ekutakinere aburuch, edokarete ngitunga kidiama emoru.” Sodi totiyaun Musa alomoru tolimok ngitunga atamar tosubakinos kotere akipeyokin Akuj. Sodi kilotasi kesi ngiworui kech, tolimok Musa kesi tama, “Ani enangi akolongit na etupit naka moi, toliworos lu irumosi asubakin, nakaneni nyeepero ngikiliok ka ngaberu ngirwa ngulu.” Ani enangi ataparach a akolongit ana ngauni, togirok akwap kimilea. Tatakanu edou loapolon alokidiama emoru. Kiirarae aburuch erukini lokojokon noi. Tamaranikis ngitunga daang lu ayakasi nadakar ebulit. Toriko Musa kesi daang topudosi anadakar eloose akiriamun ka Akuj, sodi towaa kesi anakeju a emoru. Toburuchia apuru wadaang a emoru a Sinai, kainyo abuni Ekapolon Akuj kidiama emoru eyei nakim. Kidiiri kidiama loger a apuru a adui ana erirae. Tamaranikis ngitunga daang lokojokon noi. Torubak eruye a aburuch iatanakin talalaar. Kiruorik Musa sodi tatachu Akuj ngakiro keng a akimilea. Totiyaun Ekapolon Akuj min kidiama emoru a Sinai sodi tanyaraa Musa kidiama emoru. Todoka Musa kidiama sodi tolimok Ekapolon Akuj ngesi tama, “Totiyaar kichikichik ngitunga nyiikalama ekukuor pot kengolikis ayong. Ani kikokis neni, etoakete ngikaalak kech. Tani ngimurok a Akuj lu eapuunete diyete kang, ejoikinit italeunosi, ani kemam erirae ayong kesi.” Tolimok Musa Ekapolon Akuj tama, “Nyedokunete ngitunga ani kidungokinea iyong sua atamar italeunitoe emoru nabo tama kiwaakinae ekukuor kiriam emoru.” Tatachak Ekapolon Akuj ngesi tama, “Totiyaar sodi tolot kirukut ka Aron. Nakaneni nyiikalam ngimurok ka ngitunga ekukuor pot nikang. Ani kikokis neni, erirae ayong kesi.” Abu Musa totiyaar tolot nia ngitunga sodi tolimok kesi ngakiro na alimuni Ekapolon Akuj. Kiruorik Akuj. Ngakiro na alimuni ngesi kesi nugu, “yong arai Ekapolon Akuj na arai Akuj kus nakepuduni esi alo Misiri, ani iraakatar esi ngikedalak. “Wara nyiilip akuj ache mati ayong bon. “Nyiisubak ngakisikwaanet a ibore a idio ani eyei nadis kori nakwap, kori ni eyei tooma nakipi kwap ngalup. Wara nyiiriedikok akuj nasubuna kori nyiilip, kainyo ayong Ekapolon Akuj kus, arai Akuj a etereku. Erirae ayong lu karemokino ayong nabo erirae ngalesea kech tanang nalesea na ngauni ka na ngoomwon. Nakaneni amina ayong ngabunge a ngalesea ana kaminasi ayong kiwapito ngitalio kang. “Nyiilim ekiro kang kotere ngakiro naaronok, kainyo ayong Ekapolon Akuj na arai Akuj kus, erirae itwaan daang ni elimit ekiro kang pas. “Kirichak akolongit a Sabato kitaleu. Tosub etich daang a ngirwa a ngikan-kapei, nakaneni erai akolongit na ngakan-kaarei na italeunitoe toliwor akang. Emam itwaan esubi etich akolongit ngina napei anikon, tanang lode kon, ka ngikasubak etich kon, ka ngibaren kon, ta ngitunga a akwap anache lu eyakasi nawiyei kon. A ngirwa a ngikan-kapei, asubi ayong Ekapolon Akuj akwap, ka adis, ka anam, ta ibore daang ni eyei tooma kech, sodi eanga akolongit na ngakan-kaarei. Ngakiro nguna kesi apiarea ayong Ekapolon Akuj akolongit a Sabato etaleu. “Toker apakon ka itiokon, sodi kibooyo ngirwa lukaalak anakwap ana kainakini ayong esi. “Nyiar. “Nyiilom. “Nyiikoko. “Nyiitingak itwaan niche ngakiro na eraakasi alioko. “Wara nyikiterekuia akai a itwaan aniche, wara nyikiterekuia aberu a itwaan aniche, kori ngikasubak etich keng, kori ngaatuk keng, kori ngisikiria keng, kori ibore cha daang ni etingit itwaan niche.” Ani irarete ngitunga agiro ka eruye a aburuch, sodi kingolikis akimilea ka emoru epurui, tobul kesi tamaranikis, towaa anikalonan. Tolimokis kesi Musa tamasi, “Ani kisuruor iyong sua, kipupokini. Nakaneni kibulit sua esibit ani kisuruor sua Akuj, kitoaki.” Tatachak Musa kesi tama, “Nyieam. Abu Akuj akining esi sodi torubakineta esi iwapito ngakiro keng nyiisecheta.” Nakaneni torubakis ngitunga ewaasi anikalonan. Musa bon abu taapiya diyete edou loapolon lo ayei Akuj. Todungok Ekapolon Akuj Musa atamar tolimok Ngisirael tama, “Ingolikis esi eger lo eruoror ayong Ekapolon Akuj anadis. Warasi nyiisubanakinosi ngakujo a ngasua anakwangae, kori egolit toliworos ipeyonokinete kesi ka ayong aapei. Todukokisi ekeno a ngakipeyos kang a echoto, sodi kipeyoto ngamesekin ka ngaatuk kus alokidiama toliworos ngakipeyos na inomio tonomiyasi ka na a ngakipeyos a ekisil. Abuni ayong katopia esi awadaang ani aseuni ayong kepeyonokinere ayong. Ani kidukokis esi ekeno loa ngamoru, nyiidukokis a ngamoru ana ekulitae kainyo na ikuleta esi ngamoru a erokon, inyasun nyesubere etich kang. Nyiidukokis ekeno a ngakipeyos kang eyakasi ngadoket na etenete lokeno. Ani kikokis esi neni, eliwor kiteo esi iwapito ngadoket. “Kidodik Ngisirael ngitalio lugu. Ani kigielu iyong ekedalan lo erai Eburaniait, kimiek tosub etich kon a ngikaru a ngikan-kapei. Ani ekaru loa ngikan-kaarei, talakak ngesi tolot emam ibore itatachio. Ani kolong pekiutarit ngesi na aliworor ekedalan kon, nyerikori aberu keng na erotokinio. Nakaneni ani kiutarit kolong sek ngesi eringa nyeliworo ekedalan kon, erikori ngesi aberu keng. Ani kirumakinit ngesi ekile a awi aberu na idouni ngide lusapa ka lupesur, erai aberu ngina ka ngide keng ngika ekile a awi, nakaneni erotokini ekedalan ngolo bon. Ani kelimu ekedalan ngolo atamar amina ekile a awi ka aberu keng, ta ngide keng, nakaneni nyasaki katalakakin atolot, ejoikinit ekile a awi erikori ngesi ni ilipeenere. Itowei ngesi ekedalan keng kaneni, kitowo alokidor kori anakitoe a ekidor sodi torub akit keng. Nakaneni eliwor ngesi ekedalan keng jik. “Ani kegiela itwaan nakookeng toliwor akedalan, nyelakakinio ngesi tolot loger lo elakakinere ngikedalak luche lukiliok. Ani kegielar ngesi nitwaan ni esaki akitiliwor ngesi aberu keng, nakaneni toronik ekile ngolo akedalan ngina, ejoikinit akedalan ngina ebuario togiel nabo apakeng. Nyegielari ekile a awi kangina ngesi lotunga a akwap anache kainyo aboliar ngesi akedalan ngina. Ani kegiel itwaan akedalan esaki akirumakin lokookeng, ejoikinit ngesi itusubuni akedalan ngina nakookeng. Ani kiut itwaan aberu na ngaarei, ejoikinit ngesi erubakini ainanakin aberu na ekingaren akimuj ka ngiworui lu etia lukolong ainanakini ekingaren, nabo tosubea ngesi ngakiro nakolong asubea ekingaren. Ani pekesubea ngesi kongina, ejoikinit elakakini ngesi tolot emam ibore imichat. “Itwaan cha daang ni erami itwaan totoan, eario. Nakaneni ani kerai ibore nipeeyechakini ngesi, pearai abuchakin peesaki, edokini ngesi tolot nakwap na aseuni ayong Ekapolon Akuj, nakaneni iboikin neni niajokon. Nakaneni ani kengo itwaan kiyechak akiar niche, ejoikinit ngesi eario, tani kematar ngesi lokeno a ngakipeyos tasak ayuun kaneni. “Itwaan cha daang ni erami apakeng kori itiokeng, ejoikinit eario. “Itwaan cha daang ni ekokoyari itwaan niche, erai esaki agielar kori akitiliwor ekedalan, ejoikinit eario. “Itwaan cha daang ni iruoror apakeng kori itiokeng ngakiro naaronok, ejoikinit eario. “Ani kejikin ngitunga sodi kimas itwaan niche a amoru kori kilulungik akan, nakaneni nyear, nyirirao ngesi. Ani kerai akiper bon eperi itwaan ni ewanitae, ani ekisidi tonyou tolot akilare anikalapatan ichogae a akitoe, etachi itwaan ni arami ngesi ngisaa lu aperio itwaan ngini ewanan, ani erumor kitedek ngesi tanang ejoker. “Ani kelemu itwaan aburo kidet ekedalan keng, kerai nikile kori niberu, sodi totoan ekedalan ngolo kaneni, irirao itwaan ngini. Nakaneni ani peketoana ekedalan ngolo akolongit na ekingaren kori na ngaarei, nyirirao itwaan a awi kangina. Itemokinosi ngiboro lu abukorosi loriras keng. “Ani kejwoto ngitunga ngiarei sodi towana aberu na epoti kiyes, nakaneni nyewana ngesi a erot a eche, itubukio itwaan ni awani ngesi ngaropiyae etiae locha elimuni ekile a aberu kangina, erai kechamut ngikatubok ngakiro. Ani kewanitae aberu ngina, eliwor eriras lo etachakinere akiyar nakiyar nache, akongu nakongu nache, ekelae lokelae loche, akan nakan nache, akeju nakeju nache, anomat nanomat nache, ajeme najeme nache, ni ebutoro ni eyei niche ebutoro. “Ani keram itwaan akedalan keng kori ekedalan keng nakongu sodi tojongo akitere akwap, ejoikinit ngesi elakakini ekedalan ngolo toliwor ibore ni etachit akongu keng ngini. Ani keram todoto ekelae, ejoikinit elakakini ekedalan ngolo toliwor ibore ni etachit ekelae keng ngini. “Ani kigum emong itwaan a ngaamwar totoan, imasio emong ngolo a ngamoru. Emam itwaan enyami akiring keng, nakaneni nyirirao elope a emong. Ani sek kegiranakin emong ngitunga sodi kichikichikae elope a emong dio towou akien emong, ani kigum itwaan a ngaamwar totoan, imasio emong a ngamoru, sodi taarae ilope a emong dang. Nakaneni ani kechamun atamar eremio ilope a emong kibusere itwaan nikatoan, ejoikinit ngesi ipotori ibore ni itemokino toyuunor. Ani kear emong edia kori apese, esubio ngakiro napei nguna. Ani kear emong ekedalan kori akedalan, etachi ilope a emong ilope a ekedalan ngaropiyae ngatomwon-uni, ani erumor kimasae emong a ngamoru totoan. “Ani kimiek itwaan adui engaara, kori kebok itwaan adui nyeerap, sodi tachakakin emong kori esikiria tooma, etachi itwaan ngini ibarasit ngini. Etachakini ngesi ilope a ibarasit ngaropiyae sodi toting ngesi ibarasit nikatoan. Ani kear emong a itwaan emong a itwaan aniche, egielarete ngitunga luarei ngulu emong lo eyari totiaka ngaropiyae. Emorete kesi tani akiring a emong alokatoan. Ani keyenio atamar igumono sek emong nakaneni towou ilope akien, etachakini ngesi itwaan nia emong alokatoan emong lo eyari, sodi toliwor lokatoan ekeng. “Ani kekokoya itwaan aite kori emesek sodi taar kori togiela, ejoikinit ngesi etachakini ngaatuk ngakan naite apei sodi tatachak ngamesekin ngoomwon namesek apei. “Ani kirumun ekokolan nakwaare ekokoi sodi taramae totoan, nyepaikinio ilope a ibore ngakiro a akitu keng. Nakaneni ani kesubakin nguna kipiripiru akolong, epaikinio ilope a ibore ngakiro a akitu keng. Ejoikinit ekokolan etachi ibore ni ekokoyari. Ani kemam ngesi ibore eyei, ejoikinit ngesi egielario toliwor ekedalan sodi tatachere ibore ni akokoyari ngesi. Ani keriamun ibarasit ni akokoyari ngesi eringa emeat ngesi, kerai aite kori esikiria, kori amesek, etachakini ngesi ngibaren ngiarei nibarasit ipei. “Ani kimiek itwaan ngibaren keng edakasi anaro kori alomana sodi toloto kesi adaka amana a itwaan aniche, ejoikinit ngesi etachi ngalemet nguna ana ngaroatin keng kori ana ngamanat keng. “Ani kinokak itwaan akim anaro keng sodi kiniapar alodoan tanang naro a itwaan aniche sodi tonom ngimomwa lu ewaasi kori lu atub tosenokinoe, etachi itwaan ni enokak akim ibore ni inyasun. “Ani kechamu itwaan akiratakin ngaropiyae kori ngiboro a itwaan aniche sodi tokokoearae alokai keng, ani keanyun ekokolan ngolo, etachakini ngiboro ngiarei nibore ipei. Ani kengop ekokolan ngolo, erikunio itwaan nikolong eratakinit ngiboro, torikunoe ni ilipitere Akuj sodi kikong kaneni atamar nyelemara ngesi ibore a itwaan aniche. Ibore daang ni engolopatar ngitunga kerai ngaatuk, kori ngisikiria, kori ngamesekin, kori ngiworui, ta ibore cha daang ni echakara, ngitunga luarei lu esakete ibore ngini, ejoikinit erikorio ni ilipeenere Akuj. Itwaan ni idodiuni Akuj atamar ngesi esechit, etachakini itwaan niche ngiboro ngiarei tatachak nibore ipei. Ani kechamu itwaan akiratakin esikiria, kori aite, kori emesek, kori ibarasit cha daang a itwaan aniche, sodi totoan ibarasit ngini, kori towan, kori toremoi. Ani kengopa ngikaanyunak, ejoikinit itwaan ngini elosi ni ilipeenere Akuj sodi kikong atamar nyelemara ngesi ibarasit a itwaan aniche. Ani pekekokoyaritae ibarasit, ejali ilope ibarasit, nakaneni nyetachi itwaan nisek echikakinitae. Ani kekokoyaritae ibarasit, etachi itwaan ngini. Ani kenyamito ngibuin, eyauni itwaan ngini ibore ni idodiunit atamar enyamitae. Nyetachi ngesi ibarasit ni anyamete ngibuin. “Ani kijokok itwaan niche ibarasit sodi towan kori totoan emam ilope kaneni, ejoikinit itwaan ngini etachi. Nakaneni ani kesubakin nguna eyei ilope neni, nyetachi itwaan ngini. Ani kerai ibarasit ngini ni elemuununi ilope ngaropiyae nak itwaan ni ijokokinit ngesi ibarasit, itemokinosi ngaropiyae nguna nados a ibarasit kangini. “Ani kepero itwaan ka apese na nyepero ka ekile a ache, tarai emam itwaan enerit akiut, ejoikinit ngesi idesi ngibaren kiut. Ani kenger apakeng a apese ngesi iusi apese ngina, ejoikinit ekile ngolo idesi ngibaren lu aperioto ka apese ngina. “Taara aberu daang na erai akasuban. “Taara itwaan daang ni eperete ka ibarasit. “Kirirata taara itwaan daang ni ipeyonokini akuj ache mati ayong Ekapolon Akuj. “Nyiiboliar kori nyiichiakia itwaan ni erai ika akwap a ache kainyo iraakasi kolong esi dang ngitunga a akwap a ache na iyakatar Misiri. Nyiiboliar apuserut kori ikoku nikoki. Ani kiboliatar esi kesi kekaloikis ayong, eirari ayong dir akigoro kech, sodi atongo kataar esi alojie. Eliworosi ngaberu kus ngapuseru, sodi toliworos ngide kus lu emam ta apakech. “Ani kimichaarito ngitunga lu iboosit ngaropiyae kus, nyiikokis anikech ngitunga lu imichato isakete kiatakis ngaropiyae ngache ni eyakasi nakus. Ani kilemasi esi eworu a itwaan toliwor ngesi imichaata esi ngesi, kinyiakakisi ngesi eringa akolong nyedooyoro, kainyo erai eworu ngolo bon imukokin ngesi kiratakinea akatorot. Nyo nabo iche eperio ngesi? Ani na ikalounio ngesi ebala kingarakinae, eirari ayong ngakiro keng kainyo arai ayong na ngisien. “Nyiimor Akuj kori nyiilam ekarikon a ngitunga kus. “Nakinae ayong ngakipeyos a ngalemet kus, ka emuna lo epuritoe, ta akimiet a ngikito na enangea ngirwa lu echamit elemunere. “Nakinae ayong ngide kus lusapa lu ekingaren. Nakinae ayong ngiuriuna lu ekingaren anaatuk ka ngamesekin kus. Kimiekisi ngiuriuna lu ekingaren kiruko ka ta itiokech a ngirwa a ngikan-kaarei. Ani akolongit na ngakan-kauni, kipeyokis ayong. “Iraakasi esi ngitunga kang, kotere ngakiro nguna, nyejoikinit esi inyamete akiring a ibarasit ani earete ngibuin, pearai nakisi ngingokwo. “Warasi nyiipetasi ngakiro na eraakasi alioko, nabo nyiingarakis itwaan nikasechan a ngakiro ana eraakasi alioko. Nyiiwap ngakiro a ngitunga alukaalak na esecheta kori na iruorotor ngakiro na nyeraakasi ngaka ateneanut. Nyiiliworosi lu ipakarito lu iboosit esaa lo ititaare. Ani kianyut esi aite kori esikiria a emoit kus lo echakar, tobuakisi ngesi. Ani kepotikis esikiria keng ngasaaja, kingarakisi kitowaa nyiirotokis kimiekis kaneni. “Nyiisikis atiakakin itwaan ni iboosit ngakiro na eriyan na erikorere nitubet ngakiro. Nyiititata ngitunga a ngakiro ana eraakasi alioko. Nabo nyiar itwaan ni nyesechit, kainyo erirae ayong itwaan daang ni ikoni neni. Warasi nyiidiaut ibore ni kidiekitere kainyo itumudukani ibore ngini itwaan, sodi nyiiwap itwaan ngini ngakiro na iyookino, kinyasu eboyor a ngitunga alu emam ibore esechito. “Nyiiboliatar itwaan a akwap anache, ani iyeneta esi eboyor a itwaan ani nyerai akwap akeng, kainyo iraakasi kolong esi dang ngitunga a akwap anache na iyakatar Misiri. “Kitata ngamanat kus a ngikaru a ngikan-kapei sodi tolema ngalemet na ekoniunete. Ani ekaru loa ngikan-kaarei kimiekis kiangasi, nakaneni nyiilema ibore ni erupuni anamanat kanguna. Kimiekisi ngitunga lu iboosit tanyama ibore ni erupunit kaneni, ani ibore ni idongi, tanyama ngitieng a moding. Tosubeta tani ngamanat a ngimusabib kongina ka na ngikito a akimiet. “Tosuba etich a ngirwa a ngikan-kapei, nakaneni warasi nyiisuba etich akolongit na ngakan-kaarei, sodi kiangareta ngikedalak ka ngitunga a akwap anache lu esubete etich kus, ta ngibaren kus dang. “Kiirasi ngakiro daang nakalimok ayong Ekapolon Akuj esi. Nyiilipa ngakujo ngache, nyiilimut tani ngirora kech. “Tosubakisi ngisukukui nguuni alokaru a epei toliworos lu kidodikinitotor esi ayong arimatoi. Ani enangi elap lo enyaritae Abib, lo erai ngesi kolong ipudunioto esi alo Misiri, tanyama akimuj a esukukuu alo a ngamugati anapadok loger lokolong kadungokinitor ayong esi. Ngirwa lukan-kaarei a esukukuu kangolo, nyiinyam ngamugati na iwaakinitae ekitoe lo itubui. Warasi nyiipot akilip ayong peiyaunito akipeyos. “Tanyama akimuj a esukukuu a ngalemet napei isiakineta esi akilem. “Ani enangi adaunet a ekaru, tanyama akimuj a esukukuu a ngikalea na igerioto esi ngikito lu eyakasi namanat kus. Ekaru daang na enangea ngirwa a ngisukukui aluuni kalu, ejoikinit ngikiliok daang epote akipeyonokin ayong Ekapolon Akuj na arai Akuj kus. “Nyiilemut ngamugati na eyei ekitoe lo itubui nakipeyonokinioto esi ayong a ibarasit. Nyiimiekis nikatoronon a ngibaren alu kepeyoore ayong ngirwa lu esukukuu lugu eperi kiwalak. “Ekaru daang, yaunutu ngalemet na ekingaren kai a Ekapolon Akuj ana erai Akuj kus. “Nyiidorokis imesek kori ikale a ngakile a itiokeng. “Ameari ayong emalaikat kingarenik esi, sodi kiyok esi alorot, kiyau ni asubak ayong. Topupo ngesi kiwapa ngakiro keng. Nyiingero ngesi, kainyo amea ayong ngesi, nakaneni nyakarimakini ayong esi erai kingero ngesi. Ani kiwapa esi ngakiro keng sodi tosuba daang nakadungok ayong esi, etiji ayong ngimoe kus daang. Kingarenikini emalaikat kang esi, kiyaa nakwap a Ngiamor, ka Ngiiti, ka Ngiperes, ka Ngikanaan, ka Ngiipi, ta Ngiebus, nakaneni amunyari ayong kesi. Warasi nyiiriedikokis ngakujo kech kori nyiilipa. Warasi nyiiwapa eger lo ilipitotor kesi. Kinyasutu ngakujo kech sodi tobwanga ngapirio kech na ngamoru anakitaleuno. Ani kipeyonokis esi ayong Ekapolon Akuj na arai Akuj kus, kapiari ayong esi kainak akimuj ka ngakipi, nabo alemari ayong ngidekesinei kus daang. Emam aberu na akwap kus na iyesi kori na ekolupani. Etalalae ayong ngirwa lu iyareta esi. “Kaemete ayong ngitunga lu kitopegete esi. Ayauni ayong ngibiler lotunga lu kitijiete esi, nakaneni aree ayong ngimoe kus daang kipungaros anikus. Etubuli ayong ngimoe kus noi. Etwarakini ayong Ngiipi, ka Ngikanaan, ta Ngiiti eringa esi iponito. Nyetwarakini ayong kesi a ekaru a epei kainyo ani kekok neni, iboikin akwap kongin, sodi talalaketa ngitieng a moding kichana esi. Nakaneni etwarakini ayong kesi a ngalooso a ngadikidio tanang ni ilalakearotor esi kiruma akwap. Etiliwori ayong ekukuor a akwap kus lo isiakini anapas a Akaba tanang nangolol a Eupurate, kisiak loche ananam a Mediterenian tanang nariet. Kainakini ayong esi agogongu na ireuneta ngitunga a akwap kangina sodi kitwarakis esi kesi alongaren kus. Nyiichamakinosi ka kesi kori ngakujo kech. Nyiimiekis ngitunga ngulu elomete nakwap kus, ani kimiekis esi kesi, kitosechete kesi esi etal kang. Ani kilipa esi ngakujo kech, eliworosi elokit loaronon anikus.” Tolimok Ekapolon Akuj Musa tama, “Todokutu kidiama emoru ni ayei ayong, iyong ka Aron, ka Nadab, ka Abiu, ta ngikarikok a Ngisirael ngitomwon-kaarei. Ani eringa esi iloka, kijuuruoto kilipa. Nyeapuunete luche nikang, iyong bon iapuuni. Nyeedokut ngitunga kidiama emoru.” Tolot Musa tolimok ngitunga ngitalio daang ka ngakiro na adungunit Ekapolon Akuj. Sodi tatachut ngitunga daang aapei tamasi, “Kisubi sua ngakiro daang na alimu Ekapolon Akuj.” Kigir Musa ngakiro na adungunit Ekapolon Akuj daang. Ani nataparach elilim, todukok ngesi ekeno a ngakipeyos nakeju a emoru sodi kitowo ngamoru ngatomon ka ngaarei na aweikinito ngitela lutomon ka ngiarei a Ngisirael. Sodi tomea ngesi ngisorok lu epeyonokinete Ekapolon Akuj ngakipeyos na inomio, ka akipeyore ngaatuk ngache na eraakasi ngakipeyos a ekisil. Totiak Musa ngaakot a ngibaren alokiding sodi kiwaak ngache natubwae nachukul, ani nache towatak lokeno a ngakipeyos. Ani erumor tolem akitab na achamunet, na egiritae ngakiro na adungunit Akuj, sodi kikeu etoil isomae kiirareta ngitunga. Tolimut ngitunga tamasi, “Kiwapi sua ngakiro a Ekapolon Akuj, atosuba daang na adungu ngesi.” Tolem Musa ngaakot na ayakasi natubwae nachukul towatak ngitunga. Tolim tama, “Ngaakot nugu iyookinete achamunet na ichamunotor esi ka Ekapolon Akuj nakolong kidungokinea esi ngakiro nugu daang.” Apot Musa ka Aron, ka Nadab, ka Abiu, ta ngikarikok a Ngisirael daang lutomwon-kaarei todokasi moru, sodi taanyungasi Akuj a Isirael. Kwap ngakejen keng ayei ibore ni atokokino loger a amoru anapus-arengan, topuseana loger a adis. Nyewana Akuj ngikarikok a Ngisirael ngulu. Aanyungarete kesi Akuj, ani erumor kimuja, sodi tamata. Tolimok Ekapolon Akuj Musa tama, “Todoku kidiama emoru ni ayei ayong nege. Ani na ibunio iyong nege, kainakini ayong iyong ngamoru ngaarei nadapal na igiritae ngitalio daang lu itatamio ngitunga.” Tonyout Musa ka Yochua lo engarakinit ngesi. Kisiak Musa adokar kidiama emoru a Akuj. Tolimok Musa ngikarikok a Ngisirael tama, “Kiboikinos nadakar nege kidarut sua kibonguni. Irukete esi ka Aron ta Ur kane. Itwaan cha daang ni eyei akiroit na engolopatar ka niche, tolot nikech totiaka.” Todoka Musa moru a Sinai, sodi toburuchia edou emoru. Min akwangis a Ekapolon Akuj kidiama emoru. Toburuchia edou emoru a ngirwa a ngikan-kapei. Ani akolongit na ngakan-kaarei, tanyara Ekapolon Akuj Musa alotooma edou. Ani a Ngisirael, ekoni akwangis ngina akim na enoki alokidiama emoru. Sodi toloma Musa lodou na adokea emoru. Kiboi ngesi alokidiama emoru ngirwa ngitomwon-omwon, akwaar ka apaaran. Tolimok Ekapolon Akuj Musa tama, “Tolimok Ngisirael katolemikis ayong ngadekon. Kidiau ngadekon daang nacha esaki itwaan alemun. Ngadekon nguna, ejoikinit eliworosi egolit, ka ngasua nakwangae, ta ngasua nanyangayek. Ngiworui lukaanikak ejokak, ka ngajul a ngamesekin napusiek, ka napusiek-arengak, ta naarengak. Ngiworui lu edonyunitoe anajul a ngaanei. Ngileui a ngimesekin lu emuritae torengeta. Ngileui luajokak, ta ngakito a ngiwo. Ngamieta a ngataae, ekitoe lokaakunyon lo imorikinio ka akimiet a etal, ka eminae lokaakunyon ikwaan ka emitina. Ngamoru naarengak ka asir a ngasua na iwaakinio nakaluwat na erai aka emuron aloapolon a Akuj, ta eboli lo enapit ngesi alorarum. Ejoikinit ngitunga kadukokinete ayong eam, sodi eboikin ayong kiding kech. Todukokisi sodi kiwaakis ngiboro keng daang itemem ka eger lokedodikini ayong esi. “Tosubutu asaduku anakitoe a ewoi ana erai aoyau keng na alokwap ngasentimitae amiat apei ka ngatomon, tarai aurianut ngasentimitae ngatomwon-kapei ka ngakan-kapei, tarai aoyau na alokidiama ngasentimitae ngatomwon-kapei ka ngakan-kapei. Toburuchia nikalapatan ka tooma a egolit, sodi kiwaak egolit lokwaasea keng daang. Tosubak ngasua a egolit na iriamito ngoomwon, tokodakis nakejen keng naomwon, pena ngasua ngaarei na iriamito lowae epei. Tosubak ngakito na etingitere anakitoe a ewoi, tobutak ngakito nguna egolit, sodi kirepak kesi nasua na iriemito eyakasi lowaitin a asaduku. Ejoikinit ngakito nguna imiekinio anasua ana iriemito, nyechamit eutunio. Kiwaak ngamoru nadapal naarei kainakini ayong iyong tooma nasaduku. Ngamoru nadapal nguna kesi na igiritae ngitalio. “Tosubak apukenit na erai egolit bon. Toliwor aoyau keng ngasentimitae amiat apei ka ngatomon, tarai aurianut keng ngasentimitae ngatomwon-kapei ka ngakan-kapei. Tosubak ngiborei lua ngabeben*g** ngiarei lu itiekunitae alogolit. Min ipei lowae epei a apukenit. Tosubak kesi toliworos ngipei ka apukenit. Ekienyikinosi ngiborei lua ngabeben anapukenit. Ngabeben kech na epetara, kimuko apukenit. Kiwaak ngamoru nadapal tooma asaduku sodi kiwaak apukenit kidiama. Kianyun ayong ka iyong kaina. Amini ayong kidiama apukenit, nakidingos a ngiborei aluarei a ngabeben, kainak iyong ngitalio daang lu adungokini ayong Ngisirael. “Tosubak emeesa anakitoe a ewoi lo erai aoyau keng na alokwap ngasentimitae ngatomwon-kauni ka ngakan-kauni, tarai aurianut keng ngasentimitae ngatomwon-omwon ka ngoomwon, tarai aoyau keng na alokidiama ngasentimitae ngatomwon-kapei ka ngakan-kapei. Toburuchia a egolit bon sodi kiwaak atorosit a egolit lowaitin kiriam. Kiwaak atorosit na erai ngamilimitae ngatomwon-kaarei ka ngakan, sodi kisiriam egolit lowaitin a atorosit. Tosubak ngasua a egolit na iriemito ngoomwon, kiwaak kesi lowaitin luomwon eyakasi nakejen. Ngasua na igangito ngakito na etingitere emeesa, iwaakinio diyete atorosit. Tosubak ngakito anakitoe a ewoi toburuchia a egolit. Tosubak ngatubwae nabeleny ka ngikopoi, ka ngichupae, ta ngatubwae nachukul toliworos elemuununere emuna lo epuritoe. Esubio ngiboro ngulu daang a egolit bon. Iwaakinio emeesa ngaren asaduku a Achamunet. Emini amugati na italeunitoe na kepeyoore ayong kidiama emeesa jiik. “Tosubak ni esipor ataa a egolit bon. Tosubak ewae loa ngalup ka ngaten keng a egolit alo itiekitae. Ani ngatur keng nakebuseak, ka nilemu, ta ni epukiarit, imorikinosi daang toliworos ibore ipei. Erupunete ngaten ngakan-kapei alowaitin keng, epete ngauni lowae epei. Apei a ngaten anakan-kapei kanguna, epete ngatur nakebuseak ngauni na eraakasi auk a ngatur a ekitoe alo ikwaan ka engoomo, na eyakasi nilemu, ka ni epukiarit. Epete ngaten ani esipor ataa ngatur nakebuseak ngoomwon na ikote ngatur a ekitoe alo ikwaan ka engoomo, ni eyakasi nilemu ka ni epukiarit. Emini nilemu kwap ateni apei a ngaten anakan-kapei kanguna. Ngalemuyek, ka ngaten, ta ni esipor ataa, eliworosi daang na itiekunitae aapei, a egolit bon. Tosubak ngataae ngakan-kaarei kotere ni esipokinitae, sodi kiwaak kesi toliworos echayete alowae alo alongaren. Tosubak ngasua naridet ngatotol ka ngikaparaparae keng a egolit bon. Tolem ngakiloi ngatomwon-uni ka ngakan a egolit bon tosubakinea ni esipor ataa ka ngiboro luche eyakasi neni. Tochoik asubakin kesi itemem ka eger lokedodikini ayong iyong alomoru. “Tosubak tooma eam kang lo italeunitoe, a ngawarui a ngatomon ana edonyunitoe anajul a ngamesekin anakaanikak ajokak pusiek, ka napusiek-arengak, ta naarengak. Todonyokinoe kesi asir totokokinoe ngiborei lua ngabeben. Tosubak ngawarui daang eriyan, erai aoyau ngamitae ngatomon ka ngaarei, tarai aurianut ngamitae ngaarei. Todonyok ngakan wapei toliworos atiaket apei, todonyok nache kan dang wapei kongina. Tosubak ngatoron a awaru anapus alokwaas alo anikalapatan a awaru ana a atiaket a apei. Kiwaak ngatoron ngatomwon-kan nawaru na atiaket ana ekingaren, ta ngatoron ngatomwon-kan na ikwaan ka kesi na eyakasi nawaru na esal na a atiaket ana ngaarei. Tosubak ngikodo a egolit ngitomwon-kan lu iropakinea iyong ngatiaket naarei toliworos apei. “Tosubak ngawarui ngatomon ka apei anajul a ngaanei toliworos kesi imukitere eam kang. Tosubak ngawarui daang eriyan, erai aoyau ngamitae ngatomon ka ngauni, tarai aurianut ngamitae ngaarei. Todonyok ngakan wapei toliworos atiaket ache. Tobilak awaru na ngakan-kapei ngabilakinet ngaarei alongaren eam kang. Kiwaak ngatoron ngatomwon-kan lokwaas a awaru ana esal a atiaket a apei, sodi kiwaak ngatoron ngatomwon-kan lokwaas a awaru ana atiaket anache. Tosubak ngikodo ngitomwon-kan lua ngasua ananyangayek, tokodak natoron toropakinotor ngatiaket naarei toliworotor akimuket apei. Kinenek epewae a awaru a apei kamanakete eam. Ngasentimitae nache tomwon-kan eyakasi lokwaasea a ewae alokooyen, inenekinosi lokwaasea a eam kimuko. “Tosubak ngakimuket ngache ngaarei, toliwor apei aka eleu a emesek alo emuritae torenger, tarai nache aka eleu aloajokon, toliwor imukere nikalapatan. “Tosubak ngakito na igangito eam eraakasi na eteneenete. Tosub anakitoe a ewoi. Toliwor akitoe na igangit eam daang na erai aoyau keng ngamitae ngoomwon, tarai aurianut keng ngasentimitae ngatomwon-kapei ka ngakan-kapei. Pena ngiwaitin ngiarei lu ejipito, ibakito, toliworos kesi eropakinere ngakito na igangito eam aapei. Pena ngajipet nguna nakito na igangito eam daang. Tosubak eam a Akuj ngakito na igangito ngatomwon-arei lowae loa lokuju pena ngasua na eraakasi ngakwangae ngatomwon-omwon kwap kech. Kwap akitoe apei, pena ngakwangae ngaarei na etingete ngajipet naarei. Tosubak ngakito na igangito eam ngatomwon-arei lowae loa lokwap eam. Pena ngasua na eraakasi ngakwangae ngatomwon-omwon, lowae loa ngalup a ngakito anaarei igangito eam. Ani ewae loa lokamanakete eam lo eyei too, tosubak ngakito na igangito eam ngakan-kapei, ka ngakito na igangito eam ngaarei na eyakasi lowaitin. Ngakito na igangito eam eyakasi lowaitin nguna, eropakinio alokwap sodi kimorikinos aapei tanang kidiama. Ngakito naarei igangito eam eyakasi lowaitin luarei, esubakinio loger ngolo. Nakaneni epete ngakito na igangito eam ngakan-kauni, imorikina ka ngasua na eraakasi ngakwangae ngatomon ka ngakan-kapei na eyakasi lowae loa ngalup, eyakasi ngaarei kwap akitoe na igangit eam apei. “Tosubak ngakito na iriwokina ngatomon ka ngakan anakitoe a ewoi. Toliworos ngakan ngaka ngakito ana igangito ewae epei a eam. Toliworos ngakan ngaka ngakito ana igangito ewae loche a eam. Toliworos ngakan ngaka ngakito ana igangito ewae loa lotoo, lo erai eka lokamanakete. Akitoe na iriwokina na eyei kiding, na ewei anakidingos a ngakito ana igangito eam, emini lowae epei a eam, tanang lowae loche. Toburuchia ngakito na igangito eam a egolit sodi tokodak ngasua na iriemito na igangete ngakito na iriwokina. Eburuchiario ngakito na iriwokina nguna dang a egolit. Todukok eam itemem ka eger lokolong kedodikini ayong iyong alomoru. “Tosubak awaru nakaanikan ajokon edonyunitoe anajul a ngamesekin anapusiek, ka napusiek-arengak, ta naarengak. Todonyokinoe kesi totokokinoe ngiborei lua ngabeben. Kinenek kesi napirio ngoomwon na eburuchiaritae a egolit, na eraakasi ngawo, na ekodakinitae lokodo, sodi kitowae alowaitin a nguomwon alu a ngalup eyakasi ngasua nakwangae. Kinenek awaru kwap angedakinet a ngikodo na eyei lowae loa alokidiama eam kang. Ani asaduku a Achamunet na eyakasi ngamoru nadapal ngaarei tooma, kiwaak naabor a awaru. Etiaki awaru ngina ewae lo italeuno ka ewae lo italeuno noi. Tonikenik apukenit nasaduku a Achamunet. Nikalapatan a ewae alo italeuno noi, kiwaak emeesa lowae loa lokwap eam kang, ka ni esipor ataa lowae loa lokuju. “Ani akituk a eam, kiwaak awaru nakaanikan ajokon edonyunitoe anajul a ngamesekin anapusiek, ka napusiek-arengak, ta naarengak. Todonyokinoe asir. Tosubak awaru naga ngapirio ngakan na esubunitae anakitoe a ewoi, toburuchiarae a egolit, ka akodakin ngikodo ngikan a egolit. Tosubak ngapirio nguna ngiwaitin lua ngalup ngikan a ngasua ananyangayek. “Todukok ekeno a ngakipeyos a Ekapolon Akuj a ngakito a ewoi. Eliwor lo eriyan ngiwaitin daang, erai aoyau keng ngamitae 2.2, tarai aurianut keng ngamitae 2.2. Toliwor aoyau na alokidiama amita 1.3. Kiwaak ngajipet kidiama ngiwaitin luomwon. Imorikinosi kesi toliwor ngipei ka ekeno a ngakipeyos, sodi toburuchiarae a asuat ananyang. Isubakini iyong ngakaparaparae na ikamete ekuron, ka ngakalobochio nawadet ngalup, ka ngatubwae, ka ngikodo, ta ngataritarea na elemere ngatotol anakim. Esubio ngiboro ngulu daang a ngasua ananyangayek. Tosubak ngiriko anasua ananyangayek sodi kiwaak ngasua na iriemito ngoomwon lowaitin toliworos ngatinget. Kiwaak ngiriko ngulu kwap atorosit na ekeno a ngakipeyos, sodi tanang kiding ekeno. Tosubak ngakito natinget anakitoe a ewoi, toburuchia a asuat ananyang. Kirepak kesi daang nasua na iriemito na eyakasi lowaitin daang a ekeno a ngakipeyos, pena neni esaa lo ilepilepitere kesi. Tosubak ekeno a ngakipeyos a ngakito ana etemem, kimiek eororete, itemem ka eger lokolong kedodikini ayong iyong alomoru. “Tosubak alaar a eam kang a ngawarui anakaanikak ajokak. Ani alowae alo alokuju, toliwor aoyau a ngawarui kanguna ngamitae ngatomwon-omwon ka ngoomwon. Kiganga ngapirio ngatomwon-arei na ngasua ananyangayek ana eyakasi ngiwaitin lua ngalup ngitomwon-arei lua ngasua ananyangayek, ta ngikodo ka ngasua kech na esubunitae anasua anakwangae. Tosubae kongina tani alowae alo alokwap alaar. Ani ewae loa lotoo, pena ngawarui na eraakasi aoyau kech ngamitae ngatomwon-arei ka ngaarei, toyakas ngapirio ngatomon ka ngiwaitin lua ngalup ngitomon. Ani ewae loa lokide lo eyei ekidor, toliwor aurianut a alaar ngamitae ngatomwon-arei ka ngaarei. Ngawarui na epete lowae epei eliworosi ngamitae 6.6, toyakas ngapirio ngauni ka ngiwaitin lua ngalup nguuni. Ani ewae loche, epete ngawarui na eraakasi ngimitae 6.6, toyakas ngapirio ngauni ka ngiwaitin lua ngalup nguuni. Ani akituk a eam, emini awaru na erai aoyau keng ngamitae ngakan-koomwon na edonyunitoe anawaru anakaanikan ajokon a ngajul a ngamesekin anapusiek, ka napusiek-arengak, ta naarengak, todonyokinoe asir. Igangio a ngapirio a ngoomwon alowaitin a nguomwon alu a ngalup. Ngapirio daang na iriemito alaar, eropakinio a ngasua anakwangae. Esubunio ngikodo keng anakwangat, sodi tosubunae ngiwaitin kech lua ngalup anasuat ananyang. Eliwor aoyau na ngalup a alaar ngamitae ngatomwon-omwon ka ngoomwon, eliwor aurianut ngamitae ngatomwon-arei ka ngaarei, tarai aoyau na alokidiama ngamitae 2.2. Esubunio ngawarui anawaru anakaanikan ajokon, tosubunae ewae loa ngalup a ngasua ananyangayek. Ngiboro daang lu esubere etich aloeam ka ngakito daang na itoweito eam, ka alaar, esubunio anasuat ananyang. “Todungok Ngisirael kiinut iyong akimiet naajokon a ngikito sodi kinokakinere ataa ebong. Iwaakinete Aron ka talokookeng ataa loeam kang, lowae lo anikalapatan a awaru ana eyei ngaren asaduku a Achamunet. Enoki ataa ngina alongaren kang kaneni ebong tanang nataparach. Irichakinete Ngisirael ka ngalesea kech ngitalio ngulu jik. “Tanyarau Aron ka talokookeng lu enyaritae Nadab, ka Abiu, ka Eleasar, ta Isamar. Totiaku iyong kesi ani a Ngisirael, sodi tosuba etich kang eraakasi ngimurok. Todonyok lokaatokon Aron ngiworui lu eraakar emuron a Akuj, sodi taanyunea ngesi ekipur ka arimatoi. Tanyarau ngikadonyok daang lu etaanyu ayong ekunonoonu a akidony, tolimok kesi atamar todonyo ngiworui a Aron sodi toliworor ngesi emuron kang. Tolimok kesi todonyokis eboli lo erarum, ka akaluwat a emuron a Akuj, ka eworu lokooyen, ka echat lo edonyokinitoe asir, ka achaat, ta aruba. Esubakinete kesi lokaatokon Aron ka talokookeng ngiworui ngulu, sodi tosubeta kesi etich kang eraakasi ngimurok kang. Edonyioto ngikadonyok ngajul a ngamesekin napusiek, ka napusiek-arengak, ka naarengak, ta awaru nakaanikan ajokon, a auno a egolit. “Esubakinete akaluwat a emuron a Akuj anajul a ngamesekin anapusiek, ka napusiek-arengak, ta naarengak. Esubakinete tani a auno a egolit, ta awaru nakaanikan ajokon edonyokinitoe asir. Lokwaasea a awaru, eropakinio ngaunoi ngaarei na eenikinere losegeta. Aruba na etokitoe niajokon na esubunitae aloboro alupei kangulu, eropakinio akaluwat a emuron a Akuj kimorikin toliworos awaru apei. Tolem ngamoru naarengak ngaarei sodi kigerok ngirora lutomon ka ngiarei kata lokookeng a Yakobo namoru nguna, itutupakinit a eger alo kolong edounere. Pena ngikan-kapei namoru apei, pena ngikan-kapei namoru nache. Toseu itwaan ni ekulana, kigerok ngamoru naarei nguna ngirora kata lokookeng a Yakobo, kitowo ngamoru a ngiriko a egolit. Kiwaak kesi kidiama ngaunoi na eananakinere akaluwat a emuron a Akuj losegeta, toliworos kesi itamunitere ngitela lutomon ka ngiarei a Ngisirael. Ani kikokin neni, enapi Aron ngirora kech alosegeta keng, sodi etamuununea ayong Ekapolon Akuj ngitunga kang jiik. Tosubak nginerin a egolit ngiarei ta ngiriko a egolit bon lu eluguritoe loger a loikit sodi toropak logerin. “Todonyok emuron loapolon a Akuj eboli lo enapi alorarum toyeneenea ngakiro na esaki Akuj. Edonyunio aloboro alupei ikote lu asubere akaluwat na emuron a Akuj. Todonyok tani asir na ikwaan ka na akaluwat a emuron a Akuj. Eliwor eboli ngolo lo eriyan ngiwaitin daang, tobilakinitetei ngaarei. Eliwor aoyau keng ngasentimitae ngatomwon-arei ka ngaarei. Tatapak ngangedakinet ngoomwon a ngamoru ana elalak ngaropiyae kidiama keng. Angedakinet na ekingaren, kirepak ngamoru nakaalak a ngaropiyae naarengak-puu, ka na enyaritae topas, ta napus-aliban toreng. Ani angedakinet na ngaarei, kirepak ngamoru nakaalak a ngaropiyae na eraakasi napus-aliban, ka napus-arengan, ta na enyaritae alumas. Ani angedakinet na ngauni, kirepak ngamoru nakaalak a ngaropiyae na enyaritae yasinito, ka nakaagongon noi, ta na enyaritae amesisto. Ani angedakinet na ngoomwon, kirepak ngamoru nakaalak a ngaropiyae na enyaritae berili, ka naarengan, ta auk ana enyaritae alumas. Irepakinio ngamoru na elalak ngaropiyae nguna daang logerin a egolit. Ngamoru natomon ka ngaarei nguna daang, kigerok ekiro epei namoru apei, a ngirora alutomon ka ngiarei a talokookeng a Yakobo. Ikokinio neni sodi toweikis kesi ngitela lutomon ka ngiarei a Ngisirael. Tosubak ngiriko a egolit bon lu eluguritoe loger a loikit, kotere eboli lo enapitae alorarum. Tosubak ngiriko a egolit ngiarei sodi toropak lochileta lu alokidiama eboli lo enapitae alorarum. Toinik ta loikit luarei loriko luarei. Toinik ngiwaitin luche arei ata loikit ni eyakasi ngigerin luarei. Kotere erot ngolo, toropak kesi alowae alo alongaren naunoi na eananakinere akaluwat na emuron a Akuj losegeta. Ani erumor tosubak ngiriko ngiarei a egolit sodi toropak lowaitin lua lokwap a eboli alo enapitae alorarum. Eliwor ni eropakinio neni ekwaas lo alotooma a akaluwat ana emuron a Akuj. Tosubak nabo ngiriko ngiarei a egolit sodi toropak lowae loa lokwap ngaunoi naarei eananakinere akaluwat a emuron losegeta. Aropakinitae ngiriko ngulu diyete etoro a eworu, tarai kidiama aruba na edonyunitoe niajokon. Ani ngiriko a eboli alo enapitae alorarum, toinik loriko a akaluwat a emuron a Akuj a auno anapus, sodi min eboli lo enapitae alorarum kidiama aruba, nakaneni nyiilajalajakin. “Ani elomari Aron lowae lo italeunitoe, enapi eboli lo enapeeneo alorarum. Epete ngirora a ngitela a Ngisirael loboli ngolo. Ikokini ngesi neni sodi etamuununea ayong Ekapolon Akuj ngitunga kang jiik. Kiwaak Urim ka Sumim loboli lo enapitae alorarum sodi toting Aron na ebunio lowae lo italeuno lo ayei ayong. Esaa ngolo, ejoikinit ngesi enapeene eboli ngolo jiik topedorea ngesi akiyen ngakiro na asaki ayong ani a Ngisirael. “Esubunio eworu lo iporit akaluwat a emuron a Akuj a awaru anapus ana esubunitae a ngajul a ngamesekin bon. Toped kiding eworu ngolo min ni ebutokinere akou, sodi totokok ngikwaasea a apedot kangina kiratakinere nyeechil. Kitokorian kwap keng a ngalukan ana ikwaan ka ngalam napusiek, ka napusiek-arengak, ta naarengak, aapei ka eworu lokaanikan ajokon. Tongichak ngichoroi lu esubunitae a egolit nakidingos kech. Tanapeene Aron eworu ngolo na esubea etich erai emuron kang. Iirario eruye a ngichoroi kangulu esaa daang lo elomarea ngesi lowae lo italeuno lo ayei ayong Ekapolon Akuj, kori na erotokinio ngesi kaneni, sodi nyetoana ngesi. “Tosub akaparaparat a egolit sodi kigirak ngakiro nugu kidiama, ‘Italeunitoe toliwor ika Ekapolon Akuj’. Toinik akaparaparat ngina ngaren achaat a auno anapus. Enapeene Aron akaparaparat ngina aloreet keng sodi atachamunea ayong Ekapolon Akuj ngadekon daang na italeunete Ngisirael toliworos ngakang, tani kichwangakinito kesi eger eche lo elemunere ngadekon nguna. “Todonyok echat a Aron lo eninik tojok, sodi totokok achaat naajokon ka aruba na edonyokinitoe asir. “Todonyok talokookeng a Aron ngichetea, ka ngarubae, ta ngapukoto, taanyuneta kesi ekipur ka arimatoi. Kitanap lokaatokon Aron ka talokookeng ngiworui ngulu. Ani erumor toseu kesi ka akitaleun kiwasak akimiet toliworos esubete etich kang eraakasi ngimurok. Todonyok kesi ngisurualei lukaanikak lu enapete kesi anaaborin tananga nakalokidingo. Enapete kesi ngisurualei ngulu tojongoto ngawat kech atakanuu. Ejoikinit Aron ka talokookeng enapeenete jiik ngisurualei ngulu na elomuneta loeam kang kori na eponeta kesi lokeno loa ngakipeyos esubete etich lo eraakatar ngimurok alowae alo italeuno. Ani kikokis neni, nyeario kesi kotere akitatakanuunit ngawat kech. Eliwor etal ngolo lo iwapete Aron ka ngalesea keng jik. “Ikokini iyong nege italeuni Aron ka talokookeng toliworos ngimurok lu esubete etich kang. Tolem emong losorokit ka ngimesekin ngiarei lu emam ni ichwangakina. Tolem ngakiria a ngakanoi naajokak nakaneni nyiiwaak ekitoe lo itubui, sodi tosubak ngamugati ngache kiwaak akimiet, ani ngache nyiiwaak akimiet. Ani ngache tosubak eraakasi ngabisikutio na imorikinitae ka akimiet. Kiwaak kesi nakikap sodi kipeyoo ayong na ilemunea iyong emong ka ngimesekin luarei eraakasi ngakipeyos. “Toriku Aron ka talokookeng nakituk a eam kang, sodi kitaleu kesi kilotaros a ngakipi. Ani erumor kitanap Aron ngiboro lu eraakar emuron a Akuj. Ngiboro ngulu kesi echat, ka akaluwat na emuron a Akuj, ka eworu lokooyen lo iporit akaluwat, ka eboli lo enapitae alorarum, ta aruba. Kitanap ngesi achaat sodi tokodak lomachar lo italeunitoe lo igiritae ngakiro nugu, ‘Italeunitoe toliwor ika Ekapolon Akuj’. Ani erumor tolem akimiet na etal sodi kidokak nakou keng kitaleu ngesi. “Toriku talokookeng a Aron sodi kitanap ngichetea. Kitanap kesi ngarubae anaaborin, ani erumor tobutok ngapukoto nakies kech. Ikokini iyong neni italeuni Aron ka talokookeng. Esubete kesi ka ngalesea kech etich kang eraakasi ngimurok jik. “Toriku emong ngaren eam kang sodi tolimok Aron ka talokookeng atamar kidokokis ngakan kech nakou a emong. Taara emong alongaren kang anakituk a eam kang. Tomietu ngaakot a emong ngadi a ekimoin kon sodi kiwasak najipet a ekeno a ngakipeyos. Ani erumor tobukok ngaakot nache lowae loa ngalup a ekeno. Ani erumor tolem asepae daang, ka ewae loajokon a emany, ta ngingalur luarei imorikina aapei ka asepae kech, sodi topee alokeno toliworos ngakipeyos nakipeyokinit iyong ayong. Ani eliwor akiring a emong ka eleu, ta ngiboro a akook ka ngikujit, topee anikalapatan a adakar toliworos ngakipeyos na elemarete ngasechesea a ngimurok a Akuj. “Tolem emesek epei tolimok Aron ka talokookeng kidokokis ngakan kech nakou a emesek kangolo. Taar emesek ngolo towatak ngaakot keng lowaitin daang luomwon a ekeno a ngakipeyos. Totubutubu nginerin a emesek, kilota ngiboro a akook ka ngamuroi sodi kidokok kidiama akou ka nginerin luche. Topee emesek daang alokeno toliwor akipeyos a akiriket. Kajoikinit ayong akukuny a akipeyos kangina. “Tolem emesek loche, sodi tolimok Aron ka talokookeng kidokokis ngakan kech nakou a emesek kangolo. Taar emesek ngolo sodi kiwasak ngaakot keng ngache lobonibon a ngaki ana aloteten a Aron ka talokookeng. Kiwasak tani lomoyo luapolok a ngakejen ana aloteten. Ani ngaakot na idongete, torwatak lowaitin daang a ekeno a ngakipeyos. Tolem ngaakot ngache alokeno a ngakipeyos, tolem tani akimiet a etal, sodi kiteraterak nia Aron ka ngiworui keng, ani erumor kiteraterak talokookeng ka ngiworui kech. Italeunosi kesi ka ngiworui kech toliworos ngika Ekapolon Akuj. “Kipachu nikatoronon alomesek, ka asonyok, ka asepae, ka ewae loajokon alomany, ka ngingalur luarei imorikina aapei ka asepae kech, ta akalokiding a amuro anakitalio. Anakikap a ngamugati ana kepeyokinitoe ayong, tolem ngamugati ngapei-pei nagelagelae. Tolem apei kanguna iwaakinitae akimiet, tolem apei na nyiwaakinitae akimiet, ta abisikut apei. Kiwaak akimuj naga daang nakan a Aron ka talokookeng tolimok kesi atamar kitaleut, kainakis ayong erai akipeyos na iwakiwakio. Ani erumor tolema iyong anakan kech sodi topee alokeno alo ipeyonokinere Akuj imorikina ka akiring na inomio, toliworos ngakipeyos a akiriket. Kajoikinit ayong akukuny a akipeyos kangina. “Tolem atorobu a emesek kalo kitaleu, kiinak ayong erai akipeyos na iwakiwakio. Eliwor ekiner ngolo anibarasit ekon. “Ani italeunio emuron toliwor eka Akuj, elemunio atorobu ka akalokiding a amuro anakitalio a emesek alo a ngakipeyos a ana iwakiwakio kainakin ayong toliwor akipeyos na iwakiwakio, sodi kitegeliarae toliwor aka ngimurok a Akuj. Ngirwa daang lu elemuneta ngitunga kang ngakipeyos a ekisil, eliworosi atorobu ka akalokiding a amuro anakitalio a ibarasit ngaka ngimurok. Nginerin ngulu eliworosi kesi kainanakinete ayong Ekapolon Akuj. “Irumete talokookeng a Aron ngiworui keng lu eraakar emuron a Akuj, na etoanea ngesi. Ani na italeunere kesi tarata ngimurok, tanapa ngiworui ngulu. Lokookeng a Aron lo ilunyokin nados keng ngesi eliwor emuron, enapi ngiworui ngulu a ngirwa a ngikan-kaarei. Lokookeng a Aron ngolo ngesi lo elomari lowae lo italeunitoe, akisub etich kang alotooma eam kang. “Tolem akiring a emesek alo italeunere Aron ka talokookeng sodi kipoo alowae alo italeunitoe. Enyamete Aron ka talokookeng akiring a emesek ka ngamugati na eyakasi nakikap anakituk a eam kang. Ani akiring na arai ngakipeyos na arimakinere ngasechesea a ngimurok na etaleunere, enyamete kesi. Ngimurok a Akuj make enyamete akiring ngina kainyo erai na italeunitoe. Ani kiwalak akiring kori ngamugati ngache, ejoikinit inomio, nyechamit enyamio, kainyo eraakasi na italeunitoe. “Tosubea Aron ka talokookeng ngakiro daang nakadungok ayong iyong. Kitaleu kesi toliworos ngika Akuj a ngirwa a ngikan-kaarei. Akolongit daang ejoikinit iyong ilemuni emong toliwor akipeyos na erimakinere akisech. Italeuni akipeyos ngina ekeno a ngakipeyos. Ani erumor kiwasak akimiet na etal toliwor lo italeunitoe. Tosubeene kongina akolongit daang, a ngirwa a ngikan-kaarei. Ani kikok iyong neni, eliwor ekeno a ngakipeyos lo italeunitoe. Sodi ani itwaan daang kori ibore daang ni etapi ekeno ngolo, eliwor ni italeunitoe. “Akolongit daang, kipeye jiik alokeno ngimesekin luuchik ngiarei lu eraakasi ekaru epei. Kipeye imesek ipei nataparach, sodi kipeye niche ebong. Ani imesek ni ekingaren, tolem akilo apei a ngakiria a ngakanoi naajokak, kimorik ka alita apei a akimiet ana etal. Kidokak alita apei a emuna alo epuritoe toliwor akipeyos. Kipeye imesek niche ebong, sodi tolem aapei ka ngakiria, ka akimiet, ta emuna lo epuritoe, loger alo a ataparach. Eliworosi ngakipeyos a akiriket kang, ayong Ekapolon Akuj. Kajoikinit ayong akukuny a akipeyos kangina. Ngirwa daang, eliworosi ngakipeyos nugu na ipeyeo alongaren kang, anakituk a eam kang. Neni ngesi kiriamiriami ayong ka ngitunga kang, kesuruor iyong. Kiriamiriami ayong ka Ngisirael neni. Itiliwori akwangis kang neni ni italeuno. Etiliwori ayong eam ka ekeno a ngakipeyos kang lu italeuno. Etaleuni ayong Aron ka talokookeng tosuba etich kang eraakasi ngimurok. Amini ayong ni eyakasi Ngisirael, sodi atoliwor Akuj kech. Eyenunete kesi atamar ayong Ekapolon Akuj arai Akuj kech, nakolong epuduni kesi anakwap a Misiri, amin ni eyakasi kesi. Ayong Ekapolon Akuj arai Akuj kech. “Tosubak ekeno a ngakipeyos a ngakito ana eraakasi ngawo, kinomere emitina. Echamit ngiwaitin daang eriyan, ewae lokooyen erai ngasentimitae ngatomwon-omwon ka ngakan, ewae loche louriyen erai ngasentimitae ngatomwon-omwon ka ngakan, ani aoyau na alokidiama erai ngasentimitae ngatomwon-koomwon. Ngajipet na eyakasi lowaitin luomwon, ejoikinit imorikinosi ka ekeno ngolo tarata ngipei. Tobutak egolit lowae lo alokidiama ka lowaitin luomwon, ta ngajipet keng ani erumor tosil a atorosit a egolit kiriam. Tosubak ngiriko ngiarei a egolit lu ilepilepere, sodi toinik kwap atorosit na egolit alowaitin aluarei ibakito, tokoda ngakito na ilepilepere. Tolem ngakito nguna anakito ana eraakasi ngawo sodi tobutak egolit. Kiwaak ekeno ngolo lowae loa anikalapatan a awaru ana ineno alongaren asaduku a Achamunet. Neni ngesi kiriamiriami ayong ka iyong. Ataparach daang na ebunio Aron akisutar ngataae, inomi ngesi emitina alokeno kangolo. Inomi Aron emitina tani ebong na ebunio akinokakin ngataae. Akipeyos na inomeenere emitina naga, ejoikinit esi ka ngalesea kus ilemuunete jiik. Nyiipeo alokeno kangolo ibore nikitengeritoe ipeyoo, kerai akipeyos a ibarasit, kori akipeyos a ngalemet, nabo nyiidokak emuna lo epuritoe toliwor akipeyos. Akolongit apei alokaru, elemuni Aron akipeyos na italeunio ekeno ngolo, kiwasak ngaakot a ibarasit ani erai akipeyos na erimakinere akisech, kiwasak najipet naomwon a ekeno. Esubio kongina ekaru daang, jiik. Ejoikinit ekeno ngolo eliwor lo italeuno noi ayei ayong Ekapolon Akuj.” Tolimok Ekapolon Akuj Musa tama, “Ani imari iyong Ngisirael, ejoikinit itwaan daang elemuni ngaropiyae na eyuunea akiyar keng, sodi nyeanyunotor ngesi ka ngakiro naaronok na imarunere. Itwaan daang ni imarunio, ejoikinit elemuni ngaropiyae na itemokino, itemitoe a eger alosek itemeenere. Ejoikinit itwaan daang elemuni toliworos ngadekon kang. Itwaan daang ni ejoikinit imarunio ni eraakasi ngikaru keng ngitomwon-arei, ka lu iporito ngikaru keng ngitomwon-arei elemuni ngaropiyae nguna. Nyeelem ekabaran nakaalak na idwangito nguna, nyeelem ni iboosit na nyitemokino, esaa lo elemuneta kesi ngaropiyae nguna toyuuneta akiyar kech. Kidiau ngaropiyae nguna ani a Ngisirael sodi tosubea etich aloeam kang. Eliwor echur ngolo lo elemunete kesi etachitotor akiyar kech, sodi etamunea ayong akiyok kesi.” Tolimok Ekapolon Akuj Musa tama, “Tosubak ateger a ngasua ananyangayek ana erai ewae loa ngalup ngasua nanyangayek. Kiwaak nakidingos a eam ka ekeno a ngakipeyos kang, kiwaak ngakipi nateger. Kilotanareta Aron ka talokookeng ngakan ka ngakejen a ngakipi kanguna, eringa nyelomara loeam kori na eponeta kesi lokeno apeikin Akuj ngakipeyos a akiriket. Ani kikokis neni, nyeario kesi. Ejoikinit kesi ilotarete ngakejen kech ka ngakan kech sodi nyeetoaka. Irichakinete kesi ka ngalesea kech etal logo jik.” Tolimok Ekapolon Akuj Musa tama, “Tolem ngikito lukaakunyok kitem ngakiloi ngakan-kapei a ekinyaate alokaliwan ekukuny todwar, ka ngakiloi ngauni a ekitoe aloongor-nyang itukukunyi akimuj, ka ngakiloi ngauni a ngakasirim anakaakunyok. Kitem nabo ngakiloi ngakan-kapei a ekitoe alo ikwaan ka loongor-nyang itukukunyi akimuj, (kitemoi daang itemem ka eger lopalem sek itemeenere). Kiatak ngalitae ngoomwon a akimiet, sodi kitaleu akimiet nakiwasakina ngina, kimorikinae loger a akimiet anakaakunyon. Kiwasak akimiet ngina loeam kang, ka asaduku a Achamunet, ka emeesa, ka ngiboro keng daang, ka ni esipor ataa ka ngiboro keng, ka ekeno lo inomere emitina, ta ekeno a ngakipeyos ka ngiboro keng daang. Kiwasak atubwa na ilotare, kiwasak tani ewae keng loa ngalup. Kitaleu ngiboro ngulu a eger kangolo, nakaneni eliworosi lu italeuno noi. Itwaan daang kori ibore daang ni etapi kesi, ewani agogongu na eraakatar kesi lu italeuno. Ani erumor kiwasak Aron ka talokookeng akimiet, sodi kitaleu kesi toliworos ngimurok lu esubete etich kang. Tolimok Ngisirael tama, ‘Erai akimiet na etal ngina esubere etich keng jiik analesea kus kadaang. Nyechamit esi iwasakinete ngitunga lu nyitaleunitoe, kori warasi nyiiwap ekitetemes lopei ngolo tosubeta akimiet ache na imorimoritae loger ngolo. Erai akimiet ngina na etal, nakaneni ejoikinit esi itiliworete na italeunitoe. Itwaan cha daang ni esubakini akimiet ache na ikoni ngina, kori itwaan daang ni iwasakini itwaan ni nyerai emuron a Akuj, nyeringa imarunitae atamar erai ipei a ngitunga kang.’ ” Tolimok Ekapolon Akuj Musa tama, “Tolem ngikito lu itukukunyete akimuj lugu lu eriyan, lu enyaritae ngitapi, ka ngichekeles, ka ngikelibena, ta lo erai ekinyaate bon. Tosubakinea kesi emitina lo inomio, kimorikinae loger a akimiet anakaakunyon. Kiatak amakat kitoseg ngesi ka akitaleun. Kirie epewae keng tonyapidid, sodi yaa tooma eam kang. Ani erumor kipurupurak ngaren asaduku a Achamunet. Kitiliwo emitina lo inomio ngolo lo italeuno noi. Warasi nyiiwap ekitetemes logo tosubuneta emitina eche lo inomio lo erai ekus. Kitiliwosi emitina ngolo lo etaleun toliwor ekang. Ani kesubaki itwaan emitina lo ikoni ngolo kitiliwo akimiet nakaakunyon na iwasa, nyeringa ngesi imarunitae atamar erai ipei a ngitunga kang.” Tolimok Ekapolon Akuj Musa tama, “Kingolik a, aseu ayong Besalel, lokookeng a Ur, lo erai etatait a Uri, alo erai eka ekitela a Yuda. Elelebik ayong ngesi agogongu kang. Etaanyu ayong ngesi achwaanu, ka aosou, ta ekunonoonu lo eyenea akisub ngiboro, ka arere ngiboro lokojokon tosub a egolit, ka akwangat, ta asuat nanyang, tokul ngamoru na esubere ngiboro, kichie ngakito, ka akisub ibore niche esaki ekunonoonu daang. Aseu ayong tani Oliab lokookeng a Aisamak, lo erai eka ekitela a Dan, tosuba ka ngesi etich. Ainak ayong tani ngikunonoe a adukuoru luche aosou, sodi tosubeta kesi ibore daang ni kadungok ayong iyong atamar tosubae. Esubunete kesi eam kang, ka asaduku a Achamunet ka apukenit keng, ta ngiboro daang a eam, emeesa ka ngiboro keng, ni esipor ataa erai egolit bon esubunitere ka ngiboro keng daang, ekeno lo inomere emitina, ekeno a ngakipeyos ka ngiboro keng daang, ta atubwa ka ewae keng loa ngalup. Esubunete kesi ngiworui luajokak enapete Aron ka talokookeng esubete etich kang lo eraakatar ngimurok. Esubunete akimiet na etal ka emitina, lu eyakasi lowae lo italeunitoe. Ani esubete kesi ngiboro ngulu daang, ejoikinit esubakinete iyookino loger lo kadungok ayong iyong.” Todungok Ekapolon Akuj Musa atamar, tolimok Ngisirael tama, “Kirichakisi akolongit a Sabato na erai akolongit eangaritor ayong, kainyo erai ibore ni idodiuni anikus ka ayong jiik atamar ketiliwo ayong Ekapolon Akuj esi ngitunga kang. Kirichakisi akolongit a Sabato kainyo erai na italeunitoe. Nakaneni itwaan cha daang ni ewouni akirichakin, dio tosub etich akolongit ngina, eario. Eyakasi esi ngirwa ngikan-kapei lu echamit isubeta etich kus. Nakaneni erai akolongit na ngakan-kaarei na italeunitoe toliwor akang. Itwaan cha daang ni esubi etich akolongit ngina, eario. Irichunete Ngisirael akolongit ngina toliwor itamunitotor achamunet. Eliwor akolongit ngina kitamunitor ayong ka Ngisirael jik atamar asubi ayong Ekapolon Akuj adis ka akwap a ngirwa a ngikan-kapei. Ani akolongit na ngakan-kaarei, eanga.” Ani kiruor Akuj ka Musa alomoru a Sinai kerumor, nak ngesi Musa ngamoru nadapal ngaarei na egirit ngesi alope ngitalio. Ani eyenunete ngitunga atamar atineniki Musa nikooyen awou atiyaun alomoru, tochunakinos wapei toloto nia Aron tolimokis tamasi, “Nyikiyeni sua ngakiro kiriamunotor itwaan be Musa en, nikolong kipuduni ngoni alo Misiri. Tosubakinae tokona sua akuj nakiriki.” Tolimok Aron kesi tama, “Talachutu ngamaritoi a egolit na enapito ngaberu kus ka talokookus, ka tanakookus anaki kiinut ayong.” Sodi talachut ngitunga daang ngamaritoi na anapito anaki inut Aron. Kidiau Aron ngamaritoi na ngaki sodi kinom tokeiasi, tobukok niborosit, sodi tosubak, itaok nikile. Tolimut ngitunga tamasi, “Ngisirael, akuj yok naga, nakolong kipuduni ngoni alo Misiri!” Ani ingolikini Aron ngakiro nguna, todukok ekeno a ngakipeyos ngaren itaok ngini sodi tama, “Emini moi esukukuu lo kirimar Ekapolon Akuj.” Ani nataparach elilim, yaut kesi ngibaren lu eraakasi ngakipeyos na inomio, luche lunyamat lu araakasi ngakipeyos a ekisil. Kiboikinos ngitunga akinyam akimuj a esukukuu, ani erumor tolomakis akimat epurot ka akidongare emerasi. Tolimok Ekapolon Akuj Musa tama, “Totiyaar atipei kainyo ngitunga kon lu ngoon irikuni iyong alo Misiri, asecha kangero ayong. Aisikis erot lokolong adungokini ayong kesi atamar kiwapa. Asubakis kesi itaok nikile alogolit alo etekeiarete, ani erumor kilipa ka akipeyokin ngakipeyos. Ebalasi kesi erai ibore ngini akuj kech, nakolong epuduni kesi alo Misiri. Ayeni ayong atamar ichanaka ngitunga lugu noi. Kimiekinae tokona ayong nyikiratak. Angoikinit ayong kesi, asaki atomunya, sodi ketiliwo iyong ka ngalesea kon ebukut lo eyenikinitae.” Nakaneni kimaima Musa Ekapolon Akuj na erai Akuj keng tolimok tama, “Ekapolon Akuj, nyo ingoikinitor iyong ngitunga kon kona, tarai kolong iyuuni iyong alo Misiri a agogongu anaationon? Isaki iyong Ngimisiri tamasi irikuni iyong ngitunga kon alo Misiri akiar alomoru sodi tomunya anakwap a? Toisik angoit, kimiek ngakiro nguna, nyiiyau ngichan luaronok ngulu lotunga kon. Kitamu ngikasubak etich kon Aburaam, ka Isaka, ta Yakobo. Ichikakini kolong iyong kesi tolimok atamar italalae iyong ngalesea kech loger a alalau a ngikanyer alu eyakasi nadis. Kichikak iyong kesi nabo atamar iinakini ngalesea kech akwap ngina toliwor akech jik.” Nakaneni abu Ekapolon Akuj kimiek ngakiro nguna, nyeeyau ngichan luaronok lotunga keng loger losek abalar ayauni. Totiyaar Musa alomoru ekodit ngamoru nadapal naarei na egiritae ngitalio lowaitin luarei. Akuj alope asubi ngamoru nadapal naarei nguna, sodi kigirak ngitalio lutomon. Kiira Yochua ngitunga echalasi tolimok Musa tama, “Apupi ayong echale a ejie anadakar.” Tolim Musa tama, “Abe esibit bo meere echale lo idwangitere ngimoe, kori akigoro na idwangitotor ngimoe kesi. Erai echale ngolo eka aeo.” Ani eapuuni Musa diyete adakar, taanyunga itaok ngini ka ngitunga lu edongaate, abu tongo. Kimasak ngesi ngamoru naarei nadapal nguna kwap eringa eyei nakeju a emoru, tobwang ngesi ngamoru nguna. Tolem ngesi itaok nisek asubakinete kesi kinom, ani erumor kirie tonyapidid, sodi kimorik ka ngakipi. Abu ngesi kitamat ngitunga. Tolimok ngesi Aron tama, “Anukiro nugu kisubeta iyong ngitunga lugu, itusubea iyong kesi akisech naaronon ikoni naga?” Tatachak Aron tama, “Nyikingoik ayong. Iyeni iyong eger lo imuitor ngitunga lugu akisub naaronok. Kalimokinete kesi ayong tamasi, ‘Nyikiyeni sua ngakiro asubakinosi anitwaan be Musa kaen, ani kolong kirikuni sua alo Misiri. Kotere ngakiro nguna tosubakinae sua akuj nakiriki.’ Atolimok ayong kesi atamar yaut asir kech na egolit. Apot lu anapito asir ngina talachut kainut ayong. Atachakak ayong asir ngina nakim sodi tatakanu itoak nikile en!” Kingolik Musa atamar abu Aron kimiek ngitunga emerakinosi a abangaanut, tokienatar ngimoe kech kesi. Sodi towo ngesi alokidor a adakar kirema tama, “Itwaan daang ni ibakit alowae a Ekapolon Akuj, bu nege!” Apot ngitunga a ekitela a Lawi daang tochunun kiriama ngesi. Tolimok ngesi kesi tama, “Edungunit Ekapolon Akuj, na erai Akuj a Isirael atamar toting ipei kus daang ekileng, sodi kitor kiding adakar napei alokidor kalo tanang loche, taar ngikaitotoi keng, ka ngipaalon, ta ngikidunyet keng.” Kiwapakis ngitunga a ekitela a Lawi ngakiro nguna, sodi taara ngitunga ngabunge ngauni akolongit ngina. Tolimok Musa ngitunga a ekitela a Lawi tama, “Italeunosi esi akolongit naga tarata ngimurok lu isubete etich a Ekapolon Akuj ani iareta talokookus ka ngikaitotoi kus. Kotere ngakiro nguna kipia esi Ekapolon Akuj.” Ani iwalari tolimok Musa ngitunga tama, “Isuba esi akisech naaronon noi. Nakaneni adoki tokona ayong nabo emoru atobongo nia Ekapolon Akuj atoro kapedori aanyun arimakino a akisech kus.” Tobongo Musa nia Ekapolon Akuj tolimok tama, “Asuba ngitunga lugu akisech naaronon noi. Asubakinete kesi akuj alogolit sodi kilipa. Torimak kare akisech kech. Ani pekirimak iyong akisech kech, kikisa ekiro kang anakitab ana igirit iyong ngirora a ngitunga kon.” Tatachak Ekapolon Akuj tama, “Ngulu kasechakis ayong kesi ekisari ayong ngirora kech anakitab kang. Kape tokona. Toriko ngitunga nikolong kalimokini ayong iyong. Toyen atamar kiriki iyong emalaikat kang, nakaneni enangi akolongit na eriraa ayong ngitunga lugu kotere akisech kech.” Sodi yau Ekapolon Akuj edeke lotunga ani etusubeta kesi Aron itoak alogolit. Tolimok Ekapolon Akuj Musa tama, “Tonyoutu kane, iyong ka ngitunga lu irikuni iyong alo Misiri. Toloto nakwap nakolong echikakini ayong ainakin Aburaam, ka Isaka, ka Yakobo, ta ngalesea kech. Ameuni ayong emalaikat kitorik iyong, sodi etwarak ayong Ngikanaan, ka Ngiamor, ka Ngiiti, ka Ngiperes, ka Ngiipi, ta Ngiebus. Iloose esi nakwap na ileleba ngakile ka akimiet a ao. Nakaneni nyikirukori ayong ka esi kainyo iraakasi esi ngitunga lukechanak noi. Ani kiruko ayong ka esi, kamunyakini ayong esi lorot.” Ani iirarete ngitunga ngakiro nguna, tolomakis akigoro nakaneni nyenapa nabo asir a ngasua. Adungokinit sek Ekapolon Akuj Musa atamar tolimok kesi tama, “Iraakasi esi ngitunga lu ichanaka noi. Ani kiruko ayong ka esi, tani wadiochichi, kamunyari ayong esi. Talachutu tokona asir kus sodi atotiaku ayong ngakiro nakasubakinea esi.” Ani erotokinete ngitunga alomoru a Sinai, nyenapa nabo kesi asir a ngasua jik. Abu toliwor na elometa Ngisirael ni elomete, tolem Musa eam lo italeunitoe, kiwaak ni echadakina anadakar. Apon tanyarae eam a Akuj. Ani itwaan daang ni ayei akiroit asaki ani a Ekapolon Akuj, tolot loeam. Ani nacha elosio Musa inaa, towaa ngitunga anakituk a ngieman kech kiteosi Musa tanang elomari loeam ngolo. Ani elomari Musa tooma, totiyaun apir a edou min nakituk a eam, sodi kisuruor Ekapolon Akuj Musa. Napei ingolikineta ngitunga apir a edou anakituk a eam, toriediko. Eruoronosi Ekapolon Akuj ka Musa ekobanakinosi ngakiro, loger lo iruorotor itwaan ka lopae keng. Ani erumor tobongo Musa nadakar. Nakaneni esorokit lo engarakinit ngesi lo anyaritae Yochua lokookeng a Nun, eboyeene aloeam. Tolimok Musa Ekapolon Akuj tama, “Kilimok iyong ayong dir atamar toriko ngitunga lugu nakwap ngina, nakaneni nyelimokina iyong ayong atamar ngae imeari iyong erukosi ka ayong. Ibala iyong kiyeni ayong lokojokon nabo kijoikinito ngakiro kang. Ani tokona kijoikinito ngakiro kang, tolimokinae ngakiro na isaki iyong akisub, sodi atosub ayong etich kon, atorubak ketalakarit iyong. Toyen nabo dang atamar iseu iyong ebukut logo toliwor ekon a alope.” Tolim Ekapolon Akuj tama, “Kirukori ayong ka iyong, sodi kesianga ayong iyong.” Tatachak Musa tama, “Ani pekiruko sua ka iyong, nyikitorotok sua kane. Ikokinio eyenio atamar ilakara iyong kotere ngitunga kon, ka ayong dang ai, erai pekiruko sua ka iyong? Erukitene kon ka sua ngesi kitiakit sua ka ngitunga luche daang anakwap.” Tolimok Ekapolon Akuj Musa tama, “Kotere nikayenea ayong iyong lokojokon, nabo kitalakarit iyong ayong, asubakini ayong ngakiro nguna loger lo ilimunio iyong.” Kimaima Musa ngesi tolimok tama, “Kimiekinae kare ayong ataanyunga akwangis kon naakwaan kea.” Tatachak Ekapolon Akuj ngesi tama, “Esitoruni ayong apolou kang daang ngaren kon, sodi atanyara ayong ekiro kang ipupi iyong. Ayong arai Ekapolon Akuj, nakaneni edodiuni ayong ajokis kang ka ngisien ani eyakasi ngulu aseu ayong. Nyeketaanyungari ayong iyong ereet kang, kainyo emam itwaan kaanyungari ayong kidong eyari. Nakaneni diyete kang nege eyei ataaba na ipedorea iyong akiwo. Ani itoruni akwangis kang naakwaan kea neni, ewaakini ayong epuke nataaba, sodi katarap iyong a akan kang, etor mono ayong neni torumor. Ani erumor atolema ayong akan kang, sodi taanyunga iyong akau kang, nakaneni nyianyungari ereet kang.” Tolimok Ekapolon Akuj Musa tama, “Tokul ngamoru ngaarei nadapal na ikwaan ka nangoon a ekingaren, sodi egirak ayong ngakiro nakolong ayakasi namoru na ekingaren nakolong ibwangi iyong. Tonyou iyong moi nataparach, todoku kidiama emoru a Sinai kitoriam ayong alokidiama. Nyiirukut ka itwaan tani ipei, nabo emam itwaan eanyungario alowae a eche a emoru. Nyechamitae ngamesekin kori ngaatuk edakasi akeju a emoru.” Sodi tokul Musa ngamoru ngache ngaarei. Ani iwalari, nataparach elilim, yaa kidiama emoru a Sinai, loger lo adungokinitor Ekapolon Akuj. Bu Ekapolon Akuj eyei lodou towaa ka Musa kaneni. Abu Ekapolon Akuj tolim ekiro keng, lo erai Ekapolon Akuj. Kitor Ekapolon Akuj ngaren Musa, tolim tama, “Ayong lo arai Ekapolon Akuj, arai Akuj naajokon noi, nabo arai Akuj a ngisien. Arai ayong Akuj na nyangoyeene atipei, nabo edodiunit amina naationon atarai nakamunoi. Erichakinit ayong akichikichiket kang anabunge a ngalesea, nabo arimakini aronis ka akisech. Nakaneni nyaisikini ayong akirirare ngide ka ngide a ngide kotere akisech a ngikauriak kech, tanang nalesea na ngauni ka na ngoomwon.” Toriedik Musa atipei tatap ereet ngalup, sodi kilip. Tolim ngesi tama, “Ekapolon, ani kijoikinito iyong dir ngakiro kang, bua kare erukosi ka sua. Ichanaka ngitunga lugu, nakaneni torimakinae sua aronis ka akisech kosi, sodi kitacham sua atarautu ngitunga kon a alope.” Tolimok Ekapolon Akuj Musa tama, “Kichamakin tokona ayong ka Ngisirael. Asubakini ayong ngakiro nakailiilok iteete kesi. Nyesubakina ayong ngakiro na ikote nguna alobukut a eche, anakwapea kadaang. Ingolikinete ngitunga daang ngakiro nakailiilok asubakini ayong, Ekapolon Akuj, kainyo asubakini ayong ibore niketubulon anikus. Kiwapa ngitalio lu kainakinit ayong esi akolongit naga. Ani iloose esi ngaren, etwarakini ayong Ngiamor, ka Ngikanaan, ka Ngiiti, ka Ngiperes, ka Ngiipi ta Ngiebus. Tochoito ichamakinosi ka ngitunga a akwap ana ilomarete esi, kainyo eliwor ibore ngini elokit loaronon anikus. Nakaneni toyatasi ngikenoi kech lua ngakipeyos, tobwangabwangata ngapirio kech na italeunitoe, sodi totubutuboto ngakisikwaanet a akuj kech anabe Achera. “Nyiilipa akuj ache, kainyo Ekapolon Akuj, na erai ekiro keng Etereku, erai Akuj a etereku. Nyiichamakinosi ka ngitunga a akwap kangina kainyo na ilipeta kesi ngakujo kech kipeyokis ngakipeyos, kinyaraunete kesi esi kimuja ka kesi. Ani kikokis neni, inyamete esi akimuj kech na ipeyokinito kesi ngakujo kech. Epedorete talokookus akiut ngide kech lupesur lu ibatarete kesi katongero ayong, toliworos ilipito ngakujo kech nagelayek. “Nyiisubakis ngakujo a ngasua sodi kilipa. “Kirichakisi esukukuu a ngamugati anapadok. Elap lo enyaritae Abib, tanyama ngamugati napadok a ngirwa a ngikan-kaarei loger lokolong kadungokinea ayong esi, kainyo irotokinete kolong esi elap ngolo alo Misiri. “Ikoku nisapat daang ni idounio ekingaren ka ibarasit daang ni euriunio ekingaren, erai ikang. Nakaneni ilokonyuunete esi itasikiria ni euriunio ekingaren toliwor ikus ani ilokonyikinioto imesek nados keng. Ani pekilokonyuut esi toliwor ikus, tobila emosiring keng. Kilokonyuutu ikoku nisapat daang toliwor ikus. “Emam itwaan ebuni ngaren kang emam akipeyos etingit. “Tosuba ngitichisio kus a ngirwa a ngikan-kapei nakaneni nyiisuba ngitichisio akolongit na ngakan-kaarei, tani kerai ngirwa lu itaare, kori lu elemere ngamanat. “Kirichakisi esukukuu a ngalemet lo elemere ngakanoi na ekingaren, ka esukukuu loa ngikalea lo egerere ageor ngirwa lu elosio ekaru adaun. “Ekaru epei, echamit ngitunga kus lukiliok epote ngaponet ngauni kepeyoto ayong Ekapolon Akuj na arai Akuj a Ngisirael. Ani ketwarak ayong ngibukui lu eyakasi ngaren kus kerumor, sodi eatak akwap kus, emam nabo itwaan eremi akwap kus ngaponet nauni daang iponeta esi akilip Ekapolon Akuj na erai Akuj kus. “Nyiilemut ngamugati na eyei ekitoe lo itubui nakipeyokinioto esi ayong akipeyos a ibarasit. Warasi akiring adio a ibarasit ani eario kotere esukukuu a Adeparet eperi kiwalak. “Yaunutu kai a Ekapolon Akuj ngikinyam lua ekingaren a ngalemet kus. “Nyiidorokis imesek kori ikale a ngakile a itiokeng.” Tolimok Ekapolon Akuj Musa tama, “Kigirak ngakiro nugu, kainyo ngakiro nugu kesi kichamakinor ayong ka iyong, ta Ngisirael.” Kiboikin Musa inaa kiruko ka Ekapolon Akuj a ngirwa a ngitomwon-omwon, akwaar ka apaaran. Emam ibore ni amat ngesi kori ni anyam. Kigirak ngesi ngakiro a achamunet namoru nadapal. Ngakiro nguna kesi ngitalio lutomon. Na atiyaunor Musa alomoru a Sinai etingit ngitalio lutomon, emaunit ereet keng, kainyo eruorosi sek ngesi ka Ekapolon Akuj. Nakaneni peayeni Musa atamar emaunit ereet keng. Taanyungasi Aron ka ngitunga daang ereet a Musa imaunit sodi toema kesi aapiyar diyete keng. Abu Musa tanyarau kesi, sodi toloto Aron ka ngikarikok daang a ngitunga nia Musa, kisuruor Musa kesi. Ani erumor tochunun Ngisirael daang kiriama Musa. Nak Musa kesi ngitalio daang lusek ainakini Ekapolon Akuj alomoru a Sinai. Ani erumori Musa akisuruor kesi, kimuk ereet keng a awaru. Toliwor ani elomari Musa loeam a Akuj akiruor ka Ekapolon Akuj, talacha awaru aloreet keng. Ani epuduni nikalapatan, tolimok Ngisirael ngakiro daang na adungokinitae ngesi atamar tolimo. Kingolikis ngitunga ereet keng imaunit. Sodi kimukok Musa awaru loreet keng nabo tanang na elosio akiruor ka Ekapolon Akuj. Tochunak Musa Ngisirael daang wapei tolimok tama, “Ngakiro nugu kesi kidungok esi Ekapolon Akuj atamar tosuba. Isubete esi etich a ngirwa a ngikan-kapei, nakaneni eliwor akolongit na ngakan-kaarei nakiangaret, na italeunitoe kotere ayong, Ekapolon Akuj. Itwaan daang ni esubi etich akwaar ngina, eario. Nyiinokakis tani akim anawiyei kus akolongit na Sabato.” Tolimok Musa Ngisirael daang tama, “Ngakiro nugu kesi adungu Ekapolon Akuj. Yautu ngadekon nia Ekapolon Akuj. Itwaan daang ni esaki, echamit eyauni ngadekon a egolit, ka akwangat, ta ngasua nanyangayek, ngiworui lukaanikak ajokak, ta ngajul a ngamesekin napusiek, ka napusiek-arengak, ta naarengak, ta ngiworui lu edonyunitoe anajul a ngaanei. Ngileui a ngimesekin lu emuritae torengeta, ngileui lukaanikak ajokak, ta ngakito a ngiwo. Akimiet a ngataae, ekitoe lokaakunyon lo imorikinio ka akimiet na etal, ta emitina. Ngamoru naarengak, ka asir a ngasua na iwaanakinio nakaluwat na erai aka emuron aloapolon, nabo iwaakinio tani loboli lo enapit ngesi alorarum. “Ngitunga daang lukunonoi anikus, ejoikinit epote tosuba ibore daang loger lo edungunitor Ekapolon Akuj. Tosubakisi eam ka ibore ni imukere ewae loa anikalapatan, ka ngikodo, ta ngakito na igurorere, ta ngakito na iriwokinio, ka ngapirio, ta ngiwaitin lua ngalup. Tosubakisi asaduku a Achamunet, ka ngapirio keng, ka apukenit keng, ka awaru na erapere. Tosubakisi emeesa ka ngakejen keng, ka ngiboro keng daang, ta ngamugati na ipeyoore Akuj. Tosubakisi tani ni esipokinio ibore ni inwakuni neni, ka ngiboro keng daang. Tosubakisi ngataae ka ngamieta kech. Tosubakisi ekeno lo inomere emitina, ka ngakito keng, ka akimiet na etal, ka emitina, ta awaru na akituk a eam. Tosubakisi ekeno a ngakipeyos ekodakina ka ngasua keng nanyangayek na iriwokina, ka ngapirio keng, ka ngiboro keng daang, ta ateger ka ewae loa ngalup. Tosubakisi ngawarui a alaar, ngapirio keng ka ngiwaitin lua ngalup. Tosubakisi awaru na ekidor a alaar. Tosubakisi ngiriko ka ngaunoi a eam ka na alaar, ta ngiworui luajokak enapete ngimurok a Akuj na esubeta etich alowae alo italeunitoe. Ngiworui lua etal lu eraakasi ngika Aron alo erai emuron a Akuj, ka talokookeng.” Torotokis Ngisirael daang ani ayei Musa, ani itwaan daang ni asakit, abu yau ngadekon nia Ekapolon Akuj, todukere eam a Akuj. Yaut kesi ibore daang ni asakitae kotere akipeyore Akuj ka adonyio ngiworui a ngimurok. Ngitunga daang lu asakito, napei alokiliok tanang naberu, yaut ngimutuin lua asir, ka ngamaritoi, ka ngikabaabae, ta asir a egolit daang, sodi kitaleut toliworos ngika Ekapolon Akuj. Itwaan daang ni atingit ngiworui lukaanikak ajokak, ka ngajul a ngamesekin napusiek, ka napusiek-arengak, ta naarengak. Ngiworui lu edonyunitoe anajul a ngaanei. Ngileui a ngimesekin lu emuritae torengeta, ta ngileui luajokak, apot kesi yaut. Ngitunga daang lu atingito ngasua nakwangae kori nanyangayek, apot yaut nia Ekapolon Akuj eraakasi ngadekon. Ani ngulu atingito ngakito a ngiwo na adikino esubere etich, apot yaut. Apot ngaberu nakunonoi daang yaut ngiunoi lukaanikak ajokak, ta ngiunoi a ngajul a ngamesekin lupusiek, ka lupusiek-arengak, ta luarengak lu aoyiunito kesi. Apot tani tooyiut ngiunoi ludonyet anajul a ngaanei. Yaut ngikapolok a ngitunga ngamoru naarengak ka asir nache a ngasua ana iwaanakinio nakaluwat na emuron a Akuj, ta eboli lo enapit emuron alorarum. Yaut tani ekitoe lokaakunyon, ka akimiet a ngataae, ka akimiet a etal, ta emitina. Ngisirael daang lu asakete, apot yaut ngadekon kech nia Musa kotere etich lo adungokini Ekapolon Akuj Musa atamar tosub. Tolimok Musa Ngisirael tama, “Aseu Ekapolon Akuj Besalel lokookeng a Uri, lo erai etatait a Uri, alo erai eka ekitela a Yuda. Elelebik Akuj ngesi agogongu keng, etaanyu achwaanu ka aosou, ta ekunonoonu lo eyenea akisub ngiboro daang, ka arere ngiboro daang niajokon tosub a egolit, ka akwangat, ta asuat nanyang. Tokul ngamoru na esubere ngiboro, kichie ngakito, ka akisub ibore niche ni esaki ekunonoonu daang. Ainaki Ekapolon Akuj ngesi ka Oliab lokookeng a Aisamak, lo erai eka ekitela a Dan aosou na itatameta ngitunga luche ekunonoonu. Ainaki ngesi kesi aosou na esubeta etich daang lo esubete ngikunonoi lukakulak ngamoru, ka ngikegerok a adukuoru, ta ngikunonoi a akidony ngiworui lukaanikak ajokak, ka ngajul a ngamesekin napusiek, ka napusiek-arengak, ta naarengak, ka ngiworui luche. Eyenete kesi akisub etich daang nabo eraakasi ngikegerok a adukuoru. “Besalel ka Oliab, ta ngikadukok luche daang lu ainaki Ekapolon Akuj achwaanu ka aosou na eyeneta akisub ibore daang ni edukere eam a Akuj, ejoikinit esubete ibore daang loger lo edungunitor Ekapolon Akuj.” Tanyarau Musa Besalel, ka Oliab, ta ngikadukok luche daang lu ainakini Ekapolon Akuj achwaanu nabo tasakete akingarakin luche akiduk. Abu Musa tolimok kesi atamar kisiakis akiduk. Nak Musa kesi ngadekon daang na ayaunete Ngisirael eraakasi ngaduket eam a Akuj. Nakaneni torubakis Ngisirael eyaununete ngadekon nia Musa ataparach daang. Sodi toloto ngikunonoi lu asubete etich nia Musa tolimokis ngesi tamasi, “Alalaketa ngadekon noi na ayaut ngitunga kotere etich lokolong adunguni Ekapolon Akuj atamar tosubae.” Sodi todung Musa atamar tolimokinae ngitunga daang a adakar atamar tojongoto ayaunun ngadekon. Apot ngitunga tojongoto ayaunun ngadekon. Alalak noi ngiboro lusek ayaunete kesi adikino erumorete etich kidongo epewae. Itwaan daang ni arai ekunonoit noi ani eyakasi ngulu asubete etich, abu toduk eam a Akuj. Todukut kesi eam ngolo a ngawarui a ngatomon anakaanikak ajokak edonyunitoe anajul a ngamesekin anapusiek, ka napusiek-arengak, ta naarengak, sodi todonyokinoe asir totokokinoe ngiborei lua ngabeben. Ariyan ngawarui daang, arai aoyau ngamitae ngatomon ka ngaarei, tarai aurianut ngamitae ngaarei. Todonyokis kesi ngakan wapei toliworos atiaket apei, todonyokis nabo nache kan wapei loger lopei ngolo. Tosubakis ngatoron a awaru anapus lokwaas loa anikalapatan a awaru ana a atiaket a apei. Kiwaakis kesi ngatoron ngatomwon-kan nawaru na a atiaket ana ekingaren, ta ngatoron ngatomwon-kan na ikwaan ka nguna nawaru na esal na a atiaket ana a ngaarei. Tosubakis ngikodo a egolit ngitomwon-kan lu eropakinere ngatiaket naarei toliworos apei. Tosubakis ngawarui ngatomon ka apei anajul a ngaanei toliworos kesi imukitere eam a Akuj. Tosubakis kesi ngawarui daang eriyan, erai aoyau ngamitae ngatomon ka ngauni, tarai aurianut ngamitae ngaarei. Todonyokis kesi ngakan wapei toliworos atiaket apei, todonyokis nache kan-kapei wapei toliworos atiaket ache. Kiwaakis kesi ngatoron ngatomwon-kan lokwaas a awaru ana esal a atiaket a apei, sodi kiwaakis ngatoron ngatomwon-kan lokwaas a awaru anache. Tosubakis kesi ngikodo ngitomwon-kan lua ngasua ananyangayek tokodakis natoron sodi toropakinere ngatiaket naarei toliworos akimuket apei. Tosubakis ngakimuket ngache ngaarei. Arai apei eleu a emesek lo emuritae torenger, tarai nache eleu lokaanikan ajokon. Toliworos kesi imukitere nikalapatan. Tosubakis kesi ngakito na iteneneete na itoweito eam a Akuj. Tosubut kesi ngakito nguna anawo. Arai aoyau a akitoe a apei ana etowei eam kitenik, ngamitae ngoomwon, tarai aurianut keng ngasentimitae ngatomwon-kapei ka ngakan-kapei, toyakas ngiwaitin ngiarei lu ajipito ibakito, lu araakasi kesi eropakinere ngakito a eam. Ayakasi ngajipet nguna nakito na itoweito eam. Tosubakis ngakito na itoweito eam ngatomwon-arei lowae loa lokuju ka ngakwangae ngatomwon-omwon na ewae alo a ngalup, pena kwap kech. Kwap akitoe apei pena ngakwangae ngaarei na ewae alo a ngalup, na etingete ngajipet keng naarei. Tosubakis kesi ngakito na itoweito eam ngatomwon-arei lowae loa lokwap eam ta ngakwangae na ewae alo a ngalup ngatomwon-omwon, epete ngaarei kwap akitoe apei. Ani ewae loa lokamanakete eam, lo eyei lowae loa lotoo, tosubakis ngakito na itoweito eam ngakan-kapei, ta ngakito na itoweito eam ngaarei na eyakasi lowaitin. Ngakito na itoweito eam eyakasi lowaitin nguna, toropakinae alokwap sodi kimorikinos napei alokwap tanang kidiama. Ngakito naarei itoweito eam eyakasi lowaitin luarei, asubakinio loger ngolo. Nakaneni pena ngakito na itoweito eam ngakan-kauni, erukito aapei ka ngasua nakwangae na ewae alo a ngalup ngatomon ka ngakan-kapei, erai ngaarei eyakasi kwap akitoe apei kech kadaang. Tosubakis kesi ngakito na iriwokina ngatomon ka ngakan na araakasi ngawo. Toliworos ngakan ngaka ngakito ana itoweito ewae epei a eam. Toliworos ngakito na itoweito ewae loche a eam ngakan. Ani ngakito na itoweito ewae loa lotoo, lo erai kamanakete, toliworos ngakan. Akitoe na iriwokina na eyei kiding, na awei anakidingos a ngakito ana itoweito eam, eriwokina lowae epei a eam, tanang lowae loche. Tobutakis kesi ngakito na itoweito eam egolit sodi tokodakis nasua na iriamito na igangete ngakito na iriwokina. Tobutakinae ngakito na iriwokina nguna dang egolit. Tosubakis kesi awaru nakaanikan ajokon esubunitae anajul a ngamesekin anapusiek, ka napusiek-arengak, ta naarengak. Todonyokinoe asir totokokinoe ngiborei lua ngabeben. Tosubakis kesi ngapirio ngoomwon na ebutakinitae egolit, na eraakasi ngawo, kiganga awaru naajokon ngina. Tokodakinae ngikodo a egolit. Sodi tosubakis kesi ngakwangae a ewae alo a ngalup ngoomwon kiganga ngapirio. Ani akituk a eam, kiwaakis kesi awaru nakaanikan ajokon edonyunitoe anajul a ngamesekin anapusiek, ka napusiek-arengak, ta naarengak. Todonyokinoe asir. Tosubakis kesi awaru ngina ngapirio ngakan na araakasi ngawo, eyakasi ngikodo. Tobutakis kesi ngakito nguna egolit. Tosubakis kesi ngapirio nguna ngiwaitin lua ngalup ngikan a ngasua ananyangayek. Tosub Besalel asaduku a Achamunet a ngakito anawo. Arai aoyau a ewae alo alokwap a asaduku ngasentimitae amiat apei ka ngatomon, tarai aurianut ngasentimitae ngatomwon-kapei ka ngakan kapei, tarai aoyau na alokidiama ngasentimitae ngatomwon-kapei ka ngakan-kapei. Tobutak ngesi egolit tooma ka nikalapatan, sodi kiwaak atorosit a egolit kiriam. Tosubak ngesi ngasua a egolit na iriemito ngoomwon, tokodak nakejen keng naomwon, pena ngasua ngaarei na iriemito lowae epei. Tosubak ngakito na etingitere a ngakito anawo, tobutak ngakito nguna egolit, sodi kirepak kesi nasua na iriemito na eyakasi lowaitin a asaduku. Tosubak ngesi apukenit na erai egolit bon. Arai aoyau keng ngasentimitae amiat apei ka ngatomon, tarai aurianut keng ngasentimitae ngatomwon-kapei ka ngakan-kapei. Tosubak ngesi ngiborei lua ngabeben ngiarei lu asubunitae alogolit, min ipei lowae epei a apukenit. Tosubak ngesi kesi toliworos ngipei ka apukenit. Tokienyikinos ngiborei lua ngabeben ngulu anapukenit, kimuko ngabeben kech na apetara apukenit. Tosubak ngesi emeesa a ngakito anawo, arai aoyau keng ngasentimitae ngatomwon-kauni ka ngakan-kauni tarai aurianut keng ngasentimitae ngatomwon-omwon ka ngoomwon, tarai aoyau keng na alokidiama ngasentimitae kapei ka ngakan-kapei. Abu ngesi tobutak egolit bon sodi kiwaak egolit lowaitin kiriam. Kiwaak ngesi atorosit na arai ngamilimitae ngatomwon-kaarei ka ngakan, sodi kisiriam egolit lowaitin a atorosit. Tosubak ngesi ngasua a egolit na iriemito ngoomwon, kiwaak kesi lowaitin luomwon lu ayakasi ngakejen. Kiwaakinae ngasua na igangito ngakito na etingere emeesa diyete atorosit. Tosubak ngesi ngakito na araakasi ngawo sodi tobutak egolit. Tosubak ngesi ngatubwae nabeleny, ka ngikopoi, ka ngichupae, ta ngatubwae nachukul toliworos elemuunere emuna lo epuritoe. Tosubunae ngiboro ngulu daang a egolit bon. Tosubak ngesi ni esipor ataa a egolit bon. Tosubak ngesi ewae loa ngalup ka ngaten keng a egolit alo itiekitae. Ani ngatur keng nakebuseak, ka nilemu, ta ni epukiarit, kimorikinos daang toliworos ibore ipei. Toruput ngaten ngakan-kapei alowaitin keng, pena ngauni lowae epei. Apei a ngaten anakan-kapei kanguna, ayakasi ngatur nakebuseak ngauni na ikote ngatur a ekitoe alo ikwaan ka engoomo na eyakasi nilemu ka ni epukiarit. Ayakasi ngaten ani esipor ataa ngatur nakebuseak ngoomwon na ikote ngatur a ekitoe alo ikoni engoomo, na ayakasi nilemu ka ni epukiarit. Ayei nilemu kwap ngaten ngaarei a ngaten anakan-kapei kanguna. Ngalemuyek, ka ngaten, ka ni esipor ataa, araakasi daang na itiakunitae aapei, a egolit bon. Tosubak ngesi ngataae ngakan-kaarei, ka ngasua naridet ngatotol, ta ngikaparaparae kech. Asubunitae ngiboro ngulu daang a egolit bon. Alemunit ngesi ngakiloi ngatomwon-uni ka ngakan a egolit bon tosubakinere ni esipor ataa ka ngiboro keng daang. Tosubak ngesi ekeno lo inomanakinere Akuj emitina a ngakito anawo. Ariyan ngiwaitin daang arai lokooyen ngasentimitae ngatomwon-omwon ka ngakan, arai louriyen ngasentimitae ngatomwon-omwon ka ngakan, tarai aoyau na alokidiama ngasentimitae ngatomwon-koomwon. Emorikina ngajipet na ayakasi lowaitin luomwon araakasi ngapei. Abutakinit ngesi egolit lowae lo alokidiama, ka lowaitin luomwon, ta ngajipet keng, ani erumor kiwaak atorosit a egolit kiriam. Tosubak ngesi ngiriko ngiarei a egolit lu ilepilepere, sodi toinik kwap atorosit a egolit alowaitin aluarei ibakito, tokoda ngakito na ilepilepere. Tosubak ngesi ngakito nguna anakito ana araakasi ngawo, sodi tobutak egolit. Abu ngesi tani tosubak akimiet a etal, ka emitina lo inomio, imorikina loger a akimiet anakaakunyon. Tosubak Besalel ekeno a ngakipeyos ana inomio a ngakito anawo. Ariyan ngiwaitin keng daang arai aoyau ngamitae 2.2, tarai aurianut ngamitae 2.2, arai nabo aoyau na alikidiama amita 1.3. Kiwaak ngesi ngajipet kidiama ngiwaitin luomwon, sodi kimorikinos kesi toliworos ngipei ka ekeno a ngakipeyos. Tobutak ngesi kesi daang asuat nanyang. Tosubak ngesi tani ngiboro daang a ekeno, lu eraakasi ngamoti, ka ngikodo, ta ngataritarea na elemere ngatotol anakim. Asubunitae ngiboro ngulu daang anasua ananyangayek. Tosubak ngesi ngasua na iriwokina anasua ananyangayek sodi kiwaak ngasua na iriwokina nguna kwap atorosit na ekeno, sodi tananga ngasua na iriwokina nguna kiding ekeno. Tosubak ngesi ngasua na iriemito ngoomwon sodi kiwaak kesi lowaitin luomwon. Tosubak ngesi ngakito natinget anawo, tobutak asuat nanyang, sodi kirepak kesi daang nasua na iriemito na eyakasi lowaitin daang a ekeno. Asubunitae ekeno anakito anadapal kaabenak, nabo araakasi na aororete. Tosubak ngesi ateger a ngasua ananyangayek, ka ewae loa ngalup lo arai ngasua nanyangayek, tosub anakiyoi ana inwakare ana araakasi ngaka ngaberu ana asubete etich anakituk a eam a Akuj. Tosubak ngesi alaar a eam a Akuj a ngawarui anakaanikak ajokak. Ani alowae alo alokuju, arai aoyau a ngawarui kanguna ngamitae ngatomwon-omwon ka ngoomwon. Egangito ngapirio a ngasua ananyangayek eraakasi ngatomwon-arei, na ayakasi ngiwaitin lua ngalup ngitomwon-arei lua ngasua ananyangayek, ta ngikodo ka ngasua nakapisa kech na esubunitae anakwangat. Ekoni alaar neni tani alowae alo alokwap. Ani alowae alo alo too, ayakasi ngawarui na araakasi aoyau kech ngamitae ngatomwon-arei ka ngaarei. Ayakasi tani ngapirio ngatomon ka ngiwaitin lua ngalup ngitomon, ta ngikodo ka ngasua kech na asubunitae anakwangat. Ani ewae loa lokide lo ayei ekidor, arai aurianut a alaar ngamitae ngatomwon-arei ka ngaarei. Lowae epei a ekidor ayakasi ngawarui na araakasi ngamitae 6.6, toyakas ngapirio ngauni ka ngiwaitin lua ngalup nguuni. Ani nabo ewae loche a ekidor, ayakasi ngawarui na araakasi ngamitae 6.6, toyakas ngapirio ngauni ka ngiwaitin lua ngalup nguuni. Ngawarui daang na eriemito alaar, asubunitae anawarui anakaanikak ajokak. Ngiwaitin lua ngalup a ngapirio, asubunitae anasuat ananyang. Ani ngikodo, ka ngasua nakapisa, ta ngiwaitin lu alokidiama a ngapirio, asubunitae anakwangat. Ngasua daang na eriemito alaar, aropakinitae anasua anakwangae. Awaru na ayei lokidor a alaar, asubunitae a awaru anakaanikan ajokon a ngajul a ngamesekin anapusiek, ka napusiek-arengak, ta naarengak. Todonyokinoe asir. Arai aoyau na alokwap ngamitae ngakan-koomwon, tarai aoyau na alokidiama ngamitae ngaarei, ekwaan ka ngawarui na alaar. Egangito ngapirio ngoomwon ekidor alowaitin aluomwon a ngalup. Asubunitae ngapirio nguna anasua ananyangayek. Asubunitae ngikodo kech ka ngiwaitin lua alokidiama anakwangae. Ngakito daang na itoweito eam ka alaar, asubunitae anasua ananyangayek. Erai logo ekimar a ngiboro kadaang alu asubere etich aloeam a Akuj, ani ewaakinitae ngamoru naarei nadapal na egiritae ngitalio lutomon. Musa kolong adunguni ngakiro a ekimar kangolo, sodi apot ngitunga a ekitela a Lawi kimara ngiboro ngulu. Asubete ngitunga a ekitela a Lawi etich eweikinit Isamar lo arai lokookeng a Aron alo arai emuron a Akuj. Abu Besalel lo arai lokookeng a Uri, tarai etatait a Uri, tosubak ngakiro daang loger lo adungunitor Ekapolon Akuj. Arai Besalel eka ekitela a Yuda. Ani erukitos keng lo anyaritae Oliab lokookeng a Aisamak, arai ekunonoit a adukuoru, ka ekegeron a adukuoru, ka ekunonoit a akidony ngiworui lukaanikak ajokak eraakasi ngipusiek, ka lupusiek-arengak, ta luarengak. Arai ngesi eka ekitela a Dan. Egolit daang lo alemikinitae Ekapolon Akuj toliwor eka eam keng, arai ngakiloi abunget apei, itemitoe a eger alosek itemeenere. Etiae a ngasua anakwangae ana ayaunete ngitunga lu emarunio arai ngakiloi 3,430, itemitoe a eger alosek itemeenere. Ekimar ngolo alemunete ngitunga daang lu emarunio, tolem itwaan daang ngasua na asakitae, itemitoe a eger alosek itemeenere. Araakasi ngitunga daang lu emarunitae 603,550. Araakasi kesi ngitunga a ngikaru a ngitomwon-arei, ta lu eporito ngikaru kech ngitomwon-arei. Ani anasua anakwangae, tolemunae ngakiloi 3,400, tosubakinere ngiwaitin lua ngalup amiat apei lu araakasi ngika eam a Akuj, tosubakinere tani awaru. Arai ngakiloi ngatomwon-uni ka ngoomwon asubakinere ewae loa ngalup epei. Ani ngakiloi ngatomwon-uni a ngasua anakwangae, anache edongete, tosubakinea Besalel ngasua nakapisa, ka ngikodo lua ngapirio, ta ngiwaitin lua alokidiama a ngapirio. Etiae a ngasua ananyangayek alemikinio Ekapolon Akuj, arai ngakiloi 2,425. Kotere ngasua nanyangayek nguna, tosubak ngesi ewae loa ngalup a akituk a eam a Akuj. Tosubak tani ngasua nanyangayek a ekeno a ngakipeyos ka ngasua keng nanyangayek na iriwokina, ta ngiboro a ekeno daang. Tosubak tani ngiwaitin lua ngalup a alaar, ka ekidor a alaar, ta ngakito na itoweito eam, ta na itoweito alaar. Apot kesi todonyokis ngiworui luajokak anapeenete ngimurok a Akuj na esubeta etich alowae alo italeunitoe. Adonyunitoe ngiworui ngulu a ngiunoi alupusiek, ka lupusiek-arengak, ta luarengak. Todonyokis kesi Aron ngiworui lu eraakar emuron a Akuj, loger lo adungokinitor Ekapolon Akuj Musa. Tosubut kesi akaluwat a emuron anawaru anakaanikan ajokon a ngajul a ngamesekin ana eraakasi ngapusiek, ta napusiek-arengak, ta naarengak, ta ngiunoi a egolit. Kitiekunae egolit lodapal ani erumor kididiunae ngiunoi tosubunere awaru nakaanikan ajokon napus, ka napus-arengan, ta naarengan. Tosubakis kesi ngaunoi ngaarei na eananakinere akaluwat a emuron losegeta sodi toropakis lowaitin keng, minio kona eenikinere. Ani aruba na edonyunitoe niajokon na asubunitae aloboro alupei kangulu, aropakinitae nakaluwat kimorikinos toliworos awaru apei, loger lo adungokinitor Ekapolon Akuj Musa. Tosubakis kesi ngamoru naarengak kirepakis logerin a egolit. Namoru nguna, apon kigerokinoe niajokon ngirora a talokookeng a Yakobo lutomon ka ngiarei. Kiwaakis kesi ngamoru nguna kidiama ngaunoi na eananakinere akaluwat a emuron a Akuj losegeta, toliworos kesi eweikinito ngitela lutomon ka ngiarei a Ngisirael, loger lo adungokinitor Ekapolon Akuj Musa. Todonyut kesi eboli lo enapio alorarum aloboro alupei asubuneta akaluwat a emuron a Akuj. Todonyokis tani asir na ekwaan ka na akaluwat. Ariyan ngiwaitin daang tobilakinitetei ngaarei. Arai aoyau keng ngasentimitae ngatomwon-arei ka ngaarei, tarau aurianut ngasentimitae ngatomwon-arei ka ngaarei. Tatapakis kesi ngangedakinet ngoomwon a ngamoru anakaalak a ngaropiyae kidiama keng. Angedakinet na ekingaren, tatapakis ngamoru nakaalak a ngaropiyae na eraakasi naarengak puu, ka na enyaritae topas, ta napus-aliban toreng. Ani angedakinet na ngaarei, tatapakis ngamoru napus-aliban, ka napus-arengan, ta na enyaritae alumas. Ani angedakinet na ngauni, tatapakis ngamoru na na enyaritae yasinito, ka nakaagongon noi, ta na enyaritae amesisto. Ani angedakinet na ngoomwon, tatapakis ngamoru na na enyaritae berili, ka naarengan, ta auk ana enyaritae alumas. Atapakinitae ngamoru na elalak ngaropiyae nguna daang logerin a egolit. Ngamoru natomon ka ngaarei nguna daang, egerokinitoe ekiro epei namoru apei, a ngirora alutomon ka ngiarei a talokookeng a Yakobo. Ekokinio neni sodi toweikis kesi ngitela lutomon ka ngiarei a Ngisirael. Tolugurikis ngiriko a egolit bon loger a loikit, loboli lo enapitae alorarum. Tosubakis ngigerin a egolit ngiarei ka ngiriko a egolit ngiarei sodi toropakis ngiriko luarei ngulu lochileta lu alokidiama a eboli alo enapitae alorarum. Toinikis kesi taloikit luarei loriko luarei. Sodi toinikis ngiwaitin luche arei a taloikit logerin luarei. Kotere erot ngolo toropakis kesi alowae alo alongaren naunoi na eananakinere akaluwat a emuron a Akuj losegeta. Tosubakis kesi ngiriko ngiarei a egolit sodi toropakis lowaitin lua lokwap a eboli alo enapitae alorarum. Arai ni aropakinio neni ekeli lo alotooma akaluwat a emuron. Tosubakis kesi nabo ngiriko ngiarei a egolit sodi toropakis lowae loa ngalup a ngaunoi anaarei eananakinere akaluwat a emuron losegeta. Aropakinitae ngiriko ngulu diyete etoro a awaru, tarai kidiama aruba na edonyitoe niajokon. Ani ngiriko a eboli alo enapitae alorarum, toinikis kesi loriko a akaluwat a auno anapus, sodi min eboli kidiama aruba, nakaneni abu nyiilajalajakin. Tosuba kesi kongina loger lo adungokinitor Ekapolon Akuj Musa. Tosubunae eworu lo iporit akaluwat a emuron a awaru anapus ana esubunitae anajul a ngamesekin bon. Apon totokoi apedot na irepanakinio akou kiratakinere nyeechil. Apot kesi kitokoriana kwap keng a ngalukan ana ikwaan ka ngalam napusiek, ka napusiek-arengak, ta naarengak, aapei ka eworu lokaanikan ajokon. Tongichanakis ngichoroi lu esubunitae a egolit nakidingos kech. Loworui lu esubere etich, kiwaakinae ngalukan na ikwaan ka ngalam loger lo adungokinitor Ekapolon Akuj Musa. Todonyokis kesi Aron ka talokookeng ngichetea. Todonyokis ngesi tani achaat, ka ngapukoto, ka ngisurualei lukaanikak, ka aruba nakaanikan ajokon edonyokinitoe asir a ngiunoi alupusiek, ka lupusiek-arengak, ta luarengak. Asubete kesi kongina loger lo adungokinitor Ekapolon Akuj Musa. Apot kesi tosubakis akaparaparat a egolit toliwor emachar lo italeunitoe lo idodiuni atamar erai ngesi eka Ekapolon Akuj. Kigirakis ngakiro nugu kidiama keng, “Italeunitoe toliwor ika Ekapolon Akuj.” Toinikis kesi akaparaparat ngina kidiama achaat a awaru anapus, loger lo adungokinitor Ekapolon Akuj Musa. Apon torumoroe etich daang a eam a Akuj. Tosubakis Ngisirael ibore daang loger lo adungokinitor Ekapolon Akuj Musa. Apot kesi inut Musa eam ka ngiboro a eam lu ikote ka ngikodo ka ngakito na igurorere eam, ka ngakito na iriwokinio, ka ngapirio, ta ngiwaitin lua ngalup. Yaut ngileui a ngimesekin lukimuket lu amuritae torengeta, ka ngileui lukaanokak lukimuket, ta awaru natiaket eam. Yaut asaduku a Achamunet aapei ka ngiboro keng lu eraakasi ngamoru nadapal, ka ngapirio, ta apukenit. Yaut emeesa erukito ka ngiboro keng daang, ta ngamugati na ipeyonokinio Akuj. Yaut ni esipor ataa na erai aka egolit bon, ka ngataae keng, ka ngiboro keng daang, ta akimiet a ngataae. Yaut ekeno a ngakipeyos lo erai eka egolit. Yaut akimiet na etal, ka emitina, ta awaru na akituk a eam. Yaut ekeno a ngakipeyos lo esubunitae anasuat ananyang, ka ngasua na iriwokina na esubunitae anasuat ananyang, ka ngapirio, ta ngiboro keng daang. Yaut ateger ka ewae loa ngalup. Yaut ngawarui na alaar, ka ngapirio, ta ngiwaitin lua ngalup. Yaut awaru na ekidor a alaar ka ngaunoi keng. Yaut ngakito na itoweito eam. Yaut ngiboro daang lu esubere etich aloeam. Yaut ngiworui lu enapete ngimurok a Akuj alowae alo italeunitoe. Ngiworui lu italeunitoe a Aron alo erai emuron a Akuj, ka talokookeng. Asubito Ngisirael etich daang loger lo adungokinitor Ekapolon Akuj Musa. Kiseme Musa ibore daang sodi kingolik atamar esubito kesi loger lo adungunitor Ekapolon Akuj. Abu Musa topia kesi. Tolimok Ekapolon Akuj Musa tama, “Akolongit na ekingaren a elap alo ekingaren, kiguro eam kang. Kiwaak tooma keng asaduku a Achamunet na eyakasi ngitalio lutomon tooma, ani erumor kiwaak awaru na iriwokina ngaren keng. Yau emeesa tooma sodi kiwaak ngiboro kidiama keng. Yau tani ibore ni esipotor ngataae sodi kiwaak ngataae kidiama. Kiwaak ekeno loa egolit lo inomere emitina ngaren asaduku a Achamunet sodi kinenek awaru na akituk a eam. Kiwaak ekeno a ngakipeyos ngaren eam. Kiwaak ateger nakidingos a eam ka ekeno a ngakipeyos, sodi kilelebik ngakipi. Kiwaak alaar na iriami sodi kinenek awaru na ekidor keng. “Sodi kitaleu eam ka ngiboro keng daang toliworos ngikang kiwasak akimiet na etal, toliworos lu italeunitoe. Ani erumor kitaleu ekeno a ngakipeyos ka ngiboro keng daang, kiwasak akimiet na etal, toliworos lu italeunitoe. Kitaleutu ateger dang ka ewae keng loa ngalup loger lopei ngolo. “Toriku Aron ka talokookeng nakituk a eam, sodi tolimok kesi atamar kilotaros tosegeta. Kitanap Aron ngiworui lu eraakar emuron a Akuj, kiwasak akimiet na etal sodi kitaleunor toliwor ekang, tosubea etich kang erai emuron. Toriku talokookeng sodi kitanap ngichetea. Ani erumor kiwasak kesi akimiet na etal, loger lokolong iwasakinea iyong apakech akimiet, sodi tosubeta kesi etich kang eraakasi ngimurok. Iwasakinio kesi akimiet na etal toliworotor ngimurok jiik.” Tosubak Musa ibore daang loger lo adungokinitor Ekapolon Akuj. Ani akolongit na ekingaren a elap alo ekingaren a ekaru alo a ngiarei arotokinioto Ngisirael alo Misiri, apon kiguroroe eam a Akuj. Abu Musa kiguro ngiwaitin lua ngalup, kitowo ngakito na igangito eam, toropak ngakito na iriwokina, ani erumor kitowo ngapirio. Topetak ngesi ibore nikimuket kidiama eam, ani erumor kiwaak ibore iche nikimuket kidiama, loger lo adungunitor Ekapolon Akuj. Sodi tolem ngamoru nadapal naarei kiwaak nasaduku a Achamunet. Kiwaak ngesi ngakito tooma nasua na iriemito na arai ngaka asaduku, sodi kiwaak apukenit alokidiama. Ani erumor kiwaak ngesi asaduku loeam, sodi kinenek awaru na erapit. Kotere erot ngolo abu ngesi tarap asaduku a Achamunet, loger losek adungokinitor Ekapolon Akuj. Kiwaak ngesi emeesa tooma loeam, lowae lo ingoliarit kwap kamanakete awaru. Tolem ngamugati na ipeyokinitoe Ekapolon Akuj kiwaak kidiama emeesa, loger lo adungokinitor Ekapolon Akuj. Kiwaak ngesi ibore ni esipor ataa tooma loeam, lowae loa alokuju, ekienyikina ka emeesa. Kinokak ngataae alongaren Ekapolon Akuj loger lo adungokinitere. Kiwaak ngesi ekeno a ngakipeyos lo erai eka egolit, kiwaak loeam, ngaren awaru. Ani erumor kinom emitina loger losek adungokinitor Ekapolon Akuj. Kinenek ngesi awaru na akituk a eam. Kiwaak ekeno a ngakipeyos ngaren awaru. Tolem ngesi akipeyos ka ngalemet topee loger lo adungokinitor Ekapolon Akuj. Kiwaak ngesi ateger nakidingos a eam ka ekeno a ngakipeyos, sodi kilelebik ngakipi. Kilotasi Musa ka Aron ka talokookeng a Aron ngakan kech ka ngakejen anateger kangina, nacha elomareta kesi loeam, kori na elooso lokeno a ngakipeyos, loger lo adungunitor Ekapolon Akuj. Todukok Musa alaar kisiriam eam ka ekeno a ngakipeyos kinenek awaru na ekidor a alaar. Sodi torumo ngesi etich daang. Sodi kimuk edou eam a Akuj, kilelebun akwangis naakwaan kea a Ekapolon Akuj loeam. Tongopik Musa kona elomari loeam ani emukitor edou. Araakasi Ngisirael nyenyounete awosit wache mati kikeun edou aloeam. Ani esaa daang lo emukitor edou eam, peachamakinitae Ngisirael eramakinete. Ngirwa daang lu elatotor kesi, eteete edou a Akuj imukit eam naparan, ani nakwaare kiteto akim enoki alokidiama eam. Tanyara Ekapolon Akuj Musa, kiruorik Akuj aloeam keng sodi tolimok Musa tama, “Tolimok Ngisirael kona, itwaan cha daang ni eyauni ibarasit ni ipeyeo, ejoikinit eyauni kerai aite, kori amesek, kori akine. Ani keyau ngesi aite keng toliwor akipeyos, ejoikinit eyauni emong lo emam ni ichwangakina. Ejoikinit ngesi ipeyoe anakituk a eam a Akuj sodi tachamunea Ekapolon Akuj. Idokokini itwaan akan keng nakou a ibarasit ani ipeyeo. Ani kikok ngesi neni, eliwor akipeyos ngina na emookere ngesi tolema ngasechesea keng. Eari ngesi emong kaneni. Talokookeng a Aron lu eraakasi ngimurok a Akuj, eyaunete ngaakot nia Ekapolon Akuj. Elemunete kesi ngaakot nguna towatakis lowaitin luomwon a ekeno alo a ngakipeyos, alo eyei nakituk a eam. Eyengi itwaan ngini ibarasit ni ipeyeo, totubutubu. Talokookeng a Aron lu eraakasi ngimurok, erekinete ngakito lokeno lo a ngakipeyos sodi kinokakis. Iwaakinete kesi nginerin a ibarasit nakim, kiwaakis tani akou ka nikataronon. Ejoikinit itwaan ngini ilotari ngiboro a akook ka ngamuroi, sodi topee emuron a Akuj akipeyos daang alokeno alo a ngakipeyos. Ejoikinit akukuny a akipeyos kangina Ekapolon Akuj. “Ani kelemu itwaan amesek keng kori akine, ejoikinit eliwor nikile ni emam ni ichwangakina. Eari ngesi ibarasit ngini alowae alo alokwap ekeno a ngakipeyos, sodi towatakis ngimurok ngaakot lowaitin luomwon a ekeno. Ani ketubutub kerumor, iwaakini emuron a Akuj nginerin daang nakim, kiwaakis tani akou ka nikataronon. Ejoikinit itwaan ngini ilotari ngiboro a akook ka ngamuroi sodi tolemik emuron Ekapolon Akuj akipeyos sodi topee daang alokeno alo a ngakipeyos. Ejoikinit akukuny a akipeyos kangina Ekapolon Akuj. “Ani kelemu itwaan ikeny toliwor akipeyos, ejoikinit erai akuuri kori kidomelio. Iwaakini emuron a Akuj lokeno lo a ngakipeyos, tomojirik akou torutun, sodi topee alokeno. Toliworos ngaakot keng idokadokasi lowaitin a ekeno a ngakipeyos. Elemari ngesi etole a ikeny aapei ka ngikujit, sodi tomurak ni iwaanakinio ekuron, ni eyei kide ekeno a ngakipeyos. Etingi ngesi ngabeben sodi kibeletetea ikeny, nakaneni nyeerut ngabeben. Ani erumor topee elemwaana. Ejoikinit akukuny a akipeyos kangina Ekapolon Akuj. “Ani keyau itwaan akipeyos erai ngalemet nia Ekapolon Akuj, ejoikinit mono irie toliworos ngakiria. Ejoikinit ngesi iwaakini akimiet ka emitina nakiria nguna, inu talokookeng a Aron lu eraakasi ngimurok. Emukuni emuron ngakiria na eyei akimiet, tomuk ileleba akan, imorikina ka emitina, sodi topee alokeno a ngakipeyos erai akipeyos nakisitamunet na elemikinitae Ekapolon Akuj. Ejoikinit akukuny a akipeyos kangina Ekapolon Akuj. Eliworos ngakipeyos na a ngalemet na idongete ngaka Aron ka talokookeng. Eraakasi na italeunitoe noi kainyo elemunitae anakimuj ana elemikinitae Ekapolon Akuj. “Ani kerai akipeyos ngina amugati na imakinitae nakim, ejoikinit esubakinio emam ekitoe lo itubui. Epedorete aliwor ngamugati nalangir imorikinitae ka akimiet, kori ngabisikutio na iwasakinitae akimiet. “Ani kerai akipeyos amugati na ipoo a apalarang anabeleny tosubunae anakiria ana imorikinitae ka akimiet, nakaneni nyiiwaakin ekitoe lo itubui. Tonyilinyili ngamugati nguna kiwasak akimiet, na ilemunea erai akipeyos. “Ani kerai akipeyos ngamugati na ipoo anapalarang, ejoikinit eliwor ngakiria imorikina ka akimiet. Yau nia Ekapolon Akuj erai akipeyos nak emuron lo eyaari lokeno lo a ngakipeyos. Elemari emuron akipeyos ngina epewae toliwor akipeyos nakisitamunet elemikinitae Ekapolon Akuj, sodi topee alokeno alo a ngakipeyos. Ejoikinit akukuny a akipeyos kangina Ekapolon Akuj. Eliwor akipeyos a ngalemet na idongi aka Aron ka talokookeng. Erai na italeunitoe noi kainyo elemunitae anakimuj ana elemikinitae Ekapolon Akuj. “Akipeyos daang a ngalemet na iyauni iyong nia Ekapolon Akuj, ejoikinit emam ekitoe lo itubui. Tochoite iwaakini ekitoe lo itubui kori akimiet a ao nakimuj na ilemikini Ekapolon Akuj. Akipeyos a ngalemet na ekingaren ana ilemi iyong ekaru daang, yau nia Ekapolon Akuj. Nakaneni nyelemunio topeoi alokeno alo a ngakipeyos. Kiwaak amakat nakipeyos a ngalemet daang, kainyo erai amakat emachar lo itemokino anachamunet kon ka Akuj. (Kiwaak ngakipeyos kon daang amakat.) Ani iyauni iyong nia Ekapolon Akuj akipeyos na a ngalemet ana ekingaren, tolem ngalemet na epeitoe kori na irietae. Kiatak akimiet sodi kiwaak emitina. Epeyi emuron a Akuj epewae a akipeyos ana a ngalemet ka akimiet, ta emitina daang, toliwor akipeyos na epeikinitoe Ekapolon Akuj. “Ani elemuni itwaan aite keng toliwor akipeyos a ekisil, ejoikinit eliwor emong kori aite na emam ni ichwangakina. Idokokini itwaan akan nakou a ibarasit sodi taar anakituk a eam a Akuj. Talokookeng a Aron lu eraakasi ngimurok a Akuj, ewatakinete ngaakot lowaitin luomwon daang a ekeno alo a ngakipeyos. Epeikinete kesi Ekapolon Akuj nginerin a ibarasit lu eraakasi asepae daang a ngiboro akook, ka ngingalur ka asepae kech, ta ewae loajokon a emany. Epeyete ngimurok nginerin ngulu daang alokeno alo a ngakipeyos aapei ka akipeyos na inomio. Ejoikinit akukuny a akipeyos kangina Ekapolon Akuj. “Ani kerai amesek kori akine erai akipeyos a ekisil, eliwor ibarasit nikile kori niberu, nakaneni ejoikinit erai na emam ni ichwangakina. Ani kelemu itwaan imesek, idokokini ngesi akan keng nakou a imesek sodi taar alongaren eam. Ewatakinete talokookeng a Aron ngaakot a ibarasit lowaitin daang a ekeno alo a ngakipeyos. Epeikinete kesi Ekapolon Akuj nginerin a ibarasit lu eraakasi nikataronon ka asonyok daang etubunio ani etiakatar ka achir, ka asepae daang, ka ngingalur ka asepae kech, ta ewae loajokon a emany. Epeikini emuron Ekapolon Akuj akipeyos ngina alokeno alo a ngakipeyos. “Ani kelemu itwaan akine, idokokini ngesi akan keng nakou a akine sodi taar alongaren eam. Ewatakinete talokookeng a Aron ngaakot a ibarasit kangini lowaitin luomwon a ekeno a ngakipeyos. Sodi tolemikis Ekapolon Akuj nginerin a ibarasit lu eraakasi asepae daang a ngiboro a akook, ka ngingalur ka asepae kech, ta ewae loajokon a emany. Ipeye emuron nginerin ngulu daang alokeno alo a ngakipeyos, toliwor akukuny kech na ejoikinit Ekapolon Akuj. Erai nikataronon daang ika Ekapolon Akuj. Alosirael, emam itwaan enyami nikatuman kori ngaakot. Erai ibore en etal lo iwapete Ngisirael jik awadaang ani elomete kesi.” Todungok Ekapolon Akuj Musa tama, “Tolimok Ngisirael kona, itwaan cha daang ni esechi sodi kichwangak etal epei alotalio alu edungunit Ekapolon Akuj erai peiyechakinit, ejoikinit irichakini ngitalio lu isisaunitae lugu. “Ani kerai Emuron Loapolon a Akuj esechi sodi kitosech ngitunga, elemuni ngesi emong losorokit lo emam ni ichwangakina toliwor akipeyos ani a Ekapolon Akuj kotere akisech a emuron kangolo. Eramuni ngesi emong nakituk a eam kidokok akan keng nakou a emong, taar kaneni alongaren Ekapolon Akuj. Elemuni Emuron Loapolon ngaakot ngache yaa tooma eam. Ilumokini emuron ngolo ekimoin keng naakot kiterak ngaren awaru na etiakit ngiwaitin lu italeunitoe ngakiterakinet ngakan-kaarei. Ani erumor kiwasak ngaakot ngadi najipeta na eyakasi lowaitin a ekeno alo inomere emitina, alotooma eam. Ani ngaakot na idongete, ebukokini ngesi lowae lo a ngalup a ekeno a ngakipeyos, alo eyei nakituk a eam. Elemari ngesi nikataronon daang alomong kangolo. Elemari asepae, ngingalur ka asepae kech ta ewae loajokon a emany. Elemuni emuron a Akuj nikataronon topee alokeno a ngakipeyos ana inomio, loger lo epeyo nikataronon a ibarasit ani eario kotere ngakipeyos a ekisil. Nakaneni ejomu a emong kangolo, ka akiring, ka akou, ka ngamuroi ka ngakwaas ka aboi imorikina ka ngamaliteny, edakari nikalapatan a adakar tanang ni echamakinitae alotal, ni erai ngesi ebukonorio ekuron. Epeyi ngesi nginerin ngulu kaina a akim ana inokakinitae a ngakito. “Ani kerai Ngisirael daang esechete ngitalio a Ekapolon Akuj erai peiyechakinito, napei eyenere akisech ngina, eramunete ngitunga daang emong losorokit toliwor akipeyos a akisech. Eramunete kesi loeam a Akuj. Idokokinete ngikarikok a ngitunga ngakan kech nakou a emong kangolo. Earakinio emong ngolo neni. Eyaari Emuron Loapolon ngaakot a emong ngache tooma loeam. Ilumokini ngesi ekimoin keng naakot, sodi kiterak ngaren awaru ngakiterakinet ngakan-kaarei. Iwasakini ngesi ngaakot ngadi najipeta na eyakasi lowaitin a ekeno alo inomere emitina, alotooma eam. Ani ngaakot na idongete ebukokini ngesi lowae lo alokwap a ekeno a ngakipeyos lo eyei nakituk a eam. Ani erumor, elemari ngesi nikataronon keng daang sodi topee alokeno alo a ngakipeyos. Esubea ngesi emong ngolo ngakiro napei esubea emong lo a akipeyos ana akisech. Kotere eger ngolo, elemuni emuron akipeyos a akisech na emookere ngitunga, nakaneni erimakinio kesi. Elemari ngesi emong yaa nikalapatan a adakar topee loger lo epeyo ngesi emong lo elemunit ngesi kotere akisech keng a ilope. Erai akipeyos ngina na elemari akisech a ngitunga. “Ani kerai ekarikon a ngitunga esechi kichwangak epei a ngitalio alu edungunit Ekapolon Akuj erai peiyechakinit, napei elimokinere ngesi atamar esechit, erikuni ngesi ekoroe lo emam ni ichwangakina toliwor akipeyos keng. Idokokini ngesi akan keng nakou a ekoroe kangolo, sodi taar ani palem eareenere akipeyos na inomio alongaren Ekapolon Akuj. Erai akipeyos ngina na elemari akisech. Ilumokini emuron ekimoin naakot a ibarasit, kiwasak najipeta na eyakasi lowaitin a ekeno alo a ngakipeyos. Ani erumor tobukok ngaakot na idongete lowae lo a ngalup a ekeno alo a ngakipeyos. Epeyi ngesi nikataronon a akine kangina alokeno alo a ngakipeyos loger lo epeyo nikataronon a akipeyos ana ekisil. Kotere eger ngolo, elemuni emuron akipeyos na emookere akisech a ekarikon a ngitunga, sodi torimakinere ekarikon ngolo. “Ani kerai ipei a ngitunga alu nyeyenikinitae esechi kichwangak epei a ngitalio alu edungunit Ekapolon Akuj erai peiyechakinit, napei elimokinere ngesi atamar esechit, erikuni ngesi akine naberu na emam ni ichwangakina toliwor akipeyos a akisech keng. Idokokini ngesi akan keng nakou a akine kangina sodi taar anipalem eareenere akipeyos na inomio alongaren Ekapolon Akuj. Ilumokini emuron a Akuj ekimoin naakot a ibarasit, kiwasak najipeta na eyakasi lowaitin a ekeno alo a ngakipeyos. Ani erumor tobukok ngaakot na idongete lowae lo a ngalup a ekeno alo a ngakipeyos. Elemari ngesi nikataronon keng daang loger lo elemanarere nikataronon alobaren kadaang alu eario eraakasi akipeyos a ekisil. Ipeye ngesi alokeno a ngakipeyos sodi tojoik akukuny Ekapolon Akuj. Kotere eger ngolo, elemuni emuron akipeyos a akisech a itwaan, sodi torimakinae itwaan ngini. “Ani keriku itwaan imesek erai akipeyos a akisech, ejoikinit imesek ngini emam ni ichwangakina. Idokokini ngesi akan keng nakou a imesek kangini sodi taar anipalem eareenere akipeyos na inomio alongaren Ekapolon Akuj. Ilumokini emuron a Akuj ekimoin naakot a ibarasit, kiwasak najipeta na eyakasi lowaitin a ekeno alo a ngakipeyos. Ani erumor tobukok ngaakot na idongete lowae lo a ngalup a ekeno alo a ngakipeyos. Elemari ngesi nakataronon keng daang loger lo elemanarere nikataronon alobaren kadaang alu eario eraakasi akipeyos a ekisil. Ipeye ngesi alokeno a ngakipeyos aapei ka ngakipeyos nache epeikinitoe Ekapolon Akuj. Kotere eger ngolo, elemuni emuron akipeyos na emookere akisech a itwaan, sodi torimakinae itwaan ngini. “Ngakiro na ikote nugu kesi elemunere ngakipeyos a akisech. “Ani kenyaraun itwaan nitubet ekies tamarae kisisau ngakiro a ibore ani engolik ngesi kori eira, nakaneni towou ngesi alimor, asech ngesi. “Ani ketap itwaan ibore ni nyitaleunitoe peiyechakinit, kerai ta ibore ni ikoni ibarasit nikatoan, eliwor ngesi ni nyitaleuno nabo erai ekasechan napei eyenea ngesi ngakiro na asub. “Epedori ta itwaan peiyechakinit akitap ibore cha daang ni nyitaleunitoe, ni itorunit nitwaan. Eliwor itwaan ngini ekasechan napei eyenea ngesi atamar atap ibore ngini. “Ani kekopokin itwaan akikong eringa nyitamakina ngakiro lokojokon, tarai nyeyeni ngesi, eliwor ekasechan napei eyenea atamar ekong. “Ani kesech itwaan anakiro kanguna, ejoikinit elimori akisech na asub ngesi. Erikuni ngesi imesek niberu kori ikale niberu nia Ekapolon Akuj toliwor akipeyos. Elemuni emuron akipeyos na emookere akisech a itwaan kangini. “Ani kengopiki ngesi imesek niberu kori ikale niberu elemuni, eyauni ngesi nia Ekapolon Akuj ngakurio ngaarei kori takidomelio ngaarei toliworos ngakipeyos na emookere ngasechesea keng. Eliwor apei akipeyos na emookere akisech, toliwor nache akipeyos na epeikinitoe Ekapolon Akuj. Eyauni ngesi kesi nia emuron a Akuj. Elemuni emuron ikeny nia akipeyos a akisech mono. Emojirikini ngesi akou a ikeny nakaneni nyerutori akou keng. Iwasakini ngesi ngaakot ngache lokwaas a ekeno alo a ngakipeyos. Ngaakot nache idongete, iteleleario alowae alo a ngalup a ekeno alo a ngakipeyos. Erai akipeyos naga na emookere akisech. Ani erumor tolem ngesi ikeny nia ngiarei erai akipeyos na epeikinitoe Ekapolon Akuj, loger lo elimunitere. Kotere eger ngolo, elemuni emuron a Akuj akipeyos na emookere akisech a itwaan kangini, nakaneni, erimakinio ngesi. “Ani kengopikis itwaan ngakurio ngaarei kori takidomelio ngaarei, eyauni ngesi akilo apei a ngakiria toliworos akipeyos a akisech. Nyiwaakini ngesi akimiet kori emitina nakiria nguna kainyo erai akipeyos a akisech, meere akipeyos a ngalemet. Eyauni ngesi ngakiria nguna nia emuron a Akuj. Emukuni emuron ngakiria nguna akan apei ileleba, kidodiu ibore ngini atamar erai akipeyos nakisitamunet na elemikinitae Ekapolon Akuj. Inomio ngakiria nguna alokeno alo a ngakipeyos erai akipeyos epeikinitoe Ekapolon Akuj. Erai ibore ngini akipeyos na emookere akisech. Kotere eger ngolo, elemuni emuron akipeyos na emookere akisech a itwaan, sodi torimakinae itwaan ngini. Eraakasi ngakiria nache ngaka a emuron a Akuj, loger lo a akipeyos a ngalemet.” Tolimok Ekapolon Akuj Musa tama, “Ani kesech itwaan ani ewounea akipotor ngiboro lu italeunitoe eraakasi ngika Ekapolon Akuj, erikuni ngesi nia Ekapolon Akuj emesek lo emam ni ichwangakina toliwor akipeyos na a atachanot a akisech. Itemio etiae a ngaropiyae a emesek kangolo a eger alosek itemeenere aloeam a Akuj. Ejoikinit ngesi elemuni ngiboro lusek awouni akipotor ani erumor tolem nabo ngiche lu eraakasi alemunet apei anakan. Elemuni ngesi nak emuron a Akuj sodi emuron tolem ibarasit kipeye erai akipeyos a akisech a a itwaan, nakaneni erimakinio ngesi. “Ani kesech itwaan idio peiyechakinit kichwangak ngitalio a Ekapolon Akuj edio, erai ngesi ekasechan nakaneni ejoikinit ibusi akisech keng. Ejoikinit ngesi erikuni nia emuron a Akuj emesek lo emam ni ichwangakina toliwor akipeyos a atachanot a akisech. Itemio etiae a ngaropiyae a emesek kangolo a eger alosek itemeenere. Elemuni emuron akipeyos na emookere akisech a itwaan kangini sodi torimakinae ngesi. Erai ngina akipeyos a atachanot a akisech ana asechaki ngesi Ekapolon Akuj.” Tolimok Ekapolon Akuj Musa tama, “Ani kesech itwaan ani a Ekapolon Akuj, elemuni akipeyos ani ewounea akinyiakakin itwaan niche ibore nisek imiekinitere ngesi, kori kekoko ibore a itwaan aniche, kori kingala itwaan niche ka akitoaniar ibore keng. Elemuni akipeyos erai keanyu ibore a itwaan aniche nisek achakara sodi kikong epega tama nyeanyuna. Ani na esechea ngesi toyen atamar asechit, inyiakari ngesi ibore nikolong ademari itwaan, kori nikolong etoaniari ngesi anitwaan, kori nikolong emiekinere ngesi, kori ibore a itwaan nisek achakara taanyu ngesi. Ibore cha daang nikolong ekongio ngesi eliokonit, inyiakari ngesi daang imorikina ka atiaket apei anakan a ibore kangini. Erikuni ngesi nia emuron a Akuj emesek ka ekoroe lo emam ni ichwangakina toliwor akipeyos a atachanot a akisech ani a Ekapolon Akuj. Itemio etiae a ngaropiyae keng a eger alosek itemeenere aloeam a Akuj. Elemuni emuron akipeyos na emookere akisech a itwaan, sodi torimakinae ngesi.” Todungok Ekapolon Akuj Musa tama, “Todungok Aron ka talokookeng atamar ikote ngitalio a ngakipeyos ana inomio nege. Imiekinio akipeyos na inomio alokeno akwaar daang kiiya kiwala, nakaneni kimiekinae akim erubakinit enoki. Enapi emuron eworu lokooyen kaanikan ka edengo lokaanikan, tolem ekuron itilit alokeno kiwaak lokwaas a ekeno alo a ngakipeyos. Ani erumor ilochi ngesi ngiworui sodi yaa ekuron nikalapatan a adakar, ni italeunitoe. Akim na enoki alokeno alo a ngakipeyos, ejoikinit imiekinio enoki, nakaneni nyiimiekin edunge. Ataparach daang, iwaakini emuron ngakito nakim ngina, torek akipeyos na inomio kidiama, sodi topee nikataronon a ngakipeyos a ekisil. Ejoikinit akim imiekinio enoki jiik alokeno alo a ngakipeyos, nakaneni nyiimiekin edunge. “Ikote ngitalio a ngakipeyos a ngalemet nege. Emuron a Akuj lo erai lokookeng a Aron, elemikini Ekapolon Akuj akipeyos a ngalemet alongaren ekeno lo a ngakipeyos. Ani erumor tomuk ngesi ngakiria na eyei akimiet ileleba akan, imorikina ka emitina, sodi topee alokeno erai akipeyos nakisitamunet, kidodiu ibore ngini atamar elemikinit daang Ekapolon Akuj. Ejoikinit akukuny a akipeyos kangina Ekapolon Akuj. Enyamete Aron ka talokookeng ngakiria na idongete. Enyamete alowae alo italeunitoe erai peiwaakinito ekitoe lo itubui. Enyamete kesi ngakiria nguna alo tooma alaar a eam a Akuj. Nyejoikinit epeyo imorikina ka ekitoe lo itubui ngamugati. Ainaki Ekapolon Akuj ngimurok ngakiria nguna toliworos na etiakakinitae kesi anakipeyos ana epeikinitoe Ekapolon Akuj. Erai akipeyos ngina na italeunitoe lokojokon, loger a akipeyos ana a akisech ka na a atachanot a akisech. Edungunitoe atamar, analesea kadaang, enyamete ngide lusapa jiik analesea a Aron akipeyos na epeikinitoe Ekapolon Akuj. Itwaan cha daang ni etapi akipeyos ngina, italeun.” Tolimok Ekapolon Akuj Musa tama, “Kotere akitaleun Aron ka talokookeng toliworos ngimurok. Ani akolongit na italeunere ngesi ani idokakinere akimiet nakou, elemikini Ekapolon Akuj akipeyos na erai akilo apei a ngakiria anaajokak (eriyan etiae keng ka lopalem a akipeyos a ngalemet ana elemuununio akolongit apei), elemunio anus nataparach, tolemunea anus nache ebong. Imorikini ngakiria nguna ka akimiet kipoo anapalarang anabeleny. Eyauni igurokina lokojokon, topee eraakasi ngakapongor loger a akipeyos a ngalemet, dio alemun erai akipeyos na ejoikinit akukuny keng Ekapolon Akuj. Emuron daang lo italeunio analesea a Aron kidokakinae akimiet nakou toliwor Emuron Loapolon. Akipeyos cha daang a ngalemet na elemuni emuron a Akuj, inomio daang, emam na enyamio.” Todungok Ekapolon Akuj Musa tama, “Tolimok Aron ka talokookeng ngitalio lua ngakipeyos a akisech lugu. Ibarasit ni eario kotere akipeyos a akisech, eario alowae alo alokwap ekeno lo a ngakipeyos, ni earanakinio ngibaren lua ngakipeyos ana inomio. Erai akipeyos naga na italeuno lokojokon. Emuron lo ipeye ibarasit, imuji ani italeunitoe, alotooma alaar a eam a Akuj. Itwaan cha daang kori ibore cha daang ni etapi akiring a ibarasit kangini, italeun. Eworu cha daang lo etapakin ngaakot a ibarasit kangini, ejoikinit ilotario alowae alo italeuno. Amot nalupe cha daang na ikulaare akiring, ejoikinit ebwangio. Ani kerai apalarang ikulaare, ejoikinit irigaario, sodi kilatarae a ngakipi. Itwaan nikile daang ni erai ika awi ana ngimurok, enyami akipeyos ngina, kainyo italeunitoe. Nakaneni emam akipeyos a akisech na enyamio erai keyaun ngaakot loeam toliwor italeunere ewae lo italeuno. Inomio akipeyos ngina. “Eraakasi lugu ngitalio a ngakipeyos a atachanot, ana italeunitoe. Eario ibarasit a akipeyos kangina alowae alo alokwap ekeno lo a ngakipeyos, ani eareenere ngibaren a ngakipeyos ana inomio. Nakaneni ewatakinio ngaakot kech lowaitin luomwon a ekeno alo a ngakipeyos. Elemunio nikataronon keng daang topeoi alokeno alo a ngakipeyos. Elemunio asonyok, ka asepae, ka ngingalur ka asepae kech, ta ewae loajokon a emany. Inomi emuron a Akuj nikataronon daang alokeno alo a ngakipeyos toliwor akipeyos epeikinitoe Ekapolon Akuj. Erai akipeyos ngina aka atachanot. Enyami itwaan nikile a awi a ngimurok a Akuj daang akipeyos ngina. Nakaneni ejoikinit enyamio alowae alo italeunitoe kainyo erai akipeyos na italeunitoe. “Ikwaan etal a akipeyos a akisech ka etal a akipeyos a atachanot. Erai akiring aka emuron alo inomi akipeyos. Erai eleu a ibarasit ani inomio tonomia aka emuron alo inomi akipeyos. Akipeyos a ngalemet daang na emakinitae nakim, kori apeyo anapalarang kori anapalarang anabeleny, erai aka emuron a Akuj alo apeikini Ekapolon Akuj. Nakaneni ani ngakipeyos a ngalemet daang na nyepeyo, erai kimorikinitae ka akimiet kori pekimorikinitae, erai aka talokookeng a Aron alu eraakasi ngimurok a Akuj. Ejoikinit kesi emorete ngakipeyos nguna eriyan. “Ngitalio a ngakipeyos a ekisil lugu. Ani kelemu itwaan akipeyos ngina erai abuakinet Akuj alakara, elemuni ngesi ngamugati napadok, aapei ka ibarasit ni ipeyoe. Ejoikinit ngamugati nguna eraakasi nakabwok kori ngabisikutio na iwasakinitae akimiet kori ngakekio imorikinitae ka akimiet. Elemuni ngesi ngamugati nakabwok, aapei ka akipeyos a ekisil na ebuakinere Ekapolon Akuj alakara. Eyauni ngesi apei a ngamugati kadaang erai alemunet na iwakiwakio elemikinitae Ekapolon Akuj. Erai aka emuron a Akuj alo elemuni ngaakot a ibarasit towatak lokeno loa ngakipeyos. Ejoikinit akiring a ibarasit enyamio akwaar na earere, amam na imiekinio eperi kiwalak. “Ani keyau itwaan akipeyos a ekisil anisek ekongio, kori erai keyau ani esakitor ngesi ilope ayaun, enyamio akiring a ibarasit kangini akolongit ngina, ani na idongi, enyamio akolongit na etupit ngina. Akiring daang na eperi tanang akolongit na ngauni, ejoikinit inomio. Ani kenyam akiring ngina adio akwaar na a ngauni, nyechamuni Akuj akipeyos a itwaan kangini, nabo nyimarunio atamar alemu itwaan ngini akipeyos. Eliwor akiring ngina na ilamitae, ani itwaan ni enyami, eanyunosi ka ngakiro naaronok. Ani ketapakin akiring ka ibore cha daang ni nyitaleunitoe, nyejoikinit enyamio. Nakaneni ejoikinit inomio. “Itwaan cha daang ni italeuno epedori akinyam akiring nache daang. Nakaneni ani kenyam itwaan ni nyitaleuno akiring ngina, nyeringa nabo ngesi imarunitae atamar erai ipei a ngitunga a Akuj. Nabo, itwaan cha daang ni enyami akiring a ibarasit kaen tarai sek etapit ngesi ibore ni nyitaleunitoe, kerai itwaan kori ibarasit, nyeringa nabo ngesi imarakinitae atamar erai ipei a ngitunga a Akuj.” Tolimok Ekapolon Akuj Musa tama, “Tolimok Ngisirael ngitalio lugu. Emam nikataronon a ngaatuk, ka ngamesekin, ta ngaanei na echamakinitae enyamio. Nyiinyam nikataronon a ibarasit ani atoani bon kori ani eari ebu nakaneni epedorio asubea ngakiro nache. Itwaan daang ni enyami nikataronon a ibarasit ani elemunio erai akipeyos a ekisil ani Ekapolon Akuj, nyeringa imarunitae atamar erai ipei a ngitunga a Akuj. Wadaang nicha elomete Ngisirael, nyejoikinit kesi enyamete ngaakot a ngikieny kori a ngibaren. Itwaan daang ni esechi etal logo, nyeringa imarunitae atamar erai ipei a ngitunga a Akuj.” Tolimok Ekapolon Akuj Musa tama, “Tolimok Ngisirael ngitalio lugu. Itwaan cha daang ni elemuni akipeyos a akisil, ejoikinit eyauni epewae a ibarasit kangini erai ainakinet na elemikinit Ekapolon Akuj. Yau ngesi a ngakan keng a ilope erai alemunet na elemikinit Ekapolon Akuj. Eyauni ngesi nikataronon a ibarasit ka atorobu keng sodi tolemu erai ainakinet nabekot ani a Ekapolon Akuj. Inomi emuron a Akuj nikataronon alokeno alo a ngakipeyos, nakaneni eliwor atorobu aka ngimurok. Elemunio amuro nakitalio erai alemunet nabekot nakinae emuron a Akuj lo alemuni ngaakot ka nikataronon a akipeyos ana a ekisil. Erai atorobu a ibarasit ainakinet nabekot, tarai amuro nakitalio alemunet nabekot na alemu Ekapolon Akuj Alosirael sodi nak ngimurok keng. Nginerin ngulu ejoikinit Ngisirael einanakinete ngimurok a Akuj jiik. Nginerin ngulu alemikinitae Ekapolon Akuj anakipeyos ana inomio, nakinae Aron ka talokookeng akolongit na etaleunere kesi ani edokakinere akimiet nakies toliworos ngimurok a Akuj. Akwaar ngina, todungok Ekapolon Akuj Ngisirael atamar toliworos einanakinete Aron ka talokookeng nginerin ngulu jiik. Eliwor etal ngolo lo iwapete Ngisirael ngirwa daang.” Eraakasi ngulu robo ngitalio a ngakipeyos ana inomio tonomiasi, ka ngakipeyos a ngalemet, ka ngakipeyos a akisech, ka ngakipeyos a atachanot, ka ngakipeyos a akitaleun, ta ngakipeyos a ekisil. Abu Ekapolon Akuj todungok Musa ngitalio ngulu alomoru a Sinai alo ayei nariet, akolongit na alimokinea Musa Ngisirael atamar yaut ngakipeyos. Tolimok Ekapolon Akuj Musa tama, “Toriko Aron ka talokookeng nakituk a eam a Ekapolon Akuj sodi yau ngiworui a ngimurok a Akuj, ka akimiet na iwasakinio, ka emong losorokit a akipeyos a akisech, ka ngimesekin luarei, ta akikap na a ngamugati anapadok. Ani erumor tochunak ngitunga daang neni.” Tosubak Musa ngakiro daang loger lo adungokinitor Ekapolon Akuj. Ani kechunakin ngitunga daang kerumor, tolimok ngesi kesi tama, “Ngakiro na tokona edikino ayong asubakini kesi adungu Ekapolon Akuj atamar tosubakinae.” Toriku Musa Aron ka talokookeng sodi kilota kesi a ngakipi kitaleunotor. Kitanap ngesi Aron echat ka eworu lokooyan, sodi kitanap aruba anaabor. Kitanap ngesi akaluwat*g** a emuron sodi toenik aruba na edonyitoe niajokon naabor keng. Kitanap ngesi Aron eboli alorarum sodi kiwaak Urim ka Sumim*g** tooma ichue. Tobutok ngesi apukot nakou a Aron, sodi kiwaak egolit lowae lo alongaren a apukot kangina, toliwor ekiraun lo italeunitoe, loger losek adungunitor Ekapolon Akuj. Abu Musa tolem akimiet na etal kitaleunio eam a Akuj ka ngiboro luche kidokak akimiet loeam ka ngiboro daang lu ayakasi tooma eam. Tolem akimiet epewae nakiwasakina towatak ngawatakinet ngakan-kaarei lokeno a ngakipeyos, ka ngiboro a ekeno ta ateger ka ewae lo a ngalup a ateger. Kotere eger ngolo, kitiliwo Musa eam ka ngiboro a eam lu italeunitoe. Kitaleu ngesi Aron kidokak epewae akimiet ana etal nakou a Aron. Ani erumor, toriku Musa talokookeng a Aron kitanap ngiworui, kitanap ngarubae anaaborin, ani erumor tobutok ngapukoto nakies kech, loger losek adungunitor Ekapolon Akuj. Sodi taramu Musa emong losorokit lo a akipeyos a akisech. Apot Aron ka talokookeng kidokokis ngakan kech nakou a emong kangolo. Taar Musa emong ngolo, tomietu ngaakot ngache a ekimoin keng sodi kiwasak najipeta a ekeno a ngakipeyos, kitaleunio ekeno ngolo. Sodi tobukok ngesi ngaakot nache lowae lo a ngalup a ekeno a ngakipeyos. Kotere eger ngolo, kitaleu ngesi ekeno ngolo kiteseg. Tolem Musa a asepae daang, ka ewae loajokon a emany, ta ngingalur luarei imorikina ka asepae kech, topee alokeno alo a ngakipeyos. Ani eliwor akiring a emong ka eleu, ta ngiboro a akook ka ngikujit, topee anikalapatan a adakar loger losek adungunitor Ekapolon Akuj. Ani erumor taramu Musa emesek lo a akipeyos ana inomio, sodi kidokokis Aron ka talokookeng ngakan kech nakou a emesek kangolo. Taar Musa emesek ngolo towatak ngaakot keng lowaitin luomwon a ekeno alo a ngakipeyos. Ani etubitubio nginerin a emesek kangolo, topee Musa akou a emesek, ka nginerin keng, ta nikataronon. Ani kilotar ngiboro a akook, ka ngamuroi, ta ngakwaas anakipi kerumor, topee Musa emesek ngolo alokeno alo a ngakipeyos, erai akipeyos na inomio. Ejoikinit Ekapolon Akuj akukuny akipeyos kangina. Tosubak Musa kongina loger lo adungokinit Ekapolon Akuj. Sodi toriku Musa emesek lo a ngiarei, lo italeunere ngimurok a Akuj kidokakinae akimiet nakies. Kidokokis Aron ka talokookeng ngakan kech nakou a emesek kangolo. Taar Musa emesek ngolo. Tolem ngaakot ngache kiwasak lobonibonit akit ana aloteten a Aron, ka ekimoin loapolon a akan analoteten ta ekimoin loapolon a akeju ana aloteten. Ani erumor apot talokookeng a Aron dang, kiwasak ngesi ngaakot ngache lobonibon a ngaki kech ana aloteten, ta lomoyo luapolok a ngakan kech ana aloteten, ta lomoyo luapolok a ngakejen kech ana aloteten. Sodi towatak Musa ngaakot na edongete lowaitin luomwon a ekeno a ngakipeyos. Kipachu ngesi nikataronon alomesek, ka asonyok, ka asepae, ka ewae loajokon a emany, ka ngingalur luarei imorikina ka asepae ta akalokiding a amuro anakitalio. Abu ngesi tolem amugati apei anakikap a ngamugati anapadok etalekinitoe Akuj, ka ngamugati nadapal apei na apeyo a akimiet, ta abisikut apei. Sodi kiwaak kidiama nikataronon ka amuro nakitalio. Nak Musa Aron ka talokookeng, sodi tolemut kesi erai akipeyos na iwakiwakio elemikinitae Ekapolon Akuj. Abu Musa kidiau ngamuja nguna daang anikech topee alokeno alo a ngakipeyos, aapei ka akipeyos a akiriket, eraakasi ngakipeyos a akitaleun. Ejoikinit akukuny a akipeyos kangina Ekapolon Akuj. Sodi tolem Musa atorobu kiwakawak erai akipeyos na iwakiwakio elemikinitae Ekapolon Akuj. Ibore ngini arai ika Musa alomesek alo italeunere ngimurok a Akuj. Tosubak Musa ngakiro daang loger lo adungokinitor Ekapolon Akuj. Tolem Musa akimiet nakiwasakina epewae ta ngaakot ngache na ayakasi lokeno a ngakipeyos, towatak Aron ka talokookeng, towatak tani loworui kech. Kotere eger ngolo, kitaleu ngesi kesi ka ngiworui kech toliworos ngika Ekapolon Akuj. Tolimok Musa Aron ka talokookeng tama, “Kitukulautu akiring ngina anakituk a eam a Akuj, sodi tanyama kaneni aapei ka amugati na eyei nakikap na ngiboro alu italeunitoe. Tosuba loger lo kadungokinitor ayong Ekapolon Akuj ebala, ‘Enyamete Aron ka talokookeng akiring ngina.’ Topeo akiring daang ka ngamugati daang na epiyanun. Kiboikinos nakituk a eam a ngirwa a ngikan-kaarei, tanang edaunosi ngirwa lu kitaleere esi, kainyo eraakasi ngirwaa lu kitaleere esi ngikan-kaarei. Adungu Ekapolon Akuj atamar tosubae nguna kongina torimanakinere ngasechesea kus. Ejoikinit esi iboikinosi nakituk a eam akwaar ka apaaran, a ngirwa a ngikan-kaarei, isubete nakolong adunguni Ekapolon Akuj.” Apot Aron ka talokookeng tosuba daang na adungunit Ekapolon Akuj kisitoru nia Musa. Ani enangi akolongit na a ngakan-kauni, kitaleun akolongit na a ngakan-kaarei kerumor, tanyarau Musa Aron ka talokookeng, ta ngikarikok a Ngisirael. Tolimok ngesi Aron tama, “Tolem emong losorokit erai akipeyos a akisech, tolem emesek erai akepeyos na inomio tarai daang lu emam ni ichwangakina. Tolemik Ekapolon Akuj. Ani erumor tolimok Ngisirael tolemut ekoroe erai akipeyos a akisech, tolemut itaok ni erai ekaru epei ka imesek ni erai ekaru epei, tarai daang lu emam ni ichwangakina, toliworos akipeyos na inomio. Nabo, tolemut emong ka emesek toliworos akipeyos a ekisil. Epeikinio Ekapolon Akuj ngibaren ngulu aapei ka akipeyos a ngalemet ana imorikinitae ka akimiet. Ejoikinit kesi esubete kongina kainyo ebuni Ekapolon Akuj nikech akolongit naga.” Yaut Ngisirael ibore daang ni adungunit Musa lowae lo alongaren a eam. Tochunakin ngitunga daang kirudun akilip Ekapolon Akuj. Tolimok Musa kesi tama, “Kidungok esi Ekapolon Akuj atamar tosuba nugu daang, sodi taanyungareta akwangis keng naakwaan kea.” Ani erumor tolimok Musa Aron tama, “Taapia lokeno loa ngakipeyos sodi tolem akipeyos a akisech ka na inomio na elemari akisech kon ka akisech a Ngisirael kadaang. Tolem akipeyos naga tomookere ngasechesea a ngitunga kadaang loger lo adungunitor Ekapolon Akuj.” Abu Aron taapiya lokeno lo a ngakipeyos sodi taar emong losorokit lo arai akipeyos a akisech keng. Inut talokookeng ngesi ngaakot, kilumok ngesi ekimoin keng naakot nguna kiwasak najipeta a ekeno a ngakipeyos. Ani erumor, tobukok ngaakot nache lowae loa ngalup a ekeno alo a ngakipeyos a Ekapolon Akuj. Sodi topeo nikataronon alokeno alo a ngakipeyos, topeo tani ngingalur, ka ewae loajokon a emany, loger lo adungokinitor Ekapolon Akuj Musa. Nakaneni topee ngesi akiring ka eleu anikalapatan a adakar. Taar ngesi ibarasit ni arai ika akipeyos keng ana inomio. Inut talokookeng ngesi ngaakot, sodi towatak lowaitin luomwon a ekeno alo a ngakipeyos. Nakis kesi ngesi akou ka nginerin luche a ibarasit, sodi topee ngesi alokeno alo a ngakipeyos. Ani erumor kilota ngesi ngiboro a akook ka ngamuroi ani erumor topee alokeno alo a ngakipeyos aapei ka nginerin luche a akipeyos ana inomio. Ani erumor, tolem ngesi akine na erai akipeyos a ngasechesea a ngitunga kadaang. Taar, sodi tolem loger losek alemunea ngesi ibarasit nia akipeyos a akisech keng a ilope. Toriku tani ibarasit a akipeyos ana inomio loger lo asakitere alotal. Tolem ngesi akipeyos a ngalemet sodi tomuk ngakiria ileleba akan, topee alokeno alo a ngakipeyos. (Arai akipeyos naga na eatakinitae nakipeyos na elemuununio akolongit daang.) Taar ngesi emong ngolo ka emesek erai akipeyos a ekisil kotere ngitunga. Inut talokookeng ngesi ngaakot towatak ngesi lowaitin luomwon a ekeno a ngakipeyos. Nikataronon a emong ka na emesek, ka asonyok a emesek, ka asepae, ka ngingalur, ta ewae loajokon a emany, kimorik Aron ka atorobu, sodi topee alokeno alo a ngakipeyos. Nakaneni atorobu ka ngamuroi nakitalio, kiwakawak Aron eraakasi akipeyos na iwakiwakio alongaren Ekapolon Akuj, loger lo adungokinea Ekapolon Akuj Musa. Ani erumor Aron alemun ngakipeyos daang, kikea ngakan kidiama topia ngitunga, ani erumor totiyaun ani ayei ekeno lo a ngakipeyos. Tolomasi Musa ka Aron loeam a Akuj. Ani epudunete kesi, topiasi ngitunga. Tatakanu akwangis naakwaan kea a Ekapolon Akuj alotunga. Tolem Ekapolon Akuj akim atipei tonom akipeyos na inomio, ka nginerin lu atumak ayakasi lokeno lo a ngakipeyos. Ani eanyungarete ngitunga akim ngina, tachalakis daang sodi toriediko tojuko ngireetin kech ngalup. Talokookeng a Aron lu anyaritae Nadab ka Abiu, apot tolemut ipei kech daang asuat na elemere ngatotol anakim, kiwaakis ngatotol na anokete, kiwaakis nabo emitina, sodi tolemikis Ekapolon Akuj. Nakaneni peetaleunitoe akim ngina, kainyo peadungokinit Ekapolon Akuj kesi atamar kikokis neni. Abu Ekapolon Akuj tachaku akim atipei tonomia kesi alongaren keng. Sodi tolimok Musa Aron tama, “Ngakiro nugu kesi kolong abala Ekapolon Akuj na alimunio ebala, ‘Daang lu esubete etich kang, ejoikinit erimasi akitaleno kang. Edodiuni ayong apolou kang alotunga kang.’ ” Abu Aron kililing chek. Tanyarau Musa Michael ka Elisapan lu araakasi talokookeng a Usiel alo arai apakeng a Aron loochi. Abu ngesi tolimok kesi tama, “Potu kilepulepoosi talokaatokus aloeam a Akuj tachadasi nikalapatan a adakar.” Sodi kilepulepoosi kesi a ngiworui kech nikalapatan a adakar loger losek adungokinitor Musa. Tolimok Musa Aron ka talokookeng a Aron lu anyaritae Eleasar ka Isamar tama, “Nyiimiekis ngitim a ngakies kus nyikiarara kori nyiichila ngiworui kus idodiunito atamar igorosi esi isutonokinete. Ani kikokis esi neni, itoakete, nabo engoikini Ekapolon Akuj ngitunga daang. Nakaneni ngitunga kus luche, Ngisirael daang etia ni etia epedorete akigoro tosutonokis kotere akitu na ayauni akim naga na achakuni Ekapolon Akuj. Nyiipudosi aloeam a Akuj. Ani kipudosi itoakete, kainyo kitaleun esi ani kiwasakinere akimiet na etal na Ekapolon Akuj.” Tosuba Aron ka talokookeng ngakiro nguna loger lo alimokinitor Musa. Tolimok Ekapolon Akuj Aron tama, “Nyiilomut ka talokookon loeam kang erai kimasito emuna lo epuritoe kori kimasito epurot. Ani kilomutu, itoakete esi. Erai ibore en etal lo irichakinete ngalesea kon daang. Ejoikinit esi iyenete akitiak ngakiro na eraakasi ngaka Akuj ka ngakiro na nyeraakasi ngaka Akuj. Ejoikinit nabo iyenete akitiak ibore ni italeunitoe ka ibore ni nyitaleunitoe. Kitatama Ngisirael ngitalio daang lukadungok ayong esi esitoru nia Musa.” Tolimok Musa Aron ka talokookeng luarei edongito lu anyaritae Eleasar ka Isamar tama, “Tolemutu akipeyos a ngalemet na edongi anakimuj ana apeikinio Ekapolon Akuj, tanyama alo diyete ekeno lo a ngakipeyos emam ekitoe lo itubui iwaakinitae, kainyo erai akipeyos ngina na italeunitoe. Tanyama ani italeunitoe, kainyo ngesi kitiakakinitae iyong ka talokookon anakipeyos ana epeikinitoe Ekapolon Akuj. Kadungokini kolong ayong Ekapolon Akuj kongina. Nakaneni ani atorobu ka amuro nakitalio na eraakasi ngaka ngakipeyos ana iwakiwakio, tanyama awadaang anicha kijoikinit esi. Tanyama ka ngitunga a awi kon. Eraakasi ngakipeyos nguna na kitiakakinitae iyong ka ngide kon anakipeyos a ekisil ana elemuunete Ngisirael. Eyaunete amuro nakitalio ka atorobu na erai akipeyos na iwakiwakio, yaunae aapei ka nikataronon ni inomio sodi kiwakawakae erai akipeyos na iwakiwakio alongaren Ekapolon Akuj. Eraakasi nginerin ngulu ngikus ka ngide kus jik, loger lo adungunitor Ekapolon Akuj.” Ani ingita Musa ngakiro a akine ana alemunio erai akipeyos a akisech, abu toyen atamar kepei. Tongoik ngesi Eleasar ka Isamar lu edongete, sodi kingit tama, “Nyo peinyameta esi akipeyos a akisech ani italeunitoe? Erai akipeyos ngina na italeunitoe, nakaneni kiinak esi Ekapolon Akuj sodi tomookere akisech a ngitunga. Kingolikisi a, nyeyauna esi ngaakot nguna loeam a Akuj. Ajoikinit esi inyamete akipeyos ngina alotooma eam loger lo kadungokinitor ayong.” Tatachak Aron Musa tama, “Kingolik a, alemut tokona ngitunga akipeyos akisech ka akipeyos na inomio alemikis Ekapolon Akuj. Tani kikoni neni, aanyu ayong ngakiro naaronok ikote nugu! Tokona, arai atanyam ayong akipeyos na a akisech a, kejoikinito ngakiro nguna Ekapolon Akuj a?” Kitemokinos Musa ngakiro nguna na eirarea. Tolimok Ekapolon Akuj Musa ka Aron tama, “Tolimokisi Ngisirael ngitalio lugu. Ipedorete esi akinyam etiengit daang lo eyei nakwap, lo epakak ngakichiaket, tarai nabo lo iyeruununi nginyia. Nakaneni eyakasi ngitieng lu eraakasi nginyia make iyeruununete, kori ngakichiaket make epakak, nyiinyam ekaal kainyo tani kiyeruuni nginyia, nyepakak ngakichiaket. Erai ngesi ibarasit ni italeo akinyam. Nyiinyam adukae kainyo tani kiyeruuni nginyia, nyepakak ngakichiaket. Erai ngesi etiengit lo italeo akinyam. Nyiinyam apoo kainyo tani kiyeruuni nginyia, nyepakak ngakichiaket. Erai ngesi etiengit lo italeo akinyam. Nyiinyam ngiputiro. Italeo kesi akinyam kainyo tani kepakak kesi ngakichiaket, nyiyeruunete nginyia. Eraakasi kesi ngitieng lu italeo akinyam. Nyiinyam akiring kech kori nyiitap tani na etoaketa. “Ipedorete akinyam ngikolea daang lu eyakasi ngibeben ka ngikabebekwa. Nakaneni ibore ni eyei nakipi daang, ni emam ngibeben ka ngikabebekwa, italeo akinyam. Italeo akinyam ngitieng lu ikote ngulu. Nyiinyam akiring kech kori nyiitap tani ngawat kech nakatoak. Nyiinyam ibore daang ni eyei nakipi, tamam ngibeben ka ngikabebekwa. Warasi nyiinyam ngikieny lu italeo akinyam, lu imarunitae kanege lugu, lu eraakasi ngigolei ka ngataruk, ka ngataruk nakanyamak ngikolea, ka egole lobe lokidole, ta auk a ngigolei daang, ka ngikuruka, ta auk a ngikuruka daang, ka ngikaleeso, ka tatula na a akwaar, ka ngabaanga ka ngigolei luche, ta auk kech, ka tatula, ka nalumio, ka tatula naachik, ka ngabaanga naakwaak, ka ngaumoi, ka atarukot nabe kotol, ka tanatole ka tanamedot, ta auk kech, talokuto ka talononwa. “Ngiborei luuchik daang lu eporito, italeo akinyam, mati lu eporoporoote analup. Ipedorete akinyam ngimases, ka ngikajekelea, ta talodete. Nakaneni ngiborei luche luuchik daang lu eyakasi ngabeben toliato, italeo akinyam. “Kitiliworete ngiborei ngulu esi lu nyitaleuno. Itwaan cha daang ni etapi ibore ni etoanit eliwor ni nyitaleunitoe tanang ebong. Ani kelema itwaan akiring a ibore ani katoan, ejoikinit ngesi ilotari ngiworui keng. Eliwor itwaan ngini ni nyitaleunitoe tanang ebong. Itwaan cha daang ni etapi ibarasit ni epakak ngakichiaket tarai nyiyeruuni nginyia, eliwor itwaan ngini ni nyitaleunitoe. Ngitieng daang lu ichiakito ngalup a ngimaagor, tani keyakasi ngakejen ngoomwon, eraakasi lu italeo akinyam. Itwaan cha daang ni etapi etiengit lokatoan, eliwor ni nyitaleunitoe tanang ebong. Itwaan cha daang ni edaki etiengit lokatoan, eliwor ni nyitaleunitoe tanang ebong. “Italeo akinyam ngitieng lugu, nacheleru, ka lorunye, ka taata a ngarewa daang, ka ayele, ka anakanak ka lokibobo, ta agea. Itwaan cha daang ni etapi kesi, kori lu atoaka, eliwor ni nyitaleunitoe tanang ebong. Ani kechakakin etiengit lokatoan nibore idio, eliwor ibore ngini ni nyitaleunitoe. Epedori ibore ngini aliwor nikitoe, kori eworu, kori eleu, kori echue, kori ibore cha daang ni esubere ibore idio. Ilumokinio ibore ngini nakipi, nakaneni eliwor ni nyitaleunitoe tanang ebong. Ani kechakakin ibore nikatoan namot nalupe, eliwor ibore daang ni eyei namot ngina ni nyitaleunitoe, nakaneni ejoikinit iyong ibwangi amot ngina. Akimuj cha daang napalem epedorio akinyam, nakaneni tarai abukokin ngakipi a amot kangina, eliwor na italeo akinyam. Ani ibore cha daang ni epedorio akimat anamot kangina eliwor ni italeo akimat. Ibore cha daang ni echakakin ibore nikatoan, eliwor ni nyitaleunitoe. Kerai lokeno echakakin kori namot, ejoikinit ebwangio. Eliworosi lu nyitaleunitoe, kotere ngakiro nguna, eliworosi lu nyitaleunitoe anikus. Tani kikoni neni, ejok akar kori elelea. Nakaneni ibore cha daang ni etapi ibore nikatoan, eliwor ni nyitaleunitoe. Ani kechakakin ibore nikatoan lokinyam lu esakio akitakin, nyerokearosi ngikinyam ngulu. Nakaneni ani kemur ngikinyam anakipi esakio toruput, sodi tochakakin ibore nikatoan neni, eliworosi ngikinyam ngulu lu nyitaleunitoe. “Ani ketoana etiengit lo nyitaleo akinyam, itwaan cha daang ni etapi etiengit lokatoan ngolo, eliwor ni nyitaleuno tanang ebong. Ani kenyam itwaan idio akiring a ibarasit anikatoan kangini, ilotari ngiworui keng, nakaneni eliwor ngesi ni nyitaleunitoe tanang ebong. “Nyiinyam ngiborei luuchik daang lu eliato analup. Keliato kesi, kori keloose a ngakejen a ngoomwon, kori kelalak ngakejen. Warasi nyiiliworosi lu nyitaleuno ani inyameta tani ipei kech. Ayong arai Ekapolon Akuj na arai Akuj kus, nakaneni ejoikinit esi italeunosi, kainyo arai ayong na etaleuno. Arai ayong Ekapolon Akuj nakolong kepuduni esi alo Misiri sodi atoliwor Akuj kus. Kotere ngakiro nguna ejoikinit esi iliworosi lu italeuno kainyo arai ayong Akuj kus na etaleuno. “Eraakasi ngulu ngitalio a ngitieng ka ngikieny, ka ibore daang ni eyei nanam, ta ibore daang ni elosi anakwap. Ejoikinit esi irichakinete akitiak ibore ni nyitaleo akinyam ka ni italeo akinyam, ka ngitieng lu enyamio ka lu nyenyamio.” Tolimok Ekapolon Akuj Musa tama, “Tolimok Ngisirael kona, ani kepoti aberu kidou ikoku nisapat, eliwor ngesi na nyitaleunitoe a ngirwa a ngikan-kaarei, kikok eger lopalem sek eyakar lolap ibooyo. Ilengerio ikoku ngini akolongit na a ngakan-kauni. Erubakini aberu ngina erai na nyitaleunitoe a ngirwa a ngiche a ngitomwon-uni ka nguuni. Ngirwa ngulu, nyejoikinit ngesi etapi ibore ni italeuno, kori nyeeloma loeam a Akuj eringa ngirwa lu italeunere ngesi nyedauna. “Ani kidou aberu ngina ikoku nipese, eliwor ngesi na nyitaleunitoe a ngirwa a ngitomon ka nguomwon, kikok eger losek eyakar lolap ibooyo. Erubakini aberu ngina erai na nyitaleunitoe a ngirwa a ngitomwon-kapei ka ngikan-kapei. “Ani enangi ngirwa lu italeunere ngesi, kerai lua ikoku anisapat kori lua anipese, eyauni ngesi nia emuron a Akuj anakituk a eam a Akuj, imesek ni ekaru a epei erai akipeyos na inomio, ta kidomelio, kori akuuri erai akipeyos a akisech. Erikuni emuron a Akuj ngesi ngaren Ekapolon Akuj tolem akipeyos na italeunio ngesi. Nakaneni eliwor ngesi na etaleun. Ngakiro nguna kesi esubi aberu kidou kerumor. Ani kengopiki aberu imesek, eyauni ngakurio ngaarei kori takidomelio ngaarei. Eliwor apei aka akipeyos ana inomio, toliwor nache aka akipeyos a akisech. Italeuni emuron a Akuj ngesi, toliwor ngesi na etaleun.” Tolimok Ekapolon Akuj Musa ka Aron tama, “Ani kemin itwaan ajeme nakwaan, kori elepunait, kori kebu akwaan tasak aliwor enomokere, ejoikinit erikunio nia Aron alo erai emuron, kori ni eyei epei a talokookeng lo erai emuron. Iseme emuron ajeme. Ani keliworo ngitim kaneni luakwaak, nabo kichukuliyoro ajeme ngina, erai ibore ngini enomokere. Elimuni emuron atamar erai itwaan ngini ni nyitaleunitoe. Nakaneni ani kekwang ajeme, tarai nyichukuliyoro, nabo tarai nyekwangak ngitim, echadari emuron itwaan ngini a ngirwa a ngikan-kaarei. Iseme emuron ngesi nabo akolongit na a ngakan-kaarei. Ani kingolik emuron ngolo atamar ikoni ajeme ngina nikolong sek a ekingaren nyenyeara, ejoikinit echadari ngesi nabo a ngirwa ngikan-kaarei. Iseme emuron ngesi nabo akolongit na a ngakan-kaarei. Ani kengopiarit ajeme pekenyaara, elimuni emuron atamar erai itwaan ngini ni italeuno, erai ibore ngini ajeme pas. Nakaneni ani kenyaar ajeme ngina ekisidi a emuron akisemere ngesi tolim atamar italeuno, ejoikinit ngesi elosi nia emuron nabo. Iseme emuron itwaan ngini nabo, ani kenyaara ajeme, elimuni emuron atamar erai ngesi ni nyitaleuno. Erai edeke ngolo enomokere. “Ani kedekakin itwaan enomokere, erikunio lomuron a Akuj. Iseme emuron ngesi. Ani kekwang ajeme, taraakas ngitim luakwaak, nabo kileleba ngabulon, erai edeke ngolo enomokere lo amin nakwaan nikooyen. Elimuni emuron atamar erai itwaan ngini ni nyitaleunitoe. Nyechadario ngesi kainyo etakani dir atamar erai ngesi ni nyitaleunitoe. Ani kemin enomokere nakwaan wadaang, tobutakin nakwaan napei anakou tanang nakejen, iseme emuron ngesi nabo. Ani kingolik ngesi atamar kebutakin akwaan wadaang, elimuni ngesi atamar erai itwaan ngini ni italeuno. Ani kekwangera akwaan wadaang erai ngesi ni italeuno. Nakaneni napei cha etakanuunea ajeme, erai itwaan ngini ni nyitaleunitoe. Iseme emuron ngesi nabo. Ani keanyunga ngesi ajeme, elimuni ngesi atamar erai itwaan ngini ni nyitaleunitoe. Erai ajeme ngina enomokere, nakaneni nyitaleunitoe itwaan ngini. Ani kengaleki ajeme ngina tokwanger nabo, elosi itwaan ngini lomuron a Akuj. Iseme ngesi emuron ngolo nabo. Ani kekwangera ajeme, elimuni emuron atamar erai itwaan ngini ni italeunitoe. “Ani keyei itwaan elepunait lokengaleki, ani ekisidi min abus naakwaan kori nakori-arengan nisek ayei elepunait, elosi itwaan ngini lomuron. Iseme ngesi emuron, ani kichukuliyoro neni, tokwangak ngitim, elimuni emuron atamar erai itwaan ngini ni nyitaleunitoe. Enomokere ngesi esiak alolepunait kangolo. Nakaneni ani kiseme emuron a Akuj itwaan ngini kingolik atamar nyekwangera ngitim keng, nabo nyichukuliyoro ajeme ngina, nabo ekot angopiar, echadari emuron ngesi a ngirwa a ngikan-kaarei. Ani kenyaar ajeme ngina, elimuni emuron atamar nyitaleunitoe itwaan ngini. Edeak itwaan ngini. Nakaneni ani kerupu ajeme awapei towou anyaar, erai aporosit nasek a elepunait. Elimuni emuron atamar italeuno itwaan ngini. “Ani kenom itwaan akim, sodi tokwanger anomat ngina, kori toliwor nakori-akwaan, iseme emuron ngesi. Ani kekwangera ngitim lua ajeme, kichukuliyor ajeme, erai enomokere esiak ananomat a akim kangina. Elimuni emuron atamar erai itwaan ngini ni nyitaleunitoe. Ani pekekwangera ngitim kaneni, nabo pekichukuliyoro tani ajeme, tarai ekot ajeme ngina angopiar, echadari emuron ngesi a ngirwa a ngikan-kaarei. Iseme emuron ngesi nabo akolongit na a ngakan-kaarei. Ani kenyaara ajeme ngina, erai enomokere. Elimuni emuron atamar erai itwaan ngini ni nyitaleunitoe. Ani pekilochokin ajeme ngina towou anyaar, nabo tokote angopiar, nyerai edeke ngolo enomokere. Elimuni emuron atamar italeuno itwaan ngini kainyo erai aporosit ngina aka anomat a akim. “Ani kemin ekile kori aberu ajeme nakou kori nabokony, iseme emuron. Ani kichukuliyoro ajeme ngina tonyangaaniyarito ngitim keng todiseak, erai enomokere. Elimuni emuron atamar nyitaleunitoe itwaan ngini. Ani kiseme emuron ngesi, kingolik atamar nyichukuliyoro ajeme, nakaneni eringa ngitim nyiriokera, echadari ngesi a ngirwa a ngikan-kaarei. Iseme emuron ajeme nabo akolongit na a ngakan-kaarei. Ani keringa nyenyaara, tamam ngitim lunyangayek, nabo nyiichukuliyoro, ebanyi itwaan ngini akou kimiek ewae lo eyakasi ngitim. Echadari emuron ngesi nabo a ngirwa a ngiche a ngikan-kaarei. Iseme emuron ajeme akolongit na a ngakan-kaarei. Ani pekenyaara nabo nyiichukuliyoro, elimuni emuron atamar italeuno itwaan ngini. Ilotari itwaan ngini ngiworui keng, sodi toseger ngesi. Ani kenyaar ajeme erai kelimu emuron atamar italeuno itwaan ngini kerumor iseme emuron itwaan ngini nabo. Ani kenyaara ajeme, nyeesak nabo emuron aanyungar ngitim lunyangayek, etakani atamar erai itwaan ngini ni nyitaleunitoe. Ani kingolik emuron atamar nyenyaara ajeme nabo keruput ngitim lukirionok kaneni, kengaleki ajeme ngina. Elimuni emuron atamar italeuno itwaan ngini. “Ani kepean ekile kori aberu ngakemera naakwaak nakwaan, iseme emuron itwaan ngini. Ani kingolik emuron atamar ekwangikinit cha ngakemera nguna, erai ibore ngini loper. Italeuno itwaan ngini. “Ekile lo edaunosi ngitim tapaloror, italeuno. Ani kedaunosi itwaan ngitim a akou lua ereet kori lua alokiding akou, kori min angole namedo, epalor itwaan ngini nakaneni italeuno. Ani kemin ajeme nakori-akwaan napalore, erai enomokere. Iseme emuron itwaan ngini ani keyei ajeme nakori-akwaan, elimuni emuron atamar nyitaleunitoe itwaan ngini, kotere enomokere lo eyei nakou keng. “Itwaan ni edeak enomokere, enapi ngiworui lu edaudauna, nyikiarari ngitim keng, nabo erapi ewae loa lokwap a ereet keng, toliwor ebala, ‘Nyitaleunitoe, nyitaleunitoe!’ Erubakini itwaan ngini erai ni nyitaleunitoe ngirwa daang lu eringaakar edeaka edeke ngolo. Iboikin ngesi nikalapatan a adakar tachadar ani eyakasi ngitunga luche. “Ani kemin erukopus loworui, keraakasi lua ngajul a ngamesekin, kori lua ngawarui, kori kemin nawaru cha daang, kori nawaru a ngajul a ngamesekin, kori loleu, kori nibore cha daang ni esubunitae aloleu. Ani kepusianikinit kori kerengikinit erukopus lo eyei nibore ninapat ngini, erai erukopus ngolo lo iata, ejoikinit idodikinio emuron. Iseme emuron tachada iborosit ngini a ngirwa a ngikan-kaarei. Iseme emuron nabo akolongit na a ngakan-kaarei. Ani kiatakin erukopus, eliwor iborosit ni nyitaleunitoe. Inomi emuron iborosit ngini kainyo epetarit erukopus lo ejoikinit inomio a akim. “Nakaneni ani kiseme emuron iborosit ngini, torukau erukopus nyiatakina anibore kangini, elimuni ngesi atamar kilotarae iborosit ngini, kikacharae a ngirwa a ngiche a ngikan-kaarei. Ani erumor kiseme ngesi, ani pekilochokino eger a erukopus kangolo, tani pekepetara erukopus ngolo, eringa iborosit ngini erai ni nyitaleuno. Ejoikinit iborosit ngini inomio, tani keyei erukopus ngolo ngaren ibore kangini kori naabor. Nakaneni ani kiseme emuron nabo torukau erukopus kengopia, ikisari ngesi erukopus ngolo aloworui kori aloleu. Ani ketakanuu erukopus kiatakin nabo, ejoikinit ilope inomi iborosit ninapat ngini. Ani kilota ngesi iborosit ngini tongopia erukopus, ilotari ngesi nabo iborosit ngini. Eliwor iborosit ninapat ngini ni italeuno. “Erai ngolo etal a erukopus alo eyei loworui, keraakasi lua ngajul a ngamesekin, kori lua ngawarui, kori kemin nawaru cha daang, kori nawaru a ngajul a ngamesekin, kori nibore cha daang ni esubunitae aloleu. Ikokinio eyenio neni kerai iborosit ni italeuno kori ni nyitaleuno.” Tolimok Ekapolon Akuj Musa tama, “Ngitalio lugu kesi lu italeunere itwaan nisek adeaka enomokere, tangalek enomokere ngolo. Akolongit na elimunere atamar erai itwaan ngini ni italeuno, erikunio ngesi nia emuron a Akuj. Elosi emuron kiseme ngesi anikalapatan a adakar. Ani kengalekinit edeke, elimuni emuron atamar yaunae ngikieny ngiarei lu italeunitoe, aapei ka akitoe a echekereng, ka auno naarengan eluguritoe, ta akuyen a ekitoe alobe isopo.*g** Elimuni emuron atamar taarae ikeny ipei anatubwa ana esubunitae alochoto, ana eyakasi ngakipi naajokak a elelea. Elemari emuron ikeny niche ni eyari, aapei ka akitoe a echekereng, ka auno naarengan na eluguritoe, ta akuyen a ekitoe alobe isopo, sodi kiwaak daang naakot a ikeny ani aario. Itwaan ni italeunio alonomokere, ewatakini emuron ngesi ngaakot, ngawatakinet ngakan-kaarei, ani erumor tolim emuron atamar angaleki itwaan ngini. Imiekini ngesi ikeny ni eyari toporo tolot naroatin. Ilotari itwaan ngini ngiworui keng, tabanya ngitim daang, sodi kilotar. Eliwor itwaan ngini ni italeuno. Ani erumor, elomuni ngesi nadakar nakaneni iboikin nikalapatan a eam keng ngirwa ngikan-kaarei. Ani akolongit na ngakan-kaarei, ebanyi ngesi nabo akou keng, ka abokony, ka ngakiir, ta ngajul nache daang na eyakasi nakwaan keng. Ilotari itwaan ngini ngiworui ka akwaan keng, sodi toliwor ni italeuno. “Akolongit na a ngakan-kauni, eyauni ngesi ngimesekin lukiliok ngiarei lu ediseak, ka imesek niberu ni erai ekaru epei, ni emam ni ichwangakina. Eyauni tani ngakiloi ngauni a ngakiria ana imorikinitae ka akimiet, ta atiaket apei anauni a alita a apei a akimiet. Emuron lo italeuni itwaan ngini, erikori ngesi nakituk a eam a Akuj ka ngakipeyos keng aapei. Elemuni emuron imesek nikile ipei ka atiaket apei anauni a alita a akimiet, tolem erai akipeyos a atachanot. Elemuni ngesi erai akipeyos na iwakiwakio ani Ekapolon Akuj. Eari ngesi imesek ngini ani italeuno, ani palem eareenere ngibaren a ngakipeyos akisech, ka ngakipeyos na inomio tonomiasi. Ejoikinit ngesi esubi kongina kainyo ngakipeyos a atachanot ka ngakipeyos na inomio tonomiasi, eraakasi daang ngaka emuron, nabo italeunitoe noi. Elemuni emuron ngaakot ngache a imesek kiwasak lobonibonit a akit ana aloteten, ka lokimoin loapolon a akan ana aloteten, ta ekimoin loapolon a akeju ana aloteten, a itwaan ani edikino elimunio atamar italeuno. Elemuni emuron akimiet a ngikito ache, tobukok lotau a akan keng ana alokedieny, sodi kilumok ekimoin a akan keng ana aloteten nakimiet ngina, towatak itwaan ni italeo ngawatakinet ngakan-kaarei alongaren Ekapolon Akuj. Elemuni emuron akimiet ache na idongi lotau a akan keng ana alokedieny kiwasak itwaan ni italeo ngini lobonibonit a akit keng ana aloteten, ka lokimoin loapolon a akan ana aloteten, ta ekimoin loapolon a akeju ana aloteten, kimorikin ka ngaakot nasek ewasakinio neni. Idokakini emuron akimiet nache na idongi lotau a akan keng, nakou a itwaan ani italeo. Ani kikok emuron neni, italeuni itwaan ngini ani Ekapolon Akuj. “Ipeye emuron akipeyos a akisech kitaleunio itwaan ngini. Ani kikok neni kerumor, eari ibarasit a akipeyos ana inomio tonomia sodi tolem ka akipeyos a ngalemet alokeno a Akuj. Alorot kangolo, italeuni emuron itwaan ngini toliwor ngesi ni italeuno. “Ani kiboosit itwaan tokuruwo alemun ngiboro ngulu, ejoikinit elemuni imesek nikile ipei erai akipeyos a atachanot. Eliwor akipeyos a Ekapolon Akuj na iwakiwakio. Eyauni ngesi akilo apei a ngakiria ana imorikina ka akimiet erai akipeyos a ngalemet, ta atiaket apei anauni a alita a apei a akimiet a ngikito. Eyauni ngesi tani ngakurio ngaarei, kori takidomelio ngaarei, erai apei aka akipeyos a akisech, tarai nache aka akipeyos ana inomio tonomia. Akolongit na a ngakan-kauni italeere itwaan ngini, eyauni ngesi kesi nia emuron a Akuj anakituk a eam. Elemari emuron imesek nikile ka atiaket apei anauni a alita a apei a akimiet a ngikito, sodi tolem erai akipeyos na iwakiwakio ani a Ekapolon Akuj. Eari ngesi imesek nikile ni erai ika akipeyos a akisech ngini kiwasak ngaakot ngache lobonibonit a akit keng ana aloteten, ka lokimoin loapolon a akan ana aloteten, ta ekimoin loapolon a akeju ana aloteten, a itwaan kangini. Ebukokini emuron akimiet ache lotau a akan keng ana aloteten. Ani erumor towatak emuron itwaan ngini akimiet a ekimoin keng a akan ana loteten, ngawatakinet ngakan-kaarei, alongaren Ekapolon Akuj. Iwasakini emuron itwaan ngini akimiet lobonibonit a akit keng ana aloteten, ka lokimoin loapolon a akan keng ana aloteten, ta ekimoin loapolon a akeju ana aloteten. Ani ngaakot nache idongete, idokakini ngesi nakou a itwaan kangini, sodi kitaleunio ngesi. Ani erumor tolem ikeny ni cha keyei, kerai akuuri kori kidomelio toliwor akipeyos a akisech, nabo tolem akipeyos na inomio tonomia toliwor akipeyos a ngalemet. Elemuni nabo tani akipeyos a ngalemet, sodi kitaleu emuron itwaan ngini ani a Ekapolon Akuj. Erai ngolo etal a itwaan ani edeaka enomokere, nakaneni nyepedori alemuni akipeyos napalem ipeyoeneo kotere edeke ngolo.” Tolimok Ekapolon Akuj Musa ka Aron tama, “Ani ilomarete esi nakwap a Kanaan nakainak ayong esi toliwor akus, sodi ewaak ayong Ekapolon Akuj erukopus nawas a akai a adio anakwap ana eliwor akus, ejoikinit itwaan a akai kangina elimokini emuron tama, ‘Esibit eyei erukopus kai kang.’ Elimuni emuron atamar kipudoroe ngiboro daang nikalapatan eringa ngesi nyeloto akisemere akai ngina. Ani pekipudor ngiboro nikalapatan, epedorio alimun atamar eraakasi ngiboro daang lu eyakasi neni lu nyitaleuno. Ani erumor elosi emuron akisemere erukopus. Ani keyakasi ngakemera napusiek kori naarengak esibit kichukuliyoro awas, erotokini ngesi alokai togol tanang ngirwa ngikan-kaarei edaunosi. Ebonguni ngesi nabo akolongit na ngakan-kaarei kiseme. Ani kepetakina erukopus ngolo nawas a akai, elimuni ngesi atamar tolemarae ngamoru na eyei erukopus, tachakakinae wadio ni nyitaleunitoe anikalapatan a ere. Ani erumor elimuni ngesi atamar kikisarae ngikwaasea a akai daang lu alotooma sodi tochakakinae ngalup na eraraunosi wadio ni nyitaleunitoe anikalapatan a ere. Elemunio ngamoru nakitet todukokinae nisek ekisario, ipuchakinio nabo akai ngina kilalakinae. “Ani ketakanuu erukopus nabo alokai kelemar ngamoru kikisae akai kilalakinae, elosi emuron kingolik. Ani kepetakina erukopus kai ngina, erai akai ngina na nyitaleunitoe. Ejoikinit akai ngina ebwangio sodi tolemunae ngamoru keng, ka ngakito keng, ta ngalup keng na eraraunosi daang yaarae nikalapatan a ere ni nyitaleunitoe. Itwaan cha daang ni elomari kai ngina eringa egolitoe, eliwor ni nyitaleunitoe tanang ebong. Itwaan ni inapakin kori ni imuji alokai kangina, ejoikinit ilotari ngakan. “Nakaneni ani kebu emuron akisemere; torukau erukopus eringa nyetakanuuna kipuchakin akai kilalakinae torumor, elimuni atamar erai akai na italeunitoe, kainyo adaun erukopus jik. Ani esakio akitaleun akai ngina, elemuni ngesi ngikieny ngiarei, ka akitoe a echekereng, ka auno naarengan eluguritoe, ta akuyen a ekitoe be isopo.*g** Eari ngesi ikeny ipei anatubwa ana esubunitae alochoto ana eyakasi ngakipi naajokak a elelea. Sodi tolem emuron akitoe a echekereng, ka akuyen a ekitoe alo be isopo, ka auno naarengan eluguritoe, ta ikeny ni eyari, sodi kiwaak daang naakot a ikeny ani aario, kiwaak nabo tani nakipi naajokak. Ani kikok ngesi neni, italeuni akai a ngaakot a ikeny, ka ngakipi naajokak, ka akitoe a echekereng ka akuyen a ekitoe be isopo, ta auno naarengan eluguritoe. Imiekini ngesi ikeny ni eyari toporo tolot naroatin. Ani kikok ngesi neni, italeuni akai, sodi toliwor na italeuno. “Eraakasi ngulu ngitalio a enomokere kadaang, ka loper, ka erukopus lo eyei kai, kori loworui, ka abus, ka elepunait, ta ajeme, sodi toyenere atamar nyitaleuno kori italeuno. Erai ngolo etal a enomokere.” Todungok Ekapolon Akuj Musa ka Aron tama, “Ani keleleut ngabulon anamir a ekile, eraakasi ngabulon nguna na nyitaleunitoe, erai keringa ngabulon eleleete anamir kori ketubub ngabulon nguna. Ekitanda cha daang lo iboikin ngesi kori lo inapakin, erai lo nyitaleuno. Itwaan cha daang ni etapi ekitanda a itwaan kangini kori ni iboikin nisek ebooyo itwaan ngini, ejoikinit ilotari ngiworui keng ka akwaan keng, nakaneni eliwor ngesi ni nyitaleunitoe tanang ebong. Itwaan cha daang ni etapi itwaan ni eleleete ngabulon, ejoikinit ilotari ngiworui keng ka akwaan keng, nakaneni eliwor ngesi ni nyitaleunitoe tanang ebong. Ani kimoak itwaan ni eleleete ngabulon itwaan ni italeunitoe, ejoikinit itwaan ngini ilotari ngiworui keng ka akwaan keng, nakaneni eliwor ngesi ni nyitaleunitoe tanang ebong. Ekicholong lo iboikin itwaan ni eleleete ngabulon alotiengit alo edoki ngesi, eliwor lo nyitaleunitoe. Itwaan cha daang ni etapi ibore ni ebooyo itwaan ngini, eliwor ni nyitaleuno tanang ebong. Ani itwaan cha daang ni iwoki ibore ni erai ika itwaan kangini, ejoikinit ilotari ngiworui keng ka akwaan keng, nakaneni eliwor ngesi ni nyitaleuno tanang ebong. Ani ketap itwaan ni eleleete ngabulon itwaan eringa ngesi nyilotara ngakan keng, ejoikinit itwaan ni atapio ngini ilotari ngiworui keng ka akwaan keng, nakaneni eliwor itwaan ni atapio ngini ni nyitaleuno tanang ebong. Amot nalupe daang na etapi itwaan ni eleleete ngabulon, ejoikinit ebwangio. Ani atubwa nakitoe etapi itwaan ngini, ejoikinit ilotario. “Ani kengaleki edeke a itwaan ani eleleete ngabulon, ejoikinit ngesi idari ngirwa ngikan-kaarei edaunosi. Ani erumor, kilota ngesi ngiworui keng, ka akwaan keng anakipi a elelea anaajokak, nakaneni eliwor ngesi ni italeuno. Akolongit na a ngakan-kauni, eyaari ngesi ngakurio ngaarei kori takidomelio ngaarei nakituk a eam a Ekapolon Akuj sodi nak emuron a Akuj. Elemuni emuron apei toliwor akipeyos a akisech, sodi tolem nache erai akipeyos na inomio. Kotere eger ngolo, esubakini ngesi etal lo akitaleun. “Ani keleleete ekile ngadwa, ejoikinit ngesi ilotari akwaan keng daang, nakaneni eliwor ngesi lo nyitaleuno tanang ebong. Eworu daang lo edokakin ngadwa nguna kori eleu, ejoikinit ilotario, nakaneni eliwor ibore ngini ni nyitaleuno tanang ebong. Kepero ekile ka aberu, ejoikinit kesi daang ilotarosi, nakaneni eliworosi kesi lu nyitaleuno tanang ebong. “Aberu na ibooyi eyei lolap, eliwor na nyitaleuno a ngirwa a ngikan-kaarei. Itwaan cha daang ni etapi ngesi eliwor nyitaleuno tanang ebong. Ibore cha daang ni eperio ngesi kori ni iboikinor ngirwa lu eyakar lolap, eliwor ni nyitaleuno. Itwaan cha daang ni etapi ekitanda a aberu kangina, ejoikinit ilotari ngiworui keng ka akwaan keng, nakaneni toliwor nyitaleuno tanang ebong. Itwaan cha daang ni etapi ibore ni ibooyo aberu ngina, ilotari ngiworui keng ka akwaan keng, nakaneni eliwor ni nyitaleuno tanang ebong. Ekile cha daang lo etapi ibore cha daang ni eperio aberu ngina kori ni iboikinor, eliwor lo nyitaleuno tanang ebong. Ani kepero ekile ka aberu ngina ngirwa lu eyakar aberu ngina lolap, etapakin ngaakot na aberu kangina ekile ngolo toliwor ngesi lo nyitaleuno a ngirwa a ngikan-kaarei. Ani ekitanda cha daang lo inapakin ekile ngolo, eliwor lo nyitaleuno. “Ani keleleete aberu ngaakot a ngirwa lukaalak, tarai nyeraakasi ngirwa ngulu lu ibooyo ngesi eyakar lolap, eliwor ngesi na nyitaleuno ngirwa daang lu eleleata ngaakot nguna. Kikok eboyor keng lo ibooyo ngesi eyakar lolap. Ekitanda cha daang lo eperio ngesi kori ibore cha daang ni eperio ngesi eliwor ni nyitaleunitoe. Itwaan cha daang ni etapi ngiboro lu eperio ngesi kori lu ibooyo, ejoikinit ilotari ngiworui keng ka akwaan keng, nakaneni eliwor ngesi ni nyitaleuno tanang ebong. Ani ketubosi ngaakot keng alelere, ejoikinit ngesi idaruni ngirwa ngikan-kaarei edaunosi, sodi toliwor ngesi na italeuno. Akolongit na a ngakan-kauni, eyaari ngesi ngakurio ngaarei kori takidomelio ngaarei nakituk a eam a Ekapolon Akuj sodi nak emuron a Akuj. Elemuni emuron a Akuj apei toliwor akipeyos a akisech, sodi tolem nache erai akipeyos na inomio. Kotere eger ngolo, esubakini emuron ngolo etal lo a akitaleun anaberu kangina.” Tolimok Ekapolon Akuj Musa tama, “A eger kangolo, itiliworete esi Ngisirael lu italeuno, sodi nyeemunyarotor kesi erai kinyasut eam kang, lo eyei kiding kech.” Eraakasi ngulu ngitalio a ekile alo eleleete ngabulon, kori ngadwa, ka aberu na ibooyi eyei lolap, ta ekile lo eperete ka aberu na nyitaleuno. Eruorosi Ekapolon Akuj ka Musa ekisidi a akitu a talokookeng a Aron aluarei, alu aario na alemikineta Ekapolon Akuj akim na peetaleunitoe. Tolimok Ekapolon Akuj Musa tama, “Tolimok lokaatokon Aron atamar nyeeloma tooma ni italeunitoe noi eringa esaa lolomaret nyenanga. Nyeeloma ngesi neni kainyo neni ngesi atakanuunea ayong alodou amin kidiama apukenit a asaduku a Achamunet. Ani kewou ngesi akiwap ngakiro nguna, etoani. Elomari Aron ni italeuno noi keyau emong losorokit erai akipeyos a akisech ta emesek erai akipeyos na inomio.” Abu Ekapolon Akuj todung ngakiro nugu. Ani eringa Aron nyelomara ni italeunitoe noi, ejoikinit mono ilotar sodi tanap ngiworui lu eraakar emuron. Ngiworui ngulu kesi eworu lokooyen kaanikan, ka esuruale, ka aruba, ta achaat. Elemuni ngesi alotunga a Ngisirael ngikora ngiarei kotere akipeyos akisech, ka emesek epei kotere akipeyos na inomio. Elemuni Aron emong erai akipeyos a elemari ngasechesea keng ka ngasechesea a ngitunga a awi keng. Ani erumor eyaari ngesi ngikora luarei ngulu nakituk a eam a Akuj. Erami ngesi ekura kaneni a ngamoru a ngaarei, apei na igiritae “Aka Ekapolon Akuj” ka nache na igiritae, “Aka Asasel.” Ipeye Aron ekoroe lo aseunio a akiram ekura toliwor akipeyos a akisech ani a Ekapolon Akuj. Ani ekoroe lo aseunio toliwor eka Asasel, elemikinio Ekapolon Akuj eyari, sodi kimiek emuron a Akuj elosi nariet a Asasel, tolemarere ngasechesea a ngitunga. “Elemuni Aron emong erai akipeyos a akisech keng ka na a ngitunga a awi keng. Ani erumor, elemuni ngesi atartar na elemere ngatotol anakim ileleba ngatotol na enokete na alemunio alokeno a Akuj, ka emitina lo ileleba ngakan ngaarei, sodi yau kesi ni etaleuno noi. Iwaakini ngesi emitina nakim alongaren Ekapolon Akuj, sodi tarap apuru a emitina apukenit a asaduku a Achamunet, sodi nyeanyunga ngesi totoanea. Elemuni ngesi ngaakot ngache a emong kiterak a ekimoin keng lowae lo alongaren a apukenit, ani erumor kiterak ngache ngakiterakinet ngakan-kaarei, lowae lo alongaren a asaduku a Achamunet. “Ani erumor, eari ngesi ekoroe kotere akisech a ngitunga. Eyauni ngesi ngaakot a ekoroe kangolo tooma ni italeuno noi, tosubea ngakiro nasek asubea ngaakot a emong, kiterak apukenit alowae alo alongaren. Kotere eger ngolo, esubakini etal lo italeunere ni italeuno noi anaronis a Ngisirael ka ngasechesea kech daang. Ejoikinit ngesi esubakinea tani eam a Akuj lo eyei kiding adakar ngakiro napei nguna, kainyo erai lo nyitaleuno. Ani elomari Aron ni italeuno noi asubakin etal loa akitaleun tanang ni epudunio, emam itwaan echamakinitae emini loeam. Ani kesubaki ngesi etal ngolo kotere ngesi elope, ka ngitunga a awi keng, ta ngitunga luche daang, ejoikinit ngesi elosi lokeno lo a ngakipeyos ana inomio sodi kitaleu. Elemuni ngesi ngaakot a emong epewae, ka ngaakot a ekoroe epewae, sodi kiwasak najipeta na eyakasi lokwaasea a ekeno. Ewatakini ngesi ekeno ngaakot a ekimoin keng ngawatakinet ngakan-kaarei. Kotere eger ngolo, italeuni ngesi ekeno ngolo anasechesea a Ngisirael, sodi toliwor lo italeuno. “Ani erumori Aron akisub etal lo italeunio ni italeuno noi, ka ewae loche a eam a Akuj ta ekeno a Akuj, elemikini ngesi Ekapolon Akuj akine na eyari na asekinitae Asasel Idokokini Aron ngakan keng nakou a ekoroe alo eyari sodi tolimo alokidiama keng ngakiro naaronok daang, ka ngasechesea a Ngisirael, sodi kiwaakinea ngakiro naaronok nguna daang nakou a ekoroe. Ani erumor kitwara itwaan ni eseunitae ekoroe ngolo nariet. Iwoki ekoroe ngolo ngasechesea daang a ngitunga yaa nakwap na emam itwaan elomit. “Ani erumor ebongori Aron tooma loeam, talacha ngiworui lu eraakar emuron, lusek anapi ngesi eroko nyelomara ni italeuno noi. Imiekini ngesi ngiworui ngulu kaneni. Ilotar ngesi ani italeuno sodi tanap ngiworui lukeng a ilope. Ani erumor, elosi ngesi tolem akipeyos na inomio tolemarea ngasechesea keng ka na a ngitunga. Inomi ngesi nikataronon a akipeyos a akisech alokeno. Itwaan ni arujari ekoroe nariet nia Asasel, ejoikinit ilotari ngiworui keng ka akwaan keng eringa nyebonguno nadakar. Emong ka ekoroe lu alemunio toliworos ngika akipeyos a akisech a akisech, lu ayaunio ngaakot kech ni italeuno noi tolemarere akisech, edakario nikalapatan a adakar topeoi. Itwaan ni inomi kesi, ejoikinit ilotari ngiworui keng ka akwaan keng eringa nyebongoro nadakar. “Irichakinete esi ngitalio lugu jiik. Akolongit na a ngatomon a elap alo a ngikan-kaarei, Ngisirael daang ka ngitunga lua a ngakwapea anache lu erukito ka kesi, ejoikinit eroneenete tasala alotich. Akolongit ngina, esubi etal lo italeunere kesi anasechesea kech, sodi toliworos kesi lu italeuno. Eliwor akolongit ngina na italeunitoe noi, akolongit na eronioto kesi tasala alotich. Irichakinio ngitalio ngulu jiik. Emuron Loapolon lo eseunio kitaleunoe kilunyokin nados ka apakeng, esubakini etal lo akitaleun. Enapi ngesi ngiworui lu emuron a Akuj sodi tosubak etal lo italeunere ni italeuno noi, ka ewae loche a eam a Akuj, ka ekeno, ka ngimurok, ta ngitunga daang. Irichakinio ngitalio ngulu daang jiik. Esubakinio etal ngolo asubakinet apei a ekaru a epei, sodi kitaleunere Ngisirael anasechesea kech. Sodi tosubak Musa loger lo adungokinitor Ekapolon Akuj.” Tolimok Ekapolon Akuj Musa tama, “Tolimok Aron ka talokookeng, ta Ngisirael daang atamar, ngitalio lugu kesi adungu Ekapolon Akuj atamar kiwapae. “Ani kear itwaan idio Alosirael emong kori imesek, kori akine alotooma adakar kori anikalapatan a adakar, ejoikinit itwaan ngini eyauni mono akipeyos nia Ekapolon Akuj alongaren eam a Akuj. Itwaan cha daang ni nyikokini neni, erai ekasechan, nakaneni echamit etachi ngaakot na abukor. Nyeringa itwaan ngini imarunitae atamar erai ipei a ngitunga a Akuj. Erai eger a etal kalo atamar eyaunete Ngisirael nia Ekapolon Akuj ngibaren daang lukolong aareenete kesi anaroatin. Eyaunete tokona kesi nia emuron a Akuj anakituk a eam sodi taara eraakasi ngakipeyos a ekisil. Ewatakini emuron ngaakot lokwaasea a ekeno alo a ngakipeyos anakituk eam, sodi topee nikataronon ni ejoikinit akukuny keng Ekapolon Akuj. Nyejoikinit Ngisirael eliworosi lu nyemunosi Ekapolon Akuj ani eareta ngibaren alomoding kipeyokis ngipean a ngaanei. Ejoikinit Ngisirael irichakinete etal logo jiik. “Ilimokini iyong kesi atamar itwaan cha daang a Ngisirael kori itwaan cha daang a akwap anache ni irukito ka esi, ni elemuni akipeyos na inomio kori akipeyos ache, ani a Ekapolon Akuj, tolem awache ani nyerai akituk a eam a Akuj, nyeringa itwaan ngini imarunitae atamar erai ipei a ngitunga a Akuj. “Ani kenyam itwaan idio a Ngisirael kori itwaan a akwap anache ni irukito ka esi ngaakot, engeri Ekapolon Akuj itwaan ngini nyeringa nabo imaruni ngesi atamar erai ipei a ngitunga keng. Akiyar a ibore kadaang ani eyari, eyei naakot. Ngakiro nguna kesi edungunitor Ekapolon Akuj atamar tobukokinae ngaakot daang lokeno tolemarere ngasechesea a ngitunga. Ngaakot na eraakasi akiyar, kesi elemarete ngasechesea a ngitunga. Ngakiro nguna kesi alimokinea Ekapolon Akuj Ngisirael ka ngitunga a ngakwapea anache erukitotor kesi atamar nyeenyam akiring. “Ani kear itwaan idio a Ngisirael kori itwaan a akwap anache erukito ka kesi etiengit kori ikeny ni italeunitoe alorika, ejoikinit ebukokini ngaakot keng kwap sodi tonuk a ngalup. Eyei akiyar a ibore kadaang naakot. Ngakiro nguna kesi alimokinea Ekapolon Akuj Ngisirael atamar nyeenyam ngaakot. Ani kenyam itwaan idio ngaakot, nyeringa imarakinitae atamar erai ipei a ngitunga a Ekapolon Akuj. “Itwaan cha daang, kerai Isiraelit kori itwaan a akwap anache, ni enyami akiring a etiengit alo etoani bon kori alo enyamete ngibuin, ejoikinit ilotari ngiworui keng ka akwaan keng, kidar tanang ebong esaa lo eliworor ngesi ni italeunitoe. Ani pekikok neni, ejoikinit ititakinio.” Tolimok Ekapolon Akuj Musa tama, “Tolimok Ngisirael atamar ayong Ekapolon Akuj arai Akuj kus. Warasi nyiiwap ngakiro na esubete ngitunga a akwap a Misiri, ana kolong ilomito esi, kori nyiiwap ngakiro a ngitunga a akwap a Kanaan ana tokona kayaarit ayong esi. Kiwapa ngitalio kang tosuba ngakiro na kadungokinit ayong esi. Ayong arai Ekapolon Akuj na arai Akuj kus. Kiwapa ngakiro kang ka ngitalio lu kadungokini ayong esi. Iyuunete esi akiyar kus erai kikokis neni. Ayong arai Ekapolon Akuj. “Engeritoe anikus eperete ekile ka aberu na eyanatar. Wara nyiisurum apakon ngileech ani iperieto ka itiokon nakolong kidouni iyong. Nyiisurum itiokon ngileech. Nyiisurum apakon ngileech ani iperioto ka ngaberu keng nache. Nyiipero ka nakaatokon kori nakaatokon na a aberu anache, kerai nawi apei kitanunitere esi kori meere. Nyiipero ka nakookeng a nakookon. Eliwor ibore ngini ngileech anikon. Nyiipero ka nakaatokon na a aberu anache, kainyo erai ngesi dang nakaatokon. Wara Nyiipero ka eyaakon, kainyo erai ngesi nakaatokeng a apakon. Wara nyiipero ka eyaakon kainyo erai ngesi itiokon naapolon kori naachi. Wara nyiipero ka aberu a apakon aloapolon, kori aloochi, kainyo erai ngesi dang itiokon. Wara nyiipero ka aberu a lokookon kori ka aberu a lokaatokon. Wara nyiipero ka nakookeng kori atatait a aberu anasek iperito ka iyong. Eraakasi kesi ngiyenet kon, nabo eliworosi nguna ngakiro aronok. Wara nyiiut nakaatokeng a aberu kon ngirwa daang lu eyarea aberu kon. “Wara nyiipero ka aberu ngirwa lu ibooyo eyakar lolap, kainyo erai ngesi na nyitaleuno. Nyiipero ka aberu a ekile a loche kainyo kitiliwori iyong ibore ngini lo nyitaleuno. Nyiipoto ikoku kon kipeyokinoe akuj nabe Molek, kainyo eyaunete ngakiro nguna ngileech lokiro a Akuj, ana erai Ekapolon Akuj. Emam ekile lo itoperi loche loger lopalem itoperio aberu, eremokino Akuj ngakiro na ikote nguna. Nyeepero ekile kori aberu ka etiengit, kitiliworete ngakiro na ikote nguna esi lu nyitaleuno. “Warasi nyiitiliworosi lu nyitaleuno a ngakiro kanu, kainyo ekokinete kolong ngibukui itiliworosi lu nyitaleuno neni. Ngibukui ngulu kesi lu esiaunete toloma neni nakaneni etwarakini tokona ayong Ekapolon Akuj kesi anakwap kangina sodi tolometa esi. Etiliwori eboyor kech akwap na nyitaleuno, nakaneni erirae ayong akwap sodi tongerio akwap ngitunga keng. Nakaneni kiwapa esi ngakiro kang ka ngitalio kang, warasi nyiisuba ngakiro naaronok nguna, esi kori ngitunga a ngakwapea anache lu irukito ka esi. Kainyo asubete kolong ngitunga lu esiaunete toloma nakwap a Kanaan eringa esi ngakiro naaronok nugu daang, sodi kitiliwosi akwap na nyitaleuno. Nakaneni nyiisuba esi na ikote nguna. Ani kisuba esi na ikote nguna, kingeri esi akwap ngina loger lokolong angerio ngibukui lu esiaunete toloma nakwap ngina eringa esi. Iyenete esi atamar itwaan cha daang ni esubi ngakiro naaronok ikote nguna, nyeringa imarunitae atamar erai ipei a ngitunga a Akuj.” Sodi tolim Ekapolon Akuj tama, “Kiwapa ngitalio lu kadungokini ayong esi, warasi nyiiwap eboyor a ngitunga alu kolong esiaunete toloma nakwap a Kanaan eringa esi. Nabo warasi nyiiliworosi lu nyitaleuno ani isubeta ngakiro nguna ngadi. Ayong arai Ekapolon Akuj na arai Akuj kus.” Tolimok Ekapolon Akuj Musa tama, “Tolimok Ngisirael daang atamar, kitaleunos kainyo ayong Ekapolon Akuj na arai Akuj kus, arai na etaleuno. Ejoikinit ipei kus daang erima itiokeng ka apakeng. Nabo ejoikinit irichakini akolongit a Sabato loger lo adungunitor ayong. Ayong arai Ekapolon Akuj na arai Akuj kus. “Nyikingero ayong kilipa ngakujo ngache. Warasi nyiisuba ngakujo a ngasua kilipa. Ayong arai Ekapolon Akuj na arai Akuj kus. “Ani ilemikinete esi Ekapolon Akuj akipeyos a ekisil, kirichakisi ngitalio lu kainak ayong esi sodi atachamunea ayong akipeyos kus. Ejoikinit akiring enyamio akolongit na earere ibarasit kori akolongit na etupit ngina. Akiring daang na eperi tanang akolongit na a ngauni, ejoikinit inomio kainyo nyitaleunitoe. Ani kenyam itwaan akiring ngina, nyachamuni ayong akipeyos. Itwaan cha daang ni enyami akiring ngina, ejoikinit irirao kainyo enyasu ngesi ibore ni italeunitoe erai ika Ekapolon Akuj. Nyeringa itwaan ngini imarunitae atamar erai ipei a ngitunga kang. “Ani ilemi iyong ngamanat kon, wara nyiilem ngalemet na eyakasi lokukuor a amana kon kori nyiibong akidep ngalemet na echakakin kwap. Wara nyiibong naabor alomana kon a ngimusabib sodi togeru ngamusabib nasek idongito kori kidep ngamusabib na echakakina kwap. Kimiekinea nguna ngikebootok ka ngitunga a ngakwapea anache. Ayong arai Ekapolon Akuj na arai Akuj kus. Wara nyiikoko, kori nyiilim alioko kori nyiingalasi make. Nyiikong ilimit ekiro kang iliokonit, sodi yau ngileech lokiro kang. Ayong arai Ekapolon Akuj na arai Akuj kon. “Nyiichekia ekidunyet kon kori nyiikoko ibore keng. Wara nyiitinenikinio ngaropiyae a ekasuban etich kon kitoper tanang tani akolongit apei. Wara nyiilam ekinim kori nyiilegerik ibore ni edakari emuduk ngaren keng. Nakaneni ejoikinit iyong ikeri Akuj kon. Ayong arai Ekapolon Akuj. “Toliwor lo itenoono na itubio ngakiro. Wara nyiiminak lo iboosit kori nyiiker ekabaran. Wara nyiiswam itwaan niche. Ani kititakinitae itwaan esakio akiar, wara nyiiremokin ngesi alokiruor kon. Ayong arai Ekapolon Akuj. “Wara nyiiman itwaan niche, nakaneni topupokinos ka ngesi sodi nyiisech iyong kotere ngesi. Wara nyiitachak ngakiro naaronok kisubea iyong itwaan kori nyiirubak iremit ngesi, nakaneni tominak itwaan niche loger lo iminar iyong ilope akwaan kon. Ayong arai Ekapolon Akuj. “Kiwap ngitalio kang, nyiisik ngibaren kon euriyete ngajul nagelagelae. Nyiitak ngikinyam ngiarei lugelagelae mana apei. Wara nyiinap ngiworui lu egelagela ngawarui na edonyunitere. “Ani kepero ekile ka akedalan na enerit ekile loche, nakaneni toringa ngaropiyae nalachakinet ngesi nyelemuna, ejoikinit ngakiro nguna engichunio. Nakaneni nyear kesi kainyo aringa akedalan ngina nyelachakina. Erikuni ekile ngolo emesek ngaren eam a Akuj toliwor akipeyos a atachanot. Esubakini emuron etal lo a akitaleun tolemarea akisech na asubi ekile ngolo, nakaneni erimakini Akuj ngesi. “Ani inangete esi nakwap a Kanaan kitakis ngikito daang a ageor toyena atamar italeo ageor ngina akinyam a ngikaru a nguuni. Nyiinyam ageor ngikaru ngulu. Ani ekaru lo a nguomwon, elemunio ageor daang toliwor akipeyos ani a Ekapolon Akuj, kidodiuneta esi alakara anikang. Nakaneni tanyama ageor ekaru lo a ngikan. Ani kisuba esi daang kongina, ekoniunete ngikito kus ageor nakaalan. Ayong arai Ekapolon Akuj na arai Akuj kus. “Warasi nyiinyam akiring na eyakasi ngaakot. Warasi nyiidwar kori nyiimuroto. Nyiibany ngitim lua ngikwaasea a ngakies kus kori nyiitubo ngitim lua abokony. Warasi nyiidungudungoto ngawat kus ani igorotor itwaan ni atoana, kori nyiigear ngawat kus. Arai ayong Ekapolon Akuj. “Wara nyiisurum tanakookon ngileech ani itiliworea ngamalaae a akai a akuj. Ani kikok iyong neni, ibatarosi ngitunga daang lomalaanu, sodi kilelebun akwap emalaanu. Kirichakisi akolongit a Sabato, sodi kidodiut arima ani kelipitere ayong Ekapolon Akuj. “Warasi nyiilot lomurok ka ngikapilak. Ani kikokis esi neni, iliworosi esi lu nyitaleuno. Ayong arai Ekapolon Akuj na arai Akuj kus. “Tonyou towo alongaren ngitunga lumojong ani ikeritor, sodi kidodik arima. Toker Akuj kon. Ayong arai Ekapolon Akuj. “Nyiiboliar ngitunga a akwap anache lu irukito ka iyong. Tosubea kesi ngakiro napei isubea iyong Ngisirael luche, sodi tominak kesi loger lo iminar iyong akwaan kon. Kitam atamar irai kolong iyong dang itwaan a akwap anache na iyakar Misiri. Ayong arai Ekapolon Akuj na arai Akuj kus. “Wara nyiingala itwaan itemi aoyau a ibore, kori apotis, ta alalau. Ejoikinit itemi ngiboro a ngaratilio ana eteniyete, ka apotis na etenoono, ta ngakitemiet na eteniyete. Arai ayong Ekapolon Akuj na arai Akuj kus, nakaneni kepuduni kolong ayong esi alo Misiri. Kiwap ngitalio kang daang ka ngakiro na adungunit ayong. Ayong arai Ekapolon Akuj.” Tolimok Ekapolon Akuj Musa tama, “Tolimok Ngisirael atamar itwaan daang ni erai Isiraelit kori itwaan a akwap anache ni irukito ka esi erai kipoto ikoku keng nak akuj nabe Molek, ejoikinit itwaan ngini eario. Imasete ngitunga a akwap kangina ngesi a ngamoru taara. Angeri ayong alope itwaan ngini nyeringa emaruni atamar erai ipei a ngitunga kang, kainyo epotori ngesi ikoku keng ipei nak akuj nabe Molek. Kotere erot ngolo, kinyasu ngesi eam kang lo italeunitoe, nabo yau ngileech lokiro kang lo italeunitoe. Nakaneni ani pekemisikis ngitunga ngakiro na asubi ngesi sodi nyear ngesi, angeri ayong alope itwaan ngini ka ngitunga a awi keng. Angeri ayong ngitunga daang lu imorikinosi ka ngesi towout amuno ayong ani ilipeta akuj nabe Molek. Nyeringa ayong emaruni kesi atamar eraakasi ngitunga kang. “Ani kelot itwaan lomurok ka ngikapilak sodi tojongo amuno ayong, angeri ayong ngesi nakaneni nyeringa emaruni atamar erai ipei a ngitunga kang. Toliworos lu italeuno, kainyo ayong arai Ekapolon Akuj na arai Akuj kus. Kiwapa ngitalio kang kainyo ayong arai Ekapolon Akuj, nakaneni ketiliwori ayong esi lu italeuno. Itwaan daang ni ichieni apakeng ka itiokeng eario. Eraakasi ngakiro a akitu keng ngaka akiding keng. “Ani kelom ekile ka aberu a Esiraelit aloche, eario ekile ngolo ka aberu ngina. Ani kitoper ekile apei a ngaberu a apakeng, isurumi ngesi apakeng ngileech. Eario ekile ngolo ka aberu ngina. Eraakasi ngakiro a akitu kech aka akiding kech. Ani kitoper ekile aberu a lokookeng, eario ekile ngolo ka aberu ngina. Asuba kesi ngakiro naaronok, nakaneni eraakasi ngakiro a akitu kech ngaka akiding kech. Ani kitoper ekile ekile loche, asuba kesi ngakiro na italeo. Nakaneni eario ngikiliok ngulu. Eraakasi ngakiro a akitu kech ngaka akiding kech. Ani kuut itwaan aberu keng ka itiokeng a aberu keng, eario kesi luuni daang kotere ngakiro na ngileech asuba kesi. Nyejoikinit ngakiro na ikote nguna echamakinio anikus. Ani kitoper ekile etiengit, eario ngesi ka etiengit ngolo. Ani keapikin aberu ka etiengit topero ka etiengit ngolo, eario aberu ngina ka etiengit ngolo. Eraakasi ngakiro a akitu kech ngaka akiding kech. “Ani kuut ekile nakaatokeng na idounitoe ka ngesi anakook a apei, kori nakaatokeng na a aberu anache, ejoikinit kesi isurumio ngileech alongaren ngitunga kitwarakinae alotunga keng. Etoper ngesi nakaatokeng nakaneni ejoikinit itiri nguna. Ani kepero ekile ka aberu na ibooyi eyei lolap, itwarakinio kesi daang alotunga kech kainyo asech kesi etal lo italeununere. “Ani kepero ekile ka eyaakeng, ejoikinit kesi daang irirao ani asubeta ngakiro naaronok nguna tarai eyanasi. Ani kitoper ekile aberu a amaekeng, esurum ngesi amaekeng ngileech. Irirao ekile ngolo ka aberu ngina, etoakete kesi nyeanyuna ngide. Ani kuut ekile aberu a lokaatokeng, etoakete ekile ngolo ka aberu ngina nyeanyuna ngide. Asub ekile ngolo ngakiro na italeo akisub, nakaneni esurum lokaatokeng ngileech.” Tolim Ekapolon Akuj tama, “Kirichakisi ngitalio kang daang ka ngakiro na adungunit ayong, sodi nyikingerio esi akwap a Kanaan na asaki ayong esi toloma. Warasi nyiirokut ngitalio a ngitunga alu elomito neni. Etwarakini ayong ngibukui ngulu sodi tolometa esi nakwap ngina. Kakadakis kesi ayong ani asubeta ngakiro naaronok nguna daang. Nakaneni kechikak ayong esi atamar kainakini akwap kech toliwor akus. Ileleba akwap ngina ngakile ka akimiet a ao. Ayong arai Ekapolon Akuj na arai Akuj kus, nabo ketegelia ayong esi alobukui aluche. Kotere ngakiro nguna, ejoikinit esi itiakito ngitieng ka ngikieny lu italeunitoe ka lu nyitaleunitoe. Warasi nyiinyam ngitieng ka ngikieny lu nyitaleunitoe, alimu ayong atamar eraakasi kesi lu nyitaleunitoe, ani kinyam esi kesi iliworosi esi dang lu nyikitaleunitoe. Toliworos lu italeuno lu iraakasi ngikang make, kainyo arai ayong Ekapolon Akuj na etaleuno. Ketegelia ayong esi alobukui aluche sodi toliworos esi ngikang. “Ekile cha daang kori aberu na elosi lomurok kori lokapilak, ejoikinit imasio a ngamoru totoan. Eliwor akitu a itwaan kangini aka akiding keng.” Tolimok Ekapolon Akuj Musa tama, “Tolimok ngimurok lu eraakasi talokookeng a Aron atamar nyiitiliwor tani epei kech lo nyitaleuno ani elosio ni enukere itwaan niyenet keng ni etoani, mati kerai itwaan ngini itiokeng kori apakeng, kori lokookeng, kori nakookeng, kori lokaatokeng, kori nakaatokeng na eringa nyiuta na ibooyi anawi a itwaan kangini. Nyiitiliwor ngesi lo nyitaleuno kotere akitu ka ngulu eyanasi ka ngesi ani eraakatar ngikamurak. “Emam emuron a Akuj lo eluri, kori etubi ngitim a abokony keng, kori edungidungi akwaan keng ani igoror itwaan ni atoana. Ani kona eraakar ngesi ipeyoe ngakipeyos alongaren kang ayong Ekapolon Akuj, ejoikinit ngesi eliwor lo italeuno sodi nyiisurum ekiro kang ngileech. Ani kona eraakar emuron itwaan ni italeuno ani a Akuj keng, ejoikinit ngesi peiusi amalaat, kori aberu na eperito ka ekile a ache kori aberu nasek elakit ekile loche. Italeuni iyong ngesi toliwor ika Akuj, nakaneni italeun ngesi anikon kainyo ngesi ipeye ngakipeyos alongaren kang ayong Ekapolon Akuj. Ayong Ekapolon Akuj ketaleuni iyong toliwor ika Akuj, nakaneni etaleuno ayong. Ani keliwor nakookeng a emuron amalaat, isurumi ngesi apakeng ngileech. Ejoikinit ngesi inomio a akim totoan. “Emuron loapolon daang, kona edokakinere ngesi akimiet na etal nakou, nabo etaleun ngesi tanap ngiworui lu a emuron a Akuj, nyejoikinit ngesi imiekini ngitim keng nyikiarara kori echili ngiworui keng idodiunit ibore ngini atamar igoro ngesi itwaan keng nia atoana. Nyelomari ngesi ni eyei itwaan nikatoan kori nyejoikinit eliwor lo nyitaleuno ani etapea itwaan nikatoan tani kerai itwaan ngini apakeng kori itiokeng. Ani kona aseunere ngesi ani edokakinere akimiet a Akuj nakou keng, nyejoikinit ngesi inyasuni eam a Akuj ani epudorea aloeam kangolo toloma kai na eyei itwaan nikatoan, tani kerai itwaan ngini apakeng kori itiokeng. Ayong arai Ekapolon Akuj. Iusi ngesi apese na nyepero ka ekile a ache, meere apuserut, kori aberu na elakitae, kori na enyasun a emalaanu. Nakaneni ejoikinit iusi apese na nyepero ka ekile a ache na erai aka emachar keng. Ani pekikok ngesi neni, ngide keng lu ejoikinit italeuno eliworosi lu nyitaleunitoe. Arai ayong Ekapolon Akuj, nakaneni etegelia ayong ngesi toliwor emuron loapolon.” Todungok Ekapolon Akuj Musa atamar, tolimok Aron tama, “Emam ales kon na eyei ni ichwangakina anakwaan nakalemikini ayong Ekapolon Akuj keng ngakipeyos. Eliworosi ngakiro nugu na iwapio jiik. Emam itwaan ni eyei ni ichwangakina anakwaan ni elemuni akipeyos, kerai itwaan ngini emuduk, kori ni engwalit, kori ni eyakasi ngaporos loreet, kori ni engwalit ekiner eche a akwaan, kori ni engwalit akan kori akeju, kori ni eyei aruk, kori ni earit aurianut, kori nipirong a ngakonyen, kori ni etingit ekipianu, kori loper, ta ni idongitoe. Aron lo erai emuron, emam ales keng na eyei ni ichwangakina nakwaan, nakalemikini ayong ngakipeyos na inomio ka na a ngalemet. Epedori itwaan ni ikoni neni akinyam akimuj na kalemikinitae ayong na erai na italeunitoe noi, ka nache italeunitoe. Ani kona eyakar ngesi ni ichwangakina anakwaan, nyejoikinit ngesi eapuuni diyete awaru natiaket eam kori lokeno a ngakipeyos. Nyejoikinit ngesi itiliwori ngiboro lu italeunitoe lugu lu nyitaleunitoe, kainyo ayong na erai Ekapolon Akuj ngesi etaleuni.” Ngakiro nugu robo kesi alimokini Musa Aron ka talokookeng, ta Ngisirael daang. Tolimok Ekapolon Akuj Musa tama, “Tolimok Aron ka talokookeng atamar, nyeeyaut ngileech lokiro kang lo italeuno. Kotere ngakiro nguna, kidodiutu arima anakipeyos ana italeunitoe kalemanakinete Ngisirael ayong. Ayong arai Ekapolon Akuj. Tolimok kesi tama, ‘Ani keapuu epei a ngalesea kus lo nyitaleuno diyete ngakipeyos na italeunitoe nakalemikis ayong Ngisirael, nyeringa nabo ngesi esubi etich alokeno alo kepeyonokinere ayong. Eliworosi ngakiro nugu na irichakinio jiik. Ayong arai Ekapolon Akuj. Emam itwaan daang ni erai ales a Aron totingite enomokere kori toleleete ngabulon anakwaan ni enyami ngakipeyos na italeunitoe mati mono kitaleun ngesi kerumor. Eliwor emuron daang lo nyitaleuno erai ketap ibore ni nyitaleuno ni ikoni itwaan nikatoan, kori keleleete ngadwa, kori ketap etiengit lo nyitaleunitoe, kori itwaan ni nyitaleunitoe. Emuron daang lo nyitaleunitoe, erubakini erai lo nyitaleunitoe tanang ebong. Ani ikoni neni dang, nyenyami ngesi ngakipeyos na italeunitoe mati kilotar mono. Ani edooyori akolong erumor, eliwor ngesi lo italeuno, nakaneni epedori akinyam ngakipeyos na italeunitoe na eraakasi akimuj keng. Nyeenyam ngesi akiring a etiengit kadaang alo etoani bon kori alo earete ngibuin, sodi nyeeliworor lo nyitaleuno. Arai ayong Ekapolon Akuj.’ “Irichakinete ngimurok daang ngitalio lu adungok ayong. Ani pekikokis neni, esechete kesi totoaka ani awouneta akiwapakin ngitalio kang lu italeunitoe. Arai ayong Ekapolon Akuj na etiliwori kesi lu italeuno. “Ngitunga lu eyanasi ka ngimurok make enyamete ngakipeyos na italeunitoe. Emam itwaan niche ni enyami ngakipeyos nguna. Nyenyami tani itwaan ni ibooyete ka emuron kori ekasuban etich keng. Nakaneni ani ekedalan lo agieluni emuron a ngaropiyae keng, kori lo edounio anawi a emuron, epedori akinyam ngakipeyos nguna. Nakookeng a emuron na iusi itwaan ni nyerai emuron, nyenyami ngakipeyos na italeunitoe nguna. Nakaneni ani kerai nakookeng a emuron apuserut kori kelakitae tamam ikoku, sodi tobongu akiyar anawi a apakeng, epedori ngesi akinyam akimuj na eanyuununi apakeng ani eraakar emuron, nyenyami itwaan ni nyeyanasi ka emuron akimuj ngina. “Ani kenyam itwaan ni nyeyanasi ka emuron ngakipeyos na italeunitoe peeyeni, etachakini ngesi emuron ngolo etiae lo eriyan ka akimuj ngina, ani erumor kiatak nabo etiae lo erai alemunet apei anakan. Nyiitiliwosi ngimurok ngakipeyos na italeunitoe na nyitaleunitoe ani itanyameta ngitunga lu nyechamakinitae enyamete. Eyaunete ngakiro nguna akisech ka eriras nitwaan ni ikoni ngini. Ayong arai Ekapolon Akuj nakaneni etiliwori ayong ngakipeyos na italeuno.” Todungok Ekapolon Akuj Musa tama, “Tolimok Aron ka talokookeng, ta Ngisirael daang ngitalio lugu. Itwaan daang ni erai Isiraelit kori ni a akwap anache ni elomit nakwap a Isirael, na elemunea akipeyos na inomio, kotere nisek ekongio kori ani esakitor ngesi ilope alemun, ejoikinit ibarasit ngini emam ni ichwangakina. Ani esakio tachamunae, ejoikinit erai ibarasit nikile ni emam ni ichwangakina. Ani kilemu iyong ibarasit ni eyei ni ichwangakina, nyechamuni Ekapolon Akuj ibarasit ngini. Ani kelemiki itwaan idio Ekapolon Akuj ngakipeyos a ekisil, kotere nisek ekongio kori ani esakitor ngesi ilope alemun, ejoikinit ibarasit ngini emam ni ichwangakina erai esakio tachamunae. Nyiilemik Ekapolon Akuj ibarasit ni emudukana, kori ni ebilil, kori ni engwalit, kori ni eyei ajeme na eleleete ngabulon, kori ni etingit etune, ta ni etingit ekuruoru. Nyiilem ngibaren lu ikote ngulu toliworos ngakipeyos na epeikinitoe Ekapolon Akuj. Ani akipeyos na ilemuni iyong ani isakitor, ipedori iyong alemuni emong kori imesek ni engwalit kori ni euriana ekiner eche. Nakaneni nyechamunio erai akipeyos na ilemuni iyong ani ikongio. Nyiilemik Ekapolon Akuj ibarasit ni ewanitae ngitou kori ni egelemitae kori idongitoe kori ni edungitoe. Nyejoikinit ibarasit ni ikoni neni elemunio erai akipeyos anakwap kon. Nyiilem ibarasit a itwaan a akwap anache toliwor akipeyos na epeikinitoe Ekapolon Akuj. Eraakasi ngibaren ngulu lu ichwangakina, nakaneni emam itwaan echamuni.” Tolimok Ekapolon Akuj Musa tama, “Na euriunere itaok, kori imesek, kori ikale, imiekinio tanak a ngirwa a ngikan-kaarei. Ani edaunosi ngirwa ngulu, echamunio na elemunere erai akipeyos na epeikinio Ekapolon Akuj. Nyiipeye aite ka itaok keng akolongit apei, kori amesek ka imesek keng, kori akine ka ikale keng. Ani ilemuni iyong akipeyos na ebuakinitere Ekapolon Akuj alakara, kiwap ngitalio sodi kitachamunea ngesi iyong. Tanyam akiring a ibarasit kangini akolongit ngina nyiimiek ache eperi.” Tolim Ekapolon Akuj tama, “Kiwap ngitalio kang, ayong arai Ekapolon Akuj. Nyiisurum ekiro kang lo italeuno ngileech. Ejoikinit Ngisirael daang eyenete atamar etaleuno ayong. Ayong arai Ekapolon Akuj, nakaneni ketaleuni ayong esi. Ayong kolong kepuduni esi anakwap a Misiri atoliworor Akuj kus. Ayong arai Ekapolon Akuj.” Tolimok Ekapolon Akuj Musa tama, “Eraakasi lugu ngitalio lua ngirwa alu esukukuu a Ekapolon Akuj. Ngirwa lua ngisukukui a Ekapolon Akuj ngulu, iriamiriamete Ngisirael kilipa. Isubete esi etich a ngirwa a ngikan-kapei nakaneni toyena atamar akolongit na a ngakan-kaarei, nabe Sabato, erai akwaar nakiangaret. Akolongit ngina, nyiisuba etich, nakaneni tochunakinos kilipa. Erai Sabato aka Ekapolon Akuj, ani ilomito esi kadaang. Tolimunoe ngirwa lu esukukuu lugu a ngirwa alu ereatae. “Esukukuu a Adeparet lo erimare Ekapolon Akuj, isiakini adooyoret a akolong akolongit na a ngatomon ka ngoomwon a elap alo a ekingaren. Akolongit na a ngatomon ka ngakan, isiakini esukukuu a ngamugati anapadok. A ngirwa a ngikan-kaarei napei ngina jik, tanyama ngamugati na emam ekitoe lo itubui. Akolongit na a ekingaren a esukukuu, ejoikinit esi ichunakinosi kilipa, sodi nyiisuba edio a ngitichisio alupalem sek isubete esi. A ngirwa a ngikan-kaarei, tolemikisi Ekapolon Akuj kus ngakipeyos na epeyo. Ani akolongit na a ngikan-kaarei tochunakinos nabo kilipa, nakaneni nyiisuba edio a ngitichisio alupalem sek isubeenete esi.” Tolimok Ekapolon Akuj Musa tama, “Tolimok Ngisirael atamar, ani ipote esi nakwap nakainakini ayong esi sodi tolema esi ngalemet a akwap kangina, yaasi ngalemet na ekingaren nia emuron a Akuj. Elemuni ngesi erai akipeyos na iwakiwakio ani a Ekapolon Akuj, sodi kitachamunere esi. Elemuni emuron a Akuj akipeyos ngina akolongit na etupit na a Sabato. Akolongit na ilemunea iyong ngalemet tolem tani imesek niichi nikile ni erai ekaru epei, tamam ni ichwangakina, kitiliwo akipeyos na inomio. Tolem aapei ka ngakiloi ngaarei a ngakiria ana imorikinitae ka akimiet, toliwor akipeyos na epeikinitoe Akuj. Ejoikinit akukuny a akipeyos kangina Ekapolon Akuj. Tolem aapei ka alemunet na erai alita apei a emuna alo epuritoe. Nyiinyam ngalemet nakiteat, kejonak kori kepeitoe, kori kesubakinitae toliwor amugati, mati mono kiyau akipeyos naga nia Ekapolon Akuj. Irichakinete ngalesea kus etal logo jiik. “Kimarutu ngiukio ngikan-kaarei napei anakolongit ana etupit Sabato na iyauneta esi ngaenet a ngalemet tolemikis Ekapolon Akuj. Ani akolongit na a ngatomwon-kan, akolongit na etupit Sabato na a ngakan-kaarei, tolemikisi Ekapolon Akuj ngalemunet a ngalemet anakiteat. Eyaunete ngitunga a awi a apei ngamugati ngaarei sodi tolimokis Ekapolon Akuj eraakasi akipeyos na iwakiwakio. Amugati apei, esubunio anakiria ana eraakasi ngakiloi ngaarei, ana eyei ekitoe lo itubui ngamugati. Elemikinio Ekapolon Akuj erai alemunet a ngalemet alu isiaunio akilem. Aapei ka ngamugati nguna, elemunete ngitunga ngimesekin luuchik ngikan-kaarei lu eraakasi ekaru epei, ka itaok, ta ngimesekin ngiarei lu emam ni ichwangakina. Elemikinio Ekapolon Akuj eraakasi akipeyos na inomio, aapei ka akipeyos a ngalemet ka na emuna alo epuritoe. Ejoikinit akukuny a akipeyos kangina Ekapolon Akuj. Tolem tani ekoroe erai akipeyos a akisech, ta ngimesekin luuchik ngiarei lua ekaru a epei, toliworos akipeyos a ekisil. Elemuni emuron a Akuj amugati ka ngimesekin luuchik ngiarei eraakasi akipeyos na iwakiwakio ani a Ekapolon Akuj kotere ngimurok a Akuj. Akolongit ngina, nyiisuba etich lopalem sek isubeenete, nakaneni tochunakinos kilipa. Irichakinete ngalesea kus etal logo jiik, awadaang anicha elomete kesi. “Ani ilemete esi ngamanat kus, nyiitubo ngalemet na eyakasi lokwaasea a ngamanat, kori nyiibongosi akitub ngalemet na idongito naabor. Kimiekineta ngikebootok ka ngitunga a ngakwapea anache. Ayong arai Ekapolon Akuj na arai Akuj kus.” Tolimok Ekapolon Akuj Musa tama, “Tolimok Ngisirael atamar, ani akolongit na ekingaren a elap alo a ngikan-kaarei, ejoikinit iangario. Eliwor akolongit ngina na itamunio ani ekutakinere ngaburucho kiriamariamae kilipae. Akolongit ngina, nyiisuba etich lopalem sek isubeenete, nakaneni tolemikisi Ekapolon Akuj akipeyos na epeikinio.” Tolimok Ekapolon Akuj Musa tama, “Akolongit na ngatomon a elap alo a ngikan-kaarei ngesi erai akolongit na esubakinere etal lo erimakinere ngasechesea a ngitunga. Akwaar ngina, torono nyiinyam akimuj tani nadiochichi, nakaneni kiriamariama wapei kilipa, sodi tolemikis Ekapolon Akuj akipeyos na epeikinio. Nyiisuba etich akolongit ngina kainyo akolongit ngina esubakinere etal lo erimakinere akisech. Itwaan cha daang ni enyami akimuj adio akolongit ngina, nyeringa imarunitae atamar erai ipei a ngitunga kang. Ani kesub itwaan etich akolongit ngina, eari Ekapolon Akuj itwaan ngini. Erai etal logo lo irichakinete ngalesea kus daang, awadaang anicha elomete. Napei anadooyeret a akolong a akolongit ana ngakan-koomwon a elap tanang adooyoret a akolong a akwaar ana ngatomon, kirichakisi akolongit naga toliwor na iangaritere. Emam ibore enyamio akolongit ngina.” Tolimok Ekapolon Akuj Musa tama, “Tolimok Ngisirael atamar, isiakini esukukuu a ngikalea akolongit na a ngatomon ka ngakan a elap alo a ngikan-kaarei, sodi torubak a ngirwa a ngikan-kaarei. Akolongit na ekingaren a ngirwa kangulu, kiriamariama wapei kilipa nakaneni nyiisuba etich lopalem sek isubete. Akolongit daang a ngirwa alukan-kaarei kangulu, ilemikinete esi Ekapolon Akuj akipeyos na epeikinio. Akolongit na a ngakan-kauni, kiriamariama wapei kilipa sodi tolemut akipeyos na epeikinio Ekapolon Akuj. Erai akolongit ngina na ilipitere, nakaneni nyiisuba etich. “Eraakasi lugu ngisukukui a Ekapolon Akuj lu irimatar esi Ekapolon Akuj. Kiriamariama akilip ka alemun ngakipeyos na epeikinio Ekapolon Akuj, ka ngakipeyos na inomio, ka ngalemunet a ngalemet, ka ngakipeyos nache, ta ngalemunet a emuna alo epuritoe, tolemunae ngakipeyos nguna nacha esakitae akolongit apei. Eraakasi ngisukukui ngulu lu iatakinosi nia Ngasabatoi anapalem eyakasi. Ani ngakipeyos nugu, eraakasi na iatakinosi nia ngainakinet anapalem eyakasi, ka ngakipeyos na elemunio anisek ikongitere, ta ngakipeyos na elemanakinio Ekapolon Akuj ani esakitor ilope ayaun. “Ani kilema esi ngamanat kus kerumor, kikareikisi esukukuu logo a ngirwa a ngikan-kaarei, isiakini akolongit na a ngatomon ka ngakan a elap alo a ngikan-kaarei. Eliwor akolongit na ekingaren na iangarere, toliwor nabo akolongit na ngikan-kauni na iangaerere. Akolongit ngina, tolemutu ageor naajokon alokito kus. Tolemutu ngaten a auk a ngingolea, ta ngaten a ngikito alukaalak a ngakui, sodi kisiakis esukukuu a Ekapolon Akuj lo erimare Ekapolon Akuj na erai Akuj kus. Kirichakisi esukukuu lo a Ekapolon Akuj ngolo a ngirwa a ngikan-kaarei. Irichakinete ngalesea kus etal logo jiik na enangea elap lo a ngikan-kaarei. Ngisirael daang elomete lokalea a ngirwa a ngikan-kaarei, sodi toyeneta ngalesea kus atamar nakolong epudunio ayong Ekapolon Akuj Ngisirael alo Misiri, abu etolom kesi lokalea. Ayong arai Ekapolon Akuj na arai Akuj kus.” Eger ngolo ngesi alimokinea Musa Ngisirael ngitalio lu irichakineta ngisukukui lu erimare Ekapolon Akuj. Tolimok Ekapolon Akuj Musa tama, “Todungok Ngisirael kiinut iyong akimiet naajokon noi a ngikito, kotere ngataae a eam, sodi toliwor akim enoki kaneni jiik. Atabong a akolongit kadaang, inokakini Aron ngataae sodi kimiek enokete tanang nataparach. Enokete ngataae nguna alongaren kang alowae alo anikalapatan a awaru ana eyei ngaren asaduku a Achamunet, ana eyei ni italeunitoe noi. Irichakinio etal logo jiik. Echoikini Aron ngataae na eyakasi ni esipor ataa ni erai egolit bon esubunitere. Nakaneni ejoikinit ngesi echoikini atamar enokete ngataae nguna jiik kaneni. “Tolem ngakiloi ngatomon ka ngaarei a ngakiria sodi kipou ngamugati ngatomon ka ngaarei. Torek ngamugati a ngangedakinet a ngaarei, ngamugati ngakan-kapei nangedakinet apei, erekinitae kidiama emeesa lo ebutakinitae egolit, alongaren Ekapolon Akuj. Kiwaak emitina bon nangedakinet naarei nguna erai akipeyos nakisitamunet epeikinio Ekapolon Akuj kilunyokin nados a amugati. Akolongit a Sabato daang, ejoikinit amugati iwaakinio ngaren Ekapolon Akuj. Erai etich ngolo eka Ngisirael jik. Erai amugati aka Aron ka ngalesea keng. Nakaneni enyamete kesi amugati ani italeunitoe kainyo erai atiaket a akimuj naga na italeunitoe noi anakimuj ana elemikinitae Ekapolon Akuj kotere ngimurok a Akuj.” Ayei ekile epei lo arai lokookeng a aberu ana anyaritae Chelomis, lo arai apakeng Emisirit. Abu ekile ngolo tongolopa ka Esiraelit anadakar. Lokookeng a Chelomis, ngolo, abu kimeny ka akilam ekiro a Akuj. Torikut ngitunga ngesi nia Musa. Arai aberu na anyaritae Chelomis ngina nakookeng a Dibiri alo arai eka ekitela a Dan. Apot kiratakis ngesi kiteto, kidareta Ekapolon Akuj elimokini kesi ibore ni esubeta itwaan ngini. Sodi tolimok Ekapolon Akuj Musa tama, “Kipudosi itwaan ngini nikalapatan a adakar. Itwaan daang ni eirari ngesi ilami Akuj, idokokini ngakan keng nakou a itwaan kangini tolim atamar esechit itwaan ngini. Nakaneni imasete ngitunga daang ngesi a ngamoru totoan. Ani erumor tolimok Ngisirael atamar itwaan cha daang ni ilami Akuj irirao kotere akisech keng sodi taarae. Itwaan ni erai Isiraelit kori ni erai ika akwap anache ni elomit nakwap a Isirael na ilamea Ekapolon Akuj, imasete ngitunga daang a ngamoru totoan. “Itwaan daang ni eari niche, eario. Ani itwaan cha daang ni eari ibarasit a itwaan aniche, ejoikinit etachi, tatachak akiyar nakiyar nache. “Ani kewan itwaan itwaan niche, ejoikinit esubakinere ngesi dang ngakiro nguna asubea ngesi itwaan niche. Ani kebil ngesi akoit, ebilio akoit keng dang apei. Ani kitumudukan ngesi akongu a itwaan aniche apei, itumudukanio nakeng dang apei. Ani kedoto ngesi ekelae a itwaan aniche, edotorio ekelae keng dang. Ewane locha ewani ngesi itwaan niche, ewanio ngesi dang kongina. Itwaan ni eari ibarasit, etachi, nakaneni itwaan ni eari itwaan niche, eario. Erai etal logo ekus kadaang, esi Ngisirael ka ngitunga a ngakwapea anache lu irukito ka esi, kainyo arai ayong Ekapolon Akuj na arai Akuj kus.” Ani elimokini Musa Ngisirael ngakiro nguna, kipudosi kesi itwaan ngini nikalapatan a adakar kimasa a ngamoru taara. Eger ngolo ngesi asubakineta Ngisirael ngakiro na adungokinit Ekapolon Akuj Musa. Tolimok Ekapolon Akuj Musa alokidiama emoru a Sinai tama, “Tolimok Ngisirael kona, ani ilomarete esi nakwap nakainakini ayong esi, kidodiutu arima anikang nyiitata ngalup ekaru lo a ngikan-kaarei. A ngikaru a ngikan-kapei, kitata ngamanat kus, toiro ngasepukan a ngimusabib ka akilem ngalemet. Nakaneni eliwor ekaru lo a ngikan-kaarei ekaru lo iangaritotor ngalup, ekaru lo italeunitoe ani a Ekapolon Akuj. Nyiitata ngamanat kus kori nyiiro ngasepukan a ngimusabib kus. Nyiilema tani ngalemet na erupunito make, na emam itwaan etat, nabo nyiilema ngamusabib alomusabib kus alu eringa esi nyeiro ngasepukan. Erai ekaru ngolo lo iangaritotor ngalup. Tani pekitatae ngalup ekaru ngolo, ianyunete esi akimuj analup. Eanyunete tani ngikedalak kus, ka ngikasubak etich kus, ka ngitunga a ngakwapea anache lu irukito ka esi, ka ngibaren kus, ta ngitieng kus a moding lu eyakasi nakwap kus. Tanyama ibore daang ni ekoniunete ngalup kus. “Kimarutu ngikaru ngikan-kaarei ngakimarunet ngakan-kaarei. Eraakasi ngikaru ngulu daang ngitomwon-omwon ka ngikan-koomwon. Ani erumor, akolongit na a ngatomon a ekaru alo a ngikan-kaarei akolongit na erai aka arimakin ngasechesea, tomeasi itwaan nakwap daang etia ni etia tokutak aburuch. Eger ngolo ngesi italeunioto esi ekaru loa ngitomwon-kan, sodi talachakis ngitunga lu eyakasi nakwap daang. Ekaru logo, ngiboro daang lukolong agielario, ebuakinio itwaan nikolong sek arai ilope kori ngalesea a itwaan kangini. Ani itwaan daang nikolong agielario erai ekedalan, ebongori lotunga a awi keng. Nyiitata ngamanat kus kori nyiilema ngikinyam lu erupunete make, kori nyiilema ngamusabib a ngimusabib alu nyeiro ngasepukan. Eliwor ekaru ngolo daang etia ni etia lo italeunitoe anikus. Inyamete esi akimuj na ekoniunete ngamanat make. “Ekaru logo, ngiboro daang lukolong agielario, ebuakinio itwaan nikolong sek arai ilope. Ani kigielak iyong itwaan niche ni arai Isiraelit ngalup kon kori ani kigielu iyong anikeng, wara nyiisechak ngesi. Ejoikinit etiae a ngaropiyae ana egielere akwap ngina itemio ka ngikaru lu ekonio amana ngina ngalemet eringa ekaru lo a ngitomwon-kan nyenanga. Ani keringa ngikaru elalak, elalakearosi ngaropiyae na egielere, nakaneni ani kekidioko ngikaru idongito, ekidiokerosi ngaropiyae egielere kainyo ibore ni egielaritae ngesi etiae a ngalemet ana ekoniunete ngalup. Nyiingala itwaan niche ni erai Isiraelit, nakaneni tokera Ekapolon Akuj na erai Akuj kus. “Kiwapa ngitalio kang daang ka ngakiro nakadungokinit ayong esi, sodi kibooyoto niajokon anakwap. Ekoniunete ngamanat ngalemet, nabo ianyunete esi akimuj na inyamete kibooyoto niajokon. Ipedorete esi akingita tamasi, ‘Ani pekitak sua ngamanat atolema, nyoni kinyami ekaru lo a ngikan-kaarei?’ Apiari ayong akwap kus ekaru lo a ngikan-kapei sodi tokoniu ngalemet na itemokin ngikaru ngiarei. Ani itaate esi ngamanat ekaru lo a ngikan-kauni, inyamete esi ngalemet nakolong ilemete ekaru loa ngikan-kapei. Nakaneni emini esi akimuj na itemokino tanangea ngikinyam lu itakinete esi ekaru ngolo elemio. “Nyiigielasi akwap kus jik kainyo nyerai akus, erai akang. Nakaneni iraakasi esi ngitunga a ngakwapea anache nabo ngikalotok. “Ani egielario akwap, ejoikinit eyenio atamar epedori itwaan ni agielari akwap ngina akigiel nabo toliwor akeng. Ani keliwor itwaan ni erai Isiraelit ekebootonit sodi togiela akwap keng, egieli itwaan ni eyanatar ngesi noi akwap. Ani kemam itwaan ni egieli akwap keng ani ekisidi tabar ngesi sodi taanyu ngaropiyae na egielia nabo akwap ngina, ejoikinit ngesi imaruni ngikaru lukolong agielarea ngesi akwap ngina tatachak ngesi itwaan ni agielit akwap ngina ngaropiyae a ngikaru kangulu, kitiliwo ngesi akwap akeng nabo. Ani kemam ngesi ngaropiyae na itemokino etachakini itwaan ngini, eliwor akwap ngina aka itwaan ani kolong agieli tanang ekaru lo a ngitomwon-kan edoli. Ani edoli ekaru ngolo, ebuakinio ilope akwap ngina. “Ani kegiela itwaan akai alore alo eyakasi ngawasea, epedori ngesi akigiel nabo toliwor akeng ekaru epei akisiakin anakolongit ana kolong agielarea. Nakaneni ani pekegiel ngesi nabo ekaru lopei ngolo, nyepedori ngesi akigiel nabo. Eliwor akai ngina jik aka itwaan ani agieli ka ngalesea keng. Nyebuario nia itwaan ani kolong sek arai ilope na enangea ekaru lo a ngitomwon-kan. Nakaneni ngakais na eyakasi nadakarin na emam ngawasea, ikokinete ngamanat. Epedori itwaan nikolong sek arai ilope akigiel nabo, nakaneni ekaru lo a ngitomwon-kan, ebuakinio itwaan nikolong sek arai ilope. Tani kikoni neni, epedorete Ngilawi agielun nabo ngiboro lu eraakasi ngikech, lu eyakasi lorerea lu etiakakinitae kesi. Ani kegiela itwaan a ekitela a Lawi akai alorerea kangulu sodi nyeegielun nabo, ejoikinit ani edoli ekaru loa ngitomwon-kan, tobuakinae itwaan nikolong sek arai ilope, kainyo ngakais na Ngilawi alorerea alu etiakakinitae kesi, eraakasi ngaka ngikulepek jik Alosirael. Nakaneni akwap na iyokiyo ngibaren na idunyatar ngirerea a Ngilawi, nyegielario. Erai akwap ngina akech jik. “Ani kiboot itwaan ni erai Isiraelit ni elomit diyete kon, nakaneni tongopik ibore ni eyarea, kitan ngesi loger lo itanea iyong ekasuban etich kon, sodi torubakinea elomit diyete kon. Nyiisiat ngesi ngaropiyae ngache ni eyakasi nakon, nakaneni toker Akuj sodi kimiek itwaan niche ni erai Isiraelit tolom diyete kon. Nyiitatach ngesi ngaropiyae ngache kiatak ni eyakasi na earit ngesi anikon, kori nyiigielak ngesi akimuj taanyunea iyong ngaropiyae na elalak. Eraakasi nugu ngakiro na adungunit ayong Ekapolon Akuj na arai Akuj kus nakolong kepuduni esi alo Misiri, sodi kainak akwap a Kanaan ka aliwor Akuj kus. “Ani kiboot noi Esiraelit lo elomit diyete kon, sodi togiel iyong ngesi ani esakea agielanot, nyiitusub ngesi etich loger a ekedalan. Irukete iyong ka ngesi erai ekasuban etich kon sodi tosub etich kon tanang ekaru lo a ngitomwon-kan. Ani enangi ekaru ngolo, erotokinete ngesi ka ngide keng anawi kon, sodi toloto lotunga a awi kech ka ngibaren a ngalesea kech. Eraakasi Ngisirael ngikedalak a Ekapolon Akuj, nakaneni epuduni ngesi kesi alo Misiri. Kotere ngakiro nguna, nyejoikinit kesi egielario toliworos ngikedalak. Nyiimoitanik kesi, nakaneni toker Akuj kon. Ani kisaki iyong ngikedalak, ipedori iyong agielun alobukui alu idunyatar iyong. Ipedori iyong tani akigiel ngide a ngitunga a ngakwapea anache, alu irukito ka iyong. Ngide lu ikote lu idounio anakwap kon, eliworosi ngikon. Nakaneni imiekini iyong kesi tarata ngikedalak a ngide kon jik. Nakaneni nyiimoitanik tani itwaan ipei a Ngisirael. “Ani kebar itwaan a akwap anache ni irukito ka iyong, tarai Esiraelit lo a akwap kon ekebootonit, sodi togiel itwaan a akwap anache ngesi ani esakea katogiel, kori togiel ngesi eyenet a itwaan a akwap anache, ani kegiel ngesi kerumor, epedorio ngesi akigiel nabo. Epei a ngikaitotoi keng, kori amaekeng, kori lokaapakeng, kori itwaan iche ni eyanasi ka ngesi noi, epedori akigiel ngesi. Kori ani keanyu ngesi dang ilope ngaropiyae na itemokino, epedori akipotor talakakinere. Ejoikinit ngesi epupokin ka itwaan nisek egielit ngesi kimarut ngikaru lukolong agielere ngesi tanang ekaru loa ngitomwon-kan. Nakaneni ipotori ngesi ngaropiyae na itemokino atachea ekasuban etich alokaru kangulu. Ani keringa ngikaru elalak, ipotori ngesi ngaropiyae na itemem ka ngikaru lu idongito tanang ekaru loa ngitomwon-kan. Ani keringa ngikaru ngidikidio, ipotori ngesi ngaropiyae na itemem ka ngirwa lu idongito tananga ekaru loa a ngitomwon-kan. Nakaneni ejoikinit ngaropiyae nguna imarunio iwapitae eger lo a itwaan ani esubi etich, meere ekedalan. Ani pekelachakin ngesi ka ngitunga a awi keng a ngirotin kangulu kadaang, ejoikinit ngesi ka ngitunga a awi keng elakakinio na enangea ekaru lo a ngitomwon-kan. Nyepedori itwaan ni erai Isiraelit aliwor ekedalan nakajik, kainyo eraakasi Ngisirael ngikedalak kang. Epuduni kolong ayong kesi alo Misiri. Arai ayong Ekapolon Akuj na arai Akuj kus.” Todungok Ekapolon Akuj Ngisirael tama, “Nyiisuba ngakujo nasubuna kori ekisikwaane lo ichietae, kori ngapirio a ngamoru, kori akikul ngamoru na ilipio. Arai ayong Ekapolon Akuj na arai Akuj kus. Kirichakisi ngisukukui kang sodi kidodiut arima ani kelipitere ayong. Arai ayong Ekapolon Akuj. “Ani kiwapa esi ngitalio kang ka ngakiro na adungunit ayong, ameuni ayong akiru nikus toliwor erameene ngirwa lupalem erameenea, sodi tokoniunio akwap ngalemet, nabo tokoniut ngikito ageor. Elalakearosi ngalemet kus toliwor ilemete esi tani kenang ngirwa lu egerere ngamusabib, nabo iliworosi esi igerete ngamusabib tani kenang ngirwa lu itakinere ngikinyam. Ianyunete esi akimuj daang na isakete akinyam, sodi kiboikinotor niajokon anakwap kus. “Kainakini ayong esi ekisil anakwap kus, sodi topero esi emam itwaan iemito. Alemari ayong ngitunga lukaadengak anakwap, nakaneni engopi ejie kaneni. Iritarete esi ngimoe kus taara. Ngitunga kus ngikan, iritarete ngimoe amiat apei, ani ngitunga kus amiat apei, iritarete ngimoe kus ngabunge ngatomon. Kapiari ayong esi etalala ngide kus. Erichakini ayong achamunet nakolong kichikakin ka esi. Elalakearosi ngalemet kus tananga lokaru loche lo elemere ngamanat. Ani ilemete esi ngamanat, ichakarete esi ngikinyam lungorok lu idongito sodi minio nikaaloman iwaakinete lu elemio. Kiruki ayong ka esi aloeam kang, nakaneni nyakangeri ayong esi. Kiruki ayong ka esi atoliwor Akuj kus, sodi toliworos esi ngitunga kang. Ayong Ekapolon Akuj na arai Akuj kus, ngesi kolong kepuduni esi alo Misiri sodi nyiiliworosi esi ngikedalak nabo. Abu ayong atobil ngakito na aenitere ngimosiringan kus, sodi kemiek esi iloose a ekileenu!” Tolim Ekapolon Akuj tama, “Ani pekiwapa esi ngitalio kang, kirirao esi. Ani kiwout esi akiwap ngitalio kang ka ngakiro nakechikakinit ayong, sodi tosecha achamunet nakichikakin ayong ka esi, kerirae ayong esi. Ayauni ayong ngakiro naaronok nikus na ikote ngidekesinei lu nyengalekinete ka ngilekesinei lu kitumudukanete esi, kinyasut eboyor kus. Itakinete esi ngikinyam kus, nakaneni eliwor akitare kus aka pas kainyo kidwangete esi ngimoe kus tanyama ngalemet a ngamanat ana itaate esi. Kabilakin ayong esi katonger sodi kidwang esi. Kipolokinete esi ngitunga lu iremokino esi. Kibuli esi noi toliworos ikerete tani emam itwaan kirisit. “Ani kiwout esi akiwap ngakiro kang tani kirirae kerumor, eatakini ayong eriras kus ngakiatakinet ngakan-kaarei. Enyasuni ayong ekinis kus lo iraakatar lu ichanaka noi. Engopi akiru, toon akwap kus deu togogonger loger a ngasua anakirionok. Etich kus lo isubete esi itionikinito, emam ibore ajokon kitaanyuni esi, kainyo nyekokete ngamanat nabo nyekoniunete ngikito ageor. “Ani keringa esi kingerito ayong, sodi towout akiwap ngakiro kang, eatakini ayong eriras kus nabo ngakiatakinet ngakan-kaarei. Ameuni ayong ngitieng lukaadengak nikus, sodi taara ngide kus, tomunyasi ngibaren kus, sodi kidongo esi ikidioko noi toliworos ngirotin kus lu asilok. “Ani kiwout esi akiwap ngakiro tani kirirae loger ngolo kerumor, nakaneni torubakis ingerito ngakiro kang, kabilakin ayong esi kerira ngakiriraet ngakan-kaarei naaronok noi na idwangito na a ekingaren. Ayauni ayong ejie nikus kerira esi kotere ni isecheta achamunet yok. Ani kichunakinosi esi lorerea kus isakete ayuuno, ayauni ayong ngidekesinei lu nyengalekinete nikus, sodi tachamut esi akisil ka ngimoe kus. Atubi ayong akimuj kus toditeu, sodi toliwor ekeno epei itemokin ngaberu ngatomon akipoo ngamugati. Kikoranakinete kesi esi akimuj ngina itemito. Ani tani kirikasi esi akimuj ngina kerumor, idongi akoro kinyamit. “Ani kirubakis esi kingerito ayong towout akiwap ngakiro kang tani kirirae kerumor, kabilakin ayong esi angoit noi sodi kerira ngakiriraet ngakan-kaarei na eroko noi idwangito nakolong a ekingaren. Eroner akoro kus noi toliwor inyamete esi ngide kus. Enyasuni ayong ni ilipeeneta esi alokidiama ngimukur, atobwang ngikenoi lu inomeeneta esi emitina, sodi atachakak ngawat kus nakatoak kidiama ngawat nakatoak a ngakujo kus anasubuna. Kotere eger lo kakadakineta ayong ngakiro nguna, enyasuni ayong ngirerea kus ka ni ilipitotor esi, sodi atonger ngakipeyos kus. Enyasuni ayong akwap kus lokojokon noi tatalasi tani ngimoe kus lu elomete nakwap ngina ngakiro a nginyas kangulu. Ayauni ayong ejie nikus sodi katopeta esi nakwapea nagelayek. Idongi akwap kus ibooyi kongin, sodi kidongo ngirerea inyasuna. Ani iyakasi esi nakwapea a ngimoe kus, iangari akwap kainyo iboikin kongin. Ngirwa daang lu ibooyo akwap kongin, eliwor iangarit eger lokolong nyiangara a ache ngirwa lu ilomitotor esi nakwap ngina. “Ani esi lu ipete nakwapea a ngimoe kus, ketubuli ayong esi toliwor tani kekutaki ekuwan akuyen kiirasi esi, imatarosi. Imatarosi esi tosub kori kirisitae alojie, nabo idakarosi esi, tani emam emoit eyei diyete kus. Idakanakinosi esi ni eyakasi luche, tamam itwaan kirisit, nabo nyitijiete esi ngimoe kus. Itoakete esi anakwapea a ngimoe kus, kirikakinos nakwapea nguna. Ani esi ludikidio ipiyanunosi anakwapea a ngimoe kus, inyasunosi kotere akisech kus ka akisech kata apaakus. Nakaneni elimorete ngalesea kus ngasechesea kech ka ngasechesea kata apaakech, alu kolong kangerete ayong towout akiwap ngakiro kang, sodi ketongoa ayong atobilakin kesi etwarak toloto nakwapea a ngimoe kech. Ani kitiditeunosi ngalesea kus tolunga akisech kech, etamuni ayong achamunet nakichamakin ayong ka Yakobo, ka Isaka, ta Aburaam, nakaneni alimuni nabo atamar ainakini ayong ngitunga kang akwap. Nakaneni imiekinete mono kesi akwap ibooyi kongina sodi kianga. Nakaneni irirao kesi kotere ngasechesea kech, kainyo angerete kesi ngitalio kang ka ngakiro na adungunit ayong. Ani tani ikoni neni, ani epete kesi nakwapea a ngimoe kech, nyachakari ayong kesi jik kori nyamunyari, nyeedaunor achamunet nakichamakin ayong ka kesi, kainyo arai ayong Ekapolon Akuj na arai Akuj kech. Etiliwori ayong achamunet nakichamakin kata apaakech akitetet. Achamunet ngina ngesi nakichamakin ayong ka kesi na edodikinea ngibukui daang agogongu kang ani epudunio ngitunga kang alo Misiri, sodi atoliworor ayong Ekapolon Akuj, Akuj kech.” Eraakasi lugu daang ngitalio ka ngakiro na adungokini Ekapolon Akuj Musa alokidiama emoru lobe Sinai kotere Ngisirael. Tolimok Ekapolon Akuj Musa tama, “Tolimok Ngisirael kona, ani elemikinio Ekapolon Akuj itwaan kotere akikong na itegeliarere, epedorio itwaan ngini alakakin erai ketach ngaropiyae na itemokino egielere itwaan, itemitoe a eger alopalem itemeenere. Ekile cha daang lo erai ekimar a ngikaru keng ngitomwon-arei, kori akipor ngikaru ngulu tananga ngitomwon-kapei, elakakinio a ngaropiyae a ngatomwon-kan. Ani kerai aberu, elakakinio ngaropiyae a ngatomwon-uni. Ani kerai itwaan ngini edia lo erai ekimar a ngikaru keng ngikan, kori akipor ngikaru ngulu tananga ngitomwon-arei, elakakinio a ngaropiyae a ngatomwon-arei. Ani kerai itwaan ngini nipese, elakakinio a ngaropiyae ngatomon. Ani kerai idia ni erai ekimar a ngikaru keng elap tanang ngikaru ngikan, elakakinio a ngaropiyae a ngakan. Ani kerai ikoku ngini ipese, elakakinio a ngaropiyae a ngauni. Ani itwaan nikile ni erai ekimar a ngikaru keng ngitomwon-kapei, kori lu iporito ngikaru ngulu, elakakinio a ngaropiyae a ngatomon ka ngakan. Ani kerai itwaan ngini niberu elakakinio a ngaropiyae a ngatomon. “Ani kiboosit itwaan ni ikongit tongopikis ngaropiyae na itemokinosi napalem elakanakinere ngitunga, erikuni ngesi itwaan ngini lomuron a Akuj. Itemokini emuron a Akuj itwaan ngini ngaropiyae na ejoikinit etachi, itemem ka ibore ni etingit itwaan ngini. “Ani kerai akikongiet ngina aka ibarasit ani palem echamakinitae elemanakinio Ekapolon Akuj, eliwor ainakinet na elemikinio Ekapolon Akuj daang na italeunitoe. Itwaan ngini alemuni ibarasit ngini, nyepedori nabo jik akilokony ibarasit ngini ka iche niajokon kori niaronon. Ani kilokony ngesi, eliworosi ngibaren luarei ngulu daang ngika Ekapolon Akuj. Nakaneni ani kerai akikongiet aka ibarasit ani nyitaleunitoe, ibarasit ni nyechamakinitae elemikinio Ekapolon Akuj, erikori itwaan ngini ibarasit ngini lomuron a Akuj. Elimuni emuron a Akuj ngaropiyae na egielere ibarasit ngini, itemit ajokis keng ka aronis keng. Nakaneni eliworosi ngaropiyae na elimuni emuron nguna egielere ibarasit ngini. Ani kesaki itwaan nisek arai ilope a ibarasit akigiel nabo ibarasit ngini, ejoikinit ngesi elemuni ngaropiyae nagielet ani erumor kiatak alemunet apei anakan a ngaropiyae ana egielitere ibarasit. “Ani italeuni itwaan akai keng toliwor aka Ekapolon Akuj, elemuni emuron a Akuj ngaropiyae na egielere akai ngina, itemit ajokis keng ka aronis keng. Nakaneni eliworosi ngaropiyae na elimuni emuron nguna egielere akai ngina. Ani kesaki itwaan nisek arai ilope a akai akigiel nabo akai ngina, ejoikinit ngesi elemuni ngaropiyae nagielet ani erumor kiatak alemunet apei anakan a ngaropiyae ana egielitere akai. “Ani kitaleu itwaan akwap keng epewae toliwor aka Ekapolon Akuj, elimunio ngaropiyae na egielere itemitoe ka ngikinyam lu itaanakinio neni. Ngakiloi ngatomwon-arei a erau, eraakasi ngaropiyae keng ngatomon. Ani kitaleu ngesi akwap ngina ekaru lo a ngitomwon-kan, elemunio ngaropiyae daang na itemokino egielere akwap ngina. Ani kitaleu ngesi akwap ekisidi, itemi emuron a Akuj etiae a ngaropiyae a akwap kangina alokaru alo eringa idongit tanangea ekaru lo a ngitomwon-kan, sodi tolim ngesi ngaropiyae na etubitoe. Ani kesaki itwaan nisek arai ilope a amana akigiel nabo amana ngina, ejoikinit ngesi elemuni ngaropiyae nagielet ani erumor kiatak alemunet apei anakan a ngaropiyae ana egielitere amana ngina. Ani kegielaki ngesi amana itwaan iche eringa mono nyegieluna ani a Ekapolon Akuj, nyepedori ngesi akigiel nabo amana ngina. Ani enangi ekaru lo a ngitomwon-kan, eliwor amana ngina aka Ekapolon Akuj jik. Ngimurok a Akuj elemarete amana ngina toliwor akech. “Ani kitaleu itwaan amana toliwor aka Ekapolon Akuj, tarai amana ngina na agieli ngesi meere nakolong erumi, itemi emuron a Akuj etiae a ngaropiyae a amana kangina alokaru alu eringa idongito tanangea ekaru loa ngitomwon-kan. Nakaneni ejoikinit itwaan ngini elemuni ngaropiyae akolongit napei ngina. Eraakasi ngaropiyae ngaka Ekapolon Akuj. Ani enangi ekaru lo a ngitomwon-kan, ebuakinio amana ngina itwaan nikolong sek arai ilope, ka ngalesea keng. “Ngaropiyae daang na egielanarere, itemio a eger alosek itemeenere. “Iuriuna nia ekingaren a ibarasit, erai alotal ika Ekapolon Akuj, kotere ngakiro nguna, emam itwaan italeuni toliwor akipeyos na elemuni ngesi ani esakitor alemuni kerai itaok, kori imesek, kori ikale, eraakasi ngika Ekapolon Akuj. Nakaneni iuriuna ni ekingaren a ibarasit ani nyitaleunitoe, epedorio akigiel nabo a etiae a ngaropiyae ana itemitoe ka napalem egielere, ani erumor kiatakinae alemunet apei anakan a ngaropiyae ana egielere. “Emam itwaan egielari kori egieli nabo ibore ni italeuni ngesi toliwor ika Ekapolon Akuj emam itwaan itingakini. Kerai ibore ngini itwaan, kori ibarasit, kori akwap, eraakasi ngika Ekapolon Akuj jik. Tani itwaan nikolong etaleunio ani Ekapolon Akuj, nyegielunio nabo, ani kegielun, ejoikinit eario. “Alemunet apei anatomon a akimuj kadaang ana ekoniuni akwap, kerai ngalemet kori ageor, erai aka Ekapolon Akuj. Ani kesaki itwaan akigiel nabo, ejoikinit ngesi elemuni etiae a ngaropiyae ana palem egieleenere, ani erumor kiatak alemunet apei anakan a ngaropiyae egieleenere. Ibarasit ipei alobaren alutomon erai ika Ekapolon Akuj. Ani imario ngibaren, ibarasit daang nia ngitomon, erai ika Ekapolon Akuj. Nyejoikinit ilope a ngibaren erekini ngibaren toliworos lu ijiwaikinit eseunio, nabo nyejoikinit ngesi ilokonyi ngibaren. Ani kilokony ngesi ibarasit ipei ka niche eliworosi ngibaren ngulu daang ngika Ekapolon Akuj, nakaneni emam itwaan egieli nabo.” Ngitalio ngulu kesi adungokini Ekapolon Akuj Musa alokidiama emoru lobe Sinai, kotere Ngisirael. Akolongit na ekingaren a elap alo a ngiarei, ekaru loa ngiarei kerotokis Ngisirael alo Misiri kerumor, abu Ekapolon Akuj kisuruor Musa alotooma eam keng, anariet a Sinai. Tolimok tama, “Echamit iyong ka Aron imarunete Ngisirael, kimara a ngimacharin ka ngawiyei. Kigira ngirora a ngikiliok kadaang alu eraakasi ngikaru kech ngitomwon-arei kori lu iporito ngikaru kech ngitomwon-arei, lu epedorete alosit lojie. Alokitela a epei, emini ekarikon a emachar a epei lo kingarakini esi. Ngirora a ngikiliok alu kingarenikinete esi kesi lugu. Alokitela a Reuben, eliwor Elisur lo erai lokookeng a Chedeur. Alokitela a Simeon, eliwor Chelumiel lo erai lokookeng a Surichadai. Alokitela a Yuda, eliwor Nachon lo erai lokookeng a Aminadab. Alokitela a Isakar, eliwor Nesanel lo erai lokookeng a Suar. Alokitela a Sebulun, eliwor Eliab lo erai lokookeng Elon. Ani eyakasi talokookeng a Yosep, alokitela a Epiraim, eliwor Elichama lo erai lokookeng a Amiud. Alokitela a Manase, eliwor Gamaliel lo erai lokookeng a Pedasur. Alokitela a Benjamen, eliwor Abidan lo erai lokookeng Gideon. Alokitela a Dan, eliwor Ayeser lo erai lokookeng a Amichadai. Alokitela a Acher, eliwor Pagiel lo erai lokookeng a Okiran. Alokitela a Gad, eliwor Eliasap lo erai lokookeng a Deuel. Alokitela a Naputal, eliwor Aira lo erai lokookeng a Enan.” Ngulu kesi lu aseun alotunga eraakasi ngikarikok alotela kech taraakas nabo ngikarikok alomacharin kech. Apot Musa ka Aron kingarakinos ka ngikiliok lutomon ka ngiarei ngulu. Ani akolongit na ekingaren a elap alo a ngiarei, apot kesi tochunakis ngitunga daang wapei kimara kesi a ngimacharin ka ngawiyei sodi kigira ngirora kech. Apon ngikiliok daang lu araakasi ngikaru kech ngitomwon-arei kori lu eporito ngikaru kech ngitomwon-arei, kigirae ngirora kech sodi kimarunae, loger losek adungokinitor Ekapolon Akuj Musa. Emari Musa ngitunga anariet a Sinai. Ngikiliok daang lu araakasi ngikaru kech ngitomwon-arei kori lu eporito ngikaru kech ngulu, lu epedorete alosit lojie, emario loger logo a ngimacharin ka ngawiyei. Reuben lo arai lokookeng a Yakobo lo ekingaren, arai ekimar a ngitunga a ekitela keng 46,500. Alokitela a Simeon, arai ekimar a ngitunga kangulu 59,300. Alokitela a Gad, arai ekimar a ngitunga kangulu 45,650. Alokitela a Yuda, arai ekimar a ngitunga kangulu 74,600. Alokitela a Isakar, arai ekimar a ngitunga kangulu 54,400. Alokitela a Sebulun, arai ekimar a ngitunga kangulu 57,400. Alokitela a Yosep, alu eraakasi ngitunga a Epiraim, arai ekimar a ngitunga kangulu 40,500. Alokitela a Yosep alu eraakasi ngitunga a Manase, arai ekimar a ngitunga kangulu 32,200. Alokitela a Benjamen, arai ekimar a ngitunga kangulu 35,400. Alokitela a Dan, arai ekimar a ngitunga kangulu 62,700. Alokitela a Acher, arai ekimar a ngitunga kangulu 41,500. Alokitela a Naputal, arai ekimar a ngitunga kangulu 53,400. Ngulu kesi emarunete Musa ka Aron ingarakina ka ngikiliok lutomon ka ngiarei lu araakasi ngikapolok a ngimacharin kech, eweikinit epei kech daang ngitunga a awi a apei. Alotunga a Ngisirael kadaang, arai ekimar a ngikiliok alu araakasi ngikaru kech ngitomwon-arei kori lu eporito ngikaru kech ngitomwon-arei, lu apedorete alosit lojie, arai ekimar kech 603,550. Nakaneni peemarunitae Ngilawi aapei ka ngitela luche, kainyo alimokinit sek Ekapolon Akuj Musa tama, “Ani imaruni ngikiliok lu epedorete alosit lojie, nyiimarak lua ekitela a Lawi. Nakaneni kiwaak kesi toweikis eam kang ka ngiboro keng daang. Edakete kesi eam ka ngiboro keng. Esubete etich alotooma eam, nabo edukokinete adakar kech kiriam eam. Ani cha eramakinio wache, toyatasi Ngilawi eam kang sodi ani enangi ni elomio, kigurosi. Eario itwaan cha daang ni eapuuni diyete eam. Todukokis Ngisirael luche daang ngadakarin a ngalooso, itwaan daang erukito ka ngitunga keng, toduk kwap abendera keng a ilope. Nakaneni edukokinete Ngilawi adakar kech kiriam eam. Iyokiyete kesi eam kang sodi nyeebunio itwaan iche diyete, sodi nyaangoik ayong Ngisirael daang.” Apot Ngisirael tosuba ngakiro daang nakolong adungokinit Ekapolon Akuj Musa. Tolimok Ekapolon Akuj Musa ka Aron tama, “Ani edukete Ngisirael adakar, toduk itwaan daang adakar a ngitunga keng a ilope, ni eyei abendera a emachar keng. Edukio adakar sodi kiriam eam kang. Ngulu elomete lowae lo alo kide, lo ipiripiruunea akolong, kesi lua abendera a adakar a Yuda, a ngalooso kech. Ekarikon kech ngesi Nachon lo erai lokookeng a Aminadab. Arai ekimar a ngitunga keng 74,600. Ngulu elomete diyete ngesi, kesi lua ekitela a Isakar. Ekarikon kech ngesi Nesanel lo erai lokookeng a Suar. Arai ekimar a ngitunga keng 54,400. Totupak ekitela a Sebulun. Eliab lo erai lokookeng a Elon ngesi erai ekarikon kech. Arai ekimar a ngitunga keng 57,400. Arai ekimar a ngalooso kadaang a ngitunga a Yuda 186,400. Kesi isiaunete torotokis. “Ewae lo alokuju ngesi elomete ngitunga a adakar a Reuben a ngalooso. Ekarikon kech ngesi Elisur lo erai lokookeng a Chedeur. Arai ekimar a ngitunga keng 46,500. Ngulu elomete diyete ngesi, kesi lua ekitela a Simeon. Ekarikon kech ngesi Chelumiel lo erai lokookeng a Surichadai. Arai ekimar a ngitunga keng 59,300. Totupak ekitela a Gad. Ekarikon kech ngesi Eliasap lo erai lokookeng a Deuel. Arai ekimar a ngitunga keng 45,650. Arai ekimar a ngalooso kadaang a ngitunga a Reuben 151,450. Kesi araakasi lua ngaarei erotokinete. “Sodi epete Ngilawi edakito eam kiding ngalooso naarei ingarenikinete ka ngalooso naarei isidiyete. Erotokinete ngalooso daang etupup loger lo elometa nakwap, etingit daang abendera keng. “Ewae lo alo too ngesi elomete ngitunga a adakar a Epiraim a ngalooso kech. Ekarikon kech ngesi Elichama lo erai lokookeng a Amiud. Arai ekimar a ngitunga keng 40,500. Ngulu elomete diyete ngesi, kesi lua ekitela a Manase. Ekarikon kech ngesi Gamaliel lo erai lokookeng a Pedasur. Arai ekimar a ngitunga keng 32,200. Totupak ekitela a Benjamen. Ekarikon kech ngesi Abidan lo erai lokookeng a Gideon. Arai ekimar a ngitunga keng 35,400. Arai ekimar a ngalooso kadaang a ngitunga a Epiraim 108,100. Kesi araakasi lua nguuni erotokinete. “Ewae lo alokwap ngesi elomete ngitunga a Dan a ngalooso kech. Ekarikon kech ngesi Ayeser lo erai lokookeng a Amichadai. Arai ekimar a ngitunga keng 62,700. Ngulu elomete diyete ngesi, kesi lua ekitela a Acher. Ekarikon kech ngesi Pagiel lo erai lokookeng a Okiran. Arai ekimar a ngitunga keng 41,500. Totupak ekitela a Naputal. Ekarikon kech ngesi Aira lo erai lokookeng a Enan. Arai ekimar a ngitunga keng 53,400. Arai ekimar a ngalooso kadaang a ngitunga a Dan 157,600. Kesi araakasi lua esal erotokinete.” Ekimar a Ngisirael kadaang alu emario a ngalooso a ngawiyei, arai 603,550. Peemarunitae Ngilawi aapei ka Ngisirael luche loger lo kolong sek adungokinitor Ekapolon Akuj Musa. Apot Ngisirael tosuba ngakiro daang na adungokinit Ekapolon Akuj Musa. Toduko kesi adakar, itwaan daang ni ayei abendera keng. Torotokis kesi, itwaan daang erukito ka ngitunga a emachar keng. Ngirwa lu esuruorea Ekapolon Akuj Musa alomoru a Sinai, lugu kesi araakasi ngitunga a awi a Aron ka Musa. Ayakasi Aron talokookeng nguomwon. Anyaritae loapolon Nadab. Anyaritae luche Abiu, ka Eleasar, ta Isamar. Ewasakinio sek kesi akimiet na etal sodi kitaleunoe toliworos ngimurok a Akuj. Nakaneni apot Nadab ka Abiu totoaka esaa lo alemikinitotor Ekapolon Akuj akim na peetaleunitoe anariet a Sinai. Amam kesi ngide. Aloger kangolo, apot Eleasar ka Isamar tosuba etich eraakasi ngimurok a Akuj ngirwa daang lu ayarea Aron. Tolimok Ekapolon Akuj Musa tama, “Toriku ngitunga a ekitela a Lawi diyete, sodi toseu kesi toliworos ngikasubak etich a Aron alo erai emuron a Akuj. Esubete kesi etich lo echamakina esubio aloeam kang, nabo tosuba etich a ngimurok a Akuj, ta etich a ngitunga kadaang. Eweikinete kesi ngiboro daang lu eyakasi loeam nabo tosuba etich kotere Ngisirael luche daang. Etich loteno esubete Ngilawi ngesi loa Aron ka talokookeng. Toseu Aron ka talokookeng tosuba etich eraakasi ngimurok a Akuj. Itwaan niche daang ni ebuni diyete neni, eario.” Tolimok Ekapolon Akuj Musa tama, “Alemu ayong Ngilawi alo Isirael toliworos ngikang, akidwang alemanar iuriuna ni ekingaren daang ani a Ngisirael. Nakaneni eliworosi Ngilawi ngikang kainyo eraakasi ngiuriuna lua ekingaren daang ngikang. Akwaar nakolong aarea ayong ngiuriuna lu ekingaren a Ngimisiri, abu ayong etaleu iuriuna ni ekingaren daang ni arai ikile anawiyei kadaang a Ngisirael, alotunga ka ngibaren. Eliworosi ngikang. Ayong arai Ekapolon Akuj.” Abu Ekapolon Akuj todungok Musa anariet a Sinai atamar kimaru Ngilawi a ngimacharin ka ngawiyei, sodi kigir itwaan nikile daang ni arai elap epei kori ni iporit elap epei. Abu Musa kimaru kesi loger lo adungokinitor Ekapolon Akuj. Ngirora a talokookeng a Lawi kesi Gerichon, ka Koas, ta Merari. Ngirora a talokookeng a Gerichon kesi Libini ka Chimei. Anyaritae ngawiyei kech a ngirora kangulu. Anyaritae ngide a Koas Amuram, ka Ichar, ka Eburon, ta Usiel. Anyaritae ngawiyei kech a ngirora kangulu. Ngirora a talokookeng a Merari kesi Masi ka Muchi. Anyaritae ngawiyei kech a ngirora kangulu. Nguna eraakasi ngawiyei a Ngilawi a ngimacharin kech. Ngawiyei a emachar a Gerichon kesi na Libini ka Chimei. Arai ekimar daang a ngitunga alu egiritae, alukiliok alu araakasi elap epei kori lu eporito elap epei, arai 7,500. Asakitae ngitunga a emachar kangolo elomete lowae loa lotoo, naabor a eam. Eliasap lokookeng a Lael ngesi arai ekapolon kech. Kesi aweikinito eam ka ewae lo alotooma, ka alaar, ka awaru na arapitere akituk a eam, ka ngawarui na iriamito eam, ka ekeno a ngakipeyos ta ngaunoi. Kesi aweikinito etich daang a ngiboro kangulu. Ngawiyei a emachar a Koas kesi na a Amuram, ka Ichar, ka Eburon, ta Usiel. Arai ekimar daang a ngitunga alu egiritae, alukiliok alu araakasi elap epei kori lu eporito elap epei, arai 8,600. Asakitae ngitunga a emachar kangolo elomete lowae loa lokuju a eam. Eliasapan lokookeng a Usiel ngesi erai ekarikon kech. Aweikinito kesi asaduku a achamunet, ka emeesa, ka ni esipor ataa, ka ngikenoi a ngakipeyos, ka ngiboro lukimujet a ngimurok a Akuj, lu esubere etich ani italeuno, ta awaru na erapit niasegan noi. Kesi aweikinito etich daang a ngiboro kangulu. Ekapolon a Ngilawi ngesi Eleasar lokookeng a Aron alo arai emuron a Akuj. Ngesi aweikinit ngulu asubete etich ani italeunitoe. Ngawiyei a emachar a Merari kesi na Mali ka Muchi. Arai ekimar daang a ngitunga alu egiritae, alukiliok alu araakasi elap epei kori lu eporito elap epei, arai 6,200. Asakitae ngitunga a emachar kangolo elomete lowae loa lokwap a eam. Suriel lokookeng a Abiyail ngesi arai ekarikon kech. Kesi aweikinito ngakito na egangito eam, ka ngasua na igangito eam, ka ngapirio, ka ewae lo a ngalup, ta ngiboro keng daang. Kesi aweikinito etich daang a ngiboro kangulu. Kesi nabo aweikinito ngapirio, ka ewae lo a ngalup, ka ngakito natikokinet, ta ngaunoi na anikalapatan. Asakitae Musa ka Aron ka talokookeng a Aron elomete ngaren eam alowae alo alo kide alo ipiripiruunea akolong. Kesi aweikinito ngitichisio lu asubio ani italeunitoe, kotere Ngisirael. Itwaan niche daang ni ebuni diyete neni, eario. Arai ekimar daang a Ngilawi alukiliok, alu eraakasi elap epei kori lu eporito elap epei 22,000. Emarete Musa ka Aron kesi kigira a ngimacharin loger lokolong adungunitor Ekapolon Akuj. Tolimok Ekapolon Akuj Musa tama, “Kimaru ngiuriuna a Ngisirael daang lu ekingaren lukiliok lu eraakasi elap epei kori lu iporito elap epei, kigir ngirora kech. Nakaneni tosekinae ayong Ngilawi toliworos ngikang, pena nados a ngiuriuna alu ekingaren a Ngisirael! Ayong arai Ekapolon Akuj! Asaki nabo ngaatuk a Ngilawi daang pena nados a ngitak alu ekingaren a ngaatuk a Ngisirael.” Abu Musa kimaru ngiuriuna lu ekingaren daang lukiliok loger losek adungokinitor Ekapolon Akuj ngesi, lu araakasi elap epei kori lu eporito elap epei. Toliwor ekimar kech daang 22,273. Tolimok Ekapolon Akuj Musa tama, “Kitaleu Ngilawi toliworos ngikang pena nados a ngiuriuna alu ekingaren alusapa a Ngisirael. Nabo kitaleu ngaatuk a Ngilawi pena nados a ngitak alu ekingaren a ngaatuk a Ngisirael. Ayong arai Ekapolon Akuj! Aloger elalakeata ngiuriuna lu ekingaren a Ngisirael, idwangitotor Ngilawi kotere 273, ejoikinit iyong igieli ngide lu idongito. Kotere ikoku nisapat ipei, tolem ngaropiyae ngakan itemitoe ka eger lopalem itemeenere. Nak Aron ka talokaatokeng ngaropiyae nguna.” Tosubak Musa loger lo alimokinitae sodi tolem ngaropiyae 1,365, nak Aron ka talokookeng loger lo adungokinitor Ekapolon Akuj. Tolimok Ekapolon Akuj Musa ka Aron tama, “Kimarutu ngitunga a emachar a Koas alo a ekitela a Lawi. Kimarutu a ngatekerin ka ngawiyei, nabo kimaru ngikiliok lu eraakasi ngikaru kech ngitomwon-uni tanang ngitomwon-kan, lu epedorete akisub etich aloeam a Akuj. Esubete kesi etich lo erai eka ngiboro alu italeunitoe noi. “Ani enangi esaa lo eramakinere, elomarete Aron ka talokookeng loeam talachut awaru na eyei ngaren asaduku a achamunet sodi tarapeta asaduku. Tolemut eleu lokaanokan tarapakis, sodi kimukokis awaru napus alokidiama, ani erumor kirepakis ngakito nakilepilepiet. “Elemunete kesi awaru napus topetakis lomeesa loa ngamugati ana elemanakinio Ekapolon Akuj sodi kidokokis ngatubwae nabeleny, ka ngatubwae na emitina alo inomeeneo, ka ngatubwae na a ngadekon, ta ngachupae na a ngadekon a emuna. Epete ngamugati lomeesa jiik. Imukokinete kesi awaru naarengan loboro ngulu daang, tarapakis eleu lokaanokan, ani erumor kirepakis ngakito nakilepilepiet. “Elemunete kesi awaru napus tarapeta ni esipor ataa, ka ngataae keng, ka ngasua nakitudungeet akim, ka ngiboro lu ikachanakinio kesi, ta ngiboro daang lutinget akimiet a ngikito. Emukeikinete kesi ka ngiboro keng daang loleu lokaanokan kimuko sodi kidokokis nakito nakilepilepiet. “Ani erumor tolemut awaru napus tarapeta ekeno a ngakipeyos lo erai eka egolit, kimukokis eleu lokaanokan alokidiama, ani erumor kirepakis ngakito nakilepilepiet. Elemunete kesi ngiboro daang lupalem eyakasi ni italeunitoe tomukeikis nawaru napus, sodi tarapakis eleu lokaanokan alokidiama, ani erumor kirepakis ngakito nakilepilepiet. Emudarete kesi ekuron lo itilit alokeno alo a ngakipeyos sodi kimukokis awaru napus kidiama. Iwaakinete kesi ngiboro lupalem esubere etich alokeno a ngakipeyos kidiama neni. Ngiboro ngulu kesi, ngasua na elemere ngatotol anakim ka ngikodo, ka ngakalobochio nawadet ngalup, ta ngatubwae. Ani erumor kimukokis eleu lokaanokan kidiama, sodi kirepakis ngakito nakilepilepiet. Ani enangi esaa lo eramakinere, esakitae ngitunga a emachar a Koas edakete ngiboro lu italeunitoe ngulu, erai kerumosi Aron ka talokookeng akimuk ngiboro ngulu daang. Nyechamitae ngitunga a emachar a Koas etapete ngiboro lu italeunitoe ngulu, kainyo ani kikokis neni, etoakete. “Etich ngolo ngesi esakitae ngitunga a emachar a Koas esubete na eyatarere eam kang yaarae wache. “Eleasar lokookeng a Aron alo erai emuron a Akuj, ngesi eweikini eam kang daang, ka akimiet a ngataae, ka emitina, ka ngadekon a ngalemet, ka akimiet na idokanakinio ngimurok a Akuj nakies, ta ibore daang ni eyei loeam ni etaleun toliwor ika Ekapolon Akuj.” Tolimok Ekapolon Akuj Musa ka Aron tama, “Warasi ngitunga a emachar a Koas nyear ani eapikineta ngiboro lu italeunitoe noi. Ani esakio akiratakin kesi nyeetoaka, esakitae Aron ka talokookeng tolomasi tooma sodi totiakakis itwaan daang etich keng, nabo kidodikis ibore ni edaki. Nakaneni etoakete ngitunga a Koas, kelomasi kesi loeam sodi kingolikis ngimurok a Akuj ngulu esubete ngiboro lu italeunitoe ngulu sodi tadakere.” Tolimok Ekapolon Akuj Musa tama, “Kimaru ngitunga a emachar a Gerichon alo a ekitela a Lawi, kimaru a ngatekerin ka ngawiyei, nabo kimaru ngikiliok a ngikaru a ngitomwon-uni tanang ngitomwon-kan, lu epedorete akisub etich aloeam a ekapolon Akuj. Etich kech ngesi akidak ngiboro lugu, eam ka ngiboro lu eburitere tooma ka nikalapatan, ka alaar, ka eleu lokaanokan lo imukokinitae kidiama, ka awaru na erapitere akituk a eam ka ngawarui aapei ka ngaunoi na anikalapatan a eam ani elukakina eam ka ekeno a ngakipeyos, ka awaru na a ekidor a alaar, ta ngiboro luche daang lu itoweyere ngiboro ngulu. Esubete kesi ngitichisio daang lua ngiboro kangulu. Ejoikinit Musa ka Aron ingolikinete atamar asubakis Ngigerichon ngitichisio daang lusek atiakakinete Aron ka talokookeng kesi. Ngitichisio ngulu kesi esubete ngitunga a emachar a Gerichon aloeam kang. Esubete kesi ngitichisio ngulu iwapito ngakiro a Isamar alo erai lokookeng a Aron, alo erai emuron a Akuj.” Tolimok Ekapolon Akuj Musa tama, “Kimaru ngitunga a emachar a Merari, alo a ekitela a Lawi, kimaru a ngatekerin ka ngawiyei, sodi kigir ngikiliok a ngikaru a ngitomwon-uni tanang ngitomwon-kan, lu epedorete akisub etich aloeam a Ekapolon Akuj. Eliwor etich kech ngesi akiwok ngakito nakiganget eam kang, ka ngasua nakapisa, ka ngapirio, ta ngiwaitin lua ngalup a eam. Etich kech nabo tani kesi ngapirio ka ngiwaitin lua ngalup, ka ngakito na itoweito eam, ka ngaunoi na anikalapatan ani irimit eam, ka ngiboro luche daang lukitoweet eam. Etiakakinio itwaan daang ngiboro lu iwoki. Ngitichisio ngulu kesi esubete ngitunga a emachar a Merari. Esubete kesi ngitichisio ngulu iwapito ngakiro a Isamar alo erai lokookeng a Aron, alo erai emuron a Akuj.” Apot Musa ka Aron ta ngikarikok, kimarut ngitunga a emachar a Koas, a ngatekerin ka ngawiyei kech, kimarut ngikiliok lu anangito ngikaru kech ngitomwon-uni tanang ngitomwon-kan, daang lu cha apedorete akisub etich aloeam a Akuj. Toliwor ekimar lo emarere kesi a ngawiyei kech, ngitunga 2,750. Ngolo ngesi arai ekimar a ngitunga emachar a Koas. Araakasi ngulu daang lu asubete etich aloeam a Ekapolon Akuj, lu emarunete Aron ka Musa loger lokolong adungokinitor Ekapolon Akuj Musa. Emarunio ngitunga a emachar a Gerichon a ngatekerin ka ngawiyei kech. Emarunio lu enangito ngikaru kech ngitomwon-uni tanang ngitomwon-kan, daang lu apedorete akisub etich aloeam a Ekapolon Akuj, toliwor ekimar lo emarere kesi a ngawiyei kech, ngitunga 2,630. Ngolo ngesi erai ekimar a ngitunga a emachar a Gerichon. Araakasi ngulu daang lu asubete etich aloeam a Ekapolon Akuj, lu emarunete Musa ka Aron loger lokolong adungunitor Ekapolon Akuj. Emarunio ngitunga a emachar a Merari a ngatekerin ka ngawiyei kech. Emarunio lu anangito ngikaru kech ngitomwon-uni tanang ngitomwon-kan, daang lu apedorete akisub etich aloeam a Ekapolon Akuj, toliwor ekimar lo emarere kesi a ngawiyei kech, ngitunga 3,200. Ngolo ngesi erai ekimar a ngitunga a emachar a Merari, lu emarunete Musa ka Aron loger lokolong adungokinitor Ekapolon Akuj Musa. Apot Musa ka Aron, ta ngikarikok a Ngisirael, kimara ngitunga a ekitela a Lawi a ngatekerin ka ngawiyei kech. Kimarut lu anangito ngikaru kech ngitomwon-uni tanang ngitomwon-kan, daang lu apedorete akisub etich aloeam a Ekapolon Akuj, toliwor ekimar kadaang alu emarunio, ngitunga 8,580. Apon itwaan daang kimarunae loger losek adungokinitor Ekapolon Akuj Musa. Apon nabo totiakakinae itwaan daang etich keng lo esubi, ka ibore ni edaki, loger losek adungokinitor Ekapolon Akuj Musa. Tolimok Ekapolon Akuj Musa tama, “Todungok Ngisirael atamar kitwarakis anadakar itwaan daang ni edeak a enomokere, ka ni elelee ibore niaronon anakwaan keng, ta itwaan daang ni nyitaleunitoe ani atapea itwaan nikatoan. Kitwarakisi ngitunga lu nyitaleunitoe ngulu daang nikalapatan anadakar sodi nyiinyasut adakar, ni erai ngesi ebooyo ayong alotunga kang,” Apot Ngisirael kiirasi ngakiro nguna, sodi kitwarakis kesi daang anadakar Tolimok Ekapolon Akuj Musa tama, “Tolimok Ngisirael kona, ani kesechaki itwaan Ekapolon Akuj sodi tosubakinea itwaan niche naaronok, ejoikinit ngesi elimori akisech keng, tatach amicha a akisech kangina kadaang, kiatak nabo alemunet apei anakan ni eyei ibore ni etachitor ngesi amicha, sodi nak itwaan ni esechakinit ngesi. Nakaneni ani ketoanit itwaan ni esechakinit ngesi, tarai emam eyenet keng lo eyei diyete lo epedorio atachakin ibore ngini, einakinio Ekapolon Akuj ibore ngini toliwor ika emuron a Akuj. Eliwor ibore ngini ni iatakinio lomesek lo italeunere itwaan nikasechan ngini. Ani nabo dang, alemunet daang na iwakiwakio na elemanakinete Ngisirael Ekapolon Akuj, eliwor aka emuron alo elemikinete kesi. Ejoikinit emuron a Akuj daang ikachakini ngadekon na einakinio ngesi.” Todungok Ekapolon Akuj Musa tama, “Tolimok Ngisirael kona, epedori aberu a itwaan toroner toliwor akaloman alongaren ekile keng, sodi topero ka ekile eche, nakaneni nyeeyen lokile keng ngakiro nguna, nabo nyeetakanu akisech a aberu kangina ani emamakar ekaanyunan lokolong erumuni ngesi ka ekile eche eperete. Kori epedori tani lokile keng toting etereku, tama kori esechit aberu keng, tarai bo nyesechit aberu, kori tani epedori toliwor esechit aberu. Anakiro kanguna kadaang, esakitae ekile ngolo toriko aberu keng lomuron a Akuj. Esakitae tani yaa alemunet na esakitae, na erai akilo apei a ngakiria a erau, nakaneni nyiidokak akimiet a ngikito nakiria nguna kori nyiiwaak tani emitina, kainyo erai alemunet a ekile alo engayat ngakiro a aberu keng, nabo erai alemunet na elemunitae kisileereu ngakiro na a iteni. “Erikuni emuron aberu ngina kitowo alongaren ekeno a ngakipeyos. Elemuni ngesi ngakipi na italeunitoe tobukok nagulu, sodi tolem ngalup na alotooma eam a Akuj kiwaak nakipi nguna todwaraketa. Elachari ngesi ngitim a aberu kangina sodi kiwaak alemunet na a ngakiria ngina nakan keng. Etingi emuron atubwa na eyakasi ngakipi naadwarak na eyaunete ngilam. Sodi kisikong emuron aberu ngina. Elimuni emuron tama, ‘Ani pekilomit iyong nyikiwanete iyong ngilam a ngakipi anaadwarak kanu. Nakaneni ani kilomit iyong, kitiliwori iyong Ekapolon Akuj itwaan nilamam alokiding ngitunga kon. Echikini ngesi ngakalokidingo kon nabo kisiwuk akook kon. Kimiek ngakipi nugu tolomasi nakook kon sodi kisiwukis nabo tochikis ngakalokidingo kon.’ Etachuni aberu ngina tama, ‘Acham. Tosubak Ekapolon Akuj loger ngolo.’ “Ani erumor, igirakini emuron ngilam ngulu nakitab sodi kikisak ngagiran nguna natubwa na eyakasi ngakipi naadwarak. Ani eringa ngesi nyitamata aberu ngakipi na epedorete ainakin ngesi nikaapilan, elemari emuron alemunet a ngakiria na eyakasi nakan a aberu, sodi kiwaak lokeno a ngakipeyos. Ani erumor emukuni emuron ngakiria a akan a apei ileleba toliwor akipeyos nakisitamunet, sodi kinom alokeno a ngakipeyos. Ani erumor kitamat ngesi aberu ngina ngakipi nguna. Ani kelomit ngesi einakinete ngesi ngakipi nguna nikaapilan. Iwukini akook keng nabo echikin ngakalokidingo keng. Eliwor ekiro keng lo ilamam alokiding ngitunga keng. Nakaneni ani pekesechit ngesi, nyewana ngesi nabo epedori akidoun ngide. “Erai etal ngolo eka ngakiro a etereku kotere aberu na eroner tolom tarai na iusitae. Erai nabo kotere na etingea ekile etereku ani engayar ngakiro a aberu keng. Esakitae emuron itowei aberu ngina alongaren Ekapolon Akuj, sodi tosub emuron etal logo daang anaberu kangina. Eliwor ekile lo emam akisech na esubit, nakaneni ani kesech aberu, ejoikinit irirao.” Todungok Ekapolon Akuj Musa tama, “Tolimok Ngisirael kona, itwaan cha daang kerai ikile kori iberu, ni ikongi atamar etaleun atoliwor ika Ekapolon Akuj, ejoikinit peemasi emuna lo epuritoe kori epurot. Nyejoikinit ngesi emasi emuna lo epuritoe cha daang lo esubunitae anageor a ngamusabib, kori nyeenyam ageor a ngamusabib kori nyeenyam ngarinyo a ngamusabib. Ngirwa daang lu eraakar ngesi ikitaleuno ani Ekapolon Akuj, nyejoikinit enyami ibore daang ni elemunitae alokito a ngimusabib, kerai tani ngichok kori ngapocho a ngimusabib. “Ngirwa daang lu eringaakar iwapit akikong na eraakar ikitaleuno ani a Ekapolon Akuj, nyejoikinit ngesi etubi ngitim keng kori ebanyi akou. Irichakini ngesi akikongiet ngina ngirwa daang lu eringaakar ngesi itegeliara ani a Ekapolon Akuj. Ejoikinit ngesi imiekini ngitim lua akou ka ngajul na abokony toruput tooyaketa. Nyejoikinit ngesi eapiyari diyete itwaan nikatoan ngirwa daang lu italeunookor ngesi eraakar ika a Ekapolon Akuj. Nyejoikinit ngesi eapiari nitwaan nikatoan tani kerai apakeng kori itiokeng, kori lokaatokeng, kori nakaatokeng kainyo ngitim keng erai emachar lo idodiunit atamar erai ngesi ika Ekapolon Akuj. Ngirwa daang lu italeunookor ngesi, eliwor ngesi ika Ekapolon Akuj. “Ani ketoana itwaan atipei alodiyete ikitaleuno Akuj, sodi tosech etal lo a ngitim, ejoikinit ngesi idari ani adaunet a ngirwa a ngikan-kaarei, tabany akou keng ka abokony keng. Erot ngolo ngesi italeunor ngesi. Ani akolongit na ngakan-kauni, ejoikinit eyauni ngakurio ngaarei kori takidomelio ngaarei nak emuron a Akuj, anakituk a eam a Akuj. Elemuni emuron akuuri apei toliwor akipeyos a akisech, sodi tolem nache toliwor akipeyos na inomio. Erot ngolo ngesi italeunio emuron itwaan ngini anakisech keng ani aapikinea diyete itwaan nikatoan. Akolongit napei ngina, esakitae ngesi italeuni nabo ngitim keng, sodi kitaleun ani a Ekapolon Akuj. Nyimarunitae ngirwa luche a ekingaren, kainyo abu ngesi tosech etal a ngitim keng alusek etaleunitoe. Ejoikinit ngesi eyauni imesek ni erai ekaru epei toliwor akipeyos a atachanot. “Ani edaun ngirwa lukolong ekongitor itwaan ngini aliwor ika Akuj, ejoikinit iwapi etal logo, elosi ngesi nakituk a eam, sodi tolemik Ekapolon Akuj imesek nikile ipei ni erai ekaru epei tamam ni ichwangakina, toliwor akipeyos na inomio. Tolem nabo imesek niberu ipei ni erai ekaru epei tamam ni ichwangakina toliwor akipeyos a akisech. Tolem nabo emesek epei lo emam ni ichwangakina toliwor akipeyos a ekisil. Elemuni ngesi nabo akikap apei na eyakasi ngamugati ngalooso ngauni na emam ekitoe lo itubui, ka ngamugati nalangir na esubitae a ngakiria anaajokak ka akimiet, ta ngabisikutio, aapei ka ngadekon a ngalemet ka emuna lo epuritoe. “Eyauni emuron kesi daang nia Ekapolon Akuj sodi kipeyo akipeyos a akisech ka na inomio. Ipeyokini ngesi Ekapolon Akuj imesek toliwor akipeyos a ekisil. Elemikini tani akikap na a ngamugati ana emam ekitoe lo itubui. Elemikini tani ngadekon a ngikinyam ka emuna lo epuritoe. Ebanyari itwaan ni italeuno ani a Akuj ngitim keng anakituk a eam sodi yaa kiwaak nakim na epeyere akipeyos a ekisil. Nakaneni elemuni emuron eseget a emesek kitukulaun kerumor, tolem nabo anakikap amugati nalangir a apei ka abisikut, sodi kiwaak nakan a itwaan ani itegeliar aliwor ika a Akuj. Iwakawakakini emuron ngakipeyos nguna toliworos ngakipeyos na iwakiwakio ani a Ekapolon Akuj. Eraakasi kesi ngakipeyos na italeunitoe toliworos ngaka emuron, imorikina aapei ka atorobu na iwakiwakio, ta amuro nakitalio na erai aka emuron. Arumoret kanguna, echamakinio itwaan ni italeuno ani a Akuj emasi emuna lo epuritoe. “Eraakasi ngulu ngitalio a itwaan ani ikongit akitaleun ani a Akuj. Nakaneni ani kelimu ngesi atamar alemuni alemunet ache na nyerai nakolong ekongio ngesi, ejoikinit ngesi elemuni loger lokolong sek alimunio.” Todungok Ekapolon Akuj Musa tama, “Tolimok Aron ka talokookeng atamar tolimuunut kona na epiareta Ngisirael. ‘Kitopia Ekapolon Akuj esi kitochoik. Kiinak Ekapolon Akuj esi ajokis keng ka ajakaanut. Kitominak Ekapolon Akuj esi sodi kiinak ekisil.’ ” Sodi tolim Ekapolon Akuj tama, “Ani kepiasi kesi Ngisirael a ekiro kang, apiari ayong kesi.” Akolongit na arumorea Musa akiduk eam a Akuj, abu ngesi kitaleu eam ka ngiboro keng daang, ta ekeno a ngakipeyos ka ngiboro keng daang. Ngikarikok a ngimacharin, lu araakasi ngikarikok a ngitela a Ngisirael, lu araakasi nabo ngitunga lupei kolong aweikinito ekimar, kesi apot yaut ngadekon nia Ekapolon Akuj. Araakasi ngadekon nguna ngaurukukui na irito ngimongin ngikan-kapei, ka ngimongin ngitomon ka ngiarei. Arai aurukuk na irito ngimongin apei aka ngikarikok a ngiarei, tarai emong epei eka ekarikon a epei. Ani kipotosi kesi ngiboro ngulu kerumor, abu Ekapolon Akuj tolimok Musa tama, “Kidiau ngiboro ngulu tosubere etich aloeam. Tokorak Ngilawi ngiboro ngulu, itemem ka etich lo esubi ipei kech daang.” Sodi abu Musa tolem ngaurukukui nguna ka ngimongin nak Ngilawi. Abu ngesi tolem ngaurukukui ngaarei ka ngimongin nguomwon nak talokookeng a Gerichon itemem ka etich kech. Tolem nabo ngaurukukui ngoomwon ka ngimongin ngikan-kauni nak talokookeng a Merari itemem ka etich kech. Asubete kesi daang etich kech iwapito ngakiro a Isamar alo arai lokookeng a Aron, alo arai emuron a Akuj. Nakaneni emam ngaurukukui kori ngimongin abu Musa nak talokookeng a Koas, kainyo kesi asubete etich a ngiboro alukitaleuno alu araakasi ngidakan alosegeta. Apot nabo ngikarikok tolemut ngadekon na etaleunere ekeno a ngakipeyos. Ani enangi ni elemuneta kesi ngadekon kech, abu Ekapolon Akuj tolimok Musa tama, “Elemunete kesi ngadekon ekarikon epei akolongit apei, a ngirwa a ngitomon ka ngiarei, kotere akitaleun ekeno a ngakipeyos.” Nachon lo arai lokookeng a Aminadab alo a ekitela a Yuda ngesi alemuni ngadekon keng akolongit na a ekingaren, araakasi ngadekon keng atubwa nakwangat, na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak imorikina aapei ka akimiet na a ngakipeyos a ngalemet. Tolem nabo itubwa a egolit ni arai apotis keng ngagiramea 110, ni elelebitae emitina. Tolem nabo itaok ka emesek, ka imesek nia ekaru a epei ni arai akipeyos na inomio, ka ekoroe lo erai akipeyos a akisech. Tolem nabo ngakipeyos a ekisil na araakasi ngimongin ngiarei, ka ngimesekin ngikan, ka ngikora ngikan, ta ngimesekin lukiliok ngikan lu araakasi ngikaru ngipei-pei. Ngadekon a Nachon alo arai lokookeng a Aminadab kesi nguna. Nesanel lo arai lokookeng a Suar alo a ekitela a Isakar ngesi alemuni ngadekon keng akolongit na a ngaarei. Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemenere. Elelebitae ngatubwae nguna daang ngakiria naajokak imorikina aapei ka akimiet na a ngakipeyos a ngalemet. Tolem nabo itubwa a egolit ni arai apotis keng ngagiramea 110, ilelebitae emitina. Tolem nabo itaok, ka emesek, ka imesek ni erai ekaru epei ni arai akipeyos na inomio, ka ekoroe lo arai akipeyos a akisech, ta ngakipeyos a ekisil na araakasi ngimongin ngiarei, ka ngamesekin ngakan, ka ngikora ngikan, ta ngimesekin lukiliok ngikan lu araakasi ngikaru ngipei-pei. Ngadekon a Nesanel alo arai lokookeng a Suar kesi nguna. Eliab lo arai lokookeng a Elon alo a ekitela a Sebulun ngesi alemuni ngadekon keng akolongit na a ngauni. Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwaangat na arai apotis keng ngagiramea 800, itemem ka eger losek itemeenere. Elelebitae ngatubwae nguna daang ngakiria naajokak imorikina ka akimiet na a ngakipeyos a ngalemet. Tolem nabo itubwa a egolit ni arai apotis keng ngagiramea 110, elelebitae emitina, ka itaok, ka emesek, ka imesek nikile ni erai ekaru epei ni erai akipeyos na inomio, ka ekoroe lo arai akipeyos a akisech. Tolem nabo ngakipeyos a ekisil na araakasi ngimongin ngiarei, ka ngimesekin ngikan, ka ngikora ngikan, ta ngimesekin lukiliok ngikan lu araakasi ngikaru ngipei-pei. Ngadekon a Eliab alo arai lokookeng a Elon kesi nguna. Elisur lo arai lokookeng a Chedeur alo a ekitela a Reuben ngesi alemuni ngadekon keng akolongit na a ngoomwon. Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak imorikina aapei ka akimiet na a ngakipeyos a ngalemet. Tolem nabo itubwa a egolit ni arai apotis keng ngagiramea 110, ilelebitae emitina. Tolem nabo itaok, ka emesek, ka imesek nikile ni erai ekaru epei toliwor akipeyos na inomio, ka ekoroe toliwor akipeyos a akisech, ta ngakipeyos a ekisil na araakasi ngimongin ngiarei, ka ngimesekin ngakan, ka ngikora ngikan ta ngimesekin lukiliok ngikan lua ngikaru a ngipei-pei. Ngadekon a Elisur alo arai lokookeng a Chedeur kesi nguna. Chelumiel lo arai lokookeng a Surichadai alo a ekitela a Simeon ngesi alemuni ngadekon keng akolongit na a ngakan. Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak imorikina ka akimiet na a ngakipeyos a ngalemet. Tolem nabo itubwa a egolit ni arai apotis keng ngagiramea 110, ilelebitae emitina. Tolem nabo itaok ka emesek, ka imesek nikile ni erai ekaru epei toliwor akipeyos na inomio, ka ekoroe lo arai akipeyos a akisech, ta ngakipeyos a ekisil na araakasi ngimongin ngiarei, ka ngimesekin ngikan, ka ngikora ngikan, ta ngimesekin lukiliok ngikan lu eraakasi ngikaru ngipei-pei. Ngadekon a Chelumiel alo arai lokookeng a Surichadai kesi nguna. Eliasap lo arai lokookeng a Deuel alo a ekitela a Gad ngesi alemuni ngadekon keng akolongit na a ngakan-kapei. Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak ka akimiet na ngakipeyos a ngalemet. Tolem nabo itubwa a egolit ni arai apotis keng ngagiramea 110, elelebitae emitina. Tolem nabo itaok, ka emesek, ka imesek nikile ni erai ekaru epei toliwor akipeyos na inomio, ka ekoroe lo erai akipeyos a akisech, ta ngakipeyos a ekisil na araakasi ngimongin ngiarei, ka ngamesekin ngakan, ka ngikora ngikan, ta ngimesekin ngikan lukiliok lu araakasi ngikaru ngipei-pei. Ngadekon a Eliasap alo arai lokookeng a Deuel kesi nguna. Elichama lo arai lokookeng a Amiud alo a ekitela a Epiraim ngesi alemuni ngadekon keng akolongit na a ngakan-kaarei. Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak ka akimiet na a ngakipeyos a ngalemet. Tolem nabo itubwa a egolit ni arai apotis keng ngagiramea 110, ilelebitae emitina. Tolem nabo itaok, ka emesek, ka imesek nikile, ni arai ekaru epei toliwor akipeyos na inomio, ka ekoroe lo erai akipeyos a akisech, ta ngakipeyos a ekisil na araakasi ngimongin ngiarei, ka ngamesekin ngakan, ka ngikora ngikan, ta ngimesekin lukiliok ngikan lu araakasi ngikaru ngipei-pei. Ngadekon a Elichama alo arai lokookeng a Amiud kesi nguna. Gamaliel lo arai lokookeng a Pedasur alo a ekitela a Manase ngesi alemuni ngadekon keng akolongit na a ngakan-kauni. Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe loger losek itemeenere. Elelebitae ngatubwae nguna daang ngakiria naajokak ka akimiet na a ngakipeyos a ngalemet. Tolem nabo itubwa a egolit ni arai apotis keng ngagiramea 110, ilelebitae emitina. Tolem nabo itaok, ka emesek, ta imesek nikile ni arai ekaru epei toliwor akipeyos na inomio, ka ekoroe toliwor akipeyos a akisech, ta ngakipeyos a ekisil na araakasi ngimongin ngiarei, ka ngimesekin ngikan ka ngikora ngikan, ta ngimesekin lukiliok ngikan araakasi ngikaru ngipei-pei. Ngadekon a Gamaliel alo arai lokookeng a Pedasur kesi nguna. Abidan lo arai lokookeng a Gideon alo a ekitela a Benjamen ngesi alemuni ngadekon keng akolongit na a ngakan-koomwon. Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak ka akimiet na a ngakipeyos a ngalemet. Tolem nabo itubwa a egolit ni arai apotis keng ngagiramea 110, ilelebitae emitina. Tolem nabo itaok ka emesek, ta imesek ni arai ekaru epei toliwor akipeyos na inomio, ka ekoroe toliwor akipeyos a akisech, ta ngakipeyos a ekisil na araakasi ngimongin ngiarei, ka ngamesekin ngakan, ka ngikora ngikan, ta ngimesekin lukiliok ngikan lu eraakasi ngikaru ngipei-pei. Ngadekon a Abidan alo arai lokookeng a Gideon kesi nguna. Ayeser lo arai lokookeng a Amichadai alo a ekitela a Dan ngesi alemuni ngadekon keng akolongit na a ngatomon. Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak ka akimiet na a ngakipeyos a ngalemet. Tolem nabo itubwa a egolit ni arai apotis keng ngagiramea 110, ilelebitae emitina. Tolem nabo itaok, ka emesek, ta imesek nikile ni arai ekaru epei toliwor akipeyos na inomio, ka ekoroe toliwor akipeyos a akisech, ta ngakipeyos a ekisil na eraakasi ngimongin ngiarei, ka ngimesekin ngikan, ka ngikora ngikan, ta ngimesekin lukiliok ngikan lu eraakasi ngikaru ngipei-pei. Ngadekon a Ayeser alo arai lokookeng a Amichadai kesi nguna. Pagiel lo arai lokookeng a Okiran alo ekitela a Acher ngesi alemuni ngadekon keng akolongit na a a ngatomon ka apei. Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe loger losek itemeenere. Elelebitae ngatubwae nguna daang ngakiria naajokak ka akimiet na akipeyos a ngalemet. Tolem nabo itubwa a egolit ni erai apotis keng ngagiramea 110, ilelebitae emitina. Tolem nabo itaok, ka emesek ta imesek nikile ni erai ekaru epei toliwor akipeyos na inomio, ka ekoroe lo arai akipeyos a akisech, ta ngakipeyos a ekisil na araakasi ngimongin ngiarei, ka ngimesekin ngikan, ka ngikora ngikan, ta ngimesekin lukiliok ngikan lu eraakasi ngikaru ngipei-pei. Ngadekon a Pagiel alo arai lokookeng a Okiran kesi nguna. Aira lo arai lokookeng a Enan alo a ekitela a Naputal ngesi alemuni ngadekon keng akolongit na a ngatomon ka ngaarei. Araakasi ngadekon keng atubwa nakwangat na arai apotis keng ngakiloi 1.5, ka ateger nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak ka akimiet na a ngakipeyos a ngalemet. Tolem nabo itubwa a egolit ni arai apotis keng ngagiramea 110, ilelebitae emitina. Tolem nabo itaok, ka emesek, ta imesek ni erai ekaru epei toliwor akipeyos na inomio, ka ekoroe lo arai akipeyos a akisech, ta ngakipeyos a ekisil na araakasi ngimongin ngiarei, ka ngimesekin ngikan, ka ngikora ngikan ta ngimesekin lukiliok ngikan lu araakasi ngikaru ngipei-pei. Ngadekon a Aira alo arai lokookeng a Enan kesi nguna. Ngadekon daang na etaleunere ekeno a ngakipeyos, alemunete ngikarikok lutomon ka ngiarei a Ngisirael, ngatubwae nakwangae ngatomon ka ngaarei, ka ngategerin naachik ngakwangae ngatomon ka ngaarei, ta ngitubwae lua egolit ngitomon ka ngiarei. Arai apotis a ngatubwae anakwangae kadaang ka ngategerin nakwangae ngakiloi 27.6, itemitoe a eger alosek itemeenere. Arai apotis a ngitubwae alu a egolit kadaang ilelebitae emitina, arai ngakiloi 1.32, itemitoe a eger alosek itemeenere. Araakasi ngakipeyos na inomio ngimongin ngitomon ka ngiarei, ka ngimesekin ngitomon ka ngiarei, ka ngimesekin lukiliok ngitomon ka ngiarei lu araakasi ngikaru ngipei-pei, imorikina aapei ka ngakipeyos kech na a ngalemet. Araakasi ngakipeyos a akisech ngikora ngitomon ka ngiarei. Araakasi ngakipeyos a ekisil ngimongin ngitomwon-arei ka nguomwon, ka ngimesekin ngitomwon-kapei, ka ngikora ngitomwon-kapei, ngimesekin lukiliok ngitomwon-kapei lu araakasi ngikaru ngipei-pei. Nguna kesi eraakasi ngadekon na alemunio na etaleunere ekeno a ngakipeyos. Ani elomari Musa loeam a Akuj akiruor ka Ekapolon Akuj, abu ngesi kiira Ekapolon Akuj isuruori ngesi anapukenit a asaduku a achamunet, alokiding ngiborei luarei lua ngabeben.*g** Tolimok Ekapolon Akuj Musa tama, “Tolimok Aron kona, ani iwaakini ngataae nakan-kaarei ni esipotor, ejoikinit isingoliari lowae lo alongaren tolot akicha kech inaa.” Abu Aron kiwapak nguna sodi kisingolia ngataae ngaren ni asipotor, loger losek adungokinitor Ekapolon Akuj Musa. Asubunitae ni esipor ataa a egolit alo itiakunitae napei alowae alo alokidiama tanang lowae lo a ngalup, ikwaan ka ekitetemes losek edodikinit Ekapolon Akuj Musa. Tolimok Ekapolon Akuj Musa tama, “Kitegelia Ngilawi ani eyakasi Ngisirael luche sodi kitaleu kesi a eger kalo, towatak kesi ngakipi na italeunotor, sodi tolimok tabanya ngawat kech daang nabo kilotasi ngiworui kech. Italeunosi kesi. Ani erumor, tolemut kesi emong losorokit aapei ka ngakipeyos a ngadekon ne eraakasi ngakiria naajokak ka akimiet, sodi tolemut nabo emong losorokit eche toliwor akipeyos a akisech. Tochunak Ngisirael daang wapei sodi kitowo Ngilawi alongaren eam kang. Ani irikuni iyong Ngilawi ngaren Ekapolon Akuj, idokokinete Ngisirael ngakan kech nakies a Ngilawi. Ani erumor kitaleu Aron Ngilawi toliworos akipeyos na iwakiwakio kalemikinito Ngisirael ayong sodi tosubeta kesi etich kang. Idokokinete Ngilawi ngakan kech nakies a ngimongin aluarei, sodi tolemunae epei toliwor akipeyos a akisech, toliwor loche akipeyos na inomio, sodi kitaleunere Ngilawi. “Kitaleu Ngilawi toliworos akipeyos na iwakiwakio anikang, sodi tolem Aron ka talokookeng toweikis Ngilawi. Kitegelia Ngilawi ani eyakasi Ngisirael luche aloger kangolo sodi toliworos ngikang. Ani kirumo iyong akitaleun ka akitegeliar Ngilawi, eliworosi kesi lu itemokino akisub etich aloeam. Alema ayong kesi toliworos ngikang, pena nados a ngide alusapa alu ekingaren a Ngisirael. Aliworosi kesi ngikang a ilope. Nakolong aarea ayong ngiuriuna lua ekingaren alo Misiri, abu ayong etaleu ngiuriuna a Ngisirael lua ekingaren toliworos ngikang, etaleu alotunga ka ngibaren aapei. Alem tokona ayong Ngilawi pena nados a ngiuriuna alu a ekingaren a Ngisirael. Epoto ayong Ngilawi ainak Aron ka talokookeng toliworos ainakinet a Ngisirael. Esubete kesi etich a Ngisirael aloeam, sodi kiratakineta ngakiro naaronok nyeanyun ka Ngisirael epote diyete ewae lo italeunitoe.” Apot Musa ka Aron, ta Ngisirael daang kitaleut Ngilawi loger losek adungokinitor Ekapolon Akuj Musa. Apot Ngilawi kitaleunos ka akilotar ngiworui kech. Abu Aron kitaleu kesi toliworos akipeyos na iwakiwakio ani Ekapolon Akuj, nabo tosubak etal lo a akitaleun. Apot ngitunga tosubeta Ngilawi ngakiro daang loger lo kolong adungokinitor Ekapolon Akuj Musa. Sodi apot Ngilawi kisiakis akisub etich aloeam, eweikinito Aron ka talokookeng kesi. Tolimok Ekapolon Akuj Musa tama, “Ngilawi lu eraakasi ngikaru kech ngitomwon-arei ka ngikan, ka lu iporito ngikaru kech ngulu, esubete etich aloeam kang, ani enangete ngikaru ngitomwon-kan, esakitae tojongoto akisub etich ngolo. Nakaneni epedorete kesi akingarakin Ngilawi luche akisub etich aloeam, nakaneni nyesakitae kesi esubete etich make. Eger ngolo ngesi itiakanakinea iyong Ngilawi etich.” Elap lo a ekingaren a ekaru alo a ngiarei alo kolong arotokinioto Ngisirael alo Misiri, abu Ekapolon Akuj kisuror Musa anariet anabe Sinai ebala, “Ejoikinit Ngisirael irichakinete akolongit a Adeparet. Atabong a akolongit ana a ngatomon ka ngoomwon a elap kalo, ngesi ejoikinit Ngisirael irichakineta Adeparet itemem ka ngitalio keng daang.” Sodi tolimok Musa ngitunga atamar kirichakis Adeparet. Apot kesi tosubakis nguna akolongit na a ngatomon ka ngoomwon a elap alo a ekingaren, anariet a Sinai. Apot ngitunga tosuba ngakiro loger lokolong adungokinitor Ekapolon Akuj Musa. Ayakasi ngikiliok ngiche lupeetaleuno ani atapitotor akwaan a itwaan anikatoan. Peapedorete kesi akirichakin Adeparet akolongit ngina. Apot kesi toloto nia Musa ka Aron tolimokis tamasi, “Nyikitaleuno sua kainyo kitap akwaan a itwaan anikatoan, nakaneni kotere nyo pekichamunere sua kilemuni aapei ka Ngisirael luche ngakipeyos a Ekapolon Akuj?” Tatachak Musa kesi tama, “Kidarutu eira ngakiro na edunguni Ekapolon Akuj.” Tolimok Ekapolon Akuj Musa atamar tolimok Ngisirael tama, “Ani keyei itwaan nikus kori nalesea kus ni nyitaleuno ani atapea akwaan a itwaan anikatoan, kori kelosit alotoru na anikalonan, nakaneni tasaki ngesi akirichakin Adeparet, ejoikinit ngesi irichakini adaunet a elap a epei, atabong a akolongit ana ngatomon ka ngoomwon, a elap alo a ngiarei. Ejoikinit ngesi enyami akolongit ngina ngamugati napadok ka ngikito luadwarak. Emam akimuj ngina na eperi kiwalak, kori emam akoit a ibarasit na ebelio. Kirichakisi akolongit a Adeparet kiwapa ngitalio keng daang. Ani itwaan cha daang ni italeuno, tarai nabo nyelosit nikalonan, nakaneni towou akirichakin akolongit a Adeparet, nyeringa ngesi imarunitae atamar erai ipei a ngitunga a Ekapolon Akuj, kainyo abu ngesi nyeelemik Ekapolon Akuj ngakipeyos akolongit ngina. Eriamuni ngesi ngichan a akisech keng a ilope. “Ani keyei itwaan a akwap a ache ni irukito ka esi, tasaki akirichakin Adeparet, ejoikinit ngesi irichakini iwapit ngitalio a Adeparet daang. Etal ngolo esakitae itwaan daang iwapi tani kerai ilope a akwap kori ika akwap a ache.” Akolongit na adukokinere eam a Akuj, abu edou kimuk eam. Ani nakwaare, kikwaanikin edou ngolo ka akim. Tosubas loger ngolo akolongit daang, naparan kimuk edou ani nakwaare kikwaanikin edou ka akim, Nacha ikeunor edou, taramakis Ngisirael, ani nicha ewaar edou, toloma kesi neni. Arai na edungunio Ekapolon Akuj atamar taramakinae, taramakis Ngisirael, ani esaa daang lo emukitor edou eam, toloma kesi nadakar ngina. Ani imuki edou eam nikooyen, apot kesi kiwapa ngakiro a Ekapolon Akuj, nyeeramakis. Ngirwa ngiche, emukit edou eam a ngirwa a ngidikidio. Ani kanguna kadaang, eboikinosi kesi kori aramakinete iwapito ngakiro na adunguni Ekapolon Akuj. Ngirwa Ngiche, emukeene edou eam napei ebong jik tanang nataparach, ani napei ikeunor, tonyout Ngisirael taramakis. Ani nacha ikeunor edou, taramakis kesi. Ani kimuk edou eam a ngirwa a ngiarei kori a elap a epei kori a ekaru a epei, kori a ngirwa alukaalak, apot Ngisirael kiboikinos, nyeeramakis. Nakaneni ani ikeun, apot kesi taramakis. Arai na edungunio Ekapolon Akuj atamar toloma wache, apot Ngisirael tosubakis loger ngolo. Ani na edungunio atamar taramakinae, tosubakis loger ngolo. Asubete kesi nguna daang iwapito ngakiro nakolong adunguni Ekapolon Akuj kisitoru nia Musa. Tolimok Ekapolon Akuj Musa tama, “Tosubak ngaburucho ngaarei a ngakwangae ana itiakitae, toliworos kesi inyaraunia iyong ngitunga tochunakinotor, kori taramakineta. Ani ekutakinio ngaburucho naarei nguna nikooyen, echunun ngitunga daang kiriama iyong anakituk a eam kang. Nakaneni, ani ekutakinio aburuch apei bon, ngikarikok a ngimacharin make echunakin kiriama iyong. Ani ekutakinio ngakutakinet nauriyesik, ngitela lu elomito kide eramakinete. Ani ekutakinio ngakutakinet nauriyesik na a ngaarei, ngitela lu elomito kuju kesi epudorete nikalapatan. Eraakasi ngakutakinet nauriyesik ngakitaramakinet ngitunga. Nakaneni, eraakasi ngakutakinet nakooyak nganyaraet ngitunga tochunakinos. Talokookeng a Aron lu eraakasi ngimurok a Akuj kesi eliworosi ngikakutak ngaburucho. “Etal logo ngesi iwapio jik. Ani ijiete esi anakwap kus ijiete ka ngimoe lukitijiete esi, tokutakis ngaburucho nguna. Ayong Ekapolon Akuj na arai Akuj kus kengarakini esi katoyuu alomoe kus. Tani ngirwa lua alakara, lu ikote ngirwa a ngisukukui alu eanyungarere elap, ta ngirwa lua Ngisukukui a Ekapolon Akuj, ikutakinete esi ngaburucho ilemunete ngakipeyos kus na inomio ka na a ekisil. Sodi kengarak ayong esi. Ayong arai Ekapolon Akuj na arai Akuj kus.” Akolongit na a ngatomwon-arei a elap alo a ngiarei a ekaru alo a ngiarei napei kolong arotokinioto Ngisirael alo Misiri, abu edou kikeun aloeam a Akuj, Apot Ngisirael kisiakis arotokin anariet a Sinai. Abu edou tolot towo anariet a Paran. Apot kesi kisiakis alosit loger lo adungunitor Ekapolon Akuj kisitoru nia Musa. Ani nganyounet kech daang, arekina kesi. Ngulu ayakasi nabendera a ekitela a Yuda kesi engarenikinete a ngalooso. Nachon lo arai lokookeng a Aminadab ngesi arikit kesi. Nesanel lo arai lokookeng a Suar ngesi arikit lua ekitela a Isakar. Eliab lo arai lokookeng a Elon ngesi arikit lua ekitela a Sebulun. Ani iwaakinio eam kwap, torotokis ngitunga a a emachar a Gerichon ka lua emachar a Merari lu edakeenete eam. Ngulu ayakasi nabendera a ekitela a Reuben kesi atupakinete a ngalooso. Elisur lo arai lokookeng a Chedeur ngesi arikit kesi. Chelumiel lo arai lokookeng a Surichadai ngesi arikit lua ekitela a Simeon. Eliasap lo arai lokookeng a Deuel ngesi arikit lua ekitela a Gad. Ani erumor torotokis ngitunga a Lawi lua emachar a Koas edakito ngiboro lu italeunitoe. Apon eam todukokinae eringa kesi nyenanguna nadakar. Ngulu ayakasi nabendera a ekitela a Epiraim kesi atupakinete a ngalooso. Elichama lo arai lokookeng a Amiud ngesi arikit kesi. Gamaliel lo arai lokookeng a Pedasur ngesi arikit lua ekitela a Manase. Abidan lo arai lokookeng a Gideon ngesi arikit lua ekitela a Benjamen. Ani esal, ngulu ayakasi nabendera a ekitela a Dan, kesi apot kisidiunos eraakasi ngasigerea nguna esidiyete. Ayeser lokookeng a Amichadai ngesi arikit kesi. Pagiel lo arai lokookeng a Okiran ngesi arikit lua ekitela a Acher. Nakaneni Aira lo arai lokookeng a Enan ngesi arikit lua ekitela a Naputal. Eger ngolo anyouniyoto Ngisirael a ngalooso, nacha eramakineta. Tolimok Musa lokamuran keng Obab lo arai lokookeng a Yesiro alo a akwap a Midian tama, “Kinyou sua alosit nakwap nakolong kichikakini Ekapolon Akuj sua atamar kiinakini. Bua erukosi ka sua. Kisubea sua iyong ngakiro naajokak kainyo echikak Ekapolon Akuj Ngisirael atamar eanyunete ngakiro naajokak.” Tatachu Obab tama, “Nyalosi ayong. Abongori ayong nakwap kang ni eyakasi ngitunga kang.” Tolim Musa tama, “Nyikiisik kare sua. Iyeni iyong ni kilom sua anariet nabo iyong kirik sua. Ani kibu iyong erukosi ka sua, kimori ngoni apiaro daang nakiinakini Ekapolon Akuj sua.” Ani erotokinete ngitunga alo Sinai alo erai emoru a Akuj, apot kesi toloto a ngirwa a nguuni. Engarenikini asaduku a achamunet a Ekapolon Akuj, sodi taanyunea ni elomete kesi. Aramakinet daang aramanakinete kesi, emukit edou a Ekapolon Akuj kesi naparan. Arai nacha erotokinio asaduku a achamunet, tolim Musa tama, “Tonyou Ekapolon Akuj, kieala ngimoe kon nabo kirita ngulu kiremokino iyong!” Ani nacha ewaar asaduku a achamunet tolim Musa tama, “Tobong Ekapolon Akuj, tobong ni eyakasi Ngisirael lu eraakasi ngabunge.” Apot ngitunga kisiakis akisuburare Ekapolon Akuj kotere ngichan lu aanyunito kesi. Ani iirari Ekapolon Akuj ngakiro nguna, abu tongo noi sodi tomeu akim lotunga. Abu akim torirau alokiding kech kinyasu ewae epei a adakar. Apot ngitunga kigoronokis Musa esakete kingarakin. Ani ilipi Musa Ekapolon Akuj, todunge akim. Sodi tolimokinae neni ekiro be Tabera kainyo neni ngesi ariraunea akim a Ekapolon Akuj alokiding kech. Ayakasi ngitunga a ngakwapea anache lu aloose aapei ka Ngisirael. Emuit kesi akiring noi, sodi apot Ngisirael dang kisiakis akiburare nabo ebalasi, “Arai bo ataanyunete akiring nakinyami dang! Kolong alo Misiri kinyami sua ngikolea etiae lo kisaki, lupearai ngigialan. Kitamunit ngamunye, ka ngakaidei, ta ngikitunkuwoi lugelagelae kolong kinyami. Nakaneni adaun tokona ngikilinga yok. Emam jik akimuj ache kinyami, erai akimuj nabe mana naga bon kinyami ngirwa daang.” ( Ekwaan mana ka ngikinyam luuchik nabo arai anyang -akwaan. Aloseenete ngitunga kirimo idepete mana. Kiriata tanyapidid, ani erumor kitukulata a ngamoti sodi tosubeta ngamugati nadapal. Ekwaan abobou ka na a ngamugati ana epotoi a akimiet a ngikito. Arai na edooto ngakop nalup nakwaare, todoto aapei ka mana.) Kiira Musa ngitunga daang iburaate, ewaasi a ngalooso anakituk a ngieman kech. Abu Musa nyeelakar ani angoikinitor Ekapolon Akuj Ngisirael. Sodi kingit Musa Ekapolon Akuj tama, “Nyo isubea iyong ekasuban etich kon niaronon kona? Nyo kingoikinitor iyong ayong? Nyo kiinakinitor iyong ayong etich a ngitunga kalu kadaang? Ayong kolong auri ngitunga lugu daang a? Kori ayong kolong asubuni kesi ibalar iyong ayong ekok aberu nakadakan ngide, dio atadak kesi loger a ngide, sodi atoriko nakwap na kolong ichikakini iyong taapaakech a? Aliwae alemunea ayong akiring na ainakini ngitunga lugu daang? Kainyo kegoronokinete kesi ayong ebalasi, ‘Nakinae sua akiring atanyama.’ Nyetiri ayong bon etich a ngitunga kalu kadaang, elal noi anikang. Ani kerai ngakiro isaki iyong asubea ayong kesi nugu, kisienoi ayong taarae atipei, sodi nyaarubak ayong etee aboliaro na ikoni naga.” Tolimok Ekapolon Akuj Musa tama, “Tochunak ngitunga ngitomwon-kaarei lu erimae nabo lusek eyenio atamar eraakasi ngikarikok a ngitunga. Toriku kesi loeam kang sodi towaa ka iyong kaina. Atiyaun ayong eruoro ka iyong kaina, alemuni ayong epewae a etau alo kainak ayong iyong, sodi ainak kesi, topedoreta kesi akingarakin iyong etich a ngitunga kalu, nyiisub iyong etich ngolo alopei. Tolimok tokona ngitunga tama, ‘Kitaleunos kotere akolongit naka moi. Iriamunete esi akiring na inyamete. Eira Ekapolon Akuj akigoro kus na ibalatar isakete akiring, nabo ibalasi ajok kolong Misiri. Kiinakini tokona Ekapolon Akuj esi akiring sodi tanyama. Meere akolongit apei inyameta esi akiring ngina, kori ngirwa ngiarei, kori ngikan, kori ngitomon, kori ngitomwon-arei, pearai inyamete esi a elap a epei tanang epuruuni alokumes, kitopenik esi. Esubakinosi nguna kainyo ingero esi Ekapolon Akuj lo irukito ka esi nabo iburata esi anikeng ibalasi peajoikinit kolong ipudunete alo Misiri.’ ” Tolimok Musa Ekapolon Akuj tama, “Abe erai bo ekimar a ngitunga alu arikit ayong kalu 600,000, tarai ibala iyong abe iinakini kesi akiring na enyamete elap epei! Ngaai ngaatuk ka ngamesekin engolio kimwoketa ngitunga lugu? Ngikolea a anam ngiai echunakinio kitemut kesi?” Tatachak Ekapolon Akuj Musa tama, “Eyei ibore dir ni kepiyori ayong asubakin a? Ingolikini tokona iyong kesubakin ngakiro na alimu ayong kori kemam!” Sodi topudo Musa nikalapatan tolimok ngitunga ngakiro na alimuni Ekapolon Akuj. Tochunak ngesi ngikarikok ngitomwon-kaarei, sodi kitowo kesi kiriama eam. Ani erumor, totiyaun Ekapolon Akuj eyei lodou kisuruorik Musa. Tolem ngesi epewae a etau alosek ainakinit Musa, sodi nak ngikarikok lutomwon-kaarei ngulu. Napei alomarea etau nikech, kisiakis kesi akidwar loger a ngikadwarak a Akuj, ani anipei nabo kaneni, kililinga. Edongito sek ngikarikok ngiarei nadakar, pealosito loeam. Anyaritae kesi Elidad ka Medad. Abu etau toloma nikech kaina anadakar, sodi kisiakis kesi dang akidwar loger a ngikadwarak a Akuj. Tomotun esorokit epei alimokin Musa ngakiro na asubete Elidad ka Medad anadakar. Abu Yochua lokookeng a Nun, losek arai ekengarakinan a Musa napei kolong eringa esorokana, tolimok Musa tama, “Ekapolon kang, kitonger kesi!” Tatachu Musa tama, “Iyong ingichit ngakiro kang a? Esibit ayong tani nak Ekapolon Akuj ngitunga daang etau keng sodi kiremasi daang loger a ngikadwarak keng!” Ani erumor, tobongosi Musa ka ngikarikok lutomwon-kaarei a Ngisirael nadakar. Atipei, abu Ekapolon Akuj tomeu ekuwam lo ayauni ngalurui ananam, na aporito ani arai amita apei alokidiama ngalup. Todoto kesi kiriama adakar tanang nikalonan ni erai ngakilomitae nakaalak alowaitin kadaang, Sodi apaaran ngina daang ka nakwaare, ta akolongit na atupit ngina daang, asubete ngitunga etich lo akirum ngalurui. Erumunit itwaan daang ngalurui na anangit apotis kech ngakiloi abunget ka na eporito. Tolokis kesi ngalurui wadaang anadakar sodi tookioto. Ani eringa akiring nanyamat elal, abu Ekapolon Akuj tongoik ngitunga noi sodi taar ngitunga a edeke aloaronon. Tolimokinae neni ekiro be Kibiros Atapa (eger keng ngesi atamar “Ngalielin a ekimue aloaronon”), kainyo neni apon tonukakinae ngitunga lukolong emuit akiring. Ani enyounete ngitunga alo kibiros Atapa, apot toloto Aseros, sodi toloma neni. Eusit sek Musa aberu a akwap a Kuch. Apot Miriam ka Aron kitorono Musa kotere aberu ngina. Tolimut kesi tamasi, “Erai mono Musa bon isuruorit Ekapolon Akuj a? Nyisuruoro ngesi ngoni dang a?” Kiira Ekapolon Akuj ngakiro na alimunete kesi. ( Arai Musa itwaan ni itiditeuna, etiditeun noi akidwang ngitunga daang anakwap.) Atipei, abu Ekapolon Akuj tolimok Musa, ka Aron, ta Miriam tama, “Topudutu esi luuni lugu aloeam kang.” Sodi topudutu kesi luuni daang. Totiyaun Ekapolon Akuj eyei napir a edou towo anakituk a eam tama enyara, “Aron! Miriam!” Pot luarei ngulu ngaren. Tolim Ekapolon Akuj tama, “Topupokisi tokona ngakiro na alimuni ayong! Ani eyakasi ngikadwarak a Akuj irukito ka esi, edodiunun ayong anikech anakisingolikineta nabo esuruori ayong kesi na irujaata. Etiakak ka eger lo esuruorea ayong Musa lo erai ekasuban etich kang. Ngesi eweikinit Ngisirael daang, lu eraakasi ngitunga kang. Kiruoro ayong ka ngesi kikobanakin ngakiro na ilereete meere ngakitadapet, nabo engolik ngesi eger lo ekoni ayong. Ikokinete esi itenikinete ekasuban etich kang Musa kitorono ai?” Abu Ekapolon Akuj tongoik kesi, sodi torotok. Ani erotokini edou aloeam, tobutokin enomokere nakwaan a Miriam tokwanger kea. Ani ingoliari Aron nia Miriam kingolik atamar kebutakin enomokere. Tolimok Aron Musa tama, “Ekapolon kang, nyikirira kare sua kotere akisech nakisubit sua a abangaanut. Wara ngesi nyiikok itwaan ni edounio etoanit irikarit ibore akwaan epewae.” Sodi kikaloik Musa Ekapolon Akuj tama, “Ee Akuj, kitangalek ngesi!” Tatachu Ekapolon Akuj tama, “Arai kimoakinite apakeng ngesi loreet, pekirumito ngesi ngileech kotere ngirwa ngikan-kaarei a? Kotere ngakiro nguna egolorio ngesi nikalapatan a adakar a ngirwa a ngikan-kaarei.” Apon Miriam togoloroe nikalapatan a adakar a ngirwa a ngikan-kaarei, nakaneni apot ngitunga nyeeramakis tanang ni abuunere Miriam tooma nadakar. Ani erumor taramakis ngitunga alo Aseros toloto toloma nariet a Paran. Tolimok Ekapolon Akuj Musa tama, “Toseu ngikarikok ngitomon ka ngiarei, epei alokitela a epei, sodi tomea torebo akwap a Kanaan na ainakini ayong Ngisirael.” Abu Musa tomea kesi anariet a Paran loger losek adungunitor Ekapolon Akuj. Araakasi ngitunga ngulu daang ngikarikok a Ngisirael. Ngirora kech kesi lugu, Chamua lo arai lokookeng a Sakur ngesi aseunio alokitela a Reuben. Chapat lo arai lokookeng a Ori ngesi aseunio alokitela a Simeon. Kaleb lo arai lokookeng a Yepune ngesi aseunio alokitela a Yuda. Igal lo arai lokookeng a Yosep ngesi aseunio alokitela a Isakar. Ochea lo arai lokookeng a Nun ngesi aseunio alokitela a Epiraim. Paliti lo arai lokookeng a Rapu ngesi aseunio alokitela a Benjamen. Gadiel lo arai lokookeng a Sod ngesi aseunio alokitela a Sebulun. Gadi lo arai lokookeng a Susi ngesi aseunio alokitela a Manase. Amiel lo arai lokookeng a Gemali ngesi aseunio alokitela a Dan. Sesur lo arai lokookeng a Mikael ngesi aseunio alokitela a Acher. Nabi lo arai lokookeng a Popisi ngesi aseunio alokitela a Naputal. Geuel lo arai lokookeng a Maki ngesi aseunio alokitela a Gad. Ngulu kesi araakasi ngikarebok lu ameari Musa akireb akwap. Kiloch ngesi ekiro a Ochea alo arai lokookeng a Nun, toliwor Yochua. Ani na amearea Musa kesi akireb akwap a Kanaan, abu tolimok tama, “Kapesi lowae lo alokwap, napei kane kitoro Negeb, kiporosi tolomasi nakwap na ngimukur. Taanyutu eger lo ikoni akwap ngina, taanyut kejwoko ngitunga kori kemam, nabo kelalak kori kekidioko. Taanyutu nabo kejok akwap kech kori kerono, kori kedukitoe ngirerea kech ngawasea kori kemam. Taanyutu keraakasi ngalup kech naketurupunak ngikinyam kori pekerai. Taanyutu nabo kemutono akwap kori kemam. Totitinyeketo, yaut ageor adio a akwap kangina.” (Araakasi ngirwa ngulu lu akokitotor ngamusabib.) Apot ngitunga ngulu toloto lowae lo alokwap, napei anariet a Sin alokuju tanang Reob, ni ayei diyete napak a Amas alowae alo alokwap. Toloto kesi mono Negeb, ani erumor tanangut Eburon ni alomito ngimacharin a Aiman, ka Chechai, ta Talimai lu araakasi ngalesea a ngitunga alulangir-kooyak noi anyaritae Ngianak. (Esiaunio Eburon todukoe ngikaru ngikan-kaarei eringa ere a Soan lo eyei Misiri nyeduko.) Pot kesi tanangut nadipo a Echikol, sodi totubut kaneni ateni na ayakasi ngamusabib. Kotere apotis a ateni kangina, arai ngitunga ngiarei apedorete akilepelep ateni a akitoe. Apot kesi yaut tani ngalam ka ngameyana. ( Alimokinio neni ekiro be adipo a Echikol kotere ateni a ngamusabib na atubunete Ngisirael kaneni.) Apot ngikarebok ngulu tobongut arumoret a akireb akwap a ngirwa a ngitomwon-omwon. Pot kesi nia Musa ka Aron ta Ngisirael daang anibe Kadech ani eyei nariet a Paran. Tolimosi kesi ngakiro na aanyunete nabo kidodikis ngitunga ageor na agerunete. Tolimokis kesi Musa tamasi, “Kireb sua akwap nakolong kimeari iyong sua. Ileleba ngakile ka akimiet a ao. Ageor kech dang ache naga. Nakaneni ejwoko ngitunga lu elomito nakwap ngina, nabo ngirerea kech edukitoe ngawasea nabo topolok. Ani eyakasi nguna daang, kingolik sua tani ngalesea a ngitunga alulangir-kooyak noi kaina. Ngiamalek kesi elomito Negeb. Ngiiti ka Ngiebus, ta Ngiamor kesi elomito nakwap na a ngimukur. Ngikanaan kesi elomito lokwaas a anam a Mediterenian ka lokwaas a angolol a Yorudan.” Nakaneni kisililing Kaleb ngitunga lu esuburaate Musa, sodi tolim tama, “Potu apana tokona jik atoremo akwap atoloma. Kipedori ngoni alemar.” Sodi tolimut ngitunga lusek erukorito ka Kaleb tamasi, “Mam, nyikipedori ngoni alosit akitijwore ngitunga ngulu, kainyo ejwoko kesi kidwangito ngoni.” Sodi apot kesi tokeikis lotunga a Ngisirael ngakiro naaronok a akwap ana alosito kesi akireb. Tolimut kesi tamasi, “Erono akwap ngina emam akimuj na itemokino tani ngitunga lu elomito inaa. Nabo araakasi ngitunga lu kingolikini sua daang lukokooyak. Kipotu tani engolikisi kaina ngitunga lulangir-kooyak noi lu eraakasi ngalesea a Anak. Atoditeutu sua anikech ekokisi ngidete.” Nakwaare a akolongit kangina, apot ngitunga kigoro noi iuteete. Apot kesi kisuburata Musa ka Aron tamasi, “Arai bo kolong atotoaka alo Misiri dang, kori kane anariet! Nyo kiyaaritor Ekapolon Akuj ngoni nakwap ngina? Kiario ngoni alojie sodi torikoe ngaberu yok ka ngide yok kitodemar. Nyejoikinit ngoni kibongori Misiri a?” Apot kesi tolimonokinos make tamasi, “Potu atoseutu ekarikon, sodi atobongosi Misiri!” Ani erumor toriediko Musa ka Aron alongaren Ngisirael daang. Sodi apot Yochua lokookeng a Nun ka Kaleb lokookeng a Yepune, lusek arukito ka ngikarebok luche, tochilichilaasi ngiworui kech ialolongete, tolimokis ngitunga tamasi, “Akwap nakolong kilosit sua akireb erai akwap ajokon noi. Ani kejoikinito Ekapolon Akuj ngakiro yok, kiyaari ngesi ngoni inaa, sodi kiinak akwap naajokon ngina, na ileleba ngakile ka akimiet a ao ngina. Nyiingero Ekapolon Akuj nabo nyieam ngitunga a akwap kangina. Kidwangi ngoni kesi dir. Nyieam kesi kainyo kirukit ngoni ka Ekapolon Akuj nabo edwang ngesi ngakujo na igienosi ngitunga ngulu.” Asakete ngitunga daang akimas Yochua ka Kaleb a ngamoru taara, nakaneni apot kesi atipei kingolikis akwangis naakwaan kea a Ekapolon Akuj alo kidiama eam. Tolimok Ekapolon Akuj Musa tama, “Kangerete ngitunga lugu ayong tanang ori? Ewounete kesi akinup ngakiro kang tanang ori, tani kasub ayong ngakitoodikinet nakailiilok anikech? Ameuni ayong ngidekesinei luaronok atomunya kesi, nakaneni ketiliwori ayong iyong apakeng a ebukut aloapolon, alokajwon noi akidwang kesi!” Nakaneni tatachak Musa Ekapolon Akuj tama, “Ipuduni kolong iyong ngitunga lugu alo Misiri a agogongu kon. Ani na iirareta Ngimisiri ngakiro na isubakinea iyong ngitunga kon, elimokinete kesi ngitunga lu eyakasi nakwap naga. Nakaneni eirasi kolong ngitunga lugu atamar iyong Ekapolon Akuj kirukit ka sua, nabo kingolenakinio iyong na ewaar edou kon alokidiama kosi. Eirasi nabo atamar kirikit iyong sua a apir a edou naparan, ani nakwaare kitorik a apir a akim. Ani tokona kiar iyong ngitunga kon daang, etamarete ngibukui lukolong eirasi ekipur kon kona, ‘Erikak Ekapolon Akuj ngitunga keng nariet kainyo akuruwori ngesi akitanang kesi nakwap nakolong echikakini ngesi atamar ainakini.’ Tokona bocha, Ekapolon Akuj, kelipit atamar kidodiu agogongu kon sodi tosubak ngakiro nakolong kichikakini iyong sua ibala, ‘Ayong Ekapolon Akuj, nyangoyeene atipei, nabo edodiununi ayong amina naationon, atarai nakamunoi, nabo arimanakini akisech ka aronis. Tani kikoni neni, nyamamakini ayong akirirare ngide ka ngitatae tanang nalesea na a ngauni ka na ngoomwon, kotere ngasechesea a ngikauriak kech.’ Tokona bocha, Ekapolon Akuj, kelipit atamar torimak akisech a ngitunga kalu, itemem ka ationis a amina kon ana nyilocho, loger lokolong irimanakinea iyong kesi napei arotokinioto alo Misiri tanang tokona.” Tatachu Ekapolon Akuj tama, “Arimakini ayong kesi loger lokilipea iyong ayong. Nakaneni ekong ayong atamar, ani kona ayarea ayong dir, ka ni ayakar ayong nakwap wadaang, emam tani ipei a ngitunga kalu ni elomari nakwap ngina. Engolikis kesi akwangis kang naakwaan kea, ka ngakitoodikinet nakailiilok nakolong asubi ayong alo Misiri ka nariet, nakaneni apot kesi keningo ayong ngakininget nakaalak, nabo towout akiwap ngakiro kang. Nyelomarete kesi jik nakwap nakolong echikakini ayong taapaakech. Emam tani ipei kangulu kangero ayong ni elomari nakwap ngina jik. Nakaneni etananguni ayong Kaleb lo erai ekasuban etich kang ka ngalesea keng nakwap nakolong alosit ngesi akireb, sodi toliwor akech, kainyo nyikote ngakiro keng nakus, nabo ewap ngesi ngakiro kang lokojokon. Tokona bocha, ani kona elomitotor Ngiamalek ka Ngikanaan nadipoe, toreas moi jik toloto nariet kitoro lowae lo a apas a Akaba.” Tolimok Ekapolon Akuj Musa ka Aron tama, “Kesuburaate ngitunga luaronok lugu ayong tanang ori? Kaup ayong eburas a ngitunga kalu! Tolimok tokona kesi atamar abala ayong Ekapolon Akuj kona, ‘Ekongi ayong atamar ani kona ayarea ayong, kasubea esi ngakiro na isakete, ayong Ekapolon Akuj ngesi alimu nguna. Itoakete esi sodi kiealakin ngawat kus nariet naga. Ani kona kisuburaata esi ayong, esi lu eraakasi ngikaru kus ngitomwon-arei ka lu iporito, emam tani ipei ni elomari nakwap ngina. Kechikakini kolong ayong esi atamar ilomete inaa, nakaneni tokona, emam tani ipei kus ni elomari neni mati Kaleb ka Yochua. Ilimunete kolong esi atamar be kidemario ngide kus torikoe, nakaneni etananguni ayong kesi nakwap na ingero esi sodi toliwor awi kech. Itoakete esi anariet kana. Eliworosi ngide kus ngikeyokok anariet a ngikaru a ngitomwon-omwon, tanang esi daang itoakete. Eriamunete kesi ngichan ngulu kotere aronis kus. Iriamunete esi ngichan kotere akisech kus a ngikaru a ngitomwon-omwon. Eliwor ekaru epei itemitoe ka akolongit apei a ngirwa alu kolong tomwon-omwon irebioto esi akwap. Iyenunete esi eger a aronis ana karemokinor ayong esi! Ekongi ayong atamar asubakini nguna alotunga aluaronok alu apupokin akinger ayong kalu. Itoakete esi daang kane anariet. Ayong Ekapolon Akuj ngesi alimu nguna.’ ” Ngitunga lukolong ameari Musa akireb akwap kesi ayaunete ngakiro naaronok, sodi kisuburata ngitunga Ekapolon Akuj. Abu Ekapolon Akuj inu kesi edeke loaronon, sodi totoaka. Alotunga alutomon ka ngiarei kangulu, Yochua ka Kaleb make kesi apot toyara. Ani elimokini Musa Ngisirael ngakiro na alimuni Ekapolon Akuj, apot kesi kigoro noi tosutonokis. Ani iwalari, tonyout kesi nataparach elilim toloto akirem akwap na a ngimukur ebalasi, “Kinyou tokona sua alosit nakwap nakolong kichikakini sua Ekapolon Akuj. Kicham sua atamar kisechit.” Nakaneni tolim Musa tama, “Ani toliwor nyo peiwapeta esi ngakiro a Ekapolon Akuj? Kipiyori esi ibore daang! Nyiilot. Kidwangete esi ngimoe kus kainyo nyirukito esi ka Ekapolon Akuj. Ani itijikinete esi Ngiamalek ka Ngikanaan, itoakete esi alojie. Nyirukete esi ka Ekapolon Akuj kainyo ingero esi akiwap ngesi.” Nakaneni apot kesi jik todokasi kidiama, toloto nakwap na a ngimukur, tarai bo tani nyenyouno asaduku a achamunet a Ekapolon Akuj ka Musa anadakar. Sodi apot Ngiamalek ka Ngikanaan lu alomito neni, kitijikis kesi kidwanga, kiritasi jik tananga Orima. Abu Ekapolon Akuj tolimok Musa tama, “Tolimok Ngisirael kona, ani inangete nakwap na kainakini ayong esi, epedori itwaan alemikin Ekapolon Akuj emong kori emesek, kori amesek, kori akine erai akipeyos na inomio, kori akipeyos na ikongit itwaan alemun, kori akipeyos na esaki itwaan alemun, kori akipeyos a esukukuu a Ekapolon Akuj. Ejoikinit akukuny a ngakipeyos kanguna Ekapolon Akuj. Itwaan daang nicha elemikini Ekapolon Akuj akipeyos na inomio, na erai amesek kori akine, ejoikinit imoriuni ka akipeyos a ngalemet na erai ngakiria naajokak akilo apei ka akimiet a ngikito alita apei, tolem nabo alemunet a emuna alita apei. Ani ipeyeo emesek, ejoikinit elemunio ngakiloi ngaarei a ngakiria anaajokak imorikina aapei ka akimiet a ngikito alita apei ka anus, toliworos akipeyos a ngalemet, kimorikinae aapei ka alemunet a emuna alita apei ka anus. Ejoikinit akukuny a ngakipeyos kanguna Ekapolon Akuj. Ani kelemikin Ekapolon Akuj emong erai akipeyos na inomio, kori akipeyos na ikongitere, kori akipeyos a ekisil, ejoikinit elemunio ngakiloi ngauni a ngakiria anaajokak imorikina aapei ka akimiet a ngikito ngalitae ngaarei, toliworos akipeyos a ngalemet, kimorikinae aapei ka ngalitae ngaarei a emuna. Ejoikinit akukuny a ngakipeyos kanguna Ekapolon Akuj. “Ngiboro ngulu kesi ejoikinit imoriuniyo ka emong, kori emesek, kori amesek, kori akine. Ani elemunio ngibaren lu iporito ipei toliworos ngakipeyos, ejoikinit ekimar a ngiboro iatakinio itemem ka ngibaren ngulu. Ejoikinit Esiraelit daang esubi ngakiro nguna na elemunea akipeyos na epeikinio Akuj, na ekukunyikinit Ekapolon Akuj. Nakaneni ani keyei itwaan a akwap a ache ni irukito ka esi, kerai ekaloton kori ekeboyon, tasaki ngesi alemun akipeyos na epeikinio Akuj, na ekukunyikinit Ekapolon Akuj, ejoikinit ngesi iwapi ngakiro napei nguna. Napei tokona jik, ikwaan ngitalio lu iwapete esi ka lu iwapete ngitunga lua ngakwapea anache, lu irukito ka esi. Ikwaan esi ka kesi anakonyen a Ekapolon Akuj. Ikwaan ngitalio ka ngakiro na iwapete esi ka na iwapete kesi.” Tolimok Ekapolon Akuj Musa tama, “Tolimok Ngisirael kona, ani inangete esi nakwap nakainakini ayong esi, sodi tanyama esi akimuj na a akwap kangina, ejoikinit epewae itegeliario toliwor alemunet na elemikinitae Ekapolon Akuj. Ani esaa lo imaata esi ngamugati a akim, ejoikinit amugati na ekingaren na elemunio analemet anakitet, elemunio toliwor alemunet a Ekapolon Akuj. Elemunio ngadekon nguna loger a ngadekon a ngikinyam alu iriatae. Irichakinete esi jiik alemanakin Ekapolon Akuj alemunet ngina anamugati ana imaate esi a akim. “Nakaneni epedori itwaan iche tosech peiyechakinit, sodi nyiirichak ngitalio ngiche alotalio alu alimoki Ekapolon Akuj Musa. Nabo epedorete ngitunga daang moi ekisidi akisech, sodi nyiirichakis ngakiro daang na adungokini kesi Ekapolon Akuj kisitoru nia Musa. Ani kolong kesubito ngitunga akisech ngina peiyechakinito, ejoikinit kesi elemunete emong toliwor akipeyos na inomio, na ejoikinit akukuny keng Ekapolon Akuj, tolemut aapei ka akipeyos keng a ngalemet, ta na a emuna na itemokino. Ejoikinit nabo elemunete ekoroe toliwor akipeyos a akisech. Italeuni emuron a Akuj kesi, sodi torimakinae kesi kainyo peeyechakinete kesi akisech, nabo apot tolemikis Ekapolon Akuj akipeyos a akisech kech toliwor akipeyos na epeikinitoe Ekapolon Akuj. Erimakinio Ngisirael daang aapei ka ngitunga a ngakwapea anache lu erukito ka kesi, kainyo apot daang tosecha. “Ani kesech itwaan peiyechakinit, ejoikinit elemuni akine na erai aka ekaru a epei toliwor akipeyos a akisech. Italeuni emuron a Akuj ngesi alokeno alo ipeyonokinere Akuj, kitaleu itwaan ngini anakisech keng, sodi torimakinae. Erai etal ngolo lo iwapi itwaan daang ni esechi peiyechakinit, kerai Esiraelit kori itwaan a akwap a ache ni elomit neni. “Nakaneni itwaan daang ni esechi iyechakinit, kerai Esiraelit kori itwaan a akwap a ache, asechaki ngesi Ekapolon Akuj emenya, nakaneni ejoikinit ngesi eario, kainyo anger ngesi ngakiro a Ekapolon Akuj, nabo asech etal a Akuj. Erai akitu keng aka akiding keng a ilope.” Akolongit ache na ayakatar Ngisirael nariet, apot kesi toriamut itwaan ikeyeni ngakito akolongit a Sabato. Apon itwaan ngini torikoroe nia Musa ka Aron, ta ngitunga luche daang. Apon ngesi kiratakinae kainyo aringa kesi nyeyena ngakiro na esubakinere ngesi. Sodi tolimok Ekapolon Akuj Musa tama, “Echamit itwaan ngini eario. Epote ngitunga kimasa ngesi a ngamoru anikalapatan adakar.” Sodi apot ngitunga daang yaasi ngesi nikalapatan adakar, kimasa a ngamoru totoan, loger losek adungokinitor Ekapolon Akuj Musa. Todungok Ekapolon Akuj Musa tama, “Tolimok Ngisirael kona, tosubakisi ngatoron na isanisanitae kiwaakis lokwaasea a ngiworui kus, sodi kiwaakis auno napus natorosit daang. Ejoikinit esi isubete kongina jiik analesea kus kadaang. Eliworosi ngatoron nguna ngakisitamunet a ngitalio. Ani ingolikinete esi kesi, kitamut ngitalio kang daang kiwapa, sodi nyiirearotor esi anikang kiwapa ngakiro na isakete esi ngikulepek nakiminarito. Kisitamunete esi ngatoron nguna akirichakin ngitalio kang sodi toliworos esi ngikang jik. Arai ayong Ekapolon Akuj na arai Akuj kus. Kepuduni kolong ayong esi alo Misiri atoliwor Akuj kus. Arai ayong Ekapolon Akuj.” Apot Kora lokookeng a Ichar alo a emachar a Koas, alo a ekitela a Lawi, ka ngitunga a ekitela a Reuben nguuni lu araakasi Dasan ka Abiram lu araakasi talokookeng a Eliab, ta On lokookeng a Peles, tongero eger lo arikitor Musa ngitunga. Apot kesi tonyoikis Musa imorikina ka ngikarikok 250 a ngitunga aluyenan alu aseunete ngitunga. Apot kesi tochununos nia Musa ka Aron tolimokis tamasi, “Eporo ngakiro kus napalem esakitae. Eraakasi ngitunga daang ngika Ekapolon Akuj, nabo kirukit ngoni daang ka Ekapolon Akuj. Nyo bo itopolounokotor esi alotunga a Ekapolon Akuj?” Ani iirari Musa ngakiro nguna, abu ngesi tadakakin nalup kilip. Ani erumor tolimok Musa Kora ka ngirukitos keng tama, “Idodiuni Ekapolon Akuj moi nataparach atamar ngae erai ikeng. Ngini erai ikeng, ngesi atamar ngini aseu ngesi, imiekini taapiya lokeno a ngakipeyos. Iyong Kora ka ngitunga kon tolemutu moi nataparach ngabelekeke nalemet akim, kiwaakis akim ka emitina yaasi ngaren Ekapolon Akuj, ataanyutu itwaan ni eseunit Ekapolon Akuj aniyok. Esi Ngilawi kesi eporo ngakiro kus napalem esakitae!” Torubak Musa isuruori Kora ebala, “Topupokisi esi Ngilawi! Kiditeikinit esi eger lo kitaleunio esi Akuj a Ngisirael ani eyakasi ngitunga luche sodi taapuuneta esi diyete keng, tosuba etich aloeam keng, ka akisub etich a ngitunga a? Kiinak ngesi esi ka Ngilawi luche arimatoi ngina. Nakaneni isakete tokona esi aliwor tani ngimurok! Ngae sek Aron lo isuburaate esi? Erai Ekapolon Akuj ngesi ingerito esi ka ngirukitos kus.” Ani erumor tomea Musa itwaan anyarare Dasan ka Abiram, nakaneni apot kesi tolimut tamasi, “Nyikiponi sua! Nyitemokino tani eger lokolong kipudunio iyong sua alo Misiri, anakwap ana ileleba ngakile ka akimiet a ao, sodi kiyau aarakin nege nariet a? Isaki tokona nabo iyong aliwor ekapolon kosi a? Eringa iyong tani nyeyauna sua nakwap na ileleba ngakile ka akimiet a ao, kori eringa tani nyeinakina sua ngamanat, ka ngamanat a ngimusabib, tarai iyong logo kingalae sua. Nyikiponi sua!” Tongo Musa noi sodi tolimok Ekapolon Akuj tama, “Nyiicham ngakipeyos daang nacha elemunete ngitunga lugu. Nyesechakina ayong tani ipei kech. Emam esikiria kech tani epei lo alema ayong.” Tolimok Musa Kora tama, “Moi, echamit iyong ka ngirukitos kon lu eraakasi 250 ipote loeam a Akuj. Emini Aron dang neni. Elemuni ipei kus daang abelekeke keng nalemet akim kiwaak emitina, sodi yau lokeno lo a ngakipeyos.” Abu itwaan dang tolem abelekeke keng nalemet akim, kiwaak akim ka emitina sodi towo anakituk a eam aapei ka Musa ta Aron. Ani erumor tochunak Kora ngitunga daang towaa ingoliarito lowae lo a Musa ka Aron anakituk a eam. Atipei apot ngitunga kingolikis akwangis naakwaan kea a Ekapolon Akuj. Tolimok Ekapolon Musa ka Aron tama, “Tachadaros alotunga kalu, sodi atomunya ayong kesi atipei.” Nakaneni apot Musa ka Aron toriediko tatapa ngireetin kech ngalup, tamasi, “Ee Akuj, na irai alope a akiyar kadaang, na esechea itwaan ipei, ingoikini iyong ngitunga daang a?” Tolimok Ekapolon Akuj Musa tama, “Tolimok ngitunga tachadaros aloeaman a Kora, ka Dasan, ta Abiram.” Sodi toloto Musa ka ngikarikok a Ngisirael nia Dasan ka Abiram. Tolimok Musa ngitunga tama, “Tonyoutu tachadaros aloeaman a ngitunga aluaronok kalu, nabo nyiitap ibore cha daang ni erai ikech, nyikimunyar aapei ka kesi kotere ngasechesea kech daang.” Apot ngitunga tachadaros aloeaman a Kora, ka Dasan, ta Abiram. Apudunito Dasan ka Abiram awaasi alodorin a ngieaman kech, aapei ka ngaberu kech ta ngide kech. Tolimok Musa ngitunga tama, “Eger logo ngesi iyeneta esi atamar Ekapolon Akuj ngesi kameunit ayong akisub ngakiro nugu daang, nabo meere ngakiro kang a ilope asubi ayong. Ani ketoaka ngitunga lugu make kona etoakeeneta ngitunga luche, totoaka emam erot eche irirator Akuj, ikwa meere Ekapolon Akuj kameunit ayong. Nakaneni ani kesubaki Ekapolon Akuj ngakiro na nyeanyuna a ache, tapakas ngalup kilikosi kesi, sodi toloto kesi eyarete ni eyakasi ngikatoak, iyenunete esi atamar engerito ngitunga lugu Ekapolon Akuj.” Ani napei arumorea Musa akiruoro, apot ngalup na awaatar Dasan ka Abiram tapakas, kilikosi kesi ka ngitunga a ngawiyei kech daang, aapei ka ngirukitos a Kora daang, ta ngiboro kech. Toloto kesi eyarete ka ngiboro kech, kwap ni eyakasi ngikatoak. Tobunakin nabo ngalup alokidiama kech, tongopiasi kesi. Tamataros Ngisirael luche daang lu ayakasi neni na eirareta kesi igorosi. Kiremasi Ngisirael tamasi, “Tamataros! Epedorete ngalup kilikosi ngoni dang!” Ani erumor yau Ekapolon Akuj akim na arirauni tonomia ngitunga lu araakasi 250, lu ayaunito emitina akinom. Ani erumor tolimok Ekapolon Akuj Musa tama, “Tolimok Eleasar lokookeng a Aron alo erai emuron a Akuj atamar tolem ngabelekeke nanyangayek nalemet akim alotunga alu amunya akim, sodi kieala ngatotol tachada anabelekeke, kainyo italeunitoe ngabelekeke nguna. Etaleunio kesi na ayaunere lokeno lo ipeyonokinere Akuj. Tolem ngabelekeke nalemet akim a ngitunga alu atoaka kotere akisech kech kalu, kitiek toliworos ngatubwae nabeleny nakaabenak, toliworos ngaburet ekeno a ngakipeyos. Eliwor ibore ngini akichikichika alo Isirael.” Sodi tolem Eleasar lo arai emuron ngabelekeke nalemet akim nanyangayek nguna, kitiekae toliworos ngatubwae nabeleny nakaabenak naburet ekeno a ngakipeyos. Arai ibore ngini akichikichika ani a Ngisirael atamar emam itwaan ni nyerai ales a Aron ni echamit ebuni lokeno a ngakipeyos, akinom emitina ani a Ekapolon Akuj. Ani kesub itwaan kongina, emunyario loger a Kora ka ngitunga keng. Asubasi ngakiro nugu daang loger losek adungokinitor Ekapolon Akuj Eleasar kisitoru ngakiro nguna nia Musa. Ani akolongit nache, apot ngitunga daang kisuburata Musa ka Aron tamasi, “Iara esi ngitunga a Ekapolon Akuj ngiche.” Ani kechunun ngitunga akisuburare Musa ka Aron kerumor, apot kesi torearos lowae lo a eam kingolikis edou keburuchia eam, nabo kingolikis akwangis naakwaan kea a Ekapolon Akuj. Toloto Musa ka Aron towaa alongaren eam, sodi tolimok Ekapolon Akuj Musa tama, “Tachadaros alotunga kalu, atomunya kesi atipei!” Apot Musa ka Aron toriediko tatapa ngireetin ngalup. Abu Musa tolimok Aron tama, “Tolem abelekeke kon nalemet akim, tolem akim alokeno a ngakipeyos kiwaak, sodi kiwaak emitina nakim. Tamataror lotunga sodi kitaleu kesi. Kiburuburak! Angoiki Akuj ngitunga nabo esiak edeke loaronon.” Abu Aron kiwap ngakiro nguna sodi tamataror abelekeke keng kiding ngitunga lu achunakina. Ani ingolikini ngesi atamar keting edeke loaronon ngitunga, abu ngesi kiwaak emitina nakim sodi kitaleu ngitunga. Ani ikokini ngesi neni, tadaun edeke ngolo. Abu ngesi towo alokiding ngitunga lu atoakito ka lu ayerete. Arai ekimar a ngitunga alu atoakete 14,700, peimarunitae lu atoakete anakisech a Kora. Ani edaun edeke loaronon ngolo, abu Aron tobong nia Musa ani ayei, anakituk a eam. Tolimok Ekapolon Akuj Musa tama, “Tolimok Ngisirael kiinakis iyong ngakito ngatomon ka ngaarei, tolemut ngikarikok a ngitela kadaang ngakito ngapei-pei. Kigir ekiro a ekarikon kadaang nakitoe keng, sodi kigir ekiro a Aron nakitoe a ekitela a Lawi. Emini ekarikon a ekitela daang akitoe keng. Yaa ngakito nguna loeam kang kiwaak ngaren asaduku a achamunet, ni kiriamunor ayong ka iyong. Nakaneni erupuni akitoe a itwaan ani aseuni ayong. Aloger kangolo atubori ayong eburas lokisuburaate esi Ngisirael jiik.” Abu Musa kisuruor Ngisirael. Apot ngikarikok daang nakis Musa ngakito. Arai daang ngakito ngatomon ka ngaarei, akitoe apei arai aka ekitela a epei, sodi apon kimorikinae ka akitoe a Aron dang. Ani erumor kiwaak Musa ngakito daang tooma eam, ngaren asaduku a achamunet a Ekapolon Akuj. Ani akolongit nache, elomari Musa loeam, abu ngesi kingolik akitoe a Aron, na arai aka ekitela a Lawi kerupu. Kebu topukia ka akilikiluun, nabo akoniunit ageor na ikoni engoomo. Abu Musa tolem ngakito daang kidodik Ngisirael. Apot kesi kingolikis nguna kesubakin, sodi abu ekarikon daang tolema akitoe keng a ilope. Tolimok Ekapolon Akuj Musa tama, “Tobua akitoe a Aron ngaren asaduku a achamunet. Ikachakinio akitoe ngina neni toliwor akichikichiket Ngisirael lukasechak. Idodikini kesi atamar etoakete pekepalikis eburas.” Tosubak Musa nguna loger lo adungokinitor Ekapolon Akuj. Tolimokis Ngisirael Musa tamasi, “Ikwa esal bo kosi ngolo! Ani ketoani itwaan daang ni ebuni diyete eam, ikwa ngikatoak bo sua daang!” Tolimok Ekapolon Akuj Aron tama, “Iyong ka talokookon ta Ngilawi kesi kirirao erai kesechakin ibore aloeam kang. Nakaneni iyong bon ka talokookon kitingete ngakiro erai kesechakin etich a ngimurok a Akuj. Toriku ngiyenet kon lu eraakasi ngitunga a ekitela a Lawi, kiruko ka iyong kingarakis, sodi tosubeta iyong ka talokookon etich aloeam. Ejoikinit kesi esubete etich kech lokisubakinito iyong, ka ngitichisio lua eam, nakaneni nyechamitae kesi etapete ngiboro lu italeunitoe lu eyakasi lowae lo italeunitoe kori lokeno a ngakipeyos. Ani ketap kesi ngiboro ngulu, etoakete kesi aapei ka iyong. Ejoikinit kesi esubete etich ka iyong, nabo tosuba ngitichisio kech daang aloeam, nakaneni emam itwaan iche ni isubete ka iyong etich aapei. Iyong ka talokookon make isubete etich alowae alo italeunitoe ka ekeno a ngakipeyos, nyaangoikinea ayong Ngisirael. Ayong ngesi aseu ngiyenet kon lu eraakasi Ngilawi Alo Isirael, etiliwo kesi ainakinet nakainakinitae ayong. Etaleun kesi tarata ngikang sodi tosubeta ngitichisio kech aloeam. Nakaneni iyong ka talokookon kesi isubete ngitichisio daang iraakasi ngimurok a Akuj alokeno alo ipeyonokinere Akuj ka ewae lo italeunitoe noi. Erai etich lo a ngiboro kangulu ekon kainyo kainak ayong iyong ainakinet na iliworor emuron a Akuj. Itwaan niche cha daang ni ebuni diyete ngiboro lu italeunitoe, eario.” Tolimok Ekapolon Akuj Aron tama, “Kingolik a, kainakinit ayong iyong ngadekon daang nakalemanakinio ayong, na nyeraakasi ngakipeyos na inomio. Kainakinit ayong iyong ka talokookon ngadekon nguna toliworos nginerin kus jik. Ngakipeyos na italeunitoe noi daang na nyinomio alokeno a ngakipeyos, eraakasi ngakon. Ngakipeyos nguna kesi ngakipeyos a ngalemet, ka ngakipeyos a akisech, ta ngakipeyos a atachanot. Ibore daang nikalemikinitae ayong erai akipeyos na italeunitoe, erai ikon ka talokookon. Echamitae iyong inyami ngakipeyos nguna ani italeunitoe, nabo ngikiliok make echamakinitae enyamete. Kitiliwosi ngiboro ngulu lu italeunitoe. “Nabo dang ngadekon daang nakalemikinito Ngisirael ayong ka ngadekon na iwakiwakio, eliworosi ngakon. Kainakinit ayong iyong ka talokookon, ka tanakookon ngadekon nguna toliworos ngakus. Epedori itwaan a awi kon daang ni italeunitoe akinyam. “Kainakinit ayong iyong ewae loajokon daang a ngalemet ana isiaunio tolemae ana kalemanakinete Ngisirael ayong ekaru daang, na eraakasi akimiet a ngikito, ka emuna, ta ngikinyam. Eraakasi daang ngakon. Epedori itwaan a awi kon daang ni italeunitoe akinyam. “Ibore daang alo Isirael ni italeunio anikang emam itwaan itingakinit itwaan, erai ikon. “Iuriuna ni ekingaren daang kerai alotunga kori alobaren, nikalemikinito Ngisirael ayong erai ikon. Nakaneni ejoikinit iyong ichamuni ibore ni elemunio tobuarea ikoku ni ekingaren, nabo tacham tani ibore ni elemunio tobuarea ibarasit daang ni nyitaleunitoe. Ebuario ngide lu eraakasi elap epei, a ngaropiyae a ngakan itemem ka egielit losek egieleenere. Nakaneni emam itwaan egieli tobua ngiuriuna lua ekingaren a ngaatuk, ka ngamesekin, ta ngaanei, kainyo eraakasi ngikang jik, ejoikinit ipeyeo. Towatak ngaakot kech lokeno a ngakipeyos, sodi topee nikataronon erai akipeyos na epeikinitoe Akuj nakajoikinit ayong akukuny keng. Erai akiring a ngibaren kangulu akon loger lo eraakatar atorobu na iwakiwakio ka amuro nakitalio ngakon. “Kainak ayong iyong ka talokookon, ka tanakookon ngadekon daang na italeunitoe nakalemikinito Ngisirael ayong. Eraakasi ngakus jik. Erai ibore achamunet na nyichwangakin, na kichamakin ayong ka iyong ta ngalesea kon.” Tolimok Ekapolon Akuj Aron tama, “Emam ibore ni erai ikiruma daang ni iriamuni iyong, nabo emam akwap a Isirael nakitiakakinio iyong. Ayong Ekapolon Akuj arai ibore ni iitanit iyong daang.” Tolim Ekapolon Akuj tama, “Ainak ayong Ngilawi alemunet apei anatomon a ngadekon ana kalemanakinete Ngisirael ayong. Erai ibore ngini ngesi etachitere etich lo esubete aloeam kang. Nyejoikinit Ngisirael luche enangete diyete eam kainyo kesubakis kongina ichanyunete akitu. Napei tokona jik, Ngilawi make esubete etich aloeam ka aweikin ngakiro a eam daang. Erai ibore etal lokajik lo iwapete tani ngalesea kus. Emam Ngilawi ibore ni eliwor ikech jik alo Isirael, kainyo ainak ayong kesi alemunet apei anatomon a ngadekon anakalemanakinete Ngisirael ayong. Ngakiro nguna abalar ayong kesi emam ibore ni eliwor ikech jik alo Isirael.” Todungok Ekapolon Akuj Musa atamar tolimok Ngilawi tama, “Ani idiaunete esi alemunet apei anatomon, nakiinakini esi Ekapolon Akuj toliwor akus, ejoikinit esi ilemunete alemunet apei anatomon a ngadekon kanguna tolemikis Ekapolon Akuj. Isikwaanikinio ngadekon nguna ka ngadekon na elemuni eketan analemet anakitet, ka emuna lokitetet. Aloger kangolo, ilemikinete esi dang Ekapolon Akuj ngadekon na eraakasi ngakeng analemunet kadaang anapei-pei, ani eyakasi natomon-tomon idiauniyete esi alo Isirael. Tolemutu alemunet na a Ekapolon Akuj ngina nakis Aron lo erai emuron a Akuj. Tolemutu ngadekon naajokak noi ani eyakasi nguna idiaut esi. Ani ilemunete esi na ejokak noi, totinga esi lu idongete loger lo etingeenea eketan dang ibore ni idongi na elemunea ngadekon keng kerumor. Inyamete esi ka ngitunga a ngawiyei kus akimuj na idongi anicha inyameta, kainyo erai ngesi etachitere etich lo isubete esi aloeam. Nyisechito esi erai kinyam, kainyo ilemikis esi Ekapolon Akuj ewae loajokon noi. Tochoito inyasunete ngainakinet a Ngisirael na italeunitoe, ani inyameta alemunet tani apei eringa nyipotoro ewae loajokon noi. Ani kisubakis esi kongina, kiario.” Tolimok Ekapolon Akuj Musa ka Aron tama, “Eger a etal alo adungu Ekapolon Akuj ngesi logo. Tolimokisi Ngisirael atamar kitorujakis esi aite naarengan na emam ni ichwangakina tarai na nyitusubitae etich a ache, sodi taramut nia Eleasar alo erai emuron a Akuj. Taramarae aite ngina nikalapatan a adakar taarae alongaren Eleasar. Ani erumor tolem Eleasar ngaakot ngache a ekimoin keng kiteraterak ngakiteraterakinet ngakan-kaarei lowae loa eam. Tolemunae aite daang etia ni etia, eleu, ka akiring, ka ngaakot, ta ngiboro a akook, kinomae alongaren Eleasar. Ani erumor tolem ngesi ngakito a echekereng ka isopo,*g** ta auno naarengan, tachakak kesi nakim. Ani kesubaki nguna kerumor, kilota ngesi ngiworui keng ka akwaan keng, nakaneni eliwor ngesi lo eringa nyitaleuno tanang ebong. Ejoikinit itwaan ni inomi aite dang ilotari ngiworui keng ka akwaan keng, nakaneni eliwor ngesi lo eringa nyitaleuno tanang ebong. Ani erumor tolem itwaan ni italeunitoe ekuron a aite kangina sodi kiwaak lowae lo italeunitoe a adakar. Iwaakinio ekuron ngolo neni toliworos Ngisirael imorenakinete ka ngakipi na italeununotor. Eliwor akitaleuno ngina alemaret akisech. Ejoikinit itwaan ni alemuni ekuron ilotari ngiworui keng, nakaneni eliwor ngesi lo eringa nyitaleuno tanang ebong. Eliwor etal logo lokajik ani a Ngisirael ka ngitunga a ngakwapea anache lu elomito kiding kech. “Itwaan cha daang ni etapi itwaan nikatoan, eliwor ni nyitaleuno a ngirwa a ngikan-kaarei. Italeun ngesi a ngakipi ana italeununere, akolongit na a ngauni ka na a ngakan-kaarei, sodi toliwor ngesi ni etaleun. Nakaneni ani pekilotar ngesi a ngakipi ana itosegare, akolongit na a ngauni ka na a ngakan-kaarei, nyitaleun ngesi. Itwaan cha daang ni etapi itwaan nikatoan sodi nyiitoseg, eliwor ni nyitaleuno kainyo emam itwaan awataki ngesi ngakipi na itesegare. Inyasuni ngesi eam a Ekapolon Akuj nabo nyimarunio ngesi atamar erai ipei a ngitunga a Akuj. “Ani ketoaniki itwaan loeam, eliwor itwaan cha daang ni eyei loeam esaa ngolo, kori ni elomari loeam, ni nyitaleuno a ngirwa a ngikan-kaarei. Achupa cha daang ka amot na emam apukenit enikenikinitoe, eliwor na nyitaleuno. Itwaan cha daang ni etapi itwaan ni aario, kori ni atoani bon anikalapatan, kori itwaan cha daang ni etapi akoit a itwaan kori aliel, eliwor ni nyitaleuno a ngirwa a ngikan-kaarei. “Ani esakio akitaleun itwaan ni nyitaleuno, elemunio ekuron a aite anaarengan ana kolong enomio toliwor akipeyos a akisech, kiwaakinae natubwa sodi kiatakinae ngakipi nakaliwak. Kotere itwaan ni ekingaren, elemuni itwaan ni italeuno akitoe a ekitoe alobe isopo,*g** kirepak nakipi sodi kiteraterak loeam ka ibore daang ni eyei loeam, ka ngitunga lu eyakasi neni. Kotere itwaan nia ngiarei, elemuni itwaan ni italeuno ngakipi kiteraterak nitwaan ni atapit akoit a itwaan, kori atapit itwaan nikatoan, kori atapit aliel. Elemuni itwaan ni italeuno ngakipi kiteraterak nitwaan ni nyitaleuno akolongit na a ngauni ka na a ngakan-kaarei. Ani akolongit na a ngakan-kaarei, kitoseg ngesi itwaan. Ilotari ngesi ngiworui keng sodi kilotar anakipi, ani edooyori akolong toliwor ni italeuno. “Itwaan daang ni aliwor ni nyitaleuno, ni nyitosega, idongi ngesi erai ni nyitaleuno kainyo emam itwaan abukoki ngesi ngakipi na itosegare. Inyasuni ngesi eam a Ekapolon Akuj nabo nyimarunitae atamar erai ipei a ngitunga a Akuj. Kirichakisi etal logo jik. Ejoikinit tani itwaan ni iteriteri ngakipi ilotari ngiworui keng. Itwaan cha daang ni etapi ngakipi nguna eliwor ni nyitaleuno tanang ebong. Ibore daang ni cha etapi itwaan ni nyitaleuno, nabo itwaan daang ni cha etapi ibore ngini eliwor ni nyitaleuno tanang ebong.” Tanangut Ngisirael daang nariet a Sin elap loa ekingaren, sodi toloma Kadech. Totoan Miriam kaina sodi tonukakinae neni. Amam ngakipi ani alomito kesi kaneni. Tochunun ngitunga kiriama Musa ka Aron sodi kiburakis ebalasi, “Arai bo kolong atotoaka alongaren eam a Akuj na atoaketa Ngisirael luche dang. Nyo kolong kiyauneta esi sua nariet naga? Isakete esi atotoaka sua ka ngibaren kosi a? Nyo kolong kipudunioto esi sua alo Misiri kiyaut nakwap naaronon na emam ibore erupununi naga? Emam ngikinyam, emam ngameyana, emam ngamusabib, emam ngalam. Emam tani nia ngakipi anamatan!” Torotokis Musa ka Aron alotunga sodi towaa anakituk a eam. Kijuuruoto kesi tatapa ngireetin ngalup, sodi kingolikis akwangis naakwaan kea a Ekapolon Akuj. Tolimok Ekapolon Akuj Musa tama, “Tolem aburo na eyei ngaren asaduku a achamunet, ani erumor tochunakis iyong ka Aron ngitunga. Kisuruorik ataaba yaga iteete kesi daang, sodi iyesunosi ngakipi anataaba, tamata ngitunga ka ngibaren kech.” Tolot Musa tolem aburo loger losek adungokinitor Ekapolon Akuj. Tochunakis ngesi ka Aron ngitunga ngaren ataaba, tolim Musa tama, “Topupokisi esi ngikechanak lugu! Esakitae sua kilemikini esi ngakipi anataaba kana?” Ani erumor kikea Musa aburo taram ataaba ngaramet ngaarei, sodi kiyesun ngakipi elalak, tamata ngitunga daang ka ngibaren. Nakaneni kikilak Ekapolon Akuj Musa ka Aron tama, “Aloger emamakar esi anupit anagogongu kang ana italeuno alongaren Ngisirael, nyirikete esi kesi tolomasi nakwap na kolong echikakini ayong kesi.” Asubasi ngakiro nguna alo Meriba, ani kolong esuburaata Ngisirael Ekapolon Akuj, sodi kidodik Ekapolon Akuj kesi atamar etaleuno ngesi. Tomea Musa ngitunga alo Kadech toloto lokapolon a Edom. Tolimokis ngesi tamasi, “Ebunit akiroit naga ani eya ngiyenet kon, lu eraakasi ngitela a Ngisirael. Iyeni iyong ngichan lu kiriamu sua, ka eger lokolong alooso taapaakosi Misiri, nikolong kibooyo sua ngikaru lukaalak. Aboliatar Ngimisiri taapaakosi ka sua sodi ekaloikisi sua Ekapolon Akuj atamar kingarak. Abu ngesi kiira akigoro kosi, sodi tomeu emalaikat lo kipuduni sua alo Misiri. Kiya tokona sua lore a Kadech lo eyei lokukuor a akwap kon. Tachamakinae kare sua kitori nakwap kon. Nyikinachari sua alorukudi atoloto namanat kus kori namanat a ngimusabib, nabo nyikimasi ngakipi a ngakare kus. Kitori sua lorukudi loapolon jik tanang kipudori anakwap kon.” Nakaneni tatachut Ngiedomae tamasi, “Kinger sua esi itorete nakwap kosi! Ani kisak esi akitorun, kiponi sua etijikisi esi.” Tolimut Ngisirael tamasi, “Kitori sua lorukudi loapolon nakaneni ani kimat sua kori ngibaren kosi ngakipi kus, kitachi sua. Akitor bon kisaki sua.” Tolimut nabo Ngiedomae tamasi, “Kinger sua!” Tolot ajore a ngasigerea natikajwon akitijikin Ngisirael. Ani aloger angerioto Ngiedomae Ngisirael itorete nakwap kech, apot Ngisirael toreas kitoro lorot eche. Torotokis Ngisirael daang alo Kadech tanangut moru a Hor, lokukuor a Edom. Tolimok Ekapolon Akuj Musa ka Aron kaina tama, “Nyelomari Aron nakwap nakolong echikakini ayong Ngisirael. Etoani ngesi kainyo iwounete kolong esi luarei akiwap etal kang alo Meriba. Toriko Aron ka lokookeng Eleasar moru a Hor, ani enangi inaa, tobut ngiworui lu enapit Aron eraakar emuron a Akuj sodi kitanap Eleasar. Etoanikini Aron inaa.” Tosubak Musa nguna adungokinit Ekapolon Akuj. Todokasi kesi kidiama emoru a Hor iteete ngitunga daang. Tobut Musa ngiworui a Aron lu eraakar emuron a Akuj kitanap Eleasar. Totoan Aron kaina alokidiama emoru, sodi totiyaunos Musa ka Eleasar alokidiama emoru. Apot ngitunga daang toyena atamar atoana Aron, sodi tosutonokis a ngirwa a ngitomwon-uni kotere akitu keng. Na eirarea ekapolon a Ngikanaan lo a Arad, lo alomit Negeb atamar eponito Ngisirael iwapito erot lo a Asarim abu ngesi kitijik kesi sodi torik ngiche. Apot Ngisirael kikongo ani a Ekapolon Akuj ebalasi, “Ani kimiek iyong sua atoremo ngitunga lugu, kitiliwori sua kesi ka ngirerea kech ngikon jik, sodi enyasutu ngirerea kech.” Abu Ekapolon Akuj kiira ngakiro kech, sodi kingarak kesi akirem Ngikanaan. Apot Ngisirael tomunyasi kesi nabo kinyasut ngirerea kech, sodi tolimokis akwap ngina ekiro be Orima. Torotokis Ngisirael alomoru a Hor, kiwapa erot lo elosi napak a Akaba sodi kirimieto akwap a Edom. Apot kibunyakinos analotoru kech, sodi kisuburata Akuj ka Musa, ebalasi, “Nyo kolong kipudunio iyong sua alo Misiri atotoanikisi nariet na emam akimuj ka ngakipi naga? Nyikinaikini sua nabo akimuj naaronon naga!” Abu Ekapolon Akuj tomeu ngimunio luadwarak lotunga, tokonyakonyaasi Ngisirael lukaalak totoaka. Potu ngitunga nia Musa tamasi, “Kisech sua ani kisuburaa Ekapolon Akuj ka iyong. Kilip tokona Ekapolon Akuj tolema ngimunio lugu.” Sodi abu Musa kilipak ngitunga. Ani erumor tolimok Ekapolon Akuj Musa atamar tosubak emun a asuat kiwaak napir, sodi itwaan daang ni ekonyi emun, kingolik emun lo a asuat tojoker. Abu Musa tosubak emun a asuat ananyang sodi kiwaak napir. Itwaan cha daang ni akonyi emun, abu kingolik emun lo a asuat ananyang, sodi tojoker. Torotokis Ngisirael toloma Obos. Ani erotokinete kaneni, toloma Abarim anariet ana eyei kide akwap a Moab. Ani erumor toloma nadipo a Sered. Ani enyounete kaneni, toloto toloma kwap angolol a Arinon, anariet ana enangit nakwap a Ngiamor. (Arai Arinon ekukuor a Ngimoab ka Ngiamor.) Ngakiro nguna ngesi igiritere nakitab a ngijiesinei a Ekapolon Akuj atamar, “Ere a Waeb anakwap a Supa, ka ngadipoe a Arinon, ka ngakokoriyoret a ngadipoe, na enangito lore a Ari, tanang lokukuor a Moab.” Ani enyounete kaneni toloto ni enyaritae Ngakare, ni alimokinea Ekapolon Akuj Musa tama, “Tochunak ngitunga daang wapei ainak ngakipi.” Sodi toeokis Ngisirael eeos logo. “Ngakare yautu ngakipi kus. Sodi atoeonokisi sua ngakipi. Akar na abokete ngikarikok a ngitunga, ka ngikajakaanak. Ebokio a aburo a apolou, ka ngakito kech.” Torotokis kesi anariet tananga Matana. Ani enyounete kaneni, toloto Naaliel, ani enyounete kaneni toloto Bamos, ani enyounete kaneni toloto nadipo a akwap a Ngimoab, kwap aita a emoru a Pisiga, na erounit ariet. Ani erumor tomeasi Ngisirael ngitunga nia Sion alo arai ekapolon a Ngiamor tamasi, “Kimiekinae sua etoro nakwap kon. Kiwapi sua ka ngaatuk kosi erukudi jik, nyikinachari namanat kus ka namanat a ngimusabib, nabo nyikimasi ngakipi a ngakare kus. Kitori sua lorukudi loapolon jik tanang kipudori anakwap kon.” Nakaneni abu Sion tonger Ngisirael itorete nakwap keng. Abu ngesi tochunak ngasigerea keng toloto Yaasa anariet kitijikis Ngisirael. Nakaneni apot Ngisirael taara ngimoe kech lukaalak alojie, sodi todemasi akwap kech napei anangolol a Arinon tanang kwap Yabok, nia Ngiamon, kainyo eyokiyo ekukuor a Ngiamon lokojokon. Apot Ngisirael todemasi Ngiamor ngirerea daang a aapei ka ere a Echibon ka ngadakarin keng daang, sodi toloma neni. Echibon arai ere apolon a Sion alo arai ekapolon a Ngiamor, losek etijit ekapolon longorot a Ngimoab, sodi tolema akwap keng daang tanang nangolol a Arinon. Ngakiro nguna kesi ebalatar ngikaitak eeosi, “Potu Echibon, lore a Sion alo erai ekapolon! Kisaki engolikisi edukio, tobong loger longorot. Kolong alore alo a Echibon kalo, anyouniyete ngasigerea a Sion loger a akim. Kinyasut ere a Ari alo Moab, kirikasi ngimukur alowae alo alokidiama Arinon. Oitiakoi! Abe etioko nginyas ianyunete esi ngitunga a Moab! Esi lu ilipito Chemoch, Kimunyar esi! Emiekini kolong akuj kus ngikiliok edokinete nakwap ache. Kimiek ngaberu eliwor ngarikon a ekapolon a Ngiamor. Nakaneni amunyar tokona ngalesea kech. Napei alo Echibon tanang Dibon. Napei alo Nachim tanang Nopa, diyete Medeba.” Sodi apot Ngisirael toloma nakwap a Ngiamor. Tomea Musa ngitunga akireb Yaser. Tolemasi Ngisirael ere ngolo ka ngadakarin keng, sodi kitwarakis Ngiamor lu alomito neni. Ani erumor toreas Ngisirael kiwapakis erot lo elosi Bachan. Abu Ogu lo arai ekapolon a Bachan potu ka ngasigerea keng akitijikin Ngisirael alo Edirei. Tolimok Ekapolon Akuj Musa tama, “Nyiem ngesi. Kainakini ayong iyong agogongu na idwangea ngesi, ka ngitunga keng daang, ta akwap keng. Tosubakinea ngesi ngakiro nakolong isubakinea iyong Sion, lo arai ekapolon a Ngiamor lo apolokinit ere a Echibon.” Sodi apot Ngisirael taara Ogu, ka talokookeng, ta ngitunga keng daang. Emam tani ipei ni abu topuun toyar. Ani erumor toloma kesi nakwap a Ogu. Torotokis Ngisirael toloma naroatin a Moab kide Yorudan, ni ekienyikina ka Yeriko. Ani iirari Balak lokookeng a Sipor lo arai ekapolon a Moab, ngakiro na asubeta Ngisirael ekapolon a Ngiamor ka eger lo alalakiata Ngisirael, tobul ngesi noi ka ngitunga keng daang. Tolimokis Ngimoab ngikarikok a Ngimidian tamasi, “Irigaari ajore naga ibore daang kane atipei, loger a emong alo irigae nginyia edak.” Sodi abu Balak ekapolon a Moab tomea ngitunga anyarare Balaam lokookeng a Beor lo ayei Pesor, diyete angolol a Eupurate anakwap a Amau. Tolimokis kesi Balaam ngakiro a Balak na abalasi, “Asaki ayong iyong toyen atamar abu ebukut etia ni etia alo Misiri. Apetakin ngitunga keng wadaang esakete alemar akwap yok. Elalak kesi kidwangito ngoni. Bua kare kilamakinae ngitunga lugu, ejok bo atopedosi ngoni akidwang kesi ka akiritar anakwap. Ayeni ayong atamar ani kilimu iyong apiaro, epiario ngitunga. Ani kilimu iyong ngilam, ilamio ngitunga.” Sodi apot ngikarikok a Ngimoab ka Ngimidian yaasi atachanot a ngilam nakis Balaam, tolimokis tani ngakiro a Balak. Tolimok Balaam kesi tama, “Topero nege ani moi katolimok ngakiro na kalimokini ayong Ekapolon Akuj.” Sodi topero ngikapolok a Ngimoab ngulu neni ka Balaam. Bu Akuj nia Balaam kingit tama, “Tangae ngitunga lu irukitotor iyong lugu?” Tatachu Balaam tama, “Balak lo erai ekapolon a Moab ngesi emeunit kesi alimokin ayong atamar apetakin ngitunga ngiche apote alo Misiri akwap wadaang. Esaki Balak ayong elam ngitunga ngulu, topedorea akitojwore kesi ka akiritar.” Tolimok Akuj Balaam tama, “Nyiirukosi ka ngitunga lugu, nabo nyiilam Ngisirael kainyo apiarit ayong kesi.” Ani enyouni Balaam nataparach tolimok ngitunga a Balak tama, “Toloto nakwap kus. Anger Ekapolon Akuj ayong kirukori ka esi.” Sodi tobongosi kesi nia Balak tolimokis tamasi, “Awouni Balaam akirukun ka sua.” Tomea nabo Balak ngikarikok ngiche lukaalak nabo topolok kidwangito lu ekingaren. Toloto kesi tolimokis Balaam ngakiro a Balak na abalasi, “Wara kare ibore iche nyikiratak iyong abunere nikang! Katachi ayong iyong lokojokon nabo kasubakinea daang na isaki iyong. Bua kare kilamakinae ngitunga lugu.” Nakaneni tatachu Balaam tama, “Tani kainaki Balak ayong ngaropiyae daang ka egolit lo eyei kai keng, nyapedori ayong echwangak tani wadiochichi ngakiro na adungu Ekapolon Akuj na erai Akuj kang. Topero nege kare, loger lokolong aperioto luche, sodi atoyenea keya ngakiro ngache kalimokini Ekapolon Akuj ayong kori kemam.” Bu Akuj nia Balaam nakwaare tolimok tama, “Ani keponito ngitunga lugu anyarare iyong kirukosi ka kesi, tonyou, tolot kirukosi ka kesi, nakaneni tosub nguna kalimokini ayong iyong make.” Ani enyouni Balaam nataparach, todoka losikiria keng kirukosi ka ngikarikok lu a Ngimoab ngulu. Abu Akuj tongo ani alosio Balaam. Ani na ametor Balaam esikiria keng, arukito ngesi ka ngikedalak keng ngiarei. Bu emalaikat a Akuj towo alorukudi kiratak ngesi nyiitor. Ani ingolikini esikiria emalaikat ewey totingite ekileng, abu torei toisik erukudi tolot namanat. Taram Balaam esikiria tobuu lorukudi. Sodi towo emalaikat alorot aloochi alo angichakina kiding ngamanat ngaarei, toya ngawasea lowaitin daang. Na engolikinea esikiria emalaikat, tolot tatapakin nawas, sodi tokiritoo awas akeju a Balaam. Taram nabo Balaam esikiria. Tolot nabo emalaikat ngaren. Tolot towo anikaadingan ani amam ni itorio alowaitin kadaang. Ani ingolikini esikiria emalaikat nabo, kinapakin nalup. Tongo Balaam kisiak akidet esikiria a aburo keng. Kisuruorik Ekapolon Akuj esikiria, sodi tolimok esikiria Balaam tama, “Nyo kasubakinea ayong iyong? Nyaanu ngakiro kiramea iyong ayong ngaramet nauni nugu?” Tatachu Balaam tama, “Kainyo kitabangaan iyong ayong! Arai atotingite ayong ekileng, kaar ayong iyong.” Tatachu esikiria tama, “Meere ayong esikiria kon a, lo kimeat iyong ngirwa daang lu iyarea iyong a? Kasubea ayong iyong nakanuan loger logo a?” Tatachu Balaam tama, “Mam.” Ani erumor kisingolik Ekapolon Akuj Balaam emalaikat ewei etingit ekileng. Tadakakin Balaam kwap tatap ereet keng ngalup. Kingis emalaikat tama, “Kotere nyo iramea iyong esikiria kon ngaramet ngauni kona? Abu ayong akiratakin iyong kainyo nyechamitae iyong iyei nalotoru naga. Abu esikiria kon kengolik ayong torei ngareet ngauni. Arai nyeerei esikiria ngolo anikang, kimasit iyong ekileng sodi emiek esikiria toyar.” Tatachu Balaam tama, “Asech ayong. Peayeni ayong atamar iwei iyong alorukudi akiratakin ayong. Nakaneni ani kironikinit iyong alosi ayong ngaren, abongori ayong nawi.” Tolim emalaikat tama, “Kirukosi ka ngitunga lugu, sodi kiruor ngakiro nakalimokini ayong iyong make.” Sodi torotokis Balaam ka kesi. Ani iirari Balak atamar ebunit Balaam, abu tolot akisiriamiar ngesi alore a Ari, alo eyei lokwaas a angolol a Arinon, lokukuor a Moab. Tolimok Balak ngesi tama, “Nyo kolong peibunio iyong na ameunitor ayong ngitunga ekingaren? Itamit iyong atamar nyapedori ayong akitach iyong lokojokon a?” Tatachu Balaam tama, “Abu ayong tokona! Nakaneni agogongu ani eyei ayong? Apedori ayong alimun ngakiro nakalimokini Akuj make.” Sodi toloto Balaam ka Balak lore a Usos. Tongol Balak ngaatuk ka ngamesekin kaina sodi nak Balaam ka ngikarikok lu arukitotor akiring. Ani ataparach nache, toriko Balak Balaam ni enyaritae Bamos Baal. Neni ngesi apedorea Balaam akingolikin Ngisirael epewae lu aapiyete. Tolimok Balaam Balak tama, “Todukokinae ayong ngikenoi a ngakipeyos ngikan-kaarei nege, ani erumor kiinu ngimongin ngikan-kaarei ka ngamesekin ngakan-kaarei,” Tosubak Balak loger lo alimokinitere. Kipeye Balaam emong ka amesek alokeno a epei kech kadaang. Sodi tolimok Balaam Balak tama, “Towo kane alodiyete ngakipeyos kon, sodi atolot engolik chene kianyun ka Ekapolon Akuj kori kemam. Kalimokini ayong iyong ngakiro nakalimokini ngesi ayong daang.” Sodi tolot ngesi bon naita a imukura taanyunos ka Akuj, tolimok Balaam Akuj tama, “Adukok ayong ngikenoi a ngakipeyos ngikan-kaarei, nabo epeyoo emong ka amesek alokeno a epei kadaang.” Tolimok Ekapolon Akuj Balaam ngakiro na elimuni, sodi tomea ngesi nia Balak alimokin ngakiro nguna. Tobongo ngesi toriam Balak eringa ewei anakipeyos keng aapei ka ngikarikok daang a Moab. Todwar Balaam ngakiro nu tama, “Kayau ayong Balak, ekapolon a Moab, kayau alo Siria, ani a ngimoru a akide. Ebala, ‘Bua kilamakinae Yakobo. Kilamakinae Ngisirael’ Ekokini ayong elami ibore ni nyilama Akuj ai? Kori echien toringa Ekapolon Akuj nyichieno ai? Etee ayong kesi anaitae a ngimoru, Etee kesi alomukur, erai ebukut lo ibooyi bon. Eyenete atamar kipiaritae kesi akidwang ngibukui luche. Ikote ngalesea a Yakobo apua. Elalak nyimarun. Kimiekinae atotoan arai ipei a ngitunga a Akuj. Kimiekinae atotoan loger alu etenooko.” Sodi tolimok Balak Balaam tama, “Anukiro kisubea iyong ayong? Kayauni ayong iyong nege akilam ngimoe kang, nakaneni ipia tokona iyong kesi.” Tatachu Balaam tama, “Apedori ayong akiruor ngakiro nakalimokini Ekapolon Akuj make.” Ani erumor tolimok Balak Balaam tama, “Bua apana wache ni ipedorea iyong akingolikin Ngisirael epewae make, lu eapiyete. Kilamakinae kesi kaina.” Toriko ngesi naroatin a Sopim, kidiama emoru a Pisiga. Todukok nabo neni ngikenoi ngikan-kaarei sodi kipeyoe emong ka emesek alokeno a epei kech kadaang. Tolimok Balaam Balak tama, “Towo kane anakipeyos kon, sodi atolot ataanyun ka Akuj kaama.” Taanyun Balaam ka Ekapolon Akuj, tolimok Ekapolon Akuj ngesi ngakiro na elimuni, sodi tomea ngesi nia Balak alimokin ngakiro nguna. Tobongo ngesi toriam ewei anakipeyos keng aapei ka ngikarikok a Moab. Kingis Balak ngakiro na alimu Ekapolon Akuj sodi todwar Balaam ebala, “Bua, Balak lokookeng a Sipor. Topupok ngakiro na asaki alimun. Nyikoni Akuj ngitunga lu ingalaate Nyikoni ngesi itwaan ni ibele ngitamen keng. Itemokini ngesi ngakichiket keng. Esubakinosi na elimuni ngesi. Kalimokin ayong atamar atopia. Na epiarea Akuj, nyapedori ayong abuar apiaro ngina. Engolik ayong na isidiuno alo Isirael, atamar nyeanyunete ekeny aronon kori ngichan. Erukito kesi ka Ekapolon Akuj na erai Akuj kech. Ebalasi ngesi erai Ekapolon kech. Epud Akuj kesi alo Misiri. Ejii ngesi alowae kech loger a ekosowan. Emam asubanot, emam akapel, na epedorio asubea Ngisirael. Iruorotor tokona ngitunga Ngisirael. Ebalasi, ‘Kingolik ngakiro na asubaki Akuj!’ Ikwaan Isirael ka engatuny lokaadengan. Nyieangari ngesi mati kenyilinyili sodi kirika. Mati kemat ngaakot kangulu aar ngesi.” Ani erumor tolimok Balak Balaam tama, “Iwou iyong akilam Ngisirael, aloger kangolo, nyiipia kare kesi!” Tatachu Balaam tama, “Petakalimokinit ayong iyong atamar asubi ayong ngakiro daang nakalimokini Ekapolon Akuj a?” Tolimok Balak Balaam tama, “Bua tokona, katoriko wache. Tokona ngon kichamakini Akuj iyong ilami kesi kaina kotere ayong.” Sodi toriko ngesi Balaam kidiama emoru a Peor, lo erounit ariet. Tolimok Balaam ngesi tama, “Todukokinae ayong ngikenoi a ngakipeyos ngikan-kaarei, sodi kiinu ngimongin ngikan-kaarei ka ngamesekin ngakan-kaarei.” Tosubak Balak nguna alimokinitae, sodi kipeyoo emong ka emesek alokeno a epei kech kadaang. Abu Balaam toyen atamar esaki Ekapolon Akuj ngesi topia Ngisirael. Abu ngesi nyeelot akisak ekeny loger losek asubeene ekingaren. Torei ngesi kingolia lowae lo a ariet sodi kingolik Ngisirael elomito ngadakarin a ngitela. Bu etau a Akuj nikeng sodi todwar ngesi ebala, “Akiroit a Balaam alokookeng a Beor. Ngakiro a itwaan ani itee lokojokon. Ngae iirari ngakiro na iruoro Akuj. Iteete ngakonyen kang anaju, akisingolikinet na ebunit ani Akuj Naationon. Ibuseak ngieaman a Isirael, Ikote ngingolea erekina, kori ngamanat alokwaas a angolol, Ikote ngichuchuk lu itakinit Ekapolon Akuj, kori ngichekereng alokwaas a ngakipi. Eriamunete kesi akiru nakaalan. Kitata ngikinyam kech nalup na eupito ngakipi. Epoloor ekapolon kech kidwang Agag, nabo ekeikin apolou keng wadaang. Epuduni Akuj kesi alo Misiri. Ejii ngesi alowae kech loger a ekosowan. Emunyarete kesi ngimoe kech, kiroborobaasi ngakoyo kech, tobilibilaar ngimalea kech. Ikoni Isirael engatuny lokaadengan. Na ejotoo, emam itwaan itekienyuni. Itwaan daang ni epiari Isirael, epiario ngesi dang. Itwaan daang ni ilami Isirael, ilamio ngesi dang.” Tongo Balak noi, taramanak ngakan keng. Tolimok Balak Balaam tama, “Kanyarauni ayong iyong akilam ngimoe kang, nakaneni ipia iyong kesi ngapiaret ngauni. Kape tokona nawi kon! Abala kolong ayong katachi iyong, nakaneni kitonger Ekapolon Akuj iyong atachanot ngina.” Tatachu Balaam tama, “Alimokini kolong ayong ngitunga lukolong imeuni iyong nikang atamar tani kiinak iyong ayong ngaropiyae daang ka egolit lo eyei kai kon, nyapedori ayong echwangak ngakiro na adungu Ekapolon Akuj sodi atosub ngakiro kang a ilope. Eruoro ayong ngakiro nakalimokini Ekapolon Akuj atamar tolim make.” Tolimok Balaam Balak tama, “Abongori tokona ayong lotunga kang, nakaneni ani eringa nyerotokino, kechikichiki ayong iyong anakiro anamoi esubakineta Ngisirael ngitunga kon.” Ani erumor todwar ngesi tama, “Akiroit a Balaam a lokookeng a Beor. Ngakiro a itwaan ani itee lokojokon. Ngae iirari ngakiro na iruoro Akuj sodi toriam aosou a Akuj Naationon. Iteete ngakonyen kang anaju, akisingolikinet na ebunit ani a Akuj Namerikanyer. Engolik ayong na isidiuno, nabo aanyunga Isirael. Elomuni ekapolon lo ikoni ekanyerit lokariran alo Isirael. Elomuni ngesi alo Isirael loger a etop. Itijikini ngesi ngikarikok a Moab, nabo kidwang ngitunga a Set daang. Idwangi ngesi ngimoe keng alo Edom. Sodi kitiliwo akwap kech akeng, tarai Isirael cha erai ekedwangan. Ipudaari Isirael kesi, tomunyasi tani lu epuunosi.” Ani erumor kingolik Balaam Ngiamalek anakisingolikinet keng, sodi todwar tama, “Amalek kolong ajwono alobukui kadaang, nakaneni ani ekisidi, emunyario ngesi jik.” Abu ngesi kingolik Ngikenis anakisingolikinet keng sodi todwar tama, “Emam ni ilomito esi ibore eemitae. Ikwaan ka akai a ikeny na engichakina nataaba, nakaneni kimunyario esi Ngikenis nakirikio Asiria esi toliworos ngirikon.” Todwar nabo Balaam tama, “Tangae ngitunga lu echunakina kwap lugu? Epote ngikaremok alo Kupuro kitorut nanam. Eremete kesi Asiria ka Eber, nakaneni emunyario ngikaremok ngulu jik.” Tonyou Balaam tobong nawi keng, sodi tolot Balak dang lowae keng. Na alomitotor Ngisirael nadipo a Awoi, apot ngikiliok kisiakis akiper ka ngaberu a Ngimoab na ayakasi neni. Apot ngaberu nguna tanyaraasi kesi ni epeyonokinere akuj a Moab. Kimuja Ngisirael akimuj ngina, nabo kilipa akuj ngina, na anyaritae Baal na a Peor. Tongoik Ekapolon Akuj kesi sodi tolimok Musa tama, “Tolem ngikarikok a Ngisirael daang, taar kesi anakonyen a itwaan kadaang, sodi nyaangoikinea ayong nabo ngitunga.” Tolimok Musa ngikatubok ngakiro a Ngisirael tama, “Echamitae ipei kus daang eari itwaan daang alokitela keng ni aliwor ilipit Baal na a Peor.” Abu Esiraelit epei yau aberu na arai Amidianit kilomak loeam keng iteete Musa ka ngitunga daang. Esaa ngolo, egorosi Ngisirael anakituk a eam a Akuj. Pineas lo arai lokookeng a Eleasar tarai etatait a Aron alo arai emuron a Akuj, na engolikinea ngakiro nguna abu tonyou torotok alotunga. Tolem ngesi akwara, kiwapak ekile ka aberu aloeam, sodi kichum a akwara daang kwasiarei akichumet apei. Eger ngolo ngesi atuboror edeke loaronon lo abu tomunya Ngisirael. Nakaneni aarit sek edeke ngolo ngitunga ngabunge ngatomwon-arei ka ngoomwon. Tolimok Ekapolon Akuj Musa tama, “Kotere ngakiro na asubaki Pineas, nyeringa ayong angoikinit Ngisirael. Angeri Pineas anaikin akitere akuj ache ilipitae pearai ayong. Ngakiro nguna ngesi peamunyarea ayong kesi a angoit kang. Aloger kangolo, tolimok ngesi atamar kichamakin ayong ka ngesi jik. Eliworosi ngesi ka ngalesea keng ngimurok a Akuj jik, kainyo angeri ngesi ngakujo nache pearai ayong, nabo ayau ngesi arimakino a ngasechesea lotunga.” Anyaritae Esiraelit lo aario erukito ka aberu a Midian Simri lokookeng a Salu alo arai ekapolon awi alokitela a Simeon. Anyaritae ekiro a aberu Anamidianit kangina Kosibi nakookeng a Sur alo arai ekatukon a ngitunga a emachar a eche alo Midian. Todungok Ekapolon Akuj Musa tama, “Torem Ngimidian sodi tomunya kesi, kotere ngakiro naaronok kisubeta kesi esi nakingalaata esi alo Peor, nabo kotere ngakiro a Kosibi ana aario alo Peor, ngirwa lu ayakar edeke loaronon.” Ani kedaun edeke loaronon kerumor, Ekapolon Akuj tolimok Musa ka Eleasar lo arai lokookeng a Aron tama, “Kimarutu Ngisirael daang a ngawiyei, daang lu enangito ngikaru ngitomwon-arei kori lu iporito nabo tarai lu epedoreto alosit lojie.” Apot Musa ka Eleasar lo arai emuron a Akuj tochunakis ngitunga kisuruoro anaroatin a Moab ekwakaye angolol a Yorudan alo Yeriko. Tanyaraut kesi ngikiliok lu anangito ngikaru ngitomwon-arei ka lu eporito, loger losek adungokinitor Ekapolon Akuj Musa. Ekimar a Ngisirael alu apudunete alo Misiri ngesi logo. Alokitela a Reuben (alo arai lokookeng a Yakobo lo ekingaren), kesi ngimacharin a Anok, ka Palu, ka Esiron, ta Karimi. Arai ekimar a ngimacharin kangulu ngikiliok 43,730. Ngalesea a Palu kesi Eliab, ka talokookeng Nemuel, ka Dasan ta Abiram. (Dasan ka Abiram ngulu kesi lukolong aseunete ngitunga. Angerete kesi ngakiro a Musa ka Aron kimorikinos ka ngitunga a Kora na angerioto Ekapolon Akuj. Apot ngalup tapakakis kilikosi kesi, sodi totoaka kesi ka Kora ta ngitunga keng na amunyarea akim ngitunga 250. Apot kesi toliworos akichikichiket alo Isirael. Nakaneni apon talokookeng a Kora nyear.) Alokitela a Simeon, kesi ngimacharin a Nemuel, ka Yamin, ka Yakin, ka Sera ta Chaul. Arai ekimar a ngimacharin kangulu ngikiliok 22,200. Alokitela a Gad, kesi ngimacharin a Sepon, ka Agi, ka chuni, ka Osini, ka Eri, ka Arod, ta Areli. Arai ekimar a ngimacharin kangulu ngikiliok 40,500. Alokitela a Yuda, kesi Er ka Onan. Atoakete Er ka Onan lu araakasi talokookeng a Yuda alo Kanaan. Araakasi ngimacharin a ekitela a Yuda kesi Chela ka Peres, ka Sera ka Esiron ta Amul. Arai ekimar a ngimacharin kangulu ngikiliok 76,500. Alokitela a Isakar, kesi ngimacharin a Tola, ka Pua, ka Yachub ta Chimuron. Arai ekimar a ngimacharin kangulu ngikiliok 64,300. Alokitela a Sebulun, kesi ngimacharin a Sered, ka Elon, ta Yaleel. Arai ekimar a ngimacharin kangulu ngikiliok 60,500. Alokitela a Yosep arai talokookeng ngiarei, lu anyaritae Manase ka Epiraim. Alokitela a Manase, ngesi Makiri lo arai lokookeng a Manase alo arai apakeng a Gilead. Lugu kesi araakasi ngimacharin kech, Iyeser, ka Elek, ka Asiriel, ka Chekem, ka Chemida, ta Eper. Amam Selopead lo arai lokookeng a Eper ngide lusapa. Ayakasi ngide lupesur make, kesi Mala, ka Noa, ka Ogila, ka Milika ta Tirisa. Arai ekimar a ngimacharin kangulu ngikiliok 52,700. Alokitela a Epiraim, kesi ngimacharin a Chutela, ka Becher, ta Taan. Esiakini emachar a Eran ani eyei Chutela. Arai ekimar a ngimacharin kangulu ngikiliok 32,500. Ngulu araakasi ngimacharin a ngalesea a Yosep. Alokitela a Benjamen, kesi ngimacharin a Bela, ka Achibel, ka Airam, ka Chepupam, ta Upam. Esiakinete ngimacharin a Arid ka Naaman ani eyei Bela. Arai ekimar a ngimacharin kangulu ngikiliok 45,600. Alokitela a Dan, ngesi emachar a Uchim, lo arai ekimar keng ngikiliok 64,400. Alokitela a Acher, kesi ngimacharin a Imuna, ka Ichipi, ta Beria. Esiakinete ngimacharin a Eber ka Malikiel ani eyei Beria. Ayei Acher nakookeng na anyaritae Sera. Arai ekimar a ngimacharin kangulu ngikiliok 53,400. Alokitela a Naputal, kesi ngimacharin a Yaseel, ka Guni, ka Yeser, ta Chilem. Arai ekimar a ngimacharin kangulu ngikiliok 45,400. Arai ekimar daang a ngikiliok a Ngisirael 601,730. Tolimok Ekapolon Akuj Musa tama, “Totiakak ngitela akwap itemem ka etiae kech. Ekitela loapolon, totiakak akwap na epolot, ani ekitela loochi, totiakak akwap na edit. Etiakakinio ekitela daang akwap itemem ka etiae a ngitunga. Nakaneni, eramio ekura totiakere akwap, itemem ka ngirora a ngitela. Etiakio akwap kech itemem ka ekura a ngitela a luapolok ka luuchik.” Ngimacharin a ekitela a Lawi kesi Gerichon, ka Koas, ta Merari. Ngalesea kech kesi Ngatekerin a Libini, ka Eburon, ka Mali, ka Muchi, ta Kora. Arai Koas apakeng a Amuram, alo eusit nakookeng a Lawi na anyaritae Yokebed, na edounio alo Misiri. Kidou ngesi talokookeng a Amuram ngiarei, lu anyaritae Aron ka Musa ta napese na anyaritae Miriam. Ayakasi Aron talokookeng nguomwon lu anyaritae Nadab, ka Abiu, ka Eleasar, ta Isamar. Totoaka Nadab ka Abiu na alemikineta Ekapolon Akuj akim na peetaleunitoe. Arai ekimar a ngide alusapa a Ngilawi alu anangito elap epei ka lu eporito 23,000. Atiakaritae ekimar kech ani eya Ngisirael luche, kainyo amam ibore ainakinio kesi alo Isirael. Musa ka Eleasar emarete ngimacharin ngulu daang na emareta kesi Ngisirael anaroatin a Moab, ekwakaye angolol a Yorudan alo Yeriko. Alotunga alu kolong emarunete Musa ka Aron alokimar alo kolong a ekingaren, emam tani ipei ni abu kidong nyimaruna. Alimunit sek Ekapolon Akuj atamar etoakete kesi daang anariet. Iteni apot daang totoaka pearai Kaleb lokookeng a Yepune ka Yochua lokookeng a Nun. Mala ka Noa, ka Ogila, ka Milika, ta Tirisa kesi araakasi tanakookeng a Selopead alo arai lokookeng a Eper, alo arai lokookeng a Gilead, alo arai lokookeng a Makiri, alo arai lokookeng a Manase, alo arai lokookeng a Yosep. Aloose kesi towaa alongaren Musa ka Eleasar lo arai emuron a Akuj, ka ngikarikok, ta ngitunga daang, alokidor a eam a Akuj. Tolimut kesi tamasi, “Atoanikini kolong apakosi nariet. Amam ngesi ngide lusapa. Amam ngesi alotunga a Kora alu kolong angerete Ekapolon Akuj. Atoani ngesi kotere akisech keng a ilope. Kotere nyo eraakar amamau a ngide alusapa engopitor ekiro a apakosi alo Isirael? Totiakakinae sua ngiboro ani eya ngiyenet a apakosi.” Yaa Musa ngakiro a tanakookeng a Selopead nia Ekapolon Akuj, sodi tolimok Ekapolon Akuj ngesi tama, “Ngaka iteni ngakiro na ingitasi tanakookeng a Selopead. Totiakak kesi ngiboro ani eya ngiyenet a apakech. Kimiek kesi kiruma ngiboro a apakech. Tolimok Ngisirael atamar, ani ketoana itwaan tamam idia nisapat, ejoikinit nakookeng napese irumi ngiboro keng. Ani kemam ngesi ikoku nipese, ejoikinit talokaatokeng irumete ngiboro keng. Ani kemam ngesi talokaatokeng, ejoikinit talokaatokeng a apakeng irumete ngiboro. Ani kemam talokaatokeng a apakeng, ejoikinit eyenet keng lo alo diyete irumi ngiboro, kitiliwo ngikeng. Ejoikinit Ngisirael irichunete etal ngolo loger lokadungokinea ayong, Ekapolon Akuj iyong.” Tolimok Ekapolon Akuj Musa tama, “Todoka moru a Abarim sodi kingolik akwap na ainakinit ayong Ngisirael. Ani kingolik iyong kerumor, itoani iyong loger lo kolong atoanea lokaatokon Aron, kainyo ingerete kolong esi ngakiro na adungunit ayong anariet a Sin. Nakolong kesuburaata ngitunga daang ayong alo Meriba, ipot esi towout akidodiun agogongu kang alongaren kech.” (Erai Meriba elelea alo Kadech, anariet a Sin.) Kilip Musa tama, “Ekapolon Akuj, Namerikanyer, na irai alope a akiyar kadaang, kelipit atamar toseu itwaan ni epedori akirik ngitunga, nabo ni epedori akirik kesi alojie, sodi nyiikokineta ngitunga kon ngamesekin na emam ekeyokon.” Tolimok Ekapolon Akuj Musa tama, “Tolem Yochua lokookeng a Nun, lo erai itwaan ni epedori etich, sodi kidokok ngakan kon nakou keng. Kitowo ngesi alongaren Eleasar lo erai emuron, ka ngitunga daang, sodi tolim alongaren ngitunga ngulu daang atamar Yochua ilunyokin lotich kon. Kiwaak apolou kon epewae nikeng sodi kiwapeta Ngisirael daang ngakiro keng. Eleasar lo erai emuron ngesi eweikini Yochua alotich keng. Elemuni Eleasar Urim ka Sumim*g** toyeneenea ngakiro na asaki ayong. Erot ngolo ngesi erikio Eleasar Yochua ka Ngisirael daang anakiro kech kadaang.” Tosubak Musa loger lo adungokinitor Ekapolon Akuj ngesi. Kitowo ngesi Yochua alongaren Eleasar alo erai emuron, ka ngitunga daang. Kidokok Musa ngakan keng nakou a Yochua, sodi tolim atamar Yochua ilunyokin lotich keng, loger losek adungunitor Ekapolon Akuj. Todungok Ekapolon Akuj Musa atamar tolimok Ngisirael tolemanakis Akuj ngakipeyos na epeyo, na ejoikinito ngesi. Tolemuunut a ngirwa alu eseunitae tolemuunere. Ngakipeyos nugu kesi elemikinio Ekapolon Akuj erai ngakipeyos na epeikinitoe Akuj. Ngakipeyos na inomio akolongit daang kesi ngimesekin lukiliok ngiarei lu erai ngikaru ngipei-pei, tamam ni ichwangakina, kipeye imesek ni ekingaren nataparach, kipeye niche ebong erukito daang ka ngakipeyos a ngalemet na eraakasi ngakiria akilo apei, imorikina ka alita apei a akimiet anaajokon. Erai akipeyos ngina aka akolongit kadaang, na inomio tonomia, ngesi nakolong epeyeo ekingaren alomoru a Sinai erai akipeyos na epeikinitoe Akuj. Ejoikinit akukuny keng Ekapolon Akuj. Akipeyos a emuna na erukito ka imesek ni ekingaren, ejoikinit idokakinio alita apei a emuna lokeno a ngakipeyos. Ani ebong, kipeye imesek nia ngiarei loger a akipeyos ana ataparach, aapei ka akipeyos keng na emuna. Erai ngesi dang akipeyos na epeikinitoe Akuj. Ejoikinit Ekapolon Akuj akukuny keng. Ani akolongit na a Sabato, kipeye ngimesekin lukiliok ngiarei, lua ngikaru a ngipei-pei, tamam ni ichwangakina, ka ngakipeyos a ngalemet na eraakasi ngakiloi ngaarei a ngakiria imorikina ka akimiet, ta alemunet a emuna. Echamitae akipeyos na inomio naga, ka alemunet keng a emuna, elemuununio akolongit na a Sabato daang, etiakak ka ngakipeyos na elemuununio ngirwa daang. Tolemanakisi Ekapolon Akuj akipeyos na inomio akisiakinet a elap kadaang. Tolemutu ngimongin ngiarei, ka emesek epei, ta ngimesekin lukiliok ngikan-kaarei lu eraakasi ngikaru ngipei-pei, tamam ni ichwangakina. Tolemutu ngakipeyos a ngalemet na eraakasi ngakiria imorikina ka akimiet, ngakiloi ngauni a ngakiria kiturukooroe ka akipeyos a emong a epei kech kadaang, ka ngakiloi ngaarei a ngakiria kiturukooroe ka akipeyos a emesek. Ani ngimesekin luuchik, kiturukooroe epei daang ka akilo apei a ngakiria. Ngakipeyos na inomio nguna epeikinitoe Akuj. Ejoikinit Ekapolon Akuj akukuny kech. Ngadekon a emuna na itemokino kesi ngalitae ngaarei kiturukooroe ka emong epei kech kadaang, ka anus a alita kiturukooroe ka emesek, ta alita apei kiturukooroe ka imesek nikile ipei kech kadaang. Erai ngolo etal a ngakipeyos ana inomio akolongit na ekingaren a ngilapio kadaang alokaru. Kipeyoto ekoroe epei toliwor akipeyos a akisech aapei ka ngakipeyos na ipeyeo jiik imorikina ka alemunet a emuna. Esukukuu a Adeparet lo erimare Ekapolon Akuj, isiakini akolongit na a ngatomon ka ngoomwon a elap alo a ekingaren. Akolongit na a ngatomon ka ngakan, ngesi isiakineta ngisukukui a Ekapolon Akuj lu irikarete ngikaru ngikan-kaarei, ngirwa ngulu tanyamae ngamugati na emam ekitoe lo itubui make. Akolongit na ekingaren a esukukuu, ejoikinit esi ichunakinosi kilipa nabo nyiisuba etich. Tolemikisi Ekapolon Akuj akipeyos na epeyo. Tolemutu ngimongin lusorok ngiarei, ka amesek apei, ta ngimesekin lukiliok ngikan-kaarei lua ngikaru a ngipei-pei, tamam ni ichwangakina. Tolemutu ngakipeyos a ngalemet na itemokino na eraakasi ngakiria imorikina ka akimiet, tolemut ngakiloi ngauni kiturukooroe ka emong epei kadaang, ngakiloi ngaarei kiturukooroe ka emesek, akilo apei kiturukooroe ka imesek ipei kech kadaang. Tolemutu nabo ekoroe epei toliwor akipeyos a akisech, sodi aloger kangolo, kitaleunere ngitunga tosegeta. Tolemutu ngakipeyos nguna etiakak ka ngakipeyos napalem inomio ataparach daang. Aloger alopei kangolo, a ngirwa a ngikan-kaarei, tolemanakis Ekapolon Akuj akipeyos na epeyo, na ejoikinit ngesi akukuny keng. Tolemutu akipeyos ngina etiakak ka akipeyos na inomio ka alemunet a emuna na elemuununio ngirwa daang. Kiriama akolongit na a ngakan-kaarei kilipa, nabo nyiisuba etich. Akolongit na ekingaren a esukukuu a ngalemet, na ilemikineta esi Ekapolon Akuj ngikinyam lukitet, ejoikinit esi ichunakinosi kilipa, nabo nyiisuba etich. Tolemutu akipeyos na inomio na ejoikinit akukuny keng Ekapolon Akuj. Tolemutu ngimongin lusorok ngiarei, ka emesek epei, ta ngimesekin lukiliok ngikan-kaarei lua ngikaru a ngipei-pei, tamam daang ni ichwangakina. Tolemutu ngakipeyos a ngalemet na itemokino na eraakasi ngakiria na imorikina ka akimiet, tolemut ngakiloi ngauni kiturukooroe ka emong epei kadaang, ngakiloi ngaarei kiturukooroe ka emesek, akilo apei kiturukooroe ka imesek ipei kech kadaang. Tolemutu tani ekoroe toliwor akipeyos a akisech, sodi alorot kangolo, kitaleunere ngitunga tosegeta. Tolemuunutu ngakipeyos nguna ka alemunet a emuna etiakak ka ngakipeyos na inomio ka na a ngalemet na elemuununio ngirwa daang. Toliworos daang lu emam ni ichwangakina. Akolongit na ekingaren a elap alo a ngikan-kaarei, ejoikinit esi ichunakinosi kilipa, nabo nyiisuba etich. Ekutakinio ngaburucho akolongit ngina. Tolemikisi Ekapolon Akuj akipeyos na inomio na ejoikinit akukuny keng Ekapolon Akuj. Tolemutu emong losorokit epei ka emesek epei, ta ngimesekin lukiliok luuchik ngikan-kaarei lua ngikaru a ngipei-pei, tamam daang ni ichwangakina. Tolemutu ngakipeyos a ngalemet na itemokino na eraakasi, ngakiria imorikina ka akimiet, tolemutu ngakiloi ngauni kiturukooroe ka emong, ngakiloi ngaarei kiturukooroe ka amesek, akilo apei kiturukooroe ka imesek ipei kech kadaang. Tolemutu nabo ekoroe epei toliwor akipeyos a akisech, sodi aloger kangolo, kitaleunere ngitunga tosegeta. Tolemutu ngakipeyos nguna etiakak ka ngakipeyos napalem inomio akolongit na ekingaren a elap erukito ka ngakipeyos a ngalemet, ka ngakipeyos na inomio akolongit daang erukito ka ngakipeyos ngalemet ta a ngadekon a emuna. Ngamuja na epeikinitoe Akuj nguna, ejoikinit akukuny kech Ekapolon Akuj. Akolongit na a ngitomon a elap alo a ngikan-kaarei, tochunakinos kilipa. Nyiinyam akimuj nabo nyiisuba etich. Tolemikisi Ekapolon Akuj akipeyos na inomio, na ejoikinit ngesi akukuny keng. Tolemutu emong epei, ka amesek apei, ta ngimesekin lukiliok ngikan-kaarei lu eraakasi ngikaru ngipei-pei, tamam daang ni ichwangakina. Tolemutu ngakipeyos a ngalemet na itemokino na eraakasi ngakiria ka akimiet, tolemut ngakiloi ngauni a ngakiria kiturukooroe ka emong, ngakiloi ngaarei kiturukooroe ka amesek, akilo apei kiturukooroe ka imesek ipei kech kadaang. Tolemutu nabo ekoroe epei toliwor akipeyos a akisech, etiakak ka ekoroe lo italeuniyere ngitunga, ka akipeyos na inomio akolongit daang erukito ka ngakipeyos a ngalemet ka emuna. Akolongit na a ngatomon ka ngakan a elap alo a ngikan-kaarei, kiriamariama wapei kilipa. Tosubakis esukukuu logo irimatar Ekapolon Akuj a ngirwa a ngikan-kaarei, nabo nyiisuba etich. Akolongit na ekingaren ngina, tolemikis Ekapolon Akuj akipeyos na epeikinio ngesi, ejoikinit akukuny a akipeyos kangina Ekapolon Akuj. Tolemutu ngimongin lusorok ngitomon ka nguuni, ka ngimesekin ngiarei, ta ngimesekin luuchik lukiliok ngitomon ka nguomwon lu eraakasi ngikaru ngipei-pei, tamam ni ichwangakina. Tolemutu ngakipeyos a ngalemet na itemokino na eraakasi ngakiria imorikina ka akimiet, tolemut ngakiloi ngauni a ngakiria kiturukooroe ka emong epei kadaang, ngakiloi ngaarei kiturukooroe ka amesek apei kadaang, akilo apei kiturukooroe ka imesek ipei kadaang. Tolemunae kesi aapei ka ngadekon kech a emuna. Tolemutu nabo ekoroe epei toliwor akipeyos a akisech. Tolemutu ngakipeyos nguna etiakak ka ngakipeyos napalem inomio akolongit daang aapei ka ngakipeyos a ngalemet ka emuna. Akolongit na a ngaarei tolem ngimongin lusorok ngitomon ka ngiarei, ka ngimesekin ngiarei, ta ngimesekin lukiliok ngitomon ka nguomwon lu eraakasi ngikaru ngipei-pei, tamam daang ni ichwangakina. Ejoikinit ngimongin, ka ngimesekin, ta ngimesekin luuchik, iturukorio ka ngakipeyos a ngalemet ta emuna loger losek itemitere. Tolemutu tani ekoroe epei toliwor akipeyos a akisech, etiakak ka ngakipeyos napalem inomio aapei ka ngakipeyos a ngalemet ta emuna. Akolongit na a ngauni, tolemutu ngimongin lusorok ngitomon ka epei, ka ngimesekin ngiarei ta ngimesekin lukiliok ngitomon ka nguomwon lu eraakasi ngikaru ngipei-pei, tamam daang ni ichwangakina. Ejoikinit ngimongin, ka ngimesekin, ta ngimesekin lukiliok luuchik iturukorio ka ngakipeyos a ngalemet, ta emuna loger losek itemitere. Tolemutu tani ekoroe epei toliwor akipeyos a akisech, etiakak ka ngakipeyos napalem inomio akolongit daang aapei ka ngakipeyos a ngalemet ta emuna. Akolongit na a ngoomwon, tolemutu ngimongin lusorok ngitomon, ka ngamesekin ngaarei, ta ngimesekin lukiliok ngitomon ka nguomwon lu eraakasi ngikaru ngipei-pei, tamam daang ni ichwangakina. Ejoikinit ngimongin, ka ngimesekin, ta ngimesekin lukiliok luuchik iturukorio ka ngakipeyos a ngalemet, ta emuna loger losek itemitere. Tolemutu tani ekoroe epei toliwor akipeyos a akisech, etiakak ka ngakipeyos napalem inomio akolongit daang, aapei ka ngakipeyos a ngalemet ka emuna. Akolongit na a ngakan, tolemutu ngimongin lusorok ngikan-koomwon, ka ngimesekin ngiarei, ta ngimesekin lukiliok ngitomon ka nguomwon lu eraakasi ngikaru ngipei-pei, tamam daang ni ichwangakina. Ejoikinit ngimongin, ka ngimesekin, ta ngimesekin lukiliok luuchik iturukorio ka ngakipeyos a ngalemet ta emuna loger losek itemitere. Tolemutu tani ekoroe epei toliwor akipeyos a akisech, etiakak ka ngakipeyos napalem inomio akolongit daang aapei ka ngakipeyos a ngalemet, ta emuna. Akolongit na a ngakan-kapei, tolemutu ngimongin lusorok ngikan-kauni, ka ngimesekin ngiarei, ta ngimesekin lukiliok ngitomon ka nguomwon lu eraakasi ngikaru ngipei-pei, tamam daang ni ichwangakina. Ejoikinit ngimongin ka ngimesekin, ta ngimesekin lukiliok iturukorio ka ngakipeyos a ngalemet ta emuna loger losek itemitere. Tolemutu tani ekoroe epei toliwor akipeyos a akisech, etiakak ka ngakipeyos napalem inomio akolongit daang aapei ka ngakipeyos a ngalemet, ta emuna. Akolongit na a ngakan-kaarei, tolemutu ngimongin lusorok ngikan-kaarei, ka ngimesekin ngiarei, ta ngimesekin lukiliok ngitomon ka nguomwon lu eraakasi ngikaru ngipei-pei, tamam daang ni ichwangakina. Ejoikinit ngimongin, ka ngimesekin, ta ngimesekin lukiliok luuchik iturukorio ka ngakipeyos a ngalemet, ta emuna loger losek itemitere. Tolemutu tani ekoroe epei toliwor akipeyos a akisech, etiakak ka ngakipeyos napalem inomio akolongit daang aapei ka ngakipeyos a ngalemet, ta emuna. Akolongit na a ngakan-kauni, kiriamariama wapei kilipa, nabo nyiisuba etich. Tolemutu akipeyos na inomio toliwor akimuj na epeikinitoe Ekapolon Akuj, na ejoikinit ngesi akukuny keng. Tolemutu emong losorokit epei, ka amesek apei, ta ngimesekin lukiliok ngikan-kaarei lu eraakasi ngikaru ngipei-pei, tamam ni ichwangakina. Ejoikinit emong, ka emesek ta ngimesekin lukiliok luuchik iturukorio ka ngakipeyos a ngalemet, ta emuna loger losek itemitere. Tolemutu tani ekoroe epei toliwor akipeyos a akisech, etiakak ka ngakipeyos napalem inomio akolongit daang aapei ka ngakipeyos a ngalemet, ta emuna. Ngulu kesi eraakasi ngitalio a ngakipeyos ana inomio, ka ngakipeyos a ngalemet ka ngadekon a emuna, ta ngakipeyos a ekisil. Esakitae esi ilemanakinete Ekapolon Akuj ngakipeyos nguna a ngirwa kech alu aseun. Etiakak ngakipeyos nugu ka ngakipeyos na ikongitor itwaan kori na esaki itwaan alemun. Sodi abu Musa tolimok Ngisirael ngakiro daang nasek adungokinit Ekapolon Akuj ngesi. Abu Musa nak ngikarikok a ngitela a Ngisirael ngitalio lugu. Ani kikong itwaan atamar ainakini Ekapolon Akuj ibore, kori kikong itwaan atamar apalikini ibore, nyechamitae ngesi ichwangakini ngakiro nguna, nakaneni ejoikinit ngesi esubakini ngakiro nguna loger lokolong alimunio ngesi. Ani kikong apese ekingaren eyei nawi a apakeng atamar ainakini Ekapolon Akuj ibore, kori kikong atamar apalikini ibore, ejoikinit ngesi esubakini ngakiro na ekong ngesi mati kitonger apakeng ngesi, na eirarea apese ngina ikongi. Nakaneni ani kitenger apakeng ngesi asubakin ngakiro nguna, na eirarea ngesi ikongi, nyechamitae ngesi irichakini ngakiro na ekong ngesi nguna. Erimakini Ekapolon Akuj ngesi. Ani kikong aberu na nyiusitae, sodi tolim ngakiro iyechakinit, kori peemisit, kori tolim atamar apalikini ibore, nabo ani ekisidi kiutae, echamitae ngesi esubakini ngakiro na ekong ngesi nguna, mati kitenger lokile keng na iirarea ikongi. Nakaneni ani kitenger lokile keng ngesi asubakin ngakiro nguna, na eirarea ngesi ikong, nyechamitae ngesi irichakini ngakiro na ekong nguna. Erimakini Ekapolon Akuj ngesi. Echamitae apuserut ka aberu na alaka irichakini ngakiro daang na ekong ngesi, ka na alimu atamar apalikini. Ani kikong aberu na iusitae kori tolim atamar apalikini ibore, echamit ngesi esubakini ngakiro na ekongok ngesi, mati kitonger lokile keng na iirarea ngesi ikongi. Nakaneni ani kitonger lokile keng ngesi asubakin ngakiro nguna, na eirarea ngesi ikongi, nyechamitae ngesi irichakini ngakiro na ekong. Erimakini Ekapolon Akuj ngesi, kainyo etengeri lokile keng ngesi akirichakin ngakiro na ekong nguna. Epedori lokile keng achamun kori akinger ngakiro daang na ekong ngesi kori na alimu atamar asubakini. Nakaneni ani pekenger ekile ngolo ngakiro nguna akolongit na eirarea ngesi aberu ikongi, echamitae aberu esubakini ngakiro daang na ekong ngesi kori na alimu atamar asubakini. Achamu ekile ngakiro nguna kainyo nyengero ngesi akwaar na eirarea ngakiro nguna. Nakaneni ani kenger ngesi ngakiro nguna ekisidi, ekile ngolo eriamuni naaronok erai pekirichakin ngakiro nguna. Ngitalio ngulu kesi ainakini Ekapolon Akuj Musa kotere ngakiro na ikongi aberu na nyiusitae, na eringa eyei nawi a apakeng kori aberu na iusitae. Tolimok Ekapolon Akuj Musa tama, “Kirira Ngimidian kotere ngakiro nakolong asubeta kesi Ngisirael. Ani erumor nguna, itoani iyong.” Sodi tolimok Musa ngitunga tama, “Tonyoutu lojie, kitijikis Ngimidian, kirirata kesi kotere ngakiro nakolong asubeta kesi Ekapolon Akuj. Tolem ekitela a Isirael daang ngitunga abunget apei toloto lojie.” Sodi apon toseunae ngitunga abunget apei alokitela kadaang, toliwor ekimar a ngitunga kadaang alu anyounito alosit lojie ngitunga ngabunge ngatomon ka ngaarei. Tomea Musa kesi toloto lojie erikit Pineas lokookeng a Eleasar alo erai emuron a Akuj. Pineas ngesi atingit ngiboro lua Akuj ka ngaburucho na ekusio. Apot kesi kitijikis Midian, loger lo adungokinitor Ekapolon Akuj Musa, apot taara ngikiliok daang, taara tani ngikapolok a Ngimidian lukan lu anyaritae, Epi, ka Rekem, ka Sur, ka Hur, ta Reba. Taara kesi tani Balaam lokookeng a Beor. Todemasi Ngisirael ngaberu a Ngimidian ka ngide, ka ngaatuk, ta ngamesekin, tolemasi ebari kech daang. Sodi kichunyakis ngirerea kech daang, ka ngadakarin. Apot kesi tolemasi ngiboro lu angatarete daang lu eraakasi ngitunga ka ngibaren. Yaasi kesi ngiboro ngulu nia Musa ka Eleasar, ta Ngisirael, lu ayakasi naroatin a Moab, ekwakaye Yorudan alo Yeriko. Apot Musa ka Eleasar, ta ngikarikok luche daang a Ngisirael topudosi nikalapatan a adakar akisiriamiar ngasigerea. Abu Musa tongoik ngikaweikinak ka ngikarikok a ngajorei ana abongunete alojie. Kingit ngesi kesi tama, “Kotere nyo isidongitotor esi ngaberu daang eyarete? Kitamutu atamar ngaberu kolong ewapete ngakiro a Balaam, sodi kitongero ngitunga Ekapolon Akuj alo Peor. Ibore kolong ngini ngesi ayauni edeke loaronon lotunga a Ekapolon Akuj. Tokona bocha, taara ngide lusapa daang ka aberu daang na eperito ka ekile, nakaneni kimiekisi ngapesur daang ka ngaberu daang na nyepero ka ngikiliok, toliworos ngakus. Ejoikinit tokona itwaan daang ni earit itwaan kori ni etapit itwaan nikatoan, iboikin nikalapatan a adakar a ngirwa a ngikan-kaarei. Akolongit na a ngauni ka na ngakan-kaarei, kitosegas aapei ka ngaberu na ilemasi esi. Ejoikinit esi itosegete tani eworu daang, ka ibore daang nileu, ta nia ngajul a ngaanei, kori nikitoe.” Tolimok Eleasar lo erai emuron a Akuj ngikiliok lu abongunete alojie tama, “Ngitalio lugu kesi ainaki Ekapolon Akuj Musa. Ngasua make na eraakasi egolit ka akwangat, ka nanyang, ka nakirion, ka nakaabenan, ta naapotion, aapei ka ibore daang ni nyenomiari akim, kesi isitorio kiding akim kitosegae. Ngiboro luche daang lu epedori akim anomiar, ilotario a ngakipi kitosegae. Ani akolongit na ngakan-kaarei, kilotasi esi ngiworui kus, toliworotor lu italeuno sodi kitachamun ilomunete nadakar.” Tolimok Ekapolon Akuj Musa tama, “Esakitae iyong ka Eleasar, ta ngikarikok luche a ngitunga, imarunete ngiboro daang lu angatario, ka ngitunga ta ngibaren. Totiaka ngiboro ngulu ngatiaket ngaarei, toliwor atiaket apei aka ngasigerea, toliwor nache aka ngitunga aluche. Anatiaket ana a ngasigerea, totiakakisi Ekapolon Akuj ngiboro ngiche. Tolemikisi Ekapolon Akuj asiger apei anasigerea a ngamiae a ngakan, tosuba loger lopei ngolo anaatuk, ka ngisikiria, ka ngamesekin, ta ngaanei. Nak ngiboro ngulu Eleasar lo erai emuron a Akuj, toliworos elemikinitae Ekapolon Akuj. Aloboro alu etiakakinitae ngitunga luche, tolemutu asiger apei anasigerea a natomwon-kan, tosuba loger lopei ngolo anaatuk, ka ngisikiria, ka ngamesekin, ta ngaanei. Nak ngiboro ngulu Ngilawi lu eweikinito eam a Akuj.” Tosubakis Musa ka Eleasar ngakiro na adunguni Ekapolon Akuj. Arai ekimar a ngiboro alu angatarete ngasigerea peimaritae lu etiliworete kesi ngikech, arai ngamesekin ka ngaanei 675,000, ka ngaatuk 72,000, ka ngisikiria 61,000, ta ngaberu 32,000 na aringa nyepero ka ngikiliok. Arai ekimar a atiaket ana a ngasigerea ngamesekin ka ngaanei 337,500. Arai na alemikinitae Ekapolon Akuj 675. Arai ekimar a ngaatuk 36,000, toliworos na alemikinitae Ekapolon Akuj 72. Arai ekimar a ngisikiria 30,500, toliworos lu alemikinitae Ekapolon Akuj 61. Arai ekimar a ngaberu ana aringa nyepero ka ngikiliok 16,000, toliworos na alemikinitae Ekapolon Akuj 32. Sodi abu Musa nak Eleasar alemunet na alemikinitae Ekapolon Akuj, loger losek adungunitor Ekapolon Akuj. Ariyan atiaket na a Ngisirael ka atiaket na atiakakini Musa ngasigerea. Arai ekimar a ngamesekin ka ngaanei 337,500, ka ngaatuk 36,000, ka ngisikiria 30,500, ta ngaberu 16,000. Abu Musa tolem anatiaket kangina, itwaan ipei alotunga a ngitomwon-kan, ka ibarasit ipei alobaren a ngitomwon-kan, sodi nak Ngilawi lu arai kesi aweikinito eam a Akuj, loger losek adungunitor Ekapolon Akuj. Ani erumor, apot ngikaweikinak lusek arikito ngasigerea nia Musa sodi tolimokis tamasi “Ekapolon, kimaru sua ngasigerea kosi daang, nakaneni eyakasi daang. Kiyaunit sua ngiboro lu kianyuni lu eraakasi, asir a egolit, ka ngigiel, ka ngasua a ngakan, ka ngikabaabae, ka ngamaritoi, ta ngalagam. Kilemikinit sua Ekapolon Akuj toliworos kesi etachitere akiyar kosi, kiyokio ngesi sua.” Apot Musa ka Eleasar yaut egolit ngolo, lo arai daang asir. Arai egolit daang lo alemikinete ngikaweikinak Ekapolon Akuj, ngakiloi ngamiae ngaarei. Ngulu, pearai ngikaweikinak, apot kesi totinga ngiboro lu angatarete. Apot Musa ka Eleasar yaasi egolit ngolo loeam, sodi kiyokio Ekapolon Akuj Ngisirael. Ayakasi ngitela a Reuben ka Gad ngaatuk nakaalak noi. Na engolikineta kesi atamar ejok akwap a Yaser ka Gilead anaatuk, apot kesi toloto nia Musa ka Eleasar ta ngikarikok luche a ngitunga tamasi, “Ngakwapea a Ataros, ka Dibon, ka Yaser, ka nimura, ka Echibon, ka Eleale, ka Sibima, ka Nebo, ta Beon, nakolong etiliwori Ekapolon Akuj ngaka Ngisirael, eraakasi ngakwapea ajokak kotere ngaatuk, tarai eya sua ngaatuk nakaalak, Nakinae kare sua akwap ngina toliwor akosi, nyikiyaasi sua ekwakaye Yorudan.” Tatachak Musa kesi tama, “Eloose Ngisirael luche lojie, kibooyete esi kane a? Kotere nyo edikino esi itengerioto Ngisirael adokar ekwakaye Yorudan toloma nakwap na einakinit kesi Ekapolon Akuj? Ngakiro nakolong asubete taapakus nguna nakolong amearea ayong kesi alo Kadech Barinea alosit akireb akwap. Toloto kesi tananga nadipo a Echikol kingolikis akwap, nakaneni ani ebongunete, apot kesi tasaka akitenger ngitunga alomar nakwap na ainakinit kesi Ekapolon Akuj. Abu Ekapolon Akuj tongo akolongit ngina tolim akichikakinet ebala, ‘Ekongi ayong atamar, aloger awouneta akiwap ngakiro kang, emam itwaan nikolong apuduni alo Misiri daang ni erai ngikaru ngitomwon-arei kori ni iporit ni elomari nakwap na kolong echikakini ayong atamar ainakini Aburaam, ka Isaka, ta Yakobo.’ Arai ngakiro nguna ngaka ngitunga kadaang pearai Kaleb lokookeng a Yepune alo erai Ekenisit, ka Yochua lokookeng a Nun, lu ewapete ngakiro a Ekapolon Akuj. Abu Ekapolon Akuj tongoik ngitunga kisirim ariet a ngikaru a ngitomwon-omwon tanang ngitunga daang a alesit ana kolong etongoi ngesi etoakete. Isubakis tokona esi ngakiro nakolong kata apakus, iliworosi alesit nakitetet a ngitunga alukasechak, lu isakete ayauni angoit a Ekapolon Akuj nia Isirael nabo. Ani kiwout esi ngitunga a Reuben ka Gad akiwap ngesi tokona, engeri ngesi nabo ngitunga lugu daang anariet, nabo eliwor esi imunyarito ngitunga lugu daang.” Pot kesi nia Musa tolimokis tamasi, “Tachamakinae mono sua atoduko nganokin na a ngamoru nege kotere ngamesekin kosi, ka ngirerea lu edukitoe ngawasea kotere ngitunga kosi. Ani erumor atonyoutu atoloto ka Ngisirael luche lojie, tanang ni kitanangea kesi nakwap na eliwor akech. Ani tokona, iboikinosi ngitunga kosi nege lorerea lu edukitoe ngawasea toyuunotor alotunga a akwap kana. Nyikibonguni sua nawiyei kosi mati keriamut Ngisirael luche daang ngakwapea na einakinitae kesi. Emam ibore kilemari sua anikech alowae alo a ekwakaye Yorudan, kainyo kiriam sua ibore ni erai ikosi kane alo kide Yorudan.” Tatachu Musa tama, “Ani kerai ngakiro na iruorosi esi ngaka iteni, tonyoutu tokona kona kane alongaren Ekapolon Akuj toloto lojie. Tonyout ngikiliok kus daang lu a ejie todokasi ekwakaye Yorudan, torik Ekapolon Akuj, sodi toremo ngimoe tanang ni idwangea Ekapolon Akuj kesi, sodi tolema akwap. Ani erumor, tobongut esi, kainyo irumosi etich kus ani a Ekapolon Akuj ka Ngisirael luche, sodi toliworor akwap na alo kide Yorudan naga akus alongaren Ekapolon Akuj. Nakaneni ani pekirichakis esi akichikakinet kus, kechikichiki atamar isechakinito esi Ekapolon Akuj. Warasi nyiichwangakis nguna. Kirirao esi kotere akisech kus. Toduko robo ngirerea kus ka nganokin a ngamesekin kus, nakaneni tosubakis nguna ilimut!” Tolimut ngikiliok a ngitela a Gad ka Reuben tamasi, “Ekapolon, kisubakini sua loger lo idunguni iyong. Idongete ngaberu kosi, ka ngide, ka ngaatuk, ta ngamesekin nege lorerea a Gilead. Nakaneni kinyounit sua daang alosit lojie kitorik Ekapolon Akuj. Kidokari sua ekwakaye Yorudan atojwoto loger lo ilimunio iyong.” Sodi abu Musa todungok Eleasar ka Yochua ta ngikarikok luche a Ngisirael tama, “Ani kenyout ngikiliok a Gad ka Reuben todokasi ekwakaye Yorudan, toloto lojie, erikit Ekapolon Akuj, ani kingarakis kesi esi toremo akwap, nakis kesi akwap a Gilead toliwor akech. Nakaneni ani pekedokasi kesi ekwakaye Yorudan kirukosi ka esi lojie, etiakakinio kesi akwap kech alo Kanaan loger lopei kus.” Tatachut ngikiliok a Gad ka Reuben tamasi, “Ekapolon, kisubakini sua loger lo edungunitor Ekapolon Akuj. Kiriki sua Ekapolon Akuj atoloto ekwakaye nakwap a Kanaan, atojwoto, sodi toliworor akwap na alo kide Yorudan akosi.” Abu Musa totiakak ngitela a Gad ka Reuben, ta epewae a ekitela a Manase, akwap daang a Sion alo arai Ekapolon a Ngiamor, ka Ogu lo apolokinit Bachan, aapei ka ngirerea ta ngakwapea na eriamito kesi. Apot ngitunga a Gad toduko nabo ngirerea lusek adukitoe ngawasea lu araakasi, Dibon, ka Ataros, ka Aroer, ka Atiros, Chopan, ka Yaser, ka Yogibea, ka Bes Nimura, ta Bes Aran. Toduko ngitunga a Reuben ngirerea a Echibon, ka Eleale, ka Kiriasaim, ka Nebo, ka Baal-meon (apon ekiro ngolo kilochoi). Apot kesi tanyarata ngirerea lu adukete a ngirora alukitet. Apot ngitunga a emachar a Makiri alo arai lokookeng a Manase toremo akwap a Gilead, toloma, kiritasi Ngiamor lusek alomito neni. Sodi abu Musa nak ngitunga a emachar a Makiri akwap a Gilead, toloma neni. Abu Yair lo arai eka ekitela a Manase torem ka alemar ngadakarin ngache, sodi tanyara ekiro be “Ngadakarin a Yair.” Abu Noba torem ka alemar Kenas ka ngadakarin keng sodi tanyara Noba, a ekiro keng a ilope. Ngakwapea nugu kesi alomeenete Ngisirael a ngitela kech na arotokinioto alo Misiri erikito Musa ka Aron. Egireene Musa ekiro a akwap kadaang anacha elomio, loger lo adunguunio Ekapolon Akuj. Arotokinete Ngisirael alo Misiri akolongit na a ngatomon ka ngakan a elap alo ekingaren a ekaru, arai akolongit na atupit na a Adeparet ana ekingaren. Apot kesi iyoki Ekapolon Akuj, torotokis alo Rameses iteete Ngimisiri lu anukete talokookech lu ekingaren lusek aari Ekapolon Akuj. Alorot kangolo, abu Ekapolon Akuj kidodiu atamar epolot agogongu keng idwangit na a ngakujo a Misiri. Torotokis Ngisirael alo Rameses toloma Sukos. Ani erotokinete kaneni toloma Esam lokwaas a ariet. Ani enyounete kaneni, toreas toloto Pi Airos, kide a Baal Sepon, sodi toloma diyete Migidol. Torotokis a lo Pi Airos kitoro nanam a Chamu,*g** tolomasi nariet a Chur. Adaunet a ngirwa a nguuni eloose, toloma Mara. Ani enyounete kaneni, toloto Elim, toloma neni kainyo ayakasi ngileleae a ngakipi ngitomon ka ngiarei ka ngikito a ngingolea ngitomwon-kaarei. Torotokis alo Elim toloma diyete apas a Sues. Ani enyounete kaneni, toloma nariet a Sin. Ani erumor toloma Dopuka, ani erumor toloma Aluch. Ani enyounete kaneni toloma Repidim, ni amam ngakipi na emaase kesi. Torotokis alo Repidim toloma nariet a Sinai. Torotokis anariet a Sinai toloma Kibiros Atapa. Ani enyounete kaneni toloma Aseros. Ani enyounete kaneni toloma Risima. Torotokis alo Risima toloma Rimon Peres. Tonyout kaneni toloma Libuna. Ani enyounete kaneni toloma Risa. Torotokis alo Risa toloma Keelasa. Ani enyounete kaneni toloma moru a Cheper. Torotokis kaneni toloma Arada. Ani enyounete kaneni toloma Makelos. Tonyout kaneni toloma Taas. Tonyout kaneni toloma Tera. Ani enyounete kaneni toloma Mitika. Torotokis kaneni toloma Hachimona. Torotokis kaneni toloma Moseros. Ani enyounete kaneni toloma Bene Yaakan. Tonyout kaneni toloma Hor Agidigad. Tonyout kaneni toloma Yoti Basa. Ani enyounete kaneni toloma Aburona. Ani enyounete kaneni toloma Esionigeber. Ani enyounete kaneni toloma nariet a Sin (ngesi Kadech). Ani enyounete alo Kadech toloma moru a Hor, lokwaas a akwap a Edom. Loger lo adungunio Ekapolon Akuj, abu Aron lo erai emuron a Akuj todoka moru a Hor, totoan kaina, akolongit na ekingaren a elap alo a ngikan a ekaru alo a ngitomwon-omwon, napei kolong apudunioto Ngisirael alo Misiri. Arai Aron ngikaru amiat apei ka ngitomwon-arei ka nguuni na atoanea alomoru Hor. Abu ekapolon a Ngikanaan lo ebooyi alo Negeb kiira atamar eponito Ngisirael. Torotokis Ngisirael alomoru a Hor toloma Salimona. Torotokis alo Salimona toloma Puno. Ani enyounete kaneni toloma Obos. Ani enyounete kaneni toloma Abarim anakwap a Moab. Tonyout kaneni toloma Dibon Gad. Tonyout kaneni toloma Alimon Dibilasaim. Ani enyaunete Kaneni toloma moru a Abarim, diyete emoru a Nebo. Ani enyounete kaneni toloma naroatin a Moab, ekwakaye angolol a Yorudan alo Yeriko. Sodi toloma kiding Bes Yechimo ka adipo a Ngio. Anaroatin a Moab ekwakaye Yorudan alo Yeriko, abu Ekapolon Akuj tolimok Musa ngakiro nugu kotere Ngisirael. “Na idokareta esi ekwakaye Yorudan tolomasi nakwap a Kanaan, kiritasi ngitunga daang lu elomito nakwap ngina. Kinyasutu ngakujo kech daang nasubuna a ngamoru ka ngasua ka wadaang ni ilipeeneta kesi. Tolemasi akwap toloma, kainyo kainakinit ayong esi akwap ngina. Totiakatiaka akwap a akiram ekura, totiakanak ngitela ka ngimacharin lugelagelae. Akwap naapolon nakinae ngitunga lu elalak, ani akwap nadiochichi nakinae ngitunga lu ekidioko. Nakaneni ani pekiritasi esi ngitunga lu elomito neni, ludikidio lu idongete, kichanete esi kikokis ngiborei lukadopak ngakonyen kus ka ngiikwa alosiepion kus, nabo kitijiete kesi esi. Ani pekiritasi esi kesi, kamunyari ayong esi loger losek asakea amunyar kesi.” Abu Ekapolon Akuj tolimok Musa ngakiro nugu kotere Ngisirael, “Na ilomareta esi Kanaan, nakwap na kainak ayong esi, ikokinete ngikukuorea a akwap kus nege. Isiakini ekukuor lo alokuju anariet a Sin, kitor lokukuor a Edom. Isiakini alo kide alosal alo alokwap anam a Amakat. Ani erumor torei kuju lowae lo a apak a Akirabim, tolot kitor Sin tanang kadech Barinea alokuju. Ani erumor torei kwap tanang Asar Adar ka Simon, ni erear tanang nadipo na eyei lokukuor a Misiri, tasalu alo Mediterenian. “Anam a Mediterenian ngesi eliwor ekukuor alo too. “Idiri ekukuor lo alokwap napei alo Mediterenian tanang moru a Nor, ani enyouni kaneni tolot napak a Amas. Torotok ngaren tanang Sedad ka Sipiron, tasalu alo Asar Enan. “Idiri ekukuor lo alo kide napei alo Asar Enan tanang Chepam. Ani erumor tolot tanang Abel alokuju, kide Ain, tanang lomukur lua lokide anam a Galilaya, ani erumor kiwapak angolol a Yorudan alokuju tanang nanam a Amakat. “Ngulu kesi eliworosi ngikukuorea luomwon a akwap kus.” Sodi tolimok Musa Ngisirael tama, “Akwap naga ngesi ilemarete esi kotere akiram ekura, akwap na ainaki Ekapolon Akuj ngitela lukan-koomwon ka epewae a ekitela a Manase. Ngitela a Reuben ka Gad, ta epewae a ekitela a Manase, ariamut akwap kech, etiakitae itemem ka ngawiyei kech. Einakinitae kesi akwap alowae alo alo kide Yorudan alo ekienyikina ka Yeriko.” Tolimok Ekapolon Akuj Musa tama, “Eleasar lo erai emuron a Akuj, ka Yochua lokookeng a Nun, kesi etiakakinete ngitunga akwap. Tolem nabo ekarikon epei alokitela kadaang kingarakinos ka kesi akitiak akwap.” Ngirora a ngitunga alu aseuni Ekapolon Akuj kesi lugu. Alokitela a Yuda, aseunio Kaleb lokookeng a Yepune. Alokitela a Simeon, aseunio Chelumiel lokookeng a Amiud. Alokitela a Benjamen, aseunio Elidad lokookeng a Kilison. Alokitela a Dan, aseunio Buki lokookeng a Yogili. Alokitela a Manase, aseunio Aniel lokookeng a Epod. Alokitela a Epiraim, aseunio Kemuel lokookeng a Chipitan. Alokitela a Sebulun, aseunio Elisapan lokookeng a Parinak. Alokitela a Isakar, aseunio Palitiel lokookeng a Asan. Alokitela a Acher, aseunio Aiud lokookeng a Chelomi. Alokitela a Naputal, aseunio Pedael lokookeng a Amiud. Ngulu kesi aseuni Ekapolon Akuj atiakakin Ngisirael akwap a Kanaan. Anaroatin a Moab, ekwakaye Yorudan alo Yeriko, tolimok Ekapolon Akuj Musa tama, “Tolimok Ngisirael atamar anakwapea ana elemarete kesi, ejoikinit etiakakinete Ngilawi ngirerea lu elomete ka ni edakasi ngibaren, ni iriamit ngirerea ngulu. Eliworosi ngirerea ngulu ngika Ngilawi, toloma kesi neni. Eliwor ni edakasi ngibaren ika ngaatuk kech, ka ngibaren kech daang. Esakitae ni edakasi ngibaren itemio napei alore elosi nikalapatan ngamitae 450 alowaitin kadaang, sodi min ni eriyan ngiwaitin daang, erai ewae epei ngamitae 900, toyei ere kiding. Esakitae esi iinakinete Ngilawi ngirerea ngikan-kapei lu eyuunotor ngitunga, lu epedori itwaan adukia erai kear niche peiyechakinit. Ani erumor, nakis kesi nabo ngirerea ngiche ngitomwon-omwon ka ngiarei, aapei ka ni edakasi ngibaren, toliworos daang ngirerea ngitomwon-omwon ka ngikan-kauni. Ejoikinit ekimar a ngirerea a Ngilawi, lu elemuni ekitela daang, itemio ka etiae a akwap kangina.” Tolimok Ekapolon Akuj Musa atamar tolimok Ngisirael tama, “Na idokareta esi ekwakaye angolol a Yorudan tolomasi nakwap a Kanaan, esakitae esi iseunete ngirerea lu eloose ngitunga na edokinioto, lu epedori itwaan amatar erai kear niche peiyechakinit. Neni ngesi edukea ngesi anitwaan ani esaki atachakin akitu a eyenet keng alo atoana. Itwaan ni ititakinio atamar earit niche, nyejoikinit eario mati keyaun lokies alongaren ngitunga daang. Toseutu ngirerea ngikan-kapei, nguuni alo kide Yorudan ka nguuni anakwap a Kanaan. Eliworosi ngulu ngirerea lu edokinete Ngisirael ka ngitunga a ngakwapea anache lu eraakasi ngikalotok ka lu elomito neni. Itwaan daang ni eari itwaan peiyechakinit epedori alosit ni eyei epei a ngirerea kangulu toduk. “Nakaneni ani keram itwaan niche a ibore anisuat, totoan, aliwor ngesi ekaaran, eario ngesi. Ani kimas ngesi itwaan a amoru taar, aliwor ngesi ekaaran, eario ngesi. Kori ani keram ngesi itwaan a akitoe, taar, aliwor ngesi ekaaran, eario ngesi. Epedori eyenet a itwaan anikatoan taar ekaaran ngolo. Ani keanyu eyenet ngolo ngesi, ejoikinit eari. “Ani keremokin itwaan niche sodi taar ani emasakinea ngesi nalup, kori emasea a ibore kori ani elulungikinea akan, aliwor ngesi ekaaran, eario ngesi. Epedori eyenet a itwaan anikatoan kangini taar ekaaran ngolo. Ani keanyu eyenet ngolo ngesi, ejoikinit eari. “Ani bo kear itwaan niche peiyechakinit ani ejukarea kimasak nalup kori ani emasea a ibore. Kori ani bo kimasa itwaan amoru peitee, tolot amoru ngina taar itwaan nipeasaki ngesi akiwan kori pearai emoit keng. Ani kikokis ngakiro neni ejoikinit ngitunga etiakete ngakiro nguna, sodi toikis itwaan nikaaran, meere eyenet a itwaan anikatoan, lo esaki atachakin. Ejoikinit ngitunga eyuunete itwaan nikaaran aloyenet a itwaan anikatoan, sodi tobuasi lore lo adokinit lokolong sek alosit ngesi adukia. Ejoikinit ngesi iboikin neni tanang ni etoanea itwaan ni erai emuron loapolon a Akuj a ngirwa kangulu, ani erumor tobongo nawi. Ani kerotoki itwaan ni aari niche peiyechakinit alore alosek alosit adukia, sodi taanyu ngesi eyenet a itwaan ani kolong aari ngesi, taar ekatachakinan akitu keng ngesi, nyerai itwaan ni atachakini akitu ngini ekaaran. Ejoikinit itwaan ni aari niche peiyechakinit elomi lore lo edukitor tanang emuron loapolon etoani, ani ekisidi a akitu a emuron kangolo, tobongo ngesi nawi keng. Erai ngitalio lugu ngikus ka ngalesea kus awadaang ani ilomito. “Itwaan ni ititakinitae atamar earit niche, epedori atamar esechit, sodi taarae erai keya ngikaanyunak ngiarei kori lukaalak. Nyepedorete ngakiro a ekaanyunan a epei akitemokin etitas ngolo. Ejoikinit ekaaran eario. Nyepedori ngesi abuchar aloriras kalo kotere akitach ngaropiyae. Ani kedoki itwaan tolot lore lo eyuunere, nyiichamu ngesi etachi ngaropiyae tobongunio nawi eringa emuron loapolon Akuj nyetoana. Ani kisubakis esi kongina, inyasunete esi akwap na ibooyoto. Inyasuni akiar ngitunga akwap. Mati kear itwaan ni eari niche ngesi italeunor akwap na earere itwaan. Nyiinyasut akwap na ibooyoto esi, kainyo arai ayong Ekapolon Akuj, nabo ebooyi alokiding Ngisirael.” Aloose ngikapolok a ngawiyei a emachar a Gilead, alo arai lokookeng a Makiri tarai etatait a Manase alo erai lokookeng a Yosep, toloto nia Musa ka ngikarikok luche. Tolimut kesi tamasi, “Kidungokini kolong Ekapolon Akuj esi atiakanakin Ngisirael akwap a akiram ekura. Kidungokini kolong esi tani ainakin tanakookeng a Selopead alo erai eyenet kesi, ibore nikolong arai ikeng. Nakaneni ani kiuta kesi ngikiliok a ekitela a eche, eliworosi ngiboro ngulu ngika ekitela kangolo, sodi toditeu ibore nikitiakakinitae sua. Ani enangi ekaru lo ebuarere ngiboro daang lukolong agielio lokulepek, iatakinio ngiboro a tanakookeng a Selopead lokitela lo iusitere kesi, sodi tolemarae alokitela yok.” Sodi tolimok Musa Ngisirael ngakiro nugu na adunguni Ekapolon Akuj. Tolim ngesi tama, “Iyookino ngakiro na iruorosi ngitunga a ekitela a Manase. Adungu tokona Ekapolon Akuj atamar epedorete tanakookeng a Selopead achamun ngikiliok cha daang ajoikinete kesi, sodi kiutas, nakaneni ejoikini erai lua ekitela kech make. Emam ngiboro a Ngisirael lu eloose lokitela loche. Eliwor ibore a Esiraelit kadaang ika ekitela keng. Aberu na irumi ibore alokitela a Isirael, ejoikinit echamuni ekile a ekitela keng kiutas. Erot ngolo ngesi irumea Esiraelit daang ibore a taapaakeng nakaneni nyipori ibore alokitela a epei tolot lokitela loche. Etingi ekitela daang ibore keng a ilope.” Apot tanakookeng a Selopead tosuba loger lo adungokinitor Ekapolon Akuj Musa. Apot Maala, ka Tirisa, Ogila, ka Milika ta Noa na araakasi tanakookeng a Selopead, tachamut talokaapakech kiutas. Apon kesi kiutae alomacharin a ekitela a Manase alo erai lokookeng Yosep, sodi kidongo ngiboro kech erai ngika ekitela a apakech. Ngitalio ngulu kesi ainakini Ekapolon Akuj Ngisirael, isitorunit nia Musa, anaroatin a Moab ekwakaye angolol a Yorudan alo Yeriko. Eraakasi ngakiro na eyakasi nakitab naga na esuruori Musa Ngisirael na ayakatar nariet, kide angolol a Yorudan. Ayakasi kesi nadipo a Yorudan diyete Sup, ni ibakitor ere a Paran alowae a epei, kibakito ngirerea a Topel ka Laban, ka Aseros, ta Disaab alowae aloche. ( Ngirwa ngitomon ka epei ngesi alemari alosit enyounio alomoru a Sinai tanang Kadech Barinea iwapitae erot lo itori nakwap na a ngimukur a Edom.) Akolongit na ekingaren, elap lo a ngitomon ka epei, ekaru lo a ngitomwon-omwon napei kolong arotokinioto kesi alo Misiri, abu Musa tolimok ngitunga ngakiro daang na adungokinit ngesi Ekapolon Akuj atamar tolimok. Asubasi nguna ekisidi kidwang Ekapolon Akuj Sion lo arai ekapolon a Ngiamor, lo apolokinit ere a Echibon, kidwang tani Ogu lo apolokinit ngirerea a Achitaros ka Edirei. Na ayakatar ngitunga kide Yorudan, nakwap a Moab, ngesi esiakinea Musa akiruoro ngakiro a ngitalio a Akuj ka akitatam ebala, “Nakolong kiyakar ngoni moru a Sinai, abu Ekapolon Akuj na erai Akuj yok kitolimok ngoni tama, ‘Ibooyoto esi alomoru kalo nikooyen. Tonyoutu taramakisi. Kapesi nakwap na a ngimukur a Ngiamor ka ngiwaitin ngulu daang, tanang nadipo a Yorudan, tanang nakwap na a ngimukur ka ngaroatin, tanang lowaitin lua lokuju, tanang lokwaas a anam a Mediterenian. Toloto nakwap a Kanaan, kiporosi ngimoru a Lebanon, tananga nangolol naapolon a Eupurate. Akwap na daang ngesi kolong echikakini ayong Ekapolon Akuj ainakin taapaakus Aburaam, ka Isaka, ka Yakobo, ta ngalesea kech. Kapesi toloma neni.’ ” Tolimok Musa ngitunga tama, “Kolong eringa ngoni kiya moru a Sinai, kalimokini ayong esi atama, ‘Etich lo a akirik esi elal noi anikang. Nyetiruni ayong alopei. Kitalala Ekapolon Akuj kus esi loger a ngikanyer alu eyakasi nadis. Kimiek kiatak Ekapolon Akuj kata apaakus esi ngakiatakinet abunget apei, talalaketa nabo tajakaana loger lokolong kichikakinea! Ekokini ayong bon asubi etich lokaagongon lo a akitub ngikesio kus bon ai? Toseutu ngitunga lukoosok tochwaaka, tarai lu eyenete etich alotela kus, sodi etiliwo ayong kesi lu kiweikinito esi.’ Ipot kolong esi tachamut atamar ejoikinit kisubi kongina. Sodi etiliwo ayong ngikarikok lukolong iseunete esi, lu araakasi lukoosok tarai lu eyenete etich, etiliwo lu kiweikinito esi. Toweikis ngiche ngitunga abunget apei, toweikis ngiche ngitunga amiat apei, toweikis ngiche ngitunga ngitomwom-kan, toweikis ngiche ngitunga ngitomon. Abu nabo atoseu ngikaweikinak ngiche alotela kadaang. “Abu ayong atolimok kesi atama, ‘Topupokisi ngikesio lu eyauniyete ngitunga kus. Totubo ngikesio daang niajokon, kerai ngika ngitunga kus kori kerai ngika ngitunga alu eponito anakwapea anache, lu elomito nakwap kus. Nyiiminakis ewae epei itubete ngikesio, topuponokisi ngikesio a ngitunga kadaang ikwaan, tani kerai itwaan ngae. Nyieam itwaan kainyo ngakiro na itiakunete esi eponito ani a Akuj. Ani keyei ekies kigogongikini esi, yaut nikang atopupok ayong.’ Abu nabo ayong katolimok esi eger lo isubeta ngakiro nache daang. “Kisub ngoni ngakiro nakolong kidungokini Ekapolon Akuj na erai Akuj yok. Kipot atorotokisi alomoru a Sinai etoro nariet naapolon naketubulon na eyei lorot lo elosere nakwap na a ngimukur a Ngiamor. Ani kinanguni Kadech Barinea, abu ayong katolimok esi atama, ‘Ipot tokona esi nakwap na a ngimukur a Ngiamor nakiinak ngoni Ekapolon Akuj na erai Akuj yok. Kingolikisi a, akwap ngina ngesi yaa, tonyoutu toloma loger lo kidungokinea Ekapolon Akuj kata apaayok. Nyieam kori nyiimaranikis.’ “Ipot esi daang pot nikang kitolimokis ayong tamasi, ‘Atomeasi ngitunga kingarenikis ngoni torebo akwap, sodi kitolimokis kesi ngoni erot loajokon lo kitori ka ngirerea lu eyakasi inaa.’ “Katojoikis ayong ngakiro nguna, sodi atoseu ayong ngitunga ngitomon ka ngiarei, ipei alokitela a epei. Toloto kesi nakwap na a ngimukur tananga nadipo a Echikol, torebo. Kiinut kesi ngoni ageor na aanyunete kaina, tolimut atamar ejok akwap nakiinakinit ngoni Ekapolon Akuj na erai Akuj yok. “Nyelomara esi nakwap ngina kainyo ipot esi tongero ngakiro na adunguni Ekapolon Akuj kus. Kingununguno ilimonokinosi make ibalasi, ‘Kiremokino Ekapolon Akuj ngoni. Kipuduni kolong ngesi ngoni alo Misiri, kiyau nia Ngiamor alu kiarete. Nyo kisaki ngoni kaina? Kiemit ngoni. Ebalasi ngitunga lu ngoon kimeari ngoni, elangir ngitunga a akwap kangina nabo ewoyak kidwangito ngoni. Ebalasi nabo, ibooyete ngitunga ngulu alorerea alu edukitoe ngawasea nakooyak na enangito nadis. Taanyungasi kesi ngitunga lulangir-tooyak noi kaina!’ “Nakaneni atolimu ayong atama, ‘Nyieam ngitunga ngulu. Kiriki Ekapolon Akuj na erai Akuj kus esi, nabo eji kotere esi loger lokolong ianyungareta esi eji, alo Misiri, ka na ajio anariet. Ingolikis esi eger lo kiyaunea esi nege niajokon loger lo edakea itwaan lokookeng.’ Nakaneni ani eyakasi nguna daang alimu ayong, ipotu esi nyiinupa Ekapolon Akuj na erai Akuj kus, tarai bo aloseene ngesi ngaren kus jiik aanyikin esi ni ilomete. Engareni ngesi kidodeanakini esi erot, kitorik nakwaare a apir a akim, ani naparan kitorik a apir a edou. “Kiira Ekapolon Akuj eburas kus, abu tongo sodi kikongo tama, ‘Emam tani ipei kus alotunga aluaronok kalu ni elomari nakwap naajokon nakolong ekongi ayong atamar ainakini taapaakus. Kaleb bon lokookeng a Yepune ngesi elomari. Aliwor ngesi itwaan ni amuno ayong nabo ainakini ayong ngesi ka ngalesea keng akwap na areb ngesi.’ Kangoiki Akuj tani ayong kotere esi, tolimu tama, ‘Nyilomari tani iyong Musa nakwap ngina. Kitogogong ekengarakinan kon, Yochua lokookeng a Nun. Ngesi eriki Ngisireal toloma nakwap ngina.’ “Sodi kitolimok Ekapolon Akuj ngoni daang tama, ‘Ngide kus lu eringa ediseak, lu nyeyenete naajokak ka naaronok kesi elomarete nakwap ngina. Ngide ngulu kesi lukolong ibalasi esi erikete ngimoe kus. Ainakini ayong kesi akwap toloma. Ani eliwor lu erai esi, toreas tobongosi nariet, kiwapa erot lo a apas a Akaba.’ “Ipot esi tatachut tamasi, ‘Musa, kisechak sua Ekapolon Akuj. Nakaneni kinyouni tokona sua ejie, loger lokidungukinea Ekapolon Akuj na erai Akuj kosi.’ Sodi ipot esi daang tolemut ngiboro a ejie, itamito atamar kori ebeben akirem akwap a ngimukur. “Nakaneni katolimok Ekapolon Akuj ayong tama, ‘Kichikichikak kesi atamar nyeejwoto kainyo nyikiruki ayong ka kesi, kotere ngakiro nguna, idwangete ngimoe kesi.’ Katolimok ayong esi ngakiro na alimuni Ekapolon Akuj, nakaneni nyiimisikis esi. Tongero esi ngesi, Toloto nakwap na a ngimukur inisasi. Sodi pot Ngiamor lu alomito lomukur ngulu kitobukokinos esi loger a asepich a ao. Kiritasi kesi esi tanang Orima, sodi kidwang kesi esi kaina anakwap a ngimukur a Edom. Sodi kikaloikis esi Ekapolon Akuj isakete kingarak, nakaneni nyiirara ngesi kori nyemisikina ngakiro kus. “Ipot esi kibooyoto alo Kadech ngirwa lukaalak. “Kipot ekisidi atoreas atoloto nariet, kiwapit erot lo a apas a Akaba, loger lokolong kidungokinitor Ekapolon Akuj. Kipot erikasi ngirwa lukaalak kiwowoot anakwap ana a ngimukur a Edom. “Sodi katolimok Ekapolon Akuj ayong atamar, atoloto lowae lo alokwap kainyo kirika ngoni ngirwa lukaalak kiwowoot alomukur kangulu. Katolimok ngesi ayong atamar kechikichik esi kona, ‘Anang esi ni itorioto nakwap na a ngimukur a Edom, nakwap a ngiyenet kus alu eraakasi ngalesea a Esau. Kiemete kesi esi, nakaneni nyiisiakis ejie ka kesi kainyo nyakainakini ayong esi akwap kech tani wadiochichi. Ainak ayong ngalesea a Esau akwap a Edom. Ipedorete esi akigiel akimuj ka ngakipi anikech.’ “Kitamutu eger lo kipiarea Ekapolon Akuj na erai Akuj kus esi anakiro kadaang ana isuba esi. Kiyoki ngesi esi na ilatotor anariet kana. Iruko esi ka ngesi alokaru alutomwon-omwon, nabo iriamut esi ibore daang ni isakete. “Sodi atotena ngaren atodepasi erot lo eteni lorerea a Elas ka Esionigeber tanang nanam a Amakat. Sodi atoreas atoloto lowae lo a kwap akide atoloto Moab. Katolimok Ekapolon Akuj ayong tama, ‘Nyiichan ngitunga a Moab lu eraakasi ngalesea a Loti, kori nyiitijikis kesi. Ainak ayong kesi ere a Ari, nabo emam akwap kech nakainakini ayong esi.’ ” ( Alomito ngitunga lulangir-kooyak noi anyaritae Ngiemim neni. Alalak kesi noi nabo ajwoko. Aoyak kesi ekwaan ka Ngianak, lu araakasi ngibukui ngiche lulangir-kooyak noi. Anyaritae kesi dang Ngirepai loger a Ngianak, nakaneni anyarito Ngimoab kesi Ngiemim. Alomito sek Ngiori Edom, nakaneni apot ngalesea a Esau kiritasi kesi, tomunyasi kesi. Sodi toloma kesi neni loger lo etwarakineta Ngisirael ngimoe kech ekisidi anakwap ana ainakini Ekapolon Akuj kesi.) “Sodi atodokasi ekwakaye angolol a Sered loger lo kolong kilimokinitor Ekapolon Akuj. Araakasi ngikaru ngulu ngitomwon-uni ka ngikan-kauni napei kolong kirotokinio ngoni alo Kadech Barinea. Ngikiliok daang lukajwok a ngirwa kangulu atoakito loger lokolong alimunitor Ekapolon Akuj. Abu Ekapolon Akuj tonger kesi tanang emunyari daang. “Ani etoakete daang, kitolimok Ekapolon Akuj ngoni tama, ‘Ejoikinit esi itorete nakwap a Moab, a erot alo itori Ari. Ipete esi diyete akwap a Ngiamon alu eraakasi ngalesea a Loti. Nyiichan kori nyiitijwoto kesi kainyo emam akwap na ainak ayong kesi nakainakini ayong esi.’ ” ( Enyaritae akwap naga akwap a Ngirepai, erai ekiro ngolo eka ngitunga alu kolong alomito neni. Anyarito Ngiamon kesi Ngisamusumim. Alangir kesi tooyak noi ekwaan ka Ngianak. Alalak kesi, nabo ajwoko. Abu Ekapolon Akuj tomunya kesi, sodi tolemasi Ngiamon akwap kech toloma. Asubitor sek Ekapolon Akuj napei kiro nguna Ngiedomae lu araakasi ngalesea a Esau, lu elomito nakwap a ngimukur a Edom. Abu tomunya Ngiori sodi tolemasi Ngiedomae akwap toloma, eringa tokona kesi elomito neni. Ngitunga a ekwar alo elukakina nanam enyaritae Kirete, kesi aloma lokwaas a anam a Mediterenian. Apot kesi tomunyasi Ngiapim lusek alomito neni, sodi tolemasi akwap kech daang tanang lore a Gasa lo eyei lowae lo alokuju.) “Nakitorio ngoni Moab abu Ekapolon Akuj kitolimok ngoni tama, ‘Kapesi tokona todokasi ekwakaye angolol a Arinon. Ewaak ayong Sion lo erai ekapolon a ere a Echibon, lo erai Eamorit, nakan kus, aapei ka akwap keng. Kitijikisi ngesi sodi tolemasi akwap keng toloma. Napei tokona jik, ewaakini ayong ebuloi lotunga awadaang, kotere esi. Eemi itwaan daang tamaranik napei iirarea esi kilimitoe.’ “Sodi atomea ayong ngitunga anariet a Kedemos toloto lokapolon enyaritae Sion lo a ere a Echibon, toloto alimor akiroit nakisilet ebalasi, ‘kimiekinae sua etoro nakwap kon. Kipori sua jik ewapa erot nakaneni nyikitubor. Kitachi sua akimuj na kinyami ka ngakipi na kimasi. Ibore daang ni kisaki ngesi akitor nakwap kon, tanang kidokari ekwakaye angolol a Yorudan atolomasi nakwap nakiinakinit sua Ekapolon Akuj na erai Akuj kosi. Kichamakinete sua ngalesea a Esau lu alomito Edom, ka Ngimoab lu alomito Ari, kitachamakis kitori nakwap kech.’ “Nakaneni, towou Sion achamakin ngoni kitori nakwap keng. Abu Ekapolon Akuj na erai Akuj kus kitininik etau keng toliwor ngesi lokechanan, atolemareta akwap keng, na tokona eringa kilomit. “Abu Ekapolon Akuj katolimok ayong tama, ‘Kingolik a, tolemasi tokona ekapolon Sion ka akwap keng kainak esi, tolemasi tokona akwap keng toloma.’ Pot Sion ka ngitunga keng akitijwore ngoni alodiyete ere a Yaasa, nakaneni abu Ekapolon Akuj na erai Akuj yok kiwaak ngesi nakan yok, ataara ngoni ngesi ka talokookeng, ta ngitunga keng daang. Kipot nabo atoremo ka akinyasun ngirerea daang, ataara ngitunga daang, ngikiliok ka ngaberu ta ngide. Emam itwaan kiisik ngoni eyari. Atolemasi ngaatuk kech ka alemar ngiboro alorerea. Abu Ekapolon Akuj na erai Akuj yok kimiek ngoni atolemasi ngirerea daang napei ani eyei lo enyaritae Aroer, lo eyei lokeli a adipo a Arinon, ka ere lo alokiding adipo ngina, kinapar jik tanang Gilead. Emam ere lo abu awas keng togogonger kipiyo ngoni. Nakaneni nyeloto ngoni diyete akwap a Ngiamon kori lokwaasea a angolol a Yabok, kori lorerea a akwap a ngimukur, kori wache ni aringa Ekapolon Akuj na erai Akuj yok nyelimokina ngoni atamar atoloto. “Ani erumor, atoloto kwap lowae lo a Bachan, sodi pot ekapolon Ogu ka ngitunga keng daang akitijwore ngoni alo diyete ere a Edirei. Nakaneni katolimok Ekapolon Akuj ayong tama, ‘Nyiem ngesi. Kainakini ayong ngesi, ka ngitunga keng, ta akwap keng daang. Tosubea ngesi ngakiro nakolong isubea Sion, lo arai ekapolon a Ngiamor lo apolokinit ere a Echibon.’ “Sodi kiwaak Ekapolon Akuj nabo ekapolon Ogu ka ngitunga keng nakan yok, ataara ngoni kesi daang. Ani nabo dang, atolemasi ngirerea keng daang. Amam tani epei lo nyelemara ngoni. Araakasi ngirerea daang lu kilemari ngoni ngitomwon-kapei, anakwap kadaang a Arikob ana apolokinit Ogu lo arai ekapolon a Bachan. Adukitoe ngirerea ngulu daang ngawasea nakooyak, ka ngidorin, ta ngasua nagoliet ngidorin. Ayakasi nabo tani ngadakarin nakaalak na amam ngawasea. Kipot ngoni enyasutu ngirerea daang, ataara ngikiliok daang, ka ngaberu, ta ngide, loger lokolong kisubi alorerea a Sion alo arai ekapolon a Echibon. Kipot atolemasi ngaatuk ka ngiboro alorerea. “Kipot atolemasi alokapolok aluarei a Ngiamor kangulu akwap na ayei kide angolol a Yorudan, napei anangolol a Arinon tanang moru a Erimon. ( Elimokinito Ngisidon emoru a Erimon ekiro be Sirion, ani Ngiamor elimokinito ekiro be Senir.) Atolemasi akwap a Ogu daang alo arai ekapolon a Bachan. Atolemasi ngirerea lu ayakasi lomuria, ka lua akwap a Gilead ta Bachan, toeka tanang kide a ngirerea a Saleka ka Edirei.” ( Ekapolon Ogu ngesi erai ekapolon lo a esal a Ngirepai. Echiatae asaduku nakiweet akwaan keng anamoru. Arai aoyau keng ngamitae ngoomwon tarai aurianut ngamitae ngaarei itemitoe kotere ekiteme lo a ngirwa kangulu. Eringa asaduku ngina eyei Raba, lore a Ngiamon.) “Nakitiliworea ngoni akwap ayok, abu ayong atotiakak ngitela a Reuben ka Gad ewae lo alokwap ere a Aroer, diyete angolol a Arinon, ta epewae a akwap ana a ngimukur a Gilead, aapei ka ngirerea keng. Ani epewae a ekitela a Manase, abu atotiakak ewae loche a Gilead, ta wadaang a Bachan, ni erai nisek apolokinit Ogu. Arai neni daang akwap anyaritae Arigob.” (Anyaritae Bachan akwap a Ngirepai. Abu Yair, lo a ekitela a Manase tolema akwap a Arigob daang, na erai napei alo Bachan, tanang lokukuoru a Gechur ka Maaka. Sodi tolimok ngesi ngadakarin nguna ekiro keng a ilope, eringa enyaritae ngadakarin a Yair.) “Atotiakak ayong Makir lo a ekitela a Manase akwap a Gilead. Ani ngitela a Reuben ka Gad atotiakak ayong akwap na isiakini alo Gilead tanang nangolol a Arinon. Ekukuor kech lo alokuju ngesi kiding angolol, ani ekukuor lo alokwap ngesi angolol a Yabok, arai ngina epewae ekukuor a Ngiamon. Ani alo too, anangit ekukuor kech nangolol a Yorudan, napei ananam a Galilaya alokwap, tanang nanam a Amakat alokuju, ani alo kide tanang nakeju a emoru a Pisiga. “Abu ayong echikichik kesi napei ngina atama, ‘Kiinak Ekapolon Akuj na erai Akuj yok esi akwap na alo kide Yorudan naga toloma. Kitonyoutu tokona ngikiliok lukajwok daang totinga ngiboro a ejie sodi todokasi ekwakaye angolol a Yorudan pena kesi ngaren ngitela luche daang a Ngisirael, sodi kingarakis Ngisirael ngulu kitoloma nakwapea kech. Ngaberu kus make, ka ngide kus, ta ngaatuk kus (ayeni atamar eyakasi esi ngaatuk nakaalak) kesi idongete lorerea lu katiakak ayong esi. Kingarakisi Ngisirael luche toloma nakwap na einakinit Ekapolon Akuj kesi alo too Yorudan, nabo tanang Ekapolon Akuj itolomi kesi neni a ekisil, loger lokolong kisubea esi dang kane. Ani erumor, ipedorete abongun nakwap nakatiakak ayong esi naga.’ “Sodi atodungok ayong Yochua atama, ‘Ingolik iyong a ngakonyen kon, daang nakolong asubea Ekapolon Akuj na erai Akuj kus ngikapolok luarei anyaritae Sion ka Ogu. Nabo esubea ngitunga luche daang lu iremi iyong akwap kech, esubea ngakiro napei nguna. Nyiem kesi, kainyo eji Ekapolon Akuj na erai Akuj kus alowae kus.’ “Ngirwa ngulu, abu ayong elip lokojokon atama, ‘Ekapolon lo irai ekapolon Akuj, ayeni atamar kidodik iyong ayong akisiakinet a ngakiro anakatalarak taraakas nabo nakailiilok na isaki iyong akisub. Emam akuj na eyei kidiama kori kwap na epedori akisub ngakiro naapolok na isubi iyong! Kimiekinae ayong atodoka ekwakaye angolol a Yorudan, Ekapolon Akuj, sodi engolik ewae loche ye, a akwap anaajokon a ngimukur ka ngimoru a Lebanon.’ “Nakaneni kotere esi, abu Ekapolon Akuj katongoik ayong, sodi towou apupokin ngakiro kang. Pearai abu ngesi katolimok ayong tama, ‘Etemokin nguna! Nyiilim nabo nguna! Todoka naita a emoru a Pisiga, sodi kingolia kwap ka kuju, kingolia kide ka too. Kiseme lokojokon ibore ni ingolikini iyong a ngakonyen kon, kainyo nyidokari iyong jik ekwakaye Yorudan. Kichikichikak Yochua ngakiro keng. Kitogogong ngesi kainyo ngesi eriki ngitunga ekwakaye, toloma nakwap na ingolik iyong.’ “Aloger kangolo, kipot sua edongo nadipo na ekienyikina ka ere a Bespeor.” Sodi tolimok Musa ngitunga tama, “Kiwapa ngitalio daang lu ketatami ayong esi, nakaneni iyarete esi toloma nakwap nakiinak esi Ekapolon Akuj na erai Akuj kata apaakus. Nyiatakis ngakiro ngache nakiro nakadungokinit ayong esi, kori nyiilemasi ngakiro ngache. Kiwapa ngitalio a Ekapolon Akuj ana erai Akuj kus, lukainak ayong esi. Ipot esi ngikulepek kingolikis a ngakonyen kus ngakiro na asubi Ekapolon Akuj alomoru a Peor. Abu ngesi tomunya itwaan daang ni elipit Baal kaina, nakaneni esi lukolong imunosi Ekapolon Akuj na erai Akuj kus, eringa iyarete tani tokona. “Ketatam ayong esi ngitalio daang loger lokolong kalimokinitor Ekapolon Akuj na erai Akuj kang. Kiwapa kesi anakwap ana tokona edikino iremete toloma. Kiwapa kesi imunosi nakaneni idodikinete nugu ngitunga a ngibukui aluche eger lo iosokioto esi. Na iirareta kesi ngakiro a ngitalio kangulu kadaang, etamarete, ‘Etia aosou ka ayenut eyei lotunga lugu ai!’ “Emam ngitunga a akwap a ache tani keyenikinitae kesi kwaani, lu eyei akuj na eapi anikech esaa lo esaketa kesi ngesi, loger lokiapikinitor ngoni Ekapolon Akuj na erai Akuj yok. Kitachanakini ngesi ngoni ngakiro nakinyaraa atamar kingarak. Emam ngitunga a akwap a ache tani keyenikinitae kesi kwaani, lu eyakasi ngitalio luajokak lu ikote lu ketatam ayong esi akolongit naga. Tochoikinos! Ngirwa daang lu iyareta esi, warasi nyikimuriakis nguna ingolikis esi a ngakonyen kus. Tolimokisi ngide kus ka ngitatae kus ngakiro a akolongit ana kolong iwaatar esi alongaren Ekapolon Akuj na erai Akuj kus alomoru a Sinai nakalimokinea ngesi ayong tama, ‘Tochunak ngitunga. Asaki ayong kesi kiirasi ngakiro na asaki alimun, sodi kitatamatar kesi akiwap ngakiro kang ngirwa daang lu eyareta, nabo kitatameta ngide kech akiker ayong.’ “Tolimokisi ngide kus eger lo ilooso esi towaa anakeju a emoru alo aburuchiarito ngidowon a apuru ana aribokinit ka asarae a akim na anangit kidiama. Tolimokisi kesi eger lo kisurorea esi Ekapolon Akuj anakim, ka eger lo ipupioto esi ngesi iruoro nakaneni nyingolikina akwaan pearai etoil bon ipupete. Abu ngesi kitolimok esi ngakiro na isubete sodi kirichakineta achamunet nakolong ichamakinosi esi ka ngesi. Ejoikinit esi iwapete ngitalio lutomon lukolong egirakini ngesi namoru nadapal naarei. Kalimokini Ekapolon Akuj ayong atamar ketatam esi ngitalio daang lu ejoikinit esi iwapete anakwap ana edikino esi iremete toloma. “Mam akwaan ipot esi kingolikis nakisuruorea esi Ekapolon Akuj anakim alomoru a Sinai. Tochoikinos tokona esi noi sodi nyiisecheta tosuba ngakujo nasubuna a ekisikwaane cha kadaang, kerai eka ekile kori eka aberu, kori eka etiengit, kori eka ikieny kori eka ibore ani eliat, kori eka ekolia. Warasi nyiisak akilip ibore daang ni eyei nadis, kerai akolong kori elap, ta ngikanyer. Ainaki Ekapolon Akuj na erai Akuj kus ngitunga luche daang ngiboro ngulu toliworos ilipeenete. Nakaneni esi kesi ngitunga lukolong kiyuuni Ekapolon Akuj alo Misiri, ani kiboliare. Kipuduni ngesi esi toliworotor ngitunga keng loger lo tokona iraakatar. Abu Ekapolon Akuj na erai Akuj kus katongoik ayong kotere esi, sodi kikongok atamar nyadokari ayong ekwakaye angolol a Yorudan ataanyu akwap naajokon nakiinakini esi Ekapolon Akuj. Atoanikini ayong nakwap naga nyadokari ekwakaye angolol, nakaneni aapuu esi adokar ekwakaye toloma nakwap naajokon. Warasi nyikimuriak achamunet nakolong ichamakinosi esi ka Ekapolon Akuj na erai Akuj kus. Kiwapa etal keng nyiisubakis akuj cha daang nasubuna. Ani kona ikonea Ekapolon Akuj na erai Akuj kus asarae nakariran, erai Akuj na nyesaki kilipae Akuj ache. “Tani kiloma esi neni nikooyen kidounoe ngide ka ngitatae kus, nyiisech tosuba ngakujo nasubuna a ekisikwaane cha kadaang. Nyejokak ngakiro nguna alongaren Ekapolon Akuj nabo itongoyete ngesi. Adis ka akwap kesi eraakasi ngikaanyunak kus akolongit naga, ani pekiwap esi ngakiro kang, ingopiarete esi anakwap atipei. Nyiyarete esi nikooyen anakwap ana eyei ekwakaye Yorudan ana aapuu esi alomar toloma. Kimunyario esi jik. Kiealakini Ekapolon Akuj esi lobukui luche, kidongo ngidikidio kus eyarete kaneni. Ilipete esi kaina ngakujo na esubunitae a ngakan, ngakujo na ichiatae anakito ka na ekulunitae anamoru, ngakujo na nyiteete kori na nyepupete ngakiro, nyimujete kori nyinguyete. Ilomarete esi akisak kaina Ekapolon Akuj na erai Akuj kus, nakaneni ani kisak a ngitai kus kadaang, ianyunete. Ani kianyut esi ngichan, nabo tosubakin ngakiro nguna daang anikus, ireeunosi esi ekisidi nia Ekapolon Akuj kiwapa ngesi. Erai ngesi Akuj na a ngisien. Nyikiisikini ngesi esi kori nyikimunyari, nabo nyimuriakini ngesi achamunet nakolong achamakin ngesi alope kata apaakus. “Kingitas ngakiro a ngikaru alu kolong aringaakar esi nyeuriuna, jik tanang ngirwa lu asubunea Akuj itwaan anakwap. Kingitas ngakiro a akwap etia ni etia. Asubakin ngache naapolok nakanuan a? Eyei itwaan ni eira ngakiro na ikote nugu nakanuan a? Eyakasi ngitunga eirasi akuj isuruori kesi anakim sodi toyara, loger lo iyareta esi a? Eyei akuj ache nakanuan, na alemu ngitunga a ebukut a eche kitiliwo ngikeng loger lo kisubea esi Ekapolon Akuj na erai Akuj kus alo Misiri a? Abu ngesi kidodiu agogongu keng naationon iteete esi ngikulepek a ngakonyen kus. Abu ngesi yau ngidekesinei luaronok ka ejie, tosub ngakiro nakailiilok ka nakatalarak, tosubak nabo ngakiro naketubulok. Kidodik Ekapolon Akuj esi nguna sodi toyeneta dir atamar ngesi bon erai Akuj, nakaneni emam akuj ache eyei. Kimiek ngesi esi iirarete etoil keng anadis sodi kitatamea esi. Ani kane anakwap abu ngesi kisingolik esi akim keng, sodi nabo kisuruor esi anakim. Ani kona kolong aminar ngesi taapaakus, kiseu ngesi esi, sodi kipud alo Misiri kotere agogongu keng a alope. Ani na ilooso esi ngaren, kirita ngesi ngitela lu ayenikinitae nabo taraakas lukajwok kidwangito esi, sodi kiyaunea ngesi esi kiinakinea akwap kech na tokona eringa erai akus. Kanguna, kitamutu akolongit naga warasi nyikimuriak atamar, Ekapolon Akuj ngesi erai Akuj anadis ka akwap. Emam akuj ache. Kiwapa ngitalio keng daang lukainak ayong esi akolongit naga, tojokearotor ngakiro daang anikus ka ngalesea kus. Irubakinete esi ilomito nakwap nakiinak Ekapolon Akuj na erai Akuj kus esi, toliwor akus jik.” Sodi totiaku Musa ngirerea nguuni alo kide angolol a Yorudan lu epedori itwaan tamatar todukea erai kear itwaan peiyechakinit. Tarai pearai sek itwaan ngini emoit keng. Epedori ngesi tamatar ni eyei epei a ngirerea kangulu toduk nyearere. Alokitela a Reuben ayei ere a Beser lo ayei lomuria lo a ariet. Alokitela a Gad, ayei ere a Ramos lo ayei nakwap a Gilead. Alokitela a Manase, ayei ere a Golan lo ayei nakwap a Bachan. Ainakini Musa Ngisirael ngitalio ka ngakitatamet a Akuj. Lugu kesi ngakitutuket ka ngitalio lu adungokini Musa Ngisirael na arotokinioto alo Misiri, toringa eyakasi ekwakaye Yorudan anadipo ana ekienyikina ka ere a Bespeor. Neni ngesi ainakinea Musa kesi ngitalio ngulu. Arai neni akwap a Sion alo arai ekapolon a Ngiamor, lo alomit lore a Echibon. Ngesi lokolong edwangete Musa ka Ngisirael na apudunioto alo Misiri. Apot kesi toloma nakwap a Sion ka akwap a Ogu, alo erai ekapolon a Bachan. Alomito ngikapolok luarei ngulu kide angolol a Yorudan. Esiakinit akwap naga alore a Aroer, alokeli a angolol a Arinon, tolot jik kwap tanang moru a Sirion ngesi atamar, emoru a Erimon. Emorikina tani ka ewae alo kide angolol a Yorudan napei alokuju tanang nanam a Amakat. Ani alo kide tanang nakeju a emoru a Pisiga. Tanyara Musa Ngisirael daang tochunak, sodi tolimok tama, “Ngisirael, Topupokisi ngitalio daang lu kainakini ayong esi akolongit naga. Kitatamas sodi kiwapa kesi. Alomoru a Sinai, abu Ekapolon Akuj na erai Akuj yok nyeechamakin ka taapayok make, pearai ngoni daang lu tokona eringa kiyari. Alokidiama emoru, abu Ekapolon Akuj kisuruor esi anakim ikobanakinosi ngakiro. Abu ayong atowo anakidingos kus ka Ekapolon Akuj katolimokinea esi ngakiro na eruoro ngesi, kainyo iemete esi akim, nyiidokasi moru. “Tolim Ekapolon Akuj tama, ‘Ayong arai Ekapolon Akuj na arai Akuj kus nakolong kayuuni esi alo Misiri ani iraakatar ngikedalak. “ ‘Warasi nyiilipa akuj ache mati ayong bon. “ ‘Nyiisubakis ekisikwaane a ibore a idio ani eyei nadis kori nakwap, kori ni eyei tooma nakipi, kwap ngalup. Warasi nyiiredikokis akuj nasubuna kori nyiilipa, kainyo ayong Ekapolon Akuj na arai Akuj kus, arai Akuj na nyasaki kilipae akuj ache. Erirae ayong lu karemokino ayong, nabo erirae ngalesea kech tanang nalesea na ngauni ka na ngoomwon. Nakaneni amina ayong ngabunge nakaalak alu kaminasi ayong, kiwapito ngitalio kang. “ ‘Nyiilimut ekiro kang a ngakiro anaaronok, kainyo ayong Ekapolon Akuj na arai Akuj kus, erirae itwaan daang ni elimit ekiro kang pas. “ ‘Kirichakisi akolongit a Sabato sodi kitaleut, loger lokadungokinea ayong Ekapolon Akuj na arai Akuj kus esi. Tosuba etich daang a ngirwa a ngikan-kapei, nakaneni erai akolongit na a ngakan-kaarei nakiangaret na itegeliaritae toliwor akang. Emam itwaan esubi etich akolongit ngina tani anikus, ka ngide kus, ka ngikedalak kus, ka ngibaren kus, ka ngitunga a akwap anache lu elomito nakwap kus. Ejoikinit ngikedalak kus iangarete loger lo iangaritotor esi. Kitamutu atamar iraakasi kolong esi ngikedalak alo Misiri, kitamutu nabo atamar ayong Ekapolon Akuj na arai Akuj kus kayuuni esi a agogongu kang anaationon. Ngakiro nguna abalar ayong esi kirichakisi akolongit na Sabato. “ ‘Toker apakon ka itiokon loger lokolong kadungokinea, sodi tojokearotor ngakiro kon daang, sodi toyarea nikooyen anakwap ana kainakinit ayong iyong. “ ‘Nyiiar. “ ‘Nyiilom. “ ‘Nyiikoko. “ ‘Nyiitingak itwaan niche ngakiro na eraakasi alioko. “ ‘Nyikiterekuia aberu a itwaan aniche, kori akai keng, kori amana keng, kori ngikedalak keng, kori ngaatuk keng, kori ngisikiria keng, kori ibore cha daang ni etingit itwaan niche.’ “Ngitalio ngulu kesi lukolong kiinakini esi Ekapolon Akuj, na ichunakinotor moru. Na eruoror ngesi ikiarit etoil anakim ka ngidowon, abu ngesi kiinak esi ngitalio ngulu make, emam ngiche. Sodi kigir ngesi ngitalio ngulu namoru nadapal ngaarei, dio kainak ayong. “Na ariraunea emoru wadaang akim, sodi kiirasi esi etoil anaribu, apot ngikarikok kus ka ngikatukok a ngitela kus pot nikang tamasi, ‘Kidodik sua Ekapolon Akuj na erai Akuj kosi apolou ka ekipur keng na kiirarea sua ngesi iruoro anakim! Kiyen tokona atamar ikwa epedori itwaan arubakinit eyari tani kisuruor Akuj ngesi. Nakaneni tokona, nyo edikino ngoni kitoakea nabo? Kimunyari ngoni akim naaronon ngina. Kitoaki ngoni dir erai kiira ngoni Ekapolon Akuj na erai Akuj yok iruoro nabo. Eyei itwaan nakanuan eira Akuj na eyari iruoro anakim sodi toyar a? Musa, tobongo kiira ngakiro daang na iruoro Ekapolon Akuj na erai Akuj kosi, sodi tobongu kitolimok sua ngakiro nakilimok ngesi iyong. Kiirari sua ewapa.’ “Na eirarea Ekapolon Akuj ngakiro nguna, katolimok ngesi ayong tama, ‘Eira ayong ngakiro na iruorosi ngitunga lugu, nabo iyookinito kesi nguna. Arai bo kikote kesi jiik dang ne! Arai bo katorimasi kesi ayong jik, ka akiwap ngitalio kang, kejokearosi ngakiro kech daang ka na ngalesea kech jik. Kape tolimok kesi atamar tobongosi loeaman kech. Nakaneni ani iyong Musa, kiboikin nege eruko ka ayong, sodi kainak ayong iyong ngitalio ka ngakiro kang daang. Kitatam ngitunga ngitalio ngulu, sodi kiwapa kesi anakwap ana ainakini ayong kesi.’ “Ngisirael, tosuba ngakiro daang nakidungok esi Ekapolon Akuj na erai Akuj kus, sodi kitemokis. Nyiingero ngitalio keng tani epei. Kiwapa kesi daang sodi tojokearotor ngakiro daang anikus, nabo kiboikinotor esi jik nakwap na ilomete. “Ngitalio daang lugu lukolong kadungokini ayong Ekapolon Akuj na erai Akuj kus atamar ketatam esi, kiwapa kesi anakwap ana edikino esi ilomarete toloma. Ani cha eringa esi iyarete, esakitae esi ka ngalesea kus irimasi Ekapolon Akuj na erai Akuj kus ka akiwap ngitalio keng daang lu kainakinit ayong esi, sodi toyareta esi nikooyen anakwap kangina. Kiirasi robo Ngisirael ngitalio ngulu sodi kiwapa! Tojokearos ngakiro kus daang, ilalakearosi esi noi, nabo toloma nakwap na ileleba ngakile ka akimiet a ao loger lo kolong kichikakinitor Ekapolon Akuj na erai Akuj kata apaayok. “Ngisirael, kiirasi nugu! Ekapolon Akuj nakilipit ngoni ngesi bon erai Akuj yok. Tominakisi Ekapolon Akuj kus a ngitai kus kadaang, ka akiyar kus daang ta ngikilinga kus daang. Warasi nyikimuriakis ngitalio lu tokona kainakinit ayong esi lugu. Kitatama ngide kus. Tolimuunutu iyakasi nawiyei, ka na imamakatar anawiyei, tolimuunutu iangarito ka na isubeta etich. Toinikisi nakan kus ka akinap aloreetin kus, kitamuuneta. Kigira nakito a ngidorin a ngakais kus ka lodorin a ngawasea kus. “Kiinakini Ekapolon Akuj na erai Akuj kus esi akwap na a ngirerea aluapolok ajokak, lu araakasi meere esi idukete, loger lokolong echikakinitor ngesi taapaakus Aburaam, ka Isaka, ta Yakobo. Ileleba ngiboro lukoajokak nakais lu nyeraakasi esi iwaakinete, epete ngakare na nyeraakasi esi iwadete, ta ngamanat a ngimusabib ka ngikito a akimiet lu nyeraakasi esi itakinete. Nakiyaunea esi Ekapolon Akuj nakwap naga, sodi tanyama esi akimuj na isakete daang kimwoko, warasi nyikimuriak Ekapolon Akuj nakolong kiyuuni esi alo Misiri ani iraakatar ngikedalak. Tokera Ekapolon Akuj na erai Akuj kus, kilipa ngesi bon, nabo ani ngakiro na isakete esi akichikakin itwaan niche, tolimutu ekiro keng bon. Nyiilipa ngakujo ngache na eraakasi ngakujo a ngitunga alu irukito ka esi. Ani kilipa esi ngakujo ngache, kingoikini esi Ekapolon Akuj lokojokon, sodi kitomunya esi anakwap, kainyo Ekapolon Akuj na erai Akuj kus, na irukito ka esi, erai Akuj na nyesaki kilipae ngakujo ngache. “Nyiiningeeneto Ekapolon Akuj na erai Akuj kus loger lokolong isubeta alo Masa. Kirichakisi noi akiwap ngitalio lu kiinakini ngesi esi. Tosuba ngakiro na ebala Ekapolon Akuj itemokino tojokak, nakaneni ejokearosi ngakiro kus daang. Ipedorete esi alemar akwap naajokon nakolong ekongi Ekapolon Akuj atamar ainakini taapaakus, nabo itwarakinete esi ngimoe kus loger lokolong kichikakinitor ngesi. “Kingisete monan esi ngide kus tamasi, ‘Nyo kolong kidungokinitor ngoni Ekapolon Akuj na erai Akuj yok atamar ewapa ngitalio lugu daang?’ Sodi ilimokinete esi kesi tamasi, ‘Kirai kolong ngoni ngikedalak a Parao alo arai ekapolon a Misiri, sodi kitoyuu ngoni Ekapolon Akuj a agogongu keng anaationon. Kingolik sua a ngakonyen kosi ngesi esubi ngakiro nakailiilok ka naketubulok alotunga a Misiri ka ekapolon kech, ta ngikasubak etich keng daang. Abu ngesi kitalachu ngoni alo Misiri, kiyau nege ainakin akwap naga, loger lokolong alimokinitor taapaayok. Sodi kitodungok ngoni Ekapolon Akuj na erai Akuj yok atamar ewapa ngitalio lu daang nabo atokera ngesi. Ani kisubi ngoni kongina, kiyoki ngesi ngoni sodi kitajakaan. Ani kiwap ngoni dir ngakiro daang nakidungokinit ngoni Akuj, elakar ngesi kotere ngoni.’ “Kiyauni esi Ekapolon Akuj na erai Akuj kus nakwap na ilomete, nabo itwarakini ngesi ngibukui lukaalak anakwap kangina. Ani iloose ngaren, itwarakini ngesi ngibukui ngikan-kaarei lu elalak ngitunga nabo lu ejwoko noi kidwangito esi. Ngibukui ngulu kesi Ngiiti, ka Ngigirigach, ka Ngiamor, ka Ngikanaan, ka Ngiperes, ka Ngiipi, ta Ngiebus. Ani iwaakini Ekapolon Akuj na erai Akuj kus ngitunga ngulu daang nakan kus, sodi kidwanga esi kesi, ejoikinit esi imunyarete kesi daang. Nyiichamakinosi ka kesi kori nyikisieneto kesi esi. Nyiuta kesi kori warasi ngide kus nyiuta kesi, kainyo ibatarete kesi ngide kus ani a Ekapolon Akuj sodi kilipa ngakujo ngache. Ani kesubakin nguna, kingoikini Ekapolon Akuj esi sodi kitomunya atipei. Aloger kangolo, toyatasi ngikenoi a ngakipeyos kech, tobwangabwangata ngapirio kech na a ngamoru na italeunitoe, totubutuboto ngakisikwaanet a akuj kech anabe Achera,*g** sodi kichunya ngakujo kech nasubuna daang. Tosuba kongina kainyo iraakasi esi ngika Ekapolon Akuj ana erai Akuj kus. Abu ngesi kitoseu esi alotunga kadaang anakwapea sodi toliworos ngitunga keng a alope. “Pekiminakini Ekapolon Akuj esi kitoseu ani ilalaketa akidwang ngitunga luche. Iraakasi esi ebukut lo ekidioko ngitunga anakwapea. Nakaneni kitominak esi Ekapolon Akuj tasak akirichakin akichikakinet nakolong ainakini ngesi taapaakus. Ngakiro nguna kolong kiyuunea ngesi esi a agogongu keng anaationon, sodi kitalachu ani kolong iraakatar ngikedalak a ekapolon a Misiri. Toyena atamar Ekapolon Akuj na erai Akuj kus ngesi bon erai Akuj, nabo erai ngesi Akuj na emunoi. Irichakini ngesi achamunet keng nabo idodiuni ngesi amina na nyedaun analesea ana eraakasi abunget apei a ngulu eminasi ngesi kiwapito ngitalio keng, nakaneni nyemamakini ngesi akirirare lu eremito ngesi. Tokona bocha, kiwapa ngakiro nakitatam esi. Kiwapa ngitalio daang lu kainak ayong esi akolongit naga. “Ani kiirasi esi ngitalio lugu sodi kiwapa iteni dir, erubakini Ekapolon Akuj na erai Akuj kus irichakinit achamunet keng anikus, nabo kidodikini esi amina keng na nyedaun, loger lokolong echikakinitor taapaakus. Kiminakini ngesi esi kitopia, sodi kiatakinotor esi taanyut ngide lukaalak. Epiari ngesi ngamanat kus sodi toriamut esi ngikinyam ka emuna, ta akimiet, nabo kipiari ngesi esi kiinak ngaatuk ka ngamesekin nakaalak. Kipiari ngesi esi daang anakwap ana kolong echikakini ngesi taapaakus atamar kiinakini esi. Emam ngitunga ngiche anakwapea lu epiario noi loger kus. Emam tani ipei kus kori ipei a ngibaren kus ni ekolupani. Kiyok Ekapolon Akuj esi alodekesinei kadaang, nabo nyikiinun esi tani epei a ngidekesinei alu kolong aronok idekasi esi alo Misiri, nakaneni ititingi ngesi ngimoe kus ngidekesinei ngulu daang. Tomunyasi ngibukui daang lu iwaakini Ekapolon Akuj na erai Akuj kus nakan kus, nabo tochoito kisieniyete. Nyiilipa ngakujo kech kainyo erikunete ngakiro nguna akitu nikus. “Warasi nyiitamasi be elalak ngitunga lu kidwangito esi, kori nyipedorete esi akitwarakin kesi. Nyieam kesi. Kitamutu ngakiro nakolong asubea Ekapolon Akuj na erai Akuj kus ekapolon a Misiri ka ngitunga keng daang. Kitamutu ngidekesinei luaronok kolong ingolikinete esi a ngakonyen kus, ka ngakitoodikinet nakailiilok ka nakatalarak, ka agogongu naationon kolong kilachunea esi Ekapolon Akuj na erai Akuj kus. Inyasuni ngitunga lu tokona ikerito esi lugu daang loger lokolong enyasunea ngesi Ngimisiri. Itubuli ngesi tani kesi nabo emunyari ngulu ematarosi akiduk. Warasi robo nyieam ngitunga ngulu. Irukito esi ka Ekapolon Akuj na erai Akuj kus. Erai ngesi Akuj naapolon na echamit ekerio. Ani iloose esi ngaren, itwarakini ngesi ngitunga ngulu a ngapei-pei. Nyipedorete esi amunyar kesi amunyaret apei, kainyo ani kisuba esi kongina, iatakin ngitieng a moding, toliwor kitoemito esi. Iwaakini Ekapolon Akuj ngimoe kus nakan kus, sodi kitubul kesi tanang imunyarete esi kesi daang. Iwaakini ngesi ngikapolok kech nakan kus. Iarete esi kesi sodi tomunyaros kesi. Emam itwaan epedori aweikin esi. Imunyarete esi itwaan daang. Kichunya ngakujo kech nasubuna. Warasi ngakwangae kori egolit lo eyei kidiama kech nyikimina, kori nyiilemasi toliworos ngikus. Ani kisuba esi kongina, erikunete ngakiro nguna akitu, kainyo nyesaki Ekapolon Akuj ilipio ngakujo nasubuna. Warasi nyiiyaut ngakujo nasubuna nugu nawiyei kus kainyo ianyunete esi ngilam lu eraakasi ngikech. Echamitae esi iremokinosi ngakujo nguna kimenyasi, kainyo ilamit Ekapolon Akuj kesi. “Kiwapa lokojokon ngitalio daang lu kainak ayong esi akolongit naga, sodi toyareta esi, talalakearotor sodi toloma nakwap nakolong echikakini Ekapolon Akuj taapaakus. Kitamutu eger lokolong kirikio esi Ekapolon Akuj na erai Akuj kus analosit anakooyen kana, kisitor nariet a ngikaru a alutomwon-omwon kangulu. Abu ngesi yau ngichan lukaalak nikus kiningio esi toyenea ngakiro na isakete esi akisub, nabo taanyunea kiwapete esi ngitalio keng. Abu ngesi kitanyam esi akoro sodi kiinak akimuj be mana tanyama, akimuj nakolong nyenyama esi ka taapaakus a ache. Asubi ngesi kongina sodi kitatamea esi atamar nyejoikinit itwaan igienokin imugati bon toyarea, pearai ejoikinit igienokin ngakiro daang na elimuni Ekapolon Akuj. Alokaru alutomwon-omwon kalu, nyekorisiuna ngiworui kus nabo nyebwo ngakejen kus. Toyena atamar kirionokini esi Ekapolon Akuj na erai Akuj kus loger lo erionokinea itwaan ngide keng. Aloger kangolo, tosuba ngakiro nakidungokinit esi Ekapolon Akuj. Kibooyoto iwapito ngitalio, keng nabo tokera ngesi. Kiyauni esi Ekapolon Akuj na erai Akuj kus nakwap naajokon, akwap na eyakasi ngangololin ka ngileleae, ta ngichwae lu ebukuno ngakipi nadipoe ka lomukur. Akwap na ekoniuni ngakanoi, ka ngimomwa, ka ngamusabib, ka ngameyana, ka ngalam, ka ngikito a akimiet, ta akimiet a ao. Nyikinyami esi akoro kaina jik kori emam ibore iitunete. Eyakasi ngasua tooma natabab a akwap kangina, nabo ipedorete esi abokun ngasua nanyangayek alomukur a akwap kangina. Iriamunete esi ibore daang ni isakete akinyam, nabo ibuakinete Ekapolon Akuj na erai Akuj kus alakara kotere akwap naajokon kiinak ngesi esi. “Warasi nyikimuriak Ekapolon Akuj na erai Akuj kus. Warasi nyiingero akiwap tani epei a ngitalio keng alu kainak ayong esi akolongit naga. Ani iriamunete esi akimuj daang ka akiduk ngakais naajokak na iboikinosi, nabo ani iatakinosi ngaatuk ka ngamesekin kus, ngaropiyae ka egolit kus, ta ngiboro kus daang, warasi nyiiwogakinosi kimuriak Ekapolon Akuj na erai Akuj kus, nakolong kiyuuni esi alo Misiri ani iraakatar ngikedalak. Abu ngesi kitorik esi kisitor nariet naasilon ketubulon ni ayakasi ngimunio luadwarak ka ngikuutanea. Anakwap anakoonon amam ngakipi kangina, abu ngesi kitoleleu ngakipi anataaba anakaagongon kotere esi. Kiinak ngesi esi akimuj nabe mana anariet tanyama, akimuj nakolong nyenyama taapaakus a ache. Abu ngesi kining esi a ngakiro anaationok, sodi ani ekisidi, kitopiarea esi a ngiboro aluajokak. Tokona bocha, nyiitamasi alotai kus ‘Agogongu kosi ka ngikilinga ngesi kianyunea sua ebarit logo’. Kitamutu Ekapolon Akuj na erai Akuj kus kainyo ngesi kiinakini esi agogongu na ibareta. Esubi ngesi kongina kainyo eringa ngesi tani tokona irichakinit achamunet na kolong achamakin ngesi ka taapaakus. Warasi nyikimuriak Ekapolon Akuj na erai Akuj kus kori nyiirearosi akilip ngakujo ngache ka akisub etich kech. Kechikichiki tokona ayong esi atamar ani kisubakis esi kongina, kimunyario esi dir. Ani pekiwap esi Ekapolon Akuj, kimunyario esi loger a ngibukui a luche alu tokona emunyari ngesi iloose esi ngaren. “Topupokisi Ngisirael! Akolongit naga, anang esi ni idokareta ekwakaye angolol a Yorudan sodi toloma nakwap a ngitunga alu eyenikinitae nabo ejwoko noi kidwangito esi. Epolok ngirerea kech nabo eyakasi ngawasea na enangito nadis. Ani ngitunga ngikulepek, ewoyak nabo egogong. Eraakasi kesi ngide a Ngianak, lukolong iirarete esi ebeyo, ‘Emam itwaan epedori aweikin ngide a Anak.’ Nakaneni ingolikinete tokona esi atamar kingarenikini esi Ekapolon Akuj na erai Akuj kus ikoni akim nakariran. Idwangi ngesi kesi iloose esi ngaren, sodi kitwarakineta esi kesi nabo tomunyasi atipei, loger lokolong kichikakinitor ngesi. “Ani kitwarak Ekapolon Akuj na erai Akuj kus kesi anikus kerumor, nyiilimut tamasi ‘Kiyauni kolong Ekapolon Akuj sua atoloma nakwap naga, ani kiraakar luajokak.’ Meere kongina, itwarakini Ekapolon Akuj ngitunga lu kotere esi kainyo eroko kesi. Meere ni iraakatar esi luajokak kori ni isubeta ngakiro na iyookino ngesi kimiekinitor esi Ekapolon Akuj ilemarete akwap kech. Itwarakini Ekapolon Akuj kesi ani eraakatar ngitunga luaronok nabo kotere akichikakinet nakolong echikakini ngesi taapaakus Aburaam, ka Isaka, ta Yakobo. Toyena bocha atamar nyikiinakinit esi Ekapolon Akuj na erai Akuj kus akwap naajokon naga ani iraakatar esi ngitunga luajokak. Meere kongina! Iraakasi esi ngitunga lukechanak. “Kitamutu eger lokolong itongoeta esi Ekapolon Akuj na erai Akuj anariet. Napei kolong irotokinioto esi alo Misiri tanang akolongit na inanguneta esi nege ingerito esi Ekapolon Akuj. Tani kolong alomoru a Sinai, ipot esi kitongoa Ekapolon Akuj. Tongo ngesi lokojokon tasak tani amunyar esi. Atolot ayong kidiama emoru akidiaun ngamoru nadapal na egiritae achamunet nakolong ichamakinotor esi ka Ekapolon Akuj. Eboikin ayong moru ngirwa ngitomwon-omwon, akwaar ka apaaran, emam ibore anyami kori amasi. Abu Ekapolon Akuj kainak ayong ngamoru ngaarei nadapal na egirit ngesi a akan keng a ilope. Egirit ngakiro nasek kilimokinit ngesi esi anakim, akolongit na iriamiriamitotor esi moru. Adaunet a ngirwa alutomwon-omwon kangulu, abu Ekapolon Akuj kainak ayong ngamoru naarei dapal nguna, na egiritae achamunet. “Sodi katolimok Ekapolon Akuj ayong tama, ‘Tonyou totiyaar alomoru atipei, kainyo asecha ngitunga kon lukolong irikuni iyong alo Misiri, asuba naaronok. Arearosi kesi atipei anakiro ana kolong adungokini ayong kesi atamar tosuba, asubakis kesi akuj kech nasubuna.’ “Katolimok nabo Ekapolon Akuj ayong tama, ‘Ayeni ayong atamar ichanaka ngitunga lugu noi. Wara nyikiratak ayong, kainyo asaki ayong atomunya kesi tojongoi alimit anakwap. Sodi ketiliwo ayong iyong apakeng a ngibukui alukaalak nabo tojwoko noi kidwangito kesi.’ “Abu ayong atorei atotiyaun alomoru adakit ngamoru naarei dapal na egiritae achamunet. Ariraunit asarae a akim alomoru. Abu ayong engolik atamar ingero esi ngakiro nakolong kidungokini esi Ekapolon Akuj na erai Akuj kus. Engolik nabo atamar isechakis esi Ekapolon Akuj, ani isubeta akuj nasubuna a asuat kisikwaanikis ka itaok nikile. Abu ayong atochakak ngamoru naarei dapal nguna kwap, atobwangabwanga alongaren kus. Abu nabo ayong atoper a akook alongaren Ekapolon Akuj a ngirwa a ngitomwon-omwon, akwaar ka apaaran, emam ibore anyami kori amasi. Asubi ayong kongina kainyo isechakinito esi Ekapolon Akuj nabo itongoito. Atoem ayong angoit a Akuj naaronon, kainyo angoit ngesi noi adikino kimunyari esi, nakaneni abu Ekapolon Akuj nabo kiira ngakiro kang. Angoikinit nabo Ekapolon Akuj tani Aron adikino eari, nakaneni elip ayong nabo kotere Aron dang esaa lopei ngolo. Atolem ayong ibore ni a akisech ni isubete esi ngini, ni arai itaok nikile nisuat, sodi atachakak nakim. Abu ayong atobilibili, nabo eriak tanyapidid kikok apua, sodi atobukok apua keng nangolol tolelea kwap emoru. “Ipot esi nabo kitongoa Ekapolon Akuj na erai Akuj kus na iyakatar Tabera, ka Masa, ta Kibiros Ataapa. Ani nabo kimeari ngesi esi alo Kadech Barinea ebala, ‘Toloto tolemasi akwap nakainak ayong esi,’ ipot esi tongero ngesi. Ipot esi nyiigienokinosi ngesi kori nyiiwap ngesi. Ingerito esi jik Ekapolon Akuj napei kolong kianyunor ngoni. “Abu ayong atoper a akook alongaren Ekapolon Akuj a ngirwa alutomwon-omwon kangulu kainyo ayeni atamar asaki ngesi amunyar esi jik. Elip ayong atama, ‘Ekapolon lo irai Ekapolon Akuj, nyiimunya ngitunga kon a ilope, ngitunga lukolong iyuuni iyong kipud alo Misiri a agogongu kon anaationon. Kitamu ngikasubak etich kon ta Aburaam, ka Isaka, ta Yakobo. Nyiimisik akichananu a ngitunga kalu, ka aronis ta akisech kech. Ani kemam, elimunete Ngimisiri tamasi, kona epiyorea Ekapolon Akuj akitanang ngitunga keng nakwap nakolong echikakinit ngesi kesi, nabo kona eremitor ngesi kesi, ariku amunyar anariet. Nakaneni iseuni kolong iyong ngitunga lugu toliworos ngikon nabo kipud kesi alo Misiri a agogongu kon anaationon.’ “Abu Ekapolon Akuj katolimok ayong tama, ‘Tokul ngamoru ngaarei nadapal na ikwaan ka nangoon a ekingaren, sodi tosubak asaduku nakitoe kiwaak kesi tooma. Todoku kidiama emoru ni ayei ayong, sodi egir ayong namoru nguna ngakiro nangoon egirit ayong namoru nakolong ibwangabwangaari iyong, ani erumor kiwaak iyong kesi tooma nasaduku.’ “Abu ayong atosubak asaduku anakito a ngiwo, atokul ngamoru ngaarei na ikwaan ka nakolong a ekingaren sodi ayaa kesi kidiama emoru. Kigirak Ekapolon Akuj ngamoru nguna ngakiro nakolong sek egirit ngesi ekingaren, ngitalio lutomon lukolong kiinakini ngesi esi na eruoror anakim, akolongit na iriamiriamitotor esi moru. Kainak Ekapolon Akuj ayong ngamoru nguna, atorei ayong atotiyaun alomoru. Sodi ewaak ayong kesi nasaduku na asubuni ayong loger lokolong adungunitor Ekapolon Akuj. Nakaneni apena kesi neni napei kolong jik.” ( Torotokis Ngisirael ani ayakasi ngakiro nakolong araakasi ngaka ngitunga a Yaakan, sodi toloto nadakar be Mosera. Totoan Aron kaina sodi tonukae, ani erumor kilunyokin lokookeng nados keng toliwor emuron a Akuj. Na anyounioto kaneni toloto ni anyaritae Gudigoda tanang Yotibasa nia ngakipi anakaalak. Ani alomoru, abu Ekapolon Akuj toseu ngikiliok a ekitela a Lawi toliworos kesi etingito asaduku a Achamunet, nabo tosuba etich keng eraakasi ngimurok a Akuj, ta agatanakin apiaro elimito ekiro a Ekapolon Akuj. Ngitichisio ngulu kesi eringa kesi esubete. Ngakiro nguna kesi kolong peanyunea ekitela a Lawi akwap na aanyunito ngitela luche. Ibore aanyunete kesi ngesi aliwor ngimurok a Ekapolon Akuj, loger lokolong echikakinitor Ekapolon Akuj na erai Akuj kus.) “Eboikin ayong moru ngirwa ngitomwon-omwon, akwaar ka apaaran, loger lokolong a ekingaren. Abu nabo Ekapolon Akuj kiira ngakiro kang sodi tacham atamar nyakamunyari esi. Abu Ekapolon Akuj katolimok ayong tama, ‘Tonyou toriko ngitunga tolemasi akwap nakolong echikakini ayong atamar ainakini taapaakus.’ “Ngisirael, topupokisi tokona ngakiro na esaki Ekapolon Akuj na erai Akuj kus. Nugu ngesi esaki ngesi anikus. Kilipa Ekapolon Akuj tosuba ngakiro daang na elimuni ngesi. Tominakisi ngesi, tosuba etich keng a ngitai kus kadaang. Kiwapa ngitalio keng daang lukadungok ayong esi taanyuneta naajokak. Erai tani adis na eyei kidiama noi aka Ekapolon Akuj. Erai tani akwap dang ka ibore daang ni eyei nakwap ikeng. Kotere ni aminar Ekapolon Akuj taapaakus noi, abu ngesi kitoseu esi alokiding ngitunga luche daang, nabo eringa esi iraakasi ngitunga keng luseuna. Aloger kangolo, toliworos tokona jik ngitunga lu iwapito Ekapolon Akuj, tojongoto araakau lukechanak. Epol Ekapolon Akuj na erai Akuj kus idwangit ngakujo daang ka ngapolosio daang. Epol ngesi etiono, nabo erai na ekeritae. Meere ngesi Akuj na etiakatiakat ngitunga nabo nyechamit ngesi akitololonakino ngiboro. Irichakinit ngesi ngikokiok ka ngapuseru. Emina ngesi ngitunga a ngakwapea anache lu erukito ka ngitunga yok, einakinit akimuj ka ngiworui. Tominakisi robo ngitunga a ngakwapea anache ngulu kainyo iraakasi kolong esi dang ngitunga a akwap a nache na iyakatar Misiri. Kiwapa Ekapolon Akuj na erai Akuj kus, sodi kilipa ngesi bon. Toliworos lu kimuno ngesi, tolimut ngakichikakinet kus daang alokiro keng bon. Kipuro ngesi kainyo erai Akuj kus, nakisubea esi ngakiro nakailiilok ka naketubulok ingolikis esi a ngakonyen kus a ngikulepek. Aloose kolong taapaakus Misiri eraakasi ngitomwon-kaarei. Tokona, kitalala Ekapolon Akuj esi loger a ngikanyer alu eyakasi nadis. “Tominakisi Ekapolon Akuj na erai Akuj kus, kiwapa jiik ngitalio keng daang. Toyena akolongit naga ngakiro daang nakitatam Ekapolon Akuj esi anakiro ana kisubea ngesi esi, kainyo esi kolong kisubere ngakiro nugu, meere ngide kus. Ingolikinete kolong esi apolou a Ekapolon Akuj ka agogongu, ka ationis, ta ngakiro nakailiilok asubi ngesi. Ingolikinete kolong esi ngakiro na asubea ngesi ekapolon a Misiri ka akwap keng daang etia ni etia. Ingolikinete kolong esi eger lo amunyarea Ekapolon Akuj ngasigerea a Misiri aapei ka ngangolei kech, ta ngaurukukui kech na irito ngangolei, sodi kitanyam kesi anam a Chamu, na kiwapitotor kesi esi. Iyenete esi ngakiro nakolong kisubea esi Ekapolon Akuj anariet eringa nyenanguna nege. Itamunito esi ngakiro nakolong asubea ngesi Dasan ka Abiram lu araakasi talokookeng a Eliab alo a ekitela a Reuben. Apot ngalup tapakas alongaren ngitunga sodi kilikosi kesi aapei ka ngitunga a ngawiyei kech, ka ngieman kech, ka ngikedalak kech daang, ta ngibaren kech. Iteni dir, esi kesi ingolikis ngakiro nakailiilok daang asubi Ekapolon Akuj. “Kiwapa robo ngitalio daang lukadungok ayong esi akolongit naga, taanyuneta esi agogongu idokareta ekwakaye angolol toloma nakwap na edikino esi ilomarete. Elalakearosi ngirwa kus anakwap kangina, ana ileleba ngakile ka akimiet a ao. Akwap ngina ngesi nakolong echikakini Ekapolon Akuj taapaakus ka ngalesea kech. Nyikwaan akwap na edikino esi ilomarete ka Misiri, na kolong ilomito esi ekingaren. Itaate kolong esi ngikinyam kaina nabo tosuba etich lokaagongon lo a achilanakin ngamanat ngakipi. Eya robo tokona akwap na ilomarete esi ngimoru ka ngadipoe nabo etepi akiru. Irichakinit Ekapolon Akuj na erai Akuj kus akwap naga, nabo iyoki napei anakisiakinet a ekaru tanang losal. “Aloger kangolo, kiwapa ngitalio lukadungok ayong esi akolongit naga, tominakisi Ekapolon Akuj na erai Akuj kus, tosuba etich keng a ngitai kus kadaang. Ani kisubakis esi kongina, eyauni ngesi akiru toliwor erameene ngirwa lupalem erameenea akwap kus, kerai ngirwa lua akiporo kori lua ngirupei, sodi toriamut esi ngikinyam, ka, emuna, ka akimiet kus, ta nginyia a ngaatuk kus. Iriamunete esi akimuj daang na isakete. Warasi nyiirearosi ani a Ekapolon Akuj kilipa ngakujo nache ka akisub etich kech. Ani kisubakis esi kongina, kingoikini Ekapolon Akuj esi. Itongopi akiru toon akwap kus deu nyeeruput ngikinyam kus, nabo tomunyaros esi atipei toisikis akwap nati ajokon kiinak ngesi esi naga. “Kiwaakisi ngitalio lugu lotai kus ka lotamen kus tominakis. Tanapa anakan ka ngireetin kus kikokis emachar. Kitatama ngide kus ngitalio lugu. Kiruoro ngakiro a ngitalio kalu iyakasi nawiyei, ka nalotoru, ka na iangaritotor, ta na isubeta etich. Kigira kesi nakituk a ngakais kus ka lodorin a ngawasea kus. Sodi talalakearotor ngirwa lu ibooyoto esi ka ngide kus anakwap ana kolong echikakini Ekapolon Akuj na erai Akuj kus taapaakus. Ilomete esi neni ngirwa daang lu eyakar adis kidiama akwap. “Kiwapa dir ngitalio daang lukadungok ayong esi. Tominakisi Ekapolon Akuj na erai Akuj kus, tosuba ngakiro na edungunit ngesi daang, nabo toliworos lu kimuno ngesi. Nakaneni itwarakini ngesi ngibukui luche daang iloose esi ngaren, sodi toloma esi nakwap a ngibukui alu eyenikinitae nabo tojwoko noi kidwangito esi. Ngalup na ichiakete esi daang eliworosi ngakus. Isiakini akwap kus napei anariet ana eyei kuju tanang lomoru a Lebanon alokwap. Kisiak nabo anangolol a Eupurate alo kide tanang nanam a Mediterenian alo too. Akwap nacha ilomarete esi daang itukuriani Ekapolon Akuj ngitunga kitoeam esi, loger lokolong echikichikar ngesi, nakaneni emam itwaan kiweikini esi. “Akolonngit naga ewaak ayong ngakiro ngaarei natiakuna nikus, apiaro ka ngilam. Ianyunete apiaro erai kiwap esi ngitalio a Ekapolon Akuj ana erai Akuj kus, lukadungok ayong esi akolongit naga. Nakaneni ianyunete ngilam erai kingero esi ngitalio lugu, sodi toreas kilipa ngakujo na eringa nyilipa nakanuan. Ani kiyauni Ekapolon Akuj esi nakwap na ilomarete esi tolemasi, tolimut apiaro alomoru a Gerisim, tolimut ngilam alomoru a Ebal. ( Eyakasi ngimoru luarei ngulu too angolol a Yorudan, nakwap a Ngikanaan alu elomito nadipo a Yorudan. Eyakasi ngimoru ngulu daang lowae lo alo too diyete ngichokei lua etal a More, diyete ere a Giligal.) Edikino esi idokete angolol a Yorudan, sodi toloma nakwap nakiinakinit esi Ekapolon Akuj na erai Akuj kus. Ani ilemarete esi akwap ngina toloma, kirichakisi ngitalio daang lukadungok ayong esi akolongit naga. “Ngitalio lugu kesi echamit esi iwapete ngirwa daang lu ilomitotor esi nakwap nakiinakinit esi Ekapolon Akuj na erai Akuj kata apaakus. Kirichakisi robo! Anakwap ana ilemarete esi, kinyasutu ni ilipeeneta ngitunga ngakujo kech alokidiama ngimoru lukooyak, ka kidiama ngimukur, ta kwap ngikito lu elibito. Tobwanga ngikenoi a ngakipeyos kech sodi kiealasi ngapirio a ngamoru ana italeunitoe edukito kesi. Kichunya ngakisikwaanet a akuj kech anaberu anabe Achera*g** a akim nabo totubutuboto ngakujo kech nasubuna sodi nyiilipa kesi nabo kaneni. “Nyiilipa Ekapolon Akuj na erai Akuj kus loger lo ilipitotor ngitunga lugu ngakujo kech. Anakwapea kadaang a ngitela kus, eseuni Ekapolon Akuj wapei ni eponeeneta ngitunga nikeng kilipa ngesi. Neni esakitere esi ipeyooto ngakipeyos kus na inomio, ta ngakipeyos nache dang. Ilemunete esi kaneni alemunet apei anatomon, ka ngalemunet, ka ngainakinet na ikongito esi alemun, ta ngiuriuna lu ekingaren a ngaatuk ka ngamesekin kus. Imujete esi ka ngitunga a ngawiyei kus kaneni alongaren Ekapolon Akuj kus nakipiarit esi. Nabo ianyunete esi ngiboro luajokak daang lu eraakasi kesi kolong isubeta esi etich. “Ani enangi ngirwa ngulu, nyiisubakis napalem isubete. Napei kolong jik tanang tokona, ilipeenete esi loger lo isaketa esi ngikulepek, ani eringaakar esi nyelomara nakwap nakiinakinit Ekapolon Akuj na erai Akuj kus esi. Akwap ngina ngesi ilomete esi a ekisil. Ani idokarete ekwakaye angolol a Yorudan, kimiekini Ekapolon Akuj esi ilomarete nakwap toloma. Kiyoki ngesi esi alomoe kus kadaang, sodi toloma neni isilito. Eseuni Ekapolon Akuj wapei ni ilipeenere ngesi, neni ngesi iyaunete esi ibore daang nikadungok ayong esi. Yautu neni ngakipeyos kus na inomio, ka ngakipeyos nache, ka alemunet apei anatomon, ta ngadekon kus, ka ngainakinet na ikong esi atamar ilemikinete Ekapolon Akuj. Talakaros kaina ani a Ekapolon Akuj. Talakaros aapei ka ngide kus, ka ngikasubak etich kus, Ngilawi lu ilomito ka esi lorerea kus. Toyena atamar emam ngitunga a ekitela a Lawi akwap na erai akech a ngikulepek. Nyechamitae esi ipeyoote ngakipeyos kus awadaang ani iseunete esi. Echamitae ipeyoote ani eseuni Ekapolon Akuj anakwap a ekitela a epei anikus. Neni bon ngesi echamit esi ipeyooto ngakipeyos kus na inomio ka akisub ngakiro nache daang nakadungok ayong esi. “Nakaneni ipedorete esi akiar ka akinyam ngibaren kus awadaang anicha ilomito esi. Ipedorete akinyam daang lu kiinakini Ekapolon Akuj. Esi daang lu kitaleunitoe ka lu nyikitaleunitoe ipedorete akinyam kesi loger lopei inyameta akiring a emakata kori na a agete. Nakaneni nyejoikinit esi inyamete ngaakot. Ejoikinit esi ibukokinete nalup loger a ngakipi. Emam ibore daang ni ilemikinito esi Ekapolon Akuj ni enyamio ani ilomito esi. Kerai tani alemunet apei anatomon a ngikinyam kus, kori emuna kus, kori akimiet kus, kori ngiuriuna lua ekingaren a ngaatuk kus ka ngamesekin, kori ngadekon na ikong esi atamar ilemikinete Ekapolon Akuj, kori ngalemunet na isakete esi alemun, kori ngalemunet nache daang. Esi aapei ka ngide kus, ka ngikasubak etich kus, ta ngitunga a ekitela a Lawi lu ilomito ka esi lorerea kus, inyamete ngakipeyos nguna alongaren Ekapolon Akuj na erai Akuj kus. Tanyama ani aseu Ekapolon Akuj na erai Akuj kus atamar kilipeenere. Nakaneni ejoikinit esi ilakarosi kaina kotere ibore daang ni isuba esi. Tochoikisi ngitunga a ekitela a Lawi, warasi nyikimuriakis ngirwa daang lu ilomitotor esi nakwap kus. “Ani enyaari Ekapolon Akuj na erai Akuj kus akwap kus loger lokolong echikichikar ngesi, ipedorete esi akinyam akiring esaa daang lo isaketa. Ani kelonera ni ilipeenere, taara robo aite kori amesek alobaren alu kiinak Ekapolon Akuj, erai kisakete akiar. Ani erumor tanyama akiring anawi loger lokalimokinea ayong esi. Esi daang lu kitaleunitoe ka lu nyikitaleunitoe, ipedorete akinyam akiring ngina loger lopei inyameta akiring a emakata kori na agete. Tochoito robo inyamete akiring eringa ngaakot eyakasi, kainyo eyei akiyar naakot, nakaneni nyejoikinit esi inyamete akiyar ka akiring. Nyiinyam ngaakot, tobukokisi nalup loger a ngakipi. Ani kiwap esi etal ngolo, elakar Ekapolon Akuj nabo ejokearosi ngakiro daang anikus ka ngalesea kus. Yaasi ngalemunet kus ni ilipeenere aapei ka ngainakinet na ikong esi atamar ilemikinete Ekapolon Akuj. Kipeyoto kaneni ngakipeyos na inomio tonomiasi alokeno alo ipeyonokinere Ekapolon Akuj. Kipeyoto nabo dang ngakipeyos na inyamete esi akiring sodi tobukokis ngaakot lokeno a Ekapolon Akuj. Kiwapa dir ngakiro daang nakadungokinit ayong esi, tojokearotor jik ngakiro daang anikus ka ngalesea kus, kainyo iliworosi esi lu isubete na eriyan, kitalakarito Ekapolon Akuj na erai Akuj kus. “Emunyari Ekapolon Akuj na erai Akuj kus ngibukui na ilemareta esi akwap kech, nakaneni ilomarete esi nakwap ngina toloma. Ani emunyari Ekapolon Akuj kesi erumor, warasi nyiiwap ngakujo kech, kainyo erikunete ngakiro nguna akitu. Warasi nyiisak akingichingich eger lo ilipeeneta kesi ngakujo kech, sodi tasaka esi dang akilip loger ngolo. Nyiilipa Ekapolon Akuj na erai Akuj kus loger lo ilipeeneta kesi ngakujo kech, kainyo anakilipit kech, esubeenete kesi ngakiro naaronok daang na eremokino Ekapolon Akuj. Ipeyoonete kesi tani ngide kech alokenoi a ngakipeyos. “Tosuba ngakiro daang nakadungok ayong esi. Warasi nyiatakis ibore idio nakiro nguna kori nyiilemasi ibore idio anakiro kanguna. “Epedori ekadwaran kori ekerujan bu nikus kichikak esi ngakiro nakailiilok kori nakatalarak esaki kibatarea sodi kilipa ka akisub etich a ngakujo ana eringa esi nyilipa a ache. Tani kiyookin ngakiro nakichikakini ngesi esi, nyiimisikis ngakiro keng, kainyo kiningit Ekapolon Akuj na erai Akuj kus esi a ngakiro keng sodi taanyunea kiminasi esi Ekapolon Akuj na erai Akuj kus a ngitai kus kadaang ka akiyar kus daang. Kiwapa Ekapolon Akuj, tokera ngesi, topupo ngakiro keng, kirichakis ngitalio keng. Kilipa ngesi sodi toliworos lu imunosi ngesi. Nakaneni taara ekerujan ka ekadwaran daang lo ebala esi tongero Ekapolon Akuj nakolong kiyuuni esi alo Misiri ani kolong iraakatar esi ngikedalak. Erono itwaan ni ikoni neni kainyo esaki ngesi akibatar esi anakiyar anakolong kidungokini Ekapolon Akuj atamar kiwapa. Ejoikinit ngesi eario sodi tolemareta esi ibore niaronon ngini anikus. “Epedori tani lokaatokon, kori lokookon, kori nakookon, kori aberu kon naminat, kori lopae kon lo etau akimod iyong peiyeni tama kilip ngakujo ngache, ngakujo na kolong nyilipa iyong ka ta apaakon nakanuan. Epedori tani iche atamar iyong kilip ngakujo a ngitunga alu idunyasi ka esi kori alu elomito nialonan. Nakaneni wara ngesi nyikimaima iyong. Nyiipupok tani napupokin. Wara nyikisien, kori torimak, nabo tochoite iikini. Taar ngesi! Kingela a akan kon kimas ngesi a ngamoru, ani erumor kimasa ngitunga luche daang ngesi a ngamoru. Kimasa a ngamoru totoan! Asaki ngesi akibatar esi ani a Ekapolon Akuj ana erai Akuj kus, ana kolong kiyuuni esi alo Misiri, ani iraakatar ngikedalak. Sodi iirarete Ngisirael daang ngakiro na asubasi toema, nakaneni emam itwaan ebongokini akisub ngakiro naaronok nguna jik. “Ani ilomete lorerea lu kiinakini Ekapolon Akuj na erai Akuj kus esi, ipedorete akiirar atamar ebatasi ngitunga kus ngiche pasiek, ebatasi ngitunga a ere kech akilipit ngakujo na nyilipa esi nakanuan. Ani kiirasi esi ngakiro nguna, tongichutu lokojokon, ani kesubakina dir ngakiro naaronok nguna, taara ngitunga a ere kangolo daang ka ngaatuk kech daang. Kinyasutu ere ngolo lokojokon. Tochunakisi ngiboro a ngitunga alu elomito neni kadaang tosenokis kiding ere. Sodi kichunya ere ka ibore ni eyei lore daang toliwor akipeyos a Ekapolon Akuj ana erai Akuj kus. Ejoikinit imiekinio inyasuna nyeeduk nabo jik. Emam ibore ni ejoikinit inyasunio ni ilemarete esi tani ipei. Ani pekilemasi esi, epalikini Ekapolon Akuj anyunyura toliwor lo a ngisien anikus, kitiliwo esi ngitunga lukaalak loger lokolong echikakinitor ngesi taapaakus, erai kiwap esi ngitalio keng daang lukadungok ayong esi akolongit naga, sodi tosuba ngakiro na esaki ngesi. “Iraakasi esi ngitunga a Ekapolon Akuj ana erai Akuj kus. Ani igorosi esi tosutonokis kotere itwaan ni atoana, nyiidungudungoto ngawat kus kori nyiiluro loger a ngitunga aluche. Iraakasi esi ngika Ekapolon Akuj ana erai Akuj kus. Kiseu ngesi esi toliworos ngitunga keng alotunga kadaang alu eyakasi nakwapea. “Nyiinyam ibore daang ni alimu Ekapolon Akuj atamar italeo akinyam. Ipedorete esi akinyam ngibaren ka ngitieng. Tanyama ngibaren lugu, ngaatuk, ka ngamesekin, ka ngakinei. Tanyama ngitieng lugu ngimakatae, ka ngamesekin na a ngimoru, ka ngatirikiki, ka ngagetei, ta ngitieng daang lupakak a ngakichiaket, kiyeruuniyete nginyia. Emam etiengit enyamio mati epakak akichiaket tarai nabo iyeruununi nginyia. Nyiinyam ngikaala ka ngapooe, kori ngadukae. Italeo kesi akinyam kainyo tani kiyeruuniyete nginyia, nyeepakak ngakichiaket. Nyiinyam ngiputiro. Italeo kesi akinyam kainyo tani kepakak kesi ngakichiaket, nyiyeruunete nginyia. Eraakasi kesi ngitieng lu italeo akinyam. Nyiinyam akiring kech kori nyiitap na etoaketa. “Ipedorete akinyam ngikolea daang lu eyakasi ngibeben ka ngikabebekwa. Nakaneni ibore ni eyei nakipi daang, ni emam ngibeben ka ngikabebekwa, italeo akinyam. “Tanyama ngikieny daang lu nyitaleo akinyam. Nakaneni nyiinyam ngikieny lu imarunitae kanege lugu, lu eraakasi egole, ka atarukot, lokidole, chiili ka auk kech daang, apanaangor ka auk keng daang. Ekalees, ka tula na akwaar, ka ngabaanga, ngigolei luche ta auk kech. Tula naachi ka naapolon, ta abaangat naakwaan. Aumo ka atarukot nabe kotol, ka nalumio, ka natole, ka nabe namedot ta auk kech daang. Lokut ka lononwa. “Ngiborei daang luuchik lu eporito, italeo akinyam. Ipedorete akinyam ngiborei luuchik lu eporito lu nyitaleo akinyam. “Nyiinyam ibarasit ni etoani bon. Kimiekisi ngitunga a ngakwapea anache lu elomito nakwap kus tanyama, kori togielakisi ngitunga ngiche lugelayek. Nakaneni iraakasi esi ngitunga luseuna a Ekapolon Akuj ana erai Akuj kus. Iraakasi esi ngitunga keng. “Nyiidorok ikale kori imesek a ngakile a itiokeng. “Kitegeleasi apei anatomon a ngalemet ana ekokete anamanat kus ekaru daang. Sodi toloto ni aseu Ekapolon Akuj na erai Akuj kus toliwor ilipeenere ngesi, sodi tanyama kaneni alongaren keng alemunet apei anatomon a ngikinyam keng ka emuna lo epuritoe, ka akimiet ta ngiuriuna lu ekingaren a ngaatuk ka ngamesekin kus. Tosuba kongina kitatamatar arima Ekapolon Akuj na erai Akuj kus jiik. Ani keloner ni ilipeenere anawiyei kus, kitokuruwo esi akiwok alemunet apei anatomon a ngalemet ana kipiaritor esi Ekapolon Akuj, tosuba kona. Togialasi ngalemet kus sodi yaasi ngaropiyae ni ilipeenere. Togieleta ibore nicha isakete esi, kerai ngimongin, kori ngimesekin, kori emuna lo epuritoe, kori epurot. Sodi kimuja esi ka ngitunga a ngawiyei kus alongaren Ekapolon Akuj na erai Akuj kus talakaros. “Tochoikisi ngitunga a ekitela a Lawi lu elomito lorerea kus kainyo emam kesi ibore ni erai ikech. Adaunet a ekaru alo a nguuni, yautu alemunet apei anatomon a ngalemet kus kadaang kikachakis lorerea kus. Erai akimuj ngina aka Ngilawi kainyo emam kesi ibore ni erai ikech. Erai akimuj ngina tani aka ngitunga a ngakwapea anache, ka ngikokiok, ta ngapuseru na elomito lorerea kus. Ejoikinit kesi epote tolemasi ibore daang ni esakete. Tosuba kongina sodi kitopia esi Ekapolon Akuj na erai Akuj kus anakiro kadaang. “Adaunet a ngikaru a ngikan-kaarei, tajal ngaropiyae daang nakolong emichaarito ngitunga anikon. Esakitae esubio kona. Itwaan daang ni imichaarit Esiraelit loche ngaropiyae keng, esakitae tajal ngaropiyae nguna. Nyejoikinit ngesi elosi akimichaun ngaropiyae nguna, kainyo ekisa Ekapolon Akuj alope amicha ngina. Kimicha ngitunga a ngakwapea anache ibore kon ni elemarito, nakaneni nyejoikinit iyong imichae ngitunga lukon a ilope ibore ni elemarete anikon. “Kipiari esi Ekapolon Akuj na erai Akuj kus anakwap ana kiinakinit. Emam itwaan tani ipei anikus ni iboosi erai kiwap esi ngakiro a Ekapolon Akuj sodi kirichakis ngakiro daang nakadungok ayong esi akolongit naga. Kipiari esi Ekapolon Akuj loger lokolong echikichikar ngesi. Earete ngibukui luche ngamichae anikus nakaneni nyiarete esi ngamichae anikech. Ipolokinete esi ngibukui lukaalak nakaneni nyikipolokinete kesi esi. “Ani keyei Esiraelit lo iboosit alorerea a akwap ana kiinakini esi Ekapolon Akuj, wara nyiimoner towou akingarakin ngesi. Nakaneni tapataner toliwor lo iinanakini ngesi ibore daang ni esaki. Nyiiwou robo ainakin ngesi ibore ani aapuunea ekaru lo ikisarere ngamichae. Wara nyiitamak ngakiro naaronok ikote nguna. Ani kiwou iyong akitaar ngesi amicha, ikaloikini ngesi Ekapolon Akuj kotere iyong sodi kimarun iyong atamar isechit. Nak iyong ngesi pas peimonitor, nakaneni kipiari iyong Ekapolon Akuj anakiro kon kadaang. Ngirwa daang, nyengopete Ngisirael ngiche lu iboosit, kadungokinit ayong esi atamar tapataketa anikech sodi iinanakis ibore. “Ani kigiel iyong itwaan ni erai Isiraelit ani esakea ngesi iyong togiel ngesi, toliwor ekedalan kerai itwaan ngini ikile kori iberu, kimiek tosub etich kon a ngikaru a ngikan-kapei. Ani enangi ekaru lo a ngikan-kaarei, talakak tolot. Ani ilakakini iyong ngesi elosi, nyiilakak elosi a ngakan anikirion. Nak a apatanu ngiboro lu kipiaritor Ekapolon Akuj iyong, anaatuk dang, ka ngikinyam, ta emuna. Kitamutu atamar iraakasi kolong esi ngikedalak alo Misiri sodi abu Ekapolon Akuj na erai Akuj kus kitoyuu esi, eger ngolo ngesi kadungokinitor ayong esi ngakiro nugu. “Ani pekesaki ekedalan kon arotokin ani kiminar ngesi iyong, ka ngitunga a awi kon, ta nabo ni irukioto ka iyong niajokon, toriko ngesi nakituk a akai kon sodi torub akit keng, toliwor ekedalan kon jik. Tosubea tani akedalan kon naberu kongina. Wara nyikitionik iyong alakakin ekedalan kon tolot kainyo asub ngesi etich kon a ngikaru a ngikan-kapei. Asub ngesi etich ngolo ngasubet ngaarei a itwaan ani igiritae akinyam ngaropiyae. Tosub kona sodi kitopia Ekapolon Akuj na erai Akuj kon anakiro kadaang ana isubi iyong. “Kitegeliasi ngiuriuna lu ekingaren a ngaatuk ka ngamesekin toliworos ngika Ekapolon Akuj ana erai Akuj kus. Nyiisubeta ngitak ngulu etich kori nyiitub ngajul a ngimesekin kangulu. Ekaru daang esakitae esi ka ngitunga a ngawiyei kus inyamete ngiuriuna ngulu alongaren Ekapolon Akuj ani echamakinitae ilipeenere. Nakaneni ani kesechech ngibaren ngulu, kengwalito, kori kemudukaka, kori keyei wache ichwangakina, nyechamitae esi ilemunete kesi kitiliwosi ngakipeyos a Ekapolon Akuj ana erai Akuj kus. Ipedorete esi akinyam ngibaren lu ikote neni anawiyei. Esi daang, erai kitaleunitoe kori pekitaleunitoe, ipedorete akinyam loger lo inyameta emakata kori agete. Nyiinyam ngaakot kech. Tobukokisi nalup loger a ngakipi. “Tokera Ekapolon Akuj na erai Akuj kus ani itamuuneta akolongit a esukukuu a Adeparet alolap alobe Abib, kainyo elap kolong ngolo nakwaare ngesi kiyuunea Ekapolon Akuj na erai Akuj kus esi alo Misiri. Tolemutu ibarasit ipei anamesekin kori anaatuk tongolakis ni echamakinitae ilipeenere toliwor ngakipeyos a Adeparet na erimare Ekapolon Akuj na erai Akuj kus. Ani inyamete akimuj ngina, nyiinyam ngamugati na eyei ekitoe lo itubui. Ngirwa ngikan-kaarei inyamete esi ngamugati na emam ekitoe lo itubui ikirikirasi, loger lo kolong inyameta na irotokinioto alo Misiri. Tanyama amugati ngina, na enyarao amugati a aboliaro, sodi ani cha eringa esi iyarete kitamunitotor akolongit na irotokinioto alo Misiri, ani erai akwap a aboliaro. A ngirwa a ngikan-kaarei, emam itwaan anakwap kus ni esakitae eyei ekitoe lo itubui ngamugati nawi keng, nabo echamitae akiring a ibarasit ani eario atabong a akolongit ana ekingaren, enyamio akolongit ngina nakwaare. “Nyiipeyoto ngakipeyos a Adeparet alorerea alu kiinakini esi Ekapolon Akuj na erai Akuj kus. Nakaneni kipeyoto ani eseuni Ekapolon Akuj na erai Akuj kus toliwor ni echamakinitae ilipeenere. Kipeyoto ebong adooyoret a akolong kainyo esaa lokolong irotokinioto esi alo Misiri ngolo. Kidorokisi akiring tanyama ani echamakinitae ilipeenere, ani nataparach tobongo nawiyei. A ngirwa a ngikan-kapei ekisidi a akolongit kangina, esakitae esi inyamete ngamugati na emam ekitoe lo itubui. Ani enangi akolongit na ngikan-kaarei, tochunakinos kilipa Ekapolon Akuj na erai Akuj kus, nakaneni nyiisuba etich akolongit ngina. “Kimarakisi ngiukio ngikan-kaarei napei isiakineta esi akilem ngamanat kus, sodi tosubakis Ekapolon Akuj na erai Akuj kus esukukuu a ngalemet, yaut nikeng ngakipeyos na isakito esi alemun itemem ka etiae lo kipiaritor ngesi esi. Talakaros alongaren Ekapolon Akuj. Talakaros aapei ka ngide kus, ka ngikasubak etich kus, ka Ngilawi ka ngitunga a ngakwapea anache, ka ngikokiok, ta ngapuseru na ilomito ka esi lorerea kus. Tosuba kona ani echamakinitae ilipeenere. Kiwapa ngitalio ngulu dir itamunito atamar iraakasi kolong esi ngikedalak alo Misiri. “Ani ipiatarete esi ngikinyam kus ka achuun emuna anamusabib kus, tosubakisi esukukuu a ngikalea a ngirwa a ngikan-kaarei. Talakaros kotere esukukuu ngolo, esi ka ngide kus, ka ngikasubak etich kus, ka Ngilawi, ka ngitunga a ngakwapea anache, ka ngikokiok, ta ngapuseru na ilomito ka esi lorerea kus. Tokera Ekapolon Akuj na erai Akuj kus, tosubakis esukukuu lo a ngirwa a ngikan-kaarei ani echamakinitae ilipeenere. Talakaros kainyo apia Ekapolon Akuj ngalemet kus ka etich kus. “Esakitae ngikiliok a ebukut kus daang eloose ngalosiet ngauni akilip Ekapolon Akuj alokaru a epei ani achamakinitae ilipeenere, akolongit na a esukukuu a Adeparet, ka lo a ngalemet, ta lo a ngikalea. Esakitae ekile daang eyauni ainakinet na epedori ngesi ayaun itemem ka eger lo epiaritor ngesi Ekapolon Akuj na erai Akuj kus. “Toseutu ngikatubok ngakiro ka ngikaweikinak luche alorerea kadaang alu kiinak esi Ekapolon Akuj na erai Akuj kus. Esakitae kesi etubete ngakiro a ngitunga eriyan. Nyesakitae kesi iwapito ngakiro na nyeriyan, kori ipakanarete ngitunga ngiche etubete ngakiro, nyesakitae kesi idiaunete ngiboro lu ediekitere kori ngainakinet, kainyo itumudukanete ngiboro ngulu ngakonyen tani a ngitunga alukoosok ka lu emunoi, sodi kisichwangak kesi etubete ngakiro. Toliworos jiik ngitunga luajokak ka lu isubete na eriyan, sodi tolemareta akwap nakiinakini Ekapolon Akuj na erai Akuj kus esi, torubakis ilomito neni. “Ani isubakinete ekeno a ngakipeyos a Ekapolon Akuj ana erai Akuj kus, nyitowaa nabo kaneni ekisikwaane lokitoe a akuj anabe Achera.*g** Kori nyiisenokis ngamoru kitiliwosi akuj kus nasubuna, kainyo eremokino Ekapolon Akuj kesi. “Warasi nyiipeyokis Ekapolon Akuj na erai Akuj kus ngaatuk ka ngamesekin na eyakasi ni ichwangakina, kainyo eremokino Ekapolon Akuj ibore ngini. “Ani keyei itwaan alorerea kus nikile kori niberu ni asechaki Ekapolon Akuj ani echwangakinea achamunet a Ekapolon Akuj, ani elipea ngakujo nache ka akisub etich kech, keraakasi ngakujo nguna akolong, kori elap, kori ngikanyer, tarai nyitemem nguna ka ngakiro nakolong adunguni Ekapolon Akuj. Ani kiirasi esi ngakiro na ikote nguna, tongichutu lokojokon. Ani kesubakina dir ngakiro naaronok nguna anakwap a Ngisirael, kipudosi itwaan ngini nikalapatan a ere kimasa a ngamoru totoan. Echamitae ngesi eario eraakasi ngikaanyunak ngiarei kori kelalak. Nyechamitae ngesi eario erai ekaanyunan epei bon. Ngikaanyunak kesi isiaunete kimasa itwaan ngini, ani erumor kimasa ngitunga luche. Kotere eger ngolo, ilemarete esi ngakiro naaronok nguna anikus. “Epedorete ngikesio ngiche agogongikin ngikatubok ngakiro lu iseut esi. Ngikesio ngulu kesi lu ikote akitiak ngiboro a ngitunga, ka eger lo ewanatar ngitunga, kori akitiak kerai akitu a itwaan na iyechakinitae kori na nyiyechakinitae. Ani kikokis ngakiro neni toloto ni echamakinit Ekapolon Akuj na erai Akuj kus ilipeenere, kisisaut ngakiro kus ani a ngimurok a Akuj alu eraakasi Ngilawi, ta ekatubon ngakiro lo esubi etich esaa ngolo, sodi kimiekis kesi totubo ngakiro. Etubete kesi ngakiro sodi tosuba esi ngakiro nakilimokinete kesi esi. Tachamutu ngakiro na edungunete kesi alokies, sodi kiwapa ngakiro na elimunete kesi daang lokojokon. Itwaan cha daang ni nyiwapi ngakiro a ngikatubok ngakiro ka emuron lo esubi etich esaa ngolo, eario. Kotere eger ngolo, ilemarete ngakiro naaronok nguna anakwap a Ngisirael. Nakaneni iirarete ngitunga daang ngakiro nguna toema, toliwor emam itwaan nabo iyechakini tosubak ngakiro nugu. “Ani ilemarete esi akwap nakiinakini Ekapolon Akuj na erai Akuj kus, sodi toloma neni, itiakunete esi atamar kisaki ekapolon loger a ngibukui aluche kadaang. Toyena atamar esakitae esi iseunete itwaan ni aseu Ekapolon Akuj. Nyiitiliwosi itwaan a akwap anache ekapolon kus, ejoikinit erai itwaan nia akwap kus. Nyesakitae ekapolon eyakasi ngangolei a ngasigerea keng nakaalak, nabo nyesakitae ngesi emeari ngitunga Misiri akigiel ngangolei, kainyo alimu Ekapolon Akuj atamar nyebongete ngitunga keng inaa nabo jik. Nyesakitae ekapolon eriki ngaberu nakaalak, kainyo ibatarete ngaberu ngesi ani a Ekapolon Akuj. Nabo nyesakitae ngesi ebari ngaropiyae ka egolit. Ani eliwor ngesi ekapolon, esakitae ngesi toting akitab na igiritae ngitalio a Akuj, lu elemunitae anakitab ana kolong a ekingaren a etal ana etingito ngimurok a Ngilawi. Esakitae ngesi iwaakini akitab ngina diyete, sodi kisoma ngirwa daang lu eyarea ngesi, kitatamar ngesi akiker Ekapolon Akuj ka akiwap ngakiro daang na edungunit ngesi anakitab. Iratakinete ngakiro nguna ekapolon ngolo nyiitam atamar ajok ngesi noi edwangit Ngisirael luche, nabo nyeenger ngitalio a Ekapolon Akuj. Ani kikok neni, epolokini ngesi akwap ngikaru lukaalak. Epolokinete ngesi ka ngalesea keng akwap a Ngisirael ngikaru lukaalak. “Emam ewae a akwap a Ngisirael na einakinio ekitela a Lawi, lo erai eka a ngimurok a Akuj, pearai esakitae kesi toyara a ngalemunet ka ngakipeyos nache na elamanakinio Ekapolon Akuj. Emam akwap eliwor akech loger a ngitela aluche. Ibore einakinitae kesi, ngesi aliwor ngimurok a Akuj loger lo kolong echikichikar Ekapolon Akuj. “Ani ipeyoo ngaatuk kori ngamesekin, esakitae ngimurok einakinio eseget, ka abokony, ta ngiboro a akook. Esakitae eanyunete ngalemet na ekingaren, ka emuna lo ekingaren, ka akimiet na ekingaren, ta ngajul a ngamesekin na ekingaren. Alotela kus kadaang, aseuni Ekapolon Akuj ngitunga a ekitela a Lawi tosuba etich keng, toliworos ngimurok keng jik. “Itwaan a Lawi ni eyei lore cha daang a akwap a Ngisirael, epedori erai kesaki, alosit ni echamakinitae ilipeenere, sodi tosub kaneni etich erai emuron a Ekapolon Akuj ana erai Akuj keng, loger a Ngilawi aluche alu esubete etich kaneni. Esakitae ngesi eriamuni akimuj na etia na einakinitae ngimurok luche, nabo epedori tani akitiliwor ibore ni einunete ngitunga a awi keng, ikeng. “Ani inangete esi nakwap nakiinakini Ekapolon Akuj na erai Akuj kus esi, nyiiwap ngakiro naaronok na esubete ngibukui lu eyakasi inaa. Nyiipeyoto ngide kus anakimea a ngikenoi kus. Warasi ngitunga kus nyeemuroto kori nyeedwar, kori nyiirakanasi ngitunga, kori nyeesuba ngitunga luche. Warasi nyiiruor ka ngikaram. Eremokino Ekapolon Akuj na erai Akuj kus ngitunga lu esubete ngakiro naaronok nguna. Ngakiro nguna kesi etwarakinea Ekapolon Akuj ngibukui luche anakwap iloose esi ngaren. Toliworos lu imunosi Ekapolon Akuj lokojokon noi.” Sodi tolim Musa tama, “Akwap na edikino esi ilemarete, iwapito ngitunga ngakiro a ngimurok todwarete, nakaneni nyesakit Ekapolon Akuj na erai Akuj kus esi tosuba ngakiro nguna. “Nakaneni emeuni Ekapolon Akuj ekadwaran keng lo ikwaan ka ayong lo erai itwaan kus, nabo esakitae esi kiwapa ngakiro keng. “Akolongit nakolong iriamitotor esi moru a Sinai, ipot esi tamasi nyisakete akiirar nabo etoil a Ekapolon Akuj iruoro kori tani nyisakete akingolikin akim nakariran ngina, kainyo iemito esi ibalasi kori itoakete. Abu Ekapolon Akuj katolimok ayong tama, ‘Alimut ngitunga lugu ngakiro na iyookino. Asekini ayong kesi ekadwaran lo ikwaan ka iyong, lo erai itwaan kech. Alimokini ayong ngesi ngakiro na elimuni, sodi tolimok ngesi ngitunga ngakiro daang na adunguni ayong. Itwaan daang ni ewouni akiwap ngakiro na elimuni ekadwaran elimit ekiro kang, erirae ayong ngesi. Nakaneni ani kelimu ekadwaran ngakiro elimit ekiro kang toringa ayong nyelimokina ngesi, etoani ngesi kotere ngakiro nguna. Etoani tani ekadwaran daang lo iruoro elimit ngakujo nache.’ “Ipedorete robo esi akingitakin atamar ‘Kikokini sua kiyeni ai atamar iruoro ekadwaran ngakiro na eponito ani a Ekapolon Akuj?’ Ani kelimu ekadwaran ngakiro elimit ekiro a Ekapolon Akuj, nyeesubakin ngakiro nguna, toyena atamar meere ngaka Ekapolon Akuj. Iruoro ekadwaran ngolo ngakiro na eraakasi ngakeng a ilope, nabo nyiikear ngesi. “Ani emunyari Ekapolon Akuj na erai Akuj kus ngitunga a akwap ana kiinakini ngesi esi, sodi tolemasi esi ngirerea kech ka ngakais toloma inaa, kitegeliasi ngirerea nguuni anakwap ana ilemarete esi. Tosubakisi ngirukudi a ngirerea kangulu, totiaka akwap ngina ngatiaket ngauni sodi toloseene itwaan ni earit niche todukea. Ani kear itwaan niche peiyechakinit, nyeerai itwaan ni eario ngini emoit keng, epedori ngesi alosit toduk alorerea kangulu. Ani a ekitetemes, eloose ngitunga ngiarei namoni akitub ngikito. Ani kikea ipei aep sodi toutun aep anakitoe topor taar itwaan niche, epedori ngesi amatar lore epei a ngirerea aluuni kangulu toyuun, sodi nyiiwapea ngesi itwaan ni esaki atachakin akitu a eyenet keng, todita ani elonia ere, taar ngesi ani engoitor noi tani pekesechit itwaan ngini, kainyo be peeyechakini bo ngesi dang akiar itwaan niche ni pearai emoit keng. Ngakiro nguna kesi abalar ayong esi kitegeliasi ngirerea nguuni. “Ani kiatak Ekapolon Akuj na erai Akuj kus akwap kus, loger lokolong alimokinitor ngesi taapaakus, sodi kiinak ngesi esi akwap daang, loger lokolong echikichikar ngesi, esakitae esi nabo iseunete ngirerea ngiche nguuni. (Kiinakini ngesi esi akwap ngina daang erai kiwap esi ngakiro daang nakadungokinit ayong esi akolongit naga, nabo tominakis Ekapolon Akuj na erai Akuj kus, kiwapa ngakiro na esaki ngesi.) Tosuba kona nyeetoaketa ngitunga lu nyesechito, nabo nyiiliworosi esi ngikasechak ani iareta kesi anakwap ana kiinakini Ekapolon Akuj esi. “Nakaneni, ani kiyechak itwaan taar emoit keng, sodi tamatar ngesi akiduk alore a epei a ngirerea kangulu, esakitae ngikarikok a ere keng ebuarete ngesi, sodi kipotokis eyenet a itwaan ani earitae, lo erai ngesi etachakini akitu ngina, sodi taarae ngesi. Warasi nyikisien. Tolemasi ekaaran ngolo anakwap a Ngisirael, sodi tojokearotor ngakiro kus daang. “Anakwap ana kiinakini esi Ekapolon Akuj, warasi nyiisiyotosi ibore ni igerokinitor ekidunyet kon ekukuor keng, nikolong ewaakinio a angorot. “Nyitemokino erai ekaanyunan epei ngesi idodiuni atamar esechit itwaan, pearai ngiarei epedorete akidodiun atamar esechit itwaan. Ani kesak itwaan ipei akititakin itwaan niche a eliit, kitingak ngakiro a alioko, eloose daang ni echamakinitae ilipeenere, ngaren ngimurok a Akuj ka ngikatubok ngakiro lu esubete etich esaa ngolo. Ingichingichete ngikatubok ngakiro a eriras kangolo lokojokon. Ani kititakinit itwaan ngini Esiraelit loche, kitingak ngakiro na eraakasi alioko, eriamuni ngesi eriras losek adikino lo irirakinitae eriamuni. Nakaneni iirarete ngitunga daang ngakiro na asubakinosi sodi toema, nabo emam itwaan ebongokini akisub ngakiro naaronok nguna. Warasi ngakiro na ikote nguna nyikisieneto esi. Tatachakisi akiyar nakiyar nache, akongu tatachakin nakongu nache, ekelae tatachakin lokelae loche, akan tatachakin nakan nache, akeju tatachakin nakeju nache. “Nyieam robo na ilooso akirem ngimoe kus, sodi kingolikis ngaurukukui ka ngangolei, ka ngasigerea kech nakaalak idwangito nakus. Irukete esi ka Ekapolon Akuj na erai Akuj kus nakolong kiyuuni esi alo Misiri. Ani eringa esi nyisiakina ejie, ebuni emuron a Akuj tolimok ngasigerea tama, ‘Topupokisi Ngisirael! Iloose esi akolongit naga ejie. Nyieam ngimoe kus kori nyiimaranikis, kori warasi nyikibul. Irukorete esi ka Ekapolon Akuj na erai Akuj kus, nabo kisidwangi ngesi esi ngimoe kus.’ “Nakaneni elimokinete ngikaweikinak ngitunga tamasi, ‘Eyei nege itwaan ni aduk akai nakaneni eringa nyitaleuno a? Ani keyei, echamit ebongi nawi, nyearakin lojie, sodi tolema itwaan iche akai kitaleu. Eyei nege itwaan itakinit amana a emusabib nakaneni nyelema ngesi ageor a? Ani keyei, echamit ebongi nawi, nyearakin lojie, sodi tamat itwaan iche emuna keng. Eyei nege itwaan enyounit akuuta a? Ani keyei, echamit ebongi nawi, nyearakin lojie, sodi kuut ekile eche apese na enerit ngesi.’ “Elimokinete nabo ngikaweikinak ngitunga tamasi, ‘Eyei nege itwaan ni ebulit emarani a? Ani keyei, echamit ebongi nawi.’ Ani erumorete ngikaweikinak akisuruor ngasigerea, eseunio ngikarikok a ngitunga. “Ani iloose akirem ere, taanyutu mono kesakete ngitunga a ere kangolo ekisil kori kemam. Ani kengaasi kesi ngidorin tasaka ekisil, eliworosi kesi daang ngikedalak kus sodi kidesikinae akisub etich. Nakaneni ani pekesakete ngitunga a ere kangolo ekisil, tasaka ejie, kirikautu ere ngolo a ngasigerea kus. Ani kiinak esi Ekapolon Akuj na erai Akuj kus ere ngolo, taara ngikiliok daang kaneni. Nakaneni ipedorete esi alemar ngaberu, ka ngide, ka ngibaren, ta ibore daang ni eyei lore ngolo, kitiliwosi ngikus. Ipedorete alemar ibore daang ni erai ika ngimoe kus. Kiinak Ekapolon Akuj esi. Tosubeta ngakiro nguna ngirerea daang lu eloka anakwap ana moi ilomete esi. “Nakaneni ani ilemarete esi ngirerea a akwap ana kiinakini esi Ekapolon Akuj na erai Akuj kus, taara ngitunga daang. Tomunyasi ngitunga daang pil. Tomunyasi Ngiiti, ka Ngiamor, ka Ngikanaan, ka Ngiperes, ka Ngiipi, ta Ngiebus, loger lokolong kidungokinitor esi Ekapolon Akuj. Taara kesi sodi nyikitiliwosi esi ngikasechak ani a Ekapolon Akuj nabo nyikitatam esi akisub ngakiro naaronok daang na esubete kesi ilipito ngakujo kech. “Ani iriamete esi ere isakete alemar, nyiitubo ngikito a ageor tani kelalaketa ngirwa lu ijioto esi kaneni. Tanyama ageor, nakaneni nyiinyasut ngikito kainyo meere ngikito ngimoe kus. Ipedorete esi akitub ngikito luche lu nyenyamio todukioto ngachukulei na iduketa ijiete tanang ni ilemareta ere. “Ani bo keriamun itwaan etoanit anakwap ana kiinakini esi Ekapolon Akuj na erai Akuj kus, nabo nyiiyenete esi itwaan ni aari ngesi. Esakitae ngikarikok kus ka ngikatubok ngakiro itemete alonis ani earakinitae itwaan ka ngirerea lu eapiyete kaneni. Nakaneni eseunete ngikarikok a ere alo eapi ani earakinitae itwaan ataok nasek nyitusubitae etich a ache. Erikorete kesi ataok ngina nadipo ni eyei elelea lo nyeoneene, tarai nabo ni nyechilitae ngamanat, kori nyitatae, sodi tobila eluute kaneni. Eloose tani ngimurok lua ekitela a Lawi inaa, kainyo kesi etubete eriras daang lu ewanatar ngitunga. Aseu kesi Ekapolon Akuj na erai Akuj kus tosuba etich keng ka apiar ngitunga elimito ekiro keng. Nakaneni ilotarete ngikarikok daang a ere alo earakinitae itwaan, ngakan kech alokidiama itaok ebalasi, ‘Nyeara sua itwaan en, nabo nyikiyeni sua itwaan ni aari. Ekapolon Akuj, torimak ngitunga kon Ngisirael, lukolong iyuuni iyong alo Misiri. Torimakinae sua, nabo wara nyikipaik sua akitu a itwaan ani nyesechit.’ Aloger kangolo, kisuba esi ngakiro na esaki Ekapolon Akuj, nyikipaikinio esi akitu ngina. “Nakisidwangea esi Ekapolon Akuj na erai Akuj kus ngimoe alojie sodi kirumut esi ngimoe kus ngiche toriko, ipedori iyong kingolik aberu nakebusean iyong tasak akiut. Toriko ngesi nawi kon sodi tabanya akou keng, ka akitub ngimaagor keng, ta akilokony ngiworui keng. Esakitae ngesi kiboikin nawi kon sodi kialolong kotere akitu a ngikauriak keng a elap a epei, ani erumor, kiuut iyong ngesi. Ani kinger iyong ngesi ekisidi, kimiek tolot nyetacha ibore idio, kainyo itingakini kolong iyong ngesi akiper ka iyong. Nyipedori iyong togiela ngesi loger a akedalan. “Ani bo keya ngaberu ngaarei sodi kidout daang ngide lusapa, nakaneni tarai edia lo a ekingaren meere eka aberu ana emina ekile. Ani etiakakini itwaan ngini ngide keng ngiboro keng, nyesakitae ngesi ipakuni edia a aberu ana emina ngesi sodi nak ibore a edia aloapolon. Esakitae ngesi nak edia lo a ekingaren ngiboro keng ngainakinet ngaarei akidwang luche, tani pekerai edia ngolo lokookeng a aberu ana emina ngesi. Ejoikinit itwaan esubi kona sek esubere edia lo a ekingaren, sodi nak ibore ni echamit einakinio. “Ani bo keyei itwaan edia lokechanan, nyeepupi ngakiro tarai nabo lo nyiwapit ngakiro a ngikauriak keng tani kides. Esakitae ngikauriak keng torikosi ngesi lokarikok a ere alo elomit ngesi. Elimokinete ngikauriak ngikarikok ngulu tamasi, ‘Ichanana edia kosi, nyepupi ngakiro, nabo nyiwapit ngakiro kosi. Eboliar ngesi ngaropiyae, nabo ematana epurot.’ Nakaneni imasete ngesi ngikiliok a ere kangolo a ngamoru taara, sodi tolemasi ngakiro naaronok nguna anikus. Iirarete ngitunga daang anakwap a Ngisirael ngakiro nguna asubasi, sodi toema. “Ani kesech itwaan sodi taarae kinenekinoe napir, nyeeper akwaan keng neni kiwalak. Echamit enukio ngesi akolongit napei ngina, kainyo eyauni akwaan a itwaan na ineno anapir ngilam a Akuj nakwap. Tonuka akwaan sodi nyiinyasut esi akwap nakiinakini esi Ekapolon Akuj na erai Akuj kus. “Ani kingolik iyong aite kori amesek a Esiraelit aloche echakara, wara nyiisik ewoliyori, tarama tobuak ilope. Nakaneni ani kelona ni elomit ilope, kori pekiyeni iyong ilope, tarama nawi kon. Ani kebu ilope esaki, nak. Tosub ngakiro napei nguna erai kiriam esikiria, kori awaru, kori ibore a Esiraelit aloche ni echakara daang. “Ani kibusokin esikiria a Esiraelit aloche, nyiisik kongina, kingarak ilope akitonyoun ibarasit ngini. “Nyeenap ngaberu ngiworui a ngikiliok, nabo nyeenap ngikiliok ngiworui a ngaberu. Eremokino Ekapolon Akuj na erai Akuj kus ngitunga lu esubete ngakiro nguna. “Ani kiriamu iyong akai a ikeny alokitoe, kori analup eurenea ikeny ngabeyei kori ngitak keng, wara nyiilema ikeny ni eurit ngini. Ipedori iyong alemar ngitak, nakaneni tochoite ilemari itiokech, sodi kibooyo iyong nikooyen kipiaritae. “Ani iduki akai nakitetet, kiriwok ngakito lokwaasea a ewae alo alokidiama, sodi nyikipaikin iyong, erai kechakun itwaan alokidiama totoan. “Nyiitak ekitoe eche mana na itakinit iyong emusabib. Ani kitak, kitengeritoe iyong akinyam ngamusabib, ka ageor a ekitoe aloche kangolo. “Nyiien emong ka esikiria aapei isaki tochila amana. “Nyiinap ngiworui lu edonyunitoe anajul ka ngawarui aapei. “Todonyokisi ngawarui na isanasanasi lowaitin luomwon a ngiworui kus. “Epedori itwaan kiut apese ani ekisidi tasak akinger ngesi. Ani erumor kitingak ngesi aberu ngina atamar eperito sek ka ekile eche eringa kesi nyiriamuna. Ani kesubakin ngakiro nguna, elemunete ngikauriak a aberu kangina eworu lodapal lokolong aperioto ekile ngolo ka aberu keng na eutatar. Eyaarete kesi eworu lodapal eyakasi ngakemera a ngaakot nitubet ngakiro kidodikis ngikarikok a ere. Idodiuni eworu lodapal ngolo atamar nyepero ngesi ka ekile a ache. Elimokini apakeng a aberu kangina kesi tama, ‘Ainakini kolong ayong ekile logo nakookang kiut, nakaneni anger tokona ngesi. Etingak ngesi nakookang atamar eperito kolong sek ka ekile eche eringa nyiriamuna ka ngesi. Nakaneni ibore en ngesi idodiunit atamar eringa nakookang nyepero ka ekile eche. Kingolikisi ngaakot na eyakasi loworu logo lokolong aperioto kesi akwaar na akuuta!’ Nakaneni erikorete ngikarikok a ere ekile ngolo kideta ngesi. Kitelemunae nabo ngaropiyae amiat apei nakinae apakeng a aberu kangina, kainyo ayau ekile ngolo ngileech napese na erai Asiraelit. Nabo eliwor aberu ngina akeng jik, nyelaki ngesi jik ngirwa daang lu eyarea ngesi. “Nakaneni ani kerai ngakiro a ekile iteni, nabo tamam ibore ni idodiunit atamar peaperito aberu ngina ka ekile sek, erikorio aberu ngina tanang nakituk a akai a apakeng, ani enangi neni, kimasa ngikiliok a ere kangolo ngesi a ngamoru totoan. Asub ngesi ngakiro na a ngileech alotunga yok ani aperioto ka ekile eringa ngesi nyiuta, ngirwa lu aringaakar eyei nawi ka apakeng. Kotere eger ngolo, ilemarete esi ngakiro naaronok nguna. “Ani keriamun ekile eperete ka aberu a ekile aloche, eario kesi daang. Kotere eger ngolo, ilemarete esi ngakiro naaronok nguna. “Ani keriamun ekile alore eperete ka apese na enerit ekile loche, kipudosi kesi alore sodi kimasa a ngamoru totoan. Echamit apese dang etoani kainyo nyiremara ngesi esaki atamar katoyuun, tarai ayei lore ni adikino ngitunga luche iirareta ngesi irema. Nabo echamit ekile etoani kainyo aperete ngesi ka apese na eneritoe. Kotere eger ngolo, ilemarete esi ngakiro naaronok nguna. “Ani ketikoono ekile apese na eneritoe alomoding, ekile bon echamit etoani. Emam ibore esubakinere apese, kainyo nyesuba ngesi akisech na echamit earere. Ikwaan ngakiro nguna ka na a itwaan ani enyoikini niche kitoji sodi taar. Atikoonori ekile apese na aneritoe, ani tani na eremarea apese ngina esaki ayuuno, tongop itwaan eyuuni ngesi. “Ani ketikoono ekile apese na nyeneritoe, echamit ngesi elemikini apakeng a apese ngaropiyae ngatomwon-kan na iutar, toliwor apese ngina aberu keng, kainyo etingakini ngesi apese ngina akiper ka ngesi. Nyeringa nabo ngesi elaki aberu ngina jik ngirwa daang lu eyarea ngesi. “Nyeepero itwaan ka aberu a apakeng, kainyo eyauni ibore ngini ngileech nika apakeng. “Emam ekile lo idongitoe kori lo etuboritae amir keng lo eliwor epei a ngitunga a Ekapolon Akuj. “Emam ikoku nia akeor kori alesit keng ni eliwor ipei a ngitunga a Ekapolon Akuj, napei anikeng tanang nalesit na a ngatomon. “Emam Ngiamor kori Ngimoab kori ngalesea kech ni eliwor ipei a ngitunga a Ekapolon Akuj, tanang ales na a ngatomon. Kipukorete kolong kesi esi akimuj ka ngakipi alorot na irotokinioto alo Misiri, nabo todiaka kesi Balaam lokookeng a Beor, lo a ere a Pesor alo eyei Mesopotamia, sodi bu ngesi kilam esi. Nakaneni abu Ekapolon Akuj na erai Akuj kus nyiira ngakiro a Balaam, pearai abu Akuj kiloch ngilam ngulu toliworos apiaro, kainyo kimina ngesi esi. Ngirwa daang lu iyareta esi, nyiingarakis ngibukui ngulu, kori nyiisak erot lo itabareta kesi. “Nyiimenyasi Ngiedomae, kainyo eraakasi ngiyenet kus. Nabo nyiimenyasi Ngimisiri, kainyo ilomito kolong esi nakwap kech. Napei analesea kech ana a ngauni tanang na isidiunosi, eliworosi ngitunga a Ekapolon Akuj. “Ani iyakasi nadakar ngirwa lu ejie, totiakas ka ibore daang ni kitiliwori esi ngitunga lu nyitaleuno. Ani keyei ekile lo nyitaleuno ani erujaa nakwaare kitapapal niperiet, esakitae ngesi topudo nikalapatan a adakar kiboikin inaa. Ani enangi ebong kilota akwaan keng sodi tobongu nadakar edooyori akolong. “Totiakutu wadio anikalapatan kingaranakinotor iloseenete kinga. Totinga akitoe iloose kinga sodi ani irumorete esi akingarakin, tobokasi ngalup tonuka ngachin. Kitaleutu adakar kus toseger kainyo eyei Ekapolon Akuj na erai Akuj kus nadakar irukito ka esi, nabo kitee esi kiinakini agogongu na idwangeta ngimoe kus. Warasi nyiisuba ngakiro naaronok na itongoyete Ekapolon Akuj kitonger esi. “Ani kedoki ekedalan ani eyei ilope bu nikon esaki ayuuno, nyiibua. Kimiek ngesi kiboikin lore locha esaki ngesi alorerea kon, nabo nyiiboliar. “Emam itwaan a Ngisirael kerai iberu kori ikile ni elomari akilip Akuj alorot a emalaanu. Nabo, emam ngaropiyae na eriamunitae a erot kangolo na eyaunio kai a Ekapolon Akuj ana erai Akuj kus anisek ekongitere. Eremokino Ekapolon Akuj ngamalaae alokai keng. “Ani iinakini iyong Esiraelit loche ngaropiyae kori akimuj taar amicha, nyiisak akiatakin ngaropiyae ngache ni eyakasi nakon. Ipedori iyong akisiatakin itwaan a akwap anache, nakaneni nyiisiatak Esiraelit loche. Kiwapa etal ngolo sodi kitopiarea esi Ekapolon Akuj anakiro kadaang ana isubete esi anakwap ana kiinakini ngesi esi toloma. “Ani ikongi iyong ani a Ekapolon Akuj ana erai Akuj kus, wara nyiisik akisub nguna ichikakini iyong atamar isubi, kainyo esaki Ekapolon Akuj na erai Akuj kus kirichak iyong akichikakinet ngina, nabo eliwor akisech erai pekirichak iyong. Emam akisech eyei erai pekikong iyong ani a Ekapolon Akuj, nakaneni ani kikong iyong a akiding kon a ilope, kirichak akikongiet ngina. “Ani kitor iyong mana a itwaan, tanyam ngamusabib cha daang na isaki iyong nakaneni tochoite igerori na itingi a ibore. Ani kitor iyong mana a itwaan na a ngimomwa, tanyam ngimomwa lucha ipedori abilun a ngakan kon, nakaneni tochoite itubi a ekileng alolemet. “Ani kiut itwaan aberu, sodi ekisidi tonger ani eyakatar ngakiro na akadakis anikeng, ejoikinit ngesi igiri abarua a elakit nak aberu ngina, sodi kitwarak anawi keng. Ani kiut ekile eche aberu ngina, sodi tonger nabo ngolo dang, igirakini ekile ngolo aberu ngina abarua a elakit sodi kitwarak anawi keng. Kori epedori ta ekile lo a ekisidi ngolo totoan. Tani kikokis neni, nyiutasi nabo aberu ngina ka ekile lo a ekingaren jik, kainyo enyasun aberu ngina. Eronikinete Ekapolon Akuj ngakiro nguna erai kuut nabo ekile ngolo aberu ngina. Tochoite isubakini akisech naaronon ikoni ngina anakwap ana kiinakini iyong Ekapolon Akuj na erai Akuj kus. “Ekile lo erai akiutar ngina, echamit peiwaakinio lotich a ngasigerea kori loche daang. Echamit imiekinio ngesi emam etich ekaru epei sodi kiboikinor nawi kitalaka aberu keng. “Ani iinakini iyong itwaan ibore taar amicha, nyiilem akiries keng toliwor ikachakinit iyong kidarea amicha etachio, kainyo ikoni ibore ngini alemar ibore ni imujeta ngitunga a awi kangina eyaritotor. “Itwaan cha daang ni idaari Esiraelit loche kitiliwo ekedalan keng, kori togielak ngitunga luche toliwor ekedalan kech, echamit itwaan ngini eario. Kotere eger ngolo, ilemarete esi ngakiro naaronok nguna. “Ani kidekakin iyong enomokere, kirichak lokojokon ngakiro nakilimokinete iyong ngimurok a ekitela a Lawi atamar tosub. Kiwapa ngakiro na echikichikak ayong kesi. Kitamutu ngakiro na asubea Ekapolon Akuj na erai Akuj kus Miriam na irotokinioto esi alo Misiri. “Ani iinakini iyong itwaan ibore taar amicha, nyiiloma kai keng tolemu eworu lo esaki ngesi ainakin iyong kidarea amicha etachio. Kidaru anikalapatan sodi yau ngesi ilope nikon. Ani kiboosit ngesi, nyiiteper eworu ngolo nawi kon. Kinyiakanak ngesi atabong daang kimukokin. Nakaneni elakar ngesi, sodi tojoikis Ekapolon Akuj na erai Akuj kus ngakiro kon. “Nyiiboliar ekedalan lo iboosit kichana, kerai ngesi Esiraelit kori itwaan a akwap anache ni elomit lore epei a ngirerea kus. Tatachak ngesi ngaropiyae a etich a akolongit kangina eringa akolong nyedooyoro, kainyo esaki ngesi ngaropiyae nguna, nabo iitanit atamar kainakin. Ani pekitach iyong ngesi ikaloikini ngesi Ekapolon Akuj kotere iyong, sodi toliwor iyong isechit. “Nyechamit ngikauriak eario kotere ngisech a ngide kech, nabo nyechamit ngide eario kotere ngisech a ngikauriak kech. Echamit itwaan eario kotere akisech na esubi ngesi ilope bon. “Nyiiboliar ngitunga a ngakwapea anache ka ngikokiok. Nyiilema eworu a apuserut kikachak kidarea amicha kon etachio. Kitam atamar irai kolong iyong ekedalan alo Misiri sodi kitoyuu Ekapolon Akuj na erai Akuj kus. Ngakiro nguna kesi kadungokinitor ayong esi etal logo. “Ani ilemi iyong amana kon sodi kimuriakis ngalemet ngache alomana, nyiibongo ayaun. Kimiekinea nguna ngitunga a ngakwapea anache, ka ngikokiok, ta ngapuseru, sodi kitopiarea Ekapolon Akuj na erai Akuj kus anakiro kadaang ana isubi. Ani igeri iyong ageor a ngikito a akimiet ageriet apei, nyiibongo nabo akidepun na idongito. Eraakasi nguna ngaka ngitunga a ngakwapea anache, ka ngikokiok, ta ngapuseru. Ani ichunakini iyong ngamusabib kon achunakinet apei, nyiibongo nabo kidep na idongito. Eraakasi nguna ngaka ngitunga a ngakwapea anache, ka ngikokiok, ta ngapuseru. Kitamu atamar irai kolong iyong ekedalan alo Misiri. Ngakiro nguna kesi kadungokinitor ayong iyong etal ngolo. “Ani kelot Ngisirael ngiarei nitubet ngakiro, sodi tamarae esechit epei, nyeesechite loche. Ani ketubun atamar idesio itwaan nikasechan, esakitae itwaan nikatubon ngakiro elimokini ngesi atamar toper a akook sodi kidetae. Itemio ngaramet ka akisech na esubit ngesi. Epedorio akidet ngesi ngakideset ngatomwon-omwon, nakaneni nyiisiporosi neni kainyo ani kisiporor, irumete ngesi ngileech alotunga aluche. “Nyiitenger emong adaka esaa lo isipudaare ngalemet. “Ngikaitotoi lu erukito aapei, na etoanea epei nyeuriuna ikoku nisapat, nyesakitae aberu keng irumete ngitunga lugelayek. Ejoikinit erai lokaatokeng a ekile keng ngesi irumi. Ikoku nisapat ni ekingaren ni euriunete kesi, eliwor ika ekile alokatoan, sodi nyeengopiarea ekiro keng anakwap a Ngisirael. Ani kewou lokaatokeng a ekile alokatoan kangolo akirum aberu ngina, esakitae aberu tolot lokarikok a ere tama, ‘Awou lokaatokeng alokile kang akisub etich keng. Awou ngesi auriun ikoku a lokaatokeng min nakwap a Ngisirael.’ Nakaneni enyaraunete ngikarikok a ere ekile ngolo kisuruoro. Ani keringa engerit akiut aberu ngina, esakitae apuserut ngina elosi lokile ngolo iteete ngikarikok a ere, sodi tobut amukat a ekile apei, ani erumor kimoak loreet tama, ‘Ngakiro na ikote nugu asubakinosi alokile alo awouni auriun ikoku a lokaatokeng.’ Eyenikinio awi a itwaan kangini alo Isirael tamarae, ‘Awi a ekile alo kolong abutunio amukat.’ “Ani kejikin ngikiliok ngiarei, sodi tasak aberu a epei aikin lokilekeng, toruakin nia auri a ekile aloche, wara nyikisien, totubo akan keng. “Nyiingala ngitunga kiwaak ibore niapotion ka nikaabenan lochue kon. Nyiingala ngitunga nabo kiwaak ibore nikitemiet niichi ka niapolon kai kon. Echamit ngiboro kus lu itemieto esi apotis ka aoyau eraakasi lua iteni, lu eriyan, sodi kiboikinotor esi nikooyen anakwap ana kiinakini esi Ekapolon Akuj na erai Akuj kus. Eremokino Ekapolon Akuj ngitunga lu ingalaate. “Kitamutu ngakiro nakolong kisubeta esi Ngiamalek na iponeta esi alo Misiri. Peakerito kesi Akuj, kotere ngakiro nguna, apot kesi kitijikis esi anaabor nakiburunitor esi kiloite. Apot kesi taara ngitunga lu esidiyete. Tokona bocha, ani kiinak esi Ekapolon Akuj na erai Akuj kus akwap, nabo kitee esi alomoe kus kadaang alu idunyasi ka esi, taara Ngiamalek daang, sodi nyiitamun kesi nabo. Warasi ngakiro nguna nyikimuriakis esi! “Ani ilomarete nakwap nakiinakini esi Ekapolon Akuj na erai Akuj kus, sodi toloma inaa, esakitae ipei kus daang edekuni akikap apei a ngalemet ana ekingaren yaa ni echamakinitae ilipeenere. Tolot lomuron lo eweikinit neni esaa ngolo tolimok ngesi tama, ‘Asaki tokona ayong akitaanyun Ekapolon Akuj na erai Akuj kang atamar anangu ayong nakwap nakolong echikakini ngesi taapaayok atamar kiinakini ngoni.’ “Elemari emuron ngolo akikap ngina anikon, sodi kiwaak ngaren ekeno a ngakipeyos a Ekapolon Akuj ana erai Akuj kon. Sodi tolim iyong ngakiro nugu alongaren Ekapolon Akuj tama, ‘Arai kolong apaakang Earamit lo awoowoot amam awi, toriko ngesi ngitunga a awi keng toloma Misiri. Akidioko kolong kesi eloose inaa, nakaneni apot kesi talalaketa nabo toliworos ngitunga lukajwok. Apot Ngimisiri kitoboliatar sua, kidesikis sua akisub etich atoliworos ngikedalak. Sodi ekaloikisi sua Ekapolon Akuj, na erai Akuj kata apaakosi, kisaki kingarak. Abu ngesi kiira ngakiro kosi, sodi kingolik aboliaro kosi, ka ngichan, ta ariaba. Abu ngesi kitoyuu sua alo Misiri a agogongu keng anaationon. Tosub ngesi ngakitoodikinet nakailiilok ka nakatalarak. Kiyau ngesi sua nege kiinak akwap na ileleba ngakile ka akimiet a ao. Kotere ngakiro nguna, ainunit tokona ayong Ekapolon Akuj ngalemet na ekingaren a ngalemet ana kainaki ngesi ayong.’ “Ani kilimu iyong kongina kerumor, kiwaak akikap kwap ngaren Ekapolon Akuj, kilip kaneni. Talakar kotere ngiboro luajokak lu kiinak Ekapolon Akuj na erai Akuj kon iyong ka ngitunga a awi kon. Kimiek ngimurok a Akuj ka ngitunga a akwap anache lu irukito ka esi kaneni, kimorikinos ka esi talakaros. “Adaunet a ngikaru a nguuni daang, tolem alemunet apei anatomon analemet kon, nak Ngilawi, ka ngitunga a ngakwapea anache, ka ngikokiok, ta ngapuseru, sodi taanyuneta ngitunga ngulu daang ibore ninyamat kimwoko. Ani kisubak iyong kongina, tolimok Ekapolon Akuj tama, ‘Emam alemunet apei anatomon na edong nawi kang. Alemu ayong ainak Ngilawi, ka ngitunga a ngakwapea anache, ka ngikokiok, ta ngapuseru loger lokolong kidungokinea iyong ayong. Emam etal loa alemunet a apei anatomon, lo nyiwapa ayong kori emam lokemuriak. Nyenyama ayong epewae a alemunet a apei anatomon na egoror, kori nyipudoro ayong epewae nikalapatan a akai kang peetaleuno, kori nyelemuna ayong epewae etiliwo ngakipeyos a ngikatoak. Ewap ayong ngakiro kon Ekapolon Akuj asub daang nakolong kidungokini iyong ayong kotere alemunet apei anatomon. Tokienyu ani italeuno iyei iyong anadis sodi topia Ngisirael lu eraakasi ngitunga kon. Topia tani akwap na ileleba ngakile ka akimiet a ao nakiinak iyong sua, loger lo kolong ichikakinea iyong taapaakosi.’ “Kidungok esi Ekapolon Akuj na erai Akuj kus akolongit naga atamar kiwapa ngitalio keng daang. Kiwapa dir a ngitai kus kadaang ka akiyar kus daang. Ilimosi akolongit naga atamar Ekapolon Akuj erai Akuj kus. Ilimut esi atamar iwapete ngakiro keng, kirichakis ngitalio keng, nabo tosuba daang nakidungokini ngesi esi. Kicham Ekapolon Akuj esi akolongit naga iliworosi ngitunga keng loger lokolong kichikakinea ngesi esi. Nabo kidungok ngesi esi atamar kirichakisi ngitalio keng daang. Kitiliwori ngesi esi lu kiyenikinitae noi kidwanga ngibukui luche daang lukolong asubi ngesi, sodi kipuruut esi ngesi tokera. Iliworosi esi ngitunga keng a ilope loger lokolong kichikakinitor ngesi esi.” Apot Musa ka ngikarikok a Ngisirael tolimokis ngitunga tamasi, “Kiwapa ngitalio daang lukadungokini ayong esi akolongit naga. Akolongit na idokareta esi ekwakaye angolol a Yorudan, tolomasi nakwap nakiinakini esi Ekapolon Akuj na erai Akuj kus, esakitae esi kitowaa ngamoru naapolok kipuchakis echoto. Sodi kigirakis ngitalio ka ngakitatamet nugu daang. Ani ilomarete esi nakwap na ileleba ngakile ka akimiet a ao ngina, akwap nakolong kichikakini Ekapolon Akuj na erai Akuj kata apaakus atamar kiinakini esi, toekasi esi ekwakaye Yorudan, kitowaa ngamoru nugu alomoru a Ebal, kilalakis echoto, loger lokalimokinitor ayong esi akolongit naga. Tosubakisi kaneni ekeno a ngakipeyos a ngamoru ana nyimorikinitae ka ngasua, kainyo esakitae ekeno lo idukokinete esi Ekapolon Akuj na erai Akuj kus esubunitae a ngamoru ana nyetubitoe. Neni ngesi esakitere esi kipeyoto ngakipeyos na inomio. Kipeyoto kaneni sodi tanyama ngakipeyos kus na ekisil, talakaros alongaren Ekapolon Akuj ana erai Akuj kus. Kigira ngakiro daang a etal a Akuj ilereete kidiama namoru na ilalatae a echoto nguna.” Abu Musa imorikina aapei ka ngimurok a Akuj tolimok Ngisirael daang tama, “Topupokisi Ngisirael, kiirasi ngakiro kang. Iliworosi esi akolongit naga ngitunga a Ekapolon Akuj ana erai Akuj kus. Kiwapa ngakiro keng sodi kirichakis ngitalio keng daang lukadungok ayong esi akolongit naga.” Sodi tolimok Musa Ngisirael tama, “Ani idokarete esi ekwakaye Yorudan, ngitela lugu kesi ewaasi alomoru a Gerisim na epiarere ngitunga. Ewaasi ngitunga a ekitela a Simeon, ka Lawi, ka Yuda, ka Isakar, ka Yosep, ta Benjamen. Ani na ilamere ngitunga, ewaasi ngitela lugu alomoru a Ebal. Ewaasi ngitunga a ekitela a Reuben, ka Gad, ka Acher, ka Sebulun, ka Dan, ta Naputal. Esakitae Ngilawi tolimut ngakiro nugu ikeunito ebalasi, “ ‘Ilamit Akuj itwaan daang ni esubuni akuj anamoru, kori anakitoe, kori anasuat, sodi kilip idait. Eremokino Ekapolon Akuj akilipit ngakujo nasubuna.’ “Esakitae ngitunga daang tatachut tamasi, ‘Aamen!’ “ ‘Ilamit Akuj itwaan daang ni nyekerit apakeng ka itiokeng.’ “Esakitae ngitunga daang tatachut tamasi, ‘Aamen!’ “ ‘Ilamit Akuj itwaan daang ni isiyotoori ibore ni igerokinitor ekidunyet keng ekukuor keng.’ “Esakitae ngitunga daang tatachut tamasi, ‘Aamen!’ “ ‘Ilamit Akuj itwaan daang ni eriki emuduk kitooliyo alorot.’ “Esakitae ngitunga daang tatachut tamasi, ‘Aamen!’ “ ‘Ilamit Akuj itwaan daang ni eboliar ngitunga a ngakwapea anache, ka ngikokiok, ta ngapuseru.’ “Esakitae ngitunga daang tatachut tamasi, ‘Aamen!’ “ ‘Ilamit Akuj itwaan daang ni itoperi apei a ngaberu a apakeng, kainyo isurumit apakeng ngileech!’ “Esakitae ngitunga daang tatachut tamasi, ‘Aamen!’ “ ‘Ilamit Akuj itwaan daang ni itoperi ibarasit kori etiengit.’ “Esakitae ngitunga daang tatachut tamasi, ‘Aamen!’ “ ‘Ilamit Akuj itwaan daang ni eperete ka nakaatokeng na idounitoe ka ngesi anakook a apei kori nakaatokeng na a aberu anache.’ “Esakitae ngitunga daang tatachut tamasi, ‘Aamen!’ “ ‘Ilamit Akuj itwaan daang ni eperete ka nakamuran keng.’ “Esakitae ngitunga daang tatachut tamasi, ‘Aamen!’ “ ‘Ilamit Akuj itwaan daang ni eari niche peeyenio.’ “Esakitae ngitunga daang tatachut tamasi, ‘Aamen!’ “ ‘Ilamit Akuj itwaan daang ni idiauni ngaropiyae sodi taarea itwaan ni nyesechit.’ “Esakitae ngitunga daang tatachut tamasi, ‘Aamen!’ “ ‘Ilamit Akuj itwaan daang ni nyiwapit ngitalio a Akuj daang ka ngakitatamet keng.’ “Esakitae ngitunga daang tatachut tamasi, ‘Aamen!’ “Ani kiwap esi Ekapolon Akuj na erai Akuj kus sodi kirichakis dir ngitalio keng, lukadungok ayong esi a akolongit naga, kitiliwori ngesi esi lu kiyenikinitae kidwanga ngibukui luche daang anakwapea. Kiwapa ngakiro a Ekapolon Akuj ana erai Akuj kus sodi toliworor apiaro naga daang akus. “Epiari Ekapolon Akuj ngirerea kus ka ngamanat kus. “Kipiari Ekapolon Akuj esi kiinak ngide lukaalak, ka ngikinyam lukaalak, ka ngaatuk nakaalak, ta ngamesekin nakaalak. “Epiari Ekapolon Akuj ngikinyam kus ka akimuj na iriamunito esi alokinyam kangulu. “Epiari Ekapolon Akuj ibore daang ni isubete esi. “Ipiyori Ekapolon Akuj ngimoe kus nakitijikinioto esi. Kitijikinete kesi esi itorunito lowae epei, nakaneni ematarosi anikus kitoro lowaitin daang. “Epiari Ekapolon Akuj na erai Akuj kus etich kus nabo kileleb ngidulae kus ngikinyam. Kipiari ngesi esi anakwap ana kiinakini ngesi esi. “Ani kiwapa esi ngakiro a Ekapolon Akuj ana erai Akuj kus sodi tosuba ngakiro daang na edungunit ngesi, kitiliwori ngesi esi ngitunga keng a alope, loger lokolong echikichikar ngesi. Nakaneni ingolikinete ngitunga daang anakwapea atamar kiseu Ekapolon Akuj esi toliworos ngitunga keng, sodi kitokera kesi esi. Kiinakini Ekapolon Akuj esi ngide lukaalak, ka ngaatuk nakaalak, ta ngikinyam lukaalak anakwap ana kolong echikakini ngesi taapaakus atamar kiinakini esi. Eyauni ngesi akiru nakaalan alokai keng ana a adis, sodi topia etich kus, toliwor eareenete ngibukui lukaalak amicha anikus, nakaneni nyiarete esi amicha anikech. Kitiliwori Ekapolon Akuj na erai Akuj kus iyong ekarikon, meere ekewapan. Eloose ngakiro kon daang ngaren meere naabor, erai kiwap iyong ngitalio keng daang lukadungok ayong esi akolongit naga, nyiisechak. Wara nyiinger akiwap ngitalio lugu tani wadiochichi, kori nyiilip ka akisub etich a ngakujo anache. “Ani pekiwap esi Ekapolon Akuj na erai Akuj kus, nabo ani pekirichakis dir ngitalio keng daang lukadungok ayong esi akolongit naga, epote ngakiro naaronok nugu daang nikus. “Ilami Ekapolon Akuj ngirerea kus ka ngamanat kus. “Ilami Ekapolon Akuj ngikinyam kus ka akimuj na iriamunito esi alokinyam kangulu. “Kilami Ekapolon Akuj esi kiinak ngide ngidikidio, ka ngikinyam luaronok, ka ngaatuk ngadikidio, ta ngamesekin ngadikidio. “Ilami Ekapolon Akuj ibore daang ni isubete esi. “Ani kisuba esi ngakiro naaronok sodi tongero Ekapolon Akuj, kiinuni ngesi esi ngilam, ka ejokopu taanyut ngichan anakiro ana isubete esi kadaang, tanang esi imunyarosi daang atipei. Itoropuuni ngesi ngidekesinei nikus, tadaunos esi nyiidong tani ipei nakwap na edikino esi ilomarete. Kiinuni ngesi esi ngidekesinei lu etapuununio alotunga aluche, lu ikote abwore a ngawat ka elekes. Eyauni ngesi eron ka ekuwam lo a akamu sodi kinyasut ngikinyam kus. Kiwapete esi ngakiro naaronok nguna tanang ni itoaketa. Nyerami akiru, nabo egogongerosi ngalup kikokis asuat. Apua ka ekuwam lo ekusi ngalup kesi eliworosi akiru a akwap kus, todoto nikus kinyasut esi. “Einakini Ekapolon Akuj ngimoe kus agogongu na kidwangeta esi. Itijikinete esi kesi itorunito lowae epei nakaneni imatarosi esi anikech itorito lowaitin daang, sodi tobul ngitunga daang anakwapea na ingolikineta ngakiro na esubasi anikus. Ani itoakete esi, epote ngikieny ka ngitieng a moding tanyama ngawat kus, nabo emam itwaan iritari kesi. Iturupuni Ekapolon Akuj ngilepunae anawat kus loger lo kolong eturupunea alotunga a Misiri. Ijemeikini ngawat kus lokojokon. Ebutari loper ngawat sodi kipii. Kitokopori Ekapolon Akuj esi ngikerep, kitumudukani ngesi esi, kibiler ngakies. Itwangete esi naparan loger a ngimuduk, nakaneni nyianyunete esi erot lo itorete. Nyejokearosi ngakiro daang na isubete esi. Kiboliare esi jiik tokokoae ngiboro kus, nakaneni emam itwaan kingarakini. “Ineri iyong apese isaki, akiut, nakaneni egealakin itwaan iusi. Iduki iyong akai nakaneni nyilomi kai ngina. Itakini iyong amana nakaneni nyinyami ngamusabib keng. Engolio ngaatuk kon itee iyong ilope, nakaneni nyinyami iyong akiring kech tani nadiochichi. Iurukukorio ngisikiria kon itee iyong nakaneni nyikibuakinio. Ipotorio ngamesekin kon nakinae ngimoe kon, nakaneni emam itwaan kingarakini iyong. Ipotorio talokookon ka tanakookon nakinae ngitunga a ngakwapea anache itee iyong toliworos ngikedalak. Kidong iyong ingolengole akolongit daang ibala kori ebongunete ngide kon. Ngibukui luche kesi elemarete ngikinyam kon daang lu itakini iyong a ngakan kon. Nakaneni emam ibore iriamuni pearai kiboliare jiik kitosubere naaronok. Kitokopori aboliaro ngina iyong ngikerep. Eburuchiari Ekapolon Akuj ngakejen kon a ngajemei anakariabak ana nyengalekinete. Kibutarete iyong ngilepunae napei anakou tanang nakejen. “Ekapolon Akuj kiyaari esi ka ekapolon kus nakwap nagela nakolong nyenanga esi kori taapaakus a ache. Ani inangete inaa tosuba etich a ngakujo ana esubunitae anakito ka ngamoru. Anakwapea ana kiealakini esi Ekapolon Akuj, eriangakinosi ngitunga kotere ngakiro na asubasi anikus. Kikianatar kesi esi sodi kimenya. “Itakinete esi ngikinyam lukaalak nakaneni inyamete ngidikidio, kainyo irikari emaase ngamanat kus. Itakinete esi ngamanat a ngimusabib sodi kiyoko, nakaneni nyilemete ngamusabib kech kori nyimaase emuna a ngamusabib kech, kainyo irikari ekurut ngamusabib nguna. Erupunete ngikito a akimiet awadaang anakwap kus, nakaneni nyiriamunete akimiet tani nadiochichi, kainyo eraraun ageor a akimiet. Iuriyete esi ngide lusapa ka lupesur, nakaneni nyitingete kainyo erikio kesi alojie toliworos ngirikon. Irikarete ngikur ka emaase ngikito kus daang ka ngamanat. “Egogongerosi ngitunga a ngakwapea anache daang lu eyakasi nakwap kus, nakaneni ipalagagete esi. Kiinakinete kesi esi ngaropiyae na iarete nakaneni emam nakus earete kesi. Toliworos kesi ingarenete, kisidioto esi. “Epote ngakiro naaronok nugu daang nikus kiruko ka esi tanang ni imunyarotor esi, kainyo iwounete esi akiwap ngakiro a Ekapolon Akuj ana erai Akuj kus sodi nyiirichakis ngitalio keng daang lu kidungokini ngesi esi. Ngakiro nugu kesi idodiunete eriras a Akuj anikus ka ngalesea kus jik. Kipiari kolong Ekapolon Akuj esi anakiro kus kadaang nakaneni nyesuba esi etich keng a ngitai ajokak iraakasi lu ilakara. Kotere ngakiro nguna, isubete esi etich a ngimoe alu emeuni Ekapolon Akuj nikus. Kinyami esi akoro ka akure nabo engopi ibore inapete anawat. Iliworosi ngulu ichanasi ibore daang. Kiboliar esi Ekapolon Akuj niaronon tanang imunyarosi. Eyauni Ekapolon Akuj ngibukui anasalunet a akwap, ngibukui lu nyiyenete esi tani ngabukui kech. Kikoporete kesi esi loger a egole. Ngibukui luaronok lu nyisieniyete ngitunga lusorok ka lumojong. Enyamete kesi ngaatuk kus ka ngikinyam kus sodi kitoriyo esi erogo. Emam ngikinyam, kori emuna, kori akimiet, kori ngaatuk ka ngamesekin nakiisikineta kesi esi. Nakaneni itoakete esi. Eremete kesi ngirerea daang anakwap ana kiinakini esi Ekapolon Akuj na erai Akuj kus, nabo eukorosi nakooyak palem igienosi esi. “Ani iriamete ngimoe kus ngirerea kus, kinyami esi akoro lokojokon tanyama tani ngide lu kiinak esi Ekapolon Akuj na erai Akuj kus. Tani ekile lokapatanan noi anikus lo ejakaanit, engopikini akimuj, nyisieni tani lokaatokeng, kori aberu keng naminat, kori ngide keng lu idongete. Nabo akiring a ngide keng na enyami ngesi, nyeinakini ngesi tani ipei kech. Eliwor ibore keng daang ngini kotere ngichan lu ianyunete esi ani iriameta ngimoe ngirerea kus daang. Tani aberu keng nakapatanan na ejakaanit, na nyeloto wache nakanuan ani abaritor, esubi ngakiro na ikote napei nguna. Ani iriamete ngimoe ere keng, engopikini ngesi akimuj, kidaa ikoku tani ni aringa idounio tanyam ka angasep keng. Nyemorete ngesi ka ekile keng lominat, kori tani ipei a ngide keng. “Ani pekiwap esi dir ngakitatamet a Akuj daang na igiritae nakitab naga, nabo ani pekirimasi esi ekiro loajokon tarai lokitimi lo a Ekapolon Akuj ana erai Akuj kus, eyauni ngesi nikus ka ngalesea kus ngidekesinei lu nyengalekinete, ngidekesinei luaronok noi lu ekeikin wadaang, nabo nyedaunosi. Kiinuni ngesi esi nabo ngidekesinei lukolong aronok ianyunito esi alo Misiri, nabo nyijokearosi esi jik. Eyauni nabo ngesi ngidekesinei luche daang nikus, lu nyelimunitoe anakitab ana a etal Akuj kana. Kimunyarete kesi esi. Tani kilalakearosi esi loger a ngikanyer alu eyakasi nadis, ngidikidio anikus kesi epote toyara, kainyo iwounete kolong esi akiwap ngakiro a Ekapolon Akuj ana erai Akuj kus. Loger lokolong kiminakinea Ekapolon Akuj esi kitosubea naajokak, nabo kitalala, loger lopei ngolo, kinyasuni ngesi esi, kitomunya. Kilemario esi anakwap ana tokona edikino ilomarete. “Kiealakini Ekapolon Akuj esi lobukui luche, napei alosal a akwap tanang losal loche, sodi tosuba kaina etich a ngakujo ana esubunitae anakito ka ngamoru, ngakujo nakolong nyilipa esi kori taapaakus a ache. Emam ni iriamuneta esi ekisil, emam ngalup eliworosi ngakus. Kitiliwori Ekapolon Akuj esi lu ichanasi, lu ipasakina, nabo toliworos ialolongete. Eliwor eboyor kus lo kiilitor esi jiik. Iliworosi esi lu kibulit nakwaare ka apaaran, nabo iliworosi iemito jiik akitu. Ebuli ngitai kus kidongakis kotere ngakiro daang nacha ingolikinete esi. Ani iwalari ataparach, tasaka esi atamar towar atipei. Ani ewari, tasaki esi atamar kiwala atipei. Kibuari Ekapolon Akuj esi Misiri idokito ngatubwae, tani kolong kelimunit ngesi atamar nyibongete Misiri nabo. Ani inangete inaa isakete esi kitogiala ngimoe kus toliworos ngikedalak kech, nakaneni emam itwaan echamuni akigiel esi.” Eraakasi ngakiro nugu ngaka achamunet ana adungokini Ekapolon Akuj Musa atamar tachamakin ka Ngisirael anakwap a Moab. Iatakin achamunet ngina nachamunet nache kolong achamakin kesi alomoru a Sinai. Tochunak Musa Ngisirael tolimok tama, “Ingolikis kolong esi ngakiro nakolong asubea Ekapolon Akuj ekapolon a Misiri, ka ngikapolok keng luche ta akwap keng daang. Ipot esi kingolikis ngidekesinei luaronok ka ngakiro nakailiilok ka nakatalarak asubi Ekapolon Akuj. Nakaneni anang akolongit naga eringa Ekapolon Akuj nyiteyena esi eger ngakiro ana ianyut kadaang. Kirik esi Ekapolon Akuj ngikaru ngitomwon-omwon anariet, nabo nyedaidauna ngiworui kus ka ngamuk kus. Amam esi ngamugati inyamete, kori emuna lo epuritoe ka epurot lo imaase, nakaneni abu Ekapolon Akuj kiinak esi ibore ni iitanito daang sodi kitatamea esi atamar arai ngesi Akuj kus. Ani kiponi ngoni nege, abu ekapolon Sion lo a Echibon, ka ekapolon Ogu lo a Bachan, pot akitijwore ngoni. Nakaneni kipot ngoni edwanga kesi, atolemasi akwap kech, atotiakisi ngitela a Reuben ka Gad, ta epewae a ekitela a Manase. Kiwapa dir ngakiro daang a achamunet kana, tojokearotor ngakiro na isubete esi daang. “Akolongit naga, iwaasi esi daang alongaren Ekapolon Akuj na erai Akuj kus, aapei ka ngikarikok kus ka ngikapolok luche, ka ngikiliok kus, ka ngaberu kus, ka ngide kus, ta ngitunga a ngakwapea anache lu irukito ka esi, ikeyenete ngakito kus tookete ngakipi kus. Iyakasi esi nege akolongit naga taanyuneta achamunet na ichamakinosi esi ka Ekapolon Akuj na erai Akuj kus, tachamut akiwap ngitalio keng. Sodi kidodiunea Ekapolon Akuj tokona atamar iraakasi esi ngitunga keng, sodi toliwor ngesi Akuj kus, loger lo kolong kichikakinea ngesi esi ka taapaakus Aburaam, ka Isaka, ta Yakobo. Meere esi make kitaanyunit Ekapolon Akuj achamunet ngina ka ngitalio lu iwapio. Kitaanyunit ngesi ngoni daang lu kiya nege ngaren keng akolongit naga, aapei ka ngalesea yok na eringa nyeuriuna. “Itamunito esi eger a eboyor alo kolong a akwap a Misiri, ka eger lo itorioto esi kiding ngakwapea a ngibukui aluche. Ipot esi kingolikis ngakujo kech nakikadakinete, na esubunitae anakito ka ngamoru, ka ngakwangae, ta egolit. Tochoikisi atamar alotunga alu ewaasi kane akolongit naga, kerai ekile kori aberu, kori ngitunga a awi, kori ekitela, emam lu ibatarosi ani a Ekapolon Akuj ana erai Akuj yok, sodi kilipa ngakujo a ngibukui aluche. Ikote ngakiro nguna ateni a ekitoe na erupuni toliwor ekitoe lokadwaran lo kiari. Warasi itwaan ni eyei nege tani ipei, ni epupi ngakiro nugu akolongit naga, nyiingalai ebala kori emam niaronon eyei tani pekewap ngakiro nugu. Kimunyarete ngakiro nugu esi daang, luajokak ka luaronok aapei. Nyerimakini Ekapolon Akuj itwaan ni ikoni neni. Pearai erirauni anyunyura a Ekapolon Akuj anikeng, tanang eanyuni ngilam daang lu igiritae nakitab naga, sodi tomunya Ekapolon Akuj ngesi pil. Ipakuni Ekapolon Akuj itwaan ngini toliwor ekitetemes alotela a Ngisirael kadaang. Einuni ngesi ngakiro naaronok daang itemem ka ngilam daang lu eyakasi nachamunet na igiritae nakitab na etal a Ekapolon Akuj naga. “Monan ngirwa ngiche ingolikinete ngalesea kus ka ngitunga a ngakwapea anache eyakasi nikalonan, ngakiro naaronok ka ngichan lu ayau Ekapolon Akuj nakwap kus. Eliworosi ngamanat akwap nakoonon na eburuchiarit etulia ka edoot. Emam ibore itakinio, nyerupuni tani edoan kaneni. Ikokini akwap kus ngirerea a Sodom ka Gomora, Adima ka Seboim, lukolong enyasuni Ekapolon Akuj na angoea noi. Sodi ingitakinosi ngitunga daang anakwapea tamasi, ‘Ekoe nyo asubea Ekapolon Akuj akwap kech ngakiro na ikote nege? Nyo engoitor ngesi enyunyurar kona?’ Nakaneni etachunio tamarae, ‘Asubi Ekapolon Akuj kongina kotere ni angerioto ngitunga a Akuj achamunet na kolong achamakinosi kesi ka ngesi, Akuj a taapaakech, ngirwa lu epudunere kesi alo Misiri. Tosuba kesi etich a ngakujo a ngache ana kolong nyilipa kesi a ache, ngakujo nakolong etengerit Ekapolon Akuj kesi akilip. Abu Ekapolon Akuj tongoik ngitunga keng, yau nakwap kech ngilam daang lu igiritae nakitab naga. Abu Ekapolon Akuj tongo noi tonyunyur. Ani na angoitor ngesi kongina, kitwarak kesi anakwap kech, yaa nakwap nagela, na tokona eyakasi kesi.’ “Eyakasi ngakiro ngache na imunonit Ekapolon Akuj na erai Akuj yok. Nakaneni esileereu ngesi etal keng, lo kiwapi ngoni ka ngalesea yok jik. “Abala tokona ayong esi taanyutu ibore iseunete, kerai apiaro kori ngilam. Ani esubakinosi ngakiro nugu daang anikus, sodi toloma esi kiding ngibukui lu kiealakini ngesi esi, itamunete esi ngakiro na abala ayong toseutu nugu. Ani kireeunosi esi ka ngalesea kus nia Ekapolon Akuj, sodi kirichakis a ngitai kus kadaang ngitalio keng lu kadungok ayong esi akolongit naga, isieniyete esi Ekapolon Akuj na erai Akuj kus. Kibuuni ngesi esi alobukui alu kiealakinit esi, sodi kitojok ngakiro kus nabo. Tani kiealara esi tanang losal a ngakwapea, kichunakini Ekapolon Akuj na erai Akuj kus esi kitobuu, sodi tolemareta esi nabo akwap nakolong alomito taapaakus. Kitabari ngesi esi, nabo kitalalae kidwanga tani eger lokolong alalaketa taapaakus. Itiliwori Ekapolon Akuj na erai Akuj kus ngitai kus ka lua ngalesea kus lu iwapito ngakiro, sodi tominakineta esi ngesi a ngitai kus kadaang, torubakineta ilomito nakwap ngina jiik. Ereari ngesi ngilam daang nia ngimoe kus, alu kolong kiremokino esi kitoboliatar. Nabo iwapete esi ngakiro keng kirichakis ngitalio keng daang lukadungok ayong esi akolongit naga. Itojoki Ekapolon Akuj ngakiro na isubete esi daang. Epete esi ngide lukaalak, ka ngaatuk nakaalak, nabo ilemete ngikinyam lukaalak anamanat kus. Elakar Ekapolon Akuj anikus kitojok ngakiro kus daang loger lokolong etojokea ngakiro daang a taapaakus. Nakaneni echamitae esi iwapete ngakiro keng sodi kirichakis ngitalio keng daang lu igiritae nakitab na etal keng naga. Ireeunosi esi nikeng a ngitai kus kadaang. “Nyegogong etal lokadungok ayong esi akolongit naga, kori nyelona anikus. Nyelona nyeyei kidiama. Nyiingitas ibalasi, ‘Ngae elosi kidiama yau etal nikosi, sodi eirasi sua ewapa?’ Kori nyeyei ngesi ekwakaye anam. Nyiingitasi ibalasi ‘Ngae edokari ekwakaye anam yau etal nikosi sodi eirasi sua ewapa?’ Meere kongina, eyei etal nipei nege irukito ka esi. Iyenete esi, ipedorete tani alimun. Kirichakisi robo tokona. “Akolongit naga, abala ayong esi toseutu kerai naajokak kori naaronok, kerai akiyar kori akitu. Ani kiwapa esi ngitalio a Ekapolon ana erai Akuj kus, lukadungok ayong esi akolongit naga, ani kiminakis esi ngesi, kiwapa ngakiro keng ka akirichakin ngitalio keng daang, iboikinosi esi niajokon nabo toliworos ebukut lo elalak ngitunga. Kipiari esi Ekapolon Akuj na erai Akuj kus anakwap ana edikino esi ilomarete. Nakaneni ani pekiwap esi nabo towout akiirar, sodi kibataros akilip ngakujo ngache, kimunyario esi. Kechikichiki tokona ayong esi kane. Nyilomete esi nikooyen nakwap na a ekwakaye Yorudan na edikino esi ilomarete. Abala tokona ayong esi toseutu kerai akiyar kori akitu, kerai apiaro a Akuj kori ngilam a Akuj. Anyarit ayong adis ka akwap toliworos ngikaanyunak a ngakiro ana iseunete esi. Toseutu akiyar. Tominakisi Ekapolon Akuj na erai Akuj kus, kiwapa ngesi, toliworos lu imunosi ngesi, sodi kiboikinotor esi ka ngalesea kus nikooyen nakwap nakolong echikakini ngesi taapaakus Aburaam, ka Isaka, ta Yakobo.” Torubak Musa isuruori Ngisirael ebala, “Anang tokona ngikaru kang amiat apei ka ngitomwon-arei. Nyapedori nabo ayong aliwor ekarikon kus. Ani ikoni neni dang, kalimoki Ekapolon Akuj ayong atamar nyadokari ekwakaye angolol a Yorudan. Kingarenikini esi Ekapolon Akuj na erai Akuj kus, tomunya ngibukui lu elomito inaa, sodi tolemareta esi akwap kech. Yochua ngesi eliwor ekarikon kus lo alimunio Ekapolon Akuj. Emunyari Ekapolon Akuj ngitunga ngulu loger lokolong edwangea Sion ka Ogu lu araakasi ngikapolok a Ngiamor, nabo kinyasu akwap kech. Kisidwangi Ekapolon Akuj esi kesi, nakaneni tosubeta esi kesi ngakiro nakalimok ayong esi. Togogongioto nabo totitinyeketo. Warasi nyieam kesi. Irukete esi ka Ekapolon Akuj alope na erai Akuj kus. Nyikingeri ngesi esi ori nyikiisikini.” Sodi tanyarau Musa Yochua tolimok alongaren Ngisirael daang tama, “Togogonger nabo totitinyer. Iyong ngesi iriki ngitunga lugu tolomareta nakwap nakolong echikakini Ekapolon Akuj taapaakech. Ekapolon Akuj alope ngesi kiriki iyong nabo irukete ka iyong. Nyikingeri ngesi iyong kori nyikiisikini. Wara robo nyiimaranik kori nyiem.” Abu Musa kigir etal a Akuj nak ngimurok a Akuj lu aweikinito asaduku a Achamunet, ka ngikarikok a ngitunga. Todungok kesi tama, “Adaunet a ngikaru a ngikan-kaarei kadaang, na enangea ekaru lo ikisere ngamichae, kisomata etal logo iremasi alosukukuu a ngikalea. Kisomata kiirasi Ngisirael na eponeta akilip Ekapolon Akuj na erai Akuj kus ani echamakinitae ilipeenere. Tochunakisi ngikiliok daang ka ngaberu ka ngide, ta ngitunga a ngakwapea anache lu irukito ka esi alorerea kus, sodi kiirarea itwaan daang, toyenea arima Ekapolon Akuj na erai Akuj kus, nabo kiwapea ngitalio keng dir. Kotere eger ngolo, epedorete tani ngalesea kus na kolong sek nyiirara etal a Ekapolon Akuj ana erai Akuj kus akiirar. Nakaneni itatamasi kesi akiwap ngakiro keng ngirwa daang lu elomitotor kesi nakwap na edikino esi ilomarete a ekwakaye angolol a Yorudan.” Sodi tolimok Ekapolon Akuj Musa tama, “Aapuut ngirwa kon lu itoanea. Tanyarau Yochua tolom loeam, sodi atolimokinea ngakiro keng.” Tolomasi Musa ka Yochua loeam, sodi bu Ekapolon Akuj nikech kaneni eyei napir a edou alo awei anakituk a eam. Tolimok Ekapolon Akuj Musa tama, “Itoani iyong atipei, ani kitoana iyong kerumor, kangerete ngitunga ayong kichwangakis achamunet na kichamakin ayong ka kesi. Kaisikinete kesi ayong sodi kilipa ngakujo nagelayek na a akwap ana elomarete kesi. Ani kesubakin nguna, angoikini ayong kesi niaronon. Aisikini ayong kesi kinyasunos. Epote ngakiro naaronok nakaalak nikech, sodi toyena kesi atamar esubasi ngakiro nguna anikech kainyo nyeringa ayong Akuj kech kirukit ka kesi. Awouni ayong akingarakin kesi, kainyo asecha kesi elipa ngakujo nache. “Kigir tokona eeos logo kitatam Ngisirael toliwor ngesi eyenere ngakiro kech. Ayaari ayong kesi nakwap na ileleba ngakile ka akimiet a ao ngina, loger lokolong echikakinitor ayong taapaakech. Eriamunete kesi akimuj daang na esakete kaina, nabo iboikinosi niajokon. Nakaneni ibatarosi kesi kilipa ngakujo ngache. Kangerete kesi ayong kichwangakis achamunet kang. Epote ngakiro naaronok nakaalak nikech. Nakaneni erubakinio eeokinitoe eeos logo toliwor ngesi eyenere ngakiro kech. Tani tokona eringa ayong nyitananga kesi nakwap nakolong echikakini ayong ainakin kesi, ayeni ayong ngakiro na itamete kesi.” Akolongit napei ngina, abu Musa kigir eeos ngolo kitatam Ngisirael. Sodi abu Ekapolon Akuj tolimok Yochua lokookeng a Nun tama, “Totitinyer nabo togogonger. Iriki iyong Ngisirael tolomasi nakwap nakolong echikakini ayong kesi, nakaneni kiruki ayong ka iyong.” Kigir Musa etal a Akuj nakitab, kirichak noi nyeisik akiroit tani apei nyigira. Ani erumor, tolimok ngimurok a Akuj lu aweikinito asaduku a Achamunet tama, “Tolemasi akitab na etal a Akuj naga, kisibaka ka asaduku a achamunet a Ekapolon Akuj ana erai Akuj kus, sodi kidong neni erai ngesi eyenere ngakiro a ngitunga keng. Ayeni ayong atamar ichanaka kesi eroko. Angerito kesi Ekapolon Akuj ngirwa daang lu ayarea ayong, nabo engerete kesi Ekapolon Akuj noi katoana ayong kerumor. Tochunakisi ngikarikok a ngitela kus daang ka ngikapolok luche pot nikang, sodi atolimok ngakiro nugu. Adis ka akwap kesi eraakasi ngikaanyunak kang kotere ngakiro kech. Ayeni ayong atamar na atoanea ayong, erokearosi ngitunga tongero ngakiro na etatam ayong kesi. Ani ekisidi eanyunete kesi ngakiro naaronok kainyo itongoyete kesi Ekapolon Akuj, ani esubeta ngakiro na etengeritoe.” Sodi toeok Musa ngakiro a eeos daang topupokinito Ngisirael. “Akwap ka adis, kiirasi ngakiro kang. Topupokisi lokojokon ngakiro na alimuni ayong. Echakun akitatamet kang loger a akiru, sodi min nakwap loger a ngakop. Echakun ngakiro kang loger a elimlim alo itipitipi lokito luuchik, loger a elimilim alo itipitipi lonyia luchokil. Epuruuni ayong ekiro a Ekapolon Akuj, elimorete ngitunga keng eger lo epoloo ngesi. “Ekapolon Akuj ataaba kon. Eraakasi ngirotin keng daang lu itemokino eriyan. Erai Akuj kus na iteni na emunoi. Esubi ngesi ngakiro na iyookino, kitemokino. Nakaneni iraakasi esi lu nyikimunoi, lu nyitemokino iraakasi ngitunga keng, ekitela lokasechan tomodeana. Ngakiro ejoikinit esi isubeta Ekapolon Akuj nugu a? Esi lubaang emam ngitamen a? Erai ngesi apakus, lo kisubuni esi. Kitiliwori kolong ngesi esi ebukut keng. “Kitamasi ngakiro nakolong ngorok, kolong kanuan. Kingita taapaakus ngakiro nakolong asubasi. Kingita ngikasukou ngakiro nangorok. Atiakakini kolong Akuj na Epol Noi ngibukui ngakwapea kech. Toseu ngesi ni elomete ngitunga. Totiakak ekitela daang akuj keng. Nakaneni toseu ngesi ngalesea a Yakobo toliworos ngikeng. “Toriam kesi ewowooto anariet, alapat ariet ngina apiat ekuwam. Abu ngesi kiyok kesi nabo kirichak, loger lo iyokor ngesi bon. Loger a egole alo itatami ngitak keng aporor, kikamuunu kesi a ngabeben keng ana epetara. Eratak Ekapolon Akuj Ngisirael nyeedakarosi. Ekapolon Akuj bon arikit ngitunga keng, amam akuj ache nagela engarakinit. “Kitopolok ngesi kesi ngimuriae, sodi tanyama kesi akimuj na etatae namanat. Taanyut kesi akimiet a ao anatabab, ngikito kech a akimiet, tokoniut alokitela. Kiwokis ngaatuk kech ta ngaanei kech. Ajokak ngamesekin kech ka ngaanei, ta ngaatuk. Ajokak tani ngakanoi kech, ka emuna. “Tabara ngitunga a Ekapolon Akuj, nakaneni apot toroketa. Totuma kesi kimuja tanyakut. Toisikis kesi Akuj na erai akasubunan kech, tongero ekayuunan kech lokaagongon. Toting Ekapolon Akuj etereku ani elipitotor kesi ngakujo nasubuna. Tongo Ekapolon Akuj kotere ngakiro naaronok asubete kesi. Kipeyonokis kesi ngipean, lu araakasi ngakujo napasiek, ngakujo nakiteat nakolong peayenete taapaakech, ngakujo nakolong peewapito Ngisirael. Kimuriak kesi Akuj kech, ataaba kech, lokolong ainakini kesi akiyar. “Ani ingolikini Ekapolon Akuj ngakiro nguna, tongo, tonger talokookeng ka tanakookeng. Tolim Akuj tama, ‘Nyengarakini ayong kesi nabo.’ Sodi ataanyu ngakiro na asubakinosi ani a ngitunga alukechanak, nyemunoi kangulu. Ketongoa kesi ayong a ngakujo kech anasubuna, ngakujo na nyeraakasi ngaka iteni. Alemuni tokona ayong ngibukui lu itongoyete kesi. Etitingi ayong kesi etereku kotere ngibukui lubaang. Erirauni angoit kang loger a akim, tonomia ibore daang anakwapea. Enangi tani kwap lokatoak, tonomia ngarupunet a ngimoru. “ ‘Etoropuuni ayong ngakiro naaronok nikech, atogumugumia kesi a ngimalea kang kadaang. Etoakete kesi kotere akoro ka elekes. Etoakete kesi kotere ngidekesinei luaronok, Ameuni ayong ngitieng a moding tanyama kesi, ka ngimunio luadwarak tokonya kesi. Etoakete lukaalak alorotin kotere ejie, epete naaronok nawiyei. Etoakete ngisorok lusapa ka lupesur, nyidongete tani ngide luuchik, kori ngitunga lumojong. Kamunyarit ayong kesi jik, sodi nyiitamunere kesi nabo jik. Nakaneni nyaachamak ngimoe kech iwogasi ebalasi kidwang ngitunga kang, tarai bo ayong kolong amunyari kesi.’ “Eraakasi Ngisirael ebukut lokabangaanan. Emam kesi aosou jik. Awout kesi akiyen ngakiro kolong edwangere, nyepedorete akiyen ngakiro na esubasi. Nyo edwangea itwaan ipei ngitunga abunget apei? Ani nyo edwangeta ngitunga ngiarei ngitunga ngabunge ngatomon? Ekapolon Akuj na erai Akuj ngesi aisikini kesi. Ataaba kech ngesi angeri kesi. Eyenete ngimoe kech atamar epalag ngakujo kech, nyegogong nyikote Akuj a Isirael. Ngimoe kech luaronok lu ikote Sodom ka Gomora, ikwaan ka ngimusabib lu ekoniunete ngamusabib naadwarak kiarete, loger a emuna alo esubunitae anakisierit a ngimunio. “Itamunit Ekapolon Akuj ngakiro na asubete ngimoe a Ngisirael. Idarit ngesi ngirwa lu itemokino kirira kesi. Etachakini Ekapolon Akuj kirira kesi, enangi ngirwa lu edakarotor kesi. Aapuu akolongit na iriraare kesi. Eyuuni Ekapolon Akuj ngitunga keng, na ingolikinea atamar adaunosi ngikilinga kech. Isieniyete ngesi ngulu esubete etich keng, na ingolikinea atamar emam eger ingarakinotor. Nakaneni ingisi Ekapolon Akuj ngitunga keng tama, ‘Nyaanu ngakujo kech, nangoon araakasi ataaba igienosi esi? Itanyamete esi kesi atumes a ngakipeyos kus, nabo nakis kesi emuna tamata. Kimiekisi kesi pot kingarakis esi tokona. Kimiekisi kesi tomotunos kitoyuut esi. “‘Ayong nabo ayong bon arai Akuj. Emam akuj ache erai na iteni. Aari ayong, nabo eteyari, ewaakini ajeme, nabo etangalekini, emam itwaan itepegi ngakiro na asubi ayong. Ani kona araakar ayong dir Akuj na ayari, ekeari ayong akan kang ekongok atamar epenari ekileng kang lokariran, sodi engolik atamar esubio ngakiro na itemokino. Atachakini ayong ngakiro a ngimoe kang, sodi erira ngulu karemokino ayong. Eliworosi ngaakot kech idokasi alomalea kang, nabo eari ekileng kang daang lu karemokino ayong. Nyaisikini itwaan ni ketiji ayong tani ipei, tani lu ewanan ka lu nyeenitae, etoakete daang.’ “Ngibukui, kipuro ngitunga a Ekapolon Akuj. Irirae ngesi ngulu earete ngitunga keng. Etachanakini ngesi ngakiro a ngimoe keng, sodi torimak ngasechesea a ngitunga keng.” Apot Musa ka Yochua lokookeng a Nun toeokis eeos ngolo sodi kiirareta Ngisirael. Ani erumori Musa akisuruor Ngisirael ngakiro a Akuj, tolim tama, “Kiwapa dir ngitalio daang lukadungok ayong esi akolongit naga. Tobongonokisi itatamete ngide kus sodi tomunokis dir akirichakin ngakiro a Akuj daang. Nyeraakasi ngakiro nugu ngapasiek, pearai ngaka akiyar kus. Kiwapa kesi talalakearotor ngikaru kus anakwap ana iloose esi akilom, a ekwakaye angolol a Yorudan.” Akolongit napei ngina, tolimok Ekapolon Akuj Musa tama, “Tolot lomoru a Abarim lu eyakasi nakwap a Moab, ni ekienyikina ka ere a Yeriko. Todoka moru a Nebo tokienyik akwap a Kanaan na asaki ayong ainakin Ngisirael. Itoanikini iyong kidiama moru ngolo loger lokolong atoanikinea lokaatokon Aron kidiama emoru a Ori, kainyo nyemunokina kolong esi luarei daang ayong alongaren Ngisirael. Nakolong iyakatar esi nakipi a Meriba diyete ere a Kadech anariet a Sin, ipot nyiiraut lu kirimasi ayong alongaren ngitunga. Ingolikini iyong akwap anikalonan, nakaneni nyilomari iyong nakwap na ainakini ayong Ngisirael.” Erai naga apiaro na apiarea Musa lo arai itwaan a Akuj Ngisirael eringa nyetoana. Abuni Ekapolon Akuj alomoru a Sinai. Kipiripiru loger a akolong alokidiama Edom, sodi tacha alotunga keng alokidiama emoru a Paran. Arukito ngesi ka ngimalaikae ngabunge ngatomon, toyei akim na arirae anakan keng ana aloteten. Emina Ekapolon Akuj ngitunga keng, nabo itee ngesi lu eraakasi ngikeng. Nakaneni kiriediki ngoni anakejen keng, sodi ewapa ngitalio keng. Kiwapi ngoni etal lokolong kidungokini Musa, ibore niajokon noi a ebukut yok. Abu Ekapolon Akuj topolok Ngisirael, na achunakinotor ngitela kech, ka ngikarikok kech wapei. Tolim Musa ngakiro nugu kotere ekitela a Reuben. “Nyetoakete ngitunga a ekitela a Reuben, tani kekidioko ngitunga kech.” Tolim ngakiro nugu kotere ekitela a Yuda tama, “Ekapolon Akuj kiira akigoro kech, na esaketa akingarakino. Kimorik kesi nabo ka ngitela luche. Tojii kotere kesi, Ekapolon Akuj, sodi kingarak kesi, Ekapolon Akuj, sodi kingarak kesi na itijioto ngimoe kech.” Tolim ngakiro nugu kotere ekitela a Lawi tama, “Iyong Ekapolon Akuj, kidodiu echami kon, kotere Urim ka Sumim,*g** ani a ngikasubak etich kon alu emunoi, alu eraakasi Ngilawi, Iroi kolong iyong kesi alo Masa. Kidodiu kolong iyong atamar, eraakasi kesi lu eteniyete anakipi a Meriba. Apot kesi topupo ngakiro kon dir, akidwang ngikauriak, ka ngikaitotoi, ta ngide. Apot kesi kiwapa ngitalio kon. Nabo tomunokis achamunet kon. Itatamete kesi ngitunga kon akiwap etal kon. Ipeyoote kesi ngakipeyos alokeno kon. Ekapolon Akuj, kingarak ekitela kech togogonger. Talakar kotere ngakiro na esubete kesi. Tomunya ngimoe kech daang. Wara kesi nyeenyout nabo.” Tolim ngakiro nugu kotere ekitela a Benjamen. “Ekitela logo ngesi emina Ekapolon Akuj, nabo itee kesi akolongit daang etia ni etia. Nakaneni ibooyi alokiding kech.” Tolim ngakiro nugu kotere ekitela a Yosep. “Topia Ekapolon Akuj akwap kech nak akiru, ka ngakipi na alokwap ngalup. Topiarae akwap kech min ageor, na itokonit akolong. Talalaar ageor a ngikaru kadaang. Eburuchiari ageor naajokon ngimukur kech lungorok. Kilelebun ibore niajokon daang nakwap kech. Epiarit ajokis a Ekapolon Akuj, ana kolong eruorikini anamoni ana anoki. Min apiaro naga lotela a Yosep, kainyo ngesi kolong arai ekarikon a talokaatokeng. Eyakasi Yosep ngikilinga lu ikote lu a emong. Ikote ngaamwar keng a ekosowan. Eraakasi ngaamwar keng ani a Manase ngabunge nakaalak, taraakas ani a Epiraim ngabunge ngatomon. Igumi ngesi ngibukui a ngaamwar, kijuka tanang losal a ngakwapea.” Tolim ngakiro nugu kotere ngitela a Sebulun ka Isakar. “Kimiekisi Sebulun tabarak lotich keng, lo esubi ananam. Nabo kiatakin ebari a Isakar anawi. Ipeyounete kesi ngitunga a ngakwapea anache moru kech, sodi kipeyoto ngakipeyos na iyookino kaina. Eanyunito kesi ebarit kech ananam, nabo eanyunito anasinyen ka ekwaas a anam.” Tolim ngakiro nugu kotere ekitela a Gad. “Kipuruutu Akuj nakolong etololomi akwap kech. Esadit Gad loger a engatuny, tangarakakia akan ka amuny a akou. Alemasi kolong kesi ibore niajokon a akwap daang toliwor ikech. Ainakin kesi ibore ni erai ika ekarikon. Ewapete kolong kesi ngakiro na adungunit Ekapolon Akuj, ka ngitalio keng nakolong achunakinitor ngikarikok a Ngisirael daang wapei.” Tolim ngakiro nugu kotere ekitela a Dan tama, “Erai Dan engatuny losorokit. Epori ngesi alo Bachan.” Tolim ngakiro nugu kotere ekitela a Naputal. “Eanyunit Naputal eboyor loajokon, nabo epiarit Ekapolon Akuj ngesi lokojokon. Enangit akwap kech kuju napei ananam a Galilaya.” Tolim ngakiro nugu kotere ekitela a Acher tama, “Epiaritae Acher akidwang ngitela luche. Toliwor ngesi lo eminae noi alokaitotoi keng. Talalaketa ngikito a akimiet anakwap keng. Togoloi ngirerea keng a ngidorin alu a ngasua. Toliwor ngesi ibooyi jiik emam ibore eemit.” Ngisirael, emam akuj ikwaan ka Akuj kus, na elosi anadis esegaana, kitor lodowon ebunit akingarakin iyong. Akuj ngesi imecheene iyong jiik. Ngakan keng nakajik kigangito iyong. Etwarakini ngesi ngimoe kon ilosi iyong ngaren, sodi kitolimok iyong atamar tomunya kesi. Kotere nguna ibooyete ngalesea a Yakobo nikaalimon, emam ibore eemito anakwap ana ileleba ngikinyam ka emuna, akwap na itapapalito ngakop a adis. Ngisirael, ilakara esi noi! Emam ebukut eche lo ikwaan ka iyong. Ebukut lo ayuuni Ekapolon Akuj. Ekapolon Akuj alope erai aupwal kus ka ekileng kus, Kitoik esi sodi kidwanga ngimoe kus. Epote ngimoe kus kimaimaa esi esakete kitorimakin, nakaneni ipudaarete esi kesi. Torotok Musa anaroatin a Moab tanang moru a Nebo, todoka naita a emoru a Pisiga, alo eyei kide Yeriko. Kidodik Ekapolon Akuj ngesi akwap daang kaina. Kidodik akwap a Gilead tanang lore a Dan alowae alo alokwap. Kidodik akwap a Naputal daang, ka ngakwapea a Epiraim, ka Manase, ka akwap a Yuda tanang nanam a Mediterenian alo too, ka Negeb, ka aro na isiakinit alo Soar tanang Yeriko lo erai ere a ngingolea. Sodi tolimok Ekapolon Akuj Musa tama, “Akwap naga ngesi kolong echikakini ayong Aburaam, ka Isaka, ta Yakobo atamar ainakini ngalesea kech. Kesingolikini ayong iyong akwap ngina nakaneni nyilosi iyong inaa.” Sodi abu Musa lo arai ekasuban a Ekapolon Akuj totoan a anakwap a Moab, loger lokolong alimunitor Ekapolon Akuj. Tonukak Ekapolon Akuj ngesi nadipo a Moab, ana ekienyikina ka ere a Besipeor, nakaneni tani akolongit naga, emam itwaan eyeni dir ni eyei aliel a Musa. Araakasi ngikaru a Musa amiat apei ka ngitomwon-arei na atoanea. Aringa ngesi eyakasi ngikilinga, nabo akienyete ngakonyen keng ajokak. Apot Ngisirael kigoro Musa tosutonokis a ngirwa a ngitomwon-uni anaroatin a Moab. Aos Yochua lokookeng a Nun, kainyo aseuni Musa ngesi kilunyokin nados keng. Apot Ngisirael kiwapa ngakiro a Yochua sodi kirichakis ngitalio lukolong adungokini Ekapolon Akuj kisitoru nia Musa. Nyemino ekadwaran a Akuj eche lo ikoni Musa nakwap a Ngisirael nakanuan. Esuruori Ekapolon Akuj ngesi ikobanakinosi ngakiro. Emam ekadwaran eche lo asub ngakitoodikinet nakailiilok ka nakatalarak na ikote nakolong ameari Ekapolon Akuj Musa akisub alongaren Parao alo arai ekapolon a Misiri, ka ngikaweikinak keng, ta ngitunga a akwap kangina daang. Emam ekadwaran eche lo asub ngakiro naapolok ka naketubulok na ikote nakolong asubi Musa alongaren Ngisirael daang. Ani ketoana ekasuban etich a Ekapolon Akuj lo anyaritae Musa kerumor, abu Ekapolon Akuj kisuruor Yochua lokookeng a Nun, lo arai ekengarakinan a Musa. Tolim tama, “Atoana ekasuban etich kang Musa. Tonyoutu tokona iyong ka Ngisirael, todokasi angolol a Yorudan tolomasi nakwap na ainakinit ayong kesi. Loger lokolong alimokinea ayong Musa, kainak iyong ka ngitunga kang daang akwap daang nacha ichiakete ngakejen kus. Isiakini akwap kus alokuju anariet, tanang lomoru a Lebanon alokwap. Ani alo kide, isiakini anangolol anaapolon a Eupurate kitor nakwap a Ngiiti, tanang nanm a Mediterenian alo too. Yochua, emam itwaan kidwangi iyong eringa iyari. Kiruki ayong ka iyong lokolong kirukitor ka Musa. Kiruki ayong ka iyong jiik. Nyakaisikini ayong. Togogonger nabo totitinyer, kainyo itolomi iyong ngitunga lugu nakwap nakolong echikakini ayong taapaakech. Toliwor lo irichakina totitinyer, nabo kirichak etal daang lokolong kiinakini iyong ekasuban etich kang Musa. Wara nyiipasak tani wadiochichi, nakaneni emam ibore kipiyori iyong awadaang ani ilosi. Kirichak akiruoro jiik ngakiro a akitab ana etal anakilip. Toliwor itami akwaar ka apaaran, nabo kiwap ngakiro daang na igiritae nakitab ngina. Nakaneni iliwor iyong lo kipiaritae lokojokon. Nabo kalimok ayong iyong atamar toliwor lo irichakina nabo totitinyer! Wara nyiiem kori nyiimaranik kainyo ayong Ekapolon Akuj na arai Akuj kon, kirukit ka iyong ani ilosi kadaang.” Nakaneni abu Yochua todungok ngikarikok atamar, toloto nadakar tolimokis ngitunga tamasi, “Tosubakisi akimuj adio natingat kainyo adaunet a ngirwa a nguuni, iloose esi todokasi angolol a Yorudan toloma nakwap nakiinakinit esi Ekapolon Akuj na erai Akuj kus.” Tolimok Yochua ekitela a Reuben ta epewae a ekitela a Manase tama, “Kitamutu eger lokolong kilimokinea esi Musa lo erai ekasuban etich a Ekapolon Akuj, atamar kiinakini esi Ekapolon Akuj na erai Akuj kus akwap na eyei kide Yorudan toliwor awi kus. Ngaberu kus, ka ngide kus ta ngaatuk kus elomete nege, nakaneni ngasigerea kus na ejie, edokarete ekwakaye kingarenikis ngirukitos kus luche a Ngisirael sodi kingarakineta kesi, tanang ni elometa nakwap na eyei too Yorudan na ainaki kesi Ekapolon Akuj na erai Akuj kus. Ani isiangari Akuj ngitela daang a Ngisirael, tobongut esi toloma nakwap kus na eyei kide Yorudan nakolong kiinakini esi Musa, ekasuban etich a Ekapolon Akuj.” Tatachakis kesi Yochua tamasi, “Kisubi sua ngakiro daang nakilimok iyong nabo kilosi wadaang nikimeari iyong sua. Kiwapi sua ngakiro kon loger lokolong kiwapitor ngakiro a Musa. Kimiek Ekapolon Akuj na erai Akuj kon kiruko ka iyong loger lokolong arukitotor ka Musa! Itwaan daang ni engeri ngakiro kon kori ni nyiwapi etal kon, eario. Kirichakin nabo totitinyer!” Sodi abu Yochua tomea ngirototin ngiarei anadakar ana ayei ni enyaritae Aawoi, todungok atamar toloto torebo akwap a Kanaan, tarai cha noi ere a Yeriko asakitae torebo. Ani enanguneta lore, toloto topero kai ana amalaat anyaritae Raab. Kiira ekapolon a Yeriko atamar akolongit ngina nakwaare, aponito Ngisirael ngiche neni akireb akwap. Abu ekapolon ngolo tomea itwaan nia Raab tama, “Eponito ngitunga lu eya kai kon akireb akwap daang! Kipud kesi nikalapatan!” Nakaneni ewait aberu ngina ngitunga luarei ngulu. Abu ngesi tatachu tama, “Iteni, aponito ngitunga ngiche nawi kang, nakaneni nyayeni ayong ni aponeta. Ani eribokini enangi ni egolere ekidor a ere, apot ngitunga ngulu topudosi nikalapatan, nyayeni ayong ni apot kesi toloto. Kiwapakisi kesi atipei kainyo ipedorete esi akidol.” Nakaneni keyaarit aberu ngina ngitunga ngulu kidiama akai keng tarap kesi a ngakasirim. Apetakinit sek ngesi ngakasirim nguna kidiama akai. Apot ngitunga a ekapolon torotokis, sodi togoloi ekidor. Torotokis kesi esakete ngirototin a Ngisirael tanang ni etubokinor erot angolol a Yorudan. Ani eringa ngirototin nyepero, abu Raab tolot kidiama akai tolimok kesi tama, “Ayeni atamar kiinak esi Ekapolon Akuj akwap naga. Ebulit itwaan daang a akwap kana kotere esi. Kiira sua eger lo etoonio Ekapolon Akuj anam a Chamu alongaren kus na irotokinioto esi alo Misiri. Kiira nabo eger lokolong iareta esi ngikapolok luarei a Ngiamor lu enyaritae Sion ka Ogu, lu alomito kide angolol a Yorudan. Kipotu sua atoema atamaranikisi napei kiirarea ngakiro nguna! Kiem sua esi. Erai Ekapolon Akuj na erai Akuj kus, Akuj na eyei kidiama nadis, toyei nakwap nege. Kikongo tokona a ekiro keng atamar isubeta esi ngitunga a awi kang niajokon loger lokasubea ayong esi niajokon, nabo kidodikinae ibore ni ketunupi ayong ngakiro kus. Kichikakinae ayong atamar iyuunete esi apakang ka itiokang ka talokaatokang ka tanakaatokang, ta ngitunga a ngawiyei kech daang! Warasi sua nyikiar!” Tolimokis ngitunga ngulu ngesi tamasi, “Kitaar Akuj sua pekisub sua ngakiro nakilimu! Ani pekilimok iyong itwaan ngakiro nakisubi sua, kichikak sua iyong atamar ani kiinakini sua Ekapolon Akuj akwap naga, kisubea sua iyong niajokon.” Alomit Raab kai na adukokinitae nawas a ere. Sodi kiyooliu ngesi ngitunga ngulu kwap a auno kisitor lopuke. Tolimok kesi tama, “Kapesi lomukur nyikianyuneta ngitunga a ekapolon. Toduka kaina a ngirwa a nguuni tanang ni ebongunioto kesi, ani erumor toloto.” Tolimokis ngitunga ngulu ngesi tamasi, “Kirichakini sua akichikakinet nakitilimu iyong sua. Ngakiro na echamit iyong isubi kesi nugu. Ani kiremi sua akwap kus, toinik auno naarengan naga lopuke lota kisitoruni iyong sua. Tochunak apakon ka itiokon ka talokaatokon ta ngitunga a awi a apakon daang tooma kai kon. Ani kepudo itwaan nikalapatan a akai, ngesi ilope epaikinio akitu keng, meere sua kipaikinio, nakaneni ani kewan itwaan alotooma akai, sua kipaikinio nguna. Nakaneni ani kilimo iyong ngakiro na kisubi sua, nyikirichakini sua akichikakinet na kichikak sua iyong.” Tacham ngesi ngakiro nguna sodi talakak kesi toloto. Ani erotokinete kesi, toinik ngesi auno naarengan lopuke. Toloto ngirototin lomukur toduka. Tasaka ngitunga a ekapolon kesi wadaang a ngirwa a nguuni, nakaneni nyeanyuna kesi. Apot ngitunga a ekapolon tobongosi Yeriko. Sodi totiyaun ngirototin luarei ngulu alomukur, todokasi ekwakaye angolol, tobongosi nia Yochua. Tolimokis ngesi ngakiro na asubasi daang, ani erumor tamasi, “Kiyen sua dir atamar kiinak ngoni Ekapolon Akuj akwap daang. Ebulit ngitunga daang kaina kotere ngoni!” Ataparach nache, apot Yochua ka Ngisirael daang tonyout nataparach elilim taramakis ani enyaritae Aawoi, toloto Yorudan toloma neni eringa idarito akidok ekwakaye. Adaunet a ngirwa a nguuni, apot ngikarikok kitoro kiding adakar tolimokis ngitunga tamasi, “Ani ingolikinete ngimurok a Akuj iwokito asaduku a Achamunet a Ekapolon Akuj ana erai Akuj kus, tonyoutu anadakar kiwapakis kesi. Nyenanguna esi nege a ache, kanguna kirikete kesi esi. Nakaneni nyiapiasi diyete asaduku a Achamunet, tachadakinos akilomitait apei iwapito ngesi.” Tolimok Yochua ngitunga tama, “Kitaleunos kitosegas, kainyo esubakini moi Ekapolon Akuj ngakitoodikinet nakailiilok anikus.” Sodi tolimok ngimurok a Akuj atamar tolemasi asaduku a Achamunet tolooso ngaren ngitunga. Tosuba kesi loger lo alimuni Yochua. Tolimok Ekapolon Akuj Yochua tama, “Kotere ngakiro na asubakini ayong akolongit naga, kirimasi iyong Ngisirael daang toyena atamar irai iyong itwaan ni kiyenikinitae. Eyenunete tani atamar kirukit ayong ka iyong loger lokolong kirukitor ka Musa. Tolimok ngimurok a Akuj lu edakito asaduku a Achamunet atamar na enangeta lokwaas a ngakipi a Yorudan, towaa kaneni.” Tolimok nabo Yochua Ngisirael tama, “Potu nege kiirasi ngakiro na elimuni Ekapolon Akuj na erai Akuj kus. Ani kirotokis esi ngaren, iritari ngesi dir Ngikanaan, ka Ngiiti, ka Ngiipi, ka Ngiperes, ka Ngigirigach, ka Ngiamor ta Ngiebus. Iyenunete atamar eyei Akuj na eyari nikus na idokarere asaduku a Achamunet Ekapolon Akuj a akwap kadaang ekwakaye Yorudan toeka ngaren kus. Toseutu tokona ngitunga ngitomon ka ngiarei alotela alutomon ka ngiarei a Ngisirael, itwaan ipei alokitela a epei. Ngimurok a Akuj lu edakito asaduku a Achamunet a Ekapolon Akuj ana erai Ekapolon a akwap kadaang, ani ilomakinete ngakejen kech nakipi, etubosi ngakipi a angolol a Yorudan sodi kiliirakin ngakipi na eleleunito alokuju wapei.” Torotokis ngitunga anadakar toloto nangolol a Yorudan, edakito ngimurok a Akuj asaduku a Achamunet ingarenete. Ani enangunete ngimurok lu adakito asaduku nangolol, ilomakinete ngakejen kech lokwaas a angolol (ilelebuunun Yorudan ngirwa lulemet ngamanat), apot ngakipi na aleleunito alokuju kiliirakin wapei tooyaketa, eyakasi nikalonan enyaritae Adam, ere lo eyei diyete Saretan. Apot ngakipi nakalelearak kwap anam a Amakat kisunyar, topedosi ngitunga adokar ekwakaye diyete Yeriko. Ani eringa ngitunga edokete ekwakaye itorito nikoonon, apot ngimurok lu adakito asaduku a Achamunet a Ekapolon Akuj towaa alotau a angolol a Yorudan anikoonon a ngalup tanang ngitunga daang edokarete ekwakaye. Ani kedokasi ngitunga daang ekwakaye Yorudan kerumor, tolimok Ekapolon Akuj Yochua tama, “Toseu ngitunga ngitomon ka ngiarei, ipei alokitela a epei, sodi todungok kesi atamar tolemut ngamoru ngatomon ka ngaarei alotau a angolol a Yorudan anisek awaatar ngimurok. Tolimok kesi atamar totinga ngamoru nguna tanang nita iperete esi nakwaare.” Ani erumor tanyara Yochua ngitunga lutomon ka ngiarei lu aseunit ngesi, sodi tolimok tama, “Tolomasi tooma Yorudan kingarenikis asaduku a Achamunet a Ekapolon Akuj ana erai Akuj kus. Tolem itwaan daang amoru kiwok aloseget, ngitela a Ngisirael epei itwaan ipei. Isitamunete ngamoru nugu ngitunga ngakiro na asub Ekapolon Akuj. Ani monan ingitasi ngide kus atamar nyoni eger a ngamoru kanu anikus, ilimokinete esi kesi atamar atubosi ngakipi a Yorudan na edokarere asaduku a Achamunet a Ekapolon Akuj ekwakaye angolol. Isitamunete ngamoru nugu Ngisirael jiik ngakiro na asubasi.” Apot ngitunga ngulu kiwapa ngakiro a Yochua. Loger lo adungokinitor Ekapolon Akuj Yochua, apot kesi tolemut ngamoru ngatomon ka ngaarei alotau a angolol a Yorudan, eweikinit amoru apei ekitela epei a Ngisirael. Yaasi kesi ngamoru nguna tanang ni aperete, kiwaakis neni. Abu Yochua dang kitowo ngamoru ngatomon ka ngaarei alotau a angolol a Yorudan, anisek awaatar ngimurok a Akuj lu adakito asaduku a Achamunet. (Eringa ngamoru nguna eyakasi neni tani tokona.) Apot ngimurok towaa alokiding angolol a Yorudan tanang ni arumorotor ngakiro daang na adungokinit Ekapolon Akuj Yochua atamar tosuba ngitunga. Eraakasi ngakiro nugu kolong adunguni Musa. Apot ngitunga todokasi atipei ekwakaye. Ani enangete kesi ekwakaye, apot ngimurok a Akuj ka asaduku a Achamunet kingarenikis ngitunga. Todokasi ngitela a Reuben ka Gad ta epewae a ekitela a Manase, kingarenikis ngitunga luche loger lo alimokinitor Musa kesi. Atingito kesi daang ngiboro lua ejie. Alongaren Ekapolon Akuj, apot ngitunga ngabunge ngatomwon-omwon lu atingito ngiboro lujiet todokasi naroatin na eyakasi diyete Yeriko. Apot ngakiro na asubi Ekapolon Akuj akolongit ngina kitoyena Ngisirael atamar erai Yochua dir itwaan ni eyenikinitae. Toliwor erimasi ngesi aloboyor keng kadaang loger lokolong arimatar Musa. Sodi tolimok Ekapolon Akuj Yochua atamar todungok ngimurok lu adakito asaduku a Achamunet todokut alo Yorudan. Tosubak Yochua nguna. Ani enangete ngimurok a Akuj lokwaas a angolol, kisiak angolol aleleun nabo sodi kilelebun tani lokwaasea. Adokete ngitunga angolol a Yorudan akolongit na ngatomon a elap alo ekingaren, toloma kesi Giligal ni eyei kide Yeriko. Abu Yochua kitowo kaneni ngamoru natomon ka ngaarei na alemunio alo Yorudan. Tolimok Ngisirael tama, “Monan na kingiseta ngide kus esi atamar nyoni eger a ngamoru kanu, ilimokinete esi kesi ngakiro a akolongit ana adoketa Ngisirael Yorudan kitoro nikoonon. Tolimokis kesi atamar etooni Ekapolon Akuj na erai Akuj kus ngakipi a Yorudan todokareta esi ekwakaye, loger lokolong etoonio anam a Chamu kotere ngoni. Kotere nguna, eyenunete ngibukui daang anakwap ationis a agogongu a Ekapolon Akuj, nabo ikerete esi Ekapolon Akuj na erai Akuj kus jik.” Ngikapolok a Ngiamor daang lu alomito too Yorudan, ka ngikapolok a Ngikanaan daang lu alomito lokwaas a anam a Mediterenian, apot kiirasi atamar etooni Akuj Yorudan sodi todokasi Ngisirael ekwakaye. Apot kesi toema tamaranikis kotere Ngisirael. Sodi tolimok Ekapolon Akuj Yochua tama, “Kibetu ngamoru ngadi kilengerea Ngisirael.” Abu Yochua tosub loger lo adungokinit Ekapolon Akuj, sodi kilenger ngesi Ngisirael ani enyaritae emukura Kilengeret. Elengeri Yochua kesi kainyo apot ngikiliok daang lukolong apote alo Misiri, ka ngikiliok lukajwok daang totoaka alorot anariet kerotokis alo Misiri kerumor. Elengeritae sek ngitunga lu apote alo Misiri, nakaneni aringa ngide daang lu edounio alorot anariet nyilengera. Erikakinete Ngisirael ngikaru ngitomwon-omwon eloose anariet, tadaun tani ngikiliok lukajwok daang lukolong apote alo Misiri, totoaka anariet kotere peewapito kesi ngakiro a Ekapolon Akuj. Kikong Ekapolon Akuj atamar nyenangete kesi nakwap na a ajako a ngakile ka akimiet a ao nasek echikakinitae taapaakech. Peelengeritae ngide lusapa a ngitunga kalu, nakaneni toliwor ngalesea nakitet nguna kesi elengeri Yochua. Ani erumor akilengero, apot Ngisirael kiboikinos nadakar tanang ni angalekinioto ngajemei. Tolimok Ekapolon Akuj Yochua tama, “Akolongit naga, alema ayong ngileech lukolong iraakatar esi ngikedalak alo Misiri.” Ngakiro nguna kesi enyaritere neni Giligal, tani tokona. Na ayakar adakar a Ngisirael Giligal, naroatin na eyakasi diyete Yeriko, apot kesi tanyama esukukuu a Adeparet akolongit na ngatomon ka ngoomwon a elap. Akolongit na atupit ngina ngesi arai akolongit na ekingaren esiakineta kesi akinyam akimuj a akwap a Kanaan, na arai ngalemet na apeitoe ka ngamugati napadok. Tojongo tani akimuj na anyaritae manna achakuunun alokidiama, nabo amam manna aringa Ngisirael etingito. Napei ngina jik, toliworos kesi enyamete akimuj na etatae nakwap a Kanaan. Ani eringa Yochua eyei diyete Yeriko, abu ngesi tanangakin itwaan ewei alongaren keng etingit ekileng loapolon. Tolot Yochua ni ayei ngesi kingit tama, “Irai iyong epei a ngasigerea kosi kori emoit?” Tatachut itwaan ngini ngesi tama, “Meere ayong asiger kus kori emoit. Ayei ayong nege arai ekarikon a ngasigerea a Ekapolon Akuj.” Tadakakin Yochua kwap ilipit ebala, “Arai ayong ekasuban etich kon ekapolon. Nyo isaki iyong ayong atosub?” Tolimok ekarikon a ajore a Ekapolon Akuj ngesi tama, “Tobuto ngamuk kon, iwei iyong analup ana italeunitoe.” Tosubak Yochua loger lo alimokinio. Agolitoe ngidorin a Yeriko nabo eteo nyeelomuneta Ngisirael. Amam itwaan apedori alomun kori apudor nikalapatan a ere. Tolimok Ekapolon Akuj Yochua tama, “Kotere ayong, idwang iyong ngitunga a Yeriko, ka ekapolon kech, ta ngasigerea nakajwok daang ilema. Kirimokisi iyong ka ngasigerea kon ere logo akirimokinet apei akolongit apei, a ngirwa a ngikan-kapei. Esakitae ngimurok a Akuj ngikan-kaarei etingito ngaburucho, kingarenikis asaduku a Achamunet. Akolongit na ngakan-kaarei, kirimokis iyong ka ngasigerea kon ere ngakirimokinet ngakan-kaarei, tokutakinito ngimurok a Akuj ngaburucho. Ani erumor tokutakis akutakinet nakooyen. Napei iirareta esi akutakinet ngina, kiremasi ngitunga daang lokojokon, sodi toukor awas. Ani erumor toloma ajore daang lore.” Tanyara Yochua ngimurok a Akuj tolimok tama, “Tolemasi asaduku a Achamunet, toloto ngikan-kaarei kus ngaren asaduku etingito ngaburucho.” Sodi todungok ngesi ngitunga keng atamar kisiakis akirimokin ere, pena lukajwok ngaren asaduku a Achamunet a Ekapolon Akuj. Loger lo adungokinea Yochua ngitunga, apot ngimurok lukan-kaarei kingarenikis ekutakinito ngaburucho, kiwapite kesi asaduku a Achamunet a Ekapolon Akuj. Kingarenikis ngikiliok lukajwok ngimurok a Akuj lu akutakinito ngaburucho, sodi kiwapuut nabo ngasigerea nache, tokutakinitetei ngaburucho esaa ngolo daang. Nakaneni alimokinit Yochua ngitunga atamar nyiiremasi kori nyeelimut akiroit tanang ni edungunio ngesi elope. Sodi tolimok ngesi atiakaru ngina atamar tolemasi asaduku a Achamunet a Ekapolon Akuj kirimokineta ere akirimokinet apei. Ani erumor tobongut topero neni. Sodi tonyou Yochua nataparach elilim, tolemasi ngimurok a Akuj asaduku a Achamunet a Ekapolon Akuj. Kingarenikis ngimurok lukan-kaarei lu atingito ngaburucho, ekusete jiik. Kingarenikis kesi ngasigerea ngache, kiwapuut nabo ngasigerea nache asaduku a Achamunet a Ekapolon Akuj, tokutakinitetei ngaburucho jiik. Akolongit na ngaarei, toloto nabo kirimokis ere akirimokinet apei, sodi tobongut nadakar. Apot kesi tosuba kongina kotere ngirwa ngikan-kapei. Akolongit na ngakan-kaarei tonyout kesi echili nanyang kirimokis ngakirimokinet ngakan-kaarei loger lopalem sek. Akolongit naga bon ngesi erimokineta kesi ngakirimokinet ngakan-kaarei. Akirimokinet na ngakan-kaarei, ani eapikini ngimurok akutakin ngaburucho, tolimok Yochua ngitunga keng atamar kiremasi, sodi tolim ngesi tama, “Kiinak esi Ekapolon Akuj ere! Ejoikinit ere ka ibore daang ni eyei tooma inyasunio toliwor akipeyos a Ekapolon Akuj. Amalaat Raab bon ka ngitunga a awi keng ngesi imiekinio, kainyo ewai kolong ngesi ngirototin yok. Nabo nyejoikinit esi ilemarete ibore ni echamit inyasunio, ani kilemasi, iyaunete ngichan ka nginyas nadakar a Ngisirael. Ibore daang ni esubitae a akwangat, ka egolit ta asuat nanyang kori asuat nakirion, ikitegeliara toliwor ika Ekapolon Akuj. Ikiwaakina ni iwaanakinio ngaropiyae a Ekapolon Akuj.” Sodi tokutakis ngimurok ngaburucho. Napei eirareta ngitunga, apot kiremasi noi, sodi toukor awas. Tamataros ngasigerea daang tolomasi lore, sodi tolemasi ere. Tolemut ngilengea kech taareta ngitunga daang alore, ngikiliok ka ngaberu, lusorok ka lumojong. Apot nabo taara ngaatuk, ka ngamesekin ta ngisikiria. Tolimok Yochua ngitunga luarei lusek araakasi ngirototin tama, “Kapesi kai a amalaat kipudut ngesi ka ngitunga a awi keng nikalapatan, loger lokolong ichikakineta.” Apot kesi toloto kipudut Raab nikalapatan, erukito ka apakeng ta itiokeng, ka talokaatokeng ta ngitunga a awi keng daang. Torikosi kesi ngiyenet ka ngikedalak daang diyete adakar a Ngisirael toyuunotor. Kichunyakis kesi ere a akim tonomia, ka ibore daang ni ayei lore, pearai ngiboro lu esubitae a egolit, ka akwangat, ka asuat nanyang ta asuat nakirion. Ayaarete kesi ngiboro ngulu kiwaakis ni iwaanakinio ngaropiyae a Ekapolon Akuj. Nakaneni kimiek Yochua Raab ka ngitunga a awi a apakeng eyarete kainyo ewai kolong ngesi ngirototin lu amearit Yochua Yeriko. (Eringa ngalesea a Raab eyakasi nakwap a Isirael tani tokona.) Sodi kikong Yochua akolongit ngina tama, “Itwaan daang ni etamari adukokini nabo ere a Yeriko, eliwor ni ilamit Ekapolon Akuj. Itwaan cha daang ni edukokini ngateak, etoani lokookeng loapolon. Itwaan cha daang ni edukokini ngidorin, etoani lokookeng loochi.” Sodi abu Ekapolon Akuj kiruko ka Yochua, nabo abu ekipur keng tokeikin nakwap daang. Apon nyiiwap ngakiro na adungokini Ekapolon Akuj Ngisirael atamar nyeelemasi alo Yeriko ibore daang ni echamit inyasunio. Abu itwaan ni anyaritae Akani nyiiwap ngakiro na adungunitoe, sodi abu Ekapolon Akuj tongoik Ngisirael lokojokon. (Arai Akani lokookeng a Karimi, tarai etatait a Sabudi alo arai lokookeng a Sera alo erai eka ekitela a Yuda.) Tomea Yochua ngitunga ngiche alo Yeriko toloto lore a Ai, arai Ai ere lo ayei kide Besel, diyete Betapen, tolimok kesi atamar toloto torebo akwap ngina. Ani kelot kerumor, tobongut tolimokis Yochua tamasi, “Nyejoikinit ngitunga daang eloose akirem Ai. Tomea ngitunga ngabunge ngaarei kori ngauni make. Nyiimea ngasigerea daang inaa alosit ejie, kainyo nyerai ere lotiapolon.” Sodi apot Ngisirael ngabunge ngauni toremo ere ngolo, nakaneni apot kesi tamataros alotunga a Ai. Apot ngitunga a Ai kiritasi kesi jik napei alokidor a ere tanang niboket ngamoru naduket, sodi taarae ngasigerea ngatomwon-uni ka ngakan-kapei anakikokoriunet a emoru. Apot Ngisirael toema tamaranikis, toliworos ebulit. Apot Yochua ka ngikarikok a Ngisirael tochilichilaasi ngiworui kech ialolongete, sodi tadakakinos kesi kwap ilipito alongaren asaduku a Achamunet a Ekapolon Akuj. Topero kesi kaneni tanang ebong, eyei apua nakies kech idodiunit atamar ialolongeta kesi. Tolim Yochua tama, “Ekoe anukiro nugu Ekapolon lo irai Ekapolon Akuj? Ani nyo kidokunea iyong sua ekwakalo Yorudan? Akipotokin sua Ngiamor a? Isaki iyong amunyar sua? Nyo kolong pekimiekinere sua eboikinos ekwakaye Yorudan? Nyaanu na alimuni ayong, Ekapolon, na tokona amatarotor Ngisirael alomoe? Iirarete Ngikanaan ka itwaan daang anakwap ngakiro nugu. Kiriamete kesi sua, sodi kitaar sua daang. Ani anukiro isubakini iyong toliwor kirimae iyong?” Tolimok Ekapolon Akuj Yochua tama, “Tonyou! Nyo iperio iyong analup kona? Asecha Ngisirael! Asecha kesi nakolong adungokini ayong kesi atamar kirichakis. Alemasi kesi ngiboro lu achamakinitae inyasunio. Akokoyete kesi ngiboro ngulu, nabo kidaasi sodi kimorikis ka ngiboro kech. Ngakiro nugu kesi nyeweikineta Ngisirael ngimoe kech kitijwoto. Ematarosi kesi alomoe kech kainyo eraakasi tokona kesi daang ngimunyara! Nyeringa nabo ayong kiruki ka esi mati kinyasut esi ngiboro lukolong kidungokinitae atamar nyiilemasi. Tonyou! Kitaleu ngitunga kitoseg poneta ngaren kang. Tolimok kesi tosubakinos moi, kainyo ayong Ekapolon Akuj na arai Akuj a Isirael, eyakasi ngakiro na asaki alimun abala, ‘Ngisirael, itingito esi ngiboro ngiche lukolong kadungokini ayong esi atamar kinyasutu! Nyipedorete esi aweikin ngimoe kus mati kichakasi esi ngiboro ngulu!’ Tolimok kesi atamar moi nataparach, erikunio kesi ngaren kang a ngapeipei, etupit ekitela apei loche. Ekitela lo epakuni ayong, pot ngimacharin a ngapeipei, etupit emachar loche. Ani emachar lo epakuni ayong, pot ngitunga a ngawiyei a ngapeipei, etupito ngitunga a awi a apei lua nache. Ngitunga a awi ana epakuni ayong, pot a ngapeipei, etupit itwaan ipei niche. Itwaan ni ipakunio toriamunae etingito ngiboro lu echamit inyasunio, inomio ngesi ka ngitunga a awi keng ka ibore keng daang, kainyo ayau ngesi ngileech luapolok nia Ngisirael nabo asech achamunet kang.” Ani iwalari enangi nataparach elilim, abu Yochua toriku Ngisirael ngaren Ekapolon Akuj, a ngapeipei, etupit ekitela epei loche. Apon kipakunae ekitela a Yuda. Toriku ngesi ekitela a Yuda ngaren Ekapolon Akuj, etupit emachar epei loche, sodi apon kipakunae emachar a Sera. Toriku ngesi emachar a Sera ngaren Ekapolon Akuj, etupito ngitunga a awi a apei lua nache. Apon kipakunae ngitunga a awi a Sabudi. Sodi abu ngesi tanyarau ngitunga a awi a Sabudi ngaren Ekapolon Akuj, etupit itwaan ipei niche, sodi apon kipakunae Akani lokookeng a Karimi, tarai atatait a Sabudi. Tolimok Yochua ngesi tama, “Lokookang, tolim ngakiro na iteni ani a Ekapolon Akuj ana erai Akuj a Isirael, sodi tolimo akisech kon. Tolimokinae ayong tokona ngakiro na isubit iyong. Nyikimunon ayong ngakiro nguna.” Tatachak Akani tama, “Asechit ayong dir ani a Ekapolon Akuj ana erai Akuj a Isirael. Ngakiro na asubi ayong kesi nugu. Aloboro alu aremio, abu engolik eworu loajokon kooyen a Babilon, ka ngakiloi ngaarei a akwangat ta engolit anus a akilo. Katominasi ayong ngiboro ngulu lokojokon, atolema. Iriamuni iyong enukakina tooma eam kang toberite akwangat kwap kech.” Abu Yochua tomea ngitunga ngiche, kipiirioto loeam toriamut ngiboro lu achamakinitae inyasunio enukakina dir neni, toyei akwangat kwap. Kipudut kesi ngiboro nikalapatan a eam yaasi nia Yochua ka Ngisirael daang, sodi kinapanapakis daang kwap ngaren Ekapolon Akuj. Apot Yochua ka Ngisirael daang kirumut Akani, tolemut akwangat dang, ka eworu, ta egolit kimoriut aapei ka talokookeng, ka tanakookeng, ka ngaatuk keng, ka ngisikiria, ka ngamesekin ta eam keng ta ibore keng daang. Sodi yaarae kesi nadipo a Ngichan. Tolim Yochua tama, “Nyo kiinunea iyong sua ngichan lugu? Kiinuni tokona Ekapolon Akuj iyong ngichan akolongit naga!” Kimasa ngitunga daang Akani a ngamoru totoan, kimasa tani ngitunga a awi keng a ngamoru ani erumor kinoma ka ngiboro keng daang aapei. Tosenokis kesi ngamoru nakaalak kidiama keng, eringa ngamoru nguna eyakasi neni tani tokona. Ngesi enyaritere neni adipo a Ngichan. Abu Ekapolon Akuj tojongo angoit. Tolimok Ekapolon Akuj Yochua tama, “Kirukosi ka ngasigerea daang toloto lore a Ai. Wara nyiiem kori nyiimaranik. Kotere ayong, idwangi iyong ekapolon a Ai, ka ngitunga keng, ka ere, nakaneni eliwor akwap keng akus. Echamit esi isubeta Ai ka ekapolon keng ngakiro nakolong isubeta Yeriko ka ekapolon keng, nakaneni ipedorete esi alemar ngiboro ka ngaatuk kech toliworos ngakus. Kituumwokisi toremo ere alowae alo too.” Sodi tonyout Yochua ka ngasigerea keng daang toloto Ai. Toseu ngesi ngitunga ngabunge ngauni lukajwok, tomea kesi nakwaare todungok tama, “Toduka alowae aloche a ere, meere robo nikalonan noi, tasada isakete akirem. Kiponi ayong ka ngitunga kang lore. Ani epote ngitunga a Ai akitijwore sua, kibongi sua atamataros loger lokolong a ekingaren. Kiritarete kesi sua tanang ni kiteyakarea kesi alore. Etamarete kori kiem sua kesi kimatar loger lokolong a ekingaren. Sodi topudut esi ani idukitotor toremo ere. Kiinakini esi Ekapolon Akuj kus ere. Ani ilemarete ere, kichunyakisi akim, loger lo adungunio Ekapolon Akuj. Ngakiro kidungokinitae esi nguna.” Tomea Yochua kesi, sodi toloto kesi ni aduketa, too ere a Ai, kidara kaina. Ayei neni nakidingos a Ai ka Besel. Toper Yochua nadakar. Ani iwalari, tonyou Yochua nataparach elilim tanyara ngasigerea tochunak wapei. Apot ngesi ka ngikarikok a ngasigerea torikosi ngitunga toloto lore a Ai. Apot ngasigerea na arukito ka ngesi toloto lokidor loa lokinga a ere topero lowae loa lokwap, eyei adipo kiding kech ka ere a Ai. Toriko ngesi ngitunga ngabunge ngakan sodi toduka alo too ere, nakidingos a Ai ka Besel. Torekis kesi ngasigerea a ejie, ayei adakar naapolon kuju ere, toyakas ngitunga luche too ere. Toper Yochua nakwaare nadipo. Ani ingolikini ekapolon a Ai ngitunga a Yochua, abu ngesi tonyou atipei. Apot ngesi ka ngitunga keng toloto nadipo a Yorudan akitijwore Ngisirael ani kolong ajiere ekingaren, peayeni ngesi atamar edikino kitijikinio alo too. Apot Yochua ka ngitunga keng kiyechakis atamar kimatara, sodi tamataros nariet. Anyaraunitae sek ngitunga daang a ere atamar kiwapakis kesi, ani na erisitotor kesi Yochua, apot toekasi alore. Abu itwaan daang alo Ai kirita Ngisirael, toisikinae ere engaara, emam itwaan idongit itee. Sodi tolimok Ekapolon Akuj Yochua tama, “Kidodia akwara lowae a Ai, kainak ayong iyong ere a Ai.” Tosub Yochua loger lo alimokinitae, napei ekearea ngesi akan keng, tonyout ngitunga lusek adukito atipei, tamataros lore toremo. Kichunyakis kesi akim lore atipei. Ani ingoliarete ngitunga a Ai naabor, apot kingolikis apuru kenang kidiama. Tongopik kesi erot lo epuunotor, kainyo apot Ngisirael lusek amatara nariet toreeunos kitijwoto kesi. Ani ingolikinete Yochua ka ngitunga keng atamar aremo luche ere, nabo kichunyakin ere akim, apot toreeunos jik kisiakis akiar ngitunga a Ai. Pot Ngisirael lu ayakasi lore kimorikinos ka luche alojie. Sodi kiriama Ngisirael ngitunga a Ai alowaitin kadaang, taara daang. Emam itwaan abu tobuchar kori kidong eyari mati ekapolon a Ai bon. Apon kirumunae ngesi torikoroe nia Yochua. Taarakis Ngisirael ngitunga daang nariet nisek erisitere kesi. Ani erumor tobongosi Ai sodi taara itwaan daang kaina. Ngitunga lu atoakete akolongit ngina, ngikiliok ka ngaberu, araakasi ngabunge ngatomon ka ngaarei, araakasi daang ngitunga a Ai. Abu Yochua nyeekudok akan keng nasek ekearitor akwara, tanang ni aarere ngitunga a Ai daang. Apot Ngisirael tolemasi ngaatuk ka ngiboro daang lu aremio alore, loger lo alimokinitor Ekapolon Akuj Yochua. Kichunyak Yochua Ai kimiek erai ekuron. Eringa tani tokona ikoni neni. Kinenek Yochua ekapolon a Ai lokitoe a auno tomied, sodi kimiek akwaan ineno kaneni tanang ebong. Ani edooyori akolong todungok Yochua ngitunga atamar tolemasi akwaan ngina. Apon tachakakinae akwaan keng diyete ekidor a ere. Tosenokinos ngamoru nakaalak kidiama akwaan ngina. Eringa ngamoru nguna eyakasi neni tani tokona. Abu Yochua todukok ekeno a ngakipeyos a Ekapolon Akuj na erai Akuj a Isirael moru a Ebal. Asubakini ngesi itemem ka ngakiro nakolong alimokini Musa, ekasuban etich a Ekapolon Akuj ana erai Akuj a Ngisirael, loger lo igiritere lotal a Musa kona, “Ekeno a ngakipeyos, lo edukitoe a ngamoru ana nyibetunitae a ngiboro alusua.” Kipeyonokinoe Ekapolon Akuj alokidiama ekeno ngolo, apot nabo dang tolemut ngakipeyos a ekisil. Ani eyakasi neni, abu Yochua kigirak etal lokolong egiri Musa namoru iteete Ngisirael. Apot Ngisirael ka ngikarikok kech, ka ngikapolok kech, ka ngikatubok ngakiro ta ngipeyok daang lu ayakasi neni, towaa alowaitin aluarei a asaduku a Achamunet a Ekapolon Akuj, ingoliarito lowae lo ayakasi ngimurok a ekitela a Lawi lu adakito asaduku a Achamunet. Towaa ngitunga epewae ibongokinito emoru a Gerisim akau, nabo towaa epewae ibongokinito emoru a Ebal akau. Alimokinit kolong Musa ekasuban etich a Ekapolon Akuj kesi atamar tosuba kongina enangi akolongit na epiarere kesi. Kisomak Yochua etal daang irema, kisomak tani apiaro ka ngilam, loger lo egiritere nakitab a etal. Kisomak Yochua ngitalio a Musa daang kiirasi ngitunga, kiirasi tani ngaberu ka ngide ta ngitunga a ngakwapea anache lu ayakasi neni. Toyena ngikapolok daang lu ayakasi too Yorudan ajwonu a Ngisirael. Ngikapolok ngulu kesi lu alomito lomukur ka naukon ta lokwaas a anam a Mediterenian tanang Lebanon alokuju. Araakasi kesi ngikapolok a Ngiiti, ka Ngiamor, ka Ngikanaan, ka Ngiperes, ka Ngiipi ta Ngiebus. Kiriamariama kesi kimorikinos ngasigerea kech sodi kitijwoto Yochua ka Ngisirael. Nakaneni Ngigibeon lu araakasi Ngiipi, kiirasi ngakiro na asubea Yochua Yeriko ka Ai, sodi tasaka kesi akingalare ngesi. Tolemut kesi akimuj, sodi kisiwoko ngisikiria ngichuei luchilichila, ka ngituol a emuna lu edapitae. Tanapa kesi ngakorisae a ngiworui ta ngamuk nadaidauna na kedonyonokinio. Aokito ngamugati na atingito kesi nabo ayei erukopus. Toloto kesi nadakar a Giligal tolimokis Yochua ka Ngisirael tamasi, “Kiponit sua anakwap anakalonan. Kisaki sua atachamakin ka esi.” Nakaneni tolimut Ngisirael tamasi, “Kotere nyo kichamakinor ngoni? Tokona ngon ibooyete esi alo diyete kane.” Tolimokis kesi Yochua tamasi, “Kirai sua ngikasubak etich kon.” Kingit Yochua kesi tama, “Tangae esi, aliwae iponitotor esi?” Sodi tolimokis kesi ngesi akiroit naga, “Kiponit sua anakwap anakalonon noi ekapolon, kainyo kiira ngakiro a Ekapolon Akuj ana erai Akuj kus. Kiira ngakiro na asubi ngesi alo Misiri daang ka na asubea ngikapolok luarei a Ngiamor alo kide Yorudan, kesi Sion ekapolon a Echibon, ka Ogu ekapolon a Bachan lu alomito Achitaros. Ngikarikok kosi ka ngitunga daang lu elomito nakwap kosi kesi kilimokinete sua atamar atolemutu akimuj atonyoutu alosit akisiriam esi. Kitolimokis atamar atoliworos ngikasubak etich kus sodi atachamakinos ka esi. Kingolik mono cha iyong ngamugati, nakolong kirotokinio sua kiponit akisiriam esi, aringa ngamugati ibus. Nakaneni kingolik a! Aoko tokona amin erukopus. Nakolong kilelebea sua ngituol lugu, aringa ekiteteka, nakaneni kingolik a, adaidaunosi! Adaidaun ngiworui kosi ka ngamuk kotere alosit nakooyen.” Tachamut Ngisirael akidiaun akimuj ngina epewae nakaneni nyitaanyuna kesi Ekapolon Akuj ngakiro a akimuj kangina. Abu Yochua toelokin ka kesi tachamakin, sodi kimiek kesi eyarete. Apot ngikarikok a Ngisirael kichikakis atamar kirichuni achamunet ngina. Adaunet a ngirwa a nguuni ekisidi a achamakin, apot Ngisirael taanyut atamar elomito ngitunga ngulu diyete neni. Sodi tonyout Ngisirael toloto, ani adaunet a ngirwa a nguuni, tananga lorerea lu alomito ngitunga lu enyaritae Ngigibeon, ka Ngikepira, ka Ngibeeros ta Ngikirias Yearim. Nakaneni nyeara Ngisirael kesi kainyo ekongito ngikarikok kech alokiro a Ekapolon Akuj ana erai Akuj a Ngisirael. Apot ngitunga daang kisuburata ngikarikok kotere ngakiro nguna, nakaneni tatachut kesi tamasi, “Kisikong kolong kesi sua a ekiro a Ekapolon Akuj ana erai Akuj a Isirael. Nyikiwani tokona ngoni kesi. Echamit ngoni kimiekini kesi toyara kotere akikong na kikongi ngoni, ani pekisub ngoni kongina, kirirae Akuj ngoni. Kimiekisi kesi toyara, nakaneni eliworosi kesi kiyapanakinete ngoni ngakito ka aokonokin ngakipi.” Ngakiro na alimunete ngikarikok nguna. Todung Yochua atamar torikunoe Ngigibeon ni ayei ngesi, sodi kingit kesi tama, “Nyo kingalaata esi sua ibalatar iponito anikalonan, tarai ilomito esi nipei nege? Ani kona isubeta esi kongina, kilam esi Akuj. Eliworosi ngitunga kus ngikedalak jik, eyepete ngakito ka akuok ngakipi a akai a Akuj kang.” Tatachakis tamasi, “Kisubi sua kongina ekapolon, kainyo kipot atoyena dir atamar adungokini kolong Ekapolon Akuj na erai Akuj kus Musa ekasuban etich keng ebala, kiinakini esi akwap daang sodi taara ngitunga lu elomito neni daang, iloose ngaren. Kisubi sua kongina ani kiemitor sua esi, kipot sua kitobul. Eraakasi tokona ngakiro kosi ngaka akiding kus, tosubere sua ngakiro nakijoikinito esi.” Abu Yochua toik kesi kiratak Ngisirael nyear kesi. Ani kikok neni, kitiliwo kesi ngikedalak, toliworos eyapanakinete Ngisirael ngakito tookonokinete ngakipi. Ayepeenete tani ngakito ka akiok ngakipi a ekeno a ngakipeyos. Arubakis kesi esubete etich logo ani kolong aseuni Ekapolon Akuj atamar kelipere ngesi, tanang akolongit napei tokona naga. Abu Adonisedek lo arai ekapolon a Yerusalem, kiira atamar abu Yochua torem ka akinyasun ere a Ai, ani erumor taar ekapolon keng, loger lokolong asubea Yeriko ka ekapolon keng. Kiira nabo atamar esila Ngigibeon ka Ngisirael nabo elomito kesi daang wapei. Apot ngitunga a Yerusalem toriangakinos kotere ngakiro nguna, kainyo apolot ere a Gibeon ariyan ka ngirerea lu ayakasi ngikapolok, apol tani edwangit Ai, nabo ajwoko ngitunga keng. Sodi abu Adonisedek tomea itwaan nia Oamu alo arai ekapolon a Eburon, ka Piram lo arai ekapolon a Yarimus, ka Yapia lo arai ekapolon a Lakich, ta Debir lo arai ekapolon a Egilon, ebala, “Potu kingarakinae ayong etijwoto ngitunga a ere a Gibeon, kainyo esila ka Yochua ta Ngisirael.” Apot ngikapolok ngikan a Ngiamor lu eraakasi ngikapolok a ngirerea alu enyaritae Yerusalem, ka Eburon, ka Yarimus, ka Lakich, ta Egilon, kimorikis ngasigerea kiriama ere a Gibeon sodi kitijwoto. Apot Ngigibeon tomeasi itwaan nia Yochua anadakar a Giligal tamasi, “Nyikichaka sua, ekapolon! Bua nege atipei kingarakinae sua! Toyuunae sua! Ngikapolok a Ngiamor daang lu elomito nakwap na ngimukur, emorikis ngasigerea kech kiremo sua!” Sodi apot Yochua ka ngasigerea keng daang, eyakasi tani lukajwok noi, torotokis alo Giligal. Tolimok Ekapolon Akuj Yochua tama, “Nyiem kesi. Ketiliwo ayong iyong lo idwangi. Emam tani ipei anikech ni kiweikini iyong.” Torotokis Yochua ka ngasigerea keng nakwaare alo Giligal tananga Gibeon, sodi kituumwokis Ngiamor kitijikis. Abu Ekapolon Akuj kitoem Ngiamor napei engolikineta ngasigerea a Ngisirael. Apot Ngisirael taara kesi alo Gibeon kiritasi kitoro ni enyaritae Bes-oron, ni eyei napak a emoru, kitijiosi kesi tanang ni anyaritae Aseka ka Makeda alowae alo alokuju. Ani eringa Ngiamor ekerete anapak a emoru kiwapito ngasigerea a Ngisirael, abu Ekapolon Akuj tachaku ngamoru a akiru naapolok alokidiama kimasa kesi alorot eloose Aseka. Taara ngamoru nguna ngitunga lukaalak noi lu idwangito lu aarete Ngisirael. Akolongit na epotorea Ekapolon Akuj Ngiamor kidwanga Ngisirael kesi, kiruoro Yochua ka Ekapolon Akuj. Tolim Yochua alongaren Ngisirael tama, “Akolong, towo nyiingunyakin alokidiama Gibeon. Elap, towo alokidiama adipo a Aijalon.” Abu akolong towo nyiingunyakin, nabo nyiyotokino elap tanang na edwangeta kesi ngimoe kech. Igiritae ngakiro nugu nakitab na enyaritae Yachar. Abu akolong towo naparan lotingilan, nyedooyoro a akolongit a apei. Emam akolongit ache nabo ekoni ngina kori ekok ngina nakanuan, na eirarea Ekapolon Akuj ngakiro a itwaan. Toji Ekapolon Akuj alowae a Ngisirael! Arumoret kanguna, apot Yochua ka ngasigerea keng tobongosi Giligal. Apot ngikapolok lukan a Ngiamor tobucharos, toduka anaburibur alo Makeda. Taanyu itwaan iche kesi sodi tolimokinae Yochua ni adukitotor kesi. Tolim Yochua tama, “Kikokorikisi ngamoru ngadi naapolok nakituk a aburibur, kiwaakis ngitunga kiteto neni, nakaneni nyiiboikinosi esi neni. Kiwapakisi esi ngimoe sodi kitijikis kesi anaabor. Warasi nyeenang lorerea kech! Epoto Ekapolon Akuj na erai Akuj kus ngimoe kus sodi kidwanga esi kesi.” Apot Yochua ka Ngisirael taara kesi, nakaneni apon ngiche kech nyear ani aduketa anawasea a ere kech. Sodi tobongut ngitunga a Yochua daang ni ayei ngesi niajokon, anadakar ana ayei Makeda. Emam itwaan tani ipei anakwap kangina ni asak akiruoror Ngisirael ngakiro naaronok. Tolim Yochua tama, “Tangaasi akituk a aburibur sodi yaut ngikapolok lukan ngulu nia ayei ayong.” Apon tangaarae aburibur, sodi kipudunoe nikalapatan ngikapolok a Yerusalem, ka Eburon, ka Yarimus, ka Lakich ta Egilon, torikoroe nia Yochua. Sodi tanyara Yochua Ngisirael daang, ani erumor todungok ngikarikok daang lusek arukito ka ngesi atamar kichiaka ngimosiringan a ngikapolok alukan kangulu. Tosubakis kesi kongina. Sodi tolimok Yochua ngikarikok lu arukito ka ngesi tama, “Warasi nyieam kori nyiimaranikis. Togogongioto nabo totitinyeketo kainyo ngakiro esubea Ekapolon Akuj ngimoe kus daang nugu.” Sodi abu Yochua taar ngikapolok daang kinenek lokito ngikan, kinenos ngawat kech kaneni tanang ebong. Ani edooyori akolong, todung Yochua atamar totiyaunae ngawat kech tachakakinae naburibur nasek adukitotor. Tosenokinoe ngamoru naapolok nakituk a aburibur, eyakasi neni tani tokona. Akolongit ngina torem Yochua Makeda tolema, sodi taar ekapolon. Taar ngesi itwaan daang alore, emam itwaan aisikin eyari. Tosubea ngesi ekapolon a Makeda ngakiro nasek asubea loa Yeriko. Arumoret kanguna, apot Yochua ka ngasigerea keng torotokis alo Makeda toloto toremo Libina. Kingarak Ekapolon Akuj Ngisirael kidwanga ngitunga a ere kangolo ka ekapolon kech. Emam itwaan aisikis kesi eyari, nakaneni apot taara itwaan a ere daang, Tosubeta kesi ekapolon a ere kangolo ngakiro nasek asubeta ekapolon a Yeriko. Arumoret kanguna, tonyout Yochua ka ngasigerea keng alo Libina toloto Lakich kiriama sodi toremo. Kingarak Ekapolon Akuj Ngisirael kidwanga ngitunga a ere a Lakich akolongit na ngaarei ajiere. Apot kesi taara itwaan daang alore, loger losek aareta alo Libina. Abu Oram lo arai ekapolon a Geser bu ayuun Lakich, sodi kidwang Yochua ngesi ka ngasigerea keng daang, nabo emam itwaan ni edong eyari. Ani erumor tonyout Yochua ka ngasigerea keng alo Lakich toloto Egilon, kiriama toremo. Toremo Egilon akolongit ngina, taara itwaan daang loger losek aareta alo Lakich. Arumoret kanguna, apot Yochua ka ngasigerea keng tonyout alo Egilon toloto lomukur lu etenere Eburon, toremo sodi tolemasi ere. Taara ekapolon ka itwaan ni ayei lore daang ta ngitunga a ngirerea alu aapiyete kaneni. Kinyasu Yochua ere lokojokon loger lo enyasunea Egilon. Emam itwaan kaneni ni abu kidong eyari. Sodi tobongosi Yochua ka ngasigerea keng toloto Debir toremo. Tolema ere ngolo, ka ekapolon keng ta ngirerea lu edunyatar daang. Taara kesi ngitunga daang kaneni. Tosubea Yochua Debir ka ekapolon keng ngakiro nasek asubea Eburon ka Libina ka ekapolon keng. Torem Yochua akwap daang. Kidwang ngesi ngikapolok a akwap ana ngimukur, ka ngakokoriyoret a ngimoru na eyakasi kide, ta ngaukon na eyakasi too tanang tani nariet a Negeb. Emam itwaan ni abu ngesi toisik eyari, apon itwaan daang taarae loger losek adungunitor Ekapolon Akuj erai Akuj a Ngisirael. Abu Yochua toji jik napei alo Kadech-barinea ana eyei kuju tanang Gasa na eyei lokwaas a anam. Toji alowaitin kadaang a Gochen tanang Gibeon alowae alo alokwap. Kidwang Yochua ngikapolok ngulu daang ka ngakwapea kech ajikinet apei kainyo ajii Ekapolon Akuj na erai Akuj a Ngisirael alowae kech. Arumoret kanguna, apot Yochua ka ngasigerea keng tobongosi nadakar na ayei Giligal. Na eirarea Yabin lo arai ekapolon a Asor ngakiro na edwangeta Ngisirael ngitunga, abu tomea itwaan nia Yobab alo a Madon, ka nia ekapolon a Chimuron ka ekapolon a Akichap. Sodi tomea itwaan nia ngikapolok alu ayakasi lomukur, lowae loa lokwap, ka lu ayakasi nadipo a Yorudan, lowae loa lokuju anam a Galilaya, ka lu ayakasi naroatin, ta lu ayakasi lokwaas a anam, diyete Dor. Abu nabo tomea itwaan nia Ngikanaan alu alomito kide ka too angolol a Yorudan, ka nia Ngiamor, ka nia Ngiiti, ka nia Ngiperes, ta nia Ngiebus alu alomito nakwap na ngimukur. Tomea nabo itwaan nia Ngiipi alu alomito nakeju a emoru enyaritae Erimon alo eyei nakwap na enyaritae Misipa, pot kesi ka ngasigerea kech daang. Alalak ngasigerea nguna noi atiakasi asinyen na eyei lokwaas a anam. Ayakasi kesi ngangolei ka ngaurukukui na irito ngangolei. Apot ngikapolok ngulu daang kimorikis ngasigerea aapei sodi tolom adakar kech ningolol ni enyaritae Merom, esakete akitijwore Ngisirael. Tolimok Ekapolon Akuj Yochua tama, “Nyiem kesi. Moi esaa lo ikoni logo, aari ayong kesi daang ewaak nakan a Ngisirael. Tonged ngamori a ngangolei kech tongwala, sodi kinom ngaurukukui na irito ngangolei.” Abu Yochua ka ngitunga keng kituumwokis kesi kitijikis aningolol a Merom. Sodi nak Ekapolon Akuj Ngisirael agogongu na idwangeta kesi. Kitijikis Ngisirael kesi ka akiritar tanangut alowae alo alokwap ni anyaritae Misirepos Maim ta Sidon, ani alowae alo alo kide, kiritasi tananga nadipo a Misipa. Taara Ngisirael ngimoe, emam tani epei lo edong eyari. Tosubakinea Yochua kesi ngakiro na adungunit Ekapolon Akuj, tonged ngamori a ngangolei kingwal nabo kinom ngaurukukui kech na irito ngangolei. Abu Yochua tobong torem a Asor sodi taar ekapolon keng. (Ngirwa ngulu, ekapolon a Asor ngesi ajwono noi edwangit ngikapolok luche daang.) Taara kesi itwaan daang kaneni, emam itwaan edong eyari, ani erumor kinomae ere. Abu Yochua tolema ngirerea ngulu ka ngikapolok kech, taar itwaan daang loger lokolong adungokinitor Musa, ekasuban etich a Ekapolon Akuj. Nakaneni apot Ngisirael nyiinoma ngirerea lu adukitoe kidiama lotela. Asor bon ngesi abu Yochua kichunyak akim kinom. Apot Ngisirael tolemasi ngiboro luajokak daang ka ngaatuk alorerea kangulu. Nakaneni apot kesi taara itwaan daang, emam itwaan edong eyari. Adungokinit sek Ekapolon Akuj Musa lo arai ekasuban etich keng nguna, sodi todungok Musa Yochua, dio Yochua kiwap ngakiro nguna. Tosub ngesi ngakiro daang nakolong adungokinit Ekapolon Akuj Musa. Tolema Yochua akwap daang, akwap na ngimukur ka ngaukon, napei alokwap tanang Negeb, tolema akwap a Gochen daang ka akwap nakoonon ayei kwap keng, ta adipo a Yorudan. Napei alomoru a Alak alo eteni lowae a Edom, tanang ni enyaritae Baaligad ni eyei nadipo a Lebanon, na eyei kuju emoru lo enyaritae Erimon. Sodi kirum ngesi ngikapolok kech daang kibunga taar kesi. Abu Yochua tojwoto ka ngikapolok ngulu a ngirwa alukaalak. Ngitunga a ere a Gibeon make kesi esilete ka Ngisirael. Alomito Ngiipi ngiche neni. Apon luche daang kidwangae alojie. Abu Ekapolon Akuj kitiliwo kesi lu irichasi tojwoto ka Ngisirael, sodi tomunyarae kesi nabo taarae daang emam akisienut. Nguna kesi kolong adungokini Ekapolon Akuj Musa. Ngirwa ngulu, abu Yochua tolot tomunya ngitunga lulangir kooyak anyaritae Ngianak lu alomito nakwap na ngimukur ni enyaritae Eburon, ka Debir, ka Anab ta ngakwapea na ngimukur daang a Yuda ka Isirael. Abu Yochua tomunya kesi ka ngirerea kech. Emam Ngianak tani epei abu kidong nakwap a Isirael. Nakaneni apot ngidikidio kidongo Gasa, ka Gas, ka Achidod. Tolema Yochua akwap daang loger lokolong adungokinitor Ekapolon Akuj Musa. Nak Yochua Ngisirael akwap ngina kitiliwosi akech, sodi totiakanak ewae apei toliwor eka ekitela a epei. Apot sek Ngisirael toremo akwap na ayei kide Yorudan, tolemasi napei anadipo a Arinon tanang nadipo a Yorudan. Ani alowae alo alokwap, tanang moru a Erimon. Kidwanga kesi ngikapolok ngiarei. Arai epei Sion, lo arai ekapolon a Ngiamor lo apolokinit Echibon. Apolokinit ngesi tani epewae a akwap a Gilead napei alo Aroer (ani eyei lokukuoru a adipo a Arinon) ka ere lo eyei kiding adipo ngina, tanang nangolol a Yabok, ni etiakaror Amon. Anangit ni apolokinit ngesi nadipo a Yorudan, alowae alo eyei kwap anam a Galilaya, tanang Bes Yechimos (Kide anam a Amakat) kiriwor jik tanang nakeju a emoru a Pisiga. Apot nabo kesi kidwanga Ogu lo arai ekapolon a Bachan, lo arai epei a ngikapolok alu esal a ngitunga alulangir kooyak anyaritae Ngirepai. Apolokinit ngesi Achitaros ka Edirei. Apolokinit napei alomoru a Erimon, ka Saleka ta akwap a Bachan daang, tanang lokukuoru a akwap a Gechur ka Maaka ta epewae a Gilead ni esalunitor akwap a ekapolon alo anyaritae Sion alo arai ekapolon a akwap a Echibon. Musa lo arai ekasuban etich a Ekapolon Akuj, ta Ngisirael, apot kidwanga ngikapolok luarei ngulu. Abu Musa nak ekitela a Reuben ka Gad epewae a ekitela a Manase ngina kitiliwosi akech. Apot Yochua ka Ngisirael kidwanga ngikapolok daang lu alomito nakwap na ayei too Yorudan, napei alo Baaligad ani eyei nadipo a Lebanon tanang lowae loa lokuju, ni eyei emoru a Alak, diyete Edom. Abu Yochua tokorak akwap ngina ngitela toliwor akech jik. Anangit akwap ngina nakwap na ngimukur ka ngaukon na alo too, ka adipo a Yorudan ka ngaukon keng, ka ngakokoriyoret a emoru na alo kide, ta ariet a Negeb. Arai sek akwap ngina aka Ngiiti, ka Ngiamor, ka Ngikanaan, ka Ngiperes, ka Ngiipi ta Ngiebus. Apot Ngisirael kidwanga ngikapolok a ngirerea alu enyaritae Yeriko, ka Ai (diyete Besel), ka Yerusalem, ka Eburon, ka Yarimus, ka Lakich, ka Egilon, ka Geser, ka Debir, ka Geder, ka Orima, ka Arad, ka Libina, ka Adulam, ka Makeda, ka Besel, ka Tapua, ka Eper, ka Apek, ka Lacharon, ka Madon, ka Asor, ka Chimuron Meron, ka Akichap, ka Taanak, ka Megido, ka Kedech, ka Yokineam (lo eyei Karimel), ka Dor (lo eyei lokwaas a anam), ka Goimu (lo eyei Galilaya, ) ta Tirisa, ngikapolok ngitomwon-uni ka epei daang. Abu Yochua tomojong. Tolimok Ekapolon Akuj ngesi tama, “Imojong iyong noi toringa akwap na echamit elemario elal. Eringa akwap a Pilistia daang ka na Ngigechur, ka akwap na enyaritae Apim na eyei lowae loa lokuju. (Akwap na isiakini aningolol a Chior, ana eyei lokukuoru a Misiri, tanang alowae alo alokwap lokukuoru a Ekiron, arai daang aka Ngikanaan. Alomito ngikapolok a Ngipilisti Gasa, ka Achidod, ka Achikelon, ka Gas, ta Ekiron.) Eringa akwap a Ngikanaan daang eyei, ka na enyaritae Meara (na erai aka Ngisidon), napei ani eyei Apek na eyei lokukuoru a Ngiamor. Eringa akwap a Ngigebal ka akwap a Lebanon daang alowae alo alo kide. Napei alo Baaligad kuju emoru a Erimon, tanang napak a Amas. Imorikina akwap ngina ka akwap daang a Ngisidon alu elomito nakwap a ngimukur, nakidingos a ngimoru a Lebanon ka Misirepos Maim. Eritari ayong ngitunga ngulu daang esaa lo eponitotor Ngisirael. Echamit iyong itiakakini Ngisirael akwap loger lo kadungok ayong iyong atamar tosub. Tokona bocha, totiakak akwap naga ngitela luche lukan-koomwon ka epewae a ekitela a Manase toliwor akech.” Aanyunito sek ngitela a Reuben ka Gad, ta epewae a ekitela a Manase akwap na atiakakini Musa kesi, lo arai ekasuban etich a Ekapolon Akuj. Ayei akwap ngina lowae loa lokide angolol a Yorudan. Anangit akwap kech Aroer (lokeli a adipo a Arinon), nabo ere lo ayei kiding adipo ngina imorikina ka emuria napei alore a Medeba tanang Dibon. Tanang lokukuoru a Amon ka ngirerea daang lukolong apolokinit Sion lo arai ekapolon a Ngiamor, lo apolokinit Echibon. Emorikina neni ka Gilead, ka ngiwaitin a Gechur ka Maaka, ka emoru a Erimon wadaang, ta Bachan daang tanang ni enyaritae Saleka. Emorikina ka apolou a Ogu alo a Bachan arai ekapolon loa esal a ngitunga alu anyaritae Ngirepai, losek apolokinit Achitaros ka Edirei. Edwangi Musa ngitunga ngulu sodi kirita. Nakaneni nyiritara Ngisirael ngitunga a Gechur ka Maaka. Eringa kesi elomito nakwap a Isirael. Peainakinit Musa ekitela a Lawi akwap. Loger lokolong alimokinea Ekapolon Akuj Musa, asakitae kesi totiakanakinae epewae a ngakipeyos ana epeyeeneo alokeno alo ipeyonokinere Ekapolon Akuj na erai Akuj a Isirael. Ainakinit Musa ngitunga a ekitela a Reuben akwap epewae kitiliwosi akech. Anangit akwap ngina Aroer (lokeli a adipo a Arinon), ka ere lo eyei kiding adipo ngina, ta wadaang a emuria alo edunyunatar ere a Medeba. Emorikina ka Echibon, ka ngirerea daang a emuria lu enyaritae Dibon, ka Bamos Baal, ka Bes Balimeon, ka Yaasa, ka Kedemos, ka Mepaas, ka Kiriasaim, ka Sibima, ka Seres-chaar lo eyei narii a adipo, ka Bespeor, ka ngakokoriyoret a emoru a Pisiga, ta Bes Yechimos. Emorikina ka ngirerea daang a emuria kangolo, ka wadaang ni apolokinit Sion lo arai ekapolon a Ngiamor, losek apolokinit Echibon. Kidwang Musa ngesi ka ngikarikok daang a akwap a Midian ka lu enyaritae Epi, ka Rekem, ka Sur, ka Uri, ta Reba. Apolokinito kesi daang akwap kotere Sion. Alotunga alu aario, ayei ekekerian lobe Balaam lokookeng a Beor. Arai Yorudan ekukuor a Reuben alowae alo alo too. Ngulu kesi araakasi ngirerea lu ainakinio ngitunga a ekitela a Reuben toliworos ngikech. Ainakinit nabo Musa ngitunga a ekitela Gad akwap ache toliwor akech. Arai akwap kech Yaser ka ngirerea a Gilead daang, ka epewae a akwap a Amon ni enangit ni enyaritae Aroer, ni eyei kide Raba. Esiakinit akwap kech alo Echibon tanang Ramas Misipe ka Betonim, ani alo Maanaim tanang lokukuoru a Lodebar. Ani anadipo a Yorudan, emorikina ka Bes Aram, ka Besinmira, ka Sukos, ka Sapon, ta ngiwaitin luche daang apolokinit Sion lo arai ekapolon a Echibon. Ekukuor kech loa lotoo ngesi angolol a Yorudan, ani alowae alokwap, anangit nanam a Galilaya. Ngulu kesi eraakasi ngirerea ka ngadakarin na ainakinio ngitunga a ekitela a Gad toliworos ngakech. Ainakinit Musa ngitunga epewae a ekitela a Manase akwap ache toliwor akech. Anangit akwap kech Maanaim imorikina ka akwap a Bachan daang, ka wadaang ni apolokinit Ogu lo arai ekapolon a Bachan. Ayei akwap epewae Gilead, imorikina ka Achitaros ta Edirei, lu araakasi luapolok ayakasi Bachan, lu apolokinit Ogu. Ngirerea ngulu daang ainakinio epewae a ngitunga alu araakasi ngalesea a Makiri alo arai lokookeng a Manase. Eger ngolo ngesi kolong atiakea Musa akwap na ayei kide Yeriko ka Yorudan na ayakar naroatin a Moab. Nakaneni abu Musa nyeeinak ekitela a Lawi akwap. Abu tolimok kesi atamar etiakanakinio kesi epewae a ngakipeyos ana einanakinio Ekapolon Akuj na erai Akuj a Isirael. Eger logo ngesi kolong atiakakinere Ngisirael akwap a Kanaan na ayei too Yorudan. Apot Eleasar lo arai emuron a Akuj, ka Yochua lokookeng a Nun, ka ngikapolok a ngawiyei a ngitela a Ngisirael totiakakis ngitunga akwap. Loger lokolong adungokinitor Ekapolon Akuj Musa, apon ngakwapea a ngitela alukan-koomwon ka epewae ekitela eche totiakae kotere akiram ekura, kainyo atiakinit sek Musa ngitela ngiarei ka epewae a ekitela a epei akwap, ayakasi ngulu kide Yorudan. Nakaneni peatiakakinit ngesi Ngilawi akwap. Araakasi ngalesea a Yosep ngitela ngiarei, lua Manase ka lua Epiraim. Nakaneni amam akwap abu Musa totiakak Ngilawi, abu nak ngirerea make lu elomete kesi ka lu iyokiyete ngaatuk kech ka ngibaren luche. Apot Ngisirael totiaka akwap loger lokolong adungokinitor Ekapolon Akuj Musa. Akolongit apei, pot ngitunga a ekitela a Yuda nia Yochua alo Giligal. Abu epei kech lo anyaritae Kaleb lo arai lokookeng a Yepune, lo arai eka akwap a Kenis, tolimok Yochua tama, “Iyeni iyong ngakiro nakolong alimokini Ekapolon Akuj Musa lo arai itwaan keng alo Kadech-barinea kotere iyong ka ayong. Arai kolong ngikaru kang ngitomwon-omwon nakamearea ayong Musa lo arai ekasuban etich a Ekapolon Akuj alo Kadech-barinea, akireb akwap naga. Nakaneni apot ngitunga lu kirukorit ka ayong kitoema ngitunga yok. Nakaneni ewap ayong ngakiro a Ekapolon Akuj kang a eger alo etenoono. Kotere nguna asubi ayong, abu Musa kechikak ayong atamar kirumi ayong ka ngide kang akwap nakolong echiaki ayong toliwor akosi jik. Kingolik tokona, adaunosi ngikaru ngitomwon-omwon ka ngikan alorwa alu kolong alimokinea Ekapolon Akuj Musa ngakiro nguna. Ngirwa ngulu kesi lukolong alooso Ngisirael anariet. Keteyar ayong Ekapolon Akuj tanang tokona, loger lokolong alimunitor. Kingolikinae ayong! Eraakasi tokona ngikaru kang ngitomwon-kauni ka ngikan. Eringa tani tokona eyakasi ngikilinga lu ikote lua ngirwa alu kolong kamearitor Musa. Eringa ayong eyakasi ngikilinga lujiet kori lusubet ibore daang. Tokona bocha, nakinae ayong akwap na ngimukur nakolong kechikakini Ekapolon Akuj ayong akolongit nakibongunio ka ngitunga kang. Kilimokini kolong sua esi atamar eyakasi ngitunga lulangir kooyak inaa enyaritae Ngianak, lu elomito lorerea luapolok a ngawasea. Ani erai kiruk ayong ka Ekapolon Akuj, eritari ayong kesi loger lokolong alimunio Ekapolon Akuj.” Topia Yochua Kaleb lokookeng a Yepune sodi nak ngesi ere a Eburon toliwor ekeng. Eringa Eburon erai eka ngalesea a Kaleb lokookeng a Yepune, alo arai eka akwap a Kenis kainyo ewapi ngesi Ekapolon Akuj na erai Akuj a Isirael a eger alo etenoono. Sek ekingaren anyaritae Eburon ere a Ariba. (Arai Ariba itwaan ni apolot ni edwangit Ngianak luche.) Min tokona ekisil nakwap. Apot ngitunga a ekitela Yuda toriamut ngakwapea loger logo. Alowae alo alokuju, anangit akwap kuju ariet na enyaritae Sin, ana enangit lokukuoru Edom. Esiakinit ekukuor lo alokuju logo ani esalunea anam a Amakat alokuju. Kinapar jik kuju anapak a Akirabim tanang Sin. Kinapar alokuju Kadech-barinea kitor Esiron tanang Adar. Ani erumor kiriwor lowae a Karika. Kinapar alo Asimon kiwapak jik ayanae alokukuoru a Misiri. Ngolo arai ekukuor a Yuda alokuju. Ekukuor loa lokide ngesi anam a Amakat, kinapar jik tanang ni eremio Yorudan anam ngina. Kisiak ekukuor loa lokwap kaneni. Kinapar alo Bes Ogila, kiriwor kwap ekeku lo erounit adipo a Yorudan. Kinapar tanang namoru a Boan (arai Boan lokookeng a Reuben). Kinapar anadipo a Ngichan tanang Debir, sodi kiriwor kwap lowae a Giligal, ni ekienyikina ka apak na anyaritae Adumim na eyei lowae lo alokuju adipo. Sodi kinapar alolelea a Enichemech topudo kinapar Enirogel. Kitor nadipo a Inom alowae alo alokuju emoru lo eyei ere a Ngiebus enyaritae Yerusalem. Tanang ekukuor kidiama emoru lo eyei too adipo a Repaim. Kinapar kaneni lolelea a Nepitoa sodi topudo lorerea lu eyakasi diyete emoru a Epiron. Kiriwor kaneni lowae a Baala (kori Kirias Yearim), kiloda too Baala, kinapar lowae loa ngimukur a Edom. Kinapar lowae loa lokwap emoru enyaritae Yearim (kori Kesalon), toten kwap Bes Chemech, kiporo Timuna. Sodi kinapar ekukuor alomoru alo eyei Ekiron kwap, kiriwor alowae a Chikeron, kiporo emoru a Baala tanang Yaminia, sodi tasalu ananam a Mediterenian, ana erai ekukuor alowae alo alo too. Tooma ngikukuorio ngulu kesi alomito ngitunga a ngawiyei a Yuda. Loger lokolong adungokinitor Ekapolon Akuj Yochua, apon epewae a akwap a Yuda nakinae Kaleb lokookeng a Yepune, loa ekitela a Yuda. Nakinae ngesi Eburon, ere a Ariba alo arai apakeng a Anak. Kirita Kaleb ngalesea a Anak alore. Kirita emachar a Chechai, ka Aiman ta Talimai. Tonyou kaneni tolot akirem ngitunga a Debir. (anyaritae kolong ere ngolo Kirias Seper.) Tolim Kaleb tama, “Itwaan nicha eremi ere a Kirias Seper ainakini ayong nakookang Akisa sodi kiut.” Abu Osiniel lokookeng a Kenas alo arai lokaatokeng a Kaleb, torem ere sodi nak Kaleb ngesi nakookeng kiuut. Akolongit na akuuta, abu Osiniel kimaima Akisa atamar kilip apakeng amana. Sodi todoku ngesi alosikiria keng, kingit Kaleb ngesi ibore ni asaki. Tatachu ngesi tama, “Asaki apiaro, nakinae ngabwelin a ngakipi. Kiinakinit iyong ayong akwap nakoonon.” Sodi nak Kaleb ngesi ngileleae lu ayakasi lowaitin lua alokuju ka kwap. Akwap naga ngesi na ariamunete ngitunga a ekitela a Yuda toliwor akech. Ngirerea lu araakasi ngikech alowae alo alokuju, lu ayakasi diyete ekukuor a Edom kesi lu anyaritae Kabiseel, ka Eder, ka Yagur, ka Kina, ka Dimona, ka Adada, ka Kedech, ka Asor, ka Isinan, ka Sip, ka Telem, ka Beolos, ka Asor Adata, ka Kerios Esiron (kori Asor), ka Amam, ka Chema, ka Molada, ka Asar Gada, ka Echimon, ka Besipelet, ka Asar Chual, ka Beer-cheba, ka Bisiosia, ka Baala, ka Iyimu, ka Esem, ka Elitolad, ka Kesil, ka Orima, ka Sikilag, ka Madimana, ka Sanisana, ka Lebaos, ka Chiliim, ka Ain, ta Rimon. Araakasi ngirerea ngulu daang ngitomwon-arei ka ngikan-koomwon, imorikina aapei ka ngadakarin na edunyatar. Ngirerea lu ayakasi naukon kesi lu anyaritae Echitaol, ka Sora, ka Achina, ka Sanoa, ka Enganim, ka Tapua, ka Enam, ka Yarimus, ka Adulam, ka Soko, ka Aseka, ka Chaaraim, ka Adisaim, ka Gedera, ka Gederosaim. Araakasi ngirerea ngulu daang ngitomon ka nguomwon imorikina ka ngadakarin na edunyatar. Ngirerea nabo ngiche kesi lu enyaritae Senani, ka Adacha, ka Migidaligad, ka Dilan, ka Misipa, ka Yokiseel, ka Lakich, ka Bosikas, ka Egilon, ka Kabon, ka Lamas, ka Kisilich, ka Gederos, ka Besidagon, ka Naama, ta Makeda. Araakasi ngirerea ngulu daang ngitomon ka ngikan-kapei, imorikina aapei ka ngadakarin na edunyatar. Ngirerea nabo ngiche kesi lu enyaritae Libina, ka Eseri, ka Achan, ka Ipita, ka Achina, ka Neseb, ka Keila, ka Kesibu, ta Marecha. Araakasi ngirerea ngulu daang ngikan-koomwon imorikina aapei ka ngadakarin na edunyatar. Apon kesi nakinae tani Ekiron ka ngirerea keng ta ngadakarin keng. Ayakasi ngirerea daang lu alodiyete Achidod, napei ani a Ekiron tanang nanam a Mediterenian. Ayakasi Achidod, ka Gasa, ta ngirerea kech ka ngadakarin na enangito nayanae na eyei lokukuoru a Misiri, ta ekwaas a anam a Mediterenian. Ani anakwap ana ngimukur, ayakasi ngirerea lu enyaritae Chamir, ka Yatir, ka Soko, ka Dana, ka Kirias Seper (kori Debir), ka Anab, ka Echitemos, ka Anim, ka Gochen, ka Olon, ta Gilo. Araakasi ngirerea ngulu daang ngitomon ka epei, imorikina aapei ka ngadakarin na edunyatar. Ayakasi Arab ka Duma, ka Echan, ka Yanim, ka Bes Tapua, ka Apeka, ka Umuta, ka Eburon, ta Sior. Araakasi ngirerea ngulu daang ngikan-koomwon, imorikina aapei ka ngadakarin na edunyatar. Ayakasi Maon, ka Karimel, ka Sipu, ka Yuta, ka Yesireel, ka Yokideam, ka Sanoa, ka Kain, ka Gibea, ka Timuna. Araakasi ngirerea ngulu daang ngitomon, imorikina aapei ka ngadakarin na edunyatar. Ayakasi Aliul, ka Besisur, ka Gedor, ka Maaras, ka Besanos ta Elitekon. Araakasi ngirerea ngulu daang ngikan-kapei, imorikina aapei ka ngadakarin na edunyatar. Ayakasi Kirias Baal (kori Kirias Yearim), ta Raba. Araakasi ngirerea ngulu ngiarei, imorikina aapei ka ngadakarin na edunyatar. Ani anariet, ayakasi Bes Araba, ka Midin, ka Sekeka, ka Nibichan, ka ere a Amakat, ta Engedi. Araakasi ngirerea ngulu dang ngikan-kapei imorikina aapei ngadakarin na edunyatar. Nakaneni peapedorete ngitunga a Yuda akiritar Ngiebus lu alomito Yerusalem. Eringa Ngiebus elomito neni ka ngitunga a Yuda. Ekukuor a akwap ana atiakakinio ngalesea a Yosep alowae alo alokuju, esiakini alo Yorudan ana eyei diyete Yeriko, ana eyei kide ngileleae a Yeriko, toten nariet. Esiakini alo Yeriko kiriwor toten nakwap a ngimukur tanang Besel. Kisiak alo Besel, tanang Lus, kipor tanang Ataros Adar ni alomito Ngiarak. Kinapar too tanang nakwap a Ngiyapilet, alowae alo alokwap Bes-oron. Kisiak kaneni tanang Geser, tasalu ananam a Mediterenian. Apot ngitela a Yosep lu araakasi ngitela a Epiraim ka Too Manase nakinae akwap toliwor akech. Naga ngesi arai akwap a ngitunga a Epiraim. Esiakini ekukuor a akwap kech alo Ataros Adar kiriwor kide tanang kuju Bes-oron, kinapar tanang nanam a Mediterenian. Ebakit Mikimesas alokwap. Alo kide keng, torii ekukuor toten Taanas Chilo, kiporo alo kide tanang Yanoa. Sodi kisiak alo Yanoa tanang Ataros ka Naara, tanang tani Yeriko, sodi tasalu alo Yorudan. Kiriwor ekukuor too alo Tapua tanang nayanae a Kana, tasalu ananam a Mediterenian. Akwap ngina ngesi atiakakinio ngitunga a ekitela a Epiraim toliwor akech, imorikinio aapei ka ngadakarin na ayakasi nakwap a Manase, taraakas ngaka ngitunga a Epiraim. Apot kesi nyiitwarakis Ngikanaan lu alomito Geser. Eringa Ngikanaan elomito wapei ka ngitunga a Epiraim tani tokona. Apon kesi kidesikinae akisub etich loger a ngikedalak. Epewae akwap na ayei too Yorudan ngesi apon totiakakinae ngitunga a Manase alo arai lokookeng a Yosep lo ekingaren. Apakeng a Gilead lo anyaritae Makiri ngesi arai lokookeng a Manase lo ekingaren nabo arai lo ajwono noi anajorei. Apon nakinae ngesi ngirerea a Gilead ka Bachan lu ayakasi kide Yorudan. Akwap na ayei too Yorudan ngesi apon totiakakinae ngitunga luche a Manase lu anyaritae Abieser ka Elek, ka Asiriel, ka Chekem, ka Eper, ta Chemida. Lugu kesi araakasi ngide lusapa a Manase alo arai lokookeng a Yosep, nabo kesi araakasi ngikapolok a ngawiyei. Nakaneni Selopead lo arai lokookeng a Eper, alo arai lokookeng a Gilead, alo arai lokookeng a Makiri, alo arai lokookeng a Manase, amam ngide lusapa. Ayakasi ngesi ngide lupesur make. Ngirora kech kesi ta Maala, ka Noa, ka Ogila, ka Milika ta Tirisa. Toloto kesi nia Eleasar alo arai emuron a Akuj, ka Yochua lokookeng a Nun ta ngikarikok luche tamasi, “Adungokini kolong Ekapolon Akuj Musa ainakin sua ka ngiyenet kosi lukiliok akwap epewae toliwor akosi.” Apon kesi ka ngiyenet kech lukiliok nakinae akwap loger lokolong adungunitor Ekapolon Akuj. Abu Manase toriam ngatiaket ngatomon kimorik aapei ka Gilead ta Bachan lu ayakasi kide Yorudan, kainyo atiakakinitae ngide keng lusapa ka lupesur akwap. Apon akwap a Gilead totiakakinae ngide luche a Manase. Esiakini akwap a Manase alo Acher tanang Mikimesas na eyei kide Chekem. Kinapar ekukuor kuju tanang lotunga a Enitapua. Arai akwap na ayei diyete Tapua aka Manase, nakaneni ani ere a Tapua lo ayei lokukuoru, arai eka ngalesea a Epiraim. Sodi tanang ekukuor nayanae a Kana. Araakasi ngirerea lu ayakasi kuju ayanae Epiraim, tani kerai nakwap a Manase ayakasi. Kiriwor ekukuor a Manase alowae alo alokwap ayanae tasalu ananam a Mediterenian. Ayei Epiraim lowae loa lokuju, toyei Manase lowae loa lokwap. Arai anam a Mediterenian ekukuor kech alowae alo alo too. Ayei Acher kwap too, toyei Isakar kwap kide. Anakwapea a Isakar ka Acher, alemarit Manase Bes-chan ka Ibileam, imorikina aapei ka ngadakarin na edunyatar, ta nabo Dor (lo eyei lokwaas a anam), ka Endor, ka Taanak ta Megido, imorikina aapei ka ngadakarin na edunyatar. Nakaneni peapedorete ngitunga a Manase akiritar ngitunga lu alomito lorerea ngulu, aloger kangolo, apot Ngikanaan kiboikinos neni. Tani na aanyuneta Ngisirael agogongu, apot nyiitwarakis Ngikanaan, nakaneni kidesikis kesi akisub etich kech. Apot ngalesea a Yosep tolimokis Yochua tamasi, “Nyo bo kiinakinitor iyong sua epewae a akwap ana erai akosi. Tarai kilalak sua ani kipiaritor Ekapolon Akuj.” Tatachak Yochua tama, “Ani kilalak esi, kiditeikinit akwap na ngimukur, toloto robo nakwap a Ngiperes ka Ngirepaim toyapasi amoni kitiliwosi akus.” Tatachut kesi tamasi, “Edit akwap na ngimukur, nyikitemokin sua, nakaneni Ngikanaan lua ngaroatin eyakasi ngaurukukui na irito ngangolei, aapei ka lu eyakasi Bes-chan ka ngadakarin na idunyatar ta lu eyakasi nadipo a Yesireel.” Tolimok Yochua ngitela a Epiraim ka lua Too Manase tama, “Ilalak esi dir, nabo igogong noi. Ianyunete esi atiaket ache nabo. Eliwor akwap na ngimukur akus. Tani kerai amoni, iyaparete esi sodi toliwor daang akus napei alowae a epei tanang loche. Ani Ngikanaan, itwarakinete esi kesi tani keyakasi ngaurukukui na irito ngangolei, nabo taraakas lu egogong.” Ani elemarete Ngisirael akwap, apot daang kiriamariama Chilo sodi todukokis eam a Akuj. Ayakasi ngitela ngikan-kaarei a Ngisirael lu aringa nyetiakakina akwap. Sodi tolimok Yochua Ngisirael tama, “Nyooni eringa esi idarito alosit tolemasi akwap nakiinak esi Ekapolon Akuj na erai Akuj ka taapaakus. Asaki ayong toseunae ngitunga nguuni alokitela a epei, alotela kadaang. Ameari ayong kesi wadaang a akwap kisemoto akwap, sodi toseut ni esakete kesi alemar. Ani erumor tobongut ni ayei ayong. Etiakakinio kesi akwap ngatiaket ngakan-kaarei. Elomi Yuda lowae loa lokuju, sodi tolom Yosep lowae loa lokwap. Kigira eger a ngatiaket anakan-kaarei kanguna kiinut ayong. Sodi ataram ayong ekura ataanyunea ngakiro kus na esaki Ekapolon Akuj na erai Akuj yok. Nakaneni nyeriamunete ngitunga a ekitela a Lawi akwap ka esi aapei kainyo ibore ni erai ikech ngesi akisub etich a Ekapolon Akuj eraakasi ngimurok a Akuj. Nabo ekitela a Gad ka loa Reuben ta loa Kide Manase, aanyut kolong akwap kech alo kide Yorudan, nakolong atiakakini kesi Musa, ekasuban etich a Ekapolon Akuj.” Sodi apot ngitunga ngulu toloto akigeronokin akwap sodi kigira ni ikoni, arumoret a Yochua alimokin kesi ebala, “Kapesi wadaang a akwap kigerokis, sodi tobongut ni ayei ayong. Ani erumor kataramak ayong esi ekura kane alo Chilo ataanyunea ngakiro kus na esaki Ekapolon Akuj.” Apot ngitunga ngulu toloto wadaang a akwap sodi kigira eger lo atiaketa kesi akwap ngatiaket ngakan-kaarei, nabo kigira ngirora a ngirerea. Sodi tobongosi kesi nia Yochua anadakar ana ayei Chilo. Taram Yochua ekura taanyunea ngakiro na esaki Ekapolon Akuj anikech. Ngitela a Ngisirael daang lu edongito, abu ngesi totiakanak a ngapeipei akwap epewae. Akwap a ngitunga a ekitela a Benjamen ngesi epotorio ekingaren. Ayei akwap kech kiding ngitela a Yuda ka Yosep. Alokwap, esiakinit ekukuor kech alo Yorudan, kiriwor tanang nakokoriyoret na eyei kwap Yeriko. Ani alowae alo alo too, kitor nakwap na ngimukur, tanang nariet a Betapen. Tanang ekukuor nakokoriyoret alowae alo alokuju ani enyaritae Lus (ni anyaritae a eche kiro Besel), sodi totiyaar kwap tanang Ataros Adar, alomoru alo eyei kuju ekienyikina ka Bes-oron. Torei ekukuor napei alo too emoru kiriwor kuju tanang Kirias Baal (kori Kirias Yearim), na erai eka ekitela a Yuda. Ngolo ngesi erai ekukuor alo too. Isiakini ekukuor loa lokuju alokeli a Kirias Yearim, sodi tolot tanang lolelea a Nepitoa. Tolot tanang nakeju a emoru alo erounit adipo a Inom, alowae alo alokwap esalunea anam a Repaim. Sodi tolot kuju kitor nadipo a Inom, alowae alo alokuju ekeku a Ngiebus, lowae lo etenere Enirogel. Torei kwap tanang Enichemech, sodi kiporo tanang Gelilos na ekienyikina ka apak a Adumim. Tolot ekukuor jik tanang namoru a Boan (arai Boan lokookeng a Reuben). Sodi kitor kwap ekeku lo erounit adipo a Yorudan sodi toloma nadipo. Kitor kwap apak a Bes Ogila tasalu anaremiet ana eyei kwap anam a Amakat, ni eremio angolol a Yorudan anam ngina. Ngolo ngesi arai ekukuor loa alokuju. Yorudan ngesi arai ekukuor loa lokide. Ngikukuorin a akwap ana atiakinitae ngitunga a ekitela a Benjamen toliworos ngikech kesi ngulu. Ngirerea lu araakasi ngika ngitunga a ekitela a Benjamen kesi lu enyaritae Yeriko, ka Bes Ogila, ka Emek Kesis, ka Bes Araba, ka Semaraim, ka Besel, ka Apim, ka Para, ka Opira, ka Keparamon, ka Opini, ta Geba. Araakasi ngirerea ngulu ngitomon ka ngiarei imorikina aapei ka ngadakarin na edunyatar. Ngirerea nabo ngiche kesi lu enyaritae Gibeon, ka Rama, ka Beeros, ka Misipa, ka Kepira, ka Mosa, ka Rekem, ka Irepeel, ka Tarala, ka Sela, ka Aelap, ka Yebus (kori Yerusalem), ka Gibea ta Kirias Yearim. Araakasi ngirerea ngulu daang ngitomon ka nguomwon, imorikina aapei ka ngadakarin na edunyatar. Akwap ngina ngesi atiakakinitae ngitunga a ekitela a Benjamen toliwor akech. Akwap na ngaarei ipotorio ngesi na atiakakinio ngitunga a ekitela a Simeon. Anangit akwap kech nakwap na atiakakinio ekitela a Yuda. Ngirerea a akwap kangina kesi ta Beer-cheba, ka Cheba, ka Molada, ka Asar Chual, ka Bala, ka Esem, ka Elitolad, ka Besul, ka Orima, ka Sikilag, ka Bes Marikabos, ka Asar Susa, ka Bes Lebaos ta Charuen. Araakasi ngirerea ngulu ngitomon ka nguuni imorikina aapei ka ngadakarin na idunyatar. Ngirerea nabo ngiche kesi lu enyaritae Ain, ka Rimon, ka Eseri, ta Achan. Araakasi ngirerea ngulu nguomwon, imorikina aapei ka ngadakarin na edunyatar. Emorikina kesi aapei ka ngadakarin na edunyatar ngirerea ngulu tanang Baalas Beer (kori Rama), lo eyei Negeb. Akwap ngina ngesi atiakakinitae ngitunga a ekitela a Simeon, toliwor akech. Ani kona apoloo akwap na atiakakinitae Yuda noi, apon akwap epewae totiakakinae ekitela a Simeon. Akwap na ngauni ipotorio ngesi na atiakakinio ngitunga a ekitela a Sebulun. Anangit akwap na atiakakinio kesi Sarid. Napei kaneni, tolot ekukuor too tanang Mareal, kiriama ka Dabeches, ta ayanae na eyei kide Yokineam. Alowae aloche a Sarid, abu kinapar kide tanang Kisilos Tabor, sodi kipor Daberas tanang Yapia. Tolot kide napei alo Gas Eper ka Esikasin, torei lowae a Nea lo eyei lorot lo etenere Rimon. Alokwap, torei ekukuor alowae a Anason, tasalu anadipo a Ipitael. Ngirerea lu ayakasi nakwap ngina kesi lu enyaritae Kata, ka Naalal, ka Chimuron, ka Idala, ta Betleem. Araakasi ngirerea ngulu ngitomon ka ngiarei, imorikina aapei ka ngadakarin na edunyatar. Ayakasi ngirerea ngulu ka ngadakarin kech nakwap na atiakakinitae ngitunga a ekitela a Sebulun toliwor akech. Akwap na ngoomwon ipotorio ngesi ngitunga a ekitela a Isakar. Arai akwap ngina na ngirerea alu enyaritae Yesireel, ka Kesulos, ka Chunem, ka Aparaim, ka Chion, ka Anaaras, ka Rabis, ka Kichion, ka Ebes, ka Remes, ka Enganim, ka Eniada, ta Bespases. Eriamito ekukuor tani ka Tabor, ka Chaasuma, ta Bes Chemech, tasalu alo Yorudan. Araakasi ngirerea ngulu daang ngitomon ka ngikan-kapei, imorikina aapei ka ngadakarin na edunyatar. Ayakasi ngirerea ngulu ka ngadakarin kech nakwap na atiakakinitae ngitunga a ekitela a Isakar toliwor akech. Akwap na ngakan ipotorio ngesi na ngitunga a ekitela a Acher. Arai akwap ngina na ngirerea alu enyaritae Elikas, ka Ali, ka Beten, ka Akichap, ka Alam Melek, ka Amad, ta Michal. Ani alo too, eriamito ka Karimel ta Chior Libinas. Torei ekukuor kide tanang Besidagon, kiriama ka Sebulun ta adipo a Ipitael inapara kwap tanang Besemek ka Neyel. Kiriwor kwap tanang Kabul, ka Eburon, ka Reob, ka Amon, ka Kana, tanang Sidon. Torei ekukuor kinapar Rama, tanang lore a Tiro lo edukitoe awas. Sodi torei lowae a Osa, tasalu ananam a Mediterenian. Araakasi ngirerea keng ta Maalab, ka Akisib, ka Uma, ka Apek ta Reob. Araakasi ngirerea ngulu ngitomwon-arei ka ngiarei imorikina aapei ngadakarin na edunyatar. Ayakasi ngirerea ngulu ka ngadakarin kech nakwap na atiakakinio ngitunga a ekitela a Acher toliwor akech. Akwap na ngakan-kapei ipotorio ngesi na atiakakinio ngitunga a ekitela a Naputal. Esiakinit ekukuor keng alo Elep tanang lochoke lo eyei ni enyaritae Saananim, kinapar tanang Adaminekeb ta Yaminia, toeka tanang Lakum tasalu alo Yorudan. Torei ekukuor too tanang Asinos Tabor, kiriwor lowae loa Ukok, kiriama ka Sebulun alowae alo alokuju, ka Acher alowae alo alo too, ta Yorudan alowae alo alo kide. Ngirerea lu adukitoe ngawasea kesi Sidim, ka Ser, ka Amas, ka Rakas, ka Kineres, ka Adama, ka Rama, ka Asor, ka Kedech, ka Edirei, ka Eniasor, ka Yiron, ka Migidalel, ka Orem, ka Besanas, ta Bes Chemech. Araakasi ngirerea ngulu ngitomon ka ngikan-koomwon, imorikina aapei ka ngadakarin na edunyatar. Ayakasi ngirerea ngulu ka ngadakarin kech nakwap na atiakakinio ngitunga a ekitela a Naputal toliwor akech. Akwap na ngakan-kaarei ipotorio ngesi na atiakakinio ngitunga a ekitela a Dan. Arai akwap ngina ngirerea alu enyaritae Sora, ka Echitaol, ka Irichemech, ka Chaalibim, ka Aijalon, ka Isila, ka Elon, ka Timuna, ka Ekiron, ka Eliteke, ka Gibeson, ka Baalas, ka Yeud, ka Beneberak, ka Gasirimon, ka Mejarikon ta Rakon, imorikina aapei ka ngadakarin na edunyatar Yopa. Ani edidingikini ngitunga a Dan akwap kech, toloto kesi toremo Laich. Taara ngitunga kaneni todemasi akwap kitiliwosi akech. Toloma kesi neni kilocho ekiro be Laich kitiliwosi Dan, tolimokis ekiro a apakech alo enyaritae Dan. Ayakasi ngirerea ngulu ka ngadakarin kech nakwap na atiakakinio ngitunga a ekitela a Dan, toliwor akech. Ani erumorete Ngisirael atiakatiak akwap, apot nakis Yochua lokookeng a Nun akwap epewae toliwor akeng. Loger lokolong adungunitor Ekapolon Akuj, apot nakis ngesi ere lo asakit ngesi lo enyaritae Timunas Sera, anakwap ana ngimukur a Epiraim. Toduka ngesi ere ngolo sodi tolom neni. Apot Eleasar lo arai emuron a Akuj ka Yochua lokookeng a Nun, ta ngikapolok a ngawiyei a ngitela a Ngisirael, totiakatiakata akwap kotere akiram ekura alo Chilo, alokidor a eam a Akuj, taanyuneta ngakiro na esaki Ekapolon Akuj. Aloger kangolo, apot kesi torumosi akitiak akwap. Sodi tolimok Ekapolon Akuj Yochua atamar tolimok Ngisirael tama, “Toseutu ngirerea lu eyuunotor ngitunga, lukolong adungokini ayong Musa atamar kitolimok esi. Itwaan ni eari itwaan niche peiyechakinit, tolot inaa topuun anitwaan ani esaki atachakin akitu a itwaan ani earitae. Epedori ngesi adokin tolot ni eyei epei a ngirerea kangulu, sodi tolot ni elomanarere lokidor a ere, tolimok ngikapolok a ere ngakiro na asubasi. Nakaneni ilomakinete kesi ngesi lore kidodikis ni elomi. Ani kiwapak ngesi itwaan ni esaki atachakin akitu a itwaan ani earitae tanang neni, nyiipotokis ngitunga a ere kangolo itwaan ngini, torikokis itwaan ni iwapit. Echamit iyokiyete ngesi kainyo peeyachakini ngesi akiar itwaan kori peangoit. Iboikin ngesi lore ngolo tanang ititao alongaren ngitunga, nabo tanang atoanet emuron loapolon a Akuj, alo a ngirwa kangulu. Ani erumor tobongo itwaan ngini lore lo eyei awi keng, nikolong arotokinio.” Alo too Yorudan, apon toseunae ere a Kedech lo eyei Galilaya, anakwap ana ngimukur a Naputal, ka Chekem anakwap ana ngimukur a Epiraim, ta Eburon anakwap ana ngimukur a Yuda. Alo kide Yorudan, apon toseunae ere a Beser loa akwap a Reuben, lo eyei lomuria a ariet ana eyei kide Yeriko, ka Ramos alo Gilead, ni eyei akwap a Gad, ka Golan alo Bachan, ni eyei akwap a Manase. Ngirerea ngulu kesi lu aseunio toyuunotor Ngisirael ka itwaan cha daang a akwap a ache ni arukito ka kesi. Itwaan ni aari itwaan niche peiyechakinit, apedori ayuun kaina, kilany itwaan ni asaki atachakin akitu a itwaan ani earitae. Peapedorio akiar ngesi mati mono kititae alongaren ngitunga daang. Apot ngikapolok a ngitunga a ekitela a Lawi toloto nia Eleasar alo arai emuron a Akuj, ka Yochua lokookeng a Nun, ta ngikapolok a ngawiyei a ngitela a Ngisirael kadaang. Sodi tolimokis kesi alo Chilo, alo arai ere a akwap a Kanaan tamasi, “Adunguni kolong Ekapolon Akuj ani a Musa atamar kiinakin sua ngirerea lu kilomi, ka akwap na idunyatar ngirerea ngulu na kiyoki sua ngibaren kosi.” Aloger alo adungunitor Ekapolon Akuj, apot Ngisirael totiakut anakwap kech ngirerea epewae ka ni iyokiyo ngibaren sodi nakis ngitunga a ekitela a Lawi. Ngitunga a ekitela a Lawi lu araakasi ngika emachar a Koas, kesi esiaunio totiakakinae ngirerea. Ngitunga lu araakasi ngalesea a Aron, alo arai emuron a Akuj, kesi apon totiakakinae ngirerea ngitomon ka nguuni anakwapea a Yuda ka Simeon ta Benjamen. Ngitunga luche a emachar a Koas, kesi apon totiakakinae ngirerea ngitomon anakwap a Epiraim ka Dan ta Too Manase. Apon totiakakinae emachar a Gerichon ngirerea ngitomon ka nguuni anakwapea a Isakar, ka Acher, ka Naputal ta kide Manase. Apon totiakakinae ngitunga a emachar a Merari ngirerea ngitomon ka ngiarei anakwapea a Reuben, ka Gad ta Sebulun. Apot Ngisirael totiakakis ngitunga a ekitela a Lawi ngirerea ngulu ka ni iyokiyo ngibaren. Apot tosuba kongina kotere akiram ekura lokolong adungunitor Ekapolon Akuj kisitoru nia Musa. Lugu kesi eraakasi ngirora a ngirerea a ngakwapea a Yuda ka Simeon, lu ainakinio ngalesea a Aron na araakasi ngaka emachar a Koas, alo erai eka Lawi. Akwap kech ngesi engareni etiakunio. Apon kesi nakinae ere enyaritae Ariba (arai Ariba apakeng a Anak). Enyaritae tokona ere ngolo Eburon. Eyei ere ngolo nakwap na ngimukur a Yuda, imorikina aapei ka akwap na idunyatar na iyokiyo ngibaren. Nakaneni atiakakinitae sek Kaleb lokookeng a Yepune ngamanat a ere kangolo ka ngadakarin toliworos ngakeng. Apon Aron lo arai emuron a Akuj totiakakinae Eburon (lo arai epei a ngirerea alu eyuunotor ngitunga), kiatakin lorerea lu enyaritae Libina, ka Yatir, ka Echitemoa, ka Olon, ka Debir, ka Ain, ka Yuta ta Bes Chemech, imorikina aapei ka ni iyokiyo ngibaren. Araakasi daang ngirerea ngikan-koomwon ipotorio alotela a Yuda ka Simeon. Apon ngalesea a Aron totiakakinae ngirerea nguomwon anakwap a Benjamen. Ngirora a ngirerea kangulu kesi Gibeon, ka Geba, ka Anasos ta Alimon, imorikina aapei ka ni iyokiyo ngibaren. Ngirerea ngulu daang atiakakinio ngimurok a Akuj lu araakasi ngalesea a Aron. Araakasi ngirerea daang ngitomon ka nguuni, imorikina aapei ka ni iyokiyo ngibaren. Ngitunga luche a ekitela a Lawi lu araakasi ngika emachar a Koas kesi apon totiakakinae ngirerea ngiche anakwap a Epiraim. Atiakakinitae ngirerea nguomwon lu anyaritae Chekem ka akwap keng na iyokiyo ngibaren anakwap ana ngimukur a Epiraim (arai epei a ngirerea alu ayuunotor ngitunga), ka Geser, ka Kibisaim ta Bes-oron, imorikina aapei ka ni iyokiyo ngibaren. Apon kesi nakinae ngirerea nguomwon anakwap a Dan. Ngirora a ngirerea kangulu kesi Eliteke, ka Gibeson, ka Aijalon ta Gasirimon, imorikina aapei ka ni iyokiyo ngibaren. Apon kesi totiakakinae ngirerea ngiarei anakwap a too Manase. Ngirora a ngirerea kangulu kesi Taanak ta Gasirimon imorikina aapei ka ni iyokiyo ngibaren. Apon ngitunga lua emachar a Koas ngulu totiakakinae ngirerea ngitomon, imorikina aapei ka ni iyokiyo ngibaren. Apon totiakakinae ngitunga a ekitela a Lawi lu emachar a Gerichon ngirerea ngiarei anakwap a Kide Manase. Ngirora a ngirerea kangulu kesi Golan lo eyei Bachan (arai epei a ngirerea alu ayuunotor ngitunga) ta Beechitera, imorikina aapei ka ni iyokiyo ngibaren. Apon totiakakinae ngirerea nguomwon anakwap a Isakar. Ngirora a ngirerea kangulu kesi Kichion, ka Daberas, ka Yarimus ta Enganim, imorikina aapei ka ni iyokiyo ngibaren. Apon totiakakinae ngirerea nguomwon anakwap a Acher. Ngirora a ngirerea kangulu kesi Michal, ka Abidon, ka Elikas ta Reob, imorikina aapei ka ni iyokiyo ngibaren. Apon kesi totiakakinae ngirerea nguuni anakwap a Naputal. Ngirora a ngirerea kangulu kesi Kedech lo eyei Galilaya, imorikina aapei ka ni iyokiyo ngibaren (arai epei a ngirerea alu ayuunotor ngitunga), ka Amos Dor ta Karitan, imorikina aapei ka ni iyokiyo ngibaren. Araakasi ngirerea lu atiakakinitae ngitunga a emachar a Gerichon ngitomon ka nguuni imorikina aapei ka ni iyokiyo ngibaren. Apon ngitunga a ekitela a Lawi luche lu a emachar a Merari totiakakinae ngirerea nguomwon anakwap a Sebulun. Ngirora a ngirerea kangulu kesi Yokineam, ka Karita, ka Dimina ta Naalal, imorikina aapei ka ni iyokiyo ngibaren. Apon kesi totiakakinae ngirerea nguomwon anakwap a Reuben. Ngirora a ngirerea kangulu kesi Beser, ka Yaas, ka Kedemos ta Mapaas imorikina aapei ka ni iyokiyo ngibaren. Apon kesi totiakakinae ngirerea nguomwon anakwap a Gad. Ngirora a ngirerea kangulu kesi Ramos lo eyei Gilead, ka ni iyokiyo ngibaren (arai epei a ngirerea alu ayuunotor ngitunga), ka Maanaim, ka Echibon ta Yaser, imorikina aapei ka ni iyokiyo ngibaren. Nakaneni apon emachar a Merari totiakakinae ngirerea ngitomon ka ngiarei. Araakasi ngirerea a ngitunga a Lawi anakwap kadaang ana aliwor aka Ngisirael ngitomwon-omwon ka ngikan-kauni, imorikina aapei ka ni iyokiyo ngibaren. Ayakasi ngirerea ngulu daang ngiwaitin lu iyokiyo ngibaren. Abu Ekapolon Akuj nak Ngisirael akwap daang nakolong echikakinit ngesi taapaakech atamar ainakini. Ani elemarete kesi akwap ngina, apot toloma neni. Kitaanyu Ekapolon Akuj kesi ekisil anakwap kadaang, loger lokolong echikakinitor taapaakech. Emam ngimoe kech lo abu toweik kesi tani epei, kainyo apot Ngisirael kidwanga ngimoe kech daang kotere Ekapolon Akuj. Kiyook Ekapolon Akuj ngakichikakinet keng daang nakolong echikakinit Ngisirael. Abu Yochua tochunak ngitunga a ngitela a Reuben, ka Gad ta Kide Manase. Tolimok kesi tama, “Isuba esi ngakiro daang nakolong kidungokini Musa ekasuban etich a Ekapolon Akuj atamar tosuba, nabo irichakis ngakiro nakadungokinit ayong esi daang. Nyeisikina esi Ngisirael luche alochan napei kanuan jik. Ichoikis esi akiwap ngakiro nakidungok Ekapolon Akuj, na erai Akuj kus. Tokona, etaanyu Ekapolon Akuj na erai Akuj kus Ngisirael luche ekisil loger lokolong echikakinitor ngesi. Aloger kangolo, tobongosi nawi, nakwap nakolong kitiakakinio esi toliwor akus, nakwap na eyei kide Yorudan, nakolong kiinakini esi Musa, lo erai ekasuban etich a Ekapolon Akuj. Kirichakisi etal lokolong kidungokini Musa esi. Tominakisi Ekapolon Akuj na erai Akuj kus, tosuba ngakiro na esaki ngesi, kirichakisi ngitalio keng, toliworos ngitunga lu kimuno Akuj, tosuba etich keng a ngitai kus kadaang, ka akiyar kus daang.” Nakaneni topia Yochua kesi kimiek toloto. Apot kesi toloto nawiyei kech. Atiakakinit Musa ngitunga a ekitela a Manase epewae akwap alo Bachan, nakaneni ani ngitunga a ekitela a Manase luche, atiakakinit Yochua akwap aapei ka talokaatokech alowae alo alo too Yorudan. Ani elimokini Yochua kesi atamar toloto nawiyei kech, sodi topia kesi, tolimok kesi tama, “Tobongosi nawiyei kus ka ebari lotikaalan, ka ngaatuk nakaalak, ka ngasua nakwangae, ka egolit, ka ngasua nanyangayek, ka ngasua nakirionok ta ngiworui lukaalak. Tokora ka ngitunga kus luche ngiboro lu ingatarete alomoe kus.” Apot ngitunga a ngitela a Reuben ka Gad, ta Kide Manase tobongosi nawiyei. Toisikis kesi Ngisirael luche alo Chilo, anakwap a Kanaan, sodi toloto kesi nakwap a Gilead na arai akwap kech nakolong alemarete kesi loger lokolong echikakinitor Ekapolon Akuj kesi kisitoru nia Musa. Ani enangunete ngitela a Reuben ka Gad ta Kide Manase ni enyaritae Gelilos, ni erai too Yorudan, apot todukokis ekeno a ngakipeyos lotiapolon ajokon lokwaas a angolol. Apon tolimokinae Ngisirael luche tamarae, “Topupokisi! Adukokis ngitunga a ngitela a Reuben, ka Gad ta Kide Manase ekeno a ngakipeyos Gelilos, lowae a Yorudan lo erai eyok!” Ani iirarete Ngisirael ngakiro nguna, apot ngitunga daang tochunakin Chilo alosit akitijwore ngitela lua akide. Sodi tomeasi Ngisirael Pineas lokookeng a Eleasar alo arai emuron a Akuj, sodi tolot lotunga a ngitela a Reuben, ka Gad ta Kide Manase anakwap a Gilead. Apot ngikapolok ngitomon kirukosi ka Pineas, epei eweikinit ekitela epei alotela alu ayakasi too, nabo ayakasi ngikapolok lu araakasi ngika ngimacharin, eweikinit epei emachar epei. Tanangut kesi nakwap a Gilead lotunga a Reuben, ka Gad, ta Kide Manase, kisuruorikis kesi ngitunga a Ekapolon Akuj daang tamasi, “Kotere nyo isubeta esi Akuj a Isirael ngakiro naaronok nugu? Ingero esi Ekapolon Akuj ani idukioto ekeno lo a ngakipeyos logo kitiliwosi ekus! Nyeringa esi iwapito ngesi! Kitamutu akisech nakolong kisubi ngoni alo Peor, na eriraa Akuj ngitunga keng a ngidekesinei aluaronok. Eringa ngoni kichana kotere ngakiro nguna. Nyitemokino kolong akisech ngina? Ingerete tokona esi akiwap ngesi a? Ani kingero esi Ekapolon Akuj akolongit naga, engoikini moi ngesi Ngisirael daang. Aloger kangolo, ani pekitemokino akwap kus ilipeenere, potu nakwap a Ekapolon Akuj, ni eyei eam keng. Tolemasi akwap nakosi epewae. Nakaneni nyiingero Ekapolon Akuj kori nyikitiliwosi sua ngitunga lu engerito Ekapolon Akuj ani idukioto ekeno a ngakipeyos toyei ekeno a ngakipeyos a Ekapolon Akuj ana erai Akuj yok. Kitamutu eger lokolong awounea Akani lokookeng a Sera akirichakin ngakiro na adungokinitae aloboro alu achamit inyasunio. Apon kirirae Ngisirael daang kotere ngakiro nguna. Meere Akani bon atoani kotere akisech keng.” Apot ngitunga a ngitela a Reuben ka Gad ta Kide Manase tatachakis ngikapolok a ngitunga a ngitela a atoo tamasi, “Akuj ngesi erai Namerikanyer! Ngesi erai Ekapolon Akuj! Akuj ngesi erai Namerikanyer! Ngesi erai Ekapolon Akuj! Eyeni ngesi atamar anukiro kisubea sua kona, nabo kisaki tani esi toyena! Ani kingerit sua Ekapolon Akuj, sodi atosuba ngakiro na nyeraakasi ngaka iteni anikeng, nyikimiekis sua kiyari nabo jik! Ani kingerit sua Ekapolon Akuj sodi atoduko ekeno a ngakipeyos kosi a ngikulepek, kori toliwor eka ngakipeyos a ngalemet ka ngakipeyos a ekisil, kimiekisi Ekapolon Akuj alope kirira sua. Meere kongina! Kisubi sua kongina kainyo kiemi kitamit atamar epote moi ngalesea kus tolimokis ngalesea kosi tamasi, ‘Nyo kus Ekapolon Akuj na erai Akuj a Isirael? Ewaakini ngesi angolol Yorudan kitotiak sua ka esi ngitunga a Reuben ka Gad. Meere esi ngitunga a Ekapolon Akuj.’ Nakaneni epedorete ngalesea kus kitapalikis ngalesea kosi akilip Ekapolon Akuj. Kipot sua atoduko ekeno, meere loa ngakipeyos kori loa ngalemunet. Nakaneni erai akidodiunet a ngitunga kosi ka lukus, ka ngalesea yok nakisidiun ngoni. Kidodiu atamar kilipit ngoni Ekapolon Akuj iteni aloeam keng a ngakipeyos yok ana inomio, ka ngakipeyos a ngibaren ta ngakipeyos a ekisil. Kisubi sua kona nyeetamareta ngalesea kus nyeyenete ngalesea kosi Ekapolon Akuj. Kitamit sua atamar ani kisubak kona, etamarete ngalesea kosi, ‘Kingolikisi! Asubakinete kolong taapaakosi ekeno a ngakipeyos lo ikwaan ka ekeno a ngakipeyos. Arai meere eka ngakipeyos ana inomio, kori ngakipeyos a ngibaren kori ngakipeyos a ekisil, nakaneni arai akidodiunet a ngitunga kosi ka lukus.’ Iteni nyikingeri sua Ekapolon Akuj kori nyikipalikini tokona sua akiwap ngesi kotere akiduk ekeno lo inomere ngakipeyos, kori lo ipeyoore ngalemet, kori ngakipeyos a ngibaren. Nyikiduki sua ekeno eche mati lo ipeyonokinere Ekapolon Akuj na erai Akuj yok. Ekeno ngolo ngesi lo eyei ngaren eam keng.” Apot Pineas lo arai emuron a Akuj ngikapolok a ngitunga lutomon lu arukito ka ngesi, ta ngikapolok a ngawiyei a ngitela a atoo, kiirasi ngakiro na alimunete ngitunga a ngitela a Reuben, ka Gad ta Kide Manase, sodi tojoikis ngakiro nguna kesi. Abu Pineas lokookeng a Eleasar, alo arai emuron a Akuj, tolimok kesi tama, “Kiyen tokon sua atamar kirukit ngoni ka Ekapolon Akuj. Eringa esi nyengero ngesi. Aloger kangolo, iyuut esi Ngisirael aloriras a Ekapolon Akuj.” Apot Pineas ka ngikapolok toisikis ngitunga a Reuben, ka Gad anakwap a Gilead. Toloto kesi tobongosi Kanaan ni ayakasi Ngisirael, sodi tolimokis Ngisirael ngakiro nguna. Tojoikis Ngisirael ngakiro nguna sodi kipuruut Akuj. Apot kesi nyiiruoro nabo ngakiro a alosit lojie esakete akinyasun akwap a ngitunga a Reuben ka Gad. Tolimut ngitunga a Reuben ka Gad tamasi, “Erai ekeno loa ngakipeyos logo itaanyuni ngitunga daang atamar Ekapolon Akuj ngesi erai Akuj.” Kotere ngakiro nguna, apon ekeno ngolo tolimokinae ekiro be “Ekaanyunan.” Ekisidi abu Ekapolon Akuj kiyok Ngisirael alomoe kech alu eriamito kesi. Ngirwa ngulu amojongit Yochua noi. Sodi tanyarau ngesi Ngisirael daang ka ngikasukou, ka ngikapolok, ka ngikatubok ngakiro ta ngikaweikinak a ngitunga, tolimok tama, “Amojong ayong tokona noi. Ingolikis esi ngakiro daang na asubea Ekapolon Akuj na erai Akuj kus ngibukui lugu daang kotere esi. Atiakak ayong ngitela kus ngakwapea a ngitela alu idongito, imorikina aapei ka ngibukui daang lu edwang ayong napei alo kide angolol a Yorudan tanang nanam a Mediterenian alo too. Iritari Ekapolon Akuj na erai Akuj kus kesi anikus, nabo itwarakini kesi toeakasi na ilooso esi ngaren. Ilemarete esi akwap kech loger lo kichikakinea esi Ekapolon Akuj na erai Akuj kus. Kirichakinos robo kiwapa ka akisub ngakiro daang na igiritae nakitab a etal a Musa. Nyiilagalagakis tani wadiochichi. Sodi nyiimorikinosi esi ka ngitunga lu idongito kiding kus lugu kori tolimuunut ngakujo kech, kori kikongo a ngirora a ngakujo kech, kori kilipa kesi, kori toriediko alongaren kech. Pearai toliworos esi lu kimuno Ekapolon Akuj loger lo isubeta tanang tokona. Itwarakini Ekapolon Akuj ngibukui lu eyenikinitae taraakas nabo lukajwok, itwarakini na ilooso esi ngaren. Emam tani epei kiweikini esi alojie. Epedori itwaan ipei anikus akiritar ngitunga abunget apei, kainyo Ekapolon Akuj na erai Akuj kus ngesi eji kotere esi, loger lokolong kichikakinea. Kirichakisi robo aminakin Ekapolon Akuj na erai Akuj kus. Ani kisecha esi kimorikinos ka ngibukui luche idongito kiding kus, sodi toliwor iutasi ka esi, toyena iteni dir atamar nyiritari Ekapolon Akuj na erai Akuj kus ngibukui lugu esaa lo ilooso esi ngaren. Pearai erokearosi kesi anikus kikokis eloit, kori akipany, nabo epipiler noi loger a akulit ana kirami kaku, kori kikok ngiikwa anakonyen kus. Epete ngakiro nugu jik tanang imunyarosi esi, nyiidong tani ipei nakwap naajokon naga, nakiinak esi Ekapolon Akuj na erai Akuj kus. “Anang tokona esaa kang lo adaunor. Iyenete esi daang alotai kus nabo anakiyar kus atamar kiinak Ekapolon Akuj ngakiro naajokak daang nakolong kichikakini. Eyookin ngakichikakinet daang nakolong alimuni ngesi. Emam tani apei na nyiyookino. Loger lokolong eyookinio ngakichikakinet naajokak daang, kongina pei tani naaronok daang na alimu ngesi atamar ayauni nikus. Ani pekirichakis esi achamunet nakolong kidungokini esi Ekapolon Akuj na erai Akuj kus atamar kirichakis, sodi kiwapa esi ka akilip ngakujo nache, engoi Ekapolon Akuj noi kirira esi. Ani napei ngina jik, emam tani ipei kus ni idongi nakwap naajokon nakiinak ngesi esi naga.” Abu Yochua tochunak ngitela a Ngisirael daang Chekem. Tanyara ngikasukou, ka ngikapolok, ka ngikatubok ngakiro ta ngikaweikinak a Ngisirael, sodi pot kesi ngaren Akuj. Tolimok Yochua ngitunga daang tama, “Ngakiro na esaki Ekapolon Akuj na erai Akuj kus alimun kesi nugu, ‘Kolong a angorot, alomito taapaakus ekwakaye angolol a Eupurate, nabo elipito ngakujo ngache. Epei ka taapaakus ngesi Tera, lo arai apakeng a Aburaam ka Naor. Sodi etonyou ayong apaakus Aburaam a ekwakaye angolol a Eupurate, atorik esitor kiding akwap a Kanaan daang. Ainak ayong ngesi ngalesea nakaalak. Ainak ayong ngesi Isaka. Ani Isaka, abu ainak Yakobo ka Esau. Ainak Esau akwap na ngimukur enyaritae Edom toliwor akeng, nakaneni ani apaakus Yakobo ka ngide keng, toloto Misiri. Ani ekisidi atomea Musa ka Aron, nakaneni ayau ayong ngichan luaronok nakwap a Misiri, sodi kepud esi alo Misiri. Epuduni ayong taapaakus alo Misiri, sodi kiwapa ngitunga a Misiri kesi a ngaurukukui ana irito ngangolei ka ngasigerea na adokito ngangolei. Na ananguneta taapaakus nanam a Chamu, apot kekaloikis ayong esakete akingarakino, sodi ewaak ayong aribu kiding kech ka ngitunga a Misiri. Etonyou ayong ngakipi a anam toburichiasi Ngimisiri daang totoaka. Iyenete esi ngakiro na asubea ayong Misiri. “ ‘Ibooyete kolong esi anariet nikooyen. Sodi kayau ayong esi nakwap a Ngiamor, alu elomito kide Yorudan. Kitijwoto kesi esi, nakaneni kotere ayong, ipot esi kidwanga kesi daang. Tolemasi esi akwap kech sodi atomunya ayong kesi iloose esi ngaren. Sodi kitiji esi ekapolon a Moab lo anyaritae Balak lokookeng a Sipor. Tomea ngesi akituk nia Balaam alo arai lokookeng a Beor atamar kilam ngesi esi. Nakaneni abu ayong nyaamisik ngakiro a Balaam. Abu ngesi kitopia esi toliwor erot ngolo kayuunea ayong esi ani a Balak. Todokasi esi ekwakaye Yorudan tananga Yeriko. Apot ngitunga a Yeriko kitijwoto esi loger lo kitijioto esi Ngiamor, ka Ngiperes, ka Ngikanaan, ka Ngiiti, ka Ngigirigach, ka Ngiipi ta Ngiebus. Nakaneni kotere ayong, ipot esi kidwanga kesi daang. Ani iloose esi ngaren, etubul ayong kesi sodi kitwarakinere ngikapolok luarei a Ngiamor. Meere kolong ngilengea kus asubete ngakiro nguna. Kainak ayong esi akwap na eringa nyitakina a ache, ka ngirerea lu aringa esi nyeduko. Ilomito tokona esi inaa inyamete ageor a ngimusabib alu nyitakina esi, inyamete akimiet a ngakito alu nyitakina esi.’ ” Torubak Yochua iruoro ebala, “Tokona bocha, tokera Ekapolon Akuj, tosuba etich keng a ajokis ka erot loa iteni. Tachakasi ngakujo nakolong elipito taapaakus alo Mesopotamia ka Misiri, sodi tosuba etich a Ekapolon Akuj. Ani pekisakete esi akisub etich keng, totiakutu akolongit naga atamar ngae isakete esi, ngakujo nakolong elipito taapaakus alo Mesopotamia, kori ngakujo a Ngiamor alu tokona ilomito esi nakwap kech. Ani eliwor ayong ka awi kang, kisubi sua etich a Ekapolon Akuj.” Tatachut ngitunga tamasi, “Nyikiisikini sua Ekapolon Akuj sodi atosuba etich a ngakujo a ngache! Ekapolon Akuj na erai Akuj yok ngesi kolong kipuduni ngoni ka taapaayok alo Misiri kirai ngikedalak, sodi engolikisi ngakitoodikinet nakailiilok na asubi ngesi. Kiyok ngesi ngoni awadaang anicha kitori alokiding ngibukui daang. Ani kiponi ngoni nakwap naga, kitwarak Ekapolon Akuj Ngiamor daang lu alomito nege. Kotere nguna, kisubi tani sua etich a Ekapolon Akuj ana erai Akuj kosi.” Tolimok Yochua ngitunga tama, “Nyipedorete esi akisub etich a Ekapolon Akuj. Erai ngesi Akuj na italeuno nakaneni nyikirimakini esi ngasechesea kus. Erai ngesi Akuj na esaki kilipae ngesi bon. Nakaneni ani kiisikis esi ngesi sodi tosuba etich a ngakujo anagelayek, kibilakin ngesi esi sodi kirira. Kimunyari ngesi esi tani kolong sek kejok ngesi anikus.” Tolimokis ngitunga Yochua tamasi, “Meere kongina! Kisubi sua etich a Ekapolon Akuj.” Tolimok Yochua kesi tama, “Esi ngikulepek iraakasi ngikaanyunak kus make atamar iseut esi akisub etich a Ekapolon Akuj.” Tamasi kesi, “Ee! Kirai sua ngikaanyunak.” Todung Yochua tama, “Tachakasi robo tokona ngakujo nagelayek na itingito esi, sodi toreikis ngitai kus nia Ekapolon Akuj ana erai Akuj a Isirael.” Sodi tolimokis ngitunga Yochua tamasi, “Kisubi sua etich a Ekapolon Akuj ana erai Akuj kosi. Kiwapi sua ngakiro na edungunit ngesi.” Sodi tachamakin Yochua ka ngitunga akolongit ngina, dio ainakin kesi ngitalio lu iwapete ani enyaritae Chekem. Kigir Yochua ngitalio ngulu nakitab a etal a Akuj. Sodi tolem ngesi amoru naapolon kitowo alokwap echoke alotooma akai a Akuj. Tolimok ngesi ngitunga daang tama, “Amoru naga eliwor akaanyunan yok. Eira ngesi ngakiro daang nakilimok Ekapolon Akuj ngoni. Ngesi eliwor akaanyunan kus nyiingerioto esi Akuj kus.” Sodi kieala Yochua ngitunga, tobongo itwaan daang nakwap keng. Arumoret kanguna, totoan Yochua lokookeng a Nun, lo arai ekasuban etich a Ekapolon Akuj. Atoani ngesi eraakasi ngikaru keng amiat apei ka ngitomon. Tonukakinae ngesi nakwap keng na enyaritae Timunas Sera. Eyei neni nakwap ngimukur a Epiraim, na eyei lowae lokwap emoru a Gaach. Ani eringa Yochua eyari, asubete Ngisirael etich a Ekapolon Akuj. Tani ketoana Yochua kerumor, apot kesi torubakis esubete etich a Ekapolon Akuj. Ekote kesi neni na ayareta ngikapolok lukolong eteete ngakiro daang na asubea Ekapolon Akuj Ngisirael. Apon akwaan a Yosep na ayaunete Ngisirael alo Misiri tonukakinae Chekem, nakwap nakolong agieli Yakobo ani a talokookeng a Amor, alo arai apakeng a Chekem, togiel a ngaropiyae a amiat a apei. Apot ngalesea a Yosep kiruma akwap ngina. Totoan Eleasar lokookeng a Aron sodi tonukakinae Gibea lo arai ere a akwap ana ngimukur a Epiraim. Ainakinitae sek lokookeng lo enyaritae Pineas akwap ngina. Na atoanea Yochua kerumor, apot Ngisirael kingita Ekapolon Akuj tamasi, “Ekitela ali anikosi ingarenikini torem Ngikanaan?” Tatachu Ekapolon Akuj tama, “Ekitela a Yuda ngesi ingarenikini. Ainak ayong kesi akwap.” Apot ngitunga a Yuda tolimokis ngitunga a Simeon tamasi, “Potu erukosi ka sua nakwap nakiinakin sua, sodi etijwoto Ngikanaan aapei. Ani erumor erukosi nabo nakwap nakiinakin esi.” Apot ngitela a Simeon ka Yuda kirukosi lojie aapei. Abu Ekapolon Akuj nak kesi agogongu na idwangeta Ngikanaan, ka Ngiperes, kidwanga ngikiliok ngabunge ngatomon alo Besek. Toriamut kesi Adonibesek kaneni sodi kitijikis. Tamatar ngesi nakaneni apot kesi kiritasi ngesi, sodi kirumut totubosi ngimoyo luapolok a ngakan ka lua ngakejen. Tolim Adonibesek tama, “Ngikapolok ngitomwon-kaarei lu atuboritae ngimoyo kech luapolok lua ngakan ka lua ngakejen edepete akimuj alokwap emeesa kang. Kasubakinea tokona Akuj ayong ngakiro nakolong asubea ayong kesi.” Apon ngesi yaarae Yerusalem, totoan kaina. Apot ngitunga a Yuda kitijikis Yerusalem ka alemar ere ngolo. Taara kesi ngitunga a ere kangolo daang, kichunyakis ere akim. Ani erumor toloto kesi kitijikis Ngikanaan lu ebooyete anakwap ana a ngimukur, ka naukon, ta akwap nakoonon a Negeb. Toloto kesi nia Ngikanaan alu ebooyete alore a Eburon, lokolong anyaritae Kirias Ariba. Kidwanga kesi kaina ngimacharin a Chechai, ka Aiman, ta Talimai. Ani enyounete ngitunga a Yuda kaneni, apot toloto lore a Debir, lo anyaritae ngirwa ngulu Kirias Seper. Abu epei kech lo anyaritae Kaleb tolim tama, “Itwaan daang nicha eremi Kirias Seper, ainakini ayong nakookang Akisa, sodi kiut.” Osiniel lokookeng a Kenas alo arai lokaatokeng a Kaleb loochi, ngesi abu tolema ere, sodi abu Kaleb kipoto nakookeng Akisa nak ngesi kiut. Ani akolongit na akuuta, abu Osiniel kimaima Akisa atamar kilip apakeng amana. Abu ngesi todoku alosikiria keng sodi kingit Kaleb ngesi ibore ni asaki. Tatachu ngesi tama, “Asaki ayong ngabwelin a ngakipi. Kiinakinit iyong akwap nakoonon.” Sodi nak Kaleb ngesi ngileleae lu ayakasi lowae lo alokuju ka kwap. Apot ngalesea alokamuran a Musa, alo arai eka akwap a Kenis torotokis ka ngitunga a Yuda alo Yeriko, ere lo ayakasi ngikito a ngingolea, toloto nakwap nakoonon a Negeb na eyei diyete Arad. Ani enangete inaa, toloma kesi kiding Ngiamalek. Kirukosi ngitunga a Yuda ka lua Simeon aapei, kidwanga Ngikanaan lu alomito lore a Sepas. Kilama kesi ere ngolo, kinyasut, sodi tanyarata ekiro be Orima. Tolema Yuda tani ere a Gasa ka akwap keng, ka Achikelon ka akwap keng ta Ekiron ka akwap keng. Kingarak Ekapolon Akuj ngitunga a Yuda sodi tolemasi kesi akwap na a ngimukur, nakaneni peapedorete akiritar ngitunga lu alomito naroatin kainyo ayakasi kesi ngaurukukui. Loger losek adungunitor Musa, apon Eburon nakinae Kaleb lo eritari ngalesea nauni a Anak alore kangolo. Nakaneni apot ngitunga a Benjamen nyiiritasi Ngiebus lu alomito Yerusalem. Eringa Ngiebus elomito neni aapei ka ngitunga a Benjamen. Apot talokookeng a Yosep dang toloto toremo ere a Besel, sodi kingarak Ekapolon Akuj kesi. Tomeasi kesi ngitunga akireb Besel. (Anyaritae kolong sek ere ngolo Lus.) Apot ngikarebok kingolikis itwaan epuduni alore sodi tolimokis tamasi, “Kidodikinae sua erot lo elomarere lore, sodi nyikiwani sua iyong.” Kidodik ngesi ngitunga ngulu erot. Apot ngitunga a Epiraim ka Manase taara itwaan daang alore pearai itwaan ngini ka ngitunga a awi keng. Ani ekisidi tolot itwaan ngini nakwap a Ngiiti, toduk ere neni sodi tanyara ekiro be Lus, ngesi eringa erai ekiro keng. Apot ngitunga a ekitela a Manase nyiiritasi ngitunga lu alomito lorerea a Bes-chan, ka Taanak, ka Dor, ka Ibileam, ka Megido, ta ngirerea lu ayakasi diyete. Nakaneni apot Ngikanaan toloma neni. Ani eriamunete Ngisirael agogongu, apot kidesikis Ngikanaan akisub etich kech, nakaneni apot nyiiritasi kesi daang. Apot ngitunga a ekitela a Epiraim nyiiritasi Ngikanaan lu alomito lore a Geser, sodi apot Ngikanaan toloma neni aapei ka kesi. Apot ngitunga a ekitela a Sebulun nyiiritasi ngitunga lu alomito lorerea a Kitiron ka Naalal, nakaneni apot Ngikanaan ngulu toloma neni aapei ka kesi, nabo kidesikinae akisub etich. Apot ngitunga a ekitela a Acher nyiiritasi ngitunga lu alomito lorerea a Ako, ka Sidon, ka Alab, ka Akisib, ka Eliba, ka Apek, ta Reob. Apot ngitunga a Acher kiboikinos aapei ka Ngikanaan ngulu kainyo apot nyiiritasi kesi. Apot ngitunga a ekitela a Naputal nyiiritasi ngitunga lu alomito lorerea a Bes Chemech ka Besanas. Apot ngitunga a Naputal kiboikinos aapei ka Ngikanaan ngulu nakaneni kidesikis akisub etich kech. Apot Ngiamor kijukasi ngitunga a ekitela a Dan nakwap na a ngimukur, sodi kiratakis kesi nyeetiyaunosi naroatin. Kiboikinos Ngiamor lorerea a Aijalon, ka Chaalibim, ta moru a Eres, nakaneni apot ngitunga a Epiraim ka Manase topolokis kesi nabo kidesikis akisub etich kech. Alokwap Sela, etorit ekukuor a Ngiedomae napak a Akirabim. Torotok emalaikat a Ekapolon Akuj alo Giligal tolot Bokim tolimok Ngisirael tama, “Kepuduni kolong ayong esi alo Misiri kayau nakwap nakolong echikakini ayong taapaakus. Atolim ayong atama, ‘Nyechwangakini ayong jik achamunet kang ka esi. Nyejoikinit esi ichamakinosi ka ngitunga lu elomito nakwap naga. Echamitae esi ibwangete ngikenoi kech a ngakipeyos.’ Nakaneni nyesuba esi ngakiro nakolong kalimokini ayong esi. Isubakis esi nakolong kitengeritoe! Kalimokinit tokona ayong esi atamar nyeritari ayong ngitunga lugu iloose esi ngaren. Eliworosi kesi ngimoe kus, sodi toliworos ngakujo kech eloit anikus.” Ani elimuni emalaikat ngakiro nguna erumori, kikalout Ngisirael daang, ngesi enyaritere neni Bokim. Kipeyonokis kesi Ekapolon Akuj kaneni. Abu Yochua kiala Ngisirael, sodi tolot itwaan daang alemar akwap keng. Apot Ngisirael tosuba etich a Ekapolon Akuj ngirwa lu ayarea Yochua daang, ka ngirwa lu ayareta ngikarikok daang lu eteete ngakiro naapolok daang na asubea Ekapolon Akuj Ngisirael. Abu Yochua lokookeng a Nun, lo arai ekasuban etich a Ekapolon Akuj totoan erai ngikaru keng amiat apei ka ngitomon. Tonukakinae ngesi Timunas Sera na arai akwap na atiakakinitae ngesi anakwap ana a ngimukur a Epiraim kwap emoru a Gaach. Apot ngitunga a alesit kangina daang totoaka, sodi bu alesit ache na peayeni Ekapolon Akuj kori ngakiro na asubea ngesi Ngisirael. Sodi tosechakis Ngisirael Ekapolon Akuj kisiakis akisub etich kata Baal. Tapalikis kesi akilip Ekapolon Akuj, na erai Akuj kata apaakech, Akuj nakolong epuduni kesi alo Misiri. Kisiakis kesi akilip ngakujo ngache, na eraakasi ngakujo a ngitunga alu iriamito kesi. Kijuuruoto kesi ilipito ngakujo nguna, sodi kitongoa Ekapolon Akuj. Tapalikis kesi akilip Ekapolon Akuj sodi tosuba etich kata Baal ka Achitaros. Sodi tongoik Ekapolon Akuj Ngisirael kimiek ngimoe itijikinete kesi nabo toremo ngiboro kech daang. Abu ngesi kimiek ngimoe lu eriamito kesi idwangete Ngisirael nakaneni apot Ngisirael nyeeweikis ngimoe kech. Nacha alooso kesi lojie, peebakit Ekapolon Akuj alowae kech, loger lokolong sek alimunitor atamar nyebaki alowae kech. Apot kesi pena lochan lukaapilak. Ani erumor nak Ekapolon Akuj Ngisirael ngikarikok lu ayuunete kesi alomoe. Nakaneni apot Ngisirael nyiiwap ngakiro a ngikarikok kech. Apot Ngisirael tongero Ekapolon Akuj sodi kilipa ngakujo nache. Ewapito kolong taapakech ngitalio a Ekapolon Akuj, nakaneni apaliki alesit nakitetet naga akisub kongina. Arai nacha einakinea Ekapolon Akuj Ngisirael ekarikon, kingarak ngesi ekarikon ngolo toyuu ngitunga alomoe kech ngirwa daang lu eyarea ngesi. Apeneenete Ekapolon Akuj ngisien anikech na ikalounioto kesi kotere ngulu aboliatar kesi nabo kichiakiarito. Nakaneni na etoanea ekarikon ngolo, tobongosi ngitunga nakiro nangorok, sodi toroketa noi kidwanga tani alesit na engareni nakech. Tosuba kesi etich a ngakujo anache ka akilip kesi. Towout kesi aisikin ngakiro kech naaronok. Ani erumor tongoik Ekapolon Akuj Ngisirael tolimok tama, “Echwangak ebukut logo achamunet nakolong echikakini ayong taapaakech atamar kirichakis. Ani aloger awouneta kesi akiwap ngakiro kang, nyeringa ayong nabo eritari ngibukui lukolong aringa eya nakwap na atoanea Yochua, sodi atoroea ayong anikech kiwapete Ngisirael ngirotin kang kori kemam, loger lokolong ewapitotor taapaakech.” Sodi abu Ekapolon Akuj tachamak ngibukui ngulu idongete nakwap. Abu ngesi nyeeinak Yochua agogongu na idwangea kesi kori abu nyiirita kesi na atoanea Yochua. Ani erumor, abu Ekapolon Akuj kimiek ngibukui ngiche anakwap sodi toroea Ngisirael lusek aringa nyeloto lojie alo Kanaan. Asubi ngesi kona sodi kitatamea ngalesea a Ngisirael daang ngakiro a ejie, tarai noi ngulu aringa nyeloto lojie a ache. Ngulu emiekinio anakwap ngesi ngirerea ngikan a Ngipilisti, ka Ngikanaan daang, ka Ngisidon daang, ta Ngiipi lu ebooyete alomoru a Lebanon, napei alomoru a Baal Erimon tanang napak a Amas. Ngitunga ngulu aroyere Ngisirael, taanyunere kiwapete ngitalio lukolong ainakini Ekapolon Akuj taapaakech, kisitoru nia Musa. Sodi toloma Ngisirael kiding Ngikanaan, ka Ngiiti, ka Ngiamor, ka Ngiperes, ka Ngiipi, ta Ngiebus. Apot Ngisirael kiutas ka kesi nabo kilipa ngakujo kech. Toisikis Ngisirael Ekapolon Akuj na erai Akuj kech. Apot tosechakis ngesi, sodi kilipa ngakujo nasubuna a Baal ka Achera.*g** Sodi tongoik Ekapolon Akuj Ngisirael kimiek Kuchan Richasaim, lo arai ekapolon a Mesopotamia torem kesi, sodi topolok kesi a ngikaru a ngikan-kauni. Ani erumor kikaloikis Ngisirael Ekapolon Akuj, sodi tomeu ngesi itwaan ni alachuni kesi. Arai ngolo Osiniel lokookeng a lokaatokeng a Kaleb aloochi alobe Kenas. Abu etau a Ekapolon Akuj bu nia Osiniel, toliwor ngesi ekarikon a Ngisirael. Abu Osiniel tolot lojie sodi nak Ekapolon Akuj ngesi agogongu na edwangea ekapolon a Mesopotamia. Min ekisil nakwap a ngikaru a ngitomwon-omwon, ani erumor totoan Osiniel. Tosechakis Ngisirael Ekapolon Akuj nabo. Kotere ngakiro nguna, abu Ekapolon Akuj kitiliwo Egilon lo arai Ekapolon a Moab lo egogong noi akidwang Ngisirael. Tochunak Egilon Ngiamon ka Ngiamalek kirukosi ka ngesi kidwanga Ngisirael, sodi tolemasi ere a Yeriko lo arai ere a ngingolea. Tosuba Ngisirael etich a Egilon alo arai ekapolon a Moab a ngikaru a ngitomon ka ngikan-kauni. Ani ikaloikinete Ngisirael Ekapolon Akuj, abu ngesi inu kesi ekayuunan lo anyaritae Eud lokookeng a Gera, alo a ekitela a Benjamen. Akedienyana Eud. Tolemut Ngisirael ngainakinet nakis Eud yaa nia Egilon alo arai ekapolon a Moab. Asubakinit sek Eud ekileng keng loapolon loakwanan a ngiwaitin kadaang, tarai aoyau keng ngasentimitae ngatomwon-kan. Ainikinit ngesi ekileng ngolo tooma ngiworui keng alowae alo aloteten. Sodi inaa ngesi Egilon ngainakinet. Arai Egilon itwaan nitiatuman. Ani erumori Eud akipotor ngainakinet, kitwaarak ngesi ngitunga lusek adakito ngiboro ngulu. Nakaneni ani enangi namoru na ekulitae eyakasi diyete Gilgal, tobongo Eud nia Egilon. Tolimok tama, “Ee ekapolon, eya ayong ngakiro namunonoe asaki alimokin iyong.” Sodi todungok Ekapolon Ngikasubak etich keng tama, “Kililinga chek.” Topudosi ngikasubak etich keng daang. Ebooyi ekapolon anamaniyat keng anakaalimon eyei kidiama akai. Tolot Eud nikeng tolimok ngesi tama, “Eya ayong ngakiro na asaki alimokin iyong na eponito ani Akuj.” Tonyou ekapolon towo. Kirepak Eud akan keng na alokedieny tout ekileng alowae keng alo aloteten, sodi kilijak nakook a Ekapolon. Toloma ekileng daang tooma aapei ka atinget a ekileng dang, sodi toburuchia atumes kesi. Abu Eud nyeeut ekileng ngolo anakook a ekapolon, nakaneni abu ekileng toporu alokaku. Ani erumor topudo Eud nikalapatan togolok ngidorin a amaniyat ana alokidiama akai, sodi torotok. Pot ngikasubak etich keng, nakaneni ani ingolikinete ngidorin egolitoe kitama ebalasi, “Elosit tokona ngon kinga akingarakin anamaniyat anakaalimon.” kidara kesi nikooyen, tanang ni eilio. Ani ewouni ngesi angaar ngidorin a amaniyat, tolemut kesi egoliet tangaareta ngidorin. Toriamut ekapolon kech eperi alokwap etoanit. Ani eringa kesi idarito, tosiiwak Eud, kiporo ngamoru na ekulitae tanang Seira. Ani enanguni nakwap na a Ngimukur a Epiraim, tokutak ebune anyarare Ngisirael lojie, sodi torik ngesi kesi totiyaun alomukur. Tolimok kesi tama, “Kiwapakinae ayong! Kisidwang Ekapolon Akuj esi Ngimoab lu eraakasi ngimoe kus.” Sodi kiwapakis kesi Eud tolemasi ewae lo adikino Ngimoab edokareta ekwakaye Yorudan. Nyelakakina kesi itwaan tani ipei edokari ekwakaye. Akolongit ngina, apot Ngisiraael taara Ngimoab ngabunge ngatomon, lu araakasi daang ngikiliok lua ngikilinga. Emam tani epei lo abuchar. Kidwanga Ngisirael Ngimoab akolongit ngina, sodi min ekisil nakwap a ngikaru a ngitomwon-kauni. Ekarikon lo atupit ngolo ngesi Chumugar lokookeng a Anas. Ayuuni ngolo daang Ngisirael taar Ngipilisti ngamiae ngakan-kapei a akitoe ana irit emong. Ani ketoana Eud kerumor, tosechakis Ngisirael Ekapolon Akuj nabo. Sodi kipoto Ekapolon Akuj kesi nak Yabin, lo arai ekapolon a Ngikanaan lo apolokinit ere a Asor. Anyaritae ekarikon a ngasigerea keng Sisera, lo alomit Aroches Agoim. Apot Ngisirael kikaloikis Ekapolon Akuj esakete akingarakino, kainyo ayakasi Yabin ngaurukukui na ngasua na irito ngangolei ngamiae ngakan-koomwon, nabo aboliar ngesi Ngisirael niaronon a ngikaru a ngitomwon-arei. Debora, na arai aberu a Lapidos, arai akadwaran, nabo arai ngesi akatubon ngakiro kotere Ngisirael ngirwa ngulu. Ebooyeene ngesi alokwap eengol eche ayei kiding Rama ka Besel anakwap ana a ngimukur a Epiraim, sodi tolosioneto Ngisirael neni totub ngesi ngakiro. Abu ngesi tomea itwaan anyarare Barak lokookeng a Abinoam alo Kedech anakwap a Naputal. Abu ngesi tolimok Barak tama, “Kidungok iyong Ekapolon Akuj na erai Akuj a Ngisirael atamar, ‘Tolem ngikiliok ngabunge ngatomon alotela a Naputal ka Sebulun sodi toriko kesi moru a Tabor. Ayauni ayong Sisera lo erai ekarikon a ngasigerea a Yabin, bu kitijik iyong anangolol a Kichon. Irukunete ngesi ka ngaurukukui keng na irito ngangolei ka ngasigerea nakaneni kesidwangi ayong iyong ngesi.’ ” Tatachak Barak Debora tama, “Alosi ayong erai kilot iyong, nakaneni ani pekilot iyong, nyalosi ayong dang.” Tatachu Debora tama, “Etemokin. Kirukori ayong ka iyong, nakaneni ani aloger kangolo, nyeliwor ekipur lo idwangere ngimoe ekon, kainyo ipotokini Ekapolon Akuj Sisera kipotok aberu.” Sodi kirukosi Debora ka Barak toloto Kedech. Tonyarau Barak ngitela a Naputal ka Sebulun potu Kedech, sodi kiwapakis ngesi ngikiliok ngabunge ngatomon. Kirukosi Debora ka ngesi. Eber lo arai itwaan a Kenis, eguruorit eam keng alodiyete echoke lo eyei Sananim diyete Kedech. Atiakak ngesi ka Ngikenis luche lu araakasi ngalesea a Obab alo arai lokamuran a Musa. Ani iirari Sisera atamar anangu Barak lokookeng a Abinoam moru a Tabor, abu ngesi tanyarau ngaurukukui keng na araakasi ngamiae ngakan-koomwon ka ngasigerea keng, tanyarau kesi alo Aroches Agoim potu nangolol a Kichon. Sodi tolimok Debora Barak tama, “Tonyou! Kiinak Ekapolon Akuj iyong Sisera, kidwang akolongit naga.” Sodi totiyaun Barak alomoru a Tobor ka ngikiliok keng lu araakasi ngabunge ngatomon. Ani isiakini Barak ejie, kisibiler Ekapolon Akuj Sisera ka ngaurukukui keng ta ngasigerea keng, sodi todoku Sisera anaurukuk keng tamatar a ngakejen. Kiwap Barak ngaurukukui nguna ka ngasigerea tanang Aroches Agoim, sodi taarae ngasigerea a Sisera daang. Emam itwaan apon toiisikinae tani ipei. Tamatar Sisera tolot loeam a Yael ana arai aberu a Eber alo arai Ekenisit, kainyo achamam Yabin lo arai ekapolon a Asor ka awi a Eber. Tolot Yael kisiriamia Sisera tolimok tama, “Tolom tooma, ekapolon. Tolom tooma loeam kang. Nyiiem.” Sodi tolom ngesi tooma. Tarap Yael ngesi a awaru. Tolimok Sisera ngesi tama, “Nakinae kare ngakipi namatan. Kanyamit akure.” Tangaa ngesi etuo keng loa ngakile, kidokak tamat, sodi tarap ngesi nabo. Tolimok Sisera ngesi tama, “Towo anakituk a eam. Ani kebu itwaan kingit iyong tama, ‘Eyei itwaan eyei nege a?’ Tolimok tama, ‘Emam,’ ” Ani aloger aburunitor Sisera noi, abu tojotoor. Tolem Yael akitoe a eam, tolem esebo toting anakan ana aloteten, toniamar nia Sisera sodi kisitor akitoe lowae lo a loteten a akou toped toloma nalup, taar. Ani ebuni Barak esaki Sisera, topudo Yael akisiriamiar ngesi tolimok tama, “Bua nege! Kedodikini ayong iyong itwaan ni isaki iyong.” Sodi tolomasi Barak ka Yael tooma, toriamut Sisera eperi alokwap etoanit, epedit akitoe a eam akou. Abu Ekapolon Akuj akolongit ngina kisidwang Ngisirael Yabin lo arai ekapolon a Ngikanaan. Apot Ngisirael kichiakiasi ngesi lokojokon tanang inyasunete ngesi. Apot Debora ka Barak lokookeng a Abinoam toeokis eeos logo akolongit ngina. Kipuro Ekapolon Akuj! Erichakina Ngisirael ejie. Alemuna ngitunga a alakara. Topupokisi esi ngikapolok! Todetasi ngaki, esi ngikapolok! Aeokini ayong Ekapolon Akuj. Aboliakini ayong atoeonok. Ekapolon Akuj, na erai Akuj a Isirael. Ekapolon Akuj, na irotokinio iyong alomoru a Seir, naipudunio anakwap a Edom, abu akwap tamaranik, talakak adis ngakipi. Iteni, apot ngidowon talakakis ngakipi. Tamaranikis ngimoru alongaren Ekapolon Akuj a Sinai, alongaren Ekapolon Akuj na erai Akuj a Isirael. Ngirwa lua Chamugar lokookeng a Anas, ngirwa lua Yael, apot ngajorei a ngimuchurus tapalikis akitoruunun nakwap, nabo kileilea ngikalotok alorotin alu eloka. Tapalikinae ngirerea a Ngisirael, tanang ni ibunio iyong Debora, bu iyong loger a itiokeng a Ngisirael. Ani eseunio ngakujo nakitet, min ejie nakwap. Ayei itwaan abu toting akwara alokiliok a Ngisirael, alu eraakasi ngabunge ngatomwon-omwon a? Erukito etau kang ka ngikarikok a ngajorei a Ngisirael, lukolong alemunosi a alakara. Kipuro Ekapolon Akuj! Tolimutu ngakiro nguna, esi lu idokito ngasikiria naakwaak, esi lu ibooyete alojemu aluajokak, ka esi lu iloose alorotin. Tani ngikaeok lu eyakasi lochorin, alimosi akidwang a Ekapolon Akuj ngimoe keng, akidwang a Ngisirael ngimoe kech! Totiyaunos ngitunga a Ekapolon Akuj alorerea kech. Debora, tonyou, tonyou! Tonyou toeok eeos, tonyou! Barak lokookeng a Abinoam, tonyou! Toriko ngirikon kon! Ani erumor totiyaunos lu emunoi pot lokarikok kech. Pot ngitunga a Ekapolon Akuj nikeng esakete ejie. Apote kesi alo Epiraim tolomasi nadipo, ewapito ekitela a Benjamen ka ngitunga keng. Atiyaunosi ngikarikok a ngajorei alo Makiri, totiyaunos ngikaweikinak alo Sebulun. Apot ngikapolok a Isakar ka Debora. Iteni abu Isakar kiwapak Barak, kiwapakis ngesi tolomasi nadipo. Nakaneni atiakak emachar a Reuben, nyetiakuna kesi atamar kilosi. Kotere nyo edongioto kesi ka ngamesekin? Akipup ngikeyokok enyarito ngamesekin a? Iteni, atiakak emachar a Reuben, nyetiakuna kesi atamar kilosi. Kiboikin ekitela a Gad kide Yorudan. Ani kotere nyo edongio ekitela a Dan natubwae? Tolom ekitela a Acher lokwaas a anam, Kidong tolom neni Nakaneni apot ngitunga a Sebulun ka Naputal, tajala akiyar kech alojie. Pot ngikapolok tojwoto, pot ngikapolok a Kanaan tojwoto, alo Taanak, anakipi a Megido, nakaneni emam ngakwangae apot kesi tolemasi, Tojwoto ngikanyer anadis, totubonoros kesi alokidiama, kitijwoto Sisera. Tolelea kesi akaale a Kichon, angolol a Kichon na alelee. Arotokini ayong ngaren, arotokini ayong ngaren a agogongu! Sodi pot ngangolei eporoporoote, ituruyete ngakichiaket kech ngalup. Ebala emalaikat a Ekapolon Akuj, “Kilama Meros. Kilama ngulu elomito inaa. Nyepona kesi akingarakin Ekapolon Akuj, nyepona kesi akingarakin Ekapolon Akuj ejie.” Yael epiaritae anaberu, aberu a Eber alo erai Ekenisit, ngesi epiaritae anaberu ana elomito loeaman. Elipi Sisera ngesi ngakipi, nakaneni nak ngakile, Ainuni ngesi elaabo a ngakile a atubwa anatiajokon. Alemuni ngesi akitoe a eam a akan apei, tolem esebo akan anache Taram ngesi Sisera kirobak akou. Kichum ngesi toped akou. Toriedik ngesi, tadakar, toper anakejen a Yael, tadakakin neni totoan. Kingoliana itiokeng a Sisera alopuke a akai, Tokienyiana ngesi kayaaye alaar, ingita ebala, “Kotere nyo etinenikinitor aurukuk keng? Nyo awouneta ngangolei keng abongun atipei?” Tatachut ngaberu nakoosok erukito ka ngesi. Kitamana ngesi bon tama, “Engasete kesi ngiboro ka akikor. Tolema asiger apei apese apei kori ngaarei, tolema Sisera eworu loajokon, asir na itakitae na anapi ayong alomosiring kang.” Ee Ekapolon Akuj, kimiek ngimoe kon daang totoaka kongina. Nakaneni kimiek ngipaalon kon tachaut loger a akolong ana ipiripiruuni! Sodi min ekisil nakwap a ngikaru a ngitomwon-omwon. Tosechakis nabo Ngisirael Ekapolon Akuj. Kotere ngakiro nguna, abu ngesi kimiek Ngimidian epolokinete Ngisirael a ngikaru a ngikan-kaarei. Togogongioto Ngimidian akidwang Ngisirael, sodi toduka Ngisirael anaburiburio ka ngamoru, edukakinito Ngimidian. Arai nacha itakineta Ngisirael ngikinyam, pot Ngimidian, ka Ngiamalek ta ngitunga a akide kitijikis kesi. Alomeenete kesi nakwap kinyasut ngikinyam tanang kuju nakwap a Gasa. Tolemasi ngamesekin daang, ka ngaatuk ta ngisikiria. Kidongo Ngisirael emam akimuj. Aponeenete kesi ka ngaatuk kech ta ngieman, pot elalak loger a emaase. Alalak kesi ka ngikaala kech peapedorosi akimarun. Aponeenete kesi kinyasut akwap. Tolilimiyosi Ngisirael kotere Ngimidian. Kikaloikis kesi Ekapolon Akuj esakete akingarakino. Ani ikaloikinete Ngisirael Ekapolon Akuj esakete akingarakino kotere Ngimidian, abu Ekapolon Akuj tomeu ekadwaran Losirael. Tolimok ekadwaran ngolo kesi tama, “Ebala Ekapolon Akuj na erai Akuj a Isirael kona, ‘Kepuduni kolong ayong esi alo Misiri ani iraakatar ngikedalak. Katoyuu ayong esi ani Ngimisiri ka ngitunga lu kitijiete esi anakwap kana. Abu ayong erita kesi na ilooso esi ngaren, sodi kainak ayong esi akwap kech. Katolimok ayong esi atama, ayong arai Ekapolon Akuj na arai Akuj kus. Nyiilipa ngakujo a Ngiamor, alu tokona ilomito esi nakwap kech. Nakaneni ipot esi nyiiwap ngakiro kang.’ ” Sodi bu emalaikat a Ekapolon Akuj nadakar a Opira, kiboikin kwap echoke lo arai eka Yoach, alo arai itwaan a ekitela a Abieser. Lokookeng lo anyaritae Gideon adai ngakanoi aniborosit anichiet emuna. Eweit ngesi ngakanoi nguna nyiingolikis Ngimidian ngesi. Bu emalaikat a Ekapolon Akuj nikeng kaneni tolimok tama, “Erukito Ekapolon akuj ka iyong, iyong lokooson togogong!” Tolimok Gideon ngesi tama, “Kimiekinae kengit, ekapolon, kotere nyo asubatar ngakiro nugu daang anikosi erai kirukit sua ka Ekapolon Akuj? Nyaanu bo ngakiro nakatalarak daang nakolong abalasi taapakosi sua asubi Ekapolon Akuj ebalasi, ‘Pekolong kiyauni ngoni Ekapolon Akuj alo Misiri a?’ Kiisik tokona Ekapolon Akuj sua, kimiekinea Ngimidian.” Sodi todungok Ekapolon ngesi tama, “Kape, tolot a ngikilinga alukon kalu toyuu Ngisirael ani eya Ngimidian. Ayong ilope kamearit iyong.” Tatachu Gideon tama, “Ekokini ayong ayuuni Ngisirael ai? Emachar kang ngesi emam agogongu alokitela a Manase, nabo ayong adit anawi kosi.” Tatachu Ekapolon Akuj tama, “Ipedori iyong kainyo kirukit ayong ka iyong. Imunyari iyong Ngimidian tosub keraakasi itwaan ipei.” Tatachu Gideon tama, “Ani ketalakarit ayong iyong, kidodikinae ayong atamar iyong dir irai Ekapolon Akuj. Nyiirotok kare, kidarou kainu alemunet kang a akimuj.” Tatachu ngesi tama, “Eboikin ayong tanang ibonguni iyong.” Sodi tolot Gideon kai keng kidorok ikale. Tolem ngakiloi ngatomon a ngakiria tosubakinea ngamugati na emam ekitoe lo itubui. Kiwaak ngesi akiring nakikap, kiwaak ngapoko namot, sodi inu emalaikat a Ekapolon Akuj alokwap echoke, dio ainakin ngesi. Todungok emalaikat ngesi tama, “Tolem akiring ka ngamugati kidokok nataaba naga, sodi tobukok ngapoko alokidiama.” Tosubak Gideon loger ngolo. Ani erumor tolem emalaikat a Ekapolon Akuj aburo na atingit tatapea akiring ka ngamugati. Torirau akim anataaba tanomia akiring ka ngamugati. Ani erumor, topuripuriakin emalaikat. Toyen Gideon atamar engolik ngesi emalaikat a Ekapolon Akuj, sodi tolim ebulit tama, “Ekapolon lo irai Ekapolon Akuj! Engolik ayong emalaikat kon kikenyikin!” Nakaneni tolimok Ekapolon Akuj ngesi tama, “Min ekisil nikon. Nyiem. Nyitoani iyong.” Todukok Gideon neni ekeno a ngakipeyos, sodi tolimok ekiro be “Ekapolon Akuj erai ekisil.” (Eringa ekeno ngolo eyei nadakar a Opira, na erai aka emachar a Abieser.) Tolimok Ekapolon Akuj Gideon akolongit ngina nakwaare tama, “Tolem emong a apakon ka emong eche lo eraakasi ngikaru kech ngikan-kaarei, toyata ekeno a apakon lo ipeyonokinio Baal, sodi totubutubu akisikwaanet a akuj ana enyaritae Achera ana eyei lokwaas a ekeno. Todukok ekeno a ngakipeyos loajokon a Ekapolon Akuj ana arai Akuj kon, Todukok kidiama ngasenon nguna. Ani erumor tolem emong lo a ngiarei sodi kipeye daang toliwor akipeyos na inomio, kinoma a ngakito a Achera ana itubutubi iyong.” Sodi tolem Gideon ngikedalak keng ngitomon dio asubakin ngakiro na alimokinit ngesi Ekapolon Akuj. Ani kona aemitor ngesi ngitunga a awi keng ka ngitunga a ere, abu tosub ngakiro nguna nakwaare, meere naparan. Ani ekienyunete ngitunga a ere nataparach toriamut ekeno a Baal kebwangabwangaar nabo ketubutubui akisikwaanet a Achera. Toriamut nabo emong lo a ngiarei kipeyoe alokeno alo kedukokin. Kingitas make ebalasi, “Ekoe, ngae asubi ngakiro nugu?” Kingitanasi kesi sodi tangichut atamar Gideon lokookeng a Yoach asubi ngakiro nguna. Tolimokis kesi Yoach tamasi, “Kipud lokookon nikalapatan nege, sodi taarae! Kainyo ayata ngesi ekeno a ngakipeyos a Baal nabo totubutubu akisikwaanet a Achera na ayei lokwaas a ekeno.” Nakaneni tolimok Yoach ngitunga lu aponito nikeng daang tama, “Ibakito esi ka Baal a? Kori iikinito esi Baal? Itwaan daang ni ibakito ka Baal eario eringa ataparach nyiwalara. Ani kerai Baal akuj, kimiekisi toikin bon. Erai ekeno a ngakipeyos keng ngesi ayatario.” Akolongit ngina jik, apon tanyarae Gideon ekiro be Yerubaal, ani alimunio Yoach tama, “Kimiekisi Baal toikin bon, erai ekeno a ngakipeyos keng ngesi ayatario.” Ani erumor tochunakin Ngimidian daang, ka Ngiamalek ta ngitela a akide todokasi ekwakaye angolol a Yorudan, sodi toloma nadipo a Yesireel. Min etau a Ekapolon Akuj nia Gideon, sodi tokutak ngesi aburuch anyarare ngikiliok a emachar a Abieser kiwapakis ngesi. Tomea ngesi ngitunga lowaitin a Manase daang anyarare kesi kiwapakis ngesi. Tomea ngitunga anyarare ngitela a Acher ka Sebulun ta Naputal, toloto kirukosi ka kesi. Ani erumor tolimok Gideon Akuj tama, “Ilim iyong atamar kitiyuuni iyong ayong Ngisirael. Ewaak ayong ngajul a ngamesekin nalup nipalem kidaea sua ngakanoi. Kepean ngakop najul make, meere nalup, atoyen atamar kitiyuuni iyong ayong Ngisirael.” Apot nguna tosubakin loger ngolo. Ani ekienyuni Gideon nataparach elilim, kichiamak ngajul sodi tochiiu ngakop kilelebun atubwa a ngakipi. Sodi tolimok Gideon Akuj tama, “Nyikingoik. Kimiekinae eruorik apei bon. Kimiekinae atoro ngajul nugu aroet apei nabo. Kimiek tokona ngajul tooko, sodi tapapalaketa ngalup.” Tosubak Akuj nguna akolongit ngina nakwaare. Ani iwalari ataparach, aokito ngajul, nakaneni toya ngakop wadaang analup. Akolongit apei nataparach elilim, tonyout Gideon ka ngitunga keng toloma lokwaas a elelea a Arod. Alomit adakar a Ngimidian nadipo kwap kesi alomoru a More. Tolimok Ekapolon Akuj Gideon tama, “Kalalakinito ayong ngitunga lu irukitotor iyong kotere akisidwang kesi Ngimidian. Epedorete Ngisirael kiwogakinos make tamasi, ‘Kiyuun sua make.’ Sodi nyakainakis ayong ekipur. Tolimok tokona ngitunga tama, ‘Itwaan daang ni eemit ejoikinit ebongori nawi, edongo sua nege moru a Gilead.’ ” Toroana Gideon ngitunga sodi tobongosi ngitunga ngabunge ngatomwon-arei ka ngaarei, kidongo ngabunge ngatomon. Sodi tolimok Ekapolon Akuj Gideon tama, “Eringa ngitunga elalak. Toriko kesi nakipi katotiakak ayong iyong kesi kaneni. Ani itwaan ni kalimokini ayong iyong atama, ‘irukorete itwaan en ka iyong’, elosi ngini. Ani atamari ayong, ‘Nyirukorete itwaan en ka iyong’, nyelosi ngini.” Sodi toriko Gideon kesi nakipi, tolimok ekapolon Akuj ngesi tama, “Kipaka itwaan daang ni ijakijaki ngakipi emasi a angajep loger a iingok, totiak ka ngitunga lu ekudokinosi a ngakungin kech tamata ngakipi.” Tookut ngitunga ngamiae ngauni ngakipi a ngakan kech kijakajakakis, nakaneni tokudokin luche daang a ngakungin tamata. Tolimok Ekapolon Akuj Gideon tama, “Ngitunga ngamiae ngauni lu ejakajakinete ngakipi emaase kesi kayuunea ayong esi kesidwang Ngimidian. Tobongosi ngitunga luche daang nawiyei kech.” Sodi kimiek Gideon Ngisirael luche daang tobongosi nawiyei, dio kisidong ngamiae ngauni. Ngulu kesi etingito ngiboro ka ngaburucho a ngitunga a luche. Arounito kesi adakar Ngimidian na eyei nadipo. Akolongit ngina nakwaare, tolimok Ekapolon Akuj Gideon tama, “Tonyou, totiyaar kitiji adakar, kainyo kesidwangi ayong iyong. Nakaneni ani kiemit iyong alosit akitijikin, kirukosi ka Pura lo erai ekasuban etich kon. Iirari iyong ngakiro na iruosi kesi sodi taanyunea iyong agogongu na itijikinio.” Apot Gideon kirukosi ka Pura lo arai ekasuban etich keng, totiyaaros ni ayakasi ngasigerea anadakar a ngimoe. Akeikina Ngimidian, ka Ngiamalek, ta ngitunga a akide akeikina nadipo loger a emaase nabo alalak ngikaala kech loger a asinyen ana eyei lokwaas a anam. Napei anangunea Gideon neni, abu toriam ekile isisanakini loche ngakiro na erujae, ebala, “Erujae ayong amugati a ngakiria a ngimomwa ikokoriun nadakar yok, sodi tanang eam. Toukor eam toper analup.” Tatachu ekile loche tama, “Emam nabo iche, pearai ekileng a Esiraelit a lobe Gideon lokookeng a Yoach. Esidwang Akuj ngesi Ngimidian ka ngasigerea yok daang!” Ani iirari Gideon ngakiro a akirujare kangina, ka eger a ngakiro kanguna, abu ngesi toriedik kilip Akuj. Sodi tobongo ngesi nadakar tolimok Ngisirael tama, “Tonyoutu! Kisidwang Ekapolon Akuj esi ngasigerea a Ngimidian!” Totiak Gideon ngitunga keng lu araakasi ngamiae ngauni, totiak a ngalooso a ngauni sodi nak itwaan daang aburuch ka amot na eyei akinwaket tooma. Sodi tolimok kesi tama, “Kingolikinae ayong, tosubakis ngakiro na asubakini ayong esaa lokinangunea ngoni nikalapatan a adakar Nakikutakinea ayong ka ngitunga lukirukitor ngaburucho nakosi, tokutakis esi dang nakus alowaitin kadaang a adakar, sodi kiremasi ibalasi, ‘Eka Ekapolon Akuj ka Gideon!’ ” Apot Gideon ka ngikiliok lu arukitotor lu araakasi amiat apei tanangut nikalapatan a adakar keapiki kiding akwaar, akilokonyiet a itwaan ani eyoki adakar. Sodi tokutakis kesi ngaburucho nabo tabwanga ngamoti na ayakasi na atingito anakan kech. Tokutakis ngalooso nauni daang ngaburucho nabo tobwanga ngamoti. Totinga ngakinwaket a ngakan kech ana alokedieny, totinga ngaburucho a ngakan kech ana aloteten, sodi kiremasi ebalasi, “Ekileng a Ekapolon Akuj ka Gideon!” Towaa kesi, itwaan daang alowae keng, kiriama adakar. Tamataros ngasigerea daang na a ngimoe igorosi. Ani ekutakinete ngitunga a Gideon ngaburucho na araakasi ngamiae ngauni nguna, abu Ekapolon akuj kisibiler ngasigerea a ngimoe taaras make a ngilengea kech. Tamataros kesi lowae a Saretan tananga Bes Chita tanang lore a Abel- meola diyete Tabas. Sodi tanyarae ngikiliok a Isirael alotela a Naputal ka Acher ta ngiwaitin daang a Manase pot kiritasi Ngimidian. Tomea Gideon ngitunga nakwap daang na a ngimukur a Epiraim ebala, “Totiyaunos kitijikis Ngimidian. Kibaka anangolol a Yorudan ka ngayana daang tanang Besbara, kiratakis Ngimidian nyeedokasi ekwakaye.” Sodi tanyaraunae ngitunga a ekitela a Epiraim daang pot kibaka anangolol a Yorudan ka ngayana daang tanang Besbara. Kirumut kesi Oreb ka Seeb lu araakasi ngikatukok a Ngimidian. Taarakis kesi Oreb nataaba a Oreb, sodi taarakis Seeb ni enyaritae nichiet emuna a Seeb. Kiwapakis kesi Ngimidian, sodi yaut ngakies a Oreb ka Seeb nia Gideon alo kide Yorudan. Sodi tolimokis ngitunga a Epiraim Gideon tamasi, “Anukiro nugu kisubea iyong sua? Nyo pekinyaraa iyong sua na ilosio iyong akitijwore Ngimidian?” Apot kisuburata ngesi lokojokon. Tolimok ngesi kesi tama, “Anukiro apedo ayong asubakin na isikwaanikinio ka na isubakis esi, idwangito tani nadikidio isubakis esi ngitunga a Epiraim, na asubakis ngitunga a emachar kang a Abieser. Kotere agogongu a akuj, ipot esi taara Oreb ka Seeb lu araakasi ngikatukok a Ngimidian. Anukiro asubak ayong na isikwaanio ka nguna?” Ani elimuni Gideon nguna, apot kesi kiapakis angoit. Apot Gideon ka ngitunga keng lu araakasi ngamiae ngauni pot nangolol a Yorudan todokasi ekwakaye. Aburunit kesi, nakaneni aringa iwapito ngimoe. Ani enangunete kesi lore a Sukos, tolimok ngesi ngitunga a Sukos tama, “Nakisi kare ngitunga lukang lugu ngamugati ngadi. Eburunit kesi, nakaneni ewapit ayong Seba ka Salimuna lu eraakasi ngikapolok a Ngimidian.” Nakaneni tatachut ngikarikok a Sukos tamasi, “Irum iyong Seba ka Salimuna ibalar iyong sua ainakisi ngasigerea kon akimuj a?” Sodi tolim Gideon tama. “Ani kikote neni, nakainakinea Ekapolon Akuj ayong Seba ka Salimuna, sodi erum kesi, kedesi ayong esi a ngiikwa ka ngirega lua ariet.” Tonyou Gideon kaneni, tolot Penuel. Tolimok ngitunga kaneni ngapei kiro nguna, sodi tatachakis ngitunga a Penuel ngesi ngakiro napei atachakinete ngitunga a Sukos. Tolimok ngesi ngitunga a Penuel tama, “Na abongunio ayong nabo a ekisil, aukori ayong adukoru nakus nakooyen naga!” Ayakasi Seba ka Salimuna lore a Karikor ka ngasigerea kech. Anasigerea kadaang ana a ngitunga a akide, ngitunga 15,000 make kesi apot kidongo. Ngasigerea 120,000 kesi apon taarae. Sodi kiwapak Gideon erukudi alokwaas a ariet, ewae loa lokide Noba ka Yogibea, kituumwok ngasigerea kitijik. Tamataros Seba ka Salimuna lu araakasi ngikapolok a Gibeon, nakaneni kiwap Gideon kesi sodi kirum. Kitubul ngesi ngasigerea a Ngimidian daang. Tobongu Gideon lokookeng a Yoach alojie kitoru napak a Eres. Kirum ngesi esorokit lo abuni alo Sukos sodi kingitana ngakiro. Kigirak esorokit ngolo ngirora a ngikarikok a Sukos nak Gideon, araakasi ngikarikok ngulu ngitomwon-kaarei ka ngikan-kaarei. Ani erumor tolot Gideon lotunga a Sukos tolimok tama, “Kingolikisi Seba ka Salimuna lukolong kichiketa esi ayong ibalasi, ‘Irum iyong Seba ka Salimuna ibalar iyong sua nakisi ngasigerea kon na eburunit akimuj a?’ ” Ani erumor, tolem ngesi ngiikwa ka ngirega anariet kiriraa ngikarikok a Sukos. Touko nabo adukoru nakooyen alo Penuel sodi taar ngitunga alore kangolo. Ani erumor kingit Gideon Seba ka Salimuna tama, “Nyaalu ngitunga lukolong iarete esi alo Tabor?” Tatachut kesi tamasi, “Ekwaan kesi daang ka iyong. Ekoni ipei kech daang lokookeng a ekapolon.” Tolim Gideon tama, “Araakasi kesi talokaatokang, ngide a itiokang. Ekongi ayong ani Akuj atamar arai kolong nyiiar esi, pekaar ayong esi.” Sodi tolimok Gideon lokookeng loapolon lo anyaritae Yeser tama, “Tonyou, taar kesi.” Nakaneni abu edia nyeeut ekileng keng. Toem ngesi ani araakar edia. Sodi Seba ka Salimuna tolimokis Gideon tamasi, “Tonyou iyong elope taarae sua. Ekile ngesi epedori akisub etich lo erai eka ekile.” Sodi tonyou Gideon taar Seba ka Salimuna, dio alemar asir na ayei lomosiringan a ngikaala kech. Ani erumor tolimokis Ngisirael Gideon tamasi, “Topolokinoe sua, iyong ka ngalesea kon na isidiyete, kainyo kiyuu iyong sua ani a Ngimidian.” Tatachu Gideon tama, “Nyakapolokini ayong esi, kori nyikipolokini lokookang esi. Ekapolon Akuj kipolokini esi.” Nakaneni tolimok Gideon kesi tama, “Asaki ayong ibore ipei bon anikus. Kainak itwaan daang ayong ngamaritoi na eyakasi loboro lu engatarit ngesi.” (Anapito Ngimidian ngamaritoi a egolit loger a ngitunga aluche a ariet.) Tatachut kesi tamasi, “Kicham sua ainakin iyong ngamaritoi.” Topetakis kesi awaru sodi tachakak itwaan daang ngamaritoi na angatarit ngesi. Arai apotis a ngamaritoi ana a egolit ainakinio Gideon ngakiloi ngatomwon-arei, peimaritae asir, ka ngalagam ta ngiworui lupusiek-arengak lu anapito ngakapolok a Midian. Peemaritae tani ngiriko lu abutokinitae lomosiringan a ngikaala kech. Tolem Gideon egolit ngolo tosubunea akuj nasubuna kiwaak nawi keng na eyei lore a Opira. Tongero Ngisirael daang Akuj toloto inaa akilip akuj nasubuna ngina. Arai ibore ngini elokit ani a Gideon ka ngitunga a awi keng. Apot Ngisirael kidwanga Ngimidian tojongoto aemit. Min ekisil nakwap a ngikaru a ngitomwon-omwon tanang ni atoanea Gideon. Tobongo Gideon lokookeng a Yoach nawi keng, kiboikin inaa. Ayakasi Gideon talokookeng ngitomwon-kaarei, lu auri ngesi elope kainyo ayakasi ngesi ngaberu nakaalak. Ayei nabo ngesi apese a ngabwes na alomit Chekem. Abu apese a ngabwes ngina kidou idia a Gideon, sodi tanyara ekiro keng Abimelek. Abu Gideon lokookeng a Yoach totoan emojongit noi, sodi tonukakinae ngesi naliel a Yoach alo arai apakeng. Ayei aliel ngina lore a Opira, alo arai ere a emachar a Abieser. Ani ketoana Gideon kerumor, apot nabo Ngisirael tongero Akuj sodi kilipa ta Baal. Kitiliwosi kesi Baal na achamunet akuj kech. Tapalikis Ngisirael akilipit Ekapolon Akuj na erai Akuj kech, nakolong ayuuni kesi alomoe kech alu eriamito kesi. Emam naajokak apot kesi tosubeta ngitunga a awi a Gideon kotere ngakiro nakolong ajokak daang asubea ngesi Ngisirael. Abu Abimelek lokookeng a Gideon tolot lore a Chekem, ni alomito ngiyenet a itiokeng daang, tolimok kesi tama, “Kingita ngitunga a Chekem daang tamasi, ‘Ichamito esi anu? Atamar kitopolokis talokookeng a Gideon lutomwon-kaarei daang kori epei bon?’ Kitamutu robo atamar arai ayong ngakoyo ka ngaakot kus.” Kisuruoro ngiyenet a itiokeng ngitunga a Chekem ngakiro naajokak kotere Abimelek, sodi apot ngitunga a Chekem totiakut akiwapakin Abimelek, ebalasi, “Erai ngesi lokaatokosi.” Tolemikis kesi Abimelek ngaropiyae ngatomwon-kaarei alokai a Baal ana a achamunet. Tolem Abimelek ngaropiyae nguna kigirea ngitunga luko aronok, kiwapakis kesi ngesi. Tolot Abimelek nawi a apakeng alo Opira, sodi taar talokaatokeng, lu araakasi ngitomwon-kaarei, taar daang alokidiama amoru apei. Nakaneni apon nyear Yosam lokookeng a Gideon loochi kainyo abu ngesi toduk. Ani erumor tochunakin ngitunga a Chekem daang ka Besmilo, toloto lochoke lo italeunitoe alo Chekem, sodi kitiliwosi Abimelek ekapolon. Ani iirari Yosam ngakiro nguna, abu ngesi tolot towo alokidiama emoru a Gerisim sodi kirema tolimok kesi tama, “Topupokinae ayong, esi ngitunga a Chekem, sodi kiirarea Akuj esi! Eriamiriamete kolong ngikito aseun ekapolon kech. Tolimokis kesi ekitoe a akimiet tamasi, ‘Toliwor ekapolon kosi.’ Tatachu ekitoe akimiet tama, ‘Aisikini ayong atumes kang, na erai ngesi erimare ngakujo ka ngitunga atolot atubonor alokidiama ngikito a?’ Sodi tolimokis ngikito emeyan tamasi, ‘Toliwor ekapolon kosi.’ Tatachak emeyan kesi tama, ‘Aisikin ayong abobou kang ka ageor naajokon atolot atubonor alokidiama ngikito a?’ Sodi tolimokis emusabib tamasi, ‘Toliwor ekapolon kosi.’ Tatachak emusabib kesi tama, ‘Aisikini ayong emuna kang lo italakanari ngakujo ka ngitunga atolot atubonor alokidiama ngikito a?’ Sodi tolimokis ngikito daang eregae tamasi, ‘Toliwor ekapolon kosi.’ Tatachak eregae kesi tama, ‘Ani kisakete esi iteni akitiliwor ayong ekapolon, potu kigienokinos etolim kang. Ani kemam, erirauni akim anaten kang ana a ngiikwa tonomiasi ngichekereng a Lebanon.’ ” Tolim nabo Yosam tama, “Tokona bocha, itiliworete kolong esi Abimelek ekapolon kotere ngakiro na iteni a? Ipot esi kidodikis Gideon arimatoi ka asubea ngitunga a awi keng niajokon, itemem ka ngakiro nakolong asubi ngesi a? Kitamutu atamar ajii kolong apakang kotere esi. Adikino ngesi etoani ani asakea ayuun esi ani a Ngimidian. Nakaneni inyoikis tokona esi ngitunga a awi a apakang, taara talokookeng alokidiama amoru apei. Nabo Abimelek, lo erai lokookeng apakang lo edouni akedalan keng, itiliwosi esi ngesi ekapolon a Chekem ani iyanatar ka esi. Tokona bocha, ani kerai ngakiro na isubeta esi Gideon ka ngitunga a awi keng akolongit naga ngaka iteni, talakaros robo ka Abimelek, sodi talakar ngesi ka esi. Nakaneni ani pekikote neni, kimiek torirau akim ani a Abimelek sodi tonomia ngitunga a Chekem ka Besmilo. Torirau akim ani a ngitunga a Chekem ka Besmilo tonomia Abimelek.” Ani aloger aemitor Yosam lokaatokeng Abimelek, abu ngesi tamatar todok, tolot Beer. Abu Abimelek topolok Isirael a ngikaru a nguuni. Kiteremok Ekapolon Akuj Abimelek ka ngitunga a Chekem, sodi tongero kesi Abimelek. Asubakinosi nguna kongina tatachakinor akitu a talokookeng a Gideon alutomwon-kaarei aarete Abimelek ka ngitunga a Chekem lu engarakinete ngesi akiar. Tongero ngitunga a Chekem Abimelek sodi kidaa ngitunga alokidiama ngimoru toliworos ngirukooi lu ademete ngitunga lu etoruuniyete neni daang ngiboro. Tolimokinae Abimelek ngakiro nguna. Sodi pot Gaal lokookeng a Ebed ka ngiyenet keng Chekem. Kigienokinos ngitunga a Chekem ngesi. Toloto kesi daang namanat kech togerut ngamusabib, tochiut emuna sodi tosubakis esukukuu. Tolomasi kesi kai a akuj kech sodi kimuja nabo tamata, sodi kiruorotor Abimelek imenyete. Tolim Gaal tama, “Ekoe a, kikoni ngoni ngitunga a Chekem ai? Erai Abimelek ngae kisubea ngoni etich keng? Meere ngesi lokookeng a Gideon a? Meere Sebul lo iwapit ngakiro na edunguni ngesi a? Kiwapa ngakiro a Amor alo erai apaakus, apakeng a Chekem! Arai bo tarai ayong arikit ngitunga lugu dang, ketwarak ayong Abimelek! Kalimok atama, ‘Kiatak ngasigerea kon sodi tonyou toji.’ ” Abu Sebul lo arai ngesi apolokinit ere ngolo, tongo kilelebun na eirarea ngakiro na alimuni Gaal. Tomea ngesi ngitunga nia Abimelek alo Aruma ebala, “Gaal lokookeng a Ebed ka ngiyenet keng, apot Chekem ayaut ekurikur. Kiratakinete kesi iyong nyiilom lore. Tokona bocha, tonyoutu iyong ka ngitunga kon nakwaare toduka anaroatin. Tonyout moi nataparach ipiripiruuni akolong kituumwokis ere toremo. Sodi ani epote Gaal ka ngitunga keng akitijikin esi, tarama lokojokon!” Sodi tonyout Abimelek ka ngitunga keng daang nakwaare toloto toduka anikalapatan Chekem a ngalooso a ngoomwon. Ani ingolikinete Abimelek ka ngitunga keng Gaal epuduni towo alokidor a ere, tonyout kesi anisek adukitotor. Kingolik Gaal kesi sodi tolimok Sebul tama, “Kingolik! Ngitunga kui etiyauna alokidiama ngimoru!” Tatachu Sebul tama, “Meere ngiborei ngulu ngitunga, erai ngitorubei a ngimoru.” Tolimu Gaal nabo tama, “Kingolik! Ngitunga kui ekokoriunito alomoru, nabo iwapuunit ajore ache erot lo ebunit alokitoe alobe emulon alo a ngikekeriak!” Sodi tolimok Sebul ngesi tama, “Nyaani tokona akituk kon, iyong lo been ibala, ‘Ngae sek Abimelek, kisubea ngoni etich keng?’ Meere ngitunga lubeen imenyi iyong lugu a? Tonyou tokona tojwoto ka kesi.” Toriko Gaal ngitunga a Chekem kitiji Abimelek. Tamatar Gaal sodi kirita Abimelek ngesi. Towanawanaaros ngitunga lukaalak tanang lokidor a ere. Tolom Abimelek Aruma, sodi kirita Sebul Gaal ka ngiyenet keng nyiiboikinos Chekem nabo. Ani akolongit nache, toloto ngitunga naroatin, sodi tolimokinae Abimelek. Tolem ngesi ngitunga keng totiak a ngalooso a ngauni sodi toduka anaroatin idarito. Ani ingolikini ngesi ngitunga epudunete alore, topud ani adukitor, bu akiar kesi. Ani ematarosi Abimelek ka atiaket nakeng akibak alokidor a ere, kitijikis ngalooso nache naarei ngitunga anaroatin taara daang. Tojwoto ngitunga apaaran ngina daang. Tolema Abimelek ere sodi taar ngitunga a ere, toukono ngakais keng, dio aburuchiar ngalup a amakat. Ani iirarete ngikarikok a adukuoru anaapolon a Chekem ngakiro nguna, toloto kesi esakete ayuun anawas anakaagongon a akai a Baal ana achamunet. Tolimokinae Abimelek atamar echunakina kesi inaa. Sodi kirukosi Abimelek ka ngitunga keng moru a Salimon. Tolem ngesi aep totub ateni a ekitoe sodi kidokok loseget keng. Tolimok ngesi ngitunga keng tama, “Nyo ingolikis esi ayong asubakini? Tosubakisi esi dang atipei.” Sodi totub itwaan daang ateni a ekitoe. Kiwapakis kesi Abimelek sodi totukokis ngakito nawas nakaagongon ngina sodi kichunyakis akim, totoaka ngitunga lu ayakasi tooma neni daang. Araakasi kesi ngitunga abunget apei, ngikiliok ka ngaberu. Ani erumor tolot Elimelek Sebes toji kaneni sodi tolema ere a Sebes. Nakaneni ayei adukuoru nakaagongon lore ngolo. Tamataros ngitunga a ere kangolo tooma sodi todokasi kidiama adukuoru ngina. Tolot Abimelek nadukuoru ngina esaki akitijwore sodi taapia lokidor esaki akichunyakin akim. Sodi kimasu aberu ache amoru nakirias todo nakou a Abimelek kirobak. Sodi tanyarau Abimelek atipei esorokit lo atingakinit ngesi ngiboro keng lujiet, tolimok tama, “Tout ekileng kon kitaar ayong, nyekeruorotor ayong ngitunga ebalasi, ‘Aberu aari Abimelek.’ ” Sodi tout esorokit lokeng ngolo ekileng kichum ngesi toporu kayaaye, dio Abimelek totoan. Ani ingolikinete Ngisirael atamar atoana Abimelek, tobongosi nawiyei kech. Eger ngolo ngesi atachakinea Akuj Abimelek akisech nakolong asubea ngesi apakeng, aarea talokaatokeng lutomwon-kaarei. Sodi abu Akuj tobuak ngitunga a Chekem ngakiro nakolong aronok daang asubete kesi, tobongokinos kesi ngikulepek, loger cha lokolong elamea kesi Yosam lokookeng a Gideon. Na atoanea Abimelek kerumor, abu Tola lokookeng a Pua alo arai lokookeng a Dodo bu ayuun Ngisirael. Arai Tola eka ekitela a Isakar. Alomit ngesi Chamir nakwap na ngimukur a Epiraim. Abu ngesi torik Isirael a ngikaru a ngitomwon-arei ka nguuni. Totoan Tola tonukakinae Chamir. Adaunet a Tola, bu Yair lo a akwap a Gilead. Torik ngesi Isirael a ngikaru a ngitomwon-arei ka ngiarei. Ayakasi ngesi talokookeng ngitomwon-uni lu ameenete ngisikiria ngitomwon-uni. Ayakasi kesi ngirerea ngitomwon-uni anakwap a Gilead, lu eringa enyaritae ngadakarin a Yair. Totoan Yair tonukakinae Kamon. Tosechakis Ngisirael nabo Ekapolon Akuj kilipa ta Baal ka Achitaros ka ngakujo a akwap a Sidon, ka Moab, ka Amon ta Pilistia. Toisikis kesi Ekapolon Akuj tapalikis akilip ngesi. Tongoik Ekapolon Akuj Ngisirael kilelebun, sodi kimiek Ngipilisti ka Ngiamon idwangete kesi. Kichiakiasi kesi ka aboliar Ngisirael daang lu alomito nakwap na a Ngiamor kide angolol a Yorudan anakwap a Gilead. Todokasi Ngiamon tani ekwakaye Yorudan toloto akitijwore ngitela a Yuda ka Benjamen ta Epiraim. Tanoma ngakiro nguna Ngisirael. Kikaloikis Ngisirael Ekapolon Akuj ebalasi, “Kisechak sua iyong, kainyo kiisik sua Akuj kosi sodi elipa ta Baal.” Tatachak Ekapolon Akuj kesi tama, “Pekolong kayuuni ayong esi Alomisiri, katoyuu nabo ani a Ngiamor, ka Ngiamon, ka Ngipilisti a? Apot Ngisidon dang ka Ngiamalek ta Ngiamon kitoboliatar esi. Nakaneni kikaloikis esi ayong, sodi katoyuu ayong esi anikech. Nakaneni kitoisikis esi ayong kilipa ngakujo ngache. Nyeringa nabo ayong kayuuni esi. Kapesi kikaloikisi ngakujo na iseut esi. Kimiekisi kesi kitoyuut esi ngirwa lu iriamuneta ngichan.” Nakaneni tolimokis Ngisirael Ekapolon Akuj tamasi, “Kisech sua. Tosubakinere sua ngakiro na kijoikinete iyong. Toyuunae kare sua akolongit naga.” Tachakasi kesi ngakujo nagelayek na atingito kesi sodi kilipa Ekapolon Akuj. Apot ngakiro na echanatar Ngisirael nguna kitongoa Ekapolon Akuj. Ani erumor tonyout ngasigerea a Ngiamon lojie, toloma Gilead. Tochunun Ngisirael toloma Misipa alo Gilead. Kingitas Ngisirael ka ngikarikok tamasi, “Ngae isiauni kitijik Ngiamon? Itwaan nicha isiauni ngesi eliwor ekarikon a ngitunga kadaang alo Gilead.” Arai Yepita lo a akwap a Gilead ekajwon. Nakaneni arai ngesi lokookeng a amalaat. Gilead ngesi arai apakeng a Yepita. Ayakasi Gilead talokookeng ngiche lu edouni aberu keng. Ani epolounete kesi, kiritasi Yepita anawi ebalasi, “Emam ibore irumi iyong ani a apakosi, kainyo irai iyong ikoku a aberu a ache.” Todok Yepita ani kata lokookeng tolot nakwap a Tob. Tochunun ngitunga ngiche luko pasiek nia Yepita, kiruko ka ngesi toliworos ngirukooi. Ani ekisidi kitijikis Ngiamon Ngisirael. Ani itijikinete Ngiamon Ngisirael, toloto ngikarikok a Gilead torikut Yepita alo Tob. Tolimokis kesi Yepita tamasi, “Bua toliwor ekarikon kosi, sodi atopedoreta akitijikin Ngiamon.” Nakaneni tatachak Yepita kesi tama, “Pekolong kiremokinosi esi ayong kiritasi anawi a apakang a? Nyo tokona iponitotor esi nikang ani ianyunitotor ngichan?” Tolimokis kesi Yepita tamasi, “Kibongu tokona sua nikon kainyo kisaki erukosi ka iyong kitiji Ngiamon sodi toliwor ekarikon a ngitunga kadaang a Gilead.” Tolimok Yepita kesi tama, “Ani kibuunito esi ayong nawi nabo akitijwore Ngiamon, ani kiinak Ekapolon Akuj ngoni agogongu edwanga Ngiamon, aliwor ayong ekapolon kus.” Tatachut kesi tamasi, “Ekapolon Akuj eliwor ekaanyunan yok. Kisubakini sua dir ngakiro na ilim iyong.” Sodi kirukosi Yepita ka ngikarikok a Gilead. Kitiliwosi ngitunga ngesi ekapolon ka ekarikon kech. Tolimu Yepita ngakiro keng daang alongaren Ekapolon Akuj alo Misipa. Ani erumor tomea Yepita ngitunga nia ekapolon a Ngiamon ebala, “Nyo kon atingit ayong, ibunitor akitijwore ngitunga a akwap kosi?” Tatachak ekapolon a Ngiamon ngitunga a Yepita tama, “Alemarete kolong Ngisirael akwap kang na apudunioto alo Misiri. Tolemasi napei anangolol a Arinon tanang nangololin a Yabok ka Yorudan. Tajala bocha tokona akwap ngina a ekisil.” Tobua nabo Yepita ngitunga keng nia ekapolon a Ngiamon ebala, “Nyelemara Ngisirael akwap a Moab kori na Amon. Ekote kolong ngakiro nege, na arotokinioto Ngisirael alo Misiri, apot kesi kitoro nariet tananga napas a Akaba, sodi potu Kadech. Tomeasi Ngisirael ngitunga nia ekapolon a Edom ebalasi, ‘Kimiekinae kare sua etoro nakwap kus.’ Nakaneni, abu ekapolon a Edom towou achamun kesi. Tomeasi nabo ngitunga lokapolon a Moab, towou nabo tani ngolo. Sodi kiboikinos robo Ngisirael Kadech. Ani erumor toloto kesi kitoro nariet, kirimo akwap a Edom ka Moab jik tanangut lowae lo alo kide Moab, lowae loche a angolol a Arinon. Toloma kesi neni, nakaneni nyedokara kesi ekwakaye Arinon kainyo arai neni ekukuor a Moab. Tomeasi Ngisirael itwaan nia Sion alo arai ekapolon a Ngiamor lo apolokinit Echibon, ebala, ‘Kimiekinae kare sua etoro nakwap kon atoloto nakwap kosi.’ Nakaneni towou Sion achamun Ngisirael itorete nakwap keng. Sodi Sion tochunak ngasigerea keng daang tolom Yaas, kitiji Ngisirael. Nakaneni abu Ekapolon Akuj na erai Akuj a Isirael kisidwang Ngisirael Sion ka ngasigerea keng. Sodi tolemasi Ngisirael akwap daang a Ngiamor alu alomito neni. Toloma kesi nakwap daang a Ngiamor napei alo Arinon alokuju tanang Yabok alowae alo alokwap. Kisiak nabo anariet ana eyei kide tanang Yorudan alo too. Aloger kangolo, Ekapolon Akuj na erai Akuj a Isirael ngesi eritari Ngiamor kotere Ngisirael lu eraakasi ngitunga keng. Isakete tokona esi abuar akwap ngina? Nyitingete ibore nikiinak esi akuj kus nabe Chemoch a? Kitingi sua ibore daang nikiinak sua Ekapolon Akuj na erai Akuj kosi. Ijok tokona iyong noi idwangit Balak lokookeng a Sipor lo erai ekapolon a Moab a? Eyei akolongit elekatar ngesi ka Ngisirael a, kori eyei akolongit ajioto kesi ka Ngisirael a? Ngikaru ngamiae ngauni kesi alomitotor Ngisirael Echibon, ka Aroer, ka ngadakarin kech ta ngirerea daang lu eyakasi lokwaasea a angolol a Arinon. Ikote kolong esi abuar ngirerea ngulu alokaru kangulu kadaang ai? Nyesechakina robo ayong esi, nakaneni kisechakis esi ayong ani isaketa akitijwore ayong. Kimiek Ekapolon Akuj na erai akatubon ngakiro totiaku akolongit naga ngakiro a Ngisirael ka Ngiamon.” Nakaneni abu ekapolon a Ngiamon nyiira ngakiro na ameuni Yepita nikeng. Sodi bu etau a Ekapolon Akuj nia Yepita tonyou ngesi kitor Gilead ka Manase, sodi tobongu Misipa alo Gilead ani erumor tolot Amon. Sodi kikong Yepita ani a Ekapolon Akuj ebala, “Ani kisidwang iyong ayong Ngiamon, kepeyokin ayong iyong itwaan nicha isiauni topud alokai kang bu akisiriamuun ayong abonguni alojie arai ekedwangan. Kalemikini ayong iyong itwaan ngini toliwor akipeyos na inomio.” Sodi todoka Yepita ekwakaye angolol tolot akitijwore Ngiamon. Kidwang ngesi Ngiamon kotere Ekapolon Akuj. Kitijik ngesi kesi napei alo Aroer tanang lowaitin daang a Minis. Araakasi daang ngirerea ngitomwon-arei, tanang Abel Keramim. Aarar ngitunga lukaalak. Apot Ngisirael kidwanga Ngiamon. Ani ebongori Yepita nawi keng alo Misipa, kisiriamu ngesi nakookeng idongae taramite atamburin. Ngesi bon arai ikoku a Yepita, amam Yepita ngide ngiche, lusapa kori lupesur. Ani ingolikini Yepita nakookeng, abu tochilichilaa ngiworui keng ialolongi tama, “Wae, nakookang! Kiar iyong ayong etau! Nyaanu ngakiro kiinunea iyong ayong ngichan luapolok kona? Ekong ayong ani a Ekapolon Akuj, nakaneni nyapedori ayong abuar akikong ngina!” Tolimok nakookeng ngesi tama, “Apa, ani kikongit iyong ani a Ekapolon Akuj, tosubere ayong ngakiro na ikong iyong, aloger alo kitachakinea Ekapolon Akuj iyong ngakiro naaronok ani eya Ngiamon, alu eraakasi ngimoe kon.” Nakaneni abu ngesi kingit apakeng tama, “Tosubakinere ayong akiroit napei naga, kimiekinae ayong bon a ngilapio a ngiarei, sodi erukosi ka ngapaalon kang atoloto ealolongo alomoru ani atoanea ayong eringa arai apese na nyepero ka ekile a ache.” Tolimok apakeng ngesi tama, “Kape.” Kimiek Yepita ngesi tolot a ngilapio a ngiarei. Kirukosi ngesi ka ngapaalon keng kigoro ialolongete alomoru ani araakar ngesi akatoan eringa nyiuta, kidou ngide. Ani edaun ngilapio ngiarei, tobongu ngesi nika apakeng. Tosubea apakeng ngesi ngakiro nasek ekongit ani a Ekapolon Akuj. Totoan nakookeng a Yepita eringa erai apese na nyepero ka ekile a ache. Toliwor ibore ngini etal alo Isirael, toliworos ngapesur eloseenete ekaru daang moding a ngirwa a nguomwon akigoro nakookeng a Yepita na akwap a Gilead. Tonyout ngitunga a Epiraim lojie, todokasi ekwakaye angolol a Yorudan toloto Sapon tolimokis Yepita tamasi, “Ikokini iyong ikalami ekukuor tolot kitiji Ngiamon, nyikinyar sua erukosi ka iyong ai? Kinomi sua akai kon a akim alokidiama kon!” Tolimok Yepita kesi tama, “Kipot ayong ka ngitunga kang eburata ka Ngiamon lokojokon. Ani kanyarae ayong esi nyepona esi ayuun ayong anikech. Ani engolikini ayong atamar nyikiyuunete esi ayong, abu ayong atajal akiyar kang atodoka ekwakaye atolot etiji Ngiamon. Kesidwang Ekapolon Akuj ayong kesi. Nyo tokona iponitotor esi nikang akolongit naga akitijwore ayong?” Ani erumor tochunak Yepita ngitunga a Gilead daang kitijwoto Ngiepiraim kidwanga. (Abalasi sek Ngiepiraim, “Esi ngitunga a Gilead lu iyakasi Epiraim ka Manase, irotokinete kolong esi ani a Epiraim!”) Kibaka ngitunga a Gilead alodoketa kadaang a angolol a Yorudan sodi kiratakinae Ngiepiraim nyeesiwa. Ani nacha ebunio itwaan a Epiraim ni esaki akisii, kingit kesi tama, “Kimiekinae atodoka ekwakaye.” Kingita ngitunga a Gilead ngesi tamasi, “Irai iyong itwaan a Epiraim a?” Ani ketama ngesi, “Meere.” Tolimokis ngesi tamasi, “Tama, iyong Chiboles.” Elimuni ngesi tama, “Siboles,” kainyo akuruworit ngesi alimun akiroit ngina niajokon. Sodi kirumut ngitunga a Gilead ngesi taarakis lodoket a Yorudan. Ngirwa ngulu, apon taarae Ngiepiraim ngabunge ngatomwon-omwon ka ngaarei. Topolok Yepita Isirael a ngikaru a ngikan-kapei. Sodi totoan ngesi tonukakinae lore a Gilead, lo ayei awi keng. Atoanet a Yepita, abu Ibisan lo a Betleem torik Isirael. Ayakasi ngesi talokookeng ngitomwon-uni ka tanakookeng ngatomwon-uni. Kipoto ngesi tanakookeng kiuta ngikiliok a emachar alogela, sodi torikok nabo talokookeng ngapesur ngatomwon-uni na emachar alogela kiuta. Topolok Ibisan Isirael a ngikaru a ngikan-kaarei. Sodi totoan ngesi tonukakinae Betleem. Atoanet a Ibisan, abu Elon lo a Sebulun topolok Isirael a ngikaru a ngitomon. Ani erumor totoan ngesi tonukakinae Aijalon anakwap a Sebulun. Atoanet a Elon, abu Abidon lokookeng a Ilel loa Pirason topolok Isirael. Ayakasi ngesi talokookeng ngitomwon-omwon ka ngitatae ngitomwon-uni lu ameto ngisikiria ngitomwon-kaarei. Topolok Abidon Isirael a ngikaru a ngikan-kauni. Sodi totoan ngesi tonukakinae lore a Pirason lo eyei nakwap a Epiraim ana a akwap a ngimukur a Ngiamalek. Apot nabo Ngisirael tosechakis Ekapolon Akuj, sodi kimiek ngesi Ngipilisti epolokinete Ngisirael a ngikaru a ngitomwon-omwon. Ayei itwaan iche a ere a Sora anyaritae Manoa. Arai ngesi eka ekitela a Dan. Amam aberu keng ngide ayakasi. Bu emalaikat a Ekapolon Akuj naberu a Manoa tolimok tama, “Kingolik a, ikolupana iyong emam ngide. Nakaneni ipoti iyong kidou ikoku nisapat. Tochoite robo imasi emuna kori epurot, kori nyiinyam akimuj cha daang na italeo akinyam, kainyo ipoti iyong kidou ikoku nisapat. Nyiibany akou keng jik kainyo italeunio ngesi toliwor ika Akuj napei idounere. Isiakini ngesi ayuun Ngisirael ani eya Ngipilisti.” Tolot aberu ngina tolimok lokile keng tama, “Abunit itwaan a Akuj nikang. Ekwaan ngesi ka emalaikat a Akuj, arai lo kiteemi lokojokon. Nyingita ayong ngesi ni abunio, nabo nyelimokina ngesi ayong ekiro keng. Nakaneni abu ngesi katolimok ayong tama, ‘Kingolik a, ipoti iyong kidou ikoku nisapat. Tochoite robo imasi emuna kori epurot, nabo nyiinyam ibore cha daang ni italeo akinyam, kainyo eliwor idia ikitaleuno a Akuj napei idounere.’ ” Sodi kilip Manoa Ekapolon Akuj tama, “Ee, Ekapolon Akuj, kelipit atamar, kimiek kare itwaan a Akuj ni imeuni iyong, bu nabo nikosi kitatam sua ngakiro na ejoikinit kisubea idia ni idounio.” Abu Ekapolon Akuj kiira ngakiro a Manoa sodi tomeu nabo emalaikat ni aberu eyei naroatin. Nakaneni pearukito Manoa ka ngesi. Sodi kipiiri aberu ngina atipei tolimok lokile keng tama, “Kingolik a, abu nabo ekile lo ngoon abunit nikang.” Tonyou Manoa kiwapak aberu keng. Tolot ngesi lokile ngolo kingit tama, “Iyong itwaan ningoon isuruori aberu naga?” Tatachu ekile ngolo tama, “Ee.” Sodi kingit Manoa tama, “Ani kiyookin ngakiro kon, nyo ejoikinit edia esubi? Ejoikinit ngesi ibooyi eboyor ali?” Tolimok emalaikat a Ekapolon Akuj Manoa tama, “Ejoikinit aberu kon echoikini ngakiro daang na alimok ayong ngesi. Nyeenyam ngesi ibore cha daang ni itorunit namusabib. Nyeemat emuna kori epurot, kori nyeenyam akimuj cha daang na italeo akinyam. Kiwap ngesi ngakiro daang na adungok ayong ngesi.” Tolimok Manoa emalaikat a Ekapolon Akuj tama, “Nyiilot kare. Kimiekinae sua ataarakisi iyong ikale idio.” Tolimok emalaikat a Ekapolon Akuj Manoa tama, “Ani kiratakis esi ayong, nyanyami ayong akimuj kus. Nakaneni ani kisubakis esi akipeyos na inomio, kipeyokis Ekapolon Akuj.” (Peayeni Manoa atamar erai ngesi emalaikat a Ekapolon Akuj.) Tolimok Manoa emalaikat tama, “Tolimokinae sua ekiro kon sodi atopedoreta sua arima iyong erai kiyookin ngakiro kon.” Kingit emalaikat ngesi tama, “Nyo ingitar iyong ekiro kang, kitee atamar erai lo kitalari?” Sodi tolem Manoa ikale ka akipeyos a ngalemet kipeye alokidiama ataaba, kipeyok Ekapolon Akuj na esubi ngakiro nakitalarete. Ani elosi asarae a akim kidiama alokeno a ngakipeyos, abu emalaikat a Ekapolon Akuj tolot kidiama alotooma asarae a akim, iteete Manoa ka aberu keng. Sodi tadakakinos kesi kwap tatapa ngireetin ngalup. Nyebuno emalaikat a Ekapolon Akuj nia Manoa ka a beru keng nabo jik. Tolimok Manoa aberu keng tama, “Iteni kitoaki ngoni kainyo kingolik Akuj!” Nakaneni tolimok aberu keng ngesi tama, “Arai tasaki Ekapolon Akuj akiar ngoni, pekechamunit ngesi ngakipeyos yok, nabo pekitoodikinit ngesi ngoni ngakiro nugu daang kori pekilimokinit ngakiro na ikote nugu.” Kidou aberu ngina ikoku nisapat, tolimok ekiro keng Samson. Abu idia topolou, topia Ekapolon Akuj ngesi. Min etau a Ekapolon Akuj nikeng kitogogong ngesi, na ayakar ngesi kiding Sora ka Echikol anadakar a Dan. Akolongit apei, abu Samson totiyaar tolot Timuna. Ani enangi inaa, kingolik ngesi apese ache na arai aka Ngipilisti. Sodi tobongo ngesi nawi tolimok apakeng ka itiokeng tama, “Eyei apese ache a Ngipilisti Timuna nakaminarit ayong. Torikokinae ayong apese ngina toliwor aberu kang.” Nakaneni tolimokis apakeng ka itiokeng ngesi tamasi, “Nyo peianyunea iyong apese alotunga a emachar yok, alu eraakasi ngitunga yok? Nyo ilositor iyong asakar aberu ni eya Ngipilisti lu eraakasi ngibukui lugelayek?” Nakaneni tolimok Samson apakeng tama, “Torikokinae ayong apese ngina kainyo ngesi kaminarit ayong.” Peayenete apakeng ka itiokeng atamar arai Ekapolon Akuj arikit Samson akisub ngakiro nguna ani asakea erot lo itijio Ngipilisti. Arai Ngipilisti apolokinito Isirael ngirwa ngulu. Sodi kirukosi Samson ka apakeng ta itiokeng toloto Timuna. Ani epedete kesi ngamanat a Ngimusabib alo Timuna, kiira Samson engatuny lotisorokit irurumae. Atipei bu etau a Ekapolon Akuj nia Samson kitogogong ngesi, sodi toruakin engatuny tonyilinyilaa a ngakan, loger lo enyilinyilaarea itwaan ikale. Nakaneni abu ngesi nyeelimok apakeng ka itiokeng ngakiro na abu ngesi tosubak. Ani erumor tolot Samson kisuruor apese ngina, tomina apese ngina ngesi. Ani ekisidi tobongo Samson kiut apese ngina. Totubor ngesi alorot tolot akingolikin akwaan a engatuny a lokolong aari ngesi. Kingolik ngesi enene a ao ka akimiet keng anakwaan a engatuny. Tokiritok ngesi akimiet a ao nakan keng tanyam alorot. Tolot ngesi nika apakeng ka itiokeng, nak kesi akimiet a ao ache, tanyama kesi. Nakaneni abu Samson nyeelimok kesi atamar alemuni ngesi akimiet a ao anakwaan a engatuny alo atoanit. Tolot apakeng a Samson nawi a apese kangina, sodi tosubak Samson akimuj nakaalan, kimujae. Asubeenete ngisorok lu eutanasi kongina. Ani ingolikinete Ngipilisti ngesi, yaut ngisorok ngitomwon-uni kiruko ka ngesi. Tolimok Samson kesi tama, “Kimiekisi katolimok ngakitadapet, ani kilimokis esi ayong eger a ngakitadapet kanguna eringa ngirwa lukan-kaarei a esukukuu a akuuta nyedauna, kainakini ayong esi ngiworui luajokak ngitomwon-uni ka ngiworui luche nabo ngitomwon-uni. Nakaneni ani kipiyo esi alimun eger a ngakitadapet kanguna, kiinakis esi ayong ngiworui luajokak ngitomwon-uni ka ngiworui luche nabo ngitomwon-uni.” Tolimut kesi tamasi, “Tolimokinae sua ngakitadapet kon eirasi, pan.” Tolim ngesi tama, “Nia ekanyaman abunio ibore ninyamat. Nia lokaagongon abunio ibore nikaabon.” Kipiyo kesi alimun eger a ngakitadapet kanguna a ngirwa a nguuni. Ani enangi akolongit na a ngoomwon, tolimokis kesi aberu a Samson tamasi, “Kimaima lokile kon kitolimok sua eger a ngakitadapet kanguna. Ani kemam kinomi sua iyong a akim ka ngitunga a awi a apakon. Kinyaraunete kolong esi sua nege akidem ngiboro a?” Tolot aberu a Samson nikeng kigoronok ngesi tama, “Kiremokino iyong ayong. Ilimokini iyong ngitunga kang ngakitadapet nakaneni nyikilimok ayong eger a ngakitadapet kanguna!” Tolimok Samson ngesi tama, “Kingolik a, eringa ayong nyelimokina tani apakang ka itiokang. Ekokini ayong kalimokini iyong ai?” Kigoronok aberu ngina Samson alorwa alukan-kaarei a akuuta kangulu. Ani enangi akolongit na ngakan-kaarei, tolimok Samson ngesi eger a ngakitadapet kanguna, kainyo abu ngesi toneikin akingisit loche. Tolimok aberu ngina ngitunga keng eger a ngakitadapet kanguna. Sodi ani akolongit na ngakan-kaarei, eringa Samson nyepero, apot ngitunga a ere kangolo tolimokis Samson tamasi, “Nyo ebob idwangit ao? Nyo egogong idwangit engatuny?” Tatachak Samson kesi tama, “Arai nyeerai aite kang ichileta esi ngalup, pekianyunito eger a ngakiro kanguna.” Atipei bu etau a Ekapolon Akuj nikeng kitogogong ngesi. Totiyaar ngesi tolot Achikelon taar ngikiliok ngitomwon-uni, tobut ngiboro kech, sodi yau ngiworui lukaanikak ajokak inu ngikiliok lu alimunete eger a ngakitadapet. Ani erumor, tobongo ngesi nawi a apakeng engoit ileleba kotere ngakiro asubakinosi. Kipotoroe aberu a Samson nakinae lopae keng lokolong aweikinit ngesi anakuuta. Ani ekisidi, tolot Samson aanyun aberu keng ngirwa lu alemere ngakanoi. Arikokinit ngesi aberu keng ikale. Tolimok ngesi apakeng a aberu keng tama, “Asaki atoloma kai a aberu kang.” Nakaneni kitonger apakeng a aberu Samson alomar tooma. Tolimok ngesi Samson tama, “Etamit ayong atamar kori iremokino iyong ngesi lokojokon. Sodi epoto ayong ngesi ainak lopae kon. Nyibus mono nakaatokeng naachi akidwang ngesi a? Tolema kare ngina.” Tolim Samson tama, “Akolongit naga, nyeringa nabo ayong kapaikinio ngakiro na asubakinea ayong Ngipilisti!” Sodi tolot Samson kirum ngikweei ngamiae ngauni. Kimorik ngikosiman kech toen a ngaarei-rei, sodi toinik ngakinwaket naeneta. Ani inokakini ngesi ngakinwaket nguna, talakak ngesi ngikweei tolomasi namanat a Ngipilisti. Kinoma kesi ngikinyam lu alemitae daang ka lu ayakasi namanat, ta ngikito a akimiet dang. Sodi kingitas Ngipilisti tamasi, “Ngae asubi ngakiro nugu?” Tolimut kesi tamasi, “Samson, lo erai lokamuran a itwaan a Timuna. Asubi ngesi kongina kainyo epotorio aberu keng nakinae lopae keng.” Sodi tolot Ngipilisti naberu kinoma ngesi ka apakeng a akim totoaka. Tolimok Samson kesi tama, “Ani kerai na isubete esi kesi nugu, ekongi ayong atamar atachakini jik, ani erumor atolot!” Kitijik Samson kesi nikaronon taar lukaalak. Ani erumor tolot ngesi kiboikin nakope a ataaba ana eyei Etam. Pot Ngipilisti toloma Yuda, sodi kitijikis ngitunga a ere a Lei. Kingit ngitunga a Yuda kesi tamasi, “Nyo kitijioto esi sua?” Tatachut kesi tamasi, “kipotu sua akirumun Samson atoena sodi atosubeta ngesi ngakiro nakolong kisubea ngesi sua.” Tonyout ngitunga a Yuda ngabunge ngauni toloto nakope a ataaba ana eyei Etam kingita Samson tamasi, “Nyiyeni iyong atamar kipolokinito ngoni Ngipilisti a? Anukiro tokona nugu kisubakinea iyong sua?” Tatachak Samson kesi tama, “Asubakinea ayong kesi ngakiro nakasubakineta kesi ayong.” Tolimokis kesi ngesi tamasi, “Kipotu tokona sua akien iyong sodi epotokisi Ngipilisti.” Tolimok Samson kesi tama, “Kikongo esi atamar nyikiarete esi ngikulepek ayong.” Tolimut kesi tamasi, “Mam, nyikiari sua iyong. Akien bon kieni sua iyong sodi epotokisi Ngipilisti.” Sodi toena kesi ngesi a ngaunoi a ngaarei anakitet tobuut ngesi anaburibur. Ani enanguni ngesi Lei, tomotunos Ngipilisti nikeng echalasi. Atipei bu etau a Ekapolon Akuj nikeng kitogogong ngesi. Tongedangedaa ngesi ngaunoi na aenitere ngakan keng tosub keraakasi ngiunoi lu enomit akim. Taanyu ngesi akoit a abokony a esikiria alo keringa etoani. Tokudokin ngesi tolem akoit ngina, taarea ngikiliok abunget apei. Toeok Samson tama, “Aar ngikiliok abunget apei a akoit a abokony a esikiria. Asenok ayong kesi a akoit a abokony a esikiria.” Ani erumor ngesi aeo, tachaka ngesi akoit ngina anakan. Tanyarae neni Ramas Lei. Sodi tanyam ngesi akure lokojokon. Tanyara ngesi Ekapolon Akuj tama, “Kitiliwo iyong ayong ekedwangan a eger aloationon. Kaari tokona akure ayong, sodi kerumut Ngipilisti lu eraakasi ngibukui lugelayek lugu a?” Sodi tangaa Akuj nikoororon analup alo Lei, pot ngakipi. Tamat Samson ngakipi kikwaru ngesi topuatun etau keng. Tanyarae elelea ngolo Akore. Eringa elelea ngolo eyei Lei. Torik Samson Ngisirael a ngikaru a ngitomwon-arei alu apolokinitotor Ngipilisti akwap Akolongit apei, alosi Samson lore a Ngipilisti lo enyaritae Gasa, kingolik amalaat sodi tolot topero ka ngesi. Tolimokinae ngitunga a Gasa tamarae, “Abu Samson nege.” Kiriama kesi neni sodi toperut kesi Samson alokidor a ere akwaar kiiya. Kidatakis kesi akwaar kiiya itamete ebalasi, “Kimiekisi edarutu tanang echili nanyang, sodi ataara ngesi.” Toper Samson ani enangi kiding akwaar, tonyou tolot toting ngidorin a ere toditu, kiturukuu ka ngapirio naarei daang aapei ka egoliet kech, ta ngiboro kech daang, sodi kidokok losegeta keng tadaka jik todokarae kidiama emukura lo erounit Eburon. Ani ekisidi kanguna, tachamun Samson ka aberu ache anyaritae Delila, na alomit nadipo a Serek. Pot Ngikapolok lukan a Ngipilisti tolimokis aberu ngina tamasi, “Kimaima Samson kitolimok ibore itogogongit ngesi lokojokon, ka eger lo kipedorea sua akidwang ngesi, atoena sodi etilimiyosi. Elemuni ipei kosi ngaropiyae abunget apei ka amiat apei kiinak iyong.” Sodi tolimok Delila Samson tama, “Tolimokinae kare ayong ibore ni kitogogongit iyong lokojokon ka eger lo epedorea itwaan akidwang iyong kitoen sodi kitililimiyo.” Tatachu Samson tama, “Ani kaen ayong a ngaunoi a akau anakitet a ngakan-kaarei ana nyitoonitoe, apalagagi ayong ekok ngitunga luche.” Sodi inut ngikapolok a Ngipilisti Delila ngaunoi a akau nakitet ngakan-kaarei na peetoonitoe, sodi toen Delila Samson a ngaunoi kanguna. Edait Delila ngikiliok ngiche alokai ana alotooma idarito. Tolimok Delila Samson tama, “Samson, eponito Ngipilisti!” Nakaneni tonged Samson ngaunoi nguna loger a ngiunoi alu enomi akim tongedas. Sodi apot kesi nyeeyan ni eanyunitor ngesi ngikilinga. Tolimok Delila Samson tama, “Kingolik a, kitabangaan iyong ayong, sodi kingal. Tolimokinae kare eger lo epedorea itwaan akien iyong.” Tolimok Samson ngesi tama, “Ani kaen ayong a ngaunoi anakitet ana emam ibore aenitere a ache, apalagagi ayong ekok ngitunga luche.” Sodi tolem Delila ngaunoi nakitet toen Samson, ani erumor kirema tama, “Samson, eponito Ngipilisti!” Edarito ngikiliok anamaniyat ana alotooma. Nakaneni tonged Samson ngaunoi anakan keng loger a ngiunoi aluuchik. Tolimok Delila Samson tama, “Tani tokona eringa iyong kitabangaanit ayong kingalae. Tolimokinae kare eger lo epedorea itwaan akien iyong.” Tatachu Samson tama, “Ani kioyik iyong ngaenet nakan-kaarei a ngitim kang totokokin, todonyok a emutu kirijak, apalagagi ayong ekok ngitunga luche.” Ani ejotoor Samson, tolem Delila ngaenet nakan-kaarei a ngitim a Samson tooyik totokokin, sodi todonyok a emutu kirijak, dio alimokin Samson tama, “Samson, eponito Ngipilisti!” Nakaneni tokienyu Samson talachak ngitim keng anatokot. Sodi kingit Delila Samson tama, “Ikokini iyong itamari ayong ‘Kamina ayong iyong,’ togeal etau kon ni eyei ai? Ngalooso nauni nugu kitabangaan iyong ayong, nabo nyelimokina iyong ayong ibore ni kitogogongit iyong lokojokon.” Torubak Delila ingisit Samson jiik. Tobela Samson ni aneikinor Delila akingisit ngesi, sodi tolimok ngesi Delila ngakiro keng daang tama, “Nyebanya akou kang nakanuan jik, kainyo ketaleunio kolong ayong atoliwor ika Akuj napei eringa ayei nakook a itiokang. Ani kabanyar ayong, edaun ngikilinga kang atapalagag ayong ekok ngitunga luche.” Ani eanyuni Delila atamar kalimoki Samson ngakiro na iteni, tomea itwaan anyarare ngikapolok a Ngipilisti ebala, “Potu tokona aponet naga bon kainyo kalimoki ngesi ayong ngakiro na iteni.” Sodi pot ngikapolok a Ngipilisti nikeng etingito ngaropiyae. Kitojotoo ngesi Samson anakejen keng sodi tanyarau itwaan bu tabanya ngaenet nakan-kaarei a ngitim a Samson. Ani erumor tolomak aboliar Samson ani adaunotor Samson ngikilinga. Tolim Delila tama, “Samson eponito Ngipilisti!” Tokienyu Samson itami ebala, “Alachakin ayong atobuchar loger lopalem.” Peayeni ngesi atamar aisiki Ekapolon Akuj ngesi. Kirumut Ngipilisti ngesi topuyonokis ngakonyen keng. Torikosi ngesi Gasa sodi toena ngesi a ngiriko a ngasua ananyangayek. Kitusubae ngesi etich a akiriere alojela. Nakaneni kisiakis ngitim a akou keng arupun nabo. Kiriamariama ngikapolok a Ngipilisti akinyam akimuj nakaalan ka akipeyokin akuj kech nabe Dagon akipeyos naapolon. Toeokis kesi tamasi, “Kisidwang akuj kosi sua Samson lo erai emoit kosi!” Ani ingolikinete ngitunga Samson, kipuruut akuj kech ebalasi, “Kisidwang akuj kosi sua emoit kosi, lo enyasu akwap kosi, lo aar ngikaalak kosi.” Ani elakarosi kesi, tamasi, “Tanyarautu Samson, bu tobolia kitalaka ngoni.” Sodi tanyaraunae kitalaka kesi. Kitowae ngesi alokiding ngapirio. Tolimok Samson edia lo arikit ngesi tama, “Kimiekinae atatap ngapirio na itoweito akai, asaki atogongakin.” Eleleba ngikiliok ka ngaberu kai, ta ngikapolok a Ngipilisti daang. Ayakasi nabo ngikiliok ka ngaberu esibit ngabunge ngauni kidiama akai, lu eteete Samson ebolia. Sodi tanyara Samson Ekapolon Akuj tama, “Ee Ekapolon lo irai Ekapolon Akuj, kitamunae ayong. Kelipit iyong atamar kitogogong ayong akitogogongiet naga bon. Kitogogongoi kare cha Akuj sodi atatachakinea Alopilisti kalu ngakiro na apuyokineta kesi ngakonyen kang naarei.” Toting Samson ngapirio naarei eyakasi kiding akai igangito, toting apei a akan ana aloteten, toting nache alokedieny, sodi kijuka Kirema tama, “Kimiekinae ayong atotoaka ka Ngipilisti!” Abu ngesi kijuka a ngikilinga keng kadaang, sodi toukokin akai lokapolok lukan ka ngitunga daang lu ayakasi neni. Abu Samson taar ngitunga lukaalak na atoanea ngesi lu idwangito lu aari ngesi eringa eyari. Pot talokaatokeng ka ngitunga a awi kech, luche tolemasi akwaan keng yaasi tanukakis kiding Sora ka Echitaol, naliel a Manoa alo arai apakeng. Arikit Samson Ngisirael a ngikaru a ngitomwon-arei. Ayei kolong itwaan anyaritae Mika ni alomit nakwap na a ngimukur a Epiraim. Tolimok ngesi itiokeng tama, “Ngaropiyae nakolong araakasi abunget apei ka amiat apei akokoyari itwaan anikon a, sodi kilamakin iyong eira ayong a ngaki kang, kingolik a, ngaropiyae nguna atingit ayong. Ayong kolong alemari.” Tolimok itiokeng ngesi tama, “Kitopia iyong Ekapolon Akuj, ikakoku.” Sodi tobuak ngesi itiokeng ngaropiyae. Tolim itiokeng tama, “Ekongi ayong alope akitaleun ngaropiyae nugu toliworos ngaka Ekapolon Akuj nyeeponeta ngilam nia lokookang. Elemunio kesi tosubunere akuj nasubuna nakitoe sodi toburuchiarae a akwangat. Tokona bocha, kabuakini ayong iyong ngaropiyae nugu.” Ani erumor tolem ngesi ngaropiyae nguna tobuak itiokeng. Tolem itiokeng ngaropiyae nguna ngamiae ngaarei nak eketiakan ngasua. Kicheu itwaan ngini akuj nasubuna anakitoe sodi toburuchia a akwangat. Kiwaakinae kai a Mika. Ayei itwaan nibe Mika ngini ni elipeenea akuj keng. Tosub ngesi ngakujo nasubuna nabo todonyu akaluwat*g** sodi toseu lokookeng epei toliwor emuron keng. Ngirwa ngulu amam ekapolon ayei Isirael. Asubi itwaan daang ngakiro na ajoikinito ngesi ilope. Ngirwa lupei ngulu, ayei esorokit epei a Ngilawi lo ebooyi alore a Betleem alo Yuda. Tonyou ngesi alo Betleem tasaka wache ni elomi. Ani analosit keng, tanangu ngesi nawi a Mika na ayei nakwap na a ngimukur a Epiraim. Kingit Mika ngesi tama, “Aliwae ibunio iyong?” Tatachu ngesi tama, “Arai ayong Elawit abunit alore a Betleem alo Yuda. Asaki wadio ni alomi.” Tolim Mika tama, “Eruko, toliwor eketutukon kang ka emuron kang, sodi kainak ayong iyong ngaropiyae ngatomon ekaru daang, ka ngiworui, ta akimuj.” Tacham esorokit lo a Lawi ngolo akiboikin ka Mika loger a lokookeng. Kitiliwo Mika ngesi emuron keng, sodi kiboikin nawi a Mika. Tolim Mika tama, “Ayeni tokona ayong atamar itojoki Ekapolon Akuj ngakiro kang daang kainyo Elawit erai emuron kang.” Ngirwa ngulu, amam ekapolon ayei Isirael. Ngirwa ngulu, asakete ngitunga a Dan akwap na itiliworete akech toloma, kainyo peatiakakinitae kesi akwap na erai akech alotela a Isirael. Sodi tomeasi ngitunga a Dan ngikiliok ngikan lukoosok anawiyei kadaang a ekitela a Dan. Ameario kesi alorerea a Sora ka Echitaol akireb akwap. Tolimokinae kesi kona, “Kapesi torebo akwap.” Tanangut kesi nakwap na a ngimukur a Epiraim, pot kai a Mika, topero neni. Na ayakatar kesi kai a Mika, apot toyena ekiruor a Elawit alosorokit ayei neni. Toreeunos nikeng kingita ngesi tamasi, “Ngae kiyauni iyong nege? Nyo isubi iyong anakwap kana?” Tatachu ngesi tama, “Eya ngakiro nakipupokina ayong ka Mika. Katachi ngesi ayong atosubea etich arai emuron keng.” Tolimokis kesi ngesi tamasi, “Kingit kare Akuj kejokearosi ngakiro a alotoru anakosi kana!” Tatachu emuron tama, “Kapesi akaalimon. Kiyoki esi Ekapolon Akuj analotoru anakus kana.” Sodi torotokis ngikiliok lukan ngulu tanangut lore a Laich, sodi kingolikis eger lo ebooyoto ngitunga kaneni peemito. Ekoni eboyor kech lo a Ngisidon. Araakasi kesi ngitunga lu ebooyete akaalimon, taraakas lukelilingak, lu amam itwaan eburaata. Ariamunito kesi ibore daang nicha eitanito, nabo abarito. Aloka kesi ani a Ngisidon nabo peaiyosi kesi ka ngitunga ngiche. Ani ebongorete ngikiliok lukan ngulu Sora ka Echitaol, apot ngitunga kech kingita kesi tamasi, “Anukiro ianyut esi?” Tolimut kesi tamasi, “Tonyoutu! Atoloto etijikisi ngitunga a ere a Laich, kainyo kingolik sua akwap erai natiajokon. Iboikinosi tokona esi emam ibore isubete a? Kiburuburakisi toloto tolomasi nakwap kitiliwosi akus! Ani inangete neni, iriamunete ngitunga lu nyiilit. Epolot akwap. Kiinak esi Akuj akwap ngina, na erai akwap na eyei ibore daang ni iitanit itwaan.” Tonyout ngitunga ngamiae ngakan-kapei alokitela a Dan, tonyout alo Sora ka Echitaol alosit ejie. Toloto kesi kigurosi adakar alo too Kirias Yearim, alo Yuda. Ngesi eringaakar neni enyaritae adakar a Dan. Ani enyounete kaneni, tanangut kai a Mika na ayei nakwap a ngimukur a Epiraim. Apot ngikiliok lukan kolong sek alosito akireb akwap a Laich, tolimokis ngirukitos kech tamasi, “Iyenete esi atamar, tooma apei a ngakais kanu eyei akuj na esubunitae anakitoe sodi toburuchiarae a akwangat a? Eyakasi tani ngakujo nache ka akaluwat a emuron. Ekoe, anukiro kisubakini?” Apot kesi toloto kai a Mika ni ebooyo esorokit loa Lawi ngolo, kingitanasi ngesi eger a eboyor keng. Esaa lopei ngolo, apot ngitunga luche a ekitela a Dan, lu eraakasi ngamiae ngakan-kapei, lu aponito ejie, towaa alokidor. Tolomasi ngikarebok lukan ngulu jik kai tolemut akuj na asubunitae anakitoe toburuchiarae a akwangat, tolemut tani ngakujo nache, ka akaluwat na emuron. Esaa ngolo awei emuron alokidor arukito ka ngitunga lu aloose ejie lu araakasi ngamiae ngakan-kapei. Ani elomarete ngitunga ngulu kai a Mika alemar ngiboro lukitaleuno ngulu, abu emuron kingit kesi tama, “Nyo isubete esi?” Tolimut kesi tamasi, “Kililing. Tobunak akituk nakon ngina bu erukosi ka sua toliwor eketutukon kosi ka emuron kosi. Nyejok iyong iliwor emuron a ekitela alo Isirael akidwang aliwor emuron awi a itwaan a ipei a?” Kitalakasi ngakiro nguna emuron ngolo, sodi tolem ngiboro lukitaleuno ngulu kirukosi ka ngitunga ngulu. Toreas kesi torotokis. Kingarenikis ngide kech, ka ngaatuk kech, ta ngiboro kech. Ani eakarete kesi alokai a Mika, tanyarau Mika ngikudunyet keng lu ayakasi nakais pot toloto lojie. Toditasi kesi ngitunga a Dan, enyarito kesi echalasi. Sodi toreas ngitunga a Dan tolimokis Mika tamasi, “Nyo kichani iyong irikunitor iyong ajore naga daang?” Tatachu Mika tama, “Nyo ibalatar esi ayong, ‘Nyo kichani?’ Tarai bo ilemasi esi ngakujo kang nakolong asubi ayong, ka emuron kang tolooso. Nyo idongit nikang?” Tolimut ngitunga lua Dan ngulu tamasi, “Tobunak akituk nyiilim tani akiroit apei, kainyo engoyete ta ngikiliok lugu kitijikis iyong, sodi totoaka iyong ka ngitunga a awi kon.” Sodi torotokis ngitunga a Dan. Ani ingolikini Mika atamar eya ngitunga ngulu ngikilinga kedwangito ngesi, abu tobong nawi keng. Alemaret kech ngiboro lu asubuni Mika, ani erumor torikosi emuron keng, apot kesi toloto Laich ni ayakasi ngitunga lu ebooyete akaalimon, taraakas lukelilingak. Taara kesi ngitunga a ere kangolo daang sodi kichunya ere a akim. Emam itwaan abu toyuu kesi kainyo alonikina kesi ka Sidon nabo amam ngitunga ngiche aiyotor kesi. Ayei neni nadipo napei ayei ere a Besireob. Toduko ngitunga a Dan ere ngolo nabo, toloma. Tanyarata kesi ekiro a ere kangolo Dan. Arai Dan ekiro a apaakech alokookeng a Yakobo. Arai sek ekiro a ere kangolo Laich. Kitowaa ngitunga a Dan akuj nasubuna ngina toliwor ilipeeneo. Yonasan lo arai lokookeng a Gerichon, alo arai lokookeng a Musa ngesi abu toliwor emuron a ekitela a Dan. Toliworos ngalesea keng ngimurok jik tanang ni arikere ngitunga toliworos ngirikon. Abu akuj nasubuna a Mika ngina min neni ngirwa daang lu ayakar eam lo elipeenere Akuj Chilo. Ngirwa ngulu, lu amamakar ekapolon ayei Isirael, ayei Elawit epei alomit lowaitin lukalonak a akwap ana a ngimukur a Epiraim. Toriko ngesi apese alore a Betleem alo Yuda akitiliwor apese keng a ngabwes, nakaneni abu apese ngina tongoa ka ngesi sodi tobongo nawi a apakeng alo Betleem sodi kiboi kaina ngilapio nguomwon. Tonyou lokile keng tolot asakar ngesi, esaki akimaima tobuu nawi. Kirukosi ngesi ka ekasuban etich keng taramasi ngisikiria ngiarei. Toriko apese ngesi kai, ani ingolikini apakeng a apese ngesi, kipeyou elakara. Abu apakeng a apese kiratak ngesi, sodi kiboikin ngesi neni a ngirwa a nguuni. Toliworos kesi imujeenete ka apereenen neni. Ani akolongit na a ngoomwon, tonyout kesi nataparach elilim esakete alosit. Nakaneni tolimok apakeng a apese lokamuran keng tama, “Tanyam mono ibore idio kigangea etau. Ani erumor toloto.” Sodi kiboikinos ngikiliok luarei kimuja, tamata aapei. Abu apakeng a apese tolimok ekile ngolo tama, “Toper kare nege akwaar naga talakar.” Tonyou Elawit esaki alosit, nakaneni kiratak apakeng a apese ngesi, tanang eperi neni nabo. Akolongit na a ngakan, tanyou ngesi nataparach elilim tasak alosit. Tolim apakeng a apese tama, “Kimuj mono akimuj adio tonyou ta esaa eche.” Apot ngikiliok luarei ngulu kimuja aapei. Ani enyounete ekile ngolo ka apese keng, ta ekasuban etich keng, esakete alosit, tolimok apakeng a apese ngesi tama, “Kingolik a, edikino tokona ewari. Toper nege akwaar naga. Aapiki tokona ni eribokinea. Toper nege sodi talakar. Ani moi tonyou nataparach elilim tolot nawi.” Nakaneni towou ekile ngolo akiper. Tonyou torotok, sodi tanangu diyete Yebus (ngesi Yerusalem). Arikit ngesi ngisikiria ngiarei iwokito ngasaaja. Arukito nabo ka apese keng. Tanangut kesi diyete Yebus kewar, sodi tolimok ekasuban etich keng ngesi tama, “Nyo pekilomarea lore loa Ngiebus logo atopero?” Nakaneni tolimok ekapolon keng ngesi tama, “Nyikilomari ngoni lore a ngitunga alugelayek, alu nyeraakasi Ngisirael. Kapana ngaren wadio atopero Gibea kori Rama.” Sodi toloto kesi kiporosi Yebus. Ani edooyori akolong, tanangut kesi Gibea ni ayei nakwap a ekitela a Benjamen. Totuboros kesi lore ngolo toloto akiper neni. Tolomasi kesi lore kiboikinos nikalapatan kainyo emam itwaan abu kipeyou kesi topero nawi keng. Na ayakatar kesi neni, abu ekasukout eche bu neni ebong arumoret a etich keng anamanat. Arai ngesi eka akwap a Epiraim, nakaneni alomit ngesi Ngibea ngirwa ngulu. (Araakasi ngitunga luche alomito neni ngika ekitela a Benjamen.) Abu ngesi kingolik ekaloton ngolo ibooyi anikalapatan a ere, sodi kingit ngesi tama, “Aliwae ilosi iyong? Aliwae ibunio iyong?” Tatachu Elawit tama, “Kinyouni sua alore a Betleem, alo Yuda, kilosi lowaitin lukalonak a akwap ana a ngimukur a Epiraim, ani erai akwap kang. Alosit ngoon ayong lore a Betleem, alo Yuda. Alosi tokona nawi kang. Nakaneni emam itwaan kipeyou sua nawi keng atopero. Kitingit sua nginyia lu itoonitoe ka ngatunyeny na edakasi ngisikiria kosi. Kitingit tani ngamugati ka emuna lu kinyami ayong, ka apese kang, ta ekasuban etich kang. Kitingit sua ibore daang nikiitanit.” Tolim ekasukout tama, “Kiboyoto akaalimon. Tolomutu nawi kang kengarakini ayong esi, nyiipero nikalapatan.” Toriko ngesi kesi kai keng. Nakinae ngisikiria nginyia tadaka. Kilotasi ngipeyok kech ngakejen, sodi kimuja, tamata. Ani eringa kesi imujete, elakara, pot ngikiliok a ere kangolo lu itepereenete ngikiliok luche kiriama akai. Kidichakis kesi ekidor a akai isuruorete ekasukout lolope a akai ebalasi, “Kipud itwaan nitete abuni kai kon! Kisaki sua etopero ngesi!” Nakaneni topudo ekasukout ngolo tolimok kesi tama, “Meere kongina talopaekang! Nyiisubakis kare akisech naaronon noi, a ngileech naga! Abe erai bo itwaan epeyonon kang! Kingolikis a, eyei apese keng na a ngabwes nege, ka nakookang na eringa nyepero ka ekile a ache. Kimiekisi kepudok kesi, tosubeta ngakiro daang na isakete. Nakaneni nyiisubeta itwaan en akisech naaronon noi naga!” Nakaneni apot ngikiliok ngulu nyiirasi ngakiro keng. Sodi kipudok Elawit ngolo kesi apese keng na a ngabwes. Totikoonosi kesi apese ngina akwaar kiiya kiwala. Ani iwalari, tonyou aberu ngina tolot tadakakin lokidor a akai a ekasukout, ana ayei lokile keng tooma. Toper ngesi kaneni tanang ipiripiruuni akolong. Tonyou lokile keng nataparach esaki alosit. Ani engaari ngesi ekidor, toriam ngesi apese keng eperi alongaren akai itorwarit ngakan enangunito lokidor a akai. Tolim ngesi tama, “Tonyou atoloto!” Nakaneni nyetachuna apese ngakiro. Sodi kidokok ngesi akwaan a apese losikiria tolot nawi keng. Ani enanguni ngesi nawi keng, toloma kai tolem ekileng. Tolem ngesi akwaan a apese keng totubutubu ngatubet ngatomon ka ngaarei. Yaa ngesi ngatubet nguna a ngapei-pei lotela lutomon ka ngiarei a Ngisirael. Tolimut ngitunga daang lu engolikinete tamasi, “Nyeanyuna nugu nakanuan! Nyesubakina na ikote nugu nakanuan, napei kolong apudunioto Ngisirael anakwap a Misiri! Kitamakisi pan ngakiro nugu ataanyutu ibore nikisubakini! Ekoe, kikokini ai?” Tonyout Ngisirael daang napei alo Dan tanang Beer-cheba, pot tani anakwap a Gilead ana ayei lowae lo alo kide. Tochunun kesi Misipa eraakasi ngipei alongaren Ekapolon Akuj. Ayakasi ngikarikok a ngitela a Ngisirael daang ni achunakina ngitunga a Akuj neni. Arai ekimar a ngasigerea ana aloose a ngakejen 400,000. Kiirasi ngitunga a Benjamen atamar achunakin Ngisirael luche daang Misipa. Kingitas Ngisirael tamasi, “Tolimokinae sua eger lo asubakinor akisech naga?” Abu Elawit lo arai lokile keng a apese ana aaritae tatachu tama, “Kiponi ayong ka apese kang a ngabwes apotu Gibea na erai akwap a ngitunga a Benjamen, kisaki akiper neni. Katonyoikis ayong ngitunga a Gibea kiriama akai nakwaare. Asakete kesi akiar ayong. Nakaneni totikoonosi kesi apese kang, totoan. Atolema ayong akwaan keng atotubutubu sodi ayaa ngatubet a ngapei-pei lotela lutomon ka ngiarei a Ngisirael. Asubakis ngitunga ngulu akisech naaronon noi a ngileech alokiding Ngisirael. Kingolikisi a, Ngisirael daang, tolimutu pan ngakiro na isakete esi tosubakinae.” Tonyout ngitunga daang towaa aapei tolimut tamasi, “Emam sua itwaan tani ipei, kerai ni elomit loeam kori ni elomit kai, ebongori nawi. Nakaneni ngakiro kisubakinea Gibea nugu. Kirami ekura atoseutu ngitunga lu eloose kitijikis ngitunga a Gibea. Alo Isirael kadaang, elemunio ngitunga ngipei-pei ani eya lutomon totingakis ngasigerea akimuj, sodi toloto luche kirirata ngitunga a Gibea kotere akisech naaronon asubakis kesi alo Isirael.” Sodi tachunakin Ngisirael daang kotere ibore ipei bon, akitijikin ere ngolo. Apot ngitunga a ngitela a Ngisirael tameasi ngitunga wadaang akwap a ekitela a Benjamen ebalasi, “Anukiro naaronok nugu isubakis esi? Tokona bocha, kipotokinoe sua ngitunga luaronok eya Gibea ngulu ataara sodi atolemasi ngakiro naaronok nugu alo Isirael.” Nakaneni apot Ngitunga a Benjamen nyiirasi ngakiro na eruosi Ngisirael luche. Tochunun ngitunga a Benjamen alorerea aluche pot Gibea esakete akitijwore Ngisirael. Tanyaraut ngitunga a Benjamen ngasigerea ngabunge ngatomwon-arei ka ngakan-kapei alorerea kech. Kiatakinos nabo ngitunga a Gibea lu aseunitae lu araakasi ngamiae ngakan-kaarei. Anasigerea kanguna kadaang, ayakasi ngikiliok lu aseunitae lu araakasi ngamiae ngakan-kaarei. Akedienyaka ngikiliok ngulu. Eoseka kesi arai na egumarea epei kech daang amoru a apira, nyedieki tani etimot. Tochunakis Ngisirael luche ngasigerea nakajwok 400,000. Tonyout Ngisirael toloto ni elipeenere alo Besel, kingita Akuj tamasi, “Ekitela ali anikosi echamit isiauni kitijik ngitunga a Benjamen?” Tatachu Ekapolon Akuj tama, “Ekitela a Yuda ngesi isiauni.” Tonyout Ngisirael nataparach toloto toloma diyete ere a Gibea. Toloto kesi kitijikis ngasigerea a Benjamen, sodi kisibaka ngasigerea alowaitin alu ingoliarito lore. Topudut ngasigerea a Benjamen alore. Taara akolongit ngina ngasigerea a Ngisirael ngabunge ngatomwon-arei ka ngaarei. Nakaneni apot Ngisirael totitinyikis toloto kibaka anisek ebakitotor akolongit na ekingaren. Toloto kesi kigoro alongaren Ekapolon Akuj sodi kingita ngesi tamasi, “Kibongori nabo etijwoto ngitunga a Benjamen lu eraakasi talokaatokosi a?” Tatachu Ekapolon Akuj tama, “Kapesi kitijwoto kesi.” Sodi toloto Ngisirael akitijikin ngitunga a Benjamen akolongit na a ngaarei. Topudut nabo ngitunga a Benjamen alo Gibea akolongit na a ngaarei ngina taara ngasigerea a Ngisirael ngabunge ngatomon ka ngakan-kauni. Sodi toloto Ngisirael daang Besel kialolongo kaina. Kiboikinos kesi neni ngaren Ekapolon Akuj, nyimuja tanang ebong. Kipeyoto kesi ngakipeyos a ekisil ka ngakipeyos na inomio nginerin daang, kipeyoto daang alongaren Ekapolon Akuj. Kingita Ngisirael Ekapolon Akuj nguna esubakinete. (Kainyo ayei asaduku a Achamunet a Akuj Besel ngirwa ngulu. Pineas lokookeng a Eleasar alo erai lokookeng a Aron ngesi aweikinit asaduku ngina.) Kingita kesi Ekapolon Akuj tamasi, “Kibongori nabo etijikis ngitunga a Benjamen lu eraakasi talokaatokosi, kori kiboikin emiekisi?” Tatachu Ekapolon Akuj tama, “Kitijwoto. Kesidwangi ayong esi moi nataparach.” Sodi kisiriama Ngisirael ngasigerea ngache Gibea toduka. Tonyout Ngisirael akitijikin ngitunga a Benjamen akolongit na a ngauni, kibaka ingoliarito Gibea loger losek a ngirwa aluche. Topudut ngitunga a Benjamen alore, toreae kesi wache torotokis alore. Kisiakis kesi akiar Ngisirael ngiche loger losek asubeenete, taara alorotin a ngaroatin ana etenere Besel ka na etenere Gibea. Taara kesi Ngisirael esibit ngitomwon-uni. Tolimut ngitunga a Benjamen tamasi, “Kidwangi ngoni kesi loger lopalem.” Nakaneni tolimut Ngisirael tamasi, “Potu atamataros atoreasi kesi alore toloto lorotin lua ngaroatin.” Ani enyounete ngasigerea a Ngisirael ibakete alo Baaltar, tokurwaunos Ngisirael luche lusek adukito eriamito Gibea, topudut alowaitin alu a ngimukur adukitotor iriamito ere. Apot ngikiliok ngabunge ngatomon lu aseunitae alo Isirael kadaang kitijikis Gibea. Toliwor ibore ejie loationon. Nyeyena ngitunga a ekitela a Benjamen atamar edikino kimunyario. Kisidwang Ekapolon Akuj Ngisirael ngitunga a ekitela a Benjamen. Taara Ngisirael akolongit ngina ngitunga a ekitela a Benjamen 25,100. Sodi kingolikis ngitunga a ekitela a Benjamen atamar kidwang kesi. Kikutosi ngasigerea a Ngisirael ani eya ngitunga a ekitela a Benjamen kainyo egienosi kesi Ngisirael luche adukito iriamito Gibea. Tonyout ngitunga lu adukito tamataros Gibea kiealakinos lore taara itwaan daang. Alimokina sek ngasigerea a Ngisirael ka Ngisirael lu adukito atamar ani edirisi apuru alore, toreunos ngasigerea na ayakasi lojie. Nasek aareta ngitunga a ekitela a Benjamen Ngisirael esibit ngitomwon-uni, apot tamasi, “Iteni, kidwangi ngoni kesi loger a ejie alo ngoon a ekingaren.” Sodi Todirit apuru alore toinikin alokidiama. Ani ingoliarete ngitunga a ekitela a Benjamen naabor, tatalasi ngakiro engolikineta ere daang kenomia akim, kedirit apuru kidiama. Ani ereeunosi Ngisirael, tobul ngitunga a ekitela a Benjamen kainyo apot kingolikis atamar edikino kimunyario. Tobongobongoosi kesi ani a Ngisirael tamataros lowae ngaroatin, nakaneni apot nyeepuunos. Apot ngasigerea a Ngisirael nasek ajiete ka kesi, ka na apote alore, kiriama tolukakis kesi nakidingos, sodi tomunyarae ngitunga a ekitela a Benjamen. Toroosi Ngisirael ngitunga a ekitela a Benjamen alowaitin kadaang. Kiwapa kesi jik tanang kide Gibea, taarete kesi eloose. Taarae ngasigerea nakajwok a ngitunga a ekitela a Benjamen ngabunge ngatomon ka ngakan-kauni. Toreas luche tamatoros lowae lo a ngaroatin, tananga nataaba a Rimon. Taarae ngabunge ngakan alorot. Kiwapakinae luche jik tanang Gidom sodi taarakinae ngabunge ngaarei neni. Araakasi ngitunga a ekitela a Benjamen lu aario akolongit ngina ngabunge ngatomwon-arei ka ngakan. Araakasi daang ngasigerea nakajwok. Nakaneni tobucharos ngikiliok ngamiae ngakan-kapei tamataros lowae lo a ariet toloto nataaba a Rimon, sodi kiboikinos neni ngilapio nguomwon. Toreeunos Ngisirael kitijikis ngitunga a ekitela a Benjamen luche taara daang, ngikiliok ka ngaberu, ka ngide, ta ngibaren. Kichunyakis ngirerea daang akim kaneni. Ani echunakinosi Ngisirael Misipa, kikongo ani a Ekapolon Akuj tamasi, “Emam sua itwaan ipotori nakookeng nak itwaan a ekitela a Benjamen kiut.” Sodi toloto ngitunga Besel kiboikinos ngaren Akuj tanang ebong. Kigoro kesi lokojokon echalasi, “Ee, Ekapolon Akuj, na irai Akuj a Isirael, kotere nyo asubakinotor ngakiro nugu alo Isirael? Kotere nyo edikino ekitela a Benjamen engopiyarea alo Isirael?” Ani nataparach nache elilim, todukokis ngitunga ekeno a ngakipeyos neni. Kipeyoto kesi ngakipeyos a ekisil ka na inomio nginerin daang. Kingitas Ngisirael tamasi, “Ekitela ali alotela kadaang a Ngisirael peabunit lokiriam a Ekapolon Akuj alo Misipa?” (Kainyo ekongito sek kesi atamar itwaan daang nipealosit Misipa, eario.) Kisieneto Ngisirael ngitunga a ekitela a Benjamen lu araakasi talokaatokech. Tolimut kesi tamasi, “Angopia ekitela epei alo Isirael akolongit naga. Anukiro kisubakini ngoni taanyuneta ngikiliok a ekitela a Benjamen lu idongito ngaberu? Kikong ngoni alongaren Ekapolon Akuj atamar nyikiinakini kesi ngide yok lupesur kiuta.” Tolimut kesi tamasi, “Tangae alotela a Ngisirael peaponito lokiriam alo Misipa?” Toyena kesi atamar amam itwaan abunit alore a Yabech alo Gilead, kainyo na anyarare ngirora a ngitunga, amam itwaan tani ipei a ere Yabech alo Gilead abu kiki. Sodi tamasi ngitunga lu achunakina neni ngitunga lukajwok ngabunge ngatomon ka ngaarei, todungokis kesi tamasi, “Kapesi taara itwaan daang alo Yabech, tani ngaberu ka ngide. Taara ngikiliok daang, ka aberu cha daang na apero ka ekile.” Taanyut kesi alo Yabech ngapesur na nyepero ka ngikiliok a ache ngamiae ngoomwon, sodi yaut Chilo, nakwap a kanaan. Ani erumor tomeasi ngitunga daang lu achunakina neni itwaan nia ngitunga a ekitela a Benjamen alu ayakasi nataaba a Rimon, tolimokis atamar kisil kesi. Tobongut ngitunga lua ekitela a Benjamen ngulu, sodi nakis Ngisirael luche kesi ngapesur na ayaunio alo Yabech, na aisikinete kesi nyeara. Nakaneni peetemokino ngapesur nguna lokiliok ngulu, Kisieneto Ngisirael ngitunga a ekitela a Benjamen kainyo abu Ekapolon akuj totiakatiaka ngitela a Ngisirael. Sodi tolimut ngikarikok a ngitunga alu achunakina tamasi, “Anukiro kisubakini ngoni taanyuneta ngikiliok a ekitela a Benjamen lu idongito ngaberu? Emam ngaberu eringa eyakasi lokitela a Benjamen.” Tolimut kesi tamasi, “Nyejoikinit Ngisirael itongopiarete epei a ngitela keng alutomon ka ngiarei. Atasakakisi ngitunga a ekitela a Benjamen erot nyeengopiareta. Nakaneni nyikiinakini ngoni kesi ngide yok lupesur kiuta, kainyo kilam ngoni itwaan a ekitela yok daang ni ipotori nakookeng kiut itwaan a ekitela a Benjamen.” Sodi tolimut kesi tamasi, “Aapuu esukukuu a Ekapolon Akuj lopalem esubeeneo ekaru daang alo Chilo.” (Eyei Chilo kwap Besel, kuju Lebona, tarai kide erot lo eyei kiding Besel ka Chekem.) Todungokis kesi ngitunga a ekitela a Benjamen tamasi, “Kapesi toduka anamanat kiteto. Ani epote ngapesur a Chilo akidongare alosukukuu, topudutu esi anamanat. Kirum ipei kus apese na eliwor aberu keng a napesur kanguna, sodi tobongoreta nakwap a ekitela a Benjamen. Ani epote taapakech ka talokaatokech akisuburare esi, ilimokinete esi kesi tamasi, ‘Kimiekinere kare sua, kainyo nyerikuno kolong sua ngapesur alojie etiliwosi ngaberu kosi. Ani aloger eraakar meere esi ipotorete ngapesur kiinakis sua, nyisechito esi tani bo kichwangakina ngakiro nakolong ikongete esi dang.’ ” Tosubakis ngitunga a ekitela a Benjamen loger ngolo. Toriko epei kech daang apese keng anapesur ana edongaate alo Chilo. Tobongosi kesi nakwap kech, toduko ngirerea toloma. Esaa ngolo, kiealaros Ngisirael luche daang kaneni. Tolot itwaan daang lokitela keng, ni ayakasi ngitunga a awi keng ta ni ayakasi ngiboro keng. Ngirwa ngulu, amam ekapolon ayei nakwap a Ngisirael. Asubi itwaan daang ngakiro na ajoikinito ngesi ilope. Kolong a angorot erai ngikatubok ngakiro epolokinito akwap a Isirael, tolom eron a akoro nakwap ngina. Abu ekile epei a emachar a Epirasa, tonyou alore a Betleem anakwap a Yuda, tolot Moab kirukosi ka aberu keng ka talokookeng ngiarei. Anyaritae ekiro keng Elimelek, tonyaritetei aberu keng Naom. Anyaritae talokookeng Malon ka Kilion. Tolot kesi nakwap a Moab toloma neni. Totoan Elimelek. Kidongo Naom ka talokookeng luarei make. Kiutasi ngide ngulu ngapesur a akwap a Moab na anyaritae Oripa ka Rus. Adaunet a ngikaru asibit ngitomon, totoaka Malon ka Kilion dang. Sodi kidong Naom anapei emam ekile kori talokookeng. Ani ekisidi kiira Naom atamar apia Ekapolon Akuj ngitunga keng etiliwo akwap a Isirael aka ajako. Taramakis ngesi ka ngaterak keng anakwap a Moab. Tonyout kesi aapei alosit nakwap a Yuda. Ani enangete kesi lorot, tolim Naom tama, “Kapesi tobongosi lotunga kus. Kingarak Ekapolon Akuj esi loger lo kingarakineta esi ayong ka ngikasiak. Kingarak Ekapolon Akuj taanyut ngikiliok lu kuusete esi nabo taanyuneta ngawiyei.” Sodi tonuak ngesi kesi tolimok atamar toloto niajokon. Nakaneni kikalout kesi tolimokis ngesi tamasi, “Mam, kilosi sua ka iyong lotunga kon.” Tatachak Naom kesi tama, “Tobongosi ngide kang, nyo isaketa esi akirukor ka ayong? Aliwae aanyunea ayong ngide lu kuusete esi nabo? Tobongosi lotunga kus kainyo amojong ayong nyekeusio nabo. Arai tani atasaki ayong akuuto nabo, sodi keus akolongit naga atouri ngide, kedikino esi idarete ngide ngulu topolout a? Ipedorete esi akinger itwaan iche kiusi a? Meere kongina ngide kang, iyenete esi atamar nyitemokino nguna. Ekoni ayong itwaan nilamam ani a Ekapolon Akuj, nakaneni kisienito esi ayong.” Kikalout kesi nabo. Nakaneni tonuak Oripa ataakeng tolimok atamar tolot niajokon ani erumor tobong lotunga keng. Sodi kirumeikin Rus nika ataakeng. Tolimok Naom ngesi tama, “Rus, abong nakain kon lotunga keng ka nakujo keng. Tobongo lotunga kon kirukosi ka ngesi.” Tatachu Rus tama, “Tojongo akimaima ayong atamar atotiakas ka iyong. Kimiekinae ayong erukosi ka iyong. Ni ilosi iyong, alosi ayong dang. Ni ilomi iyong alom ayong dang. Ngitunga kon kesi eliworosi ngikang, nabo Akuj ngina ilipi iyong ngesi elipi ayong dang. Ni itoanikini iyong, ngesi atoanikini ayong dang, neni ngesi kanukakinio ayong dang. Ekong ayong atamar ani pekewap ayong ngakiro nugu eringa ngoni nyetoaka, aliwor ayong itwaan nilamam alongaren Akuj.” Ani ingolikini Naom atamar irichakina Rus akirukor ka ngesi, kililing chek. Toloto kesi tananga Betleem. Ani enangunete kesi neni, talakaros ngitunga daang a ere kangolo. Tolimut ngaberu tamasi “Erai itwaan en Naom dir a?” Tolimok Naom kesi tama, “Nyikinyarata ayong Naom. Tanyarae ayong Mara kainyo etoron Akuj Naationon eboyor kang. Arotokini kolong ayong kanege eyei ibore daang, nakaneni kabuu tokona Akuj Naationon ayong emam ibore tani ni etal. Nyo kinyaritotor esi ayong Naom nakeriraa ayong Akuj kelomak lochan?” Eger ngolo ngesi abongunio Naom anakwap a Maob ka nateran keng Rus na arai aka akwap a Moab. Anangunete kesi Betleem akisiakinet a ngirwa alu alemere erau. Ayei Naom eyenet keng anyaritae Boas. Arai Boas ekabaran lo ayanasi ka Elimelek. Akolongit apei tolimok Rus ataakeng tama, “Kimiekinae atolot namanat edepuunu ngikinyam lu echakanakin nalup, alomana a itwaan kadaang ani cha kachamuni ayong alomari mana keng.” Tolimok Naom ngesi tama, “Kape ikakoku.” Sodi toloma Rus mana kidep ngikinyam lu aisianakinete ngikalemak. Ikwa kerai amana na ayei ngesi ngina aka Boas alo ayanasi ka Elimelek. Ani ekisidi bu Boas alo Betleem kimala ngikalemak tama, “Kiruko ka Ekapolon Akuj!” Tatachut kesi tamasi, “Kitopia iyong Ekapolon Akuj!” Kingit Boas itwaan ni aweikinit luche tama, “Ani aberu naga?” Tatachak itwaan ngini ngesi tama, “Erai ngesi aberu napeyonon ngoon erukunete ka Naom anakwap a Moab. Kengisi ngesi ayong tama, ‘Kimiekinae ewap ngikalemak anaabor edep ngikinyam lu echakanakin nalup.’ Nyiangara ngesi jik natete esiakinea akidep ngikinyam nataparach tanang tokona na eangarea wadiochichi.” Sodi tolimok Boas Rus tama, “Kiira ngakiro kang, kidep ngikinyam alomana kana bon. Wara nyiilot wache. Kiruko ka ngaberu na eyakasi nege, ewae lo elemete kesi kiruko ka kesi aapei. Alimok ayong ngisorok lu eya mana kang atamar nyikichan iyong. Ani kinyam iyong akure, tamat ngakipi na eya nakurumo na ilelebito kesi.” Kijuuru Rus tatap ereet keng ngalup, tolimok Boas tama, “Nyoni ilemunor iyong akingarakin ayong kona? Nyoni ijokearor iyong anikang kona atarai bo ayong itwaan a akwap a ache?” Tatachak Boas ngesi tama, “Eira ayong daang na isubea iyong ataakon na atoanea lokile kon. Ayeni ayong atamar iisikini iyong apakon ka itiokon ta akwap kon sodi bu akiruk ka ngitunga lu nyeanyuna iyong a ache. Kitopia iyong Ekapolon Akuj kotere ngakiro nguna isubi iyong. Kiinak iyong Ekapolon Akuj na erai Akuj a Isirael ebachit loapolon noi, Akuj ngina ibu iyong nikeng isaki ayuuno.” Tolim Rus tama, “Irai iyong itwaan ajokon ekapolon. Ajoker ayong etau ani kisuruorea iyong ayong niajokon, tani bo pekarai ayong akasuban etich kon.” Esaa lo emujere, tolimok Boas Rus tama, “Bua omu amugati adio kilumok lomuna.” Dio Rus kiboikinos ka ngikasubak etich sodi nak Boas ngesi ngikinyam lu apeitoe. Kimuj ngesi kimwon, topiyanu akimuj epewae. Ani enyouni Rus akidep ngikinyam, kichikichikak Boas ngikasubak etich keng tama, “Kimiekisi ngesi kidep tani alokinyam alu eenitae. Warasi nyiitengero. Toututu tani ngikinyam ngiche lu eenitae kimiekis kidongo, sodi bu ngesi kidep. Warasi nyiikilakis.” Sodi toloma Rus akidep erau tanang ebong. Ani epiatari ngesi erau, kitemokin ngakiloi asibit ngatomon. Yaa ngesi ngikinyam lore kidodik ataakeng etiae lo edepuni ngesi. Nak ngesi ataakeng tani akimuj na apiyanuni ngesi. Kingit Naom ngesi tama, “Aliwae ianyunea iyong akimuj naga daang? Idepi iyong ngikinyam alomana a ngae? Epiari Akuj itwaan ni kingarakini iyong.” Sodi tolimok Rus ataakeng tama, “Edepi ayong ngikinyam alomana a itwaan enyaritae Boas.” Tolimu Naom tama, “Epiari Ekapolon Akuj Boas. Iyoonokini Ekapolon Akuj ngakichikakinet keng alotunga alu eyarete ka lukatoak.” Tolim nabo ngesi tama, “Erai itwaan ngini iyenet yok, ipei a ngitunga alu ejoikinit kitanete ngoni.” Sodi tolimu Rus tama, “Nabo kaneni dang kalimokini Boas ayong tama, ‘Kiruko ka ngikasubak etich luche tanang ni elemiyarere ngamanat.’ ” Tolimok Naom Rus tama, “Kongina ikakoku, ejoikinit iyong irukete ka ngaberu nache alomana a Boas. Epedorio iyong akichan erai kisub etich alomana a itwaan a iche.” Nakaneni kiruko Rus ka kesi tochunakis ngikinyam daang tanang ni elemiyarere erau ka ngakanoi. Kibooyoto Rus ka ataakeng. Ani ekisidi abu ataakeng na anyaritae Naom tolimok ngesi tama, “Nyejoikinit mono ayong kasakakini iyong ekile lo kiusi taanyunea awi na erai akon a? Toyen atamar itwaan nibe Boas ni been irukito iyong ka ngaberu na esubete etich keng, erai eyenet yok. Atabong naga epiesi ngesi erau. Ejoikinit iyong ilotar kiwasakin akimiet nakaakunyon, sodi tanap ngiworui luajokak noi, ani erumor tolot ni epiesea ngesi erau. Nakaneni wara ngesi nyeeyen atamar iyei iyong neni eringa ngesi nyemata ka akimuj. Ani elosi ngesi akiper, tongichu lokojokon toyen ni inapakin ngesi. Ani ejotoor ngesi, tolot iyong kiwolo eworu keng kinapakin nakejen keng. Kilimokini ngesi iyong ngakiro na ejoikinit isubakini.” Tatachu Rus tama, “Asubakini ayong ngakiro daang nakilimok iyong ayong.” Sodi tolot Rus nipieset ngalemet tosub ngakiro daang na alimokini ngesi ataakeng. Na arumorea Boas akimat ka akimuj, abu talakar. Tolot ngesi nipieset erau kinapakin neni tojotoor. Toniamar Rus kiwolo eworu a Boas dio kinapakin nakejen keng. Ani enangi kiding akwaar, toriangakin Boas kibeloor, nakaneni tatalasi ngakiro aperio aberu kaneni. Kingis ngesi tama, “Ngae iyong?” Tatachu Rus tama, “Erai ayong Rus, akasuban etich kon. Kona iraakar iyong eyenet a lokile kang, iyong ejoikinit kitani ayong. Nakaneni ejoikinit iyong kirumi ayong.” Tolim Boas tama, “Kipiari iyong Ekapolon Akuj noi ikakoku. Ijoker iyong tokona noi edwang tani nikolong a ekingaren kainyo nyesaka iyong atamar kiruma ngisorok lu kebarito kori lu kiboosit. Tokona ikakoku, wara nyiem. Asubakini ayong daang na kilimok iyong ayong kainyo kiyenete iyong tani ngitunga a ere daang atamar irai aberu ajokon. Iteni dir arai ayong eyenet a lokile kon lo ejoikinit ketani iyong, nakaneni eyei eyenet a lokile kon eche lo eyanasi ka ngesi noi. Toper iyong nege akwaar naga. Moi nataparach kingichuni ngoni kechamuni ngesi akirum iyong kori kemam. Ani kechamu, emam ngakiro. Ani pekechamu, ekongi tokona ayong alongaren Ekapolon Akuj jik atamar kerumi ayong iyong. Toper iyong nege tanang nataparach.” Toper ngesi nakejen keng tanang ebayiari. Nakaneni tonyou ngesi eringa akwap emuimui, tolimok Boas ngesi tama, “Nyejoikinit ngitunga eyenete atamar aperi aberu nege.” Tolimok Boas ngesi tama, “Yau awaru nakon ngina topeta.” Topeta Rus awaru sodi tookok Boas ngesi erau ngakiloi esibit ngatomwon-arei, ani erumor kisiwok. Tolot Rus lore. Ani enangi ngesi nawi kingit ataakeng ngesi tama, “Apot ngakiro kikokis ai ikakoku?” Sodi Rus kisisau daang na asubea Boas ngesi. Tolim nabo tama, “Katolimok Boas ayong tama, ‘Nyibongori nika ataakon a ngakan anikirion,’ sodi kainak ngesi ayong erau logo daang.” Tolimok Naom ngesi tama, “Kidarou cha iyong ikakoku, ejokearosi ngakiro nugu daang. Nyiangakini Boas akolongit naga eringa nyerumoro ngakiro nguna.” Tolot Boas kiboikin lokidor a ere, nipalem iriameenere. Sodi bu eyenet a Elimelek losek abala Boas. Tanyara Boas ngesi tama, “Bua mono iyong lodia lo kiboikin nege.” Dio itwaan ngini tolot kiboikin. Tochun Boas ngikasukou ngitomon a ere kangolo tolimok kesi dang tama, “Kiboikinos nege.” Apot kesi kiboikinos. Tolimok Boas eyenet keng tama, “Kona tokona abongunio Naom alo Moab, esaki ngesi agielar amana a Elimelek alo erai eyenet yok. Nakaneni asaki ayong iyong dang toyen ngakiro nguna. Tokona, ani kisaki iyong akigiel, togiel eyakasi ngikasukou lugu nege. Ani pekisaki iyong akigiel, tolim iyong kainyo iyong ngesi mono echamit igieli, atotupuu ayong erai pekigiel iyong.” Tolim ekile ngolo tama, “Agieli ayong.” Tolim Boas tama, “Ejok noi. Nakaneni ani kigieli iyong amana ngina ani a Naom, ejoikinit iyong irumi apuserut nabe Rus na akwap a Moab. Sodi toliworor amana ngina jik aka ngitunga a Elimelek.” Tatachu ekile ngolo tama, “Ani kikote neni, nyapedori ayong akigiel amana ngina kainyo idodiunit neni atamar nyepedorete ngide kang akirum amana ngina. Togiel iyong kainyo nyapedori ayong.” Ngirwa ngulu alo Isirael, arai na esakere akilokony ngiboro, alemuuni ekagielaran ibore, tolem amukat keng nak ekagielan ibore. Eger ngolo ngesi edodiununeta Ngisirael atamar arumor ngakiro nguna. Na alimokinea ekile ngolo Boas tama, “Togiel iyong,” abu ngesi tobut amukat keng nak Boas. Ani erumor tolimok Boas ngikasukou ngulu ka ngitunga luche daang tama, “Iraakasi esi akolongit naga ngikaanyunak atamar agiel ayong ani a Naom ibore daang nikolong arai ika Elimelek ka talokookeng lu enyaritae Kilion ka Malon. Erumi nabo tani Rus na akwap a Moab, na erai apuserut a Malon. Eliwor Rus aberu kang. Iratakinete ngakiro nguna ngiboro a awi a ekasian sodi nyeengopiyarea ekiro keng alotunga keng ka ere keng. Esi iraakasi ngikaanyunak akolongit naga.” Tolimut ngitunga daang lu ayakasi neni ka ngikasukou tamasi, “Iteni kirai sua ngikaanyunak. Kimiek Ekapolon Akuj kisikwaanik aberu kon ka Rael ka Lea nakolong edoikinete Yakobo ngide lukaalak. Ibari iyong alomachar a Epirasa nabo toliwor lo kiyenikinitae alo Betleem. Kikok awi kon na a Peres alokookeng a Yuda ka Tamar, kotere ngide lu kiinakini Ekapolon Akuj iyong anaberu anasorokit kana.” Sodi abu Boas tolema Rus, toriko nawi kitiliwo aberu keng. Topia Ekapolon Akuj Rus topoti, kidou ikoku nisapat. Tolimokis ngaberu Naom tamasi, “Kipuroe Ekapolon Akuj! Kiinak ngesi iyong akolongit naga etatait lo kitani iyong. Kimiek idia en toliwor lo eyenikinitae alo Isirael! Kimina iyong nateran kon nabo kisubea ngesi iyong ngakiro na idwangito na a ngide alusapa a ngikan-kaarei. Kidoik nabo tokona ngesi iyong etatait lo kiteyari iyong nabo kiyok anamojongu kon.” Tolem Naom idia tadak, toliwor ngesi edakeene. Tanyarata ngaberu ekiro a idia Obed ebalasi “Edoikin Naom idia!” Toliwor Obed apakeng a Yese alo arai apakeng a Daudi. Nugu kesi eraakasi ngalesea a Peres. Arai Peres apakeng a Esiron, alo arai apakeng a Ram, alo arai apakeng a Aminadab, alo arai apakeng a Nachon, alo arai apakeng a Salimon, alo arai apakeng a Boas, alo arai apakeng a Obed, alo arai apakeng a Yese, alo arai apakeng a Daudi. Ayei itwaan a ekitela a Epiraim anyaritae Elikana. Alomit ngesi lore a Rama anakwap ana a ngimukur a Epiraim. Arai ngesi lokookeng a Yeroam, alo arai lokookeng a Eliu, alo arai lokookeng a Tou, alo arai lokookeng a Supu. Ayakasi Elikana ngaberu ngaarei. Anyaritae apei Ana tanyaritetei nache Penina. Ayakasi Penina ngide, nakaneni amam Ana ngide. Ekaru daang, arotonokini Elikana alo Rama tolot Chilo akilip ka akipeyonokin Akuj Namerikanyer. Talokookeng a Eli lu anyaritae Opini ka Pineas kesi araakasi ngimurok a Ekapolon Akuj alo Chilo. Akolongit cha daang na elemunea Elikana ngakipeyos, akoranakini ngesi Penina ka ngide keng ngatiaket ngapei-pei a ngakipeyos. Tani keyei eger lo aminar ngesi Ana noi, ainanakini atiaket apei bon kainyo aenit Ekapolon Akuj akook keng pedoununi. Abu Penina na arai nakain keng tobeny ngesi kitilili kainyo amam Ana ngide ayakasi. Tosubas ngakiro nugu ngikaru daang na cha elooso kesi kai a Ekapolon Akuj. Etongoyeene Penina Ana lokojokon sodi kigor Ana towou akimuj. Alimonokini Elikana lo arai lokile keng ngesi tama, “Ana, nyo igoro iyong? Nyo peimuja iyong? Nyo ialolongio iyong jiik? Nyedwangit ayong ngide lusapa ngitomon anikon a?” Ani erumorete kesi akimuj alo Chilo, tonyou Ana. Ebooyi Eli lo arai emuron a Akuj alokidor ani palem ibooyeeneo. Ealolongi Ana noi ariaba. Kigor ngesi noi ilipit Akuj. Kikong Ana tama, “Ee Ekapolon Akuj, Namerikanyer, kingolikinae ayong akasuban etich kon! Taanyunga ngichan kang kitamu ayong! Wara kare ngakiro kang nyikimuriakis iyong! Ani kiinak ikoku nisapat, epotori ayong ngesi toliwor ika Ekapolon Akuj ngirwa daang lu eyarea ngesi. Nyetapi ebanyet akou keng.” Ani erubakinit Ana akilipit, toloma Eli akisemere akituk keng. Elipit Ana alotau keng, atakanete ngipon keng atamar iruoro ngesi nakaneni peapupio etoil keng. Sodi tama Eli kori irakarit epurot Ana. Abu Eli kingit ngesi tama, “Kirakarit iyong emuna tanang ori? Kimiek emuna lokon lo!” Tatachu Ana tama, “Emam, ekaapaan, nyekerakarit ayong emuna kori epurot. Nyemata ayong emuna kori epurot. Arai ayong itwaan ni echana noi. Elipit ayong alimokinit Ekapolon Akuj ngichan kang daang. Nyiitama robo kori arai ayong akedalan kon aberu naaronon. Elipit ayong kona ani echanar noi.” Tolim Eli tama, “Kape akaalimon, kiinak Akuj na Ngisirael iyong ibore ni ilipit.” Tatachu Ana tama, “Tosubea akedalan kon niajokon jiik.” Tolot Ana sodi kimuj, nakaneni nyialolong ngesi nabo jik. Tonyout kesi nataparach nache kilipa Ekapolon Akuj. Ani erumor tobongosi Rama ni ayei awi kech. Topero Elikana ka Ana, sodi tatachu Ekapolon Akuj akilip a Ana. Sodi topoti Ana, kidou ikoku nisapat. Tanyara ekiro keng Samuel ebala, “Elipuni ayong ngesi ani a Ekapolon Akuj.” Tonyout Elikana ka Ngitunga a awi keng alosit Chilo akipeyokin Ekapolon Akuj ngakipeyos na ekaru kadaang ka ngakipeyos na ikongitoe alemun. Abu Ana nyeelot akolongit ngina. Tolimok ngesi lokile keng tama, “Napei cha itapalikinere ikoku ngisikin, ayaari ayong ngesi kai Ekapolon Akuj kiboikin inaa jik.” Tatachu Elikana tama, “Itemokino. Tosubak loger lo kijoikinit iyong. Kidong nawi, tanang akolongit na itapalikinea iyong ngesi akinak ngisikin. Kiyook Ekapolon Akuj akiroit na ichikak iyong ngesi.” Sodi kidong Ana nawi tadak ikoku keng. Ani itapalikini Ana idia akinak ngisikin, abu yaa ngesi Chilo. Yaa ngesi tani emong lo a ngikaru a nguuni, ka ngakiloi ngatomon a ngakiria ta etuo lo eleleba emuna. Yaa ngesi Samuel eringa edit kai a Ekapolon Akuj alo Chilo. Ani kear kesi emong kerumor, yaasi idia nia Eli. Tolimok Ana Eli tama, “Abala ayong iyong ekaapaan a! Kitamunit iyong ayong a? Ayong aberu nakolong awei kanege alongaren kon elipit Ekapolon Akuj. Elipit ayong ngesi ikoku en, nakaneni kainaki ngesi ayong ibore ni elipa. Aloger kangolo, ainak ayong ngesi Ekapolon Akuj. Eliwor ngesi ika Ekapolon Akuj ngirwa lu eyarea ngesi daang.” Sodi kilipa kesi Ekapolon Akuj kaina. Kilip Ana tama, “Elakara etau kang noi ani a Ekapolon Akuj. Alakara ayong kotere na asubaki ngesi! Akianar ayong ngimoe kang. Alakara ayong ani kengarakinea Akuj! “Emam iche italeuno loger a Ekapolon Akuj, emam iche ikwaanatar ngesi, emam ataaba ikwaan ka Akuj yok. Tojongo akinisa iruoro, Kimiek ekiwog lokon, Kainyo eos Ekapolon Akuj, itemeene ngakiro na esubete ngitunga daang. Abilibilaar ngakawa a ngasigerea anakajwok, nakaneni agogongioto lupalag. Ngitunga lukolong emwokito, asaka tokona ngitichisio lu eanyuneta akimuj, nakaneni lukolong anyamit akoro, ajongo akoro anyamit. Edou aberu nakolup ngide ngikan-kaarei, Nakaneni edong aberu nakaalan a ngide emam tani ipei. Ekapolon Akuj ngesi eari ka akiteyar, ngesi eyaanari ngitunga lokatoak, dio nabo akiteyarun. Ekapolon Akuj itiliwonori ngitunga ngiche ngikebootok, dio kitabar ngiche. Itiliwonori ngitunga ngiche lu nyeyenikinitae, kitiliwo ngiche lu eyenikinitae. Ikeununi lukebootok anapua, kitonyou alokuron ni ibat ngakan ilipanar, kisiboik kesi ka ngikapolok wapei nia arimatoi. Ngapirio na ewaar akwap ngaka Ekapolon Akuj. Iyoki ngesi akwap alokidiama kech. “Iyoki ngesi elote alu emunosi ngesi, nakaneni engopikinete luaronok naribu, kainyo nyidwangi itwaan a agogongu keng a ilope. Emunyario ngimoe a Ekapolon Akuj. Ebuni agiro keng anadis, bu kidiama kech. Irirae Ekapolon Akuj ngakwapea daang, Einakini ngesi ekapolon keng agogongu. Itiliwor ngesi ekapolon keng loseuna ekedwangan.” Ani erumor tobongo Elikana nawi keng na ayei Rama. Nakaneni kidong Samuel ni anyaritae Chilo tosub etich a Ekapolon Akuj ani eyei Eli lo arai emuron a Akuj. Araakasi talokookeng a Eli ngitunga luaronok. Peakerito kesi Ekapolon Akuj, kori peewapito kesi etal a ibore ani alemanari emuron alotunga. Pearai abu toliwor nacha elosio itwaan akipeyore, bu ekasuban etich a emuron etingit akaloboch na a ngikel a nguuni. Ani eringa akiring ekulae, kirepak ngesi akaloboch namot, ani ibore daang ni cha ichumuni akaloboch, toliwor ika emuron. Ngakiro nguna kesi asubeenere Ngisirael daang lu aponeenete Chilo akipeyore. Aapei kanguna, arai ani eringa nikatoronon nyinoma, abuneene ekasuban etich a emuron nitwaan ni ipeyoe tama, “Nakinae akiring na epeyi emuron, kainyo nyechamuni ngesi akiring na itukulat iyong, esaki na ejon bon.” Ani ketachu itwaan tama, “Kimiek enoma mono nikatoronon, ani erumor tolema akiring etiae lo cha isaki iyong.” Tolim ekasuban etich a emuron tama, “Emam! Ejoikinit iyong kiinakini ayong tokona! Ani kemam, katodema!” Arono akisech na asubete talokookeng a Eli naga noi alongaren Ekapolon Akuj, kainyo pearimasi kesi ngalemunet a Ekapolon Akuj. Asubi Samuel etich a Ekapolon Akuj, enapit akaluwat nawaru. Asubanakini itiokeng ngesi iwaru nikooyen, sodi inaa ngesi na cha elooso ka lokile keng akipeyore ekaru daang. Arai na erumoror topia Eli Elikana ka aberu keng tama, “Kiinak Ekapolon Akuj iyong ngide anaberu kana kilunyokinos nados a idia ani iinakis esi Ekapolon Akuj.” Ani erumor tobongosi kesi nawi. Topia Ekapolon Akuj Ana sodi ngide lusapa ngiche nguuni ka lupesur ngiarei. Topolou Samuel esubi etich a Ekapolon Akuj. Abu Eli tomojong lokojokon. Topup ngesi ngakiro daang na asubeta talokookeng Ngisirael. Kiira tani atamar etepereenete kesi ngaberu na asubete etich anakituk a eam a Ekapolon Akuj. Kingit ngesi kesi tama, “Nyo isubeta esi ngakiro na ikote ne? Eira ayong alotunga kadaang ngakiro naaronok isubete esi. Kimiekisi nguna, talokoku! Eroko ngakiro na apupi ayong ngitunga a Ekapolon Akuj iruorosi. Ani kesechaki itwaan niche, eyuuni Akuj ngesi, nakaneni ani kesechaki itwaan Ekapolon Akuj, ngae eyuuni itwaan ngini?” Nakaneni apot kesi nyiirasi ngakiro a apakech, kainyo atiakunit Akuj atamar aari kesi. Abu Samuel topolou, sodi tominak Ekapolon Akuj ngesi. Apot tani ngitunga tominakis ngesi. Bu ekadwaran a Akuj nia Eli tolimok tama, “Ebala Ekapolon Akuj kona, ‘Edodiun kolong ayong ani Aron alo erai apaakon nakolong araakatar ngesi ka ngitunga a awi keng ngikedalak ekapolon a Misiri. Atoseu ayong ngitunga a awi keng alotela a Ngisirael kadaang, atoseu toliworos ngimurok kang, tosuba etich alokeno alo kepeyonokinere ayong. Toliworos inomete emitina, ka akinap akaluwat*g** alongaren kang. Ainak ayong kesi ngakipeyos na inomio, nakalemanakinete ayong Ngisirael. Nyo tokona itororokanitor iyong akook anakipeyos ka ngalemunet na elemuununete ngitunga kang? Eli, nyo mono irimar iyong talokookon akidwang ayong, kimiek etumakinete lonerin luajokak a ngakipeyos kang kadaang ana kepeyonokinete ngitunga kang? Alimuni kolong ayong Ekapolon Akuj na arai Akuj a Ngisirael atamar, ngitunga a awi kon ka lu emachar kon, esubete etich kang eraakasi ngimurok jiik, nakaneni alimu tokona ayong atamar nyeringa nabo kesi eliworosi ngimurok! Arima ayong lu karimasi ayong, sodi emenya lu kemenyarito ayong. Topupok, enangi ngirwa lu aarea ayong ngikiliok lusorok alotunga a awi kon, ka lu a emachar kon, sodi tongop ekile a awi kon lo etoani emojongit. Ichanakin iyong sodi kiraka etereku kotere apiaro na epiarere Ngisirael luche, nakaneni emam nabo jik itwaan a awi kon ni etoani emojongit. Nakaneni emiekini ayong epei a ngalesea kon toyar toliwor emuron kang. Emudukani ngesi sodi tajal ngakiro daang, nakaneni eario ngalesea nache daang. Ngakiro nugu kidodikinete iyong atamar iyookinosi ngakiro na eruoro ayong. Etoakete Opini ka Pineas akolongit apei. Aseuni ayong emuron kang lo eliwor kamuno ayong ka akisub ngakiro daang na asaki ayong ngesi tosub. Ainakini ayong ngesi ngalesea na esubete etich alongaren ekapolon kang loseuna. Ngalesea kon na idongete eyarete, eloose lomuron ngolo kilipa ngesi ngaropiyae ka akimuj. Kilipas nabo atamar arai kimiekin atosuba etich a ngimurok a Akuj, ataanyuneta ibore ninyamat.’ ” Asubi idia ni anyaritae Samuel etich a Ekapolon Akuj eweikinit Eli. Peasojunit akiroit a Ekapolon Akuj ngirwa ngulu. Peasojunito tani ngakisingolikinet a Ekapolon Akuj. Tojongoto ngakonyen a Eli akitere akwap lokojokon. Akolongit apei nakwaare, aperi ngesi anamaniyat keng, toperi Samuel alotooma akai a Ekapolon Akuj, ni ayei asaduku a Achamunet a Akuj. Ani eringa nyebaiara, eringa ataa enoki, tanyara Ekapolon Akuj Samuel tama, “Samuel! Samuel!” Kiki Samuel tama, “Ayong lo ekapolon!” Tamatar ngesi nia Eli tama, “Ayong lo, be kinyarit bo iyong ayong.” Tatachu Eli tama, “Nyenyara ayong iyong, tobongo toper.” Tobongo Samuel toper. Sodi Tanyara Ekapolon Akuj nabo tama, “Samuel!” Tonyou Samuel tolot nia Eli tama, “Ayong lo, be kinyarit bo iyong ayong.” Nakaneni tolim Eli tama, “Nyenyara ayong iyong lokoku, tobongo toper.” Aringa Samuel nyeyena Ekapolon Akuj, nabo aringa Ekapolon Akuj nyisuruoro ngesi a ache. Tanyara Ekapolon Akuj Samuel nabo na a ngauni. Tonyou Samuel tolot nia Eli tolimok tama, “Ayong lo, be kinyarit bo iyong ayong.” Sodi toyen Eli atamar Ekapolon Akuj ngesi anyarit idia. Tolimok Eli Samuel tama, “Kape toper. Ani kinyarae ngesi iyong nabo, tolim tama, ‘Kiruorik Ekapolon Akuj, kainyo epupokinit ekasuban etich kon.’ ” Bu Ekapolon Akuj towo kaneni sodi tanyara loger a nganyaraet a nache, tama, “Samuel!” Tatachu Samuel tama, “Kiruorik kainyo epupokinit ekasuban etich kon.” Tolimok Ekapolon Akuj Samuel tama, “Topupok a, aapuu ayong asubakin ngakiro naaronok noi alo Isirael. Itamaranikinete ngakiro nguna itwaan cha daang ni iirari. Akolongit ngina, asubakini ayong ngakiro daang nakolong abala ayong asubakinea awi a Eli napei anakisiakinet tanang losal. Alimok ayong ngesi atamar erirae ayong ngitunga a awi keng nakajik kainyo keruorotor talokookeng ayong ngakiro naaronok. Ayeni Eli atamar esubete kesi kongina nakaneni abu nyiiratak. Ekong tokona ayong kotere ngitunga a awi a Eli atamar emam akipeyos kori alemunet na epedori alemar ngakiro na eyauni akisech naaronon ngina.” Toper Samuel tanang nataparach. Ani enyouni, tangaa ngidorin a akai a Ekapolon Akuj. Toem ngesi alimokin Eli ngakiro a akisingolikinet kangina. Nakaneni tanyara Eli ngesi tama, “Samuel! Ikakoku!” Kiki Samuel tama, “Ayong lo!” Kingit Eli ngesi tama, “Anukiro kilimokini Ekapolon Akuj iyong? Nyikidaa ayong ngakiro nguna. Kirirae Akuj iyong lokojokon erai kiwou iyong alimokin ayong ngakiro na alimuni ngesi daang.” Sodi tolimok Samuel ngesi ngakiro daang. Emam akiroit abu kidaa. Tolim Eli tama, “Erai ngesi Ekapolon Akuj, esubakini ibore nicha ejoikini ngesi.” Ani na apolounio Samuel, arukito ka Ekapolon Akuj, nabo abu Ekapolon Akuj kiyook ngakiro na eruorono Samuel. Toyena Ngisirael daang napei alo Dan tanang Beer-cheba atamar erai Samuel dir ekadwaran a Akuj. Torubak Ekapolon Akuj idodiunun alo Chilo, ani kolong etaanyunor Samuel kiruoro. Toliwor na iruorikinea Samuel, topupokis Ngisirael daang. Ngirwa ngulu, tochunakin Ngipilisti alosit ejie ka Ngisirael, sodi tonyout Ngisirael akitijwore kesi. Toloma Ngisirael nadakar na anyaritae Ebeneser, sodi toloma Ngipilisti nadakar na enyaritae Apek. Tonyoikis Ngipilisti Ngisirael kitijikis nikaronon. Kidwangae Ngisirael taarae luko esibit ngabunge ngoomwon alojie. Ani ebongunete lu apuunosi nadakar, tolimut ngikarikok a Ngisirael tamasi, “Kotere nyo emiekinea Ekapolon Akuj Ngipilisti kidwangete ngoni akolongit naga? Potu apana Chilo ayautu asaduku a Achamunet a Ekapolon Akuj, ayautu nege sodi erukoreta ngoni ka ngesi kitoyuu alomoe.” Sodi tomeasi kesi ngitunga Chilo yaut asaduku a Achamunet a Ekapolon Akuj Namerikanyer ana ibooyi alokidiama ngiborei lua ngabeben.*g** Apot Opuni ka Pineas lu araakasi talokookeng a Eli, kirukut ka asaduku a Achamunet a Akuj. Ani eyaunio asaduku a Achamunet a Ekapolon Akuj nadakar, apot Ngisirael daang kiremasi lokojokon imariteteete, kikamasi tani ngalup. Ani iirarete Ngipilisti echale ka akimaritetet, tolimut tamasi, “Ekoe, nyeka inyo echale eyei nadakar a Ngieburaniae logo?” Ani iirarete Ngipilisti atamar asaduku a Achamunet a Ekapolon Akuj ngesi ayaun nadakar, apot toema, sodi tolimut tamasi, “Abu akuj nadakar kech! Oitiakoi! Abe kimunyar lu erai ngoni! Nyesubakina na ikote nugu aniyok a ache! Oitiakoi! Abe kimunyar lu erai ngoni! Ngae kiyuuni ngoni anakujo anakaagongok kanguna? Ngakujo nguna kolong aarete Ngimisiri anariet. Totitinyeketo Ngipilisti! Tonyout tojwoto loger a ngikiliok. Ani kemam, kiliwor ngoni ngikedalak a Ngieburaniae loger lo ngoon araakatar kesi ngikedalak yok. Tonyoutu robo, tojwoto loger a ngikiliok!” Tojwoto Ngipilisti niationon kidwanga Ngisirael. Tamataros Ngisirael nawiyei kech. Taarae ngitunga lukaalak. Taarae ngasigerea a Ngisirael ngabunge ngatomwon-uni. Tolemarae asaduku a Achamunet a Akuj. Taarae talokookeng a Eli luarei anyaritae Opuni ka Pineas. Tamatar itwaan a ekitela a Benjamen alojie tanang Chilo akolongit napei ngina. Achilichilaarit ngesi ngiworui kiwasak ngalup nakou ani egoror. Eboi Eli alokicholong keng alokwaas a erukudi itee, kainyo amarani etau keng kotere asaduku a Achamunet a Akuj. Ani edoluni itwaan ngini, tokeik ngakiro lore daang, sodi kisiakis ngitunga akigoro, ebulit. Ani iirari Eli echale lo egorore, kingis tama, “Eka inyo echale loti lo?” Kikomak itwaan nia Eli alimokin ngakiro nguna. ( Amojongit Eli noi araakasi ngikaru keng ngitomwon-koomwon ka ngikan-kauni. Peeteete ngakonyen keng akwap lokojokon.) Tolimok itwaan ngini Eli tama, “Apuun ayong alojie, atomotun jik atanangu nege akolongit naga.” Kingit Eli ngesi tama, “Anukiro asubakinosi lokoku?” Tolim itwaan ngini tama, “Amatarosi Ngisirael ani a Ngipilisti, nabo aar ngitunga lukaalak noi alotunga yok. Ani eya daang, aar talokookon luarei Opuni ka Pineas, nabo alemar asaduku a Achamunet a Akuj!” Ani elemuni itwaan ngini asaduku a Achamunet a Akuj, tadakar Eli akamaluwot alokicholong keng, alo ebooyo ngesi alo diyete ekidor. Tobil emosiring keng, totoan ngesi, kainyo arai ngesi itwaan nimojong nabo alangir. Apolokinit ngesi Ngisirael a ngikaru a ngitomwon-omwon. Aberu a lokookeng a Eli alo anyaritae Pineas, apoti adolit. Ani iirari ngesi atamar alemar asaduku a Achamunet a Akuj, kiira nabo atamar atoaka lokile keng ka apakeng a lokile keng, abu ngesi toriabakin atipei kidou. Ani eringa ngesi iroga, apot ngaberu nakesidounok ngesi tolimokis tamasi, “Nyiem, kainyo idou iyong ikoku nisapat.” Nakaneni abu ngesi nyeemisik nabo nyetachuna ngakiro nguna. Tolimok ngesi idia ekiro be Ikabod ebala “Aisiki apolou a Akuj Isirael!” Alimuni ngesi kongina kotere ni alemarere asaduku a Achamunet a Akuj ka ni atoanea lokile keng, ta nabo ni atoanea apakeng a lokile keng. Tolim ngesi tama, “Aisiki apolou a Akuj Isirael kainyo alemar asaduku a Achamunet a Akuj.” Ani elemarete Ngipilisti asaduku a Achamunet, apot tadakasi alo Ebeneser tanang Achidod lo arai ere kech. Yaasi kesi asaduku a Achamunet a Akuj kirepakis tooma kai a akuj kech ana anyaritae Dagon, sodi kisibaka ka Dagon. Ani enyounete ngitunga a Achidod nataparach elilim, toriamut Dagon edakakina kwap edot aloreet, alongaren asaduku a Achamunet a Ekapolon Akuj. Sodi kikeut kesi Dagon kitowaa anipalem keng. Ani enyounete nataparach nache elilim, toriamut Dagon kedakakin nabo ngaren asaduku a Achamunet. Toriamut akou ka ngakan daang ketuborosi eperete alokidor. Akwaan bon ngesi edongit. ( Ngakiro nguna kesi eraakar tani tokona, ngimurok a Dagon ka ngitunga lu elomanarete kai keng akilip ngesi alo Achidod, ekalameenete neni, peechiakeenete.) Kirira Ekapolon Akuj ngitunga a Achidod lokojokon, kitubul kesi. Erirae ngesi kesi ka ngikidunyet kech a ngidekesinei aluaronok noi. Ani ingolikinete ngakiro na asubakinosi, tolimut tamasi, “Nyejoikinit asaduku a Achamunet a Akuj a Isirael imiekinio kanege nabo, kainyo kirira ngesi ngoni aapei ka akuj yok Dagon.” Sodi tomeasi kesi ngitunga tanyarata ngikapolok lukan a Ngipilisti daang tochunakin. Kingita ngitunga kesi tamasi, “Kikokini ngoni asaduku a Achamunet a Akuj a Isirael ai?” Tatachut kesi tamasi, “Yaasi lore a Gas.” Sodi yaasi ngitunga asaduku ngina lore a Gas lo arai ere eche a Ngipilisti. Ani eyaunio asaduku neni, kirira Ekapolon Akuj ngitunga a ere kangolo dang, kitubul kesi noi. Kirira kesi a ngidekesinei aluaronok noi alu atingete ngitunga daang, lusorok ka lumojong ekwaan. Apot kesi yaasi asaduku a Achamunet a Akuj lore a Ekiron. Ani eyaunio lore ngolo, kikalout ngitunga a Ekiron tamasi, “Ayaut kesi asaduku a Achamunet a Akuj a Isirael nege kitaareta ngoni daang!” Apot kesi nabo tanyarata ngikapolok a Ngipilisti daang tolimokis tamasi, “Tobuasi asaduku a Achamunet a Akuj a Ngisirael nipalem eyei, nyikiarea asaduku ngina sua ka ngitunga kosi.” Tobua ngitunga a ere daang kainyo erirae Akuj kesi lokojokon. Tani ngitunga lu apot nyeetoaka, todeakakinos edeke loaronon noi. Kigoronokis kesi ngakujo kech esakete akingarakino. Ani kemin asaduku a Achamunet a Ekapolon Akuj nakwap a Ngipilisti a ngilapio a ngikan-kaarei, tanyaraut Ngipilisti ngimurok ka ngikekeriak kingita tamasi, “Kikokini sua asaduku a Achamunet a Ekapolon Akuj ai? Nyo kiturukoori sua ka asaduku atobuareta nipalem eyei?” Tatachut kesi tamasi, “Ani kibuarete esi asaduku a Achamunete a Akuj a Isirael, nyiibuasi pas. Ejoikinit eyaario aapei ka ainakinet na etachi akisech kus. Eger ngolo ngesi ingalekinioto esi toyena ngakiro nakiriraa esi Akuj.” Kingitas ngitunga tamasi, “Nyo ainakinet kiyaari sua nikeng?” Tatachut kesi tamasi, “Ngakisikwaanet ngakan a ngidekesinei aluaronok noi, na esubunitae a egolit, ka ngakisikwaanet a ngirunyei na esubunitae a egolit, itemem ka ekimar a ngikapolok a Ngipilisti. Ngakiro napei aronok nguna kesi ayaunitae nikus ka ngikapolok lukan. Ejoikinit esi isubakinete ngakisikwaanet na ngidekesinei ka ngirunyei, na enyasut akwap kus ngina, sodi kipuruut Akuj a Isirael. Ejongoe tokona ngon akirirare esi, ka ngakujo kus, ta akwap kus. Nyo iraakatar esi lukechanak loger lokolong a Parao ka Ngimisiri? Toyena atamar abu Akuj kitabangaan kesi ani ekisidi talakakis kesi Ngisirael erotokinete alo Misiri. Tolemutu tokona aurukuk na iritae ka ngaatuk namanang ngaarei na nyeena aapei a akitoe anaapotion a ache. Toenikis ngaatuk naurukuk sodi tobuasi ngitak nawi. Tolemutu asaduku a Achamunet a Ekapolon Akuj kidokokis naurukuk, sodi tolemut asaduku ache kiwaakis ngakisikwaanet a egolit na iyaarito esi nikeng erai ainakinet natachet akisech. Kiwaakisi asaduku ngina diyete na a Achamunet. Kitorotokisi aurukuk na iritae ngina kimiekis tolot bon. Ani erumor kiteosi elosi. Ani kelot lore a Bes Chemech lo erai akwap keng, toyena atamar Akuj a Isirael ngesi eyaunit eriras loaronon logo niyok. Nakaneni ani pekelot inaa, toyena atamar meere ngesi ayauni ngidekesinei luaronok lugu. Erai cha ekeny aronon.” Apot kesi tosubakis ngakiro na alimokinio. Tolemut ngaatuk namanang ngaarei toenikis naurukuk, sodi togolokis ngitak kech nawi. Kidokokis kesi asaduku a Achamunet a Ekapolon Akuj naurukuk. Kidokokis tani asaduku na aya ngakisikwaanet a ngirunyei ka ngidekesinei, na asubunitae a egolit. Torotokis ngaatuk kiwapakis erukudi lo eteni Bes Chemech, kidirasi inaa nyiitosi alorukudi. Arwosi kesi eloose. Kiwapakis ngikapolok lukan a Ngipilisti ngaatuk nguna tanang lokukuoru a Bes Chemech. Esaa ngolo alemete ngitunga a Bes Chemech ngakanoi anadipo. Ani napei ekeuneta ngakies kech, kingolikis asaduku a Achamunet a Ekapolon Akuj. Talakaros kesi lokojokon. Bu aurukuk ngina tanangu mana a itwaan anyaritae Yochua, ani alomit Bes Chemech, towo kaneni alodiyete ataaba natiapolon. Toyepa ngitunga ngakito na asubunitere aurukuk ngina, sodi taara ngaatuk tolemikis Ekapolon Akuj erai akipeyos na inomio. Totiyaut Ngilawi asaduku a Achamunet a Ekapolon Akuj ka asaduku na ayakasi ngakisikwaanet na egolit, sodi kidokokis kesi kidiama ataaba naapolon. Ani erumor tolemikis ngitunga a Bes Chemech Ekapolon Akuj ngakipeyos na inomio ka ngakipeyos nache akolongit ngina. Ani ingolikinete ngikapolok lukan a Ngipilisti ngakiro nguna, tobongosi lore a Ekiron akolongit ngina. Ngakisikwaanet nakan a ngidekesinei aluaronok asubunitae a egolit, apot Ngisirael yaasi nia Ekapolon Akuj erai ainakinet natachet akisech kech. Alemunitae ainakinet apei kotere ere epei alorerea kalu, Achidod, ka Gasa, ka Achikelon, ka Gas, ta Ekiron. Alemunitae ngakisikwaanet a ngirunyei dang na asubunitae a egolit, itemitoe ka ekimar a ngirerea a ngikapolok a Ngipilisti alukan, ngirerea lu adukito ngawasea ka ngadakarin napeadukitoe ngawasea. Ataaba naapolon na eyei mana a Yochua alo elomit Bes Chemech, nakolong edokokinio asaduku a Achamunet a Ekapolon Akuj, eringa eyei neni erai ngesi eyenere nakolong asubakin. Aari Ekapolon Akuj ngitunga a Bes Chemech ngitomwon-kaarei kainyo aripakinete kesi asaduku a Achamunet. Kigoro ngitunga tosutonokis kainyo abu Ekapolon Akuj taar ngitunga lukaalak alokiding kech. Sodi tolimut ngitunga a Bes Chemech tamasi, “Ngae epedori towo alongaren Ekapolon Akuj, na erai Akuj na italeuno? Nia ngae tokona elosi Akuj tachadaror aniyok?” Tomeasi kesi ngitunga ni eya ngitunga a Kirias Yearim ebalasi, “Abuut Ngipilisti asaduku a Achamunet a Ekapolon Akuj. Potu tolemasi.” Sodi tolemasi ngitunga a Kirias Yearim asaduku a Achamunet a Ekapolon Akuj, yaasi kai a itwaan anyaritae Aminadab, ani alomit lomukura. Kitaleut kesi lokookeng a Aminadab lo anyaritae Eleasar sodi toweik asaduku a Achamunet. Ebooyi asaduku a Achamunet a Ekapolon Akuj alo Kirias Yearim a ngikaru alukaalak, alu araakasi ngitomwon-arei. Ngirwa ngulu daang, egoronokinete Ngisirael Ekapolon Akuj. Tolimok Samuel Ngisirael tama, “Ani kibongokinete esi Ekapolon Akuj a ngitai kus kadaang, tachakasi ngakujo nagelayek ka ngakisikwaanet a akuj anaberu enyaritae Achitaros. Tolemunos toliworos ngika a Ekapolon Akuj dir, kilipa ngesi bon, sodi kitoyuu ngesi anapolou a Ngipilisti.” Tochakasi Ngisirael ngakujo kech nasubuna na a Baal ka Achitaros, sodi kilipa Ekapolon Akuj bon. Ani erumor Tolim Samuel tama, “Tochunakin Ngisirael daang Misipa, elip ayong Ekapolon Akuj kotere esi.” Sodi tochunakinos kesi Misipa. Tookut kesi ngakipi tobukosi erai akipeyos na alemikinitae Ekapolon Akuj sodi torono akimuj akolongit ngina daang. Tolimut kesi tamasi, “Kisechak sua Ekapolon Akuj.” (Atubeene Samuel ngikesio a Ngisirael alo Misipa.) Ani iirarete Ngipilisti atamar achunakin Ngisirael Misipa, apot ngikapolok lukan a Ngipilisti tonyout ka ngitunga kech alosit akitijwore Ngisirael. Tobul Ngisirael na eirareta ngakiro nguna. Tolimokis Ngisirael Samuel tamasi, “Torubak kare akilipit Ekapolon Akuj na erai Akuj yok kitoyuu ngoni ani eya Ngipilisti.” Taar Samuel imesek nisorokit tolemik Ekapolon Akuj erai akipeyos na inomio elemwaana. Ani erumor kilip Samuel Ekapolon Akuj esaki kingarak Ngisirael, sodi kiik Ekapolon Akuj akilip a Samuel. Ani eringa Samuel ipeyoe, kirudun Ngipilisti akitijikin Ngisirael. Nipei bore ngini, togirok Ekapolon Akuj anadis, tobelak Ngipilisti. Kibiler kesi lokojokon tamataros eemito. Tonyout Ngisirael alo Misipa kiwapakis Ngipilisti tanang Besikar, taarete alorot. Ani erumor tolem Samuel amoru kitowo alokiding Misipa ka Chen, ebala, “Kingarak ngoni Ekapolon Akuj jik tanang tokona” sodi tanyara ngesi amoru ngina “Amoru a akingarakino.” Sodi kidwangae Ngipilisti. Kiratak Ekapolon Akuj kesi nyeeremo nabo akwap a Ngisirael ngirwa daang lu ayarea Samuel. Apon Ngisirael tobuakinae akwap daang. Tobuakinae tani ngirerea kech daang lukolong alemarito Ngipilisti napei alo Ekiron tanang Gas. Kisila Ngisirael tani ka Ngikanaan. Abu Samuel topolok Ngisirael ngirwa daang lu ayarea ngesi. Ekaru daang aloseene ngesi irimit ngirerea a Besel, ka Giligal, ta Misipa sodi totubonok ngitunga ngikesio alorerea kangulu. Ani erumor tobong nawi keng na ayei Rama. Atubeene ngikesio tani kaneni. Abu ngesi todukok ekeno a ngakipeyos Rama. Ani emojongi Samuel, kitiliwo talokookeng ngikatubok ngikesio alo Isirael. Anyaritae ekiro a lokookeng aloapolon Yoel, tanyaritetei lo aloochi Abija. Araakasi kesi ngikatubok ngikesio alo Beer-cheba. Nakaneni apot kesi nyiiwapa elote a apakech. Toliworos kesi ngitunga lu esakete ngaropiyae. Kidiaunut kesi ngaropiyae na ediakitere kesi nyeetubeeneto ngikesio eriyan. Sodi tochunakin ngikarikok a Ngisirael daang toloto nia Samuel alo Rama, tolimokis tamasi, “Topupok a, imojong iyong tarai nyiwapito talokookon elote kon. Aloger kangolo, tosekinae sua ekapolon lo kipolokini loger a ngakwapea anache.” Apot ngakiro na abalasi kesi “Nakinae sua ekapolon lo kipolokini,” nyeejoikis Samuel. Sodi kilip Samuel Ekapolon Akuj. Tolimok Ekapolon Akuj ngesi tama, “Topup ngakiro daang nakisuruorete ngitunga iyong. Meere iyong kingerito ngitunga. Ayong kangerito kesi aliwor ekapolon kech. Napei kolong epudunio ayong kesi alo Misiri, areasi kesi anikang elipa ngakujo ngache. Ngakiro napei nguna kesi tokona kisubeta ngitunga iyong. Tokona bocha, topupok ngakiro kech, nakaneni kichikichik kesi lokojokon tolimok ngakiro na esubeeneta ngikapolok kech kesi.” Abu Samuel tolimok ngitunga lu asakete ekapolon ngakiro daang na eruoro Ekapolon Akuj. Tolim Samuel tama, “Ngakiro nugu ejoikinit ekapolon kus esubi. Itiliwori ngesi talokookus ngasigerea keng. Elomarete ngiche lotich lo a ngaurukukui keng ana a ejie, elomarete ngiche amere ngangolei keng, tokera ngiche kingareno ngaurukukui keng. Eseuni ngesi ngiche toweikis ngitunga abunget apei, toseu ngiche toweikis ngitunga ngitomwon-kan. Itaate talokookus ngiche ngamanat keng, tolema ngiche ngalemet keng, tosubakis ngiche ngiboro keng lujiet ka ngiboro a ngaurukukui ana irito ngangolei. Tanakookus kesi esubete akimiet keng nakaakunyon ka akipore akimuj keng ta akimare ngamugati keng a akim. Elemari ngesi ngamanat kus naajokak ka ngamanat na a ngimusabib ta ngikito kus a akimiet sodi nak ngikasubak etich keng. Elemari ngesi alemunet apei anatomon a ngikinyam kus ka ngamusabib kus nak ngitunga lu etubete ngikesio ka ngikasubak etich keng luche. Elemari ngesi ngikasubak etich kus, lukiliok ka luberu, ka ngaatuk kus naajokak, ta ngisikiria kus sodi toliworos ngika etich keng. Elemari ngesi alemunet apei anatomon a ngibaren kus, sodi toliworos esi ngikedalak keng. Ngirwa ngulu, ikalounete esi lokojokon kotere ekapolon lo iseunete esi nakaneni nyiirari Ekapolon Akuj akigoro kus.” Nakaneni apot ngitunga nyiirasi ngakiro a Samuel. Tolimut kesi tamasi, “Mam! Kisaki sua ekapolon lo kipolokini sua, ekokisi sua dang ngitunga a ngakwapea anache, min ekapolon kosi lo kiriki alojie sodi tojii.” Topupok Samuel ngakiro daang na alimunete ngitunga sodi tolot tolimok Ekapolon Akuj. Tolimok Ekapolon Akuj Samuel tama, “Kiira ngakiro kech, sodi tolemik kesi ekapolon.” Ani erumor tolimok Samuel Ngisirael tama, “Tobong itwaan daang lore keng.” Ayei ekile epei a ekitela a Benjamen anyaritae Kich. Abarit ngesi nabo ayenikinitae. Arai ngesi lokookeng a Abiel, alo arai lokookeng a Seror, alo arai lokookeng a Bekoras, alo arai eka emachar a Apia. Ayei Kich lokookeng lo anyaritae Saul. Arai Saul esorokit lokebusean. Amam ekile alo Isirael lo edwangit Saul anakibuseanu. Arai ngesi lokooyen eporit akou na ngitunga kadaang. Tachakaros ngisikiria a Kich. Tolimok Kich Saul tama, “Tonyou kirukosi ka epei a ngikasubak etich tasakasi ngisikiria.” Toloto kesi kitoro nakwap na a ngimukur a Epiraim, kitoro lowae lo a Chalicha, tongopikis ngisikiria. Kitoro lowae lo a Chaalim, sodi kitoro nakwap a Benjamen, nakaneni tongopikis ngisikiria kaina dang. Ani enangunete nakwap a Supu, tolimok Saul ekasuban etich tama, “Bua atobongosi nawi. Epedori apakang kimiek akichana kotere ngisikiria, sodi kichanakin kotere ngoni.” Tatachu ekasuban etich tama, “Towo pan! Eyei itwaan a Akuj lore logo. Erai ngesi itwaan ni erimae noi kainyo iyoonokin ngakiro daang na elimuni ngesi. Bua apana nikeng. Epedori tokona ngon alimokin ngoni nikianyunea ngisikiria.” Kingit Saul ngesi tama, “Nyo tokona kiinari ngoni ngesi nakilosio aanyun? Adaun akimuj nangoon ayei lochuei yok. Emam ainakinet kiinari ngoni itwaan a Akuj. Nyo kitingit ngoni?” Tatachu ekasuban etich tama, “Atingit ayong iropiyat. Ainakini ayong ngesi kitilimokinea ngoni nikianyunea ngisikiria.” ( Kolong sek alo Isirael, na esakea itwaan akingit Akuj ngakiro, elimuni tama, “Bua apana lokengolikinan,” kainyo anyaritae kolong ekadwaran ekengolikinan). Tolimok Saul ekasuban etich tama, “Ilim iyook. Bua apana.” Sodi toloto kesi lore ni ayei itwaan a Akuj. Ani eringa edokete imukura eloose lore, kiriamun kesi ka ngapesur na aloose akiok ngakipi. Kingita kesi ngapesur tamasi, “Eyei ekengolikinan nege a?” Tatachut ngapesur tamasi, “Eyei. Kingareni ngesi esi, kikomakisi. Adoluni tokona ngesi lore kainyo ipeyoote ngitunga akolongit naga alomukura. Napei ilomareta esi lore, iriamunete esi ngesi eringa nyedokara lomukura akimuj. Nyimujete ngitunga eringa ngesi nyebuno, kainyo esakitae ngesi epiari akipeyos. Ani erumor kimuja ngitunga lu enyaraunitae.” Tolomasi Saul ka ekasuban etich lore. Ani elomarete kesi kingolikis Samuel epudunit elosi ni ilipeenere. Akolongit nache eringa Saul nyebuno, esuruorit sek Ekapolon Akuj Samuel ebala, “Moi ngisaae lu ikote lugu, ameuni ayong itwaan a akwap a Benjamen nikon. Kitaleu ngesi kidokak akimiet nakou toliwor ekapolon a Ngisirael alu eraakasi ngitunga kang. Eyuuni ngesi ngitunga kang Alopilisti. Engolik ayong aboliaro a ngitunga kang nabo eira akigoro kech na esaketa akingarakino.” Ani ingolikini Samuel Saul, tolimok Ekapolon Akuj Samuel tama, “Itwaan nikolong kalimokini ayong iyong ngakiro keng en! Ngesi epolokini ngitunga kang.” Tolot Saul nia Samuel alodiyete ekidor, kingit tama, “Aliwae ibooyo ekengolikinan.” Tatachu Samuel tama, “Ayong arai ekengolikinan. Kapesi kingarenikisi toloto ni ilipeenere. Imujete esi ka ayong akolongit naga. Ani moi nataparach, kalimokini ayong esi ngakiro kus daang, sodi katalakak toloto. Ani Eliwor ngisikiria lu ngoon achakar ngirwa nguuni tokona, nyiimisikis ngakiro kech kainyo aanyun kesi. Ani ngae itwaan ni esakete Ngisirael lokojokon? Itwaan ngini ngesi iyong, ka ngitunga a awi a apakon a?” Tatachu Saul tama, “Arai ayong itwaan a ekitela a Benjamen alo edit alotela a Isirael. Nyeyenikinitae tani ngitunga a awi kang alokitela a Benjamen. Nyo tokona bo kisuruorea iyong ayong kona?” Sodi toriko Samuel Saul ka ekasuban etich namaniyat naapolon kisiboik ngaren emeesa lo ebooyoto ngitunga lu anyaraunitae, lu asibit ekimar kech ngitomwon-uni. Tolimok Samuel ekepon tama, “Yau akiring nata abala ayong iyong kipoga.” Sodi tolem ekepon amuro ngina inu Saul. Tolim Samuel tama, “Kingolik a, akiring nata kidekinitae iyong naga. Tanyam. Kedekini tete ayong iyong tanang esaa lo tokona logo tanyameta iyong ka ngipeyok lu anyarauni ayong.” Abu Saul kimuja ka Samuel akolongit ngina. Ani etiyaunosi kesi ani ilipeenere epote lore, tosubakinae ni eperi Saul alokidiama akai, Sodi toper ngesi inaa. Ani ebayiari, tanyara Samuel Saul alokidiama akai tama, “Tonyou katalakak tolot.” Sodi tonyou Saul topudosi ka Samuel aapei nikalapatan. Ani enangete kesi lokukuoru a ere, tolimok Samuel Saul tama, “Tolimok ekasuban etich kingarenik ngoni. Ani erotokini ngesi, kidaru iyong kane wadio katolimok ngakiro na alimu Akuj.” Ani erumor tolem Samuel echupa lo ayei akimiet tobukok nakou a Saul, sodi tonuak ngesi tama, “Kiseu iyong Ekapolon Akuj toliwor ekapolon a Ngisirael alu eraakasi ngitunga keng. Ipolokini iyong ngitunga a Ekapolon Akuj toyuu kesi alomoe kech alu iriamito kesi. Ibore en idodiuni atamar kiseu Ekapolon Akuj iyong toliwor ekapolon a ngitunga keng. Ani irotokini iyong akolongit naga anikang, iriamunosi iyong ka ngikiliok ngiarei analiel a Rael alo Selisa ani eyei nakwap a Benjamen. Kilimokinete kesi iyong atamar aanyun ngisikiria lu ngoon isakete esi. Ajongo tokona apakon akachit ngakiro a ngisikiria, aliwor iyong kiitunit. Ingita ngesi ebala, ‘Ekokini ayong ngakiro a lokookang ai?’ Ani erumor torotok kaneni tanang lochoke lo italeunitoe lo eyei Tabor. Iriamuni ngikiliok nguuni eloose akipeyonokin Akuj alo Besel, edakit epei ngikaalei nguuni, todakite loche ngamugati ngauni, totingite loche etuo loa emuna. Kimalaate kesi sodi kiinakis ngamugati ngaarei. Kidiau ngamugati nguna. Ani erumor tolot lomukura a Akuj lo eyei Gibea, ni eyei adakar a Ngipilisti. Ani ilomari lore, iriamunosi ka ajore a ngikadwarak etiyauna alokeno a ngakipeyos alokidiama emukura, ideese ngagitae ka ngiburin, tokusete ngibunei, tobolias ngagitae, todwarete. Emini Etau a Akuj nikon atipei todwara iyong ka kesi, tosub itwaan iche nigela. Ani esubakinosi ngakiro nugu anikon, tosubak ngakiro daang nacha kidodikini iyong Akuj atamar tosubak. Kingarenikini iyong ayong tolot Giligal. Kariamuni ayong iyong kaneni, abu atolemik Akuj ngakipeyos na inomio ka na ekisil. Kidarunae ayong kaina a ngirwa a ngikan-kaarei tanang ni abunio ayong katolimok na isubakini.” Ani erea Saul erotokini ani a Samuel, kibele Akuj eboyor a Saul. Akolongit ngina, tosubakin anikeng ngakiro daang nasek alimokinit Samuel ngesi. Ani enangunete Saul ka ekasuban etich keng Gibea, abu ajore a ngikadwarak kisiriamu ngesi. Min etau a Akuj nia Saul atipei sodi kimorikin ngesi ka kesi idongaate ka akirema. Ani ingolikinete ngitunga lusek ayenete ngesi eger lo adwareta ngesi ka ngikadwarak, apot kingitanaros make tamasi, “Nyooni abu ni eyei lokookeng a Kich? Aliwor Saul dang ekadwaran a?” Tatachu itwaan ipei ni alomit neni tama, “Ani bo luche ngul, ngae apakech?” Eger ngolo kolong esiakineta ngakitadapet be, “Aliwor Saul dang ekadwaran a?” Ani erumori Saul akidongare ka akirema, tolot ngesi lokeno a ngakipeyos lo ayei kidiama emukura. Abu apakeng a Saul loochi taanyunga ngesi ka ekasuban etich kingit tama, “Aliwae ilosito esi?” Tatachu Saul tama, “Asakar ngisikiria. Ani kingopikinete, atoloto nia Samuel.” Tolim nabo apakeng loochi ngolo tama, “Tama ngesi esi ai?” Tatachak Saul apakeng loochi ngolo tama, “Kitolimok ngesi sua atamar aanyun Ngisikiria.” Nakaneni abu Saul nyeelimok ngesi ngakiro na abalar Samuel eliwor ngesi ekapolon. Tanyara Samuel ngitunga tochunak Misipa, lokiriam a Ekapolon Akuj. Tolimok ngesi Ngisirael tama, “Alimu Ekapolon Akuj na erai Akuj a Isirael ebala, ‘Kepuduni kolong ayong esi alo Misiri, katoyuu esi Alomisiri, katoyuu tani alotunga aluche kadaang kiboliatar esi. Nakaneni kingero esi ayong Akuj kus akolongit naga. Ayong nakengaranakini esi alochan kus kadaang ka ngakiro naationok. Ilimut esi atamar tosekinae ekapolon. Aloger kangolo, tochinakinos tokona ngaren Ekapolon Akuj a ngitela kus ka ngimacharin kus.’ ” Ani erumor toriku Samuel ngitela a Isirael daang diyete, sodi toseu Ekapolon Akuj ekitela a Benjamen. Toriku ngesi ekitela a Benjamen diyete a ngawiyei kech, sodi toseu Ekapolon Akuj awi a Matiri. Ani erumor toriku ngesi ngikiliok a awi a Matiri a ngapei-pei, sodi toseu Ekapolon Akuj Saul lokookeng a Kich. Tasakae ngesi tongop. Sodi kingita kesi Ekapolon Akuj tamasi, “Eyei itwaan iche eringa nyebuno a?” Tatachu Ekapolon Akuj tama, “Saul ye kaama, edukit ani eyei eegos.” Tamataros kesi torikut Saul lotunga. Ani ewei ngesi alokiding ngitunga tooyaar noi kipor akou keng na a ngitunga kadaang. Tolimok Samuel ngitunga daang tama, “Ingolikis esi itwaan ni aseu Ekapolon Akuj a? Emam itwaan ikwaanatar ngesi alotunga kadaang!” Kiremasi ngitunga daang tamasi, “Kipuruunoe ekapolon!” Ani erumor tolimok Samuel ngitunga ngakiro a eboyor a ekapolon ka etich keng. Ani erumor kigir nakitab kiwaak akitab ngina ni italeunitoe. Sodi tolimok Samuel ngitunga atamar toloto nawiyei kech. Tobongo Saul dang nawi keng alo Gibea. Apot ngitunga ngiche lu ayenikinitae, lu alomarit Akuj lotai kech, kirukosi ka Saul. Apot ngitunga ngiche lupasiek tamasi, “Ikokini itwaan en kiyuuni sua ai?” Apot kesi kimenyasi Saul. Emam ngainakinet apot kesi inut Saul. Nakaneni nyemisikina Saul ngakiro kech. Adaunet a elap a epei, abu ekapolon a Ngiamon lo anyaritae Naach toloto ka ngasigerea keng lore a Yabech anakwap a Gilead, sodi kiriama ere. Tolimokis ngitunga a Yabech Naach tamasi, “Bua atachamakin, sodi atachamutu sua iyong toliwor ekapolon kosi.” Tolim Naach tama, “Kichamakini ngoni erai kesubakin ibore ipei. Kichamakin erai kapuyonok ayong akongu a itwaan kadaang na aloteten, sodi pena ngileech nia Ngisirael kadaang.” Tolimokis ngikarikok a Yabech ngesi tamasi, “Tachamakinae sua ngirwa ngikan-kaarei lukimearea ngitunga nakwap a Isirael daang. Ani kemam itwaan kingarakini sua, kichamuni sua ngakiro kon.” Tanangut ngitunga lu amearitae Gibea ni ayei Saul. Ani elimorete kesi ngakiro nguna, apot ngitunga daang kigoro lokojokon. Abunit Saul anamanat emeat ngimongin keng. Kingis ngesi tama, “Ekoe, nyo anyam ngitunga igorotor daang?” Sodi tolimokis kesi ngesi ngakiro na ayaunete ngitunga a Yabech. Toloma etau a Akuj nia Saul napei eirarea ngesi ngakiro nguna, tongo kilelebun. Tolem ngesi ngimongin ngiarei totubutubu nak ngitunga akiring na atubunio alomongin kirimioto akwap a Isirael daang ichikichikasi ebalasi, “Itwaan cha daang ni nyiwapakini Saul ka Samuel alojie, esubere ngimongin keng kona!” Toema Ngisirael ngakiro na adikino Ekapolon Akuj esubakini, sodi tochunun daang, emam tani ipei abu kidong. Ani echunakini Saul kesi alo Besek, araakasi ngitunga lua Isirael 300,000, taraakas lua Yuda 30,000. Tolimokis kesi ngitunga lu ameunitae alo Yabech tamasi, “Tolimokisi ngitunga a Yabech kona, ‘Moi naparan lotingilan, kiyuunio esi!’ ” Ani eloose ngitunga ngulu kisisakis ngitunga a Yabech ngakiro nguna, apot kesi talakaros noi, sodi tolimokis Naach tamasi, “Moi, kichamuni sua ngakiro kon, kitosubea iyong sua ngakiro nacha isaki daang.” Akolongit ngina nakwaare, abu Saul totiak ngitunga keng a ngalooso a ngauni. Ani ebayiari, toloto kesi nadakar a Ngiamon kitijikis Ngiamon. Aarito kesi Ngiamon na anangea naparan lotingilan. Ani lu apuunosi apot kiealaros tamataros a ngapei-pei. Sodi tolimokis Ngisirael Samuel tamasi, “Ngae mono ngoon abala nyikipolokini ngoni Saul? Torikutu ngitunga ngulu ataara!” Nakaneni tolim Saul tama, “Emam itwaan eario akolongit naga, kainyo akolongit naga ayuunea Ekapolon Akuj Ngisirael.” Ani erumor tolimok Samuel ngitunga tama, “Potu apana Giligal etiliwosi nabo Saul ekapolon yok.” Sodi toloto ngitunga Giligal kitiliwosi Saul kech alongaren Ekapolon Akuj. Kipeyokis kesi Ekapolon Akuj ngakipeyos a ekisil kaina. Talakaros Saul ka Ngisirael daang lokojokon alo Giligal. Sodi tolimok Samuel Ngisirael daang tama, “Asubak ayong ngakiro nangoon isakete esi. Kasek ayong esi ekapolon. Ngesi tokona logo kirikit esi. Amojong ayong apena ngakorwo. Talokookang lugu irukito ka esi. Karik ayong esi napei kolong eringa asorokona, tanang tokona. Ayong tokona logo. Ani keyakasi naaronok asubak, tolimosi alongaren Ekapolon Akuj ka ekapolon lo aseu ngesi. Eyei aite a itwaan alema ayong, kori asikiria? Eyei itwaan engal ayong kori aboliar a? Eyei itwaan ediau ayong ngaropiyae anikeng nakadiakitere a? Ani kasubakinit tani apei a ngakiro kanguna, atachi ibore ni alema.” Tatachut ngitunga tamasi, “Nyingala iyong sua, kori nyeboliara, kori nyedemara itwaan ibore keng.” Tolimok Samuel kesi tama, “Ekapolon Akuj ka ekapolon lo aseu ngesi kesi eraakasi akolongit naga ngikaanyunak atamar emam ibore ianyut esi asechit ayong.” Tatachut ngitunga tamasi, “Ee, Ekapolon Akuj erai ekaanyunan kosi!” Tolimok Samuel ngitunga tama, “Ekapolon Akuj ngesi kolong aseuni Musa ka Aron, ngesi kolong kipuduni esi alo Misiri. Tokona bocha, towaa loger ngolo sodi ketitak esi alongaren Ekapolon Akuj kesitam esi ngakiro naapolok na kolong asubi Ekapolon Akuj kitoyuunea esi ka taapaakus. Nakolong alooso Yakobo ka ngitunga a awi keng Misiri, sodi toboliatar Ngimisiri kesi, apot taapaakus kigoronokis ngesi sodi tomeu Ekapolon Akuj Musa ka Aron kipudut kesi alo Misiri, potu toloma nakwap naga. Nakaneni apot kesi tongero Ekapolon Akuj na erai Akuj kech. Kipoto Ekapolon Akuj kesi kitijwoto Ngipilisti ka ekapolon a Ngimoab, ta Sisera kesi kidwanga. Arai Sisera ekarikon a ngasigerea a ere a Asor. Ani erumor kigoronokis kesi Ekapolon Akuj ebalasi, ‘Kisech sua kainyo kinger sua Ekapolon Akuj kisub sua etich a ta Baal ka Achitaros, nakaneni toyuunae tokona sua alomoe kosi sodi atosuba sua etich kon!’ Sodi tomeu Ekapolon Akuj Gideon, ka Barak, ka Yeputa, ani ekisidi katomeu ayong. Abu ipei kosi daang kitoyuu esi alomoe kus, kiboikinos esi nikaalimon. Nakaneni ani ingolikinete esi Naach lo erai ekapolon a Ngiamon ebuni akitijwore esi, tongero esi Ekapolon Akuj na erai Akuj kus, na kipolokinit esi. Tamasi esi ayong, ‘Kisaki sua itwaan ni kipolokini sua.’ “Kingolikisi tokona, ekapolon lokolong isakete esi logo kiinak Ekapolon Akuj esi. Ani kikera esi Ekapolon Akuj erai Akuj kus, tosuba etich keng, topupo ngakiro keng ka akiwap ngitalio keng, ani kiwap esi ka ekapolon kus ngesi, ejokearosi ngakiro kus daang. Nakaneni ani pekipupo esi ngakiro a Ekapolon Akuj kiwapa ngitalio keng, eroner ngesi anikus ka ekapolon kus. Tokona bocha, towaa loger ngolo kingolikis akiroit naapolon naga, na esubakini Ekapolon Akuj iteete esi. Nyerai ngirwa lugu lua akamu a? Elipi ayong Ekapolon Akuj sodi tomeu agiro ka akiru. Ani kesubakin ngakiro nugu toyena atamar epolot akisech na isechakinito esi Ekapolon Akuj ani ibalatar esi ngesi isakete ekapolon.” Ani erumor kilip Samuel Ekapolon Akuj sodi tomeu Ekapolon Akuj agiro ka akiru ngina. Tokera ngitunga daang Ekapolon Akuj ka Samuel. Tolimokis ngitunga daang Samuel tamasi, “Kilipakinae kare sua ngikasubak etich kon nyikitoaka, Kiyen tokona atamar eatakin akisech nakisakea ekapolon nasechesea kosi nache.” Tolimok Samuel kesi tama, “Nyieam. Tani bo kisechito esi loger ngolo, nyiingero Ekapolon Akuj, nakaneni tosuba etich keng a ngitai kus kadaang. Nyiiwapa ngakujo na nyerai ngaka iteni. Nyikingarakinete kesi esi kori nyikiyuunete kainyo nyeraakasi ngaka iteni. Ekong Ekapolon Akuj atamar nyakachakari esi, kainyo kiseu ngesi esi toliworos ngitunga keng a ilope. Ani eliwor lo erai ayong, agasi atamar nyaapalik akilipanakin esi sodi nyaasechak Ekapolon Akuj. Ketatami ayong esi ngakiro naajokak ka na itemokino esi isubete. Tokera Ekapolon Akuj, tosuba etich imunosi ngesi a ngitai kus kadaang. Kitamutu ngakiro naapolok daang nakolong kisubea ngesi esi. Nakaneni ani keringa esi isecheenete, kimunyario esi ka ekapolon kus.” Arai ngikaru a Saul... na esiakinea ngesi apolokini Isirael. Topolok ngesi Isirael a ngikaru a... ka ngiarei. Aseuni Saul ngitunga ngabunge ngauni alo Isirael. Kiruko ngesi ka ngitunga ngabunge ngaarei alo Mikimach ka akwap na a ngimukur a Besel, sodi tomea ngitunga abunget apei kirukosi ka Yonasan toloto Gibea, na arai akwap a ekitela a Benjamen. Tolimok Saul ngitunga luche atamar tobongosi nawiyei kech. Taar Yonasan ekarikon a ngasigerea a Ngipilisti alo Geba. Kiirasi Ngipilisti daang ngakiro nguna. Tomea Saul ngitunga tokutakis ngaburucho anakwap kadaang ebalasi, “Kimiekisi Ngieburaniae daang kiirasi.” Kiirasi Ngisirael daang atamar aar Saul ekarikon a Ngasigerea a Ngipilisti. Kiirasi nabo atamar aremokin Ngipilisti ngesi. Apot kiikis ngakiro na anyaritere, toloto nia Saul alo Giligal. Tochunakin Ngipilisti alosit akitijwore Ngisirael. Ayakasi kesi ngaurukukui na ejie na erito ngangolei ngabunge ngatomwon-uni, ka ngikiliok lukameak ngangolei ngabunge ngakan-kapei ka ngasigerea nakaalak etia asinyen a ekwaas a anam. Toloto kesi Mikimach kide Betapen, Toloma neni. Sodi tonyout kesi akitijikin Ngisirael lokojokon kichanakin Ngisirael noi. Toduka Ngisirael ngiche anaburiburio, ka ngapanya, ka ngatabab, ka ngalielin ta ngakare. Todokasi ngiche ekwakaye angolol a Yorudan toloto nakwap na Gad ka Gilead. Aringa Saul eyei Giligal, kiwapakis daang ngesi ebulit emaranete. Kidar ngesi Samuel a ngirwa a ngikan-kaarei loger losek alimokinitor Samuel, nakaneni abu Samuel nyeebu Giligal. Kisiakis ngitunga akialanar ani a Saul. Sodi tolimok Saul kesi tama, “Inunae ayong ngakipeyos na inomio ka na ekisil.” Kipeye ngesi ngakipeyos na inomio. Napei cha arumorea Saul akipeyore ngakipeyos na inomio, todolu Samuel. Tolot Saul akisiriam ka akipeyoun ngesi, nakaneni kingit Samuel tama, “Anukiro isubak iyong?” Tatachu Saul tama, “Engolikini ayong atamar ealarosi ngitunga anikang, nabo adaunosi ngirwa lukolong ibalar ibuni. Ani eya nguna daang, achunakina Ngipilisti Mikimach. Abu robo ayong atama, ‘Ketijikinete tokona ayong Ngipilisti kane alo Giligal, toringa ayong nyitalakara Ekapolon Akuj.’ Abu ayong atama ejoikinit epeye ngakipeyos” Tatachak Samuel Saul tama, “Ngaka abangaanut ngakiro na isubak iyong. Nyiwapa iyong ngakiro nakidungokini iyong Ekapolon Akuj na erai Akuj kon. Arai kiwap iyong, kimiekinit Ekapolon Akuj iyong ka ngalesea kon topolokis Isirael nakajik. Adaun tokona apolou kon, kainyo nyiwapa iyong etal a Ekapolon Akuj. Eseuni Ekapolon Akuj itwaan ni esaki ngesi toliwor ekapolon a ngitunga keng.” Tonyou Samuel alo Giligal tolot Gibea nakwap a Benjamen. Kimaru Saul ngitunga lu arukito ka ngesi eraakasi ngamiae ngakan-kapei. Apot Saul ka Yonasan lo arai lokookeng, ta ngitunga lu arukitotor ngesi toloma Geba ni eyei nakwap a Benjamen, toloma Ngipilisti Mikimach. Tonyout ngasigerea a Ngipilisti anadakar kech alosit akirem, a ngajorei a ngauni, apei tolot Opira ni eyei nakwap a Chual. Tolot ache lowae lo a Bes-oron, tolot nache lokukuoru lo erounit adipo a Seboim ka ariet. Amam ngiketiakak a ngasua ayakasi nakwap a Isirael daang, kainyo abalasi Ngipilisti, “Warasi Ngieburaniae ngiitiaka ngilengea ka ngakwaaras.” ( Aloseenete Ngisirael nia Ngipilisti akipen ngasua nachilet ngalup, ka ngirokonin, ka ngaepe, ta ngilengea. Etatacheeneo kesi aropiyat apei kotere akipen ngaepe ka asubanakin ngakito nameet ngimongin, ngaropiyae ngaarei kotere akipen ngasua nachilet ngalup ka ngirokonin.) Ani akolongit na a ejie amam Ngisirael tani epei lo atingit ekileng ka akwara mati Saul ka lokookeng lo anyaritae Yonasan make. Tomeasi Ngipilisti ngasigerea kech ngache akiratakin apak a Mikimach. Akolongit apei, tolimok esorokit lo atingakinit ngesi ngiboro lujiet tama, “Bua atotuboros lowae loche ye atoloto nadakar a Ngipilisti.” Nakaneni abu Yonasan nyeelimok apakeng ngakiro nguna. Alomit apakeng Migiron diyete Gibea, kwap elamae. Arukito ngesi ka ngitunga ngamiae ngakan-kapei. ( Emuron lo anapit akaluwat ngesi Aija lokookeng a Aitub alo arai lokaatokeng a Ikabod. Arai Atub lokookeng a Pineas alo arai lokookeng a Eli, arai emuron a Ekapolon Akuj alo Chilo.) Peayenete ngitunga atamar arotoki Yonasan. Ayakasi ngatabab ngaarei naapolok tokwaka napak a Mikimach ni etori Yonasan tolomarea nadakar a Ngipilisti. Ayakasi ngatabab nguna lowaitin luarei a apak, anyaritae apei Boses tanyaritetei nache Sene. Awei ataaba apei alowae alokwap akienyikina ka Mikimach, towei nache alowae alo alokuju ekienyikina ka Geba. Tolimok Yonasan esorokit lorukitos keng ngolo tama, “Bua atotuboros nadakar a Ngipilisti alu eraakasi ngibukui lugelayek. Tokona ngon, kingarakini Ekapolon Akuj ngoni. Emam ibore iratakini ngesi ayuun ngoni tani kikidioko ngoni.” Tatachu esorokit ngolo tama, “Tosubak cha daang na isaki iyong akisub. Kirukit ayong ka iyong.” Tolim Yonasan tama, “Itemokino. Kitubor ngoni ekwakaye esingolikinos Ngipilisti. Ani ketamasi kesi ngoni, ‘Kidarutu apotu sua nikus,’ kiwei ngoni ani kiwaar, nyikilosi nikech. Nakaneni ani ketamasi kesi, ‘Potu nikosi,’ kilosi ngoni nikech kainyo idodiuni ibore ngini atamar achamu Akuj ngoni kidwangi kesi.” Sodi kisingolikinos kesi Ngipilisti tamasi, “Kingolikisi a, alomut Ngieburaniae anapanya ana ngoon adukitotor!” Tanyarata kesi Yonasan ka esorokit lorukitos keng tamasi, “Potu nikosi eyei ibore kisaki sua akidodikin esi!” Tolimok Yonasan esorokit ngolo tama, “Bua kiwapakinae ayong. Esidwang Ekapolon Akuj Ngisirael kesi.” Sodi todoka Yonasan apak a ngakan keng ka ngakungin, kiwapak esorokit ngolo ngesi. Alojie alo ekingaren kangolo, apot Yonasan ka esorokit ngolo taara ngitunga ngitomwon-arei ani arai atiaket apei anaomwon a ekitela. Toema Ngipilisti daang lu ayakasi moding Apot ngikaremok ka ngasigerea na ayakasi nadakar tobul tamaranikis. Tamaranik akwap, sodi min ebuloi loaronon noi. Apot ngitunga a Saul lu erereete alore a Gibea alo eyei nakwap a Benjamen, kingolikis Ngipilisti ekerete ama ka ama. Tolimok Saul ngitunga keng tama, “Kimarutu ngasigerea taanyut ngitunga lu emam kane.” Ani imarunio, toriamunae Yonasan ka ekatingan ngiboro keng lujiet emam. Tolimok Saul Aija tama, “Yau asaduku a Achamunet a Akuj nege.” (Akolongit ngina, adakit Aija ngesi alongaren Ngisirael.) Ani eringa Saul iruorosi ka emuron, abu ekurikur anadakar a Ngipilisti toroner noi, sodi tolimok Saul ngesi tama, “Emam esaa isuruorikinere Ekapolon Akuj!” Tonyout Saul ka ngasigerea keng akitijwore Ngipilisti, lu apot tojwoto make ani ebileritor lokojokon noi. Apot Ngieburaniae ngiche lusek arukito ka Ngipilisti anadakar kech, kilocho ewae lo ibakitotor, sodi kibaka alowae a Saul ka Yonasan. Luche dang, lusek adukito alomukur a Epiraim, apot kimorikin ka Ngisirael luche alojie na eirareta atamar amatarosi Ngipilisti. Tojwoto jik kiporosi Betapan. Toyuu Ekapolon Akuj Ngisirael akolongit ngina. Tanyam Ngisirael akoro tolilimiyosi akolongit ngina, kainyo abu Saul kikong edungunit tama, “Ilamam itwaan enyami akimuj akolongit naga eringa nyenanga ebong, sodi atatachakinea ngakiro naaronok alomoe kang.” Emam itwaan abu kiir akimuj akolongit ngina. Pot ngitunga daang ni alalaketa ngakito torukaut akimiet a ao epetakina wadaang. Eleleba akimiet a ao nakito, nakaneni emam itwaan abu tanyam kainyo aemito kesi ngilam a Saul. Nakaneni aringa Yonasan nyiirara apakeng ichikichiki ngitunga ilama. Sodi tolem ngesi akitoe na atingit kirepak kai a ao, sodi tanyam akimiet a ao. Atipei topwatun akwaan keng. Tolimok itwaan iche ngesi tama, “Echikichiki apakon ngitunga ikongi tama, ‘Ilamam itwaan ni enyami akimuj akolongit naga’ ”. Tolilimiyosi ngitunga. Sodi tolim Yonasan tama, “Ichanit apakang akwap. Kingolikisi tokona eger lo ekwarunea ayong ani anyamea akimiet a ao! Kejokera arai tanyama ngitunga akimuj na alemunete kesi na edwangeta ngimoe akolongit naga. Kelalak tani Ngipilisti earitae!” Akolongit ngina, kidwanga kesi Ngipilisti, kitijwoto napei alo Mikimach tanang Aijalon. Esaa ngolo etililimiyorit akoro Ngisirael. Tamatakinos kesi loboro lu aarunete alomoe. Tolemut ngamesekin ka ngaatuk tongola kaneni tanyama akiring na eyakasi ngaakot aapei. Tolimokinae Saul kona, “Asechakis ngitunga Ekapolon Akuj, ani anyameta akiring eyakasi ngaakot.” Tolim Saul tama, “Imodeaka esi! Kikokoriutu amoru naapolon ni ayei ayong nege.” Sodi tolim nabo tama, “Kapesi lotunga tolimokis atamar yau itwaan daang aite keng kori emesek keng tongol kane tanyam. Nyiisechakis Ekapolon Akuj ani inyameta akiring na eyakasi ngaakot.” Abu itwaan daang akolongit ngina nakwaare toriku aite keng tongol kaneni. Todukok Saul ekeno a ngakipeyos. Arai ekeno ngolo lo ekingaren adokini ngesi Ekapolon Akuj. Tolim Saul tama, “Potu apana etijikisi Ngipilisti nakwaare, atodema ngiboro tanang iwalari, ataara kesi daang.” Tolimut ngitunga tamasi, “Tosubak ngakiro nacha kijoikinito iyong daang.” Nakaneni tolim emuron tama, “Potu mono engita Akuj.” Sodi kingit Saul Akuj tama, “Alosi etijik Ngipilisti a? Kisidwangi iyong sua kesi a?” Nakaneni abu Akuj nyeetach ngakiro keng akolongit ngina. Tolimok Saul ngikarikok a ngitunga tama, “Potu nege taanyut akisech na asubakin akolongit naga. Ekongi ayong ani a Ekapolon Akuj ana eyari, ana eyuununi Ngisirael, atamar eario itwaan ni esechit daang tani kerai lokookang Yonasan!” Nakaneni abu itwaan daang kililing. Sodi tolimok ngesi Ngisirael daang tama, “Towaa esi daang luche kaama, kiwei ayong ka lokookang Yonasan kane.” Tolimokis ngitunga Saul tamasi, “Tosubak ngakiro nacha kijoikinito iyong.” Kingit Saul Ekapolon Akuj tama, “Anukiro peitachea iyong ngakiro kang akolongit naga? Ekapolon Akuj na irai Akuj a Isirael, tatachu ngakiro kang a ngamoru ana italeunitoe. Ani kerai akisech aka Yonasan kori akang, kidodiu kotere Urim. Nakaneni ani kerai aka ngitunga Ngisirael, kidodiu kotere Sumim.”*g** Kidodiunae Yonasan ka Saul, tobuchun ngitunga. Sodi tolim Saul tama, “Kidodiu tokona ani eyei lokookeng Yonasan ka ayong.” Kidodiunae Yonasan. Sodi kingit Saul Yonasan tama, “Anukiro isubit iyong?” Tatachu Yonasan tama, “Alemuni ayong akimiet a ao nadiochichi a akitoe ana atingit eir. Ayong logo acham akitu.” Tolim Saul tama, “Kataar Akuj ayong erai pekiar iyong Yonasan!” Nakaneni tolimokis ngitunga Saul tamasi, “Eario Yonasan lo ngoon arai ngesi ayuuni Ngisirael a? Mam! Kikong sua ani a Ekapolon Akuj ana eyari atamar nyechakar tani etimat epei anakou keng. Akuj engarakini ngesi anakiro ana asubio akolongit naga.” Apot ngitunga toyuut Yonasan nyear. Ani erumor, tojongo Saul akiwapit Ngipilisti tobongosi Ngipilisti dang nakwap kech. Ani eliwor Saul ekapolon a Ngisirael, kitiji ngimoe keng alowaitin kadaang. Abu kitiji ngitunga a Moab, ka Amon ta Edom. Kitiji ngikapolok a Soba ka Ngipilisti. Arai nacha itijikinio ngesi kesi, kidwang. Toji ngesi a ekileenu sodi kidwang tani Ngiamalek. Toyuu ngesi Ngisirael alojiesinei kadaang. Talokookeng a Saul kesi Yonasan, ka Ichipi ta malikichua. Anyaritae nakookeng naapolon Merab, tanyaritetei naachi Mikal. Aberu a Saul ngesi Ainoam na arai nakookeng a Aimaas, ekapolon a ngasigerea keng ngesi a Abiner lo arai lokookeng a apakeng a Saul aloochi alo anyaritae Ner. Kich lo arai apakeng a Saul, ka Ner lo arai apakeng a Abiner, araakasi talokookeng a Abiel. Etijii Saul Ngipilisti lokojokon ngirwa daang lu ayarea ngesi. Arai nacha eriamunea ngesi ekile loa ngikilinga daang kori lokooson, abu kitiliwo asiger keng. Tolimok Samuel Saul tama, “Ayong kolong kameuni Ekapolon Akuj akidokakin akimiet nakou kon toliwor ekapolon a Ngisirael alu eraakasi ngitunga keng. Tokona bocha, topupok ngakiro a Ekapolon Akuj. Ebala Ekapolon Akuj Namerikanyer kona, ‘Erirae ayong Ngiamalek kainyo eratakinete kolong kesi taapaakech a Ngisirael alorot na apudunioto alo Misiri. Kape kitijik Ngiamalek kinyasu ibore daang ni etingito. Nyiisik ibore tani ipei. Taar ngikiliok, ka ngaberu, ka ngide, ka lu enakete, ka ngaatuk, ka ngamesekin, ka ngikaala, ta ngisikiria.’ ” Sodi tanyarau Saul ngajorei keng tachunak wapei, kimaru alo Telem. Ayakasi ngasigerea 200,000 na aponito alo Isirael, ka 10,000 na aponito alo Yuda, Ani erumor toloto Saul ka ngitunga keng lore a Amalek sodi toduka anasinyonoit ana etau a angolol. Kichikichik Saul Ngikenis tama, “Tonyoutu toloto, toisikisi Ngiamalek, nyekemorik kataar aapei, kainyo ingarakinete kolong esi Ngisirael daang na apudunioto alo Misiri.” Sodi tonyout Ngikenis toloto. Kidwang Saul Ngiamalek, toji napei alo Apila tanang Chur, kide Misiri. Toriko ngesi Agag lo arai ekapolon a Ngiamalek eringa eyari, sodi taar ngitunga daang. Nakaneni apot Saul ka ngitunga keng kimiekis Agag eyari, kimiekis ngamesekin ka ngaatuk, ka ngitak ta ngimesekin kori ibore niche ajok daang. Kinyasut kesi ibore niche daang nipasit ka ni emenyaritae. Tolimok Ekapolon Akuj Samuel tama, “Kakadaki ayong nikolong aseunea Saul aliwor ekapolon, kainyo area ngesi anikang anger ngitalio kang.” Tongo Samuel, kigoronok Ekapolon Akuj akwaar kiiya. Tonyou Samuel nataparach elilim asakar Saul. Tolimokinae Samuel kona, “Alot Saul lore a Karimel ni adukoki ibore nikisitamunet ni erimare ngesi ilope. Ani erumor kipor Samuel tolot Giligal.” Tolot Samuel nia Saul, Kimala Saul ngesi ebala, “Kitopia Ekapolon Akuj iyong! Erichak ayong etal a Ekapolon Akuj.” Tolimok Samuel tama, “Ani nyo bo apupio ayong ngaatuk ka ngamesekin eruosi?” Tolim Saul tama, “Alemunete ngitunga kang ngibaren ngulu ani a Ngiamalek. Emiekinete ngamesekin ka ngaatuk naajokak sodi kipeyonokinoe Ekapolon Akuj na erai Akuj kon, ani luche daang, kinyasut jik.” Sodi todungok Samuel Saul tama, “Kililing katolimok ngakiro nakesuruori Ekapolon Akuj ayong been nakwaare.” Tolimok Saul ngesi tama, “Kasio tolimokinae.” Tolim Samuel tama, “Tani kibala iyong kori irai itwaan pasit, irai iyong ekarikon a ngitela a Ngisirael. Sodi kitomea ngesi iyong todung tama, ‘Kape, tomunya ngitunga luasechak a Ngiamalek ngulu. Kitiji kesi tomunya daang.’ Ani kotere nyo bo peiwapea iyong ngakiro a Ekapolon Akuj? Kotere nyo imatakinor iyong angatar ngiboro ka akisub naaronok alongaren Ekapolon Akuj?” Tatachu Saul tama, “Ewap ayong ngakiro a Ekapolon Akuj. Abu atolot loger lo kamearitor ngesi ayong. Ariku ayong Agag lo arai ekapolon a Ngiamalek nabo amunya ayong Ngiamalek daang. Nakaneni apot ngitunga kang tangatasi ngamesekin ka ngaatuk naajokak, sodi yaut ngibaren ngulu Giligal akipeyonokinio Ekapolon Akuj na erai Akuj kon.” Tolim Samuel tama, “Anukiro esaki Ekapolon Akuj, akiwap ngakiro keng kori ngalemunet ka ngakipeyos? Ejok akiwap ngakiro keng akidwang akipeyonokin ngesi ngimesekin luatumak. Kainyo akinger ngakiro keng, ikwaan ka akapel. Nabo ikwaan ngiwog ka akilipit ngakujo nasubuna. Ani aloger ingerio iyong ngakiro a Ekapolon Akuj, kinger ngesi dang iyong iliwor ekapolon.” Tatachak Saul Samuel tama, “Asech ayong ani angerio na adungit Ekapolon Akuj ka ngakiro kon. Aemi ayong ngitunga kang dio atosub na asakete kesi. Kelipit tokona iyong atamar torimakinae kare akisech kang, atobongosi Giligal atopedorea ayong akilip Ekapolon Akuj.” Tatachu Samuel tama, “Nyikibongori ayong ka iyong kainyo inger iyong ngakiro a Ekapolon Akuj nabo kinger Ekapolon Akuj iyong aliwor ekapolon a Ngisirael.” Ani erea Samuel ebala atorotok, torwakin Saul ewaru a Samuel tochil. Tolimok Samuel ngesi tama, “Achilichilia Ekapolon Akuj akolongit naga apolou kon alo Isirael, ainaki ekidunyet kon, lo ejok kidwangit iyong. Akuj a Isirael na erimae, nyingalae kori nyilochi ngakiro keng. Meere ngesi itwaan, nyilocheene ngesi ngakiro keng.” Tatachu Saul tama, “Asech ayong. Nakaneni kidodikinae arimatoi alongaren ngikarikok a ngitunga kang ka Ngisirael daang. Bua atobongosi atopedorea ayong akilip Ekapolon Akuj na erai Akuj kon.” Sodi kirukosi Samuel ka ngesi tobongosi Giligal, kilip Saul Ekapolon Akuj. Ani erumor todung Samuel tama, “Torikokinae ayong Agag lo erai ekapolon a Ngiamalek.” Bu Agag nikeng ebulit emarani, itami ebala, “Epipil chanai ibore be akitu en!” Tolim Samuel tama, “Ani aloger etiliworea ekileng kon ngaberu na emam ngide, idongi tokona itiokon dang emam ikoku.” Totubutubu Samuel Agag alongaren ekeno a ngakipeyos alo Giligal. Ani erumor tolot Samuel Rama. Tolot Saul nawi keng Gibea. Ngirwa lu aringaakar Samuel eyari, abu nyiingolik Saul nabo, nakaneni egoro ngesi kotere Saul. Toronokis Ekapolon Akuj ngakiro nakolong etiliworea Saul ekapolon a Ngisirael. Tolimok Ekapolon Akuj Samuel tama, “Igoro iyong kotere Saul tanang ori, kitee iyong atamar anger ayong ngesi eliwor ekapolon a Ngisirael? Tolem akimiet adio tonyou tolot Betleem, nawi a itwaan enyaritae Yese kainyo aseu ayong lokookeng epei toliwor ekapolon.” Kingis Samuel tama, “Ekokini ayong alosi ai? Ani kiira Saul ngakiro nguna kaari ayong!” Tatachu Ekapolon Akuj tama, “Tolema itaok tolot tama, ‘Abu ayong akipeyokin Ekapolon Akuj.’ Tanyarau Yese bu nakipeyos sodi kedodik ayong iyong ngakiro na isubakini. Idokakini iyong akimiet nakou a itwaan ani kalimokini ayong iyong toliwor ekapolon.” Tosubak Samuel ngakiro na alimokini Ekapolon Akuj ngesi, tolot Betleem. Pot ngikarikok a ere akisiriam ngesi emaranete tamasi, “Ibunit iyong akaalimon a?” Tatachu Samuel tama, “Abunit akaalimon. Abunit akipeyokin Ekapolon Akuj. Kitaleunos pot atoloto nikipeyoet.” Tolimok ngesi tani Yese ka talokookeng atamar kitaleunos, sodi tolimok atamar pot nikipeyoet. Ani epote kesi, kingolik Samuel lokookeng a Yese lo anyaritae Eliab, dio kitama bon tama, “Iteni dir lo aseu Ekapolon Akuj logo ewei alongaren keng.” Nakaneni tolimok Ekapolon Akuj ngesi tama, “Nyiimisik aoyau ka akibuseanu keng. Anger ayong ngesi, kainyo nyetee ayong loger lo iteeo itwaan. Itee itwaan akwaan nikalapatan nakaneni etee ayong etau.” Ani erumor tanyarau Yese Abinadab toriku nia Samuel. Tolim Samuel tama, “Mam. Nyeseuna Ekapolon Akuj tani logo.” Sodi toriku Yese Chama neni. Tolim Samuel tama, “Nyeseuna Ekapolon Akuj tani logo.” Toriku Yese talokookeng lukan-kaarei daang nia Samuel alorot alopei kangolo. Tolimok Samuel Yese tama, “Mam. Nyeseuna Ekapolon Akuj tani ipei kalu.” Kingit Samuel Yese tama, “Eyakasi talokookon daang nege a?” Tatachu Yese tama, “Idongit loochi, nakaneni iyoki ngamesekin.” Tolimok Samuel Yese tama, “Tanyarau bu nege, kainyo nyikilemuni ngoni ngakipeyos eringa ngesi nyenanguna nege.” Abu Yese tomea itwaan anyaraun edia. Arai ngesi lokajokon a akwaan, lokebusean tojokak ngakonyen. Tolimok Ekapolon Akuj Samuel tama, “Tonyou kidokak akimiet nakou keng kainyo ngesi logo!” Tolem Samuel akimiet kidokak nakou a Daudi alongaren talokaatokeng. Abu etau a Ekapolon Akuj toloma nia Daudi atipei, kiruko ka ngesi akisiakin akolongit ngina jik. Ani erumor tobong Samuel Rama. Abu etau a Ekapolon Akuj toisik Saul, sodi tomeu Ekapolon Akuj etau loaronon toloma akichan ngesi. Tolimokis ngikasubak etich keng ngesi tamasi, “Kiyeni atamar abu etau loaronon ani a Akuj akichan iyong. Todungokinae tokona sua, ekapolon, atamar atasakutu itwaan ni eyeni akiram agita. Sodi toliwor nacha ebunio etau loaronon nikon, taram itwaan ngini agita, sodi tojoker iyong.” Sodi todungok Saul ngikasubak etich keng tama, “Tasakakinae ayong itwaan ni epedori akiram agita niajokon, kitorikokis.” Tolim epei a ngimeanara kaneni tama, “Eyei Yese loa ere a Betleem lokookeng lo eeono niajokon. Erai ngesi lokooson tarai lokebusean. Ejwono ngesi nabo eyeni ekiruor. Erukito Ekapolon Akuj ka ngesi.” Sodi tomea Saul ngitunga nia Yese ebala, “Nakinae ayong lokookon Daudi, lo iyoki ngamesekin.” Tolem Yese esikiria iwokit ngamugati, ka etuo ileleba emuna, ta ikale, nak Daudi yaa nia Saul. Tolot Daudi nia Saul toloma lotich a Saul. Tominak Saul lokojokon, toseu toliwor ekatingan ngiboro keng lujiet. Sodi tomea Saul ngitunga nia Yese ebala, “Kimiek Daudi kiboikin nege lotich kang, kainyo aminak ayong ngesi.” Toliwor nacha ebunio etau loaronon ani Akuj, bu nia Saul, tolem Daudi agita keng taram. Sodi torotok etau loaronon ngolo, tojoker Saul nabo. Tochunakis Ngipilisti ngajorei kech alosit lojie. Tochunakis lore a Soko, alo Yuda. Toloma kesi kiding Soko ka Aseka, ni enyaritae Epes Damim. Tochunakin Saul ka Ngisirael nadipo a Ela, kibaka esakete akitijikin Ngipilisti. Torekin Ngipilisti lowae epei a emoru, torekin Ngisirael lowae loche, min adipo kiding kech. Abu ekajwon epei enyaritae Golias lo ere a Gas, topud anajore a Ngipilisti, esaki akitijikin Ngisirael. Arai aoyau keng ngamitae esibit ngauni. Anapit ngesi apukot na asubunitae anasuat ananyang, tobutakina nakwaan asuat nanyang na arai apotis keng ngakiloi esibit ngatomwon-kan ka ngakan-kaarei. Aburit ngakejen keng a asuat ananyang. Atingit ngesi amorok na asubunitae anasuat ananyang ariongit aloseget. Alangir akwara keng ekoni akitoe nalangir na etokere ngiworui. Arai apotis a akou a akwara kangina ngakiloi ngakan-kaarei. Alosi asiger na atingit aupwal keng engareni ngesi. Towo Golias kirema tolimok Ngisirael tama, “Nyo isubete esi kaina, meere ejie iponito esi a? Arai ayong epei a Ngipilisti, iraakasi esi ngikedalak a Saul! Toseutu ekile anikus, bu atojwoto ka ayong. Ani kedwang ngesi ayong kataar, kiliwor sua ngikedalak kus. Ani kedwang ayong ngesi ataar, iliworosi esi ngikedalak kosi. Angasi tokona ayong ajore a Ngisirael, toseutu pan itwaan atojwoto ka ayong!” Ani iirarete Saul ka ngitunga keng ngakiro nguna, tobul kesi noi, kipirisaaros. Arai Daudi lokookeng a Yese. Abunit Yese alo Betleem alowae alo enyaritae Epirasa. Ayei neni nakwap a Yuda. Ayakasi Yese ngide lusapa ngikan-kauni. Ngirwa lu araakar Saul ekapolon, tomojongite Yese noi. Alosito talokookeng a Yese luapolok luuni ka Saul lojie. Anyaritae ekiro aloapolon Eliab, totupak Abinadab, totupak Chama. Daudi ngesi arai loochi, Arai nacha elooso talokaatokeng luuni nia Saul, tobongo Daudi Betleem akiyok ngamesekin a apakeng. Angaseene Golias Ngisirael ataparach ka atabong daang esaki ejie a ngirwa a ngitomwon-omwon. Akolongit apei, tolimok Yese lokookeng Daudi tama, “Tolema ngalemet na epeitoe ngakiloi ngatomon. Kikomakinea inaa talokaatokon anadakar. Tolem tani ngatiaket natomon a akidietet nugu inaa ekapolon a ajore kech. Taanyu atamar ikote talokaatokon ai, sodi yau ibore idio ni idodiuni atamar ianyu iyong kesi, nabo ibooyete emam ngache aronok. Eyakasi ekapolon Saul ka talokaatokon ta Ngisirael luche daang nadipo a Ela ejiete ka Ngipilisti.” Ani iwalari, tonyou Daudi nataparach elilim, toisikinea itwaan iche ngamesekin, sodi tolot yaa akimuj loger losek alimokinitor Yese. Ani enanguni Daudi nadakar, kisiriamik Ngisirael ni enyounioto alosit lojie, eramito elii a ejie. Tonyout ngajorei a Ngipilisti ka Ngisirael torekinos ekienyikina, esakete ejie. Toisik Daudi akimuj anitwaan ani etee ngiboro. Tamatar Daudi lojie tolot nika talokaatokeng, kingitu atamar ikote kesi aliwae. Ani eringa ngesi isuruori kesi, tachadun nabo Golias anajore kiira ngakiro keng. Ani ingolikinete Ngisirael Golias, tobul tamataros. Tolimokinos tamasi, “Ingolikis esi itwaan ni achadun ngin a? Kiirasi ngakiro na engasea ngesi Ngisirael! Einakini ekapolon Saul itwaan ni eari ngesi ebachit lokaalan, nabo ipotokini nakookeng kiut sodi kimiek ngitunga a awi a apakeng nyeebuk echur alo Isirael.” Tolimok Daudi ngitunga lu awaasi alodiyete keng tama, “Nyooni esubakinere itwaan ni eari Epilistit logo, tolema ngileech lugu alo Isirael? Erai mono tokona Epilistit lo erai ebukut logela logo nyo, imenyea ajore a Akuj ana eyari?” Apon tolimokinae ngesi ngakiro na esubakinere itwaan ni eari Golias. Abu lokaatokeng a Daudi loapolon lobe Eliab kiira Daudi isuruori ngitunga. Tongoik ngesi Daudi noi, tolimok tama, “Nyo ibunit iyong akisub kane? Ngae iisikinitor iyong ngamesekin nadikidio eya nariet? Ayeni ayong erasi lokon ka achamanikin nakon! Ibunit iyong nege akitere ejie.” Tatachu Daudi tama, “Anukiro tokona asubak ayong? Ikwa nyapedori ayong akingita tani akiroit a?” Torei Daudi nabo ni ayei itwaan iche kingit akiroit napei ngina. Nacha ingisea ngesi itwaan, tatachakinae akiroit napei ngina. Ani iirario ngakiro na eruoro Daudi, apon tolimokinae Saul. Tomea Saul ngitunga anyarare Daudi. Tolimok Daudi Saul tama, “Ekapolon, nyeem itwaan Epilistit logo! Alosi ayong ekasuban etich kon etiji ngesi.” Tolimok Saul Daudi tama, “Nyipedori iyong akitijwore Epilistit logo, kainyo eringa iyong idit, tarai ngesi ekajwon anajorei napei kolong eringa edit!” Tolimok Daudi Saul tama, “Ekapolon, eyokiyeene ayong ngamesekin a apakeng. Nacha ebunio engatuny, kori ebu tadaka imesek, ewapanakini ayong atachak, sodi atoyuu imesek. Ani na ereeunor etiengit ngolo nikang, erum emosiring ebunga ataar. Aar ayong ekasuban etich kon ngingatunyo ka ngibuin dang, nabo aari tani Epilistit lo erai abukut logela logo, ani imenyea ngajorei a Akuj ana eyari. Kayuu Ekapolon Akuj ayong alongatunyo ka ngibuin, kayuuni tani Alopilistit kalo.” Tatachak Saul tama, “Kape robo, irukete Ekapolon Akuj ka iyong.” Tolem Saul ngiboro keng lujiet kitanap Daudi. Arai apukot na asubunitae anasuat ananyang, tobutokinae nakou a Daudi, nabo kitanap eworu losuat anakwaan. Toenik Daudi ekileng a Saul kidiama ngiboro lu ejie anapit. Kisilek ngesi arotokin tokuruwo kainyo peanaikinit sek anapit ngiboro ngulu. Sodi tolimok Daudi Saul tama, “Nyapedori ayong ajio ngiboro lugu. Nyanaikinit sek ayong kesi.” Sodi tobuto ngesi ngiboro ngulu daang. Tolem Daudi akitoe keng nakiyokiyet tolot ningolol toseu ngakaleuleui ngakan kirepak lochue keng. Tolem ngesi auno nakibaariet ngamoru, tolosio akitijwore Golias. Taapuu Epilistit ngolo nia Daudi, kingareni ekatingan aupwal keng ngesi. Kirudun ngesi jik. Ani ingolikini Daudi, kimenya kainyo arai Daudi edia loajokon lokebusean. Tolimok ngesi Daudi tama, “Aliwor ayong iingok kitingakinit iyong akitoe a?” Kisiak Epilistit ngolo akilam Daudi elimit ngakujo keng. Tolimok ngesi Daudi tama, “Bua lopae nikang, ainak akwaan kon ngataruk ka ngitieng a moding tanyama.” Sodi tolimok Daudi Epilistit ngolo tama, “Ibunit iyong nikang itingit ekileng ka akwara ta amorok, nakanen abunit ayong nikon alokiro a Ekapolon Akuj ana Epol Noi ana erai Akuj a ngajorei a Ngisirael ana imenyarit iyong. Kesidwangi Ekapolon Akuj ayong iyong akolongit naga. Kaari ayong sodi atotubo akou kon. Ainakini ayong ngawat a ngasigerea a Ngipilisti ngataruk ka ngitieng a moding. Toyena ngitunga daang a ngakwapea atamar eya Ngisirael Akuj. Toyena ngitunga lu eyakasi nege daang atamar meere ngilengea ka ngakwaaras eyuunea Akuj ngitunga keng. Ekapolon Akuj erai ekedwangan alojie nabo kisidwangi ngesi sua esi daang.” Ani ikomauni Golias nia Daudi, tamatar Daudi atipei ni ajienere kisiriamia ngesi kitiji. Kirepak ngesi akan lochue keng tout amoru, kibaarik Golias. Kimas amoru ngesi ngaren ereet tobwang akulului a akou. Kimasakin Golias kwap todo aloreet. Sodi kidwang Daudi Golias taar a auno ana ibaariyere ngamoru ka amoru! Tamatar Daudi towo alokidiama Golias tout ekileng keng anamuny totubo akou keng taar. Ani ingolikinete Ngipilisti atamar atoana ekajwon kech, tamataros. Tonyout ngitunga a Isirael ka Yuda kiwapakis kesi iremasi, kiritasi jik tanang Gas, tanang lodorin a Ekiron. Tadakanar Ngipilisti towanas, tadakanakin erot neni daang napei alo Chaaraim, tanang Gas ka Ekiron. Ani ebongunete Ngisirael anakirisit Ngipilisti, tangatasi ngiboro anadakar kech. Yaa Daudi akou a Golias Yerusalem, nakaneni kiwaak ngiboro a Golias lujiet loeam keng. Na engolikinea Saul Daudi elosi akitijwore Golias, abu kingit Abiner lo arai ekarikon a ngasigerea keng tama, “Abiner, lokookeng mono a ngae ngol?” Tatachu Abiner tama, “Nyayeni ayong ekapolon.” Todungok Saul Abiner tama, “Kape tongichu atamar erai ngesi lokookeng a ngae.” Ani ebonguni Daudi ani aarea Golias, toriko Abiner ngesi nia Saul. Aringa Daudi etingit akou a Golias. Kingit Saul ngesi tama, “Lodia lo, lokookeng a ngae iyong?” Tatachu Daudi tama, “Arai ayong lokookeng a Yese alo a Betleem, alo erai ekasuban etich kon.” Ani erumorete Daudi akiruoro ka Saul, abu lokookeng a Saul lobe Yonasan kisupa Daudi. Tominak ngesi Daudi loger lo aminar akwaan keng a ilope. Toriko Saul ngesi akolongit ngina, nyelakakina nabo ebongi nawi a apakeng. Sodi kikongo Yonasan ka Daudi aliwor ngipaalon jik, kainyo amina ngesi Daudi noi, Tobut Yonasan eworu lo anapit ngesi nak Daudi. Nak tani aupwal keng, ka ekileng, ka akau ta aruba. Etemonokini Daudi ngakiro daang na ameanari ngesi Saul akisub. Sodi kitiliwo Saul ngesi ekarikon a ngasigerea keng. Kitalakasi ngakiro nguna ngitunga daang ka ngikasubak etich a Saul. Ani ebongorete kesi nawi, kear Daudi Golias kerumor, topudut ngaberu alorerea kadaang a Ngisirael akisiriamiar ekapolon Saul. Aeosi kesi inyiakanarete, kideese ngatamburin ka ngagitae. Aeosi kesi inyiakanarete ebalasi, “Aar, Saul ngabunge, nakaneni aar Daudi ngabunge nakaalak.” Toronikis Saul ngakiro nguna noi sodi tama, “Ebalasi kesi aar Daudi ngabunge nakaalak, ani ayong ngabunge make. Nyo tokona iche idongit pearai ainakin ngesi apolou?” Akisiakin akolongit ngina jik, toliwor Saul lo a etereku, nabo kitapo kotere Daudi. Akolongit nache, bu etau loaronon ani a Akuj toloma nia Saul, tachalak ngesi alotooma akai loger a itwaan ani a ngikerep. Aramit Daudi agita loger losek erameenea, totingite Saul akwara. Toremo Saul akwara nia Daudi kainyo etamit ebala, “Ebubukini ayong Daudi losiep a akai.” Nakaneni kiidak Daudi ngaremoret a akwara ngaarei. Toem Saul Daudi kainyo arukito Ekapolon Akuj ka Daudi, nakaneni aisiki Saul. Sodi tachada Saul Daudi anikeng, kitoweik ngitunga abunget apei. Torikono Daudi ngitunga keng lojie. Kitemonok daang na asubeene kainyo arukito Ekapolon Akuj ka ngesi. Ani ingolikini Saul atamar itemonokin ngakiro a Daudi daang toriyana lokojokon, toem ngesi noi. Nakaneni ngitunga daang alo Isirael ka Yuda, aminasi Daudi kainyo arai ngesi ekarikon lo itemokino ngakiro keng. Sodi tolimok Saul Daudi tama, “Nakookang naapolon naga nabe Merab Kainakini ayong iyong ngesi toliwor aberu kon erai kiliwor iyong asiger nakajwon na iwapit ngakiro, sodi toji alojiesinei a Ekapolon Akuj.” (Etamit Saul atamar earete Ngipilisti Daudi a eger kangolo, nyeeliwor ngesi elope eari Daudi.) Tolimok Daudi Saul tama, “Ngae ayong, nabo nyo ngitunga a awi kosi alo Isirael aliworor ayong lokamuran a ekapolon?” Nakaneni ani enangi akolongit na adikino ipotokinere Merab Daudi, apon ngesi kipotoroe nakinae Adiriel lo abunit alo Meola. Abu Mikal na arai nakookeng a Saul kiiu Daudi. Ani iirari Saul ngakiro nguna tojoikis. Kitama ngesi bon tama, “Kimiekisi ainak ngesi Mikal, atolokakinea taareta ngesi Ngipilisti.” Sodi tolimok Saul Daudi na ngaarei tama, “Iliwor iyong lokamuran kang.” Todungok Saul ngikasubak etich keng tama, “Kisuruoro Daudi anikeng bon tamasi, ‘Elakara ekapolon anikon nabo kiminasi iyong ngikasubak etich keng daang. Tacham robo tokona akiut nakookeng.’ ” Kisuruoro kesi Daudi sodi tatachak Daudi kesi tama, “Erai arimatoi nateno aliwor lokamuran a ekapolon. Etenoono arimatoi ngina noi anikang alo arai ekebootonit, nabo nyakayenikinitae.” Tolimokis ngitunga ngulu Saul ngakiro na alimuni Daudi. Sodi todungok Saul kesi tama, “Tolimokis Daudi tamasi, ‘Nyesaki ekapolon ngibaren a akuuta anikon. Ibore ni esaki ekapolon ngesi iyong akiar Ngipilisti amiat kilenger yau ngamunyin kech inu ngesi, tatachakinea ngakiro na asubete ngimoe keng.’ ” (Arai eger ngolo asakea Saul Ngipilisti taara Daudi.) Ani elimokinete ngikasubak etich a Saul Daudi ngakiro nguna, tojoik Daudi aliwor lokamuran a ekapolon. Ani eringa akolongit na akuuta, toloto Daudi ka ngitunga keng taara Ngipilisti ngamiae ngaarei. Totub ngamunyin kech inu ekapolon kimarak ngesi, sodi toliworor lokamuran a ekapolon. Sodi kipoto Saul nakookeng Mikal kiut Daudi. Abu Saul toyen atamar erukito Ekapolon Akuj ka Daudi nabo emina nakookeng Mikal ngesi. Abu ngesi toem Daudi noi, toliwor emoit keng ngirwa daang lu ayarea Saul. Aponeenete ngajorei a Ngipilisti ejie, nakaneni alojiesinei kadaang ajwono Daudi edwangeene ngimoe akidwang ngikarikok luche a ngasigerea a Saul. Kotere ngakiro nguna, kipuruunoe Daudi. Tolimok Saul lokookeng Yonasan ka ngikasubak etich keng daang atamar asaki lokojokon akiar Daudi. Sodi tolimok Yonasan Daudi tama, “Esaki apakang akiar iyong. Tochoikin robo moi nataparach, tolot toduk awache kiboikin inaa. Alosi ayong atowo alodiyete apakeng anamanat ani idukitor iyong, esuruor ngesi ngakiro kon. Ani keya ngakiro aanyuni ayong, ketaanyuni ayong iyong.” Kipuruu Yonasan Daudi ani a Saul tama, “Ekapolon, wara kare nyiisubea ekasuban etich kon Daudi naaronok, kainyo emam naaronok kisubakinea ngesi iyong, pearai ngakiro na asubaki ngesi daang nakingarakis iyong. Ajali ngesi akiyar keng akolongit na aarea Golias, sodi kisidwang ekapolon Akuj Ngisirael ngimoe kech. Ani ingolikini iyong ngakiro nguna, talakar. Nyo tokona isakea iyong asubea naaronok itwaan ni emam ibore esechit taar pas?” Kiira Saul ngakiro a Yonasan, sodi kikong tama, “Ekong jik tani Ekapolon Akuj, nyaari ayong Daudi.” Tanyarau Yonasan Daudi tolimok ngakiro nguna daang. Toriko ngesi Daudi nia Saul tosub etich a ekapolon loger lo kolong sek a ekingaren. Tojwoto nabo Ngisirael ka Ngipilisti. Kitijik Daudi kesi kidwang lokojokon, tamatarosi. Sodi bu etau loaronon ani a Ekapolon Akuj toloma nia Saul. Ebooyi ngesi alokai keng etingit akwara a akan, toyei Daudi dang neni taramite agita. Tasak Saul akibubukin Daudi losiep a akai a akwara, nakaneni tamatar Daudi tobuchar. Akolongit ngina nakwaare, tomea Saul ngitunga akitere akai a Daudi, sodi taarere ngesi iwalari ataparach. Abu Mikal na arai aberu a Daudi kichikichik Daudi tama, “Ani pekisii iyong akolongit naga nakwaare, kiario iyong moi.” Sodi kiyooliu Mikal Daudi alopuke a akai, tamatar tosii. Tolem Mikal akuj nasubuna na ayei kai sodi kiperik lokitanda. Tolem ibore ni icholongi ni asubunitae a ngajul a ngaanei kiwaak nakou, sodi kimuk a ngiworui. Ani emeuni Saul ngitunga arikor Daudi, tolim Mikal tama, “Edeak ngesi.” Nakaneni tobua nabo Saul ngitunga aanyun Daudi ebala, “Kilepuleputu ngesi alokitanda, yaut nege sodi ataarea.” Ani epote ngitunga, toriamut akuj nasubuna ngina alokitanda, eyei ekicholong a ngaanei nakou. Kingit Saul Mikal tama, “Nyo kingalaa iyong ayong kona, kimiek emoit kang elosi tosii?” Tatachu Mikal tama, “Kalimokini ngesi ayong tama, kaari ayong iyong erai pekingarak iyong atosii.” Tobuchar Daudi tolot Rama ni ayei Samuel, sodi tolimok ngesi ngakiro daang na asubea Saul. Kirukosi ngesi ka Samuel toloto akiboi alo Naios. Tolimokinae Saul kona, “Eyei Daudi Naios alo Rama.” Sodi tomea Saul ngitunga akirumun Daudi. Ani ingolikinete kesi ngikadwarak a Akuj edwarete, erai Samuel ekarikon kech, toloma etau a Akuj lotunga a Saul, todwara tani kesi. Ani iirari Saul ngakiro nguna, abu nabo tomea ngitunga ngiche. Todwara tani ngulu. Tomea nabo Saul ngitunga na a ngauni, todwara tani ngulu. Sodi tonyou ngesi elope alosit Rama. Ani enanguni nakuja na eyei Seku, kingis tama, “Aliwae eyakasi Samuel ka Daudi?” Tatachu itwaan ipei tama, “Eyakasi Naios alo Rama.” Ani enyouni ngesi kaneni, toloma etau a Akuj nikeng, todwar ngesi erot neni daang tanang enanguni Naios. Tobuto ngesi ngiworui keng, todwar alongaren Samuel. Toper ngesi akolongit ngina emuner, akwaar ka apaaran. (Neni kolong etorunete ngalimuununet na ebeyo, “Aliwor Saul dang ekadwaran a?”) Ani erumor todok Daudi alo Naios ani eyei Rama, nia Yonasan tolimok tama, “Anukiro asubit ayong? Nyooni asechakinit ayong apa kon esakea ngesi akiar ayong?” Tolim Yonasan tama, “Nyikote neni. Nyitoani iyong. Kalimonokini apakang ayong ngakiro daang na esubi ngesi, kepolok kori kemam. Ikokini apakang kedai ayong ngakiro nguna ai? Nyikote neni!” Nakaneni tatachu Daudi tama, “Eyeni apakon atamar kimina iyong ayong, itami ngesi ebala, ‘Kimiekisi Yonasan nyeanyu ngakiro nugu nyiialolong.’ Nakaneni iteni, ekongi ayong alokiro a Ekapolon Akuj atamar aapiki ayong akitu!” Tolim Yonasan tama, “Kasubea ayong iyong ngakiro nacha isaki iyong daang.” Tolimok Daudi Yonasan tama, “Eyei moi esukukuu lo eanyungarere elap, echamitae ayong kimuji ka ekapolon aapei. Nakaneni kimiekinae ayong atolot atoduk anamanat tanang ebong a akolongit ana ngauni. Ani keituni apakon ayong, tolimok ngesi kona, ‘Kemaimai Daudi ayong esaki akikirikiraar Betleem nawi kech, kainyo anang ngirwa lu ipeyoo awi kech daang ngakipeyos na a ekaru.’ Ani ketama ngesi, ‘Itemokino,’ ejokearosi ngakiro alokasuban etich kon. Nakaneni ani kengo ngesi, toyen atamar asak asubakinea ayong naaronok. Kongina bocha, tosubere ayong naajokak, ani kolong kichamakinor ngoni alongaren Akuj. Nakaneni ani kasechit ayong, taarae iyong ilope! Nyo kirikoritor iyong ayong nika apakon kataar?” Tatachak Yonasan ngesi tama, “Tojongo alimit ngakiro nguna! Arai atoyeni ayong atamar esaki apakeng akiwan iyong, pekalimokinit ayong iyong a?” Sodi kingis Daudi tama, “Ngae kalimokini ayong erai kitachanak apakon iyong ngakiro engoit?” Tolim Yonasan tama, “Bua apana atoloto namanat.” Sodi toloto kesi Tolimok Yonasan Daudi tama, “Kimiek Ekapolon Akuj na erai Akuj a Isirael toliwor akaanyunan yok! Esaa lo ikoni logo moi, kori akolongit nache engitanari ayong apakang ngakiro. Ani kengolik ayong ngesi peekadakinit ekiro kon, kalimokini ayong iyong. Ani kesaki ngesi akiwan iyong kimiekisi Ekapolon Akuj kataar ayong erai kawou ayong alimokin iyong, sodi kengarak iyong tobuchar. Irukete Ekapolon Akuj ka iyong loger lo erukioto ka apakang. Ani eringa ayong ayari, kirichak akichikakinet kon anikang, nabo kitosubea na iteni, nakaneni ani katoana ayong, tosubea ngitunga a awi kang ngakiro na iteni nguna jik. Ani emunyari Ekapolon Akuj ngimoe kon daang jik, kidong achamun nakichamakin ayong ka iyong na nyepalikinio. Ani kepalikin, kirirae iyong Ekapolon Akuj.” Abu Yonasan kisikong nabo Daudi atamar tominak ngesi, kainyo amina Yonasan Daudi loger lo aminar ngesi akwaan keng a ilope. Sodi tolimok ngesi Daudi tama, “Aloger eyakar moi esukukuu lo eanyungarere elap, kiitunio iyong anakimuj. Ani akolongit na a ngauni, kiitunio iyong noi. Kape bocha ni ngoon idukitor toduk kayaaye ngamoru na etukokina neni. Agumari ayong ngimalea nguuni namoru nguna, tosub kori ngamoru asaki akigum. Ani erumor alimokini ayong ekasuban etich kang atama, ‘Kape tolem ngimalea.’ Ani katama ayong ngesi, ‘Kingolik a, eyakasi ngimalea lowae lokalaalo iyong tolem,’ toyen atamar emam naaronok eyakasi, topud nikalapatan. Ekongi ayong alokiro a Ekapolon Akuj ana eyari atamar emam ngakiro naaronok ianyunotor iyong. Nakaneni ani kalimok ayong edia ngolo atama, ‘Kingolik a, eyakasi yaaye kon,’ tonyou tolot kainyo ebala Ekapolon Akuj iyong kape. Ani anakiro anakipupokin ngoni, kirukit ngoni ka Ekapolon Akuj kisirichakini ngoni ngakiro nguna jik.” Sodi toduk Daudi anamanat. Ani enangi akolongit a esukukuu alo eanyungarere elap, bu ekapolon Saul nakimuj. Kiboikin ngesi lokicholong lopalem keng lo egongakina losiep a akai. Kiboikin Abiner diyete keng, sodi kiboikin Yonasan lokicholong lo akienyikina ka lo a Saul. Nakaneni amam itwaan ebooyi alokicholong a Daudi. Emam ngakiro abu Saul tolim akolongit ngina kainyo etamit ngesi abala, “Eya ngakiro kesubakin ani a Daudi, nyitaleuno ngesi.” Ani akolongit na atupit ngina, na arai akolongit na a ngaarei aanyungarere elap, aringa ekicholong a Daudi emam itwaan ibooyo. Sodi kingit Saul Yonasan tama, “Kotere nyo peabunio Daudi nakimuj been ka akolongit na?” Tatachak Yonasan Saul tama, “Kemaimai Daudi ayong atamar emiek ngesi tolot Betleem. Abala ngesi, ‘Kimiekinae kare ayong atolot kainyo ipeyoete ngitunga a awi kosi esukukuu lo a ngakipeyos alore. Adungu lokaatokang atamar atolot ayong inaa. Tokona bocha, ani kijoikinito iyong ngakiro kang, kimiekinae atolot ataanyu talokaatokang!’ Ngakiro nguna kesi emamakar Daudi anipalem ibooyo alomeesa kon.” Sodi tongoik Saul Yonasan noi tolimok tama, “Iyong lokookeng a aberu anakaronon ana nyepupi ngakiro! Ayeni ayong atamar ibakito iyong ka Daudi yaunea ngileech nikon ka itiokon! Nyiyeni iyong atamar ani cha eringa Daudi eyari nyiliwor iyong ekapolon a akwap kana? Kape tokona toriku ngesi nege, kainyo ejoikinit ngesi etoani!” Tatachak Yonasan apakeng tama, “Kotere nyo earere ngesi? Anukiro asubaki ngesi?” Abu Saul toremo akwara keng nia Yonasan esaki akiar ngesi. Toyen Yonasan atamar iteni esaki Saul akiar Daudi. Tonyou Yonasan alomeesa engoit ilileba. Nyimuja ngesi akolongit ngina na a ngaarei esukukuu, kainyo ealolongi ngesi kotere Daudi ani asubea Saul Daudi niaronon. Ani iwalari ataparach, tolot Yonasan naroatin nisek echikakina akiriamun ka Daudi kirukosi ngesi ka edia losorokit. Tolimok ngesi edia tama, “Tamatar kidepuunu ngimalea lu agumari ayong.” Kipungar edia, ani eringa edia ekeri, toguma Yonasan emal ngaren keng. Ani enanguni edia ni ayei emal lo agumari Yonasan tanyara Yonasan ngesi tolimok tama, “Abe emal bo yege alongaren kon!” Tolem edia emal tolosio nia ekapolon keng, peeyeni eger a ngakiro ana asubasi. Yonasan ka Daudi make ayenete eger a ngakiro kanguna. Nak Yonasan edia ngiboro keng lujiet tolimok tama, “Yaa ngiboro lugu lore.” Ani kerotoki edia kerumor, tonyou Daudi kayaaye ngamoru na asenokino tadakakin kwap tatap ereet ngalup ngatapet ngauni. Tonuakinos ngesi ka Yonasan kikalout daang. Ealolongi Daudi noi akidwang Yonasan. Sodi tolimok Yonasan Daudi tama, “Kape nikaalimon, kotere eger lo kikongio ngoni luarei a ekiro a ‘Ekapolon Akuj, kisirichakini ngoni Ekapolon Akuj achamunet nakajik ngina kikong ngoni, Isirichakini ngesi tani ngalesea yok jik.’ ” Tolot Daudi lore lo anyaritae Nob ni ayei Aimelek lo arai emuron a Akuj. Topud Aimelek bu akisiriam Daudi emarani, kingis tama, “Kotere nyo ibunitor iyong alopei?” Tatachak Daudi emuron tama, “Kameunit ekapolon ayong asubakin ngakiro ngache, katolimok ayong tama, ‘Wara itwaan nyeeyen ngakiro nakamearit ayong iyong akisub.’ Alimok ayong ngikiliok lurukitos kang atamar eriamar wache. Eyei tokona ibore itingit iyong a? Nakinae ayong ngamugati ngakan kori ibore cha daang ni itingit iyong.” Tatachak emuron Daudi tama, “Emam ngamugati ngache atingit ayong pearai ngamugati na italeunitoe. Ipedorete esi akinyam erai robo pekeringa ngirukitos kon nyepero ka ngaberu.” Tatachak Daudi emuron tama, “Iteni nyepero ngirukitos kanga ka ngaberu. Italeunosi ngirukitos kang tani palem eloose lotich losek esubeenete. Ani bo tokona na emenitere kona, italeuno kesi noi!” Sodi tolem emuron ngamugati na etaleunitoe na alemanakinio Akuj. Alemunio ngamugati nguna alomeesa a Akuj italeuno kilunyokinae ngache na aringa emoka. ( Akolongit ngina ayei itwaan neni ni arai ipei a ngikasubak etich a Saul. Eratakinitae ngesi kaneni kainyo aya ngakiro a Akuj na asakitae ngesi tosubak. Anyaritae ngesi Doeg. Abunit Doeg alo Edom. Arai ngesi ekapolon a ngikeyokok a Saul.) Tolimok Daudi Aimelek tama, “Emam akwara kori ekileng itingit iyong kane lo apedori alemar a? Nyeyauna ayong ekileng kang kori ngiboro lujiet kainyo ekirikirakin ayong kotere ngakiro a ekapolon.” Tatachu Aimelek tama, “Eyei nege ekileng a Epilistit alo kolong iari iyong anadipo a Ela, alo enyaritae Golias. Eyei yaaye akaluwat, emukeikinitae nawaru. Ani kisaki iyong, tolema kainyo emam ekileng eche pearai ngolo bon.” Tolim Daudi tama “Nakinae emam ekileng eche ejok noi idwangit ngolo!” Tonyou Daudi akolongit ngina tamatar ani a Saul, tolot nia Akich alo arai ekapolon a Gas. Apot ngikasubak etich a Akich tolimokis Akich tamasi, “Meere logo Daudi lo erai ekapolon anakwap keng a? Ngesi lo kolong enyiakanareta ngaberu eeosi ebalasi, ‘Aar Saul ngabunge, nakaneni aar Daudi ngabunge nakaalak.’ ” Kitimo Daudi ngakiro nguna toem ngesi Akich. Sodi kiroko Daudi eboyor eche alongaren kech, kiyechak atamar kekerepikinit. Ani esakio akiratakin, tosub ngesi ngakiro a itwaan ani ekoporito ngikerep. Kigir ngidorin a ere, talakak akajoolat eleleari tanang najul a abokony. Sodi tolimok Akich ngikasubak etich keng tama, “Oitiakoi! Abe ekoporito bo ngikerep itwaan en! Nyo irikunitotor esi ngesi nikang? Kangopikinito sek ayong ngitunga a ngikerep irikunitotor esi logo akisub abangaanut alongaren kang, tolomu tani kai kang a?” Todok Daudi alore a Gas tolot naburibur na ayei diyete ere a Adulam. Ani iirarete talokaatokeng ka ngiyenet keng atamar eyei Daudi inaa, toloto ni ayei ngesi. Apot ngitunga daang lu echiakiaritae, kori lu aarito ngamichae, kori lu eburaate, apot daang toloto nia Daudi, toliwor ngesi ekarikon kech. Araakasi kesi ngitunga asibit ngamiae ngoomwon. Tonyou Daudi kaneni tolot lore a Misipa lo ayei nakwap a Moab, sodi tolimok ekapolon a Moab tama, “Kimiek kare apakang ka itiokang potu kiruko ka iyong tanang ni aanyunea ngakiro na esaki Akuj asubea ayong.” Toisik Daudi kesi ani a ekapolon a Moab. Kiruko kesi ka ekapolon a Moab ngirwa daang lu adukitor Daudi anaburibur. Sodi tolimok ekadwaran lo anyaritae Gad Daudi tama, “Tojongo akiboi kane. Tolot atipei nakwap a Yuda.” Sodi tonyou Daudi tolot namoni a Eres. Akolongit apei, alo Gibea, ebooyi Saul alokwap epeduru, alokidiama emukura. Atingit ngesi akwara keng anakan, towaas ngikapolok keng luuchik daang kiriamito ngesi. Tolimokinae Saul atamar aanyun Daudi ka ngitunga keng lu arukitotor. Tolimok Saul ngikapolok keng luuchik awaasi alodiyete keng tama, “Topupokisi esi ngitunga a Benjamen! Esibit esi kiinakini Daudi esi daang ngamanat ka ngamanat a ngimusabib a? Kitiliwori ngesi esi daang ngikarikok a ngasigerea ana eraakasi ngabunge ka ngamiae a? Ngakiro nguna itukotor esi akinger ayong a? Emam tani ipei kus nikalimoki ayong atamar echamakina lokookang ka Daudi. Emam itwaan kamisit ayong kori kalimokini atamar Daudi lo erai epei a ngitunga kang, esaki nipei bore tokona en erot lo kaarea ayong, nabo lokookang ngesi edongakinit ngesi akikokin neni!” Ayei Doeg neni awaasi ka ngikapolok luuchik luche a Saul. Tolim Doeg tama, “Engolikini ayong Daudi ebuni Nob ni ayei Aimelek lokookeng a Aitub. Kingit Aimelek ekapolon Akuj ngakiro na ejoikinit Daudi esubakini, sodi nak ngesi Daudi akimuj ka ekileng a Golias Alopilistit.” Sodi tomea Saul ngitunga anyarare Aimelek lo arai emuron a Akuj, ka ngiyenet keng daang lu araakasi ngimurok alo Nob. Pot kesi nia Saul. Tolimok Saul Aimelek tama, “Topupok Aimelek!” Tatachu Aimelek tama, “Ayong ekasuban etich kon ngesi logo.” Kingit Saul ngesi tama, “Nyo itukitotor iyong ka Daudi asubea ayong niaronon? Nyo iinakinea iyong ngesi akimuj ka ekileng sodi kingit Akuj ngakiro keng? Kanyoiki tokona ngesi ayong esaki erot lo kaarea ayong!” Tatachak Aimelek ekapolon tama, “Alokasubak etich kon kadaang, ngae emunoi loger a Daudi, alo erai lokamuran kon tarai ekarikon a ngasigerea ana kiyokiyete iyong? Nabo erimae ngesi noi alokai a ekapolon. Iteni engit ayong Akuj ngakiro keng, nakaneni meere akingiset na ekingaren naga. Ekapolon, ani eliwor atukuor iyong ngakiro naaronok, nyikipaik ayong kori ngitunga a awi kang. Nyayeni ayong ngakiro ta wadiochichi!” Tolim ekapolon tama, “Aimelek, itoakete iyong ka ngiyenet kon daang.” Ani erumor tolimok ekapolon ngasigerea na eyokiyete na awaasi alodiyete keng tama, “Taara ngimurok a Ekapolon Akuj! Atukete kesi ka Daudi towout alimokin ayong atamar amatar Daudi, tarai bo ayenete kesi ngakiro nguna.” Nakaneni apot ngasigerea nguna towout akikear ngakan kech akiar ngimurok a Akuj. Sodi tolimok Saul Doeg tama, “Taar iyong kesi!” Taar Doeg kesi daang. Akolongit ngina, taar ngesi ngimurok ngitomwon-kauni ka ngikan lu achamakinitae enapito akaluwat a emuron. Todung Saul atamar taarae ngitunga daang lu alomito lore a ngimurok lo anyaritae Nob, ngikiliok ka ngaberu, ka ngide, ka lu enakete, ka ngaatuk, ka ngisikiria ta ngamesekin. Taarae daang. Nakaneni abu lokookeng a Aimelek lo anyaritae Abiasar tobuchar, tolot nia Daudi. Kisisak Abiasar Daudi eger lo aarea Saul ngimurok a Akuj. Tolimok Daudi ngesi tama, “Akolongit nakolong engolikinea ayong Doeg kaina, abu ayong atoyen atamar iteni elimokini ngesi Saul ngakiro nguna. Aloger kangolo, ayong arikokini ngiyenet kon daang akitu. Bua eruko wara nyiiem. Esaki Saul akiar ngoni, nakaneni emam ngakiro kianyunete iyong ka ayong kirukit.” Apon Daudi tolimokinae kona, “Ayoro, etijikis Ngipilisti ngitunga a ere a Keila, nabo akokoyasi ngalemet nakitet.” Sodi kingit Daudi Ekapolon Akuj tama, “Alosi etijik Ngipilisti lugu a?” Tama Ekapolon Akuj, “Ee, kape kitijik Ngipilisti toyuu ngitunga a ere a Keila.” Nakaneni tolimokis ngitunga a Daudi ngesi tamasi, “Eger lo tokona kiemitor ngoni kane alo Yuda, nyikiemi ngoni noi erai kilot Keila akitijwore ngasigerea a Ngipilisti a?” Sodi kingis Daudi nabo ani a Ekapolon Akuj. Tatachak Ekapolon Akuj ngesi tama, “Tonyou tolot Keila kainyo kesidwangi ayong iyong Ngipilisti.” Sodi tonyout Daudi ka ngitunga keng toloto Keila kitijikis Ngipilisti. Taara kesi Ngipilisti lukaalak sodi tolemasi ngibaren kech. Eger ngolo ngesi ayuunea Daudi ngitunga a ere a Keila. Ngirwa lu asia Abiasar lokookeng a Aimelek, tolot akiruk ka Daudi alo Keila, abu ngesi toting akaluwat napalem a emuron a Akuj. Tolimokinae Saul atamar alot Daudi Keila. Tolim Saul tama, “Ariku Akuj ngesi nakan kang sodi edwang, echiak ngesi bon eloit ani alomarea lore lo edukokinitae awas togolitetei.” Abu Saul tanyarau ngajorei keng lojie alosit akirem ngitunga a Keila, sodi tapaka ngajorei kiriama Daudi ka ngitunga keng. Ani iirari Daudi atamar esaki Saul akitijikin ngesi, abu tolimok Abiasar lo arai emuron a Akuj tama, “Yau akaluwat ngina nege.” Sodi tolim Daudi tama, “Ee Ekapolon Akuj na irai Akuj a Ngisirael, eira ayong atamar esaki Saul abunere Keila akinyasun ere kotere ayong lo arai ekasuban etich kon. Kepotorete ngitunga a Keila ayong kepotokis Saul a? Ebuni Saul nege loger lo eirarea ayong a? Ee Ekapolon Akuj na irai Akuj a Isirael, kemaimai atamar tolimokinae kare!” Tatachu Ekapolon Akuj tama, “Ebuni Saul.” Sodi kingit Daudi tama, “Kepotorete ngitunga a Keila ayong ka ngitunga kang kepotokis Saul a?” Tatachu Ekapolon Akuj tama, “Kipotorete.” Sodi tonyout Daudi ka ngitunga keng lu asibit ngamiae ngakan-kapei, torotokis alo Keila atipei, toloto wadaang nicha apedorete kesi alosit. Ani iirari Saul atamar asii Daudi alo Keila, abu Saul tasalu alosit Keila. Toduk Daudi anakwap ana ngimukur anariet ana eyei diyete Sip. Aripi Saul ngirwa daang erot lo eanyunea ngesi, nakaneni abu Akuj kimik ngesi Daudi. Toyen Daudi atamar esaki Saul akiar ngesi. Ayei Daudi Orech ni ayei diyete ariet a Sip. Tonyou Yonasan lokookeng a Saul tolot nia Daudi alo Orech sodi kitititiny Daudi tolimok eger lo epedorea Akuj akiyok. Tolimok Yonasan Daudi tama, “Nyiiem, nyepedori apakang akiwan iyong. Eyeni Saul dang atamar iliwor iyong ekapolon a Isirael, katotupak ayong iyong anapolou.” Kichikakinos kesi luarei alongaren Ekapolon Akuj atamar kiliwor ngipaalon. Kidong Daudi Orech, tobong Yonasan nawi. Toloto ngitunga a Sip nia Saul alo Gibea tamasi, “Edukit Daudi anakwap kosi ani enyaritae Orech, alomoru a Akila, alokuju ariet na Yudea. Aloger isakitor iyong lokojokon akirumun ngesi, bua tokona ekapolon, sodi epotosi sua ngesi kirum iyong.” Tolim Saul tama, “Kitopia Ekapolon Akuj esi ani idodiuneta esi ngisien anikang! Toloto nabo tongichitu nidira eyei ngesi ka itwaan ni engolik ngesi, kainyo kalimokin ayong atamar emodeana ngesi noi. Tongichitu lokojokon ni edukeenea ngesi, tobongut nikang kiinut ngakiro na iteni. Sodi erukosi ayong ka esi, ani keringa ngesi eyei nakwap ngina, atasak ayong ngesi nakwap daang a Yuda.” Apot kesi tonyout tobongo Sip, kingarenikis Saul. Ayakasi Daudi ka ngitunga keng nariet a Maon, ayakasi kesi nadipo naasilon eyei kuju ariet na a Yudea. Toloto Saul ka ngitunga keng akisak Daudi. Ani iirari Daudi atamar kasakio ngesi, abu tolot nimukura nia ngatabab ni eyei nariet toduk kaneni. Ani iirari Saul atamar alot Daudi inaa, abu kiwapak. Tolot Saul lowae epei a emukura, toyakas Daudi ka ngitunga keng lowae loche a emukura. Ekirikirasi Daudi ka ngitunga keng esakete akilany Saul ka ngitunga keng kainyo apot Saul ka ngitunga keng todolo Daudi ka ngitunga keng esakete akirumun. Ani anipei, todolu itwaan nia Saul tama, “Tobongu atipei! Aremo Ngipilisti akwap!” Sodi kimiek Saul akiwapit Daudi tobongo akitijwore Ngipilisti. Ngakiro nguna ngesi enyaritere neni Ataaba nasiet. Tolot Daudi nakwap a Engedi toduk kaina. Ani ebonguni Saul ani etijio Ngipilisti, apon tolimokinae kona, “Eyei Daudi nariet na eyei diyete Engedi.” Sodi toriko Saul ngasigerea nakajwok alo Isirael ngabunge ngauni. Toloto ngesi ka ngitunga keng akisak Daudi alo kide ni enyaritae ngatabab a Atirikiki. Tanangu ngesi naburibur ache ni ayakasi nganokin a ngamesekin alodiyete erukudi. Tolot Saul kinga akingarakin kaneni. Naburibur napei ngina ngesi adukitotor Daudi ka ngitunga keng anagule a ache alotooma noi. Tolimokis ngitunga a Daudi ngesi tamasi, “Akolongit naga ngesi nakolong kilimokinit iyong Ekapolon Akuj ebala, ‘Ewaakini ayong emoit kon nakan kon, tosubea ngesi ngakiro cha daang na kijoikinete iyong.’ ” Toliaa Daudi sodi totub echilet a eworu a Saul peeyeni ilope. Nakaneni abu Daudi kichanakin alotau keng ani atubunio eworu a Saul. Tolimok Daudi ngitunga keng tama, “Kimiekisi Ekapolon Akuj keratak ayong nyaawan ekapolon lokolong aseuni Ekapolon Akuj! Nyejoikinit ayong awani ngesi tani wadiochichi, kainyo erai ngesi ekapolon lo aseuni Ekapolon Akuj!” Sodi kimaima Daudi ngitunga atamar nyiitijikis Saul. Tonyou Saul topudo anaburibur, torotok. Ani erumor kiwapak Daudi ngesi tanyara tama, “Ekapolon!” Toreeun Saul kaku. Abu Daudi kijuuru tatap ereet ngalup, idodiunit arimatoi. Tolimok Daudi Saul tama, “Nyo ipupio iyong ngakiro a ngitunga alu ebalasi asaki ayong akiwan iyong? Nakaneni ingolik tani iyong elope atamar tokona anaburibur abu Ekapolon Akuj kiwaak iyong nakan kang. Apot ngitunga ngiche katolimokis ayong atamar taar iyong, nakaneni abu ayong pena ngisien anikon, atama ayong nyakawani iyong tani wadiochichi kainyo iyong kolong kiseuni Ekapolon Akuj toliwor ekapolon. Apa, kingolik echilet a eworu kon logo anakan kang! Adikino ayong kaari iyong, nakaneni atotub ayong echilet a eworu bon. Ejoikinit ngakiro na asubak ayong kitunupete iyong atamar nyasaki ayong akinger iyong akiwan iyong. Kirisit iyong ayong isaki akiar, tarai bo tani emam ngakiro naaronok kasechakinit ayong iyong. Kimiekisi Ekapolon Akuj totiaku atamar ngae anikon ka ayong esechit. Kimiek ngesi kirira iyong kotere ngakiro nakisubea iyong ayong, kainyo nyakawani ayong iyong tani wadiochichi. Iyeni iyong ngakamatak nangorok ebeyo, ‘Ngitunga luaronok kesi esubete ngakiro naaronok.’ Aloger kangolo, nyakawani ayong iyong. Iwapit ekapolon a Isirael ngae? Etia ibore irisit iyong ai? Iwapit iyong iingok nikatoan! Eechut! Etiakuni Ekapolon Akuj itwaan ni esechit aniyok. Kimiek ngesi kingolik ngakiro nugu, katoik ayong, katoyuu ani iyei iyong.” Ani erumori Daudi akisuruor Saul ngakiro nguna, tolimu Saul tama, “Daudi, iyong dir itwaan lokoku a?” Kisiak Saul akigoro. Sodi tolimok Saul Daudi tama, “Nyisechit iyong, asechit ayong. Kisubea iyong ayong ngakiro naajokak, tarai kasubea ayong iyong iyong naaronok! Idodiu iyong akolongit naga atamar ijok iyong anikang, kainyo ibu iyong nyikear ayong, tani nakewaakinea ayong Ekapolon Akuj nakan kon. Kainyo itwaan ani irumuni emoit keng, tajalu kimiek elosi akaalimon? Kitopia Ekapolon Akuj iyong kotere nakisubea iyong ayong akolongit naga! Ayen tokona ayong dir atamar iliwor iyong ekapolon a Isirael, nabo erubakini apolou ngina anakan kon. Kikong tokona anikang alokiro a Ekapolon Akuj atamar imiekini iyong ngalesea kang toyara nyeengopiarea ekiro kang ka lo a ngiyenet kang.” Kikong Daudi ani a Saul atamar asubakini nguna. Ani erumor tobongo Saul nawi. Tobongosi Daudi ka ngitunga keng ni adukitotor. Totoan Samuel, sodi tochunakin Ngisirael daang kigoro tosutonokis kotere ngesi. Ani erumor tonukakis ngesi nawi keng Rama. Ani ekisidi, tonyou Daudi tolot a Paran. Ayei itwaan a emachar a Kaleb lore a Maon. Ayei amana keng lore a Karimel. Abarit ngesi ayakasi ngamesekin ngabunge ngauni ka ngaanei abunget apei. Atubeene ngesi ngajul a ngamesekin keng alo Karimel. Anyaritae ekiro keng Nabal, tanyaritetei aberu keng Abigail. Arai aberu keng nakebusean toos, nakaneni arai Nabal lokamonan tongoana. Na ayakar Daudi nariet, abu kiira atamar etubi Nabal ngamesekin keng ngajul. Abu Daudi tomea ngisorok ngitomon tolimok tama, “Kapesi Karimel tasakasi Nabal kimalata. Tolimokis ngesi atamar abala ayong kona, ‘Ekone, agasi atamar kiboikinos iyong ka ngitunga a awi kon ta ibore kon daang akaalimon. Eira ayong atamar itubi iyong ngamesekin kon ngajul. Ayakasi ngikeyokok kon nege kirukit ka sua, nakaneni nyewana sua kesi. Emam ibore kech abu tongop ngirwa daang lu ayakatar kesi Karimel. Kingit iyong kesi, kisisakinete iyong. Aloger kangolo, kipeyou robo ngisorok kang niajokon, kainyo kipotu sua akolongit na esukukuu. Kimaimai iyong atamar tolem ibore nicha itingit nak ngikasubak etich kon ka lokookon Daudi.’ ” Ani epote ngisorok a Daudi, tolimokis Nabal ngakiro nguna daang loger lo alimokini Daudi. Sodi kidara kesi kaina. Ani ekisidi, tatachak Nabal ngitunga a Daudi tama, “Ngae erai Daudi? Ngae erai lokookeng a Yese? Eyakasi ngikedalak lukaalak nakwap ngirwa lugu lu amatarosi alokapolok kech. Alemuni ayong ngamugati kang ka ngakipi kang ta akiring na aarakinit ayong ngikatubok ngajul a ngamesekin kang, atolemu ainak ngitunga lu nyayeni ayong atamar aliwae eponitotor a?” Tobongosi ngitunga a Daudi tolimokis ngesi ngakiro na eruoro Nabal. Tolim Daudi tama, “Tanap itwaan daang ekileng keng.” Apot kesi daang tanapa ngilengea kech. Tanap Daudi dang ekileng keng, toriko ngitunga ngamiae ngoomwon kidongo ngamiae ngaarei loboro. Abu epei a ngikasubak etich a Nabal tolimok Abigail na arai aberu a Nabal tama, “Eyakasi ngakiro iyeni iyong a? Ameunit Daudi ngitunga anariet akimalare ekapolon yok, nakaneni kiyeny ngesi kesi. Nakaneni ajokak kolong ngitunga ngulu anikosi. Nyichana kesi sua, emam ibore kosi abu tongop ngirwa daang lu kirukitor sua ka kesi anaroatin. Kiyuunito kesi sua ngirwa daang lu kirukitor sua ka kesi kiyoki ngamesekin kosi. Toyen robo ngakiro nugu taanyu na isubakini, kainyo epedorete ngakiro naaronok asubakin alokapolon yok ka ngitunga a awi keng daang. Erono itwaan en akou nyiirari ngakiro a itwaan aniche!” Abu Abigail tolem atipei ngamugati ngamiae ngaarei, ka emuna ileleba ngituol ngiarei, ka ngimesekin ngikan lu apeitoe, ka ngasabu amiat apei a ageor ana iwaanakinio namugati ta ngakekio ngamiae ngaarei na ngameyana ana itoonitoe. Kisiwok ngesi ngisikiria ngiboro ngulu. Ani erumor tolimok ngikasubak etich tama, “Kingarenikisi esi, kewapuu ayong esi.” Nakaneni nyelimokina ngesi lokile keng ngakiro nguna. Adokit Abigail esikiria, ani enanguni ngesi nakilodet na eyei nakook a emukura, kiriamunos ngesi ka Daudi ka ngitunga keng idirunito nikeng. Etami sek Daudi abala, “Nyo kolong eratakinitor ayong ngiboro a itwaan kaen anariet? Emam ibore keng abu tongop. Katachaki tokona ngesi ayong ngakiro naaronok kotere naajokak asubea ayong ngesi! Kataar Akuj ayong erai pekaar itwaan nikile daang anawi a Nabal, eringa nyiwalara!” Ani ingolikini Abigail Daudi, todoku ngesi atipei alosikiria tadakakin kwap nakejen a Daudi sodi tolimok ngesi tama, “Ekapolon kang, topupokinae kare ayong! Tapaikinae ayong ngakiro nguna. Wara kare nyiimisik ngakiro a Nabal, a ekawaiwaat kangolo! Itemem ngesi ka eger a ekiro keng, ekabangabangat! Amam ayong kaneni esaa lo imeunea iyong ngikasubak etich kon ekapolon. Ekapolon Akuj ngesi kiratak iyong nyiitachak ngakiro nguna taar ngimoe kon. Ekongi tokona ayong anikon alokiro a Ekapolon Akuj atamar ngimoe kon daang lu esakete akiwan iyong, irirao loger a Nabal. Kemaimai tokona ekapolon atamar tachamu ainakinet nakainu ayong iyong naga nak ngitunga kon. Torimakinae ayong kare ekapolon, kotere naaronok nakasubakinea ayong iyong. Kitiliwori Ekapolon Akuj iyong ekapolon ka ngalesea kon dang kainyo iji iyong ngijiesinei keng. Emam naaronok isubakini iyong ngirwa lu iyarea iyong daang. Ani kitijik itwaan iyong tasak akiar, kiyuuni Ekapolon Akuj iyong loger lo iratakinea itwaan ebari keng. Ani eliwor ngimoe kon, imasari ngesi kesi loger lo isirimokinea itwaan auno kibaariyo amoru. Ani esubakini Ekapolon Akuj ngakiro naajokak daang nakichikikinit iyong, kitiliwo iyong ekapolon a Isirael, emam ngakiro iitonori iyong, kori nyiriangakin ani iarea ngitunga pas kori itachanakinea ngakiro. Ani kipiari Ekapolon Akuj iyong, kitamunae kare ayong ekapolon.” Tolimok Daudi Abigail tama, “Kipuroe Ekapolon Akuj na erai Akuj a Isirael, nakimeuni iyong akolongit naga akisiriam ayong! Kipiario iyong kotere ngakiro na isubak iyong akolongit naga ani kiratakinea ayong nyaaliwor ekaaran. Kiratak iyong ayong tani nyaatachak ngakiro nakasubere ayong. Keratak Ekapolon Akuj ayong nyakawan iyong. Nakaneni ekongi ayong alokiro a Akuj a Isirael atamar arai nyiikirikiruun iyong akisiriam ayong, ketoakito ngikiliok a Nabal daang eringa nyiwalara!” Abu Daudi kidiau ngiboro lo ayaunit Abigail, tolimok ngesi tama, “Kape nawi kon akaalimon. Wara nyiichanakin. Asubakini ayong ngakiro na isaki iyong.” Tobongo Abigail nia Nabal, toriam enyami esukukuu anawi lo eriyan ka lo ekapolon. Erakarit ngesi epurot alakara. Emam ngakiro alimoki Abigail ngesi tanang iwalari. Ani nataparach kedaun epurot anakou a Nabal, tolimok aberu ngesi ngakiro daang. Kipirisaar etau a Nabal, kitenar akwaan kikok amoru. Adaunet a ngirwa a ngitomon, tongeda Ekapolon Akuj Nabal sodi totoan. Ani iirari Daudi atamar atoana Nabal, tolim tama, “Kipuroe Ekapolon Akuj! Atachaki ngesi ani a Nabal ngakiro nakeyenyea ayong. Keratak ngesi ayong ekasuban etich keng nyaasubak naaronok. Eriraa Ekapolon Akuj Nabal kotere ngakiro keng naaronok.” Ani erumor tomea Daudi ngitunga nia Abigail akimalare ngesi toliwor aberu keng. Toloto ngikasubak etich a Daudi Karimel ni ayei Abigail tolimokis tamasi, “Kimeunit Daudi sua arikor iyong toliwor aberu keng.” Tonyou Abigail toriedik tatap ereet keng ngalup, tolim tama, “Arai ayong akasuban etich keng, apedori akilotar ngakejen a ngikasubak etich keng.” Tonyou Abigail atipei todoka losikiria keng. Tonyout ngesi ka ngakasubak etich keng nakan kirukosi ka ngikasubak etich a Daudi. Toliwor Abigail aberu a Daudi. Eutarit sek Daudi Ainoam na abunit alo Yesireel. Toliworos daang kwasiarei ngaberu keng. Ngirwa lupei ngulu, abu Saul kipoto nakookeng na anyaritae Mikal, nasek arai aberu a Daudi, nak Paliti lokookeng a Laich, lo abunit alore a Galim. Apote ngitunga ngiche a ere a Sip, pot nia Saul alo Gibea tolimokis Saul tamasi, “Edukit Daudi alomoru a Akila, alokeli a ariet a Yudea.” Tonyou Saul atipei tolot kwap nariet a Sip, kirukosi ka ngasigerea nakajwok alo Isirael ngabunge ngauni, toloto asakar Daudi. Tolom adakar a Saul lokwaas a erukudi, alomoru enyaritae Akila. Aringa Daudi eyei nariet, ani iirari ngesi atamar ebunit Saul akisak ngesi, tomea ngesi ngirototin aanyun atamar eyei Saul neni dir. Tonyou Daudi atipei tolot nia Saul. Taanyu ngesi ni aperioto Saul ka Abiner lokookeng a Ner, lo arai ekarikon a Ngasigerea a Saul. Aperi Saul alotooma adakar, kiriamito ngasigerea keng ngesi. Ani erumor kingit Daudi Aimelek lo arai eka ekitela a Ngiiti ka Abichai lo arai lokaatokeng a Yoab (itiokech ngesi Seruya), tama, “Ngae anikus kirukori ka ayong nadakar a Saul?” Tatachu Abichai tama, “Kirukori ayong ka iyong.” Apot Daudi ka Abichai tolomasi akolongit ngina nadakar a Saul, toriamut Saul ejotoe alokiding adakar, edupakina akwara keng nalup diyete akou keng. Tolimok Abichai Daudi tama, “Kisidwang Ekapolon Akuj iyong emoit kon akolongit naga. Kimiekinae tokona atolem akwara napei keng echumea atorubokinea ngesi nalup arubokinet apei. Nyenyiagaari ayong na ngaarei!” Nakaneni tolimok Daudi ngesi tama, “Wara nyiiwan ngesi! Irirae dir Ekapolon Akuj itwaan cha daang ni ewani ekapolon lo aseu ngesi. A ekiro a Ekapolon Akuj ana eyari, ayeni ayong atamar eari Ekapolon Akuj alope Saul, na enangea akolongit keng a akitu, kori kelot lojie taarae. Kimiekisi Ekapolon Akuj keratak ayong nyaawan ngolo aseu ngesi aliwor ekapolon! Kimiek atolemasi akwara keng ka akurum keng na ngakipi sodi atoloto.” Sodi tolema Daudi akwara ka akurum na ngakipi alodiyete akou a Saul torotokis kesi. Emam itwaan abu kingolik kori toyen ngakiro na asubasi. Emam itwaan tani abu tokienyu. Anakakinito kesi daang ngaju kainyo ainakinit Ekapolon Akuj kesi ngaju nakatoak. Ani erumor todoka Daudi ekwakaye adipo, todoka nimukura ni achadakina. Kirema Daudi enyarit ngasigerea a Saul ka Abiner ebala, “Abiner, kipupi iyong ayong a?” Tatachu Abiner tama, “Ngae ngini echala esaki akitekienyun ekapolon?” Tolimok Daudi Abiner tama, “Meere iyong ekile a? Ngae iche eyenikinitae loger kon alo Isirael? Nyo bo peiyokiyo iyong ekapolon kon Saul? Kainyo alomunit tokona itwaan iche nadakar esaki akiar ekapolon kon. Ichwangak iyong alotich kon Abiner. Ekongi ayong ani a Ekapolon Akuj ana eyari atamar ejoikinit esi daang kiario kainyo nyiyoko esi ekapolon kus lokolong aseuni Ekapolon Akuj. Kingolikisi a! Aliwae tokona eyei akwara a ekapolon? Aliwae eyei akurum keng na ngakipi nata asipo alodiyete akou keng?” Toyen Saul etoil a Daudi, sodi kingit tama, “Daudi, iyong itwaan ngini lokoku a?” Tatachu Daudi tama, “Ayong itwaan ekapolon kang.” Tolim nabo Daudi tama, “Kotere nyo ekapolon kiwapitor iyong ayong, ekasuban etich kon? Nyooni asechit ayong? Ekapolon kang, kiirarae tokona ayong, ekasuban etich kon. Ani kerai Ekapolon Akuj kichuchiunit iyong nikang, epedori ngesi akiloch ngitamen keng erai kelemikin akipeyos. Ani keraakasi ngitunga kichucchiunito, epete ngilam a Ekapolon Akuj nikech, kainyo keritasi kesi ayong anakwap a Ekapolon Akuj ebalasi, ‘Kape kilip ngakujo nagelayek.’ Tokona bocha, nyikimiek ayong kaarakinio nalup nagelayek, nikalonan ani a Ekapolon Akuj. Kotere nyo abunitor ekapolon a Isirael akiar ayong, lo ekoni eechut? Nyo kirikaa iyong ayong loger a ikeny a moding?” Sodi tolim Saul tama, “Asech ayong. Daudi lokookang, tobongu nyakawani ayong iyong nabo kainyo kijaluni iyong ayong akolongit naga. Aliwor ayong ekabangabangat! Asech ayong lokojokon!” Tatachu Daudi tama, “Akwara kon naga, ekapolon! Tomeu ipei a ngitunga alukon kangulu bu omu. Einanakini Ekapolon Akuj lu emunoi ka lu etenooko ebachit. Akolongit naga, kiwaakinit iyong Ekapolon Akuj nakan kang, nakaneni nyewana ayong iyong, lokolong kiseuni Ekapolon Akuj. Loger lo kajalunea ayong iyong akolongit naga, kimiek Ekapolon Akuj katajalu ayong katoyuu alochan kadaang!” Tolimok Saul Daudi tama, “Kitopia Ekapolon Akuj iyong lokoku! Ejokearosi ngakiro na isubi iyong daang!” Sodi torotok Daudi, tobongo Saul nawi. Tolim Daudi alotau tama, “Kaari Saul ayong jik akolongit apei. Emam ibore iche ejoikinit ayong asubi pearai adokin atolot nakwap a Ngipilisti, sodi tojongo Saul akisak ayong alo Isirael, ebooyi ayong akaalimon.” Apot Daudi ka ngitunga keng lu araakasi ngamiae ngakan-kapei tonyout atipei toloto nia Akich alo arai lokookeng a Maok. Arai Akich ekapolon a Gas. Apot Daudi ka ngitunga keng erukito ka ngitunga a ngawiyei kech toloma Gas. Arukito Daudi ka ngaberu keng naarei na anyaritae Ainoam na abunit alo Yesireel, ka Abigail na abunit alo Karimel, na arai apuserut a Nabal. Ani iirari Saul atamar adoki Daudi alot nakwap na Gas, abu ngesi tojongo akisak Daudi. Tolimok Daudi Akich tama, “Ani kirai iyong lopae kang nakinae ayong ere loochi epei atolom. Nyejoikinit ayong, ekapolon, kilomit ka iyong lore loapolon.” Abu Akich akolongit ngina nak Daudi ere a Sikilag. Kotere ngakiro nguna, aliwor ere a Sikilag eka ngikapolok a Yuda tani tokona. Tolom Daudi nakwap a Ngipilisti a ekaru a epei a ngilapio nguomwon. Ngirwa ngulu, aloseenete Daudi ka ngitunga keng kitijwoto ngitunga a Gechur, ka Giris ta Amalek lusek alomito nakwap ngina nikooyen. Angaanari ngesi ajore akwap kech tanang Chur, toloto kwap tanang Misiri. Aareene Daudi ngikiliok daang ka ngaberu, sodi toruja ngamesekin, ka ngaatuk, ka ngisikiria, ka ngikaala, tolema tani ngiworui dang, ani erumor tobongu ngesi nia Akich. Ani ingisi Akich ngesi etamari, “Aliwae ingaarit iyong ejie akolongit naga?” Tatachak Daudi ngesi tama, “Alosit ayong Negeb ka Yuda,” kori “Alosit ayong nakwap a Yerameel,” kori “Alosit ayong nakwap a Ngikenis.” Aareene Daudi ngitunga daang lukiliok ka luberu tongopea itwaan ebongi Gas akisisare ngakiro na asubete Daudi ka ngitunga keng. Ngakiro nguna asubi Daudi ngirwa daang lu ayakar nakwap a Ngipilisti. Nakaneni amuno Akich Daudi etami ebala, “Aremokinosi ngitunga keng ngesi noi. Eliwor tokona ngesi ekasuban etich kang jiik.” Ngirwa ngulu, apot Ngipilisti tochunakis ngajorei kech esakete akitijwore Ngisirael. Tolimok Akich Daudi tama, “Toyen atamar inyounete iyong ka ngitunga kon ebaka ka ayong alojie.” Tatachak Daudi Akich tama, “Nyenguna. Ingolikini iyong etich lo apedori ayong ekasuban etich kon asubakin.” Tolim Akich tama, “Ejok. Ketiliwori ayong iyong asiger na kiyoki ayong jik.” Adaunet a akitu a Samuel, apot Ngisirael kigoro tosutonokis kotere akitu keng, sodi tonukakis ngesi nawi keng alo Rama. Etwarakinit sek Saul ngikekeriak daang ka ngimurok a ngipean alo Isirael. Tochunakin ngajorei a Ngipilisti, tolom adakar kech diyete ere a Chunem. Tochunak Saul ngajorei a Ngisirael toloma moru a Giliboa. Ani ingolikini Saul ngasigerea a Ngipilisti, tobul tamaran. Abu Saul tanyara Ekapolon Akuj esaki akiyen ngakiro na esubakin. Nakaneni towou Ekapolon Akuj atachakin ngesi anakirujare kori ani a Urim ka Sumim kori alokadwarak. Sodi todungok Saul ngikasubak etich keng tama, “Tasakakinae ayong amuron a ngipean adio, atolot engit ngesi.” Tatachut kesi tamasi, “Eyei apei Endor.” Sodi kipasakin Saul tanap ngiworui ngiche, ani eribokini, kirukosi ka ngitunga ngiarei aanyun aberu ngina. Tolimok Saul aberu tama, “Kingitakinae ngikaram ngakiro na esubakinosi. Tanyara ngikaram a itwaan ani alimuni ayong ekiro keng.” Tolimok aberu ngesi tama, “Iteni iyeni iyong ngakiro na asubaki ekapolon Saul, eger lo etwarakinea ngesi ngikekeriak ka ngimurok a ngipean alo Isirael. Nyo tokona kiroitotor esi ayong isaketa kataar?” Sodi kikong Saul alokiro a Ekapolon Akuj tama, “Ekongi ayong alokiro a Ekapolon Akuj ana eyari atamar emam itwaan kirirae iyong kotere ngakiro nugu.” Tolim aberu tama, “Kanyarakini ngae?” Tatachu Saul tama, “Samuel.” Ani ingolikini aberu Samuel, kirema kikalou tolimok Saul tama, “Kotere nyo kingalaa iyong ayong? Irai iyong Saul.” Tolimok ekapolon ngesi tama, “Nyiiem. Nyo itee iyong?” Tatachu aberu tama, “Engolik ayong ekaramit elomuni analup.” Kingis Saul tama, “Ikwaan ngesi ka nyo?” Tatachu aberu tama, “Erai ekasukout elomunit, enapit eworu lokooyen.” Abu Saul toyen atamar erai itwaan ngini Samuel. Sodi kijuuru ngesi tatap ereet ngalup idodiunit arimatoi. Tolimok Samuel Saul tama, “Nyo kichanea iyong ayong kibuunea?” Tatachu Saul tama, “Ayei ayong lochan! Anyout Ngipilisti ejie ka ayong, nakaneni kanger ayong Akuj. Awou ngesi atachun ngakiro kang alokadwarak kori anakirujare. Kanyaraunit robo ayong iyong kitolimok ngakiro na asubakini.” Tolim Samuel tama, “Ani nyo bo kinyaritor iyong ayong na kingerio Ekapolon Akuj, aliworor emoit kon? Kisubakinea Ekapolon Akuj iyong ngakiro nakolong alimuni ngesi kisitoru nikang, kainyo alema Ekapolon Akuj apolou anikon, ainaki Daudi. Iwouni kolong iyong akiwap ngakiro a Ekapolon Akuj nakidungokinitor iyong atamar tomunya Ngiamalek ka ngiboro kech daang. Ngakiro nguna kesi kisubakinea Ekapolon Akuj iyong ngakiro nugu akolongit naga. Kipotori Ekapolon Akuj iyong ka Ngisirael kidwanga Ngipilisti. Ipote iyong ka talokookon moi ni ayei ayong. Ipotori Ekapolon Akuj tani ngasigerea a Ngisirael kidwanga Ngipilisti.” Atipei, abu Saul kibusokin kwap kitenar analup, tobul kotere ngakiro na alimuni Samuel. Tolilimiyo akwaan keng kainyo peemujit ngesi apaaran juui ka akwaar kiiya kiwala. Tolot aberu ngina nia Saul, ani ingolikini atamar ebulit ngesi, tolimok tama, “Ekapolon, ajali tete ayong akiyar kang ani asubea ngakiro na isaki iyong atosub. Kemaimai tokona iyong atamar tosubak iyong dang ngakiro na kengisi ayong iyong. Kimiek kedorok akimuj adio. Ejoikinit iyong imuji taanyunea ngikilinga lu ibongorea.” Tonger Saul tolim tama, “Nyemuji ayong.” Nakaneni apot tani ngikapolok keng luuchik kimaimaa ngesi esakete kimuj. Abu ngesi tacham tonyou analup kiboikin lokitanda. Atipei, abu aberu ngina tongol itaok nisek etutumit ngesi. Ani erumor tolem ngakiria tosubak, sodi kidorok ngamugati na emam ekitoe lo itubui. Nak ngesi Saul ka ngikasubak etich keng luuchik akimuj, kimuja. Torotokis kesi akolongit napei ngina nakwaare. Tochunakis Ngipilisti ngajorei kech Apek, tochunakina Ngisirael lolelea lo eyei nadipo a Yesireel. Torotokis ngikapolok lukan a Ngipilisti ka ngajorei kech a ngalooso ana araakasi ngamiae ka ngabunge. Ayakasi Daudi ka ngitunga keng naabor erukito ka ekapolon Akich. Ani eanyungarete ngikapolok a ngajorei a Ngipilisti kesi, kingitas tamasi, “Nyo esubete Ngieburaniae lugu kane?” Tatachu Akich tama, “Daudi logo, ekasuban etich Saul alo erai ekapolon a Isirael. Kiruk ka ayong nikooyen tokona. Emam ngakiro naaronok engolik ayong anikeng napei kolong jik ebuni nikang.” Nakaneni tongoikis ngikapolok lua ngasigerea a Ngipilisti Akich tolimokis tamasi, “Tolimok itwaan ngini tobongo lore lokolong iinakini iyong ngesi. Nyikirukori ngoni ka ngesi lojie, nyeebu kitobilakin ngoni alojie. Kainyo erot ali eche italakarea ngesi ekapolon keng? Erai mati kear ngitunga yok! Ani ikoni dang, abe erai bo logo Daudi lokolong aeonokinete ngaberu inyiakanarete ebalasi, ‘aar Saul ngabunge, nakaneni aar Daudi ngabunge nakaalak.’ ” Sodi tanyarau Akich Daudi tolimok tama, “Ekongi ayong ani Akuj a Isirael ana eyari atamar iwapit iyong ngakiro kang nabo kajoikinit ayong akirukor ka iyong lojie logo. Emam ngakiro naaronok aanyu ayong anikon napei kolong ibunio iyong nikang. Nakaneni nyikisakete iyong ngikapolok luche. Tobongo robo nawi akaalimon wara nyiisubak ngakiro na itongoyete kesi.” Kingit Daudi Akich tama, “Anukiro asech ayong ekapolon? Ani keringa iyong nyeanyuna ngakiro naaronok anikang napei kolong abuni ayong nikon loger lo ibalar iyong, nyo bo pekirukorea ayong ka iyong, ekapolon kang, etiji ngimoe kon?” Tatachu Akich tama, “Iteni ayeni ayong atamar ipupi iyong ngakiro noi loger a emalaikat a Akuj. Nakaneni alimut ngikapolok luche atamar nyikirukori ngoni lojie. Kanguna bocha Daudi, tonyoutu moi nataparach elilim, ka ngitunga luche daang lukolong irukunete ka iyong, torotokis jik napei iwalarea.” Sodi kisiokakis Daudi ka ngitunga keng nataparach elilim, tobongosi Pilistia, toloto Ngipilisti Yesireel. Adaunet ngirwa a ngiarei, apot Daudi ka ngitunga keng tobongosi Sikilag. Keremito Ngiamalek ewae lo a Negeb, ani erumor kitijikis ngitunga a Sikilag. Kepot kesi kinoma ere, ani erumor toriko ngaberu ka ngitunga daang lu ayakasi lore, luapolok ka luuchik. Emam itwaan apot kesi taara, nakaneni apot toriko ngitunga daang na arotokinioto. Ani enangunete Daudi ka ngitunga keng lore, toriamut kesi ere kinom. Toriamut nabo ngaberu kech, ka talokookech ka tanakookech kerikor. Kigoro Daudi ka ngitunga keng tosutonokis nikooyen tolilimiyosi tani ngawat. Aponi ngaberu a Daudi dang naarei, Ainoam ka Abigail, torikoroe. Min Daudi lochan luapolok noi kainyo angoito ngitunga keng daang anyunyurasi kotere ni arikere ngide kech, tasaka akimas ngesi a ngamoru, nakaneni abu Ekapolon Akuj na ngesi atitinyu. Tolimok Daudi Abiasar lokookeng a Aimelek, lo arai emuron a Akuj tama, “Inunae ayong akaluwat a emuron.” Inu Abiasar ngesi akaluwat. Kingit Daudi Ekapolon Akuj tama, “Ewapakini ngikaremok lugu a? Adoli ayong kesi a?” Tatachu Ekapolon Akuj tama, “Kiwapak. Idoli iyong kesi, toyuu ngirikon.” Apot Daudi ka ngitunga keng lu eraakasi ngamiae ngakan-kapei tonyout torotokis. Ani enangunete kesi ningolol a Besor, kidongo ngiche kech neni. Torotokis Daudi ka ngitunga ngamiae ngoomwon. Kidongo ngitunga ngamiae ngaarei kainyo aburunit kesi noi peadikino edokete ingolol. Apot ngitunga lu arukito ka Daudi toriamut edia a akwap Misiri eyei nalongisat, sodi torikut ngesi nia Daudi, nakis ngesi akimuj ka ngakipi. Nakinae tani ngameyana na etoonitoe, ta asabut a ageor ana etoonito. Ani imuji ngesi erumor, topwatun etau keng kainyo aronit sek akimuj na ibore nimatat a ngirwa a nguuni. Kingit Daudi ngesi tama, “Ika ai iyong? Aliwae ibunitor iyong?” Tatachu edia tama, “Arai ayong eka akwap a Misiri. Arai ayong ekedalan a itwaan a akwap a Amalek. Kaisikini ekapolon kang ayong ngirwa nguuni lu ngoon adaunosi, kainyo adeaka ayong. Kingaarit sua atoremo akwap a Ngikeres, ka Negeb na Yuda, ta akwap a ngitunga a emachar a Kaleb, sodi enoma ere a Sikilag.” Tolimok Daudi ngesi tama, “Kirikori iyong ayong lokaremok ngulu a?” Tatachu edia tama, “Karikori ayong iyong irai kikongi iyong ilimit ekiro a Akuj atamar nyikiari iyong ayong kori nyikipotokini iyong ayong kitobua nia ekapolon kang.” Abu ngesi toriko Daudi nikech. Apetakina ngikaremok ngulu neni daang imujete, tamaase, kidongaate kotere alalau a ngiboro alu angatarito kesi anakwap a Ngipilisti ka akwap a Yuda. Ani ebayiari akolongit na atupit ngina, kitijik Daudi kesi, sodi tojwoto tanang ebong. Emam itwaan abu topuun alomoe pearai ngisorok ngamiae ngoomwon lu achunarete ngikaala tolooso. Tobuu Daudi ngiboro daang lusek alemarito Ngiamalek, tobuu tani ngaberu keng naarei ka ngitunga luche daang. Amam ibore eituno, kepolot kori kedit, alode alusapa kori alupesur, aloboro alu angataritae kori anibore cha kadaang ani kolong alemaritae. Abu Daudi tobuu daang. Abu Daudi tobuu tani ngamesekin daang ka ngaatuk. Torujasi ngitunga keng ngibaren daang kingarenikis kesi ebalasi, “Eraakasi lugu ngika Daudi!” Ani erumor tobongu Daudi ni ayakasi ngitunga ngamiae ngaarei lusek edongito ningolol a Besor, ani amamakatar ngikilinga elooso ngaren. Toloto kesi akisiriamiar Daudi ka ngitunga lu arukitotor. Taapia Daudi diyete kech kimala niajokon. Nakaneni apot ngitunga daang luaronok ka lukechanak arukito ka Daudi tolimut tamasi, “Nyikiinakini ngoni kesi ngiboro lu kingatarit kainyo nyeloto ngoon kesi ka ngoni. Kimiekisi kesi torikosi ngaberu kech ka ngide toloto.” Nakaneni tatachu Daudi tama, “Ngikaitotoi kang, nyiikokis neni kotere ngiboro lukiinak Ekapolon Akuj ngoni! Kainyo kiyok ngesi ngoni, nabo kisidwang ngikaremok ngulu. Emam itwaan echamuni ngakiro nakus nguna! Etiakio daang ngiboro eriyan. Itwaan daang ni edongit loboro, eriamuni ibore ni eriyan ka nia itwaan ani alosit lojie.” Kitiliwo Daudi ngakiro nguna etal lo ewap alo Isirael tanang akolongit naga. Ani ebonguni Daudi Sikilag, kipoto ngiboro lu angatari ngesi naarae talopaekeng lu araakasi ngikarikok a Yuda, tolim tama, “Ainakinet kon naga aloboro alu kingatari sua alomoe a Ekapolon Akuj.” Ainari ngesi ngiboro ngulu ngitunga lu ayakasi Besel, ka lua Rama alo Negeb ta lu ayakasi lorerea a lorerea a Yatir, ka Aroer, ka Sipimos, ka Echitemoa, ka Rakal. Inaa tani ngitunga a ngirerea a emachar a Yerameel, ka lua ngirerea a Ngikenis, ta ngitunga lu ayakasi lorerea a Orima, ka Borachan, ka Asak, ta Eburon. Yaa ngesi ngiboro ngulu lorerea daang lu kolong sek erimito ngesi ka ngitunga keng. Apot Ngipilisti kitijikis Ngisirael alomoru a Giliboa Taarae Ngisirael lukaalak kaneni. Tamataros epewae kech, erukito ka Saul ka talokookeng. Nakaneni todolo Ngipilisti Saul ka talokookeng, sodi taara kesi talokookeng a Saul nguuni lu anyaritae Yonasan, ka Abinadab ta Malikichua. Torirau ejie alodiyete Saul, togumugumaasi ngesi ngimalea a ngimoe towana noi. Tolimok ngesi esorokit lo atingit ngiboro keng lujiet tama, “Tout ekileng kon kichumea ayong, nyeeponeta Ngipilisti, lu nyeyenete Akuj lugu kechuma ayong, sodi katokianatar.” Nakaneni toem esorokit ngolo asubakin ngakiro nguna. Sodi tolemu Saul ekileng keng a ilope kimasakin ngesi lokolong kichumi bon. Ani ingolikini esorokit ngolo atamar atoana Saul, kimasakin ngesi dang lokileng keng a ilope totoaka aapei ka Saul. Eger ngolo ngesi atoaketa Saul ka talokookeng luuni ta esorokit lo atingit ngiboro a Saul lujiet. Totoaka ngikiliok lu arukitotor Saul daang akolongit ngina. Ani iirarete Ngisirael lu ayakasi lowae loche a adipo a Yesireel ka lu ayakasi kide angolol a Yorudan atamar amatarosi ngasigerea a Ngisirael, nabo atoaka Saul ka talokookeng, apot kesi toisikis ngirerea kech tamataros. Sodi pot Ngipilisti toloma lorerea ngulu. Ani akolongit na atupit ngina, toloto Ngipilisti akibut ngiboro a ngitunga alu atoakito. Toriamut kesi ngawat a Saul ka talokookeng luuni eperete alomoru a Giliboa. Totubosi kesi akou a Saul nabo talachut ngiboro keng lujiet, sodi tomeasi ngitunga lowaitin daang a akwap a Ngipilisti alimokin ngitunga kech ka ngakujo ngakiro naajokak anikech nguna. Kiwaakis kesi ngiboro keng lujiet kai a akuj ana anyaritae Achitaros, sodi kibubukis akwaan keng nawas a ere a Betleem. Ani iirarete ngitunga a ere a Yabech alo eyei Gilead ngakiro na asubeta Ngipilisti Saul, tonyout ngikiliok lukajwok toloto akwaar kiiya tananga Besichan. Totiyaut kesi ngawat a Saul ka talokookeng anawas tobuasi Yabech, kinoma kaina. Tolemut kesi ngakoyo tonukakis kwap epeduru lo ayei tooma ere. Apot kesi torono akimuj a ngirwa a ngikan-kaarei. Ekisidi a akitu a Saul, tobongu Daudi ani edwangea Ngiamalek sodi toper Sikilag ngirwa ngiarei. Akolongit na ngauni, bu esorokit anadakar a Saul. Ani kona asakea ngesi akidodiun atamar ealolongi, tochilichili ngiworui keng sodi kiwaak apua nakou. Tolot ngesi nia Daudi toriedik idodiunit arimatoi. Kingit Daudi ngesi tama, “Aliwae ibunio iyong?” Tatachak itwaan ngini ngesi tama, “Asii ayong anadakar a Ngisirael.” Tolim Daudi tama, “Tolimokinae ayong ngakiro nguna asubakinosi.” Tatachak itwaan ngini tama, “Amatarosi ngasigerea yok alojie, sodi taarae ngitunga yok lukaalak. Taarae tani Saul ka lokookeng Yonasan.” Kingit Daudi ngesi tama, “Ikokini iyong iyeni atamar atoaka Saul ka Yonasan ai?” Tatachu esorokit ngolo tama, “Ayei ayong moru a Giliboa, sodi ataanyunga Saul egongakina nakwara keng, nakaneni erudunito ngaurukukui ka ngasigerea a ngimoe erikaunito ngesi. Abu ngesi toreeun kengolik ayong, sodi katanyar. Ekii ayong atama, ‘Ayong lo ekapolon.’ Abu ngesi kengit ayong tama, ‘Ngae iyong?’ Atatachak ayong ngesi atama, ‘Arai ayong itwaan a ekitela a Amalek.’ Katolimok ngesi ayong tama, ‘Bua nege kitaar ayong! Kawanitae ayong lokojokon, nakaneni edikino ayong atoani.’ Sodi atolot ayong ni ayei ngesi ataar, kainyo ayeni ayong atamar adikino ngesi etoani napei edakaror. Atalachu ayong ekiraun anakou keng ngasua na a ngakan keng, nakaneni kainu tokona ayong iyong, ekapolon.” Apot Daudi ka ngitunga daang lu arukitotor ngesi tochila ngiworui kech ialolongete. Apot kesi kigoro tosutonokis kotere Saul, ka Yonasan, ta Ngisirael lu eraakasi ngitunga a Ekapolon Akuj. Torono kesi akimuj akolongit ngina daang tanang ebong, kainyo aaritae ngitunga lukaalak alojie. Kingit Daudi esorokit lo abuni akisisare ngakiro nguna tama, “Aliwae ibunitor iyong?” Tatachu ngesi tama, “Arai ayong itwaan a ekitela a Amalek, nakaneni alomit ayong nakwap kus.” Kingit Daudi ngesi tama, “Ikokini iyong peikeri akiar ekapolon lo aseuni Ekapolon Akuj ai?” Abu Daudi tanyarau epei a ngitunga keng tolimok tama, “Taara ngesi!” Taram itwaan ngini esorokit lo ekitela a Amalek ngolo totoan, isuruori Daudi ngesi ebala, “Eliwor akitu kon ngaka akiding kon, kainyo ilimu iyong ilope atamar iari lokolong aseuni Ekapolon Akuj toliwor ekapolon.” Toeok Daudi eeos lo egoror akitu a Saul ka Yonasan lo arai lokookeng, sodi todung atamar kitatamae ngesi Ngisirael. (Igiritae nakitab a Yochar.) “Atoaka ngikarikok yok alomoru a Ngisirael! Adakarosi ngasigerea yok nakatitinyok! Nyiilimo alo Gas kori alorotin a Achikelon. Wara ngaberu alo Pilisti nyeelakarosi. Nyiimiek tanakookeng a ngaberu ana nyeraakasi Ngasirael imareteteete. “Nyeeram akiru, kori nyeepean ngakop lomukur a Giliboa. Kimiekisi ngamanat kech toliworos eokito jiik! Kainyo eperete ngaupwala alukajwok kaina eraakasi na nyitaleunitoe. Nyeringa aupwal a Saul iwasio akimiet. Aarana akau a Yonasan, echumana ekileng a Saul. Ichumi nikajwon, taar emoit. “Saul ka Yonasan ngiminan luajokak. Erukito aapei anakiyar, erukito aapei anakitu. Epiraka idwangito ngigolei, egogong idwangito ngingatunyo. “Ngaberu Nasirael, kigoro kotere Saul! Kitanapit ngesi esi ngiworui lukaanikak ajokak, sodi kitanap esi asir ka egolit. “Adakarosi ngasigerea nakatitinyok, apon kesi taarae alojie. Eperi Yonasan alomukur etoanit. “Ealolongi ayong kotere iyong, lokaatokang Yonasan. Kamina ayong iyong noi! Ajok noi eger lo kimina iyong ayong, idwangit tani amina a ngaberu. “Adakarosi ngasigerea nakaatinyok. Aliworosi ngiboro kech a ejie ngipasiek apalikin ajio.” Ani erumor, kingit Daudi Ekapolon Akuj tama, “Ejoikinit ayong alosi atolema epei a ngirerea a Yuda a?” Tatachu Ekapolon Akuj tama, “Ee.” Kingit Daudi tama, “Ali?” Tatachu Ekapolon Akuj tama, “Eburon.” Sodi tolot Daudi Eburon erikit ngaberu keng naarei nabe Ainoam na abunit alo Yesireel, ta Abigail na arai apuserut a ekile anyaritae Nabal alo a ere a Karimel. Abu ngesi toriko tani ngitunga keng ka ngitunga a ngawiyei kech, sodi toloma lorerea lu edunyasi ka Eburon. Apot ngitunga a Yuda pot Eburon sodi kidokakis Daudi akimiet na etal nakou ekapolon a Yuda. Ani iirari Daudi atamar anuka ngitunga a ere a Yabech Saul alo Gilead, abu tomea ngitunga alimokin ngitunga ngulu kona, “Kitopia esi Ekapolon Akuj ani idodiuneta atamar imunosi ekapolon kus ani inuketa. Kimiekisi Ekapolon Akuj kitaanyu esi amina naationon na nyedaun ajokis keng! Kasubea ayong esi naajokak ani isubeta esi ngakiro nugu. Tarata lu igogong totitiny! Atoana Saul lo arai ekapolon kus, nakaneni kedokakis ayong ngitunga a Yuda akimiet na etal nakou atoliwor ekapolon kech.” Ekarikon a ngasigerea a Saul, lobe Abiner lo arai lokookeng a Ner, apot tamataros ka lokookeng a Saul lobe Ichibochet todokasi angolol a Yorudan, tananga lore a Maanaim. Ani enangete inaa, kitiliwo Abiner Ichibochet ekapolon a ngakwapin anabe ta Gilead, ka Acher, ka Yesireel ka Epiraim, ka Benjamen, ta ngiwaitin a Isirael daang. Araakasi ngikaru keng ngitomwon-omwon na aliworor ngesi ekapolon a Ngisirael. Abu ngesi topolok a ngikaru a ngiarei. Nakaneni amuno ekitela a Yuda Daudi, ani na ayakar ngesi Eburon, topolok ngesi ngitunga a ekitela a Yuda a ngikaru a ngikan-kaarei ka ngilapio ngikan-kapei. Apot Abiner ka ngikapolok lu atupito Ichibochet tonyout alore a Maanaim toloto lore a Gibeon. Tonyout Yoab lo anyaritae itiokeng Seruya, ka ngikapolok luche etupito Daudi, kisiriama ta Abiner anabwel. Kiboikinos kesi neni, ajore apei lowae epei a abwel, ajore nache lowae loche a abwel. Tolimok Abiner Yoab tama, “Kimiekisi ngisorok ngidi a ngajorei yok tolemut ngiboro a ejie, tojikinos ebolosi.” Tatachak Yoab tama, “Kimiekisi tonyout.” Sodi ngikiliok ngitomon ka ngiarei lu aweikinito Ichibochet ka ekitela a Benjamen kitojwoto ngikiliok ngitomon ka ngiarei a Daudi. Apot ngikiliok ngulu, toting epei kech daang akou aloche, kichum ipei kech daang itwaan ni ajioto losiep a ekileng, sodi tadakakinos kesi lutomwon-arei ka nguomwon daang kwap totoaka. Kotere ngakiro nguna, enyaritae neni alo Gibeon, “Aro a ngilengea.” Apot ngitunga tojikinos, toroner ejie noi. Kidwanga ngitunga a Daudi Abiner ka Ngisirael. Talokookeng a Seruya luuni kesi ta Yoab, ka Abichai, ta Asael. Asael lo apirana ekoni emakata lokaadengan, abu kirita Abiner, kidira jik nakwaan keng. Kingolia Abiner naabor sodi tama, “Iyong mono itwaan Asael a?” Tatachu ngesi tama, “Ee.” Tolim Abiner tama, “Tojongo akirisit ayong! Kirita epei a ngasigerea tolema ibore ni etingit.” Nakaneni abu Asael torubak irisit Abiner. Tolimok nabo Abiner ngesi tama, “Tojongo akirisit ayong! Nyo kitingakinitor iyong ayong akiar iyong? Ekokini ayong aweikini lokaatokon Yoab ai?” Nakaneni towou Asael aisikin akirisit Abiner. Abiner ngolo, toremo akwara keng akamaluot, torem Asael nakook sodi toporu akwara alogur. Kibusokin Asael kwap totoan. Ani itwaan daang ni etoruni ni atoanikinit ngesi, towo kaneni. Nakaneni apot Yoab ka Abichai kiwapakis Abiner. Ani adooyoret a akolong, tananga lomukur a Ama, lo eyei kide Gia, ana eyei lorot lo etenere nariet a Gibeon. Tochunakin ngitunga a ekitela a Benjamen towaa ka Abiner nabo alokidiama emukura. Tanyara Abiner Yoab kingit tama, “Kiliwor tokona ngoni kiji jiik a? Nyiteete esi atamar ibooi ejie logo yau ngiman a? Kirai ngoni ngitunga a akwap a apei. Nyo nyilimokinea iyong ngitunga kon atamar tojongoto akirisit sua?” Tatachak Yoab tama, “Ekong jik tani Akuj na eyari. Arai nyiiruorik iyong, kirisito iyong ngitunga kang tanang moi nataparach.” Sodi tokutak Yoab aburuch esaki ngitunga keng tojongoto akirisit Ngisirael. Abu ejie tadaun. Apot Abiner ka ngitunga keng kikiiyata akwaar ngina daang itorito nadipo a Yorudan. Todokasi kesi anangolol a Yorudan, ani kelot ataparach daang etia ni etia, tananga Maanaim. Ani ebonguni Yoab ani erisitor Abiner, tochunak ngitunga keng wapei, kiitu ngikiliok ngitomon ka ngikan-koomwon lu amam, peimarakinitae Asael. Ngitunga a Daudi, aarito ngitunga 360 a Abiner, lu ekitela a Benjamen. Tolemasi Yoab ka ngitunga keng akwaan a Asael tonukakis naliel na anukanakinio ngitunga a awi keng alo Betleem. Sodi toloto Yoab ka ngitunga keng akwaar kiiya, kiwalak Eburon. Apot ngajorei na ebakito alowae a Saul ka lu ebakito ka Daudi tojwoto nikooyen. Abu Daudi tojwoner noi, topalagageta ngimoe keng noi. Ayakasi Daudi talokookeng ngikan-kapei lu edounio alo Eburon, ngirora kech kesi lu elimunitoe lugu isiaunitae aloapolon tasalu ani eyei loochi kadaang. Amunon lo arai lokookeng loapolon, ayei itiokeng na anyaritae Ainoam na arai aka ere a Yesireel. Ayei Kileab itiokeng na anyaritae Abigail na abunit alomoru a Karimel. Ayei Abusalom itiokeng na anyaritae Maaka, na arai nakookeng a ekapolon alobe Talimae alo a akwap a Gechur. Ayei Adonija itiokeng na anyaritae Agis. Ayei Chepatia itiokeng na anyaritae Abital. Ayei Isiream itiokeng na anyaritae Egila. Edounio talokookeng a Daudi ngulu daang alo Eburon. Ani erubakinito ngajorei a Daudi ejiete ka na ebakito alowae a Saul, toliwor Abiner lokajwon noi anajore a Saul. Abu Ichibochet lo arai lokookeng a Saul tolim atamar eperito Abiner ka apese a ngabwes a Saul na anyaritae Risipa na arai nakookeng a Aya. Tongo Abiner kotere ngakiro nguna tama, “Esibit iyong nyewapit ayong ngakiro a Saul a? Esibit iyong asubi ayong etich a Yuda a? Napei kolong jik, erichakinit ayong ngakiro ka apakon, ka talokaatokeng ta ngipaalon keng, nabo kayuu ayong iyong nyikidwang Daudi. Tani kikoni neni, ibala tokona iyong asechit ayong kotere ngakiro a aberu. Kimiek Akuj kataar ayong erai peketemok ayong ani a Daudi ngakiro nakolong ekongi Ekapolon Akuj anikeng, atamar alemari apolou ani a Saul, sodi etiliwo Daudi ekapolon a Isirael ka Yuda, napei alo Dan tanang Beer-cheba.” Abu Ichibochet nyeetachak Abiner akiroit ache, ani akeritor ngesi noi. Tomea Abiner ngitunga nia Daudi. Ayei Daudi Eburon ngirwa ngulu. Alimokinit Abiner ngitunga kona, “Ngae epolokini akwap naga? Atachamakin ka ayong, sodi kengarak ayong iyong tolema Isirael daang toliwor akon.” Tatachu Daudi tama, “Ejok! Kichamakin ayong ka iyong erai kirukut iyong ka nakookeng a Saul na enyaritae Mikal na ibunio aanyun ka ayong.” Abu Daudi nabo tomea ngitunga nia Ichibochet ebala, “Tobuakinae ayong aberu kang Mikal nakolong alemari ayong a ngamunyin a Ngipilisti a amiat a apei alu aari ayong.” Sodi tomea Ichibochet itwaan toriku Mikal alokile keng alo anyaritae Palitiel lokookeng a laich. Kiwap Palitiel aberu keng, igoro neni daang tanang lore a Baurim. Ani elimuni Abiner ebala, “Tobongo nawi.” Abu Palitiel tobongo. Tolot Abiner ni ayakasi ngikarikok a Ngisirael tolimok tama, “A ngirwa a ngikaalak, isakete esi Daudi toliwor ekapolon kus. Alolomu tokona kus naga. Toyena atamar alimu Ekapolon Akuj kona, ‘Eliwor ekasuban etich kang Daudi ngesi eyuuni ngitunga kang Ngisirael ani a Ngipilisti, ka ngimoe kech luche daang.’ ” Kisuruor Abiner tani ngitunga a ekitela a Benjamen, ani erumor tolot Eburon alimokin Daudi ngakiro na achamunete ngitunga a Benjamen ka Isirael asubakin. Ani epote Abiner ka ngitunga lutomwon-arei arukitotor nia Daudi alo Eburon, abu Daudi kidorok kesi akimuj nakaalan. Tolimok Abiner Daudi tama, “Alosi tokona ayong atochunak ngitunga daang toliworos ngikon ekapolon kang. Kichamunete kesi iyong toliwor ekapolon kech, sodi topolokinio iyong akwap daang loger lo isakitor.” Abu Daudi tolimok Abiner atamar tolot akaalimon. Ani ekisidi, todolut Yoab ka ngikasubak etich luche a Daudi alojie. Yaut kesi ngiboro lukaalak aremete. Nakaneni, amam Abiner alo Eburon pearukito ka Daudi kainyo achamakinit sek Daudi ngesi elosi akaalimon. Ani edolunete Yoab ka ngitunga keng, tolimokinae atamar abunit Abiner aanyun ekapolon Daudi, nakaneni alimoki Daudi atamar tolot akaalimon. Sodi tolot Yoab nia ekapolon kingit ngesi tama, “Anukiro isub iyong? Nyo imiekinea iyong Abiner elosi loger ngolo na abunio nikon? Abunit ngesi akingalare iyong sodi toyenea ibore daang ni isubi iyong ka wadaang ni iloseene iyong. Iyeni iyong iteni dir atamar ikote nguna neni!” Ani erotokini Yoab ani ayei Daudi, tomea ngitunga asakar Abiner. Apot kesi tobuut ngesi alokare a Sira, nakaneni peayeni Daudi ngakiro nguna. Ani edoluni Abiner Eburon, tochada Yoab ngesi nikeng bon alodiyete ekidor, tosub esaki akisuruor ngesi anikeng bon. Kichum ngesi Abiner kaneni nakook. Nakaneni apon Abiner taarae anisek aarea lokaatokeng a Yoab lo anyaritae Asael. Ani iirari Daudi ngakiro nguna ekisidi, tolim tama, “Eyeni Ekapolon Akuj atamar emam ayong ka ngitunga lu apolokinit ayong ngakiro kipaikinio kotere akitu a Abiner. Kimiekisi akitu keng tapaikinae Yoab ka ngitunga awi keng! Analesea keng kadaang, emini itwaan a awi keng ni edeakakin elepot kori enomokere, kori ni erai etich lo esubi aberu bon epedori akisub, kori ni eario alojie, kori ni engopikini akimuj nanyamat!” Apot Yoab ka lokaatokeng Abichai taara Abiner, anisek aarea Abiner lokaatokech Asael na ajiere alo Gibeon. Abu Daudi todungok Yoab ka ngitunga daang lu arukitotor ngesi tama, “Tochila ngiworui kus tanapa ngiguniae, sodi tosutonokis kotere Abiner.” Atupit ekapolon Daudi ngitunga lu elepilepito asaduku na ayei akwaan. Tonukakinae Abiner Eburon, sodi kigor ekapolon Daudi analiel irema, kikalout tani ngitunga luche daang kongina. Toeok Daudi eeos logo igoro kotere Abiner. “Ekokini Abiner etoani loger a ekabangabangat ai? Amam itwaan aenit ngakan keng. Nabo amam itwaan aenit ngakejen keng. Atoani ngesi loger a itwaan ani aarete ngirukooi!” Apot ngitunga kigoro nabo kotere ngesi. Tasaka ngitunga apaaran daang etia ni etia akimaima Daudi esakete kimuj, nakaneni kikong ngesi kichikak tama, “Kimiekisi Akuj kataar ayong erai kemuj ayong eringa nyewara!” Taanyungasi ngitunga daang ngakiro nguna talakaros. Kainyo ibore daang ni asubi ekapolon, etalakarit ngitunga. Ngitunga daang a Daudi ka lua Isirael, toyena atamar pearai Daudi epei a ngitunga alu aarete Abiner. Tolimok ekapolon ngikasubak etich keng tama, “Ikwa nyiyenete esi atamar atoana ekapolon loyenikina alo Isirael a? Tani karai ayong ekapolon lokaseunito Akuj, apalag ayong akolongit naga. Talokookeng a Seruya lugu, ededeng kakuruwosi ayong. Kimiekisi Ekapolon Akuj kirira ngirukooi ngulu itemem ka naaronok asubete kesi!” Ani iirari Ichibochet lo arai lokookeng a Saul atamar aar Abiner alo Eburon, abu tobul. Apot tani ngitunga daang alo Isirael tamaranikis. Ayakasi Ichibochet ngikiliok ngiarei lu araakasi ngikarikok a ngajorei ana aloseenete akirem. Ngirora a ngikarikok kangulu kesi ta Baana ka Rekab lu araakasi talokookeng a Rimon alo a ere a Beeros. Arai Rimon eka ekitela a Benjamen. (Imarunitae Beeros atamar erai ere a Benjamen dang. Ngitunga lusek araakasi ngika ere a Beeros apot tamataros Gitaim, ni elomito kesi tani tokona.) Yonasan lo arai lokookeng a Saul, ayei lokookeng lo anyaritae Mepiboches, lo angwalit ngakejen. Araakasi ngikaru keng ngikan ngirwa lu aarere Saul ka Yonasan. Na aponeta ngakiro a akitu kech alore a Yesireel, aberu na adakit Mepiboches, abu tadaku ngesi tamataror. Ani kona ekirikirar aberu ngina noi, abu Mepiboches tochakun, sodi tongwal. Apot Rekab ka Baana tonyout toloto nawi a Ichibochet, sodi tananga inaa naparan lotingilan. Aperi Ichibochet esaa ngolo eangarit. Abu aberu na ayei lokidor akai kilurakin iekieki ngakanoi tojotoor. Sodi Rekab ka Baana kiidakinos tooma. Ani elomarete tooma, tolomasi namaniyat naperot, torukaut Ichibochet ejotoe, sodi taara ngesi. Ani erumor totubosi akou keng totinga. Toloto kesi akwaar kiiya, itorito nadipo a Yorudan. Yaut kesi akou nia ekapolon Daudi alo Eburon tolimokis tamasi, “Erai naga akou a Ichibochet alo erai lokookeng a emoit kon alobe Saul, alo asaki akiar iyong. Akolongit naga, kichamak Ekapolon Akuj iyong lo irai ekapolon, itachakini naaronok ani eyei Saul ka ngalesea keng.” Tatachak Daudi kesi tama, “Ekongi ayong Ekapolon Akuj na eyari, na kayuu ayong alomoe kang kadaang! Itwaan nikolong abuni nikang na ayakar ayong Sikilag, katolimok ayong ngakiro a akitu a Saul, abala ngesi kori kainunit ayong ngakiro naajokak. Abu ayong erum ngesi sodi atama taara. Ebachit lo ainakini ayong ngesi ngolo kotere ngakiro naajokak nguna. Erokearosi noi ngakiro na eanyunete ngitunga luaronok lu earete itwaan ni nyesechit ejotoe alokai keng! Atachakini tokona ayong akitu keng anikus, sodi kekisa esi anakwap!” Tanyarau Daudi ngasigerea keng, taara Rekab ka Baana, sodi totubosi ngakan ka ngakejen, kinenekis diyete abwel alo Eburon. Tolemasi kesi akou a Ichibochet tonukakis naliel a Abiner alore a Eburon. Apot ngitela daang a Isirael pot nia Daudi alo Eburon sodi tolimokis tamasi, “Kirai sua ngakoyo ka ngaakot kon. Kolong tani eringa Saul erai ekapolon, irikit iyong ngitunga a Isirael alojie. Abu nabo Ekapolon Akuj kichikak iyong atamar iliwor ekeyokon a ngitunga keng toliwor ekapolon kech.” Sodi pot ngikarikok daang alo Isirael ni ayei ekapolon Daudi alo Eburon. Kikong Daudi achamakin ka kesi, kidokakis kesi ngesi akimiet na etal nakou, toliwor ngesi ekapolon a Isirael. Araakasi ngikaru a Daudi ngitomwon-uni na aliworor ngesi ekapolon. Topolok ngesi a ngikaru a ngitomwon-omwon. Topolok ngesi Yuda eyei Eburon, ngikaru a ngikan-kaarei ka ngilapio ngikan-kapei. Topolak ngesi Yuda ka Isirael eyei Yerusalem, a ngikaru a ngitomwon-uni ka nguuni. Abu tanang ngirwa lu aremioto Daudi ka ngitunga keng Yerusalem. Etamito Ngiebus lu araakasi ngikulepek a akwap kangina atamar kori nyelemari Daudi ere ngolo. Apot kesi tolimokis Daudi tamasi, “Nyilomuni iyong tooma nege, Kiratakinete iyong tani ngimuduk ka ngikangwalak.” ( Nakaneni tolema Daudi awas a Sion, sodi tolimokinae neni ekiro be, “Ere a Daudi.”) Akolongit ngina tolimok Daudi ngitunga keng tama, “Eyei itwaan iche kane ni eremokino Ngiebus loger lo aremitor ayong a? Ani kesaki itwaan ngini akiar kesi, ejoikinit ngesi edokari kitor lopuke a ngakipi taar ngimuduk ka lukangwalak.” (Ngakiro nguna kesi ebeyere, “Nyelomarete ngimuduk ka ngikangwalak kai a Ekapolon Akuj.”) Ani kelema awas kerumor, abu Daudi tolom neni sodi tanyara, “Ere a Daudi.” Abu ngesi kisiriam adukuoru napei alo Milo tanang lowae lo alotooma. Ngirwa daang, toliwor ngesi lokajwon kainyo arukito ngesi ka Ekapolon Akuj Namerikanyer. Tomea Iram lo arai ekapolon a Tiro ngitunga nia Daudi, etingito ngakito a ngichekereng. Ayakasi ngikadukok lu edukete a ngakito ka lu edukete a ngamoru, lotunga ngulu. Abu ekapolon Daudi toyen atamar etiliwo ngesi Ekapolon Akuj ekapolon alo Isirael, nabo apia apolou keng kotere ngitunga keng. Ani kewot ngesi alo Eburon tanang Yerusalem kerumor, torik Daudi ngapesur a ngabwes ka ngaberu ngache, pena ngide lupesur ka lusapa lukaalak. Ngirora a ngide keng alu edounio alo Yerusalem kesi Chamua, ka Chobab, ka Nasan, ka Solomon, ka Ibiar, ka Elichua, ka Nepeg, ka Yapia, ka Elichama, ka Eliada, ta Elipelet. Apon Ngipilisti tolimokinae atamar etiliwor Daudi ekapolon a Isirael. Kotere ngakiro nguna, abu ajore a Ngipilisti tonyou akirem Daudi. Ani iirari ngesi ngakiro nguna, tolot ngesi ni adukitoe awas. Todolut Ngipilisti nadipo a Repaim topetakin neni. Kingit Daudi Ekapolon Akuj tama, “Etijikini Ngipilisti a? Kisidwangi iyong ayong kesi a?” Tatachak Ekapolon Akuj tama, “Ee, kitijik! Kesidwangi ayong iyong kesi!” Sodi tolot Daudi Baal Perasim kidwang Ngipilisti kaina. Tolim tama, “Ejukun Ekapolon Akuj alokiding ngimoe kang loger a akaale.” Kotere ngakiro nguna, apon tanyarae neni Baal Perasim. Ani ematarosi Ngipilisti, toisikis ngakujo kech nasubuna kaneni, sodi tolemasi Daudi ka ngitunga keng ngakujo nguna. Ani erumor tobongosi Ngipilisti nadipo a Repaim toloma neni nabo. Ani ingisi Daudi Ekapolon Akuj nabo, tatachak ngesi, tama, “Nyiitijik kesi kane, nakaneni kiloda kitijik kesi alowae aloche, alodiyete ngikito lube talokimieta. Ani iirari iyong erue a ngakejen alokidiama ngikito, kitijik iyong kesi kainyo kengarenikini ayong iyong edwang ajore a Ngipilisti.” Tosubak Daudi ngakiro na adungokinit Ekapolon Akuj. Abu ngesi kirita Ngipilisti tobongosi alo Geba tananga Geser. Tochunak Daudi nabo ngasigerea nakajwok noi alo Isirael. Araakasi kesi daang ngikiliok 30,000. Abu ngesi toriko kesi tanang lore a Baala alo Yuda, esakete ayaun kaina asaduku a Achamunet na erai aka a Akuj. Alimokinitae asaduku na a Achamunet ngina ekiro a Akuj Namerikanyer, ana ibooyi alokidiama ngiborei lua ngabeben. Tolemut kesi anawi a Abinadab ana ayei kidiama emukura, sodi kiwaakis namotoka na iritae nakitetet. Talokookeng a Abinadab lu anyaritae Usa ka Aio eyokiyete aurukuk. Engareni Aio. Edongaate Daudi ka Ngisirael daang a ngikilinga kech kadaang idodiunito arimatoi ani a Ekapolon Akuj. Aeosi kesi ideese ngagitae ka ngiburin, kituruyete ngichoroi ka ngasua. Ani enangunete kesi ni eramere ngalemet ani enyaritae Nakon, tadakar emong, sodi toruakin Usa asaduku a Achamunet toting. Atipei, abu Ekapolon Akuj Namerikanyer tongoik Usa, taar ani awuonea akidodiun arimatoi. Totoanik Usa neni diyete asaduku a Achamunet. Kotere ngakiro nguna, anyarae neni Peres Usa tani nakolongit naga. Tongo Daudi ani angoea Ekapolon Akuj kirira Usa. Abu Daudi toker Ekapolon Akuj tolim tama, “Ekokini tokona ayong alemari asaduku a Achamunet ai?” Sodi towou ngesi ayaar asaduku a Achamunet Yerusalem. Nakaneni abu ngesi tongelar alorot, yaa kai a itwaan be Obed Edom, ani arai ika ere enyaritae Gas. Kirika asaduku ngina ngilapio nguuni kaina. Abu Ekapolon Akuj topia Obed Edom ka ngitunga a awi keng. Kiira ekapolon Daudi atamar apia Ekapolon Akuj ngitunga a awi a Obed Edom, ka ibore daang ni arai ikeng. Sodi tolema Daudi asaduku a Achamunet anawi a Obed Edom, yaa Yerusalem inyiakanarete ngitunga. Ani ikalamete ngitunga lu adakito asaduku a Achamunet ngakikalamikinet ngakan-kapei, tolimok Daudi kesi atamar towaa. Taarak Daudi Ekapolon Akuj akipeyos a emong ka itaok nikanakunan. Daudi lo anapit eworu lokaanikan bon anaabor keng, abu kidongak a ngikilinga keng kadaang idodikinit Ekapolon Akuj arimatoi. Apot ngesi ka Ngisirael daang yaasi asaduku a Achamunet Yerusalem, elakara imariteteete, tokusete ngaburucho. Ani na ayaunitere asaduku a Achamunet lore, abu Mikal na arai nakookeng a Saul kingolia alopuke a akai, kingolik ekapolon Daudi idongae toporoporoe alodonga alo a etal. Apot ngakiro a Daudi takadakis aberu ngina. Yaut kesi asaduku a Achamunet tosipokis nisek asubakinit Daudi alotooma eam. Ani erumor tolemikis kesi Ekapolon Akuj ngakipeyos na inomio ka na ekisil. Ani erumori ngesi akipeyore ngakipeyos, topia ngitunga elimit ekiro a Akuj Namerikanyer. Sodi tokorak kesi daang akimuj. Nak ngesi itwaan nikile ka niberu daang alo Isirael amugati apei, ka akiring na apeitoe, ta ngarinyo a ngamusabib. Ani erumor tolot itwaan daang nawi keng. Ekisidi, ani elosi Daudi nawi keng akimalare ngitunga a awi keng, abu Mikal topud akimalare Daudi. Tolimok Mikal Daudi tama, “Eturuu ekapolon a Isirael ekiro keng akolongit naga! Edodiun ngesi loger a ekabangabangat, kiteeto ngakedalak ka ngikasubak etich keng!” Tatachak Daudi tama, “Edongae ayong edodikinit Ekapolon Akuj arimatoi. Ekapolon Akuj nakaseuni ayong kimiek apakon ka ngitunga awi keng, ketiliwo ngesi ayong ekarikon a Ngisirael alu eraakasi ngitunga keng. Nakaneni arubakini ayong edodikinit Ekapolon Akuj arimatoi, sodi etaanyun tani ngileech noi. Ipedori iyong atamar kori arai ayong itwaan nipasit, nakaneni karimasi ayong ngapesur nguna!” Abu Mikal nakookeng a Saul totoan nyeanyuna ngide. Ani elomi ekapolon Daudi kai keng, abu Ekapolon Akuj kisianga ngesi, toyuu alomoe keng kadaang, abu ekapolon Daudi tolimok Nasan lo arai ekadwaran a Akuj tama, “Kingolik mono tokona iyong a, abe alomit ayong kai ana adukio a ngakito a ngichekereng, tarai iwaakinitae asaduku a Achamunet na erai aka Akuj, loeam!” Tatachak Nasan tama, “Tosub ibore nicha isaki iyong akisub daang kainyo irukito iyong ka Ekapolon Akuj.” Nakaneni akwaar napei ngina nakwaare, tolimok Ekapolon Akuj Nasan tama, “Kape tolimok ekasuban etich kang Daudi tama, ‘Meere iyong kidukokini ayong akai na eboikin. Napei kolong ayuunea ayong Ngisirael alo Misiri tani tokona, nyiboikino ayong kai. Erimit ayong akwap eboi aloeam. Ngirwa daang lu kirimitor ayong ka Ngisirael akwap, emam tani epei a ngikarikok alu aseuni ayong lo engit ayong atamar nyo ko pekadukinea ayong akai na a ngakito a ngichekereng.’ “Kotere ngakiro nguna, tolimok ekasuban etich kang Daudi atamar ayong Akuj Namerikanyer, alimokinit ngesi kona, ‘Kaseuni kolong ayong iyong anachokor ana iyokiyo ngamesekin, sodi ketiliwo ekapolon a ngitunga kang alu eraakasi Ngisirael. Kiruki ayong ka iyong ani ilosi kadaang, sodi edwang ngimoe kon daang esaa lo ilosio iyong ngaren. Ketiliwori ayong iyong lokipuruunitoe loger a ngikarikok alu eyenikinitae noi anakwapea. Nakaneni aseuni ayong akwap na eliwor aka Ngisirael alu eraakasi ngitunga kang, sodi etak kesi, tolometa nakwap na erai akech a ngikulepek, nyiichanere nabo. Nyewanete kesi ngitunga luaronok loger lokolong sek a ekingaren, ka na etijioto kesi ngitunga lukadedengak napei kolong alomuneta nakwap naga. Kesianguni ayong esi alomoe kus kadaang, kainak nabo tani ngalesea. Ani itoani iyong kitonukakin ni enukakinitae taapakus, etiliwori ayong epei kata lokookeng ekapolon, sodi etogogong apolou keng. Lokookon ngolo ngesi kadukokini ayong akai, nakaneni eturubi ayong apolou keng toliwor akajik. Aliwor ayong apakeng, toliwor ngesi lokookeng. Ani esechi ngesi, erirae ayong, loger lo iriraa apa lokookeng. Nakaneni nyawouni nyawouni ayong akingarakin ngesi loger lokolong awounea akingarakin Saul, lokolong alemari ayong toliworor iyong ekapolon. Epete iyong ngalesea ngirwa daang, nakaneni etiliwori ayong apolou kon akajik. Nyedaun apolou kon jik.’ ” Tolimok Nasan Daudi ngakiro daang na edodikinit ngesi Akuj. Sodi toloma Daudi loeam a Akuj, kiboikin sodi kilip tama, “Nyo tokona lo ayong dang, nyo tani ngitunga a awi kang, kisubakinea iyong Ekapolon lo erai Ekapolon Akuj ngakiro na ikote nugu? Tarai imenit iyong Ekapolon lo irai Ekapolon Akuj ngakiro nguna. Kichikak iyong ayong ngakiro a ngalesea kang kotere ngikaru lu monan isidiunosi. Nakaneni Ekapolon lo irai Ekapolon Akuj, kimiek iyong ayong lo arai itwaan engolikini ngakiro nugu! Anukiro nabo ngache kalimokini ayong iyong? Kiyeni iyong ayong lo arai ekasuban etich kon. Kotere akichikakinet kon ka ngakiro isaki iyong asubakin, isub iyong ngakiro nakatalarak nugu daang isaki akitatam ayong. Ipol iyong dir, Ekapolon Akuj na irai Akuj! Emam tani ipei ni ikwaan ka iyong. Kiyen sua ngirwa daang atamar iyong bon irai Akuj. Emam nabo ebukut eche anakwapea lo ikwaan ka Ngisirael, lukolong iyuuni iyong ani araakatar ngikedalak, kitiliwo ngitunga kon a alope. Ngakiro nakatalarak ka naketubulok isubi iyong anikech, apetakis ekipur kon wadaang a ngakwapin. Itwarakini iyong ngibukui luche ka ngakujo kech na alooso ngitunga kon ngaren. Ngitunga ngulu kesi lu ilachakini iyong alo Misiri, toliworos ngitunga kon. Itiliwo iyong Ngisirael ngitunga kon nakajik. Ani iyong Ekapolon Akuj, iliwor Akuj kech. “Tokona bocha Ekapolon Akuj na irai Akuj, kitemok akichikakinet nakolong kichikakini iyong ayong ka ngalesea kang, sodi tosub ngakiro nakolong ilimuni iyong atamar isubi. Eyenikinio ekipur a ekiro kon nakajik, sodi tolimuunut ngitunga jiik ebalasi, ‘Akuj Namerikanyer, ngesi erai Akuj a Isirael!’ Nakaneni itiliwori iyong apolou kang akajik. Akuj Namerikanyer, na irai Akuj a Isirael! Apedori ayong akilip iyong loger logo, kainyo kidodik iyong ayong ekasuban etich kon ngakiro nugu daang, ilimu tani atamar itiliwori iyong ngalesea kang ngikapolok. “Tokona bocha Ekapolon lo irai Ekapolon Akuj, iyong irai Akuj. Iyoonokini iyong ngakichikakinet kon jiik, kichikak iyong ayong akichikakinet naajokon noi naga. Kelipit iyong atamar topia ngalesea kang sodi torubakis eanyunito ngakiro naajokak anikon. Iyong, Ekapolon lo erai Ekapolon Akuj, ngesi ilimu nguna, nakaneni eliwor apiaro kon aka ngalesea kang jik.” Ani ekisidi, tolot ekapolon Daudi nabo akitojwore Ngipilisti sodi kidwang. Todema kesi ere a Metegama. Ani erumor kidwang ngesi Ngimoab. Kiteperik ngesi ngitunga lu eenitae kwap, sodi toliwor alotunga cha kadaang aluuni eperete, taar ngesi ngitunga ngiarei. Apot Ngimoab toliworos ngitunga lu epolokinit ngesi, sodi tobukonokis ngesi echur. Kidwang ngesi ekapolon a Siria lo apolokinit ni enyaritae Soba. Ekapolon ngolo ngesi Adadeser lokookeng a Reob. Edwangio Adadeser esaa lo alosio akidodiun atamar arai ekapolon a ewae alo alokuju angolol a Eupurate. Abu Daudi torem ngasigerea abunget ka ngamiae ngakan-kaarei ani a Adadeser. Araakasi ngasigerea nguna na emeto ngangolei. Torem nabo ngasigerea ngabunge ngatomwon-arei. Araakasi ngasigerea nguna na eloose a ngakejen. Kimiek ngesi ngangolei na iriyete ngaurukukui amiat apei, sodi tonged ngesi ngangolei nache daang ngamori na a ngakejen tongwala. Ani emeunete ngitunga a Siria lu ayakasi Damasko ajore na ingarakini ekapolon Adadeser alojie, abu Daudi kitijik ajore ngina taar ngitunga ngabunge ngatomwon-arei ka ngaarei. Ani erumor kiwaak ngesi ngadakarin na ejie nakwap kech. Apot kesi toliworos ngitunga lu epolokinit Daudi, tobukonokis ngesi echur. Abu Ekapolon Akuj kisidwang Daudi ngimoe keng awadaang. Tolema Daudi ngaupwala a egolit na atingito ngikapolok a arieng a Adadeser, sodi yaa Yerusalem. Tolema ngesi tani asuat nanyang nakaalan alo Beta, ka Berosai, alu araakasi ngirerea lu apolokinit Adadeser. Kiira Toi lo arai ekapolon a Amas atamar edwang Daudi ngasigerea daang a Adadeser. Sodi tomea ngesi lokookeng anyaritae Yoram akimalare ekapolon Daudi ka abuakin ngesi alakara ani edwangea Adadeser. Ajito sek Toi ka Adadeser ngajiet nakaalak. Inaa Yoram Daudi ngiboro lu asubunitae a egolit ka akwangat, ta asuat nanyang. Kitaleu ekapolon Daudi kesi toliworos ilepeenere. Kimorik aapei ka akwangat, ta egolit lo alemuni ngesi alobukui alu edwangi. Ngibukui ngulu kesi Ngiedomae, ka Ngimoab, ka Ngiamon, ka Ngipilisti, ta Ngiamalek. Tolem Daudi tani epewae a ngiboro alu alemuni ngesi ani a Adadeser. Apon Daudi kipuruunoe noi abongunio ani aarea Ngiedomae ngabunge ngatomon ka ngakan-kauni anadipo a Amakat. Kiwaak ngesi ngadakarin a ejie lowaitin daang a Edom. Toliwor ngesi epolokinit ngitunga lu Edom. Kidwang Daudi ngimoe keng awadaang kotere Ekapolon Akuj. Topolok Daudi akwap a Isirael daang, sodi tosubea ngitunga keng daang ngakiro itemokino toriyan. Yoab lo anyaritae itiokeng Seruya, ngesi arai ekarikon a ngasigerea. Yeochapat lokookeng a Ailud ngesi aweikinit ekimar. Sadok lokookeng a Aitud ka Aimelek lokookeng a Abiasar kesi araakasi ngimurok a Akuj. Seraya ngesi arai ekegiran ngikesio. Benaya lokookeng a Yeoyada ngesi arai ekarikon a ngasigerea ana eteete Daudi. Araakasi talokookeng a Daudi ngimurok a Akuj. Akolongit apei, kingis Daudi tama, “Eyei itwaan ni eyanasi ka Saul ni eringa eyari a? Ani keyei a, asaki ayong atosubea niajokon kotere Yonasan.” Ayei ekasuban etich a awi a Saul anyaritae Siba. Aponi ngesi tolimokinae atamar tolot nia Daudi. Kingit Daudi ngesi tama, “Iyong irai Siba a?” Tatachak Siba tama, “Ayong ekasuban etich kon ngesi logo.” Kingit ekapolon ngesi tama, “Eyei itwaan idio eyanasi ka Saul ni eringa eyari, ni apedori ayong asubea niajokon loger lokolong echikakinea ayong Akuj atamar ekokini neni a?” Tatachak Siba tama, “Eringa lokookeng a Yonasan epei eyari. Engwalit ngesi ngakejen.” Kingit ekapolon ngesi tama, “Aliwae eyei ngesi?” Tatachak Siba tama, “Eyei nawi a Makiri alo erai lokookeng a Amiel alo elomit Lodebar.” Abu ekapolon Daudi tomea itwaan anyaraun ngesi. Ani edoluni Mepiboches lo arai lokookeng a Yonasan, tarai etatait a Saul, toriedik ngesi kijuuru alongaren Daudi idodiunit arimatoi. Tanyara Daudi tama, “Mepiboches,” sodi tatachak ngesi tama, “Ayong ekasuban etich kon ngesi logo.” Tatachak Daudi ngesi tama, “Wara nyiem. Kasubea ayong iyong naajokak kotere apakon Yonasan. Kabuakini ayong iyong akwap daang nakolong arai aka apaakon Saul. Nakaneni iliwor iyong kimujeene ka ayong ngirwa daang.” Abu Mepiboches kijuuru sodi tama, “Nyo tokona ayong dang ekasuban etich kon, ekapolon? Nyoni isakea iyong asubea ayong lo ekoni nyiingok nikatoan naajokak?” Sodi tanyara ekapolon ekasuban etich a Saul lo anyaritae Siba tolimok tama, “Ainakini ayong Mepiboches lo erai etatait a ekapolon kon ibore daang nikolong arai ikeng ka ngitunga a awi keng. Itaate iyong, ka talokookon, ta ngikasubak etich kon amana a ngiyenet a ekapolon kon sodi tolema, taanyuneta kesi akimuj na enyamete. Ani lo erai Mepiboches, kimujeene ka ayong ngirwaa daang.” (Ayakasi Siba talokookeng ngitomon ka ngikan, ta ngikasubak etich ngitomwon-arei.) Tatachak Siba tama, “Asubi ayong ibore daang ni ilimuni iyong, ekapolon.” Abu Mepiboches toliwor imujeenete ka ekapolon ngirwa daang, loger a lokookeng a ekapolon. Ayei Mepiboches lokookeng anyaritae Mika. Toliworos ngitunga a awi a Siba daang ngikasubak etich a Mepiboches. Sodi Mepiboches lo angwalit ngakejen daang kibooyeene alo Yerusalem imujeenete ka ekapolon ngirwa daang. Ani ekisidi, totoan Naach lo arai ekapolon a Ngiamon. Sodi toliwor lokookeng Anun ekapolon. Tolim ekapolon Daudi tama, “Asaki ayong atosubea Anun naajokak loger lokolong kasubea apakeng Naach ayong naajokak.” Abu Daudi tomea ngitunga akisililing Anun. Ani enangete kesi nakwap nabe Amon, apot ngikarikok a Ngiamon tolimokis ekapolon kech tamasi, “Esibit iyong emeunit Daudi ngitunga lugu akisililing iyong ani erimar apakon a? Meere kongina! Emeunit ngesi kesi nege akireb ere sodi kidwangea ngoni!” Torwakin Anun ngitunga lu ameunit Daudi sodi tabany ngiwaitin epewae a ngajul a ngabokonya kech. Totub ngesi ngiwaitin a ngiworui kech lu erapito ngikalokoi, sodi kimiek kesi toloto. Kiruma ngitunga ngulu ngileech noi tokuruwo kona ebongorete nawi. Ani iirari Daudi ngakiro na asubakinosi, abu tomea itwaan alimokin kesi ebala, “Tasala mono alo Yeriko toruput ngajul a ngabokonya kus, ani erumor tobongut nawi.” Ani eyenunete Ngiamon atamar akadakis Daudi ngakiro kech, apot tanyaraut ngasigerea a akwap a Siria ngabunge ngatomwon-arei na apote alo Besireob ka Soba, ka ngabunge ngatomon ka ngaarei na apote alo Tob, tanyaraut tani ekapolon a Maaka lo arukito ka ngasigerea abunget apei. Ani iirari Daudi ngakiro kech, abu tomea Yoab aapei ka ngasigerea keng daang nakajwok. Toropuut Ngiamon kibaka alokidor a Raba, alo arai ere loapolon a akwap kech. Ani luche daang, lu araakasi ngitunga a akwap a Siria ka lu apote alo Tob ka Maaka, apot kibaka alowae alo alomoding. Abu Yoab kingolik atamar ketijikinete ngesi ngimoe keng alowae alo alongaren ka ewae lo alokaku, toseu ngesi ngasigerea nakajwok noi kisibak alowae alo a ngitunga a akwap a Siria. Kitiliwo ngesi lokaatokeng Abichai ekarikon a ngasigerea anache. Kisibak Abichai kesi tokienyikinos ka Ngiamon. Tolimok Yoab ngesi tama, “Ani kingolik iyong atamar kedwang ayong ngitunga a akwap a Siria, bu kingarak ayong. Ani kidwanga iyong Ngiamon, abuni ayong kengarak iyong. Toliwor lo igogong nabo ititiny! Atojwoto lokiliok kotere ngitunga yok ka ngirerea a Akuj yok. Kimiekisi nguna esaki Ekapolon Akuj tosubakin!” Pot Yoab ka ngitunga keng akitijikin ngimoe kech, nakaneni tamataros ngitunga a akwap a Siria. Ani ingolikinete Ngiamon ngitunga a akwap a Siria ematarosi, tamataros kesi ani ayei Abichai tolomasi lore. Abu Yoab tobongu ani etijio Ngiamon, sodi tobongo Yerusalem. Ani eyenete ngitunga a akwap a Siria atamar edwanga Ngisirael kesi, apot tanyaraut ngasigerea kech daang tochunakis wapei. Tomea ekapolon Adadeser itwaan anyaraun ngitunga a Siria lu ayakasi kide angolol a Eupurate, sodi pot kesi ni anyaritae Elam, erikit ekarikon a ngasigerea anyaritae Chobak. Arai Chobak ekarikon a ngasigerea a ekapolon Adadeser alo a akwap a Soba. Ani iirari Daudi ngakiro nguna, tochunak ngasigerea a Isirael, todoka angolol a Yorudan, tanang Elam ni ebaketa ngitunga a Siria ekienyikinito kesi. Kisiak ejie, Tamatar ajore a Siria ani ayakasi Ngisirael. Taara Daudi ka ngitunga keng ngasigerea a Siria ngamiae ngakan-kaarei na adokito ngaurukukui, ta ngasigerea ngabunge ngatomwon-omwon na ameto ngangolei. Apot kesi towana Chobak lo arai ekarikon a ngasigerea a Siria. Abu Chobak totoan ani ajiere. Ani eyenete ngikapolok lu apolokinit Adadeser atamar edwang Ngisirael kesi, apot kesi kisila ka Ngisirael, topolokis Ngisirael kesi. Apot ngitunga a Siria toema, tapalikis akingaranakin Ngiamon. Ani akisiakinet a ekaru, ngirwa lupalem eloseeneto ngikapolok lojie, tomea Daudi Yoab ka ngikapolok luuchik keng, ta ngasigerea a Ngisirael. Apot kesi kidwanga Ngiamon, sodi kirikaut ere a Raba. Nakaneni edongit Daudi Yerusalem. Akolongit apei erii akolong, abu Daudi tokienyu, tonyou ani aperio todoka kidiama akai keng. Ani na elator ngesi alokidiama kaina, taanyunga aberu ache ilota. Arai aberu ngina nakebusean noi. Abu ngesi tomea itwaan akingitun atamar erai aberu ngina ngae. Tolimok ngesi itwaan ngini tama, “Erai aberu ngina Besicheba nakookeng a Eliam. Erai ngesi aberu a Uria alo erai Eitit.” Tomea Daudi ngitunga anyaraun ngesi. Apot ngitunga ngulu torikut ngesi nia Daudi, topero Daudi ka Besicheba (Aringa nisek etaleunor ngesi kitoseg ani ayakar lolap ebooyo.) Abu Besicheba tobongo nawi kech. Ani ekisidi eyeni ngesi atamar apoti, tomea itwaan nia Daudi ebala, “Apoti ayong.” Abu Daudi tomea itwaan nia Yoab ebala, “Tolimok Uria lo erai Eitit atamar bu ataanyun.” Abu Yoab tolimok Uria atamar tolot nia Daudi. Ani edoluni Uria, kingit Daudi ngesi kejokak ngakiro daang ani a Yoab ka ngasigerea. Kingit nabo tama, “Ikoni ejie ai?” Abu Daudi tolimok Uria tama, “Kape nawi kianga wadio.” Tonyou Uria tolot, nakaneni tomea Daudi itwaan nawi a Uria, yaa ibore ni epotori Daudi. Nakaneni nyeloto Uria nawi keng. Abu ngesi toper lokidor a akai a ekapolon, aapei ka ngasigerea na eyokiyete ekapolon. Ani iirari Daudi atamar nyeloto Uria nawi keng, kingit tama, “Nyo peilosio nawi kon, tarai abongun iyong naga ani ngoon iperorit ngirwa lukaalak?” Tatachak Uria tama, “Emam ngasigerea a Isirael ka Yuda kane, eyakasi kesi ka Asaduku a Achamunet lojie. Elomito ekarikon a ngasigerea Yoab ka ngikapolok keng luuchik moding. Ekokini ayong alosi nawi emuj, atamasi, ka akiper ka aberu kang ai? Ekong jik tani iyong ka ayong lu kiyari, nyasubakini ayong ngakiro na ikote nguna!” Sodi tolim Daudi tama, “Tasal kane akolongit naga, ani moi kalimokini ayong iyong atamar tobongo.” Abu Uria tasal alo Yerusalem akolongit ngina ka akolongit na atupit ngina. Kipeyou Daudi ngesi nawi keng kisimuj akimuj naka ebong, sodi kitamat ngesi epurot kilewa. Nakaneni akwaar ngina dang, nyeloto Uria nawi keng, pearai abu kinapakin loworu keng lodapal ani apereenete ngasigerea na eyokiyete ekapolon. Ani ataparach a akolongit anache, kigirak Daudi Yoab abarua sodi nak Uria lo ainari Yoab. Egirit ngesi kona, “Kitebeik Uria lowae lo a alongaren lo eriraa ejie, ani erumor kikutokis, sodi kimiekis ngesi taarae.” Ani iriamete ngitunga a Yoab ere, tolimok ngesi Uria atamar tolot ni ariraa ejie. Topudut ngasigerea a ngimoe alu ajioto Ngisirael alore, kitijwoto ngasigerea a Yoab. Apon ngikapolok luuchik a Yoab ngiche taarae alojie. Apon tani Uria taarae. Abu Yoab tomea itwaan akisisakin Daudi ngakiro a ejie. Abu ngesi tolimok itwaan ni amearit tama, “Ani kilimok iyong ekapolon ngakiro a ejie daang kerumor, Epedori ngesi alemar kingit iyong tama, ‘Nyo irudarotor esi diyete ere akitojwore kesi? Peiyenete esi atamar epedorete kesi agumun ngimalea a amod anawasea a? Nyitamunito esi eger lokolong aarere Abimelek lokookeng a Gideon a? Ani enyaritae Sebes, emasuni aberu ache amoru nakires anawas sodi taara ngesi. Nyo bo irudarotor esi diyete awas?’ Ani kingit iyong ekapolon kongina, tolimok ngesi tama, ‘Aar tani ekapolon kon loochi enyaritae Uria.’ ” Abu itwaan ngini tolot nia Daudi kisisak ngakiro na adungokini ngesi Yoab atamar tolimok. Tolim tama, “Ajwoko ngimoe noi akidwang sua. Apot kesi topudut alore akitojwore sua anikalapatan. Nakaneni kipot sua atobuasi kesi naabor tananga lokidor a ere. Apot kesi togumut ngimalea a amod anawasea, sodi taarae ngikapolok kon luuchik ngiche, ekapolon. Aar tani Uria, lo erai ekapolon kon loochi.” Tolimok Daudi itwaan ni ameunitae ngini tama, “Kitititiny Yoab tolimok ngesi atamar nyiingolik niaronon, kainyo nyepedorio akiyen atamar ngae etoani alojie. Tolimok ngesi atamar kitijik ngitunga a ere kangolo lokojokon, tolema ere.” Ani iirari Besicheba atamar aar lokile keng, abu kigor tosutonok. Ani edaunosi ngirwa lua asutonokin, tomea Daudi itwaan alimokin ngesi atamar bu nawi a Daudi. Toliwor Besicheba aberu a Daudi, kidou ikoku nisapat ni arai ika Daudi. Nakaneni nyelakara Ekapolon Akuj kotere ngakiro na abu Daudi tosubak. Tomea Ekapolon Akuj ekadwaran keng Nasan nia Daudi tolimok tama, “Ayakasi ngitunga ngiarei lu alomito lore epei. Abarit itwaan ipei, tarai niche ekebootonit. Ameat itwaan nikabaran ngaatuk nakaalak ka ngamesekin. Ani ngolo eboosit, ameat imesek ipei bon nikile ni agieluni. Tochoik ngesi imesek ngini, kitanu anawi ka ngide keng aapei. Atiakanakini ngesi imesek ngini akimuj keng epewae etanea. Etamaseene a ekopo keng, ka akidak anakejen keng. Ekoni imesek ngini nakookeng. Akolongit apei, bu epeyonon nawi a ekabaran. Peasaki ekabaran ngolo akiar ibarasit keng tani kipeyounio epeyonon. Nakaneni, abu ngesi kirumia imesek a ekebootonit kangolo taarak epeyonon keng.” Abu Daudi tongo kotere ngakiro a ekabaran kangolo tolim tama, “Ekong jik tani Ekapolon Akuj na eyari, ejoikinit itwaan ni ekokini neni etoani! Ani kona asubea ngesi ngakiro na amoitanut nguna, echamit ngesi etachi imesek ngini ngatachet ngoomwon.” Tolimok Nasan Daudi tama, “Iyong ngesi itwaan ngini. Ngakiro na alimu Ekapolon Akuj na erai Akuj a Isirael kesi nugu, ‘Ketiliwori kolong ayong iyong ekapolon a Ngisirael, katoyuu a nia a Saul. Kainak ayong iyong apolou keng ka ngaberu keng. Ketiliwori ayong iyong ekapolon a akwap a Isirael ka Yuda. Arai kolong nyitemokino nguna, kainakinit ayong iyong nabo ngainakinet ngaarei. Nyo tokona iwounea iyong akiwap ngitalio lu kadungokinit ayong iyong? Nyo isubea iyong ngakiro naaronok nugu? Iari iyong Uria alojie. Imiekini iyong Ngiamon earete ngesi, ani erumor tolema iyong aberu keng! Tokona eliwor analesea kon kadaang epete lu etoakete alojie, kainyo iwouni iyong akiwap ngakiro kang ani ilemarea aberu a Uria kitiliwo, akon. Kalimokinit ayong iyong ekong dir atamar ketonyoikini ayong iyong itwaan ipei a awi kon kichan iyong. Alemuni ayong ngaberu kon itee iyong ainak itwaan niche. Eperete itwaan ngini ka kesi naparan. Isubi kolong iyong akisech idait, nakaneni emiekini ayong ngakiro nguna esubakinosi naparan, sodi taanyungareta Ngisirael daang.’ ” Tolim Daudi tama, “Asechak ayong Ekapolon Akuj.” Tatachak Nasan tama, “Kirimak iyong Ekapolon Akuj, nyitoani. Nakaneni ani kona imenyarea iyong, Ekapolon Akuj ani isubea nguna, etoani ikoku kon.” Abu Nasan tobongo nawi keng. Kitedekak Ekapolon Akuj idia a Daudi ni edouni aberu a Uria. Kilip Daudi Akuj esaki kitangalek idia. Tonger ngesi akimuj, toliwor nakwaare a akolongit kadaang, elomari ngesi namaniyat keng naperot sodi toper alokwap akwaar daang kiiya. Aloseenete ngikasukou a akai keng nikeng esakete akitonyoun ngesi, nakaneni towou ngesi. Awoununi ngesi tani akimuj ka kesi. Ani edaun ngirwa ngikan-kaarei, totoan idia ngini. Toema ngikasubak etich keng alimokin ngesi atamar atoana idia. Tolimut kesi tamasi, “Ani ngoon eringa idia eyari, pekitachanakini Daudi ngoni ngakiro nakisuruorea ngoni ngesi. Kikokini tokona ngoni kilimokini ngesi atamar atoana idia ai? Epedori ngesi awana bon!” Ani ingolikini Daudi kesi ingaingaanakinosi ngakiro, toyen atamar atoana idia. Sodi kingit ngesi kesi tama, “Atoana idia a?” Tatachakis tamasi, “Ee, atoana.” Tonyou Daudi kilotar ka akikierar ngitim keng, ani erumor tanap ngiworui ngiche. Abu ngesi tolot akilip alokai a Ekapolon Akuj. Ani ebongori ngesi kai keng, tolimok ngitunga atamar kainakis akimuj. Kirajakin ngesi akimuj napei ainakinere. Tolimokis ngesi ngikasubak etich keng tamasi, “Anukiro nugu isubi iyong? Ani ngoon eringa idia eyari, igoro iyong kotere ngesi ingerit akimuj. Nakaneni ani napei atoanea ngesi, tonyou iyong sodi kimuj!” Tatachak Daudi tama, “Ee, iteni dir aroneene ayong akimuj sodi egor na aringaakar ngesi eyari. Abala ayong kori kesieni ayong Ekapolon Akuj, kimiek idia toyar. Ani kona tokona atoanea ngesi, nyo tokona nabo aroneeneo ayong akimuj? Apedori ayong akiteyarun idia? Alosi ayong akolongit apei ni eyei ngesi, nakaneni nyebonguni ngesi ni ayei ayong nabo jik.” Abu Daudi kisililing Besicheba na arai aberu keng. Topero ngesi ka Besicheba, kidou ikoku nisapat ni alimokini Daudi ekiro be Solomon. Tominak Ekapolon Akuj idia ngini sodi todungok ekadwaran a Akuj Nasan atamar tolimok ekiro be Yedidia, ani aminar Ekapolon Akuj ngesi. Aringa Yoab erubakinit akitojwore ngitunga a ere a Raba, alo arai ere loapolon a akwap a Amon. Adikino ngesi elemari ere ngolo. Tomea ngesi ngitunga nia Daudi akisisare kona, “Arem ayong Raba, alema nipalem ewokeenere ngakipi. Tochunak tokona ngasigerea kon nache daang torem ere todema Ngiamon. Nyasaki ayong ademar Ngiamon ere ngolo kepuruun kotere ngakiro nguna.” Abu Daudi tochunak ngasigerea keng, tolot torem Raba, kidwang ngitunga a ere kangolo. Tolem Daudi ekiraun a egolit anakou a akuj anasubuna a Ngiamon anabe Milikom. Arai apotis a ekiraun kangolo ngakiloi ngatomwon-uni ka ngakan, nabo ayei asir lokiraun ngolo. Tolem Daudi ekiraun ngolo tanap. Tongata ngesi tani ngiboro lukaalak alore. Sodi tolimok ngitunga a ere kangolo atamar tolemut ngigirigirea, ka ngakutae ta ngaepe. Abu ngesi kitingak kesi akisub ngimataparea. Tosubea ngesi ngitunga a ngirerea kadaang a akwap a Amon ngakiro napei nguna. Apot ngesi ka ngitunga lu arukitotor tobongosi Yerusalem. Ayei lokookeng a Daudi lobe Abusalom nakaatokeng nakebusean anyaritae Tamar na arai apese. Abu lokookeng a Daudi epei lobe Amunon kisupa apese ngina. Tomina ngesi apese ngina noi, kitodeakakis ngakiro nguna, kainyo engolikinit ngesi atamar emam kona kiperi ka ngesi, kona araakar ngesi apese na nyepero ka ekile a ache, eratakinitae ngesi nyiiriamun ka ngikiliok. Nakaneni ayei Amunon lopae keng lotikamodeanan be Yonadab. Arai Yonadab lokookeng a lokaatokeng a Daudi alo be Chama. Tolimok Yonadab Amunon tama, “Irai iyong lokookeng a ekapolon. Nyo isiliyorotor ngirwa daang? Nyo pekilimokinea iyong ayong?” Tatachak Amunon ngesi tama, “Amina ayong noi Tamar na erai nakaatokeng alokaatokang alo be Abusalom.” Tolimok Yonadab ngesi tama, “Kiyechak atamar ideaka sodi kinapakin lokitanda. Ani ebuni apakon aanyun iyong, kisisak ngesi tama, ‘Tolimok kare nakaatokang Tamar bu kesimuj ayong. Asaki ayong ngesi kidorok akimuj ani eteeo ayong ngesi, ani erumor kesimuj ayong.’ ” Abu Amunon kiyechak atamar adeaka, tolot kinapakin lokitanda. Tolot ekapolon Daudi aanyun ngesi. Tolimok Amunon ngesi tama, “Kimiek kare Tamar bu kidorok ngakekio ngadi kane ani eteeo ayong ngesi, ani erumor kesimuj ngesi ayong.” Sodi tomea Daudi itwaan anyarare Tamar alokai a ekapolon, ebala, “Kape kai a Amunon kidorok ngesi akimuj.” Tolot Tamar inaa torukau Amunon eperi alokitanda. Tolem ngesi ngakiria tomunak, sodi kidorok ngakekio kaneni ani eteeo Amunon ngesi. Ani erumor kitaatan ngesi ngakekio sodi kiwaak natubwa inaa ngesi esaki tanyam, nakaneni towou ngesi akinyam. Tolim Amunon tama, “Tolimok ngitunga daang toloto.” Apot ngitunga daang torotokis. Abu ngesi tolimok Tamar tama, “Yau ngakekio nege a ekitanda kang sodi kisimuj ayong.” Tolem ngesi ngakekio sodi tolot ni ayei ngesi. Ani esaa ainakinere ngesi ngakekio, toruakin ngesi Tamar tama, “Bua atopero!” Tolim Tamar tama, “Meere kongina. Nyikitingak ayong akisub ngakiro na a ngileech ikote nugu! Eroko ngakiro nguna! Nyai ni ayaari ayong ngileech lu ikote lugu? Ani eliwor iyong, iliwor iyong nyiingok alo Isirael. Kisuruor kare ekapolon, ayeni ayong atamar kepotori ngesi ayong nikon.” Nakaneni towou ngesi akiirar ngakiro keng. Ani kona agogongio ngesi akidwang Tamar, abu ngesi totikoono Tamar, topero ka ngesi. Sodi Amunon toremokin Tamar noi. Toremokin ngesi Tamar noi akidwang tani eger losek aminar. Tolimok ngesi tama, “Topudo nikalapatan!” Tatachak Tamar ngesi tama, “Meere kongina, erono noi akitwarakin ayong atolot ekoni nege, idwangit tani akisech na tokona isubak iyong!” Nakaneni towou Amunon akiirar ngakiro a Tamar. Tanyarau ngesi ekasuban etich keng tolimok tama, “Kitwarak aberu naga torotok alongaren kang!” Kipudo ekasuban etich Tamar nikalapatan, togolok ekidor. Anapit Tamar eworu lokooyen towoyak ngakan. Anapeenete tanakookeng a ngikapolok loger ngolo ngirwa ngulu. Kiwasak ngesi ekuron nakou keng, tochil eworu keng, sodi torotok igoro, erapit ereet a ngakan. Ani eanyungari ngesi Abusalom lo arai lokaatokeng kingit tama, “Kiboliar iyong Amunon a? Nakaatokang, wara kare ngakiro nyiichan etau kon. Erai Amunon lokaatokon, kotere ngakiro nguna nyiilimok itwaan idio ngakiro nugu.” Sodi kiboi Tamar anawi a Abusalom, ialolongi, tosilikinite. Tongo ekapolon Daudi na eirarea ngakiro nguna asubakinosi. Toremokin Abusalom Amunon noi ani atikoonorea nakaatokeng Tamar, tapalik tani akisiruoreenen. Adaunet a ngikaru a ngiarei, etutubi Abusalom ngitunga ngajul a ngamesekin keng alo Baal Asor, diyete ere a Epiraim. Abu ngesi tanyarau talokookeng a ekapolon daang neni. Tolot ngesi nia ekapolon Daudi tolimok tama, “Ekapolon, etutubi ayong ngitunga ngajul a ngamesekin kang. Ipedorete iyong ka ngikapolok kon luuchik aponere losukukuu a?” Tatachak ekapolon tama, “Mam, lokookang. Eliwor ibore ngini akichan iyong noi erai kipot sua daang.” Torubak Abusalom ingisit ngesi, nakaneni towou ekapolon achamun, sodi tolimok ngesi atamar torotok kaneni. Nakaneni tolimok Abusalom tama, “Kimiek robo lokaatokang Amunon erukosi ka sua.” Kingit ekapolon ngesi tama, “Nyo isakea iyong ngesi bu inaa?” Abu Abusalom torubak ingisit ngesi, tanang ni achamunea Daudi atamar toloto Amunon ka talokookeng a Daudi luche daang kirukosi ka Abusalom. Tosubak Abusalom akimuj na etemokino erai aka ekapolon sodi tolimok ngikasubak etich keng tama, “Kiteto Amunon taanyungasi esaa lo emerakinor emuna. Ani kalimokini ayong esi abala, ‘Tarama Amunon,’ sodi taara esi ngesi. Warasi nyiieam! Eliworosi ngakiro nguna ayong kapaikinio. Totitinyeketo, warasi nyiitinenikis!” Apot ngikasubak etich ngulu kiwapa ngakiro na alimokini Abusalom sodi taara Amunon Todokasi talokookeng a Daudi luche daang losikiria, tamataros. Ani eringa kesi nyenanga nawi, tolimokinae Daudi kona, “Aar Abusalom talokookon daang, emam tani epei idongit!” Tonyou ekapolon tochil ngiworui keng ialolongi, sodi tadakakin nalup. Tochila tani ngikasubak etich lu arukito ka ngesi ngiworui kech. Yonadab lo arai lokookeng a lokaatokeng a Daudi alo be Chama, abu tolim tama, “Ekapolon, nyeara kesi talokookon daang, Amunon bon ngesi atoana. Ipedori iyong akiyen kotere akienyikin Abusalom atama atiakunit ngesi asubakin nguna napei kolong atikoonorea Amunon nakaatokeng nabe Tamar. Kotere ngakiro nguna, nyiinup atamar atoaka talokookon daang. Amunon bon aar.” Kebu Abusalom todok tolot. Abu asiger na eyoki ere taanyunga ngitunga lukaalak etiyauna, iwapito erot be Oronaim lo ayei nakook a emoru. Tolot ngesi nia ekapolon kisisak ngakiro a ngitunga kangulu. Tolimok Yonadab Daudi tama, “Talokookon kui eponito loger lotete kalimokinitor ayong iyong.” Ani napei arumorea ngesi alimun ngakiro nguna, todolut talokookeng a Daudi ka ngikasubak etich keng. Abu Abusalom todok, tolot nia ekapolon a akwap a Gechur, alo anyaritae Talimae lo arai lokookeng a Amiud. Kialolong Daudi nikooyen kotere lokookeng Amunon. Sodi todok Abusalom tolot Gechur, kiboi kaina a ngikaru a nguuni. Ani edaunos ngirwa lu ealolongio Daudi kotere akitu a Amunon, kimuu ngesi aanyun ka Abusalom. Ayeni Yoab atamar imuit noi ekapolon Daudi aanyun ka Abusalom. Abu Yoab tomea itwaan anyaraun aberu natikooson alomit Tekoa. Ani edoluni aberu ngina, tolimok Yoab tama, “Kiyechak atamar kigoro iyong isutonokini. Tanap ngiworui kon lu igoror isutonokini, nakaneni nyiikiara ngitim. Kiyechak atamar irai aberu na kigor nikooyen kesutonoki. Ani erumor tolot nia ekapolon tolimok ngesi ngakiro nakalimokini ayong iyong.” Abu Yoab tolimok ngesi ngakiro na elimuni. Tolot aberu nia ekapolon, toriedik tatap ereet ngalup idodiunit arima, sodi tama, “Kingarakinae kare ayong, ekapolon!” Kingit ekapolon ngesi tama, “Nyo isaki iyong?” Tatachu aberu ngina tama, “Ekapolon, arai ayong apuserut. Atoana kolong lokile kang. Ekapolon, ayakasi kolong ayong talokookang ngiarei. Akolongit apei, tongolopa kesi anaroatin ani amamakar itwaan ni etiaki. Abu epei taar loche. Tokona ekapolon, kanyoikis ayong ngiyenet kang daang, ebalasi ayong epoto lokookang ainak kesi taara ani aarea ikoku nisapat eyei. Inyasunete kesi ibore nipei ni eringa ayong egieno, sodi tongop ekile kang ikoku nisapat elimitere anakwap.” Tatachak ekapolon aberu ngina tama, “Tobongo nawi, adunguni ayong atamar tosubakinae ngakiro na isaki iyong.” Tatachak aberu ngina tama, “Ekapolon daang na isubakini iyong, kipaikinio ayong ka ngitunga a awi kang, emam iyong ka ngitunga a awi kon ibore isechito.” Tatachak ekapolon ngesi tama, “Ani keyei itwaan etamari ‘Ngwe’ toriku nikang, nyepedori ngesi nabo akichan iyong jik.” Tatachu aberu tama, “Ekapolon, kilip kare Ekapolon Akuj na erai Akuj kon, sodi eyenet kang lo ejoikinit etachakini akitu a lokookang, nyear lokookang.” Tatachak Daudi tama, “Kechikakinit ayong iyong ani a Ekapolon Akuj ana eyari atamar nyewanio lokookon tani wadiochichi.” Tolim aberu ngina tama, “Ekapolon, kimiekinae kare ayong atolim ibore ipei bon.” Tatachu Daudi tama, “Tolim.” Tolimok aberu ngina ngesi tama, “Nyo isechakinea iyong ngitunga a Akuj kona? Iwou iyong akimiekin lokookin tobongu ani kolong adokini. Kotere ngakiro nguna, irira iyong bon kotere ngakiro na tokona ilimuni iyong. Kitoaki ngoni daang kikoni ngoni ngakipi abukokin nalup, na emam itwaan eokuni nabo. Nyiteyaruununi tani Akuj ngikatoak, nakaneni epedori ekapolon asakun erot lo ebuunea itwaan ni adoki. Tokona ekapolon, abunit ayong nikon ani kabenyeta ngitunga atamar isubakini iyong ngakiro nakalimokini ayong iyong. Etamit ayong atamar iirari iyong ngakiro kang sodi kitoyuu ayong ani eyei itwaan ni esaki akiar lokookeng ka ayong, kitomunya anakwap ana kolong ainakini Akuj ngitunga keng. Abu ayong etam atamar kisiangari iyong ayong a ngakiro ana kichikakini, kainyo ikoni ekapolon emalaikat a Akuj. Ipedori tani dang akitiak nguna ejokak ka na eroko. Kimiek Ekapolon Akuj na erai Akuj kon kiruko ka iyong!” Tatachak ekapolon ngesi tama, “Asaki ayong akingit iyong akiroit, nakaneni ejoikinit iyong kilimokini ayong ngakiro na eraakasi ngaka iteni dir.” Tatachu aberu tama, “Ekapolon, kingitae ayong ibore nicha isaki iyong akingit daang.” Kingit ekapolon Daudi tama, “Meere mono cha dir Yoab kilomakini iyong nakiro nugu a?” Tatachu aberu ngina tama, “Ekapolon, ekong jik tani ibore ni italeunitoe daang, emam kona awouni ayong atachun akiroit na kingisit iyong. Erai dir ekapolon a ngasigerea kon Yoab kalimokini ayong ngakiro na asubakini ka na alimuni. Ekokini ngesi neni sodi torikinere eboyor a ngakiro kanu. Ios iyong ekapolon ikoni emalaikat a Akuj nabo iyeni ngakiro daang na esubasi.” Ani ekisidi, tolimok ekapolon Yoab tama, “Atiaku ayong akisub ngakiro na isaki iyong. Kape toriku esorokit lobe Abusalom tobuu nege.” Tadakakin Yoab nalup alongaren ekapolon Daudi idodiunit arima, sodi tolim tama, “Kipiari iyong Akuj, ekapolon! Ayeni tokona ayong atamar kitalakarito iyong ngakiro kang, ani ichamunea iyong asubakin ngakiro na kelipit ayong iyong.” Abu Yoab tonyou tolot Gechur sodi arikun Abusalom Yerusalem. Nakaneni abu ekapolon todung atamar nyiiboikin Abusalom kai a ekapolon Daudi. Tolim ekapolon tama, “Nyasaki ayong akingolikin ngesi.” Abu Abusalom kiboi alokai ana arai akeng a ilope, nakaneni nyebuno ngaren ekapolon. Amam itwaan iche alo Isirael ni ayenikinitae kotere akibuseanu keng, akidwang Abusalom. Amam ngesi ni echwangakina napei anakou tanang nakeju. Asamuk ngitim a akou keng, atubeene ngesi atubet apei ekaru epei, nacha ewoyakerotor, tasamukuko. Aliwonor apotis a ngitim keng akilo apei, itemio a ekiteme alo itemeeneo ekapolon. Ayakasi Abusalom talokookeng nguuni ka nakookeng nakebusean noi anyaritae Tamar. Kiboi Abusalom ngikaru ngiarei alo Yerusalem eringa nyeanyuna ekapolon. Abu ngesi tomea itwaan anyaraun Yoab. Asaki ngesi Yoab tolot aanyun ekapolon kotere ngakiro keng, nakaneni towou Yoab abunere. Tomea nabo Abusalom itwaan anyaraun Yoab, nakaneni towou nabo Yoab abunere. Sodi tolimok Abusalom ngikasubak etich keng tama, “Kingolikisi a, idunyasi amana a Yoab ka nakang, nabo erai erau ekoniunit alomana kangina. Kapesi kichunyakisi akim.” Apot kesi toloto kichunyakis amana akim. Tolot Yoab nawi a Abusalom kingit ngesi tama, “Nyoni echunyeta ngikasubak etich kon amana kang?” Tatachak Abusalom tama, “Echunyete kainyo ameunit ayong itwaan anyaraun iyong nakaneni towou iyong abunere. Asaki ayong iyong tolot kingit ekapolon ibore nikolong anyounio ayong alo Gechur abu nege. Kejok tani kolong ayong eboikin inaa.” Torubak Abusalom iruoro ebala, “Asaki ayong iyong tasaku erot lo kianyunor ayong ka ekapolon. Ani kasechit ayong, ejoikinit ngesi kaari ayong.” Abu Yoab tolot nia ekapolon Daudi tolimok ngesi ngakiro na alimokini Abusalom. Tomea ekapolon itwaan anyaraun Abusalom. Tolot Abusalom nia Daudi sodi toriedik tojuk ereet ngalup alongaren Daudi. Tonuak ekapolon ngesi. Ani ekisidi, tolem Abusalom aurukuk, ka ngangolei ta ngikiliok ngitomwon-kan lu eliworosi ingarenete ngesi. Anyoununi ngesi nataparach elilim, tolot towo alorot alo a ekidor a ere. Esaa daang lo ebunio itwaan ni eyakasi ngakiro na esaki ekapolon totiak, toliwor enyaraari Abusalom ngesi kingit ni ebunitor. Ani kelimoki itwaan ngesi ekitela keng kerumor, tolimok Abusalom ngesi tama, “Kingolik a, iyookino ngakiro nugu alowae kon, nakaneni emam itwaan eyei nege eseunit ekapolon apupokin ekies kon.” Ani erumor, iatakini Abusalom tama, “Arai bo atarai ayong ekatubon ngakiro dang! Kebu cha itwaan daang nikang, ni eyei ibore epega, kori ekies, sodi atotiakak ayong ngakiro eriyan.” Ani na eapuunea itwaan nia Abusalom toriedik alongaren keng, kitorwaa Abusalom akan toruakin ngesi, tonuak. Abu Abusalom tosubeene ngakiro na ikote nguna ani eyakasi Ngisirael daang lu aponeenete nia ekapolon esakete atubokino ngakiro eriyan. Kotere erot ngolo, apot Ngisirael tominakis ngesi. Adaunet a ngikaru a nguomwon, tolimok Abusalom ekapolon Daudi tama, “Ekapolon, kimiekinae ayong atolot Eburon sodi erichakinea akichikakinet kolong echikakini Ekapolon Akuj. Kolong na ebooyo ayong alo Gechur anakwap a Siria, abu ayong echikak Ekapolon Akuj atamar ani kabua ayong Yerusalem, elipi ayong ngesi alo Eburon.” Tolim ekapolon tama, “Kape nikaalimon.” Abu Abusalom tolot Eburon. Nakaneni tomea ngesi ngitunga lotela daang a Ngisirael tolimok tama, “Ani iirarete esi ngaburucho ekutakinio, tachalutu tamasi, ‘Aliwor Abusalom ekapolon alo Eburon!’ ” Ayakasi ngitunga ngamiae ngaarei lu anyaraunit Abusalom akirukor ka kesi alo Yerusalem. Peayenete kesi ngakiro na atukit Abusalom akisub aloose kesi elemuu. Ani na epeyoo Abusalom ngakipeyos, tomea itwaan anyaraun Aisopel lo arai itwaan a ere a Gilo. Arai Aisopel eketutukon a ekapolon Daudi. Abu eger lo atukitere akinger ekapolon kisikokin, talalaketa ngitunga lu ebakito alowae a Abusalom. Bu itwaan tolimok Daudi tama, “Aminakis Ngisirael Abusalom, ewapakis.” Sodi tolimok Daudi ngikapolok luuchik keng daang ayakasi Yerusalem tama, “Ejoikinit ngoni kirotokini kane atipei erai kisaki ngoni abuchar ani a Abusalom! Tonyoutu atipei! Ani kemam, enanguni ngesi nege atipei kidwang ngoni sodi taar itwaan daang alore!” Tatachut kesi tamasi, “Ee, ekapolon, kisadit sua akisub ibore daang ni ilimuni iyong.” Abu ekapolon torotok, erukito ka ngitunga a awi ka ngikapolok keng luuchik. Kimiek ngesi ngapesur keng a ngabwes ngatomon na asaki kiyoko akai a ekapolon. Ani na arotokinioto ekapolon ka ngitunga keng alore, towaa alokai ana a esal. Towaa ngikapolok keng luuchik daang alo diyete esaa lo etorunioto ngasigerea na eyokiyete ngesi ngaren keng. Tani ngasigerea ngamiae nakan-kapei kolong erukunete ka Daudi alo Gas, apot kitorut neni. Abu Daudi tolimok Itai lo arai ekarikon a ngasigerea kanguna tama, “Nyo isakea iyong akirukor ka sua? Tobongo kiruko ka ekapolon lokitetet. Irai iyong itwaan nia akwap anache, itwaan nikolong idokini anakwap kon. Aringa been iyong ilomi nege. Nyo tokona nitibore kemiekinea ayong iyong kirimi ka ayong akwap en? Nyayeni ayong tani ni alosi. Tobongo kirukosi ka ngitunga a akwap kon. Agasi atamar toliwor Ekapolon Akuj loajokon ka lo emunoi anikon.” Nakaneni tatachak Itai tama, “Ekapolon, ekongi ayong a ekiro a Ekapolon Akuj atamar kirukori ayong ka iyong wadaang nicha ilosi iyong, tani ketamar kaario.” Tatachak Daudi tama, “Itemokino, kape ngaren!” Abu Itai torotokis ka ngasigerea keng ka ngitunga a ngawiyei kech. Kikalout ngitunga iuteete na arotokinioto ngirukitos a Daudi. Todok ekapolon ingolol a Kidiron, kiwapakis ngitunga lu arukitotor, toloto daang lowae lo a ariet. Ayei Sadok lo arai emuron a Akuj neni, arukito ka Ngilawi lu adakito asaduku a Akuj na italeunitoe. Tosipokis kesi asaduku kwap, apot nyeelemut tanang na arotokinioto ngitunga daang alore. Abiasar dang lo arai emuron a Akuj, ayei neni. Sodi tolimok ekapolon Sadok tama, “Tobua asaduku a Akuj lore. Ani kelakara Akuj kotere ayong, kabuuni ngesi ayong akolongit ache ataanyu ka akingolikin ni iwaakinitae. Ani pekitalakarito ngesi ngakiro kang, kimiekisi bocha ngesi katosubea ayong ngakiro na esaki.” Abu nabo ekapolon Daudi tolimok Sadok tama, “Kingolik a, toriko lokookon Aimaas ka Yonasan lo erai lokookeng a Abiasar sodi tobongo lore akaalimon. Kingolik a, edari ayong ani ichierea angolol anariet, tanang eirari ngakiro anikon.” Apot Sadok ka Abiasar tobuasi asaduku a Akuj Yerusalem kiboikinos neni. Todok Daudi emoru a ngikito a akimiet igoro. Aturi ngesi nabo kimuk ereet keng idodiunit ibore ngini atamar ialolongi ngesi. Kimuko ngitunga daang lu arukito ka ngesi ngakies kech, kigoros nabo dang. Ani elimokinio Daudi atamar emorikin Aisopel ka Abusalom kotere akinger ngesi, kilip Daudi tama, “Ekapolon Akuj, kiloch kare ngakiro na itutuki Aisopel Abusalom toliworos ngapasiek!” Ani enangi Daudi kidiama emukura, ni ilipeenere Akuj, abu kiriamun ka lopae keng lo amuno ngesi noi lo anyaritae Uchai lo arai Earakit. Achilichilit Uchia ngiworui keng, nabo ewasakinit ekuron nakou. Tolimok Daudi ngesi tama, “Emam ibore kingarakini iyong ayong erai kiruko ngoni. Nakaneni ipedori iyong akingarakin ayong erai kibongo lore sodi tolimok Abusalom atamar isubi tokona iyong etich niajokon loger lokolong isubea etich a apakeng. Kirichakin iyong kitopeg ngakiro daang na elimuni Aisopel. Eyakasi ngimurok a Akuj Sadok ka Abiasar inaa, kisisak kesi ngakiro daang na iirari iyong alokai a ekapolon. Erukito kesi ka talokookech Aimaas ka Yonasan, imeuni iyong kesi nikang tolimok ngakiro daang na ianyuni iyong.” Abu lopae keng a Daudi lo anyaritae Uchai tanangu lore esaa lopei adolunio Abusalom. Ani iporori Daudi anaita a emukura wadio, kiriamun atipei ka Siba, lo arai ekasuban etich a Mepiboches. Ameat Mepiboches ngisikiria lu ewokito ngamugati ngamiae ngaarei, ka ngarinyo a ngimusabib amiat apei, ka ageor naajokon na arai amiat apei, ta etuo lo eleleba emuna. Kingit Ekapolon Daudi ngesi tama, “Nyo iyaunitor iyong ngiboro lugu daang?” Tatachak Siba tama, “Ekapolon, arujunit ayong ngisikiria tometa ngitunga a awi kon. Ayaunit ngamugati ka ageor tanyama ngitunga. Ani emuna, lo emaase ngitunga na eburunea anariet.” Kingit ekapolon ngesi tama, “Nyaali Mepiboches lo erai etatait a ekapolon kon Saul?” Tatachak Siba tama, “Edong Yerusalem kainyo enupit atamar kabuakinete ngesi Ngisirael apolou ka a apaakeng Saul.” Tolimok ekapolon Siba tama, “Ibore daang ni erai ika Mepiboches, erai ikon.” Tatachak Siba tama, “Arai ayong ekasuban etich kon. Agasi ayong atamar ketalaka iyong ekapolon kang ngirwa daang!” Ani enangi ekapolon Daudi ni enyaritae Baurim, kisiriamu ngesi eyenet a Saul epei anyaritae Chimei, lo arai lokookeng a Gera. Echieni ngesi Daudi esaa lo esiriamunea. Kimas ngesi Daudi ka ngikapolok keng luuchik a ngamoru. Kikok ngesi neni esaa lo eriamitotor Daudi ngirukitos keng ka ngasigerea na eyokiyete. Ayakasi kesi lowae lo aloteten ka kedieny a Daudi. Kimeny Chemei ngesi tama, “Kape ekaaran! Kape erukoot! Ilemari kolong iyong apolou a Saul, nakaneni kirirae tokona iyong Ekapolon Akuj ani iarea ngitunga ngikaalak a awi a Saul. Ainaki Ekapolon Akuj lokookon Abusalom apolou, inyasun iyong ekaaran!” Abichal lo anyaritae itiokeng Seruya, tolimok ekapolon Daudi tama, “Ekapolon, nyo imiekinitor iyong iingok en kichieni iyong? Kimiek atolot atotub akou keng!” Tolimok ekapolon Abichai ka lokaatokeng Yoab tama, “Meere ngakiro nugu ngaka akiding kus. Ani kechieni ngesi ayong ani ameunea Ekapolon Akuj, ngae iche epedori alimun atamar nyo ikonea neni.” Tolimok Daudi Abichai ka ngikapolok keng luuchik daang tama, “Esaki lokookeng akiar ayong. Nyo tokona ikilaaritotor esi ngakiro a itwaan ani a ekitela a Benjamen kaen? Ekapolon Akuj alimokini kesi atamar kecheon ayong. Nyiikachikis ngakiro keng, kimiekisi kecheon ayong. Epedori Ekapolon Akuj aanyungar ngichan kang sodi ataanyu ayong apiaro na ilunyokin nakicheno naga.” Apot Daudi ka ngirukitos keng kiwapakis erot, kiwapak Chimei kesi iwapit akook a emukura. Echieni ngesi kesi, kimasamasae a ngamoru, ka akuruonokin ngalup eloose. Aburunit ekapolon ka ngirukitos keng daang na anangeta Yorudani. Apot kesi kiangasi kaneni. Tolomasi Abusalom ka Ngisirael daang lu arukito ka ngesi Yerusalem. Arukito kesi ka Aisopel. Abu Uchai lo arai lopae keng a Daudi lo amuno ngesi na eriameta ka Abusalom, kirema tama, “Kiboi ekapolon nikooyen! Kiboi ekapolon nikooyen!” Kingit Abusalom Uchai tama, “Ikwa ikoni eger imunor iyong lopae kon nege a? Nyo peirukoreta iyong ka lopae kon Daudi?” Tatachak Uchai tama, “Kekok ayong kirukori ka ngesi ai? Ebakit ayong alowae alo eyei ngolo aseu Ekapolon Akuj, ka ngitunga lugu, ta Ngisirael daang. Kiruki ayong ka iyong. Ngae mono nabo iche ejoikinit ayong asubi etich keng, ikwa meere lokookeng a ekapolon kang a? Asubi ayong tokona etich kon loger lokolong asubea etich a apakon.” Sodi torei Abusalom kingit Aisopel kingit tama, “Ani kona tokona kinangunea ngoni nege a, isaki iyong ekokisi ai?” Tatachak Aisopel tama, “Kape topero ka ngaberu napesur a ngabwes daang nangoon emiekini apakon iyokiyete akai a ekapolon. Sodi toyen itwaan daang alo Isirael atamar eyeni apakon atamar irai iyong emoit keng. Kotere ngakiro nguna elakarosi ngirukitos kon.” Apot kesi kigurosi eam a Abusalom alokidiama akai a ekapolon. Toloma Abusalom neni iteete ngitunga daang topero ka ngapesur a ngabwes a apakeng. Ngakiro cha daang na alimuni Aisopel ngirwa ngulu, anupitae ekote ngakiro naadwarak a Akuj a alope. Ewapito Daudi ka Abusalom ngakiro nguna. Ani adaunet a ngirwa a ngidikidio, tolimok Aisopel Abusalom tama, “Kimiek atoseu ngikiliok ngabunge ngatomon ka ngaarei. Ani nakwaare a akolongit kana, ewapakini ayong Daudi. Etijikini ayong ngesi eringa eburunit, elilimiyorit. Ebuli ngesi kialaros ngasigerea keng daang. Aari ayong ekapolon bon, sodi atobuu ngasigerea keng daang nikon, kikok ateran na ebuunitae nia ekile keng. Ejoikinit iyong iari ekile epei bon, emam ibore etapi ngitunga luche daang.” Tojoikis ngakiro nguna Abusalom ka ngikarikok a Ngisirael daang. Tolim Abusalom tama, “Tanyarautu tokona Uchai eirasi ngakiro na elimuni.” Ani edoluni Uchai, tolimok Abusalom tama, “Ngakiro nugu kesi kilimok sua Aisopel, kiwap tokona sua ngakiro nugu. Ani pekiwap, tolimokinae iyong sua atamar kikokini ai?” Tatachak Uchai tama, “Akolongit naga, nyejokak ngakiro nakilimok iyong Aisopel. Iyeni iyong atamar apakon Daudi ka ngasigerea keng, ejwoko. Ededeng kesi ikote ebu lo edemaritae ngitak keng. Erai apakon asiger na enaikinit ejie, nabo nyiboyeenete ngesi ka ngasigerea keng awapei nakwaare. Tokona ngon, edukit ngesi anaburibur, kori awache. Napei itijikinio Daudi ngasigerea kon, itwaan cha daang ni iirari ngakiro a ejie kangolo, etamari edwang ngasigerea kon. Eliwor tani itwaan nikatitinyon noi alo Isirael, itwaan nikaadengan loger a engatuny, eemi kainyo eyeni daang alo Isirael atamar erai apakon itwaan nikajwon noi, nabo ejwoko ngasigerea keng. Ngakiro na alimuni ayong kesi na abala tochunakisi Ngisirael daang wapei, napei alo Dan tanang Beer-cheba, totiau alalau kech alalau a asinyen ana eyei lokwaas a anam. Ani erumor, torik iyong elope kesi lojie. Kisakuni ngoni Daudi anicha eyei, sodi etijikisi ngesi eringa nyeyena atamar anukiro esubasi. Emam ngitunga keng kori ngesi elope ni idongi eyari. Ani kebongo ngesi lore, elemunete ngitunga yok ngaunoi kiriyasi ere tooma nadipo. Emam amoru tani apei idongi kidiama emukura.” Tamasi Abusalom ka Ngisirael daang, “Ejokak ngakiro a Uchai idwangito na Aisopel.” Atiakunit Ekapolon Akuj atamar nyiwapio ngakiro a Aisopel na ajokak, sodi taanyunea Abusalom ngakiro naaronok. Abu Uchai kisisak ngimurok a Akuj Sadok ka Abiasar ngakiro na etutuki ngesi Abusalom ka ngikarikok a Ngisirael, ta ngakiro nasek etutuki Aisopel kesi. Kiatak Uchai tama, “Tomeasi tokona ngitunga ni eyei Daudi atipei, nyeeper akwaar naga ni ichierea angolol anariet. Nakaneni ejoikinit ngesi edoki angolol a Yorudan atipei, sodi nyiirumun ngesi ka ngitunga keng daang taarae.” Lokookeng a Abiasar lo anyaritae Yonasan ka lokookeng a Sadok lo anyaritae Aimaas, adukito alolelea enyaritae Enirogel, alodiyete Yerusalem. Peasakete kesi taanyungarae elomarete lore. Aloseene akedalan sodi tolimok kesi ngakiro na esubanakinosi, ani erumor toloto kesi tolimokis ekapolon Daudi. Ani akolongit apei, taanyunga idia iche kesi tolot tolimok Abusalom. Apot kesi kikomakis akiduk alokai a itwaan a iche alo Baurim. Ayei akar diyete akai keng, sodi tolomasi kesi kare ngina. Tolem aberu a ekile kangolo apukenit kimukok nakituk a akar, ani erumor kiealak ngikinyam kidiama apukenit, sodi tongop kona eyeni itwaan atamar eyakae neni. Pot ngikapolok luuchik a Abusalom nawi ngina kingita aberu tamasi, “Nyaalu Aimaas ka Yonasan?” Tatachu aberu ngina tama, “Adokasi ekwakaye angolol.” Apot ngitunga ngulu tasaka kesi ani engopikinete, tobongosi Yerusalem. Ani kerotokis kesi kerumor, topudut Aimaas ka Yonasan alokare, toloto akisuruor ekapolon Daudi. Apot kesi tolimokis Daudi ngakiro na atukit Aisopel anikeng. Sodi tolimokis Daudi tamasi, “Tonyou atipei, todoka ekwakaye angolol.” Apot Daudi ka ngitunga keng kisiakis adokar ekwakaye Yorudan. Ani enangi ni echilea nanyang, adokarito kesi daang ekwakaye. Ani ingolikini Aisopel atamar awoun akiwapakin ngakiro na alimuni ngesi, abu todoka losikiria keng, tobongo lore keng. Ani kesubaki ngesi ngakiro a awi keng kerumor, abu kinenekin lokitoe tomied. Tonukakinae ngesi nalielin a ngitunga a awi keng. Abu Daudi tanang lore a Maanaim esaa lo adokareta Ngisirael ekwakaye Yorudan. ( Abu Abusalom kitiliwo Amasa ekarikon a ngasigerea, kilunyokin nados a Yoab. Arai Amasa lokookeng a Yeser alo arai Echimaelit. Abigail nakookeng a Naach arai itiokeng. Arai nabo Abigail nakaatokeng a itiokeng a Yoab ana anyaritae Seruya.) Topero Abusalom ka ngitunga keng nakwap a Gilead. Ani enanguni Daudi Maanaim, kisiriam Chobi lo arai lokookeng a Naach, lo a ere a Raba alo eyei nakwap a Amon. Kisiriam nabo Makiri lo arai lokookeng a Aniel, lo a ere a Lodebar. Kisiriam tani Barisilai lo a ere a Rogelim alo a akwap a Gilead. Yaut kesi ngiboro luperiet, ka ngatubwae nachukul, ta ngamoti nalupei. Yaut tani ngakanoi, ka erau ka ngakiria, ka epeipe lo epeitoe, ka ngimare ka auk a ngimare, ka akimiet a ao, ka akidietet, ka akimiet, ta ngamesekin ngache. Ayenete kesi atamar enyamit Daudi ka ngitunga keng akoro ka akure, toburunite anariet. Tochunak ekapolon Daudi ngasigerea keng daang wapei, totiakatiaka kesi pena najoresio na eraakasi apei abunget apei, tarai nache amiat apei. Toseu ngesi ngikarikok a ngajorei kanguna. Ani erumor, kitorotok ngesi kesi eraakasi ngajorei ngauni. Ngikarikok a ngajorei kanguna kesi Yoab, ka lokaatokeng Abichai, ta Itai. Arikit ipei kech ajore apei. Sodi tolimok ekapolon Daudi ngasigerea keng tama, “Kirukori ayong elope ka esi.” Tatachakis kesi ngesi tamasi, “Nyiibu akirukor ka sua. Kainyo, ani kimatar sua, nyemisikinete ngimoe yok ngakiro nguna. Kori ani ketoaka tani epewae kosi, nyemisikinete ngimoe yok ngakiro nguna. Nakaneni ikwaan iyong ka ngitunga ngabunge ngatomon anikosi. Ejoikinit idongi iyong lore nege sodi tomeunu nikosi ngiboro lu kingarakinor.” Tatachak ekapolon tama, “Ewapakini ayong ngakiro na ingolikinito esi atamar kesi ejokak.” Sodi towo ngesi alokwaas a ekidor, topudut ngasigerea keng a ngajorei ana ayakasi ngitunga abunget apei ka na ayakasi ngitunga amiat apei. Todungok ngesi Yoab, ka Abichai, ta Itai tama, “Kotere ayong, nyiiwan esorokit lo be Abusalom ngolo.” Apot ngasigerea daang kiirasi Daudi edungokini ngikapolok keng luuchik kongina. Apot ngasigerea a Daudi toloto naroatin sodi tojwoto ka Ngisirael anamoni a Epiraim. Kidwanga ngasigerea a Daudi Ngisirael niaronon noi akolongit ngina. Taarae ngitunga ngabunge ngatomwon-arei. Topetakin ejie akwap wadaang, sodi totoaka ngitunga lukaalak anamoni akidwang lu atoakete alojie. Kiriamunos Abusalom ka ngasigerea ngache a Daudi atipei. Adokit Abusalom esikira, ani itori esikira kwap echoke, tongichakin akou a Abusalom naten a ekitoe. Kiporo esikiria sodi kidong Abusalom iyeloyelo. Kingolik epei a ngasigerea a Yoab ngesi tolot alimokin Yoab ebala, “Ekapolon, engolikini ayong Abusalom iyeloyelo alochoke!” Tatachak Yoab ngesi tama, “Ani na ianyungarea iyong, nyo peiarea iyong ngesi kaneni? Kainakinit ayong iyong ngaropiyae ngatomon ka aruba.” Nakaneni tatachak ngesi itwaan ngini tama, “Tani kiinak ayong ngaropiyae abunget apei, pekatapit ayong lokookeng a ekapolon. Kipupi sua daang ekapolon kidungokini iyong, ka Abichai, ta Itai ebala, ‘Kotere ayong, nyiiwan esorokit lobe Abusalom ngolo.’ Arai atama ayong nyewapi ngakiro a ekapolon ataar Abusalom, kiira ekapolon ngakiro nguna. Iiranari ngesi ngakiro daang. Ayeni ayong atamar pekiikinit iyong ayong.” Tolim Yoab tama, “Nyetadauni nabo ayong esaa eche anikon.” Tolem ngesi ngakwaaras ngauni kichumea Abusalom lorarum eringa eyari, iyeloyelo alochoke. Apot ngasigerea ngatomon a Yoab kirudun diyete Abusalom taara jik. Todung Yoab atamar tokutakinae aburuch tojongoto ngitunga ejie. Sodi tobongut ngasigerea keng ani erisitotor Ngisirael. Totiyaut kesi akwaan a Abusalom, tochakakis nadui natikooyen anamoni, ani erumor tosenokis ngamoru. Tamataros Ngisirael daang, tobong itwaan daang nawi keng. Ngirwa lu ayarea Abusalom, abu toduk ibore ni itamunere ngesi nadipo a ekapolon, kainyo amam ngesi ikoku nisapat ayei ni adikino idongi tolimitere ekiro keng. Abu ngesi tolimok ibore nikisitamunet ngini ekiro keng a ilope. Enyaritae tokona ibore nikisitamunet ngini, “Akisitamunet a Abusalom,” tani tokona. Abu Aimaas lo arai lokookeng a Sadok tama, “Kimiek epungar ni ekapolon atolimok ngesi atamar ayuu ngesi Ekapolon Akuj alomoe keng.” Tatachak Yoab ngesi tama, “Mam, nyiyaari iyong akolongit naga ngakiro naajokak. Ipedori iyong ayaar akolongit ache, nakaneni meere tokona, kainyo atoana lokookeng a ekapolon.” Sodi tolimok ngesi ekedalan keng lo a akwap a Kuch*g** tama, “Kape tolimok ekapolon ngakiro na ingolik iyong.” Kijuuru ekedalan ngolo, sodi tamatar. Tolim Aimaas nabo tama, “Nyakachit ayong ngakiro na esubakinosi. Kimiekinae kare ayong dang ayaa ngakiro naajokak.” Kingit Yoab ngesi tama, “Nyoni isakea iyong akikokin neni, lokoku? Emam ebachit kiinakinio iyong.” Tolim Aimaas nabo tama, “Tani keyakasi na esubakinosi, asaki ayong alosit.” Tolimok Yoab tama, “Kape robo.” Abu Aimaas tamatar, kiwapak erot kitor nadipo a Yorudan, sodi kilany ekedalan atipei. Ebooyi Daudi anakidingos a ekidor alo alotooma ka lo anikalapatan a ere. Tolot eketeon a ere todoka kidiama awas, sodi towo alokidiama ekidor. Ani ingoliari ngesi, taanyunga itwaan ekeri alopei. Kirema eketeon ere sodi kisisak ekapolon. Tolim ekapolon tama, “Ani kerai ngesi bon, eyaunit ngakiro naajokak.” Abu ekakeran ngolo taapuu diye. Ani erumor kingolik eketeon a ere itwaan iche ekeri alopei sodi tanyara eketeon ekidor tolimok tama, “Itwaan iche yi ekeri!” Tatachu ekapolon tama, “Eyaunit ngini dang ngakiro naajokak.” Tolim eketeon ere tama, “Ekeri itwaan ni ekingaren loger a Aimaas.” Tolim ekapolon tama, “Erai ngesi itwaan niajokon, eyaunit ngakiro naajokak.” Abu Aimaas kirema kimala ekapolon, tadakakin nalup alongaren keng, sodi tama, “Ekiro a Ekapolon Akuj ana erai Akuj kon, kipuroe. Ekapolon, kotere ngesi, idwang iyong ngitunga lu ngoon kingerete iyong!” Kingit ekapolon tama, “Ani bo esorokit lobe Abusalom, nyaanu ngache anikeng?” Tatachak Aimaas tama, “Ekapolon, nakameunea ayong ekarikon a ngasigerea kon Yoab, abu ayong engolik ekurikur loationon, nakaneni nyayeni ayong atamar kerai eka inyo.” Tolim ekapolon tama, “Torei towo kaneni.” Abu ngesi torei towo kaneni. Sodi todolu ekedalan lo a akwap a Kuch tolimok tama, “Ekapolon, kainunit ayong iyong ngakiro naajokak! Akolongit naga, idwang iyong daang lu kingerito iyong, kotere Ekapolon Akuj!” Kingit ekapolon tama, “Ani bo esorokit lo be Abusalom, nyaanu ngache anikeng?” Tatachak ekedalan tama, “Ekapolon, esibit ayong tosubakinos ngakiro na asubakinosi anikeng alomoe kon kadaang.” Kialolong ekapolon noi. Tolot ngesi todoka kai na ayei diyete ekidor, sodi kikalou. Ani na alosio ngesi, kigor ebala, “Wae, lokookang wae, lokookang Abusalom! Lokookang, arai bo tarai ayong atoanit kidong iyong dang! Lokookang Abusalom!” Tolimokinae Yoab atamar igoro ekapolon Daudi esutonokini kotere Abusalom. Abu alakara na edwangeta kesi Ngisirael kiloch akolongit ngina ani eyakasi ngasigerea a Daudi toliwor akialolong ani eirareta kesi atamar igoro ekapolon lokookeng. Tolomasi kesi lore ekiilingat, loger a ngasigerea ana eemete tamataros alojie. Kimuk ekapolon ereet keng kiute ebala, “Wae, lokookang! Lokookeng Abusalom! Abusalom lo irai lokookang!” Abu Yoab tolot kai a ekapolon sodi tolimok tama, “Akolongit naga, isurum iyong ngasigerea kon ngileech. Ngasigerea na eraakasi kesi kiyuunete iyong, ka talokookon, ka tanakookon, ka ngaberu kon, ta ngapesur kon a ngabwes. Iremokino iyong lu kiminasi iyong, tomina lu kiremokino iyong! Idodiu iyong atamar nyikachit ngakiro a ngikapolok kon aluuchik, ta na a ngikasubak etich kon. Engolik tokona ayong atamar, arai atotoaka sua luche daang kidong Abusalom eyari, kilakara iyong. Tonyou tokona tolot kisuruor ngitunga kon talakaros. Ani pekikok iyong neni ekong jik tani Akuj, emam tani ipei kech iwalakini irukito ka iyong. Eliworosi ngakiro nguna naaronok noi anikon akidwang na ianyu iyong napei kanuan.” Abu ekapolon tonyou, tolot kiboikin diyete ekidor a ere. Kiirasi ngitunga keng atamar eyei ngesi neni, sodi tochunar kiriama ngesi a ngiwaitin kadaang. Apot Ngisirael kiealaros, tolot itwaan daang nawi keng. Tolomakis kesi akiburare make alowaitin kadaang a akwap tolimonokin make ebalasi, “Kiyuu ngoni ekapolon Daudi alomoe yok. Kiyuu ngesi ngoni ani eyakasi Ngipilisti, nakaneni erita tokona Abusalom ngesi arotoki anakwap. Kiseuni ngoni Abusalom toliwor ekapolon yok, nakaneni aar tokona ngesi alojie. Nyo tokona peebuunea itwaan idio ekapolon Daudi?” Abu ekapolon Daudi kiira ngakiro na eruorosi Ngisirael. Sodi tomea ngesi ngimurok a Akuj lu anyaritae Sadok ka Abiasar akingit ngikarikok a Yuda ebalasi, “Nyo eraakar esi lu esal ipote abuun ekapolon kai keng? Iraakasi esi ngiyenet kang, lu iraakasi ngakoyo ka ngaakot a akwaan kang. Nyo eraakar esi lu esal kibuunete ayong?” Tolimok Daudi kesi atamar tolimokis Amasa kona, “Irai iyong eyenet kang napei tokona jik, ketiliwori ayong iyong ekapolon a ngasigerea kilunyokin nados a Yoab. Kimiekisi Akuj kataar ayong erai pekekok neni!” Apot ngitunga daang a Yuda tachamut ngakiro na alimuni Daudi. Tomeasi kesi itwaan alimokin kesi atamar tobongut ka ngikapolok luuchik keng daang. Ani na Abongunitor Daudi, kiriamun ka ngitunga a Yuda nangolol a Yorudan. Aponito ngitunga ngulu alo Giligal, akitenun ngesi edoki angolol. Esaa lopei ngolo, Chimei lokookeng a Gera lo abunit alore a Baurim, tolot atipei Yorudan akisiriamiar ekapolon Daudi. Arukito ngesi ka ngitunga a ekitela a Benjamen abunget apei. Bu tani Siba lo arai ka talokookeng ngitomon ka ngikan, ta ngikasubak etich ngitomwon-arei. Apot kesi tanangut Yorudan eringa ekapolon Daudi. Todoka kesi angolol esakete akitenun aloturu a ekapolon edoki angolol, ka akisub ibore daang ni asaki ekapolon Daudi. Ani na asakea ekapolon daudi akidok angolol, tadakakini Chimei kwap alongaren keng sodi tama, “Ekapolon, kimiek kare kimuriakis ngakiro naaronok asubi ayong akolongit na irotokinio iyong alo Yerusalem. Nyikiman ayong kori nyiitamana nabo ngakiro nguna. Ekapolon, ayeni ayong atamar asechit ayong. Ngakiro nguna kesi araakar ayong itwaan nia ekingaren alotela alu elomito lowae lo alokwap abuni akisiriam iyong ekapolon, akolongit naga.” Tolim Abichai lokookeng a Seruya tama, “Ejoikinit Chimei eario kainyo elami ngesi ngolo aseuni Ekapolon Akuj toliwor ekapolon.” Nakaneni tolimok Daudi Abichai ka lokaatokeng Yoab tama, “Ngae Kingisit esi atamar ikokinio ai? Isakete esi akichan ayong a? Ayong arai ekapolon a Ngisirael tokona, nakaneni emam Esiraelit eario akolongit naga.” Sodi tolimok ngesi Chimei tama, “Kalimokinit ayong atamar nyikiario iyong.” Abu Mepiboches lo arai etatait a Saul, bu akisiriam ekapolon Daudi. Napei kolong arotokinio ekapolon Daudi alo Yerusalem tanang akolongit na abongunio Daudi niajokon, nyilotara Mepiboches ngakejen, kori nyebanya ngitim a abokony, kori nyilotara ngiworui. Ani edoluni Mepiboches alo Yerusalem akisiriam ekapolon Daudi, tolimok ekapolon Daudi ngesi tama, “Mepiboches, nyo peibunio iyong erukosi ka ayong?” Tatachak Mepiboches ngesi tama, “Ekapolon, iyeni cha iyong dang atamar angwalit ayong. Alimokini ayong ekasuban etich kang atamar todoka losikiria kang sodi erukosi ka iyong, nakaneni katomod ngesi ayong. Keturum ngesi ayong ani iyei iyong, ekapolon, nakaneni ikoni iyong emalaikat a Akuj. Tosubere ayong ngakiro nakijoikinito iyong, ekapolon. Ekapolon, ajoikinit kolong iyong iari ngitunga a awi kosi daang, nakaneni ibu iyong kitachamak ayong emuji alomesae kon. Ekapolon, nyitemokino ayong kalimokini iyong atamar kitosubakinea ayong ngakiro naajokak.” Tatachak ekapolon Daudi ngesi tama, “Nyiilim nabo ngakiro ngache. Atiaku ayong atamar imorete iyong ka Siba ngiboro a Saul.” Tatachu Mepiboches tama, “Kimiek Siba toting daang. Ketemokin ayong ni ibongunio iyong nawi niajokon.” Barisilai dang lo abunit anakwap a Gilead, abu bu alore a Rogelim akiten ekapolon Daudi edoki angolol a Yorudan. Amojongit Barisilai noi, araakasi ngikaru keng ngitomwon-kauni. Abarit ngesi noi. Eritokinit ngesi ekapolon Daudi akimuj ka ngiboro ngirwa lu aperitor Daudi lore a Maanaim. Tolimok ekapolon Daudi ngesi tama, “Bua apana Yerusalem katochoik ayong iyong kaina.” Nakaneni tatachu Barisilai tama, “Akidiekuut ngikaru kang lu ayarea, nyo kirukorea ayong ka iyong Yerusalem, ekapolon? Eraakasi tokona ngikaru kang ngitomwon-kauni? Nyapedori ayong akiyen ibore ni ejok ka ni erono. Emam kona apedori ayong akiyen kebob akimuj kori ibore ni amasi ayong kori kepena. Emam kona eirari ngitoilio a ngitunga na eeotor. Aliwor ayong ekapolon itwaan ni kechani iyong. Nyitemokino ayong aanyuni ebachit lo epol etia ngolo. Nakaneni kirukori ayong ka iyong wadio, tanang ekwakaye a Yorudan. Ani erumor kimiek ayong atobongo nawi kang, sodi atotoanik diyete aliel ka apakang ka itiokang. Lokookang Kimuam logo, lo esubi etich kon. Ekapolon, toriko ngesi sodi tosubea nguna kijoikinito iyong.” Tatachak ekapolon Daudi tama, “Arikori ayong ngesi atosubea daang na isaki iyong. Nakaneni kainakini ayong iyong ibore daang ni isaki iyong anikang.” Abu Daudi ka ngitunga keng todoka Yorudan. Tanuak ngesi Barisilai sodi topia. Abu Barisilai tobongo nawi keng. Ani kedoka ekapolon Daudi kerumor, itenarito ngitunga a Yuda daang ka epewae a Ngisirael, abu ngesi tolot Giligal, erukito ka Kimuam. Apot Ngisirael daang toloto nia ekapolon Daudi, tolimokis tamasi, “Ekapolon, nyo ingolikinitotor talokaatokosi, lu eraakasi ngitunga a Yuda atamar itemokino erai kesi kirikete iyong kitenasi ka ngitunga a awi kon, ta ngitunga luche todoka Yorudan?” Tatachut ngitunga a Yuda tamasi, “Kikokini sua neni kainyo erai ekapolon Daudi eyenet kosi. Nyo ingoitotor esi kotere ngakiro nguna? Emam akimuj kosi nakimichat sua ngesi, nabo emam ibore kiinak ngesi sua”. Tatachut Ngisirael tamasi, “Idwangito ngikitetio lu eraakar Daudi ekapolon kosi, idwangito lukus ngakidwanget ngatomon, tani kerai ngesi eyenet kus. Nyo kimenyaritotor esi sua? Nyiyenete esi atamar sua kiseuni alimun atamar atobuutu ekapolon Daudi a?” Nakaneni ekilenikinit noi ngitunga a Yuda anakiro ana alimunete akidwang Ngisirael. Ayei itwaan a ekitela a Benjamen anyaritae Cheba, lokookeng a Bikiri. Arai ngesi itwaan nitipasit aronon. Tokutak ngesi aburuch sodi kirema tama, “Nyikisaki sua Daudi! Nyikiwapi sua ngesi! Ngisirael, potu apana nawi!” Apot Ngisirael toisikis Daudi sodi kirukosi ka Cheba, nakaneni kidongo ngitunga a Yuda emunosi ngesi, sodi kiwapa Daudi napei alo Yorudan tanang Yerusalem. Ani enangi ekapolon Daudi kai keng alo Yerusalem, tolim atamar kiratakinae ngapesuru keng a ngabwes natomon kiyokoi. Ngapesur a ngabwes nguna kesi nakolong edongete iyokiyete akai a ekapolon Daudi. Kitan ngesi kesi nakaneni nyepero ka kesi. Kiratakinae kesi iyokiyo ngirwa daang lu ayareta kesi Ebooyete kesi loger a ngapuser. Tolimok ekapolon Daudi Amasa tama, “Tochunak ngitunga a Yuda sodi kirukut ka kesi nege moi nache.” Tolot Amasa anyaraun kesi, nakaneni aringa kesi nyebonguno na anangea akolongit nakolong alimokinit ngesi ekapolon. Sodi tolimok ekapolon Daudi Abichai tama, “Kichani Cheba ngoni akidwang Abusalom. Torik ngitunga kang sodi kiwapiyasi ngesi kainyo epedori ngesi akilom lorerea ngidi lu edukitoe ngawasea, sodi kichan ngoni.” Apot ngasigerea na Yoab, ka ngasigerea na eyokiyete ekapolon Daudi, ta ngasigerea nache daang, torotokis alo Yerusalem ka Abichai akiwap Cheba. Ani enangete kesi nataaba naapolon alo Gibeon, kiriamun ka Amasa. Anapit Yoab ngiboro lu ejie. Ayei ekileng nakiroru na akodakinitae naruba. Ani na atenea ngesi ngaren, tachakun ekileng. Tolimok Yoab Amasa tama, “Nyaanu ngache, ekone?” Abu ngesi toruakin ngajul na a abokony a Amasa esaki anuakin. Peeyokit Amasa ekileng lo atingit Yoab alokiedieny. Abu Yoab kichum ngesi nakook sodi kiyesunos ngiboro a akook nalup. Totoan ngesi atipei nyinyiagakina Yoab akichum ngesi. Apot Yoab ka lokaatokeng Abichai toloto akiwap Cheba. Towo itwaan ipei a Yoab alo diyete akwaan a Amasa, sodi tama, “Itwaan daang ni ibakit alowae a Yoab ka Daudi, kiwapak Yoab!” Aperi akwaan a Amasa alokiding erot, abutarito ngaakot. Abu itwaan nia Yoab ngini kingolik atamar awaanarete ngitunga daang lu etorununete neni. Abu ngesi kiria akwaan alorot kirik naro ani erumor kimukok eworu lodapal. Ani kelemar akwaan alorot kerumor, kiwapak itwaan daang Yoab, toloto akirit Cheba. Kitor Cheba nakwapea a ngitela kadaang a Ngisirael sodi tanang lore a Abel Bes Maaka. Apot ngitunga daang a emacher a Bikiri kiriamariama sodi kiwapiyasi ngesi alore. Kiirasi ngasigerea a Yoab atamar eyei Cheba neni. Apot kesi toloto kiriama ere. Apot kesi totukokis ngalup natekur lokwaasea a awas anakalapatan, sodi toboka nabo kwap a awas esakete aukor awas. Ayei aberu ache natikooson lore ngolo. Abu aberu ngina kirema anawas tama, “Abala ayong esi a! Tolimokisi Yoab bu nege asaki ayong eruorikisi ka ngesi.” Tolot Yoab, sodi kingit aberu ngina ngesi tama, “Iyong irai Yoab a?” Tatachu Yoab tama, “Ee, ayong lo.” Tolim aberu ngina tama, “Ekapolon, topupok mono iyong ngakiro kang.” Tatachak Yoab tama, “Apupi.” Tolim aberu ngina tama, “Kolong kanuan, aminae atamar, ‘Kape kitolimokin alo Abel.’ Eger ngolo ngesi ekoanakinete ngitunga. Epol ere kosi noi. Erai epei a ngirerea alu isilito nabo tarai lo emunoi alo Isirael. Nyo isakea iyong akinyasun? Isaki iyong akinyasun ibore ni erai ika Ekapolon Akuj a?” “Mam jik! Nyamunyari ayong kori nyenyasuni ere kus! Meere ibore kisaki sua ngini. Itwaan enyaritae Cheba lokookeng a Bikiri, lo erai eka a akwap ana ngimukur a Epiraim, ngesi angeri ekapolon Daudi. Kipotokinoe sua itwaan nipei en, sodi atorotokisi sua alore.” Tolim aberu tama, “Kimasakini sua iyong akou keng esitorutu kidiama awas.” Ani erumor tolot aberu ngina lotunga a ere kidodik kesi ngakiro na ejoikinit esubakinete. Apot kesi totubut akou a Cheba kimasakis Yoab kisitorut kidiama awas. Tokutak Yoab aburuch na enyaraa ngasigerea keng torotokis alore. Apot kesi tobongosi nawi. Abu Yoab tobongo Yerusalem nia ekapolon Daudi. Arai Yoab ekarikon a ngasigerea a Ngisirael. Benaya lokookeng a Yeoyada ngesi arai ekarikon a ngasigerea ana eyokiyete ekapolon. Adoniram ngesi apolokinit ngitunga lu itingakinitae akisub etich. Yeochapat lokookeng a Ailud ngesi aweikinit akimar. Chepa arai ekegiran a ngikesio. Sadok ka Abiasar kesi araakasi ngimurok. Arai Ira dang lo a ere a Yair epei a ngimurok a Daudi. Ngirwa lu araakar Daudi ekapolon, min eron a akoro a ngikaru a nguuni. Abu Daudi kingit Ekapolon Akuj ngakiro a akoro kangina. Sodi tama Ekapolon Akuj, “Esechito Saul ka ngitunga a awi keng ani aarea ngesi Ngigibeon.” ( Pearaakasi Ngigibeon Ngisirael. Araakasi kesi ngitunga a Ngiamor ngidikidio, lusek ekongokinito Ngisirael atamar nyikiari. Nakaneni asaki Saul amunyar kesi ani aminar ngesi Ngisirael ka ngitunga a Yuda noi.) Abu Daudi tanyarau Ngigibeon, tolimok kesi tama, “Nyo isakete esi ayong katosubakinea esi? Nyo ngakiro naajokak kasubakinea ayong esi kotere ngakiro naaronok kolong kisubere esi sodi topiareta esi ngitunga a Ekapolon Akuj?” Tatachut kesi tamasi, “Meere ngaropiyae kori egolit etachete nakingoikinitor sua Saul ta ngitunga a awi keng. Emam Esiraelit tani kisaki sua taarae.” Kingit Daudi tama, “Nyo tokona isakete esi katosubakinea esi?” Tatachut tamasi, “Asaki Saul amunyar sua tongop tani ipei kosi idongi Isirael. Kipoto tokona talokookeng ngikan-kaarei sodi enenekisi sua lokito, atomieda alongaren Ekapolon Akuj alo Gibea, alo erai ere a Saul, alo arai ekapolon lo aseuni Ekapolon Akuj.” Tatachak ekapolon Daudi tama, “Kepotokini ayong esi kesi.” Nakaneni abu ekapolon Daudi kimiek Mepiboches lo arai lokookeng a Yonasan tarai etatait a Saul kotere ngikong lukolong ekongete Daudi ka Yonasan ania Ekapolon Akuj. Abu ngesi kipoto Arimon ka Mepiboches, lu araakasi talokookeng a Saul lu edouni Risipa na arai nakookeng a Aya. Kipoto tani talokookeng a nakookeng a Saul ana anyaritae Merab. Anyaritae apakeng a ngide alusapa kangulu Adiriel lo arai lokookeng a Barisilai, alo a akwap a Meola. Kipoto Daudi kesi nak Ngigibeon, lu enenekinete kesi moru alongaren Ekapolon Akuj tomieda. Apot kesi lukan-kaarei daang totoaka aapei. Aario kesi ngirwa lu isiakinere akilem ngamanat, napei isiakinio akilem erau. Abu apese a ngabwes a Saul na anyaritae Risipa, na arai nakookeng a Aya tolem ngiguniae todukokinea ekal lo iboikin anataaba ana ayakasi ngawat a ngitunga alukatoak kangulu. Kiboikin ngesi neni napei esiakinere akilem ngamanat tanang ni aramea akiru. Eratakinit ngesi ngikieny anawat a ngitunga alukatoak kangulu naparan, ani nakwaare kiratak ngibuin. Ani iirari Daudi ngakiro na asubi Risipa, abu tolot kidiau ngakoyo a Saul ka na alokookeng Yonasan alotunga a ere a Yabech alo a akwap a Gilead. (Akokoyarete sek kesi alo Bes-chan, ana arai aro atukuonotor ngitunga. Enenekinete Ngipilisti ngawat neni akolongit na aareta Saul alomoru a Giliboa.) Yau Daudi ngakoyo a Saul ka na a Yonasan, sodi tochunak tani ngakoyo a ngikiliok aluuni enenekinio lokitoe tomiedae. Apot ngitunga tonukakis ngakoyo a Saul ka Yonasan naliel a apakeng a Saul alo anyaritae Kich. Ayei aliel ngina lore a Sela, alo a akwap a Benjamen. Apot ngitunga tosuba ngakiro daang loger lo adungokinitor ekapolon Daudi. Ekisidi kanguna, abu Akuj kiira ngakiro na elipakinitere akwap. Tojikinos nabo Ngipilisti ka Ngisirael. Apot Daudi ka ngasigerea keng toloto akitijwore Ngipilisti. Akolongit apei na ajiere, abu Daudi tobur. Itwaan ipei nilangir-kooyan noi anyaritae Ichibibenob, lo atingit akwara a asuat ananyang, abu tama kori aari Daudi. Arai apotis a akwara kangina ngakiloi ngauni ka anus. Anapit itwaan ngini ekileng lokitetet. Nakaneni abu Abichai lo arai lokookeng a Seruya bu aikin Daudi. Kitijik ngesi itwaan nilangir-kooyan noi ngini taar. Apot ngasigerea a Daudi kimaimaa ngesi tolimokis tamasi, “Nyikirukori nabo sua ka iyong lojie, kainyo nyikisaki sua iyong kitaar.” Ani ekisidi kanguna, tojikinetei ka Ngipilisti ani enyaritae Gob. Alojie kangolo, taar Sibekai lo a Ucha itwaan nilangir-kooyan noi anyaritae Sap. Tojikinetei nabo ka Ngipilisti ejie eche alo Gob. Abu Elianan lokookeng a Yair, lo abunit alo Betleem, taar Golias lo a ere a Gas. Alangir akwara a Golias ekoni amorok akitoe nalangir eyei ni etokere ngiworui. Apon tojikinetei nabo ejie eche alo Gas, ani ayei itwaan iche nilangir-kooyan noi ni amina ejie. Ayakasi ngesi ngimoyo ngikan-kapei nakan apei, toyakasi ngikan-kapei nakan nache. Ngakejen nabo dang kona pei. Arai ngesi alesit a ngitunga alulangir-kooyak noi. Kimenya ngesi Ngisirael. Abu Yonasan, lo arai lokookeng alokaatokeng a Daudi alo anyaritae Chama taar ngesi. Araakasi luomwon ngulu ngalesea a ngitunga alulangir-kooyak noi a Gas. Apot Daudi ka ngasigerea keng taara kesi. Abu Daudi toeok Ekapolon Akuj eeos logo na ayuunea ngesi Ekapolon Akuj ani a Saul, ka ngimoe keng luche. Tama Daudi, “Ekapolon Akuj erai ataaba kang, ka awas kang nakaagongon. Erai Akuj kang ataaba kang na ayuunor ayong. Kayuunit ngesi ayong loger a aupwal, kayuunit ngesi ayong sodi ebooyi akaalimon. Erai ngesi ekayuunan kang, kachoikinit ngesi ayong katoyuu alokurikur. Anyarae ayong Ekapolon Akuj, katoyuu ngesi ayong alomoe kang. Ekiro a Ekapolon Akuj kipuroe! “Apot ngitoroi a akitu kerikaut ayong, kilapun ngitoroi a nginyas nikang. Kerudakina ayong akitu, katolokite. Atanyara ayong Ekapolon Akuj alochan kang. Egoronok Akuj kang abala kengarak. Kiira ngesi etoil kang alokai keng, topupok ngesi akigoro na asakea ayong kengarakin. “Abu akwap tamaranik ka arikirikokin. Kiukuukokin ngapirio a adis ka amaranikin ani angoitor Akuj! Kidauu apuru alokumes keng, sodi asarae nakariran ka ngatotol na enokete topudut anakituk keng. Apaki ngesi adis totiyaun, eyei edou lo ilirakina, kwap ngakejen keng. Aporori atipei ibore ni eyakasi ngabeben.*g** Alosi ngesi eyei nabeben a ekuwam. Abutakin ngesi aribu. Eriamito ngesi ngidowon luapolok, lu eleleba ngakipi. Tonokut ngatotol anakimilea ana eyei ngaren keng. Sodi togirok Ekapolon Akuj anadis, kiirarae etoil a Akuj ana Epol Noi. Toguma ngesi ngimalea keng a akau, kieala ngimoe keng. Kirita ngesi kesi a akimilea. Apon akook a anam kitoonoi deu, sodi talacharae ngateak a akwap, na ekilakinea Ekapolon Akuj ngimoe keng, sodi kirurumakinea kesi engoit. “Abu Ekapolon Akuj na eyei kidiama tanangu kwap, sodi katoting ayong. Keriu ngesi ayong anakipi anatuluk. Kayuuni ngesi ayong alomoe kang alukajwok noi, ka daang lu karemokino ayong. Agogong kesi noi akidwang ayong. Ketijikinete kesi ayong na ayakar lochan, nakaneni katoik ayong Ekapolon Akuj. Kengarakini ngesi ayong alochan. Kayuuni ngesi ayong kainyo alakara kotere ayong. “Ketaanyunit ayong Ekapolon Akuj ekeny ajokon kainyo asubi ayong ngakiro na iyookino. Kapiarit ngesi ayong ani emamakar ibore asechit. Ewapit ayong Etal a Ekapolon Akuj. Eringa ayong nyereiara wache ani eyei Akuj kang. Ewap ayong ngitalio keng daang. Nyengero ayong akiwap ngakiro na edungunit ngesi. Eyeni ngesi atamar nyasechit ayong. Awou ayong akisub naaronok. Ketaanyu ngesi ayong ekeny loajokon, ani eyenea atamar emam ibore asechit ayong. “Ee Ekapolon Akuj, imuno iyong lu kimunosi iyong, nabo ijok noi ani eyakasi ngulu ikiuna. Ikiuna iyong ani eyakasi ngulu ikiuna, tarai imoitanikinit luaronok. Iyuuni iyong lu itiditeuna, nakaneni itiditeuni lu inisasi. Iyong Ekapolon Akuj irai akicha kang. Itwarakini aribu kang. Kitaanyuni iyong ayong ngikilinga lu etijio ngimoe kang, ka agogongu na edwangea lu ketepegete. “Akuj naga, ikiuna nguna esubi ngesi. Eraakasi ngakiro keng ngaka iteni. Ikoni ngesi aupwal ani eyakasi daang lu esakete ayuuno keng. Ngae iche erai Akuj, peerai Ekapolon Akuj? Ngae iche erai ataaba, peerai Akuj yok bon? Akuj naga erai akayuunan kang nakaagongon, itiliwori erot kang lo emam ibore aronon eyei. Itenikini ngesi ngakejen kang kikokis na a agete. Kachoikini ngesi ayong niajokon alomoru. Ketatami ngesi ayong ejie, sodi atotingea ayong akau nakaanikan noi. Ee Ekapolon Akuj, kiinak iyong ayong aupwal ngina ayuunor. Aliwor ayong lokayenikinitae ani kingarakinitor iyong ayong. Kiratak iyong ayong nyekerumun, nabo nyedakara ayong jik. Erisi ayong ngimoe kang sodi edwang. Nyaisikini ayong kesi tanang amunyari. Arami ayong kesi atowan, sodi tokuruwo anyoun. Edakakinosi kesi nakejen kang. Kiinanakini iyong ayong ngikilinga lu ajio, sodi edwang ngimoe kang. Isipungari iyong ngimoe kang ani ayei ayong. Amunyari ayong lu karemokino ayong. Esakete kesi atamar kingarakin, nakaneni emam itwaan ingarakini kesi. Enyaraate kesi Ekapolon Akuj, nakaneni nyetachi ngesi ngakiro kech. Eriekini ayong kesi kikokis apua. Echieki ayong kesi loger a echoto alo eyei lorotin. “Kiyuuni iyong ayong alotunga kang alu kangerito, sodi kitowo apolou kang ani eyakasi ngibukui. Ngitunga lukolong sek peayeni ayong, aliworosi tokona lu apolokinit ayong. Eriedikete ngibukui lugelayek alongaren kang. Na iirareta kesi ngakiro kang, kiwapakis. Elilimiyorete kesi sodi pot emaranete anawasea kech. “Eyari Ekapolon Akuj! Kipuroe ataaba kang! Kipuroe apolou a Akuj kang anakaagongon ana erai ngesi kayuuni ayong! Edwangi ayong ngimoe kang kotere ngesi. Etikiori ngesi ngibukui lu apolokinit ayong, nakaneni katoyuu ayong alomoe kang. Ee, Ekapolon Akuj, kisidwang iyong ayong ngimoe kang, sodi kitoyuu ayong alotunga alukajwok. “Kotere nguna, kepuruuni iyong alobukui. Ekusi ayong ekiro kon. Ekapolon lo aseu Akuj, idwangi ngimoe keng lokojokon noi. Idodikini ngesi lo aseu amina na nyedaun. Idodikini Daudi ka ngalesea keng jik.” Daudi lokookeng a Yese ngesi lo etiliwori Akuj lo eyenikinitae. Aseuni ngesi Akuj a Yakobo kitiliwo ekapolon, nabo ngesi arai ekaitan a ngieosio aluajokak a Ngisirael. Ngakiro a Daudi na esal kesi nugu, “Iruoro Etau a Akuj anikang. Eruorik Akuj a Isirael. Ebala ataaba a Isirael kona, ‘Ekapolon epolokini itemit ngakiro eriyan, ngolo epolokinit iwapit ngakiro a Akuj, ikokini ngesi akicha na a ataparach, esaa lo ipiripiruunea akolong tamam ngidowon anadis, akicha na iturupuni nginyia aramet a akiru.’ Ikokini Akuj epiari ngalesea kang neni, kainyo kichamakin ayong ka ngesi jik. Emam itwaan ebili achamunet ngina. Erai akichikakinet na nyilochi itwaan. Ibore ngini ngesi asaki ayong. Ibore kesidwang ayong ngimoe kang ngini, nakaneni esubakini Akuj nguna. Ikote ngitunga lu nyenupito ngiikwa lu echakaritae. Emam itwaan etapi kesi a ngakan. Ejoikinit iyong itingi asuat kori akwara. Enomiari kesi jik.” Lugu kesi eraakasi ngirora a ngasigerea a Daudi anakajwok. Anyaritae itwaan ni ekingaren Yocheb Bachebes lo emachar a Takemon, ni arai ekarikon “Aluuni.” Kitiji ngesi ngikiliok ngamiae ngakan-kauni a akwara keng, sodi taar daang akitijiet apei. Itwaan nia ngiarei ani aluuni kajwok noi ngesi Eleasar lokookeng a Dodo, lo a emachar a Ao. Akolongit apei, apot ngesi ka Daudi tobenyut Ngipilisti lu achunakina esakete ejie. Apot Ngisirael tobongosi naabor, nakaneni toweik ngesi Ngipilisti kitiji tanang akan keng itenar tongop tani kona elakakini ekileng lo ejie. Apot kesi kidwanga Ngipilisti kotere Ekapolon Akuj akolongit ngina. Ani kebwanga ejie kerumor, tobongosi Ngisirael ni ayei Eleasar sodi tobutut ngiboro a ejie alokatoak. Itwaan nia nguuni ani aluuni kajwok noi ngesi Chama lokookeng a Agee, lo a Ara. Achunakin Ngipilisti ni enyaritae Lei ni ayei amana a ngimare. Tamataros Ngisirael ani eyakasi Ngipilisti. Nakaneni toweik Chama Ngipilisti alomana, kikota kaneni, sodi taar Ngipilisti. Apot kesi kidwanga Ngipilisti kotere Ekapolon Akuj akolongit ngina. Ani eapikini ngirwa lu elemere ngamanat, apot nguuni “Alutomwon-uni” toloto naburibur enyaritae Adulam. Ayei Daudi neni na aperitotor ngajorei a Ngipilisti nadipo a Repaim. Ngirwa ngulu, ayei Daudi lomukura lo eriwokinitae awas, tolomite ajore a Ngipilisti Betleem. Abu Daudi kiito awi tolim tama, “Arai bo kainuni itwaan idio ngakipi alokare ana eyei lokidor a Betleem dang!” Apot ngasigerea nauni kajwok noi kimingakis kitoro kiding adakar a Ngipilisti, tookut ngakipi alokare sodi inut Daudi. Nakaneni towou ngesi akimat ngakipi nguna, pearai abu tobuko toliworos ngakipeyos ani a Ekapolon Akuj. Ebala, “Ekapolon Akuj, nyamasi ayong nugu jik! Ikokini ibore ngini akimat ngaakot a ngikiliok alu ajalete ngawat kech tonyout akitu kalu!” Abu ngesi tonger akimat ngakipi nguna. Ngakiro nguna idodiunito atitinyu a ngasigerea anauni kajwok kanguna. Abichai lo arai lokaatokeng a Yoab (anyaritae itiokech Seruya) ngesi arai ekarikon a ngasigerea “Anatomwon-uni kajwok.” Etiji ngesi ngikiliok ngamiae ngauni a akwara taar, sodi toliwor ngesi lokajwon noi ani eyakasi “Lutomwon-uni.” Ngesi arai lokajwon noi ani eyakasi “Lutomwon-uni.” Abu ngesi toliwor ekarikon kech, nakaneni pearai ngesi lokajwon noi loger “Aluuni.” Itwaan iche nikajwon noi ngesi Benaya lo arai lokookeng Yeoyada lo a ere a Kabiseel. Asubi ngesi ngakiro naationok, aari ngesi tani ngikiliok ngiarei lukajwok a Ngiamor. Akolongit apei, eyei ibore ni ikoni eloch nakwap, abu ngesi toloma nadui taar engatuny. Aari ngesi tani itwaan nilangir a akwap a Misiri. Atingit itwaan ngini akwara. Kitijik Benaya ngesi a aselej todema akwara anakan keng, taarea. Araakasi nguna ngakiro naationok a Benaya alo arai epei “Alutomwon-uni.” Arai ngesi lo ayenikinitae anikech, nakaneni peekoni “Luuni.” Toseu Daudi Benaya topolok ngasigerea na eyokiyete ngesi. Ngitunga luche “Alutomwon-uni” kesi ta Asael lo arai lokaatokeng a Yoab, ka Elianan lo arai lokookeng a Bodo alo a Betleem, ka Chama lo a elelea a Arod, ka Elika lo a elelea a Arod, ka Eles lo a Pelet, ka Ira lo arai lokookeng a Ikech alo a ere a Tekoa, ka Abieser lo a ere a Anasos, ka Mebunai lo a emachar a Ucha, ka Salimon lo a emachar a Ao, ka Maarai lo a akwap a Netopa, Eleb lo arai lokookeng a Baana, lo arai eka akwap a Netopa, ka Itai lo arai lokookeng a Ribai lo a arai eka ani enyaritae Gibea ani erai ika akwap a Benjamen, ka Benaya lo a akwap a Pirason, ka Idai lo a ngadipoe ana eyakasi diyete ere a Gaach, ka Abialibon lo a a adipo a Araba, ka Asimapes lo a ere a Baurim, ka Eliaba lo a akwap a Chaalibon, ka talokookeng a Yachen ka Yonasan, ka Chama lo a emachar a Arar, ka Aiam lo a emachar a Arar, ka Elipelet lo arai lokookeng a Aasibai lo a akwap a Maaka, ka Eliam lo arai lokookeng a Aisopel alo akwap a Gilo, ka Esiro lo a Karimel, ka Paarai lo a Arab, ka Igal lo arai lokookeng a Nasan alo a akwap a Soba, ka Bani lo a emachar a Gad, ka Selek lo a emachar a Amon, ka Naarai lo a ere a Beeros, lo atingit ngiboro a Yoab lu ejie, ka Ira, ka Gareb, lu araakasi daang ngika emachar a Yatir, ka Uria lo arai Eitit. Araakasi ngikiliok lukajwok daang ngitomwon-uni ka ngikan-kaarei. Tongoik Ekapolon Akuj Ngisirael nabo, abu ngesi kichichiu Daudi lotunga. Tolimok Ekapolon Akuj ngesi tama, “Kape kimaru Ngisirael, ka ngitunga a Yuda.” Abu ekapolon Daudi tolimok Yoab lo arai ekarikon a ngasigerea ka ngikarikok a ngasigerea luche arukito ka ngesi tama, “Kirukosi ka ngikapolok kon luuchik daang kitoro nadakarin a ngitela a Ngisirael kadaang napei alo Dan tanang Beer-cheba, sodi kimarut ngitunga daang. Asaki ayong atoyen atamar eraakasi ngitunga daang ngiai.” Nakaneni tatachak Yoab ekapolon Daudi tama, “Ekapolon, agasi atamar kitalala Ekapolon Akuj kon Ngisirael ngakitalalaet amiat apei akidwang eger lo tokona elalaketa kesi, sodi kingolik iyong eger lo elalaketa kesi. Ekapolon, nyo tokona isakea iyong kimarae ngitunga?” Nakaneni apot Yoab ka ngikarikok a ngasigerea luche kiwapa ngakiro na alimuni ekapolon. Torotokis kesi ani a Daudi, toloto akimar Ngisirael. Todokasi kesi ekwakaye Yorudan topero kuju a Aroer alo arai ere lo eyei kiding adipo, anakwap a Gad. Ani enyounete kaneni, toloto kwap, tananga Yaser. Ani erumor kiporosi tananga Gilead ka Kadech ni arai akwap a Ngiiti. Sodi toloto Dan, ani enyounete alo Dan toloto too, tananga Sidon. Apot toloto kuju tananga lore a Tiro lo esiriamitae ngawasea. Apot tananga lorerea daang a Ngiipi ka Ngikanaan, tasalut alo Beer-cheba alokuju Yuda. Ani adaunet a ngilapio a ngikan-koomwon ka ngirwa ngitomwon-arei, tobongut kesi Yerusalem, kerumosi akirimit akwap daang. Tolimokis kesi ekapolon Daudi ekimar a ngikiliok alukajwok atingito ngakwaaras. Araakasi kesi 800,000 alo Isirael, tarai 500,000 alo Yuda. Ani kimaru Daudi ngitunga kerumor, kichanakin Daudi alotau keng, sodi tolimok Ekapolon Akuj tama, “Asub ayong akisech naaronon ani ekokinea nege! Torimakinae kare. Asubi ayong nguna a abangaanut.” Ani eringa Daudi nyekienyuna nataparach, abu Ekapolon Akuj tolimok ekadwaran keng Gad, lo arai ngesi adwareene ngakiro ani a Daudi tama, “Kape tolimok Daudi atamar asaki ayong ngesi totiaku akiroit apei anakiro anauni kanu. Asubakinea ayong ngesi na etiakuni.” Tolot Gad nia Daudi tolimok ngesi ngakiro na alimuni Ekapolon Akuj, sodi kingit tama, “Anukiro ejoikina esubakin? Akimin eron a akoro nakwap kon a ngikaru a nguuni, kori ngimoe akirit esi a ngilapio a nguuni, kori edeke loaronon akimin nakwap kon a ngirwa a nguuni? Kitama tokona nguna, sodi kitolimok ayong akiroit na abuari nia Ekapolon Akuj.” Tatachak Daudi Gad tama, “Kariebete ayong ngakiro nugu! Nakaneni nyasaki ayong kerirata ngitunga. Kimiekisi Ekapolon Akuj alope toliwor ngesi kirirae ngoni, kainyo erai ngesi na a ngisien.” Abu Ekapolon Akuj yau edeke loaronon nia Ngisirael. Kisiak edeke ngolo ataparach ngina, tanang akolongit nasek aseunit ngesi. Napei alo Dan tanang Beer-cheba, apot Ngisirael ngabunge ngatomwon-kaarei totoaka. Ani na adikino emalaikat a Ekapolon Akuj inyasuni Yerusalem, abu Ekapolon Akuj kiloch ngakiro kotere akirirare ngitunga sodi tolimok emalaikat lo aari ngitunga tama, “Kimiek etemokin!” Anangunit emalaikat lo aari ngitunga niramet ngalemet a itwaan ani anyaritae Arauna, alo arai Eebusit. Kingolik Daudi emalaikat lo aari ngitunga, sodi tolimok Ekapolon Akuj, tama, “Ayong ngesi asechit. Ayong ngesi echwangakini. Nyo esubito ngitunga lu ikote ngamesekin lugu? Ejoikinit iyong kirirae ayong ka ngitunga a awi kang.” Akolongit napei ngina, tolot Gad nia Daudi tolimok tama, “Tolot niramet ngalemet a itwaan ani enyaritae Arauna sodi todukok ekeno a ngakipeyos neni.” Kiwap Daudi ngakiro na adunguni Ekapolon Akuj, sodi tolot inaa loger lo alimokinea Gad. Kingolia Arauna taanyunga ekapolon Daudi ka ngikapolok keng luuchik idirunito nikeng. Tadakakin ngesi kwap alongaren Daudi sodi kingit tama, “Ekapolon, nyo ibunitor iyong nege?” Tatachak Daudi tama, “Asaki ayong akigiel ni irameenea iyong ngalemet sodi atodukok ekeno a ngakipeyos, totuboror edeke loaronon logo.” Tolim Arauna tama, “Ekapolon, tolema topeikinio Ekapolon Akuj ibore nicha isaki iyong. Ngimongin dang lugu kane, lu ipeye iyong alokeno. Ngakito napalem eenikinitae lomosiringan kech nugu ka ngadaet ngalemet, kitiliwo ngakito napeyet.” Kipoto Arauna daang nak ekapolon Daudi sodi tolimok ngesi tama, “Kimiek Ekapolon Akuj na erai Akuj kon tacham akipeyos kon.” Nakaneni tatachak ekapolon Daudi ngesi tama, “Meere kongina. Atachi ayong. Nyalemikini ayong Ekapolon Akuj na erai Akuj kang ngakipeyos na emam ibore epoto ayong atatachea.” Abu ngesi togiel niramet ngalemet ka ngimongin dang a ngakitemiet a ngatomwon-kan a ngaropiyae. Abu ngesi todukok ekeno a ngakipeyos, sodi tolem ngakipeyos na inomio ka na ekisil. Kiira Ekapolon Akuj ngakilipasinei na elipitor ngesi, sodi totubor edeke. Tomojong Daudi noi toliwor tani kimukokin ngesi ngiworui luapotiok nyemoner akwaan keng. Sodi tolimokis ngikasubak etich keng ngesi tamasi, “Ekapolon kosi, kimiek atasakutu apese na irukete ka iyong, kitan. Inapanakin ngesi nakook kon kitomonu akwaan kon.” Apot kesi kirimo akwap a Isirael daang esakete apese nakebusean. Toriamunae apese na anyaritae Abichag alo Chunem, sodi torikoroe ngesi lokapolon. Arai apese ngina nakebusean noi. Kibooyoto apese ngina ka ekapolon itani, nakaneni abu ekapolon nyeepudosi ka ngesi. Abu Adonija lo arai lokookeng a Daudi ka Agis kipuruun bon ebala, “Aliwor ayong ekapolon.” Kitonyou ngesi bon ngaurukukui ka ngangolei, dio aseun ngikiliok ngitomwon-kan lu eliworosi ngasigerea na ingarenete ngesi. Emam akolongit etongolopea apakeng ngesi kingit tama, “Kotere nyo isubea iyong kona?” Arai ngesi ekile lokebusean noi. Ngesi atupit Abusalom idounio. Atukosi ngesi ka Yoab (itiokeng a Yoab ngesi Seruya), ta Abiasar lo arai emuron a Akuj. Tachamut kesi akingarakin Adonija. Nakaneni Sadok lo arai emuron a Akuj, ka Benaya lokookeng a Yeoyada, ka Nasan lo arai ekadwaran, ka Chimei, ka Rei, ta ngasigerea naketeok Daudi, peebakito alowae a Adonija. Akolongit apei, abu Adonija, kipeye ngakipeyos a ngimesekin, ka ngimongin, ta ngitak lukoatumak anataaba a Emun, diyete elelea a Enirogel. Tanyarau ngesi talokookeng a ekapolon luche, ka ngikasubak etich a ekapolon lu aponito alo Yuda pot nakipeyos keng. Nakaneni nyenyarauna ngesi Nasan lo arai ekadwaran, kori Benaya, kori ngasigerea naketeok ekapolon, kori Solomon lo arai lokaatokeng lo aberu anache. Sodi tolot Nasan nia Basicheba ana arai itiokeng a Solomon kingit tama, “Nyiirara iyong atamar aliwor Adonija lo erai lokookeng a aberu anabe Agis ekapolon a? Eringa ekapolon Daudi nyeyena ngakiro nguna! Kimiek tokona kesuruor kisaki iyong alope ayuun, toyuu tani lokookon Solomon. Tolot tokona atipei nia ekapolon Daudi tolimok kona, ‘Ekapolon kang, abe kolong bo kilimokini iyong ayong kikong atamar lokookang Solomon irumi apolou kon, kiboikin lokicholong kon. Ani ekokini bo Adonija eliwor ekapolon ai?’ ” Tolim nabo Nasan tama, “Sodi ani eringa iyong iruorosi ka ekapolon, alomuni ayong neni atolim nabo ngakiro napei nguna.” Sodi tolot Basicheba aanyun ekapolon alokai ana aperio. Amojongit Daudi noi arai Abichag na abunit alo Chunem ngesi etani ngesi. Kijuuru Basicheba a arimatoi alongaren ekapolon. Kingit ekapolon ngesi tama, “Nyo isaki iyong?” Tatachu Basicheba tama, “Ekapolon kang, ikongi kolong iyong anikang alokiro a Ekapolon Akuj ana erai Akuj kon kitolimok ayong tama, ‘Lokookon Solomon ngesi irumi apolou kang. Iboikin ngesi lokicholong kang.’ Nakaneni aliwor tokona Adonija ekapolon, tarai bo nyiyeni iyong ekapolon ngakiro nguna. Alemu ngesi ngakipeyos nakaalak a ngimongin, ka ngimesekin, ta ngitak lukanakunak. Epeyou ngesi talokookon, ka Abiasar lo erai emuron, ta Yoab lo erai ekarikon a ngasigerea. Nakaneni nyipeyouno ngesi lokookon Solomon. Ekapolon kang, ingoliunito Ngisirael daang nikon, kidarito iyong tolimok kesi atamar ngae iboikin lokicholong kon kirum apolou. Ani pekisubak iyong kongina, ketoronio ayong ka lokookang Solomon akolongit na itoanea iyong.” Ani eringa Basicheba iruorosi ka ekapolon, tolomu Nasan lo arai ekadwaran kai a ekapolon. Tolimokinae ekapolon tamarae, “Eyei ekadwaran Nasan nege.” Ani ebuni Nasan nia ekapolon, kijuuru ngesi noi a arimatoi alongaren ekapolon. Tolim Nasan tama, “Ekapolon kang, ilimu iyong atamar irumi Adonija apolou kon, kiboikin lokicholong kon a? Akolongit na tokona naga, alot ngesi akipeyore ngakipeyos nakaalak a ngimongin, ka ngimesekin ta ngitak lukanakunak. Epeyou ngesi talokookon daang, ka Yoab lo erai akarikon a ngasigerea kon, ta Abiasar lo erai emuron. Imujete tokona kesi iremasi ebalasi, ‘Ekapolon Adonija toyei!’ Nakaneni ekapolon nyipeyouno ngesi ayong, ka Sadok lo erai emuron, ka Benaya lokookeng a Yeoyada, ta lokookon Solomon. Iyong ekapolon itiakuni ngakiro nugu, sodi nyiilimok ngikasubak etich kon atamar ngae iboikin lokicholong kon kirum apolou a?” Sodi tatachu ekapolon Daudi tama, “Tanyarau Basicheba tobongu nege.” Tolomu Basicheba towo alongaren ekapolon. Kikong ekapolon tama, “Alokiro a Ekapolon Akuj ana eyari, ana kolong kayuuni ayong alochan kadaang, ekongi ayong abala, ‘Lokookon Solomon ngesi irumi apolou, kiboikin lokicholong, kilunyokin nados kang.’ Asubakini ayong akolongit naga ngakiro nakolong kechikakini iyong.” Kijuuru Basicheba noi idodiunit arimatoi tama, “Toyar ekapolon kang Daudi jik.” Tolim Daudi tama, “Tanyarakinae Sadok, ka Nasan, ta Benaya.” Ani epote kesi, tolimok ekapolon kesi tama, “Torikosi ngikasubak etich kang, kimiekis lokookang Solomon todoka losikiria lopalem kang, sodi kitenasi ngesi tolot lolelea a Gion. Neni ngesi iwasakineta Nasan, ka Sadok ngesi akimiet toliwor ekapolon a Isirael. Ani erumor tokutakis aburuch kiremasi tamasi, ‘Ekapolon Solomon toyei!’ Kiwapuut ngesi na ebunio akiboikin lokicholong kang a apolou. Aseu ayong ngesi kilunyokin napolou kang toliwor ekapolon a Isirael ka Yuda.” Tatachu Benaya tama, “Ikokinete neni! Kimiek Ekapolon Akuj na erai Akuj a ekapolon kang Daudi kiyook ngakiro nguna. Loger lo ngoon arukitotor Ekapolon Akuj ka iyong, irukete tani ka Solomon, kitiliwo apolou keng na epiaritae noi akidwang nakon.” Apot Sadok, ka Nasan, ka Benaya, ta ngasigerea naketeok ekapolon kidokokis Solomon losikiria a Daudi, sodi kitenasi tanang lolelea a Gion. Tolem Sadok aamwara na eturakinitae akimiet, sodi kiwasak Solomon akimiet ngina aloeam a Akuj. Tokutakis kesi aburuch, kiremasi ngitunga daang tamasi, “Ekapolon Solomon toyei!” Sodi kiwapuut ngitunga daang ngesi iremasi a alakara, ekusete ngibunei. Amaranete ngalup kotere echale lokech ngolo. Ani esaa lo arumoreta Adonija ka ngipeyok keng akimuj, kiirasi kesi echale. Ani iirari Yoab erue a aburuch, kingis tama, “Eka inyo echale lo eyei lore ngolo?” Ani eringa ngesi iruoro, todolu Yonasan lokookeng a Abiasar alo arai emuron. Tolim Adonija tama, “Tolom irai iyong itwaan ajokon. Iyaunit tokona ngon ngakiro naajokak.” Tatachak Yonasan Adonija tama, “Nyikote neni, kainyo etiliwo ekapolon yok Daudi Solomon ekapolon. Ameari ngesi Sadok, ka Nasan, ka Benaya lokookeng a Yeoyada, ta ngasigerea naketeok ekapolon, sodi kitenasi Solomon. Kidokokis kesi Solomon losikiria a Daudi sodi kiwasakis Sadok ka Nasan ngesi akimiet alolelea a Gion, toliwor ekapolon. Ani erumor toloto kesi lore iremasi a alakara, echalasi tokona ngitunga. Echale ngolo ngesi iirasi esi. Ibooyi tokona Solomon alokicholong a apolou. Ani eya daang, aloto ngikasubak etich a ekapolon Daudi nia Daudi ebalasi, ‘Kimiekisi Akuj kon kitiliwo ekiro a Solomon lo eyenikinitae akidwang lokon, nabo kitiliwo apolou keng na epiaritae noi akidwang nakon.’ Sodi kijuuru ekapolon Daudi alokitanda keng ilipit ebala, ‘Epuruutu Ekapolon Akuj na erai Akuj a Isirael, na etiliwo akolongit naga ipei a ngide kang ekapolon, kiboikin lokicholong kang a apolou eringa ayong ayari etee!’ ” Sodi toema ngipeyok a Adonija daang, tonyout taman itwaan daang anakodet keng tolot. Toem Adonija Solomon. Tolot loeam a Akuj toting ngaamwar a ekeno a ngakipeyos. Tolimokinae Solomon kona, “Eemit Adonija ekapolon Solomon. Arwakin ngesi ngaamwar a ekeno a ngakipeyos ebala, ‘Asaki ayong kikong mono ekapolon Solomon anikang atamar nyakaari ayong.’ ” Tolim Solomon tama, “Ani kidodiu ngesi atamar arai itwaan nikamunoi, emam itwaan etapi tani etimot epei a akou keng, nakaneni ani kerai ngesi itwaan aronon, etoani.” Tomea Solomon ngitunga arikun Adonija. Sodi torikunoe ngesi alokeno a ngakipeyos. Tolot ngesi nia ekapolon, kijuuru alongaren keng idodiunit arimatoi, sodi tolimok ekapolon ngesi tama, “Kape nawi kon.” Ani eapuunete ngirwa lo etoanea Daudi, tanyarau ngesi lokookeng Solomon kisuruor ngakiro na esal ebala, “Anang ngirwa kang lu atoanea. Totitinyer, tatakanu atamar irai ekile. Tosub ngakiro na edunguni Ekapolon Akuj na erai Akuj kon atamar tosub. Kiwap ngirotin keng ka ngakitatamet, ta ngitalio keng, loger lo igiritere lotal a Musa, sodi kitopiarea iyong awadaang ani ilosi ka ni irear iyong. Kirichak Ekapolon Akuj akiroit nakolong kalimokini ayong ebala, ‘Ani kiwap talokookon ngitalio kang a ngitai kech kadaang ka akiyar kech daang, epolokinete kesi Isirael.’ “Eya nabo ngakiro ngache. Iyeni iyong ngakiro nakolong kasubea Yoab ayong na aarea ngesi ngikarikok a ngasigerea a Isirael ngiarei, Abiner lokookeng a Ner, ka Amasa lokookeng a Yeser. Iyeni iyong eger lo aarea ngesi kesi ngirwa lua ekisil etachakinit akitu a ngitunga alu aario ngirwa lu ejie. Aari ngesi ngitunga lu peasechito nakaneni kapaikinitae tokona ayong ngakiro na asubi ngesi. Ariamunit tokona ayong ngichan kotere ngakiro nguna. Iyeni iyong ngakiro na isubakinea ngesi. Tochoite imiekini Yoab etoani akaalimon. “Nakaneni tosubea naajokak talokookeng a Barisilai, lu eponito alo Gilead, kimiek kesi tarata ngipei alu imujete alomeesa kon, kainyo kasubeta kolong ayong naajokak, na epungaror ayong elanyit lokaatokon Abusalom. “Eyei nabo Chimei lokookeng a Gera, lo ebunit alore a Baurim anakwap a Benjamen. Kelami kolong ngesi ayong nikaronon noi akolongit nakolong alosio ayong Maanaim. Nakaneni na abunio ngesi akisiriam ayong anangolol a Yorudan, abu ayong ekong anikeng alokiro a Ekapolon Akuj abala, ‘Nyakaari ayong iyong.’ Tokona bocha, nyiilakak robo ngesi nyirira, kainyo ios iyong. Iyeni iyong ngakiro na isubakinea ngesi, ejoikinit eario.” Totoan Daudi sodi tonukakinae lore keng. Arai ngikaru lu apolokinitor ngesi Isirael ngitomwon-omwon, apolokinit Eburon a ngikaru a ngikan-kaarei sodi topolok Yerusalem a ngikaru a ngitomwon-uni ka nguuni. Abu Solomon kiboikin lokicholong a apolou a apakeng Daudi. Etenikina apolou keng lokojokon. Abu Adonija lo arai lokookeng a aberu anabe Agis tolot nia Basicheba ana arai itiokeng a Solomon. Kingit Basicheba ngesi tama, “Ibunit iyong a ekisil a?” Tatachu Adonija tama, “Ee, abunit a ekisil. Eyakasi ngakiro asaki alimokin iyong.” Tolimok Basicheba ngesi tama, “Kasio kiruorik.” Tolim Adonija tama, “Iyeni iyong atamar arai apolou akang, nabo ayenete Ngisirael daang atamar ayong aliwor ekapolon. Nakaneni, apot ngakiro kilochos, toliwor lokaatokang ekapolon kainyo asakit Ekapolon Akuj kikokis neni. Eyei tokona ibore ipei asaki akilip iyong. Nyikimik kare.” Tolimok Basicheba ngesi tama, “Kasio kiruorik.” Tolim Adonija tama, “Tolimok kare ekapolon Solomon kemiek atoriko Abichag na ebunit alo Chunem toliwor aberu kang, ayeni ayong atamar nyikimiki iyong ekapolon.” Tatachu Basicheba tama, “Itemokino. Alimokini ayong ekapolon ngakiro kon.” Sodi tolot Basicheba nia ekapolon alimokin ngakiro a Adonija. Tonyou ekapolon akimalare itiokeng kijuuru idodiunit arimatoi. Ani erumor kiboikin ngesi lokicholong keng dio atamar yaunae ekicholong eche lo iboikinor itiokeng nakan keng na aloteten. Tolim itiokeng tama, “Eyakasi ngakiro ngadikidio asaki ayong akingit iyong, nyikimik kare.” Tolim ekapolon tama, “Kingis ngakiro na isaki iyong, itio, nyekemiki ayong iyong.” Tolim itiokeng tama, “Kimiek lokaatokon Adonija toriko Abichag toliwor aberu keng.” Kingit ekapolon Solomon itiokeng tama, “Nyo bo ibalar iyong ayong epoto Abichag ainak Adonija? Abe nyiitama bo nak ngesi tani apolou! Abe ngesi bo tani erai lokaatokang loapolon, nabo dang, ibakito Abiasar lo erai emuron, ka Yoab alowae keng!” Sodi kikong ekapolon Solomon alokiro a Ekapolon Akuj ebala, “Kataar Akuj ayong erai peketoana Adonija ani alimunio ngakiro nugu! Kewaak Ekapolon Akuj ayong lokicholong a apolou a apakang Daudi. Erichak ngesi akichikakinet keng kainaki ayong ka ngalesea kang apolou. Ekongi ayong alokiro a Ekapolon Akuj ana eyari atamar etoani Adonija akolongit naga!” Sodi tomea ekapolon Benaya, tolot ngesi taar Adonija. Tolimok ekapolon Solomon Abiasar lo arai emuron tama, “Kape nawi kon na eyei Anasos, kainyo ejoikinit iyong itoani. Nakaneni nyakaari ayong iyong kainyo iweikinit kolong iyong asaduku a Achamunet a Ekapolon alo erai Ekapolon Akuj ngirwa lu irukitotor iyong ka apakang Daudi, nabo iriamunit iyong ngichan lu ariamunit ngesi daang.” Abu Solomon talachak Abiasar alotich alo araakar emuron a Akuj. Asubakini Solomon nguna kiyookinotor nakolong alimuni Ekapolon Akuj alo Chilo kotere Eli lo arai emuron a Akuj ka ngalesea keng. Ani iirari Yoab ngakiro na asubakin (kainyo ebakit sek ngesi alowae a Adonija, meere alowae a Abusalom), abu ngesi tamatar loeam a Akuj torwakin ngaamwar a ekeno. Tolimokinae ekapolon Solomon kona, “Amatar Yoab loeam a Akuj, eyei lokeno a ngakipeyos.” Tomea Solomon Benaya lokookeng a Yeoyada ebala, “Kape taar Yoab.” Tolot Benaya loeam a Akuj tolimok Yoab tama, “Adungu ekapolon atamar topud iyong nikalapatan.” Tatachu Yoab tama, “Mam, atoanikini ayong nege.” Tobongo Benaya nia ekapolon tolimok ngesi ngakiro na alimuni Yoab. Tolimok Solomon Benaya tama, “Tosubak loger lo ebala Yoab. Taar ngesi tonuk. Nyakapaikin ayong ka ngalesea nache daang a apakang Daudi, ngaakot a ngitunga alu kolong aari Yoab peesechito. Irirae Ekapolon Akuj Yoab kotere ngaakot a ngitunga alu aari ngesi peeyeni apakang Daudi. Aari Yoab ngitunga lupeasechito ngiarei, luajokak edwangito ngesi. Ngitunga ngulu kesi Abiner lokookeng a Ner lo arai ekarikon a ngasigerea a Isirael, ka Amasa lokookeng a Yeser lo arai ekarikon a ngasigerea a Yuda. Iwapi eriras a ngaakot a ngitunga kangulu Yoab ka ngalesea keng jik. Nakaneni epiari Ekapolon Akuj Daudi ka ngalesea keng, ka awi keng ta, ekicholong keng a apolou, irukete ka ekisil a Ekapolon Akuj jik.” Sodi tolot Benaya loeam a Akuj taar Yoab, tonukakinae ngesi nawi keng anariet. Kilunyok ekapolon Benaya lotich a Yoab toliwor ekarikon a ngasigerea, sodi kilunyokin Sadok lotich a Abiasar toliwor emuron a Akuj. Ani erumor tomea ekapolon itwaan anyarare Chimei, tolimok tama, “Todukok akai kon nege Yerusalem, sodi kiboikin neni. Wara nyiipudo alore. Akolongit nacha irotokinio iyong kikalam ayanae a Kidiron, iteni itoani iyong. Iyong ilope kipaikinio akitu kon.” Tolimok Chimei ekapolon tama, “Ekapolon kang, itemokino ngakiro na ilimu iyong. Asubakini ayong loger ngolo.” Abu Chimei kiboi alo Yerusalem a ngirwa alukaalak. Adaunet a ngikaru a nguuni, apot ngikedalak a Chimei ngiarei tosiwa tolot lokapolon a akwap a Gas lo anyaritae Akich lo arai lokookeng a Maaka. Tolimokinae Chimei tamarae, “Alot ngikedalak kon nakwap a Gas.” Tonyou Chimei todoka losikiria keng tolot nakwap a Gas nia Akich, asakar ngikedalak keng. Tobuu ngesi ngikedalak keng nawi. Ani elimokinio Solomon atamar alosit Chimei nakwap a Gas ani erumor tobongu, tomea ekapolon itwaan anyaraun Chimei, sodi tolimok ngesi tama, “Kesikongi kolong ayong iyong alokiro a Ekapolon Akuj atamar nyiirotok alo Yerusalem. Abu kechikichik atamar ani kilot iyong wache, iteni itoani. Ibu kitolimok ayong tama, ‘Itemokino ngakiro na ilimu iyong, ewapi ayong.’ Nyo peirichakinea iyong ngakiro na ikongi iyong ka etal lokadungokini ayong iyong? Iyeni iyong ilope ngakiro naaronok daang nakolong isubea iyong apakang Daudi. Kirirae Ekapolon Akuj iyong kotere nguna. Nakaneni kapiari Ekapolon Akuj ayong jik, nabo itogogongi apolou a Daudi jik.” Sodi todungok ekapolon Benaya atamar tolot taar Chimei. Abu apolou daang min nakan a Solomon. Abu Solomon tachamakin ka ekapolon a Misiri kiut nakookeng a ekapolon kangolo. Toriku Solomon aberu ngina lore a Daudi tanang ngirwa lu arumorea ngesi akiduk akai keng, ka akai a Akuj, ta awas na eriamit ere a Yerusalem. Epeyoenete ngitunga ngakipeyos alokenoi alugelagelae kainyo aringa akai a Akuj nyeduko. Amina Solomon Ekapolon Akuj nabo ewapit ngesi ngakiro a apakeng Daudi. Tani ikoni neni dang, angoleene ngesi dang ngibaren eraakasi ngakipeyos alokenoi alugelagelae. Akolongit apei, tolot Solomon akipeyore alo Gibeon kainyo inaa ngesi ayei ekeno lo ayenikinitae. Epeyot sek Solomon ngakipeyos abunget apei kaneni. Akolongit ngina nakwaare alo Gibeon, bu Ekapolon Akuj nia Solomon anakirujare tolimok tama, “Kilipae ibore ni cha isaki iyong kainak.” Tolim Solomon tama, “Idodiunit kolong iyong amina naationon na nyedaun anika apakang Daudi alo arai ekasuban etich kon, kainyo arai ngesi lo imuno iyong nabo atenoono, tarai loajokon noi anikon. Eringa iyong idodikinit ngesi amina naationon noi na nyedaun ani iinakinea ikoku nisapat ni iboi alokicholong tokona a apolou keng. Tokona bocha, Ekapolon Akuj na irai Akuj kang, kilunyok iyong ayong napolou a apakang, tani bo kadit dang, nyayeni akou ka aabor a ngakiro a apolou. Ayong logo ayei kiding ngitunga lukolong iseuni iyong, ebukut lo eyenikinitae, ngitunga lu nyimarun ani elalaketa noi. Aloger kangolo, nakinae aosou na apolokinio ngitunga kon alorot alo a iteni, atoyenea naajokak ka naaronok. Kainyo ngae epedori apolokin ngitunga lukon kaalak lugu?” Tojoikis Ekapolon ngakiro na elipar Solomon aosou. Tolimok Akuj ngesi tama, “Ani aloger ilipar iyong aosou na ipolokinio ngitunga a erot alo a iteni, akidwang akilipa atamar toyar a ngirwa alukaalak, kori ebari, kori akitu a ngimoe kon, asubakini tokona ayong nguna ilipa iyong. Kainakini ayong iyong aosou ka achwaanu na emam itwaan aanyu napei kolong jik eringa, nabo emam itwaan iche eanyuni ni isidiun iyong. Kainakini tani ngakiro na eringa nyilipa, kainakini ebari ka ekipur, nyemini ekapolon eche kisikwaanere iyong ngirwa daang lu iyarea iyong. Ani kiwap iyong ngirotin kang, ka ngakitatamet kang, ta ngitalio kang, loger lokolong ewapitor apakon Daudi, eatakini ayong ngirwa lu iyarea iyong.” Tokienyu Solomon toyen atamar kesuruori Akuj ngesi anakirujare. Tolot ngesi Yerusalem towo alongaren asaduku a Achamunet a Akuj, kipeyo ngakipeyos na inomio, ka na a ekisil, kipeyonok Ekapolon Akuj. Ani erumor kisumuj ngesi ngikasubak etich keng daang. Apote ngamalaae ngaarei akolongit apei towaa alongaren Solomon. Tolim apei kech tama, “Ekapolon kang, kibooyi kolong ayong ka aberu naga alokai a apei. Edou ayong ikoku nisapat alokai eyei ngesi neni. Adaunet a ngirwa a ngiarei anakolongit ana edounio ayong, kidou aberu naga dang ikoku nisapat. Sua naarei make kiya kai, amam itwaan iche ayei neni. Akolongit apei nakwaare, kibelobeloor aberu naga totik ikoku keng taar. Tonyou ngesi kiding akwaar tadaka ikoku kang anakook kang ajotoe ayong, dio akiperikin nakook keng. Tadaku ngesi ikoku keng ni atoanit kiperik nakook kang. Ani anyouni ayong nataparach abala etanak ikoku kang, atoriam etoanit. Ani esemee ayong ngesi lokojokon, atoriam pearai nikang.” Nakaneni tolim aberu nache tama, “Meere kongina! Erai ikoku ni eyari ikang. Erai nikatoan ikon!” Tatachu na ekingaren tama, “Meere kongina! Erai ikoku nikatoan ikon! Erai ni eyari ikang!” Topegakin kesi loger ngolo alongaren ekapolon. Sodi tolim ekapolon tama, “Ebala esi apei, ‘Ikoku kang ni eyari, ikon ni etoanit’, tama nache, ‘Meere kongina, nikon ni etoanit, nikang ni eyari.’ ” Tolim ekapolon tama, “Inunae ayong ekileng.” Sodi inunae ekapolon ekileng. Tolim ekapolon tama, “Tapak ikoku ni eyari ngaarei, nak ewae epei aberu apei, nak ewae loche aberu nache.” Ani aloger aminar aberu nalope ikoku keng, abu ngesi tolimok ekapolon tama, “Ekapolon kang, nyiar kare ikoku! Nak aberu naga!” Nakaneni tolim aberu nache tama, “Nyeinakinio itwaan ipei ikoku ngini, tapak!” Ani erumor tolim Solomon tama, “Nyiar ikoku! Nak aberu nata a ekingaren, ngesi erai ikoku ikeng dir.” Ani iirarete Ngisirael eger lo atubio Solomon ngakiro nguna, apot kesi daang tokera ngesi noi erimasi kainyo apot kesi toyena atamar ainaki Akuj Solomon aosou na etubio ngakiro alorot alo a iteni. Arai Solomon ekapolon a Ngisirael kadaang. Lugu kesi araakasi ngikapolok a arieng keng. Asariya lokookeng a Sadok ngesi arai emuron a Akuj. Eliorep ka Aija lu araakasi talokookeng a Chicha kesi araakasi ngikegirak a arieng. Yeochapat lokookeng a Ailud ngesi eweikinit ekimar. Benaya lokookeng a Yeoyada ngesi arai ekarikon a ngasigerea. Sadok ka Abiasar kesi araakasi ngimurok a Akuj. Asariya lokookeng a Nasan ngesi apolokinit ngikaweikinak a ngatiaket a akwap. Sabud lokookeng a Nasan ngesi arai emuron, tarai lopae keng a ekapolon. Abichai ngesi aweikinit ngikasubak etich alokai a ekapolon. Adoniram lokookeng a Abuda ngesi aweikinit etich lo edesikinitae ngitunga akisub. Aseunit Solomon ngikaweikinak ngitomon ka ngiarei aweikin Isirael daang. Ayauniyete kesi akimuj inut ekapolon ka ngitunga a awi keng. Alemuununi ipei kech daang akimuj a elap a epei alokaru a epei. Ngirora kech lugu, Benur aweikinit atiaket a akwap ana ngimukur a Epiraim. Bendeker aweikinit ngirerea a Makas, ka Chaalibim, ka Bes Chemech, ka Elon, ta Bes Anan. Benesed aweikinit ngirerea a Arubos, ka Soko, ta akwap daang a Eper. Benabinadab lo eusit nakookeng a Solomon na anyaritae Tapas, ngesi aweikinit atiaket a akwap a Dor daang. Baana lokookeng a Ailud aweikinit ngirerea a Taanak, ka Megido, ka atiaket a akwap na alodiye Bes-chan daang, diyete ere a Saretan, kuju ere a Yesireel, tanang lore a Abel-meola, ta ere a Yokineam. Benigeber aweikinit ere a Ramos alo Gilead ka ngadakarin na ayakasi Gilead na ngitunga alu emachar a Yair alo erai ales a Manase, ka atiaket a akwap a Arigob alo Bachan. Araakasi daang ngirerea ngitomwon-kapei lu adukitoe ngawasea, toyakas ngidorin a ngasua ananyangayek. Ainab lokookeng a Ido aweikinit atiaket a akwap a Maanaim. Aimaas lo eusit nakookeng a Solomon ache na anyaritae Basemas, ngesi aweikinit atiaket a akwap a Naputal. Baana lokookeng a Uchai aweikinit atiaket a akwap a Acher, ka ere a Bealos. Yeochapat lokookeng a Parua aweikinit atiaket a akwap a Isakar. Chimei lokookeng a Ela aweikinit atiaket a akwap a Benjamen. Geber lokookeng a Uri aweikinit atiaket a akwap a Gilead, nakolong apolokinit Sion lo arai ekapolon a Ngiamor ka Ogu lo arai ekapolon a Bachan. Ani ipakara lutomon ka ngiarei ngulu, ayei ekaweikinan epei lo aweikinit akwap a Yuda daang. Alalak ngitunga a Yuda ka Isirael ekote asinyen na eyei lokwaas a anam. Emujete kesi, tamaase, talakaros. Anangit apolou a Solomon nakwapea daang napei anangolol a Eupurate, tanang nakwap a Ngipilisti, ta ekukuoru a Misiri. Abukonokinete kesi Solomon echur, ka akisub etich keng ngirwa daang lu ayarea ngesi. Etiae a akimuj ana asakit Solomon akolongit apei ngesi logo, ngalitae ngabunge ngakan a ngakiria anaajokak, ka ngalitae ngabunge ngatomon a ngakanoi, ka ngimongin luatumak ngitomon, ka ngaatuk ngatomwon-arei na edakasi anachokor, ta ngimesekin amiat apei peimaritae ngimakatae, ka ngagetei ka ngatirikikio ta ngikieny. Apolokinit Solomon akwap daang na eyei too angolol a Eupurate, napei alo Tipisa Eupurate, tanang lore a Gasa. Apolokinit ngesi ngikapolok daang lu ayakasi too Eupurate nabo esilito ngesi ka ngakwapea na edunyatar daang. Ngirwa daang lu ayarea Solomon, ebooyete ngitunga daang a Yuda ka Isirael a ekisil, itwaan daang ka ngikito keng a ngimusabib ta ngimeyana keng. Ayakasi Solomon nganokin ngabunge ngatomwon-omwon na ngangolei ana irito ngaurukukui. Ayakasi nabo ngesi ngasigerea na edokito ngangolei ngabunge ngatomon ka ngaarei. Ngikaweikinak a ngatiaket a akwap keng lutomon ka ngiarei, ainuniyete ngesi akimuj na anyamete ekapolon ka ngitunga a awi keng daang. Ayauniyete kesi tani erau ka nginyia ni asakitere, kotere ngangolei ka ngibaren lu etusubio etich. Abu Akuj nak Solomon aosou naationon, ka akeleanut a akou ta achwaanu naationon noi na nyepedorio akitem. Edwangit aosou a Solomon na a ngitunga kadaang a akide Misiri. Ngesi aos noi alokiliok kadaang. Aos ngesi edwangit Esan lo arai Esirait, ka Eman, ka Kalikol, ta Darida, lu araakasi talokookeng a Maol. Kipuruunoe Solomon anakwapea kadaang ana edunyatar. Abu ngesi kiroku ngakatamak ngabunge ngauni, toeok ngieosio abunget apei ka ngikan. Kiruor ngesi ngakiro a ngikito, napei alochekereng a akwap a Lebanon tanang lokito lu enyaritae isopo*g** lu erupete alokwaasea a ngawiyei. Kiruor ngakiro a ngitieng napei alokieny, ka lu eliato tanang lokolea. Apot ngikapolok a ngakwapea kadaang kiirasi ngakiro a aosou a Solomon, sodi tomeasi ngitunga akiirar aosou keng. Arai sek ekapolon a Tiro lo anyaritae Iram lopae keng a Daudi. Ani iirari ngesi atamar elunyokin Solomon napolou a apakeng Daudi, abu ngesi tomea ngikaweikinak keng nia Solomon. Tomea Solomon ngitunga nia Iram ebala, “Iyeni iyong atamar peapedori apakang Daudi akiduk akai a Akuj kotere ngijiesinei lu etijio ngesi jiik nakwapea na eriamito ngesi, tanang ni esidwangea Ekapolon Akuj ngesi ngimoe keng daang. Nakaneni kainaki tokona ayong Ekapolon Akuj na erai Akuj kang ekisil alowaitin kadaang. Emam tokona ngimoe eyakasi kori aremo. Aloger kangolo, asaki ayong adukokin akai a Ekapolon Akuj ana erai Akuj kang, loger lokolong echikakinea Ekapolon Akuj apakang Daudi tama, ‘Lokookon lo elunyokini ayong lokicholong a apolou, ngesi kadukokini ayong akai.’ Tokona bocha, tomea ngitunga kon katotubokis ayong ngakito a ngichekereng alo Lebanon. Epote ngitunga kang kimorikin ka kesi alotich. Atachi ayong ngitunga kon ngaropiyae etiae locha itiakuni iyong. Iyeni iyong atamar emam itwaan anikosi kane eyeni akitub ngikito loger a ngitunga kon, a Ngisidon.” Ani iirari Iram ngakiro a Solomon, talakar ngesi lokojokon, tolim tama, “Kipuroe Ekapolon Akuj akolongit naga ani ainakinea Daudi lokookeng lokooson noi lo epolokini ngitunga lukaalak lugu!” Abu Iram tomea ngitunga nia Solomon ebala, “Eira ayong ngakiro kon. Asubakini ayong ngakiro na isaki iyong daang. Alemuni ayong ngikito a ngichekereng ka ngidomou. Eyaunete ngikasubak etich kang ngakito alo Lebanon yaasi nanam toena aapei, kilebolebooros ananam tanang ni isaki iyong, ani enangi neni, talachakis ngitunga kang ngakito nguna nakis ngitunga kon. Ani alowae kon, ilemuni iyong akimuj a ngitunga kang.” Sodi inu Iram Solomon ngakito a ngichekereng ka ngidomou na asaki ngesi, sodi tolemanak Solomon ngesi ngataanea ngabunge ngatomwon-arei a ngakanoi, ka ngalitae ngabunge ngamiae ngoomwon a akimiet anaajokon, sodi kisumujea ngitunga ngulu. Alemuununi Solomon akimuj ngina ekaru daang. Nak Ekapolon Akuj Solomon aosou loger losek echikakinitor. Min ekisil nia Iram ka Solomon, sodi tachamakin kesi luarei. Kipaku Solomon ngitunga ngabunge ngatomwon-uni alo Isirael kadaang, kidesik akisub etich, sodi toseu Adoniram toweik kesi. Totiak Solomon kesi a ngalooso a ngauni, a ngitunga ngabunge ngatomon. Eboyeene atiaket apei alo Lebanon a elap a pei, tobongut nawi a ngilapio a ngiarei. Ayakasi Solomon nabo ngitunga ngabunge ngatomwon-kauni nakwap na a ngimukur abelebeleete ngamoru, toyakas ngitunga ngabunge ngatomwon-kaarei lu adakete ngamoru nguna. Toseu ngesi ngitunga ngabunge ngauni ka ngamiae ngauni toweikis etich ka ngitunga lu asubete etich. Apot kesi tobelabelata ngamoru naapolok naajokak nakitoweet akai a Akuj loger losek adungunitor ekapolon Solomon. Apot ngikadukok a Solomon, ka lua Iram, ta ngitunga a ere a Bibilos tolemut ngamoru ka ngakito naduket akai a Akuj. Adaunet a ngikaru a ngamiae a ngoomwon ka ngitomwon-kauni napei kolong erotokinete Ngisirael alo Misiri, ekaru lo a nguomwon lo apolokinitor Solomon Isirael, elap lo a ngiarei lo enyaritae Sip, abu Solomon kisiak etich lo akiduk akai a Ekapolon Akuj. Arai aoyau na alokwap alotooma akai ngina ngamitae 27, tarai ewae louriyen ngamitae 13.5. Arai aoyau na elosi nalup a akai ana elomanarere namaniyae ngamitae 4.5, tarai ewae louriyen ngamitae 9, eriyan ka ewae lo alongaren akai. Tosubak ngesi alokwaasea a akai ngipukei lukaadingak anikalapatan, tabalany alotooma. Alokwaasea a akai, ngisiepion ka aabor alowae alo anikalapatan, apon kiatarae ngakais na alokidiama ngauni. Arai aoyau na alokidiama a akai a apei ngamitae 2.2. Anamaniyat a apei kadaang a akai ana alokwap, arai ewae louriyen ngamitae 2.2, ani na alokiding ngamitae 2.7, ani na alokidiama ngamitae 3.1. Abeben ngikwaasea a akai kadaang ana alokidiama akidwang na alokwap, sodi towaar akai peirepakinitae ngakito nakiganget. Asubio akai a ngamoru anasek asubitae ani ebesere, ani esaa lo edukere akai, nyeeminio erue a ngakujuka ka ngaepe kori ngiboro luche lusua. Ayei ekidor a akai ana alokwap lowae lo alokuju akai, toyakas ngadoket na edokarere lowae lo alokidiama tolomarere namaniyat na alokiding ta na ngauni. Sodi toduk Solomon akai a Akuj torumo. Toduk ngesi kidiama akai alowae alo alotooma a ngakito a ngichekereng. Adukokinitae adukuor na ayakasi ngakais na alokidiama ngauni ngina lokwaas lo anikalapatan akai a Akuj, tokonyakinitetei a ngakito anakiganget ana araakasi ngaka ngichekereng. Arai aoyau na alokidiama a akai a apei ngamitae 2.2. Tolimok Ekapolon Akuj Solomon tama, “Anakiro a akai ana iduki iyong kana, kasubakinea ayong iyong ngakiro nakolong echikakini ayong apakon Daudi, erai kiwap iyong ngakitatamet kang, ka ngakiro kang ta akirichakin ngitalio kang daang. Eboikin ayong kiding Ngisirael lu eraakasi ngitunga kang alokai ana iduki iyong kana. Nyaisikini ayong kesi jik.” Sodi toduk Solomon akai a Akuj torumo. Apon ngikwaasea a akai alowae alo alotooma toburae a ngakito a ngichekereng napei alokwap tanang kidiama, sodi tosubunae ewae lo alokwap a ngakito a ngidomou. Adukitoe amaniyat na alotooma na enyaritae ewae lo italeuniote noi, lowae lo aabor a akai a Akuj. Arai aoyau keng ngamitae ngakan-koomwon, totiakitetei a ngakito a ngichekereng napei alokwap tanang kidiama. Arai aoyau a amaniyat ana eyei ngaren ewae lo italeunitoe noi ngamitae ngatomon ka ngakan-kauni. Etisiritoe ngakito na alotooma, akulakinitae ngituol ka ngatur. Aburuchiaritae ewae lo alotooma daang a ngakito a ngichekereng sodi nyeepedoreta ngamoru atakanuun. Ani ewae lo alotooma noi akai a Akuj, abu ngesi todukok amaniyat na alotooma ni iwaakinio asaduku a Achamunet a Akuj. Arai aoyau a amaniyat ana alotooma kangina ngamitae ngakan-koomwon, tarai auriaunut ngamitae ngakan-koomwon, tarai aoyau na alokidiama ngamitae ngakan-koomwon. Aburuchiaritae ngiwaitin daang a egolit bon. Aburuchiaritae ekeno a ngakipeyos a ngakito a ngichekereng. Kitokorian Solomon ewae lo alotooma akai a egolit, sodi kiriwokinae ngiriko a egolit ngaren amaniyat na alotooma, sodi toburuchiarae ngiriko ngulu a egolit. Aburuchiaritae akai daang a egolit, tani ekeno a ngakipeyos lo ayei namaniyat na alotooma noi, toburuchia ngesi a egolit. Tosub ngesi ngiborei lua ngabeben ngiarei anakito a ngikito a akimiet kiwaak lowae lo italeunitoe noi. Arai aoyau a ipei kech kadaang ngamitae 4.4. Arai aoyau a abeben kech a apei ngamitae 2.2, tarai aoyau a abeben anache ngamitae 2.2. Napei alokidiama abeben apei tanang kidiama nache, arai ngamitae 4.4. Arai nabo ibore nia ngabeben niche dang ngamitae 4.4. Ariyan ngiborei luarei lua ngabeben ngulu ekwaan. Arai aoyau na alokidiama a ipei kech kadaang ngamitae 4.4. Esibakitae ngiborei lua ngabeben ngulu alowae alo alotooma noi, sodi tatapas ngabeben kech na epetara alokiding amaniyat. Aburuchiaritae ngiborei luarei a ngabeben ngulu a egolit. Abu Solomon kitisir ngikwaasea a amaniyat anaapolon ka na alotooma, tokulak ngiborei lua ngabeben, ka ngingolea, ta ngatur. Aburuchiaritae tani ewae lo ngalup a egolit. Asubunitae ngidorin ngiarei lu iriamito a ngakito kitowae ani elomarere lowae lo alotooma noi. Ewae lo alokidiama ekidor ka ngapirio a ekidor, akuduno kiganga ekidor. Etisiritoe ngidorin a ngiborei alu a ngabeben, ka ngingolea, ta ngatur na akulitae. Ngidorin, ka ngiborei lua ngabeben, ta ngingolea, etisiritoe a egolit. Tosubunae ngakito na itoweito ekidor anakito a ngikito a akimiet, eyakasi ngiwaitin nguomwon lu eriyan lu elomarere namaniyat naapolon. Ayakasi ngidorin ngiarei lu abilanakinio lu asubunitae anakito a ngidomou. Etisiritoe ngidorin ngulu a ngiborei alu a ngabeben alu akulunitae. Etisiritoe tani a ngingolea, ta ngatur, sodi toburuchiarae a egolit kilalakinae. Tokudokinae alaar na alotooma ngaren akai a Akuj. Kisiriamae ngikwaasea a akidokiet a apei a ngakito a ngichekereng, ka ngakidokiet ngauni a ngamoru. Arumorio akiduk ewae lo a ngalup a akai a Akuj elap lo a ngiarei lo enyaritae Sip, ekaru lo a ngauomwon lo araakar Solomon ekapolon. Ani enangi elap lo a ngikan-kauni lo anyaritae Bul, ekaru lo a ngitomon ka epei lo araakar Solomon ekapolon, apon torumoroe jik akiduk akai a Akuj loger lokolong sek arekinitae. Erikakini Solomon ngikaru ngikan-kaarei eduki akai ngina. Aduki Solomon akai keng a elope torumo a ngikaru a ngitomon ka nguuni. Aduki ngesi akai na anyaritae akai a Amoni a Lebanon. Arai aoyau keng ngamitae 44, tarai aurianut ngamitae 22, tarai aoyau na alokidiama ngamitae 13.5. Adukokinitae kidiama ngangedakinet ngauni a ngapirio a ngichekereng. Ayakasi ngapirio ngatomon ka ngakan, kiriwokinitetei ngakito a ngichekereng kidiama ngapirio. Aburuchiaritae kidiama a ngakito a ngichekereng tanang lopemin lu adukokinitae kidiama napirio ngatomwon-omwon ka ngakan. Arai ngapirio ngatomon ka ngakan ayakasi nangedakinet apei. Ngikwaasea luarei a akai, ayakasi epei kech daang ngangedakinet ngauni a ngipidinga. Ayakasi ngidorin daang ka ngipidinga ngakito na itoweito na ayakasi ngiwaitin nguomwon. Akienyikina ngangedakinet a ngipidinga aluuni ka ngangedakinet nache daang. Todukok ngesi akai na anyaritae akai a Ngapirio. Arai aoyau keng ngamitae 22, tarau aurianut ngamitae 13.5. Ayei ekidor lo aburitae kigangito ngapirio. Todukok Solomon akai na anyaritae akai a Apolou, anyaritae nabo ekiro eche akai a Eriras, ni atubeeneo ngesi ngakiro. Adukitoe a ngakito a ngichekereng napei analup tanang kidiama. Adukitoe akai a Solomon a elope loger a ngakais anache. Ayei akai keng nalaar ache na ayei naabor a akai a Eriras. Todukok ngesi nabo aberu keng na arai nakookeng a ekapolon a Misiri akai na ikoni ngina. Ngakais nguna daang napei anakai a Akuj tanang kai a Solomon, adukitoe a ngamoru anakaalak a ngaropiyae napei analup tanang najipet na alokidiama. Echietae ngamoru nguna sodi kitemoi, totuboe ngiwaitin lu alotooma ka lu anikalapatan a ngigirigirea. Adukitoe ewae lo a ngalup a ngamoru anakaalak a ngaropiyae taraakas naapolok, na asubio anikibeset ngamoru. Arai aoyau a ngache kech ngamitae ngauni ka anus tarai aoyau a ngache ngamitae ngoomwon. Kidiama kech adukitoe a ngamoru anakaalak a ngaropiyae, na ibesite kitemitetei lokojokon. Adukitoe tani a ngakito a ngichekereng. Alaar na akai a ekapolon, ka alaar na alotooma akai a Akuj, ta amaniyat na elomarere kai a Akuj, ayakasi ngikwaasea lu achulitoe a akidokiet a apei a ngakito a ngichekereng, tochulokinae nakidokiet ngauni a ngamoru ana ibesitae. Tanyarau Solomon itwaan ni anyaritae Uram alo Tiro. Arai ngesi lokookeng a apuserut a apei ana arai aka ekitela a Naputal. Arai apakeng itwaan a akwap a Tiro. Arai kolong apakeng ekunonoit a ngasua ananyangayek. Arai Uram itwaan nikachwaan tarai ekunonoit lo eyenikinitae alotich a ngasua ananyangayek. Abu ngesi tacham aweikin etich daang a ngasua ananyangayek loger lo alimokinitor Solomon. Tosubak Uram ngakitoropiet ngaarei na ngasua ananyangayek. Arai aoyau a apei ngamitae 8, tarai alangirir ngamitae 5.3, sodi kiwaak kesi ni elomarere kai a Akuj. Tosubak ngesi nabo ngiwaitin lua ngakies ngiarei lua asuat ananyang, erai aoyau a ipei kech kadaang ngamitae 2.2, sodi kidokok nakies a ngakitoropiet. Etisiritoe kidiama ngakitoropiet nguna a ngiriko alu edanyitae, kimorikinae ka ngangedakinet ngaarei a asir ana ekwaan ka ngalam. Asubunitae ngiwaitin lua ngakies a ngakitoropiet kanguna ikwaan ka ngatur a eewat, erai aoyau kech ngamitae 1.8, kiwaakinae kesi lowae lolem lo eyei kidiama asir a ngiriko. Ayei asir na ekwaan ka ngalam ngamiae ngaarei na ayakasi nangedakinet ngaarei, na eriamito akou apei. Kitowo Uram ngakitoropiet naarei a ngasua ananyangayek nguna alodiyete ni elomanarere kai a Akuj. Abu ngesi tanyara akitoropiet na ayei lowae lo alokuju Yakin, sodi tanyara na ayei lowae lo alokwap Boas. Ngiwaitin lua ngakies a asuat ananyang lu ekwaan ka eewat ngulu, ayakasi kidiama kech ngakitoropiet. Sodi torumor etich a ngakitoropiet. Tosubak Uram atanki a ngakipi a ngasua ananyangayek. Eriamit atanki ngina. Arai aoyau keng ngamitae 2.2, tarai aurianut napei alokwaas aloche tanang loche ngamitae 4.4. Arai aoyau a akirimokinet a apei ngamitae 13.2. Eriamito ngitoroi ngiarei a ngituol lowae lo anikalapatan ngikelio a atanki alowae alo a ngalup. Asubunitae ngituol ngulu anasua ananyangayek. Edokokinitoe atanki ngina kidiama ngimongin ngitomon ka ngiarei lu asubunitae anasua ananyangayek. Engoliarito ngimongin nguuni kwap, kingoliasi nguuni too, kingoliasi nguuni kuju, sodi kingoliasi nguuni kide. Engoliarito ngaaborin kech lowae lo alotooma. Arai alangirir a ngikwaasea a atanki kangina ngamilimitae 75. Ekote ngipon a atanki kangina lua ekopo, tokuduno ngikwaasea nikalapatan loger a ngatur a eewat. Elelebuunun atanki ngina ngakipi na eraakasi ngalitae ngabunge ngatomwon-omwon. Tosubak Uram tani ngaurukukui na iritae ngatomon anasua ananyangayek. Arai aoyau a apei kech kadaang ngamitae 1.8, tarai aurianut ngamitae 1.8, tarai aoyau na alokidiama ngamitae 1.3. Asubunitae ngaurukukui nguna a ngiwaitin alu eriyan alu ewaanakinio nakito, na atapakinitae ngakisikwaanet a ngingatunyo, ka ngimongin ta ngiborei lua ngabeben. Nasua nguna ka ngakito alokwap ka kidiama ngingatunyo, ka ngimongin ngulu, ayei asir na aluguritoe niajokon. Ayakasi ngaurukukui nguna ngakejen ngaomwo-omwon na asubunitae anasuat ananyang. Lowaitin luomwon, ayakasi ngakiganget ngoomwon na ngategerin. Etisiritoe ngakiganget nguna a asir ana aluguritoe niajokon. Ayakasi ngasua na eriamito lowae lo alokidiama ateger. Alowae alo alokidiama aurukuk arai aoyau a ngasua kanguna ngasentimitae 45. Tarai alowae alo alotooma ngasentimitae 18. Akulakinitae asir lowaitin daang. Arai aoyau na alokidiama a ngakejen ngasentimitae 66. Ayakasi kesi kwap ngasua, nabo emorikina ngasua na ngakejen ka aurukuk atokokino. Ekwaan ngakejen ka ngakejen a aurukuk ana irito ngangolei. Asubunitae ngasua na ngakejen, ka ngipon, ka ngaunoi nasua, ta ngalukan na alotooma ngakejen. Asubunitae daang anasua ananyangayek. Ayakasi ngakiganget ngoomwon kwap ngikwaasea a ngaurukukui kadaang. Asubunitae ngakiganget nguna ka aurukuk imorikina etokokino. Ayei atorosit na arai ngasentimitae 22 eriamit ewae lo alokidiama aurukuk. Ngakiganget keng ka ngasua, emorikina ka aurukuk atokokino. Etisiritoe ngakiganget nguna ka ngasua a ngiborei alu a ngabeben, ka ngingatunyo ta ngingolea, awadaang anicha alolom sodi kisiriamae asir na eluguritoe niajokon. Asubakinitae ngaurukukui loger ngolo, ekwaan daang, ariyan aoyau keng ka eger lo asubitere. Tosubak Uram tani ngategerin ngatomon, apei kotere aurukuk apei. Arai abalanyany a ateger a apei ngamitae 1.8, elelebuunun ngakipi ngalitae ngamiae ngakan-kauni. Kiwaak Uram ngaurukukui ngakan lowae lo alokuju akai a Akuj, kiwaak nache lowae lo alokwap. Sodi kiwaak atanki lowae lo alo kide alokuju. Tosubak Uram tani ngamoti ka ngakalobochio nawadet ngalup, ta ngatubwae nabeleny. Torumo Uram etich lo akiduk akai a Akuj losek adungokinit ekapolon Solomon ngesi. Asubakinit ngesi ngapirio ngaarei, ka ngakies kech na ikwaan ka ngakalobochio, ta ngiriko lu edanyitae lurapet ngakies a ngapirio. Tosubak ngakisikwaanet a ngalam ngamiae ngoomwon kotere ngiriko luarei ngulu, ngangedakinet ngaarei a ngalam kotere erikot epei, sodi kitisiro ngakies a ngapirio. Tosubak ngaurukukui ngatomon, ka ngategerin ngatomon na asiponokinio ngaurukukui. Tosubak atanki ka ngakisikwaanet a ngimongin lu asipokinitae atanki. Tosubak ngamoti, ka ngakalobochio nawadet ngalup, ta ngatubwae. Ayakasi ngiboro ngulu daang kai a Akuj nakolong aduki Uram kotere ekapolon Solomon. Asubunitae ngiboro ngulu daang anasuat ananyang ana epusitae. Loger lo alimunitor ekapolon, apon ngiboro ngulu daang tosubae ani asubeenere ngasua anadipo a Yorudan, kiding Sukos ka Saretan. Abu Solomon nyiitem ngiboro lua ngasua ananyangayek ngulu kainyo alalak noi. Aloger kangolo, nyeanyuna apotis a ngiboro kangulu. Sodi tosubak Solomon ngiboro daang lu iwaakinio kai a Akuj, tosubak a egolit. Ngiboro ngulu kesi ekeno a ngakipeyos ka emeesa a ngamugati ana elemanakinio Akuj, ka ngasipet ngatomon a ngataae na ayakasi ngaren ewae lo italeuno noi, ayakasi ngakan kuju, toyakas ngakan kwap. Tosubak ngatur ka ngataae, ka ngasua naridet ngatotol. Tosubak ngikopoi, ka ngasua nakitudungeet ngataae, ka ngatubwae nabeleny, ka ngitubwae lukinomet emitina, ta ngataritarea nalemet ngatotol na enokete. Tosubak ngasua a ngidorin a ewae alo italeuno noi ka ngidorin lua nikalapatan akai a Akuj. Asubunitae ngiboro ngulu daang a egolit. Ani erumori ekapolon Solomon etich keng daang a akai a Akuj, abu tolem ngiboro daang lukolong etaleuni apakeng Daudi toliworos ngika Ekapolon Akuj, kiwaak lokerui a akai a Akuj. Araakasi ngiboro ngulu ngakwangae, ka egolit ta ngiboro luche. Ani erumor tochunak ekapolon Solomon ngikarikok daang a ngitela, ka ngimacharin a Ngisirael pot nikeng alo Yerusalem, sodi tolemareta asaduku a Achamunet a Akuj alo Sion alo erai ere a Daudi, yaarae kai a Akuj. Tochunakinos kesi daang ngirwa lua esukukuu a ngikalea elap lo a ngikan-kaarei lo enyaritae Esanim. Ani echununosi ngikarikok daang, tadakut ngimurok asaduku a Achamunet, tadakasi kai a Akuj. Apot Ngilawi ka ngimurok yaasi tani eam a Akuj ka ngiboro keng daang yaasi kai a Akuj. Abu ekapolon Solomon ka Ngisirael daang lu achunakina ngaren asaduku a Achamunet kipeyoto ngamesekin ka ngaatuk nakaalak na nyimarun. Ani erumor tadakasi ngimurok asaduku a Achamunet tooma kai a Akuj, kiwaakis lowae lo italeunitoe noi, kwap ngiborei lua ngabeben. Tarapa ngabeben kech na apetara asaduku ka ngakito na adakitere. Aoyak ngakito nguna noi atakanete ngasalunet kech arai kewo itwaan alongaren ni italeuno noi. Peapedorio aanyungar anikalapatan. (Eringa ngakito nguna eyakasi neni tani tokona.) Amam ibore ayei tooma asaduku a Achamunet pearai ngamoru nadapal naarei nakolong ewaakini Musa alomoru a Sinai, nakolong achamakinotor Ekapolon Akuj ka Ngisirael na apudunioto alo Misiri. Ani napei apudunioto ngimurok alokai a Akuj, abu edou toburuchia akai a Akuj. Kilelebun akwangis naakwaan kea a Ekapolon Akuj kai, tongop kesi kona ebongorete tooma akisub ngitichisio kech. Sodi kilip Solomon tama, “Ekapolon Akuj, iwaak iyong akolong nadis, tarai iseu iyong akiboikin lodowon ka naribu. Kadukok tokona ayong iyong akai a apolou, sodi kiboikini iyong neni jik.” Towaa ngitunga sodi torei Solomon kingolia lowae kech topia kesi. Tolim ngesi tama, “Kipuroe Ekapolon Akuj na erai Akuj a Ngisirel! Asubaki ngesi ngakiro nakolong echikakini ngesi apakang Daudi ebala, ‘Napei kolong epudunio ayong ngitunga kang alo Misiri, emam ere aseu ayong anakwap a Isirael kadaang lo edukokinio akai na kelipere ayong. Nakaneni kaseuni ayong iyong Daudi apolokin ngitunga kang.’ ” Torubak Solomon iruoro ebala, “Asaki kolong apakang Daudi adukokin akai na ilipere Ekapolon Akuj na erai Akuj a Ngisirael. Nakaneni tolimok Ekapolon Akuj ngesi tama, ‘Itemokino eger lo isakea iyong akiduk akai kang, ani kaneni dang, nyiduki iyong pearai lokookon lo iuriuni iyong ngesi kadukokini ayong akai.’ “Asubaki tokona Ekapolon Akuj ngakiro nakolong echikakini ngesi, kainyo elunyokin ayong napolou a apakang Daudi, aliwor ekapolon a Ngisirael, nabo adukok akai a Ekapolon Akuj ana erai Akuj a Isirael. Alotooma akai ngina, asubak tani ni iwaakinio asaduku a Achamunet na eyakasi ngamoru nadapal na achamunet ana kolong achamakinosi Ekapolon Akuj kata apaayok na epudunio kesi alo Misiri.” Sodi towo Solomon alongaren ekeno a ngakipeyos a Ekapolon Akuj ani achunakin Ngisirael daang kaneni. Kikea ngesi ngakan keng kidiama, kilip tama, “Ee Ekapolon Akuj na irai Akuj a Ngisirael, emam akuj na ikwaan ka iyong alokidiama nadis ka kwap nege! Irichakinit iyong ngakichiket kon, nabo imina iyong ngitunga kon lu iwapito ngakiro kon a ngitai kech kadaang. Irichak iyong ngakiro nakolong ichikakini apakang Daudi. Eyookin ngakiro nguna daang akolongit naga. Ee Ekapolon Akuj na irai Akuj a Isirael tokona bocha, kilipit atamar kirichak tani akichikakinet nache na kolong ichikakini iyong apakang Daudi ibala, ‘Ngirwa daang, nyengopi itwaan analesea kon ni epolokini Ngisirael, erai cha kiwap kesi ngakiro kang lokojokon loger lokolong iwapitor iyong.’ Akuj a Isirael, tokona bocha, kimiek ngakiro kon kiyookin. Ngakiro nakolong ichikakini iyong apakang Daudi, lo arai ekasuban etich kon. “Nakaneni ipedori iyong dir Akuj akiboikin nakwap nege a? Ekoe, ani bo akai na aduk ayong naga, nyediding noi a! Ee Ekapolon Akuj na irai Akuj kang, kiira akilip kang a ekasuban etich kon, tosubak nguna kelipi akolongit naga. Kitee akai nakon naga akwaar ka apaaran, nege ni ilimu iyong ibala, ‘Ni kelipere ayong nege.’ Kiirarae ayong esaa lo akienyikinea akai naga kelip iyong. Kiira akilip kang ka ngakilipasinei a ngitunga kon na ekienyikineta akai naga kilipa iyong. Kiirarae sua anawi kon ana eyei nadis, sodi kitorimak. “Ani itwaan ni esechakini itwaan niche, sodi torikunoe lokeno kon a ngakipeyos alokai kon, kikong atamar nyasechit ngesi, kiira iyong anadis sodi totiaku ngakiro a ngikasubak etich kon, na iyookino. Kirira ngini esechit loger lo ejoikinit iriraare, sodi talakak ngini nyesechit itemem ka ateneanut keng. “Ani idwangete ngimoe ngitunga kon Ngisirael ani kisechakinitotor iyong, nakaneni ani kereeunosi kesi nikon, pot kai naga kilipa iyong itiditeuna esakete kitorimakin, kiira iyong ngakiro kech anadis. Torimak ngasechesea a ngitunga kon, sodi tobuu kesi nakwap nakolong iinakini iyong taapaakech lungorok. “Ani kigolo iyong akiru ani kisechakinitotor kesi iyong, nakaneni ani kelunga kesi akisech kech, tokienyikis akai naga, kilipa iyong itiditeuna, kiira iyong anadis. Torimak ngasechesea a ekapolon ka ngikasubak etich kon, alu eraakasi ngitunga kon Ngisirael. Kitatam kesi akisub nguna iyookino. Ee Ekapolon Akuj, talakak robo akiru taram akwap nakon naga, nakolong iinakini iyong ngitunga kon toliwor akech jik. “Ani kemin eron a akoro nakwap, kori edeke loaronon kori kinyasu edii a akamu ngamanat, kori ngasepicho a emaase, kori kiriama ngimoe ngitunga kon, kori keting kesi edeke kori elekes, kiira ngakilipasinei kech. Alotunga kon a Ngisirael, itwaan cha daang ni kilipi iyong ialolongi alotau keng, ibakinit akai naga ngakan ilipit, kiira akilip keng. Kiira kesi anawi kon ana eyei nadis, torimak kesi, kingarak. Iyong bon iyeni ngakiro na eyakasi lotau a itwaan. Tosubea itwaan daang nguna itemokino esubere, sodi kitokereta ngitunga kon iyong ngirwa daang lu ibooyoto kesi anakwap ana kolong iinakini iyong taapaakech lungorok. “Loger lopei ngolo, ani kebu itwaan a akwap anache ni nyerai ipei a ngitunga kon, bu anakwap anakalonan akilip iyong alokai kana, ( kainyo iirarete kesi ekipur kon ka ngakiro naationok isubi iyong), kiira akilip keng. Kiira akilip keng anadis ani ibooyo iyong, tosubak nguna ilipa ngesi, sodi kitoyeneta iyong ngitunga a ngakwapea daang kitokereta, loger lokikeritotor ngitunga kon Ngisirael. Eyenunete kesi atamar akai na aduk ayong naga ngesi iseu iyong kilipeenere. “Ani kidungok iyong ngitunga kon atamar toloto akitijwore ngimoe kech, nakaneni ani kilipa kesi iyong awadaang anicha eyakasi, ekienyiunito lore lo iseu iyong logo ka akai nakadukok ayong iyong naga, kiira ngakilipasinei kech. Kiira kesi anadis sodi tobwanga kesi ngimoe kech. “Ani kisechakis ngitunga kon iyong, aloger emamakar itwaan nyesecheene, sodi ani ingoi iyong kimiek ngimoe idwangete kesi toriko kesi nakwapea nache toliworos ngirikon, tani keloka ngakwapea nguna, kiira ngakilipasinei kech. Ani kilipa kesi tolunga ngasechesea kech anakwap kangina, elimorito akisech ka aronis kech, kiira ngakilipasinei kech, Ekapolon Akuj. Ani kelunga kesi ngasechesea kech anakwap kangina, tolunga a ngitamen kech kadaang ka ngitai kech daang, sodi kilipa iyong ekienyiunito nakwap naga nakolong iinakini iyong taapaakosi lungorok, ka ere lo iseu iyong logo ta akai nakadukok ayong iyong naga, kiira ngakilipasinei kech. Ani iyei iyong nadis ni erai awi kon, kiira ngakiro kech, kisieneto kesi. Torimak ngasechesea kech daang ka angerit nakingeritotor iyong, sodi kitojok ngitai a ngimoe kech tosubeta kesi naajokak. Eraakasi kesi ngitunga kon a ilope, lukolong ipuduni iyong alo Misiri, ana ekwaan ka akim nakariran. “Ekapolon Akuj na Ipol Noi, tominak ngitunga kon Ngisirael ka ekapolon kech jiik. Kiira ngakilipasinei kech nache kinyaraata iyong esakete akingarakino. Ee Ekapolon lo irai Ekapolon Akuj, iseuni kolong iyong kesi alotunga kadaang toliworos ngitunga kon a ilope, loger lokolong ilimokinea iyong kesi ani a ekasuban etich kon Musa, nakolong ipudunio iyong taapaakosi lungorok alo Misiri.” Ani kilip Solomon Ekapolon Akuj kerumor, abu towo alongaren ekeno a ngakipeyos anisek ariedikitor ngesi ikearit ngakan. Kirema ngesi kilip Akuj ebala topia ngitunga daang lu achunakina neni. Tolim ngesi tama, “Kipuroe Ekapolon Akuj na ainaki ngitunga keng ekisil loger lokolong echikakinitor. Erichak ngesi ngakichikakinet keng naajokak daang nakolong esitoruni nia ekasuban etich keng Musa. Kimiekisi Ekapolon Akuj na erai Akuj yok eruko ka ngoni loger lokolong arukitotor ka taapaayok lungorok. Nyikiisik Ekapolon Akuj ngoni kori nyikinger. Kitiliwo ngesi ngoni lu kiwapit ngakiro keng, sodi ebooyoto ngoni jiik loger lo esakea ngesi, erichakisi ngitalio keng daang ka ngakiro nakolong adungokini ngesi taapaayok lungorok. Kimiekisi Ekapolon Akuj na erai Akuj yok toliwor itamunit ngakiro na elipa ayong nugu ngirwa daang. Toliwor ngesi jiik lo a ngisien ani a Ngisirael ka ekapolon kech, itemem ka ngakiro na iitanito kesi jiik, sodi toyeneta ngitunga a ngakwapea daang atamar Ekapolon Akuj bon ngesi erai Akuj, emam ache. Toliworos esi ngitunga a Akuj lu inupito Ekapolon Akuj na erai Akuj yok, iwapito ngitalio keng daang ka ngakiro na edungunit ngesi loger lo tokona iwapitotor.” Ani erumor tolemut Solomon ka ngitunga daang ngakipeyos kipeyokis Ekapolon Akuj. Kipeye Solomon ngaatuk ngabunge ngatomwon-arei ka ngaarei, ka ngamesekin ngabunge amiat apei ka ngatomwon-arei, eraakasi ngakipeyos a ekisil. Sodi kitaleut Solomon ka ngitunga daang akai a Akuj. Akolongit napei ngina, abu ngesi kitaleu kiding alaar, alowae alo alongaren akai, sodi kipeye kaneni ngakipeyos na inomio nginerin daang, ka ngakipeyos a ngalemet ta nikatoronon a ngibaren alu eraakasi ngakipeyos a ekisil. Asubi ngesi kongina kainyo adit ekeno lo a ngasua ananyangayek peadikino itemokin ngakipeyos nguna daang. Apot Solomon ka Ngisirael daang tanyama esukukuu loa ngikalea ngolo a ngirwa a ngikan-kaarei alokai a Akuj. Alal asepich a ngitunga esiakini napei anapak a Amas alokwap tanang lokukuoru a Misiri alokuju. Ani akolongit na ngakan-kauni, kieala Solomon ngitunga toloto nawiyei elakara kotere apiaro daang na apiarea Ekapolon Akuj ekasuban etich keng Daudi, ka ngitunga keng Ngisirael. Ani erumori Solomon akiduk akai a Akuj, ka akai a ekapolon, ta ibore daang nikolong cha asaki ngesi akiduk, bu Ekapolon Akuj nia Solomon na ngaarei loger lokolong sek abunitor nikeng alo Gibeon. Tolimok Ekapolon Akuj ngesi tama, “Eira ayong akilip kon. Etaleu ayong akai na iduk iyong naga, toliwor akilipet ayong jik. Etee ayong, eratak ngirwa daang. Ani eliwor iyong, ani kisub iyong etich kang kotere iteni ka ateneanut, loger lokolong asubea apakon Daudi, ani kiwap iyong ngitalio kang ka ngakiro nakadungokini ayong iyong, apiari ayong apolou kon alo Isirael jik loger lokolong echikakinea Daudi abala, ‘Ngirwa daang, nyengopi itwaan analesea kon ni epolokini Isirael.’ Nakaneni ani kirea iyong anikang, kori kereasi ngalesea kon anikang, towout akiwap ngitalio kang ka ngakiro nakadungok ayong esi, sodi kilipa ngakujo ngache, alemari ayong ngitunga kang Ngisirael anakwap ana ainak ayong kesi. Aisikini ayong tani akai na etaleu ayong toliwor kelipeenere ayong naga. Imenyarete ngitunga awadaang Ngisirael kisuruma ngileech. Eliwor akai naga ngamoru na etukokina, toliwor ngitunga daang na itorunioto nege toriangakinos kuumwokis ebalasi, ‘Kotere nyo asubakinea Ekapolon Akuj ngakiro nugu anakwap kana ka akai naga?’ Etachunete ngitunga tamasi, ‘Erai ni aisikineta kesi Ekapolon Akuj na erai Akuj kech nakolong epuduni taapaakech lukolong ngorok alo Misiri. Achamunete kesi ngakujo ngache sodi kilipa ka akipeyonokin. Kotere ngakiro nguna, ayau Ekapolon Akuj ngakiro naaronok nugu nikech.’ ” Aduki Solomon akai a Akuj ka akai a ekapolon a ngikaru a ngitomwon-arei. Ainakinit Iram lo arai ekapolon a Tiro Solomon ngiboro luduket lu araakasi ngakito a ngichekereng, ka ngidomou ta egolit daang lo asakitae asubea etich ngolo. Ani erumor etich, nak Solomon Iram ngirerea ngitomwon-arei anakwap a Galilaya. Tolot Iram aanyun ngirerea ngulu, nakaneni apot nyeejoikis ngesi. Sodi tolimok ngesi Solomon tama, “Lokaatokang, ngirerea lu ikote nege lugu kesi kiinakinit iyong ayong a?” Kotere ngakiro nguna, eringa neni tani tokona enyaritae Kabul. Ainarit sek Iram Solomon egolit lo eporit ngakiloi ngabunge ngoomwon. Kidesik ekapolon Solomon ngitunga etich lo akiduk akai a Akuj, ka akai a ekapolon, ka akiduk ewae lo alo kide ere kimulelearae, ta akiduk awas a ere. Abu nabo kidesik ngitunga akiduk ngirerea a Asor, ka Megido, ta Geser. ( Aremi sek ekapolon a Misiri Geser tolema, taar ngitunga lu alomito neni, sodi kichunyak ere akim. Ani erumor kipoto ere ngolo nak nakookeng akolongit na eusea Solomon apese ngina, sodi toduk Solomon ere ngolo nabo.) Kidesik Solomon ngitunga nabo akiduk ere a Bes-oron lo alokwap, ka Baalas, ka ere a Tamar lo ayei nariet a akwap a Yuda, ka ngirerea lu ekachio ngiboro a Solomon, ka ngirerea lu ayakasi ngangolei keng ka ngaurukukui na iritae, ta ibore cha daang ni asaki ngesi akiduk alo Yerusalem, ka Lebanon, ta ngiwaitin luche cha daang a akwap ana apolokinit ngesi. Ngitunga lukolong edongete lu araakasi Ngiamor, ka Ngiiti, ka Ngiperes, ka Ngiipi ta Ngiebus (lu pearaakasi Ngisirael), ngalesea kech nakolong edongete nakwap, lukolong akuruworete Ngisirael amunyar alo Kanaan, abu Solomon kidesik kesi akisub etich. Eringa ngalesea kech eraakasi ngikedalak tani tokona. Nakaneni abu Solomon nyiitiliwo Ngisirael ngikedalak, pearai abu kitiliwo kesi ngasigerea keng, ka ngikapolok a arieng, ka ngikarikok a ngasigerea, ka ngikapolok a ngaurukukui ana irito ngangolei, ta ngikameak ngangolei. Ayakasi ngikapolok a arieng ngamiae ngakan ka ngitomwon-kan lu aweikinito etich lo akiduk, lo edesikinitae ngitunga. Abu nakookeng a ekapolon a Misiri na arai aberu a Solomon taramak alore a Daudi tolot kai a ekapolon na adukokini Solomon ngesi. Ani erumor toduk Solomon ewae lo alo kide ere kimulelea. Epeyoene Solomon ngakipeyos na inomio ta na ekisil, kipeyo alokeno a Akuj ngakipeyoet ngauni alokaru a epei. Enomanakini ngesi Ekapolon Akuj tani emitina. Sodi torumo ngesi akiduk akai a Akuj. Toduk ekapolon Solomon ngatubwae naapolok nakaalak alo Esionigeber, diyete Elas, lokwaas a apak a Akaba, anakwap a Edom. Tomea ekapolon Iram ngitunga keng lu ayenete amere ngatubwae ananam toloto akisub etich ka ngitunga lua Solomon. Kiwaaros kesi ananam tananga ni enyaritae Opir, tobongut inut Solomon egolit ngakiloi ngabunge ngatomon ka ngoomwon. Ani iirari akapolon a Cheba ekipur a Solomon ka eger lo ayenea ngesi Ekapolon Akuj, abu ngesi tolot nia Solomon aroanar kingitana ngakiro nakaagongok. Tanangu ngesi Yerusalem erukito ka ngimeanara lukaalak, ta ngikaala lu ewokito ngikito lukitukukunyet akimuj, ka asir, ta egolit lotikaalan. Ani ebuni ngesi nia Solomon, kingitana ngesi ngakiro daang nacha apedori akitamun. Tatachu Solomon ngakiro nguna daang, emam ibore abu tokuruwo akisisaun. Kiira akapolon ngina ngakiro a Solomon na aosou. Kingolik akai a ekapolon na aduki Solomon. Kingolik ngesi akimuj na emujio alomeesa a Solomon, ka ngakais a ngikapolok a arieng keng. Kingolik nabo eger lo arekinitere ngikasubak etich a akai a Solomon, ka ngiworui lu ikwaan lu anapito kesi. Kingolik ngikasubak etich lu esumujeenete Solomon. Kingolik ngakipeyos na inomio na epeyoene Solomon alokai a Akuj. Ani ingolikini ngesi ngakiro nguna daang, tatalasi tolilimiyo. Tolimok ngesi ekapolon Solomon tama, “Ikwa ngaka iteni ngakiro nakolong eirari ayong anakwap kang, ngakiro na isubi iyong ka na aosou kon! Nakaneni nyenupa sek ayong ngakiro nguna jik, mati been kabu ayong engolik a ngakonyen kang. Ikwa keringa kolong ayong nyiirara tani epewae a aosou kon. Etiono aosou kon noi ka ebari kon, idwangit eger lokolong kalimokinitae ayong. Abe ngika ekeny ajokon ngitunga kon! Abe ngika ekeny ajokon ngikasubak etich kon lu irukito ka iyong jiik epupete ngakiro kon a aosou! Kipuroe Ekapolon Akuj na erai Akuj kon! Edodiu ngesi alakara keng kotere iyong ani kitiliworea iyong ekapolon a Isirael. Aloger eminar ngesi Isirael jik, kitiliwo ngesi iyong ekapolon sodi kirichakinea etal ka ngakiro na iteni.” Ani erumor nak akapolon ngina ekapolon Solomon ngainakinet na ainunit ngesi Solomon na araakasi egolit lo eporit ngakiloi ngabunge ngoomwon, ka ngikito lukitukukunyet akimuj lukaalak, ta ngamoru nakaalak a ngaropiyae. Ngikito lu itukukunyete akimuj lu ainakini ngesi Solomon, alalak noi nyeriamuna Solomon lu etia ngulu a ache. ( Ngatubwae a Iram nasek ayauniyete egolit alo Opir, apot yaut ngakito a ngimusandali nakaalak ka ngamoru nakaalak a ngaropiyae. Todukio Solomon ngakito ngadoket a akai ka akai keng, tosubea nabo tani ngagitae na eeotor ngikaeok. Tani nakolongit naga, emam ngakito a ngimusandali naajokak noi ayaun Isirael. Nabo emam ngache na ikote nguna na engolikin nabo jik.) Abu ekapolon Solomon nak akapolon a Cheba ibore daang nicha asaki, peimaritae ngainakinet napalem a etal na achamakinitae einakinio ngesi. Apot ngesi ka ngimeanara keng tobongosi nakwap a Cheba. Alokaru a epei, ariamununi Solomon egolit lo esibit ngakiloi ngabunge ngatomwon-arei ka ngauni toyei echur lo atachete ngimuchurus, ka ngaropiyae na ariamunitae alomuchuruseenu, ta ngaropiyae na alemununete ngikapolok a Arabia, ta ngikapolok a ngiwaitin alugelagelae a Isirael. Tosubak Solomon ngaupwala naapolok ngamiae ngaarei alogolit. Egolit lo esibit ngakiloi ngakan-kaarei ngesi asubere aupwal apei. Tosubak ngaupwala naachik ngamiae ngauni alogolit. Egolit lo asibit ngakiloi ngaarei ngesi asubere aupwal apei. Kiwaak ngesi ngaupwala nguna daang tooma akai a Amoni a Lebanon. Abu ngesi nabo tosubak ekicholong a ekapolon lotiapolon, ewae epewae aburuchiarit a ekelae a etom, toburuchia ewae loche a egolit bon. Ayakasi ekicholong ngolo ngadoket ngakan-kapei. Ayei ekisikwaane a akou a itaok lowae lo aabor a ekicholong. Ewae lopalem idokonokinio ngakan, ayei ekisikwaane a engatuny lowaitin daang. Anadoket anakan-kapei ayei ekisikwaane a engatuny losal a adoket a apei, arai daang ngingatunyo ngitomon ka ngiarei. Emam ekicholong eche napei kanuan ikwaan ka ngolo anapolou a ache. Ngikopoi lu amasea Solomon daang asubitae a egolit. Ngiboro lukimujet lu ayakasi kai a Amoni a Lebanon daang, asubitae a egolit bon. Amam ngiboro lukwangae kainyo arai ngasua nakwangae ibore pasit ngirwa lua Solomon. Ayakasi ngesi ngatubwae nakaalak na ametae ananam aapei ka ngatubwae a Iram. Arai nacha edaunotor ngikaru nguuni, tobongut ngatubwae keng yaut egolit, ka ngasua nakwangae, ka ngikel a etom, ta ngichomin ta ngikadokoi. Edwangit Solomon ngikapolok luche a ngakwapea daang kotere ebari ka aosou. Tasaka ngitunga a ngakwapea daang aponere akiirar aosou a Solomon na ainakini Akuj ngesi. Itwaan cha daang ni ebuni nikeng, inu ngainakinet a ngiboro alukwangae ka egolit, ka ngiworui, ka ngiboro lujiet, ka ngikito lukitukukunyet akimuj, ka ngangolei ta ngisikiria. Asubasi ngakiro nguna loger ngolo ekaru daang. Tochunak Solomon ngaurukukui na irito ngangolei ngamiae ngatomon ka ngoomwon ka ngikameak ngangolei ngabunge ngatomon ka ngaarei. Kiwaak ngesi ngiche lorerea ngiche, sodi kiruko ngesi ka ngiche alo Yerusalem. Ngirwa lu araakar Solomon ekapolon, asojunito ngasua nakwangae alo Yerusalem loger a ngalup. Alalak nabo ngakito a ngichekereng alo Yerusalem loger lo elalaketa ngakito a ngikuno anaukon a akwap a Yuda. Aweikinito ngimuchurus a ekapolon egielit a ngangolei ana ayauniyo alo Misiri ka Kilikia. Aweikinito kesi tani egielit a ngaurukukui ana iritae ana aponeenete alo Misiri. Agialanakinete kesi ngikapolok a Ngiiti, ka Siria, ngaurukukui a ngaropiyae a ngamiae a ngakan-kapei, ani ngangolei a ngaropiaye a amiat a apei ka ngatomwon-kan apei kech daang. Amina Solomon ngaberu nakaalak a ngakwapea anache. Eusit ngesi nakookeng a ekapolon a Misiri. Abu nabo kiut ngaberu a akwap a Ngiiti, ka na Ngimoab, ka na Ngiamon, ka na Ngiedomae ta Ngisidon. Abu Solomon kiut ngaberu a ngakwapea ana kolong alimokini Ekapolon Akuj Ngisirael tama, “Nyiuta ngapesur kech, kori nyiutasi kesi ngapesur kus kainyo kibatarete kesi esi kilipa ngakujo nagelayek.” Ayakasi Solomon ngaberu ngamiae ngakan-kaarei na araakasi tanakookech a ngikapolok, ayakasi nabo ngapesur a ngabwes ngamiae ngauni. Apot ngaberu keng kibatasi ngesi ani a Akuj. Ani enangi ngirwa lu amojongea Solomon, apot ngaberu keng kibatasi ngesi sodi kilip ngakujo nagelayek. Peamuno ngesi Ekapolon Akuj na erai Akuj keng loger lokolong amunor apakeng Daudi Ekapolon Akuj. Kilip Solomon Achitaros na erai akuj naberu a Ngisidon, kilip nabo Molek na erai akuj a Ngiamon nakikadakini. Tosechak Solomon Ekapolon Akuj, nyeesub nguna a iteni ani a Ekapolon Akuj loger lokolong asubea apakeng Daudi. Todukok Solomon ngasenon na ilipeenere Kemoch na erai akuj nakikadakini a Ngimoab moru lo eyei kide Yerusalem. Todukok nabo ngasenon na ilipeenere Molek na erai akuj nakikadakini a Ngiamon. Toduk nabo ngesi ngasenon na ilipeeneta ngaberu keng daang na ngakwapea anache, kinomeeneta emitina, ta ngakipeyos kotere ngakujo kech. Tongoik Ekapolon Akuj Solomon ani ebataror anikeng ana erai Akuj a Isirael, nakolong abuni nikeng ngabunet ngaarei, todungok ngesi atamar nyiilip ngakujo nagelayek. Nakaneni abu Solomon nyiira ngakiro na adungokini Ekapolon Akuj. Sodi tolimok Ekapolon Akuj Solomon tama, “Aloger iyechakinea iyong kichwangak akichikakinet kang, ta ngakitatamet kang, iteni kademari ayong iyong apolou, ainak ekasuban etich kon. Ani kotere apakon Daudi, nyasubakini ayong nguna ngirwa lu iyarea iyong, pearai atiakatiakari ayong apolou ngina anakan a lokookon. Nyademari ayong ngesi apolou daang, pearai aisikinea ngesi ekitela epei, kotere ekasuban etich kang Daudi, ka ere a Yerusalem lokolong aseuni ayong etiliwo ekang a ilope.” Abu Ekapolon Akuj kitiliwo Adad emoit a Solomon. Auriunitae Adad anawi a ngikapolok a Edom. Kolong sek, na etijio Daudi Edom, abu Yoab lo arai ekarikon a ngasigerea a Daudi tolot nakwap a Edom akinuk ngikatoak. Abu Yoab taar ngikiliok daang kaina. Kainyo apot Yoab ka ngitunga keng kiboyoto alo Edom ngilapio ngikan-kapei, tanang ni aareta itwaan nikile daang alo Edom, nakaneni apot Adad ka ngikasubak etich a apakeng ngiche lu araakasi Ngiedomae tosiwa toloto Misiri. (Ngirwa ngulu, aringa Adad edit.) Tonyout kesi alo Midian toloto Paran. Kirumut kesi ngitunga ngiche kaneni, kirukosi tananga Misiri. Nak ekapolon ngolo Adad akai, nak akimuj ta amana. Toelokin Adad ka ekapolon a Misiri noi, sodi nak ekapolon ngesi nakaatokeng a aberu keng kiut. Arai ngina nakaatokeng a akapolon anabe Tapenes. Kidou aberu ngina idia ni anyarao Genubas, sodi kitanu aberu a ekapolon anawi a ekapolon, kiruko ka talokookeng a ekapolon luche. Ani iirari Adad alo Misiri atamar atoana Daudi, kiira nabo atamar atoana Yoab lo arai ekarikon a ngasigerea, abu Adad tolimok ekapolon tama, “Kimiekinae ayong atobong nakwap kang.” Kingit ekapolon ngesi tama, “Kotere nyo? Nyooni kingopik iyong anikang isakea iyong akibong nakwap kon?” Tatachu Adad tama, “Kimiekinae cha ayong atolot.” Adad lo arai ekapolon a Edom, arai itwaan niaronon ni aremokino Ngisirael noi. Abu Akuj nabo kitiliwo Reson lo arai lokookeng a Eliada emoit a Solomon. Asiit sek Reson ani eyei ekapolon keng Adadeser lo arai ekapolon a akwap a Soba. Tochunak Reson ajore a ngirukooi, toliwor ngesi ekarikon a ngirukooi kangulu. (Asubasi nguna kejwoto Daudi ka Adadeser sodi kidwang. Taar Daudi Ngisiria lu aikinito Adadeser.) Toloto Reson ka ajore keng toloma Damasko. Kitiliwosi ngitunga ngulu Reson ekapolon a Siria. Arai Reson emoit a Ngisirael ngirwa daang lua apolou a Solomon. Itwaan iche ni abu tonger Solomon ngesi epei a ngikapolok a arieng keng lo anyaritae Yeroboam, lokookeng a Nebat, lo abunit alo Sereda anakwap a Epiraim. Arai itiokeng apuserut na anyaritae Serua. Ngakiro angerio ngesi Solomon kesi nugu. Emuleleari Solomon ewae lo alo kide Yerusalem ka asubanakin ngawasea a ere. Arai Yeroboam esorokit lo ayeni etich. Ani ingolikini Solomon eger lo asubea Yeroboam etich lokojokon, kitiliwo ngesi eweikinit etich lo edesikinitae ngitunga lo asubio anakwap a ngitela a Manase ka Epiraim. Akolongit apei, tonyou Yeroboam alo Yerusalem, kiriamun ngesi ka ekadwaran lo anyaritae Aija lo abunit alo Chilo. Kiriamun kesi aluarei naroatin. Tobut Aija eworu lokitetet anapit ngesi tochilichili, tochilun ngawarui ngatomon ka ngaarei. Tolimok ngesi Yeroboam tama, “Tolema ngawarui ngatomon toliworos ngakon, kainyo kilimokinit iyong Ekapolon Akuj na erai Akuj a Isirael ebala, ‘Kingolik a, edikino ayong atiakatiakari apolou anakan a Solomon sodi kainak iyong ngitela ngitomon. Etingi Solomon ekitela epei bon kotere ekasuban etich kang Daudi, ka ere a Yerusalem lo aseu ayong toliwor ekang alorerea kadaang anakwap a Ngisirael. Asubakini ayong nguna kainyo kanger Solomon ayong nabo elip ngesi ngakujo nagelayek na enyaritae Achitaros na erai akuj a Ngisidon, ka Kemoch na erai akuj a Ngimoab, ta Molek na erai akuj a Ngiamon. Awou Solomon akiwap ngirotin kang, tosub na iyookino alongaren kang, ka akirichakin ngakitatamet kang, ka ngakiro kang, loger lo kolong erichakinitor apakeng Daudi. Nakaneni nyademari ayong ngesi apolou daang, nabo etiliwori ayong ngesi ekapolon ngirwa daang lu eringaakar ngesi eyari. Asubakini ayong nguna kotere ekasuban etich kang Daudi lokolong aseuni ayong, kiwap ngesi ngitalio kang, ka ngakitatamet kang. Ademari ayong lokookeng a Solomon apolou kainak iyong ngitela ngitomon. Nakaneni ainakini ayong lokookeng a Solomon ekitela epei, sodi toliwor ngirwa daang, epolokini alesit a ekasuban etich kang Daudi Yerusalem, lo erai ere lo aseu ayong kelipeenere. Kaseu ayong iyong Yeroboam topolok wadaang nicha isaki iyong, toliwor ekapolon a Isirael. Ani kiwap iyong ngakiro kang dir kirichak nguna kadungokinit, kiwap ngirotin kang, tosub na etee ayong atamar iyookino, kirichak ngakitatamet kang ka ngitalio, loger lokolong asubea ekasuban etich kang Daudi, kiruki ayong ka iyong jiik. Ketiliwori ayong iyong ekapolon a Ngisirael, nabo erichak atamar irumete ngalesea kon apolou kon loger lokolong asubea ayong Daudi. Kotere akisech a Solomon, erirae ayong ngalesea a Daudi, nakaneni meere jik.’ ” Sodi tasak Solomon akiar Yeroboam, nakaneni tosii Yeroboam tolot nia ekapolon a Misiri alo anyaritae Chichak, kiboi kaina tanang ni atoanea Solomon. Ngakiro nache daang na asubi Solomon, na eraakasi ngaka aosou keng, ka eger lo asubea ngesi etich, igiritae nakitab na enyaritae Ngakiro a Solomon. Ebooyi ngesi alo Yerusalem apolokinit Isirael daang a ngikaru a ngitomwon-omwon. Totoan ngesi sodi tonukakinae lore a Daudi. Kilunyokin lokookeng lo anyaritae Reoboam napolou keng. Tolot Reoboam Chekem ni achunakina ngitela a Ngisirael lua lokwap daang akitiliwor ngesi ekapolon. Abu Yeroboam lo arai lokookeng a Nebat, lokolong sek asii ani a ekapolon Solomon tolot Misiri, kiira ngakiro nguna, tobongu alo Misiri. Tanyarata ngitunga a ngitela alu alokwap Yeroboam sodi kirukosi nia Reoboam tolimokis tamasi, “Kiboliar kolong apakon sua, kitusub etich loationon. Ani kitiliwo iyong etich kosi lo nyetiono sodi tojoker eboyor kosi, kiliwor sua ngitunga kon lu kimuno iyong.” Tolimok Reoboam kesi tama, “Kapesi tasala ngirwa nguuni sodi pot katatachak ngakiro nguna.” Apot kesi torotokis. Tolot Reoboam lokasukou lukolong araakasi ngiketutukok a Solomon alo arai apakeng, kingit kesi tama, “Ibalasi esi ayong tatachak ngitunga lugu anukiro?” Tatachakis ngikasukou ngesi tamasi, “Ani kisaki iyong akisub etich a ngitunga kalu niajokon, tatachanak kesi ngakiro naajokak nakingiseta iyong ngakiro, sodi tosuba kesi etich kon kimunosi iyong.” Nakaneni nyeekachik Reoboam ngakiro na alimokinete ngikasukou. Tolot ngesi losorok lukolong apolounete ka ngesi lu araakasi ngiketutukok keng. Kingit kesi tama, “Anukiro ibalasi esi ayong atolimok ngitunga lugu, lu ebalasi ayong, ‘Kitiliwo etich lokolong kiinakini apakon sua lo nyetiono’?” Tatachakis ngesi ngisorok tamasi, “Tolimok kesi kona, ‘Elangir ekimoin kang loochi idwangit aabor a apakang! Kitusubi kolong apakang esi etich loationon, etiliwori tokona ayong etich ngolo lo etiono noi. Kidesi kolong apakang esi a ngalita, kedesi tokona ayong esi a ngarega!’ ” Adaunet a ngirwa a nguuni, tobongut Yeroboam ka ngitunga nia ekapolon Reoboam loger losek alimokinitor ngesi kesi ebala, “Tobongutu nikang adaunet a ngirwa a nguuni.” Nyeekachik ekapolon ngakiro nasek alimokinete ngikasukou ngesi, dio kisuruoria ngitunga niaronon. Kiruor ngesi loger losek alimokinitotor ngisorok. Tolim tama, “Kitusubi kolong apakang esi etich loationon, nakaneni eatakini tokona ayong totioner noi. Kidesi kolong ngesi esi a ngalita, nakaneni kedesi tokona ayong esi a ngarega!” Asaki Ekapolon Akuj akiyookin ngakiro nakolong sek alimokini Yeroboam lo arai lokookeng a Nebat kisitoru nia Aija alo abunit alo Chilo. Ngakiro nguna kesi peapupokinea ekapolon Reoboam ngakiro a ngitunga. Ani ingolikinete ngitunga daang atamar awou ekapolon apupokin kesi, tatachakis kesi ekapolon tamasi, “Nyo ibore ajokon kiriamuni ngoni anapolou a Daudi? Emam ibore kirumi ngoni ani a lokookeng a Yese. Ee Ngisirael, toloto nawiyei kus! Kimiekisi Reoboam kirichak ngakiro a awi keng a ilope.” Sodi tolungakinos Ngisirael tobongosi nawiyei. Topolok Reoboam Ngisirael lu ayakasi nakwap a Yuda make. Ani erumor tomea ekapolon Reoboam Adoniram losek aweikinit etich lo edesikinitae ngitunga tolot nia Ngisirael, nakaneni kimasa ngitunga Adoniram a ngamoru taara. Ani ikokinete ngakiro neni, kikirikirakin Reoboam todoka naurukuk keng na irito ngangolei tosii tolot Yerusalem. Tani tokona, engerito ngitela lua lokwap Isirael apolou a awi a Daudi. Ani iirarete Ngisirael atamar abongu Yeroboam alo Misiri, apot tanyarata ngesi bu ni eriamiriamito ngitunga kitiliwosi ngesi ekapolon a Isirael. Ekitela a Yuda bon ngesi abu kidong epolokinito ngalesea a Daudi. Ani enanguni Reoboam Yerusalem, tochunak ngesi ngitunga a ngitela a Yuda ka Benjamen lu araakasi ngasigerea nakajwok ngabunge amiat apei ka ngatomwon-kauni. Asaki ngesi alosit akitijwore ngitela lua lokwap Isirael topolokinio tani kesi. Nakaneni kisuruor Akuj ekadwaran Chemaya tama, “Tolimok Reoboam lokookeng a Solomon, lo erai ekapolon a Yuda, tolimok tani ngitunga daang a ngitela a Yuda ka Benjamen kona, ‘Ebala Ekapolon Akuj esi nyiitijikis ngitunga a Isirael lu eraakasi ngikaitotoi kus. Kapesi esi daang nawiyei kainyo eraakasi ngakiro na asubakin ngakang.’ ” Kiirasi kesi daang ngakiro na adunguni Ekapolon Akuj, sodi tobongosi nawiyei. Toduk ekapolon Yeroboam ngawasea a ere a Chekem anakwap ana a ngimukur a Epiraim, sodi tolom neni a ngirwa. Torotok kaneni toduk ngawasea a ere a Penuel. Tolim Yeroboam alotau tama, “Edikino tokona apolou ebongori nawi a Daudi. Ani kelosieneto ngitunga lugu Yerusalem akipeyore ngakipeyos alokai a Ekapolon Akuj, kangerete ayong ekapolon kech, tachamut Reoboam lo erai ekapolon a Yuda, sodi kataar ayong.” Ekisidi a akitamanar ngakiro nugu, abu ekapolon tosubak ekisikwaane a ngitak a ngiarei alogolit sodi tolimok ngitunga keng tama, “Iloseenete esi Yerusalem akilip nakanuan. Ee Ngisirael, ngakujo kus nugu, nakolong kipudunete esi alo Misiri!” Kiwaak ngesi ngitak ngulu ipei Besel, kiwaak niche Dan. Apot ngitunga kikokis esechete neni, tolosieneto akilip apei alo Besel, toloto akilip nache alo Dan. Todukok Yeroboam ngasenon na ilipeenere nabo kidiama ngimukur, sodi toseu ngimurok anawiyei ana pearaakasi ngaka ekitela a Lawi. Abu Yeroboan kiwaak esukukuu akolongit na ngatomon ka ngakan a elap alo a ngikan-kauni. Ekwaan ka esukukuu lo asubeeneo alo Yuda. Epeyoene Yeroboam ngakipeyos a ngitak alu a egolit alu asubuni ngesi, epeyoene alokeno alo ayei Besel, sodi kiwaak neni ngimurok lu asubete etich ani elipeenere anisek aduki ngesi. Tolot ngesi lokeno lo ayei Besel akolongit na ngatomon ka ngakan a elap alo a ngikan-kauni, alosek aseuni ngesi ilope, sodi kipeye ngakipeyos nasek ewaakini ngesi kotere Ngisirael. Awei Yeroboam alokwaas a ekeno esaki akipeyore ngakipeyos. Sodi todolu ekadwaran a Akuj alo Yuda bu Besel eyaunit ngakiro na adungokinit Ekapolon Akuj. Loger losek adungunitor Ekapolon Akuj, abu ekadwaran ngolo kilam ekeno ngolo irema ebala, “Ee ekeno, ekeno, ebala Ekapolon Akuj kona, ‘Idounio idia anawi a Daudi ni enyarao ekiro keng Yosia. Engolakini ngesi kidiama kon ngimurok lu esubete etich alokenoi alugelayek, lu ipeyoote ngakipeyos alokidiama kon. Inomi Yosia ngakoyo a ngitunga alokidiama kon.’ ” Torubak ekadwaran ngolo iruoro ebala, “Ibore en idodiuni atamar eponito ngakiro nugu ani a Ekapolon Akuj, ‘Eukor ekeno logo sodi kiealar ekuron keng.’ ” Ani iirari ekapolon Yeroboam ngakiro nguna, todod ekadwaran ngolo tama, “Kirumutu itwaan ngin!” Atipei tolilimiyo akan a Yeroboam kitenar, tokuruwo akudokin. Atipei toukor ekeno sodi tobukokin ekuro keng nalup loger losek adwaritor ekadwaran ngolo itemem ka ngakiro a Ekapolon Akuj. Tolimok ekapolon Yeroboam ekadwaran tama, “Kilipakinae kare ayong ani a Ekapolon Akuj ana erai Akuj kon, sodi ketangalek akan kang!” Kilip ekadwaran Ekapolon Akuj sodi kitangalekinoe akan a ekapolon. Tolimok ekapolon ekadwaran ngolo tama, “Bua erukosi ka ayong nawi kang kimuj. Kainakini ayong iyong ebachit kotere ngakiro na kisubea iyong ayong.” Tolimok ekadwaran ekapolon tama, “Arai tani kiinak iyong ayong epewae a ebari kon, pekiruko ayong ka iyong nawi kon. Nyikimuji ayong ka iyong kori nyikimasi, kainyo kadungokini Ekapolon Akuj ayong ngakiro nugu ebala, ‘Nyiimuj kori nyiimat idiobore, nabo ani ibonguni nyiitoru lorot lotete ibunio.’ ” Abu ngesi todepa erot losek etoruni, sodi kitor lorot eche ebongori. Ngirwa ngulu ayei ekadwaran lo amojongit Besel. Pot talokookeng tolimokis ngesi ngakiro daang na asubi ekadwaran a Akuj alo Besel akolongit ngina. Tolimokis apakeng tani ngakiro na alimokini ekadwaran a Akuj ekapolon. Kingit apakech kesi tama, “Etori ngesi lorot ali ebongi?” Kidodikis kesi ngesi erot, sodi tolimok ngesi talokookeng tama, “Topetakinae ngiboro losikiria.” Topetakis kesi ngiboro losikiria dio ngesi adokar tolot. Kiwap ngesi ekadwaran a Akuj toriam ibooyi alokwap echoke, dio akingit tama, “Iyong ekadwaran lobe ibuni alo Yuda a?” Tatachu ngesi tama, “Ee.” Sodi tolimok ekadwaran lomojong ngesi tama, “Bua apana nawi emuja.” Tatachu ekadwaran lo a Yuda tama, “Nyikirukori ayong ka iyong nawi kon kori nyachamuni aliwor epeyonon kon. Nyikimuji ayong kori nyikimasi ka iyong idiobore kane, kainyo kadungokini Ekapolon Akuj ayong tama, ‘Nyiimuj kori nyiimat idiobore kaina, nabo ani ibonguni, nyiitoru lorot lobeen ibunio.’ ” Sodi tolim ekadwaran lomojong a Besel tama, “Arai ayong dang ekadwaran loger kon. Ameuni been Akuj emalaikat katodungok ayong tama, ‘Tobuu ngesi nawi kon sodi kisumuj nabo tamat idiobore.’ ” Nakaneni engalae ekadwaran lomojong ngolo loche. Abu ekadwaran lo a Yuda kirukosi ka lomojong nawi keng kimuja aapei. Ani eringa kesi ibooyete alomeesa imujete, kisuruorik Ekapolon Akuj ekadwaran lomojong, sodi kikaloik ngesi ekadwaran lo a Yuda tama, “Ebala Ekapolon Akuj kona, ‘Aloger iwounea iyong akiwap ngakiro a Ekapolon Akuj sodi towou akirichakin ngitalio lu kidungokini ngesi iyong, nakaneni ibongu iyong kimuj ani kolong kitengeritoe imujea. Ani kona ikokinea iyong neni, kiario iyong, nabo nyikinukakinio iyong naliel kata apaakon.’ ” Ani erumorete kesi akimuj, topetak ekadwaran lomojong ngiboro losikiria a ekadwaran a Yuda, taram ekadwaran a Yuda esikiria keng tolot. Ani enangi lorot, kiriamun ka engatuny, taar engatuny ngesi. Toper akwaan keng alorot, towaas esikiria ka engatuny alodiyete akwaan ngina. Kitorut ngikiliok ngiche neni kingolikis akwaan eperi alorot, towei engatuny alodiyete. Toloto kesi kisisata ngakiro nguna alo Besel. Ani iirari ekadwaran lomojong ngakiro nguna tolim tama, “Erai itwaan ngini ekadwaran lo ngoon awouni akiwap ngakiro na adungunit Ekapolon Akuj! Kotere ngakiro nguna, ameu Ekapolon Akuj engatuny lo anyilinyilaa ngesi taar, itemem ka akiroit nakolong alimokini Ekapolon Akuj ngesi.” Sodi tolimok ekadwaran ngolo talokookeng tama, “Topetakinae ngiboro losikiria.” Sodi topetakis kesi. Todoka ngesi losikiria tolot toriam akwaan a ekadwaran kangolo eperi alorot towaas esikiria ka engatuny alodiyete. Aringa engatuny nyenyama akwaan a ekadwaran kangolo, nabo aringa nyenyilinyilaara esikiria. Tadaku ekadwaran lomojong ngolo akwaan a ekadwaran aloche, kidokok losikiria, tobuu lore a Besel, sodi kigoror ani erumor tonuk. Tonukak ngesi akwaan ngina naliel a ngitunga a awi keng a ilope. Sodi kigoro ngesi ka talokookeng ebalasi, “Wae, lokaatokang, lokaatokang!” Ani erumori ngesi akinuk ekadwaran ngolo, tolimok talokookeng tama, “Ani atoani ayong, tonukakinae naliel na ekadwaran kalo naga, kisibaka akwaan kang ka nakeng. Iyookinosi ngakiro daang nakolong adungokini Ekapolon Akuj ngesi, sodi tolim ngesi ilami ekeno lo eyei Besel, ta ni ilipeenere ngasenon daang alorerea a Samaria.” Abu Yeroboam lo arai ekapolon a Isirael nyeeisik ngakiro naaronok asubi ngei. Torubak ngesi eseununi ngimurok anawiyei cha kadaang, lu esubete etich alokenoi alu adukit ngesi. Abu ngesi kitaleu itwaan cha daang ni asaki aliwor emuron. Akisech ngina alowae keng ngesi abu yau nginyas luapolok lu atuborete awi keng anapolou. Ngirwa ngulu, todeakakin lokookeng a Yeroboam lo anyaritae Abija. Tolimok Yeroboam aberu keng tama, “Tonyou kilochokin nyikiyenere iyong atamar aberu a ekapolon, tolot Chilo ni eyei ekadwaran Aija, lokolong abala ayong aliwor ekapolon a Isirael. Inaa ngesi ngamugati ngatomon, ka ngakekio ngadi, ta ebur a akimiet a ao. Kilimokini ngesi iyong ngakiro na esubakinosi anidia yok.” Abu aberu a Yeroboam tonyou tolot Chilo nawi a Aija. Peapedori Aija akingolikin kainyo abu amojongu kitumudukan ngesi. Tolimok Ekapolon Akuj Aija tama, “Ebunit aberu a Yeroboam akingitun ngakiro a lokookeng anikon, kainyo edeak idia.” Sodi tolimok Ekapolon Akuj Aija ngakiro na elimokini aberu ngina. Ani ebuni aberu ngina, kitusubun aberu ache. Ani napei eirarea Aija ngakejen a aberu kangina alokidor, tolim tama, “Tolom, ayeni ayong atamar irai iyong aberu a Yeroboam. Nyo bo isakea iyong akitusubun itwaan iche? Eroko ngakiro na asaki ayong alimokin iyong! Kape tolimok Yeroboam atamar ebala Ekapolon Akuj na erai Akuj a Isirael kona, ‘Kaseuni kolong ayong iyong alotunga ketiliwo ekapolon a Ngisirael alu eraakasi ngitunga kang. Ademuni kolong ayong ngalesea a Daudi apolou kainak iyong. Nakaneni nyikwaanikina iyong ka ekasuban etich kang Daudi, lokolong kamuno ayong dir kirichak ngitalio kang, ka akiwap ngakiro kang a etau keng kadaang, tosubi ngakiro nakajoikinito ayong make. Isubak iyong naaronok noi akidwang lukolong kingarenete iyong anapolou. Kinger iyong ayong nabo kitongo kitilil ani isubea ngakujo ngache ka ngakisikwaanet a ngasua, sodi kilip, kibongok ayong akau. Kotere ngakiro nguna, ayauni ayong ngakiro naaronok napolou kon, sodi ataar itwaan nikile daang analesea kon, luuchik ka luapolok. Amunyari ayong ngitunga a awi kon loger a ngasike ana inomio tadaun. Itwaan a awi kon daang ni etoanikini lore, enyamete ngingokwo. Ani ni etoanikini moding, enyamete ngataruk. Ayong Ekapolon Akuj ngesi alimu nguna.’ ” Torubak Aija isuruori aberu a Yeroboam ebala, “Tonyou tokona tobongo nawi. Napei ichieketa ngakejen kon ere, etoani lokookon. Ikalounete Ngisirael daang tosutonokis kotere ngesi. Idia ngini bon anawi a Yeroboam ngesi enukio niajokon, kainyo ngesi alopei italakarit Ekapolon Akuj na erai Akuj a Ngisirael. Elemuni Ekapolon Akuj itwaan ni epolokini Isirael, ni etubori apolou a Yeroboam tasalu. Irirae Ekapolon akuj Isirael kiloilookin loger a atiriwae ana iloiloo anakipi. Elemari ngesi Ngisirael anakwap anaajokon kana ana kolong ainakini ngesi taapaakech lungorok. Epetakini Ekapolon Akuj kesi yaaye angolol a Eupurate, kainyo etongoa kesi Ekapolon Akuj etilileta, ani asubakineta ngakujo nasubuna a Achera ana erai akuj kech naberu. Eisikini Ekapolon Akuj Ngisirael kainyo asech Yeroboam nabo elomak ngitunga nakisech.” Sodi tonyou aberu a Yeroboam torotok, tobongo Tirisa. Napei cha elomuni ngesi nawi keng, totoan idia. Kigorotor Ngisirael ngesi tonuka loger losek alimunitor Ekapolon Akuj, kisitoru nia ekadwaran Aija alo arai ekasuban etich keng. Ngakiro nache daang nakolong asubi Yeroboam, ngijiesinei lu ajii, ka eger lo apolokinitor akwap, igiritae daang nakitab na enyaritae Ngakiro a Ngikapolok a Isirael. Arai Yeroboam ekapolon a ngikaru a ngitomwon-arei ka ngiarei. Totoan ngesi tonukae. Sodi kilunyokin lokookeng lo anyaritae Nadab napolou keng. Araakasi ngikaru a lokookeng a Solomon alo anyaritae Reoboam ngitomwon-omwon ka epei na aliworor ekapolon a Yuda. Toliwor ngesi ekapolon a ngikaru a ngitomon ka ngikan-kaarei alo Yerusalem, ere lo aseuni Ekapolon Akuj anakwap a Isirael kadaang, toseu toliwor ngesi ilipeenere ngesi. Anyaritae itiokeng a Reoboam Naama, na abunit alo Amon. Tosechakis ngitunga a Yuda Ekapolon Akuj. Tosuba kesi naaronok noi na etongoyete Ekapolon Akuj kitilileta, akidwang daang nakolong asubete taapaakech lungorok. Toduko kesi ni ilipeta ngasenon, kitowaa ngapirio a ngamoru ka ngakisikwaanet a Achera alomukur, ka kwap ngikito lua etolim. Ayakasi nabo tani ngikiliok ka ngaberu lu asubete emalaanu kaneni elipeenere ngakujo nagelayek nguna. Tosuba ngitunga a Yuda ngakiro na ngileech daang nakolong asubete ngibukui lu eritari Ekapolon Akuj anakwap, na alomuneta Ngisirael nakwap. Ekaru lo a ngikan lo araakar Reoboam ekapolon, abu ekapolon a Misiri lo anyaritae Chichak kitijik Yerusalem. Tolema ngesi ebari a akai a Akuj daang, ka lo a akai a ekapolon, aapei ka ngaupwala na egolit nakolong asubakini Solomon. Tosubak ekapolon Reoboam ngaupwala ngache anasua ananyangayek kilunyok nados ana alemario. Nak ngesi ngaupwala nguna ngasigerea na eyokiyete ngidorin a akai a ekapolon totinga. Toliwor nacha elosio ekapolon kai a Akuj, totinga ngasigerea nguna ngaupwala, ani erumor tobuasi kai na eteeto kesi ngidorin. Ngakiro nache daang na asubi ekapolon Reoboam, igiritae nakitab na enyaritae Ngakiro a Ngikapolok a Yuda. Ngirwa ngulu daang ajienete Reoboam ka Yeroboam jiik. Totoan Reoboam, tonukakinae nalielin a ngikapolok alore a Daudi, sodi kilunyoki lokookeng Abija napolou keng. Ekaru lo a ngitomon ka ngikan-kauni lo araakar Yeroboam ekapolon a Isirael, toliwor Abija ekapolon a Yuda. Toliwor ngesi ekapolon a ngikaru a nguuni alo Yerusalem. Anyaritae itiokeng Maaka, na arai nakookeng a Abusalom. Tosub Abija ngasechesea daang nakolong asubi apakeng. Peamuno ngesi Ekapolon Akuj na erai Akuj keng loger lokolong a Daudi alo arai apaakeng. Nakaneni kotere Daudi, nak Ekapolon Akuj na erai Akuj keng ngesi edia lo ilunyokin napolou keng alo Yerusalem, kitowea Yerusalem. Asubi Ekapolon Akuj nguna, kainyo asubi Daudi ngakiro na ajoikinito ngesi, nabo nyichwangakina ngesi ngakiro na adungunit Ekapolon Akuj tani apei mati ngakiro a Uria alo a ekitela a Ngiiti. Ejie lokolong esiakini ngirwa lu araakatar Reoboam ka Yeroboam ngikapolok, abu torubak ejio ngirwa daang lu araakar Abija ekapolon. Ngakiro nache daang na asubi Abija, igiritae nakitab na enyaritae Ngakiro a Ngikapolok a Yuda. Totoan Abija sodi tonukakinae lore a Daudi. Kilunyokin lokookeng lo anyaritae Asa nados keng toliwor ekapolon. Ekaru lo a ngitomwon-arei lo araakar Yeroboam ekapolon a Isirael, abu Asa toliwor ekapolon a Yuda. Toliwor ngesi ekapolon a ngikaru a ngitmwon-omwon ka epei alo Yerusalem. Anyaritae ataakeng Maaka na arai nakookeng a Abusalom. Tosub Asa ngakiro na etalakarito Ekapolon Akuj loger lokolong asubea apaakeng Daudi. Kitwarak ngesi anakwap ngitunga lumalaae daang lu asubete etich ani ilipeenere ngakujo nagelayek. Tachaka ngesi ngakujo nagelayek daang nakolong asubete taapaakeng lungorok. Tolema ngesi tani ataakeng nabe Maaka anapolou ana araakar itiokeng a ekapolon kainyo asubakinit akuj nasubuna naaronon na anyaritae Achera, na erai akuj naberu a aur. Totubutubu Asa akuj nasubuna ngina sodi kinom anadipo a Kidiron. Nakaneni abu Asa nyiinyasu ngasenon na ilipeenere. Tani ikoni neni, amuno Asa Ekapolon Akuj ngirwa daang lu ayarea ngesi. Tolem Asa ngiboro daang lukolong etaleunit apakeng kotere Akuj, kiwaak kai a Akuj aapei ka ngiboro lua egolit ka lukwangae lu etaleunit ngesi elope. Asa lo arai ekapolon a Yuda, ka Baacha lo arai ekapolon a Isirael, ajienete jiik ngirwa daang lu araakatar kesi ngikapolok. Kitijik Baacha akwap a Yuda, kisiak akiduk ngawasea a ere a Rama, sodi nyeelomuneta ngitunga lore ngolo kori nyeepudoreta alore. Tolem ekapolon Asa ngakwangae daang, ka egolit lo edongit kai a Akuj, ka kai a ekapolon, sodi nak ngikasubak etich keng ngiche yaasi Damasko nia ekapolon Benadad alo a Siria, alo arai lokookeng a Tabrimon, tarai etatait a Esion. Yaarae ngiboro ngulu, tomearitetei atamar kiruor kona, “Kimiek atachamakin loger lokolong achamatar taapaayok. Eraakasi ngakwangae nugu ka egolit logo ngainakinet kon. Tongeros tokona ka ekapolon Baacha loa Isirael, sodi tolemarea ngesi ngasigerea keng anakwap kang.” Tacham ekapolon Benadad ngakiro na alimuni Asa. Tomea Benadad ngikarikok a ngasigerea keng ka ngasigerea kech alosit akitijwore ngitunga a ngirerea a Isirael. Tolemasi kesi ngirerea a Ijon, ka Dan, ka Abel Bes Maaka, ka ewae lo alodiye anam a Galilaya, ta akwap daang a Naputal. Ani iirari ekapolon Baacha ngakiro na asubakinosi, kimiek ngesi akiduk ngawasea a ere a Rama, sodi tolot Tirisa. Ani erumor todung ekapolon Asa akiroit alo Yuda kadaang esaki itwaan daang, emam ni imiekinitae, kiritosi ngamoru ka ngakito nasek adukio Baacha ngawasea alo Rama, sodi todukio ekapolon Asa ngiboro ngulu ngawasea a ngirerea a Misipa, ka Geba lo ayei nakwap a Benjamen. Ngakiro nache daang nakolong asubi ekapolon Asa, ajwonu keng, ka ngakiro daang na asubi ngesi, ta ngirerea lu aduki ngesi ngawasea, igiritae nakitab na enyaritae Ngakiro a Ngikapolok a Yuda. Nakaneni anamojongu keng, abu edeke a ngakejen kingwal ngesi. Totoan Asa tonukakinae nalielin a ngikapolok alore a Daudi, sodi kilunyokin lokookeng Yeochapat nados keng toliwor ekapolon. Ekaru lo a ngiarei lo araakar Asa ekapolon a Yuda, toliwor Nadab lo arai lokookeng a Yeroboam ekapolon a Isirael. Topolok ngesi Isirael a ngikaru a ngiarei. Loger lokolong a apakeng, abu ngesi tosechak Ekapolon Akuj, nabo kilomak Ngisirael nakisech. Abu Baacha lo arai lokookeng a Aija, lo a ekitela a Isakar, totuk akiar Nadab, sodi taar Baacha Nadab alore a Ngipilisti alo anyaritae Gibeson. Nadab ka ngasigerea keng, eriamito Gibeson a ngiwaitin kadaang. Taar Baacha Nadab ekaru lo a nguuni lo araakar Asa ekapolon a Yuda, sodi kilunyokin Baacha napolou a Nadab. Napei cha aliworor ngesi ekapolon, abu taar ngitunga a awi a Yeroboam daang. Emam tani ipei ni abu kidong eyari anawi a Yeroboam, itemem ka ngakiro nakolong alimuni Ekapolon Akuj kisitoru nia ekadwaran Aija alo abunit alo Chilo. Asubakinosi ngakiro nguna kainyo etongoi sek Yeroboam Ekapolon Akuj na erai Akuj a Isirael kitilil, ani asechea ngesi, nabo kilomak Ngisirael nakisech. Ngakiro nache daang nakolong asubi Nadab, igiritae nakitab na enyaritae Ngakiro a Ngikapolok a Isirael. Ekapolon Asa lo a Yuda, ka ekapolon Baacha lo a Isirael, ajienete jiik ngirwa daang lu araakatar kesi ngikapolok. Ekaru lo a nguuni lo araakar Asa ekapolon a Yuda, toliwor Baacha lokookeng a Aija ekapolon a Isirael. Topolok ngesi Isirael alo Tirisa a ngikaru a ngitomwon-arei ka nguomwon. Loger a Yeroboam alosek engareni ngesi, abu Baacha tosechak Ekapolon Akuj, nabo kilomak Ngisirael nakisech. Kisuruor Ekapolon Akuj ekadwaran Yeu lokookeng a Anani, tolimok ngakiro a Baacha ebala, “Kalemuni kolong ayong iyong irai itwaan pasit ketiliwo ekapolon a ngitunga kang Ngisirael. Isech tokona iyong loger a Yeroboam, nabo ilomak ngitunga kang nakisech, sodi ketongoa ngasechesea kech ayong ketilileta. Kamunyari tokona ayong iyong ka ngitunga a awi kon loger lokolong asubea ayong Yeroboam. Itwaan a awi kon daang ni etoani alore, enyamete ngingokwo, ani ni etoani alomoding enyamete ngataruk.” Ngakiro nache daang nakolong asubi Baacha, ka ajwonu keng, igiritae nakitab na enyaritae Ngakiro a Ngikapolok a Isirael. Totoan Baacha tonukakinae Tirisa, sodi kilunyokin lokookeng lo anyaritae Ela nados keng toliwor ekapolon. Ekadwaran Yeu lokookeng a Anani ngesi ayauni ngakiro nguna ani a Ekapolon Akuj. Araakasi ngakiro nguna na emunyarete Baacha ka ngitunga a awi keng, kotere ngasechesea kech daang na asubete kesi alongaren Ekapolon Akuj. Meere akisech keng bon etongoea Baacha Ekapolon Akuj kitilili loger lokolong a Yeroboam, pearai etongoit ngesi Ekapolon Akuj tani ani kolong amunyarea ngitunga a awi a Yeroboam daang. Ekaru lo a ngitomwon-arei ka ngikan-kapei lo araakar Asa ekapolon a Yuda, toliwor lokookeng a Baacha lo anyaritae Ela ekapolon a Isirael, alo Tirisa. Topolok ngesi Isirael a ngikaru a ngiarei. Abu epei a ngikapolok a arieng keng lo anyaritae Simri totuk akiar ngesi. Aweikinit Simri epewae a ngaurukukui a ekapolon ana irito ngangolei. Akolongit apei alo Tirisa, abu epurot kiraka Ela anawi a Arsa alo aweikinit akai a ekapolon. Tolom Simri tooma kai sodi taar Ela, dio kilunyokin napolou. Asubasi nguna ekaru lo a ngitomwon-arei ka ngikan-kaarei lo araakar Asa ekapolon a Yuda. Napei aliworor Simri ekapolon, taar ngitunga a awi a Baacha. Taar ngesi ngikiliok daang aloyenet ka ngipaalon a Baacha. Taar Simri ngitunga a awi a Baacha daang itemem ka ngakiro nakolong alimuni Ekapolon Akuj, kisitoru nia ekadwaran Yeu. Apot Baacha ka lokookeng lo anyaritae Ela, kitongoa Ekapolon Akuj na erai Akuj a Isirael, kitilileta kotere ngasechesea kech na elipitotor ngakujo nasubuna, ka ni elomakineta Ngisirael nakisech. Ngakiro nache daang na asubi Ela, igiritae nakitab na enyaritae Ngakiro a Ngikapolok a Isirael. Ekaru lo a ngitomwon-arei ka ngikan-kaarei lo araakar Asa ekapolon a Yuda, toliwor Simri ekapolon a Isirael alo Tirisa. Topolok ngesi Isirael a ngirwa a ngikan-kaarei. Eriamito ngasigerea a Ngisirael ere a Gibeson, anakwap a Ngipilisti. Ani iirarete kesi ebeyo, “Atuk Simri akinger ekapolon, nabo aar ngesi,” apot kesi tolimut kaneni jik atamar ekarikon a ngasigerea kech lo anyaritae Omri ngesi eliwor ekapolon a Isirael. Tonyout Omri ka ngasigerea keng alo Gibeson toloto kiriama Tirisa. Ani ingolikini Simri atamar alemar ere, toloma ngesi namaniyat na eyuunere alotooma akai a ekapolon, sodi kichunyak akai a ekapolon akim totoanik ngesi nasarae a akim. Asubakinosi nguna kainyo asechakini ngesi Ekapolon Akuj. Loger lokolong a Yeroboam, abu ngesi tosub naaronok alongaren Ekapolon Akuj, nabo kilomak Ngisirael nakisech. Ngakiro nache daang nakolong asubi Simri, ka eger lo atukio ngesi akiar ekapolon, igiritae nakitab na enyaritae Ngakiro a Ngikapolok a Isirael. Totiakas Ngisirael ngatiaket ngaarei, kiwapakis epewae Tibini lokookeng a Ginas esakete akitiliwor ekapolon, kiwapakis epewae Omri. Apot ngitunga lu asakete Omri kidwanga ngitunga a Tibini. Sodi totoan Tibini, toliwor Omri ekapolon. Ekaru lo a ngitomwon-uni ka epei lo araakar Asa ekapolon a Yuda, toliwor Omri ekapolon a Isirael. Topolok ngesi Isirael a ngikaru a ngitomon ka ngiarei. Ngikaru ngikan-kapei lu a ekingaren, apolokinit ngesi Isirael alo Tirisa. Togiel ngesi imukura a Samaria ani a Chemer a ngaropiyae ngabunge ngakan-kapei. Toduk ngesi ngawasea kisiriam imukura ngini sodi toduk ere neni, tanyara ere ngolo Samaria. Erai ekiro ngolo eka Chemer alo kolong arai ilope a imukura. Tosechak Omri Ekapolon Akuj noi akidwang ngikapolok luche daang lukolong engarenete ngesi. Loger a Yeroboam, abu Omri kitongo Ekapolon Akuj na erai Akuj a Isirael kitilili, kotere akisech keng a ilope ka akisech na elomakinea ngesi Ngisirael nakisech ka akilipit ngakujo nasubuna. Ngakiro nache daang nakolong asubi Omri, ka ngakiro daang na abu ngesi kitemok, igiritae nakitab na enyaritae Ngakiro a Ngikapolok a Isirael. Totoan Omri tonukakinae Samaria, sodi lokookeng lo anyaritae Aab kilunyokin napolou. Ekaru lo a ngitomwon-uni ka ngikan-kauni lo araakar Asa ekapolon a Yuda, toliwor Aab lokookeng a Omri ekapolon a Isirael. Topolok ngesi Isirael a ngikaru a ngitomwon-arei ka ngiarei alo Samaria. Tosechak Aab Ekapolon Akuj noi akidwang ngikapolok daang lukolong engarenete ngesi. Takad ngesi tani akisech na etia nakolong a Yeroboam alo arai lokookeng a Nebat. Kiut Aab Yesebel na arai nakookeng a Esibaal alo arai ekapolon a Sidon, sodi Aab kilip Baal. Toduk ngesi akai na ilipeenere Baal Samaria, toduk ekeno lo ipeyoore sodi kiwaak tooma kai ngina. Tosubak ngesi nabo ekisikwaane a Akuj anaberu anabe Achera. Asubit ngesi nakaalak na etongoyete Ekapolon Akuj na erai Akuj a Isirael kitilileta, akidwang ngikapolok a Isirael daang lu engarenete ngesi. Ngirwa lu araakar Aab ekapolon, abu Iel lo abunit alo Besel tobongok akiduk Yeriko. Itemem ka akiroit nakolong alimuni Ekapolon Akuj kisitoru nia Yochua lokookeng a Nun, abu lokookeng a Iel lo ekingaren lo anyaritae Abiram totoan na adukere ngateak a Yeriko, sodi totoan lokookeng loochi lo anyaritae Segub na adukere ngidorin a Yeriko. Abu ekadwaran Elija lo abunit alo Tichibe anakwap a Gilead tolimok ekapolon Aab tama, “Alokiro a Ekapolon Akuj ana erai Akuj a Isirael ana eyari, ana asubi ayong etich keng, kalimokinit ayong iyong atamar nyepete ngakop, kori nyerami akiru a ngikaru a ngiarei, kori nguuni lu isidiuno, mati kalimu ayong atamar erami.” Tolimok Ekapolon Akuj Elija tama, “Tonyou kane tolot kide toduk alodiyete ayanae a Keris, alo kide Yorudan. Imasi iyong ngakipi anayanae kangina, nabo adungok ayong ngikuruka atamar kitan iyong kaina.” Sodi kiwap Elija ngakiro na adunguni Ekapolon Akuj, tolot ngesi tolom lokwaas a ayanae a Keris, ana eyei kide Yorudan. Inuunut ngesi ngikuruka ngamugati ka akiring ataparach ka atabong. Tamat ngesi ngakipi a ayanae kangina. Adaunet a ngirwa a ngiche, toon ayanae ngina kotere angopit a akiru. Sodi tolimok Ekapolon Akuj Elija tama, “Tonyou tokona tolot lore a Sarepas, diyete Sidon, tolom neni. Adungok ayong apuserut ache kaina atamar kitan iyong.” Dio Elija tolot Sarepas, ani enanguni ngesi lokidor a ere, kingolik apuserut ikeyeni ngakito, sodi tanyara tama, “Kitamatae kare.” Ani eringa elosi ayaun ngakipi, tanyara Elija ngesi nabo tama, “Kiinu kare tani ngamugati ngadi.” Tolim apuserut ngina tama, “Ekong tani Ekapolon Akuj na eyari, na erai Akuj kon, emam ayong ngamugati eyakasi. Daang na atingit ayong ngesi akan apei a ngakiria ana eyakasi natubwa ka ikimiet nidiochichi eyei lobur. Abunit ayong akikeyen ngakito sodi atolot edorok akimuj nidiochichi ngini, atanyama ka lokookang edareta erogo kiriyori.” Tolimok Elija ngesi tama, “Nyiem. Kape kidorok akimuj kon. Nakaneni tosubakinae mono ayong amugati nadiochichi kiinu, ani erumor kidorok nakon ka lokookon. Kainyo alimu Ekapolon Akuj na erai Akuj a Isirael kona, ‘Nyedaun ngakiria anatubwa kori nyedaun akimiet alobur eringa akolongit na etaramea ayong Ekapolon Akuj akiru.’ ” Tolot apuserut ngina tosub loger lo abalar Elija, sodi min kesi daang akimuj na itemokino ngirwa lukaalak. Nyedauna ngakiria anatubwa, kori nyedauna akimiet alobur, itemem ka ngakiro nakolong alimuni Ekapolon Akuj kisirotu nia Elija. Ekisidi a ngakiro kanguna, todeakakin lokookeng a apuserut kangina. Toroner edeke noi tanang ni atoanea. Tolimok apuserut ngina Elija tama, “Itwaan a Akuj, kotere nyo kisubea iyong ayong kona? Ibunit iyong akisitamun ayong akisech kang sodi totoanea lokookang a?” Tolimok Elija ngesi tama, “Tadakakinae pan idia.” Tadaka Elija idia anakan a apuserut kangina sodi todokarea namaniyat na alokidiama na apereene ngesi, dio akiperikin idia lokitanda. Kikaloik ngesi Ekapolon Akuj ebala, “Ee Ekapolon Akuj na irai Akuj kang, kotere nyo isubakinea ayong ngakiro naaronok anapuserut kana? Kedodikini ngesi ayong apatanu ketepeyon anawi keng. Kotere nyo iarea iyong lokookeng?” Sodi torwaa Elija alokidiama idia ngarwaaret ngauni ilipit ebala, “Ee Ekapolon Akuj na irai Akuj kang, kiteyaru idia en!” Kiira Ekapolon Akuj akilip a Elija, sodi toyaru idia kisiak akianga. Totiyaaror Elija idia kwap, sodi kikobak itiokeng ebala, “Kingolik a, eyari lokookon!” Tolimok aberu ngina ngesi tama, “Ayen tokona atamar irai iyong itwaan a Akuj. Ayen nabo atamar iruoro Ekapolon Akuj dir anikon!” Adaunet a ngirwa alukaalak, ekaru lo a nguuni a akamu, abu Ekapolon Akuj tolimok Elija tama, “Kape kitoodikin ekapolon Aab, sodi atalakak ayong akiru taram.” Abu Elija tonyou tolot. Toroner eron a akoro noi alo Samaria. Sodi tanyara Aab Obadia lo aweikinit akai a ekapolon. (Arai Obadia itwaan ni elipit Ekapolon Akuj lokojokon. Ngirwa lukolong aarea Yesebel ngikadwarak a Akuj, abu Obadia toriko ngikadwarak amiat apei, kidaa ngitomwon-kan anaburibur a apei, kidaa nabo ngitomwon-kan anaburibur a ache. Sodi kitan kesi kaneni kitamasi ngakipi.) Tolimok Aab Obadia tama, “Kapana atorebo ngileleae daang ka ngadipoe daang anakwap keyakasi nginyia lu epedorete ngangolei yok ka ngisikiria adaka toyareta.” Sodi tachamakin kesi ni elosi ipei kech daang akireb, toten Aab lowae epei, toten Obadia lowae loche. Ani eringa Obadia elosi alorot, atipei tanangakin Elija, toyen. Kijuuru Obadia idodiunit arimatoi ani a Elija, sodi kingit tama, “Ekapolon, iyong dir itwaan a?” Tatachu Elija tama, “Ee, ayong itwan. Kape tolimok ekapolon kona, ‘Eyei Elija nege!’ ” Tolim Obadia tama, “Anukiro asechit ayong isakea iyong ekapolon Aab kataar ayong? Ekong jik tani ekiro a Ekapolon Akuj ana eyari, ana erai Akuj kon, erim ekapolon kang akwap daang kisaki iyong. Toliwor na elimokinere ngesi kona, ‘Emam kane,’ kisikong ngesi ekapolon ngolo atamar ingop iyong dir. Abe ibala tokona iyong ayong atolot atolimok ngesi atama, ‘Eyei Elija nege.’ Ani bo tokona kebu etau a Ekapolon Akuj napei arotokinio ayong, kitoriko iyong wache ni nyayeni ayong? Ani kalimok ayong Aab atamar iyei iyong nege, kitasak ngesi iyong tongop, dio ngesi kataar ayong, tarai na elipit ayong Ekapolon Akuj lokojokon, napei kolong eringa arai idia. Nyiirara iyong ngakiro nakolong asubi ayong ngirwa lu aarea Yesebel ngikadwrak a Ekapolon Akuj a? Abu ayong edaa ngikadwarak amiat a ngatiaket a ngaarei, ngitomwon-kan naburibur apei, ngitomwon-kan naburibur nache, sodi etan kaneni ka akitamat. Ekokini tokona ayong alosi alimokin ekapolon atama, ‘Eyei Elija nege’ ai? Kaari ngesi ayong!” Tatachak Elija ngesi tama, “Alokiro a Akuj Namerikanyer ana eyari, ana asubi ayong etich keng, iteni jik etoodikin ayong akolongit naga ekapolon.” Sodi tolot Obadia alimokin Aab, tolot Aab akisiriam Elija. Ani ingolikini Aab Elija tolim tama, “Iyong itwaan a? Ekechanan a Isirael a?” Tolim Elija tama, “Meere ayong arai ekechanan. Iyong ka apakon iraakasi ngikechanak a Ngisirael. Iwout esi akiwap ngitalio a Ekapolon Akuj, nakaneni ilipito ngakujo nasubuna a Baal. Tochunak tokona Ngisirael daang eriamariama ka ayong moru a Karimel. Toriku tani ngikadwarak a Baal lu eraakasi ngamiae ngoomwon ka ngitomwon-kan, ka ngikadwarak a akuj anaberu anabe Achera lu eraakasi ngamiae ngoomwon, ngulu ibakit akapolon Yesebel alowae kech.” Sodi tanyarau Aab Ngisirael daang ka ngikadwarak a Baal tochunakin moru a Karimel. Bu Elija lotunga tolimok tama, “Itubonorosi esi anakiro anaarei tanang ori? Ani kerai Ekapolon Akuj erai Akuj, kilipa ngesi, nakaneni ani kerai Baal erai Akuj, kilipa ngesi!” Nyelimuno ngitunga akiroit tani apei. Sodi tolimok Elija ngitunga tama, “Ayong bon edongit alokadwarak a Ekapolon Akuj, nakaneni eyakasi ngikadwarak a Baal ngamiae ngoomwon ka ngitmwon-kan. Yautu ngimongin ngiarei. Toseasi ngikadwarak a Baal emong epei, taara, sodi totubutuboto kiwaakis kidiama nakito, nakaneni nyiinokakis akim. Atosubakinea ayong emong loche ngakiro napei nguna. Ani erumor kilipa ngikadwarak a Baal akuj kech, sodi elip ayong Ekapolon Akuj. Ani Akuj na etachuni akilip yau akim, ngesi erai Akuj.” Tatachut ngitunga daang tamasi, “Alimun na itemokino.” Dio Elija alimokin ngikadwarak a Baal tama, “Aloger ilalaketa esi, toseutu emong, kisieut tosubakis. Kilipa akuj kus nakaneni nyiinokakis akim nakito.” Tolemasi kesi emong lo ainakinio tosubakis, sodi kilipa Baal napei nataparach tanang naparan lotingilan ebalasi, “Ee Baal, tatachu ngakiro kosi!” Nakaneni tongop tani nia kabek, emam ni eik! Toporoporoto kesi kirimo ekeno lo erokonyikinete kesi. Ani enangi naparan lotingilan, tolomak Elija akianar kesi ebala, “Kiremasi kilipa! Abe erai bo akuj! Iani tokona ngon, kori elosit kinga! Elosit tokona ngon wache, kori ejotoe, ejoikinit esi itekienyunete!” Sodi kilipa kesi iremasi, nabo todungudungos a ngilengea ka ngamorokin toleleut ngaakot. Asubeenete kesi kongina alotal kech. Tachala kesi tanang asonget a akolong, nakaneni emam ngakiro atachakin, emam tani nia etoil eirasi. Ani erumor tolimok Elija ngitunga daang tama, “Potu diyete kang.” Sodi tochunun kesi daang kiriama ngesi. Dio ngesi tosubak mono ekeno a Akuj losek aukoritae. Tolem Elija ngamoru ngatomon ka ngaarei eweikinit apei kech daang ekitela epei alotela alutomon ka ngiarei a talokookeng a Yakobo, alo kolong alimokini Ekapolon Akuj tama, “Eliwor ekiro kon Isirael.” Tolem Elija ngamoru nguna todukio ekeno lokilipet Ekapolon Akuj. Toboka ngesi akipany nabalany kisiriam ekeno. Apedori akipany ngina akiting ngakipi ngalitae ngatomon ka ngoomwon. Torek ngesi ngakito lokeno sodi totubutubu emong dio akiwaakin nakito. Tolim Elija tama, “Kileleba ngamoti ngoomwon ngakipi tobukokis kidiama ngakipeyos ka ngakito.” Tosubakis kesi kongina. Tolim ngesi nabo tama, “Tobukokisi nabo,” sodi tobukokis kesi. Tolim nabo tama, “Tobongokisi abongokinet apei,” sodi tobongokis kesi. Kiyesaros ngakipi alokeno kileleba akipany. Ani enangi esaa lo akipeyos ana asonget a akolong, kirudun ekadwaran Elija diyete ekeno kilip tama, “Ee Ekapolon Akuj na irai Akuj a Aburaam, ka Isaka, ta Yakobo, kidodiu tokona atamar iyong irai Akuj a Isirael, ka atamar arai ayong ekasuban etich kon. Nabo kidodiu atamar asubi ayong nugu daang itemem ka ngakiro na idunguni iyong. Tatachu ngakiro kang Ekapolon Akuj, tatachu ngakiro kang, sodi toyeneta ngitunga lugu atamar iyong Ekapolon Akuj irai Akuj, ka atamar ibuu iyong kesi nikon a alope.” Sodi totiyaun akim a Ekapolon Akuj tonom ngakipeyos, ka ngakito ta ngamoru. Tonom tani ngalup kijujia ngakipi anakipany. Ani ingolikinete ngitunga ngakiro nguna, tadakakinos kwap tojuko ngireetin ngalup ebalasi, “Ekapolon Akuj ngesi erai Akuj! Ekapolon Akuj bon erai Akuj!” Todungok Elija ngitunga tama, “Kirumutu ngikadwrak lua Baal. Warasi tani epei nyeematar!” Kirumut ngitunga kesi daang. Toriko Elija kesi nangolol a Kichon taar kaneni. Ani erumor tolimok Elija ekapolon Aab tama, “Kape tokona kimuj, eira ayong erue a akiru keapuu.” Ani elosi Aab akimuj, tolot Elija todoka naita a emoru a Karimel, toriedik tojuk ereet ngalup, min akou keng kiding ngakungin. Tolimok ngesi ekasuban etich keng tama, “Kape kingolia lowae lo anam.” Tolot ekasuban etich ani erumor tobongu tama, “Emam ibore engolik ayong.” Tolimok Elija ngesi tama, “Tobongo ngabongoret ngakan-kaarei.” Alosiet na ngakan-kaarei, tobongu ngesi tama, “Engolik ayong idou nidiochichi etia akan a itwaan ejipunit ananam.” Todungok Elija ekasuban etich keng tama, “Kape tolimok Aab kona, ‘Todoka naurukuk kon na irito ngangolei nyikiratak akiru.’ ” Adaunet a esaa alouriyen toribok adis toburuchiasi ngidowon. Kisiak ekuwam akikut sodi taram akiru nakaalan noi. Todoka Aab naurukuk keng tobongo Yesireel. Min agogongu a Ekapolon Akuj nia Elija. Toinik ngesi ngiworui keng naabor kirijak, sodi tamatar kingarenik Aab tanang Yesireel. Tolimok ekapolon Aab aberu keng Yesebel ngakiro daang na asubi Elija, ka eger lo aarea Elija ngikadwarak a Baal daang. Tomea Yesebel itwaan nia Elija ebala, “Kataar ayong ngakujo erai kenang moi esaa lo ikoni logo, eringa ayong nyesubakina anikon ngakiro na ngoon isubea iyong ngikadwarak a Baal!” Toem Elija. Todok ngesi esaki ayuun. Toriko ekasuban etich keng, sodi toloto Beer-cheba alo Yuda. Toisik Elija ekasuban etich keng kaneni, dio alosit apaaran juui tanang nariet. Tolot kiboikin lotolim a ekitoe tagat atamar atotoan. Kilip ebala, “Ekapolon Akuj, kaupa ayong ngakiro nugu. Taarae! Ejoikina ayong atoani, kainyo emam ibore kitiakit ayong kata apaakang lungorok!” Kinapakin ngesi kwap ekitoe tojotoor. Atipei bu emalaikat tatap ngesi tama, “Tonyou kimuj.” Tongolengolek Elija, kingolik amugati ka agurum a ngakipi alodiyete akou keng. Kimuj ngesi, tamat, dio akinapakin nabo. Tobongu emalaikat a Akuj kitekienyu ngesi nabo tama, “Tonyou kimuj. Ani pekimuj iyong, kitionikini iyong alotoru noi.” Tonyou Elija kimuj, tamat. Nak akimuj ngina ngesi ngikilinga lu alosio ngirwa ngitomwon-omwon, akwaar ka apaaran tanang Sinai, emoru a Akuj. Ani enangi neni, toloma ngesi naburibur akiper. Kisuruorik Ekapolon Akuj ngesi atipei kingit tama, “Elija, nyo isubi iyong kane?” Tatachu Elija tama, “Ekapolon Akuj Namerikanyer, asubi ayong jiik etich kon bon. Nakaneni echwangakis Ngisirael achamunet nakolong ichamakinosi ka iyong, aukosi ngikenoi kon, nabo aar ngikadwarak kon daang. Ayong bon edongit, nakaneni esakete akiar ayong!” Tolimok Ekapolon Akuj ngesi tama, “Topud tolot towo alokidiama emoru alongaren kang.” Totiaak Ekapolon Akuj kitoru neni, tomeu ekuwam lotiapolon tapak ngimoru, kieala ngatabab, nakaneni amam Ekapolon Akuj alokuwam kangolo. Adaunet a ekuwam, torikirikok akwap, nakaneni amam Ekapolon Akuj anarikirikokin kangina. Adaunet a arikirikokin a akwap, bu akim, nakaneni amam Ekapolon Akuj anakim kangina. Adaunet a akim, bu etoil loochi ingaingaa. Ani iirari Elija etoil ngolo, tarap ereet keng a eworu keng sodi tolot towo anakituk a aburibur. Kingit etoil ngesi tama, “Elija, nyo isubi iyong kane?” Tatachu Elija tama, “Ekapolon Akuj Namerikanyer, asubi ayong jiik etich kon bon. Nakaneni echwangakis Ngisirael achamunet nakolong ichamakinosi ka iyong. Aukosi ngikenoi kon, nabo aar ngikadwarak kon daang. Ayong bon edongit, esakete akiar ayong!” Tolimok Ekapolon Akuj ngesi tama, “Tonyou tobongo nariet na eyei diyete Damasko, sodi toloma lore kiwasak Asael akimiet toliwor ekapolon a Siria. Kiwasak Yeu lokookeng a Nimchi akimiet toliwor ekapolon a Isirael. Tolem Elicha lokookeng a Chapat lo ebunit alo Abel-meola kiwasak akimiet kilunyokin nados kon toliwor ekadwaran. Itwaan ni ebuchar ani a Asael nyeara, eari Yeu. Ani ni ebuchar ani a Yeu, eari Elicha. Nakaneni aisikini ayong ngitunga ngabunge ngakan-kaarei alo Isirael eyarete, ngulu daang kamunosi ayong, lu eringa nyeriedikokina Baal, kori nyenuakina akuj keng nasubuna.” Torotok Elija toriam Elicha itichili ngimongin amana. Engarenete ngaenet a ngimongin ngatomon ka apei, arukito ngesi ka aenet a ngimongin na ngatomon ka ngaarei. Tobutu Elija eworu keng dio abutokin Elicha. Toisik Elicha ngimongin keng kipiiri kiwapak Elija tama, “Kimiekinae atolot atonuak apakang ka itiokang atama, ‘Kidongo robo,’ sodi abu kewapak iyong.” Tolim Elija tama, “Tobongo robo. Nyekeratakini ayong iyong!” Sodi tolot Elicha taar ngimongin lu araakasi aenet keng, tolem ngakito nasek ainikinitere wapei, kinokakinea akim. Nak ngesi ngitunga akiring tanyama. Ani erumor tolot ngesi kiwapak Elija toliwor ekengarakinan keng. Tochunak ekapolon a Asiria lo anyaritae Benadad ngajorei keng daang, erukito ka ngikapolok ngiche ngitomwon-uni ka ngiarei lu aikinito ngesi, ka ngangolei, ta ngaurukukui na iritae. Tonyou ngesi tolot kisiriam ngajorei a Samaria, sodi kitijik. Tomea ngesi ngimeanara lore nia Aab alo arai ekapolon a Isirael alimokin ngesi kona, “Ebala Benadad kona ‘Tajalakinae ayong ngaropiyae kon, ka egolit, ka ngaberu kon naajokak, ta ngide.’ ” Tatachu Aab tama, “Ee ekapolon, loger lo ilimunio iyong, ekapolon kang tolemarae ayong ka ibore ni atingit daang.” Ani ekisidi tobongut ngimeanara ngulu nia Aab ebalasi, “Ebala Benadad kona, ‘Ameunit kolong ayong ngitunga nikon, asaki kiinak iyong ayong ngaropiyae kon, ka egolit, ka ngaberu ta ngide. Nakaneni tokona, ameuni ayong ngikapolok a arieng kang kisemoto tooma akai kon ka ngakais a ngikapolok a arieng kon, sodi tolemasi ibore daang ni ejoikini kesi. Epote kesi moi esaa lo ikoni logo.’ ” Tanyarau ekapolon Aab ngikarikok a akwap daang tolimok tama, “Ingolikis tokona esi atamar esaki itwaan en akibeny ngoni. Ameuni ngoon ngesi ngitunga esaki ngaberu kang, ka ngide, ka ngaropiyae, ta egolit. Atacham ayong.” Tolimut ngikarikok ka ngitunga tamasi, “Wara nyiimisik ngakiro keng. Wara nyiicham.” Sodi tolimok Aab ngimeanara a Benadad tama, “Tolimokisi ekapolon kang, lo erai ekapolon a Siria kona, ‘Achamu ayong daang nakolong alimuni ngesi ekingaren, nakaneni anger na tokona nugu.’ ” Torotokis ngimeanara sodi tobongut nabo ka ngakiro ngache ani a Benadad ebala, “Ameuni moi ayong ngitunga lu itemokino akinyasun Samaria sodi tolemasi ekokoto a ngakan kech. Kataara ayong ngakujo erai pekasubak nguna!” Tatachu Aab tama, “Tolimokisi Benadad kona, ‘Iwoga palem ekajwon erai kerumo ejie, meere eringa!’ ” Tolimokinae Benadad ngakiro nguna esaa lo eboyooto ngesi ka ngikapolok luche lu aikinito ngesi, emaase emuna aloeaman kech. Tolimok ngesi ngitunga keng tama, “Tochila akodet.” Tochila kesi akodet esakete akitijikin ngitunga a ere. Esaa lopei ngolo, tolot ekadwaran nia Aab tolimok tama, “Ebala Ekapolon Akuj, ‘Wara nyiem ajore natikaalan naga! Kesidwangi ayong iyong akolongit naga, toyen atamar ayong arai Ekapolon Akuj.’ ” Kingis Aab tama, “Tangae erikete ejie?” Tatachu ekadwaran tama, “Ebala Ekapolon Akuj ngasigerea nasorok erikito ngikaweikinak a ngakwapea kesi erikete ejie.” Kingis Aab tama, “Ngae isiakini ejie?” Tatachu ekadwaran tama, “Iyong.” Sodi tanyarau ekapolon ngasigerea nasorok erikito ngikaweikinak a ngakwapea, eraakasi daang ngamiae ngaarei ka ngitomwon-uni ka ngiarei. Sodi tanyarau ngasigerea a Ngisirael na araakasi daang ngabunge ngakan-kaarei. Tonyout kesi ejie naparan lotingilan, esaa lo amaasa Benadad ka ngikapolok lutomwon-uni ka ngiarei aloeaman kech. Kingarenikis ngasigerea a Aab nasorok. Pot ngasigerea nasek amearit Benadad akirereor, tolimokis ngesi tamasi, “Eponito ngasigerea alo Samaria.” Todung Benadad tama, “Kirumutu eyarete, nyiimisikis kerai ejie eponito kori ekisil.” Kisiakis ngasigerea nasorok ejie, totupuut ngasigerea a Ngisirael, sodi taar ipei kech daang itwaan ni ajioto. Tamataros ngitunga a Siria, kiritasi Ngisirael kesi, nakaneni tobuchar Benadad edokit angole, ka ngikameak ngangolei ngiche. Toloma Aab lojie sodi tolema ngangolei ka ngaurukukui na irito ngangolei, taar ngesi ngitunga a Siria lukaalak. Ani erumor bu ekadwaran nia ekapolon Aab tolimok tama, “Tobongo kiatak ngajorei kon, torek ngakiro kon lokojokon kainyo kitijikini ekapolon a Siria iyong erupe lo moi.” Tolimokis ngikapolok a arieng a Benadad ngesi tamasi, “Eraakasi ngakujo a Ngisirael ngika ngimoru, ngesi ngoon kidwangeta kesi ngoni. Kipedori ngoni akidwang kesi dir erai kitijik anaroatin. Tosubak tokona kona, tolema ngikapolok lutomwon-uni ka ngiarei, sodi kilunyok ngikarikok a ngasigerea. Ani erumor tochunak ngasigerea na etia na ngoon kiisikinete iyong, kitiriyan tani ngangolei ka ngaurukukui kech. Kitijikini ngoni Ngisirael anaroatin edwanga jik.” Kiira ekapolon Benadad ngakiro nguna sodi tosubak loger lo abalatar kesi. Ani enangi ngirwa lua erupe, tochunak Benadad ngasigerea keng toloto lore a Apek akitijikin Ngisirael. Tochunakin Ngisirael etingito ngiboro kech lujiet, torotokis sodi topero a ngalooso a ngaarei ekienyikinito ngasigerea a Siria. Kikwaanikini Ngisirael ka ngisipaan a ngaanei luuchik ngiarei, itemio ka ngitunga a Siria lu apetakina akwap wadaang. Tolot ekadwaran nia ekapolon Aab tolimok tama, “Ebala Ekapolon Akuj kona, ‘Aloger ebalatar ngitunga a Siria arai ayong akuj a ngimukur, meere akuj a ngaroatin, kesidwangi ayong iyong ajore natikaalan naga, toyeneta iyong ka ngitunga kon atamar arai ayong Ekapolon Akuj.’ ” Kiboyoto ngitunga a Siria ka lua Isirael anadakarin kech ekienyikina a ngirwa a ngikan-kaarei. Ani akolongit na ngakan-kaarei, kisiakis kesi ejie. Taara Ngisirael ngitunga a Siria ngabunge amiat apei a akolongit a apei. Ani lu edongete, tamataros tolomasi lore a Apek. Ani enangete neni, toukokinos ngawasea a ere kesi taara ngitunga ngabunge ngatomwon-arei ka ngakan-kaarei lusek edongito. Tobuchar Benadad dang tolot lore sodi toloma namaniyat na ayei naabor a akai a ache. Tolimokis ngikapolok a arieng keng tamasi, “Kiira sua atamar abe isieneko ngikapolok a Ngisirael. Kimiekinae sua atanapa ngiguniae anaaborin kosi, elogaloga ngaunoi lomosiringan kosi, sodi atoloto nia ekapolon a Isirael, kijaluni tokona ngon ngesi iyong.” Sodi toinikis kesi ngiguniae naaborin kech, kilogaloga ngaunoi lomosiringan kech, toloto nia Aab tamasi, “Ebala Ekasuban etich kon Benadad, ‘Kimiekinae kare nyikiar.’ ” Tolim Aab tama, “Eringa ngesi eyari a? Ikwa ejok! Ikoni ngesi lokaatokang!” Agasete ngitunga ngulu tolimunoe akiroit naajokon. Ani napei alimunio Aab akiroit be, “Lokaatokang,” kiroposi kesi jik tamasi, “Erai Benadad lokaatokon loger lo ibalar iyong!” Todung Aab tama, “Kapesi torikutu ngesi nikang.” Ani edoluni Benadad, tanyarau Aab ngesi naurukuk keng na irito ngangolei. Tolimok Benadad ngesi tama, “Kabuakini ayong iyong ngirerea lukolong alemari apakang anika apakon. Ipedori iyong akiduk ni isubea emuchuruseenu kon lore a Damasko, loger lokolong asubea apakang alo Samaria.” Tatachak Aab tama, “Kalakakini ayong iyong kotere ngakiro nguna.” Tachamakinos kesi sodi kimiek Aab Benadad tolot. Loger lo adungokinitor ngesi Ekapolon Akuj, abu epei anatiakar a ngikadwarak tolimok loche tama, “Taramae kare ayong!” Nakaneni towou loche akiram ngesi. Sodi tolimok lo ekingaren loche tama, “Aloger iwounea iyong akiwap ngakiro a Ekapolon Akuj, kiari iyong engatuny napei irotokinio anikang.” Ani napei arotokinio ngolo, totubun engatuny taar ngesi. Sodi tolot ekadwaran ngolo nitwaan iche tolimok tama, “Taramae kare ayong!” Taram itwaan ngini ngesi lokojokon towan. Toen ekadwaran ngolo ereet keng a achaat, kitiliwoon enape, sodi tolot towo alorot idarit ekapolon a Isirael itoruni neni. Ani itoruni ekapolon neni, tanyara ekadwaran ngesi tama, “Ekapolon, ajii ayong alojie, sodi bu asiger ache erikit emoit lo erumunio katolimok ayong tama, ‘Kitee itwaan en. Ani kesii, kiario iyong kori itachi ngaropiyae ngabunge ngauni.’ Nakaneni etumor ayong alotich a eche, sodi tosii itwaan ngini.” Tolimok ekapolon ngesi tama, “Eriras kon ngolo ilimu iyong. Itachi iyong.” Kiwolo ngesi achaat aloreet keng atipei, toyen ekapolon ngesi atamar erai epei a ngikadwarak. Tolimok ekadwaran ekapolon tama, “Ebala Ekapolon Akuj kona, ‘Aloger ilakakinea iyong itwaan nikolong adunguni ayong atamar taarae, talakak iyong esii, itachi iyong a akiyar kon, nabo emunyario ngasigerea kon ani alakakineta ngasigerea keng esiyete.’ ” Tobongo ekapolon nawi keng Samaria ialolongi tosiliyorite. Ayei amana a itwaan ani anyaritae Nabos diyete awi a ekapolon Aab alo Yesireel. Akolongit apei, tolimok Aab Nabos tama, “Nakinae ayong amana kon. Asaki ayong etaene aloger eyakar diyete akai kang. Kelokonyikini ayong iyong amana naajokon, kori ani kisaki iyong agieli a ngaropiyae ana itemokino.” Tatachak Nabos Aab tama, “Keratak Ekapolon Akuj ayong nyakainak iyong amana naga! Kainyo erumi kolong ayong amana naga ani kata apaakang.” Tolot Aab nawi esiliyorit tongoite ani abalar nabos, “Nyakainakini ayong iyong amana kata apaakang.” Kinapakin Aab lokitanda keng, ekienyikinit esiep a akai, nabo tonger akimuj. Tolot aberu keng Yesebel nikeng kingit tama, “Nyo isiliyoritor iyong? Nyo peimujea iyong?” Tatachak ngesi tama, “Kainyo esuruori ayong Nabos atama, ‘Nakinae amana kon atogiel a ngaropiyae. Kori ani kerai amana nache isaki iyong, kelokonyik nakang.’ Tatachu ngesi tama, ‘Nyakainakini ayong iyong amana kang.’ ” Tolimok Yesebel ngesi tama, “Iyong irai ekapolon kori meere? Tonyou kimuj. Kainakini ayong iyong amana a Nabos!” Kigir Yesebel ngabaruae a ekiro a Aab togol tatapak emachar a Aab, sodi tomea lokapolok a arieng, ka lokarikok a ngitunga a Yesireel. Egiritae abarua kona, “Kikeutu atamar toronoi akimuj, tochunakis ngitunga, sodi kiwaakis Nabos ni erimae. Tolemutu ngirukooi ngiarei kisuburata Nabos tamasi, ‘Ichieni iyong Akuj ka ekapolon.’ Ani erumor torikosi ngesi nikalapatan a ere, sodi kimasa a ngamoru taara.” Apot ngikapolok a arieng ka ngikarikok a ngitunga a Yesireel, tosubakis loger lo adungokinitor Yesebel kesi. Apot kikeut atamar toronoi akimuj, tochunakis ngitunga, sodi kiwaakis Nabos ni erimae. Kisuburata ngirukooi luarei ngulu ngesi alongaren ngitunga ebalasi, “Echieni Nabos Akuj ka ekapolon.” Sodi torikosi ngesi nikalapatan a ere kimasa a ngamoru taara. Tomearae itwaan nia Yesebel tolot alimokin kona, “Aar Nabos.” Napei eirarea Yesebel atamar emas Nabos a ngamoru atoana, tolimok ngesi Aab tama, “Tonyou tolema amana a Nabos, nakolong awouni ngesi agielakin iyong.” Tonyou Aab atipei tolot tolema amana a Nabos. Ani erumor tolimok Ekapolon Akuj ekadwaran Elija loa ere a Tichibe tama, “Kape nia ekapolon a Isirael alo enyaritae Aab alo eyei Samaria. Iriamuni iyong ngesi alomana a Nabos, esaki alemar amana ngina. Tolimok ngesi atamar abala ayong Ekapolon Akuj kona, ‘Ikwa iari iyong itwaan ani erumor kirum ibore keng dang a?’ Tolimok ngesi atamar abala ayong Ekapolon Akuj kona, ‘Ni kolong ameyoto ngingokwo ngaakot a Nabos, nipei neni ngesi emeyoto ngaakot kon!’ ” Ani ingolikini Aab Elija, kingit tama, “Emoit kang, kisiriamik iyong ayong a?” Tatachu Elija tama, “Ee, kesiriamik, kainyo ilemuni iyong akisub nguna aronok noi alongaren Ekapolon Akuj. Ebala robo Ekapolon Akuj kona, ‘Ayauni ayong ngakiro naaronon nikon. Kekisari ayong iyong, sodi atomunya itwaan nikile daang anawi kon, lusorok ka lumojong. Ikokini awi kon awi a ekapolon Yeroboam alokookeng a Nebat, ka awi a Baacha alokookeng a Aija, kainyo kitongo iyong ayong kitilil, ani ilomakinea Ngisirael nakisech.’ Ani na erai Yesebel, ebala Ekapolon Akuj kona, ‘Enyamete ngingokwo akwaan a Yesebel alore a Yesireel.’ Eyenet kon cha daang lo etoanikini lore, enyamete ngingokwo. Ani lo etoanikini moding, enyamete ngataruk.” ( Amam itwaan iche alemuna akisub naaronok noi alongaren Ekapolon Akuj loger a Aab. Aberu keng Yesebel ngesi echuchukinit ngesi nakiro nguna daang. Asubi ngesi ngasechesea na ngileech noi ani elipitor ngakujo nasubuna, loger losek asubete Ngiamor, lusek eritari Ekapolon Akuj na alooso Ngisirael ngaren.) Ani iirari Aab ngakiro nguna, tochilichili ngiworui keng, tobuto, sodi tanap ngiguniae. Tonger akimuj, toper aloguniae toliwor elosi esinyit tosiliyorite. Tolimok Ekapolon Akuj ekadwaran Elija tama, “Ingolik iyong eger lo etiditeunor Aab alongaren kang a? Aloger ekokinea ngesi neni, nyayauni ayong ngakiro nugu nikeng eringa ngesi eyari. Ayauni ayong ngakiro naaronok nguna nawi a Aab ngirwa lu eliworor lokookeng ekapolon.” Esilito Ngisirael ka ngitunga a Siria a ngikaru a nguuni. Nakaneni ani ekaru lo a nguuni, tolot ekapolon Yeochapat lo a Yuda aanyun ekapolon Aab lo a Isirael. Kingit Aab ekapolon a arieng keng tama, “Iyenete ba esi atamar erai ere a Ramos alo Gilead eyok a? Ani nyo bo kibooyo ngoni pekilosio alemar ani a ekapolon a Siria?” Kingit Aab Yeochapat tama, “Ibuni iyong erukosi etijikisi Ramos a?” Tatachu Yeochapat tama, “Anyouni ayong esaa daang lo inyounio iyong. Ngasigerea kang dang ka ngangolei, enyounito loger anakon. Nakaneni kimiek mono engitutu Ekapolon Akuj ngakiro nugu.” Sodi tochunak Aab ngikadwarak luko asibit ngamiae ngoomwon kingit tama, “Alosi etijik Ramos kori nyalosi?” Tatachut tamasi, “Kape. Kisidwangi Ekapolon Akuj iyong.” Nakaneni kingit Yeochapat tama, “Emam nege ekadwaran eche a Ekapolon Akuj lo kipedori ngoni akingit a?” Tatachu Aab tama, “Eringa eyei itwaan ipei ni kipedori ngoni akingit ngakiro a Ekapolon Akuj. Enyaritae ngesi Mikaya lokookeng a Imula. Nakaneni aremokino ayong ngesi kainyo nyedwareene ngesi ngakiro naajokak anikang, pearai naaronok jiik.” Tolim Yeochapat tama, “Nyejoikinit iyong ilimuni kongina.” Sodi tanyarau Aab epei a ngikapolok a arieng keng tama, “Kape toriku Mikaya lokookeng a Imula nege atiepi.” Ebooyete ngikapolok luarei ngulu alokicholongo kech a apolou, enapito ngiworui lukooyak a ngikapolok. Ebooyete kesi anidaet ngalemet anikalapatan ere a Samaria. Ayakasi ngikadwarak daang neni adwarete alongaren ngikapolok ngulu. Abu epei a ngikadwarak lo anyaritae Sedekia lokookeng a Kenaana tosubak ngaamwar nasua sodi tolimok Aab tama, “Ebala Ekapolon Akuj kona, ‘Itijikini iyong Ngisiria a ngaamwar kanu tomunya.’ ” Tolimut ngikadwarak luche daang ngakiro napei nguna ebalasi, “Kape kitijik Ramos kidwang. Kisidwangi Ekapolon Akuj iyong.” Abu itwaan nisek amearitae anyaraun Mikaya tolimok Mikaya tama, “Adwar ngikadwarak luche daang ngakiro naajokak ani a ekapolon, ejoikinit iyong dang elimuni napei nguna.” Nakaneni tolim Mikaya tama, “Ekongi ayong alokiro a Ekapolon Akuj atamar ngakiro nakalimokini ayong Ekapolon Akuj, kesi alimuni ayong!” Ani enanguni ngesi nia ekapolon Aab, kingit Aab ngesi tama, “Mikaya, kilosi ayong ka ekapolon Yeochapat akitijikin Ramos kori mam?” Tatachu Mikaya tama, “Kape kitijik kidwang. Kisidwangi iyong Ekapolon Akuj.” Tolim Aab tama, “Ibala katolimok ngalimokinet ngaai atamar nakisuruorea iyong ayong alokiro a Ekapolon Akuj kiruor ngakiro na iteni?” Tatachu Mikaya tama, “Engolik ayong ngasigerea a Ngisirael epetakina kidiama ngimukur loger a ngamasekin ana emam ekeyokon. Tolim Ekapolon Akuj tama, ‘Emam ngitunga lugu ekarikon. Kimiekisi kesi tobongosi nawi akaalimon.’ ” Tolimok Aab Yeochapat tama, “Petete kalimokini ayong iyong atamar nyedwareene logo naajokak jik anikang pearai naaronok a?” Tolim Mikaya tama, “Kiira tokona ngakiro na elimunit Ekapolon Akuj! Engolikini ayong Ekapolon Akuj ibooyi alokicholong keng anadis, ka ngimalaikae keng daang ewaasi alodiye keng aloteten ka kedieny. Kingis Ekapolon Akuj tama, ‘Ngae ingalae Aab tolosio taarae alo Ramos?’ Tolimut ngimalaikae ngiche nugu, tolimut luche ngun. Sodi bu etau towo alongaren Ekapolon Akuj tama, ‘Engalae ayong ngesi.’ Kingit Ekapolon Akuj ngesi tama, ‘A eger kaali?’ Tatachu etau tama, ‘Alosi ayong etiliwo ngikadwarak a Aab daang ngikaliokok.’ Tolim Ekapolon Akuj tama, ‘Kape kingala ngesi. Ipedori iyong.’ ” Torumo Mikaya ngakiro keng ebala, “Ngakiro na asubakin kesi nugu, eteliokon Ekapolon Akuj ngikadwarak lukon lugu, sodi kingalata iyong. Nakaneni adungu Ekapolon Akuj alope atamar iriamunosi iyong ka naaronok!” Sodi tonyou ekadwaran Sedekia tolot kibap Mikaya namatangen ebala, “Ekokini etau a Akuj kadepari ayong kisuruor iyong ai?” Tatachu Mikaya tama, “Iyenuni iyong akolongit na ilosio akiduk anamaniyat ana alotooma.” Todungok ekapolon Aab epei a ngikapolok a arieng keng tama, “Kirumutu Mikaya torikosi nia Amon alo erai ekapolon a ere, ka Yoach lo erai lokookeng a ekapolon. Tolimokisi kesi atamar abala ayong kona, ‘Toinikisi itwaan en lojela kisumuja ngamugati, ka ngakipi tanang abonguni ayong akaalimon!’ ” Tolim Mikaya tama, “Ani kibongu iyong akaalimon, nyisuruoro Ekapolon Akuj ayong.” Kiatak nabo tama, “Kiira iyong itwaan daang ngakiro na alimu ayong nguna.” Sodi toloto ekapolon Aab lo a Isirael ka Yeochapat loa Yuda akitijikin ngitunga a ere a Ramos alo Gilead. Tolimok Aab Yeochapat tama, “Ani kilosi ngoni lojie, etiliwooni ayong enape kang, nakaneni tanap iyong ngiworui kon a apolou.” Sodi tolot ekapolon a Isirael lojie itiliwoonit enape. Adungokinit sek ekapolon a Siria ngikarikok a ngasigerea keng lutomwon-uni ka ngiarei lu aweikinito ngaurukukui na irito ngangolei tama, “Nyiitijikis itwaan iche, kedit kori kepolot, pearai ekapolon a Isirael bon.” Ani ingolikinete kesi ekapolon Yeochapat tamasi, “Ekapolon a Isirael logo.” Apot kesi toreas esakete akitijikin ngesi, sodi toowanik Yeochapat. Ani eyenete kesi atamar meere ngolo ekapolon a Isirael, tobongut tojongoto akiwapit ngesi. Nakaneni toguma asiger apei a Siria emal keng lo echanyuni ekapolon Aab, togum nakiriamet a ngiboro alu ejie alu anapit ngesi. Tolimok ngesi ekamean aurukuk keng na irito ngangolei tama, “Torei topudo alojie! Kainyo kawan ayong!” Torirau ejie noi akolongit ngina. Kigangakinae Aab naurukuk keng kisingoliarae lowae lo a ngitunga a Siria. Toleleasi ngaakot anajeme keng toburuchiasi kwap aurukuk, ani enangi ebong, totoan ngesi. Ani eapikini adooyoret a akolong, taramae elii anasigerea a Ngisirael ebeyo, “Tobong itwaan daang nakwap keng ka lore keng!” Totoan ekapolon Aab, yaarae akwaan keng Samaria tonukae. Kilotarae aurukuk keng anabwel a Samaria, ani ameyoto ngingokwo ngaakot keng, nabo ni elotatar ngamalaae, loger losek alimunitor Ekapolon Akuj atamar esubakin. Ngakiro nache daang nakolong asubi Aab, aapei ka ngakiro a akai ana aduki ngesi ana etisiritoe a ngikel a etom, ka ngirerea daang lu aduki ngesi, igiritae nakitab na enyaritae Ngakiro a Ngikapolok a Isirael. Ani etoani ngesi, kilunyokin lokookeng Aasia napolou keng. Ekaru lo a nguomwon lo araakar Aab ekapolon a Isirael, toliwor Yeochapat lokookeng a Asa ekapolon a Yuda, erai ngikaru keng ngitomwon-uni ka ngikan. Topolok ngesi Yerusalem a ngikaru a ngitomwon-arei ka ngikan. Anyaritae itiokeng Asuba nakookeng a Chili. Tosub Yeochapat nguna eriyan alongaren Ekapolon Akuj loger a apakeng alo engareni ngesi. Nakaneni aringa ngikenoi lu ipeyoore anasenon nyinyasuna. Aringa ngitunga ipeyoote ngakipeyos ka akinom emitina kaneni. Abu Yeochapat kisila ka ekapolon a Isirael. Ngakiro nache daang nakolong asubi Yeochapat, ajwonu keng daang ka ngijiesinei lu ajii, igiritae nakitab na enyaritae Ngakiro a Ngikapolok a Yuda. Abu ngesi tomunya ngitunga lumalaae daang lu epeyonokinete ngakujo nagelayek. Ngitunga ngulu kesi lu kolong edongete nakwap ngirwa lu araakar Asa ekapolon. Arai Asa apakeng a Yeochapat. Amam akwap a Edom ekapolon ayei. Ekapolon a Yuda ngesi aseununi itwaan ni etupit ngesi topolok neni. Tosubak ekapolon Yeochapat ngatubwae naapolok na eloose ananamea sodi kiwaanaros nakwap na enyaritae Opir tasakasi egolit. Nakaneni nyeyakara kesi kainyo apot tobwangabwangae alo Esionigeber. Abu Aasia lo arai ekapolon a Isirael tolimok Yeochapat tama, “Kimiek ngitunga kang tolomasi natubwae kiwaaros ka lukon aapei.” Nakaneni towou Yeochapat. Totoan Yeochapat, tonukakinae nalielin a ngikapolok na eyakasi lore a Daudi. Sodi kilunyokin lokookeng Yeoram napolou. Ekaru lo a ngitomon ka ngikan-kaarei lo araakar Yeochapat ekapolon a Yuda, toliwor Aasia lo arai lokookeng a Aab ekapolon a Isirael, sodi topolok alo Samaria a ngikaru a ngiarei. Tosechak ngesi Ekapolon Akuj, kiwap eboyor a Aab alo arai apakeng, ka Yesebel na arai itiokeng, ta ekapolon Yeroboam lokolong elomakini Ngisirael nakisech. Kilip Aasia Baal ka akisub etich a Baal. Loger lo kolong a apakeng, abu ngesi kitongo Ekapolon Akuj na erai Akuj a Isirael kitilil. Ekisidi a akitu a Aab alo arai ekapolon a Isirael, apot ngitunga a akwap a Moab tongero Ngisirael. Tochakun ekapolon Aasia lo arai ekapolon a Isirael, alopuke a akai ana alokidiama ayei Samaria. Abu ngesi towan lokojokon. Sodi tomea ngesi ngitunga ebala, “Kapesi nia Baalsebub ana erai akuj a Ngipilisti na ayei lore a Ekiron. Kingitutu akuj ngina kajoker ayong kori kemam.” Nakaneni todungok emalaikat a Ekapolon Akuj Elija lo arai ekadwaran a ere a Tichibe tama, “Tonyou, tolot kisiriamia ngitunga lu emearit ekapolon Aasia, sodi kingit kesi kona, ‘Nyo eraakar Baalsebub na erai akuj a ere a Ekiron ingisit iyong ngakiro kon? Kori be ni ibalar iyong emam Akuj alo Isirael!’ Ebala robo tokona Ekapolon Akuj kona, ‘Nyinyouni iyong ani iperio, itoani!’ ” Sodi torotok Elija. Tobongosi ngitunga ngulu ni eyei ekapolon Aasia. Kingit ekapolon kesi tama, “Nyo bo ibongunioto esi?” Tatachakis kesi tamasi, “Kiriamun sua ka itwaan ni kilimokini sua atamar atobongutu sodi atolimokisi iyong atamar ebala Ekapolon Akuj kona, ‘Nyo imearitor iyong ngitunga akingitun akuj a ere a Ekiron ngakiro kon? Kori be ni ibalar iyong emam akuj alo Isirael! Nyinyouni iyong ani iperio, itoani!’ ” Kingit ekapolon Aasia kesi tama, “Arai itwaan ngini iyes ai?” Tatachakis kesi tamasi, “Anapit ngesi eleu a ngibaren, aenitae a aruba anamuny.” Tolim ekapolon Aasia tama, “Erai Elija lo a ere a Tichibe!” Sodi tomea ngesi ekarikon a ngasigerea erikit ngasigerea ngatomwon-kan, anyaraun Elija. Abu ekarikon ngolo loochi ngolo torukau Elija ibooyi alomukura, tolimok tama, “Itwaan a Akuj, kidungokinit iyong ekapolon Aasia atamar totiyaun.” Tatachak Elija ngesi tama, “Ani karai ayong itwaan a Akuj, kimiekisi akim totiyaun alokidiama kitaar iyong ka ngasigerea kon!” Abu akim totiyaun atipei taar ekarikon ngolo ka ngasigerea keng. Tomea ekapolon Aasia ekarikon eche arikit ngasigerea ngatomwon-kan, anyaraun Elija. Tolot ekarikon ngolo sodi tolimok Elija tama, “Itwaan a Akuj, kidungokinit ekapolon Aasia iyong atamar totiyaun.” Tatachak Elija ngesi tama, “Ani karai ayong itwaan a Akuj, kimiekisi akim totiyaun alokidiama kitaar iyong ka ngasigerea kon!” Abu akim totiyaun atipei taar ekarikon ngolo ka ngasigerea keng. Abu ekapolon Aasia tomea nabo ekarikon eche erikit ngasigerea ngatomwon-kan. Todoka ngesi lomukura toriedik alongaren Elija, sodi kimaima ebala, “Itwaan a Akuj, torimakinae ayong ka ngirukitos kang. Kimiekinae sua atoyara. Aario ngikarikok luche luarei ka ngasigerea na arukitotor a akim ana atiyaun anadis, nakaneni kisieni kare ayong!” Abu emalaikat a Ekapolon Akuj tolimok Elija tama, “Kirukosi ka ngesi wara nyiem.” Abu Elija kirukosi ka ekarikon ngolo nia ekapolon Aasia, sodi tolimok ngesi tama, “Ebala Ekapolon Akuj kona, ‘Ani kona imearea iyong ngitunga akingitun ngakiro kon ani a Baalsebub ana erai akuj a ere a Ekiron, tosub emam Akuj na ingisi iyong ngakiro alo Isirael, kotere nguna, itoani iyong, nyijoker.’ ” Totoan Aasia loger lo alimunio Ekapolon Akuj ani a Elija. Amam Aasia talokookeng ayakasi. Abu lokaatokeng Yoram kilunyokin nados keng toliwor ekapolon ekaru loa ngiarei araakar Yeoram lokookeng a Yeochapat ekapolon a Yuda. Ngakiro nache daang na asubi ekapolon Aasia, igiritae nakitab na enyaritae Ngakiro a Ngikapolok a Isirael. Abu tanang akolongit na eyaarea Ekapolon Akuj Elija kidiama alokuwam alo edirisit. Tonyout Elija ka Elicha toloto Giligal. Ani eloose alorot, tolimok Elija Elicha tama, “Kidong tokona nege kainyo kadungoki Ekapolon Akuj ayong atamar tolot Besel.” Nakaneni tatachak Elicha ngesi tama, “Ekong jik, kona amunor ayong Ekapolon Akuj na eyari, katomuno iyong dang, nyakaisikini ayong iyong.” Apot kesi toloto Besel. Abu atukuor a ngikadwarak na alomit Besel tolot nia Elicha kingit tama, “Iyeni iyong atamar elemari Ekapolon Akuj ekapolon kon kitotiak ka iyong akolongit naga a?” Tatachak Elicha kesi tama, “Ee, ayeni. Nakaneni nyikiruor ngakiro nguna.” Abu Elija tolimok Elicha tama, “Kidong tokona nege kainyo kadungoki Ekapolon Akuj ayong atamar tolot Yeriko.” Nakaneni tatachak Elicha ngesi tama, “Ekong jik, kona amunor ayong Ekapolon Akuj na eyari, katomuno iyong dang, nyakaisikini ayong iyong.” Apot kesi toloto Yeriko. Abu atukuor a ngikadwarak na alomit Yeriko tolot nia Elicha kingit ngesi tama, “Iyeni iyong atamar elemari Ekapolon Akuj ekapolon kon kitotiak ka iyong akolongit naga a?” Tatachak Elicha kesi tama, “Ee, ayeni. Nakaneni nyikiruor ngakiro nguna.” Sodi Elija tolimok Elicha tama, “Kidong tokona nege kainyo kadungoki Ekapolon Akuj ayong atamar tolot nangolol a Yorudan.” Nakaneni tatachak Elicha ngesi tama, “Ekong jik, kona amunor ayong ekapolon Akuj na eyari, katomuno iyong dang, nyakaisikini ayong iyong.” Apot kesi toloto, sodi kiwapakis kesi ngikadwarak Akuj ngitomwon-kan tananga Yorudan. Towaa Elija ka Elicha alokwaas a angolol, sodi towaa ngikadwarak lutomwon-kan tachadakinos kaneni. Abu Elija talachu eworu keng tobilak, sodi taramea ngakipi a Yorudan. Apot ngakipi tapakas sodi kitoro ngesi ka Elicha nalup nakoonok todokasi ekwakaye. Ani enangi ekwakaye tolimok Elija Elicha tama, “Tolimokinae ayong ibore ni kasubakinea iyong eringa ayong nyelemara katotiak ka iyong.” Tatachak Elicha ngesi tama, “Kimiekinae ayong erum agogongu a etau kon naketiliwori ayong lo elunyokin nados kon.” Tatachak Elija tama, “Etioko ngakiro na isaki iyong nguna. Nakaneni ianyuni iyong erai kianyunga iyong ayong kalemario atotiakas ka iyong. Ani pekianyunga iyong ayong kalemario, nyianyuni.” Torubakis kesi iruorosi eloose. Atipei, abu aurukuk a akim na erito ngangolei tongichakin kiding kech. Apon yaarae Elija nadis eyei tooma lokuwam lo adirisit. Taanyunga Elicha sodi kikaloik Elija tama, “Apakang! Apakang! Ekayuunan a Ngisirael loationon! Ilot cha iyong a?” Nakaneni nyeanyungara ngesi Elija nabo jik. Tochil Elicha eworu keng ialolongi. Ani erumor tolem eworu a Elija losek achakun anakwaan a Elija, sodi tobongo towo alokeli a Yorudan. Taram ngesi ngakipi a eworu a Elija tolim tama, “Nyaali Ekapolon Akuj na erai Akuj a Elija?” Ani erumor taram ngakipi nabo, sodi tapakas ngakipi, torotok ngesi todoka ekwakaye. Abu atukuor a ngikadwarak a lutomwon-kan apote alo Yeriko taanyungasi ngesi sodi tamasi, “Aanyu Elicha agogongu a Elija!” Toloto kesi kisiriamiasi ngesi, kijuuruoto alongaren keng, sodi tamasi, “Kiya sua ngitomwon-kan nege lu kirai daang lua ngikilinga. Kimiekinae sua atoloto atasakasi ekapolon kon. Ejok kori kiwoko ngesi Etau a Akuj sodi kimiek alomoru kori anadipo a adio.” Tatachak Elicha tama, “Emam, nyiilot.” Nakaneni kirichakinos kesi atamar kilosi tanang ngesi echamuni. Toloto lutomwon-kan ngulu akisak Elija wadaang a ngirwa a nguuni, tongopik, nyeanyuna. Ani erumor tobongosi kesi nia Elicha lo edarunit kesi alo Yeriko. Abu ngesi kingit kesi tama, “Aberakin ngoon ayong alimokin esi atamar nyiilot.” Toloto ngitunga ngiche a ere a Yeriko nia Elicha tolimokis tamasi, “Ekapolon, ejok ere logo noi loger lo iteo iyong dang, nakaneni eroko ngakipi a ere kalo isiyesete ngaberu.” Todungok Elicha kesi tama, “Kiwaakisi amakat natubwa nachukul nakitetet yaut nege.” Apot kesi inut ngesi atubwa ngina, sodi tolot ngesi lolelea, towatak amakat nakipi, dio alimun tama, “Ebala Ekapolon Akuj kona, ‘Etaleu ayong ngakipi nugu, nyeringa earete ngitunga kori isiyesete ngaberu.’ ” Aliworosi ngakipi nguna na italeuno, loger lo alimunio Elicha atamar ikokinete neni. Torotok Elicha alo Yeriko tolot Besel. Ani elosi ngesi alorot, potu ngide lusapa alore a eche tokianatar ngesi echalasi ebalasi, “Torotok kane iyong lopalor logo!” Torei ngesi tokienyik kesi sodi kilam kesi elimit ekiro a Ekapolon Akuj. Apot ngibuin ngiarei luberu topudut anamoni taara ngide lusapa ngulu ngitomwon-omwon ka ngiarei. Abu Elicha tolot moru lobe Karimel, ani ekisidi tolot Samaria. Ekaru lo a ngitomon ka ngikan-kauni lo araakar Yeochapat ekapolon a Yuda, abu Yoram lo arai lokookeng a Aab toliwor ekapolon a Isirael alo Samaria a ngikaru a ngitomon ka ngiarei. Tosech ngesi ani a Ekapolon Akuj, nakaneni pearono akisech keng noi loger ana ka apakeng kori ana itiokeng ana anyaritae Yesebel, kainyo aukori ngesi ekisikwaane losek asubakini apakeng kilipere Baal. Tani ikoni neni, abu ngesi kitosech Ngisirael loger a Yeroboam lokookeng a Nebat, lo awouni apalikin akisech. Ameat Mecha lo arai ekapolon a akwap a Moab ngamesekin. Ekaru daang, abukonokini ngesi ekapolon a Isirael echur a ngimesekin aluuchik alukiliok 100,000, nabo ainanakini ngajul a ngamesekin ana araakasi 100,000. Ani etoani Aab lo arai ekapolon a Isirael, tonger ekapolon a Moab ngakiro a ekapolon a Isirael. Tonyou ekapolon Yoram atipei alo Samaria tochunak ngasigerea keng daang. Tomea ngesi itwaan nia ekapolon Yeochapat alo arai ekapolon a Yuda ebala, “Anger ekapolon a Moab ngakiro kang. Isaki iyong erukosi ka ayong etijwoto ngesi a?” Tatachak ekapolon Yeochapat ngesi tama, “Asaki ayong erukosi ka iyong. Kirai ngoni ngipei. Ikote ngitunga kang lukon, ikote ngangolei kang nakon. Erot ali kitori ngoni kilosi ejie?” Tatachak Yoram ngesi tama, “Kiwapi ngoni erot lokooyen, lo itori nariet a Edom.” Abu ekapolon Yoram torotokis ka ngikapolok a Yuda ka Edom. Ani akolongit na ngakan-kaarei eloose kesi, tadaunos ngakipi kech, tongopa ngakipi emaase ngasigerea ka ngibaren lu ewapito kesi. Tachalu ekapolon Yoram tama, “Oitiakoi kare! Kipoto Ekapolon Akuj ngoni luuni kijalak ekapolon a Moab!” Kingis ekapolon Yeochapat tama, “Eyei ekwadwaran nege lo epedori akisuruor Ekapolon Akuj a?” Tatachu epei a ngasigerea a Yoram tama, “Eyei Elicha lokookeng a Chapat nege. Arai kolong ngesi ekasuban etich a Elija.” Tolim Yeochapat tama, “Erai ngesi emuron a Akuj loa iteni dir.” Apot ngikapolok luuni ngulu toloto nia Elicha. Kingit Elicha ekapolon a Isirael tama, “Nyo isakea iyong kengarak ayong iyong? Kape nia ngikadwark alu kolong aanyununete apakon ka itiokon.” Tatachak Yoram tama, “Mam, Ekapolon Akuj kipoto sua luuni kijalak ekapolon a Moab.” Tatachak Elicha tama, “Ekong jik tani Akuj Namerikanyer na eyari, na erai ngesi asubi ayong etich keng. Arai nyaarima ayong ekapolon Yeochapat lo ipupokina ka iyong, pekamisik ayong ngakiro kon. Tanyarakinae ayong ekaeon tokona.” Ani erami ekaeon agita keng, min agogongu a Ekapolon Akuj nia Elicha, sodi tolim tama, “Ebala Ekapolon Akuj kona, ‘Tobokakisi ngichileta wadaang a etau a angolol kana. Tani pekingolikis esi ekuwam kori akiru imarukuunit, ilelebunosi ngakipi lotau a angolol kana, tamata esi ka ngibaren kus, ta ngibaren lua eegos.’ ” Torubak Elicha iruoro ebala, “Ebeben ani a Ekapolon Akuj asubakin ngakiro nugu. Idwangete esi tani Ngimoab kotere ngesi. Ilemarete esi ngirerea kech luajokak lu edukitoe ngawasea. Itubete esi ngikito kech daang lua ageor, tonuka ngileleae daang, ka akinyasun ngamanat daang toburuchiasi a ngamoru.” Ani ataparach nache esaa lopalem ipeyoore akipeyos, toleleut ngakipi alowae a Edom, toburuchiasi ngalup. Ani iirarete Ngimoab atamar eponito ngikapolok luuni akirem kesi, apon tanyaraunae ngitunga daang lu epedorete akiting ngiboro lua ejie, napei aluuchik tanang luapolok, sodi kiriwokinae kesi lokukuoru. Ani ekienyunete Ngimoab ataparach nache, kingolikis ngakipi imakinit akolong itusubunit erengak ngaakot. Tachalut kesi tamasi, “Erai ngaakot! Kejwoto ngikapolok luuni ngulu make taaras! Potu apana inaa atangatasi ngiboro!” Ani enangete kesi inaa, apot Ngisirael kitijikis kesi kiritasi. Torubakis Ngisirael irisito Ngimoab taara ka akinyasun ngirerea kech. Ani esaa lo itorioto kesi mana naajokon, alemuununi itwaan daang amoru tachakak mana tanang eburuchiarete ngamanat naajokak daang. Apot kesi tani tonuka ngileleae daang ka akitub ngikito a ageor. Ani esal, arai ere a Kir Eres bon abu kidong nyeukoro ngamoru keng. Nakaneni apot ngitunga lu agumanarete ngamoru a ngapirae kiriama ere ngolo toremo. Ani eyeni ekapolon a Ngimoab atamar kedwang ngesi alojie, toriko ngikiliok ngamiae ngakan-kaarei lukajwok a ngilengea, tasak akimingaar toped ngajorei tosii tolot nia ekapolon a Siria. Abu ngesi tokuruwo akikokin neni. Abu ngesi torwakin lokookeng loapolon lo adikino ilunyokin nados keng toliwor ekapolon, sodi kipeye ngesi anawas a ere, ipeyokinit akuj a Ngimoab. Tobul Ngisirael sodi torotokis alore, tobongo nakwap kech. Tolot apuserut na arai aka atukuor a ache a ngikadwarak nia Elicha tolimok tama, “Ekapolon, atoana lokile kang! Iyeni iyong atamar elipit kolong ngesi Ekapolon Akuj ngirwa daang, nakaneni abu tokona itwaan nikolong aarit ngesi amicha keng arikor talokookang luarei toliworos ngikedalak keng, tatachakin namicha nakolong aari lokile kang.” Kingit Elicha aberu ngina tama, “Nyo isaki iyong katosubakinea? Nyooni eyei nawi kon?” Tatachak aberu ngina tama, “Emam ibore eyei mati ebur lodiochichi a akimiet.” Tolimok Elicha ngesi tama, “Kape nia ngikidunyet kon kidiau ngiburin lu emam ibore eyei lukaalak lucha ianyuni iyong. Ani erumor tolomasi iyong ka talokookon kai togolo ekidor, sodi tobukonokis akimiet loburin. Nacha ilelebunor ebur locha ilelebun, kingadaasi.” Abu aberu ngina tolomasi ka talokookeng tooma kai, togolokis ekidor, sodi tolemut ebur loochi a akimiet, tobukonok loburin lu ainunete ngesi talokookeng. Ani ilelebete kesi ngiburin daang torumor, tolimok ngesi ngide tama, “Yautu ebur eche.” Tatachak lokookeng epei ngesi tama, “Lota arai lo esal ngolo.” Abu akimiet tojongo akidokuunun. Tobongo ngesi nia Elicha sodi tolimok Elicha ngesi tama, “Togiela akimiet ngina daang sodi tatachea ngamichae kon daang. Nakaneni idongete ngaropiyae ngache na kitemokinosi iyong ka talokookon iyareta.” Akolongit apei, tolot Elicha Chunem ni alomit aberu natikabaran. Tanyaraia aberu ngina Elicha nawi keng sodi kisumuj. Napei ngina jik, toliwor na elosio Elicha Chunem, kimujeene anawi a aberu kangina. Tolimok aberu ngina lokile keng tama, “Iteni dir, itwaan nia Akuj ni ebuneene nege jiik erai ni italeuno. Atodukokisi ikai nidiochichi lowae lo alokidiama akai yok ewaakisi ekitanda, ka emeesa, ka ekicholong ta ataa, sodi toliwor iboyeene ngesi kaneni esaa daang lo ebunio aanyun ngoni.” Akolongit apei, tobongo Elicha Chunem sodi todoka kai, dio alomar kai nikeng esaki akiangar. Tolimok ngesi ekasuban etich keng Geasi tama, “Kape tanyarau aberu ngin.” Ani ebuni aberu, tolimok Elicha Geasi tama, “Kingit ngesi ibore ni esaki atosubakinea ayong ngesi tatachakin lochan daang lu aanyu ngesi ani kingarakinea ngoni. Kori robo esaki ngesi ayong atolot nia ekapolon kori ekarikon a ngasigerea atolimok kesi tosubakineta ngesi ibore idio niajokon.” Tatachak aberu ngina ngesi tama, “Eyei ayong ibore daang ni asaki ani kirukitor ka ngitunga kang kane.” Kingit Elicha Geasi tama, “Ani nyo tokona asubakinea ayong ngesi?” Tatachak Geasi ngesi tama, “Emam cha ngesi ikoku nisapat dir, tarai emojongit lokile keng.” Todungok Elicha ngesi tama, “Tanyarau bu nege.” Bu aberu ngina towo anakituk a ikai a Elicha, sodi tolimok Elicha ngesi tama, “Ngirwa lu ikote lu tokona lugu ekaru lo moi, idaki iyong ikoku nisapat a ngakan kon a ilope.” Tachalu aberu ngina tama, “Ayoro ekaapaan lo, nyikingal ayong. Irai iyong itwaan a Akuj!” Nakaneni abu aberu ngina kidou ikoku nisapat ngirwa lu ekote ngulu ekaru lo atupit ngolo, loger lo alimunitor Elicha. Ani kepolou idia, tolot achekolongit nia ayei apakeng. Arukito apakeng ka ngikalemak ngamanat. Kikalou idia atipei tanyara apakeng ebala, “Epipil akou! Epipil akou!” Tolimok apakeng ekasuban etich keng tama, “Tadaka idia nia itiokeng.” Tadaka ekasuban etich idia nia itiokeng. Tadak itiokeng ngesi anakejen tanang naparan lotingilan, esaa lo atoanea. Tadaka ngesi idia nikai a Elicha, kiteperik lokitanda sodi torotok togolok ekidor. Ani erumor tanyarau lokile keng tolimok tama, “Tolimok ekasuban etich atamar toriku esikiria nege. Asaki ayong alosit nia Elicha alo erai emuron a Akuj. Abonguni ayong atipei.” Kingit lokile keng ngesi tama, “Nyo isakea iyong alosit akwaar naga? Nyerai akwaar naga Sabato kori na esukukuu alo eanyungarere elap.” Tatachak aberu ngesi tama, “Emam ngakiro.” Abu ngesi tolim atamar taramae esikiria, sodi todungok ekasuban etich keng tama, “Toruja esikiria kikomak lokojokon. Wara nyiiapak elote mati kalimok ayong iyong atamar kiapak.” Abu ngesi tonyou tolot moru a Karimel, ni alomit Elicha. Kingolik Elicha ngesi ebunit. Ani eringa ebunit anikalonan, tolimok Elicha Geasi tama, “Kingolik a, aberu na akwap a Chunem yaa ebunit! Kikomak kingit ngesi ngakiro a eboyor keng, ka lokile keng ta lokookeng.” Tolimok aberu ngina Geasi atamar ejokak ngakiro daang, nakaneni tolot ngesi ni ayei Elicha toriedik kijuuru alongaren keng, sodi toting ngakejen a Elicha. Tasak Geasi akijukar ngesi, nakaneni tolimok Elicha tama, “Kimiek. Nyitee iyong atamar eya ngakiro eriebete ngesi noi a? Tarai emam ngakiro keng nakalimoki ayong Ekapolon Akuj.” Tolimok aberu ngina Elicha tama, “Ekaapaan, abala kolong ayong iyong nakinae ikoku a? Ikwa kolong peabala ayong iyong nyikisigienok ayong ngakiro na eraakasi alioko a?” Torei Elicha tolimok Geasi tama, “Tonyou atipei! Tolema aburo kang tolot. Wara nyiiwo kimala itwaan ni iriameta. Ani kimalae itwaan, wara nyiisak abuakin ngesi emalas. Kape jik tanang kai, sodi toting aburo kang alokidiama idia.” Tolimok aberu ngina Elicha tama, “Ekong jik tani iyong, ka Ekapolon Akuj na eyari. Nyakaisikini ayong iyong jik!” Apot kesi luarei tonyout kirukosi. Kingarenik Geasi tolot toting aburo a Elicha alokidiama idia. Nakaneni peeanga idia, nabo amam ibore idodiunit atamar eyari idia. Sodi tobongo Geasi akisiriamiar Elicha, tolimok tama, “Awou idia akienyun.” Ani edoluni Elicha, toloma alopei nikai nikeng, kingolik idia eperi alokitanda etoanit. Togol ngesi ekidor kilip Ekapolon Akuj. Ani erumor kinapakin kidiama idia, kiwaak akituk keng, ka ngakonyen ta ngakan ni ayei akituk, ka ngakonyen ta ngakan a idia. Ani na aperio ngesi alokidiama idia, abu akwaan a idia tomoner. Tonyou Elicha torotonok alotooma ikai, ani erumor tobongo kinapakin kidiama idia nabo. Kikarisia idia ngakikarisiaret ngakan-kaarei, sodi tokienyu. Tanyara Elicha Geasi tolimok tama, “Tanyarau itiokeng a idia.” Ani elomuni itiokeng a idia, tolimok Elicha ngesi tama, “Lokookon lo.” Tadakakin aberu ngina nakejen a Elicha, tatap ereet keng ngalup. Ani erumor toriko ngesi lokookeng topudo. Kolong ngirwa lu ayakar eron a akoro nakwap, tonyou Elicha tobongo Giligal. Esaa lo etatamea ngesi atukuor a ngikadwarak, tolimok ngesi ekasuban etich keng atamar tosipok amot natiapolon lokeno, sodi kikulak akimuj adio. Tolot epei kech naroatin agerun ageor. Taanyu ngesi emusabib lo alomoding, sodi tolem ngituol cha daang lu apedori ngesi akiting. Abu ngesi yau ngituol ngulu kipach sodi kitukula erai peeyeni atamar eraakasi nyo. Kikaatounoe ngituol ngulu tokorakinae ngikadwarak. Ani napei eireta kesi, tachalakis tolimokis Elicha tamasi, “Eyei ekitoe lokaaran!” Apot nyeenyam. Tolim Elicha tama, “Nakinae chene ngakiria ngadi.” Abu kipurupurak namot tolim tama, “Toodokisi kesi nabo akimuj ache.” Nakaneni amam ibore aronon ayei nakimuj ngina. Akolongit ache, bu itwaan alo Baal Chalicha. Ainunit ngesi Elicha ngamugati ngatomwon-arei na epounio alorau alo ekingaren elemio ekaru ngolo. Ainunit tani ngakies a ngimomwa alukaapalak. Tolimok Elicha ekasuban etich keng tama, “Tokorak ngikadwarak akimuj naga tanyama.” Nakaneni kingit ekasuban etich keng ngesi tama, “Esibit iyong itemokin akimuj naga ngitunga amiat apei a?” Tatachak Elicha ngesi tama, “Nak tanyama kainyo ebala Ekapolon Akuj enyamete kesi kidong tani ache.” Sodi tokorak ekasuban etich keng kesi akimuj, tanyama kesi kidong ache loger lo alimunitor Ekapolon Akuj. Ekarikon a ngasigerea a Siria lo anyaritae Naaman, arai itwaan ni ayenikinit ekapolon a akwap keng, kidodikinite arimatoi. Ekoni ngesi neni kainyo abu Ekapolon Akuj kisidwang ngasigerea a Siria ngimoe kech kotere Naaman. Arai ngesi asiger nakajwon noi, nakaneni adeaka enomokere. Aremiet apei na aremioto Ngisiria Ngisirael, apot Ngisiria torikosi apese naachi na arai Asiraelit, toliwor akasuban etich a aberu a Naaman. Akolongit apei, tolimok apese ngina aberu a Naaman tama, “Arai tachamuni ekapolon kang alosit aanyun ekadwaran a Akuj lo eyei Samaria, kitangalek edeke keng.” Ani iirari Naaman ngakiro nguna, tolot lokapolon a akwap a Siria tolimok ngakiro na eruoro apese. Tolim ekapolon tama, “Kape lokapolon a Isirael sodi nak abarua naga.” Sodi tonyou Naaman etingit ngatiaket 30,000 a ngaropiyae, ka ngatiaket 6,000 a egolit, ta ngatiaket ngatomon a ngiworui alukaanikak ajokak. Egiritae abarua na atingit ngesi kona, “Kedodikinit ayong iyong anabarua kana ekasuban etich kang lo enyaritae Naaman. Asaki ayong iyong kitangalek enomokere keng.” Ani isomae ekapolon a Isirael abarua ngina, tochilichilia ngiworui keng ialolongi tama, “Ebala ekapolon a Siria etangalekini ayong itwaan en kwaani? Itamit ngesi atamar arai ayong Akuj na eyei agogongu a akiyar ka akitu a? Ileere dir atamar esaki ngesi abenyun ayong!” Ani iirari ekadwaran Elicha ngakiro na asubakinosi, tomea itwaan nia ekapolon ebala, “Nyo ichilichilaarea iyong ngiworui kon ialolongi? Kimiek itwaan ngini bu nikang tokona, toyenea atamar eyei ekadwaran nakwap a Isirael!” Pot Naaman ka ngaurukukui keng na irito ngangolei, sodi towaa alokidor a awi a Elicha. Tomea Elicha ekasuban etich keng nia Naaman alimokin ngesi kona, “Tolot kilotar anangolol a Yorudan ngakilotaret ngakan-kaarei, sodi topwatun akiring a akwaan kon, tojoker.” Nakaneni tongo Naaman torotok ebala, “Etamit tete ayong atamar kori ebuni ngesi ni ayei ayong, kilip Ekapolon Akuj na erai Akuj keng, ka akiwakawak akan alokidiama ni edeak, sodi kitangalek enomokere kang! Ikwa nyejokak ngangololin a Abana ka Parpar na eyakasi Damasko akidwang ngangololin daang na eyakasi Isirael a? Ikwa pekelotara ayong anangololin kanguna tangalek edeke kang a?” Tolungakin ngesi torotok enyunyura. Toloto ngikasubak etich a Naaman tolimokis ngesi tamasi, “Ekapolon, arai kitolimok iyong ekadwaran atamar tosubak ibore niationon, pekisubakinit iyong a? Nyo tokona peilotaror iyong loger lo ebala ngesi, tangalekinio edeke kon?” Abu Naaman tolot Yorudan tolumo anakipi ngalumoret ngakan-kaarei loger lo alimokinitor Elicha, sodi topwatun akiring a akwaan keng tosulutut loger a ikoku. Tobongosi ngesi ka ngitunga keng daang alongaren Elicha, tolim Naaman tama, “Ayen tokona ayong atamar emam akuj ache, mati Akuj a Isirael. Tacham kare ekapolon akidiaun ainakinet kang.” Tatachak Elicha ngesi tama, “Ekong jik tani Ekapolon Akuj na eyari, na erai ngesi asubi ayong etich keng, nyediauni ayong ainakinet.” Kimaima Naaman ngesi esaki tacham alemar ainakinet, nakaneni towou ngesi akidiaun. Sodi tolim Naaman tama, “Ani pekidiau iyong ainakinet kang, kimiekinae ewoko ngalup kane a ngisikiria a ngiarei ayaa nawi kang, kainyo napei tokona jik, nyalemuni ayong akipeyos kori nyepeyokini akuj ache mati Ekapolon Akuj. Nakaneni kimiekisi Ekapolon Akuj katorimak ayong nakirukorea ka ekapolon a akwap kang na elosio ngesi kai a akuj a Siria ana enyaritae Rimon, akilip akuj ngina. Kimiekisi Ekapolon Akuj katorimak ayong anakiro kanguna!” Tolimok Elicha ngesi tama, “Kape akaalimon.” Torotok Naaman. Ani eringa Naaman nyeyakara, abu Geasi lo arai ekasuban etich a Elicha kitama tama, “Emiek ekapolon kang Naaman elosi emam ibore alemu! Ajoikinit ngesi idiauni ngiboro lu alemunit itwaan nia Siria ngini. Ani kona eyarea Ekapolon Akuj dir, amatar ayong ewapak ngesi ediau ibore idio.” Abu ngesi kiwapak Naaman. Ani eanyungari Naaman itwaan ekeri iwapit ngesi, totiyaun anaurukuk keng ana erito ngangolei, kisiriamia itwaan ngini kingit tama, “Eyei ibore esechech a?” Tatachak Geasi tama, “Emam. Ekapolon kang ngesi kameuni ayong ebala, ‘Adolunete tokona ngitunga ngiarei a atukuor a ngikadwarak alu elomito nakwap na ngimukur a Epiraim. Asaki ayong iyong tolemik kesi ngaropiyae ngabunge ngauni ta ngatiaket ngaarei a ngiworui.’ ” Tatachak Naaman tama, “Tolema kare ngaropiyae ngabunge ngakan-kapei.” Kimaima Naaman ngesi toinik ngaropiyae lochuei ngiarei. Tolem nabo ngalooso ngaarei a ngiworui alukaanikak ajokak, nak daang kwasiarei ngikasubak etich keng ngiarei, tolimok atamar kingarenikis Geasi. Ani enangete kesi moru lo alomit Elicha, tolema Geasi ngichuei luarei ngulu yaa tooma akai. Ani erumor tolimok ngikasubak etich a Naaman atamar tobongosi. Tobongo ngesi kai, kingit Elicha ngesi tama, “Aliwae ilosit iyong?” Tatachak Geasi tama, “Emam ni alosit ayong, ekapolon.” Nakaneni tolimok Elicha ngesi tama, “Ikwa pekirukit ayong ka iyong alotau na atiyaunor itwaan ngini anaurukuk keng ana irito ngangolei kisiriam iyong a? Meere tokona akwaar naga nakidiaunet ngaropiyae ka ngiworui, kori ngamanat a ngikito a akimiet ka ngimusabib, kori ngamesekin ka ngaatuk, kori ngikasubak etich! Kitingi tokona iyong enomokere a Naaman toliwor ekon ka ngalesea kon jik!” Ani erotokini Geasi kaneni, todeakakin enomokere ngolo, tokwanger akwaan keng kea. Akolongit apei, abu atukuor a ngikadwarak alu aweikinit Elicha tolimokis ngesi tamasi, “Ediding noi ni kibooyo ngoni! Kimiek atoloto Yorudan akitub ngakito, atodukioto ni kibooyo.” Tatachak Elicha kesi tama, “Kapesi.” Kimaima epei kech Elicha esaki kirukosi ka kesi, tacham ngesi alosit. Apot kesi kirukosi aapei. Ani enangete nangolol a Yorudan, kisiakis akitub ngakito. Ani na etelitor epei kech akitoe, tachakakin akou a aep nakipi atipei. Tachalu ngesi kingit Elicha tama, “Ekokini ayong ai, ekapolon? Erai aep aka itwaan!” Kingit Elicha ngesi tama, “Aliwae achakakin?” Kidodik itwaan ngini ngesi ni achakakin, sodi totub Elicha akitoe tachakak nakipi, kisilebulebu akitoe akou a aep. Todung Elicha tama, “Tolem.” Abu itwaan ngini tokudokin tolem akou a aep. Kolong na ajioto ekapolon a Siria ka Ngisirael, abu ngesi totuko ka ngikarikok a ngasigerea tama, “Asaki ayong adakar kang tolom nibe ati.” Nakaneni tomea Elicha itwaan nia ekapolon a Isirael tolimok tama, “Wara nyiitor nibe ati, kainyo edukito Ngisiria kaina.” Abu ekapolon a Ngisirael kichikichik ngitunga lu alomito neni, toliworos erebete kesi ngimoe. Tosubakinos ngakiro nguna ngasubakinet nakaalak. Tongo ekapolon a Siria kotere ngakiro nguna. Tanyarau ngesi ngikarikok a ngasigerea kingit tama, “Ngae anikus ibakit alowae a ekapolon a Isirael?” Tatachak epei kech ngesi tama, “Ekapolon, emam itwaan ibakit alowae keng. Elicha lo erai ekadwaran lo eyei Isirael ngesi elimonokini ekapolon a Isirael ngakiro tani namunonoe na iruoro iyong iyei namaniyat kon na alotooma.” Todung ekapolon tama, “Tasakutu ani eyei atolot erum.” Ani elimokinio ngesi atamar eyei Elicha Dosan, tomea ngesi ngasigerea nakaalak inaa na adokito ngaurukukui na irito ngangolei. Apot kesi tananga lore ngolo nakwaare sodi kiriama. Ani nataparach nache elilim, tonyou ekasuban etich a Elicha topudo alokai. Taanyunga ngesi ngasigerea a akwap a Siria ka ngangolei kech ta ngaurukukui na irito ngangolei iriemito ere. Tolot ngesi nia Elicha tachalu tama, “Ekapolon, kimunyar ngoni. Kikokini tokona ngoni ai?” Tatachak Elicha ngesi tama, “Elalak lu ibakito alowae yok idwangito lu ibakito alowae kech.” Sodi kilip Elicha tama, “Ee Ekapolon Akuj, tangaa ngakonyen keng sodi kingolik ngesi!” Abu Ekapolon Akuj tangaa ngakonyen a ekasuban etich a Elicha, taanyunga ngangolei ka ngaurukukui a akim irito ngangolei eburuchiarito akook a emukura. Ngangolei nguna ka ngaurukukui kech, eriamito Elicha. Ani isiakinete Ngisiria ejie, kilip Elicha tama, “Ee Ekapolon Akuj, kitumudukan ngitunga lugu!” Kitumudukan Ekapolon Akuj kesi loger lo elipitor Elicha. Sodi tolot Elicha ni ayakasi kesi tama, “Ioliyorito esi. Meere ere lo isakete esi logo. Kiwapakinae ayong katoriko nitwaan ni isakete esi.” Abu ngesi toriko kesi Samaria. Ani napei alomareta kesi lore, kilip Elicha tama, “Ekapolon Akuj, tangaa ngakonyen kech kingolikis akwap.” Abu Ekapolon Akuj tangaa ngakonyen kech, kingolikis akwap. Apot kesi toyena atamar kiya Samaria. Ani eanyungari ekapolon a Isirael kesi, kingit Elicha tama, “Ekapolon, aari a? Aari a?” Tatachak Elicha tama, “Nyiiar. Ikwa iareene iyong tani ngirikon kon lu irumuni iyong alojie a? Nak kesi akimuj na enyamete ka ibore ni emaase, sodi kimiek tobongo lokapolon kech.” Abu ekapolon a Isirael kidorok kesi akimuj natikaalan. Ani imujete kesi erumor nabo tamata, tolimok ngesi kesi atamar tobongosi nia ekapolon a Siria. Napei ngina jik tapalikis Ngisiria aremeenen Ngisirael. Ani ekisidi, tangaa ekapolon a Siria lo enyaritae Benadad ngasigerea keng daang kirikaut ere a Samaria kiriama. Ani kona eriamere ere, tadaun akimuj alore toliwor egielanario akou a esikiria a ngaropiyae a ngatomwon-kauni. Ani ngachin a ngakurio na arai apotis kech ngagiramea ngamiae ngaarei, agielanario a ngaropiyae a ngakan. Alosi ekapolon a Isirael anawas a ere. Esaa ngolo, kikalou aberu ache tama, “Ekapolon yaa, kingarakinae ayong!” Tatachak ekapolon aberu ngina tama, “Ani pekingarak iyong Ekapolon Akuj, ekokini ayong kengarakini ai? Eyakasi ngakanoi kori emuna lo epuritoe atingit ayong a? Nyo ngichan kon?” Tatachak aberu ngina ngesi tama, “Ngoon akolongit ache, kalimokini aberu naga ayong tama, ‘Yau lokookon atanyama akolongit naga, sodi atanyama lokookang moi.’ Kipotu sua edorokisi lokookang atanyama. Ani akolongit nache, atolimok ayong ngesi atama, ‘Yau lokookon atanyama,’ nakaneni kebu ngesi kidaa lokookeng.” Ani iirari ekapolon ngakiro nguna, abu tochilichilia ngiworui keng ialolongi. Taanyungasi ngitunga lu ayakasi diyete awas a ere atamar anapit ngesi ngiguniae alotooma ngiworui keng. Tachalu ngesi tama, “Kimiekisi Akuj kataar ayong erai peketubor akou a Elicha eringa akolong nyedooyoro!” Sodi tomea ngesi itwaan arikun Elicha. Nipei bore ngini, ayei Elicha nawi keng arukito ka ngikasukou ngiche lu aponito aanyun ngesi. Ani eringa itwaan ni ameuni ekapolon nyedoluno, tolimok Elicha ngikasukou tama, “Emeunit ekaaran ngolo itwaan akiar ayong! Tokona, ani enanguni ngesi nege, togolo ekidor nyiimiekis ngesi elomuni. Etupit ekapolon elope ngesi alo diyete.” Ani eringa ngesi nyerumoro alimun ngakiro nguna, todolu ekapolon tolim tama, “Ekapolon Akuj ngesi kiinu ngoni ngichan lugu! Nyo tokona eringa ayong edaritor ngesi esubakini ibore iche?” Tatachak Elicha tama, “Kiira ngakiro na elimunit Ekapolon Akuj! Esaa lo ikoni lo tokona logo moi, ipedorete esi akigiel alo Samaria ngakiloi ngauni a ngakanoi anaajokak, ka ngakiloi ngakan-kapei a erau a aropiyat a apei.” Abu emeanara a ekapolon tolimok Elicha tama, “Nyesubakinosi ngakiro nguna tani keyau Ekapolon Akuj akiru atipei!” Tatachak Elicha tama, “Ingolikini iyong esubakin, nakaneni emam akimuj ngina na inyami iyong.” Ayakasi ngitunga nguomwon lu adeakasi enomokere nikalapatan a ere a Samaria. Apot kesi tolimonokinos tamasi, “Nyo mono kibooyo ngoni kane tanang kitoaki? Tani tokona kitama ngoni, ‘Potu atolomasi lore,’ eyei eron a akoro lore, nakaneni kitoaki ngoni kaneni. Kitoaki ngoni erai tani kiboi kane. Potu tokona apana nadakar a Ngisiria. Ibore niaronon epedorete kesi asubakinea ngoni ngesi akiar, nakaneni epedorete karika cha kesi tani akimiekin ngoni kiyari.” Apot kesi tonyout esaa lo ikaikaakinea toloto nadakar a Ngisiria. Ani enangete kesi lokukuoru a adakar, torukaut emam itwaan eyei. Esiirarit sek Ekapolon Ngisiria echale lo esibit eka ngasigerea anakaalak aponito a ngangolei ka ngaurukukui na irito ngangolei. Apot Ngisiria tamasi, “Keriku ekapolon a Isirael ngasigerea a Ngiiti, ka Ngimisiri, ta ngikapolok kech, akitijwore ngoni.” Kotere ngakiro nguna, apot Ngisiria kipungaros atabong ngina kimiekis ngieman kech, ka ngangolei, ka ngisikiria sodi kimiekis adakar loger losek ekoni. Ani enangete ngitunga luomwon ngulu lokukuoru a adakar, tolomasi loeam kimuja nabo tamata ibore ni ayei neni. Tolemasi ngakwangae, ka egolit, ta ngiworui lu aanyunete, toloto kidaa. Ani erumor tobongut tolomasi loeam eche, tosuba ngakiro napei nguna. Nakaneni apot kesi tolimokinos make tamasi, “Nyejoikinit ngoni kisubi ngakiro na ikote nugu! Kianyu ngoni ngakiro naajokak, nakaneni nyejoikinit kimunoni. Ani kiwou ngoni alimor tanang nataparach, kirirao ngoni. Tonyoutu atipei atoloto alimokin ngikasubak etich a ekapolon!” Apot kesi torotokis anadakar a Ngisiria tobongosi Samaria, tanyarata ngasigerea na eteete ngidorin tolimokis tamasi, “Kilosit sua nadakar a Ngisiria, nakaneni nyeanyungara itwaan kori nyiirara etoil a itwaan. Eenitae ngangolei ka ngisikiria, nabo idongito ngieman ikote eger lo aisikineta Ngisiria.” Tolimosi ngasigerea naketeok ngakiro nguna, sodi tolimokinae ngikasubak etich a ekapolon a Isirael. Aringa akwap erai akwaar, nakaneni tonyou ekapolon alokitanda keng tolimok ngikasubak etich keng tama, “Kalimokini ayong esi ngakiro na etukito Ngisiria! Eyenete kesi atamar kinyamit ngoni akoro, nakaneni alot kesi akiduk alomoding. Itamito kesi atamar kirotokini ngoni alore atasakasi akimuj, sodi kirumut kesi ngoni kiyari tolemasi ere.” Tolim epei a ngikasubak etich keng tama, “Ekot ngitunga a ere kalo amunyar. Ikote kesi ngitunga lu atoaka. Kimiekisi atomeasi ngitunga ka ngangolei ngakan na idongito, sodi ataanyutu atamar anukiro kesubakinosi.” Toseut kesi ngitunga ngiche sodi tomea ekapolon kesi todoka ngaurukukui na irito ngangolei, tolimok tama, “Toloto taanyutu ngakiro na asubakinosi ani eyakasi ngasigerea a Siria.” Toloto ngitunga ngulu tananga Yorudan. Wadaang a erot alo ewapito kesi, eteete kesi ngiworui ka ngiboro lu aisikinete Ngisiria na amatarotor. Apot kesi tobongosi kisisakis ekapolon. Tamataros ngitunga a Samaria sodi tomoriakinos ngiboro anadakar a Ngisiria. Apon togielanarae ngakiloi ngauni a ngakanoi anaajokak ka ngakiloi ngakan-kapei a erau, a aropiyat a apei. Aseunit ekapolon a Isirael ekarikon a ngasigerea lo ameanari ngesi toliwor ngesi eweikinit ekidor a ere. Apot ngitunga kipudaasi ekarikon ngolo totoan loger lo adwarea Elicha nasek alositor ekapolon aanyun ngesi. Alimokinit sek Elicha ekapolon atamar esaa lo ikoni ngolo akolongit na atupit ngina, ngakiloi ngauni a ngakanoi anaajokak ka ngakiloi ngakan-kapei a erau, egielanario alo Samaria a aropiyat a apei, loger lo alimunitor Ekapolon Akuj. Nakaneni abu ekarikon a ngasigerea ngolo tatachu tama, “Nyesubakinosi ngakiro nguna tani keyau Akuj akiru atipei!” Abu Elicha tatachu tama, “Ingolikini iyong esubakin, nakaneni emam akimuj ngina na inyami iyong.” Ngakiro nguna apot tosubakin anikeng. Totoan ngesi na epudaareta ngitunga alokidor a ere. Alimokini sek Elicha aberu nakolong eteyaruni ngesi lokookeng tama, “Tonyou taramakisi ka ngitunga a awi kon toloto toloma wache, kainyo eyauni Ekapolon Akuj eron a akoro min nakwap naga a ngikaru a ngikan-kaarei.” Abu aberu ngina kiira ngakiro na alimokini Elicha, towoto ka ngitunga a awi keng toloma nakwap a Ngipilisti a ngikaru a ngikan-kaarei. Ani adaunet a ngikaru a ngikan-kaarei, tobongo ngesi nakwap a Isirael tolot alimokin ekapolon atamar katobuakin ngesi akai ka amana keng. Torukau ngesi ekapolon iruorosi ka Geasi lo arai ekasuban etich a Elicha, ingisit ebala, “Kisisakinae ayong ngakitoodikinet nakailiilok daang na asubaki Elicha.” Ani eringa Geasi elimonokini ekapolon eger lo eteyarunea Elicha itwaan nikatoan, abu aberu nasek eteyarunio lokookeng tolimok ekapolon atamar asaki katobuakin akai keng ka amana. Tolimok Geasi ekapolon tama, “Ekapolon, aberu ngina ngesi naga, ka lokookeng lo eteyaruni Elicha!” Ani ingisi ekapolon aberu ngina ngakiro nguna, abu ngesi tama ikote neni. Abu ekapolon tanyarau ekapolon keng loochi tolimok tama, “Tobuak aberu naga ibore daang ni kolong arai ikeng. Ani erumor kiatak tani ngakiaset a ngalemet kadaang ana akoniunete ngamanat ngikaru lukan-kaarei daang lu awositor aberu naga.” Tolot Elicha lore a Damasko ngirwa lu adeakar Benadad lo arai ekapolon a Siria. Ani elimokinio ekapolon atamar eyei Elicha neni, tolimok ngesi Asael lo arai epei a ngikapolok keng aluuchik tama, “Tolem ainakinet inaa ekadwaran sodi kingit ngesi Ekapolon Akuj tama, ‘Engalekini edeke a Benadad kori emam?’ ” Abu Asael kisiwok ngikaala ngitomwon-omwon ngiboro luajokak daang a Damasko, tolot nia Elicha. Ani enangi ngesi nia Elicha, tolimok tama, “Ekapolon Benadad lo erai ekasuban etich kon, ngesi kameunit ayong akingitun anikon kengalekini edeke keng kori kemam.” Tatachu Elicha tama, “Kape tolimok ngesi atamar engalekini dir edeke keng. Nakaneni kedodik ayong Ekapolon Akuj atamar etoani ngesi.” Sodi tokienyik Elicha ngesi eriangakina tanang ni erumeta Asael ngileech. Abu Elicha kikalou. Kingit Asael tama, “Ekapolon, nyo igoror iyong?” Tatachak Elicha tama, “Egoro ayong kainyo ayeni ngakiro naaronok isubea iyong Ngisirael. Inomi iyong ngawasea a ngirerea kech, ka akiriar ngide kech sodi topuwono ngaberu na epotiyete.” Kingit Asael ngesi tama, “Ekokini ayong ekasuban etich kon lo ekoni iingok asubi ngakiro naationok ikote nguna ai?” Tatachak Elicha ngesi tama, “Kedodik ayong Ekapolon Akuj atamar iliwor iyong ekapolon a Siria.” Tobongo Asael nia Benadad. Kingit Benadad ngesi tama, “Abala Elicha ai?” Tatachak Asael tama, “Abala engalekini edeke kon dir.” Nakaneni ani akolongit nache, tolem Asael eburangkit kirepak nakipi, tobunea ekapolon Benadad, taar. Abu Asael kilunyokin nados a Benadad toliwor ekapolon a Siria. Ekaru lo a ngitomon ka ngikan lo araakar lokookeng a Aab lo anyaritae Yoram ekapolon a Isirael, abu Yeoram lo arai lokookeng a Yeochapat toliwor ekapolon a Yuda, ngirwa lu araakar ngesi ngikaru ngitomwon-uni ka ngiarei. Topolok Yeoram Yerusalem a ngikaru a ngikan-kauni. Arai aberu a Yeoram nakookeng a Aab. Kona araakatar ngitunga a awi a Aab ngipei ka ngesi, abu ngesi kiwap ngakiro naaronok a ngikapolok a Isirael. Tosechak ngesi Ekapolon Akuj, nakaneni peasaki Ekapolon Akuj akinyasun Yuda, kainyo echikakinit sek ekasuban etich keng Daudi atamar erubakinete ngalesea keng eraakasi ngikapolok jik. Ngirwa lu araakar Yeoram ekapolon, tongero ngitunga a akwap a Edom eger lo apolokinitor ekapolon a Yuda kesi. Kipakaros kesi topolokinos make. Sodi tonyout Yeoram ka ngasigerea keng toloto Sair, ni eriameta ngasigerea a Ngiedomae kesi. Ani enangi nakwaare, tonyout ngesi ka ngikarikok lu aweikinito ngaurukukui na irito ngangolei, tosiwa. Apot ngasigerea keng kialaros toloto nawiyei kech. Napei ngina jik, tongero ngitunga a Edom lu Yuda. Ngirwa lupei ngulu, tongero ngitunga a ere a Libina dang eger lo apolokinitor ekapolon a Yuda kesi. Ngakiro nache daang asubi Yeoram, igiritae nakitab na enyaritae Ngakiro a Ngikapolok a Yuda. Totoan Yeoram tonukakinae nalielin a ngikapolok na eyakasi lore a Daudi. Abu Aasia lo arai lokookeng a Yeoram kilunyokin nados keng toliwor ekapolon. Ekaru lo a ngitomon ka ngiarei lo araakar Yoram lokookeng a Aab ekapolon a Isirael, abu Aasia lo arai lokookeng a Yeoram toliwor ekapolon a Yuda. Araakasi ngikaru a Aasia ngitomwon-arei ka ngiarei na aliworor ngesi ekapolon. Topolok ngesi Yerusalem a ekaru a epei. Anyaritae itiokeng Asalia, na arai nakookeng a Aab, tarai atatait a ekapolon a Isirael alo anyaritae Omri. Ani kona araakar Aasia lokamuran a Aab, abu ngesi tosechak Ekapolon Akuj loger lo asechakineta ngitunga a awi a Aab. Abu ekapolon Aasia kimorikin ka ekapolon a Isirael lo anyaritae Yoram, kitijwoto ekapolon a Siria lo anyaritae Asael. Tojikinos ngasigerea anakwap a Gilead, ani enyaritae Ramos. Towana Ngisiria ekapolon Yoram alojie. Tobongo Yoram lore a Yesireel akitedek ngajemei keng. Sodi tolot Aasia aanyun ngesi kaina. Nipei bore ngini, Elicha lo arai ekadwaran, abu tanyarau epei a ngikadwarak tolimok tama, “Tonyou tolot lore a Ramos lo eyei nakwap a Gilead. Toting ebur lo akimiet logo ani inangi inaa, tasaku lokookeng a Yeochapat lo enyaritae Yeu, lo erai etatait a Nimchi. Toriko ngesi namaniyat na alotooma akai alopei, sodi tolem ebur tobukok akimiet nakou keng. Tolimok ngesi kona, ‘Ebala Ekapolon Akuj kona, kaseu ayong iyong toliwor ekapolon a Isirael.’ Ani erumor topudo kipungar kaneni.” Abu ekadwaran losorokit ngolo tolot Ramos. Torukau ngikarikok a ngasigerea iriamiriamito ianete. Tolim tama, “Ekapolon, eyakasi ngakiro asaki ayong akisisakin iyong.” Kingit Yeu ngesi tama, “Ngae mono anikosi isuruori iyong?” Tatachak tama, “Iyong ekapolon, ngesi esuruori ayong.” Apot kesi luarei tolomasi kai, sodi tobukok ekadwaran ngolo akimiet nakou a Yeu, tolimok tama, “Ebala Ekapolon Akuj na erai Akuj a Isirael kona, ‘Kaseu ayong iyong toliwor ekapolon a Ngisirael alu eraakasi ngitunga kang. Iari iyong ekapolon a Isirael lo erai ekapolon kon, lo erai lokookeng a Aab. Ikokini iyong neni eriraa ayong Yesebel ani aarea ngikadwarak ka ngikasubak etich kang luche. Etoakete ngitunga a awi a Aab daang ka ngalesea keng. Amunyari ayong ngikiliok a awi keng daang, lusorok ka lumojong aapei. Asubakinea ayong ngitunga a awi keng ngakiro nakolong asubea ayong ngitunga a ngawiyei a ngikapolok a Isirael alu anyaritae Yeroboam ka Baacha. Nyenukio Yesebel, enyamete ngingokwo akwaan keng alo Yesireel.’ ” Ani kelimu nguna kerumor, topudo ekadwaran losorokit ngolo alokai, kipungar. Tobongo Yeu ni ayakasi ngikarikok a ngasigerea lurukitos keng. Kingita kesi ngesi tamasi, “Ebeyo ai? Nyo abunitor itwaan nia ngikerep ngini nikon?” Tatachak Yeu tama, “Iyenete esi ibore ni asaki ngesi.” Tatachut kesi tamasi, “Mam, nyikiyeni sua! Tolimokinae sua ngakiro na alimuni ngesi!” Tolim Yeu tama, “Kalimokini ngesi ayong atamar ebala Ekapolon Akuj kona, ‘Kaseunit ayong iyong toliwor ekapolon a Isirael.’ ” Atipei, apot ngikarikok a ngasigerea lurukitos a Yeu topetakis ngiworui kech kidiama ngadoket, towaar Yeu. Tokutakis kesi ngaburucho sodi tachalut tamasi, “Yeu erai ekapolon!” Abu Yeu lo arai lokookeng a Yeochapat, tarai etatait a Nimchi, tonyoik ekapolon Yoram. (Yoram ka Ngisirael daang, eyokiyete sek Ramos Gilead ani eyei Asael lo arai ekapolon a Siria. Nakaneni apon tobuarae Yoram Yesireel akitedek ngajemei na awaneta ngesi Ngisiria na etijio Asael lo arai ekapolon a Siria.) Abu Yeu tolimok ngikarikok a ngasigerea lurukitos keng tama, “Ani kibakito esi alowae kang, warasi itwaan tani ipei nyeesii alo Ramos tolot Yesireel alimor ngakiro nugu.” Ani erumor todoka ngesi naurukuk keng na irito ngangolei, tolot Yesireel kainyo aperi Yoram kaina. Aasia lo arai ekapolon a Yuda, abunit neni aanyun Yoram. Itwaan nikereron akwap, awei alopem alo alokidiama eyei Yesireel, irere akwap. Kingolik ngesi Yeu ka ngitunga keng eponito. Kirema ekereron tama, “Etee ayong ngitunga ngiche emeto ngangolei eponito.” Tatachak Yoram tama, “Tomea itwaan ni emeat angole tolot kingis kona, ‘Ibunit iyong a ekisil kori arem?’ ” Taram itwaan ngini angole kisiriamia Yeu tolimok tama, “Ebala ekapolon, ‘Ibunit iyong a ekisil kori arem?’ ” Tatachak Yeu tama, “Nyo tokona kon ngakiro a ekisil? Torei iyong toruju angole kiwapak ayong.” Tolimo ekereron lo ayei lopem lo alokidiama tama, “Eriama itwaan ngini ka ngitunga lu aponito nakaneni awou abongun.” Tomearae itwaan iche, kingit itwaan ngini Yeu tama, “Ebala ekapolon kona, ‘Ibunit iyong a ekisil kori arem?’ ” Tatachak Yeu ngesi tama, “Nyo tokona kon ngakiro a ekisil? Torei iyong toruju angole kiwapak ayong.” Tolimo ekereron nabo tama, “Eriama itwaan ngini ka ngitunga lu aponito nakaneni awou abongun.” Ani erumor kiatak tama, “Emeat ekarikon a ngitunga kangulu aurukuk na irito ngangolei loger a itwaan ani a ngikerep. Emeat loger a Yeu!” Todung ekapolon Yoram tama, “Tosubakisi aurukuk kang na irito ngangolei.” Apon tosubakinae aurukuk ngina, apot ngesi ka ekapolon Aasia todoka ipei kech daang naurukuk keng kisiriamiasi Yeu. Kiriama ka ngesi mana nakolong arai aka Nabos. Kingit Yoram Yeu tama, “Ibunit iyong a ekisil a?” Tatachak Yeu tama, “Ikokini ekisil emini ai, toringa amuronot ka akilipit ngakujo nasubuna nakolong esiakini itiokon Yesebel eyakasi?” Kirema Yoram esaa lo areea aurukuk keng tama, “Aasia, erai ibore erukoonu longeriet ekapolon!” Kirik Yeu akau keng toguma emal lokojokon togum Yoram kaku topele emal alotau. Totoanik Yoram naurukuk keng, tolimok Yeu ekengarakinan keng lo anyaritae Bidkar tama, “Tolema akwaan keng tachakak mana na Nabos ngin. Kitamu atamar nakolong kidokitor ngoni ngaurukukui yok na irito ngangolei kiwapit ekapolon Aab lo arai apakeng a Yoram, abu Ekapolon Akuj kiruor ngakiro nugu itopegea Aab ebala, ‘Engolik been ayong Nabos ka talokookeng eario. Nakaneni kechikakinit ayong iyong atamar kerirae ayong iyong alomana anapei kana.’ ” Todungok Yeu ekengarakinan keng tama, “Tolema tokona akwaan a Yoram tachakak mana nakolong arai aka Nabos sodi kiyookinotor ngakiro nakolong alimuni Ekapolon Akuj.” Taanyunga ekapolon Aasia ngakiro na asubakinosi, sodi tamatar ngesi edokit aurukuk keng toten lore a Bes Agan. Erisit Yeu ngesi. Todungok Yeu ngitunga keng tama, “Taara ngolo dang!” Apot kesi toguma ngesi esaa lo ametor aurukuk alorot alo etenere Gur, alo diyete ere a Ibileam. Nakaneni torubak ngesi elosi ngaren tanang lore a Megido ni atoanikini. Kiwokosi ngikasubak etich keng akwaan keng Yerusalem iwokito a aurukuk ana irito ngangolei, sodi tonukakis ngesi nalielin a ngikapolok na eyakasi lore a Daudi. Arauni sek Aasia ekapolon a Yuda ekaru lo a ngitomon ka epei lo araakar Yoram lokookeng a Aab, ekapolon a Isirael. Tanang Yeu Yesireel. Abu Yesebel nasek eirarit ngakiro nguna asubakinosi, kiwos ngakonyen keng a emunyen ka aoyere ngitim, sodi towo alopuke a akai ana alokidiama a ekapolon, tokienyia lorot. Ani esaa lo etorunio Yeu lorot, kirema Yesebel tama, “Ibunit iyong a ekisil Simri ekaaran a ekapolon kon a?” Kirereo Yeu kidiama kirema tama, “Ngae ibakit alowae kang?” Apot ngikasubak etich a akai a ekapolon lu idongitoe ngiarei kori nguuni tokienyikis ngesi alopuke, sodi tolimok Yeu kesi tama, “Kimasutu ngesi kwap!” Kimasunae Yesebel kwap, sodi kiterakin ngaakot keng nawas a akai ka ngangolei. Taram Yeu aurukuk keng kisitor kidiama akwaan a Yesebel, toloma kai a ekapolon sodi kimuj. Ani kimuj kerumor tolim tama, “Yaasi aberu na ilamitae ngin tonuka, ani eraakar nakookeng a ekapolon.” Nakaneni apot ngitunga lu aloose akinuk ngesi torukaut akulului a akou ta ngakoyo a ngakan ka na ngakejen make. Ani elimokinio Yeu ngakiro nguna, tolim tama, “Ngakiro nguna kesi nakolong alimuni Ekapolon Akuj atamar esubakinosi kisitoru nia ekasuban etich keng Elija lo a ere a Tichibe ebala, ‘Enyamete ngingokwo akwaan a Yesebel alo Yesireel. Epetakin akiring keng neni loger a ngaor, sodi tongopea itwaan eyeni.’ ” Alomito talokookeng a Aab ngitomwon-kaarei lore a Samaria. Kigir Yeu abarua sodi tomea ngitunga yaasi lokapolok a ere, ka ngitunga lu eyenikinitae, ta ngitunga lu etanete talokookeng a Aab. Egiritae abarua kona, “Esi iweikinito talokookeng a ekapolon. Eraakasi ngaurukukui na irito ngangolei ka ngangolei, ka ngiboro lujiet ta ngirerea lu iriamito ngawasea, nakan kus eyakasi. Tokona bocha, napei iriamuneta esi abarua naga, ejoikinit esi iseunete lokookeng a ekapolon lo eyeni etich lokojokon, kitiliwosi ekapolon, sodi tojwoto, toyuut ngesi.” Tobul ngikapolok a Samaria. Tolimut kesi tamasi, “Ngae epedori akitopeg Yeu? Tarai akuruwo tani ngikapolok Yoram ka Aasia.” Abu ekarikon a ngasigerea lo aweikinit akai a ekapolon, ka ekarikon a ngasigerea lo aweikinit ere, ka ngitunga lu eyenikinitae ta ngitunga lu etanete talokookeng a Aab, tomeasi itwaan nia Yeu ebalasi, “Kirai sua ngikasubak etich kon, nabo kipedori akisub ibore daang ni ilimuni iyong. Nakaneni emam itwaan ni kitiliwori sua ekapolon. Tosub iyong ngakiro nakijoikinito iyong.” Kigirak Yeu kesi abarua ache ebala, “Ani kibakito esi alowae kang tasakete akiwap ngakiro na adunguni ayong, yautu ngakies kata lokookeng a ekapolon Aab nikang kanege alo Yesireel, ngisaae lu tokona lugu moi.” Talokookeng a Aab lutomwon-kaarei, arukito ka ngitunga lu ayenikinitae alo Samaria. Ngitunga ngulu etanete kesi. Ani eanyunio abarua a Yeu, taara ngikarikok a Samaria talokookeng a Aab daang lutomwon-kaarei, kiwaakis ngakies kech nakikapea inasi Yeu alo Yesireel. Ani elimokinio Yeu atamar ayaun ngakies kata lokookeng a Aab, todung ngesi tama, “Tosenokisi toliworos ngasenon ngaarei alokidor a ere, kimiekis kaneni tanang moi nataparach.” Ani enangi nataparach, topudo Yeu alokidor sodi tolimok ngitunga lu ayakasi neni tama, “Ayong ngesi anyoikini ekapolon Yoram ataar, emam itwaan kipaikinit esi ngakiro keng. Nakaneni ngae aari lugu daang? Idodiunit ibore en atamar iyookinosi ngakiro nakolong eruoro Ekapolon Akuj kotere talokookeng a Aab. Asubaki Ekapolon Akuj ngakiro nakolong alimuni kisitoru nia Elija alo arai ekasuban etich keng.” Sodi taar Yeu ngiyenet a Aab lu alomito Yesireel, ka ngikapolok a Aab luuchik daang, ka ngipaalon keng luminan ta ngimurok. Emam tani ipei kech ni apon kimiekinae eyari. Torotok Yeu alo Yesireel tolot Samaria. Ani enangi lorot ni enyaritae “Adakar a Ngikeyokok”, kiriama ngesi ka ngiyenet ngiche a Aasia alo kolong arai ekapolon a Yuda. Kingit ngesi kesi tama, “Tangae esi?” Tatachut kesi tamasi, “Kirai sua ngiyenet a Aasia. Kilosi sua Yesireel akidodiun arimatoi ani a ngide a akapolon Yesebel ta ngitunga luche a awi a ekapolon.” Todungok Yeu ngitunga keng tama, “Kirumutu kesi eyarete.” Apon kesi kirumunae, taarak Yeu kesi diyete akipany na ayei neni. Araakasi ngitunga ngulu daang ngitomwon-koomwon ka ngiarei, nakaneni emam tani ipei kech ni abu kidong eyari. Torotok Yeu nabo. Ani enangi lorot, kisiriam ngesi Yonadab lo arai lokookeng a Rekab. Kimala Yeu ngesi sodi tama, “Kitami ayong ka iyong ngakiro ngapei. Ibaki iyong alowae kang a?” Tatachu Yonadab tama, “Ebaki.” Tatachak Yeu ngesi tama, “Kikobakinae robo ayong akan kon.” Totingas kesi sodi kingarak Yeu ngesi todoka naurukuk na irito ngangolei, ebala, “Bua apana kedodik eger lo alemunakar ayong ani a Ekapolon Akuj.” Apot kesi todoka aurukuk apei toloto Samaria. Ani enangete kesi neni, taar Yeu ngiyenet a Aab daang, nyimiekina tani ipei. Ngakiro nguna kesi nakolong alimokini Ekapolon Akuj Elija atamar esubakinosi. Tanyarau Yeu ngitunga a Samaria wapei tolimok tama, “Peelipit ekapolon Aab akuj nabe Baal lokojokon. Nakaneni elipi ayong Akuj ngina lokojokon. Tanyarautu ngikadwarak a Baal daang tochunakis wapei, ka ngitunga lu ilipito ngesi ta ngimurok keng daang. Emam tani ipei kech ni echamit idongi. Alemikini ayong Baal akipeyos naapolon noi. Ani itwaan cha daang ni engopi, eario.” (Arai ibore ngini elokit a Yeu lo asakea akiar ngitunga daang lu elipito Baal.) Abu Yeu todung tama, “Kitaleutu akolongit apei na ilipere erimae Baal!” Apon tolimunoe akolongit na italeunio, sodi tomea Yeu ngitunga lowaitin daang a Isirael anyaraun ngitunga daang lu ilipito Baal. Apot daang lu ilipito Baal pot, emam tani ipei abu tongop. Toloto kesi daang kai a Baal, kilelebikin napei alowae a epei tanang loche. Sodi todungok Yeu emuron lo aweikinit ngiworui lu italeunitoe atamar kipud ngiworui tokoranak ngitunga lu ilipito Baal. Arumoret kanguna, apot Yeu ka Yonadab lo arai lokookeng a Rekab tolomasi kai a Baal, tolimokis ngitunga lu ayakasi neni tamasi, “Warasi ngitunga lu ilipito Ekapolon Akuj nyeelomut nege, ngitunga lu ilipito Baal make echamit elomunete.” Apot ngesi ka Yonadab tolomasi alemikin Baal ngakipeyos ka ngakipeyos na inomio. Ewaakinit Yeu ngitunga ngitomwon-kauni nikalapatan a akai a Baal elimokinit ebala, “Taara ngitunga lugu daang. Itwaan nicha eisikini tani ipei kech esii, etachi kotere akiyar keng!” Ani napei alemunea Yeu ngakipeyos keng, tolimok ngesi ngasigerea na iteete ngidorin ka ngikarikok a ngasigerea daang tama, “Tolomasi taara kesi daang. Nyiilakakis tani ipei esii!” Apot kesi tolomasi kai etakito ngilengea, taara kesi daang sodi kiriyasi ngawat nikalapatan. Ani erumor tolomasi kesi lowae lo alotooma noi a akai a Baal, tolemut apir na italeunitoe ayei neni kinoma. Sodi kinyasut kesi apir na italeunitoe ka akai a Baal, kitiliwosi akai ngina echoo. Eringa neni erai echoo tani tokona. Eger ngolo ngesi atuborea Yeu akilip Baal anakwap a Ngisirael. Nakaneni abu ngesi tosub akisech na ekoni na ekapolon alo anyaritae Yeroboam. Ariki kolong Yeroboam Ngisirael kisilip ngitak lu egolit lu etowei ngesi alo Besel ka Dan. Abu Ekapolon Akuj tolimok Yeu tama, “Isubakinea iyong talokookeng a Aab ngakiro daang nakolong asaki ayong iyong tosubakinea kesi. Kotere ngakiro nguna, kechikakinit ayong iyong atamar eliworosi ngalesea kon ngikapolok a Isirael tanang nalesit na ngoomwon.” Nakaneni nyiwapa Yeu etal a Ekapolon Akuj ana erai Akuj a Isirael, a etau keng kadaang. Pearai abu ngesi kiwap ekitetemes a Yeroboam alo elomakini Ngisirael nakisech. Ngirwa ngulu, abu Ekapolon Akuj totubono ngiwaitin ngiche a akwap a Isirael. Abu ekapolon a Siria lo anyaritae Asael torem akwap a Ngisirael daang na eyei kide Yorudan, tanang lowae lo alokuju lo eyei ere a Aroer, lo eyei nangolol a Arinon. Ayakasi ngakwapea a Gilead ka Bachan neni, na alomito ngitela a Gad, ka Reuben ta Kide Manase. Ngakiro nache daang asubi Yeu, ka ngakiro na idodiunito atitinyu keng, igiritae nakitabea na enyaritae Ngakiro a Ngikapolok a Isirael. Totoan ngesi tonukakinae Samaria. Abu Yeowaas lo arai lokookeng kilunyokin nados keng toliwor ekapolon. Apolokinit Yeu Isirael alo Samaria a ngikaru a ngitomwon-arei ka ngikan-kauni. Ani napei ayenea Asalia na arai itiokeng a ekapolon Aasia atamar aar lokookeng, abu tolim atamar taarae ngitunga a awi a ekapolon daang. Lokookeng a Aasia lo anyaritae Yoach bon ngesi abu tosii. Adikino ngesi eario ka luche, nakaneni toyuu ngesi eyaakeng na anyaritae Yeocheba, na arai nakaatokeng a Aasia na aberu anache. Abu Yeocheba toriko Yoach ka aberu na adakit ngesi, kilomak namaniyat naperot alokai a Akuj. Kidaa Yeocheba ngesi ani eyei Asalia, sodi nyear ngesi. Kidaa Yeocheba edia ngolo alotooma akai a Akuj a ngikaru a ngikan-kapei, alu araakar Asalia akapolon a Yuda. Ani ekaru lo a ngikan-kaarei, abu Yeoyada lo arai emuron a Akuj tomea itwaan anyaraun ngikarikok lu aweikinito ngasigerea na eteete akapolon, ka ngasigerea na eteete akai a akapolon. Tolimok ngesi kesi atamar pot kai a Akuj. Kisikong ngesi kesi kaneni, kitacham ngakiro na atukit ngesi asubakin. Kidodik Yeoyada kesi Yoach lo arai lokookeng a Aasia. Todungok ngesi kesi ngakiro nugu tama, “Ani ipote esi akisub etich akolongit na Sabato, totiakas ngatiaket ngauni. Ejoikinit atiaket apei anikus itee akai a akapolon. Ejoikinit atiaket ache itee ekidor lo enyaritae ekidor a Sur. Towo atiaket nache kitee ekidor lo eyei naabor a ngiketeok aluche. Ngalooso naarei napalem ianganarete akolongit na Sabato, towaa iteete akai a Akuj, sodi tochoikis ekapolon. Kieto ekapolon Yoach itakito ngilengea, sodi kiruko ka ngesi awadaang anicha elosi. Itwaan cha daang ni eapuuni diyete keng, ejoikinit eario.” Apot ngikarikok a ngasigerea kiwapa ngakiro na adungunit Yeoyada, torikut ngitunga kech nia Yeoyada. Torikut lu asalito alotich ka lu aloose akisub etich akolongit na Sabato. Nak Yeoyada ngikarikok ngakwaaras ka ngaupwala na kolong araakasi ngaka ekapolon Daudi. Ekachakinitae ngiboro ngulu kai a Akuj. Kitowo ngesi ngasigerea na atakito ngilengea alowae alo alongaren akai a Akuj, kiteeto ekapolon napei alowae alo alokuju akai tanang lowae loa alokwap, ta ngiwaitin a ekeno a ngakipeyos ka akai. Abu Yeoyada kipud Yoach nikalapatan kiwaak ekiraun nakou keng. Ani erumor nak akitab na igiritae ngitalio lu iwapi itwaan ni erai ekapolon a akwap. Apon Yoach kiwasakinae akimiet toliwor ekapolon. Tarama ngitunga ngakan kiremasi tamasi, “Kiboi ekapolon nikooyen!” Kiira akapolon Asalia echale lo achalatar ngasigerea ka ngitunga, sodi kikirikiraar kai a Akuj ni achunakina ngitunga. Ani enangi neni, taanyunga ngesi ekapolon lo aringa eseunio ewei anapir ana akituk a akai a Akuj, loger lopalem sek ewaanar ekapolon kaneni. Eriamito ngesi ngikarikok a ngasigerea ka ngikakutak ngaburucho. Achalasi ngitunga daang imariteteete, tokusete ngaburucho. Tochilichili Asalia ngiworui keng ialolongi, kirema tama, “Erukoonu longeriet akapolon! Erukoonu!” Peasaki Yeoyada taarakinae Asalia diyete akai a Akuj. Abu ngesi tolimok ngikarikok a ngasigerea tama, “Kipudosi ngesi kane, yaasi kiding ngasigerea, sodi taara itwaan cha daang ni esaki ayuun ngesi.” Torwakinos kesi ngesi torikosi kai a ekapolon, sodi taara ngesi ani enyaritae ekidor a Angole. Abu emuron a Akuj lo anyaritae Yeoyada kilomak ekapolon Yoach ka ngitunga keng nakiro na achamunotor ka Ekapolon Akuj, toliworos kesi ngitunga a Ekapolon Akuj. Apot ngitunga tolomasi kai a Baal sodi toukosi Baal, tobwangabwangata kesi ngikenoi ka ngakujo nasubuna. Ani Matan, lo arai emuron a Baal, taara alongaren ngikenoi a ngakipeyos. Tolimok Yeoyada ngasigerea atamar kiteto akai a Akuj. Apot Yeoyada ka ngikarikok a ngasigerea ka ngasigerea na eteete ekapolon, ta ngasigerea na eteete akai a ekapolon, kitenasi ekapolon napei alokai a Akuj, tananga kai a ekapolon, iwapito ngitunga daang. Toloma Yoach kitor Lokidor Lokiteet, sodi kiboikin lokicholong a ekapolon. Apot ngitunga daang talakaros noi, tongop echale alore ani aarere Asalia alokai a ekapolon. Toliwor Yoach ekapolon a Yuda eraakasi ngikaru keng ngikan-kaarei. Ekaru lo a ngikan-kaarei lo araakar Yeu ekapolon a Isirael, toliwor Yoach ekapolon a Yuda. Toliwor ngesi ekapolon alo Yerusalem a ngikaru a ngitomwon-omwon. Itiokeng na arai aka ere a Beer-cheba, anyaritae Sibia. Ngirwa lu ayarea Yoach daang, asubeene ngakiro na etalakarito Ekapolon Akuj kainyo etatami emuron Yeoyada ngesi. Nakaneni emam itwaan abu kinyasu ni elipitere ngakujo nagelayek. Apot ngitunga torubakis elemuununete ngakipeyos ka akinom emitina kaneni. Tanyarau Yoach ngimurok sodi todungok kesi atamar kidiatakis ngaropiyae na elemuununio kotere ngakipeyos a akai a Akuj. Araakasi ngaropiyae nguna na ngakipeyos ka na elemuununete ngitunga kotere ni esakitotor alemun. Aweikinit emuron daang ngaropiyae na ayauniyete ngitunga lu asubi ngesi etich kech. Alemununio ngaropiyae nguna esaa cha daang lo esakere abongokin akiduk akai a Akuj. Nakaneni abu tanang ekaru lo a ngitomwon-arei ka nguuni lo araakar Yoach ekapolon, aringa ngimurok nyebongokino akiduk akai a Akuj. Sodi tanyarau ngesi Yeoyada ka ngimurok luche, kingit kesi tama, “Nyo peibongokinioto esi akiduk akai a Akuj? Napei tokona jik, nyiikachakis ngaropiyae na kiinakinio esi. Ejoikinit esi ipotonorete tobongonokinere akiduk akai a Akuj.” Apot ngimurok tachamut ngakiro nguna, tachamut tani abongokin akiduk akai a Akuj. Ani erumor tolem Yeoyada asaduku toped apukenit, sodi kiwaak asaduku ngina lokeno lo ipeyonokinere Akuj, alowae alo ibakit anakan ana aloteten, erai elomari itwaan kai a Akuj. Ngimurok lu asubete etich alokai a Akuj, apot kiwaakis nasaduku ngina ngaropiyae daang na alemuununete ngitunga lu apote akilip. Arai nacha epeneta ngaropiyae nakaalak nasaduku ngina, aponenete ekegiran a ekapolon ka emuron loapolon kimarut ngaropiyae nguna kiturakis lochuei. Ani kigira kesi etiae lo itemokino kerumor, epotonorete kesi nakis ngitunga lu aweikinito etich alokai a Akuj, sodi tatacheta ngitunga lu adukete ngakito, ka ngikadukok luche, ka lua ngamoru, ka akigiel ngakito ka ngamoru na ebongonokinere akiduk akai a Akuj, ta akitach ngiboro lukooche daang. Nakaneni emam ngaropiyae nguna na apon togielere ngikopoi lukwangae kori ngatubwae nachukul, kori ngaburucho, kori ngiboro lukinoket ngataae, kori ngiboro cha luche daang a ngakwangae ka egolit. Apon ngaropiyae nguna daang tatachere ngikadukok ka agielea ngiboro daang lu adukere. Araakasi ngitunga lu asubete etich ngolo lu amunoi alotich kech. Kotere ngakiro nguna, emam itwaan engiseene kesi eger lo asubeta ngaropiyae etich. Ngaropiyae na alemuununio eraakasi na ngakipeyos a atachanot ka na akisech, apon nyiiwaakin nasaduku. Araakasi ngaropiyae nguna ngaka ngimurok. Ngirwa ngulu, abu Asael lo arai ekapolon a Siria torem ere a Gas, tolema. Ani erumor tasak akirem Yerusalem. Tolem Yoach lo a arai ekapolon a Yuda ngakipeyos daang nakolong etaleunete ngikapolok toliworos ngaka Ekapolon Akuj. Ngikapolok ngulu kesi lusek engarenete ngesi, lu enyaritae Yeochapat, ka Yeoram ta Aasia. Kiatak Yoach ngakipeyos keng ni eyakasi ngakipeyos a ngikapolok kangulu, kimorik aapei ka egolit lo ayei kai a Akuj ka lo ayei kai a ekapolon. Sodi tomea ngesi ngitunga ayaar ngiboro ngulu daang nia Asael alo arai ekapolon a Siria. Apot Asael ka ngasigerea keng torotokis kimiekis Yerusalem nyeremo. Ngakiro nache daang na asubi ekapolon Yoach, igiritae nakitab na enyaritae Ngakiro a ngikapolok a Yuda. Apot ngikapolok a Yoach luuchik tonyoikis ngesi. Taara kesi ngesi alokai ana ayei lowae lo imulelearitae ngalup alo kide Yerusalem, alorot alo elosere Sila. Yosakar lokookeng a Chimeas ka Yeosabad lokookeng a Chomer kesi aarakinete ngesi kai na ayei lowae lo alo kide Yerusalem. Tonukakinae Yoach nalielin a ngikapolok na eyakasi lore a Daudi. Kilunyokin lokookeng lo enyaritae Amasia nados keng toliwor ekapolon. Ekaru lo a ngitomwon-arei ka nguuni lo araakar Yoach lo arai lokookeng a Aasia ekapolon a Yuda, toliwor Yeowaas lo arai lokookeng a Yeu ekapolon a Isirael. Abu ngesi toliwor ekapolon alo Samaria a ngikaru a ngitomon ka ngikan-kaarei. Tosechak ngesi Ekapolon Akuj ka arikokin Ngisirael akisech, loger a Yeroboam alosek engareni ngesi. Nyepalikina ngesi akiwapit ngirotin keng luaronok. Sodi tongo Ekapolon Akuj kitilileta Ngisirael. Tachamak ngesi Asael lo arai ekapolon a Siria ka Benadad lo arai lokookeng, idwangeenete Ngisirael jiik. Sodi kilip Yeowaas Ekapolon Akuj. Ani ingolikini Ekapolon Akuj eger lo aboliar ekapolon a Siria Ngisirael niaronon, kiik akilipit a Yeowaas. Tomeu Ekapolon Akuj ekarikon nia Ngisirael, lo ayuuni kesi ani a Ngisiria. Sodi kiboyoto Ngisirael a ekisil loger lokolong sek ebooyoto ekingaren. Nakaneni apot kesi nyeepalikis ngasechesea nakolong arikokini kesi Yeroboam lo arai ekapolon a Isirael. Torubakis kesi jiik esecheenete. Tani ekisikwaane a akuj anaberu anyaritae Achera, aringa eyei Samaria. Akidioko ngasigerea a Yeowaas na ejie edongito. Araakasi ngasigerea na adokito ngangolei ngatomwon-kan, ka ngaurukukui na irito ngangolei ngatomon ta ngasigerea na eloose a ngakejen ngabunge ngatomon, kainyo abu sek ekapolon a Siria tomunya nache daang, kipudaa loger a apua. Ngakiro nache daang asubi Yeowaas, ka ngakiro na idodiunito atitinyu keng, igiritae nakitab na enyaritae Ngakiro a ngikapolok a Isirael. Totoan ngesi tonukakinae Samaria. Abu Yewach lo arai lokookeng kilunyokin nados keng toliwor ekapolon. Ekaru lo a ngitomwon-uni ka ngikan-kaarei lo araakar Yoach ekapolon a Yuda, toliwor Yewach ekapolon a Isirael. Toliwor ngesi ekapolon alo Samaria a ngikaru a ngitomon ka ngikan-kapei. Tosechak ngesi dang Ekapolon Akuj sodi kiwap ekitetemes a Yeroboam, alo kolong arikokini Ngisirael akisech. Ngakiro nache daang asubi Yewach, ka atitinyu keng alojie alo etijio Amasia lo arai ekapolon a Yuda, igiritae nakitab na enyaritae Ngakiro a ngikapolok a Isirael. Totoan Yewach sodi tonukakinae nalielin a ngikapolok na eyakasi Samaria. Abu lokookeng lo anyaritae Yeroboam loa ngiarei kilunyokin nados keng toliwor ekapolon. Todeakakin Elicha lo arai ekadwaran edeke lokaaran. Ani na aperio ngesi ekot akitu, tolot Yewach lo arai ekapolon a Ngisirael aanyun ngesi. Kikalou Yewach iute tama, “Iyong ngesi irai ekaikinan loationon a Ngisirael!” Todungok Elicha ngesi tama, “Yau akau ka ngimalea ngidi.” Tolem Yewach. Sodi tolimok Elicha ekapolon a Ngisirael tama, “Toting akau kirepak emal.” Kikok Yewach neni. Abu Elicha kidokok ngakan keng nakan a ekapolon. Ani erumor tangaa epuke a akai lo ingoliarit Siria, loger lo alimokinitor ekadwaran. Todungok Elicha ngesi tama, “Toguma emal!” Ani napei agumarea ekapolon emal, tolim Elicha tama, “Iyong irai emal a Ekapolon Akuj, lo idwangea ngesi Ngisiria. Itiji iyong Ngisiria alo Apek kidwang kesi.” Ani erumor tolimok Elicha ekapolon atamar tolem ngimalea luche taramea ngalup. Taram ekapolon ngalup ngaramet ngauni ani erumor kimiek. Kitongoa Elicha ngakiro nguna sodi tolimok ekapolon tama, “Ajoikinit iyong irami ngaramet ngakan kori ngakan-kapei, sodi kidwang Ngisiria jik. Nakaneni eliwor tokona idwangi iyong kesi ngakidwanget ngauni make.” Totoan Elicha sodi tonukae. Ekaru daang aponenete ngajorei a Ngimoab akirem akwap a Ngisirael. Akolongit apei na asakere akinuk itwaan, apon taanyungarae apei a ngajorei kanguna. Apot ngitunga tachakakis itwaan nikatoan ngini naliel a Elicha, tamataros kesi. Ani napei atapea akwaan a itwaan anikatoan kangini ngakoyo a Elicha, toyaru itwaan ngini towo. Ekapolon a Siria lo anyaritae Asael, aboliar Ngisirael ngirwa daang lu araakar Yeowaas ekapolon. Nakaneni apatana Ekapolon Akuj anikech arai loa ngisien. Nyimiekina Ekapolon Akuj kesi emunyario, pearai abu kingarak kesi kotere achamunet nakolong achamakin ngesi ka Aburaam, ka Isaka, ta Yakobo. Eringa ngesi nyitwarakina kesi anikeng tani tokona. Ani etoani Asael lo arai ekapolon a Siria, toliwor Benadad lo arai lokookeng ekapolon. Sodi kidwang Yewach lo arai ekapolon a Isirael ekapolon a Siria lo anyaritae Benadad ngakidwanget ngauni sodi tobuu ngirerea lukolong alemarit Benadad ngirwa lu araakar Yeowaas lo arai apakeng ekapolon. Ekaru lo a ngiarei lo araakar Yewach lo arai lokookeng a Yeowaas ekapolon a Isirael, abu Amasia lo arai lokookeng a Yoach toliwor ekapolon a Yuda, eraakasi ngikaru keng ngitomwon-arei ka ngikan. Toliwor ngesi ekapolon alo Yerusalem a ngikaru a ngitomwon-arei ka ngikan-koomwon. Anyaritae itiokeng Yewadin, na arai aka ere a Yerusalem. Asubi ngesi ngakiro na ejoikinito Ekapolon Akuj, nakaneni nyesuba naajokak noi loger a Daudi alo arai apakeng longorot. Pearai asubi ngesi nasek asubi Yewach lo arai apakeng. Nyebwangabwangaara ngesi ni ilipitere ngakujo nagelayek. Nakaneni torubakis ngitunga elemuununete ngakipeyos ka akinom emitina kaneni. Ani napei esikokinor Amasia anapolou keng, abu taar ngikarikok a ngasigerea daang lukolong aarete apakeng lo arai ekapolon. Nakaneni nyeara ngesi ngide kech, pearai abu kiwap ngakiro nasek adunguni Ekapolon Akuj alotal a Musa kona, “Nyeario ngide kotere akisech a ngikauriak kech. Eario itwaan kotere akisech na asubi ngesi ilope.” Taar Amasia ngasigerea a Ngiedomae ngabunge ngatomon anadipo a Amakat. Torem ngesi ere a Sela tolema, tolimok ekiro be Yokiseel. Ekiro ngolo eringa erai ekeng tani tokona. Sodi tomea Amasia ngitunga nia Yewach alo arai ekapolon a Isirael, ebenyi ngesi esaki ejie. Nakaneni tomea ekapolon Yewach ngitunga alimokin ngesi kona, “Ayei kolong eregae lo a ngimoru a Lebanon, lo abala tolimokisi echekereng kona, ‘Kipoto nakookon kiut lokookang.’ Kitoru etiengit a moding neni kipudaa eregae ngolo. Tokona bocha Amasia, idwang iyong Ngiedomae inisakin. Kimiek ekipur ngolo kitemokin iyong sodi kiboikin nawi kon. Nyo tokona ikurio iyong ngichan lu eyaunete ngakiro naaronok nikon ka ngitunga kon?” Nakaneni towou Amasia akiirar ngakiro nguna. Sodi tonyout ekapolon Yewach ka ngasigerea keng kitijwoto ngesi alo Yuda, ani enyaritae Bes Chemech. Kidwangae ngasigerea a Amasia kipungaros daang toloto nawiyei kech. Kirum Yewach Amasia toen. Tolot ngesi Yerusalem touko awas a ere napei alokidor a Epiraim tanang lokidor lo Ekeli, arai aoyau ani aukori ngesi ngamitae esibit ngaarei. Tolema ngesi ngasua nakwangae ka egolit daang lo ariamuni kaneni. Tolema tani ngiboro lu akai a Akuj daang ta ngaropiyae daang na ayakasi kai a ekapolon, yaa daang Samaria. Torik ngesi tani ngirikon. Ngakiro nache daang asubi Yewach, ka atitinyu keng na etijio ngesi Amasia lo arai ekapolon a Yuda, igiritae nakitab na enyaritae Ngakiro a ngikapolok a Isirael. Totoan Yewach tonukakinae nalielin a ngikapolok na eyakasi Samaria. Abu Yeroboam lo a ngiarei kilunyokin nados keng toliwor ekapolon. Kiboi Amasia lo arai ekapolon a Yuda ngikaru ngitomon ka ngikan ketoana Yewach lo arai ekapolon a Isirael kerumor. Ngakiro nache daang asubi Amasia, igiritae nakitab na enyaritae Ngakiro a Ngikapolok a Yuda. Totukoe alo Yerusalem atamar eario Amasia. Sodi todok ngesi toten lore a Lakich. Apot ngimoe keng kiwapiasi ngesi kaina taara. Kiwokunae akwaan keng a angole yaunae Yerusalem, sodi tonukakinae nalielin a ngikapolok na eyakasi lore a Daudi. Apot ngitunga a Yuda kitiliwosi Usia lo arai lokookeng a Amasia ekapolon. Araakasi ngikaru a Usia ngitomon ka ngikan-kapei. Kidwang Usia ngitunga a ere a Elas ketoana apakeng kerumor. Toduk ngesi nabo ere a Elas. Ekaru lo a ngitomon ka ngikan lo araakar Amasia lo arai lokookeng a Yoach ekapolon a Yuda, abu Yeroboam lo arai lokookeng a Yewach toliwor ekapolon a Isirael. Toliwor ngesi ekapolon alo Samaria a ngikaru a ngitomwon-omwon ka epei. Tosechak ngesi Ekapolon Akuj, kiwap ekitetemes loaronon a ekapolon Yeroboam alo arai lokookeng a Nebat, alo arikokini Ngisirael akisech. Abu ngesi torem nabo akwap daang nakolong sek arai aka Ngisirael, tolema napei anapak a Amas alowae alo alokwap, tanang nanam a Amakat alowae alo alokuju. Ngakiro nguna kesi nasek alimuni Ekapolon Akuj na erai Akuj a Ngisirael, kisitoru lokasuban etich keng ekadwaran Yona lo arai lokookeng a Amitai. Arai Yona itwaan ni abunit alo Gas Eper. Taanyunga Ekapolon Akuj eger lo aboliare Ngisirael niaronon noi. Amam itwaan tani ipei nikengarakinan kesi. Nakaneni peasaki Ekapolon Akuj amunyar Ngisirael anakwap, kotere ngakiro nguna, abu ngesi kitoru nia Yeroboam alo ngiarei toyuu kesi. Ngakiro nache daang asubi Yeroboam lo a ngiarei, ka atitinyu keng alojie, ka eger lo abuakinea Damasko ka Amas nia Isirael, igiritae daang nakitab na enyaritae Ngakiro a ngikapolok a Isirael. Totoan Yeroboam tonukakinae nalielin a ngikapolok. Abu Sekaria lo arai lokookeng kilunyokin nados keng toliwor ekapolon. Ekaru lo a ngitomwon-arei ka ngikan-kaarei lo araakar Yeroboam lo a ngiarei ekapolon a Isirael, abu Usia lo arai lokookeng a Amasia toliwor ekapolon a Yuda eraakasi ngikaru keng ngitomon ka ngikan-kapei. Toliwor ngesi ekapolon alo Yerusalem a ngikaru a ngitomwon-kan ka ngiarei. Anyaritae itiokeng Yekolia, na arai aka ere a Yerusalem. Kiwap Usia ekitetemes a apakeng, tosub ngakiro na ajoikinito Ekapolon Akuj. Nakaneni apon kimiekinae ni ilipitotor ngitunga ngakujo nagelayek nyinyasuna. Arubakinito tani ngitunga elemuununete ngakipeyos ka akinom emitina kaneni. Kititing Ekapolon Akuj Usia enomokere lo erukete ka ngesi ngirwa daang lu ayarea. Kipakar ngesi topereene kai na arai akeng bon, toisik akisub ngitichisio luche daang, toliwor lokookeng Yosam epolokinit akwap. Ngakiro nache daang asubi Usia igiritae nakitab na enyaritae Ngakiro a Ngikapolok a Yuda. Totoan Usia tonukakinae nalielin a ngikapolok na eyakasi lore a Daudi. Abu Yosam lo arai lokookeng kilunyokin nados keng toliwor ekapolon. Ekaru lo a ngitomwon-uni ka ngikan-kauni lo araakar Usia ekapolon a Yuda, abu Sekaria lo arai lokookeng a Yeroboam alo a ngiarei toliwor ekapolon a Isirael. Toliwor ngesi ekapolon alo Samaria a ngilapio a ngikan-kapei. Tosechak ngesi Ekapolon Akuj loger a ngikapolok aluche sek engarenete ngesi. Kiwap ngesi ekitetemes loaronon a ekapolon Yeroboam alo arai lokookeng a Nebat, alo arikokini Ngisirael akisech. Abu Chalum lo arai lokookeng a Yabech tonyoik ekapolon Sekaria, taar alo Ibileam, sodi kilunyokin nados keng toliwor ekapolon. Ngakiro nache daang asubi Sekaria, igiritae nakitab na enyaritae Ngakiro a Ngikapolok a Isirael. Eger ngolo ngesi eyookinor akichikakinet nakolong echikakini Ekapolon Akuj ekapolon Yeu ebala, “Eliworosi ngalesea kon ngikapolok a Isirael tanang nalesit na ngoomwon.” Ekaru lo a ngitomwon-uni ka ngikan-koomwon lo araakar Usia ekapolon a Yuda, toliwor Chalum lo arai lokookeng a Yabech ekapolon a Isirael. Topolok ngesi Samaria a elap a epei. Tonyou Menaem lo arai lokookeng a Gadi alo Tirisa tanang Samaria, taar Chalum ani erumor kilunyokin nados keng toliwor ekapolon. Ngakiro nache daang asubi Chalum, ka eger lo atukio ngesi akiar ekapolon, igiritae nakitab na enyaritae Ngakiro a Ngikapolok a Isirael. Ani enyouni Menaem alo Tirisa, kinyasu ere a Tapua ka ngitunga a ere kangolo ta ngakwapea na edunyatar, kainyo awounete ngitunga a ere kangolo angaar ekidor a ere. Abu ngesi tani topuwono ngakokies a ngaberu ana apotiyete. Ekaru lo a ngitomwon-uni ka ngikan-koomwon lo araakar Usia ekapolon a Yuda, abu Menaem lo arai lokookeng a Gadi toliwor ekapolon a Isirael. Toliwor ngesi ekapolon alo Samaria a ngikaru a ngitomon. Tosechak ngesi Ekapolon Akuj. Ngirwa daang lu ayarea ngesi, ewapit loaronon a ekapolon Yeroboam alo arai lokookeng a Nebat, lo arikokini Ngisirael akisech tanang ngirwa lu atoanea ngesi. Tigilas Pileser lo arai ekapolon a Asiria, abu torem akwap a Ngisirael. Nak Menaem ngesi ngakiloi ngabunge ngatomwon-uni ka ngoomwon a ngasua anakwangae esaki Tigilas Pileser kingarak ngesi topolokinio ngiwaitin daang a akwap lokojokon. Kidiau Menaem ngaropiyae alokabarak a akwap a Isirael, kitingak ipei kech daang adekun ngaropiyae ngatomwon-kan. Sodi torotok Tigilas Pileser anakwap kangina, tobongo nakwap keng. Ngakiro nache daang asubi Menaem, igiritae nakitab na enyaritae Ngakiro a Ngikapolok a Isirael. Totoan ngesi sodi tonukae. Abu Pekaya lo arai lokookeng kilunyokin nados keng toliwor ekapolon. Ekaru lo a ngitomwon-kan lo araakar Usia ekapolon a Yuda, abu Pekaya lo arai lokookeng a Menaem toliwor ekapolon a Isirael. Toliwor ngesi ekapolon alo Samaria a ngikaru a ngiarei. Tosechak ngesi Ekapolon Akuj kiwap ekitetemes loaronon a Yeroboam alo arai lokookeng a Nebat, alo arikokini Ngisirael akisech. Peka lo arai lokookeng a Remalia, apot ka ngitunga ngitomwon-kan lu aponito alo Gilead totuko akiar Pekaya. Taara kesi Pekaya animaniyat ani eyei tooma akai a ekapolon, alo Samaria. Kilunyokin Peka nados a Pekaya toliwor ekapolon. Ngakiro nache daang asubi Pekaya, igiritae nakitab na enyaritae Ngakiro a Ngikapolok a Isirael. Ekaru lo a ngitomwon-kan ka ngiarei lo araakar Usia ekapolon a Yuda, abu Peka lo arai lokookeng a Remalia toliwor ekapolon a Isirael. Toliwor ngesi ekapolon alo Samaria a ngikaru a ngitomwon-arei. Tosechak ngesi Ekapolon Akuj, kiwap ekitetemes loaronon a ekapolon Yeroboam alo arai lokookeng a Nebat, alo arikokini Ngisirael akisech. Ngirwa lu araakar Peka ekapolon, Tigilas Pileser lo arai ekapolon a Asiria, abu torem ngirerea a Ijon, ka Abel Bes Maaka, ka Yanoa, ka Kedech, ka Asor ta ngakwapea nabe ta Gilead, ka Galilaya ta Naputal. Toriko ngesi ngitunga nakwap a Asiria toliworos ngirikon. Ekaru lo a ngitomwon-arei lo araakar Yosam lo arai lokookeng a Usia ekapolon a Yuda, abu Ochea lo arai lokookeng a Ela totuk akiar Peka. Taar ngesi sodi kilunyokin nados keng toliwor ekapolon. Ngakiro nache daang asubi Peka, igiritae nakitab na enyaritae Ngakiro a Ngikapolok a Isirael. Ekaru lo a ngiarei lo araakar Peka lo arai lokookeng a Remalia ekapolon a Isirael, abu Yosam lo arai lokookeng a Usia toliwor ekapolon a Yuda eraakasi ngikaru keng ngitomwon-arei ka ngikan. Toliwor ngesi ekapolon alo Yerusalem a ngikaru a ngitomon ka ngikan-kapei. Yerucha nakookeng a Sadok ngesi arai itiokeng. Tosub Yosam ngakiro na ajoikinito Ekapolon Akuj, ani ewapitor ekitetemes a apakeng. Nakaneni emam itwaan abu kinyasu ni ilipitere ngakujo nagelayek. Apot ngitunga torubakis elemuununete ngakipeyos ka akinom emitina kaneni. Yosam ngesi aduki ekidor loa lokwap akai a Akuj. Ngakiro nache daang asubi Yosam, igiritae nakitab na enyaritae Ngakiro a Ngikapolok a Yuda. Ngirwa lu araakar ngesi ekapolon, kesi esiaunea Ekapolon Akuj tomea ekapolon Resin lo a Siria, ka ekapolon Peka lo a Isirael, esaki toremo Yuda. Totoan Yosam sodi tonukakinae nalielin a ngikapolok na eyakasi lore a Daudi. Kilunyokin lokookeng Aas nados keng toliwor ekapolon. Ekaru lo a ngitomon ka ngikan-kaarei lo araakar Peka lo arai lokookeng a Remalia ekapolon a Isirael, abu Aas lo arai lokookeng a Yosam toliwor ekapolon a Yuda eraakasi ngikaru keng ngitomwon-arei. Toliwor ngesi ekapolon alo Yerusalem a ngikaru a ngitomon ka ngikan-kapei. Nyiwapa ngesi ekitetemes loajokon a ekapolon Daudi alo arai apaakeng longorot. Nyesuba ngesi ngakiro na ejoikinito Ekapolon Akuj na erai Akuj keng. Kiwap ngesi ekitetemes a ngikapolok a Isirael. Abu ngesi tani tolem lokookeng toliwor akipeyos na ipeyokinio akuj nasubuna. Ewapi ngesi eboyor lokikadakini a ngitunga alu kolong etwarakini Ekapolon Akuj anakwap ngirwa lu alooso Ngisirael ngaren. Tolem Aas ngakipeyos ka emitina lo inomio ani ilipitere ngakujo nagelayek, ka ngimukur, ta kwap ngikito lua ngitorubei. Apot Resin lo arai ekapolon a Siria ka Peka lo arai ekapolon a Isirael toremo Yerusalem kiriama. Nakaneni abu Aas kidwang kesi. ( Esaa lopei ngolo, tolema nabo ekapolon a Edom ere a Elas topolok. Kitwarak ngesi ngitunga a Yuda lu alomito neni. Toloma Ngiedomae Elas, eringa elomito neni tani tokona.) Tomea Aas ngitunga nia Tigilas Pileser, lo arai ekapolon a Asiria, ebala, “Arai ayong ekasuban etich kon lo arai lokookon. Bua toyuunae ayong ani a ekapolon a Siria ka Isirael, alu ketijiete ayong.” Tolem Aas ngakwangae ka egolit alokai a Ekapolon Akuj, ta ngaropiyae na akai a ekapolon, tomea ngitunga yaasi ngainakinet nguna nia Tigilas Pileser, alo arai ekapolon a Asiria. Kiik Tigilas Pileser ngakiro a Aas, tonyout ka ngasigerea keng kitijikis Damasko tolemasi. Taar Resin lo arai ekapolon sodi kirumiya ngitunga toriko nibe Kir eraakasi ngirikon. Ani elosi ekapolon Aas Damasko aanyun ka ekapolon Tigilas Pileser, taanyunga ngesi ekeno a ngakipeyos kaneni. Tolem Aas ekisikwaane a ekeno kangolo nak ngitunga yaasi nia Uria alo arai emuron a Akuj. Edodiunitae ibore ni eyei lokeno ngolo daang, alokisikwaane kangolo. Sodi todukok Uria ekeno lo ekwaan ka ngolo per, torumo eringa Aas nyebonguno. Ani ebonguni Aas alo Damasko, kingolik atamar kerumor ekeno. Sodi kinom ngesi ngakipeyos a ngibaren ka na ngalemet alokeno kangolo, kidokak ngakipeyos a emuna ta ngaakot a ngakipeyos a ekisil, kidiama nakipeyos nguna. Ekeno lo asuat ananyang lo etalekinitoe Ekapolon Akuj, ayei kiding ekeno lokitetet ka akai a Akuj. Sodi kisiyotoo Aas kiwaak lowae lo alokwap ekeno keng lokitetet. Ani erumor todungok ngesi Uria tama, “Ekeno kang loapolon logo, toliwor ngesi ipeyoeneo iyong ngakipeyos na inomio nataparach ta ngakipeyos a ngalemet naka ebong. Toliwor eka ngakipeyos ana inomio ka na ngalemet a ekapolon ka ngitunga kang ta ngakipeyos a ngitunga na emuna. Tobukok lokeno ngolo ngaakot a ngibaren kadaang alu ipeyeo. Nakaneni eliwor ekeno lo a ngasua ananyangayek ngesi engituununea ayong ngakiro na esaki Ekapolon Akuj.” Tosubak Uria nguna adungokini ekapolon. Kielaelaa ekapolon Aas ngiurukukui lua ngasua ananyangayek na ayakasi kai a Akuj, tolemasi ngategerin na ayakasi kidiama kech. Tolema ngesi tani atanki a asuat ananyang anaaborin a ngimongin alutomon ka ngiarei a ngasua ananyangayek. Kiwaak ngesi atanki ngina ni adukunitoe a amoru. Ani kona asakea ngesi akitalakar ekapolon a Asiria, tolema Aas nipalem ikeuna ni iboyonokin ekapolon alokai a Akuj. Togol tani ekidor lopalem erai ekapolon bon itoreene elosi kai a Akuj. Ngakiro nache daang asubi Aas, igiritae nakitab na enyaritae Ngakiro a ngikapolok a Yuda. Totoan Aas sodi tonukakinae nalielin a ngikapolok na eyakasi lore a Daudi. Kilunyokin lokookeng lo anyaritae Esekia nados keng toliwor ekapolon. Ekaru lo a ngitomon ka ngiarei lo araakar Aas ekapolon a Yuda, abu Ochea lo arai lokookeng a Ela toliwor ekapolon a Isirael. Toliwor ngesi ekapolon alo Samaria a ngikaru a ngikan-koomwon. Tosechak ngesi Ekapolon Akuj, nakaneni peasechit ngesi loger a ngikapolok alu kolong sek apolokinito Ngisirael. Kitiji ekapolon a Siria lo anyaritae Chalimaneser ngesi. Tacham Ochea Chalimaneser eweikini ngesi, toliwor ebukonokini echur ekaru daang. Nakaneni tomea Ochea ngitunga nia So alo arai ekapolon a Misiri, esaki kingarak ngesi. Towou Ochea abukokin ekapolon a Asiria echur lopalem ebukonokini ekaru daang. Ani iirari Chalimaneser ngakiro nguna, abu kisurum Ochea ngitunga toinikis lojela. Sodi torem Chalimaneser akwap a Isirael, kiriama ngasigerea keng Samaria. Ekaru lo a nguuni eriemitere ere, tolema ekapolon a Asiria Samaria. Toriko ngesi Ngisirael toloto Asiria eraakasi ngirikon, sodi kitolom ngiche kech lore lo enyaritae Ala, kitolom ngiche diyete angolol a Abor na eyei nakwap a Gosan, sodi kitolom nabo ngiche lorerea a Media. Arai ekaru ngolo lo a ngikan-koomwon lo araakar Ochea ekapolon. Asubakinosi ngakiro nguna kainyo asechakinete Ngisirael Ekapolon Akuj na erai Akuj kech. Akuj ngina ngesi nakolong ayuuni kesi alokapolon a Misiri, kipud kesi alo Misiri. Elipito kesi ngakujo ngache, kiwapa ngitalio a ngitunga alu kolong etwarakini ngesi na alooso ngitunga keng ngaren. Apot kesi kiwapa tani ngitalio lu erokunete ngikapolok a Isirael. Tosuba Ngisirael ngakiro na angerit Ekapolon Akuj. Alorerea kech kadaang, toduko kesi ni ilipeta ngakujo nagelayek, napei anadakar anaachi, tanang lore loapolon. Alokidiama ngimoru ka kwap ngikito lua ngitorubei, kiwaakis ngapirio a ngamoru, ka ngakisikwaanet a akuj kech anaberu enyaritae Achera. Kinoma kesi emitina alokenoi kadaang alu elipitere ngakujo nagelayek, iwapito ngitalio a ngitunga alu kolong etwarakini Ekapolon Akuj anakwap. Kitongoa kesi Ekapolon Akuj kitilileta kotere eboyor kech loaronon. Tongero tani etal lo adungunit Ekapolon Akuj atamar nyiilipa ngakujo nasubuna. Tomea Ekapolon Akuj ngimeanara ka ngikadwarak keng akichikichik Ngisirael ka ngitunga a Yuda ebala, “Toisikisi ngirotin kus luaronok, kiwapa ngakiro na adungunit ayong na eyakasi lotal lokolong etaanyuni ayong taapaakus lungorok, sodi nabo ayau nikus kitoru nia ngikasubak etich kang lu eraakasi ngikadwarak.” Nakaneni nyiwapa Ngisirael ka ngitunga a Yuda ngakiro nguna. Echanaka kesi loger kata apaakech alu kolong awounete amuno Ekapolon Akuj na erai Akuj kech. Awounete kesi akiwap ngakiro keng. Towout tani akirichakin achamunet nakolong achamakin Akuj ka taapaa kech. Nyemisikina kesi ngakiro na echikakini ngesi kesi. Kilipa kesi ngakujo nasubuna napasiek, sodi toliworos kesi dang ngikulepek ngipasiek. Kiwapa kesi ngitalio a ngibukui alu edunyasi ka kesi, nyiwapa ngakiro na adungokinit Ekapolon Akuj kesi ebala nyiirokosi ngakiro kech. Tosecha kesi ngitalio daang a Ekapolon Akuj ana erai Akuj kech, tosubakis ngitak a ngasua ngiarei kilipa. Tosubakis tani ekisikwaane a akuj anaberu enyaritae Achera. Elipito kesi ngikanyer, ka akuj nabe Baal. Alemanakinete kesi ngakujo nagelayek talokookech ka tanakookech toliworos ngakipeyos na inomio. Aloseenete kesi lomurok ka ngikasubak, toliworos jik esubete ngakiro na etee Ekapolon Akuj atamar eroko. Kitongoa kesi Ekapolon Akuj kitilileta kotere ngakiro nguna. Tongoik Ekapolon Akuj Ngisirael kitwarak kesi alongaren keng. Emam kesi lu apot kidongo mati ekitela a Yuda bon. Nakaneni nyiwapa tani ngitunga a ekitela a Yuda ngitalio a Ekapolon Akuj ana erai Akuj kech. Apot kesi kisisata ngitalio lu erokunete Ngisirael. Tonger Ekapolon Akuj Ngisirael daang, kirira kesi ka akipotor nak ngimoe luaronok, tanang itwarakini kesi daang alongaren keng. Ani ketiak Ekapolon Akuj Ngisirael ka ngitunga a Yuda kerumor, kitiliwosi Ngisirael Yeroboam lo arai lokookeng a Nebat ekapolon kech. Kitiisik Yeroboam kesi Ekapolon Akuj sodi torikok kesi ngasechesea naaronok. Kiwapa kesi ngakiro a Yeroboam, torubakis esubete ngasechesea daang na asubi ngesi, tanang Ekapolon Akuj itwarakini kesi daang alongaren keng loger losek echikichikea kesi ani a ngikasubak etich keng alu araakasi ngikadwarak atamar ekokini neni. Apon Ngisirael torikoe Asiria, ni eringa eyakasi tani tokona. Abu ekapolon a Asiria kitonyou ngitunga alorerea a Babilon ka Kus, ka Ipa, ka Amas, ta Separipaim, sodi kitolom lorerea a Samaria, kilunyokinos nikolong ayakasi Ngisirael lu arikio. Tolemasi kesi ngirerea toloma neni. Ngirwa lu esiauneta kesi akilom neni, nyilipa kesi Ekapolon Akuj. Kotere ngakiro nguna, tomeu Ekapolon Akuj ngingatunyo taara kesi ngiche. Tolimokinae ekapolon a Asiria kona, “Ngitunga lu kolong itolomi iyong lorerea a Samaria, nyeyenete etal a akuj a akwap kangina. Kotere ngakiro nguna, ameu akuj ngina ngingatunyo alomakis akiar kesi.” Sodi todungok ekapolon kesi tama, “Tobuasi emuron epei ani eya lu ngoon kirikuni ngoni alu eenitae. Tolimokisi ngesi atamar tobongo tolom inaa, sodi kitatam ngitunga etal a akuj a akwap kangina.” Abu emuron a Akuj lo arai Esiraelit losek arikorio alo Samaria, tolot tolom Besel, ni etatamea ngitunga eger lokilipet Ekapolon Akuj. Nakaneni apot ngitunga lu alomito Samaria torubakis esubete ngakujo nasubuna na araakasi ngakech a ngikulepek. Kiwaakis kesi lokenoi lu adukete Ngisirael lukipeyonokinet ngakujo nagelayek. Tosubakis ngajorei nagelagelae ngakujo nasubuna alorerea alu alomito kesi. Tosubakis ngitunga a Babilon akuj nasubuna na anyaritae Sukos Benos. Tosubakis lua Kus akuj nasubuna a na anyaritae Nerigal, lua Amas, tosubakis akuj na anyaritae Achima, lua Ipa, tosubakis akuj nasubuna na anyaritae Nibias ka Taritak, ani lua Separipaim, tolemut ngide kech eraakasi ngakipeyos na inomio, topeikis ngakujo kech na enyaritae Adiramelek ka Anamelek. Elipito nabo ngitunga lupei ngulu Ekapolon Akuj, toseut alokiding kech ngitunga lugelagelae toliworos ngimurok lu ipeyoenete ngakipeyos alokenoi alu ayakasi kidiama ngimukur. Sodi kilipa kesi Ekapolon Akuj, nakaneni kilipa tani ngakujo kech a ngikulepek iwapap ka eger a ngitalio a ngakujo ana ngakwapea ana kolong aponeta kesi. Eringa kesi iwapito ngitalio lukolong ngorok tani tokona. Nyilipito kesi Ekapolon Akuj kori nyiwapito ngakitatamet, ka ngakiro, ta ngitalio lukolong adungokini ngesi ngalesea a Yakobo, lo alimokini ngesi ekiro lo enyaritae Isirael. Achamakin kesi ka Ekapolon Akuj sodi todungok Ekapolon Akuj kesi tama, “Nyiilipa ngakujo ngache. Nyiiriedikokis kesi tosuba etich kech, kori nyiipeyonokis kesi ngakipeyos. Tokera ayong Ekapolon Akuj nakolong kepuduni esi alo Misiri a agogongu anaationon ka ngikilinga. Toriedikokinae ayong kipeyokis ngakipeyos. Kirichakisi jiik akiwap ngakitatamet, ka ngakiro, ka ngitalio, ta ngakiro nakadungokini ayong esi. Nyiiwapa ngakujo ngache, kori warasi nyikimuriak achamunet nakichamakin ayong ka esi. Nyiikera ngakujo nache. Nakaneni tokerae ayong Ekapolon Akuj na arai Akuj kus, sodi katoyuu ayong esi ani eyakasi ngimoe kus daang.” Nakaneni apot ngitunga ngulu towout akiirar ngakiro nguna. Torubakis kesi iwapito ngitalio kech lungorok. Apot ngibukui ngulu kilipa Ekapolon Akuj, ka ngakujo kech dang. Eringa tani tokona ngide kech ka ngalesea kech ilipito Ekapolon Akuj loger lopei ngolo. Ekaru lo a nguuni lo araakar Ochea lo arai lokookeng a Ela ekapolon a Isirael, toliwor Esekia lo arai lokookeng a Aas ekapolon a Yuda eraakasi ngikaru keng ngitomwon-arei ka ngikan. Toliwor ngesi ekapolon alo Yerusalem a ngikaru a ngitomwon-arei ka ngikan-koomwon. Abija nakookeng a Sekaria ngesi arai itiokeng. Kiwap ngesi ekitetemes a ekapolon Daudi, alo arai apaakeng longorot tosub ngakiro na ejoikinito Ekapolon Akuj. Kinyasu ngesi ni elipitere ngakujo nagelayek, tobwangabwanga ngikenoi lua ngamoru, ka atubutub ngakisikwaanet a akuj anaberu anyaritae Achera. Tobilibili ngesi tani emun lo asubunitae a asuat ananyang sek asubakini Musa, lo anyaritae Neuchitan. Napei kolong sek jik tanang akolongit ngina, enomeenete Ngisirael emitina erimasi ngesi. Amuno Esekia Ekapolon Akuj, na erai Akuj a Isirael. Nyeanyuna ngitunga a Yuda a ache ekapolon lo ekoni ngesi, nabo emam eche apot taanyut. Amuno ngesi Ekapolon Akuj, emam akwaar awounea akiwap ngakiro keng. Abu ngesi kirichak lokojokon ngakiro daang na kolong adungokini Ekapolon Akuj Musa. Abu Ekapolon Akuj kiruko ka ngesi, toliwor esubi ibore daang itemokino eriyan. Tonger ngesi ekapolon a Asiria epolokini ngesi, towou achamun ngakiro keng. Kidwang ngesi Ngipilisti sodi torem ngirerea kech napei anadakar anaachi tanang lore loapolon. Torem tani Gasa ka ngirerea lu edunyatar. Ekaru lo a nguomwon lo araakar Esekia ekapolon, tarai ekaru lo arai lo a ngikan-kaarei lo araakar Ochea lokookeng a Ela ekapolon a Isirael, abu ekapolon a Asiria lo anyaritae Chalimaneser torem Ngisirael, kiriama ngasigerea keng Samaria. Ani ekaru lo a nguuni eriemitere, tolema ngesi Samaria. Arai ekaru lo a ngikan-kapei araakar Esekia ekapolon ngolo, tarai ekaru lo a ngikan-koomwon araakar Ochea ekapolon. Toriko ekapolon a Asiria Ngisirael nakwap keng eraakasi ngitunga lu aenitae. Kitolom ngiche lore a Ala, kitolom ngiche diyete angolol a Abor na eyei nakwap a Gosan, ani luche toloma lorerea a Media. Toukor Samaria kainyo awounete Ngisirael akiwap ngakiro a Ekapolon Akuj ana erai Akuj kech. Nakaneni apot kesi kichwangakis achamunet nakolong achamakinosi ka kesi, tosecha ngitalio daang lukolong alimokini kesi Musa, lo arai ekasuban etich a Ekapolon Akuj. Towout kesi akiirar ka akiwap ngitalio ngulu. Ekaru lo a ngitomon ka nguomwon lo araakar Esekia ekapolon, abu Senakerib lo arai ekapolon a Asiria torem ngirerea a Yuda lu adukitoe ngawasea, sodi tolema. Tomea Esekia itwaan nia Senakerib, alo Lakich tolimok ngesi tama, “Asechit ayong. Kitowo kare ejie. Kainakini ayong iyong ibore daang ni isaki iyong.” Tolim ekapolon Senakerib atamar tolimokinae Esekia tolemik ngesi ngakiloi ngabunge ngatomon a akwangat ka ngakiloi abunget apei a egolit. Tolem Esekia akwangat daang a akai a Akuj ka na ayei lobari lo akai a ekapolon. Tadalachu ngesi tani egolit lo a ngidorin a akai a Akuj, ka losek abutakinit ngesi elope napirio a ekidor, sodi kipoto daang naarae ekapolon a Asiria. Tomea ekapolon a Asiria ngasigerea nakaalak alo Lakich toloto akitijwore Esekia alo Yerusalem. Ngikapolok lu atupito ngesi nguuni kesi araakasi ngikarikok a ngasigerea kanguna. Ani enangunete kesi Yerusalem, pena lorot lo edonyeenere ngiworui, ni eyei echilet lo eleleunitotor ngakipi anatapar ana alokuju. Apot kesi tomeasi itwaan anyarare Esekia. Pot ngitunga nguuni akisiriam kesi. Ngitunga ngulu kesi Eliakim lokookeng a Ilikia, lo aweikinit akai a ekapolon, ka Chebina lo arai ekegiran a ngikesio, ta Yoa lokookeng a Asapu lo aweikinit ekimar. Tolimok epei a ngikarikok a ngasigerea a Asiria kesi tama, “Tolimokisi Esekia kona, ‘Ebala ekapolon lo eyenikinitae, lo erai ekapolon a Asiria, nyooni mono igieno iyong? Itamit iyong atamar itemunete ngakiro make ajwonu a ngasigerea ka ekileenu kech a? Ngae tokona igieno iyong, kingeritor ayong? Abe itamit iyong atamar kingarakinete ngitunga a akwap a Misiri, nakaneni ikoni ibore ngini alemun akasirimait kichogaa. Ebil akasirimait ngina torem akan kon. Ikoni ekapolon a Misiri neni kigienokin itwaan ngesi.’ ” Torubak ekarikon a ngasigerea a Asiria ngolo iruoro ebala, “Kori robo isaki iyong alimokin ayong atamar igieno iyong Ekapolon Akuj na erai Akuj kon? Esekia ngesi enyasuni ngikenoi ka ni ipeyonokinere Ekapolon Akuj, na alimokinea ngitunga a Yuda ka Yerusalem atamar kilipa alokeno alo ipeyonokinere Akuj alo eyei Yerusalem bon. Kibolokin ayong ka iyong alokiro a ekapolon a Asiria. Kamekini ayong iyong ngangolei ngabunge ngaarei erai kianyu iyong ngikiliok ngabunge ngaarei lu edokete tometa! Kidwangi iyong tani ekarikon a ngasigerea a Asiria loochi lo nyeyenikinitae. Tani ikoni neni, abe eringa iyong isaki Ngimisiri tomeut ngaurukukui na irito ngangolei ka ngikadokak ngangolei nikon! Esibit iyong aremit ayong akwap kon ketiji iyong pekengarakinit Ekapolon Akuj a? Ekapolon Akuj alope kalimokini ayong tama, ‘Tonyou torem akwap naga sodi kinyasu.’ ” Apot Eliakim, ka Chebina, ta Yoa tolimokis ekarikon lo a ngasigerea a Asiria ngolo tamasi, “Ekapolon, kisuruoroe kare sua a Ngaramaik, kipupi sua. Nyiiruor Ngaeburaniae kainyo epupokinito ngitunga lu eyakasi nawas a ere daang.” Tatachu ngesi tama, “Itamito esi atamar kameunit ayong ekapolon a Asiria nikus ka ekapolon kus bon, alimokin ngakiro nugu a? Mam jik. Esuruori ayong tani ngitunga lu edokito ngawasea, lu enyamete ngachin kech, tamata ngakul kech loger kus.” Abu ekarikon a ngasigerea ngolo tonyou towo kirema a Ngaeburaniae tama, “Topupokisi ngakiro a ekapolon alo eyenikinitae, alo erai ekapolon a Asiria! Ebala ekapolon kona, ‘Warasi Esekia nyikingal, nyikiyuuni ngesi esi. Warasi nyiichamut ngesi kimaimai esi kigienokinos Ekapolon Akuj. Nyiitamasi kori kiyuuni esi Ekapolon Akuj. Nyiitamasi tani nabo kori iratakini ngesi ngasigerea nakosi a Asiria nyeelemasi ere kus.’ Nyiirasi ngakiro a Esekia. Kidungokinit esi ekapolon a Asiria atamar topudutu alore esila, toliworos ngitunga kang. Kichamakinio esi inyamete ngamusabib alokito a ngimusabib alu eraakasi ngikus a ngikulepek. Tanyama ngameyana alomeyana alu eraakasi ngikus a ngikulepek, sodi nabo tamata ngakipi anakare ana eraakasi ngakus a ngikulepek. Tanang abuni ayong katoriko esi ketolom nakwap na ikwaan ka nakus. Eyakasi akwap ngina ngamanat a ngimusabib alu epureenere emuna, toyakas ngakiria na ipoore ngamugati. Erai akwap na eyakasi ngikito a akimiet, ka akimiet, ta akimiet a ao. Ani kisubakis esi na edungunit ngesi, nyitoakete esi, pearai iyarete. Warasi Esekia nyikingal esi ani ebalar, ‘Kiyuuni ngoni Ekapolon Akuj.’ Apot kolong sek ngakujo a ngibukui aluche toyuut ngakwapea kech alokapolon a Asiria a? Nyaanu tokona ngakujo a Amas ka Aripad? Nyaanu ngakujo a Separipaim, ka Ena ta Ipa? Eyei kolong itwaan abu toyuu Samaria a? Ori kolong ayuunea tani apei a ngakujo kanguna akwap keng ani a ekapolon a Asiria? Ani nyo tokona itamitotor esi atamar eyuuni Ekapolon Akuj Yerusalem?” Kililinga ngitunga chek emam akiroit atachakis ngesi, kainyo adungunit ekapolon Esekia ebala, “Nyiitachakis ngesi akiroit.” Apot Eliakim, ka Chebina, ta Yoa tochilichilaasi ngiworui kech ialolongete, toloto alimokin ekapolon Esekia ngakiro na alimu ekarikon a ngasigerea a Asiria. Ani napei eirarea ekapolon Esekia ngakiro na esisaunete kesi, tochilichilia ngiworui keng ialolongi, tanap ngiguniae. Abu ngesi tolot kai a Akuj. Abu ngesi tomea ngitunga nia ekadwaran alo anyaritae Isaya, lokookeng a Amos. Ngitunga ngulu kesi Eliakim lo aweikinit akai a ekapolon, ka Chebina lo arai ekegiran a ngikesio, ta ngimurok a Akuj luapolok. Anapito kesi dang ngiguniae. Tolimok Esekia kesi atamar tolimokis Isaya kona, “Erai akolongit naga aka ngichan. Kirirao sua nabo kirumito ngileech. Kikok sua aberu na adol akidoun nakaneni alilimiyo emam kona idinyakini. Ameu ekapolon a Asiria ekarikon a ngasigerea keng akimeny Akuj na eyari. Agasi atamar kiira Ekapolon Akuj na erai Akuj kon ngimeny ngulu sodi kirira ngitunga lu alimunete. Kilip robo Akuj kotere ngitunga yok lu epuunosi.” Ani iirari Isaya ngakiro a ekapolon Esekia, tolimok ngitunga ngulu tama, “Tolimokisi ekapolon kus kona, ‘Ebala Ekapolon Akuj iyong, wara Ngisiria nyikitubul esi ani ebalatar nyikiyuuni iyong Ekapolon Akuj. Kingolik a, esiirari ayong Ekapolon Akuj ekapolon a Asiria ngakiro na itorotokinete ngesi tobong nakwap keng. Ani enangi inaa, etaari ayong Ekapolon Akuj ngesi ngitunga.’ ” Abu ekarikon a ngasigerea a Asiria kiira atamar arotoki ekapolon a Asiria alo Lakich, alot akitijwore ngitunga a ere a Libina alo idunyatar Lakich. Tolot ekarikon a ngasigerea ngolo inaa aanyun ekapolon keng. Apot Ngisiria kiirasi atamar ebunit ajore a Ngimisiri akitijwore kesi, erikit ekapolon a Sudan lo anyaritae Tiriaka. Ani iirari ekapolon a Asiria ngakiro nguna, nak itwaan abarua na einari Esekia lo arai ekapolon a Yuda. Egiritae abarua ngina ngakiro nugu, “Kilimok iyong Akuj na igieno iyong atamar nyekedwangi ayong iyong, nakaneni wara ngakiro nguna nyikingalata iyong. Iira iyong ngakiro na esubeenea ekapolon a Asiria akwap nacha esaki ngesi akinyasun. Esibit iyong ipuun iyong a? Enyasunete kolong taapaakosi ngirerea a Gosan, ka Aran, ka Resep, sodi taara ngitunga a Beseden lu alomito Telasar. Emam ngakujo kech na apot toyuut kesi. Nyaanu ngakujo a ngirerea alu enyaritae Amas, ka Aripad, ka Separipaim, ka Ena ta Ipa?” Kidiau ekapolon Esekia abarua alotunga alu ameunitae, kisoma. Ani erumor tolot kai a Akuj, kiwaak abarua ngaren Ekapolon Akuj, sodi kilip ebala, “Ekapolon Akuj na irai Akuj a Ngisirael. Ibooyi iyong alokicholong alo eyei kidiama ngiborei lua ngabeben. Iyong bon irai Akuj, ipolokinit ngapolosio daang a ngakwapin. Isubakini kolong iyong akwap ka adis. Kingolik tokona Ekapolon Akuj ngakiro na esubasi anikosi. Kiira ngakiro daang na iruoro Senakerib kimenyi iyong Akuj na iyari. Kiyeni sua daang atamar enyasut ngikapolok a Asiria ngibukui lukaalak kidongo ngakwapea kech esil. Enoma kesi ngakujo a ngibukui kangulu. Pearai tani ngakujo nguna ngakujo dir, araakasi ngakito ka ngamoru na esubunitae eraakasi ngakisikwaanet a ngakujo. Tokona Ekapolon Akuj na irai Akuj kosi, toyuunae sua ani a Ngisiria sodi toyeneta ngibukui daang a ngakwapin atamar iyong bon Ekapolon Akuj, irai Ekapolon Akuj.” Abu Isaya lokookeng a Amos, tomea itwaan alimokin ekapolon Esekia kona, “Ngakiro nugu kesi alimu Ekapolon Akuj na erai Akuj a Ngisirael. Eira ayong akilip kon nakilipitor iyong ayong kotere Senakerib ekapolon a Asiria. Senakerib, kikianatar iyong ngitunga a ere a Yerusalem kimenyarito. Esibit iyong ngae imenyi iyong ka akianar? Nyidodiuna iyong arimatoi anikang, ayong Akuj a Isirael na etaleuno. Imeuni iyong ngimeanara kon pot akiwoganakin ayong atamar ilema iyong ngimoru lukooyak daang alo Lebanon a ngaurukukui kon kadaang ana irito ngangolei. Iwoga iyong ibala itub alomoru kangulu ngichekereng lukooyak, ka ngikito a ngidomou luajokak, tanang kiding ngamon nikamutonon. Iwoga iyong ibala iboki ngakare sodi tamat ngakipi anakwapea anagelayek. Ibala nabo iyong epudaate ngasigerea kon angolol a Nili kitoono deu. “Nyiirara iyong nakanuan atamar arekini ayong nguna kolong a angorot a? Nakaneni asubak tokona ayong nguna daang. Kainakini kolong ayong iyong agogongu na ilochio ngirerea lu edukitoe ngawasea tosenokinos. Apalag ngitunga lu alomito inaa. Abulit kesi erakara. Ekote kesi nginyia lu eyakasi naro. Ekote nginyia lu erupunito alokidiama akai, lu etoon ekuwam lokariran a akide. “Nakaneni ayeni ayong ngakiro kon daang. Ayeni ngakiro na isubi iyong ka ni ilosi iyong. Ayeni ayong eger lo kingoikinitor iyong ayong. Eira ayong ngakiro a angoit kangina ka ngiwog kon. Akodakini tokona ayong ekodait lokume kon, sodi katoriko iyong tobongo kitor lorot lopei kolong iwapuuni.” Abu Isaya tolimok ekapolon Esekia tama, “Ibore en idodiuni ngakiro na esubakinosi. Ekaru logo, ka loche lo etupit logo, inyamete esi ageor na alomoding bon. Ani ekaru loche, itakinete esi ngamanat kus tolema. Itakinete esi ngimusabib tanyama ngamusabib. Ngitunga a Yuda lu idongete, isikokinosi kikokis nginyia lu ilijasi ngaten nalup, ani erumor tokoniut ageor. Epuunosi ngitunga ngiche a Yerusalem ka emoru a Sion, kainyo esaki Ekapolon Akuj nguna kikokis neni. “Ngakiro nugu kesi alimu Ekapolon Akuj kotere ekapolon a Asiria, ‘Nyelomuni ngesi lore kori nyegumi tani a emal a akau. Emam ngasigerea na etingito ngaupwala na eapuunete lore. Emam ngakatiputipui a ejie na edukio kiriama ere. Ebongori ngesi iwapit erot lopei ngoon abunio, eringa nyelomuna lore logo. Ayong Ekapolon Akuj ngesi alimu nguna. Eratakini ayong ere logo atoyuu kotere ekipur kang a ilope, ka ngakiro nakolong echikakini ayong ekasuban etich kang Daudi.’ ” Akolongit ngina nakwaare, tolot emalaikat a Ekapolon Akuj nadakar a Ngisiria taar ngasigerea 185,000. Ani akolongit nache iwalari, aperete kesi daang kaneni etoakito! Abu Senakerib lo arai ekapolon a Asiria tobongo nakwap keng tolot Ninewi. Akolongit apei na elipitor ngesi alokai a akuj keng ana enyaritae Nisirok, apot talokookeng ngiarei lu anyaritae Adiramelek, ka Chareser taara ngesi a ngilengea kech, todokis kesi toloto nakwap a Ararat. Abu lokookeng eche lo anyaritae Esaradon kilunyokin nados keng toliwor ekapolon. Ngirwa lupei ngulu, todeakakin ekapolon Esekia tonyou akitu. Tolot ekadwaran a Akuj Isaya lokookeng a Amos aanyun ngesi tolimok tama, “Ebala iyong Ekapolon Akuj tosubak ibore daang kitiriyan kainyo nyengalekini edeke kon. Tosubakin kiteu akitu.” Torei Esekia tokienyik esiep a akai kilip tama, “Ekapolon Akuj, kitam atamar asub ayong etich kon ewapit ngakiro kon atarai lokamuno iyong, nabo asak ayong ngirwa daang akisub ngakiro na isaki iyong.” Abu Esekia kikalou lokojokon. Torotok Isaya ani a Ekapolon. Ani eringa ngesi nyitoro kiding alaar a akai a ekapolon, tolimok Ekapolon Akuj ngesi tama, “Tobongo tolimok Esekia lo erai ekapolon a ngitunga kang kona, ‘Ayong Ekapolon Akuj na arai Akuj a apaakon Daudi, eira akilipit kon nabo engolik ngakiyo kon. Etangalekini ayong edeke kon, ani akwaar na a ngauni, ilosi iyong kai kang. Kemiekini ayong iyong toyar ngikaru ngiche lu eraakasi ngitomon ka ngikan. Kayuuni ayong iyong ka ere lo a Yerusalem logo ani eyei ekapolon a Asiria. Eratakini ayong ere logo kotere ekipur kang a ilope, ka ngakiro nakolong echikakini ayong ekasuban etich kang Daudi.’ ” Ani erumor tolimok Isaya ngimeanara a ekapolon tama, “Yautu atap a ngameyana. Tolemutu atap ngina tomietakisi lolepunait, sodi tangalek edeke keng.” Kingit ekapolon Esekia Isaya tama, “Nyooni idodiuni atamar itangalekini Ekapolon Akuj edeke kang ani akwaar na ngauni apedori ayong alosit kai a Akuj?” Tatachu Isaya tama, “Ibore en kidodikini iyong Ekapolon Akuj toyenea atamar irichakini ngesi ngakiro nakichikak iyong. Tokona a, isaki iyong etorube a ngadoket kiyoto ngaren ngakikalamikinet ngatomon kori kiyoto naabor ngakikalamikinet ngatomon?” Tatachak Esekia tama, “Ebeben akisiyotoor etorube ngaren ngakikalamikinet ngatomon! Kisiyotoo naabor ngakikalamikinet ngatomon.” Kilip Isaya Ekapolon Akuj. Abu Ekapolon Akuj kisiyotoo etorube naabor ngakikalamikinet ngatomon anadoket ana kolong aduki ekapolon Aas. Ngirwa lupei ngulu, kiira ekapolon a Babilonia lo anyaritae Melodak Baladan lo arai lokookeng a Baladan atamar adeakakin ekapolon Esekia. Abu ngesi tomea ngitunga inasi Esekia abarua ka ainakinet. Kipeyou Esekia ngipeyok kidodik ebari keng. Kidodik tani ngakwangae ka egolit, ngikito lu itukukunyete akimuj, ka ngamieta nakaakunyok ta ngiboro keng daang a ejie. Emam ekeru keng tani epei lo abu kidong nyidodikina ngesi kesi. Kidodik ngesi kesi tani ngiwaitin daang a akwap keng. Sodi tolot ekadwaran a Akuj Isaya nia ekapolon Esekia kingit tama, “Aliwae eponitotor ngitunga lugu? Abalasi kesi iyong ai?” Tatachak Esekia tama, “Eponito anakwap anakalonan noi enyaritae Babilonia.” Kingit Isaya ngesi tama, “Nyooni aanyungarete kesi alokai kon?” Tatachak Esekia tama, “Aanyungasi kesi ibore daang. Emam ibore daang ni eyei lokerui ni nyidodikina ayong kesi.” Abu Isaya tolimok ekapolon tama, “Kiira akiroit a Ekapolon Akuj. Kingolik a, enangi akwaar na elemarere ibore daang alokai kon, ka ngiboro lukolong ekachete taapaakon napei kolong jik tanang akolongit naga. Iritorio ngiboro ngulu daang Babilonia. Emam ibore idongi. Erikio ngalesea na iyanatar iyong ngache toliworos ngikiliok lu idongitoe lu esubete etich alokai a ekapolon a Babilonia.” Abu Esekia tolimok Isaya tama, “Ejok akiroit a Ekapolon Akuj na ilimu iyong.” Etamit ngesi abala, “Abe ejok bo erai kemin ekisil kiratakin ibore daang ngirwa daang lu ayarea ayong.” Ngakiro nache daang asubi ekapolon Esekia, na ikote na ajwonu keng, ka eger lo adukio abwel a ngakipi ani erumor tobokak akipany na echiluni ngakipi lore, igiritae nakitab na enyaritae Ngakiro a Ngikapolok a Yuda. Totoan Esekia, kilunyokin lokookeng lo anyaritae Manase nados keng toliwor ekapolon. Araakasi ngikaru a Manase ngitomon ka ngiarei na aliworor ngesi ekapolon a Yuda. Toliwor ngesi ekapolon alo Yerusalem a ngikaru a ngitomwon-kan ka ngikan. Anyaritae itiokeng Episiba. Tosechak Manase Ekapolon Akuj, kiwap ngakiro nakakadakinak a ngibukui alusek etwarakini Ekapolon Akuj anakwap na alooso Ngisirael ngaren. Toduk ngesi nabo ngakais nakolong abwangabwangaari apakeng, na araakasi ngakilipet ngakujo nagelayek. Toduk ngesi ngikenoi lu ilipere Baal. Tosubak ngesi ekisikwaane a akuj anaberu enyaritae Achera, loger lokolong asubi ekapolon a Ngisirael lo anyaritae Aab. Kilip Manase tani ngikanyer. Toduk ngesi ngikenoi lu ilipitere ngakujo nagelayek tooma kai a Akuj, nikolong abala Ekapolon Akuj ejoikinit kelipere ngesi. Todukok ngesi ngikenoi lu ilipitere ngikanyer nalaarin naarei a akai a Akuj. Kipeye lokookeng erai akipeyos na inomio. Adwareene ngesi tarai emuron. Aanyuununi ngesi ngikekeriak ka ngimurok. Tosechak ngesi Ekapolon Akuj noi kitongo kitilili. Kiwaak ekisikwaane a akuj anaberu anabe Achera tooma kai a Akuj, nikolong alimokini Ekapolon Akuj Daudi ka lokookeng Solomon tama, “Alokai kana, kanege alo Yerusalem, ngesi aseu ayong anakwap kadaang ana ngitela alutomon ka ngiarei a Ngisirael atamar kelipere ayong. Ani kiwap Ngisirael ngakiro daang na adung ayong kirichakis ngitalio daang lukolong etaanyuni ekasuban etich kang Musa kesi, nyemiekini ayong kesi itwarakinio anakwap ana kolong ainakini ayong taapaakech.” Nakaneni nyiwapa ngitunga a Yuda ngakiro a Ekapolon Akuj. Abu Manase torikok kesi akisub ngasechesea naaronok noi na idwangito na asubete ngibukui lu etwarakini Ekapolon Akuj anakwap na alooso Ngisirael ngaren. Tolim Ekapolon Akuj ngakiro na etorunete nia ngikasubak etich keng alu araakasi ngikadwarak tama, “Asub ekapolon Manase ngakiro nakikadakinete ikote nugu, ngakiro naaronok noi idwangito tani nakolong asubete Ngikanaan, nabo arikokini ngesi ngitunga a Yuda nakisech kotere ngakujo nasubuna. Kotere ngakiro nguna, ayong Ekapolon Akuj na arai Akuj a Ngisirael, ayauni ayong ngakiro naaronok Yerusalem ka Yuda, toliwor itwaan daang ni iirari, ebuli kirakar. Erirae ayong Yerusalem loger lo eriraa Samaria. Erirae loger lo eriraa Aab lo arai ekapolon a Isirael ka ngalesea keng. Ani ngitunga a Yerusalem, amiatari miet, kidong Yerusalem eseg loger a atubwa anabeleny ana isutario tobuburiarae. Aisikini ayong ngitunga lu idongete sodi epoto ainak ngimoe kech, lu idwangete kesi tolemasi akwap kech. Asubea ayong ngitunga kang ngakiro nguna kainyo kasechakis kesi ayong ayong ketongoa ketilileta napei kolong apudunito taapaakech alo Misiri tanang akwaar na tokona naga.” Taar Manase ngitunga lukokaalak lupeasechito tanang ngaakot eleleunete alowae a epei a Yerusalem toporut alowae aloche. Asubi ngesi nguna kimorikin ka ngakiro na arikokinea ngesi ngitunga a Yuda akilipit ngakujo nasubuna, tosechakineta kesi Ekapolon Akuj. Ngakiro nache daang asubi Manase, imorikina aapei ka ngasechesea na asubi ngesi, igiritae nakitab na enyaritae Ngakiro a Ngikapolok a Yuda. Totoan Manase tonukakinae mana a akai a ekapolon, na arai amana a Usa. Abu lokookeng lo anyaritae Amon kilunyokin nados keng toliwor ekapolon. Araakasi ngikaru a Amon ngitomwon-arei ka ngiarei na aliworor ekapolon a Yuda. Toliwor ngesi ekapolon alo Yerusalem a ngikaru a ngiarei. Anyaritae itiokeng Mechulemes, nakookeng a Arus alo enyaritae Yotiba. Tosechak ngesi ekapolon Akuj loger a Manase alo arai apakeng, sodi kilip ngakujo nasubuna nasek elipit apakeng. Tonger ngesi Ekapolon Akuj na erai Akuj kata apaakeng, sodi towou akiwap ngakiro na adungunit Ekapolon Akuj. Apot ngikarikok a ngasigerea a Amon totuko, sodi taarakis ngesi kai keng. Apot ngitunga a Yuda taara ngitunga lu aarete Amon, sodi kitiliwosi lokookeng lo anyaritae Yosia ekapolon. Ngakiro nache daang asubi Amon igiritae nakitab na enyaritae Ngakiro a Ngikapolok a Yuda. Tonukakinae Amon naliel na ayei mana a Usa. Abu lokookeng kilunyokin nados keng toliwor ekapolon. Araakasi ngikaru a Yosia ngikan-kauni na aliworor ekapolon a Yuda. Toliwor ngesi ekapolon alo Yerusalem a ngikaru a ngitomwon-uni ka epei. Anyaritae itiokeng Yedida, nakookeng a Adaya, alo a ere a Bosikas. Tosub Yosia ngakiro na ajoikinito Ekapolon Akuj. Kiwap ngesi ekitetemes a apaakeng Daudi, kiwap ngitalio a Akuj daang lokojokon. Ekaru lo a ngitomon ka ngikan-kauni lo araakar Yosia ekapolon, tomea ngesi ekegiran a ngikesio lo anyaritae Chapan, lo arai lokookeng a Asalia, tarai etatait a Mechulam. Tomea ngesi ekegiran keng ngolo kai a Akuj idesikinit ebala, “Kape Lomuron Loapolon a Akuj lo enyaritae Ilikia kitolimok iyong etiae a ngaropiyae ana ayaun kai a Akuj. Kitolimok ngesi etiae a ngaropiyae ana ediaunete ngimurok lu esubete etich alokidor a akai a Akuj, kidiaut ngitunga. Tolimok ngesi nak ngaropiyae nguna ngitunga lu eweikinito abongonokin akiduk akai a Akuj. Etacheta kesi ngaropiyae nguna ngikadukok a ngakito, ka luche, ka lua ngamoru, ka akigiel ngakito ka ngamoru na edukere akai a Akuj. Eraakasi ngitunga lu eweikinito etich ngolo lu emunoi noi. Kotere ngakiro nguna, nyechamit kesi etamario kidodiut ibore daang ni asubeta kesi ngaropiyae.” Tolimok Chapan Ilikia ngakiro daang na adungunit ekapolon atamar tosubae. Abu Ilikia tolimok Chapan tama, “Aanyu ayong akitab a Etal alokai a Akuj.” Nak Ilikia Chapan akitab, sodi kisomak Chapan. Ani erumor tolot Chapan nia ekapolon tolimok tama, “Alemut ngikasubak etich kon ngaropiyae na ayakasi kai a Akuj ainakis ngitunga lu eweikinito akiduk.” Ani erumor tolimok Chapan ekapolon tama, “Akitab ache naga kainakini ayong Ilikia.” Abu ngesi kisomak akitab ngina irema, topupokinite ekapolon. Ani iirari ekapolon ngakiro a etal na esomao anakitab, tochilichilia ngiworui keng enyunyura. Abu ekapolon tanyara ngitunga lugu, Ilikia lo arai emuron a Akuj, ka Aikam lo arai lokookeng a Chapan, ka Akibor lo arai lokookeng a Mikaya, ka Chapan lo arai ekegiran a ngikesio ta Asaya lo arai ekasuban etich a ekapolon, todungok kesi tama, “Kapesi tanyarata Ekapolon Akuj kotere ayong ka ngitunga a Yuda daang, toyena eger a ngakiro a akitab kana. Kingoikinit ngoni Ekapolon Akuj kainyo nyesuba taapaayok ngakiro na igiritae nakitab naga atamar ejoikinit esubio.” Apot Ilikia, ka Aikam, ka Akibor, ka Chapan ta Asaya toloto aanyun aberu na anyaritae Ulida. Arai ngesi akadwaran na alomit lowae a Yerusalem lo aringa edukio. (Lokile keng lo anyaritae Chalum, lo arai lokookeng a Tikipa tarai etatait a Araas, ngesi aweikinit asaduku na a ngiworui a akai a Akuj.) Kisisakinae Ulida ngakiro na asubakinosi, sodi tolimok ngesi kesi tama, “Ebala Ekapolon Akuj, na erai Akuj a Isirael kona, ‘Tolimokisi itwaan ni kimeuni esi ni ayei ayong atamar ebala Ekapolon Akuj kona, kingolik a, ayauni ayong ngakiro naaronok nakwap naga ka lotunga keng, ayauni ngilam lu igiritae nakitab na esoma ekapolon. Kangero kesi ayong epeyonokis ngakujo ngache ngakipeyos. Kotere ngakiro nguna, ketongoa kesi ayong ketilileta a ngakiro ana esubete. Angoik ayong Yerusalem anyunyurikin, emam kona etubor angoit ngina. Ngakiro nguna kesi alimuni ayong Ekapolon Akuj na arai Akuj a Isirael, kotere ekapolon a Yuda. Iirari iyong ngakiro na igiritae nakitab, sodi tolung akisech kon ka akitiditeun alongaren kang. Ibu tochilichilaa ngiworui kon kigor, na iirarea atamar ayauni ayong ngakiro naaronok nakwap naga ka lotunga keng. Idongi akwap naga esil, toliwor ngesi elimito ngitunga na ilamatar. Nakaneni eira ayong ngakiro kon. Kotere ngakiro nguna, kingolik a, nyianyungari iyong ngakiro naaronok ayauni ayong nakwap naga. Epote kitoana iyong kerumor. Kemiekini ayong iyong totoan akaalimon.’ ” Apot kesi yaut ngakiro nguna nia ekapolon Yosia. Tanyarau ekapolon Yosia ngikarikok a Yuda daang ka lua Yerusalem ni ayei ngesi. Kirukosi kesi kai a Akuj, aapei ka ngimurok, ka ngikadwarak ta ngitunga luche daang, luuchik ka luapolok. Towo ekapolon alongaren kesi daang, kisomak irema epupete kesi ngakiro daang a akitab a achamunet ana aanyunio alokai a Akuj. Towo ekapolon alo diyete apir sodi tachamakin ka Ekapolon Akuj atamar ewapi ngakiro keng. Tacham ngesi a etau keng ka akiyar keng daang atamar erichakini ngitalio ka ngakiro daang na edungunit Ekapolon Akuj. Tacham ngesi atamar asubi ngakiro daang a achamunet loger lo igiritere nakitab. Apot ngitunga daang tolimut atamar kirichakini achamunet. Ani erumor kidesik Yosia Ilikia lo arai emuron loapolon a Akuj, ka ngimurok lu engarakinito ngesi, ka ngasigerea na eteete ekidor a akai a Akuj, atamar kipudut alokai a Akuj ngiboro daang lusek elipitere Baal, ka akuj naberu enyaritae Achera ta ngikanyer. Kinom ekapolon ngiboro ngulu daang anikalapatan ere alo diyete adipo a Kidiron, ani erumor tama yaasi ekuron Besel. Talachak alotich ngimurok daang lukolong etaleunete ngikapolok a Yuda toliworos ipeyoete ngakipeyos alokenoi a ngakujo anagelayek alorerea a Yuda ka ngakwapea na edunyatar Yerusalem. Talachakinae alotich tani ngimurok daang lu epeyonokinete Baal, ka akolong, ka elap, ka ngitopon ta ngikanyer. Tolem ngesi ekisikwaane a akuj anaberu enyaritae Achera alotooma akai a Akuj, kipudo nikalapatan a Yerusalem yaa nadipo a Kidiron. Abu kinom ani erumor kirie ekuron keng toliwor apua, sodi kielak nalielin a ngitunga alu nyeyenikinitae. Tobwangabwanga ngesi ni alomito ngitunga lumalaae alotooma akai a Akuj. (Neni ngesi adonyioto ngaberu ngiworui lukooyak elipitere Achera.) Ngimurok a Akuj lu ayakasi lorerea a Yuda, yau ngesi Yerusalem. Anakwap kadaang etia ni etia, kinyasu ngesi ngikenoi lusek epeyeeneto kesi ngakipeyos. Tobwang ngesi ngikenoi tani lu etalekinitoe ngipean a ngaanei. Ayakasi ngikenoi ngulu diyete ekidor lo aduki ekapolon a ere lo anyaritae Yochua. Ani enanguni itwaan lokidor lo alokinga elomuni lore, ebakit ekidor lo aduki Yochua alokedieny. Peachamakinitae ngimurok a Akuj epote lokeno a ngakipeyos alo Yerusalem, nakaneni apedorete kesi akinyam ngamugati na emam ekitoe lo itubui, na araakasi ngaka ngimurok alurukitos kech. Kinyasu ekapolon Yosia tani Topes, ni arai ngesi elipitere ngakujo nagelayek anadipo a Inom. Ekokini ngesi neni tongop kona ipeye itwaan lokookeng kori nakookeng erai akipeyos na inomio ani akuj ana enyaritae Molek. Tobwang ngesi ngakisikwaanet a ngangolei na echietae, nakolong etaleunete ngikapolok a Yuda toliworos ilipitere akolong. Kinom ngesi ngaurukukui na irito ngangolei, na elipitere akolong. (Ewaakinitae ngakisikwaanet nguna ka ngaurukukui nalaar a akai a Akuj, diyete ekidor. Aapi neni ani alomit Nasan Melek lo edongitoe.) Abu Yosia tobwang ngikenoi lu adukete ngikapolok a Yuda kidiama akai a ekapolon, kidiama tani amaniyat na apereene ekapolon Aas. Tobwang ekapolon Yosia aapei ka ngikenoi lu aduki ekapolon Manase nalaarin naarei a akai a Akuj. Tobwangabwanga ngesi ngikenoi kiela sodi kimasak nadipo a Kidiron. Kinyasu Yosia ngikenoi lusek aduki ekapolon Solomon kide Yerusalem, kuju emoru a ngikito a akimiet. Araakasi ngikenoi ngulu lukilipet ngakujo nasubuna nakikadakinete, na anyaritae Asitarite na arai akuj naberu a Ngisidon, ka Kemoch na arai akuja Ngimoab ta Molek na arai akuj Ngiamon. Tobwang ekapolon Yosia ngapirio a ngamoru kiela, totubo akisikwaanet a akuj anasubuna anaberu enyaritae Achera. Kilelebik ngesi ngamoru nikolong awaatar ngapirio nguna ka akisikwaanet a akuj anasubuna. Tobwang ngesi tani nikolong elipitere alo Besel, ni adukokini ekapolon Yeroboam lo arai lokookeng a Nebat. Yeroboam ngolo ngesi lo arikokini Ngisirael nakisech. Touko Yosia ekeno, tobwang ngamoru keng kiela sodi kirie toliwor apua. Kinom ngesi tani akisikwaanet a akuj anasubuna enyaritae Achera. Ani erea Yosia, taanyunga ngalielin ngache alomukura. Tomea ngesi ngitunga akutun ngakoyo analielin kanguna, kinomae alokeno a ngakipeyos. Kinyasu ngesi ekeno a eger kangolo, tosub nakolong adwari sek ekadwaran akolongit na esukukuu na awaar ekapolon Yeroboam alo diyete ekeno a ngakipeyos. Torei ekapolon Yosia sodi kingolik aliel a ekadwaran alo kolong adwari ngakiro nguna. Kingis ngesi tama, “Aka ngae aliel ngin?” Tatachakis ngitunga a Besel tamasi, “Erai aliel a ekadwaran alo abuni alo Yuda, todwar ngakiro na tokona isubakinea iyong ekeno logo.” Tolimok Yosia kesi tama, “Nyiitap aliel ngina. Nyiikutut ngakoyo keng.” Apon ngakoyo keng kimiekinae. Kimiekinae tani ngakoyo a ekadwaran alo abuni alo Samaria. Alore kadaang a akwap a Isirael, tobwang ekapolon Yosia ni elipitere ngakujo nagelayek, ni adukete ngikapolok a Isirael, kitongoeta Ekapolon Akuj kitilileta. Tosubea ngesi ngikenoi ngulu daang ngakiro nakolong asubi alo Besel. Taar ngesi ngimurok a ngakujo anagelayek daang alokenoi alu asubeta kesi etich, sodi kinom ngakoyo a ngitunga alokenoi kadaang. Ani erumor tobongo ngesi Yerusalem. Kidesik ekapolon Yosia ngitunga daang tama, “Tosubakisi esukukuu a Adeparet idodikinitotor Ekapolon Akuj na erai akuj kus arimatoi loger lo igiritere nakitab na achamunet naga.” Emam Adeparet ache na ikoni naga na asubakis ngikapolok ngiche a Isirael kori a Yuda, akisiakin napei kolong apolokinitotor ngikatubok ngakiro akwap. Nakaneni ekaru lo a ngitomon ka ngikan-kauni lo araakar Yosia ekapolon, apon esukukuu a Adeparet tosubakinae alo Yerusalem. Ani kona asakea ekapolon Yosia akiyookin ngitalio lu egiritae nakitab na aanyuni emuron loapolon anyaritae Ilikia alokai a Akuj, abu ngesi tolema alo Yerusalem ka ngiwaitin luche daang a Yuda, ngikadwarak ka ngimurok a ngipean daang, ka ngakujo a ngawiyei, ka ngakujo nasubuna ta ngiboro luche daang elipitere ngakujo nagelayek. Emam ekapolon eche nakanuan lo ekoni ngesi. Asubi ngesi etich a Ekapolon Akuj a etau keng kadaang, ka ngitamen ta ngikilinga, iwapit ngakiro a etal a Musa daang. Nakaneni emam nabo ekapolon eche ekok ngesi napei kolong ngina. Angoikinit sek Ekapolon Akuj ngitunga a Yuda anyunyurikina kotere ngakiro na asubi ekapolon Manase. Abu angoit ngina towou atubor. Tolim Ekapolon Akuj tama, “Asubea ayong Yuda ngakiro na asubea Yerusalem. Etwarakini ayong ngitunga a Yuda alongaren kang. Angeri ayong Yerusalem lo erai ere lokolong aseuni ayong. Angeri tani akai a Akuj, ni erai ngesi kolong alimuni ayong atamar toliwor ni ilipeenere.” Ngakiro nache daang asubi ekapolon Yosia, igiritae nakitab na enyaritae Ngakiro a Ngikapolok a Yuda. Ngirwa lu araakar Yosia ekapolon, abu ekapolon a Misiri lo anyaritae Neko, abu torik ajore tanang nangolol a Eupurate, esaki akingarakin ekapolon a Asiria. Tasak ekapolon Yosia akiratakin ajore a Ngimisiri alo Megido, sodi taarae ngesi alojie kaneni. Kiwaakis ngikarikok a ngasigerea akwaan keng naurukuk na irito ngangolei, yaasi Yerusalem tonukakinae nalielin a ngikapolok. Araakasi ngikaru a Yoaas ngitomwon-arei ka nguuni na aliworor ekapolon a Yuda. Abu ngesi toliwor ekapolon alo Yerusalem a ngilapio a nguuni. Anyaritae itiokeng Amutal, na arai nakookeng a Yeremia alo a ere alo enyaritae Libina. Kiwap ngesi ekitetemes kata apaakeng tosechak Ekapolon Akuj. Asaluni apolou keng ngirwa lu arikio ngesi ekapolon a Misiri lo anyaritae Neko alo Ribila. Ayei Ribila nakwap a Amas. Abu Neko kitubuk ngitunga a Yuda echur lo arai ngakiloi 3,400 a akwangat, ka ngakiloi ngatomwon-uni ka ngoomwon a egolit. Kitiliwo ekapolon Neko lokookeng a Yosia lo anyaritae Eliakim ekapolon a Yuda, kilunyokin nados a Yosia. Kiloch Neko ekiro a Eliakim toliwor Yeoyakim. Toriko Neko Yoaas Misiri totoan kaina. Todeku ekapolon Yeoyakim ngaropiyae alotunga, itemem ka etiae a ebari kech. Ekokini ngesi neni esaki taanyunea ngaropiyae na itemokino ebukere echur lo asaki ekapolon a Misiri. Araakasi ngikaru a Yeoyakim ngitomwon-arei ka ngikan na aliworor ekapolon a Yuda. Abu ngesi toliwor ekapolon alo Yerusalem a ngikaru a ngitomon ka epei. Anyaritae itiokeng Sebida, na arai nakookeng a Pedaya alo a ere alo enyaritae Ruma. Kiwap ngesi ekitetemes kata apaakeng tosechak Ekapolon Akuj. Ngirwa lu araakar Yeoyakim ekapolon, torem ekapolon a Babilonia lo anyaritae Nebukadinesa akwap a Yuda. Apon kitingakinae Yeoyakim achamun apolou a Nebukadinesa a ngikaru a nguuni. Ani erumor tonger ngesi apolou a Nebukadinesa. Abu Ekapolon Akuj tomea ngajorei a Ngibabiloniae, ka Ngisiria, ka Ngimoab ta Ngiamon akitijwore Yeoyakim, kinyasut Yuda, loger losek alimunitor Ekapolon Akuj ani a Ngikadwarak alu araakasi ngikasubak etich keng atamar ekokini neni. Asubakinosi nguna ani adungunio Ekapolon Akuj, sodi kitwarakinea ngesi ngitunga a Yuda alongaren keng kotere ngasechesea na asubi ekapolon Manase, tarai cha noi kotere ngitunga lupeasechito daang lu aari ngesi. Towou Ekapolon Akuj arimakin Manase kotere ngakiro nguna. Ngakiro nache daang asubi Yeoyakim, igiritae nakitab na enyaritae Ngakiro a ngikapolok a Yuda. Totoan Yeoyakim sodi kilunyokin lokookeng Yeoyakin nados keng toliwor ekapolon. Nyepudoro nabo ekapolon a Misiri ka ngasigerea keng anakwap keng, kainyo abu ekapolon a Babilonia topolok akwap daang nakolong sek arai aka Misiri, napei anangolol a Eupurate tanang lowae lo alokwap Misiri. Araakasi ngikaru a Yeoyakin ngitomon ka ngikan-kauni na aliworor ekapolon a Yuda. Toliwor ngesi ekapolon alo Yerusalem a ngikaru a nguuni. Anyaritae itiokeng Neuchita, na arai nakookeng a Elinasan alo a ere a Yerusalem. Kiwap ngesi ekitetemes a apakeng tosechak Ekapolon Akuj. Ngirwa lu araakar ngesi ekapolon kesi aponeta ngasigerea a Babilonia kiriama Yerusalem. Ngikarikok a ngasigerea a Nebukadinesa kesi arikito ngajorei. Ngirwa lu eriamitere Yerusalem, bu ekapolon Nebukadinesa Yerusalem. Abu ekapolon Yeoyakin, ka itiokeng, ka talokaatokeng, ka ngikarikok a ngasigerea ta ngikasubak etich a akai a ekapolon, tajalakinos Ngibabiloniae. Ekaru lo a ngikan-kauni araakar Nebukadinesa ekapolon, abu ngesi toen Yeoyakin torik. Tolema ngesi ebari daang lo ayei kai a Akuj ka na ekapolon, yaa Babilonia. Tobwangabwanga Nebukadinesa ngiboro lu egolit daang lukolong asubakini ekapolon Solomon toliwor esubere etich alokai a Akuj. Ekokini ngesi neni loger lo adwaritere. Toen Nebukadinesa ngitunga a Yerusalem torik. Torik ngesi talokookeng a ekapolon a Yerusalem daang ta ngitunga lukajwok daang ngabunge ngatomon. Kitwarak tani ngikunonoi daang ka ngiketiakak ngasua, kimiek ngitunga lukebootok make alo Yuda. Toen Nebukadinesa Yeoyakin torik Babilonia, aapei ka itiokeng a Yeoyakin, ka ngaberu keng, ka ngikapolok keng luuchik ta ngitunga lu ayenikinitae alo Yuda. Kitwarak Yeoyakin ngitunga lukajwok daang toloto Babilonia. Araakasi ngitunga lukajwok ngulu daang ngabunge ngakan-kaarei, ka ngikunonoi abunget apei, imorikina aapei ka ngiketiakak ngasua. Araakasi kesi daang ngitunga lulangir tojwoko. Kitiliwo Nebukadinesa amae keng a Yeoyakin lo anyaritae Matania ekapolon a Yuda, sodi kiloch ekiro keng toliwor Sedekia. Araakasi ngikaru a Sedekia ngitomwon-arei ka epei na aliworor ekapolon a Yuda. Toliwor ngesi ekapolon alo Yerusalem a ngikaru a ngitomon ka epei. Anyaritae itiokeng Amutal, nakookeng a Yeremia alo a ere a Libina. Tosechak ekapolon Sedekia Ekapolon Akuj, loger losek asechea apakeng Yeoyakim. Tongoik Ekapolon Akuj ngitunga a Yerusalem ka lua Yuda noi, kitwarak kesi alongaren keng. Tonger Sedekia ekapolon a Babilonia lo anyaritae Nebukadinesa. Sodi Nebukadinesa kirukut ka ajore keng daang toremo Yerusalem akolongit na ngatomon a elap alo a ngitomon, a ekaru alo a ngikan-koomwon araakar Sedekia ekapolon. Toloma kesi nikalapatan ere toduko ngawasea kiriama ere. Kiriama kesi ere tanang ekaru lo a ngitomon ka epei lo araakar Sedekia ekapolon. Akolongit na ngikan-koomwon a elap alo a nguomwon a ekaru kangolo, ekaru lo aronia eron a akoro noi tongop ibore iche enyamio, apon ngawasea a ere tobwangae. Eriamito Ngibabiloniae ere, tani kikoni neni, apot ngasigerea daang tosiwa alore nakwaare. Ewapete kesi erot lo elosere mana a ekapolon, kitoro lorot lo imorikinit ngawasea naarei, sodi tamataros lowae a adipo a Yorudan. Nakaneni abu ajore a Ngibabiloniae kiritasi Sedekia, kirumut anaroatin ana eyakasi diyete Yeriko. Apot ngasigerea a Sedekia dang toisikis ngesi kaneni. Torikoroe Sedekia nia ekapolon Nebukadinesa kiriraa Sedekia kaneni. Taarae talokookeng itee ngesi. Ani erumor tolim Nebukadinesa atamar topuyokinae ngakonyen a Sedekia. Kitoen ngesi Sedekia ngitunga, torikoroe Babilon. Akolongit na ngakan-kaarei a elap alo a ngikan a ekaru alo a ngitomon ka ngikan-koomwon alo araakar Nebukadinesa ekapolon a Babilonia, abu Nebusaradan lo arai eketutukon a ekapolon ka ekarikon a ngasigerea toloma Yerusalem. Kinom ngesi akai a Akuj ka akai a ekapolon ta ngakais a ngitunga kadaang alu eyenikinitae kadaang alo Yerusalem. Tobwanga ngasigerea keng ngawasea a ere. Ngitunga daang lusek edongito, abu Nebusaradan torik Babilonia. Ngitunga ngulu kesi lu araakasi ngikunonoi, ka ngitunga lukolong asiyete toloto Lobabiloniae. Nakaneni kimiek ngesi alo Yuda ngitunga ngiche lu ebootonit, amam ibore kech ayei. Kitusub ngesi ngitunga ngulu etich anamanat a ngimusabib ka ngamanat nache. Tobwangabwangata Ngibabiloniae ngakitoropiet a ngasua ananyangayek ka ngaurukukui na ijukio na ayakasi kai a Akuj, ta atanki a asuat ananyang. Apot kesi yaasi asuat nanyang daang Babilon. Tolemasi kesi tani ngakalobochio nawadet ngalup, ka ngiboro lu ekuron lu itosegere ekeno a Akuj, ka ngiboro lu isutanarere ngataae, ka ngatubwae na iwoore ngaakot a ngibaren alu a ngakipeyos ka ngatubwae na inomere emitina, ta ngiboro luche a ngasua ananyangayek daang, lu esubere etich alokai a Akuj. Tolemasi kesi ibore daang ni arai ika egolit kori ika akwangat, imorikina aapei ka ngitubwae luuchik, ta ngabelekeke nalemet akim. Tolemasi ngiboro lua ngasua ananyangayek ngiarei lu kolong asubakini ekapolon Solomon kotere akai a Akuj. Araakasi ngiboro ngulu ngakitoropiet naarei, ka ngaurukukui na ijukio ta atanki naapolon. Apotiok ngiboro ngulu daang amam kon itemio. Ariyan ngakitoropiet naarei nguna. Arai aoyau a apei kech kadaang ngamitae ngakan-kauni, toyei asuat nanyang nakou a apir, na arai aoyau keng ngamitae 1.3. Asuat nanyang apolon daang, eriamito ngiriko a asuat ananyang lu etisiritoe a ekisikwaane a ngalam ana asubunitae anasuat ananyang. Abu Nebusaradan lo arai ekarikon a ngasigerea toen tani Seraya lo arai emuron loapolon a Akuj, ka Sepania lo arai emuron lo atupit Seraya ta ngikarikok a ngasigerea nguuni lu asubete etich alokai a Akuj, taraakas ngitunga lu eyenikinitae. Toriko Nebusaradan ngitunga ngulu daang. Toriko ngesi alore kangolo itwaan nisek arai ekarikon a ngasigerea, ka ngiketutukok a ekapolon ngikan lu ayakasi lore, ta itwaan ni atupit ekarikon a ngasigerea. Itwaan ngini ngesi aweikinit ngakiro a ekimar anasigerea. Toriko tani ngitunga ngiche ngitomwon-kapei lu ayenikinitae. Toriko Nebusaradan kesi nia ekapolon a Babilonia. Ayei ekapolon ngolo lore a Ribila lo ayei nakwap a Amas. Tolim ekapolon kaneni atamar kibungae kesi ani erumor taarae. Apon ngitunga a Yuda kikokinae erikio neni, kipudoroe anakwap kech. Abu ekapolon a Babilonia lo anyaritae Nebukadinesa kitiliwo Gedalia lo arai lokookeng a Aikam, ekapolon a Yuda. Arai Gedalia etatait a Chapan. Apon ngesi toseunae toweik ngitunga daang lu edongete na arikere luche Babilonia. Ani iirarete ngikarikok a ngasigerea ka ngasigerea na awounete akisil ka ekapolon a Babilonia, iirarete ngakiro nguna, toloto ni ayei Gedalia alo Misipa. Ngikarikok a ngasigerea ngulu kesi ta Ichimael lo arai lokookeng a Nesania, ka Yoanan lo arai lokookeng a Karea, ka Seraya lo arai lokookeng a Taniumes alo a ere a Netopa ta Yesania loa Maaka. Tolimok Gedalia kesi tama, “Nyieam ngikapolok a Babilonia. Toloma nakwap naga tosuba etich a ekapolon a Babilonia, nakaneni ejokearosi ngakiro daang anikus.” Nakaneni elap lo a ngikan-kaarei a ekaru kangolo, abu Ichimael lo arai lokookeng a Nesania, tarai etatait a Elichama kirukosi ka ngikiliok ngitomon Misipa kitijikis Gedalia sodi taara. Arai Ichimael eyenet a itwaan anisek arai ekapolon. Taar Ichimael tani Ngisirael ka Ngibabiloniae lu arukito ka Gedalia kaneni. Apot Ngisirael daang napei aluuchik tanang luapolok aapei ka ngikarikok a ngasigerea, tonyout toloto Misiri ani aemitotor Ngibabiloniae. Ekaru lo aliworor Epilimerodak ekapolon a Babilonia, abu ngesi kidodiu ajokis ani a ekapolon a Yuda anyaritae Yeoyakin, talachak ngesi alojela. Asubakinosi ngakiro nguna akolongit na ngatomwon-arei ka ngakan-kaarei a elap alo a ngitomon ka ngiarei, adaunet a ngikaru a ngitomwon-uni ka ngikan-kaarei, napei kolong erumiarere Yeoyakin torikoe. Tosubea Epilimerodak ngesi ngakiro naajokak, kidodik ngesi arimatoi noi akidwang ngikapolok luche daang aenikinitae ka Yeoyakin Babilonia. Apon tachamakinae Yeoyakin ebutori ngiworui lusek aenitere tanap lukeng a ilope. Ngirwa daang lu ayarea ngesi, toliwor imujeene alomeesa alo emujeenea ekapolon. Akolongit daang, ainanakinio ngesi ngaropiyae na egielea ibore ni esaki, ngirwa daang lu ayarea ngesi. Auriuni Adam Set. Touriu Set Enoch. Touriu Enoch Kenan. Touriu Kenan Maalalel. Touriu Maalalel Yared. Touriu Yared Enok. Touriu Enok Metusela. Touriu Metusela Lamek. Touriu Lamek Noa. Ayakasi Noa talokookeng nguuni lu anyaritae Chem, ka Ham, ta Yapes. Talokookeng a Yapes kesi Gomer, ka Magog, ka Madai, ka Yapan, ka Tubal, ka Mechek ta Tiras. Kesi eraakasi taapaakech a ngitunga alu elimokinitae ngirora kech. Ngalesea a Gomer kesi ngitunga a Achikenas, ka Ripas ta Togarima. Ngalesea a Yapan kesi ngitunga a Elicha, ka Sipania, ka Kupuro ta Rode. Talokookeng a Ham kesi Kuch, ka Misiri, ka Libia ta Kanaan. Eraakasi kesi taapaakech a ngitunga alu elimokinitae ngirora kech. Ngalesea a Kuch kesi ngitunga a Seba, ka Apila, ka Sabita, ka Raama ta Sabiteka. Ngalesea a Raama kesi ngitunga a Cheba ka Dedan. ( Ayei Kuch lokookeng lo anyaritae Nimurod lo arai itwaan ni ekingaren anakwapea ni ekileenikinit ajwono.) Ngalesea a Misiri kesi ngitunga a Lidia ka Anam, ka Leab, ka Napitu, ka Pasirus, ka Kasilui ta lua Kirete (lu araakasi nikech etorunete Ngipilisti). Talokookeng a Kanaan, anyaritae loapolon Sidon tanyaritetei loche Hes. Eraakasi kesi taapaakech a ngitunga alu elimokinitae ngirora kech. Nabo dang, arai Kanaan apaakech a Ngiebus, ka Ngiamor, ka Ngigirigach, ka Ngiipi, ka Ngiarik, ka Ngisin, ka Ngiaripad, ka Ngisemar, ka Ngiamas. Talokookeng a Chem kesi Elam, ka Asiria, ka Aripakichad, ka Ludi, ka Aram, ka Us, ka Ul, ka Geser ta Mechek. Eraakasi kesi taapaakech a ngitunga alu elimokinitae ngirora kech. Arai Aripakichad apakeng a Chela. Arai Chela apakeng a Eber. Ayakasi Eber talokookeng ngiarei. Anyaritae ekiro a epei Peleg, kainyo atiakio ngitunga a ngakwapea ngirwa lu edounere ngesi. Anyaritae loche Yokitan. Ngalesea a Yokitan kesi ngitunga a Alimodak, ka Chelepu, ka Asarimawesi, ka Yera, ka Adoram, ka Usali, ka Dikila, ka Ebal, ka Abimael, ka Cheba, ka Opiri, ka Apila, ta Yobab. Ngalesea a ngitunga kangulu kadaang napei ani a Chem tanang nia Aburam kesi lu anyaritae Chem, ka Aripakichad, ka Chela, ka Eber, ka Peleg, ka Reu, ka Serug, ka Naor, ka Tera ta Aburam (enyaritae ekiro keng eche Aburaam). Ayakasi Aburaam talokookeng ngiarei lu anyaritae Isaka ka Ichimael. Toliworos talokookeng a Ichimael ngikapolok a ngitela a ngitomon ka ngiarei alu enyaritae Nebayos (itorunit ekiro be Nebayos lokiro a lokookeng a Ichimael aloapolon), ka Kedar, ka Adibeel, ka Mibisam, ka Michima, ka Duma, ka Masa, ka Adad, ka Tema, ka Yetur, ka Napich ta Kedema. Ayei Aburaam apese a ngabwes na anyaritae Ketura, na edoikini ngesi ngide lusapa ngikan-kapei. Anyaritae ngide ngulu Simuran ka Yokichan, ka Medan, ka Midian, ka Ichibak ta Chua. Touriu Yokichan ngisapa ngiarei lu anyaritae Cheba ka Dedan. Ayakasi Midian ngide lusapa ngikan. Anyaritae kesi Epa, ka Eper, ka Anok, ka Abida ta Elidaa. Lokookeng a Aburaam lo anyaritae Isaka ayakasi talokookeng ngiarei lu anyaritae Esau ka Yakobo. Talokookeng a Esau, anyaritae Elipas, ka Reuel, ka Yeuch, ka Yalam ta Kora. Toliwor Elipas apaakeng a ngitela alu enyaritae Teman, ka Omar, ka Sepi, ka Gatam, ka Kenas, ka Timuna ta Amalek. Toliwor Reuel apaakeng a ngitela alu enyaritae Naas, ka Sera, ka Chama ta Misa. Ngitunga lusek alomito Edom, etorunete nika talokookeng a Seir alo enyaritae Lotan, ka Chobal, ka Sibeon, ka Ana, ka Dichon, ka Eser ta Dichan. Arai Lotan apaakeng a ngitunga a ngimacharin a Ori ka Omam. (Ayei Lotan nakaatokeng na anyaritae Timuna.) Arai Chobal apaakeng a ngitunga a ngimacharin a Aliwan, ka Manaas, ka Ebal, ka Chepi ta Onam. Ayakasi Sibeon talokookeng ngiarei lu anyaritae Aya ka Ana. Ayei Ana lokookeng lo anyaritae Dichon. Arai Dichon apaakeng a ngitunga a ngimacharin a Amuran, ka Echiban, ka Isiran ta Keran. Arai Eser apaakeng a ngitunga a ngimacharin a Bilian, ka Saawan ta Yaakan. Arai Dichan apaakeng a ngitunga a ngimacharin a Us ka Aran. Lugu etupup kona kesi ngikapolok lu apolokinito akwap enyaritae Edom, kolong eringa Ngisirael nyemino ekapolon lo apolokinit. Arai Bela lokookeng a Beor ekapolon a akwap a Edom, anyaritae ere keng loapolon Diniaba. Ani etoani Bela, toliwor Yobab lokookeng a Sera ekapolon. Anyaritae ere keng loapolon Bosira. Ani etoani Yobab, toliwor Ucham lo a akwap a Ngiteman ekapolon. Ani etoani Ucham, toliwor Adad lokookeng a Bedad ekapolon. Anyaritae ere keng loapolon Apis. (Adad ngesi kolong etiji Ngimidian anakwap a Moab kidwang.) Ani etoani Adad, toliwor Samula lo a ere a Masireka ekapolon. Ani etoani Samula, toliwor Chaul lo a ere a Reobos, lo ayei lowae a angolol, toliwor ekapolon. Ani etoani Chaul, toliwor Baalinan lokookeng a Akibor ekapolon. Ani etoani Baalinan toliwor Adad ekapolon. Anyaritae ere keng loapolon Pau. (Anyaritae aberu keng Meetabel, na arai nakookeng a Matired, tarai atatait a Mesaab.) Atiakitae ngitunga a Edom a ngitela alu anyaritae Timuna, ka Aliwa, ka Yesesi, ka Olibama, ka Ela, ka Pinon, ka Kenas, ka Teman, ka Mibisar, ka Magidiel ta Iram. Ayakasi Yakobo ngide lusapa ngitomon ka ngiarei lu anyaritae Reuben, ka Simeon, ka Lawi, ka Yuda, ka Isakar, ka Sebulun, ka Dan, ka Yosep, ka Benjamen, ka Naputal, ka Gad ta Acher. Araakasi talokookeng a Yuda daang ngikan. Talokookeng a aberu keng ana a akwap a Kanaan ana anyaritae Basichua, araakasi nguuni. Anyaritae kesi Er, ka Onan ta Chela. Lokookeng loapolon lo anyaritae Er, arai itwaan niaronon noi. Kotere ngakiro nguna, taar Ekapolon Akuj ngesi. Ayakasi Yuda talokookeng ngiche ngiarei lu araakasi ngika aberu a lokookeng ana anyaritae Tamar. Anyaritae kesi Peres ka Sera. Ayakasi Peres talokookeng ngiarei lu anyaritae Esiron ka Amul. Ani lokaatokeng Sera, ayakasi talokookeng ngikan lu anyaritae Simri, ka Esan, ka Eman, ka Kalikol ta Darida. Akani lokookeng a Karimi, lo arai ales a Sera, ngesi abu yau ngichan Isirael ani ewea ngiboro lu achamitae inyasunio. Ayei Esan lokookeng lo anyaritae Asaria. Ayakasi Esiron ngide lusapa nguuni. Anyaritae kesi Yerameel, ka Ram ta Kaleb. Ngiyenet keng napei ani eyei Ram tanang Yese kesi lu anyaritae Ram, ka Aminadab, ka Nachon (arai Nachon itwaan ni ayenikinitae alokitela a Yuda), ka Salimon, ka Boas, ka Obed ta Yese. Ayakasi Yese ngide lusapa ngikan-kaarei. Arai Eliab lo ekingaren, totupuunos ani eyei loapolon tanang loochi. Anyaritae kesi Abinadab, ka Chama, ka Nesanel, ka Radai, ka Osem ta Daudi. Ayakasi ngesi tani ngide lupesur ngiarei lu anyaritae Seruya ka Abigail. Ayakasi nakookeng a Yese na anyaritae Seruya ngide lusapa nguuni. Anyaritae kesi Abichai, ka Yoab ta Asael. Kiut Yeser nakookeng a Yese nache na anyaritae Abigail. Arai Yeser alesit a Ichimael. Taanyut kesi ikoku nisapat anyaritae Amasa. Lokookeng a Esiron lo anyaritae Kaleb, abu kiut Asuba, touriut ikoku nipese ni anyaritae Yerios. Ayakasi Yerios ngide lusapa nguuni lu anyaritae Yecher, ka Chobab ta Aridon. Ani etoani Asuba, kiut Kaleb Epirasa. Taanyut kesi ikoku nisapat anyaritae Ur. Anyaritae lokookeng a Ur Uri, tanyaritetei etatait keng Besalel. Ani enangete ngikaru a Esiron ngitomwon-kapei, kiut nakookeng a Makiri na arai nakaatokeng a Gilead. Taanyut kesi ikoku nisapat anyaritae Segub. Ayei Segub lokookeng lo anyaritae Yair. Apolokinit Yair ngirerea ngitomwon-arei ka nguuni anakwap a Gilead. Nakaneni apot ngapolon a Gechur ka Aram tolemasi ngirerea ngitomwon-kapei alo Gilead, imorikina aapei ka ngadakarin a Yair ka Kenas ta ngirerea lu edunyatar. Ngitunga daang lu alomito neni, araakasi ngalesea a Makiri, alo arai apakeng a Gilead. Ani etoani Esiron abu lokookeng lo anyaritae Kaleb kiut Epirasa na arai apuserut nasek eusit apakeng. Taanyut kesi ikoku nisapat anyaritae Achur, lo esiakini ere a Tekoa. Yerameel arai lokookeng a Esiron loapolon. Ayakasi Yerameel ngide lusapa ngikan. Anyaritae loapolon Ram, totupuut luche anyaritae Buna, ka Oren, ka Osem ta Aija. Ayei Yerameel aberu ache anyaritae Atara. Anyaritae lokookeng Onam. Talokookeng a Ram, anyaritae loapolon Yerameel totupak Maas, ka Yamin ta Eker. Anyaritae talokookeng a Onam Chamai ka Yada. Anyaritae talokookeng a Chamai Nadab ka Abichur. Kiut Abichur aberu na anyaritae Abiyail. Apot kesi taanyut ngide lusapa ngiarei lu anyaritae Aban ka Molid. Lokaatokeng a Abichur lo anyaritae Nadab, ayakasi ngide lusapa ngiarei lu anyaritae Seled ka Apaim. Nakaneni totoan Seled nyeuriuna ngide lusapa. Arai Apaim apakeng a Ichi. Arai Ichi apakeng a Chechan. Arai Chechan apakeng a Alai. Yada lo arai lokaatokeng a Chamai, ayakasi ngide lusapa ngiarei lu anyaritae Yeser ka Yonasan. Nakaneni totoan Yeser nyeuriuna ngide lusapa. Ayakasi Yonasan ngide lusapa ngiarei, lu anyaritae Peles ka Sasa. Araakasi ngitunga ngulu daang ngalesea a Yerameel. Ngide lupesur make ayakasi Chechan, amam lusapa ayakasi. Arikit ngesi ekedalan lo arai Emisirit lo anyaritae Yara. Abu Chechan kipoto nakookeng apei kiut Yara. Taanyut kesi ikoku nisapat ni anyaritae Atai. Ngiyenet keng napei ani eyei Atai tanang nia Elichama kesi lu anyaritae Atai, ka Nasan, ka Sabad, ka Epilal, ka Obed, ka Yeu, ka Asaria, ka Eles, ka Eleasa, ka Sisimai, ka Chalum, ka Yekamia ta Elichama. Lokookeng a Kaleb loapolon, lo arai lokaatokeng a Yerameel, anyaritae Mecha. Arai Mecha apakeng a Sip, alo arai apakeng a Marecha. Arai Marecha apakeng a Eburon. Ayakasi Eburon talokookeng nguomwon lu anyaritae Kora, ka Tapua, ka Rekem ta Chema. Arai Chema apakeng a Raam, tarai apaakeng a Yorikeam. Rekem lo arai lokaatokeng a Chema, ngesi arai apakeng a Chamai. Arai Chamai apakeng a Maon, alo arai apakeng a Besisur. Arikit Kaleb apese a ngabwes na anyaritae Epa. Kidoik Epa Kaleb ngide lusapa nguuni lu anyaritae Aran, ka Mosa ta Gases. Ayei Aran dang lokookeng lo anyaritae Gases. ( Itwaan ni anyaritae Yadai, ayakasi ngide lusapa ngikan-kapei lu anyaritae Regem, ka Yosam, ka Gechan, ka Pelet, ka Epa ta Chaapu.) Arikit Kaleb apese a ngabwes ache nabo anyaritae Maaka. Kidoik apese a ngabwes ngina ngesi ngide lusapa ngiarei lu anyaritae Cheber, ka Tirana. Ani ekisidi kidou nabo ngide lusapa ngiarei. Anyaritae epei Chaapu lo arai ngesi esiakini ere a Madimana, ta Chepa lo esiakini ngirerea a Makibena ka Gibea. Nabo dang, ayei Kaleb nakookeng na anyaritae Akisa. Ngitunga lu elimunitoe kanege lugu kesi araakasi ngalesea a Kaleb. Ur arai lokookeng a Kaleb loapolon. Anyaritae aberu keng Epirasa. Lokookeng a Ur lo anyaritae Chobal ngesi esiakini ere a Kirias Yearim. Lokookeng lo atupit ngolo ngesi Salima. Ngesi esiakini Betleem. Lokookeng lo a nguuni lo anyaritae Arepu ngesi esiakini ni anyaritae Basigader. Chobal lo esiakini Kirias Yearim ngesi arai apaakeng a ngitunga alu enyaritae Ngiaroe ka epewae a Ngimenuot, ta ngimacharin a ngitunga a Kirias Yearim, ka lua Ngiisir, ka Ngipus, ka Ngichumas ta Ngimichirai. (Ngitunga a ngitela a Sora ka Echitaol araakasi ngika ngimacharin kangulu.) Salima lo arai ngesi esiakini Betleem, arai apakeng a Nginetopas, ka Atiros Bes Yoab ta Ngisor. Araakasi ngulu emachar epei a ngimacharin aluarei ayakasi Manaas. ( Ngitunga a ngimacharin a ngikunonoi alu egiraka noi, alomito Yabes. Araakasi kesi Ngitiras, ka Ngichimeas ta Ngisukas. Araakasi kesi Ngikenis lu eutasi ka Ngirekab.) Eraakasi lugu ngirora a talokookeng a Daudi alu edounio alo Eburon. Anyaritae loapolon Amunon. Itiokeng a Amunon ngesi Ainoam na abunit alore a Yesireel. Lo a ngiarei ngesi Daniel. Itiokeng a Daniel ngesi Abigail na abunit alo Karimel. Lo a nguuni ngesi Abusalom. Itiokeng a Abusalom ngesi Maaka na arai nakookeng a Talimai alo arai ekapolon a Gechur. Lo a nguomwon ngesi Adonija lo anyaritae itiokeng Agis. Lo a ngikan ngesi Chepatia lo anyaritae itiokeng Abital. Lo a ngikan-kapei ngesi Isiream lo anyaritae itiokeng Egila. Edounio lukan-kapei ngulu daang alo Eburon ngikaru lukan-kaarei ka ngilapio ngikan-kapei lu apolokinitor Daudi neni. Arai ngesi ekapolon alo Yerusalem a ngikaru a ngitomwon-uni ka nguuni. Apon ngide keng lusapa lukaalak kidounoe kaneni. Aberu keng na anyaritae Besicheba na arai nakookeng a Amiel, abu kidoik ngesi ngide lusapa nguomwon lu anyaritae Chimea, ka Chobab, ka Nasan ta Solomon. Ayakasi neni talokookeng ngiche lu anyaritae Ibiar, ka Elichua, ka Elpelet, ka Noga, ka Nepeg, ka Yapia, ka Elichama, ka Eliada ta Elipelet. Ani eyakasi ngide lusapa ngulu daang, ayakasi Daudi ngide lusapa a ngapesur a ngabwes keng. Ayei ngesi tani nakookeng na anyaritae Tamar. Ngalesea a ekapolon Solomon, ingareni apakeng totupak lokookeng, kesi Solomon, ka Reoboam, ka Abija, ka Asa, ka Yeochapat, ka Yeoram, ka Aasia, ka Yoach, ka Amasia, ka Usia, ka Yosam, ka Aas, ka Esekia, ka Manase, ka Amon ta Yosia. Ayakasi Yosia ngide lusapa nguomwon lu anyaritae Yoanan, ka Yeoyakim, ka Sedekia ta Yoaas. Ayakasi Yeoyakim ngide lusapa ngiarei lu anyaritae Yeoyakin ka Sedekia. Eraakasi nugu ngalesea a ekapolon Yeoyakin alo aenete Ngibabiloniae toriko. Ayakasi Yeoyakin ngide lusapa ngikan-kaarei lu anyaritae Chealitiel, ka Malikiram, ka Pedaya, ka Chenasar, ka Yekamia, ka Ochama ta Nedabia. Ayakasi Pedaya ngide lusapa ngiarei lu anyaritae Serubabel ka Chimei. Arai Serubabel apakeng a ngide a lusapa a ngiarei alu anyaritae Mechulam ka Anania. Ayei ngesi ikoku nipese ipei anyaritae Chelomis. Ayakasi ngesi nabo ngide lusapa ngikan lu anyaritae Achuba, ka Oel, ka Berekia, ka Asadia ta Yuchab Esed. Ayakasi Anania ngide lusapa ngiarei lu anyaritae Pelatia ka Yechaya. Arai Yechaya apakeng a Repaya, alo arai apakeng a Arinan, alo arai apakeng a Obadia, alo arai apakeng a Chekania. Ayei Chekania ikoku nisapat ipei anyaritae Chemaya. Ayakasi Chakania ngitatae ngikan lu anyaritae Atuch, ka Igal, ka Baria, ka Nearia ta Chapat. Ayakasi Nearia ngide lusapa nguuni lu anyaritae Elioenai, ka Isikia ta Asirikam. Ayakasi Elioenai ngide lusapa ngikan-kaarei lu anyaritae Odapia, ka Eliachib, ka Pelaya, ka Akuk, ka Yoanan, ka Delaya ta Anani. Eraakasi nugu ngalesea ngache a Yuda. Anyaritae kesi Peres, ka Esiron, ka Karimi, ka Ur ta Chobal. Arai Chobal apakeng a Reya, alo arai apakeng a Yaas, alo arai apakeng a Aumai ka Laad, alu araakasi taapaakech a ngitunga alu elomito Sora. Talokookeng a Etam kesi Yesireel, ka Ichima ta Idibach. Anyaritae nakaatokech Aselelponi. Arai Penuel apakeng a Gedor. Arai Eser apakeng a Ucha. Eraakasi nugu ngalesea a Ur, alo arai lokookeng a Kaleb loapolon edouni aberu na anyaritae Epirasa. Ngalesea a Ur kesi esiakinete Betleem. Achur lo arai apakeng a Tekoa, ayakasi ngaberu ngaarei na anyaritae Ela ka Naara. Kidoik ngesi Naara Ausam, ka Eper, ka Temeni ta Aachitari. Ayakasi Achur ka Ela ngide lusapa nguuni lu anyaritae Eres, ka Isiar ta Esinan. Arai Kos apakeng a Anub ka Sobeba. Arai ngesi apaakeng a ngitunga a ngimacharin alu etorunete nia Aarel alo arai lokookeng a Arum. Ayei itwaan anyaritae Yabes, ni arai itwaan ni erimae noi alotunga a awi keng. Alimokinit itiokeng ngesi ekiro be Yabes, kainyo ariaba itiokeng noi na edounio ngesi. Nakaneni kilip Yabes Akuj a Isirael tolim tama, “Topiarae ayong Akuj, sodi kiatak akwap kang tololomer. Eruko sodi kiratak anibore cha kadaang aniaronon ani epedori ayaun apipilu nikang.” Abu Akuj tosubakinea ngesi ngakiro na elipa. Kaleb lo arai lokaatokeng a Chua, ayei lokookeng lo anyaritae Meir. Arai Meir apakeng a Echiton. Ayakasi Echiton ngide lusapa nguuni lu anyaritae Besirapa, ka Pasea ta Teina. Teina ngesi esiakini ere a Naach. Alomito ngalesea a ngitunga kalu Reka. Ayakasi Kenas ngide lusapa ngiarei lu anyaritae Osiniel ka Seraya. Ayakasi Osiniel dang ngide lusapa ngiarei lu anyaritae Asas ka Meonosai. Meonosai ngesi arai apakeng a Opira. Arai Seraya apakeng a Yoab. Yoab ngesi esiakini adipo a Ngikunonoi. Araakasi ngitunga daang lu ayakasi neni ngikunonoi lukachwaak. Kaleb lo arai lokookeng a Yepune, ayakasi ngide lusapa nguuni lu anyaritae Iru, ka Ela, ta Naam. Arai Ela apakeng a Kenas. Ayakasi Yealelel ngide lusapa nguomwon lu anyaritae Sip, ka Sipa, ka Tiria ta Asarel. Ayakasi Esira talokookeng nguomwon lu anyaritae Yeser, ka Mered, ka Eper ta Yalon. Kiut Mered Bisia na arai nakookeng a ekapolon a Misiri. Apot kesi taanyut ikoku nipese anyaritae Miriam, ka ngide lusapa ngiarei lu anyaritae Chamai ka Ichiba. Ichiba esiakini ere a Echitemoa. Abu Mered kiut tani aberu a ekitela a Yuda, sodi taanyut kesi ngide lusapa nguuni lu anyaritae Yered lo esiakini ere a Gedor, ka Eber lo esiakini ere a Soko ta Yekusiel lo esiakini ere a Sanoa. Kiut Odia nakaatokeng a Naam. Ngalesea kech aliworosi ngitunga a emachar a Garim, lu alomito lore a Keila ta ngitunga a emachar a Maaka lu alomito lore a Echitemoa. Ayakasi Chimon ngide lusapa nguomwon lu anyaritae Amunon, ka Rina, ka Benianan ta Tilon. Ayakasi Ichi ngide lusapa ngiarei lu anyaritae Soes ka Bensoes. Arai Chela epei a talokookeng a Yuda. Ngalesea keng kesi ngide lusapa lu anyaritae Er lo esiakini ere a Leka, ka Laada lo esiakini ere a Marecha, kesi emachar a ngitunga alukadonyok ngiworui, alu elomito lore a Bes Achibea. Ngalesea keng ngache kesi Yokim ka ngitunga lu alomito lore a Koseba ta Yoach ka Sarapi. Eusi Sarapi ngaberu na araakasi Ngamoab, sodi tolom Betleem. (Eraakasi ngakiro nugu ngangorok.) Araakasi kesi ngikayak ngamoti lu asubete etich a ekapolon, lu alomito lorerea a Netaim ka Gedera. Ayakasi Simeon ngide lusapa ngikan lu anyaritae Nemuel, ka Yamin, ka Yarib, ka Sera ta Chaul. Anyaritae lokookeng a Chaul Chalum. Anyaritae etatait keng Mibisam. Anyaritae lokookeng a Mibisam Michima. Ngalesea na ewapito na Michima kesi na kata Amuel, ka Sakur ta Chimei. Ayakasi Chimei ngide lusapa ngitomon ka ngikan-kapei ka ngide lupesur ngikan-kapei. Nakaneni akidioko ngide a ngiyenet kech. Nyelalakera ngitunga a ekitela a Simeon loger a ngitunga a ekitela a Yuda. Alomito ngitunga a ekitela a Simeon lorerea lu anyaritae Beer-cheba, ka Molada, ka Asar Chual, ka Bilia, ka Esem, ka Tolad, ka Besuel, ka Orima, ka Sikilag, ka Bes Marikabos, ka Asarisusim, Besibiri ta Chaaraim. Alomito kesi tani nakwapea ngache ngakan na enyaritae Etam, ka Ain, ka Rimon, ka Token, ka Achan, ta ngadakarin na edunyatar, tani kuju too ere a Baalas. Eraakasi lugu ngirora a ngitunga a ngawiyei kech ka ngirora a ngakwapea ana alomito kesi. Ngitunga lu araakasi ngikapolok a ngimacharin kesi ta Mechobab, ka Yamilek, ka Yoach lo arai lokookeng a Amasia, ka Yoel, ka Yeu (lo arai lokookeng a Seraya, alo arai lokookeng a Asiel), ka Elioenai, ka Yaakoba, ka Yechoya, ka Asaya, ka Adiel, ka Yesimiel, ka Benaya, ka Sisa (alo arai lokookeng a Chipi, alo arai lokookeng a Alon, alo arai alesit a Yedaya, ka Chimuri ta Chemaya). Ngitunga ngulu kesi araakasi ngikapolok a ngimacharin kech. Ani kona arubanakineta ngalesea kech iatanakin talalaketa, apot kesi topetaros lowae lo alo too tananga diyete Gerar. Apot kesi kiyoko ngamesekin kech lowae lo aloteten a adipo, ni erai ngesi eyei ere ngolo. Apot kesi torukaut akwap na iyokiyo ngibaren na alibit noi. Ayei ni iyokiyo ngibaren neni naro na asil na ebooyi akaalimon. Ngitunga lusek alomito neni araakasi ngitunga a Ham. Ngirwa lu araakar Esekia ekapolon, apot ngikiliok lu ta alimunitoe toloto Gerar sodi kinyasut ngieman ka ngakais a ngitunga alu alomito neni. Kitwarakis kesi ngitunga ngulu toloma kesi neni jik, kainyo alibit neni kotere ngamesekin kech. Apot ngitunga ngiche a ekitela a Simeon ngamiae ngakan toloto kide Edom. Arikito kesi talokookeng a Ichi lu anyaritae Pelatia, ka Nearia, ka Repaya ta Usiel. Apot kesi taara Ngiamalek lu aringa idongito neni, nakaneni aliwor kesi elomito neni napei ngina jik. Eraakasi nugu ngalesea a Reuben alo arai lokookeng a Yakobo loapolon. (Ani kona aperioto ngesi ka apese a ngabwes apei na arai aka apakeng, apon ngesi todemarae apolou a awi kech nakinae Yosep. Nakaneni arai ekitela a awi a Yuda abu toliwor lokajwon noi sodi toliwor nikeng aseunere ekapolon a ngitela kadaang.) Reuben lo arai lokookeng a Yakobo loapolon, ayakasi ngide lusapa nguomwon lu anyaritae Anak, ka Palu, ka Esiron ta Karimi. Eraakasi nugu ngalesea a Yoel napei ananaket a apei tanang nache. Anyaritae lokookeng a Yoel Chemaya. Anyaritae lokookeng a Chemaya Gog. Anyaritae lokookeng a Gog Chimei. Anyaritae lokookeng a Chimei Mika. Anyaritae lokookeng a Mika Reya. Anyaritae lokookeng a Reya Baal. Anyaritae lokookeng a Baal Beera. Ekapolon a Asiria lo anyaritae Tigilas Pileser, abu kirum Beera lo arai ekarikon a ekitela kangolo, toeniya nakwap ache. Ngirora a ngitunga alu araakasi ngikarikok a ngimacharin alokitela a Reuben kesi ta Yeiel, ka Sekaria ta Bela, lokookeng a Asas tarai etatait a Chema alo a emachar a Yoel. Alomito ngitunga a emachar kalo Aroer ka akwap na ayei too kaneni, tanang Nebo ka Baal Meon. Ayakasi kesi ngibaren lukaalak anakwap a Gilead. Kotere ngakiro nguna, apot kesi toloma nakwap na alo kide tanang nariet na eakarit enangit nangolol a Eupurate. Ngirwa lu araakar Saul ekapolon, apot ngitunga a ekitela a Reuben toremo Ngiagir taara, sodi toloma nakwap kech alo kide Gilead. Alomito ngitunga a ekitela a Gad lowae lo alokwap ani alomito ngitunga a ekitela a Reuben. Alomito kesi ni enyaritae Bachan, tanang kide Saleka. Yoel ngesi arai ekarikon a emachar aloapolon. Chapan ngesi arai ekarikon a emachar alo atupit ngolo. Yanai ka Chapat araakasi ngikarikok a ngimacharin aluche alo Bachan. Ngitunga luche a ekitela a Gad, araakasi ngika ngimacharin alukan-kaarei enyaritae Mikael, ka Mechulam, ka Cheba, ka Yorai, ka Yakan, ka Sia ta Eber. Araakasi kesi ngalesea a Abiyail alo arai lokookeng a Uri. Ani iwapiyario nikolong etorunete, eraakasi taapaakech kesi lu anyaritae Abiyail, ka Uri, ka Yaroa, ka Gilead, ka Mikael, ka Yechichai, ka Yado ta Bus. Ai lo arai lokookeng a Abidiel, tarai etatait a Guni, ngesi arai ekapolon a ngitunga a ngimacharin kalu. Alomito kesi lorerea a ngakwapea a Bachan ka Gilead ta ni eyokiyo ngibaren alo Charon. ( Egirio ngirora lugu ngirwa lua ekapolon Yosam alo a Yuda, ka ekapolon Yeroboam lo a Isirael.) Alotela a Reuben, ka Gad ta Too Manase, ayakasi ngasigerea 44,760 na etatamitae ajwore a ngaupwala, ka ngilengea ta ngakawa. Kitijwoto kesi ngitela a Ngiagir lu anyaritae Yetur, ka Napich ta Nodad. Apot kesi kigienokinos Akuj sodi kilipa esakete atamar kingarak kesi. Abu Akuj kiira ngakilipasinei kech, sodi kidwanga ngitela ngulu Ngiagir ka ngitunga lu ebakito ka Ngiagir. Tangatasi kesi alomoe kech ngikaala 50,000, ka ngamesekin 250,000, ka ngisikiria 2,000 ta ngitunga 100,000 lu aenio torikoe. Taara kesi ngimoe kech lukaalak kainyo arai ejie ngolo lo achamit Akuj. Apot kesi jik toloma nakwap ngina tanang ngirwa lu arikere ngitunga. Apot ngitunga a Kide Manase toloma nakwap a Bachan. Arai ni alomito kesi alowae alo alokwap Baal Erimon ka Senir ta emoru a Erimon. Apot kesi talalaketa noi. Ngikapolok a ngatekerin kech kesi ta Eper, ka Ichi, ka Eliel, ka Asiriel, ka Yeremia, ka Odapia ta Yadiel. Araakasi kesi ngasigerea na ayenikinitae, taraakas ngikapolok a ngatekerin kech lu aruunito. Nakaneni towout ngitunga amuno Akuj kata apaakech, sodi toisikis ngesi toliworos ilipito ngakujo a ngibukui alusek etwarakini Akuj anakwap kangina. Kotere ngakiro nguna, abu Akuj kitorem ekapolon anyaritae Pul akwap kech. Arai Pul ekapolon a akwap a Asiria. (Anyaritae ekiro keng eche Tigilas Pileser.) Kitwarak ekapolon ngolo ngitela a Reuben, ka Gad ta Kide Manase, sodi kitolom kesi jik ni enyaritae Ala, ka Abor ta Ara. Kitolom kesi tani diyete angolol a Gosan. Ayakasi Lawi talokookeng nguuni lu anyaritae Gerichon, ka Koas ta Merari. Ayakasi Koas talokookeng nguomwon lu anyaritae Amuram, ka Ichar, ka Eburon ta Usiel. Ayakasi Amuram talokookeng ngiarei lu anyaritae Aron ka Musa. Ayei nakookeng apei na anyaritae Miriam. Ayakasi Aron talokookeng nguomwon lu anyaritae Nadab, ka Abiu, ka Eleasar ta Isamar. Ngalesea a Eleasar napei ananaket a apei tanang nache, kesi ta Pineas, ka Abichua, ka Buki, ka Usi, ka Seraya, ka Merayos, ka Amaria, ka Aitub, ka Sadok, ka Aimaas, ka Asaria, ka Yoanan, ka Asaria (lokolong asubi etich alokai anakolong adukokini Solomon Akuj alo Yerusalem), ka Amaria, ka Aitub, ka Sadok, ka Chalum, ka Ilikia, ka Asariya, ka Seraya ta Yeosadak. Kitwarak ekapolon Nebukadinesa Yeosadak aapei ka ngitunga luche a Yuda ka Yerusalem, lusek etwarakini Ekapolon Akuj toloto nakwapea nagelayek. Ayakasi Lawi talokookeng nguuni lu anyaritae Gerichon, ka Koas ta Merari. Ayakasi kesi daang talokookech. Talokookeng a Gerichon kesi Libini ka Chimei. Talokookeng a Koas kesi Amuram, ka Ichar, ka Eburon ta Usiel. Talokookeng a Merari kesi Mali ka Muchi. Eraakasi lugu ngalesea a Gerichon napei ananaket a apei tanang nache. Ngirora kech kesi Libini, ka Yaas, ka Sima, ka Yoa, ka Ido, ka Sera ta Yeaserai. Eraakasi lugu ngalesea a Koas napei ananaket a apei tanang nache. Ngirora kech kesi Aminadab, ka Kora, ka Asir, ka Elikana, ka Ebiasap, ka Asir, ka Taas, ka Uriel, ka Usia ta Chaul. Ayakasi Elikana talokookeng ngiarei lu anyaritae Amasai ka Aimos. Eraakasi lugu ngalesea a Aimos napei ananaket a apei tanang nache. Ngirora kech kesi Elikana, ka Sopai, ka Naas, ka Eliab, ka Yeroam ta Elikana. Ayakasi Samuel talokookeng ngiarei. Anyaritae loapolon Yoel, tanyaritetei loochi Abija. Eraakasi lugu ngalesea a Merari napei ananaket a apei tanang nache. Ngirora kech kesi Mali, ka Libini, ka Chimei, ka Usa, ka Chimea, ka Agia ta Asaya. Ngitunga lugu kesi aseuni Daudi toliworos kesi eweikinito ngieosio ani ilipeenere Akuj alo Yerusalem, keyaun asaduku a Achamunet neni kerumor. Ani sek eringa ekapolon Solomon nyeduko akai a Akuj, asubete kesi etich aloeam a Akuj elunyasi. Ngiyenet kangulu asubete etich ngolo kesi lugu. Alomachar a Koas, Eman lo arai ekarikon a ngikaeok alu ekingaren, arai lokookeng a Yoel. Ngiyenet keng napei ani ekingaren tanang Yakobo, kesi Eman, ka Yoel, ka Samuel, ka Elikana, ka Yeroam, ka Eliel, ka Toa, ka Supu, ka Elikana, ka Maas, ka Amasai, ka Elikana, ka Yoel, ka Asaria, ka Sepania, ka Taas, ka Asir, ka Ebiasap, ka Kora, ka Ichar, ka Koas, ka Lawi ta Yakobo. Asap ngesi arai ekarikon a ngikaeok alu a ngiarei. Ngiyenet keng napei ani ekingaren tanang Lawi, kesi Asap, ka Berekia, ka Chimea, ka Mikael, ka Baaseya, ka Malkija, ka Esini, ka Sera, ka Adaya, ka Esan, ka Sima, ka Chimei, ka Yaas, ka Gerichon ta Lawi. Alomachar a Merari, Esan ngesi arai ekarikon a ngikaeok alu a nguuni. Ngiyenet keng napei ani ekingaren tanang Lawi, kesi Esan, ka Kichi, ka Abudi, ka Maluk, ka Achabia, ka Amasia, ka Ilikia, ka Amusi, ka Bani, ka Chemer, ka Mali, ka Muchi, ka Merari ta Lawi. Ngilawi luche daang, aseunitae akisub ngitichisio luche ani ilipeenere Akuj. Aron ka ngalesea keng kesi enomeenete emitina ka akipeyore ngakipeyos alokeno a Akuj. Kesi aweikinito ngakilipasinei daang na elipeenere ani italeunitoe noi. Aweikinito kesi tani ngakipeyos na erimanakinea Akuj ngasechesea a Ngisirael. Asubete kesi ngakiro nguna daang loger lokolong edodikinitor Musa, lo arai ekasuban etich a Akuj. Ngiyenet a Aron kesi lu anyaritae Eleasar, ka Pineas, ka Abichua, ka Buki, ka Usi, ka Seraya, ka Merayos, ka Amaria, ka Aitub, Sadok ta Aimaas. Erai naga akwap na ainakinio ngalesea a Aron lu araakasi ngika emachar a Koas. Kesi esiaunio totiakakinae akwap a Ngilawi. Akwap ngina ngesi ere a Eburon lo ayei nakwap a Yuda, ta ni eyokiyo ngibaren, ni edunyatar ere ngolo. Nakaneni ngaroatin ka ngadakarin a ere kangolo, apon nakinae Kaleb lo arai lokookeng a Yepune. Ngirerea lugu kesi ainakinio ngalesea a Aron. Eburon, ka ere lo eyuunotor ngitunga, ka Yatir ta ngirerea a Libina, ka Echitemoa, ka Ilen, ka Debir, ka Achan, ka Bes Chemech. Ainakinio kesi ngirerea ngulu ka ni iyokiyo ngibaren ni idunyatar ngirerea ngulu. Ani anakwap a Benjamen, nakinae kesi ngirerea lugu ka ni iyokiyo ngibaren ni idunyatar ngirerea ngulu. Ngirora kech kesi Geba, ka Alemes ta Anasos. Araakasi ngirerea daang lu alomito ngitunga a ngawiyei kech ngitomon ka nguuni. Ngirerea ngitomon a Too Manase, aramanakinio ekura, nakinae ngitunga luche daang a emachar a Koas a ngawiyei wiyei. Ngitunga a emachar a Gerichon, ainakinio ngirerea ngitomon ka nguuni a ngawiyei wiyei anakwap a Isakar, ka Acher, ka Naputal ta Kide Manase, alo Bachan. A eger alopei kangolo, ainakinio ngitunga a emachar a Merari ngirerea ngitomon ka ngiarei a ngawiyei wiyei. Ngirerea ngulu kesi lua akwap a Reuben, ka Gad ta Sebulun. Kotere eger ngolo, nakis ngitunga Ngilawi ngirerea lu elomete, nakis tani ni iyokiyo ngibaren, ni idunyatar ngirerea ngulu. ( Ngirerea a akwap a Yuda, ka Simeon ta Benjamen lu ta alimunitoe, epotonorio kotere akiram ekura.) Ngawiyei ngache a emachar a Koas apon nakinae ngirerea ka ni iyokiyo ngibaren anakwap a Epiraim. Ngirerea ngulu kesi Chekem lo erai ere eyuunere lo eyei lomukur a Epiraim, ka Geser, ka Yokimeam, ka Bes-oron, ka Aijalon ta Gas Rimon. Ani anakwap a Too Manase, nakinae kesi ngirerea a Aner ka Bileam ta ni iyokiyo ngibaren ni idunyatar. Ngawiyei a emachar a Gerichon, ainakinio ngirerea lugu ka ni iyokiyo ngibaren ni idunyatar. Anakwap a Kide Manase, ngirerea ngulu kesi Golan alo Bachan ta Achitaros. Anakwap a Isakar, ngirerea ngulu kesi Kedech, ka Daberas, ka Ramos ta Anem. Anakwap a Acher, ngirerea ngulu kesi Machal, ka Abidon, ka Ukok ta Reob. Anakwap a Naputal, ngirerea ngulu kesi Kedech lo eyei Galilaya, ka Amon ta Kiriasaim. Ani ngawiyei nache daang a emachar a Merari, apon nakinae ngirerea lugu ka ni iyokiyo ngibaren ni edunyatar. Anakwap a Sebulun, ngirerea ngulu kesi Rimono ta Tabor. Anakwap a Reuben, kide angolol Yorudan, yaaye Yeriko, ngirerea ngulu kesi Beser lo eyei lomuria, ka Yasa, ka Kedemos ta Mepaas. Anakwap a Gad, ngirerea ngulu kesi Ramos lo eyei Gilead, ka Maanaim, ka Echibon ta Yaser. Araakasi talokookeng a Isakar nguomwon. Anyaritae kesi Tola, ka Pua, ka Yachub ta Chimuron. Araakasi talokookeng a Tola ngikan-kapei. Anyaritae kesi Usi, ka Repaya, ka Yeriel, ka Yamai, ka Ibisam ta Chemuel. Kesi araakasi ngikapolok a ngawiyei a emachar a Tola. Araakasi kesi ngasigerea nakajwok. Ani ngirwa lu ayarea ekapolon Daudi, anangit ekimar a ngitunga kangulu 22,600. Ayei Usi lokookeng lo anyaritae Isiraya. Arai ngesi epei bon. Ayakasi Isiraya talokookeng nguomwon lu anyaritae Mikael, ka Obadia, ka Yoel ta Ichia. Araakasi kesi daang ngikapolok a ngawiyei. Ayakasi kesi ngaberu nakaalak ka ngide lukaalak. Kotere ngakiro nguna, kipakunae ngikiliok 36,000 analesea kech toliworos ngasigerea. Alokimar a ekitela a Isakar, ayakasi ngikiliok 87,000 lu araakasi ngasigerea. Ayakasi Benjamen talokookeng nguuni lu anyaritae Bela, ka Beker ta Yediael. Ayakasi Bela talokookeng ngikan lu anyaritae Esibon, ka Usi, ka Usiel, ka Yerimos ta Iri. Araakasi kesi ngikapolok a ngawiyei a emachar kangolo, nabo eraakasi daang ngasigerea nakajwok. Ayakasi ngikiliok a ngalesea kech 22,034 lu etemokino eliworosi ngasigerea. Ayakasi Beker talokookeng ngikan-koomwon. Anyaritae kesi Semira, ka Yoach, ka Elieser, ka Eleoenai, ka Omri, ka Yeremos, ka Abija, ka Anasos ta Alemes. Alokimar a ngalesea a ngawiyei ana egiritae, ayakasi ngikiliok 20,200 lu etemokino eliworosi ngasigerea. Ayei Yediael lokookeng lo anyaritae Belian. Ayakasi Belian talokookeng ngikan-kaarei lu anyaritae Yeuch, ka Benjamen, ka Eud, ka Kenaana, ka Sesan, ka Tarchich ta Aichaar. Araakasi kesi ngikapolok a ngawiyei alomachar kangolo nabo araakasi daang ngasigerea nakajwok. Analesea kech, ayakasi ngikiliok 17,200 lu etemokino eliworosi ngasigerea. Araakasi Chupim ka Upim dang ngika ekitela kangolo. Ayei Dan lokookeng epei lo anyaritae Uchim. Ayakasi Naputal talokookeng nguomwon lu anyaritae Yasiel, ka Guni, ka Yeser ta Chalum. (Araakasi kesi ngalesea a Bilia.) Abu apese a ngabwes a Manase kidou ngide lusapa ngiarei lu anyaritae Asiriel ka Makiri. Arai aberu ngina aka akwap a Arania. Makiri arai apakeng a Gilead. Tasakak Makiri Upim aberu, tasakak tani Chupim aberu ache. Anyaritae nakaatokeng a Makiri Maaka. Anyaritae lokookeng a Makiri lo a ngiarei Selopead. Touriu Selopead ngide lupesur make. Kidou aberu a Makiri na anyaritae Maaka ngide lusapa ngiarei. Anyaritae ngide ngulu Perech ka Cherech. Ayakasi Perech talokookeng ngiarei lu anyaritae Ulam ka Rakem. Anyaritae lokookeng a Ulam Bedan. Ngalesea a Gilead daang nugu. Arai Gilead lokookeng a Makiri, tarai etatait a Manase. Ayakasi nakaatokeng a Gilead na anyaritae Amolekes talokookeng nguuni lu anyaritae Ichod, ka Abieser ta Mala. ( Ayakasi Chemida talokookeng nguomwon lu anyaritae Ayan, ka Chekem, ka Liki ta Aniam.) Eraakasi nugu ngalesea a Epiraim napei ananaket a apei tanang nache. Auriuni Epiraim Chutela, touriu Chutela Bered, touriu Bered Taas, touriu Taas Eleada, touriu Eleada Taas, touriu Taas Chutela. Ayakasi Epiraim nabo ngide lusapa ngiarei lu anyaritae Eser ka Elead. Aario ngide lusapa ngulu alojie na asaketa kesi akirem ngibaren a ngitunga a akwap a Gas. Egoro apakech lo arai Epiraim tosutonok nikooyen kotere akitu kech. Apot ngiyenet keng pot akisililing ngesi totikokis etau keng. Abu ngesi topero ka aberu keng, sodi topoti aberu kidou ikoku nisapat. Tolimokis kesi idia ngini ekiro be Beria, kotere ngichan lu aanyunete kesi anawi kech. Ayei Epiraim nakookeng na anyaritae Cheera. Abu Cheera toduk ngirerea lua Lokidiama ka Kwap Bes-oron ta Usen Cheera. Ayei Epiraim lokookeng eche lo anyaritae Repa. Ngirora a ngalesea keng kesi lugu. Auriuni Epiraim Rechep, touriu Rechep Tela, touriu Tela Taan, touriu Taan Ladan, touriu Ladan Amiud, touriu Amiud Elichama, touriu Elichama Nun, touriu Nun Yochua. Akwap na alemarete kesi toloma ngesi Besel ka ngirerea lu idunyatar. Alowae alo alo kide, anangit Naaran. Ani alowae alo alo too, anangit Geser ka ngirerea lu idunyatar Geser. Anangit tani lorerea a Chekem ka Aya ta ngirerea lu idunyatar. Aweikinito ngalesea a Manase ngirerea a Bes-chan, ka Taanak, ka Megido, ka Dor ta ngirerea lu idunyatar. Araakasi nguna daang ngakwapea na alomito ngalesea a Yosep alo arai lokookeng a Yakobo. Ngalesea a Acher nugu. Ayakasi ngesi ngide lusapa nguomwon. Anyaritae kesi Imuna, ka Ichipa, ka Ichipi ta Beria. Ayei ikoku nipese ipei anyaritae Sera. Ayakasi Beria ngide lusapa ngiarei lu anyaritae Eber ka Malikiel. (Malikiel esiakini ere a Birisais.) Ayakasi Eber ngide lusapa nguuni lu anyaritae Yapulet, ka Chomer ta Osam. Ayei ikoku nipese ipei anyaritae Chua. Ayakasi Yapulet ngide lusapa nguuni lu anyaritae Pasak, ka Bimal ta Achipas. Ayakasi lokaatokeng lo anyaritae Chomer ngide lusapa nguuni lu anyaritae Roga, ka Yeuba ta Aram. Lokaatokeng a Yapulet lo anyaritae Osam, ayakasi ngide lusapa nguomwon lu anyaritae Sopa, ka Imuna, ka Chelech ta Amal. Ngalesea a Sopa kesi Sua, ka Arineperi, ka Chual, ka Beri, ka Imura, ka Beser, ka Od, ka Chama, ka Chilicha, ka Isiran ta Beera. Ngalesea a Yeser kesi Yepune, ka Pisipa ta Ara. Ngalesea a Ula kesi Ara, ka Aniel ta Risia. Araakasi nguna daang ngalesea a Acher. Araakasi kesi ngikapolok a ngawiyei, ngikiliok lukajwok epuruunitoe, taraakas ngikarikok lu eyenikinitae. Analesea a Acher, ayakasi ngikiliok 26,000 lu etemokino eliworosi ngasigerea. Ayakasi Benjamen ngide lusapa ngikan. Anyaritae loapolon Bela, totupak Achibel, totupak Airam, totupak Noa ta Rapa. Ngalesea a Bela kesi Adar, ka Gera, ka Abiud, ka Abichua, ka Naaman, ka Aoa, ka Gera, ka Chepupan ta Uram. Ngalesea a Eud kesi Naaman, ka Aija ta Gera. Araakasi kesi ngikapolok a ngawiyei ana kolong sek alomito Geba, nakaneni apon kitwarakinae toloto toloma Manaas. Gera lo arai apakeng a Usa ka Aiud ngesi arikit kesi. Talak Chaaraim ngaberu keng ngaarei na anyaritae Uchim ka Baara. Ani elomi ngesi nakwap a Ngimoab ekisidi, kiut Odech touriu ngide lusapa ngikan-kaarei. Ngirora a ngide kangulu kesi Yobab, ka Sibia, ka Mecha, ka Malkam, ka Yeus, ka Sakia ta Mirma. Toliworos talokookeng ngikapolok a ngawiyei. Ayakasi nabo ngide keng lusapa ngiarei lu edouni Uchim. Anyaritae kesi Abitub ka Elipaal. Touriu Elipaal ngide lusapa nguuni. Anyaritae kesi Eber, ka Micham ta Chemed. Chemed ngesi aduki ngirerea a Ono ka Lod ta ngadakarin na edunyatar. Beria ka Chema kesi araakasi ngikapolok a ngawiyei ana alomete lore a Aijalon, sodi kitwarakis ngitunga lu alomito lore a Gas. Ngalesea a Beria kesi Aio, ka Chachak, ka Yeremos, ka Sebadia, ka Arad, ka Eder, ka Mikael, ka Ichipa ta Yoa. Ngalesea a Elipaal kesi Sebadia, ka Mechulam, ka Isiki, ka Eber, ka Ichimerai, ka Isilia ta Yobab. Ngalesea a Chimei kesi Yakim, ka Sikiri, ka Sabudi, ka Elienai, ka Silesai, ka Eliel, ka Adaya, ka Beraya ta Chimuras. Ngalesea a Chachak kesi Ichipan, ka Eber, ka Eliel, ka Abidon, ka Sikiri, ka Anan, ka Anania, ka Elam, ka Ansosiya, ka Ipideya ta Penuel. Ngalesea a Yeroam kesi Chemucherai, ka Chearia, ka Asalia, ka Yaarechia, ka Elija ta Sikiri. Araakasi ngulu taapaakech lu apolokinito ngawiyei ka ngalesea na ayenikinitae alomito Yerusalem. Esiakini Yeiel ere a Gibeon tolom neni. Anyaritae aberu keng Maaka, tanyaritetei lokookeng loapolon Abidon. Anyaritae talokookeng luche Sur, ka Kich, ka Baal, ka Ner, ka Nadab, ka Gedor, ka Aio, ka Seker ta Mikilos lo arai apakeng a Chimea. Alomito ngalesea kech Yerusalem, idunyasi ka ngitunga luche a emachar kech. Ner arai apakeng a Kich. Arai Kich apakeng a Saul. Ayakasi Saul ngide lusapa nguomwon lu anyaritae Yonasan, ka Malikichua, ka Abinadab ta Echibaal, Yonasan arai apakeng a Meribaal, alo arai apakeng a Mika. Ayakasi Mika ngide lusapa nguomwon lu anyaritae Pison, ka Melek, ka Tarea ta Aas. Aas arai apakeng a Yeoada. Ayakasi Yeoada ngide lusapa nguuni lu anyaritae Alemes, ka Asimapes ta Simri. Simri arai apakeng a Mosa. Mosa arai apakeng a Binea. Binea arai apakeng a Rapa. Rapa arai apakeng a Eleasa. Eleasa arai apakeng a Asel. Ayakasi Asel ngide lusapa ngikan-kapei lu anyaritae Asirikam, ka Bokeru, ka Ichimael, ka Chearia, ka Obadia ta Anam. Ani lokaatokeng a Asel lo anyaritae Echek, ayakasi ngide lusapa nguuni lu anyaritae Ulam, ka Yeuch ta Elipelet. Araakasi ngide lusapa a Ulam lu ayenikinitae anajwonu ka agumanar ngimalea a akau. Ayakasi ngesi ngide lusapa ka ngitatae lusapa amiat apei ka ngitomwon-kan. Araakasi ngulu daang ngika ekitela a Benjamen. Egirio Ngisirael daang iwapap ka eger a ngitunga a ngawiyei wiyei. Igiritae ngakiro nugu daang nakitab na enyaritae Ngakiro a ngikapolok a Isirael. Etwarakinitae sek ngitunga a Yuda toloto Babilon kotere ngasechesea kech. Ngitunga lu esiaunete tobongosi loboro kech alorerea kesi Ngisirael luche, ka ngimurok, ka Ngilawi ta ngikasubak etich alokai a Akuj. Toloto ngitunga a ekitela a Yuda, ka Benjamen, ka Epiraim ta Manase akilom Yerusalem. Ngitunga a ekitela a Yuda kesi ta Usai lo arai lokookeng a Amiud, alo arai lokookeng a Omri, alo arai lokookeng a Imri, alo arai lokookeng a Bani, alo arai lokookeng a Peres, alo arai lokookeng a Yuda. Ngalesea a lokookeng a Yuda alo anyaritae Chela, Asaya arai loapolon, ayakasi ngesi ngide lusapa. Ngalesea a lokookeng a Yuda alo anyaritae Sera, Yeuel ngesi arai loapolon anikech. Araakasi ngitunga ngulu daang 690. Lugu kesi araakasi ngitunga a ngalesea a Benjamen ana alomito Yerusalem. Ayei Salu lo arai lokookeng a Mechulam, alo arai lokookeng a Odapia, alo arai lokookeng a Asenua. Ayei Ibineya lo arai lokookeng a Yeroam, ka Ela lo arai lokookeng a Usi tarai etatait a Mikiri, ka Mechulam lo arai lokookeng a Chepatia, alo arai lokookeng a Reuel, alo arai lokookeng a Ibinija. Ayakasi ngitunga 956 a ekitela kangolo alomito inaa. Ngitunga ngulu daang araakasi ngikapolok a ngawiyei wiyei. Ngimurok lugu kesi alomito Yerusalem, ngirora kech kesi Yedaya, ka Yeoyarib ta Yakin, ka Asaria lokookeng a Ilikia (ekapolon a akai a Akuj), alo arai lokookeng a Mechulam, alo arai lokookeng a Sadok, alo arai lokookeng a Merayos, alo arai lokookeng a Aitub. Emuron eche ngesi Adaya lo arai lokookeng a Yeroam, alo arai lokookeng a Pachur, alo arai lokookeng a Malkija. Emuron eche ngesi Maasai lo arai lokookeng a Adiel, alo arai lokookeng a Yaisera, alo arai lokookeng a Mechulam, alo arai lokookeng a Mechilemis, alo arai lokookeng a Imer. Ngimurok lu apolokinito ngawiyei wiyei, araakasi 1,760. Kesi araakasi ngikunonoi a etich kadaang alo asubio alokai a Akuj. Ngilawi lugu kesi alomito Yerusalem, lo anyaritae Chemaya lo arai lokookeng a Achub, alo arai lokookeng a Asirikam, alo arai lokookeng a Achabia, lu emachar a Merari. Anyaritae luche Bakibakar, ka Erech, ka Galal, ka Matania lo arai lokookeng a Mika, lo arai lokookeng a Sikiri, alo arai lokookeng a Asap. Anyaritae eche Obadia lo arai lokookeng a Chemaya, alo arai lokookeng a Galal, alo arai lokookeng a Yedusun. Anyaritae eche Berekia lo arai lokookeng a Asa, tarai etatait a Elikana, alo alomit nakwap na ayei ere a Netopa. Ngasigerea a akai a Akuj nugu kesi alomito Yerusalem. Ngirora kech kesi Chalum, ka Akub, ka Talimon ta Aiman. Chalum arai ekarikon kech. Napei kolong jik tanang ngirwa ngulu, ngitunga a ngimacharin kech eteenete ekidor lo alo kide a ekidor a Ekapolon. Eteenete sek kesi ngidorin lu elomarere nadakarin a Ngilawi. Chalum lo arai lokookeng a Kore, tarai etatait a Ebiasap, aapei ka ngitunga keng lu araakasi ngika ekitela a Kora, kesi araakasi ngiketeok a ekidor alo elomarere loeam a Akuj. Ekote kesi neni loger losek eteeto taapaakech ngirwa lu aweikinitotor adakar a Ekapolon Akuj. Pineas lo arai lokookeng a Eleasar, aweikinit kolong kesi a ache. Kimiekisi Ekapolon Akuj kiruko ka ngesi. Arai Sekaria lokookeng a Mechelemia dang asiger anakituk a eam a Akuj. Arai ekimar a ngasigerea kadaang ana aseunitae akitere ngidorin 212. Egiritae kesi iwapap ka eger a ngirerea alu alomito kesi. Ekapolon Daudi ka ekadwaran Samuel aseunete taapakech kitoweikis ngitichisio ngulu. Apot kesi ka ngalesea kech torubakis iteete ngidorin a akai a Akuj. Ayei ekidor lo engoliarit lowaitin luomwon daang, kwap, ka kuju, ka kide ta too. Ayei ekidor daang asiger na apolokinit. Ayakasi ngasigerea nguna ngiyenet kech lu engarakinito. Alomito ngiyenet kech ngulu nadakarin, alunyaanasi a ngirwa a ngikan-kaarei iteete ngidorin. Araakasi ngasigerea naomwon Ngilawi, kesi aweikinito ngakiro daang. Aweikinito kesi tani ngamaniyae na eyakasi tooma kai a Akuj ka ngiboro lu ekachakinitae neni. Alomito kesi diyete akai a Akuj, kainyo araakasi kesi eteenete akai ngina, ka angaanar ngidorin ataparach daang. Ngilawi luche kesi aweikinito ngiboro lu ilipeenere. Esemeenete kesi ngiboro esaa daang lo elemarere asubea etich ka esaa lo inyiakunere. Aweikinito ngiche ngiboro lu italeunitoe, ka ngakiria, ka emuna lo epuritoe, ka akimiet a ngikito, ka emitina ta ngikito lu itukukunyete akimuj. Nakaneni etich lo imorenakinere ngikito lu itukukunyete akimuj, arai eka ngimurok a Akuj. Itwaan a Lawi enyaritae Matisia, lo arai edia loapolon a Chalum, a emachar a Kora, ngesi aweikinit ngakipeyos na imao nakim. Ngitunga a emachar a Koas kesi asubanakinete ngamugati na etal alokai a Akuj akolongit na Sabato daang. Ngitunga ngiche a Lawi kesi aweikinito aeo alokai a Akuj. Ngikapolok a ngitunga kangulu alomito namaniyae ngache alokai a Akuj, emam etich asubete alokai a Akuj kainyo eteete akai ngina apaaran ka akwaar. Araakasi ngitunga ngulu ngikapolok a ngawiyei a Ngilawi, iwapap ka eger kata apaakech. Araakasi kesi ngikapolok lu alomito Yerusalem. Esiakini Yeiel ere a Gibeon sodi tolom neni. Tolimokinae aberu keng ekiro be Maaka. Anyaritae lokookeng loapolon Abidon. Anyaritae talokookeng luche Sur, ka Kich, ka Baal, ka Ner, ka Nadab, ka Gedor, ka Aio, ka Sekaria ta Mikilos, lo arai apakeng a Chimea. Alomito ngalesea kech Yerusalem, diyete ngitunga luche a emachar kech. Ner arai apakeng a Kich. Arai Kich apakeng a Saul. Ayakasi Saul ngide lusapa nguomwon lu anyaritae Yonasan, ka Malikichua, ka Abinadab ta Echibaal. Yonasan arai apakeng a Meribaal, alo arai apakeng a Mika. Ayakasi Mika ngide lusapa nguomwon lu anyaritae Pison, ka Melek, ka Tarea ta Aas. Aas arai apakeng a Yara. Ayakasi Yara ngide lusapa nguuni lu anyaritae Alemes, ka Asimapes ta Simri. Simri arai apakeng a Mosa. Mosa arai apakeng a Binea. Binea arai apakeng a Repaya. Repaya arai apakeng a Eleasa. Eleasa arai apakeng a Asel. Ayakasi Asel ngide lusapa ngikan-kapei lu anyaritae Asirikam, ka Bokeru, ka Ichimael, ka Chearia, ka Obadia ta Anan. Apot Ngipilisti kitijikis Ngisirael alomoru a Giliboa. Taarae Ngisirael lukaalak kaneni. Nakaneni todolo Ngipilisti kesi, sodi taara talokookeng a Saul nguuni lu anyaritae Yonasan, ka Abinadab ta Malikichua. Torirau ejie alodiyete Saul, togumugumaasi ngesi ngimalea a ngimoe towana noi. Tolimok Saul esorokit lo atingit ngiboro keng lujiet tama, “Tout ekileng kon kichumea ayong, nyeeponeta Ngipilisti lu eraakasi ngibukui lugelayek lugu kechuma ayong sodi katokianatar.” Nakaneni toem esorokit ngolo asubakin ngakiro nguna. Abu Saul tolem ekileng keng a ilope kimasakin ngesi lokileng kichumi bon. Ani ingolikini esorokit ngolo atamar atoana Saul, kimasakin ngesi dang lokileng keng a ilope totoaka aapei ka Saul. Eger ngolo atoaketa Saul aapei ka talokookeng luuni daang, sodi tasalu apolou keng. Ani iirarete Ngisirael lu ayakasi nadipo a Yesireel atamar amatarosi ngasigerea a Ngisirael, nabo atoaka Saul ka talokookeng, apot kesi toisikis ngirerea kech tamataros. Sodi pot Ngipilisti toloma lorerea ngulu. Ani akolongit na atupit ngina, toloto Ngipilisti akibut ngiboro a ngitunga alu atoakito. Toriamut kesi ngawat a Saul ka talokookeng luuni eperete alomoru a Giliboa. Totubosi kesi akou a Saul nabo talachut ngiboro keng lujiet, sodi tomeasi ngitunga lowaitin daang a akwap a Ngipilisti alimokin ngitunga kech ka ngakujo ngakiro naajokak anikech nguna. Kiwaakis kesi ngiboro kech lujiet kai apei a ngakujo kech, sodi kinenekis akou kai a akuj kech enyaritae Dagon. Ani iirarete ngitunga a ere a Yabech alo eyei Gilead ngakiro na asubeta Ngipilisti Saul, tonyout ngikiliok lukajwok toloto alemun ngawat a Saul ka talokookeng, yaasi Yabech. Tonukakis kesi kwap echoke, torono akimuj a ngirwa a ngikan-kaarei. Atoani Saul ani awounea akiwap ngakiro a Ekapolon Akuj. Angeri ngesi ngakiro na adungokinit Ekapolon Akuj, tasak ngesi atamar kedodeanakis ngikaram ngakiro na adikino esubakinosi, towou akingitun ani a Ekapolon Akuj. Kotere ngakiro nguna, taar Ekapolon Akuj ngesi, kitiliwo Daudi lokookeng a Yese ekapolon. Pot ngitela daang a Isirael nia Daudi alo Eburon sodi tolimokis tamasi, “Kirai sua ngakoyo ka ngaakot kon. Kolong tani eringa Saul erai ekapolon, irikit iyong Ngisirael alojie. Abu nabo Ekapolon Akuj kichikak iyong atamar iliwor ekeyokon a ngitunga keng toliwor ekapolon kech.” Sodi pot ngikarikok daang alo Isirael ni ayei ekapolon Daudi alo Eburon. Kikong Daudi achamakin ka Akuj, kidokakis kesi ngesi akimiet na etal nakou, loger losek echikakinitor Ekapolon Akuj kisitoru nia ekadwaran Samuel. Tonyout ekapolon Daudi ka Ngisirael daang toloto akirem ere a Yerusalem. Ngirwa ngulu, anyaritae ere ngolo Yebus. Ngiebus lu araakasi ngikulepek a akwap kangina, aringa elomito neni. Tolimokis Ngiebus Daudi atamar nyelomari ngesi jik tooma ere. Nakaneni tolema Daudi awas nakaagongon a Sion. Kotere ngakiro nguna, apon tanyarae neni, “Ere a Daudi.” Tolim Daudi tama, “Itwaan ni isiauni taar itwaan a Ngiebus, eliwor ekarikon a ngasigerea!” Abu Yoab lo enyaritae itiokeng Seruya torik ejie, toliwor ekarikon a ngasigerea. Ani kona alomea Daudi tooma awas, apon tanyarae neni, “Ere a Daudi.” Abu ngesi kisiriam adukuor napei alowae alo imuleleara tanang lowae lo alotooma. Toduk Yoab ngiwaitin luche a ere. Toliwor Daudi lokajwon noi kainyo arukito ngesi ka Akuj Namerikanyer. Lugu kesi eraakasi ngirora a ngasigerea a Daudi anakajwok. Ngasigerea nguna erukito aapei ka Ngisirael luche, apot kingarakis ngesi toliwor ekapolon, loger lo echikakinitor Ekapolon Akuj, kiganga kesi apolou keng togogonger. Anyaritae asiger na a ekingaren Yachobeam lo emachar a Achimon, lo arai ekarikon “Aluuni”. Kitiji ngesi ngikiliok ngamiae ngauni a akwara sodi taar daang akitijiet apei. Lo atupit lo a ekingaren aluuni kajwok noi ngesi Eleasar lokookeng a Dodo, lo emachar a Ao. Ebakete ngesi ka Daudi kitijwoto Ngipilisti alo Pas Damim. Ayei ngesi mana a erau esaa lo esiakineta Ngisirael amatar. Apot ngesi ka ngirukitos keng toweikis Ngipilisti alokiding amana kitijwoto Ngipilisti. Kidwanga kesi Ngipilisti kotere Ekapolon Akuj. Akolongit apei, toloto ngasigerea ngache ngauni anasigerea anatomwon-uni kajwok noi nataaba na ebooyo Daudi, na ayei diyete aburibur anyaritae Adulam. Esaa ngolo, ayakasi ngajorei a Ngipilisti nadipo a Repaim. Ngirwa ngulu, ayei Daudi lomukura lo eriwokinitae awas nakaagongon, tolomite ajore a Ngipilisti Betleem. Abu Daudi kiito awi tolim tama, “Arai bo kainuni itwaan idio ngakipi alokare ana eyei Betleem dang!” Apot ngasigerea nauni kajwok noi kimingakis kitoro kiding adakar a Ngipilisti, tookut ngakipi alokare sodi iinut Daudi. Nakaneni towou Daudi akimat ngakipi nguna, pearai abu tobuko toliworos ngakipeyos ani a Ekapolon Akuj. Tolim ngesi tama, “Nyamasi ayong ngakipi nugu jik! Ikokini ibore ngini akimat ngaakot a ngikiliok kalu alu ajalete ngawat kech tonyout akitu!” Abu ngesi tonger akimat ngakipi nguna. Ngakiro nguna idodiunito atitinyu a ngasigerea anauni kanguna. Abichai lo arai lokaatokeng a Yoab ngesi arai ekarikon a ngasigerea “Anatomwon-uni kajwok”. Etiji ngesi ngikiliok ngamiae ngauni a akwara taar sodi toliwor ngesi lokajwon noi ani eyakasi “Lutomwon-uni.” Ngesi arai lokajwon noi ani eyakasi “Lutomwon-uni”. Abu ngesi toliwor ekarikon kech, nakaneni pearai ngesi lokajwon noi loger “Aluuni” a ekingaren. Benaya lo arai lokookeng a Yeoyada lo a ere a Kabiseel, arai asiger nakajwon noi. Asubi ngesi ngakiro naationok, aari tani ngikiliok a Ngiamor ngiarei lukajwok. Akolongit apei, ayei ibore ni ekoni eloch nakwap, abu ngesi toloma nadui taar engatuny. Aari ngesi tani itwaan a akwap a Misiri. Arai itwaan ngini nilangir tarai aoyau keng ngamitae ngaarei, totingite akwara nalangir. Kitijik Benaya ngesi a aselej todema akwara anakan keng, taarea. Araakasi nguna ngakiro naationok a Benaya alo arai epei “Alutomwon-uni”. Arai ngesi lo ayenikinitae anikech, nakaneni peekoni “Luuni”. Toseu Daudi ngesi topolok ngasigerea na eyokiyete ngesi. Ngitunga luche “Alutomwon-uni” kesi ta Asael lo arai lokaatokeng a Yoab, ka Elianan lo arai lokookeng a Dodo alo a Betleem, ka Chamos lo elelea a Arod, ka Eles lo abunit alo Pelet, ka Ira lo arai lokookeng a Ikech alo ere a Tekoa, ka Abieser lo a ere a Anasos, ka Sibekai lo a emachar a Ucha, ka Ilai lo a emachar a Ao, ka Maarai lo a akwap a Netopa, ka Isai lo arai lokookeng a Ribai alo ebunit alo Gibea anakwap a Benjamen, ka Benaya lo a akwap a Pirason, ka Urai lo abunit anadipoe ana eyakasi diyete ere a Gaach, ka Abiel lo abunit anadipo a Araba, ka Asimapes lo a ere a Baurim, ka Aliaba lo abunit alo Chaalibon, ka Achem lo abunit alo Gison, ka Yonasan lokookeng a Chagee lo a emachar a Arar, ka Ayam lo arai lokookeng a Sakar alo a emachar a Arar, ka Elipal lo arai lokookeng a Ur, ka Eper lo abunit alo Mekera, ka Aija lo abunit alo Pelon, ka Esiro lo abunit alo Karimel, ka Naarai lo arai lokookeng a Esibai, ka Yoel lo arai lokaatokeng a Nasan, ka Mibiar lo arai lokookeng a Agiri, ka Selek lo a emachar a Amon, ka Naarai lo a ere a Beeros, lo atingit ngiboro a Yoab lu ejie, ka Ira, ka Gareb, lu araakasi daang ngika emachar a Yatir, ka Uria lo arai Eitit, ka Sabad lo arai lokookeng a Ailal, ka Adina lo arai lokookeng a Chisa (arai ngesi lo ayenikinitae alokitela a Reuben. Ayei ngesi ajore keng a ilope na arai ngasigerea ngatomwon-uni), ka Anan lokookeng a Maaka, ka Yochapat lo a Misan, ka Usia lo a Achitera, ka Chama ka Yeiel lu araakasi talokookeng a Osam alo a Aroer, ka Yediael lo arai lokookeng a Chimuri, ka lokaatokeng Yoa lu aponito alo Tis, ka Eliel lo abunit alo Maapa, ka Yeribai ka lokaatokeng Yochapia, lu araakasi talokookeng a Elinaam, ka Isima lo a akwap a Moab, ka Eliel, ka Obed ta Yaasiel lo abunit alo Soba. Alomit Daudi Sikilag, nikolong alosi ngesi na amataror ani ekapolon Saul. Apot ngasigerea nakaalak nakajwok toloto ni ayei ngesi. Araakasi ngasigerea nguna ngaka ekitela a Benjamen alo arai ekitela a Saul. Apedorete kesi agumanar ngimalea a akau ka akibaarior ngamoru a ngakan ana alokedieny ka teten. Ngikarikok kech kesi Ayeser, totupak Yoach. Araakasi daang talokookeng a Chemaa alo abunit alo Gibea. Ngikarikok a ngasigerea kesi Yesiel ka Pelet, lu araakasi talokookeng a Asimapes, ka Beraka, ka Yeu lua Anasos, ka Ichimaya lo abunit alo Gibeon, lo arai asiger na ayenikinitae tarai epei a ngikarikok “Alutomwon-uni”, ka Yeremia, ka Yaasiel, ka Yoanan ta Yosabab lo abunit alo Gedera, ka Elusai, ka Yerimos, ka Bealia, ka Chemaria, ka Chepatia lo abunit alo Arip, ka Elikana, ka Ichia, ka Asarel, ka Yoeser ta Yachobeam lo a emachar a Kora, ka Yoela ta Sebadia, lu araakasi talokookeng a Yeroam, lu aponito alo Gedor. Eraakasi lugu ngirora a ngasigerea ana eyenikinitae tojwoko, ana apote alokitela a Gad toloto kimorikinos ka ngasigerea a Daudi na ayakatar ni eriwokinitae awas anariet. Aperikinito kesi ejie a ngaupwala ka ngakwaaras. Adedeng ekote ngingatunyo, topiraka loger a ngimakatae alu a ngimoru. Eser arai ekarikon kech, Obadia ngesi lo a ngiarei, Eliab ngesi lo a nguuni, Michimana ngesi lo a nguomwon, Yeremia ngesi loa ngikan. Atai lo a ngikan-kapei, Eliel lo a ngikan-kaarei, Yoanan lo a ngikan-kauni, Elisabad lo a ngikan-koomwon, Yeremia lo a ngitomon, Makibanai lo a ngitomon ka epei. Ngasigerea nugu ngache na a ekitela a Gad, araakasi ngikapolok lu aweikinito ngasigerea abunget apei, taraakas luche ngasigerea naachik na aweikinito ngasigerea amiat apei. Elap lo ekingaren a ekaru a epei, ngirwa lu elelebunor angolol Yorudan kipaun ngakipi, apot kesi todoka angolol, topetasi ngitunga lu alomito nadipoe na ayakasi kide ka too angolol. Anyounete kolong ngikiliok a ngitela a Benjamen ka Yuda toloto ni eriwokinitae awas, ni ayei Daudi. Tolot Daudi akisiriam kesi tolimok tama, “Ani kiponito esi iraakasi ngipaalon lu isakete akingarakin ayong, kepeyounit ayong esi. Emorikin ngoni! Nakaneni ani kisakete esi akipotokin ayong ngimoe kang tarai nyasaki ayong akiwan esi, eanyuni Akuj kata apaayok ngakiro nguna kirira esi.” Abu Etau a Akuj toloma ni eyei epei kech lo anyaritae Amasai. Amasai ngesi lo aliwor ekisidi ekarikon “Alutomwon-uni.” Abu ngesi tolim tama, “Daudi lokookeng a Yese, kirai sua ngikon! Kiboikinos akaalimon ka ngitunga lu kingarakinito iyong! Ibakit Akuj alowae kon.” Kipeyou Daudi kesi kitiliwo ngikapolok luuchik a ngasigerea keng. Apot ngasigerea ngache alokitela a a Manase toloto kibaka alowae a Daudi na alooso ngesi ka Ngipilisti akitijwore ekapolon Saul. Abu ngesi nyiingarak Ngipilisti alojie, kainyo aemito ngikapolok a Ngipilisti abalasi epedori Daudi akipotokin kesi Saul lokolong arai ekapolon keng. Apon Daudi tolimokinae atamar tobongo Sikilag. Ngasigerea na Manase nugu kesi nakolong aloose nia Daudi, na abongio ngesi Sikilag. Ngirora kech kesi Adina, ka Yosabad, ka Yediael, ka Mikael, ka Yosabad, ka Eliu ta Silesai. Alo Manase, arai ipei kech daang ekarikon a ngasigerea abunget apei. Toliworos kesi ngasigerea naachik anajore a Daudi, kainyo araakasi kesi daang ngasigerea nakajwok. Ani ekisidi toliworos kesi ngikarikok anasigerea a Ngisirael. Akolongit daang, aponeenete ngikiliok alomar nasigerea a Daudi, sodi talalaaros ngasigerea keng tarata nakajwok. Lugu kesi eraakasi ngirora a ngajorei ana apote alo Eburon, kibaka alowae a Daudi, akitiliwor ngesi ekapolon, kilunyokin nados a Saul loger lokolong alimunitor Ekapolon Akuj. Ekimar kech ngesi logo. Ani a Yuda, ngikiliok lu atingito ngaupwala ka ngakwaaras, araakasi 6,800. Ani a Simeon, araakasi ngikiliok lukajwok 7,100. Ani a Lawi, 4,600. Ngirukitos a Yeoyada alo arai alesit a Aron, araakasi 3,700. Ngiyenet a Sadok alo arai esorokit lokajwon, ayakasi ngikarikok ngitomwon-arei ka ngiarei. Ani a Benjamen (alo arai ekitela a Saul) araakasi 3,000. (Ngitunga a ekitela a Benjamen lukaalak, ebakito ani a Saul, nyeisikina ngesi.) Ani a Epiraim, araakasi 20,800. Araakasi kesi lu ayenikinitae alomacharin kech. Ani a Too Manase, araakasi 18,000 lu aseunitae tolimokinae atamar toloto kitiliwosi Daudi ekapolon. Ani a Isakar, araakasi ngikarikok 200, erukito aapei ka ngitunga lu apolokinito kesi (ngikarikok lugu kesi ayenete ngakiro na ejoikinit Ngisirael esubakinete ka esaa lo ejoikinit esubakineta). Ani a Sebulun, araakasi 50,000 ngikiliok luajokak lu emunoi, tasadito ejie. Etatamitae kesi ajwore a ngiboro alu ejie kadaang. Ani a Naputal, araakasi ngikarikok 1,000, erukito aapei ka ngikiliok 37,000 lu atingito ngaupwala ka ngakwaaras. Ani a Dan, araakasi 28,600, ngikiliok lu etatamitae. Ani a Acher, araakasi 40,000, ngikiliok lu asadito ejie. Ani a ngitela alu alomito kide Yorudan, Reuben, ka Gad ta Kide Manase, araakasi 120,000 ngikiliok lu etatamitae ajwore a ngiboro alu ejie kadaang. Tonyout ngasigerea nguna daang esadito ejie toloto Eburon, esakete akitiliwor Daudi ekapolon a Ngisirael. Atukito Ngisirael daang akitiliwor Daudi ekapolon. Kiruko kesi ka Daudi kaneni a ngirwa a nguuni, enyamete akimuj ka akimat emuna lo epuritoe lo epeyokineto kesi Ngisirael luche. Napei alotela alukalonak alomito kwap, lu araakasi Isakar, ka Sebulun ta Naputal, potu ngitunga emeto ngisikiria, ka ngikaala, ka ngangolei ta ngimongin iwokito ngakiria, ka ngameyana, ka ngarinyo a ngamusabib, ka emuna lo epuritoe ta akimiet a ngikito. Taramut kesi tani ngaatuk ka ngamesekin na eario tanyamae. Edodiunito nguna daang eger a alakara a ngitunga kadaang anakwap kangina. Totuko Daudi ka ngikarikok a ngasigerea daang lu aweikinito ngasigerea abunget apei ka lu aweikinito ngasigerea amiat apei. Ani erumor tolimok Ngisirael daang tama, “Ani kichamito esi, taraakas nabo ngakiro nugu na echamit Ekapolon Akuj na erai Akuj yok, kimiekisi atomeasi ngitunga ni eyakasi Ngisirael luche ka ngimurok ta Ngilawi ani eyakasi kesi alorerea kech, sodi tolimokis kesi atamar pot eriamariama ka ngoni nege. Sodi atonyoutu ngoni atoloto ayaun asaduku a Achamunet a Akuj yok, nakolong kijamuarit ngoni ngirwa lu araakar Saul ekapolon.” Tachamut ngitunga daang asubakin kongina ani ajoikinitotor kesi ngakiro nguna. Abu Daudi tochun Ngisirael daang alowaitin kadaang napei alokukuor a Misiri alowae alo alokuju tanang napak a Amas alowae alo alokwap. Asaki ngesi yaunae asaduku a Achamunet alo Kirias Yearim yaarae Yerusalem. Toloto Daudi ka ngitunga lore a Baala, ngesi atamar Kirias Yearim lo eyei nakwap a Yuda. Aloose kesi inaa esakete ayaun asaduku a Achamunet a Akuj. Elimokinitae asaduku na a Achamunet ngina ekiro a Ekapolon Akuj Namerikanyer, ana ibooyi alokidiama ngiborei lua ngabeben. Tolemut kesi asaduku a Achamunet alokai a Abinadab kiwaakis naurukuk na iritae nakitetet. Usa ka Aio eyokiyete aurukuk ngina, kidongaate Daudi ka ngitunga daang a ngikilinga kech kadaang idodiunito arimatoi ani a Akuj. Aeosi kesi kideese ngiboro lu eeore lu araakasi ngagitae, ka ngiburin, ka ngasua, ka ngichoroi, ta ngaburucho. Ani enangunete kesi ni edayere ngalemet ani enyaritae Kidon, tadakar emong, sodi kitorwaa Usa akan torwakin asaduku a Achamunet toting. Tongoik Ekapolon Akuj Usa atipei, taar ngesi ani atapea asaduku ngina. Totoan ngesi kaneni alongaren Ekapolon Akuj. Kotere ngakiro nguna, anyarae neni Peres Usa tani tokona. Tongo Daudi ani angoea Ekapolon Akuj kirira Usa. Abu Daudi toem Akuj tolim tama, “Ekokini tokona ayong alemari asaduku a Achamunet ai?” Sodi towou Daudi ayaar asaduku ngina Yerusalem. Abu kimiek anawi a itwaan ani anyaritae Obed Edom, ani erai ika ere a Gas. Kiboi asaduku kaina a ngilapio a nguuni. Abu Ekapolon Akuj topia ngitunga a awi a Obed Edom ka ibore ni arai ikeng daang. Tomea Iram lo arai ekapolon a Tiro ngitunga nia Daudi, etingito ngakito a ngichekereng. Ayakasi ngikadukok lu adukete a ngakito ka lu adukete a ngamoru, lotunga ngulu. Abu ekapolon Daudi toyen atamar etiliwo Ekapolon Akuj ngesi ekapolon a Isirael, nabo apia apolou keng kotere ngitunga keng. Kiut Daudi ngaberu ngache alo Yerusalem, touriu ngide lusapa ka lupesur lukaalak. Ngide auriuni ngesi alo Yerusalem kesi Chamua, ka Chobab, ka Nasan, ka Solomon, ka Ibiar, ka Elichua, ka Elpelet, ka Noga, ka Nepeg, ka Yapia, ka Elichama, ka Beeliada, ta Elipelet. Ani iirarete Ngipilisti atamar etiliwor Daudi ekapolon a Isirael kadaang, tolot ajore a Ngipilisti akirem ngesi. Sodi tonyou Daudi kisiriamia kesi. Todolut Ngipilisti nadipo a Repaim toremo neni. Kingit Daudi Akuj tama, “Etiji Ngipilisti a? Kisidwangi iyong ayong kesi a?” Tatachak Ekapolon Akuj tama, “Ee, kitijik! Kesidwangi ayong iyong kesi!” Sodi kitiji Daudi kesi alo Baal Perasim, kidwang. Tolim tama, “Kotere Akuj, ejukun ayong alokiding ajore a ngimoe loger a akaale.” Apon neni tanyarae Baal Perasim. Ani ematarosi Ngipilisti, toisikis ngakujo kech nasubuna kaneni, todung Daudi atamar kinomae. Nipei bore ngini, apot Ngipilisti tobongosi nabo nadipo a Repaim toremo nabo. Ani ingisi Daudi Akuj nabo, tatachak ngesi tama, “Nyiitijik kesi kane, kiloda kitijik kesi alowae aloche, alodiyete ngikito lube ta lokimieta ngul. Ani iirari iyong erue a ngakejen alokidiama ngikito, kitijik iyong kesi kainyo kengarenikini ayong iyong edwang ajore a Ngipilisti.” Tosubak Daudi ngakiro na adungokinit Akuj. Kotere ngakiro nguna, kirita ngesi Ngipilisti tobongosi alo Gibeon tananga Geser. Tokeikin ekipur a Daudi wadaang, sodi kitubul Ekapolon Akuj ngibukui daang kotere Daudi. Abu Daudi toduk ngakais keng lore a Daudi. Tosubak ngesi tani ni iwaakinio asaduku a Achamunet ani erumor kimukok eam. Sodi tolim ngesi tama, “Emam nabo ngitunga ngiche ilepilepete asaduku a Achamunet mati Ngilawi lukolong aseuni Ekapolon Akuj atamar kesi eliworosi ilepilepeenete, toliworos esubete etich keng jik.” Abu Daudi tochun Ngisirael daang Yerusalem, esaki yaut asaduku a Achamunet ni asubakini ngesi kotere asaduku ngina. Ani erumor tochun ngalesea a Aron ka Ngilawi. Ani a Ngilawi, bu Uriel lo emachar a Koas. Apolokinit ngesi ngitunga a emachar keng 120. Alomachar a Merari, bu Asaya lo apolokinit ngitunga a emachar keng 220. Alomachar a Gerichon, bu Yoel lo apolokinit ngitunga a emachar keng 130. Alomachar a Elisapan, bu Chemaya lo apolokinit ngitunga a emachar keng 200. Alomachar a Eburon, bu Eliel lo apolokinit ngitunga a emachar keng 80. Ani alomachar a Usiel, bu Aminadab lo apolokinit ngitunga a emachar keng 112. Tanyarau Daudi ngimurok a Akuj lu anyaritae Sadok ka Abiasar ta Ngilawi lukan-kapei anyaritae Uriel, ka Asaya, ka Yoel, ka Chemaya, ka Eliel ta Aminadab. Tolimok ngesi Ngilawi tama, “Esi iraakasi ngikapolok a ngimacharin a Ngilawi. Kitosegas esi ka Ngilawi luche, sodi yaut asaduku a Achamunet a Ekapolon Akuj ana erai Akuj a Ngisirael kiwaakis ni asubak ayong. Erai nikolong nyilepolepo esi asaduku akolongit na ekingaren, ngesi kiriraa ngoni Ekapolon Akuj na erai Akuj yok, kainyo kipot nyikisub itemem ka etal.” Apot ngimurok ka Ngilawi kitosegas esakete alemar asaduku a Achamunet a Ekapolon Akuj ana erai Akuj a Ngisirael. Kilepolepo Ngilawi a ngakito ana ariongakinito losegeta, loger lo adungokinitor Ekapolon Akuj kisitoru nia Musa. Todungok Daudi ngikapolok a Ngilawi atamar toseut Ngilawi ngiche toeoto ka akiram ngagitae ka ngasua. Apot Ngilawi toseut Eman lo arai lokookeng a Yoel, ka eyenet keng Asap lo arai lokookeng a Berekia ta Esan lo arai lokookeng a Kuchaya alo emachar a Merari. Ngitunga ngiche lu aseunio akingarakin kesi akiram ngagitae nakaruok noi kesi Sekaria, ka Yaasiel, ka Chemiramos, ka Yeyel, ka Uni, ka Eliab, ka Benaya, ka Maaseya, ka Matisia, ka Elipeleu, ka Mikneya ta ngasigerea a akai a Akuj ngaarei, Obed Edom ka Yeiel. Ngikaeok lu anyaritae Eman, ka Asap ta Esan, asakitae kituruoto ngasua nanyangayek. Sekaria, ka Asiel, ka Chemiramos, ka Yeyel, ka Uni, ka Eliab, ka Maaseya ta Benaya, asakitae tarama ngagitae nakaruok noi. Ani Matisia ka Elipeleu, ka Mikneya, ka Obed Edom, ka Yeiel ta Asasia, asakitae tarama ngagitae na nyeruosi noi. Ani kona araakar Kenania ekunonoit a aeo, apon ngesi toseunae topolok Ngilawi lukaeok. Berekia ka Elikana, toseunae toliworos ngiketeok asaduku a Achamunet. Ngimurok lu anyaritae Chebania, ka Yochapat, ka Nesanel, ka Amasai, ka Sekaria, ka Benaya ta Elieser, apon toseunae tokuta ngaburucho alongaren asaduku a Achamunet. Apot ekapolon Daudi ka ngikasukou a Ngisirael ta ngikarikok a ngasigerea toloto nawi a Obed Edom ayaun asaduku a Achamunet. Kidongata kesi kinyiakanasi. Tolemut kesi ngimongin ngikan-kaarei ka ngamesekin ngakan-kaarei taara ngakipeyos esakete Akuj kingarak Ngilawi lu elepilepito asaduku a Achamunet. Anapit Daudi eworu lokaanikan ajokon, tanapito tani ngikaeok, ka ekarikon kech Kenania ta Ngilawi lu elepilepito asaduku. Anapit Daudi tani akaluwat*g** a emuron. Apot Ngisirael daang yaasi asaduku a Achamunet Yerusalem elakara kimariteteete, ekusete ngaburucho ka ngaamwar, kituruyete ngasua, taramito ngagitae. Ani na ayaunitere asaduku a Achamunet lore, abu Mikal na arai nakookeng a Saul kingolia alopuke a akai, kingolik ekapolon Daudi idongae toporoporoe kotere alakara. Abu Mikal kimenya Daudi alotau keng. Yaasi kesi asaduku a Achamunet loeam losek asubakinit Daudi, sodi kiwaakis tooma. Ani erumor tolemikis Akuj ngakipeyos na inomio ka na a ekisil. Ani kelemu Daudi ngakipeyos kerumor, topia ngitunga a ekiro a Ekapolon Akuj, sodi tokorak kesi daang akimuj. Nak ngesi ekile ka aberu daang alo Isirael amugati apei, ka akiring na epeitoe ta ngarinyo a ngamusabib. Toseu Daudi Ngilawi ngiche akilip Ekapolon Akuj, Akuj a Ngisirael, alongaren asaduku a Achamunet, eeosi ka akikut Akuj. Toseunae Asap toliwor ekapolon kech, totupak Sekaria. Ngilawi luche aseunitae kesi Yeiel, ka Chemiramos, ka Yeyel, ka Matisia, ka Eliab, ka Benaya, ka Obed Edom ta Yeyel. Ngulu kesi aramito ngagitae. Asap ngesi eturui ngasua. Ngimurok luarei anyaritae Benaya ka Yaasiel, toliworos ekuseenete ngaburucho alongaren asaduku a Achamunet. Arai akolongit na ekingaren ngina ainakinea Daudi Asap ka Ngilawi luche etich lo eeotor ipurosi Ekapolon Akuj. Tobuakisi Ekapolon Akuj alakara, tolimosi ationis keng. Tolimokisi ngibukui ngakiro na asub ngesi. Toeokisi kipuro Ekapolon Akuj. Tolimosi ngakiro nakatalarak asubaki ngesi. Atalakaros ani kiraakar ngoni ngikeng. Kimiekisi lu ilipito ngesi daang talakaros! Kapesi nia Ekapolon Akuj kingarak, sodi kilipa ngesi jiik. Kitamutu ngakiro nakatalarak asubaki ngesi. Kitamutu ngakitoodikinet nakailiilok asubi Akuj, ka ngakiro a eriras na alimuni ngesi. Esi ngalesea a Yakobo, alo erai ekasuban etich a Akuj. Esi ngalesea a Isirael, alo aseuni Akuj. Ekapolon Akuj erai Akuj yok. Eraakasi ngitalio keng ngika ngakwapea kadaang. Itamunit Akuj achamunet keng, na kolong adunguni ngesi toliwor aka jik. Achamunet na achamakin ngesi ka Aburaam. Ngakiro na ekongi ngesi ani a Isaka. Achamakinosi Ekapolon Akuj ka Yakobo, tachamakinos jik. Tolim tama, “Kainakini iyong akwap a Kanaan. Eliwor akwap ngina akon a ilope.” Akidioko ngitunga a Akuj. Araakasi kesi ngipeyok anakwap a Kanaan. Atubonorosi kesi anakwapea, tonyout alokapolon a epei toloto nia loche. Kiratak Akuj ngitunga nyeeboliatar kesi. Ani kona asakea ayuun kesi, kichikichik ngikapolok ebala, “Nyiiwan ngikasubak etich kang luseuna, nyiitap ngikadwarak kang.” Ngitunga daang, taramakisi Ekapolon Akuj eeos! Tolimosi akolongit daang ngakiro naajokak, na atamar kiyuu ngesi ngoni. Tolimokisi ngibukui akibuseanu keng, tolimokisi ngitunga daang ngakiro naationok esubi ngesi. Etiono Ekapolon Akuj, ejoikinit ipuroi noi. Ejoikinit ngesi erimae akidwang ngakujo nache daang. Eraakasi ngakujo a ngibukui aluche ngasubuna, nakaneni Ekapolon Akuj asubi adis. Iriamit ngesi akibuseanu ka ekipur. Ileleba agogongu ka alakara kai keng. Kipuruutu Ekapolon Akuj, ngitunga daang anakwap! Kipuruutu akibuseanu keng ka apolou. Kipuruutu ekiro a Ekapolon Akuj lo ibus. Yautu akipeyos tolomut kai keng. Toriediko alongaren ngolo italeuno na etakanunea. Tamaranik akwap daang alongaren keng! Ewei akwap itirokina wapei, emam kona isiyotoorio. Talakaros akwap ka kidiama! Tolimokisi ngibukui atamar Ekapolon Akuj erai ekapolon. Toruk anam ka ibore daang ni eyei tooma kon. Talakaros ngamanat ka ibore daang ni eyei nikus! Iremarete ngikito a namoni elakara, na ebunio Ekapolon Akuj apolokin akwap. Tobuakisi Ekapolon Akuj alakara, kainyo ejok ngesi. Tolimokisi ngesi tamasi, “Toyuunae sua, Akuj na irai Akayuunan kosi. Tochunakinae sua wapei, toyunae alobukui, sodi atobuakineta sua iyong alakara, epuruutu ekiro kon lo italeuno.” Epuruutu Ekapolon Akuj, Akuj a Isirael! Epuruutu ngesi tokona ka jik! Apot ngitunga daang tamasi, “Aamen,” sodi kipuruut Ekapolon Akuj. Kitiliwo ekapolon Daudi Asap ka Ngilawi luche kesi eweikinito jik akilip na elipeenere ani ewaakinitae asaduku a Achamunet. Toliworos kesi esubeenete etich kaneni ngirwa daang. Obed Edom lo arai lokookeng a Yedusun ka ngikiliok ngitomwon-kauni a emachar keng, toliworos ingarakinito kesi. Osa ka Obed Edom kesi eyokiyete ngidorin. Emuron Sadok ka ngimurok luche, kesi aweikinito ni elipeenere Ekapolon Akuj alo Gibeon. Ataparach ka atabong daang, enomeenete kesi akipeyos na inomio nginerin daang alokeno, itemem ka eger lo igiritae lotal lo etaanyuni Ekapolon Akuj Ngisirael. Arukito kesi ka Eman, ka Yedusun ta daang lu aseunio aeonokin Ekapolon Akuj ipurosi kotere amina keng na nyesaluni. Eman ka Yedusun nabo aweikinito ngaburucho ka ngasua ta ngiboro luche lu eturuonokinio na aeore ngieosio a ekipur. Ngitunga a emachar a Yedusun kesi aseunitae kiyoko ngidorin. Apot ngitunga daang toloto nawiyei, sodi tolot Daudi nawi akiruk ka ngitunga a awi keng. Alomit tokona Daudi kai keng. Akolongit apei, tanyarau ngesi ekadwaran Nasan tolimok tama, “Kingolik mono tokona iyong a, abe alomit ayong kai na adukio a ngakito a echekereng, tarai iwaakinitae asaduku a Achamunet na erai aka Akuj loeam!” Tatachak Nasan tama, “Tosub ibore nicha isaki iyong akisub daang kainyo irukito iyong ka Ekapolon Akuj.” Nakaneni tolimok Ekapolon Akuj nia Nasan nakwaare a akolongit kangina tama, “Kape tolimok ekasuban etich kang Daudi atamar ebala Ekapolon Akuj kona, ‘Meere iyong kidukokini ayong akai na eboikin. Napei kolong ayuunea ayong Ngisirael alo Misiri tani tokona, nyiboikino ayong kai. Eboyeene ayong jiik aloeaman, erimit akwap. Ngirwa daang lu kirimitor ayong ka Ngisirael akwap, emam tani epei a ngikarikok alu aseuni ayong lo engit ayong atamar nyo pekadukokinea akai na ngakito a echekereng.’ “Kotere ngakiro nguna, tolimok ekasuban etich kang Daudi atamar ayong Akuj Namerikanyer alimokinit ngesi kona, ‘Kaseuni kolong ayong iyong anachokor ana iyokiyo ngamesekin, sodi ketiliwo ekapolon a ngitunga kang alu eraakasi Ngisirael. Kiruk ayong ka iyong ani ilosi kadaang, sodi edwang ngimoe kon daang esaa lo ilosio iyong ngaren. Ketiliwori ayong iyong lo kiyenikinitae loger a ngikarikok alu eyenikinitae noi anakwapea. Aseuni ayong akwap na eliwor aka Ngisirael alu eraakasi ngitunga kang, sodi etak kesi, tolometa nakwap na erai akech a ngikulepek, nyiichanere nabo. Nyewanete kesi ngitunga luaronok loger lokolong sek a ekingaren, na etijioto kesi ngitunga lukadedengak napei kolong alomuneta nakwap naga. Kechikakinit esi atamar edwangi ayong ngimoe kus daang, sodi kainak esi ngalesea. Ani itoani iyong kitonukakin ni enukakinitae taapaakon, etiliwori ayong epei kata lokookon ekapolon, sodi etogogong apolou keng. Lokookon ngolo ngesi kadukokini ayong akai, nabo eturubi ayong apolou keng toliwor akajik. Aliwor ayong apakeng, toliwor ngesi lokookang. Nyawouni ayong akingarakin ngesi loger lokolong awounea akingarakin Saul, lokolong alemari ayong toliworor iyong ekapolon. Etiliwori ayong ngesi ekapolon a ngitunga kang, toweik ka apolou kang jik. Nyedaun apolou keng jik.’ ” Tolimok Nasan Daudi ngakiro daang na edodikinit ngesi Akuj. Sodi toloma Daudi loeam a Akuj, kiboikin kilip tama, “Nyo tokona lo arai ayong dang, kisubakinea iyong ngakiro nugu, Ekapolon Akuj na irai Akuj. Nyo tani ngitunga a awi kang? Ani ikoni neni dang, Ekapolon Akuj na irai Akuj, kichikak iyong ayong ngakiro a ngalesea kang kotere ngikaru lu monan isidiunosi. Nakaneni Ekapolon Akuj, kisikok iyong ayong itwaan ni eyenikinitae. Anukiro nabo ngache kalimokini ayong iyong? Kiyeni iyong ayong lokojokon. Ani ikoni neni dang, kirima iyong ayong ekasuban etich kon. Araakasi ngakiro nguna na ichamit iyong akisub kotere ayong. Isaki nabo iyong akidodikin ayong apolou kang na isidiuno. Ekapolon Akuj, emam tani ipei ni ikwaan ka iyong. Kiyen sua ngirwa daang atamar iyong bon irai Akuj. Emam nabo ebukut eche anakwapea lo ikwaan ka Isirael, lokolong iyuuni ani araakar ekedalan, kitiliwo ngitunga kon a alope. Ngakiro nakatalarak ka naketubulok isubi iyong anikech, apetakis ekipur kon wadaang a ngakwapea. Iyuuni iyong ngitunga kon alo Misiri, sodi kitwarak ngibukui luche na alooso ngitunga kon ngaren. Itiliwo iyong Ngisirael ngitunga kon nakajik. Ani iyong Ekapolon Akuj, iliwor Akuj kech. “Tokona bocha Ekapolon Akuj, kitemok jik akichikakinet nakolong kichikakini iyong ayong ka ngalesea kang, sodi tosub ngakiro nakolong ilimuni iyong atamar isubi. Eyenikinio ekipur a ekiro kon nakajik, sodi tolimuunut ngitunga jiik ebalasi, ‘Akuj Namerikanyer, ngesi erai Akuj a Isirael!’ Nakaneni itiliwori iyong apolou kang akajik. Akuj kang, apedori ayong akilip iyong loger logo, kainyo kidodik iyong ayong ekasuban etich kon ngakiro nugu daang, ilimu tani atamar itiliwori iyong ngalesea kang ngikapolok. Ee Ekapolon Akuj, irai iyong Akuj, kichikak iyong ayong ekasuban etich kon akichikakinet naajokon noi naga. Kelipit iyong atamar topia ngalesea kang sodi torubakis eanyunito ngakiro naajokak anikon. Iyong Ekapolon Akuj ipia kesi, nakaneni eliwor apiaro kon aka ngalesea kang.” Ani ekisidi, tolot ekapolon Daudi nabo akitijwore Ngipilisti sodi kidwang. Todema kesi ere a Gas ka ngadakarin na edunyatar. Kidwang ngesi tani Ngimoab, toliworos ngitunga lu epolokinit ngesi, sodi tobukonokis ngesi echur. Ani erumor kitijik Daudi ekapolon anyaritae Adadeser lo apolokinit ni anyaritae Soba, ni ayei nakwap a Siria. Ayei ni anyaritae Soba neni diyete akwap a Amas. Etijikini Daudi Adadeser kaneni esaa lo asakea Adadeser akidodiun atamar arai ekapolon a ewae alo alokuju angolol Eupurate. Torem Daudi ngaurukukui keng na irito ngangolei abunget apei ani a Adadeser, ka ngikameak ngangolei ngabunge ngakan-kaarei, ta ngasigerea na eloose a ngakejen ngabunge ngatomwon-arei. Kimiek ngesi ngangolei na iriyete ngaurukukui amiat apei, sodi tonged ngesi ngangolei nache daang ngamori na a ngakejen tongwala. Ani emeunete ngitunga a Siria lu ayakasi Damasko ajore na ingarakini ekapolon Adadeser alojie, abu Daudi kitijik ajore ngina taar ngitunga ngabunge ngatomwon-arei ka ngaarei. Ani erumor kiwaak ngesi ngadakarin na ejie nakwap kech. Apot kesi toliworos ngitunga lu epolokinit Daudi, tobukonokis ngesi echur. Abu Ekapolon Akuj kisidwang Daudi ngimoe keng awadaang. Tolema Daudi ngaupwala a egolit na atingito ngikapolok a arieng a Adadeser, sodi yaa Yerusalem. Tolema ngesi tani asuat nanyang nakaalan alo Tibas ka Kun, alu araakasi ngirerea lu apolokinit Adadeser. (Ekisidi, tolem Daudi asuat nanyang ngina tosubakinea atanki, ka ngapirio ta ngiboro lu akai a Akuj lu asubunitae anasua ananyangayek.) Kiira Toi lo arai ekapolon a Amas atamar edwang Daudi ngasigerea daang a Adadeser. Sodi tomea ngesi lokookeng lo anyaritae Yoram akimalare ekapolon Daudi ka abuakin ngesi alakara ani edwangea Adadeser. Ajito sek Toi ka Adadeser ngajiet nakaalak. Naa Yoram Daudi ngiboro lu asubunitae a egolit ka akwangat ta asuat nanyang. Kitaleu Ekapolon Daudi kesi toliworos ilipeenere. Kimorik aapei ka akwangat ta egolit lo alemuni ngesi alobukui alu edwangi. Ngibukui ngulu kesi Ngiedomae, ka Ngimoab, ka Ngiamon, ka Ngipilisti ta Ngiamalek. Abichai lo anyaritae itiokeng Seruya, abu kidwang Ngiedomae ani enyaritae adipo a Amakat. Taar ngesi Ngiedomae ngabunge ngatomon ka ngakan-kauni. Kiwaak ngesi ngadakarin a ejie lowaitin daang a Edom. Toliwor ngesi epolokinit ngitunga a Edom. Kidwang Daudi ngimoe keng awadaang kotere Ekapolon Akuj. Topolok Daudi akwap a Isirael daang, sodi tosubea ngitunga keng daang ngakiro na itemokino toriyan. Yoab lo arai lokaatokeng a Abichai ngesi arai ekarikon a ngasigerea. Yeochapat lokookeng a Ailud ngesi aweikinit ekimar. Sadok lokookeng a Aitud ka Aimelek lokookeng a Abiasar kesi araakasi ngimurok a Akuj. Seraya ngesi arai ekegiran ngikesio. Benaya lokookeng a Yeoyada ngesi arai ekarikon a ngasigerea ana eteete Daudi. Araakasi talokookeng a Daudi ngikapolok a arieng. Ani ekisidi, totoan Naach lo arai ekapolon a Ngiamon. Sodi toliwor lokookeng Anun ekapolon. Tolim ekapolon Daudi tama, “Asaki ayong atosubea Anun naajokak loger lokolong kasubea apakeng Naach ayong naajokak.” Abu Daudi tomea ngitunga akisililing Anun. Ani enangete kesi nakwap nabe Amon, toloto aanyun ekapolon Anun, apot ngikarikok a Ngiamon tolimokis ekapolon kech tamasi, “Esibit iyong emeunit Daudi ngitunga lugu akisililing iyong ani erimar apakon a? Meere kongina! Emeunit ngesi kesi nege akireb akwap sodi kidwanga ngoni!” Torwakin Anun ngitunga lu ameunit Daudi sodi tabany ngajul a ngabokonya kech. Totub ngesi ngiwaitin a ngiworui kech lu erapito ngikalokoi, sodi kimiek kesi toloto. Kiruma ngitunga ngulu ngileech noi tokuruwo kona ebongorete nawi. Ani iirari Daudi ngakiro na asubakinosi, abu tomea itwaan alimokin kesi ebala, “Tasala mono alo Yeriko tanang erupunete ngajul a ngabokonya kech, ani erumor tobongut nawi.” Ani eyenunete Ngiamon atamar akadakis Daudi ngakiro kech, apot tolemut akwangat ngakiloi ngabunge ngatomwon-uni ka ngoomwon togieleta ngaurukukui na iritae ka ngikameak ngaurukukui nguna, lu apote alokuju Mesopotamia ka ngakwapea a Siria na enyaritae Maaka ka Soba. Togiela kesi ngaurukukui na iritae ngabunge ngatomwon-uni ka ngaarei. Kirukut ekapolon a Maaka ka ajore keng toloma diyete Medeba. Pot Ngiamon dang alorerea kech sodi tasada ejie. Ani iirari Daudi ngakiro kech, abu tomea Yoab aapei ka ngajorei keng daang nakajwok. Toropuut Ngiamon kibaka alokidor a Raba, alo arai ere loapolon a akwap kech. Ani ngikapolok lu apote akingarakin kesi, apot kibaka alowae alo alomoding. Kingolik Yoab atamar ketijikinete ngesi ngimoe keng alowae alo alongaren ka ewae lo alokaku, toseu ngesi ngasigerea nakajwok noi kisibak alowae a ngitunga a akwap a Siria. Kitiliwo ngesi lokaatokeng Abichai ekarikon a ngasigerea anache. Kisibak kesi tokienyikinos ka Ngiamon. Tolimok Yoab ngesi tama, “Ani kingolik iyong atamar kedwang ayong ngitunga a akwap a Siria, bu kingarak ayong. Ani kidwang iyong Ngiamon, abuni ayong kengarak iyong. Toliwor lo igogong nabo ititiny! Atojwoto lokiliok kotere ngitunga yok ka ngirerea a Akuj yok. Kimiekisi nguna esaki Ekapolon Akuj tosubakin.” Pot Yoab ka ngitunga keng akitijikin ngimoe kech, nakaneni tamataros ngitunga a akwap a Siria. Ani ingolikinete Ngiamon ngitunga a akwap a Siria ematarosi, tamataros kesi ani eyei Abichai tolomasi lore. Abu Yoab tobongo Yerusalem. Ani eyenete ngitunga a akwap a Siria atamar edwang Ngisirael kesi, apot tanyaraut ngasigerea kech daang tochunakis wapei. Apote ngasigerea nguna alowaitin a Siria alu eyakasi kide angolol a Eupurate. Abu Chobak lo arai ekarikon a ngasigerea a Adadeser alo arai ekapolon a Soba, toliwor ekarikon kech. Ani iirari Daudi ngakiro nguna, tochunak ngasigerea a Isirael, todoka angolol a Yorudan, kisibak kesi ekienyikinito ngitunga a Siria. Kisiak ejie, tamatar ajore a Siria ani ayakasi Ngisirael. Taara Daudi ka ngitunga keng ngasigerea a Siria ngabunge ngakan-kaarei na adokito ngaurukukui ta ngasigerea ngabunge ngatomwon-omwon na aloose a ngakejen. Apot kesi tani taara ekarikon a ngasigerea a akwap a Siria lo anyaritae Chobak. Ani eyenete ngikapolok lu apolokinit Adadeser atamar edwang Ngisirael kesi, apot kisila ka Daudi, topolok Daudi kesi. Apot ngitunga a Siria toema, tapalikis akingaranakin Ngiamon. Ani enangi ekaru lo atupit ngolo ngirwa lu eitiarea, torik Yoab ajore sodi torem akwap a Ngiamon. Araakasi ngirwa ngulu alosieneto ngikapolok lojiesinei. Kidong ekapolon Daudi Yerusalem. Apot kesi kiriama ere a Raba, toremo sodi kinyasut. Ayei akuj nasubuna a Ngiamon na enyaritae Milikom, ayei ekiraun a egolit lo arai apotis keng ngakiloi ngatomwon-uni ka ngoomwon. Ayei asir lokiraun ngolo, na alemuni Daudi kiwaak lokiraun keng a ilope. Tangata ngesi tani ngiboro lukaalak alore. Sodi tolimok ngitunga a ere kangolo atamar tolemut ngigirigirea, ka ngakutae ta ngaepe tosubeta ngimataparea. Tosubea ngesi ngitunga a ngirerea kadaang a akwap a Amon ngakiro napei nguna. Apot ngesi ka ngitunga lu arukitotor tobongosi Yerusalem. Ani ekisidi, tojikinetei ka Ngipilisti alo Geser. Ngirwa ngulu kesi lu aarea Sibekai lo akwap a Ucha itwaan nilangir-kooyan noi anyaritae Sipai. Apon Ngipilisti kidwangae. Tojikinetei nabo ka Ngipilisti ejie eche. Abu Elianan lokookeng a Yair taar Lami lo arai lokaatokeng a Golias alo a akwap a Gas. Alangir akwara a Golias ekoni amorok a akitoe analangir eyei ni etokere ngiworui. Apon tojikinetei nabo ejie eche alo Gas, ani ayei itwaan iche nilangir-kooyan noi. Ayakasi ngesi ngimoyo ngikan-kapei nakan apei, toyakas ngikan-kapei nakan nache. Ngakejen nabo dang kona pei. Arai ngesi alesit a ngitunga alungorok lulangir-kooyak noi. Kimenya ngesi Ngisirael. Abu Yonasan lo arai lokookeng a lokaatokeng a Daudi alo anyaritae Chama, taar ngesi. Araakasi luuni ngulu ngalesea a ngitunga alulangir-kooyak noi a Gas. Apot Daudi ka ngasigerea keng taara kesi. Asaki Ekipe ayaun ngichan nia Ngisirael. Abu ngesi kichuchik Daudi atamar ejoikinit imari ngitunga. Tolimok Daudi Yoab ka ngikarikok a ngasigerea luche tama, “Kapesi kitoro kiding Isirael, napei alo Beer-cheba tanang Dan, sodi kimarut ngitunga. Asaki ayong atoyen atamar eraakasi ngitunga daang ngiai.” Tatachak Yoab tama, “Agasi atamar kitalala Ekapolon Akuj Ngisirael ngakitalalaet amiat apei akidwang eger lo tokona elalaketa. Ekapolon, eraakasi kesi ngikasubak etich kon. Nyo tokona isakea iyong kimarae ngitunga? Nyo isakea iyong ayaun ngakiro naaronok nia Ngisirael?” Nakaneni abu Yoab kiwap ngakiro na alimuni ekapolon. Tolot Yoab kirim akwap a Isirael wadaang, ani erumor tobongo Yerusalem. Tolimok ngesi ekapolon Daudi ekimar a ngikiliok alu atingito ngakwaaras. Araakasi kesi 1,100,000 alo Isirael, taraakas 470,000 alo Yuda. Ani kona peasakitor Yoab ngakiro na adungunit ekapolon, nyimara ngesi ngitunga a ngitela a Lawi ka Benjamen. Tongo Akuj kotere ngakiro na apon tosubae, kotere ngakiro nguna, kirira ngesi Ngisirael. Tolimok Daudi Akuj tama, “Asub ayong akisech naaronon ani ekokinea nege! Torimakinae kare. Asubi ayong nguna a abangaanut.” Abu Ekapolon Akuj tolimok ekadwaran keng Gad lo arai ngesi adwareene ngakiro ani a Daudi tama, “Kape tolimok Daudi atamar asaki ayong ngesi totiaku akiroit apei anakiro anauni kanu. Asubakinea ayong ngesi na etiakuni.” Tolot Gad nia Daudi tolimok ngesi ngakiro na alimuni Ekapolon Akuj, ani erumor kingis tama, “Anukiro ejoikina esubakin? Akimin eron a akoro nakwap kon a ngikaru a nguuni, kori ngimoe akirit esi a ngilapio a nguuni, kitodolo ngakwaaras a ngimoe, kori ejoikina kitorem akwara a Ekapolon Akuj ani eyaunea edeke loaronon nakwap, bu emalaikat taar ngitunga alo Isirael awadaang. Anikiroit abuari ayong nia Ekapolon Akuj?” Tatachak Daudi Gad tama, “Kariebete ayong ngakiro nugu! Nakaneni nyasaki ayong kerirata ngitunga. Kimiekisi Ekapolon Akuj alope toliwor ngesi kerirae ayong, kainyo erai ngesi na a ngisien.” Sodi yau Ekapolon Akuj edeke loaronon nia Ngisirael, totoaka ngabunge ngatomwon-kaarei. Abu Akuj tomea emalaikat akinyasun Yerusalem, ani enangi ni inyasunea emalaikat Yerusalem, kingolik Ekapolon Akuj dio kiloch nabo ngakiro sodi tolimok emalaikat tama, “Kimiek etemokin!” Awei emalaikat ngolo aniramet ngalemet a itwaan ani anyaritae Arauna, alo arai Eebusit. Taanyunga Daudi emalaikat ewey alokiding adis ka akwap, etingit ekileng esadit akinyasun Yerusalem. Apot Daudi ka ngikarikok a ngitunga kijuuruoto tatapa ngireetin ngalup. Anapito Daudi ka ngikapolok ngulu ngiguniae. Kilip Daudi tama, “Ee Akuj, ayong ngesi asechit. Ayong ngesi echwangakini. Ayong adunguni atamar kimarae ngitunga. Nyo esubito ngitunga lu ikote ngamesekin lugu? Ekapolon Akuj na irai Akuj kang, ejoikina iyong kirirae ayong ka ngitunga a awi kang, sodi kimiek ngitunga kon.” Tolimok emalaikat a Ekapolon Akuj Gad atamar tolot tolimok Daudi atamar tolot todukok Ekapolon Akuj ekeno a ngakipeyos aniramet ngalemet a itwaan ani anyaritae Arauna. Kiwap Daudi ngakiro na adunguni Ekapolon Akuj, sodi tolot inaa loger lo alimokinea Gad. Aniramet ngalemet a Arauna, ayakasi Arauna ka talokookeng nguomwon eramete ngakanoi. Ani ingolikinete kesi emalaikat, tamataros talokookeng toduka. Ani napei engolikinea Arauna ekapolon Daudi ebunit, torotok ani aramere ngalemet, kijuuru tojuk ereet ngalup. Tolimok Daudi ngesi tama, “Togialakinae ayong ni irameenea iyong ngalemet, sodi atodukok ekeno a ngakipeyos totuboror edeke loaronon logo. Kainakini ayong iyong ngaropiyae na itemokino egielere.” Tolim Arauna tama, “Ekapolon, tolema tosubea ibore nicha isaki iyong. Ngimongin dang lugu kane, lu ipeye iyong alokeno. Ngadaet ngalemet nugu kitiliwo ngakito napeyet ta ngakanoi na eraakasi ngakipeyos. Kainakinit ayong iyong daang.” Nakaneni tatachak ekapolon Daudi ngesi tama, “Meere kongina. Kainakini ayong iyong ngaropiyae na itemokino egielere. Nyalemikini ayong Ekapolon Akuj ibore ni erai ikon, ni emam ibore epoto ayong atatachea.” Abu ngesi nak Arauna ngaropiyae a egolit ngamiae ngakan-kapei kotere niramet ngalemet neni. Todukok Daudi ekeno a ngakipeyos Akuj neni, sodi tolem ngakipeyos na inomio ka na a ekisil. Kilip ngesi, kiira Ekapolon Akuj ngakilipasinei keng ani ameunea akim anadis tonom ngakipeyos na ayakasi lokeno. Tolimok Ekapolon Akuj emalaikat atamar kingadaa ekileng keng, sodi kiwapak emalaikat ngakiro nguna. Kotere ngakiro nguna, kingolik Daudi atamar eik Ekapolon Akuj ngakilipasinei keng. Sodi kipeye ngesi ngakipeyos alokeno a Akuj, aniramet ngalemet a Arauna. Eam a Akuj lokolong asubakini Musa anariet, ka ekeno a ngakipeyos, aringa eyakasi ni ilipeenere ani enyaritae Gibeon. Nyeloto Daudi inaa akilip Akuj, kainyo akerit ngesi ekileng a emalaikat a Ekapolon Akuj. Sodi tolim Daudi tama, “Emini akai a Ekapolon Akuj ana erai Akuj nege. Ekeno logo ngesi elemuuneta Ngisirael ngakipeyos na inomio.” Todung ekapolon Daudi atamar tochunakin ngitunga a ngakwapea anache daang lo alomito Isirael. Kidodik ngesi kesi etich lo esubete. Tosubakis ngiche kech ngamoru naapolok todukioto akai a Akuj. Kipoto ngesi ngasua nakirionok nakaalak tosubere ngisumarea ka ngakirijet a ngidorin alu a ngakito. Kipoto tani ngasua nanyangayek nakaalak noi na angopi tani kona itemio. Tolimok ngesi ngitunga a Tiro ka Sidon atamar kainut ngesi ngakito a ngichekereng nakaalak. Etamit Daudi kona, “Akai a Akuj na eduki lokookang Solomon, ejoikinit ejoker toliwor na eyenete ngitunga a ngakwapea kadaang. Nakaneni edit ngesi emam ibore eyeni, kotere ngakiro nguna, ejoikinit ayong aree ngakiro a akai kangina.” Sodi torek Daudi ngiboro lukaalak eringa nyetoana. Tanyarau ngesi lokookeng Solomon tolimok atamar todukok Ekapolon Akuj na erai Akuj a Isirael akai. Tolimok Daudi ngesi tama, “Lokoku, asaki sek ayong akiduk akai na edodikinea Ekapolon Akuj na erai Akuj kang arimatoi. Nakaneni katolimok ayong Ekapolon Akuj atamar aarit ayong ngitunga lukaalak, nabo ajit ngijiesinei lukaalak. Kotere ngitunga lukaalak lu aar ayong, nyechamakina Akuj ayong adukokini ngesi akai. Ani ikoni neni dang, abu kechikak ayong akiroit. Tolim tama, ‘Emini lokookon lo epolokini akwap niajokon, kainyo esisili ayong ngesi ka ngimoe keng daang. Enyarao ekiro keng Solomon, kainyo ngirwa lu eraakar ngesi ekapolon, ainakini ayong Ngisirael ekisil ka amamau anaaronok. Kadukokini ngesi ayong akai. Eliwor ngesi lokookang, atoliwor ayong apakeng. Eliwor apolou keng akajik.’ ” Torubak Daudi iruoro ebala, “Tokona lokookang, irukete iyong ka Ekapolon Akuj na erai Akuj kon. Kimiekisi ngesi kirichak akichikakinet keng na esakea iyong todukok ngesi akai. Kimiekisi Ekapolon Akuj na erai Akuj kiinak iyong achwaanu ka aosou sodi topolokinio Ngisirael iwapap ka etal. Itemokinosi ngakiro kon daang toriyana erai kiwap iyong ngitalio daang lu ainakini Ekapolon Akuj Musa kotere Ngisirael. Togogonger nabo totitinyer, wara nyiem. Ani alowae a akai a Akuj, ediatak ayong egolit lo idwangit apotis keng ngataanea a metirik 3,400, ediatak nabo akwangat na erai apotis keng ngataanea a metirik 34,000. Eraakasi daang lu edukere akai. Kaneni daang, eyakasi ngasua nanyangayek ka nakirionok nakaalak noi. Eyakasi tani ngakito ka ngamoru na engadaarit ayong, nakaneni ejoikinit iyong idietuni ngache. Elalak ngikasubak etich kon. Eyakasi ngitunga lu ebokete ngamoru toyakas lo edukete a ngamoru ka lua ngakito, toyakas ngikunonoi a adukuor lukaalak gelagelae lu esubete etich a egolit, ka akwangat, ka asuat nanyang, ka nakirion. Kisiak tokona etich. Agasi atamar kiruko iyong ka Ekapolon Akuj.” Todungok Daudi ngikapolok a Ngisirael daang atamar kingarakis Solomon. Tolim ngesi tama, “Iruko esi ka Ekapolon Akuj na erai Akuj kus, kiinak esi ekisil alowaitin kadaang. Edwang ayong ngitunga daang lukolong alomito nakwap naga, kotere ngesi. Esi ka Ekapolon Akuj, ipolokis tokona kesi. Tosuba tokona etich a Ekapolon Akuj ana erai Akuj kus a ngitai kus kadaang ka akiyar kus daang. Tolomakisi akiduk akai a Akuj, sodi kiwaakis asaduku a Achamunet a Ekapolon Akuj tooma neni, aapei ka ngiboro luche lu italeunitoe daang lu ilipitere ngesi.” Ani ngirwa lu amojongea Daudi noi, kitiliwo ngesi lokookeng Solomon ekapolon a Isirael. Abu ekapolon Daudi tochunak wapei ngikapolok a Ngisirael daang, ka ngimurok a Akuj ta Ngilawi. Kimaru ngesi Ngilawi lukiliok daang lu araakasi ngikaru kech ngitomwon-uni kori lu eporito ngikaru ngulu. Araakasi daang 38,000. Totiaku ekapolon 24,000 toliworos esubete etich alokai a Akuj, toliworos 6,000 eweikinito ekimar ka akitub ngikesio, toliworos 4,000 ngikeyokok a etich, toliworos 4,000 ngikekutak Ekapolon Akuj eeotor ngiboro lu alemuni ekapolon toeore. Totiak Daudi Ngilawi ngatiaket ngauni, itemem ka ngimacharin lu araakasi Gerichon, ka Koas ta Merari. Ayakasi Gerichon ngide lusapa ngiarei lu anyaritae Ladan ka Chimei. Ayakasi Ladan ngide lusapa nguuni lu anyaritae Yeyel, ka Sesam ta Yoel. Kesi araakasi ngikapolok a ngimacharin alu etorunete nia Ladan. (Ayakasi Chimei ngide lusapa nguuni lu anyaritae Chelomos, ka Asiel ta Aran.) Ayakasi Chimei ngide lusapa nguomwon lu anyaritae Yaas, ka Sina, ka Yeuch ta Beria. Anyaritae loapolon Yaas, totupak Sina, totupak Yeuch, totupak Beria. Amam Yeuch ka Beria ngalesea nakaalak. Kotere ngakiro nguna, apon kimarunae kesi atamar eraakasi emachar epei. Ayakasi Koas ngide lusapa nguomwon lu anyaritae Amuram, ka Ichar, ka Eburon ta Usiel. Lokookeng loapolon lo anyaritae Amuram, ngesi arai apakeng a Aron ka Musa. (Etegeliaritae Aron ka ngalesea keng toliworos kesi eweikinito ngiboro lu italeunitoe jik, ka akinom emitina ilipitere Ekapolon Akuj, ka akisub etich keng ta apianar ngitunga a ekiro a Ekapolon Akuj. Ani ngide lusapa a Musa alo arai itwaan a Akuj, emarunitae aapei ka Ngilawi.) Ayakasi Musa ngide lusapa ngiarei lu anyaritae Gerichom ka Elieser. Alode a Gerichom alusapa, anyaritae loapolon Chebuel. Ayei Elieser lokookeng epei bon lo anyaritae Reabia, nakaneni ayakasi Reabia ngalesea nakaalak. Lokookeng a Koas lo a ngiarei lo anyaritae Ichar, ayei lokookeng lo anyaritae Chelomis lo arai ekapolon a emachar kech. Lokookeng a Koas lo a nguuni lo anyaritae Eburon, ayakasi talokookeng nguomwon lu anyaritae Yeria, ka Amaria, ka Yaasiel ta Yekameam. Lokookeng a Koas lo a nguomwon lo anyaritae Usiel, ayakasi talokookeng ngiarei lu anyaritae Mika ka Ichia. Ayakasi Merari talokookeng ngiarei lu anyaritae Mali ka Muchi. Ayakasi Mali talokookeng ngiarei lu anyaritae Eleasar ka Kich. Nakaneni totoan nyeanyuna ngide lusapa, lupesur make ayakasi. Kiuta talokookeng a Kich lu araakasi ngichenin kech ngapesur nguna. Ayakasi lokookeng a Merari lo a ngiarei lo anyaritae Muchi talokookeng nguuni lu anyaritae Mali, ka Eder ta Yerimos. Lugu kesi araakasi ngalesea a Lawi, a ngimacharin kech ka ngawiyei wiyei, igirakinitae ekiro a ipei kech kadaang. Ipei a ngalesea kech daang ni araakasi ngikaru keng ngitomwon-arei ka ni eporito, ayei etich lo asubi alokai a Akuj. Tolim Daudi tama, “Ainaki Ekapolon Akuj na erai Akuj a Ngisirael ngitunga keng ekisil. Emini ngesi Yerusalem jik. Kotere ngakiro nguna, nyeringa nabo Ngilawi etingete eam a Akuj ka ngiboro luche daang ilipeenere.” Kotere ngakiro na esal alimuni Daudi nguna, apon Ngilawi kigirakinae lotich na anangeta ngikaru kech ngitomwon-arei. Ngitichisio ngulu kesi lu akingarakin ngimurok luyenet a Aron lu asubete etich ani elipeenere, ka achoikin ngalaarin ka ngamaniyae kech, ka akirichun ibore daang ni italeuno, ka achoikin ngamugati na elemanakinio Akuj, ka ngakiria na elemuununio ngakipeyos, ka ngamandasia na nyiwaakinitae ekitoe lo itubui, ka ngakipeyos na imao, ka ngakiria na imorikinitae ka akimiet a ngikito ta aanyun apotis ka akitem ngadekon a akai a Akuj, ka akipuruun ta akikut Ekapolon Akuj ataparach ka atabong daang, esaa daang lo inomere ngakipeyos a Ekapolon Akuj akolongit a Sabato, ka esukukuu a elap alokitetet ta ngisukukui luche. Torekinae ngitalio lu edodiunito etiae a ngimurok alu esubete ekimar ngolo asubet apei. Totiakakinae ngimurok etich lo ilipitotor Ekapolon Akuj jiik. Nakinae kesi etich lo echoikineta eam ka akai a Akuj, ka akingarakin ngiyenet kech ani ilipeenere alokai a Akuj. Ngiyenet kech ngulu kesi lu ayanasi ka Aron. Atiakar a ngalesea a Aron kesi nugu. Ayakasi Aron ngide lusapa nguomwon lu anyaritae Nadab, ka Abiu, ka Eleasar ta Isamar. Kisiaut Nadab ka Abiu totoaka eringa apakech. Emam ngalesea apot kesi toisikis anakwap. Sodi talokaatokech Eleasar ka Isamar toliworos ngimurok. Torek ekapolon Daudi ngalesea a Aron totiak itemem ka etich lo esubete kesi. Itwaan ni engarakinit ngesi kaneni ngesi Sadok lo arai alesit a Eleasar ta Aimelek lo arai alesit a Isamar. Totiakae ngalesea a Eleasar ngatiaket ngatomon ka ngakan-kapei. Ani na Isamar, totiakae ngatiaket ngakan-kauni. Asubio kongina kainyo ayakasi ngikiliok lu araakasi ngikapolok a ngawiyei nalesea a Eleasar. Ani kona ayakatar ngikapolok a akai a Akuj ka lu aweikinito ngakiro a Akuj nalesea a Eleasar ka Isamar, apon kesi totiakakinae etich kotere akiram ekura. Apot ngalesea a Eleasar ka Isamar totupakin eramete ekura. Sodi kigir kesi Chemaya lo arai lokookeng a Nesanel. Arai Chemaya ekegiran lo arai Elawit. Ngitunga lu araakasi ngikaanyunak kanguna kesi ekapolon ka ngikapolok a arieng keng, ka emuron a Akuj lobe Sadok, ka Aimelek lokookeng a Abiasar, ka ngikapolok a ngawiyei a ngimurok ta na Ngilawi. Eger logo ngesi atiakere ngitunga ngulu ngatiaket ngatomwon-arei ka ngoomwon torekinae lotich kona. Aseuni ekura lo ekingaren Yeoyarib. Toseu lo a ngiarei Yedaya. Toseu lo a nguuni Arim. Toseu lo a nguomwon Seorim. Toseu lo a ngikan Malkija. Toseu lo a ngikan-kapei Mijamin. Toseu lo a ngikan-kaarei Akos. Toseu lo a ngikan-kauni Abija. Toseu lo a ngikan-koomwon Yechua. Toseu lo a ngitomon Chekania. Toseu lo a ngitomon ka epei Eliachib. Toseu lo a ngitomon ka ngiarei Yakim. Toseu lo a ngitomon ka nguuni Upa. Toseu lo a ngitomon ka nguomwon Yechebeab. Toseu lo a ngitomon ka ngikan Biliga. Toseu lo a ngitomon ka ngikan-kapei Imer. Toseu lo a ngitomon ka ngikan-kaarei Esir. Toseu lo a ngitomon ka ngikan-kauni Apises. Toseu lo a ngitomon ka ngikan-koomwon Pesaya. Toseu lo a ngitomwon-arei Yeesikel. Toseu lo a ngitomwon-arei ka epei Yakin. Toseu lo a ngitomwon-arei ka ngiarei Gamul. Toseu lo a ngitomwon-arei ka nguuni Delaya. Toseu lo a ngitomwon-arei ka nguomwon Maasia. Egiritae ngitunga ngulu tolosioneto kai a Akuj sodi tosuba ngitichisio lukolong esiakini apaakech Aron, loger lo adungunitor Ekapolon Akuj na erai Akuj a Isirael. Lugu kesi araakasi ngikapolok a ngawiyei lu etorunete nia Lawi. Arai Yedeya alesit a Amuram lo auriuni Chebuel. Arai Ichia alesit a Reabia. Arai Yaas alesit a Ichar lo auriuni Chelomis. Akisiaun ani eyei loapolon, anyaritae talokookeng a Eburon, Yeria, ka Amaria, ka Yaasiel ta Yekameam. Arai Chamir alesit a Usiel lo auriuni Mika. Arai Sekaria alesit a Usiel lo auriuni Ichia lo arai lokaatokeng a Mika. Ngalesea a Merari kesi Mali, ka Muchi ta Yaasia. Ayakasi Yaasia ngide lusapa nguuni. Anyaritae kesi Choam, ka Sakur ta Ibiri. Lokookeng a Mali lo anyaritae Eleasar, amam ngide lusapa. Lokookeng lo anyaritae Kich, ayei lokookeng lo anyaritae Yerameel. Ayakasi Muchi ngide lusapa nguuni lu anyaritae mali, ka Eder ta Yeremos. Eraakasi lugu ngitunga a ngawiyei a Ngilawi. Edia loapolon a awi, ka epei kata lokaatokeng, aramete ekura kotere etich kech, loger lo aramete ngimurok lu etorunete nia Aron. Araakasi Ngilawi ngiyenet kech. Ngikaanyunak a ngakiro kanguna kesi ekapolon Daudi, ka Sadok, ka Aimelek, ka ngikapolok a ngawiyei a ngimurok ta na Ngilawi. Apot ekapolon Daudi ka ngikapolok a Ngilawi toseut ngimacharin a Ngilawi lu esilipeenete ngitunga. Toseunae Asap ka Eman ta Yedusun. Asakitae kesi tolimosi akiroit a Akuj iwapito ngitunga lu eramito ngagitae kituruyete ngasua. Eraakasi lugu ngirora a ngitunga alu aseunio kisilipeeneta ngitunga, ka etich lo asubete ngitunga ngigelagelae. Talokookeng a Asap luomwon, anyaritae Sakur, ka Yosep, ka Nesania ta Acharela. Asap ngesi aweikinit kesi. Asap alimuununi ngakiro daang na edunguni ekapolon. Talokookeng a Yedusun lukan-kaarei, anyaritae Gedalia, ka Seri, ka Yechaya, ka Chimei, ka Achabia ta Matisia. Apot kesi tolimosi akiroit a Akuj iwapito lu aramito ngagitae, toeoto ebuakinito Ekapolon Akuj alakara. Apakech aweikinit kesi. Talokookeng a Eman lutomon ka nguomwon, anyaritae Bukia, ka Matania, ka Usiel, ka Chebuel, ka Yerimos, ka Anania, ka Anani, ka Eliasa, ka Gidalti, ka Romamti Eser, ka Yochibekacha, ka Malosi, ka Osir ta Maasios. Abu Akuj nak ekadwaran keng Eman ngide lusapa lutomon ka nguomwon ngulu daang ka ngide lupesur nguuni loger losek echikakinitor, esaki ainakin Eman agogongu. Kituruoto talokookeng daang ngasua ka akiram ngagitae eweikinit apakech. Ekote kesi neni irukorito ka lu aloose akilip alokai a Akuj. Echikichikit ekapolon Asap, ka Yedusun ta Eman. Araakasi ngitunga lutomon ka nguomwon daang ngikunonoi. Ani Ngilawi lurukitos kech, etatamitae aeo. Araakasi ngitunga daang 288. Kona asakere akiyen eger lo esubere etich, apot kesi daang tarama ekura, napei alusorok ka lumojong, ka nabo lukunonoe ka lu aringa isiakinete. Toliwor ekura lo ekingaren eka Yosep, ka talokookeng ta ngiyenet keng lu araakasi ngitomon ka ngiarei. Toliwor lo a ngiarei eka Gedalia, ka talokookeng ta ngiyenet keng lu araakasi ngitomon ka ngiarei. Toliwor lo a nguuni eka Sakur, ka talokookeng ta ngiyenet keng lu araakasi ngitomon ka ngiarei. Toliwor lo a nguomwon eka Seri, ka talokookeng ta ngiyenet keng lu araakasi ngitomon ka ngiarei. Toliwor lo a ngikan eka Nesania, ka talokookeng ta ngiyenet keng lu araakasi ngitomon ka ngiarei. Toliwor lo a ngikan-kapei eka Bukia, ka talokookeng ta ngiyenet keng lu araakasi ngitomon ka ngiarei. Toliwor lo a ngikan-kaarei eka Yecharela, ka talokookeng ta ngiyenet keng lu araakasi ngitomon ka ngiarei. Toliwor lo a ngikan-kauni eka Yechaya, ka talokookeng ta ngiyenet keng lu araakasi ngitomon ka ngiarei. Toliwor lo a ngikan-koomwon eka Matania, ka talokookeng ta ngiyenet keng lu araakasi ngitomon ka ngiarei. Toliwor lo a ngitomon eka Chimei, ka talokookeng ta ngiyenet keng lu araakasi ngitomon ka ngiarei. Toliwor lo a ngitomon ka epei eka Asarel, ka talokookeng ta ngiyenet keng lu araakasi ngitomon ka ngiarei. Toliwor lo a ngitomon ka ngiarei eka Achabia, ka talokookeng ta ngiyenet keng lu araakasi ngitomon ka ngiarei. Toliwor lo a ngitomon ka nguuni eka Chebuel, ka talokookeng ta ngiyenet keng lu araakasi ngitomon ka ngiarei. Toliwor lo a ngitomon ka nguomwon eka Matisia, ka talokookeng ta ngiyenet keng lu araakasi ngitomon ka ngiarei. Toliwor lo a ngitomon ka ngikan eka Yeremos, ka talokookeng ta ngiyenet keng lu araakasi ngitomon ka ngiarei. Toliwor lo a ngitomon ka ngikan-kapei eka Anania, ka talokookeng ta ngiyenet keng lu araakasi ngitomon ka ngiarei. Toliwor lo a ngitomon ka ngikan-kaarei eka Yochibekacha, ka talokookeng ta ngiyenet keng lu araakasi ngitomon ka ngiarei. Toliwor lo a ngitomon ka ngikan-kauni eka Anani, ka talokookeng ta ngiyenet keng lu araakasi ngitomon ka ngiarei. Toliwor lo a ngitomon ka ngikan-koomwon eka Malosi, ka talokookeng ta ngiyenet keng lu araakasi ngitomon ka ngiarei. Toliwor lo a ngitomwon-arei eka Eliasa, ka talokookeng ta ngiyenet keng lu araakasi ngitomon ka ngiarei. Toliwor lo a ngitomwon-arei ka epei eka Osir, ka talokookeng ta ngiyenet keng lu araakasi ngitomon ka ngiarei. Toliwor lo a ngitomwon-arei ka ngiarei eka Gidalti, ka talokookeng ta ngiyenet keng lu araakasi ngitomon ka ngiarei. Toliwor lo a ngitomwon-arei ka nguuni eka Maasios, ka talokookeng ta ngiyenet keng lu araakasi ngitomon ka ngiarei. Toliwor lo a ngitomwon-arei ka nguomwon eka Romamti, ka talokookeng ta ngiyenet keng lu araakasi ngitomon ka ngiarei. Lugu kesi araakasi ngitichisio a Ngilawi alu araakasi ngasigerea a akai a Akuj. Alomachar a Kora, ayei Mechelemia lo arai lokookeng a Kore, lo arai eyenet a Asap. Ayakasi ngesi talokookeng ngikan-kaarei, akisiakin aloapolon, anyaritae kesi Sekaria, ka Yediael, ka Sebadia, ka Yasiniel, ka Elam, ka Yewanan ta Elioenai. Ayei tani Obed Edom lo apiari Akuj nak ngide lusapa ngikan-kauni, akisiakin aloapolon anyaritae kesi Chemaya, ka Yeosabad, ka Yoa, ka Sakar, ka Nesanel, ka Amiel, ka Isakar ta Peulesai. Ayakasi lokookeng lo anyaritae Chemaya talokookeng lu araakasi ngikapolok anawi a apakech kainyo araakasi kesi ngikiliok lu eyenikinitae. Anyaritae talokookeng a Chemaya Osini, ka Rapael, ka Obed, ka Elisabad, ka Eliu ta Semakia. Eliu ka Semakia kesi ayenikinitae noi. Ngitunga a Obed Edom, lu asubete etich ngolo, araakasi ngitomwon-kapei ka ngiarei, lu ayenete etich ngolo lokojokon. Ngitunga a awi a Mechelemia araakasi ngitomon ka ngikan-kauni lu ayenete etich ngolo. Ani alomachar a Merari, ayei Osa lo ayakasi ngide lusapa nguomwon lu anyaritae Chimuri, (etiliwori apakeng ngesi ekapolon, tarai bo tani pearai ngesi ageari akidouno). Ngirora aluche kesi ta Ilikia, ka Tebalia ta Sekaria. Ngide lusapa daang a awi a Osa lutomon ka nguuni araakasi ngasigerea a akai a Akuj. Atiakitae ngasigerea nguna a ngawiyei totiakakinae etich lo esubete alokai a Akuj, loger a Ngilawi aluche. Ngitunga a awi a apei, napei aniichi tanang niapolon, arameene ekura toyenea atamar ekidor ali eyoki. Abu ekura totiakak Chelemia ekidor lo alo kide. Ani lokookeng Sekaria lo arai itwaan ni etutukeene jiik ngitunga ngakiro naajokak, abu ekura totiakak ekidor lo alokwap. Totiakakinae Obed Edom lo alokuju, totiakakinae lokookeng akiyok ngikerui. Totiakakinae Chupim ka Osa ekidor lo alo too, ka ekidor lo anyaritae Chalekes lo ayei lorot lo etorit lowae lo alokidiama. Atiakitae ngisaa lu iyokiyere ngidorin, alunyaanasi ngasigerea. Eyokiyete ngasigerea ngakan-kapei ewae lo alo kide akolongit apei. Ani ewae lo alokwap nguomwon, ani ewae lo alokuju nguomwon. Eyokiyete ngasigerea ngoomwon ngikerui akolongit apei, ekeru epei, kiyoko ngiarei. Diyete alaar na alo too, ayakasi ngasigerea ngoomwon lorot, toyakas ngaarei nalaar. Etich ngolo atiakakinitae ngasigerea alomacharin a Kora ka Merari. Ayakasi Ngilawi ngiche lu aweikinito ni iwaanakinio ngaropiyae alokai a Akuj, ka ngikerui lua ngiboro alu italekinitoe Akuj. Epei kata lokookeng a Gerichon lo anyaritae Ladan, arai apaakeng a ngawiyei wiyei anagelagelae erukito aapei ka ngitunga a awi a lokookeng alo anyaritae Yeyel. Talokookeng a Ladan ngiarei lu anyaritae Sesam ka Yoel kesi aweikinito ni iwaanakinio ngaropiyae alokai a Akuj ta ngikerui. Atiakakinitae tani ngalesea a Amuram, ka Ichar, ka Eburon ta Usiel ngitichisio ngiche. Chebuel lo arai lokookeng a Gerichom ngesi arai ekapolon aluche kadaang aweikinito ni iwaanakinio ngaropiyae a akai a Akuj. Arai Gerichom lokookeng a Musa. Kotere lokaatokeng a Gerichom lo anyaritae Elieser, ayanasi Chelomis ka Chebuel. Elieser arai apakeng a Reabia. Reabia arai apakeng a Yechia. Yechia arai apakeng a Yoram. Yoram arai apakeng a Sikiri. Sikiri arai apakeng a Chelomis. Chelomis ka ngiyenet keng kesi aweikinito ngainakinet na etaleunit ekapolon Daudi eraakasi ngaka Akuj. Ngainakinet nguna kesi na alemunete ngikapolok a ngawiyei, ka ngikapolok a ngimacharin ta ngikapolok a ngasigerea. Tolemut kesi ngiboro ngiche lu angatarete alojie kitaleut tosubere etich alokai a Akuj. Chelomis ka ngiyenet keng aweikinito ibore daang ni etaleunitoe tosubere etich alokai a Akuj, napei anainakinet ana ayauni ekadwaran a Akuj Samuel, ka na ayauni ekapolon Saul, ka na ayauni Abiner lo arai lokookeng a Ner ta na ayauni Yoab lo arai lokookeng a Seruya. Analesea a Ichar, Kenania ka talokookeng atiakakinitae ngakiro a ngitichisio alu esubio, alu ikote aweikin ekimar ka akitiak ngikesio a Ngisirael. Analesea a Eburon, ka Achabia ta ngiyenet keng ngitomon ka ngikan-kaarei, lu araakasi daang ngikiliok lu ayenikinitae, kesi aweikinito etich a Ekapolon Akuj ka loa arieng daang alo Isirael, too angolol a Yorudan. Yeria ngesi arai arai ekapolon a ngalesea a Eburon. Ekaru lo a ngitomwon-omwon lo araakar Daudi ekapolon, apon tasakae angichun aur a ngalesea a Eburon. Apon taanyunae ngasigerea na ayenikinitae a ngitunga kangulu elomito Yaser nia akwap a Gilead. Toseu ekapolon Daudi ngikapolok a ngawiyei wiyei ngabunge ngaarei ka ngamiae ngakan-kaarei lu ayenikinitae, lu araakasi ngiyenet a Yeria, sodi kitoweik kesi etich a Ekapolon Akuj ka lo a arieng daang alo Isirael, kide angolol Yorudan, nakwapea a Reuben, ka Gad ta Kide Manase. Eraakasi lugu ngirora a Ngisirael, alu araakasi ngikarikok a ngajorei a ngawiyei, ka ngikarikok a ngajorei a ngimacharin, ta ngikarikok a arieng lu asubete etich anapolou kangina. Elap epei, ayei atiakar a ngitunga ngabunge ngatomwon-arei ka ngoomwon lu asubete etich eweikinit ekarikon epei. Yachobeam lo arai lokookeng a Sabudiel ngesi arai ekarikon a atiakar ana ekingaren ana asubi etich elap lo ekingaren. Araakasi kesi 24,000. ( Arai ngesi eka emachar a Peres, alo arai eka ekitela a Yuda). Dodai lo alesit a Aoi (Mikilos arai ekarikon lo atupit ngesi), arai ekarikon a atiakar ana ngaarei ana asubi etich elap lo a ngiarei. Araakasi kesi 24,000. Benaya lo arai lokookeng a emuron alo anyaritae Yeoyada ngesi arai ekarikon a atiakar ana ngauni ana asubi etich elap lo a nguuni. Araakasi kesi 24,000. Arai ngesi ekarikon “Alutomwon-uni” (lokookeng a Amisabab ngesi abu kilunyokin nados keng toliwor ekarikon a atiakar kangina). Asael lokaatokeng a Yoab (lokookeng a Sebadia ngesi abu kilunyokin nados keng) ngesi arai ekarikon a atiakar ana ngoomwon ana asubi etich elap lo a nguomwon. Araakasi kesi 24,000. Chamuus lo arai alesit a Ichar ngesi arai ekarikon a atiakaru ana ngakan ana asubi etich elap lo a ngikan. Araakasi kesi 24,000. Ira lo arai lokookeng a Ikech, lo abunit alo Tekoa, ngesi arai ekarikon a atiakar ana ngakan-kapei ana asubi etich elap lo a ngikan-kapei. Araakasi kesi 24,000. Eles lo emachar a Epiraim, lo abunit alo Pelon, ngesi arai ekarikon a atiakar ana ngakan-kaarei ana asubi etich elap lo a ngikan-kaarei. Araakasi kesi 24,000. Sebekai lo abunit alo Ucha (arai ngesi eka emachar a Sera, alo arai eka ekitela a Yuda) ngesi arai ekarikon a atiakar ana ngakan-kauni, ana asubi etich elap loa ngikan-kauni. Araakasi kesi 24,000. Abieser lo abunit alo Anasos anakwap a ekitela a Benjamen ngesi arai ekarikon a atiakar ana ngakan-koomwon ana asubi etich elap lo a ngikan-koomwon. Araakasi kesi 24,000. Maarai lo abunit alo Netopa (arai ngesi eka ekitela a Sera) ngesi arai ekarikon a atiakar ana ngatomon ana asubi etich elap lo a ngitomon. Araakasi kesi 24,000. Benaya lo abunit alo Pirason anakwap a ekitela a Epiraim ngesi arai ekarikon a atiakar ana ngatomon ka apei ana asubi etich elap lo a ngitomon ka epei. Araakasi kesi 24,000. Elidai lo abunit alo Netopa (arai alesit a Osiniel) ngesi arai ekarikon a atiakar ana ngatomon ka ngaarei ana asubi etich elap lo a ngitomon ka ngiarei. Araakasi kesi 24,000. Eraakasi lugu ngirora a ngikapolok a arieng alu asubete etich alo Isirael. Lo ekitela a Reuben ngesi Elieser lokookeng a Sikiri. Lo ekitela a Simeon ngesi Chepatia lokookeng a Maaka. Lo ekitela a Lawi ngesi Achabia lokookeng a Kemuel. Lo ekitela a Aron ngesi Sadok. Lo a ekitela a Yuda ngesi Eliu lokaatokeng a ekapolon Daudi. Lo ekitela a Isakar ngesi Omri lokookeng a Mikael. Lo ekitela a Sebulun ngesi Ichimaya lokookeng a Obadia. Lo ekitela a Naputal ngesi Yerimos lokookeng a Asiriel. Lo ekitela a Epiraim ngesi Ochea lokookeng a Asasia. Lo ekitela a Too Manase ngesi Yoel lokookeng a Pedaya. Lo ekitela a Kide Manase ngesi Ido lokookeng a Sekaria. Lo ekitela a Benjamen ngesi Yaasiel lokookeng a Abiner. Lo ekitela a Dan ngesi Asarel lokookeng a Yeroam. Nyimara ekapolon Daudi ngitunga lu aringa ngikaru kech nyenanga ngitomwon-arei, kotere ni echikakinitor Ekapolon Akuj atamar etalalae Ngisirael totiata ngikanyer lu eyakasi nadis. Yoab lo anyaritae itiokeng Seruya, abu kisiak akimar ngitunga nakaneni nyerumoro akimar daang. Kirira Akuj ngitunga kotere akimaret ngitunga ngina. Kotere ngakiro nguna, apon nyiigir etiae a ngitunga nakitabea a Daudi na arieng. Eraakasi lugu ngirora a ngitunga alu aweikinito ngiboro a ekapolon. Asimapes lokookeng a Adiel ngesi awekinit ngikerui a ekapolon. Yonasan lokookeng a Usia ngesi aweikinit ngikerui luche. Esiri lokookeng a Kelub ngesi aweikinit etich alomana. Chimei lo abunit alo Rama ngesi aweikinit ngamanat a ngimusabib. Sabudi lo abunit alo Chepam ngesi aweikinit ngikerui a emuna. Baal Anan lo abunit alo Geder ngesi aweikinit ngikito a akimiet ka ngikuno (lu eyakasi naukon na alo too). Yoach ngesi aweikinit ngikerui a akimiet a ngikito. Chiritai lo abunit alo Charon ngesi aweikinit ngaatuk na ayakasi naro a Charon. Chapat lokookeng a Adilai ngesi aweikinit ngaatuk na ayakasi nadipoe. Obil lo arai Echimailit ngesi aweikinit ngikaala. Yedeya lo abunit alo Meronos ngesi aweikinit ngisikiria. Yasis lo arai Egiriit ngesi aweikinit ngamesekin ka ngaanei. Araakasi ngulu daang ngitunga lu aweikinito ngiboro a ekapolon Daudi. Amae keng a Daudi lo anyaritae Yonasan, arai eketutukon lokooson tarai itwaan ni esomat. Ngesi ka Yeyel lo arai lokookeng a Akimoni aweikinito akitatam ngide a ekapolon. Aisopel arai eketutukon a ekapolon. Uchai lo arai Earikit arai lopaekeng a ekapolon. Ani etoani Aisopel, toliworos Abiasar ka Yeoyada lo arai lokookeng a Benaya ngiketutukok a ekapolon. Yoab arai ekarikon a ngasigerea a ekapolon. Todung ekapolon Daudi atamar tochunakin ngikarikok a Ngisirael daang Yerusalem. Apot ngikarikok daang a ngajorei a ngitela, ka lu asubete etich anapolou, ka ngikarikok a ngajorei a ngimacharin ta lu aweikinito ngiboro ka ngibaren a ekapolon ka talokookeng, apot tochunakin. Daang lu asubete etich alokai a ekapolon, ka ngasigerea na ayenikinitae ta ngikiliok lu ayenikinitae daang, apot tochunakinos Yerusalem. Towo Daudi alongaren kech kisuruor ebala, “Ngikaitotoi ka ngitunga kang, topupokinae. Asaki ayong akiduk akai na esipokinio asaduku a Achamunet a Ekapolon Akuj, toliwor ni idokokinit Ekapolon Akuj na erai Akuj yok ngakejen keng. Arek ayong tani ngiboro lu adukokinea ngesi akai na edodikinea arimatoi. Nakaneni katolimok Akuj ayong tama, ‘Nyiduki iyong akai kotere ekiro kang kainyo ijii iyong ngijiesinei, ibuko ngaakot.’ Tani ikoni neni, Ekapolon Akuj na erai Akuj a Isirael, kaseuni ayong ka ngalesea kang apolokin Isirael jik. Aseuni ngesi ekitela a Yuda toliwor ekapolon, ani alokitela a Yuda, toseu ngesi awi a apakang. Ani alotunga kadaang a awi kangina, abu tojoik ngesi akitiliwor ayong ekapolon a Isirael kadaang. Kainak ngesi ayong ngide lusapa lukaalak. Ani alode kangulu kadaang, toseu ngesi Solomon apolokin Isirael na erai apolou a Ekapolon Akuj. “Katolimok Ekapolon akuj ayong tama, ‘Lokookon Solomon ngesi eduki akai kang. Aseu ayong ngesi toliwor lokookang, atoliwor ayong apakeng. Eturubi ayong apolou keng jik erai kirichak ngesi lokojokon akiwap ngitalio kang daang ka ngakiro na adunguni ayong loger lo esubea tokona.’ “Tokona bocha ngitunga kang, alongaren Akuj yok ka Ngisirael daang lu echunakina nege, lu eraakasi ngitunga a Ekapolon akuj, kechikichiki esi atamar kiwapa lokojokon ngakiro daang nakidungok ngoni Ekapolon Akuj na erai Akuj yok, sodi torubakis esi ilomito nakwap naajokon naga, ani erumor kimiekineta nganaketa na isidiunosi kiruma jik.” Ani eliwor Solomon tolimok tama, “Lokoku, kechikichiki iyong atamar tacham Akuj a apakon tosub etich keng a etau kon kadaang, ka ngitamen kon daang. Eyeni ngesi ngakiro na itami iyong daang ka na iitanit. Ani kilot iyong nikeng, kichamuni ngesi iyong. Nakaneni ani kinger iyong ngesi, kiisikini ngesi iyong jik. Ejoikinit iyong iyeni atamar kiseu iyong Ekapolon Akuj toduk akai keng na italeunitoe. Totionik tokona akiduk akai ngina.” Kidodik Daudi Solomon eger daang lo edukere akai a Akuj, ka ngikerui ta ngamaniyae nache ka ni italeunitoe noi, ni erimanakinere ngasechesea. Kidodik tani ngakiro daang na ayeni ngesi kotere akiduk ngataboi ka ngamaniyae na eriamito, ka ngikerui lu ewaanakinio ngiboro a akai a Akuj ka ngiboro lu italekinitoe Ekapolon Akuj. Kidodik Daudi ngesi tani eger lo itenanakinea ngimurok ka Ngilawi alosube ngitichisio kech, kidodik eger lo esubere etich alokai a Akuj, ka achoikin ngiboro a akai a Akuj daang. Tolimok ngesi etiae a akwangat ka egolit alu esubere ngiboro, kidodik ngesi etiae a egolit a ataa kadaang ka ni esiponokinio ataa, kidodik etiae a akwangat a ngimeesae alu a ngakwangae, ka etiae a egolit a emeesa alo iwaanakinio ngamugati na elemanakinio Akuj. Tolim ngesi tani etiae a egolit aloasegan alo esubere ngakichiera na ngikel a nguuni, ka ngatubwae nachukul, ka ngichupae. Tolimok etiae a akwangat ka egolit lo esubere ngatubwae, ka etiae a egolit aloasegan edukere ekeno lo inomeenere emitina. Kidodik ngesi tani eger lo esubere aurukuk kotere ngiborei lua ngabeben lu epetakinito ngabeben kech kidiama asaduku a Achamunet a Ekapolon Akuj. Tolim ekapolon Daudi tama, “Eyakasi ngakiro nugu daang ni igiritae ngakiro nakolong kalimokini ayong Ekapolon Akuj atamar tosubere etich.” Tolimok ekapolon Daudi lokookeng tama, “Togogonger nabo totitinyer. Kisiak etich, wara ibore iche nyikiratak iyong. Ekapolon Akuj na erai Akuj, na asubi ayong etich keng, irukete ka iyong. Nyikiisikini ngesi iyong, nakaneni irukete ka iyong tanang irumori etich a akai kangina. Atiakakin ngimurok ka Ngilawi etich lo esubete alokai. Ngitunga daang lu eyenete akisub etich, imuit akingarakin iyong. Ngitunga daang ka ngikarikok kech, esubete ngakiro daang na idungokini iyong kesi atamar tosuba.” Tolimok ekapolon Daudi ngitunga daang ngakiro nugu tama, “Lokookang Solomon lo aseu Akuj, eringa edit, nyeyeni akisub etich lokojokon. Etiono etich lo esakio akisub kainyo meere eka akai a ekapolon alo erai itwaan, pearai erai akai a Ekapolon Akuj ana erai Akuj. Erichakin ayong asubak ngiboro daang a akai a Akuj, lu eraakasi egolit, ka akwangat, ka asuat nanyang, ka nakirion, ka ngakito ka ngamoru nakaalak a ngaropiyae ka asir, ka ngamoru nakookes na isiritoe ta nakabulitinei. Ani eyakasi ngiboro luche ngulu daang alemu ayong, alemu nabo ayong akwangat ka egolit lu eraakasi ngikang a ilope, kotere ni aminar ayong akai a Akuj. Alemu ayong egolit loajokon noi ngataanea a metirik na iporito amiat apei. Alemu akwangat naajokon noi ngataanea a metirik ngamiae ngaarei ka ngatomwon-omwon, kotere akitokorian ngikwaasea akai a Akuj, ka nabo ngiboro daang lu esubete ngikadukok.” Apot ngikapolok a ngimacharin ka lua ngitela, ka ngikarikok a ngasigerea ta ngikaweikinak a ngiboro a ekapolon, tolemunos alemun ngiboro kotere etich a akai a Akuj. Araakasi ngiboro ngulu egolit ngataanea a metirik na eporito 170, ka akwangat ngataanea a metirik na eporito 340, ka asuat nanyang ngataanea a metirik 620 ta asuat nakirion ngataanea a metirik na eporito 3,400. Ani lu atingito ngamoru nakaalak a ngaropiyae kiwaakis ni iwaanakinio ngaropiyae a akai a Akuj, ni aweikinit Yeyel lo emachar a Ngilawi anyaritae Gerichom. Apot ngitunga tolemikis Ekapolon Akuj echamito. Talakaros kesi noi ani alemuneta ngiboro lukaalak. Abu ekapolon Daudi dang talakar lokojokon noi. Kipuruu ekapolon Daudi Ekapolon Akuj alongaren ngitunga daang. Tolim ngesi tama, “Ekapolon Akuj na irai Akuj a apaakosi Yakobo, kimiekisi iyong kipuruun jik! Irai iyong nakiyenikinitae togogong tarai nakebusean, naajokon, topolot. Ibore daang ni eyei nadis ka nakwap erai ikon. Ee Ekapolon Akuj, ipol iyong idwangit daang. Erai ebari daang ka arimatoi ngikon. Ipolokinit iyong ibore daang a ngikilinga ka agogongu. Ipedori iyong akitiliwor itwaan ni eyenikinitae togogong. Tokona Akuj kosi, kibuakinit iyong alakara, epuros ekiro kon lokebusean. “Tani ikoni neni, emam ibore kiinakini ayong ka ngitunga kang iyong, kainyo nikon ebunitor ibore kosi daang, nakaneni kibuak sua iyong ibore nisek erai ikon. Iyeni iyong Ekapolon Akuj atamar kitorit sua nakiyar naga loger a ngipeyok ka ngitunga a ngakwapea anache, loger lokolong kata apaakosi. Ikote ngirwa kosi etorube lo ipori, nyikipedori sua abuchar anakitu. Ee Ekapolon Akuj na irai Akuj kosi, kichun sua ebari logo daang adukio akai nakirimar ekiro kon lo italeunitoe, nakaneni abuni daang anikon, nabo erai ebari daang ekon. Ayeni ayong atamar itemit iyong etau a itwaan kadaang, nakaneni kijoikinito iyong ngitunga lu etenooko. Kalemik ayong iyong ngiboro lugu daang a ateneanut a etau kang, engolik tani ngitunga kon daang lu echunakina nege elakara ani ayauneta ngalemunet nikon. Ekapolon Akuj na irai Akuj kata apaakosi Aburaam, ka Isaka ta Yakobo, kitiliwo kare jiik ateneanut na ikoni naga na eyei agogongu alotai a ngitunga, toreeu iyong ngitai kech nikon jiik. Kingarak lokookang Solomon sodi kiitan a etau keng kadaang akirichakin ngitalio kon daang, nabo toduk akai na arekini ayong eger lo edukere daang.” Abu Daudi todungok ngitunga tama, “Kipuruutu Ekapolon Akuj na erai Akuj kus!” Apot ngitunga daang kipuruut Akuj kata apaakech, toriediko sodi kidodikis Ekapolon Akuj arimatoi, kidodikis tani ekapolon kech arimatoi. Akolongit na atupit ngina, taara kesi ngibaren kipeyoto, kitaleut ani a Ekapolon Akuj, ani erumor nakis ngitunga tanyama. Apot nabo kipeyoto ngimongin abunget apei, ka ngimesekin abunget apei, ka ngimesekin luuchik abunget apei, kinoma nginerin daang a ngibaren kangulu alokeno. Apot kesi yaut tani emuna lo epuritoe erai ngakipeyos. Sodi talakaros kesi noi akolongit ngina imujete tamaase alongaren Ekapolon Akuj. Kitiliwosi kesi Solomon ekapolon na ngaarei kidokakis akimiet a etal nakou alongaren Ekapolon Akuj, toliwor Sadok emuron. Sodi kilunyokin Solomon nados naka apakeng toliwor ekapolon, anapolou ana kolong esiakini Ekapolon Akuj. Toliwor ngesi ekapolon lo esubi daang itemokino eriyan, sodi kiwapa Ngisirael daang ngakiro keng. Ngikapolok a arieng daang, ka ngasigerea, ka talokookeng a Daudi luche, kichikichikas atamar kichamuni Solomon erai ekapolon. Kitowo Ekapolon Akuj ngitunga a akwap daang alongaren Solomon erimasi ngesi. Abu kitosegaan ngesi noi akidwang ekapolon eche daang lokolong sek kepolokinit Isirael. Daudi lo arai lokookeng a Yese, apolokini Isirael daang a ngikaru a ngitomwon-omwon. Arai ngesi ekapolon alo Eburon a ngikaru a ngikan-kaarei. Toliwor ekapolon alo Yerusalem a ngikaru a ngitomwon-uni ka nguuni. Totoan ngesi akaalimon kemojong, tarai ekabaran lo arimae. Kilunyokin lokookeng Solomon nados keng toliwor ekapolon. Ngakiro a ekapolon Daudi napei anakisiakinet tanang losal, igiritae nakitabea a ngikadwarak aluuni anyaritae Samuel, ka Nasan ta Gad. Idodiunito na igiritae nguna eger lo apolokinitor ngesi akwap, ka ajwonu keng ta ngakiro daang na asubakinosi anikeng, ka Ngisirael ta ngapolosio na edunyatar. Abu Solomon lo arai lokookeng a ekapolon Daudi kisiak apolou keng alo Isirael. Abu Ekapolon Akuj na erai Akuj keng topia ngesi kitiliwo lo eyenikinitae noi. Abu ekapolon Solomon kisuruor Ngisirael daang, ngulu araakasi ngikarikok a ngasigerea a abunget, ka amiat, ka ngikapolok a arieng daang, ka ngikapolok a ngawiyei daang ta ngitunga luche daang. Todungok kesi atamar kirukosi ka ngesi ni ilipeenere alo Gibeon. Toloto kesi inaa kainyo ayei eam a Akuj neni. Asubakini kolong Musa lo arai ekasuban etich a Ekapolon Akuj eam ngolo anariet. ( Nakaneni ayei asaduku a achamunet a Akuj Yerusalem, ewaakinitae tooma loeam losek adukokini Daudi na ayaunea asaduku alo Kirias Yearim.) Ekeno a ngakipeyos lo a ngasua ananyangayek lo asubakini Besalel, ayei ngaren eam a Akuj alo Gibeon. Arai Besalel lokookeng a Uri tarai etatait a Ur. Apot Solomon ka ngitunga daang kilipa Ekapolon Akuj kaina. Abu Solomon kipeyonok Ekapolon Akuj ngakipeyos alokeno alo a ngasua ananyangayek alongaren eam. Araakasi ngakipeyos nguna ngibaren abunget apei lu inomio nginerin daang. Akolongit ngina nakwaare, bu Akuj nia Solomon kingit tama, “Nyo isaki iyong kainak ayong iyong?” Tatachu Solomon tama, “Idodiunit kolong iyong jiik amina naationon anika apakang Daudi, nabo kimiek tokona ayong elunyokin lokicholong keng, atoliwor ekapolon. Ee, Ekapolon Akuj na irai Akuj, kiyook ngakiro nakolong ichikakini iyong apakang. Kitiliwo iyong ayong ekapolon a ngitunga alukaalak noi etia asinyen. Nakinae robo aosou ka achwaanu atopolokinio kesi. Ani kemam, ekokini ayong apolokini ngitunga lukon kaalak lugu ai?” Tatachak Akuj Solomon tama, “Iseu iyong ibore niajokon. Akidwang iyong akisak ebari kori ngiboro luajokak, kori ekipur, kori akitu a ngimoe kon, kori tani ngirwa kon lu iyarea kiatakinae, ilimu iyong atamar isaki aosou ka achwaanu topolokinio ngitunga kang, lu ketiliwo ayong iyong ekapolon kech. Kainakini ayong iyong aosou ka achwaanu. Kainakini nabo dang ebari ka ngiboro luajokak ta ekipur akidwang ngikapolok daang lukolong engarenete iyong ka lu isidiunosi.” Sodi torotok Solomon ani elipeenere alo Gibeon, ani ayei eam a Akuj, sodi tobongo Yerusalem. Topolok ngesi Ngisirael kaneni. Tochunak Solomon ngaurukukui na irito ngangolei abunget apei ka ngamiae ngoomwon ka ngasigerea nakameak ngangolei ngabunge ngatomon ka ngaarei. Kiwaak ngesi ngiche kech Yerusalem, sodi kiwaak ngiche lorerea lugelagelae. Ngirwa lu araakar Solomon ekapolon, asojunito ngasua nakwangae alo Yerusalem loger a ngalup. Alalak nabo ngakito a ngichekereng loger lo elalakeata ngikuno anaukon. Aweikinito ngimuchurus a ekapolon Solomon egielit a ngangolei ana ayauniyo alo Musiri ka Kilikia, ka ngaurukukui na eriuniyo alo Misiri. Agielanakinete kesi ngikapolok a Ngiiti ka Siria aurukuk apei ngakiloi ngakan-kapei a ngaropiyae, ani ngangolei ngakiloi 1.5 a ngaropiyae. Totiaku ekapolon Solomon atamar aduki akai a Akuj kilipeenere Ekapolon Akuj. Totiaku nabo atamar aduki akai keng a elope na erai akai a ekapolon. Kiwaak ngesi ngitunga ngabunge ngatomwon-kaarei lotich lo a akirituunun ngiboro luduket, sodi kiwaak ngitunga ngabunge ngatomwon-kauni lotich lo a abokuunun ngamoru. Ayakasi ngitunga ngabunge ngauni ka ngamiae ngakan-kapei lu aweikinito kesi. Tomea Solomon ngitunga nia Iram alo arai ekapolon a Tiro, ebala, “Tosubere ayong ngakiro nakolong isubea iyong apakang Daudi, na igielanakinea iyong ngesi ngakito a ngichekereng todukio akai keng. Asaki ayong adukokin akai na edodikinea Ekapolon Akuj na erai Akuj kang arima. Eliwor akai ngina na italeunitoe, toliwor ngesi kilosi ayong ka ngitunga kang elipeta ngesi sodi enoma emitina lo a ngikito alukaakunyok. Neni ngesi kilemunea sua ngalemunet a ngamugati ana italeunitoe, atolemanakisi Ekapolon Akuj jiik. Eliwor tani ngesi kipeyeo sua ngakipeyos na inomio nataparach ka ebong, ka ngirwa lua Sabato, ka ngirwa lua esukukuu alo eanyungarere elap ta ngirwa luche lu italeunitoe idodikinitere Ekapolon Akuj na erai Akuj kosi arima. Adungoki ngesi Ngisirael akisub loger ngolo jik. Epolot akai a Akuj na asaki ayong akiduk, kainyo epolot Akuj kosi idwangit ngakujo daang. Nakaneni ngae epedori akiduk akai a Akuj? Tarai tani adis daang etia ni etia, nyitemokino ngesi. Ekokini tokona ayong aduki akai keng na epolot idwangit ekeno lo inomanakinere ngesi emitina ai? Tomeu tokona itwaan idio nikang ni erai ekunonoit alotich a egolit, ka ngasua nakwangae, ka nanyangayek ta nakirionok apotiok. Toliwor itwaan ngini ni eyeni akisub ngawarui napusiek, ka napusiek-arengak ta naarengak. Ebuni ngesi tosuba etich ka ngitunga lukunonoi lu eyakasi Yuda ka Yerusalem lukolong aseuni apakang Daudi. Inunae ayong alo Lebanon tani ngichekereng ka ngidomou ta ngaalimo kainyo ayeni ayong atamar eyenete ngitunga kon akitub ngakito. Ameuni ayong ngitunga kang kingarakin ka lukon akitub ngakito nakaalak kainyo eliwor akai na asaki ayong akiduk naapolon nabo nakebusean. Kainuni ayong iyong akimuj a ngitunga kon alu esubete etich, ngesi ngakanoi ngataanea a metrik 2,000, ka erau ngataanea a metrik 2,000 ka emuna lo epuritoe ngalitae 400,000 ta akimiet a ngikito ngalitae 400,000.” Kigira ekapolon Iram abarua nia Solomon etachakinit ebala, “Aloger eminar Ekapolon Akuj ngitunga keng, kitiliwo ngesi iyong ekapolon kech. Kipuroe Ekapolon Akuj na erai Akuj a Ngisirael na kolong asubi adis ka akwap! Ainaki ngesi ekapolon Daudi lokookeng lokooson, tarai lokachwaan nabo ekunonoit lo tokona esaki akiduk akai a Ekapolon Akuj ka akai keng a ilope. Ameuni ayong itwaan ni enyaritae Uram nikon. Erai ngesi ekunonoit lokachwaan. Erai itiokeng aka ekitela a Dan, tarai apakeng itwaan a akwap a Tiro. Eyeni ngesi asubun ngiboro a egolit, ka akwangat, ka ngasua nanyangayek, ka ngasua nakirionok, ka ngamoru ta ngakito. Eyeni asubun ngiboro a ngiworui alupusiek, ka lupusiek-arengak, ka luarengak ta lukaanikak. Epedori ngesi akulun asir daang nacha elimokinio ngesi. Kimiek ngesi tosuba etich ka ngikunonoi kon aapei ka lukolong asubete etich a ekapolon Daudi alo erai apakon. Tokona bocha, inunae sua ngakanoi, ka erau, ka emuna ta akimiet a ngikito nakolong kichikakini iyong sua atamar kiinuni. Kiyapakini sua iyong ngakito a ngichekereng daang na isaki iyong alomoru a Lebanon, sodi atoena totukokin ani erumor atachakakisi nanam kiwaaros tanang Yopa. Ani enangunete neni, tolema iyong kesi kaneni yaa Yerusalem.” Abu ekapolon Solomon kimaru ngitunga a ngakwapea anache daang lu alomito nakwap a Isirael. Ekwaan ekimar ngolo ka lokolong emarea Daudi lo erai apakeng ngitunga. Toliwor ekimar a ngitunga kangulu 153,600. Alotunga kangulu, abu ngesi kipaku ngitunga 70,000 nak etich lo a akiwok ngiboro, kipaku ngitunga 80,000 nak etich lo a akibet ngamoru alomoru, sodi toseu ngikaweikinak 3,600 kitusuba ngitunga etich. Aseunit sek ekapolon Daudi lo erai apakeng a Solomon ni edukokinio akai a Akuj. Arai neni kidiama emoru a Moria alo Yerusalem, nikolong abunio Ekapolon Akuj nia Daudi. Neni ngesi nikolong etiliworit itwaan nibe Arauna nia ekitela a Ngiebus niramet ngalemet keng. Kisiak ekapolon Solomon adukuoru elap lo a ngiarei ekaru lo a nguomwon lo araakar ngesi ekapolon. Eger logo ngesi etemio ekapolon Solomon akai a Akuj na aduki ngesi. Arai aoyau ngamitae ngatomwon-arei ka ngakan-kaarei tarai ewae louriyen ngamitae ngakan-koomwon. Arai aoyau a amaniyat ana elomarere tooma ngamitae ngakan-koomwon, ariyan ka ewae louriyen a akai a Akuj, tarai aoyau na alokidiama ngamitae ngatomwon-kan ka ngoomwon. Ewae lo alotooma a amaniyat kangina, elalatae a egolit bon. Adukitoe amaniyat naapolon a ngakito a ngidomou sodi kilalae a egolit bon, sodi kitakae asir a ngingolea ka ngiriko. Kitisir Solomon akai a Akuj a ngamoru anaajokak alalak ngaropiyae ka egolit lo ayaunio anakwap enyaritae Paripaim. Kilala ngesi ngikwaasea a akai a egolit, ka ngakito, ka nilomaret ta ngidorin, sodi kitisir ngikwaasea kiwaak ngiborei lua ngabeben.*g** Amaniyat na alotooma na enyaritae ni italeuno noi, arai aoyau ngamitae ngakan-koomwon, tarai ewae louriyen ngamitae ngakan-koomwon, ariyan ka ewae louriyen a akai. Egolit lo aburuchiarere ewae lo italeuno noi, eporit apotis keng ngataanea ngatomwon-arei. Arai apotis a egolit alo asubere ngisumarea ngagiramea 570. Aburuchiaritae ngikwaasea a ngamaniyae ana alokidiama dang a egolit. Todungok ekapolon ngitunga atamar tosubakis ngiborei lua ngabeben ngiarei anasua toburuchiasi a egolit, sodi kiwaakinae lowae lo italeunitoe noi. Arai aoyau a ngabeben kech epetaritae ngamitae ngakan-koomwon. Arai abeben a ipei kech ngamitae 2.2. Atapit abeben ngina ekwaas a akai, kiriamito ka abeben a ibore aniche alokiding akai. Ibore niche, arai abeben keng apei ngamitae 2.2. Atapit abeben ngina ekwaas a akai, kiriamito ka abeben a ibore ani ekingaren alokiding akai. Arai aoyau a ngabeben kanguna epetaritae ngamitae ngakan-koomwon. Awaasi ngiborei ngulu ekienyikinito ekidor. Tosubunae awaru na erapere ewae lo italeuno noi. Asubunio a ngawarui anakaanikak ajokak ka ngawarui nache na eraakasi napusiek, ka napusiek-arengak ta naarengak, sodi todonyokinoe asir a ngiborei alu a ngabeben. Tosubak ekapolon ngapirio ngaarei. Arai aoyau a apei ngamitae ngatomon ka ngakan ka anus, sodi kitowo kesi alongaren akai a Akuj. Ayakasi ngapirio nguna ngiwaitin lua ngakies lu arai aoyau a epei ngamitae 2.2. Etisiritoe kidiama ngapirio nguna a ngiriko alu edanyitae ka asir na ikwaan ka ngalam amiat apei na asubunitae a ngasua ananyangayek. Kitowae ngapirio nguna alowaitin a ekidor a akai a Akuj. Kitowo apei alokuju, nache alokwap, sodi tanyara na alokuju Yakin, tanyara na alokwap Boas. Tosubak Solomon ekeno a ngakipeyos a ngasua ananyangayek. Ariyan ngiwaitin daang arai ngamitae ngakan-koomwon, tarai aoyau na alokidiama ngamitae ngoomwon ka anus. Tosubak ngesi atanki a ngakipi a ngasua ananyangayek kisiriam. Arai aoyau keng ewei ngamitae 2.2, tarai aoyau napei alokwaas a epei tanang loche ngamitae 4.4. Arai aoyau a akirimokinet a apei ngamitae 13.2. Akiriam ekeli lo anikalapatan a atorosit a atanki, ayakasi ngangedakinet ngaarei a asir, edokokino apei kidiama nache. Esikwaanitae asir ngina ka ngimongin. Atapakina nasua nache a atanki. Edokokinitoe atanki ngina nakawa a ngakisikwaanet a ngimongin a ngitomon ka ngiarei alu a ngasua ananyangayek. Akienyiarito ngimongin lowae lo anikalapatan, akienyiarito nguuni too, tokienyiasi nguuni kuju, sodi tokienyiasi nguuni kide, tokienyiasi nguuni kwap. Arai alangirir a ngikwaasea a atanki ngamilimitae 75. Ekote ngipon a atanki kangina lua ekopo, tokuduno ngikwaasea nikalapatan loger a ngaki a aturot. Elelebuunun atanki ngina ngakipi na eraakasi ngalitae ngabunge ngatomwon-kapei. Tosubakis nabo ngategerin ngatomon, toliworos ngakan ngakiwaakina lowae lo alokuju akai, ani ngakan lowae lo alokwap. Elotanarere kesi nginerin a ngibaren lu epeyeo. Arai ngakipi na ayakasi natanki naapolon ngakilotanaret a ngimurok a Akuj. Tosubakis kesi ngasipet ngatomon a ngataae loger losek esubere, sodi kiwaakis kai a Akuj, kiwaakis ngataae ngakan lowae lo alokuju, kiwaakis ngakan lowae lo alokwap. Tosubakis nabo ngimeesae ngitomon, sodi kiwaakis kai, ngimeesae ngikan lowae lo alokuju, ngikan lowae lo alokwap. Tosubakis tani ngategerin amiat apei a egolit. Tosubakis kesi alaar na alotooma toliwor aka ngimurok, ka alaar na anikalapatan dang. Toburuchiarae ngidorin a ngalaarin kanguna a ngasua ananyangayek. Kiwaakinae atanki nagule na alokuju kide akai. Tosubak Uram tani ngamoti ka ngakalobochio nawadet ngalup ta ngategerin. Torumo ngesi akisub ngiboro daang lusek echikakinit ngesi ekapolon Solomon atamar asubakini kotere akai a Akuj. Ngiboro lu asubi ngesi ngulu, kesi ngapirio ka ngakies naarei ikwaan ka ngatubwae nachukul na eyakasi kidiama ngapirio, ka ngiriko lu irumeikina eyakasi kidiama akou apei. Tosubak ngakisikwaanet a ngalam ngamiae ngoomwon kotere ngiriko luarei ngulu, ngangedakinet ngaarei a ngalam lorikot epei sodi kitisiro ngakies naarei a ngangedakinet. Tosubak tani ngaurukukui natomon na iritae ka ngategerin ngatomon ta atanki. Tosubak atanki ka ngakisikwaanet a ngimongin na asipokinitae atanki. Tosubak ngamoti ka ngakalobochio nawadet ngalup ta ngakichiera na ngikel a nguuni. Asubakini Uram lo erai ekunonoit loapolon ngiboro ngulu daang a ngasua ananyangayek ana epusitae, loger losek adungokinitor ekapolon Solomon ngesi, sodi tosubere etich alokai a Akuj. Loger lo alimunitor ekapolon, apon ngiboro ngulu daang tosubae ani esubeenere ngasua anadipo a Yorudan, nakidingos a Sukos ka Sereda. Tosubak Solomon ngiboro lugu daang elalak tongop tani kona itemio apotis a ngasua ananyangayek ana asubere ngiboro ngulu. Tosubak Solomon tani ngiboro lu iwaakinio kai a Akuj, tosubak a egolit, ekeno a ngakipeyos ka ngimeesae a ngamugati ana elemanakinio Akuj, ka ngasipet a ngataae, ka ngataae na asubunitae alogolit bon, na ajoikinit itonokio alongaren ni italeunitoe noi, loger losek asakitere. Tosubak asir a ngatur, ka ngataae, ka ngasua naridet ngatotol, ka ngasua nakitudunget ngataae, ka ngatubwae nachukul, ka ngitubwae lu inomere emitina ta ngataritarea natinget ngatotol a akim. Asubunitae ngiboro ngulu daang a egolit bon. Ngidorin lua nikalapatan akai ka lua ni italeunitoe noi, elalatae a egolit. Ani erumori ekapolon Solomon etich daang a akai a Akuj, abu tolem ngiboro daang lukolong etalekinit apakeng Daudi Ekapolon Akuj, tolem kiwaak lokerui lu ikachio ngiboro a Ekapolon Akuj. Araakasi ngiboro ngulu ngakwangae, ka egolit, ta ngiboro luche. Ani erumor tochunak ekapolon Solomon ngikarikok daang a ngitela ka ngimacharin a Ngisirael pot Yerusalem, tolemareta asaduku a achamunet a Ekapolon Akuj alo Sion alo erai ere a Daudi,*g** yaarae kai a Akuj. Tochunakinos kesi daang ngaren ekapolon ngirwa lua esukukuu a ngikalea. Ani echununosi ngikarikok daang, tadakut Ngilawi asaduku a achamunet, yaasi kai a Akuj. Apot ngimurok ka Ngilawi yaasi tani eam a Akuj ka ngiboro keng daang, yaasi kai a Akuj. Abu ekapolon Solomon ka Ngisirael lu achunakina ngaren asaduku a achamunet kipeyoto ngamesekin ka ngaatuk nakaalak noi na nyimarun. Ani erumor tadakasi ngimurok asaduku a achamunet tooma akai, kiwaakis lowae lo italeunitoe noi, kwap ngiborei lua ngabeben. Tarapa ngabeben kech na apetara asaduku ka ngakito na adakitere. Aoyak ngakito noi atakanete, erai kewo itwaan alongaren ni italeunitoe noi kingolik. Peapedorio akingolikin anikalapatan. (Eringa ngakito nguna eyakasi neni tani tokona.) Amam ibore ayei tooma asaduku a achamunet pearai ngamoru nadapal naarei nakolong ewaakini Musa alomoru a Sinai, nakolong achamakinotor Ekapolon Akuj ka Ngisirael naapudunioto alo Misiri. Ani elomunete ngimurok a Akuj ani italeunitoe (kainyo etaleuno ngimurok lu ayakasi neni daang, peekachitae atamar erai eka atiakaru kaani. Ngikaeok lua ekitela a Lawi daang lube ta Asap, ka Eman, ka Yedutun ta ngitunga a ngimacharin kech, awaasi alo kide ekeno a ngakipeyos enapito ngiworui lukaanikak ajokak. Awaasi kesi aapei ka ngimurok amiat apei ka ngitomwon-arei lu araakasi ngikakutak ngaburucho. Asakitae ngikakutak ngaburucho ka ngikaeok iirario eeosi aapei ipurosi ka abuakin Ekapolon Akuj alakara). Ani ikeunio eeos tokutakinitetei ngaburucho, kideese ngasua ta ngiboro luche ipurosi Ekapolon Akuj, eeosi ebalasi, “Kipuro Ekapolon Akuj, kainyo ejok ngesi. Nabo erai amina keng nakajik.” Ani enangi ni elomuneta ngimurok alokai, atipei kilelebun edou kai a Akuj. Tokuruwo kesi atinenikin ilipito kotere edou ngolo kainyo eleleba akwangis a Ekapolon Akuj kai a Akuj. Sodi kilip ekapolon Solomon tama, “Ekapolon Akuj, ilimu iyong atamar iboikin naribu nakirion chuch. Kadukok ayong iyong akai a ekipur, na iboikin iyong jik.” Towaa ngitunga daang. Torei Solomon kingolia lowae kech sodi topia kesi. Tolim ngesi tama, “Kipuroe Ekapolon Akuj na erai Akuj a Ngisirael! Asubaki ngesi ngakiro nakolong echikakini ngesi apakang Daudi ebala, ‘Napei kolong epudunio ayong ngitunga kang alo Misiri, emam ere aseu ayong anakwap a Isirael kadaang, lo edukokinio akai na kelipere ayong. Nabo emam itwaan aseu ayong toliwor ekarikon a ngitunga kang a Ngisirael. Nakaneni aseu tokona ayong ere a Yerusalem toliwor ngesi kelipeenere ayong, nabo aseu Daudi topolok ngitunga kang.’ ” Torubak Solomon iruoro ebala, “Emuit kolong etau a apakang Daudi adukokin akai na ilipere Akuj na erai Akuj a Ngisirael. Nakaneni tolimok Ekapolon Akuj ngesi tama, ‘Itemokino eger lo imuitor etau kon akiduk akai kang, ani kaneni dang, nyiduki iyong pearai lokookon lo iuriuni iyong ngesi kadukokini ayong akai nakalimitere.’ “Asubaki tokona Ekapolon Akuj ngakiro nakolong alimuni ngesi, kainyo elunyokin ayong napolou a apakang Daudi, aliwor ekapolon a Ngisirael loger lokolong alimunio Ekapolon Akuj, nabo adukok akai na elimitere Ekapolon Akuj na erai Akuj a Ngisirael. Ewaak tooma akai a Akuj asaduku a achamunet na eyakasi ngamoru nadapal na achamunet ana kolong achamakinosi Ekapolon Akuj ka Ngisirael.” Sodi towo Solomon alongaren ekeno a ngakipeyos a Ekapolon Akuj ani achunakina Ngisirael daang kaneni. Kibaa ngesi ngakan keng kidiama ilipit. ( Asubakinit sek Solomon ekicheeles a ngasua ananyangayek kiwaak nakidingos a alaar. Ariyan ngiwaitin daang arai ngamitae 2.2 tarai aoyau na alokidiama ngamitae 1.3. Todoka ngesi neni toriedik ani apedoreta ngitunga daang akingolikin ngesi, kibaa ngakan keng kidiama nadis.) Kilip ngesi tama, “Ee, Ekapolon Akuj na irai Akuj a Ngisirael, emam akuj na ikwaan ka iyong alokidiama nadis ka kwap nege. Irichakinit iyong achamunet kon, nabo ngitunga kon lu iwapito ngakiro kon a ngitai kech kadaang, idodikinit iyong amina kon na nyedaun. Irichak iyong ngakiro nakolong ichikakini apakang Daudi. Ee robo, ilimuni kolong a akituk kon, nakaneni isubak akolongit naga a akan itemok. Tokona Ekapolon Akuj na irai Akuj a Ngisirael, kelipit atamar kirichak tani akichikakinet nache nakolong ichikakini iyong apakang Daudi ibala, ‘Ngirwa daang, nyengopi itwaan analesea kon ni epolokini Ngisirael, erai cha kirichut talokookon elote kech, kiwapa ngakiro kang loger lokolong iwapitor iyong.’ Tokona bocha Ekapolon Akuj na irai Akuj a Ngisirael, kimiek ngakiro kon daang kiyookin, nakolong ichikakini iyong apakang Daudi, lo erai ekasuban etich kon. “Nakaneni, ipedori iyong dir Ekapolon Akuj akiboikin nakwap kiruko ka ngitunga a? Tani adis daang etia ni etia, ediding nyikitemokin iyong. Ekoe ani bo akai na aduk ayong naga, nyedit noi a? Ee Ekapolon Akuj na irai Akuj kang, kiira akilip kang a ekasuban etich kon, tosubak nguna kelipi. Kiyok akai nakon naga akwaar ka apaaran, nege ni ilimu iyong ibala, ‘Ni kelipere ayong nege.’ Kiirarae ayong esaa lo akienyiarea kai naga kelip iyong. Kiira akilip kang ka ngakilipasinei a ngitunga kon alu eraakasi Ngisirael esaa lo ekienyiareta kai naga kilipa iyong. Kiirarae sua anawi kon ana eyei nadis. Ani iirari, kitorimak. “Ani itwaan ni esechakini itwaan niche, sodi torikunoe lokeno kon a ngakipeyos alokai kon, kikong atamar nyasechit ngesi, kiira iyong anadis sodi totiaku ngakiro a ngikasubak etich kon na iyookino. Kirira ngini esechit loger lo ejoikinit iriraare, sodi talakak ngini nyesechit itemem ka ateneanut keng. “Ani idwangete ngimoe ngitunga kon Ngisirael ani kisechakinitotor iyong, nakaneni ani kereeunosi kesi nikon pot kai naga, kiira iyong ngakiro kech anadis. Torimak ngasechesea a ngitunga kon, sodi tobuu kesi nakwap nakolong iinakini iyong taapaakech. “Ani kigolo iyong akiru ani kisechakinitotor ngitunga kon iyong, nakaneni ani kelunga kesi ngasechesea kech tokienyiut kai naga, kilipa iyong itiditeuna, ee Ekapolon Akuj, kiira iyong anadis. Torimak ngasechesea a ngikasubak etich kon Ngisirael. Kitatam kesi akisub nguna iyookino. Ani kikokis neni Ekapolon Akuj, talakak akiru taram akwap nakon naga, nakolong iinakini iyong ngitunga kon toliwor akech jik. “Ani kemin eron a akoro nakwap, kori edeke loaronon, kori kinyasu ekuwam lokariran ngamanat, kori ngasepicho a emaase, kori kitijikis ngimoe ngitunga kon, kori keting kesi edeke kori elekes, kiira ngakilipasinei kech. Alotunga kon alu eraakasi Ngisirael, ani keyei itwaan cha daang ni kilipi iyong, kori kimaimai, kori keraakasi ngitunga kon Ngisirael, eriangakina ipei kech daang, kori ialolongi, ibakinit akai naga ngakan ilipit, kiira akilip keng. Kiira kesi anawi kon ana eyei nadis sodi torimak kesi. Iyong bon ngesi iyeni ngakiro na eya lotau a itwaan. Tosubea itwaan daang nguna itemokino esubere, sodi kitokereta ngitunga kon iyong ka akiwap ngakiro kon ngirwa daang lu ibooyoto kesi anakwap ana kolong iinakini iyong taapaakosi. “Loger lopei ngolo, ani kebu itwaan anakwap anache ni nyerai ipei a ngitunga kon, bu anakwap anakalonan ani eirarea ekipur kon, ka ngakiro naationok isubi iyong, ka eger lo nyimamakinea iyong asubakin ngakiro, ani kebu ngesi akilip alokai kana, kiira akilip keng. Kiira ngesi anadis ani ibooyo iyong, tosubak nguna ilipa ngesi, sodi kitoyeneta iyong ngitunga a ngakwapea daang, kitokera loger a ngitunga kon alu eraakasi Ngisirael. Toyena kesi atamar akai na aduk ayong naga ngesi elimitere ekiro kon. “Ani kidungok iyong ngitunga kon atamar toloto akitijwore ngimoe kech, nakaneni ani kilipa kesi iyong awadaang anicha eyakasi kesi, ekienyiunito lore lo iseu iyong logo ka akai nakadukok ayong iyong naga, kiira ngakilipasinei kech. Kiira kesi anadis sodi kisidwang ngimoe kech. “Ani kisechakis ngitunga kon iyong, aloger emamakar itwaan nyesecheene, sodi ani ingoi iyong kimiek ngimoe idwangete kesi torikosi nakwapea nache toliworos ngirikon, tani keloka ngakwapea nguna, kiira ngakilipasinei a ngitunga kon. Ani kilipa kesi tolunga ngasechesea kech anakwap kangina, elimorito akisech kech ka aronis kech, kiira ngakilipasinei kech, Ekapolon Akuj. Ani kelunga kesi ngasechesea kech anakwap kangina, tolunga a ngitamen kech kadaang ka ngitai kech daang, kilipa iyong ekienyiunito nakwap naga, nakolong iinakini iyong taapaa kosi ka ere lo iseu iyong logo ta akai nakolong kadukokini ayong iyong naga, kiira ngakilipasinei kech. Kiira kesi kisieneto anawi kon ana eyei nadis, sodi torimak ngasechesea a ngitunga kon daang alu kisechakis iyong. “Ee Akuj kang, tokona bocha, kingolikinae sua sodi kiira ngakilipasinei kosi na kilipit sua kanege. “Ee Ekapolon Akuj na irai Akuj, tonyou tokona ka asaduku a achamunet kon, na erai emachar a apolou kon, toloma kai kon kiboikin neni jik. Topia ngimurok kon alotichisio kech kadaang, nabo talakaros ngitunga kon daang, kotere ajokis kon anikech. Ekapolon Akuj na irai Akuj, nyiibongok ekapolon lo iseu iyong akau. Kitamu amina kon na nyedaun ani a ekasuban etich kon Daudi.” Ani erumori Solomon akilip, totiyaun akim anadis tonomia ngakipeyos na alemunitae, sodi kilelebun akwangis naakwaan kea a Ekapolon Akuj kai. Peapedorete ngimurok alomar kai kainyo eleleba akwangis naakwaan kea. Ani ingolikinete Ngisirael daang akim etiyaun anadis ka akwangis ilelebun kai, apot tadakakinos kwap tojuko ngireetin ngalup kilipa ka abuakin Ekapolon Akuj alakara ebalasi, “Ejok Akuj. Erai amina keng aka jik.” Ani erumor kipeyoto Solomon ka ngitunga daang ngakipeyos alongaren Ekapolon Akuj. Kipeyo Solomon ngaatuk 22,000 ka ngamesekin 120,000 toliworos ngakipeyos a ekisil. Sodi kitaleut ngesi ka ngitunga daang akai a Akuj. Towaa ngimurok anisek asakitere towaa. Towaa Ngilawi ekienyikina ka ngimurok ipurosi Ekapolon Akuj a ngiboro alu eeore alu kolong alemuni ekapolon Daudi. Aeosi kesi eeos lo ebala, “Erai amina keng aka jik,” loger losek adungokinitor Daudi kesi. Tokutakis ngimurok ngaburucho ewaasi ngitunga daang. Kitaleu Solomon kiding alaar alowae alo alongaren akai a Akuj, sodi kipeye kaneni ngakipeyos na enomio nginerin daang, ka ngakipeyos a ngalemet ta nikatoronon a ngibaren alu a ngakipeyos a ekisil. Asubi ngesi kongina kainyo adit ekeno lo a ngasua ananyangayek losek asubakinit ngesi peadikino itemokin ngakipeyos nguna daang. Apot Solomon ka ngitunga daang tanyama esukukuu a ngikalea a ngirwa a ngikan-kaarei. Alal asepich a ngitunga esiakini napei anapak a Amas alokwap tanang lokukuoru a Misiri alokuju. Etaleunete kesi ekeno a ngakipeyos a ngirwa a ngikan-kaarei, sodi tanyama esukukuu a ngirwa a ngiche a ngikan-kaarei. Ani akwaar na esal, min esukukuu lo a esal. Ani akolongit na ngatomwon-arei ka ngauni a elap alo a ngikan-kaarei, abu Solomon kieala ngitunga toloto nawiyei. Talakaros kesi kotere ngakiro daang na apiaritor Ekapolon Akuj ngitunga keng Ngisirael, ka Daudi ta Solomon. Ani erumori ekapolon Solomon akiduk akai a Akuj ka akai keng, kitemok loger lokolong asakea ngesi, bu Ekapolon Akuj nia Solomon nakwaare tolimok tama, “Eira ayong akilip kon, nabo achamu ayong akai naga toliwor ngesi kepeyonokinere ayong ngakipeyos. Nacha agolorea ayong akiru nyeeram, kori nacha ameunea emaase kirika ngamanat, kori ayau edeke loaronon lotunga kang, ani kelipa kesi ayong tolunga ngasechesea ka aisikin naaronok daang na asubito kesi, eirari ayong ngakiro kech anadis atorimak ngasechesea kech sodi atopia akwap kech. Etee ayong akai naga eratak, sodi eira ngakilipasinei daang na ilipio kanege, kainyo aseu ayong ka akitaleun akai naga toliwor ngesi kelipeenere ayong jik. Etee ayong eratak ngirwa daang. Ani kisub iyong etich kang kitomunok ayong loger lo kolong asubea apakon Daudi, kiwap ngitalio kang ka ngakiro daang nakadungokini ayong iyong, asubakini ayong ngakiro nakolong echikakini apakon Daudi abala, ‘Ngirwa daang, nyengopi itwaan analesea kon ni epolokini Isirael.’ Nakaneni ani kiwout iyong ka ngitunga kon akiwap ngitalio kang ka ngakiro nakadungok ayong iyong, sodi kilipa ngakujo ngache, kalemari ayong esi anakwap ana kainak ayong esi. Aisikini ayong akai na etaleu ayong naga toliwor kelipeenere ayong. Imenyarete ngitunga awadaang akai naga ianeta ngakamatak. “Erimae tokona akai naga lokojokon, nakaneni ngirwa ngulu, eriangakinosi ngitunga daang lu itorunete nege, kingitas etalarito ngakiro ebalasi, ‘Kotere nyo asubakinea Ekapolon Akuj ngakiro nugu anakwap kana ka akai naga?’ Sodi tatachut tamasi, ‘Kainyo aisikinete kesi Ekapolon Akuj na erai Akuj kata apaakech, nakolong epuduni kesi alo Misiri. Ewapete kesi ngakujo ngache, kilipa ka akisub etich kech. Kotere ngakiro nguna, ayau Ekapolon Akuj ngakiro naaronok nguna nikech.’ ” Aduki Solomon akai a Akuj ka akai keng a ngikaru a ngitomwon-arei. Tobongonok Solomon nabo akiduk ngirerea lukolong ainakini ekapolon Iram ngesi, dio amear Ngisirael toloma lorerea ngulu. Tolema Solomon akwap nabe Amas ka Soba. Toduk awas kiriam ere a Palimira lo eyei nariet. Tobongonok ngesi akiduk ngirerea daang lu ayakasi nakwap a Amas lu araakasi kesi ekachio ngiboro. Toduk Solomon nabo ngirerea lugu, Bes-oron lo alokuju ka Bes-oron lo alokwap. (Ayakasi ngirerea ngulu ngawasea ka ngidorin lu eriwokina ngasua), ka ere a Baalas, ka ngirerea daang lu ekachio ngiboro, ka ngirerea lu ayakasi ngangolei keng ka ngaurukukui na iritae. Todukok ngesi ibore daang nikolong asaki ngesi akiduk alo Yerusalem, ka Lebanon ta akwap daang na apolokinit ngesi. Ngitunga lukolong edongete lu araakasi Ngiiti, ka Ngiamor ka Ngiperes, ka Ngiipi ta Ngiebus lu pearaakasi Ngisirael, ngalesea kech nakolong edongete nakwap, nakolong aringa Ngisirael nyemunyara, ngitunga ngulu kesi abu Solomon kidesik akisub etich. Eringa ngalesea kech eraakasi ngikedalak tani tokona. Nakaneni abu Solomon nyiitiliwo Ngisirael ngikedalak, pearai abu kitiliwo kesi ngasigerea, ka ngikaweikinak a arieng, ka ngikarikok a ngasigerea a ngaurukukui ana irito ngangolei ta ngikameak ngangolei. Ayakasi ngikaweikinak a arieng 250 lu aweikinito etich lo a akiduk lo edesikinitae ngitunga. Abu Solomon kitaramak aberu keng na arai nakookeng a ekapolon a Misiri, kitaramak alore a Daudi tolot kai na adukokini Solomon ngesi. Tolim Solomon tama, “Nyiboikin aberu kang kai a Daudi alo erai ekapolon a Ngisirael, kainyo italeuno wadaang nicha emini asaduku a achamunet.” Kipeyonok Solomon Ekapolon Akuj ngakipeyos alokeno alosek adukit ngesi ngaren akai a Akuj. Kipeyo Solomon ngakipeyos na inomio itemem ka eger lo asakitae alotal a Musa, kotere ngirwa lu etaleuno daang lu araakasi ngasabatoi, ka esukukuu lo eanyungarere elap ta ngisukukui luuni lupalem a ekaru, lu eraakasi esukukuu a ngamugati anapadok, ka esukukuu a ngalemet ta esukukuu a ngikalea. Abu Solomon torek etich lo a ngirwa kadaang lo esubete ngimurok a Akuj, ka Ngilawi lu engarakinito ngimurok aeo ngieosio, ka akisub etich. Asubi Solomon nguna iwapit ngitalio lukolong adungunit apakeng Daudi. Torek Solomon nabo etich a ngitunga alu eteete ngidorin, kotere akisub etich a ngirwa kadaang alodorin alugelagelae, itemem ka eger lokolong adungunit Daudi lo erai itwaan a Akuj. Apot kesi tosubakis ngakiro daang nakolong adungokinit Daudi ngimurok ka Ngilawi alowae a ngakais ana ekachio ngiboro ta ngakiro nache. Arumorit Solomon etich keng daang lo a adukuoru napei anakisiakinet tanang narumoret akai a Ekapolon Akuj. Arumoro etich daang niajokon. Ani erumor tolot Solomon lorerea a Esionigeber ka Elas lu ayakasi lodoket lo ekwaas a apas a Akaba, anakwap a Edom. Tomeu ekapolon Iram ngatubwae na aweikinito ngitunga a arieng keng, nabo ameto ngikameak lu ayenete amere ngatubwae. Tometa kesi ngatubwae na adokito ngikaweikinak a arieng nguna, tananga nakwap a Opir. Inut kesi Solomon egolit lo eporit ngakiloi 15,000. Ani iirari akapolon a Cheba ekipur a Solomon, abu ngesi tolot nia Solomon aroanar kingitana ngakiro nakaagongok. Tanangu ngesi Yerusalem erukito ka ngikasubak etich keng lukaalak ta ngikaala iwokito ngikito lukitukukunyet akimuj, ka egolit lotikaalan ta ngamoru nakaalak a ngaropiyae. Ani ebuni ngesi nia Solomon, kingitana ngesi ngakiro daang nacha apedori akitamun. Tatachu Solomon ngakiro nguna daang, emam ibore abu tokuruwo akisisaun. Kiira akapolon ngina ngakiro a Solomon na aosou. Kingolik akai a ekapolon na aduki Solomon. Kingolik ngesi akimuj na emujio alomeesa a Solomon, ka ngakais a ngikaweikinak a arieng keng. Kingolik nabo eger lo arekinitere ngikasubak etich a akai a Solomon ka ngiworui lu ikwaan lu anapito kesi. Kingolik ngiworui lu anapito ngikasubak etich lu esumujeenete Solomon. Kingolik ngakipeyos na epeyeene Solomon alokai a Akuj. Ani ingolikini ngesi ngakiro nguna daang, tatalasi kililing chek. Tolimok akapolon ngina Solomon tama, “Ikwa ngaka iteni ngakiro nakolong eirari ayong anakwap kang, ngakiro na isubi iyong ka na aosou kon! Nyenupa sek ayong ngakiro nguna jik, mati been kabu engolik a ngakonyen kang. Ikwa keringa kolong ayong nyiirara tani epewae a aosou kon. Ios iyong noi akidwang tani eger lo kolong kalimokinitere ayong. Abe ngika ekeny ajokon ngikasubak etich kon lu irukito ka iyong jiik epupete ngakiro kon a aosou! Kipuroe Ekapolon Akuj na erai Akuj kon! Edodiu ngesi alakara keng kotere iyong ani kitiliworea iyong ekapolon, sodi topolok ngitunga a ekiro keng. Aloger eminar ngesi ngitunga keng Ngisirael, tasaki kesi toyakas jik, kitiliwo ngesi iyong ekapolon sodi kirichakinea ngakiro na eriyan ka na iteni.” Ani erumor nak akapolon ngina Solomon ngainakinet na ayaunit na araakasi egolit lo eporit ngakiloi ngabunge ngoomwon ka ngikito lu itukukunyete akimuj lukaalak ta ngamoru nakaalak a ngaropiyae. Ngikito lu itukukunyete akimuj lu ainakini ngesi Solomon, alalak noi, emam ngiche ekote ngulu nakanuan. ( Ngitunga a Iram ka Solomon lusek ayaunete egolit alo Opir, apot yaut tani ngakito a ngimusandali nakaalak ta asir. Todukio Solomon ngakito ngadoket a akai a Akuj ka na akai keng, tosubea tani ngagitae na eeotor ngikaeok. Emam ngakito na ikote nguna engolikin anakwap a Yuda nakanuan.) Abu ekapolon Solomon nak akapolon na Cheba ngina ibore daang nicha asaki, peimaritae ngainakinet nasek ainakinio ilokonyitoe ka na ainuni ngesi Solomon. Apot ngesi ka ngikasubak etich keng tobongosi nakwap a Cheba. Alokaru a epei, ariamununi Solomon egolit ngakiloi esibit ngabunge 23,000 toyei echur lo etachete ngikagielanarak ngiboro ka ngimuchurus. Ainuniyete ngikaweikinak a Arabia ka ngikapolok a ngiwaitin alugelagelae a Isirael, ainuniyete Solomon ngakwangae ka egolit. Tosubak Solomon ngaupwala naapolok ngamiae ngaarei alogolit. Egolit lo esibit ngakiloi ngakan-kaarei ngesi asubere aupwal apei. Tosubak ngaupwala naachik ngamiae ngauni alogolit. Egolit ngakiloi esibit ngauni ngesi asubere aupwal apei. Kiwaak ngesi ngaupwala nguna daang tooma kai naapolon na ayei Namoni a Lebanon. Abu ekapolon tosubak tani ekicholong keng lotiapolon, ewae epewae eburuchiarit ekelae a etom, sodi toburuchia ewae loche a egolit bon. Ayakasi ekicholong ngolo ngadoket ngakan-kapei, tatapakinitetei ekicholong loochi lo idokonokinio ngakejen, lo aburuchiaritae a egolit. Ayakasi ni idokonokinio ngakan lokwaasea a ekicholong. Ayakasi ngakisikwaanet a ngingatunyo a ngiarei ni idokonokinio ngakan, epei lokwaas epei, loche lokwaas loche. Ayakasi ngakisikwaanet a ngingatunyo ngitomon ka ngiarei nadoket, ayei engatuny losal a adoket a apei. Emam ekicholong eche napei kanuan ikwaan ka ngolo anapolou a ache. Ngikopoi lu amasea Solomon daang asubitae a egolit. Ngiboro lukimujet lu ayakasi kai naapolon na ayei Namoni a Lebanon daang, asubitae a egolit bon. Arai ngasua nakwangae pas ngirwa lua Solomon. Ayakasi ngesi ngatubwae nakaalak na ameatae ananam aapei ka ngatubwae a Iram. Arai nacha edaunotor ngikaru nguuni tobongut ngatubwae keng yaut egolit, ka ngasua nakwangae ka ngikel a etom, ka ngichomin ta ngikadokoi. Edwangit Solomon ngikapolok luche a ngakwapea daang kotere ebari ka aosou. Tasaka ngikapolok daang alosit aanyun ngesi sodi kiirasi aosou na ainakinit Akuj ngesi. Inu itwaan daang Solomon ngainakinet a ngiboro alukwangae, ka egolit, ka ngiworui, ka ngiboro lujiet, ka ngikito lu itukukunyete akimuj, ka ngangolei ta ngisikiria. Asubasi ngakiro nguna loger ngolo ekaru daang. Ayakasi Solomon nganokin ngabunge ngoomwon a ngangolei keng ka ngaurukukui. Ayakasi ngesi ngikameak ngangolei ngabunge ngatomon ka ngaarei. Ewaakinit ngiche kech Yerusalem, kiwaak luche lorerea lugelagelae. Solomon apolot noi alokapolok kadaang napei anangolol a Eupurate tanang nakwap a Ngipilisti ta ekukuor a Misiri. Ngirwa lu araakar Solomon ekapolon, asojunito ngasua nakwangae alo Yerusalem loger a ngalup. Alalak nabo ngakito a ngichekereng alo Yerusalem loger lo elalaketa ngikuno anaukon a akwap a Yuda. Agieleene Solomon ngangolei na ayauniyo alo Misiri ka ngakwapea nache daang. Ngakiro nache daang a Solomon napei anakisiakinet tanang losal, igiritae nakitabea na enyaritae Ngakiro a ekadwaran Nasan, ka ngakiro na adwari Aija lo a ere a Chilo, ka ngakisingolikinet a ekadwaran Ido na eyakasi tani ngakiro a apolou a Yeroboam alo arai ekapolon a Isirael. Apolokinit Solomon Isirael daang eyei Yerusalem a ngikaru a ngitomwon-omwon. Totoan ngesi sodi tonukakinae lore a Daudi. Kilunyokin lokookeng lo anyaritae Reoboam nados keng toliwor ekapolon. Tolot Reoboam Chekem ni achunakina ngitela a Ngisirael lua lokwap daang akitiliwor ngesi ekapolon. Abu Yeroboam lokookeng a Nebat lokolong sek asii ani a ekapolon Solomon tolot Misiri, kiira ngakiro nguna tobongu alo Misiri. Tanyarata ngitunga a ngitela alu alokwap Yeroboam sodi kirukosi nia Reoboam tolimokis tamasi, “Kiboliar kolong apakon sua kitusub etich loationon. Ani kitiliwo iyong etich kosi lo nyetiono, sodi tojoker eboyor kosi, kiliwor sua ngitunga kon lu kimuno iyong.” Tolimok Reoboam kesi tama, “Kimiekinae etamak ngakiro nguna, ani adaunet a ngirwa a nguuni tobongut.” Sodi torotokis ngitunga ngulu. Tolot Reoboam lokasukou lukolong araakasi ngikesuruorok a Solomon alo arai apakeng kingit kesi tama, “Ibalasi esi ayong atatachak ngitunga lugu anukiro?” Tatachut kesi tamasi, “Ani kijoker iyong alotunga kalu sodi kitalaka kesi, tatachanak ngakiro naajokak, eliworosi kesi ngikasubak etich kon jik.” Nakaneni nyeekachik Reoboam ngakiro na alimokinete ngikasukou. Tolot ngesi losorok lukolong apolounete ka ngesi lu araakasi ngikesuruorok keng. Kingit kesi tama, “Anukiro ibalasi esi ayong atolimok ngitunga lugu, lu ebalasi ayong, ‘Kitiliwo etich lokolong kiinakini apakon sua lo nyetiono’?” Tatachakis ngesi ngisorok tamasi, “Tolimok kesi kona, ‘Elangir ekimoin kang loochi idwangit aabor a apakang! Kitusubi kolong apakang esi etich loationon, etiliwori tokona ayong etich ngolo lo etiono noi. Kidesi kolong apakang esi a ngalita, kedesi tokona ayong esi a ngarega!’ ” Adaunet a ngirwa a nguuni, tobongut Yeroboam ka ngitunga nia ekapolon Reoboam loger losek alimokinitor ngesi kesi ebala, “Tobongutu nikang adaunet a ngirwa a nguuni.” Nyeekachik ekapolon ngakiro nasek alimokinete ngikasukou ngesi, dio kisuruoria ngitunga niaronon. Kiruor ngesi loger losek alimokinitotor ngisorok. Tolim tama, “Kitusubi kolong apakang esi etich loationon, nakaneni eatakini tokona ayong totioner noi. Kidesi kolong ngesi esi a ngalita, nakaneni kedesi tokona ayong esi a ngarega!” Asaki Ekapolon Akuj akiyookin ngakiro nakolong sek alimokini Yeroboam lokookeng a Nebat, kisitoru nia Aija alo abunit alo Chilo. Ngakiro nguna ngesi peapupokinea ekapolon Reoboam ngakiro a ngitunga. Ani ingolikinete ngitunga daang atamar awou ekapolon apupokin kesi, tatachakis kesi ekapolon tamasi, “Nyo kitiakakinio sua anapolou a Daudi? Emam ibore kirumi sua ani a lokookeng a Yese. Ee Ngisirael, toloto nawiyei kus! Kimiekisi Reoboam tosub ngakiro keng a ilope!” Sodi tongero ngitunga lu ayakasi Isirael Reoboam. Kimiekis ngesi epolokini ngitunga lu ayakasi nakwap a Yuda make. Ani erumor tomea ekapolon Reoboam Adoniram, losek aweikinit etich lo edesikinitae ngitunga, tolot nia Ngisirael, nakaneni kimasa ngitunga Adoniram a ngamoru taara. Ani ikokinete ngakiro neni, kiburuburak Reoboam todoka naurukuk keng na iritae tamatar Yerusalem. Napei alorwa kangulu jik tani tokona, engerito ngitela lua lokwap Isirael apolou a awi a Daudi. Ani enanguni Reoboam Yerusalem, tochunak ngitunga a ngitela a Yuda ka Benjamen lu araakasi ngasigerea nakajwok 180,000. Asaki ngesi alosit akitijwore ngitela lua lokwap Isirael topolokinio kesi nabo. Nakaneni kisuruor Akuj ekadwaran Chemaya tama, “Tolimok Reoboam lokookeng a Solomon, lo erai ekapolon a Yuda, tolimok tani ngitunga daang a ngitela a Yuda ka Benjamen kona, ‘Ebala Ekapolon Akuj esi nyiitijikis Ngisirael lu eraakasi ngiyenet kus. Kapesi esi daang nawiyei kainyo eraakasi ngakiro na asubakin ngakang.’ ” Kiirasi kesi ngakiro na adunguni Ekapolon Akuj, nyeelot akitijwore Yeroboam. Tolom Reoboam Yerusalem sodi toduk ngawasea a ngirerea kalu anakwap a Yuda ka Benjamen. Toduk Betleem, ka Etam, ka Tekoa ka Betsur, ka Soko, ka Adulam, ka Gas, ka Marecha, ka Sip, ka Adoraim, ka Lakich, ka Aseka, ka Sora, ka Aijalon ta Eburon. Toduk ngesi ngawasea a ngirerea kangulu lokojokon kitogogong. Toseu ngesi ngikarikok a ngasigerea ngipei-pei kiwaanak lorerea ngulu. Kiwaanak nabo lorerea ngulu ngikerui a akimuj, ka akimiet ta emuna. Kiwaak tani ngaupwala ka ngakwaaras. A eger kangolo, abu ngesi topolok Yuda ka Benjamen. Apot ngimurok a Akuj ka Ngilawi lu ayakasi nakwap a Isirael daang toloto kuju, nakwap a Yuda. Kimiekis Ngilawi ngakwapea kech na iyokiyo ngibaren ka ngakwapea nache, sodi toloto Yuda ka Yerusalem, kainyo apot Yeroboam ka talokookeng kitengero Ngilawi akisub etich eraakasi ngimurok a Akuj. Toseu Yeroboam ngimurok keng a ilope tosuba etich ani ilipitere ngakujo nagelayek, ka akilip ngipean ta ngakujo na asubunit ngesi isikwaanit ka ngitak lukiliok. Alotela kadaang a Ngisirael, apot ngitunga lu amunokinito akilip Ekapolon Akuj na erai Akuj a Ngisirael, kiwapakis Ngilawi toloto Yerusalem akipeyonokin Ekapolon Akuj na erai Akuj kata apaakech. Abu apolou a Yuda kisikokin kotere ngakiro nguna. Apot kesi kibaka alowae a Reoboam alo arai lokookeng a Solomon a ngikaru a nguuni. Kibooyoto kesi a ngikaru a nguuni loger a ngirwa alu kolong araakatar Daudi ka Solomon ngikapolok. Eusi Reoboam aberu na anyaritae Maalas na arai nakookeng a Yerimos alo arai lokookeng a Daudi. Itiokeng a Maalas ngesi Abiyail na arai nakookeng a Eliab tarai atatait a Yese. Kidou Maalas ngide lusapa nguuni lu anyaritae Yeuch, ka Chemaria ta Saam. Ani ekisidi kiut Reoboam Maaka na arai nakookeng a Abusalom. Kidou aberu ngina ngide lusapa nguomwon lu anyaritae Abija, ka Atai ka Sisa ta Chelomis. Araakasi ngaberu a Reoboam nakuuta ngatomon ka ngakan-kauni, taraakas ngapesur a ngabwes ngatomwon-kapei. Araakasi talokookeng ngitomwon-arei ka ngikan-kauni, taraakas tanakookeng ngatomwon-kapei. Anaberu keng kadaang, amina ngesi Maaka na arai nakookeng a Abusalom noi. Amina Reoboam lokookeng a Maaka lo anyaritae Abija akidwang ngide keng daang. Asaki ngesi edia ngolo kilunyokin nados keng ekisidi toliwor ekapolon. Abu Reoboam totiakanak talokookeng ngitichisio a eger alo a aosou. Kiwaak ngesi talokookeng wadaang a akwap a Yuda ka Benjamen, lorerea lu adukitoe ngawasea. Nak ngesi kesi ngiboro lukaalak a apatanu, tasakak nabo ngaberu nakaalak. Napei esikokinor apolou a Reoboam togogonger, apot ngesi ka Ngisirael daang toisikis etal a Ekapolon Akuj. Ekaru lo a ngikan lo araakar Reoboam ekapolon, apon kesi kirirae ani peamunotor Ekapolon Akuj. Abu Chichak lo arai ekapolon a Misiri kitijik Yerusalem, erukito ka ngaurukukui na iritae 1,200, ka ngikameak ngangolei 60,000 ka ngasigerea nakaalak na nyimarun, erukito aapei ka ngasigerea a ngitunga a Libia, ka lua Suk ta lua Kuch.*g** Abu Chichak tolema ngirerea a Yuda lu adukitoe ngawasea nakaagongok, tolot ngaren tanang Yerusalem. Sodi tolot ekadwaran Chemaya nia ekapolon Reoboam ka ngikarikok a Yuda lu achunakina Yerusalem esakete abuchar ani a Chichak. Tolimok Chemaya kesi tama, “Ebala Ekapolon Akuj kona, ‘Kiisikis esi ayong. Aloger kangolo, kaisikinea ayong dang esi Chichak.’ ” Apot ekapolon ka ngikarikok tachamut atamar kisechit kesi, sodi tolimut tamasi, “Etenooko ngakiro na esubi Ekapolon Akuj.” Ani ingolikini Ekapolon Akuj atamar etiditeunosi kesi, abu ngesi kisuruor Chemaya tama, “Aloger achamuneta kesi akisech kech, nyerirae ayong kesi lokojokon. Nyebuni angoit kang towan Yerusalem, nakaneni idwangi Chichak kesi, toyeneta atamar etiakak akisub etich kang ka akisub etich a ngikapolok a ngakwapea.” Bu Chichak lo arai ekapolon a Misiri Yerusalem, sodi tolema ebari a akai a Akuj ka lo a akai a ekapolon. Tolema ngesi ibore daang aapei ka ngaupwala na egolit nakolong asubakini Solomon. Tosubak ekapolon Reoboam ngaupwala ngache anasua ananyangayek kilunyok nados ana alemario. Nak ngesi ngaupwala nguna ngasigerea na eyokiyete ngidorin totinga. Toliwor nacha elosio ekapolon kai a Akuj, totinga ngasigerea nguna ngaupwala, ani erumor tobuasi kai na eyokiyete kesi ngidorin. Ani aloger etiditeunor ngesi ani a Ekapolon Akuj, abu angoit a Ekapolon Akuj nyeemunya ngesi jik, nakaneni apot ngakiro tojoketa ani a Yuda. Abu apolou a Reoboam kisikokin alo Yerusalem. Araakasi ngikaru keng ngitomwon-omwon ka epei na aliworor ekapolon. Toliwor ngesi ekapolon a ngikaru a ngitomon ka ngikan-kaarei alore a Yerusalem, alo aseuni Ekapolon Akuj anakwap a Isirael kadaang toliwor ilipeenere ngesi. Anyaritae itiokeng a Reoboam Naama. Arai aka akwap a Amon. Tosech Reoboam kainyo nyesaka akisub ngakiro na esaki Ekapolon Akuj. Ngakiro na asubi Reoboam daang napei anakisiakinet tanang losal, ka ngakiro a awi keng, igiritae nakitab na enyaritae Ngakiro a ekadwaran Chemaya, ka nakitab na enyaritae Ngakiro a ekadwaran Ido. Ajienete Reoboam ka Yeroboam jiik. Totoan Reoboam tonukakinae nalielin na ngikapolok eyakasi lore a Daudi, sodi abu lokookeng Abija kilunyokin nados keng toliwor ekapolon. Ekaru lo a ngitomon ka ngikan-kauni lo araakar Yeroboam ekapolon a Isirael, toliwor Abija ekapolon a Yuda. Toliwor ngesi ekapolon a ngikaru a nguuni alo Yerusalem. Anyaritae itiokeng Mikaya na arai nakookeng a Uriel, na abunit alore a Gibea. Tojikinos Abija ka Yeroboam. Ayakasi Abija ngasigerea nakajwok 400,000. Kitijik Yeroboam ngesi erikit ngasigerea nakajwok 800,000. Kiriamun ngasigerea nakwap na ngimukur a Epiraim. Todoka ekapolon Abija kidiama emoru a Semaraim tama, “Iyong Yeroboam ka Ngisirael daang, topupokisi mono esi! Nyiyenete esi atamar achamakinosi kolong Ekapolon Akuj na erai Akuj a Ngisirael ka Daudi kikong Akuj jik na ebala eliworosi Daudi ka ngalesea keng ngikapolok jik a? Abu Yeroboam lokookeng a Nebat tonger Solomon lo arai ekapolon keng. Ani ekisidi tochunak Yeroboam ngirukooi lupasiek sodi kitopega Reoboam lokookeng a Solomon. Aringa Reoboam edit nyeyena ngakiro. Peapedori akikotar kesi. Isakete tokona esi akitijwore apolou na ainaki Ekapolon Akuj ngalesea a Daudi, ani irikitotor ngasigerea nakaalak, ka nabo ni itingitotor ngitak lukiliok lu esubunitae alogolit, lukolong asubakini Yeroboam toliworos ngakujo kus a? Iritarete kolong esi ngimurok a Akuj lu araakasi ngalesea a Aron, kiritasi tani Ngilawi, sodi toseut ngimurok kus loger a ngibukui alugelayek. Toliwor itwaan cha daang ni eyauni emong kori ngimesekin ngikan-kaarei epedori akitaleun toliwor emuron a ngakujo ana nyeraakasi ngakujo. “Nakaneni eringa sua kisubi etich a Ekapolon Akuj ana erai Akuj kosi, nyengero sua ngesi. Eyakasi sua ngimurok lu eraakasi ngalesea a Aron, kesi esubete etich eraakasi ngimurok a Akuj. Ingarakinito Ngilawi kesi. Ipeyonokinete kesi Ekapolon Akuj ataparach daang ka atabong daang emitina ka ngakipeyos na inomio nginerin daang. Elemuunete kesi ngalemunet a ngamugati alomeesa alo italeunitoe. Atabong daang, inokanakinete kesi ngataae anasipet a egolit. Kirichakinit sua ngakiro na edungunit Ekapolon Akuj, nakaneni ingero esi ngesi. Akuj alope erai akarikon kosi, toyakas ngimurok keng nege etingito ngaburucho esakete akutakin kitanyaraata sua atojikin ka esi. Ekoe Ngisirael, nyiitijwoto Ekapolon Akuj na erai Akuj kata apaakus! Nyidwangete esi!” Abu Yeroboam tomea ngajorei keng ngache kituumwokis ngasigerea a Yuda anaabor, toyakas nache lowae lo alongaren. Ani ingoliarete ngitunga a Yuda, kingolikis ajore kiriam kesi. Kikaloikis kesi Ekapolon Akuj esakete akingarakino, sodi tokutakis ngimurok ngaburucho. Kiremasi ngitunga a Yuda lokojokon. Torik Abija kesi kisiakis ejie. Kidwang Akuj Yeroboam ka ngasigerea a Ngisirael. Tamataros Ngisirael ani a ngitunga a Yuda. Kimiek Ekapolon Akuj ngitunga a Yuda idwangete kesi. Apot Abija ka ngitunga keng taara Ngisirael lukaalak. Taarae ngasigerea a Ngisirael nakajwok 500,000. Apot ngitunga a Yuda kidwanga Ngisirael kainyo egienosi kesi Ekapolon Akuj na erai Akuj kata apaakech. Abu Abija kiwap Yeroboam sodi todema ngirerea keng ngiche lu enyaritae Besel, ka Yechana ta Epiron, ka ngadakarin na edunyatar ngirerea ngulu. Abu apolou a Yeroboam nyiisikokin nabo jik ngirwa lu araakar Abija ekapolon. Ani ekisidi, taram Ekapolon Akuj Yeroboam taar. Toliwor Abija lo eyenikinitae. Arikit ngesi ngaberu ngatomon ka ngoomwon. Araakasi ngide keng lusapa ngitomwon-arei ka ngiarei, taraakas lupesur ngitomon ka ngikan-kapei. Ngakiro nache a Abija, na eruoro ngesi ka na asubi, igiritae nakitab na enyaritae Ngakiro a ekadwaran Ido. Totoan ekapolon Abija tonukakinae nalielin a ngikapolok na eyakasi lore a Daudi. Kilunyokin lokookeng lo anyaritae Asa nados keng toliwor ekapolon. Ngirwa ngulu, min ekisil nakwap a ngikaru a ngitomon. Kitalaka Asa Ekapolon Akuj na erai Akuj keng tosub ngakiro na eyookino tojokak anakonyen a Ekapolon Akuj. Tolema ngesi ngikenoi a ngakipeyos a ngakujo anagelayek ka ni ilipeenere. Tobwangabwanga ngesi ngapirio ka atubutub ngakisikwaanet a akuj anaberu enyaritae Achera.*g** Todungok ngesi ngitunga a Yuda atamar tosuba ngakiro na esaki Ekapolon Akuj na erai Akuj kata apaakech, ka akiwap ngakitatamet keng ka ngitalio. Ngirwa lu araakar Asa ekapolon, min ekisil nakwap kainyo abu ngesi tolema ni ilipeenere ngakujo nagelayek ka ngikenoi kech lukinomet emitina, sodi kipudo alorerea kadaang a Yuda. Toduk ngawasea nakaagongok a ngirerea a Yuda ngirwa ngulu. Amam ejie ayei kainyo abu Ekapolon Akuj nak ngesi ekisil. Tolimok ngesi ngitunga a Yuda tama, “Potu atoduko ngirerea lugu, atodukokisi ngawasea, ka ngipemin ta ngidorin lu elegerio ngakilori. Erai akwap ayok kainyo kisub ngoni nguna esaki Ekapolon Akuj na erai Akuj yok. Kiyok ngesi ngoni nabo eratak ejie alowaitin kadaang.” Apot kesi toduko, kisikokin eboyor kech. Ayakasi ekapolon Asa ngasigerea 300,000 na aponito alo Yuda na atingito ngaupwala ka ngakwaaras. Ayakasi nabo ngasigerea 280,000 na aponito anakwap a Benjamen na atingito ngaupwala ka agumanar ngimalea a amod. Araakasi ngitunga ngulu daang lukajwok lu ekileenikinit. Abu itwaan a akwap a Kuch ni anyaritae Sera torem Yuda erikit ngasigerea amilion apei ka ngaurukukui na irito ngangolei ngamiae ngauni. Torem tanang Marecha. Tolot Asa kisiriamia ngesi, kibaka kesi anadipo a Sepata, alodiyete Marecha. Kilip Asa Ekapolon Akuj na erai Akuj keng ebala, “Ee Ekapolon Akuj, ipedori iyong kingarak ajore na nyejwono ka na ejwono. Ee Ekapolon Akuj na irai Akuj kosi, kingarakinae sua tokona, kainyo kigieno sua iyong. Erai iyong kiponitor sua akitijwore ajore natikaalan naga. Ekapolon Akuj, irai iyong Akuj kosi. Wara itwaan nyikidwang iyong.” Kidwang Ekapolon Akuj ngasigerea a Kuch na etijikinioto Asa ka ngasigerea a Yuda, sodi tamataros. Kiwapakis Asa ka ngajorei keng tananga Gerar. Taarae ngitunga a Kuch lukaalak tokuruwo tani achunakin nabo tojwoto. Abu Ekapolon Akuj ka ngasigerea keng kidwanga kesi, sodi tangatasi ngasigerea ngiboro lukaalak. Kinyasut kesi ngirerea daang lu edunyatar Gerar, kainyo akerito ngitunga kaneni Ekapolon Akuj. Todemasi ngasigerea ngitunga ngiboro alorerea kangulu kadaang, tangatasi ngiboro lukaalak noi. Apot kesi kitijikis tani ngadakarin a ngikeyokok a ngiche, tolemasi ngamesekin nakaalak ka ngikaala. Ani erumor tobongosi Yerusalem. Min etau a Akuj nia Asaria lokookeng a Oded, sodi tolot ngesi aanyun ekapolon Asa tolimok tama, “Topupok ngakiro kang, iyong Asa ka ngitunga daang a Yuda ta lua Benjamen! Erukito Ekapolon Akuj ka esi erai kirukito esi ka ngesi. Ani kisak esi ngesi, ianyunete. Nakaneni ani kiisikis esi ngesi, kiisikini ngesi esi. Ebooyoto Ngisirael nikooyen emam Akuj na iteni, ka ngimurok lu itatamete kesi tamam etal. Nakaneni ani eanyunete kesi ngichan, apot toreas nia Ekapolon Akuj ana erai Akuj a Ngisirael. Tasaka kesi ngesi sodi taanyut. Ngirwa ngulu, amam itwaan apedori abunere ka arotokin a ekisil, kainyo ayakasi ngichan ka ekurikur nakwapea daang. Toliwor akwap apei ichiekiari nache, toliwor ere epei ichiekiari loche, kainyo abu Akuj inu kesi ngichan ka ngakiro naaronok. Nakaneni ejoikinit iyong ititinyer! Nyiilout ngakiro etau, kainyo kiinakinio ebachit kotere etich lo isubi iyong.” Ani iirari Asa ngakiro na adwari Asaria lokookeng a Oded, abu etau keng topwatun. Abu ngesi tachaka ngakujo nasubuna daang na ayakasi nakwapea a Yuda ka Benjamen, ka ngakujo nasubuna daang na angatari alorerea alu kolong alemari ngesi anakwap ana ngimukur a Epiraim. Tobongonok ngesi akiduk ekeno a ngakipeyos losek adukokinitae tooma alaar a akai a Akuj. Aponito sek ngitunga lukaalak lowae a Asa alo Epiraim, ka Manase ta Simeon, sodi toloma kesi nakwap na apolokinit Asa, kainyo apot kesi kingolikis atamar erukito Ekapolon Akuj ka Asa. Tanyara Asa kesi daang ka ngitunga a Yuda ka Benjamen. Tochunakinos kesi Yerusalem elap lo a nguuni ekaru loa ngitomon ka ngikan lo araakar Asa ekapolon. Akolongit ngina, apot kesi tolemikis Ekapolon Akuj ngakipeyos alobaren alu abuunete kesi alu araakasi ngaatuk ngamiae ngakan-kaarei ka ngamesekin ngabunge ngakan-kaarei. Apot kesi tachamakin atamar kilipi Ekapolon Akuj na erai Akuj kata apaakech a ngitai kech kadaang ka akiyar kech daang. Itwaan daang ni nyilipi Ekapolon Akuj, eario, kesorokona kori kemojongit, kerai ikile kori iberu. Apot kesi kikongo alokiro a Ekapolon Akuj iremasi, ka achala, ka akutakin ngaburucho ta ngaamwar. Apot ngitunga a Yuda daang talakaros kotere akikong ngina, kainyo apot kesi kikongo a ngitai kech kadaang, nabo apot kesi tasaka Ekapolon Akuj dir. Apot kesi taanyut Ekapolon Akuj, sodi nak Akuj kesi ekisil lo eriami kesi. Abu ekapolon Asa tolema ataakeng na anyaritae Maaka tojongo araakau akimat nakapolon, kainyo asubunit ngesi ekisikwaane lokikadakini a Achera.*g** Touko Asa ekisikwaane ngolo totubutubu kinom anadipo a Kidiron. Tani pekinyasunit Asa ngiwaitin daang lu elipeenere ngakujo nagelayek alo Isirael, arai ngesi lo amam ibore asechit ngirwa daang lu ayarea ngesi. Abu ngesi kiwaak tooma akai a Akuj ngiboro daang lu kolong ekongi apakeng Abija atamar toliworos ngika Akuj. Kiwaak tani ngiboro lua egolit ka lukwangae lu ekongitor ngesi ilope. Emam nabo ejie amin nakwap tanang ekaru loa ngitomwon-uni ka ngikan lo araakar ngesi ekapolon. Ekaru lo a ngitomwon-uni ka ngikan-kapei lo araakar Asa ekapolon a Yuda, abu Baacha lo arai ekapolon a Isirael torem Yuda, kisiak akiduk awas Rama sodi kiratakinea ngikalotok daang lu elomete ka apudor alo Yuda. Sodi tolem Asa ngakwangae ka egolit alobari a akai a Akuj ka lo a akai a ekapolon sodi tomea ngitunga yaasi Damasko nia Benadad alo arai ekapolon a Siria ebala, “Kimiek atachamakin loger lokolong achamatar taapayok. Eraakasi ngakwangae nugu ka egolit logo ngainakinet kon. Tongeros tokona ka Baacha lo erai ekapolon a Isirael, sodi tolemarea ngesi ngajorei keng anakwap kang.” Tacham Benadad ngakiro a Asa sodi tomea ngikarikok a ngasigerea keng ka ngasigerea kech akitijikin ngirerea a Isirael. Tolemasi kesi ngirerea lu enyaritae Ijon, ka Dan, ka Abel Bes Maaka ta ngirerea a akwap a Naputal daang lu ekachanakinio ngiboro. Ani iirari ekapolon Baacha ngakiro nguna, tojongo akiduk ngawasea Rama dio aisikin etich ngolo. Sodi tochunak ekapolon Asa ngitunga alo Yuda kadaang todungok atamar tolemasi ngamoru ka ngakito nasek adukio Baacha alo Rama. Tolemut kesi ngamoru ka ngakito nguna sodi todukioto ngirerea a Geba ka Misipa. Ngirwa ngulu, tolot ekadwaran Anani nia ekapolon Asa tolimok tama, “Aloger igienokinor iyong ekapolon a Siria akidwang akigienokin Ekapolon Akuj na erai Akuj kon, abucharosi ngasigerea a ekapolon a Isirael anikon. Ikwa pealalak kolong ngajorei a Kuch ka Libia, toyakas ngaurukukui na iritae ka ngikameak ngangolei lukaalak a? Abu Ekapolon Akuj kisidwang iyong kesi kainyo igienokino iyong ngesi. Iyoki Ekapolon Akuj akwap daang, sodi kitogogong ngulu emunosi ngesi. Ani aloger isubakinea iyong ngakiro na abangaanut nugu, napei tokona jik, iliwor iyong itwaan a ejie.” Abu Asa tongoik ekadwaran ngolo kotere ngakiro nguna, sodi toen ngesi alojela. Ngirwa ngulu kesi esiakinea Asa aboliar ngitunga ngiche. Ngakiro daang nakolong asubi Asa anapolou keng napei anakisiakinet tanang losal, igiritae nakitab na enyaritae Ngakiro a ngikapolok a Yuda ka Isirael. Ekaru lo a ngitomwon-uni ka ngikan-koomwon lo araakar Asa ekapolon, abu edeke a ngakejen kingwal ngesi. Tani alodeke kangolo, abu ngesi nyeelot nia Ekapolon Akuj, pearai abu tolot lomurok. Adaunet a ngikaru a ngiarei, abu ngesi totoan tonukakinae naliel keng nasek akulakinit ngesi nataaba alore a Daudi. Apot kesi tolemut ngikito lukakukunyok ka ngamieta nakakukunyok kiwasakis nakwaan keng tonuketa. Kirirakis kesi akim natiapolon kigorotor ngesi esutonokinete. Kilunyokin Yeochapat nados a apakeng Asa toliwor ekapolon, sodi kitogogong angerit keng Isirael. Kiwaak ngesi ngajorei keng lorerea a Yuda lu adukitoe ngawasea anakwap a Yuda, ka ngirerea lusek alemarit Asa anakwap a Epiraim. Topia Ekapolon Akuj Yeochapat kainyo abu ngesi kiwap eboyor a apakeng lo ekingaren, nyilipa ngesi Baal. Tosub ngesi etich a Akuj anaka apakeng, kiwap ngitalio a Akuj. Nyesuba ngesi ngakiro nasek asubete ngikapolok a Isirael. Abu Ekapolon Akuj nak Yeochapat apolou na isikokina alo Yuda. Inut ngitunga daang ngesi ngainakinet sodi toliwor ngesi ekabaran nabo lo erimae lokojokon. Abu ngesi totitinyer anakisub etich a Ekapolon Akuj, sodi kinyasu ngesi wadaang ni elipeenere ngakujo nagelayek, nabo kinyasu ngakisikwaanet a akuj anaberu enyaritae Achera alo Yuda. Ekaru lo a nguuni a apolou keng, abu ngesi tomea ngikapolok a arieng keng akitatam alorerea a Yuda. Anyaritae ngikapolok ngulu Benail, ka Obadia, ka Sekaria, ka Nesanel ta Mikaya. Kirukosi kesi ka Ngilawi ngikan-koomwon ta ngimurok a Akuj ngiarei. Anyaritae Ngilawi ngulu Chemaya, ka Nesania, ka Sebadia, ka Asael, ka Chemiramos, ka Yeonasan, ka Adonija, ka Tobija ta Tobadonija. Anyaritae ngimurok Elichama ka Yeoram. Totinga kesi akitab a etal a Ekapolon Akuj toloto lorerea a Yuda daang itatamete ngitunga Etal. Kitoem Ekapolon Akuj ngapolosio na edunyatar Yuda daang toema akitijikin Yeochapat. Apot Ngipilisti ngiche inut Yeochapat ngakwangae nakaalak ka ngainakinet ngache. Inut nabo Ngimwaarabui ngiche ngesi ngamesekin 7,700 ka ngaanei 7,700. Toliwor Yeochapat lo eyenikinitae noi. Toduk ngesi ngawasea wadaang a akwap a Yuda ka ngirerea lu ekachio akimuj nakaalan. Kiwaak ngesi ngasigerea na eyenikinitae nakajwok Yerusalem, torek a ngimacharin kech. Adina ngesi arai ekarikon a ngajorei a ngimacharin a ekitela a Yuda. Arikit ngesi ngasigerea 300,000. Lo atupit Adina ngesi Yewanan lo arikit ngasigerea 280,000. Totupak Amasia lokookeng a Sikiri lo arikit ngasigerea 200,000. (Alemuna Amasia akisub etich a Ekapolon Akuj.) Eliada ngesi arikit ngajorei a ngimacharin a ekitela a Benjamen. Arai ngesi lokajwon. Arikit ngesi ngasigerea 200,000 na atingito ngaupwala ka ngakawa. Lo atupit Eliada ngesi Yeosabad lo arikit ngasigerea 180,000 na atingito ngiboro kech a ejie. Asubete ngitunga ngulu etich a ekapolon alo Yerusalem, toyakas ngasigerea nache nasek ewaakinit ekapolon lorerea luche lu adukitoe ngawasea alo Yuda. Ani eliwor Yeochapat lo arai ekapolon a Yuda ekabaran lo ipuruunitoe, tachamakin ngesi ka Aab lo arai ekapolon a Isirael atamar iutasi itwaan a awi a Yeochapat ka ni awi a Aab. Adaunet a ngikaru a ngiche, tolot Yeochapat Samaria nia Aab. Abu Aab taarak Yeochapat ka ngitunga lu arukitotor ngamesekin nakaalak ka ngaatuk tanyama ngitunga. Kimaima Aab Yeochapat esaki kirukosi ka ngesi toremo ere a Ramos alo Gilead. Tolimok Aab Yeochapat tama, “Ibuni iyong erukosi etijikisi Ramos a?” Tatachu Yeochapat tama, “Anyouni ayong esaa daang lo inyounio iyong. Ngasigerea kang dang enyounito. Kirukori sua ka iyong.” Sodi tolim nabo Yeochapat tama, “Nakaneni kimiek mono engitutu Ekapolon Akuj ngakiro nugu.” Sodi tochunak Aab ngikadwarak luko asibit ngamiae ngoomwon kingit tama, “Alosi etijik Ramos kori nyalosi?” Tatachut ngikadwarak tamasi, “Kape. Kisidwangi Ekapolon Akuj iyong.” Nakaneni kingis Yeochapat tama, “Emam nege ekadwaran a Ekapolon Akuj lo kipedori ngoni akingit a?” Tatachu Aab tama, “Eringa eyei itwaan ipei ni kipedori ngoni akingit ngakiro a Ekapolon Akuj. Enyaritae ngesi Mikaya lokookeng a Imula. Nakaneni aremokino ayong ngesi kainyo nyedwareene ngesi ngakiro naajokak anikang, pearai naaronok jiik.” Tolim Yeochapat tama, “Nyejoikinit iyong ilimuni kongina.” Sodi tanyarau Aab epei a ngikapolok a arieng keng tolimok tama, “Kape toriku Mikaya lokookeng a Imula nege atipei.” Ebooyete ngikapolok luarei ngulu alokicholongo kech a apolou, enapito ngiworui lukooyak a ngikapolok. Ebooyete kesi anidaet ngalemet anikalapatan ekidor a ere a Samaria. Ayakasi ngikadwarak daang neni adwarete alongaren ngikapolok ngulu. Abu epei kech lo anyaritae Sedekia lokookeng a Kenaana tosubak ngaamwar nasua tolimok Aab tama, “Ebala Ekapolon Akuj kona, ‘Itijikini iyong Ngisiria a ngaamwar kanu tomunya.’ ” Tolimut ngikadwarak luche daang ngakiro napei nguna ebalasi, “Kape kitijik Ramos kidwang. Kisidwangi Ekapolon Akuj iyong.” Abu itwaan nisek amearitae anyaraun Mikaya tolimok Mikaya tama, “Adwar ngikadwarak luche daang ngakiro naajokak ani a ekapolon, ejoikinit iyong dang ilimuni napei nguna.” Nakaneni tolim Mikaya tama, “Ekongi ayong alokiro a Ekapolon Akuj ana eyari atamar ngakiro nakalimokini Akuj kang ayong, kesi alimuni ayong!” Ani enanguni ngesi nia ekapolon Aab, kingit Aab ngesi tama, “Mikaya, ejoikinit ayong ka ekapolon Yeochapat kilosi akitijikin Ramos kori mam?” Tatachu Mikaya tama, “Kape kitijik kidwang. Kisidwang Ekapolon Akuj iyong.” Tolim Aab tama, “Ibala katolimok ngalimokinet ngaai atamar nakisuruorea iyong ayong alokiro a Ekapolon Akuj, kiruor ngakiro na iteni?” Tatachu Mikaya tama, “Engolik ayong ngasigerea a Ngisirael epetakina kidiama ngimukur loger a ngamesekin ana emam ekeyokon. Tolim Ekapolon Akuj tama, ‘Emam ngitunga lugu ekarikon. Kimiekisi kesi tobongosi nawi akaalimon.’ ” Tolimok Aab Yeochapat tama, “Petete kalimokini ayong iyong atamar nyedwareene logo naajokak jik anikang, pearai naaronok a?” Tolim Mikaya tama, “Kiira tokona ngakiro na elimunit Ekapolon Akuj! Engolikini ayong Ekapolon Akuj ibooyi alokicholong keng anadis, ka ngimalaikae keng daang ewaasi alodiyete keng, aloteten ka kedieny. Kingis Ekapolon Akuj tama, ‘Ngae ingalae Aab tolosio taarae alo Ramos?’ Tolimut ngimalaikae ngiche nugu, tolimut luche ngun. Sodi bu etau towo alongaren Ekapolon Akuj tolim tama, ‘Engalae ayong ngesi.’ Kingit Ekapolon Akuj ngesi tama, ‘A eger kaali?’ Tatachu etau tama, ‘Alosi ayong etiliwo ngikadwarak a Aab daang ngikaliokok.’ Tolim Ekapolon Akuj tama, ‘Kape kingala ngesi. Ipedori iyong.’ ” Torumo Mikaya ngakiro keng ebala, “Ngakiro na asubakin kesi nugu, eteliokon Ekapolon Akuj ngikadwarak lukon lugu, sodi kingalata iyong. Nakaneni adungu Ekapolon Akuj alope atamar iriamunosi iyong ka naaronok!” Sodi tonyou ekadwaran Sedekia tolot kibap Mikaya namatengen ebala, “Ekokini Etau a Akuj kadepari ayong kisuruor iyong ai?” Tatachu Mikaya tama, “Iyenuni iyong akolongit na ilosio akiduk anamaniyat ana alotooma.” Todungok ekapolon Aab epei a ngikapolok a arieng keng tama, “Kirumutu Mikaya torikosi nia Amon alo erai ekapolon a ere, ka Yoach lo erai lokookeng a ekapolon. Tolimokis kesi atamar abala ayong kona, ‘Kiwaakisi itwaan en lojela kisumuja ngamugati ka ngakipi tanang abonguni ayong ajok!’ ” Tolim Mikaya tama, “Ani kibongu iyong akaalimon, nyisuruoro Ekapolon Akuj ayong.” Kiatak nabo tama, “Kiira iyong itwaan daang ngakiro na alimu ayong nguna!” Sodi toloto Aab lo arai ekapolon a Isirael ka Yeochapat lo arai ekapolon a Yuda akitijikin ere a Ramos alo Gilead. Tolimok Aab Yeochapat tama, “Ani kilosi ngoni lojie, epasakin ayong, nakaneni tanap iyong ngiworui kon lua apolou.” Adungokinit sek ekapolon a Siria ngikarikok a ngasigerea keng lu aweikinito ngaurukukui na iritae, tolimok tama, “Nyiitijikis itwaan iche kedit kori kepolot pearai ekapolon a Isirael bon.” Ani ingolikinete kesi ekapolon Yeochapat, tamasi, “Ekapolon a Isirael logo.” Sodi toreas kesi esakete akitijikin ngesi. Nakaneni toowanik Yeochapat sodi toyuu Ekapolon Akuj ngesi. Toree Akuj kesi anikeng. Ani eyenete ngikarikok a ngasigerea atamar meere ngolo ekapolon a Isirael, tobongut tojongoto akiwapit ngesi. Toguma asiger apei a Siria emal keng, sodi kichanyu ekapolon Aab, togum nakiriamet a ngiboro alu ejie anapit ngesi. Sodi tolimok ngesi ekamean aurukuk keng na iritae tama, “Torei topudo alojie kainyo kawan ayong!” Torirau ejie noi akolongit ngina. Kigangakinae Aab naurukuk keng ingoliarit lowae lo a ngitunga a Siria. Ani adooyoret a akolong, totoan ngesi. Abu Yeochapat lo arai ekapolon a Yuda tobongu akaalimon nawi keng na ayei Yerusalem. Abu ekadwaran lo anyaritae Yeu lokookeng a Anani kisiriamia ngesi tolimok tama, “Esibit ejok akingarakin ngitunga luaronok ka aminakin lu eremokino Ekapolon Akuj a? Kotere ngakiro na isubak iyong, kingoik iyong Ekapolon Akuj. Kaneni dang, eyakasi cha naajokak nikon kainyo inyasu iyong ngakisikwaanet daang a akuj anaberu anabe Achera ana kolong elipito ngitunga, tasak akirichakin akiwap ngakiro na esaki Akuj.” Tani kerai Yerusalem alomit Yeochapat, elaanakini ngesi jiik ngitunga napei alo Beer-cheba alokuju tanang lokwaas a akwap ana ngimukur a Epiraim alokwap. Asubi ngesi kongina esaki abuun ngitunga nia Ekapolon Akuj ana erai Akuj kata apaakech. Toseu ngesi ngikatubok ngakiro alorerea kadaang a Yuda alu adukitoe ngawasea sodi tolimok kesi tama, “Tochoikisi eger lo itubeeneto esi ngakiro, kainyo nyiwapito esi ngakiro a itwaan pearai na a Ekapolon Akuj. Erukito ngesi ka esi esaa lo ilimunioto eriras. Torimas Ekapolon Akuj ka achoikin etich kus, kainyo nyechamit Ekapolon Akuj na erai Akuj kus akingalaanar ngitunga ngiboro kori akipakanar ngitunga ngiche, kori akidiaunun ngaropiyae nadiaket.” Alo Yerusalem, abu Yeochapat toseu Ngilawi, ka ngimurok a Akuj ta ngikarikok ngiche toliworos ngikatubok ngakiro alokesio alu esecheeneta ngitunga etal a Ekapolon Akuj ka lu engolopatar ngitunga a ere. Kichikichikak ngesi kesi kona, “Ejoikinit esi isubete etich kus ikerito Ekapolon Akuj, imunosi ngesi a ngitai kus kadaang. Na eponeta ngitunga kus luche lugu alorerea kech, yaut ngikesio nikus kerai lo earitere itwaan kori lo a etal, kori ngakiro na edungunitoe, ejoikinit esi itatamete kesi lokojokon eger lo echamit esubete ngirwa lua ekies kangolo, sodi nyeesechakineta kesi Ekapolon Akuj. Ani pekisubakis kongina, kingoikini Ekapolon Akuj esi ka ngitunga kus luche. Nakaneni ani kisuba esi etich kus, nyiliworosi ngikasechak. Amaria lo erai emuron loapolon a Akuj ngesi kipolokini esi alokesio kadaang alu a ngakiro a Ekapolon Akuj. Sebadia lokookeng a Ichimael alo erai ekapolon a arieng alo Yuda, ngesi kipolokini esi alokesio kadaang a arieng. Ngilawi kesi ingolikinete atamar asubakin ngakiro a ngikesio kadaang alu atub. Totitinyeketo sodi kiwapa ngakiro nguna. Min Ekapolon Akuj lowae kangulu etenooko!” Adaunet a ngirwa a ngiche, apot ngasigerea a Ngimoab ka Ngiamor aapei ka ngipaalon kech lu anyaritae Ngimeun toloto akitijikin Yeochapat. Pot ngitunga ngiche tolimokis Yeochapat tamasi, “Ebunit ajore natikaalan alo Edom, itorunito lowae loche a anam a Amakat, eponito akitijikin iyong. Alemasi Asason Tamar.” (Enyaritae ekiro keng eche Engedi.) Toem Yeochapat sodi kilip Ekapolon Akuj. Todung ngesi atamar toronoi akimuj anakwap a Yuda kadaang. Tonyout ngitunga alorerea a Yuda kadaang toloto Yerusalem akilip Ekapolon Akuj kingarak. Tochunakinos kesi ka ngitunga a Yerusalem tooma alaar nakitetet a akai a Akuj. Tolot ekapolon Yeochapat towo alongaren kech sodi kilip ebala, “Ee Ekapolon Akuj na irai Akuj kata apaakosi, iyei iyong nadis ipolokinit ngibukui a ngakwapea daang. Eyei iyong agogongu ka apolou, emam itwaan epedori aweikin iyong. Irai iyong Akuj kosi. Nakolong aponeta ngitunga kon Ngisirael nakwap naga, ibu iyong kitwarak ngitunga lu alomito nege, sodi nak akwap naga ngalesea a Aburaam alo arai lopae kon toliwor akech jik. Aloma kesi nakwap naga, toduko akai kon nakirimatar iyong ebalasi, ‘Ani kepot ngakiro naaronok akirirare sua, na eraakasi ejie, kori edeke loaronon, kori akoro, kiponi sua atowaa alongaren akai nakon naga, nakilipitere iyong, sodi ekaloikisi iyong kotere ngichan kosi, dio kiira iyong sua kitoyuu.’ “Apot tokona ngitunga a Amon ka Moab ta Edom akitijikin sua. Nakolong aponeta taapaakosi alo Misiri, ibu iyong nyiilakak kesi elomarete nakwapea a ngitunga kangulu. Apot taapaakosi kiloda ngakwapea kech, nyeemunyasi kesi. Ngakiro tokona kitachakis kesi sua nugu, ngesi akitwarakin sua anakwap ana kolong kiinakini iyong. Ee Akuj kosi, nyirirae tokona iyong kesi a? Kainyo emam sua ngikilinga kitijio ajore natikaalan ebunit nikosi naga. Nyikiyeni sua ngakiro nakisubakini, nakaneni kiponit nikon kingarak.” Awaasi ngikiliok a Yuda daang alokai a Akuj erukito ka ngaberu kech ta ngide kech. Toloma Etau a Akuj nia Elawit a epei alo ayei kiding asepich a ngitunga. Anyaritae ngesi Yaasiel lokookeng a Sekaria, alo arai lokookeng a Benaya, alo arai lokookeng a Yeyel, alo arai lokookeng a Matania, alo arai alesit a emachar a Asap. Tolim Yaasiel tama, “Iyong ekapolon Yeochapat, ka ngitunga a Yuda daang ta lua Yerusalem, topupokisi, ebala Ekapolon Akuj kona, ‘Nyieam. Nyiiriangakinosi kotere ajore nakaalan naga. Erai ejie eka Akuj, meere ekus. Toloto moi kitijikis kesi enangunete napak a Asis. Iriamunosi esi ka kesi losal a adipo ana eyei kide ariet a Yeruel. Nyijiete esi tani alojie kangolo. Kapesi cha esi kibaka kidarut. Ingolikinete esi Ekapolon Akuj idwangi kotere esi.’ Ngitunga a Yuda ka Yerusalem, nyiitiito kori nyieam. Kapesi lojie, irukete esi ka Ekapolon Akuj!” Ani erumor kijuuru ekapolon Yeochapat tatap ereet keng ngalup, sodi kijuuruoto ngitunga daang ka ngesi aapei kilipa Ekapolon Akuj. Tonyout Ngilawi lua ngimacharin a Koas ka Kora kiremasi ipuruunito Ekapolon Akuj na erai Akuj a Ngisirael. Tonyout kesi nataparach elilim kiswakakis nariet na eyei diyete Tekoa. Ani enyounete kesi alosit, kisuruor Yeochapat kesi ebala, “Topupokinae ngitunga a Yuda ka Yerusalem! Kigienokinos Ekapolon Akuj na erai Akuj kus sodi kisikokinos. Tonupa ngakiro a ngikadwarak keng sodi kidwanga.” Arumoret a akisuruor ngitunga, toseu ekapolon ngikaeok, kitanap ngiworui lukooyak lupalem enapeeneo ngirwa lua etal. Kingarenikis ngikaeok ngasigerea eeosi ebalasi, “Kipuroe Ekapolon Akuj! Erai amina keng aka jik!” Ani isiakinete kesi aeo, kisibiler Ekapolon Akuj ngasigerea a Ngiamon, ka Ngimoab ta Ngiedomae. Apot Ngiamon ka Ngimoab kitijikis Ngiedomae tomunyasi. Ani erumorete, tojikinos kesi make tomunyaros. Ani enangunete ngasigerea a Yuda naita na erounit ariet, kingoliasi lowae lo ayakasi ngimoe. Kingolikis daang eperete analup ketoaka. Emam tani ipei ni abu tobuchar. Toloto Yeochapat ka ngasigerea keng alemar ngiboro lu angatario. Ani eloose, toriamut ngaatuk nakaalak, ka ngamuja, ka ngiworui ta ngiboro luche luajokak. Kiboikinos kesi neni ngirwa nguuni echunete ngiboro, nakaneni talalaketa ngiboro noi tokuruwo kesi alemar daang. Tochunakinos kesi nadipo a Beraka akolongit na ngoomwon akipuro Ekapolon Akuj kotere ngakiro daang na asubaki. Ngakiro nguna enyaritere neni “Beraka”. Toriko Yeochapat ngasigerea keng tobongosi Yerusalem elakara kainyo abu Ekapolon Akuj kidwang ngimoe kech. Ani enangunete kesi Yerusalem, toloto kai a Akuj ideese ngagitae tokusete ngaburucho. Toema ngibukui daang na eirareta eger lo edwangea Ekapolon Akuj ngimoe a Ngisirael. Sodi topolok Yeochapat akwap a ekisil, nak Akuj ngesi ekisil alowaitin kadaang. Araakasi ngikaru a Yeochapat ngitomwon-uni ka ngikan na esiakinea ngesi apolokin Yuda. Toliwor ngesi ekapolon alo Yerusalem a ngikaru a ngitomwon-arei ka ngikan. Anyaritae itiokeng Asuba na arai nakookeng a Chili. Loger a apakeng alo engareni ngesi, abu Yeochapat tosub nguna eyookino alongaren Ekapolon Akuj. Nakaneni apon nyiinyasun ni ilipeenere ngakujo nagelayek. Apot ngitunga nyeereunosi akilip Ekapolon Akuj na erai Akuj kata apaakech a ngitai kech kadaang. Ngakiro na asubi Yeochapat napei anakisiakinet a apolou keng tanang losal, igiritae nakitab na enyaritae Ngakiro a Yeu a lokookeng a Anani. Erai akitab ngina epewae a akitab ana enyaritae Ngakiro a ngikapolok a Isirael. Ngirwa ngiche, achamakinosi Yeochapat ka Aasia lo arai ekapolon a Isirael lo asubi ngakiro naaronok nakaalak. Toduko kesi ngatubwae naapolok alodoket alo enyaritae Esionigeber, tometa ananamea. Nakaneni abu Elieser lokookeng a Dodapau lo a ere a Marecha kichikichik Yeochapat ebala, “Aloger ichamakinotor iyong ka Aasia, inyasuni Ekapolon Akuj ibore ni isubakis esi.” Apon ngatubwae kinyasunae, nyemea ananam jik. Totoan Yeochapat tonukakinae nalielin a ngikapolok alore a Daudi, kilunyokin lokookeng Yeoram nados keng toliwor ekapolon. Yeoram lokookeng a Yeochapat alo arai ekapolon a Yuda, ayakasi talokookeng ngikan-kapei lu anyaritae Asaria, ka Yeyel, ka Sekaria, ka Asariau, ka Mikael ta Chapatia. Ainakinit apakech kesi ngainakinet nakaalak na araakasi egolit, ka ngakwangae ta ngiboro luche luajokak, sodi kiwaak Yeochapat talokookeng daang lorerea lu adukitoe ngawasea, epei lore epei. Ani aloger araakar Yeoram lokookeng loapolon, abu Yeochapat kilunyok ngesi nados keng toliwor ekapolon. Ani isikokin Yeoram anapolou keng, abu taar talokaatokeng daang ka ngikapolok a arieng keng ngiche. Araakasi ngikaru a Yeoram ngitomwon-uni ka ngiarei na aliworor ekapolon, toliwor ngesi ekapolon alo Yerusalem a ngikaru a ngikan-kauni. Abu ngesi kiwap ngakiro naaronok a ekapolon Aab ka ngikapolok luche a Isirael, kainyo eusit ngesi nakookeng a Aab. Tosechak ngesi Ekapolon Akuj, nakaneni peasaki ekapolon Akuj akinyasun apolou a awi a Daudi kainyo achamakina kolong sek ngesi ka Daudi kichikak atamar erubakinete ngalesea keng eraakasi ngikapolok jiik. Ngirwa lu araakar Yeoram ekapolon, apot ngitunga a Edom tongero ekapolon a Yuda, sodi toseut ekapolon kech a ngikulepek. Sodi tonyout Yeoram ka ngikarikok a ngasigerea keng ta ngaurukukui kech na iritae toloto toremo Edom. Kiriama ngasigerea a Ngiedomae kesi, nakaneni ani enangi nakwaare, topukuchoros kesi tosiwa. Angero ngitunga a Edom ekapolon a Yuda napei ngina jik tani tokona. Ngirwa lupei ngulu, tongero ngitunga a ere a Libina dang Yeoram, kainyo aisikinit Yeoram ekapolon Akuj na erai Akuj kata apaakeng. Abu ngesi toduk tani ni ilipeenere ngakujo nagelayek nakwap na ngimukur a Yuda, sodi torikok ngitunga a Yuda ka Yerusalem nakisech, tosechakis Ekapolon Akuj. Inunae Yeoram abarua a ekadwaran Elija na egirit kona, “Kirirae iyong Ekapolon Akuj na erai Akuj a apaakon Daudi, kainyo iwou iyong akiwap ngakiro nakolong asubi apakon Yeochapat kori nakolong asubi apaakon Asa. Pearai iwap iyong ngakiro a ngikapolok a Isirael, itiliwo ngitunga a Yuda ka Yerusalem lu nyemunosi Akuj, loger lokolong asubete Aab ka ngikapolok lu atupito ngesi. Iar iyong tani talokaatokon lu araakasi ngitunga luajokak akidwang iyong. Kotere ngakiro nguna kirirae Ekapolon Akuj iyong lokojokon ka ngide kon ta ngaberu kon. Inyasuni ngesi ngiboro kon. Kitingi iyong ilope edeke a ngamaliteny lokaapilan lo iatanakin apipilu keng ngirwa daang.” Alomito Ngipilisti ngiche ka Ngimwaarabui diyete ni alomito ngitunga a Kuch ngiche alokwaas a anam. Abu Ekapolon Akuj kichuchia kesi akitijikin Yeoram. Toremo kesi Yuda sodi tolemasi ngiboro daang ka talokookeng, pearai Aasia lo arai lokookeng loochi. Arumoret kanguna kadaang, abu Ekapolon Akuj kititing Yeoram edeke a ngamaliteny lokaapilan. Toting edeke ngolo ngesi a ngikaru a ngiarei iyosi aroner, ekisidi totoan Yeoram eriaba noi. Apot ngitunga keng nyiinokakis akim na igorore ngesi esutonokinio loger lo kolong enokanakinere na kata apaakeng. Aliwor Yeoram ekapolon eraakasi ngikaru keng ngitomwon-uni ka ngiarei. Toliwor ngesi ekapolon alo Yerusalem a ngikaru a ngikan-kauni. Emam itwaan abu toriangakin kotere akitu keng. Tonukakinae ngesi lore a Daudi, nakaneni meere nalielin a ngikapolok. Apot ngitunga a Yerusalem kilunyokis Aasia nados a apakeng toliwor ekapolon, kainyo apot sek Ngimwaarabui ngiche taara talokookeng a Yeoram luapolok daang. Araakasi ngikaru a Aasia ngitomwon-arei ka ngiarei na aliworor ekapolon. Toliwor ngesi ekapolon alo Yerusalem a ekaru a epei. Anyaritae itiokeng Asalia, na arai nakookeng a Aab, tarai atatait a Omri, alo kolong arai ekapolon a Isirael. Abu Aasia kiwap ngakiro naaronok asubete ngitunga a awi a Aab kainyo etutuki itiokeng ngesi akisub naaronok. Abu ngesi tosechak Ekapolon Akuj, kainyo na atoanea apakeng, apot ngitunga luche a awi a Aab kitutuko. Ngakiro nguna enyasunete ngesi. Abu ngesi kiira ngakiro kech sodi kimorikin ka ekapolon a Isirael lo anyaritae Yoram toloto kitijwoto ekapolon a Siria lo anyaritae Asael. Apot ngasigerea tojikinos alo Ramos anakwap a Gilead, sodi towanae Yoram. Tobongo Yoram lore a Yesireel akitedek ngajemei keng. Sodi tolot Aasia aanyun ngesi kaina. Esitoruni Akuj esal a apolou a Aasia nalotoru keng aanyun Yoram. Na ayakar Aasia inaa, apot ngesi ka Yoram toloto akisiriamiar Yeu lokookeng a Nimchi, lo aseunit Ekapolon Akuj atamar kinyasu apolou a awi a Aab. Na eriraa Yeu apolou a awi a Aab, apot kiriamun ka ngikarikok a Yuda, kata lochien a Aasia lusek arukito ka Aasia analotoru keng. Taar Yeu kesi daang. Tasakae Aasia toriamunae edukit alo Samaria. Torikoroe ngesi nia Yeu taarae. Apon tonukae ngesi ani arimare apaakeng ekapolon Yeochapat, losek asubit ngakiro nakaalak ani a Ekapolon Akuj. Emam itwaan a awi a Aasia ni abu kidong ni apedori aliwor ekapolon. Ani napei ayenea Asalia na arai itiokeng a ekapolon Aasia atamar aar lokookeng, abu tolim atamar taarae ngitunga a awi a ekapolon daang. Ayei Aasia nakaatokeng na a aberu anache na eusit emuron lo anyaritae Yeoyada. Abu ngesi kidaa lokookeng a Aasia epei lo anyaritae Yoach, tachada ngesi ani ayakasi talokaatokeng luche lu adikino eario. Abu Yeocheba kidaa Yoach ka aberu na adakit ngesi, kidaa anamaniyat anaperot alokai a Akuj. Kidaa Yeocheba idia ngini ani eyei Asalia sodi nyear. Kidae Yoach kaneni a ngikaru a ngikan-kapei alu araakar Asalia akapolon. Adaunet a ngikaru a ngikan-kapei, abu Yeoyada lo arai emuron totiaku asubakin ngakiro ngache. Abu ngesi topupokin ka ngikarikok a ngasigerea ngikan. Araakasi kesi Asaria lokookeng a Yeroam, ka Ichimael lokookeng a Yewanan, ka Asaria lokookeng a Obed, ka Maseya lokookeng a Adaya ta Elichapat lokookeng a Sikiri. Apot kesi toloto lorerea a akwap a Yuda daang sodi tobuut Ngilawi ta ngikapolok a ngimacharin daang, tobuut Yerusalem. Tochunakinos kesi daang kai a Akuj, sodi tachamakinos ka Yoach lo arai lokookeng a ekapolon. Tolimok Yeoyada kesi tama, “Lokookeng a ekapolon alokasian logo! Ngesi tokona eliwor ekapolon loger lokolong echikakinea Ekapolon Akuj ekapolon Daudi atamar eliworosi ngalesea keng ngikapolok. Tosubakisi kona. Na eponeta ngimurok ka Ngilawi akisub etich akolongit na Sabato, etiakasi kesi ngatiaket ngauni. Itee atiaket apei ngidorin a akai a Akuj, itee atiaket ache akai a akapolon, sodi pena luche ni enyaritae ekidor a Ngateak. Echunakinosi ngitunga daang tooma nalaar a akai a Akuj. Emam itwaan echamitae elomari tooma kai a Akuj mati ngimurok, ka Ngilawi lu esubete etich. Epedorete kesi alomar kainyo italeunitoe kesi, nakaneni ejoikinit ngitunga luche daang iwapete ngakiro na elimunit Ekapolon Akuj, sodi pena nikalapatan. Esakitae Ngilawi ewaasi kiriama ekapolon etakito ngilengea kech, kiruko ka kesi ani elosi kadaang. Itwaan cha daang ni elomuni kai a Akuj, ejoikinit eario.” Apot Ngilawi ka ngitunga a Yuda tosubakis ngakiro na alimuni Yeoyada. Apon ngitunga lu arumorete etich kech akwaar na Sabato nyeelakakin eloose, sodi tochunakis ngikarikok ngitunga lu aponito lotich akolongit ngina ka lu arumorito etich. Abu Yeoyada nak ngikarikok ngakwaaras nakolong arai ngaka ekapolon Daudi nasek ekachakinitae kai a Akuj. Abu ngesi kitowo ngasigerea na atakito ngilengea kisiriam ewae lo alongaren akai a Akuj, kiyoko ekapolon, napei alowae alowae alo alokuju akai tanang lowae lo alokwap, kiriama ekeno a ngakipeyos ka akai. Abu Yeoyada kipud Yoach nikalapatan, kiwaak ekiraun nakou keng. Ani erumor nak akitab na igiritae ngitalio lu iwapi ekapolon a akwap. Kitiliworoe ngesi ekapolon. Apot Yeoyada ka talokookeng kidokakis Yoach akimiet, sodi kiremasi ngitunga daang tamasi, “Kiboi ekapolon nikooyen!” Ani iirari Asalia echale lo akereta ngitunga ka lo epurotor ekapolon, abu ngesi kikirikiraar kai a Akuj ni achunakina ngitunga. Ani enangi neni taanyunga ekapolon lo aringa eseunio ewei alokidor a akai a Akuj, alodiyete apir anipalem ewaanatar ngikapolok. Eriamito ngesi ngikapolok a ngasigerea ka ngikakutak ngaburucho. Achalasi ngitunga daang imariteteete, tokusete ngaburucho. Apot ngikaeok lu atingito ngiboro kech a aeo, kingarenikis erikito ngitunga. Abu Asalia tochilichilia ngiworui keng kirema tama, “Erukoonu longeriet akapolon! Erukoonu!” Peasaki Yeoyada taarakinae Asalia diyete akai a Akuj. Abu ngesi tolimok ngikapolok a ngasigerea tama, “Kipudosi ngesi kane yaasi kiding ngasigerea, sodi taara itwaan cha daang ni esaki ayuun ngesi.” Torwakinos kesi ngesi torikosi kai a ekapolon, sodi taara ngesi ani enyaritae ekidor a Angole. Abu emuron a Akuj lo anyaritae Yeoyada kilomak ekapolon Yoach ka ngitunga keng nakiro na achamakinotor ka Ekapolon Akuj toliworos kesi ngitunga a Ekapolon Akuj. Apot ngitunga daang tolomasi kai a Baal sodi toukosi Baal. Tobwangabwangata kesi ngikenoi ka ngakujo nasubuna, sodi taara Matan lo arai emuron a Baal alongaren ngikenoi lu ipeyoore. Abu Yeoyada tolem ngimurok ka Ngilawi toweikis etich lo esubio alokai a Akuj. Asakitae kesi esubete etich lo kolong atiakakini ekapolon Daudi kesi, ka akinom ngakipeyos na ipeyonokinio Ekapolon Akuj itemem ka etal a Musa. Kesi aweikinito tani ngieosio ka ngisukukui. Abu Yeoyada kiwaak ngasigerea kiyoko ngidorin a akai a Akuj sodi kiratakineta ngitunga lu nyitaleuno nyeelomut. Apot ngikapolok a ngasigerea ka ngikarikok luche, ka ngikapolok luche, ka ngikapolok a arieng ta ngitunga luche daang kirukosi ka Yeoyada sodi torikut ekapolon alokai a Akuj torikosi kai a ekapolon. Tolomasi kesi kitoro lokidor lo alokinga sodi tolot Yoach kiboikin lokicholong a ekapolon. Apot ngitunga daang talakaros sodi tongop echale alore ani aarere Asalia. Araakasi ngikaru a Yoach ngikan-kaarei na aliworor ekapolon a Yuda. Toliwor ngesi ekapolon alo Yerusalem a ngikaru a ngitomwon-omwon. Anyaritae itiokeng Sibia na arai aka ere a Beer-cheba. Asubeene Yoach ngakiro na etalakarito Ekapolon Akuj ngirwa daang lu ayarea emuron Yeoyada. Toseu Yeoyada ngaberu ngaarei toliworos ngaka Yoach. Kidoikis ngaberu nguna Yoach ngide lusapa ka lupesur. Ekisidi totiaku Yoach atamar tobongokinoe akiduk akai a Akuj. Tochunak ngesi ngimurok ka Ngilawi tolimok tama, “Kapesi lorerea a Yuda, tochunut alotunga kadaang ngaropiyae na ebongonokinere akiduk akai a Akuj loger lopalem esubio ekaru daang. Kiburuburakisi ngakiro nguna.” Nakaneni apot Ngilawi nyiiburuburakis. Sodi tanyarau Yoach Yeoyada lo arai ekapolon kech kingit tama, “Kotere nyo peilimokinea iyong Ngilawi atamar toloto lotunga a Yuda ka Yerusalem kidiaut echur lokolong adunguni Musa lo erai ekasuban etich a Ekapolon Akuj, atamar tolemut ngitunga tobongonokinere akiduk eam a Akuj?” Apot sek ngitunga a aberu anaaronon be Asalia kangina kinyasut akai a Akuj sodi tolemasi ngiboro lu italeunitoe tosubeta etich a Baal. Todungok ekapolon Ngilawi atamar tosubakis asaduku na iwaanakinio ngadekon sodi kiwaakis lokidor a akai a Akuj. Apon tomearae ngitunga lowaitin a Yuda daang ka Yerusalem alimokin ngitunga atamar tolemut echur lokolong etelemuununi Musa lo erai ekasuban etich a Ekapolon Akuj, kitelem Ngisirael anariet. Apot ngakiro nguna tojoikis ngitunga ka ngikapolok kech. Tolemut kesi ngaropiyae kileleba asaduku. Akolongit daang, ayaanarete Ngilawi asaduku lokapolon a arieng lo aweikinit asaduku. Arai nacha ilelebunor asaduku, tolemut ekegiran a ekapolon ka ekapolon loochi a Emuron aloapolon, tolemut ngaropiyae anasaduku sodi tobuasi asaduku ni ewaanakinio. Aloger kangolo, kidiaunut kesi ngaropiyae nakaalak. Apot ekapolon ka Yeoyada tolemut ngaropiyae nakis ngitunga lu abongonokinete akiduk akai a Akuj. Kigira kesi ngitunga lu araakasi ngikadukok a ngamoru, ka lua ngakito ta lua ngasua. Tobongonokis kesi akiduk akai a Akuj. Apot ngikadukok ngulu daang toduko lokojokon, sodi tobong akai loger lokolong ekoni, nabo togogonger. Ani erumorio abongonokin akiduk, apon egolit ka ngakwangae na edongete nakinae ekapolon ka Yeoyada. Tolemut kesi tosubere ngatubwae ka ngiboro luche a akai a Akuj. Ngirwa lu aringaakar Yeoyada eyari, epeyoo ngakipeyos alokai a Akuj jiik. Ani emojongi Yeoyada enangete ngikaru keng amiat apei ka ngitomwon-uni, totoan. Tonukakinae ngesi nalielin a ngikapolok na eyakasi lore a Daudi kotere etich loajokon asubi ngesi ani a Ngisirael, ka Akuj ta akai a Akuj. Ekisidi a Akitu a Yeoyada, apot ngikapolok a Yuda kimaimaa Yoach atamar topupeene ngakiro kech. Sodi tojongoto ngitunga akilipeenen alokai a Ekapolon Akuj ana erai Akuj kata apaakech, sodi kisiakis kesi akilip ngakujo nasubuna ka ekisikwaane a akuj anaberu be Achera. Abu angoit a Ekapolon Akuj min nia Yuda ka Yerusalem kotere akisech nakech ngina. Tomea Ekapolon Akuj ngikadwarak akichikichik kesi sodi tobongioto nikeng, nakaneni towout kesi akiirar. Sodi min etau a Akuj nia Sekaria alo arai lokookeng a emuron Yeoyada. Towo ngesi ani eteeto ngitunga ngesi, sodi tolimok ngitunga tama, “Ebala Akuj kona, ‘Kotere nyo iwouneta esi akiwap ngitalio keng lu tokona kiinut esi nginyas? Ingero esi ngesi, kinger ngesi dang esi!’ ” Abu ekapolon totuko ka ngitunga akiar Sekaria. Todungok ngesi ngitunga atamar tachaka Sekaria a ngamoru analaar a akai a Akuj. Kimuriak Yoach etich lokolong ajokon asubea apakeng a Sekaria lo enyaritae Yeoyada, asubea ngesi, sodi taar Yoach Sekaria. Esaa lo eridea Sekaria, abu tolim tama, “Kimiekisi Ekapolon Akuj kingolik ngakiro na isubi iyong sodi tatachak!” Esal a ekaru kangolo, apot ngasigerea a Siria kitijikis ngitunga a Yuda ka Yerusalem, taara ngikapolok daang, tangatasi ngiboro lukokaalak tobongioto Damasko. Akidioko ngasigerea a Siria, nakaneni abu Ekapolon Akuj nak kesi agogongu na idwangeta ngasigerea a Yuda nakaalak kainyo apot kesi tongero Ekapolon Akuj na erai Akuj kata apaakech. Apon Yoach kirirae a eger kangolo. Apon ngesi towanae lokojokon. Ani erotokinete ngimoe, apot ngikapolok a arieng a Yoach ngiarei totuko akiar ngesi sodi tatachakineta akitu a lokookeng a Yeoyada alo arai emuron a Akuj. Tonukakinae Yoach lore a Daudi, nakaneni meere nalielin a ngikapolok. ( Anyaritae epei a ngikiliok alu atukete akiar ngesi Sabad lo arai lokookeng a aberu ana anyaritae Chimeas, ana ekitela a Amon. Anyaritae loche Yeosabad lo arai lokookeng a aberu ana anyaritae Chimuris, ana ekitela a Moab.) Ngakiro kata lokookeng a Yoach, ka ngakiro naaronok adwario ani a Yoach ta eger lo abongonokinio ngesi akiduk akai a Akuj, igiritae daang nakitab na isisae ngakiro a ngikapolok. Abu lokookeng lo anyaritae Amasia kilunyokin nados keng toliwor ekapolon. Toliwor Amasia ekapolon eraakasi ngikaru keng ngitomwon-arei ka ngikan. Toliwor ngesi ekapolon alo Yerusalem a ngikaru a ngitomwon-arei ka ngikan-koomwon. Anyaritae itiokeng Yewadin na arai aka ere a Yerusalem. Asubi ngesi ngakiro na ejoikinito Ekapolon Akuj, nakaneni peerichakina. Ani napei esikokinor ngesi anapolou keng, abu taar ngikapolok a arieng lukolong aarete apakeng. Nakaneni nyeara ngesi ngide kech, pearai abu kiwap ngakiro nakolong adunguni Ekapolon Akuj alotal a Musa kona, “Nyeario ngikauriak kotere akisech a ngide kech, nabo nyeario ngide kotere akisech a ngikauriak kech. Eario itwaan kotere akisech na asubi ngesi ilope.” Abu Amasia tochunak ngikiliok daang a ngitela a Yuda ka Benjamen totiakatiaka ngajorei itemem ka ngimacharin kech, kiwaanak ngikarikok a ngasigerea ana eraakasi ngabunge ngapei-pei, ka ngamiae ngapei-pei. Araakasi kesi ngikiliok lu enangito ngikaru kech ngitomwon-arei ka lu iporito. Arai ekimar kech kadaang 300,000. Araakasi ngikiliok ngulu lu epakunitae, lukajwok nabo toyenete ejie a ngakwaaras ka ngaupwala. Abu ngesi nabo togiel ngasigerea ngache alo Isirael na araakasi 100,000 nakajwok, togiel a ngakwangae ana arai apotis kech ngakiloi 3,400. Nakaneni abu ekadwaran eche tolot nia ekapolon tolimok tama, “Ee ekapolon, nyiirukosi ka ngasigerea a Ngisirael kainyo nyerukito Ekapolon Akuj ka ngitela lua apolou ana lokwap lugu. Ipedori iyong akitam atamar kori kesi kiinakinete iyong agogongu na idwangea alojie, nakaneni erai Akuj kiinakini iyong agogongu kidwangea ngimoe kori kidwangere iyong.” Kingit Amasia ekadwaran tama, “Ikokinio tokona ngaropiyae daang na atachak ayong kesi ai?” Tatachu ekadwaran tama, “Epedori Ekapolon Akuj abuakin iyong nakaalak na idwangito nguna!” Sodi talakak Amasia ngasigerea nguna tolimok atamar toloto nawiyei. Tobongosi kesi nawiyei engoikinito ngitunga a Yuda kotere ngakiro nguna. Tonyou Amasia etitiny toriko ngasigerea keng nadipo a Amakat. Tojwoto kaneni taara ngasigerea a Ngiedomae 10,000. Sodi torikosi ngiche 10,000 eyarete. Torikosi kesi lore a Sela, yaasi kidiama akope tachakut kaina taara ngatabab na ayakasi kwap. Nakaneni apot ngasigerea a Ngisirael nasek awouni Amasia arikor lojie, kitijikis ngirerea a Yuda lu ayakasi kiding Samaria ka Bes-oron, taara ngitunga ngabunge ngauni ka angatar ngiboro lukaalak. Ani ebonguni Amasia alojie alo edwangea Ngiedomae, abu yau ngakujo kech nasubuna kitowo kesi, sodi kilip ka akinomanakin emitina. Apot ngakiro nguna kitongoa Ekapolon Akuj, sodi tomea ekadwaran nia Amasia. Tolimok ekadwaran Amasia tama, “Kotere nyo ilipea iyong ngakujo nagelayek, nakolong akuruwori tani ayuun ngitunga kech anikon?” Kitutubok Amasia ngesi ngakiro tama, “Napei ori kitiliworea sua iyong ekesuruoron a ekapolon? Kililing nyeketaar tokona ayong iyong ngitunga!” Kililing ekadwaran, nakaneni ani eringa nyililinga tolim tama, “Ayen tokona ayong atamar atiaku Akuj akinyasun iyong, kainyo isubak iyong ngakiro nugu, nabo iwou akiirar ngakiro kang.” Abu Amasia lo arai ekapolon a Yuda ka ngikesuruorok keng totuko akitijikin Isirael. Tomea ngesi ngitunga nia ekapolon a Isirael alo anyaritae Yewach lo arai lokookeng a Yewaas tarai etatait a Yeu, ebenyi ngesi esaki ejie. Sodi tomea ekapolon Yewach ngitunga alimokin ngesi kona, “Ayei kolong eregae lo a ngimoru a Lebanon lo abala tolimokisi ekitoe lobe echekereng kona, ‘Kipoto nakookon kiut lokookang.’ Kitoru etiengit a moding neni kipudaa eregae ngolo. Tokona bocha Amasia, abe iwoga iyong ibala, ‘Edwang ayong Ngiedomae.’ Nakaneni abala ayong iyong kiboikin nawi. Nyo ikurio iyong ngichan lu eyaunete ngakiro naaronok nikon ka ngitunga kon?” Nakaneni towou Amasia akiirar ngakiro nguna. Atiakunit sek Akuj atamar idwangio Amasia kainyo abu kilip ngakujo a Ngiedomae. Sodi tonyou ekapolon Yewach tolot kitiji Amasia lo arai ekapolon a Yuda. Tojikinos kesi alo Bes Chemech anakwap a Yuda. Kidwangae ngasigerea a Yuda tamataros nawiyei kech. Kirum Yewach Amasia toriko Yerusalem. Ani enangi neni touko awas a ere napei alokidor a Epiraim tanang lokidor a Ekeli. Arai aoyau ani aukori ngesi ngamitae esibit ngamiae ngaarei. Tolema ngesi egolit daang ka ngakwangae na ayakasi kai a Akuj. Tolema tani ngiboro a akai a Akuj lu eyokiyete ngalesea a Obed Edom, ka ngaropiyae a akai a ekapolon. Torik ngesi tani ngirikon, tobongo Samaria. Kiboi Amasia lo arai ekapolon a Yuda ngikaru ngitomon ka ngikan ketoana Yewach lo arai ekapolon a Isirael kerumor. Ngakiro nache daang na asubi Amasia napei anakisiakinet a apolou keng tanang losal, igiritae nakitab na enyaritae Ngakiro a ngikapolok a Yuda ka Isirael. Napei alorwa alu angerio Amasia Ekapolon Akuj, apot ngitunga alo Yerusalem totuko anyoikin ngesi. Ekisidi, todok ngesi tolot lore a Lakich, nakaneni apot ngimoe keng kiwapa ngesi kaina taara. Apon akwaan keng kiwokoroe a angole yaarae Yerusalem, sodi tonukakinae nalielin a ngikapolok na eyakasi lore a Daudi. Apot ngitunga a Yuda daang toseut Usia lo araakasi ngikaru keng ngitomon ka ngikan-kapei, kilunyokis nados a apakeng alo anyaritae Amasia, toliwor ekapolon. ( Ani ketoana Amasia kerumor, tolema Usia ere a Elas nabo sodi toduk.) Aliwor Usia ekapolon eraakasi ngikaru keng ngitomon ka ngikan-kapei. Toliwor ngesi ekapolon alo Yerusalem a ngikaru a ngitomwon-kan ka ngiarei. Anyaritae itiokeng Yekolia na arai aka ere a Yerusalem. Kiwap Usia ekitetemes a apakeng, tosub ngakiro na ajoikinito Ekapolon Akuj. Amuno Usia etich a Ekapolon Akuj ngirwa lu ayarea Sekaria, lo etatami ngesi akiker Akuj. Topia Akuj Usia. Tolot Usia akitijwore Ngipilisti. Touko ngesi ngawasea a ngirerea alu enyaritae Gas, ka Yaminia ta Achidod, sodi toduk ngawasea a ngirerea alu ayakasi diyete Achidod ta ngiwaitin luche a Pilistia. Kingarak Akuj ngesi kidwang Ngipilisti, ka Ngimwaarabui lu alomito Gurbaal ta Ngimeun. Apot Ngimaon tobukonokis Usia echur, toyenikinae ngesi lokojokon tanang ekipur keng tani Misiri. Kitogogong Usia ngawasea a Yerusalem toduk ngakais nakooyak lokidor a Ekeli, ka lokidor a Adipo ta ni erear awas. Abu ngesi toduk ngakais nakooyak nguna tani nariet. Towad ngesi ngakare nakaalak kainyo ayakasi ngesi ngibaren lukaalak naukon na lotoo ka naroatin. Ani aloger aminar ngesi akitare, abu ngesi kisitaa ngitunga ngamanat a ngimusabib nakwap na ngimukur, ka akitare akwap na itokoniunete ngalup akimuj. Ayakasi ngesi ngasigerea nakaalak nakajwok. Egirete ngikegirak ekimar a ngasigerea kanguna. Anyaritae ngikegirak Yeyel ka Maaseya. Anania lo arai epei a ngikapolok a arieng ngesi aweikinit kesi. Arai ekimar a ngikarikok a ngasigerea 2,600. Arai ekimar a ngasigerea anakajwok, ana asakitae itijiete ngimoe a ekapolon, araakasi 307,500. Tokorak Usia ngasigerea ngaupwala, ka ngakwaaras, ka ngapukoto, ka ngasua na enapio alorarum, ka ngakawa ka ngimalea ta ngamoru na isirimokinio kibaariyoroe. Alo Yerusalem, apot ngitunga keng tosubakis ngiboro lu egumanarere ngimalea, ka lu imasanarere ngamoru naapolok, kimasunae anakais anakooyak ta ngikwaasea a awas a ere. Topetakin ekipur keng wadaang, toyenikinae ngesi kotere eger lo engarakinitor Akuj ngesi. Ani isikokin Usia, abu ngesi kinisakin, kinyasut ngakiro nguna. Abu ngesi towou akiirar ngakiro a Ekapolon Akuj ana erai Akuj keng, toloma ngesi kai a Akuj sodi kinom emitina alokeno alo inomeenere emitina. Abu Asaria lo arai emuron a Akuj kirukosi ka ngimurok ngiche lukaatinyok ngikan-kauni, kiwapakis ekapolon, esakete akiratakin ngesi. Tolimut tamasi, “Usia! Meere iyong echamitae inomanakini Ekapolon Akuj emitina. Ngimurok lu eraakasi ngalesea a Aron make kesi etaleun tosuba etich ngolo. Torotok ani italeuno kane. Itongo iyong Ekapolon Akuj na erai Akuj, nabo nyeringa Akuj kipiarit iyong.” Awei Usia alokai a Akuj, alokwaas a ekeno alo inomere emitina, etingit atartar na inomere emitina. Tongoik ngesi ngimurok ngulu. Atipei abu enomokere toting ereet keng. Apot Asaria ka ngimurok luche tokienyikis, kingolikis atamar keting enomokere ereet keng. Kitingaasi kesi ngesi torotok alokai a Akuj. Topudo ngesi atipei kainyo abu Ekapolon Akuj kirira ngesi. Abu edeke ngolo kitiliwo Usia lo nyitaleuno ngirwa daang lu ayarea ngesi. Peapedori ngesi alomar kai a Akuj, nakaneni abu tolom kai na arai akeng a ilope. Tojongo ngesi akisub ngitichisio keng daang. Abu lokookeng lo anyaritae Yosam topolok akwap. Abu ekadwaran Isaya lo arai lokookeng a Amos kigir ngakiro nache daang na asubi ekapolon Usia ngirwa lu araakar ekapolon. Totoan Usia tonukakinae diyete ngalielin a ngikapolok. Kotere edeke lo atingit ngesi, apon nyeenukakin nalielin a ngikapolok. Abu lokookeng lo anyaritae Yosam kilunyokin nados keng toliwor ekapolon. Toliwor Yosam ekapolon eraakasi ngikaru keng ngitomwon-arei ka ngikan. Toliwor ngesi ekapolon alo Yerusalem a ngikaru a ngitomon ka ngikan-kapei. Anyaritae itiokeng Yerucha na arai nakookeng a Sadok. Tosub ngesi ngakiro na ejoikinito Ekapolon Akuj loger lo kolong asubea apakeng. Abu ngesi nyeesech loger lokolong asechea apakeng kotere akinom emitina alokai a Akuj. Kaneni dang, apot ngitunga torubakis esecheenete. Yosam ngesi aduki ekidor lo alokwap akai a Akuj, toduk nabo lokojokon awas a ere alowae alo enyaritae Opel. Toduk Yosam ngirerea a Yuda sodi toduk ngakais na eyuunotor ngitunga ka ngakais nakooyak na iteere akwap, toduk namon. Kitiji ngesi ekapolon a Ngiamon ka ngasigerea keng sodi kidwang. Ani erumor kidesik Yosam Ngiamon abukonokin ngesi echur ekaru daang a ngikaru a nguuni. Ngiboro lu alemuununio kesi ngakwangae ngakiloi 3,400, ka ngakanoi ngataanea 1,000 ta erau ngataanea 1,000. Abu Yosam toliwor lo eyenikinitae kainyo amuno ngesi ngakiro a Ekapolon Akuj ana arai Akuj keng. Ngakiro nache daang na asubi Yosam anapolou keng, ka ngijiesinei keng ta ngakiro na ewapit ngesi, igiritae nakitab na enyaritae Ngakiro a Ngikapolok a Isirael ka Yuda. Araakasi ngikaru a Yosam ngitomwon-arei ka ngikan na aliworor ekapolon. Toliwor ngesi ekapolon alo Yerusalem a ngikaru a ngitomon ka ngikan-kapei. Totoan ngesi tonukakinae lore a Daudi. Abu lokookeng lo anyaritae Aas kilunyokin nados keng toliwor ekapolon. Aliwor Aas ekapolon eraakasi ngikaru keng ngitomwon-arei. Toliwor ngesi ekapolon alo Yerusalem a ngikaru a ngitomon ka ngikan-kapei. Nyiwapa ngesi ekitetemes loajokon a apaakeng ekapolon Daudi. Nyesuba ngesi ngakiro na ejoikinito Ekapolon Akuj. Kiwap ngesi ekitetemes a ngikapolok a Isirael. Tosub ngesi ngakisikwaanet a Baal anasua, sodi kinom emitina anadipo a Inom. Abu ngesi tani tolem talokookeng toliworos ngakipeyos na ipeyonokinio ngakujo nasubuna. Ewapi ngesi eboyor lokikadakini a ngitunga alu kolong etwarakini Ekapolon Akuj anakwap ngirwa lu alooso Ngisirael ngaren. Tolemuunu Aas ngakipeyos ka emitina lo inomio ani ilipitere ngakujo nagelayek alomukur ka kwap ngikito lua ngitorubei. Kotere akisech a Aas abu Ekapolon Akuj na erai Akuj keng nak ekapolon a Siria agogongu kidwang Aas, sodi torik ngitunga a Aas lukaalak toliworos ngirikon, toriko Damasko. Abu ekapolon a Isirael dang kidwang Aas, taar ngitunga lukaalak. Ekapolon a Isirael lo anyaritae Peka lo arai lokookeng a Remalia, abu taar ngasigerea a Yuda nakajwok 120,000 a akwaar a apei. Asubasi ngakiro nguna kainyo angerete ngitunga a Yuda Ekapolon Akuj na erai Akuj kata apaakech. Abu itwaan nikajwon anyaritae Sikiri ni arai asiger a Isirael taar lokookeng a Aas lo anyaritae Maaseya ka itwaan ni aweikinit akai a ekapolon ni anyaritae Asirikam ta Elikana lo arai ngesi atupit ekapolon anapolou. Ayanasi ngitunga a Yuda ka Ngisirael. Tani kikoni neni, apot ngasigerea a Isirael toriko ngaberu a akwap a Yuda ka ngide 200,000 eraakasi ngirikon tobuasi Samaria. Tolemasi tani ngiboro lukaalak lu angatarete kesi. Ayei itwaan ni anyaritae Oded ni arai ekadwaran a Ekapolon Akuj. Alomit ngesi lore a Samaria. Kiriamun ngesi ka ngasigerea a Isirael erikito ngirikon kech lu araakasi ngitunga a Yuda. Kiriamun ka kesi esakete alomar lore tolimok tama, “Aloger angoikinitor Ekapolon Akuj na erai Akuj kata apaakus, ngitunga a Yuda, abu kimiek esi idwangete kesi. Nakaneni eira ngesi atamar iarete esi kesi inyunyurikina. Isakete tokona esi nabo akitiliwor ngitunga a Yerusalem ka Yuda lukiliok ka luberu, ngikedalak kus. Nyiyenete esi atamar isechakis esi dang Ekapolon Akuj na erai Akuj kus a? Topupokinae tokona ayong! Eraakasi ngirikon lugu ngiyenet kus. Talakakisi kesi toloto, ani kemam kirirae Ekapolon Akuj esi a angoit keng.” Apot ngikapolok nguomwon lua ngitela alu alokwap tonyout tongero ngakiro na asubito ngasigerea nguna. Anyaritae ngikapolok ngulu Asaria lo arai lokookeng a Yewanan, ka Berekia lo arai lokookeng a Mechilemos, ka Yeisikia lo arai lokookeng a Chalum ta Amasa lo arai lokookeng a Adilai. Tolimut kesi tamasi, “Nyiiyaut ngirikon ngulu nege! Kisechakinit sek ngoni Ekapolon Akuj. Kitongo ngoni ngesi anang ni kiriraa ngoni. Isakete tokona esi akisub ngakiro na iatakinete akisech yok.” Sodi kipotosi ngasigerea ngirikon ka ngiboro lu angatarito nakis ngitunga ka ngikapolok kech. Toseunae ngikapolok lutakae omwon sodi kitanapa ngirikon ngiworui lu alemunio aloboro alungatara. Nakis kesi ngiworui ka ngamuk tanapa, nakis akimuj ka ibore nimatat ni eupi, sodi kiwosakis akimiet najemei kech. Apot kidokokis lu alilimiyorito losikiria, sodi tobuarae ngirikon daang lore a Yeriko lo eyakasi ngingolea. Ani erumor tobongosi Ngisirael Samaria. Ngirwa ngulu tomea ekapolon Aas ngitunga alimokin ekapolon a Asiria lo anyaritae Tigilas Pileser atamar kengarak, kainyo apot Ngiedomae toremo Yuda nabo kidwanga, sodi toriko ngirikon lukaalak. Ngirwa lupei ngulu, toremo Ngipilisti ngirerea lua ngaukon ana lotoo, ka ewae lo alokuju Yuda. Tolemasi kesi ngirerea a Bes Chemech, ka Aijalon, ka Gederos ta ngirerea a Soko, ka Timuna ta Gimuso aapei ka ngadakarin kech. Toloma kesi neni jik. Abu Ekapolon Akuj yau ngichan lotunga a Yuda kainyo abu ekapolon Aas tosechanak ngitunga alo Yuda, nabo abu toliwor lo nyemuno Ekapolon Akuj. Aloger kangolo, abu ekapolon a Asiria nyiingarak Aas pearai abu inu ngichan. Sodi tolem Aas egolit alokai a Akuj, ka kai a ekapolon ta ngawiyei a ngikapolok, nak ekapolon a Asiria, nakaneni apot ngakiro nguna nyiingarakis ngesi. Abu itwaan nibe Aas ngini tosechak Ekapolon Akuj noi naarokearotor ngichan keng. Abu ngesi kipeyonok ngakujo a Ngisiria alusek edwangete ngesi. Tolim Aas tama, “Engarakinete kolong ngakujo a Siria ngikapolok a Siria. Ani kepeyonok ayong kesi, kengarakinete ayong dang.” Apot ngakiro nguna yaut nginyas nikeng ka Ngisirael daang. Ani eyakasi nguna, abu ngesi tolem ngiboro a akai a Akuj daang tobwangabwanga sodi togol akai a Akuj. Kitowo ngesi ngikenoi a ngakipeyos alowaitin kadaang a Yerusalem. Alorerea kadaang a Yuda, abu ngesi toduk ni ilipeenere ngakujo nagelayek, ka akinom emitina. Kotere ngakiro nguna, abu ngesi kitongoikin Ekapolon Akuj na erai Akuj kata apaakeng. Ngakiro nache daang na asubi Aas anapolou keng, napei anakisiakinet tanang losal, igiritae nakitab na enyaritae Ngakiro a ngikapolok a Yuda ka Isirael. Totoan ekapolon Aas tonukakinae Yerusalem. Nyenukakina ngesi nalielin na ngikapolok. Abu lokookeng lo anyaritae Esekia kilunyokin nados keng toliwor ekapolon. Toliwor Esekia ekapolon a Yuda eraakasi ngikaru keng ngitomwon-arei ka ngikan. Toliwor ngesi ekapolon alo Yerusalem a ngikaru a ngitomwon-arei ka ngikan-koomwon. Anyaritae itiokeng Abija nakookeng a Sekaria. Kiwap ngesi ekitetemes a ekapolon Daudi, alo arai apaakeng, tosub ngakiro na ejoikinito Ekapolon Akuj. Elap lo ekingaren a ekaru alo aliworor Esekia ekapolon, abu ngesi tangaa nabo ngidorin a akai a Akuj sodi tobongokinoe akiduk. Tochunak ngesi ngimurok ka Ngilawi nalaar na alo kide akai a Akuj sodi kisuruor kesi kaina. Tolim tama, “Esi Ngilawi, kitaleunos sodi kitaleut akai a Ekapolon Akuj ana erai Akuj kata apaakus. Tolemasi ibore daang ni inyasuni akai a Akuj. Peamunosi kolong taapaayok Ekapolon Akuj na erai Akuj yok, sodi tosuba ngakiro napeajoikinito ngesi. Tongero kesi ngesi, tomuleno ni ibooyo Ekapolon Akuj. Togolo kesi ngidorin a akai a Akuj, kimiekis ngataae edungeete. Apot kesi nyiinom emitina kori nyiipeyoto ngakipeyos alokai a Akuj a Ngisirael. Kotere ngakiro nguna, angoiki Ekapolon Akuj Yuda ka Yerusalem. Asubea kesi ngakiro na eteriangakis ka akitoem itwaan daang, loger lo tokona iteeto esi ngikulepek. Aario taapaayok alojie sodi torikoe ngaberu yok ka ngide yok. “Atiaku tokona ayong achamakin ka Ekapolon Akuj na erai Akuj a Ngisirael, sodi nyikingoikinea ngesi ngoni nabo. Ngide kang, nyiimamakis kainyo kiseu Ekapolon Akuj esi akinom emitina ka akirik ngitunga akilipeenen ngesi.” Ngilawi lugu kesi ayakasi neni. Alomachar a Koas, ayakasi Maas lokookeng a Amasai ka Yoel lokookeng a Asaria. Alomachar a Merari, ayakasi Kich lokookeng a Abudi ka Asaria lokookeng a Yealelel. Alomachar a Gerichon, ayakasi Yoa lokookeng a Simuna ka Eden lokookeng a Yoa. Alomachar a Elisapan, ayakasi Chimuri ka Yeul. Alomachar a Asap, ayakasi Sekaria ka Matania. Alomachar a Eman, ayakasi Yewul ka Chimei. Alomachar a Yedusun, ayakasi Chemaya ka Usiel. Apot ngitunga ngulu tochunakis Ngilawi luche sodi kitaleunos daang. Ani erumor tosuba kesi ngakiro nasek adungunit ekapolon, sodi kisiakis akitaleun akai a Akuj, itemem ka etal a Ekapolon Akuj. Tolomasi ngimurok tooma akai akitaleun, kipudosi kesi ibore daang nipeetaleuno kiwaakis nalaar a akai a Akuj, sodi yaasi Ngilawi nikalapatan a ere, nadipo a Kidiron. Esiakinio etich ngolo akolongit na ekingaren a elap alo ekingaren. Ani akolongit na ngakan-kauni, torumor daang aapei ka amaniyat na elomarere kai a Akuj. Ani erumor tosuba nabo etich a ngirwa a ngiche a ngikan-kauni tanang akolongit na ngatomon ka ngakan-kapei a elap kangolo, esubanakinete akai a Akuj kilipere. Toloto Ngilawi nia Esekia tolimokis tamasi, “Kirumo sua akitaleun akai a Akuj daang aapei ka ekeno a ngakipeyos ana inomio, ka emeesa a ngamugati a Akuj ta ngiboro kech daang. Kibuu sua tani ngiboro daang lukolong alemarit ekapolon Aas ngirwa lupeamunor ngesi Akuj. Kitaleu sua ngiboro ngulu nabo. Eyakasi daang ngaren ekeno a ngakipeyos a Ekapolon Akuj.” Tonyou ekapolon Esekia atipei tochunak ngikapolok a ere sodi kirukosi kai a Akuj. Tolemut kesi ngimongin ngikan-kaarei, ka ngimesekin ngikan-kaarei, ka ngimesekin luuchik ngikan-kaarei ta ngikora ngikan-kaarei. Araakasi ngibaren ngulu ngakipeyos na elemarere ngasechesea a ngitunga a awi a ekapolon, ka ngitunga a Yuda ta akitaleun akai a Akuj. Tolimok ekapolon ngimurok lu araakasi ngalesea a Aron atamar kipeyoto ngibaren ngulu alokeno toliworos ngakipeyos. Taara ngimurok ngimongin mono, totupuut ngimesekin, totupuut ngimesekin luuchik, sodi towatakis ngaakot a akipeyos kadaang lokeno. Ani erumor yaasi ngikora nia ekapolon ka ngitunga luche lu elipito, sodi kidokokis ngitunga ngulu ngakan kidiama lokora. Ani erumor taara ngimurok ngikora sodi tobukokis ngaakot a ngikora lokeno toliwor akipeyos na elemarere ngasechesea a ngitunga kadaang, kainyo adungunit sek ekapolon atamar tolemunae ngakipeyos na inomio ka na ngasechesea kotere Ngisirael daang. Kiwap ekapolon ngakiro nakolong alimokini Ekapolon Akuj ekapolon Daudi, kisitoru nia Gad alo arai ekadwaran a ekapolon, kisitoru nabo nia ekadwaran Nasan. Kitowo Esekia Ngilawi alokai a Akuj etingito ngagitae ka ngasua. Ekote ngiboro ngulu lukolong atingit ekapolon Daudi. Apot ngimurok towaa kaneni etingito tani ngaburucho. Abu Esekia todung atamar tolemunae akipeyos na inomio. Ani isiakinio akinom akipeyos, toeokis ngitunga ipurosi Ekapolon Akuj, sodi kisiakis ngikaeok akutakin ngaburucho ka ngiboro luche daang. Kilipa ngitunga daang lu ayakasi neni toeos tanang esaa lo enomere ngakipeyos daang. Sodi toriediko ekapolon Esekia ka ngitunga luche daang kilipa Akuj. Apot ekapolon ka ngikapolok luche a akwap tolimokis Ngilawi atamar toeonokis Ekapolon Akuj ngieosio a ekipur lu kolong egiri Daudi ka lu egiri ekadwaran Asap. Sodi toeokis ngitunga elakara lokojokon, toriediko kilipa Akuj. Tolimok Esekia ngitunga tama, “Ani aloger italeunotor esi, yautu ngakipeyos nabuakinet Ekapolon Akuj alakara.” Apot kesi kiirasi ngakiro nguna tosubakis. Yaut tani ngiche ngibaren a akiding kech toliworos ngakipeyos na inomio. Yaut kesi ngimongin ngitomwon-kaarei, ka ngimesekin amiat apei, ka ngimesekin luuchik ngamiae ngaarei, inut Ekapolon Akuj toliworos ngakipeyos na inomio. Yaut nabo ngimongin ngamiae ngakan-kapei, ka ngimesekin ngabunge ngauni, toliworos ngakipeyos na enyamete ngitunga. Ani aloger akidiokioto ngimurok, peapedorete akiar ngibaren ngulu daang. Apot Ngilawi kingarakis kesi tanang ni arumoror etich. Esaa ngolo, kitaleuno ngimurok lukaalak. (Ekiuna Ngilawi noi anakitaleun kech akidwang ngimurok.) Epeyoenete ngimurok ngakipeyos na inomio nginerin daang aapei ka akinom nikatoronon a ngakipeyos ana anyamete ngitunga ta emuna lo abukonokinio nakipeyos na inomio. Sodi kisiakinae akilipeenen alokai a Akuj nabo. Talakaros ekapolon Esekia ka ngitunga, kainyo abu Akuj kingarak kesi arumor etich ngolo daang atipei. Tomea Esekia ngitunga nia Ngisirael kadaang ka Yuda, kigir ngabaruae tani nia ngitunga a Epiraim ka Manase atamar pot kai a Ekapolon Akuj alo Yerusalem tosubakineta esukukuu a Adeparet torimare Ekapolon Akuj na erai Akuj a Ngisirael. Apot ekapolon Esekia ka ngikapolok a arieng keng ta ngitunga daang a Yerusalem, tachamakin atamar enyamio esukukuu a Adeparet elap lo a ngiarei. Peapedorete sek kesi akinyam esukukuu a Adeparet ngirwa lu asakitere kainyo peetaleuno ngimurok lukaalak, nabo peachunakina ngitunga lukaalak Yerusalem. Tojoikis ekapolon ka ngitunga ngakiro na arekinito kesi nguna, sodi tanyaraut kesi Ngisirael daang napei alo Dan tanang Beer-cheba. Tanyaraunae kesi kiriamariama Yerusalem akinyam esukukuu a Adeparet. Alalak ngitunga lu anyaraunitae noi, nyepona lukaalak loger ngolo a ache. Apot ngitunga lu ameario toloto wadaang anakwap a Isirael ka Yuda etingito ngabaruae a ekapolon ka ngikapolok a arieng keng. Egiritae ngabaruae nguna kona: “Ee Ngisirael, lu ibuchunosi alojie a ngikapolok a Asiria. Tobongutu tokona nia Ekapolon Akuj ana erai Akuj a Aburaam, ka Isaka ta Yakobo, sodi tobongunio ngesi nikus. Nyiikokis taapaakus ka Ngisirael luche lukolong peamunosi Ekapolon Akuj na erai Akuj kech, sodi kirira ngesi kesi lokojokon, loger lo tokona iteeto esi. Nyiiliworosi lukechanak loger lokolong araakatar kesi, nakaneni kiwapa ngakiro a Ekapolon Akuj. Potu kai keng na eyei Yerusalem. Etaleu Ekapolon Akuj na erai Akuj kus akai ngina jik. Potu kilipa ngesi sodi nyikingoikinea ngesi esi nabo. Ani kibongut esi nia Ekapolon Akuj, epete ngisien lotunga lu erikorito ngiyenet kus sodi kimiekis kesi tobongut nawi, kainyo ejok Ekapolon Akuj na erai Akuj kus nabo erai na ngisien. Ani kibongut esi nikeng, kichamuni ngesi esi.” Apot ngitunga lu amearitae toloto lorerea daang anakwap a ngitela a Epiraim ka Manase tananga nakwap a ekitela a Sebulun alokwap, nakaneni apot ngitunga tokianatar kesi toboliatar. Ayakasi ngitunga ngidikidio a ngitela a Acher, ka Manase ta Sebulun lu apot tachamut alosit Yerusalem. Abu Akuj tosub etich tani anakwap a Yuda sodi kimorik ngitunga, kiwapa ngakiro na adungunete ekapolon ka ngikapolok a arieng keng. Apot ngitunga lukaalak noi tochunun Yerusalem akinyam esukukuu a ngamugati anapadok. Apot kesi tolemasi ngikenoi daang lukolong epeyoore ngakipeyos ka akinom emitina alo Yerusalem, yaasi tachakakis nadipo a Kidiron. Akolongit na ngatomon ka ngoomwon a elap alo a ngiarei, apot kesi taara ngimesekin luchik lu araakasi ngakipeyos a Adeparet. Apot ngileech kiruma ngimurok ka Ngilawi lusek peetaleuno, sodi kitaleunos kesi ka akipeyore ngakipeyos na inomio alokai a Akuj. Apot kesi pena lotichisio kech alokai a Akuj, itemem ka etal a Musa alo arai itwaan a Akuj. Apot Ngilawi kikobakis ngimurok ngaakot a ngibaren alu epeyoo. Towatakis ngimurok ngaakot nguna lokeno a ngakipeyos. Ani aloger araakatar ngitunga lukaalak lupeetaleuno, peapedorete akiar ngimesekin a esukukuu a Adeparet, taara Ngilawi ngimesekin ngulu sodi kitaleut tolemikis Ekapolon Akuj. Ayakasi ngitunga lukaalak lua ngitela a Epiraim, ka Manase, ka Isakar ta Sebulun lupeetaleuno, nakaneni anyamete kesi esukukuu a Adeparet peerichunito ngitalio keng, kainyo elipakinit sek ekapolon Esekia kesi ebala, “Ee Ekapolon Akuj na irai Akuj kata apaakosi, kotere ajokis kon torimak itwaan daang ni kilipit iyong a etau keng kadaang tani bo pekitaleuno.” Kiira Ekapolon Akuj akilip a Esekia sodi torimak ngitunga, nyiirira kesi. Apot ngitunga lu achunakina Yerusalem tanyama esukukuu a ngamugati anapadok a ngirwa a ngikan-kaarei, tanyama a alakara anakaalan. Akolongit daang, apot Ngilawi ka ngimurok kipuro Ekapolon Akuj a ngikilinga kech kadaang. Abu Esekia kipur Ngilawi kotere etich loajokon loa akisilip ngitunga Ekapolon Akuj. Adaunet a ngirwa alukan-kaarei, alu epeyooto kesi ngakipeyos ipurosi Ekapolon Akuj na erai Akuj kata apaakech, apot kesi totiakut akinyam esukukuu ngolo a ngirwa a ngiche a ngikan-kaarei. Apot kesi tanyama esukukuu ngolo a alakara. Abu ekapolon Esekia nak ngitunga ngimongin abunget apei ka ngimesekin ngabunge ngakan-kaarei sodi taara tanyama. Apot ngikapolok a arieng keng nakis ngitunga ngimongin ngiche abunget apei ka ngimesekin ngabunge ngatomon. Kitaleunos ngimurok lukaalak. Talakaros ngitunga daang lu aponito alo Yuda ka ngimurok, ka Ngilawi, ka ngitunga lu aponito alokwap ta ngitunga a ngakwapea anache lu alomito nakwap a Isirael ka Yuda. Min alakara natiapolon lore a Yerusalem, kainyo peasubakina ngakiro na ekote nguna a ache nakolong adangaror ngirwa lua Solomon alo arai lokookeng a Daudi. Tonyout ngimurok ka Ngilawi topiasi ngitunga. Anawi keng anadis, abu Akuj kiira ngakilipasinei kech tacham. Arumoret a ngakiro kanguna kadaang, apot Ngisirael daang lu ayakasi neni, toloto lorerea a Yuda daang tobwangabwangaasi ngapirio a ngamoru ka atubutub ngakisikwaanet a akuj anaberu anabe Achera, sodi kinyasut ngikenoi lu ipeyonokinere ngakujo nagelayek. Apot kesi tosuba ngakiro napei nguna anakwap a Yuda kadaang, ka ngakwapea a Benjamen, ka Epiraim ta Manase. Ani erumor tobongosi kesi nawiyei kech. Abu ekapolon Esekia torek atukuoru a ngimurok ka Ngilawi, totiakanak ipei kech daang etich keng. Ngitichisio ngulu kesi akipeyore ngakipeyos na inomio, ka ngakipeyos a ekisil, akilipeenen alokai a Akuj, akipuro Akuj ka abuakin alakara alowaitin alugelagelae a akai a Akuj. Abu Esekia tolemuunu alosipaan keng ngibaren lu alemunio eraakasi ngakipeyos na inomio ataparach daang ka atabong daang, ka lu epeyoo ngirwa lua Sabato, ka ngirwa lu esukukuu alo eanyungarere elap ta ngisukukui luche lu esakit etal a Ekapolon Akuj. Todungok ekapolon ngitunga a Yerusalem atamar tolemanakisi ngimurok ka Ngilawi ngalemunet na eraakasi ngakech, sodi tolemunotor kesi loger lo esakitor etal a Ekapolon Akuj. Napei adungunere ngakiro nguna, apot Ngisirael yaut ngainakinet na araakasi ngikinyam kech luajokak, ka emuna, ka akimiet a ngikito, ka akimiet a ao, ka ngalemet nache ta ngalemunet a ngiboro kech kadaang. Apot tani ngitunga daang lu alomito lorerea a Yuda yaut ngalemunet a ngaatuk kech ka ngamesekin, yaut tani ngainakinet nakaalak noi sodi kitaleut toliworos ngaka Ekapolon Akuj ana erai Akuj kech. Esiakinete kesi ayaunun ngainakinet elap lo a nguuni sodi kidiatas tanang elap lo a ngikan-kaarei. Ani ingolikinete ekapolon Esekia ka ngikapolok a arieng keng etiae a ngiboro alu alemunio, apot kesi kipuro Ekapolon Akuj ka Ngisirael lu eraakasi ngitunga keng. Abu ekapolon kisuruor ngimurok ka Ngilawi ngakiro a ngainakinet kanguna. Abu emuron loapolon lo anyaritae Asaria lo arai alesit a Sadok, tolimok ekapolon tama, “Napei kolong esiakineta ngitunga ayaunun ngadekon kech kai a Akuj, kimuj sua kimwoko nabo edeun ngiboro lukaalak. Eyakasi ngiboro lugu kainyo epiarit Ekapolon Akuj ngitunga keng.” Todungok ekapolon Esekia kesi atamar tosubakis ngidulae alokai a Akuj, sodi kiwaakis ngainakinet daang ka ngalemunet kikachakinae ejok. Abu Elawit epei lo anyaritae Konania toweik ngiboro ngulu. Lokaatokeng lo anyaritae Chimei ngesi engarakinit ngesi. Ngilawi ngitomon kesi aseunitae akisub etich ka kesi. Anyaritae kesi Yeyel, ka Asasia, ka Naas, ka Asael, ka Yerimos, ka Yosabad, ka Eliel, ka Isimakia, ka Maas ta Benaya. Asubio ngakiro nguna daang loger lo adungunitotor ekapolon Esekia ka Asaria lo arai emuron loapolon. Elawit lo anyaritae Kore lokookeng a Imuna lo arai asiger naketeon ekidor lo alo kide akai a Akuj, ngesi aweikinit ngainakinet na alemanakinio Ekapolon Akuj ka akikor ngainakinet nguna. Alorerea aluche alu alomito ngimurok, ayakasi Ngilawi lu engarakinito ngesi. Anyaritae kesi Eden, ka Miniamin, ka Yechua, ka Chemaya, ka Amaria ta Chekania. Akoranakinete kesi Ngilawi luche akimuj kitiriyana itemem ka ngitichisio lu atiakanakinitae kesi, meere itemem ka ngimacharin. Akoranakinio akimuj ngina ngikiliok daang lu araakasi ngikaru kech ngitomwon-uni kori lu eporito, lu asubete ngitichisio alokai a Akuj akolongit daang itemem ka eger lo atiakanakinitae. Atiakanakinio ngimurok ngitichisio a ngimacharin, totiakakinae Ngilawi lokech a ngalooso. Kigirae kesi daang aapei ka ngaberu kech, ka ngide ta ngitunga luche lu erikito kesi, kainyo erichunito kesi akitaleun. Ayakasi ngitunga lu asubete etich lo akikor akimuj. Akoranakinete kesi ngikiliok daang lua ngawiyei a ngimurok, ka itwaan cha daang ni egiritae lomacharin a Ngilawi. Anakwap kadaang a Yuda, abu ekapolon Esekia tosub ngakiro na eyookino nabo na ajoikinito Ekapolon Akuj na erai Akuj keng. Tojoker etich keng daang, kainyo ibore ni asubi ngesi daang kotere akai a Akuj, kori Etal, asubi ngesi kotere amuno ka alemuna ani Akuj. Arumoret a ngakiro kanguna kadaang, ana asubea Esekia etich a Ekapolon Akuj emuno, abu ekapolon a Asiria lo anyaritae Senakerib torem Yuda. Kisiriam ngesi ngasigerea keng ngirerea lu adukitoe ngawasea sodi todungok ngasigerea atamar topedo awas kitoro. Ani ingolikini Esekia atamar esaki Senakerib akitijikin Yerusalem dang, apot Esekia ka ngikapolok a arieng keng ta ngasigerea keng nakajwok totiakut akigol ngakipi na alokinga ere, sodi nyeanyuneta Ngisiria ngakipi na epeneta diyete ere. Apot ngitunga lukaalak noi tochunakin, togolo ngileleae daang ka ingolol ni alokinga ere, tongopa ngakipi elelearete kinga ere. Sodi kisiak ekapolon etich loationon lo a adukonokin nabo awas, ka adukonokin ngakais nakooyak kidiama awas, ta akiduk awas na alokinga. Abu nabo todukonok ewae lo emuleleara alo kide ewae longorot a Yerusalem. Tosubak tani ngakwaaras nakaalak ka ngaupwala. Toseu ngesi ngikarikok a ngasigerea toweikis ngitunga, sodi todungok atamar tochunakinos naro a ekidor a ere. Tolimok kesi tama, “Togogongioto nabo totitinyeketo. Nyieam ekapolon a Asiria kori ngasigerea na erikit ngesi, kainyo epolot ngolo ibakit alowae yok akidwang lo ibakit alowae keng. Agogongu keng aka itwaan nakaneni eyei ngoni Ekapolon Akuj na erai Akuj yok, kingarakini ngoni, nabo eji ngijiesinei yok.” Apot ngitai a ngitunga topwatun kotere ngakiro na alimuni ekapolon kech. Ekisidi, eringa Senakerib eyei Lakich, abu ngesi tomea ngitunga nia Esekia ka ngitunga a Yuda lu arukitotor ngesi alo Yerusalem. Tomea ngesi ngitunga ngulu ebala, “Ayong Senakerib lo arai ekapolon a Asiria, ngesi kengisit esi atamar nyo igienosi esi eringa iyakatar Yerusalem na iriamitae? Ebala Esekia esi kiyuuni Ekapolon Akuj na erai Akuj kus anikosi, nakaneni kingalae ngesi esi esaki kitaar akoro ka akure. Ngesi kolong enyasuni ni ilipeenere Ekapolon Akuj ka ngikenoi keng, dio alimokin ngitunga a Yuda ka Yerusalem atamar kilipeeneta ka akinom ngakipeyos alokeno a epei bon. Nyiyenete esi ngakiro nakisubea ayong ka taapaakang ngibukui luche a? Apot kolong ngakujo a ngibukui aluche kangulu toyuut ngitunga kech ani eyei ekapolon a Asiria? Ngae anakujo kanguna kadaang ayuu nakanuan ngitunga keng anikosi? Esibit tokona esi Akuj kus kiyuuni esi anikang a? Warasi robo tokona Esekia nyikingal esi kori kitoree loger ngolo. Nyiinupa ngakiro keng! Emam akuj a ngibukui aluche nakanuan ayuu ngitunga keng alokapolon a Asiria. Nyepedori robo tokona Akuj nakus naga ayuun esi!” Apot ngikapolok a arieng a Senakerib kiruorotor Ekapolon lo erai Ekapolon Akuj ngakiro naaronok noi, ka Esekia lo arai ekasuban etich keng. Kigir Senakerib abarua imenyi Ekapolon Akuj na erai Akuj a Ngisirael. Egirit kona, “Nyeyuuna ngakujo a ngibukui ngitunga kech anikang, kori nyeyuuna tani Akuj a Esekia ngitunga keng anikang.” Tolimut ngikapolok a arieng keng ngakiro nguna a Ngaeburaniae iremasi, esakete akitoem ka akitubul ngitunga a Yerusalem lu ebooyete alokidiama awas, sodi tolemareta ere. Apot kesi kiruorotor Akuj a Yerusalem ngakiro napei eruorotor ngakujo a ngitunga aluche, ngakujo na asubunete ngitunga a ngakan kech. Sodi ekapolon Esekia ka ekadwaran Isaya lo arai lokookeng a Amos kilipa Akuj esakete akingarakino. Tomeu Ekapolon Akuj emalaikat taar ngasigerea ka ngikarikok a ngasigerea a Asiria. Sodi tobongo ekapolon a Asiria nakwap keng irumito ngileech. Akolongit apei, eyei ngesi kai a akuj keng, apot talokookeng ngiche taara ngesi a ngilengea kech. Abu Ekapolon Akuj toyuu ekapolon Esekia ka ngitunga a Yerusalem ani a Senakerib, toyuu nabo alomoe keng a eger kangolo. Kimiek Ekapolon Akuj ngitunga kiboikinos akaalimon ka ngitunga a ngakwapea ana edunyatar kesi. Pot ngitunga lukaalak Yerusalem eyaunito ngalemunet nia Ekapolon Akuj, ka nia Esekia. Napei ngina jik, apot ngibukui luche daang toliworos erimasi Esekia. Ngirwa lupei ngulu, todeakakin Esekia tonyou akitu. Kilip ngesi Ekapolon Akuj kidodik ngesi emachar lo a atamar ejoker. Nakaneni kinisakin Esekia noi nyeesak akidodiun alakara kotere ngakiro na asubea Ekapolon Akuj ngesi. Kotere ngakiro nguna, tonyunyurikin Akuj ngitunga a Yuda ka Yerusalem. Ekisidi, apot Esekia ka ngitunga a Yerusalem kitiditeunos sodi abu anyunyura a Ekapolon Akuj nyeebu nikech ngirwa lu aringaakar Esekia eyari. Tabar ekapolon Esekia noi, sodi toliwor itwaan daang erima ngesi. Ayakasi ngesi ngidulae lu adukitoe kikachae egolit keng, ka ngakwangae, ka ngamoru nakaalak a ngaropiyae, ka ngikito lukitukukunyet akimuj, ka ngaupwala ta ngiboro luche luajokak. Ayakasi nabo ngesi ngidulae lu ikachio ngikinyam, ka emuna ta akimiet a ngikito. Ayakasi ngesi nganokin a ngaaatuk ka ngamesekin. Ani eyakasi nguna daang, abu Akuj nak ngesi ngamesekin ka ngaatuk ta ebari loche lokaalan, sodi toduk ngesi ngirerea lukaalak. Esekia kolong agoli ngakipi na epudorito alolelea a Gion sodi toree ngakipi nguna kitoro kwap toloto lowae lo alo kide ere a Daudi. Tojoketa ngakiro na asubi Esekia daang. Ani tani emeunio ngitunga a Babilonia akiyen ngakiro nailiilok asubakinit Akuj anakwap kangina, abu Akuj kimiek Esekia tosub ngakiro nakeng a ilope esaki akiro eger a eboyor keng. Ngakiro nache daang na asubi ekapolon Esekia ka alemuna keng ani a Ekapolon Akuj, igiritae nakitab na enyaritae Akisingolikinet a ekadwaran Isaya lokookeng a Amos, ka nakitab na enyaritae Ngakiro a ngikapolok a Yuda ka Isirael. Totoan Esekia tonukakinae lowae lo alokidiama ngalielin a ngikapolok. Apot ngitunga a Yuda daang ka Yerusalem pot nikeng na atoanea idodiunito arimatoi. Kilunyokin lokookeng lo anyaritae Manase nados keng toliwor ekapolon. Araakasi ngikaru a Manase ngitomon ka ngiarei na aliworor ngesi ekapolon a Yuda. Toliwor ngesi ekapolon alo Yerusalem a ngikaru a ngitomwon-kan ka ngikan. Tosechak ngesi Ekapolon Akuj, kiwap ngakiro nakakadakinak a ngibukui alusek etwarakini Ekapolon Akuj anakwap na alooso Ngisirael ngaren. Tobongonok ngesi akiduk ngakais nakolong abwangabwangaari apakeng na araakasi ngakilipasinei ngakujo nagelayek. Toduk ngesi ngikenoi lu ilipitere Baal. Tosubak ngesi ngakisikwaanet a akuj anaberu anabe Achera, sodi kilip ngikanyer. Toduk ngesi ngikenoi lu ipeyonokinere ngakujo nagelayek tooma kai a Akuj, nikolong abala Ekapolon Akuj ejoikinit kelipere ngesi jik. Toduk ngesi ngikenoi lu ilipitere ngikanyer nalaarin naarei a akai a Akuj. Kipeye ngesi talokookeng toliworos ngakipeyos na inomio anadipo a Inom. Adwareene ngesi tomuroe. Aanyununi ngesi ngikekeriak ka ngimurok. Tosechak ngesi Ekapolon Akuj noi kitilili. Kiwaak ngesi ekisikwaane a akuj anasubuna tooma kai a Akuj, nikolong alimokini Akuj Daudi ka lokookeng Solomon tama, “Alokai kana, kanege alo Yerusalem ngesi aseu ayong anakwap kadaang ana ngitela alutomon ka ngiarei a Ngisirael atamar kelipere ayong. Ani kiwapa Ngisirael ngakiro daang na adung ayong, kirichakis ngitalio daang lukolong etaanyuni ekasuban etich kang Musa kesi, nyemiekini ayong kesi itwarakinio anakwap ana kolong ainakini ayong taapaakech.” Abu Manase torikok ngitunga a Yuda akisub ngasechesea naaronok noi na idwangito na asubete ngibukui lu etwarakini Ekapolon Akuj anakwap na alooso Ngisirael ngaren. Kichikichik Ekapolon Akuj Manase ka ngitunga keng, nakaneni towout kesi akiirar. Sodi kimiek Ekapolon Akuj ngikarikok a ngasigerea a Asiria kitijikis Yuda. Kirumut kesi Manase, todupanakis ngimutuin nakwaan keng, toena a ngiriko, sodi torikosi Babilon. Ani eanyuni ngesi ngichan ngulu, abu kitiditeun kimaima Ekapolon Akuj na erai Akuj keng sodi kilip esaki kingarak ngesi. Kiira Akuj akilip a Manase sodi tobua ngesi Yerusalem aliwor ekapolon nabo. Toyen Manase atamar Ekapolon Akuj erai Akuj. Arumoret kanguna, abu Manase kiatak aoyau a awas ana alokinga, alowae alo alo kide ere a Daudi, napei anadipo ana eyei diyete elelea a Gion toten kwap lokidor a Ekolia ta ewae lo enyaritae Opel. Abu ngesi kiwaak ngikarikok a ngasigerea toweikis ngasigerea alorerea kadaang a Yuda alu adukitoe ngawasea. Tolema ngesi alokai a Akuj ngakujo nagelayek ka ekisikwaane lokolong ewaakinit ngesi neni, ka ngikenoi lu ipeyonokinere ngakujo nagelayek, lusek adukitoe lomukura lo adukitoe akai a Akuj ta ngikenoi lu ayakasi lowaitin luche a Yerusalem. Kipudo ngesi ngiboro ngulu daang alore tachaka. Abu ngesi tani tobongonok akiduk ekeno lo elipeenere Ekapolon Akuj, sodi kipeyo ngakipeyos a ekisil, ka nabuakinet Akuj alakara. Todungok ngesi ngitunga a Yuda daang atamar kilipa Ekapolon Akuj na erai Akuj a Ngisirael. Tani na arubakinitotor ngitunga ipeyoenete ngakipeyos alowaitin aluche elipeenere, arai Ekapolon Akuj bon epeyonokinete kesi ngakipeyos nguna. Ngakiro nache daang na asubi Manase, ka akilip na elipit ngesi Akuj keng ta ngakiro na esuruorete ngikadwarak ngesi alokiro a Ekapolon Akuj ana erai Akuj a Ngisirael, igiritae nakitab na enyaritae Ngakiro a ngikapolok a Isirael. Akilip a ekapolon, ka eger lo atachunea Akuj, ka ekimar a ngasechesea ana kolong asubi ngesi eringa nyelunga akisech, ka ngakiro naaronok na asubi ngesi, ka ni elipeenere ngakujo nagelayek, ka ngakisikwaanet a akuj anaberu anabe Achera ana kolong asubi ngesi ta ngakujo nasubuna na elipit ngesi, igiritae daang nakitab na enyaritae Ngakiro a ngikadwarak. Totoan Manase tonukakinae kai a ekapolon sodi kilunyokin lokookeng lo anyaritae Amon nados keng toliwor ekapolon. Araakasi ngikaru a Amon ngitomwon-arei ka ngiarei na aliworor ekapolon a Yuda. Toliwor ngesi ekapolon alo Yerusalem a ngikaru a ngiarei. Loger a Manase alo arai apakeng, abu Amon tosechak Ekapolon Akuj, kilip ngakujo nasubuna nakolong elipit apakeng. Towou ngesi akitiditeun toreeun nia Akuj loger lo kolong etiditeunor apakeng nakaneni abu ngesi tosub akisech noi akidwang apakeng. Apot ngikapolok a arieng a Amon totuko, sodi taarakis ngesi kai keng. Taara ngitunga a Yuda ngikaarak a Amon sodi kitiliwosi lokookeng lo anyaritae Yosia ekapolon. Araakasi ngikaru a Yosia nguuni na aliworor ekapolon a Yuda. Toliwor ngesi ekapolon alo Yerusalem a ngikaru a ngitomwon-uni ka epei. Tosub Yosia ngakiro na ajoikinito Ekapolon Akuj. Kiwap ngesi ekitetemes a apaakeng Daudi, kirichu ngitalio a Akuj daang lokojokon. Ekaru lo a ngikan-kauni lo araakar Yosia ekapolon, eringa ngesi edit noi, abu ngesi kisiak akilip Akuj a apaakeng Daudi. Adaunet a ngikaru a nguomwon, kisiak ngesi akinyasun ni ilipeenere ngakujo nagelayek, ka ngakisikwaanet a akuj anaberu anabe Achera ta ngakujo nache daang nasubuna. Abu ngesi kitobwangabwanga ngitunga keng ngikenoi lu elipitere Baal ka ngikenoi lu enomere emitina lu ayakasi diyete neni. Kiriata kesi ngakisikwaanet a Achera ka ngakujo nache nasubuna tanyapidido, ani erumor kiealakis apua nalielin a ngitunga alu kolong epeyonokinete ngakujo nguna. Abu ngesi kinom ngakoyo a ngimurok a ngakujo anagelayek alokenoi alu kolong epeyoeneto kesi. A eger kangolo, abu ngesi kitaleu nabo Yuda ka Yerusalem. Abu ngesi tosub ngakiro napei nguna alorerea ka ngiwaitin lu enyasuna a Manase, ka Epiraim ta Simeon, toten kwap tanang nakwap a Naputal. Anakwap ana ngitela alu alokwap kadaang, abu ngesi tobwangabwanga ngikenoi a ngakipeyos a Achera, kirie ngakujo nasubuna tanyapidido, sodi kieala ngikenoi daang lu enomere emitina. Ani erumor tobong ngesi Yerusalem. Ekaru lo a ngitomon ka ngikan-kauni lo araakar Yosia ekapolon, arumoret ngesi akitaleun akwap ka akai a Akuj ani atuborea akilipit ngakujo nagelayek, abu ngesi tomea ngitunga nguuni abongonokin akiduk akai a Ekapolon Akuj. Anyaritae kesi Chapan lokookeng a Asalia, ka Maaseya lo arai ekapolon a Yerusalem ta Yoa lokookeng a Yowaas lo arai ekegiran. Apon nakinae emuron loapolon lo anyaritae Ilikia ngaropiyae na ediauniyete Ngilawi lu eyokiyete ngidorin alokai a Akuj. (Ediauniyo ngaropiyae nguna alotunga a Epiraim, ka Manase, ka ngitela luche lua lokwap, ka ngitunga a Yuda, ka Benjamen ta Yerusalem.) Ani erumor kipotoroe ngaropiyae nguna nakinae ngikiliok luuni lu aweikinito etich lo a abongonokin akiduk akai a Akuj. Nakis kesi ngaropiyae nguna ngikadukok a ngakito, ka ngikadukok luche sodi togieleta ngamoru ka ngakito na ebongonokinere akiduk ngakais nakolong emiekinete ngikapolok a Yuda ebosiarete. Araakasi ngitunga lu asubete etich ngolo lu emunoi noi. Aweikinito Ngilawi nguomwon kesi, Yaas, ka Obadia lua emachar a Merari ta Sekaria ka Mechulam lua emachar a Koas. (Araakasi Ngilawi daang lukaeok noi.) Aweikinito Ngilawi ngiche ngitunga lu ewokuuniyete ngiboro luduket, ka aweikin ngitunga lu asubete ngitichisio lugelagelae, taraakas ngiche ngikegirak ekimar a ngiboro, taraakas ngiche ngikeyokok a ngidorin. Ani esaa lo epudunere ngaropiyae alokeru alo alotooma akai a Akuj, abu Ilikia taanyu akitab a etal a Ekapolon Akuj. Etal ngolo lokolong ainakini Akuj Musa. Tolimok Ilikia Chapan tama, “Aanyu ayong akitab a etal alokai a Akuj.” Nak Ilikia Chapan akitab sodi yaa Chapan nia ekapolon, tolimok tama, “Kisub sua etich daang lokolong kidungokini iyong sua. Kilemu sua ngaropiyae na ayakasi kai a Akuj kiinak ngikasubak etich ka ngikaweikinak kech.” Ani erumor kiatak Chapan tama, “Akitab ache naga kainakini ayong Ilikia.” Abu Chapan kisomak akitab ngina epupokinit ekapolon. Ani iirari ekapolon ngakiro na esomao anakitab, tochilichilia ngiworui keng eriangakina. Abu ekapolon tanyara ngitunga lugu, Ilikia ka Aikam lokookeng a Chapan, ka Abidon lokookeng a Mikaya, ka Chapan lo arai ekegiran a ngikesio ta Asaya lo arai emeanara a ekapolon, todungok tama, “Kapesi tanyarata Ekapolon Akuj kotere ayong ka ngitunga a Yuda daang, toyena eger a ngakiro a akitab kana. Kingoikinit Ekapolon Akuj ngoni kainyo nyesuba taapaayok ngakiro na igiritae nakitab naga, loger lo esakitere.” Loger lo adungunio ekapolon, apot Ilikia ka ngitunga luche ngulu toloto aanyun aberu na anyaritae Ulida. Arai ngesi akadwaran na alomit lowae lo a Yerusalem lo aringa edukio. (Lokile keng lo anyaritae Chalum lo arai lokookeng a Tikipa, tarai etatait a Araas, ngesi aweikinit asaduku na ngiworui a akai a Akuj.) Kisisakinae Ulida ngakiro na asubakinosi, sodi tolimok ngesi kesi tama, “Ebala Ekapolon Akuj na erai Akuj a Ngisirael kona, ‘Tolimokisi itwaan ni kimeuni esi ni ayei ayong atamar ebala Ekapolon Akuj kona, kingolik a, ayauni ayong ngakiro naaronok Yerusalem aapei ka ngitunga daang lu eyakasi neni, ayauni ngilam lu igiritae nakitab na esomakinio ekapolon a Yuda. Kangero kesi ayong epeyonokis ngakujo ngache ngakipeyos. Ketongoa kesi ayong ketilil a ngakiro ana esubete. Angoik ayong Yerusalem anyunyurikin, emam kona etubor angoit ngina. Ani eliwor lo erai ekapolon elope, ngakiro nugu kesi alimuni ayong anikeng, ayong Ekapolon Akuj na arai Akuj a Ngisirael. Iirari iyong ngakiro na igiritae nakitab, sodi tolung akisech kon ka akitiditeun alongaren kang. Ibu tochilichilaa ngiworui kon kigor, na iirarea atamar ayauni ayong ngakiro naaronok Yerusalem ka ngitunga lu eyakasi neni. Eira ayong akilip kon. Kotere ngakiro nguna, nyianyungari iyong ngakiro naaronok na ayauni ayong Yerusalem. Epote kitoana iyong kerumor. Kemiekini ayong iyong totoan akaalimon.’ ” Tobongosi ngitunga ngulu nia ekapolon Yosia tolimokis ngakiro nguna. Tanyarau ekapolon Yosia ngikarikok daang a Yuda ka Yerusalem ni ayei ngesi. Kirukosi kesi daang kai a Akuj aapei ka ngimurok, ka Ngilawi ta ngitunga luche daang, lu eyeninikinitae ka lu nyeyenikinitae. Towo ekapolon alongaren kech kadaang kisomak akitab a achamunet na aanyunio alokai a Akuj. Towo ekapolon alodiyete apir napalem keng sodi tachamakin ka Ekapolon Akuj atamar ewapi ngakiro keng. Tacham ngesi a etau keng ka akiyar keng daang atamar erichakini ngitalio ka ngakiro daang na edungunit Ekapolon Akuj. Tacham ngesi atamar asubi ngakiro daang na achamunet loger lo igiritere nakitab. Abu ngesi kitilim ngitunga a Benjamen ka ngitunga daang lu ayakasi Yerusalem atamar kirichakini achamunet. Sodi kiwapa ngitunga a Yerusalem ngakiro na asakitae anachamunet ana achamakinosi kesi ka Akuj kata apaakech. Kinyasu ekapolon Yosia ngakujo nakakadakinak daang na ayakasi nakwap a Ngisirael. Ngirwa lu aringaakar ngesi eyari daang, abu ngesi todungok ngitunga akisub etich a Ekapolon Akuj ana erai Akuj kata apaakech. Tosubak ekapolon Yosia esukukuu a Adeparet alo Yerusalem erimar Ekapolon Akuj. Taara kesi ngibaren a esukukuu akolongit na ngatomon ka ngoomwon a elap alo ekingaren. Totiakanak ngesi ngimurok ngitichisio lu esubete alokai a Akuj, sodi kitiliwo lukaatinyok tosuba etich niajokon. Tolimok ngesi Ngilawi lu araakasi ngiketatamak a Ngisirael, taraakas nabo lu etaleuno ani Ekapolon Akuj, tolimok tama, “kiwaakisi asaduku a achamunet na italeuno tooma kai a Akuj nakolong aduki ekapolon Solomon lo arai lokookeng a Daudi. Nyejoikinit esi eringa idakeenete alosegeta kus, nakaneni tosuba tokona etich a Ekapolon Akuj ana erai Akuj kus, ka etich a Ngisirael alu eraakasi ngitunga keng. Kitebeikin itwaan daang nipalem keng alokai a Akuj, totiakas a ngimacharin itemem ka ngitichisio lukolong kitiakakini esi ekapolon Daudi ka lokookeng Solomon. Torekinos peneta ngiche lu ingarakinete ngitunga a ngawiyei-wiyei Alosirael. Taara ngimesekin luuchik ka ngaanei a esukukuu a Adeparet. Kitaleunos sodi tosubakis ngakipeyos kiwapeta Ngisirael luche ngakiro nakolong adunguni Ekapolon Akuj kisitoru nia Musa.” Alosipaan keng, abu ekapolon Yosia kipakak ngitunga ngamesekin ka ngimesekin luuchik, ka ngikaalei lu anangito ngabunge ngatomwon-uni ta ngimongin ngabunge ngauni, nak tanyameta alosukukuu a Adeparet. Apot tani ngikapolok a arieng keng tolemut ngadekon kech nakis ngitunga ka ngimurok ta Ngilawi ngimesekin luuchik ka ngikaalei ngabunge ngaarei ka ngamiae ngakan-kapei, ka ngimongin ngamiae ngauni toliworos ngakipeyos a esukukuu a Adeparet. Apot ngikapolok a Ngilawi lu anyaritae Konania, ka Chemaya, ka lokaatokeng lo anyaritae Nesanel, ka Achabia, ka Yeyel ta Yosabad, apot nakis Ngilawi ngimesekin luuchik ka ngikaalei ngabunge ngakan ka ngimongin ngamiae ngakan toliworos ngakipeyos. Ani erekinio ibore daang kotere esukukuu, apot ngimurok ka Ngilawi pena lotichisio kech loger losek adungunitor ekapolon. Taarae ngimesekin luuchik ka ngaanei toyangasi Ngilawi, sodi towatakis ngimurok ngaakot lokeno. Ani erumor totiakakis kesi ngitunga a ngalooso ngibaren lu eliworosi ngakipeyos na inomio, sodi kipeyoto kesi loger lo igiritere lotal a Musa. Topeo Ngilawi ngakipeyos a esukukuu a Adeparet anakim itemem ka etal, sodi kitukulata ngakipeyos na etal anamoti ka ngagului ta ngapalaranga nabeleny, sodi yaasi akiring atipei tokorakis ngitunga. Arumoret kanguna, apot Ngilawi tolemut akiring nakech ka na ngimurok alu eraakasi ngalesea a Aron kainyo asubete ngimurok etich lokaalan tanang nakwaare, enomete kesi ngibaren lu enomio nginerin daang, kinomete tani nikatoronon a ngakipeyos kanguna. Ngilawi lukaeok lua emachar a Asap, ayakasi lowaitin lukolong alimokinit ekapolon Daudi kesi atamar pena. Anyaritae kesi Asap, ka Eman ta Yedusun lo arai ekadwaran a ekapolon. Ngasigerea na eteete ngidorin, nyerotokino kesi alotich kech kainyo apot Ngilawi luche tosubakis kesi esukukuu. Tosubakinae ibore daang akolongit ngina kotere akilip Ekapolon Akuj, irichunitae esukukuu a Adeparet ka akipeyore ngakipeyos na inomio alokeno, tosubae daang loger losek adungunitor ekapolon Yosia. Apot Ngisirael daang lu ayakasi neni tanyama esukukuu a Adeparet ka lo a ngamugati anapadok a ngirwa a ngikan-kaarei. Tadangaror ngirwa lukolong a ekadwaran Samuel, nyesubakina esukukuu a Adeparet loger logo. Emam alokapolok alu kolong engarenete lo asubaki nakanuan esukukuu a Adeparet lo ikoni logo, lo asubakinete Yosia, ka ngimurok, ka Ngilawi ta ngitunga a Yuda, ka Isirael ta lua Yerusalem. Asubakinete kesi esukukuu ngolo ekaru lo a ngitomon ka ngikan-kauni lo araakar Yosia ekapolon. Arumoret Yosia akisub ngakiro nguna daang kotere akai a Akuj, abu ekapolon a Misiri lo anyaritae Neko torik ngasigerea esaki akitijikin ere a Karikemich lo ayei lokwaas a angolol a Eupurate. Tasak Yosia akiratakin ngesi nakaneni abu Neko tomea ngitunga nia Yosia ebala, “Nyo kingoit ayong ka iyong, ekapolon a Yuda? Meere iyong abunit ayong akitijwore, pearai abunit akitijwore ngimoe kang. Kadungoki Akuj ayong atamar eburuburak. Ibakit Akuj alowae kang. Koto nyiitepeg Akuj, ani kemam kimunyari iyong.” Nakaneni abu Yosia kimingak alosit lojie. Towou ngesi akiirar ngakiro na eruoro Akuj kisitoru nia Neko, sodi kiloch ngesi enape tolot ejie anaroatin a Megido. Toguma ngimalea a Ngimisiri Yosia alojie. Todungok ngesi ngikasubak etich keng tama, “Yaarae ayong. Awanan ayong lokojokon!” Tadakut kesi ngesi anaurukuk keng ana iritae, sodi kidokokis ngesi naurukuk keng na ngaarei. Kiwokoroe ngesi Yerusalem. Totoanik ngesi inaa sodi tonukakinae nalielin a ngikapolok. Apot ngitunga daang a Yuda ka Yerusalem kigoro tosutonokis kotere akitu keng. Abu ekadwaran Yeremia toeok eeos lo egoror ekapolon Yosia. Aliwor etal alo Isirael, a ngikaeok alukiliok ka luberu aeokin eeos ngolo na igorotor Yosia. Igiritae eeos ngolo nakitab na ngieosio alu igorore. Ngakiro na asubi Yosia daang, alemuna keng ani a Ekapolon Akuj, ka akiwapit keng Etal, ka ngakiro keng napei anakisiakinet tanang losal, igiritae daang nakitab na enyaritae Ngakiro a ngikapolok a Isirael ka Yuda. Apot ngitunga a Yuda toseut lokookeng a Yosia lo anyaritae Yoaas kiwasakis akimiet a etal kitiliwosi ekapolon alo Yerusalem. Araakasi ngikaru a Yoaas ngitomwon-arei ka nguuni na aliworor ekapolon a Yuda. Toliwor ngesi ekapolon alo Yerusalem a ngilapio a nguuni. Abu Neko lo arai ekapolon a Misiri toriko ngesi kitiliwo erikot. Kitubuk Neko ngitunga a Yuda echur lo arai ngakiloi 3,400 a akwangat, ka ngakiloi 34 a egolit. Kitiliwo ekapolon Neko lokaatokeng a Yoaas lo anyaritae Eliakim ekapolon a Yuda. Kiloch Neko ekiro a Eliakim toliwor Yeoyakim. Toriko Neko Yoaas Misiri. Araakasi ngikaru a Yeoyakim ngitomwon-arei ka ngikan na aliworor ekapolon a Yuda. Abu ngesi toliwor ekapolon alo Yerusalem a ngikaru a ngitomon ka epei. Tosechak ngesi Ekapolon Akuj na erai Akuj keng. Abu Nebukadinesa lo arai ekapolon a Babilon torem Yuda. Kirum ngesi Yeoyakim, toen a ngiriko sodi toriko Babilon eenen. Tolema Nebukadinesa ebari eche a akai a Akuj dio ayaar kai keng na ayei Babilonia. Ngakiro daang na asubi Yeoyakim, aapei ka ngakiro nakakadakinak asubi ngesi, ka ngakiro naaronok asubi ngesi, igiritae nakitab na enyaritae Ngakiro a ngikapolok a Yuda. Kilunyokin lokookeng lo anyaritae Yeoyakin nados keng toliwor ekapolon. Araakasi ngikaru a Yeoyakin ngitomon ka ngikan-kauni na aliworor ngesi ekapolon a Yuda. Toliwor ngesi ekapolon alo Yerusalem a ngilapio a nguuni ka ngirwa ngitomon. Abu ngesi dang tosechak Ekapolon Akuj. Ani enangi ngirwa lua ngirupei, abu ekapolon Nebukadinesa toriko Yeoyakin Babilonia kitiliwo eenat. Tolema Nebukadinesa ebari a akai a Akuj. Ani erumor kitiliwo Nebukadinesa amae keng a Yeoyakin lo anyaritae Sedekia, kitiliwo ekapolon a Yuda ka Yerusalem. Araakasi ngikaru a Sedekia ngitomwon-arei na aliworor ekapolon a Yuda. Toliwor ngesi ekapolon alo Yerusalem a ngikaru a ngitomon ka epei. Tosechak Sedekia Ekapolon Akuj. Nyitiditeuna ngesi kiira ngakiro a ekadwaran Yeremia, alo eruoro akiroit a Ekapolon Akuj. Tonger Sedekia ekapolon Nebukadinesa. Esikongi sek Nebukadinesa Sedekia alokiro a Akuj kitilim atamar aliwor lokamunoi. Kichananer ngesi towou akilung akisech keng ka abongokin Ekapolon Akuj na erai Akuj a Ngisirael. Ani eyakasi nguna, apot nabo ngikarikok a Yuda daang ka ngimurok ta ngitunga, kiwapa ekitetemes lokikadakini a ngibukui alu edunyatar kesi. Kilipa kesi ngakujo nasubuna sodi kinyasut akai a Akuj nakolong etaleuni Ekapolon Akuj alope. Abu Ekapolon Akuj na erai Akuj kata apaakech torubak ameununi ngikadwarak akichikichik ngitunga keng, kainyo esienito ngesi ngitunga keng ka akai keng asaki ayuun. Nakaneni tokianatar kesi ngimeanara a Akuj, kimenya ngakiro a Akuj, nabo tokianatar ngikadwarak keng tanang ni angoikinea Ekapolon Akuj ngitunga keng noi tongop kona eyuun kesi. Sodi toriku Ekapolon Akuj ekapolon a Babilonia bu kitijik kesi. Taar ekapolon ngolo ngikiliok lusorok a Yuda, taar tani alokai a Akuj. Nyisieno ngesi itwaan, kesorokona kori kemojongit, kerai ekile kori aberu, kedeaka kori pekedeaka. Abu Akuj kipoto kesi daang nak ngesi. Abu ekapolon a Babilonia tangata ngiboro lu ayakasi kai a Akuj daang, luuchik ka luapolok lu araakasi ebari a akai a Akuj, ka ebari a ekapolon, ka ngikarikok. Yaa ngesi ngiboro daang Babilonia. Kinom ngesi akai a Akuj, ka ere, ka ngakais a ngikapolok na ayakasi lore daang, ka ebari a ere, sodi toukosi awas a ere. Toriko ngesi ngitunga lu apuunosi daang Babilonia toliworos ngikedalak keng ka ngalesea keng, tanang ngirwa lu esiakinea apolou a akwap a Persia. Sodi kiyookin ngakiro nakolong alimuni Ekapolon Akuj kisitoru nia ekadwaran Yeremia ebala, “Idongi akwap erai alaireng a ngikaru a ngitomwon-kaarei, sodi kiangarea akwap ngakiangaret a Sabato nakolong aringa nyirichuna.” Ekaru lo ekingaren lo araakar Korech ekapolon a Persia, abu Ekapolon Akuj kiyook ngakiro nakolong alimuni kisitoru nia ekadwaran Yeremia. Abu Ekapolon Akuj kitonyou Korech todung ngakiro nugu kigirae sodi kisomae anakwap keng kadaang. Egiritae kona, “Ngakiro nugu kesi edungunit Korech lo erai ekapolon a Persia. Ketiliwo Ekapolon Akuj na erai Akuj a adis ayong ekapolon a ngakwapea kadaang. Kainaki ayong etich loa akiduk akai keng lore a Yerusalem anakwap a Yuda. Esi daang lu iraakasi ngitunga a Akuj, kapesi tokona inaa. Irukete esi ka Ekapolon Akuj na erai Akuj kus.” Ekaru lo ekingaren lo aliworor Korech lo a akwap a Persia ekapolon, abu Ekapolon Akuj kiyook ngakiro nakolong alimuni kisitoru nia ekadwaran Yeremia. Kitonyou Ekapolon Akuj Korech sodi kisigir ngakiro na adunguni, tomea ngitunga yaasi wadaang a akwap keng, sodi kisomae iremae. Egiritae kona: “Ebala Korech lo erai ekapolon a akwap a Persia kona, ketiliwo Ekapolon Akuj na erai Akuj a adis ayong ekapolon a ngakwapea kadaang. Kainaki ayong etich lo a adukokin ngesi akai keng lore a Yerusalem, anakwap a Yuda. Kiruko Akuj ka esi daang lu iraakasi ngitunga keng. Ejoikinit esi iloose Yerusalem tobongonokis akiduk akai a Ekapolon Akuj ana erai Akuj a Isirael, na erai ngesi ilipitae alo Yerusalem. Ani keyakasi ngitunga keng lu eeniaritae nakwap nagela, lu esakete akingarakino tobongut, ejoikinit ngikidunyet kech ingarakinete kesi a eger kalo, nakis ngaropiyae ka egolit, ka akimuj ta amekin ngibaren, ka ainakin ngadekon na elemuununio alokai a Akuj alo Yerusalem.” Sodi tonyout ngikapolok a ngimacharin a ngitela a Yuda ka Benjamen, ka ngimurok, ka Ngilawi ta itwaan daang nicha abu Etau a Akuj kitonyou. Apot tonyout alosit abongonokin akiduk akai a Ekapolon Akuj alo Yerusalem. Apot ngikidunyet kech daang kingarakis kesi nakis ngiboro lukaalak lu araakasi ngiboro lukwangae lukimujet, ka egolit, ka ngamuja, ka ngibaren, ka ngiboro luche lukaalak a ngaropiyae ta ngadekon a akai a Akuj. Tobuak Korech kesi ngatubwae ka ngikopoi lukolong alemarit ekapolon Nebukadinesa alokai a Akuj alo Yerusalem, yaa nakais a ngakujo keng. Kipoto Korech ngiboro ngulu nak Misiredas lo aweikinit ngaropiyae a ekapolon, sodi kimaranak Chechibasar lo arai ekarikon a ewae a Yuda. Ekoni ekimar a ngiboro kangulu nege, ngatubwae na egolit eraakasi ngaka ngakipeyos 30 ngatubwae nakwangae eraakasi ngaka ngakipeyos 1,000 ngatubwae nache 29 ngitubwae lua egolit 30 ngitubwae lukwangae 410 ngiboro luche 1,000 Araakasi ngiboro ngulu daang 5,400, lu araakasi ngika egolit ka lukwangae ta ngiboro luche lu ayaari Chechibasar, naarotokinioto ngesi ka ngitunga luche lu arikitoe nakwap nagela, na arotokinioto alo Babilon toloto Yerusalem. Apot ngitunga lukaalak lusek arikitoe nakwap nagela torotokis alo Babilon tobongosi Yerusalem ka Yuda, tolot itwaan daang lore keng. Alomito ngitunga a ngawiyei kech nakwap a Babilonia napei kolong arikio ekapolon Nebukadinesa kesi eraakasi ngirikon. Anyaritae ngikarikok kech Serubabel, ka Yochua, ka Neemia, ka Seraya, ka Reelaya, ka Mordekai, ka Bilichan, ka Misipar, ka Bigipai, ka Reum ta Baana. Ngirora a ngimacharin a Ngisirael lugu, ka ekimar a ngimacharin kadaang alu abongunete anakwap anagela. Lua Paroch araakasi 2,172. Lua Chepatia araakasi 372. Lua Ara araakasi 775. Lua Paas Moab (lu araakasi ngalesea a Yechua ka Yoab) araakasi 2,812. Lua Elam araakasi 1,254. Lua Satu araakasi 945. Lua Sakai araakasi 760. Lua Bani araakasi 642. Lua Bebai araakasi 623. Lua Asigad araakasi 1,222. Lua Adonikam araakasi 666. Lua Bigipai araakasi 2,056. Lua Adin araakasi 454. Lua Ater (ekiro eche ngesi Esekia) araakasi 98. Lua Besai araakasi 323. Lua Yora araakasi 112. Lua Achum araakasi 223. Lua Gibar araakasi 95. Apot tani lu kolong alomito taapaakech lorerea lugu tobongut: Lua Betleem araakasi 123. Lua Netopa araakasi 56. Lua Anasos araakasi 128. Lua Asimapes araakasi 42. Lua Kirias Yearim, ka Kepira ta Beeros araakasi 743. Lua Rama ka Geba araakasi 621. Lua Mikimach araakasi 122. Lua Besel ka Ai araakasi 223. Lua Nebo araakasi 52. Lua Magibich araakasi 156. Lua Elam aloche araakasi 1,254. Lua Arim araakasi 320. Lua Lod ka Adid ta Ono araakasi 725. Lua Yeriko araakasi 345. Lua Senaa araakasi 3,630. Ngirora a ngimacharin a ngimurok alu abongunete anarikonot kesi lugu: Lua Yedaya (lu araakasi ngalesea a Yechua) araakasi 973. Lua Imer araakasi 1,052. Lua Pachur araakasi 1,247. Lua Arim araakasi 1,017. Ngimacharin a Ngilawi alu abongunete anarikonot kesi lugu: Lua Yechua ka Kadimiel (lu araakasi ngalesea a Odapia) araakasi 74. Ngikaeok alokai a Akuj (lu araakasi ngalesea a Asap) araakasi 128. Ngiketeok a akai a Akuj (lu araakasi ngalesea a Chalum, ka Ater, ka Talimon, ka Akub, ka Atita ta Chobai) araakasi 139. Ngimacharin a ngikasubak etich alokai a Akuj alu abongunete anarikonot kesi lugu: Sia, ka Asupa, ka Tabaos. Keros, ka Siaa, ka Padon. Lebana, ka Agaba, ka Akub. Agab, ka Chamulai, ka Anan. Gidel, ka Gaar, ka Reaya. Resin, ka Nekoda, ka Gasam. Usa, ka Pasea, ka Besai. Asina, ka Meunim, ka Nepusim. Bakibuk, ka Akupa, ka Arur. Basilus, ka Meida, ka Aricha. Barkos, ka Sisera, ka Tema. Nesia ta Atipa. Ngimacharin a ngikasubak etich a Solomon alu abongunete kesi lugu: Kesi Sotai, ka Asoperes, ka Peruda. Yaala, ka Darkon, ka Gidel. Chepatia, ka Atil, ka Pokeres Asebaim ta Ami. Ngalesea a ngikasubak etich alokai a Akuj, ka ngikasubak etich a Solomon, alu abongunete anarikonot, arai ekimar kech daang 392. Ngimacharin apote alorerea alu enyaritae Tel Mela, ka Tel Aricha, ka Kerub, ka Adan ta Imer, nakaneni peapedorete kesi akidodiun atamar kirai ngalesea a Ngisirael, kesi lua Delaya, ka Tobia ta Nekoda. Arai ekimar kech 652. Alomacharin a ngimurok, ayakasi lua Abaya, ka Akos ta Barisilai. (Apaakech a emachar kangolo ngesi kolong eusi nakookeng a Barisilai alo arai eka akwap a Gilead, sodi tanyarae kesi a ekiro alokamuran kech.) Apot kesi tasaka ni kolong etoruni alesit kech nakaneni tongopik. Aloger akuruworea kesi akiyen ni kolong etorunete, apon kikotarae nyeeliworosi ngimurok a Akuj, tamarae nyitaleuno. Abu ekarikon a ewae a Ngiyaudi tolimok kesi atamar nyeenyam akimuj na epeyonokinio Akuj, tanang eanyunio emuron lo epedori akingitun ngakiro kotere Urim ka Sumim.*g** Araakasi ngitunga lu abongunete daang 42,360, emam itwaan imarakinit ngikasubak etich kech lukiliok ka luberu lu araakasi 7,337. Amam itwaan emarakinit tani ngikaeok lukiliok ka luberu lu araakasi 200. Ayakasi kesi ngangolei 736, ka ngisikiria 245, ka ngikaala 435 ta ngisikiria ngiche 6,720. Ani enangunete ngitunga lu abongunete ngulu kai a Akuj alo Yerusalem, apot ngikapolok a ngimacharin ngiche tolemut ngadekon kotere akai a Akuj, tobongonokinere akiduk akai ngina ni kolong sek adukokinitae. Apot kesi tolemut ngadekon nakaalak itemem ka eger lo apedorete. Arai ekimar a ngiboro kangulu kadaang, egolit ngakiloi 500, ngakwangae ngakiloi 2,800 ta ngiworui lukooyak a ngimurok 100. Apot ngimurok ka Ngilawi ta ngitunga ngiche toloma Yerusalem. Apot ngikaeok ka ngiketeok a akai a Akuj ta ngikasubak etich alokai a Akuj toloma lorerea lu aapiyete kaneni. Toloma Ngisirael luche lorerea lu kolong alomito taapaakech. Ani enangi elap lo a ngikan-kaarei, tolomito Ngisirael daang lorerea kech, apot kesi daang tochunakinos Yerusalem. Apot Yochua lokookeng a Yeosadak, ka ngimurok luche, ka Serubabel lokookeng a Chealitiel aapei ka ngiyenet keng, apot toduko nabo ekeno a Akuj a Isirael, sodi kipeyoore ngakipeyos loger lo igiritere Lotal a Musa, alo erai itwaan a Akuj. Tani bo na aemitotor ngitunga lu abongunete ngulu ngitunga lusek alomito nakwap ngina, apot kesi tobongokis akiduk ekeno a Akuj ni kolong sek awaar. Sodi kisiakis kesi nabo akinom ngakipeyos napalem a ataparach ka naka ebong. Tanyama kesi esukukuu a ngikalea itemem ka ngitalio keng. Kipeyoto kesi akolongit daang ngakipeyos na esakitae. Ani erumor kipeyoto ngakipeyos napalem inomio nginerin daang, ka na ipeyoo akolongit na eanyungarere elap, ka ngirwa a ngisukukui aluche alu ilipitere Ekapolon Akuj. Apot tolemut tani ngadekon na alemanakinio Ekapolon Akuj kotere achamit. Napei anakolongit ana ekingaren a elap alo a ngikan-kaarei, kisiakis kesi akipeyonokin Ekapolon Akuj ngakipeyos na inomio. Nakaneni aringa kesi tani nyebokara ni edukokinio akai a Akuj. Tolemut ngitunga ngaropiyae na etachere ngikadukok a ngamoru, ka ngikadukok a ngakito. Tolemut nabo akimuj, ka ibore nimatat ta akimiet yaarae lorerea a Tiro ka Sidon, kilokonyuunere ngakito a ngichekereng alo Lebanon, kiwaakinae nanam tanangut Yopa. Asubio ngakiro nguna ani achamakinitor Korech lo arai ekapolon a Persia. Elap lo a ngiarei a ekaru alo a ngiarei, kenangut kesi kai a Akuj alo Yerusalem, apot Serubabel lokookeng a Chealitiel ka Yochua lokookeng a Yosadak, ka ngitunga kech luche ka ngimurok ta ngilawi ta daang cha lu kolong abongunete Yerusalem, apot kisiakis etich. Ngilawi daang lu anangito ngikaru ngitomwon-arei ka lu eporito, apon toseunae toweikis etich lo a abongonokin akiduk akai a Akuj. Abu Elawit lo anyaritae Yechua ka talokookeng ka ngiyenet keng, ka Kadimiel ka talokookeng (lu araakasi emachar a Odapia,) apot daang toweikis etich loa abongonokin akiduk akai a Akuj. (Apot Ngilawi lua emachar a Enadad kingarakis kesi.) Ani ebokarete ngitunga ni edukokinio akai a Akuj, apot ngimurok tanapa ngiworui kech lua ngimurok totinga ngaburucho pot ngaren. Towaa Ngilawi lua emachar a Asap kaneni etingito ngasua. Kipuruut kesi Ekapolon Akuj itemem ka eger lo kolong egiri ekapolon Daudi. Toeoto kesi ngieosio lu ipurore Ekapolon Akuj ikobanarete ebalasi, “Ejok Ekapolon Akuj, emina ngesi Isirael nakajik.” Kirema itwaan daang a ngikilinga keng kadaang ipuro Ekapolon Akuj, kainyo apon tobokarae ni edukokinio a akai a Akuj. Nakaneni ngitunga lumojong lukaalak lu araakasi ngimurok, ka Ngilawi ta ngikapolok a ngimacharin, engolikinito kolong akai a Akuj na ekingaren. Ani ingolikinete kesi eger lo abokarere ni edukokinio akai na, kigoro kesi kiuteto. Ani ngitunga luche, eremasi kotere alakara. Peapedorete ngitunga akitiak akirema a ngitunga alu alakara ka akirema alu egorosi, kainyo achalasi kesi noi tanang echale nikalonan. Ani iirarete ngimoe a ngitunga a Yuda ka lua Benjamen atamar edukete ngitunga lu abongunete akai a Akuj ana erai Akuj a Isirael, Apot kesi toloto nia Serubabel ka ngikapolok a ngimacharin tolimokis tamasi, “Kimiekinae sua emorikin ka esi atoduko akai a Akuj. Kilipit sua dang Akuj loger lo ilipitotor esi. Kipeyonokini sua ngesi ngakipeyos napei kolong kirikunio sua ekapolon a Asiria lo enyaritae Esaradon, kitolom nege.” Apot Serubabel, ka Yochua ta ngikapolok a ngimacharin tolimokis kesi tamasi, “Nyikisakit sua esi kingarakis sua akiduk akai a Ekapolon Akuj ana erai Akuj kosi. Kiduki sua ngikulepek, loger lo kidungokinea Korech lo erai ekapolon a Persia.” Sodi apot ngitunga lusek alomito neni tasaka akisileleny Ngiyaudi ka akitubul kesi tongerioto akiduk. Apot kesi tani nakis ngikaweikinak a arieng a Persia ibore todiaka kesi, sodi kitengerioto Ngiyaudi akiduk. Apot kesi tosuba kona ngirwa daang lu araakar Korech ekapolon, tanang ngirwa lu aliworor Dario ekapolon. Ngirwa lu esiakinea Kerkesi aliwor ekapolon, apot ngimoe a ngitunga a Yuda ka Yerusalem kigira ngakiro na etitakinitotor kesi. Nabo ngirwa lu araakar Artachasta lo a akwap a Persia ekapolon, apot Bichilam, ka Misiredas ka Tabeel, ta ngirukitos kech kigir abarua nia ekapolon Artachasta. Egiritae abarua ngina a Ngaramaik. Asakitae ilokonyio esaa lo isomaare. Abu Reum dang lo arai ekarikon ka Chimchai lo arai ekegiran keng kigirakis Artachasta abarua naga, igirito ngakiro a Yerusalem. “Ebunit abarua naga ani a Reum alo erai ekarikon a ewae a akwap, ka Chimchai lo erai ekegiran keng, ka ngirukitos kech, ka ngikatubok ngakiro ta ngikaweikinak a arieng luche daang ka ngitunga lu kolong sek apote alo Erek, ka Babilon ta Susa na anakwap a Elam, aapei ka ngibukui luche lu kolong etaramakini ekapolon Achuribanipal ka kesi anawiyei kech, sodi toloma lore a Samaria ka ngiwaitin luche alo too Eupurate.” Ngakiro na ayakasi nabarua nugu: “Nia ekapolon Artachasta, sua ngikasubak etich kon lu kiya lowae lo alo too Eupurate, kimalae iyong. “Ee ekapolon, kisakit iyong toyen atamar Ngiyaudi lu ngoon apote alowaitin a akwap kon, aloma Yerusalem. Abongokis kesi akiduk Yerusalem, ere lo a ngakiro anaaronok, lokechanan. Esiakis kesi akiduk ngawasea, erumorete atipei. Ekapolon, ani kebongokin akiduk ere logo torumoroe ngawasea keng, epalikinete ngitunga akibuk echur, sodi tokidiekuut ngaropiyae kon. Tokona ekapolon, aloger eraakar etich kosi ibore en, nyikisaki sua arima kon inyasunio, ngesi kibalar sua iyong todung atamar tasakae ngakiro a ere kalo nakitabea kata apaakon. Ani kikok neni, ianyuni iyong atamar erai ere logo eka ekurikur napei kolong a angorot, ichanito kesi ngikapolok a akwap ka lua ngiwaitin a akwap. Ichanaka ngitunga keng etiono apolokin. Ngakiro nguna kesi kolong enyasunere ere logo. Kinupit sua atamar ani kebongokin akiduk ere logo torumoroe ngawasea keng, nyeringa iyong nabo ipolokini ewae lo alo too Eupurate.” Abu ekapolon tobua ngakiro na atachuni ebala: “Nia Reum alo erai ekarikon ka Chimchai lo erai ekegiran keng ta ngirukitos kech lu elomito Samaria ka ngiwaitin luche alo too Eupurate, kemalae. “Elokony ngakiro a abarua ana ngoon igirunete esi kesomakin ayong. Abu ayong atodung atamar tongichunae ngakiro nguna. Iteni angichun atamar napei kolong a angorot, engerito ngitunga a Yerusalem ngikapolok nabo ileleba ngitunga luaronok neni ka lukechanak. Apolokis ngikapolok lu eyenikinitae ere ngolo ka ewae lo alo too Eupurate daang, itubukete ngitunga echur ka akidieunun ngaropiyae. Tokona bocha, todungutu atamar tojongoto ngitunga ngulu akiduk ere ngolo, tanang adunguni ayong ngakiro ngache. Tosubakisi nguna atipei, nyiinyasun ngakiro kang.” Napei eirareta Reum ka Chimchai ta ngirukitos kech abarua na Artachasta naga isomao, apot toloto Yerusalem atipei sodi kitengero Ngiyaudi akiduk ere ngolo. Apon kimiekinae etich lo a akiduk akai a Akuj tanang ekaru lo a ngiarei araakar Dario lo a akwap a Persia ekapolon. Ngirwa ngulu, apot ngikadwarak ngiarei lu anyaritae Agai ka Sekaria lokookeng a Ido, kisiakis akisuruor ngitunga lu elomito Yuda ka Yerusalem, alokiro a Akuj a Isirael. Ani iirarete Serubabel lokookeng a Chalitiel ka Yochua lokookeng a Yeosadak ngakiro nguna, apot kisiakis abongokin akiduk akai a Akuj a Yerusalem, ingarakina ka ngikadwarak luarei ngulu. Ani anipei, apot Tetanai lo arai ekarikon a ewae alo alo too Eupurate, ka Chesar Bosenai ta ngirukitos kech toloto Yerusalem kingitas tamasi, “Ngae kidungokini esi atamar toduko akai naga torumosi kona?” Kingitas kesi nabo tamasi, “Tangae ngirora a ngitunga alu adukete akai naga?” Nakaneni etee Ekapolon Akuj ngikasukou a Ngiyaudi, sodi apot ngikaweikinak lua arieng a Persia ngulu nyiitengero kesi akiduk, tanang igirarete kesi abarua nia Dario sodi kidarut ngakiro na etachuni. Apot Tatenai lo arai ekarikon a alo too Eupurate, ka Chesar Bosenai ta ngirukitos kech, kigirasi abarua nia ekapolon Dario. Ngakiro nugu egirakinitae ekapolon: “Nia ekapolon Dario, ipolokini iyong akwap a ekisil. “Ekapolon, kisaki alimokin iyong atamar kipotu sua atoloto lowae lo a Yuda atoriamutu akai a Akuj Anaapolon edukio. Edukio akai ngina a ngamoru anakoapolok nabo engichanakinio ngakito lokwaasea. Esubio etich kotere achwaanu lokojokon nabo elosi ngaren niajokon. “Kipotu sua engita ngikasukou atamasi, ‘Ngae kidungokini esi atamar toduko akai naga torumosi kona?’ Kipotu nabo engita kesi ngirora kech sodi atolimokineta iyong atamar tangae ngikarikok a etich kangolo. “Apot kesi tatachut tamasi, ‘Kirai sua ngikasubak etich a Akuj a adis ka akwap, kibongokinit sua akiduk akai a Akuj na kolong aduki ekapolon epei loapolon a Isirael, toduk torumor kolong a angorot. Nakaneni ani aloger etongoeta taapaa kosi Akuj na adis, abu Akuj kimiek ekapolon a Babilonia lo enyaritae Nebukadinesa lo a akwap a Kalidayo, idwangi kesi. Abu ngesi kinyasu akai a Akuj sodi torik ngitunga nakwap a Babilonia. Ani ekaru lo ekingaren lo araakar Korech ekapolon a Babilonia, abu ngesi todung atamar tobongokinoe akiduk akai a Akuj. Abu ngesi tobuu egolit, ka ngakwangae ta ngiboro lukimujet lu kolong alemari Nebukadinesa alokai a Akuj alo Yerusalem, yaa kai na ayei Babilon. Abu Korech nak ngiboro ngulu itwaan ni anyaritae Chechibasar, lo aseuni ngesi toweik ewae a Yuda. Tolimok Korech ngesi atamar, Yaa ngiboro lugu kiwaak kai a Akuj na eyei Yerusalem, sodi tobongokinoe akiduk akai a Akuj ni kolong sek adukitoe. Sodi tolot Chechibasar toboka ni edukokinio akai a Akuj alo Yerusalem. Napei ngina jik tanang tokona, edukio akai ngina, nakaneni eringa akai a Akuj nyerumoro akiduk.’ “Tokona bocha, ani kisaki iyong, kimiek robo tasakae ni igiritae ngakiro a ngikapolok na eyakasi Babilon taanyunae kedungunit kolong Korech atamar tobongokinoe akiduk akai a Akuj alo Yerusalem, kori kemam. Ani erumor kitolimok iyong sua atamar ibala iyong ai anakiro kanu.” Sodi todung ekapolon Dario atamar tasakae ngakiro a akai kangina anakiro a ngikapolok ana eyakasi Babilon. Nakaneni apon taanyunae akitab alore a Ekibatana alo erai ere loapolon alowae a Media. Egiritae ngakiro nugu nakitab ngina: “Ekaru lo ekingaren lo araakar Korech ekapolon, abu ngesi todung atamar tobongokinoe akiduk akai a Akuj Yerusalem toliwor ni ipeyoore ka akinom ngakipeyos. Esakitae aoyau na alokidiama a akai kangina erai ngamitae ngatomwon-arei ka ngakan-kaarei. Toliwor abalanyany keng ngamitae ngatomwon-arei ka ngakan-kaarei. Todukoe ngikwaasea a akai a akidokiet a apei a ngakito kidiama ngakidokiet ngauni a ngamoru. Tatachae etich ngolo daang a ngaropiyae a ekapolon. Tani ngiboro lua egolit ka lukwangae lu kolong alemari ekapolon Nebukadinesa alokai a Akuj alo Yerusalem yaa Babilon, ejoikinit ebuario kiwaakinae ni kolong ayakasi alokai a Akuj alo Yerusalem.” Ngakiro na atachuni Dario nugu, “Nia Tatenai alo erai ekarikon alo too Eupurate, ka Chesar Bosenai ta ngikaweikinak a arieng lurukitos kus. “Tochoito inangete kai a Akuj. Kimiekisi etich lo a adukuoru ngolo torotok ngaren. Kimiekisi ekarikon a ewae a Yuda ka ngikasukou a Ngiyaudi todukokis akai a Akuj ni kolong sek adukokinitae. Kadungokinit tokona ayong esi atamar kingarakisi kesi alotich kangolo. Etachio ngaropiyae atipei anaropiyae a ekapolon, ana idiauniyo erai echur alo too Eupurate, sodi torotokinio etich ngaren. Akolongit daang esakitae esi inanakinete ngimurok a Akuj lu eyakasi Yerusalem ibore daang nicha iitanito. Warasi nyiipukosi. Kerai ngimongin lusorok esakete, ka ngimesekin, kori ngimesekin luuchik lu ipeyonokinio Akuj na adis erai ngakipeyos na inomio, kori kerai ngakanoi, ka amakat, ka emuna ta akimiet. Esubakinosi ngakiro nguna sodi kipeyooto kesi ngakipeyos na ejoikinete Akuj na adis, sodi kelipakis ayong ka ngide kang kitopia Akuj. Adungunit nabo ayong atamar itwaan daang nicha nyiwapi ngakiro nugu, iriunio akitoe alokai keng, tokularae ewae epei toitaaner, sodi torubokinae nakwaan keng. Kitiliworoe akai keng na echakio asakatan. Kimiek Ekapolon Akuj na kolong aseuni Yerusalem toliwor ni ilipeenere ngesi, todema apolou, ekapolon cha daang kori akwap na itopegi ngakiro nugu kori na esaki akinyasun akai a Akuj alo Yerusalem. Ayong Dario ngesi adung ngakiro nguna. Ejoikinit iwapio eriyan.” Apot Tatenai lo arai ekarikon a ewae alo alo too Eupurate, ka Chesar Bosenai ta ngikaweikinak a arieng lurukitos kech, tosuba ngakiro na adunguni ekapolon, kitemokis. Torotokis ngikasukou a Ngiyaudi ngaren niajokon edukete akai a Akuj, italakarito ngikadwarak a Akuj lu anyaritae Agai ka Sekaria ainakinito kesi agogongu. Apot kesi torumosi akai a Akuj loger lo kolong adungokinitor Akuj a Isirael ka eger lo adungunitor Korech, ka Dario ta Artachasta, lu araakasi ngikapolok a Persia. Torumosi kesi akiduk akai a Akuj akolongit na ngauni a elap alo enyaritae Adar, ekaru lo a ngikan-kapei lo araakar Dario ekapolon. Ani erumor, apot Ngisirael, ka ngimurok, ka Ngilawi ta ngitunga luche daang lusek abongunete anakwapea anache, kitaleut akai a Akuj a alakara. Kotere akitaleun akai ngina, apot kesi kipeyoto ngimongin amiat apei, ka ngimesekin ngamiae ngaarei, ka ngimesekin luuchik ngamiae ngoomwon, toliworos ngakipeyos. Kipeyoto nabo ngikora ngitomon ka ngiarei toliworos ngakipeyos a akisech, eweikinit ekoroe epei ekitela epei a Isirael. Apot kesi totiakanakis tani ngimurok ka Ngilawi ngitichisio alokai a Akuj alo Yerusalem loger lo igiritere nakitab a Musa. Apot ngitunga lusek abongunete anakwapea anache tanyama esukukuu a Adeparet akolongit na ngatomon ka ngoomwon a elap alo ekingaren, ekaru lo atupit ngolo. Apot ngimurok daang ka Ngilawi kitosegas toliworos lu italeuno. Taara Ngilawi ngibaren lua ngakipeyos a Adeparet kotere ngitunga daang lu abongunete, ka ngimurok ta kesi ngikulepek. Tanyama Ngisirael daang lu abongunete anarikonot ngakipeyos nguna. Tanyama tani daang lu aisikinete ngakujo nagelayek elipito ngibukui luche lu alomito nakwap ngina, sodi kilipeta Ekapolon Akuj na erai Akuj a Isirael. Apot kesi tanyama esukukuu a ngamugati anapadok a ngirwa a ngikan-kaarei, elakara. Alakara kesi noi kainyo abu Ekapolon Akuj kitojok etau a ekapolon a Asiria anikech, sodi kingarak kesi alotich kech alo abongonokinioto akiduk akai a Akuj ana erai Akuj a Isirael. Adaunet a ngikaru alukaalak, na araakar Artachasta ekapolon a Persia, ayei itwaan ni anyaritae Esira. Abu kimara taapaakeng tanang nia Aron alo arai emuron loapolon. Arai Esira lokookeng a Seraya, alo arai lokookeng a Asaria, alo arai lokookeng a Ilikia, alo arai lokookeng a Chalum, alo arai lokookeng a Sadok, alo arai lokookeng a Aitub, alo arai lokookeng a Amaria, alo arai lokookeng a Asaria, alo arai lokookeng a Merayos, alo arai lokookeng a Seraya, alo arai lokookeng a Usi, alo arai lokookeng a Buki, alo arai lokookeng a Abichua, alo arai lokookeng a Pineas, alo arai lokookeng a Eleasar, alo arai lokookeng a Aron, alo kolong arai emuron loapolon a Akuj. Arotokini itwaan nibe Esira ngini alo Babilonia. Arai ngesi eketataman lo arai ekunonoit a Etal alo kolong alemuni Ekapolon Akuj na erai Akuj a Isirael nak Musa. Ainakinit ekapolon Artachasta Esira ibore daang nicha asaki, kainyo apiarit Ekapolon Akuj na erai Akuj keng ngesi. Abu ngesi ka Ngiyaudi ngiche pot Yerusalem ekaru loa ngikan-kaarei lo araakar Artachasta ekapolon. Araakasi Ngiyaudi ngulu ngimurok ka Ngilawi, ka ngikaeok, ka ngiketeok a akai a Akuj ta ngikasubak etich a akai a Akuj. Ananguni Esira Yerusalem elap lo a ngikan a ekaru alo a ngikan-kaarei alo araakar Artachasta ekapolon. Esiakini Esira alotoru keng alo Babilonia akolongit na ekingaren a elap alo ekingaren, sodi tanang Yerusalem akolongit na ekingaren a elap alo a ngikan, kainyo eyoki Akuj ngesi. Alemuna Esira akisomare Etal a Ekapolon Akuj, ka akisub eger lo esakea Etal, ta akitatam Ngisirael ngakiro a Etal daang. Abarua naga ngesi egirakini Artachasta Esira, lo arai emuron a Akuj, tarai eketataman a Etal. Ayeni ngesi noi ngitalio ka ngakiro na adungokinit Ekapolon Akuj Ngisirael. Egiritae abarua kona: “Ebunit abarua naga ani a Artachasta alo erai ekapolon. Igirakinit Esira alo erai emuron ka eketataman a Etal a Akuj a Adis. “Adungunit ayong atamar anakwap kang kadaang, ani keyei Esiraelit daang kori emuron kech, kori Elawit lo esaki alosit Yerusalem, epedori ngesi akirukor ka iyong. Ayong ka ngikasukou kang lukan-kaarei, kimearit iyong Yerusalem ka Yuda angichun kiwapitae Etal a Akuj kon, lo kiinakin iyong. Yaa ngadekon a egolit ka akwangat na kisaki ayong ka ngikasukou kang alemikin Akuj a Isirael, na eyei akai keng Yerusalem. Yaa tani akwangat daang ka egolit lo ichunakini iyong anakwap a Babilon kadaang, ka ngadekon na elemunete Ngisirael ka ngimurok kech kotere akai a Akuj kech na eyei Yerusalem. “Ejoikinit iyong ichoikini ngaropiyae nguna, togielea ngimongin, ka ngimesekin, ka ngimesekin luuchik, ka ngadekon a ngalemet ta emuna, sodi kipeye alokeno a ngakipeyos alo eyei kai a Akuj kon alo Yerusalem. Akwangat ka egolit lo idongi, ipedorete iyong ka ngitunga a akwap kon luche asubea ibore nicha isakete, itemem ka eger lo esakea Akuj. Tolemik Akuj alo Yerusalem ngiboro daang lu kiinakin iyong asubea etich alokai a Akuj. Ani keyei ibore iche isaki iyong kotere akai a Akuj, ipedori iyong aanyun anaropiyae a ekapolon. “Adungok ayong ngikaweikinak a arieng daang lu eweikinito ngaropiyae alowae alo alo too Eupurate ainakin Esira, lo erai emuron ka eketataman a Etal a Akuj a adis, ibore daang ni esaki, tanang ngaropiyae ngakiloi 3,400, ka ngakanoi ngakiloi 10,000, ka emuna ngalitae 2,000, ka akimiet ngalitae 2,000 ta amakat etiae locha esakitae. Ejoikinit echoikinio alemun ibore daang ni esaki Akuj a adis kotere akai keng, nyakangoikinea ngesi ayong kori talokookang. Kilimokinitae esi atamar ngimurok, ka Ngilawi, ka ngikaeok, ka ngiketeok a akai Akuj ta ngikasubak etich alokai a Akuj, kori itwaan cha daang ni eiyosi ka akai a Akuj, italeo akitubuk echur. “Iyong Esira, kotere aosou nakiinak iyong Akuj kon, toseu ngikaweikinak a arieng ka ngikatubok ngakiro topolokis ngitunga daang lu alo too Eupurate lu iwapito Etal a Akuj kon. Ejoikinit iyong itatami Etal ngolo itwaan daang ni nyeyeni. Ani kichwangak itwaan cha daang ngitalio a Akuj kon, kori lua akwap, ejoikinit irirao atipei. Toliwor eriras keng akitu, kori toeniarae nakwap nagela, kori todemarae ngibaren keng, kori toenae alojela.” Tolim Esira tama, “Kipuroe Ekapolon Akuj na erai Akuj kata apaayok! Kainyo etachamu ngesi ekapolon akitisir akai a Akuj na eyei Yerusalem. Kotere amina a Akuj na nyedaun, aanyu ayong akingarakino ani a ekapolon, ka ngikasukou keng ta ngikaweikinak a arieng keng daang lu eyenikinitae. Kainaki Ekapolon Akuj na erai Akuj kang ayong atitinyu na apedorea akimaima ngikapolok a ngimacharin a Ngisirael daang sodi atobongutu ka ayong aapei.” Erai lugu ngirora a ngikarikok a ngimacharin alu kolong arikitoe Babilonia, lu abongunete ka Esira Yerusalem ngirwa lu araakar Artachasta ekapolon. Gerichom lo a emachar a Pineas. Daniel lo a emachar a Isamar. Atuch lo a emachar a Daudi. Arai Atuch lokookeng a Chekania. Sekaria lo a emachar a Paroch, erukito ka ngikiliok amiat apei ka ngitomwon-kan lua emachar keng (ayenio ni etorunete ngalesea kech). Eliewonai lokookeng a Seraya lo a emachar a Paas Moab, erukito ka ngikiliok ngamiae ngaarei. Chekania lokookeng a Yaasiel lo a emachar a Satu, erukito ka ngikiliok ngamiae ngauni. Ebed lokookeng a Yonasan lo a emachar a Adin, erukito ka ngikiliok ngitomwon-kan. Yechaya lokookeng a Asalia lo a emachar a Elam, erukito ka ngikiliok ngitomwon-kaarei. Sebadia lokookeng a Mikael lo a emachar a Chepatia, erukito ka ngikiliok ngitomwon-kauni. Obadia lokookeng a Yeyel lo a emachar a Yoab, erukito ka ngikiliok ngamiae ngaarei ka ngitomon ka ngikan-kauni. Chelomis lokookeng a Yosipia lo a emachar a Bani, erukito ka ngikiliok amiat apei ka ngitomwon-kapei. Sekaria lokookeng a Bebai lo a emachar a Bebai, erukito ka ngikiliok ngitomwon-arei ka ngikan-kauni. Yoanan lokookeng a Akatan lo a emachar a Asigad, erukito ka ngikiliok amiat apei ka ngitomon. Elipelet, ka Yeuel ta Chemaya lua emachar a Adonikam, erukito ka ngikiliok ngitomwon-kapei (abongunete ngulu ekisidi). Usai ka Sakur lua emachar a Bigipai, erukito ka ngikiliok ngitomwon-kaarei. Atochunak ayong ajore daang lochilet a angolol ana eleleunit tanang lore a Aapa, sodi atoloma neni ngirwa nguuni. Ani engolenakini tooma ajore, abu atorukau atamar eyakasi ngimurok nakaneni amam Ngilawi alokiding kech. Atanyarau ngikarikok ngikan-koomwon lu araakasi Elieser, ka Ariel, ka Chemaya, ka Elinasan, ka Yarib, ka Elinasan, ka Nasan, ka Sekaria ta Mechulam aapei ka ngiketatamak ngiarei, Yoyarib ka Elinasan. Atomea ayong kesi nia Ido alo arai ekarikon a ngitunga alu ayakasi Kasipia, alimokin ngesi ka ngirukitos keng lu asubete etich alokai a Akuj, atamar tomeut ngitunga ngidi pot tosuba etich alokai a Akuj. Kotere ajakaanut a Akuj na kirukit ka sua, apot kesi tomeut Cherebia, itwaan ni epedori etich, lo arai Elawit a emachar a Mali. Abu ngesi kirukut ka ngitunga ngitomon ka ngikan-kauni lu araakasi talokookeng ka talokaatokeng. Apot kesi tomeut tani Achabia ka Yechaya lua emachar a Merari erukito ka ngiyenet kech ngitomwon-arei. Aapei ka ngulu, ayakasi ngikasubak etich a akai a Akuj 220, lu kolong aseunito Daudi ka ngikaweikinak a arieng akingarakin Ngilawi. Egiritae ngirora kech kadaang. Sodi atodung ayong kaneni alochilet a angolol a Aapa atamar atorono sua daang akimuj, etiditeunos alongaren Akuj kosi, elipa ngesi kitorik ka akiyok analotoru kosi ka ngide kosi ta ngibaren kosi daang. Ketimit ayong alosit nia ekapolon atamar kiinak sua ajore a ngasigerea ka ngikameak ngangolei sodi kiyoko sua alomoe analotoru kosi, kainyo alimokinit sek ayong ngesi atamar epianari Akuj itwaan daang ni igieno ngesi, nakaneni irirae daang nicha engeri ngesi. Sodi atorono sua akimuj elipa Akuj kiyok sua, abu ngesi kiira ngakilipasinei kosi. Abu atoseu ngimurok a Akuj lu ayenikinitae ngitomon ka ngiarei lu anyaritae Cherebia, ka Achabia ta ngirukitos kech ngitomon. Ani erumor etem ngakwangae ka egolit ta ngadekon na kolong alemunete ekapolon, ka ngikasukou keng ta ngikaweikinak a arieng keng, nakis Ngisirael tosubeta etich alokai a Akuj, sodi ainak ayong ngimurok. Ngiboro lu ainakini ayong kesi lugu: Ngakwangae ngataanea 22. Ngiboro lukwangae 100, lu arai apotis kech ngakiloi 20. Egolit ngakiloi 3,400. Ngatubwae na esubunitae a egolit 20, arai apotis kech ngakiloi 8.4. Ngatubwae naajokak ngaarei na asubunitae anasua ananyangayek ana eriyan ngaropiyae kech ka na ngatubwae ana asubunitae alogolit. Atolimok ayong ngimurok atama, “Kitaleun esi toliworos ngika Ekapolon Akuj ana erai Akuj kata apaakus. Italeunitoe tani ngiboro lukwangae lugu daang ka lua egolit lu elemikinitae ngesi erai ngadekon na echamit itwaan alemun. Tochoikisi ngiboro ngulu lokojokon tanang inangete kai a Akuj alo Yerusalem. Ani inangete neni, ilomarete namaniyat na a ngimurok, kitemo ngiboro ngulu, sodi kipotosi nakis ngikarikok a ngimurok, ka lua Ngilawi ta ngikarikok a Ngisirael.” Sodi kidiaut ngimurok ka Ngilawi ngakwangae, ka egolit ta ngiboro lukimujet, yaasi kai a Akuj yok alo Yerusalem. Ani enangi akolongit na ngatomon ka ngaarei a elap alo ekingaren, atorotokisi sua alochilet a angolol a Aapa atoloto Yerusalem. Eruko sua ka Akuj kosi, kiyok alomoe kadaang alu adikino kituumwokinete alorot. Ani kinanguni Yerusalem, eangasi a ngirwa a nguuni. Ani akolongit na ngoomwon, atoloto kai a Akuj etemo ngakwangae, ka egolit ta ngiboro lukimujet, ani erumor ainakisi Meromos lokookeng a Uria lo arai emuron. Arukito ngesi ka Eleasar lokookeng a Pineas ta Ngilawi ngiarei lu anyaritae Yosabad lokookeng a Yechua, ka Noadia lokookeng a Binui. Apon kimarunae ngiboro daang kitemoi, sodi kigirae ekimar kech esaa lopei ngolo. Ani erumor apot ngitunga daang lu kolong abongunete anarikonot tolemut ngakipeyos na inomio, kipeyokis Akuj a Ngisirael. Kipeyoto kesi ngimongin ngitomon ka ngiarei kotere Ngisirael daang, ka ngimesekin ngitomwon-koomwon ka ngikan-kapei ta ngimesekin luuchik ngitomwon-kaarei ka ngikan-kaarei. Kipeyoto tani ngikora ngitomon ka ngiarei lu italeunotor kesi anakisech. Apon ngibaren ngulu daang kinomae toliworos ngakipeyos a Ekapolon Akuj. Apot kesi tolemut tani abarua na kolong ainakini ekapolon sodi nakis ngikaweikinak a arieng ka ngikarikok a ewae alo alo too Eupurate. Apot ngulu kingarakis kesi ka akilip alokai a Akuj. Arumoret a ngakiro kanguna kadaang, pot ngikarikok a Ngisirael ngiche nikang katolimokis anyong tamasi, “Awout Ngisirael, ka ngimurok ta Ngilawi atiakar alotunga a ngakwapea ana idunyatar kesi ana enyaritae Amon, ka Moab ta Misiri. Awout tani atiakar ani a Ngikanaan, ka Ngiiti, ka Ngiperes, ka Ngiebus ta Ngiamor. Esubete kesi ngakiro nakikadakinete loger a ngitunga a akwap kangina. Kainyo euta Ngiyaudi ngaberu na ngibukui alugelayek kangulu. Enyasut ngakiro nguna ngitunga a Akuj lu italeuno. Ngikarikok a Ngisirael ka ngikaweikinak a arieng kesi eroko noi anakisech kangina.” Ani eirari ayong ngakiro nguna, abu atochilichilia ngiworui kang ariangakina, atorut ngitim kang lua akou ka lua abokony sodi eboikin kwap ealolongi. Eboikin ayong neni ealolongi tanang esaa lo epeyoore akipeyos naka ebong. Kisiakis ngitunga achunakin keriam ayong, ngitunga daang lu abulit kotere ngakiro na alimuni Akuj a Isirael kotere ngasechesea a ngitunga alusek abongunete anakwap anache. Ani esaa lo a akipeyos anaka ebong, atonyou ayong anisek ealolongio eringa anapit ngiworui kang luchilichila, atoriedik etorwaa ngakan kang nia Ekapolon Akuj ana erai Akuj kang, elip atama, “Ee Akuj kang, ketimit ayong tani akikeun ngakonyen kang alongaren kon katokienyik iyong. Edilakin ngasechesea kosi aoyaketa eporosi ngakies kosi, aoyaketa anang nadis. Napei alorwa alu kata apaakosi tanang tokona, kisechak sua ngitunga kon iyong lokojokon. Kotere ngasechesea kosi, ka na a ngikapolok kosi ta ngimurok kosi, kidwang ngikapolok a ngakwapea anagelayek sua. Kiar kesi sua, kitokokoeasi nabo kitoriko atoliworos ngirikon. Kiruma sua ngileech lokojokon tanang tokona. Ee Ekapolon Akuj na irai Akuj kosi, kiinak tokona iyong sua ajakaanut kon a ngirwa a ngidikidio, sodi kimiek iyong ngiche kosi kipiyanun ani kiraakar ngikedalak atoloma nakwap na italeuno naga akaalimon. Kilakak iyong sua ani kiraakar ngikedalak kiinak akiyar nakitetet. Kirai kolong sua ngikedalak, nakaneni ibu iyong nyikiisik sua kirai ngikedalak. Ibu iyong kitojok ngitai a ngikapolok a Persia anikosi, sodi kitachamakis kesi sua kiyari ka akiduk akai kon na kolong abu kinyasun, nabo kiriwokis sua awas kanege alo Yuda ka Yerusalem. “Ani tokona, ee Akuj kosi, anukiro kilimuni arumoret kanguna kadaang? Kainyo nyiwapa sua ngakiro na kolong kidungokini iyong sua kisitoru nia ngikadwarak alu eraakasi ngikasubak etich kon, ibala, ‘Akwap na iloose esi akilom, nyitaleuno kainyo ileleba ngitunga lu elomito neni, ngakiro naaronok nakikadakinete esiriama te! Aloger kangolo, nyiiutasi ka ngitunga ngulu nabo tochoito ingarakinete kesi kisikokinos kori toriamut ngakiro naajokak, sodi toriamuneta esi agogongu ka ngakiro naajokak a akwap kangina, ani erumor toisikineta ngalesea kus toliwor akech jik.’ Tani kiriamunit sua eriras kotere ngasechesea kosi naaronok kisubi, kiyeni atamar eriras lo kiinak iyong sua, ee Akuj kosi, edit noi nyeriyan ka akisech kosi, nakaneni kimiek iyong sua tani lupiyayek kiyari. Kikokini tokona sua ai kingeri ngitalio kon sodi eutas ka ngitunga luaronok lugu? Ani kisubak sua kongina, ingoi iyong lokojokon kitomunya sua jik nyiidong tani ipei eyari. Ekapolon Akuj na irai Akuj a Isirael, irai iyong na itenoono, nakaneni kimiek iyong sua kiyari. Kilimorit sua akisech kosi anikon, kiyeni atamar nyitemokino sua kiponi ngaren kon.” Esaa lo elipitor Esira, tolimonori ngasechesea, ka akigoro, kibusonokin kwap alongaren akai a Akuj, apot Ngisirael, ngikiliok ka ngaberu ta ngide, kiriama ngesi igorosi lokojokon. Abu Chekania lokookeng a Yeyel lo a emachar a Elam tolimok Esira tama, “Kichwangak sua anupit kosi ani a Akuj ani kiusea ngaberu a ngakwapea anache. Ani kaneni dang, eringa Ngisirael eyei akigieno. Ejoikinit tokona sua kikongi ani a Akuj yok atamar kitwarakini ngaberu nguna ka ngide kech. Kisubakini sua ngakiro nakilimokinete iyong ka ngitunga luche lu erimasi ngitalio a Akuj. Kisubakini ngakiro na esaki Etal a Akuj. Tonyou tokona nugu kainyo erai etich kon sodi ewapakisi sua ngakiro kon. Tonyou robo totitinyer, tosubak nguna.” Sodi kisiak Esira akisikong ngikarikok a ngimurok ka lua Ngilawi ta lua Ngisirael, kikongo atamar kisubakini ngakiro na alimuni Chekania. Sodi torotok Esira alongaren akai a Akuj, tolot kai a Yewanan alo arai lokookeng a Eliachib, sodi toper neni akwaar kiiya kiwala ialolongi ani peanupitotor ngitunga lu abongunete anarikonot Akuj. Emam ibore anyam ngesi kori amat. Apon kikeunae akiroit alo Yerusalem kadaang ka Yuda atamar ejoikinit ngitunga daang lu abongunete anarikonot iriamiriamete Yerusalem, loger lo adungunioto ngikaweikinak a arieng ka ngikasukou. Itwaan daang nicha nyenanguni neni a ngirwa a nguuni, edemario ibore keng daang, sodi tojongo araakau ipei a ngitunga alu abongunete. Alorwa aluuni kangulu, akolongit na ngatomwon-arei a elap alo a ngikan-koomwon, apot ngitunga daang lu alomito nakwap a Yuda ka Benjamen pot Yerusalem tochunakin naro a akai a Akuj. Atepi akiru natikaalan. Kotere akatorot ka eger lo amunokinitor itwaan daang ekiriam, amaranete ngitunga. Tonyou Esira lo arai emuron kisuruor kesi. Tolimok tama, “Iliworosi esi lu nyikimunoi, iuta ngaberu a ngakwapea anache. Kotere nguna, iatakis esi akisech a Ngisirael. Tolunga tokona ngasechesea kus ani a Ekapolon Akuj ana erai Akuj kata apaakus, sodi tosuba ngakiro na ejoikinito ngesi. Totiakas ka ngitunga a ngakwapea anache lu elomito nakwap yok, sodi kitwarakis ngaberu kus na ngakwapea anache.” Sodi kiremasi ngitunga daang tatachut tamasi, “Kisubakini sua ngakiro nacha ilimuni iyong daang.” Nabo kiatakis tamasi, “Elalak ngitunga noi totepi akiru nakaalan. Nyikipedori sua akiwo anikalapatan loger logo, tarai meere ngakiro nugu na erumorosi a akolongit a apei kori a ngirwa a ngiarei, kainyo kisechit sua lukaalak anakiro kanu. Kimiek ngikaweikinak a arieng kosi kidongo Yerusalem tosubakis ngakiro nguna. Sodi itwaan daang ni erikit aberu a akwap anache, bu esaa lo etiakakinio, kirukut ka ngikarikok ta ngikatubok ngakiro lu ere keng, tanang ni edaunor angoit a Akuj aniyok.” Emam itwaan abu tonger ngakiro nguna, pearai Yonasan lokookeng a Asael ka Yaseya lokookeng a Tikipa make. Mechulam ka Chabesai lu eraakasi Ngilawi kesi ebakito ka kesi. Apot ngirikon lu abongunete ngulu tachamut ngakiro nguna. Sodi toseu Esira lo erai emuron ngitunga alokiding ngikapolok a ngimacharin, dio akigir ngirora kech. Akolongit na ekingaren a elap alo a ngitomon, kisiakis kesi etich kech lo a akingich ngakiro nguna. Adaunet a ngilapio a nguuni, torumosi kesi akingich ngakiro a ngikiliok kadaang alu arikito ngaberu a ngakwapea anache. Ngirora a ngikiliok alu arikito ngaberu a ngakwapea anache kesi lugu. Eraakasi lugu ngirora a ngimurok, imarunitae alomacharin kech. Alomachar a Yochua ka talokaatokeng lu araakasi ngide a Yeosadak, kesi Maaseya, ka Elieser, ka Yarib ta Gedalia. Apot kesi tolimut atamar kilaki ngaberu kech. Kipeyoto kesi emesek toliwor akipeyos a akisech kech. Alomachar a Imer, kesi Anani ka Sebadia. Alomachar a Arim, kesi Maaseya, ka Elija, ka Chemaya, ka Yeyel ta Usia. Alomachar a Pachur, kesi Elioenai, ka Maaseya, ka Ichimael, ka Nesanel ka Yosabad ta Elasa. Ani a Ngilawi, kesi Yosabad, ka Chimei, ka Kelaya (enyaritae ekiro eche Kelita), ka Pesaya, ka Yuda ta Elieser. Alokaeok, ngesi Eliachib. Ani a ngiketeok a akai a Akuj, kesi Chalum, ka Telem ta Uri. Alotunga aluche, alomachar a Paroch, kesi Ramia, ka Isia, ka Malikija, ka Mijamin, ka Eleasar, ka Malikija ta Benaya. Alomachar a Elam, kesi Matania, ka Sekaria, ka Yeyel, ka Abudi, ka Yeremos ta Elija. Alomachar a Satu, kesi Elioenai, ka Eliachib, ka Matania, ka Yeremos, ka Sabad ta Asisa. Alomachar a Bebai, kesi Yewanan, ka Anania, ka Sabai ta Asilai. Alomachar a Bani, kesi Mechulam, ka Maluk, ka Adaya, ka Yachub, ka Cheal ta Yeremos. Alomachar a Paas Moab, kesi Adina, ka Kelal, ka Benaya, ka Maaseya, ka Matania, ka Besalel, ka Binui ta Manase. Alomachar a Arim, kesi Elieser, ka Ichija, ka Malikija, ka Chemaya, ka Chimeon, ka Benjamen, ka Maluk ta Chemaria. Alomachar a Achum, kesi Matenai, ka Matata, ka Sabad, ka Elipelet, ka Yeremai, ka Manase ta Chimei. Alomachar a Bani, kesi Maadai, ka Amuram, ka Uel, ka Benaya, ka Bedeya, ka Kelui, ka Pania, ka Meremos, ka Eliachib, ka Matania, ka Matenai ta Yaasu. Alomachar a Binui, kesi Chimei, ka Chelemia, ka Nasan, ka Adaya, ka Makinadebai, ka Chachai, ka Charai, ka Asarel, ka Chelemia, ka Chemaria, ka Chalum, ka Amaria ta Yosep. Alomachar a Nebo, kesi Yeyel, ka Matisia, ka Sabad, ka Sebina, ka Yadai, ka Yoel ta Benaya. Arikito ngikiliok ngulu daang ngaberu na ngakwapea anache. Apot kesi talaka ngaberu nguna, sodi kitwarakis ka ngide kech. Eraakasi ngakiro na isisaunitae kane na asubakini Neemia lokookeng a Akalia. Elap lo a Kislep ekaru lo a ngitomwon-arei lo araakar Artachasta ekapolon a Persia, ayei ayong Neemia lore a Susa lo arai ere loapolon. Abu epei kata lokaatokang lo anyaritae Anani todolu alo Yuda erukito ka ngitunga ngiche. Engit ayong kesi ngakiro a Yerusalem ka ngakiro a Ngiyaudi aluche kosi abongunete anarikonot alo Babilonia. Katolimokis kesi ayong tamasi, “Ngiyaudi lukolong abuchun anarikonot tobongut nakwap, eyakasi lochan kirumito ngileech. Aukor awas a Yerusalem, nabo anomiasi ngidorin keng akim.” Ani eirari ayong ngakiro nguna daang, abu eboikin ekalou. Egor ayong atosutonok a ngirwa alukaalak nyimuja. Elip Akuj atama, “Ekapolon Akuj na irai Akuj a adis! Ipol iyong, nabo irai naketimon. Irichakinit iyong achamunet kon ka amina na nyedaun kotere ngulu kiminasi iyong ka akiwap ngakiro na idunguni iyong. Todeta akit kon Ekapolon Akuj. Kiira akilip kang na elipitor akwaar ka apaaran kotere Ngisirael lu eraakasi ngikasubak etich kon. Alimorit ayong atamar kisechit sua Ngisirael. Iteni dir, kisech ayong ka taapaakang. Kisubea sua iyong ngakiro naaronok noi nabo nyiwapa ngakiro nakidungok iyong sua. Nyirichakina sua ngitalio lu kolong kiinakini iyong sua kisitoru nia Musa alo erai ekasuban etich kon. Kitamu tokona ngakiro nakolong idungokini iyong Musa ibala, ‘Ani pekimunokis esi Ngisirael ayong, kapetakini ayong esi lobukui luche. Nakaneni ani kibongokis esi ayong tosuba ngakiro na adunguni ayong, tani bo kipetara esi lowaitin daang a akwap, kabuuni ayong esi ni aseu ayong atamar kelipeenere ayong.’ “Ekapolon Akuj, eraakasi lugu ngikasubak etich kon a ilope. Iyuuni kolong iyong kesi a apolou kon anaationon ka ngikilinga kon. Todeta akit kon kiira akilip kang. Kiira tani ngakilipasinei a ngikasubak etich kon alu eminasi arima iyong. Kitojok ngakiro kang akolongit naga, sodi kitiliwo ekapolon logo lo a ngisien anikang.” Ngirwa ngulu, ayong etamaseene ekapolon emuna. Elap lo anyaritae Nisan, ekaru lo a ngitomwon-arei lo araakar Artachasta ekapolon, akolongit apei na emujea Artachasta, abu ayong ainak ngesi emuna. Aringa ngesi nyingolikina ayong asinyit a ache. Sodi kengit ngesi ayong tama, “Nyo isinyitor iyong, tarai bo nyideaka? Abe eyakasi tokona ngon ngakiro kinomito iyong etau!” Katobul ayong noi. Atatachu atama, “Ekapolon toyei jik! Nyo bo peasinyo na enyasunor Yerusalem ni enukakinitae taapaakang, nabo enyasu akim tani ngidorin keng?” Kengit ekapolon ayong tama, “Nyo tokona isaki iyong?” Elip ayong Akuj a adis. Abu ayong atolimok ekapolon atama, “Ani kijoikinito iyong ngakiro kang tasaki akingarakin, kimiekinae ayong atolot nakwap a Yuda, lore lo enukakinitae taapaakang, sodi atobongok akiduk ere ngolo.” Kengit ekapolon ayong tama (ebooyi aberu keng alo diyete keng), “Ngirwa ngiai iperori iyong inaa? Ori ibongunio iyong?” Tachamu ngesi ngakiro kang sodi atolimok ayong ngesi atamar abonguni ori. Atolimok ayong ekapolon atama, “Ekapolon, ani kijoikinito iyong ngakiro kang, kelipit atamar kigirak ngabaruae ayaa lokaweikinak a ewae alo eyei too angolol a Eupurate sodi katachamakineta ayong etori neni atolot nakwap a Yuda. Kigirak nabo abarua ayaa nia Asap lo eweikinit ngamon a ekapolon, sodi kainak ayong ngakito na adukio ngidorin a awas anakaagongon a akai a Akuj, ka ngakito naduket awas a ere ta naduket akai na alomi ayong.” Tacham ekapolon ngakiro kang daang kainyo kirukit ayong ka Akuj. Toseu ekapolon ngikarikok a ngasigerea ngiche ka ngikameak ngangolei, sodi erukosi ka ayong. Atorotok ayong ani anangi too Eupurate, ainak ngikaweikinak a ewae kangolo ngabaruae a ekapolon. Sanbalat lo abunit alo Bes-oron, ka Tobia lo arai ekaweikinan a arieng a Amon, na eirareta atamar asubakinea ayong Ngisirael ngakiro naajokak, apot kesi tolemasi lokojokon. Atolot ayong Yerusalem, atoper inaa ngirwa nguuni. Amam itwaan alimokinit ayong ngakiro na asaki Akuj kang ayong atosubea Yerusalem. Ani enangi kiding akwaar, atonyou ayong atopudo nikalapatan, atoriko ngirukitos kang ngidikidio. Emam ibarasit iche kirikit sua pearai esikiria lo adokit ayong. Ani eringa akwaar, atorotok ayong alore etor lokidor a Adipo lo eyei too, atolot kuju eporo eitanit a Emun apolon, atolot lokidor a Asakatan. Ani alosi, eseme ayong ngawasea a Yerusalem na aukoro ka ngidorin lu anomiarit akim. Ani enangi kide ere, atolot kwap lokidor a Eitanit ka nabwel a Ekapolon. Tongopik esikiria lo adokit ayong ni itori. Abu ayong nadipo a Kidiron atolot eseme awas. Ani erumor atobongu etoru nisek abunio etoro lokidor a Adipo atobongo lore. Ngikaweikinak a arieng daang lu kaneni, amam lo ayeni ni alosit ayong kori ibore ni asubi ayong. Nabo emam ngakiro abu ayong atolimok Ngiyaudi, ka ngimurok a Akuj, ka ngikarikok ta ngikaweikinak a arieng, kori itwaan cha daang ni adikino elomari lotich ngolo. Nakaneni atolimok ayong kesi atama, “Kingolikis mono esi ngichan lu kianyu ngoni ani enyasunor Yerusalem ka ngidorin keng lu anomia akim! Potu atodukokisi ngawasea a ere sodi totuborotor ngileech aniyok.” Abu ayong atolimok kesi eger lo kirukitor ayong ka Akuj ka eger lokengarakinea ngesi ayong ta ngakiro nakalimokini ekapolon ayong. Tatachut kesi tamasi, “Tonyoutu esiakisi abongokin akiduk!” Tonyout kesi esakete akisiakin etich. Ani iirarete Sanbalat, ka Tobia lo arai ekaweikinan a arieng ta Emwarabut eche anyaritae Gechem, iirarete ngakiro na kisaki sua akisub, apot kitokianatar sua ka akimeny ebalasi, “Abe nyo mono tokona isubete esi? Isakete esi akinger ekapolon a?” Atatachak ayong kesi atama, “Kipwatakini sua Akuj na adis ngakiro naajokak. Kirai sua ngikasubak etich keng, kisiakini akiduk. Nakaneni emam esi ibore kus eyei Yerusalem kori nyikimaritae esi alotalio a Yerusalem.” Adukio awas a Yerusalem kona. Apot Eliachib lo arai emuron loapolon ka ngimurok luche toduko ekidor a Emesek, kitaleut sodi kitowaa ngidorin keng. Kitaleut kesi awas napei alopem a Amiat tanang lopem a Ananel. Toduko ngitunga a ere a Yeriko ewae lo atupit ngolo. Toduk Sakur lokookeng a Imuri ewae lo atupit ngolo. Toduk emachar a Asenaa ekidor a Ekolia. Kiwaakis kesi nakito ngakiganget na akitowo ngidorin, sodi kirepakis ngasua naenet ka ngasua nakiriwokina togolere ekidor. Toduk Meremos lokookeng a Uria tarai etatait a Akos ewae lo atupit ngolo. Toduk Mechulam lokookeng a Berekia tarai etatait a Mechesabel ewae lo atupit ngolo. Toduk Sadok lokookeng a Baana ewae lo atupit ngolo. Ngitunga a ere a Tekoa kesi adukete ewae lo atupit ngolo, nakaneni apot ngijakaanotin a ere towout akisub etich lo a ngakan lo atiakakinito kesi ngikaweikinak etich. Apot Yoyad lokookeng a Pasea ka Mechulam lokookeng a Besodeya toduko ekidor a Yechana. Kiwaakis kesi ngakito nakiganget, ka akitowo ngidorin sodi kirepakis ngasua naenet ka ngasua nakiriwokina togolere ekidor. Apot Melatia lo ere a Gibeon ka Yadon lo a ere a Merenos ta ngitunga a ere a Gibeon ka lua ere a Misipa, apot toduko ewae lo atupit ngolo tanang ni alomit ekaweikinan a ewae lo alo too Eupurate. Usiel lokookeng a Araya lo arai eketiakan egolit ngesi aduki ewae lo atupit ngolo. Anania lo asubeene ngamieta nakaakunyok ngesi aduki ewae lo atupit ngolo tanang nawas nalangir. Repaya lokookeng a Ur, lo apolokinit epewae Yerusalem, ngesi aduki ewae lo atupit ngolo. Yedaya lokookeng a Arumap ngesi aduki ewae lo atupit ngolo, lo akienyikina ka akai keng. Atuch lokookeng a Achabneya ngesi aduki ewae lo atupit ngolo. Malikija lokookeng a Arim ka Achub lokookeng a Paas Moab kesi adukete ewae lo atupit ngolo ka epem lo a ngikenoi alukimaet akimuj. Chalum lokookeng a Aloech, lo apolokinit ewae loche a Yerusalem, ngesi aduki ewae lo atupit ngolo. (Engarakinito tanakookeng ngesi etich.) Anun ka ngitunga lu alomito lore a Sanoa kesi abongokinete akiduk ekidor a Adipo. Kiwaakis kesi ngidorin, kirepakis ngasua naenet ka ngasua nagoliet ekidor. Tobongonokis akiduk awas na arai ngamitae 440, tanang lokidor a Asakatan. Malikija lokookeng a Rekab, lo apolokinit ewae lo a Bes Akerem, ngesi aduki ekidor a Asakatan. Kiwaak ngesi ngidorin sodi kirepak ngasua naenet ka ngasua nakiriwokina togolere ekidor. Chalum lokookeng a Kolose, lo apolokinit ewae loa Misipa ngesi aduki ekidor a Eitanit. Toburuchia ngesi erot lo elomarere, sodi kiwaak ngidorin ka akirepakin ngasua naenet ka ngasua nakiriwokina. Ani anabwel a Chela, todukok ngesi awas kibaka ka amana a ekapolon, tanang na etiyaarere lore a Daudi. Neemia lokookeng a Asibuk lo apolokinit ewae loa Betsur, ngesi aduki ewae lo atupit ngolo, tanang naliel a Daudi, tanang nabo tani nabwel ta ni alomito ngasigerea. Ngilawi lugu kesi abongokinete akiduk ngiwaitin lugelagelae a awas. Reum lokookeng a Bani ngesi aduki ewae lo atupit ngolo. Achabia lo apolokinit epewae Keila ngesi aduki ewae lo atupit ngolo, eweikinit ewae keng. Bapai lokookeng a Enadad, lo apolokinit ewae loche a Keila, ngesi aduki ewae lo atupit ngolo. Eser lokookeng a Yechua, lo apolokinit Misipa, ngesi aduki ewae lo atupit ngolo, ngaren ni ikachio ngiboro lujiet tanang ni erear awas. Baruk lokookeng a Sabai ngesi aduki ewae lo atupit ngolo, tanang ni elomarere kai a emuron aloapolon alo enyaritae Eliachib. Meremos lokookeng a Uria tarai etatait a Akos, ngesi aduki ewae lo atupit ngolo tanang lowae lo esal a akai a Eliachib. Ngimurok lugu kesi adukete ngiwaitin lugelagelae a awas Ngimurok lu aponito alowaitin alu idunyatar Yerusalem, kesi adukete ewae lo atupit ngolo. Benjamen ka Achub kesi adukete ewae lo atupit ngolo, lo akienyikina ka ngakais kech. Asaria lokookeng a Maaseya tarai etatait a Anania, ngesi aduki ewae lo atupit ngolo lo ayei ngaren akai keng. Binui lokookeng a Enadad ngesi aduki ewae lo atupit ngolo napei alokai a Asaria tanang ni ekudunor awas. Palal lokookeng Usai ngesi aduki ewae lo atupit ngolo, isiakinit ani ekudunor awas ka epem a akai a ekapolon diyete akai a ngasigerea anakeyokok. Pedaya lokookeng a Paroch, aapei ka ngikasubak etich a akai a Akuj lu alomito Opel, kesi adukete ewae lo atupit ngolo, tanang wache alo kide ni ekienyikina ka ekidor a Ngakipi ka epem lo irereere iyokiyo akai a Akuj. Ngitunga a ere a Tekoa kesi adukete ewae lo atupit ngolo, erai ewae lo a ngiarei edukete kesi, napei ani ekienyikina ka epem loapolon iyokiyere akai a Akuj tanang nawas na eyei diyete Opel. Atiakaru ache a ngimurok ngesi aduki ewae lo atupit ngolo, toten kwap napei alokidor a Angole, toduk itwaan daang ewae lo ekienyikina ka akai keng. Sadok lokookeng a Imer ngesi aduki ewae lo atupit ngolo, lo ekienyikina ka akai keng. Chemaya lokookeng a Chekania, lo arai ekeyokon a ekidor alo a Kide, ngesi aduki ewae lo atupit ngolo. Anania lokookeng a Chelemia ka Anun lokookeng a Salap lo a ngikan-kapei, kesi adukete ewae lo atupit ngolo, erai ewae lo a ngiarei edukete kesi. Mechulam lokookeng a Berekia ngesi aduki ewae lo atupit ngolo, lo ekienyikina ka akai keng. Malikija lo arai eketiakan egolit ngesi aduki ewae lo atupit ngolo, tanang kai na ayakasi ngikasubak etich a akai a Akuj ka ngimuchurus, na ebakito ka ekidor a Mikipad diyete amaniyat na eyei kidiama ni ekudunor awas alowae alo alokwap kide. Ngiketiakak egolit ka ngimuchurus kesi adukete ewae lo esal, napei anamaniyat ana eyei ni ekudunor awas tanang lokidor a Emesek. Na eirarea Sanbalat atamar kisiak sua Ngiyaudi abongokin akiduk awas, abu tongo noi kimeny sua alongaren ngirukitos keng ka ngasigerea a Ngisamariae. Tolim ngesi tama, “Abe nyo mono esubete Ngiyaudi lupalag lugu? Abe esakete abongokin akiduk ere a? Itamito kesi atamar ani kipeyoo ngakipeyos kirumori etich a akolongit a apei a? Epedorete kesi asubun ngamoru naduket alongame alo inomitae a?” Awei Tobia lo ekitela a Ngiamon alo diyete Sanbalat. Abu kiatak tama, “Awas ani epedorete lugu akiduk? Epedori tani kwee aukor ketama ekekini!” Elip ayong Akuj atama, “Ee Akuj, kiira eger lo kikianatar kesi sua! Kimiek ngimeny lukech ngulu tobongokis kesi ngikulepek. Kimiek kesi todemarae ngiboro lu etingito daang sodi torikoroe nakwap nagela toliworos ngirikon. Nyiirimak kesi anakiro anaaronok esubete kesi, nabo wara ngasechesea kech nyiikisar alongaren kon kainyo eyenya kesi ngikadukok!” Kipot sua atoduko awas kitemokin anus a aoyau ana alokidiama, kainyo erichasi ngitunga alotich. Sanbalat, ka Tobia, ka ngitunga a akwap a Arabia, ka lua Amon, ta lua Achidod, apot kiirasi atamar erubakinito ngitunga edukete awas a Yerusalem nabo agol ngipukei lu ayakasi nawas. Apot kesi tongoa noi. Totuko kesi daang aponere akitijikin ngitunga a Yerusalem ka ayaun ekurikur lotunga. Nakaneni kipotu sua elipa Akuj kosi, sodi ewaakisi ngasigerea na iteete ere akwaar ka apaaran. Tamasi ngitunga a Yuda, “Alilimiyosi sua ngawat ani kiwokitor eegos loapotion, toringa engame lokiwoko elal. Kikokini sua kiduki awas akolongit naga ai?” Apot ngimoe kosi tamasi, “Nyepedorete kesi akiyen kori akingolikin ngoni tanang ni kituumwokinea kesi ataara sodi tasalu etich kech.” Ngiyaudi lu alomito kiding kech, aponeenete jiik akichikichik sua ebalasi, “Epote kesi alowaitin kadaang alu elomito, kitijikis ngoni.” Sodi atokorak ayong ngitunga ngilengea, ka ngakwaaras ta ngimalea, dio atorek kesi a ngimacharin kech towaa kayaaye awas alowaitin alu aringa nyerumoro akiduk. Ani engolikini ayong atamar aema ngitunga, atolimok kesi ka ngijakaanotin a ere ta ngikaweikinak atama, “Nyieam ngimoe yok. Kitamutu eger lo eraakar Ekapolon Akuj na Epol tarai naketubulon! Tojwoto kotere ngitunga kus, ka ngide kus, ka ngaberu kus ta ngawiyei kus.” Kiirasi ngimoe kosi atamar kiyen sua ngakiro na atukito kesi, nabo toyena atamar etepenia Akuj ngakiro kech. Ani erumor atobongokisi sua daang akiduk awas. Akisiakin akolongit ngina jik, toliworos ngitunga kang epewae esubete etich, kiteto luche akwap enapito ngasua alorarumo totingito ngakwaaras, ka ngaupwala ta ngimalea a akau. Kibaka ngikarikok kosi alowae a ngitunga a Yuda, alu adukete awas. Tani ngitunga lu adakito ngiboro luduket, asubete etich a akan a apei, totingito ibore nijiet anache. Aenikinit itwaan ni aduki daang ekileng losiep keng toduki. Kirukit ayong jiik ka itwaan nikaraman elii. Atolimok ayong ngitunga ka ngijakaanotin ta ngikarikok kech atama, “Elal etich, epetakina wadaang. Kilonikin ngoni anawas. Napei iirareta esi elii eramio, tomotunos laalo kiya sua. Ejii Akuj yok alowae yok.” Sodi toliwor akolongit daang napei echilea nanyang tanang ni etakanuneta ngikanyer anadis, esubete epewae kosi etich towaas luche etingito ngakwaaras. Esaa ngolo, atolimok ayong ngitunga atama, “Ekarikon daang ka ngitunga keng, iteete ere a Yerusalem nakwaare, ani naparan tosuba etich.” Ayong ka ngirukitos kang ta ngikasubak etich kang ta ngasigerea naketeete ayong, nyebutoro ngiworui kosi tani nakwaare. Kitingit sua daang ngiboro kosi lujiet anakan. Ekisidi, apot Ngiyaudi lukaalak, lukiliok ka luberu, kitongolopa Ngiyaudi luche. Tolimut ngiche tamasi, “Aloger elalaketa ngitunga a ngawiyei kosi, kisaki sua akimuj nakaalan atoyareta.” Tolimut ngiche tamasi, “Kilokonyiyono sua ngamanat kosi ka ngimusabib ta ngakais ataanyuneta akimuj, nyikiar akoro.” Toyakas lu abalasi, “Kiar sua ngamichae atoriamuneta ngaropiyae na kitachea echur lo esaki ekapolon anamanat kosi ka ngimusabib. Kirai sua ngaakot ngapei ka Ngiyaudi luche. Ikwaan ngide kosi dang ka lukech. Nakaneni kitiliwo sua ngide kosi ngikedalak. Etiliwor tanakookosi ngakedalak. Emam ngakiro kipedori sua asubakin kainyo kidemar sua ngamanat kosi ka ngimusabib.” Ani eirari ayong angolopa ka akigoro kech, abu atongo noi. Atotiaku ayong nguna asubakini. Ekilak ayong ngijakaanotin ka ngikaweikinak atama, “Ichiekiarito esi talokaatokus!” Atochunak ayong ngitunga kingolikist ngakiro nguna sodi atolim atama, “Itemem ka eger lo kipedori ngoni, kipot atoliworos kigieli talokaatoyok lu ngoon agielara lotunga a ngakwapea anache. Itingakis tokona esi talokaatokus agielakin nikus alu iraakasi Ngiyaudi lurukitos kech!” Kililinga ngikarikok chek tongopikis ngakiro etachunete. Ani erumor atolim ayong atama, “Eroko ngakiro na isubete esi! Ejoikinit esi ikerete Akuj tosuba ngakiro na iyookino, sodi nyikimenyasi ngoni ngibukui lugelayek lu eraakasi ngimoe yok. Ayong ka ngirukitos kang ta ngikasubak etich kang, kimiek sua ngitunga earete ngamichae a ngaropiyae ka akimuj anikosi. Atajala tokona ngaropiyae na idokio daang nyeetach. Tajala ngamichae daang na earito kesi anikus, kerai ngaropiyae, kori akimuj, kori emuna, kori akimiet a ngikito. Tobuakisi kesi ngamanat kech, ka ngimusabib ka ngamanat a ngikito ta ngakais atipei!” Tolimut ngikarikok tamasi, “Kisubakini sua ngakiro na ilimu iyong. Kibuakini sua kesi ngiboro sodi nyikimichau ngamichae na earito kesi.” Atanyarau ayong ngimurok, sodi esikong ngikarikok alongaren ngimurok atamar esubakinete ngakiro na alimut. Sodi atalachu ayong aruba na anapit anaabor elakalakaa atolim atama, “Eger logo ngesi ilakalakaarea Akuj itwaan anikus ni ewouni asubakin ngakiro na alimu. Kidemari Akuj esi ngakais kus ka ngiboro kus daang, sodi kitoisik a ngakan anikirion.” Tolimut ngitunga daang lu ayakasi neni tamasi, “Aamen!” sodi kipuruut Ekapolon Akuj. Apot ngikarikok kirichakis ngakichikakinet kech. Ngikaru lutomon ka ngiarei daang lu araakar ayong ekarikon a ewae a Yuda, napei alokaru alo a ngitomwon-arei alo araakar Artachasta ekapolon tanang lokaru loa ngitomwon-uni ka ngiarei, nyenyama ayong ka ngiyenet kang akimuj na asakitae emuji arai ekarikon. Ngikarikok luche daang lu kengarenete ayong, apot kichana ngitunga tasaka ngaropiyae ngatomwon-omwon akolongit apei na egielere akimuj ka emuna lo epuritoe. Echiekiarito ngikasubak etich kech dang ngitunga. Nakaneni nyesuba ayong nguna kainyo akerit ayong Akuj. Abu ayong erichakin akiduk awas nabo emam ebarit abu atolema. Apot ngikasubak etich kang daang tolomasi lotich lo a adukuor. Esumujeene ayong jiik alomeesa kang ngitunga amiat apei ka ngitomwon-kan lu araakasi Ngiyaudi ka ngikarikok kech, toyakas ngitunga luche daang lu aponeenete nikang alobukui alukidunyet. Akolongit daang angoleene ayong emong epei, ka ngimesekin luajokak ngikan-kapei ta ngatapeno. Arai nacha edaunotor ngirwa ngitomon, atolem ayong emuna lo epuritoe lokitetet. Nakaneni ayeni ayong atamar ichanasi ngitunga noi. Kotere ngakiro nguna, abu ayong nyaasak ngaropiyae napalem elemanakinio ekarikon. Ee Akuj, kelipit iyong atamar kitam ngakiro naajokak daang na asubea ayong ngitunga lugu. Sanbalat, ka Tobia, ka Gechem Lomwaarabut ta ngimoe kosi luche, apot kiirasi atamar kirumo sua akiduk awas nabo emam ngipukei eyakasi nawas tani bo keringa sua nyiwaakina ngidorin dang. Apot Sanbalat ka Gechem tomeut ngitunga nikang ebalasi, “Bua eriamunos nadakar apei anaro a Ono.” Arai eger ngolo lo asaketa kesi akiwan ayong. Atomea ayong ngitunga alimokin kesi kona, “Epol etich lo asubi ayong noi, nyapedori ayong abunere inaa. Nyapedori ayong abunere nikus sodi towo etich.” Tomeut kesi ngitunga nikang ngameunet ngoomwon iruorosi ngapeikiro. Atomeana nabo ayong ngitunga nikech eruoro ngapeikiro. Sodi tomeu Sanbalat ngikasubak etich keng ameunet na ngakan etingito abarua na engaara. Egiritae abarua kona, “Eyakasi ngakiro na epetakina lobukui lu idunyare, alimu Gechem dang atamar ikote neni, na ebeyo isakete iyong ka Ngiyaudi akinger ekapolon. Ngakiro nguna kesi ibongokineto esi akiduk awas. Isaki iyong aliwor ekapolon, nabo iwaak iyong ngikadwarak ngiche Yerusalem lu elimorete atamar irai iyong ekapolon a Yuda. Elimokinio ekapolon Artachasta ngakiro nguna. Kalimokinit bocha atamar eriama ayong ka iyong eruoro ngakiro nguna.” Atomea ayong ngitunga nikeng atama, “Emam ngakiro na ilimu iyong erai iteni. Iyong ilope itongunit ngakiro nguna daang.” Asakete kesi akitubul sua itamito atamar elilimiyorete ngakan kosi atoisikisi etich. Nakaneni elip ayong Akuj atama, “Akuj, kitogogong robo tokona ngakan kang!” Atolot ayong nawi a Chemaya alo arai lokookeng a Delaya tarai etatait a Meetabel. Agolokinitoe ngesi kai keng. Katolimok ngesi ayong tama, “Kapana atoduka alowae alo italeuno alokai a Akuj sodi atogolo ngidorin, kainyo eponitae akiar iyong.” Atolimok ayong ngesi atama, “Meere robo ayong itwaan ni ematanar ka akiduk. Esibit iyong alosi ayong akiduk alokai a Akuj atoyuunor a? Nyapedori ayong.” Ani etamakini ayong ngakiro nguna, atoyen atamar meere Akuj emeunit Chemaya, pearai Tobia ka Sanbalat kesi ediakito ngesi bunio akisuruor ayong ngakiro nguna. Adiekio ngesi a ngaropiyae bunio akitubul ayong atosechea, sodi taanyuneta kesi alolom na keruorotor ayong niaronon ka akisurum ngileech. Elip ayong Akuj atama, “Akuj, kitamu ngakiro na asubakis Tobia ka Sanbalat, kirira kesi. Kitamu tani aberu na erai akadwaran na enyaritae Nodia ta ngikadwarak luche daang lu asakete akitubul ayong.” Arai ngirwa daang lu asubere etich ngitomwon-kan ka ngiarei. Torumor etich akolongit na ngatomwon-arei ka ngakan a elap alo enyaritae Elul. Ani iirarete ngimoe kosi lu ayakasi lobukui lu idunyare, atamar kirumo sua etich, kiruma ngileech kainyo ayenete atamar Akuj kosi kiturumori sua etich. Ngirwa ngulu daang, egiranakinosi ngikarikok a Ngiyaudi ka Tobia ngabaruae. Ngitunga lukaalak alo Yuda, ebakito alowae a Tobia kotere lokamuran keng lo arai Eyaudit, lo anyaritae Chakania lokookeng a Ara. Nabo lokookeng a Tobia lo anyaritae Yewanan, eusit nakookeng a Mechulam alo arai lokookeng Berekia. Kalimonokinete ngitunga ayong ngakiro naajokak daang na asubi Tobia, sodi tolimokis ngesi ngakiro daang nacha alimuni ayong. Toliwor Tobia kegiranakini ayong ngabaruae jiik, esaki akitubul ayong. Arumoret abongokin akiduk awas ka ngidorin keng daang, abu ayong atorek ngasigerea naketeok akai ka ngikaeok ta Ngilawi, atorek etich kech. Atoseu ayong lokaatokang Anani ka Anania lo arai ekarikon a ngasigerea a adukuor ana iteere ere, topolokis ere a Yerusalem. Arai Anania itwaan ni amunoi nabo akerit Akuj, amam itwaan iche ekwaanatar. Atolimok ayong kesi atama, “Nyeengaar ngidorin akwaar kiiya, tanang iwalari emonuni akolong. Togoloi ngidorin a ngasua eringa ngasigerea naketeok nyerotokino edooyori akolong. Toseutu ngasigerea nakeyokok ere alotunga alu elomito Yerusalem sodi kitebeanakis ngiche kech lowaitin lugelagelae, kirimo luche ngiwaitin lu eyakasi ngakais kech a ngikulepek.” Arai Yerusalem ere lotiapolon nakaneni akidioko ngitunga lu alomito neni. Aringa ngakais nakaalak nyeduko. Kesimuu Akuj ayong atamar atochunak ngikarikok ka ngikaweikinak a arieng, ta ngitunga sodi atoyen ekimar a ngitunga a ngawiyei kech. Ataanyu ayong akitab na egiritae ngitunga lukolong abongunete ekingaren anarikonot. Atorukau ngakiro nugu eyakasi nakitab ngina. Apot ngitunga lukaalak lusek arikitoe nakwap nagela a Babilon torotokis tobongosi Yerusalem ka Yuda, tolot itwaan daang lore keng. Alomito ngitunga a ngawiyei kech nakwap a Babilonia napei kolong arikio ekapolon Nebukadinesa kesi erai ngirikon. Anyaritae ngikarikok kech Serubabel, ka Yochua, ka Neemia, ka Asaria, ka Raamia, ka Naamani, ka Mordekai, ka Bilichan, ka Misiperes, ka Bigipai, ka Neum ta Baana. Ngirora a ngimacharin a Ngisirael lugu ka ekimar a ngitunga a emachar kadaang alu abongunete anakwap anagela. Lua Paroch araakasi 2,172. Lua Chepatia araakasi 372. Lua Ara araakasi 652. Lua Paas Moab (lu araakasi ngalesea a Yechua ka Yoab) araakasi 2,818. Lua Elam araakasi 1,254. Lua Satu araakasi 845. Lua Sakai araakasi 760. Lua Binui araakasi 648. Lua Bebai araakasi 628. Lua Asigad araakasi 2,322. Lua Adonikam araakasi 667. Lua Bigipai araakasi 2,067. Lua Adin araakasi 655. Lua Ater (ekiro eche ngesi Esekia) araakasi 98. Lua Achum araakasi 328. Lua Besai araakasi 324. Lua Arip araakasi 112. Lua Gibeon araakasi 95. Apot tani lukolong alomito taapaakech lorerea lugu tobongut. Lua Betleem ka Netopa araakasi 188. Lua Anasos araakasi 128. Lua Bes Asimapes araakasi 42. Lua Kirias Yearim, ka Kepira ta Beeros araakasi 743. Lua Rama ka Geba araakasi 621. Lua Mikimach araakasi 122. Lua Besel ka Ai araakasi 123. Lua Nebo aloche araakasi 52. Lua Elam aloche araakasi 1,254. Lua Arim araakasi 320. Lua Yeriko araakasi 345. Lua Lod, ka Adid ta Ono araakasi 721. Lua Senaa araakasi 3,930. Ngirora a ngimurok alu abongunete kesi lugu. Lua Yedaya (lu araakasi ngalesea a Yechua) araakasi 973. Lua Imer araakasi 1,052. Lua Pachur araakasi 1,247. Lua Arim araakasi 1,017. Ngimacharin a Ngilawi alu abongunete anarikonot kesi lugu. Lua Yechua ka Kadimiel (lu araakasi ngalesea a Odapia) araakasi 74. Ngikaeok alokai a Akuj (lugu araakasi ngalesea a Asap) araakasi 148. Ngiketeok a akai a Akuj (lu araakasi ngalesea a Chalum, ka Ater, ka Talimon, ka Akub, ka Atita ta Chobai) araakasi 138. Ngimacharin a ngikasubak etich alokai a Akuj lu abongunete anarikonot kesi lugu. Sia, ka Asupa, ka Tabaos ka Keros, ka Sia, ka Padon, ka Lebana, ka Agaba, ka Chalimai, ka Anan, ka Gidel, ka Gaar, ka Reaya, ka Resin, ka Nekoda, ka Gasam, ka Usa, ka Pasea, ka Besai, ka Meunim, ka Nepuchesim, ka Bakibuki, ka Akupa, ka Arur, ka Basilis, ka Meida, ka Aricha, ka Barkos, ka Sisera, ka Tema, ka Nesia ta Atipa. Ngimacharin a ngikasubak etich a Solomon alu abongunete anarikonot kesi lugu. Kesi Sotai, ka Soperes, ka Perida, ka Yaala, ka Darkon, ka Gidel, ka Chepatia, ka Atil, ka Pokeres Asebaim ta Amon. Ngalesea a ngikasubak etich alokai a Akuj, ka ngikasubak etich a Solomon, alu abongunete anarikonot arai ekimar kech daang 392. Ngimacharin 642 kesi apote alorerea alu enyaritae Tel Mela, ka Tel Aricha, ka Kerub, ka Adon ta Imer, nakaneni peapedorete kesi akidodiun atamar kirai ngalesea a Ngisirael. Ngimacharin ngulu kesi lua Delaya, ka Tobia ta Nekoda. Alomacharin a ngimurok, ayakasi lua Obaya, ka Akos ta Barisilai. (Apaakech a emachar kangolo ngesi kolong eusi nakookeng a Barisilai alo erai eka akwap a Gilead, sodi tanyarae kesi a ekiro alokamuran kech.) Apot kesi tasaka nikolong etoruni alesit kech nakaneni tongopik. Aloger akuruworea kesi akiyen nikolong etorunete, apon nyeechamun kesi eliworosi ngimurok a Akuj, tamarae nyitaleuno. Abu ekapolon a Ngiyaudi tolimok kesi atamar nyeenyam akimuj na epeyonokinio Akuj tanang eanyunio emuron lo epedori akingitun ngakiro a Urim ka Sumim.*g** Araakasi ngitunga lu abongunete anarikonot daang 42,360. Araakasi ngikasubak etich kech lukiliok ka luberu 7,337. Araakasi ngikaeok lukiliok ka luberu 245. Ayakasi kesi ngangolei 736, ka ngisikiria 245, ka ngikaala 435 ta ngisikiria ngiche 6,720. Apot ngikapolok ngiche a ngimacharin alu abongunete anarikonot tolemunos alotich a akiduk. Abu ekapolon a ewae kangolo tolem ngakiloi ngakan-kauni a egolit, ka ngatubwae ngatomwon-kan ta ngiworui lukooyak 530 lua ngimurok a Akuj. Tolemut ngikapolok a ngimacharin ngakiloi 168 a egolit ka ngakiloi 1,250 a ngakwangae. Tolemut ngitunga luche daang ngakiloi 168 a egolit, ka ngakiloi 140 a ngakwangae ta ngiworui lukooyak 67 lua ngimurok a Akuj. Ngimurok a Akuj, ka Ngilawi, ka ngasigerea a akai a Akuj, ka ngikaeok, ka ngitunga luche lukaalak, ka ngikasubak etich alokai a Akuj ta Ngisirael daang, apot toloma lorerea a akwap a Yuda. Ani enangi elap lo a ngikan-kaarei, toloma Ngisirael daang lorerea kech anakwap a Yuda. Akolongit na ekingaren a elap kangolo, tochunakinos kesi daang Yerusalem naro na alotooma ekidor a Ngakipi. Tolimokis kesi Esira lo arai emuron nabo esomat etal lokolong ainakini Ekapolon Akuj Ngisirael kisitoru nia Musa, tolimokis atamar yau akitab a etal. Sodi yau Esira akitab ni achunakina ngitunga, lukiliok ka luberu ta ngide lukoosok lu apedorete akiyen ngakiro. Abu ngesi kisomak etal anaro a ekidor a Ngakipi, napei nataparach tanang naparan lotingilan. Topupokis kesi daang lokojokon. Towo Esira anakito ana eraakasi ekicheeles anasek adukitoe kotere etich ngolo. Towaa ngikiliok lugu aloteten keng, Matisia, ka Chema, ka Anaya, ka Uria, ka Ilikia ta Maaseya. Towaa ngikiliok lugu alokedieny keng Pedaya, ka Michael, ka Malikija, ka Achum, ka Achibadana, ka Sekaria ta Mechulam. Esaa lo awaar Esira alongaren kaneni alokicheles erounit ngitunga, apot kesi daang tokienyikis ngesi. Napei cha anganyarea ngesi akitab, tonyout kesi daang towaa. Tolim Esira tama, “Kipuroe Ekapolon Akuj Namerikanyer na epol!” Kikeasi ngitunga daang ngakan kech kidiama tatachut tamasi, “Aamen! Aamen!” Toriediko kesi ilipito Akuj, tojuko ngireetin kech ngalup. Ani erumor tonyout kesi towaa anisek awaatar, sodi kitatamikis Ngilawi lugu kesi etal, Yechua, ka Bani, ka Cherebia, ka Yamin, ka Akub, ka Chabesai, ka Odia, ka Maaseya, ka Kelita, ka Asaria, ka Yosabad, ka Anan ta Pelaya. Kisomata kesi akitab a etal a Akuj sodi kisisaut ngakiro a etal topedoreta ngitunga akiyen. Ani iirarete ngitunga ngakiro na asakit etal, apot ngakiro nguna tonoma kesi sodi kisiakis akigoro. Kotere ngakiro nguna, apot Neemia lo arai ekapolon, ka Esira lo arai emuron a Akuj tarai eketataman a etal ta Ngilawi lusek eruorosi ngakiro a etal, tolimokis ngitunga daang tamasi, “Erai akolongit naga na italekinitoe Ekapolon Akuj na erai Akuj kus, warasi nyiisutonokis kori nyiigor. Kapesi nawi kimuja. Tolemutu akimuj kus ka emuna tomora ka ngulu nyetingito na itemokino. Italeuno akolongit naga ani a Ekapolon Akuj ana erai Akuj yok, warasi nyiialolong, kainyo alakara nakiinakini esi Ekapolon Akuj ngesi kitogogongi esi.” Apot Ngilawi kirimokis ngitunga isililingete tolimonokinete atamar nyiialolong akolongit na italeuno ngina. Sodi toloto ngitunga daang nawiyei kimuja tamaase elakara nabo tomora ka luche akimuj kainyo apot kesi toyena ngakiro na esomanakinio kesi. Akolongit na atupit ngina, apot ngikapolok a ngimacharin, aapei ka ngimurok ta Ngilawi toloto nia Esira esakete akitatama etal. Tongichut atamar edungunit etal lokolong esitoruni Ekapolon Akuj nia Musa atamar toloma ngitunga lokalea ngirwa lu esukukuu a ngikalea. Sodi todungut kesi ngakichikichiket nugu dio yaarae wadaang alo Yerusalem, ka ngirerea luche ta ngadakarin. Tamasi, “Kapesi lomukur tolemut ngaten a ngiberoch ka na ngikito akimiet, ka na lopara, ka na ngingolea ta ngikito luche luduket ngikalea, itemem ka ngakiro na igiritae Lotal.” Sodi tolemut ngaten todukioto ngikalea kidiama nilapat a ngakais, ka tooma nalaarin kech, ka tooma alaar a akai a Akuj, ka naro na eyei diyete ekidor a Ngakipi ta na eyei diyete ekidor a Epiraim. Ngitunga daang lusek abongunete anarikonot anakwap anagela, apot toduko ngikalea toloma. Asubakin ngakiro nugu na ekingaren naga, nakolong adangaror ngirwa lua Yochua lokookeng a Nun. Tojoikis ngakiro nugu ngitunga daang, talakaros. Napei anakolongit ana ekingaren tanang na esal, esomaenete kesi etal a Akuj. Tanyama kesi esukukuu ngolo a ngirwa a ngikan-kaarei, ani akolongit na ngakan-kauni, min akiriamariam na esal, loger lo esakitor etal. Akolongit na ngatomwon-arei ka ngoomwon a elap alopei kangolo, apot Ngisirael tochunakinos wapei, torono akimuj ka akinap ngiguniae, nabo tonukakis apua nakies kech. Kipakaros Ngisirael alotunga alu a ngakwapea anache kadaang. Towaa kesi sodi tolimosi ngasechesea kech ka ngasechesea kata apaakech. Apon kesi kisomakinae etal a Ekapolon Akuj ana erai Akuj kech a ngisaae a nguuni. A ngisaae a nguuni alu atupuunete, apot kesi tolimosi ngasechesea kech sodi kilipa Ekapolon Akuj na erai Akuj kech. Ayei ekicheeles a Ngilawi. Towaa Yechua, ka Bani, ka Kadimiel, ka Chebania, ka Buni, ka Cherebia, ka Bani ta Kenani kaneni. Apot kesi kilipa Ekapolon Akuj na erai Akuj kech, iremasi. Ngilawi lugu, Yechua, ka Kadimiel, ka Bani, ka Achabneya, ka Cherebia, ka Odia, ka Chebania ta Pesaya, kesi apot tolimut tamasi, “Tonyoutu kipuro Ekapolon Akuj na erai Akuj kus. Kipuro ngesi jik nakajik! Kipur itwaan daang ekiro keng lo a apolou, tani bo kemam ekipur a itwaan lo itemokin dang.” Ani erumor kilipa Ngisirael ngakilipasinei nugu. “Iyong bon Ekapolon Akuj ngesi irai Ekapolon Akuj. Isubuni kolong iyong adis, ka ngikanyer lu eyakasi nadis. Isubuni iyong akwap ka anam, ta ngiboro daang lu eyakasi nikech. Sodi kiteyar iyong kesi daang. Kilipito iyong ngajorei na adis. Iyong Ekapolon Akuj ngesi kolong iseuni Aburam, sodi kipudo ngesi alo Ur anakwap a Babilonia. Kilokony iyong ekiro keng toliwor Aburaam. Ibu iyong toyen atamar kimuno ngesi iyong, dio iyong tachamakinos ka ngesi. Kichikak iyong ngesi atamar iinakini akwap a Ngikanaan, ka na a Ngiiti, ka Ngiamor, ka Ngiperes, ka na a Ngiebus ta na a Ngigirigach, sodi toliwor akwap na elomete ngalesea keng. Ibu iyong kirichak akichikakinet kon kainyo irai iyong lo itenoono. “Ibu iyong kingolik aboliaro a taapaakosi alo Misiri. Nakikaloikinioto kesi iyong ananam a Chamu, ibu iyong kiira. Ibu iyong tosub ngakitoodikinet nakailiilok tosubea ekapolon, ka ngikapolok keng luuchik, ta ngitunga a akwap keng, kainyo iyeni iyong eger lo echiakiaritotor kesi ngitunga kon. Neni ngesi iriamunea iyong ekipur, lo kipurore iyong tani tokona. Kiwaak iyong erot kiding anam, kitoro ngitunga kon, sodi toriko iyong kesi kitoro nalup nakoonok. Apot ngakipi natuluk kilikosi ngulu ewapito kesi, loger lo esiporor amoru nituluk. Torik iyong kesi a apir a edou naparan, ani nakwaare kinwaku erot kech a akim. Alomoru a Sinai, ibu iyong totiyaun anadis, dio kisuruor ngitunga kon. Nak iyong kesi ngitalio luajokak, ka ngakitatamet naajokak. Kitatam iyong kesi kitaleut ngirwa kon a Sabato. Nak iyong kesi ngitalio kon, kisitoru nia Musa alo arai ekasuban etich kon. “Ani enyami kesi akoro, nak iyong akimuj na abuni anadis. Ani enyami kesi akure, nak iyong ngakipi na apote anataaba. Tolimok iyong kesi atamar tolemasi akwap nakolong ibala iyong iinakini kesi. Nakaneni apot taapaakosi toliworos lua ngiwog, nabo lukechanak, towout kesi akiwap ngakiro na idunguni iyong. Towout kesi akiwap ngakiro, kimuriakis kesi ngakiro nakolong isubi iyong daang. Kimuriakis kesi ngakiro nakailiilok, nakolong isubi iyong. Kotere ngiwog kech, apot kesi toseut ekarikon, lo ebuari kesi toliworos ngikedalak alo Misiri. Nakaneni irai iyong Akuj na irimanakini, irai iyong na ngisien ka amina, nyingoyeene iyong atipei. Etioko ngisien kon, nyeisikina iyong kesi. Apot kesi tosubut akuj, isikwaanito ka emong, sodi tamasi, ‘akuj nakolong kirikuni sua alo Misiri!’ Araakasi ngiyeny ngulu luaronok noi anikon! Nakaneni ibu iyong nyiisik kesi kaina anariet, kainyo etioko ngisien kon. Ibu iyong nyiilema edou kori akim, lu arikito kesi akwaar ka apaaran. Aloger ijokia iyong, ibu iyong kitatam kesi ngakiro na ejoikinit esubete. Nak iyong kesi akimuj nabe manna tanyama, ka ngakipi tamata. Alokaru alutomwon-omwon alu ayakatar kesi nariet, ibu iyong nak kesi ibore daang. Nyedaudauna ngiworui kech, kori nyebwo ngakejen kech. “Kisidwang iyong kesi ngibukui ka ngapolosio, ngakwapea na edunyatar kesi. Kidwanga kesi akwap na enyaritae Echibon. Sion ngesi arai ekapolon a akwap kangina. Kidwanga nabo akwap na enyaritae Bachan. Ogu ngesi arai ekapolon a akwap kangina. Nak iyong kesi ngide lukaalak, loger lo elalaketa ngikanyer lu eyakasi nadis. Kimiek iyong kesi toloma nakwap nakolong ichikakini iyong taapaakech. Apot kesi tolemasi akwap a Kanaan, Kidwang iyong ngitunga lu alomito neni. Kimiek iyong kesi tosuba ngakiro na asakete, tosubeta ngitunga a Kanaan ka ngikapolok kech. Apot ngitunga kon tolemasi ngirerea lu edukitoe ngawasea, ka ngalup naketurupunak ngikinyam, ka ngakais na eleleba ngiboro luajokak, ka ngakare nasek awaditae, ka ngikito a akimiet, ka ngikito a ageor ta ngamanat a ngimusabib. Tanyama kesi akimuj nacha asakete daang, totuma. Talakaros kesi kotere ngiboro luajokak daang lu iinakini iyong kesi. “Nakaneni towout ngitunga kon akiwap ngakiro kon, kitongero iyong. Tobobongo kesi etal kon. Taara kesi ngikadwarak lu echikichikete kesi, ebalasi kesi toreeunos nikon. Kiyenya kesi iyong jiik. Kotere nguna, kimiek iyong ngimoe kech idwangete kesi, sodi topolokis. Ani epete kesi lochan, kitanyarata iyong esakete akingarakino, sodi kiira iyong kesi anadis. Kotere ngisien kon luationok, inu iyong kesi ngikarikok, lu ayuunete kesi alomoe kech. Ani emini ekisil nakwap, tosecha kesi nabo. Dio iyong nabo kimiek ngimoe kech idwangete kesi. Kaneni dang, ani elungete kesi ngasechesea, sodi kikaloikis iyong, ibu iyong kiira kesi anadis. Toyuu iyong kesi jiik kotere ngisien kon luationok. Kichikichik iyong kesi atamar kiwapa ngakitatamet kon. Kotere ngiwog kech, apot kesi tongero ngitalio kon, lu eraakasi ani kiwap itwaan, eyari. Totumaaketa kesi nabo kichanaketa, tongero akiwap ngitalio kon. Ngikaru daang, kichikichik iyong kesi ititinyikinit. Tomea iyong ngikadwarak kon akichikichik kesi, nakaneni apot ngitunga kon nyiirasi, dio iyong kimiek ngibukui luche kidwanga kesi. Kaneni dang, kotere ngisien kon luationok, ibu iyong nyiisik kesi kori nyiimunya. Irai iyong Akuj naajokon na ngisien! “Ee Akuj na irai Akuj kosi, Ipol iyong! Irai iyong naketubulon, nabo tarai nakaagongon! Irichakinit iyong ngakichikakinet kon, nabo irai Akuj a ngisien noi. Napei alorwa alu kolong a ngikapolok a Asiria, tanang tani tokona, kiboliare sua noi! Aboliare ngikapolok kosi, ka ngikarikok kosi, ka ngimurok kosi, ka ngikadwarak kosi, ka taapaakosi ta ngitunga kosi daang. Wara robo nyikiditeik aboliaro ngina! Iyookino ngakiro nakirirator iyong sua. Irai iyong lokimunoi, tani kisechit sua. Taapaakosi, ka ngikapolok kosi, ka ngikarikok kosi ta ngimurok kosi, nyirichakina etal kon. Nyiirara kesi ngakiro na idungunit iyong, ka ngakichikakinet kon. Kotere apiaro kon, apot ngikapolok topolokis ngitunga kon, na alomitotor nakwap nakaaloman, naketurupunan ngikinyam, nakolong iinakini iyong kesi. Nakaneni apot kesi nyereeunosi anakisech kech, pot akisub etich kon. Kingolik a, sua tokona lugu kirai ngikedalak anakwap ana kolong iinakini iyong taapaakosi, isaki tanyama ageor ka ibore niajokon daang eyei neni. Kotere akisech kosi, aliwor ebari a akwap eka ngikapolok alu kolong iyauni iyong kitopolokis sua. Kisubeta kesi sua ka ngibaren kosi ngakiro nacha esakete, kiya sua lochan luationok!” Kotere ngakiro daang na asubakin, sua Ngisirael daang, kigir tokona nege atamar kichamakin ka iyong. Ngikapolok kosi, ka Ngilawi ta ngimurok, egirakis ngirora kech ka ngimacharin. Ekapolon Neemia lokookeng a Akalia ngesi esiauni kiwaak emachar keng, totupak Sedekia. Apot tani ngitunga lugu kiwaakis ngimacharin kech. Ngimurok a Akuj kesi Seraya, ka Asaria, ka Yeremia, ka Pachur ka Amaria, ka Malikija, ka Atuch, ka Chebania, ka Maluk, ka Arim, ka Meremos, ka Obadia, ka Daniel, ka Gineson, ka Baruk, ka Mechulam, ka Abija, ka Mijamin, ka Maasia, ka Biligai ta Chemaya. Ngilawi kesi Yechua lokookeng a Asania, ka Binui loa emachar a Enadad, ka Kadimiel, ka Chebania, ka Odia, ka Kelita, ka Pelaya, ka Anan, ka Mika, ka Reob, ka Achabia, ka Sakur, ka Cherebia, ka Chebania, ka Odia, ka Bani ta Benuni. Ngikarikok a ngitunga kesi Paroch, ka Paas Moab, ka Elam, ka Satu, ka Bani, ka Buni, ka Asigad, ka Bebai, ka Adonija, ka Bigipai, ka Adin, ka Ater, ka Esekia, ka Asur, ka Odia, ka Achum, ka Besai, ka Arip, ka Anasos, ka Nebai, ka Magipiach, ka Mechulam, ka Esir, ka Mechesabel, ka Sadok, ka Yadua, ka Pelatia, ka Anan, ka Anaya, ka Ochea, ka Anania, ka Achub, ka Aloech, ka Pila, ka Chobek, ka Reum, ka Achabuna, ka Maaseya, ka Aya, ka Hanan, ka Anan, ka Maluk, ka Arim, ka Baana. Sua Ngisirael, ngimurok ka Ngilawi, ka ngasigerea a akai a Akuj, ka ngikaeok, ka ngikasubak etich alokai a Akuj ta ngitunga luche daang lu epakarosi alotunga a ngakwapea anache iwapito etal a Akuj, aapei ka ngaberu kosi, ka ngide kosi lukoosok lu eyenete ngakiro, kichamakin tokona ka ngikarikok kosi atamar kiwapi etal a akuj, lokolong kiinakini Akuj kisitoru nia Musa alo arai ekasuban etich keng. Kiwapi sua ngakiro daang nakidungokini Ekapolon lo erai Akuj kosi. Nabo kirichakini ngitalio keng daang ka ngakiro na esaki ngesi. Kiliwor sua lu kilamam erai kisech akikong ngina. Nyikipotori sua tanakookosi kiuta ngitunga a ngakwapea anache lu elomito nakwap kosi, kori nyiusete ngide kosi tanakookech. Ani keyaut ngitunga ngulu ngalemet kori ibore iche cha daang agielakin sua akolongit na Sabato, kori akolongit cha daang na etal, nyikigieli sua anikech. Ekaru daang lo a ngikan-kaarei, nyikitae sua ngamanat, nabo kikisari ngamichae daang. Ekaru daang, elemuni itwaan daang anikosi ngakwangae ngagiramea ngakan tatachere etich lo esubio alokai a Akuj. Kilemuni sua ngiboro lugu kotere akilipeenen alokai a Akuj, amugati a etal, ngakipeyos a ngalemet na akolongit kadaang, ngibaren lu inomio akolongit daang eraakasi ngakipeyos, ngakipeyos na etal a ngasabatoi, ka ngirwa a esukukuu alo eanyungarere elap ta ngisukukui luche. Kilemuni ngakipeyos nache na etal, ka ngakipeyos na emookere akisech a Ngisirael ta ibore niche cha dang ni esakitae alokai a Akuj. Sua Ngisirael, ngimurok a Akuj ta Ngilawi, kirami ekura ekaru daang atoyeneta ngimacharin lu ejoikinit eyaunete ngakito na inomere ngakipeyos na ipeyonokinio Ekapolon Akuj na erai Akuj yok, loger lo esakitere Alotal. Ekaru daang, kiyaari sua ngalemet na ekingaren a ngamanat kosi toliworos ngalemunet, ka ageor na ekingaren na ekoniunete ngikito kosi. Ngide kosi lusapa lu ekingaren, kiinari sua ngimurok alokai a Akuj sodi etalekisi Akuj loger lo esakitere Alotal. Kitalekini sua Akuj tani ngitak a ngaatuk kosi lu ekingaren lukiliok, ka ngimesekin lukiliok, ka ngikaalei lukiliok lu ekingaren. Kiinari sua ngimurok alokai a Akuj ngakiria a ngalemet ana elemio ekingaren ekaru daang, ka ngalemunet kosi nache na eraakasi emuna, ka akimiet ta ngikitetio daang a ageor. Kiinari sua Ngilawi ngadekon a ngalemet kosi kainyo kesi idiauniyete ngadekon nguna anadakarin. Ngimurok lu eraakasi ngalesea a Aron, ejoikinit irukete ka Ngilawi esaa lo idiauniyere ngadekon. Esakitae Ngilawi tolemut alemunet apei anatomon a ngadekon kadaang ana idiauniyete kesi kikachakis lokerui a akai a Akuj tosubere etich alokai a Akuj. Esakitae Ngisirael ka Ngilawi yaasi ngadekon a ngalemet, ka emuna ta akimiet kikachakis lokerui a akai a Akuj, ka ni eyakasi ngakais a ngimurok alu eyakasi lotich, ka ngasigerea a akai a Akuj ta ngikaeok a akai a Akuj. Nyikipasakini sua akai a Akuj kosi. Apot ngikarikok toloma Yerusalem sodi apot ngitunga luche daang tarama ekura toseuneta awi apei anawiyei a ngatomon, na elosi tolom Yerusalem lore a Akuj. Toloma ngawiyei nache lorerea luche. Apot ngitunga kipuruut ngitunga luche cha daang lu alemunosi akilom Yerusalem. Alorerea aluche, apot Ngisirael ka ngimurok, ka Ngilawi, ka ngikasubak etich alokai a Akuj ta ngalesea a ngikasubak etich a Solomon, apot daang toloma lorerea kech, itwaan daang lowae keng. Ngikarikok a akwap a Yuda lu alomito Yerusalem kesi lugu. Lua ekitela a Yuda kesi lugu, Ataya lokookeng a Usia tarai etatait a Sekaria. Taapaakeng luche kesi Amaria, ka Chepatia ta Maalalel lu araakasi ngalesea a Peres, alo arai lokookeng a Yuda. Maaseya lokookeng a Baruk, alo arai lokookeng a Kolose. Taapaakeng luche kesi Asaya, ka Adaya, ka Yoyarib, ta Sekaria lu araakasi ngalesea a Chela alo arai lokookeng a Yuda. Ngitunga a ngalesea a Peres lu alomito Yerusalem, araakasi 468. Lua ekitela a Benjamen kesi lugu, Salu lokookeng a Mechulam, tarai etatait a Yoed. Taapaakech luche kesi Pedaya, ka Kolaya, ka Maaseya, ka Isiel ta Yechaya, ka Gabai ka Salai lu araakasi ngiyenet a Salu. Araakasi ngitunga a ekitela a Benjamen daang lu alomito Yerusalem 928. Yoel lokookeng a Sikiri ngesi arai ekarikon kech. Yuda lokookeng a Asenua ngesi arai ekapolon loochi alore. Ngimurok lu alomito Yerusalem kesi Yedaya lokookeng a Yoyarib, ka Yakin, ka Seraya lokookeng a Ilikia, tarai etatait a Mechulam. Taapaakeng luche kesi Sadok, ka Merayos, ka Aitub lo arai emuron loapolon a Akuj. Ngitunga a emachar kalo 822 kesi asubete etich alokai a Akuj. Ayei tani Adaya lokookeng a Yeroam tarai etatait a Pelalia. Taapaakeng luche kesi Amusi, ka Sekaria, ka Pachur ta Malikija. Ngitunga a emachar kalo 242 kesi araakasi ngikapolok a ngawiyei. Ayei tani Amachisai lokookeng a Asarel tarai etatait a Asai. Taapaakeng luche kesi Mechilemos, ka Imer. Ngitunga a emachar kalo 128 kesi araakasi ngasigerea nakajwok. Sabudiel lokookeng a Agedolim ngesi arai ekarikon kech. Ngilawi kesi Chemaya lokookeng a Achub tarai etatait a Asirikam. Taapaakeng luche kesi Achabia, ka Buni. Chabesai ka Yosabad lu araakasi Ngilawi luyenat lu aweikinito etich lo asubio anikalapatan akai a Akuj. Matania lokookeng a Mika tarai etatait a Sabudi alo arai alesit a Asap. Ngesi arikit ngikaeok a akai a Akuj aloeos alo abuanakinere Akuj alakara. Bakibukia arai ekengarakinan a Matania. Abuda lokookeng a Chamua tarai etatait a Galal alo arai alesit a Yedusun. Ngilawi 284 kesi alomito Yerusalem lo arai ere a Akuj. Ngasigerea a akai a Akuj na alomito Yerusalem kesi Akub, ka Talimon ta ngiyenet kech. Araakasi daang 172. Ngisirael luche daang, ka ngimurok lu edongito ta Ngilawi, apot toloma lorerea luche a Yuda, itwaan daang lowae keng. Apot ngitunga lu asubete etich alokai a Akuj toloma lowae a Yerusalem lo enyaritae Opel. Sia ka Gichipa kesi aweikinito kesi alotich. Itwaan ni aweikinit Ngilawi lu alomito Yerusalem ngesi Usi lokookeng a Bani tarai etatait a Achabia. Taapaakeng luche kesi Matania, ka Mika. Arai Usi eka emachar a Asap. Ngitunga a emachar kangolo kesi araakasi ngikaeok alokai a Akuj. Ayakasi ngitalio a ekapolon lu edodiunito eger lo eeotor ngikaeok alokai a Akuj akolongit daang. Pesaya lokookeng a Mechesabel, lo a emachar a Sera tarai eka ekitela a Yuda, ngesi aweikinit Ngisirael anitubet ekies alo Persia. Alomito ngitunga nikaalan lorerea lu ayakasi diyete ngamanat kech. Lua ekitela a Yuda, alomito lorerea a Kirias Ariba, ka Dibon, ka Yekabseel ta ngadakarin na edunyatar. Alomito kesi tani lorerea a Yechua, ka Molada, ka Besipelet, ta Asarchual. Toloma tani Beer-cheba ka ngadakarin na edunyatar. Alomito kesi lore a Sikilag, ka Mekona ka ngadakarin keng, ka Enirimon, ka Sora, ka Yarimus, ka Sanoa, ka Adulam ta ngadakarin na edunyatar ngirerea ngulu. Alomito kesi Lakich, ka namanat na ayakasi diyete neni, ka Aseka ka ngadakarin keng. Ngesi atamar, alomito ngitunga a Yuda nakwap na eyei kiding Beer-cheba alokuju ka adipo a Inom alokwap. Alomito ngitunga a ekitela a Benjamen lorerea a Geba, ka Mikimach, ka Ai, ka Besel ta ngadakarin na edunyatar. Alomito ngiche Anasos, ka Nob, ka Anania, ka Asor, ka Rama, ka Gitaim, ka Adid, ka Seboim, ka Nebalat, ka Lod, ka Ono, ta adipo a ngikechiak ngiboro. Ngilawi ngiche lusek alomito nakwap a Yuda, apon totiakakinae akilom ka ngitunga a Benjamen wapei. Lugu kesi ngimurok ka Ngilawi lukolong abongunete anarikonot erukito ka Serubabel lokookeng a Chealitiel, erukito nabo ka Yochua lo arai emuron loapolon. Ngimurok kesi Seraya, ka Yeremia, ka Esira, ka Amaria, ka Maluk, ka Atuch, ka Chekania, ka Reum, ka Meremos, ka Ido, ka Ginesoi, ka Abija, ka Mijamin, ka Maadia, ka Biliga, ka Chemaya, ka Yoyarib, ka Yedaya, ka Salu, ka Amok, ka Ilikia ta Yedaya. Araakasi ngulu ngikarikok a ngimurok aluche kadaang ngirwa lua Yochua. Ngilawi lugu kesi aweikinito ngieosio lu ebuanakinere Akuj alakara. Yechua, ka Binui, ka Kadimiel, ka Cherebia, ka Yuda ta Matania. Lugu kesi araakasi ngikekamanarak ngieosio. Bakibukia, ka Uno ta Ngilawi lurukitos kech. Auriuni Yochua Yoyakim, touriu Yoyakim Eliachib, touriu Eliachib Yoyada, touriu Yoyada Yonasan, touriu Yonasan Yadua. Ngirwa lu araakar Yoyakim emuron loapolon, lugu kesi araakasi ngikapolok a ngimacharin a ngimurok. Meraya apolokinit emachar a Seraya, topolok Anani emachar a Yeremia, topolok Mechulam emachar a Esira, topolok Yewanan emachar a Amaria, topolok Yonasan emachar a Maluk, topolok Yosep emachar a Chebania, topolok Adina emachar a Arim, topolok Elikai emachar a Merayos, topolok Sekaria emachar a Ido, topolok Mechulam emachar a Gineson, topolok Sikiri emachar a Abija, emachar a Miniamin, topolok Pilitai emachar a Moadia, topolok Chamua emachar a Biliga, topolok Yeonasan emachar a Chemaya, topolok Matenai emachar a Yoyarib, topolok Usi emachar a Yedaya, topolok Kalai emachar a Salai, topolok Eber emachar a Amok, topolok Achabia emachar a Ilikia, topolok Nesanel emachar a Yedaya. Egiritae ekimar a ngikapolok a ngawiyei a Ngilawi ka ngimurok, ngirwa lu araakatar ngitunga lugu ngimurok luapolok. Eliachib, ka Yoyada, ka Yonasan ta Yadua. Tasalu ekimar ngolo ngirwa lu araakar Dario ekapolon a Persia. Kaneni dang, ngikapolok a ngawiyei a Ngilawi, egirio lokimar lopalem a arieng tanang ngirwa lua Yonasan alo arai etatait a Eliachib. Totiakae Ngilawi a ngalooso, eweikinito Achabia, ka Cherebia, ka Yechua, ka Binui ta Kadimiel. Apot kesi kipuruut Akuj a ngalooso a ngaarei-rei, ikamanarete ka abuanakin Akuj alakara, itemem ka ngakichikichiket a ekapolon Daudi alo arai itwaan a Akuj. Ngasigerea a akai a Akuj na eyokiyete ngikerui lu ayakasi lodorin kesi lugu, Matania, ka Bakibukia, ka Obadia, ka Mechulam, ka Talimon ta Akub. Ayakasi ngitunga ngulu ngirwa lukolong a Yoyakim lokookeng a Yochua tarai etatait a Yeosadak, ka ngirwa lua Neemia alo arai ekapolon, ka ngirwa lua Esira alo arai emuron a Akuj lo ayeni etal. Na etaleunere awas a ere a Yerusalem, apon tasakunae Ngilawi anicha alomito kadaang pot losukukuu lokitaleunet awas toeokis ngieosio lu ebuakinere Akuj alakara, toeokis ituruyete ngasua tokusete ngibunei. Apot ngitunga a Ngilawi alukaeok tochunun alowaitin alu alomito kesi alu eriamito Yerusalem, ka lu eriamito Netopa. Tochunun tani alo Bes-giligal, ka Geba ta Asimapes. Apot ngimurok ka Ngilawi kitaleunos kesi, kitaleut ngitunga, ka ngidorin ta awas a ere. Atochunak ayong ngikarikok a Yuda kidiama awas, ewaak toweikis ngalooso naapolok ngaarei, kirimokis ere ebuakinito Akuj alakara. Tolot atiaket na ekingaren lowae lo aloteten alokidiama awas, toloto lowae lo ekidor a Asakatan. Ewapit Ochaya ngikaeok, kiwapito ngesi epewae a ngikarikok a Yuda. Ngimurok lu erukorete ka ngesi kesi Asaria, ka Esira, ka Mechulam, ka Yuda, ka Benjamen, ka Chemaya ta Yeremia. Talokookeng a ngimurok lu akusete ngaburucho kesi Sekaria lokookeng a Yonasan tarai etatait a Chemaya. Taapaakeng luche kesi Matania, ka Mikaya ta Sakur lo emachar a Asap. Apot kirukosi ka ngitunga luche a emachar keng lu anyaritae Chemaya, ka Asarel, ka Milalai, ka Gilalai, ka Maai, ka Nesanel, ka Yuda ta Anani. Atingito ngulu daang ngiboro lu eeore lu ikote lukolong aeor ekapolon Daudi, lo arai itwaan a Akuj. Esira lo ayeni etal ngesi arikit atiaket ngina analotoru. Alokidor a Eitanit, tananga nadoket na eloose lore a Daudi, kiporosi akai a Daudi, sodi tobongut nawas alokidor a Ngakipi, alowae alo alo kide ere. Atiaket nache a ngitunga alu abuanakinete Akuj alakara, apot toloto kedieny alokidiama awas, sodi ewapakisi ayong ka ngitunga epewae. Atoloto eporosi epem lo a a ngikenoi alu kimaet akimuj atananga nawas nabalany. Ani kinyouni kaneni, atoloto eporosi ekidor a Epiraim, ka ekidor a Yechana, ka ekidor a Ekolia, ka epem a Ananel, ka epem a Amiat atananga lokidor a Amesek. Atorumosi alotoru kosi alo diyete ekidor lo elosi kai a Akuj. Apot ngalooso naarei nguna na abuanakinete Akuj alakara tananga lowae lo a akai a Akuj. Kirukit ayong ka ngikarikok epewae. Lu ayakasi natiaket nakang kesi ngimurok lu akusete ngaburucho lu anyaritae Eliakim, ka Maaseya, ka Miniamin, ka Mikaya, ka Elioenai, ka Sekaria ta Anania. Totupuut Maaseya, ka Chemaya, ka Malikija, ka Elam ta Eser. Toeokis ngikaeok erikit Yesiraya kiremasi. Kipeyoe ngakipeyos nakaalak akolongit ngina, sodi talakaros ngitunga noi kainyo etalakarit Akuj kesi noi. Apot tani ngaberu ka ngide talakaros. Abu echale lo alakara ngolo kiirarae anikalonan. Akolongit ngina, toseunae ngitunga toweikis ngikerui lu ikachio ngadekon a akai a Akuj, ka ngalemunet, ka ngalemet na ekingaren ta ageor na akoniununi ekaru daang. Ngitunga ngulu kesi ediauniyete ngalemet a ngimurok ka Ngilawi anamanat ana ayakasi diyete ngirerea lugelagelae, loger lo esakitere Alotal. Apot ngitunga a Yuda daang talakaros kotere ngimurok ka Ngilawi kainyo asubete kesi esukukuu lo a akitaleunun ka ngitalio lusek adungunit Akuj. Apot ngikaeok dang ka ngasigerea a akai a Akuj tosuba ngitichisio kech itemem ka ngitalio lukolong ewaakinete ekapolon Daudi ka lokookeng Solomon. Napei kolong a angorot alorwa a Daudi ka ekaeon Asap, aliworosi ngikaeok eeosi ngieosio a ekipur ka abuanakin Akuj alakara. Ngirwa nabo lua Serubabel ka Neemia, alemuuniyete Ngisirael daang ngalemunet na einakinio ngikaeok ka ngasigerea a akai a Akuj. Alemanakinete ngitunga Ngilawi akipeyos sodi totiakakis Ngilawi ngimurok nginerin kech. Na esomakinere ngitunga etal a Musa iremae pon kisomakinae ni igiritae atamar emam itwaan a Ngiamon kori a Ngiamoab ni ejoikinit elomari lotunga a Akuj, kotere apukorete kolong ngitunga ngulu Ngisirael akimuj ka ngakipi alorot na arotokinioto Ngisirael alo Misiri. Pearai apot kesi nakis Balaam ngaropiyae kilamea Ngisirael, nakaneni abu Akuj yok kiloch ngilam ngulu toliworos apiaro. Ani iirarete Ngisirael etal ngolo isomao, apot totiakakisi ngitunga lua ngakwapea anache daang anikech. Emuron lo anyaritae Eliachib lo aweikinit ngikerui a akai a Akuj, achamasi sek ka Tobia a ngirwa alukaalak. Abu ngesi nak Tobia amaniyat naapolon na asakitae erai ngesi ikachanakinio ngalemunet a ngalemet ka emitina, ka ngiboro lu asubere etich alokai a Akuj, ka ngalemunet a ngimurok, ka ngatiaket a ngalemet, ka emuna ta akimiet na ainanakinio Ngilawi ka ngikaeok ta ngasigerea a akai a Akuj. Ani esubasi ngakiro nguna, atamam ayong alo Yerusalem, kainyo ekaru lo a ngitomwon-uni ka ngiarei lo araakar Artachasta ekapolon a Babilon, abongorit ayong nikeng akitaanyun ngesi. Adaunet a ngirwa a ngikos, katachamak ngesi ayong abongori Yerusalem. Atorukau ayong kaneni Eliachib kesubaki ngakiro naaronok ani ainakinea Tobia amaniyat alokai a Akuj. Atongo ayong noi dio emasa ngiboro a Tobia daang nikalapatan. Atodung ayong atamar kitaleunoe ngamaniyae, sodi tolemunae ngiboro a akai a Akuj ka ngalemunet a ngalemet ta emitina tobuakinae namaniyae. Atoriam ayong tani ngikaeok ka Ngilawi kedokis alo Yerusalem kebongosi namanat kech, kainyo peainakinete ngitunga kesi ngalemet na itemokino. Sodi ekilak ayong ngikapolok luuchik atama, “Kotere nyo epasakinere akai a Akuj?” Atobuu ayong Ngilawi ka ngikaeok kai a Akuj sodi tobongokis ngitichisio kech. Sodi kisiakis Ngisirael daang nabo ayaunun ngalemunet kech a ngalemet ka emuna ta akimiet yaut lokerui a akai a Akuj. Atoseu ayong ngitunga lugu toweikis ngikerui, Chelemia lo arai emuron a Akuj, ka Sadok lo ayeni etal ta Pedaya lo arai Elawit. Anan lokookeng a Sakur tarai etatait a Matania, engarakina ka kesi, kainyo amunoi kesi. Arai etich kech akoranakin ngikasubak etich luche akimuj. Ee Akuj kang, kitamu ngakiro nugu daang na asubea ayong akai kon ka etich kon. Ngirwa ngulu, engolik ayong ngitunga a Yuda echiuniyete emuna anamusabib akolongit na Sabato. Edokete ngiche ngalemet kech, ka emuna, ka ngamusabib, ka ngameyana ta ngiboro luche losikiria kech yaasi Yerusalem. Abu ayong echikichik kesi atamar nyeegielasi ibore tani ipei akolongit na a Sabato. Ayakasi ngitunga ngiche a ere a Tiro lu alomito Yerusalem. Apot kesi yaut ngikolea ka ngiboro lugelagelae daang lore agielanakin ngitunga kosi akolongit na a Sabato. Ekilak ayong ngikarikok a Ngiyaudi atama, “Anukiro naaronok isubete esi nugu! Isecha esi etal a Sabato. Ngakiro napei kolong eriraa Akuj taapaakus nugu naenyasunea ere logo. Nakaneni eringa esi isakete akitongoikin Akuj Ngisirael ani isecheta etal a Sabato.” Sodi atodung ayong atamar togolonokinoe ngidorin a ere na isiakinea akolongit na a Sabato daang napei cha eliworor atabong, nyeengaar ngidorin ngulu nabo tanang ni edaunor Sabato. Ewaak ayong ngitunga lukang ngiche lodorin nyiilomunere ngiboro lore akolongit na a Sabato. Ngimuchurus lu agielanarete ngiboro daang lugelagelae, apereenete dopetei nikalapatan awas a ere akolongit na Ijumaa nakwaare. Echikichik ayong kesi atama, “Emam ibore idarito esi anikalapatan tanang iwalari. Ani kibongokis esi ngakiro nguna nabo, kerumuni ayong esi.” Akisiakin ngina jik, nyebonguno kesi nabo jik akolongit na a Sabato. Atodungok ayong Ngilawi atamar kitaleunos sodi toloto kiyoko ngidorin kirichakinere etal a Sabato. Ee Akuj kang, kitamunae kotere tani ngakiro nguna, sodi kitajalu kotere amina kon naapolon. Ngirwa ngulu, engolik ayong Ngiyaudi nikaalan iutanarito ngaberu a akwap a Achidod, ka Amon ta Moab. Ngide kech epewae, eruorosi ngabukui a Achidod, kiruoros ngiche ngabukui ngache, peayenete ngabukui yok. Ekilak ayong ngikiliok ngulu, elam kesi, edet sodi atorut ngitim kech. Ani erumor esikong ayong kesi alokiro a Akuj atama, “Nyiipotosi tanakookus kiuta talokookech, kori nyiirikosi tanakookech kiuta talokookus kori esi ngikulepek. Abe ngaberu bo na ekote nguna kesi kolong etesechete Solomon lo arai ekapolon a Isirael! Ayenikinitae ngesi akidwang ngikapolok a ngibukui aluche kadaang. Amina Akuj ngesi sodi kitiliwo ekapolon a Isirael kadaang. Kaneni dang, apot ngaberu na ngakwapea anache kitosecha ngesi. Ejoikinit tokona sua kiwapi ekitetemes kus atosechakisi Akuj kosi, euta ngaberu na ngakwapea anache a?” Arai Yoyada lokookeng a Eliachib alo arai emuron loapolon. Nakaneni abu lokookeng a Yoyada epei kiut nakookeng a Sanbalat alo abunit alore a Bes-oron. Abu ayong etwarak Yoyada alore a Yerusalem kotere ngakiro nguna. Ee Akuj kang, kitamu eger lo asecheta ngitunga etich a emuron a Akuj ka achamunet nakolong ichamakinosi iyong ka ngimurok ta Ngilawi. Etaleu ayong ngitunga anibore kadaang ani akwap anache. Ewaak ngitalio lu iwapete ngimurok ka Ngilawi toyenea itwaan daang etich keng. Atorek ayong ngisaae lu echamit eyauniyere ngakito na inomere ngakipeyos, ka ngisaae lu eyauneta ngitunga ngakipeyos kech na ngalemet ana ekingaren ta ageor na ekoniuni ekingaren. Ee Akuj kang, kitamu ngakiro nugu daang sodi kitosubea naajokak. Ngirwa lua ekapolon Kerkesi, apolokinit ngesi ngiwaitin a akwap amiat apei ka ngitomwon-arei ka ngiarei napei alo India tanang Kuch.*g** Ebooyi ngesi alore a Susa alo arai ere loapolon a Persia. Ekaru lo a nguuni lo araakar ngesi ekapolon, abu ngesi tosubak akimuj nakaalan kotere ngikapolok keng luuchik daang ka ngikasubak etich keng. Ayakasi ngasigerea a Persia ka Media. Ayakasi tani ngikarikok a ngiwaitin a akwap ka ngikajakaanak neni. A ngilapio a ngikan-kapei, abu Kerkesi kidodiu ebari keng ka ajako a apolou keng. Ekisidi kanguna, tosubak ekapolon akimuj kotere ngitunga daang lu ayakasi lore loapolon a Susa, lu eyenikinitae ka lunyeyenikinitae. Kirika ekimuje ngolo ngirwa ngikan-kaarei anamanat a akai a ekapolon. Kitisiroe neni a ngawarui anapusiek ka naakwaak, toenae a ngaunoi anapusiek-arengak anaajokak, tokodakinae nasua nanyangayek iriamito sodi kinenekinoe napirio na esubunitae a ngakabulitinei. Asipokinitae ngikicholongo luapolok lu asubunitae a egolit ka ngasua nanyangayek, asipokinitae neni. Tooma alaar ngina, atapanakinitae ngakabulitinei naakwaak ka ngikam ta ngamoru nakaalak a ngaropiyae. Amasio a ngikopoi a egolit alu peekwaan. Eposi ekapolon emuna keng tamatae. Peamisitae etiae lo amaase ngitunga. Adungokinit sek ekapolon ngikasubak etich keng atamar tamat itwaan daang etiae locha esaki. Nipei bore ngini, esumuji aberu a ekapolon na enyaritae Pachti ngaberu. Akolongit na ngakan-kaarei imujio, tamat ekapolon emuna talakar sodi tanyarau ngikasubak etich keng lukan-kaarei lu anyaritae Meuman, ka Bisita, ka Aribona, ka Bigita, ka Abagita, ka Setar ta Karikas. Todungok ekapolon kesi atamar torikut aberu keng Pachti, enapit ekiraun keng lo a apolou. Arai aberu ngina nakebusean. Asaki ekapolon akidodikin ngikapolok keng luuchik ka ngipeyok keng dang atamar ibus aberu keng. Nakaneni ani elimokinete ngikasubak etich Pachti ngakiro na adungunit ekapolon, abu ngesi towou abunere. Tongo ekapolon noi tonyunyur. Arai eger a ekapolon akingiseenen ngikunonoi a etal ngakiro. Sodi tanyarau ngesi ngitunga ngulu kingit ngakiro na esubakini. Ngitunga lu engiseene ngesi jiik kesi ta Karichena, ka Chetar, ka Admata, ka Tarchich, ka Meres, ka Marsena ta Memukan. Araakasi lukan-kaarei ngulu ngikarikok a Persia ka Media lu araakasi ngikapolok lu engarenete anapolou a Kerkesi. Tolimok ekapolon kesi tama, “Ameari ayong ngikasubak etich kang nia akapolon Pachti, towou ngesi asubakin ngakiro na adungunit ayong! Ekoe, anukiro esakit etal tosubakinere ngesi?” Dio Memukan tolimok ekapolon ka ngikapolok keng tama, “Meere ekapolon bon esechakinit Pachti pearai esechakinit tani ngikapolok luuchik a ekapolon ta itwaan cha daang anapolou a Kerkesi! Imenyarete tokona ngaberu daang ngikiliok kech napei iirareta ngakiro na asubaki Pachti. Etamarete kesi, ‘Adungokini ekapolon Kerkesi Pachti atamar bu, nakaneni towou ngesi.’ Ngaberu a ngikapolok a Persia ka Media daang na eirasi ngakiro na asubaki aberu a ekapolon, elimonokinete tokona ngikiliok kech nakiro nguna, sodi tonyunyurikin ngikiliok ngaberu kech. Ani kisaki iyong ekapolon, todung atamar nyeenangu Pachti nabo jik nia ekapolon. Todung atamar kigirae ngakiro nguna lotalio a Persia ka Media, sodi nyiiloch nabo jik. Ani erumor toseu aberu ache naajokon akidwang ngesi, kilunyokin nados keng toliwor aberu a ekapolon. Ani elimorio etal ngolo anakwap anakon kana kadaang, eliwor aberu daang ekerit lokile keng, kebarit kori kiboosit.” Apot ngakiro nguna tojoikis ekapolon ka ngikapolok keng luuchik, sodi tosubak ekapolon ngakiro na alimuni Memukan. Tomea ekapolon ngitunga yaasi ngabaruae lowaitin a akwap daang, kigirae abarua a ewae kadaang a ngabukui ka ekigire a ewae kangolo. Egiritae atamar eliwor ekile daang ekapolon anawi keng nabo ngesi etiakuni ngakiro na esal. Ekisidi, tani kedaun angoit a ekapolon kerumor, abu ngesi toliwor itami Pachti ka ngakiro na asubakinit ta ngakiro na adungunio kotere Pachti. Sodi apot ngikasubak etich keng ngiche tolimokis ngesi tamasi, “Nyo bo peisakunea iyong ngapesur nasorok nakebuseak na nyepero ka ngikiliok a ache? Toseu ngikapolok luuchik alowaitin a akwap kadaang, sodi todungok kesi atamar tasakut ngapesur nasorok nakebuseak daang torikut kai kon kane alo Susa, lo erai ere loapolon. Kichikak kesi ekasuban etich kon lo enyaritae Egai, lo eweikinit ewae lo a ngaberu, sodi kisubusae kaneni. Ani erumor tosea iyong apese nakiminari kilunyokin nados a Pachti toliwor akapolon.” Tojoikis ekapolon ngakiro nguna sodi tosubak. Ayei Eyaudit eche alomit lore a Susa, anyaritae ngesi Mordekai lokookeng a Yair. Arai ngesi eka ekitela a Benjamen. Arai alesit a Kich ka Chimei. Nakolong arikio Nebukadinesa lo arai ekapolon a Babilon, torik ekapolon a Yuda lo anyaritae Yeoyakin ka ngirikon luche alo Yerusalem, ayei Mordekai dang lotunga ngulu. Ayei Mordekai nakamaekeng na anyaritae Esita. Anyaritae ekiro keng lo a Ngaeburaniae Adasa. Arai ngesi apese nakebusean nakiminari. Nakolong atoaketa ngikauriak a Esita, tadaka Mordekai ngesi kitan kitiliwo nakookeng. Ani elimorio ngakiro na adunguni ekapolon, apon ngapesur nakaalak torikunoe Susa, ayei Esita dang neni. Apon ngesi dang kichikakinae Egai lo arai ngesi aweikinit ngaberu alokai a ekapolon. Amina Egai Esita. Atipei abu ngesi kisiak akios Esita akimiet ka akisumuj niajokon. Kiwaak Egai Esita lowae loajokon alokai kangina, sodi toseu ngapesur ngakan-kaarei alokai a ekapolon tosuba etich a Esita. Abu Esita nyeelimo atamar arai ngesi Ayaudit loger losek echikakinitor Mordekai atamar nyeelimo. Akolongit daang, elaanari Mordekai kitor ngaren akai ngina esaki akiyen ngakiro na esubasi ka ngakiro na esubakinosi ani a Esita. Esubusio ngapesur a ngilapio a ngitomon ka ngiarei. Ngilapio ngikan-kapei lu ekingaren, ewasio kesi akimiet nakakukunyon todwar, ani ngilapio luche lukan-kapei, kiwosae epie ka ngamieta nache nakakukunyok. Ani erumor toloto ngapesur nguna nia ekapolon Kerkesi a ngapei-pei. Na erotokinio apese alokai kangina tolot kai a ekapolon, epedori akinap ngiboro lucha esaki. Arai ebong elosio apese neni, ani nataparach torikoroe kai ache na aweikinit Chaachgas, lo arai ekasuban etich a ekapolon lo apolokinit ngapesur keng a ngabwes. Nyebongori apese ngina lokapolon nabo jik mati kolong kejoikinit ngesi ekapolon, sodi tanyara ekapolon ngesi a ekiro keng. Abu tanang akolongit na elosio Esita nia ekapolon. Arai Esita nakookeng a Abiyail alo arai amaekeng a Mordekai. Adakarit sek Mordekai Esita kitiliwo nakookeng. Arai itwaan nicha ingolikini Esita daang, tomina. Ani enangi anyoun keng, abu ngesi tanap ngiboro lu alimokinit Egai, lo aweikinit ewae loa ngaberu alokai a ekapolon. Ekaru lo a ngikan-kaarei, elap lo a ngitomon lo anyaritae Tebes, lo araakar Kerkesi ekapolon, apon Esita torikoroe kai a ekapolon, nia ekapolon Kerkesi. Abu ngesi tojoik ekapolon akidwang ngapesur nache daang. Abu ngesi tomina ekapolon lokojokon akidwang ngapesur nache daang. Abu ekapolon tobutok ekiraun nakou a Esita sodi kilunyok ngesi nados a Pachti toliwor akapolon. Abu ekapolon tosubak akimuj nakaalan erimar Esita, sodi kipeyou ngikapolok keng luuchik daang ta ngikasubak etich. Tolim ekapolon akolongit nakiangaret anakwap kadaang, sodi tokor ngainakinet nakaalak napalem a ekapolon. Aseunit ekapolon Mordekai aliwor ekasuban etich keng anapolou. Aringa Esita nyelimoro atamar arai ngesi Ayaudit. Alimokinit Mordekai ngesi atamar nyeelimo. Kiira Esita ngakiro a Mordekai loger lokolong sek eiranarea eringa erai ikoku ni arikit ngesi. Ngirwa lu asubea Mordekai etich alokai a ekapolon, apot ngikasubak etich a ekapolon ngiarei lu eyokiyete ngidorin lu elomarere namaniyat a ekapolon, apot tongoa totuko akiar ekapolon Kerkesi. Ani eanyuni Mordekai ngakiro nguna, abu tolimok akapolon Esita, dio ngina tolimok ekapolon ngakiro na aanyuni Mordekai. Apon ngakiro nguna tongicharae toyenae atamar ngaka iteni, sodi kinenekinoe ngitunga luarei ngulu lokito taarae. Todung ekapolon atamar kigirae ngakiro nguna nakitab na igirio ngakiro a akwap. Ekisidi a ngakiro kanguna, abu ekapolon Kerkesi kitiliwo Aman ekapolon lo atupit ngesi. Arai Aman lokookeng a Amedasa alo arai alesit a Agag. Abu Kerkesi todungok ngikapolok keng luuchik atamar kidodikis Aman arimatoi toriediko ka akijuur alongaren keng. Apot daang tosuba nguna pearai Mordekai bon abu towou. Apot ngikapolok luche luuchik kingita Mordekai tamasi, “Nyo bo iwounitor iyong akiwap ngakiro na adungu ekapolon?” Emaimayete kesi Mordekai akolongit daang, nakaneni towou Mordekai akiirar ngakiro kech, tolimok tama, “Arai ayong Eyaudit. Nyariedikokini ayong Aman.” Apot kesi tolimokis Aman ngakiro a Mordekai esakete akiyen na elimuni ngesi kotere eboyor a Mordekai. Ani ingolikini Aman atamar awou Mordekai ariedikokin kori akijuur alongaren keng, abu tongo noi. Ani eanyuni atamar erai Mordekai Eyaudit, totiaku atamar nyitemokino akirirare Mordekai alopei. Totiaku ngesi amunyar Ngiyaudi daang anakwap a Persia kadaang. Ekaru lo a ngitomon ka ngiarei lo araakar Kerkesi ekapolon, elap lo ekingaren lo enyaritae Nisan, abu Aman todung atamar taramae ekura (anyaritae ekura ngolo Purim) taanyunere akolongit ka elap lo esubakinere ngakiro nasek atiakunit ngesi. Apon totiakunae akolongit na ngatomon ka ngauni a elap alo a ngitomon ka ngiarei alo enyaritae Adar. Sodi tolimok Aman ekapolon tama, “Eyakasi ngitunga a ekitela a eche epetakina nakwap kon wadaang nabo eyakasi lowaitin daang a akwap. Etiakak ngitalio kech ka lua ngitunga aluche kadaang. Nyiwapito kesi ngitalio kon, ekapolon. Nyejoikinit tokona iyong irubakini anaikinit ngakiro kech. Ekapolon, ani kisaki iyong, todung atamar taarae kesi. Ani kisubak nguna, alimu ayong atamar alemuni ngakwangae na iporito ngakiloi 340,000 ewaak ni iwaanakinio ngaropiyae a ekapolon tosubere etich a akwap.” Tobut ekapolon ekababaat keng nak emoit a Ngiyaudi lo anyaritae Aman lokookeng a Amedasa, lo erai alesit a Agag. Arai ekababaat ngolo emachar lo itodiuni atamar erai ngakiro na alimun ngaka ekapolon. Tolimok ekapolon Aman tama, “Eraakasi ngaropiyae ngakon, eraakasi ngitunga dang ngikon. Tosubea kesi nacha isaki iyong.” Akolongit na ngatomon ka ngauni a elap alo ekingaren, tanyarau Aman ngikegirak a ekapolon todungok atamar kigira ngabaruae sodi kilokonyo a ngabukui kadaang ka ekigire daang a akwap, sodi yaarae lokapolok, ka ngikapolok a ngiwaitin a akwap ta ngikapolok luuchik daang. Apon ngabaruae nguna kipotoroe a ekiro a Kerkesi tatapakinae emachar a ekababaat keng. Apot ngimeanara yaasi ngabaruae nguna lowaitin daang a akwap. Egiritae atamar akolongit na ngatomon ka ngauni a elap alo enyaritae Adar, esakitae Ngiyaudi daang taarae, napei aluuchik tanang lumojong, napei anaberu tanang lode. Esakitae kesi eario emam akisienut, sodi todemarae ngiboro kech. Asakitae akiroit ngina ikekinio ngitunga daang alowaitin kadaang, sodi toyenea itwaan daang na enangea akolongit ngina. Loger lo adungunitor ekapolon, apon akiroit ngina tolimoroe alore aloapolon enyaritae Susa. Yaasi ngimeanara ngakiro nguna lowaitin luche a akwap. Apot ekapolon ka Aman kiboikinos tamata aapei, toriangakina ngitunga a ere a Susa. Ani iirari Mordekai ngakiro na asubakin, abu ngesi tochilichilia ngiworui keng eriaba. Sodi tanap ngiguniae tonukak ekuron nakou, dio kitor kiding ere igoro irema, tokunua. Tanangu ngesi lokidor a akai a ekapolon. Nyelomara ngesi kainyo nyechamakinitae itwaan ni enapit ngiguniae elomari. Ngiwaitin daang a akwap, nicha elimorere ngakiro a ekapolon, egorosi Ngiyaudi eremasi esutonokinete. Torono kesi akimuj, kigoro iremasi, tanapa lukaalak kech ngiguniae topero alokuron. Apot ngikasubak etich a Esita luberu ka lukiliok lu agelemitae tolimokis Esita ngakiro na asubi Mordekai. Kichanakin Esita lokojokon kotere ngakiro nguna. Kipoto ngesi ngiworui naarae Mordekai sodi tobutorea ngiguniae, nakaneni tonger Mordekai. Ani erumor tanyarau Esita Atak lo arai epei a ngikasubak etich a akai a ekapolon lo agelemitae, losek aseunit ekapolon akisub etich a Esita. Tolimok Esita ngesi atamar tolot nia Mordekai taanyu ngakiro na asubakin ka eger kech. Tolot Atak nia Mordekai anaro a ere, alokidor a akai a ekapolon. Tolimok Mordekai ngesi ngakiro daang na asubakinosi anikeng, ka ekimar a ngaropiyae a ekapolon, erai kear Ngiyaudi daang. Nak Mordekai Atak abarua na epotoritae alo Susa na edungunitere atamar tomunyarae Ngiyaudi. Tolimok Mordekai Atak atamar nak Esita abarua ngina, kisisak ngakiro nguna, tolimok atamar tolot kimaima ekapolon kisieneto Ngiyaudi lu eraakasi ngitunga a Esita. Abu Atak tolot kisisak Esita ngakiro daang na asubakinosi. Tomea Esita ngesi nia Mordekai alimokin kona, “Itwaan cha daang, kerai ikile kori aberu, ni elomari nalaar na alotooma aanyun ekapolon eringa nyenyarauna, eario. Erai ibore ngini etal. Eyeni itwaan daang napei alokesuruorok a ekapolon tanang lotunga a ngiwaitin a akwap. Eyei bocha erot epei lo ebucharor itwaan alotal kangolo. Ani kikek ekapolon itwaan aburo keng a apolou, na egolit, nyeario itwaan ngini. Kaneni dang, anang tokona elap epei eringa ekapolon nyenyara ayong.” Ani elimokinio Mordekai ngakiro na alimuni Esita, abu tomea ngitunga nia Esita kichikichik tama, “Nyiitama robo kori ibuchar iyong akidwang Ngiyaudi luche ani iyakar kai a ekapolon. Ani kililing iyong ikote ngakiro nege, tokona ngon eyuunosi Ngiyaudi a erot a eche, sodi totoaka iyong ka ngitunga a awi a apakon tomunyaros. Eyananaroi mono a, epedori tani aliwor ngichan lu ikote lugu kesi kolong kitiliworere iyong akapolon ngirwa lu!” Tomea Esita ngitunga alimokin Mordekai kona, “Kape tochunak Ngiyaudi daang lore a Susa. Torono akimuj kilipakis ayong. Warasi nyiimuj kori nyiimat a ngirwa a nguuni, akwaar ka apaaran. Ayong dang ka ngapesur nakasubak etich kang kisubi kongina pei. Ani erumor alosi ayong lokapolon tani pekitemokino alotal. Ani keliwor akitu, atotoan.” Ani erumor torotok Mordekai tosubak ngakiro daang na alimokini Esita ngesi. Akolongit na ngauni na aronitor Esita akimuj, abu ngesi tanap ngiworui keng lua apolou, tolot towo analaar ana alotooma a akai a ekapolon, ingoliarit namaniyat na ayei ekicholong a ekapolon. Ayei ekapolon tooma ebooyi alokicholong keng engoliarit lokidor. Ani ingolikini ekapolon Esita, abu tomina dio akikekin Esita aburo keng a apolou na egolit. Sodi bu Esita tatap akou a aburo. Kingit ekapolon Esita tama, “Nyaai akapolon Esita? Tolimokinae ibore ni isaki iyong, tani kerai epewae a apolou kang kiinakinio.” Tatachu Esita tama, “Ekapolon, ani kichamuni, kepeyounit ayong iyong ka Aman pot takae ebong nakimuj nakasubakinit ayong esi.” Atipei abu ekapolon todungok Aman atamar bu, sodi toloto toliworos ngipeyok a Esita. Sodi toloto ekapolon ka Aman akimuj anawi a Esita. Ani esaa lo amaasa kesi emuna, kingit ekapolon Esita tama, “Tolimokinae ibore ni isaki iyong, kiinakinio. Kainakini ayong iyong ibore ni isaki tani kerai epewae a apolou kang.” Tatachu Esita tama, “Ngakiro kang nugu, ekapolon, ani kijoikis iyong ngakiro na asaki ayong, kepeyounit iyong ka Aman pot moi nakimuj ache nakasubakini ayong esi. Moi ngesi kalimokinea ayong iyong ibore ni asaki.” Torotok Aman anakimuj elakara ebala etau chuu. Ani anipei, kingolik Mordekai alokidor a akai a ekapolon. Ani ewouni Mordekai anyoun kidodik Aman arimatoi na etorunio neni, abu Aman tongo noi. Nakaneni totitinyik ngesi tolot nawi. Ani erumor kipeyou ngesi ngipaalon keng nawi keng dio tanyara aberu keng dang na anyaritae Serech bu neni. Kiwogakin Aman kisisa eger lo ebaritor ngesi, kimaru talokookeng, ka eger lo ainakinea ekapolon ngesi etich loa apolou, ka eger lo epoloo ngesi akidwang ngikapolok luche luuchik daang a ekapolon. Torubak Aman iruoro ebala, “Tani eyakasi nguna daang, emam ichetwaan epeyou akapolon Esita nakimuj alokai keng pearai ekapolon ka ayong, nabo kipeyounitoe moi nabo dang. Nakaneni emam ngakiro nugu daang nakajoikinete ayong erai cha keringa ayong etee Eyaudit lobe Mordekai ibooyi alokidor a akai a ekapolon.” Sodi apot aberu keng ka ngipaalon keng daang tolimokis ngesi kona, “Nyo peidukio iyong ngakito na inenekinio taarere na eraakasi aoyau kech ngamitae ngatomwon-arei ka ngaarei? Ani moi nataparach tolimok ekapolon atamar tomiedakinae Mordekai nakito nguna totoan, sodi tolot iyong nakimuj ilakara.” Apot ngakiro nguna tojoikis Aman, sodi todukok ngakito nguna. Akolongit ngina nakwaare kikoler ekapolon. Todung ngesi atamar yaunae ngakitabea na igiritae ngakiro a apolou kisomakinae ngesi. Ewae lo esomao, ayakasi ngakiro a Mordekai nakolong angichunea ngakiro na atukitere akiar ekapolon. Bigtana ka Terech kesi atukito akiar ekapolon. Araakasi kesi ngikasubak etich a akai a ekapolon lu eyokiyete ngamaniyae a ekapolon. Kingis ekapolon tama, “Anukiro kipot ngoni atosubakineta Mordekai ebusioto ngakiro nugu?” Tatachut ngikasubak etich keng tamasi, “Emam ngakiro asubakinere ngesi.” Kingit ekapolon kesi tama, “Eyei ekapolon loochi lo eyei nalaar a?” Esaa lopei ngolo alomunea Aman nalaar. Abunit ngesi alimokin ekapolon atamar kinenekinoe Aman nakito na adukitoe taarae. Sodi tatachut ngikasubak etich tamasi, “Eyei Aman nege, esaki aanyun iyong.” Tolim ekapolon tama, “Kilomutu.” Sodi tolom Aman tooma, tolimok ekapolon ngesi tama, “Eyei itwaan ni asaki ayong lokojokon akidodikin arima. Anukiro asubakinea ayong itwaan ngini?” Kitama Aman alotau tama, “Ekoe, ngae tokona iche esaki ekapolon arima pearai ayong?” Sodi tolimok Aman ekapolon tama, “Itwaan ni esaki ekapolon akidodikin arimatoi ngini, inunae ngiworui a ekapolon lu enapeene ekapolon elope, ka angole na edokeene ekapolon elope, angole na etapakinitae ekiraun nakou. Ani erumor toseu epei a ngikapolok kon aluuchik lo erimae noi, kitanap itwaan ngini ngiworui ngulu, sodi torik angole edokit itwaan ngini, kisitor kiding aro a ere, irema ebala, ‘Kingolikisi eger lo etacheenea ekapolon itwaan ni esaki akidodikin arimatoi!’ ” Ani erumor tolimok ekapolon Aman tama, “Tonyou atipei tolem ngiworui ka angole, sodi tosubea ngakiro na arima nguna Mordekai Loyaudit, lo ibooyeene alokidor a akai a ekapolon.” Sodi tolem Aman ngiworui ka angole, kitanap Mordekai ngiworui. Todoka Mordekai nangole, torik Aman ngesi kisitor kiding aro a ere elimokinit ngitunga irema ebala, “Kingolikisi eger lo etacheenea ekapolon itwaan ni esaki akidodikin arimatoi!” Ani erumor tobongo Mordekai lokidor a akai a ekapolon. Kikomak Aman nawi erapit ereet ani erumitotor ngileech. Tolimok ngesi aberu keng ka talopaekeng daang na asubakin. Sodi tolimut aberu keng ka talopaekeng lukoosok ngulu tamasi, “Kidema ro iyong lobe Mordekai ngolo apolou. Erai ngesi Eyaudit, nyipedori iyong akidwang ngesi. Iteni kidwangi ngesi iyong.” Ani eringa kesi iruorosi, todolut ngikasubak etich a ekapolon atipei arikor Aman nakimuj a Esita. Sodi toloto ekapolon ka Aman akimuj ka Esita na ngaarei. Esaa lo amaasa kesi emuna, kingit ekapolon Esita tama, “Akapolon Esita, nyo isaki iyong? Tolimokinae kiinakin. Kainakini ayong iyong tani epewae a apolou kang.” Tatachu akapolon Esita tama, “Ani kijoikinito iyong ngakiro kang, ani kisaki iyong ainakin ayong ibore ni elipa, ibore ni elipa ayong ngesi atamar atoyara ayong ka ngitunga kang. Kigialar ayong ka ngitunga kang kitaar emam akisienut kitomunyar. Arai bo tarai ibore en ni kigialarere sua atarata ngikedalak dang, kelilingit pekechanit iyong. Nakaneni anang sua ni kimunyarere kikisar jik!” Sodi kingit ekapolon Kerkesi Esita tama, “Ngae ngini eyechakini asubakin ngakiro nguna? Ngae itwaan ngini?” Tatachak Esita tama, “Emoit kosi, ekaboliaran kosi, ngesi itwaan niaronon be Aman en!” Tobul Aman alongaren ekapolon. Tonyou ekapolon engoit noi, tolot namanat a akai a ekapolon. Toyen Aman atamar atiaku ekapolon jik akirirare ngesi kotere ngakiro nguna. Kidong Aman imaimai Esita atamar katoyuu nyakaar. Kimasakin Aman lokicholong lo ebooyo Esita imaimai esaki katorimakin. Ani ebonguni ekapolon anamanat elomuni namaniyat, kingolik ngakiro na asubi Aman. Tachalak ekapolon tama, “Oitiakoi kare! Esaki ekile logo atikoonor akapolon alongaren kang alokai kang a?” Napei alimunio ekapolon ngakiro nguna, todolut ngikasubak etich a ekapolon tobura akou a Aman. Abu epei kech lo anyaritae Aribona tolim tama, “Abu Aman ngoon toduk tani ekitoe loaret kai keng esaki kinenek Mordekai taar, tarai Mordekai kolong kiyuuni iyong ekapolon. Erai aoyau a ekitoe kangolo ngamitae ngatomwon-arei ka ngaarei!” Todung ekapolon tama, “Kinenekisi Aman lokitoe ngolo.” Apon Aman kinenekinoe lokitoe lokolong aduki ngesi esaki aarea Mordekai. Ani erumor toyon angoit a ekapolon. Akolongit napei ngina, abu ekapolon Kerkesi nak Esita ngiboro a Aman daang. Arai Aman emoit a Ngiyaudi. Tolimok Esita ekapolon atamar kiruoro ngesi ka Mordekai, ani napei ngina jik, apon Mordekai tachamakinae eanyuununi ekapolon. Tobut ekapolon ekababaat lo ayei emachar keng nak Mordekai. Ademuni sek ngesi Aman ekababaat ngolo. Ani erumor kisuruor Esita ekapolon nabo, tadakakin nakejen keng igoro. Kimaima Esita ekapolon atamar kiratak ngakiro naaronok nasek atukit Aman lo arai alesit a Agag asubea Ngiyaudi. Kikek ekapolon ngesi aburo a apolou na egolit, sodi tonyou Esita tolim tama, “Ani kijoikinito iyong ekapolon ngakiro kang, ani kikachit iyong ngakiro kang, tolim kare atamar kiratakinae ngakiro nangoon adunguni Aman nyeesubakin. Ngakiro nangoon adunguni lokookeng a Amedasa lo arai alesit a Agag atamar tomunyarae Ngiyaudi daang anapolou kon. Ekokini ayong anaikini ai, erai kesubakin naaronok nugu alotunga kang, taarae ngiyenet kang?” Sodi tolimok ekapolon Kerkesi akapolon Esita ka Mordekai Loyaudit tama, “Kingolikisi a, enenek ayong Aman lokitoe aar, kotere ngakiro na atukit asubea Ngiyaudi, nabo ainak Esita ngiboro keng. Nakaneni ngakiro na alimun a ekiro a ekapolon, tatapakinae emachar a ekapolon, nyepedorio akiloch. Tokona bocha, ipedorete esi akigirakin Ngiyaudi ngakiro nacha isakete esi, ipedorete akigir a ekiro kang tatapakis emachar kang.” Asubasi ngakiro nugu akolongit na ngatomwon-arei ka ngauni elap lo a nguuni lo enyaritae Sipan. Abu Mordekai tanyarau ngikegirak a ekapolon tolimok atamar kigira ngabaruae Loyaudi, ka ngikapolok a ewae a akwap, ka ngakasubak etich ta ngikapolok luuchik a ngiwaitin kadaang alu eraakasi 127 napei alo India tanang Kuch. Apon ngabaruae kigirarae lowae a akwap daang a ngabukui keng ka ekigire keng. Kigirakinae nabo Ngiyaudi a ngabukui kech ka ekigire kech. Kigir Mordekai ngabaruae a ekiro a ekapolon tatapak emachar a Kerkesi. Apot ngitunga lu adokito ngangolei nakapiranak na anok a ekapolon, yaasi ngabaruae nguna. Egiritae ngabaruae nguna atamar achamaki ekapolon Ngiyaudi alorerea kadaang tojwoto toyuunos make. Ani kitijikis kesi ngitunga a akwap cha kadaang lu etingito ngiboro lujiet, alowae a akwap kadaang, esakitae kesi itijikinete ngitunga ngulu tomunyasi aapei ka ngaberu kech ta ngide kech. Taara kesi emam akisienut nyiidong tani ipei sodi tolemasi ngiboro kech. Asakitae ngakiro nguna esubakinosi anakwap a Persia kadaang akolongit nasek aseunitae atamar earere Ngiyaudi, akolongit na ngatomon ka ngauni a elap alo a ngitomon ka ngiarei alo enyaritae Adar. Asakitae ngakiro nguna elimorio erai etal toyen itwaan daang alowae a akwap kadaang. Sodi kiboikinos Ngiyaudi itemokino, tatachakineta ngakiro nguna alomoe kech enangi akolongit ngina. Loger lo adungunitor ekapolon, apot ngikameak ngangolei todokasi nangolei a ekapolon kipirakis lokojokon. Apon ngakiro nguna tolimoroe tani alore aloapolon anyaritae Susa. Torotok Mordekai alokai a ekapolon enapit ngiworui lua apolou lupusiek ka luakwaak, ka eworu lokaanikan ajokon lopus-arengan ta ekiraun loapolon lo a egolit. Talakaros ngitunga alorotin a ere a Susa kimariteto. Apot ngitai a Ngiyaudi talakunos, toliworos elakara, kikilenikinite. Alorerea kadaang ka ngiwaitin a akwap daang, nicha esomakinere abarua a ekapolon, apot Ngiyaudi tosubakis esukukuu kimuja talakaros. Apot tani ngitunga ngiche tamasi kirai Ngiyaudi kainyo aemito kesi Ngiyaudi. Tanang akolongit na ngatomon ka ngauni a elap alo a ngitomon ka ngiarei alo anyaritae Adar. Akolongit ngina ngesi adikino ngakiro nakolong adunguni ekapolon esubakinere, ngesi asakitere ngimoe a Ngiyaudi idwangete Ngiyaudi. Nakaneni apot ngakiro kilochos, kidwanga Ngiyaudi ngimoe kech. Alorerea kadaang a ngiwaitin a akwap a Kerkesi, apot Ngiyaudi tochunakinos akitijikin itwaan cha daang ni iningokini akiwan kesi. Apot ngikapolok a ngiwaitin kadaang ka ngikapolok a ngiwaitin a akwap, ka ngikasubak etich ta ngikapolok luuchik a ekapolon, kingarakis Ngiyaudi kainyo aemito kesi daang Mordekai. Ayenio anakwap kadaang atamar abu Mordekai toliwor itwaan niyanat alokai a ekapolon, nabo adikino eyenikinio noi. Kotere nguna, apot Ngiyaudi tosubeta ngimoe kech ngakiro daang nacha asakete asubea. Apot kitijikis kesi a ngilengea, tongolongolaasi tomunyasi. Alo Susa alo arai ere loapolon, apot Ngiyaudi taara ngitunga ngamiae ngakan. Taara kesi tani Parchandasa, ka Dalpon, ka Asipasa, ka Porasa, ka Adalia, ka Aridasa, ka Parmachita, ka Arisai, ka Aridai ta Paisata. Araakasi lutomon ngulu talokookeng a emoit a Ngiyaudi alo anyaritae Aman alo arai lokookeng a Amedasa. Kaneni dang, apot Ngiyaudi nyeemoriakinosi ngiboro a ngitunga. Akolongit napei ngina, apon tolimokinae ekapolon ekimar a ngitunga alu aario alo Susa. Sodi tolimok ekapolon Esita tama, “Alore a Susa bon, abe aar Ngiyaudi ngitunga ngamiae ngakan, aapei ka talokookeng a Aman lutomon. Ekoe, anu tokona kesubakis kesi alowaitin aluche a akwap! Nyo tokona isaki iyong? Esubakinio. Nyo tokona iche ilipa iyong? Kiinakinio.” Tatachu Esita tama, “Ani kijoikinit iyong ekapolon, kimiek Ngiyaudi lu eyakasi Susa tosubakis moi nabo ngakiro na ikote na akolongit kana. Todung atamar kinenekinoe ngawat kata lokookeng a Aman alutomon lokito.” Todung ekapolon atamar tosubae ngakiro nguna, apon ngakiro nguna tolimoroe alo Susa. Apon ngawat kata lokookeng a Aman alutomon kinenekinoe lokito luaret. Akolongit na ngatomon ka ngoomwon a elap alo enyaritae Adar, apot Ngiyaudi alo Susa tochunakin nabo taara ngitunga ngiche ngamiae ngauni alore. Nakaneni apot kesi nabo nyeemoriakinosi ngiboro a ngitunga. Apot Ngiyaudi a ngiwaitin aluche dang tochunakin tojwoto. Apot kesi tomunyasi ngimoe kech, taara ngitunga 75,000 lu aremokino kesi. Nakaneni nyemoriakina kesi ngiboro. Arai akolongit ngina na ngatomon ka ngauni a elap alo enyaritae Adar. Arai akolongit na atupit ngina, na ngatomon ka ngoomwon, apot kesi kiangasi nyeara ngitunga, kitiliwosi akolongit ngina na alakaraka ekimuje. Kaneni dang, apot Ngiyaudi lu ayakasi Susa kiangasi akolongit na ngatomon ka ngakan, kainyo aarete kesi ngitunga akolongit na ngatomon ka ngauni ka na ngatomon ka ngoomwon, kiangasi na ngatomon ka ngakan. Ngakiro nguna kesi itiliworitotor Ngiyaudi lu elomito lorerea luuchik akolongit na ngatomon ka ngoomwon a elap alo Adar aka alakara ka akiangar, imujio inanakinetei ngainakinet a akimuj. Abu Mordekai kigir ngakiro na asubasi nguna daang, sodi kigira ngabaruae Loyaudi daang lu ayakasi diyete ka lukalonak anakwap a Persia kadaang. Asaki Mordekai Ngiyaudi kitiliwosi akolongit na ngatomon ka ngoomwon ka na ngatomon ka ngakan a elap alo Adar, esukukuu. Ngirwa ngulu kesi kolong amunyareta Ngiyaudi ngimoe kech. Elap ngolo ngesi elochor akialolong kech toliwor alakara, kiloch akigoro kech toliwor esukukuu. Asakitae kesi kitiliwosi ngirwa ngulu lua esukukuu ka ngimujen. Kitiliwosi ngirwa lu einanakinotor make akimuj ka ainanakin ngikebootok ngainakinet. Apot Ngiyaudi kiwapa ngakichikichiket a Mordekai toliwor esukukuu ngolo ekaru daang. Aman lokookeng a Amedasa alo arai alesit a Agag, tarai emoit a Ngiyaudi, abu taram ekura lo enyaritae Purim esaki aanyunea akolongit na emunyarea Ngiyaudi. Areat ngesi akikisar kesi anakwap. Nakaneni tolot Esita nia ekapolon, todung ekapolon kigirae atamar ngakiro naaronok nasek atukit Aman asubea Ngiyaudi, tobongokis ngesi. Apon ngesi ka talokookeng kinenekinoe lokito taarae. Ngakiro nguna kesi enyaritere ngisukukui ngulu Purim. Kotere abarua a Mordekai ka ngakiro daang na asubakin Aloyaudi, apot Ngiyaudi kitiliwosi etal kech, ka etal a ngalesea kech, ta etal a itwaan cha kadaang ani eliwor Eyaudit, atamar kirichunae ngirwa luarei ngulu ekaru daang loger lo echikakinitor Mordekai kesi. Anawiyei kadaang a Ngiyaudi, analesea kadaang, alowaitin kadaang a akwap, ka ngirerea daang, apon totiakunae atamar ejoikinit ngirwa lua Purim itamunio kirichunae jiik. Ani erumor apot Esita nakookeng a Abiyail ka Mordekai kigira abarua, kigirak Esita nabarua ngina atamar achamak ngakiro a Purim nasek egirit Mordekai. Egirakinitae abarua ngina Ngiyaudi daang, sodi yaarae ngabaruae nguna lowaitin 127 a akwap a Persia daang. Agatakinit abarua ngina Ngiyaudi ekisil ka ajokis, nabo edodikinit kesi ka ngalesea kech atamar kirichakis ngirwa lua Purim itemokino loger lokolong sek erichakinitotor aroneenen akimuj ngirwa lu igorotor esutonokinete. Mordekai ka akapolon Esita kesi adungunete ngakiro nguna. Ngakiro na adunguni Esita echamakinit ngitalio a Purim, apon kigirae nakitab. Abu ekapolon Kerkesi kidesik ngitunga lugu akisub etich, ngitunga lua ekwaas a anam ka ngiwaitin luche a akwap. Ngakiro naationok ka nakitalarete daang nakolong asubi ngesi, ka eger lokolong ainakinea ngesi Mordekai etich loapolon, igiritae nakitab na enyaritae Ngakiro a ngikapolok a Persia ka Media. Mordekai Loyaudit ngesi atupit ekapolon Kerkesi anapolou. Arimasi ngesi Ngiyaudi luche nabo aminasi. Asubea ngesi ngitunga keng niajokon nabo agatakinit kesi ekisil. Ayei kolong itwaan anyaritae Yob, ni alomit nakwap a Us. Akerit ngesi Akuj, angerit naaronok. Arai ngesi itwaan ni atenoono peadiposi ka naaronok. Ayakasi ngesi ngide lusapa ngikan-kaarei ka lupesur nguuni. Ani alowae a ngibaren, ameat ngesi ngamesekin ngabunge ngakan-kaarei, ka ngikaala ngabunge ngauni, ka ngaatuk abunget apei, ta ngasikiria ngamiae ngakan. Arikit ngesi tani ngikasubak etich lukaalak. Arai ngesi itwaan ni abarit noi alotunga a akide. Apuyeenete talokookeng a Yob jiik, epukini epei luche akolongit apei, sodi kipeyout tanakaatokech nauni nakimuj. Arai na edaunotor ngirwa lua apuore, tonyou Yob kipeyo ngakipeyos kotere ipei kech daang esaki akitaleun kesi. Asubeene ngesi kongina jiik kainyo abala ngesi, “Esechito tokona ngon talokookang, kichieno Akuj alotai kech.” Ani enangi akolongit na alooso talokookeng a ngakujo aanyun Ekapolon Akuj, ayei Ekipe dang kiding kech. Kingit Ekapolon Akuj ngesi tama, “Aliwae ibunio iyong?” Tatachu Ekipe tama, “Elat ayong ateneene ama ka ama, erimit akwap.” Kingit Ekapolon Akuj Ekipe tama, “Ianyunga iyong ekasuban etich kang Yob a? Emam itwaan iche anakwap kadaang ni nyesechit totenoono loger a Yob. Kakerit ngesi ayong nabo nyediposi ka naaronok.” Tatachu Ekipe tama, “Ikwa ekerit Yob Akuj pas a? Iyoki iyong ngesi ngirwa daang. Ipiarit iyong ibore daang ni etingit ngesi, nabo alalaar ebari lo keng anakwap. Nakaneni ani tokona kitorwaa iyong akan kon tolema ibore daang ni etingit ngesi, kimenyari ngesi iyong toyen!” Tolimok Ekapolon Akuj Ekipe tama, “Kingolik a, kemiekinea tokona ayong iyong ibore daang ni etingit ngesi, nakaneni wara nyiitap akwaan keng.” Abu Ekipe torotok alongaren Ekapolon Akuj. Akolongit apei, emujete ngide a Yob akimuj tamaase emuna anawi a lokookeng a Yob aloapolon. Tomotun itwaan nia Yob tolimok tama, “Kitae sua ngamanat a ngimongin, tadakas ngisikiria nginyia alo diyete. Apot Ngisabea kitoremo sua atipei torujasi ngibaren ngulu daang. Aar kesi ngikasubak etich kon daang. Ayong bon abuchun abu alimokin iyong.” Ani eringa ngolo iruoro, todolu loche tama, “Aar akimilea ngamesekin ka ngikeyokok kon daang. Ayong bon abuchun abu alimokin iyong.” Ani eringa ngolo iruoro, todolu loche tama, “Kiremete sua ngajorei ngauni a Ngikalidayo taramasi ngikaala, sodi taara ngikasubak etich kon daang. Ayong bon abuchun abu alimokin iyong.” Ani eringa ngolo iruoro, todolu loche tama, “Emujete ngide kon akimuj tamaase emuna anawi alokookon aloapolon, tokut ekuwam atipei anariet, touko akai ngina taar kesi daang. Ayong bon abuchun abu alimokin iyong.” Abu Yob tonyou tochilichili ngiworui keng eriaba. Tolur ngesi sodi tobuburiar kilip. Tolim tama, “Kedouni kolong itiokang ayong alecher, nabo abongi nikolong abunio alecher. Ekapolon Akuj kolong kainakini, nakaneni ngesi tokona alema. Kimiekisi ekiro keng kipuroe!” Tani na aanyunea Yob ngakiro nguna daang, nyesecha Yob. Ani enangi akolongit na alooso talokookeng a ngakujo aanyun Ekapolon Akuj nabo, ayei Ekipe dang kiding kech. Kingit Ekapolon Akuj ngesi tama, “Aliwae ibunio iyong?” Tatachu Ekipe tama, “Elat ayong ateneene ama ka ama, erimit akwap.” Kingit Ekapolon Akuj ngesi tama, “Ianyunga iyong ekasuban etich kang Yob a? Emam itwaan iche anakwap kadaang ni nyesechit totenoono loger a Yob. Kakerit ngesi ayong, nabo nyediposi ka naaronok. Kimaimai kolong iyong ayong isaki atamar atomunya ngesi pas. Nakaneni Yob kamuno ayong jik.” Tatachu Ekipe tama, “Towan chene kingolik. Epedori itwaan alemun ibore keng daang torubakinea eyari. Nakaneni ani tokona kitorwaa iyong akan kon tatap akwaan keng, kimenyari ngesi iyong toyen!” Sodi tolimok Ekapolon Akuj Ekipe tama, “Kingolik a, kemiekinea tokona iyong. Nakaneni tochoite iari.” Abu Ekipe torotok alongaren Ekapolon Akuj, kiturup ngajemei awadaang anakwaan a Yob, napei anakichieket tanang losieduduk. Topudo Yob nikalapatan a ere kiboikin lokuruon ialolongi. Tolem ikabeleakat a amot toliwor ekoo akwaan keng. Tolimok aberu keng ngesi tama, “Abe eringa cha iyong jik irai lokimunoi a? Nyo peichienio iyong Akuj totoan?” Tatachak Yob tama, “Iruoro cha iyong loger a ngaberu anakabangaanak. Na kiinakinea Akuj ngoni ibore niajokon, kidiaununi ngoni kilakara. Ani nyo kiburaa ngoni nakiinakinea ngesi ngoni ngichan?” Tani na aanyunea Yob ngichan ngulu daang, nyesecha ngesi. Ayakasi Yob talopaekeng nguuni. Abunit Elipas alore a Teman. Abunit Bilidad anakwap a Chua. Abunit Sopar anakwap a Naama. Ani iirarete ngipaalon ngulu atamar eyei Yob lochan, apot toloto akisililing ngesi. Ani eringa eloose anialonan, taanyungasi Yob, nakaneni nyeyena ngesi. Apot tolomakis akigoro ka akiutere, tochilichileta ngiworui kech eriabasi, sodi tokuronosi ngalup kidiama ka akurokin nakies kech. Ani erumor kiboikinos ka Yob nalup ekiilingat a ngirwa a ngikan-kaarei, akwaar ka apaaran, kainyo apot kingolikis atamar etioko ngichan lu eanyunit ngesi. Ani ekisidi kiruorik Yob kichien akwaar nakolong edounere ngesi. Tolim Yob tama, “Akuj, kilam kare akolongit nakolong kedounere ayong. Kilam akwaar nakolong kapotiunio itiokang ayong. Kibele apaaran ngina toliwor aribu. Akuj, nyiitam kare nabo akwaar ngina. Wara nyiicham akicha inwakuni apaaran ngina. Kitiliwo akwaar ngina naketubulon ka aribu nakirion chuch. Tarap a ngidowon, sodi toburichia akolong toribok akwap. Tachakak akwaar ngina naribu nakirion chuch. Tolema akwaar ngina, nyeelakar alorwa a ekaru, kori nyiimarun alorwa a elap. Ee, ekolupani akwaar ngina, tongopik alakara. Kilama ngikapilak akolongit ngina. Ngulu eweikinito Lepiasan, kilama akwaar ngina. Kitiribok etop keng lo a abaet. Tani kesak akicha nyeanyunete. Wara nyeechil nanyang. Kilamae akwaar ngina, ani awounea akigol akook a itiokang, nabo nyakayuu alochan ka ariaba. “Arai bo kolong atotoan anaperit a itiokang dang! Arai bo kolong atotoan nakedounere dang! Nyo kolong kedakea itiokang ayong? Nyo kolong ketanakea ngesi ayong? Kenapakina eliling, kaperit eanga, ka ngikapolok ta ngikarikok a akwap, lukolong adukete ngakais a ngikapolok na tokona arata asakatan. Keangarit ka talokookeng a ngikapolok, lukolong elelebete egolit ka ngakwangae nakais kech. Arai bo kolong ekok ikoku ni edounio etoanit dang! Arai bo kolong ekok ikoku ni nyeanyungara akicha dang! Epalikinete ngitunga luaronok aronis kech analiel. Ani ngitunga lu eburunit, iangarete jik. Lu eenitae dang, elakarosi kaneni kotere ekisil, lo emamakar itwaan erujit kesi. Eyei itwaan daang naliel, ni eyenikinitae ka ni nyeyenikinitae. Ani ngikedalak, eliworosi kaneni lu elachakina dir. “Nyo imiekinitere ngitunga ibooyete alochan? Nyo isiteere ngitunga lu eriabasi akwap? Iitanito ngitunga lu ikote neni akitu, nakaneni nyetoakete. Iitanito kesi akitu akidwang tani ebari. Elakarosi kesi noi erai ketoaka tonukae. Nyo isiteere itwaan ni erapap erot keng akwap, ni agol Akuj ngiwaitin keng daang? Akisutusuta aliwor akimuj kang, eropuunit akunua kang loger a ngakipi. Kainyo ibore ni akerit ayong ngesi esubakin anikang. Ibore ni ketubuli, ngesi iyoonokin. Nyesilit ayong kori nyelilingi. Emam ngichan kang esal, nyeangarit ayong.” Ani erumor tatachak Elipas lo abunit alo Teman Yob tama, “Yob, ingoi tokona iyong erai kesuruorik ayong iyong a? Nyapedori robo ayong achakin chek jiik. Itatam iyong ngitunga lukaalak, nabo itogogong ngakan napalag. Esichiat ngakiro kon itwaan ni adakara. Itogogong iyong ngakungin na itagatagasi. Erai tokona akolongit kon naga na ianyunea ngichan, nakaneni ibunyakin iyong. Napei tokona kitapeta iyong, kitobul. Meere ni ikeritor iyong Akuj ititinyio iyong a? Meere amamau kon akisech igieno iyong a? Kitama chene iyong. Eyei itwaan idio ni aanyu ngichan nakanuan tarai nyesechit ngesi a? Kori eyakasi lu etenooko lu abukorosi a? Engolik ayong ngitunga echilete ngamanat a aronis sodi kitakis aronis loger a ngikinyam. Elemete tokona kesi ngakiro naaronok. Inyasuni Akuj kesi a akianget keng, sodi tomunya a angoit keng. Irurumaate luaronok loger a engatuny alokaadengan, nakaneni isililingi Akuj kesi topwanyipwanyaa ngikel kech. Etoakete kesi loger a engatuny alo engopikini etiengit eari tanyam. Etoakete kesi kongina topetaros ngide kech. “Akolongit apei, kengaingaakinio ayong ngakiro nakit, katolimokin akiroit imunonitae noi. Kichan ibore ngini ngaju kang loger lo irujaa iyong. Abu ayong katobul atamaranik. Tamaranik akwaan kang daang ani kabulitor. Tokutak akatorot ereet kang, nabo keil topukia akwaan kotere ebuloi. Towo ibore alongaren kang. Atokienyik ayong atowou bo akiyen. Achakina ibore ngini chek. Ani erumor eira etoil elimuni tama, “Epedori itwaan dir aliwor ni etenoono ani a Akuj a? Epedori itwaan dir aliwor ni ikiuna ani a Akasubunan keng a? Nyemuno Akuj tani ngikasubak etich keng lua adis. Eanyuununi ngesi akisech tani alomalaikae keng. Esibit iyong emuno ngesi itwaan ni erai lochoto esubunitere a? Ibore a apua ni epedorio akipudaar loger a ngakimam a? Enyouni itwaan nataparach peedeaka. Ani enangi ebong, totoan atipei peeyenio. Tolemarae ngiboro keng daang. Totoan ngesi pearai ekooson.” Yob, kirema chene taanyu keyei itwaan iikini. Eyei emalaikat edio lo epedori akingarakin iyong a? Iteni eari akichana ekabangabangat, nabo eari etereku ekawaiwaat. Engolik ayong ngikabangabangae isikokinosi nakaneni elam ayong ngawiyei kech atipei. Nyiboikinosi talokookech akaalimon. Ipudaario kesi alokidor, emam itwaan enyouni toik kesi anitubet ngakiro. Ngulu enyamit akoro, enyamete ngalemet a ngikabangabangae. Enyamete tani ngikinyam lu echakakinosi lookwa. Ani ngulu enyamit akure, iterekuyarit ebari a ngikabangabangae. Nyerupuuniyete naaronok analup, kori nyerupuuniyete ngichan analup. Erai itwaan ilope elemuni ngichan keng, loger a ngikatwany alu iteruunosi anakim. “Arai tarai ayong, kasak Akuj, sodi atolimok ngichan kang. Nyikipedori ngoni akiyen ngakiro nakatalarak esubi ngesi. Ani ngakitoodikinet nakailiilok keng, nyesalunete. Eyauni ngesi akiru nakwap, tobukok ngakipi namanat. Akuj ikeuni lupalag, nak lu esutonokinete daang alakara. Epetari ngesi na ereto ngikamodeanak, nyeesubakinotor na esakete kesi. Irumununi ngesi ngikoosok anakiro ana ereto, kisalu ngakiro a ngikamodeanak atipei. Iteete kesi aribu naparan, ani naparan lotingilan, itwapitwapete loger a akwaar. Nakaneni eyuuni Akuj ngikebootok anakitu. Eyuuni lu ichanasi nyiichiakiar. Isigienokini ngesi ngikebootok, ani luaronok kisililingae. “Talakar itwaan ni ikilakini Akuj Naationon! Wara robo nyiimenya ngakiro nakikilakinea Akuj. Iturupuni Akuj ngajemei anitwaan, ani erumor toen. Ewani Akuj itwaan, ani erumor kitangalek. Kiyuununi ngesi iyong jiik nyikiwan. Ani emini eron a akoro, kiratakini iyong anakitu. Ani ngirwa lu ejie, kiyuuni anakwara. Kiyuuni iyong Akuj aloswamit. Kiyuuni ngesi iyong na eponeta nginyas. Ani epote nginyas ka akoro, ikieni iyong, kori nyikeri iyong ngitieng lukaadengak. Engopete ngamoru anamanat kon. Ichamunosi ka ngitieng lukaadengak. Iboikin iyong nawi kon akaalimon. Ani iisi ngibaren kon, irukauni daang eyakasi. Elalakearosi ngide kon. Ee robo, elalakearosi noi totiata asepich a ngimases. Itoani iyong kitonuk imojongit noi. Kikok ngakanoi na eramio ngirwa lu elemere. Yob, kisoma sua ngakiro nugu nikooyen kiyen. Topupok ngakiro nugu toyen, kingarakinete iyong.” Abu Yob tatachak Elipas tama, “Arai bo topedoretei akitem ngichan aloboro alukitemiet dang, kepotiok noi akidwang ngalup a anam. Wara nyiiriangakin kotere angolopa kang. Kagum ayong Akuj Naationon a ngimalea a amod. Akeikin akisierit a ngimalea nakwaan kang daang. Isibakuunitae ngakiro naketubulok a Akuj nikang. “Eruo dir esikiria na edakar nginyia? Eruo aite na edakar amelu a? Nakaneni ngae epedori akinyam akimuj nakapenan nyiwaakina amakat? Nyoni ebob aniakwaan a abeeye? Nyekemuit ayong akimuj na ikoni ngina. Ibore cha daang ni anyami ayong, kemololou. “Wae, nyo pekainakinea ayong Akuj ibore ni elipit. Nyo pekainakinea ibore nikemuit? Ajoikinit cha ngesi jik keriadari ayong. Ajoikinit cha ngesi kaari ayong. Arai atoyeni atamar kaari, kapor ayong alakara, pekamisikinit nikaapilan. Kainyo nyengero ayong ngakiro na edungunit Ekapolon Akuj. Nyaalu ngikilinga arubakinitor ayong ayari? Nyo eringa atitinyikinitor na emamakar ibore egieno? Erai ngikilinga kang lua amoru a? Kori erai akwaan kang asuat nanyang? Iteni dir emam ayong kona ayuun. Emam ayong kona engarakin. Alochan alu ikote lugu, asaki ayong ngipaalon lu amuno. Erai keringa ewapit Akuj Naationon kori kemam. Ani eliwor esi ngipaalon kang, kingalaate esi ayong, loger a ngingololin, alu eokete ngirwa lua akamu. Eburichiari eloch ngingololin ngulu, toduka ngamoru a akiru alotooma kech, Ani ngirwa lu eriraunea akolong, tokeiasi tongopa, kidongo ngangololin eoko deu. Tachakaros ngikalotok esakete ngakipi. Tolomasi awowoot sodi totoanikis nariet. Elomarete ngikalotok alo Cheba ka Tema akisak. Nakaneni edaikin akigieno kech nangololin nakoonok. Ikote esi ngingololin ngulu anikang. Iteete esi ngichan kang, kikutukutoosi akamaluwot ani iemitotor. Abala ayong esi nakinae ibore idio a? Kori abala todiakakinae itwaan idio a ibore? Kori abala ayong esi toyuunae alomoit kang? Kori abala toyuunae alotunga alu kechiakiarito? “Kitatamae robo ayong, tolimokinae ngakiro na echwangakinit ayong. Elilingi ayong atopupok ngakiro kus. Echamuni itwaan ngakiro na iteni, Nakaneni ngapasiyek ngakiro iruorosi esi. Esibit esi ketanaki ayong esi ngaanyukae a? Ani kikoni neni a, nyo itacheeneta esi ngaanyukae nguna? Irameenete esi ekura totiaketa ngikedalak lukokiok. Tabara tani ani igielanareta ngipaalon kus Tokienyikinae mono esi ayong. Nyekengalae ayong esi. Kaupa ayong ngakiro nakus nugu. Tojongoto aremokino ayong. Nyikirirata ayong, emam ibore asechit. Abe ibalasi esi kori kengalae ayong esi. Esibit esi nyapedori ayong akiyen naaronok ka naajokak a? Erai eboyor a itwaan anakwap eka ekilek jiik. Ikoni eboyor lo esubere etich loationon. Ikoni ngesi ekedalan lo imuit etolim. Ikoni ekasuban etich lo idarit ngaropiyae na itanyamio. Ngilapio daang, emam ibore egieno ayong. Ngakwaarisea daang, ariaba ayong. Na enapakinor ayong, engis abala, ‘Ekoe, ori anyounio!’ Nakaneni nyiwalari atipei. Ebelobelo ayong akwaar kiiya agasi atamar tabaiya. Ileleba ngikur ka elos nakwaan kang. Ebutakina loper nakwaan kang. Eropiyete ngabulon anajemei kang. Ekerete ngirwa kang akidwang tani acheran na edonyere. Emam ibore egieno ayong alorwa kangulu. “Ee Akuj, kitam atamar erai akiyar kang ekuwam. Adaun kolong alakara kang. Kitee iyong ayong tokona, nakaneni nyikianyungari nabo. Ani kisak iyong ayong, atongopiarite ayong. Loger a edou alo etoaniari tongopia, ikokini itwaan ni etoani tolot lokatoak neni. Nyebonguni nabo itwaan ngini nawi keng. Nyeringa nabo ngitunga daang lukolong arukitotor ngesi eyenete ngesi. Kotere nguna, nyelilingi ayong! Angoit ayong ariaba. Eburakini ayong kotere ngakiro nakanomito etau. Nyo eringa iyong kiyokiyo ayong? Esibit iyong arai ayong etiengit a anam a? Ani alimuni ayong atama, ‘Eangari ayong alokitanda kang. Kesianguni aperiet kang ayong aloburas kang.’ Nakaneni kitoem iyong ayong kotere akirujare, Kitubul kotere ngakisingolikinet. Tanang atiakuni ayong amiadakin, atotoan akidwang akiboi alochan kalu. Kakadaki ayong eboyor kang kainyo nyayari jik. Kimiekinae! Kainyo ikote ngirwa akianget. Nyo kijoikinit iyong anitwaan? Nyo imisitor iyong ngakiro na esubi ngesi? Ingichit iyong ngesi ataparach daang, iningit ngesi adakikat daang. Nyingoliari iyong tani wache wadio, kimiek eliko tani ni erai ngakimul a? Iyong eketeon ngitunga, ani kasech ayong, ikokini akisech ngina kiwani iyong ai? Nyo kitiliworea iyong ayong ni egumanakinio ngimalea kon? Kaliwor kolong ayong eegos loapotion noi anikon a? Nyo kolong peirimakinea iyong akisech kang? Ikwa nyikisari iyong aronis kang a? Nipei bore en, amini ayong naliel kang, ilomari iyong akisak ayong, nakaneni angopi ayong!” Abu Bilidad lo abunit alo Chua, tatachak Yob tama, “Irubakini iyong iruoro ngakiro nguna tanang ori? Ikote ngakiro kon ekuse a ekuwam aloapolon. Esibit iyong ibatanari Akuj na eriyan a? Epedori Akuj Naationon akibatar ngakiro na iyookino a? Kesechakinito tokona kolong ngide kon Akuj dir, ngakiro nguna emiekina Akuj kesi anaronis kech. Ani kisak iyong Akuj, kimaima ngesi na erai Akuj Naationon, tarai iyong lo nyisechit tarai lo itenoono, ebuni Akuj kingarak iyong, kitojok nabo ngakiro a awi kon. Ebari daang lo abukor anikon edit. Elalaar ebari lo kiinakini iyong Akuj ekisidi. “Kitama mono iyong aosou nakolong a angorot. Kitama ngakiro nakolong aanyunete taapaayok. Kirai ngoni ngitunga lubeen aringa kidounio, emam ibore kiyeni. Kitorit ngoni nakwap naga loger a etorube. Kimiek ngikoosok lu ngorot kitatam. Topupok ngakiro kech na aosou. ‘Nyerupunete ngitiriwae ani emam ngakipi. Nyekilikiluunete kesi ani echadakina alorus. Ani ijiwarete ngakipi, isiaunete ngitiriwae tooko, eringa edisiak emam ibore esubakinere. Ikote ngitunga lu nyekerito Akuj ngitiriwae ngulu. Engopi ibore igienosi kesi, na eisikineta Akuj. Igienosi kesi iuno, igienosi akai a asimokok. Ani kegongakinosi kesi kai a asimokok, igangi akai ngina kesi a? Ani kerwakinosi kesi iuno a, igangi kesi towaatar a?’ “Erupete ngitunga luaronok loger a edoan alo imakinit akolong, loger a edoan alo ialakina mana wadaang. Engichakinosi ngaten kech namoru, totinga ataaba daang. Nakaneni ani erutunio kesi, tosub pekeyakasi kolong neni. Ee, alakara a ngitunga aluaronok daang ngina. Epote luche pena nisek ayakasi kesi. “Nakaneni nyengeri Akuj ni emam akisech, nabo nyingarakini luaronok. Kimiekini ngesi iyong tokieni kimaritete. Nakaneni ngulu kiremokino iyong, isurumi ngesi ngileech. Epuripuriakinosi ngawiyei aluaronok.” Ani erumor tatachu Yob tama, “Iteni dir ayeni ayong atamar ikote ngakiro neni. Nakaneni ikokini itwaan idodiuni ani a Akuj atamar eriyan eboyor keng ai? Ikokini itwaan epegasi ka ngesi ai? Epedori ngesi akingis ngakiro abunget apei na emam ikatachunan. Eos Akuj noi totiono. Ngae mono aweiki Akuj tama epiyo ngesi Akuj? Isiyotonokini ngesi ngimoru nyelimuno sek. Toukono ngesi engoit. Eyaununi Akuj amaranikin a akwap, kitamaranik ngalup. Itirikirikokini ngesi ngapirio na itoweito akwap. Epedori ngesi akiratakin akolong nyiipiripiruu, ani ngikanyer nyiimaut nakwaare. Akuj kolong bon apetakini adis, topolok anam. Akuj ngesi enenekini ngikanyer nadis. Lu enyaritae etom loapolon, ka ngikarikok, ka ngakanyer, ta ngikanyer lua lokuju. Nyikipedori ngoni akiyen ngakiro nakitalarete na esubi ngesi. Ani ngakitoodikinet keng nakailiilok, nyesalunete. “Epedori Akuj akitorun diyete kang nyaanyunga ayong. Ani erumor tolot wache peayeni ayong. Elemari ngesi ibore ni esaki, nakaneni emam itwaan iratakini ngesi. Emam itwaan epedori akingit ngesi tama, ‘Nyo isubi iyong?’ Nyiratakini Akuj angoit keng. Amunyari ngesi ngimoe keng lu engarakinete etiengit a anam lo anyaritae Raab aweikin Akuj. Ekokini tokona ayong atachi ngakiro a Akuj ai? Nyaai ni aanyunea ngakiro na alimuni? Tani kemam ayong akisech, emam kona atachi ngakiro keng. Erai anikang idongit akilip Akuj na erai akeriran kang atamar kesien. Tani kanyara ayong ngesi kiki, esibit ayong nyepupokini ngakiro kang. Emeuni ngesi ngikuwamea katowana ayong, kitalala ngajemei kang akiding pas. Nyekemiekini ngesi ayong tani eangak. Eleleb ngesi anyunyura loboyor kang. Eyei ibore etingakini ayong Akuj a ekileenu kang a? Ani kisak iyong kitotubokin na eriyan, Ngae itonyouni ngesi tolot nitubet ngakiro? Tani kemam ibore asechit ayong Keriraate ayong ngakiro kang Esibit ayong kerirae ibore daang ni alimuni ayong. Emam ibore asechit, nyamisit ayong akiyar kang. Aremokino ayong eboyor kang. Emunyari Akuj lukasechak ka lu nyesechito aapei. Eraakasi nguna daang ngapei anikeng. Ani etoani itwaan ni nyesechit atipei, tokieni Akuj. Ainakini Akuj ngitunga luaronok akwap. Kitumudukan ngikatubok ngakiro daang. Ani pekerai Akuj asubi nguna, ngae iche asubi? “Ekerete ngirwa kang. Eroko ngirwa ngulu daang. Ibiroro ngirwa kang loger a emal. Epiraka ikote egole lo ibiriuno kwap ni eyei apoo. Ani kalim atama, ‘Emiekini ayong akiburare. Ajongoe ayong asinyit, atoliwor alakara.’ Kabulit ayong kotere ngichan kang daang, kainyo ayeni ayong atamar kemarunit ayong Akuj atamar asechit. Ani keriratae ayong atamar arai ekasechan, nyo echanar ayong pas? Emam esabuni ilotari akisech kang. Kachakakini Akuj ayong nakipany a ekabose. Irumete ngiworui kang daang ngileech kotere ayong. Arai tarai Akuj itwaan, katach ayong ngakiro keng. Kilot nitubet ngakiro kitotiek kaneni. Nakaneni emam itwaan engichakin kiding kosi, kitotiak ayong ka Akuj. Akuj, tojongo akirirare ayong. Tolema ngakiro naketubulito ayong. Ani kikok neni, kiruoro ayong ka iyong peaemit, kainyo nyakabuli ayong alongaren kon.” Kakadaki ayong akiyar kang! Eburakini emam ibore aemit. Alimuni ngakiro nakanomito. Alimokini Akuj atama, Akuj, nyikirira kare. Tolimokinae mono iyong ibore nikibolor ngoni. Tokona mono a, ejok iyong ichiekiari ka akimenyar etich kon a ilope, sodi kitojoikis ngakiro a ngitunga aluaronok a? Eyakasi iyong dang ngakonyen na ikote na ngitunga a? Itee iyong dang loger a ngitunga a? Ekidioko ngirwa kon loger alu a ngitunga a? Ani bo ngikaru kon, ekidioko loger alu a ngitunga a? Ani nyo ingichitor iyong ngasechesea kang daang? Nyo iripitor iyong ibore ni echwangakini ayong daang? Iyeni iyong atamar nyasechit ayong. Iyeni tani atamar emam itwaan kayuuni ayong anikon. Ngakan kon kolong kayeunete ayong katosubut. Tokona, ngakan napei nguna kenyasut ayong. Toyen atamar kisubuni iyong ayong alochoto. Kibuari cha iyong ayong nabo napua a? Kiyesuni kolong iyong loger a ngakile. Kisipuk anakook a itiokang loger a edodo. Iwaakini iyong ngakoyo ka ngamori nakwaan kang, ani erumor toburichia ngakoyo a akiring ka amuny. Kiinak iyong ayong akiyar ka amina na nyedaun. Ayari ayong ani kichoikinitor iyong ayong. Nakaneni ayen tokona ayong atamar ngirwa ngulu daang ireat iyong akiwan ayong. Idarit iyong akingolikin ayong asechi, sodi towounea arimakin ayong. Oitiakoi! Na asechea ayong, atoloma lonyas! Ani asubi naajokak, nyekepuruunio. Kainyo kerumito ayong ngileech, ayen ngichan kang. Ani naanyunea naajokak, toloma iyong akirikare ayong loger a engatuny. Isubi iyong tani ngakitoodikinet nakailiilok isaki akiar ayong. Ingichit iyong jiik keyei ibore iche asech ayong. Iatanakin angoit kon anikang jiik. Isakuununi iyong jiik erot eche lo kitijikinio ayong. “ ‘Akuj, nyo kolong kimiekinea iyong ayong kedounio? Arai bo kolong atotoan dang eringa ngitunga nyeanyungara ayong! Napei anaperit kayaar jik naliel, tosub kamam kolong. Aapuut ngirwa a akitu kang. Kimiekinae kare! Eangarea mono wadio. Eringa nyeloto ni nyabongunio nabo. Atolot ni eribokinit kiriono chuch. Erai aribu, ka ngitorubei ta ekurikur eyakasi neni. Ikwaan aribu ka akicha kaneni.’ ” Ani erumor tatachak Sopar lo abunit alo Naamas Yob tama, “Ebucharosi ngakiro nakaalak nugu nyetacha a? Ikwa itenikin akwaan kotere ayenut ekiruor a? Ibala iyong kori isililingi ayenut kon ekiruor ngitunga? Ibala iyong kori kichakin sua chek kotere aratanu kon a? Abe ibala iyong, ‘Ejokak ngakitatamet kang. Ekiuna ayong ani a Akuj!’ Arai bo tangaari Akuj akituk keng dang, kisuruorik iyong. Kilimok ngesi iyong ngakiro namunonoe daang a aosou keng. Kainyo eyeni ngesi ngakiro a aosou anaationon nyeyeni itwaan. Kirirat iyong Akuj wadiochichi akidwang eger lo ajoikinit kiriraa. “Ikwa ipedori iyong akiyen ekukuor ka etiae a apolou ka agogongu a Akuj Anaationon a? Ilanyit ekukuor keng adis, ikokini iyong ai? Eyei ekukuor keng kwap noi akidwang ni eyakasi ngikatoak, nyoni iyeni iyong? Ewoi apolou a Akuj idwangit akwap, ebalany idwangit anam. Ani kirum ngesi iyong kiteriku nitubet ngakiro, ngae epedori akiratakin? Eyeni Akuj ngitunga lu eraakasi ngipasiyek. Itee ngesi ngakiro kech naaronok daang. Isiakinete ngikabangabangae aosun na euruunere ngisikiria a moding epataka. “Yob, kitenik eboyor kon. Kibaa ngakan kilip Akuj. Ani keyakasi naaronok tachaka. Nyiichamu naaronok epete nawi kon. Sodi kilekakinos iyong ka ngakiro a akwap nabo, itionikinit tarai lo ititiny. Ngesi engopiareta ngichan kon daang alotamen kon, loger a ngakalel ana ijuarete kimuriakis ngitunga ngakiro kech. Ekwanger eboyor kon kidwang akwangis a apaaran lotingilan. Ani ngisaae a eboyor na aribu, ekwanguunete loger a esaa alo echilea nanyang. Iboikin iyong niajokon eyakasi na igieno. Kiyoki iyong Akuj kisianga. Nyiem iyong ngimoe kon. Etamarete ngitunga lukaalak iyong kingarakinae. Nakaneni engolengoleete luaronok ejamakina. Engopikini kesi kona esiyete. Ibore ni igienosi kesi ngesi akiyen atamar kitoaki.” Abu Yob tatachu tama, Itemokino, kainyo esi kesi ngitunga, lu iraakasi na itoaketa, edaun aosou. Nakaneni aos ayong dang loger kus. Nyijokak esi noi akidwang ayong. Eyeni itwaan ngakiro na ilimu iyong. Kakianatar ayong tani ngipaalon kang tokona, atarai ayong lo atenoono emam ibore asechit. Nakaneni ayakasi kolong ngirwa lu atachuununea Akuj ngakilipasinei kang. Emam esi ngichan eyakasi, tani ikoni neni, kikianatar esi ayong. Kiteete esi ayong acheretaara, torubakinito esi kijukarito. Nakaneni ibooyete ngikokolak ka ngitunga luaronok akaalimon. Tarai ngikilinga kech eraakasi Akuj kech. Kingita chene ngitieng a moding, kitatamikinete esi. Kingita chene ngikieny, kilimokinete esi. Kingita ngiborei lua akwap ka lua nganamea, kitatamete kesi esi aosou. Eyenete ngiborei ngulu daang atamar, Ekapolon Akuj Namerikanyer kisubuni kesi. Eyei akiyar a ibore kadaang nakan keng. Eyei akiyar a itwaan kadaang nagogongu keng. Eroanari akit ngakiro loger lo iirea angajep akimuj. Eosok ngikasukou, tochwaaka lu ebooyete nikooyen. Tani ikoni neni, Akuj ngesi eos, togogong tarai na echwaana. Na eukorea Akuj, ngae ebongokini akiduk? Ani ngae elachakini itwaan ni aen Akuj? Emini akamu na ewounea Akuj akiru. Ani engauni ngesi ngakipi, pena ngakalel. Egogong Akuj tarai akedwangan. Lu ingalao ka lu ingalaate, eyakasi daang nakan keng. Elemanari ngesi aosou a ngikapolok, ani ngikarikok kitusub ngikabangabangae. Edemanari ngesi ngikapolok apolou kitiliwo kesi ngienan. Itiditeununi ngimurok a Akuj ka ngikajwok. Isililingeene lu emunoi, todema ngikasukou aosou kech. Isurumeene lu eraakasi ngikapolok ngileech, kitasalu ngikilinga a ngikapolok. Isileereununi na eyakasi naribu. Ani na eyakasi ni eribokinit chuch, yau nakicha. Itiliwonori ngesi ngibukui lukajwok ka lu eyenikinitae. Ani erumor kidwang ngesi kesi kinyasu. Itabangaani ngesi ngikapolok a ngibukui kangulu. Kimiek kesi esakasakato, ibilerit. Itwapitwapete kesi anaribu kimatamatas loger a ngitunga alu ilewat. Toyen atamar engolik ayong nguna a ngakonyen kang, eira ayong a ngaki kang a ilope, ayen lokojokon. Nguna iyenete esi, ayeni ayong dang. Nyijokak esi akidwang ayong. Nakaneni asaki ayong eruoro ka Akuj Naationon, meere ka esi. Asaki ayong atopega ka ngesi kotere ngakiro kang. Irapito esi abangaanut kus a alioko. Ikote esi ngimurok lu nyitedekuunete itwaan. Arai bo kililinga chek dang. Ketamar kori iosok! Kiira ngakiro na alimuni ayong. Nyo iruorotor esi alioko? Ibalasi esi kori ingarakini aliokon Akuj a? Isakete esi aikin Akuj a? Ipedorete esi akiwo anitubet ngakiro toikis ngesi a? Keloma Akuj angichit ngakiro kus, esibit esi epedori ngesi aanyun ibore idio ejok anikus a? Esibit esi ipedorete akingalare Akuj loger lo ingalaata ngitunga a? Kikilakini ngesi esi erai kitiakito esi ngitunga imunonito. Kitubuli esi agogongu keng. Ngapasiyek ngakamatak kus loger a ekuron. Ikote ngakiro na igaate esi akigare a echoto. Kililinga kimiekinae eruorik. Tosubakin cha ngakiro na esubakinosi. Ajali ayong akiyar kang. Emam ayong ibore egieno. Emam ngakiro tani kaar Akuj ayong. Eruorikini ayong ngakiro kang kiira ngesi. Apedori ayong tani ayuun kotere atitinyu kang. Kainyo emam itwaan aronon epedori aweikin Akuj. Topupok tokona ngakiro na esisauni ayong. Todeta akit kiira ngakiro na alimuni ayong. Asadit ayong, asaki akisisaun ngakiro kang, kainyo ayeni ayong atamar nyasechit. Akuj, ibunit ayong akirirare ayong a? Ani kibunit iyong akirirare ayong, kimiekinae eliling sodi atotoan. Eyakasi ngakiro ngaarei kelipit iyong. Ani kiinak iyong ayong, nyepungar ayong anikon asaki akiduk. Tojongo kare akirirare ayong. Wara nyikimunya ani kitubulio. Kiruorik mono Akuj, atatachu ayong ngakiro kon. Kori kimiekinae ayong robo eruorik mono, tatachu iyong nakang. Nyoni asechit ayong? Nyoni echwangakinit ayong? Kerirakinitae ayong a ngakiro kaanu? Nyo kibongokinitor iyong ayong akau? Nyo kitusubunitor iyong ayong emoit kon? Nyikitoem kare, ekoni ayong akuyen. Ekoni ayong akasirimait nakoonon na ekutakinit ekuwam. Itoronit iyong noi ngakiro nakiriraa ayong. Imarunit iyong tani ngakiro nakolong asubi ayong eringa adit. Ienikinit iyong ngiriko nakejen kang. Iseme iyong elote kang daang. Iripi iyong tani ni ichiekete ngakejen kang. Kinyasun itwaan loger a ibore ani abosia, loger a eworu alo irikari ekatapan. Epalag itwaan daang nikolong edouni aberu. Ekidioko ngirwa keng eraakasi ngika ngichan. Epukiari itwaan loger a aturot, ani erumor tooniyo atipei. Ekeri itwaan loger a etorube tongopia. Tokona mono Akuj a, nyo ikienyikinitor iyong ngesi? Nyo irikitor iyong ngesi nitubet ngakiro? Isaki atamar totub ngakiro keng a? Emam ibore italeuno ni ebuni anibore ani nyitaleuno ikoni itwaan. Etiakunitae etiae a eboyor keng kolong sek, ka etiae a ngilapio keng. Igerok iyong ngikukuorin lu nyejoikinit ngesi ilami. Tojongo akitere itwaan ngini, topedorea ngesi alakar, loger lo elakaror ekasuban etich einakinio ngaropiyae keng. Eyei ibore igieno tani ekitoe lo etuborio. Erupuni ngesi nabo kimineau. Tani kemojongeta ngaten na alokwap, totoanik atorom keng nalup, ani eriamuni ngakipi, imineauni loger a ekitoe alo aringa erupuni. Nakaneni itwaan na etoanea, esal keng ngesi ngolo. Ani na etoanea ngesi, eringa nabo eyei aliwae? Eger lopei etubotor ngangololin, ka eger lopei eonioto nganamea, ikoni itwaan dang neni. Nainapakinor ngesi nalup, nyenyouni nabo jik. Tani kengopia adis, nyerianguni ngesi anaju jik. Arai bo kidaa ani eyakasi ngikatoak dang! Tanang anyunyura kon edaun. Ani erumor toseu ngirwa lu kitamunea ayong. Ani ketoana itwaan a, eyaruni a? Kedar ayong iyong ngirwa a etich kang daang, tanang kalachakinio ayong. Ani ekisidi kanguna, kinyarae iyong ayong ekii. Talakar iyong kianyungari ayong, lo arai esubuna kon. Toliwor iyong imari akikalamikinet kang daang, nakaneni toliwor nyingichingichi iyong ngasechesea kang. Kirimakini iyong ayong ngasechesea kang tachada. Ikisari iyong ngakiro naaronok daang asub ayong. “Epete ngirwa lu eukorotor ngimoru, sodi tolemarae ngatabab anipalem esipotor. Ikisete ngakipi ngamoru. Emiatari akiru nakaalan ngalup, sodi tongopik itwaan ibore ni eyarea. Idwangi iyong itwaan ngirwa daang, tolot ngesi. Ebilakini ngesi ereet keng totoan. Ani erimae talokookeng, nyeyeni ngesi, kori nyelimokinio ngesi tani na irumeta kesi ngileech. Eyeni ngesi apipilu na akwaan keng bon, kigor tosutonok kotere ngesi ilope bon.” Ani erumor tatachak Elipas lo abunit alo Teman Yob tama, Yob, eraakasi ngakiro kon ngaanyukae! Ngaanyukae ngakiro kon! Nyiruoro itwaan nikooson loger ngolo. Kori nyepega a ngakiro anapasiyek loger logo. Nakaneni ipalik iyong akerit Akuj, sodi kimenya akilipit Akuj. Aronis kon kitatami iyong. Isaki iyong akiduk alokiruor alokooson. Ngakiro kon kiriraate iyong, meere ayong. Kirirae iyong angajep kon. Esibit iyong kori iyong irai lo ekingaren kidounio a? Iyei kolong iyong na asubea Akuj ngimoru a? Iirarit kolong iyong ngakiro na areat Akuj a? Esibit anikon iyong bon irai itwaan nikooson a? Emam ibore ni iyeni iyong ni nyikiyeni sua. Kitatama sua aosou alokasukou alu a ngakorwo. Ngikasukou lu amojongito akidwang apakon. Ikwa nyikitemokino iyong akisienguno a Akuj a? Kori nyikijoikinito iyong ngakiro nakisubea ngesi iyong a ajokis keng? Nakaneni ilakara iyong, kipochonokini sua ngakonyen ingoit. Ingoikinit Akuj iloma akiruor ngakiro naaronok. Eyei itwaan erai ni ikiuna? Eyei itwaan nikolong edouni aberu ni etenoono ani a Akuj a? Kingolik a, nyemuno Akuj tani ngimalaikae keng lu italeuno. Nyikiuna tani kesi alongaren keng. Emasi itwaan naaronok itisibit ngakipi. Erai itwaan ni ileleba naaronok ni ibatara. Topupok tokona Yob, Katolimok na ayeni. Ketatam ayong ngikoosok ngakiro na iteni, nakolong etatamete taaapakech kesi, emam ngakiro emunono kesi. Amam ngitunga a akwap a ache lu ayakasi nakwap kech. Amam ikebataran kesi Anakuj kech. Itwaan niaronon ni ichiekiarit luche, eriab ngirwa daang lu eyarea ngesi. Iirari ngesi ngitoilio lu itubulete. Eremete ngesi ngirukooi esaa lo ebalar ngesi kori ebooyi niajokon. Nyenupit ngesi atamar abonguni anaribu, kainyo idarit akiar ngesi. Idarito tani ngataruk akinyam akiring keng. Eyeni atamar kaapiki ngesi aribu. Itubulito ngesi ngichan ka nikaapilan. Itubulito loger a ekapolon alo enyounit lojie. Ngakiro nguna kesi eanyuni itwaan ni isiganakini Akuj akan, sodi tonger ngakiro Anaationon. Epeuni nikeng kibirun etingit aupwal a akan. Kainyo ikileenikinit ngesi, nabo erai itwaan a ngikilinga. Elomi itwaan ngini lorerea lu eraakasi alaireng. Elomi nakais nakolong amatarotor ngikulepek. Nakaneni inyasuni ejie ngirerea ngulu ka ngakais. Ekidioko ngirwa ebaritor itwaan ngini. Emam ibore keng ni erubi. Engopiari tani etorube keng. Nyebuchar ngesi anaribu ana ebunit nikeng. Ikokini ngesi ekitoe lo inomio ngaten keng a akim, tokutanari ekuwam ngatur keng. Ani kebangaana ngesi, elomari amuno naaronok, Toliwor naaronok eraakasi ebachit keng. Ani eringa esaa keng nyitemokino, eoniori ngesi, loger a ateni ana nyimineauni nabo jik. Ikokini ngesi emusabib lo erarauni ngamusabib naajonak. Ikokini ekitoe a akimiet lo erarauni ngatur keng. “Engopete ngalesea alu nyekerito Akuj. Enomiari akim ngawiyei alu ipotonorete ngaropiyae nadiaket ngitunga. Ereto ngitunga ngulu ngichan, kirokete ngakiro naaronok. Ileleba engalas lotai kech.” Sodi tatachak Yob ngesi tama, Eira ayong ngakiro na ikote nguna nakaalak. Akisililing nakisililingeta esi ayong erai ariaba naaronon anikang. Irubakini iyong ekiruor jik a? Nyo kipiipiakinit iyong isakea ekiruor jiik? Arai tarai iyong ayong, nabo atarai ayong iyong, keruor ayong ngakiro daang na tokona iruoro iyong. Keroku ayong ngakiro daang nakesuruori esi, sodi eikiik akou kang kotere aosou. Kesuruor ayong iyong ketenik, ketubo angajep kang ibore ni kipipilikinit iyong. Nakaneni emam ibore eyauni ekiruor kang, kori nyitupupokini akililing kang nikaapilan. Akuj, kitubur iyong ayong. Imiek iyong ngitunga a awi kang eario. Kirum iyong ayong kiting a agogongu. Irai iyong emoit kang. Edong ayong ngamunyin ka ngakoyo make. Ebalasi ngitunga kori kekaritor ayong ni asechitor. Anyilinyilaa Akuj nginerin kang engoit. Kapochonokini ngesi ayong ngakonyen engoit. Kakianatar ayong ngitunga. Keriamito kesi ayong a ngajorei, kebapabapata ngamatengen. Kepoto Akuj ayong kainaki ngitunga luaronok. Ebooyi kolong ayong akaalimon, nakaneni katorwakin ayong Akuj emosiring katonyilinyilaa. Kesikok Akuj ayong ibore ni echakachakao ileletoi. Kagumit ayong a ngimalea alowaitin kadaang. Kechumete ayong ngimalea ngulu katowan, tani kikok neni emam ngesi ngisien anikang. Kawaneene ngesi ayong jiik. Karemeene ngesi ayong enyunyura, loger a asiger ana ekoporito ngikerep. Egoro ayong anapit ngikuniae, sodi eboikin napua nege abanganiarit. Arengeta ngakonyen kang kotere akigoro. Abuoto ngakonyen kang eriam ngitorubei. Nakaneni nyarai ayong ekademan, nabo ikiuna akilip na elipitor ayong Akuj. Wae akwap, nyiiwa naaronok kasubere ayong! Nyikisililing kare ayong, asaki ayong katosubakinere na eriyan. Eyei ekaanyunan kang nadis ni elimuni ngakiro kang katoik ayong. Kemenyarito ayong ngipaalon kang. Atoyae ayong ngakiyo ani a Akuj. Asaki ayong itwaan idio todiak Akuj kotere ayong. Loger lo ediakar itwaan kotere lopae keng. Adaunet a ngikaru a ngidikidio isidiunosi, alosi ayong ni nyabongunio nabo. Aapuu esal a akiyar kang. Emam ayong tani kona eangakini. Kedarit ayong aliel kang. Etee ayong a ngakonyen kang eger lo kakianar itwaan daang. Akuj, eruoro ngakiro na iteni, tonup ngakiro kang. Emam itwaan iche iikini ngakiro na alimuni ayong. Igol iyong ngitamen kech nyeeyan ngakiro kang. Nyiicham kesi tokona kedwangete ayong. Epedori itwaan akimod lopae keng kotere ngaropiyae, sodi taanyut ngide keng ngichan kotere ngakiro nguna. Ketiliwo ngesi ayong lo kakianatar ngitunga, apot ngitunga ngulu akimoanakin ayong loreet. Ekot ariaba kang akitumudukan ayong. Ekokis nginerin kang daang ngitorubei. Eteriangakis ngakiro nugu ngitunga daang lu eteniyete. Ani lu nyesechito, akadakis ngakiro a ngichan kang. Erubakinete lu eteniyete iwapito elote kech. Ani ni ikiuna, isikokin togogonger. Nakaneni ani kepot kesi daang towaa alongaren kang, kemam tani epei kech aanyuni ayong erai itwaan nikooson. “Adaunosi ngirwa kang, enyasun ngakiro na asaki ayong akisub. Emam ibore eringa ayong egieno. Abe ebalasi ngipaalon kang erai akwaar apaaran. Ebalasi kesi aapuu akicha, nakaneni ayeni ayong atamar edongi ayong naribu. Ni egieno ayong ngesi ni eyakasi ngikatoak. Neni ngesi enapakin ayong, atoper ani eribokinit. Ani kalimok ayong aliel atama, ‘Irai iyong apakang.’ Ani erumor atolimok ekurut atama, ‘Irai iyong itiokang,’ kori ‘Irai iyong nakaatokang.’ Nyaani tokona akigieno kang? Ngae eanyungari na egieno ayong? Nyikiruki ayong ka akigieno na alosio lokatoak.” Ani erumor tatachak Bilidad lo abunit alo Chua Yob tama, “Yob, nyililingi kolong iyong jik a? Arai topuponokini iyong, kisuruor sua iyong. Nyo kitabangaanitor iyong sua kwa ngamesekin? Inyilinyila iyong bon a angoit kon. Ibala iyong kori idongi akwap erai alaireng, kori isiyotoori Akuj ngimoru ani ingoitor iyong a? Itudungeo ataa a itwaan aniaronon. Nyenokuni asarae a ataa kangina jik. Eribokini akicha na eyei kai keng. Ani ataa na inenekino, edunge. Agogong kolong ngakichieket keng, nakaneni iteriterosi tokona. Ani ngakiro na ereat ngesi ilope, edakarete ngesi. Elosi ngesi ilope kichiak epuute, tachakakin ngesi nakipany. Erwakin eloit ngatitiny keng tokod. Idaikinitae atachit lorot. Ewaakin eloit ni itori ngesi. “Itubulitoe ngesi alowaitin kadaang. Ebulit ngesi ani elosi kadaang. Abarit kolong ngesi, nakaneni angopiki tokona akimuj. Erukito ngesi ka ngichan. Erika edeke loaronon akwaan keng korot, etobosia ngakan ka ngakejen keng. Alemario ngesi anawi ana kolong egieno, kiriarae ni eyei ekapolon lobe Akitu. Epedori tokona itwaan cha daang akilom nawi keng, erai kewatakin akibirit kitoseg. Aoko ngaten keng na alokidiama ka na alokwap. Adaun ekipur keng anawi ka moding. Emam itwaan eringa itamunit ngesi. Itwarakinio ngesi anakwap ana eyareta ngitunga. Itwarakinio anakicha tolot naribu. Emam ngesi ngide kori ngalesea. Emam ekeruman awi keng. Napei alo kide tanang too, daang lu iirarete ngakiro keng, imungumungakinete ngakies tamaranikis ebulit. Ngakiro na ikote nguna eanyunete ngitunga luaronok, lu nyekerito Akuj.” Ani erumor tatachak Yob tama, “Kiboliatar esi ayong a ngakiro kus tanang ori? Kirata esi ayong ngaraset nakaalak, nakaneni nyikitimi esi tani eger lo kirasitotor esi ayong. Tani kasechit ayong dir a, nyo kipipilikinit esi? Esibit esi ijokak esi noi akidwang ayong. Itamito esi atamar idodiunito ngichan kang atamar asechit ayong dir. Nyiteete esi atamar Akuj ngesi asub nugu a? Apetaki ngesi eloit lo kesurumea ayong. Angerit ayong ngakiro nakaremitor Akuj kongina, nakaneni emam ikapupokinan. Emam ikeiraran atamar asaki ayong katosubere na eriyan. Agol Akuj erot kang, emam ayong kona etori neni. Arap ngesi erot kang a aribu. Alema ngesi ebari kang daang kinyasu ekipur kang. Kenyasu ngesi ayong alowaitin kadaang kamunya. Ani akigieno kang, adita ngesi loger a ekitoe. Engoit Akuj, etililit ayong ngesi. Ketisibit ayong emoit keng. Ameu ngesi ngasigerea keng akitijwore ayong. Aboka kesi ngapanya eriam awi kang. “Achada Akuj talokaatokang anikang. Aliwor ayong itwaan nigela ani eyakasi ngipaalon kang. Kachakasi ayong ngiyenet kang ka ngipaalon. Ngipeyok lukolong epeyoununi ayong nawi kang, achadarosi anikang. Ngakasubak etich kang, ketusubut ayong itwaan nia akwap anache. Na anyaraa ayong ekasuban etich, nyikii. Tani kemaima ayong ngesi atamar kengarak ayong. Nyenaikini aberu kang ebose a ngikumes kang. Nyeapuunete talokaatokang diyete kang. Kemenyarito ayong tani ngide luuchik, keruorotor ayong napei kengolikineta. Akadakinit ayong ngipaalon kang daang luminat. Kanyoikis ayong lukolong amina ayong noi. Emidiikin amuny kang nakoyo kang. Edit ibore ketubuchi ayong akitu. “Esi ngipaalon kang, kisienoi ayong! Kainyo kawan Akuj ayong. Nyo kiboliatar esi dang ayong loger lo kaboliar Akuj? Eringa esi nyeburuna aboliar akwaan kang a? Arai bo toyei ikegiran ngakiro kang dang, kigir cha nakitab! Kori kichietae ngakiro nguna nataaba, ani erumor kigirae torubeta jik Tani ikoni neni, ayeni ayong atamar eyari ekayuunan kang. Esal kadaang, ebuni ngesi katoik ayong. Tani kinyasu edeke amuny kang kerumor, aanyungari ayong Akuj a akwaan kang. Aanyungari ayong Akuj ibakit alowae kang. Nyeliwor nabo ngesi na egelaana anikang. Alilimiyo ayong! Ani kitamasi esi, ‘Kirubakini aboliar ngesi.’ Ipotu esi tasakut ibore ni kiboliatar ayong. Nakaneni tokera tokona ekileng lo etiyaunitae kotere anyunyura a Akuj, sodi kirira akisech toyeneta atamar ebunit eriras.” Abu Sopar lo a emachar a Naamas tatachak Yob tama, “Kesibusikis ngakiro nugu. Ngakiro nguna kesi asakea ayong akitach ngakiro kon atipei. Kirasit iyong ayong a ngakiro ana ilimu, nakaneni ayeni ayong eger lo atachea ngakiro kon. “Iyeni iyong dir atamar kolong kanuan, napei kolong ewaakinere itwaan nakwap, emam itwaan niaronon ni alakar akooyen. Tani kipuruun ngesi noi tanang ekipur keng nadis. Kori tani keoyaar noi tatap akou keng adis, ekutario ngesi nialonan loger a apua. Lukolong ayenete ngesi, ingitasi, ‘Ekoe, nyaai ni kelot?’ Engopiari ngesi loger a ngakiro ana irujao, loger a akisingolikinet a akwaar, nyeanyungar nabo jik. Engopi ngesi ani kolong sek alomit. Esakete ngide keng atamar kitachamut ngikebootok. Ibore daang ni aanyuni ngesi, ebuuni a ngakan keng. Akwaan keng nakolong adwarunit akilikili, eliwor apua atipei. “Tani kebob aronis anakituk a itwaan aniaronon, tani kidait ngesi alokwap angajep keng, tani kekuruworit ngesi aisikin, torubak iwaakinit nakituk keng, nakaneni edwarer na enangea nakook, edwarer topipiler loger a akisierit a emun. Elekuni ekabaran ebarit lokolong akokoiari. Ebuuni Akuj ebari anakook keng tani kilikorit ngesi. Ikoni ibore ni ilikori itwaan niaronon akisierit, eari ngesi loger lo kikonyea emun lo kingedari. Nyeyari ngesi taanyunga ngangololin a akimiet a ngikito kori ngingololin lu eleleete ngakile ka akimiet a ao. Eisikini ngesi ibore daang nikolong aanyuni a ngakiinyir keng. Nyeyarea ngesi ebari keng, Kainyo echiekiari ngesi ngikebootok tajamua. Abu ngesi kidoko ngitunga ngakais nakolong nyeduko ngesi. “Emam ibore itemuni etereku keng. Esaa lo imujea ngesi, emam ibore epiyanuni, nakaneni asalu tokona ebari keng. Ani eanyuni ngesi ibore daang ni esaki, etikokinosi ngesi ngichan luaronok. Kimiek ngesi tanyam ibore cha daang ni esaki! Irirae Akuj ngesi engoit tonyunyurikin. Ipungar ngesi esaki nyakaar ekileng a asuat anakirion, nakaneni egumi ngesi emal a asuat ananyang. Egumi emal ngesi toporu kayaaye, toleleut ngaakot keng anangajep a emal alo ewaliwali, tobul ngesi tamaranik. Kinyasun ibore daang nikolong adatunit ngesi. Akim na nyinokakina itwaan enomi ngesi ka ngitunga a awi keng daang. Isileereuni adis akisech a itwaan kaen, sodi kiruor akwap ngakiro keng. Inyasunio ebari keng daang akolongit na anyunyura a Akuj. “Akiroit ipakakinitae ngitunga luaronok ngina, akiroit ngina etiakakinit Akuj kesi.” Sodi tatachu Yob tama, “Topupokisi tokona lokojokon ngakiro na esisauni ayong, ibore abala esi kisianguneta ayong ngini. Kiapakinae kare kimiekinae eruorik, ani arumori ekiruor, ipedorete akianar. “Meere ngitunga kiburaa ayong, ngakiro nguna kesi ebunyar ayong. Kingolikinae ayong. Ikwa nyikitalarit esi eboyor kang tobuna ngakituk a? Na etamarea ngakiro na asubakinosi anikang, erakar, sodi atamaranik kabulit. “Nyo imiekinitor Akuj ngitunga luaronok eyarete? Nyo imiekinitor kesi emojongete eringa ngikilinga eyakasi? Ibooyete kesi taanyungasi ngide kech isikokinosi, kingolikis tani ngitatae kech epolounete. Nyeyauni Akuj ngakiro naaronok nawiyei kech. Nyibooyete kesi ebulit. Edwarunito ngimongin kech jiik. Euriyeenete ngaatuk kech daang, nyiyecheenete. Ematarosi ngide kech toboliata loger a ngimesekin, kichurokis eruosi ngagitae ka ngibunei. Ibooyete kesi eboyor kech ejakaanito, totoaka emam ni eriabi kesi. “Elimokinete ngitunga luaronok Akuj tamasi, ‘Kimiekinae sua! Nyikisaki sua akiyen ngakiro na isaki iyong aloboyor kosi. Akuj Naationon ngesi ngae kisubea sua etich keng? Nyo niajokon kianyuni sua erai kilip ngesi?’ Itamito kesi atamar kianyuni naajokak kotere ngikilinga kech a ngikulepek, nakaneni nyachamuni ayong ngakiro na itamete kesi nguna. “Ekoe a, anikolongit etudungeere ataa a itwaan aniaronon? Ekoe a, eyei itwaan niaronon idio ni ariamu ngakiro naaronok a? Ekoe a, eyei kolong ni eriraa Akuj ngitunga luaronok engoit, tokutana kesi loger lo ekutanarea ekuwam nginyia, kori loger a apua ana ekutarit ekuwam a? “Abe ibalasi esi irirae Akuj ikoku kotere akisech a apakeng. Meere kongina! Kimiekisi Akuj kirira ngikasechak make. Kimiek ngesi kidodiu atamar asubi kongina kotere ngasechesea kech. Kimiekisi ngikasechak kitiro eriras kech a ngikulepek. Kimiekisi kesi kimadasi anyunyura a Akuj Anaationon. Na edaunotor ngirwa a itwaan a, ekachit ngesi kelakara ngide keng kori kemam a? Epedori itwaan akitatam Akuj na irirae tani lu eyakasi nadis a? “Etoani iche ibooyi anajako, elakara lokojokon ibooyi akaalimon, etumit ebutur, ileleba akimiet nakoyo keng. Etoani iche eriaba lokojokon, emam ibore ajokon aanyu. Nakaneni etoakete kesi daang tonukae. Tobutakinos daang ngikur nawat. Ayeni ngakiro na itamito esi, ka ngakiro na itukitotor esi akibatar ayong. Ingitasi esi ibalasi, ‘Nyaani tokona akai a ekapolon, itwaan nikolong asubi naaronok?’ Ikwa nyieana esi ka ngitunga lukalotok a? Nyiyenete esi ngakiro na isisaenete kesi na ebongunioto a? Atamar ebuchar itwaan niaronon akolongit na akitu, eyuun ngesi akolongit na engoitor Akuj. Emam itwaan irirae itwaan niaronon kori etachi ngesi kotere ngakiro daang na asub ngesi. Nailepoleporere ngesi akinuk, iyokiyo aliel keng. Iwapuunete ngitunga lukaalak ngesi anaabor, ani ngiche lu emam kona imarunio, ingarenikinete ngesi. Tani ngalup na enukere ngesi, emudanakinio tooma naliel iyapakinitae wadio. “Tokona a, ipedorete esi akisililing ayong a ngakiro pas a? Ngakiro na itachunito esi daang eraakasi alioko.” Abu Elipas lo abunit alo Tema tolimok Yob tama, “Ekoe, eyei itwaan epedori akingarakin Akuj a? Iteni ingarakin itwaan nikooson bon. Eyei ibore eanyuni Akuj Naationon ani isubea iyong na iyookino a? Eyei erot ingarakinitor iyong ngesi ani ijokia? Erai ni ikeritor iyong Akuj ngesi kikilanakinea ngesi iyong, sodi kilomak loriras a? Meere kongina, erai ni isechitor iyong lokojokon. Erai kotere ngakiro naaronok daang isub iyong. Ani kona isakea iyong lokaatokon tatach ngaropiyae nakolong aari anikon, ibu iyong tolema ngiworui keng daang, kimiek ngesi elienyi. Imiki kolong iyong ngakipi ngitunga lu aburunit, kimik akimuj ngitunga lu anyamit akoro. Ikwa erai akwap aka ngitunga alu ikileenikinit make a? Ikwa erai iuriaritae kotere lukidio eminae make a? Iwouni iyong akingarakin ngapuseru. Ikokoi iyong ngiboro a ngikokiok ka aboliar kesi. Kotere ngakiro nguna, kiriamito iyong ngiloken alowaitin kadaang, kitobul iyong atipei. Erionik akicha kon nyianyungarea iyong. Kiburuchia iyong akaale. “Iteni dir, ibooyi Akuj alokidiama adis. Erounit ngikanyer daang alokwap, tani keyakasi kesi kidiama noi. Tani ikoni neni, ingita iyong ibala, ‘Nyo eyeni Akuj? Epedori ngesi akirirare lu eyakasi naribu a?’ Itamit iyong atamar erapete ngesi ngidowon tojongo akitere, esaa lo itorio lokukuor a akwap ka adis a? “Isaki iyong akiwap ngirotin lukolong ewapete ngitunga luaronok a? Abu akaale tolelea kesi, eringa tani ngirwa kech nyenanga. Elimokinete ngitunga ngulu Akuj tamasi, ‘Koto kane. Anukiro kisubakinea sua Akuj Naationon?’ Tani ikoni neni Akuj ilelebi ngakais kech ngiboro luajokak. Nyapedori ayong akiyen ngakiro na itamete ngitunga luaronok. Elakarosi ngitunga luajokak, ani lu etenooko tokienata na ingolikineta luaronok irirao. Inyasunio ngiboro daang aluaronok, sodi tonomia akim ibore nicha idongi. “Yob, tachamunos tokona ka Akuj, kisila ka ngesi, sodi kitopia ngesi iyong. Tachamu ngakitatamet nakitatami ngesi iyong. Kirichak ngakiro keng alotau kon. Ee, ejoikina iyong ibonguni nia Akuj Anaationon itiditeuna sodi totubo naaronok daang na esubio anawi kon. Tachaka egolit kon. Ani egolit kon loajokon noi, tachakak lotau a angolol anakoonon. Kitiliwo Akuj Naationon egolit kon. Kimiek ngesi toliwor anikon akwangat naajokon, sodi kigienokinor iyong Akuj Naationon ngirwa daang tokienyia iyong nia Akuj kon. Ani ilipi iyong, iikini ngesi ngakiro kon, kitemok iyong ngakikongiet nakolong ikongi iyong. Ejoker ibore daang ni isubi iyong, tacha akicha alorot kon. Etiyauni Akuj lu inisasi nakaneni eyuuni lu itiditeuna. Eyuuni ngesi lu nyesechito. Kiyuunio iyong erai kisub naajokak.” Tatachu Yob tama, “Eringa ayong eburae anyunyura. Erubakinit Akuj kaboliar ayong tani akunua kona. Arai bo atoyeni ni aanyunea ngesi dang! Kaapia ayong diyete ekicholong keng. Kalim ayong ngakiro daang alongaren keng esunyak ngesi na apega daang. Asaki ayong atoyen ngakiro na edikino ngesi elimuni, ka eger lo etachunea ngakiro kang. Ekoe, epedori ngesi abolo ka ayong a ngikilinga keng kadaang a? Mam jik! Iirari ngesi ngakiro kang. Emam ayong ibore asechit. Kiruoro ayong Akuj, tolim ngesi atamar emam ayong ibore asechit “Asak ayong Akuj kide, nakaneni emam kaina. Asak ayong ngesi too kangopiki. Esubi Akuj etich alokwap ka kuju, tani ikoni neni, eringa ayong nyeanyungara ngesi. Nakaneni eyeni Akuj erot lo etori ayong. Ani kening ngesi ayong, karukauni aseg loger a egolit. Ichiekit akeju kang ngikukus keng make, nyiitoro ayong wache. Asubeene ayong jiik na edungunit Akuj. Ewapi ayong ngakiro na esaki ngesi, meere nakang. “Nyilochokin Akuj. Ngae epedori akiloch ngesi? Esubakini ngesi ibore ni esaki. Iyookini ngesi ngakiro na ereat kotere ayong. Elalak ngakiro na ikote nguna anikeng. Kotere nguna aemit ayong alongaren keng. Kabuli ayong na etamunea ngakiro keng. Ketililimiyo ayong Akuj, ketubul ayong Akuj Naationon. Kainyo keriamit ayong aribu. Erapit aribu nakirion chuch ereet kang.” Nyo peetiakunea Akuj Naationon akolongit a eriras? Nyo peetiakunea akolongit na esubere na eriyan kotere ngikasubak etich keng. Elemanarete ngitunga ngamoru na idodiunito ekukuor tanyaareta ngalup kech. Ekokoyete kesi ngamesekin, tomekis losipaan kech. Edemanarete kesi ngikokiok ngisikiria kech, sodi kiratakis emong a apuserut tanang etachi amicha keng. Ijukanarete kesi ngikebootok alorot, sodi tamataros ngikebootok toduka. Kanguna, esakete ngikebootok akimuj, loger a ngisikiria a moding. Emam nabo wache eanyuneta kesi akimuj a ngide kech. Elemete kesi ngamanat a ngitunga aluche, ka agerun ngamusabib alomusabib a ngitunga aluaronok. Eperete kesi kiiya kiwala emam ibore imukokinosi. Emam ibore iratakineta kesi akatorot. Etepi kesi akiru alomoru, tatapanakinos kesi natabab esakete akimech. Eyakasi lu ekoporete ngide lukokiok alosikin kata itiokech kitiliwosi ngikedalak kech. Ani ngide a ngikebootok, kiratakis tanang etachio amicha. Ilato ngide ngulu emuner emam ngiworui. Elemete kesi ngakanoi taarite akoro. Echuunete kesi akimiet alokito, tochuut emuna alomusabib, ani kesi ngikulepek, enyamit akure. Ekunuasi lu etoakete alore. Ani lu ewanan noi ebalasi, ‘Toyuunae kare,’ nakaneni nyemisit Akuj akilipit kech. “Eyakasi ngitunga lu engerito akicha. Nyeyenete kesi ngirotin a akicha, kori nyiwapito ngirotin keng. Enyouni ekaaran na eribokinea topudo taar ngikebootok, toloma akoko nakwaare. Idaruni ekaloman akwap kikaikaak. Tama, ‘Emam itwaan kaanyungari ayong.’ Sodi kimuk ereet keng. Ebwangete ngikokolak ngakais nakwaare, ani naparan, toduka anakicha. Nyediposi kesi ka akicha. Ekerito kesi akicha naparan, tarai nyekerito aribu.” Tolim Sopar tama, “Abe ibalasi esi, ‘Eleleari akaale kesi atipei. Ilamit Akuj na erai akech. Nyeringa ngesi eloseene anamanat a ngimusabib keng. Eger lo itokeiareta nikariran ka akamu eloch, ikokini aliel itongopiari ekasechan neni. Nyeringa tani itiokeng itamunit ngesi tokona. Enyamete ngesi ngikuru tobosia loger a ekitoe alo eukoro.’ Esubakinosi nguna kainyo aboliar ngesi ngapuseru, nabo nyisieno ngesi ngaberu nakolup. Inyasuni Akuj lukajwok a ngikilinga keng. Ani enyouni Akuj, etoani itwaan niaronon. Imiekini Akuj luaronok ibooyete akaalimon, nakaneni eriparit elote kech. Isikokin itwaan niaronon wadiochichi ani eringa tooniyo loger a edoan, kori loger a akou a emwae etuborio. Eyei itwaan epegi ebala nyikote nguna neni a? Eyei itwaan elimuni atamar alioko ngakiro kang a?” Ani erumor tatachu Bilidad lo abunit alo Chua tama, “Epol Akuj, ejoikinit ngitunga daang ekerete ngesi. Ibooyi apolou keng na adis a ekisil. Ngae epedori akimarun ngajorei keng? Eyei wadio ni nyechaea akicha a Akuj a? Eyei itwaan ni etenoono ani a Akuj a? Ikokini ni edouni aberu eliwor ni ikiuna ai? Kingolik a, anakonyen keng, nyechai tani elap, kori nyejokak tani ngikanyer. Ani bo itwaan, ni erai ekurut, tarai eechut. Ikwa itee sek Akuj itwaan atamar erai ibore iche a?” Sodi tatachak Yob Bilidad tama, “Wae, abe kingarak iyong ayong dir, ayong lo arai itwaan nipalag! Iyuu iyong akan na elilimiyorit! Kisuruori iyong ayong a eger aloajokon, kitaanyu ayong dang ekabangabangat aosou kon! Esibit iyong ngae epupokini ngakiro kon daang? Ngae abala iyong kiruor loger logo?” Tatachu Bilidad tama, “Emaranikinete ngikasiak anakipi alokwap ngalup. Engaara ni eyakasi ngikatoak ani a Akuj. Emam ibore erapit neni anakonyen keng. Apetakini kolong Akuj adis kidiama sodi kiwaak akwap natorite pas. Akuj ngesi ilelebi ngakipi lodowon, kiratak ngidowon lukirionok nyeepakas na inueta ngakipi. Erapi ngesi elap, topetak edou kidiama keng. Etiakuni ngesi ni iteete ngakonyen alokidiama anam toliwor ngesi etiakit akicha ka aribu. Ani ikilakini ngesi ngapirio na itoweito adis, erikirikokinete kesi tamaranikis ebulit. Ngikilinga keng kolong edwangete anam. Kotere aosou keng, taram ngesi etiengit lobe Raab. Akienget kolong keng elotari adis. Akan keng ngesi echumi etiengit lo a anam. Nakaneni eraakasi nguna ekwaas a ationis keng. Eraakasi nguna akingaingaa bon kiira ngoni. Ngae epedori akiyen eger lo epoloo Akuj dir?” Tatachu Yob tama, “Ekong jik tani Akuj Naationon na erai Akuj na eyari. Akuj na ewounit asubea ayong na eriyan, ketiliwo ngesi ayong lo anyunyura. Ani eringa ayong eanga, toringa etau a Akuj eyei nikang, nyelimuni akituk kang ngakiro naaronok, kori nyelimuni angajep kang alioko. Nyapedori ayong alimun atamar iruorosi esi na iteni. Arubakini ayong eruoro atamar nyasechit, tanang akolongit na atoanea. “Aneikin ayong ateneanut kang nyalakakini. Ayeni ayong alotau kang atamar nyasechit. “Daang lu ketepegete ayong ketijiete, ejoikinit irirao loger a ngitunga aluaronok alu nyeteniyete. Eyei ibore igieno itwaan ni nyenupit Akuj na engerio Akuj ngesi a? Ee, nyoni igienokin ngesi na engedea Akuj etau keng? Ekoe, epupokini Akuj akigoro keng na eanyunea ngichan a? Epedori ngesi alakar ani a Akuj Anaationon a? Eliwor ngesi enyarit Akuj jiik a? “Kimiek ketatam eger lo epoloo apolou a Akuj, ka akisisakin ngakiro na ereat Akuj Naationon. Kingolikisi a, iteni dir ingolikis tani esi ngikulepek. Nyo tokona iruorotor esi abangaanut?” Eger logo ngesi iriraa Akuj Naationon ngitunga luaronok ichiekiarito luche. Epedorete kesi aanyun ngide lusapa lukaalak, nakaneni irikari akwara daang. Ekadit ngide kech akimuj jiik. Ani ngulu epuunosi, eari edeke. Nyigorosi tani ngaberu kech tosutonokis kotere akitu kech. Epedorete luaronok akiting ngaropiyae nakaalak na emam kona imarunio, kori totinga ngiworui lukaalak noi. Tani ikoni neni, itwaan niajokon enapi ngiworui ngulu. Ani ngaropiyae keng, lu nyesechito kesi ekoranakinosi. Akai na eduki itwaan niaronon, ikoni akai a asimokok, kori ikoni epem lo iteere ngikieny alomana. Aperiet na esal, eperi ngesi erai ekabaran, ani ekienyuni, erukauni ebari keng kengopia. Iteriangakini ebuloi ngesi loger a akaale, ekutari ekuwam ngesi nialonan nakwaare. Ekutari ngesi ekuwam lo alo kide anawi keng. Ekutari ngesi ekuwam ngolo niaronon. Esaki ngesi amatar nakaneni nyepedori. Eruonokini ekuwam ngesi ekeri, kitubul ngesi a nginyas aluationok. “Eyei dir ni ebokere akwangat ka ni itosegere egolit. Ebokunete ngitunga asuat nakirion analup, ka akitekeiar ngasua nanyangayek anamoru. Eripete ngitunga tooma nikirion chuch. Esakete kwap noi ngalup, sodi tobokut ngamoru anikirion chuch. Nikalonan noi ani elomito ngitunga, kori ani itoreenete ngitunga, ngesi ebokete ngitunga. Esubete kesi etich anikasilon kaina, ipunasi anaunoi alotooma ngapanya. Eanyuununio akimuj analup. Nakaneni ani tooma ngalup napei nguna, Ibelukwaanario ibore daang kipudae. Eyakasi ngikabel lupusiek-arengak namoru, ani apua a ngamoru kanguna, eyei egolit. Emam egole eanyungari ngirotin lu elosere akibok ngamoru. Emam atarukot eporeene alokidiama ngirotin ngulu. Emam engatuny kori etiengit edio lokaadengan, lo itoreene lorotin lukasilok ngulu. “Ebokete ngitunga ngulu ngatabab nakaagongok noi. Ebokarete kesi ngakejen a ngimoru. Ani epedonokinete kesi ngiporotoi natabab, taanyut ngamoru nakaalak a ngaropiyae. Ebokete kesi ni isiakineta ngangololin, kisileereut ibore ni erapap. “Nakaneni nyaai ni eanyunere aosou? Nyaai ni kitatamar ngoni achwaanu? Emam itwaan eyeni ni ebunitor aosou, emam alotunga. Ebala nituluk a nganamea, ‘Emam anikang.’ Ebalasi ngitoroi, ‘Emam aosou anikosi.’ Nyegielun a akwangat kori a egolit. Nyeriyanete ngesi ka egolit loajokon noi, kori ka asir a ngamoru. Ejok noi akidwang egolit, idwangit igulu a egolit kori agilas naajokon. Ejok aosou noi akidwang ekame, kori amoru nakamilimilan kori amoru naarengan puu. Amoru na enyaritae topas naajokon noi ka egolit loasegan noi, nyikwaanikinosi ka ajokis a aosou. “Nyaai tokona ni isiakinitor aosou? Nyaai ni kitatamar ngoni achwaanu? Emam ngiborei lu eyarete lu eanyungarete aosou. Nyeanyungari tani ikeny ni eporit. Tani akitu ka nginyas ebalasi eum pas kiira. “Akuj bon ngesi eyeni erot. Ngesi eyeni ni eanyunere aosou. Kainyo itee ngesi esal a akwap, itee ngesi ibore daang alokwap adis. Nakolong ainakinea Akuj ekuwam apolou, sodi kigerok etiae a anam, nakolong atiakunea Akuj ngirwa lu eramea akiru, ka erot lo iwapit agiro, neni kolong engolikinea ngesi aosou toyen ajokis keng. Tacham ngesi atamar ejok aosou. “Abu Akuj tolimok ngitunga tama, ‘Akiker Ekapolon ngesi erai aosou. Achwaanu ngesi akinger naaronok.’ ” Kiruorik Yob nabo tama, “Arai bo kikokini eboyor kang eger lokolong a ekingaren dang! Eger lokolong keyokiyo Akuj! Kirukit ayong ka Akuj jiik ngirwa ngulu. Kimau akicha keng alosi ayong anaribu. Ngirwa ngulu lukolong asorokonea ayong, kiyokiye Akuj awi kang. Kirukit ayong ka Akuj Naationon ngirwa ngulu, keriamito ayong ngide kang daang. Alepununio ngakile nakaalak anaatuk kang ka ngaanei. Alele akimiet alokito alu arupunito anatabab. Arai na iriamiriameta ngikasukou a ere, atolot ayong lokiriam ngolo, tachadaros ngisorok towaa alokwaas napei kengolikineta ayong. Ani ngikasukou tonyout towaa idodiunito arimatoi anikang. Nakengolikineta ngikapolok ayong, kililinga, tojongoto akiruoro. Tani ngitunga lu eyenikinitae lokojokon, kililinga chek. “Itwaan daang ni kaanyungari ayong, kori ni eirari ngakiro kang, abu kian ngakiro naajokak kotere na asubi ayong. Nakegoronokinioto ngikebootok, engarak. Ani ngikokiok lu echanasi, engarak. Ngitunga lu echanasi lokojokon, kepuruut ayong. Engarak ayong ngapuseru, talakarotor. Abutokina ayong ngakiro na eteniyete loger a eworu. Atanap ngakiro na eriyan loger a apukot. Ayong arai ngakonyen alumuduk, atarai ngakejen alu engwalito. Alokebootok, ekoni ayong apakech. Ani alochan, ebaka ka ngitunga a akwap anache. Enyasuni ayong agogongu a ngitunga alukamoitanak, sodi atoyuu ngitunga lu aremokino kesi. Etamit ayong jiik atamar ebooyi nikooyen, atotoan alakara anawi kang. Ekoni ayong ekitoe lo eyakasi ngaten na ngalup nakipi jiik, nabo kitapapalito ngakop ngaten keng na alokidiama jiik. Kepuruunit ayong itwaan daang jiik, emam akolongit adaunotor ngikilinga kang. “Arai na alimunio ayong akiroit, kililinga ngitunga, topupokis lokojokon ngakiro na alimuni ayong. Ani keruorik ayong kerumor, amam ngakiro ngache eatanakinete kesi. Tolomasi ngakiro kang naki kech, loger lo elometa ngakipi a akiru nalup. Keitanito kesi ayong jiik loger lo iitanitotor atepun a akiru. Amaisanakini ayong kesi na esiliyoreta. Kitalaka kesi amaisan kang. Atotiakuunu ayong ngakiro na esubete kesi. Atorik ayong kesi loger lo erikio ekapolon ngasigerea keng, esiengu kesi na ajamakinotor.” Nakaneni kakianatar tokona ayong ngitunga lu esorokoka akidwang ayong. Araakasi kolong taapakech lupasiyek, lu peadikino ayong tani emiekini kiratakis ka ngingokwo kang ngaanei. Araakasi kesi atukuoru a ngitunga alu alilimiyorito, alu apalag noi, amam etich kang adikino esubakinete. Eboosit kesi noi tanyamite akoro arai anyakayete ngigilae lukoonok nakwaare alomoding ani esil. Aditunete kesi ngikito lu eyakasi nariet tanyama, tanyama tani ngaten nakapenak a ngisanyana. Tachalakis ngitunga daang kitwarakis kesi, tosub ngikokolak irisito echalatar. Ebooyete kesi anaburiburio, anaduon ana abokitae lokwaasea a akope. Toruoto kesi alomoding loger a ngitieng, tochunakinos nachara. Atukuoru a ngitunga alupasiyek alukabangaanak kangulu, apon kitwarakinae anakwap. Aliwor tokona ayong kaitanakinio ngieosio. Aliwor kakianatar kesi. Akadakinit ayong kesi, achadarosi kesi anikang. Nyeriakasi kesi akimoakin ayong napei kengolikineta. Ani kona ketapalagagea Akuj ayong ketililimiyo, kanyoikis kesi ayong kanyunyurikinosi. Enyouni atukuoru ngina aloteten kang, kerita ayong erukokin. Kesiwapakis kesi ayong ngirotin lua nginyas. Etongopiasi kesi erot kang daang lo asiiwakinea ayong, esakete amunyar ayong. Nakaneni emam itwaan iratakini kesi. Ijukunosi kesi kitorut lopukei anawasea kang, pot katotikokinosi. Kabulit ayong noi. Angopia arimatoi kang loger a ekuwam. Angopia ajako kang loger a edou. Edikino tokona ayong atoani. Katinga ayong ngichan lokojokon ngirwa lugu. Kariebete ayong ngakoyo kang daang nakwaare. Nyetubo apipilu nakadupakin ayong. Karuakin Akuj ayong eworu, sodi tomojirikin ngiworui kang tomodokoikin. Kachakakini ngesi ayong lochoto. Ekok ayong apua ka ekuron. Kekaloikini ayong iyong Akuj, nakaneni nyitachi iyong ngakiro kang. Ani elipi ayong, nyikimisit iyong ayong. Kiremokin iyong ayong. Kiboliar iyong ayong a agogongu kon kadaang. Imiekini iyong ekuwam katokuta ayong. Kileleenori iyong ayong alokuwam aloationon. Ayeni ayong atamar kiyaarit iyong ayong nakitu kang, akitu na idarit itwaan daang. Nyo itijio iyong itwaan ni adaun? Itwaan ni emam ibore epedori asubakin, mati akilipa atamar kingarakinae. Ikwa kolong pekegoro ayong ka ngitunga lu aanyunito ngichan a? Ikwa pekesienito ayong ngikebootok a? Ani na asakitor ayong naajokak, pot naaronok. Ani na edaritor akicha, bu aribu. Ketubur ayong akichana ka apipilu. Akolongit daang ayei ayong lochan. Erioner akwaan kang chuch, nakaneni meere kotere nikanomitor akolong. Anyouni ayong atowo alongaren ngitunga atolim atamar kingarakinae. Aliwor ekolowo lokaatokang. Aliwor ayong erukitos a ekalees. Elocho amuny kang erioner ka abolochuun, edeakasi ngakoyo kang kariebete. Aliwor agita kang na alakara aka akigoro. Ani ebune kang lo a alakara aliwor aka ngitunga alu igorosi. “Ekong ayong atamar nyengolikini apese keterekuya. Nyo kitaanyuni ngoni Akuj Naationon? Etacheene ngesi na esakete ngitunga a inyo? Eyaununi ngesi ngichan ka nginyas lotunga lu esubete naaronok. Eyeni Akuj ibore daang ni asubi ayong. Itee ngakikalamikinet kang daang. “Ekongi ayong atamar nyesuba ayong naaronok kori nyesaka akingalare ngitunga luche. Kimiek Akuj ketem ayong anakitemiet ana eteniyete, sodi kingolik atamar nyasechit ayong. Ani kenacharit ayong alorot, kori atacham naaronok keriarete, ani kinyasunit akisech ngakan kang, kimiekisi ngalemet kang kinyasunae, kori kimiekisi ngitunga luche tanyama akimuj na etae ayong. “Ani kaminarit ayong aberu a itwaan aniche, sodi atoduk ayong edaru anikalapatan akai keng, kimiekisi aberu ngina kipoonok ekile eche. Ejoikinit eriras a ngakiro anaaronok ana ikote nguna erai akitu. Kainyo kikok akitu akim na inyasuni ka akirirare ibore daang ni atingit ayong. “Arai na ketongolopea ayong epei a ngikasubak etich kang, atopupok ayong ngakiro keng atosubea na eriyan. Arai nyeekok ayong neni, kekok ayong aweikini Akuj ai? Kerai ngakiro anu alimuni ayong nakeriraa Akuj? Akuj nakasubuni ayong ngesi asubuni ngikasubak etich kang dang. “Nyewouna ayong akingarakin lukebootok. Kori nyejamuara ayong ngapuseru. Emam akolongit emujea ayong emik ngikokiok akimuj. Ekok ayong apakech alukokiok, atorik napei alokiditeu kech. Na engolikinea itwaan ni ichana, ni erai ekebootonit ni emam kona egieli ngiworui, abu ainak eworu lo edonyunitoe anajul a ngamesekin kang. Sodi kepuruu ngesi ayong a etau keng kadaang. “Ani kengalat ayong ngikokiok ayeni atamar kaikinio anitubet ngakiro, kimiekisi ngakan kang tobilas napei alosegeta, torutunos. Nyapedori ayong akisub ngakiro na ikote nguna, kainyo akerit ayong eriras a Akuj. Nyigienokino ayong nakanuan ebari kori nyinisakina ayong kotere ebari kang. Nyilipa ayong akolong nakanuan tani kekwaikwai, kori nyilipa elap tani kibus noi. Aringa ngiboro ngulu nyibatara ayong kori nyenuakina ayong akan kang ani arimar ngiboro ngulu. Ejoikinit eriras a akisech ana ikoni ngina erai akitu, kainyo engalat ayong Akuj na eyei kidiama. “Emam akolongit alakaror ayong na eanyunea emoit kang ngakiro naaronok. Nyechamuna ayong akituk kang esechi, atanyarak emoit kang akitu. Eyenete ngikasubak etich kang daang atamar epeyoununi ayong ngitunga lugelayek. Anyaraununi ayong ngikalotok nawi kang, nyemianakini eperete lorotin. “Esakete ngitunga luche akidaa ngasechesea kech, nakaneni nyidaa ayong nakang. Nyekera ayong ngakiro na elimunete ngitunga. Nyililinga ayong kori nyegolokino kai ani akeritor ngimeny kech. “Arai bo toyei ni iirari na alimuni dang! Ekongi ayong atamar iteni ngakiro kang daang. Kimiekisi Akuj Naationon tatachu ngakiro kang. Arai kolong kigiretei ngakiro nakerirator ayong emoit kang engolik ayong, kanap ayong aloseget kang ewogar, ka akinap anakou kang loger a ekiraun. Kalimok ayong Akuj ibore daang ni asubit, sodi kekileenik alongaren keng. “Ani kakokoit ayong ngalup na etae sodi atodema ngikulepek, ani kanyamit ayong akimuj na arupuni kaneni emiek ngiketak emunyari akoro, kimiekisi edoan ka ngiikwa toruput kaneni, meere ngakanoi ka erau.” Adaunosi ngakiro a Yob. Ani kona awounea Yob ebala atenoono, apot ngikiliok luuni tokuruwo kona etachete ngakiro keng. Nakaneni abu itwaan ni anyaritae Eliu ni awei kaneni tongo, kainyo abala Yob atenoono ngesi akidwang atamar Akuj etenoono. (Arai Eliu lokookeng a Barakel, alesit a Bus, tarai eka emachar a Ram.) Angoikinit ngesi talopaekeng a Yob luuni, kainyo angopikinit kesi kona etachete ngakiro a Yob, tarai abalasi Yob esechit. Kona araakar Eliu adit anikech, edarit ngesi ngikasukou daang torumosi mono ekiruor. Ani ingolikini ngesi atamar akuruwo ngikiliok luuni ngulu atachun ngakiro a Yob, abu tongo. Abu Eliu kiruorik tama, “Asorokona ayong, imojongito esi. Kotere ngakiro nguna, akerit ayong alimokin esi ngakiro na etamit. Alimuni ayong atama, ‘Kimiekisi ngimojong kiruorikis, kimiekisi ngikasukou tolimut aosou kech.’ Nakaneni etau lo eyei tooma lotunga lo a akienget a Akuj Naationon ngesi einakini kesi aosou. Meere amojongu itoosuni ngitunga, kori ngesi iteyeni kesi ibore ni iyookino. Tokona bocha abala ayong, ‘Topupokisi ngakiro kang. Kimiekisi katolimok esi ngakiro na etamit ayong.’ Arubakinit ayong apupokinit na iruorotor esi. Atopupok ayong ekiruor kus lo a aosou, na ingicheta esi na ilimunete. Atopupok ayong ngakiro kus lokojokon noi, nakaneni emam akiroit nateno na eira ayong. Kikuruwo esi daang akitopeg ngakiro na alimu Yob. Ikokinete esi itamarete ianyut aosou ai? Akuj etachi ngakiro a Yob, kainyo kikuruwosi esi. Esi kisuruori Yob, meere ayong. Nakaneni pekatachunit ayong ngakiro keng loger lo itachuneta esi. Yob, akuruwosi lugu ngakiro, emam nakitachakinete iyong. Tokona, arubakini ayong edarit na ililingeta kesi chek a? Ewaasi kesi kaneni emam akiroit ache elimunete. Atachuni tokona ayong dang, katolimok iyong na etamit ayong. Emam ayong kona eratakini ngakiro. Nyeringa edari akiruorikin. Ani pekachamakin eruorikini, abwanga loger a etuo alo ileleba emuna lokitetet. Emam ayong kona anaikini. Kimiekinae eruorik. Emam ewae ebakea ayong alokiruor kalo. Emam itwaan esoswae ayong, kainyo nyayeni ayong akisosware. Kainyo kaari ayong Akuj atipei kotere ngakiro nguna.” Nakaneni tokona Yob, topupok lokojokon ngakiro na asaki ayong alimun daang. Anyou ayong akiruorikin, etorut ngakiro nakituk kang. Eraakasi ngakiro kang daang na etenooko, nabo eruoro ayong na eraakasi iteni. Kasubuni ayong etau a Akuj Anaationon, kainak akiyar. Tatachu ngakiro kang erai kipedori. Torek ngakiro kon lokojokon. Kikwaan ayong ka iyong alongaren Akuj, kisubunio kolong ngoni daang alochoto. Kotere ngakiro nguna, emam ibore kikeritor iyong ayong. Nyekesibuusikini ayong iyong. Eirari ayong iyong ilimuni tama, ‘Ekiuna ayong. Emam aronis eyei nikang. Ee robo, nyasechit ayong, emam ibore echwangakinit. Nakaneni esaki Akuj ibore ni kawanea ayong. Ketusubunit ngesi ayong emoit. Eenikinit ngesi ngiriko nakejen kang. Iseme ngesi elote kang.’ Nakaneni Yob, kalimokinit ayong iyong atamar ichwangakinit iyong. Epolot Akuj akidwang itwaan. Nyo ibolotor iyong ka Akuj ibalar abe nyetachuni akiroit kon tani apei? Iruoro Akuj a erot a epei kori aloche tani pekepedori itwaan akiyen. Nakwaare na ejotoorotor ngitunga ngaju nakapotiok, isuruori Akuj kesi anakirujare ka akisingolikinet. Engaari Akuj ngaki a ngitunga kikilak toema. Toema kesi na ikilakinere. Ikilakini Akuj kesi toisikineta akisech, ka apalikin ekinis. Iratakini Akuj kesi nyeemunyarosi. Eyuununi Akuj kesi nyeetoaka. Erionokini Akuj itwaan ani itedeakakinea, kitipipil akwaan keng lokojokon noi. Ituuruyori ngesi akimuj. Tani akimuj naajokon noi, eliwor akeleleunan. Eriyori erogo akwaan keng. Kidong erai ngakoyo bon. Edikino ngesi elosi ni eyakasi ngikatoak. Ani a ekeny ajokon, epedori emalaikat abunere kingarak ngesi, emalaikat epei a ngabunge a ngimalaikae a Akuj, kisitamut ngitunga na ejoikinit esubete. Kotere ngisien elimuni emalaikat tama, ‘Talakakisi. Nyelosi ngesi ni eyakasi ngikatoak. Ariwo keng naga.’ Kimiek akwaan keng kikok nabo na esorokit, tobongokis ngikilinga lukolong a esorokane keng. Ani ilipi ngesi, etachuni Akuj ngakiro keng. Ilipi ngesi Akuj elakara. Esubakini Akuj nabo ngakiro toriyana kotere ngesi. Elimuni itwaan ngini alongaren luche tama, ‘Asech ayong nyesuba na iyookino, nakaneni kayuu Akuj ayong. Keratak ngesi ayong nyaalot ni eyakasi ngikatoak. Eringa tokona ayong ayari.’ Esubeenea Akuj itwaan ngakiro nguna jiik. Eyuuni Akuj eboyor a itwaan, talakaror itwaan ngini. “Yob, topupok tokona ngakiro kang lokojokon. Kililing kimiekinae ayong eruorik. Nakaneni ani keyei iyong akiroit isaki alimun, tolimokinae. Achamuni ayong alakara atamar iyookino ngakiro kon. Nakaneni ani pekikote neni, kililing topupok ngakiro kang, sodi ketatam ayong iyong aosou.” Torubak Eliu iruoro ebala, “Esi ngikoosok, topupokisi ngakiro kang. Todetasi ngaki kus esi lu ichwaaka. Eroanari akit ngakiro loger lo iirea angajep akimuj. Atoseutu na eriyan. Ee, atoseutu aniyok akiroit na ejok. Ebala Yob, ‘Nyasechit ayong, nakaneni awou Akuj akidodikin na eriyan. Tani kateneana ayong, itamitae atamar aliokono. Awou ajeme kang angalekin, tarai nyasechit ayong.’ “Eyei itwaan ni ianyu iyong nakanuan ni ikoni Yob a? Nyidodiuni ngesi arimatoi ani a Akuj jik. Emina ngesi arukit ka ngitunga luaronok, kilato ka ngikasechak. Abe ebala ngesi nyejok itwaan ichana esaki akiwap ngakiro na esakit Akuj. “Topupokisi ngakiro kang, esi ngitunga lu ichwaaka! Epedori Akuj Naationon akisub ngakiro na ichwangakina a? Einanakini ngesi ngitunga ebachit kotere na esubete kesi ka asubea kesi na ejoikinit esubere. Nyesubeene Akuj Naationon akisech. Nyepedori ngesi asubea itwaan na nyeriyan. Ngae kolong ainakini Akuj apolou? Ngae kolong ainakini Akuj apolou na epolokinio akwap? Arai tobuari Akuj akienget, ketoana itwaan ni tokona eyari daang, tobongo itwaan napua. “Topupok tokona ngakiro kang kios iyong. Irirae iyong Akuj na etenoono a? Esibit iyong eremokino ngesi ngakiro na eriyan a? Irirae Akuj ngikapolok ka ngikarikok ani eraakatar kesi ngitunga lupasiyek toroko. Nyibakit ngesi alowae a ngikapolok kori nyemisit ngakiro a ngikabarak noi akidwang na ngikebootok. Kainyo ngesi kolong asubi kesi daang. Epedorete ngitunga atoakere atipei nakwaare. Itamaranikini Akuj ngitunga tadaunos. Eari ngesi lukajwok emam itwaan aram. “Iseme ngesi elote a ngitunga. Daang na esubete kesi, itee ngesi. Emam aribu na irioner chuch noi kidaa ekasechan ani a Akuj. Emam ngirwa eseunit Akuj atamar tolooso ngitunga ngaren keng kirirae Elemanari Akuj ngikarikok nyeripa ngakiro kech, kilunyok luche nados kech. Ikwaanakini neni ani eyenea na esubete kesi. Engichi ngesi kesi kirie nakwaare. Irirae ngesi ngikasechak kitee ngoni, kainyo apalikis kesi akiwapit ngesi, emenyasi ngitalio keng daang. Esikalounete kesi ngikebootok kikaloikis Akuj, kiira ngesi akigoro kech. “Arai totiaku Akuj atamar nyasubakini ibore tani ipei, kemam itwaan elimuni atamar erono Akuj. Arai kidaa ngesi ereet keng, kemam ikengarakinan ngitunga. Kemam ibore esubakinete ngibukui kiratakineta ngikechekiarak lu nyenupito Akuj nyeepolokis kesi. “Yob, ilimok iyong Akuj ngasechesea kon a? Sodi kichikak ngesi atamar nyisechi nabo a? Ilip mono iyong Akuj atamar kidodik ngasechesea kon a? Ichamu iyong atamar ipalikini akisub naaronok a? Ani kona itopegea iyong ngakiro na esubi Akuj, ikwa esibit iyong esubakini ngesi ngakiro na isakit iyong a? Iyong ejoikinit itiakuni ngakiro, meere ayong. Tolimokinae tokona sua ngakiro na itamit iyong. “Itwaan nikooson daang ka ni echwaana ni eirari ngakiro kang, etamari iruoro Yob napenyeyeni nabo ngapasiyek ngakiro keng. Tochiwasi ngakiro daang na iruoro Yob. Ingolikinete esi atamar iruoro ngesi loger a itwaan aniaronon. Iatanakini ngesi akinger ngakiro nasechesea keng. Ekianar ngesi Akuj alongaren yok kadaang.” Torubak Eliu iruoro ebala, “Nyitemokino iyong Yob iruoro ibala, ‘Nyasechit ayong alongaren Akuj,’ kori akingit Akuj tama ‘Nyo kon akisech kang? Nyoni aanyu ayong ani nyesecha?’ Atachuni ayong ngakiro kon ka na ngipaalon kon aapei. “Kingolik chene adis! Taanyunga eger lo eyakatar ngidowon kidiama noi! Ani kisech iyong, nyewani akisech kon Akuj. Ani kisub iyong ngasechesea nakaalak, esibit iyong eyei erot lo iwanitor iyong Akuj a? Ikwa ingarakinit iyong Akuj ani iraakar lo itenoono a? Emam ibore esaki Akuj anikon. Itwaan niche ewanan kotere ngasechesea kon. Ani naajokak na isubi iyong, ingarakinito itwaan ngini. “Epodokinete ngitunga na ichiekiarere. Ikalounete kesi esakete kitoyuun. Nakaneni nyerearosi kesi nia Akuj ana erai Akasubunan kech, ana ingarakini kesi na eanyuneta ngichan luationok. Nyerearosi kesi nia Akuj ana kitoosuni ngoni, atoosokioto noi akidwang etiengit kori ikeny. Igorosi kesi esakete akingarakino, nakaneni nyetachi Akuj ngakiro kech. Kainyo inisasi kesi eroko. Ngapasiyek ngakiro na igorotor kesi. Nyitee Akuj Naationon kesi kori nyepupi ngakiro kech. “Yob, abe ibala iyong nyitee Akuj a? Kidarou. Eyakasi ngakiro kon ngaren keng. Itamit iyong atamar nyirirae Akuj, kori be nyekachit akisech. Eka pas eger lo irubakinitor iyong akiruoro. Etakani dir atamar nyiyeni iyong ngakiro na iruoro.” Torubak Eliu iruoro ebala, “Tanaik ngakiro kang wadio kedodik. Eyakasi ngakiro a Akuj na asaki ayong alimokin iyong. Elal aosou kang, kotere aosou ngina, apedori ayong akidodiun atamar etenoono Akuj na erai Akasubunan kang. Emam ngakiro kang na eraakasi alioko. Erai itwaan ni itee iyong en nikooson dir. “Erai Akuj nakaagongon noi, emam ni imenyarit. Eyeni ngesi ibore daang. Nyimianakini ngesi ngikasechak eyarete. Nakaneni esubanakinea lu eboliare na iyookino. Nyingoliari ngesi wache ani eyakasi lu etenooko. Echamuni ngesi kesi epolokinete loger a ngikapolok taanyut arimatoi nakajik. Nakaneni ani keen ngitunga a ngiriko, ichanasi kesi kotere na esubete. Idodikinit Akuj kesi ngasechesea kech ka ekinis kech. Idodikinit atamar eraakasi kesi lu inisaka. Engaari ngesi ngaki kech topupokis. Todungok kesi atamar toisikis naaronok. Ani kiwapa kesi ngakiro a Akuj tosuba etich keng ibooyete kesi niajokon ngirwa daang. Kibooyoto akaalimon jiik. Nakaneni ani pekiwapa kesi, eario, totoaka kotere abangaanut kech. “Engoito lu nyekerito Akuj jiik. Ani tani na iriraare, nyikalounete esakete atamar kingarakin. Etoakete kesi eringa esorokoka, tadakakin eboyor kech lomalaanu. Itatami Akuj ngitunga kotere ariaba nabo ngichan engaanarea ngaki kech. Kipuduni iyong Akuj alochan, kiwaak ni emam naaronok. Toritakinae akimuj lomeesa kon. “Nakaneni kirirao tokona iyong dir loger a itwaan aniaronon. Kidolok tokona iyong eriras ka ngakiro na eriyan. Tochoikin wara anyunyura nyikingal iyong toliwor itwaan ni imenyena. Tochoikin nyikibata ebari. Emam ibore ianyuni iyong ani igoror isaki atamar kitoyuun. Nyikiyuunete iyong tani ngikilinga kon. Nyiisak atamar bu akolongit na emunyarere ngitunga. Tochoite irear nakisech. Araakasi ngichan kon lu asakere iyong tobuchun anakisech. Kitamu eger lo epoloo agogongu a Akuj. Epol ngesi noi akidwang ngiketatamak daang. Emam itwaan elimokini Akuj ngakiro na echamit esubakini, kori atamar ichwangakinit ngesi. “Ikuseeneo ngesi jiik kotere na esubi. Ejoikinit iyong dang ikusi ngesi. Engolik itwaan daang na esubi Akuj. Itee itwaan nguna anialonan. Emam itwaan eyeni apolou a Akuj kori emam itwaan imarunit ngikaru keng. Akuj elemari ngakipi analup kiloch kitiliwo ngakipi a akiru. Ngesi itarami akiru alodowon. Totep kotere ngitunga daang. Ngae eyeni eger lo elooso ngidowon? Kori eger lo ebelakinea togirok kidiama, ni ibooyo Akuj? Epetanari ngesi akimilea wadaang alokidiama. Nakaneni kidong nituluk ananam eribokinit. Ikoni ngesi irirae ngitunga neni. Naanak akimuj nakaalan. Irumuni ngesi akimilea a ngakan keng todungok atamar tobelak ni esaki ngesi. Elimori agirokin atamar ebunit ekuwam. Toyena ngaatuk atamar ebunit ekuwam.” Itamaranikini agiro etau kang kitodouunu anipalem eyei. Topupokisi agiro a etoil a Akuj ka agiro na epudunit anakituk keng. Epetakini ngesi akimilea kidiama, napei alowae a epei tanang loche. Ani ekisidi kiirarae erue a etoil keng erue loketimon a agiro, esaa ngolo daang kimileaununi akimilea. Egiro etoil a Akuj niationon. Esubi ngesi ngakiro nakatalarak nyikipedori ngoni akiyen. Kainyo elimokini ngesi eloch tama, ‘Min nakwap.’ Ani elimlim ka akiru tolimok ngesi tama, ‘Talalaar.’ Itadauni ngesi ngitichisio a ngitunga. Kidodik kesi etich keng. Eloose ngitieng a moding toduka anaduon kech. Ekutuni ekuwam lo ipiri alokuju, ani akatorot nakaalimon noi tokut alokwap. Isipuki akienget a Akuj ngakipi, sodi toliworos ngakipi ngamoru. Ilelebi ngesi ngakipi lodou lolangir. Epetarito ngidowon akimilea keng. Eger lo epolokinitor Akuj, irimito ngidowon jiik, kidiama akwap na ibooyoto ngitunga, loger lo edungunitor Akuj. Eyauni Akuj akiru tobukok nakwap. Eyauni ngesi akiru kirira ngitunga, kori kidodiunea atamar amina kesi. “Topupok mono iyong ngakiro nugu Yob. Kitama ngakiro nakatalarak esubi Akuj. Iyeni iyong dir eger lo edungunio Akuj ngakiro, sodi kisimileau akimilea anadis a? “Iyeni iyong eger lo eporitotor ngidowon alokidiama a? Erai etich ngolo lo kitalari a ekunonoonu a Akuj. Iriabakin iyong kotere ebuuse erai na ekutunea ekuwam lo ebunit alokuju nakwap. Ipedori iyong dir apetar adis loger a Akuj a? Ipedori iyong dir akitogogong loger a asuat anasek kitekearitae a? Akuj, kitatamae sua ngakiro nakilimuni. Echakina sua ngakies chek, emam ibore kilimuni. Nyalimuni ayong atama asaki eruoro ka Akuj. Nyo nitibore edikino ayong etumunyaror ngesi en? “Emam tokona ngoni kona kikienyikini akicha na ebunit alokidiama. Ekwang akicha ngina kea. Nakaneni elota ekuwam kidiama aseger. Etakani amilimilu a egolit alokwap. Ani akibuseanu a Akuj, kitubul ngoni noi. Nyikipedori ngoni aapiyar diyete Akuj Naationon. Egogong ngesi noi nabo itiriyanit ngakiro. Etenoono ngesi noi nyichwangakini. Ngakiro nguna kesi ekeritotor ngitunga ngesi. Imenyarit ngesi daang lu iwogasi ebalasi kiosok.” Abu Ekapolon Akuj kisuruorik Yob alotooma ekuwam lo ipiripiri tama, “Ngae iyong itoniaritor aosou kang a ngakiro kon anapasiyek? Towo tokona lokile tatachu ngakiro nakengisi ayong iyong. Aliwae iyei iyong nakolong etowea ayong ngapirio a akwap? Tolimokinae kichwaana iyong. Ngae kolong egerokini alolom a akwap? Iyeni iyong a? Ngae kolong etenari auno na etemere? Nyo etingakinit ngapirio na itoweito akwap? Ngae ewaakini amoru na alokwap ngateak akwaar na aeokinito ngikanyer lua ataparach aapei, talakaros ngiborei a adis daang kimaritetekis? Kori ngae kolong agolokini ngidorin a anam, nakolong abwangunotor ngakipi anakook a anam? Ayong kolong aburi anam a ngidowon sodi atarapak naribu. Ayong egerokini anam ekukuor, eratak a ngidorin alu agolitoe. Atolimok atama, ‘Ekukuor kon nege, tochoite ipori nege. Esalunete ngitoroi kon lukaruok kane.’ Yob, napei kolong kidounere iyong, eyei akolongit idungunio iyong atamar kiwala? Eyei akolongit idungokinea iyong akiwalar bu, kitwarak ngitunga luaronok ani edukitotor a? Isileereuni akicha ngimoru ka ngadipoe loger a ngabilakinet a ngiworui. Kileereto loger a emachar alo igerokinitoe lochoto. Ekwang akwangis a apaaran kea kotere luaronok. Iratakini kesi nyeesuba naaronok. “Imin iyong dir ni eyakasi ngileleae a anam a? Kori ilot iyong nituluk noi ichiekit ngalup a? Eyei itwaan kidodik iyong ngidorin lu egolitere aribu nakirion chuch na eyakasi ngikatoak a? Esibit iyong etia apolou a akwap ai? Tatachakinae chene nguna daang kiyeni. “Iyeni iyong ni ebunitor akicha kori ni isiakinitor aribu a? Ipedori iyong alimokin kesi atamar toloto tananga nibe ati, kori ipedori abuar ni aponeta? Ayeni ayong atamar ipedori iyong alimun kainyo imojongit iyong noi nabo iyei kolong ngirwa lu asubakinere akwap. “Eyei akolongit ilosio iyong lokerui lu ewaakinit ayong eloch ka ngamoru a akiru a? Ekacharit ayong kotere ngirwa lua ngichan, kotere ngirwa lua ngichan ka ejie. Inang iyong dir ni ejipuunia akolong a? Kori ni ekutuunia ekuwam lo akide a? “Ngae aboki eporoto a ngakipi a akiru? Ngae asubakini erot a agiro? Ngae itetepi akiru nariet ni emam ngitunga elomito? Ngae ebukokini ngakipi nakwap nakoonon deu kiturup nginyia? Eyei akiru apakeng a? Kori ngae auri ngakop? Nakook a ngae aponeta ngamoru a ngakipi? Ngae auri eloch, lo ilochi ngakipi toliworos ngamoru ka akisipuk ngakipi a anam? “Ipedori iyong ainikin ngakanyer wapei a? Kori ipedori iyong alachakin ngaenet na eenitere ngikanyer lu enyaritae ngikaremok? Ipedori iyong akirik ngikanyer ngakamusio ka ngakiporosea daang a? Ipedori iyong akirik ekanyerit lo enyaritae etom loapolon ka ngide keng daang a? Iyeni iyong ngitalio lu epolokinito adis a? Ipedori iyong akitiliwor ngitalio ngulu ngika akwap dang a? “Ipedori iyong akiremar todungok ngidowon ngakiro sodi yauneta kesi akiru nikon a? Ani kidungok iyong akimilea atamar kimileau, Epedori ngesi abunere nikon tama, ‘Ayong na?’ Ngae iwaakinit aosou lodowon? Kori ngae iwaakinit achwaanu loloch? Ngae eos noi epedori akimarun ngidowon kori ngae epedori akirii kesi totepea akiru? Akiru na isipuki apua toliwor ngakapongor. “Isakanakini iyong ngingatunyo akimuj kech a? Itaneene iyong ngitak a ngingatunyo lu enyamit akoro na edukitotor anaburiburio a? Kori na edukitotor anamon a? Ngae itani ngikuruka na ilatotor enyamit akoro kori nakegoronokinioto ayong ngitak kech esakete akimuj na enyamete.” “Iyeni iyong ngirwa lu eurieta ngatirikiki a? Iseme iyong ngagetei euriyete a? Iyeni ngilapio lu irikanarete kesi ekapete a? Iyeni akolongit na eurieta kesi a? Iyeni akolongit na eurienikinotor kesi toureta ngitak a? Edakasi ngitak kech amoni sodi kingaarikis. Erotokinete kesi nyeebongut nabo. “Ngae alakakini ngisikiria lu alomoding eloose? Ngae alachakini kesi kimiek irimito akwap? Ainakini kolong ayong kesi ariet toliwor awi kech. Emiek kesi pena naroatin a amakat. Echadarosi kesi alochale a ngirerea. Emam itwaan eeni kesi kitusub etich. Ngimoru eraakasi achokor kech ni esaketa kesi ibore nialiban daang tadaka. “Epedori dir ekosowan akisub etich kon a? Epedori ngesi akiper nanok kon a? Ipedori iyong ainikin auno lokosowan kitaa amana kon kori kirii emeleku lochilet amana? Ipedori iyong akigienokin ngesi ani eyakatar ngikilinga egogongio a? Tasak atamar kitosubak etich loationon a? Igieno iyong atamar kiinuni ekosowan ngalemet anawi a? Itamit iyong atamar echunakini ngalemet ani eramere a? “Iwakiwaki ekalees ngabeben ematara ipirakinit! Nakaneni emam ekalees eporori loger a pelekuto. Imiekini ekalees ngabeyei keng alokidiama ngalup sodi kisubus niamonan a ngalup. Ikwa nyeyeni ngesi atamar epedorio akichiak. Kori epedori etiengit akibwang. Eboliar ekalees ngitak keng kwa ibore esibit meere ngikeng. Nyemisit ngesi tani kinyasun etich keng. Ayong kolong etabangaani ngesi nyeetaanyu ngesi aosou. Ani iwakawakakini ngesi ngabeben esaki akipungar, ekianar ekalees angole ka ekamean angole. “Yob, iyong kolong itiliwori ngangolei na ngikilinga a? Iyong kolong iwaakini lomosiringan kech ngajul na emalimalete a? Iyong kolong itoporoporoe kesi loger a ngimases a? Iyong itiliwori kesi itoemete ngitunga a akitusa kech a? Ichiekete kesi ngalup anadipo. Ematarosi kesi lojie a ngikilinga kech kadaang. Ekianar angole ebuloi, emam ibore eemi. Etenikini ngesi tani ekileng, nyebongi. Ngiboro lujiet lu etingito ngikameak ngangolei, igolagolasi kinwakunite akolong. Ipungar angole toten ngaren engoit tamarani. Ani ekutakinio aburuch, nyeweyi ngesi. Napei ekutakinere aburuch, itusakini ngesi. Inguunete ngesi ejie eringa elona. Kiira ngikarikok a ngasigerea edungunete ngakiro. “Erai nikon itatamar egole akipor a? Ikwa iyong itopetanari ngesi ngabeben keng tokienyiasi kuju a? Ikwa eporonori egole kotere ngakiro na idungunit iyong sodi todukok akai keng kidiama emoru a? Edukeene egole akai keng kidiama ngatabab, kitiliwo ngaitae awas a akai keng. Toliwor ngesi kaina ingolianari nikalonan ka nikaapean, esaki ibore ni eari tanyam. Echunakinosi ngigolei ni etoanikinit ibore, tamata ngitak kech ngaakot.” Torubak Ekapolon Akuj isuruori Yob tama, “Yob, abe isaki iyong abolo ka Akuj Naationon. Ilimuni tokona iyong atamar kidwang kori eyakasi ngakiro itachakini Akuj?” Abu Yob tatachak Ekapolon Akuj tama, “Kingolik a, emam itwaan kemarit ayong. Anukiro katachakini ayong iyong? Abunakini ayong akituk. Alimu ayong nakaalak napeajoikinit alimuni.” Sodi kisuruorik Ekapolon Akuj Yob nabo alokuwam alo ipiripiri tama, “Tonyou tokona towo lokile, tatachu ngakiro nakengisi ayong iyong. Isaki tokona iyong atamar nyetiriyanit ayong ngakiro na asubi a? Isaki iyong atamar asechit ayong, nyiisechite iyong a? Igogong iyong kwa ayong a? Ipedori iyong agirokin loger kang a? “Ani kikote neni, towo chene engolikisi iyong anarimatoi kon ka ekisil. Kidodiun anakibuseanu kon ka ajokis. Tokienyik ngitunga lukenisak. Tangau robo anyunyura kon kitiditeu kesi. Ee robo, tokienyik kesi sodi kitiditeu. Kichiak luaronok ani ewaatar. Tonukak kesi daang nalup. Tonukak kesi ni eyakasi ngikatoak. Sodi toliwor ayong esiauni akipuruun iyong. Atolim atamar iyong ilope idwangi. “Tokienyik tani etiengit lo enyaritae epir. Asubuni ayong loger lo kasubea iyong. Edak ngesi nginyia loger a aite, nakaneni etioko ngikilinga a akwaan keng, ani ngamori a akwaan keng, egogong. Itenara ekosim keng loger a echekereng. Ani ngaputon a ngakalokidingo keng, etokokino wapei. Ikote ngakoyo keng ngasua nanyangayek, kikote ngakejen keng ngasua nakirionok. “Erai ngesi kitalari noi alotieng kang kadaang! Akasubunan keng bon epedori akidwang ngesi. Nginyia lu itanere ngesi, erupunito alomukur alu eboliata ngitieng a moding. Inapakin ngesi kwap aregae, toduk anatiriwae ani erai erus. Ngirega ka ngikito lu erupunito alokipetot a ayanae kesi imukito kesi a etolim kech. Nyekerit ngesi angolol na ileleba. Ililingi ngesi chek. Tani na ilelebunor angolol a Yorudan kipichun. Ngae epedori akitumudukan ngesi ani erumor kirum ngesi? Kori ngae epedori akiped ekume keng a eloit?” Ipedori iyong akisurum Lepiasan a ekorobich a? Kori ipedori iyong akien angajep keng a auno a? Ipedori akirepakin auno lokume keng a? Kori akiped ekitinyo keng a ekorobich a? Kimaimai ngesi iyong ebala kimiekinae a? Ekoe, kisuruori ngesi iyong ngakiro nakaabok a? Ekoe, ichamakinosi iyong ka ngesi kichikak iyong atamar asubi etich kon jik a? Iboliasi iyong ka ngesi loger lo iboliata ka ikeny a? Kori iratakini iyong ngesi toliwor eboliatar ngakedalak kon? Epegakinosi ngimuchurus kotere ngaropiyae na egielere ngesi a? Etubitubete ngimuchurus ngesi togielanasi a? Ipedori iyong akileleb amuny keng lorimocha lu eremere ngikolia? Kori ipedori iyong akirem akou keng a erimoch aloapolon eremere ngikolea? Ani kitap iyong ngesi, iyenuni iyong ekilek lo emini. Nyibongokini nguna nabo jik. “Itwaan daang ni ingolikini Lepiasan, elilimiyori tadakakin kwap. Emam itwaan epedori akiteriangakin ngesi. Ani ngae tokona epedori aweikin ngesi? Ibore a ngae alema ayong ejoikinit atachakini ilope? Erai ibore daang ni eyei kwap adis ikang. “Kimiek katolimok ngakiro a nginerin a Lepiasan. Kesisak eger lo epoloo ngesi tarai lokaagongon. Ngae epedori abuluchiar amuny keng? Kori ngae epedi aupwal keng a ejie? Ngae epedori angaar akituk keng? Ileleba akituk keng ngikel lu kitubulete! Eyakasi ngangedakinet a ngaupwala naabor keng na etokokino wapei togogong loger a amoru. Etokokino daang wapei emam tani ni epedoror ekuwam. Irumeikina apei ni eyei nache emam kona etiakio. Imauni akicha na ikarisaarea ngesi. Enokete ngakonyen keng loger a akolong ana ipiripiruunit. Epuduunete ngakinwaket na enokete anakituk keng. Kiteraros ngikatwany a akim nikalapatan. Eneteunun apuru alokume keng loger a apuru ana epuruunit alodoan alo enomit akim alokwap amot. Itonokuni akienget keng ngatotol. Kiwaru asarae anakituk keng. Egogong emosiring keng noi erai lu iriamete ka ngesi daang ebuli. Edupup ngamori keng lokojokon. Egogong ikote asuat. Etiono etau keng ikoni amoru nakaagongon. Egogong ikoni amoru nakiries. Na enyounio ngesi, tobul ngikajwok. Ebuli kesi tongop kona ikokinete. Emam ekileng ewani ngesi. Emam akwara, kori emal, kori erimoch ewani ngesi. Enonok asuat anikeng ikoni nginyia. Ani asuat nanyang, ikoni akitoe naabosan. Nyitamatari ngesi emal. Ani kibiirokin ngesi ngamoru, kitusub ngisul a amelu. Ikoni esebo anikeng akasirimait. Ekianar ngesi ngitunga na eremioto ngesi a amorok. Amuny na erapit akook keng ikoni ngakabelebele naitayek. Echilete kesi ngalup kiealasi loger a iborosit ani iriere. Itukulae ngesi nituluk loger a amot, toliwor ekui loger a amot a akimiet. Ani itori ngesi ni itori, idongi erot keng imaunit, sodi kibele anam toliwor ekurudo. Emam ibore iche ikwaan ka ngesi anakwap. Erai ngesi etiengit lo emam ibore eemit. Imenyarit ngesi tani ngitieng lukenisak. Ngesi epolokinit ngitieng a moding daang.” Abu Yob tatachak Ekapolon Akuj tama, “Ekapolon Akuj, ayeni ayong atamar erai agogongu daang akon. Ayeni atamar ipedori iyong akisub ibore daang ni isaki. Kingit iyong ayong ibala, ‘Ngae iyong itoniarit aosou kang a ngakiro anapasiyek?’ Ngakiro nguna kesi alimunio ayong napeayeni, na araakasi ngakiro nakitalarete lokojokon, nakakuruwori ayong akiyen. Ibu iyong kitolimok ayong tama, ‘Topupok, katolimok. Kengisi ayong iyong ngakiro sodi tatachu iyong.’ Apupi kolong ayong ngakiro kon a akit, nakaneni kengolik tokona a ngakonyen. Kotere ngakiro nguna, keruma ayong ngileech kotere daang na alimuni. Alungi tokona ayong akisech kang ewasakin apua ka ekuron.” Ani kiruor Ekapolon Akuj ka Yob kerumor, tolimok Akuj Elipas tama, “Angoit ayong anikon ka talopaekon luarei kainyo nyiruoro esi ngakiro na iteni anikang loger lo eruoror ekasuban etich kang Yob. Torujasi tokona ngimongin ngikan-kaarei ka ngimesekin ngikan-kaarei nia Yob, tolemut eraakasi ngakipeyos kus na ipeyeo. Kilipakini Yob esi sodi eik ayong ngakilipasinei keng, nyakasubea esi ngakiro na itemem ka abangaanut kus, kainyo nyiruoro esi ngakiro na iteni anikang loger lo eruoror ekasuban etich kang Yob.” Apot Elipas, ka Bilidad ta Sopar tosuba ngakiro na alimokini kesi Ekapolon Akuj. Kiik Ekapolon Akuj akilip a Yob. Ani kilipak Yob ngipaalon keng luuni kerumor, tobuak Ekapolon Akuj Yob ebari keng daang, nak ngainakinet ngaarei a ibore kadaang anisek arai ikeng. Pot talokaatokeng, ka tanakaatokeng ta daang lusek anaikina ka kesi, kimuja ka Yob anawi keng. Apot kidodikis kesi ngisien ka akisililing ngesi kotere ngichan daang lu etaanyuni Ekapolon Akuj ngesi. Tolem ipei kech daang ngaropiyae ka ekababaat a egolit nak Yob. Topia Ekapolon Akuj eboyor a Yob lo ekisidi akidwang eboyor keng lo ekingaren. Araakasi ngibaren keng ngirwa ngulu ngamesekin 14,000, ka ngikaala 6,000, ka ngaatuk 2,000 ta ngisikiria 1,000. Ayakasi ngesi tani talokookeng ngikan-kaarei ka tanakookeng ngauni. Nakookeng naapolon, tolimok ngesi ekiro be Yemima. Ani na ngaarei, tolimok ekiro be Kesia. Ani naachi, tolimok ekiro be Keren Apaki. Amam ngaberu ngache anakwap etia ni etia na edwangito tanakookeng a Yob anakibuseanu. Kimiekinea apakech kesi ebari keng kiruma ka talokaatokech aapei. Ekisidi kanguna, torubak Yob eyari a ngikaru a amiat a apei ka ngitomwon-omwon. Abu ngesi taanyunga ngitatae keng, tanang alesit na nguomwon. Abu ngesi totoan emojongit noi. Epiaritae itwaan ni nyerukito ka ngitunga luaronok, kori nyiwapit erot a ngikasechak, kori nyiboikin natuk a ngitunga alu imenyarito Akuj. Nakaneni emina ngesi etal a Ekapolon Akuj, nabo itamanari etal ngolo naparan ka nakwaare. Ikoni ngesi ekitoe lo itakinitae lokwaas a elelea, ekitoe lo nyesali akoniun ageor, nabo nyeokete ngakui keng jik. Ibore ni esubi ngesi daang, ejoker. Nyikote ngitunga luaronok neni. Ikote kesi ngatunyeny na ekutari ekuwam. Etubi Akuj ngakiro a ngitunga aluaronok, kipakarae alotunga alu a Akuj. Kainyo erikit Ekapolon Akuj lu etenooko. Ani luaronok, emunyari kesi elote kech. Nyo etukuotor ngibukui ngakiro naaronok? Nyo etukuotor ngitunga pas? Ebaka ngikapolok a ngakwapea achunakin wapei akitopeg Ekapolon Akuj ka ekapolon lo aseuni ngesi. Abe ebalasi, “Atalachakinos anapolou kech. Atachakasi ngiriko kech.” Ekapolon Akuj lo eyei nadis ekianar kesi ka akimeny. Ani erumor kisuruor kesi engoit enyunyura ebala, “Ewaak ayong ekapolon kang kidiama Sion, lo erai emoru kang.” Ebala ekapolon kona, “Alimori ngakiro na adungu Akuj. Kalimokini ngesi ayong tama, ‘Irai iyong lokookang. Aliwor ayong apakon akolongit naga. Kilipae ayong sodi kainak iyong ngibukui daang. Eliwor akwap daang akon. Ibili iyong kesi a asuat anakirion. Ibwangi iyong kesi kieala loger a amot analupe.’ ” Toosokioto tokona esi ngikapolok. Topupokisi ngakiro nakichikichikere esi nugu, esi ngikarikok a ngakwapea. Tosuba etich a Ekapolon Akuj ikerito. Tamaranikisi idodikinito arimatoi. Ani kemam engoi ngesi tomunyaros esi, kainyo eriraununi angoit keng atipei. Epiaritae ngulu daang ematarosi nikeng! Ee, Ekapolon Akuj, elalak ngimoe kang. Elalak lu kanyoikinito ayong! Eyakasi lukaalak lu ebalasi, “Nyingarakini Akuj ngesi.” Nakaneni iyong Ekapolon Akuj kiyuunit iyong ayong loger a aupwal. Nikon edwangea ayong ngimoe kang, nabo iyong kitiliwori ayong lokaatinyon. Egoronokini ayong Ekapolon Akuj erema abala kingarakinae. Etacheene ngesi ngakiro kang eyei lomukura keng. Enapakin ayong atojotoor ani erumor atokienyu nabo, kainyo keyoki ayong Ekapolon Akuj. Nyakeri ayong ngitunga ngabunge nakaalak lu keriamito ayong ngiwaitin daang. Tonyou kare Ekapolon Akuj! Toyuunae ayong Akuj kang! Ibil iyong ngakoyo a ngabokonya a ngimoe kang kadaang. Ipok iyong ngikel aluaronok nyakawan ayong. Ekapolon Akuj eyuununi. Ee Ekapolon Akuj, topia ngitunga kon. Akuj akayuunan kang, kiikinae ayong nakanyaraa. Kingarakini iyong ayong na aanyunea ngichan. Kidodiu tokona ngisien anikang sodi kiira akilip kang. Esi ngitunga, kiyenyete esi ayong tanang ori? Iminasi esi ngakiro napasiek ka akiwapit alioko tanang ori? Toyena atamar aseu Akuj ni etenoono toliwor ikeng. Epupi Ekapolon Akuj ngakiro kang na anyaraa ayong ngesi. Tamaranikisi iemito sodi tapalikis akisub akisech. Kitama lokojokon ngakiro nugu alotai kus, iperete alokitandae kus ililingete. Tolemikisi Ekapolon Akuj ngakipeyos na iyookino. Kigienokinos ngesi. Ilipete lukaalak ebalasi, “Ekapolon Akuj, topiarae sua lokojokon! Tokienyikinae sua a ngisien!” Nakaneni alakara nakitaanyu iyong ayong, ejok noi idwangit nakech tani ketingito emuna ka ngakanoi nakaalak noi. Enapakin ayong atojotoor niajokon. Kainyo iyong Ekapolon Akuj, kisiboi ayong akaalimon. Ee Ekapolon Akuj, topupok ngakiro kang. Kiira akunua kang. Kiira akigoro kang, Akuj, Ekapolon kang. Kainyo iyong ngesi kelipit. Ipupi iyong etoil kang nataparach. Ani ipiripiruuni akolong katolemik iyong akipeyos kang, ani erumor edaru nakilimokini iyong. Meere iyong Akuj na imina naaronok. Nyiboikin itwaan niaronon nikon. Kikadakinit iyong akingolikin ngitunga lukenisak. Iremokino iyong ngitunga luaronok daang. Imunyari iyong ngikaliokok daang nabo imenyarit lu emoitaka, tomodeaka. Nakaneni kotere amina kon na nyedaun, alomari ayong kai kon. Elipi ayong alokai ana italeunitoe atoriedik kedodikinit iyong arimatoi. Ekapolon Akuj, torikoe ayong a ateneanut kon! Kotere ngimoe kang, kitenik erot kon alongaren kang. Emam ngakiro na iteni iruorosi ngimoe kang. Esakete kesi ayaun nginyas. Itoboboto kesi ngakituk, nakaneni erai ekiruor kech lokaaran. Akuj, tomunya kare kesi. Kimiek tomunyasi ngakiro na etukito. Kitwarak kesi kotere ngasechesea kech nakaalak, kainyo kingero kesi iyong. Ani daang lu kimechete iyong, elakarosi. Eeosi jiik imariteteete. Kiyok lu eminasi ekiro kon. Toliworos elakara kotere iyong. Ekapolon Akuj, ipiari iyong ni iwapit ngakiro kon. Imukit iyong ngesi a amina kon loger a aupwal. Ekapolon Akuj, nyikikilak kare a angoit kon. Nyikirira a anyunyura kon. Ekapolon Akuj, apalag ayong, kisienoi kare. Ekapolon Akuj, kitangalek edeke kang, kariebi ayong akwaan daang tanang nakoyo. Echanakin etau kang lokojokon. Ekapolon Akuj, kedari ayong iyong tanang ori? Ekapolon Akuj, toreun kitoyuu ayong. Toyuunae ayong anakitu kotere amina kon na nyedaun. Emam itwaan kitamunit iyong alokatoak. Ngae kipuruuni iyong alokatoak? Ketubur ayong akialolong kang. Akolongit daang nakwaare esisik ekitanda kang kotere akigoro. Etapapal ngakiyo eworu lo echolongit. Ariboki ngakonyen kotere akialolong. Abuoto kotere ngakiro a ngimoe kang. Kotosi anikang esi daang lu isubete naaronok! Kainyo eira Ekapolon Akuj akigoro kang. Eira ngesi akigoro na asakea kengarakin. Iikini ngesi akilip kang. Irumete ngimoe kang daang ngileech kichanakinos. Ereasi kesi tobongosi kotere ngileech lu irumete atipei. Ekapolon Akuj na irai Akuj kang, Iyong kamechi ayong. Toyuunae ayong ani eyakasi daang lu kerisito. Ani pekikok iyong neni, epote kesi nikang loger a engatuny keriyasi nikalonan ni engopea itwaan kayuuni, katonyilinyilaasi kaina. Ekapolon Akuj, Akuj kang! Ani kasubit ayong apei a ngakiro kanu, ani kenyasunit ayong ngakan kang anaaronok, ani kasubitor lopae kang naaronok, kori karemit emoit kang pas, kimiek robo ngimoe kang keritasi ayong kerumut. Kimiek kesi katotubo ayong kataar, kemiekis aperi analup atoanit! Tonyou kare Ekapolon Akuj anangoit kon! Toweik anyunyura a ngimoe kang. Isakeene iyong jiik tosubae na eriyan. Tochunak ngitunga daang kiriama iyong, topolok alokidiama. Iyong itubi ngakiro a ngitunga kadaang. Totub ngakiro kang itemem ka ateneanut kang. Itemem ka eger lo nyasechitor ayong. Totubo aronis a ngitunga aluaronok. Kitowo itwaan niajokon. Iyong Akuj na isubi na eteniyete, na itemi ngitai ka ngitamen. Akuj erai aupwal nakayuunit ayong. Eyuunit ngesi lu iwapito ngakiro keng. Erai Akuj akatubon ngakiro na etenoono. Ngirwa daang irirae luaronok. Ani pekelunga ngitunga ngasechesea, ipenari Akuj ekileng keng. Irikini akau keng esaki akigum. Alemu ngesi ngiboro keng a ejie lukaarak, kipena ngimalea keng. Kingolik eger lo irokioto luaronok naaronok. Ileleba aronis nikech nabo euriuni engalas. Ebokakinito kesi luche ngapanya, nakaneni kesi ngikulepek echakakinosi neni. Ebongokini aronis kech kesi ngikulepek. Ewani kesi amoitanut kech a ngikulepek. Epuruuni ayong Ekapolon Akuj kotere ateneanut keng. Ekusi ayong Ekapolon Akuj na Epol Noi. Ee Ekapolon Akuj, Ekapolon kosi. Ipuroi ekiro kon anakwapea kadaang! Enangit ekipur kon tani nadis. Ikusete ngide lusorok ka luuchik. Iwei iyong idira ani eyakasi lu kitepegete iyong. Isalununi iyong ngimoe kon. Na engolikinea ayong adis, na erai etich a ngimoyo kon, elap ka ngikanyer lu isubuni iyong, atama, “Nyo mono itwaan itamitor iyong ngakiro keng? Nyo imisitor iyong ngakiro a itwaan?” Tani ikoni neni, ibu iyong kitiliwo ngesi lo edit wadio akidwang iyong. Kitiliwo iyong ngesi ekapolon lo erimae kipuruunitetei. Iseuni iyong ngesi topolok ibore ni isubuni iyong daang. Iwaakini iyong ngiborei daang kwap keng. Ngamesekin, ka ngaatuk ta ngitieng a moding. Ngikieny, ka ngikolea ta ngiborei daang lu eyakasi nanam. Ee Ekapolon Akuj, Ekapolon kosi. Ipuroi ekiro kon anakwapea kadaang! Ekapolon Akuj, kepuruuni ayong iyong a etau kang kadaang. Alimori ayong ngakiro nakailiilok na isubak iyong daang. Aeokini ayong alakara kotere iyong. Aeokini ayong kekusi iyong, Akuj na Ipol Noi. Na areatar ngimoe kang tobongosi, apot tadakaros totoaka alongaren kon. Kiweik iyong ayong kiinak na eteniyete. Iboikin iyong lokicholong lo a apolou, totub ngakiro a ateneanut. Ikilak iyong ngibukui luche, tomunya luaronok. Itongopia iyong kesi jik. Adaunosi ngimoe kosi jik, angopiasi. Ibwang iyong ngirerea kech, nyeringa nabo kesi ekachitae jik. Nakaneni erai Ekapolon Akuj ekapolon jik. Ewaak ngesi ekicholong keng lo a apolou kotere akitub ngakiro. Etubi ngakiro a ngakwapea a eger alo etenoono. Etubi ngesi ngakiro a ngibukui a eger alo eriyan. Ekapolon Akuj ngesi emechi itwaan ni ichiakiaritae. Ngesi emechio ngirwa lua ngichan. Ekapolon Akuj, lu elimorito ekiro kon, kigienosi iyong. Nyichakari iyong itwaan daang ni kisaki iyong. Kipuruutu Ekapolon Akuj na epolokinit Sion! Tolimokisi ngibukui daang ngakiro na asubi ngesi. Itamunit Akuj lu eboliare. Nyimuriakini ngesi akigoro alu eremitoe. Ekapolon Akuj, kisienoi ayong! Kingolik aboliaro nakaboliatar ngimoe kang! Ekapolon Akuj, toutunoe ayong anakitu, atolimorea ekipur kon alongaren ngitunga a Yerusalem, kekut iyong ani kiyuunea. Aboka ngibukui akipany tachakakinos kesi ngikulepek tooma. Erum kesi eloit kech a ngikulepek. Edodiun Ekapolon Akuj kotere ngakiro na ateneanut atubuni ngesi. Ani ngitunga luaronok, irumi kesi ngikulepek eboyor kech loaronon. Edaikinosi luaronok daang nakitu. Ikokinete ngitunga daang lu engerito Akuj neni. Nakaneni lu etingito ngichan nyimurianakinosi jiik. Nyengopiari akigieno alukebootok jik. Tonyou Ekapolon Akuj! Nyiimiek itwaan iwoga. Tochunakin ngibukui ngaren kon totubok kesi ngakiro. Kitoem kare kesi, Ekapolon Akuj. Toyena atamar nyikirai kesi ichebore pearai kirai ngitunga. Nyo iwaar iyong anialonan, Ekapolon Akuj? Nyo idukeenea iyong nakitingeta sua ngichan? Iwogasi luaronok, toboliatar ngikebootok. Kimiekisi ngiloi lu esubete kesi kiruma kesi ngikulepek. Iwoga itwaan niaronon kotere etereku keng loaronon. Ani ngini iterekuyarito ngiboro, ichieni Akuj pas engerit. Nyemisit itwaan niaronon Ekapolon Akuj. Iwoga ngesi ebala, “Emam Akuj.” Ejok eboyor a itwaan aniaronon jiik. Nyepedori ngesi akiyen ngakiro na etubuni Akuj. Imenyi ngesi ngimoe keng daang. Itamanari ngesi ebala, “Nyeketeriangakinio ayong. Analesea kadaang, emam ngichan aanyuni ayong.” Ileleba ngilam, ka alioko, ta angata nakituk keng. Ekoponokin ngesi ekiruor ngakiro nakikadakinete naaronok. Edukit ngesi anadakarin idarit akiar ngitunga lu emam akisech. Irere ngitunga lupalag, edukit ngesi idarit loger a engatuny. Idarunit ngesi lukebootok. Isurumi ngesi kesi a eloit keng tolema. Erwakinoi nipalag tadakakinae kwap. Edakari amoitanut aluaronok. Itamanari itwaan niaronon ebala, “Emuriakis Akuj ngakiro kang. Edaa ngesi ereet keng. Nyeringa nabo kaanyungari.” Ekapolon Akuj, tonyou kare totub ngakiro a ngitunga aluaronok! Wara nyikimuriakis lu ichiakiaritae! Ikokini itwaan niaronon imenyi Akuj ai? Abe toliwor itamanari ebala, “Nyekerirae ngesi ayong.” Nakaneni itee iyong lu eyakasi lochan toriabas. Isaki iyong jiik akingaranakin kesi. Kimuno iyong itwaan nipalag. Ingaranakini iyong lukokiok. Tobwang agogongu a ngitunga aluaronok ka ngirukooi. Kirira kesi kotere naaronok esubete, nyeesuba nabo. Erai Ekapolon Akuj ekapolon jik. Ngibukui lu nyilipito ngesi engopiarete anakwap keng. Ekapolon Akuj, ipupi iyong akigoro a itwaan ani itiditeuna. Ipupokini iyong ngakiro keng kitogogong. Iirari iyong akigoro alu ichiakiaritae ka lukokiok. Isubakinea iyong kesi ngakiro na esakete tongop itwaan iteriangakini kesi. Nia Ekapolon Akuj amatar ayong! Nyoni ibalatar esi ayong, “Toporo lomoru loger a ikeny? Kingolikisi eger lo erikineta luaronok akau, adupakis kesi ngimalea eketakis ngakawa, togumasi ngimalea anaribu lotunga luajokak. Emam ibore esubakini itwaan niajokon na inyasunor ibore daang.” Eyei Ekapolon Akuj kai keng na italeuno. Eyei ekicholong keng lo a apolou nadis. Itee ngesi ngitunga awadaang, eyeni ngakiro na esubete. Iseme ngesi luajokak ka luaronok aapei. Eremokino ngesi ngikasechak lokojokon. Eyauni ngesi ngatotol na eriraate kwap lokasechak. Akim nakariran ka ekuwam lo a akamu iriraa ngesi kesi. Etenoono ekapolon Akuj. Emina eboyor loajokon. Eanyungarete lu etenooko ereet keng. Kingarakinae sua, Ekapolon Akuj! Adaunosi lu ilipito Akuj. Angopiasi lu emunoi alokiding ngitunga. Ingalasi kesi daang make. Ingalasi kesi make itoboboto ngakituk, totiakito ngitai ngaarei. Ekapolon Akuj, kisililing kare ngakituk na itobobotoi nguna. Tobunak ngakituk na iwogasi ebalasi, “Ngakituk kosi kiyuunor sua, ngangajepa kosi kiyuunete sua, ngae epedori akidwang sua?” Ebala Ekapolon Akuj kona, “Nakaneni abuni ayong kainyo ichiakiaritae ngikebootok, ani lu eboliare, ekunuasi kotere nikaapilan. Esienguni ayong kesi kiboikinos akaalimon, loger lo esakitotor.” Ngakichikakinet a Ekapolon Akuj, enupio. Esegak kesi ikwaan ka akwangat na itosegio a akim, kitosegae ngakitoseget ngakan-kaarei. Toyuunae kare sua Ekapolon Akuj, kitochoik ani eyakasi ngitunga luaronok kalu. Irimito ngitunga luaronok ngiwaitin daang. Iwoga itwaan daang kotere naaronok. Ekapolon Akuj, emuriakin ayong anikon tanang ori? Iduki iyong anikang tanang ori? Anaikini ayong ngichan tanang ori? Ialolongi etau kang jiik tanang ori? Kedwangeenete ngimoe kang ayong tanang ori? Tokienyikinae kare ayong Ekapolon Akuj na irai Akuj kang, kibut ngakiro kang. Tobuakinae ayong ngikilinga kang nyikimiek atoani. Nyiichamu ngimoe kang elimunete tamasi, “Kisubak sua logo!” Nyiichamu ngimoe kang ichurokinete ani ariangakinor ayong. Egieno ayong amina kon na nyedaun. Alakar ayong kotere ayuuno kon. Kaeokini ayong iyong Ekapolon Akuj, kainyo kisubea iyong ayong naajokak. Ebalasi ngikabangabangae alotai kech, “Emam Akuj.” Inyasuna kesi, esubete ngakiro naaronok noi. Emam tani ipei ni esubi ngakiro naajokak. Ingoliunit Ekapolon Akuj anadis itee ngitunga. Esaki akiyen keyei ipei ni eos, ni iwapit ngesi. Nakaneni ebatarosi kesi daang. Ikwaan kesi daang eroko. Emam ni esubi naajokak, emam tani ipei. Ingita Ekapolon Akuj ebala, “Ekoe, ebangaaka ngitunga daang lu esubete naaronok a? Ngiboro lu edemete kesi ngitunga kang eyaritotor. Tarai nyetamarete kesi ayong, ‘Kingarakinae kare a?’ ” Ani ikoni neni dang ebuli kesi, kainyo eikinit Akuj lu etenooko. Itulunyete luaronok ngakiro na ereat itwaan ni itiditeuna. Nakaneni Ekapolon Akuj emechi itwaan ngini. Elipit atamar bu ayuuno nia Isirael alo Sion! Elakarosi Ngisirael noi na itaanyunea Ekapolon Akuj kesi ebari nabo. Ee Ekapolon Akuj, ngae elomari kai kon? Ngae epedori akilip alomoru kon? Itwaan ngini ngesi ni iwapi ngakiro a Akuj anibore kadaang, tosubeene jiik ngakiro na iyookino. Itwaan ngini ni eraakasi ngakiro keng na iteni, nabo nyeswami itwaan niche, nyesubea itwaan niche ngakiro naaronok, kori nyiruoro ngakiro a ngitunga aluche. Imenyarit ngesi lukamodeanak, nakaneni erima lu ekerito Ekapolon Akuj. Esubeene ngesi jiik ngakiro na alimu tani keanyu ngichan kwaani. Emam ngaropiyae idoki ngesi ni eyakasi na eario amicha. Emam itwaan edieki ngesi a ngaropiyae kitingakinea itwaan ni nyesechit ngakiro. Itwaan ni esubi ngakiro nugu, erubi jik. Toyuunae kare Ekapolon Akuj. Amotuno nikon kitoyuu. Alimok ayong Ekapolon Akuj abala, “Irai iyong Ekapolon kang. Nikon eponitotor ngiboro luajokak lu atingit ayong daang.” Ejokak noi ngitunga a Akuj lu eyakasi nakwap! Arukit ka kesi ngesi kajoikinit ayong. Ngitunga lu ekerete ni eya ngakujo ngache, eanyunete ngichan lukaalak. Nyamisikini ayong ngakipeyos kech. Nyelipi ayong ngakujo kech. Iyong bon Ekapolon Akuj ngesi kegieno ayong. Kiinakinit iyong ayong ibore daang ni eitanit. Nakan kon eyei akiyar kang. Kitiakak iyong ayong ewae loajokon. Iteni dir, ejok noi nikiinak iyong ayong. Epuruunit ayong Ekapolon Akuj ani karikitor. Ani nakwaare kechikichik ayong etau kang. Ewaakinit ayong Ekapolon Akuj ngaren kang ngirwa daang. Eyei ngesi diyete kang, emam ibore keteriangakini ayong. Kotere ngakiro nguna alakara ayong emaritete. Ebooyi ayong niajokon. Kainyo kiyuunit iyong ayong ani eyakasi ngikatoak, nabo nyikimiekini iyong ayong lo kelipit iyong alomari nakipany. Kidodikini iyong ayong erot lo eteni nakiyar. Alakara ayong noi ani kirukitor ka iyong. Ketalakarit ayong jik ayakau teten kon. Ekapolon Akuj, topupok kare ngakiro kang, nakelipea atamar kitosubakinea na eteniyete. Kiira akigoro kang. Kiira akilip kang na emam engalas. Itiakuni iyong ngakiro na ejokak anikang, kimiek ngakonyen kang kingolikis ngakiro na iyookino. Ani kining iyong etau, ani kibu iyong nikang nakwaare, ani kining iyong ayong, emam naaronok ianyungari iyong anikang. Emam naaronok itorunito nakituk kang loger a ngitunga aluche. Ewapit ayong etal kon, nyiwapa ngirotin a ngitunga alukamoitanak. Ewapit ayong ngirotin kon jiik, emam wache abu enacha. Kanyarit iyong Akuj ani ipupio ngakiro kang. Todeta akit, kiira ngakiro kang. Kidodikinae amina kon na nyedaun a eger alo kitalari, Ani ngulu emotunosi nikon, nyetapete ngimoe. Tochoikinae ayong loger lo ichoikinitor ngakonyen kon. Kidae alotorube a ngabeben kon, atoyuun alojie a ngitunga aluaronok, ka ngimoe lukaarak keriamito ayong. Emam kesi ngisien, kiwogas a ngakituk kech. Kerikaunito kesi ayong alowaitin kadaang. Esadito esakete adakakin ayong kwap. Esadito kesi anyilinyilaar ayong loger lo esaditor engatuny, eperunit etiengit tonyilinyilaa. Tonyou Ekapolon Akuj! Kitopeg ngimoe kang kidwang kesi. Toyuunae ayong a ekileng kon ani eyakasi luaronok. Toyuunae ayong ani eyakasi lu ejakaanito anakwap kana. Kirira kesi a ngichan alu idiatakinit iyong kotere kesi. Toliworos ngichan ngulu lu itemokino ngide kech, kimiekineta tani ngitatae kech. Nakaneni kaanyungari ayong iyong, kainyo emam naaronok asubit ayong. Ani anyouni ayong, ketalakari ayong nikirukitor ka iyong. Kamina ayong iyong Ekapolon Akuj! Iyong irai ekaikinan kang. Ekapolon Akuj erai ataaba kang, ka awas kang nakaagongon, tarai akayuunan kang. Erai Akuj kang, tarai ataaba kang na amatakin ayong. Egaa ayong ngesi loger a aupwal, sodi eboikinor akaalimon. Anyarae ayong Ekapolon Akuj, lo ejoikinit ipuruunio, katoyuu ngesi ayong alomoe kang! Abu akitu katorwakin ayong, kilapun ngitoroi a nginyas nikang. Kerudakin ayong akitu, katolokite aliel. Atanyara ayong Ekapolon Akuj alochan kang. Egoronok ayong Akuj kang abala kengarak. Kiira ngesi etoil kang alokai keng. Topupok ngesi akigoro kang na asakea kengarakin. Abu akwap tamaranik ka arikirikokin. Kuukuukokin ngateak a ngimoru ka arikirikokin, ani angoitor Akuj! Kidauu apuru alokumes keng, sodi akim nakariran ka ngatotol na enokete topudut anakituk keng. Apaki ngesi adis totiyaun, eyei edou lo ilirakina kwap ngakejen keng. Aporori ngesi atipei a ibore ani a ngabeben. Alosi eyei nabeben a ekuwam. Abutakin ngesi aribu. Emukito ngesi ngidowon luapolok, lu eleleba ngakipi. Na abunio ngesi kinwaku akimilea. Ani erumor totupuut ngamoru a akiru ka ngasarae eponito alodou aloapolon. Sodi togirok Ekapolon Akuj anadis, kiirarae etoil a Akuj ana Epol Noi. Talakak ngamoru a akiru ka akim. Toguma ngesi ngimalea keng a akau kieala ngimoe keng. Kirita ngesi kesi a akimilea. Apon akook a anam kitoonoi deu, sodi talacharae ngateak a akwap, na ekilakinea Ekapolon Akuj ngimoe keng, sodi kirurumakinea kesi engoit. Abu Ekapolon Akuj na eyei kidiama tanangu kwap katoting ayong. Keriu ngesi ayong anakipi anatuluk. Kayuuni ngesi ayong alomoe kang alukajwok noi, ka daang lu karemokino ayong. Agogong kesi noi akidwang ayong. Ketijikinete kesi ayong na ayakar lochan, nakaneni katoik ayong Ekapolon Akuj. Kengarakini ngesi ayong alochan. Kayuuni ngesi ayong kainyo alakara kotere ayong. Ketaanyunit ayong Ekapolon Akuj ekeny ajokon kainyo asubi ayong ngakiro na iyookino. Kapiarit ngesi ayong ani emamakar ayong ibore asechit. Ewapit ayong Etal a Ekapolon Akuj. Eringa ayong nyereiara wache ani eyei Akuj kang. Ewapit ayong ngakiro keng daang. Nyengero akiwap ngakitatamet keng. Eyeni ngesi atamar nyasechit ayong. Awou ayong akisub naaronok. Kotere ngakiro nguna, ketaanyu ngesi ayong ekeny ajokon, ani eyenea ngesi atamar atenoono ayong. Ani emamakar ibore asechit alongaren keng. Ekapolon Akuj, imuno iyong lu kimunosi iyong, nabo nyisechit iyong ani eyakasi lu nyesechito. Ikiuna iyong ani eyakasi ngulu ikiuna. Ios iyong ani a ngikamodeanak. Iyuuni iyong lu itiditeuna, nakaneni itiditeuni lu inisasi. Ekapolon Akuj, iyong kare inokakinit ataa kang. Akuj kang, iyong itwarakini aribu kang. Kitaanyuni iyong ayong ngikilinga lu etijio ngimoe kang, ka agogongu na edwangea lu ketepegete. Akuj naga, ikiuna na esubi ngesi! Eraakasi ngakiro keng ngaka iteni! Ikoni ngesi aupwal ani eyakasi daang lu esakete kitoyuu ngesi. Kainyo ngae erai Akuj? Ikwa meere Ekapolon Akuj a? Ani ngae erai ataaba? Ikwa meere Akuj yok a? Erai ngesi Akuj naketogogongi ayong. Itiliwori ngesi erot kang lo emam ibore niaronon eyei. Itenikini ngesi ngakejen kang kikokis na agete. Kachoikini ngesi ayong niajokon alomoru. Ketatami ngesi ayong ejie, sodi atotingea ayong akau nakaagongon noi. Ee Ekapolon Akuj, kiinak iyong ayong aupwal na ayuunor. Kegangit ayong akan kon na a aloteten. Aliwor ayong lokayenikinitae, ani kingarakinitor iyong. Kiratak iyong ayong nyekerumun, nakaneni nyedakara ayong jik. Erisi ayong ngimoe kang sodi erum. Nyaisikini ayong kesi tanang amunyari. Arami ayong kesi atowan, sodi towout anyoun. Edakakinosi kesi nakejen kang. Kiinanakini iyong ayong ngikilinga lu ajio, sodi edwang ngimoe kang. Isipungari iyong ngimoe kang ani anikang. Amunyari ayong lu karemokino ayong. Igorosi kesi esakete atamar kingarakin, nakaneni emam itwaan ingarakini kesi. Enyaraate kesi Ekapolon Akuj, nakaneni nyetachi ngesi ngakiro kech. Eriekini ayong kesi kikokis apua na ekutari ekuwam. Epudae ayong kesi loger a echoto alo eyei lorotin. Kiyuuni iyong ayong alotunga alu kangerito. Sodi kitiliwo ayong ekapolon a ngibukui. Ngitunga lu kolong sek peayeni ayong, aliworosi tokona lu apolokinit ayong. Ngitunga a akwap anache, eriedikete alongaren kang. Nairareta kesi ngakiro kang, kiwapakis. Elilimiyorete kesi sodi pot emaranete anawasea kech. Eyari Ekapolon Akuj! Kipuroe ataaba kang! Kipuroe apolou a Akuj ana kayuuni ayong. Edwangi ayong ngimoe kang kotere ngesi. Etikiyori ngesi ngibukui lu apolokinit ayong, nakaneni katoyuu ayong alomoe kang. Ee Ekapolon Akuj, edwangi ayong ngimoe kang kotere iyong, dio kitoyuu iyong ayong alotunga alukamoitanak. Kotere nguna, kepuruuni iyong alobukui. Ekusi ayong ekiro kon. Ekapolon lo erai eka Akuj, isidwangi Akuj ngesi ngimoe keng lokojokon. Idodikini Akuj lo aseu amina na nyedaun. Idodikini Daudi ka ngalesea keng jik. Isileereunit adis apolou a Akuj! Elimorit dir ibore ni asubi ngesi! Alimuni apaaran apei akiroit tolimok apaaran na etupit ngesi. Tolimu akolongit apei aosou tolimok akolongit na etupit ngesi. Emam ekiruor, emam tani ngakiro. Emam etoil epupio. Tani ikoni neni dang, apetar ekiruor kech nakwap daang. Ani ngakiro kech, epupio alosal a akwap. Ewaakini kolong Akuj awi a akolong nadis. Epuduni akolong anawi keng loger a ekile alo iuta, loger a ekakeran alo ebobokinit abolo anakerit. Ipiripiruuni alowae a epei, kirimo tanang lowae loche. Emam ibore ebuchar anamonis keng. Ikiuna etal a Ekapolon Akuj. Itaanyuni itwaan ngikilinga lukiteat. Eraakasi na edunguni Ekapolon Akuj na emunoi. Itoosunete lu emam ibore eyenete. Iyookino ngitalio a Ekapolon Akuj, italakarete ngitai alu iwapete. Eriyan ngitalio lu edungunit Ekapolon Akuj, itoosunete itwaan. Ejok akerit Ekapolon Akuj, erubi jik. Iyookino ngakitatamet a Ekapolon Akuj, eraakasi na etenooko. Ejokak kesi noi akidwang tani egolit loajokon noi. Ebobok akidwang akimiet a ao naajokon noi. Ketoosunete ayong ekasuban etich kon. Aanyunit ayong ekeny ajokon ani ewapitor kesi. Emam itwaan eanyungari na ichwangakinit ngesi ilope. Toyuunae kare ayong Ekapolon Akuj alosech alu nyayeni! Kiratakinae ayong anasechesea ana kiyechakina. Wara kesi nyakapolokis ayong. Ani kikok neni atoliwor ayong lo ekiuna lo emam akisech eyei. Kimiek ngakiro a akituk kang, ka ngitamen a etau kang, kitojoikis iyong. Ee Ekapolon Akuj, ataaba kang ka ekangarunan! Agasi atamar kiik Ekapolon Akuj ngakiro kon na iyakar lochan! Agasi atamar kitoyuu iyong Akuj a Yakobo. Emeuni ngesi akingarakino nikon alokai keng. Eyauni ngesi akingarakino nikon alomoru a Sion. Tachamu ngesi ngalemunet kon daang nabo talakar kotere ngakipeyos kon. Agasi atamar kiinak ngesi iyong na iitanit. Kitojok ngakiro na ireat iyong daang. Kilakar sua emaritetekisi ani idwangea iyong. Kidupakini sua ngapenderae kipuruunit ekiro a Akuj yok. Kitosubakinea Ekapolon Akuj ngakiro na iitanit iyong daang! Ayeni tokona ayong atamar einakini Ekapolon Akuj ekapolon keng loseuna akidwang. Iikini ngakiro keng ani italeuno anadis. Itaanyuni ngesi akidwang na epol noi a agogongu keng. Igienosi ngiche ngaurukukui kech a ejie, kigienos ngiche ngangolei kech. Nakaneni kigieno ngoni Ekapolon Akuj, Akuj yok. Etiyaunio kesi tadakaros. Ani ngoni, kinyouni etiirakinos. Ekapolon Akuj, kisidwang kare ekapolon. Kiikinae sua nakinyaraa iyong. Ekapolon Akuj, elakara ekapolon, kotere ngikilinga lu iinakini iyong. Elakara ngesi ani isidwangea iyong ngesi. Itaanyu iyong ngesi na imuito etau keng. Nyengero iyong akilip keng. Ibuni iyong nikeng, topia lokojokon. Itanap iyong ngesi ekiraun lo egolit aloajokon anakou. Kilip ngesi iyong akiyar, nak iyong ngesi. Kitalala ngirwa keng jik. Epuruun ngesi noi ani ingarakinea iyong. Itaanyu iyong ngesi ekipur ka arimatoi. Itiliwo iyong ngesi lo epiaritae jik. Italakarit iyong ngesi noi ani irukitotor. Ani kona igienor ekapolon Ekapolon Akuj, kotere amina na nyedaun a Akuj ana Epol Noi, ibooyi ngesi niajokon nyiloilookin. Irumuni iyong ngimoe kon daang. Irumuni daang lu kiremokino iyong. Imunyari iyong kesi a asarae a akim na itakanunea. Emunyari Ekapolon Akuj kesi engoit. Emunyari kesi akim. Emam ngalesea kech na epuunosi. Eari ekapolon kesi daang. Tani ketuko kesi asubea ayong naaronok, kori akiwan ayong, ekuruworete kesi na esakete akisub. Kainyo isipungari iyong kesi. Iketakini akau toreik loreetin kech. Kikusi sua iyong, ee Ekapolon Akuj, kotere ngikilinga kon! Kieokini sua epuruutu agogongu kon. Akuj kang, Akuj kang, nyo kiisikinea? Nyo ichadaror iyong pekingarakinea? Nyo ichadaror anakiro ana kegoronokinio? Akuj kang! Egoro ayong naparan, nakaneni nyipupokini iyong ngakiro kang. Egoro ayong nakwaare, nakaneni nyepote ngaju jik. Tani ikoni neni dang, irai iyong lo italeuno. Iyong ngesi kipuruunito Ngisirael. Kigienokino iyong taapaakosi. Kigienokino kesi iyong, toyuu iyong kesi. Kigoronokinete kesi iyong toyuunos alochan. Kigienokino kesi iyong, kotere ngakiro nguna, nyiruma kesi ngileech. Nakaneni nyeringa ayong arai itwaan, arai ekurut. Kemenyarit ayong itwaan daang kakianar. Kemielanakinete daang ngangajepa, kemungumungeta ngakies, kenyaiyonorete. Ebalasi kesi, “Igienokino kolong iyong Ekapolon Akuj. Nyo pekiyuunea ngesi iyong? Ani kimina iyong Ekapolon Akuj, nyo pekingarakinea ngesi iyong?” Ekapolon Akuj, iyong kipuduni ayong anakook a itiokang, kitochoik ngirwa lu anakea. Kegieno ayong iyong napei kolong kedounere. Napei kolong kedounere ayong, irai iyong Akuj kang. Nyiichadakin anikang! Iruduna ngichan, tamam itwaan kengarakini ayong. Kerikaunito ayong ngimoe lukaalak loger a ngimongin. Keriamito loger a ngimongin alukaadengak a akwap a Bachan! Engaarito kesi ngakituk loger a ngingatunyo, irurumaate esakete anyilinyilaar. Adaunosi ngikilinga kang loger a ngakipi ana abukokinosi nalup. Edotunosi ngakoyo kang daang. Ikoni etau kang aarwak na akeia. Aono edokole kang deu loger a abelekek. Etapakina angajep kang nangirit. Kimiek iyong ayong anapua eridi. Kerikaunit ayong ajore a ngirukooi. Idooriunito daang nikang loger a atwom a ngingokwo. Kapedopedosi ngakan ka ngakejen. Edong ayong arai ngakoyo bon. Kengolikinete ayong ngimoe kang katokianatar. Ileeto kesi ngiworui kang ngikilees, sodi tokoranakinos. Ekapolon Akuj, nyiichadakin kare anikang! Iyong irai akengarakinan kang. Bua atipei toyuunae ayong. Toyuunae ayong alokileng. Toyuunae alongokwo kalu! Toyuunae ayong anakituk a ngingatunyo kalu. Emam ayong ibore asubakini alongaren ngikosowa lugu. Alimokini ayong ngitunga kang na isub iyong. Kepuruuni iyong ani iriamito kesi. “Kipuruutu ngesi, esi ngikasubak etich a Ekapolon Akuj! Kidodikisi ngesi arimatoi, esi ngalesea a Yakobo! Kilipa ngesi ikerito, esi Ngisirael! Nyimenyarit ngesi apalagu a ngikebootok, kori nyejamuarit ngichan kech. Nyibongokini ngesi kesi akau, pearai iikini kesi na enyaraata ngesi esakete atamar kingarakin.” Kepuruuni ayong iyong alokiriam a ngitunga alukaalak. Eyookini ayong ngakikongiet kang alongaren lu kikerito iyong. Enyamete ngikebootok kimwoko. Ngulu epote ni Ekapolon Akuj, ipuruunete ngesi. Agasi atamar tajakaana kesi jik! Itamunete ngibukui daang Ekapolon Akuj. Ereeunosi daang nikeng alowaitin kadaang a ngakwapea. Ilipete ngesi ngibukui daang. Kainyo erai Ekapolon Akuj ekapolon. Epolokinit ngesi ngibukui. Ngulu inisasi daang eriedikete alongaren keng. Ngitunga daang lu etoakeenete eriedikete alongaren keng. Ngalesea na isidiunosi esubete etich keng. Elimonokinete ngitunga ngalesea na isidiunosi ngakiro a Ekapolon. Ngitunga lu eringa nyidouno, elimokinio kona, “Ayuuni Ekapolon Akuj ngitunga keng.” Ekapolon Akuj erai ekeyokon kang. Emam ibore eitunit ayong. Kesiangari ngesi ayong alonyia alukalibak. Kariki ngesi ayong lopuorin a ngakipi anakaalimok. Ketaanyuni ngesi ayong ngikilinga lukiteat. Kariki ngesi ayong alorotin alu eteniyete, kotere ekiro keng. Ekapolon Akuj, tani ketor ayong naribu nakirion chuch, nyaemi ayong, kainyo kirukit ayong ka iyong. Aburo kon ka ebela kon keyokiyete ayong. Kidorok iyong ayong akimuj nakaalan alongaren ngimoe kang. Kipeyouni iyong ayong arai epeyonon lo erimae, kileleb ekopo kang kipichun. Ayeni ayong atamar ajokis kon ka amina kon na nyedaun, kiruki ka ayong ngirwa daang lu ayarea ayong. Alomi ayong kai kon jik. Ngakwapea ka ngiboro daang lu eyakasi neni, eraakasi ngika Ekapolon Akuj. Akwap daang ka daang lu eyakasi neni, eraakasi ngika Ekapolon Akuj. Ngesi asipokini akwap kidiama anam. Todupak ngesi ngateak keng nituluk a anam. Ngae itemokino edokari kidiama emoru a Ekapolon Akuj? Ngae itemokino elomari kai keng? Itwaan ngini ngesi ni ikiuna aloboyor keng ka ngitamen. Nyilipeene itwaan ngini ngakujo nasubuna kori nyikongi alioko. Eanyuni ngesi apiaro ani a Ekapolon Akuj. Elimuni Akuj atamar emam ibore esechit ngesi. Ngitunga lu ikote neni epote nia Akuj, kesi epote nia Akuj a Yakobo. Tokona, tangaaros esi ngidorin. Tangaaros esi ngidorin lu kolong ngorok, tolomunea ekapolon a akibuseanu. Ngae ekapolon a akibuseanu logo? Erai ngesi Ekapolon Akuj na ngikilinga tojwono. Ekapolon Akuj na erai akedwangan alojie. Tangaaros esi ngidorin. Tangaaros esi ngidorin lu kolong ngorok, tolomunea ekapolon a akibuseanu. Ngae ekapolon a akibuseanu logo? Akuj Namerikanyer na ngikilinga tojwono. Ngesi erai ekapolon a akibuseanu! Ekapolon Akuj, abunit ayong nikon a etau kang kadaang. Akuj kang, kegieno ayong iyong, nyikimiek ayong kerumete ngileech, nyeelakarotor ngimoe kang ani kedwangere ayong! Nyirumete ngileech daang lu kigienosi iyong. Nakaneni lu imakounito kingerito iyong, kesi irumete ngileech. Kidodikinae ngirotin kon Ekapolon Akuj, kitoyenae ayong ngirotin kon. Torikoe anakiro kon ana iteni sodi kitatam, kainyo irai iyong Akuj nakiyuunit ayong. Iyong kedarit apaaran juui. Kitamu akisienut kon Ekapolon Akuj, ka amina kon na nyedaun, na idodiunit iyong napei kolong kanuan. Torimakinae ngasechesea ka ngakiro na echwangakinit ayong alosorokane kang. Kitamunae ayong a amina kon ana nyedaun, kotere ajokis kon Ekapolon Akuj! Kona eraakar Ekapolon Akuj naajokon totenoono, itatami ngesi ngikasechak erot lo iwapete. Erikit ngesi lu itiditeuna ana iyookino, sodi kitatam kesi erot keng. Eriki Ekapolon Akuj lu irichakinete achamunet keng ka ngakiro, torik a amina ka amuno. Kirichak achamunet kon Ekapolon Akuj, torimak ngasechesea kang, kainyo elalak. Itwaan ni erima Ekapolon Akuj itatama anikeng erot lo ejoikinit iwapi. Itwaan ni ikoni neni, ejokeanarosi ngakiro nakeng jiik. Irumete ngide keng akwap. Eelosi Ekapolon Akuj ka lu iwapito ngakiro keng. Iteyeneene ngesi kesi achamunet keng. Akienyikinit ayong Ekapolon Akuj jiik asaki kengarak. Ngesi bon kayuuni ayong aloloit. Toreeun nikang Ekapolon Akuj, kitorimak, kainyo etasiono ayong apalag. Kisiangunae ayong anakialolong kang sodi kitoyuu anariaba kang kadaang. Kingolik ariaba kang ka ngichan. Kitorimak ngasechesea kang daang. Taanyunga eger lo elalaketa ngimoe kang. Kingolik eger lo karemitotor ayong. Kirichak eboyor kang kitoyuu. Wara nyekeruma ngileech, kainyo kegieno ayong iyong. Agasi ajokis ka ateneanut kerichut, kainyo kedarit ayong iyong. Akuj, toyuu kare Ngisirael lu eraakasi ngitunga kon. Toyuu kesi alochan kech kadaang. Ekapolon Akuj, tolim atamar nyasechit ayong, kainyo asubi ayong na iyookino nabo kegieno iyong jik. Kisemoi ayong kining, Ekapolon Akuj. Kining etau kang ka ngitamen kang. Amina kon na nyedaun ngesi karikit ayong. Alosi ayong kamuno iyong. Nyikirukeene ayong ka ngitunga luaronok, kori nyikipupo ka ngikamodeanak. Kakadakinit ayong arukit ka ngitunga luaronok. Nyikiboikin ayong ka ngikasechak wapei. Ekapolon Akuj, elotari ayong ngakan kang edodiunit atamar nyasechit. Anyouni erimok ekeno kon a ngakipeyos kelipit iyong. Aeokini ayong emaritete eeos a alakara, atolimo ngakiro kon daang nakatalarak. Ekapolon Akuj, amina ayong akai na ibooyo iyong, ni erai ngesi eyei apolou kon. Nyikinyasu ayong ka ngikasechak aapei, kori nyikimorik ka ngikaarak. Eraakasi kesi ngitunga lu esubete naaronok jiik. Esadito jiik akidiaun ngaropiyae na ediekere. Ani eliwor ayong, asubi ngakiro na iyookino. Kisienoi, kitoyuu! Ewaasi ngakejen kang anilapat. Epuruuni ayong Ekapolon Akuj ani iriamiriamete ngitunga keng lukaalak. Ekapolon Akuj erai akicha kang ka ayuuno kang. Ngae akeri ayong? Keratakinit ayong Ekapolon Akuj ani eyakasi naaronok daang. Ngae aemi ayong? Nakalosikinioto ayong ngitunga luaronok sodi katoswam, itereterokinosi tadakaros. Tani kerekin ajore esaki akitijwore ayong, nyaemi ayong. Tani ketijikis ayong ngimoe kang, arubakini ayong egieno Akuj. Akiroit apei elipa ayong ani a Ekapolon Akuj. Akiroit ngina ngesi asaki ayong. Eboikin kai a Ekapolon Akuj ngirwa daang lu ayarea ayong. Etee kaneni ajokis keng, sodi elip atamar katorik. Kainyo kedai ngesi ayong alokol keng akolongit na a ngichan. Kemuki ngesi ayong alotooma akai keng, kesiboik niajokon kidiama ataaba nakooyen. Nakaneni ekeuni tokona ayong akou kang kileng ngakies a ngimoe kang kadaang alu keriamito ayong. Epeyoe ayong ngakipeyos alakara emaritete alokai keng. Aeokini ayong epuruu Ekapolon Akuj. Ekapolon Akuj, kiira ngakiro kang na ekalounio eute. Torimakinae ayong kiik ngakiro kang. Nailimunio iyong tama, “Bua kilipae ayong.” Abu ayong eik atama, “Abuni ayong Ekapolon Akuj. Nyiida ereet kon anikang!” Nyikitwarak kare ayong ingoit. Iyong kingarakinit ayong, nyikichaka. Wara nyikiisik, Akuj a ayuuno kang! Kachakasi ayong apakang ka itiokang, nakaneni kachoikini ayong Ekapolon Akuj. Kitatamae ayong erot kon, Ekapolon Akuj. Kisiwapae ayong erot lolapat, kainyo elalak ngimoe kang. Nyikiisikinea ayong ngimoe kang. Kainyo kanyoikis ayong ngikaanyunak lukaliokok, kalosikis a ekurikur. Anupit ayong atamar aanyungari ajokis a Ekapolon Akuj eringa ayari. Kigienokin Ekapolon Akuj. Togogonger wara nyiimaranik. Ee robo kigienokin Ekapolon Akuj! Iyong Ekapolon Akuj kang, kanyarit ayong iyong, ataaba kang. Kiira akigoro kang! Ani kikok iyong ekinim anikang kimorikin ayong ka lu enukakinio napanya. Kiira akigoro kang nakelipitor iyong asaki atamar kingarak. Ebakinit akai kon ngakan. Nyikirira ayong ka ngitunga lu nyetenooko, lu esubete naaronok. Esuruorete kesi luche ngakiro naaronok, tarai eremito luche alotai. Tosubea kesi na itemem ka naaronok asubete. Kirira kesi kotere naaronok asubete daang. Tosubea kesi na ejoikinit esubere! Kainyo nyemisito kesi etich a Ekapolon Akuj, kori ngakiro na esubi ngesi a ngakan keng. Kotere ngakiro nguna, erirae ngesi kesi, kinyasu jik. Kipuroe Ekapolon Akuj. Kainyo eira ngesi akigoro kang na asakea kengarakin. Ekapolon Akuj erai ngikilinga kang ka aupwal. Egieno ayong ngesi. Kengarakinit ngesi ayong nabo ketalakarit. Ekusi ayong ngesi a ngieosio alakara. Ekapolon Akuj erai ngikilinga a ngitunga keng. Ngesi erai ekayuunan a ekapolon keng aloseuna. Toyuu ngitunga kon, topia lu irumi iyong. Toliwor ekeyokon kech, kirichak kesi jik. Kipuro Ekapolon Akuj, esi ngiborei a adis. Kipuro akibuseanu keng ka agogongu. Kipuro ekiro a Ekapolon Akuj lo ibus. Toriediko alongaren ngolo italeuno na etakanunea. Eyei etoil a Ekapolon Akuj kidiama nakipi. Agirokini Akuj na ipuruunitoe kikobasi nganamea etoil keng. Epupio etoil a Ekapolon Akuj a ationis keng kadaang ka ekipur. Etoil a Ekapolon Akuj, ebili ngichekereng, ebili tani ngichekereng a Lebanon. Isichurokini ngesi ngimoru a Lebanon, loger lo ichurotor ngitak. Ani emoru a Erimon, ituusi loger lo eusea itaok a emong. Etoil a Ekapolon Akuj, eremonori ngasarae kimiliaut. Itamaranikini etoil a Ekapolon Akuj ariet. Itamaranikini ariet a Kadech. Etoil a Ekapolon Akuj, itamaranikini ngichokei sodi tararau ngakui daang alokito. Tarai ebalasi ngitunga daang alokai keng, “Kipuroe Akuj!” Epolokinit Ekapolon Akuj ngakalel. Erai ngesi ekapolon lokajik. Agasi atamar kitaanyu Ekapolon Akuj ngitunga keng ngikilinga, sodi topia kesi kitaanyu ekisil. Kepuruuni ayong iyong Ekapolon Akuj kainyo kikeu iyong ayong. Iratak iyong ngimoe kang nyekechurotor ayong. Ekapolon Akuj, Akuj kang, kegoronokini ayong iyong asaki kingarak, sodi kitangalek iyong edeke kang. Kiratak iyong ayong anakipany. Kibuak akiyar kang, arai ayong ekalomaran ni eyakasi ngikatoak. Kikuta Ekapolon Akuj esi daang ngitunga keng lu kimunoi! Kitamu ngakiro na asub lo italeuno, tobuak ngesi alakara! Edit ni engoitor ngesi, nakaneni erubi ajokis keng jik. Epedorete ngakiyo aleleun nakwaare, ani nataparach min alakara. Ani eliwor ayong, atolimu anajakaanut kang atama, “Nyekedwangio ayong jik.” Ijok iyong anikang Ekapolon Akuj. Ibu iyong kisikok ayong awas a emoru. Ani idai iyong ereet kon anikang, atoem ayong. Abu ayong katanyar iyong, Ekapolon Akuj. Kemaima ayong iyong asaki kingarak atama, “Nyo ingatari iyong katoana ayong? Nyo ebachit iriamuni iyong kalot ayong nakipany? Epedorete lu aliworosi apua akipuruun iyong a? Epedorete kesi alimor amuno kon a? Topupok kare Ekapolon Akuj, kisien! Ekapolon Akuj, toliwor kare akengarakinan kang!” Iloch iyong asutonokin kang aliwor alakara ka akichuro. Ilema iyong akialolong kang sodi kilelebik ayong alakara. Kotere ngakiro nguna, nyelilingi ayong. Kekusi ayong iyong. Ekapolon Akuj, irai iyong Akuj kang. Kabuakini ayong iyong alakara jik. Ekapolon Akuj, abunit ayong nikon akimech. Wara nyikimiek ayong kedwangio. Kotere ateneanut kon, toyuunae ayong. Todeta akit kon topupok ngakiro kang! Toyuunae ayong atipei! Kikok anikang ataaba na amechi ayong, kori awas nakaagongon ayuunor ayong. Ee robo, iyong irai ataaba kang ka awas nakaagongon. Kitenae ayong kitorik loger lo ilimunitor iyong. Toutunoe ayong aloloit alo kalokakinitere, kainyo iyong ngesi kamechi ayong. Ewaak ayong etau kang nakan kon. Ekapolon Akuj, kiyuu iyong ayong. Irai iyong Akuj na emunoi. Iremokino iyong lu ilipito ngakujo napasiek. Ani eliwor ayong, egieno Akuj. Alakar ayong emaritete kotere amina kon na nyedaun. Kainyo ianyunga iyong ariaba kang. Iyen iyong ngichan kang. Iratak iyong ngimoe kang nyekerumut ayong. Kichamak iyong ayong alosi wadaang nicha asaki. Ekapolon Akuj, kisienoi ayong kainyo ayei lochan. Abuoto ngakonyen kang kotere akigoro. Kaburu ayong atoana. Esunyakin eboyor kang nakialolong. Esunyakin ngikaru kang nakunua. Adaun ngikilinga kang kotere ngichan kang. Aoko ngakoyo kang. Ngimoe kang daang ka ngitunga luche, kemenyarito ayong. Kaemito ayong ngitunga lukayenete. Ematarosi lu kaanyungarete alorot. Emam itwaan eringa ketamunit ayong, ekok ayong itwaan nikatoan. Ekok ayong ibore nikachakar. Apupi lukaalak ingaingaasi. Eyei ebuloi lowaitin daang. Eriamariam kesi arere ngakiro kotere ayong. Etukosi kesi akiar ayong. Nakaneni kegienokino ayong iyong Ekapolon Akuj. Abala ayong, “Irai iyong Akuj kang.” Iyong kirichakinit ayong jiik. Toyuunae ayong alomoe kang, ka lu kaboliatar ayong. Kotere ajokis kon, toyuu ekasuban etich kon. Toyuunae ayong a amina kon ana nyedaun. Ekapolon Akuj, wara ayong nyekeruma ngileech, kainyo kanyarit ayong iyong. Agasi atamar kiruma luaronok ngileech. Agasi atamar toloto kesi lokatoak echakina chek. Kisililing ngakituk nakaliokok. Kisililing daang lu iruorotor lu etenooko ngakiro naaronok, inisasi kiwogas. Kitalarete ngiboro luajokak ikachakinit iyong kotere lu kirimasi iyong! Eyeni itwaan daang eger lo ijokia iyong, ka eger lo kimecheta iyong daang lu kigienosi iyong. Idai iyong kesi ani iyei iyong nyeanyunotor ka na etukito ngitunga. Idaikini iyong kesi lokol, nyeanyunotor ka ngiyeny a ngimoe kech. Ekiro a Ekapolon Akuj kipuroe! Kainyo kedodikini ngesi ayong amina keng na nyedaun, nakerikaunere ayong ketijikin. Abu ayong atolim nakesibusikinere atama, “Keritar ayong alongaren kon.” Nakaneni ibu iyong kiira akigoro kang, nakanyaraa ayong iyong asaki atamar kingarak. Tominakisi Ekapolon Akuj, esi ngitunga keng daang lu kimunoi. Irichakinit Ekapolon Akuj lu emunoi, kirirae lu iwogasi loger lo ejoikinitor iriraare. Toliworos lu igogong, toliworos lu ititiny, esi daang lu igienosi Ekapolon Akuj. Epiaritae ngulu arimakin ngasechesea, kesi ngulu arimakin na ichwangakinito. Epiaritae itwaan ni ebala Ekapolon Akuj meere ekasechan. Tarai itwaan ni emam amodeanut alotau keng. Na awounea ayong alimor ngasechesea kang, abu katobur ani egoror apaaran juui. Ekapolon Akuj, kirirae iyong ayong akwaar ka apaaran. Adaunosi ngikilinga kang ekok ayong ngakipi na editari akolong nakamu. Abu ayong atolimo ngasechesea kang anikon. Nyiwaa ayong aronis kang. Atama ayong kalimokini iyong nguna echwangakinit, kitorimak iyong ayong ngasechesea kang daang. Kotere nguna, itwaan ni kimuno iyong daang, ejoikinit kilipi iyong na eanyunea ngichan. Ani epote ngichan lu ikote akaale, nyenangete nikeng. Nikon adukea ayong. Kiyuuni iyong ayong alochan. Alakara ayong noi ani kiyuunea iyong ayong. Ebala Akuj kona, “Ketatami ayong iyong erot lo ejoikinit iwapi. Ketatami ayong iyong ketenik. Wara nyiibangaaner loger a angole kori esikiria, alu eraakasi mati keinikin ngakito ka ngikoda lokumes kech kesi itapatuunere.” Eanyunete ngitunga luaronok ngichan lukaalak. Nakaneni ngitunga lu igienosi Ekapolon Akuj, eyuunit amina keng na nyedaun. Iyong itwaan ni itenoono, talakar ani a Ekapolon Akuj, kimaritete. Esi lu iwapito ngakiro keng, kiremasi ilakara! Esi daang lu itenooko, kiremasi ilakara kotere na asubaki Ekapolon Akuj. Kipuro ngesi, esi daang lu iwapito ngakiro keng. Tobuakisi Ekapolon Akuj alakara a ngagitae. Kikuta ngesi a ngagitae ana ngiunoi a ngitomon. Toeokisi ngesi eeos lokitetet, tarama agita a achwaanu, sodi kiremasi a alakara! Eraakasi ngakiro a Ekapolon Akuj ngaka iteni, igienokinoi ngakiro na esubi ngesi daang. Emina Ekapolon Akuj ateneanut ka akitiriyan ngakiro. Ileleba amina keng na nyedaun akwap wadaang. Asubakini Ekapolon Akuj adis a ngakiro ana adunguni ngesi. Asubunio ngiboro daang lua adis a ngakiro ana alimuni ngesi. Achunakini ngesi ngakipi a nganamea wapei. Ani ngitoroi anituluk togolok lokerui. Kipeyonokis ngakwapea daang Ekapolon Akuj! Esi ngitunga daang a ngakwapea, tokera ngesi! Na eruorikinea ngesi, tosubunae akwap daang. Ani edunguni ngesi, tatakanu ibore daang. Ngakiro na etukito ngibukui, itiliwori Ekapolon Akuj ngapasiek. Ibatanari Ekapolon Akuj kesi nyeesubakis na ereto. Ngakiro na ereat Ekapolon Akuj, erubete jik. Ngakiro a etau keng, irukete ka ngalesea daang. Epiaritae ebukut lo erai Ekapolon Akuj Akuj kech. Epiaritae ngitunga lu aseu ngesi tarata ngikeng! Ekienyuuni Ekapolon Akuj kwap eyei kidiama nadis sodi taanyunga ngitunga daang. Ani ibooyo ngesi alokicholong a apolou kaina, ekienyuuni ngesi kwap taanyunga daang lu eyakasi nakwap. Ngesi irokuununi ngitamen kech daang, nabo eyeni ibore daang ni esubete kesi. Meere alalau a ngasigerea eyuuni ekapolon. Nyidwangi ekajwon ngimoe keng kotere ajwonu keng. Erai angole a ejie aka pas esakere akidwang ngimoe. Nyeyuuni achigirir keng itwaan. Echoikinit Ekapolon Akuj lu ekerito ngesi, ka lu igienosi amina keng na nyedaun. Eyuuni ngesi kesi anakitu. Iteyari ngesi kesi ngirwa lua eron a akoro. Kigienokino ngoni Ekapolon Akuj. Ngesi kingarakini ngoni, toliwor aupwal yok. Ee robo, kilakara ngoni kotere ngesi. Kigieno ngoni ekiro keng lo italeuno. Ekapolon Akuj, kimiek amina kon na nyedaun eruko ka sua, kona kigienor sua iyong. Abuanakini ayong Ekapolon Akuj alakara jiik. Arubakini ayong alimit ekipur keng jiik. Epuruuni ayong ngesi ana asubaki. Kimiekisi lu ichiakiaritae kiirasi sodi talakaros! Atolimosi ngoni apolou a Ekapolon. Epuruutu ekiro keng aapei! Elipi ayong Ekapolon Akuj, kiik ngesi akilip kang. Katoyuu ngesi alobuloi kang kadaang. Eanyungarete lu ichiakiaritae ngesi talakaros. Nyirumete kesi ngileech jik. Ekaloikini itwaan ni eyei lochan Akuj, kiik Akuj ngesi, toyuu alochan keng kadaang. Iyoki emalaikat lu ekerito Ekapolon Akuj, sodi toyuu kesi. Kiir kare toyen eger lo ejokia Ekapolon Akuj! Epiaritae lu eloose nikeng esakete atamar kitoyuun. Ngitunga a Ekapolon Akuj, tokera ngesi. Emam ibore engopikini lu ekerito Ekapolon Akuj! Tani ngingatunyo enyami akoro ani engopikinea akimuj. Nakaneni lu iwapito ngakiro a Ekapolon Akuj, emam ibore niajokon ni engopikini. Potu ngisorok topupokisi, sodi ketatam ayong esi akiker Ekapolon Akuj. Isaki iyong akiboi eboyor loajokon a? Isaki iyong akiboi nikooyen ilakara? Kiratak angajep kon ani eyakasi naaronok ka akisud ngakiro. Toreeun ani eyakasi naaronok sodi tosub naajokak. Tasak ekisil kirichak a etau kon kadaang. Itee Ekapolon Akuj lu etenooko nabo epupi akigoro kech. Engerit Ekapolon Akuj lu esubete naaronok, tolema kesi anakwap, tojongoto ngitunga akitamunit. Iirari Ekapolon Akuj ngakiro alu etenooko na enyaraata ngesi, toyuu kesi alochan kech kadaang. Eapi Ekapolon Akuj ani eyakasi lu esurur ngitai. Eyuuni lu alilimiyosi. Eanyuni lo etenoono ngichan lukaalak, nakaneni eyuuni Ekapolon Akuj ngesi alochan kangulu kadaang. Iyoki Ekapolon Akuj itwaan ni etenoono. Emam akoit keng tani apei na ebila. Emunyari aronis ngitunga. Irirao lu eremokino ngitunga lu etenooko. Eyuuni Ekapolon Akuj ngitunga keng. Nyirirao lu ematarosi nikeng daang. Ekapolon Akuj, kitopeg lu ketepegete ayong. Kitiji lu ketijiyete ayong! Tolem aupwal ka aep kon, bu kitoik. Kikea akwara ka amorok kon ani eyakasi lu kerisito ayong. Kichikakinae atamar kiyuuni iyong ayong. Kimiekisi lu esakete akiar ayong kidwangae, nabo kiruma ngileech! Kimiekisi ngulu katukuotor ayong tobuarae irumito ngileech kibilerite. Kimiekisi kikokis nginyia lu ekutarit ekuwam, na irisitor emalaikat a Ekapolon Akuj kesi! Kimiekisi erot kech toribok tarai lojurut, na irisitor kesi emalaikat a Ekapolon Akuj. Kainyo kalokakinito kesi ayong a ngiloi pas. Katobokakis akipany emam ibore asechit. Ituumwokinete kesi nginyas, irumunete kesi ngiloi kech tadakakinos nakipany kech a ngikulepek. Sodi atalakar ayong kotere Ekapolon Akuj. Alakar ayong kainyo kayuuni ngesi ayong. Elimokinete ngakoyo kang dang Ekapolon Akuj tamasi, “Iyong Ekapolon Akuj, emam iche ikwaan ka iyong! Iyuuni iyong lupalag alomaagor alu eyakasi ngikilinga, toyuu lukebootok ani eyakasi ngirukooi.” Keruorotor ayong ngitunga luaronok alioko. Keriraate ayong a ngakiro ana nyayeni. Etachete naajokak asubi ayong kotere naaronok. Edong ayong alarakina. Tarai nakolong adeakakinotor kesi, atanap ayong ngikuniae edodiunit akialolong. Abu ayong atoroneene akimuj. Elip ayong ejuurui, kikungokin abokony natorobu, loger lo egoror lopaekang kori lokaatokang. Erim ayong akwap ealolongi, loger a itwaan ani igoro esutonokini kotere akitu a itiokeng. Ani aanyuni ayong ngichan, talakaros kesi daang, tochununos katokianatar. Kebungata ayong ngirukooi lupeayeni tongop itwaan iratakini! Ekote kesi ngitunga lu ekianatar ngikangwalak, katopochokis kesi ayong ngakonyen enyunyurasi. Ekapolon Akuj, irubakini iyong itee nguna ililingi tanang ori? Toyuunae ayong alojie kech. Toyuunae alongatunyo kangulu. Sodi katobuak iyong alakara anajore anakaalan. Kepuruuni ayong iyong anasepich a ngitunga. Wara ngimoe kang luaronok ngulu nyakakianatar ayong. Wara lukaremokino ayong pas ngulu elakarosi ani aanyunitor ayong ngichan. Nyiruorosi kesi ngakiro na epaalonu, pearai isudioto lu eminasi ekisil ngakiro. Kapaikinete ayong ngakiro ebalasi, “Yee, kitee sua ngakiro na isubi iyong!” Nakaneni ianyunga iyong nguna Ekapolon Akuj. Nyiililing robo Ekapolon Akuj, nyiichadar anikang. Bua kare Ekapolon toikinae ayong. Tonyou kare Akuj kang, kingolik ngakiro kang. Ekapolon Akuj, Akuj kang, irai iyong na eteniyete ngakiro, kidodiu atamar nyasechit ayong. Nyiimiek ngimoe kang kakianatar ayong. Nyiimiek kesi elomunete tamasi, “Yee, kisubak sua logo! Kilema nidikil.” Kimiek lu elakara kotere ngichan kang, kidwangae daang kibiler. Daang lu ebalasi kijokak akidwang ayong, taanyut etimoi ka ngileech. Ani ngulu esakete akiirar atamar emam ayong akisech, talakaros lokojokon noi toliwor ebalasi jiik, “Epol Ekapolon Akuj noi! Ejoikinit ngesi eboyor a ekasuban etich keng.” Sodi atolimo ayong ateneanut kon, ka akipuruun iyong apaaran juui. Isuruori akisech itwaan niaronon alotooma etau keng. Nyekeri itwaan ngini Akuj. Kona isoswar ngesi ilope ebala kayenikinitae noi, ebala ngesi kori nyeanyuni Akuj aronis keng, kirira. Ibore ni elimuni ngesi daang, erono, tarai nabo alioko. Apaliki ngesi akiwapit aosou ka akisub naajokak. Itami ngesi akisub naaronok esaa lo eperio. Emam ibore ni esubi ngesi ni ejok, nyengeri ngesi ibore niaronon. Ekapolon Akuj, enangit amina kon na nyedaun nadis, enangit amuno kon lodowon. Ikoni ateneanut kon ngimoru luapolok. Eger lo itubio iyong ngakiro, ikwaan ka nituluk a anam. Iyong kare, Ekapolon Akuj, iyuunit ngitunga ka ngitieng. Ee Akuj, ejok noi amina kon na nyedaun! Emotunosi ngitunga lotorube lo a ngabeben kon. Isimwoni kesi akimuj a awi kon. Itamasi iyong kesi anangolol a ajokis kon. Nikon isiakinitor akiyar daang. Kitee sua akicha kotere akicha kon. Torubak imina lu kiyenete iyong. Tosubea lu eteniyete ngitai naajokak. Wara lu iwogasi nyakalosikis ayong. Wara ngitunga luaronok nyeketodokis ayong. Kingolik ni adakakinosi ngitunga luaronok. Eperete kesi kaneni, nyepedorete anyoun. Wara nyiimaran kotere ngitunga luaronok, wara nyikiting etereku kotere lu esubete naaronok! Kainyo engopiarete kesi atipei loger a nginyia, tooniyosi loger a ngikito alukalibak. Kigienokin Ekapolon Akuj, tosub naajokak, sodi kiboikinor nakwap akaalimon. Tasak alakara ani a Ekapolon Akuj, kiinak ngesi iyong ibore ni esaki etau kon. Kiwaak eboyor kon nia Ekapolon Akuj, kigienokin ngesi, kingarakini ngesi iyong. Isimauni ngesi ateneanut kon loger a akicha ana apaaran. Totitinyer ani a Ekapolon Akuj, idarit nguna esubakini. Nyiimaranik kotere ngulu abarakis lorotin kech a ngikulepek kori ereto ngakiro naaronok! Nyiiliworosi lu ingoaka kori lu inyunyurasi, kainyo itorunete ngichan neni. Lu igienosi Ekapolon Akuj, elomete nakwap. Nakaneni itwarakinio luaronok. Engopiarete luaronok atipei, tasak iyong kesi nakaneni nyianyuni. Eliwor akwap aka ngulu itiditeuna, talakaros alobarit a akwap ibooyete akaalimon. Erekini itwaan niaronon ngakiro naaronok, tosubea itwaan niajokon, sodi kiman ngesi. Ekianar Ekapolon Akuj luaronok, kainyo eyeni atamar anang esal kech. Eutunete luaronok ngilengea kech tokudokis ngakawa kech, esakete akiar lukebootok ka lu emam ibore, ka akingol lu esubete naajokak. Ebongokinete ngilengea ngulu kesi kichuma sodi tobilibilaarae ngakawa kech. Ejok ibore nidiochichi etingit itwaan niajokon, akidwang ebari lokaalan a itwaan aniaronon. Ielari Akuj agogongu aluaronok sodi kitogogong luajokak. Iyoki Akuj eboyor a ngitunga aluajokak. Irumete kesi akwap jik. Nyeboliare kesi na eponeta ngirwa luaronok, eriamunito kesi akimuj nakaalan ngirwa lua eron a akoro. Etoakete luaronok, engopiarete ngimoe a Ekapolon Akuj loger a ngatur ana a achokor. Engopiarete loger a apuru. Eari itwaan niaronon amicha nyeetach. Nakaneni epatana ni etenoono iposi ngiboro. Eliwor akwap aka ngulu epiarit Ekapolon Akuj. Nakaneni lu elam ngesi, ikisario anakwap. Ekapolon Akuj erikit itwaan ani itorit. Iyoki ngesi lu ejoikinito ngesi. Tani kedakarosi, nyidongete eperete alokwap, kainyo itonyouni Ekapolon Akuj kesi. Asorokona kolong, amojong tokona. Nakaneni nyingolikina ayong Ekapolon Akuj eisikini itwaan niajokon, kori nyingolikina ngide a itwaan aniajokon ilipanarosi akimuj. Iposi ngesi jiik pas nabo iposi ngamichae lotunga luche, sodi topiarae ngide keng. Toisik naaronok, tosub naajokak, toyareta ngalesea kon anakwap jiik. Emina Ekapolon Akuj nguna etenooko, nyeisikini ngesi ngulu emunosi ngesi. Iyoki ngesi ngulu etenooko jik. Nakaneni itwarakinio ngalesea aluaronok. Eliwor akwap aka ngulu etenooko, toloma neni jik. Iruoro itwaan ni etenoono ngakiro a aosou. Ngakiro na eriyan itorunito nangajep keng. Irichakinit ngesi etal a Akuj alotau keng, nyecheretiar ngesi. Iseme itwaan niaronon itwaan niajokon, sodi tasak erot lo earea. Nyimiekinea Akuj ngesi emoit keng, kori nyimiekini irirao na erikunere nitubet ngakiro. Kigienokin Ekapolon Akuj, kirichak ngakiro keng. Kidodikini Ekapolon Akuj iyong arimatoi kiinak akwap, kingolik iyong luaronok emunyario. Ayei kolong itwaan nikewogan tomoitana. Aoyaunit ngesi alotunga kadaang loger a ngichekereng a Lebanon. Ani bo ekisidi etoruni neni, atoriam emam. Atasak ngesi, katongopik. Toripiripaa itwaan niajokon ni etenoono, eyakasi itwaan nikaalimon ngalesea. Nakaneni emunyario ngikasechak, kikisarae ngalesea kech anakwap. Eyuuni Ekapolon Akuj ngulu etenooko. Ikoni ngesi ataaba anikech na eponeta ngichan. Ingarakini Ekapolon Akuj kesi toyuu. Eyuuni kesi ani eyakasi luaronok, kainyo amatarosi nikeng ani esaketa ayuuno. Ekapolon Akuj, nyikikilak kare ingoit! Nyikirira kinyunyurikina. Kigum iyong ayong a ngimalea kon. Kawan ayong akan kon. Emam akiyar eyei nakwaan kang, kainyo kingoikinit iyong ayong. Edeakasi ngakoyo kang kainyo kasechakinit ayong iyong. Kaburichaarito ayong ngasechesea kang, kenuito loger a eegos alo epot noi. Abos ngajemei kang tul, iwarete kotere abangaanut a akisech kang. Akudokina ayong, abilakina echana. Egoro ayong apaaran juui. Etirirau elekes akwaan kang. Emam akwaan ni nyakariebi ayong. Kaburu ayong adaidaun. Ariaba ayong akunua kotere nikaapilan. Ekapolon, iyeni iyong ibore nikemuit ayong. Ipupi iyong akigoro kang daang. Idongae etau kang, alilimiyo akwaan. Emuchakis tani ngakonyen kang, aribokis. Nyeapuunete ngipaalon kang ka ngikidunyet diyete, kotere ngajemei kang. Achadarosi tani ngitunga lu kiyanar ayong. Kalokito ayong esakete akiar. Ngulu kagatakinito ayong naaronok kanyoikinito akiar. Etukosi kesi akiar ayong apaaran juui towar. Ekoni ayong itwaan nikinim nyapupi ngakiro. Ekoni ayong itwaan ni echakina chek, nyiruorikini. Ee robo, ekok ayong itwaan nikinim, ni nyetachuni ngakiro. Nakaneni kegieno ayong iyong Ekapolon Akuj. Iirari iyong ngakiro kang, Ekapolon Akuj na irai Akuj kang. Wara ngimoe kang nyakakianatar ayong, kotere ngichan kang. Nyiiwogatar kesi eger lo adakaror ayong. Edikino ayong adakar. Erubakinit nikaapilan anikang jiik. Alimorit ayong aronis kang. Egoro ayong atamar katorimakin kotere akisech kang. Eraakasi ngimoe kang ngitunga a ngikilinga, emam edeke edeakasi. Elalak lu karemokino ayong pas. Ngulu kalunyanakinete ayong naaronok kotere naajokak asubi ayong, ketepegete ayong ani asubea na iyookino. Ekapolon Akuj, nyikichaka ayong. Nyiichadar kare anikang, Akuj kang. Kingarakinae ayong atipei, Ekapolon lo irai Ekayuunan kang! Alimuni ayong atama, “Erichakini ayong akiyar kang, nyaalakak angajep kang ketosechi ayong kotere ngakiro na alimuni. Elilingi ayong chek na engolikinea luaronok eyakasi diyete kang.” Elilingi ayong chek, emam akiroit alimu. Tani ikoni neni, apot ngichan kang toroketa noi. Apot ngichan katobelasi ayong. Ani alomari akitam, echanakin noi. Abu ayong engis atama, “Ekapolon Akuj, tolimokinae esal kang, ka etiae a ngirwa kang ta eger lo epiraketa ngirwa kang!” Itikidiokoon iyong ngirwa lu ayarea ayong! Nyerai akiyar kang ibore alongaren kon. Iteni dir, ikoni itwaan daang ekuwam pas, etoror loger a etorube. Erai ibore daang ni iricha ngesi akisub ika pas. Ebaruni ngesi ngibaren, nyeeyen atamar eliworosi moi ngika ngae. Ekapolon, nyo tokona egienokin ayong? Iyong kegienokin ayong! Toyuunae ayong anasechesea kang kadaang. Nyiichamu ngikabangabangae kakianatar ayong. Elilingi ayong chek nyalimuni akiroit, kainyo iyong kolong isubi nguna. Nyikirira nabo! Akot ayong akitu ani kibungaa iyong. Irirae iyong ngasechesea a itwaan kikilanak, kinyasu ibore ni emina ngesi, loger lo inyasuneta ngakimam ngiboro. Iteni dir, ikoni itwaan daang akianget. “Ekapolon Akuj, kiira akilip kang ka akigoro kang. Kingarakinae ayong na ekalounio. Kainyo arai ayong epeyonon lo epori. Arai ekaloton, loger kata apaakang. Kimiekinae kare atalakar, eringa nyetoana, atongopia jik.” Edarit ayong akingarakino a Ekapolon Akuj atitinyikinit. Abu ngesi katacham ayong kiira akigoro kang. Abu ngesi keriu ayong anakipany anaaronon. Keriu anasinyonoit anaikum. Kedokok ngesi ayong niajokon nataaba, atowo etiirakin. Ketatami ngesi ayong eeos lokitetet, eeos lokipuruunet Akuj yok. Ingolikinete lukaalak toema, sodi kigienokinos Ekapolon Akuj. Epiaritae itwaan ni igienokin Ekapolon Akuj. Nyereiar itwaan ngini lotunga lukenisak, lu ibatara ani ilipitotor ngakujo a alioko. Kisubea iyong sua ngakiro nakaalak, Ekapolon Akuj, na irai Akuj kosi. Emam iche ni ikwaan ka iyong! Elalak ngakiro nakatalarak irekinit iyong kotere sua. Emam kona emaruni ayong kesi daang. Elalak noi emam kona imarun! Nyisaki iyong ngakipeyos ka ngadekon. Nyisaki iyong ngakipeyos na inomio ka ngakipeyos na elemarete akisech. Pearai kiinak iyong ayong ngaki na apupio ngakiro kon. Abu ayong atama, “Ayong lo. Ngakiro nakisuruori iyong ayong, eyakasi nakitab na a Etal. Amina ayong akisub nguna isaki iyong, Akuj kang! Akiroit nakitatami iyong ayong, erichakinit alotau kang.” Alimo ayong ngakiro naajokak a ayuuno, alongaren asepich a ngitunga. Ee Ekapolon Akuj, iyeni iyong atamar nyililinga ayong tani wadiochichi. Ngakiro nakiyuunea iyong ayong nugu, nyiwaa ayong alotau kang. Eruoro ayong jiik ngakiro a ajokis kon ka eger lo kingarakinitor iyong ayong. Nyebunakina ayong akituk kang alotunga alukaalak kotere amina kon na nyedaun ka ajokis. Ekapolon Akuj, nyikimik akisienut kon! Amina kon ka ajokis, kesiboikinete ayong akaalimon. Keriamito ayong ngichan lukokaalak. Kalalakis ayong ngaronisea kang, emam kona imarun! Kesibuusikis ayong ngasechesea kang, emam tani kona engolikini akwap. Elalak kesi noi idwangito ngitim a akou kang, ketililimiyosi. Ekapolon Akuj, toyuunae kare ayong! Kingarakinae kare atipei, Ekapolon Akuj! Kimiekisi lu esakete akiar ayong kiruma ngileech ka ngibiler! Kimiekisi lu elakara ani ayakar ayong lochan, tobuarae akamaluwot, tokienare! Kimiekisi ngulu kakianatar ayong kiruma ngileech ani edwangere! Ani ngulu daang kisakete iyong, talakaros ka akimaritetere. Kimiekisi ngulu daang eminasi ayuuno kon, tolimuunut jiik ebalasi, “Epol Noi Ekapolon Akuj!” Apalag ayong, emam kona engarakin, nakaneni iyong Ekapolon, eringa kitamunit ayong. Iyong irai ekayuunan kang lo kingarakinit ayong. Bua kare atipei Akuj kang! Epiaritae itwaan ni ingarakini ngikebootok. Ingarakini Ekapolon Akuj ngesi na eanyunea ngichan. Echoikini Ekapolon Akuj ngesi kiteyar. Etamario erai ngesi ni epiaritae anakwap. Nyimiekini Akuj ngesi alomaagor a ngimoe keng. Ingarakini Ekapolon Akuj ngesi na edeakakinor. Kitangalek ngidekesinei keng daang. Alimuni ayong atama, “Ekapolon Akuj, kasechakinit ayong iyong. Torimakinae ayong kitangalek edeke kang.” Keruorotor ayong ngimoe kang ngakiro naaronok. Esakete ayong atotoan tadaunos ngakiro kang kaneni. Ngitunga lu ilaunete aanyun ayong, nyepote anaajokak. Epote aanyun ngakiro naaronok, ani epudorete topetakis lotunga luche. Daang lu karemokino ayong, kengaingaatar, katagatakinito naaronok. Ebalasi kesi, “Edeak logo eur akitu. Nyeringa enyouni nabo jik.” Tani lopae kang lo etau lo amuno ayong, lopalem kimoreene ka ayong atubwa apei, kanyoiki ayong. Ekapolon Akuj, torimakinae kare ayong, kitangalek edeke kang. Atatachak nakasubeta ngimoe kang. Nyekedwangete kesi ayong, atoyen atamar kijoikinito iyong ngakiro kang. Kingarakini iyong ayong kainyo asubi ayong ngakiro na iyookino. Kiwaakini iyong ayong ngaren kon jik. Kipuroe Ekapolon Akuj, Akuj a Isirael! Kipuroe ngesi tokona ka jik! Aamen! Aamen! Ee Akuj kang! Keitanit ayong iyong noi loger lo imuitotor agete ngakipi nakaalimok a angolol. Kanyamit ayong akure a Akuj. Ee robo, akure a Akuj ana eyari. Anangi ayong nikeng ori ataanyunga ereet keng? Egoro ayong akwaar ka apaaran. Ngakiyo aliworosi akimuj kang. Kengisito ayong ngimoe kang jiik ebalasi, “Nyaani Akuj kon?” Ealolongi noi na etamarea eger lokolong kimoreanakinor ka asepich a ngitunga engarenik arikit kai a Akuj. Alakara aeo abuakinit Akuj alakara kirukit ka asepich a ngitunga alosukukuu. Nyo ialolongio iyong kona, etau kang? Nyo iriabar iyong kona? Kigienokin Akuj, epuruuni ayong ngesi nabo, Akuj na erai akengarakinan ka akayuunan kang. Kesiasi ayong ngichan. Kotere ngakiro nguna, ketam ayong iyong Akuj, anakwap a Yorudan ka Erimon ta ngimoru a Misari. Kainu ngesi ayong ngitoroi lu kariebete etau, kabukokini ayong ngakipi a ngitoroi ka na a ngakalel. Naparan ketaanyuni Ekapolon Akuj amina keng na nyedaun. Ani nakwaare, aeonokini ayong ngesi eeos lo epuruunitor, elipit ngesi nakainakinit akiyar. Alimokinit Akuj ataaba kang abala, “Abe kimuriak bo iyong ayong, nyaai? Nyo arubakinitor ayong ealolongi, ani kechiakiaritotor ngimoe kang?” Kabelasi ayong ngiyeny kech, kengitanarete jiik ebalasi, “Aliwae eyei Akuj kon?” Nyo ialolongio iyong kona, etau kang? Nyo iriabar iyong kona? Kigienokin Akuj, epuruuni ayong ngesi nabo Akuj na erai akengarakinan ka akayuunan kang. Tolim kare atamar nyasechit ayong, Akuj. Toyuunae ayong alotunga alu nyenupito ngakiro kon, ka ngitunga lukaliokok lu nyeraakasi ngikanupak. Kainyo iyong irai Akuj na amechi ayong. Nyo kichakarea iyong ayong? Nyo arubakinitor ayong ealolongi, ani kechiakiaritotor ngimoe kang? Tomeu akicha kon ka ngakiro na iteni, katoriko ayong tanang lomukura kon, ka ni ibooyo iyong. Ani enangi neni, Akuj, alosi ayong lokeno kon. Abuni ayong nikon, iyong na erai nikon isiakinitor alakara kang. Eturukini ayong agita kang atoeok kepuruunit iyong. Nyo ialolongio iyong kona, etau kang? Nyo iriabar iyong kona? Kigienokin Akuj, kainyo epuruuni ayong ngesi nabo, Akuj na erai akengarakinan ka akayuunan kang. Akuj, kiira sua a ngaki kosi. Kisisakis sua taapaakosi, ngakiro na kolong isubea iyong kesi, kolong kanuan. Iyong alope itwarakini ngibukui luche, kitolom iyong ngitunga kon ni kolong ilomit iyong. Ibu iyong kirira ngibukui luche, talakak ngitunga kon. Nyelemara ngitunga kon akwap ngina kotere ajwonu kech. Kori nyidwanga kesi kotere ngikilinga kech. Pearai edwangete a agogongu ka ngikilinga kon, ani irukitotor iyong ka kesi kidodiu neni atamar imina iyong kesi. Iyong irai Ekapolon Akuj, Akuj kang. Itiliwo iyong ngalesea a Yakobo na idwangete. Kidwang sua ngimoe kosi a ngikilinga kon. Ee robo, epudata a ngikilinga kon. Nyegieno ayong akau kang, kori nyakayuuni ayong ekileng kang. Kiyuu iyong sua alomoe kosi, kisibiler lu kiremokino sua. Kipuruuni sua iyong ngirwa daang atobuanakisi iyong alakara jik. Nakaneni kiisik iyong sua kikianare. Nyeringa irukito ka ngasigerea kosi. Kisupunga iyong sua alomoe kosi. Tangatasi kesi ngibaren kosi. Kimiek iyong sua kingolio loger a ngamesekin. Kipetak iyong sua lobukui. Igiela iyong itwaan kon a ngaropiyae anadikidio, tosub eraakasi kesi ngipasiek. Engolikis ngikidunyet kosi nakisubea iyong sua. Alomasi kesi akimeny sua kikianatar. Kimiek iyong sua kimenyarete ngibukui luche. Kinyaiyonorete kesi sua kimenyarito. Kerumito ayong ngileech ngirwa daang. Keneineasi ayong ngileech, a ngakiro a ngiyeny ka ngimeny a ngimoe kang ka lu karemokino ayong. Asubakinosi nguna daang anikosi, tarai bo eringa sua nyimuriakina ngakiro kon. Eringa tani nyesecha achamunet na kolong kichamakin ka iyong. Nyesecha sua etal kon kori nyewoliyoro sua alorot kon. Tani ikoni neni kimiek iyong sua kilari alokiding ngitieng a moding. Kimiek iyong sua anaribu anakirion chuch. Arai kimuriak sua alimit ekiro a Akuj kosi, kori arai ebakisi akuj nagela ngakan, kiyenit iyong nguna daang kainyo iyeni iyong ngakiro namunonoe na eyakasi lotai a ngitunga. Nakaneni kilosikinitoe sua akiar jiik, kotere iyong. Kikok sua ngamesekin na engolio. Tokienyu kare Ekapolon, nyo ijotoo iyong? Tonyou kare nyikiisik sua jik. Nyo kidukakinitor iyong sua? Wara nyikimuriakis ngichan kosi ka ariaba! Kidakakin sua nalup. Kikuruwo sua anyoun anapua. Tonyou, bua kingarakinae! Toyuunae kotere amina kon na nyedaun! Ileleba ngitamen luajokak lotau kang, ekusi ekapolon a eeos kalo. Ikwaan angajep kang ka ekalam a itwaan ani igirana. Ijok iyong idwangit ngitunga daang. Epiaritae ekiruor kon, ani kipiaritor iyong Akuj jik. Iyong ekajwon, tout ekileng kon. Irai iyong lokebusean, tajakaana. Toten ngaren irai ekedwangan lo ejakaana iikinit iteni ka akitiriyan ngakiro. Idwangi iyong kotere ngikilinga kon! Ekwaka ngimalea a amod kon. Eremete kesi ngitai a ngimoe kon. Edakakinosi ngibukui nakejen kon. Ekicholong a apolou lokiinak iyong Akuj erubi jik. Aburo kon a apolou erai akitiriyanet ngakiro. Imina iyong ateneanut toremokino aronis. Ngakiro nguna kesi kiseunea iyong Akuj, na erai Akuj kon kilelebik alakara naajokon noi akidwang ngikapolok luche. Ekukunyuunito echuchuka ka ekinyaate aloworui kon. Kieonokinete iyong ngikaeok anakais ana isiritoe a ngikel a etom. Tanakookeng a ngikapolok erukito ka ngitunga lu kisiriamete iyong. Ewei akapolon aloteten kon enapit asir a egolit aloajokon noi. Ateran, topupok mono iyong! Todeta ngaki. Kimuriakis iyong ngakiro a ngiyenet kon ka ngitunga a awi a apakon. Eminari akibuseanu kon ekapolon. Ejoikinit iyong iwapi ngakiro keng ani eraakar ngesi ekapolon kon. Kiinunete iyong ngitunga a Tiro ngadekon. Esakete ngikabarak ngirotin lu iminakinea iyong kesi. Eyei ateran namaniyat keng, erai nakebusean noi! Edonyunitoe eworu keng a auno a egolit. Arikor ngesi nia ekapolon enapit eworu lo esiritoe. Iwapito ngesi ngapesur nache na nyepero ka ngikiliok a ache, irukorito ka ngesi. Toloto kesi inaa elakara imariteteete, tolomasi kai a ekapolon. Ee robo ekapolon, ianyu ngide lukaalak lu ilunyokinosi nados kata apaakech. Itopolokini iyong kesi akwap daang. Erubakini ekipur kon eruo jiik kotere eeos kang, kipuruunete iyong ngibukui daang nakajik. Akuj kimechi ngoni nabo ngesi erai ngikilinga yok. Esadit ngesi akingarakin ngoni esaa daang lo kianyunitor ngichan. Kotere nguna, emam ibore kikeri ngoni, tani kemaraniki akwap tachakakin ngimoru nituluk a anam. Tani kekulaut nganamea toruoto, sodi tamaranikis ngimukur kotere erue a nganamea. Eyei angolol na italakarit ngitunga a ere a Akuj, ka akai a Akuj ana Epol Noi. Eyei Akuj lore ngolo, nyiloilookin jik. Ingarakini Akuj ngesi napei ebayiari. Ebulit ngibukui, emaranete ngapolosio. Egirokini Akuj, tokeia akwap. Kirukit ngoni ka Akuj Namerikanyer, Akuj a Yakobo kimechi ngoni. Potu taanyutu nguna asubaki Ekapolon Akuj. Taanyungasi ngakiro nakatalarak asubaki ngesi anakwap. Etubori ngesi ngijiesinei anakwap. Ebilibili ngakawa, kieala ngakwaaras ka akinom ngaupwala. Ebala Akuj, “Kililinga chek! Toyena atamar ayong arai Akuj! Ayong kepuruunito ngibukui daang. Ayong apolokinit akwap daang.” Kirukit ngoni ka Akuj Namerikanyer. Akuj a Yakobo kimechi ngoni. Esi ngitunga daang, tarama ngakan ilakara! Kipuruutu Akuj imariteteete! Kainyo Akuj na Epol Noi, kitubuli. Erai ngesi ekapolon loapolon, lo epolokinit akwap daang. Kidwang ngoni ngibukui luche kotere ngesi. Kipolok ngibukui kotere agogongu keng. Kisek ngesi ngoni akwap na kirumi. Akwap ngina na iwogatar ngitunga a Akuj lu emina ngesi. Adoka Akuj lokicholong keng, imariteteeo, tokusetei ngaburucho. Toeokisi ikusete Akuj. Toeokisi ikusete ekapolon yok. Akuj erai ekapolon a akwap kadaang. Kikuta ngesi a ngieosio! Ibooyi Akuj alokicholong keng epolokinit ngibukui daang. Eriamariam ngikapolok a ngibukui ka ngitunga a Akuj a Aburaam. Ejwono Akuj noi akidwang ngasigerea daang. Ipuruunitoe ngesi noi! Epolot Ekapolon Akuj, ejoikinit ipuruunitoe noi, alore a Akuj yok, ka kidiama emukura keng. Sion lo erai emoru a Akuj, ewoi noi nabo ibus. Ere a ekapolon aloapolon erai alakara a akwap. Edodiu Akuj atamar ngesi emechio alotooma awas nakaagongon a ere. Achunakinosi ngikapolok wapei toremo emoru a Sion. Nakaneni ani eanyungarete ere a Sion, kuumwokis. Tobul kesi kipungaros. Apot kesi tobul toriabakinos loger a aberu ana esaki akidoun. Kikokis kesi ngatubwae na ibapabapaate ngitoroi a ekuwam aloationon. Kiira sua daang na asubi Akuj, nabo kianyunga sua ngikulepek, alore a Akuj yok, ana erai Akuj Namerikanyer. Itee Akuj ere ngolo toliwor ibooyi akaalimon jik. Ee robo, Akuj, kitamanari sua ngakiro a amina kon ana nyedaun, alotooma akai kon. Kipuruunitoe iyong awadaang. Epetakina ekipur kon akwap wadaang. Ipolokinit iyong itiriyanit ngakiro. Kimiekisi ngitunga a Sion talakaros! Kimiekisi ngitunga a ere a Yuda talakaros! Ani itubio iyong ngakiro na iyookino. Ngitunga a Akuj, kapesi kirimo Sion. Kapesi kimarutu ngipemin keng. Kingolikisi ngawasea ka akisemere ngateak keng nakaagongok. Sodi kisisakis ngalesea na isidiuno ibalasi, “Erai naga Akuj, na erai Akuj yok jik! Eliwor akarikon yok jik!” Esi ngitunga daang, topupokisi akiroit naga! Todetasi ngaki esi daang lu ilomito nakwap. Esi lu kiyenikinitae ka lu nyikiyenikinitae, lukabarak ka lukebootok aapei. Iruoro akituk kang aosou. Etamanari ayong ngakiro a achwaanut. Adetari ayong akit atopupok ngakamatak, ani erumor esisau eger kech aramit agita. Nyaemi ayong na ayakar lochan, esaa lo keriameta ngimoe, kori ngitunga luaronok igienosi ebari kech ka akiwoga ani ebaritotor noi. Emam itwaan ibusi akiyar keng a ilope. Nyepedori ngesi ainakin Akuj ibore ni egielere akiyar keng, kainyo epol ibore ni ibusere akiyar a itwaan. Emam ibore ni elemuni ngesi ni itemokin, kimiekinere ngesi erubakinit eyari jik, nyeelomarea naliel. Eyenio daang atamar etoakete tani ngikoosok, ka ngikabangabangae ta lu iwaarit dang. Imiekinete daang ebari kech kiruma ngitunga luche. Nalielin ibooyoto kesi nakajik. Ibooyete kesi kaneni jiik, tani kolong sek keyakasi ngalup na araakasi ngakech. Nyerubi itwaan anajakaanut keng. Etoani loger a etiengit a moding. Ngakiro nguna eanyunete lu igienosi abangaanut. Nguna eanyunete lu igienosi ebari kech. Idirete kesi lokatoak loger a ngamesekin. Akitu eliwor ekeyokon kech. Iengunete lu etenooko ingolikinete luaronok, ebosete ngawat kech analielin, echadara anakais ana kolong kech. Nakaneni kayuuni ayong Akuj, anagogongu a akitu. Kainyo ketepeyoni ngesi ayong. Nyiikadanakin na ingolikinea itwaan ebari, kori iatakin ebari keng talalaar noi. Emam ibore elemari ngesi na etoanea. Nyirukorete ebari keng ka ngesi naliel. Tani kenyakunit itwaan talakar ngirwa lu eyarea. Tani kipuruun ani ibooyo eboyor ajokon, elosi ni eyakasi taapaakeng alokatoak, ni nyeanyungarea akicha nabo jik. Nyerubi itwaan anajakaanut keng. Etoani ngesi loger a etiengit a moding. Ekapolon Akuj Naationon iruoro. Enyarit akwap daang napei alo kide tanang too. Imaunit Akuj alo Sion alo erai ere lokebusean noi. Ebunit Akuj yok, nakaneni nyililingi! Ingareni akim nakariran ngesi, tokutunite ekuwam lokariran alowaitin keng kadaang. Enyarauni ngesi adis ka akwap taanyungasi eger lo etubio ngesi ngakiro a ngitunga keng. Elimuni tama, “Tochunakinae ngitunga kang lu kamunosi ayong, ngitunga lu kolong kichamakin ka ayong ani aareta akipeyos!” Elimorit adis ateneanut a Akuj. Akuj alope erai akatubon ngakiro. “Topupokisi ngitunga kang eruorik! Isirael, eruoro ayong ngakiro kon. Arai ayong Akuj, Akuj kon. Nyekekilakinit iyong kotere ngakipeyos kon. Eyakasi ngakipeyos kon na inomio ngaren kang jiik. Emam emong achamuni ayong ananok kon, kori nyachamuni tani ekoroe alosipaan kon, kainyo eraakasi ngitieng a moding daang ngikang, taraakas ngabunge a ngibaren lu eyakasi lomukur ngikang. Eraakasi ngikieny a moding daang ngikang tani ngiborei lu eyarete lu eyakasi namanat eraakasi ngikang. “Tani kanyam ayong akoro nyakalimokini iyong, kainyo ngakwapea ka ibore daang ni eyei nakwapea erai ikang. Ikwa ibala iyong kori anyami ayong akiring a ngimongin, ka akimat ngaakot a ngaanei a? Kimiek abuakinit Akuj alakara toliwor akipeyos na ilemikinit iyong Akuj. Kiyook ngakiro na ichikakinit iyong Akuj Naationon. Tanyarae ayong na ianyunea ngichan. Kayuuni ayong iyong, sodi kipuruu iyong ayong.” Nakaneni elimokinit Akuj itwaan niaronon kona, “Nyo itatamar iyong ngitalio kang? Nyo iruoror iyong ngakiro a achamunet kang? Iwounit iyong asaki ayong arikin iyong. Ingerit iyong ngitalio kang. Naingolikinea iyong ekokolan, toelokinos. Irukito iyong ka ngikalomak. “Ijalak akituk kon akiruor naaronok jiik. Inait iyong akisud ngakiro. Iruoror iyong ngitunga luche ngakiro naaronok. Iswamar iyong lokaatokon lo itorunito ka iyong akook apei. Isubi iyong ngakiro nguna daang eliling ayong chek. Esibit iyong ekoni ayong iyong a? Nakaneni kekilakinit tokona ayong iyong ketoron kotere akiroit naga. “Kitamasi nugu esi lu nyikimisito ayong. Ani kemam kenyasuni ayong esi, tongop itwaan ni kiyuuni. Itwaan ni kabuakinit ayong alakara, erai akipeyos keng, itwaan karima ayong ngini. Ani itwaan ni etenoono elote keng, ayuuni ayong ngesi.” Wae Akuj, kisienoi, kotere amina kon na nyedaun. Kotere ngisien kon luationok, kikisa akichwangakinit kang! Kilota aronis kang daang, kitosegae ayong anakisech kang! Ayeni ayong dir na echwanganakinit. Eyei akisech kang ngaren kang jiik. Kasechak ayong iyong, iyong bon kasechakinit ayong, atosub nakironikinito iyong. Kotere nguna iyookinit iyong na itubio ngakiro kang. Eriyan ngakiro nakiriraa iyong ayong. Arai ayong itwaan aronon napei kolong kedounere. Kapotiuni kolong ayong itiokang arai ekasechan. Isaki iyong ateneanut ka ngakiro na iteni. Kileleb ngitamen kang aosou kon. Tolemarae akisech, etaleun. Kilotarae, atokwanger kea. Kilelebikinae alakara ka akiena. Alakar ayong nabo tani kolong kipudat iyong ayong. Tomulen, tojongo akitere ngasechesea kang, sodi kikisa aronis kang daang. Ee Akuj, tosubakinae etau lo eseg. Kiwaak tooma kang etau lokitetet totenoono. Nyikitwarak alongaren kon. Nyiilema etau kon anikang. Nakinae ayong nabo alakara na itorunit nayuuno kon. Topwatakinae etau lo ewapea ngakiro kon. Ani ikokini neni, etatam ayong lu ichwanganakinete ngitalio kon, tobongut ngikasechak nikon. Ee Akuj, akayuunan kang, toyuunae ayong anakitu anakalosikinit, atolimo ayong a alakara ateneanut kon. Ee Ekapolon, tangaa kare akituk kang, eruorik ngakiro nakepuruunitor iyong. Nyikimuito iyong ngakipeyos. Arai atama epeye akipeyos na inomio, pekiminarit iyong. Akipeyos na echamit Akuj, ngesi etau lo eriangakina. Ee robo Akuj, etau lo eriangakin kitiditeun, nyimenyari iyong. Ee Akuj, tojoker ani a Sion kingarak. Tobongok akiduk ngawasea a Yerusalem. Ani kikok neni, ilakar iyong kotere ngakipeyos na a iteni, ka ngakipeyos kosi na inomio, ka na inomio nginerin daang. Ipeyeo ngimongin alokenoi kon. Nyo iwogar iyong lotiationon lo kotere ngakiro naaronok esubere ngulu eminasi Akuj? Akolongit daang itukit iyong akisub nginyas. Ikoni angajep kon ebanyet loakwanan. Imodeana iyong jiik. Imina iyong naaronok akidwang naajokak. Imina alioko akidwang nguna a iteni. Iyong ekaliokon loaronon. Imina iyong ngakiro na emunyarete luche. Kotere nguna, kimunyari iyong Akuj jik. Kirumuni ngesi iyong kitodema awi kon. Kilemari anawi a ngitunga alu eyarete. Ingolikinete lu etenooko nguna tobul. Ani erumor tokianatar ngesi ebalasi, “Kingolikisi ngakiro a itwaan kaen! Abu itwaan en nyiigienokin Akuj tomech, pearai abu kigienokin alalau a ebari keng, tasak atamar atomech ebari keng.” Nakaneni ekoni ayong ekitoe a akimiet lokaliban, lo erupunit alokai a Akuj. Egieno ayong jik amina keng na nyedaun. Ee robo Akuj, kabuakini iyong alakara jik, kotere ngakiro na isubi iyong. Alimori ayong alotunga kon alu etenooko, atamar ijok iyong. Ebalasi ngikabangabangae alotai kech, “Emam Akuj.” Inyasuna kesi, esubete ngakiro naaronok noi. Emam tani ipei ni esubi ngakiro naajokak. Ingoliunit Ekapolon Akuj anadis itee ngitunga. Esaki akiyen keyei ipei ni eos, ni iwapit ngesi. Nakaneni areasi kesi daang. Ikwaan kesi daang eroko. Emam ni esubi naajokak, emam tani ipei. Ingita Akuj ebala, “Ekoe, ebangaaka ngitunga daang lu esubete naaronok a? Ngiboro lu edemete kesi ngitunga kang kesi eyaritotor. Tarai nyetamarete kesi ayong, ‘Kingarakinae kare a?’ ” Ani ikoni neni dang, ebuli kesi, ebule lo nyebulo a ache, kainyo ielari Akuj ngakoyo alu nyenupito ngesi. Irumete kesi ngileech, kainyo emiek Akuj kesi. Agasi atamar taanyu Isirael agogongu na idwangea, alo Sion! Elakarosi Ngisirael noi na itabarea Akuj kesi nabo! Imaritetekini Yakobo, ee robo, elakar Isirael. Wae Akuj, toyuunae ayong a agogongu kon. Talachakinae ayong kotere ngikilinga kon! Topupok kare Akuj akilip kang. Kiira ngakiro kang! Kalosikinito ayong ngitunga lukewogak. Esakete ngitunga lukamoitanak akiar ayong. Eraakasi ngitunga ngulu lu nyekachito ngakiro a Akuj. Nakaneni Akuj kengarakinit ayong. Ekapolon keturubakinit ayong ayari. Naaronok asubete ngimoe kang, ebongokinete kesi ngikulepek. Tomunya kare kesi Akuj ani iraakar iyong na itenoono. Ekapolon Akuj, kepeyokini ayong iyong ngakipeyos a etau ajokon. Epuruuni ayong ekiro kon ani ijokia iyong. Kainyo kiyuu iyong ayong alochan kang kadaang. Engolik ayong ngimoe kang idwangio. Topupok kare Akuj akilip kang. Nyikimulen nakemaimaea! Topupok ngakiro kang sodi kiik. Kesiasi ayong ngichan kang. Ketubulit ayong echale a ngimoe kang. Keleleny ni kechiakiaritotor luaronok. Kainunito kesi ayong ngichan. Kanyoikinito kesi ayong karemokino. Kabulit lokojokon ani aemitor akitu. Amarani ani kabulitor noi. Kadakakin ayong ebuloi. Arai bo toya ngabeben dang loger a akuuri! Kaporo nialonan eanga. Ee robo, kaporo nialonan, atolom nariet. Kamatar atasaka ni amechi atoyuunor alokuwam aloaronon ationon. Kinyasu kare na ereto kesi Ekapolon, Kicholiak ngangajepa kech, kainyo etee ayong ekurikur, atopupi eburas alore, irimito ere naparan ka nakwaare, ilelebito erukoonu ka ngichan. Elelebun nginyas ere wadaang. Amoitanut ka akichiakiarit luche ileleba lorotin a ere daang. Arai tarai emoit kang kamori ayong, kanaikinit. Arai tarai lo kibolor kewogakini, kadukak ayong ngesi. Nakaneni, erai iyong erukitos kang. Erai iyong lopae kang, lo emam akiroit kemunoni. Kipot kolong ngoni atanaikisi akiruoro lopaalon. Kiloseene aapei kai a Akuj. Kimiekisi ngimoe kang totoaka eringa ngirwa kech nyenanga. Kimiekisi toloto lokatoak eringa eyarete! Ileleba aronis nawiyei ka lotai kech. Nakaneni egoronokini ayong Akuj, kayuuni Ekapolon Akuj ayong. Ebong, ka nataparach, ta naparan lotingilan, eburae ayong akunua. Iirari ngesi etoil kang. Kabuuni ngesi ayong akaalimon alojiesinei alu kijio ayong ka ngimoe kang lukaalak. Akuj na epolokinit napei kolong jik edetarit akit keng kidwang kesi, kainyo emam etal iwapito kesi nabo nyekerito Akuj. Etiji erukitos kang ngipaalon keng. Echwangak ngesi nasek achamunit. Anonok ngakiro keng noi edwangito akidietet, tarai ayei arem lotau keng. Asulut ngakiro keng edwangito akimiet, tarai kidungete loger a ngilengea alukakwanak. Kimiekinea Ekapolon Akuj ngichan kon, kiikini ngesi iyong. Nyimianakini ngesi itwaan ni etenoono idwangio. Nakaneni lukaarak ka luaronok, etiyauni Akuj. Eyaari kesi nakipany na a nginyas, eringa ngirwa epewae lu eyareta kesi nyedolo. Nakaneni kegienokin ayong iyong, Akuj. Kisienoi kare Akuj, kainyo kepudaate ayong ngitunga. Kaboliatar ngimoe kang jiik. Kepudaate ngimoe kang apaaran juui. Elalak ngitunga luketijiete ayong. Nakabulio ayong, kegienokin iyong. Egienokin ayong Akuj na emunoi akiroit keng. Egienokin ayong Akuj emam ibore aemit. Nyo kasubakinea ayong itwaan? Kechanete ngimoe kang apaaran juui. Esakete kesi jiik akiwan ayong! Echunanakinosi kesi wapei kaperunito, isemeete daang elote kang, ani esaketa akiar ayong. Ee Akuj, kirira kare kesi kotere aronis kech. Tadaka ngitunga ngulu a angoit kon! Iyeni iyong eger lo kelolikinitere ayong. Iyeni iyong etiae a ngakiyo kang. Ikwa emam kesi anakitab kon a? Akolongit daang nakanyaraa ayong iyong ebuario ngimoe kang akamaluwot. Ayeni ayong dir atamar ikokinete neni kainyo kirukit ayong ka iyong. Epuruunit ayong Akuj kotere akichikakinet keng. Epuruunit Ekapolon Akuj kotere akiroit keng. Egienokin ayong ngesi, emam ibore aemi. Nyo kasubakinea ayong itwaan? Ee Akuj, kainakini iyong ibore nikekongok. Kepeyokini ayong iyong, ngakipeyos nakabuakinitor alakara. Kainyo kiyuu iyong ayong anakitu, ee robo, kitenik ngakejen kang nyaadakar. Eboikinor nikon anakicha alu eyarete. Kisienoi kare ayong, ee Akuj, kisienoi kare ayong. Kainyo nikon abuni akimech. Etorube a ngabeben kon ngesi amechi, tanang adaunet a ekuwam alo a nginyas. Egoronokini ayong Akuj na Epol Noi, na erai ngesi esubanakini daang na asaki ayong. Iirari ngesi ngakiro kang anadis katoyuu. Ngulu kechiakiarito ayong, isurumi ngesi ngileech. Kedodikini ayong Akuj amina na nyedaun ka ngisien keng. Keriamito ayong ngimoe kang loger a ngingatunyo alu enyamete ngitunga. Ikote ngikel kech ngakwaaras ka ngimalea a amod, ekwaka ngangajepa kech loger a ngilengea. Ee Akuj, kipuruunoe ekiro kon alokidiama adis. Topetakin ekipur lo kiyenikinitere iyong akwap wadaang. Alokakis ngimoe kang eloit lo kesurumeta. Esurur etau kang. Abokakinete kesi akipany lorot kang, nakaneni tadakakinos kesi ngikulepek neni. Etitiny etau kang, Akuj. Ee robo, etitiny etau kang! Aeokini ayong kepuruu iyong! Tonyou etau kang! Tonyou agita! Etonyouni ayong akolong! Ee Ekapolon kabuakini iyong alakara alotela. Kepuruuni iyong alobukui. Enangit amina kon na nyedaun nadis. Etapit amuno kon ngidowon. Ee Akuj, kipuruunio iyong alokidiama adis. Topetakin akibuseanu kon akwap wadaang. Esi ngikapolok! Itubeenete mono esi ngakiro kitiriyana a? Itubeenete esi ngakiro a ngitunga iyookino a? Mam jik! Naaronok make itamete esi akisub. Erukoonu isubete esi anakwap. Ibatarosi luaronok eringa epotiunitoe. Ichwangakinete napei idounere, eliokoko. Ileleba kesi akisierit na ikoni na a ngimunio. Egolol ngaki kech loger a akipom anakinim, ana nyiirari tani etoil a emuron alo emuroe a ngimunio, kori amuronot a ekekerian alokooson. Ee Akuj, topoko ngikel kech. Ee Ekapolon Akuj, todoto ngikel a ngingatunyo kangulu. Tongopiasi kesi loger a ngakipi ana ijujuyete ngalup, loger a nginyia alu ipudao tooniyosi. Kikok ekame lo ekeikin lodoot. Kikokis ikoku ni idounio etoanit nyeanyunga akolong. Etuborio kesi atipei eringa nyeyena. Etuborio loger a ngiikwa ka edoan. Ekutario kesi nikalonan eringa eyarete kotere anyunyura a Akuj. Elakarosi lu etenooko na ingolikineta luaronok irirao. Ipudaate kesi ngaakot aluaronok. Elimunete ngitunga daang tamasi, “Ee rocha, ainakin lu etenooko ebachit. Eyei dir Akuj na etubi ngakiro a ngakwapea.” Ee Akuj kang, toyuunae ayong alomoe kang. Kirichunae ayong ani eyakasi lu kanyoikinito ayong. Toyuunae ayong alotunga aluaronok kangulu. Kimiek atopuun ani a ngikaarak kangulu! Kingolik a! Kedarunito kesi ayong kataar. Echununa ngitunga lukamoitanak nikang. Meere kotere akisech kori ibore ni echwangakini ayong. Tani emam ibore asechit ayong, epeunito kesi Ekapolon Akuj, esadito. Tonyou kare Ekapolon Akuj, taanyunga sodi kingarak! Tonyou, ee Ekapolon Akuj Namerikanyer, irai iyong Akuj a Isirael. Tonyou kirira ngibukui lugelayek. Wara ngirukooi lugu nyikisieneto. Atabong daang ebonguunete kesi ikomosi loger a ngingokwo, irimito ere. Topupok ngiyeny ka angata kech! Ikote ngangajepa kech ngilengea lukakwanak. Kainyo itamito kesi atamar kori emam itwaan epupi ngakiro kech. Nakaneni iyong Ekapolon Akuj, ikienar kesi. Ijamuarit iyong ngibukui daang. Aeokini ayong kepuruu iyong na irai agogongu kang. Kainyo iyong, ee Akuj, ngesi kamechit ayong. Ebuni Akuj kang nikang ani kaminar. Ketaanyungari ayong ngimoe kang idwangio. Nyiar kare kesi Akuj, nyiimuriakineta ngitunga kang. Kieala kesi a ngikilinga kon kidwang. Ee Ekapolon lo irai aupwal kang! Ee Ekapolon Akuj, kimiek kesi emunyarosi, itemem ka akisech na iruorotor kesi. Kimiek kesi kisipokae alokinis kech, kotere ngilam ka alioko kech. Tomunya kesi a angoit kon tongopiasi jik. Toyeneta ngitunga daang, tani anasalunet a akwap, atamar epolokinit Akuj ngalesea a Yakobo. Atabong daang ebonguunete kesi ikomosi loger a ngingokwo, irimito ere. Esakasakato loger a ngingokwo alu esakete akimuj, tolomasi akingoorare na ekadea akimuj. Ani ayong aeo epuruunit ngikilinga kon. Ekusi nataparach amina kon na nyedaun. Kainyo iliwor iyong awas kang nakaagongon. Iyong kamechi nakatingeta ngichan. Kepuruuni iyong na irai ngikilinga kang. Ee Akuj, iyong irai awas kang nakaagongon. Iyong Akuj kidodikinit ayong amina kon na nyedaun! Ee Akuj, kinger iyong sua kieala. Kingoikinit iyong sua. Wae, tobuarae kare sua nikon. Itamaranik iyong akwap ipak, ipak iyong angaar. Toniken ni epakak, kainyo epeded. Itaanyu iyong ngitunga kon ngichan luaronok noi. Kitamat iyong sua emuna lo kisiteriteri. Itoosu iyong lukikerito iyong sodi tobucharotor kesi aloriras. Toyuunae sua a agogongu kon, kiik akilip kosi, sodi topuunotor ngitunga lu imina iyong. Eruorik Akuj ani italeuno ebala, “Alosi tokona ayong emaritete atotiakatiaka akwap a Chekem. Atotiakanak ngitunga kang adipo a Sukos. Erai Gilead akang, tarai Manase akang. Erai Epiraim apukot kang tarai Yuda aburo a apolou kang. Etiliwori ayong Moab atubwa kang na ilotare, atowatak Edom ngamuk kang, kidodiu ibore ngini atamar apolokinit neni. Emaritetekini ani edwangea Ngipilisti.” Akuj, ngae karikori ayong lore lo edukitoe ngawasea nakaagongok? Ngae kariki ayong tanang Edom? Wae Akuj, kinger iyong sua jik a? Ikwa nyeringa iyong irukito ka ngasigerea kosi a? Kingarakinae kare sua toyuunae alomoe. Kainyo erai akingarakino a itwaan pas. Kidwangi ngoni, erai ibakit Akuj alowae yok. Ngesi idwangi ngimoe yok. Ee Akuj, kiira akigoro kang. Topupok akilipit kang! Kegoronokini ayong iyong alona anawi, ipirisaara etau. Yaarae ayong nataaba na ayuunor, kainyo iyong kamechi ayong. Iyong irai epem lokaagongon lo ayuunor alomoe. Kimiekinae eboikin loeam kon jik, atomech etorube a ngabeben kon. Ee Akuj, iira iyong ngikong kang. Kiinak iyong ayong naajokak, nguna eanyuununete lu kikerito iyong. Kiatak ngikaru lu eyarea ekapolon talalaketa. Kimiek ngesi torubak eyari cha jiik! Ee, kimiek ngesi topolok jik alongaren kon. Kirichak ngesi a amina kon ana nyedaun, ka ajokis kon. Sodi toliwor aeonokini jiik kepuro iyong, alemuununi jiik ibore ni kekongok iyong. Elilingi ayong chek edarit Akuj. Nikeng ayuunor. Ngesi bon erai ataaba kang ka ayuuno kang. Ngesi erai awas kang nakaagongon, emam ibore keloilookini ayong jik. Irubakinete esi ilosikinito itwaan ni ikoni awas na eukoro tanang ori? Isakete esi atiyaun ngesi ani eanyunitor arimatoi. Iminasi esi akiruoro alioko. Ipiarito a ngakituk, tarai ilamasi alotai. Elilingi ayong chek edarit Akuj. Egienokin ayong ngesi. Ngesi bon erai ataaba kang ka ayuuno. Ngesi erai awas kang nakaagongon, emam ibore keloilookini jik. Ayuuno kang ka arimatoi eyakasi nia Akuj. Ngesi erai ataaba kang nakaagongon. Ngesi amechit ayong. Esi ngitunga kang, kigienokinos Akuj ngirwa daang. Tolimokisi ngesi ngichan kus daang, kainyo ngesi kimechi ngoni. Ikote ngitunga daang akianget. Luapolok ka luuchik, eraakasi daang ngipasiek. Tani kitem anaratil, emam apotis eyei. Eok noi akidwang tani akianget. Wara nyiigienokin erukoonu. Wara nyiijapunea ebari lo edemio ngitunga. Tani kiatakin ebari kon, nyiigienokin. Alimu Akuj alimunet apei. Eira ayong ngakiiraret ngaarei, atamar erai agogongu aka Akuj. Ekapolon, eira nabo ayong atamar erai amina kon na nyedaun. Kainyo iinanakini iyong itwaan daang ebachit itemem ka etich keng. Ee Akuj, irai iyong Akuj kang, kasaki ayong iyong. Imuit etau kang iyong, loger a itwaan ani imuito ngakipi. Kanyamit ayong akure loger a ngalup ana eokito deu engopikinito ngakipi. Kemuit ayong akingolikin iyong ani italeuno iyei, sodi ataanyunga agogongu ka akibuseanu kon. Ejok amina kon na nyedaun idwangit akiyar. Kotere ngakiro nguna kepuruuni iyong. Kabuakini iyong alakara ngirwa daang lu ayarea. Kebakini iyong ngakan kelipit. Eyelayelakin a akimiet ka nikataronon. Aeokini ngieosio a alakara kepuruunit iyong. Ketamunit ayong iyong ayei lokitanda. Etami ayong ngakiro kon akwaar kiiya kiwala. Kainyo iyong kingarak ayong jiik. Aeo ayong alakara alotorube a ngabeben kon. Erumeikina ayong nikon. Kegangit ayong akan kon na aloteten. Nakaneni daang lu esakete akiar ayong, elomarete nalup ni eyakasi ngikatoak. Eario kesi a ngakwaaras, toliworos akimuj a ngikolowoi. Nakaneni elakar ekapolon kotere Akuj. Ani daang lu ikongete elimito ekiro keng, ipuruunete Akuj. Nakaneni ebunio ngakituk alukaliokok. Akuj, ayei ayong lochan, topupok akilip kang! Toyuunae ayong, aemit ayong ngimoe kang. Kiwae ayong nyikianyun ka ngakiro namunonoe na etukito ngitunga luaronok, ka ekurikur a ngitunga aluaronok. Ipenete kesi ngangajepa kech loger a ngilengea. Eseletanarete ngakiro a amoitanut loger a ngimalea a amod. Eperunete kesi itwaan ni etenoono toguma. Ituumwokinete kesi toguma peemito. Epupokinosi kesi anakiro kech anaaronok. Echamakinosi kesi ni iweeta ngiloi kech. Itamete ebalasi, “Emam itwaan eanyungari.” Etukosi kesi naaronok tamasi, “Kirumo tokona nguna kirekinit! Ngae eanyuni ngakiro nakitukit ngoni?” Iweitae ngakiro namunonoe alotau a itwaan! Nakaneni egumi Akuj kesi a ngimalea a amod, sodi towan kesi atipei. Emunyari ngesi kesi kotere ngangajepa kech. Itwaan daang ni eanyungari kesi, imungumungakini akou. Ani ikokini neni, tokera ngitunga daang Akuj. Elimorete na asubi Akuj, sodi kitama ngakiro na esubi ngesi. Elakarosi lu etenooko ani a Ekapolon Akuj, tomecha ngesi. Ipuruunete ngesi ngitunga luajokak. Ee Akuj, itemokino iyong kipuruunio alo Sion. Erichakisi ngakikongiet kosi anikon, kainyo ipupi iyong akilip kosi! Epote ngitunga daang nikon, kotere ngasechesea kech. Kikuruworete sua ngasechesea kosi, nakaneni irimakini iyong. Epiaritae lu kolong iseuni iyong yau diyete. Kisimwokete sua ngakajokak a akai kon, ka apiaro a akai kon ana italeuno. Kotere ngakiro kon naketimok, iikini iyong ngakiro kosi ka ayuun sua. Ee Akuj, iyong ngesi kiyuuni sua. Iyong ngesi kigienosi ngiborei daang anakwap ka nganamea nakalonak. Igogong iyong lokojokon noi. Kotere ngikilinga kon, idupak ngimoru ni ewaatar. Isililingi iyong erue a anam, kisililing erue a ngitoroi a anam dang. Itudunge iyong ekurikur a ngitunga. Itimito ngakwapea daang ngakiro nakatalarak na isubi iyong. Kotere nguna, apetakin alakara wadaang napei alo kide tanang too. Irichakinit iyong akwap ani ilakakinitor akiru. Iturupaka ngalup ngikinyam tokilikileta. Ilelebi iyong ngakipi nangololin. Iturupuni iyong ngikinyam analup. Ikokini iyong isubi nguna nege. Iyauni iyong akiru nakaalan namanat na echilitae sodi kitapapal kesi a ngakipi. Itunyusukuki iyong ngalup a elimlim, topia nginyia toruput. Ileleb iyong ekaru ajako a ajokis kon! Nicha itorit iyong daang, idoka akimiet aloburin. Ileleba ngisipaan nachokor. Ileleba alakara nakookies a ngimukur. Epetakina ngamesekin naroatin. Engiyete ngakanoi anadipoe. Imaritete ibore daang elakara. Ngitunga daang kipuro Akuj kimaritetekisi! Tolimosi ekipur a ekiro keng ieosi. Kituruutu ngesi, kipuro. Tolimok Akuj tama, “Kitalarete ngakiro na isubi iyong! Itiditeunosi ngimoe kon alongaren kon kotere agogongu na ipoloo iyong. Kilipito iyong ngitunga daang anakwap. Eeosi daang kipuruunito Akuj.” Bua taanyu na asubaki Akuj. Asub ngesi ngakiro na kitimete alotunga. Elochi ngesi anam toliwor akwap nakoonon. Adokete ngitunga angolol a ngakejen. Talakaros kesi kaneni kotere ngakiro na asubi Akuj. Epolokinit ngesi nakajik kotere agogongu keng. Itee ngesi ngibukui. Wara lukechanak nyiwogakinosi. Esi ngibukui daang, kipuruutu Akuj yok. Tolimosi ekipur keng kiirarae. Kiturubak ngesi ngoni kiyari, nyechamakina ngesi ngoni kidakar. Ee Akuj, toroae sua, loger lo eroyere akwangat a akim. Kimiek iyong sua kirum eloit. Kisiwok iyong sua eegos loapotion. Imiek iyong ngitunga kipudaate sua. Kitor sua nakim ka nakipi. Nakaneni kiyau tokona iyong sua nikaaloman. Ayauni ayong ngakipeyos na inomio kai kon. Kalemikini iyong ibore ni ekongit. Kalemikini ibore ni kolong kekongokini iyong, ngirwa lu aanyunitor ayong ngichan. Kainakini iyong ngakipeyos nakatumak, ngakipeyos a ngimesekin na inomio. Kepeyokini ngimongin ka ngikora. Esi daang lu ikerito Akuj, potu topupokisi, kesisak nakasubea ngesi ayong. Egoronokini ayong ngesi asaki kengarak. Atoeok ayong epuruunit ngesi. Arai edaite ayong akisech alotau kang, pekepupoki Ekapolon Akuj ngakiro kang. Nakaneni eira Akuj ngakiro kang. Apupoki ngesi akilip kang. Epuruunit ayong Akuj, kainyo nyengero ngesi akilip kang, kori nyelemara ngesi amina keng na nyedaun anikang. Akuj, kisien eboyor kosi, kitopia. Kingolikinae sua a ajokis kon, toyeneta ngitunga a akwap erikitene kon, toyeneta ngibukui daang ayuuno kon. Ee Akuj, kimiek ngitunga kipuruut iyong. Kimiek ngitunga daang kipuruut iyong. Kimiek ngibukui daang talakaros kimaritetekis, kainyo itubi iyong ngakiro a ngitunga itemokino. Torikite ebukut daang anakwap. Ee Akuj, kimiek ngitunga kipuruut iyong. Kimiek ngitunga daang kipuruut iyong. Akono akwap ngalemet. Akuj, na erai Akuj yok, kipia ngoni. Kipia ngoni Akuj. Kimiek ngitunga daang kidodikis ngesi arimatoi. Kimiek Akuj tonyou, tobwangas ngimoe keng. Kimiek ngulu eremokino ngesi kipungaros alongaren keng. Eger lo ekutarea ekuwam apuru, ikote kesi neni ekutario. Eger lo ekeiarea aarwak imakinio nakim, ikote luaronok engopete alongaren Akuj neni! Nakaneni elakarosi lu etenooko na ebunio Akuj. Imariteteete, toeoto elakara. Toeokisi Akuj, kipuruutu ekiro keng. Tosubakisi erot keng kotere ngolo itorit lodowon. Ekiro keng ngesi Ekapolon Akuj. Talakaros alongaren keng! Akuj na ibooyi italeuno, ngesi erai apakeng a ngikokiok, nabo ngesi echoikinit ngapuseru. Einakini ngesi lukebootok awi na elomete. Elachakini ngesi lu eenitae talakaros. Nakaneni ani lurukooi elomete nariet. Ee Akuj, na irikorea iyong ngitunga kon, na ilosio iyong anariet, abu akwap tamaranik, tobukun ngakipi a akiru, kotere ni abunio Akuj a Sinai. Ee robo, kotere abunere kon, Akuj a Isirael. Ee Akuj, ibu iyong kitaram akiru nakaalan. Kisubus iyong akwap nasek abu tooniyo. Apot ngitunga kon taanyut ngawiyei kaina. Kitan iyong lukebootok kotere ajokis kon. Adunguni Ekapolon akiroit, tolimosi ngaberu nakaalak akiroit ngina. “Epungarosi ngikapolok ka ngasigerea kech!” Akoranakinosi ngaberu na ayakasi nawiyei ngiboro lu angatario. Ngitorubei a ngakurio lu abutakina akwangat, lu amalimali egolit anabeben kech. (Nyo kolong edongioto epewae kus nanokin a ngamesekin akolongit na a ejie?) Na ealarea Akuj Naationon ngikapolok alomoru a Salimon, abu eloch lo ipukit min neni. Emoru a Bachan, iwoi iyong noi, irai iyong emoru lo elalak ngaitae! Esi ngaitae! Nyo kiterekuyaritor esi emoru lo kolong aseuni Akuj akilom? Elomi Ekapolon Akuj neni jik! Ebuni Ekapolon alo Sinai tolot ni italeuno. Irukunete ka ajore nakaalan, a ngabunge anakaalak a ngaurukukui. Edokari ngesi kidiama emoru lokooyen erikit ngirikon. Idiaununi ngadekon alotunga, tani alotunga alukechanak. Neni elomi Ekapolon Akuj na erai Akuj. Kipuroe Ekapolon! Kingarakinit ngesi ngoni ngiegosio yok jiik. Ngesi erai Akuj nakiyuunit ngoni. Erai Akuj yok Akuj na eyuuni. Ekapolon Akuj na erai Ekapolon, kiyuuni ngoni anakitu. Ebwangabwangaari Akuj ngakies a ngimoe keng. Ee, ngakies alu erubakinito iwapito ngirotin kech luaronok. Ebala Ekapolon abuuni ngimoe kon alo Bachan, abuuni kesi alokwap nganamea, sodi kipuda iyong ngaakot kech, tomeyeto ngingokwo kus ngaakot kech. Ee Akuj, iteete daang alotoru kon na iraakar iyong akedwangan. Alotoru a Akuj ana erai Ekapolon kang, elomari ni italeuno! Ingarenete ngikaeok, totupito ngikaramak ngiburin. Eyakasi ngapesur na eramito ngatamburin kiding. “Kipuruutu Akuj anasepich a ngitunga. Kipuruutu Ekapolon Akuj, esi ngalesea a Yakobo!” Ingareniuni Benjamen echichi kech. Sodi totupuut ngikarikok a Yuda ka ajore kech. Kiwapuut ngikapolok a Sebulun ka Naputal. Ee Akuj, idungok iyong agogongu kon, kidodiu ngikilinga lu isileereu iyong anikosi alokai kon alo Yerusalem. Kiinunete ngikapolok ngadekon kech! Kikilak Misiri, na ikoni etiengit lo eyei natiriwae, kikilak ngibukui lu ikote ngisipaan a ngimesekin ka ngimongin, tanang ngibukui ngulu kidodikinete iyong arimatoi tobuko echur. Kieala ngitunga lu eminasi ejie ngulu! Ebuni ekaweikinan alo Misiri. Ngitunga a Kuch,*g** einunete Akuj ngiboro kech. Toeokisi Akuj, ngapolosio a akwap. Toeokisi Ekapolon ipuruunito. Ekapolon Akuj na itorit nadis, adis na kolong ngorot. Topupok ngesi iremari tobelak. Tolimosi agogongu a Akuj. Eyei akibuseanu keng Isirael. Toyei agogongu keng nadis. Erai Akuj naketubulon eyei nikeng ni italeuno. Erai ngesi Akuj a Isirael! Einanakini ngesi ngitunga keng ngikilinga ka apolou. Akuj kipuroe! Ee Akuj, toyuunae ayong. Anangut ngakipi lodokole kang. Keliko ayong echoto lokaalan, emam nikaagongon awaar. Adakakin ayong nituluk a ngakipi, edikino ngitoroi kanyamete. Kaburu ayong akigoro abala toyuunae, aono tani edokole kang. Etaapirik ngakonyen kang ani angolengoleto akingarakino kon. Elalak noi ngitunga lukaremokino ayong pas, idwangit ekimar kech tani ngitim a akou kang. Kesudioto ayong ngimoe kang ngakiro. Egogong kesi noi, esakete akiar ayong. Esakete atobuak kesi ngiboro lu kolong nyekokoeara ayong. Ee Akuj, iyeni iyong abangaanut kang. Nyidaitae ngasechesea kang anikon. Ekapolon lo irai Ekapolon Akuj, Nyiichamu lu kigienokino iyong irumete ngileech kotere ayong. Ee Akuj a Isirael, Nyiichamu lu kisakete iyong ekianare kotere ayong. Erai iyong ngesi keyenyere ayong, nabo iyong ngesi kerumitotor ayong ngileech. Ekok ayong epeyonon ani kata lokaatokang. Nyakayenete ayong ngitunga a awi kang. Kanomit ayong eger lo aminar akai kon. Ekiyeny daang lo kiyenyere iyong, aliwor ekang. Na etiditeunor ayong atoron akimuj, keyenya ngitunga ayong. Ani anapi ngikuniae egor, katokianatar kesi ayong. Kaswamatar kesi ayong alorotin. Ani ngulu ilewat, karamanakis ayong ngieosio. Ani eliwor ayong, kelipi iyong Ekapolon Akuj. Akuj kiikinae ayong esaa lo isakea iyong. Topupok kare ngakiro kang Akuj, kainyo etiono amina kon. Irai iyong ekayuunan lo emunoi. Kipudunoe ayong alochoto, nyekepok. Toyuunae ayong alomoe kang. Toyuunae anakipi anatuluk. Wara akaale nyekewoko. Wara nyeilokin nituluk kori nyaaloma naliel. Kiikinae ayong Ekapolon Akuj anajokis a amina kon ana nyedaun. Toreeun nikang kotere ngisien kon luationok! Nyikimulen ayong, ekasuban etich kon. Topupok ngakiro kang tokona, kainyo ayei ayong lochan. Taapuu nikang toyuunae. Talachakinae ayong alomoe kang. Iyeni iyong eger lo keyenyere ayong. Iyeni iyong ngileech kang ka eger lo nyakarimare. Iyeni iyong ngimoe kang daang. Etililimiyosi ngiyeny etau kang, keloo ayong. Etamit ayong atamar kori kesieniyo, apot nyiikokis neni, atama kori kesililingio, nakaneni nyisililinga. Kanyamit ayong akoro, kainakis kesi ekitoe lokaaran. Kanyamit akure, kainakis emuna loadwaran. Kimiekisi ekimuje lokaalan toliwor eloit kech. Toliwor ngakipeyos kech ni edakakinosi kesi. Kitumudukan ngakonyen kech nyiiteeto akwap! Kitiliwo ngigurae kech lu ichanete kesi. Tonyunyurikin kesi, kimiek angoit kon kiruko ka kesi. Kidongo ngadakarin kech eraakasi ngawiyei ngorok. Tongop itwaan idongi eyari aloeaman kech. Eboliatar kesi lu kolong irira iyong. Iatanakinete ngaporos alu kolong iwani iyong. Kirira kesi kotere aronis kech daang. Nyiirimak kesi jik. Kimiek ngirora kech kikisarae anakitab alu eyarete. Nyiimarakin kesi ni igiritae ngitunga kon. Nakaneni adeaka ayong nabo keloit. Ee Akuj, kikeunae ayong, kitoyuu! Epuruuni ayong Akuj aeo. Alimori apolou keng ani abuakinea alakara. Italakari ibore ngini Ekapolon Akuj noi akidwang akipeyokin ngesi aite kori emong. Eanyungarete lu ichiakiaritae nguna talakaros. Epwatunosi ngitai alu ilipito Akuj. Epupi Akuj ngakiro a ngikebootok, nabo nyimenyarit ngesi ngitunga keng lu eenitae alojela. Esi adis ka akwap, kipuruutu Akuj. Anam ka ibore daang ni eyei nanam, kipuruutu Akuj. Eyuuni Akuj Yerusalem, sodi tobongok ere a Yuda akiduk. Elomete ngitunga keng neni kiruma akwap. Irumete ngalesea a ngikasubak etich keng, ani ngulu eminasi ngesi, elomete neni. Akuj, toyuunae kare! Ekapolon Akuj, kingarakinae atipei! Kimiekisi lu esakete akiar ayong kiruma ngileech ka ngibiler. Kimiekisi lu elakara ani aanyunitor ayong ngichan tobuarae akamaluwot, tokienare. Kimiekisi ngulu kakianatar ayong kiruma ngileech ani edwangere. Ani ngulu daang kisakete iyong, talakaros ka akimaritetere. Kimiekisi ngulu daang eminasi ayuuno kon, tolimuunut jiik ebalasi, “Epol Noi Ekapolon Akuj!” Nakaneni apalag ayong emam kona engarakin, Akuj, bua kare atipei, Akuj kang! Ee Ekapolon Akuj, irai iyong ekayuunan kang lo kingarakinit ayong! Ekapolon Akuj, iyong kamechi ayong, nyikimiek kare kesurumio ngileech! Kotere ateneanut kon, kingarakinae ayong atopuun. Todeta akit kiira ngakiro kang, kitoyuu. Toliwor ataaba kang na amechi ayong, awas nakaagongon ayuunor ayong. Iyong ngesi kamechi ayong atoyuunor. Akuj kang, toyuunae kare ayong ani eyakasi ngitunga luaronok. Toyuunae anagogongu a ngitunga alukamoitanak, toroko. Kainyo iyong Ekapolon ngesi kegieno ayong. Kamuno ayong iyong napei kolong eringa asorokana. Kegienokin ayong iyong napei kolong kedounere. Kiyok iyong ayong napei kolong kedounere. Epuruuni ayong ekiro kon jiik. Aliwor ayong ekitetemes a ngikaalak, kainyo iyong lokaagongon amechi ayong. Ilelebun ekipur kon nakituk kang, ka aruonu kon apaaran juui. Nyikinger ayong ngirwa lu amojongea lugu. Nyikiisik ayong tokona ani apalagagea. Esakete ngimoe kang akiar ayong. Keruorotor, katukuotor. Ebalasi, “Aisiki Akuj ngesi. Atasakasi erumutu, kainyo emam ikayuunan ngesi!” Wara nyiichadar kare anikang. Akuj kang, bua atipei kingarakinae. Kimiekisi lu kalosikinito ayong kidwangae ka akinyasuno. Kimiekisi lu esakete akiwan ayong kiruma ngileech tokienare. Nakaneni kegienokin ayong iyong jiik. Arubakini akipuruunit iyong. Alimori ayong ngakiro a ajokis kon. Eruoro apaaran juui ngakiro a ayuuno kon, tani kelalak ngakiro nguna akidwang na apedori ayong akiyen. Ekapolon lo irai Ekapolon Akuj, epuruuni ayong agogongu kon. Alimori ajokis kon, na erai akon bon. Ee Akuj, kitatam iyong ayong napei kolong adit. Eringa alimonori ngakiro kon nakatalarak. Nyikiisik kare Akuj tani kamojongit karai ekasukout lo a ngakorwo. Kimiekinae atolimok ngalesea na isidiuno, ngakiro kon nakatalarak, ka agogongu kon. Akuj, enangit ateneanut kon nadis. Isub iyong ngakiro naationok noi. Ngae iche ikwaan ka iyong? Kiinu iyong ayong ngichan ka ariaba, nakaneni kitogogongi iyong ayong nabo. Alotooma akwap, kikeuni iyong ayong. Iatakini iyong arimatoi kang, kisililing nabo. Kepuruuni ayong iyong a agita. Kotere ni iraakar iyong nakimunoi, Akuj kang. Arami agita kang katoeonok iyong, Akuj na italeuno a Isirael. Emaritete ayong kaeonokini iyong. Aeokini a etau kang kadaang, kainyo kiyuu iyong ayong. Alimori ayong ateneanut kon apaaran juui, kainyo lu esakete akiwan ayong, eruma ngileech akianare. Ee Akuj, kitatam ekapolon akitiriyan ngakiro loger kon. Kitaanyu ngesi ateneanut kon, topolokinio ngitunga kon a ateneanut ka apolokin lukebootok itiriyanit ngakiro. Kimiekisi ngimoru kitaanyut ngitunga ekisil ani ngimukur yaut ateneanut. Kimiek ekapolon toik ngikebootok, kingarak lu ichanasi, ka akipudaar lu ichiakiarito kesi. Torup ekapolon loger a akolong, ka elap, analesea kadaang. Kimiek ekapolon kikok akiru na etepi namanat, kikok elimlim lo itililimi ngalup. Kisikokin ateneanut ngirwa lua apolou keng. Min ekisil tanang ngirwa lu engopea elap. Epolokini ngesi napei ananam a apei tanang nache. Epolokini napei anangolol a Eupurate tanang ni esalunitor akwap. Ijuuruyete ngitunga lua ariet alongaren keng. Edakakinosi ngimoe keng kwap. Ngikapolok a Sipania ka lu eyakasi lokwarea, einakinete ngesi ngainakinet. Ngikapolok a Arabia ka Isopia einunete ngesi ngadekon. Erimasi ngesi ngikapolok daang a akwap. Esubete ngibukui daang etich keng. Eyuuni ngesi ni ichana na enyaraa ngesi. Eyuuni ekebootonit lo emam ekengarakinan. Isieniyete ngesi lupalag ka lukebootok. Eyuuni lu ichanasi. Eyuuni kesi tojongoi akichiakiarit ka akidem ngiboro. Ejoikinit ngesi akiyar kech noi. Ekapolon toyei! Kimiekisi ngesi nakinae egolit lo eyaunitae alo Arabia. Kilipakinae ngesi Akuj jiik. Apiaro a Akuj kiruko ka ngesi apaaran juui. Tokoko ngamanat lokojokon anakwap. Kimiekisi ageor tongii alokidiama ngimukur, talalaar loger ana eyei Lebanon. Kimiekisi ngirerea kilelebun ngitunga loger a ngaroatin ana epetakina enyait. Ekiro a ekapolon tolimitetei jik. Ekipur keng torub loger a akolong. Kimiekisi ngitunga daang topiarae kotere ngesi. Enyaraate ngesi ngibukui daang lo epiaritae. Kipuroe Ekapolon Akuj, Akuj a Isirael! Ngesi bon esubi ngakiro nakatalarak. Kipuroe jik ekiro keng lokaruon! Kilelebun ekipur keng nakwapea daang. Aamen, Aamen! Ni erai esal a ngakilipasinei a Daudi alo arai lokookeng a Yese ngesi nege. Ejok dir Akuj ani a Ngisirael. Ejok ani eyakasi lu ikiuna ngitai. Nakaneni ani eliwor ayong, edikino adakar, echiesi ayong anidiochichi. Ikoni neni, keterekuyarete ayong lukenisak, ani engolikinea atamar isikokina luaronok. Emam ngichan eanyunete kesi. Elangir kesi ekilikilete ngawat. Nyeriabasi kesi loger a ngitunga aluche. Nyeanyunete kesi ngichan lu eanyuununete ngitunga luche. Kotere nguna, enapito kesi ekinis loger a akoromwae ana emosiring. Enapito ademanu loger a eworu. Elekete ngitai kech aronis. Ani ngitamen kech, naaronok etukosi akisub. Ekianatar kesi ngitunga luche kiruorotor naaronok. Inisasi kesi, toreta eger lo ichiakiareta ngitunga luche. Iyenyete kesi Akuj anadis, kiwoganakinete ngitunga anakwap. Iwapanakinete tani ngitunga a Akuj kesi, tonupa daang nacha elimunete kesi. Alimunete kesi tamasi, “Ikokini Akuj eyeni ai? Eos sek Akuj na Epol Noi a?” Ikote ngitunga luaronok neni. Ejakaanito kesi jiik, kiatakis ebari kech. Ikwa tokona ibore en, ekiuna ayong pas a, ebooyi emam akisech asub a? Akuj, apaaran juui, kedes ayong. Ataparach daang, kaboliare ayong. Arai eruor nguna loger kech, pekeringa ayong kemarunitae atamar ekoni ngide kon. Abu ayong atasak eger a akiroit kana, nakaneni totioner akiroit ngina noi anikang, tanang alosi ayong atoloma kai kon. Sodi atoyen ngakiro na eanyunete luaronok. Iteni dir, iwaakinit iyong kesi nichurut ni edakakinotor kesi lochan! Inyasunio kesi atipei, tadaunos a epit aloaronon. Ee Ekapolon Akuj, na inyounio iyong, tongopiasi kesi loger a akirujare ana engopi nataparach na ekienyunea itwaan. Naketilileta ayong ngakiro, katonoma etau, abu ayong atabangaaner kewaa, ekok etiengit alongaren kon. Tani ikoni neni, kirukit ayong ka iyong jiik, itingit akan kang na aloteten. Kirikit iyong ayong kitatami, ani erumor kipeyou a arimatoi. Ngae iche kengarakini ayong anadis pearai iyong? Ani kaliworo ayong ikon, nyo nabo iche asaki anakwap? Tani kapalag ayong, iyong Akuj irai ngikilinga kang. Iyong bon kasakit jik. Lu itiakasi ka iyong, emunyar dir. Imunyari iyong lu kimorete iyong. Ani eliwor ayong, ejok ayakau diyete Akuj. Ekapolon lo erai Ekapolon Akuj ngesi amechi ayong. Alimori ngakiro daang nakasubea ngesi ayong. Akuj, nyo kichakarea iyong sua jik? Nyo epuruunitor angoit kon alotunga kon? Kitamu ngitunga kon lu kolong iseuni iyong a angorot toliworos ngikon. Irikuni kolong iyong kesi ani araakatar ngikedalak, toliworos ekitela kon a ilope. Kitamu emoru a Sion lo kolong ilomit iyong. Kipuda asakatan naga. Enyasut ngimoe yok ibore daang alokai a Akuj. Ewangakis kesi ani edwangeta emaritetekis alokai kon. Etowaa ngapenderae kech kaneni ani edwangeta. Ekwaanikin kesi ka ngikatubok ngakito lu etubete ngakito a ngaepe kech. Tobwangabwangaasi kesi ngakito a ngidorin a akai a Akuj, a ngirokonin ka ngakujuka kech. Kinyasut kesi akai kon kinoma. Kitiliwosi ni kilipitere iyong ni nyitaleuno. Asakete amunyar sua daang. Anakwap kadaang, kinoma kesi ni italeunitoe. Nyeringa sua kianyungari ngakitoodikinet! Emam nabo ekadwaran eringa eyei! Nyikiyeni atamar ikokinete ngakiro nege tanang ori! Akuj, kikianatar sua ngimoe tanang ori? Kiyenyete iyong jik a? Nyo iwounitor iyong akingarakin sua? Nyo iwounitor iyong asubakin ibore idio? Akuj, irai iyong ekapolon kosi napei kolong anakisiakinet. Kiyuununi iyong sua ngayuunet nakaalak. Ipaki iyong ngakipi a anam a agogongu kon anaationon. Tobwang ngakies a ngitieng aluliwoyek a anam. Ibwangi iyong ngakies a Ekipe alo anam alo enyaritae Lepiasan, kisumuj akiring keng ngitieng a ariet. Iteleleu iyong ngileleae ka ngayana, kitoon ngangololin naapolok. Erai apaaran akon, erai akwaar dang akon. Isubakini iyong akolong ka elap. Igerokini iyong ngikukuorin daang a akwap. Kiwaak akamu ka akiporo. Ee Ekapolon Akuj, toyen atamar kikianatar iyong ngimoe kon. Kiyenyi iyong ebukut lokabangaanan. Nyiisik ngitunga kon lu emam ikengarakinan, toisikinea ngimoe kech lukamoitanak. Wara ngitunga kon lu eboliare nyikimuriakis iyong. Kitamu achamunet nakichamakin sua ka iyong. Ni eribokinit anakwap kadaang, ileleba ekurikur. Wara lu ichiakiaritae nyeanyut ngileech. Kimiek lukebootok ka lu ichanasi kipuruut iyong. Akuj, tonyou kare tolim nakon! Toyen atamar kikianatar iyong ngitunga lukabangaanak apaaran juui. Wara nyikimuriak echale a ngimoe kon, ka ekurikur lo echalatar lu kitepegete iyong. Ee Akuj, kibuakinit iyong alakara, kibuakinit iyong alakara! Kilimorit eger lo ipoloo iyong, esisaate ngakiro nakatalarak isub iyong. Ebala Akuj “Akolongit na aseunit ayong, atubi ngakiro eriyan. Tani kemaraniki akwap ka ibore daang ni eyei nakwap, ayong ngesi egangit ngapirio keng. Alimokinit lu iwogasi abala, ‘Tojongoto akiwoga’, ani luaronok, ‘Tojongoto akikiarit ngakonyen. Tojongoto akikiarit ngakonyen iteete adis, kori nyiiruor iwogasi.’ ” Nyebuni akikeuno alo kide kori alo too. Nyebuni alokwap kori alokuju. Akuj alope erai akatubon ngakiro, etiyauni ipei, kikeu niche. Etingit Ekapolon Akuj ekopo anakan keng. Ileleba emuna loadwaran a anyunyura keng. Idokuununi ngesi tamata luaronok daang. Emasete kesi kitaauyosi. Nakaneni alakar ayong jik. Aeokini epuruunit Akuj a Yakobo. Emunauni ngesi agogongu aluaronok, kiatak agogongu alu etenooko. Eyenio Akuj alo Yuda. Erimae ekiro keng alo Isirael. Eyei awi keng Yerusalem. Elomit ngesi moru a Sion. Abili ngesi ngimalea a ngimoe kaina. Tobil aupwal, ka ekileng, ka ngiboro a ejie luche daang. Ee Akuj, ibus iyong tarai nakituruunitoe! Ijakaanit iyong noi ibonguni alomoru, alu idwangea ngimoe kon. Ademar ngasigerea nakajwok kech daang ngiboro lu angatarito. Ejotoote tokona kesi etoakito. Abu ajwonu kech daang toliwor aka pas. Ani ikilakini iyong kesi, iyong na irai Akuj a Yakobo, apot ngangolei ka ngikameak ngangolei tadakakin kwap, totoaka. Nakaneni iyong Ekapolon Akuj, kikerito daang. Emam itwaan ewei alongaren kon napei ingoea iyong. Itub iyong ngakiro iyei nadis, toem akwap kililing chek, na inyounio iyong akitub ngakiro, na iyuunea daang lu ichiakiaritae anakwap. Eyauni anyunyura a ngitunga ekipur nikon. Lu epuunosi alojiesinei, irichakinete ngitalio a ngisukukui kon. Kiyookisi na ikongokinito esi Ekapolon Akuj, na erai Akuj kus. Kimiekisi daang lu eapiyete inut ngesi ngainakinet. Ngesi na eemitae. Itiditeuni ngesi lu eyenikinitae kiwogas, kitoem ngikapolok lu eyenikinitae. Ekaloikinit ayong Akuj eute. Ekaloikinit ayong eute, kiirarea ngesi ngakiro kang. Akolongit na a ngichan elipi ayong Ekapolon. Akwaar kiiya ebakinit ngesi ngakan elipit. Nakaneni anger etau kang akisililingo. Ani etamuni Akuj, atoriabakin. Ani etamari ngakiro keng, atolilimiyo. Nyeketubunakini ngesi ayong ngakonyen akwaar kiiya. Echanakin ayong noi emam tani kona eruorikini. Etami ayong ngakiro a ngirwa alu kolong ngorok. Etamunit ngikaru lu kolong kanuan. Etami ayong akwaar kiiya kiwala. Etamanari ayong engis kona, “Ekoe, kinger sua Ekapolon jik a? Ikwa nyeringa nabo kimina sua? Kengop amina keng na nyedaun a? Nyeringa ngesi iyookino akichikakinet keng a? Ekoe, kimuriak Akuj akisienut a? Ekoe, kipudo angoit keng apalaanut anikeng a?” Abu ayong atolim atama, “Ibore ni kawanit ayong noi, ngesi akiyen atamar nyeringa Akuj erai na Epol Noi!” Etamuni ayong ngitichisio kon, Ekapolon Akuj. Etamuni ngakiro nakatalarak na kolong isubi iyong. Etamuni ayong daang na isub iyong. Etamanari ngitichisio kon luationok daang. Ee Akuj, italeuno erot kon. Emam akuj epol loger kon. Irai iyong Akuj na isubi ngakitoodikinet nakailiilok. Idodiuni iyong agogongu kon alobukui. Iyuu iyong ngitunga kon a agogongu kon. Ee robo, ngalesea a Yakobo ka Yosep. Akuj, nakianyungareta iyong ngakipi, apot toema. Ee robo, tamaranik nituluk a ngakipi. Tobukut ngidowon ngakipi. Togirok kidiama torikirikok. Kimileu wadaang. Tobelak Ekipe, Kinwaku akwangis a akimilea akwap. Tamaranik akwap torikirikok. Itori iyong kiding ngitoroi a anam. Totenik anam nituluk, nakaneni emam itwaan aanyunga ngakejen kon. Irikit iyong ngitunga kon loger a ekeyokon, erai Musa ka Aron apolokinito. Ngitunga kang, topupokisi ngakitatamet kang. Todetasi ngaki kiirasi ngakiro kang. Eruorikini ayong ngakitadapet. Esisau ngamunonoe na kolong ngorok. Ngakiro na kolong kiirari ngoni atoyena. Ngakiro na kolong kilimokinete ngoni taapayok. Nyikimunoni alode yok. Kisisakini anaket na isidiuno ngakiro a apolou ka agogongu a Ekapolon Akuj, ka ngakiro nakatalarak asubi ngesi. Nak ngesi Ngisirael ngitalio. Todungok ngalesea a Yakobo ngakiro. Tolimok taapaayok atamar kitatama ngide kech ngitalio keng. Sodi toyenea anaket na isidiun, ani lu idounio ekisidi toyena, tolimokineta kesi dang ngide kech. Ani kikokis neni, igienokinosi Akuj, nyiimuriakis na asub ngesi, pearai toliwor iwapito ngitalio keng jiik. Nyiikokis kesi taapaakech lukechanak nyeepupete ngakiro. Araakasi kesi lu egienosi Akuj wadiochichi, towout amunokin ngesi a ngitai kech. Ngitunga a Epiraim lu atingito ngakawa ka ngimalea, tobongosi akamaluwot akolongit na ejie. Nyirichuna kesi achamunet a Akuj. Towout akiwap etal keng. Kimuriakis kesi ngakiro na kolong asubi ngesi, ka ngakitoodikinet nakailiilok na engolikinete kesi esubi Akuj. Asubi Akuj ngakitoodikinet nakailiilok iteete taapaakech anaro a Soan anakwap a Misiri. Tapak ngesi ngakipi a anam kisitor kesi. Kitowo ngakipi loger a ngawasea. Torik kesi a edou naparan, ani akwaar kiiya torik a akim ana anoki. Tapak ngesi ngatabab anariet kitamat kesi ngakipi na aokuniyo anituluk. Abeluni ngesi ngakipi anataaba, toleleut loger a angolol. Tani ikoni neni, apot kesi torubakis esechakinito Akuj. Tongero Akuj na Epol Noi anariet. Kiyechakis kesi akining Akuj, ani asaketa Akuj nak kesi akimuj na emuit. Apot kesi kitopega Akuj ebalasi, “Ekoe, epedori Akuj ainakin ngoni akimuj anariet a? Iteni dir arami ngesi ataaba, totulakanyuun ngakipi kilelebun ngingololin. Epedori dir ngesi akipotor akimuj a? Einakini ngesi ngitunga keng akiring a?” Tongo Ekapolon Akuj na eirarea ngakiro nguna, tonyunyurikin ngalesea a Yakobo. Tongoik ngesi Ngisirael noi, kainyo peanupito ngesi, nabo nyigienokino kesi atamar kiyuuni Akuj. Tani ikoni neni abu ngesi todungok ngidowon alokidiama, todungok ngidorin a adis atamar tangaaros. Nak kesi ngikinyam a adis ani etetepea manna tanyama. Apot kesi tanyama akimuj a ngimalaikae, nak Akuj kesi akimuj a alalau. Kitukut ngesi ekuwam lo a akide. Kotere agogongu keng, kilirak ekuwam lo alokuju. Tachaku akiring nakaalan lotunga keng, ee robo, ngikieny lu etia asinyen na ekwaas a anam. Todoto ngikieny ngulu kiding adakar kech, kiriama ngieman kech daang. Apot ngitunga kirajakin kimwoko. Nak Akuj kesi ibore ni emuit. Nakaneni ani eringa ekimue kech nyedauna, ani eringa akimuj eyei nakituk kech, abu Akuj tongoik kesi. Taar ngikiliok lua ngikilinga anikech, kibusok ngisorok lu ekileenikinit alo Isirael. Tani ikoni neni, torubakis ngitunga esechanakinete Akuj. Tani na asubea ngesi ngakitoodikinet nakailiilok, towout kesi akinup. Abu Akuj kitongopia ngirwa kech loger a akianget, ani akiyar kech, kiriamun ka naaronok. Ani eari ngiche, toreeunos lupiyayek nikeng. Tolunga kesi akisech, kilipa Akuj lokojokon. Kitamut kesi atamar Akuj erai ataaba kech, Akuj na Epol Noi ingarakini kesi. Nakaneni araakasi ngakiro kech daang alioko. Emam na eruorosi kesi na araakasi iteni. Peamunosi kesi ngesi a ngitai kech. Peerichakinito achamunet keng. Nakaneni esienito Akuj ngitunga keng. Torimak kesi nyemunyara. Ngirwa ngikaalak kiratak angoit keng, kiapak anyunyura keng. Kitamu ngesi atamar eraakasi kesi lu epedorete akitu, lu ikote ekuwam lo ipinupinuun topuripuriakin. Ngirwa ngikaalak angereenete kesi Akuj anariet. Kisialolongo kesi ngesi anariet! Kiningeeneto kesi Akuj jiik. Kitongoa Akuj na italeuno a Isirael. Kimuriak kesi agogongu keng naationon. Kimuriak tani akolongit na ayuunea Akuj kesi alomoe kech, tosub ngitichisio lukationok alo Misiri, ka ngakitoodikinet nakailiilok anaro a Soan. Elochi ngakipi a ngangololin toliworos ngaakot. Tongopikis Ngimisiri ngakipi emaase. Tomeu ngichuch nikech kichana, ka ngakidodoka na enyasunete akwap kech. Tomeu ngesi ngikutelei tanyama ngalemet kech, kirikasi ngimases ngamanat kech. Kinyasu ngimusabib a ngamoru a akiru, ani ngimeyana kech, kinyasu a eloch. Aari ngaatuk kech a ngamoru a akiru. Ani ngamesekin kech taar a akimilea. Abu ngesi kisialolong kesi noi, tobukok kesi anyunyura keng naaronon a ngichan, apote ngimalaikae luaronok nikech eyaunito akitu. Abu ngesi nyiiratak angoit keng, kori nyiimiek kesi epuunosi. Taar kesi daang a edeke aloaronon. Taar ngide lusapa lu ekingaren a Ngimisiri kadaang, lu araakasi ngikilinga a adwarun kech. Kitowot ngesi ngitunga keng loger a ngamesekin, torik anariet loger a esipanit a ngibaren. Torik kesi niajokon, nyeema kesi. Toleleu anam tanyam ngimoe kech. Kitowot kesi nakwap keng na italeuno, lomoru lu alemari ngesi a agogongu keng. Kitwarak ngesi ngibukui eloose Ngisirael ngaren. Totiakak Ngisirael akwap kech. Nak ngitunga keng ngawiyei kech. Tani ikoni neni, apot kiningo Akuj na Epol Noi tongero. Towout akirichakin ngakiro keng. Apot kesi tongero Akuj tosuba naaronok loger kata apaakech. Kibataros loger a emal alo erii. Kitilileta kesi Akuj ani elipitotor ngakujo nagelayek. Kotere ngakujo kech nasubuna, apot kitongoa ngesi. Tongo Akuj na engolikinea ngakiro nguna, tonger ngitunga keng jik. Tapalik ngesi ni eboyeeneo alo Chilo. Ni ebooyo ngesi alokiding ngitunga keng. Kimiek ngimoe elemarete asaduku a Achamunet, asaduku na erai emachar a agogongu ka aruonu keng. Tongoik ngesi ngitunga keng kimiek ngimoe kech earete kesi. Kirikarae ngisapa alojie, tongopa ngikiliok iusete ngapesur kech. Totoaka ngimurok kech alojie, nakaneni nyigoro ngaberu kech tosutonokis. Ani ekisidi tonyou Ekapolon esibit kejotoe sek. Ekoni ngesi ekile lokaagongon lo emerakina kotere emuna. Etijikini ngimoe keng tobua akamaluwot. Kisurum kesi ngileech lukajik. Tonger ngesi ngalesea a Yosep, towou aseun ekitela a Epiraim. Abu ngesi toseu ekitela a Yuda ka emoru a Sion lo emina ngesi noi. Todukok ngesi akai keng neni ikwaan ka akai keng na eyei nadis. Kitogogong ngesi jik loger a akwap. Toseu ngesi Daudi, ekasuban etich keng. Toriku ngesi anachokor. Anyarae ngesi iyoki ngibaren keng, kitiliwo ngesi ekapolon a Isirael, kiyokio ngitunga a Akuj. Alemuna Daudi lokojokon akiyok kesi, totwar echoikinit noi. Ee Akuj, aremo ngibukui lugelayek akwap kon. Enyasut kesi akai kon na italeuno. Emiekis Yerusalem erai asakatan. Emiekinete ngawat a ngitunga kon enyamete ngataruk. Kimiekis ngibuin enyamete ngawat a ngikasubak etich kon. Aleleut ngaakot alo Yerusalem loger a ngakipi. Emam ikanukan kesi. Kiyenyete sua ngibukui lu kidunyar. Kikianatar kesi sua kijamuarito. Wae! Ekapolon Akuj, nyedaunun kolong angoit kon a? Erirae anyunyura kon loger a akim tanang ori? Tobukok anyunyura kon lobukui lu nyikikerito iyong. Tobukok anyunyura kon napolosio na nyikinyarito iyong. Kainyo aar kesi ngalesea a Yakobo na eraakasi ngitunga kon, kinyasut akwap kon. Nyikirira kotere ngasechesea kata apaakosi. Kisienoi sua atipei, emam ibore eringa sua kigieno! Akuj, kingarakinae kare sua, kitoyuu. Toyuunae kitorimak ngasechesea kosi, kipuruunere ekiro kon. Nyo kingisitotor sua ngibukui ebalasi, “Nyaani Akuj kus?” Kimiekinae sua ataanyungasi eger lo iriraa iyong ngibukui lu abukorete ngaakot a ngikasubak etich kon. Kiira akunua alu eenitae. Kotere agogongu kon, toyuu lu esakio akiar. Ekapolon, kotere ngiyeny lu kiyenyeta sua ngikidunyet kosi, tobongokis kesi ngabongokinet ngakan-kaarei. Ani sua ngitunga kon, lu kirai ngamesekin kon, kibuakini iyong alakara jik, ka akipuruun iyong ngirwa daang. Todeta akit, Ekeyokon a Isirael. Iyong lo irikit ngalesea a Yosep loger a ngamesekin. Iyong lo ibooyi alokidiama ngiborei lua ngabeben. Kidodiun ani a ngitela a Epiraim, ka Benjamen, ta Manase. Kidodiu agogongu kon. Bua toyuunae sua! Akuj, kitojokae sua nabo, kisienoi sua atoyuunotor. Wae Ekapolon Akuj Namerikanyer, ingoikini iyong ngakilipasinei a ngitunga kon tanang ori? Akialolong itarau iyong akimuj kosi. Ngakiyo na eropiyete kitamasi iyong sua. Imiek iyong ngibukui lu kidunyar sua emoriate akwap kosi. Kiyenyete sua ngimoe kosi. Akuj Namerikanyer, kitojokae sua nabo, kisienoi sua, atoyuunotor. Iyauni kolong iyong emusabib alo Misiri. Kirita ngibukui lugelayek, sodi kitak emusabib nakwap kech. Ibu iyong tokurwo ni erupunea. Kilijakin ngaten keng nalup, kineineasi akwap wadaang. Kimuk etorube keng ngimukur. Kiniapar ngasepukan kech, alochekereng aluapolok. Kikobaros ngasepukan keng tananga nanam a Mediterenian. Toliasi ngaten keng tananga lokwaas a angolol a Eupurate. Nyo kolong iyatarea iyong ngawasea na eriamito ekitoe ngolo? Aliwor tokona itwaan ni itoruni neni daang, ekokoi emusabib. Ipudaate ngiputiro, tadaka ngitieng a moding. Toreeun nikosi, Akuj Namerikanyer! Tokienyu anadis nikosi. Bua toyuu ngitunga kon. Kirichak emusabib lo kolong itakini iyong a akan kon. Emusabib loochi iturupuni iyong togogonger. Enoma ngimoe ekitoe ngolo, atubosi. Tonyunyurikin kesi tomunya. Toik iyong ngitunga lu iseuni iyong. Ebukut lo itogogongi iyong. Nyeringa nabo sua kibatar anikon. Kiteyarae sua, sodi epuruutu iyong. Ekapolon Akuj Namerikanyer, Kitojokae sua nabo, kisienoi sua, atoyuunotor. Kimariteteeto ani a Akuj, ana erai akaean yok. Kikutakisi Akuj a Yakobo. Kikamasi eeos tarama atamburin. Tarama ngagitae toeokis eeos lokebusean. Tokutakisi aburuch kotere esukukuu lo eanyungarere elap, ka ngirwa lu ekwangia elap. Erai ibore en etal alo Isirael, lo edungunit Akuj a Yakobo. Adungokini ngesi Yosep ngakiro nguna na eriraa Akuj akwap a Misiri. Apupi ayong etoil lo nyayeni ebala, “Alema ayong ngiegosio alosegeta kus. Kemiek ayong esi kiwaakis kwap ngimataparea lu idakito. Ani ianyuni ngichan, kitanyar ayong, katoyuu. Ani na adukitor ayong anagiro, abu keik iyong. Kening ayong iyong anakipi a Meriba. Kiirasi ngitunga kang, ngakiro nakechikichikea esi. Isirael, arai bo kiirari ngakiro kang dang! Nyeemin akuj nagela nikon. Nyiilip jik akuj ache. Arai ayong Ekapolon Akuj na arai Akuj kon, na kolong kepuduni iyong alo Misiri. Tangaa akituk kon, sodi kesimuj. “Nakaneni towout ngitunga kang apupokin ngakiro kang. Towout Ngisirael akiwap ngakiro kang. Kotere nguna, emiekinea ayong kesi ngakiro a ngitai kech alukesiak. Kiwapa ngakiro kech a ngikulepek. Arai bo kiirasi ngitunga kang ngakiro kang dang! Arai bo kiwapa ngirotin kang dang! Kepiyo ayong ngimoe kech atipei, edwang daang lu eremokino kesi. Ani lu karemokino ayong, keriedikito alongaren kang emaranete, toliwor eriras kech lokajik. Ani iyong, ketan a ngakanoi anaajokak, kesimwon a akimiet a ao ana ataaba.” Epolokinit Akuj atuk a adis. Etubi ngakiro ani iriamito ngakujo. “Tojongoto akitub ngakiro a erot alo nyeriyan! Tojongoto aikinit luaronok. Tosubeta lukebootok ka lukokiok ngakiro na eriyan. Lu ichanasi ka lu ichiakiaritae, tosubete na etenooko. Toyuutu lupalag lu emam kona ingarakinosi. Toyuutu anakan a ngitunga aluaronok. “Nyiosok esi kori nyichwaaka! Iloose anaribu. Enyasun ngakiro a akwap daang. Alimuni ayong atama, ‘Iraakasi esi ngakujo. Ikote esi daang talokookeng a Akuj ana Epol Noi.’ Tani ikoni neni, itoakete esi loger a ngitunga. Edaun akiyar kus loger a ekapolon a eche kadaang.” Tonyou kare Akuj totub ngakiro a akwap. Kainyo eraakasi ngibukui daang ngikon! Nyiililing kare Akuj! Nyiidatak kare Akuj, kori nyiichakin chek! Kingolik a, alomakis ngimoe kon ekurikur. Lu kiremokino iyong, ekeasi ngakonyen kech iwogasi. Etukito kesi akiwan ngitunga kon. Iruorotor kesi ngulu iyoki iyong. Ebalasi, “Potu atomunyasi ebukut kech, tojongoore tani alimit ekiro a Isirael.” Echamakinosi kesi topupokinos, kimorikinos aapei akitopeg iyong. Ngitunga a Edom ka Ngichimael. Ngimoab ka ngitunga a Agar. Ngitunga a Gebal, ka Amon, ta Amalek. Ngitunga a Pilistia ka lua Tiro. Ebak Asiria dang alowae kech, aiki ngalesea a Loti! Tosubakinea na kolong isubakinea Ngimidian, tosubakinea Sisera ka Yabin anangolol a Kichon. Imunyari iyong kesi alo Endor, tobosikis ngawat kech nalup. Tosubea ngikapolok kech na kolong isubea Oreb ka Seeb. Kidwang ngikapolok kech daang loger lo idwangea Seba ka Salimuna, lu alimunete tamasi, “Atolemasi ngalup a Akuj.” Akuj, kieala kare kesi loger a apua, loger a nginyia alu ekutari ekuwam. Loger a akim ana enomi amoni, loger lo inometa ngasarae ngimukur, kitwarak kesi a ekuwam kon sodi kitubul kesi a ngikuwamea kon aluationok. Tobutak ngileech loreetin kech, Ekapolon Akuj. Topedoreta kesi akiyen apolou kon. Kimiekisi kesi kiruma ngileech tobul jik. Kimiekisi kesi totoaka aloleech. Toyena atamar iyong bon irai Ekapolon Akuj Naationon, Akuj na Epol Noi anakwap kadaang. Ibus akai kon, ee Akuj Namerikanyer! Iburakinit etau kang akimin neni! Kemuit ayong akimin kai a Ekapolon Akuj. Aeonokini ayong Akuj na eyari a etau kang kadaang ka ngikilinga kang daang. Edukete tani tanangolengor ngakais. Edukito tani talogecha ngakais. Iwaakinito kesi ngitak kech diyete ngikenoi lu kipeyonokinere iyong. Ee robo, Akuj Namerikanyer, na irai ekapolon kang ka Akuj kang! Epiaritae lu ibooyete alokai kon, eeosi jiik kipuruunito iyong. Epiaritae ngitunga lu eraakasi nikon eanyunitotor agogongu. Ngitunga lu eminasi akiwap ngirotin kon. Ani itorete kesi nadipo nakoonon a Baka, itiliworete ngileleae. Ani akiru na isiakinea atepun, kileleb ngabwelin. Isikokinosi kesi togogongioto eloose. Eanyungarete Akuj a ngakujo alo Sion. Kiira akilip kang, Ekapolon Akuj Namerikanyer, topupok kare ngakiro kang, Akuj a Yakobo! Kingolik kare a ajokis kon, Akuj kosi. Ejoikinit ingolikini ekapolon lo iseuni iyong. Akolongit apei alokai kon, ejok idwangit ngirwa abunget apei eyakare wache. Tani akiwo anakituk a akai kon ejok idwangit akiboi ka ngitunga luaronok. Kainyo erai Ekapolon Akuj na erai Akuj, erai akolong ka aupwal yok. Kitaanyuni ngesi ngoni ajokis ka arimatoi. Emam ibore ajokon imiki Ekapolon Akuj lu ibooyete eteniyete. Ee Akuj Namerikanyer, Epiaritae lu kigienosi iyong! Ekapolon Akuj, kisieni iyong akwap kon. Itaanyu iyong Isirael ekeny ajokon nabo. Irimak iyong ngitunga kon ka ngakiro na ichwangakinito kesi. Irimak iyong ngasechesea kech daang. Ipalik iyong angoikinit kesi. Iratak iyong anyunyura kon daang. Kitojokae kare sua nabo, Akuj a ayuuno kosi. Tojongo alemarit kotere sua. Tokona mono a, kingoikini iyong sua jik a? Ikwa nyedaun kolong angoit kon jik a? Nyo pekitaanyunea iyong sua eboyor lokitetet nabo, sodi atalakarotor sua anikon? Ekapolon Akuj, kidodikinae kare sua amina kon na nyedaun, kitaanyu ayuuno kon. Apupi ayong ngakiro na iruoro Ekapolon Akuj Namerikanyer. Ichikakinit ngesi ngitunga keng lu etenooko ekisil, erai pekibatarosi lorotin lua abangaanut. Iteni dir esadit ngesi ayuun lu erimasi ngesi kidongio ekipur keng nakwap yok. Iriamete amina keng ka amuno. Enuakinosi ateneanut ka ekisil. Ekurupupuuni amuno analup, etiyaun ateneanut anadis. Ee, kiinakini Ekapolon Akuj ibore ni ejok. Tokoniu akwap yok ngalemet nakaalak. Ingarenikini ateneanut Akuj tosubak erot keng. Topupok kare ngakiro kang, Ekapolon Akuj. Todeta akit kainyo keboosit ayong apalag. Toyuunae ayong anakitu, kainyo anupit ayong ngakiro kon. Toyuunae ayong ekasuban etich kon lo kegieno iyong. Irai iyong Akuj kang. Ee Ekapolon, kisienoi ayong. Kegoronokini ayong iyong apaaran juui. Ekapolon Akuj, kitalakarae kare cha ayong lo arai ekasuban etich kon. Kainyo idirunito ngakilipasinei kang nikon. Ijok iyong Ekapolon nabo irimakini atipei. Elal amina kon na nyedaun ani eyakasi lu kinyarito iyong. Ekapolon Akuj, topupok akilipa kang. Kiira akigoro na asakea atamar kingarak. Kanyarae ayong iyong akolongit na a ngichan, kainyo iikini iyong ngakilipasinei kang. Ekapolon, emam akuj ikwaan ka iyong. Emam na epedori akisub na isubi iyong. Ngibukui daang lu isubuni iyong, epote toriediko alongaren kon, Ekapolon. Ipuruunete kesi apolou kon. Igogong iyong noi tosubi ngakiro nakatalarak. Iyong bon irai Akuj. Ekapolon Akuj, kitatamae ayong elote kon, sodi ewap ayong atomunok. Torik etau kang katoker iyong. Ekapolon lo irai Akuj kang kepuruuni iyong a etau kang kadaang. Alimori ayong apolou kon jik. Elal amina kon na nyedaun anikang. Kiyuu iyong ayong analiel. Ee, Akuj, kerikaut ayong ngitunga lukewogak. Ajore a ngitunga alukamoitanak, esaki akiar ayong. Ngitunga lu nyikimisito iyong. Nakaneni iyong Ekapolon, irai Akuj naajokon na ngisien. Irai iyong na nyingoyeene atipei, na elal amina na nyedaun ka iteni. Toreeun nikang kitorimak. Kitogogongoi ayong toyuunae, ani asubea ayong etich kon, loger lo kolong asubea itiokang. Ekapolon Akuj, kidodikinae ibore ni idodiunit ajokis kon, sodi kirumeta ngileech lukaremokino ayong, na ingolikineta atamar kingarak iyong ayong kisililing. Adukoki Akuj ere enyaritae Sion, kidiama emukura keng. Emina Ekapolon Akuj Sion, akidwang wache alo Isirael. Topupok kare, ere a Akuj, ngakiro naajokak kiruorore iyong, “Alokimar alu kalimorito ayong Akuj, eyakasi ngitunga a Misiri ka Babilon. Eyakasi tani lua Pilistia, ka Tiro ta Kuch, lu iruorore ebeyo, ‘Edounio lugu dang kaina.’ ” Kotere Sion elimunio tamarae, “Edounio kesi daang alo Sion, nabo itogogongi Akuj na Epol Noi Sion.” Igiri Ekapolon Akuj ngirora a ngibukui. Igirakini ni eyei ipei kech daang kona, “Edounio ebukut logo alo Sion!” Eeonokinete kesi kidongakis ebalasi, “Sion, nikon eropuunitor apiaro kosi.” Ee Ekapolon Akuj, Akuj kang, egoro ayong apaaran juui. Ani enangi nakwaare abu nikon. Kiira akilip kang. Topupok akigoro kang na asakea kingarak. Aanyu ayong ngichan lukaalak edikino tani atoani. Kikwaanikin ayong ka ngitunga lukatoak. Adaunosi ngikilinga kang. Ekok ayong itwaan ni emuriak ngitunga alokatoak. Ekok lu aar, lu eyakasi naliel. Ekok ngitunga lu nyeringa iyong iyeni, lu nyeringa iyong ingarakini. Kiilok iyong ayong nakipany nakooyen. Kichakak nakipany nakooyen na eribokinit. Katikokin ayong angoit kon. Keliko ayong angoit kon. Kitiak iyong ayong ka ngipaalon kang, karemokinosi kesi ayong. Kainikin ayong tooma, emam kona asii. Etaapirik ngakonyen kang kotere akialolong. Ee Ekapolon Akuj, kegoronokini ayong iyong ngirwa daang, kebakinit ngakan. Nyingarakinete ngakitoodikinet kon nakailiilok ngikatoak! Nyeyarunete kesi kipuruut iyong! Elimitoe amina kon na nyedaun analiel a? Kori eyei itwaan elimit atamar kimuno iyong ani eyakasi ngikatoak? Iteo ngakitoodikinet kon nakailiilok anaribu kaneni a? Kori eyei itwaan eyeni ajokis kon ani eyakasi ngulu emam itwaan itamunit? Ekapolon Akuj, kanyarit ayong iyong asaki kingarak. Kelipit iyong ataparach daang. Ekapolon Akuj, nyo kichakarea iyong ayong? Nyo kimulenitor iyong ayong? Napei kolong eringa ayong adit, echana akot akitu. Kaburu ayong atoana, kesiasi ngimacharin lu kibungaa iyong. Kesileleny ayong angoit kon naaronon. Kenyasu ayong eger loaronon kikoponokinor iyong ayong. Apaaran juui, karounito kesi ayong loger a ngakalel. Eriamuna kesi daang nikang aapei. Kitiak iyong ayong ka talopae kang ka ngirukitos kang daang. Ayong bon edong naribu. Ee Ekapolon Akuj, aeo ayong jik amina kon na nyedaun. Alimori atamar irai iyong lo kimunoi jik. Ayeni atamar erubi amina kon na nyedaun jik. Erubit amuno kon jik loger a adis. Ilim iyong itama, “Kichamakin ayong ka eseuna kang, ekongok ekasuban etich kang Daudi abala, ‘Etiliwori alesit kon jiik ekapolon. Etiliwori ayong apolou kon na eyei jiik.’ ” Ee Ekapolon Akuj, kimiek adis kikut ngakiro nakatalarak isubi iyong. Eeosi lu italeunitoe eger lo iraakar iyong lokimunoi. Ekoe, ngae eriyan ka Akuj anadis? Emam ni ikwaan ka iyong alosubuna alu adis! Kikeritae iyong anatuk alu italeuno. Daang lu kiriamito iyong, kirimasi iyong kikerito. Ee Ekapolon Akuj Namerikanyer, ngae egogong loger kon, Ekapolon Akuj. Iyong nakimunosi daang. Ipolokinit iyong akulare a anam. Ani ekuunete ngitoroi, kisililing iyong. Irami iyong etiengit loliwo lo enyaritae Raab taar. Idwangi iyong ngimoe kon a ngikilinga kon. Erai adis akon, tarai akwap akon. Isubi iyong ngakwapea ka ngiboro daang lu eyakasi nakwapea. Isubuni iyong kwap ka kuju. Kieonokinete iyong ngimoru a Tabor ka Erimon elakara. Igogong iyong noi! Etioko ngikilinga kon! Erai apolou kon na itoweit ateneanut ka ngakiro na eriyan. Amina na nyedaun ka amuno etakani anakiro kadaang ana isubi iyong. Ee Ekapolon Akuj, epiaritae ngitunga lu eyenete akipuruun iyong a ngieosio. Ngitunga lu eloose anakicha a amina kon. Elakara kesi apaaran juui kotere iyong, kipuruunito iyong kotere ateneanut kon. Iyong irai ajakaanut ka ngikilinga kech. Kotere amina kon kisidwangi iyong sua. Kainyo erai aupwal kosi aka Ekapolon Akuj. Iyong Akuj na italeuno a Isirael ngesi kiinakini sua ekapolon kosi. Kolong a angorot, ilimokini iyong ngikasubak etich kon lu imuno, tolimok anakisingolikinet tama, “Engarak ayong ekajwon epei. Etiliwo ayong epei lo aseuni alotunga ekapolon. Aseu ayong Daudi, ekasuban etich kang, ewasak akimiet a etal. Irukete ngesi ka agogongu kang jik. Itogogongi ngesi agogongu kang a ilope. Nyidwangete ngesi ngimoe, kori nyichiakiarete ngesi luaronok. Epudaari ayong ngimoe keng. Amunyari daang lu eremokino ngesi. Amuno kang ka amina na nyedaun irukete ka ngesi. Idwangi ngesi a ekiro kang. Anyaari ayong apolou keng, napei alo Mediterenian tanang nangolol a Eupurate. Kekaloikini ngesi ayong tama, ‘Irai iyong apakang ka Akuj kang. Irai iyong ataaba kang ka ekayuunan kang.’ Etiliwori ayong ngesi euriuna kang lo ekingaren, ekapolon lo idwangit ngikapolok daang anakwap. Erichakini ayong jiik amina kang na nyedaun anikeng. Eliwor achamunet kang ka ngesi akajik. Erubi apolou keng jik loger a adis. Etiliwori ayong alesit keng jiik ekapolon. “Nakaneni ani kesecha ngalesea keng etal kang, towout akiboi iwapito na adungunit ayong. Ani kichwangakis na echikakinit ayong, towout akiwap ngitalio kang. Arami ayong kesi kotere ngasechesea kech. Erirae kesi kotere na ichwangakinito kesi. Nakaneni nyaisikini ayong amina Daudi, kori nyapalikini akirichakin akichikakinet kang anikeng. Nyechwangakini achamunet nakichamakin ka ngesi, kori nyelochi akiroit na echikakini. “Ekong ayong akikongiet apei jik kotere akitaleuno kang. Iteni dir, nyengalae ayong Daudi. Epete ngesi ngalesea jiik. Erupuni apolou keng loger a akolong. Erupuni loger a elap alo erai ekaanyunan lo emunoi anadis.” Nakaneni ingoik tokona iyong ekapolon kon loseuna. Imiek iyong ngesi inger. Ichwangak iyong achamunet na ichamakinosi ka ekasuban etich kon sodi tachakak ekiraun keng lochoto. Iuko iyong ngawasea a ere kon, sodi tobwangabwanga ngawasea keng. Ngitunga daang lu itoruunete neni ekokoyete ngiboro keng. Ekianatar ngesi ngikidunyet keng daang. Itiliwo iyong ngimoe keng daang ngikedwangak. Imiek iyong ngimoe keng daang elakarosi. Itingingi iyong ngiboro keng a ejie. Kimiek ngesi idwangio alojie. Ilema iyong aburo na eraakar ngesi ekapolon, kimasak ekicholong keng a apolou nalup. Itikidieku iyong ngirwa a esorokane keng, toburuchia ngesi a ngileech. Ekapolon Akuj, iduki iyong nakajik a? Enoki angoit kon loger a akim tanang ori? Ekapolon Akuj, kingolik mono iyong eger lo eurianea eboyor a itwaan! Toyen atamar emam ibore kolong kisubakinitor iyong sua! Ngae alotunga ibooyi nyetoana? Ngae epedori abuchun analiel? Ekapolon, nyaanu ngakiro na kolong edodiunito amina kon na nyedaun? Nyaanu ngakichikakinet na kolong ichikakini iyong Daudi? Ekapolon, kitamu eger lo eyenyere ekasuban etich kon, ka eger lo anaikinitor ekiyeny alu nyikiyenete iyong. Ekapolon Akuj, iyenyete ngimoe kon ekapolon kon loseuna! Iyenyete ngesi ani elosi kadaang. Kipuroe Ekapolon Akuj jik! Aamen! Aamen! Ekapolon Akuj, irai iyong awi kosi napei kolong kanuan. Kolong eringa iyong nyesubuna ngimoru, kori nyesubuna akwap, irai iyong Akuj nakajik, nabo iliwor Akuj nakajik. Kilimok iyong itwaan tama, “Adaunosi ngirwa kon!” Ebongori itwaan napua na kolong abunio! Anikon esibit ngikaru abunget apei akolongit apei, ikote akwaar nabeen adaun, kori ikote atiaket a akwaar! Irikari iyong ngitunga loger a akaale! Ikote ngitunga nginyia lu ekilikilete nataparach, ani ebong torinyokis tooko. Kimunya sua angoit kon. Kitubulit sua anyunyura kon. Kainyo iyeni iyong aronis kosi. Isileereu iyong ngasechesea kosi a akicha kon. Engopiari eboyor kosi kotere angoit kon, edaunosi ngikaru kosi loger a akianget. Kipedori akiboi ngikaru ngitomwon-kaarei kori ani kejok ngawat eboyoto ngitomwon-kauni. Nakaneni eraakasi daang ngichan ka ariaba! Ekerete ngirwa, atadaunos sua atipei! Ngae eyeni ationis a angoit kon? Ngae eyeni na itorunete nanyunyura kon? Kotere ngakiro nguna, kitatamae sua etiae a ngirwa kosi atopedoreta aanyun aosou. Tobongu kare Ekapolon Akuj! Ingoi iyong tanang ori? Kisienoi sua ngikasubak etich kon. Ataparach daang, kilelebae sua amina kon na nyedaun, sodi atoeokineto sua atalakaros ngirwa daang lu kiyarea. Kitaanyunae tokona ngikaru lukaalak a alakara, loger lo kolong kitaanyunea ngikaru lukaalak a ngichan ka ariaba. Kidodikinae sua ngikasubak etich kon nguna isubi iyong. Kidodik ngalesea kosi agogongu na ekipur. Ekapolon Akuj, Akuj kosi, kimiek apiaro kon min nikosi. Kitojok ibore ni kisubi sua daang! Ee robo, kitojok etich a ngakan kosi. Itwaan ni emechit Ekapolon Akuj, ngini ibooyi alotolim a Akuj Anaationon, epedori alimokin Ekapolon Akuj tama, “Iyong kamechi ayong. Iyong irai awas kang nakaagongon. Irai iyong Akuj kang, na egieno ayong!” Iteni dir kiyuuni Akuj aloloit, tobuchun alodekesinei alukaarak. Kirapi ngesi iyong a ngabeben keng. Iboikin iyong nikeng akaalimon, ikoni amuno keng aupwal na kiikini iyong. Wara nyikibul kotere na esubasi nakwaare, kori ejie lo kituumwokin naparan. Wara nyikibul kotere naaronok esubasi nakwaare, kori naaronok earete naparan. Tani kedakakinosi ngitunga ngabunge ngatomon diyete kon, kori tadakakin ngabunge ngatomon lowaitin daang, emam ibore kiwani iyong. Ingolikini iyong a ngakonyen kon a ilope eger lo iriraare ngitunga luaronok. Itiliwo iyong Ekapolon Akuj nimechat kon. Aliwor Akuj na Epol Noi ngesi igieno iyong. Kotere ngakiro nguna, emam naaronok ianyunotor iyong. Emam ekurikur eapuuni nawi kon. Elimokini Akuj ngimalaikae keng kiyoko iyong awadaang ani ilosi. Kikamunete kesi iyong a ngakan kech nyeenanga ngamoru ngakejen kon. Ichieki iyong ngingatunyo ka ngimunio, Ee robo ipudae ngitak a engatuny ka emun. Ebala Akuj kona, “Ayuuni ayong ngini kamina ayong. Aikini ngini kalimorit ayong atamar arai Ekapolon Akuj! Ani kanyarae, ekii, kiruki ayong ka ngesi na eanyunea ngichan. Ayuuni ayong ngesi etiliwo lo erimae. Etalalae ayong ngikaru keng, etaanyu ayuuno kang.” Ekapolon Akuj, ejok abuakin iyong alakara. Akuj na Ipol Noi, ejok aeo kidodikinitae iyong arimatoi. Ejok alimor ataparach daang amina kon na nyedaun, ka alimorit nakwaare atamar irai iyong nakimunoi, a ngieosio a agita ka ebune, ka erue lokebusean a agita. Ekapolon Akuj, ketalakarito ngitichisio kon luketimok. Aeokini ayong alakara kotere ngakiro na isubi iyong. Ekapolon Akuj, etioko noi na isubi iyong! Etioko ngitamen kon noi! Nyitamuni ekabangabangat akiroit naga, kori nyepedori ekawaiwaat akiyen. Epedorete luaronok arupun loger a nginyia, kisikokinos lu esubete naaronok. Nakaneni esal kech kadaang ngesi amunyar jik, kainyo iyong Ekapolon Akuj ngesi ipol jik. Ekapolon Akuj, iteni emunyarosi ngimoe lukon ngulu daang lu esubete naaronok, epetarosi! Nakaneni kiinak iyong ayong ngikilinga lu ikote lu ekosowan, kibukok iyong ayong akimiet a alakara. Engolik ayong a ngakonyen kang ngimoe kang idwangio. Eira a ngaki kang akigoro alu kasubeta ayong naaronok. Ekilikilete lu etenooko loger a eengol. Erupete loger a ngichekereng a Lebanon! Ikote kesi ekitoe lo itakinitae kai a Ekapolon Akuj, lo ekilikili alokai a Akuj yok. Tani kemojong ngesi, erubakini eyakasi ngikilinga, tolimorea ateneanut a Ekapolon Akuj. Kidodiu ibore ngini atamar emam ibore aronon eyei nikeng, ngesi lo erai ataaba kang. Erai Ekapolon Akuj ekapolon. Ebutakina ngesi ajakaanut ka ngikilinga. Ewei akwap itirokina wapei, emam kona isiyotoorio. Ewei ekicholong kon a apolou napei kolong anakisiakinet, iyei iyong kolong eringa tani ngirwa nyepena. Ee Ekapolon Akuj, eruosi ngitoroi, ee robo, eruosi ka akulare. Erai Ekapolon Akuj Naationon anadis. Idwangit agogongu keng erue a anam, ee robo, idwangit ngitoroi a anam. Ekapolon Akuj, ngika iteni ngitalio kon. Ani akai kon italeuno dir nakajik. Ekapolon Akuj, irai iyong Akuj na etachanakini ngakiro, kidodiu angoit kon! Tonyou akeriran ngitunga daang, kirirak lukenisak kimadasi ibore ni esakete. Ejakaanete luaronok tanang ori? Ekapolon Akuj, ipuruunosi kesi tanang ori? Inisasi luaronok tanang ori, iwogasi kotere naaronok esubete? Ekapolon Akuj, eriasi kesi ngitunga kon, ichiakiarito lu eraakasi ngikon. Earete kesi ngapuseru ka ngikokiok ka ngitunga a akwap anache lu elomito nakwap yok. Abe ebalasi kesi, “Nyitee Ekapolon Akuj. Nyeyeni Akuj a Isirael.” Ngitunga kang, ikokinete esi ibangaakearosi noi kona ai? Etige ngikabangabangae, iosunete esi ori? Akuj na kolong adupakini akit, ikwa nyepupi a? Akuj na kolong asubakini akongu, ikwa nyitee a? Ngolo erionokini ngibukui, ikwa nyirirae a? Ngolo itatami ngitunga, ikwa nyeos a? Eyeni Ekapolon Akuj ngakiro na itamete ngitunga. Eyeni atamar eraakasi ngapasiek. Ekapolon Akuj, epiaritae itwaan ni irionokini iyong. Epiaritae itwaan ni itatami iyong etal kon! Isienguni iyong ngesi ngirwa lua ngichan, tobokakinitetei luaronok akipany. Nyeisikini Ekapolon Akuj ngitunga keng, nyimuriakinete ngesi lu eraakasi ngikeng. Kainyo ebongokinete ngesi ngakiro na eriyan, toweikis ngitunga daang lu etenooko. Ngae kengarakinit ayong akitopeg itwaan niaronon? Ngae ebakit alowae kang kitopeg luaronok? Arai nyekengarak ayong Ekapolon Akuj, kaberakina kolong ayong alosit lokatoak. Ekapolon Akuj, na alimunio ayong atama, “Acheretaar akeju kang”, abu amina kon na nyedaun kegang ayong. Nakariebeta ayong ngakiro etau kesialolong, ibu iyong kisililing ayong atalakar. Nyipuposi iyong ka ngikatubok ngakiro lukamodeanak, lu irokete ngitalio lukitojoket na nyeriyan. Epupokinosi kesi amunyar lu etenooko, todungut atamar taara ngitunga lu nyesechito. Nakaneni Ekapolon Akuj erai ekaean kang, Akuj kang erai ataaba na amechi ayong. Irirae Akuj kesi kotere aronis kech, emunyari kesi kotere ngasechesea kech. Ee robo, Ekapolon Akuj, Akuj yok, emunyari kesi. Potu epuruutu Ekapolon Akuj! Atoeokisi ataaba a ayuuno yok, kilakara! Atolomasi ni eyei ngesi a ngieosio alu kibuakinitor alakara, atoeonokisi ngieosio lu ekipur. Kainyo erai Ekapolon Akuj, Akuj na epol, ekapolon lo epol noi idwangit ngakujo daang. Epolokinit ngesi akwap daang, napei anadipoe tanang naitae a ngimoru. Erai anam akeng kainyo ngesi kolong asubi. Tani akwap nakoonon dang, ngesi kolong asubi. Potu ejuruoto elipa, atoriediko alongaren Akuj Akasubunan yok! Erai ngesi Akuj yok, ataraakas ngoni ngitunga lu echoikinit ngesi. Kirai ngoni ngamesekin keng. Topupok akolongit naga ngakiro na elimunit ngesi ebala, “Nyiichanaketa loger lokolong echanaketa taapaakus alo Meriba, loger lo ekokineta neni akolongit ngina anariet ana enyaritae Masa. Apot taapaakus keningo ayong kaina katoroa, tarai sek aanyungarito ngakiro na asubea ayong kesi. Katakadakis kesi ayong a ngikaru a ngitomwon-omwon. Atolim ayong atama, ‘Iteni dir, ibatara ngitunga lugu! Awout kesi akiwap ngitalio kang.’ Abu ayong ekong anangoit kang atama, ‘Nyilomarete esi jik nakwap na adikino ayong kesiangarea esi.’ ” Taramakisi Ekapolon Akuj eeos lokitetet, ngitunga daang, taramakisi Ekapolon Akuj eeos. Taramakisi Ekapolon Akuj eeos kipuruut ekiro keng. Tolimosi akolongit daang ngakiro naajokak nakiyuunea ngesi ngoni. Tolimokisi ngibukui akibuseanu keng, Tolimokisi ngitunga daang ngakiro naationok esubi ngesi. Etiono Ekapolon Akuj, ejoikinit ipuroi noi. Ejoikinit ngesi erimae akidwang ngakujo daang. Eraakasi ngakujo a ngibukui aluche ngasubuna, nakaneni Ekapolon Akuj asubi adis. Iriamit ngesi akibuseanu ka ekipur. Ileleba apolou ka ajokis kai keng. Kipuruutu Ekapolon Akuj, esi ngitunga daang anakwap! Kipuruutu akibuseanu ka apolou keng. Kipuruutu ekiro a Ekapolon Akuj lo ibus. Yautu ngakipeyos tolomut kai keng. Toriediko alongaren lo italeuno na etakanunea, tamaranik akwap daang alongaren keng! Tolimokisi ngibukui tamasi, “Ekapolon Akuj erai ekapolon! Ewei akwap itirokina wapei, emam kona isiyotoorio. Irirae ngesi ngitunga a ngakiro ana eriyan.” Talakaros akwap ka kidiama! Toruk anam ka ibore daang ni eyei tooma kon. Talakaros ngamanat ka ibore daang ni eyei nikus. Iremarete ngikito lu eyakasi namoni talakaros na ebunio Ekapolon Akuj apolokin akwap. Ee robo, epolokini ngesi ngitunga a ngakwapea kotere akitiriyanit ngakiro ka iteni. Ekapolon Akuj erai ekapolon, ee akwap, talakar! Esi ngikwarin a nganamea, talakaros! Keriamito ayong ngidowon ka aribu nakirion chuch. Epolokinit ngesi kotere ajokis ka ngakiro na eriyan. Ingareni akim ngesi. Tonomia ngimoe keng alowaitin kadaang. Inwakunit akimilea keng akwap, eanyungari akwap tamaranik. Ekeiarete ngimukur loger aarwak alongaren Ekapolon Akuj. Ee robo, alongaren Ekapolon lo epolokinit akwap daang. Elimorit adis ateneanut keng. Iteete ngibukui daang akibuseanu keng. Irumete ngileech daang lu ilipito ngakujo nasubuna. Ee robo, daang lu ilipito ngakujo na nyetakanete. Eriedikete ngakujo daang alongaren Ekapolon Akuj. Elakara ngitunga a Sion, imaritete ere a Yuda, kotere eriras kon, Akuj. Ekapolon Akuj, kituruunitoe iyong anakwap kadaang. Ipol iyong noi idwangit ngakujo daang. Emina Ekapolon Akuj lu eremokino naaronok. Iyoki ngesi ngitunga keng lu etenooko, eyuuni alomaagor a ngitunga aluaronok. Imakinit akicha lu etenooko, taanyunito luajokak alakara. Esi lu itenooko, talakaros kotere na asubi Akuj! Kitamutu akitaleuno keng tobuakis alakara! Taramakisi Ekapolon Akuj eeos lokitetet, asubaki ngesi ngakiro nakatalarak! Kotere agogongu ka ngikilinga keng lu italeuno, edwang ngesi. Edodiu Ekapolon Akuj akidwang keng, edodik ngibukui agogongu keng na eyuunea. Etamu ngesi amina keng na nyedaun ka amuno ani a Ngisirael. Engolikis ngiwaitin daang a akwap akidwang a Akuj yok. Akwap daang, toeok Ekapolon Akuj ilakara. Kipuruutu ngesi a ngieosio ka akimaritetere! Kikuta Ekapolon Akuj, kiturukisi ngagitae! Tokutakisi ngaburucho ka ngaamwar, kimaritetekisi Ekapolon Akuj, ekapolon yok. Toruk anam ka ibore daang ni eyei tooma kon. Toeok akwap ka daang lu eyakasi nikon! Esi ngangololin, tarama ngakan. Esi ngimukur, toeokisi aapei, kimaritetokis alongaren Ekapolon Akuj, kainyo ebunit ngesi apolokin akwap. Epolokini ngesi ngitunga a ngakwapea itiriyanit ngakiro, kitemonok. Ekapolon Akuj erai ekapolon, emaranikinete ngitunga! Ibooyi ngesi alokidiama ngiborei lua ngabeben, kimiek akwap torikirikok! Ekapolon Akuj epolot alo Sion, epolot akidwang ngibukui daang. Ipuruunete daang ekiro keng loapolon lo kitimi. Ngesi erai lo italeuno! Ekapolon loapolon, lo imina na iyookino. Iwaak iyong ngakiro na eriyan Isirael. Iyau iyong ateneanut ka ngakiro na eriyan. Kipuruutu Ekapolon Akuj yok, tadakakinos nakejen keng kilipa. Ngesi erai lo italeuno! Musa ka Aron araakasi ngimurok keng. Arai Samuel epei alu egoronokinete ngesi. Egoronokinete kesi Ekapolon Akuj, kiira ngesi ngakiro kech. Kiruoro ngesi ka kesi anapir a edou, kiwapa kesi ngakiro ka ngakitatamet na adungokini ngesi kesi. Ee Ekapolon Akuj, Akuj kosi, ibu iyong kiira ngakiro kech, kidodik iyong kesi atamar irai iyong Akuj na epedori arimakin, tani kirirat iyong kesi kotere ngasechesea kech. Kipuruutu Ekapolon Akuj, Akuj yok, kilipa alomoru keng! Kainyo Ekapolon Akuj, Akuj yok, erai na italeuno. Ngitunga daang, taramakisi Ekapolon Akuj eeos. Kilipa Ekapolon Akuj ilakara, kapesi nikeng ieosi kimariteteete! Toyena atamar erai Ekapolon Akuj, Akuj, kisubuni ngesi ngoni, nakaneni kirai ngoni ngitunga keng. Kirai ngoni ngitunga keng, kirai ngamesekin keng. Atolomasi lodorin keng kibuakinit alakara, atolomasi ni ibooyo ngesi kikusi ngesi. Atobuakisi ngesi alakara, epuruutu. Ejok Ekapolon Akuj, erai amina keng na nyedaun akajik, ani amuno keng erubi jik. Erai eeos kang eka amuno ka akitiriyanit ngakiro. Kaeokinit iyong Ekapolon Akuj. Emam elote kang akisech tani nadiochichi. Ori ibunio iyong nikang? Eboikin ayong eboyor lo ikiuna anawi kang. Nyakienyikini ayong ibore ni erono. Aremokino ayong elote a ngitunga alu ibatara. Nyakatapakin ayong ngakiro kech. Tachadar ibore ni kibatari daang anikang. Nyetororosi naaronok anikang. Amunyari ayong lu eswamete luche imunonito. Nyanaikini ayong ngakiro alu ikiarito ngakonyen, kiwogas. Ngitunga lu emunoi kesi eliworosi ngirukitos kang. Lu emam akisech, Eliworosi ngikasubak etich kang. Emam ekaliokon lo iboikin kai kang. Emam ni isudi ngakiro ni iboikin nikang. Akolongit daang amunyari ayong luaronok daang anakwap. Atubuori luaronok daang alore a Ekapolon Akuj. Kiira akilip kang Ekapolon Akuj, tanangu akigoro kang nikon. Nakatingeta ayong ngichan, nyikimulen ayong! Todeta akit kon, kiira napei kelipea! Eporito ngirwa kang loger a apuru. Eriraate ngakoyo kang loger a akim. Kepudaar ayong loger a nginyia aoniyo. Ketuuriyorit ibore akimuj. Kotere akunua na ariabar, kekar ayong edong ngakoyo make. Ekok ayong atarukot a ariet. Ekok ayong tula na eyei nauyongorot. Kekolerit ayong loger a ikeny ani ewei alopei alokidiama akai. Keyenyete ngimoe kang akolongit daang. Ngulu kakianatar ayong, ekiro kang ngesi ilameta luche. Aliwor ekuron akimuj kang. Emorik ayong ngakiyo kang ka ibore ni amasi. Kotere anyunyura ka angoit kon, kirum iyong ayong kitachaka nikalonan. Ikoni eboyor kang etorube loka ebong. Aoniyo ayong loger a nginyia. Nakaneni, iyong Ekapolon Akuj, ngesi irai ekapolon lokajik. Inyouni iyong kisieni Sion, kainyo anang esaa lo idodiunea iyong ngisien anikeng. Etemokin esaa ngolo. Eminasi ngikasubak etich kon Sion, tani kinyasunitae. Isienit kesi tani keliwor asakatan. Ekerete ngibukui Ekapolon Akuj. Ekerete ngikapolok daang anakwap agogongu keng. Ani ebonguni Ekapolon Akuj akiduk Sion, idodiuni apolou keng. Iirari ngesi ngakiro a ngitunga keng alu nyemisitae, topupok akilip kech. Kigir ngakiro nugu kotere ngalesea na isidiunosi. Ngitunga lu idounio ekisidi, ipuruunete Ekapolon Akuj. Engoliuni Ekapolon Akuj alokidiama ani italeuno, kingoliu kwap na ayakar nadis. Abu kiira akunua alu eenitae. Talachak lu alimunitoe atamar taara. Elimorio ekiro a Ekapolon Akuj alo Sion. Ipuruunio ngesi alo Yerusalem, na echunakinotor ngibukui ka ngapolon kilipa Ekapolon Akuj. Ebula Akuj ngikilinga kang eringa asorokona. Etikidieku ngirwa lu ayarea ayong. Abala ayong, “Ee Akuj kang, nyikilema tokona eringa asorokona. Ee Ekapolon Akuj, ibooyi iyong nakajik.” Isubakini kolong iyong akwap a angorot. Isubakini adis a ngakan kon. Engopiarete kesi nakaneni irubi iyong jik. Edaudaunosi daang loger a ngiworui. Ilochi iyong kesi loger a ngiworui, tachakarae tongopiasi. Nakaneni idongi iyong ikoni neni jik, nabo nyedaun ngikaru kon. Ngide a ngikasubak etich kon, ibooyete akaalimon. Isikokinosi ngalesea kech alongaren kon. Etau kang, kipuruu Ekapolon Akuj. Akwaan kang daang, kipuruu ekiro keng! Etau kang, kipuruu Ekapolon Akuj! Wara nyikimuriak ajokis keng. Erimanakini ngesi ngasechesea kon daang. Itangalenokini ngidekesinei kon. Kiyuu ngesi iyong anakitu, kitopia amina keng na nyedaun ka akisienut. Eleleb ngesi naajokak loboyor kon daang, sodi tokitetenu esorokane kon loger a egole. Edunguni Ekapolon Akuj ngakiro na eteniyete ka na eriyan ani eyakasi lu ichiakiaritae. Edodikini ngesi Musa ngirotin keng. Kidodik Ngisirael ngitichisio keng. Erai Ekapolon Akuj lo a ngisien ka amina. Nyengoyeene atipei, nabo ileleba amina na nyedaun. Nyerubakinit ikilanakini jiik. Nyerai angoit keng akajik. Nyikirirae ngesi ngoni loger lo ejoikinitor kiriraare. Nyetachanakini ngakiro itemem ka naaronok kisubi ngoni. Loger lo eoyaa adis alokidiama akwap, ikoni amina keng na nyedaun neni ani eyakasi lu ekerito ngesi. Eger lo elonia akide alo too, Eger ngolo echadarea ngesi ngasechesea yok. Eger lo isienioto apa ngide keng, isieniyete Ekapolon Akuj daang lu ekerito ngesi. Eyeni ngesi atamar anibore kisubunitere ngoni. Eyeni atamar kirai ngoni apua. Ani eliwor itwaan, ikoni eboyor keng nginyia, lu epekeiari kikok aturot a amoni. Ani ekutakini ekuwam tongopia. Tongop tani ni kolong arupunitor. Nakaneni erubi jik amina na nyedaun a Ekapolon Akuj, ani eyakasi daang lu ekerito ngesi. Erubi ateneanut keng analesea kadaang alu irichakinito achamunet keng, kiwapito ngitalio keng dir. Ewaak Ekapolon Akuj ekicholong keng nadis. Epolokinit ngesi ngiboro daang. Esi ngimalaikae lukaagongok, kipuruutu Ekapolon Akuj. Kipuruutu esi lu iwapito ngitalio keng, topupete na iruoro ngesi. Esi lukaagongok anadis, kipuruutu Ekapolon Akuj. Kipuruutu esi ngikasubak etich keng lu isubete na esaki ngesi. Kipuruutu Ekapolon Akuj ngiborei keng lusubuna daang. Kipuruutu ani iyakasi kadaang anapolou keng. Etau kang, kipuruu Ekapolon Akuj! Etau kang, kipuruu Ekapolon Akuj! Ee Ekapolon Akuj, Akuj kang, ipolot iyong noi! Inapit iyong akibuseanu ka ekipur. Ilogakina iyong akicha loger a eworu, ipetak iyong adis loger a eam. Idukok iyong ni ilomi kidiama ngakipi a adis. Itiliwo ngidowon aurukuk kon. Iporit iyong a ngabeben a ekuwam. Itiliwo iyong ekuwam ngimeanara kon, akimilea erai ekasuban etich kon. Itowo iyong akwap itirok anapirio keng, emam kona isiyotoorio. Imukok anam kidiama akwap loger a eworu, toburuchiasi ngakipi ngimoru. Na ikilakinea iyong ngakipi, tamataros. Ani iirarete iyong igirokini, kipungaros. Toleleasi alomoru totiyaaros nadipoe, tananga ni isaki iyong epete. Kigerok iyong kesi ekukuor lo nyilamete, nyeeburichiareta akwap nabo. Iteleleu iyong ngileleae anadipoe, sodi kitoro kiding ngimukur eleleete. Itaanyunete kesi ngitieng a moding ngakipi. Emaase ngisikiria a moding ngakipi kaneni totuboreta akure. Edukete ngikieny ngakais kech lokito lu eyakasi neni, todoto naten kech toeoto. Alokidiama, itarami iyong akiru lomukur, kileleb apiaro kon nakwap. Iturupuni iyong nginyia kotere ngibaren. Kiturup ngalemet kotere itwaan taanyunea ngesi dang akimuj anakwap. Taanyunea itwaan emuna lo italakari, ka akimiet a ngikito na epwatuni ereet keng, ka akimuj na eanyunea ngesi ngikilinga. Ngichekereng a Lebanon, eanyunete ngakipi nakaalak. Ee robo, ngikito a Ekapolon Akuj, lu etakini ngesi. Edukete ngikieny ngakais kech neni, Todokito tapelekuto ngikito ngulu. Ngimoru lukooyak emechete ngatirikiki. Ani ngadukae, edukete anatabab. Isubak iyong elap atoyeneta sua ngikaru. Eyeni akolong esaa lo edooyorea. Isubakini iyong akwaar, ani eribokini, topudut ngitieng a moding daang. Irurumaate ngingatunyo lusorok irikaate, esakete akimuj na einakini Akuj. Ani ipiripiruuni akolong tobongosi kesi, kinapakinos naduon kech. Ani erumor tonyout ngitunga toloto akisub etich kech tanang ebong. Ekapolon Akuj, isub iyong ngiboro lukaalak! Isub iyong kesi daang a aosou! Ileleba ngiborei kon lusubuna nakwap. Eyei anam ama, epolot tabalany. Eyakasi ngiborei neni lu nyimarun. Ngiborei lu eyarete, luapolok ka luuchik. Iwaarosi ngatubwae naapolok ananam. Ichuro Lepiasan ananam kangina. Lepiasan ngesi Ekipe a anam lo kolong isubi iyong. Kigienosi iyong ngiborei daang, esakete nak kesi akimuj na iitanito. Irapete kesi ibore daang ni iinakini iyong. Ani ingaari iyong akan kon, kimwoko kesi. Ani imuki iyong ereet kon, toema kesi. Ani ilemari iyong akienget kech, totoaka kesi, tobongosi napua na kolong asubunere. Ani ikutakini iyong kesi akienget kon, toyara nabo. Ilotari iyong ereet a akwap tokitetenu. Akibuseanu a Ekapolon Akuj torup jik. Ejoikinito Ekapolon Akuj ngitichisio keng a ilope. Ingolikini ngesi akwap, tamaranik akwap. Etapi ngesi ngimoru, totulakanyuut apuru. Aeonokini ayong Ekapolon Akuj ngirwa daang lu ayarea. Ngirwa daang lu ayarea, epuruuni Akuj kang. Ekapolon Akuj, kimiek na etamanari ayong kitojoikis iyong, kainyo ebunit alakara kang anikon. Kimiekisi ngikasechak kirikarae anakwap, tongopa ngikasechak totorokinos! Etau kang, kipuruu Ekapolon Akuj! Ekapolon Akuj kipuroe! Tobuakisi Ekapolon Akuj alakara, tolimosi apolou keng. Tolimokisi ngibukui ngakiro na asub ngesi. Toeokisi kipuruut Ekapolon Akuj. Tolimosi ngitichisio keng lukatalarak! Epuruutu ekiro keng lo italeuno. Kimiekisi ngitai alu esakete Ekapolon Akuj talakaros. Tasaka Ekapolon Akuj ka ngikilinga keng. Tasaka atamar toyei ngesi nikus jiik. Kitamutu ngitichisio lukatalarak asub ngesi. Kitamutu ngakitoodikinet nakailiilok, ka ngakiro na atubi ngesi. Kitamutu nguna, esi ngalesea a Aburaam, alo erai ekasuban etich keng, ka ngalesea a Yakobo na aseu ngesi. Ekapolon Akuj erai Akuj yok. Eyakasi ngakiro na atubu ngesi akwap wadaang. Irichakini ngesi achamunet keng jik. Iyoonokini ngakichiket keng analesea kadaang. Irichakini achamunet na kolong achamakin ka Aburaam, kiyook akichiket na kolong ekongi ani a Isaka. Achamakin Ekapolon Akuj ka Yakobo achamakinet na erubi jik, ebala, “Kainakini esi akwap a Kanaan, eliwor akwap ngina akus a ngikulepek.” Akidioko ngitunga a Akuj, emam itwaan abilit lomoyo, araakasi ngipeyok anakwap a Kanaan. Awowooto kesi atubonorosi napei alobukut a epei tanang loche. Atubonorosi anapolou a apei tanang nache. Emam itwaan abu Akuj kimiek ichiakiari kesi. Kikilak Akuj ngikapolok kotere kesi ebala, “Nyiitap ngikasubak etich kang lu eseunitae. Nyiiwan ngikadwarak kang!” Ayauni Akuj akoro nakwap kech, kinyasu akimuj kech daang. Nakaneni amearit sek itwaan engareniyorit. Itwaan ngini ngesi Yosep losek agialario inaa erai ekedalan. Aenio ngakejen keng a ngiriko, toinikinae ngasua nalangir lomosiring, tanang ngakiro nasek adwari ngesi iyookin. Kidodiu akiroit a Ekapolon Akuj atamar araakasi ngakiro keng ngaka iteni. Todung ekapolon a Misiri atamar talachakinae ngesi. Talachak ekapolon a ngibukui ngesi. Kitiliwo ekapolon ngolo ngesi ekapolon a awi keng. Kitiliwo lo epolokinit ngiboro keng daang. Torikio ngikapolok a arieng keng luuchik ka akitatam ngikasukou keng achwaanu. Kikokis Ngisirael elomarete Misiri neni. Toliwor Yakobo epeyonon anakwap kangina. Nak Ekapolon Akuj ngitunga keng ngide lukaalak. Kitogogong kesi noi akidwang ngimoe kech. Toree Akuj ngitai a Ngimisiri toremokinos Ngisirael. Tomodeaketa ani a ngikasubak etich keng. Ani erumor tomea Akuj Musa lo arai ekasuban etich keng, ka Aron lo aseuni ngesi. Kidodiunut ngakiro nakatalarak a Akuj alotunga a Misiri, ka ngakitoodikinet nakailiilok alo Misiri. Tomeu Akuj aribu nakwap, nakaneni tongero Ngimisiri ngakiro keng. Kibele Akuj ngakipi a ngangololin kech toliworos ngaakot, taara ngikolea kech daang. Kilelebunos ngakidodoka nakwap kech, kilelebunos tani kai a ekapolon. Kiruorik Akuj tobwangun ngasepicho a ngichuch, pena ngikatuur nakwap wadaang. Kimik kesi akiru nak ngamoru a akiru, ka akimilea na enwakuni akwap kech. Kinyasu ngimusabib kech ka ngimeyana, tobil ngikito a akwap kech. Kiruorik Akuj, tobwangun ngimases, kisuuwau ngitak a ngimases emam ekimar. Tokitosi nikaliban daang anakwap, tomunyasi ngalemet kech daang. Taar ngesi ngide lusapa lu ekingaren alokolea kadaang, ngiuriuna lu ekingaren alotunga a Misiri. Ani erumor kipud Ngisirael alo Misiri, tonyout etingito akwangat ka egolit. Amam tani ipei alomacharin kech ni erogoit. Aemito Ngimisiri Ngisirael, talakaros kesi na anyounioto Ngisirael. Kimuk Akuj ngitunga keng a edou, ani nakwaare kiwaak akim na inwakuni akwap. Kilipa kesi, inu ngesi kesi ngalurui. Nak kesi akimuj a adis nakaalan. Apaki ngesi ataaba, toleleut ngakipi. Toleleasi anariet loger a angolol. Kitamu ngesi akichikakinet keng na italeuno na echikakini ngesi Aburaam, lo arai ekasuban etich keng. Abu ngesi dir kitonyou ngitunga keng a alakara. Apot luseuna keng toeokis kimariteteeto. Nak kesi akwap a ngibukui alugelayek. Tolemasi ngamanat ani eyakasi ngikulepek kitiliwosi ngakech. Ekokini ngesi neni kiwapeta ngitunga keng ngakitatamet keng, ka ngakiro keng. Ekiro a Ekapolon Akuj kipuroe! Ekiro a Ekapolon Akuj kipuroe! Tobuakisi Ekapolon Akuj alakara kainyo ejok ngesi. Nyedaun amina keng jik. Ngae epedori alimun natenoyek daang na asubaki ngesi? Ngae epedori akisisaun ekipur keng daang? Epiaritae lu iwapito ngitalio keng, tosubete ngirwa daang na eriyan. Kitamunae kare cha ayong Ekapolon Akuj, na idodikinea ngitunga kon ajokis. Kingarakinae ayong na iyuunea kesi, ataanyunea ayong ajakaanut a ngiseuna kon. Atalakaror ayong kotere ebukut kon, ataanyunea ekipur ka ngitunga kon aapei. Kisech sua loger lo kolong asecheta taapaakosi. Kichwangak sua kisub naaronok. Nakolong ayakatar taapaakosi Misiri, apot kesi nyeemisikis ngakitoodikinet nakailiilok a Akuj, kori nyitamuna alalau a ajokis a Akuj. Apot kesi tosechakis Akuj Naapolon Noi alokwaas a anam a Chamu. Tani ikoni neni, abu Akuj toyuu kesi loger lo kolong echikakinitor, kidodiunea apolou keng naapolon. Ekilakini ngesi anam a Chamu toon. Kisitor ngesi ngitunga keng ni aonit deu. Ayuuni kesi anakan a ngimoe. Topuunos anagogongu a ngimoe. Nakaneni tanyama ngakipi ngimoe kech. Emam tani epei abu kidong. Apot ngitunga tonupa ngakiro a Akuj. Toeokis ipuruunito ngesi. Nakaneni kimuriakis kesi ngakiro keng atipei. Tojongoto akigieno akiroit na elimuni ngesi. Toting kesi ekimue loationon anariet sodi kiningo Akuj. Nak kesi ibore ni asakete, nakaneni kititing kesi edeke loaronon. Toting ngitunga etereku anadakar kotere Musa ka Aron, ekasuban etich a Ekapolon Akuj lo etaleuno. Apot ngalup tapakas sodi kilikosi Dasan, tonuka Abiram ka ngitunga a awi keng. Totiyaun akim lorukitos keng dang, tonomia asarae ngitunga luaronok ngulu. Tosubakis itaok a egolit alo Sinai, kilipa akuj nasubuna. Kilokonyo akibuseanu a Akuj, kitiliwosi eka akuj anasubuna ana erai etiengit lo edak nginyia. Kimuriak kesi Akuj na erai akayuunan kech, na kolong asubi ngakiro naationok alo Misiri. Asubi ngakitoodikinet naationok anakwap ana Misiri kangina. Tosub ngakiro naketubulok ananam a Chamu. Alimuni Akuj atamar amunyari kesi. Nakaneni Musa bon lo arai eseuna keng, ngesi abu toweik Akuj, kiratak anyunyura a Akuj nyeemunya kesi. Apot kimenyasi akwap naajokon ngina, kainyo peanupito kesi na echikakinit Akuj. Kiburata kesi aloeaman kech. Towout akiwap ngakiro a Ekapolon Akuj. Kotere nguna, kichikichik Akuj kesi, kikong atamar amunyari anariet, atopeta ngalesea kech lobukui lugelayek, topetakin nakwapea. Ani erumor kimorikinos kesi kilipa Baal alo Peor, tanyama ngakipeyos na apeikinito ngikatoak. Kitilileta kesi Akuj a eboyor kech, todeakakinos ngidekesinei luaronok. Nakaneni tonyou Pineas kirira lu asechito, sodi totubor edeke ngolo. Kotere ngakiro nguna, napei analesit a apei tanang nache, imarunitae ngesi jik atamar etenoono. Kitongoa kesi Akuj alolelea a Meriba. Taanyu Musa ngichan kotere kesi. Kitolemasi kesi Musa toliwor ekoponokin ngakiro. Nyear kesi ngibukui luche loger lo adungokinitor Ekapolon Akuj. Apot kesi kimorikin ka ngibukui luche, kirokosi eboyor kech. Kilipa ngakujo kech nasubuna toliworos ngiloi kech. Taara ngide kech lusapa ka lupesur kipeyokis ngipean. Tobukosi ngaakot alu nyesechito, ngaakot a ngide kech alusapa ka lupesur, toliworos ngakipeyos a ngakujo anasubuna a Kanaan. Kinyasun akwap kotere ngaakot nguna. Apot toliworos lu nyitaleuno kotere ngakiro na asubete. Toliworos lu nyemunosi Akuj loger a ngikalomak. Tonyunyurikin Ekapolon Akuj ngitunga keng. Takadakis ngulu araakasi ngikeng. Abu kiwaak kesi nakan a ngibukui, tarata ngitunga lu eremokino ngikapolok kech. Kichiakiasi ngimoe kech, topolokinoe a ationis. Toyuu Akuj ngitunga keng ngayuunet nakaalak, nakaneni toseut aliwor lukechanak. Tobosiasi kesi kotere akisech kech. Tani ikoni neni, na eirarea Akuj akigoro kech, abu tomisik ariaba kech. Kitamu achamunet keng kotere kesi. Tapataner itemem ka alalau a amina keng ana nyedaun. Kitiliwo ngesi daang lu etusubete kesi etich, lu isienito ngitunga ngulu. Toyuunae kare Ekapolon Akuj na irai Akuj kosi. Tochununae sua alobukui kitochunak wapei, atobuakineta iyong alakara, ka akipuruun ekiro kon lo italeuno! Kipuroe Ekapolon Akuj, Akuj a Isirael. Epuruutu tokona nakajik! Tolimut ngitunga daang tamasi, “Aamen!” Kipuroe Ekapolon Akuj! “Tobuakisi Ekapolon Akuj alakara, kainyo ejok ngesi. Erai amina keng akajik!” Tolimutu kongina esi lu kiyuu Ekapolon Akuj. Kiyuu alomaagor a ngimoe kus, Kitochun anakwapea anagelayek, napei alo kide tanang too napei alokwap tanang kuju. Awowooto ngiche kech anaroatin a ariet, tongopik erot elooso lore lo elomete. Tanyam kesi akoro ka akure, tolilimiyosi. Ani eanyunete ngichan, kikaloikis Ekapolon Akuj. Toyuu ngesi kesi anariaba kech. Torik kesi alorotin alu itenikina, kitanang lore lo elomete. Ejoikinit kesi ebuakinete Ekapolon Akuj alakara kotere amina keng na nyedaun, ka ngakiro nakatalarak asubakinea ngesi ngitunga. Ngulu enyamit akure, itamasi ngakipi toupa. Ani lua akoro, kilelebik ngiboro luajokak. Ebooyete ngiche kech analaireng ka aribu, eenitae a ngiriko toriabas, ani angerioto ngakiro a Akuj, kimenyasi ngakitatamet a Akuj ana Epol Noi. Tobur kesi noi kotere etich loationon, tadakaros tongop ikengarakinan. Ani eanyunete ngichan, kikaloikis Ekapolon Akuj. Toyuu ngesi kesi anariaba kech. Kipud kesi analaireng ka aribu, tongedengede ngiriko kech. Ejoikinit kesi ebuakinete Ekapolon Akuj alakara kotere amina keng na nyedaun, ka ngakiro nakatalarak asubakinea ngesi ngitunga. Ngidorin lu esubunitae anasuat ananyang, ebwangabwangae ngesi tangaa. Ebilibili ngasua nakapisa. Tabangaaketa ngiche kech taanyut ngichan kotere ngasechesea kech ka aronis kech. Kilele kesi akimuj, tonyout akitu. Ani eanyunete ngichan, kikaloikis Ekapolon Akuj. Toyuu ngesi kesi anariaba kech. Kitangalek kesi a akiroit ana adunguni, sodi toyuu alonyas. Ejoikinit kesi ebuakinete Ekapolon Akuj alakara kotere amina keng na nyedaun, ka ngakiro nakatalarak asubakinea ngesi ngitunga. Ejoikinit ipeyokinete ngesi ngakipeyos a alakara. Tolimosi na asubaki ngesi a ngieosio alu alakara. Adokito ngiche kech ngatubwae naapolok ananam. Taanyut ananam ibore ni eyareta. Taanyungasi ngulu dang ngitichisio a Ekapolon Akuj, asubasi ngakiro nakatalarak ananam. Kainyo adunguni ngesi akiroit, tokut ekuwam loationon ananam, kitukwu ngitoroi a anam. Tokurupupuut ngitoroi kidiama, ani erumor todipaar. Tobul kesi kipirisaar ngitai kotere ngakiro nguna. Kibusokinos kesi ileteletasi loger a ngitunga alu irakarit epurot. Tabangaaniasi kesi kimuriak kona itapitapio. Ani eanyunete ngichan, kikaloikis Ekapolon Akuj. Toyuu kesi anariaba kech. Kisililing ngesi ekuwam, kililinga ngitoroi chek. Talakaros kesi ani ajongooto ngitoroi aruore. Kitanang ngesi kesi lodoket lo aloose. Ejoikinit kesi ebuakinete Ekapolon Akuj alakara kotere amina keng na nyedaun, ka ngakiro nakatalarak asubakinea ngesi ngitunga. Kimiekisi kesi kikuta ngesi alokiriam a ngitunga. Kimiekisi kipuruut ngesi anatuk a ngikasukou. Elochi Ekapolon Akuj ngangololin kitiliwo ariet, ani ngileleae, kitoon deu. Akwap naketurupan ngikinyam, kitiliwo edoot, kotere aronis a ngitunga alu alomito neni. Elochi ngarieta toliworos ngabwelin, ani akwap nakoonon, toliwor ngileleae. Kimiek ngesi lu enyamit akoro elomete inaa. Toduko kesi ere lo elomete. Etaate ngamanat ka ngikito a ngimusabib, tolema ngalemet nakaalak. Apiari ngesi ngitunga keng toureta ngide lukaalak. Kiatak ngesi ngibaren kech. Nasek akidiekotor kesi taraakas lupalag, kotere ni echiakiaritere ka ariaba, kimenya ngesi ngitunga lu aboliatar kesi kimiek ewowooto anarieta ana emam ngirotin. Nakaneni toyuu lukebootok alochan kech, kimiek ngitunga kech iatakinosi loger a esipanit a ngaanei. Eanyungarete lu etenooko ngakiro nguna talakaros, nakaneni isililingio luaronok daang. Ani ni eos, kimiek kiira ngakiro nugu. Kimiekisi ngitunga toyena amina a Ekapolon Akuj na nyedaun. Ee Akuj, atitiny ayong! Iteni dir, atitiny ayong. Aeokini ayong kepuruu iyong! Tonyou etau kang! Tonyou agita. Etonyouni ayong akolong! Ee Ekapolon Akuj, kabuakini ayong iyong alakara alotela. Kekusi iyong alobukui. Enangit amina kon na nyedaun nadis. Etapit amuno kon ngidowon. Ee Akuj, kipuruunio iyong alokidiama adis. Akibuseanu kon topetakin akwap wadaang. Toyuunae sua a agogongu kon. Kiik akilip kang sodi toyuunere ngitunga lu imina iyong. Alimu Akuj alokai keng kona, “Alosi tokona ayong emaritete atotiakatiaka akwap a Chekem. Egeronokini adipo a Sukos. Erai Gilead akang, erai Manase dang akang. Erai Epiraim apukot kang a asuat. Ani Yuda erai aburo kang a apolou. Ikoni Moab ateger kang na ilasere ngakan. Achakakini ayong ngamuk kang Edom, kidodiu ibore ngini atamar erai akwap kang. Ewangakini ayong atopogak Ngipilisti.” Akuj, ngae mono kayaari ayong lore lo edukitoe awas nakaagongon? Ngae kariki ayong Edom? Wae Akuj, kiisik iyong sua jik a? Nyeringa nabo iyong irukito ka ngasigerea kosi a? Kingarakinae sua alomoe kosi, kainyo erai akingarakin a itwaan aka pas. Kidwangi ngoni ibakit Akuj alowae yok. Idwangi ngesi ngimoe yok. Kepuruunit ayong iyong Akuj, wara nyiililing! Kainyo ngitunga luaronok ka lukengalak, kamatakina ayong kesudioto ngakiro. Keruorotor naaronok, katamatakinos emam ibore kech anyamit. Ketepegete kesi ayong tarai amina ayong kesi, nabo elipakinit. Kabuanakinete naaronok kotere naajokak kang, karemokino kesi ayong ani aminar kesi. Toseu ekatubon ngakiro loaronon kirira emoit kang. Kimiek epei a ngimoe keng totubok ngesi ngakiro. Ani ititakinio ngesi, torukaunae esechit. Ani imaimaa alokies, kimarunae ibore ngini atamar erai akisech keng ache. Tokidiekuut ngirwa lu eyarea ngesi. Tolema itwaan iche etich keng! Tokokiana ngide keng. Toliwor aberu keng apuserut! Towowooto ngide keng ilipanarosi. Kitwarakinae ngide anasakatan a akai kech. Itwaan ni imichat ngesi ibore, ejoikinit elemari ngiboro keng daang. Kimiekisi ngitunga lua akwap anache tolemasi ibore ni eanyuni ngesi alotich keng. Tongop itwaan idodiuni ngisien anikeng, kori tongop itwaan ingarakini ngide keng lukokiok. Totoaka ngalesea keng daang kimuriakinor ekiro keng analesit ana ngaarei isidiun! Kitamu Ekapolon Akuj aronis kata apaakeng, nyiirimak jik ngasechesea a itiokeng. Kitamu jiik Ekapolon Akuj ngasechesea kech, ani eliworosi kesi ngikulepek, kimuriakinos anakwap! Abu itwaan ngini kimuriak akidodiun ngisien. Nakaneni abu ngesi toboliar lukebootok, ka lu ichanasi ta lu ipirisaara ngitai, tanang tani eari. Amina ngesi akilam ngitunga, kimiekisi ngesi dang kilamae! Peamina ngesi luche epiario. Kotere nguna, tongopik ngesi dang apiaro. Peatubori ngesi ngilam anakituk keng. Kimiekisi ngilam ngulu tolomasi nakwaan keng loger a ngakipi, ka alomar nakoyo keng loger a akimiet! Kimuko ngesi ngilam loger a ngiworui, nabo kiriama ngesi jiik loger a aruba. Ekapolon Akuj, kimiek ngimoe kang taanyut nguna. Taanyut ngitunga daang lu keruorotor ayong naaronok! Wae Ekapolon Akuj, Ekapolon kang, tosubere kare ayong nakijoikinito iyong. Toyuunae ayong ani ejokia amina kon na nyedaun! Keboosit ayong emam kona engarakin. Ewanan etau kang edaudauna. Angopia ayong loger a etorube alo ka ebong. Kakutario ayong loger a ngimases. Alilimiyosi ngakungin kang ani engopitor akimuj. Kekar ayong edong ngakoyo make ka ngamunyin. Aliworosi ngitunga kakianatar ayong. Imungimungete ngakies kech kemenyete. Ekapolon Akuj na irai Akuj kang, kingarakinae kare. Toyuunae itemem ka amina kon na nyedaun. Kitoyen ngimoe kang atamar iyong kiyuununi ayong. Toyena atamar iyong Ekapolon Akuj isubak nguna. Kimiek kesi kelam ayong, nakaneni kipiari iyong ayong. Kimiek lu kaboliatar ayong kidwangae, ani ayong ekasuban etich kon, atalakar. Kimiek ngimoe kang toting etimoi, kimukokinos ngileech loger a eworu. Abuakini Ekapolon Akuj alakara erema. Epuruuni ngesi alokiding asepich a ngitunga, kainyo eanakini ngesi ekebootonit, sodi toyuu ngesi ani eyakasi lu iriraate ngesi ebalasi taara. Alimokini Ekapolon Akuj ekapolon kang tama, “Kiboikin teten kang, tanang ipudakini iyong ngimoe kon.” Napei alo Sion, enyaari Ekapolon Akuj apolou kon. Ebala ngesi, “Topolok ngimoe kon!” Ngirwa lu ijioto iyong ka ngimoe kon, iwangakinete ngitunga kon tolemunos. Epote ngisorok nikon ibuseak, kikokis ngakop na eyakasi nataparach elilim. Ekong Ekapolon Akuj, nakaneni nyilochi ngitamen keng na ebalar, “Iliwor iyong emuron a Akuj jik, iwapap ka eger a emuron a Akuj alo enyaritae Melikisedek.” Eyei Ekapolon teten kon, na engoea ngesi, ebwangi ngikapolok. Etubi ngesi ngakiro a ngibukui ka akiar ngitunga lukaalak. Epetari ngesi ngikatukok topetak akwap wadaang. Emasi ngesi ngakipi a iyanae ani eyei lokwaas a erot, kikeu akou keng na eraakar ekedwangan. Kipuroe Ekapolon Akuj! Abuakini ayong Ekapolon Akuj alakara a etau kang kadaang, kirukit ka ngitunga keng daang lu etenooko. Kitalarete noi ngitichisio a Ekapolon Akuj! Daang lu ejoikinito ngitichisio ngulu, esakete akiyen. Ibore daang ni esubi ngesi, ileleba arimatoi ka akibuseanu. Ani ateneanut keng erai akajik. Kisitamunit Ekapolon Akuj ngoni ngitichisio keng lukatalarak. Ejok Ekapolon Akuj tarai na a ngisien. Einanakini lu ekerito ngesi akimuj. Echoikinit ngesi achamunet keng jiik. Edodik ngesi ngitunga keng agogongu keng, ani ainakinea akwap a ngibukui aluche. Emunoi ngitichisio a ngakan keng nabo itiriyanit ngakiro. Eraakasi ngitalio keng daang lu igienoi jik. Erubete ngitalio keng jik, esakitae kiwapae kotere iteni ka ateneanut. Alachakini ngesi ngitunga keng tachamakin ka kesi jik. Erai ngesi na italeuno nabo kitubuli noi. Itorunit aosou nakiker Ekapolon Akuj. Ngitunga daang lu iwapito ngitalio keng, itoosuni ngesi. Erubi ekipur keng jik! Kipuroe Ekapolon Akuj! Epiaritae itwaan ni ekerit Ekapolon Akuj, itwaan ni emina akiwapit ngitalio keng. Egogongerosi ngalesea keng anakwap. Epiario ngide keng. Eliworosi ngitunga a awi keng ngikabarak. Eliwor ngesi lo etenoono jiik. Echai akicha anaribu kotere lu eteniyete. Ee robo, echai akicha kotere lua ngisien, ka lukapatanak ta lu etenooko. Epiaritae itwaan ni ipotono ngiboro, ka ni nyidokeene ngaropiyae a amicha, nabo tosubi ngakiro na eriyan. Nyidwangio ni etenoono jik, nabo eliwor ngesi itamunitae jiik. Tani kiira ngesi ngakiro naaronok, nyeemi. Etiono anupit keng, nabo igienokino ngesi Ekapolon Akuj. Irichakina etau keng nyeemit. Eyeni dir atamar idwangio ngimoe keng. Ipotonori ngesi ngiboro keng, nak lukebootok. Erubi ajokis keng jik. Eanyuni ngesi agogongu ka arimatoi. Eanyungarete luaronok nguna tongoa. Ekirichete ngikel kech sodi tongopiasi. Nasek igienosi luaronok, engopiarete jik. Kipuroe Ekapolon Akuj! Esi ngikasubak etich a Ekapolon Akuj, kipuruutu ekiro keng! Ekiro keng kikutae, napei tokona jik. Napei alo kide tanang too, kikutae ekiro a Ekapolon Akuj! Epolokinit Ekapolon Akuj ngibukui daang, ipororit akibuseanu keng adis. Ngae iche ikwaan ka Ekapolon Akuj na erai Akuj yok? Ibooyi ngesi alokidiama, nakaneni itee kwap noi. Ee robo, itee adis ka akwap. Ikeuni ngesi itwaan ni iboosit anapua. Ani ni ichana, tout alochoto, kisiboik ka lu eyenikinitae, lu eraakasi ngikapolok a ngitunga keng. Itaanyuni ngesi aberu nakolup ekal, kitalaka ngesi nak ngide. Kipuroe Ekapolon Akuj! Na anyounioto Ngisirael alo Misiri, na arotokinioto ngalesea a Yakobo anakwap anagela kangina, toliwor Yuda ebukut lo italeuno ani a Akuj, toliwor Isirael aka Akuj a alope. Taanyunga anam a Chamu sodi kipungar. Tobongo ngakipi a Yorudan. Toporoporoto ngimoru loger a ngimesekin alukiliok. Ani ngimukur, kichurokis loger ananyang. Ee anam, nyo bo kisipungari iyong? Ee Yorudan, ani nyo bo abongioto ngakipi kon? Ee ngimoru, nyo bo iporoporooto esi loger a ngimesekin alukiliok? Ee ngimukur, ani nyo bo ichurotor esi loger ananyang? Ee akwap, tamaranik alongaren Ekapolon Akuj. Ee robo, alongaren Akuj a Yakobo, ana etapi ataaba kibele toliwor atapar, ani amoru naapolon toliwor elelea a ngakipi. Meere kare sua Ekapolon Akuj, meere sua! Pearai iyong bon kipuruunio, kotere amina kon na nyedaun ka amuno. Nyo ingitatar ngibukui ebalasi, “Nyaani tokona Akuj kus?” Eyei Akuj kosi nadis. Esubi ibore ni emina ngesi akisub. Esubunitae ngakujo kech anakwangat ka egolit, ngakan a ngitunga esubete. Eyakasi ngakituk tarai nyiruorosi. Eyakasi ngakonyen tarai nyiteete. Eyakasi ngaki tarai nyepupete ngakiro. Eyakasi ngikumes tarai nyinguunete ibore. Eyakasi ngakan tarai nyetapete ibore. Eyakasi ngakejen tarai nyeloose. Eyakasi ngidokolei tarai nyiruorosi. Lu esubete kesi ikwaan ka kesi, ikote neni daang lu igienosi kesi. Ee Ngisirael, kigienokinos Ekapolon Akuj! Ngesi kingarakinit esi tarai aupwal kus. Ee ngalesea a Aaron, kigienokinos Ekapolon Akuj! Ngesi kingarakinit esi tarai aupwal kus. Esi lu ikerito Ekapolon Akuj, kigienokinos Ekapolon Akuj. Ngesi kingarakinit esi tarai aupwal kus. Kitamunit Ekapolon Akuj ngoni, nabo kipiari ngesi ngoni. Epiari ngesi Ngisirael. Epiari ngesi ngalesea a Aaron. Epiari daang lu ekerito ngesi, luapolok ka luuchik. Kimiek Ekapolon Akuj kiinak iyong ngide, iyong ka ngalesea kon. Kimiek Ekapolon Akuj kitopia iyong, ngesi lo asubi adis ka akwap! Erai adis aka Ekapolon Akuj bon, nakaneni ainaki ngesi itwaan akwap. Nyipuruunete lu atoaka Ekapolon Akuj, kori nyipuruuni itwaan cha daang ni atoana tonukae. Ani eliwor ngoni lu kiyari, kibuakini ngesi alakara napei tokona jik. Kipuroe Ekapolon Akuj! Amina ayong Ekapolon Akuj kainyo epupi ngesi ngakiro ka ngakilipasinei kang. Ani kona epupio ngesi ngakiro kang, Anyarae ayong ngesi jiik ngirwa lu ayarea. Abu akitu katotikokin ayong. Abu ebuloi a aliel katoting. Abu katobul noi atamaran. Sodi atanyara ayong ekiro a Ekapolon Akuj atama, “Ekapolon Akuj, kemaimai iyong atamar toyuunae ayong!” Ejok Ekapolon Akuj etenoono. Erai Akuj yok na a ngisien. Eikinit Ekapolon Akuj lu emenitae. Kayuuni ngesi ayong na ayakar lochan. Kianga kare etau kang, kainyo kasubea Ekapolon Akuj naajokak. Kademuni Ekapolon Akuj ayong akitu. Amiatari ngesi ngakiyo anakonyen kang, kigang ngakejen kang nyaadakar. Alosi ayong alongaren Ekapolon Akuj anakwap alu eyarete. Abu ayong atorubak anupit tani na alimunio atama, “Epirisaar ayong etau atoana.” Tani na aemea ayong atama, “Emam nibe itwaan ni eliwor ni emunoi.” Nyoni ainakini ayong Ekapolon Akuj, kotere naajokak daang kasubea ayong? Ayauni akipeyos a emuna nia Ekapolon Akuj, atobuak ngesi alakara ani kayuunea. Etemokini ayong ani a Ekapolon Akuj ngakiro daang na kolong ekongokini. Etemok iteete ngitunga keng daang. Epipilikinit Ekapolon Akuj akitu a itwaan keng. Ee Ekapolon Akuj, arai ayong ekasuban etich kon. Asubi ayong etich kon loger lo asubea itiokang. Kiyuu iyong ayong anakitu. Kalemikini akipeyos a alakara, sodi kelip iyong. Etemokini ayong ani a Ekapolon Akuj ngakiro daang na kolong ekongokini alongaren ngitunga keng daang. Etemokini a alokai a Ekapolon Akuj, alo Yerusalem. Kipuroe Ekapolon Akuj! Ngibukui daang, kipuruutu Ekapolon Akuj! Kipuruutu ngesi ngitela daang! Etiono amina keng na nyedaun aniyok. Ani amuno keng, erai akajik! Kipuroe Ekapolon Akuj! Ee, tobuakisi Ekapolon Akuj alakara, kainyo ejok ngesi, nabo erai amina keng na nyedaun akajik. Tolimut Ngisirael tamasi, “Erai amina keng na nyedaun akajik.” Tolimut ngalesea a Aron tamasi, “Erai amina keng na nyedaun akajik.” Tolimut daang lu ekerito Akuj tamasi, “Erai amina keng na nyedaun akajik.” Abu ayong atanyara Ekapolon Akuj na ariabar. Keik ngesi ayong katalachak. Kirukit ayong ka Ekapolon Akuj emam ibore akeri. Nyoni kasubakinea ayong itwaan? Kirukit ayong ka Ekapolon Akuj, kengarakinit. Engolikini ayong ngimoe kang idwangio. Ejok akigienokin Ekapolon Akuj idwangit akigienokin itwaan. Ejok akigienokin Ekapolon Akuj idwangit akigienokin ngikapolok. Kerikaunete ayong ngibukui daang, nakaneni enyasu ayong kesi kotere agogongu a Ekapolon Akuj! Keriamito ayong alowaitin kadaang, nakaneni enyasu ayong kesi kotere agogongu a Ekapolon Akuj. Kelulukinosi kesi ayong loger a ao, nakaneni tonomia kesi akim atipei loger a amoni ana ikamuni akim torirau. Kotere agogongu a Ekapolon Akuj, enyasu ayong kesi. Aponi ketijikin ayong, tonyounoe akidwang, abu Ekapolon Akuj kengarak ayong. Ekapolon Akuj erai agogongu ka ngikilinga kang. Ngesi alope kayuu ayong. Kiira ngieosio lu edwangeta ngitunga kimariteteete anawiyei a ngitunga a Akuj ebalasi, “Agogongu a Ekapolon Akuj asubaki ngakiro nakatalarak nugu! Agogongu a Akuj kidwangea ngoni ngimoe! Agogongu a Akuj ayau ngakiro nakatalarak nugu!” Nyatoani ayong pearai ayari, atolimorea ngitichisio a Ekapolon Akuj. Kerira ayong Ekapolon Akuj noi, nakaneni nyeisikina ngesi ayong atoani. Tangakinae ayong ngidorin a akai a Akuj. Atolom atobuak Ekapolon Akuj alakara! Erai ibore ekidor a Ekapolon Akuj, lu etenooko make itorete lokidor ngolo. Ee Ekapolon Akuj, kabuakinit iyong alakara ani iirarea ngakiro kang. Kainyo iyong kiyuu ayong. Amoru na kolong angerete ngikadukok ebalasi erono, ngesi tokona aliwor amoru nateno. Ekapolon Akuj asubi nguna. Kingolikinae atamar asubaki nakitalarete! Erai akolongit naga na asubaki Ekapolon Akuj, atalakaros emaritetekisi akolongit naga. Ekapolon Akuj, kimaimai sua iyong atamar toyuunae. Ee Ekapolon Akuj, kimaimai sua iyong atamar kitaanyunae sua ajako! Epiaritae ni ebuni a ekiro a Ekapolon Akuj! Kigatakinit iyong apiaro na ebuni ani a Ekapolon Akuj. Ekapolon Akuj erai Akuj. Erai ngesi na ejok aniyok. Totinga ngakui a nakan kisiakis esukukuu, inyiakanarete tanang naamwar a ekeno a ngakipeyos. Irai iyong Akuj kang, kabuakini ayong iyong alakara. Irai iyong Akuj kang, kekusi ayong iyong. Tobuakisi Ekapolon Akuj alakara kainyo ejok ngesi, nabo erai amina keng na nyedaun akajik. Epiaritae ngulu emam ibore ichwangakinito lu iwapito etal a Ekapolon Akuj. Epiaritae lu irichakinito ngakiro, lu esakete Ekapolon Akuj a ngitai kech kadaang. Nyesubete kesi naaronok, nakaneni iwapito ngirotin keng! Ee Akuj, kitaanyu iyong sua ngitalio kon, sodi kitolimok atamar kiwapa tomunokisi. Esibit cha kitenikin eboyor kang, ani ewapea ngakitatamet kon! Ani kerichak ayong ngitalio kon daang, nyekerumete ayong ngileech. Kepuruuni ayong iyong a etau alo ikiuna na etatamar ngakiro kon natenoyek. Ewapi ayong ngakitatamet kon, nyikiisik kare ayong! Ikokini esorokit echoikini eboyor keng toliwor lo ikiuna ai? Echoikini erai kiwap ngitalio kon. Erichakina ayong akisub etich kon a etau kang kadaang. Kiratakinae nyaanger ngitalio kon. Erichakinit ayong etal kon alotau kang, nyakasubakinea iyong akisech. Ee Ekapolon Akuj, kepuruunit iyong. Kitatamae ayong ngirotin kon. Alimuni ayong a angajep kang ngakiro daang na kolong idunguni iyong. Amina ayong akiwapit ngakiro kon akidwang aanyun ebari lokaalan. Eseme ayong ngitalio kon. Etebeik ngakonyen kang lorotin kon. Amina ayong ngakitatamet kon. Nyekemuriakini akiroit kon. Tosubea ekasuban etich kon naajokak, atoyarea ka akiwap akiroit kon. Tangaa ngakonyen kang, ataanyungarea ngakiro nakatalarak a etal kon. Arai ayong ekaloton anakwap kana. Nyikidaa ngitalio kon. Eriebi etau kang ekimue lo esakea akiyen ngakiro kon jiik. Ikilanakini iyong lu inisasi. Ilamam lu nyiwapito ngitalio kon. Nyikitaanyu ayong ngiyeny ka ngimeny, kainyo erichak ayong ngakiro kon. Tani katukuotor ayong ngikapolok, etamanari ayong ekasuban etich kon ngakitatamet kon. Ketalakarito ayong ngakiro kon, kesi ketoosunete. Edikino ayong atoani. Kisikwarunae itemem ka akiroit kon. Alimo ayong na asub daang, kiik iyong ngakiro kang. Kitatamae ayong ngakitatamet kon. Kitatamae eger lo ewapea ngitalio kon, sodi etamana ayong ngitichisio kon lukatalarak. Alilimiyo etau kang ani ealolongio. Kitogogongoi loger lo kolong kichikakinitor. Tachada alioko anikang, kitatam etal kon ani ijokia iyong. Aseu ayong erot lokamunor iyong, erichak ngakiro kon. Ee Ekapolon Akuj, erichak ayong ngakiro kon. Nyikimiek ayong kesurumio ngileech! Ewapi ayong ngitalio kon, kainyo kitoosu iyong ayong noi. Ee Ekapolon Akuj, kitatamae eger a ngakitatamet kon, sodi erichak ayong jik. Kitoyenae ayong etal kon, minio kona erichakinea. Erichakini ayong a etau kang kadaang. Torikoe ayong erichak ngitalio kon, kainyo aanyunit ayong alakara anikech. Nak etau kang ekimue lo erichakinea ngakiro kon, meere kotere angatarea ichebore. Toree ngakonyen kang nyiiteto eboyor lopasit. Torikoe ataanyunea akiyar alorotin kon. Kiyook akichikakinet kon ani a ekasuban etich kon. Akichikakinet ngina ngesi na ichikakini iyong ngulu kiminasi iyong. Toyuunae ayong aloyeny alu aemit ayong, kotere ejokak ngakiro kon. Asaki ayong akiwap ngitalio kon, lu kitaanyunea eboyor lokitetet, kainyo irai iyong lo itenoono. Ekapolon Akuj, kidodikinae amina kon na nyedaun. Toyuunae itemem ka akichikakinet kon. Minio ayong kona atachea ngakiro alu keyenyete, kainyo anupit ayong akiroit kon. Kingarakinae toliwor eruoro ngakiro kon na iteni jiik, kainyo ngakiro kon egieno ayong. Ewapi ayong etal kon jiik, napei tokona jik. Eboikin ayong arai lo alachikina dir, ani ationikinitor akiwap ngitalio kon. Alimokini ayong ngikapolok ngakiro kon, nyekerumeta ngileech. Kajoikinit ayong akiwapit ngitalio kon, kainyo amina ayong kesi. Akerit ayong ngitalio kon atomina. Etamanari ayong ngakitatamet kon. Kitamu akichikakinet kon anikang a ekasuban etich kon, ketaanyu akichikakinet ngina ibore ni egieno. Tani kaanyunit ngichan kesiangaritae, kainyo ketaanyuni akichikakinet kon akiyar. Ngitunga lukenisak, kemenyete ayong jiik. Nakaneni nyadepari ayong etal kon. Na etamunea ayong ngakiro kon na kolong ngorok, kesiengunete ayong, Ekapolon Akuj. Angoyeene ayong elelebun, na engolikinea luaronok ichwangakinete etal kon. Ngirwa lu apeyonitor anakwap kana, aeo ngieosio a ngakitatamet kon. Ketamuununi ayong iyong nakwaare, Ekapolon Akuj, erichakinite ngitalio kon. Ibore ni ketalakarit ayong noi, ngesi ni anupitor ngitalio kon. Ee Ekapolon Akuj, iyong bon kasakit ayong. Kechikakinit atamar ewapi ngakiro kon. Kelipit iyong a etau kang kadaang atamar, pena iyong ngisien anikang, loger lo kichikakinitor! Etamana ayong elote kang, abongu tokona akiwap ngakiro kon. Ebunyakini ayong nyamamakini akiwap ngitalio kon. Kalokito ayong luaronok, nakaneni nyekemuriakini ayong etal kon. Anyouni ayong kiding akwaar kepuruu iyong, kotere ngakiro kon na etenooko. Kielo ayong ka daang lu kikerito iyong ka daang lu irichakinito ngitalio kon. Ee Ekapolon Akuj, ileleba amina kon na nyedaun akwap wadaang. Kitatamae ngitalio kon. Ee Ekapolon Akuj, kisubea iyong ayong ekasuban etich kon naajokak, loger lo kichikakinea. Kitatamae aosou ka etube ngakiro, kainyo anupit ayong ngitalio kon. Ani eringa ayong nyirira, abu atosech, nakaneni erichak tokona akiroit kon. Ijok iyong nabo ipatana! Kitatamae ngitalio kon. Ngulu inisasi, kesudioto ayong ngakiro. Nakaneni erichakinit ayong ngitalio kon a etau kang kadaang. Edikam ngakies kech. Ani eliwor ayong, kajoikinit etal kon. Ajok eriras kon anikang, kainyo abu ketaanyu ayong ngakitatamet kon. Etal lo kitaanyu iyong ayong, kajoikinit ayong noi, akidwang ngaropiyae daang anakwap. Kisub iyong ayong a ngakan kon a ilope. Kitoosunoe ayong atoyen ngitalio kon. Ngulu kikerito iyong, kengolikinete ayong talakaros, ani egienor ayong akiroit kon. Ee Ekapolon Akuj, ayeni ayong atamar etenooko ngakiro na itubuni iyong. Ayeni nabo dang atamar kirira iyong ayong ani iraakar lo kimunoi. Kimiek amina kon na nyedaun toliwor ngesi kesililingi ayong, loger lo kichikakinea iyong ayong lo arai ekasuban etich kon. Kimiek ngisien kon pena nikang, minio kona ayarea. Kainyo ketalakarit ayong etal kon. Kimiek lu nyekerito Akuj kiruma ngileech, kainyo kamodito ayong. Ani eliwor ayong, etamanari ngitalio kon. Kimiek lukenisak daang toreeunos nikang toyeneta kesi ngakiro kon. Agasi atamar kikiun etau kang anakitatamet kon, sodi nyekedwang ataanyu ngileech. Ekapolon Akuj, kaburu ayong lokojokon, kedarit iyong kitoyuu ayong. Egieno ayong akiroit kon. Aburu ngakonyen kang angolengol ibore ni ichikakini iyong. Engita ayong abala, “Ibuni iyong ori akisililing ayong?” Ekok ayong akutwam nangorot na enoonokino. Tani kekoni neni, eringa ayong nyimuriakina ngakitatamet kon. Edari ayong tanang wori? Ori iriraa iyong lu kaboliatar ayong? Ngitunga lukenisak, aboka ngapanya nakalokitotor ayong. Nyemisito ngitunga ngulu etal kon. Eraakasi ngitalio kon daang lua iteni. Kaboliatar kesi ayong kesudonokinete ngakiro, kingarakinae kare! Edikino kesi kaarete ayong, nakaneni nyeisikina ayong ngitalio kon. Kotere amina kon na nyedaun, tosubere ayong naajokak, ewapea ngakiro kon. Ee Ekapolon Akuj, erubi akiroit kon jik. Erai na nyesaluni anadis. Erubi ajokis kon analesea kadaang. Itowei kolong iyong akwap, nakaneni eringa erubakinit ewei. Ewaasi ngiborei daang akolongit naga a akiroit ana kolong idunguni iyong. Kainyo eraakasi daang ngikasubak etich kon. Arai nyeerai etal kon ketalakarit ayong, kadauna ayong kotere ngichan kang. Nyekemuriakinete ngakitatamet kon jik kesi kitaanyunitor iyong ayong akiyar. Arai ayong ikon, toyuunae, ani erichar akiwap ngitalio kon. Kedarito ayong ngitunga luaronok esakete akiar, nakaneni etamanari ayong ngakiro kon. Ayen atamar eyei ibore daang esal, nakaneni emam etal kon esal. Amina ayong etal kon noi! Etamanari ayong jiik akolongit daang etia ni etia! Kirukit ayong ka etal kon jiik, ketoosu ayong akidwang ngimoe kang. Aosu ayong noi edwang ngiketatamak kang, kainyo etamanari ayong ngakiro kon. Aosu ayong noi edwang ngikasukou, ani ewapitor ngitalio kon. Anger ayong akiwap elote loaronon daang, erichakinea akiroit kon. Nyilagalagakina ayong ngakiro kon, kainyo iyong elope irai eketataman kang. Ebobok ngakitatamet kon anikang eunyiunyete. Ee robo, ebobok noi idwangito tani akimiet a ao anakituk kang. Aanyuni ayong aosou anakitatamet kon, kotere ngakiro nguna, aremokino ayong elote loaronon daang. Erai akiroit kon ataa a ngakejen kang, nabo erai akicha a erot kang. Ekong ayong nabo aweikinit akikong ngina abala ewapi ngakiro kon na etenooko. Ee Ekapolon Akuj, ariaba ayong lokojokon. Kiteyarae ayong loger lo ilimunio iyong. Ee Ekapolon Akuj, tacham akilip na kabuakinitor iyong alakara. Kitatamae ayong ngitalio kon. Ajalit ayong akiyar kang jiik. Nakaneni nyimuriakina ayong etal kon. Kalokito ayong ngitunga luaronok, nakaneni nyibatara ayong alotalio kon. Ngakiro kon eraakasi ebari kang lokajik. Ee robo, kesi italakarito etau kang. Atiaku ayong akiwap ngakitatamet kon, tanang akolongit na atoanea. Aremokino ayong ngitunga lu etiakito ngitai ngaarei. Nakaneni amina etal kon. Iyong irai aduket kang ka aupwal kang. Egieno ayong akiroit kon. Kiyotosi anikang, esi ngikasechak. Ewapi ayong ngitalio a Akuj kang. Kitogogongoi loger lo kolong kichikakinitor, sodi atoyar. Nyikimiek ayong aanyuni ngileech kotere ngakiro na egieno ayong. Kigangae ayong eboikinor akaalimon. Toliwor arima jiik ngakitatamet kon. Ingerit iyong ngitunga daang lu nyiwapito ngakitatamet kon. Ee robo, erai amodeanut kech aka pas. Itusubunit iyong luaronok daang asakatan. Kotere ngakiro nguna, amina ayong ngakiro kon. Emarani akwaan kang ani kaemitor iyong. Kabul ayong kotere ngakiro na idunguni iyong. Asub ayong na eriyan kiyookino. Nyikimiekinea ayong ngitunga lukechiakiarito. Kichikakinae atamar kingarakini iyong ayong. Nyiimiek lu nyikikerito iyong kechiakiarete! Aburu ngakonyen kang angolengol, edarit atamar kitoyuu. Edarit atamar kiyook natenoyek na kolong kichikakini. Tosubere ayong ekasuban etich kon, na itemokino namina kon na nyedaun. Kitatamae ayong ngitalio kon. Arai ayong ekasuban etich kon, kitoosunoe atoyen ngakiro kon. Ee Ekapolon Akuj, itemokino tokona iyong isubakini ibore idio, kainyo echwangakis ngitunga etal kon. Amina ayong ngitalio kon akidwang egolit, ee robo, akidwang tani egolit loajokon noi. Kotere nguna, ewapit ayong ngakitatamet kon daang. Aremokino erot lo amodeanut daang. Eraakasi ngakiro kon nakitalarete. Irichakinit etau kang kesi. Ngakiro na elimunitoe anakitatamet kon, eyaunito akicha. Itoosunete lu emam ibore eyenete. Achiit ayong akituk eanga, kainyo kemuit akikamun ngitalio kon. Toreeun nikang, pena ngisien anikang, loger lo kisienitotor daang lu kiminasi iyong. Kitenik elote kang, loger lo kichikakinea iyong ayong. Wara naaronok nyakadokakis ayong. Toyuunae ani eyakasi lu kechiakiarito. Sodi ewapea ayong ngitalio kon. Kimiek ereet kon kinwaku ekasuban etich kon. Kitatamae ayong ngitalio kon. Elakakinito ngakonyen kang ngakiyo eleleete loger a angolol, kotere ni nyiwapitotor ngitunga etal kon. Ee Ekapolon Akuj, itenoono iyong. Iyookino ngakiro na itubuni iyong. Ngakiro na iwaakinit iyong eteniyete nabo itemokino. Angoit ayong eleleba ani nyemisitotor ngimoe kang ngakiro kon. Eraakasi ngakichikakinet kon na ikiuna dir. Amina ayong ekasuban etich kon kesi. Adit ayong nabo kemenyaritae, nakaneni nyelagalagakinit ngitalio kon. Erubi ateneanut kon jik. Erai etal kon eka iteni. Ariaba ayong noi ayei lochan. Ketaanyunito ayong ngitalio kon alakara. Eraakasi ngakiro kon na eteniyete jik. Kitaanyunae ayong aosou atoyarea. Kegoronokini ayong iyong a etau kang kadaang. Ekapolon Akuj, kiira ngakiro kang, ewapea ayong ngakitatamet kon. Kanyarit ayong iyong. Toyuunae erichakinea ngakiro kon. Nataparach eringa akolong nyipiripiruna, anyouni ayong katanyar iyong asaki kingarak. Egieno ayong akiroit kon lokojokon. Akwaar daang kiiya, akienyi ayong, etamanari ngakitatamet kon. Kiira ngakiro kang, itemem ka amina kon na nyedaun. Kidodiu ngisien kon, kitoyuu ayong! Aapuut lukamoitanak kaboliatar ayong. Eraakasi kesi lu eloka alotal kon. Nakaneni iapi iyong anikang, Ekapolon Akuj, nabo eraakasi ngitalio kon daang lua iteni. Napei kolong kanuan, etatama ayong ngakiro kon. Iwaak iyong kesi pena jik. Kingolik ngichan kang kitoyuu, kainyo nyilagalagakina ayong etal kon. Toweikinae ayong kitalachak. Toyuunae loger lo kichikakini iyong ayong. Elonikina ayuuno ka luaronok, kainyo nyesakete akiwap ngakitatamet kon. Ee Ekapolon Akuj, etioko ngisien kon. Kidodiu ngisien kon kitoyuu ayong. Elalak ngimoe kang ka lu kechiakiarito ayong, nakaneni nyalakakini ayong ngakiro kon. Kakadakinito ngirukooi ngulu na engolikinea, kainyo nyirichakinito kesi ngitalio kon. Ee Ekapolon Akuj, kingolik eger lo aminar ayong ngitalio kon. Kirichak akiyar kang kotere amina kon na nyedaun. Iteni erai epit a etal kon. Etenooko ngakiro kon, eraakasi daang na erubete jik. Kaboliatar ngikapolok pas nakaneni akerit ayong ngakiro kon. Alakara kotere akiroit kon, ekoni itwaan ni angata ebari. Aremokino ayong alioko lokojokon, nakaneni amina etal kon. Kepuruunit iyong ngakipuruunet ngakan-kaarei akolongit apei, kotere ngakiro kon na etenooko. Ibooyete lu eminasi etal kon nikaalimon. Emam ibore ilegeuni kesi. Ee Ekapolon Akuj, kedarit iyong kitoyuu ayong. Etemokinit ayong ngitalio kon. Ewapit ayong ngakiro kon. Amina ayong a etau kang kadaang. Ewapit ngitalio ka ngakiro kon. Itee iyong daang na asubi ayong. Ee Ekapolon Akuj, kimiek akigoro kang tanangu nikon! Kitaanyunae aosou loger lo kichikakinea iyong. Topupok akilip kang, toyuunae itemem ka akichikakinet kon. Kepuruuni ayong iyong jiik, kainyo kitatami iyong ayong ngitalio kon. Aeokini ayong ngakiro a etal kon, kainyo iyookino ngitalio kon daang. Tasak akingaranakin ayong jiik, kainyo ewapit ayong ngakitatamet kon. Ee Ekapolon Akuj, eitanit ayong noi atamar kitoyuu iyong. Ketalakarit ayong etal kon. Kiteyarae ayong, kepuruunio iyong. Kimiek ngakiro kon kengarakis ayong. Erimit ayong akwap loger a amesek ana echakara. Bua tasakae ayong ekasuban etich kon, kainyo nyilagalagakina ayong ngitalio kon. Anyarae ayong Ekapolon Akuj na ariabar, kiira ngesi ngakiro kang. Ekapolon Akuj, toyuunae, ani eyakasi ngikengalak ka ngikamodeanak. Esi ngitunga lukamodeanak, nyo kiinakinio esi? Kirirao esi kwaai? Kirirao a ngimalea aluakwanak a ngasigerea ka ngatotol na enokete a esanyanait! Oitiakoi! Erono akiboi anikus ikwaan ka akiboi alotunga alugelayek a Mechek kori lua Kedar. Kiboi ayong nikooyen ka ngitunga lu eremokino ekisil. Asaki ayong ekisil. Ani bo eruorikini ngakiro a ekisil, tasaka kesi ejie. Engoliari ayong lomoru. Aliwae ebunio akingarakino kang? Ebuni akingarakino kang ani a Ekapolon Akuj, ana asubi adis ka akwap. Nyikimiekini ngesi iyong tadakar. Ekienyi ekaean kon jiik. Ekaean a Isirael, nyilurakin kori nyejotoor. Kiyoki iyong Ekapolon Akuj. Ngesi erai etorube kon ani ilosi kadaang. Nyikiwani iyong akolong naparan kori nyikiwani elap nakwaare. Kiikini Ekapolon Akuj iyong ani eyakasi naaronok daang. Itee eboyor kon. Kiyoki iyong na ilomunea ka na ipudorea, napei tokona jik. Alakar ayong nakalimokinere tamarae, “Kapana kai a Ekapolon Akuj.” Kiya tokona sua nege, kilomu Yerusalem! Edukitoe Yerusalem ikoni ere lo etokokinitoe wapei. Neni eponeenete ngitela, ngitela a Ngisirael, epote abuakin Ekapolon Akuj alakara loger lo edungokinitere kesi. Neni iboyonokinosi ngikapolok a Isirael akitub ngakiro a ngitunga kech. Kilipa min ekisil Yerusalem. “Kimiekisi daang lu kiminasi iyong kisikokinos. Min ekisil tooma ngawasea kon, ani ngakais kon, emam ibore etapi.” Aloger aminar ayong ngiyenet kang ka ngipaalon, alimokini ayong Yerusalem atama, “Ekisil min nikon!” Kotere akai a Ekapolon Akuj, ana erai Akuj yok, kelipakinit iyong atamar kisikokin. Ekapolon Akuj, kereokinit iyong, na ibooyi anadis. Kingolik a, eger lo iteeto ngikasubak etich lukiliok ngakan a ngikapolok kech, ka eger lo iteete naberu ngakan a ngakapolok kech, eger lopei ngolo kiteo sua Ekapolon Akuj na erai Akuj kosi. Kisienoi sua, ee Ekapolon Akuj, kisienoi, kainyo kimenyaritae sua noi. A ngirwa a ngikaalak, kibelasi sua ngimeny a ngikabarak ka ajamuaro a ngikenisak. Isirael, tolimu robo tokona tama, “Arai nyiibakite Ekapolon Akuj alowae yok, Arai dir nyiibakite Ekapolon Akuj alowae yok nakiremioto ngoni ngimoe yok, kilikorito kesi ngoni kiyari ngirwa lu angoeta kilelebunos. Kilelearito ngoni ngakalel, kitoburuchiasi ngakipi. Kinyamito ngoni ngakalel!” Atobuakisi Ekapolon Akuj alakara ani kiwounea ngoni nyikiriadasi ngimoe a ngikel kech. Kikok ngoni ikeny ni ebuchun isurumitae. Angeda eloit yok, kipuun ngoni. Ebuni akingarakino yok ani a Ekapolon Akuj, ana kolong asubi adis ka akwap. Ngulu igienosi Ekapolon Akuj, ikote emoru lo enyaritae Sion, lo nyingunyakin kori nyiloilookin. Eger lo iriamitotor ngimoru Yerusalem, iriamit Ekapolon Akuj ngitunga keng loger ngolo, napei tokona jik. Nyepolokinete luaronok akwap na etiakakinitae lu etenooko, nyeesubeta lu etenooko dang naaronok. Ekapolon Akuj tosubea ngitunga luajokak naajokak, ka ngitunga lu iwapito ngitalio kon. Nakaneni ani lu erearosi lorotin kech luaronok, elemari Ekapolon Akuj kesi ka luaronok aapei. Min ekisil nia Isirael! Nakolong kibuunea ngoni Ekapolon Akuj Yerusalem, kikoni ngoni ngitunga lu kirujae! Kipot atalakaros atokienata erida. Kipot atoeokisi emaritetekisi! Apot ngibukui luche tamasi, “Asubea kesi Ekapolon Akuj ngakiro natenoyek!” Iteni dir kisubea ngoni Ekapolon Akuj ngakiro natenoyek, atalakaros dir! Ee Ekapolon Akuj, kitiliworoe sua nabo lu kisikokina, loger lo eleleuneta ngangololin nasek eokito deu. Ngulu kolong etaate igorosi, elemete elakara imariteteete. Ngulu kolong aloose akitare igorosi, ebongunete elakara imariteteete, etingito ngalemet. Ani pekeduk Ekapolon Akuj akai, ngulu edukete, ichanasi pas. Ani pekitee Ekapolon Akuj ere, ngulu iteete, ekienyete pas. Ani emam Ekapolon Akuj, erai etich kus eka pas. Inyounete esi nataparach elilim tosuba etich tanang nakwaare, ichidarito ngakiinyir taanyuneta akimuj. Einanakini Akuj lu eminasi ngesi ibore daang tani eringa ejotoote. Eraakasi ngide ekeny lo ebunit ani a Ekapolon Akuj. Eraakasi ngide ainakinet ngina kiinakinitae ngoni. Ngide lu euriuni itwaan esorokona, ikote ngimalea a amod lu etingit asiger. Epiaritae itwaan ni ileleba ngimalea namod keng. Nyidwangio ngesi na ititakineta ngimoe keng anitubet ngakiro. Epiaritae daang lu ekerito Ekapolon Akuj, lu ibooyete iwapito ngitalio keng. Inyami iyong akimuj a etich alo isubi a ngakan kon. Ilakar iyong nabo isikokin. Ikokini aberu kon emusabib lo erait ageor nakaalan anawi kon. Ikokinete talokookon ngimusabib luuchik iriamito emeesa kon. Ee robo, epiario itwaan ni ekerit Ekapolon Akuj loger ngolo. Kipiari iyong Ekapolon Akuj alo Sion! Kingolik akisikokina a Yerusalem, ngirwa daang lu iyarea iyong. Ipoloe taanyunga ngide a ngide kon. Ekisil min nia Isirael! Ebala Isirael, “Kaboliatar ayong ngimoe kang napei kolong a ekiditeu kang!” “Iteni dir kechan napei kolong a ekiditeu kang, nakaneni apot nyekedwang ayong. Apot todungudungoto akaku kang kisikokis amana na echilitae. Nakaneni Ekapolon Akuj na etenoono, anged ngaunoi na kaenitotor luaronok.” Daang lu eremokino ere a Sion, kimiekisi kidwangae kisurumae ngileech. Kimiekisi daang kikwaanikinos ka nginyia lu erupunito alokidiama akai, lu eoniyorete eringa nyepolouno. Nyepedorete tani akilelebun akan a itwaan kori nyeenasi kiwokoe. Emam itwaan ni itoruni diyete neni ni etamari, “Kimiekisi Ekapolon Akuj kitopia esi! Kipiarit esi a ekiro a Ekapolon Akuj!” Ee Ekapolon Akuj, kegoronokini iyong anaaut. Ee Ekapolon, kiira akigoro kang. Todeta akit, kiira akilip kang! Ekapolon Akuj, arai kimari iyong ngasechesea kosi, kerai ngae itiri eriras? Nakaneni kirimanakini iyong sua ngasechesea, atosubeta sua etich kon kikerit iyong. Egieno ayong Ekapolon Akuj, edarit kemuit dir. Anupit dir akiroit keng. Idarit etau kang Ekapolon Akuj lokojokon, akidwang tani eger lo idaritotor ngiketeok a akwaar akwap echili. Akidwang tani eger lo idaritotor ngiketeok a akwaar akwap echili, ee Isirael, kigienokin Ekapolon Akuj! Kainyo nyedaun amina keng, nabo esaki ngesi jiik ayuun. Eyuuni ngesi Ngisirael anaronis kech kadaang. Ee Ekapolon Akuj, achaka etau kang ekinis nabo nyekeat ayong ngakonyen. Nyariparit ayong ngakiro nakationok kori ngakiro nakakuruworito. Nakaneni edatak ayong eboikin akaalimon, loger a ikoku aniichi ani idatakinit alosikina a itiokeng. Eger ngolo ngesi idatakinitor etau kang. Ee Isirael, kigienokin Ekapolon Akuj napei tokona jik. Ekapolon Akuj, kitamu Daudi ka ngichan daang lu aanyuni ngesi. Ee Ekapolon Akuj, kitamu ngakiro nakichikakini Daudi iyong. Kitamu akikong nakikongokini ngesi iyong, Akuj a Yakobo Nakaagongon Noi. Abala Daudi, “Nyalosi ayong nawi kori lokitanda. Nyemiekini ayong ngakonyen kang ilurakin, kori nyemiekini ikamunete ngaju, mati mono kasakak Ekapolon Akuj ni iboikin, ni eliwor awi keng, Akuj Nakaagongon Noi a Isirael!” Kiira sua ngakiro a asaduku a Achamunet alo Betleem, atorukautu anamanat a Yearim. Atamasi, “Potu apana kai a Ekapolon Akuj. Elipa alongaren ekicholong keng a apolou!” Ekapolon Akuj, bua kai kon aapei ka asaduku a Achamunet, na erai ngesi idodiunit apolou kon, kiboikin neni jik. Kimiek ngimurok kon tosuba jiik na etenooko. Kimiek ngitunga kon kimariteteeto elakara! Kotere ekasuban etich kon Daudi, nyiinger ekapolon kon lo iseu iyong. Ichikakini kolong iyong Daudi naka dir, nakaneni nyilocho iyong akichikakinet ngina ibala, “Etiliwori ayong epei a talokookon ekapolon, ilunyokin ngesi lokicholong kon topolok ekisidi kon. Ani kirichakis ngide kon achamunet kang, ka akiwap ngakiro kang, ilunyokinosi talokookech dang lokicholongo kech toliworos ngikapolok.” Aseu Ekapolon Akuj ere a Sion, esaki toliwor ere lo elomi ngesi. Ebala ngesi, “Alomi ayong nege jik. Asaki ayong apolokin nege. Apiari ayong ere a Sion a ibore kadaang. Esimwoni ayong ngikebootok a ere kangolo. Apiari ngimurok kech ana esubete kadaang. Eeokinete ngitunga keng kimaritetekis. Etiliwori ayong epei a ngalesea a Daudi ekapolon lo eyenikinitae kaneni. Eratakini ayong apolou a ekapolon kang aloseuna. Esurumi ayong ngimoe keng ngileech lokojokon, nakaneni ejoker apolou keng kisikokin.” Erai akiroit ajokon, nabo ejok noi, erai ibooyete ngitunga a Akuj aapei epuposi. Ikoni akimiet a etal na eleleunit anakou a Aaron kitoru najul a abokony keng, tanang ni a eluute a eworu keng. Ikote ngakop a emoru a Erimon na echakanakinosi kidiama lomukur a Sion. Neni ngesi echikakinea Ekapolon Akuj apiaro keng, na erai akiyar nakajik. Potu kipuruutu Ekapolon Akuj, esi ngikasubak etich keng daang, lu isubete etich alokai keng nakwaare. Kikiasi ngakan kus ilipito Akuj, kipuruut Ekapolon Akuj! Kimiekisi Ekapolon Akuj na kolong asubi adis ka akwap, kitopia esi alo Sion. Ekapolon Akuj kipuroe! Kipuruutu Ekapolon Akuj. Kipuruutu, esi ngikasubak etich keng, lu iwaasi alokai a Ekapolon Akuj, alokai a Akuj yok. Kipuruutu Ekapolon Akuj, kainyo ejok ngesi. Toeokisi ipuruunito ekiro keng kainyo ejok ikokinio neni. Kainyo aseu Ekapolon Akuj Yakobo toliwor ekeng, aseu Ngisirael toliworos ngikeng a ilope. Ayeni ayong iteni dir atamar epolot Ekapolon Akuj. Ee robo, epolot Ekapolon Akuj yok idwangit ngakujo daang. Esubi Ekapolon Akuj ibore ni esaki ngesi, anadis ka akwap, ananamea ka nituluk daang. Eyaununi ngidowon anasalunet a akwap. Imoriununi akiru ka akimilea. Itukutuni ekuwam alodulae. Aari ngesi ngiuriuna lu ekingaren daang alo Misiri, ngiuriuna lu ekingaren a ngitunga ka ngibaren. Asubi ngesi ngakitoodikinet nakailiilok ka nakatalarak, kirira Parao ka ngikasubak etich keng daang. Amunyari ngesi ngibukui lukaalak sodi taar ngikapolok lu eyenikinitae, kesi ta Sion, lo arai ekapolon a Ngiamor, ka Ogu, lo arai ekapolon a Bachan, ta ngikapolok daang alo Kanaan. Alemari ngesi akwap kech nak ngitunga keng, nak Ngisirael toliwor akwap kech. Ekapolon Akuj, kilimorio iyong atamar irai Akuj jik. Kitamunete iyong nganaketa daang. Eikini Ekapolon Akuj ngitunga keng. Isieniyete ngikasubak etich keng. Esubunitae ngakujo a ngibukui anakwangae ka egolit, na esubete ngakan a ngitunga. Eyakasi kesi ngakituk, nakaneni nyiruorikinete. Eyakasi ngakonyen, nakaneni nyiteete. Eyakasi ngaki, nakaneni nyepupete. Nyepedorete tani akiangakin. Ngulu asubete kesi kigienokinos, kimiekisi kikwaanikin ka ngakujo na asubete kesi nguna! Kipuruutu Ekapolon Akuj, Ngisirael! Kipuruutu ngesi, esi ngimurok a Akuj! Kipuruutu Ekapolon Akuj, esi Ngilawi. Kipuruutu ngesi, esi lu ikerito Ekapolon Akuj. Kipuruunoe Ekapolon Akuj alo Sion. Kipuruunoe alo Yerusalem, ani erai awi keng. Kipuroe Ekapolon Akuj! Tobuakisi Ekapolon Akuj alakara, ani ejokia ngesi. Kainyo erai amina keng na nyedaun akajik. Tobuakisi alakara, ngina idwangit ngakujo nache daang. Kainyo erai amina keng na nyedaun akajik. Tobuakisi alakara, ngina epol idwangit ngikapolok luche daang. Kainyo erai amina keng na nyedaun akajik. Ngesi bon esubi ngakitoodikinet nakailiilok. Kainyo erai amina keng na nyedaun akajik. Asubuni ngesi adis a aosou keng. Kainyo erai amina keng na nyedaun akajik. Ewaakini ngesi akwap kidiama ngakipi. Kainyo erai amina keng na nyedaun akajik. Asubakini akolong ka elap. Kainyo erai amina keng na nyedaun akajik. Topolok akolong apaaran. Kainyo erai amina keng na nyedaun akajik. Topolokis elap ka ngikanyer akwaar. Kainyo erai amina keng na nyedaun akajik. Aari ngiuriuna lusapa a ekingaren a Ngimisiri. Kainyo erai amina keng na nyedaun akajik. Epuduni ngesi Ngisirael alo Misiri. Kainyo erai amina keng na nyedaun akajik. Kipud a agogongu keng ka apolou. Kainyo erai amina keng na nyedaun akajik. Apaki ngesi anam a Chamu. Kainyo erai amina keng na nyedaun akajik. Kisitor Ngisirael neni. Kainyo erai amina keng na nyedaun akajik. Etanyami ngesi Parao ka ngasigerea keng anam. Kainyo erai amina keng na nyedaun akajik. Ariki ngesi ngitunga keng kisitor nariet. Kainyo erai amina keng na nyedaun akajik. Taar ngesi ngikapolok lukajwok. Kainyo erai amina keng na nyedaun akajik. Taar ngesi ngikapolok lukaruok. Kainyo erai amina keng na nyedaun akajik. Aari ngesi Sion lo arai ekapolon a Ngiamor. Kainyo erai amina keng na nyedaun akajik. Taar Ogu lo arai ekapolon a Bachan. Kainyo erai amina keng na nyedaun akajik. Tolema akwap kech nak ngitunga keng. Kainyo erai amina keng na nyedaun akajik. Toliwor akwap ngina aka Isirael, alo arai ekasuban etich keng. Kainyo erai amina keng na nyedaun akajik. Nyimuriakina ngesi ngoni nakipalagagea. Kainyo erai amina keng na nyedaun akajik. Kitoyuu ngesi ngoni alomoe yok. Kainyo erai amina keng na nyedaun akajik. Itani ngesi ibore ni eyari daang. Kainyo erai amina keng na nyedaun akajik. Tobuakisi Akuj a adis alakara. Kainyo erai amina keng na nyedaun akajik. Eboikinos ngoni lokwaasea a ngangololin a Babilon. Atoliworos kigoro kitamuununi Sion. Kipotu sua enenekisi ngagitae lokito lu ayakasi neni. Ngulu kirikete ngoni, apot kitolimokis atamar toeokisi. Apot lukiboliatar ngoni tasaka atamar etalakasi ngoni kesi. Kitolimokis ngoni tamasi, “Toeokinoe sua eite a Sion!” Kikokini sua kieokini eeos lo kipuruunitor Akuj anakwap anagela ai? Ee Yerusalem, etubor akan kang na aloteten erai pekaliwor ayong ketamunit iyong! Ani kasak ayong ibore iche akidwang iyong, Yerusalem, kimiek angajep kang tatapakin nangirit kang. Ee Ekapolon Akuj, wara nyikimuriakis na kolong asubete Ngiedomae, akolongit na alemarere Yerusalem. Kitamu eger lo abalatar kesi, “Toukosi Yerusalem! Tobwanga tani ngamoru na alokwap.” Ee Babilon, kinyasunio iyong! Epiaritae ni etachakini naaronok na kolong kisubea iyong sua! Epiaritae ni irumuni ngide kon tachakea ataaba! Ee Ekapolon Akuj, kabuakinit alakara a etau kang kadaang. Kaeonokini iyong kepuruu alongaren ngakujo. Ariediki engoliarit kai kon na italeunitoe. Kekusi iyong kotere amina kon na nyedaun ka amuno kon. Kainyo ikeu iyong ekiro kon ka akiroit kon akidwang ibore niche daang. Ibu iyong kiik ayong akolongit nakanyaraa. Kitogogong iyong ayong a ngikilinga kon. Ee Ekapolon Akuj, kipuruunete iyong ngibukui daang anakwap, kainyo eirasi ngakiro a akituk kon. Ikusete nguna isub iyong kainyo etiono akibuseanu kon. Ee Ekapolon Akuj, tani kipol iyong akidwang daang, imisikinit iyong lupalag. Nyikidukakinete iyong lukenisak. Nakeriameta ayong ngichan, kiyok iyong. Iratak iyong anyunyura a ngimoe kang, itorwaari iyong akan kon kingarakinea ayong, Kiyuuni iyong ayong a agogongu kon. Isubakini iyong ibore daang ni kolong ilimuni. Ekapolon Akuj, erai amina kon akajik. Nyiitubok etich lo isiak iyong. Ee Ekapolon Akuj, kiseme iyong ayong kiyen. Keboikin kori kawo, iyeni iyong. Iyeni ibore ni etami ayong. Esaa lo asubea ayong etich kori lo eangaritor kitee iyong ayong. Iyeni iyong elote kang daang. Tani eringa akiroit nyitoruno nakituk kang, iberakin iyong akiyen ibore ni alimuni ayong. Ibeit iyong lowaitin kang daang. Kiikini iyong ayong a agogongu kon. Kationikinit ayong aosou kon noi. Nyayeni ayong atamar ekokini aanyuni ai! Aliwae amatar ayong kelany iyong? Aliwae alosi atojongo akitere iyong? Ani kalot nadis, iyei iyong inaa. Ani kenapakin lokatoak, iyei iyong inaa. Ani kaporo atanang ni ipiripirunea akolong, kori atanang logerio a anam, kiriki iyong ayong tani kaina. Kingarakini iyong ayong kaina. Apedori ayong alimokin aribu atamar katarap ayong kori kilochoi akicha nakeriamit ayong toliwor aribu. Tani aribu anikon, nyerai aribu. Ani akwaar, ekwang loger a apaaran. Anikon, erai aribu ka akicha ngipei. Isubuni iyong akwaan kang ka etau. Kirumeikini kolong iyong ayong anakook a itiokang. Kepuruunit ayong iyong kainyo irai iyong nakitubuli, tarai nakatalaran. Kitalarete na isubi iyong. Ayeni ayong nguna a etau kang kadaang. Nakolong asubere ngakoyo kang, na erumeanakinere anakook a itiokang, kolong eyosi ayong akingaarikin, emam itwaan ayeni, pearai iyeni iyong atamar ayei ayong neni. Kingolikini kolong iyong ayong eringa nyidouno. Igiri iyong ibore daang nakitab kon. Igiri iyong ngirwa kang daang, eringa tani akolongit na ekingaren nyimarakina. Ee Akuj, kajoikinito ayong ngitamen kon noi. Emam tani kona imarunio. Arai toyei kona imarunio, kelalak noi akidwang asinyen. Na akienyunea ayong, eringa kirukit ka iyong. Ee Akuj, esibit cha taar iyong luaronok. Esibit cha kiyotokis ngikaarak ngulu anikang. Keruorotor kesi ayong ngakiro naaronok. Iruorotor ekiro kon ngakiro naaronok. Ee Ekapolon Akuj, aremokino ayong ngulu kiremokino iyong. Emenyarit ayong ngulu kingerito iyong. Aremokino ayong kesi nakationon. Emarunit ayong kesi atamar eraakasi ngimoe kang. Ee Akuj, kisemoi ayong, toyen etau kang, toroae, toyen ngitamen kang. Tongichu keyei ibore erono anikang. Kitorik ayong alorot alo erai eka jik. Ee Ekapolon Akuj, toyuunae ayong alotunga aluaronok. Toikinae alotunga alukamoitanak. Erekinito kesi naaronok alotai kech, ichuchuyete ejie jiik. Ikote ngangajepa kech ngimunio lukangedarak. Ikote ngakiro kech akisierit a akipom. Ee ekapolon Akuj, kiyokoi ayong alotunga aluaronok. Toikinae alotunga alukamoitanak alu esakete adakar ayong. Kalokakinito ayong lukenisak, apetakis auno loger a epuute, idaito ngiloi alorot esakete akisurum ayong. Alimokinit ayong Ekapolon Akuj abala, “Iyong irai Akuj kang.” Ekapolon Akuj, kiira akigoro kang na asakea ayong atamar kingarak. Ee Ekapolon Akuj, Ekapolon kang, akaean kang nakaagongon, imuk iyong akou kang akolongit na ejie. Ekapolon Akuj, nyiitaanyu luaronok na esakete. Wara nyiisubak na esakete kesi. Wara ngimoe kang nyeeliworosi ngikedwangak. Aronis a ngakiro kech tobongok kesi ngikulepek. Tachakakinos ngatotol na enokete nawat kech. Tachakakinos kesi nakipany nyeepudut nabo. Ngulu eswamete luche, nyerubete anakwap jik. Kimiekisi lukamoitanak kiriamunos ka aronis na emunyari kesi atipei. Ekapolon Akuj, ayeni atamar iikini iyong lupalag, ka aikin ni ichana. Kipuruunete iyong dir lu etenooko. Iboikinosi lu eteniyete nikon. Kegoronokini iyong Ekapolon Akuj, kingarakinae ayong tokona! Todeta akit kiira nakanyaraa. Tocham akilip kang na ikoni emitina. Ngakan na ekearit ayong, kikokis akipeyos naka ebong. Ee Ekapolon Akuj, kiwaak ekeyokon a akituk kang. Kitee ekidor a ngipon kang. Kiratakinae ayong nyaasak akisub naaronok, kori nyikimorikin ka ngitunga luaronok anaronis kech. Nyikimiek ayong aloseene losukukuu kech. Kimiek itwaan niajokon kataram ayong kori kekilak a apatanu, nakaneni nyachamuni ayong arimatoi alotunga aluaronok, kainyo elipit ayong jiik kotere naaronok esubete kesi. Ani ipotorio kesi lokerirak kech, tonupa atamar eraakasi ngakiro kang iteni. Apetakin ngakoyo kech nakituk a aliel, loger a ngamoru ana epetakina nalup! Nakaneni anupit ayong ngakiro kon, ee Ekapolon Akuj, Ekapolon kang. Iyong kamechi ayong. Nyikimiek ayong atoani. Kiyokoi aloloi alu kalokakinitere ayong, ka ngiloi a ngitunga aluaronok. Kimiekisi luaronok kisuruma ngiloi kech a ngikulepek, dio ayong atobuchar nyewana. Egoronokini ayong Ekapolon Akuj asaki atamar kengarak. Emaimai ayong ngesi. Epudok ngesi eburas kang daang. Alimok ngesi ngichan kang daang. Ani enangi ni alungakinor ayong, ayeni ngesi na asubakini ayong. Ewaakis ngimoe kang eloit lorot lo etori ayong. Ani angolengolekini ayong, emam itwaan ni kengarakini. Emam tani ni amechi. Emam itwaan kamisit ayong. Ee Ekapolon Akuj, kegoronokini iyong! Ekapolon Akuj, iyong kamechi ayong. Iyong bon kegieno aloboyor a akwap kana. Kiira akigoro kang na asakea atamar kingarak kainyo ketililimiyosi ayong ngichan. Toyuunae ayong alomoe kang kainyo egogong kesi noi akidwang ayong. Talachakinae ayong alojela, sodi kepuruunio iyong kirukit ka ngitunga lu etenooko, kainyo kisubea iyong ayong naajokak. Ekapolon Akuj, kiira akilip kang! Kotere ateneanut kon, kiira eger lo kemaimaea iyong. Tatachu akilip kang ani iraakar iyong na kimunoi. Nyiitubok ekasuban etich kon ngakiro kainyo emam itwaan nyesechit alongaren kon. Kewap ayong emoit kang kachakaki kwap kepudaa. Kainiki lojela lokirion chuch, kikwaanikin ayong ka lu kolong atoakete a angorot. Keloo ayong noi. Erakar atoana kotere ebuloi. Etamunit ngirwa lu adaun. Etamanari daang na isubi iyong. Etamuununi na asuba ngakan kon daang. Kebakinit iyong ngakan elipit. Iitanit etau kang iyong loger lo iitanitotor ngalup nakoonok ngakipi. Ee Ekapolon Akuj, tatachu ngakiro kang atipei. Kangopiki ayong ni etori. Wara nyikidukak ayong, sodi nyikikwaanikin ayong ka lu eloose nia ngikatoak. Kisitamunae nataparach ngakiro a amina kon ana nyedaun, kainyo kegieno ayong iyong. Kidodikinae erot lo etori, kainyo kalemikinit ayong iyong etau kang. Ee Ekapolon Akuj, toyuunae alomoe kang, kainyo amotuno nikon akimech. Irai iyong Akuj kang. Kitatamae akisub na isaki iyong! Kimiek etau kon loajokon, katorik alorot alolapat. Ekapolon Akuj, toyuunae ayong loger lo kolong ilimunio iyong. Toyuunae alochan kang ani ijokia iyong. Kona kiminar iyong ayong, taar ngimoe kang. Tomunya ngimoe kang daang, kainyo arai ayong ekasuban etich kon. Kipuroe Ekapolon Akuj, ataaba nakayuunit ayong. Ketatami ngesi ayong akiyen ejie nabo ketenit ayong atojio. Ngesi erai ataaba kang, ka awas nakaagongon. Ngesi amechi ayong, tarai ekayuunan. Erai ngesi aupwal kang na egieno ayong. Idwangi ngesi ngibukui pena kwap kang. Ekapolon Akuj, nyo mono itwaan itamitor iyong ngakiro keng? Nyo mono lokookeng a itwaan imisitor iyong? Ikoni itwaan akianget, ikote ngirwa keng etorube lo elosi. Ee Ekapolon Akuj, tapak adis totiyaun! Tatap ngimoru topuruut! Kisimileau akwap topeta ngimoe kon. Toguma ngimalea a amod kipungaros kesi. Kitorwaa akan kon alokidiama, kiriu ayong anakipi anatuluk, kitoyuu. Toyuunae anakan a ngitunga a akwap anache, alu isudete ngakiro nabo erai tani akikong kech alioko. Ee Akuj, kaeokini iyong eeos lokitetet. Eturukini ayong agita katoeonok iyong. Iyong ebwangeta ngikapolok ngimoe kech, sodi toyuu ekasuban etich kon Daudi. Toyuunae alomoe alukamoitanak. Toyuunae anakan a ngitunga a akwap anache, alu isudete ngakiro nabo erai tani akikong kech alioko. Kimiek talokookosi alosorokane kech kikokis ngikito lu erupunete togogongioto. Kimiek tanakookosi kikokis ngapirio nakaagongok itisirito ngikwaasea a akai a ekapolon. Kimiek ngikerui kosi kilelebun pich ngalemet nagelagelae. Kimiek ngamesekin kosi toureta ngimesekin lukaalak anachokor. Kimiek ngaatuk kosi totuma lokojokon. Nyiiyecha kori nyeechakut ngitak. Nyeemin akuutere lorotin a ngirerea yok. Epiaritae ngitunga lu aanyut ngakiro na ikote nguna. Epiaritae ngitunga lu eraakasi Ekapolon Akuj erai Akuj kech! Kekusi iyong, ee Akuj kang ka ekapolon kang. Kabuakini iyong alakara nakajik. Kabuakini iyong alakara akolongit daang. Kepuruuni iyong nakajik. Epol Ekapolon Akuj, ejoikinit ipuruunio noi. Kikuruwori akiyen etiae a apolou keng. Ipuruunio ngitichisio kon napei analesit a apei kikobakin nache. Elimorete ngitunga ngitichisio kon luationok. Iruorosi ngakiro a ajakaanut ka asir kon. Etamanari ayong ngitichisio kon lukitalarete. Iruorosi ngitunga ngakiro a ngitichisio kon alukationok. Nakaneni alimori ayong apolou kon. Elimorete atamar ijok iyong lokojokon, nabo ikusete ateneanut kon. Emina Ekapolon Akuj tarai na ngisien. Nyengoyeene ngesi atipei nabo ileleba amina na nyedaun. Ejok Ekapolon Akuj ani eyakasi daang. Isienito ngesi ngitieng keng daang. Ee Ekapolon Akuj, kipuruunete iyong ngisubuna kon daang. Kibuakinete iyong ngitunga kon daang alakara. Iruorosi ngakiro a ajakaanut ka apolou kon. Elimorete ngakiro a agogongu kon. Sodi toyeneta ngitunga daang ngitichisio kon lukationok, ka asir nakebusean a apolou kon. Erai apolou kon akajik. Erubi apolou kon analesea kadaang. Iyookini Ekapolon Akuj ngakichiket keng daang. Ejok ibore ni esubi ngesi daang. Ingaranakini Ekapolon Akuj daang lu eyakasi lochan. Ikeuni ngesi lu adakarosi. Kikienyikinito iyong ngakonyen a ngiborei kadaang, nakaneni iinanakini iyong kesi akimuj esaa lo iitanitotor. Iinanakini iyong kesi akimuj na itemokino kimwoko kesi daang. Etenoono Ekapolon Akuj ana esubi kadaang. Ejok ana esubi kadaang. Eapi Ekapolon Akuj ani eyakasi daang lu enyarito ngesi, daang lu enyarito ngesi na iteni. Itaanyuni ngesi lu ekerito ngesi ibore ni iitanito. Iirari ngesi akigoro kech toyuu kesi. Iyoki Ekapolon Akuj daang lu eminasi ngesi nakaneni emunyari luaronok daang. Epuruuni ayong Ekapolon Akuj jiik. Kimiekisi ngisubuna keng daang kipuruut ekiro keng lo italeuno, napei tokona jik. Kipuroe Ekapolon Akuj! Kipuruu Ekapolon Akuj, etau kang. Epuruuni ayong Ekapolon Akuj ngirwa kang daang lu ayarea. Nyiigienokin ngikapolok a akwap, lokookeng a itwaan lo nyepedori akingarakin. Na edungeo etau keng, tobongo ngesi napua na kolong alemunere. Akolongit ngina, tasalut ngakiro daang na kolong areat ngesi. Epiaritae itwaan ni eanyunit akingarakino ani a Akuj a Yakobo. Itwaan ni igieno Ekapolon Akuj, na erai Akuj keng, na kolong asubi adis ka akwap, anam ka ibore daang ni eyei nanam. Irichakinit ngesi ngakichiket keng jiik. Esubea ngesi lu ichiakiaritae ngakiro na eriyan. Itani lukebootok. Elachanakini Ekapolon Akuj lu eenitae, ka angaanar ngakonyen alumuduk. Ikeuni ngesi lu itasionosi. Emina ngitunga keng lu etenooko. Itee ngesi ngitunga a akwap anache lu elomito nakwap yok. Ingarakinit ngesi ngapuseru ka ngikokiok, nakaneni inyasuni elote a ngitunga aluaronok. Erai Ekapolon Akuj ekapolon jik. Ee Sion, epolokini Akuj kon jik. Kipuroe Ekapolon Akuj! Kipuroe Ekapolon Akuj! Ejok aeokin ipuruunit Akuj yok. Kainyo ejok ngesi nabo itemokino akipuruun ngesi. Esubakinit Ekapolon Akuj Yerusalem. Ebuuni ngirikon. Itangalekini ngesi lu esurur ngitai toen ngajemei kech. Eyeni ngesi etiae a ngikanyer, elimokinit epei kech daang ekiro. Epolot Ekapolon Akuj togogong. Emam kona itemio aosou keng. Ikeuni Ekapolon Akuj lu itiditeuna, nakaneni echakakini luaronok napua. Toeokisi Ekapolon Akuj ngieosio lu ipuruore. Tarama agita ieokinito Akuj yok. Epetakinit ngesi ngidowon nadis. Eyaunit ngesi akiru nakwap kiturup nginyia alomukur. Einanakini ngibaren akimuj kech, kitani ngitak a ngikuruka na erukinioto. Nyejoikinit ngesi agogongu a ngangolei, kori nyeminarit ajwonu a ngasigerea. Nakaneni eminarito lu ekerito ngesi, ngitunga lu igienosi amina keng na nyedaun. Ee Yerusalem, kipuruu Ekapolon Akuj! Ee Sion, kipuruu Akuj kon! Itogogongi ngesi ngidorin kon. Epiari ngitunga kon. Ewaak ekisil lokukuoru a akwap kon. Kitanyami iyong ngakanoi naajokak noi. Edunguni ngesi akiroit anakwap, tosubakin akiroit ngina atipei. Epetakini ngesi eloch lo ipukit loger a eworu alodapal, ka apetar eloch loger a apua. Eyauni ngamoru a akiru naapolok na etia ngikeal. Ngae enaikini akatorot nakaalimon noi ngina? Ani erumor todung akiroit, tokeiasi ngamoru nguna. Eyauni ngesi ekuwam, toleleasi ngakipi. Elimokini ngesi Yakobo akiroit keng. Elimokini Isirael ngakitatamet ka ngitalio keng. Nyesuba ngesi ngakiro na ikote nguna alobukui aluche. Nyeyenete kesi ngitalio keng. Kipuroe Ekapolon Akuj! Kipuroe Ekapolon Akuj! Kipuruutu Ekapolon Akuj anadis, kipuruutu esi lu ibooyete kaina alokidiama. Esi ngimalaikae keng daang, kipuruutu ngesi. Esi ajore a adis daang, kipuruutu ngesi. Esi akolong ka elap, kipuruutu ngesi. Esi ngikanyer daang lu inokete, kipuruutu ngesi. Iyong adis na alokidiama, kipuruu ngesi. Esi ngakipi na iyakasi kidiama adis, kipuruutu ngesi. Ejoikina ipuruunio ekiro a Ekapolon Akuj, kainyo adunguni ngesi akiroit, tosubakinae ibore daang. Akiroit na adunguni ngesi ngina, ngesi ewaakinere ibore daang ni eyei jik. Erubi etal keng jik. Kipuruutu Ekapolon Akuj anakwap, iyong etiengit a anam ka ngitoroi. Esi akim ka ngamoru a akiru, ka eloch ta ngidowon, kipuruutu ngesi. Iyong ekuwam loapolon lo iyookini na edungunit Akuj, kipuruu ngesi. Esi ngimukur ka ngimoru, ka ngikito a ageor ta ngamon, kipuruutu ngesi. Esi ngitieng a moding ka ngibaren daang, kipuruutu ngesi. Esi ngiborei lu iliato ka ngikieny daang, kipuruutu ngesi. Esi ngikapolok a ngakwapea ka ngitunga daang, kipuruutu ngesi. Esi talokookeng a ngikapolok ka ngikapolok luche daang, kipuruutu ngesi. Esi ngapesur ka ngisapa, kipuruutu ngesi. Esi ngitunga lumojong ka ngide dang, kipuruutu ngesi. Kimiekisi kesi daang kipuruut ekiro a Ekapolon Akuj. Epol ekiro keng akidwang ngirora luche daang. Ipororit akibuseanu keng akwap ka adis. Eapi ebukut keng Isirael alo diyete keng. Esikok ngesi etogogong. Ipuruunito ngesi ngitunga keng daang lu emunoi. Kipuroe Ekapolon Akuj! Kipuroe Ekapolon Akuj! Toeokisi Ekapolon Akuj eeos lokitetet. Kipuruutu ngesi irukito ka ngitunga lu etenooko! Talakar Isirael, kotere akasubunan kon. Talakaros ngitunga a Sion, kotere ekapolon kus. Kipuruutu ekiro keng idongaate. Tarama ngiburin kiturukis ngagitae ipuruunito ngesi. Eminarito Ekapolon Akuj ngitunga keng. Itiliwori ngesi lu itiditeuna lu idwangete. Kimiekisi ngitunga a Akuj talakaros ani edwangeta. Toeokis elakara akwaar kiiya kiwala. Kimiekisi kesi kiremasi ipuruunito Akuj, totingito ngilengea lukakwanak anakan kech kidwangeta ngibukui ka akirirare ngitunga lu nyenupito Akuj. Toena ngikapolok kech a ngiriko, ani ngikarikok kech, toena a ngasua. Sodi kirirata ngibukui loger lo adungunitor Akuj. Erai ibore akidwang a ngitunga a Akuj. Kipuroe Ekapolon Akuj! Kipuroe Ekapolon Akuj! Kipuroe Akuj alokai keng! Kipuroe agogongu keng anadis! Kipuruutu ngesi kotere ngitichisio luationok asubaki. Kipuruutu kotere ni epoloo noi! Kipuruutu ngesi a ngaburucho. Kipuruutu a ngagitae! Kipuruutu ngesi a ngiburin ka akidongare. Kipuruutu a ngagitae ka ngibunei. Kipuruutu a ngasua. Kipuruutu a ngasua anakaruok. Kipuruutu Ekapolon Akuj, ngitieng daang! Kipuroe Ekapolon Akuj! Ngakamatak a Solomon alo arai lokookeng a Daudi, tarai ekapolon a Isirael. Eraakasi nugu ngakamatak, na itaanyunete ngitunga aosou, ka ngakitatamet naajokak, ka achoiar ekiruor ngakamatak. Itatamete kesi toosokioto anakiro ana esubete, ka amuno, ka ateneanut ta ajokis. Itoosunete itwaan ni emam ibore eyeni, nabo kitatama ngisorok aosou. Iatakinete tani aosou alokoosok, nabo kitaanyut lu isomato ekunonoonu, sodi toyeneta ngakamatak ka ngakitadapet, ka ngakiro nakaagongok iruorosi ngikoosok. Akiker Ekapolon Akuj ngesi erai akisiakin a achwaanu. Imenyarito lubaang aosou, nabo engerito akitatamo. Lokoku, kiira ngakiro a apakon, wara nyiinger ngakitatamet a itiokon. Kainyo itojokete kesi eboyor kon, loger lo isubusea achaat akou, kisubus akoromwae emosiring. Lokoku, ani kiningete ngikasechak, nyiicham ngakiro kech. Ani ketamasi “Bua. Atoperutu itwaan ataara! Bua etijikisi lu nyesechito ataara pas! Potu elikosi kesi eyarete loger lo ilikorea aliel, elikosi elemwaaka loger alu echakakinosi nakipany! Kianyuni ngoni ebari daang, eleleba ngawiyei yok a ngiboro alu kingatari! Bua emorikin, atomora ibore ni kingatari.” Lokoku, nyiruko ka ngitunga ngulu. Tochoite ichieki ngirotin kech. Edodor ngakejen kech anakiro anaaronok, esadito jiik abukor ngaakot. Erai pas alokakin eloit, itee ikeny ni esakio akisurum. Nakaneni ngitunga lu ikote ngulu, elokakinito eloit lo isurumi kesi ngikulepek, eloit lo eari kesi ngikulepek. Ngolo erai esal alu esakete akidem ngitunga ngiboro. Eari erukoonu ngirukooi ngikulepek. Topupok! Enyaritoi aosou alorotin ka nigielanaret ngiboro, enyar irema alodorin a ngirerea ka nicha echunakina ngitunga daang ebala, “Ngikabangabangae! Isakete esi aliwor ngikabangabangae tanang ori? Imenyete ngikemenyak tanang ori? Eremokinosi lubaang achwaanu tanang ori? Topupokinae nakekilakinea, ketatami ayong iyong naajokak, katokorak achwaanu kang. Ani aloger kanyaraa, kitonger, kebak akan kanyarit, towou akiirar, nyimisit ngakitatamet kang, nyisaki akitenikino kang, ani kikok neni, kakianar ayong dang iyong imini lochan. Kajamuari nakitingeta naketubulok, nakitikokinotor loger a ekuwam aloapolon, na eponeta ngichan loger a ekuwam alo ipiripiri, nakitingea apipilu ka ariaba. Sodi tanyara iyong aosou, nakaneni nyekii ayong. Kitasak iyong ayong wadaang, nakaneni nyikianyuni. Kainyo iremokin kolong iyong achwaanu, towou akiker Ekapolon Akuj. Inger iyong ngakitatamet kang, nyiimisik ngakikilakinet kang daang. Kotere nguna, ianyuni na itemem ka nguna isubi, kitobelasi ngakiro kon a ilope. Etoakeenete lu emam ibore eyenete kainyo engerito aosou. Ngileleny kech a ngikulepek kesi emunyarete ngikabangabangae. Nakaneni ngini iirari ngakiro kang, iboikin akaalimon. Emam ibore etapi ngesi. Nyeemi ngesi naaronok.” Lokoku, kitatam ngakiro kang, kirichak nguna kadungokini. Todeta akit kiira aosou, tasak etau kon achwaanu. Ee robo, kilip achwaanu, kimaimai taanyunea akiyen ngakiro. Ani kisak lokojokon loger lo esakere akwangat, torip loger lo eripere ibore niajokon ni idaitae, iteni ianyuni eger a akiker Ekapolon Akuj, toyen ngakiro a Akuj. Kainyo Ekapolon Akuj ipotonori aosou, nakituk keng itorunit achwaanu ka akiyen ngakiro. Einakinit ngesi ngulu etenooko aosou, erai ngesi aupwal alu emunoi. Iyoki ngulu esubeta luche na eriyan, itee ngulu emunosi ngesi. Ani kiira iyong ngakiro kang, iyenuni ngakiro na iyookino, ka na eriyan ta naajokak. Iyenuni erot loajokon daang. Kainyo iosuni iyong, kitalakari achwaanu iyong. Kiyokiyete iyong aosou ka achwaanu. Kiratakis ani eyakasi naaronok. Kiratakis alotunga alu erikito ngakituk kech ekurikur, alotunga alu aisikis eboyor lo etenoono, tolomasi loboyor a akisech, ngitunga lu italakarit akisub naaronok, lu ejoikinit aronis a akisech, ngitunga luparing a ngirotin, ka lu nyemunoi. Ipedori akinger aberu namalaat na itoboboe akituk kimalaunea iyong, na nyemuno ekile lokeng a ilope, kimuriak akikong na kolong ekongi ani a Akuj. Ani kilot iyong kai keng, nakitu ilosi. Erai alosit inaa, aapiar lokatoak. Nyebonguniyete ngikiliok lu eloseenete nikeng. Nyebonguniyete nabo nakiyar. Kiwap robo elote a ngikiliok aluajokak kiboi eboyor lo etenoono. Ngikiliok lu etenooko, ngikiliok lu erimae, elomete nakwap nayok naga. Elemari Akuj ngitunga luaronok anakwap, toruto ngikasechak anakwap, loger lo erutorere ngikito analup. Lokoku, wara nguna ketatami nyikimuriakis. Kirichak jiik ngakiro nakadungok ayong iyong. Iatakinete ngirwa kon lu iyarea, toliworos lu alakara ka ekisil. Nyiitiakasi ka ateneanut ta amuno. Toinik kesi lomosiring kon. Kigir lotau kon. Ani kisub kongina, kiminakini iyong Akuj, kitominakis ngitunga dang. Kigienokin Ekapolon Akuj a etau kon kadaang. Wara nyiigienokin aosou kon a ilope. Tolimo Ekapolon Akuj alorotin kon kadaang, itenikini ngesi ngirotin kon. Nyiitama robo kori ios iyong noi, toker Ekapolon Akuj, tonger akisub naaronok. Ikokinete nguna ekitoe lo itangalekini ngajemei kon ka nikaapilan. Toliwor lo irima Ekapolon Akuj kon tolemik akimuj na ekingaren a ngalemet kon kadaang. Ani kisubak nguna, ilelebunosi ngidulae kon ngalemet, kipichun ngituol kon emuna. Lokoku, nyiimenya arikino a Ekapolon Akuj, wara nyikibur nakikilakinea ngesi iyong. Kainyo ikilanakini Ekapolon Akuj ngini emina ngesi, loger lo ikilanakinea itwaan lokookeng lo emina ngesi. Epiritae itwaan ni eanyuni aosou, ka itwaan ni eanyuni achwaanu. Ejok ibore ni eriamuni itwaan anaosou akidwang ni eriamuni anakwangat. Ejok aosou idwangit egolit. Idwangit aosou ngamoru nakaalak a ngaropiyae, emam ibore nikiminari ni itemere aosou. Kiinakini aosou ngirwa lukaalak toyarea, kiinakini ebari ka arimatoi. Itiliwori eboyor kon lo alakara, kitorik akaalimon. Elakara lukoosok, einakini aosou kesi akiyar. Asubuni Ekapolon Akuj akwap a aosou keng, kitowo adis a achwaanu keng. Kotere aosou keng, topedun ngakipi analup, talakakis ngidowon ngakipi todoto nalup. Lokoku, kirichak aosou naajokon ka akiyen ngakiro, wara nyikibuch. Kiinakinete kesi iyong akiyar, ikokinete asir alomosiring kon. Ilosi iyong wadaang akaalimon, emam ibore kilegeuni. Nyiemi na inapakinor, ijotoor ngaju nakaabok akwaar kiiya. Nyiem naaronok ituturiaunosi, kori nginyas a ngitunga aluaronok. Kainyo Ekapolon Akuj igieno iyong, kiratakini ngesi iyong nyiidakakin loloit. Tosubea naajokak ngulu ejoikinit esubere, erai kipedori akisub nguna. Nyiilimok ekidunyet kon tama, “Kape, tobongu moi kainak,” totingite iyong ibore ngini kaneni. Nyiituk asubea ekidunyet kon naaronok, tarai elomit ngesi diyete kon ani kimunor iyong. Nyiimoriata ka itwaan ngakiro pas, erai pekisechakinit ngesi iyong. Wara nyikiterekia itwaan nikamoitanan, kori nyiiwap elote keng. Kainyo eremokino Ekapolon Akuj lu esubete naaronok, nakaneni emuno ngulu etenooko. Ilamit Ekapolon Akuj ngawiyei a ngitunga aluaronok, nakaneni epiarit ngawiyei alu etenooko. Imenyarit ngulu a ngimeny, nakaneni einakinit ngulu itiditeuna ajakaanut. Eanyunete lukoosok ekipur loajokon, nakaneni eanyunete lubaang ngileech. Talokoku, topupokisi nguna kitatami apakus. Todetasi ngaki, tochoiasi. Ketatami ayong esi ngakiro naajokak, nyiisikis ngakitatamet kang. Nakolong aditia ayong kirukit ka apakang, na araakar ayong lominat, epei bon ani a itiokang, Ketatam apakang ayong tama, “Kirichak ngakiro naketatami ayong iyong, kiwap ngakiro nakadungokinit ayong iyong, sodi toyar. Taanyu aosou toyen ngakiro! Wara ngakiro kang nyikimuriakis kori nyiipasak. Nyiisik aosou, kirichakini ngesi iyong. Tominak aosou, kiyoki ngesi iyong. Ibore niteno ngesi aanyun aosou, ani keyei ichebore echamit ianyuni, taanyu achwaanu. Tominak aosou, kitiliwori iyong lokiyenikinitae. Kilogak aosou ngakan, kiinak ekipur. Ebutokini aosou achaat naajokon nakou kon, kitanap ekiraun lokiminari.” Topupok lokoku, totionik ngakiro nakesuruori ayong iyong, talalakearotor ngirwa kon lu iyarea. Ketatam ayong iyong aosou ka ateneanut. Ani kiosu iyong, emam ibore iriwokin lorot kon ilosi, nabo emam ibore kilegeuni imatar. Toting jiik ngakiro nakitatamio, wara nyikibuch. Kirichak kainyo kesi eraakasi akiyar kon. Nyiiwap ngirotin a ngikasechak, nyiiwap erot a ngitunga aluaronok. Totiaak erot ngolo, nyiitor neni. Nyiiwap erot a ngitunga aluaronok, torei alorot kangolo, sodi kiwapak erot kon. Nyejotoorosi ngitunga luaronok, mati kesubakis naaronok. Ikoleri kesi mati kewan itwaan. Ikoni aronis anikech akimuj nanyamat. Ikoni adedengu anikech emuna lo emasio. Erot a ngitunga alu etenooko ikoni akicha a akolong na ipiripirunea, kiatanakin akicha ngina tanang ekwanger kea. Nakaneni erot a ngikasechak ikoni aribu nakirion chuch. Edakanarosi kesi peeyenete ibore ni elegeuni. Lokoku, topupok ngakiro kang, todeta akit kiira nguna alimuni. Wara nyeebucharosi, kirichak alotau kon. Kainyo eraakasi akiyar anitwaan ani echoiari, itedekete akwaan keng. Tochoik noi etau kon, kainyo eitanit a akiyar kon ngolo. Nyiitorut naaronok nakituk kon, totiakas ka alioko ta amodeanut. Kidirak nakonyen kon ngaren, tokienyik ngini eyei ngaren kon. Tokienyik erot lo itorit iyong, tojokearos ngirotin kon daang. Tonger naaronok kidira ngaren, nyiitubonor teten kori kedieny. Lokoku, topupok aosou kang, todeta akit kiira achwaanu kang. Sodi tochwaaner, kiruor ngakiro na aosou. Epedorete ngipon a aberu anamalaat aboboor, loger a akimiet a ao, esulut enue keng loger a akimiet. Nakaneni ani enangi losal, todwarer noi loger a emus, nabo tokwaner loger a ekileng alo ekwaka ngiwaitin daang. Kiyaari ngesi iyong nakitu, iwapit ngesi erot lo elosi lokatoak. Nyiwapit ngesi erot lo elosi nakiyar. Ewowoot ngesi nyeyeni ni elosi. Tokona bocha, talokoku, topupokisi, warasi ngakiro kang nyikimuriakis. Tochoikin anaberu ana ikoni ngina! Tochoite inutari akituk a akai keng. Ani kinang, egelakin itwaan elemari arimatoi na kolong arai akon, sodi toloto ngikaru kon lotunga lukamoitanak. Ee robo, ngitunga lugelayek kesi elemarete ebari kon daang. Itwaan niche elemari ibore daang ni ngoon ichidaritor iyong ngakiinyir. Ani enangi esal a akiyar kon, kinapakin iyong lokitanda kon ikunua, tadalachuunun akiring anakwaan kon. Sodi tolim iyong tama, “Nyo kolong angerio ayong akitenikino? Nyo kolong emenyarea ayong akikilakino? Nyepupokina ayong ngakiro a ngiketatamak kang, kori nyedetara akit eira ngakiro kech. Atipei abu engolik atamar edikino kamunyario, ketitingitae ngileech alongaren ngitunga.” Ikoni aberu akar, tamat ngakipi na eyakasi nakurum kon a ilope, ee robo, ngakipi na eokunitoe anakar kon a ilope. Kotere nyo epetakinitere ngileleae kon wadaang? Nyo epetakinit ngingololin kon lorotin? Tarata ngingololin ngulu ngikon make, meere ngika ngitunga aluche ka iyong. Topiarae eitanit kon, talakar anaberu ana esorokane kon. Ibus ngesi, ejok ikoni agete. Kitalaka iyong arimatoi keng jiik. Kimiek amina keng kiriam iyong ngirwa daang. Lokoku, kotere nyo ichamunea iyong aberu namalaat? Nyo kijoikinitor iyong aberu a ekile aloche? Itee Ekapolon Akuj ngakiro daang na esubi itwaan. Itee wadaang ni ilosi iyong. Erai akisech a itwaan aniaronon eloit keng a ilope. Erai epuute lo isurumi ngesi ilope. Etoanene ngesi ani emamakar akitenikino, abangaanut keng ebukori ngesi. Lokoku, ani kiweik iyong ngamichae a ekidunyet kon, kori kichamakinosi ka itwaan iche, irumun robo iyong bon a ngakiro kon a ilope. Aliworosi ngakichikakinet kon eloit anikon. Toyen robo atamar imin iyong nakan a itwaan kangini. Lokoku, ani kisaki iyong ayuun, kape nitwaan ngini atipei, kimaima kitalakak. Wara nyiijotoor kori nyiilurakin. Talachakin aloloit loger a ikeny kori a agete ana epuun alokalokan. Iyong lokalany, kape kiseme ekatapan, kiseme eboyor a ekatapan, toosu. Emam kesi ekarikon, ka ekatukon kori ekapolon, tarai ikachete akimuj na ngirwa alu akamu. Echunete akimuj ngirwa lu elemere. Iyong lokalany, ijotoe tanang ori? Ori inyounio iyong anaju? Ibala cha iyong, “Kimiek atojotoor wadiochichi, kimiek atokudok ngakan eanga wadiochichi.” Kitolomak eboot loger a erukoot alo etingit ngiboro lujiet. Itwaan ni erai pas, niaronon, ewowoot iruoro ngakiro naaronok. Edongi a ngakonyen, idamidami a ngakejen ka akidod a ekimoin. Erono etau keng iroki naaronok, ka ayaunit ekurikur wadaang. Kotere ngakiro nguna, ichanyuni ngesi ngakiro naaronok. Ewanio ngesi nikaronon, nyepedori angalekin. Eyakasi ngakiro ngakan-kapei na eremokino Ekapolon Akuj. Ee robo, ngakiro ngakan-kaarei na ekadakinito Ekapolon Akuj. Ngakonyen na ekinis, a angajep nakaliokon, ngakan na earete ngitunga lu nyesechito, etau lo iroki ngakiro naaronok, ngakejen na edodor anakiro anaaronok, ekaanyunan lo iruoro alioko, ka itwaan ni iturumi ngikaitotoi. Lokoku, kirichak ngakiro nakidungok apakon. Wara ngakitatamet a itiokon nyikimuriakis. Togolok lotau kon jiik, toinik lomosiring. Kirikete ngakitatamet nguna iyong ilosi, kiyokiyete inapakin, ani ikienyuni, kitatamete. Ikote ngakiro na kidungokinio ataa, ikote ngakitatamet akicha. Ngakikilakinet nakitatamete, eraakasi ngaka eboyor ajokon. Kiratakinete iyong anaberu anaaronon, kiratakinete anangajep anakaabon a aberu a ekile aloche. Wara akibuseanu keng nyeemina etau kon. Wara ngakiir a ngakonyen keng nyikiminasi. Epedorio amalaat akigiel a amugati. Nakaneni aberu nakaloman, akiyar a ekile ngesi esaki. Eyei itwaan iwoki akim alorarum nyeenomiya ngiworui keng a? Kori eyei itwaan epedori alosit alokidiama ngatotol na eriraate nyeenom ngakejen keng a? Ikoni ekile lo eperete ka aberu a ekidunyet keng neni, itwaan nicha etapi aberu ngina, iteni irirao. Nyimenyarito ngitunga ekokolan lo ekokoi enyamit akoro. Tarai na irumunere, tatach ngatachet ngakan-kaarei. Tajal ibore ni etingit daang. Ebangaana itwaan ni elomi, ngesi ilope inyasuna. Eriamuni ngimacharin ka ngimeny. Irumete ngileech jik. Kainyo itelemari etereku ekile, emam ngisien na etachakinea. Emam atachanot echamuni ngesi. Nyiapakini angoit keng tani kiudakin ngainakinet. Lokoku, kitamu ngakiro kang, kirichak ngakiro nakadungok ayong iyong. Kirichak ngakiro kang toyar. Kirichak ngakitatamet kang, loger lo irichakinitor ngakonyen kon. Toinik lomoyo kon, kigir lotau kon. Tolimok aosou tama, “Irai iyong nakaatokang,” tolimok achwaanu tama, “Irai iyong lopae kang lo epogae.” Kiratakinete iyong anaberu anamalaat, kiratakinete anakiro anakaabok, a aberu a ekile aloche. Akolongit apei ayei ayong kai kang, abu engolia alopiding a akai. Engolik alokiding ngikabangabangae, ee robo, alokiding ngisorok, engolik esorokit epei lo iwaarit, iwapit erot alo diyete ni iitorea erot, alo diyete ni elomit aberu ache. Kiwapak esorokit ngolo erot, lo elosi nawi a aberu kangina. Arai ibore atabong ekaikai, esiakinit aribu. Atipei kiriamunos ngesi ka aberu ngina, anapit aberu loger a amalaat, ayakasi ngakiro atukit. Arai ngesi aberu nakachalan, nabo ebelana. Peeboyonokin ngesi nawi. Eyei lorukudi, toyei nigielanaret ngiboro. Eyei nakiitoret a ngirotin daang eperunit. Kirum ngesi esorokit ngolo tonuak, tokienyik a ngakonyen analerek tama, “Epeyo ayong ngakipeyos kang, asubak akolongit naga ngakiro na ekongit. Ngesi tokona abunitor akisiriamuun iyong. Kasak ayong iyong noi, a ekeny ajokon, kaanyu! Apetakinit ayong ngiworui lukoriyek kaanikak lokitanda kang. Ayaunio ngiworui ngulu alo Misiri. Etukukunyit ayong ekitanda kang a ekinyaate alokaakunyon, ka echuchuka ta ekitoe loongor-nyang kaakunyon. Bua chanai! Kapana atopero akwaar kiiya, kimera. Elogakinos ngakan atalakaros. Emam lokile kang anawi. Eperorit nikalonan. Iwokorit ngaropiyae nakaalak, eperori ngiukio ngiarei tobongu.” Kimaima aberu ngina esorokit ngolo a ngakiro anakaalak, tacham esorokit ngakiro kotere akituk nakaabon. Atipei kiwapak esorokit aberu loger a emong alo erikitoe akingol, loger a agete ana eporokini loloit, tanang ichumio a emal lotau. Ekoni ngesi ikeny ni ekeri loloit. Nyeyeni atamar edikino atoani. Tokona bocha, talokoku, topupokisi. Todetasi ngaki kiirasi ngakiro na alimuni. Tochoite etau kon ereikin lorotin keng. Nyiiwoliyo kiwap ngirotin keng. Abuko ngesi ngikiliok lukaalak. Ee robo, elalak lu arikoki ngesi akitu, nyimarun. Erai akai keng erot lo elosere lokatoak. Ee robo, erai erot longedakinet nakitu. Topupokisi! Enyaritoi aosou. Irema achwaanu. Anaitae a ngimukur, alo diyete erukudi, ewei ani iriamitotor ngirukudi. Ni elomunere lore alo diyete ngidorin, enyaritoi aosou ebala, “Kanyarit esi ngitunga, anyarit itwaan daang ni eyei nakwap. Esi ngikabangabangae, toosutu. Esi ngikawaewae, topupokisi lokojokon. Topupokisi ngakiro kang naajokak, itorunito na eriyan nakituk kang. Eruoro ayong na iteni, aremokino ayong alioko. Etenooko na itorunito nakituk kang daang, emam tani apei na erai alioko kori na emodeana. Nyemadiak ani eyei ngini echwaana. Eraakasi na iyookino ani eyei ngini kooson. Toseu ngakichikichiket kang, akidwang aseun ngaropiyae, toseu aosou akidwang egolit loajokon noi. Ayong aosou, ajok akidwang ngamoru nakaalak a ngaropiyae. Emam ibore nikiminarit iyong daang ni kesikwaanere ayong. Ayong aosou, ayeni ngakiro. Achwaana nabo aos. Akiker Ekapolon Akuj ngesi aremokin naaronok. Aremokino ayong ekinis ka ngiwog, ka ngakiro naaronok ta alioko. Aree ayong ngakiro sodi atosubak, achwaana nabo agogong. Engarakinit ayong ngikapolok apolokin akwap, ka adungun ngitalio lu eriyan. Ngikarikok a ngakwapea daang, epolokinito ani engarakinitor ayong. Engarakinit ngikapolok ka ngikajakaanak aapei. Amina ayong ngulu kaminasi ayong. Ngulu kasakete ayong lokojokon, kaanyunete. Atingit ayong ebari ka arimatoi, ee robo, ebari lokajik ka apiaro. Ejok ageor kang akidwang egolit, akidwang tani egolit loajokon. Ejok idwangit tani akwangat na eseunitae. Etenoono eboyor kang, ewapit ayong nguna eriyan. Etabareene ayong lu kaminasi ayong, eleleb ngichuei kech ngaropiyae. “Kasubuni kolong Ekapolon Akuj ayong ekingaren a ibore kadaang. Ayong engareni alotichisio keng kadaang, alu kolong a angorot kanuan. Kasubunio ayong kolong a angorot, ekingaren jik, eringa akwap nyesubuna. Kedounio ayong eringa tani nganamea nyepena, amam tani ngileleae a ngakipi. Kedounio ayong eringa ngimoru, eringa ngimukur nyitowaa, eringa Akuj nyesubuna akwap ka ngamanat na eyakasi nakwap, kori achudunet a ngalup ana ekingaren. Ayei ayong na asubunea ngesi adis, na etorwarea atorite alokidiama anam naapolon, na ewaakinea ngidowon nadis, tangau ngileleae a ngakipi, todungok ngakipi a nganamea tokurupupuut sodi nyiiporosi ni alimunit ngesi. Ayei ayong edupakini Akuj ngapirio a akwap. Kibakit ayong ka ngesi loger a ekadukon alokunonoit. Ayong etalakarit Akuj jiik. Alakara ayong anakwap ana alomito ngitunga, kajoikinito ngitunga. “Tokona bocha, talokoku, topupokisi. Epiaritae ngulu iwapito ngirotin kang. Kiirasi nakitatamio. Toosutu nyiilagalagakis. Epiaritae itwaan ni epupi ngakiro kang, itwaan ni ibooyi alokidor kang akolongit daang, idarit alokidor a awi kang. Kainyo itwaan nikaanyuni ayong, aanyu akiyar, nabo echamuni Ekapolon Akuj ngesi. Itwaan ni nyakaanyuni ayong, ewan ngesi bon. Daang lu karemokino ayong, eminasi akitu.” Aduki aosou akai keng, tosubak ngapirio ngakan-kaarei. Aar ngibaren lu enyamio, emorik emuna keng ka ngikito luadwarak, ewaak akimuj lomeesa. Amea ngakasubak etich keng, anyaraun ngitunga ni ikeuna alore. “Tolomutu, esi lu emam ibore iyenete!” Tolimok lubaang tama, “Potu tanyama akimuj kang, tamata emuna lo etodwarit ayong. Totiakas ka lu nyeyenete ngakiro, toyara. Kiwapa erot lo a achwaanu.” Itwaan ni itenikini itwaan nia ngimeny, eriamuni ngileech. Itwaan ni ikilakini itwaan niaronon, ewan bon. Nyiikilak itwaan nia ngimeny, kiremokin iyong. Kikilak itwaan nikooson, kiminakini iyong. Ani kichikichik iyong itwaan nikooson, eosuni noi. Ani kitatam iyong itwaan ni etenoono, iatakin achwaanu keng. Akerit Ekapolon Akuj ngesi erai akisiakin a aosou. Akiyen ngolo italeuno ngesi erai achwaanu. Iatakini aosou ngirwa kon, iatakini ngikaru lu iyarea iyong. Ani kios iyong, iyong ilope ingarakin. Ani kimenya iyong aosou, iyong ilope iriamuni ngichan. Echalana aberu nabaang, emam ibore eyeni, nabo nyitimete ngakiro. Ibooyi alokidor a akai keng, kori iboyonokin lokicholongo, lu eyakasi ni ikeuna alore. Tanyara ngitunga lu itoruuniyete neni, lu egeal nikech eloose. Tama, “Tolomutu esi lu emam ibore iyenete!” Tolimok itwaan nibaang tama, “Ebobok ngakipi na ekokoyo, ejok amugati na enyamio edukitae.” Ngikiliok lu isuruori ngesi, nyeyenete atamar eyei akitu neni, nyeyenete atamar ngitunga lu alomasi neni, alomasi lokatoak. Eraakasi nugu ngakamatak a Solomon. Italakari ikoku nikooson apakeng, nakaneni isialolongi nibaang itiokeng. Ebari lo eanyunio alorukoonu, emam ibore ajokon eyei, nakaneni ateneanut ngesi kiyuuni anakitu. Nyimianakini Ekapolon Akuj lu etenooko enyami akoro. Nakaneni iratakini luaronok nyeanyut ibore ni imuit. Kitiliwori akalanyanut ekebootonit nakaneni kitiliwori aturonu ekabaran. Itwaan ni echuni ngirwa lu elemere, eos. Nakaneni ni eperi ngirwa lu elemere, eyauni ngileech. Epiario itwaan ni etenoono, nakaneni akituk a itwaan aniaronon, idait amoitanut. Erai akitamun lu etenooko apiaro, nakaneni ebosiari ekiro a itwaan aniaronon. Iwapi itwaan nikooson ngakitatamet, nakaneni inyasunio ekabangabangat lo ingamangama. Elosi ni etenoono akaalimon, ani ni emodeana, irumunio. Ngini irapirapi ngakiro na iteni, eyaunit ngichan. Ani ngini ikilakinit aronis, eyaunit ekisil. Akituk a itwaan aniajokon, erai eitanit a akiyar. Ani akituk a itwaan aniaronon, idait amoitanut. Ikurukuruni arem eburas, nakaneni imuki amina ngasechesea daang. Iruorosi ngitunga lukoosok ngakiro naayarak, nakaneni ejoikinit lubaang inapio. Eanyunete lukoosok aosou daang, ani ingamangamakini ekabangabangat, taapuut ngichan. Iyoki ebari lukabarak, inyasuni eboot lukebootok. Ebachit anaajokak ngesi akiyar, ebachit anaaronok ngesi akisech. Itwaan ni iirari akitatamo, elosi nakiyar. Ngini engeri akikilakino, ibatar. Eliokono itwaan ni iweit arem keng. Ebangaana itwaan ni irit ngiturum. Ani kitalala iyong ngakiro, nyengopi akisech alokiruor kon. Nakaneni ani kios iyong, kiapak akituk. Ikwaan ngakiro a itwaan aniajokon ka akwangat naasegan. Eraakasi ngakiro a itwaan aniaronon ngapasiek. Ingarakini akituk a itwaan aniajokon lukaalak, nakaneni eareene abaangu lubaang. Apiaro a Ekapolon Akuj kitabari, nabo nyiatanakin akialolong. Itisibit ekabangabangat akisech abolia. Ejoikinit itwaan nikooson akisub ngakiro na aosou. Eanyunete lu etenooko ibore ni esakete. Ani luaronok taanyut ibore ni eemito. Napei ekutunea ekuwam, tongopiasi luaronok, nakaneni nyingunguakinosi lu etenooko. Tochoite imeari itwaan nikatumaanan, kikadakini ngesi iyong loger a emuna alokaabaran alokel kon, kori loger a apuru anakonyen kon. Toker Ekapolon Akuj kiatakin ngikaru kon. Nakaneni ekidiokuunete ngikaru aluaronok. Edaikin akigieno a ngitunga aluaronok nalakara. Itwaan niaronon, nyeanyuni ibore ni imuit. Erai Ekapolon Akuj awas nakaagongon, alotunga alu etenooko, nakaneni emunyari luaronok. Nyitwarakinio lu etenooko jik anakwap, ani luaronok, nyiboikinosi nakwap. Iruoro itwaan ni etenoono ngakiro na aosou. Nakaneni etuborio angajep, na elakakinit ngakiro naaronok. Eyeni akituk a itwaan ani etenoono ngakiro na echamitae. Ngakiro naaronok itorunito nakituk a ngitunga aluaronok. Eremokino Ekapolon Akuj ngakitemiet na ingalaare ngitunga. Pearai ejoikinito ngakitemiet na eriyan. Iwapasi ekinis ka ngileech, nakaneni eosok lu itiditeuna. Erikit ngitunga luajokak ateneanut kech, ani ngulu nyemunoi, emunyari aronis kech. Nyikingarakini ebari akolongit na akitu, pearai ateneanut ngesi kiyuuni anakitu. Ateneanut a itwaan aniajokon ngesi ingarakini eboyor keng. Inyasunosi luaronok make kotere aronis kech. Eyuuni ngitunga luajokak ateneanut kech. Eeni lu nyemunoi arorokanut kech. Na etoanea itwaan niaronon, totoan tani akigieno keng. Itwaan ni nyilipit Akuj, nyeanyuni ibore ni imuit. Eyuunio lu etenooko alochan, toreeun ngichan ngulu lotunga luaronok. Itwaan ni nyilipit Akuj, inyasuni itwaan niche a akituk. Eyuuni lu etenooko aosou kech. Na eanyuneta lu etenooko apiaro, talakaros ngitunga a ere daang. Na etoaketa ngitunga luaronok, min ekare lo alakara lotunga. Ipuruunio ere lo epiarete ngitunga lu etenooko, nakaneni inyasunete ngakituk aluaronok ere. Ebangaana itwaan ni imenyarit luche, nakaneni ililingi itwaan nikooson. Itwaan ni irimitor ngiturum, emam ngakiro imunoni. Nakaneni itwaan ni emunoi, imunoni ngakiro. Edakar akwap na emam erikitene loajokon. Ni eyakasi ngikesuruorok luajokak, ibooyo akaalimon. Itwaan ni eweikini akitach amicha a itwaan anigela, ekii. Itwaan ni engeri aweikin, nyeanyuni ngichan. Erimae aberu naajokon, eriamuni aberu naaronon ngileech. Nyeriamuni ekile lokalany ngaropiyae, nakaneni ebari lokaturonon. Esubi itwaan nikapatanan, ngakiro na ejoikinete ngesi. Nakaneni ewan itwaan nikamoitanan bon. Eanyuni itwaan niaronon ngatachet na alioko, eanyuni ni etenoono ebachit lo a iteni. Ikayaran itwaan ni iwapit natenoyek, ani ni eneikina naaronok, etoani. Eremokino Ekapolon Akuj ngitunga lu itamete naaronok. Nakaneni emina ngesi lu esubete naajokak. Toyen atamar irirao ngulu esubete naaronok, nakaneni epuunosi lu etenooko. Aberu nakebusean tabangaana, ikwaan ka ekababaat a egolit alokume a eputir. Eanyunete lu etenooko nguna esakete, ee robo, eanyunete naajokak. Eyaunete ngakiro na igienosi luaronok anyunyura. Iposi itwaan iche ibore peemisit, tonger neni tabar noi. Ekudit iche akan nyiposi, tonger neni kiboot noi. Tapataketa sodi tabareta, kingarak luche kingarakin iyong dang. Ilamete ngitunga itwaan ni idait akimuj idaritor ngaropiyae na egielere kiatakin. Epiario ngini egielari nakeng. Itwaan ngini esaki naajokak, eminakinio. Ani ngini esaki naaronok, eriamuni naaronok. Ngini igieno ebari keng, eraraar loger a ngakui ana eokito. Ekilikiluuni ni etenoono loger a ngakui anakalibak. Itwaan ni eyauni ngichan nawi keng, elarakin, ekuwam bon eanyuni. Eliwor ekabangabangat ekedalan a ekooson. Kiteyari ateneanut nakaneni kiari amoitanut. Ani ketacheeneo lu etenooko kane anakwapea, ani bo luaronok ka ngikasechak, nyetachio ngulu noi a? Itwaan ni emina arikino, emina aosou. Ebangaana itwaan ni engerit akikilakino. Emina Ekapolon Akuj itwaan niajokon. Eremokino Ekapolon Akuj ngulu etukosi naaronok. Nyitowei aronis itwaan kisikokin, nakaneni isikokinosi lu etenooko. Inisar ekile aberu naajokon, ani aberu na ngileech ikoni ibore ni ebosit anakoyo a ekile keng. Itamete lu etenooko nguna eriyan. Eliokoko ngitunga luaronok. Ngakiro nakaarak, itorunito nakituk aluaronok. Nakaneni kiyuunete ngakituk alu etenooko. Edakarosi luaronok tasalut, tadaikin neni. Nakaneni erubete ngawiyei alu etenooko jik. Ipuruunio itwaan itemem ka aosou keng, ani nibaang kimenyarae. Ejok itwaan nipasit ni esubi etich kimuj, akidwang ngini eyenikinitae tanyamite akoro. Iyoki itwaan niajokon ngibaren keng, nakaneni emoitanikinit niaronon lukeng. Itwaan ni etionikinit akitare amana keng, etingit akimuj nakaalan. Ebangaana ngini eneikina ngitichisio lu emam ibore eyaunito. Inyasun awas a itwaan aniaronon, Nakaneni ewaasi lu etenooko toruba. Elimorete itwaan niaronon ngakiro keng a ilope. Epuun ni etenoono alochan. Eanyuni itwaan ebachit, itemem ka nguna iruoro ta nguna esubi. Eanyuni nguna itemokino eanyuni. Itamit itwaan nibaang atamar, ejok elote keng. Epupi itwaan nikooson ngakitatamet. Na engoea ekabangabangat, atipei toyena ngitunga. Nyemisit itwaan nikooson ngiyeny. Itwaan ni iruoro nguna a iteni, itiriyani ngakiro. Itwaan ni iruoro alioko, isudi ngakiro. Ngakiro na ekoponokinoi alimun, ilijakinosi nitwaan towana loger a ekileng. Nakaneni kitangalekinete ngakiro a ngitunga alukoosok. Nyengopiarete ngakiro na iteni jik, nakaneni ipuripuriakin alioko atipei. Eyei amodeanut lotunga lu irokete naaronok. Elakarosi ngulu esubete naajokak. Emam naaronok eanyunotor lu etenooko, nakaneni etia ngichan aluaronok lobil. Eremokino Ekapolon Akuj ngikaliokok. Elakara ngesi kotere lu emunoi. Ililingea itwaan nikooson aosou keng, nakaneni elimori nibaang abaangu keng. Ani kitionik iyong etich, iliwor ekapolon. Ani kikalanyaner, iliwor ekedalan. Esuri akialolong etau a itwaan, nakaneni italakarete ngakiro naajokak. Itenikini itwaan ni etenoono elote alopae keng. Iwapi itwaan niaronon erot lo echakari ngesi. Nyeanyuni itwaan nikalany ibore ni esaki. Ebari itwaan ni etionikinit etich. Kiriki ateneanut nakiyar. Kiyaari aronis nakitu. Iirari ikoku nikooson ngakitatamet a apakeng, nakaneni nyechamuni nia ngimeny akikilakino. Eanyunete luajokak ebachit a ngakiro ana iruorosi, nakaneni imuit lukaliokok amoitanut. Ngini echoikinit akituk keng, irichunit akiyar keng. Ngini ingamangama, inyasun bon. Imuit itwaan nikalany ibore nakaneni nyeanyuni. Eanyuni itwaan ni etionikinit etich ibore ni esaki daang. Eremokino itwaan ni etenoono alioko, nakaneni eraakasi ngakiro a itwaan aniaronon ngaka ngileech ka ngimeny. Iyoki ateneanut ngitunga luajokak. Aronis edakanari luasechak. Ebalasi ngiche kibarit, tamam ibore etingito. Ebalasi ngiche kiboosit, tabarito noi. Elemuni ekabaran ebari keng toyuunor. Emam ibore eyuunor ekebootonit. Ikote lu etenooko akicha na imaunit, ikote luaronok ataa na enyikinyiki. Eyauni ekinis ngichan. Eosok lu esakete akitatamo. Ebari lo ekopunio atipei, engopiari atipei. Ebari lo isilekuunio a ngichan, ngesi iatakin. Ani kengop ibore ni igieno iyong, kilelenyi iyong. Ani kiyookin ngakiro nakimuito, talakar lokojokon. Itwaan ni engeri akitatamo naajokon, inyasun bon. Itwaan ni iwapit akitatamo naajokon, ejokearosi ngakiro keng. Ikwaan ngakitatamet alukoosok ka eitanit a ngakipi a akiyar. Kingarakinete topuun aloloit a akitu. Erimae ngitunga lukachwaak, nakaneni ngulu nyemunoi, iwapito erot lo a nginyas. Esubete lukoosok ngakiro kech daang a achwaanu, nakaneni elimorito lubaang abaangu kech. Eyauni emeanara loaronon ngichan, eyauni lo emunoi ekisil lotunga. Itwaan ni engerit akitatamo, eriamuni eboot ka ngileech. Ngini echamit akikilakino, eriamuni ekipur. Elakar etau kon erai kiriam ibore ni isaki. Engerito lubaang areeun anaronis. Itwaan ni irukete ka ngikoosok, eosuni. Ngini irukete ka ngikabangabangae, inyasun. Iwapit ekeny aronon ngikasechak awadaang, nakaneni etachakinio lu etenooko apiaro. Eisikinea itwaan niajokon ngide a ngide keng ebari kiruma. Nakaneni elosi ebari a ngikasechak lotunga lu etenooko. Epedorete ngamanat na nyitatae akoniun akimuj nakaalan, tanyama ngikebootok, nakaneni iratakinito ngitunga luaronok ngamanat nguna nyiitae. Itwaan ni nyetingakinit ikoku keng akulit, nyemina ikoku ngini. Itwaan ni emina ikoku keng, erionokini ngesi. Etingit itwaan ni etenoono akimuj na isimwoni. Enyamit itwaan niaronon akoro jiik. Eduki aosou akai keng, nakaneni eyatari abaangu a ngakan keng a ilope. Ekerit itwaan ni etenoono Ekapolon Akuj, nakaneni imenyarit ni ibatara Ekapolon Akuj. Iruoro itwaan nibaang ngakiro nakaalak kotere ekinis keng. Ani ekooson, echoikina alokiruor keng. Ni emam ngimongin echilere ngamanat, nyepete ngalemet. Ani eyakasi ngimongin, ilelebunosi ngalemet. Ekaanyunan lo emunoi, iruoro ngakiro na iteni. Ekaanyunan lo nyemunoi, isudi alioko. Nyepedori itwaan nia ngimeny aanyun aosou, tani kesak. Nakaneni ebeben itwaan nikachwaan aosun. Tachadar alokabangabangat kainyo emam ngakiro kayarak kitatami ngesi iyong. Eos itwaan nikachwaan kainyo eyeni ngakiro na esubi. Ebangaana ekabangabangat kainyo itamit atamar kori ayeni. Nyemisito lubaang tani kesubakis akisech, nakaneni esakete lu etenooko arimakino. Erai alakara kon, akon a ilope. Erai apipilu kon, akon a ilope. Emam itwaan imoreta iyong. Inyasunio akai a itwaan aniaronon ani akai a itwaan ani etenoono, isikokin. Eyei erot lo esibit anitwaan ejok, tarai esal keng ngesi akitu. Idait tani akiana esinyoi, ani edaun alakara, kisiak akialolong. Eriamuni itwaan niaronon nguna itemem ka aronis keng. Eriamuni itwaan niajokon ebachit a ngitichisio keng. Enupi ekabangabangat ngakiro daang. Nakaneni itee itwaan nikooson ni itorit. Echoikina itwaan nikooson ereeun anakiro anaaronok. Ekoponokin itwaan nibaang ngakiro, nyetitinyikini. Esubi itwaan nikangoan abangaanut, nakaneni etitinyikini itwaan nikooson. Eriamunete ngikabangabangae nguna itemem ka abangaanut kech. Ebachit lo eriamunete lukachwaak ngesi aosou. Epote luaronok kijuuruoto alongaren luajokak, towaa alodorin a ngitunga alu etenooko. Ekadakinit ngitunga daang ekebootonit, ekadakinit tani ekidunyet keng. Nakaneni elalak ngipaalon a ekabaran. Ngini imenyarit ekidunyet keng, erai ekasechan. Epiaritae ni epatana alokebootok. Ngulu irokete naaronok, asech. Ngulu irokete naajokak eriamunete amuno ka ekipur. Tosub etich taanyunea ibore ni iyarea. Ani kiboikin iyong tadakakin ekiruor bon, iliwor ekebootonit. Ebachit a ngikoosok ngesi ebari. Eyenio ngikabangabangae a abaangu kech. Eyuuni ekaanyunan lo iruoro iteni ngitunga. Ngolo iruoro alioko, ewani ngitunga. Akiker Ekapolon Akuj itogogongi itwaan, nabo toyuu Akuj ngesi ka awi keng. Akiker Ekapolon Akuj ngesi erai eitanit a akiyar, sodi totiakas itwaan ka eloit a akitu. Ipuroi ekapolon itemem ka alalau a ngitunga alu epolokinit ngesi. Ani emam ngitunga, emam ngesi ekipur. Eos itwaan ni nyengoyeene atipei, nakaneni itwaan ni engoyeene atipei, idodiunit abangaanut keng. Itojokete ngitamen luajokak akwaan, itobosi etereku ngakoyo. Itwaan ni ichiekiarit ngikebootok, imenyarit Akuj na kolong asubi kesi. Ani kepataner itwaan alokebootok, ekerit ngesi Akuj. Ebukorosi ngitunga luaronok make, kotere ngakiro naaronok esubete kesi. Iyoki ngitunga luajokak ateneanut kech. Eyei aosou lotamen a itwaan anikachwaan. Nakaneni nyeyenete ngikabangabangae tani ni erai ayenut. Einakini ateneanut akwap ekipur, nakaneni erai akisech ngileech alobukut kadaang. Italakari ekasuban etich lokooson ekapolon, ani ngolo eyaunit ngileech, enyunyurikin ngesi. Ngakiro na iapunitae etachunio, isinacharete anyunyura. Ikurukuruunete ngakiro nakaapilak angoit. Itojokete ngakituk a ngikoosok achwaanu, itorunit abaangu nakituk a ngikabangabangae. Itee Ekapolon Akuj wadaang, itee naaronok ka naajokak. Eyaunete ngakiro naajokak akiyar, ipirisaarete ngakiro nakamoitanak etau. Imenyarit itwaan nibaang ngakitatamet a apakeng. Eos itwaan ni echamuni arikino. Erubi ebari a itwaan ani etenoono nakaneni isunyar ebari aluaronok na eponeta ngichan. Ngitunga lukoosok epetarito achwaanu, meere ngikabangabangae. Eremokino Ekapolon Akuj ngakipeyos a ngitunga aluaronok, nakaneni emina ngesi akilip a ngitunga aluajokak. Eremokino Ekapolon Akuj eboyor a ngitunga aluaronok, nakaneni emina ngulu esubete na etenooko. Itwaan ni esubi naaronok irirao lokojokon. Etoani itwaan ni engerit arikino. Itee Ekapolon Akuj tani ni eyakasi ngikatoak, ikokini itwaan iweyi ngitamen keng ani a Akuj ai? Nyesaki ekewogan akikilakino, nyelosi lokooson kitatamae. Na elakaror itwaan, tamaisan. Itwaan ni ialolongi, esinyit. Esakete ngitunga lukoosok akitatamo, eupit ngikabangabangae abaangu. Erono eboyor alotunga alu a ngichan jiik. Ani alotunga alu elakara, ejok eboyor anikech jiik. Ejok aliwor ekebootonit tokerite Ekapolon Akuj, akidwang araakau ekabaran toyei lochan. Ejok akinyam ngakui ani eyei amina akidwang akinyam itaok niatuman ani eyei arem. Ikurukuruuni itwaan nikangoan eburas, nakaneni eyauni ni nyengoana ekisil. Eriamuni itwaan nikalany ngichan awadaang, emam itwaan ni etenoono ngichan eanyuni. Italakari idia ni eos apakeng, nakaneni imenyarit ekabangabangat itiokeng. Italakarit ngikabangabangae abaangu kech. Esubete lukoosok ngakiro na iyookino. Ani emam ngikesuruorok, nyesubakin ngakiro na eretae. Ani elalak ngikesuruorok, tosubakinos. Ejok noi alimun akiroit na iyookino, alosaa alo esakitere. Iwapito ngitunga lukoosok erot lo elosi kidiama nakiyar, meere erot lo elosi kwap lokatoak. Inyasuni Ekapolon Akuj awi a itwaan ani inisa, nakaneni iratakini ngiboro a apuserut. Eremokino Ekapolon Akuj ngitamen a ngitunga aluaronok. Ejoikinito ngesi ngakiro a ngitunga alu ikiuna. Itwaan ni erorokona, ni esaki angatar ibore ni nyerai ikeng, ilomakini awi keng lochan. Itwaan ni engerit ibore ni ediakare, eyari. Itamakini itwaan nikooson akiroit eringa nyetachuna. Akituk a itwaan aniaronon, ekoponokin atulakany ngakiro naaronok. Elona Ekapolon Akuj ani eyakasi luaronok, nakaneni iiranari akilip alu etenooko. Italakari ereet lo elakuna etau, epwatunete ngakiro naajokak akwaan. Itwaan ni iirari ngakiro na erikinitere, irukete ka ngikoosok. Itwaan ni engerit ngakitatamet, imenyara bon. Ngini echamuni arikino, eosuni. Erai akerit Ekapolon Akuj akitatama aosou. Akitiditeun ngesi ingareni ekipur. Erai ngitamen ngika itwaan, nia Akuj ebunio akiroit na irotuni nakituk. Ngakiro daang na esubi itwaan, ejokak anakonyen keng a ilope. Ekapolon Akuj iningi ngakiro na eya lotau. Kilip Ekapolon Akuj topia etich kon sodi tosubakin ngakiro na ireat iyong daang. Ibore daang ni esubunit Ekapolon Akuj, eyei etich keng. Tani ngitunga luaronok esubunitae kotere akolongit na ngichan. Eremokino Ekapolon Akuj itwaan daang ni iwoga. Toyen atamar nyebuchar nyirira. Amuno ka anupit ngesi kirimakinea Akuj akisech. Itwaan ni ekerit Ekapolon Akuj, nyeanyunosi ka naaronok. Ani kejoiki Ekapolon Akuj eboyor a itwaan, isisili Ekapolon Akuj tani ngimoe a itwaan kangini ka ngesi. Ejok atingit ibore nidiochichi ni ianyuni a erot alo eriyan, akidwang atingit nikaalan tarai nimoduna. Ereat itwaan ngakiro a ngitamen keng, nakaneni Ekapolon Akuj idodeanakini ngesi na esubakini. Ngakiro na elimuni ekapolon, eponito ani a Akuj, nyichwanganakini akituk keng ngakiro na etiakuni. Ngakitemiet a egielit na eriyan, ngesi esaki Ekapolon Akuj. Esaki egielit daang tarai lo eriyan. Italeo ngikapolok esubete naaronok, kainyo ateneanut ngesi itowei apolou. Italakarete ngakiro na iteni ekapolon, emina ngesi ngulu iruorosi ngakiro na iteni. Italakari itwaan ni eos ekapolon kainyo erukito anyunyura a ekapolon ka akitu. Ani elakuna ereet a ekapolon, eyei akiyar. Ikwaan ajokis keng ka ngidowon lua akiru ana ngirupei. Ejok noi aanyun aosou akidwang aanyun egolit. Ejok aanyun achwaanu akidwang akwangat. Erot lo iwapito ngitunga lu etenooko, inachari ani eyakasi naaronok. Itwaan ni echoikinit elote keng, eyuun. Ingareni ekinis nginyas nabo ingareni ekiwog atiyaun. Ejok akitiditeun kiruko ka ngikebootok, akidwang akimor ka ngikenisak ngiboro lu engataritae. Ngini epupi na itatamio, ejokearosi ngakiro keng. Epiario ngini igieno Ekapolon Akuj. Eyenio itwaan nikooson kotere achwaanu keng. Ngakiro keng nakaabok, eminarete lu epupete. Erai aosou eitanit a akiyar a ngitunga alukoosok. Erai abaangu eriras a ngikabangabangae. Itamakini ekooson ngakiro keng eringa nyelimuno, tobobokis ngakiro na elimuni ngesi ngitunga. Ikwaan ngakiro naajokak ka akimiet a ao, tobobokis etau nabo tojoikis akwaan. Eyei erot lo esibit anitwaan ejok tarai esal keng ngesi akitu. Esubi itwaan etich loajokon kotere ekimue a akimuj, akook ngesi itusubi ngesi etich. Etuk itwaan niaronon ngakiro naaronok ikwaan ngakiro keng ka akim nakariran. Erikit itwaan niaronon eburas. Iturumi ekaswaman ngipaalon luminin. Ingalae itwaan ni emoitana lopae keng sodi torik alorot aloaronon. Tochoik ngitunga lu kidongete a ngakonyen ka ngangajepa, eyakasi naaronok esakete asubakin. Eraakasi ngakorwo ekiraun a ekipur, kainyo erai akiyar nikooyen ebachit alu etenooko. Ejok itwaan ni nyengoana, akidwang ni eyenikinitae. Ejok itwaan ni etikokinit etau keng akidwang ni epolokinit ngirerea. Erameenete ngitunga ekura toyeneta nguna esaki Akuj, nakaneni Akuj alope etiakuni. Ejok akinyam amugati nakoonon tamam ngakiro kichanete, akidwang ayakau kai na imujere akimuj nakaalan kileleba ngichan. Epedori ekedalan lokooson apolokin lokookeng a ekapolon keng erai kesubi edia ngolo ngakiro na ngileech. Nabo irumete ekedalan ngolo ka ngide luche ebari. Eroyeeneo egolit ka akwangat a akim, nakaneni Ekapolon Akuj eroyi ngitai a ngitunga. Epupi ekasechan ngakiro naaronok, nabo epupi ekaliokon akituk nakamodeanan. Itwaan ni ekianar ngikebootok, iyenyi Akuj na kolong asubuni kesi. Ani kilakar iyong kotere ngichan lu eriamunit itwaan niche, nyibuchar iyong nyirira. Iwogatar ngikasukou ngide a ngide kech loger lo iwogatar ngisapa taapaakech. Nyiruorosi ngitunga lu erimae alioko, nabo emam lubaang ngakiro kayarak iruorosi. Itamito ngitunga ngiche atamar ikoni ibore ni ediakere itwaan ebata, nacha ipotorere, tosubakin na esakio. Itwaan ni erimanakini luche, eminakinio. Ngini itamuununi na esechakinitae, itadauni epaalonu. Itatama itwaan nikooson kotere akikilakino apei, nyitatama ekabangabangat tani keram ngaramet amiat apei. Ikoni akitu emeanara lokamoitanan, ebuneene lotunga luaronok lu eyaunito ngichan jiik. Ejok tani akiriamun ka ebu lo edemaritae ngitak keng, akidwang akiriamun ka ekabangabangat lo esubi abaangu keng. Ani kesub itwaan ngakiro naaronok tatachak nakiro naajokak, nyedaun ngakiro naaronok anawi keng. Ikwaan akisiakin a eburas ka ngakipi na engaunosi, kiratak eburas nyiisiak. Eremokino Ekapolon Akuj itwaan ni itojokit ngitunga luaronok ka ni itoronit luajokak. Emam ibore eanyuni ekabangabangat erai kelemu ngaropiyae kisomaa, kainyo ebangaana ngesi. Idodiunit epae lo a iteni amina ngirwa daang. Idounitoe lokaatokon kingarak alochan. Itwaan nibaang elimuni atamar alemuni ibore, toweik ngamichae a itwaan aniche. Itwaan ni emina akisech, emina eburas. Itwaan ni iwoga jiik, esaki nginyas. Itwaan niaronon a akou, nyejokearosi ngakiro keng. Itwaan niaronon a akituk, elomari lochan. Isialolongi idia nibaang apakeng, nyelakar apakeng a ekabangabangat. Etau lo elakara, ikwaan ka ekitoe lo itangalekini edeke, nakaneni isikarijiji ereet lo asinyit akwaan. Echamuni itwaan niaronon idaidaakinio ibore nidiaket, sodi nyeetubere ngakiro eriyan. Eriparit itwaan nikachwaan aosou, ani itwaan nibaang, itoololokinit ngakonyen wadaang. Isialolongi idia nibaang apakeng, nabo eriebete ngakiro keng itiokeng. Erono akisipak itwaan ni nyesechit ibore alokies, erono akirirare ngitunga lukajakaanak. Nyingamangama itwaan nikooson jiik. Echwaana itwaan nikaalimon. Tani ekabangabangat erai kililing, etamario kori eos. Etamario kori echwaana erai kebunaki akituk keng. Itwaan ni nyepuposi ka luche, esaki ngakiro nakeng a ilope. Itopegi ngesi ngakiro nache daang na ejokak. Nyitee ekabangabangat ajokis a aosou, nakeng make esaki ngesi kiirarae. Na ebunio akisech, tolomut ngileech dang, iwapap ngileech ka etimoi. Epedorete ngakiro na elimuni itwaan aliwor eitanit a aosou. Ee robo, eliworosi eitanit lotuluk a anam, lokaalimon a ngakipi a elelea. Nyejok aminakin itwaan ni esechit, nyejok akimik ngitunga lu nyesechito ngakiro na eriyan. Eyauni akituk a ekabangabangat eburas, enyaraunit akituk keng akideto. Eyauni akituk a ekabangabangat nginyas keng a ilope. Ngakiro keng a ilope ipakarete ngesi. Ebobok ngakiro a ekaswaman ikote akimuj, ilikorosi nikajokon tolomasi nakwaan. Erai itwaan nikalany ipei ka nia nginyas. Ikoni Ekapolon Akuj epem lokaagongon, lo ematarosi ngitunga lu etenooko toyuunos. Itamito ngikabarak atamar kiyuuni kesi ebarit kech loger a ngawasea anakooyak iriamito ere. Etupit amunyaro ekinis a itwaan, nakaneni nyerimae itwaan mati kitiditeun. Ani ketachu itwaan akiroit eringa nyiirara, erai abaangu ka ngileech keng. Itwaan ni esaki akiyar, etitinyikini edeke, nakaneni itwaan ni esurur etau, nyetitinyikini. Imuit itwaan nikooson akitatama, esakit akit keng akiirar ngakiro na aosou. Nak itwaan ni eyenikinitae ibore, ianyunosi iyong ka ngesi atipei. Itwaan ni isiauni kiruorik alokies, ngesi esibit iyookinit ngakiro, mati kebu eketopegan keng kingichingich. Ekura isalununi ngikesio, totiak ngitunga lu epegasi. Ikwaan akingarakin lokaatokon ka adukokin awas nakaagongon nawi kon. Ani kiburata iyong ka ngesi, kigolori ngesi iyong moding. Ileleba akook a itwaan ngakiro na iruoro, ee robo, isimwokete ngesi ngakiro na iruoro. Nangajep itorunito akiyar ka akitu. Ngulu eminasi angajep, kitiro robo. Ngini eanyuni aberu, aanyu ibore ajokon. Emina Ekapolon Akuj itwaan ngini. Imaimaasi ngikebootok ilipasi, ani ngikabarak, etachuunete ngakiro a adedengu. Eyakasi ngipaalon lu nyeraakasi ngipaalon dir, nakaneni eyei epae lo emunoi iyong noi, akidwang tani lokaatokon. Ejok aliwor ekebootonit, tarai lokimunoi akidwang aliwor ekabangabangat lokaliokon. Nyejok eyei ekimue tamam achwaanu. Itooliyori ekirikir itwaan alorot. Na elomarea itwaan lonyas kotere abaangu keng a ilope, tapaik Ekapolon Akuj. Iriuni ebari ngipaalon lukaalak lukiteat, nakaneni eisikini epae ekebootonit. Ekaanyunan lo iruoro alioko alokies, nyebuchar nyirira. Nyebuchar ekaliokon. Esaki itwaan daang katominak itwaan ni eyenikinitae. Eolosi itwaan daang ka itwaan ni iposi ngiboro. Itwaan nikebootonit, eremokino tani talokaatokeng. Ani bo talopae keng, nyechadarosi noi a? Tani kimaima ngesi kesi kwaai, nyebuuni. Itwaan ni eanyuni aosou, eminakina bon. Itwaan ni irichakini achwaanu, ejokearosi ngakiro keng. Itwaan ni iruoro alioko alokies, irirao, nyebuchar. Emunyario ekaliokon. Nyejoikinit ekabangabangat ibooyi anajako, nabo nyejoikinit ekedalan epolokinit ngikapolok. Nyengoi itwaan nikooson atipei, na esechakinere ngesi, kiperuwa, kidodiu neni atamar erai ngesi itwaan a arimatoi. Ikwaan anyunyura a ekapolon ka akirurumare a engatuny, ikwaan amina keng ka ka ngakop, na eyakasi kidiama nginyia. Eyauni idia nibaang nginyas nika apakeng. Ikwaan aberu nakeburan ka akiru na itipitipi. Epedori itwaan akirum akai ka ebari anika apakeng, nakaneni nia Ekapolon Akuj eanyunea ngesi aberu nakooson. Takalanyaner kisaki, toper, nakaneni toyen atamar kinyami akoro. Itwaan ni irichakinit ngitalio a Akuj, irichakinit akiyar keng. Itwaan ni engeri, etoani. Ani kiinanak iyong ekebootonit ibore, ikwaan ka akitaar Ekapolon Akuj amicha. Kitachakini ngesi iyong kotere na isubi. Totingak ikoku kon akulit eringa edit epedori akiirar. Ani kemam, inyasunit iyong ngesi. Itwaan ni emina anyunyura, kimiek kitir ngichan lu eyauni anyunyura ngina, kainyo ani kingarak iyong ngesi alochan kangulu, ibongokini iyong nabo akingarakin ngesi. Kiira ngakiro nakisuruorio, tacham akitenikino. Sodi toriamunea aosou a ngirwa alu isidiyete. Elalak ngakiro na itami itwaan asubakin, nakaneni nguna esaki Ekapolon Akuj, kesi esubakinosi. Amuno ngesi esakitae anitwaan, ejok ekebootonit akidwang ekaliokon. Akiker Ekapolon Akuj kiteyari, kianga nyiichanyunosi ka naaronok. Irepakini itwaan nikalany akan natubwa, tokuruwo tani abuun nakituk. Taram itwaan nia ngimeny, sodi kitatamatar lu emam ibore eyenete. Kikilak itwaan nikachwaan, toosu. Itwaan ni eboliar apakeng, kori kitwarak itiokeng anawi keng, eyaunit ngileech. Lokoku, ani kijongo iyong akitatama, ilagalagakini iyong nasek iyeni. Ekaanyunan loaronon, imenyarit ngakiro na eriyan. Ebobokinito ngakituk a ngitunga aluaronok aronis. Ejoikinit ngikemenyak irirao, sodi kinapae ngakautoroi a ngikabangabangae. Erikuni emuna ngimeny, eyauni epurot loadwaran eburas. Ebangaana itwaan ni irakari epurot. Anyunyura a ekapolon, ikoni akirurumare a engatuny. Itwaan ni itongoi ekapolon, ajal nginyia. Arimatoi ngesi achadar aloburas, nakaneni iburana ekabangabangat daang. Itwaan nikalany, nyitakini ngamanat keng ngirwa lu esakitere, emam ibore eanyuni ngirwa lua ngalemet. Ikwaan ngitamen a itwaan ka ngakipi a akar anakooyen, nakaneni epedori itwaan nikooson aokun. Ebala itwaan daang kamunoi ngesi, ekoe, eyei dir ni emunoi a? Epiaritae ngide lu etenoono apakech, tosubi na eriyan! Ekapolon lo ibooyi alokicholong a eriras, eyeni naaronok napei ingolikinea. Ngae epedori alimun tama, “Etaleu ayong etau kang, etaleun ayong anakisech kang?” Eremokino Ekapolon Akuj ngaratilio ka ngakitemiet a egielit na ingalaare ngitunga. Eyenikinio tani ikoku kotere na esubeene kejokak taraakas na emunoi. Ekapolon Akuj asubuni akit nakiiraret ka akongu nakingolikinet. Ani kiminak iyong ngaju, kibootoni. Ani kituroner iyong, elalaar akimuj kon. Engolopa ekagielan a ibore ebala, “Erono, erono.” Ani erotokini, kinisakin ebala katubokin ngaropiyae. Eyei egolit, eya ngamoru nakaalak a ngaropiyae, nakaneni ekiruor a itwaan anikooson, idwangit ngiboro ngulu. Tolema eworu a itwaan anibaang esaa lo eweikinea amicha a itwaan a akwap anache, kiratak toliwor eweikinit amicha. Ejok ibore nimoduna ikoni akimuj nakaabon, ani nabo atipei, tosub engame ileleba nakituk. Kiira ngakiro nakisuruorio, tojokearotor ngakiro kon, nyiiloma lojie peireat ngakiro a aosou. Elimori ekaswaman ngamunonoe, nyiiruko nabo ka ngitunga lu iruorosi lokabangabangae. Itwaan ni ichieni apakeng ka itiokeng, esaluni akiyar keng, loger a ataa ana edunge anaribu. Ebari lo isiakini ikirikiruunitae, esaluni emam apiaro. Nyiilim tama, “Atachakini naaronok.” Kigienokin Ekapolon Akuj, kingarak. Eremokino Ekapolon Akuj ngaratilio ka ngakitemiet a egielit na ingalaare ngitunga. Ekapolon Akuj idodiuni ni itori itwaan. Ani ikokini itwaan eyeni erot keng ai? Kitama lokojokon eringa nyelimuno atamar ilemikini Akuj akipeyos, sodi nyiiriangakin ekisidi kikong kerumor. Eyeni ekapolon lokooson itwaan ni esechit, sodi kirira emam ngisien. Inwakunit ataa a Ekapolon Akuj etau a itwaan, iseme ngakiro na alotooma keng daang. Erubi ekapolon erai ekapolon erai epolokinit a ngakiro ana eriyan, tarai lo emunoi, peipakarit ngitunga ngiche. Akibuseanu a ngisorok ngesi ngikilinga kech, ani ngikasukou, ngesi ngakorwo kech. Mati keanyu itwaan ngakiro nakaapilak ngesi etiakatar ka naaronok. Eyeni Ekapolon Akuj ngakiro na esubi ekapolon loger lo eyenea ni itorete ngakipi na eleleete. Ejoikinito itwaan ngakiro daang na esubi, nakaneni Ekapolon Akuj itemit ngakiro na eya lotau. Echamit Ekapolon Akuj ateneanut ka ngakiro na eriyan akidwang akipeyos. Ngiwog ka ekinis erikito luaronok loger a ataa, eraakasi nguna akisech. Itwaan ni ereat ngakiro keng lokojokon, eanyuni ngiboro lukaalak, ani itwaan ni ekoponokin ngakiro atipei, nyeanyuni nguna itemokino. Ebari lo eanyunio kotere engalas, engopiari atipei loger a apuru, nabo kitachakak nakitu. Emunyari luaronok amoitanut kech a ngikulepek, kainyo engerito kesi akisub nguna eriyan. Erono elote a itwaan aniasechan, nakaneni etenoono elote a itwaan aniajokon. Ejok akilom naita a akai, akidwang akiruk ka aberu nakeburan alokai. Imuito itwaan niaronon ngakiro naaronok, nyisieni ekidunyet keng. Nairiraare itwaan nia ngimeny, itatama itwaan nibaang. Ani kitatamikin itwaan nikooson, eanyuni achwaanu. Itee Akuj na erai ngesi etenoono nguna esubasi anawi a itwaan aniaronon, nakaneni inyasuni ngesi luaronok. Itwaan ni nyiirari akigoro a ngikebootok, nyiirario ngesi dang na ikalounio. Ani kidaidaakin itwaan ni engoit ainakinet, edauna angoit keng. Ani kebunakin ibore nidiaket, edaun anyunyura keng. Na esubakinere ngakiro na eriyan, talakaros ngitunga lu etenooko, nakaneni takadakis ngitunga luaronok. Idarit akitu itwaan cha daang, ni inachari wache kimiek aosou. Ngini emina amera, ibootoni. Ngini emina emuna ka akilibilib akimuj, nyebari. Etachario itwaan niaronon talakakinere itwaan niajokon. Etachario itwaan ni emam anupit talakakinere ni etenoono. Ejok akilom nariet akidwang akiruk ka aberu nakeburan tobenyana. Nyedaun ebari ka ajako anawi a itwaan anikooson, nakaneni irikari itwaan nibaang ebari keng napei cha eanyunea. Itwaan ni etenoono tapatana, eyari ngikaru lukaalak noi, toliwor lo erimae. Epedori itwaan nikooson alemar ere, lo iyokiyete ngitunga lua ngikilinga, sodi touko ngawasea na igienosi kesi. Itwaan ni echoikinit akituk keng ka angajep, nyelomari lochan. Ngae enyaritae “ekemenyan”? Ngesi itwaan ni iwoga, kinisa. Idodiuna ngesi anakiro ana esubi. Eari itwaan nikalany ekimue keng kainyo ewounit ngesi akisub etich. Apaaran juui towar, irakarit ngesi etereku. Nakaneni ipotorit ni etenoono, nyewounitor. Eremokino Ekapolon Akuj ngakipeyos a itwaan aniaronon. Eroner noi erai keyau esakea naaronok. Nyenupio ngakiro a ekaanyunan alo nyiruoro iteni, nakaneni erubete ngakiro a itwaan ani epupi ngakiro. Eyeni itwaan ni etenoono ngakiro keng nakaneni itingakina niaronon ajokis. Aosou ka achwaanu, ka ngakiro na etukosi ngitunga, eraakasi pas ani a Ekapolon Akuj. Itonyounio ngangolei lojie, nakaneni erai akidwang aka Ekapolon Akuj. Ejok aseun ekipur ajokon, akidwang aseun ebari lokaalan. Ejok aliwor itwaan ni kichamitae, akidwang ngaropiyae ka egolit. Ibore en ngesi isiriamiriamit ngikabarak ka ngikebootok, Ekapolon Akuj asubuni kesi daang. Ingolikini itwaan nikooson ngichan sodi totiaak. Nakaneni itwaan ni nyemisit, elomari lochan kiitok ariangakin. Ebachit a akitiditeun ka akiker Ekapolon Akuj, ngesi ebari ka arimatoi ta akiyar ngikaru lukaalak noi. Ileleba ngiikwa ka ngiloi lorotin a ngitunga aluaronok. Itwaan ni echoikina, echadar anikech. Kitatam ikoku ngakiro na ejoikinit iwapi, ani epoloe, nyetiakasi ka ngakiro nguna. Erai ekebootonit ekedalan a ekabaran, ani itwaan ni eari amicha, toliwor ekedalan a itwaan ani ipotorit amicha. Itwaan ni itae ngakiro na nyeriyan, elemi ngichan, tasalu akichiekiarit keng luche. Epiario itwaan nikapatanan kainyo emorete ka ekebootonit akimuj keng. Kitwarak itwaan nia ngimeny, tadaun eburas, ka angolopa ta ngiyeny. Itwaan ni emina etau lo italeuno ka ekiruor loajokon, eelokinosi ka ekapolon. Irichakinit Ekapolon Akuj achwaanu, kitepenia ngakiro alukaliokok. Ibooyi itwaan nikalany anawi ebala, “Eyei engatuny nikalapatan! Kaario ayong kapudo!” Akituk a aberu anakaloman, ikoni akipany nakooyen. Itwaan ni engoikinit Ekapolon Akuj, echakakin nakipany ngina. Idounitere ikoku abangaanut, ani kelojakin akulit, kiter abaangu. Itwaan ni ichiekiarit ngikebootok esaki atamar atabarea, kori ngini ipotonokini ngikabarak ngiboro, eliwor ekebootonit. Todeta akit kiira ngakiro a ngikoosok. Kiseme ngakiro naketatami ayong iyong, kainyo ilakar iyong erai kitamuunu jiik tolimuunu. Kigienokin Ekapolon Akuj. Kimiek katolimok ngakiro nugu akolongit naga. Kegirak ayong iyong ngalimuununet ngatomwon-uni, na eraakasi ngaka achwaanu ka ngakitatamet. Kitatamete iyong ngakiro na eraakasi iteni dir. Sodi ani kimeario aanyun, kirukut ka akiroit na itemokino. Nyiidema ekebootonit ibore ani iboositor, kori nyiiboliar alokies ngulu emam kona ingarakinotor. Kainyo eikinit Ekapolon Akuj kesi, sodi tomunya ngulu esakete amunyar kesi. Nyiielokinosi ka itwaan nikangoan, kori lu eminasi anyunyura. Ipedori akirokun elote kech, kisurum loger a eloit. Wara nyiiliwor itwaan ni ibala ilemuni ibore, kori nyiiweik amicha a itwaan aniche. Ani kipiyo iyong akitach, kidemario tani akapet kon. Tochoite isiyotokini ekukuor longorot, lo kolong egerokinete taapaakon. Itwaan nikunonoit alotich keng, esubi etich a ngikapolok. Meere ngitunga lu nyeyenikinitae esubanakinete ngesi etich. Ani kiboikin iyong kimuja ka ekapolon, kitamunite atamar erai ngesi ngae. Ani kimujana iyong, kiapak ekimuje. Wara nyikiminana akimuj keng, kainyo erai tokona ngon akingalaunet iyong. Nyiituburun kotere akisak ebari, toosu tochoikin. Epedori ebari angopiar atipei, tosub eyakasi ngabeben na epororea loger a egole. Nyiinyam akimuj a itwaan anikamonan, kori wara akimuj keng naajokon nyikimina. Elimuni ngesi tama, “Kasio kimuj.” Tarai nyikote neni alotau. Ilekuni iyong akimuj na inyam daang. Tobukoros ngakiro kon naajokak, na ibuakinitor alakara. Nyiilimok ekabangabangat ngakiro a aosou, kainyo nyejoikinete. Tochoite isiyotokini ekukuor longorot, kori nyiiloma namanat a ngikokiok. Ekapolon Akuj erai ekaikinan kech loapolon. Eikini ngesi kesi anikon. Kiira ngakiro nakitatamio ka apupokin ngakiro na achwaanu. Nyiriaka akitenikin ikoku a akulit. Nyeari akulit ikoku. Ani kiram iyong ikoku a akulit, iyuuni ngesi anakitu. Lokoku, ani kiosu iyong, alakar ayong dang. Etamari etau kang chuu, erai kitorut ngakiro na iyookino nakituk kon. Wara nyikirum etereku kotere ngikasechak, pearai toker Ekapolon Akuj. Iteni dir ejokearosi na isidiunosi, nabo nyengopete na igieno iyong. Topupok lokoku, toosu, sodi kitama eger a eboyor kon. Wara nyiiruko ka ngitunga lukamatak emuna lokaalan, kori lukadakak akiring nakaalan. Kainyo ibootoni lu irakanari emuna ka lukadakak. Ani kerai akimuj ka akiper bon isubi iyong, inapi ngakorisae atipei. Kiira ngakiro a apakon alo kolong kiuriuni iyong. Nyiimenya itiokon na emojongea. Togiel iteni, ka aosou, ka ngakitatamet ta achwaanu. Ejokak ngakiro nguna noi nyejoikinit egielario. Apakeng a itwaan ani etenoono, elakara lokojokon. Itwaan ni eos lokookeng, inisakinor ngesi lokookeng. Kitalaka apakon ka itiokon. Kimiek ngina kolong kidouni talakar. Lokoku, topupok lokojokon. Kiwap elote kang. Ikwaan amalaat ka akipany nakooyen. Ee robo, ikoni ngesi akar nakaadingan. Kiperuni loger a ngirukooi. Ngakiro nguna alalakearotor ngikiliok lu eloloto. Ngae ichana? Ngae ialolongi? Ngae ika ekurikur? Ngae ika eburas? Ngae eyakasi ngajemei na nyeyeni ni etorunete? Ngae erengak ngakonyen? Kesi ngitunga lu etikonokinosi emuna. Kesi lu eminasi aroanar emuna lu imorimoritae. Tojongo akitere arengis a emuna, ka eger lo emalimalea alokopo, ta eger lo itorio lodokole niajokon. Ani ekisidi kitokony loger a emun alo akisierit. Itaapirikini ngakonyen kon taanyunga ngiborei lugelayek, kibiler ngitamen kon kiruor moding. Ikokini iyong itwaan ni eperi alokiding anam, ni imasanar alokiding atubwa na imatamata. Ilimuni iyong tama, “Karamitae ayong, nakaneni nyawanan. Kedisitae, nakaneni nyepipilikina. Ekoe, ori edaunotor ngaju, atasaka epurot eche?” Wara nyikiting etereku kotere ngitunga luaronok, kori nyiisak aelokin ka kesi, kainyo akisiakin ngichan itamete kesi. Erai ekiruor kech daang lo esakere akiwan ngitunga luche. Aosou eduki awi. Kitowo achwaanu. Achwaanu ngesi ilelebi ngiboro namaniyae. Kileleb ngiboro luajokak, lu elalak ngaropiyae. Ejok itwaan nikooson idwangit nikaagongon. Idwangit achwaanu ngikilinga. Kainyo ejoikinit itwaan erekini ngakiro niajokon eringa ejie. Ani kianyu iyong ngikesuruorok lukaalak idwangi alojie. Egogongikinit ekabangabangat aosun. Nyepaki akituk nairuorore ngakiro natenoyek. Itwaan ni ereat jiik akisub naaronok, enyarao ekechanan. Ngakiro daang na ereat itwaan nibaang, eraakasi akisech. Eremokino ngitunga itwaan ni imenyi luche. Ani kililimiyo iyong akolongit na ngichan, ipalag iyong dir. Toyuu itwaan ni erikoritae akiar. Kiratak ngulu iteroterooro nangolanot. Ipedori iyong alimun tama, “Wae, pekiyeni sua!” Nakaneni toyen atamar Akuj na eroanari ngitai itee ngakiro daang. Kitee ngesi iyong kiyeni. Kitachi ngesi iyong itemem ka na isubi iyong! Lokoku, tanyam akimiet a ao, kainyo ebob. Eger cha lo eboboo akimiet a ao anangajep, eger lopei ngolo eboboo aosou alotau. Ani kianyu iyong aosou, ejokearosi ngakiro kon na isidiuno. Epete ngakiro na igienokin iyong jik. Nyiikwaanikin ka ngitunga luaronok. Nyiiperu itwaan niajokon anawi keng. Nyiikoko awi keng. Nyemisitae itwaan ni etenoono tani kedakar ngadakaret ngakan-kaarei, enyouni nabo, nakaneni emunyarosi luaronok a nginyas. Nyiilakar ichanyunosi emoit kon ka naaronok. Nyiikianar na ilegeunea ngesi ibore tadakar. Ingolikini Ekapolon Akuj atamar ikianar iyong ngesi, tongo, sodi toree angoit keng anitwaan kangini. Wara ngitunga luaronok nyikisialolong. Wara nyikiting etereku kotere kesi. Emam itwaan niaronon ibore iche igieno. Emam ibore iche eringa idarit. Lokoku, toker Ekapolon Akuj ka ekapolon. Nyiiruko ka ngitunga lu engerito kesi. Kainyo epedorete kesi ayaun ngakiro naaronok atipei. Ngae eyeni nginyas lu eyaunete Akuj ka ekapolon? Alimut ngikoosok kona. Nyejok akipakanar ngitunga alokies. Itwaan ni elimokini ekasechan tama, “Nyisechit iyong,” ilamete ngitunga daang toremokinos. Ngulu ikilakinete ekasechan, isikokinosi nabo emini ekipur loajokon. Itwaan ni etachuni akiroit na iyookino, erai epae lo a iteni. Nyiiduk akai ka asubakin ngakiro a awi, eringa nyitakina amana kon, toyen atamar ianyu ibore ni itemokino iyarea. Nyiiruoror itwaan niche naaronok, tamam ngakiro na esubit. Wara nyiisudok itwaan ngini ngakiro. Nyiilimu tama, “Asubea ayong ngesi loger lo ngoon kasubea ayong. Atachakini ayong ngakiro nakasubea ayong!” Etoruni ayong mana a itwaan anikalany, etoru mana a ngimusabib a itwaan anibaang. Abu atoriangakin! Arupunito ngiikwa amana ngina awadaang, atoriam kilelebun edoan wadaang. Atoriam alaar keng na ngamoru keukun. Atokienyik kona, etama ngakiro keng, ani ekisidi atoriam ngakitatamet. Ani kisaki ajotoor wadio, kori akilurakin, kasio! Tokudok ngakan kianga wadiochichi! Nakaneni toyen atamar esaa lo ijotoo iyong, kilomakini iyong eboot loger a erukoot, kitolomak amamau a ngiboro loger a itwaan ani etingit ngiboro lujiet. Ngakamatak a Solomon ngache nugu na kolong egirete ngitunga a Esekia alo arai ekapolon a Yuda. Ipuroi Akuj kotere ngakiro na idait. Ipuroi ngikapolok kotere ngakiro na engichunete. Nyipedori akiyen ngakiro na itamete ngikapolok, kilanyito ngoni ngitamen kech loger lo elonia adis ka eger lo etulukukio anam. Tolema aangoreanut anakwangat sodi kitiaku eketiakan ibore niajokon. Tolema ngiketutukok luaronok ani a ekapolon, toyenikinae apolou keng a ateneanut. Nyiilot akitojoka ani a ekapolon, kori nyiisak aliwor itwaan ni eyenikinitae. Kainyo ajok alimokino kona, “Bua kiboikin ngaren nege,” akidwang alemaro ani ibooyo, kitotiyaar alongaren ekapolon. Nyiikirikiraar lokies alimor ngakiro na ingolik. Ikokini iyong ai, erai kisidiun iche kitopeg? Ani kingolopa iyong ka ekidunyet kon, torumosi esi make. Nyiilimo ngakiro namunonoe a itwaan aniche. Eliworosi ngileech erai keyen itwaan daang atamar nyimunoni iyong ngakiro. Akiroit na itemokinitoe elimunitoe, ikwaan ka egolit lo itoweyo anakwangat. Eger lo ikilakinea itwaan nikooson, kikilak itwaan ni echamit apupokin, ejok noi idwangit ekababaat a egolit ka asir a egolit. Itililimi emeanara loajokon etau a itwaan ani emearit, loger a ngakipi anakaalimok ngirwa lu eriraa akolong elemio ngamanat. Itwaan ni iwoga ebala alemuni ibore, sodi nyeelemu, ikwaan ka ngidowon ka ekuwam lu nyeyaunete akiru. Itwaan ni iapunit ngakiro, epedori kimaimai ekapolon. Itwaan nikaabon a akituk, epedori tani ngakiro nakationok. Ani kianyu akimiet a ao, tanyam na itemokino. Ani kinyam nakaalan, kiteleki. Nyiiruchak aloseenen kai a ekidunyet kon. Ipenuni anikeng, sodi kitoremokin. Itwaan ni itingakini ekidunyet keng ngakiro na nyeraakasi iteni, ikwaan ka esebo, kori ekileng, kori emal lokakwanan. Akigienokin itwaan niaronon akolongit na ngichan, ikwaan ka anyakaa akimuj a ekelae alo iloiloo, kori alosit a akeju ana engwalit. Aeonokin itwaan ni eriab alotau, ikwaan ka abutor ngiworui keng akolongit na akatorot, kori akirigakin amakat najeme. Ani kenyamit emoit kon akoro, kisumuj. Ani kenyamit akure, kitamat. Kainyo enomete ngakiro nguna ngesi tosub iasi iyong ngatotol a akim nakou keng. Kiinakini iyong Ekapolon Akuj ebachit. Eyauni aswam arem loger lo eyaunea ekuwam loapolon akiru. Ejok akilom naita a akai, akidwang akiruk ka aberu nakeburan alokai. Ejokak ngakipi nakaalimok nakinyamea akure. Aloger alopei kangolo, ejokak ngakiro naajokak epote anikalonan. Itwaan ni etenoono ni epupokinosi ka itwaan niaronon, ikwaan ka akuja na ichwalimakinitae, kori akar na ebukokinitae ekitoe lokaaran. Nyejok akinyam akimiet a ao nakaalan, kiapun robo anakisak ekipur. Itwaan ni nyetikokini angoit keng, ikwaan ka ere lo etijikin kimiekinae emam ngawasea. Nyechamam ekipur ka ekabangabangat, loger lo nyechamatar eloch ka akamu, kori loger lo nyechamatar akiru ka ngirwa lu elemere ngamanat. Nyikiwanete iyong ngilam mati isechit. Ikwaan ka ngikieny lu eporito, towounito adore. Ejoikina angole idesio. Ejoikina esikira erubio. Ejoikina ekabangabangat inapio. Nyiitachak ekabangabangat ngakiro, ani kitachak, ibangaana iyong dang. Tatachak abaangu nabaangu, toyenea itwaan ni ingita atamar abangaana ngesi. Ani kimea iyong ekabangabangat ayaar ngakiro, totubo tani ngakejen kon, kainyo inyaraunit iyong ngichan pas. Ngakamatak na itorunito nakituk a itwaan anibaang, eraakasi ngapasiek, ikwaan ka eger lo iyoloyolotor ngakejen a itwaan ani engwalit. Erai pas akidodikin itwaan nibaang arimatoi, ikwaan ka akien amoru na esakio achakar. Ekabangabangat lo esaki ekiruor ngakamatak, ikwaan ka itwaan ni irakarit epurot ni esaki akuun eekwae anakan keng. Itwaan ni igiri ekabangabangat kori itwaan nikamatan epurot, ikwaan ka ekaguman lo ewani itwaan daang. Itwaan nibaang ni ebongonokini jiik akisub ngakiro na abaangu, ikwaan ka iingok ni ebongokini ngalekan keng. Ejok ekabangabangat lobaang noi akidwang itwaan ni ebala aos, tarai nyeos. Ebala itwaan nikalany ilelenyi apudor nikalapatan, “Eyei engatuny lorukudi! Eyei engatuny nikalapatan!” Ibelobelo itwaan nikalany ani eperio, emam bo ni eakari dang, ikwaan ka ekidor lo ereanar ani edupakinitae. Irepakini itwaan nikalany akan natubwa sodi kileleny abuun nakituk. Itamit itwaan nikalany atamar aos akidwang ngitunga ngikan-kaarei lu epedorete akiruor ngakiro na esakete. Itwaan ni echulokin loburas lo nyerai ekeng ikwaan ka itwaan ni elosi nikalapatan kirum iingok toting ngaki. Loger a itwaan ani ikerepikinit ani imasanari ngasarae, ka ngimalea a amod ta akitu, ikoni neni itwaan ni ibatari niche, ani erumor tama, “Erai ibore abolia karika!” Ani kengopa ngakito, edunge akim. Ani kengop eswamit, edaun eburas. Itonoki atotole akim, itirirauni akitoe asarae a akim, eger lopei ngolo ngesi erikitor itwaan nia ngichan eburas. Ebobok ngakiro a ekaswaman, ilijasi nakwaan niajokon. Akisosware toroko ngakiro na eya lotau, ikwaan ka eger lo emalimalea amot nalupe. Idait itwaan nikamodeanan aremo keng ani itobobotor akituk. Ani kiruorik itobobot akituk, nyiinup ngakiro keng, kainyo ileleba aremo lotau keng. Epedori ngesi akidaa aremo keng, nakaneni ileereuni aronis keng alotunga kadaang. Itwaan ni ebokari akipany, ngesi ilope echakakin nakipany ngina. Itwaan ni ijukari amoru kikokoriyor, etiki amoru ngina ngesi. Eremokino ekaliokon ngitunga lu ingalae. Eyauni akisosware ngichan. Wara nyiiwogakinor akolongit naka moi. Kainyo nyiyeni ngakiro na irukunioto. Kimiek itwaan niche kipuruu iyong, meere iyong ilope a akituk kon. Kimiek nigela kipuruu, meere iyong ilope a angajep kon. Epot amoru, epot asinyen dang, nakaneni ngichan lu eyauni itwaan nibaang, epotiok noi, idwangit apotis kech na amoru ka asinyen. Emoitana anyunyura tarai na nginyas, nakaneni erono etereku noi idwangit luarei ngulu. Ejok akikilakin na eleri akidwang amina na idaitae. Ejok epae tani kiwan ngesi iyong, akidwang emoit, tani kinuak iyong. Engeri itwaan ni imwonit tani akimiet a ao. Ebobokinit nia akoro tani akimuj naadwaran. Itwaan ni engopi anawi, ikwaan ka ikeny ni eoliyori alokai keng. Italakarete ngamieta nakaakunyok itwaan, nakaneni ipirisaarete ngichan etau. Wara nyiichaka ngipaalon kon kori ngipaalon a apakon. Ani kitinga ngichan, nyiilot nia lokaatokon kingarak. Kingarakini ekidunyet lo eapi akidwang lokaatokon lo elona. Lokoku toosu, sodi atalakar ayong. Ataanyu ngakiro na atachakini itwaan niketoronit. Ingolikini itwaan nikooson ngichan, sodi totiaak. Nakaneni itwaan ni nyemisit, elomari lochan kiitok ariangakin. Tolema eworu a itwaan, ani eweikini amicha a itwaan aniche, kiratak mono, tatachae amicha torumor. Itwaan ni enyouni nataparach elilim, kimala ekidunyet keng irema, etamario kori ilama. Ikwaan aberu nakeburan ka etipitip a akiru. Ikwaan akisililing aberu ngina ka akisililing ekuwam, kori abunakin akimiet nakan. Epedori asuat akipenar asuat nache. Aloger alopei kangolo, itatama itwaan ngakiro a itwaan aniche. Itwaan ni iyoki emeyan, enyami ngameyana keng. Ekapolon lo echoikini ekasuban etich keng, erimae. Ani kiripak iyong ngakipi, inwakun ereet kon anakipi. Ani kiripak etau kon, inwakun iyong ilope. Eger lo nyimwoketa ngalup ngikatoak, emam ngakonyen ibore eupi. Akim eroyere egolit ka akwangat. Iningio itwaan daang a ekipur keng. Tani kidich iyong ekabangabangat kirakar, nyitwaari abaangu keng. Totwar ngamesekin kon lokojokon, kiyok ngaatuk kon niajokon, kainyo nyerubi ebari. Nabo nyerubi apolou apei analesea kadaang. Na etubere nginyia a ngaatuk, toruput lukiteat, totuboe nginyia lu eya lomukur. Ianyuni iyong ngiworui anajul a ngamesekin, togielunea ngaanei kon ngache amana. Ani ngaanei na idongete, ilepi iyong, kitanea ngitunga a awi kon ka iyong ilope, aapei ka ngikedalak kon. Ekeri itwaan niaronon tani emam ibore irisit. Ani itwaan ni etenoono, ededeng loger a engatuny. Na esechea akwap, toliwor elunyi ngikapolok. Nakaneni ewei akwap na eyakasi ngikapolok lukoosok tochwaaka. Ekapolon lo ichiekiari ngikebootok, ikwaan ka akiru na erami tokut ekuwam todita ngikito daang. Ngulu nyekachito etal, ibakito ka luaronok. Ani ngulu irichakinito etal, nyechamam ka luaronok. Nyeyenete ngitunga luaronok ngakiro na eriyan. Ani ngulu ekerito Ekapolon Akuj, eyenete ngakiro nguna lokojokon. Ejok aliwor ekebootonit tarai lo kimunoi, akidwang aliwor ekabaran tarai lo nyikimunoi. Eos esorokit lo irichakinit etal. Nakaneni ngolo erukito ka ngikadakak, eyaunit ngileech nika apakeng. Itwaan ni ebari kotere akiatanakin ngamichae na iposi, elosi ebari keng nitwaan ni iposi ngiboro lokebootok. Ani pekiwap itwaan etal, engeri Akuj akilip keng. Itwaan ni ingalae itwaan ni etenoono kitusub naaronok, isurumi eloit keng a ilope, alongalas. Nakaneni eanyunete lu nyesechito ebachit. Ebala ekabaran kori aos nakaneni eos ekebootonit noi lo echwaana. Na eanyuneta ngitunga luajokak apolou, talakaros ngitunga daang. Ani keliworosi luaronok ngikapolok, toduka ngitunga. Itwaan ni idait ngasechesea keng, nyejoker eboyor keng. Itwaan ni elimori akisech keng tolung, erimakini Akuj ngesi. Epiaritae ngini ekerit Ekapolon Akuj jiik. Nakaneni inyasunio itwaan nikechanan. Eboliar ekapolon loaronon ngikebootok, ikoni ngesi engatuny lo irurumae, kori etiengit lobe edubu lokaadengan. Ekapolon lo emam achwaanu, erai erukoot lokamoitanan. Nakaneni ngolo eremokino na nyeriyan, epolokini ngirwa lukaalak. Itwaan ni ekudito ngaakot a itwaan aniche, kimiekisi todok nakwap ache tanang etoani, nyiingarak itwaan ngesi. Eyuunio itwaan ni emunoi. Itwaan ni nyemunoi, edakar atipei. Eketan lo irichakina alomana keng elalaar akimuj na eanyuni. Ani itwaan ni iwapit ngakiro napasiek, eliwor ekebootonit. Epiario itwaan ni etenoono, ani ni esaki akikirikiruun ebari, nyebuchar nyirira. Erono akipakanar ngitunga. Tarai echamuni itwaan iche akisub naaronok na einakinere ibore nidiochichi nidiaket. Esaki itwaan nikamonan akopun ebari, nyeyeni atamar edikino eboot ebuni. Kikilak itwaan, ani ekisidi ejoikinete ngesi nguna akidwang akisosware. Itwaan ni ekokoiari ibore alokauriak keng niti ebala, “Nyerai akisech,” ikwaan ka itwaan nikokolan. Eyauni itwaan nikadakan ngichan, nakaneni epiario ni igieno Ekapolon Akuj. Ebangaana itwaan ni iwapit aosou keng a ilope. Itwaan ni epupi ngakiro a ngikoosok, emam ibore etapi. Itwaan ni iposi ngiboro lokebootok, nyengopikini ibore, ani itwaan ni ekudit akan alokebootok, ichienete ngitunga lukaalak. Na eanyuneta luaronok apolou, toduka ngitunga. Ani edakarosi anapolou, tarata lu etenooko ngikapolok. Itwaan ni ikilanakinio jiik torubak ichanana, ewanio akolongit apei tongop kona itedekuunio. Na eliworotor ngitunga lu etenooko ngikapolok, talakaros ngitunga. Ani eliworosi luaronok ngikapolok, kisiakis ngitunga akialolong. Itwaan ni emina aosou, italakari apakeng. Nakaneni ebangaana itwaan ni isunyakini ngaropiyae keng namalae. Ekapolon lo esubi ngakiro na eriyan, itowei akwap. Ngolo erai ngaropiyae make idie, inyasuni akwap. Itwaan ni isoswae ekidunyet keng, elokakinit eloit keng a ilope. Isurumete ngitunga luaronok ngasechesea kech a ngikulepek. Nakaneni elakuna itwaan ni etenoono, elakara. Eyeni itwaan ni etenoono ngakiro na echamit esubere ngikebootok. Nyeyenete ngitunga luaronok nguna. Ngitunga lu imenyarito luche, ilomakinete ere etia ni etia lochan. Ngulu etenooko, etikokinete ngakiro naaronok nyiileereut. Ani kepegakin itwaan nikooson ka itwaan nibaang, ekieni nibaang, kiruor irema ka akiyenya. Ngitunga lukaarak, eremokino itwaan ni nyesechit. Nakaneni iyokiyete lu etenooko akiyar a itwaan kangini. Isunyuni ekabangabangat angoit keng etikokini itwaan nikooson angoit keng. Ani kepup ekapolon ngakiro na alioko, eliworosi luuchik keng daang ngikaliokok. Ibore en isikwaanit ekebootonit ka itwaan ni ichiekiarit ngesi, Ekapolon Akuj einakinit kesi daang ngakonyen. Ani kesubea ekapolon ngikebootok ngakiro na eriyan, erubi apolou keng. Akulit ka akikilakin kesi erikito aosou. Ani kimiekin ikoku tosub nacha esaki, isurumi itiokeng ngileech. Na eliworotor ngitunga luaronok ngikapolok, kiatakin asechanu. Idarito lu etenooko akingolikin ngitunga ngulu edakarosi. Kitatam lokookon eboyor loajokon, kisiangari ngesi iyong. Ee robo, italakari ngesi etau kon. Akwap na nyekerit Akuj, nyirichakinit etal. Epiaritae itwaan ni irichakinit etal a Akuj. Nyitatamete ekasuban etich ngakiro a akituk make. Epedori kiira nakaneni nyeemisik. Ikwa ejok tani akigienokin itwaan nibaang akidwang itwaan ni ekoponokin ekiruor. Ani kiinak iyong ekasuban etich kon ibore ni esaki cha daang napei alokiditeu, elemari akolongit apei ibore ni itingit iyong daang. Eyauni itwaan ni enyunyura eburas. Eyauni nikangoan ngichan. Ebukor itwaan nikewogan. Ngini itiditeuna, eanyuni arimatoi. Erukitos a ekokolan ngesi erai emoit keng. Irirao ngesi kelimo iteni alokies. Nabo irirae Akuj ngesi erai pekelimo nguna iteni. Erono akiker itwaan niche, ngini igieno Ekapolon Akuj, eyuun. Esaki itwaan daang katominak ekapolon, nakaneni Ekapolon Akuj bon esubi ngakiro na eriyan. Ngitunga lu etenooko, eremokino ngitunga luaronok, nabo eremokino luaronok dang lu etenooko. Ngakiro a Agur nugu alo arai lokookeng a Yake. “Nyikirukit ayong ka Akuj, nyikirukit ayong ka Akuj. Abangaana ayong loger a etiengit, nyikikwaan ka itwaan. Emam ayong achwaanu na ngitunga. Nyitatama ayong aosou. Nyayeni ayong Akuj tani wadiochichi. Ngae anangit nadis toyen ngakiro na eyakasi inaa? Ngae erum ekuwam toting? Ngae abunaki ngakipi nawaru? Ngae egerokini ngikukuorin a akwap? Ngae ekiro a itwaan kangini? Ngae lokookeng? “Iyoonokini Akuj ngakichikakinet keng daang. Erai ngesi aupwal a ngitunga alu emechete ngesi. Ani kitingak iyong Akuj ngakiro na nyelimuno ngesi, kikilakini ngesi iyong kitiliwo ekaliokon.” Akuj, kelipit ngakiro ngaarei, nyikimik eringa nyetoana. Tolema alioko anakituk kang. Nyikiinak ebari kori eboot. Kitanae a akimuj ana ketemokino. Ani kemwono noi, kangeri iyong atama, “Ngae erai Ekapolon Akuj?” Kori ani keboot noi, akokoi, esurum Akuj kang ngileech. Wara nyiitoron ekasuban etich ani a ekapolon keng, kichieni ngesi iyong, toliwor iyong isechit. Eyakasi ngitunga lu ichienete ta apakech, nabo nyelakara kotere ta itiokech. Eyakasi lu itamito atamar kikiuna kesi, kileleba asechanu nikech. Eyakasi lu inisasi, lu imenyarito ngitunga luche! Eyakasi lu eboliatar ngikebootok ka lu emam ibore etingito. Eyarakinito nakiro nguna. Eyakasi ekurut tanakookeng ngaarei, elimokinitae daang ekiro be, “Nakinae ayong.” Eyakasi ngiborei nguomwon lu nyimwokeenete, ni eyakasi ngikatoak, aberu na ekolupana, ngalup nakoonok na iitanito akiru, ta akim na erirae na emam kona itudungeo. Itwaan ni ekienar apakeng kori imenyarit itiokeng anamojongu ejoikinit enyamete ngataruk kori toutosi ngikuruka ngakonyen anakou. Eyakasi ngakiro ngoomwon naparing nakakuruwosi ayong akiyen, egole lo eporit alokidiama, emun lo eliat anataaba, atubwa na ilebolebo ananam ta eger lo echamunotor ekile ka apese. Ngakiro na esubi aberu nakaloman nugu. Imuji, kisuta akituk, tapalua tama, “Emam naaronok asub ayong!” Eyakasi ngakiro ngoomwon na nyitiri akwap, ekedalan lo eliwor ekapolon, ekabangabangat lo etingit akimuj nakaalan, aberu nangereny na iusio ta akedalan na ilunyokin nados a aberu analope a awi. Eyakasi ngiborei nguomwon luuchik, taraakas lukoosok noi, ekatapan, emam ngikilinga, tarai ikachete akimuj na enyamete nakamu. Ngadukae, emam ngikilinga, tarai ebokete ngatabab tarata ngakais kech. Emaase, emam kesi ekapolon, tarai erekina eloose. Taatangarewa, itingi iyong apei a akan, tarai eyakasi nakais a ngikapolok. Eyakasi ngiborei nguomwon lu kiminarete eloose, Engatuny, eyakasi ngikilinga alotieng kadaang, ereit ngitieng luche daang, ka ekoroe, ka ekokoroit lo etubonor ta ekapolon elosi alongaren ngitunga keng. Ani ngoon kibangaana iyong, kirai ekewogan lo ireat ngakiro naaronok, tapalik. Ani kibuka iyong ngakile, ianyuni akimiet. Ani kiram iyong itwaan lokumes, eiyete ngikumes. Ani kibenyaner iyong, ilomari lochan. Arai Lemuel ekapolon a Masa. Ngakiro nugu kesi etatami itiokeng ngesi. “Irai iyong lokookang lominat. Iyong irai atachunet a akilip kang. Anukiro kalimokini? Wara nyiisunyak ngikilinga kon naberu, nyiisunyak ngaropiyae kon daang naberu. Ngaberu enyasut ngikapolok. Topupok Lemuel. Nyejoikinit ngikapolok emaase emuna, nyejoikinit imuit epurot. Ani kemat imuriakinete ngitalio, kimuriakis ngakiro na echamit esubere, ngitunga lu eyakasi lochan. Erai epurot eka ngitunga alu ekot akitu, erai emuna eka ngulu enomito ngakiro. Kimiek tamata kimuriak eboot, nyiitamut nabo jik ngichan kech. Kiruor toweik ngulu nyepedorete ekiruor ngakiro kech. Kiruor iikinit nguna echamit esubere daang lu eyakasi lochan. Toweik ngakiro kech, toliwor ekatubon ngakiro lo etenoono. Kiruor iikinit ngikebootok ka lu ichanasi”. Nyepatana aanyun aberu naajokon! Ejok ngesi noi akidwang asir a ngasua! Emuno lokile keng ngesi, nyiboosi ekile ngolo jik. Ngirwa daang, eringa cha aberu ngina eyari, esubea lokile keng ngesi naajokak, emam naaronok esubea. Esakuni ngesi ngajul a ngamesekin ka ngawarui nakaanikak todony a ngakan keng. Eyaununi akimuj keng anikalonan loger a angatubwae anaapolok a ngimuchurus. Enyouni eringa akwap eribit, kidorok akimuj a awi keng, tolimonok ngikedalak keng etich lo esubakinete. Ingolikini ngesi amana sodi togiel. Elemuni ngaropiyae a ngakiinyir keng sodi kitaa amana a ngimusabib. Itirit ngesi etich nabo imukeana. Eyeni ibore ni eriamuni alotich keng, enoki ataa keng nakwaare. Eoyi ngaunoi keng a ilope, edonyi ngiworui keng a ilope. Nyekudit akan keng alokebootok, ingarakinit ngulu iitanito ibore. Nyiteriangakini ngesi akatorot, kainyo enapito ngitunga a awi keng daang ngiworui lu iratakinete akatorot. Edonyi ngawarui na epetakinio, enapit ngiworui lupusiek-arengak, lukaanikak. Eyenikinitae lokile keng alokitoe a ngikiliok, na iboikinor kiding ngikasukou a adakar. Edonyi ngiworui lukaanikak ajokak, sodi togielana. Egielanari ngarubae lomuchurus. Eyakasi ngesi ngikilinga, nabo ekeritae, nyialolongi ngakiro naka moi. Ngakiro na aosou kesi itorunete nakituk keng, ngakitatamet na apatanu kesi itorunete nangajep keng. Ikunyikunya ngesi jiik, taanyuneta ngitunga a awi keng akimuj. Elakara ngide keng kotere ngesi, ipuruunit lokile keng ngesi, ebala, “Esubete ngaberu nakaalak ngakiro naajokak nakaneni idwangit iyong kesi daang.” Ingalana akorianut, erai akibuseanu pas, nakaneni aberu na ekerit Ekapolon Akuj, ejoikinit ipuroi. Nak ngesi ibore ni itemokino kotere etich lo esubi. Echamit ngitunga daang erimasi ngesi. Eraakasi ngakiro nugu ngaka eketataman alo arai lokookeng a Daudi, alo kolong arai ekapolon alo Yerusalem. Erai pas, erai pas, ebala eketataman! Erai ibore daang pas! Nyoni eriamuni itwaan alotich kadaang, alo ichidaritor ngakiinyir kane anakwap? Edaun alesit apei, bu nache, tarai erubi akwap jik. Ipiripiruuni akolong sodi todooyo, kikirikiraar tobongo ni ipiripiruunea. Ekutari ekuwam kuju, kirimo toten kwap, tokuta irimi, tobongok nabo ekirime lopei ngolo. Eremete ngangololin daang anam, nakaneni nyilelebun anam jik. Ni eremete ngangololin, ngesi nabo isiakineta alelear. Eraakasi ngakiro daang ngaketuburunak, aburun naationon na nyisisao. Nyeupi akongu akitere, kori nyeupi akit akipup. Nguna kolong ayakasi, kesi epete. Nguna kolong asubakin kesi esubakinio. Emam ibore nikitetet eyei nakwap. Etamanarete ngitunga, “Kingolikisi, ikitetet ibore en.” Kaai? Ayei kolong sek a angorot. Emam itwaan itamuni na kolong asubakinosi kanuan. Kori emam monan itwaan itamuni na esubakinosi, napei tokona jik tanang monan. Ayong eketataman, arai kolong ekapolon a Isirael alo Yerusalem. Atolemun ayong angichun ka akiyen ngakiro daang na esubasi anakwap kana. Ekoe, etioko ngichan einakinit Akuj ngitunga! Engolik ayong ngakiro daang na esubio anakwap. Kalimokinit atamar eraakasi daang pas. Ikwaan ka akirisit ekuwam. Nyipedori akitorwaar ibore ni ekudokina, kori nyimarun ibore ni nyetakani. Etama ayong alotau atama, “Aanyu ayong aosou nakaalan noi akidwang ngikapolok daang lukengarenete ayong alo Yerusalem. Ayen ayong aosou ka achwaanu lokojokon.” Abu atolemun akiyen ibore ni etiakit aosou ka abaangu, ka ibore ni etiakit achwaanu ka ngikerep. Atogipa atamar abe edikino eliwor ekuwam erisit. Kainyo naiatakinor aosou kon, kiatakin tani ngichan kon. Naiatakinor achwaanu kon, kiatakin tani apipilu. Etama ayong alotau atama, “Kimiekinae eir ajako atalakar.” Nakaneni abu ataanyu atamar eraakasi nguna dang pas. Atama akiena, “Erai ngikerep.” Ani alakara, “Nyo kitaanyuni alakara?” Abu etama lokojokon. Ani a ekimue alo asakea aanyun aosou, abu etama ngakiro nugu, atotiaku atamar atamat emuna atomerakin. Atotiaku nabo atamar ewapi abangaanut ataanyunea kerai na ejoikinit itwaan esubi nguna, alorwa aludikidio eyakar nakwap kalu. Abu atosub naapolok. Atoduk ngakais kang ka akitare ngamanat a ngimusabib. Abu etak ngamanat a ageor ka ngamanat nache, sodi etak ageor daang nagelagela. Atochilu ngabwelin na abukio ngakipi namanat. Atogiel ngikedalak lukaalak luberu ka lukiliok, toyakasi lu edoikinio nawi kang. Abarit ngibaren lukaalak, ngisipaan a ngaatuk ka ngamesekin nakaalak, akidwang itwaan iche daang ni alom Yerusalem nakanuan. Atotukok ngaropiyae ka egolit lo ayauniyo anapolosio a ngakwapea ana apolokinit ayong. Kaeonokinete ayong ngikiliok ka ngaberu ketalakasi. Arikit ngaberu daang nacha kemuit ayong akirik. Kanguna, abu atoliwor lokayenikinitae akidwang daang lukengarenete ayong alo Yerusalem. Atorubak arai lokooson. Ibore nicha aminari ngakonyen kang, abu nyaalakak. Emam alakara abu ayong emik akwaan kang. Ewogar ayong ibore cha daang ni asubi ayong kainyo ngesi etachakin nakiinyir kang. Ani erumor etama daang na asubak ayong ka eger lo echidaritor ngakiinyir. Atoyen atamar eraakasi daang pas. Ikwaan ka akirisit ekuwam, emam ibore ianyuni anakwap. Sodi esiak akitam eger a aosou, ka ngikerep ta abaangu. Nyo epedori ekapolon lo isidiun akisub? Erai ngakiro napei kolong asubete lu engarenete. Ekoe, ayen atamar ejok aosou akidwang abaangu, loger lo ejokia akicha akidwang aribu. Eyakasi itwaan nikooson ngakonyen na iteo ni elosi, nakaneni nyikoni ekabangabangat neni. Atoyen ayong atamar ngakiro ngapei idarito kesi daang. Etama alotau atama, “Ngichan lupei eanyunito ngikabangabangae kesi aanyuni ayong dang. Ani toliwor nyo aanyu ayong anaosou kang?” Atatachu atama, “Emam. Eraakasi nugu dang pas.” Kainyo emam itwaan itamuni itwaan nikooson nabo emam itwaan itamuni itwaan nibaang. Alorwa alu isidiuno, imuriarosi ngakiro aluarei kangulu. Kitoaki ngoni daang, kirai ekooson kori ekabangabangat. Aloger kangolo, aremokin ayong eboyor. Kainyo daang na esubasi anakwap, ngichan make kainunito. Eraakasi daang pas. Ikwaan ka akirisit ekuwam. Atoremokin ayong etich kang daang lo kolong asubi ayong kanege anakwap, kainyo aisikinea moi ayong itwaan niche ni ilunyokin nados kang. Ngae eyeni keliwor itwaan ngini ekooson kori ekabangabangat? Kaneni dang, irumi ngesi ibore ngini daang. Ibore ni kolong echidaritor ayong ngakiinyir atosubea etich a aosou anakwap kana. Eraakasi daang pas. Ani etamari nakolong echidaritor ngakiinyir kanege anakwap, abu atajal daang. Kainyo esubeene itwaan etich a aosou keng, ka achwaanu ta ekunonoonu, ani erumor toliwor itwaan niche ni nyichidara ngakiinyir ngesi irumi ibore niajokon a etich kangolo talakaror. Erai pas, erono akiroit ngina noi! Nyoni eriamuni itwaan alotich keng kadaang ka ngakiinyir na ichidarit anakwap? Erai eboyor keng daang eka ngichan. Erai akisub etich dang akichana. Tani nakwaare nyianganarete ngitamen keng! Eraakasi nguna dang pas. Ibore niajokon noi anitwaan ngesi akimuj, tamat, sodi talakar alotich keng. Ayen atamar eponito nguna dang ani a Akuj. Kainyo, ai nabo wache pearai nia Akuj ianyunea iyong ibore ni inyami, talakaror? Einanakini Akuj itwaan ni emina ngesi aosou, ka achwaanu ta alakara. Nakaneni itusubi ngesi ngikalemak etich lo a akilem ka akichun, ani ibore ni eanyunete kesi, nakinae ngulu eminasi Akuj. Eraakasi nguna dang pas. Ikwaan ka akirisit ekuwam. Ereat Akuj ngakiro daang tosubas alosaa alo etiakunit ngesi. Ereat esaa lo kidounere ka lo itoanea, esaa lo itaare ka lo elemere. Ereat esaa lo earere ka lo itangalekinere, esaa lo eyatarere ka lo edukere. Ereat esaa lo iuteere ka lo ekianare, esaa lo ialolongere ka lo idongaare. Ereat esaa lo imasanarere ngamoru ka lo echunere, esaa lo enuare ka lo nyenuare. Ereat esaa lo esakere ka lo echakarere, esaa lo ikachakinitere ka lo imasarere. Ereat esaa lo echilere ka lo edonyere, esaa lo ililingere ka lo iruorore. Ereat esaa lo eminare ka lo eremitere, esaa lo a ejie ka lo ekisil. Nyoni eanyuni itwaan alotich keng kadaang? Ayeni etich loationon lo ainaki Akuj ngitunga. Atiakaki ngesi ibore daang esaa keng lo itemokino. Ainaki ngesi ngitunga ekimue lo eyeneta na isidiuno, nakaneni emik ngesi kesi akiyen lokojokon ngakiro na esubi ngesi. Ayen ayong atamar na ejoikina anitwaan ngesi alakar ka akiboi aniajokon eringa eyari. Ejoikinit ngoni daang kimuji, atamata atalakaros kotere etich daang lokisubi. Erai ibore ngini daang ainakinet a Akuj. Ayeni atamar erubi ibore daang ni esubi Akuj. Emam ibore epedori itwaan akiatakin kori alemar. Asubaki Akuj kongina sodi atokereta ngoni ngesi. Ibore ni esubakin tokona, ngesi ni kolong asubakin. Ibore ni moi esubakin ngesi ni kolong asubakin. Ebongonokini Akuj asubanakin ibore nipei ngini jiik. Ani eyakasi daang, engolik anakwap kana atamar ni esakitere ngakiro na iteni ka na eriyan esubatar, neni ngesi esubatar naaronok. Etama ayong alotau atama, “Ani bo ikoni dang, irirae Akuj luajokak ka luaronok aapei kainyo esuba ibore daang a esaa keng alo etiakunitae.” Atoyen ayong atamar kiroanari ngoni Akuj kidodikinea atamar kikwaan ngoni ka ngitieng. Kainyo erai esal a itwaan ka lo a etiengit epei. Etoane lo etoani itwaan ngesi etoani etiengit dang. Erai akianga kech apei. Emam ibore idwangitor itwaan ngitieng. Eraakasi daang pas. Eloose kesi daang wapei. Eponito daang anapua sodi tobongosi napua. Ngae eyeni keloseene etau a itwaan kidiama, sodi tolot lo a etiengit tooma nalup? Atoyen ayong atamar emam ibore iche ajokon ejoikinit itwaan esubi pearai alakar kotere ibore ni eriamunit alotich keng. Emam ibore iche kipedori ngoni akisub. Emam erot eyenea itwaan ngakiro na esubakinosi na etoanea. Ani erumor engolik aronis daang na esubio kane anakwap. Igorosi lu ichiekiaritae nakaneni emam itwaan isililingi kesi. Emam itwaan ingarakini kesi kainyo ibakito lu eyakasi napolou ka ngikechiakiarak. Kating ayong etereku kotere lu atoaka, kainyo eyei lukatoak apiaro akidwang lu eyarete. Nakaneni lu epiaritae noi kesi lu eringa nyidouno akidwang ngikatoak ka lu eyarete, kainyo eringa kesi nyeanyungara naaronok daang esubasi kane anakwap. Ayen tani atamar nyo irichatar ngitunga alotichisio kech. Erai kotere ni etingitor itwaan etereku kotere ekidunyet keng. Nakaneni erai nguna pas. Ikwaan ka akirisit ekuwam. Ebeyo, ebangaana itwaan ni erwaarit nyesubi etich, kotere ngakiro nguna, eriyori erogo. Kaneni dang, ejoikinit itingit ibore nidiochichi tamam ngakiro kichanito akidwang akakaunit ngiboro a ngakan kadaang isaki akirumun ekuwam. Agipa nabo akiroit ache na erai pas anakwap. Itwaan ni erai ipei bon, emam lokookeng kori lokaatokeng, kiricha jiik alotich. Nyeupi ngesi jik ebari, sodi nyiingis tama, “Ngae mono erichar ayong asubea etich, emikitor akwaan kang alakara?” Eraakasi nabo nguna dang pas. Erai eboyor loaronon. Ejok aliwor ngiarei akidwang aliwor itwaan ipei, kainyo eriamunete luarei ebachit a ngakiinyir kech. Kainyo na edakaror ipei, kitonyou niche. Wae, ekoe, ikokini ni erai ipei na edakaror ai? Na edakaror, emam niche ni itonyouni. Kongina pei, na inapakinotor ngitunga ngiarei wapei, emokunete. Ani bo itwaan ipei, ikokini itomonun ai? Epedori emoit akidwang itwaan ipei. Nakaneni ani eraakasi ngitunga ngiarei, itemunete kesi emoit, kidwanga. Auno na idanyitae a ngirotin a nguuni, nyebeben angeda. Ejok esorokit lokooson tani kiboosit akidwang ekapolon lomojong tabangaana, nyeepupi ngakiro na isuruorio, tani bo kolong kerai lojela alomunea toliwor ekapolon, kori tani kolong kidounitoe iboosit toliwor ekapolon. Engolik ayong ngitunga daang lu eyakasi nakwap atamar kiding kech eyei esorokit lo ilunyokin nados a ekapolon. Emam esal eyei lokimar a ngitunga alu epolokinit ekapolon. Epolokinit ngesi daang. Tani ikoni neni, ngulu idounio ekisidi, nyelakarosi kotere etich keng. Eraakasi nguna dang pas. Ikwaan ka akirisit ekuwam. Tochoikin na ilosio kai a Akuj. Ejok alosit kai a Akuj topupok ngakitatamet akidwang alosit akipeyore loger a ngikabangabangae, alu nyeyenete naajokak ka naaronok. Nyiingamanakin ekiruor. Wara nyiikoponokin alimokin Akuj ngakichikakinet, kainyo eyei Akuj nadis toyei iyong nakwap. Kotere nguna nyiitalala ngakiro na iruoro iyong. Naichanakinor iyong, ipedori akirujare ngakiro naaronok. Ani kiruor iyong ngakiro nakaalak, ipedori tolim ngache na abangaanut. Ani kikongok iyong Akuj atamar isubakini ibore, nyiitinenik asubakin. Kainyo nyelakara Akuj kotere ngikabangabangae. Tosubak ngakiro nguna ikongok iyong Akuj atamar isubakini. Ejok akililing nyiikong atamar isubakini ibore, akidwang alimun, ani erumor nyiisubak. Wara akituk kon nyikilomak nakisech. Wara nyiilimok emeanara a Akuj atamar peiyechakini akisech. Kotere nyo itongoikinor iyong Akuj sodi kinyasu ngesi etich kon? Nyekachitae tani kiruja iyong ngakiro nakaalak, kori tosub etich lo erai pas ka akitalalare ngakiro alokiruor kon. Akiroit nateno ngesi akerit Akuj. Ani kingolik iyong arieng ichiekiarit lu iboosit nyeesubea na eriyan, nabo nyeinak nguna ejoikinit eanyunete, wara nyiiumwok. Ekapolon daang, eyei nabo lo epolokinit ngesi, toyakasi nabo lu epolokinito kesi daang. Tani ikoni neni dang, eraakasi ngalemet a akwap ngaka daang. Igieno ekapolon dang ngalemet. Ani kimina iyong ngaropiyae, nyikiupete. Ani kiburakinit iyong ebarit, nyianyuni nguna isaki daang. Eraakasi daang pas. Na ibarea iyong noi, talalaketa ngakookies itani. Ibore ni eupi ilope ngesi akitere toyen atamar arai ekabaran. Ebobok ngaju a ekasuban etich, kerai akimuj nadiochichi enyamit kori nakaalan. Nakaneni nyejotoor ekabaran ani ialolongio kotere alalau a ebari keng. Eyakasi nabo nakaronok noi na engolik ayong kanege anakwap. Ikachakini itwaan ngaropiyae esaki kingarakinor ngirwa ngiche lu iitanea, tobukor ngaropiyae nguna a erot a eche aronon, tongopik ngesi ibore eisikinea ngide keng. Erotokini itwaan anakwap emuner loger lokolong edounere. Emam ibore tani edit ni elemari ngesi alotich kadaang alo ichidaritor ngakiinyir. Eraakasi nguna daang naaronok noi. Ebongi ngesi loger lo kolong abunio. Echida ngesi ngakiinyir pas, kotere akirisit ekuwam. Erikak ngesi ngirwa a eboyor keng daang naribu ka esinyoi, ka ngichan, ka ngidekesinei ta angoit. Nugu kesi abu atoyen, atamar ibore niajokon ni epedori itwaan akisub ngesi akimuj, tamat ka alakar kotere ibore ni ariamu alotich keng anakwap, alorwa aludikidio iteyaritor Akuj. Kainyo nguna kesi etiakakinitae itwaan. Ani keinaki Akuj itwaan ebari ka ngiboro, ani erumor kimiek ngesi elakaror, ejoikinit itwaan ngini ebuakini Akuj alakara, toyarea ibore ni ariamuni a ngakiinyir keng elakara. Erai ibore ngini ainakinet a Akuj. Kona achamakinea Akuj ngesi elakar, nyejoikinit ngesi eriaba kotere ni ekidiokioto ngirwa lu eyarea. Agipa ayong akiroit nakaronon anakwap, na ichanit ngitunga. Einakini Akuj itwaan iche ebari, ka arimatoi, ka ngiboro ta ibore cha daang ni iitanit ngesi. Nakaneni nyimiekini ngesi toyarea ebari ngolo. Togelakin moi itwaan eyarea. Eraakasi nguna pas. Nyitemokino nguna jik. Epedori itwaan iche aurere ngide amiat apei, nabo toyar ngesi nikooyen. Nakaneni ani pekelakar ngesi aloboyor keng, nabo nyeenuk kotere arimatoi, alimunit ayong atamar ejok ikoku ni idounio etoanit akidwang itwaan ngini. Emam ibore ajokon eriamuni ikoku ni idounio etoanit, kainyo ikalomaran naribu tongopik neni. Nabo dang, nyingolikina ikoku ngini akicha a akolong kori nyeyeni atamar ikoni eboyor ai. Nakaneni ariamu akiangar akidwang itwaan ni nyelakara aloboyor keng, tani bo keyarit ngikaru ngabunge ngaarei. Ani bo ikoni dang, eloose kesi daang wapei. Erai etich daang lo ichidaritor itwaan ngakiinyir ekisimwonet akook, nakaneni nyesaluni ekimue a akimuj jik. Nyo ibore ajokon idwangitor ekooson ekabangabangat? Nyo ibore ajokon eriamuni ekebootonit erai keyen eger a eboyor. Eraakasi pas. Ikwaan ka akirisit ekuwam. Ejok kiupi ibore ni itingit akidwang akisak iche. Ngakiro daang na esubasi, atiakunio kolong a angorot atamar esubakinosi. Nabo kiyeni ngoni daang atamar nyepedori itwaan apega ka itwaan ni idwangit ngesi a ngikilinga. Eger lo irichar iyong apega, erai pas. Nyo ikajokon ianyuni iyong? Kainyo ngae eyeni ibore ni ejok kotere itwaan, alorwa aludikidio a eboyor keng, alo erai pas, alo elosi loger a etorube? Ikokini itwaan eyeni ibore ni esubakin kane anakwap ketoana kerumor ai? Ejok ekipur ajokon, akidwang akimiet nakaakunyon nakaalan a ngaropiyae. Ejok akolongit na etoanea itwaan, akidwang akolongit na idounere. Ejok alosit ni igorore ekatoan, akidwang alosit ni imujere a alakara, kainyo ejoikinit lu eyarete, itamunito atamar kidarit ngoni daang akitu. Ejok akialolong akidwang akiena, kainyo ereet lo ebilakina, italakari etau. Itwaan ni itami jiik ngakiro a alakara, erai ekabangabangat. Itami ekooson ngakiro a akitu. Ejok akiirar akikilakino a ngitunga alukoosok, akidwang akipup ekipur a ngikabangabangae. Ikwaan akiena a ekabangabangat ka erue a ngiikwa na enomiarea akim. Eraakasi nguna dang pas. Naichiakiarea itwaan nikooson luche, ekwaanikin ngesi ka ekabangabangat. Ani kidiau iyong ibore ni kidiekitere, inyasu iyong ngitamen kon. Ejok esal a ibore, akidwang akisiakinet keng. Ejok etau lo enaikinit akidwang lo iwoga. Wara nyikirerengik angoit, kainyo erai ngiman a angoit abangaanut. Wara nyiingis tama, “Nyo bo etojokit ngirwa lu kolong ngorok akidwang ngirwa lugu?” Nyerai akingita kongina aosou. Ejok aosou ikwaan ka ibore nikiruma, ejoikinit itwaan ni eyari daang eos. Epedori aosou akiyok iyong loger lokiyokiyeto ngaropiyae. Ibooyi itwaan nikooson isilit, ajokis a aosou ngina. Kitama etich a Akuj. Ngae epedori akitorwaar ibore ni akudoki Akuj? Talakar alorwa alu ajako. Ani ngirwa lua ngichan, kitamu ngakiro nugu, atamar Akuj eyaunit ajako ka ngichan. Nyepedori itwaan akiyen ibore ni esubakin ekisidi kanguna. Aloboyor kang alo erai pas, engolik ngakiro daang. Epedori itwaan niajokon atoanere tani kejok, sodi toyar itwaan niaronon nikooyen tani kerono. Wara robo nyiijoker noi kori nyiioser noi. Nyo edikino iarar bon? Nabo dang, wara nyiironer noi, kori nyiibangaaner. Nyo edikino itoanea eringa ngirwa kon? Min nakidingos a ngakiro anaarei, ajokis ka aronis. Itwaan ni ekerit Akuj, ejokearosi ngakiro keng daang. Epedori aosou asubea itwaan ngakiro nakaalak akidwang ngakiro na epedorete ngikapolok ngitomon asubea ere. Iteni emam itwaan ajokon anakwap ni esubi naajokak jiik, toliwor emam ibore ichwangakini. Nyipupeene ngakiro daang na iruorosi ngitunga, ani kemam, iirari ekedalan kon kiyenyi, toyeni bo iyong ilope atamar iyeny iyong ngitunga luche ngakiyenyet nakaalak. Aroi kolong ayong ngakiro nguna a aosou kang. Sodi atama, “Asaki atoliwor itwaan nikooson.” Nakaneni elona aosou noi anikang. Ikokini itwaan eyeni eger a eboyor ai? Etiono akiroit ngina noi aniyok, nyebeben akiyen. Abu ayong atolemun akiyen, ka akingich ta akisak aosou ka eger a ngakiro ana tokona esubasi, ta akiyen aronis ka abangaanut a ekiwaanu. Abu ataanyu ibore ipei nikaapilan noi akidwang akitu, ngesi aberu. Isurumi amina keng itwaan loger a eloit kori epuute. Kirwakin a ngakan keng loger a ngiriko. Ebuchar ekile lo ekerit Akuj anaberu kangina, nakaneni isurumi ngesi ekasechan. Nugu kesi alimunit ayong eketataman atamar ayen a ngapei-pei, na esiakinea akingich eger a ngakiro. Asak eger a ngakiro a ngache, nakaneni emam na ariamu. Alokiding ngikiliok abunget apei, abu engolik ekile epei lo itemokino erimae. Nakaneni alokiding ngaberu na atia nguna, emam tani apei na abu engolik, na itemokino erimae. Daang na ayen ayong kesi nugu, atamar asubuni kolong Akuj ngitunga etenooko, nakaneni kesi ngikulepek etiliwosi eboyor kech loparing. Ngae ikwaan ka itwaan nikooson? Ngae eyeni eger a ngakiro? Itamaisani aosou itwaan, sodi kiloch ereet keng lo esinyit. Kirichak ngakiro na edunguni ekapolon, kotere ikongi kolong iyong alongaren Akuj. Torotok alongaren keng. Nyiitinenik na erokearotor ngakiro, kainyo epedori ekapolon akisub ibore daang nicha esaki. Ekapolon ngesi edunguni ngakiro na esal. Ngae eweikini ngesi kingit tama, “Nyo isubi iyong?” Ani cha iwapit iyong ngakiro keng, ijok. Eyeni itwaan nikooson atamar eyei esaa ka erot lo esubere ibore. Kainyo eyei ibore daang esaa ka erot lo esubere, nakaneni nitwaan ngesi edakakina ngichan! Nyeyeni ngesi nguna esubakinosi ekisidi. Ngae epedori alimokin ngesi nguna esubakinosi? Emam itwaan epedori akiratakin etau keng nyeedaun kori akiratakin akolongit na akitu keng. Akolongit na ejie, emam itwaan epuun alojie, kori nyeyuuni aronis ngulu esubete naaronok. Abu engolik nugu daang na etamarea ngakiro na esubio anakwap kana, ana eyakar ngitunga ngiche apolou, toliwor eboliatar luche. Iteni, engolik ngitunga luaronok lu kolong alomanarete ka apudun alokai a Akuj, enukio. Kipuro ngitunga kesi alore alopei kolong asubeta naaronok. Eraakasi nguna dang pas. Ani aloger nyiriraare naaronok atipei, etanyito ngitunga akisub ngakiro naaronok. Epedori ekasechan akisub ngasechesea amiat apei, toringa cha eyari. Ebeyo, “Ani kiker iyong Akuj, ejokearosi ngakiro kon. Nakaneni nyejokearosi ngakiro aluaronok. Ikoni eboyor kech etorube. Etoakete kesi eringa esorokaka, kainyo nyiwapito kesi ngakiro a Akuj.” Nakaneni eraakasi nguna pas. Kingolik ngakiro na esubasi anakwap kana. Esaa eche, esubeenere ngitunga lu etenooko ngakiro na itemem ka ngitichisio a ngitunga aluaronok, sodi tosubere ngitunga luaronok ngakiro na itemem ka ngitichisio a ngitunga aluajokak. Alimu ayong atamar eraakasi nguna dang pas. Kotere nguna, anupit ayong atamar ejoikinit itwaan elomari nalakara, kainyo emam ibore iche ajokon noi kane anakwap akidwang itwaan kimuj, ka tamat ta alakar. Nguna kesi epedori itwaan akisub ichidaritor ngakiinyir aloboyor kalo alo einakinit Akuj ngesi anakwap. Erai nacha asakea ayong aanyun aosou engolik ngakiro na esubasi kane anakwap, abu atoyen atamar ipedori akiboikin apaaran ka akwaar nyebunakina ngakonyen, nakaneni nyiiyen jik ngakiro na esubi Akuj. Tani kirichakin iyong lokojokon kwaai, nyipedori jik akiyen. Epedorete lukoosok atamar abe kiyeni kesi. Kaai? Nyeyenete. Abu etama ngakiro nugu daang lokojokon, sodi engolik atamar Akuj ngesi erikit ngitunga lukoosok ka lu etenooko, tani amina kech ka arem. Emam itwaan eyeni na esubakinosi ekisidi. Ikwaan daang. Esal epei idarit lu etenooko ka lukasechak, luajokak ka luaronok, lu italeuno ka lu nyitaleuno, ngulu ipeyoenete ka lu nyipeyoenete. Emam ibore idwangitor itwaan niajokon ekasechan. Emam ibore idwangitor itwaan ni ikongit niche ni nyikongit. Erai esal kech kadaang epei. Eroko nguna noi ani eyakasi daang esubasi kane anakwap. Ngirwa daang lu eyareta ngitunga, ileleba aronis ka ngikerep nikech, sodi totoaka atipei. Nakaneni eyei ibore igieno itwaan cha daang ni eyari anakwap ana eyakasi ngitunga lu eyarete. Kainyo ejok iingok ni eyari akidwang engatuny lo etoanit. Eyenete lu eyarete atamar kitoaki, nakaneni emam ibore eyenete lu atoaka. Emam kesi nabo ainakinet ache kainyo emuriakis kolong kesi ngitunga. Amina kech, ka arem kech ta ekimue kech, erukosi daang ka kesi atoaka. Emam kesi nabo jik ekimar eyei anakiro kadaang ana esubasi kane anakwap. Kasio karika kimuj, akimuj kon a alakara. Tamat emuna kon talakar, kainyo ajoikis Akuj ngakiro na isubi iyong. Talakar jiik, toliwor itwaan ni elakuna ereet. Talakaros aapei ka aberu kon na imina iyong. Talakaros alorwa alupasiek kalu eringa Akuj kikachakinit nakwap. Talakar anakolongit kadaang ana erai pas, kainyo ibore iriamuni iyong alochan kon daang ngini. Ibore cha daang ni isaki iyong asubakin, tosub a ngikilinga kon kadaang. Kainyo emam etich, kori ngitamen, kori achwaanu ta aosou eyei lokatoak ni erai ngesi ilosi iyong. Engolik nabo ibore iche, atamar kane anakwap, nyidwangeenete lukapiranak anakerit, nabo nyidwangeenete lukajwok alojie. Nyeriamuunete lukoosok akimuj nabo nyebareenete lukachwaak. Nyeinanakinio lukunonoi apolou alotich. Ichanyununosi ngitunga daang ka ekeny aronon. Emam itwaan eyeni atamar enangi esaa keng ori. Eger lo isurumere ngikieny a eloit, ka eger lo irumere ngikolea a epuute, eger ngolo ngesi kirumuneta ngoni naaronok pekiyeni atamar eponito. Eyei nabo akiroit ache na engolik ayong, na idodiunit eger lo emunotor ngitunga aosou kane anakwap. Ayei kolong ere lo adit lo akidioko ngitunga lu alomito. Abu ekapolon lotikajwon kitijik ere ngolo. Abu kisiriam ngasigerea keng, tasak akibwang ngawasea. Ayei itwaan neni ni arai ekebootonit, nakaneni aos ngesi noi adikino eyuuni ngitunga a ere kangolo. Nakaneni amam itwaan amisit ngesi. Alimu ayong atamar ejok aosou idwangit ngikilinga. Tarai emam itwaan itamit ngakiro a ekebootonit alokooson, nabo nyiirario ngakiro keng. Ejok akiirar ngakiro a itwaan anikooson na elimuni iapakinit ekiruor akidwang akipup akirema a ekapolon alokiding ngikabangabangae. Ejok aosou akidwang ngiboro lujiet, nakaneni epedori ekasechan epei akinyasun naajokak nakaalak. Itobosunete ngichuch lu etoakito akimiet nakaakunyon, ikisari abaangu nadiochichi aosou ka ekipur. Itwaan nikooson, erii cha jik anakiro ana etenooko, nakaneni itwaan nibaang, erii cha jik anakiro ana nyetenooko. Eyenio ekabangabangat tani alorot, kainyo elimorit ilope atamar abangaana. Ani kengo ekapolon kitongoik iyong, wara nyiisik etich, kainyo erimakinio ngasechesea naaronok erai kililing iyong. Eyei akiroit naaronon na engolik ayong anakwap, na erai ngikapolok esubete. Ngikabangabangae kesi itiliwonorio ngikapolok sodi nyeemisikin ngikabarak. Engolik ayong ngikedalak edokito ngangolei toloose ngikarikok a ngakejen loger a ngikedalak. Itwaan ni eboki akipany, echakakin nakipany. Itwaan ni eukori awas, ekonyi emun. Itwaan ni ibesi ngamoru, ewanete ngamoru. Itwaan ni eyepi ngakito, ewanete ngakito. Ani kengingi aep, sodi nyiipenar, erai mati kirichakin iyong a ngikilinga kon ngesi isubea etich a aep kangina. Ani kekony emun lo nyitapataniunitae itwaan, emam nabo ibore esakere akitapatanuun emun ngolo. Eanyuni ekooson ekipur, kotere ngakiro na iruoro ngesi. Inyasunete ekabangabangat ngakiro keng a ilope. Napei isiakinea ekabangabangat ekiruor, kiruorik abaangu. Ani erumori ekiruor, kiruorik ngikerep luaronok. Italalae ekabangabangat ngakiro. Emam itwaan eyeni nguna isidiunosi. Ngae epedori alimokin ngesi nguna isidiunosi? Ituburuni etich a ekabangabangat ilope, sodi tongopik ngesi erot lo ebongio nawi. Oitiakoi! Abe etioko nginyas ianyuni iyong akwap! Abe esorokit erai ekapolon kon, nabo imujete ngikarikok kon, akimuj nakaalan akwaar kiiya kiwala. Akwap, ijok iyong, kerai ekapolon kon itwaan ni eyeni etich keng, kimujete ngikarikok kon esaa lo itemokino imujeta, taanyuneta ngikilinga, meere kisirakarotor epurot! Kotere akalanyanut a itwaan, eukor akai keng. Kotere ngileleny a itwaan, elakakini kidiama akai keng ngakipi. Erai akimuj aka akiena, erai emuna lo kitalakari, ngaropiyae bocha erumorete ngakiro daang. Wara nyiichen ekapolon, tani alotau kon. Wara nyiichen ekabaran, tani anamaniyat kon anaperot. Epedori tani ikeny apororea ngakiro kon sodi tolimo na iruoro iyong. Tosubea ngaropiyae kon emuchuruseenu anakwap anagela, sodi toriam kiatakin ekisidi. Totiakak ebari kon lowaitin lukaalak, kainyo nyiyenanar naaronok, na iriamunotor kane anakwap. Ani kilelebun ngakipi lodowon, ibulakinete ngakipi kech nalup. Ani keukokin ekitoe kwap kori kuju, idongi eperi ani tete aukokin. Itwaan ni idarit ekuwam edaun, nyitakini ngikinyam. Ngini idarit ngidowon iealarosi, nyelemi amana. Akuj ngesi asubuni ibore daang. Nyipedori iyong akiyen ngakiro na esubi Akuj, loger lo nyipedorea akiyen eger lo isiakinea akiyar a ikoku anakook a aberu ana epoti. Kitak ngikinyam kon nataparach. Kitak tani ebong, kainyo nyiyeni atamar erupunete ejok kori mam, nabo nyiyeni atamar alu erupunete ejok, lua ataparach kori luka ebong, kori daang. Ejok akicha, nabo ejoikinit ngakonyen akisemere akicha a akolong. Ejoikinit itwaan ni ayar ngikaru lukaalak elakar alokaru kangulu, itamunit atamar elalak moi ngikaru lua akitu, taraakas na isidiuno daang pas. Iyong esorokit, talakar alosorokane kon. Tolomak amera eringa isorokana. Kiwap ngakiro a etau kon ka na iteete ngakonyen kon. Nakaneni toyen atamar anakiro kanu kadaang etubi Akuj ngakiro kon itemem ka ngakiro na isub iyong daang. Wara nyialolong, tolema ariaba anakwaan kon, kainyo meere asorokanut aka ngirwa alukaalak. Kitam Akasubunan kon eringa isorokana, eringa ngirwa luaronok nyepona. Aapuut ngikaru lu ilimunio iyong kona, “Nyeketalakarito ayong ngiboro lugu!” Ngirwa ngulu kesi lu enyikinyiketo akolong, ka elap ta ngikanyer, nabo nyengopiarete ngidowon lua akiru. Ngirwa lu emaranikineta ngakan kon na kiyokiyete iyong. Tolilimiyosi ngakejen kon na tokona eya ngikilinga. Ekidiokuunete ngikel kitokuruwo anyakaikin akimuj. Toribok ngakonyen tojongoto akitere ejok. Ekinimanete ngaki kon nyiirasi echale alorot. Nyiirari erue a akiries kori ngieosio eeoi, nakaneni kitekienyuni iyong tani erue a ikeny. Iemi iyong alosit lowaitin lu ikeuna, toem tani alosit alorot. Pena ngakorwo nakou. Kitokuruwo alosit, tongopik akwaan ekimue a ibore kadaang. Yaarae itwaan ni iangarea jik, sodi kigoro ngitunga alorotin tosutonokis. Ngesi engedar erikot lokwangat, kimasun ataa na egolit tobwang, tonged auno na eokere alokare, sodi kiealar etuo a ngakipi. Ebongete ngawat yok napua, sodi tobong akianget a akiyar nia Akuj, ana kolong kiinakini. Ebala eketataman, pas, pas, eraakasi daang pas. Ani aloger araakar eketataman itwaan nikooson, abu toliwor jiik itatami ngitunga ngakiro na ayeni ngesi. Kisoma ngesi ngakamatak sodi torek a ekunonoonu. Tasak eketataman ngakiro naketalakarak, sodi kigir ngakiro na etenooko na iteni. Ikote ngakiro a ngitunga alukoosok ngaburoi naitayek na ereuniyere ngamesekin. Ikote ngakamatak na idiasitae ngapirio na itirokinitae nalup. Akuj ngesi kiinakini, na erai ngesi bon erai ekeyokon yok kadaang. Lokoku, eyei akiroit ache na ejoikinit ichoikini! Emam akigir ngakitabea esal, nabo kituburuni akisomare lokojokon, kituburuni noi. Arumoret kanguna kadaang, eyei akiroit apei. Toker Akuj, kiwap ngakiro na edungunit ngesi. Kainyo daang na kolong asubunere itwaan nguna. Etubi Akuj ngakiro nakisubi ngoni daang, kejokak kori keroko, tani ngamunonoe. Eeos lokebusean noi aloeosio kadaang. Erai eka Solomon. Tonuakinae ayong a ngipon kon, kainyo ejok amina kon akidwang emuna. Ejok akukuny kon, ikwaan ekiro kon elimunio ka akimiet nakaakunyon na idokunitae. Nyisudete ngaberu daang kiminasi iyong! Torikoroe ayong atosiwa aapei, toliwor ekapolon kang anamaniyat kon. Kilakar ngoni aapei, ejoker echami a amina kon, idwangi na emuna. Nyisudete ngaberu daang kiminasi iyong! Ngaberu a Yerusalem, eriono ayong, nabo ebus, eriono loger a ngieman alu eya nariet a Kedar, tarai ebus loger a ngawarui ana erapitere akai a ekapolon Solomon. Wara nyikimusiono kotere amuny kang, kainyo akolong ngesi kanomit. Kangoikinete talokaatokang ayong. Ketusuba ayong etich alomana a ngimusabib. Tongop ayong esaa lo asubakinea amana kang a ilope, katokuruwo asubakin akwaan kang. Tolimokinae kare, iyong lokamina, aliwae itwarari iyong ngamesekin kon adaka? Aliwae itowea iyong kesi lotingilan? Nyo niti kasakea ayong iyong losipaan a ngikeyokok aluche? Iyong nakebusean anaberu kadaang, ani pekiyeni, kikok ne, kape kiwapak ngakejen a ngamesekin kisirajak ngaanei kon diyete ngieman a ngikeyokok. Aminat kang, iminanari iyong ngikiliok loger lo eminanarea angole naberu lukiliok lu irito ngaurukukui a Parao. Isubusit asir ngamatengen kon, itojokit asir nakamilimilan emosiring kon. Kisubakini sua iyong erikot a egolit, kitisiroe lokojokon a akwangat. Aperi ekapolon kang anamaniyat keng, tokukunyu akimiet kang awadaang. Ekukuny lominat kang loger a akimiet anakaakunyon na inapakinor kidiama ngisikin kang. Ikwaan lominat kang ka ngatur a amoni, na ekilikiluunito anamanat a ngimusabib ana eyakasi Engedi. Aminat kang, ibus iyong, enguraaka ngakonyen kon! Lominat kang, ijok iyong iteni, kiminarit iyong ayong! Nginyia lukalibak kesi eraakasi ekitanda yok. Ngakito a echekereng kesi eraakasi ngapirio a akai yok, ngadomou eraakasi ngalogoi a akai yok. Ekoni ayong aturot a moding alo Charon, ekoni ngatur a esuguru alo a ngadipoe. Ikoni akone kang alokiding ngaberu nache ngatur a esuguru na engichakina lookwa. Lominat kang alokiding ngikiliok luche, ikwaan ka ekalale alokiding ngikito a amoni. Amina ayong akiboi alotorube keng, nabo kabobokinit ayong ageor keng. Karikori ngesi ayong kai na imujere kedodik ayong amina keng. Kisimwonoe a ngarinyo a ngimusabib, kisikwarunae a ngakalalio! Kainyo ketedekak ayong amina. Echolongit ayong akan keng na alokedieny, kelogakinite na aloteten. Kemaimai esi ngaberu a Yerusalem, kikongo a ngagetei ka ngigereoi lusorok, atamar nyikurukuruokinete esi amina kosi tanang ni itemokinor. Eira ayong etoil alominat kang. Ebunit, eporoporoe alomoru, ilamalamae ngimukur. Ikwaan lominat kang ka agete, kori egereo losorokit. Nyeye ewei alodiyete awas kosi, eripi tooma akai alopukei, itee anikoororon. Kesuruori ayong lominat kang. Tonyou robo aminat kang, akone kang, bua erukosi. Adaun ngirwa lua akiporo. Adaun akiru. Akilikiluut ngatur anakwap. Anang ngirwa lua edonga. Epupio ngakurio eruosi anamanat. Akoko ngameyena. Akilikiluut ngamusabib esiakis akukunyuun. Tonyou robo aminat kang, akone kang, bua erukosi. Ikwaan iyong ka akuuri na edukit anachiet a ataaba. Kimiekinae engolik ereet kon, kimiekinae eira etoil kon, nabo ibus ereet kon. Kirumutu ngikweei, ngikweei luuchik, lu enyasut ngamanat kosi a ngimusabib ngamanat na akilikiluut. Erai lominat kang ekang, arai ayong akeng. Isirajakinit ngibaren keng esuguru lokaliban, tanang akolong imauni, sodi tongopia aribu. Tobongu, ekone kang, loger a agete kori a egereo alosorokit alomoru alungarab. Ani aperi alokitanda kang nakwaare, eruja asaki ngolo amina. Atasak ngesi, katongopik. Atolot erim ere, erim ngirotin ka nagielaru. Atasak ngolo amina. Atasak ngesi, katongopik. Kengolikis ngiketeok a ere erimit ere. Engit kesi atama, “Ingolikis esi lominat kang a?” Napei cha kitiakar ka kesi, eriamun ka ngesi. Atorwakin atowou alakakin, tanang arikori kai a itiokang, namaniyat na kolong kapotiunere ayong. Ekoe ngaberu a Yerusalem, kikongo kare a agete anakapiranan ka egereo losorokit, atamar nyikurukuruokinete esi amina kosi, tanang ni itemokinor. Nyoni ibore ngin ebunit anariet? Ikwaan ka apuru na edirisit, ekukunyuunito emitina ka ekinyaate, emitina lo egielanarete ngimuchurus. Kingolik, Solomon ngol ebunit! Iwokitae alokicholong keng alo apolou, ngasigerea ngatomwon-kapei iteete ngesi, ngasigerea nakajwok noi alo Isirael. Etingito daang ngilengea, ejwoko daang eyenikinitae alojie. Einikinit itwaan daang ekileng losiep, esadit akitijikin emoit nakwaare. Asubuni Solomon ekicholong keng lo a apolou, tosub a ngakito anaajokak a Lebanon. Ebutakinitae ngapirio keng akwangat, tarapae a awaru ana edonyokinitoe egolit. Erapitae nikibooyet a awaru anapus arengan, ana adonyunete ngaberu a Yerusalem elakara. Ngaberu a Sion, potu kingolikisi ekapolon Solomon. Enapit ekiraun lo kolong abutokini itiokeng nakou, akolongit na eutar Solomon, akolongit na alakaror ngesi noi. Irai iyong nakebusean, aminat kang! Enguraaka ngakonyen kon alotooma awaru na erapit ereet kon. Ibukeasi ngitim kon loger a esipanit a ngaanei alo ekokoriunit alomukur a Gilead. Ekwangak ngikel kon kea ikote ngamesekin na atubio ngajul, kilotarae. Emam lo iituno tani epei, etokokinitoe daang nikajokon. Ikote ngipon kon iuno niarengan, kiminarete na iruorikinea iyong. Imaunito ngamatengen kon loger a ngalam alotooma awaru na irapitor iyong ereet. Ikoni emosiring kon epem a Daudi, lo adukio kikachae ngiboro lujiet, ekodakinitae ngaupwala abunget apei. Ikote ngisikin kon ngigetei lumuu, ngigetei ngiarei lu edakasi esuguru lokaliban. Eboikin ayong lomukura a ekinyaate alokaakunyon, ka emukura a emitina, tanang imauni akolong, tongopia aribu. Ibus iyong noi, aminat kang, emam iyong ni ichwangakina! Aberu nakuuta kang, bua atorotokisi alomoru a Lebanon. Totiyaun alomoru alo enyaritae Amana, alomoru alobe Senir ka Erimon, ni eyakasi ngingatunyo ka ngirisae. Aminat a etau kang, nakuuta kang, ekienyiune kon, ka akoromwae kon na emosiring, kesupasi ayong. Ketalakarit ayong amina kon, aminat a etau kang, aberu kang nakuuta. Ebob amina kon idwangit emuna. Ekukuny epie kon idwangit ngikito lukaakunyok daang. Ebobok ngipon kon ikwaan ka akimiet a ao, aberu kang nakuuta. Ikoni angajep kon anikang ngakile ka akimiet a ao. Eyei epie a Lebanon daang loworui kon. Aminat a etau kang, aberu kang nakuuta, erai amana na egolitoe, amana na edukitoe ngawasea, elelea lo enikenitoe, neni ekilikileta ngikito. Erupete loger a ngikito a ngalam, tokoniut ageor naajokon noi. Nyengopeenete ngikito lukaakunyok lu enyaritae ina ka nardo*g** kaneni, ka sapiron, ka kalamus, ka loongor-nyang itukukunyi akimuj ta auk daang a epie. Erupete ngikito a ngikinyaatei alukaakunyok ka echuchuka kaneni, ka ngamieta daang nakaakunyok noi. Ngileleae emasi amana, ngangololin na eleleete, ngayana na eleleunito alomoru a Lebanon. Tonyou, ekuwam lo alokwap, ekuwam lo alokuju, tokut mana kang, kitukukunyu akwap. Kimiek lominat kang tolomu mana keng, tanyam ageor naajokon noi. Aloma ayong mana kang, aminat a etau kang, aberu kang nakuuta. Achuni ayong ngikito kang lukaakunyok. Anyami ayong akimiet a ao kang ka amuluj, amasi ayong emuna kang ka ngakile. Luminan, kimuja, tamata, tanang kisilewae emuna! Aperi ayong, tokienyi etau kang, eruja lominat kang idongidongi ekidor. Kimiekinae atolom akone kang, ngina etau kang, kuuri kang. Etapapal ngakop akou kang. Etisisik eloch ngitim kang. Alacha tete ayong ngiworui kang. Anapi tokona nabo a? Elota tete ayong ngakejen kang. Etongoreani tokona nabo a? Tatap lominat kang engaet a ekidor. Ketalaka ayong ni aapia ngesi. Atokurwaun angaun ngesi tooma. Abutakina ekinyaate lokaakunyon nakan kang, edokadoka akimiet nakaakunyon alomoyo kang esaa lo arwakinor ayong engaet a ekidor. Atangak ayong lominat kang ekidor. Wae! Atoriam kolong kerotoki. Tarai nakemuit akiirar etoil keng! Atasak ngesi, katongopik. Atanyara, towou akikere. Kengolikis ngikeyokok a ere. Kataram katowan. Apot ngikeyokok a awas tochilichilaasi awaru kang. Ekoe ngaberu a Yerusalem, kichikakinae kare atamar, ani kianyut esi lominat kang, ilimokinete atamar ketedekak ayong amina. Iyong nakebusean noi anaberu, emam lominat kon itwaan iche ikwaanatar a? Nyo niti ajokon eyei nikeng kimaimaea iyong sua kona? Ibus lominat kang tarai lo a ngikilinga, eyenikinitae alokiding ngikiliok ngabunge ngatomon. Ejok akou keng ikoni egolit loasegan, ejalim ngitim keng, irioko chuch loger a kuruk. Ibuseak ngakonyen keng ikwaan ka ngakurio na eyakasi lokwaas a ayanae ana elelee, ngakurio na ilotaritae a ngakile, ewaasi alokwaas a angolol. Kiminarete ngamatengen keng, loger a amana ana ileleba ngikito lukaakunyok. Ikote ngipon keng aawat nakaliban na itapapalit akimiet nakaakunyon. Esubunitae ngakan keng niajokon, enapit ngikabaabae lua ngamoru anakaalak a ngaropiyae. Esulut akwaan keng ikoni ngikel a etom, alu itakitae ngimoru lupusiek-arengak tooma. Ikote ngamuroi keng ngapirio a alabasita na irepitae egolit. Epol ngesi ikwaan ka ngimoru a Lebanon, ka ngichekereng kech lukooyak. Ebob akituk keng enuakinio. Kaminarito ayong ngakiro keng daang. Aa robo ngaberu a Yerusalem, ikoni lominat kang neni. Iyong aberu nakebusean noi anaberu, aliwae alot lominat kon? Tolimokinae sua erot lo etori lominat kon sodi engarakisi iyong akisak ngesi. Alot lominat kang mana keng, ni erupeta ta lokimieta. Isirajakinit ngesi esipanit keng alomana, tochuni ngaawata. Erai lominat kang ekang, arai ayong akeng. Isirajakinit ngesi esipanit keng aawat nakaliban. Aminat kang, ibus iyong ikwaan ka Yerusalem. Ijok iyong ikwaan ka ere a Tirisa. Imoitana ikwaan ka ngasigerea na etingito ngabenderae. Toree ngakonyen kon anikang, Kainyo ketoeam ayong! Ibukeasi ngitim kon loger a esipanit a ngaanei alo ekokoriunit alomukur a Gilead. Ekwangak ngikel kon kea ikote ngamesekin na elotar. Emam lo iituno tani epei, etokokinitoe daang nikajokon. Imaunito ngamatengen kon loger a ngalam alotooma awaru na irapitor ereet. Eyakasi ekapolon ngaberu ngatomwon-kapei, ka ngapesur a ngabwes ngatomwon-kauni, ta ngapesur na nyimarun. Nakaneni amina ayong apei bon, ibus ngesi ikwaan ka kuuri. Erai apei alokol a itiokeng, emina itiokeng ngesi noi. Ingolenakinete ngaberu daang ngesi kipuruut. Ngesi ipurosi ngaberu a ekapolon ka ngapesur keng a ngabwes. Ngae en, ekienyiununi loger a abaet? Ejok ngesi ikwaan ka elap, eparipari loger a akolong. Emoitana ikwaan ka ngasigerea na etingito ngabenderae. Atiyaun ayong aloma mana a ngikito, akisemere ngikito luuchik anadipo, akingolikin ngakui nakiteat alomusabib ta ngikito a ngalam kepukiarito. Amarani ayong, kainyo kiinak iyong ayong ekimue a amina, loger a ekamean aurukuk a ejie, alo imuit akinang lojie. Kidongak, kidongak, apese a akwap a Chulam, kidongak eteto. Nyo isaketa esi akitere ayong edongae loger lo iteere ngajorei ngaarei ejiete? Irai iyong apese nakesuparan! Ejokak ngakejen kon enapito ngamuk. Eroouno ngipate kon loger a ibore ani esubunit ekunonoit. Ikoni akapul kon atubwa na nyengopeanakini emuna lo itodwaritae. Ikoni akook kon ngatuket a ngakanoi, na iriamit esuguru lokaliban. Ikwaan ngisikin kon ka ngimakatae lumuu, ikwaan ka ngigetei ngiarei. Ikoni emosiring kon akai na edirisit na edukitoe a ngikel a etom. Ikwaan ngakonyen kon ka ngabwelin na eyakasi lore a Echibon, diyete ekidor a ere aloapolon kangolo. Ejok ekume kon ikwaan ka akai na edirisit a Lebanon na ekienyikinit ere a Damasko. Ikeara akou kon ikwaan ka emoru a Karimel. Emalimalete ngitim kon loger a ngisul. Itililimiyori akibuseanu kech ekapolon. Irai iyong nakaminaran, nakebusean, iyong naminat, kitalakari amina kon! Irai iyong nakebusean loger a eengol. Ikwaan ngisikin kon ka ngasab a eengol. Adokari ayong loongol atoger. Ikote ngisikin kon anikang ngasab a ngamusabib, ekukuny akianga kon loger a ngakalalio. Ikwaan akituk kon ka emuna loajokon. Kimiek robo jik emuna tolelek lominat kang, tolelek lopon keng ka ngikel keng. Arai ayong aka eminat kang, nabo aminarit ayong ngesi. Bua, ekone kang, kapana naroatin, kapana atopero nadakarin. Kinyouni ngoni nataparach elilim esemoto ngimusabib, engolikisi chene kerupunito, kepukiarito ngatur, engolikisi ngikito a ngalam kepukiarito, kainakini ayong iyong amina kang kaina. Kinguu akukuny a ngigilae, eyei ageor naajokon daang diyete ekidor yok. Ekone kang, kedekinit naajokak daang, nangorok ka nakiteat. Arai bo tarai iyong lokaatokang dang, lo etanaki itiokang! Kerai nakiriamar lorot, katonuak nyeekachikis ngitunga. Kerai kai a itiokang karikori, kitatam amina kaneni. Kainak emuna loadwaran, tamat emuna kang lo a ngalam. Echolongit ayong akan kon na alokedieny kilogakinite na aloteten. Ekoe ngaberu a Yerusalem, kemaimai atamar nyiichan amina kosi. Ngae en ebunit anariet, egongakina ni eyei lominat keng? Ketekienyuni ayong iyong alokwap ekalale, ani kolong ariabar itiokon, ani kolong kidounere iyong. Wara itwaan iche nyeemin lotau kon, mati ayong bon. Nyiilogak itwaan iche ngakan kon, mati ayong bon. Kainyo etiono amina ikoni aliel. Etiono ekimue ikoni akitu. Erirauni loger a asarae, tonoku loger a akim anakariran. Nyitudungeete ngakipi. Nyilikorete ngakalel. Nakaneni ani kesak itwaan akigiel amina a ebari keng, ngimeny make eriamuni. Eyei sua nakaatokosi naachi, eringa ngisikin nyejipuna. Kikokini sua ngesi ai, na eponere eloto? Arai tarai ngesi awas, kidukok ngesi akai na edirisit a ngakwangae. Arai tarai ngesi ekidor, keduk kisiriamae ngakito a echekereng. Arai ayong awas, eraakasi ngisikin kang ngakais keng na edirisito. Eyeni lominat kang atamar nikeng aanyunitor ajako. Ni enyaritae Baal Amon, eyei amana a ngimusabib a Solomon. Eyakasi ngiketak lu ichikakinit ngesi, tatach ipei kech daang ngaropiyae abunget apei. Eyei ayong amana a ngimusabib, nakang a ilope! Iyong Solomon! Toting akon bunget, totinga ngiketak ngamiae kech naarei. Aminat kang, kimiekinae eira etoil kon alomana. Idarito ngirukitos kang akiirar iyong iruorikini. Bua nikang atipei, lominat kang, loger a egete, loger a egereo alosorokit, alomoru alu itao ngikito lu itukukunyete akimuj. Eraakasi ngakiro na eyakasi nakitab naga ngakitoodikinet na edodikini Akuj Isaya lokookeng a Amos, kotere Yuda ka Yerusalem, ngirwa lu araakatar Usia ka Yosam, ka Aas ta Esekia ngikapolok a Yuda. Tama Ekapolon Akuj, “Ee adis topupok. Ee akwap, todeta akit, kiirasi ngakiro na eruoro ayong! Kangero ayong ngide lukolong etanuni ayong etopolou. Eyenete ngaatuk ilope kech, eyenete ngisikiria nipalem isumujea ilope kesi. Nakaneni nyeyenete Ngisirael lu eraakasi ngitunga kang. Emam kesi ngatameta nakayeneta ayong.” Wae, ebukut lokasechan, ileleba esi akisech, iraakasi esi ngalesea a ngikasechak, lu esubete naaronok! Itilileta esi Ekapolon Akuj na erai Akuj a Isirael na italeuno. Ibongokis esi ngesi ngakawa. Nyo irubakinitotor esi ingerito Akuj? Kori isakete kirirae nabo noi. Isirael, eburuchiarito sek ngajemei akou kon nabo ipirisaara etau kon. Napei anakou tanang nakeju, emam ni ejok anakwaan kon. Eyakasi ngagwaranaret, ka ngajemei ta ngajemei na eiyete ngaakot, eyakasi nakwaan kon. Nyilotara ngajemei kon, kori nyeena. Nyiwasakina akimiet. Enyasun akwap kus. Enom ngirerea kus a akim. Erikasi ngitunga a akwap anache ngiboro kus, anakonyen kus. Enyasut ibore daang. Edong Yerusalem bon, erai ere lo iriamito ngajorei. Ikoni epem alokiding amana a ngimusabib, kori mana a ngamunye. Arai kolong Akuj Namerikanyer nyiimiek ngidikidio yok topuunos, kemunyaritae Yerusalem jik loger a Sodom ka Gomora. Yerusalem, ngikapolok kon ka ngitunga kon ekokis lua Sodom ka Gomora. Topupokisi ngakiro na elimunit Ekapolon Akuj. Todetasi ngaki kiirasi ngakiro nakitatami Akuj yok. Ebala, “Nyo kang ngakipeyos kus nakaalak? Kaupa ayong ngakipeyos na inomio, na ngimesekin ka ngibaren lukanakunak. Ketuburut ayong ngaakot a ngimongin ka na ngimesekin aluuchik ta ngikora. Ngae ebala esi inunae ayong ngibaren lugu daang na iponeta akilip? Nyo idamidameta esi akai kang? Nyiiyaut nabo ngakipeyos kus na eraakasi pas. Kakadaki ayong aurus a emitina kus alo inomio. Nyanaikini ayong ngisukukui kus lu eanyungarere elap, ka ngasabatoi kus ta akiriamariam kus na ilipeta. Aremokino ayong ngisukukui kus lu eanyungarere elap, ka ngirwa a esukukuu lu eseunitae. Kechan kesi ayong, nyeringa etiri. “Na ibauneta esi ngakan kus ilipito, emuki ayong ngakonyen kang nyekaanyunga esi. Tani kilipa esi nikooyen, nyeirari ayong kainyo kikudito esi ngaakot. Kitosegas kitaleunos, tachadasi naaronok anakonyen kang. Ee robo, tapalikisi naaronok, kitatamas akisub naajokak. Tasaka ngakiro na eriyan. Kingarakis ngulu ichiakiaritae. Totiakakisi ngikokiok nguna eriyan. Toikisi ngapuseru.” Ebala Ekapolon Akuj, “Potu tokona atopupokinos aapei. Tani kerengak ngasechesea kus puu, ekwangearosi kea. Tani kerengak loger a emunyen aloarengan, ekwangearosi kikokis ngajul a ngamesekin. Ani kichamito esi akiwap ngakiro kang, inyamete ngamuja naajokak na ekoniunete anakwap. Nakaneni ani kingero esi ayong, kimunyario esi a akwara, kainyo ayong Ekapolon Akuj alimu nguna.” Ere lokolong amunoi, ekwaanikin ka amalaat. Asubi kolong ngakiro na eriyan. Eleleba kolong ngitunga lu etenooko, edong tokona ngikaarak make. Yerusalem, ikwaan kolong iyong ka akwangat, iliwor tokona pas. Ikoni kolong iyong emuna loajokon, ichorimim tokona. Eraakasi ngikarikok kon ngirukooi, ngirukitos a ngikokolak. Eminasi daang ibore nidiaket ka ebachit. Nyeikinito lukokiok alokies. Nyepupokinete ngakiro a ngapuseru na eponeta nikech. Tokona bocha, topupokisi ngakiro na alimu Akuj Namerikanyer, na erai Akuj naationon. Ebala, “Esi ngimoe kang, kanyunyurikin ayong esi atatachak naaronok. Kanyoikini ayong esi, ketosegi loger a asuat ana itosegio, ekisa elos kus daang. Katobuak ngikapolok ka ngikesuruorok lu ikote lukolong a ekingaren. Sodi tanyarae Yerusalem ere lo etenoono, lo emunoi.” Eyuuni ngesi Yerusalem a ngakiro ana eriyan, itwaan daang ni eyei neni ni elungi ngasechesea keng, eyuunio a ateneanut. Nakaneni emunyari Ekapolon Akuj ngitunga daang lu engerito ngesi ka ngikasechak. Eari Ekapolon Akuj daang lu aisikis ngesi. Kitingete esi ngileech kotere ngichokei lu ilipito esi ka ngamanat na iseut esi akilip. Ikwaanikinosi esi ka echoke lo eoniyori ka amana na emam ngakipi. Ngulu eyenikinitae, inyasunete ngakiro naaronok esubete kesi, loger lo edetakinor ekatwanyit lonyia tonomia. Emam itwaan epedori akiratakin nginyas ngulu. Akiroit naga ngesi ainakini Ekapolon Akuj Isaya lokookeng a Amos, kotere Yuda ka Yerusalem. Alorwa alu isidiunosi, emoru lo ewaar akai a Akuj ngesi eoyaar alomoru kadaang, ilengi ngimukur daang. Eropuunete ngibukui daang neni. Epote ngitunga lukaalak tamasi, “Potu apana moru a Ekapolon Akuj, kai a Akuj a Isirael. Kitatamikini ngesi ngoni ngakiro na esaki atosuba. Ewapa ngirotin lu aseu ngesi. Isuruori ngesi ngitunga keng alo Yerusalem, kainyo ebunit etal a Ekapolon Akuj alo Sion.” Etubi ngesi ngakiro a ngibukui totiakuunu ngakiro a ngitunga alukaalak, itiakete kesi ngilengea kech luapolok tarata ngirokonin. Kitiliwosi ngakwaaras kech ngilengea luiriet ngikito. Nyeringa nabo jik ngibukui engaarete ajore kori nyenyounete alosit lojie nabo. Tokona bocha, ngalesea a Yakobo, potu atoloto anakicha a Ekapolon Akuj. Ee Akuj, inger iyong ngitunga kon, lu eraakasi ngalesea a Yakobo! Kainyo elelebun ngimurok nakwap, eponito kesi alo kide. Elelebun ngikadwarak lu ikote Ngipilisti. Emorikinosi kesi ka ngitunga a ngakwapin anache. Ileleba akwap kech ngakwangae ka egolit. Nyimarun ebari kech. Ileleba ngangolei nakwap kech. Nyimarun ngaurukukui kech na irito ngangolei. Ileleba akwap kech ngakujo nasubuna, Ilipito kesi ngiboro lu asubunete a ngakan kech, ngiboro lu ayeunete ngimoyo kech. Etingete itwaan daang ngileech ka etimoi. Tochoite irimakini, ee Ekapolon Akuj! Elomarete natabab toduka anaburiburio, sodi toyuunotor anangopit a Ekapolon Akuj ka akwangis a apolou keng. Ebunit akolongit na elemarere ngiwog a ngitunga sodi kinyasunae ekinis kech. Akolongit ngina, Ekapolon Akuj bon ipuruunio. Akolongit ngina, itiditeuni Ekapolon Akuj daang lu iwogasi ka lu inisasi ta daang lu iparaparasi. Inyasuni ngesi ngichekereng a Lebanon lukooyak daang ta ngichokei a Bachan daang. Irieriakini ngimoru ka ngimukur talapatata, ka ngakais na edirisito daang ta ngawasea a ngirerea alu eyuunere. Iibakini ngatubwae naapolok ajokak daang nakipi. Ikisario ekiwog a ngitunga, esaluni ekinis kech. Akolongit ngina, Ekapolon Akuj bon ipuruunio. Engopiarete ngakujo nasubuna jik. Elomarete ngitunga naburiburio a ngatabab, toboka ngapanya nalup tolomasi sodi toyuunotor anangoit a Ekapolon Akuj, ka akwangis a apolou keng, na ebunio ngesi akitamaranikin akwap. Na enangea akolongit ngina, echakarete ngitunga ngakujo kech na esubunitae anakwangae ka egolit, nakolong asubunete kesi kilipa. Echakarete lorunyei ka nika ta lononwa. Na ebunio Ekapolon Akuj akitamaranikin akwap, edukete ngitunga anapanya ka ngaburiburio a ngatabab sodi toyuunotor anangoit a Ekapolon Akuj ka akiduk anakwangis a apolou keng. Totiaakisi ibore be itwaan, ni edaun akianga keng, erai ngesi nyo ajokon? Anang tokona Ekapolon Akuj Namerikanyer ni elemarea alo Yerusalem ka Yuda ibore daang ni igienosi ngitunga. Elemari akimuj ka ngakipi. Elemari lukajwok ka ngasigerea, ka ngikatubok ngakiro, ka ngikadwarak kech, ka ngimurok, ka ngikarikok kech ka ngikarikok a ngasigerea kech, ka lua akwap, ka ngikesuruorok, ka ngimurok lu eyenikinitae ta ngikasubak lupean. Itiliwori Ekapolon Akuj ngisorok ngikarikok kus, ngide luuchik kipolokinete esi. Ichiakiarete ngitunga, kichiakiasi luche, kimenya itwaan daang erukitos keng, ka ekidunyet keng, nyekerete ngisorok ngikasukou, nyekerete ngitunga ngikapolok kech. Enangi akolongit na irumunea itwaan lokaatokeng, lo eyanatar tolimok tama, “Kona eyakar iyong eworu lo inapi, toliwor ekapolon kosi. Toliwor ekapolon kosi ngirwa lua ngichan lugu.” Etachuni ngesi tama, “Nyapedori ayong akingarakin esi! Emam akimuj anawi kang, emam tani ngiworui. Nyikitiliwosi ayong ekapolon kus.” Etige, abe inyasunosi ngitunga a Yerusalem! Abukorosi ngitunga a Yuda! Kainyo ngakiro na iruorosi esi daang ka ngakiro na isubete nyejoikinito Ekapolon Akuj, iyenya esi Akuj alope. Ngakiro na ipakanarotor a ngajorei, kesi alimosi aronis kech. Oitiakoi! Abe etioko nginyas ianyunete esi! Esi ngikulepek inyarakinosi naaronok. Elakarosi lu etenooko kainyo emam naaronok eanyunotor. Eanyunete naajokak kotere etich kech. Oitiakoi! Abe etioko nginyas eanyunete luaronok! Eanyunosi ka naaronok. Kainyo nguna kolong asubeta kesi luche, ngesi esubakinere kesi dang. Echiakiasi ngide ngitunga kang, apolokis ngaberu kesi. Ngitunga kang, kitooliyosi esi ngikarikok kus, sodi kibiler esi nyiiyena ni itorito. Anyou Ekapolon Akuj alimor nguna esechakinitae, anyou akirirare ngitunga keng. Aloma Ekapolon Akuj loriras, ariku ngikasukou ka ngikarikok loriras. Erirak ebala, “Esi ngamanat a ngimusabib, ileleba ngiboro lu engasio alokebootok nakais kus. Ngae abala esi kichiakiasi ngitunga kang, kitadalatar ngikebootok? Ayong Ekapolon Akuj Namerikanyer ngesi alimu nguna.” Alimuni Ekapolon Akuj tama, “Kingolik eger lo inisatar ngaberu a Yerusalem! Eloose kesi itujakinito ngimosiringan, todongodongoote ngitunga. Ichugasi kesi eloose toruos ngasua anakejen kech. Nakaneni ayong Ekapolon Akuj erirae kesi, abanyi ayong ngakies kech emiek epalor.” Akolongit ngina elemari Ekapolon ngiboro daang lu inisatar ngaberu a Yerusalem, lu eraakasi ngasua na enapitae anakejen, ka ngibolio lua ngakies, ka ngalaga na a ngimosiringan ta ngigiel a ngakan. Elemari ngawarui na erapitotor kesi ngireetin, ka ngapukoto kech ta ngikeriau lu enapito anakan ka lu enapito anaaborin. Elemari ngikabaabae lua ngimoyo ka lua ngikumes. Elemari ngiworui kech lua ngisukukui, ka lukooyak, ka ludapal ta ngichuei a ngaropiyae. Elemari ngiworui kech luchawor, ka ngawarui namieset ngakiinyir ta ngawarui na enapito anakies. Akidwang kesi akiwosa akimiet nakaakunyon, ebosunete. Akidwang akinap ngarubae naajokak, enapete ngaunoi anaaborin. Akidwang ngitim lu eoitoe, eliwor ngakies kech napalor. Akidwang akinap ngiworui luajokak, enapete ngiguniae. Ilocho akibuseanu kech toliwor ngileech! Eario ngikiliok a Yerusalem, tani lukajwok, eario alojie. Ikalounete ngidorin a ere tosutonokis. Ikokini ere aberu na ibooyi analup, na ebutorit ngiboro daang. Na enangea ngirwa ngulu, erwakinosi ngaberu ngakan-kaarei ekile epei tolimokis tamasi, “Kitana sua make, atanapa ngiworui kosi, nakaneni kimiekinae kare sua atamasi irai iyong lokile kosi, sodi nyikirumeta ngileech lu ebeyere nyikuusitae sua.” Enangi ngirwa lu iturupunea Ekapolon Akuj ekitoe daang anakwap topoloor nabo kibuser. Ngisirael daang lupiyayek, elakarosi kinisatar akimuj na ekoniuni akwap. Itwaan daang ni idongit Yerusalem, ni aseu Akuj atamar toyar, enyarao ni italeuno. Kotere agogongu keng, irirae Ekapolon akwap, sodi kitaleu ka akilotar akisech a Yerusalem ka ngaakot na abukokin neni. Emeuni Ekapolon Akuj edou ka apuru naparan kimuk emoru a Sion ka ngitunga daang lu echunakina neni, sodi tomeu asarae a akim ka apuru nakwaare. Kimuk akwangis a Akuj ere etia ni etia, kiratak. Eliwor akwangis keng etorube lo imuki ere nyeenom akolong naparan. Kitiliwo ere ngolo lo emam naaronok, ni emechere akiru ka ekuwam. Topupok katoeok eeos logo eeos alopae kang ka amana keng. Ayei lopae kang amana a ngimusabib kidiama emukura lo iturupaka ngalup ngikinyam. Tobok ngesi ngalup tolema ngamoru, kitak ngamusabib naajokak noi. Toduk epem lo iteere, tosubak ni echiyere ngamusabib. Kidar ngesi ngamusabib ekokete, nakaneni tababaraketa ngamusabib daang. Ebala bocha tokona lopae kang, “Esi ngitunga lu ilomito Yerusalem ka Yuda, totiakutu kerai ayong asechit kori amana kang. Eyei ibore ni nyesubakina ayong alomana a? Ani kotere nyo bo akoniunio ngesi ngamusabib nakaabarak, nyeekoniu ngamusabib naajokak na edarit ayong? “Kalimokini ngakiro na asubakinea amana kang. Ayatari ayong ngikelio keng, atangarakakaa awas keng sodi emiek ngitieng tadaka kipudata. Emiekini edoan torup kaneni. Nyeragiragi ngamusabib, kori nyachili ngalup. Emiekini ayong ngirega ka ngiikwa toruput alomana. Eratakini tani ngidowon nyeelakakis ngakipi.” Isirael ngesi erai amana a ngimusabib a Akuj Namerikanyer. Eraakasi ngitunga a Yuda ngamusabib na etakini ngesi. Eitanit Akuj ngakiro na eriyan anikech, nakaneni todepasi kesi nguna toliworos earasi. Eitanit atamar tosuba ngakiro na iteni, nakaneni apot ngitunga toliworos igorosi esakete atamar kitosubere na iteni. Oitiakoi! Abe etioko nginyas ianyunete esi! Esi lu igielete ngakais naapolok ka ngamanat, kidokokis kidiama nache sek itingito. Tongopik luche ni elomete, kidongo esi make ilomito nakwap. Eira ayong Akuj Namerikanyer ikongi ebala, “Iteni idongete ngakais nakaalak erai ngawiyeingorok, engopi itwaan elomi nakais naapolok ajokak. Amana a ngimusabib na erai ngaekae ngatomon, ekoniuni ngamusabib na epuruunere emuna lo erai ngalitae ngakan-kauni make. Ngikinyam lu itakinio erai ngichuei amiat ka ngitomwon-kauni, ekoniunete ngalemet ngichuei ngitomon ka ngikan-kauni make.” Oitiakoi! Abe etioko nginyas ianyunete esi! Esi lu inyouniyete nataparach elilim tolomakis akimat epurot, toribok eringa kirakarit epurot. Alosukukui kus itingito esi ngagitae, ka ngatamburin, ka ngibunei ta emuna. Nakaneni nyikachito esi ngitichisio a Ekapolon Akuj, nabo nyiteete na esubi ngesi. Kotere nguna, eliworosi ngitunga kang ngirikon ani ebangaaketa. Eari akoro ngikarikok kus, tongeda akure ngitunga luche. Ni eyakasi ngikatoak, idarit kesi a ekimue, engaamito ngalup idarito kesi. Ilikorete ngalup ngikapolok a Yerusalem, aapei ka ajore nakachalan a ngitunga aluche. Irumete itwaan daang ngileech, itiditeunio lukenisak. Nakaneni Akuj Namerikanyer, ipuruunio. Idodiununi ngesi apolou keng ani esubea na eriyan. Kisileereu akibuseanu keng ani iriraa ngitunga keng. Alorerea alu enyasun, edakasi ngimesekin luuchik, edakasi lukanakunak ka ngikaalei, tosub neni achokor kech. Oitiakoi! Abe etioko nginyas ianyunete esi! Esi lu kikuruwo atiaka ka ngasechesea kus. Ibalasi esi, “Kiburuburak Ekapolon Akuj, tosubak na isaki asubakin, engolikisi pan. Kimiekisi Akuj a Isirael na italeuno tosub ngakiro na esaki atoyena.” Oitiakoi! Abe etioko nginyas ianyunete esi! Esi lu ibaasi, naaronok ejokak, tamasi naajokak eroko. Esi lu ilochete akicha toliwor aribu, kilocho aribu toliwor akicha. Kitoboboto ibore ni edwar, sodi kitodwara ni ebob. Oitiakoi! Abe etioko nginyas ianyunete esi! Esi lu itamito atamar iosok, tabaas ichwaaka noi. Oitiakoi! Abe etioko nginyas ianyunete esi! Esi lu iraakasi ngangutea a emuna! Esi lu iosokinito akimoromor emuna! Esi lu ilakakinete itwaan ni esechit ani kibunakinea ibore nidiaket. Towout asubakinea itwaan ni nyesechit ngakiro na eriyan. Tokona bocha, loger lo emunyarea akim ngatunyeny, ka eger lo erujakinotor nginyia anakim, ebosete ngaten kus na alokwap, tooniyosi ngakui tokuta ekuwam, kainyo ingerete esi ngakiro nakitatami Akuj Namerikanyer, na erai Akuj a Isirael na italeuno. Engoikinit Ekapolon Akuj ngitunga keng, anyoiki kesi akirirare. Emaranikinete ngimoru, Imiekinio ngawat alu etoakete eperete alorotin loger a asakatan. Tani kikokis neni, nyesaluni angoit a Ekapolon Akuj, pearai eringa ngesi enyoikinit kesi kirira. Idodiuni Ekapolon Akuj ibore ni enyaraa ebukut lo elona. Iunyakini ngesi poneta kesi alosal a akwap. Epote kesi atipei kibirunos! Nyeburuni kesi kori nyedakarosi. Nyilurakinosi kori nyejotoorosi. Nyilajalajakin ngarubae. Nyengedasi ngarukanes a ngamuk. Ekwaka ngimalea kech, ekudokina ngakawa kech esukito akigum. Egogong ngakichieket a ngangolei kech loger a ngamoru. Irimete ngakejen a ngaurukukui kech ibiroro loger a ekuwam alo edirisit. Irurumaate ngasigerea kech loger a ngingatunyo alu earete ibarasit tachadasi ni nyedemarere. Na enangea akolongit ngina, imaretetekinete kesi ani edwangeta Isirael, echalasi loger a anam ana ekulae. Kingolik akwap naga! Erai aribu ka ngichan! Eliko aribu akicha. Ekaru lo atoanea ekapolon Usia, engolik ayong Ekapolon ibooyi alokicholong keng a apolou alo ekeuna noi. Kilelebun eworu keng akai a Akuj wadaang. Eriamito ngesi ngisubuna lua asarae ewaasi. Ayakasi ipei kech daang ngabeben ngakan-kapei. Arapit ipei kech daang ereet keng a ngabeben a ngaarei, tarap akwaan a ngabeben a ngaarei sodi topor a ngaarei. Anyarasi kesi abalasi, “Italeuno, italeuno, italeuno! Italeuno Ekapolon Akuj Namerikanyer! Apetakin akibuseanu keng nakwap.” Kitamaranik agiro a ngitoilio kech ngapirio a akai a Akuj, kilelebun apuru kai. Atolim ayong atama, “Oitiakoi! Abe ekadaunan lo arai ayong lo! Kainyo achakara ani araakar itwaan ni nyitaleuno akituk, nabo ayei kiding ngitunga lu nyitaleuno ngakituk. Tarai engolikis ngakonyen kang Ekapolon, lo erai Akuj Namerikanyer!” Ani erumor toporu ipei a ngisubuna kangulu nikang etingit atotole na erirae nakelemuni ngesi alokeno a ngakipeyos, tolem a ngasua anaridet ngatotol. Tatap ngesi akituk kang a atotole kangina tama, “Atap atotole naga akituk kon. Adaun tokona aronis kon. Arimakin akisech kon.” Eira ayong Ekapolon ebala, “Ngae ameari ayong? Ngae eliwor emeanara kosi?” Ani erumor atatachu ayong atama, “Ayong logo! Tomearae ayong.” Tolim ngesi tama, “Kape tolimok ngitunga lugu kona, ‘Topupo cha ipupete, nakaneni nyiyenunete. Kiteto cha iteete, nakaneni nyingolikinete.’ ” Katolimok nabo tama, “Kitabangaania ngakies a ngitunga kalu, kitikiniman ngaki kech, kitumudukan ngakonyen kech. Sodi nyiingolikineta a ngakonyen kech, kori nyiirasi a ngaki kech, kori nyeechoiasi a ngaososio kech. Ani kesubakis nguna, epedorete katobongokis ayong sodi toyuunae kesi.” Sodi engis ayong atama, “Ngirwa ngiai irikarete ngakiro nugu, Ekapolon?” Katatachak ngesi ayong tama, “Tanang ngirerea daang inyasunio, tanang ngakais idongete emam ngitunga, tanang akwap inyasun toliwor alaireng. Etwarakini ayong ngitunga torikoe nikalonan, kidong akwap esil. Tani kidong itwaan ipei alotunga alutomon nakwap, emunyar ngini dang. Ikokini atorom a echoke alo atubor.” (Erai atorom akisiakinet nakitetet a ngitunga a Akuj.) Ngirwa lu araakar Aas ekapolon a Yuda, kisiak ejie. Arai Aas lokookeng a Yosam tarai etatait a Usia. Apot Resin lo arai ekapolon a Siria, ka Peka lokookeng a Remalia, lo arai ekapolon a Isirael, kitijikis ngitunga a Yerusalem, nakaneni tokuruwo alemar ere. Ani elimokinio ekapolon a Yuda atamar ibakito ngasigerea a Siria ka na Isirael, tobul ngesi ka ngitunga keng daang, tamaranikis loger a ngikito alu iloiloi ekuwam. Tolimok Ekapolon Akuj Isaya tama, “Toriko lokookon Chear Yachub tolot kisiriam ekapolon Aas. Iriamuni iyong ngesi alorukudi alo eyakasi ngikadonyok ngiworui, alosal a echilet alo echilunit ngakipi anabwel ana alokidiama. Tolimok ngesi kona, ‘Toosunite robo. Kililing, nyiem, nabo wara etau kon nyipirisaar, kainyo angoit a ekapolon Resin ka ngitunga keng a Siria, ka angoit a ekapolon Peka, ikwaan ka apuru pas na ebunit anakito a akim ana eloose adungere. Etukito Siria ka Isirael aapei ka ekapolon kech. Esakete akitijikin Yuda, kitoema ngitunga sodi kibaketa alowae kech, ani erumor kitiliwosi lokookeng a Tabeel ekapolon.’ “Ayong Ekapolon lo arai Ekapolon Akuj, alimu atamar nyesubakinosi nguna jik. Kainyo ere loapolon a Siria ngesi Damasko. Erai Resin ekapolon a Damasko. Adaunet a ngikaru a ngitomwon-kapei ka ngikan, epetario ngitunga a Isirael, nyeringa nabo eliwor ebukut. Aloger alopei kangolo, ere loapolon a Isirael ngesi Samaria. Erai lokookeng a Remalia ekapolon a Samaria bon. Ani pekinup iyong nyipedori akisikokin.” Tolimok nabo Ekapolon Akuj Aas tama, “Tolimok Ekapolon Akuj kon atamar kidodik akiroit nakailiilon, toliwor na ebunit analup ani eyakasi ngikatoak kori alokidiama noi anadis.” Tatachu Aas tama, “Nyengita ayong emachar. Nyasaki ayong akining Ekapolon Akuj.” Tatachu Isaya tama, “Topupok tokona, alesit a ekapolon Daudi. Kikad iyong akituburunit ngitunga kon, isak akituburun Akuj dang a? Ani kikote neni, kidodikini tokona Ekapolon iyong akiroit nakiliilon. Epoti apese kidou ikoku nisapat, tanyara ekiro keng Imanuel. Ani epoloe enangi ni engerio akisub ngakiro naaronok, enangi ni etiakunea akisub naajokak, emasi ngakile ka akinyam akimiet a ao. Ani eringa ngirwa ngulu nyenanga, eramakini itwaan daang anakwapea a ngikapolok aluarei alu kitoemito iyong kangulu. “Eyauni Ekapolon Akuj nikon, ka ngitunga kon ta ngitunga luyenet kon, eyauni ngichan lu nyeanyuna esi nakanuan atiakatar ngapolosio a Isirael ka Yuda. Kiinunio esi ekapolon a Asiria. “Na enangea ngirwa ngulu, iunyakini Ekapolon Akuj tanyara Ngimisiri, kibukeaunos loger a ngichuch eponito anangololin ana eremito angolol a Nili. Kibukeaunos lua Asiria anakwap kech loger a ao. Ilulosi kesi kilelebunos nadipo napakapaka, kilelebunos naburiburio a ngatabab ta ngachara daang na edakasi ngibaren. “Na enangea ngirwa ngulu, igiri Ekapolon ekabanyan ngakies a ekwakaye Eupurate. Ekabanyan ngolo ngesi ekapolon a Asiria! Ebuni tabany ngabokonya kus, ka ngakies ta ngawat kus daang. “Na enangea ngirwa ngulu, tani kemeat itwaan ataok apei ka ngaanei ngaarei, iwokinete, taanyu itwaan ngini akimuj na esaki daang. Ee robo, lupiyayek idongete nakwap, emaase ngakile tanyama akimiet a ao. “Na enangea ngirwa ngulu, ngamanat a ngimusabib naajokak daang, na erupunito ngamusabib abunget alomana a apei, tarai emusabib epei ngaropiyae abunget, erupunete ngirega ka ngiikwa tomutonon. Eloose ngikerikak inaa etingito ngakawa ka ngimalea. Ee robo, ilelebun akwap daang ngirega ka ngiikwa tomutonon. Ngimukur daang lukolong etaeneo, erupunete ngirega ka ngiikwa, kotere ngakiro nguna, emam itwaan elosi inaa. Eliwor ni edakasi ngamesekin ka ngaatuk.” Katolimok Ekapolon Akuj ayong tama, “Tolem ibore nidapal ni igirio sodi kigirak ngagiran naapolok kona, ‘Ademar Atipei, Angatar Atipei.’ Toriku ngitunga ngiarei lu emunoi tarata ngikaanyunak kon, Uria lo erai emuron, ka Sekaria lokookeng a Yeberekia.” Ani ekisidi, topoti aberu kang na arai akadwaran, kidou ikoku nisapat. Katolimok Ekapolon Akuj ayong tama, “Tolimok ekiro be, ‘Ademar Atipei, Angatar Atipei.’ Ani eringa idia nyepolouno, nyeanyuna atamar ‘Ito’ kori ‘Apa’, erotokini ebari a Damasko daang ka ngiboro lungatara a Samaria, kiwoko ekapolon a Asiria.” Kesuruor Ekapolon Akuj ayong nabo tama, “Ani aloger angerioto ngitunga lugu ngakipi a ingolol a Chiloa na eleleete akaalimon, sodi tamarana alongaren Resin ka Peka lokookeng a Remalia, kotere ngakiro nguna, ayong Ekapolon Akuj, ayauni ekapolon a Asiria ka ngajorei keng daang kitijikis Yuda. Eloose kesi ngaren loger a akaale a angolol ana enyaritae Eupurate na ilelebunor kiyesar ngakipi alokwaasea keng. Epeunete kesi kikisasi Yuda daang loger a ngakipi ana ilelebun tanang losegeta toburichiasi ibore daang.” Ee, kirukit ngoni ka Akuj! Ngabeben keng na epetara, iyokiyete akwap. Esi ngibukui, tochunakinos iemito. Topupokisi, esi ngakwapea na iloka. Tosubakinos anyoun ejie, nakaneni toema! Ee robo, tonyoutu ejie, nakaneni toema! Totuko aapei, nakaneni eliworosi ngakiro kus daang pas, kainyo kirukit sua ka Akuj. Kotere apolou keng naationon, abu Ekapolon Akuj kechikichik ayong atamar nyaasub ngakiro na esubete ngitunga lugu. Katolimok tama, “Nyiiloma nakiro naaronok na etukosi ngitunga lugu. Nyiiker ngakiro na ekerito kesi kori nyiem. Toyen atamar ayong Akuj Namerikanyer, ngesi etaleuno. Ayong bon ejoikinit iyong kikeri kitoem. Nikang emotunosi ngitunga toyuunos. Ekoni ayong amoru na elegeununi ngitunga a ngapolosio a Isirael ka Yuda. Ekoni ayong eloit lo esurumi ngitunga lu eyakasi Yerusalem. Ilegeunio lukaalak, tadakaros tobilas, sodi kirumunae aloloit kangolo tarata ngirikon.” Esi ngirukitos kang, kiyoko ka akirichakin ngakiro nakalimoki Akuj ayong. Adukaki Ekapolon Akuj ngitunga keng, lu eraakasi ngalesea a Yakobo, nakaneni egienokin ayong ngesi. Ayong logo kirukit ka ngide lukolong kainakini Ekapolon Akuj. Akuj Namerikanyer, na ibooyi alomoru a Sion, ngesi kitiliwo ngoni emachar a ngakiro anakatalarak ani a Ngisirael. Nakilimokineta ngitunga esi tamasi, “Tanyarata ngikelamalamak ka ngimurok lu ingaingaasi ka akirurumare loger ka ta tula”, itachakinete esi kesi atamar ejoikinit enyaraate Akuj kech, meere anyarare ngikaram kotere ngakiro alu eyarete. Ejoikinit ngitunga iwapete etal ka ngakitatamet a Ekapolon Akuj. Nyiiwap ngakiro a ngimurok kainyo ngakasalunak. Eliworosi ngitunga ewowooto anakwap, eriabasi tanyamite akoro. Kotere akoro ka angoit kech, ichienete kesi ekapolon kech ka Akuj kech. Irereorete kesi nadis, kori ekienyiarete kwap, nakaneni emam ibore eanyungarete kesi, pearai ngichan ka aribu. Ee robo, ijukario kesi naribu nakirion chuch. Emam kesi erot epuunotor anakolongit ana a ngichan kangina. Akwap a ngitela a Sebulun ka Naputal, emenyaritae kolong sek. Nakaneni ngirwa lu moi a ekisidi, eliwor akwap ngina na erimae, napei alo Mediterenian toten kide, tanang nakwap na eyei ekwakaye angolol a Yorudan, tanang tani Galilaya na elomito ngitunga a ngakwapea anache. Ngitunga lu aloose anaribu engolikis akicha natiapolon. Alomito kolong nakwap na ngitorubei, nakaneni inwakunit tokona kesi akicha. Ekapolon Akuj, italaka iyong kesi, iatak iyong alakara kech. Elakara kesi alongaren kon loger lo elakarotor ngitunga elemete ngamanat, kori ekorete ngibaren lungatara. Ibil iyong akitoe na aenitere kesi na arai eegos anikech, Ibil aburo na edichere ngisegeta kech. Idwang iyong ebukut lo echiakiarit ngitunga kon, loger lokolong idwangea iyong ngasigerea a Median. Ngamuk a ngasigerea ana itijikinete kesi, ka ngiworui kech daang lu eyakasi ngaakot, emunyari akim. Edoun ikoku aniyok! Kiinakin ngoni ikoku nisapat! Eliwor ngesi ekapolon yok. Enyarao ekiro keng, “Ekatukon Loationon,” “Akuj Namerikanyer,” “Apa Lokajik,” “Ekapolon a Ekisil.” Apolou keng ka ekisil emam esal. Ilunyokin ngesi nados a Daudi, toliwor ekapolon. Itowei ngesi apolou keng, a ngakiro ana etenooko ka na eriyan, napei tokona jik. Atiaku Akuj Namerikanyer asubakin nguna daang. Alemu Ekapolon eriras alokapolok a Isirael, alu eraakasi ngalesea a Yakobo. Eyenunete Ngisirael daang, ngitunga lu elomito lore a Samaria, atamar asubaki ngesi nguna. Inisasi tokona kesi iwogasi, ebalasi, “Aukor ngakais na edukitoe a ngimataparea, nakaneni kilunyokini neni ngakais na ngamoru. Aukor ngikuno, nakaneni kilunyokini ngichekereng luajokak.” Etonyou Ekapolon Akuj ngimoe kech, echuchuu sodi kitijikis kesi. Ngisiria lowae lo alo kide, Ngipilisti lowae lo alo too engaarito ngakituk kech esakete akilikor Isirael. Tani kikoni neni, eringa angoit a Ekapolon Akuj nyedauna, eringa enyoikinit akirirare ngitunga. Nyelunga Ngisirael akisech kech, tani kirirat kesi Ekapolon Akuj Namerikanyer, nyebonguno kesi nikeng. A akolongit a apei, irirae Ekapolon Akuj Ngisirael ka ngikarikok kech, ee robo, etubori akou ka ekosim, ateni a ekitende ka enyait. Ngikasukou ka ngulu eyenikinitae kesi eraakasi akou ekosim kesi ngikadwarak lukaliokok! Ebatasi ngikarikok kech ngitunga lugu nabo ebukakis ngitamen kech. Kotere ngakiro nguna, nyelakakini Ekapolon ngisorok kech epuun, kori nyisieniyete ngesi ngapuseru ka ngikokiok kech, kainyo eraakasi daang lu nyenupito Akuj, nabo esubete naaronok, torono ekiruor kech. Tani kikoni neni, eringa angoit a Ekapolon Akuj nyedauna, eringa enyoikinit akirirare ngitunga. Erirae aronis a ngitunga loger a akim ana inyasuni ngirega ka ngiikwa. Erirae loger a akim ana erirauni anamoni, todirit apuru na einikina kidiama. Kotere anyunyura a Akuj Namerikanyer, Erirauni eriras keng loger a akim anakwap kadaang. Ikokinete ngitunga ngakito a akim, nyisieni itwaan lokaatokeng. Awadaang anakwap, emoriakinosi ngitunga ibore cha daang tanyama, nakaneni nyimwokete. Enyami itwaan daang akiring a ekidunyet keng! Ejikinosi ngitunga a Epiraim ka lua Manase, ani imorikin kitijikis Yuda. Tani kikok neni, eringa angoit a Ekapolon Akuj nyedauna, eringa enyoikinit akirirare ngitunga. Oitiakoi! Abe etioko nginyas ianyunete esi! Esi lu irokete ngitalio lu nyeriyan lukichiakiaret ngitunga kang. Kotere erot ngolo, kitedepasi ngikebootok na eriyan, ka akimik ngitunga lukebootok na iyookino. Sodi todemareta ngapuseru ka ngikokiok ngiboro kech. Ikokinete esi ai akolongit na eriras? Ikokinete esi ai akolongit na eyaunea Akuj eriras anakwap anakalonan? Imatarosi esi nika ngae kingarak? Aliwae iweeta esi ebari kus? Emam na isubakinete esi pearai arabanikin ka ngirikon wapei, kori aarakino lojie. Tani kikok neni, eringa angoit a Ekapolon Akuj nyedauna, eringa enyoikinit akirirare ngitunga. Tolim Ekapolon Akuj tama, “Asiria! Asiria erai esebo a angoit kang, ka aburo a anyunyura kang. Amearit ayong kesi lotunga lu nyemunosi Akuj, lotunga luketongoito ayong. Amearit ayong kesi akidem ka akoko ta akipudare ngitunga loger a apua alorotin.” Nakaneni esaki ekapolon a Asiria asubakin naaronok na erai ngakeng a ilope. Esaki amunyar ngakwapea nakaalak. Kainyo iwoga ebala, “Eraakasi ngikarikok a ngasigerea kang ngikapolok! Alemari ayong ere a Kalino loger lokolong alemarea lo a Karikemich. Atolema ere a Amas, loger lokolong alemarea lo a Aripad. Atolema lo a Samaria loger lokolong alemarea lo a Damasko. Ani kalemarit ayong ngapolosio na ilipito ngakujo nasubuna, ngakujo nakaalak akidwang na Yerusalem ka Samaria. Enyasu ayong Samaria ka ngakujo keng nasubuna daang, nabo asubakini napei nguna ani a Yerusalem ka ngakisikwaanet na ilipitae kaina.” Na erumorea Ekapolon etich keng daang alomoru a Sion ka Yerusalem, irirae ngesi ekapolon a Asiria kotere ekiwog lo inisar ngesi ebala, “Asubak daang kotere ngikilinga kang. Agogong ayong, nabo aos atochwaana. Alema ayong ngikukuorin lu etiakito ngitunga sodi atolema ebari kech. Epuda ayong ngikapolok kech loger a emong. Ekote ngibukui anakwap ngakais a ngikieny, atochunak ayong ebari kech loger lo echunakinea itwaan ngabeyei. Emam tani ipei kech ni ipukupukokini abeben keratak ayong, kori emam ni erukini keteriangak ayong!” Nakaneni ebala Ekapolon Akuj, “Epedori aep atamar apolot akidwang itwaan ni etingit a? Epedori egirigir akinisa akidwang itwaan ni etubio a? Nyepedori aburo akikear itwaan, itwaan ngesi ikeari aburo!” Kotere nguna, Akuj Namerikanyer, eyauni edeke kirira ngasigerea keng na egogong. Emini akim na erirae nawat kech. Akuj, na erai akicha a Isirael eliwor akim, Akuj a Isirael na italeuno, eliwor asarae, na emunyari ibore daang tani ngiikwa ka ngirega a akolongit a apei. Ngamon ka ngamanat nakebuseak inyasunio lokojokon, loger lo inyasunea edeke itwaan. Ekidiekuunete ngikito lu idongete, epedori tani ikoku akimarun. Ngirwa ngulu, Ngisirael lupiyayek, nyigienokinosi nabo ngitunga lu adikino emunyarete kesi. Igienokinosi kesi dir Ekapolon Akuj, na erai Akuj a Isirael na italeuno. Ngisirael ngidikidio lu idongete, ebongunete nia Akuj kech anakaagongon. Tani tokona kelalak Ngisirael loger a asinyen ana eyei lokwaas a anam, ngidikidio make kesi ebongunete. Idarit ngitunga amunyaro, na itemokino eanyunete. Ee robo, eyauni Akuj Namerikanyer nginyas nakwap daang, loger lokolong alimunio. Ebala Ekapolon Akuj Namerikanyer, “Ngitunga kang, lu ilomito Sion, nyieam ngitunga a Asiria, tani bo kiboliatar esi loger lokolong a Ngimisiri. Wadiochichi idongit, tadaun eriras kang anikus, sodi atomunya ayong kesi. Ayong Ekapolon Akuj Namerikanyer, edesi kesi a akulit kang loger lokolong edesea ngitunga a Midian Anataaba a Oreb. Erirae ayong Ngisiria loger lo eriraa Ngimisiri. Ani enangi ngirwa ngulu, kalachakini ayong esi anapolou a Asiria, nyeepotier eegos kech alosegeta kus nabo jik.” Alemasi ngasigerea a ngimoe ere a Ai. Etorut kesi Migiron. Aisikis eegos kech alo Mikimach. Ekalama kesi apak, ngikaperok Geba nakwaare. Abul ngitunga a ere a Rama, amatarosi ngitunga a Gibea alo erai ere a Saul. Ngitunga a Galim, kiremasi! Ngitunga a Laich, topupokisi! Ngitunga a Anasos, tachalutu! Amatarosi ngitunga a Madimena ka lua Gebim, esakete ayuun. Akolongit naga eyakasi ngimoe lore a Nob, imanito emoru a Sion lo eyei lore a Yerusalem. Etubori Ekapolon Akuj Namerikanyer kesi loger a ngaten ana etubunio alokitoe. Etiyauni ngesi lu inisasi ka lu iwogasi kisurum ngileech. Iteli Ekapolon Akuj kesi loger a ngikito aluuchik alu itelio a aep anamoni, loger lo itelere ngikito luajokak a Lebanon! Imineauni ateni anatorom a Daudi, erupuni ateni ngina anakuruas keng. Emini etau a Ekapolon Akuj nikeng, nak aosou ka achwaanu, etau a arere ngakiro ka ationis, etau lo eyenea ka akiker Ekapolon Akuj, tojoik ngesi akiker a Ekapolon Akuj, nyetubi ngesi ngakiro kotere nguna itee kori nguna epupi. Pearai etubi ngakiro alukebootok eriyan sodi toik lupalag. Erami ngesi ngitunga a eriras a akituk keng, sodi totoka luaronok. Enapi ngesi ateneanut loger lo enapitere aruba anaabor, tanap amuno loger lo enapitere aruba anachir. Iboikinosi ngipeei ka ngamesekin wapei, eurienikinosi eris ka ikale wapei. Edakasi ngitak a ngaatuk ka lua ngingatunyo aapei, kiyok ikoku niichi kesi daang. Edakasi ngaatuk ka ngibuin aapei, tourienikinos ngitak kech wapei. Edakasi ngingatunyo nginyia loger a ngaatuk. Eboliakini ikoku alodiyete akai a emun, irepakini ikoku akan kai a akipom, nakaneni nyekonyio. Sion lo erai emoru a Akuj nyemini ibore nikawanan kori niaronon. Ilelebun ayenut na eyenere Ekapolon Akuj nakwap, loger lo ilelebakatar ngakipi nanamea. Ebuni akolongit na eliworor ekapolon lokitetet lo itorunit nalesea a Daudi, emachar alobukui. Echunarosi ngibukui nikeng kidodikis arimatoi. Na enangea akolongit ngina, ebuuni Ekapolon a agogongu keng ngitunga keng lu idongito Asiria, ka Misiri, ka Pasiros, ka Kuch,*g** ka Elam, ka Babilonia, ka Amas, ka ngikwaasea a nganamea ta ngikwarin, tobuu a agogongu keng. Ikeari Ekapolon Akuj apendera na eliwor abendera lo idodikini ngibukui atamar echuni ngesi nabo ngitunga a Isirael ka lua Yuda lu epetara, tobuu kesi alowaitin kadaang a akwap. Edaun etereku a Isirael, inyasunio amoitanut a Yuda. Nyeringa Isirael etingi etereku kotere Yuda, nyeringa Yuda eliwor emoit a Isirael. Imorikinosi aapei kitijikis Ngipilisti alo too, toremo ngitunga lua kide. Idwangete kesi Edom ka Moab, kiwapa Ngiamon ngakiro kech. Itooni Ekapolon Akuj apas a Sues, Itukutuni ekuwam lokariran kitoon angolol a Eupurate, sodi kimiek ngingololin ngikan-kaarei lu epedori itwaan daang akikalam. Emini erukudi loapolon lo epudunere alo Asiria, lo itorete ngitunga keng Ngisirael lupiyayek, loger lokolong kata apaakech na apudunioto alo Misiri. Na enangea akolongit ngina, eeokinete ngitunga tamasi, “Ee Ekapolon Akuj, kabuakinit alakara! Kainyo kingoikinit kolong iyong ayong, nakaneni adaun tokona angoit kon, kisililing iyong ayong. Erai Akuj akayuunan kang, Egienokin ayong ngesi nyaemi. Ekapolon Akuj erai ngikilinga kang, aeokini ayong ngesi ngesi kayuununi ayong. Ikoni ayuuno a Akuj alotunga keng ngakipi nakaalimok anitwaan ani enyamit akure.” Na enangea akolongit ngina, eeokinete ngitunga tamasi, “Tobuakisi Ekapolon Akuj alakara! Tanyarata ngesi kingarak. Tolimosi ngakiro na asub ngesi alobukui kadaang. Tolimosi atamar epol ngesi. Toeokisi Ekapolon Akuj ngieosio lu ekipur, kotere ngakiro naapolok asub ngesi. Kiirasi ngitunga a akwap kadaang ngakiro nguna. Kirema itwaan daang ni eyei Sion toeok! Epol Akuj a Isirael na italeuno, eyei kiding ngitunga keng.” Araakasi nugu ngakiro na adwario kotere Babilon na edodikini Akuj Isaya lokookeng a Amos. Kikeasi abendera a ejie alomukura alo erai alaireng! Kikeasi ngasigerea akituk kikeasi akan sodi tanyarauneta kesi tolomuneta lodorin a ere alokenisan kangolo. Ebala Ekapolon Akuj kona, “Ayong ilope adungok luseuna kang, anyarau ngikajwok kang lumaseniko, kinisaka, sodi kirirata ngitunga lu angoikinit ayong.” Topupokisi echale alomoru, echale a ajore anatikaalan! Echale a ngibukui ka ngapolosio echunasi! Akuj Nadmerikanyer itonyounit ngasigerea keng lojie. Eponito anakwapea anakalonak, anasalunet a akwap. Enyounit Ekapolon Akuj akinyasun akwap daang a angoit keng. Toowanikisi iriabasi! Kainyo aapuu akolongit a Ekapolon Akuj, akolongit na eyaunea Akuj Naationon nginyas. Isaalikini ngakan a ngitunga kadaang, ebuli ngitunga daang kipirisaar ngitai. Ebuli ngitunga lokojokon, toupia nikaapilan ngawat, loger a apipilu a aberu ana eriaba akidoun. Ekienyanakinosi ngitunga make iilit, tatakanu atamar irumito ngileech. Ebunit akolongit a Ekapolon Akuj, akolongit nakamoitanan, a anyunyura keng ka angoit. Inyasuni akwap toliwor alaireng, tomunyarae ngikasechak lu eyakasi nakwap. Ngikanyer daang a adis ejongoote akicha. Eribokini akolong napei ipiripiruunea, ejongoe elap akicha. Ebala Ekapolon Akuj, “Ayauni ayong ngakiro naaronok nakwap erira ngitunga luaronok daang kotere ngasechesea kech. Etiditeuni ayong daang lu inisasi sodi erira daang lu iwogasi ka lu emoitaka. Etiliwori ayong ngitunga lu echiching akidwang egolit loasegan. Ee robo, echichinguunete akidwang egolit a Opir. Kotere anyunyura kang, ayong Akuj Namerikanyer, akolongit na angoitor ayong noi ngina, etamaranikini adis, etirikirikok akwap kiyotok ani eyei. “Ngitunga a ngakwapea anache lu eyakasi Babilon, ematarosi nakwapea kech, topetaros loger a ngagetei ana ematara alokerikak, kori loger a ngamesekin ana emam ekeyokon. Itwaan ni eanyunio daang, ichumio topele ekileng kayaaye, nicha eanyunio daang, eario. Ipudaario ngide kech totoka anakonyen kech, tokokoae ngawiyei kech, totikoonoroe ngaberu kech.” Ebala Ekapolon Akuj, “Echichiunit ayong ngitunga a Medes kitijikis Babilon, ngitunga lu nyesakete ngaropiyae, ngitunga lu nyeminari egolit. Earete kesi ngisorok a ngimalea a amod. Nyitimi kesi akiar ngide lu enakete, nyisieniyete kesi ngide. Babilonia ibus anapolosio kadaang, inisatar ngitunga keng. Nakaneni ayong Ekapolon Akuj, ebelukwaari Babilon loger lokolong ebelukwaarea Sodom ka Gomora. Emam itwaan elomi neni nabo jik. Emam Emwaarabut lo ewowoot lo igurori eam keng kaneni. Emam ekeyokon eramari ngibaren keng tadaka neni. Eliwor neni ni elomito ngitieng a moding, ka ni edukito ta tula ngakais kech. Elomete ngikaleeso neni kichuro ngatirikiki kaneni. Ngakais kech na edirisito ilelebun erue a ngibuin aluongora. Iirario ngikweei eruosi anakais a ngikapolok kech. Anang esaa a Babilon! Edikino ngirwa keng edaun.” Isieniyete Ekapolon Akuj Ngisirael nabo, sodi toseu kesi tarata ngikeng a ilope. Ebuari kesi nakwap kech, pot ngitunga a ngakwapea anache kiruko ka kesi kaneni. Ingarakinete ngibukui lukaalak Ngisirael tobongut nakwap nakolong ainakini Ekapolon Akuj kesi, sodi tarata ngibukui ngikedalak kech kaneni. Ngitunga lukolong arikorito Ngisirael, eliworosi tokona ngirikon a Ngisirael. Epolokinete Ngisirael ngitunga lukolong echiakiarito kesi. Ngisirael, akolongit na kisiangarea esi Ekapolon Akuj anaboliaro, ka apipilu, ka etich lo kidesikinitae, ikianatar esi ekapolon a Babilon toeonokis kona, “Adakar ekapolon lokamoitanan, nyeringa ichiakiari itwaan iche nabo jik. Eala Ekapolon Akuj ngikilinga a ngikapolok aluaronok, asalu agogongu na epolokinitotor kesi. Echiakiarito kesi ngitunga a amoitanut, toboliatar jik ngibukui lu edwangete. Eanga tokona akwap daang eliling, eeo itwaan daang imaritete. Elakarosi ngidomou ka ngichekereng a Lebanon, kotere ekapolon lo adakar, ebalasi, ‘Kona tokona atoanea ngesi, emam itwaan eringa kitubi ngoni!’ Ikurukuruokin nia ngikatoak akisiriam ekapolon a Babilon ebuni. Enyounete ngikaram akimalare ngesi, ka daang lukolong araakasi ngikarikok a akwap. Daang lukolong araakasi ngikapolok a akwap, enyounete alokicholongo kech a apolou Isuruorikinete daang ngesi ebalasi, ‘Ipalagag iyong dang loger kosi! Ikwaanikin iyong ka sua!’ Atiyaun ekipur kon anangu lokatoak aapei ka erue a ngaburucho ana kieonokinere iyong. Inapakin iyong lojemu lo a ngikur, kimukokin eworu lo a ngikur. Ekapolon a Babilon, etop lo a ataparach lokariran, ichakun iyong anadis! Idwangeene kolong iyong ngibukui, nyelo tokona kichakun kwap. Itameene kolong iyong alotau kon ibala, ‘Adoki kidiama nadis, ewaak ekicholong a apolou kang yaaye ngikanyer lukalonak, eboikin kidiama emoru lo alokwap yege, ni iriameenete ngakujo. Adokari ayong epor ngidowon, atoliwor lo Apol Noi.’ Nakaneni iyong tokona logo kitiyaun lokatoak, nakipany nakooyen noi. Kikienyikinete iyong ngikatoak nikooyen iumwokinito, sodi kingitas tamasi, ‘Itwaan en dir ngesi nikolong etamarani akwap ka ngapolosio a? Ngesi lokolong enyasuni ngirerea kiloch akwap toliwor ariet a? Ngesi lokolong pealachanakini ngitunga lu eenitae kori peemianakini tani toloto nawiyei a?’ Eperete ngikapolok luche a ngakwapin daang analielin kech ana apolou, nakaneni emam iyong aliel, achakar akwaan kon tobos. Etikito ngawat alu kolong aario alojie, kitachakakin iyong ka kesi napanya a ngatabab, kipudae kaneni. Aloger inyasunea iyong akwap kon, taar ngitunga kon a ilope, nyikinukio iyong a arimatoi loger a ngikapolok aluche. Emam ngitunga lukaronok a awi kon lu epuunosi. Isiakini tokona aaranot! Etoakete ngide a ekapolon kalo kotere ngasechesea kata apaakech. Emam tani ipei kech ni epolokini akwap.” Alimu Ekapolon Akuj kona, “Anyoikini ayong Babilon etijik sodi enyasu. Emam ibore aisikini ayong, nyaisikini ngide kori ngitunga epuunosi. Alimu ayong Ekapolon Akuj nguna. Etiliwori ayong Babilon ngayengiyengea a ngakipi, toliwor ta tula elomito neni. Ekisari ayong ibore dang alo Babilon enyasu. Alimu ayong Akuj Namerikanyer nguna.” Ekong Akuj Namerikanyer, ebala, “Nguna arekinit ayong kesi esubakinosi. Nguna asaki ayong asubakin, kesi esubakinosi. Amunyari ayong ngitunga a Asiria alo Isirael ana erai akwap kang, epudae ayong kesi alokidiama ngimoru kang. Alachakini ayong ngitunga anakito a Ngisiria ana eenitere ngimosiringan kech. Alemari ayong eegos lo inuit ngitunga kang. Ngakiro nguna kesi arekinit ayong kotere akwap daang etia ni etia. Anyoikini ayong akirirare ngibukui daang.” Akuj Namerikanyer ngesi asak asubakin nguna. Ngae iriwokin kiratak? Anyoiki ngesi akirirare ngitunga. Ngae itopegi? Ekaru lo atonea Ekapolon Aas, apon todwarae ngakiro nugu. Ebala Ekapolon Akuj kona, “Ee ngitunga a Pilistia, warasi nyiilakarosi tamasi be abila aburo nakolong kidesere esi. Na etoanea emun, tolunyun akipom. Ngabeyei a akipom, ebekunete emun lo eseleta. Imwokete ngide lu ekingaren a ngikebootok, iboikinosi kesi akaalimon. Nakaneni esi Ngipilisti, kaari ayong esi a akoro, ani ngitunga kus lu epuunosi, ataar. Esi ngirerea a Ngipilisti daang, kiuteto. Kikaloutu toema! Kainyo einiuna edou a apua alokwap, eraakasi daang ngasigerea na emam tani apei kech na ekuriana.” Anukiro kitachakini ngoni ngitunga lu emeunitae alo Pilistia? Kilimokini kesi kona, “Etowo Ekapolon Akuj Sion esikokin, nabo ngulu eboliare, ematarosi neni toyuunos.” Ngakiro nugu kesi adwario kotere Moab. Amunyar ngirerea a Ari ka Kir akwaar apei, adaun Moab. Adokasi ngitunga a Dibon lomukura akigoro. Iutete ngitunga a Moab kotere ngirerea a Nebo ka Medeba. Elurito ka akibany ngabokonya. Ngitunga lu eyakasi lorotin, enapito ngiguniae, lu eyakasi nikalapatan a ere ka lu eyakasi naitae a ngakais, igorosi daang esutonokinete. Ekalout ngitunga a Echibon ka Eleale, enangit akigoro kech Yaas. Aawanikis tani ngasigerea a Moab, epirisaar kesi ngitai. Egoro ayong kotere Moab! Amatarosi ngitunga lore a Soar ka Egilas Chelichiya. Adokasi ngiche iwapito erot lo eteni Luis, igorosi kesi eloose, amatarosi ngiche Oronaim eewanete ani amunyarere. Aono ingolol a Nimirim, aoniyosi nginyia lua ekwaas, emam ibore aliban eringa idongit. Edokete ngitunga adipo a Atiriwae iwokito ebari daang lo angatarete ka ngiboro lusek ekachakinito. Igoro akwap a Moab daang, enangit echale a akigoro Egilaim ka Beerelim. Tani kerengera angolol na eyei lore a Dibon ngaakot, eringa Akuj esaki ayaun nginyas luapolok noi. Lupiyayek ematarosi alo Moab, emeuni Akuj ngingatunyo taara kesi. Ainasi ngitunga a Moab ekapolon lo eyei Yerusalem imesek ni emekinito, anyounete alo Sela kitorut nariet. Ewowooto ngitunga a Moab alodoketa kadaang a angolol a Arinon, loger a ngitak a ngikieny alu ipudunitoe anakais kech. Alimokis kesi ngitunga a Yuda kona, “Ekoe, kisuruoroe sua niajokon, tosubere nguna eriyan, kimukoe sua a etorube loger a ekitoe alo erapit akolong. Kipeyounoe sua kainyo kidokinit anakwap kosi, nyikilimosi kare. Kimiekinae eboikinos nakwap kus. Kiyokoi ani eyakasi ngulu esakete amunyar sua.” (Ngirwa lu erotokinio ekaboliaran, ani edaun ngichan lu esakere amunyar, ngirwa lu engopea itwaan ni eyaunit ekurikur nakwap, ngirwa ngulu, eliwor epei a ngalesea a Daudi ekapolon, epolokini ngesi ngitunga kotere amuno ka amina. Nyitoweyi ngesi asubakin na iyookino, nabo totubeene ngakiro eriyan.) Ebalasi ngitunga a Yuda kona, “Kiira sua ngakiro a ekinis a Moab. Kiyen eger lo iwogar ka abenyo keng, nakaneni erai akiojo ngina daang pas” Ikalounete ngitunga a Moab kotere akwap kech. Ikalounete ani eitunioto ngamugati ka ngarinyo a ngamusabib nakolong anyamete alo Kir Eres. Enyasun ngamanat a Echibon ka ngimusabib a Sibima. Atubosi ngikapolok a ngibukui ngaten kotere emuna. Anangito kolong ngimusabib ngulu lore a Yaser, ani alo kide tananga nariet. Ani alo too, todokasi ekwakaye anam a Amakat. Tokona bocha egoro ayong kotere ngimusabib a Sibima loger lo egoror kotere lua Yaser. Alakakinit ayong ngakiyo kotere Echibon ka Eleale, kainyo nyeringa nabo ekare iirario ani emamakatar ngalemet nakitalakarete. Emam tokona alakara kori ekare eyei namanat naketurupak ngikinyam. Emam ngieosio eeoi anamanat a ngimusabib, emam akirema epupio. Emam itwaan idichi ngamusabib a emuna. Asalu ekare. Egoro ayong akunua kotere Moab, egoro ealolongi kotere Kir Eres. Ituburuna ngitunga a Moab pas edokete kidiama akilip, kori elomete nakais kech na ilipeta kainyo nyechamunio ngakilipasinei kech. Ngakiro nguna kesi kolong alimuni Ekapolon Akuj kotere Moab. Ebala tokona Ekapolon Akuj, “Adaunet a ngikaru a nguuni, engopiari ebari a Moab. Tani kelalak ngitunga keng, ekidioko lu idongete, nabo eliworosi lupalag.” Ngakiro nugu kesi adwario kotere Damasko. Ebala Ekapolon Akuj kona, “Nyeringa Damasko eliwor ere nabo, eliwor asakatan a nginyas. Eramakinio alorerea a Siria jik. Eliworosi ni edakasi ngisipaan, nabo emam itwaan ikilakini kesi kaneni. Engopikini Isirael ni eyuunor, edaun apolou a Damasko. Ngitunga a Siria lu idongete eyarete irumete ngileech loger a Ngisirael alu idongete eyarete. Alimu ayong Akuj Namerikanyer nguna.” Alimuni Ekapolon Akuj kona, “Ebuni akolongit na edaunor ekipur a Isirael, kiloch ebari kech toliwor eboot. Ikokini Isirael amana na etubunio ngakies a ngimomwa tolemae. Ikokini amana na itao sodi kideparae ibore daang anadipo a Repaim. Ngitunga ngidikidio idongete eyarete, ikokini Isirael ekitoe a akimiet, lo ageror ageor keng daang, kidong ngaarei kori ngauni nateni na alokidiama, kidong ngoomwon kori ngakan nateni nache. Alimu ayong Ekapolon Akuj na arai Akuj a Isirael na etaleuno nguna.” Ani enangi akolongit ngina, itamunete ngitunga Akasubunan kech na erai Akuj a Isirael na italeuno. Ilipete ngesi esakete kingarak. Nyeringa nabo igienokinosi ngikenoi a ngakipeyos lukolong asubete kesi ngikulepek, kori nyeringa igienokinosi etich a ngakan kech, lo erai akisikwaanet a akuj anaberu enyaritae Achera, ka ngikenoi lukinomet emitina. Ani enangi akolongit ngina, eramakinio alorerea alu edukitoe ngawasea, sodi kimiekinae inyasuna loger a ngirerea alu kolong aisikinete Ngiipi, ka Ngiamor na amatarotor ani a Ngisirael Isirael, kimuriak iyong Akuj nakiyuununi, na ikoni ataaba na idukea iyong toyuunor. Kotere nguna, tani kitata esi ngikinyam luajokak tolemikis akuj nagela, tani keruput kiealasi akolongit napei ngina, engopiarete ngalemet kus. Akolongit ngina, epete ngichan make, ka apipilu na nyitedekuun. Kiira erue a ejie a ngakwapea anakaalak, eruo loger a anam ana ekulae, loger a erue a ngitoroi alu ekulaate ananam. Ijukuna ngakwapea loger a ngakipi ana ibiruno lokojokon. Nakaneni ikilakini Akuj kesi tamataros nikalonan. Ekutario nikalonan loger a ngatunyeny ana ekusi ekuwam alomoru, ekutario loger a apua ana eyei lokuwam lo edirisit. Eyaunete kesi ebuloi ebong, ani nataparach tongopiarito! Nguna eraakasi atachanot a ngulu kirumiarito ngoni ka ademar ebari yok. Ekwakaye ngangololin a Kuch eyei akwap na epupere erue a ngabeben. Eponenete ngikaweikinak anakwap kangina, etinguunete angolol a Nili a ngatubwae ana esubunitae a atiriwae. Tobongosi nawiyei, esi ngikaweikinak lukapiranak! Yaasi akiroit nakwap kus na etiakito ngangololin, akwap na eyenikinitae tojwono, lotunga kus lukooyak sulut a ngawat, lu eemitae anakwapea kadaang. Topupokisi esi daang lu ilomito nakwap! Kingolikisi apendera ikiario alokidiama ngimoru! Kiirasi aburuch ekutakinio! Kalimokini Ekapolon Akuj ayong kona, “Akienyiuni ayong ani ebooyo alokidiama atokienyik ngalup epali loger a ngakop ana epete niamonan ngirwa lua ngalemet, kori loger lo imaunitor akolong naparan.” Ani eringa ngirwa lua ngalemet, ngirwa lu epukiareta ngatur toliworos ngamusabib na ekokito, emunyari emoit ngitunga a Kuch loger lo itelorea ekileng ngaten a emusabib. Imiekinio ngawat a ngasigerea kech ana etoakete tanyama ngataruk ka ngitieng a moding. Eliworosi ngawat nguna akimuj a ngataruk ngirwa lua akamu, toliworos akimuj a ngitieng a moding ngirwa lua akiporo. Ngirwa ngulu, einunio Akuj Namerikanyer ngakipeyos anakwap ana etiakito ngangololin kana. Akwap na eyenikinitae tojwono, alotunga alukooyak sulut a ngawat, alu eemitae anakwapea kadaang. Einunio ngesi ngakipeyos nguna alomoru a Sion ani ilipitere Akuj Namerikanyer. Ngakiro nugu kesi adwario kotere Misiri. Ebunit Ekapolon Akuj Misiri, ebunit edokit edou lo ibiruno. Emaranete ngakujo nasubuna a Misiri alongaren Ekapolon Akuj, ebulit ngitunga a Misiri daang ipirisaara ngitai. Ebala Ekapolon Akuj kona, “Echuchukini ayong Ngimisiri tojwoto kesi make. Itijikini ere epei, kitijik loche, nabo enyoikini ekapolon epei tonyoik loche. Ekurukuruokini ayong ngakiro na ereto Ngimisiri daang ka ekileenu kech. Ematarosi ngakujo kech nasubuna tamataros lokaram ka ngimurok esakete akingarakino. Ewaakini ayong Ngimisiri nakan a ekapolon alokamoitanan, epolokini kesi ekapolon lokaadengan. Alimu ayong Ekapolon Akuj Namerikanyer nguna.” Ekidiekuunete ngakipi a angolol a Nili, iyosi akijuar jik. Ebosete ngiporotoi a angolol, kijuasi ngayana keng tooko. Ebosiarete nginyia daang ka atiriwae lu eyakasi lokwaasea a angolol. Idongete ngikwaasea a angolol a Nili elapat. Ngikinyam lu itakinio daang eokete tokutarae nikalonan. Ikalounete ngikechiemak daang tosutonokis, kainyo aliworosi ngikorobicho ka ngipuutei kech ngika pas. Ngulu edonyete ngiworui lukaanikak, ka lu etokete epamba, elungakinosi. Ngikarikok a akwap lu eyenikinitae, emunyario, daang lu igiritae eraakasi ngikunonoe a ngitichisio, ialolongete. Ebangaaka ngikarikok a ere a Soan! Ngikasukou a Parao lukoosok alo Misiri, iruorosi ngakiro nabaang! Epedorete kesi kwaai alimokin Parao tamasi, “Kirai sua ngide a ngikoosok, kirai ngide a ngikapolok alungorok.” Kasio robo Parao, nyaalu tokona ngikasukou kon lukoosok ngulu? Kimiek kitolimokis iyong ngakiro na esaki Akuj Namerikanyer, asubakinea Misiri. Ebangaaka ngikarikok a Soan, ingalatae ngikarikok a Mempis. Ngikarikok a ngitela lu eyenikinitae kesi etooliyosi Misiri. Itilimuni Ekapolon Akuj kesi ngakiro na eyaunete ekurikur, sodi kiteroterokin Misiri anakiro keng kadaang, loger a itwaan ani irakarit epurot, ani iterotero toleki. Emam itwaan tani ipei alo Misiri, kerai ekarikon kori itwaan pas, kerai ekabaran kori ekebootonit, ni epedori akingarakin. Enangi akolongit na ekuriakearotor ngitunga a Misiri loger a ngaberu. Ebuli kesi tamaranikis na ingolikineta Akuj Namerikanyer enyoikini kesi kirira. Eemete Ngimisiri akwap a Yuda. Napei cha elimunere ekiro be Yuda, eemete Ngimisiri daang kotere ngakiro na esaki Ekapolon Akuj asubakinea kesi. Ani enangi ngirwa ngulu, ngabukui a Ngaeburaniae ngesi ianete ngitunga alorerea a ngikan alo Misiri. Ikongete ngitunga a ngirerea kangulu tamasi kimunokini Akuj Namerikanyer. Enyarao epei a ngirerea kangulu, “Ere a Akolong.” Ngirwa ngulu, emini ekeno a ngakipeyos a Ekapolon Akuj kiding akwap a Misiri, ani apir a amoru na italeunitoe kotere ngesi, emini lokukuoru a Misiri. Eliworosi ekeno ka apir emachar lo elimori atamar eyei Akuj Namerikanyer Misiri. Ani keboliare ngitunga kaneni, sodi kikaloikis Ekapolon Akuj, emeuni ngesi ekayuunan lo elachuni kesi. Idodiun Ekapolon Akuj alotunga a Misiri, sodi tolimosi Ngimisiri ngesi, kilipa ka alemikin ngakipeyos na inomio ka ngadekon. Nabo ikongete kesi ani a Akuj, sodi kirichakis ngakiro na ekongete. Irirae Ekapolon Akuj Ngimisiri, ani nabo kitangalek kesi. Ebongokinete kesi ngesi sodi kiira ngesi ngakilipasinei kech, kitangalek. Ngirwa ngulu, emini erot loapolon napei alo Misiri tanang Asiria. Erotokini itwaan a Asiria toloma Misiri, torotok Emisirit toloma Asiria, sodi kilipa Ngimisiri ka ngitunga a Asiria aapei. Ngirwa ngulu, etupakinosi Isirael, ka Misiri ta Asiria, tarata ngakwapea nauni nguna apiaro anakwap kadaang. Epiari Akuj Namerikanyer kesi tama, “Apiari ayong Ngimisiri lu eraakasi ngitunga kang, apiari Asiria lukolong asubuni ayong ta Isirael lu eraakasi ngitunga kang luseuna.” Ekaru lo amearea ekapolon a Asiria lo anyaritae Sarigon, tomea ekarikon loapolon a ngasigerea akitijikin ka alemar Achidod, ngirwa ngulu, alimuni Ekapolon Akuj ngakiro kisitoru nia Isaya lokookeng a Amos, ebala, “Kape talacha egunia lo inapit iyong anaabor ngolo, nabo tobuto ngamuk na eyakasi nakejen kon.” Tosubak Isaya nguna, sodi tolot emuner toturi. Ani elemario Achidod, tolim Ekapolon Akuj tama, “Alot ekasuban etich kang Isaya emuner toturi a ngikaru a nguuni. Erai ibore ngini idodiunit ngakiro na moi esubakinere Misiri ka Kuch. Erikori ekapolon a Asiria ngirikon a ngakwapea anaarei kanguna, luuchik ka luapolok, toriko daang emuner toturete, emam ibore erapit ngiwosiwos! Erai ngileech ani a Misiri. Iumwokinete ngulu igienosi Kuch kinisatar Misiri, tadaun akigieno kech. Ngirwa ngulu, elimunete ngitunga lu elomito lokwaas a anam a akwap a Pilistia tamasi, ‘Wae! Anukiro nugu asubakin alotunga alu ngoon kigieno atamar kesi kiyokiyete alokapolon a Asiria! Kikokini tokona ngoni kipuun ai?’ ” Ngakiro nugu kesi adwario kotere Babilon. Epote ngakiro naaronok anakwap anaketubulon, loger a ekuwam aloapolon alo edirisit nariet. Kedodikin ayong ngakiro naketubulok, erubakinit ekademan edemi, erubakinit ekenyasan inyasi. Ee ngasigerea a Elam, kitijikisi! Ee ngasigerea a Media, kiriama ngirerea! Etubori Akuj aboliaro daang na ayauni Babilon. Ngakiro na engolikini ayong ka akiirar anakitoodikinet kangina, ketubul ayong noi kapipilikis loger a aberu ana epipilikinit ariaba. Ketukuruwo apipilu tani akiirar, ketukuruwo ebuloi tani akingolikin. Ebukakin akou kang, kaupia ebuloi akwaan. Edarit atabong naajokon nakaneni emam nakainu pearai ebuloi. Engolik ekimuje esubakinitae, apetakin ngawarui na iboikinotor ngipeyok. Imujete kesi tamaase. Atipei eirar anyaranot ebala, “Ngikapolok! Tolemutu ngaupwala kus!” Ani erumor katolimok Ekapolon ayong tama, “Kape kiwaak itwaan niketeon, tolimok atamar tolimo ngakiro na ingolikini daang. Ani kingolik ngitunga edokito ngangolei eloose a ngaarei-rei, ani kingolik ngitunga edokito ngisikiria ka ngikaala, ejoikinit ngesi iseme lokojokon.” Irema eketeon ebala, “Ekapolon, awo ayong alowae kang akwaar ka apaaran.” Kingolik, nyelu adolut! Edokito ngangolei a ngaarei-rei. Alimo eketeon ngakiro ebala, “Aukor Babilon! Ngakujo nasubuna daang nakolong elipitae, abwang achakakin nalup.” Ee Ngisirael, lu iraakasi ngitunga kang, kidaun esi loger a ngakanoi. Kalimok tokona ayong esi ngakiro naajokak na eirari ayong ani a Ekapolon Akuj Namerikanyer, ana erai Akuj a Isirael. Ngakiro nugu kesi adwario kotere Edom. Kanyarit itwaan alo Edom, “Nyaai eketeon, wori edaunor akwaar? Iwalari wori?” Atatachu ayong atama, “Ebunit ataparach, nakaneni ebuni akwaar dang. Ani kisaki iyong akingita nabo, kape tobongu kingis.” Ngakiro nugu kesi adwario kotere Arabia. Esi ngitunga a Dedan, Esi lu iwoose anarieta a Arabia. Esi ngitunga lu ilomito Tema, Kitamata ka akisumuj lu edokinito. Edokinito kesi anakwaaras ana esakete akiar kesi. Edokinito alomalea a amod alu esakete akigum kesi. Edokinito alokurikur a ejie. Ani erumor katolimok Ekapolon ayong tama, “Adaunet a ekaru a epei, edaun ekipur a Kedar daang. Ngikagumak a ngimalea a amod kesi ejwoko alotunga a Kedar, nakaneni tani ngulu, ekidiekuunete lu idongete. Alimu ayong Ekapolon Akuj na arai Akuj a Isirael nguna.” Ngakiro nugu kesi adwario kotere Adipo a Ngakitoodikinet. Anukiro nugu? Nyo idokaritotor esi daang naitae a ngakais kus? Nyo ichalatar esi? Eka inyo ekichur? Kotere nyo eyakar ekare lore? Ngitunga kus lu atoka, pearakinio lojie, kori peajiete kesi taarae. Amatarosi ngikarikok kus daang, sodi kirumunae eringa nyegumara tani emal epei a amod. Kimiekinae tokona ayong egor ariaba, kotere ngitunga kang lu amunyar, warasi nyiisak akisililing ayong. Erai akolongit naga aka ebuloi, ka ekurikur ta ngibiler Anadipo a Ngakitoodikinet. Ekapolon Akuj Namerikanyer ngesi kiinu ngoni ngakiro nguna daang. Aukor ngawasea a ere yok, ikamete ngimukur ngitoilio a ngitunga alu igorosi esakete akingarakino. Apote ngasigerea anakwap a Elam edokito ngangolei, totingito ngakawa ka ngimalea. Egangakinito ngasigerea a akwap a Kir ngaupwala kech. Ngadipoe naajokak a akwap a Yuda, kilelebun ngaurukukui a ejie, torekinos ngasigerea na adokito ngangolei lodorin a Yerusalem. Alema Ekapolon Akuj ibore ni eyuuni Yuda daang. Akolongit ngina, igienosi esi ngiboro lujiet lu ayakasi kai a Amoni. Naingolikineta esi ngapedon a ngawasea a Yerusalem atamar elalak, ipot esi toloto tooko ngakipi na akar ana alokwap. Kimarut esi ngakais na ayakasi Yerusalem, dio toyatasi epewae sodi toriamuneta ngamoru na idukioto awas nabo. Todukokis esi ekipor lo ikamuni ngakipi na eleleunito anakar anangorot. Nakaneni nyemisikina esi Akuj, nakolong arekini ngakiro nguna daang kolong a angorot sodi tosubakinotor. Ngirwa ngulu, Ekapolon Akuj Namerikanyer asaki esi kigoro tosutonokis, toluro ka akinap ngiguniae. Nakaneni akidwang esi asubakin nguna, ipot esi talakaros kimariteteto, tongola ngimongin ka ngimesekin, tanyama akiring, tamata emuna. Tamasi, “Emuja, atamata, kainyo kitoaki moi.” Ekapolon Akuj Namerikanyer kedodik ayong ebala, “Iteni nyerimakinio kesi jik kotere akisech naga tanang akolongit na etoaketa. Alimu ayong Ekapolon Akuj Namerikanyer nguna.” Kalimokini Ekapolon Akuj Namerikanyer ayong atamar atolot nia Chebina, alo aweikinit awi a Ekapolon, atolimok kona, “Nyo kon eyei nege? Ngae kon eyei nege, ibokakinitor iyong aliel kon natabab na akook a emukura? Tani kesibit iyong eya ngikilinga, kikopuni Ekapolon Akuj iyong kimasa nikalonan. Kilemuni ngesi iyong kisirimok loger a epira, sodi kibaariyo nakwap nabalany. Totoan kaina alokiding ngaurukukui kon na ejie na inisar iyong. Iyau iyong ngileech nawi a ekapolon kon. Kilemari Ekapolon Akuj iyong alotich kon, sodi kitotiyau anapolou kon.” Tolimok Ekapolon Akuj Chebina kona, “Akolongit na esubakinotor ngakiro nguna, aomuni ayong ekasuban etich kang Eliakim, lokookeng a Ilikia. Etanapi ayong ngesi eworu kon lo a etich, ka aruba, sodi ainak apolou daang nangoon itingit iyong. Ikokini ngesi apakeng a ngitunga a Yerusalem ka Yuda. Ariongakin ayong loseget keng engaet a apolou a ekapolon Daudi. Ngesi etingi engaet a apolou. Ngakiro na engaari ngesi, emam itwaan egoli. Nguna egoli ngesi, emam itwaan engaari. Etirokini ayong Eliakim loger a apir, sodi toliwor ngesi ekapolon lo erimae anawi a Daudi alo erai apakeng. “Nakaneni eliworosi ngiyenet keng daang eegos anikeng. Igienokinosi daang ngesi, luapolok ka luuchik. Itiri ngesi ngakiro daang naachik ka naapolok. Nakaneni akolongit na eliworor Eliakim lopalag, losek ekoni apir na etirokina, eolokoki sodi toukor. Tasalu eboyor a ngakiro kadaang ana kolong etirit ngesi. Alimu ayong Akuj Namerikanyer nguna.” Ngakiro nugu kesi adwario kotere Tiro. Kikaloutu, esi ngikadokak nganamea! Enyasun Tiro lo erai ere kus, emam ngakais ka ni ewaatar ngatubwae, arata daang asakatan pas. Iirarete esi ngakiro nugu akolongit na ebongunioto ngatubwae kus alo Kupuro. Kiuteto, esi ngimuchurus a Sidon! Imearete esi ngitunga kus toloto ekwakaye anam akigiel ka agielanar ngikinyam lu itao anakwap a Misiri, ka emuchuruseenu ka ngibukui luche. Ere a Sidon, kirumito iyong ngileech! Kainyo kinger iyong anam ka nituluk a anam, ebala, “Nyeriabakina ayong nakanuan kori nyidouno nyitanuna ayong ngide sapa kori lupesur!” Eriangakinosi tani Ngimisiri nairareta atamar enyasun Tiro. Kikaloutu, esi ngitunga a Poinike! Tamataros pan nakwap a Sipania. Erai logo dir ere lokolong kus a Tiro a? Ere lokolong a alakara, lokolong esiakini a angorot a? Ere lokolong aloseenete ngitunga keng ekwakaye nganamea toloma nakwap a ngitunga aluche a? Ngae arekini ngakiro nugu daang atamar esubakinosi alo Tiro ere lo erai nikeng aponeeneta ngikapolok, ere lo eraakasi ngimuchurus keng ngikapolok lu akeritae anakwapea kadaang? Erai Akuj Namerikanyer ngesi arekini ngakiro nguna daang. Asubakini kongina sodi kinyasunea ekinis kech, ka akititing ngileech ngulu ekeritae anakwap. Esi lu ilomito Sipania, Kapesi kitata ngamanat kus! Emam ibore kiratakini esi nabo. Ekea Ekapolon Akuj agogongu keng alokidiama anam sodi tadaka ngapolosio. Adungu ngesi atamar kinyasunae ngirerea lua ngawasea anakaagongok lu eyakasi Poinike. Alimu Ekapolon Akuj kona, “Iyong ere a Sidon, asalu alakara kon nabo ichiakiaritae ngitunga kon. Tani kematarosi kesi Kupuro, nyeyuunosi tani kaina.” ( Erai meere ngitunga a Asiria pearai ngitunga a Babilonia kolong alakakinete ngitieng ipudaate ere a Tiro. Kesi adukete ngakais na edirisito kisiriama ere kitijikinioto, toukonosi ngakais a ere kinyasut.) Toowanikisi, esi Ngisipania lu idokete nganamea! Enyasun ere lokolong igienosi esi. Enangi ngirwa lu imuriakinor Tiro a ngikaru a ngitomwon-kaarei, alu eriyan ka ngikaru lu eyarea ekapolon. Adaunet a ngikaru kangulu, ikokini ere a Tiro amalaat na eramakinitae etum ebeyo, “Tolem agita kon toeor, kirimio ere, iyong amalaat nakolong imuriakin! Toeok ngieosio lukebuseak lukaalak, kitobongokinioto ngikiliok nabo.” Adaunet a ngikaru alutomwon-kaarei kangulu, itamuni Ekapolon Akuj Tiro nabo, sodi tobua lomuchuruseenu lokolong keng ngorot, nabo togielanar ngesi napolosio a akwap daang. Ngaropiyae na eriamuni ngesi alomuchuruseenu, itegeliario tarata ngaka Ekapolon Akuj. Nyikachakinete kesi ngaropiyae nguna tarata ngakech, pearai einakinio ngulu ilipito Ekapolon Akuj togieleta akimuj kech ka ngiworui. Inyasuni Ekapolon Akuj akwap kimiek erai alaireng. Emojirikini ngesi akwap sodi topeta ngitunga. Eriamunete ngitunga ngichan ngipei. Ngichan lu eriamunete ngitunga, ikwaan ka lu eriamuni emuron. Lu eriamuni ekedalan, ikwaan ka lu eriamuni ekapolon keng. Lu eriamuni ekagielan, ikwaan ka lu eriamuni emuchurut. Lu eriamuni ekepotoron amicha, ikwaan ka lu eriamuni ekaaran amicha. Lu eriamuni ekebootonit, ikwaan ka lu eriamuni ekabaran. Inyasunio akwap lokojokon tomunyarae. Alimu Ekapolon Akuj, nabo esubakinosi. Eoniyori akwap, sodi torinyio, abul akwap daang arinyoki, abosiasi akwap ka adis. Enyasut ngitunga akwap angero ngitalio a Ekapolon Akuj, nabo nyemisito ngakiro. Awout akirichakin achamunet keng nakajik. Amunyasi robo ngilam akwap, nabo aanyut ngitunga aboliaro kotere akisech kech. Amunyarosi kesi edong ngidikidio eyarete. Arinyokis ngamusabib ajongo emuna asojunit, ngitunga lukolong alakara daang, esinyito lukolong alakara daang. Emam ngichoroi eringa eruosi, emam ekare ka akimaritetere, esililing ngagitae. Emam itwaan eringa eeo emasio emuna, adwariki epurot ngulu emaase. Ekurukuruokin ibore daang alore, agolokin ngitunga daang nakais toyuunotor. Igorosi ngitunga emuna alorotin. Asalu alakara angopia jik anakwap. Aliwor ere asakatan, abwang ngidorin a ere. Ngakiro nugu kesi esubakinosi alobukui kadaang anakwap. Ikwaanikin ka ngirwa lua esal a ngalemet, ngirwa lu iloilookinere ekitoe a akimiet, sodi tararaun ageor keng, kori ngirwa lu elemere ngamusabib daang. Lupiyayek, iremarete kotere alakara. Elimorete ngulu eyakasi too akibuseanu a Ekapolon Akuj. Ngulu eyakasi kide, ipuruunete ngesi, ngulu eyakasi lokwaas a anam, ipuruunete Ekapolon Akuj na erai Akuj a Isirael. Kipupi ngieosio a ekipur eponito anasalunet a akwap, ipurore Isirael, ebukut lo etenoono. Oitiakoi! Emam ayong ibore egieno! Abosia ayong! Ngulu ipotonorete luche lochan, erubakinito esubete nguna, nabo aroner asechanu kech noi. Topupokisi ekoe, ngitunga a ngakwapea! Kidarit esi ebuloi, kidarito ngapanya nakisipokete, kidarito ngiloi lukisurumete. Ngini ebuchar alobuloi, echakakin nakipany. Ngini ebuchar anakipany, isurumi eloit. Elakakini Akuj ngakipi anadis, tamaranikis ngapirio a akwap. Ani kerai abwanga, ebwang akwap, ani kerai aberes, eberes, ani kerai akiukuukokin, iukuukokin dir. Itereterokin loger a itwaan ani irakarit epurot, kiukuukokin loger a egaach. Inuyete akwap ngasechesea keng, toukor nyeringa nabo enyouni jik. Enangi ngirwa lu iriraa Ekapolon Akuj ngapolosio a adis ta ngikapolok lua akwap. Echunakini Ekapolon Akuj ngikapolok nakipany loger a ngitunga alu eenitae, togolok kesi lojela, ani adaunet a ngirwa alukaalak, kirira kesi. Ngirwa ngulu, eribokini elap, tojongo akolong akicha, kainyo Ekapolon Akuj Namerikanyer ngesi eliwor ekapolon. Epolokini ngesi Yerusalem alomoru a Sion, sodi kingolikis ngikarikok a ngitunga apolou keng. Ekapolon Akuj, irai iyong Akuj kang, Kekusi ayong iyong kepuruu! Isub iyong ngakiro nakatalarak, isubak iyong ngakiro daang nakolong irekini iyong a angorot, iyook. Inyasu iyong ngirerea aliworosi asakatan, toukono ngawasea kech nakaagongok. Ngakais nakolong apereenete ngikapolok a ngakwapea anache emam nabo jik. Kipuruunete iyong ngakwapea nakajwok, kikerete iyong ngirerea a ngakwapea anakamoitanak. Nikon emotunosi lukebootok ka lu emam ni ingarakinotor, nikon eyuunotor kesi ngirwa lua ngichan. Iyong kimechete kesi, iliwor iyong etorube lo iangareta kesi ana kolong. Kiramete ngitunga lukamoitanak loger a ekuwam alo ekusi ngirwa lua akiporo, loger a akamu anakwap anakoonon. Nakaneni iyong Ekapolon Akuj, isililingi ngimoe kosi. Isililing iyong akirema a ngitunga alukamoitanak, loger a edou alo itililimi akolong nakariran. Kanege alomoru alo a Sion, esubakini Akuj Namerikanyer ekimuje a ngibukui kadaang anakwap. Epete ngamuja nakatumak ka emuna loajokon. Moru lopei ngolo, ngesi elemarea Ekapolon Akuj edou a esinyoi lokolong emukit ngakwapea daang. Ikisari Ekapolon lo erai Ekapolon Akuj akitu jik! Emiatari ngesi ngakiyo anakonyen a ngitunga kadaang sodi tolema ngileech lu atingito ngitunga keng anakwapea kadaang. Alimu Ekapolon Akuj nguna. Ani esubakin ngakiro nguna, elimuni itwaan daang tama, “Akuj kosi naga! Ngesi kolong kidarit kitoyuu. Ngesi erai Ekapolon Akuj! Ngesi kigieno sua. Atalakaros tokona echurokisi kainyo kiyuu ngesi ngoni.” Iyoki Ekapolon Akuj emoru lo a Sion, nakaneni ipudao ngitunga a Moab loger a ngatunyeny ana ipudao anawaar a ngibaren. Itorwaarete kesi ngakan kech tosub esakete akilulumare, nakaneni isurumi Akuj kesi ngileech, kitedepa ekunonoonu a akilulumare. Eukori ngesi ngawasea nakaagongok a Moab, tararau daang kwap napua. Enangi akolongit na eeokinioto ngitunga eeos logo anakwap a Yuda. Egogong ere yok! Akuj alope igangit ngawasea keng! Tangaasi ngidorin a ere Totiaakisi akwap na emunoi toloma, akwap na esubete ngitunga keng ngakiro na eriyan. Iyong Ekapolon Akuj ipotori ekisil loteno nak ngulu isikokina ngakiro kech, ngulu kigienosi iyong. Kigienokin Ekapolon Akuj jiik, kainyo ngesi erai ataaba nakajik. Etiditeu ngesi ngulu enisasi, kinyasu ere lokaagongon a ngawasea lo alomito kesi, touko ngawasea keng toritak nalup. Lukolong echiakiaritae kesi tokona idamidamete a ngakejen kech. Iyong Ekapolon Akuj itenikini erot lo itorito lu etenooko, erurut ni itorito kesi. Kiwapit sua nguna isaki iyong, kigieno sua iyong, iyong bon kiitanit sua. Iyong iitanit etau kang nakwaare nabo kasaki ayong iyong lokojokon. Ani irirae iyong akwap ka ngitunga, itatamasi ngitunga daang anakwap ngakiro na eriyan. Ngitunga luaronok, tani kesubere ngakiro naajokak, nyitatamasi jik akisub nguna eriyan. Tani anakwap alu etenooko, eringa esubete naaronok make, nabo nyiteete apolou kon, Akuj. Ee Ekapolon Akuj, ikearit iyong akan, isaki akirirare ngimoe kon, nakaneni nyiteete kesi. Kisurum kesi ngileech, kimiek taanyut ngichan a eriras kon, Ekapolon Akuj. Kidodik kesi eger lo iminar iyong ngitunga kon lokojokon. Iyong Ekapolon Akuj kiinak sua ekisil, iyong ngesi isubi ngakiro kosi daang. Ekapolon Akuj, na irai Akuj kosi, kipolokis sua ngikapolok luche nakaneni iyong bon kilimorit sua atamar irai ekapolon kosi. Atoaka kesi nyeyarete nabo, aliworosi ngikaram nyeyarunete nabo, kainyo irira iyong kesi imunya, emam itwaan eringa itamunit kesi jik. Ekapolon Akuj, itopolo iyong akwap kosi, inyaa iyong akwap kosi alowaitin kadaang, ngesi tokona kipuruunitere iyong. Ekapolon Akuj, ibu iyong kirira ngitunga kon, kotere ngichan lu aanyunete kesi, apot kilipa iyong. Ekapolon Akuj, ibu iyong kisikalou sua loger a aberu ana enangi akidoun kisikalou apipilu a ariaba. Kikoni sua ngaberu nakipoti, ani enangi akidoun, atoriabakinos, atanangakinos kidouni ekuwam pas! Emam ayuuno kiyau sua nakwap nabo emam ngitunga kidoik sua nakwap. Ngitunga kosi lu atoka, eyarete nabo! Eyarunete ngawat kech nabo. Ngulu daang ejotoote analielin kech, ekienyunete toeokis elakara! Itonyouni Ekapolon Akuj lukolong atoakete a angorot, loger lo itikilukiluuneta ngakop akwap. Kasiosi ngitunga kang, tolomasi nakais kus togolokinos tooma. Toduka wadio tanang anyunyura a Ekapolon Akuj edaun. Ebunit Ekapolon Akuj anawi keng ana eyei nadis. Ebunit akirirare ngitunga a akwap kotere ngasechesea kech. Elimorete ngalup ngaakot nakolong abukorio idaitae, nyeringa ngalup idayete ngulu kolong aario. Akolongit ngina, elemuni Ekapolon Akuj ekileng keng loationon egogong taarana, sodi kiriraa Lepiasan, emun lo eseleta, kikolianar. Iteli ngesi nabo emun loche loapolon loketubulon lo eyei nanam, taar. Akolongit ngina, elimuni Ekapolon Akuj ngakiro a amana keng anaajokon a ngimusabib tama, “Ayong Ekapolon Akuj arai eketan, etamasi ayong amana ngakipi jiik. Etee akwaar ka apaaran, sodi nyiinyasu itwaan. Nyeringa ayong angoikinit amana ngina. Arai toya ngiikwa ka ngirega, kesilek ayong echunyak akim. Nakaneni ani kesakete ngimoe a ngitunga kang atochoik ayong kesi, ejoikinit epote esila, ee robo, potu esila.” Moi ekisidi, Ngisirael lu eraakasi ngalesea a Yakobo, erupunete loger a ekitoe tokilikiluut topukiasi, sodi kileleba akwap ageor kech. Nyirira Ekapolon Akuj Ngisirael lokojokon loger lo eriraare ngimoe kech, kori nyetoaka ngitunga kech lukaalak, loger a ngimoe kech. Erirae Akuj ngitunga keng yaa nakwap nagela, tokuta kesi a ekuwam alokaronon ekutuni alo kide. Erimakinio ngasechesea a Ngisirael erai kesubakinosi ngakiro nugu, erai kelemun ngamoru a ngikenoi alu ipeyooto ngitunga lu nyenupito Akuj, kirie ngamoru nguna loger a emunyen, nabo nyiimiekin ngakisikwaanet a akuj anaberu be Achera ewaasi. Enyasun tokona ere lokolong adukitoe ngawasea, aramakis ngitunga edong erai ariet na esil. Aliwor achokor a ngaatuk, edakasi neni tourienikinos. Aoko ngaten a ngikito abilasi, ikeyenete ngaberu kipooto. Ani aloger emamakar ibore eyenete ngitunga, nyepete Akuj na erai akasubunan kech ngisien anikech kori nyechamuni kesi. Akolongit ngina, napei alo Eupurate tanang lokukuoru a Misiri, echunakini Ekapolon Akuj ngitunga keng a ngapei-pei loger a itwaan ani epiesi ngakanoi. Akolongit ngina, ekutakinio aburuch tanyarae Ngisirael daang lukolong adokinete toloto Asiria ka Misiri. Ebongunete kesi Yerusalem kilipa Ekapolon Akuj alokidiama emukura keng. Oitiakoi! Abe etioko nginyas eanyuni apolou a Isirael! Ikwaan ekipur keng ka ekiraun lo isiritoe anakies a ngikarikok alu irakarit epurot. Itukukunyitoe ngakies kech nakenisak nakaneni eperete kesi earit epurot. Aseu Ekapolon itwaan nikaadengan tojwono, ni ebuni kitijik kesi. Ebuni loger a akiru ana ngamoru, loger a akiru anakaalan, loger a akaale ana ijukun toburichia akwap. Ipudaario ekinis a ngikarikok alu irakarit epurot kangulu. Engopiari ekipur a ngikarikok alukenisak kangulu, loger a ngakalalio ana eraunete ekingaren nakamu kideparae daang tanyamae atipei. Enangi akolongit na ikwaanikinotor Akuj Namerikanyer ka ekiraun lo isiritoe alotunga keng alupiyayek. Einakini ngikatubok ngakiro aosou na eyeneta ngakiro na eriyan, kitededeng ngulu iteete ere. Tani ngikadwarak ka ngimurok a Akuj, irakarit epurot itereterosi. Amat kesi emuna ka epurot lokaalan aliworosi ipianganarosi kibilerite. Irakarit epurot ngikadwarak noi akuruwo tani akiyen ngakiro na idodeanakini kesi Akuj, nabo eraka ngimurok epurot noi echwangakis ngakiro na etubeenete alokesio. Ileleba ngalekan lomeesae kech, emam ewae lo eseg. Kengunungunotor ayong ebalasi, “Abe ebala mono logo ngae etatami? Ngae esaki akiirar ngakiro keng? Ngaye robo kerai ngide luuchik lubeen aringa epalikinete akinak! Esaki ngesi akitatam ngoni etingianari etal a ngapei-pei, iwapianari ngirotin a ngakiro a ngipei-pei, echiiwanari ngakitatamet a ngapei-pei.” Kasiosi, ani pekiirarete esi nakang, emeuni Akuj ngitunga lu ianete ngabukui nagelayek, ngitunga luparing a ekiruor, toroea adikilil kus. Kiinakini kolong Akuj esi akiangar ka alakara, nakaneni towout esi akiirar ngakiro keng. Kotere nguna, kitatami Ekapolon Akuj esi etingianari ngakiro a ngapei-pei, iwapianari ngirotin a ngakiro a ngipei-pei, echiiwanari ngakitatamet a ngapei-pei sodi kilegeun esi anakikalamikinet a apei. Towanas, kirumun, kitorik. Esi ngitunga lua ngiwog, lu ipolokinito ere a Yerusalem, topupokisi ngakiro na elimunit Ekapolon Akuj. Abe iwojosi esi ibalasi ichamakinosi ka akitu tabalas ipupokina ka ni eyakasi ngikatoak. Inupito esi atamar ibucharosi erai kepot ngakiro naaronok, kainyo igienosi esi alioko ka ngakiro na isudio toyuunotor. Alimu tokona Ekapolon lo erai Ekapolon Akuj kona, “Ewaakini ayong lore a Sion amoru nateno nakaagongon, toliwor apir na itirokina. Igiritae kidiama keng ngakiro nugu, ‘Anupit ngina itirokina, etitinyikini.’ Ngakiro na eriyan kesi eliworosi auno na itemere akitirokina keng toliwor ateneanut isitenene ngesi.” Ilotari akiru na ngamoru alioko na igienosi esi, inyasunete ngakalel ibore ni imechete esi. Itongopiario achamakin kus ka akitu, ikisario apupo na ipupotor esi ka ni eyakasi ngikatoak. Ani kepot ngakiro naaronok, kiwanete esi lokojokon. Ani kepot ngakiro naaronok nguna, kisubuusikinete esi lokojokon, kiwala towariu, kiwala towariu, akwaar ka apaaran. Ngakiro nacha epote ani a Akuj daang, eliworosi naketubulok! Ikokinete esi itwaan ni eperi lokitanda louriyen, tokuruwo akitorwaar ngakejen, tasak akimukokin iworu niyoot, takad akwaan. Enyouni Ekapolon Akuj ejie loger lokolong ajio alomoru a Perasim, ka adipo a Gibeon, sodi topedorea asubakin nguna esaki, tani keparing ngakiro na esubi ngesi. Erumori ngesi etich keng, etich loparing. Tojongoto robo akienar ngakiro nakechikichik ayong esi! Ani kikokis esi neni, eroner noi eriras anikus. Eira ayong Ekapolon Akuj Namerikanyer ebala atiaku amunyar akwap daang. Topupokisi ngakiro nakalimokini ayong esi, todetasi ngaki kiirasi ngakiro kang. Eketan a, akichil ngalup bon echili jiik a? Akikusakin ngalup bon ikusae jiik a? Ani kikusak ngesi ngalup torumor, kitak ngesi ngikinyam a ngikito aluketukukunyok akimuj, kitak ngakanoi ka erau, sodi kitak ngamuja nache lokwaasea a amana. Eyeni ngesi etich keng kainyo itatami Akuj ngesi. Nyelemuni ngesi aburo naapolon tadaunea ngichok alokinyam a ngikito alu itukukunyete akimuj, pearai elemuni akitoe naachi tadaya. Nyedai ngesi ngakanoi jiik kainyo inyasunosi, eyeni ngesi akida kisitor aurukuk kidiama nyiirienya ngichok a ngakanoi. Nia Akuj Namerikanyer ebunitor aosou ngina daang. Ereanakini Akuj ngakiro keng a aosou, nabo esubanakinosi jiik. Oitiakoi, Abe etioko nginyas eanyuni Yerusalem, lo erai ekeno a ngakipeyos a Akuj! Amunyar ere lokolong alomit Daudi! Edaun ekaru epei bu loche, ka ngisukukui kech, tani kikoni neni, eyauni Akuj ngakiro naaronok Yerusalem, ere lo enyaritae “Ekeno a Akuj.” Emini akigoro ka akiutere kikok ere daang ekeno lo eburuchiarito ngaakot. Eremi Akuj ere ngolo, sodi kitijik. Ikokini Yerusalem itwaan nikatoan, ni isileki akiruorikin alotooma ngalup, ikokini etoil lo ingaingaa anapua. Yerusalem, ngimoe daang lu kitijikinete iyong, ekutario loger a apua, ani ngasigerea kech nakamoitanak, epororete loger a ngatunyeny, sodi atipei tanangakinos esi. Akuj Namerikanyer, kiyuuni esi a agiro anaapolon ka arikirikokin a akwap. Emeuni ngesi ekuwam lo edirisit ta akim nakariran noi. Sodi ngasigerea a ngakwapea kadaang ana itijiyete Yerusalem, ka ngiboro kech lujiet daang, ipuripuriakinosi loger a ngakiro ana irujao, loger a ngitapoi alu akwaar. Ngakwapea daang na echunakina akitijwore Yerusalem, ikwaanikinosi ka itwaan ni enyamit akoro kiruja niti imuji, ani ekienyuni, torukau akoro eringa enyamit. Kori itwaan ni earit akure, kiruja niti emasi ngakipi, ani ekienyuni, torukau edokole eringa eonit. Kasiosi robo, toliworos lubaang! Ee robo, toliworos ngimuduk! Ipiangapiangasi kesi tarai nyemata emuna. Kiteroterokinos nyiira epurot. Kisulurak Ekapolon Akuj esi, kiinak ngaju nakatoak. Ngikadwarak eraakasi ngakonyen a ngitunga, nakaneni arap Akuj ngakonyen kech. Idaitae eger angakitoodikinet kadaang ana ngikadwarak. Ekokis akitab na agol emachar. Ani kiyaa iyong nitwaan ni eyeni akisomare tolimok tama, “Kisomakinae pan akitab naga,” elimuni ngesi tama, “Nyapedori ayong akisomakin kainyo egolitoe a emachar.” Ani kiyaa iyong nitwaan ni nyeyeni akisomare tolimok tama, “Kisomakinae pan akitab naga,” elimuni ngesi tama, “Nyayeni ayong akisomare.” Ebala Ekapolon “Ngitunga lugu, kelipito ayong ka arima a ngakituk make, nakaneni eloka ngitai kech anikang. Kelipito kesi ayong kotere akiwapit ngitalio a ngitunga, lu etingito kesi a ngakies. Kotere nguna, asubakinea ayong kesi ngakiro nakatalarak, atobongonok ngakiro nguna jiik, kuumwokis kesi. Ngulu eosok, edaun aosou kech, ngulu echwaaka, engopiari achwaanu kech.” Oitiakoi! Abe etioko nginyas eanyunete lu esakete akimunon ngakiro na ereto ani a Ekapolon Akuj! Esubete kesi ngakiro kech idaito ebalasi, “Emam itwaan kingolikini ngoni kori kianyuni!” Ilochito kesi ngakiro daang. Ikokini agulu ikwaanikin ka ekayen keng ai? Ibore ni esubuni itwaan, ikokini ai elimokini itwaan ngini tama, “Meere iyong kisubuni ayong!” Kori tolimok tama, “Nyiyeni iyong tani ibore ni isubi!” Eringa mono wadiochichi, ilocho amoni nakamutonon a Lebanon toliwor ngamanat naketurupak ngikinyam. Sodi kilochos ngamanat naketurupak ngikinyam toliworos amoni. Ani enangi ngirwa ngulu, Iirarete lukinim akitab isomao, lumuduk, lupalem eyakasi naribu, engaarosi ngakonyen kingolikis akwap. Ngitunga lu itiditeuna, eanyunete alakara nakitetet na ebunit ani a Ekapolon Akuj. Ichurokinete lukebootok a alakara ana ebunit ani a Ekapolon Akuj, ana erai Akuj a Isirael na italeuno. Emunyario ngitunga lukamoitanak, emunyario ngulu imenyarito Akuj, daang lu etukosi akisub naaronok eario. Emunyari Akuj daang lu isudioto luche ngakiro, ngulu itikitikete eriras a luaronok ta ngulu iruorosi alioko sodi nyeeriamuneta lu etenooko ngakiro na eriyan. Tokona bocha, Ekapolon Akuj na erai Akuj a Isirael nakolong ayuuni Aburaam alochan, alimu kona kotere Ngisirael, “Ngitunga kang, nyeringa esi kisirumio ngileech, nyeringa esi idayete ngakonyen kotere etimoi. Na ingolikineta esi ngide lu kainakini ayong esi, ianyunete esi atamar ayong arai Akuj a Isirael na etaleuno. Kipuruunete esi ayong kitokera. Ngulu ebangaaka, itatamasi ngakiro toyena. Ngulu iburaate jiik, echamunete akitatamo kang.” Alimu Ekapolon Akuj kona, “Oitiakoi! Abe etioko nginyas ianyunete esi ngitunga lu ipolokinito Yuda, kainyo ichanaka esi. Iwapito nguna nyarekinit ayong, nabo ichamakinosi emam etau kang, kidoko akisech nakisech nache. Inyounete esi alosit Misiri eringa nyingita ayong. Isakete esi Misiri kiyok esi, sodi kigienokinos ekapolon a Misiri. Nakaneni epalagagi Parao nyikingarak esi, nabo ayuuno a Misiri na igienosi esi, kilomakini esi nakiro naaronok. Tani kenangito ngikaweikinak kech lorerea a Soan ka Anes anakwap a Misiri, eriangakinosi ngitunga a Yuda ekisidi ani egienokinotor akwap na nyemunoi, akwap na edepari akingarakin kesi, toliwor isurumit ngileech.” Eraakasi nugu ngakiro na edodiuni Akuj kotere ngitieng lu eyakasi Negeb. “Eloose ngikaweikinak itorito nakwap nakaronon, na eyakasi ngingatunyo ka ngimunio lukadwarak ta ngimunio luapolok eseletasi. Ngisikiria a ngikaweikinak ka ngikaala kech, isiwokitae ngadekon nakaalak a ngaropiyae, einaritae ngitunga a akwap ana nyepedori akingarakin kesi. Erai akingarakino a Misiri pas, kotere nguna, aratak ayong ekiro be, ‘Emun lo nyikiwani.’ ” Katolimok Ekapolon Akuj ayong atamar egir namoru nadapal, nabo egir nakitab, eger lo erokiata ngitunga, sodi kiboikinos ngagiran nguna jik idodiunito aronis kech. Ichanaka kesi jiik, nabo eliokoko jiik, nabo nyepupete ngakitatamet a Ekapolon Akuj. Elimokinete kesi ngikadwarak tamasi, “Kililinga, tojongoto akiruoro ngakiro na iyookino. Tolimokinae sua ngakiro nakibobokinito, todwara alioko bon. Kotosi alorot kosi, tojongoto akiriwokina lorot kosi. Nyikisaki sua tani wadiochichi akiirar ngakiro a Akuj anakus italeuno a Isirael kangina.” Nakaneni ebala Akuj a Isirael na italeuno kona, “Nyimisito esi ngakiro nakesuruori ayong, igienosi esi ekurikur ka alioko. Isechito esi. Ikote esi awas nakooyen na echii napei alokidiama tanang nalup, irimaunosi esi atipei loger a awas kangina. Iealarosi esi loger a amot analupe ana ebwanga kiealar tongop abelekek natinget tani akim, kori naokunet ngakipi anakuja.” Ekapolon lo erai Ekapolon Akuj, Akuj a Isirael na italeuno, alimoki kesi kona, “Ani kibongokis esi ayong, kiapunos kigienokinos, kiyuunio esi toliworos lua ngikilinga.” Nakaneni iwout esi asubakin nguna! Abe ibalasi esi, “Nyikisaki! Kisii sua a ngangolei kosi anakapiranak.” Iteni ipedorete esi amatar lokojokon, nakaneni epiraka lu kirisito esi akidwang esi! Ngitunga abunget apei anikus, ematarosi ingolikinete emoit epei, ngimoe ngikan make kisipungarete esi daang. Emam ibore idongi anasigerea kus pearai akitoe a apendera bon idongi naita a emukura! Tani kikote neni, kidarit Ekapolon Akuj esi akidodikin ajokis. Esaki ngesi akidodikin esi ngisien kainyo esubi ngesi jiik nguna iyookino. Epiaritae ngulu igienosi Ekapolon Akuj. Esi ngitunga a Yerusalem, nyeringa esi igorosi nabo. Kidodikini esi Ekapolon Akuj ngisien. Napei cha iirarea akigoro kus, ikii. Kitaanyuni Ekapolon esi ngichan, nakaneni emini ngesi ilope neni kitatam esi, nyeringa nabo eduki. Ani kioliyosi esi alorot toloto teten kori kedieny, iirarete etoil alokaku ebala, “Erot logo kane, kiwapakisi.” Ilemunete esi ngakujo kus nasubuna na eburuchiaritae a ngakwangae ka na eburuchiaritae a egolit, sodi tachakasi loger a asakatan ibalasi, “Kotosi kanege!” Nacha itakineta esi ngikinyam kus, kitaram Ekapolon Akuj akiru torupuneta, toriamut esi ngalemet nakaalak, taanyut ngaatuk kus nginyia lukaalak. Ngimongin ka ngisikiria kus lu isitao ngamanat, eanyunete nginyia lu itoonitoe niajokon kiwaakinae amakat. Akolongit na elemarere ngawasea nakaagongok a ngimoe kus, sodi taarae ngitunga lu eyakasi neni, eleleunete ngayana alomoru ka ngimukur daang. Ikwaanikin akicha a elap ka na akolong, torirau akolong ngariraunet ngakan-kaarei kikwaanikin ka akicha a ngirwa a ngikan-kaarei anakolongit a apei. Esubakinosi ngakiro nguna daang akolongit na eenea Ekapolon Akuj ngajemei nakolong ewaakini ngesi lotunga keng sodi kitedek. Kingolikisi, Ekapolon Akuj yege ebunit anikalonan! Akim ka apuru na einikina idodiunito angoit keng. Emaranete ngipon keng kotere angoit, ikwaan angajep keng ka akim nakamunyaran. Ikoni akianga keng ngakalel na elelearete ibore daang, kileleba tanangito ngakipi kech lodokole. Ekutari akianga keng ngakwapea lonyas ka atubor ngakiro naaronok na ereto kesi. Nakaneni esi ngitunga a Akuj, ilakarosi esi toeoto, loger lo ieotor kiiya kiwala akolongit na esukukuu a Akuj. Ilakarosi esi lokojokon loger a ngitunga alu etupasi aloeosio a ngibunei, eloose kai a Ekapolon Akuj ana erai ataaba a Isirael. Isiirari Ekapolon Akuj itwaan daang etoil a apolou keng, ka ationis a angoit keng. Epete ngasarae a akim, ka agiro nakaalan, ka ngamoru a akiru ta akiru nakaalan. Ebuli ngitunga a Asiria na iirareta etoil a Ekapolon Akuj, ka ationis a eriras keng. Aramet daang nacha eramea Ekapolon Akuj ngitunga a Asiria, etupakini erue a ngiburin ka ngagitae. Akuj alope itijikini ngitunga a Asiria. Asubakin kolong ni inomere ekapolon a Asiria a akim anakaalan. Echukul neni noi tabalany, nabo esenokinitoe ngakito tanang kidiama. Iangakini Ekapolon Akuj akianget keng kitonoku akim. Oitiakoi! Abe etioko nginyas eanyunete lu eloose Misiri esakete akingarakino! Igienosi kesi ngangolei a Misiri, ka alalau a ngaurukukui kech a ejie, ta ngikilinga a ngasigerea kech ana edokito ngangolei! Nyigienokinosi kesi Ekapolon Akuj, na erai Akuj a Isirael na italeuno, nyesaketa akingarakino anikeng. Eos Akuj, eyauni nginyas. Nyilocheene nguna alimu, iriraene luaronok ka ngulu igienosi kesi. Eraakasi Ngimisiri ngitunga, meere ngakujo! Eraakasi ngangolei kech ngitieng, epalag! Na enyounio Ekapolon Akuj eriras, ilegeunio akwap nakengarakinan, tadakar akwap na ingarakinitae, tomunyarae kesi kwasiarei. Kalimokini Ekapolon Akuj ayong tama, “Ani kear engatuny kori itaok a engatuny ibarasit, nyingunguakin kori nyiiriangakin, tani kikalout ngikeyokok kwaani. Eger lopei ngolo atiyaunor ayong Akuj Namerikanyer sodi etiji ka akiratakin emoru a Sion. Loger lo eporitor ikeny alokidiama akai keng sodi kiyok ngitak keng, a eger alopei kangolo, ayong Ekapolon Akuj na Apol Noi, eyoki Yerusalem atoyuu.” Alimuni Akuj Namerikanyer kona, “Esi Ngisirael, kisechakis esi ayong lokojokon. Nakaneni tobongutu tokona nikang! Enangi ngirwa lu ichakareta esi daang ngakujo kus nasubuna, nakolong isubunete esi anakwangat ka egolit, iraakasi ngikasechak. Eario ngitunga a Asiria alojie, meere a ngikilinga a ngitunga. Ematarosi kesi alojie, kitiliworoe ngisorok kech ngikedalak. Ematar ekapolon kech ebulit, toema ngikapolok a ngasigerea kech toisikis tani ngapenderae kech a ejie.” Alimu Ekapolon Akuj nguna, ngesi lo ilipitae alo Yerusalem, ngesi lo erirae akim a ngakipeyos keng kaina. Ebuni monan ekapolon lo etenoono, topolokis ngikarikok akwap a ngakiro ana eriyan. Ikokinete kesi daang ekal lo emechio alokuwam alo ekusi ka ni emechio alokuwam alo edirisit. Ikokinete kesi ngingololin anariet, ikokinete etorube a ataaba anaapolon, anakwap analapat. Engaarosi ngakonyen ka ngaki kech kingolikis ka akiirar ngichan a ngitunga. Ngulu palem ikirikirasi, etubete ngakiro a aosou. Ani lupalem iyagayagasi, iruorikinete ngakiro na ilereete. Nyeringa nabo etamario lubaang abe ikileenikinit, kori nyenyarao ngirukooi lu erimae. Iruoro ekabangabangat abaangu, naaronok itami ngesi asubakin. Eraakasi ngakiro keng daang ngakiyenyet Ekapolon Akuj. Nyisumuji ngesi lua akoro, kori nyitamasi lua akure. Erono itwaan nibaang nabo esubi ngesi ngakiro naaronok. Etuk ngesi amunyar ngikebootok kotere alioko keng ka akiratakin kesi nyeanyut ngakiro na eriyan. Nakaneni itwaan ni erimae, esubi ngakiro a ateneanut, nabo eneikina nakiro na eriyan. Esi ngaberu na iyakasi najako, nguna emam ngichan ianyunito. Todetasi ngaki kiirasi ngakiro kang. Imwokito esi tokona, nakaneni adaunet a ekaru a epei, ilungakinosi esi kainyo nyianyunete ngalemet a ngamusabib. Esi ngaberu na ngoon iyakasi najako emam ngichan, tamaranikisi kotere ebuloi! Tobutosi ngiworui kus kidongo imuner, sodi tanapa ngakorisae anaaborin. Tarama ngirarumo kus kialolongo, kainyo enyasun ngamanat daang naajokak, ka ngamanat a ngimusabib, toruput ngiikwa ka ngirega anakwap a ngitunga kang. Kigoro kotere ngakais a ere daang nakolong ayei alakara. Ematarosi ngitunga alokai a ekapolon taramakis ngitunga alore aloapolon. Ngawiyei ka ngakais na edirisito na iyokiyere ere, inyasunosi jik. Eliworosi kesi ichurotor ngisikiria a moding nabo kesi edakasi ngamesekin. Ikokinete ngakiro neni, tanang ni ebukunio Akuj etau keng niyok. Eliwor ariet amana na ekoniuni akimuj, talalaketa ngalemet a ngamanat kikokis amoni. Isikokin ateneanut ka ngakiro na eriyan awadaang anakwap. Eyauni ateneanut ekisil, ka akiboi akaalimon ta amuno nakajik. Iboikinosi ngitunga kang nakwap na ekisil, min ekisil nawiyei kech, kibooyoto akaalimon. ( Nakaneni erami akiru na ngamoru kinyasu ngamon, sodi toukoroe ere.) Elakarosi ngitunga daang kotere epete ngakipi a ngamanat ka nginyia a ngisikiria ta ngaatuk. Oitiakoi! Abe etioko nginyas ianyunete esi, ngimoe kosi, tani keringa esi nyemunyara! Idema esi ngitunga ngiboro, tarai emam itwaan kidema esi ngiboro! Ani ipalikinete esi akinyasun, kinyasun esi, ani ipalikinete esi ademar luche, kitedemar esi. Ee Ekapolon Akuj, kidodikinae ajokis kon. Kigieno sua iyong. Kiyokoi sua akolongit daang, kitoyuu ngirwa lua ngichan. Na irurumakinea iyong, tamataros ngitunga, na inyounio iyong, topetaros kesi. Ekakaunio ebari kech tomoriakinos ngitunga. Epol Ekapolon Akuj! Epolokinit ngesi ibore daang. Ilelebi ngesi Yerusalem ngakiro na eriyan ka ateneanut. Kitoweyi ngesi esi, iyoki ngesi ngitunga keng jiik, nak aosou ta achwaanu. Ebari kech loapolon ngesi akiker Ekapolon Akuj. Enyarasi ngikiliok lukajwok esakete akingarakino. Ngikaweikinak a ngakwapea lu esakete ayaun ekisil, igorosi tokona lokojokon. Esilok ngirotin luapolok, emam ngikalotok eyakasi. Anger ngakiro na achamakinoi, emenyar ngikaanyunak. Nyeringa erimae ngitunga nabo. Ibooyi akwap kongin, esil. Aoniyosi ngamon a Lebanon, adipo naajokon a Charon, ekok ariet, nabo erarasi ngakui alokito alo Bachan ka emoru a Karimel. Alimoki Ekapolon Akuj ngibukui kona, “Anyouni ayong tokona, edodiu agogongu kang. Ngakiro daang na irekinito esi, eraakasi pas, ngakiro na isubete esi ngaka pas. Ikwaan etau kang ka akim nakimunyari esi. Irabokoikinosi esi loger a ngatabab ana inomio toliworos emunyen, kori ngiikwa lu inomio tarata ekuron. Ngitunga daang, lu eloka ka lu eapiyete, kimiek kiirasi ngakiro na asubi ayong toyena apolou kang.” Ebulit ngitunga lukasechak alo Sion, emaranete lu nyenupito Akuj ebalasi, “Ngae iboikinosi ka akim nakamunyaran? Ngae aniyok enaikini akim na erirae nakajik?” Itwaan enaikini ngesi ni etenoono, kiruoro nguna a iteni, ngesi ni nyingalaanari ngikebootok ngiboro tabarea, ngesi ni engeri adiakanot a ngaropiyae, ngesi ni engeri alomar ni etukore akiar, ka amuduk nyeanyunga naaronok. Itwaan ngini, iboikin akaalimon, ikokini awi keng awas nakaagongon a ngatabab, eanyuni akimuj na enyami ka ngakipi namatan. Ingolikinete esi ekapolon epolokini akwap naapolon a apolou anaationon. Iliworosi esi na itamuneta ngakiro nangorok, ingitasi make tamasi, “Nyaalu mono ngikemarak yok, ka ngiketubukok echur? Nyaalu ngirototin?” Nyeringa nabo ingolikinete ngitunga lukamoitanak lu iruorosi ngabukui na nyiirarete esi. Kingolikisi Sion, ere lo kinyamea ngoni ngisukukui a Akuj! Kingolikisi Yerusalem! Erai akwap a ekisil, ejok elomio. Ikwaan ka eam lo itirokina nalup, lo nyedituunun ngakito keng na ngalup, nabo nyengedaanasi ngaunoi keng. Kidodikini Ekapolon Akuj ngoni ajokis keng. Ikokini akwap na eyakasi ngangololin ka ngayana nabalany. Nyitorete ngatubwae a ejie kori na ngikapolok. Ekapolon Akuj ngesi ekatubon ngakiro yok, ngesi kipolokin ngoni, ngesi kiyuununi ngoni. Eliworosi ngaunoi na eenitere ngatubwae nguna pas, nyepedorete akitowo atubwa. Atangatasi ngoni ngiboro lukaalak, engatarete tani luangwalak. Emam itwaan a akwap yok ni eringa etamari, “Adeaka ayong.” Erimakinio ngasechesea daang. Esi ngitunga a ngakwapea kadaang! Tochununos topupokisi. Topupok akwap etia ni etia, ka ibore daang eyei tooma keng. Angoiki Ekapolon Akuj ngakwapea daang ka ngasigerea kech daang. Ainaki kesi eriras lo a akitu. Nyenukio ngawat kech, pearai idongete eperete neni tobosa. Iterengete ngaakot kech ngimoru. Akolong, ka elap ta ngikanyer, ebosete tararaunos nalup. Engopiari adis loger a ejemu alo elugurikinio tolemarae. Eraraunosi ngikanyer loger a ngakui a emusabib kori ana emeyan. Alemu Ekapolon Akuj ekileng keng loapolon anadis taarea ngitunga a Edom. Eraakasi ngulu ngitunga lu erira ngesi atamar totoka. Eburichiarete ekileng ngolo ngaakot ka akimiet, kikokis ngaakot ka akimiet a ngimesekin ka ngaanei esaa lo engolere kipeyoore. Elemuni Ekapolon Akuj ngakipeyos nguna alore a Bosira, ka aaranot a ngitunga alukaalak anakwap a Edom. Eario ngitunga loger a ngikosowa, kori loger a ngitak ka ngimongin, iterengete ngaakot ngalup ngaakot na eburuchiarit akimiet. Eyei Ekapolon Akuj akolongit na eyuunea Isirael, tatachak naaronok alomoe kech. Ilochosi ngangololin a Edom toliworos elaam, toliwor echoto kech ngipip a akim, toliworos ngalup elaam lo enoki. Enoki akwaar ka apaaran, talakak apuru na edirisi kidiama jik. Kidong akwap erai ariet napei analesit a apei tanang nache nabo emam ekaloton itori neni jik. Tatula ka ngikuruka kesi irumete akwap. Itiliwori Ekapolon Akuj akwap alapatu na ibooyi pas, loger lokolong ekoni eringa nyesubuna. Enyarao akwap ngina, “Namam kapolon,” kainyo nyepete nabo ngikarikok. Erupunete ngiikwa ka ngirega anakais kadaang a ngikapolok, ka ngirerea lu edukitoe ngawasea, toloma ngikolowoi ka tatula. Epete ngitieng a moding neni, tanyaras ngipean make. Ebuni ekipe lo akwaar neni esaki ni elomi. Edukete tatula ngakais kech, toureta ngabeyei, tobekut ngitak kech, kitana kaneni. Echunasi ngataruk inaa a ngapei-pei. Ani kisomata akitab a Ekapolon Akuj, iyenunete atamar esubakinosi nguna daang. Ekapolon Akuj ngesi adunguni atamar ikokinete neni, ngesi elope echunakini kesi. Ekapolon Akuj ngesi ekorakini ngitieng ngulu akwap, kiboikinos neni napei analesit a apei tanang nache, eliwor akech jik. Elakar ariet ka akwap nakoonon, ekilikiluunete ngatur a ariet. Elakar ariet toeok kimaritetek, ibuser loger a ngimoru a Lebanon, iturupete ngalup ngikinyam loger a ngamanat a Karimel ka Charon. Ingolikini itwaan daang akibuseanu a Ekapolon Akuj ka agogongu keng. Kitogogongo ngakan napalag ka ngakungin na emaranete elilimiyorito. Tolimokisi ngulu iloit ngitai kona, “Totitinyeketo nyieam! Ebuni Akuj ayuun esi ka akirirare ngimoe kus.” Ingolikinete lumuduk, iirarete lukinim. Eporete luangwalak loger a agete, eeokinete ngangajepa alu nyiruorosi, kiremasi elakara. Eleleunete ngangololin anariet, eliwor asinyen na erirae anam, eliwor akwap nakoonon ngileleae. Nikolong alomito ngikolowoi, erupuni asirite ka atiriwae. Emini erot loapolon neni, lo enyaritae, “Erot lo italeuno.” Emam ekasechan itori lorot ngolo, emam ngikabangabangae lu ibatarete ngitunga lu iwapito erot ngolo. Emam ngingatunyo epete neni, emam ngitieng lukaadengak itorunete neni. Ngulu ayuu Ekapolon Akuj, kesi eloose nawi iwapito erot ngolo. Enangete kesi Yerusalem elakara, eeosi ikareete. Elakarosi kesi jik, nyeanyunosi nabo jik ka akialolong kori esinyoi. Ekaru lo a ngitomon ka nguomwon lo araakar Esekia ekapolon, abu Senakerib lo arai ekapolon a Asiria torem ngirerea a Yuda lu adukitoe ngawasea, sodi tolema. Tomea ngesi ekarikon a ngasigerea keng alo Lakich, tolot Yerusalem erikit ngasigerea nakaalak akitijwore ekapolon Esekia. Toloma ngasigerea nguna lorot lo edonyeenere ngiworui, ni eyei echilet lo echilunit ngakipi anatapar ana alokidiama. Kisiriamuut ngitunga a Yuda nguuni ngesi, ngitunga ngulu kesi Eliakim lokookeng a Ilikia, lo aweikinit akai a ekapolon, ka Chebina lokegiran ta Yoa lokookeng a Asap lo arai ekegiran ana asubasi anakwap. Tolimok ekarikon a ngasigerea a Asiria kesi tama, “Tolimokisi Esekia atamar ingita ekapolon a Asiria kona, ‘Nyoni mono igieno iyong? Itamit iyong atamar itemunete ngakiro make ajwonu a ngasigerea ka ekileenu kech a? Ngae tokona igieno iyong kingeritor ayong? Abe itamit iyong atamar kingarakinete ngitunga a akwap a Misiri, nakaneni ikoni ibore ngini alemun akasirimait kichogaa. Ebil akasirimait ngina kichum akan kon. Ikoni ekapolon a Misiri neni kigienokin itwaan ngesi.’ ” Torubak ekapolon loochi a Asiria ngolo iruoro ebala, “Kori robo isaki iyong alimokin ayong atamar igieno iyong Ekapolon Akuj, na erai Akuj kon? Esekia ngesi enyasuni ngasenon ka ngikenoi a Ekapolon Akuj na alimokinea ngitunga a Yuda ka Yerusalem atamar kilipa alokeno alo ipeyonokinere Akuj, ekeno lo erai epei bon. Kibolokin ayong ka iyong alokiro a ekapolon a Asiria. Kamekini ayong iyong ngangolei ngabunge ngaarei erai kianyu iyong ngikiliok ngabunge ngaarei lu edokete tometa! Kidwangi iyong tani ekarikon a ngasigerea a Asiria loochi lo nyeyenikinitae. Tani ikoni neni, abe eringa iyong isaki Ngimisiri tomeut ngaurukukui na irito ngangolei ka ngikameak ngangolei nikon. Esibit iyong aremit ayong akwap kon ketiji iyong pekengarakinit Ekapolon Akuj a? Ekapolon Akuj alope kalimokini ayong atamar torem sodi kinyasu.” Apot Eliakim, ka Chebina ta Yoa tolimokis ekapolon loochi a Asiria ngolo tamasi, “Kisuruoroe kare sua a Ngaramaik, kipupi sua. Nyiiruor Ngaeburaniae kainyo epupokinito ngitunga daang lu eyakasi nawas a ere.” Tatachu ngesi tama, “Itamito esi atamar kameunit ayong ekapolon a Asiria nikus ka ekapolon kus make, alimokin ngakiro nugu a? Mam jik. Esuruori ayong tani ngitunga lu edokito ngawasea, lu enyamete ngachin kech, tamata ngakul kech loger kus.” Abu ekapolon loochi ngolo tonyou towo kirema a Ngaeburaniae tama, “Topupokisi ngakiro a ekapolon alo eyenikinitae, alo erai ekapolon a Asiria! Ebala ekapolon kona, ‘Warasi Esekia nyikingal, nyikiyuuni ngesi esi. Warasi nyiichamut ngesi kimaimai esi kigienokinos Ekapolon Akuj. Nyiitamasi kori kiyuuuni esi Ekapolon Akuj. Nyiitamasi tani nabo kori iratakini ngesi ngasigerea nakosi a Asiria nyeelemasi ere kus. Nyiirasi ngakiro a Esekia! Kidungokinit esi ekapolon a Asiria atamar topudutu alore esila. Kichamakinio esi inyamete ngamusabib alokito a ngimusabib alu eraakasi ngikus a ngikulepek. Tanyama ngameyana alomeyana alu eraakasi ngikus a ngikulepek, nabo tamata ngakipi anakare ana eraakasi ngakus a ngikulepek. Tanang abuni ayong katoriko esi ketolom nakwap na ikwaan ka nakus. Eyakasi akwap ngina ngamanat a ngimusabib alu epureenere emuna, toyakas ngakiria na ipoore ngamugati. Warasi Esekia nyikingal esi tamasi kori kiyuuni esi Ekapolon Akuj. Apot kolong sek ngakujo a ngibukui aluche toyuut ngakwapea kech alokapolon a Asiria a? Nyaanu tokona ngakujo a Amas ka Aripad? Nyaanu ngakujo a Separipaim? Eyei kolong itwaan abu toyuu Samaria a? Wori kolong ayuunea tani apei a ngakujo kanguna akwap keng ani a ekapolon a Asiria? Ani nyo tokona itamitotor esi atamar eyuuni Ekapolon Akuj Yerusalem?’ ” Kililinga ngitunga chek loger lo alimokinitor kesi ekapolon Esekia atamar kililinga. Amam akiroit alimut kesi. Apot Eliakim ka Chebina ta Yoa tochilichilaasi ngiworui kech ialolongete, toloto alimokin ekapolon Esekia ngakiro daang na alimu ekapolon loochi a Asiria. Napei eirarea Esekia ngakiro na esisaunete kesi, tochilichilia ngiworui keng ialolongi, tanap ngiguniae. Abu ngesi tolot kai a Ekapolon Akuj. Abu ngesi tomea ngitunga nia ekadwaran a Akuj alo anyaritae Isaya, lokookeng a Amos. Ngitunga ngulu kesi Eliakim lo aweikinit akai a ekapolon, ka Chebina lo arai ekegiran a ngikesio ta ngimurok a Akuj luapolok. Anapito kesi daang ngiguniae. Tolimok Esekia kesi atamar tolimokis Isaya kona, “Erai akolongit naga aka ngichan. Kirirao sua nabo kirumito ngileech. Kikok sua aberu na adol akidoun nakaneni alilimiyo emam kona idinyakini. Ameu ekapolon a Asiria ekapolon lo etupit ngesi akimeny Akuj na eyari. Agasi atamar kiira Ekapolon Akuj na erai Akuj kon ngimeny ngulu sodi kirira ngitunga lu alimunete. Kilip robo Akuj kotere ngitunga yok lupiyayek.” Ani iirari Isaya ngakiro a ekapolon Esekia, tobua ngitunga ngulu nikeng ebala, “Ebala Ekapolon Akuj, warasi Ngisiria nyikitubul esi ani ebalatar nyikiyuuni esi Ekapolon Akuj. Isiirari Ekapolon Akuj ekapolon a Asiria ngakiro na itorotokinete tobong nakwap keng. Ani enangi inaa, itaari Ekapolon Akuj ngesi ngitunga.” Abu ekapolon loochi a Asiria kiira atamar arotoki ekapolon a Asiria alo Lakich, alot akitijwore ngitunga a ere a Libina. Tolot ekapolon loochi ngolo inaa aanyun ka ekapolon keng. Apot Ngisiria kiirasi atamar ebunit ajore a Ngimisiri akitijwore kesi, erikit ekapolon a Kuch lo enyaritae Tiriaka. Ani iirari ekapolon a Asiria ngakiro nguna, nak itwaan abarua na einari Esekia, lo arai ekapolon a Yuda. Egiritae abarua ngina ngakiro nugu, “Kilimok iyong Akuj na igieno iyong atamar nyekedwangi ayong iyong, nakaneni wara ngakiro nguna nyikingalata iyong. Iira iyong ngakiro na esubeenea ekapolon a Asiria akwap nacha esaki ngesi akinyasun. Esibit iyong ipuun iyong a? Enyasunete kolong taapaakosi ngirerea a Gosan, ka Aran, ka Resep, sodi taara ngitunga a Beseden lu alomito Telasar. Emam ngakujo kech na apot toyuut kesi. Nyaanu ngakujo a ngirerea alu enyaritae Amas, ka Aripad, ka Serapaim, ka Ena ta Ipa?” Kidiau ekapolon Esekia abarua alotunga alu ameunitae kisoma. Ani erumor tolot kai a Akuj, kiwaak abarua ngaren Ekapolon Akuj, sodi kilip ebala, “Ekapolon Akuj Namerikanyer, na irai Akuj a Isirael. Ibooyi iyong alokidiama ngiborei lua ngabeben. Iyong bon irai Akuj, ipolokinit ngapolosio daang anakwap. Isubuni kolong iyong akwap ka adis. Kingolik tokona Ekapolon Akuj na Ipol Noi ngakiro na esubasi anikosi. Kiira ngakiro daang na iruoro Senakerib, kimenyi iyong Akuj na iyari. Kiyeni sua daang atamar enyasut ngikapolok a Asiria ngibukui lukaalak, kidongo ngakwapea kech esil. Enoma kesi ngakujo a ngibukui kangulu. Pearai tani ngakujo nguna ngakujo dir, araakasi ngakito ka ngamoru na esubunitae eraakasi ngakisikwaanet a ngakujo. Tokona Ekapolon Akuj na irai Akuj kosi, toyuunae sua ani a Ngisiria sodi toyeneta ngibukui a ngakwapea kadaang atamar iyong bon Ekapolon Akuj irai Akuj.” Abu Isaya lokookeng a Amos tomea itwaan alimokin ekapolon Esekia kona, Ani kona ilipea iyong Ekapolon Akuj na erai Akuj a Isirael, a ngakiro a Senakerib alo erai ekapolon a Asiria, ngakiro nugu kesi alimu Ekapolon Akuj kotere Senakerib, “Iyong Senakerib, kikianatar iyong ngitunga a ere a Yerusalem, kimenyarito. Esibit iyong ngae imenyi iyong ka akianar? Nyidodiuna iyong arimatoi anikang, ayong Akuj a Isirael na etaleuno. Imeuni iyong ngikasubak etich kon, potu akiwoganakin ayong atamar, ilema iyong ngimoru lukooyak alo Lebanon, a ngaurukukui kon kadaang ana irito ngangolei. Iwoga iyong ibala itub alomoru kangulu ngichekereng lukooyak ka ngidomou luajokak, tanang kiding ngamon nikamutonon. Iwoga iyong ibala iboki ngakare, sodi tamat ngakipi anakwapea anagelayek. Ibala nabo iyong epudaate ngasigerea kon angolol a Nili kitoono. “ ‘Nyiirara iyong nakanuan atamar arekini ayong nguna kolong a angorot a? Nakaneni asubak tokona ayong nguna daang. Kainak kolong ayong iyong agogongu na ilochio ngirerea lu edukitoe ngawasea tosenokinos. Apalag ngitunga lu alomito inaa, akuriaka kesi abulit. Ekote kesi nginyia lu eyakasi naro. Ekote nginyia lu erupunito alokidiama akai, lu etoon ekuwam lokariran a akide. Nakaneni ayeni ayong ngakiro kon daang, ayeni ngakiro na isubi iyong ka ni ilosi iyong. Ayeni ayong eger lo kingoikinitor iyong ayong. Eira ayong ngakiro a angoit kangina ka ngiwog kon, akodakini ayong ekodait lokume kon, erepak akitoe nakituk kon, sodi katoriko iyong tobongo kitor lorot lopei kolong iwapuuni.’ ” Abu Isaya tolimok ekapolon Esekia tama, “Emachar lo idodiuni ngakiro na esubakinosi. Ekaru logo, ka loche lo etupit logo, inyamete esi ageor na alomoding bon. Ani ekaru loche, itakinete esi ngamanat kus tolema. Itakinete ngikito a ngimusabib, tanyama ngimusabib. Ngitunga a Yuda lu idongete, isikokinosi kikokis nginyia lu ilijasi ngaten nalup, ani erumor tokoniut ageor. Epuunosi ngitunga ngiche a Yerusalem ka emoru a Sion, kainyo esaki Akuj Namerikanyer nguna kikokis neni. “Ngakiro nugu kesi alimu Ekapolon Akuj kotere ekapolon a Asiria, ‘Nyelomuni ngesi lore kori nyegumuni tani emal a akau. Emam ngasigerea na etingito ngaupwala na eapuunete lore. Emam ngakatiputipui a ejie na edukio kiriama ere. Ebongori ngesi iwapit erot lopei ngoon abunio, eringa nyelomuna lore logo. Ayong Ekapolon Akuj alimu nguna. Eratakini ayong ere logo atoyuu kotere ekipur kang a ilope, ka ngakiro nakolong echikakini ayong ekasuban etich kang Daudi.’ ” Akolongit ngina nakwaare, tolot emalaikat a Ekapolon Akuj nadakar a Ngisiria taar ngasigerea 185,000. Ani iwalari akolongit nache, aperete kesi daang kaneni etoakito! Abu Senakerib lo arai ekapolon a Asiria tobongo nakwap keng, tolot Ninewi. Akolongit apei, na elipitor ngesi alokai a akuj keng ana anyaritae Nisirok, apot talokookeng ngiarei lu anyaritae Adiramelek, ka Chareser taara ngesi a ngilengea kech, todokis kesi toloto nakwap a Ararat. Abu lokookeng eche lo anyaritae Esaradon kilunyokin nados keng toliwor ekapolon. Ngirwa lupei ngulu, todeakakin ekapolon Esekia tonyou akitu. Tolot ekadwaran a Akuj Isaya lokookeng a Amos aanyun ngesi tolimok tama, “Ebala iyong Ekapolon Akuj tosubak ngakiro daang kitiriyan, kainyo nyengalekini edeke kon. Tosubakin kiteu akitu.” Torei Esekia tokienyik esiep a akai kilip tama, “Ekapolon Akuj, kitam atamar asub ayong etich kon ewapit ngakiro kon atarai lokamuno iyong, nabo asak ayong ngirwa daang akisub ngakiro na isaki iyong.” Abu Esekia kikalou lokojokon. Sodi tolimok Ekapolon Akuj Isaya akiroit, atamar tobongo nia Esekia tolimok tama, “Ayong Ekapolon Akuj na arai Akuj a apaakon Daudi, eira akilipit kon nabo engolik ngakiyo kon. Kemiekini ayong iyong toyar ngikaru ngiche lu eraakasi ngitomon ka ngikan. Kayuuni ayong iyong ka ere lo a Yerusalem logo ani a ekapolon a Asiria. Eratakini ayong ere logo.” Tatachu Isaya tama, “Ibore en kidodikini iyong Ekapolon Akuj toyenea atamar irichakini ngesi ngakiro nakichikak iyong. Adoket nakolong aduki ekapolon Aas, isiyotori Ekapolon Akuj etorube akamaluwot ngakikalamikinet ngatomon.” Abu etorube ngolo kiyoto akamaluwot ngakikalamikinet ngatomon. Ani engalekini ekapolon Esekia, abu ngesi kigir eeos logo lobuakinet Akuj alakara. “Abu atama kori atoani alosorokane kang, tadaikin ngikaru kang lu idongito naliel. Atama kori nyengolikini Ekapolon Akuj nabo, anakwap a ngitunga alu eyarete, atama kori nyengolikini ngitunga kirukit ka lu eyakasi nakwap. Atuboritae akiyar kang tasalu, loger a eam alo eyatario, loger a eworu alo etubunio anidonyiet. Atama kori ayau Akuj esal kang. Egoro ayong akwaar kiiya kiwala kotere apipilu, tosub kerobirobi engatuny ngakoyo kang. Atama kori ayuu Akuj esal kang. Toliwor aruo loger a logecha, toliwor akunua loger a akuuri. Tobur ngakonyen kang kotere akirereorit nadis asaki kengarakin. Ekapolon, toyuunae ayong alochan kalu kadaang. Nyaanu na alimuni? Ekapolon Akuj asubaki nguna. Kariebete ayong ngakiro etau, nyepote ngaju. “Ekapolon, ayari ayong kotere iyong bon. Kitangalekinoe atoyar. Ilocho apipilu kang toliwor ekisil. Kiyuu iyong ayong anaaronok kadaang. Irimak iyong ngasechesea kang daang. Emam ekatoan lo kipuruuni iyong. Nyigienokinosi lukatoak ateneanut kon. Ngitunga lu eyarete kesi kipuruunete iyong, loger lo tokona kepuruunitor ayong iyong. Elimonokinete ta apa ngide kech eger lo iraakar iyong lokimunoi. Ekapolon Akuj, kitangalek iyong ayong. Kirami ngagitae atoeokisi kikusi iyong, epuruutu iyong alokai kon ngirwa daang lu kiyarea.” Alimokinit sek Isaya ekapolon Esekia atamar tomunak ngameyana dio toretorea elepunait keng, sodi tangalek. Engita sek Esekia abala, “Nyo idodiuni atamar alosi ayong kai a Akuj?” Ngirwa lupei ngulu, kiira ekapolon a Babilonia lo anyaritae Melodak Baladan lo arai lokookeng a Baladan atamar adeakakin ekapolon Esekia. Abu ngesi tomea ngitunga inasi Esekia abarua ka ainakinet. Kipeyou Esekia ngipeyok kidodik ebari keng. Kidodik tani ngakwangae ka egolit, ngikito lu itukukunyete akimuj, ka ngamieta nakaakunyok ta ngiboro keng daang a ejie. Emam ekeru keng tani epei lo abu kidong nyidodikina ngesi kesi. Kidodik Esekia kesi tani ngiwaitin daang a akwap keng. Sodi tolot ekadwaran a Akuj Isaya nia ekapolon Esekia kingit tama, “Aliwae eponitotor ngitunga lugu? Abalasi kesi iyong ai?” Tatachak Esekia tama, “Eponito anakwap anakalonan enyaritae Babilonia.” Kingit Isaya ngesi tama, “Nyoni aanyungarete kesi alokai kon?” Tatachak Esekia tama, “Aanyungasi kesi ibore daang. Emam ibore daang ni eyei lokerui ni nyidodikina ayong kesi.” Abu Isaya tolimok ekapolon tama, “Kiira akiroit a Akuj Namerikanyer. Kingolik a, enangi akolongit na elemarere ibore daang alokai kon, ka ngiboro lukolong ekachete taapaakon napei kolong jik tanang akolongit naga. Iritorio ngiboro ngulu daang Babilonia. Emam ibore idongi. Erikio ngalesea ngache na iyanatar iyong, toliworos ngikiliok lu idongitoe lu esubete etich alokai a ekapolon a Babilonia.” Abu Esekia tolimok Isaya tama, “Ejok akiroit a Ekapolon Akuj na ilimu iyong.” Etami ngesi abala, “Abe ejok bo erai kemin ekisil kiratakin ibore daang ngirwa daang lu ayarea ayong.” Ebala Akuj, “Kisililinga ngitunga kang, kisililinga kesi! Kisuruoro ngitunga a Yerusalem totitinyeketo. Tolimokis kesi atamar aup kesi eriras nakaneni arimakin tokona ngasechesea kech. Ainak ayong kesi eriras lo itemokino kotere ngasechesea kech daang.” Epupio etoil a itwaan echala ebala, “Tosubakisi erot a Ekapolon Akuj nariet! Kitenikisi erot a Akuj yok anariet! Kileleba ngadipoe daang, kireriakisi ngimoru daang. Eliworosi ngimukur nilapat, tosulutut akwap nangarab. Etakanuni akwangis a Ekapolon Akuj, ingolikinete ngitunga daang. Alimu Ekapolon Akuj nguna.” Epupio etoil a itwaan echala ebala, “Tolimo!” Engis ayong atama, “Anukiro alimori?” Tolim tama, “Tolimo atamar ikwaan ngitunga daang ka nginyia, ikwaan akibuseanu kech ka ngatur a moding. Eokete nginyia nabo erinyokinete ngatur, napei cha itukutunea Ekapolon Akuj ekuwam. Ee robo, erai itwaan nginyia. Eokete nginyia, nabo erinyokinete ngatur, nakaneni erubi akiroit a Akuj jik.” Yerusalem, todoka moru lokooyen tolimo ngakiro naajokak! Sion, kirema lokojokon tolimo ngakiro naajokak! Kiruorik nyiem. Tolimok ngirerea a Yuda atamar ebunit Akuj kech! Ebunit Ekapolon lo erai Akuj aliwor ekapolon lo eyei apolou naationon, kirukut ka ngitunga lu ayuu ngesi. Iyoki ngesi esipanit keng loger a ekeyokon, echunakini ngesi ngimesekin luuchik tadak alorarum, sodi torik namanang wadio. Ngae epedori akitem ngakipi a anam a akan anidapal, kori ngae itemi adis a ngakan keng? Ngae epedori akiting ngalup a akwap alotooma ekopo, kori kitem ngimoru ka ngimukur anaratilio? Ngae epedori alimokin Ekapolon Akuj ngakiro na ejoikinit esubi? Ngae epedori akitatam ka akisian ngesi? Nia Ngae eloseene Akuj taanyunea aosou? Ngae etatami ngesi ngakiro na eriyan? Ngae ainakini ngesi aosou na eyenea ngakiro? Eraakasi ngibukui pas ani a Akuj ikwaan ka ngakipi na idokakin nibore, isikwaanitae kesi ka apua anakitemiet, eeok ngikwarin ikwaan ka apua nanyapid. Lebanon ka ngikito keng etia ni etia, nyitonokunete akim a ngakipeyos keng, ngibaren a Lebanon daang etia ni etia nyitemokino eliworosi ngakipeyos a Akuj yok. Eraakasi ngakwapea daang pas ani a Ekapolon Akuj, ikwaan anikeng ka amamau a ibore. Ngae isikwaanere Akuj? Etamario ikwaan ka nyo? Nyikwaan ngesi ka akuj na esubete ngikunonoi, toburichiasi luketiakak ngasua a egolit, sodi tosipokis nakwangat. Itwaan ni ipiyori akigiel akwangat kori egolit, toseu akitoe na nyebosi. Tasaku ngesi ekunonoit lo eyeni akichiere, sodi tosub ekisikwaane lo nyeukor. Nyiyenete esi a? Eringa esi nyiirara? Nyelimokina esi kolong a angorot a? Nyiyenete esi eger lokolong esiakinea akwap a? Ngolo ibooyi alokicholong a apolou ngesi asubuni akwap. Eyei ngesi yaaye ngidowon itee ngesi ngitunga ikwaan ka talodete. Apetari ngesi adis loger a eworu alodapal, loger a eam alo elomitae. Etiyauni ngesi ngikapolok lu eyenikinitae kitiliwo pas. Ikote kesi ngikito luuchik lu aringa itakinio, lu nyilijara ngaten nalup. Ani itukutuni Ekapolon Akuj ekuwam tooniyosi kesi tokutarae loger a ngatunyeny. Ingita Akuj na italeuno kona, “Ngae kisikwaaneta esi ayong? Eyei dir itwaan kikwaan ka ayong a?” Kireosi pan nadis! Ngae asubuni ngikanyer lugu daang? Ngae ngolo erikit kesi loger a ngasigerea? Eyeni ngesi ekimar kech, elimokinit daang ngirora! Etiono apolou a Akuj, emam ngikanyer lo engopit tani epei! Ngisirael, kotere nyo iburaata esi, ibalatar, “Nyeyeni Ekapolon Akuj ngichan kus, nabo nyemisit ngakiro na nyeriyan nakisubere esi?” Nyiyenete esi a? Nyiirara esi? Ekapolon Akuj ngesi Akuj nakajik, asubuni ngesi akwap daang. Nyeburuuni ngesi kori nyiloyeene jik. Nyepedorio angichun ngitamen keng. Itogogongi ngesi ni eburunit, ani ni epalag, nak ngikilinga. Tani ngisorok, iloyeene, tobur. Ani ngikiliok lusorok, ibusokinosi ani iloitor. Nakaneni daang lu igienosi Ekapolon Akuj, eanyunete ngikilinga lukiteat. Epororete loger a ngigolei, ematarosi nakaneni nyeburuni, eloose nakaneni nyiloi. Ebala Akuj kona, “Esi ngakwapea na iloka, kililinga pan topupokisi ngakiro kang! Tonyoutu ayaar ngakiro kus nitubet ekies, emini esi alolom na iruorikineta. Emorikinos atotiakutu itwaan ni iyookino. “Ngae kolong echuchuuni ekajwon lo abuni alo kide, tobwang ngimoe keng anicha elosi kadaang? Ngae isidwangi ngesi ngikapolok ka ngibukui? Eari ekileng keng kesi toritak nalup loger a apua. Iealarete ngimalea keng lua amod kesi loger a ngatunyeny ana ekutari ekuwam. Kiwap ngesi kesi kitor akaalimon. Ekeri ibiroro tosub nyichiakit ngalup! Ngae kolong asubakini ngakiro nguna? Ngae arekini ngirwa lu esubakinotor ngakiro? Ayong Ekapolon Akuj ayei kolong napei anakisiakinet. Ayong Ekapolon Akuj amini tanang losal. “Engolikis ngitunga a ngakwapea anakalonak ngakiro na asubak ayong, eemito kesi emaranete kotere ebuloi. Kotere nguna, echunakinosi kesi sodi pot. Ingarakinosi ngikadukok, elimonokinosi make ebalasi, ‘Totitinyer!’ Elimokini ekechian ngakito tolimok eketiakan ngasua tama, ‘Isubak iyong etich lokiminari!’ Lokedichan akuj nasubuna a ngasua, ipuruuni lokadupan ngisumarea. Tolimut kesi tamasi, ‘Asubun nikajokon.’ Sodi kitowaa kesi akuj ngina todupakis ngisumarea. “Nakaneni Isirael, ekasuban etich kang, iraakasi esi ngitunga lu aseu ayong, iraakasi esi ngalesea a Aburaam, alo erai lopae kang. Kayauni kolong ayong esi alosal a akwap, katanyar alowaitin alukalonak katolimok atama, ‘Irai iyong ekasuban etich kang.’ Abu ayong nyakanger esi, pearai abu katoseu. Nyieam kainyo kirukit ayong ka esi! Arai ayong Akuj kus, warasi nyikibul! Ketogogongi ayong esi kengarak. Keyoki ayong esi katoyuu. “Ngulu kingoikinito esi daang, irumete ngileech na idwangere. Ngulu kitijiyete esi daang, etoakete tongopiasi anakwap. Ilomarete esi akisak kesi, nakaneni nyianyunete esi kesi. Ngulu kitijiete esi, engopiarete tarata pas. Ayong arai Ekapolon Akuj na arai Akuj kus. Ketogogongi ayong esi kalimokinit abala, ‘Nyieam, kengarakini ayong esi.’ ” Ebala Ekapolon Akuj kona, “Esi Ngisirael, tani kidiseak esi, nabo tapalag, nyieam, kengarakini ayong esi. Ayong Akuj a Isirael na etaleuno, ngesi kayuununi esi. Kesikokini ayong esi ibore nidaet ngikinyam, ni eyakasi ngikel lukitet akwanak. Irienyete esi ngimoru kinyasut, eraraun ngimukur tarata ngatunyeny, sodi kilepasi esi kidiama tokuta ekuwam nikalonan kiela ekuwam loapolon. Ani erumor talakaros esi kainyo arai ayong Akuj kus. Kipuruunete esi ayong na arai Akuj a Isirael na etaleuno. “Ani kengopikis ngitunga kang ngakipi, ani esaa lo esakete, tookito ngidokolei kech akure, ayong Akuj a Isirael, nyaisikini kesi. Eteleleuni ayong ngangololin alomukur alukoonok deu, atalakak ngileleae anadipoe. Etiliwori ayong ariet ngabwelin, etiliwo akwap nakoonon ngileleae lu eleleete. Eturupuni ayong ngichekereng anariet, ka ngiwo ka ta lopara. Erupunete ngamon anakwap anakoonon, ngamon a ngidomou ngikito lu enyaritae ngimitidari ta ngitelitei. Ingolikinete ngitunga ngakiro nguna toyena atamar ayong Ekapolon Akuj, ngesi asubakini nguna. Eanyunete nabo atamar ayong Akuj a Isirael na etaleuno ngesi asubakini nguna.” Ekapolon Akuj na erai ekapolon a Isirael, ebala kona, “Esi ngakujo a ngibukui, yautu ngakiro na ikeredikina esi! Potu pan todwara ngakiro na moi esubakinosi, atoyanete sua ngirwa lu esubakinotor. Tolimokis ngikatubok ngikesio ngakiro nakolong asubasi, kitolimokis sua eger a ngakiro kanguna, sodi etamakineta. Tolimokinae sua ngakiro na isidiunosi atoyeneta atamar iraakasi esi ngakujo! Tosubakisi pan ngakiro ngadi, kejokak kori keroko, sodi atoriangakinotor sua kitobul. Iraakasi esi pas, nabo eraakasi ngakiro na isubete esi daang pas. Kikadakini itwaan ni atiaku akilip esi! “Echuchuunit ayong itwaan alo kide, itoruni ngesi kwap bu kitijik. Ipudae ngesi ngikapolok loger a echoto, loger lo ipudaa ekayen ngamoti echoto. Ngae anikus adwarit ngakiro nugu sodi atamareta iyookinito esi? Emam tani ipei kus alimunit, emam itwaan eira esi ilimunete! Ayong Ekapolon Akuj ngesi arai lo ekingaren alimokini Sion, atomea itwaan Yerusalem atamar, ‘Eponito ngitunga kon! Eponito nawi!’ Ani engolikini ngakujo, emam tani apei na ayei akiroit na elimuni, emam tani apei na apedori atachun ngakiro na engita ayong. Eraakasi ngakujo nugu daang pas, emam ibore esubakinete, epalag kesi nabo emam ngikilinga.” Ebala Ekapolon Akuj kona, “Ekasuban etich kang, lo ainak ayong ngikilinga, ngesi aseu ayong nabo ketalakarit. Elelebik ayong ngesi etau kang, eyauni ngesi ngakiro na eriyan nakwapea daang. Nyelachakini ngesi kori nyiremari, kori nyiruoro irema alorukudi. Eliwor ngesi lo epalaana ani alupalag, tapataner ani alu emam ibore. Einuni ngitunga ngakiro na eriyan. Nyelungakin ngesi kori nyipirisaar etau, itowei ngesi ngakiro na eriyan anakwap. Idarito ngakwapea nakalonak akitatamo keng.” Asubuni Akuj adis sodi topeta, kisubus ngesi akwap ka ibore daang ni eyei neni, nak ngitunga a akwap daang akiyar ka akianget. Alimoki tokona Ekapolon Akuj ekasuban keng kona, “Ayong Ekapolon Akuj kanyarae iyong kainak apolou na irichakini atamar esubio ngakiro na eriyan anakwap. Kichamakin ayong ka ngitunga daang anikon, ainuni ayong ngakwapea daang akicha esitoru nikon. Ingaari iyong ngakonyen a ngimuduk, talachak lu eenitae alojelae alu eribokinit. “Ayong bon arai Ekapolon Akuj na arai Akuj kus. Emam akuj ache kimorea ayong apolou kang, nyikimori ayong ka ngakujo nasubuna ekipur kang. Asubakinosi ngakiro nakolong adwari ayong. Kalimokini tokona nakiteat eringa nyenanga ni esubakinotor.” Toeokisi Ekapolon Akuj eeos lokitetet, toeok akwap daang ekipur keng! Esi lu iloose ananamea, kipuro ngesi! Toeokisi esi ngakwapea nakalonak ka daang lu ilomito inaa! Ariet ka ngirerea keng, kipuro Akuj! Ngitunga a ngadakarin a Kedar, kipuro ngesi! Ngulu elomito lore a Sela, kiremasi anaitae a ngimoru ilakara! Ngulu elomito nakwapea nakalonak, kipuro ka akikut Ekapolon Akuj! Anyou Ekapolon Akuj ejie loger a ekajwon, engat ngesi iburakinit ejie, ewangak ngesi ejie, irema, edodiu ngikilinga keng alomoe keng. Ebala Akuj kona, “Edatak ayong ngirwa lukaalak emam ngakiro atachak ngitunga kang. Anang tokona akolongit na anyounio, egoro loger a aberu ana eriaba akidoun. Enyasuni ayong ngimukur ka ngimoru, etoon nginyia ka ngikito. Eloch ngadipoe a ngangololin toliworos ngarieta, etoon ngabwelin a ngakipi. “Ariki ayong ngitunga kang lumuduk, esitor lorotin lu nyisitoro kesi a ache. Eloch ayong aribu kech toliwor akicha, etiliwo akwap nangarab na erurut alongaren kech. Eraakasi nguna ngakichikakinet kang, erichakini ayong kesi nyechwangakini. Ngulu daang igienosi ngakujo nasubuna, lu enyarito ngakisikwaanet abe ngakujo kech, isurumio ngileech nikaronon.” Ebala Ekapolon Akuj kona, “Topupokisi esi lukinim! Kingolikisi, esi lumuduk! Eyei itwaan emudukana akidwang ekasuban etich kang a? Eyei ni ekinimana akidwang itwaan ni ameuni ayong a? Ngisirael, ingolikis esi nakaalak, nakaneni emam na ichoiasi! Eyakasi ngaki nakiiraret nakaneni emam ibore iirasi!” Esaki Ekapolon Akuj noi ayuun ngitunga, sodi kisikok ngesi ngitalio keng ka ngakitatamet, tasak ngitunga keng tokera. Nakaneni ngitunga keng lugu tokona ademar ngiboro, nabo aliworosi kesi ngirikon! Erumiar kesi agolokin lojela. Arikor kesi angop ikayuunan. Ngae anikus iirari ngakiro nugu? Napei tokona jik, idetarete esi ngaki a? Ngae epotori Ngisirael nak ngikademak ka ngirukooi. Erai Ekapolon Akuj elope, lokolong kisechakini ngoni! Nyiwapa ngoni elote lo asaki ngesi nabo nyiwapa ngakitatamet keng. Kotere nguna, abu Ekapolon Akuj kisiwarak ngoni angoit keng, nabo atoriamutu aboliaro alojie. Torirau angoit keng alo Isirael loger a akim, nakaneni pekiyeni ngoni ngakiro na esubasi nabo nyemisikina. Isirael, ebala Ekapolon Akuj nakolong kisubuni iyong kona, “Nyiem, kayuuni ayong iyong. Kanyar ayong iyong a ekiro kon, irai iyong ikang. Ani itori iyong nakipi natuluk, kiruki ayong ka iyong, nyikipiyorete iyong ngichan. Ani itori iyong nakim, nyikinomi akim, nyikimunyari iyong asarae kainyo ayong arai Ekapolon Akuj na arai Akuj kon, Akuj a Isirael na etaleuno, nakayuununi iyong. Ajali ayong Misiri kitalakakinere iyong, ajali ayong Kuch ka Seba. Ajali ayong ngibukui etia ni etia sodi katoyuunea iyong, kainyo kamuno ayong iyong noi, nabo kamina kedodikinit arimatoi. Nyiem, kirukit ayong ka iyong! Abuuni ayong ngitunga kon nawi alo kide ka achunun alo too. Alimokini ewae lo alokwap atama, ‘Talakak kesi toloto,’ atolimok kuju atama, ‘Tochoite iratakini kesi.’ Kimiek ngitunga kang tobongut anakwapea anakalonak, tobongut alowaitin kadaang a akwap. Eraakasi kesi ngitunga kang a ilope, asubuni kolong ayong kesi kainut ayong ekipur.” Ebala Akuj, “Tanyarautu ngitunga kang nitubet ekies. Emudukaka kesi tarai eyakasi ngakonyen, Ekinimaka tarai eyakasi ngaki! Tanyarautu ngakwapea daang lokies. Anakujo kech kadaang, akuj ani apedori akidwar nguna esubakinosi, akuj ani adwarit ngakiro na tokona esubasi? Torikut ngakujo nguna ngikaanyunak kech kidodiut atamar iyookinito kesi nguna, tolimosi iteni a ngakiro kech. “Ngisirael, iraakasi esi ngikaanyunak kang, kaseuni ayong esi toliworos ngikasubak etich kang, sodi kitoyeneta esi ayong kitonup. Toyena atamar ayong bon arai Akuj. Emam akuj ache pearai ayong, emam na amin nakanuan nabo emam na emini monan jik. “Ayong bon arai Ekapolon Akuj, emam akuj ache kiyuuni iyong. Adwari kolong ayong nguna esubakinosi, ani erumor abu kengarak esi. Emam akuj nagela na asubaki nguna nakanuan, iraakasi esi ngikaanyunak kang. Ayong arai Akuj, nabo arubakini araakau Akuj jik. Emam itwaan epedori abuchar anakan kang, emam itwaan epedori akiloch ngakiro na asubi ayong.” Ekapolon Akuj nakolong kiyuuni esi, na erai Akuj a Isirael na italeuno, ebala kona, “Ani abili ayong ayuun esi, ameari ayong ngasigerea Babilon, atobwang ngidorin a ere. Ani achala a Ngikalidayo alu eraakasi ngitunga a Babilon, ilocho toliwor akigoro. Ayong arai Ekapolon Akuj, na arai Akuj kus na etaleuno. Kasubuni kolong ayong esi Ngisirael, arai ayong ekapolon kus.” Kolong a angorot, ewaakini Akuj erot kiding anam, kisitor erot kiding ngitoroi lu akulaate. Toriko ngasigerea nakajwok namunyaro, ngasigerea a ngaurukukui ka ngangolei. Toritakinos daang nalup nyenyouno nabo jik, kimuchakis loger a ataa ana itudungeo! Nakaneni ebala Ekapolon Akuj, “Tojongoto aneikina ngakiro na aekasi, kori tojongoto akitam ngakiro nangorok. Kiteutu ngakiro nakiteat asubakini ayong. Esubasi tani tokona, nyiteete esi a? Asubakini ayong erot anariet, nabo eteleleu ngangololin anariet. Kakerete ayong tani ngitieng a moding, kepuruunete ayong ngikolowoi ka ngikaleeso, kainyo eteleleuni ayong ngangololin anariet, etamat ngitunga kang luseuna ngakipi. Eraakasi kesi ngitunga lu asubuni ayong a akiding kang a ilope, sodi toeotor ekipur kang!” Ebala Ekapolon Akuj kona, “Nakaneni esi Ngisirael, abu ayong ketubur esi noi, nyilipa esi ayong. Nyeinuna esi ayong ngimesekin lu eraakasi ngakipeyos na inomio, nyidodikina esi ayong arimatoi kotere ngakipeyos kus. Nyebelara ayong esi kotere akisak ngakipeyos nakaalak, kori nyituburuna ayong esi kotere akisak emitina lokaakunyon. Nyegielakina esi ayong emitina lokaakunyon, kori nyisimwono esi ayong anikatoronon a ngibaren kus. Akidwang nguna, kisinua esi ayong eegos a ngasechesea kus, kituburut esi ayong kotere naaronok isubete. Tarai ayong ngesi Akuj nakarimanakini esi ngasechesea kus, nyeringa nabo abilit ngasechesea kus lomoyo. “Potu apana lokies, kisisautu ngakiro a ekies kus! Tolimutu ngakiro kus atoyeneta na iyookinito esi! Asechi kolong apaakus lo ekingaren, kasechakinete kolong ayong ngikarikok kus, kinyasut ngikapolok kus akai kang. Kotere nguna, enyasu ayong Isirael, emiek ngitunga kang iyenyio.” Ebala Ekapolon Akuj kona, “Topupok Isirael, lo irai ekasuban etich kang, ngitunga kang lukolong aseuni ayong, ngalesea a Yakobo. Arai ayong Ekapolon Akuj nakolong kasubuni iyong, kengarak ayong iyong napei kolong kidounere. Nyiem, irai iyong ekasuban etich kang, ngitunga kang luseuna, lu amina ayong. “Abukokini ayong ngakipi nakwap nakoonon, eteleleu ngangololin anakwap anakoonon. Abukokini ayong etau kang lode kon, atobukok apiaro kang nalesea kon. Ekilikiluunete kesi loger a nginyia alu erupunito ani a ngakipi anakaalak, loger a amelu ana erupunit alokwaas a ngakipi ana eleleete. “Etamarete ngitunga a ngapei-pei, ‘Arai ayong ika Ekapolon Akuj.’ Etamarete ngiche kirai Ngisirael. Igirakinete ngiche ngakiro nugu nakan kech, ‘ika Ekapolon Akuj,’ tamasi kirai ngalesea a Isirael.” Ekapolon Akuj na erai ngesi epolokinit ka akiyok Isirael, na erai Ekapolon Akuj Namerikanyer, ebala “Ayong lo ekingaren ka lo esal, ayong bon arai Akuj, emam akuj ache mati ayong. Ngae ikwaan ka ayong? Ani tolimo robo! Kikeu ngakiro nguna alongaren kang. Ngae kolong adwari a angorot ngakiro na esubakin? Ani tolim robo tani na moi isidiun! Ngitunga kang, warasi nyieam! Iyenunete esi atamar napei kolong a angorot tanang tokona, kalimokinit ayong esi ngakiro na esubakinosi, iraakasi esi ngikaanyunak kang. Eyei Akuj ache mati ayong a? Emam ataaba ache. Emam na ayeni ayong.” Ngitunga daang lu esubete ngakujo nasubuna eraakasi pas, nabo ngakujo na emunosi kesi noi nguna eraakasi pas. Ngulu ilipito ngakujo nguna, emudukaka nabo ebangaaka, isurumio kesi ngileech. Itwaan daang ni esubuni ekisikwaane anasuat sodi kilip tama abe erai akuj, emam ibore eriamuni! Isurumio ngulu daang ngileech. Eraakasi lu esubete ngakujo nguna ngitunga. Kimiekisi tochununos lokies. Ebuli kesi kiruma ngileech. Elemuni eketiakan ngasua, tolem asuat kitokeia anakim. Sodi kitiek a ngakan keng ana ngikilinga, tosubun ibore ngini. Esaa lo itiekea ngesi, enyami akoro, tanyam akure, nabo eburuni. Itwaan ni ichie ngakito, elemuni akitoe kitem. Kiger a emunyen ani erumor kichie a ngiboro keng alukichiet, sodi kisikwaan ka itwaan nikebusean, ani erumor tosipok kai keng. Epedori toyep ngakito a echekereng, ka na echoke ka ngiberoch anamoni. Kori epedori kitak echekereng sodi kidar akiru erami kiturup. Elemuni itwaan ngakito epewae toliwor ngakito nakipoet, tosubunea epewae akuj nasubuna. Elemuni ngakito ngache kinokakinea akim kipiarar, sodi kimaa ngamugati, tolem ngakito ngache tosubunea akuj sodi kilip. Elemuni ngakito ngache kinokakinea akim topeyo akiring, tanyam kimwon. Ani erumor kipiarar tama, “Ajoker kare nikamonan nege! Ibore be akim robo en!” Ani ngakito na idongete, tosubunea akuj dio kijuuru kilip. Kilip tama, “Toyuunae, iyong irai akuj kang!” Ebangaaka ngitunga lu ikote neni nyeyenete ngakiro na esubete. Egolol ngakonyen kech nyiteete nabo enangakina ngitamen kech nyeyenete nguna iteni. Itwaan ni esubi ngakujo nasubuna, ebangaana nyitamuni tani tama, “Enokakinea ayong akitoe epewae akim epoo ngamugati ka apeyo akiring, atanyam. Atolem akitoe na idongi atosubunea akuj. Abe ejuurui tokona ayong elipit ataagoroit a akitoe!” Abe ikwaan cha nguna ka akinyam ekuruon. Esiwaasi ngesi ngitamen lukeng a abaangu ngulu nyeringa tani ingarakin. Nyitamuni tani atamar meere ekisikwaane lo atingit ngesi ngolo akuj. Ebala Ekapolon Akuj, “Isirael, kitam nugu, toyen atamar irai iyong ekasuban etich kang, Kasubuni ayong iyong toliworor ekasuban etich kang, nakaneni nyekemuriakini ayong iyong jik. Ekisa tokona ngasechesea kon nikalonan loger a edou. Tobongu nikang, ayong kayuuni iyong.” Iyong adis, toeok a alakara! Esi ngiwaitin lu alotooma ngalup, kiremasi! Esi ngimoru ka ngikito a amoni daang, toeokisi kimaritetokis! Kainyo edodiu Ekapolon Akuj apolou keng ani ayuunea ngitunga keng Ngisirael. “Arai ayong Ekapolon Akuj, akayuunan kon. Ayong kolong kasubuni iyong anakook a itiokon. Arai ayong Ekapolon Akuj, na arai Akasubunan ibore daang. Ayong kolong bon apetakini adis. Nakolong asubunea ayong akwap, emam itwaan kengarakinit! Etabanganianari ayong ngikadwarak, sodi esiwaa ngimurok. Etepenianari ayong ngakiro alukoosok, etiliwo aosou kech abaangu. Nakaneni na edwarea ekasuban etich kang ngakiro, asubak ayong ngakiro nguna etemokin. Na ameunea ayong emeanara akisileereun ngakiro na areat ayong, asubak ayong ngakiro nguna etemokin. Alimonokini ayong ere a Yerusalem atamar elomete ngitunga neni nabo, atolimok ngirerea a Yuda atamar edukio nabo. Etonyouni ayong ngirerea ngulu alonyas. Adunguni ayong ngakiro sodi etoon anam. Atolimok Korechi atama, ‘Topolok akwap kotere ayong, tosubak nguna asaki ayong. Todung atamar todukoe Yerusalem nabo, kitowae ngapirio a akai a Akuj nabo.’ ” Aseu Ekapolon Akuj Korechi toliwor ekapolon keng! Aseu ngesi kidwang ngibukui, ameu ngesi ademar ngikapolok apolou kech, engakini Ekapolon Akuj ngesi ngidorin a ngirerea. Alimoki Ekapolon Akuj Korechi kona, “Kengarenikini ayong iyong ereriak ngimoru ka ngimukur. Abwangi ayong ngidorin lua ngasua ananyangayek, eala ngasua kech nakirionok na iriwokinitae. Kainakini ayong iyong ngaropiyae na iweitae, ka ebari lo imunonitae. Neni ngesi iyenunea iyong atamar ayong Ekapolon Akuj na arai Akuj a Isirael ngesi kolong kanyarae iyong a ekiro kon. Kaseu ayong iyong sodi kingarak Isirael, lo erai ekasuban etich kang, ngitunga lu aseu ayong. Kainak ayong iyong arimatoi naationon, tani pekiyeni iyong ayong. “Ayong arai Ekapolon Akuj, emam akuj ache. Emam Akuj ache mati ayong. Kainakini ayong iyong ngikilinga tani pekiyeni iyong ayong. Asubi kona sodi toyeneta ngitunga daang napei alo kide tanang too, atamar ayong arai Ekapolon Akuj, toyena nabo dang atamar emam akuj ache mati ayong. Asubi ayong akicha ka aribu ayaununi ayong apiaro ka naaronok. Ayong Ekapolon Akuj ngesi asubi nguna daang. Ee Akuj, tachaku kare adis alokidiama, kimiek adis kitetep ateneanut loger a akiru. Tangaar akwap kidiau ayuuno, sodi tokilikilu akwap kotere ateneanut. Asubakini ayong Ekapolon Akuj nguna.” Oitiakoi! Abe etioko nginyas eanyuni itwaan ni ebolosi ka Akasubunan keng! Ikwaan ngesi ka amot na isuburae ekayen keng. Ikokini echoto ingisi ekayen ai, tama, “Nyo iyeunit iyong?” Kori tama, “Emam ibore iyeni iyong!” Oitiakoi! Abe etioko nginyas eanyuni itwaan ni elimokini apakeng tama, “Nyo iuriunit iyong?” Kori tolimok itiokeng tama, “Nyoni idouni iyong iriabar?” Ebala Ekapolon Akuj, na erai Akuj a Isirael na italeuno, “Nyikitimi esi akingit ayong ngakiro a ngide kang, ka alimokin ayong nguna ejoikinit asubi a? Ayong kolong asubi akwap, sodi atosub ngitunga toloma neni. Apetakini ayong adis a ngikilinga kang, ayong apolokinit akolong, ka elap ta ngikanyer. Ayong echuchuuni Korechi tonyou, tosubak ngakiro na asaki ayong, kitiriyan ngakiro. Etorwaari ayong erot lo itori ngesi daang. Eduki ngesi nabo Yerusalem, lo erai ere kang, sodi talachak ngitunga kang lu irumiaritae nakwap nache. Esubi ngesi nguna emam ibore etachitere kori ediakitere.” Alimu Akuj Namerikanyer nguna. Alimoki Ekapolon Akuj Isirael kona, “Eliwor ebari a Misiri ka Kuch ekon. Ani ngitunga lukooyak a Seba, eliworosi ngikasubak etich kon, kiwapakinete kesi iyong toenitetei a ngiriko. Ijuuruyete kesi alongaren kon kimaimaa ebalasi, ‘Irukito iyong ka Akuj, emam akuj ache mati ngesi bon. Akuj a Isirael, na eyuununi ngitunga keng, iteni erai Akuj na edukit. Ngulu ilipito ngakujo nasubuna, irumete ngileech toema, ibileri kesi daang. Nakaneni eyuuni Ekapolon Akuj Isirael, eanyuni Isirael ayuuno nakajik, nyirumete Ngisirael ngileech jik kori nyitoemio kesi.’ ” Ekapolon Akuj asubuni adis, ngesi erai Akuj! Ngesi ayeuni ka asubun akwap, kitogogong jik. Pekolong asubuni ngesi akwap toliwor aka ekurikur, pearai asubuni toloma ngitunga. Ngesi ebala, “Arai ayong Ekapolon Akuj, emam akuj ache. Peeruoro ayong emunonit, nyiruoro anaribu. Nyelimokina ayong Ngisirael atama, ‘Tasakae ayong alokurikur.’ Ayong Ekapolon Akuj, eruoro ngakiro naakwaak, alimorit ngakiro na eriyan.” Ebala Ekapolon Akuj kona, “Tochununos ngitunga a ngibukui alu idongito iyarete, potu lokies! Ngulu etubonorosi edakito ngakujo na ichietae, ka akilipit ngakujo na nyeyuunete kesi, ebangaaka ngitunga ngulu! Potu kiruorikisi, tolimosi ngakiro a ekies kus, kimiekisi kesi kingitanaros ngakiro! Ngae kolong adwari ngakiro nugu a angorot? Meere ayong Ekapolon Akuj na arai akayuunan a? Emam akuj ache mati ayong bon. “Toreeunos tokona nikang toyuunos, esi ngitunga daang anakwap! Ayong bon arai Akuj, emam ache. Erai akichikakinet kang aka iteni, nyilochio. Ekongi ayong a ekiro kang, eriediki itwaan daang alongaren kang, tolim atamar aliwor ni emunoi anikang. “Elimunete kesi atamar nikang bon ngesi eanyunere akidwang ka ngikilinga. Nakaneni ngulu karemokino ayong, irumete ngileech.” Ayuuni ayong Ekapolon Akuj ngalesea a Yakobo daang, kepuruunete kesi ayong. “Esal a ngakujo a Babilon logo! Elipitae kolong Bel ka Nebo, nakaneni eyakasi tokona nasaaja isiwokitae ngisikiria, aliworosi eegos a ngibaren alu eburunit. Nyeyuunosi ngakujo nguna make, irumiaritae kesi yaarae nikalonan. Esal a ngakujo a Babilon logo! “Topupokinae, esi ngalesea a Yakobo, esi ngitunga kang lupiyayek. Ayong kadakit esi anakookes kata itiokus, keyok esi napei anakidoun. Arai ayong Akuj kus nabo keyoki esi tanang imojongete epete ngakorwo nakies. Kasubuni kolong ayong esi nabo keyoki, nabo kengarakini ayong esi katoyuu.” Ebala Ekapolon Akuj, “Ngae kesikwaanere ayong? Eyei itwaan kikwaan ka ayong a? Engaanarete ngitunga ngichuei kech tobukut egolit, itemete kesi ngakwangae anaratilio kech. Tatacha eketiakan egolit ngaropiyae sodi tosubakinea kesi akuj, ani erumor kijuuruoto kilipa! Toriongakis akuj ngina losegeta yaasi. Tosipokis sodi towo kitirokin neni jik nyiyotokini. Na igoronokinio itwaan ngesi, nyiikini kori nyeyuuni alochan. “Kitamutu nugu, esi ngikasechak, kitamanasi ngakiro na asubak ayong. Kitamutu ngakiro nangorok, toyena atamar ayong bon arai Akuj, emam ache ikoni ayong. Napei kolong anakisiakinet, adwarit ayong nguna esubakinosi. Alimuni ayong atamar nyichwangakinosi ngakiro na areat ayong, nabo asubakini daang na asaki asubakin. Anyarauni ayong itwaan alo kide, ibirun kwap loger a ekuruk, sodi kitemok nguna arekini ayong. Alimu ayong nabo asubakini. “Topupokinae ayong, esi ngitunga lukechanak, esi lu itamito atamar elona ayuuno. Etaapu ayong akolongit a ayuuno, nyelona. Nyetinenikini ayuuno kang. Ayuuni ayong Yerusalem ainu Isirael ekipur.” Ebala Ekapolon Akuj kona, “Babilon, kasio totiyaun alokicholong kon a apolou, kiboikin napua! Ikwaan kolong iyong ka apese na nyepero ka ekile a ache, irai ere lo nyidwanga, nyeringa nabo iyong irai nakajokon kori nakaalimon. Tolemu ngamoru nakirieet! Kiriak ngakiria! Talachu awaru na erapit ereet! Talacha ngiworui kon! Kikea ngiworui kon todok ngingololin! Kingolikinete ngitunga iyong imuner, ingolikinete ngileech kon. Atachakini ayong naaronok, emam itwaan keratakini.” Akuj a Isirael na italeuno kilachakini ngoni. Erai ekiro keng Akuj Namerikanyer. Ebala Ekapolon Akuj Babilon, “Kililing kiboikin naribu, nyeringa nabo kinyarao iyong akapolon a ngakwapea! Angoikinit ayong ngitunga kang, etusub kesi meere ngikang, epoto kesi kainak iyong, nyidodikina iyong kesi ngisien, ibu iyong kitusub tani ngikasukou etich loationon. Itamit iyong ibala, ‘Aliwor ayong akapolon jik,’ ibu iyong nyiimisik ngakiro nugu, kori nyiitama atamar ikokini esal kech ai. “Topupok, iyong na imina amera, iyong na ibala kori ibooyi niajokon, iyong na itami ibala, ‘Ayong bon arai, emam iche kedwangit ayong. Nyaliwor ayong jik apuserut, kori nyedaun ngide kang.’ Nakaneni apei kolongit, inangakin iyong ngakiro nguna daang esubakinosi anikon. Tani kisubit iyong asubanot daang, tomuro ngikitetio daang, edaunosi ngide kon ka ekile. “Asibit kolong iyong kori ibooyi akaalimon anaronis kon, itamit iyong ibala, ‘Emam itwaan ketee.’ Kibatasi iyong aosou ka achwaanu kon, kitama iyong tama, ‘Ayong bon arai, emam iche kedwangit ayong.’ Epote naaronok nikon, nyipedori iyong akiratakin a amuronot kon. Epote nginyas nikon atipei, nginyas lu nyeanyuna iyong a ache! Kasio, kirichak amuronot kon ka asubes, lukolong isubi iyong napei alokiditeu. Epedorete karika akingarakin iyong, epedorete karika akitoem ngimoe kon. Kituburunito iyong ngimurok kon pas. Kimiek robo ngikekeriak lukon ngulu pot kingarakis, lukesemok ngikanyer, ngulu etiakatiakaate adis, ngulu edwarete nguna esubakinosi ngilapio daang. “Ikokinete kesi ngatunyeny, nakaneni enomi akim kesi! Nyepedorete kesi tani ayuun make, erirauni akim noi anikech, nyeliwor akim na ipiarare! Daang na epedorete kesi asubakinea iyong nguna, ngikekeriak lukon igieno iyong nakanuan ngulu. Kimiekinete kesi iyong topetaros daang, emam itwaan idongi kitoyuu iyong.” Ngisirael, topupokisi, esi lu iraakasi ngalesea a Yuda. Ikongete esi a ekiro a Ekapolon Akuj tamasi abe ilipito Akuj a Isirael, nakaneni eraakasi nguna ngaka ngakituk pas. Tarai bo iwogasi esi ibalasi, iraakasi esi ngitunga a ere a Akuj, ibalasi igienosi Akuj a Isirael, na erai ekiro keng Akuj Namerikanyer. Elimokinit Ekapolon Akuj Isirael kona, “Kolong a angorot, adwari ayong nguna esubakinosi, ani erumor atosubak atipei. Ayeni ayong atamar iliwor iyong lokechanan, togogonger loger a asuat anakirion, toniniker loger a asuat ananyang. Ngesi kolong adwarea ayong ngakiro kon a angorot, atolimo ngakiro na eringa nyesubakina, sodi nyiilimunio tama, ‘Ngakujo nakang nasubuna ka ngakisikwaanet kesi asubakinete nugu.’ “Ipupi kolong a ngaki, ingolik tokona a ngakonyen! Iwouni iyong alimor nguna? Kalimokini tokona ngakiro nakiteat nakolong aringa ayong nyisileereuno. Tokona esubatar nguna, nyesubakina nakanuan a ache. Arai tosubakina, kibala iyong, ‘Anu! Na ayeni ayong sek a’ Nyiirara iyong nugu nakanuan kori nyeyena, emam akiroit tani apei anangu naki kon, kainyo ayeni ayong atamar imodeana iyong, nabo irai iyong ekasechan napei anakidoun. “Eratakinit ayong angoit kang, etikitiki ayong nyikimunya iyong sodi kipuruunioto ngitunga ekiro kang. Kening ayong iyong anakim a aboliaro, loger lo itosegere akwangat anakim. Nakaneni ariam ayong atamar irai iyong pas. Asubi ayong nguna kotere ayong alope, nyalakakini ayong ekiro kang imenyaritae, kori nyikimori ayong ka itwaan iche ekipur lo erai ekang bon.” Ebala Ekapolon Akuj kona, “Topupokinae, Isirael, ngitunga lukolong anyarae ayong! Arai ayong Akuj, ayong arai na ekingaren ka na esal, ayong bon arai Akuj. Ngakan kang kolong asubunete ngapirio a akwap, sodi atopetak adis. Na anyaraa ayong akwap ka adis, todolut daang nikang atipei. “Tochunakinos esi daang, kiirasi! Emam tani apei a ngakujo kus na abu todwar atamar itwaan ni aseu ayong ngesi itijikini Babilon. Esubakini ngesi nguna asaki ayong tosubak. Ayong ngesi alimuni nguna atanyara ngesi. Atoriko ayong ngesi sodi etojok ngakiro keng. “Taapuutu tokona, kiirasi ngakiro na alimuni ayong. Napei anakisiakinet, eruoro ayong ngakiro ilereete, nabo eyoonokini ayong ngakiro kang na alimuni daang.” (Kameu tokona Ekapolon lo erai Ekapolon Akuj ayong kainak agogongu a etau keng.) Akuj a Isirael na italeuno, Ekapolon Akuj na kiyuuni iyong, ebala, “Ayong arai Ekapolon Akuj, Akuj kon, naketatami iyong kingarakinor, katorik iyong alorot alo ejoikinit iwapi. “Arai kolong kiwapak ngitalio kang! Keleleunit apiaro nikon loger a angolol ana nyeoneene! Kebunit ayuuno nikon loger a ngitoroi a anam. Kelalak ngalesea kon loger a asinyen, pekikisar ekiro kon kori pekengopia.” Tonyoutu tokona alo Babilon talachakinos! Tolimosi ngakiro nguna a ekare, tolimosi awadaang, atamar “Ayuu Ekapolon Akuj Isirael lo erai ekasuban etich keng!” Nakolong arikitor Ekapolon Akuj ngitunga keng, nyenyama kesi akure anariet. Abu nak kesi ngakipi anataaba, apaki ngesi ataaba, toleleut ngakipi. Ebala Ekapolon Akuj, “Emam ngikasechak ekisil.” Topupokinae, esi ngakwapea nakalonak, esi ngitunga lu ilomito nikalonan! Kanyarae Ekapolon Akuj ayong eringa ayei nakook a itiokang, katoseu ayong atoliwor ekasuban etich keng. Kipena ngesi angajep kang tokwaner loger a ekileng. Katarap ngesi ayong etorube a akan keng. Kepena ngesi ayong loger a emal a amod, kerepak namod keng kewaa. Katolimok ayong tama, “Isirael, irai iyong ekasuban etich kang, kotere iyong, kepuruunete ngitunga ayong.” Atolim ayong atama, “Asub ayong etich pas! Abuko ngikilinga kang pas.” Tarai apedori ayong akigienokin Ekapolon Akuj, kainak na ejoikinit ayong aanyuni, ngesi kainanakini ayong ebachit. Kasubuni Ekapolon Akuj ayong anakook a itiokang, atoliwor ekasuban etich keng, sodi atobuu ngitunga keng, atobuu Ngisirael lu epetara. Kainaki Ekapolon Akuj ayong ekipur, ngesi erai ngikilinga kang. Kalimokini Ekapolon Akuj ayong tama, “Ekasuban etich kang, kainakinit ayong iyong etich loationon. Tani keyei etich lo a abuakin Ngisirael lu idongito eyarete apolou kech, ketiliwori ayong iyong akicha a ngakwapea, sodi toyuunotor ngitunga daang anakwap.” Akuj a Isirael na italeuno, na erai akayuunan, alimoki ngolo imenyaritae noi, ngolo eremokino ngakwapea tarai ekasuban etich a ngikapolok, alimoki kona, “Kingolikinete ngikapolok iyong kilachakinio, enyounete kidodikis iyong arimatoi, ingolikinete tani ngikapolok luuchik, ijuuruyete kesi kidodikis iyong arimatoi.” Esubakinosi nguna kainyo aseu Ekapolon Akuj ekasuban etich keng. Akuj a Isirael na italeuno, irichakini ngakichikakinet keng. Ebala Ekapolon Akuj, “Ani enangi akolongit nayuunet esi, kengarakini ayong esi, eik akigoro kus. Kachoikini ayong esi keyok kichamakin ayong ka ngitunga daang, kitoru achamunet ngina nikus. Kemiekini ayong esi tobongosi nakwap kus ngina tokona erai alaireng. Alimokini ayong lu eenitae atama, ‘Talachakinos!’ Atolimok lu eyakasi naribu atama, ‘Topudutu nakicha!’ Ikokinete kesi ngamesekin na edakasi alomukur, nyenyami kesi akoro kori akure jik. Nyenomi kesi akolong kori nyewani ekuwam lokariran a akamu, kainyo erikit kesi ngolo emina kesi. Erikori kesi loleleae a ngakipi. “Ewaakini ayong erot loapolon lomoru, atosubak erot lo itorunete ngitunga kang. Epote ngitunga kang anikalonan, epote alokwap ka too, epote alo Aswan alokuju.” Iyong adis, toeok a alakara! Iyong akwap, kirema a alakara! Esi ngimoru, kiremasi toeokisi! Isililingi Ekapolon Akuj ngitunga keng, isieniyete ngesi ngitunga keng lu eboliare. Nakaneni tolimut ngitunga a Yerusalem tamasi, “Kichaka Ekapolon Akuj sua! Kimuriakin sua ani a Ekapolon Akuj.” Tatachu Ekapolon Akuj tama, “Imuriakini aberu ikoku keng ni enaki a? Nyeminakini ngesi ikoku ni akook keng a? Tani kimuriak aberu ikoku keng, nyikimuriakinete esi ayong. Yerusalem, ketamunit ayong iyong jiik! Egirit ayong ekiro kon nidapal a ngakan kang. Ngitunga lu ebongokinete akiduk iyong, ibunyuna eponito. Erotokinete lu ngoon kinyasunete iyong. Tongolengolek kingolia wadaang! Echunasi ngitunga kon eponito nawi! Ani araakar ayong Ekapolon Akuj, Akuj na ayari, inisakinor iyong ngitunga kon, loger lo inisar aberu na iusio asir keng. “Enyasunio akwap kon kidong esil, nakaneni edidinger tokona kotere ngulu ebongunito akilom neni. Ngulu kolong kitiliworete iyong alaireng, echadario noi anikon. Ngitunga kon lukolong edoikinio nakwap nache, kilimokinete iyong akolongit ache tamasi, ‘Adidinger akwap naga, kisaki sua wache ni kilomi!’ Sodi kitamana iyong kona, ‘Ekoe, ngae kolong kedoikini ayong ngide lugu daang? Adaun kolong ngide kang, peadikino ayong aanyuni ngiche. Keritario kolong ayong kayaar nakwap nache, ngae etanuni ngide lugu? Edongi kolong ayong bon, aliwae aponeta ngide lugu daang?’ ” Ebala Ekapolon lo erai Ekapolon Akuj kona, “Ekeari ayong akan atanyara ngakwapea, eyaunete kesi ngide kon nawi. Ikokinete ngikapolok taapakon, ikokinete ngakapolok ta itiokon. Ijuuruyete kesi alongaren kon kidodikis iyong arimatoi. Emeyete kesi apua a ngakejen kon. Sodi toyen iyong atamar ayong arai Ekapolon Akuj. Daang lu idarito akingarakino a Ekapolon Akuj, nyisurumio ngileech.” Epedorio ademar asiger ibore ni engatari a? Epedorio ayuun ngirikon a itwaan anikamoitanan a? Atachu Ekapolon Akuj ebala, “Nguna kesi esubakinosi. Edemario asiger ngirikon keng, edemario itwaan nikamoitanan ibore ni engatarit. Etiji ayong itwaan nicha kitiji esi, sodi atoyuu ngide kus. Ngulu kichiakiarito esi, alemuni ayong taaras make, irakarete kesi ngaakot kech a ngikulepek loger a epurot. Neni ngesi eyenuneta ngitunga daang atamar arai ayong Ekapolon Akuj, ayong kayuununi esi katalachak. Eyenunete atamar ayong arai Akuj a Isirael nakaagongon.” Ebala Ekapolon Akuj, “Itamito esi atamar etwarakini kolong ayong ngitunga kang loger a ekile alo elaki aberu keng a? Ani aliwae eyei abarua a elakit? Itamito esi atamar kagielari kolong ayong esi tarata ngirikon, loger a itwaan ani egielari ngide keng tarata ngikedalak a? Mam jik! Kirikio kolong esi kotere ngasechesea kus, kitwarakinio kolong esi kotere aronis kus. “Kotere nyo elilingeta ngitunga kang na alosio ayong ayuun kesi? Kotere nyo peekieta na anyaraa ayong kesi? Ikwa euriana akan kang nyakalachakini esi a? Ekilakini ayong anam toon, kilochos ngangololin tarata ariet, sodi totoka ngikolia kotere angopit a ngakipi. Apedori ayong akimuk adis toribok tosub enapit ngiguniae lu igoror kotere akitu a itwaan.” Ekapolon lo erai Ekapolon Akuj, ketatam ayong ekiruor, sodi etogogong ngulu eburunit. Ataparach daang, ketedetarit ngesi ayong ngaki, sodi eira ka akirichakin nguna ketatami ngesi ayong. Ekapolon lo erai Ekapolon Akuj, kainaki ayong achwaanu, nyeliworo ayong lokechanan, kori nyibongokino ngesi akau. Ngulu kedichete ayong, ajalak ayong akau kang. Ngulu arusete ngitim a abokony, atoisikinea ngamatengen kang. Nyidaa ayong ereet kang nakesurumere ngileech kemoanakin. Nakaneni nyeriangakina ayong kainyo kengarakinit Ekapolon lo erai Ekapolon Akuj. Erichakina ayong asaki anaikin. Ayeni atamar nyekesurumio ngileech, kainyo eapi Akuj, idodiuni ngesi atamar nyasechit ayong. Ngae ketepegi ayong? Bu itwaan ngini atoloto lokies, Ngae erai emoit kang? Taapuu pan itwaan ngini diyete kang! Ekapolon lo erai Ekapolon Akuj, ngesi kengarakini ayong, ngae tokona etamari asechit ayong? Engopiarete ngikarikok ayong lokies, edaudaunosi loger a ewaru alo irikarete ngakimam. Esi daang lu irimasi Ekapolon Akuj, lu iwapito ngakiro a ekasuban etich keng, ipedorete esi akitor lorot lo eribokinit noi, nakaneni kigienokinos Ekapolon Akuj na erai Akuj kus. Esi daang lu itukosi amunyar luche, kimunyarete esi ngakiro napei kus. Ekapolon Akuj alope ngesi esubakini nguna, eliwor esal kus lokaronon noi. Ebala Ekapolon Akuj kona, “Topupokinae ayong, esi lu isakete kitoyuun, esi lu isakunito akingarakino nikang. Kitamutu ataaba nakolong iponeta esi, achukule a ngamoru nakolong kibokunere. Kitamutu apaakus Aburaam, ka Sara na erai ataakus. Anyarae ayong Aburaam emam ngide, atopia ngesi etalala ngalesea keng. “Edodiuni ayong ngisien ani a Yerusalem, ka daang lu elomito lowaitin a Yerusalem lu enyasun. Tani kerai ngalup keng ariet, etiliwori ayong amana, esikwaan ka amana nakolong etakini ayong Eden. Alakara ka ekare emini neni, ka ngieosio lu kepurore ayong ka abuakinit alakara. “Ngitunga kang, topupokinae, kiirasi ngakiro na alimuni ayong. Ainakinit ayong ngakwapea ngakitatamet kang, einunete ngitalio kang kesi akicha. Abuni ayong atipei atoyuu kesi, aapuut ngirwa lu ayuunea ayong kesi. Apolokini ayong alope ngibukui, kedarito ngakwapea nakalonak ayong, kegienosi ayong atoyuu kesi. Tokienyiasi nadis, kingolikisi akwap! Engopiari adis loger a apuru, echilichiluun akwap loger a eworu alongorot, totoaka ngitunga daang lu eyakasi nakwap loger a ngichuch. Nakaneni ayuuno na ayauni ayong, eliwor akajik, nabo nyesaluni akidwang kang. “Topupokisi ngakiro kang, esi lu iyenete nguna iyookino. Esi lu eyakasi ngitalio kang lotai kus. Warasi nyieam nakimenyere, nyiisur ngitai nakiyenyere. Irikarete kesi ngakimam loger a ngiworui. Nakaneni ayuuno na ayauni ayong, eliwor akajik, erubi akidwang kang ngirwa daang.” Ekapolon Akuj, tokienyu toyuunae! Toyuunae a agogongu kon, loger lokolong isubeenea a angorot. Iyong kolong itubi ekipe lo a anam lo enyaritae Raab kiela. Iyong kolong itooni anam tobelak erot nakipi, sodi kitorut ngitunga lu iyuuni iyong. Ngulu iyuu iyong, enangunete Yerusalem elakara, eeosi kimariteteete elakara. Elakarosi kesi jik, nyeanyunete kesi akialolong ka esinyoi nabo jik. Ebala Ekapolon Akuj kona, “Ayong kainanakini esi ngikilinga. Nyo iemitotor esi itwaan ni etoaneene, ni engopiari atipei loger a nginyia? Kimuriak esi Ekapolon Akuj nakolong kisubuni esi, nakolong apetakini adis kidiama, nakolong etowei ngapirio a akwap a? Nyo iemitotor esi jiik kotere anyunyura a ngitunga alu kichiakiarito esi, alu esakete amunyar esi? Nyeringa anyunyura kech kitapi esi. Ngulu eenitae, elachakinio atipei, eyarete kesi ngirwa lukaalak, taanyut akimuj na esakete daang. “Ayong arai Ekapolon Akuj na arai Akuj kus, etukulauni ayong anam, etonyou ngitoroi keng torukis. Ekiro kang logo, Akuj Namerikanyer! Apetari ayong kolong adis alokidiama etowo ngapirio a akwap. Abala ayong Yerusalem, ‘Iraakasi esi ngitunga kang! Kainak ayong esi ngakitatamet kang, keratakini ayong esi a agogongu kang.’ ” Yerusalem, tokienyu! Tonyou towo! Ingoba iyong eriras a Ekapolon Akuj, lo kitamasi ngesi iyong a angoit keng, ingoba iyong daang tanang kisiteroterokini. Emam itwaan kiriki iyong, emam itwaan alotunga kon ni kiriki iyong akan. Kirochakinosi iyong ngakiro ngaarei naaronok, enyasu ejie akwap kon, anyam akoro ngitunga kon. Emam itwaan kidodikini iyong ngisien. Eridakis ngitunga ani alilimiyoreta ngawat eyakasi nakiitoret a ngirotin kadaang, ikwaan ka agete na echakakin loloit a ekalokan. Aanyut eriras a angoit a Akuj. Esi ngitunga a Yerusalem lu ianyunito aboliaro, esi lu itereterosi tosub kirakarit emuna, kiikinit esi Ekapolon Akuj na erai Akuj kus, ebala, “Alemari ayong ekopo a eriras lokolong kainakinit ayong esi a angoit. Nyeringa esi nabo imaase emuna lokisitereterokini esi. Ainakini ayong eriras ngolo lukolong kichiakiarito esi, lukolong kiperikinete esi lorotin kipudata loger a asakatan.” Yerusalem, togogonger, toliwor lokiyenikinitae! Ere a Akuj lo italeuno, tobutokin akibuseanu kon! Nyeringa ngitunga lu nyenupito Akuj elomunete nabo ni iyei iyong. Yerusalem, talachakin! Tonyou anapua, kiboikin lokicholong kon lo a apolou! Talacha ngiriko lu kienito iyong, iyong Sion lo irai erikot! Alimoki Ekapolon Akuj ngitunga keng ebala, “Nakolong kitiliworere esi ngikedalak, amam ngaropiyae kitachitere esi. Aloger alopei kangolo, emam ibore etachio kitalachakinere esi. Nakolong ilooso esi akilom Misiri iraakasi ngitunga a akwap a ache, isubete esi kongina ani isaketa esi ngikulepek. Nakaneni apot ngitunga a Asiria kiterikosi esi kitingaasi, nabo emam ibore kitachakis kesi esi. Ngakiro napei nguna, kesi tokona esubakinosi alo Babilon, iraakasi esi ngirikon tarai emam ibore kitachitere. Ngulu kipolokinito esi, inisasi ka akiwoga, nabo kemenyarito ayong jiik. Enangi akolongit na iyeneta esi atamar ayong na arai Akuj kesuruor esi, nakaneni ayei ayong.” Ejok noi akingolikin itwaan ni emeunitae ekokoriuno alomoru eyaunit ngakiro naajokak, ngakiro a ekisil! Alimo ngesi akidwang, tolimok Sion tama, “Erai Akuj kon ekapolon!” Iremasi ngiketeok a ere iremasi aapei a alakara! Iteete kesi a ngakonyen kech a ngikulepek abongun a Ekapolon Akuj Sion! Kiremasi toeokisi a alakara, esi asakatan a Yerusalem! Eyuuni Ekapolon Akuj ere keng, kisililing ngitunga keng. Kotere apolou keng na italeuno, eyuuni Ekapolon Akuj ngitunga keng, ingolikinete ngitunga daang anakwap. Tonyoutu! Tonyoutu alo Babilon, esi daang lu idakito ngiboro a akai a Akuj! Nyiitap ibore ni italeo akitap. Kitaleunos tonyout toloto. Alotoru naga, nyinyounete esi ikirikirasi, nyisiyete esi inyounete. Kiriki esi Ekapolon Akuj na erai Akuj kus kitochoik alowaitin kadaang. Ebala Ekapolon Akuj kona, “Epiario etich a ekasuban etich kang, eliwor ngesi lo erimae noi. Ariangakinosi ngitunga lukaalak na engolikineta ngesi. Asechech akwaan keng peekwaan ka na itwaan. Iumwokinete ngakwapea nakaalak na ingolikineta ngesi. Iumwokinete ngikapolok tongop ngakiro elimunete. Ingolikinete kesi toyena ibore ni nyeanyuna kesi nakanuan.” Etachunete ngitunga tamasi, “Ngae adikino enupi ngakiro na tokona kiruoro ngoni? Ngae adikino ingolikini agogongu a Akuj anakiro kanu? Ekapolon Akuj ngesi asaki ekasuban etich keng torup loger a ekitoe alo ilijara ngaten nalup nakoonok. Amam ngesi apolou kori akibuseanu na adikino kisupari ngoni. Amam ibore kiminari anikeng, ni adikino kirikori ngoni nikeng. Kipotu ngoni emenyasi ngesi atongero, tanaik ngesi aboliaro ka nikaapilan. Tarapa ngitunga ngakonyen nyeanyungareta ngesi. Kipotu ngoni nyikimisik ngesi tosub erai pas. “Nakaneni abu ngesi tanaik aboliaro na adikino eliwor ayok, apipilu na adikino eliwor ayok. Neni daang kitamit ngoni atamar erai aboliaro keng eriras lo abunit ani a Akuj. Apon ngesi kiwaakinae ngajemei kotere ngasechesea yok, kidetae kotere naaronok kisubi ngoni. Aboliaro keng ngesi kitangalekini ngoni. Kikoni ngoni daang ngamesekin na echakara, itorit itwaan daang lorot keng a ilope. Nakaneni abu Ekapolon Akuj kirira ngesi, eriras lo achamit erai eyok kadaang. “Apon ngesi toboliare nikaronon, Nakaneni tanaik ngesi, nyelimuno akiroit tani apei. Kirumunae ngesi kirirae, torikoroe akiar, amam itwaan akachit ngakiro keng. Kipudoroe ngesi anakwap ana eyakasi ngitunga lu eyarete kotere ngasechesea a ngitunga yok. Kimorikinae aliel keng ka na ngitunga aluaronok, tonukae ngesi ka ngikabarak, tarai amam erukoonu asubit ngesi, kori amam akiroit na alioko tani apei na abu kitoru nakituk keng.” Ebala Ekapolon Akuj kona, “Ayong asaki taanyu ngesi ngichan, ka esinyoi. Arai akitu keng akipeyos na eyauni arimakino a ngasechesea. Kotere nguna, ingolikini ngesi ngalesea keng, eyari ngesi ngikaru lukaalak. Kotere akitorun nikeng, esubakinosi nguna asaki ayong. Ani edaun aboliaro keng, eanyuni ngesi alakara nabo, toyen ngesi atamar pearai aboliaro keng aka pas. Kotere aosou a ekasuban etich kang alo etenoono, itiliwori ngesi lukaalak lu etenooko, itiri ngesi eriras lo adikino lukaalak eanyunete, nabo kotere ngesi, arimakini ayong kesi. Ewaakini ayong ngesi nia arimatoi, ewaak kiding ngikapolok ka ngulu eyenikinitae. Kainyo ajali ngesi ilope akiyar keng kimarakinae lokasechak. Kilunyokin ngesi nados a ngikasechak alukaalak, kilip atamar torimakinae kesi.” Yerusalem, ikwaan iyong ka aberu nakolup, kirema tokona toeok a alakara. Ianyuni tokona iyong ngide lukaalak, akidwang lua aberu ana iusitae! Tanyaa eam kon, kitooyaa ngaunoi keng, todupak ngakito na itoweitere nalup! Inyaari iyong ngikukuorin kon alowaitin kadaang. Ebongunete ngitunga kon nakwap na tokona elomito ngibukui luche. Ngirerea lu arata ngawiyongorok, ilelebun ngitunga. Nyiem, nyikirumete iyong ngileech nabo, nyikitingi iyong etimoi. Kimuriakinete iyong ngileech a esorokane kon, ka asilis a araakau apuserut. Kainyo ikokini Akasubunan kon lokile kon, enyaritae ngesi Akuj Namerikanyer. Kiyuuni iyong Akuj a Isirael na italeuno, ngesi epolokinit akwap daang. Isirael, ikwaan iyong ka ateran na ialolongi ani angerio lokile keng. Nakaneni kinyarit iyong Ekapolon Akuj, Tobongu nikeng ebala, “Kaisikini ayong iyong wadiochichi, kabuuni ayong iyong ani kaminar noi. Kotere angoit kang, abu ayong kebongok iyong akau wadiochichi, nakaneni kaminakini tokona ayong iyong jik. Ayong Ekapolon Akuj na arai akayuunan kon alimu nguna. “Ikwaan ngirwa lugu anikang ka lukolong a Noa, ikwaan ka eger lokolong alimunio ayong atamar nyeringa nabo jik akaale enyami akwap. Alimu tokona nabo atamar nyakangoikini iyong, kori nyekekilakini, kori nyekerirae. Epedorete ngimoru arimaun, epedorete ngimukur aukor, nakaneni erai amina kang anikon akajik, nabo akichikakinet kang na ekisil, erichakini ayong jik. Alimu ayong Ekapolon Akuj nakamina iyong nguna.” Ebala Ekapolon Akuj kona, “Wae Yerusalem, iyong na ianyunit aboliaro ka ngichan, iyong na emam itwaan kisililingi. Aduki ayong ni isipokin iyong a ngamoru anakaalak a ngaropiyae. Aduki ngaitae kon a ngamoru anaarengak puu, atoduk ngidorin kon a ngamoru ana enokete loger a akim esiriam awas a ngamoru anakaalak a ngaropiyae. “Etatami ayong alope ngitunga kon, ainak kesi ajakaanut ka ekisil. Kitogogongete iyong ngakiro na eriyan ka ateneanut. Nyianyuni iyong aboliaro kori ebuloi. Ani itwaan ni kitijikini iyong, esubi nguna peachamakinit ayong, itwaan cha daang ni kitiji iyong, edakar ngesi ilope. “Ayong asubuni eketiakan ngasua, ngolo irirakini akim kitiakunea ngiboro lua ejie. Ayong asubi tani asiger, tolem ngesi ngiboro lua ejie taarea. Nakaneni emam ibore kiwani iyong aloboro alu ejie kangulu, epete iyong ngakiro na itachakini ngulu kititaate iyong daang. Aikini ayong ngikasubak etich kang, esidwang. Ayong Ekapolon Akuj alimu nguna.” Ebala Ekapolon Akuj kona, “Bu itwaan daang ni enyamit akure! Potu ngakipi nugu kane! Potu daang lu emam ngaropiyae, togiela ngakanoi tanyama! Potu togiela emuna ka ngakile! Emam ibore kitatachio esi! Nyo ebukoritere ngaropiyae kotere ibore ni nyerai akimuj? Nyo ibukoritotor esi ngaropiyae na inyamete kotere ibore ni nyikisimwoni? Todetasi ngaki kiirasi ngakiro kang, kiwapakis, sodi tanyama ngamuja naajokak noi, talakaros kotere ajako. “Ngitunga kang, todetasi ngaki, potu nikang toyara! Eliwor achamunet kang ka esi akajik, kainakini ayong esi apiaro nakolong echikakini ayong Daudi. Etiliwori ayong ngesi ekapolon, ka ekarikon a ngasigerea a ngakwapea. Kotere akitorun nikeng, edodik ayong kesi apolou kang. Inyaraate tokona esi ngitunga a ngakwapea anagelayek, pekolong kiyenete kesi esi, nakaneni epeunete tokona akimorikin ka esi! Ayong Ekapolon Akuj na arai Akuj a Isirael na etaleuno, asubakini nugu daang. Kainakini esi arimatoi ka ekipur.” Toreeunos nia Ekapolon Akuj, tanyarata ngesi eringa eapi. Toisikis ngitunga luaronok eboyor kech, kilocho lu nyetenooko ngitamen kech. Tobongokis kesi Ekapolon Akuj na erai Akuj yok, isienono ngesi nabo erimakini atipei. Ebala Ekapolon Akuj kona, “Nyikwaan ngitamen kang ka lukus, etiakak ngirotin kang ka lukus. Eger lo elonia adis analup, eger lopei ngolo ngesi elokieta ngirotin kang ka ngitamen ani eyakasi lukus. “Ikoni akiroit kang ngidowon ka akiru, lu etiyaunosi alokidiama nyeebongosi eringa nyitapapala akwap kiturup ngikinyam lu itao, ka akimuj nanyamat. Ikoni akiroit na alimuni ayong neni, nyelakakini asubakin ngakiro na asaki ayong esubakini daang na areat ayong akisub. “Irotokinete esi alo Babilon ilakara, kirikorio esi kipudor alore a ekisil. Eeokinete ngimoru ka ngimukur, iremarete ngikito a alakara. Erupunete ngidomou ani tokona erupunitotor ngirega, erupuni lopara ani tokona erupunitotor ngiikwa. Eliwor ibore ngini emachar lokajik, ngakisitamunet a ngakiro ana asubak ayong Ekapolon Akuj.” Ebala Ekapolon Akuj ngitunga keng, “Tosuba nguna eriyan ka naajokak, kainyo kayuuni ayong esi atipei. Apiari ayong ngulu irichakinito Sabato jiik, nabo nyimenyarito. Apiari ayong ngulu nyesubete naaronok.” Ani keloma itwaan a akwap anache lotunga a Ekapolon Akuj, nyeelimu ngesi tama, “Nyakachamuni ayong Ekapolon Akuj kilipi ka ngitunga keng.” Nyeelimu itwaan ni idongitoe tama, “Ekoni lo erai ayong ekitoe lokoonon ani nyauria, nyapedori aliwor ipei a ngitunga a Akuj.” Elimokinit Ekapolon Akuj itwaan ngini ebala, “Ani kiker iyong ayong kirichak Sabato, tosub ngakiro nakajoikinito ayong, kirichak achamunet kang, itamunio ekiro kon alokai kang, erubakinete ngitunga kang itamunito ekiro kon nikooyen, akidwang eger lo eyakatar iyong ngide lusapa ka lupesur. Kitamunio iyong jiik.” Ekapolon lo erai Ekapolon Akuj, elimokinit ngitunga a akwap anache lu areeunosi lotunga keng, lu eminasi ngesi tosubete etich keng, lu irichakinito Sabato ka achamunet keng, elimokinit ebala, “Karikuni ayong esi Sion lo erai emoru kang, talakaros alokai ana kelipeenere ayong, atacham ngakipeyos na kilemikinete esi ayong alokeno alo kepeyonokinere ayong. Enyarao akai kang akai na ilipeta ngibukui daang. Ayong Ekapolon Akuj na achununi ngitunga kang anakwap ana aeniaritae kesi, alimu ayong atamar achununi nabo ngiche kimorikinos ka lusek achun.” Elimokinit Ekapolon Akuj ngitunga a ngakwapea anache ebala, “Potu loger a ngitieng a amoni tanyama ngitunga kang. Emudukaka ngikarikok kech daang, lu ejoikinit ichikichikete ngitunga kang! Emam ibore eyenete kesi. Ikote kesi ngingokwo lu nyikomosi, lu erai ngaju ka akirujare bon eyenete. Ejotoko dir! Ikote kesi ngingokwo lukadakak lu nyimwokeenete. Emam ibore eyenete ngikarikok lugu. Esubi itwaan daang ngakiro na ejoikinito ngesi, nguna ikeunete ngesi ilope. Elimonokinosi kesi ebalasi, ‘Atolemutu emuna, atongobasi kitoup! Ejoker akolongit naka moi noi akidwang akolongit naga!’ ” Na etoanea itwaan ni etenoono, emam itwaan emisit. Ee robo, na etoanea itwaan ni ilipit Akuj, emam itwaan eyeni, kainyo elemario itwaan ni etenoono nyeanyunotor ka naaronok, toloma ngesi nia ekisil. Kiangasi ngesi kaneni aapei ka lukolong atenoono eboyor kech. Esi ngikasechak, potu nege! Iraakasi esi ngalesea a ngikapilak, ka ngikalomak ta ngamalaae. Ngae ikianatar esi? Ngae inganyanakinete esi ngakituk kus nabalany ka ngangajepa? Ngikaliokok lugu! Ilipito esi ngakujo na ituuriyete ngitunga ani ipudonoreta alokwap ngichokei lu ilipeenete esi. Ilemete esi ngide kus tarata ngakipeyos anadipoe ka ngaburiburio a ngatabab. Tosekut ngamoru nasulut anadipoe kitiliwosi ngakujo kilipa. Tolemut ngakipeyos a emuna ka na ngalemet tobukokis namoru nguna. Inut nabo ngakipeyos a ngalemet. Esibit esi kajoikinito ayong ngakiro nguna daang a? Idokete esi ngimoru lukooyak toloto kipeyoto kaina ka apudonor. Itoweito esi ngakujo kus nasubuna alotooma ngidorin kus lu alongaren. Kitoisikis esi ayong tobutosi ngiworui kus, todokasi lokitandae kus lubalany, aapei ka ngiminan kus lu itachito esi sodi kiteperioto esi. Torumosi etereku a ngawat kus kaneni. Iwasasi esi ngamieta kus nakaakunyok, sodi toloto akilip akuj na enyaritae Molek. Imeanarete esi ngitunga akirimit akwap daang, tanang tani ni eyakasi ngikatoak, sodi kitasakakis esi ngakujo na ilipete. Ituburuna esi kotere akisak ngakujo ngache, tani ikoni neni, nyiilungakinosi esi jik. Itamito esi atamar kiinakinete ngakujo kus ngikilinga, ngakiro nguna nyikiburunea esi. Ebala Ekapolon Akuj kona, “Ta ngae mono ngakujo na kitoemito esi nugu, kisingalaate esi ayong nyikitamut ayong tani wadiochichi? Nyikikerito esi ayong ani ngoon elilingea ayong nikooyen a? Itamito esi atamar isubete naajokak, alimori ayong ngakiro na isubete esi nakaneni nyikingarakinete ngakujo kus esi. Na ikalounito esi isakete akingarakino, kitoyuut pan esi ngakujo nakus nguna! Ekutari kesi ekuwam nikalonan, ee robo, ekutari tani akianget! Nakaneni ngulu kegienosi ayong, elomete nakwap kilipa alokai kang.” Ebala Ekapolon Akuj kona, “Totiaakisi ngitunga kang tobongut nikang. Topiasi erot lo itorunete kesi! Todukokisi erukudi, tosubakisi! “Ayong Akuj na etaleuno ngina ayei kidiama, ngina ayari jik. Ebooyi ayong ani italeuno alokidiama, nakaneni kibooyi ayong tani ka ngitunga lu itiditeuna lu elungito ngasechesea kech, sodi atobuakinea kesi atitinyu ka akigieno. Nyarubakini ayong nabo jik akirirare ka angoikinit ngitunga lupei kolong nabo ainakini ayong akianget a akiyar Angoikinit kolong ayong kesi kotere akisech kech ka arorokanut, sodi erira ayong kesi, ebongok akau. Nakaneni apot kesi kichanaketa torubakis iwapito ngakiro kech a ngikulepek. “Engolik ayong nguna esubete kesi, nakaneni ayuuni ayong kesi. Ariki ayong kesi engarak, esililing ngulu igorosi esutonokinete. Ainakinit ayong daang ekisil, ngulu eapiyete ka lukalonak! Etangalekini ayong ngitunga kang. Nakaneni ikote ngitunga luaronok anam na ekulae, na ijukunito ngitoroi asakatan ka echoto, emam kona etubosi. Emam ngikasechak ayuuno eyei. Alimu ayong Ekapolon Akuj nguna.” Ebala Ekapolon Akuj kona, “Kiremasi lokojokon! Tolimokisi ngitunga kang a Ngisirael ngakiro a ngasechesea kech! Kelipito kesi ayong akolongit daang, niti ebalasi, abe kisaki akiyen noi ngakiro kang ka ngitalio kang. Ebalasi kesi kisaki ngitalio lu eriyan anikang nabo tamasi kijoikinit akilipit ayong.” Ingitasi ngitunga ebalasi, “Nyo kironeeneo sua akimuj na nyikiteo Ekapolon Akuj? Nyo kitaarar sua akoro na nyemisitor ngesi?” Tolimok Ekapolon Akuj kesi tama, “Nguna a iteni isubete esi nugu, esaa lo ironioto esi akimuj, ngesi nabo pei isubeta esi ngakiro kus a ngikulepek ka akichiakiarit ngikasubak etich kus. Kitededengi esi akiron akimuj, sodi kiburata tojwoto. Esibit esi eirari ayong ngakilipasinei kus kerai erone kus akimuj ngolo a? Na ironioto esi akimuj kitasionos, kijuuruoto esi lokojokon, loger a enyait alo ekudokina, topetakis ngiguniae lokuruon toperioto. Ibore ibalasi esi akiron akimuj ngini a? Esibit esi kajoikinito ayong nguna? “Erone akimuj lo asaki ayong logo. Tongeda ngiriko lu ichiakiaritere luche, ka lua ngakiro ana nyeriyan, talakakis ngulu eboliare toliworos lu elachakina. Tomora akimuj ka lu enyamit akoro, tangaasi ngidorin tolomut lu emam ngawiyei. Nakisi ngiworui lu emam ngiworui enapito, kingarakisi lu iyanasi ka esi. “Ani kikokis esi neni, kinwakuni akicha kang loger a esimakunyuk, sodi tangalekis ngajemei kus atipei. Kiruki ayong ka esi jik katoyuu, kiyoki esi akwangis kang alowaitin kadaang. Ani kilipete esi ayong, eirari ayong. Ani kinyaraate esi ayong, ekii ayong. “Ani kipalikis esi akichiakiarit luche, ka ngimeny ta ngakiro naaronok, ani kisumuja esi lu enyamit akoro, nakis ngulu ichanasi ibore ni iitanito, ilocho aribu nakiriamit esi toliwor akicha na apaaran lotingilan. Kariki ayong esi jiik, ketuup ngiboro luajokak. Ketogogongi ayong esi ketojok. Ikokinete esi amana na eupito ngakipi, ikokinete elelea lo nyeoneene. Edukokinete ngitunga kus nabo ibore nikolong enyasun a angorot, tobongokis akiduk ngapirio nangorok. Kinyarao esi ngitunga lu ebongonokinete akiduk ngawasea, lu abongokinete akiduk ngakais na arimaun.” Ebala Ekapolon Akuj kona, “Ani kitaleut esi akolongit na Sabato sodi nyiisuba ngakiro kus a ngikulepek akolongit ngina, ani kimunokis esi akolongit kang na italeuno, kidodikis arimatoi nyiilot wache, kori nyiisub etich, kori nyiingamangam ngakiro pas. Ani kikokis esi neni, ianyunete esi alakara na ebunit anakisub etich kang. Ketiliwori ayong esi lukikeritae awadaang anakwap, sodi talakaros anakwap ana kolong ainakini ayong apaakus Yakobo. Alimu ayong Ekapolon Akuj nguna.” Nyiitamasi robo kori epalag Ekapolon Akuj noi Nyikiyuuni esi. Nyiitamasi robo kori enangakina ngaki keng nyiirari ngakiro kus. Ngasechesea kus kesi itengerito ngesi akiirar esi. Ngasechesea kus kitiakito esi ka Akuj, na isaketa esi akilip ngesi. Isechito esi ani ebukoritotor ngakan kus ngaakot, itinga naaronok a ngimoyo kus, itorunit alioko nangajepa kus nabo ingaingaasi esi naaronok a ngakituk kus. Emam esi itwaan elosi lokies kotere ngakiro na eriyan kori na eteniyete. Igienosi esi ngakiro na alioko kidwangeta ekies. Ileleba naaronok tooma kus, iuriyete esi naaronok. Ikwaan ngakiro na itukosi esi ka ngabeyei a emun alo akisierit. Itwaan ni enyami ngabeyei nguna, etoani, na ebekarere, toseletuun emun. Ikwaan ngakiro na itukosi esi ka akai a asimokok. Ngakais a ngasimokoka kus, nyedonyunosi ngiworui, nyepedorete ngitunga akimukokin ibore ni idonyunete esi. Eraakasi ngakiro na itukosi esi ngakachakarak, eroko ngakiro na isubete esi. Itukosi esi jiik ngakiro naaronok, idodor esi anakiro anaaronok. Nyiriakasi esi akiar ngitunga lu nyesechito. Nicha iloose esi daang, toisikis ngichan ka nginyas. Nyiyenete esi ibore be ekisil. Ngakiro na isubete esi daang, nyeriyan. Iwapito esi erot lokachakaran, itwaan ni iwapakini erot ngolo, nyeanyuni ekisil. Ebalasi ngitunga kona, “Kiyen tokona atamar nyo pekiyuunea Akuj ngoni alotunga alu kichiakiarito? Kisaki ngoni akicha atolooso nakaneni aribu ngesi eyei. Kitwapitwapi ngoni loger a ngimuduk, ee robo, loger a ngitunga alu emam ngakonyen. Kidakanar ngoni naparan tosub kori erai nakwaare. Kikoni ngoni ngitunga lukatoak alokiding ngitunga lua ngikilinga. Kibulit ngoni nabo kialolongi. Kimuit ngoni ayuuno a Akuj ani kichiakiaritere, nakaneni emam ngakiro esubakin. “Ekapolon Akuj, elalak ngasechesea kosi alongaren kon. Kiriraate sua ngasechesea kosi a ngikulepek, kainyo kiyeni sua ngasechesea kosi noi. Kinger sua iyong, Ekapolon Akuj, kiwou akiwapakin iyong. Kichiakia sua luche, kibongok iyong akau. Kitami sua ngakiro na alioko, itorunit alioko nakituk kosi. Etwarakin ngakiro na eriyan, achadar ateneanut. Kainyo adakakin iteni ni egielanareta ngitunga ngiboro, nabo nyelomunete ngakiro na eteniyete. Angopia ateneanut jik, itwaan ni epalikini naaronok, toloma lochan.” Engolik Ekapolon Akuj nugu, nakaneni ekadakinito ngesi, kainyo nyesubio nguna eriyan. Etalarito ngesi ngakiro na emamakar itwaan eyuuni ngulu ichiakiaritae. Aloger kangolo, eyuuni ngesi kesi a ngikilinga keng a ilope, sodi taanyu akidwang. Enapi ngesi ngakiro na eriyan, loger a eworu alo igakinitere alorarum, tanap akidwang loger a apukot. Enapi ekimue lo esakea akitemokin ngakiro daang ka atachakin naaronok esubere ngitunga. Irirae ngesi ngimoe keng itemem ka na esubete kesi, tani lu eyakasi nakwapea nakalonak. Napei alo kide tanang too, eemete ngitunga daang ngesi ka apolou keng. Ebuni ngesi loger a angolol ana etulakanyi ngakipi, loger a ekuwam aloapolon. Ebala Ekapolon Akuj ngitunga keng, “Abuni ayong Yerusalem katoik ka ayuun esi daang lu ireeunosi anasechesea kus. Kichamakin tokona ayong ka esi, kainak ayong esi agogongu kang ka ngakitatamet tarata ngakus jik. Napei tokona jik, iwapete esi ngakiro kang, kitatama ngide kus ka ngalesea kus akiwap ayong jik.” Yerusalem, tonyou, kimau loger a akolong, kimaunit iyong akwangis a Ekapolon Akuj! Eburichiari aribu ngakwapea nache daang, nakaneni emini akicha a Ekapolon Akuj nikon, etakanuni akwangis keng anikon. Epote ngibukui nakicha kon, epote ngikapolok nabaiaret a akolongit kon anakitetet. Tongolengolek kingolik ngakiro na esubasi, echunasi ngitunga kon esakete aponere nawi! Epote talokookon anikalonan, edakio tanakookon loger a ngide. Ingolikini iyong ngakiro nugu talakar, ilakar iyong kichurok. Eyaunio ebari a ngakwapea nikon, ebuni ebari kech a ekwakaye nganamea. Epote ngikaala lukaalak noi alo Midian ka Epa. Epote alo Cheba iwokito egolit ka emitina. Elimorete ngitunga ngakiro naajokak na asubaki Ekapolon Akuj. Eyaunio ngamesekin daang a Kedar ka Nebayos nikon tarata ngakipeyos, kipeyonokinoe Ekapolon Akuj alokeno a ngakipeyos. Ekapolon Akuj isubusi akai keng noi. Ngaka ai ngatubwae nugu iwaara loger a ngidowon, loger a ngakurio ana ebongete nakais kech? Eraakasi kesi ngatubwae na eponito anikalonan iwokunito ngitunga a Akuj nawi aapei ka ngakwangae kech ta egolit. Sodi torimatar Ekapolon Akuj, Akuj a Isirael na italeuno. Etiliwo ngesi ngibukui daang lu erimasi ngitunga keng. Elimokinit Ekapolon Akuj Yerusalem ebala, “Ebongokinete ngitunga a akwap anache akiduk ngawasea kon, tosuba ngikapolok kech etich kon. Kerirae kolong ayong esi kotere angoit, nakaneni kaminakini tokona esi kedodik ngisien. Engaarosi ngidorin kon akwaar ka apaaran, sodi kiinuneta iyong ngikapolok a ngakwapea ebari kech. Ngakwapea na nyesubete etich kon, inyasunio jik “Ngakito a ngidomou, ka mitidari ta ngitelitei, ngakito naajokak a ngamon a Lebanon, eyaunio tobongokinere akiduk iyong, Yerusalem, kisubusere akai kang, kisubusere ere kang. Epote talokookeng a ngitunga alu kolong kichiakiarito iyong kijuuruoto kidodikinito iyong arimatoi. Daang lukolong kimenyarito iyong, ijuuruyete anakejen kon kilipa. Kinyaraate kesi iyong ebalasi, ‘Ere a Ekapolon Akuj,’ ‘Sion, ere a Akuj a Isirael ana italeuno.’ “Nyeringa iyong nabo kiisikinio kiteremokinetei, nyiliwor ere lo aramakis ngitunga nabo nyisiler. Ketiliwori ayong iyong ere loapolon lo ibus, ni eyei alakara nakajik. Kidakete iyong ngakwapea ka ngikapolok loger lo edakea aberu ikoku keng. Iyeni iyong atamar ayong Ekapolon Akuj kayuu iyong. Kilachak iyong Akuj a Isirael naationon. “Kainuni ayong iyong egolit, meere akwangat. Kainuni akwangat ka asuat nanyang, meere asuat nakirion ka ngakito. Kainuni asuat nakirion, meere amoru. Nyeringa nabo ngikapolok kon kichiakiarete iyong. Etiliwori ayong kesi lu kipolokinete iyong kotere ateneanut ka ekisil. Nyeringa nabo erukoonu elimunio anakwap kon. Nyeringa nabo elimunio nginyas ka asilis anakwap kon. Kayuuni ayong iyong loger a awas, kipuruuni iyong ayong ani kayuunea. “Nyeliwor nabo akolong akicha kon naparan, kori nyeliwor elap akicha kon nakwaare. Ayong Ekapolon Akuj ngesi aliwor akicha kon nakajik. Kimauni iyong akicha a akwangis kang. Esalunete ngirwa kon lu esinyoi. Ayong Ekapolon Akuj ngesi aliwor akicha kon nakajik. Akicha na erubi akidwang na akolong ka elap. Eliworosi ngitunga kon daang lu esubete nguna iyookino, eliwor akwap akech jik. Ayong kolong etakini kesi, ayong kolong asubuni kesi, sodi esileereu apolou kang alotunga kadaang. Tani ngitunga a awi kon lu ekidioko ka lu itiditeuna, elalakearosi tarata ebukut lo eyenikinitae. Na enangea akolongit ngina, asubakini ayong ngakiro nguna atipei. Arai ayong Ekapolon Akuj!” Ekapolon lo erai Ekapolon Akuj, keleleb ayong etau keng. Kaseu ngesi ayong katomeu etatam ngikebootok ngakiro naajokak, etangalek ngulu esurur ngitai, atolimo atamar alachakin ngirikon, atalachak ngulu eenitae. Kameu ngesi ayong alimor atamar anang ekaru, lo eyuunea Ekapolon Akuj ngitunga keng, sodi kidwang ngimoe kech. Kameu ngesi ayong akisililing lu igorosi daang esutonokinete. Ainakin ngulu igorosi alo Sion, alakara meere esinyoi, eeos a ekipur meere akialolong. Ikokinete kesi ngichokei lu etak Ekapolon Akuj alope. Esubete kesi daang nguna iyookino, kipuroe Akuj kotere nguna asubaki. Ebongokinete kesi akiduk ngirerea lukolong enyasunio a angorot. Ngitunga kang, esubete ngitunga a akwap anache etich kus. Iyokiyete kesi ngibaren kus, itaate ngamanat kus ka achoikin ngimusabib kus. Kinyarao esi ngimurok a Ekapolon Akuj, ngikasubak etich a Akuj yok. Inyamete esi ebari a ngakwapea, kinisatar ani eraakar ekus. Edaunosi ngileech kus ka etimoi. Ilomete nakwap nakus a ngikulepek, iatakin ebari kus ngakiatakinet ngaarei, talakaros esi jik. Ebala Ekapolon Akuj kona, “Amina ayong ngakiro na eriyan, aremokin akichiakiarit luche ka asechanu. Ainakini ayong ngitunga kang ebachit dir, atachamakin ka kesi jik. Eyenikinio kesi alokiding ngibukui, itwaan daang ni ingolikini kesi, toyen atamar eraakasi kesi ngitunga lu apiarit ayong.” Elakara Yerusalem kotere ngakiro na asubaki Ekapolon Akuj. Ikoni Yerusalem aberu na iusio na enapit ngiworui a akuuta. Etanap Akuj ngesi ayuuno ka akidwang. Iteni, loger lo iturupuneta ngalup ngikinyam topoloto, Ekapolon lo erai Ekapolon Akuj, eyuuni ngitunga keng, kipuruut ngibukui daang ngesi. Eruorikini ayong etititiny Yerusalem, nyelilingi ayong tanang Yerusalem eyuunio. Tonoku ayuuno keng loger a akinwaket. Yerusalem, ingolikinete ngakwapea iyong idwangi! Ingolikinete ngikapolok daang akwangis kon. Kinyarao iyong a ekiro alokitetet, ekiro lo kiinakini iyong Ekapolon Akuj alope. Ikokini iyong ekiraun lokebusean a Ekapolon Akuj. Nyeringa nabo kinyarao iyong “Lo aisikin,” kori nyenyarao akwap kon “Aberu na achakakin neni.” Enyarao ekiro kon lokitetet, “Italakarit ngesi Akuj.” Enyarao akwap kon, “Iusitae elakara.” Kainyo italakarit iyong Akuj nabo ikokini ngesi ekile a akwap kon. Kiusi iyong ngolo kolong kisubuni loger lo iusea esorokit apese. Italakari iyong Akuj loger lo elakaror ekile kotere aberu na iusi. Yerusalem, ewaak ayong ngiketeok nawasea kon. Nyililingete kesi jik akwaar ka apaaran. Ejoikinit kesi isitamunete Ekapolon Akuj ngakichikakinet keng, nyeelakakis ngesi imuriakinete. Nyiimiekis ngesi iangari tanang ebongokini akiduk Yerusalem. Kitiliwosi ere lo ipuro akwap daang. Ekong Ekapolon Akuj a agogongu keng, nabo esubakini nguna a agogongu keng. Ebala, “Nyeringa nabo ngalemet kon, eliwor akimuj a ngimoe kon. Nyeringa nabo ngitunga a akwap anache emaase emuna kon lo ichidaritor iyong ngakiinyir. Nakaneni esi lu ilemete ngalemet nguna, kesi inyamete kipuro Ekapolon Akuj. Esi lu ichoikinito ka akiger ngamusabib, kesi imaase emuna alokai kang.” Esi ngitunga a Yerusalem, topudosi alore, todukokis erot a ngitunga kus alu ebongunito! Ee robo, todukokisi! Todukokisi erot loapolon, kidepasi ngamoru daang! Kiwaakisi ibore ni idodiunit toyeneta ngakwapea daang. Elimokinit Ekapolon Akuj akwap etia ni etia kona, “Tolimok ngitunga a Yerusalem atamar ebunit Ekapolon Akuj ayuun esi, einunit ngitunga keng ebachit.” Kinyarao esi, “Ngitunga a Akuj lu italeuno,” “Ngitunga lu ayuu Ekapolon Akuj.” Enyarao Yerusalem, “Ere lo emina Akuj.” “Ere lo nyeisikina Akuj.” “Ngae ebunit alore a Bosira alo eyei nakwap a Edom? Ngae en enapit ngiworui luajokak arengak, elosi ikileenikinit tarai nia ngikilinga?” “Erai ayong Ekapolon Akuj, abunit alimor akidwang kang, apedori ayuun.” “Nyo erengieta ngiworui kon ikwaanatar ka lua itwaan ani ipudae ngamusabib tochiunere emuna?” Tatachu Ekapolon Akuj tama, “Epudae ayong ngibukui loger a ngamusabib, Emam itwaan kengarakinit. Epudae ayong kesi a angoit, kiterakin ngaakot kech loworui kang daang. Atodung ayong atamar anang ngirwa lu ayuunea ngitunga kang. Anang akolongit na eriraa ngimoe kech. Engolia ayong atoriam emam itwaan ebunit akingarakin, katatalasi ayong ngakiro nguna. Nakaneni ketogogong ayong angoit kang edwang ayong alope anapei. Kotere angoit kang, abu ayong epuda ngibukui daang eala, atobukok ngaakot kech nalup.” Esisauni ayong amina a Ekapolon Akuj na nyesaluni. Epuruuni ayong ngesi kotere daang nakisubea ngoni. Ainaki ngesi Ngisirael apiaro nakaalan kotere ngisien keng ka amina na nyedaun. Alimuni Ekapolon Akuj tama, “Iteni eraakasi kesi ngitunga kang, ngide lu nyekengalaate.” Sodi toyuu ngesi kesi. Alochan kech kadaang, Ekapolon Akuj alope ayuuni kesi, meere emalaikat. Ayuuni ngesi kesi kotere amina keng ka ngisien. Etani ngesi kesi napei kolong a angorot. Nakaneni tongero kesi Akuj kitongoa etau a Akuj. Sodi toliwor Ekapolon Akuj emoit kech, kitiji kesi. Nakaneni kitamut kesi ngakiro nangorok, kitamut ngirwa lukolong a Musa alo arai ekasuban etich a Ekapolon Akuj, kingitas kesi tamasi, “Nyaali tokona Ekapolon Akuj, lokolong ayuuni ngikarikok a ngitunga keng ananam? Nyaali Ekapolon Akuj, lokolong ainakini Musa etau keng? Nyaani Ekapolon Akuj nakolong asubi ngakiro naationok kisitoru nia Musa? Apaki ngesi ngakipi a anam alongaren kech kipuruunere ngesi jik.” Ariki ngesi kesi kisitor nakipi natuluk loger a ngangolei ana itorete nariet nyeelakarosi. Abu Ekapolon Akuj kisianga ngitunga keng, loger lo erujarere ngaatuk nadipo na elibit. Ariki ngesi ngitunga keng kipuruunere ekiro keng. Ee Ekapolon Akuj, kingolikinae sua anadis, ani erai awi kon na italeuno. Nyo idodiunit atamar kimina iyong sua, kimisikinit? Nyaani agogongu kon? Nyaani amina kon ka ngisien? Nyikijamua sua. Irai iyong apakosi. Nyikiyenete sua taapaakosi Aburaam ka Yakobo, nakaneni iyong Ekapolon Akuj nakiyuununi sua jiik irai apakosi. Ekapolon Akuj, nyo kilakakinitor iyong sua kidepari ngirotin kon? Nyo kitiliworitor iyong sua lukechanak, atoreas anikon? Tobongu kare kotere lu esubete etich kon, kotere ngitunga lu eraakasi jiik ngikon. Sua ngitunga kon lukitaleuno, kiritarete kolong ngimoe kosi a ngirwa a ngidikidio, kipudata kesi akai kon. Kitisibit iyong sua lu eringa iyong nyepolokino nakanuan, ngitunga lu nyeliworo ngitunga kon. Nyo peipakea iyong adis totiyaun, kerai nakingolikineta iyong ngimoru, kemaranikis kotere ebuloi! Kemaranikis loger a ngakipi ana ekulaate anakim. Bua kidodik ngimoe kon agogongu kon, kitamaranik ngibukui kotere ayakau kon! Nakolong ibunio iyong, tosubak ngakiro naketubulok na pekiyeni sua atamar esubakin. Tamaranikis ngimoru kotere ebuloi nakingolikineta iyong. Emam itwaan engolik kori eira ngakiro a Akuj ana ikoni iyong, ana esubi ngakiro na etia nugu kotere ngitunga lu igienosi ngesi! Ipeyouni iyong ngulu elakara kotere akisub nguna iyookino, ngulu itamunito eger lo isaki kiboikinos. Ibu iyong kitongoik sua, nakaneni kipot sua atorubakisi kisechi, ekoe, kiyuunio sua dir a? Kirai sua daang ngikasechak, tani ngakiro naajokak kisubi sua, eroko noi. Kotere ngasechesea kosi, kikok sua nginyia lu eokete tokuta ekuwam nikalonan. Emam tani ipei ni ereeun nikon kilip, emam ni esakuni akingarakino nikon. Kidukak iyong sua nabo kichaka kotere ngasechesea kosi. Nakaneni irai iyong apakosi, Ekapolon Akuj. Kikoni sua echoto, ikoni iyong ekayen, kiyeuni iyong sua a ngakan kon. Nyikingoik robo sua noi kori nyiitamu ngasechesea kosi jik. Kirai sua ngitunga kon, kisienoi! Ngirerea kon lu italeuno, ekokis ariet, aliwor Sion ariet, asiler Yerusalem. Akai kosi na italeuno, nakebusean, nakolong kipuruunioto iyong taapaakosi, enyasu akim. Enyasun ngiwaitin daang lukolong kimina sua. Ekapolon Akuj, nyikiminarete iyong nugu daang a? Ipaluari iyong kimiek sua kianyuni ngichan lu nyikipedori anaikin a? Tolim Ekapolon Akuj tama, “Asaki kolong ayong akiikin ngakilipasinei kech, nakaneni nyilipa kesi. Asaki kolong ayong kataanyun, nakaneni nyesaka kesi ayong. Nyilipa akwap ngina ayong, tarai bo edarit ayong atachakin kesi kona, ‘Ayong logo. Kengarakini esi.’ Ebaarit ayong ngakan kang jiik anyarit ngitunga kang lukechanak, lu nyesubete naajokak, lu iwapito ngirotin kech a ngikulepek. Ketongoyeenete kesi ayong jiik, nyirumete tani ngileech. Ipeyonokinete ngakujo kech anamanat ka akinom emitina alokenoi a ngakujo anagelayek. Eloseenete kesi nakwaare naburiburio ka nalielin akisuruor ngikaram. Enyamete kesi akiring a ngiputiro tamata ngapoko a ngitieng alu kakadakinito ayong. Ani erumor tolimokis luche tamasi, ‘Tachadaros anikosi, nyiapuut kitaleuno sua noi, nyitemokino esi kitapete sua.’ Ketongoito ayong ngakiro a ngitunga kangulu ikoni angoit kang anikech akim na nyedunge. “Atiaku ayong eriras kech, igiritae eriras kech. Nyelilingi ayong pearai atachakini na esubete kesi. Atachakini ayong kesi kotere ngasechesea kech ka ngasechesea kata apaakech. Enomanakinete kesi ngakujo kech emitina anasenon a ngimukur. Keruorotor ayong naaronok. Erirae ayong kesi itemem ka ngakiro kech naaronok.” Ebala Ekapolon Akuj kona, “Emam itwaan inyasuni ngamusabib naajokak, pearai esubunere emuna. Konginapei, nyenyasuni ayong dang ngitunga kang daang, ayuuni ayong ngulu esubete etich kang. Apiari ayong Ngisirael lu ekitela a Yuda, irumete ngalesea kech akwap kang na ngimoru. Ngitunga kang luseuna, lu esubete etich kang, elomete inaa. Kelipete kesi ayong nabo torujasi ngamesekin ka ngaatuk kech tadaka nginyia alo Charon ana eraakasi ngaroatin na eyakasi too, ta adipo a Ngichan na eyei lowae lo alo kide. “Nakaneni nyikokinete neni anikus alu kiisikinito ayong. Esi lu nyimisikinito Sion, lo erai emoru kang, sodi kilipa Gad ka Meni na eraakasi ngakujo a Ekeny ka ngichan lua esal. Atiaku ayong atamar kiario esi alojie, kainyo nyikia esi nakanyaraa ayong, nabo nyepupokina esi na eruorikinea ayong. Toseut esi akinger ngakiro kang ka akisub naaronok. Ngesi kalimokinitor ayong esi atamar Ngulu esubete etich kang, imujete, nakaneni kinyami esi akoro, emasete, kitanyam esi akure, elakarosi, kiruma esi ngileech. Eeokinete kesi a alakara, nakaneni ikalounete esi esurur ngitai. Eliwor ekiro kus ngesi ilamatar ngitunga kang luseuna. Ayong Ekapolon lo arai Ekapolon Akuj, kaari esi. Ngulu iwapito ngakiro kang, ainakini ekiro lokitetet. Itwaan daang ni esaki apiaro anakwap, esakari ngesi Akuj na iteni topia ngesi. Itwaan daang niche ikongi, ikongi a ekiro a Akuj ana iteni. Edaunosi ngichan lungorok kimuriakinos.” Ebala Ekapolon Akuj kona, “Asubuni ayong akwap nakitetet ka adis nakitetet. Ngakiro nakolong asubasi a angorot, imuriakinosi jik. Talakaros jiik kotere ngiboro lu asub ayong. Yerusalem nakitetet na asubi ayong, ilelebun alakara nabo elakarosi ngitunga keng. Alakar ayong ilope noi kotere Yerusalem ka ngitunga keng. Nyemini akigoro inaa, nyemini akisak akingarakino. Nyeringa nabo ngide luuchik etoakete, ibooyete ngikasukou tomojonga noi. Ngulu enangete ngikaru kech amiat, etamario eringa esorokaka, ani ketoana itwaan nyenanga ngikaru ngulu, etamario ilamam. Edukete ngitunga ngakais toloma, itaate ngimusabib tanyama. Nyedukete ngakais togelakin ngitunga elomete. Nyitaate togelakin ngikanyamak. Eyarete ngitunga kang ngikaru lukaalak loger a ngikito, nabo elakarosi lokojokon kotere etich a ngakan kech. Nyeliwor etich kech eka pas, nabo nyeanyunosi ngide kech ka naaronok. Apiari ayong kesi ka ngalesea kech jik. Tani eringa kesi nyenyara ayong, ekii ayong. Tani eringa kesi nyerumoro akilip, atachuni ayong ngakilipasinei kech. Edakasi ngipeei ka ngimesekin aapei, edakasi ngingatunyo nginyia loger a ngaatuk, apua ngesi eliwor akimuj a ngimunio. Alomoru kang alo enyaritae Sion, emam ibore nikakwanan kori nikenyasunan. Alimu ayong Ekapolon Akuj nguna.” Ebala Ekapolon Akuj kona, “Adis erai ekicholong kang a apolou, akwap erai ekicholong lo edokokinit ayong ngakejen kang. Ipedorete esi adukokin ayong akai ani? Aliwae alomi ayong? Ayong kolong alope asubuni akwap daang! Kotere nguna, eraakasi daang ngikang. Kajoikinito ayong ngitunga lu itiditeuna ka akilung ngasechesea, ee robo, ngitunga lu kakerito ayong ka akiwap ngakiro kang. “Esubete ngitunga nacha esakete. Anikech, ikwaan akiar emong kipeyoe ka akiar itwaan kipeyoe. Ikwaan akipeyore imesek ka akibil emosiring a iingok. Ikwaan alemun ngadekon a ngalemet ka alemun ngaakot a eputir. Ikwaan akinom emitina ka akilip akuj nasubuna. Ejoikinito kesi ngakiro nakakadakinito ayong. Ayauni ayong ngakiro naaronok nikech, eanyunosi kesi ka ngakiro napei eemito kesi, kainyo emam itwaan abu kiki na anyaraa ayong, nabo emam ni abu topupok na eruorikinea ayong. Aseunete kesi akinger ngakiro kang ka akisub naaronok.” Topupokisi ngakiro na alimu Ekapolon Akuj, esi lu ikerito ngesi kiwapito ngakiro keng, “Ani aloger iraakatar esi lu itenooko anikang, kiremokino esi ngitunga kus ngiche nabo kipakarito esi. Kikianatar kesi esi ebalasi, ‘Kidodiu pan Ekapolon Akuj apolou keng kitoyuu esi sodi engolikisi sua esi ilakara.’ Topupokisi! Eyei echale lore! Ebunit etoil alokai a Akuj! Ekapolon Akuj ngesi irirae ngimoe keng! “Ere kang lo italeuno, ikoni aberu na idouni atipei nyeriabakina. Eyei itwaan engolik kori eira ngakiro na ikote nguna nakanuan a? Epedori akwap etia ni etia akidoun a akolongit a apei a? Napei ariabakinor Sion, abu kidou ngide keng. Apedori ayong ayau ngitunga kang ani enangi ni idounere, eratak nabo nyiidoun a?” Alimu Ekapolon Akuj nguna. Talakaros aapei ka Yerusalem, talakaros kotere ngesi, esi daang lu iminasi ere logo! Talakaros ka ngesi tokona, esi daang lukolong igorosi kotere ngesi! Kibobokini esi ajako a Yerusalem loger lo ebobokinioto ikoku ngakile a itiokeng. Ebala Ekapolon Akuj kona, “Kainuni ayong esi ajako nakajik, eropuuni ebari a ngakwapea kadaang nikus loger a angolol ana nyeoneene. Ikokinete esi ikoku ni itanaki itiokeng, tadakae, kikanakanae kotere amina. Kesililingi ayong esi alo Yerusalem loger lo isililingea aberu ikoku keng.” Na ingolikineta esi ngakiro nguna esubasi, etamarete ngitai kus chuu, tokilikiluut ngawat kus loger a nginyia. Neni ngesi iyenuneta esi atamar ayong Ekapolon Akuj engaranakini ngulu esubete etich kang nabo angoikinit ayong ngimoe kang. Epote Ekapolon Akuj ka akim, ta ngaurukukui keng nakapiranak loger a ekuwam aloapolon, bu kirira ngulu engoikinit ngesi. Irirae Ekapolon Akuj ngitunga a akwap daang lu eriamuni ngesi esechito, kirira a akim ka ekileng, eario lukaalak. Ebala Ekapolon Akuj kona, “Anang esal a ngitunga lu italeunosi kotere akilip ngakujo nagelayek, tolosioneto namanat, tanyama akiring a ngiputiro, ka na ngirunyei ta ngamuja nache nakakadakinito ayong. Ayeni ayong ngitamen kech ka ngakiro na esubete kesi. Abunit ayong achunakin ngitunga a ngakwapea kadaang. Na echunakinotor kesi wapei, ingolikinete apolou kang toyena atamar ayong erirae kesi. “Nakaneni edeuni ayong ngiche kech atomea lobukui ka nakwapea nakalonak, na nyiirara ekipur kang kori nyingolikina apolou kang. Ngakwapea nguna kesi Sipania, ka Libia ta Lidia. Irukorete kesi ka ngikagumanarak ngimalea a amod. Ameari toloto Tubal ka Giris. Elimorete kesi apolou kang anakwapea kanguna. Ebuunete kesi ngitunga a akwap kus luche daang alobukui kainut ayong eraakasi ainakinet. Eyaunete kesi moru kang alo Yerusalem edokito ngangolei, ka ngisikiria ta ngikaala, edokito ngaurukukui na irito ngangolei, loger lo eyaunieta Ngisirael ngadekon a ngalemet a ngiboro alu italeunitoe kai a Akuj. Etiliwori ayong ngiche kech ngimurok ka Ngilawi. “Eturubi ayong ngalesea kus ka ekiro kus loger lo erubeta akwap nakitetet ka adis nakitetet kotere agogongu kang. Esukukuu daang lo eanyungarere elap ka lo a Sabato, epote ngitunga a ngakwapea kadaang kelipa ayong kanege alo Yerusalem. Alimu ayong Ekapolon Akuj nguna. “Ani enyounete kesi, ingolikinete ngawat nakatoak a ngitunga alu kangerete ayong. Ngikuru lu enyamete ngawat nguna, nyetoakete jik. Akim na enomi kesi, nyedunge jik. Ekadakini ngitunga daang akingolikin kesi.” Eraakasi ngakiro a akitab kana ngaka Yeremia alo arai lokookeng a Ilikia. Arai ngesi alesit a ngimurok a ere a Anasos anakwap a Benjamen. Tolimok Ekapolon Akuj Yeremia akiroit ekaru lo a ngitomon ka nguuni lo araakar Yosia lokookeng a Amon ekapolon a Yuda. Kisuruor ngesi nabo na araakar Yeoyakim lokookeng a Yosia ekapolon a Yuda, ani ekisidi, kisuruor ngesi ngakisuruoret nakaalak, tanang ekaru lo a ngitomon ka epei na araakar Sedekia lokookeng a Yosia ekapolon a Yuda. Elap loa ngikan a ekaru kangolo, torikoe ngitunga a Yerusalem nakwap ache. Katolimok Ekapolon Akuj ayong akiroit tama, “Kaseuni kolong ayong iyong eringa nyesubuna anakook a itiokon. Ketaleu eringa nyidouno, katolem toliwor ekadwaran a ngibukui.” Atatachak ayong atama, “Wae Ekapolon lo irai Ekapolon Akuj, kingolik a, kakuruworit ayong ekiruor, kainyo eringa ayong adit.” Nakaneni katolimok ayong Ekapolon Akuj tama, “Nyiilim atamar eringa iyong idit. Ilosi iyong lotunga lu kalimokini ayong iyong atamar tolot, nabo ilimori iyong ngakiro daang nakadungokini ayong iyong atamar kiruor. Tochoite iemei kesi kainyo kiruki ayong ka iyong katoyuu. Ayong Ekapolon Akuj ngesi alimu nguna!” Abu Ekapolon Akuj kitorwaa akan keng, tatap akituk kang, katolimok tama, “Topupok a, ewaakini ayong ngakiro nakituk kon. Kainak ayong iyong akolongit naga apolou alobukui ka ngapolosio, toditu ka aukor, kinyasu ka akiloch, adukokin ka akitakin.” Kengit ayong Ekapolon Akuj akiroit tama, “Yeremia, nyo itee iyong?” Atatachak ayong atama, “Ateni a ekitoe alo ikoni engoomo.” Katolimok Ekapolon Akuj tama, “Ingolik iyong dir kainyo etee ayong asaki atamar kiyookinos ngakiro kang.” Katolimok Ekapolon Akuj ayong akiroit tama, “Nyo iche itee iyong?” Atatachak ayong atama, “Etee ayong amot ekulae alowae alo alokwap, edikino itelun laalo.” Katolimok ngesi ayong tama, “Ekulaunete nginyas alowae alo alokwap taanyut daang lu ibooyete anakwap kana, kainyo anyaraunit ayong ngibukui lua lokwap daang abala pot. Epote ngikapolok kech topolokis ngidorin a Yerusalem ka ngawasea keng. Epolokinete tani ngirerea luche a Yuda. Erirae ayong ngitunga kang kainyo asecha kesi. Kaisikis kesi ayong, alemikis ngakujo nache ngakipeyos. Asubakis ngakujo nasubuna kilipa. Tokona bocha Yeremia, tonyou. Kape tolimok kesi daang ngakiro nakadungok ayong iyong. Nyiem kesi sodi nyeketeemea ayong iyong alongaren kech. Akolongit naga, kesikok ayong iyong ere lo a awas anakaagongon, kori apir a asuat anakirion, kori asuat nanyang anakwap kadaang, ka alokapolok a Yuda, ka ngikapolok luuchik, ka ngimurok ta ngitunga luche. Ijiete iyong ka kesi, nakaneni nyikidwangete kesi iyong kainyo kirukit ayong ka iyong katoyuu. Ayong Ekapolon Akuj alimu nguna.” Katolimok Ekapolon Akuj ayong akiroit tama, “Kape tolimok ngitunga daang lu eyakasi Yerusalem atamar ayong Ekapolon Akuj abala kona, Etamunit ayong eger lo iraakar iyong lo kimunoi ngirwa lu isorokanea, ka amina kon na iraakar ateran. Kiwapit iyong ayong anariet, etoro nakwap na emam itwaan etat ngamanat. Isirael, irai kolong iyong na italeuno anikang. Irai kolong iyong ageor na ekingaren a ngalemet kang. Arai itwaan daang ni enyami ageor ngina, apon kimarunae atamar esechit taanyu eriras. Ayong Ekapolon Akuj alimu nguna.” Topupokisi akiroit a Ekapolon Akuj, ngitunga a awi a Yakobo, ka esi ngitela a Isirael. Ebala Ekapolon Akuj kona, “Nyoni asechakini ayong taapaakus? Nyoni aree kesi anikang? Ewapete ngakiro napasiek tarata pas. Nyelimuno kesi tamasi, ‘Nyaali Ekapolon Akuj Akuj nakolong kipuduni alo Misiri, kitorik etoro nariet etoro nakwap na ariet ka ngasinyeno, akwap nakoonon toribokinite chuch, akwap na emam ngikalotok, akwap na emam itwaan elomit?’ Karikuni ayong esi nakwap naketurupan ngikinyam talakarotor ageor keng ka ngiboro luche ajokak daang. Ani napei inangeta inaa, ipot kinyasut akwap kang. Tosuba ngakiro nakikadakinete, anakwap ana kainakini ayong esi kiruma. Apot ngimurok nyeetamasi, ‘Nyaali Ekapolon Akuj?’ Pekayenete ayong ngiketatamak a etal, katongero ayong ngikarikok. Todwara ngikadwarak a ekiro a Baal. Kilipa ngakujo nasubuna na eraakasi pas.” Ebala Ekapolon Akuj kona, “Kotere nguna, ketitakini ayong esi. Etitakini ayong ngalesea kus. Totenikisi anam toloto too lokwar a Kupuro. Tomeasi itwaan kide tolot nakwap a Kedar. Ingolikinete esi atamar emam ibore ni ikoni nege ni asubakin a ache. Eyei mono ebukut edio eloch ngakujo keng tani pekeraakasi ngakujo nguna ngaka iteni a? Tarai kaisikis ayong ngitunga kang, kaisikis ayong na etaanyuni kesi arimatoi, ewapakis ngakujo na emam ibore kitaanyunete. Kotere nguna, adungokinit ayong adis atamar toriangakin torikirikok. Kitatalasi ngakiro nguna esi kitobul, kainyo asubakis ngitunga kang ngakiro naaronok ngaarei, areasi anikang, ayong lo ekoni elelea a ngakipi anakaalimok, aliwor esubete ngatanki kech a ngikulepek, ngatanki na epeded nyiratakinete ngakipi. “Erai mono Isirael ekedalan a? Edounio kolong erai ekedalan a? Nyo bo kingatareta iyong ngimoe? Irurumanakinete ngesi ngingatunyo, irurumaate lokojokon. Etiliwosi akwap keng ariet. Edong ngirerea keng eraakasi alaireng, emam itwaan eyei. Ani eya nguna, Ngitunga a ngirerea a Mempis ka Tapanes, abwang akou keng. Isirael, iyong ilope inyarakin nguna, ani kiisikinea iyong ayong Ekapolon Akuj, na arai Akuj kon, nakarikitor iyong alorot. Tokona, esibit iyong nyo ianyuni kilot Misiri akimat ngakipi a angolol a Nili? Esibit iyong nyo ianyuni kilot Asiria akimat ngakipi a angolol a Eupurate? Aronis kon a ilope kirirae iyong. Area kon anikang kidesi iyong. Ingolikini iyong nabo iyenuni aronis ka apipilu nakiisikinea iyong ayong Ekapolon Akuj, na arai Akuj kon, tapalik akerit ayong. Ayong Ekapolon Akuj Namerikanyer, ngesi alimu nguna.” Ebala Ekapolon lo erai Ekapolon Akuj, “Isirael, ingedi kolong iyong ngamasea nakienitere, towata ngarukanes nakienitere. Kidiama emukura lokooyen daang ka kwap ekitoe lokaliban daang, ibu iyong tosub emalaanu ani ilipea ngakujo ngache. Nakaneni ketakini kolong ayong iyong loger a emusabib aloseuna alo arai ekinyamit loajokon noi. Nakaneni kingolik cha iyong na isubak! Ikok iyong emusabib loabosan, lo erai pas. Tani kirigakin iyong amakat kilotar a esabuni alokaalan, idongi akemer a akisech kon etee ayong. Alimu ayong Ekapolon Akuj nguna. “Ikokini iyong ibala, ‘Eringa ayong nyinyasuna. Nyilipa ayong Baal, ai?’ Kingolik eger lo isechea iyong anadipo. Kingolik na isub iyong. Ikoni iyong ekaal lo edwarunit, lo ekeri ipatakae, ikoni asikiria nakaturonon na itwangi anariet. Na edwarunea, tomerakin toloma akinguonor ekuwam. Esikiria daang lo iitanit ngesi, nyichanakin esaki ngesi. Erwaarit ngesi esaa daang lo esakere akwarakin. Isirael, nyiitubur ngakejen kon, kori nyiitoon edokole kon deu ani iwapitor ngakujo nagelayek. Nakaneni ibala iyong, ‘Eraakasi nugu daang akiding pas! Aminak ayong ngakujo nagelayek, ewapakini ayong kesi.’ ” Ebala Ekapolon Akuj kona, “Eger lo irumeta ekokolan ngileech, eger ngolo irumeta Ngisirael ngileech. Irumete ngileech kesi ngikulepek ka ngikapolok kech, ka ngikarikok a arieng, ka ngimurok ta ngikadwarak kech. Elimokinete kesi ekitoe tamasi, ‘Irai iyong apakang.’ Ani amoru tolimokis tamasi, ‘Irai iyong itiokang.’ Esubakinosi nguna kainyo kebongokis kesi ayong akau, towout akingoliun nikang. Nakaneni ani eanyunete ngichan tamasi, ‘Tonyou toyuunae sua!’ “Nakaneni nyaanu ngakujo kon na isubakini iyong? Kimiek kesi tonyout kepedorete ayuun iyong, na ianyunea ngichan. Etige Yuda, abe elalak ngakujo kon eriyan ka ngirerea kon! Nyo ingurunguratar esi? Nyo kingerioto esi ayong? Kerirae ayong esi, nakaneni ikwa kerirat pas. Ipot esi tongero arikino. Aar ngakwaaras kus ngikadwarak kus loger a engatuny alokaadengan.” Topupokisi esi Ngisirael akiroit a Ekapolon Akuj na ebalar, “Ekoe, ekok ayong ariet alo Isirael a? Kori akwap na eribokinit chuch a? Nyo ebalatar ngitunga kang, ‘Kilachakina sua nyikiwapi iyong nabo.’ Ekoe, eyei apese imuriakini asir keng a? Eyei ateran na imuriakini alagama keng a? Nakaneni ajongoto ngitunga kang akitamun ayong a ngirwa alukaalak emam kona imarunio. Abe kiyenikinitae iyong anakisak ngaberu. Itatam iyong tani ngaberu naaronok. Etakanete ngakemera a ngaakot aloworui kon. Ngaakot a ngikebootok ka lu nyesechito tarai nyirumuna iyong kesi ebwangito akai kon. “Tani bo ikoni neni dang, ibala iyong, ‘Nyasechit ayong. Iteni dir nyeringa Ekapolon Akuj kangoikinit ayong.’ Nakaneni kerirae ayong iyong ani ibalar, ‘Nyasechit ayong.’ Nyo iwowootor iyong kona, nyo ilochio ngirotin kon? Kisurum Misiri iyong ngileech, loger lokolong kisurumea Siria. Irotokini iyong tani alo Misiri, ijuurui ani kirumitotor ngileech. Anger ayong Ekapolon Akuj lu igieno iyong, emam ibore kingarakinete kesi iyong.” Ebala Ekapolon Akuj kona, “Ani kelak ekile aberu keng, torotok aberu ngina anikeng toliwor aberu a ekile a eche, ekoe, epedori nabo ekile ngolo abongor naberu ngina? Ikwa nyinyasun akwap noi erai kebongo ngesi a? Nakaneni, iyong Isirael, isuba ka ngitunga lukaalak emalaanu. Ikwa isaki tokona iyong abongokin ayong a? Tokienyia naitae a ngimukur nalapat. Aliwae nyepero iyong ka kesi? Idarit iyong kesi alokwaas a erot, loger a erukoot anariet. Inyasu iyong akwap, kotere emalaanu kon ka aronis. Ngakiro nguna kesi eratakinere akiru, towou tani akiru na ngirupei akiram. Tarai ikote ngakonyen kon na amalaat, emam ngileech kirumito iyong tani wadiochichi. “Kigoronokini tokona iyong ayong ibala, ‘Irai iyong apakang, kimina iyong ayong napei kolong eringa adit. Ekoe, kingoikini iyong ayong jik a? Kinyunyurikin iyong ayong jik a?’ Isirael, ekiruor kon ngolo. Tarai isubi iyong akisech daang na ipedori.” Ngirwa lu araakar Yosia ekapolon, katolimok ayong Ekapolon Akuj tama, “Ingolik mono iyong ngakiro na asubaki Isirael, ngina nyemunoi a? Kaisiki ngesi ayong adoka lomukura lokooyen daang ka alosit kwap ekitoe lo elibit daang, tosub emalaanu keng kaneni! Etamit kolong ayong atamar kesub nguna kerumor, ebonguni nikang. Ikwa emam jik. Abu nyeebongu. Abu Yuda nakaatokeng nakaliokon kingolik ngakiro nguna daang. Ani eyakasi nguna daang, abu Yuda kingolik atamar alak ayong Isirael kotere emalaanu keng lo nyekamunor ayong. Nyeema Yuda. Abu ngesi dang tolot tosub emalaanu. Ani kona epasakinitor ngesi ngakiro a emalaanu, kinyasu ngesi akwap, tosub emalaanu ani elipitor ngamoru ka ngikito. Ani kesub nguna daang kerumor, Yuda nakaatokeng a Isirael nakaliokon, nyebonguno nikang a etau keng kadaang, abu kengal ayong. Ayong Ekapolon Akuj alimu nguna.” Ani erumor katolimok ayong Ekapolon Akuj tama, “Edodiun Isirael na area ani a Ekapolon Akuj atamar ajok ngesi akidwang Yuda nakaliokon. Tokona, kape tolimok Isirael ngakiro nugu ibala, ‘Iyong Isirael nanyikimunoi, tobongu nikang. Nyakangoikini ayong iyong,’ kainyo ayong Akuj na ngisien. Nyakangoikini ayong iyong jik. Tachamu atamar isechit. Tolim atamar kinger ayong Ekapolon Akuj na arai Akuj kon. Tolimo atamar alokwap ekitoe lokaliban daang, ipoto iyong amina kon iinak ngakujo nagelayek, towou akiwap ngitalio kang. Ayong Ekapolon Akuj alimu nguna. “Tobongutu esi ngitunga lu nyikimunoi, kainyo ayong arai ekapolon kus. Karikori ayong esi epei alore a epei, atoriko ngiarei anawi a apei, kayaa moru a Sion. Ayong Ekapolon Akuj alimu nguna. “Kainakini ayong esi ngikeyokok lu iwapete ngakiro kang, kitopolokis esi a aosou ka achwaanu. Ngirwa ngulu, ani ilalakearosi esi anakwap kangina, epalikinete ngitunga alimit asaduku kang a Achamunet. Epalikinete akitamanar ngakiro keng ka akitamunit ngesi. Nyeringa kesi iitanete nabo, kori nyesubakinete ache. Ani enangi ngirwa ngulu, enyarao Yerusalem, ‘Ekicholong a Ekapolon Akuj’, nabo echunakin ngibukui daang neni a ekiro a Ekapolon Akuj. Nyeringa eliworosi lu ichanaka esubete ngakiro na esakete ngitai kech luaronok. Imorikinosi Isirael ka Yuda, ebongunete kesi daang aapei anakwap ana eyei kwap, tobongosi nakwap nakolong ainakini ayong taapaakus toliwor akech jik.” Ebala Ekapolon Akuj kona, “Isirael, etamit ayong eger lo ketiliworea iyong epei a talokookang, kainak akwap nakebusean noi, akwap na ejok noi alobukui kadaang. Etamit atamar kori kinyarae iyong ayong apa, tongop kona ipalikini akiwapit ayong. Nakaneni ikok iyong anikang aberu na nyemunoi na erotokini alokile. Kikuruwo iyong aliwor aberu nakamuno ayong. Ayong Ekapolon Akuj alimu nguna.” Epupio echale alokidiama ngimukur. Igorosi Ngisirael tosutonokinete, kainyo enyasut eboyor kech, nabo ajongoto akitamunit Ekapolon Akuj na erai Akuj kech. Tobongutu esi daang lu nyimunosi Ekapolon Akuj. Kitangalekini ngesi esi toliworos lu kimunoi. Ibalasi esi, “Kingolik a, kibongunit sua nikon kainyo iyong irai Ekapolon Akuj, Akuj kosi. Iteni dir, emam ibore kitaanyunit sua akilipit ngakujo nasubuna alomukur. Iteni, ayuuno a Isirael ebunit ani a Ekapolon Akuj, Akuj kosi. “Napei kolong a ekiditeu, amunya akiroit na ngileech naga ibore daang nikolong epitunete taapaakosi. Amunya ngisipaan kech a ngaanei ka nganokin a ngaatuk, talokookech ka tanakookech. Itemokino ngoni kinapakin ani kirumeta ngileech, emukokinos etimoi yok. Napei a ekiditeu yok tanang akolongit naga, kirai ngoni ka taapaayok lu kisechanakini jiik Ekapolon Akuj na erai Akuj yok. Nyiwapa ngoni ngitalio keng.” Ebala Ekapolon Akuj kona, “Ayoro Isirael, ani kibongu iyong, Ani kibongu iyong nikang, Ani kichaka iyong ngakujo nakikadakinete alongaren kang, nyiiliwor imatamata ananupit kon, Ani kikong iyong a ekiro kang kotere iteni ka ngakiro na eriyan ka ateneanut, apiari ayong ngibukui, kepuruut kesi ayong.” Elimokinit Ekapolon Akuj ngitunga a Yuda ka lu elomito Yerusalem ebala, “Tochila ngamanat kus nakitet. Nyiitakis ngikinyam kus lookwa. Esi ngitunga a Yuda ka lu ilomito Yerusalem. Kitaleunos ani a Ekapolon Akuj kikokis itwaan ni ilengeritae. Tolemasi naaronok alotai kus loger a itwaan ani epachar amuny. Ani pekikokis esi neni, erirauni anyunyura kang loger a akim, kitonom esi tongop ekitudungee, kotere ngakiro naaronok isubete esi.” “Tolimosi, kiremasi alo Yuda ka Yerusalem. Tarama elii awadaang anakwap. Kiremasi tamasi, ‘Tochunakinos wapei! Tamataros lorerea lu a ngawasea! Kikeasi abendera a ejie kingolia Sion, tamataros toyara, nyiimamakis. Eyaunit Ekapolon Akuj ngakiro naaronok, ngakiro naaronok na itorunito kwap. Eger a engatuny alo elomunit ani edukitor iwapit ekenyasunan a ngibukui erot. Ebunit ngesi akinyasun Yuda. Idongete ngirerea a Yuda eraakasi asakatan, emam itwaan elomi neni. Tokona bocha, tanap egunia, kigor tokunuak, kainyo eringa anyunyura a Ekapolon Akuj nyerotokino ani a Yuda.’ ” Ebala Ekapolon Akuj, “Akolongit ngina, ipirisaarosi ngitai a ngikapolok ka ngikarikok. Eriangakinosi ngimurok a Akuj, kuumwokis ngikadwarak.” Abu ayong atama, “Wae Ekapolon lo irai Ekapolon Akuj, ingala iyong dir ngitunga a ere a Yerusalem! Ilimokini iyong kesi atamar emini ekisil, tarai itubuikinitae ekileng lodokolei kech.” Ngirwa ngulu elimokinio ngitunga a ere a Yerusalem tamarae, “Ekutunit ekuwam lo iwari niamonan anariet, ekutunit lotunga kang. Meere ekuwam ngolo lo ekutari ngatunyeny make, pearai eliwor loationon lo ebunit anikang! Ayong Ekapolon Akuj alemunit eriras alotunga kang.” Kingolik a, ebunit emoit loger a ngidowon. Ngaurukukui keng a ejie, ikote ekuwam lo ipiripiri, epiraka ngangolei kech idwangito ngigolei. Oitiakoi! Abe etioko nginyas kianyuni ngoni! Yerusalem, kilota naaronok alotau minio kona iyuunor. Itami iyong naaronok tanang wori? Iruoro itwaan alore a Dan elimorit nginyas a ngimukur a Epiraim. Ikilakinit ngibukui, elimokinit Yerusalem atamar eponito ngikaremok anakwap anaalonan, esakete akitijikin ngirerea a Yuda. Irikaunito Yerusalem loger a ngitunga alu iteete ngamanat, kainyo angero ngitunga a Yerusalem Ekapolon Akuj. Alimu Ekapolon Akuj nguna. Iyong Yuda inyarakin nugu daang, kotere eboyor kon ka ngakiro na isubi iyong. Akisech kon ayau ariaba nakaapilan naga. Kichum iyong apedor tooma lotau. Kapipilikinit! Nyanaikini ayong nikaapilan! Oitiakoi kare etau kang! Erono eger lo edoununio etau kang. Nyapedori ayong akililing. Apupi ayong ngaburucho ka elii a ejie. Etupasi nginyas. Edong akwap daang erai auyongorot. Inyasun ngieman atipei. Achilichilaar ngawarui kech. Etee ayong ngabenderae a ejie tanang wori? Apupi elii a ejie tanang wori? Ebala Ekapolon Akuj kona, “Ebangaaka ngitunga kang, Nyakayenete ayong. Ikote kesi ngide lubaang, emam ibore eyenete. Eyenikinitae kesi kotere akisub naaronok, nakaneni nyeyenete akisub naajokak.” Engolikini ayong akwap erai alaireng. Engolik adis emam akicha. Engolik ngimoru, erikirikete, ani ngimukur iriangariangasi. Engolik akwap, atoriam emam itwaan. Kepot ngikieny daang toporosi. Engolik akwap naketurupan ngikinyam atoriam keliwor ariet. Kinyasun ngirerea keng kotere anyunyura naaronon a Ekapolon Akuj. ( Kainyo ebala Ekapolon Akuj kona, “Eliwor akwap daang alaireng, nakaneni nyenyasuni ayong lokojokon.) Kotere nguna, igoro akwap, toribok adis. Kainyo alimu ayong, nabo nyelochi nguna etamit. Atiaku ayong, nyabongi akamaluwot. Ani iirario echale alu edokito ngangolei, ka lu ekodito ngimalea a amod, ipungar itwaan daang. Ematarosi ngiche namoni, edokete ngiche ngatabab. Idongi ere ibooyi kongin, emam itwaan elomi neni. Yerusalem, erokearosi ngakiro ianyuni iyong. Nyo ieritor iyong? Nyo inapitor iyong asir a egolit, kitunguranite ngakonyen a emunyen? Isirit iyong pas! Kingero iyong ngiminan kon. Esakete akiar iyong. Eirari ayong akigoro na ikoni na aberu ana eriaba, ikoni na aberu ana egearit akidoun. Arai Yerusalem isileki akianga, ibaarit akan keng ebala ‘Oitiakoi kare! Eponito akiar ayong!’ ” Ngitunga a Yerusalem, tamataros ama ka ama! Kisemoto taanyungasi esi ngikulepek! Toripa ni egielanarere ngiboro. Ekoe, eyei itwaan esubi na etenooko, tosubi na eraakasi iteni a? Ani keyei, erimakini Ekapolon Akuj Yerusalem. Tani kikongete esi alokiro a Ekapolon Akuj, meere ngakiro nguna iteni. Ee Ekapolon Akuj, isaki iyong jiik ateneanut, Ibu iyong taram kesi, nakaneni nyepipilikina kesi. Ipudaari iyong kesi, nakaneni towout kesi arikin. Echanaketa noi. Awout kesi akilung ngasechesea kech. Abu ayong atama, “Eraakasi ngitunga lu ngikebootok, emam ibore ekachito. Nyeyenikinitae ngitunga lugu, ebangaaka. Nyeyenete erot a Ekapolon Akuj. Ee robo, nyeyenete etal a Ekapolon Akuj kech.” Alosikini ayong ngikapolok eruoro ka kesi. Eyenete kesi dir erot a Ekapolon Akuj, ka ngitalio a Ekapolon Akuj kech. Nakaneni angeda kesi daang ngamasea na eenitere, awatasi ngarukanes na eenitere. Kotere ngakiro nguna, earete ngingatunyo lu eponito anamoni kesi. Enyilinyilaarete ngipeei lu eponito anariet kesi. Elomarete ngirisae awowoot alorerea kech. Enyilinyilaario ngitunga lu epudorete nikalapatan, kainyo elalak ngasechesea kech, nabo angero kesi Akuj ngangeriet nakaalak. Ingita Ekapolon Akuj ebala, “Ekokini ayong karimakini esi ai? Kingero esi ayong, Ikongete esi a ngirora a ngiborei alu nyeraakasi ngakujo dir. Abu ayong kesimuj esi kimwoko, nakaneni tarata esi ngikalomak, toliwor ngamalaae irukitotor esi jiik. Kikokis ngangolei na ituupitae akimuj na emerasi a etereku. Eyei ipei kus daang etereku kotere aberu a ekidunyet keng. Ekoe, ikwa isakete esi nyekerira kotere nguna? Ikwa nyatachakini ayong ngakiro ani eyei ebukut lo ikoni nege a? Ayong Ekapolon Akuj alimu nguna. “Kinyasutu ngamanat keng a ngimusabib, nakaneni nyiinyasut noi. Tobilu ngaten keng kainyo nyeraakasi ngaka Ekapolon Akuj. Kainyo Ngisirael ka ngitunga a Yuda, nyeringa kamunosi ayong jik. Ayong Ekapolon Akuj alimu nguna.” Iruorotor kesi Ekapolon Akuj alioko ebalasi, “Emam ibore esubakini ngesi. Emam naaronok kianyunor ngoni. Nyikiriamun ka akwara kori eron. Emam ibore iruorosi ngikadwarak pearai ekuwam, kainyo emam akiroit eyei nikech. Kimiekisi na iruorosi kesi nguna tosubakin anikech a ngikulepek.” Kalimokini ayong Ekapolon Akuj Namerikanyer tama, “Ani kona alimunioto kesi nguna, etiliwori ngakiro kang akim anakituk kon. Eliworosi ngitunga lugu ngakito, enomiari kesi akim ngina. “Esi Ngisirael, ayauni ayong ebukut anialonan kiterem esi. Erai ebukut ngolo lokaagongon, nabo erai longorot noi. Nyiyenete esi angajep kech, kori nyichoiarete na elimunete. Ayong Ekapolon Akuj alimu nguna. Earaka ngimalea kech a amod. Eraakasi ngasigerea kech daang nakajwok. Emunyarete ngikinyam ka ngamuja kus. Emunyarete talokookus ka tanakookus. Emunyarete ngisipaan a ngamesekin kus ka ngaatuk. Emunyarete ngimusabib kus ka ngimeyana. Inyasunete kesi ngawasea na igienosi esi.” Ebala Ekapolon Akuj kona, “Nakaneni tani ngirwa ngulu, nyamunyari ayong kesi daang. Ani kingita kesi iyong tamasi, ‘Nyo kisubea sua Ekapolon Akuj na erai Akuj kosi ngakiro nugu daang?’ Ilimokini iyong kesi tama, ‘Eger lokolong ingerioto esi Ekapolon Akuj kiwapa ngakujo a ngakwapea anache anakwap kus, isubete esi dang etich ngitunga a akwap anache, anakwap ana nyerai akus.’ ” Ebala Ekapolon Akuj kona, “Tolimok ngalesea a Yakobo, tolimok ngitunga a Yuda kona: Topupokisi esi ngikabangaanak lu enangakina ngakies. Eyakasi esi ngakonyen nakaneni nyiteete. Eyakasi ngaki nakaneni nyiirarete. Ayong arai Ekapolon Akuj. Nyo pekikeritotor esi ayong? Nyo peimaraneta esi alongaren kang? Ewaakini ayong asinyen etiliwo ekukuor a anam. Ekukuor lokajik lo nyiporori ngesi. Tani kekulaut ngitoroi, nyilaparosi. Tani keruu anam, nyiporori ekukuor ngolo. Nakaneni ichanaka ngitunga lugu, kangerito ayong. Areasi alot wache. Nyelimuno kesi alotai kech kona, ‘Atokera Ekapolon Akuj, Akuj yok, nakiinunit akiru na enangea ngirwa a akiru. Akiru na etepunea ka na ngirupei. Kiinakinite ngirwa lu itemokino elemere ngamanat.’ Aronis kus eratak nguna nyianyut esi. Ngasechesea kus kidemasi esi naajokak. “Elomito luaronok kiding ngitunga kang. Eperete kesi edukito loger a ngitunga alu elokete ngikieny. Elokakinito kech ngatach kech, isurumete ngitunga. Eger lo ilelebea ekalokan ngikieny nakikap, eger lopei ngolo elelebeta kesi ngakais kech ngiboro lu edemete ngitunga. Ngakiro nguna aliworotor kesi ngitunga lu eyenikinitae taraakas ngikabarak, atuma kolong anakut. Kotere eboyor kech loaronon, emam ngakiro eriakasi kesi. Nyesubeta kesi ngikokiok na itemokino kisikokinotor, nabo nyeikinito lu ichiakiaritae nyeesubere ngakiro na nyeriyan. “Ekoe, nyerirae ayong kesi dir kotere ngakiro nugu a? Ekokini ayong peatachakini ngakiro kotere ebukut lo ikoni nege lo ai? Ayong Ekapolon Akuj alimu nguna. Akiroit naaronon nakiteriangakini asubakin anakwap kanaga. Edwarete ngikadwarak alioko nikirion. Epolokinito ngimurok a Akuj ngitunga loger lo itatameta ngikadwarak. Ebobokinito ngitunga kang ngakiro nguna. Ani bo na enangea esal, ikokinete kesi ai?” Tamataros toyuunos, esi ngitunga a Benjamen! Kipungaros alore a Yerusalem! Tokutakisi aburuch alore a Tekoa. Kidodiutu emachar alo Bet Akerem! Akitu ka nginyas luaronok, eponito alokwap. Esikwaanit ayong ere a Sion ka achokor nakaliban. Elomete ngikapolok neni ka ngasigerea kech, itoweyete ngieman kech kiriama ere, elomi ipei kech daang ni cha esaki. Elimunete tamasi, “Tonyoutu atoremo Sion. Atosubakinos! Kiremi naparan lotingilan!” Nakaneni elimunete ekisidi tamasi, “Oitiakoi kare! Abe etioko ngakiro kianyuni ngoni! Kedooyo akolong, kilikakis ngitorubei lua atabong. Ani kikote neni tonyoutu atoremo nakwaare. Kinyasuni ngawasea a ere.” Alimu Akuj Namerikanyer kona, “Totubo ngikito. Toduko ngakatiputipui kiriameta Yerusalem. Ejoikinit ere logo irirao kainyo ileleba aronis. Eger lopei ikiunitor akar ngakipi, ngesi ikiunitor Yerusalem aronis keng. Apupi ayong erukoonu ka nginyas alotooma keng. Edeke ka ngajemei kesi etee ayong jiik. Ngitunga a Yerusalem, toliworos nguna nakikilakinete esi, nyakachakarea ayong esi jik, kikokis ariet na emam itwaan elomit.” Ebala Akuj Namerikanyer kona, “Kidepudepuutu Ngisirael lupiyayek, loger lo idepunere ngamusabib daang alokitoe. Kotere nguna, ejoikinit iyuuni itwaan daang ni ipedori ayuun eringa ngirwa.” Tangae esuruorikini, ekilak topupokis? Kingolik a, enangakina ngaki kech, nyiirarete ngakiro. Ikoni akiroit a Ekapolon Akuj anikech ibore ni ejamuaritae. Nyeminasi kesi jik. Kotere nguna, Ekapolon Akuj, anyunyura na ingoikinitor iyong kesi, arirau anikang, kaburu akidait alotooma kang. Katolimok Ekapolon Akuj tama, “Tobukok lode lu eyakasi lorotin a ere ka losorok lu echunakina wapei. Ee robo, erikorio ngikiliok ka ngaberu aapei. Tani ngikasukou ka ngitunga lumojong noi, emam lu eisikinio. Ipotorio ngakais kech nakinae ngitunga luche, aapei ka ngamanat ta ngaberu kech. Kainyo erirae ngitunga lu elomito nakwap naga. Kesi daang, napei ani eyenikinitae tanang ni nyeyenikinitae, iterekuyarit aanyun ebari. Napei alokadwarak tanang lomurok a Akuj, eliokoko kesi daang. Eenete ngajemei a ngitunga kang ipasakinito. Ebalasi, ‘Eyei ekisil’, tarai emam ekisil! Apot mono kiruma ngileech na asubeta ngakiro nakikadakinete nguna? Mam jik! Nyiruma kesi ngileech jik. Peayenete tani atamar akirum ngileech nyo. Kotere ngakiro nguna, edakarosi kesi loger lo edakarotor luche. Na eriraa ayong kesi, eliwor esal kech ngolo. Ayong Ekapolon Akuj alimu nguna.” Alimokini Ekapolon Akuj ngitunga keng tama, “Towaa ani ichiereta ngirotin, kingoliasi. Kingitas ngirotin lungorok, ka ni eyei erot loajokon, kiwapakis. Iboikinosi esi akaalimon. Nakaneni ipot esi tamasi, ‘Nyikiwapi sua erot ngolo.’ Ani erumor kerumak esi ngiketeok atama, ‘Topupo eruye a aburuch.’ Nakaneni ipot esi tama, ‘Nyikipupi sua.’ ” Kotere ngakiro nguna, tolim Ekapolon Akuj tama, “Topupokisi esi ngibukui, toyena na esubakinosi alotunga kang. Topupok kare akwap! Kingolik a, ayauni ayong akitu lotunga lugu. Erirae kotere na etukito kesi, kainyo nyemisikina kesi ngakiro kang. Ani etal kang, angero. Nyo kang emitina lo eyaunitae alo Cheba? Kori ekitoe lo itukukunyi akimuj lo eyaunitae anakwap anaalonan? Nyachamuni ayong ngadekon kech nabo nyakajoikinito ngakipeyos kech. Kingolik a, alokakini ayong kesi, ewaak ngiborei lu ilegeunete tadakasi. Taapa ka talokookech emunyarosi, emunyarosi ngikidunyet dang ka ngipaalon.” Ebala Ekapolon Akuj kona, “Kingolikisi a, eponito ngitunga alokwap. Eneteuna ebukut loationon alowaitin alualonak anakwap. Etingito ngakawa ka ngakwaaras, ngitunga lukamoitanak emam ngisien. Ani eloose kesi edokito ngangolei, ikoni eruye a ngakejen kech lo a anam ana ekulae. Arekinosi loger a itwaan ani anyou ejie, akitijikin iyong Sion!” Ebalasi Ngisirael, “Kiira sua ngakiro nguna, ating ngakan kosi emudekeke. Kiriabakin sua loger a aberu ana esaki akidoun. Nyikilosi namanat kori nyikilae alorotin. Kainyo etingito ngimoe ngiboro a ejie, elelebun ebuloi wadaang.” Elimokinit Ekapolon Akuj ngitunga keng ebala, “Tanapa ngiguniae kipunupunos alokuruon. Kigoro tosutonokis loger a itwaan ani igoro lokookeng lo erai epei bon, kainyo ebuni ekamunyaran kitorem atipei. Yeremia, kaseu ayong iyong kining ngitunga kang toyen eboyor kech, loger lo iningio itwaan ngasua. Eraakasi daang ngikasechak lukechanak. Irimito akwap eswamete luche. Egogong ikote asuat nanyang ka nakirion. Eraakasi daang lu iwapito amodeanut. Erirae adui iwari asarae lokojokon, akeiasi ngimalea alotooma akim. Erai pas arubakinit akitoseg ngitunga kang, kainyo nyelemanario luaronok. Enyarao kesi asakatan a akwangat, kainyo ayong Ekapolon Akuj anger kesi.” Erai naga akiroit na alimokini Ekapolon Akuj Yeremia tama, “Towo anakituk a akai a Akuj kiruor ngakiro nugu, topupokisi ngitunga a Yuda lu ilomete tooma akilip Ekapolon Akuj. Ebala Akuj Namerikanyer, na erai Akuj a Isirael kona: Kibeleto elote kus ka ngakiro na isubete sodi kemiek ayong esi toloma nege. Tapalikisi akigieno ngakiro na alioko ibalatar esi ‘Kibooyi sua akaalimon! Erai nege akai a Ekapolon Akuj, erai nege akai a Ekapolon Akuj, erai nege akai a Ekapolon Akuj!’ “Kainyo ani kibeleto elote kus ka ngakiro na isubete esi, tosubea ipei kus daang niche na eriyan, ani kijongoto akichiakiarit ngitunga a akwap anache, ka ngikokiok ta ngapuseru, sodi tojongoto akiar ngitunga lu nyesechito anakwap kana, tapalikis akilipit ngakujo nache, na kinyasunete esi, ani kibeloto esi nguna daang, kemiekini esi toloma nakwap naga, akwap nakolong ainakini ayong taapaakus a angorot. “Kingolikisi a, igienosi esi ngakiro na eraakasi ngapasiek. Ikokoyete esi, iarete, ilomete, ikongete alioko, ilemanakinete akuj nabe Baal ngakipeyos, kilipito ngakujo na nyeyena esi a ache. Ani erumor pot towaa alongaren kang, alokai ana elimitere ekiro kang kana, sodi tamasi, ‘Kibooyi sua akaalimon’, tarai irubakinito esi akisub ngakiro nakakadakinito ayong nguna! Ikwa keliwor akai na elimitere ekiro kang aburibur na eduketa ngikokolak a? Toyena atamar aanyunga ayong daang na isubete esi! Kapesi tokona Chilo nikolong esiauni ayong atoseu kelipeenere. Kingolikisi nakolong asubea ayong Chilo kotere ngasechesea a ngitunga kang, Ngisirael. Isuba esi ngasechesea nguna daang, ani na abongokinio akisuruor esi, ipot towout apupokin. Towout esi akikere nakanyaraa. Kotere nguna, asubea ayong akai na elimitere ekiro kang naga, ngakiro nakolong asubea ere a Chilo. Akai naga igienosi esi. Nikolong ainakini ayong taapaakus nege, asubea ngakiro napei kolong asubea Chilo. Ketwarakini esi alongaren kang, loger lokolong etwarakinea ngiyenet kus, ngalesea a Epiraim daang.” Alimuni Ekapolon Akuj tama, “Yeremia, nyiilipak ngitunga lugu. Nyikigoronok ayong kotere kesi, kori nyiilipak. Nyikimaima ayong kotere kesi kainyo nyeirari ayong ngakiro kon. Ikwa nyitee iyong ngakiro na esubete kesi alorerea a Yuda ka ngirotin a Yerusalem a? Ikeyenunete ngide ngakito, kinokakis taapakech akim, tomunakis taito ngakiria, kidorokinioto ngamugati a akuj naberu enyaritae akapolon a adis. Ani nabo dang, elemanakinete kesi ngakujo ngache ngakipeyos a emuna, ketilileta ayong. Nakaneni mono tokona, ayong ketililiete kesi a? Ewanasi kesi make kiruma ngileech! Kotere ngakiro nguna, alimunit ayong Ekapolon lo arai Ekapolon Akuj kona, ‘Abukokini angoit kang ka anyunyura kang nege, lotunga, ka ngitieng, ka ngikito ta ngalemet. Ikokini angoit kang akim na emam itwaan itudunge. Ikoni angoit kang akim na emam itwaan itudunge.’ ” Alimu Akuj Namerikanyer na erai Akuj a Isirael kona, “Ngakipeyos napalem inomio tonomiasi, kiatakisi nakipeyos na inyamete esi. Kalimokinit tokona ayong esi atamar tanyama ngakipeyos nguna daang. Kainyo akolongit nakolong epudunio ayong taapaakus alo Misiri, emam ngakiro adungok ayong kesi anakipeyos ana inomio tonomiasi, kori anakipeyos anache. Nakaneni adungokinit ayong kesi atamar kiwapa akiroit kang, atoliwor ayong Akuj kech, toliworos kesi ngitunga kang. Alimokinit nabo atamar kiboikinos kesi loger lo adungokinit ayong, taanyuneta eboyor loajokon. Nakaneni apot kesi nyiiwapakis kori nyeedetasi ngaki, pearai apot tosuba loger lo arikitotor kesi ngitai kech lukechanak aronok. Toliworos ebongete kaku akidwang alosit ngaren. Napei kolong apudunioto taapaakus alo Misiri tanang akolongit naga, nyepalikina ayong ameanar ngikasubak etich kang ka ngikadwarak nikus jiik. Nakaneni emam itwaan epupokini ngakiro kang todeta akit, akidwang akikokin neni, ipot esi kichanaketa noi, toroketa akidwang taapaakus. “Tokona Yeremia, tolimok kesi ngakiro nu daang, nakaneni nyepupokinete kesi. Inyarae iyong kesi nakaneni nyikiyete. Ilimokini iyong kesi tama, ‘Ebukut logo ngesi lo awouni akiwap ngakiro a Ekapolon Akuj, ana erai Akuj kech, towou arikin na erirare. Adaun iteni, nyeringa ngakituk kech elimito.’ “Toluro, ngitunga a Yerusalem. Tachakasi ngitim. Kigoro tosutonokis anaitae a ngimukur anilapat, kainyo angoit ayong Ekapolon Akuj anger ngitunga kang. “Asecha ngitunga a Yuda alongaren kang. Etowaa ngakujo kech nasubuna nakikadakinete alokai kang, enyasut. Aduko kesi ekeno lo enyaritae Topes nadipo a lokookeng a Inom, tachakakineta talokookech ka tanakookech nakim tarata ngakipeyos. Nyedungokina ayong kesi atamar tosuba kongina, kori amam nguna tani na etamit ayong. Kotere nguna, enangi ngirwa lu epalikinere anyarit neni Topes kori adipo a lokookeng a Inom, pearai enyarao adipo a Aaranot. Enukakinio ngitunga neni kainyo engopi nabo wache enukakinio. Eliworosi ngawat a ngitunga alukatoak kangulu akimuj a ngikieny ka ngitieng a moding, nakaneni emam itwaan esuri kesi. Alorerea a Yuda ka ngirotin a Yerusalem, atubori ayong ekare ka akimaritetere ta akinyiakanar a akuuta, kainyo eliwor akwap ariet. “Ngirwa ngulu, ngakoyo a ngikapolok a Yuda, ka na ngikasubak etich a arieng, ka na ngimurok a Akuj, ka na ngikadwarak ta na ngitunga alu elomito Yerusalem, ekutunio analielin. Emam itwaan enuki ngakoyo nguna, ikokinete analup ngasike, kialarae alongaren akolong, ka elap ta ngikanyer lukolong aminasi ngitunga ngulu tosubete etich kech. Ngiborei ngulu asakanarete kesi kilipa. Ngitunga daang lupiyayek a ebukut aloaronon kangolo, awadaang ani kolong apetakini ayong, egaase akitu akidwang akiyar. Ayong Akuj Namerikanyer alimu nguna.” Ilimokini iyong kesi tama, ebala Ekapolon Akuj kona, “Ekoe, na edakarotor ngitunga, ikwa nyenyounete nabo a? Ani kedepa ipei erot, ikwa nyebonguni nabo lorot a? Ani nyo bo, areatar ngitunga lugu, torubakis ikote neni, nyiibongut nikang? Eneikina kesi longalas, towout abongun nikang. Adetarit ayong akit apupokinit, nakaneni emam akiroit a iteni tani apei ilimut esi. Emam itwaan eriangakina kotere aronis keng. Kori emam ni ingita ebala, ‘Nyoni asub ayong?’ Itorit itwaan daang lorot keng a ilope, loger a angole ana ibiroro lojie. Eyenete ta pelekuto dang esaa lo ebongunioto. Ngakurio ka talogecha ta ngiumio, iwapito ngirwa lu eramanakineta. Nakaneni nyeyenete ngitunga lukang lugu, ngitalio kang, ayong Ekapolon Akuj. Ikokinete esi itamarete, ‘Kiosok sua, kiyeni ngitalio a Ekapolon Akuj.’ Ikwa ngikegirak lukaliokok, eloch ngitalio kang! Irumete ngileech ngikoosok kus. Ibileri kesi kikokis lu esipok. Angero kesi akiroit kang, ayong Ekapolon Akuj. Aosou ani tokona aanyut kesi? Kotere nguna, alemuni ngaberu kech ainakini ngitunga luche. Ani ngamanat kech, epotok ngitunga luche tolemasi. Kainyo napei ani nyeyenikinitae tanang ni eyenikinitae, iterekuyarit aanyun ebari a amodeanut. Napei alokadwarak tanang lomurok a Akuj, eliokoko daang. Itedekete ngajemei a ngitunga kang ipasakinito. Ebalasi, ‘Eyei ekisil’, tarai emam ekisil. Apot mono kiruma ngileech na asubeta ngakiro nakikadakinete nguna? Mam jik! Nyiruma kesi ngileech jik. Peayenete tani atamar akirum ngileech nyo. Kotere nguna, edakarosi kesi loger lo edakarotor luche. Na erira ayong kesi, eliwor esal kech ngolo. Ayong Ekapolon Akuj alimu nguna.” Ebala Ekapolon Akuj kona, “Asaki ayong achunakin ngitunga kang, loger lo echunakinea itwaan ngalemet. Nakaneni ikote esi ngimusabib lu nyekoniunete ngamusabib. Ikote esi ngimeyana lu nyekoniunete ngameyana. Nabo aoniyosi tani ngakui kech. Kotere ngakiro nguna, emiek ayong ngitunga lugelayek elemarete akwap.” Ingitasi ngitunga a Akuj ebalasi, “Nyo mono kibooyo ngoni kirwaritor? Tonyoutu atamataros lorerea lu eyakasi ngawasea atotoniasi inaa. Ekapolon Akuj, Akuj yok, atiaku atamar kitoaki ngoni. Kiinak ngoni ngakipi iwaakinitae ekitoe lokaaran atamata, kainyo kisechak ngoni ngesi. Kigieno atamar ataanyutu ekisil, nakaneni emam ibore ajokon kianyu. Kigieno atamar kitangalekinoe ngidekesinei, nakaneni ebuloi kipot ataanyutu. “Anangut ngimoe lore a Dan, Epupio ngangolei kech itusasi. Na erukinioto ngangolei kech a ejie, tamaranik akwap daang. Apot akinyasun akwap ka ibore daang ni eyei nakwap. Apot akinyasun ere ka ibore daang ni eyei lore. Tochoikinos! Kainuni ayong esi ngimunio. Ngakipomea nakadwarak na emam itwaan ipipauni. Kikonyete esi ngakipomea nguna. Ayong Ekapolon Akuj alimu nguna.” Kangopiki kona esililinga, atojongo akialolong. Echanakin etau kang. Topupok! Wadaang anakwap, apupi ayong ngitunga kang igorosi ebalasi, “Ekoe, emam Ekapolon Akuj alo Sion a? Emam ekapolon a Sion alore a?” Etachuni Ekapolon Akuj na erai ekapolon kech tama, “Nyo kitongoitotor esi ayong ilipitotor ngakujo nasubuna ka ngakujo nagelayek?” Nakaneni igorosi ngitunga ebalasi, “Adaunosi ngalemet, esiak akamu, toringa ngoni nyeyuuna.” Alilimiyo etau kang kainyo alilimiyosi ngitunga kang. Egoro ayong, kabul noi. Ekoe, emam ekitoe matat alo Gilead a? Emam ngiketedeakak kaina? Ani nyo awounea edeke a ngitunga kang angalekin? Arai bo tarai akou kang akar a ngakipi dang, ani ngakonyen kang tarata eitanit a ngakiyo, kegor ayong apaaran ka akwaar, kotere ngitunga kang lu aario. Arai bo toyei ni alomi anariet dang, kadok ayong alotunga kang. Kainyo eraakasi daang ngimalaae a ngakujo, eraakasi ajore a ngirukooi. Ekudokinete kesi ngangajepa kech loger a akau togumasi engalas Aliwor alioko epolokinitere akwap, meere iteni. Idokete ngitunga kang aronis naronis nache, nabo nyakalimorito ayong atamar arai Akuj kech. Ekapolon Akuj alimu nguna. Ejoikinit itwaan daang iyoki ekidunyet keng, kori nyiigienokin lokaatokeng. Kainyo ingalana itwaan daang, nabo eswami itwaan daang ekidunyet keng. Ingalae itwaan daang ekidunyet keng, emam tani ipei iruoro iteni. Itanaikinito kesi ngangajepa kech alioko. Esubete kesi naaronok akuruwo akilung. Ichiakiarete itwaan ipei, ani eringa kichiakiasi niche, kiata engalas longalas loche. Awout alimor ayong. Ayong Ekapolon Akuj alimu nguna. Kotere nguna, ebala Akuj Namerikanyer, “Etokeari ayong kesi loger a asuat ening, kainyo nyaanu ngache asubea ngitunga lukang lugu? Ikote ngangajepa kech ngimalea a amod, lu iwasakinitae ekitoe lokaaran, nyepalikinete akisud ngakiro. Itobobokinit ipei kech daang ekidunyet keng akituk, tarai imanit alotau. Ekoe, nyerirae ayong kesi kotere nguna? Ikwa nyatachakini ayong ngakiro na asubi ebukut lo ikoni logo a? Ayong Ekapolon Akuj alimu nguna.” Atolim ayong atama, “Egoror ayong ngimoru atosutonok, eute kotere nginyia lua ariet, kainyo aoko deu, emam itwaan itori neni. Emam itwaan eringa epupi eruye a ngaatuk. Epungarosi ngikieny ka ngitieng a moding angopiasi.” Ebala Ekapolon Akuj kona, “Enyasuni ayong Yerusalem. Ee robo, etiliwori aburibur a ngikolowoi. Etiliwori ngirerea a Yuda alaireng, ni emam itwaan elomit.” Engis ayong atama, “Nyaai ni eyei ekooson lo eyenuni ngakiro nugu? Ngae alimoki Ekapolon Akuj ngakiro nugu esaki atamar kiruor? Nyo enyasunor akwap edongio erai alaireng, tongop tani itwaan itori neni?” Tatachu Ekapolon Akuj tama, “Erai ni angerioto kesi etal kang lokolong ainakini. Nyiwapa kesi ngakiro kang kori nyesuba kesi na alimokini ayong. Akikarun akikokin neni, echanaketa kesi alomasi akilipit akuj nabe Baal, loger lokolong etatameta taapaakech kesi. Tokona bocha, topupok na asubakini ayong Akuj Namerikanyer, na arai Akuj a Isirael. Ainakini ayong ngitunga kang akimuj naadwaran tanyama, ainak ngakipi na iwaakinitae ekitoe lokaaran tamata. Apetakini ayong kesi lobukui lusek nyeyenete kesi, kori taapaakech. Ameari ayong ngasigerea na itijikinete kesi, tomunyasi daang.” Ebala Akuj Namerikanyer kona, “Kitamasi ngakiro na esubasi! Tanyarautu ngaberu na igorosi tosutonokis. Ee robo, tanyarautu ngakunonoi a ngieosio alu enukere ngitunga.” Tolimut ngitunga tamasi, “Tolimokisi kikomaut kitoeokis sua ngieosio lu enukere ngitunga, talakakis ngakonyen kosi ngakiyo, tachalachala ngakiir a ngakonyen ani igorore.” Epupio akigoro alo Sion ebala, “Kibukor kare sua! Kisurum ngileech lokojokon! Kiisik sua akwap kosi kainyo abwang ngakais kosi.” Atolim ayong atama, “Ngaberu, kiirasi ngakiro a Ekapolon Akuj. Todetasi ngaki kiirasi ngakiro keng. Kitatama tanakookus eger lo igorotor tosutonokis. Ani ngikidunyet kus kitatama ngieosio lu enukere ngitunga. Kainyo apunun akitu alopukei a ngakais yok, alomu tooma ngakais a ngikapolok yok. Etongop ngide yok alorotin, etongop tani ngisorok yok ani egielanarere ngiboro. Eperete ngawat a ngikatoak awadaang, ikote ngasenon a ngasike anamanat, ikote ngasiina na imiekini ekaleman, tongop ikachunakinan wapei. Nguna kalimokini Ekapolon Akuj ayong atamar tolimu.” Ebala Ekapolon Akuj kona, “Nyiinisakinor ekooson aosou keng, nyiinisakinor nikaagongon ngikilinga keng, ani ekabaran nyiinisakinor ebari keng. Ani ni esaki akinisakin, kinisakin ani kayenea ayong, katochoiarite, kainyo erai amina kang na nyedaun, nabo asubi na eriyan ka na etenooko. Ngakiro nguna kaminarito ayong. Ayong Ekapolon Akuj alimu nguna.” Ebala Ekapolon Akuj kona, “Epote ngirwa lu eriraa ayong ngitunga daang lu ilengeritae, tarai nyilengeritae ngitai kech. Ngitunga ngulu kesi Ngimisiri, ka lua Yuda, ka Ngiedomae, ka Ngiamon, ka Ngimoab ta ngitunga daang lu elomito nariet, lu etubete ngitim. Eringa ngibukui ngulu nyilengera nabo eringa ebukut a Isirael daang nyilengera alotai kech.” Esi Ngisirael, topupokisi ngakiro nakilimokinit esi Ekapolon Akuj! Ebala Ekapolon Akuj kona, “Nyiiwap elote a ngibukui aluche, kori nyikiteriangakis ngakiro naparing na ianyungarete anadis, nguna itubuleenete ngibukui luche. Kainyo eraakasi ngitalio a ngitunga, eyapunete kesi akitoe anamoni, kichie ekechian a aep keng. Kitisirio a ngakwangae ka egolit, kirumeikinae a ngisumarea, nyiiloilookinosi. Ikote ngakujo nasubuna nguna ngiborei lusuriet ngikieny anamanat a ngamunye. Nyiruorikinete. Iwokitae kesi jiik kainyo nyerotokinete. Nyiikera ngakujo nasubuna nguna. Emam naaronok kisubakineta esi, kori emam ibore ajokon kisubakineta.” Ekapolon Akuj, ngae ikwaanatar iyong? Ipolot iyong, nabo eyenikinitae ationis a ekiro kon. Ngae nyikikeri iyong, iyong ekapolon a ngibukui? Ejoikina iyong kikerio. Alokoosok kadaang alobukui, ka ngikapolok kech daang, emam tani epei lo ikwaan ka iyong. Ebangaaka daang iwaarit. Nyo kitatamete ngoni ngakujo nakito? Ayaunio ngakwangae alo Sipania, yaunae egolit alo Upas. Erai etich ngolo daang eka ngikunonoi. Itanapitae ngakujo nguna ngiworui lumugeyek ka lupusiek-arengak, lu adonyete ngikadonyok lukunonoi. Nakaneni iyong Ekapolon Akuj, irai Akuj na iteni. Irai iyong Akuj na eyari, ekapolon lokajik. Na ingoea iyong, tamaranik akwap. Nyenaikinete ngibukui anyunyura kon. Ilimokinete esi kesi kona, “Ngakujo nakolong nyesubuna adis ka akwap, inyasunio. Engopiarete anadis ka kwap adis.” Asubi Ekapolon Akuj akwap a agogongu keng. Tosubak akwap a aosou keng, sodi topetak adis a achwaanu keng. Na edungunio ngesi akiroit, torukis ngakipi na eyakasi kidiama adis. Kitonyou eloch anasalunet a akwap. Kisitoru akimilea nakiru, talakak ekuwam anisek egolokino. Ebangaana itwaan daang iwaarit, irumito ngileech itwaan ni esubi ngakujo nasubuna, kainyo eraakasi ngakujo nguna ngaka alioko nabo nyeyarete. Eraakasi kesi ngapasiek, ejoikinit ekianare. Inyasunio na ebunio Ekapolon Akuj akirirare kesi. Kainyo nyikwaan Akuj a Yakobo, ka ngakujo nasubuna nguna, ngesi kolong asubuni ibore daang. Nabo aseu ngesi Isirael aliwor ebukut keng a ilope. Akuj Namerikanyer ngesi ekiro keng. Ngitunga a Yerusalem, kiriamitae esi! Tochunakisi ngiboro kus. Ebala Ekapolon Akuj kona, “Kingolikisi a, kemasari ayong esi anakwap kana nipei bore en, ketaanyu esi ngichan lu kibelarete.” Kikalout ngitunga a Yerusalem tamasi, “Oitiakoi kare! Kiwan cha sua kona? Abe nyengalekinete ngajemei kosi! Kitamit sek atamar eraakasi ngichan lugu lu kipedori sua atitinyikin. Enyasun ngieman kosi, angedasi ngaunoi kosi daang. Alot sua ngide kosi, kiisikis sua. Emam lu idongito akiguror ngieman kosi nabo, kori emam lu imukete a ngawarui.” Atatachu ayong atama, “Abangaaketa ngikeyokok. Awout alosit nia Ekapolon Akuj kiten kesi. Ibore ngini ngesi akuruworea kesi akisikokin. Ibore ngini ngesi apetarotor ngamesekin kech. Topupokisi! Edolunit akiroit! Eruunit echale loationon, ebunit alobukut alo alokwap. Itiliwori ngirerea a Yuda alaireng, toliworos ni elomito ngikolowoi.” Ekapolon Akuj, ayeni ayong atamar emam itwaan epolokinit eboyor keng, emam itwaan eriki elote keng a ilope. Torikinoe ayong Ekapolon Akuj, torikinoe a erot alo eriyan, kori nyiikok neni ingoit, nyikimunyarea. Tobukok anyunyura kon lobukui lu nyikikerito iyong, ka ngitunga lu nyikinyarito iyong. Kainyo aara kesi ngalesea a Yakobo. Aara amunyasi pil, enyasun akwap kech. Katolimok Ekapolon Akuj ayong Yeremia akiroit ebala, “Topupok ngikitetio a achamunet kana, tolot tolimok ngitunga a Yuda ka lu elomito Yerusalem. Ilimokini iyong kesi kona: Ilamit Akuj itwaan ni nyiwapit ngakiro a achamunet kana. Achamunet naga ngesi nakolong echikakini ayong taapaakus na epudunio kesi alo Misiri, akwap na ekoni anikech akim nakariran. Atolimok atamar kiwapa ngakiro kang ka akisub daang na adungokini ayong. Atama ayong kesi ani kikokis neni, eliworosi ngitunga kang, atoliwor ayong Akuj kech. Ani kiwap kesi ngitalio ngulu, eyookini ayong akichikakinet nakolong ekongokini ayong taapaakech abala ainakini akwap na ileleba ngakile ka akimiet a ao, akwap na tokona erai akech.” Atatachu ayong atama, “Kikokis kare neni, Ekapolon Akuj.” Abu Ekapolon Akuj katolimok ayong tama, “Tolimo ngakiro nguna daang alorerea a Yuda ka ngirotin a Yerusalem. Tolimok ngitunga atamar kiirasi ngakiro a achamunet kana sodi kiwapa. Kainyo echikichiki kolong ayong taapaakech lokojokon na epudunio anakwap a Misiri, nabo eringa ayong kechikichiki esi jiik tanang akolongit na tokona naga abala kiwapa akiroit kang. Nakaneni towout kesi akiwap ngakiro kang ka adetar ngaki kech. Akidwang akikokin neni, abu ipei kech daang kichananer, toroner. Sodi erira ayong kesi a ngakiro a achamunet ana kolong abala ayong kesi kiwapa kana, nakaneni towout kesi akiwap.” Abu nabo Ekapolon Akuj katolimok ayong tama, “Etukito ngitunga a Yuda ka lu elomito Yerusalem akinger ayong. Abongosi kesi nasechesea kata apaakech alu awounete akiwap ngakiro kang. Elipa kesi ngakujo ngache asuba etich kech. Echwangakis ngitunga a Isirael ka lua Yuda achamunet nakolong kichamakin ayong kata apaakech. Tokona bocha, echikichiki ayong Ekapolon Akuj kesi atamar amunyari ayong kesi, emam ni ebuchar. Ani kekaloikinete kesi ayong, nyeirari ayong kesi. Eloose ngitunga a Yuda ka lua Yerusalem nakujo na ipeyonokinete kesi ngakipeyos, kigoronokis esakete akingarakino. Nakaneni nyingarakinete ngakujo nguna kesi na eanyuneta ngichan. Iyong Yuda, elalak ngakujo kon, loger lo elalaketa ngirerea kon. Ngikenoi lu aduko ngitunga a Yerusalem ipeyonokinioto akuj nakikadakini be Baal, elalak noi loger lo elalaketa ngirotin alo Yerusalem. Yeremia, nyiilipanak ngitunga lugu, nyikigoronok ayong nabo nyikimaima kotere kesi, kainyo tani kelipa kesi ayong na eanyunitotor ngichan, nyapupokini ayong ngakiro kech.” Ebala Ekapolon Akuj kona, “Nyo elometa ngitunga lu amina ayong kai kang na esechitotor? Ebalasi kesi kori kiratakini ngakiro naaronok a ngikongen ka akipeyore ngakipeyos a? Ekoe, italakarete nguna kesi a? Abala kolong ayong eraakasi kesi ekitoe a akimiet lo elibit ekilikili, lo erait ageor naajokon. Nakaneni tokona, agirokini ayong loger a agiro, enom ngakui keng ka akibil ngaten keng. “Ayong Akuj Namerikanyer, ngesi etakini Isirael ka Yuda. Nakaneni alimunit tokona atamar eanyunete kesi ngakiro naaronok ani asecheta. Ketongoa kesi ayong ani epeyonokinioto Baal ngakipeyos.” Kedodik ayong Ekapolon Akuj, atoyen. Ee robo, kedodik Ekapolon Akuj ayong naaronok na atukito kesi. Ekoni ayong imesek nikapatanan ni erikitoe akingol. Peayeni atamar ayong katukuore ebeyo, “Enyasutu ekitoe ka ageor keng, atotubosi ngesi anakwap ana eyakasi lu eyarete, tojongoi alimit ekiro keng nabo jik.” Abu ayong elip atama, “Ee Akuj Namerikanyer, iyong na itubi ngakiro a ateneanut, na itemit ngitai ka ngitamen a ngitunga. Eraakasi ngakiro kang daang ngaka akiding kon. Kimiekinae kengolik iyong itachakini naaronok asubete ngitunga lugu.” Alimu robo Ekapolon Akuj kona kotere ngitunga a Anasos lu asakete akiar ayong ebalasi, “Nyiidwar ilimit Ekapolon Akuj, ani kemam kiari sua iyong.” Ebala Akuj Namerikanyer kona, “Kingolik a, erirae ayong ngitunga a Anasos. Eario ngisorok kech a akwara. Ngide kech lusapa ka lupesur, eriyorosi erogo. Arekinit ayong ngirwa lu ayaunea ngakiro naaronok lotunga a Anasos, ani enangi ngirwa ngulu, emam tani ipei kech ni epuun.” Ee Ekapolon Akuj, ani kesubura ayong iyong a ngakiro a ngadi, ileereuni atamar itenoono iyong. Tani kikoni neni, ayakasi ayong na asaki akingit iyong. Nyo ejokia eboyor aluaronok? Nyo itabarit lukamodeanak? Itakini iyong kesi toruput ngaten, topoloto kesi tokoniut ageor. Anakituk, eyakasi diyete kon. Ani alotai kech, eloka anikon. Kiyeni iyong ayong Ekapolon Akuj. Kitee iyong ayong, iyeni eger lo kaminar ayong iyong. Kuurukukuyo luaronok lugu loger a ngamesekin ana erikitoe akingol. Kitegelia kesi tanang esaa lo engolere. Eoni akwap yok tanang wori? Etoakete nginyia daang tanang wori? Etoakete ngitieng ka ngikieny kotere aronis a ngitunga. Ngitunga lu ebalasi, “Emudukana Akuj, nyitee elote yok.” Tolim Ekapolon Akuj tama, “Yeremia, ani kiburunit iyong ani ibolotor ka ngitunga, ikokini iyong ibolosi ka ngangolei ai? Ani kidakar iyong anikalapatan, ikokini anamoni a Yorudan ai? Tani talokaatokon, lu eraakasi ngitunga a awi ka apakon, kimoda iyong. Kichanete kesi dang iyong. Nyiinup ngakiro kech, tani kebobok ngakiro kisuruorete iyong.” Ebala Ekapolon Akuj kona, “Achaka ayong Isirael. Aisik ayong ebukut kang loseuna. Epoto ayong ngitunga kang lu amina, ajalak ngimoe kech. Ngitunga kang luseuna, kachalanakis ayong loger a engatuny alo eyei namoni. Aremokino ayong kesi kotere ngakiro nguna. Irimirimi ebu longoor ngitunga kang a? Irikaunito ngataruk alowaitin kadaang a? Kape, tochunak ngitieng a moding daang, pot kirajakinos. Enyasunete ngikeyokok lukaalak amana kang a ngimusabib. Epudata kesi ngamanat kang. Etiliwosi akwap kang naajokon alapatu. Etiliwosi ariet. Etee ayong erai alaireng. Edong akwap daang erai ariet, emam itwaan eringa emisikinit. Ngaitae a ngimukur daang anariet, adolut ngitunga akirem. Ayau ayong ejie lo emunyari akwap, napei alowae a epei tanang loche, emam itwaan iboikin akaalimon. Etakinete ngitunga kang ngakanoi tolema edoan. Asubete etich loationon, nakaneni emam ibore apot taanyut. Kotere ni angoitor ayong anyunyurar, emam ngalemet eanyunete kesi.” Ebala Ekapolon Akuj kona, “Eyei akiroit asaki alimun ani eyakasi ngikidunyet a Isirael lu enyasut akwap nakolong ainakini ayong Ngisirael lu eraakasi ngitunga kang. Arutuni ayong ngitunga luaronok ngulu anakwap kech, atoyuu Yuda alokiding kech. Ani ketiliwo ayong kesi ngirikon kerumor, edodikini ayong kesi ngisien kang. Abuari ayong ebukut daang nakwap keng, nikolong sek alomito kesi. Ani kitatamasi kesi eboyor a ngitunga kang a ngitai kech kadaang, ani erumor kikongo a ekiro kang tamasi, ‘Kona eyarea Ekapolon Akuj,’ loger lokolong etatameta kesi ngitunga kang akikong a ekiro a Baal, isikokinosi kesi daang toliworos ngitunga kang. Nakaneni ebukut cha daang lo nyiwapi ngakiro kang, adituni ayong enyasu. Ayong Ekapolon Akuj alimu nguna.” Katolimok ayong Ekapolon Akuj tama, “Kape togielu edengo, toinik naabor, wara nyiiwaak nakipi.” Abu ayong atogielu edengo loger lo kalimokinitor Ekapolon Akuj sodi atanap anaabor. Abu Ekapolon Akuj kesuruorik ayong na ngaarei tama, “Tolema edengo lo igielu iyong, lo tokona inapit iyong anaabor, tolot nangolol a Eupurate, sodi kidaa anachiet a ataaba.” Atolot ayong edaa edengo ngolo alodiyete Eupurate, loger lo kadungokinitor Ekapolon Akuj. Ani adaunet a ngirwa alukaalak, katolimok Ekapolon Akuj ayong tama, “Kape nangolol a Eupurate, tolem edengo lokolong abala ayong iyong kidaa.” Atonyou ayong atolot nangolol a Eupurate, atoboka. Atolem edengo anisek edaikini ayong. Ani alemuni, atoriangakin engolikini atamar kinyasun keliwor pas. Abu Ekapolon Akuj katolimok ayong akiroit nabo tama, “Eger ngolo enyasunea ayong ekinis a Yuda ka ekinis loationon a Yerusalem. Awout ngitunga luaronok lugu akiwap ngakiro kang. Akidwang akikokin neni, echanaketa daang aroketa. Elipa kesi ngakujo nache, asuba etich kech. Ikokinete kesi edengo lo enyasun logo. Eger lo irumeikinor edengo naabor, asaki ayong ngitunga daang a Isirael ka Yuda kerumeikinosi ayong, toliworotor ngitunga kang, lu itaanyunete ekiro kang ekipur ka arima. Nakaneni apot kesi towout akiirar ngakiro kang. Ebala Ekapolon Akuj neni.” Ekapolon Akuj na erai Akuj a Isirael, kalimokini ayong kona, “Yeremia, tolimok Ngisirael atamar ejoikinit ngamoti daang ilelebikinio emuna. Kingisete kesi iyong tamasi, ‘Esibit iyong nyikiyeni sua atamar ejoikinit ngamoti ilelebio emuna a?’ Sodi tolimok iyong kesi tama, ‘Ebala Ekapolon Akuj edikino elelebikini ngitunga a akwap kana emuna lo eupi kiraka. Irakari ngikapolok lu eraakasi ngalesea a Daudi, ka ngimurok, ka ngikadwarak ta ngitunga a Yerusalem daang. Ani erumor atobwanganak ayong kesi ni eyakasi luche loger a ngamoti, lumojong ka lusorok aapei. Nyekesieniyete ayong kori nyariaka amunyar kesi.’ ” Esi Ngisirael todetasi ngaki topupokis! Tojongoto ekinis, kainyo eruorik Ekapolon Akuj. Kipuruutu Ekapolon Akuj, na erai Akuj kus, eringa ngesi nyeyauna aribu, eringa amoru nyenanga ngakejen kus alomoru esaa lo eribokinea. Ani eringa iyong idarit akicha, kibele ngesi akicha toliwor ekamutot ani erumor kitiribok chuch. Nakaneni ani kiwout esi akiirar, ekalouni ayong ngakiyo anikang bon, kotere ekinis kus. Ekalouni ayong lokojokon, talakakis ngakonyen kang ngakiyo kainyo ngitunga a Ekapolon Akuj erumiar loger a ngamesekin arata ngirikon. Katolimok ayong Ekapolon Akuj tama, “Tolimok ekapolon ka itiokeng kona: Totiyaunos alokicholongo kus alu apolou, kainyo ngikiraunea kus luajokak, achakunosi anakies kus.” Eriam ngimoe ngirerea a Negeb. Emam itwaan elomari. Erumiar ngitunga a Yuda daang arik, arikor kesi daang toliworos ngirikon. “Yerusalem, kingolia kare! Eponito ngimoe kon alokwap! Nyaali esipanit lokolong kichikakinio iyong? Nyaali esipanit lokolong inisar iyong? Itamari iyong ai erai kidwang iyong ngitunga lukolong ielokinosi ka iyong tarata ngipaalon, ani erumor kitopolokis? Nyiriabakin cha iyong dir loger a aberu ana eriaba a? Ani kilimu iyong alotau tama, ‘Ekoe, nyo esubatar nugu daang anikang?’ Erai ni erokiata ngasechesea kon noi, ngesi ewolorere ngiworui kon toboliare akwaan kon. Epedori itwaan akiloch amuny a akwaan keng a? Epedori eris akiloch ngameriyek keng a? Ani kepedori akiloch, ikwa ipedorete esi dang, lu isubete naaronok, akisub naajokak. Kealari ayong esi loger a nginyia alu ekutari ekuwam lo a ariet. Ngakiro nguna ianyunete esi. Nguna kesi aseu ayong Ekapolon Akuj kotere esi, kainyo kimuriakis esi ngakiro kang, kigienokinos alioko. Ewolori ayong ngiworui kus tanang nakies, kileereunioto ngileech kus. Engolik ayong ngakiro nakikadakinete isubete esi. Engolik emalaanu lo iwapitotor esi ngakujo nagelayek, alokidiama ngimukur ka ngamanat. Loger a ekile alo iwapit aberu a itwaan, kori loger a esikiria alo esupit asikiria. Oitiakoi kare ngitunga a Yerusalem! Abe etioko nginyas ianyunete esi! Ani kolongit ikiunotor esi tosegeta?” Erai naga akiroit na alimokini Ekapolon Akuj Yeremia kotere akamu. Tolim tama, “Igoro Yuda esutonokini. Atoniasi ngirerea keng. Eperete ngitunga keng analup ialolongete. Kigoro Yerusalem esaki kengarakin. Emearete lukajakaanak ngikasubak etich kech esakete tookut ngakipi. Toloto ngikasubak etich nakare, nakaneni tongopikis ngakipi. Tobongut nyeoko ngiboro. Iloi kesi kibiler, tarapa ngireetin kech irumito ngileech. Ani kona emamakar akiru, eoni akwap deu. Ialolongete ngiketak, tarapa ngireetin kech. Euri agete anamoni kimiek itaok kaneni kainyo emam nginyia. Ewaasi ngisikiria a moding anaitae a ngimukur analapat, iangasi loger a ngikolowoi. Aribonoki ngakonyen kech, ani angopikinea akimuj. “Kegoronokinete ayong ngitunga kang ebalasi, ‘Tani kilimorito sua ngasechesea kosi, kingarakinae kare sua Ekapolon Akuj, sodi kipuruunere iyong. Kirea sua anikon nakaalak. Kisechak sua iyong. Iyong na irai ngesi kigieno Isirael. Iyong kiyuuni sua ngirwa lua ngichan. Nyo ikonea iyong itwaan nigela anakwap kosi? Loger a ekaloton alo eperi apei bon! Nyo ikonea iyong itwaan ni kibilerit? Nyo ikonea iyong asiger naationon na nyepedori ayuun itwaan niche? Tarai bo Ekapolon Akuj, kirukit sua ka iyong. Kirai sua daang ngitunga kon. Nyikichaka sua.’ ” Ebala Ekapolon Akuj kona kotere ngitunga keng, “Eminasi kesi awowoot, nyiratakinete kesi ngakejen kech. Kotere ngakiro nguna, anger Ekapolon Akuj kesi. Itamuni tokona ngesi aronis kech, kirira kesi kotere ngasechesea kech.” Katolimok ayong Ekapolon Akuj tama, “Nyikilip ayong isaki atamar engarak ngitunga lugu. Tani keron kesi, nyeirari ayong akigoro kech. Tani kalemanakis ayong ngakipeyos na inomio ka na ngalemet, nyachamuni ayong. Pearai amunyari ayong kesi a akwara, ka akoro ta ngidekesinei luaronok.” Abu ayong atama, “Wae, Ekapolon lo irai Ekapolon Akuj, iyeni iyong atamar elimonokinete ngikadwarak ngitunga atamar emam ejie ka akoro epete nakwap, kainyo ichikak iyong atamar ekisil bon emini nakwap kosi.” Katatachak Ekapolon Akuj ayong tama, “Isudete ngikadwarak ngakiro elimito ekiro kang. Nyemeara ayong kesi, emam tani ngakiro adungok, kori nyisuruoro ayong kesi. Kidwaranakinete kesi esi ngakisingolikinet na alioko ka ngakiro napasiek na irokete kesi ngikulepek. Kotere ngakiro nguna, alimu ayong Ekapolon Akuj nugu kotere ngikadwarak lu edwarete elimito ekiro kang ngulu, tarai nyemeara ayong kesi. Abe ebalasi kesi nyepete ejie ka akoro nakwap naga. Amunyakini ayong ngikadwarak ngulu lojie ka akoro. Ani ngitunga lu esuruorio ngakiro nguna, eario loger lopei ngolo. Echakakinio ngawat kech lorotin a Yerusalem, tongop itwaan enuki. Esubakinosi ngakiro nguna ani eyakasi kesi daang aapei ka ngaberu kech, ka talokookech, ka tanakookech, kainyo abukokini ayong kesi aronis kech a ngikulepek.” Katodungok ayong Ekapolon Akuj atamar atolimok ngitunga kona, “Kimiekisi ngakonyen kang talakakis ngakiyo apaaran juui ka akwaar kiiya. Kimiek ngakiyo nguna nyeetubos, kainyo ewanan ngitunga kang niaronon noi, idichakinitae towanae niaronon noi. Ani kalot ayong namanat, aanyungari ngawat alu aario a akwara. Ani kaloma lore, aanyungari lu aari akoro. Ngikadwarak ka ngimurok a Akuj, eloose esubete etich kech, nakaneni nyeyenete ibore ni esubete.” Ekapolon Akuj, inger iyong Yuda jik a? Iremokin iyong ngitunga a Sion a? Nyo kiwanea iyong sua niaronon noi kona? Tongop tani ngidekesinei kosi kona engalekinete? Kibala sua kori kianyuni ekisil, nakaneni emam ibore ajokon kianyu. Kigieno atamar engalekinete ngidekesinei kosi, nakaneni ebuloi bon kipot ataanyutu. Ekapolon Akuj, kilimo sua aronis kosi, ka ngasechesea kata apaakosi dang, kainyo kisechakinit sua iyong. Nyikichaka kare sua, sodi kipuruunere iyong. Wara nyiicham ngileech epete Yerusalem, ni ipuruunitere apolou kon. Kitamu achamunet nakolong kichamakin ngoni, nyiichwangak achamunet ngina. Tokona mono a, eyei tani apei anakujo anasubuna a ngibukui, na epedori ayaun akiru a? Epedori adis alakakin ngakipi kilimilimak a? Mam jik! Erai iyong Ekapolon Akuj, Akuj kosi, ngesi kigieno sua, kainyo iyong isubi nguna daang. Ani erumor katolimok Ekapolon Akuj ayong tama, “Arai tani towaas Musa ka Samuel alongaren kang kemaimayete ayong, pekarimak ayong ngitunga lugu. Kitwarak kesi alongaren kang. Kimiek toloto! Ani kingita kesi iyong ebalasi, ‘Aliwae kilosi sua?’ Itachakini iyong kesi atamar abala ayong Ekapolon Akuj kona, ‘Ngulu ilamakinitae edeke loaronon, emunyakinosi lodeke. Ngulu ilamakinitae akwara, emunyakinosi nakwara. Ngulu ilamakinitae akoro, emunyakinosi nakoro. Ngulu ilamakinitae narikonot, erikio, toliworos ngikedalak.’ “Atiaku ayong Ekapolon Akuj atamar ainuni kesi ngakiro ngoomwon na emunyarete kesi. Eario kesi alojie, enyilinyilaarete ngingokwo ngawat kech, enyamete ngataruk kesi, tomunyasi ngibuin nipiya. Etiliwori ayong kesi ibore ni itubuli ngapolosio daang anakwap, kotere ngakiro nakolong asubi ekapolon Manase lokookeng a Esekia alo Yerusalem.” Ebala Ekapolon Akuj kona, “Etige Yerusalem, isieni iyong ngae? Ngae ikalouni kotere iyong? Ngae ereeun kingit iyong ngakiro a eboyor kon? Kingero esi ayong, ibongete jiik akamaluwot. Kotere ngakiro nguna, abu ayong katomunya esi. Kaburu ayong arimanakin esi. Alore kadaang anakwap, kapiesi ayong esi loger a ngatunyeny. Aar ayong ngide kus, Amunya ayong ngitunga kang. Iwounete esi areeun alorotin kus aluaronok. Etalala ayong ngapuseru kus edwanga tani asinyen na ekwaas a anam. Aari ayong ngide kus lusorok alokileenu kech lotingilan, etaanyu taitiokech ngichan. Atipei, ayau ayong nikech ariaba ka ebuloi. Erakar aberu na aario ngide keng lusapa ngikan-kaarei. Eringa iroga. Asubu anikeng adooyo akolong eringa apaaran. Eruma ngesi ngileech ka etimoi. Ani lu eringa eyarete, emiekinea akwara a ngimoe kech. Ayong Ekapolon Akuj alimu nguna.” Oitiakoi kare! Aluchan lu katingito ayong lugu? Nyo kolong kedounio itiokang ayong? Kingolopa ayong ka apega ka itwaan daang anakwap. Emam itwaan earit ngaropiyae kang, tamam ngaropiyae a itwaan na aarit ayong, tarai kechieni itwaan daang ayong. Kimiek kikokis neni Ekapolon Akuj, erai pekasubit etich kon niajokon, erai pekegoronokinit iyong kotere ngichan a ngitunga kang. ( Emam itwaan ebili asuat nakirion. Tarai cha noi asuat nakirion na eyaunit alokwap imorikinitae ka nanyang.) Katolimok ayong Ekapolon Akuj tama, “Ameuni ayong ngimoe toremo ngibaren ka ebari loche a ngitunga kang, kirirae ngitunga kang kotere ngasechesea na asubete kesi awadaang anakwap. Emiekini ayong kesi tosuba etich a ngimoe kech anakwap ana nyeyenete kesi, kainyo arirau angoit kang loger a akim, nabo enoki jik.” Abu ayong atolim atama, “Ee Ekapolon Akuj, iyeni iyong. Kitamunae kare ayong, kingarak. Tatachak ngakiro alu kaboliatar ayong. Ititiny iyong, nyikimiek kare adaun. Toyen atamar erai iyong keyenyere ayong. Kisuruori iyong ayong, atopupok akiroit daang. Katojoikis ayong ngakiro nguna, tominak etau kang. Arai ayong ikon, ee robo, Ekapolon Akuj, Namerikanyer. Nyiruko ayong ka ngitunga lu amerasi, kori nyelakara ayong kesi aapei. Ebooyi ayong alopei ani keratakinea akan kon. Kainyo ibu iyong kitongo ayong elelebun. Nyo peedaunor apipilu kang? Nyo peengalekinio ajeme kang, ekuruworitor ekitoe lo itedekere? Isaki iyong akingalare ayong loger a ingolol ani etuboonosi ngakipi jiik a?” Abu Ekapolon Akuj tatachu tama, “Ani kibongu iyong nikang, kachamuni ayong iyong, toliwor iyong ekasuban etich kang nabo. Ani kidepa iyong ngakiro napasiek, toliwor iruoro ngakiro natenoyek, iliwor iyong ekadwaran kang nabo. Ereeunosi ngitunga nikon, meere iyong ireeun nikech. Alongaren ngitunga ngulu, ketiliwori ayong iyong awas a asuat ananyang na itirokina. Ijikinosi iyong ka kesi, nakaneni nyikidwangete kesi iyong, kainyo kirukit ayong ka iyong keyok ka ayuun iyong. Kayuuni ayong iyong anakan a ngitunga aluaronok, katalachu anakan a ngirukooi. Ayong Ekapolon Akuj alimu nguna.” Katolimok Ekapolon Akuj ayong akiroit nabo tama, “Nyiuta kori nyianyu ngide kane. Kalimokini ayong iyong ngakiro na esubakinosi alode alu idounio kane ka ngikauriak kech. Earete kesi daang ngidekesinei luaronok, emam itwaan igoro tosutonok kotere kesi, nabo emam itwaan enuki kesi. Etukokinosi ngawat kech nalup loger a ngasike. Emunyakinio kesi nakwara ka akoro, tanyama ngikieny ka ngibuin ngawat kech. “Nyiiloma kai na igorore ekatoan, nyiigor kori nyiisutonok, kainyo alema ayong ekisil kang ka amina kang na nyedaun ta ngisien kang alotunga kalu. Etoakete ngitunga daang luuchik ka luapolok anakwap kana, nakaneni emam itwaan enuki kesi kori igoror tosutonok. Emam ni edungudungo kori ni eluri idodiunit atamar egoro. Emam itwaan imujete kori emaase ka itwaan ni etoanit itwaan keng kisililingea. Emam itwaan ni idodiuni ngisien tani kerai itiokeng kori apakeng a itwaan kangini etoanit. “Nyiiloma kai na enyameta ngitunga akimuj nakaalan. Nyiiboikin akimuj kori tamata ka kesi aapei. Ayong Akuj Namerikanyer, na arai Akuj a Isirael alimu kona, ‘Esililingi ayong anakwap kana elale ka akimaritetere ta ekare a akuuta. Asubakini ayong nguna daang eringa esi iyarete.’ “Na ilimokinea iyong kesi nguna daang, kingisete kesi iyong ebalasi, ‘Nyo atiakunea Ekapolon Akuj aboliar sua niaronon kona? Nyo kichwangak sua? Nyo kisechak sua Ekapolon Akuj, na erai Akuj kosi?’ Itachakini iyong kesi atamar ebala Ekapolon Akuj kona, ‘Kemiekinete kolong taapaakus ayong, kiwapakis ngakujo ngache, kilipa ka akisub etich kech. Kemiekinete kesi ayong, towout akiwap ngitalio kang. Isuba esi naaronok noi akidwang taapaakus, kainyo ichanana ipei kus daang, torono. Nyisakete esi akiirar ngakiro kang. Kotere ngakiro nguna, ketwarakini ayong esi anakwap kana, kelomak nakwap nakolong nyeanyuna esi ka taapaakus a ache. Isubete esi ngitichisio a ngakujo anache kaina akwaar ka apaaran. Emam ngisien ianyunete esi anikang.’ ” Ebala Ekapolon Akuj kona, “Enangi akolongit na nyikongioto ngitunga ebalasi, ‘Ekong tani Ekapolon Akuj na eyari, nakolong epuduni Ngisirael anakwap a Misiri.’ Eliworosi ikongete ebalasi, ‘Ekong tani Ekapolon Akuj nakolong epuduni Ngisirael anakwap ana eyei kwap ka ngakwapea daang nakolong apetarit ngesi kesi.’ Abuari ayong kesi nakwap kech a ngikulepek, nakwap nakolong ainakini ayong taapaakech.” Ebala Ekapolon Akuj kona, “Kingolik, anyarauni ayong ngikechiemak lukaalak pot kirumut ngitunga lugu. Ani erumor atanyarau ngikerikak lukaalak kirikata kesi alomoru kadaang ka emukura daang ta ngakope. Kainyo etee ayong ngirotin kech daang. Emam ibore erapap anikang. Emam akisech erapap anakonyen kang. Etachete kesi ngasechesea kech ngatachet ngaarei, kainyo enyasut kesi akwap kang a ngakujo anasubuna ana eperete loger a ngikatoak. Nabo eleleba kesi ngakiro kech nakikadakinete nakwap kang.” Ee Ekapolon Akuj, irai iyong ngikilinga kang ka awas kang nakaagongon, nikon amotun ayong esaa daang lo aanyunea ngichan. Nikon epote ngibukui daang anasalunet a akwap, “Amam kolong taapaakosi ibore apot kiruma, mati ngakujo na alioko. Ngiborei lupasiek lu emam ibore kitaanyunete. Epedori itwaan asubakin ngakujo keng a ilope a? Mam, ani kesubaki, nyeliworosi ngakujo dir.” Ebala Ekapolon Akuj kona, “Kotere nguna, edodiun ayong anikech eleere. Ee robo, tokona jik, edodiuni ayong apolou ka agogongu kang. Toyena kesi atamar arai ayong Ekapolon Akuj.” Ebala Ekapolon Akuj kona, “Ngitunga a Yuda, igiritae akisech kus lotai kus ka lowaitin a ngikenoi a ngakipeyos. Nyikisar loger a ngagiran ana ichiekinitae namoru a ekalam alosuat alo erai niita alumas. Ilipito ngitunga kus alokenoi a ngakipeyos a akuj anabe Achera. Itoweikinitae Achera ngakisikwaanet nguna alokitoe kadaang alokaliban kilipere Achera, ka ngaitae a ngimukur ta kidiama ngimoru lu eyakasi naroatin. Ebari kus a ngibaren ka ebari loche, etangatari ayong ngimoe kus kotere ngasechesea daang na isubete esi awadaang a akwap. Iisikinete esi akwap nakolong kainakini ayong esi, kemiek ayong esi tosuba etich a ngimoe kus anakwap ana nyiyenete esi, kainyo anoku angoit kang loger a akim, nabo enoki jik.” Ebala Ekapolon Akuj kona, “Ilamam itwaan ni erea anikang, kigienokin itwaan niche, kitiliwo aupwal keng. Ikoni ngesi ekitoe lo eyei nariet, emam naajokak eanyuni pei dang. Iboikin nikoonon anariet, alodoot alo emam itwaan elomit. “Epiaritae itwaan ni igienokin Ekapolon Akuj, itwaan ni erai Ekapolon Akuj bon igieno. Ikoni ngesi ekitoe lo erupunit ani a ngakipi, lo iteliarit ngaten na alokwap nakipi. Nyeemi ngesi na eriraunea akwap, kainyo idongete ngakui keng epuseaka. Emam ibore ichani ngesi nakamu, erubakini ekoniununi ageor. “Ingalana etau noi akidwang ibore daang, nabo emodeana lokojokon. Ngae epedori akiyen eboyor keng? Ayong Ekapolon Akuj aripi ngitamen, eningono etau, atosubakinea itwaan daang na itemem ka eboyor keng, ka na itemem ka na esubi ngesi.” Itwaan ni eanyuni ngaropiyae namoduna, ikoni ikeny ni ebekuni ngitak anabeyei ana nyeraakasi ngakeng. Engopiari ebari daang eringa ngesi nyemojonga. Ani enangi esal a eboyor keng, kidong erai ekabangabangat. Ikoni akai a Akuj yok ekicholong a apolou lokebusean, lo ewaakinio kidiama emoru napei anakisiakinet. Ekapolon Akuj, iyong kigienosi Ngisirael, irumete ngileech daang lu kingerete iyong. Engopiarete lu kiisikinete iyong, loger a ngirora alu igiritae napua, kainyo kiisikis kesi iyong Ekapolon Akuj na irai elelea a ngakipi anaajokak. Kitangalekinoe kare Ekapolon Akuj, atojoker atangalek. Toyuunae ayong sodi atoyuun, kainyo iyong ngesi kepuruunit. Kingolik a, kengiseenete ngitunga ebalasi, “Nyaanu nakolong abala Ekapolon Akuj asubakini? Kimiekisi chene tosubak nguna.” Nakaneni nyengero ayong aliwor ekeyokon alotich. Kori nyesaka ayong atamar bu akolongit a ngichan. Iyeni iyong daang nakolong alimuni ayong. Nyiiliwor kitubulit ayong. Nikon amotun ayong akolongit na ngichan. Kisirum lu kaboliatar ayong ngileech, nakaneni kimiekinae ayong nyikisurum ngileech. Kitubul ngitunga ngulu, nakaneni kimiekinae ayong nyikitubul. Inu kesi akolongit na aronis, Torochak kesi ngakiro naaronok. Katolimok ayong Ekapolon Akuj tama, “Yeremia, kape tolimo akiroit kang alokidor a Ngitunga alo itoreenete ngikapolok a Yuda na elomareta ka apudor alore. Kape tolimo tani alorerea kadaang a Yerusalem. Tolimok ngakiro kang ngikapolok daang a Yuda, ka ngitunga daang a Yuda ta ngitunga daang lu elomito Yerusalem, lu elomunete kitorut lodorin ngulu. Tolimok kesi atamar abala ayong Ekapolon Akuj kona, ‘Tochoikinos. Ani kiminasi esi akiyar kus, warasi nyiiwok eegos tani lodiochichi akolongit na Sabato. Nyiiwokut eegos tolomuneta lodorin a Yerusalem. Nyiiwokosi eegos anakais kus akolongit na Sabato, kori nyiisuba etich. Kitaleutu akolongit a Sabato, loger lokolong adungokinea ayong taapaakus. Apot taapaakus towout adetar ngaki kiirasi ngakiro kang. Pearai apot kesi kichanaketa, towout akiirar ka akiwap ngakiro na adungokinit ayong.’ “Tolimok ngitunga lugu atamar kiwapa ngitalio kang daang. Nyiiwok eegos kitorunioto lodorin a ere kalo akolongit na Sabato. Ejoikinit kesi italeunete Sabato nyeesuba etich tani lodiochichi. Ani kikokis neni, elomarete ngikapolok kech ka ngikarikok kitoro lodorin a Yerusalem, taanyut apolou na ikoni nakolong a Daudi. Imorikinosi kesi ka ngitunga a Yuda ka Yerusalem, tolomut itorunito lodorin a ere kalo, edokito ngaurukukui na irito ngangolei, todokito ngangolei. Eliworosi ngitunga ileleba lore a Yerusalem jik. Epote ngitunga alorerea a Yuda, ka ngadakarin na idunyasi ka Yerusalem. Epote ngiche anakwap a Benjamen, ka ngaukon, ka lomoru ta Negeb. Eyaunete kesi kai kang ngakipeyos na inomio, ka ngakipeyos nache, ngakipeyos a ngalemet ka emitina ta ngakipeyos na ebuanakinere Akuj alakara. Nakaneni ejoikinit kesi iwapete ngakiro kang, kitaleut akolongit na Sabato, kori nyiiwok eegos kitorioto lorotin a Yerusalem akolongit na Sabato. Ani kewout kesi akiwap ngakiro kang, enokakini ayong akim lodorin a Yerusalem. Enomiari akim ngakais naapolok kebuseak daang alo Yerusalem, tongop kona itudungeo.” Katolimok ayong Ekapolon Akuj akiroit tama, “Yeremia, kape nawi a ekayen ngamoti. Kalimokini ayong iyong akiroit kaina.” Abu ayong atolot nawi a ekayen ngamoti. Ani anangi, atorukau ekayen ngamoti eyekinit amot. Arai nacha esechar echoto lo eyekinit ngesi, tolem ngesi echoto ngolo toyeunea ibore iche ni ejoikini ngesi. Sodi katolimok ayong Ekapolon Akuj akiroit tama, “Ikwa nyapedori ayong Ekapolon Akuj asubea esi Ngisirael ngakiro na esubea ekayen ngamoti echoto a? Toyena atamar eger lopei eyakar echoto nakan a ekayen ngamoti, iyakasi esi dang nakan kang, esi Ngisirael. Ani katiaku ayong ebukut be ati, kori apolou be ati, adituni, kori aukori, kori enyasuni, nakaneni tolung ebukut ngolo akisech keng, nyasubakini ayong ngakiro naaronok sek asaki asubakin. Aloger alopei kangolo, na atiakunea ayong atamar adukokini ka akitowo ebukut, kori apolou, ani erumor tosech ebukut ngolo alongaren kang towou akiwap ngakiro kang, nyasubakinea ayong ngakiro naajokak nasek asaki asubakinea. Tokona bocha, tolimok ngitunga a Yuda ka lua Yerusalem atamar abala ayong Ekapolon Akuj kona, ‘Kingolikisi a, areat ayong naaronok anikus, nabo atukit naaronok anikus. Kimiekisi ngirotin kus luaronok, kibeloto elote ka eboyor kus.’ Nakaneni etachunete kesi tamasi, ‘Mam jik, nyo kosi? Kisubi sua na kisaki sua ngikulepek. Esubi itwaan daang na esaki loger lo eronia etau keng.’ ” Ebala Ekapolon Akuj kona, “Kingit ngibukui daang, ngae nakanuan eira akiroit na ikoni naga? Asuba ngitunga kang, Ngisirael, akiroit nakitubuli! Eyei akolongit na emamakar eloch anatabab ana ekokoriyorito alo Lebanon a? Ani ngakipi keng nakaalimok eleleunito alomoru, epedorete dir atubo nyeeleleut a? Nakaneni emuriakin ayong alotunga kang. Inomanakinete kesi ngakujo nasubuna emitina. Elegeunosi kesi tadakaros alorotin kech, nyeringa iwapito erot lokolong ngorot. Etoro kesi lorotin lu inacharito adepasi akitorit lorot lo idiiri. Etiliwosi kesi akwap naga ibore ni kitubuli, ibore ni ijotajotare. Itwaan daang ni itoruni neni, ebuli kotere nguna eanyungari, kimungumungak akou keng. Apetari ayong ngitunga kang iteete ngimoe kech, loger a apua ana ekutari ekuwam lo ekutunit alo kide. Amuleni ayong kesi, atowou akingarakin akolongit na eanyuneta ngichan.” Ani erumor tamasi ngitunga kona, “Potu mono esi atotukotor Yeremia, kainyo nyikingopikinete ngoni ngimurok luche lu kitatamete, ka ngikoosok lu kisuruorete ta ngikadwarak lu elimorete akiroit a Akuj! Potu erirata ngesi a ngakiro keng a ilope, kori nyikimisik ngakiro na iruoro ngesi.” Abu ayong elip atama, “Ekapolon Akuj, topupok ngakiro kang, topupok ngakiro nakeruorotor ayong ngimoe kang. Ekoe a, naaronok etachakinio itwaan kotere naajokak a? Abe aboka bo kesi akipany na achakakin ayong. Kitam eger lokolong awaar ayong alongaren kon, eruoro naajokak kotere kesi. Asaki atamar nyiingoik iyong kesi. Tokona bocha Ekapolon Akuj, kimiek ngide kech toriyo erogo. Kimiek taarae a akwara. Kimiek ngaberu tadaunos ngikiliok ka ngide kech. Kimiek ngikiliok kech taar edeke loaronon, sodi taarae ngisapa a akwara. Kiirarae ngitunga igorosi anawiyei kech, na imeunea iyong ngirukooi lu edemarete kesi ngiboro atipei. Abe kabokakis bo kesi ayong akipany, nabo alokakis erot lo kesurumeta. Nakaneni, iyong Ekapolon Akuj iyeni ngakiro daang na etukitere akiar ayong. Wara nyiirimak aronis kech tani wadiochichi, kori nyiikisa akisech kech alongaren kon. Kimasak kesi kwap alongaren kon. Tosubea kesi na isaki eringa ingoit.” Katolimok ayong Ekapolon Akuj tama, “Kape togielu agulu alokayen ngamoti. Ani erumor toriko ngikasukou a Atuk ngiche ka ngimurok luapolok, kirukosi ka kesi tanang nadipo a Lokookeng a Inom, kitor lokidor a Abelekek. Ani inangi neni, tolimo akiroit nakalimokini ayong iyong. Ilimuni iyong kona, ‘Esi ngikapolok a Yuda ka ngitunga a Yerusalem, kiirasi akiroit na alimuni ayong Akuj Namerikanyer, na arai Akuj Isirael. Kingolikisi a, ayauni ayong ngakiro naaronok noi nakwap naga, toliwor itwaan daang ni iirari, ipiakinete ngaki. Ekokini ayong neni kainyo kaisikis ayong ngitunga. Enyasut tani nege ani etiliworeta ni ipeyonokinere ngakujo ngache ngakipeyos. Taraakas ngakujo nguna na nyeyenete kesi, nyeyenete tani taapaakech ka ngikapolok a Yuda. Eleleba kesi ngaakot a ngitunga alu nyesechito nege, adukokis akuj nabe Baal ngikenoi lu ipeyooto ngide kech eraakasi ngakipeyos. Nyedungokina ayong kesi atamar kikokis neni, peetamit ayong tani atamar kori ikokinete neni. Tokona bocha, toyena atamar epote ngirwa lu epalikinere nege anyarit Topes, kori adipo a lokookeng a Inom, eliwor enyaritae adipo a Aaranot. Nege ngesi ekurukuruokinea ayong ngakiro daang na ereto ngitunga a Yuda ka Yerusalem. Emiekini ayong ngitunga ngulu kidwangae. Earete ngimoe kech kesi a akwara. Emiekini ayong ngawat kech tanyama ngikieny ka ngibuin. Etiliwori ayong ere a Yerusalem logo ibore ni kitubuli. Ee robo, etiliwori ibore ni ijotajotare. Itwaan daang ni inutuni neni, itubulete ngakiro a nginyas kangulu, toloma akijotajota. Iriamete ngimoe ere, tasaka akiar ngitunga a ere kangolo. Eroner eboyor a ere kangolo noi. Elomakinete ngitunga anyama make alotooma ere, tanyama tani ngide kech a ngikulepek.’ “Ani erumor tobwang iyong agulu alongaren ngitunga lu irukorete ka iyong sodi tolimok kesi atamar abala ayong Akuj Namerikanyer kona, ‘Abilibili ayong ngitunga lugu, atobwang ere logo, kikokis agulu naga nabwangang na emam kona irumeikin. Enukakinio ngitunga Topes, kainyo engopi nabo wache enukakinio. Ngakiro nguna asubakinea ayong akwap naga ka ngitunga keng. Asubakinea ere logo ngakiro na asubea Topes. Ngakais na eyakasi Yerusalem ka ngakais a ngikapolok a Yuda, eliworosi na nyitaleuno loger a Topes. Tani ngakais daang nakolong enomanakinere ngikanyer emitina alokidiama kech, ka akidokanakin ngakujo nache emuna erai akipeyos, ikokinete neni.’ ” Ekisidi kanguna, torotok Yeremia alo Topes, anisek amearit Ekapolon Akuj alosit akidwar ngakiro. Tolot towo analaar a akai a Akuj tolimok ngitunga daang tama, “Akuj Namerikanyer na erai Akuj a Isirael, ebala kona, ‘Kingolikisi a, ayauni ayong lore logo ka ngadakarin daang na idunyatar, eriras lokolong abala ayong ayauni, kainyo ichanaka kesi, awout akiirar ngakiro kang.’ ” Pachur lokookeng a Imer, lo arai emuron a Akuj, ngesi apolokinit akai a Akuj. Abu ngesi kiira Yeremia edwari ngakiro nguna. Tolimok ngesi ngitunga atamar kideta Yeremia, toena a ngiriko kiboikin diyete ekidor lo alokuju lo enyaritae Benjamen lo eyei kai a Akuj. Ani akolongit nache nataparach, na alacharea Pachur ngiriko lu aenitere Yeremia, tolimok Yeremia ngesi tama, “Nyeringa Ekapolon Akuj kinyarit iyong a ekiro be Pachur, ekiro lo kilimok ngesi iyong ngesi lobe ‘Ebuloi awadaang.’ Kainyo Ekapolon Akuj alope alimu kona, ‘Ketiliwori ayong iyong lo kibulit bon, kitubulite ngipaalon kon daang. Ianyungari iyong ngipaalon kon daang earete ngakwaaras a ngimoe kech. Ewaakini ayong ngitunga daang a Yuda nakan a ekapolon a Babilonia, eriki ngesi kesi eraakasi ngirikon tanang nakwap a Babilonia, kirikak inaa a akwara. Ani eya nguna daang, ebari a ere daang ka ngiboro luche lu ikachitae, ka ngiboro daang lu elalak ngaropiyae, ka ebari daang a ekapolon a Yuda, ewaakini ayong nakan a ngimoe kech toremo, tolemasi ngiboro daang yaasi Babilonia. Ani eliwor iyong Pachur ka ngitunga a awi kon daang, kirikio esi iraakasi ngirikon tanang Babilonia, itoanikini iyong inaa, kitonuk aapei ka ngipaalon kon daang lukolong idwaranakini iyong alioko.’ ” Ekapolon Akuj, abe kingal iyong ayong, apon ayong dir kengalae. Kainyo kidwang iyong ayong. Aliwor itwaan daang keyenyi ayong. Kakianatar kesi ayong apaaran juui. Nacha eruorikinea ayong ejoikinit eremari atama, “Amoitanut ka nginyas!” Ekapolon Akuj, kakianare ayong katoseete jiik, ani alimoritor akiroit kon. Nakaneni ani katama ayong, “Nyalimuni Ekapolon Akuj, kori nyeruorikini nabo alimit ekiro keng,” kikok akiroit kon na erirae alotau kang, na egolokino nakoyo kang. Kaburu ayong akidait akiroit ngina, nabo kakuruwo akidait. Apupi ayong itwaan daang ingaingaa ebala, “Eyei ebuloi wadaang! Kitorono ngesi! Potu etorono ngesi!” Tani ngipaalon kang luminan, imuit akingolikin ayong adakar, ebalasi kesi, “Ekoe, kori dikino ingalaario, edwanga ngoni ngesi, atatachakisi nayok.” Nakaneni iyong Ekapolon Akuj ibakit alowae kang. Ikoni iyong ekajwon lokaagongon anikang. Edakarosi lu kaboliatar ayong, nyekedwangete kesi ayong. Irumete kesi ngileech jik, kainyo ekuruwori ibore daang. Nyimuriakinosi ngileech kech jik. Akuj Namerikanyer, iroanari iyong ngitunga lu etenooko, iseme iyong ngitai a ngitunga ka ngitamen, kitaanyungarae ayong ngakiro na itachanakini iyong alomoe kang. Kainyo ewaak ayong ngakiro na egieno nakan kon. Toeonokisi Ekapolon Akuj, kipuruutu Ekapolon Akuj! Kainyo ayuu ngesi ekebootonit, anakan a ngitunga aluaronok. Akolongit nakolong kedounere ayong, toliwor na ilamam! Akolongit nakolong kedounio itiokang ayong, nyeeliwor na epiaritae! Itwaan nikolong etalakari apakang, tolimok tama, “Edou aberu kon idia!” Eliwor ni ilamitae. Kimiekisi itwaan ngini kikwaanikin ka ngirerea lu amunyari Ekapolon Akuj nyiisieneto. Kimiekisi kiira akigoro nataparach ka elii lo igorore naparan, kainyo awouni ngesi akiar ayong eringa nyidouno. Arai kikok neni, keliworo akook a itiokang aliel kang, tosub itiokang na erubakinit epoti jiik. Nyo kolong kedounere ayong? Ekoe, apuduni kolong ayong ataanyunea ngichan ka akialolong a? Ebooyo kerumito ngileech a? Erai naga akiroit a Ekapolon Akuj na alimokini Yeremia, akolongit na amearea ekapolon a Yuda lo anyaritae Sedekia, tomea Pachur lokookeng a Malikia, ka Sepania lokookeng a Maaseya, lo arai emuron a Akuj, nia Yeremia alimokin kona, “Kemaimai ayong iyong atamar tanyara kare Ekapolon Akuj kilipak sua, kainyo ebunit Nebukadinesa lo erai ekapolon a Babilonia akitijwore sua. Ejok robo topedori Ekapolon Akuj asubakinea sua akitoodikinet apei nakailiilon, loger lopalem esubeenea, kitonyou Nebukadinesa kane tolot.” Tolimok Yeremia kesi tama, “Kapesi tolimokisi Sedekia atamar Ekapolon Akuj na erai Akuj a Isirael, ebala kona, ‘Sedekia, edwangi ayong ngajorei kon na itijiete ekapolon a Babilonia ka ngajorei keng. Ngiboro lu ejieto ngasigerea kon, atukokini ayong kiding ere. Ayong alope ketijikini iyong a agogongu kang kadaang, ka angoit kang ta anyunyura kang naaronon noi. Aari ayong ngitunga daang lu elomito lore logo. Eari edeke lokaronon noi ngitunga ka ngibaren aapei. Ani eliwor iyong, ka ngikasubak etich kon, ka ngitunga lu epuunosi alojie, ka lu epuunosi anakoro ta edeke, kemiekini ayong esi kirumuni ekapolon Nebukadinesa ka ngimoe kus luche, lu esakete akiar esi. Kiari esi Nebukadinesa a akwara. Emam tani ipei kus ni eisikinio kori erimakinio kori ni isieni ngimoe. Ayong Ekapolon Akuj alimu nguna.’ ” Ani erumor katolimok ayong Ekapolon Akuj atamar atolimok ngitunga kona, “Topupokisi mono esi! Ayong Ekapolon Akuj, kemiekinit esi toseut erot lo isakete kerai lo eteni nakiyar kori lo eteni nakitu. Itwaan cha daang ni idongi lore logo, eari akwara, ka akoro ta edeke loaronon. Nakaneni ani ngini epudori alore kisingolikin Ngikalidayo lu iriemito ere, nyeario. Epuun ngesi alojie kangolo. Atiaku ayong atamar amunyari ere logo, nyarimakini. Ewaakini nakan a ekapolon a Babilonia, kinom tonomia. Ayong Ekapolon Akuj alimu nguna.” Kalimokini ayong Ekapolon Akuj akiroit naga esaki atolimok ngitunga a awi a ekapolon a Yuda. Tama ngesi, “Topupokisi akiroit kang esi ngalesea a Daudi! Alimunit ayong Ekapolon Akuj kona: Tosub ngakiro na etenooko akolongit daang. Toyuutu itwaan ni ingalaaritae ibore, ani eyei itwaan nikechiakiaran. Ani pekikokis neni, erirauni angoit kang loger a akim, kotere ngasechesea kus naaronok, tongop kona itudungeo, kotere ngasechesea kus naaronok. Kingolik a, kanyoik ayong esi, lu ilomito nadipo, lu iraakasi ataaba anaro. Abe itamete esi ibalasi, ‘Ngae ebuni akirem sua? Ngae epedi ngawasea kosi nakaagongok?’ Kerirae ayong esi itemem ka nguna isub. Echunyakini ayong akai kus naapolon akim, tonomia ibore daang ni iriamit akai ngina. Ayong Ekapolon Akuj alimu nguna.” Alimokini Ekapolon Akuj Yeremia tama, “Kape kai a ekapolon tolimok akiroit naga, tama, ‘Iyong ekapolon a Yuda, lo irai alesit a ekapolon Daudi, aapei ka ngikasubak etich kon ta ngitunga lu elomito Yerusalem. Topupokisi akiroit kang, ayong Ekapolon Akuj. Abala ayong Ekapolon Akuj kona: Tosub ngakiro na eriyan ka na iyookino. Toyuutu itwaan ni ingalaaritae ibore ani eyei itwaan nikechiakiaran. Nyiisechak kori nyiidema ngitunga a akwap anache ibore, kori ngide lukokiok ta ngapuseru. Warasi nyiibukosi ngaakot a itwaan ani nyesechit kane. Kainyo ani kirichakis esi akisub etich loger lokadungokinitor ayong esi, erubakinete ngalesea a Daudi eraakasi ngikapolok. Erubakinete ngikapolok ngulu, ka ngikasubak etich kech ta ngitunga kech itoruuniyete lodorin a akai a ekapolon, edokito ngaurukukui na irito ngangolei todokito ngangolei. Nakaneni ani pekiwap esi ngakiro kang, ekongi ayong a ekiro kang atamar eliwor akai naga alaireng. Ayong Ekapolon Akuj alimu nguna.’ ” Ngakiro elimunit Ekapolon Akuj nugu kotere akai a ekapolon a Yuda, “Ibus kolong iyong loger a akwap a Gilead, ka ngimoru a Lebanon. Tani kikoni neni, ketiliwori ayong iyong ariet, ee robo, ngirerea lu emam itwaan elomit. Ameuni ayong ngitunga akinyasun iyong, etingi ipei kech daang aep anakan. Itelete ngichekereng kon luajokak, tachakakis nakim. “Ani ekisidi, itorunete ngitunga lukaalak a ngakwapea anache lore ngolo, kingitanaros make ebalasi, ‘Anukiro nugu asubakinea Ekapolon Akuj ere loapolon logo?’ Etachunete ngirukitos kech tamasi, ‘Erai nikolong aisikineta kesi achamunet nakolong achamakin ka Ekapolon Akuj na erai Akuj kech, kilipa ngakujo ngache tosuba etich kech.’ ” Ngitunga a Yuda, nyiigor kotere ekapolon Yosia. Nyiisutonokis kotere akitu keng. Nakaneni kigoro kotere lokookeng lobe Yoawas. Arik ngesi nyebonguni nabo. Nyeringa nabo eanyungari akwap nakolong edounere. Kainyo elimunit Ekapolon Akuj ngakiro nugu ani eyei lokookeng a Yosia lo enyaritae Yoawas, lo ilunyokin nados a apakeng toliwor ekapolon. Ebala Ekapolon Akuj kona, “Arotoki ngesi kane, nyebonguni nabo jik. Etoani ngesi anakwap ana arikor, nyeringa nabo eanyungari akwap naga jik.” Oitiakoi! Abe etioko nginyas eanyuni itwaan ani eduki akai keng a erukoonu, kiata ngamaniyae na alokidiama a engalas. Ee robo, itwaan ni itusubi luche etich pas, tamam ngaropiyae enyamete. Etioko ngakiro eanyuni itwaan ni ebala, “Aduki ayong akai naapolon na eyakasi ngamaniyae naapolok kidiama.” Ani erumor kitem ngipukei, todukok ngikwaasea a ngikito a ngichekereng, sodi kiwasak emunyen loarengan. Ibala iyong kori iliwor ekapolon loajokon akidwang luche, ani idukio ngakais a ngichekereng, kibuseketa noi akidwang na luche a? Peebooyi kolong apakon imuji, tamasi, tosubi na eriyan ka na etenooko? Nguna kolong etojokete ngakiro a eboyor keng. Einanakini ngesi lukebootok ka lu ibato ngakan a eger alo etenoono, kitojoka ngakiro nguna eboyor keng. Ibore erai akiyen Ekapolon Akuj ngini. Nakaneni eripiyarito ngakonyen kon ka etau ibore nimoduna ni erai iyaret kon a ilope. Ibukori iyong ngaakot ani nyesechit, kichiakia ngitunga kon, tarai ekademan. Kotere nguna, ngakiro nugu elimunit Ekapolon Akuj kotere Yeoyakim lokookeng a Yosia, lo erai ekapolon a Yuda, ebala, “Emam itwaan ikalouni kotere akitu keng, tama, ‘Oitiakoi kare lokaatokang! Oitiakoi kare nakaatokang!’ Emam itwaan iutekini kotere ngesi kori emam ni ikalouni ebala, ‘Oitiakoi kare ekarikon kang! Oitiakoi kare ekapolon kang!’ Eyaario akinuk peerimae loger a esikiria, iriyario nikalapatan kimiekinae eperi anikalapatan ngidorin a Yerusalem.” “Esi ngitunga a Yerusalem, Kapesi a Lebanon tachalakis, kiremasi alo Bachan. Kikaloutu alomoru a Abarim, kainyo amunyar lu ibakito ka esi daang. Kesuruori kolong ayong esi ngirwa lukolong iyakatar esi najako, nakaneni ipot esi tamasi, ‘Nyikipupokini sua.’ Eboyor kus ngolo napei kolong alokiditeu kus, kikuruworit esi akiwap akiroit kang. Ekutari ekuwam ngikarikok kus daang, erikio lu ibakito ka esi nakwapea nache. Sodi kiruma esi ngileech ka etimoi kotere aronis kus daang. Esi daang lu ilomito Lebanon, lu ibooyete akaalimon alochekereng. Ikunuakinete esi na iirareta apipilu. Apipilu na ikoni na aberu ana eriaba.” Tolimok Ekapolon Akuj Yeoyakin tama, “Ekong jik ani kona araakar ayong na ayari, arai tani tarai iyong Yeoyakin ekababaat lo a emachar anakan kang ana aloteten, kabuto ayong iyong kepotok ngitunga lu iemit iyong, lu esakete akiar iyong. Kepotok ayong iyong nakan a Nebukadinesa alo erai ekapolon a Babilonia, ka ngasigerea keng. Ketingaari ayong iyong ka itiokon kitorik nakwap ache nagela, nakolong pekidoikinio esi. Idaikinosi esi daang inaa. Kimui esi abongun nakwap naga, nakaneni nyibongunete.” Atolim ayong atama, “Ekoe, ekok ekapolon Yeoyakin agulu na abwanga, na echakario ani emamakar itwaan esaki a? Nyo emasarere ngesi ka ngide keng nialonan torikoe nakwap na nyeyenete kesi?” Ayoro akwap, akwap, kiira akiroit a Ekapolon Akuj! Ebala Ekapolon Akuj kona, “Kigirak atamar emam itwaan en ikoku, ekile lo emam naajokak eanyuni aloboyor keng. Emam tani ipei a ngalesea keng ni iboikin lokicholong a apolou a Daudi topolok nabo akwap a Yuda.” Ebala Ekapolon Akuj kona, “Oitiakoi! Etioko nginyas eanyunete ngikeyokok lu inyasunete ka apetar ngamesekin kang! Kotere nguna, Ekapolon Akuj, Akuj a Isirael, elimunit ngakiro nugu kotere ngikeyokok a ngitunga keng. Ebala, ‘Ipot esi nyiichoikis ngitunga kang. Ipetasi esi kesi itwarakis. Kerirae tokona ayong dang esi kotere naaronok na isubakis esi. Achununi ayong esipanit kang lopiya anakwapea kadaang ana kolong apetakinit ayong, atobuu nakwap kech. Euruunete kesi ngide lukaalak, kiatakinos kesi talalaketa. Erumakini ayong ngikeyokok lu echoikinete kesi. Nyeringa nabo kesi eemete kori ebuli. Emam tani ipei kech ni engopi.’ ” Ebala Ekapolon Akuj kona, “Kingolik a, enangi ngirwa lu aseunea ayong alesit a Daudi toliwor ekapolon lo etenoono. Eliwor ngesi ekapolon lokooson. Esubi ngesi anakwap kadaang na etenooko ka na eriyan. Ngirwa lu eliworor ngesi ekapolon, eyuunio ngitunga a Yuda, kiboikinos Ngisirael akaalimon. Enyarao ngesi, ‘Ekapolon Akuj erai ayuuno yok.’ ” Ebala Ekapolon Akuj kona, “Enangi ngirwa lu nyikongioto ngitunga nabo ebalasi, ‘Eger lo eyarea Ekapolon Akuj nakolong ayuuni Ngisirael anakwap a Misiri,’ pearai eliworosi kesi ikongete ebalasi, ‘Eger lo eyarea Ekapolon Akuj nakolong epuduni Ngisirael anakwap ana alokwap ka ngakwapea nache daang na apetarit ngesi kesi. Elomete kesi nakwap kech a ngikulepek.’ ” Ani alowae a ngikadwarak, esurur etau kang, itadatadasi ngakoyo kang daang. Elelebun akiroit a Ekapolon Akuj nikang, Kesikok ayong itwaan ni irakarit epurot, ekok itwaan ni etijit emuna. Ileleba ngikalomak nakwap, ngitunga lu nyemunosi Ekapolon Akuj. Igoro akwap kotere ngilam, aono achokor keng deu. Erono eboyor kech. Esubeta ngikilinga kech ngakiro na nyiyookino. Ebala Ekapolon Akuj kona, “Ngikadwarak ka ngimurok, nyekerito Akuj. Erum ayong kesi esubete naaronok tani alokai kang. Kotere nguna, ngirotin lu itorito kesi, ikokinete ngirotin a ngakejen lu kicheresarete anaribu. Esitori ayong kesi neni, tadakaros. Etaanyuni ayong kesi ngakiro naaronok, na enangea ekaru a eriras kech. Ayong Ekapolon Akuj alimu nguna.” “Engolik ayong ngikadwarak a Samaria, esubete akiroit nakikadakini noi. Edwarete elimito ekiro a Baal kibatasi ngitunga kang. Nakaneni engolik ayong ngikadwarak a Yerusalem, esubete nabo akiroit nakikadakini noi. Eraakasi ngikalomak kisudete ngakiro. Ingarakinito ngitunga akisub naaronok, sodi tongop ni ereen anaaronok. Kesi daang, ekokis ngitunga Sodom ka Gomora.” Kotere nguna, Akuj Namerikanyer elimunit nugu kotere ngikadwarak a Yerusalem. Ebala, “Ainakini ayong kesi ngikito luadwarak tanyama, nabo etamasi ekitoe lokaaran. Kainyo apetakis ngikadwarak a Yerusalem akimenyarit Akuj wadaang.” Alimokini Akuj ngitunga a Yerusalem tama, “Nyiirasi ngakiro na iruorosi ngikadwarak. Ngapasiek ngakiro na esakete kesi esi kigienokinos. Eraakasi ngakiro nakilimokinete kesi esi ngakisingolikinet na irokete kesi ngikulepek, meere na alimu ayong. Isuruorete kesi jiik ngitunga lu ewounito akiirar ngakiro na alimunit ayong, ebalasi, ‘Ibooyete esi akaalimon.’ Nabo elimonokinete ngitunga daang lukechanak ebalasi, ‘Emam naaronok ianyunotor esi.’ ” Atolim ayong atama, “Ngae alokadwarak kangulu alot natuk a Ekapolon Akuj, kiira ka akiyen akiroit keng? Kori ngae apupokini ka achoiar na alimuni ngesi? Ikoni anyunyura a Ekapolon Akuj ekuwam loationon, ikoni ekuwam lo ipiripiri, lo ekutakini ngakies aluaronok. Nyedaun angoit a Ekapolon Akuj, mati kitemokin daang nakolong anyoikinit ngesi. Ngirwa lu isidiunosi, iyenunete esi nguna daang lokojokon.” Alimuni Ekapolon Akuj tama, “Meere ayong ameuni ngikadwarak ngulu, nakaneni apot kesi tamatakinos akidwar Apot kesi todwara a ekiro kang, tarai nyisuruoro ayong kesi! Arai toyenete kesi ngitamen kang lumunonoe, kelimokinito ngitunga kang akiroit kang, nabo kereeunito alorotin kech aluaronok, ketiakak ka naaronok na esubete kesi. “Arai ayong Akuj na aapi, meere na alona. Ekoe, epedori itwaan adukakin ayong sodi nyeanyunga ayong ngesi a? Nyiyenete esi atamar ayei ayong wadaang, nadis ka kwap a? Ayong Ekapolon Akuj alimu nguna. Eira ayong ngakiro na iruorosi ngikadwarak lukaliokok elimito ekiro kang, ebalasi, ‘Erujae ayong, erujae ayong!’ Erubakini alioko eyei lotai a ngikadwarak alu alu edwarete alioko tanang wori? Edwarete ngikadwarak ngulu alioko na irokete kesi ngikulepek! Ebalasi kesi itamete akirujare na elimonokinosi kesi ngikulepek, kori ibatari ngitunga kimuriakis ngakiro kang. Loger lokolong emuriakineta ngakiro kang taapaakech, tominakis kesi akuj nabe Baal. Ekadwaran lo irujat, tolimo atamar erai ibore akirujare, nakaneni ani lo elimokinitae akiroit kang, kiyook elimori. Ekoe, epedorio akisikwaanikin ngatunyeny ka ngakanoi a? Ikoni akiroit kang akim, nabo ikoni akujuk na ebwangi ngatabab kieala. Angerit ayong ngikadwarak lu eanyunete akiroit nagela sodi tamasi erai akiroit kang. Angerit ayong tani ngikadwarak lu ingamangamasi ngakiro kech a ngikulepek, niti ebalasi ‘Ekapolon Akuj alimu.’ Ee robo, abala ayong Ekapolon Akuj angeri ngikadwarak lu edwarete alotunga ngakiro na eraakasi alioko. Iruorosi ngakiro na irujaate, kibatasi ngitunga kang kotere alioko kech, ka ngiwog lua abangaanut. Nyemeara ayong kesi, kori nyedungokina atamar toloto, kotere nguna, emam ngakiro ajokak eanyunete ngitunga kang. Ayong Ekapolon Akuj alimu nguna.” Katanyar ayong Ekapolon Akuj tama, “Yeremia, ani keyei ipei a ngitunga kang, kori ekadwaran, kori emuron ni kingisi iyong tama, ‘Ebeyo eegos a Ekapolon Akuj ai?’ Ilimokini iyong ngesi tama, ‘Iyong irai eegos ani a Ekapolon Akuj, nakaneni kichakari ngesi iyong.’ Ani kelimu ipei a ngitunga kang, kori ekadwaran kori emuron tama, ‘Eegos a Ekapolon Akuj,’ erirae ayong ngesi ka ngitunga a awi keng daang. Ejoikinit itwaan daang ingisi ngipaalon keng ka ngiyenet keng tama, ‘Anukiro atachu Ekapolon Akuj? Atama Ekapolon Akuj ai?’ Nakaneni nyelimunio nabo ekiruor be ‘Eegos a Ekapolon Akuj,’ kainyo ani kelimu itwaan idio kongina, etiliwori ayong akiroit kang eegos dir anikeng. Ebatasi ngitunga akiroit a Akuj ana eyari, Akuj Namerikanyer, na erai Akuj yok. Yeremia, kingit ngikadwarak kona, ‘Anukiro atachu Ekapolon Akuj?’ Kori ‘Anukiro alimu Ekapolon Akuj?’ Nakaneni ani kilimut esi tamasi, ‘Eegos a Ekapolon Akuj,’ tarai sek ketengerit ayong esi abala, ‘Nyiitamasi eegos a Ekapolon Akuj,’ karutuni ayong esi katachaka nikalonan anikang. Kachakari ayong esi aapei ka ere lokolong kainakini ayong esi ka taapaakus. Kesurumi ayong esi ngileech lukajik, ka etimoi lo nyikimuriakini.” Kedodik ayong Ekapolon Akuj ngakikapea ngaarei a ngameyana na ewaakinitae ngaren akai a Akuj. (Asubasi ngakiro nugu ekisidi a ngirwa alu arikorea ekapolon a Babilonia lo anyaritae Nebukadinesa, toriko Yeoyakin alo Yerusalem eenitae, tanang Babilonia. Arai Yeoyakin ekapolon a Yuda. Anyaritae apakeng a Yeoyakin Yeoyakim. Arikio Yeoyakin aapei ka ngikarikok a Yuda, ka ngikunonoi ta lu itatamitae etich.) Ayakasi ngameyana naajokak nakikap na ekingaren, ngameyana na engelario akiger. Ani akikap na ngaarei, ayakasi ngameyana naaronok noi, na nyepedorete tani anyama. Abu Ekapolon Akuj kengit ayong tama, “Yeremia, nyo itee iyong?” Atatachu ayong atama, “Ngameyana, na ejokak, ejokak noi, ani na eroko, eroko noi nyenyamasi.” Sodi katolimok ayong Ekapolon Akuj akiroit tama, “Ayong Ekapolon Akuj, na arai Akuj a Isirael, engolik atamar ngitunga a Yuda lukolong arikio Babilonia, ikote ngameyana naajokak nugu, nakaneni edodikini ayong kesi apatanu. Etee ayong kesi jik, atobuu nakwap naga. Aduki ayong kesi, nyayatari. Etakini, nyarutuni. Ainakini ayong kesi etau lo eyeneta atamar ayong arai Ekapolon Akuj. Eliworosi kesi ngitunga kang, aliwor ayong Akuj kech, kainyo ebongunete kesi nikang a ngitai kech kadaang. “Ekapolon Sedekia lo a Yuda, ka ngikasubak etich keng, aapei ka ngitunga lupiyayek a Yerusalem lu elomito nakwap ngina, ka ngitunga luche daang lu awoose Misiri, esikokini ayong Ekapolon Akuj kesi ngameyana naaronok noi na nyenyamasi. Ayauni ngakiro naaronok noi nikech na itubulete ngibukui a ngakwapea kadaang. Eliworosi ngitunga ekianatar kesi, toseta ka akimeny. Ilamete ngitunga kesi awadaang ani apetari ayong kesi. Ainuni ayong kesi ejie, ka eron a akoro ta edeke, tanang edaunosi korot, anakwap ana kolong ainakini ayong kesi ka taapaakech.” Ekaru lo a nguomwon lo araakar Yeoyakim ekapolon a Yuda, abu Ekapolon Akuj tolimok Yeremia akiroit na elimokini ngitunga a Yuda. (Arai ekaru ngolo lo ekingaren aliworor Nebukadinesa ekapolon a Babilonia.) Arai Yeoyakim lokookeng a Yosia. Abu Yeremia kiruoro ka ngitunga daang a Yuda, ka daang lu elomito Yerusalem. Tolimok tama, “A ngikaru a ngitomwon-arei ka nguuni tanang tokona, napei alokaru alo a ngitomon ka nguuni araakar Yosia lo arai lokookeng a Amon ekapolon a Yuda, kalimonokini Ekapolon Akuj ayong akiroit keng. Abu ayong katolimonok esi akiroit ngina jiik, nakaneni towout esi akiirar. Ipot esi towout akiirar kori adetar ngaki kus, tarai ameunit Ekapolon Akuj ngikadwarak lu araakasi ngikasubak etich keng nikus jiik. Kitolimokis kesi esi tamasi, ‘Tapalikisi akiboi eboyor loaronon ka akisub ngakiro naaronok na isubete esi, sodi torubakineta ibooyete anakwap ana kolong kiinakini Ekapolon Akuj esi ka taapaakus, toliwor akus jik. Nyiilipa ngakujo ngache kori nyiisuba etich kech. Warasi nyiitongoa Ekapolon Akuj ani ilipeta ngakujo na isubete esi ngikulepek. Arai kiwapa esi ngakiro a Ekapolon Akuj pekirirat ngesi esi.’ Nakaneni ebala Ekapolon Akuj ipot esi towout akiirar ngakiro keng. Akikarun akikokin neni, ipot esi kitongoa ngesi a ngakujo kus anasubuna, kirirae kotere ngakiro nguna. Ekapolon Akuj ngesi alimu nguna.” Abala ayong Akuj Namerikanyer kona, “Tokona bocha, ani kona iwouneta esi akiirar ngakiro kang, Kanyarakini ayong esi ngitela daang lu ewae alo alokwap aapei ka ekasuban etich kang Nebukadinesa, lo erai ekapolon a Babilonia. Arikuni ayong kesi toremo akwap na Yuda naga, ka ngitunga lu elomito nege daang ta ngibukui daang lu idunyatar kesi. Kamunyari ayong esi daang tarata ibore ni ta ngileech lu nyedaunosi jik. Ani eyakasi nguna daang, atubori ayong anikech akimaritetere ka alakara. Engopi akinyiakanar ka akimaritetere na iutare. Engopi akimiet a ngataae kech, engopi eruye lo iriere ngakiria. Idongi akwap naga daang erai asakatan ka alaireng. Ani ngibukui lu idunyare, esubete etich a ekapolon a Babilonia a ngikaru a ngitomwon-kaarei. Ani adaunet a ngikaru alutomwon-kaarei kangulu, erirae ayong ekapolon a Babilonia ka ebukut ngolo aapei. Enyasuni ayong akwap ngina kidong erai asakatan jik. Asubakini ayong ngakiro daang nakolong alimuni kotere akwap ngina. Eyookini ngakiro daang nakolong egirio nakitab naga nakolong adwari Yeremia kotere ngibukui daang. Atachakini Ngibabiloniae na itemem ka na esubete kesi ka etich a ngakan kech, kainyo ngibukui lukaalak ka ngikapolok lukaalak, itiliworio ngikedalak kech.” Ekapolon Akuj, Akuj a Isirael, kalimokini ayong kona, “Toting ekopo a emuna lo ileleba anyunyura kang. Yaa kitamat ngibukui daang lu kameari ayong iyong nikech. Na emaseta kesi, elomarete akiteretero kikerepik, kotere akwara na ayauni ayong nikech.” Sodi robo ediau ayong ekopo ngolo anakan a Ekapolon Akuj, etamat ngibukui daang lu kamearit Ekapolon Akuj nikech. Etamat Yerusalem ka ngirerea daang a Yuda, aapei ka ngikapolok ka ngikarikok kech, toliworotor kesi alaireng nalapat, ibore ni ijotajotare, nilamam loger lo tokona ikoneta neni. Parao ekapolon a Misiri, ka ngikasubak etich keng, ka ngikarikok ta ngitunga keng daang. Ngimisiri ka ngitunga a akwap anache daang lu elomito Misiri. Ngikapolok a akwap a Us daang. Ngikapolok daang a ngirerea a Ngipilisti alu enyaritae Achikelon, ka Gasa, ka Ekiron ta lupiyayek a Achidod. Ngitunga a akwap a Edom ka Moab ta Amon. Ngikapolok daang a Tiro ka Sidon. Ngikapolok daang a akwap ana ekwaas anam a Mediterenian. Ere a Dedan, ka Tema ta Bus. Ngitunga daang lu eirete ngitim kech. Ngikapolok a Arabia daang. Ngikapolok daang a ngitela alu eyakasi nariet. Ngikapolok daang a Simri, ka Elam ta Media. Ngikapolok daang alokwap, lu eloka ka lu eapiyete, napei ani eyei epei kiporok loche. Emaase ngikapolok daang anakwap. Ani erumor tamat ekapolon a Babilon dang. Tolim Akuj Namerikanyer tama, “Tolimok ngitunga atamar ayong Akuj Namerikanyer, na arai Akuj a Isirael, adungokinit kesi atamar tamata epurot kiraka, toleka tanang edakarosi, tokuruwo anyoun, kotere akwara na ayaunit ayong nikech. Ani kewout kesi akidiaun ekopo anakan kon tamaseta, ilimokini iyong kesi atamar abala ayong Akuj Namerikanyer, ejoikinit kesi emaseta ekopo ngolo! Kainyo ani kesiak ayong akirirare ere lo erai ekang, esibit ibucharosi esi aloriras a? Toyena atamar kirirao esi dir, kainyo ayauni ayong akwara lotunga daang a akwap. Ayong Akuj Namerikanyer, alimu nguna.” “Tokona bocha iyong Yeremia, todwar ngakiro daang na alimu ayong. Tolimok ngitunga lugu kona, ‘Irurumakini Ekapolon Akuj anadis. Egirokini ani italeuno ibooyo ngesi. Irurumakini akationon alotunga keng. Ikilauni loger a itwaan ani ipudae ngamusabib. Iirari itwaan daang anakwap etoil keng. Iirario etoil ngolo anasalunet a akwap. Ititakinit Ekapolon Akuj ngibukui. Etubi ngesi ngakiro a ngitunga kadaang, taar luaronok. Ekapolon Akuj alimu nguna.’ ” Alimu Akuj Namerikanyer kona, “Etingete ngakiro naaronok ebukut epei kikobakin loche. Ewotunit ekuwam loaronon ationon anasalunet a akwap.” Akolongit ngina, ngawat a ngitunga alu eari Ekapolon Akuj, epetakin ewae epei a akwap tanang loche. Nyigoroi tosutonokinae kotere kesi, kori nyiriyario tonukae. Eperete kesi analup loger a ngasike ana etukokina. Kigoro esi ngikeyokok. Kikaloutu kibelebelokinos anapua, Esi ngikulepek a esipanit, kainyo adolut ngirwa lu kingolere esi Kingolio esi loger a ngimesekin aluatumak. Emam ngikeyokok ni edokinete. Ngikulepek a ngamesekin ngulu emam kona epuunosi. Topupokisi akigoro a ngikeyokok, kiirasi akiutere a ngikulepek a ngamesekin. Kainyo enyasu Ekapolon Akuj nginyia anachokor kech. Abwang nipalem ibooyoto kesi akaalimon abwang kotere angoit a Ekapolon Akuj. Apudu Ekapolon Akuj anipalem eyei loger a engatuny alo epuduni anaburibur keng. Aliwor akwap kech alaireng kotere ngakwaaras a ngimoe ka angoit a Ekapolon Akuj. Napei aliworor Yeoyakim lo arai lokookeng a Yosia ekapolon a Yuda, katolimok ayong Ekapolon Akuj akiroit tama, “Towo analaar a akai a Akuj tolimo ngakiro daang nakalimok ayong iyong atamar tolimok ngitunga daang lu eponito alorerea a Yuda akilip alokai a Akuj. Wara nyiidepa akiroit tani apei nyelimoro. Epedori ta toliwor iirarete kesi daang ngakiro sodi tolunga ngirotin kech luaronok. Ani kikokis kesi neni, elochi ayong ngakiro naaronok na asaki ayaun nikech kotere ngakiro naaronok esubete kesi.” Katolimok ayong Ekapolon Akuj atamar atolimok ngitunga atamar abala ngesi, “Ayong Ekapolon Akuj ejoikinit esi kipupete kiwapa etal lokainak ayong esi. Kiirasi tani ngakiro a ngikadwarak alu eraakasi ngikasubak etich kang, lu ameununi ayong nikus jiik. Nyiwapa esi ngakiro na eruorosi kesi. Ani kirubakis esi iwounito akiwap ngakiro kang asubakinea ayong akai naga ngakiro nakolong asubea Chilo, eliworosi ngibukui daang a akwap elimito ekiro a ere kalo ilamatar.” Apot ngimurok ka ngikadwarak ta ngitunga daang keirasi ayong eruoro ngakiro nugu alokai a Akuj. Ani napei arumorea ayong akiruoro ngakiro daang nakadungokinit Ekapolon Akuj atamar eruor, katorwakinos kesi ayong tachalakis tamasi, “Ejoikinit iyong kiario kotere ngakiro nugu! Nyo ilimitor iyong ekiro a Ekapolon Akuj ibalar idwari abe ikokini akai naga Chilo, nabo inyasunio ere logo tongop itwaan elomi nege?” Apot ngitunga kerikaut ayong. Ani iirarete ngikarikok a Yuda ngakiro na asubakinosi, kikomaut alokai a ekapolon toloto kai a Akuj, kiboikinos nipalem iboyonokinosi alokidor alokitetet a akai Akuj. Apot ngimurok ka ngikadwarak tolimokis ngitunga ka ngikarikok kech tamasi, “Itemokino itwaan elimunio atamar taarae kotere ngakiro na elimitor ere yok. Iirasi esi nguna a ngaki kus.” Abu ayong atolimok ngikarikok ka ngitunga kech atama, “Ekapolon Akuj kameuni ayong atamar atodwar ngakiro daang a akai kana ka ere logo nguna iirasi esi. Ejoikinit tokona esi ilungete ngirotin ka ngakiro naaronok na isubete esi, sodi kiwapa ngakiro a Ekapolon Akuj ana erai Akuj kus. Ani kikokis esi neni, ilochi ngesi nginyas lu ebala ayauni nikus. Ani eliwor ayong ayei nakan kus! Tosubere ayong ngakiro daang na itamito esi atamar ejokak, kiyookino. Nakaneni toyena iteni dir atamar ani kiar esi ayong, kimarunio esi ka ngitunga a ere kalo atamar iar itwaan ni nyesechit, kainyo Ekapolon Akuj kameuni ayong kechikichikak ngakiro nugu naki kus.” Apot ngitunga ka ngikarikok tolimokis ngimurok ka ngikadwarak tamasi, “Kisuruori ngoni itwaan en elimit ekiro a Ekapolon Akuj ana erai Akuj yok. Nyejoikinit ngesi eario.” Apot ngikasukou ngiche a Atuk tonyout tolimokis ngitunga lu achunakina neni tamasi, “Nakolong araakar Esekia ekapolon a Yuda, abu Mika lo a Moreches tolimok ngitunga daang atamar abala Akuj Namerikanyer kona, ‘Echilio Sion loger a amana, eliwor Yerusalem asakatan na etukokina. Eliwor emukura lo a akai a Akuj amoni.’ “Apot dir ekapolon Esekia ka ngitunga a Yuda taara Mika a? Mam jik! Abu ngesi toker Ekapolon Akuj tasak akitalakar ngesi. Kiloch Ekapolon Akuj ngitamen keng kotere ngakiro naaronok nasek abala ngesi ayauni nikech. Tokona, edikino ngoni kiyauni ngakiro naaronok noi niyok.” ( Ayei itwaan iche ni adwari ngakiro a ere kangolo ka akwap ngina elimit ekiro a Ekapolon Akuj, loger lopei adwarea Yeremia. Anyaritae itwaan ngini Uria lo arai lokookeng a Chemaya, lo a akwap a Kirias Yearim. Ani iirari ekapolon Yeoyakim, ka ngasigerea ta ngikarikok luche arukito ka ngesi ngakiro na alimuni Uria, tasak erot lo earea Uria. Ani iirari Uria atamar esakio ngesi akiar, tobul ngesi todok tolot Misiri. Abu ekapolon Yeoyakim tomea Elinasan lo arai lokookeng a Akibor, erukito ka ngitunga ngiche. Toloto kesi Misiri arikun Uria. Torikunoe ngesi nia ekapolon Yeoyakim, lo alimuni atamar kichumae ngesi a akwara tachakakinae akwaan keng nipalem enukanakinio ngitunga daang.) Ani kona kaikinitor ayong Aikam lo arai lokookeng a Chapan, apon ayong nyekarikor lotunga lu kaarete. Napei aliworor Sedekia lo arai lokookeng a Yosia ekapolon a Yuda, katolimok ayong Ekapolon Akuj akiroit, atamar atoinik ngarukanes nakilori nakichiera sodi atobutok lomosiring kang. Ani erumor katolimok ayong Ekapolon Akuj atamar atomea ngitunga nia ngikapolok a Edom, ka Moab, ka Tiro ta Sidon. Ngitunga lu ameari ayong kesi ngikaweikinak a ngikapolok kangulu lu aponito aanyun ekapolon Sedekia alo Yerusalem. Katolimok ayong Akuj Namerikanyer na erai Akuj a Ngisirael atamar echikichik kesi tolimokis ngikapolok kech kona, “Ayong asubuni akwap a agogongu kang anaationon. Atosub ngitunga ka ngitieng lu eyakasi nakwap, nakaneni ainakini ayong ngini cha daang asaki ainakin. Epoto tokona ngakwapea kus daang ainak Nebukadinesa lo erai ekapolon a Babilonia. Erai ngesi ekasuban etich kang. Ainak ayong ngesi tani ngitieng a moding tosuba etich keng. Esubete ngibukui daang etich keng, ani erumor tosuba etich a lokookeng, ta lo a etatait keng, tanang ngirwa lu edakaror apolou a akwap keng. Ani enangi neni, esubete ngitunga a akwap keng etich a ngibukui alukajwok ka ngikapolok lu eyenikinitae. “Ani kemin akwap kori apolou na ewouni akiwap etal a Nebukadinesa, erirae ayong akwap ngina a akwara, ka akoro ta edeke loaronon. Emiekini Nebukadinesa tomunya pil. Nyiirasi ngakiro a ngikadwarak kus kori na ngimurok, kori ngikerujak, kori ngikekeriak ta ngikasubak. Kilimonokinete kesi esi kona, ‘Nyiliworosi esi ngikasubak etich ekapolon a Babilonia.’ Edwarete kesi alioko. Kotere ngakiro nguna, kemiekini ayong esi kitorikor nakwap naalonan noi. Ketwarakini ayong esi sodi tomunyaros. Ani ebukut lo iwapi etal a ekapolon a Babilonia tosub etich keng, nyetwarakini ayong anakwap ana erai akeng. Emiekini ayong tolom nakwap keng a ilope kita. Ayong Ekapolon Akuj alimu nguna.” Atolimok ayong Sedekia lo erai ekapolon a Yuda ngakiro napei nguna atama, “Tacham ngakiro a Ekapolon a Babilonia. Tosub etich keng ka lo a ngitunga keng, nakaneni idongi iyong iyari. Nyo niti bore itoanikineta iyong ka ngitunga kon nakwara ka nakoro ta lodekesinei luaronok en? Ngakiro nguna ebala Ekapolon Akuj esubakinosi anakwap kadaang ana ewouni akiwap etal a ekapolon a Babilonia. Nyiira ngakiro a ngikadwarak alu ebalasi iyong nyiicham ngakiro a ekapolon a Babilonia. Edwarete kesi alioko. Alimu Ekapolon Akuj alope ebala, ‘Nyemeuna ayong kesi. Edwarete kesi alioko elimito ekiro kang. Kotere ngakiro nguna, ketwarakini ayong iyong, kitomunyar. Imunyarosi iyong aapei ka ngikadwarak lu edwarete alioko.’ ” Abu ayong atolimok ngimurok a Akuj ka ngitunga atamar ebala Ekapolon Akuj kona, “Nyiira ngakiro a ngikadwarak alu ebalasi ebuunio ngiboro a akai a Akuj atipei alo Babilonia. Edwarete kesi alioko. Nyiira ngakiro kech! Kiwap etal a ekapolon a Babilonia, toyar! Nyo niti bore itiliworere ere logo alaireng en? Ani keraakasi kesi ngikadwarak lua iteni dir lu eanyunito akiroit ngina anikang, kimiekisi kesi kemaima ayong Akuj Namerikanyer, eratak ngiboro lu eringa eyakasi kai kang ka na ekapolon a Yuda nyeyaar Babilonia.” Kainyo elimunit Akuj Namerikanyer ngakiro nugu kotere ngakiro a ngapirio, ngatanki na ngasua ananyangayek ka ngakitoweet na ijukio ta asir nache aisikinitae alore kalo. Abu Nebukadinesa nyeelema ngiboro ngulu na arikorea Yeoyakin lo arai lokookeng a Yeoyakim alo Yerusalem tanang Babilonia. Arai Yeoyakin ekapolon a Yuda. Apon ngesi torikoroe aapei ka ngikajakaanak a Yuda ka Yerusalem. “Topupokisi ngakiro na alimunit ayong Akuj Namerikanyer na arai Akuj a Isirael, kotere asir na idongit kai kang ka kai a ekapolon a Yuda alo Yerusalem. Eyaario kesi Babilonia kiboyoto kaina tanang ngirwa lu asakitor ayong kesi. Ngirwa ngulu, abuuni ayong kesi nege ainak akwap naga.” Ekaru lopei ngolo, elap lo a ngikan a ekaru alo a nguomwon araakar Sedekia ekapolon, abu Anania lokookeng a Asur kesuruor ayong alokai a Akuj. Arai Anania ekadwaran a ere alobe Gibeon. Katolimok ngesi ayong alongaren ngimurok a Akuj ka ngitunga atamar Akuj Namerikanyer, na erai Akuj a Ngisirael, elimunit kona, “Alema ayong ekapolon a Babilonia nidikil. Napei tokona tanang ngikaru ngiarei, abuuni ayong asir daang a akai a Akuj nakolong ayaari ekapolon Nebukadinesa Babilonia. Abuuni ayong asir ngina nege. Abuuni ayong tani Yeoyakin lokookeng a Yeoyakim, lo erai ekapolon a Yuda, atobuu nege. Abuuni aapei ka ngitunga a Yuda daang lukolong arikio Babilonia, kainyo alemari ekapolon a Babilonia nidikil.” Alongaren ngimurok a Akuj ka ngitunga daang lu awaasi alokai a Akuj, abu ayong atolimok Anania atama, “Kitalarete nu! Kimiekisi robo Ekapolon Akuj tosubak nguna! Ani nyiyookini bo ngesi ngakiro na idwari iyong, tobuu asir a akai a Akuj alo Babilonia, aapei ka ngitunga daang lukolong arikio a! Nakaneni topupok ngakiro nakalimokinit ayong iyong ka ngitunga daang. Ngikadwarak lukolong esiaunete akidwar eringa ayong ka iyong, adwarete atamar ebuni ejie, ka akoro ta edeke lobukui lukaalak ka ngakwapea na eyenikinitae. Ani ekadwaran lo edwari ekisil, enupio atamar erai ekadwaran lo emeunit Ekapolon Akuj dir, erai kiyookinosi ngakiro na edwari ngesi tarata iteni.” Abu Anania tobut akilori nakichier alomosiring kang tobilibili, tolim alongaren ngitunga daang tama, “Alimu Ekapolon Akuj atamar ekokini ngesi nege abili akilori nakichier na eenikinit Nebukadinesa lomosiringan a ngibukui kadaang. Ebili ngesi loger logo napei tokona jik tanang ngikaru ngiarei.” Abu ayong atorotok. Ani adaunet a ngirwa alu abilea Anania akilori nakichier, katolimok ayong Ekapolon Akuj akiroit, atamar atolot nia Anania atolimok atama, “Ebala Ekapolon Akuj abe ipedori iyong akibil akilori nakitoe nakichier, nakaneni elunyakini ngesi akilori nasuat nados keng. Akuj Namerikanyer, na erai Akuj a Isirael, alimu atamar ewaakini asuat nakichier lobukui lugu daang, tosuba kesi etich a Nebukadinesa alo erai ekapolon a Babilonia. Alimu Ekapolon Akuj atamar etusubi tani ngitieng etich a Nebukadinesa.” Abu ayong atolimok Anania nugu eatak atama, “Anania! Topupok a, meere Ekapolon Akuj kimeunit iyong, nakaneni itunup iyong ngitunga lugu ngakiro na eraakasi alioko. Kotere ngakiro nguna, ebala Ekapolon Akuj alope kalemari iyong anakwap. Ani eringa ekaru logo nyedauna, itoani iyong kainyo ilimokini iyong ngitunga atamar tongero akiroit a Ekapolon Akuj.” Totoan Anania elap lo a ngikan-kaarei a ekaru kangolo. Egirak ayong ngimurok a Akuj ka ngikadwarak abarua. Egirak tani ngikasukou a Atuk ta ngitunga luche daang lukolong ariki ekapolon Nebukadinesa alo Yerusalem toloto Babilonia. Egiri ayong abarua ngina kerikor ekapolon Yeoyakin ka itiokeng alo Yerusalem kerumor. Arikorio kesi aapei ka ngikasubak etich a akai a ekapolon, ngikarikok a Yuda ka lua Yerusalem, ka ngikunonoi lukadonyok ka lukasubak etich, toeniarae Babilonia. Epoto ayong abarua ngina ainak Elasa lokookeng a Chapan, ka Gemaria lokookeng a Ilikia, lu ameari Sedekia ekapolon a Yuda nia Nebukadinesa alo arai ekapolon a Babilonia. Egiritae abarua ngina kona, “Akuj Namerikanyer, na erai Akuj a Isirael, elimokinit ngitunga daang lukolong achamakini ngesi Nebukadinesa eriki alo Yerusalem toloto Babilonia, ebala, ‘Toduko ngakais toloma neni. Kitakisi ngamanat tanyama akimuj na ekoniunete ngamanat. Kiutasi toureta ngide. Kimiekisi ngide kus kiutas toureta ngide. Ejoikinit esi iatakinosi talalaketa, warasi nyiikidiekuut. Tagaseta ngirerea lu kieniaritae esi naajokak. Kilipae ayong ilipanakinete ngirerea ngulu, kainyo ani kejoker eboyor kech, ejoker lokus dang. Ayong Akuj na arai Akuj a Isirael, kechikichiki esi atamar warasi ngikadwarak lu irukito ka esi nyikingalata. Kori nyikingalata ngiche lu ebalasi kipedori akidwar namonan esubakinosi. Nyiimisikis ngakiro na irujaate kesi. Kisuruorete kesi esi alioko elimito ekiro kang. Nyemeara ayong kesi. Ayong Ekapolon Akuj alimu nguna.’ “Ebala Ekapolon Akuj kona, ‘Ani edaunosi ngikaru a Babilonia lutomwon-kaarei, abuni ayong nikus eyook akichikakinet nakolong abalar kabuuni esi nawi. Ayong alope ayeni ngakiro nakareikinit esi, nguna areat kainununea esi naajokak, meere naaronok. Areat ainakin esi eboyor loajokon lo igienokinosi esi. Sodi kitanyarata esi ayong. Ipote esi kilipa ayong, eira ayong ngakiro kus. Kisakete esi ayong, kitaanyut kainyo kisakete a ngitai kus kadaang. Ee robo, abala ayong kianyunete esi ayong katobuak ayong esi nakwap kus. Kachununi ayong esi anakwap kadaang, awadaang ani cha kolong kapetari ayong esi, sodi katobuu nakwap nakolong kemiekini ayong esi kirikio. Ayong Ekapolon Akuj alimu nguna.’ “Ibalasi esi abe kiinak esi Ekapolon Akuj ngikadwarak alo Babilonia. Topupokisi ngakiro na elimunit Ekapolon Akuj kotere ekapolon lo epolokinit apolou nakolong apolokinit Daudi, ka ngakiro na elimunit kotere ngitunga a ere kalo. Ngitunga ngulu kesi ngiyenet kus lukolong emiekinio nakolong kirikere esi. Ebala Akuj Namerikanyer kona, ‘Ayauni ayong akwara ka akoro ta edeke nikech. Etiminakini ayong kesi ngameyana na ebosito na emam kona enyamio. Erisi ayong kesi a akwara, ka akoro ta edeke. Ebuli ngapolosio daang anakwap na eanyungareta kesi. Eliworosi kesi ilamitae, lu kitubulete, lu ijotajotare, nabo irumito ngileech alokiding ngibukui a ngakwapea ana apetari ayong kesi. Esubakinosi nguna anikech kainyo awounete kesi akiwap akiroit na alimonokini ayong kesi jiik, esitoru nia ngikasubak etich kang alu eraakasi ngikadwarak. Awounete kesi akiirar. Esi daang lukolong kemiekini ayong kitorik Babilonia, topupokisi ngakiro na alimunit ayong Ekapolon Akuj.’ “Ayong Akuj Namerikanyer eruoro ngakiro a Aab alo erai lokookeng a Kolaya, ka Sedekia lokookeng a Maaseya, lu kisuruorete esi alioko elimito ekiro kang. Alimu ayong Ekapolon Akuj atamar epotori kesi atorikok ekapolon a Babilonia lobe Nebukadinesa. Eari ngesi kesi anakonyen kus. Ngitunga lukolong erumunio torikoe alo Yerusalem toloto Babilonia, na esaketa akilam itwaan, elimunete tamasi, ‘Kimiek Ekapolon Akuj kitosubakinea iyong na ikote nakolong asubea Sedekia ka Aab lukolong apeyi ngesi eyarete!’ Esubere kesi nguna kainyo asuba ngasechesea naaronok noi. Elomito kesi ngaberu a ngitunga aluche nabo isudete ngakiro elimito ekiro kang, tarai nyedungokina ayong kesi ngakiro nguna. Ayong ayeni na asuba kesi, nabo aanyu atamar asuba kesi nguna. Ayong Ekapolon Akuj alimu nguna.” Tolimok Chemaya lo a ere a Neelam kona, “Ngakiro nugu elimunit Akuj Namerikanyer, na erai Akuj a Isirael: Igiri kolong iyong ngabaruae a ekiro kon a ilope kigirak ngitunga daang lu eyakasi Yerusalem. Ibu tani kigirak Sepania lokookeng a Maaseya lo erai emuron ta ngimurok luche daang. Ilimokini iyong Sepania tama, ‘Kiseu iyong Ekapolon Akuj kilunyokin nados a Yeoyada, toliwor emuron topolok akai a Akuj. Ejoikinit iyong iinikini alagama nasuat nakirion lomosiring a itwaan kadaang ani ekoporito ngikerep kadaang ani itapusi atamar arai ekadwaran.’ Ani nyo eringaakar iyong nyesubakina nguna ani a Yeremia alo a ere a Anasos, lo isuruori ngitunga ebala arai ekadwaran? Ameu ngesi itwaan iruoro ebala kienio sua nikooyen alo Babilonia. Kotere ngakiro nguna, ejoikinit kiduki ngakais atoloma neni etata ngamanat, ka akinyam ngalemet na ekoniunete ngamanat.” Kesomak Sepania ayong abarua, ani erumor katolimok ayong Ekapolon Akuj akiroit tama, “Tomea itwaan ni eyakasi ngitunga daang lu eenitae alo Babilonia, tolimok atamar elimunit Akuj kona ngakiro a Chemaya ebala, ‘Ani kona adwarea Chemaya ngakiro anikus eringa ayong nyemeara ngesi, sodi kitunup esi ngakiro na eraakasi alioko, alimu ayong Ekapolon Akuj atamar erirae Chemaya ka ngalesea keng dir. Emam itwaan a awi keng ni idongi eyari. Nyeyari ngesi taanyunga ngakiro naajokak na asubakinea ayong ngitunga kang, kainyo alimokini ngesi kesi atamar katongero ayong. Ayong Ekapolon Akuj alimu nguna.’ ” Erai naga akiroit a Ekapolon Akuj, kalimokini ayong Yeremia tama, “Kigirak ngakiro daang nakalimok ayong iyong nakitab, kainyo epote ngirwa lu abuunea ayong ngitunga kang, Isirael ka Yuda. Abuuni ayong kesi nakwap nakolong ainakini taapaakech. Elemarete kesi akwap ngina nabo. Ayong Ekapolon Akuj alimu nguna.” Elimokinit Ekapolon Akuj ngitunga a Isirael ka Yuda ebala, “Eira ayong akigoro a ebuloi, akigoro a aemit meere na ekisil. Towo tokona kitamak! Epedori ekile akidoun ikoku a? Nyo tokona eteo ayong ekile daang etapit akook loger a aberu ana eriaba? Nyo epusianiaritor itwaan daang kona? Ebunit akolongit nakitubuli noi. Emam akolongit ache ikwaanatar. Akolongit na eriabatar ngitunga kang, Ngisirael, nakaneni eyuunosi kesi anariaba kangina.” Ebala Akuj Namerikanyer kona, “Ani enangi akolongit ngina, angedi ayong ngamasea na eenitere kesi atowata ngarukanes kech. Nyeringa kesi eliworosi ngikedalak a ngitunga a ngakwapea anache. Pearai esubete kesi etich kang, ayong Ekapolon Akuj na arai Akuj kech. Esubete etich tani a alesit a Daudi, alo etiliwori ayong ekapolon.” “Ngitunga kang, warasi nyieam. Ngisirael, warasi nyikibul. Kayuuni ayong esi anakwap anaalonan kangina. Ayuuni ngalesea kus anakwap ana eraakatar ngirikon. Ibongunete esi nawi kiboikinos akaalimon. Emam ibore iche iemete esi. Kiruki ayong ka esi katoyuu. Amunyari ayong ngibukui daang anakwapea ana kapetakinit ayong esi, nakaneni nyakamunyari ayong esi. Karikini ayong esi a erot alo eriyan. Nyakalakakini esi nyirira. Ayong Ekapolon Akuj alimu nguna.” Elimokinit Ekapolon Akuj ngitunga keng kona, “Nyengalekinete ngajemei kus. Nyejokearosi ngaruma kus. Emam itwaan kichoikini esi, emam ekitoe emiatakinio najemei kus, emam kona kitedekuunio esi. Kimuleno esi ngikonei kus daang. Nyeringa kesi kimisito esi. Karem ayong esi loger a emoit. Ianyut esi eriras a emoit alokamoitanan, kotere ngasechesea kus nakaalak. Aroner asechanu kus noi. Tojongoto aawan ani kiwanere. Nyengalekini nikaapilan kus. Kainyo erono asechanu kus noi nabo elalak ngasechesea kus noi. Ayong kasubakinea esi nguna. Ani daang lu kirikarete esi, irikario. Ani lu kirikete esi, erikio. Daang lu kichiakiarito esi, ichiakiario. Ani daang lu kidemete esi ngiboro, edemario kesi dang. Etangalekini ayong ngidekesinei kus. Etangalekini ngajemei kus. Tani kebalasi ngimoe kus, ‘Ekok Sion ngikuron, emam itwaan eringa emisit.’ Ayong Ekapolon Akuj alimu nguna.” Ebala Ekapolon Akuj kona, “Abuari ayong ngitunga kang nakwap kech. Kesienioto ngitunga a ngawiyei kadaang. Ebongokinio akiduk ere towo alomukura keng, towo awas nakaagongon anipalem ewaar. Eeokinete ngitunga lu elomito neni kikutakis. Elakarosi kimariteto. Iatakinosi talalaketa ani apiaritor ayong kesi. Einuni apiaro kang kesi arimatoi, nyeringa kesi imenyario. Ikokinete ngide kech nikolong ngorot. Isikokinosi kesi alongaren kang. Erirae ayong daang lu ichiakiarito kesi. Ebuni ekarikon kech anakwap kech a ngikulepek. Ebuni lo epolokini esi alotunga kech. Etaapuuni ayong bunio nikang, kainyo ngae epedori abunere eringa ayong nyenyara? Iliworosi esi ngitunga kang, atoliwor ayong Akuj kus. Ayong Ekapolon Akuj alimu nguna.” Anyunyura a Ekapolon Akuj, ikoni ekuwam loationon, ikoni ekuwam lo ipiripiri, lo ekutakini ngakies aluaronok. Nyedaun anyunyura a Ekapolon Akuj mati kitemokin daang nakolong anyoikinit asubakin. Ngirwa lu isidiunosi, iyenunete esi nguna daang lokojokon. Ebala Ekapolon Akuj kona, “Ngirwa ngulu, aliwor ayong Akuj a ngitela kadaang a Ngisirael, sodi toliworos kesi ngitunga kang. Ngitunga daang lu abuchunosi anakwara, apot kesienioto ayong anariet. Ani esakete Ngisirael akiangar, abu ayong etaanyun kesi anialonan. Ngisirael, kaminak ayong esi nakajik. Kotere nguna, arubakini ayong kamina esi. Abongokini ayong akiduk esi. Ee robo, Ngisirael lu italeuno! Ilemunete esi ngaekeeke kus kinyiakanasi imariteteete. Itakinete esi nabo ngimusabib lomukur a Samaria. Itakinete ngiketak, tanyama ageor na ekoniuni. Ee robo, enangi ngirwa lu enyaratar ngiketeok alomukur a Epiraim ebalasi, ‘Potu atodokasi Sion, nia Ekapolon Akuj ana erai Akuj yok.’ ” Ebala Ekapolon Akuj kona, “Toeokisi a alakara kotere Ngisirael, kimaritetekisi kotere ngulu eyenikinitae alobukui. Taramutu eeos kipuruut ibalasi, ‘Ayuu Ekapolon Akuj ngitunga keng, Ngisirael lupiyayek.’ Kingolikisi a, arikuni ayong kesi alowae alo alokwap, atochun kesi alowaitin kadaang a akwap. Irukunete kesi ka ngimuduk ta ngikangwalak, aapei ka ngaberu na epotiyete, ta na adol akidoun. Ebongunete kesi eraakasi ajore natiapolon. Ebongunete ngitunga kang igorosi. Arikuni ayong kesi ilipito. Ariki ayong kesi ni eyakasi ngingololin, alorot alosulut alo emam ibore ilegeuni kesi. Kainyo arai ayong apakech a Ngisirael. Epiraim erai lokookang loapolon.” Ebala Ekapolon Akuj kona, “Ngibukui, topupokisi ngakiro kang, tolimosi alokwaasea a nganamea anaalonak. Tolimutu kona, ‘Ngolo apetari Ngisirael, echunakini kesi nabo kiyok loger lo iyokiyo ekeyokon esipanit keng.’ Alachak ayong Ngisirael, ayuu kesi alobukut alokajwon noi. Epote kesi toeokis elakara anaita a Sion. Elakarosi noi kotere ngadutan na adusea ayong kesi. Adusi kesi a ngikinyam ka emuna ta akimiet. Amekini kesi ngamesekin ka ngaatuk. Ikokinete kesi amana na ebukio ngakipi jiik. Eanyunete kesi ibore daang ni iitanito. Sodi talakaros ngapesur kinyiakanasi. Elakarosi ngisorok ka ngikasukou. Esililingi ayong kesi, eloch akigoro kech toliwor alakara. Eloch akialolong kech toliwor akiena. Eritokini ngimurok kang akimuj naajokon, sodi etemu ngichan a ngitunga kang kadaang. Ayong Ekapolon Akuj alimu nguna.” Ebala Ekapolon Akuj kona, “Eirario echale alore a Rama, etoil a itwaan igoro kisutusuta noi. Igoro Rael kotere ngide keng. Engerit ngesi akisililingo, kainyo adaunosi ngide keng.” Ebala Ekapolon Akuj kona, “Tojongo akigoro, tomieta ngakiyo anakonyen kon. Kainyo ibusio dang na isubea iyong ngide kon. Ebongunete kesi anakwap a ngimoe. Ejokearosi ngakiro kon monan, ebongunete ngide kon nawi. Ayong Ekapolon Akuj alimu nguna. “Apupi ayong Ngisirael itasionosi ebalasi, ‘Ekapolon Akuj, kikoni sua ibarasit ni eturono, nakaneni kitatami iyong sua akiwap ngakiro. Tobuunae sua. Kisaki sua abongun nikon, Ekapolon Akuj na irai Akuj kosi. Ani kimuleni sua iyong kerumor, kipot atolimosi ngasechesea kosi. Ani keanyun aronis kosi kerumor, atobilakisi sua ngiluutei etasionikinos. Kiruma sua ngileech ka etimoi, kainyo kisechi kolong sua napei kolong eringa kidisiak.’ “Isirael, irai iyong lokookang lominat, ikoku ni amina ayong noi. Napei kangoiki ayong iyong, atoloma akitam ngakiro kon, tadakun etau kang anikon jiik. Kisieni iyong ayong. “Kitowo ngapirio sodi kigeronok erot. Toripu erot lokojokon erot lokolong itori iyong na irotokinio. Tobongutu Ngisirael, tobongutu nawi, lorerea lukolong iisikinete esi. Esi ngitunga lu nyimunosi Akuj, Isadanakinete esi tanang ori? Asubak ayong ibore nikitetet anakwap ni ikoni aberu na eikini ekile.” Akuj Namerikanyer na erai Akuj a Isirael, ebala kona, “Naabuunea ayong ngitunga nakwap kech, elimunete nabo anakwap a Yuda ka ngirerea keng kona, ‘Ee emukura a Akuj, ni ibooyo ateneanut, kitopia Ekapolon Akuj iyong.’ Elomete ngitunga Yuda ka ngirerea keng daang. Epete ngiketak ka ngikeyokok ta ngibaren kech. Esiangari ayong lu eburunit, esikwaru daang lu elilimiyorito.” Ani erumor atokienyu ayong, engolia atorukau akwaan kelaka. Ebala Ekapolon Akuj kona, “Enangi ngirwa lu elelebea ayong ngitunga ka ngitieng nakwapea a Isirael ka Yuda. Loger lokolong achoikinitor ayong atamar adituni, ka ayatar, ka akitukumiyor, ka amunyar ta aukor, achoikini ayong akitakin kesi ka adukokin. Na enangea ngirwa ngulu, nyeringa ngitunga elimunete tamasi, ‘Anyamete taapa ngamusabib nakaabarak kisaalik ngikel a ngide kech.’ Erai itwaan nicha enyami ngamusabib nakaabarak ngesi isaalikini ngikel keng. Nakaneni etoani itwaan daang kotere akisech keng a ilope.” Ebala Ekapolon Akuj kona, “Enangi ngirwa lu kichamakinor ayong ka Ngisirael ta ngitunga a Yuda. Eliwor achamunet ngina nakitetet. Nyikwaanikin ka achamunet nakolong kichamakin ayong kata apaakech nakolong atingea ayong ngakan kech epudo alo Misiri. Tani na etusubunor ayong ekile kech, apot kesi nyiirichakis achamunet ngina. Achamunet nakitetet kichamakin ayong ka Ngisirael ngesi naga. Ewaakini ayong etal kang tooma kech, sodi egirak lotai kech. Aliwor ayong Akuj kech, eliworosi kesi ngitunga kang. Emam anikech itwaan itatami itwaan niche tolimok atamar toyen Ekapolon Akuj kainyo kayenete daang ayong napei ani nyeyenikinitae tanang ni eyenikinitae. Arimakini ayong ngasechesea kech nabo nyeringa emarit na ichwanganakinete kesi. Ayong Ekapolon Akuj alimu nguna.” Iwaakinit Akuj akolong tacha naparan. Kiwaak elap ka ngikanyer toliworos echayete nakwaare. Itukulauni ngesi anam toloma aruore. Ekiro keng ngesi Akuj Namerikanyer. Elimunit ngesi ebala, “Anicha kerubakis ngakiro nguna eyakasi, erubakini Isirael dang erai ebukut, alongaren kang jik. “Arai toyei kona itemio adis akolongit adio, ka akireb ni ewaar akwap, kanger ayong Ngisirael kotere daang na asuba kesi. Ayong Ekapolon Akuj alimu nguna.” Ebala Ekapolon Akuj kona, “Enangi ngirwa lu ebongokinere akiduk Yerusalem toliwor ere kang, napei alopem alo alo too tanang lokidor lokiitoret. Iriwor ekukuor alo too kaneni tanang lomukura a Gareb sodi kiriam Goa. Adipo daang etia ni etia, ni erai ngalielin tarai ni echakio asakatan, ka ngamanat daang na eyakasi kidiama ingolol a Kidiron napei alokidor a Angole alo eyei kide, eliwor ni italeunitoe. Nyeringa ere ngolo erutorio kori echakario nabo jik.” Katolimok Ekapolon Akuj ayong akiroit ekaru lo a ngitomon lo araakar Sedekia ekapolon a Yuda. Arai ekaru ngolo ani a Nebukadinesa lo a ngitomon ka ngikan-kauni erai ekapolon a Babilonia. Ngirwa ngulu, etijiete ngasigerea a ekapolon a Babilonia Yerusalem. Apon ayong katoinikin nalaar a ekapolon a Yuda, ni iteeto ngasigerea ekidor. Kainikinit ayong ekapolon Sedekia neni. Kangoikinit ngesi ayong ani alimorea atamar ebala Ekapolon Akuj kona, “Emiekini ayong ekapolon a Babilonia tolema ere logo, tongopik ekapolon Sedekia kona ebuchar ani a Ngibabiloniae. Erikorio ngesi nia ekapolon a Babilonia. Eanyungari Sedekia ngesi a ngakonyen keng nabo kikobanakinos ngakiro. Erikio Sedekia Babilonia, sodi kiboi kaina tanang abuni ayong aanyun ngesi. Tani kitiji ngesi Ngibabiloniae, nyidwangi ngesi kesi. Ayong Ekapolon Akuj alimu nguna.” Katolimok ayong Ekapolon Akuj akiroit atamar ebuni Anamel lo erai lokaamaekang alo enyaritae Chalum, katolimok tama, “Togiel amana kang na eyei Anasos na akwap a Benjamen, kainyo iyong irai eyenet kang dir lo ejoikinit igieli.” Abu Anamel bu aanyun ayong dir loger losek kalimokinitor Ekapolon Akuj. Bu ngesi nalaar na ayei ayong katolimok ayong atamar atogiel amana. Abu ayong atoyen dir atamar Akuj kesuruori ayong. Atogiel ayong amana ani a Anamel, alo arai lokaamae kang alo Anasos, emarak ayong ngesi ngaropiyae ngatomon ka ngakan-kaarei. Egirak ayong ekiro kang nachamunet ngina ataramak emachar. Atanyarak ngikaanyunak, etem ngaropiyae anaratilio. Atolem ayong achamunet na egielit na aramakinitae emachar lo etal, ka nache na amam emachar aramakinitae. Ani achamunet nagielat, ainak ayong Baruk lokookeng a Neria, tarai etatait a Maseya. Ainak itee Anamel lo arai lokaamae kang, ka ngikaanyunak ngiarei lu egirakinete ngirora kech nachamunet na egielit ta Ngiyaudi daang lu ebooyete analaar a ngasigerea ana keteok ngidorin. Atolimok ayong Baruk epupete kesi daang kona, “Akuj Namerikanyer na erai Akuj a Isirael, kidungok iyong atamar tolema ngachamunet nugu daang, na a egielit taramakinitetei emachar ka na nyeramakinitae emachar, kiwaak niborosit nilupe, kibooyoto nikooyen. Alimu Akuj Namerikanyer, na erai Akuj a Ngisirael atamar egielio nabo ngakais, ka ngamanat ta ngamanat a ngimusabib anakwap kana.” Arumoret a ainakin Baruk lokookeng a Neria achamunet na agielitae, atagat ayong Ekapolon Akuj abala, “Ee Ekapolon lo irai Ekapolon Akuj! Iyong kolong isubi adis ka akwap a agogongu kon anaationon ka akan kon naationon! Emam ibore kikuruwori iyong. Idodiunit iyong amina kon na nyedaun anabunge anakaalak, nakaneni iriraene iyong ngide kotere ngasechesea kata apakech. Irai iyong Akuj na kiyenikinitae tarai naationon. Erai ekiro kon Akuj Namerikanyer. Iosokinit iyong arere ngakiro daang tosubi naationok. Iteete ngakonyen kon ngakiro daang na esubete ngitunga sodi tosubakinea itwaan daang ngakiro na itemem ka na esubi ngesi. Kolong a angorot, isubi iyong ngakiro nakailiilok ka nakatalarak alo Misiri. Isubi iyong nguna tani tokona alo Isirael ka ngibukui luche daang. Kotere ngakiro nguna, kiyenikin iyong tani tokona. Ipuduni iyong ngitunga kon anakwap a Misiri isubi ngakiro nakailiilok ka nakatalarak. Kipud iyong kesi a agogongu anaationon, tobul ngimoe kech noi. Ibu iyong nak kesi akwap naga na ileleba ngakile ka akimiet a ao, loger lokolong ikongio iyong ani kata apaakech atamar iinakini. Tolomasi kesi nakwap ngina kitiliwosi akech. Nakaneni nyiwapa kesi akiroit kon ka etal. Anakiro ana idungokinit iyong atamar tosuba, nyesuba tani apei. Kotere ngakiro nguna, yau iyong nginyas lugu daang nikech. “Kingolik a, adukokis Ngibabiloniae ngakatiputipui esiriam ere esakete akitijikin tolemasi. Elemarete kesi ere logo a akwara, ka eron a akoro ta edeke lo eyei lore logo. Ngakiro nakolong ilimuni iyong eyookinosi dir, itee cha tokona iyong dang. Ee Ekapolon lo irai Ekapolon Akuj kilimok iyong ayong itama, ‘Togiel amana ngina a ngaropiyae iteete ngikaanyunak. Ani kerai Ngibabiloniae ngikalemarak ere logo, ikokinete ngakiro nugu ai?’ ” Abu Ekapolon Akuj katolimok ayong akiroit tama, “Ayong arai Ekapolon Akuj, na arai Akuj a ngitunga kadaang. Emam ibore kagogongikinit ayong. Tokona bocha, epotori ayong ere logo ainak Nebukadinesa lo erai ekapolon a Babilonia tolema. Epote Ngibabiloniae lu itijiete ere logo, kichunyakis akim. Inomete ere ka ngakais nakolong adokete ngitunga kinoma emitina a Baal alokidiama, ka abukokin ngakujo nache emuna, esakete akitililere ayong. Napei kolong a angorot, esubete Ngisirael ka ngitunga a Yuda ngakiro naaronok jiik. Ketilileta kesi ayong a ngakiro anaaronok esubete. Napei kolong adukere ere logo tanang tokona, ketongoa ayong ngitunga a ere kalo ketilileta. Kotere nguna, enyasuni ayong ere logo atojongo akitere. Ketongoa ayong ngitunga a Yuda ka lua Yerusalem ketilileta kotere ngakiro naaronok asubete kesi aapei ka ngikapolok kech, ka ngikarikok, ka ngimurok ta ngikadwarak kech. Apot kesi katoreikis ayong ngakawa meere ngireetin kech. Tani na etatamea ayong kesi atobongonok, nakaneni apot towout akiirar ngakiro. Kitowaa kesi ngakujo nasubuna nakikadakinete alotooma akai nakelipitere ayong, kinyasut. Adukokis kesi ngikenoi lu ipeyonokinioto Baal anadipo a lokookeng a Inom, kipeyonokinioto akuj nabe Molek ngide kech lusapa ka lupesur. Nyedungokina kolong ayong kesi atamar tosuba kongina, kori peetamit ayong tani atamar esubete kesi ngakiro na ikote nguna, kitosecha ngitunga a Yuda.” Ekapolon Akuj na erai Akuj a Isirael, kalimokini ayong tama, “Yeremia, ebalasi ngitunga akwara, ka akoro ta edeke itelemari ekapolon a Babilonia ere logo. Kiira tokona ngakiro na alimuni ayong. Achununi ayong ngitunga anakwapea kadaang ana kolong apetakini ayong kesi na angoitor anyunyura. Abuuni ayong kesi nege kiboyoto akaalimon. Eliworosi kesi ngitunga kang, atoliwor ayong Akuj kech. Ainakini ayong kesi etau epei ka erot epei, katokereta kesi ayong jik, taanyuneta ka ngalesea kech na isidiunosi ngakiro naajokak. Kichamakin ayong ka kesi achamakin naka jik. Nyamuleni ayong kesi kori nyaisikini atama ajongoe asubea kesi naajokak. Etiliwori ayong kesi lukakerito ayong alotai kech, nyereatar kesi wache anikang. Ee robo, alakar ayong kotere kesi, atosubea naajokak. Etakini ayong kesi nakwap naga jik, a etau kang kadaang ka akiyar kang daang.” Ebala Ekapolon Akuj kona, “Eger lo ayaunea ayong ngakiro naaronok nugu daang nakwap naga, ekokini neni ayauni nikech ngakiro naajokak daang na echikak ayong. Ebalasi ngitunga ikokini akwap naga ariet na emam ngitunga ka ngitieng eyakasi. Ebalasi nabo dang ainakin kolong Ngibabiloniae. Nakaneni egielio ngamanat nabo anakwap kana. Egielete ngitunga ngamanat a ngaropiyae, kigirae ngirora lu egielaritere, taramakinae emachar pena ngikaanyunak. Esubakinosi nguna anakwap a Benjamen, ka ngadakarin na idunyatar Yerusalem, ka ngirerea a Yuda, ka ngirerea a akwap ana a ngimukur, ka ngaukon ta Negeb. Abuakini ayong ngitunga nakwap kech. Ayong Ekapolon Akuj alimu nguna.” Ani eringa ayong kainikinitae nalaar na ngasigerea ana iteete ekidor a ekapolon, abu akiroit a Ekapolon Akuj bu nia Yeremia na a ngaarei. Ekapolon Akuj nakolong asubi akwap, tosub kiwaak ni tokona eyei. Elimokinitae ngesi ekiro be Ekapolon Akuj. Katolimok ngesi ayong tama, “Tanyarae ayong, nakaneni ekii ayong, kedodik iyong ngakiro naapolok namunonoe na nyiyeni iyong. Ayong Ekapolon Akuj na arai Akuj a Ngisirael, abala eyatario ngakais na eyakasi Yerusalem ka ngakais na ngikapolok a Yuda kiratakinere ngimoe alojie alo ajiere ka Ngibabiloniae, nakaneni ilelebunosi ngawat a ngitunga a Yerusalem nakais. Eraakasi ngawat nguna ngaka ngitunga alu aari ayong kotere angoit ka anyunyura. Amuleni ayong ere logo kotere ngakiro naaronok asubete ngitunga a ere. Nakaneni etangalekini ayong ngidekesinei kech tojoketa. Etangalekini ayong ngidekesinei a ngitunga kang emiek kesi kiboikinos akaalimon isilito noi. Abuuni ayong ngitunga a Yuda ka Ngisirael lukolong arikio, etojok kesi kikokis nikolong a ekingaren. Etesegi ayong kesi anakisech kadaang anakolong kasechakinete kesi ayong. Arimakini ayong kesi ngasechesea kech ka aronis nakangeritotor ayong. Eliwor ekiro a ere kalo anikang eka alakara, ka ekipur ta aruonu. Eemete ngitunga a akwap kadaang tamaranikis na iirareta ngakiro naajokak na asubea ayong ngitunga a Yerusalem ta ajako daang na ainakini ayong kesi.” Tolim Ekapolon Akuj tama, “Ebalasi ngitunga ikoni akwap naga ariet, na emam ngitunga ka ngitieng eyakasi. Iyookinito kesi nguna. Ngirerea a Yuda ka ngirotin a Yerusalem, esilok. Emam ngitunga ka ngitieng eyakasi neni. Nakaneni iirario moi nabo alorerea kangulu elale ka akimaritetere, ka ekare lo imwomworere anakuuta. Iirari iyong ngitunga eeosi esaa lo eyauneta ngakipeyos kai kang, ngakipeyos nakabuanakineta ayong alakara. Etamarete kesi, ‘Tobuakisi Akuj Namerikanyer alakara kainyo ejok ngesi nabo erai amina keng na nyedaun jik.’ Abuuni ayong ngitunga a akwap kana lukolong arikio kikokis nikolong a ekingaren. Ayong Ekapolon Akuj alimu nguna. “Anakwap ana ikoni ariet kana, ana emam ngitunga kori ngitieng eyakasi, epete nabo ngachokorin na iyokiyete ngikeyokok ngamesekin kech. Alorerea a akwap ana a ngimukur, ka ngaukon, ka kuju Yuda, ka akwap a Benjamen, ka ngadakarin na idunyatar Yerusalem ta ngirerea a Yuda, iisete nabo ngikeyokok ngibaren kech kaneni. Ayong Akuj Namerikanyer alimu nguna.” Ebala Ekapolon Akuj kona, “Enangi ngirwa lu eyookinio ayong ngakiro nakolong kichikakin ka Ngisirael ta ngitunga a Yuda. Ani enangi ngirwa ngulu, etukurupupuuni ayong ateni na etenoono a Daudi tosub na eriyan anakwap. Ngirwa ngulu, eyuunio ngitunga a Yuda, kiboikinos Ngisirael akaalimon. Enyarao ngesi ‘Ekapolon Akuj na erai ateneanut yok.’ Ayong Ekapolon Akuj echikakinit atamar ngirwa daang, nyengopi alesit a Daudi na eliwor ekapolon alo Isirael. Ngirwa daang, eliworosi ngimurok a ekitela a Lawi lu esubete etich kang, ka akipeyore ngakipeyos na inomio, ka ngakipeyos a ngalemet ta ngakipeyos nache.” Katolimok ayong Ekapolon Akuj akiroit tama, “Kichamakin ayong ka apaaran ta akwaar atamar toliworos etakanunete esaa lo itemokino. Nyichwangakinio achamunet ngina. Aloger alopei kangolo, kichamakin ayong tani ka ekasuban etich kang Daudi atamar ngirwa daang, emini alesit keng na eliwor ekapolon. Kichamakin nabo ayong ka ngimurok lu ekitela a Lawi atamar esubete kesi etich kang ngirwa daang. Nyichwangakinio ngachamunet nguna jik. Eger lo emamakar kona imarunio ngikanyer lu eyakasi nadis, ka eger lo emamakar kona imarunio asinyen a ekwaas a anam, etalalae ayong ngalesea a ekasuban etich kang Daudi totiata neni. Etalalae tani ngimurok kang Ngilawi totiata neni.” Katolimok ayong Ekapolon Akuj akiroit tama, “Ingolik iyong atamar ebalasi ngitunga lugu anger ayong Isirael ka Yuda, ngitela luarei lukolong aseuni ayong a? Imenyarito kesi ngitunga kang loger ngolo. Nyeringa nabo itamito atamar eraakasi ebukut eche lo iteo. Nakaneni kichamakin ayong Ekapolon lo arai Ekapolon Akuj ka apaaran ta akwaar. Ewaak ayong ngitalio lu erikete akwap ka kidiama. Ani kona asubakinea ayong nguna, erichakini ayong achamunet kang ani a ngalesea a Yakobo, ka ekasuban etich kang Daudi. Aseuni ayong alesit a Daudi epei topolok ngalesea a Aburaam, ka Isaka ta Yakobo. Abuuni ayong ngitunga kang lukolong arikio, atorimak.” Katolimok ayong Ekapolon Akuj akiroit ngirwa lu etijio ekapolon a Babilonia lo anyaritae Nebukadinesa ngitunga a Yerusalem ka ngirerea lu edunyatar. Nebukadinesa ka ngasigerea keng, ibakito ka ngikapolok daang a ngakwapea ka ngitela lu apolokinit ngesi. Ekapolon Akuj na erai Akuj a Isirael, abu katolimok ayong atamar atolot atolimok ekapolon Sedekia kona, “Abala ayong Ekapolon Akuj, epotori ere logo ainak ekapolon a Babilonia, kichunyak akim. Nyibuchar iyong. Kirumunio iyong kitorikor nikeng. Ianyungari iyong ekapolon a Babilonia a ngakonyen kon a ilope, kikobanakinos ngakituk. Ani erumor tolot Babilonia. Sedekia, topupok ngakiro kon na eruoro ayong. Nyikiarakinio iyong lojie. Itoani iyong akaalimon, kinoma ngitunga emitina kitonuketa iyong loger lokolong enometa na atoaketa ta apaakon lukolong sek araakasi ngikapolok. Kigorotor kesi iyong tamasi, ‘Oitiakoi kare ekapolon kosi!’ Ayong Ekapolon Akuj alimu nguna.” Abu ayong esisak ekapolon Sedekia ngakiro nguna daang alo Yerusalem esaa lo etijikinitotor ngasigerea a Babilonia Yerusalem ka ngirerea a Yuda daang lukolong edongito, Lakich ka Aseka lu araakasi ngirerea ngiarei make lu aringa ngawasea eyakasi. Katolimok Ekapolon Akuj ayong Yeremia akiroit, kerumo ekapolon Sedekia achamakin ka ngitunga a Yerusalem atamar kilachakini ngikedalak kech lu araakasi Ngieburaniae, lukiliok ka luberu aapei, sodi nyeemin Esiraelit lo erikit Esiraelit loche erai ekedalan keng. Tachamut ngitunga daang ka ngikarikok kech alachakin ngikedalak kech, nyiitiliwosi ngikedalak nabo jik. Apot kesi talachakis ngikedalak, ani ekisidi tobilunos tobuasi ngikedalak luberu ka lukiliok lusek alachakinete kesi, kitingakis kesi aliwor ngikedalak nabo. Katolimok ayong Ekapolon Akuj akiroit tama, “Ayong Ekapolon Akuj na arai Akuj a Isirael abala, kichamakin kolong ayong ka taapaakus nakolong epudunio kesi alo Misiri, sodi atalachak kesi anaenanot. Atolimok ayong kesi atamar adaunet a ngikaru a ngikan-kapei talachakis itwaan ni erai Eburaniait daang ni asub etich kech a ngikaru a ngikan-kapei. Apot taapaakus towout adetar ngaki kiirasi ngakiro kang. Been kona, ipot esi toriangakinos tosubakis ngakiro na ajoikinete ngakonyen kang. Tachamut esi daang atamar ilachakinete Ngisirael, ngitunga kus. Tachamakinos esi alongaren kang, alokai ana kelipitere ayong. Nakaneni todepasi esi nguna nabo, kisuruma ekiro kang ngileech. Ipot esi daang tobuasi ngikedalak lusek ilachakinete esi loger lo asaketa, kitingakis esi kesi aliwor ngikedalak nabo. Tokona bocha, abala ayong Ekapolon Akuj nyiwapa esi ngakiro kang. Nyelachakina esi Ngisirael, ngitunga kus. Ani kikote neni, ketiliwori ayong esi lu ilachakina. Alachakin kus ngesi atoanikin nakwara, ka edeke ta akoro. Ngitunga lu asechete achamunet kang, towout akiyookin ngakiro a achamunet ana kolong achamakinosi alongaren kang, esikokini ayong kesi itaok ni apakete kesi ngaarei, ani erumor kitoro kiding ngapaket naarei nguna. Ngikarikok a Yuda ka Yerusalem, ka ngikasubak etich alokai a ekapolon, ka ngimurok a Akuj ta ngitunga daang lu etorete kiding ngapaket naarei a itaok, epotori ayong ainak ngimoe kech lu esakete akiar kesi. Enyamete kesi ngataruk ka ngibuin ngawat kech. Epotori ayong tani Sedekia lo erai ekapolon a Yuda ka ngikarikok keng luche ainak ngimoe kech lu esakete akiar kesi. Ajali ayong kesi epotok ngasigerea a Babilonia, na ajongoto akitijikin esi. Kingolikisi a, adunguni ayong akiroit tobongut kesi lore logo. Itijikinete kesi, tolemasi, kichunyakis akim. Esikokini ayong ngirerea a Yuda alaireng na emam itwaan elomit. Ayong Ekapolon Akuj alimu nguna.” Ngirwa lu araakar Yeoyakim lo arai lokookeng a Yosia ekapolon a Yuda, katolimok ayong Ekapolon Akuj akiroit tama, “Kape nia ngitunga a emachar a Ngikerab kiruoro ka kesi. Toriku kesi kai a Ekapolon Akuj, kilomak namaniyat apei nak emuna tamata.” Etonyou ayong emachar a Ngikerab daang. Ayei Yaasania, lokookeng a Yeremia a eche, tarai etatait a Abasinia, ka talokaatokeng daang, ka talokookeng, atoriku kesi daang kai a Akuj, elomak namaniyat a ngirukitos a ekadwaran alo anyaritae Anan, alo arai lokookeng a Igidalia. Ayei amaniyat ngina kidiama amaniyat a Maaseya, lokookeng a Chalum, lo arai itwaan ni asubi etich loteno alokai a Akuj. Ayei amaniyat na alomarete kesi diyete tani ngamaniyae a ngikasubak etich aluche. Sodi atolem ngikopoi ka ngatubwae na eleleba emuna ewaak ngaren Ngikerab atolimok kesi atama, “Tamata emuna.” Nakaneni tatachut kesi tamasi, “Nyikimaseene sua emuna. Apaakosi Yonadab lokookeng a Rekab, kolong kilimokini sua tama, ‘napei anikus tanang nalesea kus, nyiimat emuna. Nyiiduk ngakais kori nyiitata ngamanat. Warasi nyiitata ngimusabib kori nyiigiel. Tolomeeneta jiik loeman sodi torubakineta iyakasi nakwap na kibooyo kikoni ngitunga lugelayek naga.’ Kiwap sua ngitalio daang lukolong kilimokini sua Yonadab. Nyikimasi sua ngikulepek emuna. Nyemaase tani ngaberu kosi, ka talokookosi ka tanakookosi. Nyikiduki ngakais na kilomi, nyechamit epete sua ngamanat a ngimusabib, kori amana, kori ngikinyam. Erai kilomit sua loeman, kiira sua ngakiro nguna, atosuba itemem ka nakolong kilimokini Yonadab lo erai apaakosi. Ani nakolong abunio Nebukadinesa nakwap naga torem, kipot sua atodokisi atolomasi Yerusalem ani kiemea ngasigerea a Babilonia ka Ngisiria. Ngakiro nguna kilomitor sua Yerusalem.” Abu Akuj Namerikanyer, na erai Akuj a Isirael katolimok ayong atamar atolot alimokin ngitunga a Yuda ka lua Yerusalem kona, “Ikwa kolong emam esi ngaki na iirareta? Ikwa nyipupete esi ngakiro kang a? Ngakiro nakolong adungokini Yonadab lokookeng a Rekab talokookeng atamar nyeemat emuna, erichakin. Nyemata kesi emuna tani tokona, kainyo epupete kesi ngakiro na adungokini apakech. Kesuruoreene ayong esi jiik, nakaneni iwout esi akiirar ngakiro kang. Ameununi ayong ngikasubak etich kang daang nikus jiik. Ngikasubak etich ngulu kesi ngikadwarak kang. Kisuruorete kesi esi jiik ebalasi, ‘Ejoikinit ipei kus daang ereeun alorotin keng aluaronok, kibele eboyor keng. Tojongoto akiwapit ngakujo ngache isubete etich kech. Ani kikokis esi neni, ilomete nakwap nakolong kainakini ayong esi ka taapaakus.’ Nakaneni towout esi adetar akit, kiirasi ngakiro kang. Ewapa ngalesea a Yonadab ngakiro nakolong adungokini kesi apaakech, nakaneni awout ngitunga lugu akiirar ngakiro kang. Tokona bocha, ngitunga a Yuda ka Yerusalem, ayong Ekapolon Akuj Namerikanyer na arai Akuj a Isirael, ayauni nikus nginyas daang lukechikak ayong esi. Asubi ayong kongina kainyo iwounete esi akiirar ngakiro kang nakesuruorea ayong esi, towout akikere nakanyaraa ayong esi.” Sodi atolimok ayong Ngirekabi atamar Akuj Namerikanyer na erai Akuj a Isirael, alimuni tama, “Iwapa esi ngakiro na kolong kidungokini apaakus Yonadab. Iwapa esi ngakiro na alimuni ngesi daang, tosuba daang nakidungokini ngesi. Kanguna, ayong Akuj Namerikanyer na arai Akuj a Isirael echikichika atamar ngirwa daang, Yonadab lokookeng a Rekab, emini alesit keng na eliwor ekasuban etich kang.” Ekaru lo a nguomwon lo araakar Yeoyakim ekapolon a Yuda, katolimok ayong Ekapolon Akuj akiroit tama, “Tolem akitab kigirak ngakiro daang nakalimok ayong iyong kotere Isirael, ka Yuda ta ngibukui luche daang. Kigirak ngakiro daang nakalimok ayong iyong napei kolong esiakinea ayong akisuruor iyong na araakar Yosia ekapolon tanang tokona. Ani tokona ngon kiirasi ngitunga a Yuda nginyas daang lu asaki ayong ayaun nikech, ereunosi aloboyor kech aloaronon. Sodi atorimak ayong aronis kech ka ngasechesea.” Abu ayong atanyarau Baruk lokookeng a Neria, esisak ngesi ngakiro daang nakalimokini Ekapolon Akuj. Kigirak Baruk ngakiro nguna daang nakitab. Atolimok ayong Baruk ngakiro nugu, “Nyekachamakinitae ayong alomari kai a Akuj. Nakaneni asaki ayong iyong tolot neni akolongit na eronitotor ngitunga akimuj, kisomak akitab irema, sodi kiirareta ngitunga ngakiro daang nakalimokini ayong Ekapolon Akuj kesisak ayong iyong. Kisoma kongina kiirarea itwaan, aapei ka ngitunga a Yuda lu eponito neni alorerea kech. Kori tokona ngon epedorete kesi akilip Ekapolon Akuj toreeunos aloboyor kech aloaronon, kainyo erono angoit ka anyunyura na elimitor Ekapolon Akuj ngitunga lugu.” Sodi kisoma Baruk ngakiro a Ekapolon Akuj alokai a Akuj loger lo alimokinitor ayong ngesi. Ekaru lo a ngikan elap lo a ngikan-koomwon lo araakar Yeoyakim ekapolon a Yuda, apot ngitunga torono akimuj esakete akitalakar Ekapolon Akuj. Kirichakis ngitunga daang lu alomito Yerusalem aroneenen akimuj ngina, kirichakis tani daang lu apote alorerea a Yuda, pot neni. Ani eringa ngitunga epupokinito, kisomak Baruk anakitab ngakiro daang nasek alimuni ayong. Asubakini ngesi nguna alokai a Akuj, anamaniyat a Gemaria, lokookeng a Chapan, alo arai ekegiran anitubet ekies. Ayei amaniyat keng nalaar na alokidiama, diyete ekidor lokitetet akai a Akuj. Abu Mikaya lokookeng a Gemaria, lo arai etatait a Chapan, kiira Baruk isomae anakitab ngakiro nasek alimunit Ekapolon Akuj. Tolot ngesi kai a ekapolon, toloma namaniyat a ekegiran na eyei nitubet ekies. Eriamiriamito ngikapolok daang neni. Ngirora a ngikapolok kangulu kesi Elichama lo erai ekegiran anitubet ekies ka Delaya lokookeng a Chemaya, Elinasan lokookeng a Akibor, Gemaria lokookeng a Chapan, Sedekia lokookeng a Anania, ayakasi neni ka ngikapolok luche daang. Kisisak Mikaya kesi ngakiro daang na eirari Baruk isomakini ngitunga. Apot ngikarikok tomeasi Yeudi (lo erai lokookeng a Nesania, tarai etatait a Chelemia, alo erai lokookeng a Kuch) alimokin Baruk atamar yau akitab nasek esomakini ngesi ngitunga. Inu Baruk kesi akitab. Tamasi kesi, “Kiboikin, sodi kisomak sua ngakiro na igiritae nakitab ngina.” Kisomak Baruk. Ani kisoma ngesi kerumor, tokienyanakinos ebulit tamasi, “Kilimokini sua ekapolon ngakiro nugu.” Apot kesi kingita Baruk tamasi, “Tolimokinae tokona sua, ikokini iyong igiri ngakiro nugu daang ai? Kori robo Yeremia kisisakini iyong?” Tatachu Baruk tama, “Yeremia kesisakini ayong ngakiro daang, egirak ayong a ewino nakitab naga.” Apot kesi tolimokis Baruk tamasi, “Kapesi iyong ka Yeremia toduka. Warasi itwaan nyeeyen ni iyakasi esi.” Apot ngikapolok kiwaakis akitab ngina namaniyat a Elichama alo arai ekegiran anitubet ekies. Toloto kesi nia ekapolon tolimokis ngakiro daang. Tomea ekapolon Yeudi ayaun akitab ngina. Tolem ngesi anamaniyat a Elichama sodi kisomak epupi ekapolon, ka ngikapolok luche daang eriamito ngesi. Araakasi ngirwa ngulu lua akatorot, ebooyi ekapolon alokai keng ana akiporo, epiara akim. Ani napei eirarea ngesi ngilainio nguuni kori nguomwon, totub a ebanyet tachakak nakim. Torubak ngesi ikwaanakini neni tanang inomi akitab daang. Nakaneni emam tani ekapolon kori epei a ngikasubak etich keng lu apot toema kori tochilichileta ngiworui kech ialolongete na eirareta ngakiro nguna daang. Tani na emaimaeta Elinasan, ka Delaya ta Gemaria ekapolon esakete nyiinom akitab ngina, towou ngesi apupokin ngakiro kech. Abu ekapolon todungok lokookeng a ekapolon lo anyaritae Yerameel, ka Seraya lokookeng a Asiriel ta Chelemia lokookeng a Abideel atamar kerumut ayong ka ekegiran kang Baruk. Nakaneni kidaa Ekapolon Akuj sua. Ani inomi ekapolon Yeoyakim akitab na esigiri ayong Baruk kerumor, katolimok ayong Ekapolon Akuj akiroit tama, “Tolem akitab ache kigir ngakiro daang nakolong ayakasi nakitab na ekingaren nakolong enomi Yeoyakim, ekapolon a Yuda. Ani eliwor Yeoyakim ekapolon a Yuda, ilimokini iyong ngesi atamar ebala Akuj Namerikanyer kona, ‘Abe inom iyong akitab, niti ibala nyo egirea Yeremia atamar ebuni ekapolon a Babilonia kinyasu akwap naga ka akiar ngitunga ka ngibaren. Tokona bocha, ayong Ekapolon Akuj kalimokinit iyong ekapolon a Yuda atamar emam alesit kon nabo jik na epolokini anapolou a Daudi. Echakario akwaan kon nikalapatan ni enomea akolong naparan, tokutak akatorot nakwaare. Kerirae ayong iyong, ka ngalesea kon ta ngikasubak etich kon kotere ngasechesea na isubete esi daang. Ayauni ayong nikus ngakiro naaronok daang nguna alimu atamar ayauni, towout esi akiirar. Ayauni ayong ngakiro napei nguna nia ngitunga a Yerusalem ka Yuda.’ ” Abu ayong atolem akitab ache ainak Baruk lokookeng a Neria, lo arai ekegiran kang. Kigirak ngesi ngakiro daang na esisakini ayong. Kigirak ngesi ngakiro daang na alimokini ayong, nakolong ayakasi nakitab na enomi ekapolon a Yuda lo enyaritae Yeoyakim. Kiatakinae nabo ngakiro ngache na ekwaan ka nguna. Abu ekapolon a Babilonia lo anyaritae Nebukadinesa kitiliwo Sedekia lo arai lokookeng a Yosia ekapolon, kilunyok nados a Yeoyakin arai lokookeng a Yeoyakim. Nakaneni Sedekia ka ngikarikok a arieng keng luche ka ngitunga a akwap kangina, apot nyiirasi ngakiro nakolong alimuni Ekapolon Akuj kisitoru nikang a ekadwaran Yeremia. Tomeu ekapolon Sedekia ngitunga lugu nikang, Yeukal lokookeng a Chelemia, ka emuron a Akuj Sepania lokookeng a Maaseya. Pot kesi nikang tamasi, “Kilip kare Ekapolon Akuj na erai Akuj yok, kilipak akwap yok.” Aringa ayong atoronor alotunga kainyo aringa nyeenikina lojela. Eriamito ngasigerea a Babilonia Yerusalem. Ani iirarete kesi atamar eponito ngajorei a Parao alo a Misiri elama ekukuor kech, apot Ngibabiloniae tobongosi naabor. Abu Ekapolon Akuj katolimok ayong akiroit atamar atolimok Sedekia kona, “Ebala Ekapolon Akuj na erai Akuj a Isirael, ebunit ajore a Ngimisiri akingarakin iyong, nakaneni ebongete nakwap kech. Ebongunete Ngibabiloniae toremo ere, tolemasi sodi kichunyakis akim. Ayong Ekapolon Akuj kechikichiki esi atamar nyiingalasi make ibalasi kori nyebongunete Ngibabiloniae, kainyo ebongunete. Tani kidwang esi ajore daang a Ngibabiloniae alu ijiete ka esi, toliworos ngikiliok lu ewanan make kesi eperete aloeman kech, enyounete kesi kichunyakis ere logo akim.” Tobongo ajore a Ngibabiloniae alo Yerusalem kainyo abu ajore a Misiri taapuu. Sodi atonyou ayong alo Yeremia alo Yerusalem, atolot nakwap a Benjamen akirum ekimar a awi kosi kaina. Ani anangi ayong lokidor a Benjamen, ketowo ekapolon a ngasigerea ana eteete ekidor ngolo. Arai ekiro keng Irija, lokookeng a Chelemia, tarai etatait a Anania. Tama Irija, “Isaki iyong alosit nia Ngibabilonia!” Atatachak atama, “Mam jik! Nyalosi ayong nikech.” Nakaneni nyiirara Irija ngakiro kang. Kerum ngesi ayong katoriko lokarikok. Katongoikis kesi ayong, todungokis ngitunga atamar kebungata ayong ani erumor katoinikis kai a Yonasan, alo erai ekegiran anitubet ekies. Apon akai a Yonasan kitiliworoe ni eananakinio ngitunga. Kewaakin ayong lojela lo ayei tooma nalup, eboi kaneni nikooyen. Ani enangi ngirwa ngiche, katanyaraa ekapolon Sedekia nawi keng kengit kirukit ka ngesi bon tama, “Eyei akiroit adio a Ekapolon Akuj eyei a?” Atatachu ayong atama, “Eyei. Kirikorio iyong lokapolon a Babilonia.” Sodi engit ayong ngesi atama, “Nyo kasechakinit ayong iyong ka ngikarikok luche ta ngitunga lugu, kainikinitere ayong lojela? Nyaalu ngikadwarak kon lukolong abalasi iyong, ‘Ekapolon a Babilonia a, nyikitijikini iyong ka akwap kon’? Kiira kare tokona ngakiro kang, kamaimai iyong, ekapolon loketimon. Nyikibua ayong lojela lo a awi a Yonasan. Ani kibua iyong ayong neni, atoanikini ayong neni.” Todung ekapolon Sedekia atamar nyekabuar ayong lojela lo alotooma ngalup, pearai katoikin lojela lo a akai a ekapolon. Eboikin ayong neni, toliwor akolongit daang kainunio amugati tanang na adaunotor ngamugati alore. Chepatia lokookeng a Matan, ka Gedalia lokookeng a Pachur, ka Yeukal lokookeng a Chelemia ta Pachur lokookeng a Malikia, apot keirasi ayong alimonokini ngitunga atamar ebala Ekapolon Akuj kona, “Itwaan cha daang ni idongi lore, eari akwara, ka akoro ta edeke. Nakaneni itwaan cha daang ni idongi sodi tolot nia Ngibabiloniae, eyari. Ikokini ngesi itwaan ni angatar, kimiekinae toyar.” Atolimok ayong kesi nabo atamar ebala Ekapolon Akuj kona, “Epotori ayong ere logo ainak ajore a Babilonia tolemasi.” Apot ngikarikok luche a arieng toloto nia ekapolon tamasi, “Ejoikinit itwaan en etoani, kainyo ekiruor lo tokona iruoro ngesi logo, esuri ngitai a ngasigerea ka lua ngitunga kadaang alu idongito lore logo. Nyesaki ngesi akingarakin ngitunga, esaki akiwan.” Tatachu ekapolon Sedekia tama, “Itemokino nguna, eraakasi ngakiro keng ngaka akiding kus, tosubeta ngesi daang nacha isakete esi. Nyapedori ayong akiratakin esi.” Sodi kirumut kesi Yeremia, kiyoolikis a ngaunoi kare a Malikia, alo arai lokookeng a ekapolon. Ayei akar ngina diyete akai a ekapolon. Amam ngakipi ayakasi kare ngina, echoto bon ayei. Kiilor Yeremia lochoto. Ayei itwaan ni anyaritae Ebedimelek ni agelemitae, tarai ika akwap a Kuch.*g** Asubi ngesi etich alokai a ekapolon. Kiira ngesi atamar achakakin Yeremia nakar. Esaa ngolo, ebooyi ekapolon alokidor a Benjamen. Tolot Ebedimelek ni ebooyo ekapolon sodi tolimok tama, “Ekapolon loketimon, esubito ngitunga lugu naaronok ani achakakineta ekadwaran Yeremia nakar ni edikino akoro earea, kainyo emam akimuj eringa idongit lore.” Abu ekapolon todungok Ebedimelek tama, “Kirukosi ka ngitunga nguuni, kiriut ekadwaran Yeremia anakar eringa nyetoana.” Abu Ebedimelek kirukosi ka ngitunga ngulu tolomasi lokeru a akai a ekapolon, tolemut ngawarui nachilichila ka ngiworui lu adaudauna kiyoolikis Yeremia alotooma akar, a ngaunoi. Tolimok Ebedimelek Yeremia tama, “Tongichak ngawarui nachilichila nugu nakirididea, kidokok ngaunoi alokidiama.” Abu Yeremia kikok neni. Kiriut kesi Yeremia a ngaunoi, kiriut nikalapatan. Kiboi Yeremia analaar ana ebooyoto ngiketeok akai a ekapolon. Akolongit ache, tomeu Sedekia itwaan anyarare ayong. Eriamariama ka ngesi lokidor lo a nguuni a akai a Akuj. Katolimok Sedekia ayong tama, “Asaki ayong akingit iyong akiroit, nakaneni wara nyikimunon akiroit tani apei.” Atatachak ayong ngesi atama, “Ani pekemunon ayong iyong akiroit tani apei, kiari iyong ayong. Nabo ani kalimok ayong iyong ngakiro na echamit isubakini, nyiirari iyong.” Abu ekapolon kikong erai ayong bon kirukit ka ngesi tama, “Ekong jik tani Akuj na eyari, nakolong asubi ngitai yok, nyakaari ayong iyong kori nyekepotori kainak ngitunga lu esakete akiar iyong.” Sodi atolimok ayong Sedekia atama, “Ekapolon Akuj Namerikanyer na erai Akuj a Isirael, ebala, ‘Ani kiwou iyong akitijwore ngikapolok a arieng a Babilonia, emam itwaan kiari iyong. Emam itwaan inomi ere logo, nabo iyarete iyong ka ngitunga a awi kon. Nakaneni ani pekijala iyong tolot lokarikok a Babilonia, ipotorio ere logo nakinae Ngibabiloniae, kichunyakis akim. Engopi iyong kona ibuchar.’ ” Abu ekapolon Sedekia katolimok ayong tama, “Aemit ayong Ngisirael lukolong alot nia Ngibabiloniae. Epedorio ayong arikor nikech katoboliatar.” Atolimok ayong ngesi atama, “Nyikirikorio iyong nikech. Kiwapak tokona akiroit a Ekapolon Akuj kotere ngakiro nakalimok ayong iyong. Ejokearosi ngakiro anikon, toyuun iyong. Nakaneni kedodik ayong Ekapolon Akuj akisingolikinet a ngakiro ana esubakinosi erai pekijal iyong ejie. Anakisingolikinet kangina, engolik ayong ngaberu daang nakolong aisikinitae alokai a ekapolon a Yuda erikoritae lokarikok a arieng a Babilonia, ebalasi, ‘Ekapolon, kingalata iyong talopae kon lu emunoi, kidwang kesi iyong. Ani kona epokea ngakejen kon alochoto, kiisikis kesi iyong.’ ” Abu ayong eatak atama, “Erikorio ngaberu kon daang ka ngide nia Ngibabiloniae. Nyibuchar tani iyong ilope anikech. Kiriki esi ekapolon a Babilonia, sodi kinomae ere logo.” Katolimok Sedekia ayong tama, “Wara itwaan tani ipei nyeeyen atamar kiruor ayong ka iyong ngakiro nugu, nakaneni nyitoani iyong. Ani kiirasi ngikarikok a arieng atamar kiruor ayong ka iyong, epote kingita iyong ebalasi, ‘Tolimokinae sua ngakiro na ianete iyong ka ekapolon. Ani kilimok iyong sua ngakiro daang, nyimunono tani apei, nyikiari sua iyong.’ Tolimok kesi atamar kimaimai iyong ayong ibala nyakabua lojela lo a awi a Yonasan totoan kaina.” Apot ngikarikok a arieng daang pot akingitanar ayong ngakiro, atatachak ayong kesi loger losek kalimokinitor ekapolon. Tasalu ekiruor kang ka kesi kaneni, kainyo emam itwaan iche abu kiira ekiruor kang ka ekapolon. Kemiekin ayong ebooyi analaar a akai a ekapolon tanang akolongit na alemarere Yerusalem. Elap lo a ngitomon a ekaru alo ngikan-koomwon alo araakar Sedekia ekapolon a Yuda, tangau ekapolon a Babilonia lo anyaritae Nebukadinesa ajore keng daang torem Yerusalem. Akolongit na ngakan-koomwon a elap alo a nguomwon a ekaru alo a ngitomon ka epei alo araakar Sedekia ekapolon, apon awas a Yerusalem tobwangae. ( Ani elemario Yerusalem, pot ngikarikok daang a arieng a Babilonia kiboikinos lokidor lo alokiding. Ngikarikok ngulu kesi ta Nerigal Sareser, ka Samigar Nebo, ka Sarisekim ta Nerigal Sareser eche.) Ani ingolikinete ekapolon Sedekia ka ngasigerea keng daang ngakiro na asubakinosi, apot tasaka akisii alore nakwaare. Torotokis kitoro lorot lo a amana a ekapolon, kitoro lorot lo imorikinit ngawasea naarei, tosiwa toloto lowae a adipo a Yorudan. Nakaneni kirit ajore a Ngibabiloniae kesi, kirumut Sedekia anaroatin ana ayakasi diyete Yeriko. Torikoe Sedekia nia Nebukadinesa, alo ayei Ribila, nakwap anyaritae Amas. Kirira Nebukadinesa ngesi kaneni. Taar ekapolon a Babilonia talokookeng a Sedekia itee apakech. Abu taar tani ngikapolok a Yuda. Ani erumor tolim atamar topuyokinae ngakonyen a Sedekia, sodi toenae a ngiriko torikoroe Babilonia. Apot Ngibabiloniae kinoma akai a ekapolon a Yuda ka ngakais a ngitunga ka aukor ngawasea a Yerusalem. Esal kanguna kadaang, Nebusaradan lo arai ekarikon a ngasigerea, abu toriko ngitunga daang Babilonia tarata ngirikon. Ngitunga ngulu kesi lusek edongito lore, erukito ka lu esiaunete tosiwa, toloto Babilonia. Kimiek ngesi alo Yuda ngitunga ngiche lu eboosit, nak kesi ngamanat a ngimusabib ka ngamanat nache. Abu ekapolon Nebukadinesa todungok ekarikon a ngasigerea lo anyaritae Nebusaradan, tama, “Kape tasaka Yeremia tosubea ngesi naajokak. Nyiiwan ngesi, nakaneni tosubea ngakiro daang nache esaki ngesi.” Apot Nebusaradan ka ngikapolok lu anyaritae Nebuchasiban ka Nerigal Sareser ta ngikapolok luche a arieng a Babilonia katorikut ayong nalaar a akai a ekapolon. Kerumakis ayong Gedalia, lokookeng a Aikam, tarai etatait a Chapan. Gedalia keteni ayong atanang nawi akaalimon. Sodi atolom ni alomito ngitunga luche. Abu Ekapolon Akuj tolimok Yeremia akiroit na ayakar nalaar a akai a ekapolon. Abala akiroit ngina, “Kape tolimok Ebedimelek lo a akwap a Kuch atamar Alimu Akuj Namerikanyer, na erai Akuj a Isirael ebala, ‘Kingolik a, eyookini ayong ngakiro nakolong abala asubakini alore kalo, ngakiro naaronok, meere naajokak. Esubakinio ngakiro nguna itee iyong. Nakaneni kayuuni ayong Ekapolon Akuj iyong akolongit ngina. Nyikipotorio iyong lotunga lu iemit iyong. Keyoki ayong iyong nyikiar akwara. Isii iyong iyari, kainyo kigieno iyong ayong. Ayong Ekapolon Akuj alimu nguna.’ ” Abu Ekapolon Akuj katolimok ayong Yeremia akiroit na kalachakinea Nebusaradan lo arai ekarikon a ngasigerea alo Rama. Karikio kolong ayong inaa kaenitae a ngiriko, erukito ka ngitunga luche lu arikunio alo Yerusalem ka Yuda. Arikoritae ngitunga ngulu Babilonia eraakasi ngirikon. Katachada ayong ekarikon a ngasigerea nikang bon, tolim tama, “Ekapolon Akuj na erai Akuj kon, alimuni kolong atamar enyasuni akwap naga. Asubaki tokona ngesi ngakiro nakolong abala asubakini. Ani kona kolong isechakineta esi Ekapolon Akuj towout akiirar ngakiro keng, asubakin nugu anikus. Kingolik tokona, alachakini ayong ngiriko anakan kon, katalakak iyong tolot. Ani kisaki iyong akirukor ka ayong Babilonia, emam ngakiro, kariki ayong iyong. Ani pekisaki iyong akirukor ka ayong, emam ngakiro. Kingolik a, eyei akwap naga daang etia ni etia ngaren kon. Kape lowae locha kijoikini iyong.” Ani awouni ayong akitach ngakiro keng, tolim Nebusaradan tama, “Tobongo nia Gedalia, lokookeng a Aikam, tarai etatait a Chapan, lo etiliwo ekapolon a Babilonia ekarikon a ngirerea a Yuda. Ipedori iyong akiruk ka ngesi kiboi alokiding ngitunga, kori ipedori iyong alosit wadaang nicha isaki.” Abu ekarikon a ngasigerea kainak ayong akimuj ka ainakinet, ani erumor kemiek atolot. Atolot ayong nia Gedalia lokookeng a Aikam lo ayei Misipa. Tolom Yeremia kiding ngitunga lu edongito nakwap ngina. Ayakasi ngikapolok a Yuda ka ngasigerea ngache na apot towout akisil. Kiirasi kesi atamar aseu ekapolon a Babilonia Gedalia aliwor ekapolon a ewae kangolo, toweik ngitunga daang lukolong edongete na arikere luche Babilonia. Araakasi ngitunga ngulu lu eboosit anakwap. Tonyout Ichimael lokookeng a Nesania, ka Yoanan lokookeng a Karea, ka Seraya lokookeng a Taniumes, ka talokookeng a Epai lu eponito alo Netopa ta Yesania lo ebunit alo Maaka, toloto ka ngitunga kech nia Gedalia alo Misipa. Tolimok Gedalia kesi ikongi tama, “Nyieam akisil ka Ngibabiloniae. Toloma nakwap naga tosuba etich a ekapolon a Babilonia, nakaneni ejokearosi ngakiro daang anikus. Alomi ayong elope Misipa atoliwor ekaweikinan kus na eponeta Ngibabiloniae nege. Nakaneni ani eliwor esi, ipedorete akilem ka akidiatakin emuna, ka ageor ta akimiet kiboyoto anadakarin ana ilomito esi.” Ngirwa lupei ngulu, apot Ngisirael daang lu alomito Moab, ka Amon, ka Edom ta ngakwapea nache kiirasi atamar abu ekapolon a Yuda kimiek ngitunga ngiche idongete Yuda. Kiirasi nabo dang atamar etiliwo ngesi Gedalia ekapolon kech. Tochunun kesi daang anakwapea ana kolong apetakina, tobongosi Yuda. Pot nia Gedalia alo Misipa, togerut ageor nakaalan ka emuna. Ekisidi kanguna, apot Yoanan lokookeng a Karea ka ngikarikok a ngasigerea anasek awounete akisil, toloto nia Gedalia alo Misipa sodi tolimokis ngesi tamasi, “Iyeni mono iyong atamar ekapolon Baalis lo a Amon emeunit Ichimael lokookeng a Nesania akiar iyong kori emam?” Towou Gedalia akinup ngakiro nguna. Kisuruor Yoanan Gedalia alopei tama, “Kimiek atolot ataar Ichimael, emam itwaan eanyuni atamar ngae aari ngesi. Nyo nitibore imiekinitere ngesi kiari iyong en? Epetari ibore ngini Ngisirael daang lu achunun ni iyei iyong, nabo eyauni ngakiro naaronok lotunga daang lu idongito Yuda.” Nakaneni abu Gedalia tatachak Yoanan tama, “Nyiar ngesi! Meere ngakiro na iruoror iyong Ichimael ngaka iteni!” Elap lo a ngikan-kaarei a ekaru kangolo, Ichimael lo arai lokookeng a Nesania, tarai etatait a Elichama, abu toloto ka ngikiliok ngitomon Misipa aanyun Gedalia. Arai Ichimael eyenet a ekapolon, nabo arai epei a ngikapolok a arieng a Babilonia. Ani na emujeta kesi akimuj aapei, toutut Ichimael ka ngikiliok lutomon ngilengea kech taara Gedalia. Taar Ichimael tani Ngisirael daang lu arukito ka Gedalia alo Misipa. Taar tani ngasigerea a Ngibabiloniae na ayakasi neni. Akolongit na atupit ngina, ani eringa itwaan tani ipei nyeyena ngakiro a akitu a Gedalia, pot ngikiliok ngitomwon-kauni alo Chekem, ka Chilo ta Samaria. Abanyarito kesi ngajul a ngabokonya kech, tochilichilito ngiworui ka adungudung ngawat kech. Ayaarito kesi ngakipeyos a ngalemet ka emitina alemun alokai a Akuj. Abu Ichimael lokookeng a Nesania tonyou alo Misipa tolot akisiriam kesi, egoro ngesi elosi alorot. Ani enanguni ni ayakasi kesi, tama, “Tolomutu kare taanyunos ka Gedalia.” Ani napei alomareta kesi lore, apot Ichimael ka ngitunga keng taara kesi tachakakis ngawat kech nakipany. Nakaneni ayakasi ngirukitos a ngitunga kangulu ngitomon lu alimokinete Ichimael tamasi, “Nyikiar sua kainyo eyakasi ngakanoi, ka erau, ka akimiet ta akimiet a ao na kiweit sua alomana.” Abu ngesi tajal kesi ka ngirukitos kech nyear. Akipany na achakakini Ichimael ngawat a ngitunga alu aari, arai akipany naapolon nakolong aboki ekapolon Asa ngirwa lu etijio ngesi ekapolon a Isirael lo anyaritae Baacha. Kileleb Ichimael ngawat nakipany ngina. Ani erumor kitiliwo tanakookeng a ekapolon ka ngitunga luche daang lu ayakasi Misipa ngirikon. Ngitunga ngulu kesi lukolong erumakini ekarikon a ngasigerea Nebusaradan Gedalia atamar toweik. Kitiliwo Ichimael kesi ngirikon, toriko totena nakwap a Amon. Apot Yoanan lokookeng a Karea ka ngikarikok a ngasigerea daang kiirasi ngakiro naaronok daang asubi Ichimael lokookeng a Nesania. Sodi tonyout kesi ka ngitunga kech toloto akitijwore Ichimael. Toditasi ngesi anabwel anaapolon alo Gibeon. Ngirikon lu arikit Ichimael na aanyungareta Yoanan ka ngikarikok a ngasigerea lu arukito ka ngesi, talakaros. Toreeunos ngitunga daang lukolong ariki Ichimael alo Misipa, tobongosi toloto nia Yoanan. Nakaneni Ichimael ka ngikiliok ngikan-kauni, apot tosiwa ani a Yoanan, toloto nia Ngiamon. Yoanan ka ngikarikok a ngasigerea lu arukitotor, toweikis ngitunga lukolong ariki Ichimael alo Misipa na aarea Gedalia. Araakasi ngitunga ngulu ngasigerea ka ngaberu, ka ngide ta ngitunga lu agelemitae. Tobuu Yoanan kesi alo Gibeon Toloto kesi toloma Gerus Chimiam ni ayei diyete Betleem, esakete alosit Misiri kotere Ngibabiloniae. Akerito kesi Ngibabiloniae ani aarea Ichimael Gedalia, lo aseuni ekapolon a Babilonia toliwor ekapolon a ewae kangolo. Ngikarikok a ngasigerea daang, aapei ka Yoanan lokookeng a Karea ta Asaria lokookeng a Echaya, kirukut ka ngitunga daang napei aniichi tanang niapolon, katolimokis ayong tamasi, “Tosubak kare nakilimokini sua iyong! Kilip Ekapolon Akuj na erai Akuj yok kotere ngoni! Kilip kotere ngoni daang lupiyayek. Kilalak ngoni, nakaneni kikidioko tokona ngoni lupiyayek, loger lo tokona iteeo iyong dang. Kilip sodi kidodik ngoni Ekapolon Akuj na erai Akuj yok erot lo ejoikinit ngoni kiwapi, ka ngakiro na ejoikinit kisubi.” Atatachak ayong kesi atama, “Eira ayong. Elipi ayong Ekapolon Akuj na erai Akuj yok, loger lo kilimokineta esi ayong. Ani ngakiro na elimuni ngesi, kalimokini ayong esi. Emam ibore kemunoni ayong esi.” Sodi katolimokis kesi ayong tamasi, “Kimiek Ekapolon Akuj toliwor akaanyunan na iteni ka na emunoi anikosi, erai pekisubak sua akiroit daang na kimeunitor iyong Akuj nikosi. Tani kejok kori kerono, kiwapi sua etoil a Ekapolon Akuj ana erai Akuj yok ana kilimokini sua iyong atamar kilip. Ejokearosi ngakiro aniyok erai kiwap ngoni ngesi.” Adaunet a ngirwa a ngitomon, abu Ekapolon Akuj katolimok ayong akiroit. Abu ayong atanyarau Yoanan ka ngikarikok a ngasigerea lu arukitotor ta ngitunga luche, napei ani nyeyenikinitae tanang ni eyenikinitae. Atolimok kesi atama, “Ekapolon Akuj na erai Akuj a Isirael, nangoon ibalasi esi ayong kilip, ebala, ‘Ani kisakete esi akilom nakwap naga, kaduki ayong esi, nyakayatari. Kadupakini ayong esi nyakadituni. Nginyas lu ayau ayong nikus, kesialolong ayong noi. Tojongoto akerit ekapolon a Babilonia lo iemito esi. Nyiikear ngesi, kainyo kirukit ayong ka esi, kayuuni ayong esi anakan keng. Ketaanyuni ayong esi ngisien, sodi toliwor ngesi lo a ngisien anikus, kimiek esi toloma nakwap na erai akus a ngikulepek. Ayong Ekapolon Akuj alimu nguna.’ “Nakaneni ani kitamasi esi, ‘Nyikilomi sua nakwap naga,’ nyiiwapa esi etoil a Ekapolon Akuj ana erai Akuj kus tamasi, ‘Emam, kilosi sua Misiri ni emam ejie, kori elii a arem ka akoro. Kilomi inaa.’ Tokona, kiirasi akiroit a Ekapolon Akuj, esi ngitunga a Yuda lu idongito. Akuj Namerikanyer, na erai Akuj a Isirael, ebala, ‘Ani kingoliarito esi Misiri, isakete alosit toloma inaa, kidoli esi ejie lo ikerito nabo kiwapi akoro nakitubuli totoanikis inaa. Ngitunga daang lu ingoliarito Misiri esakete alosit akilom inaa, eari akwara ka akoro ta edeke. Emam tani ipei kech ni idongi, nabo emam tani ipei ni epuun anakiro anaaronok ayauni ayong nikech.’ “Akuj Namerikanyer, Akuj a Isirael, ebala, ‘Loger lokolong abukokinere angoit ka anyunyura kang lotunga lu elomito Yerusalem, eger lopei ngolo abukokinea anyunyura kang lotunga a Misiri. Iliworosi esi ibore nikikadakini, ka niketubulon, ka ni ilamam, ka ni imenyio. Nyeringa esi ianyungarete akwap naga nabo jik.’ ” Atorubak ayong eruoro abala, “Ebala Ekapolon Akuj kona, ‘Esi ngitunga a Yuda lupiyayek, nyiilot Misiri.’ Toyena dir atamar kechikichiki ayong esi akolongit naga. Kainyo iwoliyosi esi ijal akiyar kus. Kilimokinete esi ayong atamar kelipak esi Ekapolon Akuj na erai Akuj yok. Ipot esi tolimut atamar isubete ngakiro daang na edunguni ngesi. Nakaneni kalimok ayong esi akolongit naga, nakaneni iwounito esi akiwap etoil a Ekapolon Akuj ana erai Akuj kus, nyiwapa esi akiroit daang nakameuni ngesi ayong alimokin esi. Toyena bocha tokona atamar kiari esi akwara, ka akoro ta edeke anakwap ana isakete esi alosit toloma.” Ani arumori ayong alimokin ngitunga daang ngakiro nakalimokini Ekapolon Akuj na erai Akuj kech atamar atolimok kesi, apot Asaria lokookeng a Ochaya ka Yoanan lokookeng a Karea ta ngitunga luche lukewogak daang, katolimokis ayong tamasi, “Isudi iyong ngakiro. Nyikimeunit iyong Ekapolon Akuj na erai Akuj kosi alimokin sua atamar nyikiwot Misiri atoloma inaa. Baruk lokookeng a Neria ngesi kichichuunit iyong nikosi, sodi kidwangeta Ngibabiloniae sua, kitaar kori kitorikosi Babilonia.” Apot Yoanan ka ngikarikok a ngasigerea ta ngitunga luche daang towout akiwap ngakiro na adungunit Ekapolon Akuj atamar nyeeramakis anakwap a Yuda. Nakaneni Yoanan lokookeng a Karea, ka ngikarikok a ngasigerea, apot torikosi ngitunga lupiyayek a Yuda daang toloto Misiri. Kimoriasi ka ngitunga daang lukolong abongunete anakwapea ana kolong apetakina kesi. Araakasi ngitunga ngulu ngikiliok, ka ngaberu, ka ngide ta tanakookeng a ekapolon, ka itwaan daang nikolong aisikinitor ekarikon a ngasigerea lo anyaritae Nebusaradan, toisikinea Gedalia, ka Baruk ta ayong. Nyiwapa kesi ngakiro na adungunit Ekapolon Akuj, toloto tolomasi Misiri, tananga lore lo anyaritae taipanes. Katolimok ayong Ekapolon Akuj alo Taipanes tama, “Tolem ngamoru naapolok ngadi tonukak lochoto lo eyei lomataparea lu eyakasi lorot lo elomarere kai a Parao alo Taipanes. Tonuk ngamoru nguna iteete Ngisirael. Ani erumor tolimok kesi atamar ayong Akuj Namerikanyer na arai Akuj a Isirael, arikuni ekasuban etich kang Nebukadinesa, ekapolon a Babilonia nakwap naga. Iwaakini ngesi ekicholong keng lo a apolou namoru na inuk iyong nugu. Imukokini ngesi kesi eam lo a apolou. Ebuni Nebukadinesa kidwang ngitunga a Misiri. Ngulu eraakasi ngikatoak a edeke, eari edeke. Ngulu eraakasi ngirikoro, erikio. Ngulu eraakasi ngiaran a akwara, eari akwara. Enomi ayong ngakais a ngakujo anagelayek a Ngimisiri. Inomi ekapolon a Babilonia ngakujo kech, kori iwoki. Itosegi ekapolon a Babilonia akwap a Misiri, loger lo elemea ekeyokon ngilach aloworui keng. Erotokini ekapolon a Babilonia kebwang Ngimisiri alojie kerumor. Inyasuni ngesi ngamoru na ilipitere ngakujo ani enyaritae Eliopolis alo Misiri. Inomi ngesi ngakais a ngakujo a Misiri.” Katolimok Ekapolon Akuj ayong akiroit kotere Ngisirael alu alomito Misiri, ayakasi lorerea a Migidol, ka Taipanes, ka Mempis ta Pasiros. Akuj Namerikanyer, na erai Akuj a Isirael, tolim tama, “Ingolikis esi ngikulepek naaronok daang nakolong ayauni ayong Yerusalem ka ngirerea luche daang a Yuda. Kingolikisi a, tani tokona akolongit naga, eraakasi kesi alaireng, emam itwaan elomit neni kainyo asubete ngitunga naaronok ketongoa ayong. Epeyonokinete kesi ngakujo nagelayek emitina, tosuba etich a ngakujo ana peayenete kesi, kori esi, kori taapaakus. Tarai ameununi ayong ngikadwarak nikus lu araakasi ngikasubak etich kang, kitolimonokis esi atamar nyiisuba ibore niaronon aremokino ayong en. Nakaneni towout esi apupokin kori adetar ngaki kiirasi. Towout esi apalikin eboyor kus loaronon ipeyonokineta ngakujo nache. Kotere nguna, abu ayong atobukok angoit kang ka anyunyura lorerea a Yuda ka ngirotin a Yerusalem, echunyak akim. Kidongo kesi eraakasi alaireng, ka ibore nikitubuli, loger lo tokona ikoneta neni. “Tokona, Ekapolon Akuj Namerikanyer, na erai Akuj a Isirael, ingita atamar, nyo isubanakinotor esi ngakiro naaronok na ikote nege? Isakete esi amunyar ngikiliok ka ngaberu, ka ngide, ta lu itanakio, sodi tongopea itwaan a ekitela kus ni idongi a? Nyo kitongoeta esi ayong ani ilipitotor ngakujo nasubuna, ka akipeyonokin ngakujo nagelayek kane alo Misiri, ani ipot esi akilom? Isubete esi nugu tomunyarotor a? Isakete esi ebukut daang anakwap toliwor kimenyarit esi ka alimit ekiro kus ilamar a? Ikwa kimuriakinito esi ngakiro naaronok daang nakolong asubete taapaakus, ka ngikapolok a Yuda, ka ngaberu kech, ka esi ta ngaberu kus alorerea a Yuda ka ngirotin a Yerusalem a? Eringa esi nyeliworo ngitunga lu itiditeuna tanang akolongit naga. Nyidodikina esi ayong arimatoi kori nyiboikino esi iwapito ngitalio daang lu ketaanyuni ayong esi ka taapaakus. “Tokona bocha, ayong Akuj Namerikanyer, na arai Akuj a Isirael, kanyoikini esi atomunya Yuda daang. Ani ngitunga a Yuda lupiyayek, lu esakete alosit akilom Misiri, amunyari ayong kesi daang. Etoakete kesi daang, lu eyenikinitae ka lu nyeyenikinitae, etoakete alo Misiri, alojie kori edeke. Eliworosi ibore nikikadakini ka niketubulon ka nilamam ta ni imenyio. Imenyarete kesi ngitunga toliworos elimito kesi na ilamatar. Erirae ayong lu elomito Misiri, loger lokolong eriraa Yerusalem a akwara, ka akoro ta edeke. Emam ngitunga lupiyayek a Yuda lu epote akilom Misiri lu esiyete kori ebucharosi. Emam tani ipei kech ni ebongori Yuda, ni iitanito akilom nabo. Emam itwaan ebongi, mati ngitunga ngidikidio lu edokinete.” Sodi pot ngikiliok daang lu ayenete atamar epeyonokinete ngaberu kech ngakujo nache, ka ngaberu daang na awaasi kaneni, aapei ka Ngisirael lu alomito kuju Misiri ni anyaritae Pasiros, araakasi daang ajore nakaalan noi, katolimokis ayong tamasi, “Nyikisaki sua akiirar ngakiro nakilimok iyong sua ilimit ekiro a Ekapolon Akuj. Nakaneni kisubi sua ngakiro daang nakilimu atamar kisubi. Kipeyonokini sua akuj kosi naberu, na erai Akapolon a adis, kibukokini sua ngesi ngakipeyos a emuna loger lokolong kisubea kata apaakosi, ka ekapolon kosi ta ngikarikok kosi alorerea a Yuda ka ngirotin a Yerusalem. Ngirwa ngulu, kitingit sua akimuj nakaalan, kibooyi niajokon, amam ngichan. Nakaneni nakolong kipalikinea sua akipeyonokin Akapolon a adis, atojongoto abukonokin ngesi emuna, kingopik ibore daang, nabo atoaka ngitunga kosi alojie ka akoro.” Apot ngaberu tamasi, “Nakolong kipoo sua ngamugati na esikwaanitae ka Akapolon a adis, epeyonokisi ngesi, ajoikinito ngikiliok kosi ngakiro nakisubi sua.” Sodi atolimok ayong ngitunga daang lukalimokinete ayong ngakiro nguna, lukiliok ka luberu, atama, “Ani emitina lo ilemunete esi, ka taapaakus, ka ngikapolok kus, ka ngikarikok kus ta ngitunga a akwap, tolemut alorerea a Yuda ka ngirotin a Yerusalem, esibit esi peayeni Ekapolon Akuj ngakiro kech, kori esibit esi apot ngakiro kech kimuriakis ngesi a? Akolongit napei tokona naga, aliwor akwap kus alaireng, emam itwaan elomit neni. Aliwor ibore nikitubuli, nabo ilamam, kainyo aburu Ekapolon Akuj anaikin ngakiro naaronok isubete esi. Apot ngakiro naaronok noi nugu nikus kainyo ipeyonokis esi ngakujo ngache, tosechakis Ekapolon Akuj ani iwouneta akiwap ngitalio keng ka ngakitatamet ta ngakiro daang.” Atolimok ayong nabo ngitunga daang, tarai cha noi ngaberu atama, “Kiirasi akiroit a Ekapolon Akuj, esi ngitunga a Yuda daang lu ilomito Misiri. Akuj Namerikanyer na erai Akuj a Isirael, ebala kona: Ilimut esi ka ngaberu kus a ngakituk kus, nabo isubakis a ngakan kus ngakiro na ikongokis Akapolon a adis, atamar ipeyokinete ngesi ka abukokin emuna. Kasiosi robo! Kirichakisi nguna ichikakis! Kiyookis ngakikongiet kus! Nakaneni topupokisi tokona akikong na ekong ayong Akuj Namerikanyer a ekiro kang aloationon ani a Ngisirael kadaang alu elomito Misiri. Nyeringa nabo ayong emiekini tani ipei kus ikongi a ekiro kang ebala, ‘Ekong jik tani Akuj na eyari!’ Kingolik a, eteorit ayong kesi anaaronok, meere anaajokak. Ngikiliok lu eponito alo Yuda daang lu elomito Misiri, emunyario a akwara ka erogo, tanang daang emunyario pil. Ani ngulu epuunosi anakwara, ebongunete anakwap a Misiri toloto Yuda. Eyenunete lu epuunosi atamar anukiro eraakasi iteni, nakech kori nakang. Ayong Ekapolon Akuj kedodikini esi ibore ni isileereuni atamar kerirae ayong esi kane, ka akidodiun atamar akichikichika na abalar ayong ayauni nginyas nikus iyookin. Epotori ayong ekapolon a Misiri lo enyaritae Opira atorikok ngimoe keng lu esakete akiar ngesi. Ekokini neni loger lokolong epotorea ekapolon a Yuda lo anyaritae Sedekia, atorikok Nebukadinesa lo arai ekapolon a Babilonia, lo arai emoit keng asaki akiar ngesi.” Ekaru lo a nguomwon lo araakar Yeoyakim lokookeng a Yosia ekapolon a Yuda, kigir Baruk ngakiro na esisakinit ayong Yeremia ngesi. Abu ayong atolimok ngesi atamar Ekapolon Akuj na erai Akuj a Isirael, alimuni tama, “Baruk, abe ibala iyong, ‘Oitiakoi kare! Eatak Ekapolon Akuj akialolong lochan kang. Ketubur ayong akunua, kangopiki kona eangari.’ “Nakaneni ayong Ekapolon Akuj ayatari ibore daang ni aduki nabo arutori ibore daang nikolong etakini. Asubakini nguna anakwap kadaang. Ikwa isaki iyong ngakiro natenoyek a? Tojongo akisak nguna. Ayauni ayong ngakiro naaronok noi lotunga daang, nakaneni ibucharor lo erai iyong akiyar kon, awadaang anicha ilosi. Ayong Ekapolon Akuj alimu nguna.” Katolimok Ekapolon Akuj ayong ngakiro a ngibukui, kisiak akisuruor ngakiro a Misiri. Ngakiro nugu alimuni ngesi kotere ajore a ngasigerea a ekapolon a Misiri alo anyaritae Neko. Edwangete ngasigerea a Nebukadinesa kesi alo Karikemich alodiyete angolol a Eupurate. Arai ekaru loa nguomwon lo araakar Yeoyakim ekapolon a Yuda. Tama Ekapolon Akuj kona, “Iremasi ngikapolok a Misiri ebalasi, ‘Totinga ngaupwala kus, tonyout toloto lojie! Toena ngangolei kus, todokasi! Totupakinos, tanapa ngapukoto kus! Kipenasi ngakwaaras! Totinga ngiboro lujiet!’ ” “Ani nyoni etee ayong? Ebulit kesi areasi abongosi naabor. Abwang ngasigerea kech amatarosi noi. Nyingoliarete naabor jik, eyei ebuloi wadaang. “Nyebucharosi lukapiranak. Nyepuunosi ngasigerea. Alokwap alowae a Eupurate, ilegeuni kesi ibore tadakaros. Ngae en ekurupupuunit loger a Nili, angolol na atenikis ngakipi ngikipetetio? Misiri ekurupupuunit loger a Nili, angolol na atenikis ngakipi ngikipetetio. Ebala Misiri ‘Akurupupuuni ayong, atoburuchia akwap daang. Enyasuni ayong ngirerea ka ngitunga lu elomito lorerea ngulu. Ee ngangolei, kapesi ngaren! Kibiroros ngaurukukui! Ngasigerea toloto ngaren. Ngikiliok lu eponito alo Kuch, ka Libia, iwokito ngaupwala, ta ngitunga lu eponito alo Lidia, ngikunonoi a ngimalea a amod.’ ” Erai akolongit naga aka Ekapolon Akuj Namerikanyer. Etachakini naaronok akolongit naga. Irirae ngimoe keng akolongit naga. Enyami akwara kesi toup, tanang itudunge akure keng a ngaakot. Akolongit naga, ipeye Ekapolon Akuj Namerikanyer ngakipeyos keng alokwap, alodiyete angolol a Eupurate. Ngitunga a Misiri, kapesi Gilead tasaka ekitoe lo itedekatar! Ekitoe kus daang aliwor pas. Nyikitangalekini esi! Eirasi ngibukui ngileech kus. Eira itwaan daang akigoro kus. Anang asiger apei nache, adakarosi kesi daang aapei. Abunet a ekapolon a Babilonia alobe Nebukadinesa akitijikin Misiri, kesuruor ayong Ekapolon Akuj tama, “Tolimo alorerea a Misiri, alo Migidol ka Mempis ta Taipanes. ‘Tonyoutu tosubakinos. Kainyo kimunyari esi daang akwara. Nyo bo amataror akuj kus nabe Apis? Nyo bo aukoror ngesi na erai akuj namong? Ekapolon Akuj ejukari ngesi.’ Ananganangaar ngasigerea kus adakarosi. Isuruori ipei kech daang niche ebala, ‘Tonyou atipei! Bua apana nawi lotunga yok atobucharos anakwara a emoit!’ “Ekapolon a Misiri lobe Parao, tolimokisi ekiro lokitetet lobe, ‘Ekachalan lo emiekini esaa keng edaun pas.’ Ayong Akuj Namerikanyer arai ekapolon. Ayong arai Akuj na eyari. Eger lo ilengitor Tabor ngimoru luche, kilengite emoru Karimel anam, ikote ngikilinga alo ebunit akitijikin iyong neni. Tosubakinos kitiliwor ngirikon, esi ngitunga a Misiri! Itiliworio Mempis ariet, alaireng na emam itwaan elomit. Ikoni Misiri aite naajokon, na egumit lolingakori lo ebunit alokwap. Tani ngasigerea keng na igiritae apotioketo ngawat ekwaanikin ka ngitak lukanakunak. Ee robo, areasi amatarosi. Nyeweikina kesi ejie. Anang akolongit na eanyuneta naaronok. Epungar Misiri, eruo loger a emun, na aapuunea ajore a ngasigerea a emoit. Eponito nikeng a ngaepe, loger a ngitunga alu itelete ngikito, kinyasut amoni keng, na emam kona epedio, kainyo nyimarun ngasigerea kech, Elalak idwangit ngimases. Esurum ngitunga a Misiri ngileech. Edwang ngitunga lu eponito alokwap kesi. Ayong Ekapolon Akuj alimu nguna.” Akuj Namerikanyer na erai Akuj a Isirael, ebala, “Erirae ayong Amon, akuj a Sebes, aapei ka Misiri, ta ngakujo keng ka ngikapolok. Alemari ayong ekapolon a Misiri ka daang lu igienosi ngesi, atoriko ni eyakasi lu esakete akiar kesi. Atoriko nia ekapolon a Babilonia alo enyaritae Nebukadinesa, ka ngasigerea keng. Ani ekisidi, elomete ngitunga Misiri nabo loger lokolong sek alomitotor. Ayong Ekapolon Akuj alimu nguna.” Ekapolon Akuj alimu ebala, “Ngitunga kang, warasi nyieam, Ngisirael, warasi nyikibul. Kayuuni ayong esi anakwap anaalonan kangina. Ayuuni ngalesea kus anakwap ana eraakatar ngirikon. Ibongunete esi nawi kiboikinos akaalimon. Emam ibore iche iemete esi. Ngitunga kang, warasi nyieam. Kainyo kirukit ayong ka esi. Amunyari ayong ngibukui daang, anakwapea ana kapetakini esi, nakaneni nyakamunyari ayong esi. Karikini ayong esi a erot alo eriyan.” Ani eringa ekapolon a Misiri nyitijikino Gasa, katolimok ayong Ekapolon Akuj ngakiro a Pilistia. Tama, “Kingolik a, ekurupupunito ngakipi alokwap, eleleunete loger a ngakalel. Eburichiarete akwap ka ibore daang ni eyei nakwap, napei alorerea tanang lotunga lu elomito neni. Enyarasi ngitunga ebalasi kingarakin. Ikalouni itwaan daang anakwap lokojokon. Iirarete kesi eruye a ngakejen a ngangolei, ka echale a ngaurukukui ana irito ngangolei, ka eruye a ngakejen a aurukuk. Nyebongorete taapa ni eyakasi ngide kech. Etingi emudekeke ngakan kech. Anang ngirwa lu inyasunere Pilistia. Totuboroe alo Tiro ka Sidon ekengarakinan daang lo eringa idongit. Ayong Ekapolon Akuj amunyari Ngipilisti, daang lu eponito alokwaasea a Kirete. Aluro ngitunga a Gasa. Elilinga ngitunga a Achikelon. Esi lupiyayek a Pilistia, igorosi esi tanang ori? Igorosi esi ibalasi, ‘Akwara a Ekapolon Akuj! Ichumichumi iyong tanang ori? Tobongo nakuroru tourienikin neni kianga!’ Nakaneni ikokini ngesi iangari ai, tarai ainaki Ekapolon Akuj ngesi etich lo esubi? Adungok ayong ngesi atamar kitijik Achikelon ka ngitunga lu elomito lokwaas a anam.” Ngakiro nugu alimuni Akuj Namerikanyer na erai Akuj a Isirael kotere Moab, “Oitiakoi kare ngitunga a Nebo! Enyasun ere kech. Alemar Kiriasaim, aukor awas keng nakaagongon, kisurumae ngitunga keng ngileech. Adaun ekipur a Moab. Alema emoit Echibon nabo etukit akinyasun Moab. Emunyario ere a Madimen. Irisi akwara kesi. Igorosi ngitunga a Oronaim ebalasi, ‘Amoitanut! Nginyas!’ “Enyasun Moab. Kiira ngide igorosi. Kiira akisutusuta kech alorot alo etenere Luis, akigoro na eriabatar alorot alo etenere Oronaim. Ebalasi, ‘Kipungaros! Tamataros toyuunos. Tamataros loger a esikiria a moding alo eyei nariet!’ “Moab, igieno iyong ngikilinga kon ka ebari, nakaneni kidwangio tokona tani iyong. Elosi akuj kon Kemoch nakwap ache, irukorete ka ngikapolok ta ngimurok. Emam ere ebuchar alonyas kangulu. Adipo ka aro, inyasunio. Ayong Ekapolon Akuj alimu nguna. Nak Moab ngabeben topororea. Idongete ngirerea keng eraakasi alaireng. Emam itwaan eringa elomi neni nabo.” ( Kilam itwaan ni nyesubi etich a Ekapolon Akuj a etau keng kadaang! Kilam itwaan ni nyichumi taar!) Tolim Ekapolon Akuj tama, “Iangarit Moab napei kolong a ekiditeu, emam akolongit arikere nakwap ache. Ikoni Moab emuna lo imiekinio tokulau, lo nyebukio alotuo a epei tobukokinae loche. Eringa abobou keng nyilochokino. Eringa akukuny keng ikoni nikolong sek. “Tokona bocha, enangi ngirwa lu amearea ayong ngitunga tobukosi Moab loger a emuna. Ebukorete kesi emuna daang alotuol, sodi tobwanga ngituol kialasi. Sodi kirum Ngimoab ngileech kotere akuj kech na enyaritae Kemoch, loger lokolong erumeta Ngisirael ngileech kotere Besel, akuj na egienosi kesi. Ngimoab, nyo ibalatar esi, ‘Kikileenikinit sua kirai ngikajwok’? Enyasun Moab ka ngirerea keng. Angol ngisorok kech luajokak. Ayong arai Akuj Namerikanyer na arai ekapolon, ngesi alimu nguna. Aapuu esal a Moab. Edikino inyasunio atipei. “Kigoro tosutonokisi kotere ebukut ngolo, esi daang lu idunyatar, lu iyenete ekipur keng. Tamasi, ‘Abil aburo a apolou keng nakaagongon. Abil ebela keng lo ekipur.’ Esi lu ilomito Dibon, totiyaunos ani kirimare, kiboikinos nalup, napua. Eyei ekenyasunan a Moab nege, enyasu ngawasea kus nakaagongok. Esi lu ilomito Aroer, towaa alorot kidarut. Kingita lu amatarosi, tongichutu anikech ngakiro na asubakinosi. Etachunete kesi tamasi, ‘Esurum Moab ngileech kainyo adakar. Kikaloutu, kiuteto. Tolimutu anangolol a Arinon atamar enyasun Moab!’ “Abu eriras lorerea lu eyakasi lomuria, lu enyaritae Olon, ka Yaisa, ka Mepaas, ka Dibon, ka Nebo, ka Bes Dibilasaim, ka Kiriasaim, ka Besigamul, ka Besimeon, ka Kerios ta Bosira. Abu eriras lorerea daang a Moab, lu eloka ka lu eapiyete. Eriar agogongu a Moab. Enyasun apolou keng. Ekapolon Akuj alimu nguna.” Tolim Ekapolon Akuj tama, “Kitamat Moab epurot kirakar, ani kangerio ayong. Ibelobelo Moab analekan keng a ilope, sodi tokianatar ngitunga. Moab kitamu eger lokolong ikianar iyong Ngisirael. Asibit iyong arukito kesi ka ngirukooi a? Toliwor nacha iruoror iyong ngakiro kech kimungumung akou a? “Esi ngitunga lu ilomito Moab, torotokisi alorerea kus. Kapesi toloma nataaba! Kikokisi akuuri na eduki akai keng lokwaas a achukule. Inisana Moab! Eira ayong eger lo eraakatar ngitunga lukenisak, lukewogak taraakas lu iwojosi. Ayong Ekapolon Akuj, ayeni ngiwog kech. Erai akinisa kech aka pas. Nyerubete ngakiro na esubete kesi. Tokona bocha, eute ayong kotere Moab. Egoro kotere ngitunga daang a Moab. Egoro atosutonok kotere ngitunga a Kir Eres. Ee ngitunga a Sibima, kegoror ayong esi, akidwang ngitunga a Yaser. Ere a Sibima, ikoni iyong emusabib lo enangito ngasepukan keng nanam a Amakat, topetara nabo tanangito Yaser. Nakaneni tokona, ageor kon na akamu ka ngamusabib kon, atubokin ekenyasunan. Akiana ka alakara alemar anakwap anaajokon a Moab. Atubo ayong emuna ani echiyeenere. Emam itwaan emuri emuna, kimaritetek. “Ngitunga a Echibon ka Eleale igorosi. Epupio akigoro kech alo Yaas. Epupio alo Soar. Epupio akigoro ngina tani alo Oronaim ta Egilas Chelichiya. Aono tani ingolol ni enyaritae Nimirim. Eratakini ayong ngitunga a Moab tojongoto akipeyore ngakipeyos na inomio ani ilipeeneta ka alemanakin ngakujo kech ngakipeyos. Ayong Ekapolon Akuj alimu nguna. “Egoro ayong atosutonokini kotere Moab ka ngitunga a Kir Eres, loger a itwaan ani ekutakinit ebune kotere eeos lo enukere itwaan, kainyo ibore daang nikolong atingito kesi, adaun. Kesi daang abany ngakies kech ka ngajul a ngabokonya. Adungudunguoto kesi daang ngakan kech, nabo enapit itwaan daang ngiguniae. Alokidiama ngakais a Moab ka ngaroatin na etukuotor ngitunga, akigoro na esutonokinere bon eyei, kainyo abwang ayong Moab loger a akurum ana emam itwaan emisit. Alimu ayong Ekapolon Akuj nguna. Abwanga Moab! Kikaloutu! Eruma Moab ngileech. Aliwor asakatan na ekianatar ngibukui daang lu idunyasi ka ngesi. Ayong Ekapolon Akuj alimu nguna.” Ebala Ekapolon Akuj kona, “Kingolik a, eporuni ebukut loger a egole, kimukok Moab ngabeben. Elemario ngirerea kirumunae ngawasea nakaagongok. Akolongit ngina, ngitai a ngasigerea a Moab, ebuli kikokis etau a aberu ana eriaba esaki akidoun. Inyasunio Moab, nyeringa nabo eliwor ebukut kainyo kangeri ngesi ayong Ekapolon Akuj. Ebuloi, akipany, ka eloit, idarito ngitunga a Moab. Ekapolon Akuj alimu nguna. Itwaan ni esaki akilany ebuloi echakakin nakipany, ani ni edokuni anakipany, ipoki eloit, kainyo ayauni ayong ngakiro nia Moab, ekaru lo iriraare Moab. “Lotorube a Echibon elomarete lu edokinito esakete akimech. Arirau akai a Sion asarae. Anom akim ngikukuorin ka ngaitae a ngimoru, a ngitunga alu eminasi ejie alu enyaritae Ngimoab. Oitiakoi! Abe etioko nginyas ianyu iyong Moab. Amunyar ngitunga lu elipito Kemoch. Kainyo arik talokookon ka tanakookon aliworosi ngirikon. Nakaneni abuuni ayong ebari a Moab nabo, ngirwa lu monan a ekisidi, alimu ayong Ekapolon Akuj. Ikoni eriras a Moab neni. Ayong Ekapolon Akuj alimu nguna.” Ngakiro alimuni Ekapolon Akuj ani a Ngiamon nugu, “Emam Isirael talokookeng a? Ikwa emam ekeruman akwap keng eyei a? Ani nyo emiekineta kesi ngitunga lu ilipito Malikom elomarete Gad? Kimiekis ngitunga ngulu elomete neni. Tokona bocha, kingolik a, eponito ngirwa lu esiirarea ayong Ngiamon lu elomito Raba echale a ejie. Eliwor ere ngolo akatiputipu a asakatan. Inomio ngadakarin keng. Sodi tobua Isirael akwap ani eyakasi lukolong ademarete kesi, alimu ayong Ekapolon Akuj nguna. Kikalou kare Echibon! Kainyo enyasun Ai. Ngaberu a Raba, kikaloutu tosutonokisi! Tanapa ngiguniae kigoro. Tamataros ama ka ama kibilerit. Eyaario akuj kus Malikom nakwap ache, aapei ka ngimurok ta ngikapolok. Nyo iwogatar esi ngitunga lu nyikimunoi? Adaunosi ngikilinga kus. Nyo igienotor esi agogongu kus, ibalasi abe emam itwaan kitijikini. Kingolikisi a, ayauni ayong ebuloi nikus alowaitin kadaang. Imatarosi esi daang. Ematar ipei kus daang esaki ni eyuunor. Engopi itwaan ni echunakini ngasigerea kus nabo. Ani ekisidi abuuni ayong ebari a Amon. Ayong Ekapolon Akuj Namerikanyer alimu nguna.” Ngakiro nugu alimuni Akuj Namerikanyer kotere Edom. “Kengop kolong aosou alo Edom a? Adau atukuoru alotunga alukachwaak a? Adaun kolong aosou daang a? Ngitunga a Dedan, toreas tamataros! Toduka anaburibur! Amunyari ayong ngalesea a Esau, kainyo anang ngirwa lu eriraa ayong kesi. Na eponeta ngikalemak a ngamusabib, imianakinete ngadikidio kidongo lomusabib. Ngikokolak na eponeta nakwaare, elemarete ibore ni iitanito bon. Nakaneni ngalesea a Esau, adema ayong ibore daang. Ewolo wadaang ni edukitotor kesi, tongopea kesi ni eduketa. Amunyar ngitunga a Edom daang. Emam tani ipei kech ni eringa idongit. Kimiekinere ayong ngide kus lukokiok, achoikini ayong kesi. Kimiekisi ngapuseru kus kegienokinosi ayong.” Alimu ayong Ekapolon Akuj kona, “Tani kitamasitere lukolong peetemokino irirao ekopo a anyunyura kang, esibit esi ibucharosi aloriras a? Mam jik, itemokino esi imaasa ekopo ngolo! Ekong ayong alope a ekiro kang abala, ere a Bosira na inyasunere, eliwor ibore nikitubuli, ka ariet. Ekianatar ngitunga, tolimito ekiro keng ilamatar. Ngadakarin na idunyatar ngesi daang, eliworosi asakatan jik.” Atolim atama, “Ngitunga a Edom, aanyu ayong ngakiro ani a Ekapolon Akuj. Amea ngesi itwaan lobukui tolimo tama, tochunakisi ngasigerea wapei. Pot kitijikis esi. Kingolikisi a, kitapalagagi esi Ekapolon Akuj alobukui. Kimenyarete esi ngitunga. Kingal esi ekinis kus. Emam itwaan kikerit esi akiding ngakiro na ibalatar esi kikeritere. Ilomito esi nipakak a ngatabab, itingito aita a emoru. Nakaneni tani kilomito esi kidiama loger a egole, kitiyauni esi Ekapolon Akuj. Ekapolon Akuj alimu nguna.” Tolim Ekapolon Akuj tama, “Nginyas lu epote Edom, erokearosi noi toliwor itwaan daang ni itoruni neni, eriangakin tobul. Eliwor ijotajota kotere ngakiro naaronok a Edom. Esubakin ngakiro napei nguna alo Edom loger lo asubakinotor alo Sodom ka Gomora, ngirwa lu enyasunere kesi ka ngirerea lu edunyatar. Emam itwaan elomi neni nabo. Kingolikisi a, abuni ayong esupunga Ngiedomae atipei anakwap kech, loger a engatuny alo epuduni anamoni a Yorudan tanangu nachokor nakaliban. Ekarikon lo aseuni ayong ngesi epolokini akwap. Ngae kikwaan ka ayong? Ngae kibolo ka ayong? Ekapolon ali ketepegi ayong? Kiira tokona ngakiro na areat ayong kotere Edom, ka ngakiro na asaki ayong asubea ngitunga a ere a Teman. Iriyario tani ngide kech, toriangakin itwaan daang. Na eukoror Edom, emaranikini akwap. Iirario akigoro kech anapas a Akaba. Kingolik a, eremi emoit Bosira ikoni egole lo epetarit ngabeben. Akolongit ngina, ebuli ngasigerea a Edom, kikokis aberu na eriab, esaki akidoun.” Ngakiro nugu alimuni Ekapolon Akuj kotere Damasko. “Ngitunga a ngirerea a Amas ka Aripad, ialolongete toriabas, kainyo eirasi ngakiro naaronok. Ilapi ariaba alokidiama kech loger a anam nakaneni nyiangarete kesi. Epalag ngitunga a Damasko epungarosi ebulit. Eriabasi kesi kitasionos loger a aberu ana esaki akidoun. Ere lo eyenikinitae lokolong aminasi ngitunga keng alakara edong esil. Akolongit ngina, edakakinosi ngisorok keng lorotin a ere, tomunyarae ngasigerea keng daang. Echunyakini ayong ngawasea a Damasko akim. Enomi ayong ngakais a ekapolon Benadad. Ayong Akuj Namerikanyer alimu nguna.” Ngakiro nugu alimuni Ekapolon Akuj kotere ngitunga a Kedar ka ngitela a Asor, nakolong alemari ekapolon Nebukadinesa lo a Babilonia. “Tonyoutu kitijikisi Kedar. Tomunyasi ngitunga lu alo kide! Tolemasi ngieman kech ka ngibaren, ngawarui a ngieman kech ka ngiboro daang lu eyakasi loeman. Torujasi ngikaala kech, tolimokis ngitunga tamasi, ‘Kiriamit esi ebuloi alowaitin kadaang!’ “Ngitunga a Asor, ayong Ekapolon Akuj, kechikichiki esi atamar tamataros nialonan toduka. Kainyo Nebukadinesa ekapolon a Babilonia kitukor esi, eya ngakiro esaki anikus.” Ebala Ekapolon Akuj Ngibabiloniae, “Tonyoutu kitijikisi ebukut lo ibooyi akaalimon emam ibore ichani! Emam ere kech ngidorin ka ngakilori, tamam itwaan iratakinit.” “Engatario ngikaala kech daang todemarae tani ngaatuk daang. Apetari lowaitin daang ngitunga lu eiriete ngitim lua ngikwaasea a ngakies. Ayauni ayong ngakiro naaronok nikech alowaitin kadaang. Aliwor Asor adui a ngikolowoi, eliwor ariet jik. Emam itwaan elomi neni. Emam itwaan itori neni.” Ani napei aliworor Sedekia ekapolon a Yuda, katolimok ayong Akuj Namerikanyer ngakiro a akwap ana enyaritae Elam. Tolim tama, “Kingolikisi a, Ayong Akuj Namerikanyer, abili ngakawa a Elam na itogogongito ngesi. Etukutuni ayong ekuwam nia Elam alowaitin kadaang. Apetari ayong ngitunga keng wadaang. Emam akwap idongi nyenanga ngitunga keng lu edokinito. Etoem ayong ngitunga a Elam ngitunga lu esakete akiar kesi. Ani kona angoea ayong noi, amunyari ayong ngitunga a Elam, atomea ngasigerea kitijwoto kesi daang. Amunyari ayong ngikapolok kech ka ngikarikok, atosipok ekicholong a apolou kang inaa. Nakaneni ani ngirwa lu isidiuno, etabari ayong ngitunga a Elam nabo. Ayong Ekapolon Akuj alimu nguna.” Ngakiro nugu kalimokini ayong Ekapolon Akuj kotere ere a Babilon ka ngitunga keng. “Tolimok ngibukui ngakiro! Kisisa! Kidodiu emachar tolimo! Wara nyiimunon! Alemar Babilon! Abwang akuj keng na enyaritae Mariduk! Ngakujo nasubuna a Babilon esurum ngileech, eroborobaar ngakisikwaanet keng! “Abu ebukut alokwap akitijikin Babilonia, kitiliwo ariet. Ematarosi ngitunga ka ngitieng, emam itwaan elomi inaa.” Ebala Ekapolon Akuj, “Na enangea ngirwa ngulu, epote ngitunga a Isirael ka Yuda igorosi, kasakete ayong, Akuj kech. Ingitakinosi kesi erot lo etenere Sion, inaa ebalasi, ‘Potu emorikin ka Ekapolon Akuj anachamunet anakajik, ana nyikichwangakini.’ “Ikote ngitunga kang ngamesekin na achakasi ngikeyokok kech alomoru. Etubonor kesi alomoru a epei toloto loche, emuriak kesi ni eyei awi. Daang lu iriamete ka kesi, itijikinete. Ebalasi ngimoe kech, ‘Asechakinete Ekapolon Akuj, kotere ngakiro nguna, nyeroko na kisub ngoni. Egienosi kolong taapaakech Ekapolon Akuj, ajoikinit kesi daang ibooyete eraakasi lu emunosi Ekapolon Akuj.’ “Ngitunga a Isirael, tamataros alo Babilonia! Tonyoutu anakwap a Ngibabiloniae! Kingarenikisi loger a ngikora anaanei. Kingolikisi a, echuchuuni ayong ngajorei a ngibukui alukajwok alokwap, emiek kesi kitijikis Babilonia. Erekinosi kitijikis akwap ngina tolemasi. Ikote ngimalea kech ekajwon lokeosean lo nyebonguni a ngakan anikirion. Engatario ngiboro a Ngibabiloniae. Ani ngulu engatarete ngiboro kech, eupete ngiboro. Ayong Ekapolon Akuj alimu nguna.” Ebala Ekapolon Akuj ngitunga a Babilonia, “Ingatarete esi ngiboro a ebukut kang. Ilakara esi imariteteete, ichurosi loger a ngitak alonyia, kori loger a angole ana edwarunito. Nakaneni ere kon lo eyenikinitae, eliwor ibore ni etimoi ka ngileech. Eliwor Babilonia ebukut lo nyeyenikinitae akidwang luche daang. Eliwor ariet na emam ngakipi na eonit deu. Emam itwaan elomi Babilon kotere angoit kang. Imiekinio erai alaireng. Ani itwaan daang ni itoruni neni, eriangakin toliwor ijotajota kotere ngakiro nguna. “Ngikajwok a ngakawa torekinos kitijikis Babilon kiriama. Toguma esi daang Babilon a ngimalea a amod, kainyo kasechaki ngesi ayong Ekapolon Akuj. Tarama elii a ejie awadaang a ere! Ekea Babilon ngakan alojie. Abwang ngawasea keng aukor. Asutorit ayong nia Ngibabiloniae. Tatachak tokona na asubete kesi, tosubea kesi napei asubeta kesi luche. Nyiichamak ngikinyam itakinio nakwap ngina, kori ngamanat elemio anakwap kangina. Itwaan a akwap anache ni elomit neni, eemi ajore a ngasigerea na engaunit, tobong nawi keng.” Ebala Ekapolon Akuj, “Ikote ngitunga a Isirael ngamesekin na iritarete ngingatunyo kialasi. Esiauni kolong ekapolon a Asiria kitijik. Ani erumor tongereb ekapolon Nebukadinesa ngakoyo kech. Kotere ngakiro nguna, ayong Akuj Namerikanyer, na arai Akuj a Isirael, erirae Nebukadinesa ka akwap keng, loger lokolong eriraa ayong ekapolon a Asiria. Abuari ayong Ngisirael nakwap kech. Enyamete akimuj na erupunit alomoru a Karimel ka akwap a Bachan, nabo enyamete ngalemet daang na erupunito anakwap a Epiraim ka Gilead. Ngirwa ngulu, emam akisech emini Isirael, emam aronis emini Yuda, kainyo arimakini ayong lu ajal ayong, emiek idongito. Ayong Ekapolon Akuj alimu nguna.” Ebala Ekapolon Akuj, “Kape kitijik ngitunga a Merasaim ka ngitunga a Pekod. Taar kesi tomunya pil. Tosub ibore daang ni kadungok iyong. Ayong Ekapolon Akuj alimu nguna. Epupio echale a ejie anakwap, apean nginyas luaronok. Edichakini Babilonia akwap daang etia ni etia kiala, nakaneni abwanga tokona akujuk ngina. Ariangakinosi ngibukui daang kotere ngakiro na asubakinosi alo Babilonia. Babilonia, kitopegi iyong ayong, kirum iyong eloit lo alokakini ayong peiyeni iyong. Kianyun iyong kirumun Angaa ayong edula a ngiboro alujiet Ango ayong epud ngiboro lu anyunyurar ayong, kainyo ayong Ekapolon Akuj Namerikanyer, eyei etich lo asaki akisub alo Babilonia. Kitijikisi kesi alowaitin kadaang. Tobwanga ngidulae a ngikinyam keng! Kidilakisi ngiboro lu engatario wapei loger a ngatukioto a ngikinyam. Kinyasutu akwap ngina jik, tongop ibore idongi! Taara ngasigerea kech daang! Tongola kesi kesi loger a ngimongin! Oitiakoi! Abe etioko nginyas aanyut ngitunga a Babilonia! Anang ngirwa lu iriraare kesi! “Topupokisi! Apot lu edokinito alo Babilonia, apot Yerusalem, isisaate ngakiro na atachakinea Ekapolon Akuj na erai Akuj yok, ngakiro na asubeta Ngibabiloniae akai keng. “Tanyarautu lua ngimalea a amod kitijikis Babilon. Tomeasi itwaan daang ni eyeni akiketakin emal a amod. Kiriama ere, nyeebuchar itwaan tani ipei. Tatachakisi daang nakolong asubete kesi. Tosubeta napei kolong asubeta kesi luche, kainyo ketepegi ngesi ayong enisakin, Akuj a Isirael naasegan. Akolongit ngina, edakakinosi ngisorok lorotin a ere. Tomunyarae ngasigerea keng daang. Ayong Ekapolon Akuj alimu nguna. “Babilonia, inisana iyong lokojokon. Kotere ngakiro nguna, ayong Ekapolon Akuj Namerikanyer, kanyoik iyong! Anang tokona akolongit nakeriraa iyong. Nikenisan ilegeuni ibore, tadakar. Engopi itwaan itonyouni. Enokakini ayong akim lorerea keng tomunya daang lu iriamito ngesi.” Ebala Akuj Namerikanyer, “Ngisirael ka ngitunga a Yuda, ichiakiaritae. Ngulu kolong erumunete kesi toriko, iratakinito lokojokon nyesakete alakakin. Nakaneni egogong ekalakunan kech, ekiro keng ngesi Akuj Namerikanyer. Ngesi elope eikini kesi, yau ekisil nakwap. Ani Ngibabiloniae, inu ngichan.” Ebala Ekapolon Akuj, “Nyope eremio akwara Babilonia! Nyope eremio ngitunga keng! Nyope eremio ngikapolok keng ta ngikoosok! Nyope eremio akwara ngikadwarak keng, sodi tarata ngikabangabangae! Nyope eremio ngasigerea keng tomunyarae! Nyope eremio akwara ngangolei ka ngaurukukui kech, ka ngasigerea kech na igiritae a, sodi kikokis ngaberu! Nyope eremio akwara ebari kech daang, sodi tangatarae! Yau akamu nakwap, tooko ngangololin. Kainyo erai akwap a ngakujo anasubuna, na kitubulete Babilonia, ana esikerepikis ngitunga. “Kotere ngakiro nguna, ngitieng a moding ka ngibuin luongora ta ngikaleeso, epete Babilon. Nyeringa nabo ngitunga elomete neni a ngirwa a ngikaalak isidiunosi. Esubakin ngakiro napei nguna alo Babilonia loger lokolong asubakinotor alo Sodom ka Gomora, na enyasunea ayong kesi ka ngirerea lu edunyatar. Emam itwaan eringa elomi neni, nabo emam itwaan itori. Ayong Ekapolon Akuj alimu nguna. “Kingolikisi a, eponito ngitunga alokwap, ebukut loationon ka ngikapolok lukaalak. Eponito ejie anakwap anakalonak. Etingito kesi ngakawa ka ngakwaaras. Emoitaka kesi emam ngisien. Eruosi loger a anam ana ekulae, emeto ngangolei kech. Erekina kesi esakete akitijikin Babilonia. “Eira Ekapolon a Babilonia nguna, ating ngakan keng emudekeke. Ariabakin ngesi aanyu apipilu loger a aberu ana esaki akidoun. “Abuni ayong Ekapolon Akuj atipei esipunga Ngibabiloniae alore kech, loger a engatuny alo elomuni anamoni a Yorudan tanangu nachokor nakaliban. Aseuni ayong itwaan ni asaki topolok ere ngolo, kainyo ngae kikwaanikin ka ayong? Ngae kibolo ka ayong? Ekeyokon ali kaweikini ayong? Tokona bocha, kiira ngakiro na areat ayong Ekapolon Akuj kotere ere a Babilon, ka ngakiro na asaki asubea akwap a Ngibabiloniae. Iteni dir iriyario tani ngide kech, sodi tobul itwaan daang kotere ngakiro nguna. Esaa lo elemarere Babilon, emini eruye loapolon noi lo itamaranikini akwap daang. Iirarete ngibukui luche akigoro keng.” Ebala Ekapolon Akuj kona, “Kingolik a, etukutuni ayong ekuwam lo a nginyas nia Babilonia, ka ngitunga keng. Ameari ngitunga a akwap anache Babilonia, topietasi Babilonia Imiekinete kesi akwap elapat, na eremioto alowaitin kadaang, akolongit na ngichan. Wara ngikagumak nyiiketakis ngakawa kech, kori nyeenapa ngiboro lukigaet. Nyiilakak ngisorok keng! Tomunya ajore keng daang pil! Earakinio kesi lorerea a Babilonia, ewanio topero alorotin. Ayong Akuj Namerikanyer eringa nyengero Isirael ka Yuda, tani kasechakinito kesi ayong Akuj a Isirael naasegan. “Tamataros alo Babilonia! Toyuu itwaan daang akiyar keng! Wara nyikiar kotere akisech a Babilonia. Anang tokona ni atachakinea naaronok, erira ngesi loger lo itemokino. Ekoni Babilonia ekopo lo egolit anakan kang, esirakanari akwap daang epurot. Amaase ngibukui emuna keng kikerepik. Aukor Babilonia atipei enyasun. Kigorotor! Kiwasakisi ekitoe najemei keng, ejok toyei kona engalekinete.” Atamarete ngitunga a akwap anache lu alomito neni, “Kisaki sua akitangalekin Babilonia, nakaneni towout ngajemei keng angalekin. Kimiekisi, tonyoutu atoloto, tolot itwaan daang nakwap keng. Erira Akuj Babilonia niaronon noi, anang eriras keng nadis.” Ebalasi Ngisirael, “Edodiu Ekapolon Akuj atamar emam ibore kisechit ngoni. Potu atolimosi alo Sion. Ngakiro a etich a Ekapolon Akuj ana erai Akuj yok.” Ekurukurok Ekapolon Akuj ngikapolok a Media, ani esakea akinyasun Babilonia. Eger ngolo etachakinea ngesi ngakiro a akai keng ana enyasunio. Ebalasi lu itijikinito, “Kipenasi ngimalea kus a amod! Tolemutu ngaupwala! Kikeasi abendera a ejie toremere ngawasea a Babilon. Kisibaka ngasigerea. Kiwaakisi ngiketeok! Toperutu ngimoe!” Kainyo Ekapolon Akuj areki nabo asubaki, nakolong abala asubea Babilon. Ee, esi lu ilomito nangololin nakaalak, tabarito. Anang esal kus, atubo irukan a akiyar kus. Akuj Namerikanyer ekong a ekiro keng a ilope. Ebala ayauni ngajorei nakaalak etia asepich a emaase, kiremasi kesi ani kidwangeta esi. Asubi Ekapolon Akuj akwap a agogongu keng. Tosubak akwap a aosou keng, sodi kiguro adis a achwaanu keng. Na edungunio ngesi akiroit, torukis ngakipi na eyakasi kidiama adis. Kitonyou eloch anasalunet a akwap. Kisitoru akimilea nakiru, talakak ekuwam anisek egolokino. Ebangaana itwaan daang iwaarit, Irumito ngileech itwaan ni esubi ngakujo nasubuna Irumete ngileech kotere ngakujo nguna, kainyo eraakasi ngakujo nguna ngaka alioko, nyeyarete. Eraakasi kesi ngapasiek, ejoikinit ekianare. Inyasunio na ebunio Ekapolon Akuj akirirare kesi. Kainyo nyikwaan Akuj a Yakobo ka ngakujo nasubuna nguna, ngesi kolong asubuni ibore daang. Nabo aseu ngesi Isirael aliwor ebukut keng a ilope. Akuj Namerikanyer ngesi erai ekiro keng. Ebala Ekapolon Akuj “Babilonia, irai iyong akujuk kang, irai iborosit ni ejie. Ngesi abwangabwangaa ayong ngibukui, ngesi enyasunea ngapolosio. Ngesi abilibilaarea ngangolei ka lu edokinito. Ngesi abilibilaarea ngaurukukui ka ngikameak ngaurukukui nguna. Ngesi anyilinyilaarea ngikiliok ka ngaberu, atonyilinyilaa lumojong ka lusorok, lusapa ta lupesur. Ngesi angolea ngikeyokok ka ngisipaan kech, atongolea ngiketak ka ngirukitos kech, ngesi eriakinea ngikaweikinak a arieng ka ngikarikok a ngasigerea.” Ebala Ekapolon Akuj, “Kingolikinete esi ayong atachakini ani a Babilonia ka ngitunga keng, ngakiro daang naaronok nakolong asubeta kesi Yerusalem. “Babilonia, irai iyong emoru lo inyasuni akwap daang. Kingolik a, ayong Ekapolon Akuj, kanyoik iyong. Kanyoikini ayong iyong, kekokoriuni ayong iyong anakope, ketiliwo emoru lo anomia. Engopi amoru elemunio anikon todukokinere agule a akai. Engopi amoru elemunio anikon todukokinere ngateak a akai. Ikokini iyong jik ariet. Ayong Ekapolon Akuj alimu nguna. “Kikea abendera a ejie! Tokutak aburuch kiirasi ngibukui! Kitonyou ngibukui kitijikis Babilonia! Tanyarau ngapolosio a Ararat, ka Mini ta Achikenas, kitijikis ngesi. Toseu ekarikon a ngasigerea lo eremi ngesi. Toneteu ngangolei loger a asepich a emaase. Kitonyou ngibukui kitijikis Babilonia. Tanyarau ngikapolok a Media, ka ngikarikok kech ka ngikaweikinak a arieng, ta ngasigerea a ngakwapea kadaang ana epolokinito kesi. Emaranikini akwap torikirikok, kainyo eweikinit Ekapolon Akuj ngakiro na esaki asubea Babilonia. Esaki akitiliwor Babilonia alaireng, na emam itwaan elomi. Apalikis ngasigerea a Babilonia ejie. Aliwor ibooyete anawasea kech anakaagongok. Akuriaketa kesi, ekokis ngaberu. Anom akim ngakais kech, Abwangasi ngasua a ngidorin a ere kech. Epeuni itwaan ipei kiriamun ka niche. Bu emeuna epei kiriamun ka loche. Alimokin ekapolon a Babilon atamar abwang ere keng alowaitin kadaang. Alemasi ngimoe ngidoketa a angolol. Echunyakis atiriwae alokwaas a angolol. Abul ngasigerea a Babilonia. Ayong Namerikanyer, na arai Akuj a Isirael abala, ebuni emoit atipei kirira ngitunga a Babilonia, kipuda kesi loger a ngikinyam, alu eyakasi ni iriere.” Epudaari ekapolon a Babilonia Yerusalem, kirika. Echidari ngesi ibore daang kaneni, kidong elapat, kiliko loger lo ilikorea etiengit lokanyaman. Tose nikatoronon kilelebea akook keng, tachaka nipiya. Etamarete ngitunga a Sion, “Ngawat kosi na ewanitae, epaikinio Ngibabiloniae!” Etamarete ngitunga a Yerusalem, “Ngaakot kosi, epaikinio Ngibabiloniae!” Kotere ngakiro nguna, ebala Ekapolon Akuj kona, “Kaikini ayong iyong atatachak na kisubere. Etooni ayong eitanit a Babilonia. Etooni ngangololin keng. Eliwor Babilonia asakatan na etukokina. Achukut a ngikolowoi, ibore ni kitubuli, ka ibore ni ijotajotare, tongop itwaan elomi neni. “Irurumaate Ngibabiloniae loger a ngingatunyo, kingoorata loger a ngitak a ngingatunyo. Ekoe, etingit kesi etereku a akimuj a? Edorokini ayong kesi akimuj nakaalan esimuj, ani erumor etamat epurot kiraka, sodi talakaros. Ejotoorosi ngaju nakajik, nyekenyunete jik. Alimu Ekapolon Akuj nguna. Arikuni ayong kesi loger a ngimesekin aluuchik, tongolae loger a ngimesekin ka ngikora. “Alemar Babilon, ere lokolong epuruunito ngibukui daang. Aliwor tokona lo kitubuli alokiding ngibukui. Aleleki anam Babilon. Aburuchia a ngitoroi alukaruok. Erai ngirerea keng lu kitubulete. Aono akwap deu aliwor ariet. Akwap na emam itwaan elomit, emam tani ekaloton itori. Erirae ayong Bel, akuj a Babilonia, eteleku ngiboro lukokoa. Nyeringa nabo ngibukui erimaate nikeng. Aukorosi ngawasea a Babilon. “Tamataros alo Babilon, ngitunga kang! Toyuun itwaan daang ananyunyura kang anaaronon! Warasi ngitai kus nyiipirisaarosi kori nyieam kotere ngakiro na iirasi. Epetarosi ngakiro ekaru epei ani erumor topetaros nache ekaru loche. Ngakiro a ekurikur alo eyei nakwap, tamarae etijik ekapolon epei loche. “Enangi ngirwa lu eriraa ayong ngakujo nasubuna a Babilonia. Irumete ngileech akwap daang, eario ngitunga keng daang. Sodi adis ka akwap ka ibore daang ni eyei nikech, eeokinete elakara kotere Babilon, kainyo epote ngitunga lu emunyarete Babilon, epote alokwap. Eukorio Babilonia ani aarea Ngisirael, ka ni aarea ngitunga a akwap kadaang.” “Esi lu ibucharosi anakwara! Kapesi, nyiwaa! Tani kiloka esi anawiyei kus, kitamunae ayong Akuj kus. Kitamanasi tani Yerusalem. Abe ibalasi esi, ‘Kititing sua etimoi nabo kisurum ngileech. Kingopik sua kona kikokini, kainyo ngitunga a akwap anache alomasi ni italeuno alokai a Akuj.’ “Tokona bocha, kingolik a, alimu ayong Ekapolon Akuj atamar, enangi ngirwa lu eriraa ayong ngakujo keng nasubuna. Anakwap keng kadaang, ikalounete lu ewanan tokunuas. Tani kedoka Babilon kidiama, todukok awas nakaagongon inaa, ameari ayong ngitunga kinyasut ngesi. Ayong Ekapolon Akuj alimu nguna.” Ebala Ekapolon Akuj, “Topupokisi! Ebunit akigoro ngina alo Babilon! Akigoro a nginyas aluapolok anakwap a Ngibabiloniae. Enyasunit ayong Babilon Esililingi eruye keng loationon. Ekerete ngajorei kech loger a ngitoroi alukaruok, ejiete echalasi lokojokon. Apot kesi akinyasun Babilon, erumun ngasigerea keng, Abilibilaar ngakawa kech. Arai ayong Akuj na erirae naaronok, nakaneni asubakinea Babilon na echamit esubere. Esirakari ngikatukok keng epurot, ka ngikoosok, ka ngikarikok, ta ngikarikok a ngasigerea. Ejotoorosi kesi nakajik nakaneni nyekenyunete jik. Ayong Akuj Namerikanyer alimu nguna. “Alimu ayong Akuj Namerikanyer kona, awas naapolon a Babilon, aukokin nalup. Ani ngidorin keng lukooyak, echunyakin akim. Esubete ngitunga etich pas. Ituburuna kesi kotere ibore ni enomiari akim.” Emeanara a ekapolon Sedekia, anyaritae Seraya lokookeng a Neria, tarai etatait a Maseya. Ekaru loa nguomwon lo araakar Sedekia ekapolon a Yuda, apot Seraya ka ekapolon Sedekia toloto Babilonia. Abu ayong Yeremia esuruor Seraya. Egirak ayong nakitab naga nginyas daang lua Babilonia, ka ngakiro nache daang. Atolimok ayong Seraya atama, “Ani inangi Babilon, echamit isomakini ngitunga ngakiro nugu. Ani erumor kilip kona, ‘Ee Ekapolon Akuj, ilimu iyong atamar inyasuni nege, tongop ibore emini nakwap naga, alotunga ka ngitieng. Eliwor nege ariet jik.’ Ani irumori akisomare akitab naga, toinik namoru kimasa nangolol a Eupurate, sodi tama, ‘Ikokini Babilonia etiyaar neni, nyiikeun nabo jik, kainyo eyauni Ekapolon Akuj nginyas luaronok nikeng.’ ” Esal a ngakiro a Yeremia logo. Araakasi ngikaru a Sedekia ngitomwon-arei ka epei na aliworor ekapolon a Yuda. Toliwor ngesi ekapolon alo Yerusalem a ngikaru a ngitomon ka epei. Anyaritae itiokeng Amutal, nakookeng a Yeremia alo a ere a Libina. Tosechak ekapolon Sedekia Ekapolon Akuj, loger losek asechea apakeng Yeoyakim. Tongoik Ekapolon Akuj ngitunga a Yerusalem ka lua Yuda noi, kitwarak kesi alongaren keng. Tonger Sedekia ekapolon a Babilonia lo anyaritae Nebukadinesa. Akolongit na ngatomon a elap alo a ngitomon a ekaru alo a ngikan-koomwon araakar Sedekia ekapolon, kirukut Nebukadinesa ka ajore keng daang toremo Yerusalem. Toloma kesi nikalapatan ere toduko ngakatiputipui kiriama ere. Kiriama kesi ere tanang ekaru lo a ngitomon ka epei lo araakar Sedekia ekapolon. Akolongit na ngakan-koomwon a elap alo a nguomwon a ekaru kangolo, torirau eron a akoro noi tongop ibore iche enyamio, apon ngawasea a ere tobwangae. Eriamito Ngibabiloniae ere, tani kikokini neni apot ngasigerea daang tosiwa alore nakwaare. Ewapete kesi erot lo elosere mana a ekapolon, kitoro lorot lo imorikinit ngawasea naarei, sodi tamataros lowae a adipo a Yorudan. Nakaneni abu ajore a Ngibabiloniae kiritasi Sedekia, kirumut anaroatin ana eyakasi diyete Yeriko. Apot ngasigerea a Sedekia dang toikis ngesi kaneni. Kirumut kesi ekapolon Sedekia torikosi nia ekapolon Nebukadinesa, alo ayei lore a Ribila nakwap a Amas, kirira Nebukadinesa Sedekia kaneni. Alo Ribila, taar Nebukadinesa talokookeng a Sedekia itee apakech, taar tani ngikatukok a Yuda. Ani erumor topuyok Nebukadinesa ngakonyen a Sedekia, sodi toenae a ngiriko torikoroe Babilon. Kiboi Sedekia alojela alo a Babilon tanang akolongit na atoanea. Akolongit na ngatomon a elap alo a ngikan, a ekaru alo a ngitomon ka ngikan-koomwon alo araakar Nebukadinesa ekapolon a Babilonia, abu Nebusaradan lo arai ekesuruoron a ekapolon tarai ekarikon a ngasigerea, toloma Yerusalem. Kinom ngesi akai a Akuj, ka akai a ekapolon ta ngakais a ngitunga kadaang alu ayenikinitae alo Yerusalem. Tobwanga ngasigerea a Ngibabiloniae ngawasea a ere. Ngitunga lusek edongito, abu Nebusaradan torik Babilonia. Ngitunga ngulu kesi ngikunonoi, ka ngitunga lukolong asiyete toloto Lobabiloniae. Nakaneni abu ngesi kimiek alo Yuda ngitunga ngiche lu eboosit, lu amam ibore kech ayei. Kitusub ngesi ngitunga ngulu etich anamanat a ngimusabib ka ngamanat nache. Tobwangabwangata Ngibabiloniae ngapirio a ngasua ananyangayek ka ngakitoweet na ijukio na ayakasi kai a Akuj, ta atanki a asuat ananyang. Apot kesi yaasi ngasua nanyangayek daang Babilon. Tolemasi kesi tani ngakalobochio nawadet ngalup, ka ngiboro lu ekuron lu itosegere ekeno a Akuj, ka ngiboro lu isutanarere ngataae ka ngatubwae na iwoore ngaakot a ngibaren alu a ngakipeyos, ka ngatubwae na inomere emitina ta ngiboro luche a ngasua ananyangayek daang, lu esubere etich alokai a Akuj. Tolemasi kesi ibore daang ni arai ika egolit, kori akwangat, kesi ngitubwae luuchik, ka ngabelekeke nalemet akim, ka ngatubwae na iwoore ngaakot a ngibaren alu a ngakipeyos, ka ngiboro lu ekuron, ka ngasipet a ataa, ka ngatubwae na inomere emitina ta ngatubwae na idokuunere emuna lo a ngakipeyos. Ngapirio naarei a ngasua ananyangayek nakolong asubuni ekapolon Solomon kotere akai a Akuj, araakasi ngakitoropiet ngaarei, ka ngaurukukui na ijukio, ka atanki naapolon ta ngimongin lutomon ka ngiarei igangito. Apotiok ngiboro ngulu amam kona itemio. Ariyan ngakitoropiet naarei nguna. Arai aoyau a apei kech ngamitae ngakan-kauni, tarai ngamitae 5.3 elukuna. Aororete kesi. Arai alangirir a asuat ngamilimitae 75. Kidiama aropiet daang, ayei apir a asuat ananyang arai aoyau keng ngamitae 2.2, kiriamito ngasua na iriwokina, na etisiritoe a asir ana ikwaan ka ngalam ana asubunitae daang anasuat ananyang. Aloriko a aropiet kadaang, ayakasi ngalam amiat apei. Anasir a apei a ngalam kanguna, atakanete analup ngatomwon-koomwon ka ngakan-kapei. Abu Nebusaradan lo arai ekarikon a ngasigerea toen tani Seraya lo arai emuron loapolon a Akuj, ka Sepania lo arai emuron lo atupit Seraya ta ngikapolok luuchik nguuni lu asubete etich alokai a Akuj. Toriko ngesi alore kangolo itwaan nisek arai ekarikon a ngasigerea, ka ngikesuruorok a ekapolon ngikan-kaarei lu ayakasi lore ta itwaan ni atupit ekarikon a ngasigerea. Itwaan ngini aweikinit ngakiro a ekimar a ngasigerea. Toriko tani ngitunga ngiche ngitomwon-kapei lu ayenikinitae. Toriko Nebusaradan kesi nia ekapolon a Babilonia, alo eyei lore a Ribila, nakwap a Amas. Tolim ekapolon kaneni atamar kibungae kesi ani erumor taarae. Apon ngitunga a Yuda kikokinae erikio neni, kipudoroe anakwap kech. Erai logo ekimar a ngitunga alu erumiari Nebukadinesa eraakasi ngirikon. Ekaru keng lo a ngikan-kaarei araakar ekapolon, kirumia ngirikon ngabunge ngauni ka ngitomwon-arei ka nguuni. Ekaru lo a ngitomon ka ngikan-kauni araakar Nebukadinesa ekapolon, abu kirumia ngirikon ngamiae ngakan-kauni ka ngitomwon-uni ka ngiarei alo Yerusalem. Ani ekaru lo a ngitomwon-uni araakar Nebukadinesa ekapolon, kirumia Nebusaradan ngirikon ngamiae ngakan-kaarei ka ngitomwon-omwon ka ngikan. Ngitunga daang lu erumiario, arai ekimar kech ngabunge ngoomwon ka ngamiae ngakan-kapei. Ekaru lo aliworor Epilimerodak ekapolon a Babilonia, abu ngesi kidodiu ajokis ani a ekapolon a Yuda alo anyaritae Yeoyakin, talachak ngesi alojela. Asubakini ngesi ngakiro nguna akolongit na ngatomwon-arei ka ngakan, a elap alo a ngitomon ka ngiarei adaunet a ngikaru a ngitomwon-uni ka ngikan-kaarei, erumiarere Yeoyakin torikoe. Kisuruor Epelimerodak ngesi niajokon kidodik ngesi arima noi akidwang ngikapolok luche daang lu ainikinitae ka Yeoyakin Babilonia. Apon tachamakinae Yeoyakin ebutori ngiworui lusek aenitere tanap lukeng a ilope. Ngirwa daang, lu ayarea ngesi, toliwor imujeene alomeesa alo emujeenea ekapolon. Akolongit daang, ainanakinio ngesi ngaropiyae na egielea ibore ni esaki, ngirwa daang lu ayarea ngesi. Ekoe, abe asiler ere noi tarai kolong eleleba ngitunga! Ekok tokona apuserut tarai kolong ayenikinitae alobukui! Ekoni kolong akapolon alorerea, aliwor tokona akasuban etich. Igoro ngesi akwaar kiiya, eropiyete ngakiyo iwapito ngamatengen. Ngiminan keng daang, emam tani epei lo isililingi ngesi. Amod ngipaalon keng daang ngesi, Aliworosi daang ngimoe keng. Erumiar ngitunga a Yuda arata ngirikon, aboliare kesi, itusubio etich loationon. Elomito tokona kesi kiding ngibukui, engopikinit ni iangareta. Daang lukolong erisito kesi, aditasi anikaadingan. Igorosi ngirotin lu elosere Sion kainyo emam ngikalotok losukukui lu ilipitere. Esil ngidorin keng daang. Ekunuasi ngimurok keng. Ichanasi ngapesur keng, toriaba ere lokojokon. Engareno tokona ngimoe keng, esikokinosi ngimoe keng, kainyo etaanyu Ekapolon Akuj ngesi ngichan, kotere ngasechesea keng nakaalak. Aloto ngide keng nikalonan, aliworosi ngirikon a ngimoe. Angopia kolong akibuseanu a Yerusalem. Ikote ngikarikok keng ngigetei lu engopikinete nginyia. Elilimiyorito kesi na ipungarotor alotunga alu irisito. Etamu Yerusalem akibuseanu nakolong keng, tokona ngirwa lua aboliaro ka ariaba keng. Ngirwa lu aremioto ngimoe ngesi, emam itwaan abu kingarak. Tokianatar ngimoe keng ngesi, kichurotor aukor keng. Asubi Yerusalem akisech naaronon, kikok ibore niabosan. Daang lukolong arimasi ngesi, aliworosi imenyarito, kainyo engolikis ngesi emuner. Ee robo, ngesi alope ekunua, kijuuru irumito ngileech. Idodiunito ngiworui keng atamar nyitaleuno ngesi. Nakaneni nyekachikina ngesi atamar aanyuni naaronok. Tadakar ngesi lokojokon noi tongop ikesililingan ngesi. Igoronokini ngesi Ekapolon Akuj ebala, “Wae, Ekapolon Akuj, kingolik aboliaro kang, kainyo kedwang ngimoe kang!” Etorwaasi ngimoe ngakan kech, esakete alemar ngiboro a Yerusalem daang lukaalak a ngaropiyae. Engolik ngesi ngibukui ngibukui elomarete kai a Akuj. Ngitunga lukolong etengerit Ekapolon Akuj alomun ni ilipitere ngesi. Ekunuasi ngitunga a Yerusalem daang, esakete ibore ninyamat. Agielasi asir kech taanyuneta akimuj, topwatunotor ngawat kech. Kigoro ere ebala, “Ee Ekapolon Akuj, kingolikinae mono iyong ayong, taanyunga eger lo kemenyaritere ayong.” Ikaloikinit ngesi itwaan daang ebala, “Esi lu itorunito nege, ikwa nyikimisito esi ayong a? Kingolikisi pan keyei itwaan iche, ni aanyu akialolong na ikoni nakang naga. Akialolong naketaanyuni ayong Ekapolon Akuj akolongit a angoit keng anaationon. “Atiyauni ngesi akim alokidiama katonom ayong tanang nakoyo. Katolokak ngesi ayong a eloit katadakak kwap. Ani erumor katoisik ngesi ayong, kemiek erakara apaaran juui. “Emaruni ngesi ngasechesea kang daang, tochunak wapei. Kesiwok, kenua. Kewaak Ekapolon nakan a ngitunga alu nyapedori ayong aweikin. “Anger Ekapolon Akuj ngasigerea nakajwok daang anikang. Achununi ngesi ngasigerea sodi tomunyasi ngisorok kang. Erianyakini ngesi ngitunga kang loger a ngapedur anibore anichiet. “Kotere ngakiro nguna, egoro ayong, elakakinito ngakonyen ngakiyo. Emam itwaan kesililingi. Emam itwaan ketititinyi. Akokian ngide kang, kainyo kedwanga ayong ngimoe kang. “Ebaunit ayong ngakan, nakaneni angop ekengarakinan. Adungu Ekapolon Akuj atamar ngikidunyet kang, eliworosi ngimoe kang. Ee robo, ekok ayong ebose anikech. “Iyookinit Ekapolon Akuj nguna, kainyo anger ayong akiroit keng. Nakaneni topupokisi ngakiro kang esi ngitunga daang. Kingolikisi eger lo kaboliare ayong. Ngisorok kang lusapa ka lupesur, arikor nakwap ache. “Anyarae ayong ngiminan kang, nakaneni kengalata kesi ayong. Ngimurok ka ngikasukou kang, arikinosi lorotin a ere esakete akimuj, topwatunotor ngawat kech. “Wae, Ekapolon Akuj, kingolikinae kare ayong ariaba. Echanakin etau kang, esurur etau kang, kainyo echananer ayong noi. Aar akwara ngitunga alorotin, tani tooma nakais eyei akitu. “Kiira eger lo akunuar ayong, tamam itwaan ni kesililingi. Ngimoe kang daang, eirasi ngakiro a ngichan kang. Alakarosi iirarete atamar, kiinu iyong ayong akitu. Yau akolongit nakolong ilimuni iyong. Toriabakinos kesi dang loger kang. “Kimiek aronis kech daang kileereu alongaren kon. Loger lokisubea iyong ayong kotere ngasechesea kang daang, tosubea kesi dang. Alalaar akunua kang, nabo alilimiyo etau kang.” Kotere angoit keng, emuk Ekapolon Sion a aribu. Emasu ngesi akibuseanu a Isirael anadis, achaku kwap. Nyitamuna ngesi tani akai keng, akolongit na a angoit keng. Wadaang ni alomito ngalesea a Yakobo, enyasuni Ekapolon nyisieno. Kotere anyunyura keng, abwang ngawasea nakaagongok a ngitunga a Yuda. Apolou keng ka ngikarikok keng, atiyau kwap esurum ngileech. Angoi ngesi kilelebun, totubo ajwonu a Isirael daang. Awouni ngesi akingarakin kesi, alongaren ngimoe kech. Arirau ngesi alo Isirael loger a asarae a akim, anom lu eyakasi neni daang. Akudoki akau keng loger a emoit, eketak a akan ana aloteten loger a emoit, taar daang lu enisar Isirael. Tobukun angoit keng Sion loger a akim. Ekok Ekapolon emoit, amunya Ngisirael. Enyasu ngakais a ngikapolok kech. Ani ngawasea kech nakaagongok, etiliwo asakatan. Etalala alotunga a Yuda, akigoro ka asutonokin. Aukori ngesi akai keng, loger a epem alomana. Enyasu nikolong elipeenere ngesi, Atubo ngisukukui ka ngasabatoi alo Sion. Kotere angoit keng naationon, ekota ekapolon ka emuron. Anger Ekapolon ekeno a ngakipeyos keng, nabo aisiki akai keng. Emiekini ngesi emoit eukori ngawasea a ngakais a ngikapolok. Min akimaritetere kai a Ekapolon Akuj, loger a akolongit a esukukuu. Atiakuni Ekapolon Akuj aukor awas a Sion toliwor asakatan. Kigerok ngiwaitin daang esaki atamar kinyasunae. Esigor ngesi ngalaarin ka ngawasea, enyasun kesi aapei. Atiko ngalup ngidorin keng. Abilibilaar ngakito kech. Arik ekapolon ka ngikajakaanak keng nakwapea nache. Emam etal eringa itatamio. Ani ngikadwarak, nyeringa Ekapolon Akuj isurujae. Eboikinosi ngikasukou a Yerusalem kwap ililingete chek. Ewasakis apua nakies kech, ani erumor tanapa ngiguniae. Itasionosi ngapesur a ere kangolo. Abwoto ngakonyen kang kotere akigoro. Esurur etau kang. Ealolongi ayong noi ani amunyarere ngitunga kang. Nabo ariyorosi ngide alorotin a ere. Igoronokinete ngide taitiokech ebalasi, “Nyaani akimuj, nyaani ibore nimatat?” Adakanarosi alorotin ikwa ibore esibit ewanitae, totoka anakan kata itiokech. Wae Yerusalem! Anukiro kalimokini, ngae kesikwaanea iyong? Ekokini kesililingi ai? Wae Yerusalem, elalak nginyas kon etia ngakipi a anam. Ngae epedori akitedekuun iyong? Ngikadwarak kon, irujaate akirujare na erai alioko. Kingal iyong akitatam kech, awout akisileereun akisech kon. Kitooliyosi iyong ngakiro kech na eraakasi alioko. Kikianatar iyong ngitunga daang lu itorito lorot. Imungimungete ngakies kech, kijotojotas kotere Yerusalem ebalasi, “Ere lokolong abeyo ekebusean noi, nabo erai alakara a akwap kadaang logo a?” Kikianatar iyong ngimoe kon daang, inyaiyonorete kimialanakinete ngangajepa, ebalasi, “Kinyasu sua ngesi! Akolongit kolong kidarit sua naga. Kianyunga tokona!” Asubaki Ekapolon Akuj nakolong asaki. Asubaki ngesi nakolong abala asubakini. Kimunya ngesi iyong peidodiunit ngisien, loger lokolong atiakunea a angorot. Esidwang ngimoe kon, kitalaka kesi ani kidwangeta iyong. Ee Yerusalem, kikaloik Ekapolon! Talakak ngakiyo kon loger a angolol, akwaar ka apaaran! Wara nyianga! Wara nyiidopok! Tonyou kigor akwaar kiiya, kigoronok Ekapolon. Tobuk ngakiro alotau kon loger a ngakipi alongaren Ekapolon. Kibak ngesi ngakan kilipak ngide kon. Ngide lu erikinit erogo lorotin daang a ere! Ee Ekapolon Akuj, kingolik a, ngae iche isubea iyong ngakiro nugu? Ekoe, enyamete taito ngide kech lu eraakasi ngika ngakookies kech a? Earakinio ngimurok ka ngikadwarak kai kon a? Lusorok ka lumojong aapei, eperete etoakito anapua a ngirotin. Ngapesur ka lusapa, aar akwara. Iari iyong kesi akolongit na ingoea nyisieno. Inyarauni kolong iyong ngimoe kang, tosub inyaraunit losukukuu, ketubulo ayong alowaitin kadaang. Emam itwaan abu tobuchun akolongit na angoit kon ngina. Taara ngimoe ngide kang lukolong etanuni ayong atominak. Ayong dir aanyu ngichan lua akulit a anyunyura a Akuj. Kejukari ngesi ayong katachakak naribu nakirion meere nakicha. Kitorwaa ngesi akan keng kataram, kebunga apaaran juui. Abuto ngesi akiring ka amuny a akwaan kang. Abilibilaa ngakoyo kang. Kesiriam ngesi ayong kemukok ngiman ka ngichan. Kesiboi ngesi ayong anaribu, loger a ekasian. Kesiriam ngesi ayong awas nyaasi. Kaen a ngiriko aluapotiok. Egorokini ayong Akuj asaki kengarak, nakaneni ewounit ngesi akiirar. Agol erukudi kang a ngamoru, nabo esulugulug ngirotin kang. Kaperunit ngesi ayong loger lo eperunitor ebu etiengit. Ikoni engatuny lo edukit. Keritari ngesi ayong alorot, katonyilinyilia, ani erumor kemiek kaneni. Akudokini ngesi akau keng katogum, kitebeik emal a amod nakwaan kang. Edirakini ngesi lotau kang, ngimalea a amod keng. Aliwor ngitunga daang kakianatar ayong. Kaeotor ngiitesinei apaaran juui karasito. Keleleb ngesi ayong ngiman, ketuup ekitoe lokaaran. Apokopoko ngesi ngikel kang anamoru, kemiek ebelobelo alokuron. Nyeringa etau kang eyeni ibore be ekisil. Kemuriak kolong ayong ibore be alakara. Abala bocha tokona ayong, “Adaun ekipur kang. Adaun tani akigieno kang, Ekapolon Akuj.” Toyen atamar ngichan ka ariaba kang, ikwaan ka ekitoe lokaaran. Etamanari ayong nguna jiik, nakaneni eriaba etau kang. Tarai na etamunea nugu, min akigieno nabo. Nyedaun amina a Ekapolon Akuj. Ee robo, emam ngisien keng esal. Eraakasi ngikitet ataparach daang. Epol amuno keng. Ekapolon Akuj bon asakit ayong, kotere nguna, egienokin ayong ngesi. Ejok Ekapolon Akuj anitwaan kadaang ani igieno ngesi. Ejoikinit itwaan idaruni ekiilingat, kidaru ayuuno a Ekapolon Akuj. Ejoikinit itwaan itatama akiwok eegos eringa esorokana. Na eanyunea ngesi ngichan, ejoikinit iboikin nikeng bon kililing, etitinyikinit. Kijuuru ngesi itiditeuna, ejok toringa akigieno eyei. Ejoikinit ngesi ipotori amatengen kibapae, sodi kiyenyae. Nyikingeri ngoni Ekapolon jik. Tani kisialolong ngesi ngoni, idodiuni ngisien aniyok nabo, itemem ka alalau a amina keng ana nyedaun. Nyemina Ekapolon Akuj aboliar, kori akisialolong ngitunga. Na ipudaare daang lu eenitae alojelae a akwap, na imikere itwaan ibore ni erai ikeng, alongaren Ekapolon Akuj na Epol Noi, na emodere itwaan anitubet ngakiro, nyechamit Ekapolon. Ngae epedori adungun akiroit tosubakin, nyelimuno Ekapolon atamar kikokis neni? Ikwa meere nakituk a Ekapolon Akuj ana Epol Noi, eponitotor naajokak ka naaronok a? Nyo iburaa itwaan tarai eyari, na iriraare kotere ngasechesea keng? Ejoikinit ngoni kitemi elote yok, sodi atobongutu nia Ekapolon Akuj. Atangakisi Akuj na eyei nadis ngitai yok ka akibakin ngakan kibala, “Kisech sua kinger iyong, nakaneni nyerimakina iyong sua. “Ingo iyong lokojokon kirita sua, kiar iyong sua nyisieno. Imukokin iyong edou loapolon, tongop akilip kosi kona epedun tanangu nikon. Kitiliwo iyong sua asakatan ka ekabose alokiding ngibukui. “Kikianatar sua ngimoe kosi daang. Kibiler sua nabo kilokakinitae, abu akitu ka akinyasuno.” Elakakinito ngakonyen kang akaale, ani amunyarere ngitunga kang. Eropiyete ngakiyo anakonyen kang, nyetubosi, nyiangarete jik, tanang Ekapolon Akuj anadis ekienyuuni kwap kitaanyunga. Ealolongi ayong na engolikinea ngakiro na esubere ngaberu a ere kalo. Ngulu karemokino ayong pas, kalokakinito loger a ikeny. Katachakakis kesi ayong nakipany ayari, sodi tobura akituk a akipany a amoru. Kelikosi ayong ngakipi tanang nakou, atama, “Esal kang lo.” Ee Ekapolon Akuj, kekaloik ayong iyong alokwap akipany. Ibu iyong kiira akilip kang. Nyegolo iyong ngaki kon nakekaloikinio. Nakanyaraa, bu iyong diye kang, kitolimok tama, “Nyiiem.” Ee Ekapolon Akuj, kitoik iyong ayong sodi toyuu akiyar kang. Ianyunga iyong naaronok kasubere ayong. Totubokinae ngakiro na itemokino. Ianyunga iyong ngiman a ngimoe kang, ka naaronok katukotor kesi ayong. Iira iyong ngieosio kech lua ngimeny, ka naaronok katukotor kesi ayong. Apaaran juui, nyiangarete ngakituk kech ka ngitamen kech anikang. Akiboikin ka anyoun kech, ayong kaeotor ngiitesinei karasito. Ee Ekapolon Akuj, kirira kesi, itemem ka etich a ngakan kech. Kisiloik kesi ngitai, kilam iyong kesi. Kiwapak ingoikinit, tomunya. Kikisa kesi anakwap. Kengoreaner egolit, kilochokin egolit loasegan! Epetakina asir lowaitin daang a erot. Talokookeng a Sion, ajokak kolong ekote egolit loasegan. Nakaneni etusubun tokona ngamoti nalupe, na eyee itwaan a ngakan! Itanaki tani kolowo ngitak keng, nakaneni ngitunga kang, ekokis ngikaleeso a ariet, emoitanikinito ngide kech. Aoko ngidokolei a ngide kech, ani enyamitor akure. Ilipasi ngide kech akimuj, tongop itwaan einakini. Ngitunga lukolong emujete akimuj naajokon, eriyonokini tokona akoro lorotin. Lukolong etanunio anajako ipunupunosi tokona alokuron. Epolot eriras a ngitunga kang, akidwang tani lokolong a ngitunga a Sodom, lukolong amunyario atipei anakan a Akuj. Ekiuna ngikarikok noi, akwangak akidwang ngakile. Amalimalete ngawat kech loger a ngikam. Ebuseak ngawat kech loger a ngamoru anapusiek-arengak. Apuseaniasi tokona ngireetin kech akidwang ekuron, emam itwaan epedori akiyen alorot. Arinyonokis ngamunyin kech nakoyo, aoko loger a ngakito. Kejok akitu alu aario a akwara akidwang akitu alu ariyo erogo, alu etoakete epali ani angopikinea akimuj. Ngakan a ngaberu ana ngisien, etukulaut ngide kech a ngikulepek, kitiliwosi akimuj kech, kotere nginyas lu apot lotunga kang. Esunyu dir Ekapolon Akuj anyunyura keng. Abuku ngesi angoit keng erirae loger a akim. Enokak ngesi akim alore a Sion, anomia aliwor ekuron. Peanupito ngikapolok a ngibukui, kori peanupito ngitunga a akwap, atamar epedorete ngimoe alomun Yerusalem. Asubakinosi nguna kotere ngasechesea a ngikadwarak a ere, ka aronis a ngimurok keng, alu aarete ngitunga lu atenooko. Kitwapatwapa kesi loger a ngimuduk. Etiliworito ngaakot kesi lupeetaleuno, amam itwaan asaki akitap kesi. Kikilakis ngitunga kesi tamasi, “Kapesi! Nyitaleuno esi. Kapesi! Kapesi! Nyikitap sua.” Apot kesi todokis toliwor ewowooto, Tamasi ngitunga a ngibukui, “Nyeringa kesi kiruki ka ngoni jik.” Ekapolon Akuj alope apeta kesi. Nyemisikini nabo ngakiro kech jik. Apot ngitunga nyiidodikis ngimurok arima, nyeminakina ngikarikok. Aburu ngakonyen yok akienyiarit kidarit akingarakino na angop. Kikienyiarit lobukut lo nyepedori ayuun. Toliworos ngimoe kiperunito ngoni, tongop ngoni kona kilosi alorotin yok. Adauna ngirwa yok, abu tanang esal yok. Apiraka lu kirisito ngoni edwangito tani ngigolei lu eporito. Kirita ngoni tanang lomukur, kitoperut ngoni anariet. Ngolo lo aseuni Akuj, lo erai ngesi kiyarea ngoni, apot kesi kisuruma anapanya kech. Ngolo ngesi lo kibala, “Kiyuuni logo ngoni alobukui.” Talakaros kichurokisi, esi ngitunga a Edom, ka lu ilomito nakwap a Us. Nakaneni eponito naaronok nikus dang. Imatamatakinosi tobutosi ngiboro anawat. Ngitunga a Sion, etemokin eriras kus, nyeringa nabo Ekapolon Akuj kimiekini esi iraakasi ngirikon. Ani esi Ngiedomae, kirirae esi Ekapolon Akuj, iwoluni ngesi ngasechesea kus. Ee Ekapolon Akuj, kitam kare ngakiro na asubakinosi anikosi. Tokienyikinae sua, kingolik ngileech kosi! Eruma ngitunga lugelayek akwap kosi. Kesi elomito nawiyei kosi. Kiliwor sua ngikokiok, emam taapakosi. Aliworosi taitiokosi ngapuseru. Kitachi sua ngakipi na kimasi. Kigieli ngakito nakipoet. Kitusubio ngitichisio loger a ngitieng. Kiburunit nakaneni nyikisiangario. Kibakinit sua Ngimisiri ka ngitunga a Asiria ngakan, ataanyuneta akimuj nakisimwoni. Asechete kolong taapaakosi, nakaneni nyeringa tokona eyarete. Kianyunit sua ngichan kotere ngasechesea kech. Ngikedalak kipolokinito sua. Emam ikayuunan sua anakan kech. Kianyuni sua akimuj ani kijalea akiyar kosi, kainyo ewowooto ngikaarak anariet. Eriraate ngawat kosi loger a akim, ani anomea eron a akoro ngawat. Atikoonor ngaberu kosi alomoru a Sion. Atikoonor ngide lupesur alorerea a Yuda. Amieda ngimoe ngikarikok kosi a ngaunoi. Nyirimae ngikasukou kosi. Itingakinitae ngisorok akiriere ngakiria, Imatamatasi ngisapa ani inuitotor ngakito. Nyeringa ngikasukou ianenete alokitoe kech alokidor a ere. Ajongoto ngisorok aeo. Adaun alakara alotai kosi. Elochokin edonga kosi aliwor akigoro. Asalu akiwolit kosi. Oitiakoi kare! Kibukor chanai ani kisechea! Kotere ngakiro nguna, kiriaba sua ngitai, nabo ariboki ngakonyen, kainyo aliwor emoru a Sion alaireng, ngikolowoi make ewowooto kaneni. Nakaneni iyong Ekapolon Akuj irai ekapolon jik. Nabo erubi apolou kon analesea kadaang. Nyo kimiekinea iyong sua jik? Nyo kichakarea iyong sua ngirwa lukaalak kona? Tobuunae sua nikon, Ee Ekapolon Akuj, sodi atobongunioto! Tobuakinae ekipur kosi lokolong ngorot! Kori robo kinger iyong sua jik? Ikwa kolong nyesaluni angoit kon a? Akolongit na ngakan a elap alo a nguomwon a ekaru alo a ngitomwon-uni, ayei ayong Esekiel lokwaas a angolol a Kebar kirukit ka ngitunga luche lurikon. Abu adis tangaar sodi engolik ayong ngakisingolikinet a Akuj. ( Arai ekaru lo a ngikan napei kolong arikere ekapolon Yeoyakin.) Abu Ekapolon Akuj katolimok ayong akiroit, ayong lo arai emuron keng, lokookeng a Busi, na ayakar Babilonia lokwaas a angolol a Kebar, katotikokin agogongu keng. Ani akienyiari, engolik ekuwam lotiapolon eneteuna alokwap. Engolik edou lotiapolon eriamit akwangis kimileaununi akim alodou. Amalimali akim ngina loger a asuat ananyang. Alokiding ekuwam ngolo, abu engolik ngiborei lu eyarete nguomwon lu ikwaan ka ngitunga, nakaneni ayakasi ipei kech daang ngireetin nguomwon ka ngabeben ngoomwon. Etenara ngakejen kech nabo ekote ngimaagor kech lua emong. Amalimalete kesi loger a asuat ananyang ana ipusitae. Aapei ka ngireetin luomwon ka ngabeben naomwon, ayakasi nabo ipei kech daang ngakan ngoomwon na a ngitunga, akan apei kwap abebenit apei. Apetara ngabeben kech atapap. Arai na erotokinioto, torotokis toten ipei kech daang ngaren nyereasi. Ngiborei lu eyarete ngulu, ayakasi ipei kech daang ngireetin nguomwon lugelagelae, ereet a itwaan ngaren, ereet a engatuny teten, ereet a emong kedieny, ereet a egole naabor. Ekote ngireetin kech neni. Apetara ngabeben ngaarei a ipei kech kadaang atapito ngabeben aniche, sodi tarapa ngabeben nache arei ngawat. Nicha asaki etau kesi toloto, kirukosi daang lowae epei nyerea ngawat, kainyo engoliarit ipei kech daang lowaitin luomwon. Kiding ngiborei lu eyarete ngulu, ayei ibore ni ekwaan ka ngatotol na enokete na alakanakinete ngikatweny lu atubonorosi alokiding ngiborei ngulu. Anokununi akim ngina ka akimileaunun. Ebironorosi ngiborei ngulu ngaren ka akamaluwot atipei loger a akimilea. Esaa lo esemo ayong ngiborei lu eyarete ngulu, abu engolik ngatairio ngoomwon etapito ngalup, eyei apei lokwaas a ipei kech kadaang. Ekwaan ngatairio naomwon daang. Amalimalete kesi loger a amoru ananyang. Angedakina atair apei kiding nache alotooma, topedoreta ngatairio nguna alosit lowaitin luomwon daang nyerea. Aburuchiarito ngakonyen ngakilelei a ngatairio. Nacha erotokinioto ngiborei lu eyarete ngulu, torotokis ngatairio dang. Aloose ngiborei ngulu nicha asaki etau kesi toloto, asubete nabo ngatairio napei kiro nguna, kainyo arikito ngiborei ngulu ngatairio. Toliwor nacha erotokinioto ngiborei lu eyarete ngulu, kori na ewaatar, kori na ikeunotor analup, tosubakis ngatairio dang napei kiro nguna, kainyo ayei etau a ngiborei alu eyarete kangulu natairio. Kidiama ngakies a ngiborei alu eyarete kangulu, ayei atorite nakaliliwan loger a akiyo na aburuchiarit ngakies nguna. Awaasi ngiborei lua ngabeben ngulu alokwap atorite nakaliliwan ngina, itorwaarito ngabeben ngaarei tatapas ka na ibore ani ibakitotor, sodi tarapa ngabeben nache arei ngawat. Ani epororete kesi, eira ayong erue a ngabeben kech. Ekwaan ka erue a anam, ekwaan ka agiro a Akuj Anaationon, ekwaan ka echale a ngasigerea anakaalak. Ani ewaasi kesi, tobilakis ngabeben kech. Ayei etoil lo eruoro alokidiama atorite na ayei kidiama kech, ani ewaasi kesi, tobilakis ngabeben kech. Kidiama atorite ngina, ayei ibore ni ekoni ekicholong a apolou lo asubunitae anamoru anapusiek-arengak. Ebooyi ibore ni ekwaan ka itwaan alokicholong kangolo. Amalimali itwaan ngini loger a asuat ananyang alokiding akim. Emaunit wadaang loger a akicha anakaalan ana eyakasi ngajul napalem a alokakinet daang. Arai ibore ngini akwangis naakwaan kea na idodiunit ayakau a Ekapolon Akuj. Na engolikinea ayong nguna, abu atadakakin kwap atodo aloreet. Sodi eira etoil ebala, “Itwaan, tonyou towo. Asaki ayong akisuruor iyong.” Ani kesuruorikini ngesi ayong, tolom etau a Akuj nikang ketowo ayong, torubak ngesi kesuruori ayong ebala, “Itwaan, kamearit ayong iyong nia Ngisirael. Kangerito kesi ayong, nabo eringa ichwanganakinete ngakiro kang tani tokona, loger lokolong kata apaakech. Ichanaka kesi nyakakerito ayong. Kamearit ayong iyong tolimok kesi ngakiro nguna alimokini ayong Ekapolon lo arai Ekapolon Akuj kesi. Ngitunga lukechanak ngulu, ani kiirasi kesi ngakiro kon kori pekiirasi, eyenunete cha kesi atamar ayei ekadwaran kiding kech. “Nakaneni iyong itwaan, nyejoikinit iemi kesi kori ngakiro nacha elimunete. Tani kiriam iyong ngirega ka ngiikwa, kori tosub kori ibooyi alokiding ngikuutanea, nyiem ngakiro kech, kori ngireetin kech, kainyo eraakasi kesi ngitunga a awi anakechanan. Ilimokini iyong kesi ngakiro daang nakalimokini ayong iyong, erai kiirasi kori kemam, emam ngakiro. Toyen atamar ichanaka kesi. “Nakaneni ani eliwor iyong itwaan, topupok ngakiro nakalimokini. Nyiichananer iyong dang loger kech. Tangaam tanyam ibore nicha kainakini ayong iyong.” Ani akienyiari ayong, engolik akan na atingit akitab ibaunitae nikang. Egiritae akitab ngina. Tanganya ngesi akitab ngina alongaren kang. Egiritae ewae lo alongaren ka lo aabor akigoro ka akialolong, ka akuutere ta ariaba. Tolim Akuj tama, “Itwaan, tanyam ibore ni kiinakinio, tanyam akitab naga, sodi tolot kisuruor Ngisirael.” Abu ayong atangaam, kainak ngesi akitab atanyam. Tolim ngesi tama, “Itwaan, tanyam akitab nakainak ayong iyong naga, kilelebik nakook kon.” Atanyam ayong, abob loger a akimiet a ao. Ani erumor katolimok Akuj ayong tama, “Itwaan, kape nia Ngisirael tolimok ngakiro nacha kalimokini ayong iyong. Nyakamearit ayong iyong lobukui lu ianete angajep naparing, kori nakaagongon, pearai kamearit nia Ngisirael. Nyakamearit lobukui lukaalak lu ianete angajep naparing na nyiyeni iyong. Arai katomearite lotunga lu ikote ngulu, kiirarito kesi ngakiro kon. Nakaneni nyiirarete Ngisirael ngakiro kon, kainyo nyesakete akiirar tani nakang. Ichanaka kesi etioko ngitai. Ketiliwori tokona ayong iyong lokechanan nabo lo itiono loger kech. Ketirokini ayong iyong loger a ataaba ana nyingunyakin, ketogogong loger a alumas. Nyiem kesi kori wara ngakonyen kech nyikitubul iyong kainyo eraakasi kesi ngitunga lukechanak.” Torubak Akuj iruoro ebala, “Itwaan, todeta ngaki kiira ngakiro nakalimokini ayong iyong daang, sodi kirichak alotau. Ani erumor tolot lotunga kon lu eraakasi ngirikon anakwap anache, tolimok ngakiro na esuruori ayong Ekapolon lo arai Ekapolon Akuj kesi, nyekachitae erai kiirasi kori kemam.” Ani erumor kekeu ayong etau a Akuj kidiama, eira etoil loapolon egirokini loger a arikirik a akwap, tama, “Kipuroe apolou a Ekapolon Akuj anadis!” Ikwa kerai etoil lo agiro loger a arikirik a akwap eka ngiborei alu eyarete esaa lo etapatar ngabeben kech ka agiro a ngatairio ana ayakasi lokwaasea kech. Kekeu ayong etau kayaa nikalonan. Atorotok ayong kanomito ngakiro etau, nakaneni katotikokin ayong agogongu a Ekapolon Akuj niationon. Atanangu ayong lotunga lu eraakasi ngirikon lu alomito Tel Abib lokwaas a angolol a Kebar. Eruko ayong ka kesi a ngirwa a ngikan-kaarei, elikorit etau kotere ngakiro nakolong engolikini ka na eirari. Adaunet a ngirwa a ngikan-kaarei, katolimok Ekapolon Akuj ayong akiroit tama, “Itwaan, ketiliwo ayong iyong eketeon a Ngisirael. Tolimonok kesi ngakichikichiket daang na itorunete nakituk kang. Ani kalimok ayong itwaan niaronon atamar etoani, sodi nyiikilak iyong ngesi tapalikinea aronis keng toyuunor, etoani itwaan ngini anaronis keng, nakaneni iyong ngesi kapaikini ayong akitu keng. Pearai ani kikilak iyong itwaan niaronon towou ngesi areeun anaronis kori alorot keng aloaronon, etoani ngesi anaronis keng, nakaneni iyuun iyong. “Ani keisiki itwaan ni etenoono ateneanut kisiak akisub ngakiro naaronok, sodi atolokak ayong ngesi nakiro naaronok, ani pekikilak iyong ngesi, etoani kotere akisech keng. Nyetamuni ayong ngakiro naajokak nakolong asubi ngesi. Nakaneni kapaikini ayong iyong akitu keng. Kaneni dang, ani kikilak iyong itwaan ni etenoono atamar nyeesech, sodi kiira ngesi, eyari ngesi dir kainyo eira ngakiro na ekilakinere, nabo iyuun iyong.” Katotikokin ayong agogongu a Ekapolon Akuj niationon, katolimok ayong tama, “Tonyou, tolot nadipo, kesuruori ayong iyong kaina.” Sodi atonyou ayong atolot nadipo. Oitiakoi! Engolik ayong akwangis a Ekapolon Akuj, loger losek engolikinitor alokwaas a angolol a Kebar. Atadakakin ayong kwap atodo aloreet. Tolomu etau a Akuj nikang, ketonyou atowo. Katolimok ngesi ayong tama, “Kape togolokin kai kon. Iyong itwaan, kienio iyong a ngaunoi nyiipedo alosit alokiding ngitunga. Erumeikini ayong angajep kon nangirit na alokidiama, sodi tokinimaner iyong tongop kona ikilakini kesi, kainyo eraakasi kesi ngitunga lukechanak. Ani ekisidi abuni ayong akisuruor iyong, angaari ayong akituk kon, tolimok iyong kesi kona, ‘Ebala Ekapolon lo erai Ekapolon Akuj ngini iirari, kimiekisi kiira. Ngini ewouni akiirar, kimiekisi towou, kainyo eraakasi kesi ngitunga lukechanak.’ ” Katolimok Akuj ayong tama, “Itwaan, tolem ematapar kiwaak ngaren kon. Kigerok ere a Yerusalem. Kidodiu atamar iriamitae ani igerokinio ngapanya, ka ngakatiputipui, ka ngadakarin ta ngasua naukonorete kiriama ere. Tolem asuat nadapal kitowo alokiding kon ka ere. Kingolia lowae lo a ere alo iriamitae. Iyong ngesi iriamit ere. Eraakasi nguna emachar lo edodiun ani a Ngisirael. “Ani erumor kinapakin a esiep kon alo alokedieny. Edokokini ayong eriras a Isirael kidiama kon. Ngirwa ngulu daang, lu iperio iyong kaneni, idaki iyong eriras kech. Katiakakinit ngirwa ngamiae ngauni ka ngitomwon-koomwon, lu eriyan ka ekimar a ngikaru a eriras kech. Ngirwa ngulu daang idaki iyong eriras kech. Ani edaun ngirwa ngulu, inapakin iyong nabo, a esiep kon alo aloteten, tadak eriras a ngitunga a Yuda. Katiakakini ayong iyong ngirwa ngitomwon-omwon, akolongit apei lokaru epei a eriras kech. “Tokienyia lowae lo iriamitere Yerusalem, kitorwaa akan na emam ibore eyei, sodi todwar ngakiro naaronok kotere Yerusalem. Kingolik a, kaeni ayong iyong a ngaunoi, sodi nyiibeloonor iyong alosiep a epei kinapakin aloche, tanang edaun ngirwa lu iriamitere Yerusalem. “Tolem tokona ngakanoi, ka erau, ka ngimare, ka auk a ngimare, ka ngimomwa ta ngakima. Kimorimorik daang kidorok ngamugati. Akimuj ngina ngesi inyami iyong ngirwa ngamiae ngauni ka ngitomwon-koomwon lu iperio iyong a esiep. Akolongit apei, kitemokinio iyong ngamugati ngagiramea ngamiae ngaarei ka ngatomwon-uni, itemokin akimuj ngina tanang akolongit nache. Itemio tani ngakipi na imasi iyong. Imasi iyong ngikopoi ngiarei akolongit apei. Inokakini iyong akim a ngachin a ngitunga kitaatanea ngamugati iteete ngitunga, ani erumor tanyam.” Tolim Ekapolon Akuj tama, “Idodiunito ngakiro nguna eger lo moi enyameta Ngisirael akimuj na italeo akinyam, anakwapea ana apetari ayong kesi.” Sodi atatachu ayong atama, “Wae Ekapolon lo irai Ekapolon Akuj! Nyinyasuna ayong akwaan kang nakanuan. Napei alokiditeu nyenyama ayong jik akiring a ibarasit ani etoani bon kori ani earete ngitieng a moding. Nyenyama ayong nakanuan akimuj na nyitaleunitoe.” Abu Akuj tama, “Kasio robo. Kemiekini ayong iyong kinokak akim a ngawar a ngaatuk, meere a ngachin a ngitunga, sodi kitaatanea ngamugati.” Katolimok Akuj ayong nabo tama, “Itwaan, kingolik a, atubori ayong akimuj alo Yerusalem. Enyamete kesi akimuj na itemitoe niti eemito, sodi tamata ngakipi na idokio niti ichanasi. Edaun akimuj kech ka ngakipi. Ejalunosi kesi tolilimiyosi kotere ngasechesea kech.” Tolim Ekapolon Akuj tama, “Itwaan, tolem ekileng lokakwanan, kitiliwo ebanyet tabanyarea akou kon, ka abokony ta ngitim kon daang. Ani erumor kitem ngitim kon a ngaratilio sodi totiak ngatiaket ngauni. Kinom atiaket apei alokiding ere, akolongit na edaunor akiriamit ere. Tolem atiaket apei kirimio ere anikalapatan itubonori a ekileng. Kialak atiaket nache lokuwam, esiwapak ayong ekileng kang. Kideu ngitim ngidikidio toinik lochilet a eworu kon. Tolem nabo ngidikidio alotim kangulu tachakak nakim kimiek tonom akim. Epetar akim anikech topetakin nakwap daang a Isirael.” Tolim Ekapolon lo erai Ekapolon Akuj tama, “Kingolik Yerusalem, ewaakinit ayong ngesi kiding ngakwapea daang, kiriama ngakwapea nache daang ngesi. Nakaneni abu Yerusalem tonger ngakitatamet kang nikaronon noi akidwang ngakwapea nache daang, tonger ngitalio kang noi akidwang ngakwapea na iriamito ngesi, towou akiwap ngakitatamet kang ka ngitalio kang. Tokona bocha Yerusalem, alimu ayong Ekapolon lo erai Ekapolon Akuj atamar, kona imoitanea iyong noi akidwang ngibukui luche lu kiriamito iyong, nabo iwou akiwap ngitalio ka ngakitatamet kang, nakaneni ibu kiwap ngitalio a ngibukui alu kiriamito iyong, ayong Ekapolon lo arai Ekapolon Akuj kalimok iyong atamar kanyoikinit ayong iyong. Kerirae ayong iyong ani iteeto ngibukui daang. Kotere ngakiro na aremokino ayong daang na isubi iyong, kerirae ayong iyong a eriras alo nyirirakina ayong nakanuan, nabo nyabongokini akirirare kongina. Kotere nguna, enyamete ngikauriak ngide kech nabo enyamete ngide ngikauriak kech. Kerirae ayong esi, nabo lupiyayek apetari ayong lowaitin daang a akwap. “Tokona bocha, kona araakar ayong Akuj na ayari, akiroit kang a Ekapolon alo arai Ekapolon Akuj. Kona inyasunea iyong akai kang a ngakiro anaaronok kikadakinete, kangeri ayong iyong emam ngisien. Atiaket apei a ngitunga kon, earete ngidekesinei luaronok ka akoro. Etoanikini atiaket apei lojie, ani atiaket nache, apetari ayong lowaitin daang a akwap erita a akwara. “Edaikin anyunyura kang ka angoit nikon loger ngolo, etoyon angoit kang anikon tama etau chuu. Toyena kesi atamar ayong Ekapolon Akuj engolik niaronon ani nyeraakatar kesi ngitunga lu emunoi. Ani eya nguna, ketiliwori ayong iyong Yerusalem alaireng, toliwor ngitunga daang lu itorunete neni, lu eponito anakwapea ana iriamito, toliwor kikianatar. “Yerusalem, na angoea ayong katonyunyurikin iyong, kitepenete iyong ngibukui daang lu kiriamito, kimenyasi. Itubulete ngakiro kon kesi nabo kikianatar kesi iyong. Atubori ayong akimuj kon, kitanyam akoro. Kipipilikini iyong akoro loger a ngimalea a amod alukakwanak alu eraakasi ngikaarak iyong. Kainuni ayong iyong akoro ka ngibuin lu earete ngide kon. Ayauni ngidekesinei ka akitu ta ejie kitaar iyong. Ayong Ekapolon Akuj alimu nguna.” Katolimok Ekapolon Akuj ayong akiroit tama, “Itwaan, tokienyia lomoru a Isirael todwar ngakiro nugu anikech. Tolimok ngimoru a Isirael atamar kiirasi ngakiro a Ekapolon alo erai Ekapolon Akuj. Kiirasi ngakiro na asaki ayong Ekapolon lo arai Ekapolon Akuj alimokin ngimoru ka ngimukur, ka ngachukulei ta ngadipoe. Ameuni ayong akwara kinyasu ni ilipitotor ngitunga ngakujo nasubuna. Erimaunosi ngikenoi kus a ngakipeyos, tobwangae lu inomere emitina. Ngawat a ngitunga kadaang alu earakinio neni, echakakinio ngaren ngakujo kus. Enapakini ayong ngawat a Ngisirael alu etoakete ngaren ngakujo kech nasubuna. Ealari ayong ngakoyo kech esiriam ngikenoi a ngakipeyos. Inyasunio ngirerea lu elomete Ngisirael daang, tobwangabwangaarae ngikenoi kech lu ipeyonokinioro ngakujo nasubuna sodi kidongioto ngikenoi a ngakujo kech anasubuna esil, kinyasuna. Eyatario ngikenoi kech lukinomet emitina, tongopia ibore daang nikolong asubunete kesi. Etoakete ngitunga kus awadaang, ani lupiyayek, eyenunete atamar ayong arai Ekapolon Akuj. “Tani ikoni neni, ngirwa lu ialarotor esi lobukui, epete ngiche kus lu ebuchunosi alojie, emiekini ayong ngulu eyarete. Toliwor epewae kus lu epuunosi alojie, eyakasi lobukui luche, lukolong arikio kesi, ketamunete ayong. Ngirwa ngulu, atobilite ayong ngitai kech lu ebatarosi katoisikis ayong, kikokis ngimuduk, kibelos kilipa ngakujo nasubuna. Ekadanakinosi kesi kotere ngakiro naaronok daang asubete kesi. Eyenunete kesi atamar ayong arai Ekapolon Akuj. Nyalimunit ayong pas atamar asubea kesi ngakiro naaronok nugu.” Ebala Ekapolon lo erai Ekapolon Akuj kona, “Taram ngakan! Topet ngalup a akeju! Kikalou tama, ‘Wae!’ Kotere ngakiro daang naaronok ka nakikadakinete na asubakis Ngisirael. Eari kesi ejie, ka akoro ta ngidekesinei. Ngini elona, edeakakin totoan. Ngini eapi, earakinio lojie, ani ngini epuun, taar akoro. Ekokini ayong adaikini angoit kang nikech neni. Eperete ngawat kech nakatoak ka ngakujo kech nasubuna, kiriama ngikenoi a ngakipeyos, pena lokenoi lu ilipitere ngakujo nasubuna ani ikeuna, ka kidiama ngimukur, ka naitae a ngimoru, kwap ekitoe loaliban ta ngichokei luapolok daang ta wadaang nikolong epeyonokinioto kesi ngakujo kech nasubuna. Sodi toyen itwaan daang atamar ayong arai Ekapolon Akuj. Ee robo, enyasuni ayong akwap kech. Etiliwori ayong akwap kech alaireng napei anariet ana alokuju tanang kwap lore a Ribila. Emam ni elomito Ngisirael ni ebuchar. Sodi toyen itwaan daang atamar ayong arai Ekapolon Akuj.” Katolimok Ekapolon Akuj ayong akiroit tama, “Iyong itwaan, alimokinit ayong Ekapolon lo erai Ekapolon Akuj akwap a Isirael kona: Anang esal! Esal a akwap kadaang logo! “Isirael, anang tokona esal. Ingolikinete tokona ationis a angoit kang, kainyo kerirae ayong esi kotere na isubete. Nabo kerirae ayong esi kotere ngakiro kus daang nakikadakinete. Nyikijaluni esi akongu kang kori nyikisieniyete esi ayong. Nakaneni kerirae ayong esi kotere eboyor kus, keringa ngakiro nakikadakinete eyakasi nikus. Ngesi iyenuneta esi atamar ayong arai Ekapolon Akuj.” Ebala Ekapolon lo erai Ekapolon Akuj kona, “Epote naaronok etupasi! Ayoro, adolut! Adolu esal! Adolu esal! Ayoro, adolu! Esi ngitunga a akwap kana, abu amunyaro kus! Anang akolongit. Ee robo, anang akolongit a ekurikur, meere akolongit na imariteteere a alakara alokidiama ngimoru. “Anang tokona ni kabukokinea esi anyunyura kang, kesunyak angoit kang, atotub ngakiro itemem ka eboyor kus. Kerirae ayong esi kotere ngakiro kus daang nakikadakinete. Nyikijaluni esi akongu kang kori nyikisieniyete esi ayong. Nakaneni kerirae ayong esi kotere eboyor kus, eringa ngakiro nakikadakinete eyakasi nikus. Ngesi iyenuneta esi atamar ayong arai Ekapolon Akuj, nakarami esi.” Ayoro, adolu akolongit na kimunyarere esi! Amin amoitanut wadaang! Akulau ekinis. Ariku amoitanut aronis. Emam tani ipei kus ni idongi, kori ngiboro kus lukaalak lu idiasitae, kori ebari kus. Emam itwaan anikus eringa eanyuni arimatoi kori ekipur. “Anang akolongit. Ee robo, aapuu akolongit na nyelakaror ekagielan kori ekagielaran, kainyo etikokin kesi daang anyunyura kang. Nyebuuni ekagielaran ibore ni agiela, tani kidong ngesi eyari, kainyo etikokin anyunyura kang kesi daang. Kotere nguna, nyebuunio ibore nisek agielari ngesi. Kotere aronis ngina, eyuun kainyo atikokin anyunyura kang itwaan daang. Erukini aburuch kitonyou ngitunga daang, nakaneni emam tani ipei ni elosi lojie, kainyo etikokin anyunyura kang ngitunga daang. “Eyei ejie nikalapatan, toyei edeke ka akoro tooma ere. Itwaan daang ni eyei nikalapatan a ere, earakinio lojie, ani itwaan daang ni eyei tooma ere, emunyari edeke ka akoro. Ani keyakasi ngitunga epuun, ematarosi lomoru loger a ngakurio ana eemito ngadipoe. Kigor itwaan daang kotere aronis keng. Elilimiyorete ngakan a ngitunga kadaang, tamarana ngakungin. Enapete kesi ngiguniae, ebulit noi. Ebanyario ngakies kech, kiruma kesi daang ngileech. Imasakinete kesi ngakwangae kech lorotin, kikok egolit kech asakatan. Nyeyuunete kesi ngakwangae kech ka egolit akolongit na abukunio ayong Ekapolon Akuj anyunyura kang. Nyimwokete kesi kori nyilelebikinete ngakwangae na egolit nakookies kech, kainyo ngiboro ngulu kolong elomakinete kesi naronis. Enisatar kolong kesi asir kech pas, nakaneni tosubeta ngakujo kech nakikadakinete ka ngiboro lua ngileech. Ngakiro nguna etiliworea ayong ngiboro ngulu daang lu inyasuna anikech. “Ewaakini ayong ebarit kech nakan a ngitunga a ngakwapea anache tangatasi. Eremete ngirukooi ebari kech kinyasut. Engoliari ayong wache sodi kinyasuneta kesi akai kang. Ebwangete ngirukooi tolomasi kinyasut. “Echoliakini ayong ibore daang. Elelebun akitu nakwap, elelebun amoitanut lorerea. Ayauni ayong ngibukui luaronok noi tolemasi ngawiyei kus. Atubori ayong ekinis a ngitunga kus alu a ngikilinga, kinyasunae ni ilipeeneta kesi. Na enometa kesi ngakiro, tasaka ekisil nakaneni nyeanyunete. Epote ngakiro naaronok kidokokinos nakiro nache naaronok. Ebuni akitu naaronon, ani eringa bu nache. Imaimayete esi ngikadwarak kitolimokineta ngakiro na aanyut. Engopikinete ngimurok a Akuj ngitalio itatamete ngitunga. Engopikinete ngikasukou ngakiro erikinioto ngitunga. Ikalouni ekapolon tosutonok, elungakin ekatukon, ebuli ngitunga tamaranikis. Kasubea ayong esi daang na isubeta esi luche. Katubokini ngakiro loger lo itubonokineta esi luche. Kidodikinete esi nguna atamar arai ayong Ekapolon Akuj.” Akolongit na ngakan a elap alo a ngikan-kapei, ekaru lo a ngikan-kapei lo kieniaritere sua nakwap nache, kibooyi ayong ka ngikasukou a Yuda alokai kang. Atipei, abu agogongu a Ekapolon alo erai Ekapolon Akuj katotikokin ayong. Ani engoliari, ataanyunga akisingolikinet a ibore ani ikwaan ka itwaan. Ewae lo alokwap lo esibit aabor, ekoni akim. Ewae lo alokidiama a akwaan keng napei anaabor, akwaikwai loger a asuat ananyang. Abu ngesi kitorwaa ibore ni ekoni akan torwakin ngitim kang. Anakisingolikinet kangina, abu etau a Akuj kekeu ayong kidiama, kiding adis ka ngalup, sodi kayaa Yerusalem anakisingolikinet a Akuj. Kelomak ngesi ayong lokidor lo alotooma lo eteni lowae lo alokwap akai a Akuj, ni ayei akuj nasubuna na akadakinit Akuj. Engolik ayong akwangis a Akuj a Isirael eyei neni, akwangis nasek engolikinit ayong anangolol a Kebar. Katolimok Akuj ayong tama, “Itwaan, tokienyia kwap.” Ani akienyiari, engolik akuj nasubuna na akadakinit Akuj esipo alodiyete ekeno a ngakipeyos, ani elomunere lokidor. Katolimok Akuj ayong tama, “Itwaan, ingolik ba ngakiro na esubete kesi? Esubete Ngisirael ngakiro naaronok ketwarakinete ayong alokai kang ana italeuno! Nakaneni ingolikini iyong ngache naaronok noi.” Ani erumor kayaa lokidor a alaar ana anikalapatan. Ani akienyiari, engolik nikoororon anawas. Tolim ngesi tama, “Itwaan, toped awas.” Atoped ayong awas, atoriam ekidor. Katolimok tama, “Toloma kingolik ngakiro naaronok nakikadakinete na esubete kesi kaneni.” Sodi atoloma ayong engolik. Atapakinitae lowaitin a akai ngitorubei a ngimunio ka ngitieng luche lu etaleo akinyam, lu elipito Ngisirael. Ayakasi neni ngikarikok a Ngisirael ngitomwon-kaarei. Ayei tani Yaasania lokookeng a Chapan. Atingit ipei kech atartar nakinomet emitina, todirisite apuru a emitina kidiama. Katolimok Akuj ayong tama, “Itwaan, ingolik ba ngakiro na esubete ngikarikok a Ngisirael anaribu? Ilipito daang alokai ana ileleba ngakisikwaanet. Abe ebalasi, ‘Nyikitee Ekapolon Akuj ngoni! Aisiki ngesi akwap.’ ” Ani erumor katolimok Ekapolon Akuj ayong tama, “Ingolikini iyong kesi esubete naaronok noi akidwang nguna.” Sodi kayaa ngesi ayong lokidor lo alokwap akai a Akuj, engolik ngaberu igorosi esutonokinete kotere akitu a akuj anabe Tamus. Katolimok ngesi ayong tama, “Itwaan, ingolik ba nguna? Eringa! Ingolikini iyong ngakiro naaronok noi akidwang nugu.” Sodi kayaa ngesi ayong nalaar na alotooma akai a Akuj. Diyete ekidor a akai, kiding ekeno a ngakipeyos ka ni itoreeneo, ayakasi ngikiliok ngitomwon-arei ka ngikan. Ebongokinito kesi akai ngakawa kech, kijuuruyete ingoliarito kide, ilipito akolong. Katolimok Ekapolon Akuj ayong tama, “Itwaan, ingolik ba nguna? Ebalasi ngitunga lua Yuda lugu kori epataka ngakiro daang naaronok esubete kesi kanege ka ekurikur lo apetakis nakwap a? Erubakinito kesi ketongoito ayong noi. Kingolik eger lo ketililieta kesi ayong noi. Kotere ngakiro nguna etikokin kesi anyunyura kang niaronon noi. Nyalakakini ayong kesi kori nyekesieniyete. Tani kegoronokis kesi ayong kesijika iremasi, nyeirari ayong ngakiro kech.” Ani erumor eira ayong Akuj iremari ebala, “Taapuutu esi lu iriraate ere. Potu itingito ngiboro kus luaret.” Engolik ngitunga ngikan-kapei epote alowae alo a ekidor alo alokidiama, alo ingoliarit kwap, etingit itwaan daang iborosit keng niaret anakan. Arukito ka itwaan ni anapit eworu lokaanikan, etingit ibore ni igirio. Potu kesi daang towaa alokeno a ngakipeyos alo a asuat ananyang. Tonyou akwangis a Akuj a Isirael aloborei alu a ngabeben,*g** anisek ayei tolot lokidor a akai a Akuj. Tanyara Ekapolon Akuj itwaan ni anapit eworu lokaanikan ni atingit ibore ni igirio, tama, “Kape kitor lore a Yerusalem etia ni etia, kigirak emachar loreetin a ngitunga kadaang alu eriabasi ka akichana kotere ngakiro naaronok daang na esubio alore.” Eira ayong Akuj elimokini ngitunga luche tama, “Kitoro lore iwapito itwaan en, taara ngitunga. Warasi nyiilakakis itwaan. Warasi nyikisien itwaan. Taara ngikasukou, ka ngisorok, ka ngaberu ta ngide. Nakaneni warasi nyiitap itwaan ni eyei emachar loreet keng. Kisiakisi kanege alokai kang.” Sodi kisiakis kesi alokasukou alu awaasi alongaren akai a Akuj. Tolimok Akuj kesi tama, “Kinyasutu akai kang. Kileleba ngawat nakatoak nalaarin. Kasiosi!” Apot kesi kisiakis akiar ngitunga alore! Ani erubakinito kesi akiar, edong ayong alopei. Emasakin ayong kwap tojuk ereet ngalup ekalou atama, “Wae, Ekapolon lo irai Ekapolon Akuj! Imunyari cha iyong Ngisirael lupiyayek ani ingoikinitor Yerusalem, a?” Tatachu Akuj tama, “Esubito Ngisirael ka ngitunga a Yuda ngasechesea nakationok noi. Elelebun ngaakot na abukosi kesi nakwap. Eleleba kesi Yerusalem ngakiro na nyeriyan, kainyo abe ebalasi, ‘Aisiki Ekapolon Akuj akwap, nabo nyikitee ngesi sua.’ Nakaneni nyedepari akongu kang kesi kori nyekesieniyete kesi ayong. Asubakinea ayong kesi ngakiro na esubeta kesi luche.” Ani erumor tobongu itwaan ni anapit eworu lokaanikan nia Ekapolon Akuj tolimok tama, “Asubak ayong loger lo kidungokinitor iyong.” Engolik ayong atorite na eriwokina kidiama ngakies a ngiborei alu a ngabeben. Kidiama kech ayei ibore ni ekoni ekicholong a apolou lo asubunitae anamoru anapus-arengan. Tolimok Akuj itwaan ni anapit eworu lokaanikan tama, “Kape tongichakin natairio na irimete na eyakasi kwap ngiborei lua ngabeben, sodi kilelebik ngatotol na enokete nakan kon. Ani erumor kiealak ngatotol nguna lore.” Eteeo ayong ngesi erotokini. Awaasi ngiborei lua ngabeben alokuju akai a Akuj esaa lo alomarea itwaan ngini. Kilelebun edou nalaar na alotooma. Todiritu akwangis a Ekapolon Akuj aloborei kangulu toten lokidor a akai a Akuj. Sodi kilelebun edou kai, kimau akicha alotooma alaar. Anangit echale lo epukipukioto ngiborei ngulu ngabeben nalaar na anikalapatan. Ekwaan ka etoil a Akuj Anaationon esaa lo iruorikinea. Ani elimokini Ekapolon Akuj itwaan ni anapit eworu lokaanikan atamar tolem akim alokiding ngatairio na erimete, na ayakasi kwap ngiborei lua ngabeben, abu itwaan ngini tolot towo alokwaas a atair a apei. Abu ipei a ngiborei kangulu kitorwa akan keng tolem akim alokiding kech, sodi kiwaak nakan a itwaan ani a eworu alokaanikan. Kidiau itwaan ngini akim ngina torotok. Engolik ayong ngiborei lua ngabeben ngulu eyei ibore ni esibit akan a itwaan kwap ngabeben kech. Ani akienyikini, engolik ngatairio ngoomwon. Atapakina atair apei lokwaas a ibore a ipei. Amalimalete ngatairio nguna loger a ngamoru anakaalak a ngaropiyae. Ekwaan ngatairio naomwon nguna. Asibit abutokina atair apei tooma nache. Na erotokinioto ngiborei ngulu, apedorete alosit lowaitin luomwon daang peereasi. Ewae locha ingoliari atair na alongaren, totupakinos daang peereasi. Ngawat a ngiborei kangulu, ka ngakawa kech, ka ngakan kech, ka ngabeben ta ngatairio, ayakasi daang ngakonyen. Eira ayong ngatairio nguna enyaritae nakerimok anakisingolikinet ana ekingaren. Ngiborei ngulu, ayakasi ipei kech daang ngireetin nguomwon. Arai ereet lo ekingaren eka emong, lo a ngiarei eka itwaan, lo a nguuni eka engatuny, ani lo a nguomwon eka egole. ( Eraakasi ngiborei lupei kolong engolikini ayong anangolol a Kebar.) Na ekurupupuneta ngiborei ngulu kidiama ka arotokin, kirukosi ngatairio dang ka kesi. Nacha epetareta ngiborei ngulu ngabeben kech esakete aporor, kirukosi ngatairio dang ka kesi. Na ewaatar ngiborei ngulu, towaa ngatairio dang. Erukonorete ngatairio ka ngiborei ngulu kainyo kesi arikito ngatairio. Sodi torotok akwangis a Ekapolon Akuj alokidor a akai, tolot towo alokidiama ngiborei ngulu. Topetasi kesi ngabeben kech sodi toporosi analup eteorit ayong, kirukosi ka ngatairio. Towaa alokidor alo alokide akai a Akuj, toyei akwangis a Akuj a Isirael kidiama kech. Atoyen ayong ngiborei ngulu atamar kesi lukolong engolikini ayong ewaasi alokwap Akuj a Isirael anangolol a Kebar. Ayakasi ipei kech daang ngireetin nguomwon ka ngabeben ngoomwon ta ibore ni asibit akan a itwaan alokwap abebenit daang. Ani eliwor ngireetin, kesi lupei kolong nabo engolikini ayong anangolol a Kebar. Aloose ngiborei ngulu daang ngaren. Kekeu ayong etau a Akuj kayaa lokidor lo alokide akai a Akuj. Engolik ayong ngitunga ngitomwon-arei ka ngikan ewaasi alokidor. Ayakasi neni tani Yaasania lokookeng a Asur ka Pelatia lokookeng a Benaya, lu araakasi ngikatukok ngiarei a akwap. Katolimok Akuj ayong tama, “Itwaan, lugu kesi lu irokete aronis ka akitutuk ngitunga a ere kalo niaronon. Kesi lu ebalasi, ‘Eringa esaa lodukokinet ngakais nyenanga. Ikwaan ere ka amot nakipoet, kikwaan ngoni ka akiring na eyei namot.’ Tokona bocha itwaan, todwar ngakiro kech! Kasio todwar!” Tachakun etau a Akuj nikang katolimok atamar atolimok ngitunga kona, “Ngisirael, ayeni ayong ngakiro na itamete esi daang. Iara esi ngitunga lukaalak alore kalo, nabo elelebun ngawat a ngikatoak lorotin. “Tokona bocha, alimu ayong Ekapolon lo arai Ekapolon Akuj kona, ‘Iteni dir erai ere logo amot nakipoet. Nakaneni ngawat a ngitunga alu iara esi eraakasi akiring. Kemasari ayong esi nikalapatan a ere! Ikwa iemito esi akwara a? Ameuni ayong ajore a ngakwaaras kitijik esi. Kepudori ayong esi alore kepotok ngitunga a ngakwapea anache. Alimu ayong atamar kiario esi. Kiario esi alojie anakwap kus a ngikulepek. Toyeneta esi daang atamar arai ayong Ekapolon Akuj. Nyeringa ere a Yerusalem kiratakini esi loger lo iratakinitor amot akiring alokeno. Kerirae ayong esi anicha iyakasi kadaang anakwap a Isirael. Iyenunete esi atamar arai ayong Ekapolon Akuj. Ipot esi tongero ngitalio kang, towout akiwap ngakiro na kadungokinit ayong esi atamar kiwapa. Pearai ipot kiwapa ngitalio a ngibukui alu kiriamito esi.’ ” Ani eringa ayong adwari, kimasakin Pelatia kwap totoan. Emasakin ayong kwap tojuk ereet ngalup, ekalou eute abala, “Wae, Ekapolon Akuj na irai Akuj! Imunyari cha iyong Ngisirael lupiyayek a?” Katolimok Ekapolon Akuj ayong akiroit tama, “Itwaan, ngitunga lu elomito Yerusalem, kiruorotor iyong ka Ngisirael luche lu kirikitoe nakwapea nache. Ebalasi kesi, ‘Eloka ngirikon ngulu emam kona ilipete Ekapolon Akuj. Kiinak ngesi ngoni akwap toliwor ayok.’ “Tolimok tokona ngirikon luche lurukitos kon ngakiro nugu. Ayong kolong kameari esi akilom nakwapea nakalonak, dio katopetak nakwapea nache. Kaneni dang, kirukit ayong ka esi anakwapea ana ilosito. “Tolimok kesi ngakiro na alimu ayong Ekapolon Akuj na lo arai Ekapolon Akuj, atamar kachununi ayong kesi anakwapea ana kolong ipetakinosi sodi katobuak esi akwap a Isirael. Ani ibongorete esi inaa, ejoikinit echakarete ibore niaronon daang ka ngakujo nasubuna nakikadakinete. Kainakini ayong esi etau lokitetet ka ngitamen lukiteat. Alemari ayong anikus etau lokaagongon ikoni amoru, ewaak etau lo epupi ngakiro nikus. Sodi kirichakis ngitalio kang, ka akiwap ngakiro na adungokinit ayong. Iliworosi esi ngitunga kang atoliwor ayong Akuj kus. Nakaneni ani ngulu eminasi ngitai kech ngakiro naaronok kikadakinete, erirae ayong kesi kotere ngakiro na asubakis. Alimu ayong Ekapolon lo arai Ekapolon Akuj nguna.” Toporosi ngiborei lua ngabeben, kirukosi ka ngatairio. Ayei akwangis a Akuj a Isirael kidiama kech. Sodi torotok akwangis alore tolot towo alokidiama emoru lo ayei kide ere. Anakisingolikinet, kekea etau a Akuj ayong kidiama katobua Babilonia ni ayakasi ngirikon. Ani erumor tongopia akisingolikinet. Abu ayong atolimok ngirikon ngakiro daang na kedodikini Ekapolon Akuj. Katolimok Ekapolon Akuj ayong akiroit tama, “Itwaan, ibooyi iyong alokiding ngitunga lu kangerito ayong. Eyakasi kesi ngakonyen tarai nyiteete, eyakasi ngaki tarai nyepupete, kainyo ichanaka kesi. “Tokona bocha, itwaan, tosubak ngiboro kon lupalem a itwaan ani edokinit, tonyou eringa nyewara. Kingolikis ngitunga iyong atamar inyou ilot wache. Tokona ngon epedorete ngitunga lukechanak apupokin ngakiro kon. Tosubak eegos kon eringa erai apaaran kingolikineta kesi iyong, ani erumor kimiek kesi kiteosi iyong irotokini ebong, tosub idokinit nakwap ache. Toped ekwaas a akai kon topuno eegos kon, topudo iteete kesi. Kimiek kesi kingolikis iyong iriongakini eegos loseget topudo nikalapatan, irapit ngakonyen nyiingolikinea ni ilosi. Ngakiro na isubi iyong nguna, eliworosi akichikichiket ani a Ngisirael.” Atosubak ayong ngakiro nakalimokini Ekapolon Akuj. Akolongit ngina naparan, atoen ayong eegos kang loger a itwaan ani edokinit, ani atabong ngina, atoped ekwaas a akai a ngakan kang, atopudo nikalapatan na aribokinea. Atoriongak eegos loseget atorotok iteete ngitunga. Ataparach na atupit ngina, katolimok Ekapolon Akuj ayong akiroit tama, “Itwaan, ani aloger kingisitotor iyong Ngisirael lukechanak ebalasi, ‘Anukiro isubi iyong?’ Tolimok kesi kona, ‘Ebala Ekapolon lo erai Ekapolon Akuj: eraakasi ngakiro nugu ngaka ekatukon alo epolokinit Yerusalem, ka ngitunga daang lu elomito neni.’ Tolimok kesi atamar ngakiro na isubak iyong nugu eraakasi emachar a ngakiro ana moi esubakinosi anikech. Eliworosi kesi ngitunga lu edokinito ka ngirikon. Ekatukon lo epolokinit kesi, eriongakini eegos keng loseget nakwaare tosii kitor lopuke lo epedokinete kesi lokwaas a akai. Erapi ngesi ngakonyen keng nyiingolik ni elosi. Nakaneni apetari ayong epuute kang esurum ngesi. Sodi ayaa ayong ngesi lore a Babilon, nakwap a Ngibabiloniae, totoanik neni nyingolikina akwap ngina. Ngirukitos keng, ka ngiketutukok ta ngasigerea keng, apetari ayong lowaitin daang. Alachuni ayong akuroru a akwara, erita kesi. “Na apetarea ayong kesi lobukui luche ka ngakwapea nache, eyenunete kesi atamar arai ayong Ekapolon Akuj. Nakaneni emiekini ayong ngidikidio kech topuunos anakwara, ka akoro ta ngidekesinei, taanyuneta ngibukui daang atamar arai ayong Ekapolon Akuj.” Katolimok Ekapolon Akuj ayong akiroit tama, “Itwaan, tanyam akimuj kon erikiriki akwaan, tamat ngakipi imarani kotere ebuloi. Tolimok ngitunga daang a akwap atamar ngakiro nugu kesi elimokinit Ekapolon Akuj lo erai erai Ekapolon Akuj ngitunga a Yerusalem, lu eringa elomito nakwap kech. Emaranikinete kesi imujete, nabo ani emaase, tamaranikis kotere ebuloi. Engopi ibore daang anakwap kech, kotere aronis a ngitunga kadaang alu elomito neni. Inyasunio ngirerea lu tokona ileleba ngitunga, nabo eliwor akwap alaireng. Toyeneta esi atamar arai ayong Ekapolon Akuj.” Katolimok Ekapolon Akuj ayong akiroit tama, “Itwaan, nyo mono ibongonokinioto esi Ngisirael ngakamatak na ebeyo, ‘Eloose ngirwa tarai nyiyoonokin ngakiro na edwario.’ Tolimok tokona kesi ngakiro na alimu ayong Ekapolon lo arai Ekapolon Akuj kotere ngakiro nguna. Etasaluni ayong ngakamatak nguna. Anang tokona ngirwa lu iyookinotor ngakiro nguna! “Alokiding Ngisirael, nyepete nabo ngakisingolikinet na alioko kori nyedwario ngakiro nakibatarete. Ayong Ekapolon Akuj esuruori kesi. Iyookinosi ngakiro na alimuni ayong. Nyetinenikinete ngakiro nguna. Esi lukechanak, asubakini nguna alimu eringa esi iyarete. Ayong Ekapolon lo arai Ekapolon Akuj alimu nguna.” Katolimok Ekapolon Akuj ayong akiroit tama, “Itwaan, abe ebalasi Ngisirael niti iruorosi, ‘Eloka ngirwa esubakinotor ngakisingolikinet a ekadwaran kalo, nabo ngaka monan ngakiro na edwari ngesi.’ Tokona bocha, tolimok kesi atamar emam ngakiro kang na eringa etinenikinete, pearai esubakinosi ngakiro na alimu ayong. Ayong Ekapolon lo arai Ekapolon Akuj alimu nguna.” Katolimok Ekapolon Akuj ayong akiroit tama, “Itwaan, kikilak ngikadwarak a Isirael lu etonguniyete ngakiro. Tolimok kesi topupokis akiroit a Ekapolon Akuj!” Ebala Ekapolon lo erai Ekapolon Akuj kona, “Oitiakoi! Abe etioko nginyas ianyunete esi ngikadwarak lubaang lu iwapito ngitamen kus a ngikulepek, tamam ibore ianyungarito. Ngisirael, ikwaan ngikadwarak kus ka ngikweei lu etubonorosi anasakatan. Nyiyokiyete kesi ni eyatanara anawas, kori nyebongonokinete akiduk nakitetet dang, sodi toyuunotor Ngisirael akolongit na ejie na alemu ayong Ekapolon Akuj. Esudo kesi ngakiro, adwar alioko. Ebalasi kesi, ‘Ebala Ekapolon Akuj kona,’ tarai nyemeara ayong kesi. Esubete kesi kongina esakete ayong eyook ngakiro na iruorosi kesi! Abala ayong kesi kona, ‘Eraakasi ngakisingolikinet nakus nguna ngapasiek, nabo eraakasi ngakiro na idwarete esi alioko. Ibalasi esi eraakasi ngakiro kang tarai nyisuruoro ayong esi!’ ” Ebala bocha esi Ekapolon lo erai Ekapolon Akuj kona, “Kona iruorotor esi ngakiro napasiek ka ngakisingolikinet na alioko, kanger ayong esi. Erirae ayong ngikadwarak alu iteete ngakisingolikinet napasiek ka akidwar alioko. Na echunakinotor ngitunga kang akitiak ngakiro, nyipete esi neni. Nyigirio ngirora kus lorora a Ngisirael, nabo nyibongete esi nakwap kus jik. Sodi toyena esi atamar arai ayong Ekapolon lo arai Ekapolon Akuj. “Engalaate ngikadwarak ngulu ngitunga kang tamasi eyei ekisil, tarai emam ekisil eyei! Nabo dang, na etagalikineta ngitunga kang akiduk awas, kiwasakis ngikadwarak ngulu emunyen loakwaan ajokon! Tolimok tokona ngimurok lu iasete emunyen loakwaan nawas ngulu atamar erami akiru nakaalan na ngamoru, tokut ekuwam loapolon touko awas ngina. Ani eukor awas, kingitas ngitunga tamasi, ‘Ekoe, etor emunyen lo ngoon akwaan ajokon ai?’ ” Ebala tokona Ekapolon lo erai Ekapolon Akuj kona, “Kotere angoit kang, ameuni ayong ekuwam loapolon, ka akiru nakaalan ta ngamoru a akiru kinyasut awas ngina. Abwangi ayong awas na iwasakinete esi emunyen loakwaan, eala kidongo ngamoru na itoweitere analup esiposi make. Eukor awas kitaar esi daang, toyenea itwaan daang atamar arai ayong Ekapolon Akuj. “Ekokini ayong neni esunyakini anyunyura kang nawas ngina ka ngikadwarak lukolong ewasete emunyen. Kalimokini esi kona, ‘Emam awas, nabo emam lukolong ewasete emunyen.’ Amunyari ayong ngikadwarak a Isirael lukolong adwarete ngakiro a Yerusalem atamar eyei ekisil tarai bo amam ekisil! Ayong Ekapolon lo arai Ekapolon Akuj alimu nguna.” Tolim Ekapolon Akuj tama, “Tokona, iyong itwaan, kingolik ngaberu a akwap kon, nguna edwarete ngakiro na etongunito kesi ngikulepek. Kikilak kesi tolimok atamar ebala Ekapolon Akuj lo arai Ekapolon Akuj kona, ‘Oitiakoi! Abe etioko nginyas ianyunete esi ngaberu! Idonyete esi ngibatae lu enapete ngitunga daang anakan, tomuroto ngawarui na enapito ngitunga anakies, sodi tosuba akiyar a ngitunga aluche. Isubete esi ngitunga kang, totinga akiyar a ngiche a ngakan kus, kingarakinotor esi ngikulepek. Kimenyarito esi ayong alongaren ngitunga kang, kitomukakinere erau lodiochichi ka akimuj nadiochichi. Iarete esi ngitunga lu nyejoikinit eario, sodi talakakis lu ejoikinit eario. Isuruorete esi ngitunga kang alioko, kitunupa kesi ngakiro kus.’ “Kalimokinit tokona ayong Ekapolon lo arai Ekapolon Akuj esi atamar aremokino ayong ngibatae lu inapito esi anakan, tosubeta ngitunga. Angedangedaari ayong anakan kus atalakak ngitunga lu isubito esi. Achilichilaari ayong ngawarui kus emiek ngitunga kang tobuchun anakan kus jik. Nyeringa nabo epete nakan kus eraakasi lu irikao. Toyeneta esi atamar arai ayong Ekapolon Akuj. “Kotere alioko kus, itepeniasi esi ngitunga luajokak, lu nyasaki ayong akiwan. Itengero esi ngitunga luaronok aisikin aronis kech ka ayuun akiyar kech. Asalut tokona ngakisingolikinet kus napasiek ka akidwar alioko. Ayuuni ayong ngitunga kang anakan kus, toyeneta esi atamar arai ayong Ekapolon Akuj.” Akolongit apei, pot ngikasukou ngiche a Ngisirael nikang akingita ngakiro na esaki Ekapolon Akuj. Sodi katolimok ayong Ekapolon Akuj akiroit tama, “Itwaan, achamut ngitunga lugu ngakujo nasubuna epolokinete ngitai kech. Elomakis ngakujo nguna kesi nakisech. Achamuni ayong dir kesi kengitanarete ayong ngakiro a? “Tolimok tokona kesi ngakiro na alimu ayong Ekapolon Akuj lo arai Ekapolon Akuj. Esiraelit cha daang lo echamakini ngakujo nasubuna epolokinete etau keng, sodi kilomakis ngakujo ngesi nakisech, ani kebu itwaan ngini nia ekadwaran akingita ngakiro, ayong ilope atachakini ngesi ngakiro, na itemem ka alalau a ngakujo keng. Enomete ngakiro na atachakini ayong Ngisirael ngitai kech, katobongokis ayong kainyo achadasi ngakujo nasubuna kesi anikang. “Tokona bocha, tolimok Ngisirael atamar abala ayong Ekapolon Akuj lo arai Ekapolon Akuj kona, ‘Tolunga ngasechesea kus, toisikis akilipit ngakujo kus nasubuna. Toisikisi akisub ngakiro nakikadakinete.’ “Esiraelit cha daang kori itwaan a akwap anache cha daang ni elomit kiding Ngisirael, ani kanger ayong kilip ngakujo nasubuna, ani erumor tolot nia ekadwaran akingitanar ngakiro, ayong Ekapolon Akuj alope ngesi atachakini ngesi ngakiro! Alemari ayong itwaan ngini nidikil. Etiliwori ngesi ekitetemes, nabo alemari ngesi alokiding ngitunga kang, sodi toyeneta esi atamar arai ayong Ekapolon Akuj. “Ani kingal ibore ekadwaran ngolo kisudok ngakiro, toyena atamar ayong Ekapolon Akuj engalat ngesi. Erirae ayong ngesi atolema ngesi alokiding Ngisirael, lu eraakasi ngitunga kang. Itirete kesi eriras kech. Ikwaanikin eriras a ekadwaran ka lo a itwaan ani ingita ngakiro, sodi nyeebongokinioto Ngisirael akibatanar anikang, nabo nyiinyasunosi make kotere ngasechesea kech. Pearai eliworosi kesi ngitunga kang, atoliwor ayong Akuj kech. Ayong Ekapolon lo arai Ekapolon Akuj alimu nguna.” Katolimok ayong Ekapolon Akuj akiroit tama, “Itwaan, ani kesech ebukut, toliwor nyekamuno ayong, atubori ayong akimuj keng, sodi atomeu eron a akoro ataar ngitunga ka ngibaren aapei. Arai tani toyakas ngitunga luuni lugu neni, Noa, ka Danel ta Yob, keyuu ajokis kech kesi luuni make. Ayong Ekapolon Akuj lo arai Ekapolon Akuj alimu nguna. “Kori apedori ayong atomeu ngitieng lukaadengak taara ngitunga sodi toliwor akwap alaireng, tojongoto ngitunga akitoreenen kotere ngitieng lukaadengak. Tani keyakasi ngitunga luuni ngulu neni, ekongi ayong Ekapolon Akuj na erai Akuj na eyari atamar nyepedorete kesi ayuun tani talokookech kori tanakookech. Epedorete kesi ayuun ngawat kech a ngikulepek, nakaneni eliwor akwap alaireng. “Kori apedori atochilu ejie nakwap ngina, atolim atamar torem akwara akwap ngina, taar ngitunga ka ngibaren aapei. Tani keyakasi ngitunga luuni ngulu neni, ekongi ayong Ekapolon Akuj lo arai Ekapolon Akuj na ayari atamar nyepedorete kesi ayuun tani talokookech ka tanakookech, pearai eyuunosi kesi ngikulepek. “Kori apedori ayaun edeke loaronon nakwap ngina, atonyunyurikin ataar ngitunga ka ngibaren, tani keyakasi Noa, ka Daniel ta Yob neni, ekongi ayong Ekapolon lo arai Ekapolon Akuj na ayari atamar nyepedorete kesi ayuun tani talokookech kori tanakookech, eyuunosi kesi ngikulepek.” Ebala Ekapolon lo erai Ekapolon Akuj kona, “Erokearosi noi ngakiro alo Yerusalem na ayaunea ayong eriras a ngakiro kang anaomwon aronok ana eraakasi ejie, ka akoro, ka ngitieng lukaadengak ta edeke, tomunyasi ngitunga ka ngibaren aapei! Kaneni dang, ani keyakasi ngitunga epuunosi, sodi kitorikokis iyong talokookech ka tanakookech kingolik iyong aronis a elote kech ka ngakiro kech, inupi dir atamar ikwa iyookino eriras lo ayaunit ayong Yerusalem. Inupi iyong atamar nyerirat ayong kesi pas, na ingolikinea elote kech ka eboyor. Ayong Ekapolon lo arai Ekapolon Akuj alimu nguna.” Katolimok ayong Ekapolon Akuj nabo akiroit tama, “Itwaan, nyoni ejokia ekitoe a emusabib akidwang ngikito luche a amoni? Emam ibore esubeenere ekitoe a emusabib, nyepedorio tani adupakin nalup kinenekinoe ibore! Erai akim ejoikinit inokere. Ani bo na enomiarea akim ngiwaitin daang ka etau keng, eyei ibore eringa esubakinere dir a? Arai sek pas eringa elemwaana. Ani kenom akim kimududuyo, eyei nabo dir ibore iche esubere a?” Tokona bocha, ebala Ekapolon lo erai Ekapolon Akuj kona, “Ajal ayong ngitunga a Yerusalem loger a ngakito a emusabib ana ejalio alokito a amoni kinokere akim. Alemari ayong ngitunga a Yerusalem nidikil. Ani ebucharosi anakim a apei, enomi kesi akim nache. Na eriraa ayong kesi, iyenuni iyong atamar arai ayong Ekapolon Akuj Namerikanyer. Ani kona nyekamunotor kesi ayong, etiliwori ayong akwap alaireng. Ayong Ekapolon lo arai Ekapolon Akuj alimu nguna.” Katolimok ayong Ekapolon Akuj nabo akiroit tama, “Itwaan, kidodik ngitunga a Yerusalem ngakiro nakikadakinete na esubete kesi. Tolimok Yerusalem atamar ayong Ekapolon Akuj lo arai Ekapolon Akuj alimunit ngakiro nugu, “Kidounio kolong iyong anakwap a Kanaan. Arai apakon ekitela a Ngiamor tarai itiokon ekitela a Ngiiti. Ani eliwor akidouno kon, emam itwaan atub apusit kon akolongit na kidounere iyong, kori emam itwaan kilota iyong a ngakipi, kori kirigak amakat, kori kilogak ngiworui. Emam itwaan tani ipei ni abu kisien iyong kitosubea ngakiro nguna. Nakolong kidounere iyong, emam itwaan abu kitominak iyong. Aponi kimasakin naro nikalapatan. “Ani etoruni ayong neni, katoriam iyong ibelobelo anaakot kon. Katolimok ayong iyong kirumorito ngaakot atama, ‘Toyar, torup tokilikilu loger a ekitoe alo eyei mana.’ Ibu iyong topolo, tooyaar toliwor apese. Kiburut ngisikin, toruput tani ngitim, nakaneni imuner iyong. “Ani etoruni ayong neni nabo kengolik iyong kenang ni iiunea ekile. Abu katobutok iyong eworu kang, atarapea akwaan kon. Atachamakin ayong ka iyong atamar kiminakin. Ee robo, abu ayong katoner iyong, toliwor akang. Ayong Ekapolon Akuj lo arai Ekapolon Akuj alimu nguna. “Ani erumor atolem ayong ngakipi elotarea ngaakot anakwaan kon, kewasak iyong akimiet. Ketanap ngiworui lu edonyitoe asir. Katobutok ngamuk na ngileui aluajokak. Kainak awaru nakaanikan narapet akou ta eworu lokooyen lokamalamalan ajokon. Ketanap ngigiel ka ngakoroomwa. Kainak asir na enapio alokume, ka ngamaritoi ta ekiraun loajokon lonapat anakou. Ketanap iyong egolit ka ngakwangae. Inapit iyong jiik ngiworui lukaanikak ka lukamalamalak lu edonyitoe asir. Inyami ngamugati na esubunitae anakiria anaajokak. Inyami akimiet a ao ta akimiet a ngikito. Toliwor akibuseanu kon nakesuparan, sodi toliwor iyong na ijakaanit. Kitoyenikin iyong anakwapea kadaang kotere akibuseanu kon naajokon, kainyo ayong kolong kesubusi iyong. Ayong Ekapolon Akuj lo arai Ekapolon Akuj alimu nguna. “Nakaneni ibu iyong kinyasu akibuseanu kon ka ekipur toliwor iperete ka itwaan cha daang ni etorun. Tolem iyong ngiworui kon ngiche kitisirio ni ilipeenea iyong, toliwor ni isubea iyong emalaanu kon neni. Emam ngakiro na ikote nguna na asubakinosi a ache kori nyesubakinosi monan. Tolem iyong asir a ngakwangae ka na egolit nakolong kainakini ayong iyong, tosubea ngakisikwaanet a ngikiliok sodi toloma ka kesi. Tolem iyong ngiworui lu edonyitoe asir lukolong kainakini ayong iyong kimukok ngakisikwaanet nguna, tolem iyong akimiet ka emitina lokolong kainakini ayong iyong, kipeyok ngakisikwaanet nguna. Kainakini kolong ayong iyong ngakiria naajokak, ka akimiet ta akimiet a ao, nakaneni tolem iyong akimuj ngina kitiliwo ngakipeyos na ejoikinete ngakujo kon nasubuna. Ayong Ekapolon lo arai Ekapolon Akuj alimu nguna. “Tolem iyong talokookon ka tanakookon lukolong kidoikini iyong ayong, tachakak nakim toliworos ngakipeyos a ngakujo anasubuna. Esibit iyong epataka ngakiro a emalaanu kon a? Ikokini nabo iyong ilemuni ngide kang kipeyonok ngakujo nasubuna ai? Anakiro ana kikadakinete iraakar iyong amalaat ngirwa daang, nyitamuna iyong jik ngirwa lukolong a ekiditeu kon, nakolong amamakar ibore inapit ibelobelor anaakot kon.” Tolim Ekapolon lo erai Ekapolon Akuj tama, “Wae, Yerusalem! Oitiakoi! Abe etioko nginyas ianyuni iyong! Isubi iyong ngakiro naaronok nguna daang ani erumor, toduk iyong lokwaasea a ngirotin kadaang ni ilipeenea iyong ngakujo kon nasubuna ka akisub emalaanu. Nakisiakinet a erot kadaang, todukok iyong ni kilipet ngakujo, dio tosubea akibuseanu kon emalaanu. Toliwor iperete ka itwaan cha daang ni etorun. Toroner emalaanu kon noi akidwang daang. Toloma iyong ka ngikidunyet kon lua etereku, kesi Ngimisiri. Ibu iyong kitalala emalaanu kon kitongo ayong a ngakiro kanguna. “Kingolik a, anyou tokona ayong akirirare iyong ka atubwor apiaro napalem katiakakinit. Kepotok ayong iyong Ngipilisti lu eraakasi ngimoe kon, lukiremokino iyong, nabo ekadakinit emalaanu kon. “Apot ngulu dang kitakada iyong! Ibu iyong tasaka ngitunga a Achuru. Tosuba iyong ka kesi emalaanu, nakaneni kitakad tani ngulu! Ibu iyong kitalala emalaanu kon tani lotunga a Babilonia, lu eraakasi ngimuchurus, nakaneni kitakad tani ngulu!” Ebala Ekapolon lo erai Ekapolon Akuj kona, “Edeak dir etau kon edeke a amera ka ngikonei! Nyikirumete iyong ngileech kotere emalaanu tani wadiochichi. Iduk iyong ni ilipeenea ngakujo nasubuna ka asubea emalaanu, iduk nakisiakinet a erot kadaang ka ni ikeuna. Nakaneni nyikoni iyong tani ngamalaae nache kainyo ijamuarit ngaropiyae. Ikwaan iyong ka aberu na elomete ka ngitunga lugelayek akidwang aminakin lokile keng. Abe palem bo etacheeneo amalaat, ani eliwor iyong idiakit talopae kon iinanakini ngainakinet poneta awadaang topero ka iyong. Nyikwaan iyong ka ngamalaae nache alomalaanu kon. Emam itwaan kitingakini iyong emalaanu. Emam itwaan kitach iyong. Iyong ngesi itachi ngikiliok! Ee robo egelaana emalaanu kon!” Tokona bocha Yerusalem, iyong amalaat naga! Kiira ngakiro na elimunit Ekapolon Akuj. Ebala Ekapolon lo erai Ekapolon Akuj kona, “Ibutori iyong ngiworui kon loger a amalaat sodi topero kata lopae kon, dio kilip ngakujo nasubuna nakikadakinete, nabo taar ngide kon tarata ngakipeyos a ngakujo anasubuna. Kotere ngakiro nguna, ayauni ayong talopae kon daang, lukolong imina iyong ka lukolong iremokino. Ayauni ayong kesi kiriam iyong, ani erumor atobuto ngiworui kon, sodi kisemoto kesi iyong imuner. Kerirae ayong iyong kotere elomit ka akiar. Anangoit kang ka anyunyura, kerirae ayong iyong kataar. Kepotokini ayong iyong talopae kon sodi toukosi kesi ngakais na isubeenea iyong emalaanu ka akilipea ngakujo nasubuna. Elemarete kesi ngiworui kon ka asir, kimiekis iyong imuner. “Ichuchuunete kesi ajore a ngitunga kitachak iyong a ngamoru, sodi kitotubutubuoto iyong a ngilengea. Inomete kesi ngakais kon, kirirata iyong iteete ngaberu nakaalak. Ketapalikini ayong iyong emalaanu ka akipotonokin talopae kon ngiboro. Ekokini ayong etemuni angoit kang anikon neni, edatak. Nyeringa nabo angoi kori katingi etereku kotere iyong. Kimuriakis iyong ngakiro nakolong kasubea ayong iyong idit. Kitongo iyong ayong kotere ngakiro na isubi iyong nugu daang. Ngakiro nguna ngesi atachakinitor ayong ngakiro nakolong isubi iyong daang. Kotere nyo kolong iatakinea iyong emalaanu nakiro nakikadakinete nache sek isubi iyong? Ayong Ekapolon lo arai Ekapolon Akuj alimu nguna.” Tolim Ekapolon Akuj tama, “Yerusalem, ani esakete ngitunga alimun ngakamatak anikon etamarete, ‘Nia ngatuny cha nia ngatuny!’ Iteni dir irai iyong ikoku a aberu ana kolong akadakinit ekile keng ka ngide keng. Ikwaan iyong ka tanakookon nakolong aremokino ngikiliok kech ka ngide. Iyong ka ngirerea luche lu idunyatar, arai itiokus aka ekitela a Ngiiti, tarai apakus eka ekitela a Ngiamor. “Nakaatokon naapolon ngesi Samaria. Ibakit alokwap ka ngadakarin keng. Nakaatokon naachi na alomit kuju kon ngesi Sodom ka ngadakarin keng. Kitakad iyong akiwapit elote kech ka ngakiro nakikadakinete na asubete kesi. Wadiochichi cha kona, toroketa nakon noi akidwang nakech daang. “Ekongi ayong Ekapolon lo arai Ekapolon Akuj na ayari atamar nakaatokon Sodom ka ngadakarin keng, nyesuba naaronok noi na ikote na isabakis iyong ka ngadakarin kon. Enisasi ngesi ka tanakookeng kotere akimuj nakaalan na atingito ka eger lo ebooyoto a ekisil, nakaneni nyitana kesi lukebootok ka lu ibato ngakan. Kinisakinos kesi kichanaketa, tosuba ngakiro na aremokino ayong. Atomunya ayong kesi na engolikinea nguna. “Ani eliwor Samaria, nyesubakina tani na enangito epewae a akisech kon. Isubak iyong nakaronok noi akidwang na asubaki ngesi. Ani itiriyanikinio aronis kon ka na naka tanakaatokon, toliwor nakech pas! Kitir ngileech kon! Aroketa ngasechesea kon noi edwang na nakaatokon. Asubu nyesechito kesi. Kingolik tokona ngileech kon sodi kitir, kainyo itusub iyong tanakaatokon nyesechito.” Tolimok Ekapolon Akuj Yerusalem tama, “Etojoki ayong nabo Sodom ka ngadakarin keng ta Samaria ka ngadakarin keng. Ee robo, ketojoki iyong dang. Kirumete iyong ngileech kon a ilope. Idodikinete ngileech kon tanakaatokon atamar ejokak kesi. Ani tanakaatokon, Sodom ka Samaria, ka tanakookech, ejokearosi ngakiro kech tobongo lopit lopalem sek. Iyong dang ka ngadakarin kon, ibongete lopit lopalem kus. Pekolong ikianar iyong nakaatokon Sodom ngirwa lukolong iwogar iyong, kolong eringa akisech kon nyileereuno a? Ikwaanikin tokona iyong ka Sodom. Iyong kikianatar Ngiedomae, ka Ngipilisti ta ngikidunyet kon luche lu kiremokino iyong. Kitir eriras a ngakiro anaaronok anakikadakinete ana isubi iyong. Ayong Ekapolon Akuj alimu nguna. “Abala ayong Ekapolon lo arai Ekapolon Akuj atamar iyong Yerusalem, kasubakinea na ejoikinit kisubere, kainyo nyirichakina iyong ngakichikakinet kon, nabo ichwangak achamunet. Kaneni dang, etamuni ayong achamunet nakolong kichamakin ka iyong eringa iyong isorokana. Kichamakin ka iyong achamunet nakajik. Kitamu elote lokolong ilosi iyong sodi kiruma ngileech nakabuakinea iyong tanakaatokon naapolon ka naachi. Esikokini ayong kesi tanakookon, tani bo kolong pekichamakina ka iyong anakiro kanguna. Abongokini ayong atachamakin ka iyong nabo, toyenea iyong atamar arai ayong Ekapolon Akuj. Karimakini ayong iyong ngasechesea kon daang. Ani itamuni iyong na isubi daang, kitalarete kililing chek kotere ngileech, tobunak akituk jik. Ayong Ekapolon lo arai Ekapolon Akuj alimu nguna.” Katolimok Ekapolon Akuj ayong akiroit tama, “Itwaan, kiruor a ngakamatak, tolimok Ngisirael akisikwaanet. Tolimok atamar ayong Ekapolon lo arai Ekapolon Akuj alimokinit kesi abala ‘Ayei kolong egole lotiapolon noi, apolok ngabeben keng. Aoyak ngakopir keng eleleba ngakoriyek nagelagelae. Toporo egole ngolo moru a Lebanon todo nalem a echekereng sodi toruto akuyen na alokidiama noi yaa nakwap a emuchuruseenu, kiwaak lore epei a ngimuchurus. Ani erumor tolem ekitoe lodiochichi anakwap a Isirael min kitak nalup naajokak na ayakasi ngakipi nakaalak na eturupunete ekitoe ngolo. Torup ekitoe ngolo toliwor emusabib lo ekilikili lo eliarit. Kiniapasi ngaten keng kidiama ni ayei egole. Kilijakin ngaten na alokwap nalup. Toburuchiasi emusabib ngolo ngaten ka ngakui. “ ‘Ayei nabo egole eche lotiapolon. Apolok ngabeben keng noi talalak ngakopir. Toreia emusabib ngolo ngaten na alokwap logole ngolo, toreia tani ngakui keng logole ngolo, iitanit atamar kainak egole ngolo ngakipi nakaalak na idwangito na ayakasi mana na arupunitor ngesi. Nakaneni etakinitae sek emusabib ngolo mana naajokon a ngalup ni ayakasi ngakipi nakaalak, sodi torupuneta ngakui tokoniunio ngamusabib nabo toliworor emusabib loajokon noi. “ ‘Engita tokona ayong Ekapolon lo arai Ekapolon Akuj abala, ekoe, erupuni emusabib logo dir toyar a? Nyedituni egole lo ekingaren ngaten keng, ka araraun ngamusabib tobilibilaa ngaten tooniyosi a? Nyiitanit ngilinga lukaalak kori ngitunga lukaalak arutun. Ee etakin ro ekitoe, nakaneni erupuni dir toyar a? Nyeoniyori cha dir na ekutunea ekuwam lo akide a? Eonikini nalup na itakinitae.’ ” Katolimok ayong Ekapolon Akuj akiroit tama, “Kingit ngitunga lukechanak lugu keyenete eger a akisikwaanet kangina. Tolimok kesi atamar abuni ekapolon a Babilonia toriko ekapolon a Yerusalem ka ngikatukok keng toloto Babilonia. Tolem epei a ngiyenet a ekapolon, tachamakin ka ngesi sodi kisikong. Tolem ngitunga lu eyenikinitae kitiliwo ngirikon sodi nyeanyunea akwap ngina agogongu nabo kirichakinere achamunet a ekapolon a Babilonia. Nakaneni abu ekapolon a Yuda tonger ngesi, tomea ngitunga keng Misiri akilipun ngangolei ka ngasigerea nakaalak. Ekoe, idwangi a? Ebuchar dir itwaan ni esubi ngakiro na ikote nugu a? Nyichwangakini ngesi achamunet sodi tobuchar nyirira! “Ayong Ekapolon lo arai Ekapolon Akuj na ayari, ekongi abala, etoanikini ekapolon ngolo Babilonia kainyo asechi ngesi ngikong ka achamunet nakolong achamakinosi ka ekapolon a Babilonia lokolong ainakini ngesi apolou. Tani ekapolon a Misiri ka ngasigerea keng nakajwok, nyingarakinete ngesi akitijwore ngitunga a Babilonia na iriamete kesi toduko ngawasea ka akibok ngalup taareta ngitunga lukaalak. Asechi ngesi nguna ekongokinit nabo nyemisikina achamunet. Kona asubea ngesi ngakiro daang, nyebuchar tokona. “Ekongi ayong Ekapolon lo arai Ekapolon Akuj na ayari abala, erirae ayong ngesi ani asechea achamunet nakolong ekongi ngesi a ekiro kang atamar erichakini. Apetakini ayong epuute kang kidiama keng esurum ngesi. Arikori ayong ngesi Babilonia erira kaina, kainyo kangeri ngesi ayong. Eario ngasigerea keng nakajwok a akwara, ani lu epuunosi, topetaros. Toyenea atamar ayong Ekapolon Akuj alimu nguna.” Ebala Ekapolon lo arai Ekapolon Akuj kona, “Alemu ayong alem a echekereng alokooyen, atubwo ni ilijaunit alongaren. Etak moru lokooyen, moru a Isirael lokooyen noi. Erupunete ngaten tokoniu ageor toliwor echekereng loajokon. Elomete ngikitetio daang a ngitieng neni. Ngikitetio daang a ngikieny, edukete ngakais naten keng. Eyenunete ngikito daang anakwap atamar ayong arai Ekapolon Akuj. Atubi ayong ngikito lukooyak sodi eturup luuchik tooyaketa. Etooni ayong ngikito lukalibak sodi etilib lukoonok. Ayong Ekapolon Akuj alimu nguna, nabo asubakini nguna alimu.” Katolimok ayong Ekapolon Akuj nabo akiroit tama, “Nyo ebongonokinioto ngitunga alimuunun ngakamatak nabe, ‘Anyamete taapa ngamusabib nakaabarak sodi kisaalik ngikel a ngide kech!’ “Ekongi ayong Ekapolon lo arai Ekapolon Akuj na ayari atamar nyeringa ngakamatak nguna elimunio alo Isirael nabo. Erai akiyar a itwaan kadaang akang, akiyar ka apa ka na ikoku. Itwaan ni esechi ngesi etoani. “Ani keyei itwaan niajokon dir ni etenoono tarai ni emunoi, ni nyenyami ngakipeyos na elemikinitae ngakujo nasubuna alomoru kori nyigieno ngakujo nguna, ni nyinyasuni aberu a ekile aloche, kori nyeperete ka aberu na ibooyi, ni nyingalaari itwaan ibore keng, pearai inyiakakini ibore nisek ainakinitae idaritere amicha etachio, nyekokoi tani lu enyamit akoro, nabo einanakini lu emuner ibore ninapat, nyipotori ngesi ngaropiyae taarae amicha tangatarea na idokitoe, iratakinit akan keng anaaronok, etubi ngikesio a ngitunga eriyan. Itwaan ngini iwapit ngakiro na adunguni ayong, nabo irichakinit ngitalio kang, etenoono ngesi eyari dir. Ayong Ekapolon lo arai Ekapolon Akuj alimu nguna. “Ani keyei itwaan ngini lokookeng lokokolan tarai ekaaran, lo esubi ngakiro daang nakolong nyesuba apakeng. Enyami ngakipeyos na elemikinitae ngakujo nasubuna alomoru ka akinyasun ngaberu a ngikiliok aluche. Eboliar ngikebootok ka lu ichanasi, ekokoi nabo nyinyiakari ibore ni einakinitae idaritere amicha etachio. Ilipeene ngakujo nasubuna ka akisub ngakiro nakikadakinete, Idoki ngaropiyae na earitae amicha sodi tangatarea nache. Kotere ngakiro nguna, etoani ngesi ani asubea ngakiro nakikadakinete nugu daang. Eliworosi ngakiro a akitu keng ngaka akiding keng a ilope. “Ani keyei itwaan nia ngiarei ngini lokookeng, lo engolik ngasechesea nakolong asubi apakeng daang, nakaneni nyiiwap ekitetemes a apakeng. Nyilipit ngakujo nasubuna a Ngisirael kori nyenyami ngakipeyos na elemikinitae ngakujo nasubuna alomoru. Nyinyasuni ngaberu a ngikiliok aluche. Nyesechakini itwaan, nyewounea ibore a itwaan nisek idaritere amicha etachio, nabo nyekokoi pearai itani lu enyamit akoro, ka ainakin lu emuner ibore ninapat. Iratakinit akan keng anaaronok, nabo nyipotonori ngaropiyae taarae amicha sodi tangatarea na idokitoe. Iwapit ngakiro na adunguni ayong, kirichakinite ngitalio kang. Nyetoani ngesi kotere ngasechesea a apakeng, eyari ngesi dir. Ani eliwor apakeng, etoani kotere akisech keng, kainyo ademuununi lokaatokeng ngiboro tokokoi, tosubea ngitunga naaronok. Kingolik a, etoani ngesi dir kotere akisech keng. “Nakaneni ingitasi esi ibalasi, ‘Nyo peiriraare ikoku kotere akisech a apakeng?’ Asubi ikoku nguna iyookino ka naajokak. Erichakinit ngesi ngitalio ka akiwap lokojokon. Kotere ngakiro nguna, eyari ngesi dir. Itwaan ni esechi ngesi etoani. Nyetoani ikoku kotere ngasechesea a apakeng, kori nyetoani apa kotere ngasechesea a lokookeng. Einakinio itwaan niajokon ebachit kotere naajokak na esubi, nakaneni irirao itwaan niaronon kotere naaronok na esubi. “Ani kereeun itwaan niaronon anasechesea kadaang ana esubi, sodi kirichak ngitalio kang, tosub na eteniyete ka na iyookino, nyetoani ngesi. Eyari ngesi dir. Erimakinio ngasechesea keng daang, eyari ngesi kotere ateneanut keng. Esibit esi kajoikinit ayong Ekapolon lo arai Ekapolon Akuj akitu a itwaan aniaronon a? Mam jik! Kajoikinit ayong elungi ngesi naaronok sodi toyar. “Nakaneni ani kepaliki itwaan ni etenoono ateneanut keng, toroner tosub ngakiro nakikadakinete na esubi itwaan niaronon, erubakini ngesi dir eyari a? Mam jik! Nyitamunio nakolong ajokak asubi ngesi tani apei. Etoani ngesi kotere amodeanut keng ka ngasechesea keng. “Nakaneni ibalasi esi, ‘Nyiyookino ngakiro na esubi Ekapolon Akuj.’ Topupokisi Ngisirael, esibit esi nyiyookino esube kang ngakiro a? Esube kus ngakiro ngesi nyiyookino. Na epalikinea itwaan niajokon akisub naajokak, kisiak akisub naaronok, sodi totoan, etoani ngesi kotere akisech na esubi. Na epalikinea itwaan niaronon akisech, tosub na eteniyete ka na iyookino, eyuun ngesi. Ani kona etamakinea ngesi toreeun anasechesea kadaang ana esubi, eyari ngesi dir, nyetoani. Nakaneni ibalasi esi Ngisirael, ‘Nyiyookino ngakiro na esubi Ekapolon Akuj.’ Esibit esi nyiyookino esube kang ngakiro a? Esube kus ngakiro ngesi nyiyookino. “Tokona bocha, ayong Ekapolon lo arai Ekapolon Akuj kalimokinit esi Ngisirael atamar erirae ayong itwaan daang itemem ka ngakiro na asubaki. Tolunga ngasechesea toreeunos anakiro anaaronok kadaang ana isubete esi. Warasi akisech kus nyikinyasu esi. Tolunga naaronok daang nakolong kisubeta esi ayong, taanyut ngitamen ka ngitai lukiteat. Ngisirael, nyo isaketa esi akitu? Emam itwaan kajoikinit ayong akitu keng. Toreeunos anasechesea kus toyara. Ayong Ekapolon lo arai Ekapolon Akuj alimu nguna.” Kalimokini Ekapolon Akuj ayong atamar atoeok eeos loa akialolong logo kotere ngikatukok luarei a Isirael. Arai itiokon ngae? Arai itiokon angatuny! Awowooto ka ngingatunyo luche, kitanu ngitak keng alokiding kech. Kitanu ngesi itaok keng ipei, toliwor engatuny! Kitatam ngesi akirikare, toliwor engatuny lokanyaman ngitunga. Kiirasi ngibukui ngakiro keng tolokakis ngesi kisuruma a eloit. Kiurukukoosi ngesi Misiri a ngikodo. Kidar itiokeng ngesi ebonguni, tanang eanyuni atamar nyeringa ebonguni. Sodi kitopolou ngesi itaok keng iche, toliwor engatuny lokaadengan. Ani epoloe ngesi, kisiak akirimit akwap ka ngingatunyo luche. Kisiak ngesi dang akirikare toliwor engatuny lokanyaman ngitunga. Touko ngesi ngawasea kech nakaagongok, kinyasu ngirerea kech. Tobul ngitunga daang anakwap nacha irurumakinea ngesi. Tochunun ngibukui alowaitin kadaang a ngakwapea kech potu akirikare engatuny ngolo. Tolokakis ngaunoi kech sodi kisuruma ngesi a eloit. Kilomakis ngesi kai a engatuny, yaasi lokapolon a Babilon. Togolokinoe ngesi kaina, sodi nyiirarea akirurumare keng nabo alokidiama ngimoru a Isirael. Ekoni itiokon emusabib lo etakinitae lokwaas a ngakipi, lo arait tasabuk, ani ayakar nakipi nakaalak. Apot ngaten keng nakaagongok toliworos ngaburoi a apolou. Tooyaar emusabib ngolo kilany ngikito luche. Kipuruut ngitunga alangirir a ateni keng. Nakaneni aponi ngesi torutoroe a angoit, tachakakinae nalup. Kitooniyo ngesi ekuwam lo a akide, tararaun ageor keng, tooniyosi ngaten keng naapolok tonomia akim. Etakin tokona nariet nakwap nakoonon na emam ngakipi. Ekam atorom keng akim, anomia ngaten keng ka ageor. Nyeringa nabo ngaten keng nakaagongok eliworosi ngaburoi a apolou. Erai eeos logo eka akialolong. Eeonokinio jiik. Akolongit na a ngatomon a elap alo a ngikan a ekaru alo a ngikan-kaarei, pot ngikasukou ngiche a Isirael nikang akingita ngakiro na esaki Ekapolon Akuj, kiboikinos ngaren kang. Katolimok Ekapolon Akuj ayong akiroit tama, “Itwaan, kisuruor ngikasukou lugu tolimok atamar abala ayong Ekapolon lo arai Ekapolon Akuj kona, ‘Iponito ba esi akingita ngakiro na asaki ayong? Ekongi ayong a ekiro kang a ilope atamar kona araakar ayong Akuj na ayari, nyachamuni ayong esi kingisete ayong ngakiro. Ayong Ekapolon Akuj alimu nguna.’ “Itwaan, inyounit iyong akitub ngakiro a ngitunga kalu a? Tolimok robo kesi ngakiro nakikadakinete nakolong asubete taapakech. Tolimok kesi atamar abala ayong Ekapolon Akuj Namerikanyer kona: Akolongit nakolong aseunea ayong Isirael, abu ayong ekong anaur a Yakobo eteyen kesi alo Misiri. Ekongok kesi atama, ‘Ayong arai Ekapolon lo arai Ekapolon Akuj kus.’ Akolongit ngina ekongio ayong atamar epuduni kesi anakwap a Misiri, sodi ayaa nakwap nakolong asakakini ayong kesi, na ileleba ngakile ka akimiet a ao, akwap nakebusean noi akidwang daang. Atolimok ayong kesi atama, ‘Tachakasi daang ngakujo nakikadakinete na iminasi esi, nyiitiliwosi ngawat kus na nyitaleuno kotere ngakujo nasubuna a Misiri, kainyo arai ayong Ekapolon Akuj na arai Akuj kus.’ Nakaneni apot kesi katongero ayong, towout akiirar ngakiro kang. Apot nyeepalikis ngakiro kech nakikadakinete, nabo nyechakara ngakujo a Misiri nasubuna. Abu ayong atama abukokini kesi anyunyura kang, esunyak kesi angoit kang daang kaina alo Misiri. Nakaneni abu ayong nyaasubak kongina sodi nyiimenyarere ekiro kang, kainyo alimokini kolong ayong Ngisirael alongaren ngitunga lu arukito ka kesi atamar epuduni kesi alo Misiri. “Sodi epud ayong kesi alo Misiri atoriko nariet. Ainak kesi ngakitatamet kang nabo etatam ngitalio kang, lu eraakasi ani kiwap itwaan, toyar. Ainak kesi ngirwa lua Sabato toliworos emachar a achamunet kang ka kesi, lo isitamunit kesi atamar ayong Ekapolon Akuj etaleuni kesi. Nakaneni katongero Ngisirael ayong anariet. Towout akiwap ngakiro na adungokini ayong, ka ngitalio kang lu eraakasi ani kiwap itwaan, toyar. Kimenyasi kesi ngasabatoi lokojokon. Abu ayong atama atobukok kesi anyunyura kang anariet atomunya pil. Nakaneni abu ayong emiek ngakiro nguna kotere ekiro kang nyiimenyarere alokiding ngibukui lukolong keteete ayong epuduni Ngisirael alo Misiri. Tani ikoni neni, abu ayong ekong anariet atamar nyayauni kesi nakwap nakolong ainakinit ayong kesi, akwap na ileleba ngakile ka akimiet a ao, akwap nakebusean noi na idwangit ngakwapea daang. Ekokini ayong neni kainyo angerete kolong kesi ngitalio kang towout akiwap ngakiro na adunguni ayong, nabo kimenyasi ngasabatoi kang, kainyo aminasi kesi akilipit ngakujo nasubuna. “Kaneni dang, apot kesi kesieneto ayong. Atalakak ayong kesi nyaamunya anariet. Atolimok ayong ngide kech anariet atama, ‘Nyiiwap ngakiro na edungunete taapaakus. Nyiirichakis ngitalio kech kori nyiinyasut ngawat kus a ngakujo kech anasubuna. Ayong Ekapolon Akuj arai Akuj kus. Kiwapa ngakiro na adunguni ayong, kirichakis ngitalio kang. Kitaleutu akolongit na Sabato, na erai emachar a achamunet kang ka esi, na kisitamuni esi atamar arai ayong Ekapolon Akuj na arai Akuj kus.’ “Nakaneni apot tani ngalesea nguna katongero ayong. Nyiwapa ngakiro na adungunit ayong, nabo nyirichakina ngitalio kang lu eraakasi ani kiwap itwaan, toyar. Kimenyasi kesi ngasabatoi kang. Abu ayong atama atobukok kesi anyunyura kang anariet atomunya pil. Nakaneni abu ayong eratak akan kang nyaasubak nguna, sodi nyiimenyarere ekiro kang alokiding ngibukui lukolong keteete ayong epuduni Ngisirael alo Misiri. Tani kikoni neni, ekong ayong anariet atamar apetari kesi nakwapea nakalonak, etolom kiding ngibukui. Ikokinete nguna neni kainyo awounete kesi akiwap ngitalio kang, tongero ngakiro na adunguni ayong, kimenyasi ngasabatoi kang nabo tominakis kesi akilip ngakujo nasubuna nakolong elipito taapaakech. “Atodungok ayong kesi ngakiro naaronok ka ngitalio lu adikino kesi peanyuneta akiyar. Enyasu ayong kesi a ngakipeyos kech a ngikulepek, emiek kesi ipeyoote ngide kech lusapa lu ekingaren. Asubi ayong kongina toyeneta kesi atamar arai ayong Ekapolon Akuj. “Tokona bocha itwaan, tolimok Ngisirael ngakiro na esuruori ayong Ekapolon lo arai Ekapolon Akuj kesi abala, keyenyete kolong taapakech ayong loger logo, ani kamodeaneta. Ayauni kolong ayong kesi nakwap nakolong echikakini kesi atamar ainakini. Toliwor nacha ingolikineta kesi emukura lokooyen daang, kori ekitoe lokaliban, kipeyoto ngakipeyos kech kaneni, sodi ketilileta ayong a ngakipeyos ana enomete ka emuna lo abukonokinete neni. Engit ayong kesi atama, ‘Enyaritae ni ikeuna ni iloseenete esi ngae?’ Tolimokis kesi neni ekiro be ‘Ni ikeuna’ tani tokona. Tolimok tokona Ngisirael atamar abala ayong Ekapolon lo arai Ekapolon Akuj kona: Inyasunosi esi ani isubeta ngasechesea napei kolong kata apaakus, kibataros ani iwapeta ngakiro kech nakikadakinete. Na ilemuneta esi ngadekon napei nguna ka akipeyore talokookus, kitiliwosi esi ngakujo nguna lu nyitaleuno tanang akolongit naga. Ani erumor abe pot esi Ngisirael akingisit ayong ngakiro na asaki! Nakaneni ekongi ayong Ekapolon lo arai Ekapolon Akuj a ekiro kang a ilope atamar nyekemiekini esi kingisete ayong ngakiro. Itiakut esi atamar isakete kikwaanikin ka ngibukui luche, kikwaanikin ka ngitunga lu elomito nakwapea nache lu ilipito ngikito ka ngatabab. Nakaneni nyesubakinosi nguna jik. “Ekongi ayong Ekapolon lo arai Ekapolon Akuj a ekiro kang a ilope atamar kapolokini ayong esi a akan ana ngikilinga, ana itorwaaritae, katobukok esi anyunyura kang. Kepuduni ayong esi alobukui, katochun anakwapea ana kolong ipetakina a akan ana ngikilinga ana itorwaaritae, dio katobukok anyunyura kang. Kayaari esi nariet a ngibukui, atotub ngakiro kus kaneni, kikienyikina. Loger lokolong atubio ngakiro kata apaakus anariet alo Misiri, atubi ngakiro kus loger ngolo. Ayong Ekapolon lo arai Ekapolon Akuj alimu nguna. “Kapolokini esi niationon, kesiwapak achamunet kang. Alemari ayong alokiding kus ngulu kangerete ayong ka ngulu ketulunyete. Etwarakini ayong kesi anakwap ana epeyonitotor, nakaneni nyelomarete nakwap a Isirael jik. Toyeneta esi atamar arai ayong Ekapolon Akuj. “Ani eliwor esi Ngisirael, alimunit ayong Ekapolon lo arai Ekapolon Akuj atamar, kapesi tosuba ngakujo kus nasubuna. Napei tokona jik, erai kiwounito akiirar ngakiro kang. Nakaneni nyeringa nabo esi imenyarete ekiro kang lo italeuno ani ilemanakineta ngakujo kus nasubuna ngainakinet. Kainyo kelipete ayong Ngisirael daang alokidiama emoru kang, alo erai emoru lokooyen a Isirael. Kachamuni ayong esi kaina sodi eitan ngakipeyos kus, ka ngadekon naajokak ta ngainakinet na italeuno. Ani kepud ayong esi anakwapea ana kolong ipetakina esi, katochunak achamuni ngakipeyos nakaakunyok, nabo edodiuni ayong akitaleuno kang anikus kingolikis ngibukui. Iyenunete esi atamar arai ayong Ekapolon Akuj, nakayaunea esi nakwap a Isirael, nakolong ekongi ayong atamar ainakini taapaakus. Itamunete esi kaina elote kus ka ngakiro na isubete esi daang nakolong kinyasunete esi. Ikadanakinosi esi make kotere ngakiro naaronok daang nakolong isubete esi. Ani kanyou ayong atoweik ekiro kang nyiimenyar, iyenunete esi atamar arai ayong Ekapolon Akuj, kainyo nyasubi ayong nguna itemem ka ngakiro naaronok isubete esi. Ayong Ekapolon lo arai Ekapolon Akuj alimu nguna.” Katolimok Ekapolon Akuj ayong akiroit tama, “Itwaan, tokienyia kuju, kikilak akwap na alokuju, todwar naaronok anamoni ana alokuju. Tolimok amoni na alokuju tama, kiira ngakiro na alimunit ayong Ekapolon lo arai Ekapolon Akuj abala, kingolik a, enokakini ayong akim anikon, tonomia ngikito kon daang, lokaliban ka lokoonon. Emam ibore itudunge akim ngina kori nyedipakin asarae. Enyamiari akwap napei alokuju tanang kwap, iwarakini itwaan daang nikamonan. Ingolikini itwaan daang atamar ayong Ekapolon Akuj enokak akim ngina, nabo emam itwaan itudunge.” Abu ayong atama, “Wae, Ekapolon lo arai Ekapolon Akuj, alomasi ngitunga akisuburare ayong ebalasi, ‘Aliwor logo ngakisikwaanet make iruoro!’ ” Katolimok Ekapolon Akuj ayong akiroit tama, “Itwaan, tokienyia Yerusalem kikilak. Kikilak tani ni ilipeeneta ngitunga. Kikilak akwap a Isirael. Tolimok akwap a Isirael atamar abala ayong Ekapolon Akuj atamar, kingolik a, kanyoikinit ayong iyong. Alachakini ayong akuroru a akwara kang, kataar esi daang, luajokak ka luaronok. Ani aloger kaarea ayong esi daang, luajokak ka luaronok, eutun akwara kang anakiroru kang taar ngitunga daang, napei alokuju tanang kwap. Toyen itwaan daang atamar ayong Ekapolon Akuj aut akwara kang, nyerepakini nabo nakuroru. “Itwaan, tokunuak esibit eriangakina etau kon, elilimiyorit. Tokunuak ialolongi, ani kingolikineta ngitunga daang. Ani kingisete kesi iyong etamarete, ‘Nyo ikunuar iyong?’ Ilimuni iyong tama, ‘Erai kotere ngakiro na eponito. Ani epote ngakiro nguna, ipirisaar ngitai a ngitunga kadaang, elilimiyorete ngakan, irakarosi ngitunga tamaranikis ngakungin. Kingolikisi, adolut nabo esubakinosi!’ Ayong Ekapolon lo arai Ekapolon Akuj alimu nguna.” Katolimok Ekapolon Akuj ayong akiroit tama, “Itwaan, todwar. Tolimok ngitunga ngakiro na alimu ayong Ekapolon Akuj abala, Akwara, epenar akwara nabo esutar. Epenar taarere, esutar imilea loger a akimileaunet! Emam ekichur emini kainyo angero ngitunga kang ngakichikichiket daang ka eriras. Ipenio akwara sodi totingere. Epenar nabo esutar nakinere ekaaran. Itwaan, kikalou kiute kainyo edodiar akwara lotunga kang earere ngikatukok a Isirael daang. Ngiaran kesi ka ngitunga kang luche. Taramaramata robo ngirarumo kus. Aroit ayong ngitunga kang ani pekelunga kesi akisech, esubakinosi nguna anikech. “Itwaan, todwar. Taram ngakan kon. Ichumi akwara ngakichumet nakaalak. Erai akwara aketubulon nabo eari. Ipirisaari ngitai a ngitunga kang. Edakakinosi lukaalak lodorin kech. Epoto ayong akwara na ebala peak. Ee robo, ikwaan ka akimilea, isutaritae taarere. Ee akwara nakakwanan, kichum lowae lo aloteten ka kedieny! Kichum ewae locha ingoliari iyong. Arami ayong dang ngakan kang, esalu angoit kang. Ayong Ekapolon Akuj alimu nguna.” Katolimok Ekapolon Akuj ayong akiroit tama, “Itwaan, kigerok ngirotin ngiarei lu itoruni akwara a ekapolon a Babilonia ebuni. Enyounete ngirotin ngulu daang anakwap a apei. Kiwaak emachar ni ichiereta ngirotin kidodiu ni eyei ere. Kigerok erot ni itori akwara elosi akichum ere a Raba lo a Ngiamon, kigerok loche lo elosi lore a Yerusalem lo isiriamitae awas nakaagongon anakwap a Yuda. Ewei ekapolon a Babilonia ani ichiereta ngirotin. Ani esaki akiyen erot lo itori ngesi, tomuro ani ilongolongakinea ngimalea a akau, tomuro ngakujo keng nasubuna, ka akisemere ngamaliteny a ibarasit ani ipeyeo. Akan keng na aloteten, etingit emachar lo igiritae ‘Yerusalem’! Tolimok ngesi atamar tolem ngasua naukonoret, taram elea lo ejie, todupak ngasua naukonoret lodorin, kiriwok ngakatiputipui ta ngaduon, kisiriama ere. Nyenupete ngitunga a Yerusalem nguna, kotere ngakiro nakolong sek ekongokis kesi. Tani kikoni neni, isitamunete na edwaritae nugu kesi ngasechesea kech, kichikichik kesi atamar eliworosi monan ngirikon. Ngakiro nugu ngesi alimu ayong Ekapolon lo arai Ekapolon Akuj. Ewolun ngasechesea kus. Eyeni itwaan daang eger lo isechitotor esi. Idodiunito esi akisech alolote kus kadaang. Ejoikinit esi kirirao. Kepotokini ayong esi ngimoe kus. “Ee ekapolon a Isirael lo nyitaleuno, iyong lokaronon, anang akolongit kon na eriras alo esal. Alimu ayong Ekapolon lo arai Ekapolon Akuj atamar, tobuto ekiraun kon ka apukot. Nyerubakinete ngakiro ikote nipalem. Kikeu ngikebootok, totiyaa ngikapolok. Ee robo, etiliwori ayong ere asakatan. Nakaneni nyesubakinosi nguna mati kebu ngolo aseunit ayong akirirare ere, dio ainak ayong ngesi ere. “Itwaan, todwar. Tolimo ngakiro na alimunit ayong Ekapolon lo Ekapolon arai Akuj, alimokinit Ngiamon, lu iyenyete Ngisirael. Tolimok kesi kona, ‘Ekear akwara esakere akichumea, esutar amalamal, kimilea loger a akimileaunet. “ ‘Ngaka alioko ngakisingolikinet na ingolianakinete esi. Alioko ngakiro na idwareenete esi. Iroko esi, nyitaleuno. Anang akolongit kus na eriras alo esal. Edoe akwara losiepion kus. “ ‘Tobuak akwara nakuroru. Kerirae ayong esi anakwap ana kolong kisubunere. Ee robo, anakwap ana kolong kidounere. Kinomi esi angoit kang, na alakakinea ayong erirauni loger a akim. Kepotori ayong esi kainak ngitunga lukamoitanak, lu eperikinito nginyas. Kimunyari esi akim. Ebukor ngaakot kus anakwap kus a ngikulepek. Emam itwaan kitamuni esi nabo jik. Ayong Ekapolon Akuj alimu nguna.’ ” Katolimok Ekapolon Akuj ayong akiroit tama, “Itwaan, inyounit iyong akitub ngakiro a ere alo a ngikaarak kalo a? Kasio tolimok ngesi ngakiro daang nakikadakinete na asub ngesi. Tolimok ere ngolo atamar abala ayong Ekapolon lo arai Ekapolon Akuj kona, ‘Aloger iraakar iyong ere lo iar ngitunga kon lukaalak, nabo inyasun iyong ani ilipeenea ngakujo nasubuna, adol akolongit kon. Isechit iyong ani ibukorea ngaakot a ngitunga, nabo kinyasut ngakujo na isubak iyong. Itaapu iyong akolongit kon na eriras. Adaun ngirwa kon! Ngakiro nguna kesi emiekinea ayong ngibukui kikianatar iyong, sodi kimenyasi iyong ngakwapea daang. Ngulu eapiyete ka lu eloka, kikianatar iyong kotere asechanu ka erukoonu kon. Ngikarikok a Isirael daang lu eyakasi nikon, elemunito ngikilinga kech abukorea ngaakot. Nyekeritae ngikauriak anikon. Ingalao ngitunga lua ngakwapea anache anikon. Eboliare ngikokiok ka ngapuseru. Imenyarit iyong ngiboro kang lu italeuno, kisurum ngasabatoi kang ngileech. Eyakasi nikon ngitunga lu itinganakinete luche ngakiro, esakete taarae. Imujete ngiche ngakipeyos a ngakujo anasubuna alomoru. Eyakasi lu iwapito etereku kech loaronon. Eyakasi nikon ngitunga lu epereenete ka ngaberu kata apakech. Etikoonorete ngiche ngaberu ngirwa lu ibooyoto. Eraakasi ngiche ngikalomak. Imalaate ngiche ngaterak kech, kimalaate ngiche ta nakaapakech. Eyakasi nikon ngitunga lu etachio ngaropiyae taareta luche. Idokete ngiche ngaropiyae na imichaanarete Ngisirael luche, tabarakis nakingalare. Kemiekis kesi ayong. Ayong Ekapolon lo arai Ekapolon Akuj alimu nguna. “ ‘Iyong Yerusalem, kelulungikini ayong iyong akan kedichak kotere ademanu kon ka ngitunga lu iar iyong. Ipedori iyong ititiny a? Egogongerosi ngakan kon dir ngirwa lu kiruoror ayong ka iyong a? Alimu ayong Ekapolon Akuj, nabo asubakini. Kapetari ayong esi lobukui, kiealakinos nakwapea daang, sodi ekisa aronis kus. Kotere nguna, kimenyarete iyong ngibukui luche nakaneni iyenunete esi atamar arai ayong Ekapolon Akuj.’ ” Katolimok Ekapolon Akuj akiroit tama, “Itwaan, ekokis Ngisirael asakatan anikang. Ekokis asakatan a asuat ananyang ka asuat naakwaan, ka asuat nakirion ta asuat naapotion na idongete esaa lo itosegere asuat a akim. Alimu tokona ayong Ekapolon lo arai Ekapolon Akuj atamar kona ekokineta kesi daang asakatan a ngasua, achununi ayong kesi daang Yerusalem. Achununi loger lo echununere akwangat, ka asuat nanyang, ka asuat nakirion, ka asuat naapotion ta asuat naakwaan, kiwaakinae nasarae na itosegere. Itekeiari angoit kang ka anyunyura kesi loger lo itekeianarea akim ngasua. Ee robo, achunakini ayong kesi Yerusalem, enokak akim a angoit kang kidiama kech, kitokeia kesi. Itokeiario kesi alo Yerusalem loger lo itokeiarere ngasua anakim, toyeneta kesi atamar abukok ayong Ekapolon Akuj anyunyura kang kidiama kech.” Katolimok Ekapolon Akuj ayong akiroit tama, “Itwaan, tolimok Ngisirael atamar nyitaleuno akwap kech. Kotere nguna, erirae ayong a angoit kang. Ikwaan ngikarikok kus ka engatuny lo irurumae erusi akiring a etiengit. Earete kesi ngitunga, todemasi asir ka ngiboro kech daang. Eatakis kesi ekimar a ngapuseru alore. Ichwanganakinete ngimurok kus ngitalio kang, nabo imenyarito ngiboro kang lu italeuno. Nyetiakito kesi ngiboro lu italeuno ka lu nyitaleuno. Nyitatamete kesi ngakiro na etiakito ibore ni italeuno ka ni nyitaleuno, nabo nyekachito kesi ngasabatoi kang. Kotere ngakiro nguna, nyakakerito Ngisirael ayong. Ikwaan ngikarikok a ere ka ngikweei lu erwakinosi akiring a ibarasit ani earete kiealasi. Earete kesi ngitunga tabareta. Iweito ngikadwarak kus ngakiro nguna, loger lo iwasakinea itwaan emunyen lokwaan lokwaas a akai loaronon. Ingoleanakinete ngakisingolikinet na alioko, nabo edwarete ngakiro napasiek, niti ebalasi, ‘Ebala Ekapolon lo erai Ekapolon Akuj kona’, tarai bo nyisuruoro ayong Ekapolon Akuj kesi. Ingalaate ngikabarak ngitunga ka akidem ngiboro. Eboliatar kesi ngikebootok ka lu ichanasi ta ngitunga a ngakwapea anache. Atasak ayong itwaan alokiding kech ni edukokini awas kitowo. Ani erumor towo alongaren kang kitubuikin ni eukoro, sodi kiratak akwap nyeenyasu ayong. Nakaneni abu nyeanyunga itwaan tani ipei. Kotere nguna abukok ayong angoit kang nikech, atomunya kesi a akim a anyunyura kang, itemem ka na asuba kesi. Ayong Ekapolon lo arai Ekapolon Akuj alimu nguna.” Katolimok Ekapolon Akuj ayong akiroit tama, “Itwaan, ayakasi kolong ngakaitotoi ngaarei, ngide a aberu a apei. Nakolong ayakatar kesi Misiri, eringa esorokoka, apot tosuba emalaanu, kimiekis ngisikin kech emunao, nabo toboliare epesuraane kech. Anyaritae naapolon Ohola, ani naachi anyaritae Oholiba. Abu ayong eut kesi, kedoikis ngide lusapa ka lupesur. Ohola ngesi Samaria, Oholiba ngesi Yerusalem. Asubi Ohola emalaanu tarai na arai aberu kang. Aminarito ngikiliok keng lua Achuru. Araakasi kesi ngasigerea na anapito ngiworui lupusiek-arengak, ka ngikapolok a arieng ta ngikarikok a ngasigerea. Araakasi kesi daang ngisorok lukebuseak lu ameto ngangolei. Toliwor ngesi amalaat a ngikapolok a Achuru kadaang. Kinyasu ngesi eboyor keng toliwor ngesi na nyitaleuno ani elipea ngakujo nasubuna a ekile kadaang alo elomete ka ngesi. Nyimiekina ngesi emalaanu keng lokolong asubi alo Misiri, kainyo aperete ngesi ka ngikiliok eringa esorokana, kinyasut ngikiliok epesuraane keng, kisunyakis etereku kech nikeng. Kotere nguna, epotok ayong ngesi lokiliok keng lua Achuru lukolong aminarito ngesi lokojokon. Tobutosi kesi ngiboro keng kimiekis emuner. Kirumut talokookeng ka tanakookeng. Ani ngesi alope, kichuma a ekileng taara. Kisiakis ngaberu awadaang aswamar ngesi kotere eriras lo aanyu. “Abu nakaatokeng nabe Oholiba kingolik nguna, nakaneni toroner ngesi noi alomalaanu ka etereku kidwang nakaatokeng Ohola. Kimua ngesi ngikiliok a Achuru noi, lu araakasi ngikapolok a arieng, ka ngikarikok a ngasigerea ta ngasigerea na enapito ngiworui kech lua ngasigerea ta ngikameak ngangolei. Araakasi kesi ngisorok lukebuseak. Atoyen ayong atamar inyasuna ngesi, ekwaan eboyor kech anaarei. “Toroner emalaanu a Oholiba noi tominasi ngitorubei a ngikiliok a Babilonia lu atapanakinitae nawasea, iwasitae emunyen loarengan, eenikinitae ngarubae naaborin tanapito ngapukoto naapolok anakies. Ekwaan kesi ka ngikapolok a Babilon, a ngitunga alu alomito nakwap a Babilon. Napei ingolikinea ngesi ngitorubei ngulu, toting etereku jik. Tomea ngitunga nakwap a Babilonia. Pot Ngibabiloniae topero ka ngesi. Kinyasut ngesi a etereku kech lokojokon. Ani kinyasut kerumor, takadakis ngesi ngitunga ngulu, totiakas. Ani erubakini ngesi esubi emalaanu ka alosit emuner, abu ayong katakadak ngesi emiek, loger lokolong emiekinea nakaatokeng. Kaneni dang, abu emalaanu keng toroner noi, tosub loger lokolong asubea esorokana alo Misiri. Kimua ngesi ngikiliok lua etereku aloaronon lu ekwarete ngesi loger lo ekwaratar ngisikiria ka ngangolei. ( Oholiba, isaki iyong abongokin emalaanu lokolong isubi iyong irai apese alo Misiri, lokolong amunaata ngikiliok ngisikin kon ediseak, kitopero iyong.) “Tokona bocha Oholiba, ngakiro nugu kesi alimu ayong Ekapolon lo arai Ekapolon Akuj. Echichiuni ayong ngikiliok kon lukolong kikadakinete iyong totiakas, pot kiriama iyong alowaitin kadaang. Ayauni ayong Ngibabiloniae daang ka Ngakalidayo, ka ngitunga a Pekod, ka Choa, ka Koa ta lua Achuru daang. Echichiuni ayong ngisorok lukebuseak ngulu daang, lu eraakasi ngikapolok, ka ngikarikok a ngasigerea, ka ngikaweikinak a ngasigerea ta ngasigerea daang na eraakasi ngikameak ngangolei. Epote kesi akitijikin iyong alokwap, yaut ngasigerea nakaalak ka ngaurukukui na irito ngangolei ta eegos. Kiriamete kesi iyong alowaitin kadaang, etingito ngaupwala tanapito ngapukoto. Kepotokini ayong iyong kesi, totubo kesi ngakiro kon iwapito ngitalio kech. Idiruni angoit kang nikon, kitonyunyurikin kesi iyong. Etuborete kesi ekume kon ka ngaki, sodi taara ngide kon. Ee robo, elemarete kesi talokookon ka tanakookon, kinoma kesi eyarete. Echilichilaarete kesi ngiworui kon tolemasi asir kon. Ekokini ayong neni atubori etereku kon ka emalaanu lokolong isubi alo Misiri. Nyeringa nabo ingolikini ngakujo ngache nasubuna kori nyitamuni Misiri nabo jik.” Ebala Ekapolon lo arai Ekapolon Akuj kona, “Kepotokini ayong iyong lotunga lu iremit, kitakadakinito. Kiremokinosi kesi iyong, kitodemasi ibore daang nikolong ichidaritor iyong ngakiinyir, kitobutosi ngiboro kimiekis imuner loger a amalaat. Etereku kon ka emalaanu kesi kiinut iyong nguna. Irai kolong iyong amalaat a ngibukui, kinyasut iyong ngakujo kech nasubuna. Kiwap iyong elote a nakaatokon. Kotere nguna, ketongobari ayong iyong ekopo a eriras lopei ngolo.” Ebala Ekapolon lo erai Ekapolon Akuj kona, “Imasea iyong ekopo a nakaatokon, epolot nabo eburuk. Kikianatar daang iyong kimenyasi, kainyo ileleba ekopo. Kisialolongi iyong nabo kisirakari epurot, ekopo a aemit ka nginyas, ekopo a nakaatokon Samaria. Imasi iyong kiuyo tobelebele, tochilichilaarea ngisikin kon. Ayong Ekapolon lo arai Ekapolon Akuj alimu nguna. “Tokona bocha, alimunit ayong Ekapolon lo arai Ekapolon Akuj abala, ‘Ani aloger kimuriakinea iyong ayong kimulenio, kitir ngichan a etereku kon ka emalaanu.’ ” Katolimok Ekapolon Akuj ayong tama, “Itwaan, inyounit iyong akitub ngakiro a Ohola ka Oholiba? Tolimok robo kesi ngakiro nakikadakinete na esubete kesi! Aloma kesi, nabo earete ngitunga. Aloma kesi ka ngakujo nasubuna nabo taarakis ngide lu kedoikinete kesi ayong tarata ngakipeyos. Ani eya nguna, emenyasi kesi akai kang nabo nyirichakinito Sabato nakolong aseuni ayong. Akolongit napei aareta kesi ngide kang, kitiliwosi ngakipeyos a ngakujo, akolongit napei ngina, pot kesi kai kang kimenyasi. Ngakiro nguna asubete kesi alokai kang. “Ameanarete kesi jiik ngitunga anyaraun ngikiliok anikalonan, pot ngikiliok ngulu. Elotanarosi ngakaitotoi naarei nguna, tongura ngakonyen kech, tosiro. Kiboikinos lokicholongo luajokak tosipokis emeesa lo ileleba ngiboro luajokak, ka emitina ta akimiet, ngiboro lukolong ainakini ayong kesi. Kiirarae ngitoilio a ajore ana emam ibore iche emisito, ajore a ngikiliok alu elewat ayaunio anariet. Tobutokis kesi ngasua nakan a ngaberu kanguna, kitanapa ngikiraunea luajokak anakies kech. Atolim ayong atamar elomete kesi ka ngaberu nakolong enyasu emalaanu. Abongonorete kesi namalaae nguna jiik. Abongonorete nia Ohola ka Oholiba na araakasi ngamalaae. Epote ngikiliok lu etenooko, kirirata kesi loger a ngaberu anakalomak taraakas ngakaarak, kainyo eraakasi kesi ngikalomak ka ngikaarak.” Ebala Ekapolon lo erai Ekapolon Akuj kona, “Yautu ajore a ngitunga kilolik kesi todema ngiboro. Tachaka kesi a ngamoru ka akitijikin a ngakwaaras taara talokookech ka tanakookech, kinoma ngakais kech. Atubori ayong emalaanu anakwap kadaang, toliwor akichikichiket anaberu kadaang nyeelom loger lokolong kech. Ani esi ngakaitotoi naarei, kerirae ayong esi kotere emalaanu kus, ka akisech na ilipitotor esi ngakujo nasubuna. Toyeneta esi atamar arai ayong Ekapolon lo arai Akuj.” Akolongit na ngatomon a elap alo a ngitomon, a ekaru alo a ngikan-koomwon alo kiraakar sua ngirikon, katolimok ayong Ekapolon Akuj akiroit tama, “Itwaan, kigirak erwait a akolongit kana, kainyo akolongit naga ngesi isiakinea ekapolon a Babilonia akisiriam ngajorei keng ere a Yerusalem. Tolimok ngitunga lukang lukechanak lugu akisikwaanet naga, na alimokinit ayong Ekapolon lo arai Ekapolon Akuj kesi. Tosipok amot lokeno, kilelebik ngakipi. Kiwaak nginerin a ngaringo, nginerin luajokak, ngamuroi ka ngakwaas. Kilelebik ngakoyo naajokak. Toseu akiring a emesek naajokon, kirepak ngakito lokeno, kitukulau ngaringo ka ngakoyo, tokulata daang lokojokon. “Abala bocha tokona ayong Ekapolon lo arai Ekapolon Akuj kona, oitiakoi, abe etioko nginyas eanyuni ere a ngikaarak! Ikwaan ere ngolo ka amot na eyei, na nyetiakasi ka ekut jik! Autonor ngaringo daang a ngapei-pei esunyar. Ngitunga lu aario alore, eringa ngaakot etakanete, kainyo abukokin nataaba. Nyebukokina nalup tonuk apua. Emiek ayong ngaakot nguna anataaba nyenuka, asaki kitonyout anyunyura na atachakinea ayong ngakiro nguna.” Ebala Ekapolon lo erai Ekapolon Akuj kona, “Oitiakoi! Abe etioko nginyas eanyuni ere a ngikaarak! Ayong alope atukokini ngakito. Eatak ayong ngapungurei ngache, sodi erirak akim. Ani erumor etukulau akiring niajokon, etiu ngapoko, dio emiek ngakoyo iluurikini. Atolem amot na ngasua ananyangayek ngina na emam ibore eyei tooma, ewaak nakim torirau torenger puu, kimududuyorea ekut! Etuburuna ayong pas! Nyemunyari akim ekut keng lokaalan. Yerusalem, ngakiro naaronok isubi iyong, kitiliwosi iyong ere lo nyitaleuno. Aroit ayong akitaleun iyong, nakaneni torubak iyong irai lo nyitaleuno. Nyikitaleunio iyong nabo mati kabukok ayong iyong anyunyura kang kitemokin. Alimu ayong Ekapolon lo arai Ekapolon Akuj kona: Anang esaa lo asubakinea ayong akiroit ngina etemok. Nyelagalagakini ayong ngasechesea kon kori nyariangakin atama kesien kare. Kerirae ayong iyong itemem ka ngakiro na isub. Ayong Ekapolon Akuj na arai Akuj alimu nguna.” Katolimok Ekapolon Akuj ayong akiroit tama, “Itwaan, kingolik a, edikino ayong angedari itwaan ni eminarit ngakonyen kon. Nakaneni tochoite ikalouni tosutonok, kori nyiilakak ngakiyo. Kisutusut ekiilingat. Nyiirap akou kori nyiitur kotere akigoro. Nyiirap ereet kori nyiinyam akimuj a ngapunyas.” Esuruori sek ayong ngitunga nataparach, ani enangi ebong, totoan aberu kang. Ani iwalari akolongit nache, atosub ayong loger losek kalimokinitere. Kengita ngitunga ayong tamasi, “Nyo pekilimokinea iyong eger a ngakiro kanu? Nyo isubea iyong kona?” Atatachak ayong kesi atama, “Kalimokini ayong Ekapolon Akuj akiroit atamar, atolimok Ngisirael atama, ‘Ebala Ekapolon lo erai Ekapolon Akuj kona: Kingolikisi a, etiliwori ayong akai kang na nyitaleunitoe. Akai ngina ngesi na inisatar esi agogongu keng, tojoikinite ngakonyen kus ka ngitai kus. Ani talokookus ka tanakookus nakolong edongete Yerusalem, earakinio lojie. Ani erumor tosubakis esi ngakiro na asubak ayong. Nyirapete esi ngireetin kus kori nyinyamete akimuj a ngapunyas. Inapete esi ngapukoto ka ngamuk. Nyisutonokinete kori nyigorosi. Ililimiyorete esi kotere ngasechesea kus, tokunuanakinos make. Eliwor Esekiel emachar anikus, isubete esi ibore daang loger losek asubea ngesi. Ani esubakinosi nguna, toyena atamar arai ayong Ekapolon lo arai Ekapolon Akuj.’ ” Katolimok Ekapolon Akuj ayong tama, “Tokona bocha itwaan, akolongit na ademarea ayong kesi akai kang na erai agogongu kech, na ipuruunito kesi elakara, tojoikinite ngakonyen kech ka ngitai, atodema tani talokookech ka tanakookech, akolongit ngina, ebuni itwaan ni ebuchun anamunyaro kangina kitolimok iyong ngakiro nguna. Akolongit napei ngina, engaar akituk kon nasek agolol, kisuruoro iyong itwaan ngini, tojongo achakina chek. Alorot kangolo, iliwor iyong emachar alotunga, toyena kesi atamar arai ayong Ekapolon Akuj.” Katolimok ayong Ekapolon Akuj akiroit tama, “Itwaan, toroas ka Ngiamon, todwar naaronok anikech. Tolimok kesi kiirasi ngakiro na alimunit ayong Ekapolon lo erai Ekapolon Akuj abala, kona kolong ibalatar esi ‘Ee rocha’, ani emenyarere akai kang kitiliworoe akwap a Isirael alaireng nabo kitiliworoe ngitunga a Yuda ngirikon, emiekini ayong ngitunga a akide kidwanga esi kainyo ilakara kolong esi. Edukokinete kesi ngadakarin kech nakwap kus. Enyamete kesi ageor kus tamata ngakile kus. Etiliwori ayong Raba ni edakasi ngikaala, etiliwo akwap a Ngiamon anok a ngamesekin. Toyeneta esi atamar arai ayong Ekapolon Akuj. “Ebala Ekapolon lo erai Ekapolon Akuj kona: Iramete kolong esi ngakan kus kichuro ani kikadakinitor akwap a Isirael. Kotere nguna, kanyoikini ayong esi kepotok ngibukui lu eremete ngiboro kus. Kamunyari ayong esi jik nyiiliworosi nabo jik ebukut kori nyeemin akwap na erai akus a ngikulepek. Toyeneta atamar arai ayong Ekapolon Akuj.” Tolim Ekapolon lo erai Ekapolon Akuj tama, “Kona ebalar Moab ikwaan Yuda ka ngibukui luche daang, emiekini ayong ngirerea lupalem iratakinito ngikukuorin a Moab kitijikinoe, tani ngirerea luajokak lu enyaritae Bes Yechimos, ka Baal Meon ta Kiriasaim. Emiekini ayong ngirerea lua akide kidwanga Moab ka Amon, nyeeliworor nabo jik ebukut. Erirae ayong Ngimoab toyeneta atamar arai ayong Ekapolon Akuj.” Tolim Ekapolon lo erai Ekapolon Akuj tama, “Atachakinete kolong ngitunga a Edom ngakiro naaronok ani a Yuda. Aliwor ibore ngini asechanu naationon ani a Edom. Alimu tokona ayong atamar erirae Edom ataar ngitunga daang ka ngibaren. Eliwor akwap alaireng napei alore a Teman tanang lore a Dedan, emunyario a akwara daang. Etonyouni ayong ngitunga kang Ngisirael tatachakis ngakiro naaronok ani a Edom, itemem ka eriras a angoit ka anyunyura kang. Neni ngesi eanyunea Edom aronis a eriras kang. Ayong Ekapolon Akuj Namerikanyer alimu nguna.” Tolim Ekapolon lo erai Ekapolon Akuj tama, “Atachakis Ngipilisti ngakiro naaronok ani a ngimoe kech alungorok, amunyasi kesi kotere arem. Kotere nguna, alimu ayong atamar anyoikini Ngipilisti atomunya. Amunyari ayong itwaan daang ni idongit eyari anaroatin a Pilistia. Erirae ayong kesi niationon atatachak ngakiro na asubete kesi. Etikokin kesi angoit kang, toyeneta atamar arai ayong Ekapolon Akuj.” Akolongit na ekingaren a elap alo..., a ekaru alo a ngitomon ka epei a arikonot kosi, katolimok ayong Ekapolon Akuj akiroit tama, “Itwaan, ekianatar ngitunga a Tiro Yerusalem ebalasi, ‘Ekoe! Ere lokolong arai ekidor a ngibukui! Adaun emuchuruseenu keng! Nyeringa nabo erai emoit yok!’ “Tokona bocha, abala ayong Ekapolon lo arai Ekapolon Akuj kona, ere a Tiro, kanyoikinit ayong iyong. Ameuni ayong ngibukui lukaalak kitijikis iyong. Eneteunosi kesi loger a ngitoroi a anam. Inyasunete kesi ngawasea kon, toukosi ngipemin kon lu iyokiyere ere. Ani erumor atopia apua keng daang, emiek ataaba nilapat. Elukakin kiding anam toliwor ngesi eloanakinete ngikechiemak ngipuutei kech. Ayong Ekapolon Akuj na arai Akuj alimu nguna. Eremete ngibukui Tiro, eari akwara ngitunga lu elomito lorerea a Tiro, lowae a akwap anakoonon. Toyeneta kesi atamar arai ayong Ekapolon Akuj.” Ebala Ekapolon lo erai Ekapolon Akuj kona, “Ayauni ayong ekapolon lo idwangit ngikapolok daang kitijik Tiro. Enyaritae ngesi Nebukadinesa lo erai ekapolon a Babilonia. Irukunete ngesi ka ngasigerea nakaalak alokwap, edokito ngangolei, tometo ngaurukukui na iritae, toloose luche a ngakejen. Ngulu elomito lorerea a akwap anakoonon, eario alojie. Ebokarete ngimoe ngaduon ka ngakatiputipui ta ngawasea na kigagarete esi anikech. Eukorete kesi ngawasea kon a ngasua anabwanget, toukosi ngipemin a ngaepe. Elalak ngangolei a Nebukadinesa. Kirapi iyong apua a ngakejen kech. Erue a ngangolei kech ka ngaurukukui na iritae, itamaranikini ngawasea kon na elomuneta lodorin kus, loger lo elomunere lore lo enyasun. Ipudaate lua ngangolei ngirotin kon, taara ngitunga kon a ngakwaaras. Eukokinio ngapirio kon naapolok nalup. Engatarete kesi ebari kon ka ngiboro a emuchuruseenu. Erimaunete ngawasea kon, toukosi ngakais kon naajokak. Elemunete kesi ngamoru ka ngakito ta echoto tachakakis nanam. Atubori ayong ngieosio kon, nyeringa nabo iirario erue a ngibunei kon. Kemiekini ayong iyong irai ataaba nilapat, ni eloanakinete ngikechiemak ngipuutei kech. Nyeringa nabo iyong kidukokinio jik. Ayong Ekapolon lo arai Ekapolon Akuj alimu nguna.” Elimokinit Ekapolon lo erai Ekapolon Akuj ere a Tiro ebala, “Nakidwangere iyong, emaranikinete ngitunga lu elomito lokwaas a anam kotere erue lo idakaror iyong ka akigoro a ngitunga alu eario. Ngikapolok daang lua ngakwapea ana eyakasi lokwaas a anam, etiyaunosi alokicholongo kech a apolou, tobutosi ngiworui kech lua apolou ka lu esiritoe. Ebuloi ngesi eliwor ngiworui kech. Iboikinosi kesi nalup torubakis emaranete, tatalarito naaronok na ianyu iyong. Kieonokinete kesi iyong eeos lo igorore ebalasi, Wae, ere lo kiyenikinitae! Ekisar ngatubwae kon ananamea. Ipolokinit kolong iyong nganamea. Kiemito daang iyong alokwaas a anam. Amaranikis tokona ngikwarin daang, akolongit na iukoror iyong naga. Ariangakinosi ngitunga kech kotere nginyas kon.” Ebala Ekapolon lo erai Ekapolon Akuj kona, “Ketiliwori ayong iyong alaireng loger a ngirerea alu enyasun, alu emam itwaan elomit. Kaburuchiari ayong iyong a ngakipi ana eponito anituluk a anam. Katiyaari ayong iyong nakipany kiruko ka ngikatoak lu alomasi nakipany, lotunga lungorok. Kewaakini ayong iyong tolom lokatoak jik, nakwap a nginyas alukajik. Nyeringa iyong imini nakwap na eyakasi ngitunga lu eyarete. Ketiliwori ayong iyong ekitetemes loketubulon, toliwor esal kon ngolo. Kisakete ngitunga iyong nakaneni nyitakanuuni nabo jik. Ayong Ekapolon lo arai Ekapolon Akuj alimu nguna.” Katolimok Ekapolon Akuj ayong akiroit tama, “Itwaan, toeok eeos lo igorore Tiro, ere lo eyei lokwaas a anam, lo esubi emuchuruseenu ka ngitunga lu eyakasi lokwaasea a anam daang. Tolimok ngesi ngakiro na alimu ayong Ekapolon lo arai Ekapolon Akuj abala, Tiro, inisar kolong iyong akibuseanu kon. Awi kon ngesi anam. Kisubunete kolong iyong ngikadukok loger a atubwa anakebusean. Adukete kesi a ngadomou ana ayaunio alomoru a Erimon. Yaut ngichekereng alo Lebanon kitoweeta ngakito. Yaut ngichokei alo Bachan, tosubakineta ngakito nakiguriet ngatubwae. Yaut ngitelitei alokwar a Kupuro tosubuneta ngiboro kech lujiet sodi kitisiro a ngikel a etom. Ngawarui a ngatubwae kon asubunitae anawarui a Misiri anakaanikak ajokak, ana adonyitoe asir ana ekoni abendera. Eam kon asubunitae a awaru anaajokon, anapus-arengan ayaunio alo Kupuro. Ngikegurok ngatubwae kon aponito alorerea a Sidon ka Aripad. Ngikunonoi kon a ilope kesi adokete nganamea. Ngikadukok a atubwa, Babilos kolong etatamere lokojokon. Ngikadokak nganamea lua ngatubwae kadaang asubete emuchuruseenu alodukanin kon. “Ngasigerea na apote alo Persia, ka Lidia ta Libia kesi araakasi ngasigerea kon. Enenekinete kesi ngaupwala kech ka ngapukoto nadakarin a ngasigerea kon. Ngulu kesi kitaanyunete iyong ekipur. Ngasigerea na apote alo Aripad kesi eteete ngawasea kon, kiteto lu apote alo Gamad ngipemin kon. Enenekinete kesi ngaupwala kech nawasea kon. Kesi kolong kitiliworete iyong lokebusean. “Isubete iyong ka ngitunga a Sipania emuchuruseenu kotere ebari kon lokaalan. Ilemanari iyong anikech ngakwangae, ka ngasua nakirionok, ka nakaabenak ta naapotiok, tolunyae ka ngiboro kon lukaalak. Isubete iyong emuchuruseenu ka Ngigirik, ka ngitunga a Tubal ta lua Mechek. Tolema iyong anikech ngikedalak ka ngiboro lua ngasua ananyangayek, tolemasi kesi ngiboro kon. Igielanari iyong ngiboro kon alo Bes Togarima taanyunea ngangolei nakewokok eegos, ka ngangolei na ejie ta ngisikiria. Asubete ngitunga a Rode emuchuruseenu ka iyong. Kiinanakinete iyong ngitunga lu elomito lokwaasea a nganamea ngikel a etom ka ngakito nakirionok tolunyae ka ngiboro kon. Isubete iyong emuchuruseenu ka ngitunga a Siria. Kiinanakinete kesi iyong ngamoru napusiek-alibak ka ngawarui napusiek-arengak, ka ngawarui nakaanikak ajokak, ka ngikam ta ngamoru naarengak puu, tolunya ka ngiboro kon luajokak. Asubete tani ngitunga a Yuda ka Isirael emuchuruseenu ka iyong. Kiinanakinete kesi iyong ngakanoi ka akimiet a ngikito, ka ngameyana na ingelario akiger, ka akimiet a ao ta ngikito luketukukunyok akimuj. Asubete ngitunga a Damasko emuchuruseenu ka iyong ani alalaketa ngiboro kon. Kiinanakinete kesi iyong emuna lo ayauniyo alo Elibon, ka ngajul a ngamesekin naakwaak na ayauniyo alo Saar tolunya ka ngiboro kon. Alunyeenete kesi tani emuna lo ayaunio alo Usal. Kiinunete kesi iyong ngasua na irigatae ka ngikito lukitukukunyet akimuj, tolunya ka ngiboro kon. Kiinanakinete ngitunga a Dedan iyong ngasaaja tolunya ka ngiboro kon. Kiinanakinete iyong Ngimuarabui ka ngikapolok a akwap a Kedar ngimesekin luuchik ka luapolok ta ngaanei, tolunya ka ngiboro kon. Ngimuchurus a Cheba ka lua Raama kiinakinete iyong namoru nakaalak a ngaropiyae, ka egolit ta ngikito lukitukukunyet akimuj luajokak, tolunya ka ngiboro kon. Ngitunga a ngirerea a Aran, ka Kane, ka Eden, ka ngimuchurus a Achuru ta Kilimad, asubete daang emuchuruseenu ka iyong. Kigialanakinete kesi iyong ngiworui luajokak, ka lupusiek-arengak, ka lu edonyitoe asir, ka ngakap nakoriyek ta ngaunoi na idanyitae niajokon. Ewokeeneo ngiboro kon lua emuchuruseenu a ngatubwae anaapolok anakaalak. Ikwaan iyong ka atubwa ananam, na ileleba eegos loapotion. Nakitanangeta iyong ngikegurok kiding anam, kitobwangabwanga iyong ekuwam a akide Alokiding anam. Ebari ka emuchuruseenu kon daang, ka ngiboro kon daang, ka ngitunga lu ayakasi natubwa daang, ngikadukok a atubwa kon ka ngimuchurus, ngasigerea daang na ayakasi natubwa, emunyakinosi daang nanam, na ebwangabwangaaror atubwa. Ani iirario ngitoilio a ngitunga alu elikorete ngakipi, apot ngikwaasea a anam tamaranikis. “Epudunete ngikegurok daang anatubwae kech. Ngikadokak daang ka ngikameak ngatubwae, ewaasi alokwaas a anam. Ikalounete kesi noi kichienete iyong, kikalout enomito ngakiro ngitai, tonukakis apua nakies kech, ka akipunupuno alokuron. Aluro kotere iyong. Anapa kesi ngiguniae. Enomito ngakiro ngitai kech esaa lo igorotor. Eeos lo kigorotor iyong ebalasi, ‘Ngae isikwaanio ka Tiro, Tiro na tokona echakina chek ananam? Ngirwa lu ewokeenere ngiboro kon ekwakaye, itemunit iyong ngibukui daang. Tabara ngikapolok, ebari a ngiboro kon alukaalak. Ibwangabwangaar tokona iyong ananam, isipor iyong nituluk a anam. Ngiboro kon daang ka ngikasubak etich kon, amunyakin daang ka iyong nanam.’ “Ariangakin ngitunga daang lu elomito lokwaas a anam kotere ngakiro naaronok ianyu iyong. Abul tani ngikapolok kech noi. Etakani ebuloi aloreetin kech. Ingopia iyong, ee robo, ingopia jik. Abul ngimuchurus daang anakwapea kadaang, kotere ebalasi kori kianyuni naaronok na ianyu iyong.” Katolimok ayong Ekapolon Akuj akiroit tama, “Itwaan, tolimok ekapolon a Tiro ngakiro na alimokinit ayong Ekapolon lo arai Ekapolon Akuj ngesi abala: Abe inisa iyong ibala, ‘Arai ayong akuj ebooyi alokicholongo a ngakujo alokiding nganamea.’ Tarai bo irai iyong itwaan, meere akuj. Tani kibala iyong ios loger a akuj. Awaa! Ibala iyong ios noi idwangit Danel, ibala iyeni ngamunonoe daang. Aosou kon ka achwaanu kesi kitabar iyong, iudak iyong egolit ka ngakwangae lobari kon. Kotere aosou kon nakaalan alomuchuruseenu, iatak ebari kon. Kisinisak iyong ebari kon! “Alimu tokona ayong Ekapolon lo erai Ekapolon Akuj abala, kona ibalar iyong ios loger a akuj, ayauni ayong ngitunga lupeyok nikon, ngibukui lukamoitanak noi. Inyasunete kesi ajokis a aosou kon, ka akibuseanu a ebari kon. Kichakakinete kesi iyong nakipany, totoan akitu naaronon alokiding anam. Na eponeta kesi akiar iyong, eringa iyong itamari abe irai akuj a? Iliwor iyong itwaan meere akuj alongaren ngikaarak kon! Itoani loger a nyiingok anakan a ngitunga alu akwap anache. Ayong Ekapolon lo arai Ekapolon Akuj alimu nguna.” Katolimok ayong Ekapolon Akuj nabo akiroit tama, “Itwaan, kikalou kotere ngakiro naaronok na eanyuni ekapolon a Tiro. Tolimok ngesi ngakiro na alimu ayong Ekapolon lo arai Ekapolon Akuj abala: Irai kolong iyong emachar a ateneanut irai lokooson tarai lokebusean! Ilomit Eden na arai amana a Akuj, inapit ngamoru nakamilimilak ngikitetio daang. Inapit naarengak puu, ka topas, ka berili, ka naarengak, ka alumasi, ka napusiek-arengak, ka napusiek-alibak, ta napusiek-alibak torengak. Ayei iyong asir a egolit. Kilemikinio kolong iyong akolongit nakisubunere. Ewaak ayong emalaikat loketubulon neni kiyok iyong. Tolom iyong moru kang lo italeuno tolot alokiding ngamoru kang nakamilimilak. Ajok elote kon napei kolong kisubunere tanang akolongit na atakanuunea akisech anikon. Kotere alalau a emuchuruseenu kon, tominak iyong amoitanut ka akisech. Sodi ketwarak ayong iyong alomoru kang alo italeuno loger a ibore ani ilamam. Emalaikat losek kiyoki iyong abu kitwarak iyong anamoru anakamilimilak. Ibu iyong kinisakinor akibuseanu kon, kitabangaania iyong ekipur kon. Abu ayong kemasa iyong nalup kingolikis ngikapolok toliwor akichikichiket anikech. Kotere alalau a ngasechesea kon ka engalas a emuchuruseenu kon, ibu iyong kinyasu tani ni ilipeenea. Kotere nguna atalakak ayong akim kitonomia iyong ketiliwo ekuron, anakonyen kadaang alu kingolikinete iyong. Ilot iyong, ilot jik, aema ngibukui daang lukolong apot kitoyena iyong. Ee robo, abul kesi, ebalasi kori kimunyario kesi dang.” Katolimok Ekapolon Akuj ayong akiroit tama, “Itwaan, todwar ngakiro naaronok ani a Sidon. Tolimok ngitunga a Sidon ngakiro na alimokinit ayong Ekapolon lo arai Ekapolon Akuj kesi abala: Ee Sidon, kingolik a! Kanyoikinit ayong iyong. Edodiuni ayong ekipur kang anakiro anakasubea iyong. Toyena ngitunga atamar arai ayong Ekapolon Akuj, na eriraa lu elomito nikon, ani araakar ayong na etaleuno. Kainuni ayong iyong ngidekesinei luaronok, nabo toleleasi ngaakot alorotin kon. Edakakinosi lu eari akwara lorotin kon, kitoroo iyong akwara alowaitin kadaang. Neni iyenunea iyong atamar arai ayong Ekapolon Akuj.” Tolim Ekapolon Akuj tama, “Ngibukui lukidunyet a Isirael lukolong emenyarito Isirael, nyeringa nabo ikwaanikinosi ka ngiikwa ta ngirega towana Isirael. Toyeneta atamar arai ayong Ekapolon lo arai Ekapolon Akuj.” Tolim Ekapolon lo arai Ekapolon Akuj tama, “Abuuni ayong Ngisirael alobukui alu kolong apetakini ayong kesi, toyena ngibukui daang atamar etaleuno ayong. Elomete Ngisirael nakwap kech a ngikulepek nakolong ainakini ayong ekasuban etich kang Yakobo. Elomete neni akaalimon, toduko ngakais, kitata ngimusabib. Elomete neni akaalimon, erira ayong ngibukui lukidunyet kech daang lukolong emenyarito kesi. Toyeneta atamar arai ayong Ekapolon Akuj, na arai Akuj kech.” Akolongit na ngatomon ka ngaarei a elap alo a ngitomon, a ekaru alo a ngitomon a arikonot kosi, katolimok ayong Ekapolon Akuj akiroit tama, “Itwaan, kibelokin Parao ekapolon a Misiri. Todwar ngakiro naaronok anikeng ka akwap a Misiri etia ni etia. Tolimok atamar abala ayong Ekapolon lo arai Ekapolon Akuj kona: Kingolik a, kanyoikinit ayong iyong, Parao lo irai ekapolon a Misiri. Iyong akinyang naaronon na iperi anangolol a Nili. Abe ibala iyong, ‘Erai Nili akang, nabo ayong kolong asubuni!’ Kimiek katokodak ekodait lokitinyo, atokodak ngikolea a angolol kon daang nikon. Ani erumor keriu iyong anangolol irukito ka ngikolea daang lu ekodakina nikon. Kawatari ayong iyong nariet irukito ka ngikolea ngulu daang. Imasakin akwaan kon nalup, kimiekinae nyenuka. Epotokini ayong akwaan kon ngitieng amoding ka ngikieny tanyama. “Ikokinete ngitunga daang a Misiri eyenunete atamar ayong Ekapolon Akuj neni. Asakete Ngisirael akigienokin iyong Misiri, nakaneni tapalagag iyong loger a atiriwae. Ani kigongakinosi kesi iyong, ibu iyong tobil kichumchumia kesi ngakirididea ka akiteriangakin ngigurae kech. Tokona bocha, abala ayong Ekapolon lo arai Ekapolon Akuj kona: Kingolik a, ameuni ayong emoit lo a akwara nikon. Earete kesi ngitunga ka ngibaren daang. Eliwor Misiri alaireng na ibooyi kongin. Toyeneta ngitunga atamar arai ayong Ekapolon Akuj. “Kona ibalar iyong ‘Erai Nili akang, nabo ayong kolong asubuni’, kanyoikinit ayong iyong ka angolol kon ani itamitor iyong atamar erai Nili akon, abe iyong kolong isubuni. Etiliwori ayong Misiri etia ni etia alaireng na ibooyi kongin napei alore a Migidol alokwap tanang lore a Aswan alokuju, toremor jik tanang lokukuoru a Kuch.*g** Emam itwaan kori ibarasit ichieki neni. Emam ibore emini neni a ngikaru a ngitomwon-omwon. Etiliwori ayong Misiri alaireng nakaronon noi anakwapea kadaang. A ngikaru ngitomwon-omwon eliworosi ngirerea a Misiri lua nginyas akidwang ngirerea luche daang. Etiliwori ayong Ngimisiri lu edokinito. Edokinete kesi toloto nakwapea daang, toloma kiding ngibukui.” Ebala Ekapolon lo erai Ekapolon Akuj kona, “Adaunet a ngikaru alutomwon-omwon, achununi ayong Ngimisiri anakwapea ana kolong apetakin kesi. Etabari ayong Ngimisiri atobuu kesi nakwap a Pasiros nikolong aponeta. Eliwor apolou kech kaneni na nyeyenikinitae. Ee robo, eliwor apolou kech na nyeyenikinitae akidwang ngapolosio daang. Nyeringa kesi nabo ikeunosi alobukui aluche. Etiliwori ayong kesi lu nyeyenikinitae dir, lu nyepedorete apolokin ngibukui luche. Nyeringa nabo Ngisirael igienokinosi Ngimisiri. Itamunete Ngisirael eger lokolong asecheta kigienokinos akwap a Misiri. Eyenunete Ngisirael atamar arai ayong Ekapolon lo arai Ekapolon Akuj.” Akolongit na ekingaren a elap alo ekingaren a ekaru alo a ngitomwon-arei ka ngikan-kaarei a arikonot kosi, katolimok ayong Ekapolon Akuj akiroit tama, “Itwaan, Nebukadinesa lo erai ekapolon a Babilonia etijikini Tiro. Kisiwok ngesi ngasigerea keng ngiegosio luapotiok tokiritoosi ngakies kech kidongo epalor, tobutoros ngisegeta kech pena ngajemei. Nakaneni emam ngesi kori ngasigerea keng ibore apot taanyut kotere akitijikin Tiro. Abala tokona ayong Ekapolon lo arai Ekapolon Akuj kona: Epotori ayong akwap a Misiri ainak ekapolon Nebukadinesa lo erai ekapolon a Babilonia. Elemari ngesi tangata ebari a Misiri daang tatachea ngasigerea keng. Ainakini ayong ngesi Misiri toliwor ngesi atachitor etich lo asubi ngesi, kainyo asubete ngasigerea keng etich kang. Ayong Ekapolon lo arai Ekapolon Akuj alimu nguna. “Akolongit ngina, etogogongi ayong Ngisirael, sodi kemiek iyong, Esekiel, kiruor ani epedoreta ngitunga daang akiirar, toyeneta atamar arai ayong Ekapolon Akuj.” Katolimok ayong Ekapolon Akuj nabo akiroit tama, “Itwaan, todwar tolimo atamar abala ayong Ekapolon lo arai Ekapolon Akuj kona: Kiute tama, ‘Ekoe, keroner akolongit! Aapuu akolongit ngina, ee robo, aapuu akolongit a Ekapolon Akuj. Eliwor akolongit a ngidowon, akolongit na emunyarotor ngibukui. Itijikinio Misiri, emini ariaba Kuch. Eario lukaalak alo Misiri, iwokio ebari a Misiri toukoroe ngapirio a ere.’ “Eari ejie ngolo tani ngasigerea na eponito alo Kuch, ka Lidia, ka Libia, ka Arabia ta Kub, tani ngitunga kang a ilope.” Ebala Ekapolon lo erai Ekapolon Akuj kona, “Napei alo Migidol alokwap tanang Aswan alokuju, eario ngikaikinak a Misiri daang alojie. Emunyario ngasigerea a Misiri nakenisak. Ayong Ekapolon Akuj Namerikanyer alimu nguna. Eliwor akwap ngina alaireng kidwang ngakwapea nache na eraakasi alaireng, inyasunio ngirerea keng noi. Na erirakinea ayong Misiri akim aapei ka ngikaikinak keng daang, ngesi eyenuneta atamar arai ayong Ekapolon Akuj. “Naenangea akolongit ngina sodi kinyasunae Misiri, ameari ayong ngimeanara a ngatubwae toloto kitoosut ngitunga a Kuch lu itumosi. Ebuli kesi noi. Ee robo, ebunit dir akolongit ngina!” Ebala Ekapolon lo erai Ekapolon Akuj kona, “Atubuori ayong ebari a Misiri a akan a Nebukadinesa alo erai ekapolon a Babilonia. Nebukadinesa ka ngasigerea keng, na emoitaka noi akidwang ngibukui daang, emeunio kinyasut akwap a Misiri. Elemunete ngakwaaras kech kitijwoto Misiri, kileleba ngitunga lu eario nakwap. Etooni ayong Nili, emiekinea ngitunga luaronok akwap a Misiri. Enyasuni ayong akwap ka ibore daang ni eyei tooma keng a ngitunga a ngakwapea anache. Ayong Ekapolon Akuj alimu nguna.” Ebala Ekapolon lo erai Ekapolon Akuj kona, “Enyasuni ngakujo nasubuna, atomunya ngakujo na alioko alo Mempis. Emam ekatukon emini Misiri nabo jik. Etubuli ngitunga daang alo Misiri. Etiliwori ayong kuju Misiri alaireng, echunyak ere a Soan alokwap akim. Ayauni eriras lore loapolon a Tebes. Abukokini anyunyura kang lore a Pelusium, lo erai awas nakaagongon a Misiri, atotubwo ebari a Tebes. Echunyakini ayong Misiri akim. Eriabakin Pelusium lokojokon. Eukori ekuwam Tebes kilelebun ngakalel lore. Ngisorok a ngirerea a Eliopolis ka Bubastis, eario a akwara, toliworos ngitunga luche ngirikon. Eribokini akwap alo Taipanes, na abwangea ayong apolou a Misiri, tasalut ngikilinga lu inisar ngesi. Eburuchiarete ngidowon Misiri, tarata ngitunga keng ngirikon. Aloger kangolo, erirae ayong Misiri, toyeneta atamar arai ayong Ekapolon Akuj.” Akolongit na ngakan-kaarei a elap alo ekingaren a ekaru alo a ngitomon ka epei a arikonot kosi, katolimok ayong Ekapolon Akuj akiroit tama, “Itwaan, abil ayong akan a ekapolon a Misiri. Emam itwaan aen tangalekinio, kori emam itwaan elogak auno torubea topedorea nabo akiting akwara. Tokona bocha, abala ayong Ekapolon lo arai Ekapolon Akuj kona, kingolik a, anyoik ayong Parao ekapolon a Misiri. Abili ayong ngakan keng daang, naajokon ka nabilil, tachakun akwara anakan keng. Apetakini ayong Ngimisiri lobukui, eala nakwapea daang. Etogogongi ayong ngakan a ekapolon a Babilonia, ewaak akwara kang nakan keng. Nakaneni abili ayong ngakan a Parao, tokunuak ngesi loger a itwaan ani ewanan lokojokon. Ee robo, etogogongi ayong ngakan a ekapolon a Babilon, sodi etapalagag na Parao, toyeneta kesi atamar arai ayong Ekapolon Akuj. Ani ewaakini ayong akwara kang nakan a ekapolon a Babilon idodiari ngesi akwara lowae a Misiri, sodi atopeta ayong Ngimisiri lobukui kiealakin nakwapea daang, toyeneta atamar arai ayong Ekapolon Akuj.” Akolongit na ekingaren a elap alo a nguuni, a ekaru alo a ngitomon ka epei a arikonot kosi, katolimok ayong Ekapolon Akuj akiroit tama, “Itwaan tolimok Parao lo erai ekapolon a Misiri ka ngitunga keng daang kona: Ngae ikwaanatar iyong anapolou kon? Kesikwaani ka echekereng alo Lebanon, loajokon a ngaten tomutono, enangit aita keng lodowon. Kitikilikiluut ngakipi ngesi, kitooyata ngakipi na ngalup ngesi. Tobukoe neni ngakipi toleleasi ngakipi lokito luche a amoni. Kotere ngakipi nakaalak abukio, tooyar ngesi noi kilany ngikito luche a amoni. Tooyaketa ngaten keng talangiriro. Ngikieny lu eporito daang, toduko ngakais kech naten keng. Toureta ngitieng a moding alokwap ngaten keng. Kiangasi ngibukui daang alotorube keng. Ebus ekitoe ngolo lokojokon! Aoyak ngaten keng, elijara ngaten na alokwap anangito nakipi na ngalup. Amam ngichekereng lua amana a Akuj lu ekwaanatar ekitoe ngolo. Emam ngimeyana lu ayakasi ngaten na ekote nguna. Emam ngitelitei lu amutoko loger a ekitoe kangolo. Amam ngikito a amana a Akuj lu ajokak loger keng. Esubus ayong ngesi atopeta ngaten. Ngesi eterekuyarit ngikito daang alomana a Akuj ana enyaritae Eden. “Tokona bocha, kalimokini ayong Ekapolon lo arai Ekapolon Akuj iyong ngakiro na esubakinosi alokitoe alo aoyaar tanang lodowon. Na aoyaaror ngesi, abu etau keng kinisakin kotere aoyau keng. Kotere nguna, anger ayong ngesi, epotori ayong ngesi lokapolon a akwap anache, tosubakinea ngesi ekitoe ngolo nguna itemem ka aronis keng. Ngitunga a akwap anache, lukamoitanak noi akidwang ngibukui daang, etuborete ngesi tachakakis neni. Erarakin ngaten keng lomoru daang ka ngadipoe. Epetakin ngatoroma keng na ebilibilitae nangololin daang. Ialarosi ngitunga a akwap daang alotorube keng torotokis. Epote ngikieny todoto naten keng na aukor, kipudata ngitieng a moding ngaten keng. Ngesi atamar emam ekitoe nabo eoyaar tanang lodowon tani kemasi ngakipi nakaalak. Eraakasi daang ngikatoak loger a ngitunga. Eraakasi daang ngikalotok lokatoak.” Ebala Ekapolon lo erai Ekapolon Akuj kona, “Akolongit na elomarea ekitoe lokatoak, etuburuchiari ayong ngakipi na lotooma ngalup, kidodiu ibore ngini akigoro. Agoli ayong ngangololin eratak ngakipi nakaalak nyeeleleut. Ayauni ayong aribu lomoru a Lebanon sodi etooniyo ngikito a amoni daang. Na ayaarea ayong ngesi lokatoak, itamaranikini erue lo eukoror ngesi ngibukui. Ngikito a Eden daang ka ngikito luajokak daang ta ngikito lu etamas ngakipi nakaalak daang lukolong alomasi nalup, elakarosi na eukoror ekitoe ngolo. Irukorete kesi dang ka ngesi lokatoak, ni eyakasi lukolong aario a akwara. Daang lu elomito lotorube keng, epetarosi lobukui. “Ngae tokona ikwaanatar iyong anapolou ka ekipur, alotooma ngikito a Eden? Kiukorio iyong ka ngikito a Eden toloto lokatoak, kiruko ka lu nyilipito Akuj ta lu aari akwara. “Erai ngolo Parao ka ngitunga keng daang. Ayong Ekapolon lo arai Ekapolon Akuj alimu nguna.” Akolongit na ekingaren a elap alo a ngitomon ka ngiarei a ekaru alo a ngitomon ka ngiarei a arikonot kosi, kesuruor ayong Ekapolon Akuj tama, “Itwaan, kiloik Parao ekapolon a Misiri tolimok kona: Ibala iyong irai engatuny alokiding ngibukui, tarai bo ikoni iyong akinyang ananamea. Ipungunun iyong anangololin kon, kicholiak ngakipi a ngakejen kon, kitongorean ngangololin. Abala ayong Ekapolon Akuj Namerikanyer, kawatakini iyong epuute na echunakinotor ngitunga lukaalak kiriut kesi iyong lokwaas a anam. Kemasakini ayong iyong nalup, kemasakini ayong iyong naro, etodo ngikieny kidiama kon, kitanyam iyong ngibuin. Apetakini akiring kon lomoru eleleb ngadipoe daang ngawat nakatoak. Abukori ngaakot kon toleleasi lomoru, kilelebun nayana. Nakamunyarea ayong iyong, arapi adis, etiribok ngikanyer. Emuki akolong a ngidowon toribok elap. Etudunge ayong ngakimea a adis daang, ani akwap etiribok chuch. Ayong Ekapolon lo arai Ekapolon Akuj alimu nguna. “Ichanakinosi ngitai a ngitunga alukaalak naketiliworea ayong iyong erikot alokiding ngibukui, anakwapea ana nyeyena iyong nakanuan. Eteriangakini ayong ngibukui lukaalak a ngakiro kon. Ebuli ngikapolok nakengolikineta ayong ekeari akwara kang. Akolongit na iukoror iyong, emaranikinete kesi daang a ebuloi kotere akiyar kech.” Alimoki Ekapolon lo erai Ekapolon Akuj ekapolon a Misiri kona, “Imasi iyong akwara a ekapolon a Babilonia. Eario ngitunga kon daang a ngakwaaras a ngibukui alukajwok, alu emoitaka akidwang ngibukui daang. Inyasunete kesi ibore daang ni inisar iyong, emunyarete ngitunga kon daang. Amunyari ngibaren kon daang alokwaas a ngakipi anakaalak. Nyeringa nabo jik akeju a itwaan icholumakini ngakipi nguna. Nyeringa nabo ngakejen a ngibaren ipudaate ngakipi nguna. Sodi etilii ayong ngakipi kech, toleleta ngangololin kech loger a akimiet. Ayong Ekapolon lo arai Ekapolon Akuj alimu nguna. Na etiliworea ayong Misiri alaireng, sodi atomunya ibore daang ni eyei nikeng, eyenunete atamar arai ayong Ekapolon Akuj. Eliwor eeos logo eka akigoro, lo eeokinete ngibukui igorotor akwap a Misiri ka ngitunga keng daang. Ayong Ekapolon lo arai Ekapolon Akuj alimu nguna.” Akolongit na ngatomon ka ngakan a elap alo ekingaren a ekaru alo a ngitomon ka ngiarei a arikonot kosi, kesuruor ayong Ekapolon Akuj tama, “Itwaan, kigor kotere ngitunga a Misiri daang. Toruja kesi nakwap na a ngikatoak aapei ka ngibukui luche lu eyenikinitae toloto ni eyakasi lu alomasi nakipany. Tolimok kona, ‘Ngae idwangito esi anakibuseanu? Kapesi lokatoak kiruko ka lu nyilipito Akuj.’ “Etoakete ngitunga a Misiri ka ngulu eario a akwara. Eari akwara kesi daang. Elimunete ngikarikok a ngajorei ka ngikengarakinak kech alokatoak tamasi, ‘Apot nege lu nyilipito Akuj, aario a akwara, eperete!’ “Achuru yaga, iriamito ngalielin a ngasigerea keng. Aario daang a akwara. Etiyaara ngalielin kech kwap noi alokatoak. Aario ngasigerea a Achuru daang a akwara. Iriamito ngalielin kech aliel keng. Tarai kolong eringa eyarete etubulito ngitunga lu ayarete. “Elam yaga, iriamito ngalielin a ngasigerea keng. Aario daang a akwara. Atiyaarosi kesi lokatoak peeyenete Akuj. Kolong eyarete, etubulito ngitunga. Nyelu tokona atoaka eruma ngileech ka ngikatoak luche aapei. Eperi Elam alokiding ngulu aario, iriamito ngalielin a ngasigerea keng ngesi. Nyeyenete kesi daang Akuj. Aario daang a akwara. Kolong eyarete, etubulito ngitunga. Nyelu tokona atoaka eruma ngileech ka ngikatoak luche aapei. Eperete kesi ka lu aario. “Mechek ka Tubal kui iriamito ngalielin a ngasigerea kech. Nyeyenete kesi daang Akuj. Aario daang a akwara. Tarai kolong eyarete, etubulito ngitunga. Nyenuka kesi a arimatoi loger a ngikarikok a ngajorei alu kolong ngorok, alu kolong alomarete lokatoak ka ngiboro kech a ejie, icholongito ngakwaaras kech kimukokina ngaupwala kech. Ajwoko kolong ngikarikok ngulu etubulito ngitunga. “Emunyario Ngimisiri a akwara loger ngolo, topero alokiding ngitunga lu nyeyenete Akuj. “Edom yaga ka ngikapolok keng ta ngikatukok. Ajwoko kolong kesi nakaneni eperete tokona ka lu erikari akwara ngitunga lu nyeyenete Akuj, lu alomasi nakipany. “Ngikatukok lua lokwap daang, eyakasi neni aapei ka Ngisidon. Etubulit kolong ajwonu kech ngitunga nakaneni aar tokona ngitunga lu nyeyenete Akuj ngulu a akwara. Eruma ngileech ka ngulu alomasi nakipany. “Na ingolikinea Parao ngitunga lu aario a akwara ngulu daang, ikilakinosi ngesi ka ngasigerea keng. Ayong Ekapolon lo arai Ekapolon Akuj alimu nguna. “Alemuni kolong ayong Parao kitubul ngitunga lu eyarete, nakaneni eario ngesi ka ngasigerea keng daang kiruko ka lu nyeyenete Akuj lu aario a akwara. Ayong Ekapolon lo arai Ekapolon Akuj alimu nguna.” Kesuruor ayong Ekapolon Akuj tama, “Itwaan, tolimok ngitunga kon nguna esubakinosi na ayaunea ayong ejie nakwap. Eseunete ngitunga a akwap kangina ipei kech toliwor eketeon. Ani ingolikini ngesi emoit ebunit taram elii kitoosu ngitunga. Itwaan cha daang ni iirari elii nyeekachik, ani kear akwara a emoit ngesi, eliwor akitu keng aka akiding keng a ilope. Eirari ngesi elii sodi nyeekachik. Eliwor akitu keng aka akiding keng a ilope. Arai takachik ngesi, keyarit. Nakaneni ani kingolik eketeon emoit ebunit sodi nyeeram elii kitoosunio ngitunga, dio bu emoit a akwara taar ngitunga, apaikini ayong eketeon ngolo akitu a ngitunga kangulu. “Tokona bocha, itwaan, ketiliwori ayong iyong eketeon a Ngisirael. Tolimonok kesi ngakichikichiket daang na itorunete nakituk kang. Ani kalimok ayong itwaan niaronon atamar etoani, sodi nyiikilak iyong ngesi tapalikinea aronis keng, etoani ngesi anaronis keng, nakaneni iyong ngesi ayong akitu keng. Nakaneni ani kikilak iyong itwaan niaronon, tolimok atamar toreeun alorot aloaronon, towou ngesi areeun alorot keng, etoani ngesi anaronis keng nakaneni iyuun iyong.” Kesuruor ayong Ekapolon Akuj tama, “Itwaan, tolimok Ngisirael ngakiro na elimuuniyete kesi ebalasi, ‘Kinua sua ngasechesea kosi ka aronis kosi, ngesi kimunyaror sua. Kikokini sua kiyari ai?’ Tolimok kesi atamar ekongi ayong Ekapolon lo arai Ekapolon Akuj, na ayari abala nyejoikinito ngakonyen kang akitere ekasechan etoani. Pearai asaki toreeun anakisech toyar. Wae Ngisirael, toreeunos! Ee robo, toreeunos alorotin kus aluaronok. Nyo isaketa akitu? “Tokona bocha itwaan, tolimok Ngisirael atamar na esechea itwaan ni etenoono, nyeyuuni ngesi ateneanut keng. Ani kepaliki itwaan niaronon akisech, nyirirao ngesi kotere aronis keng, nabo ani kesub itwaan ni etenoono akisech, nyeyuuni ngesi ateneanut keng. Apedori ayong alimokin itwaan ni etenoono atamar eyari, nakaneni ani kigienokin ngesi ateneanut keng sodi tosub akisech, nyetamuni ayong ngakiro naajokak asubi ngesi tani apei. Pearai etoani ngesi kotere akisech na asubaki. Apedori ayong atolimok itwaan niaronon atamar etoani, nakaneni ani kereeun ngesi anakisech keng tosub nguna iyookino tojokak, sodi tobua ibore a itwaan nikolong atingit idaritor amicha etachio, kori tobua ibore ni akokoi, sodi kiwap ngitalio a akiyar, nyeesech, eyari ngesi dir, nyetoani. Nyetamuni ayong ngasechesea nakolong asubi ngesi tani apei. Asub ngesi nguna iyookino tojokak, eyari ngesi dir. “Tarai ebalasi ngitunga kon, ‘Nyeriyan erot a Ekapolon Akuj!’ Tarai bo lokech ngesi nyeriyan. Na erear itwaan ni etenoono anateneanut keng sodi tosech, iteni etoani kotere akisech ngina. Nakaneni na ereeunor itwaan niaronon anaronis keng sodi tosub nguna iyookino tojokak, eyari ngesi kotere nguna. Tarai ibalasi esi, ‘Nyeriyan erot a Ekapolon Akuj.’ Ee Ngisirael, atubi ayong ngakiro kus, itwaan daang itemem ka nguna asubi.” Akolongit na ngakan a elap alo a ngitomon a ekaru alo a ngitomon ka ngiarei a arikonot kosi, bu itwaan ni apuun alo Yerusalem katolimok ayong tama, “Aukor Yerusalem!” Atabong nache eringa itwaan ngini nyebuno, katikokina sek ayong agogongu a Ekapolon Akuj. Ani ataparach na abunio itwaan ngini, tangaa Ekapolon Akuj akituk kang eruorik ayong nabo atojongo achakina chek. Katolimok Ekapolon Akuj ayong akiroit tama, “Itwaan, ebalasi ngitunga lu elomito lorerea lu enyasun kona, ‘Arai kolong Aburaam itwaan ipei tarai ainakinitae akwap daang. Nakaneni kilalak sua, erai akwap akosi dir.’ “Tolimok kesi atamar abala ayong Ekapolon lo arai Akuj Ekapolon kona: Inyamete esi akiring na eyakasi ngaakot, ilipito ngakujo nasubuna nabo iarete ngitunga. Na ikoneta esi neni a, eliwor akwap akus dir a? Igienosi esi akwara. Isubete esi ngakiro nakikadakinete. Elomi ipei kus daang naberu a ekidunyet keng. Na ikoneta esi neni a, eliwor akwap akus dir a? “Tolimok kesi atamar abala ayong Ekapolon lo arai Ekapolon Akuj kona: Ekongi ayong na ayari atamar eari akwara ngulu elomito nakwap na enyasun. Ngulu eyakasi naroatin areikin ngitieng a moding tanyama. Ani ngulu edukito anawasea anakaagongok ka ngaburiburio, amunyari a edeke aloaronon. Etiliwori ayong akwap alaireng, tasalut lukolong kajwok enisatar kesi. Esilekerosi ngimoru a Isirael, nyepedorete ngitunga akitor. Ani etiliwori ayong akwap kech alaireng kotere ngakiro naaronok noi asubete kesi, toyena kesi atamar arai ayong Ekapolon Akuj.” Tolim Ekapolon Akuj tama, “Itwaan, kiruorotor iyong ngitunga kon anawasea ka lodorin a ngakais kech. Elimonokinosi kesi ebalasi, ‘Potu apana eirasi akiroit na abu ani a Ekapolon Akuj!’ Epote kesi nikon loger a ngitunga, kiboikinos ngaren kon loger a ngitunga kang, sodi kiirasi ngakiro na iruoro iyong, nakaneni nyiwapete. Idodiunito kesi aminatoi lokojokon a ngakituk pas, tasakete ngitai ngakiro kech a ngikulepek. Ikoni iyong anikech itwaan ni eeo ngieosio lua aminatoi kori ni erami agita, kainyo epupete ro kesi ngakiro na iruoro iyong nakaneni nyiwapete. Akolongit na esubakinotor nguna, tarai esubakinosi! Ngesi elimoreta kesi atamar ayei ekadwaran kiding kech.” Katolimok Ekapolon Akuj ayong akiroit tama, “Itwaan, todwar naaronok ani a ngikeyokok a Isirael. Todwar tolimok atamar abala ayong Ekapolon lo arai Ekapolon Akuj kesi kona: Etige ngikeyokok a Isirael! Itanasi esi make a? Ikwa meere ngamesekin ejoikinit esi itanete a? Inyamete esi akidietet, tanapa ngiworui lua ngajul a ngamesekin, tongola ngimesekin lukanakunak tanyama. Tarai nyitanete esi ngamesekin. Nyiitogogongo esi lupalag, nyitangalekino esi lu edeakasi, nyeena esi lu ebilil, nyebuuna esi lu ewoliyorito, nyesakara esi lu echakara. Pearai ipolokinito esi kesi a amoitanut ka akichiakiarit. Kotere nguna, apot kesi topetaros ani amamakar ekeyokon. Toliworos kesi ngamuja a ngitieng a moding kadaang. Sodi topetakin ngamesekin kang lomukur lukooyak ka ngimoru. Ee robo, topetakinos akwap wadaang, nakaneni emam itwaan abu tasaka kesi kori kingitu. “Tokona bocha, esi ngikeyokok, kiirasi akiroit na alimunit ayong Ekapolon Akuj. Ekongi ayong Akuj na ayari atamar kona aliworotor ngamesekin kang akimuj a ngitieng a moding kadaang, ani emamakar ekeyokon, nabo nyesakara ngikeyokok kang ngamesekin kang, pearai etanasi ngikeyokok make, nyitana ngamesekin kang, tokona bocha, topupokisi esi ngikeyokok akiroit kang. Abala ayong Ekapolon lo arai Ekapolon Akuj kona: Kingolikisi anyoik ayong ngikeyokok. Alemari ayong ngamesekin kang anakan kech, tojongoto kesi araakau ngikeyokok kech. Nyeringa nabo ngikeyokok itanasi make. Ayuuni ayong ngamesekin kang anakituk kech, nyeeliworosi akimuj kech.” Ebala Ekapolon lo erai Ekapolon Akuj kona, “Kingolikisi a, ayong ilope asakari ngamesekin kang etan. Loger lo esakarea ekeyokon ngamesekin keng na epetara sodi tochun wapei, eger lopei ngolo asakarea ayong dang nakang. Abuuni ayong kesi awadaang ani epetara, akolongit na imokomokakinitor adis toribokinite. Epuduni ayong kesi alobukui aluche, atochun anakwapea, sodi ayau kesi nakwap kech a ngikulepek. Eyoki ayong kesi alokidiama ngimoru a Isirael ka lokwaasea a ngileleae ta ngiwaitin lu elomito ngitunga. Esirajakini ayong kesi nginyia lukajokak. Kidiama ngimoru a Isirael ngesi eliwor achokor kech. Eurienikinosi kesi kidiama ngimukur a Isirael ni elibit, tadaka nginyia lukalibak. Ayong ilope aliwor ekeyokon a ngamesekin kang, atasakak kesi ni eurienikinosi. Ayong Ekapolon Akuj na arai Akuj alimu nguna. “Asakari ayong ngamesekin na echakara, atobuu na ewoliyorito, atoen na ebilil, etogogong na epalag. Ani na etumito ka na ngikilinga eyok. Eyoki ayong kesi a erot alo eriyan. “Tokona bocha ngamesekin kang, abala ayong Ekapolon lo arai Ekapolon Akuj atiaki ibarasit ipei ka niche. Atiaki amesek ka amesek nache, atotiak ngamesekin ka ngaanei. Nyikiupeene esi adaka nginyia luajokak, eraakar mati kipudata tani nginyia luche a? Nyikiupeene esi akimat ngakipi nakaalimok, eraakar mati kitongorean ngakipi nache a? Mati ngamesekin kang nache kedaka nginyia lu ipudata esi ka ngakipi na itongorean esi a? “Tokona bocha, alimu ayong Ekapolon lo arai Ekapolon Akuj atamar ayong ilope atubi ngakiro a ngamesekin ana etumito ka na erogo. Ijukarete esi kesi a ngisiepion ka ngisegeta sodi kigumo lupalag a ngaamwar, topetasi kesi. Ayuuni ayong ngamesekin kang nyeeboliare nabo, sodi atotub ngakiro a amesek a apei ka nache. Alemikini kesi ekeyokon epei, ngesi ekasuban etich kang Daudi, itani ngesi kesi toliwor ekeyokon kech. Ayong Ekapolon Akuj aliwor Akuj kech. Ekasuban etich kang Daudi eliwor ekapolon alokiding kech. Alimu ayong Ekapolon Akuj nguna. Emini ayong ka kesi achamunet a ekisil ka akitwarakin ngitieng a moding anakwap, sodi kiboikinotor ngamesekin kang naroatin akaalimon nabo topero namon. “Apiari ayong kesi emiek toloma lokwaasea a emoru kang alo italeuno. Etetepi ayong akiru ngirwa lu esakitere. Eyauni akiru ngina apiaro. Ekokete ngikito a ageor, ebwangete ngamanat sodi tolom itwaan daang nakwap keng akaalimon. Na angedea ayong ngiriko lu eenitere ngitunga kang, atalachak kesi alotunga alu kolong arikete kesi tarata ngikedalak, ngesi eyeneta kesi atamar arai ayong Ekapolon Akuj. Nyeringa nabo ngibukui luche edemarete kesi ebari, kori nyeringa nabo ngitieng a moding enyamete kesi. Iboikinosi kesi akaalimon. Emam itwaan itoemi kesi. Ainakini ayong kesi ngamanat naajokak a ngalup, tasalu akoro anakwap. Nyeringa nabo ngibukui luche ekianatar kesi. Toyena kesi daang atamar ayong Ekapolon Akuj na arai Akuj kech kirukit ka kesi, nabo eraakasi kesi Ngisirael ngitunga kang. Ayong Ekapolon lo arai Ekapolon Akuj alimu nguna. “Iraakasi esi ngamesekin kang naketani ayong, arai ayong Akuj kus. Ayong Ekapolon lo arai Ekapolon Akuj alimu nguna.” Katolimok Ekapolon Akuj ayong tama, “Itwaan, todwar ngakiro naaronok ani a Edom. Tolimok ngitunga a emoru kangolo ngakiro na alimu ayong Ekapolon lo arai Ekapolon Akuj abala: Ee emoru a Edom, kanyoik ayong iyong! Ketiliwori ayong iyong alaireng. Enyasuni ayong ngirerea kon, etiliwo akwap alaireng. Toyenea atamar arai ayong Ekapolon Akuj. “Irai kolong iyong emoit a Isirael, dio kimiek kesi emunyario a akwara ngirwa lu ayakatar lochan, ngirwa lua eriras kech alo esal. Tokona bocha, ekongi ayong Ekapolon lo arai Ekapolon Akuj, na ayari atamar idarit iyong abukoro ngaakot, kirisete iyong ngaakot, kainyo isechit iyong ani ibukorea ngaakot, kikudete iyong ngaakot. Etiliwori ayong akwap na ngimukur a Edom alaireng atomunya itwaan daang ni itori neni. Aburuchiari ayong ngimoru a ngawat a ngitunga alu aario, sodi toburuchiasi ngawat alu eario a akwara ngimukur, ka ngadipoe ta ngangololin. Ketiliwori ayong iyong alaireng jik, emam nabo itwaan elomi lorerea kon. Toyenea atamar ayong arai Ekapolon Akuj. “Kona kolong ilimunio iyong tama, ‘Eliworosi Yuda ka Isirael ta ngakwapea kech ngikang, alemari ayong,’ tarai ayong Ekapolon Akuj arai Akuj kech, ekongi tokona ayong Ekapolon lo arai Ekapolon Akuj, na ayari atamar kasubakinea ayong iyong itemem ka angoit kon ka etereku ta eger lo iremitor iyong ngitunga kang. Eyenunete kesi atamar kerirae ayong iyong kotere ngakiro nakolong isubea iyong kesi. Toyenea iyong atamar keira ayong Ekapolon Akuj iyong ilimuni kotere ngimeny tama, ‘Aliwor Isirael alaireng kiisikinere sua atomunyasi.’ Eira ayong eger lo iwogar iyong kiruoror ayong niaronon.” Ebala Ekapolon arai Ekapolon Akuj kona, “Ketiliwori ayong iyong alaireng kichurok akwap daang kotere aukor kon, loger lokolong ichuror iyong na enyasunere Isirael na erai akang. Eliworosi ngimoru a Seir alaireng, ee robo, eliwor akwap a Edom daang alaireng. Toyeneta ngitunga daang atamar ayong arai Ekapolon Akuj.” Tolim Ekapolon Akuj tama, “Itwaan, todwar ani a ngimoru a Isirael tolimok kiirasi akiroit kang. Abala ayong Ekapolon arai Ekapolon Akuj kona: Echuruno kolong ngimoe a Isirael niti ebalasi, ‘Aa, arata tokona ngimoru lungorok ngul ngiyok!’ “Todwar robo, tolimo ngakiro na alimu ayong Ekapolon lo arai Ekapolon Akuj. Nakolong alemareta ngibukui lukidunyet ngimoru a Isirael, tokokoa ebari kech, apot kesi daang kiyenya Isirael. Tokona bocha, ngimoru a Isirael, kiirasi akiroit a Ekapolon alo erai Ekapolon Akuj, nakilimokinit esi ngimoru ka ngimukur, ngayana ka ngadipoe, ta ngirerea lukasilok, esi ngalairengea, lu angatareta ngibukui lu idunyatar ngiboro ani erumor kitokianatar. “Eruorik ayong Ekapolon lo arai Ekapolon Akuj a angoit kang anakariran alobukui aluche ka Edom daang, lu echurunosi alemar ngiboro kang a etereku kech ka ngimeny, tolemasi akwap kang toliwor achokor kech, tangatasi kesi ebari a akwap kang. “Kasio todwar ngakiro a akwap a Isirael sodi tolimok ngimoru ka ngimukur, ngayana ka ngadipoe atamar abala ayong Ekapolon lo arai Ekapolon Akuj kona: Kingolik a, eruoro kotere etereku lokariran anyunyurar ayong ani esurumeta ngibukui kesi ngileech. Ekongi bocha tokona ayong Ekapolon lo arai Ekapolon Akuj abala irumete ngileech ngibukui lukidunyet kus daang. Nakaneni ani eliwor esi ngimoru a Isirael, erupunete ngakui alokito toureta ageor kotere ngitunga kang Ngisirael, kainyo aapuu kesi abongun nawi. Kingolikisi a, ebakit ayong alowae kus, areeun ayong nikus. Echilio ngalup kus kitakinae ngikinyam. Etalalae ayong ngitunga kus Ngisirael noi. Elomio ngawiyei a Ngisirael daang, ka ngirerea kus, tobongokinoe akiduk ngiwaitin lu inyasuna. Etalalae ayong ngitunga kus ka ngibaren. Elomete ngitunga nikus loger lokolong sek alomitotor. Kasubea naajokak akidwang nakolong a ekingaren. Toyeneta esi atamar arai ayong Ekapolon Akuj. Ee robo, arikuni ayong ngitunga kang Ngisirael nikon. Toloma kesi nikon. Iliwor iyong akwap kech, nyilakakini iyong nabo ngide kech eriyori erogo. “Abala ayong Ekapolon lo arai Ekapolon Akuj kona: Akwap, kona ebalatar ngitunga kisuruorete iyong, ‘Inyami iyong ngitunga nabo idemi iyong ngitunga kon ngide’, nyeringa nabo iyong inyami ngitunga kori idemari ngitunga kon ngide, alimu ayong Ekapolon lo arai Ekapolon Akuj. Nyeringa iyong nabo iirari ngibukui kiyenyete iyong kori kikianatar. Itubori iyong akidem ngitunga ngide. Alimu ayong Ekapolon lo arai Ekapolon Akuj.” Katolimok ayong Ekapolon Akuj akiroit tama, “Itwaan, nakolong ebooyoto Ngisirael anakwap kech, apot kesi kitiliwosi akwap na nyitaleuno kotere eboyor kech ka ngakiro na asubete. Ekoni elote kech anakonyen kang elos a aberu ngirwa lu eyakar lolap. Kotere nguna, abu ayong atobukok kesi anyunyura kang kotere ngitunga lu aarete kesi anakwap ka ngakujo nasubuna na elipito kesi kitiliworeta akwap na nyitaleuno. Atopeta ayong kesi lobukui kiealakin nakwapea. Erira ayong kesi itemem ka elote kech ta ngakiro na asubete. Na apetakinotor kesi lobukui, apot yaut ngileech lokiro kang lo italeuno, toliwor ngitunga ebalasi, ‘Abe ngitunga a Ekapolon Akuj lugu, tarai etiisikin akwap keng!’ Kechan ayong ngakiro nguna kotere ekiro kang lo italeuno lo esurumete Ngisirael ngileech awadaang anicha aloose. “Tokona bocha, tolimok Ngisirael atamar abala ayong Ekapolon lo arai Ekapolon Akuj kona: Ee Ngisirael, meere kotere esi asakea ayong asubakin ngakiro na edikino asubakini. Erai kotere ekiro kang lo italeuno, lo isuruma esi ngileech anakwapea kadaang ana iloose. Ani edodikini ayong ngibukui akitaleuno a ekiro kang aloapolon, ekiro lokolong isurumete esi ngileech alokiding ngibukui, eyenunete ngibukui atamar arai ayong Ekapolon Akuj. Alimu ayong Ekapolon lo arai Ekapolon Akuj. Etoruni ayong nikus edodikinea kesi atamar etaleuno ayong. Kalemuni ayong esi alobukui katochun anakwapea kadaang kayau nakwap na erai akus a ngikulepek. Kawatakini ayong esi ngakipi naasegak, kitaleunos anakujo kus anasubuna ka ibore daang ni kitiliwo esi lu nyitaleuno. Kainakini ayong esi etau lokitetet ka ngitamen lukiteat. Alemari anikus etau ikoni amoru ewaak etau lo erai akiring. Ewaakini ayong etau kang nikus kitorik esi kiwapeta ngitalio kang ka ngakiro na adunguni ayong. Sodi toloma nakwap nakolong ainakini ayong taapaakus. Iliworosi esi ngitunga kang atoliwor ayong Akuj kus. Kayuuni ayong esi anibore kadaang ani kitiliwori esi lu nyitaleuno. Adungokini ayong ngikinyam talalaketa sodi nyeeminio nabo eron a akoro. Etalalae ayong ageor a ngikito ka ngalemet a ngamanat, sodi nyeeminio nabo eron a akoro lo kisurumi esi ngileech alokiding ngibukui. Itamunete esi elote kus loaronon ka ngakiro naaronok nakolong isubete esi sodi takadanakinos make kotere ngasechesea kus ka aronis. Isirael, nyasubi ayong nugu daang kotere esi. Toyena nguna. Asaki esi kiruma ngileech ka etimoi kotere ngakiro na isubete esi. Alimu ayong Ekapolon lo arai Ekapolon Akuj.” Ebala Ekapolon lo erai Ekapolon Akuj kona, “Akolongit naketaleunio ayong esi anasechesea kus kadaang, kemiekini esi toloma lorerea kus nabo, kemiek tobongokis akiduk ngirerea lukolong enyasunio. Akwap nakolong arai alaireng itakinio tojongo araakau alaireng anakonyen a ngitunga kadaang alu itoreenete neni. Etamarete kesi, ‘Akwap nakolong arai alaireng naga ekwaanikin ka amana a Eden! Ngirerea lukolong enyasunio tarata alaireng lugu kelom keduk ngawasea!’ Sodi toyena ngibukui lukidunyet lu idongito atamar ayong Ekapolon Akuj abongonokini akiduk ngirerea lukolong enyasunio, nabo abongonokini akitakin akwap nakolong arai alaireng. Alimu ayong Ekapolon Akuj nguna.” Ebala Ekapolon Ekapolon lo erai Ekapolon Akuj kona, “Apupokini ayong nabo ngakiro nakemaimaeta Ngisirael, atosubakinea kesi ngakiro nugu, etalalae ayong kesi loger a ngisipaan a ngamesekin. Ngirerea lu tokona inyasunitae, ilelebunosi ngitunga loger lokolong elelebakatar ngamesekin na epeyeo a ngisukukui, elelebakatar Yerusalem. Sodi toyena kesi atamar arai ayong Ekapolon Akuj.” Katikokin ayong agogongu a Ekapolon Akuj sodi kayau etau keng ayong kewaak nadipo na eleleba ngakoyo. Kesirim ngesi ayong ngakoyo nguna. Ekoe, alalak ngakoyo nguna noi, nabo aokito deu. Katolimok ngesi ayong tama, “Itwaan, epedorete ngakoyo nugu akiyar a?” Atatachu ayong atama, “Wae Ekapolon lo irai Ekapolon Akuj, iyong bon iyeni nguna!” Katolimok nabo tama, “Todwar ani a ngakoyo kanu. Tama iyong kesi, ‘Ee ngakoyo na iokito, kiirasi akiroit a Ekapolon Akuj. Ebala Ekapolon lo erai Ekapolon Akuj esi kona: Kingolikisi, kewaakini ayong esi akienget toyara. Kewaakini ayong esi ngamori ka akiring dio katoburuchik amuny. Kewaakini ayong esi akienget toyara, toyeneta atamar arai ayong Ekapolon Akuj.’ ” Sodi atodwar ayong loger lo kadungokinitere. Ani eringa adwari, eira eruye, tochunun ngakoyo wapei! Kimorikin akoit ka akoit nache na ikwaanatar! Ani akienyikini, engolik ngamori kepean nakoyo, kebu akiring dang min, toburuchia amuny. Nakaneni peayerete kesi. Katolimok Akuj ayong tama, “Itwaan, kasio todwar akianget, todwar tolimok ekuwam atamar abala ayong Ekapolon lo arai Ekapolon Akuj kona: Ee akianget, tokut alowaitin aluomwon kadaang kiangak ngawat nakatoak nugu toyaruneta.” Sodi atodwar ayong loger lo kalimokinitere. Tolom akianget nikech toyara. Towaa kesi. Arai ibore ajore natiapolon. Ani erumor katolimok Akuj ayong tama, “Itwaan, eraakasi ngakoyo nugu Ngisirael daang etia ni etia. Ebalasi kesi, ‘Eokito ngakoyo kosi. Emam sua akigieno, kimunyar sua pil.’ Tokona bocha, todwar tolimok ngitunga kang Ngisirael atamar abala ayong Ekapolon lo arai Ekapolon Akuj kona: Kingolikisi a, angaari ayong ngalielin kus keteyaru esi analielin kus, ngitunga kang. Kayauni esi nawi nakwap a Isirael. Ee ngitunga kang, iyenunete esi atamar arai ayong Ekapolon Akuj na angaarea ayong ngalielin kus keteyaru esi analielin. Ewaakini ayong etau kang nikus toyara. Kewaakini ayong esi nakwap kus a ngikulepek. Toyeneta atamar alimu ayong Ekapolon Akuj, nabo asubak nguna. Ayong Ekapolon Akuj alimu nguna.” Katolimok ayong Ekapolon Akuj akiroit tama, “Itwaan, tolem akitoe kigirak ngakiro nugu, ‘Aka Yuda ka Ngisirael daang lua ekitela a Yuda.’ Sodi tolem akitoe ache kigirak kona, ‘Aka Yosep (akitoe a Epiraim) ka Ngisirael daang lua ekitela a Yosep.’ Ani erumor tokonyak ngakiro naarei nguna anakan kon tosubut kori akitoe apei. Ani etamarete ngitunga kon iyong, ‘Nyo pekilimokinea iyong sua eger a ngakiro kanu?’ Tolimok iyong kesi atamar ebala Ekapolon lo erai Ekapolon Akuj kona: Edikino ayong alemuni akitoe na eweikinit Yosep na eyei nakan a Epiraim ka ngitela a Isirael, emorik ka na eweikinit Yuda. Etiliwori ayong ngakito naarei nguna akitoe apei atoting a akan kang. “Ani itingit ngakito naarei nguna a akan, iteete ngitunga, tolimok kesi atamar abala ayong Ekapolon lo arai Ekapolon Akuj kona: Kingolikisi a, epuduni ayong ngitunga kang daang Ngisirael alobukui alu kolong aloose kesi. Achununi ayong kesi alowaitin kadaang atobuu nakwap kech a ngikulepek. Emorikini ayong kesi toliworos ebukut epei anakwap, alokidiama ngimoru a Isirael. Ekapolon epei eweikini kesi daang. Nyeringa kesi nabo eliworosi ngibukui ngiarei. Nyeringa nabo etiakio tarata ngapolosio ngaarei. Nyeringa kesi nabo inyasunosi tarata lu nyitaleuno a ngakujo kech anasubuna ka ngakiro nakikadakinete kori nyeringa nabo inyasunosi a ngasechesea. Nakaneni ayuuni ayong kesi anasechesea kadaang nabo etaleu. Eliworosi ngitunga kang atoliwor ayong Akuj kech. Ekasuban etich kang Daudi ngesi eliwor ekapolon kech. Emini kesi daang ekeyokon epei. Iwapete kesi ngitalio kang kirichut. Elomete kesi nakwap nakolong ainakini ayong ekasuban etich kang Yakobo, nakwap nakolong alomito taapaakech. Elomete kesi neni jik ka ngide kech. Ekasuban etich kang Daudi ngesi eliwor ekapolon kech jik. Emini ayong ka kesi achamunet a ekisil. Eliwor achamunet nakajik. Apiari ayong kesi etalala. Etowei ayong akai kang alokiding kech jik. Alomi ayong kiding kech, atoliwor Akuj kech toliworos kesi ngitunga kang. Sodi toyena ngibukui atamar etaleu ayong Isirael ani etowea akai kang alokiding kech jik.” Katolimok ayong Ekapolon Akuj akiroit tama, “Itwaan, todwar ngakiro naaronok ani a Gog, lo akwap a Magog. Erai ngesi ekapolon loapolon a ngibukui a Mechek ka Tubal. Tolimok ngesi atamar abala ayong Ekapolon lo arai Ekapolon Akuj kona: Ee Gog, kingolik, kanyoik ayong iyong, lo irai ekapolon loapolon a Mechek ka Tubal. Kamojirikini ayong iyong erepak ngikodo lokitinyo kon, sodi keurukukuyo ka ngasigerea kon daang, ka ngangolei, ta ngikameak ngangolei, enapito daang ngiworui lu esiritoe a ejie. Eraakasi kesi ajore etingito ngaupwala ka ngakwaaras. Ngasigerea a Persia ka Kuch ta Libia, irukito ka iyong, etingito daang ngaupwala ka ngapukoto. Ngikajwok daang a akwap a Gomer ka lua Bes Togarma alokwap, irukito ka iyong. Irukito iyong ka ngitunga lukaalak. Tonyoutu, tosubakinos. Iyong ka ngasigerea daang na irukito ka iyong. Toliwor iyong ekarikon kech. Adaunet a ngikaru alukaalak, ketonyouni ayong iyong tolot kitijik akwap na ngoon ayaunio ngitunga lukaalak lu apote alobukui toloma neni peemito ejie. Iremi iyong ngimoru a Isirael lukolong araakasi alaireng nikooyen, tarai elomito tokona ngitunga akaalimon. Itilarete esi ngaren, iyong ka ngajorei kon daang ta ngibukui lukaalak itikokinosi akwap loger a ekuwam aloapolon, toburuchiasi akwap loger a edou. “Iyong Gog, abala ayong Ekapolon lo arai Ekapolon Akuj kona: Na enangea akolongit ngina, epete iyong ngitamen luaronok sodi totuk asubakin naaronok. Ilimuni iyong tama, ‘Anyoikini ayong akwap na eyakasi ngadakarin na nyedukitoe ngawasea. Atikokin ngitunga lu ibooyete akaalimon, lu emam ngawasea ka ngidorin.’ Ikokoi iyong ka angatar ebari a ngitunga alu elomito lorerea lukolong enyasunitae. Achununio kesi alobukui, emeto tokona ngibaren nabo etingito ngiboro. Elomito kesi nakiriamet a akwap. Ngitunga a Cheba ka Dedan ta ngimuchurus a ngirerea a Sipania, kingisete iyong tamasi, ‘Angatar ibunit iyong a? Ichununit iyong ngajorei kon angatar a, akiwok ngakwangae ka egolit ka ngaatuk ta ngiboro, angatar lugu daang a?’ “Tokona bocha itwaan, tolimok Gog atamar abala ayong Ekapolon lo arai Ekapolon Akuj kona: Ani tokona iboikinosi ngitunga kang akaalimon, inyouni iyong anipalem ibooyo alokwap aniti kaina. Irikuni iyong ngasigerea nakajwok nakaalak alobukui, edokito daang ngangolei. Itijikini iyong ngitunga kang Isirael totikokin loger a edou alo eburuchiarit akwap. Iyong Gog, na enangea ngirwa ngulu, ketonyouni ayong iyong tolot kitijik akwap kang, toyeneta ngibukui atamar ayong ngae, na etorunio ayong nikon edodiu akitaleuno kang anakonyen kech. Ikwa meere iyong itwaan nikolong eruoro ayong ngakiro keng a, nakolong esuruorea ngikasubak etich kang, lu araakasi ngikadwarak a Isirael atama ngirwa lu isidiuno, ameuni ayong itwaan kitijik Isirael a? Alimu ayong Ekapolon lo arai Ekapolon Akuj.” Ebala Ekapolon lo arai Ekapolon Akuj kona, “Akolongit na itijikinio Gog Isirael, angoi ayong noi. Alimunit ani ariraunea angoit kang atamar erikirikokini akwap alo Isirael lokojokon. Emaranikinete ngikolea ka ngikieny, ka ngitieng, ka ngiborei lua ngalup ta ngitunga daang. Ee robo, emaranikinete kesi anakwap ani kakeritotor ayong. Eukorosi ngimoru, erimaunosi ngikipetetio ka ngawasea daang nalup. Anyarakini ayong Gog ebuloi daang. Alimu ayong Ekapolon lo arai Ekapolon Akuj. Ebongokinosi ngasigerea keng taaras a ngakwaaras kech a ngikulepek. Erirae ayong ngesi a edeke aloaronon ka abukorit ngaakot. Alakakini akiru nakaalan ka na ngamoru, ka akim ta ngipip, potu daang kidiama keng ka ngasigerea keng ta ngibukui lukaalak lu ibakito ka ngesi. Eger ngolo edodikinea ayong ngibukui lukaalak apolou kang ka akitaleuno kang. Toyeneta ngibukui lukaalak atamar arai ayong Ekapolon Akuj.” Tolim Ekapolon lo erai Ekapolon Akuj tama, “Itwaan, todwar naaronok ani a Gog, alo erai ekapolon loapolon a ngibukui a Mechek ka Tubal, tolimok ngesi atamar abala ayong Ekapolon Akuj kona: Iyong Gog, kanyoik ayong iyong. Kamojirikini ayong iyong katoree lowae eche, sodi kepud alokwap anikalonan katoriko lomoru a Isirael. Ani erumor atanang akau kon tachakun anakan kon ana alokedieny, atanang ngimalea tachakun ana aloteten. Iyong ka ngasigerea kon ta ngitunga lu irukitotor, ibusokinosi lomoru a Isirael totoaka. Emiekini ayong ngikieny ka ngitieng a moding tanyama ngawat kus. Ibusokinosi esi naro, kainyo alimu ayong Ekapolon lo arai Ekapolon Akuj. Enokakini ayong akwap a Magog akim ka ngikwaasea a anam ni ibooyoto ngitunga akaalimon. Toyena atamar arai ayong Ekapolon Akuj. Eteyeni ayong ngitunga kang Isirael ekiro kang lo italeuno nabo nyemiekini ayong ekiro kang isurumio ngileech nabo. Toyeneta ngibukui atamar arai ayong Ekapolon Akuj na arai Akuj a Isirael na etaleuno.” Tolim Ekapolon lo erai Ekapolon Akuj tama, “Iteni dir ebunit akolongit na abala ayong. Sodi tonyout ngitunga lu elomito lorerea a Isirael toloto tochunut ngiboro lujiet lu aisikinio kichunyakis akim, kinoma ngaupwala ka ngakawa, ka ngimalea ka ngamorokin ta ngakwaaras. Etukokinete kesi ngiboro ngulu kirirakis ngakimea na irikarete ngikaru ngikan-kaarei. Nyiitanete kesi akikeyen ngakito nabo, kori akitub ngakiro anamoni, kainyo elalakearosi ngiboro ngulu irirakinete akim. Ekokoyete kesi ka angatar ngiboro a ngitunga alu kolong akokoyete ka angatar ngiboro kech. Alimu ayong Ekapolon lo arai Ekapolon Akuj.” Ebala Ekapolon Akuj, “Akolongit ngina, ainakini ayong Gog ewae lo enukakinio alo Isirael, ni enyaritae Adipo a Ngikalotok ni eyei kide anam a Amakat. Egolori erot a ngikalotok, kainyo enukakinio Gog ka ngajorei keng daang neni. Enyarao adipo ngina ‘Adipo a ngajorei a Gog.’ Irikarete Ngisirael ngilapio ngikan-kaarei enukete kesi, sodi kitaleunioto akwap. Enukete ngitunga a akwap daang kesi. Einakinete ngakiro nguna kesi ekipur akolongit na edodiunea ayong apolou kang. Alimu ayong Ekapolon lo arai Ekapolon Akuj nguna. Adaunet a ngilapio alukan-kaarei kangulu, eseunio ngitunga kirimokis akwap esakete ngawat na eringa eperete analup, tonuka, sodi kitaleunioto akwap. Ani irimito kesi akwap, nacha eriamuneta akoit a itwaan, kitowaa ibore ni idodiuni alokwaas, ani epote ngikanukak, yaasi tonukakis Nadipo a ngajorei a Gog. ( Emini tani ere diyete neni lo enyarao ngajorei a Gog.) Sodi kitaleun akwap nabo.” Katolimok Ekapolon lo erai Ekapolon Akuj ayong tama, “Itwaan, tanyarau ngikieny daang ka ngitieng tolimok tama, ‘Tochununos alowaitin kadaang pot nakipeyos nakasubakinit ayong esi. Eliwor ekimuje lotikaalan alomoru a Isirael. Inyamete esi akiring tamata ngaakot. Inyamete esi akiring a ngasigerea anakajwok, tamata ngaakot a ngikapolok a akwap, alu kolong aario loger a ngimesekin aluapolok kori a aluuchik, kori a ngaanei kori loger a ngimongin aluatumak. Na aarea ayong ngitunga ngulu loger a ngakipeyos, inyamete esi nikatoronon kiyelayelakinos, tamata ngaakot kimatamatakinos. Kisimwokio esi alomeesa kang akiring a ngangolei ka na ngikameak ngangolei ka ngasigerea ta ngikajwok. Alimu ayong Ekapolon lo arai Ekapolon Akuj nguna.’ ” Tolim Ekapolon Akuj tama, “Esingolikini ayong ngibukui apolou kang, edodik eger lo atubio ayong ngakiro eriyan a agogongu kang. Napei kaneni jik, eyenunete Ngisirael atamar arai ayong Ekapolon Akuj na arai Akuj kech. Eyenunete ngibukui atamar arikio Ngisirael nakwap nache kotere ngasechesea kech nakasubeta ayong. Atomulen ayong kesi emiek ngimoe kech idwangete kesi taarae a akwara. Ani amuleni ayong kesi atosubea ngakiro na etemem ka elos kech ta aronis.” Tolim Ekapolon lo erai Ekapolon Akuj tama, “Nakaneni kesieniyete tokona ayong Ngisirael, lu eraakasi ngalesea a Yakobo, atobuak kesi ajako kech. Erichunit ayong ekiro kang lo italeuno. Na moi elometa kesi nakwap kech a ngikulepek akaalimon, imuriakinete ngileech kech ka naaronok nakolong kasubeta kesi ayong. Emam itwaan itoemi kesi. Abuuni ayong kesi alobukui atochun anakwapea a ngimoe kech sodi edodiunea akitaleuno kang anakonyen a ngibukui alukaalak. Toyeneta ngitunga kang atamar arai ayong Ekapolon Akuj na arai Akuj kech, kainyo ameari kolong ayong kesi tarata ngirikon alobukui dio atobuu nabo nakwap kech a ngikulepek. Nyemiekini tani ipei kech idongi kiding ngibukui nabo. Nyeringa nabo amuleni kesi, pearai abukokini ngitunga kang Ngisirael etau kang. Alimu ayong Ekapolon Akuj na arai Akuj.” Arai akolongit na ngatomon a ekaru alokitetet, alo arai ekaru lo a ngitomwon-arei ka ngikan a arikonot kosi, tarai ekaru lo a ngitomon ka nguomwon napei elemario Yerusalem. Akolongit napei ngina, katotikokin ayong agogongu a Ekapolon Akuj. Abu Akuj kayaa ayong anakisingolikinet tanang nakwap a Isirael, kewaak moru lotikooyen. Ewae lo alokuju emoru ngolo, ayei adukuoru na asibit ere. Naketaapiarea ngesi ayong inaa, engolik itwaan ni amalimali loger a asuat ananyang. Atingit ngesi auno nawaru nakitemiet ka akitoe nakitemiet. Awei ngesi alokidor. Katolimok itwaan ngini ayong tama, “Itwaan, kingolik a ngakonyen kon, kiira a ngaki kon. Tochoia alotau ngakiro daang nakedodikini ayong iyong, kainyo kiyaun iyong nege sodi kedodik ayong iyong ngakiro nugu. Kiruor ngakiro daang na ingolikini iyong, tolimok Ngisirael.” Engolik akai a Akuj iriamit awas. Tolem itwaan ngini akitoe keng nakitemiet na arai aoyau keng ngamitae ngauni, dio kitemio awas. Arai aoyau na alokidiama a awas ngamitae ngauni, tarai alangirir ngamitae ngauni. Tolot ngesi lokidor lo alokide todoka nadoket kitem ni elomunere, arai ngamitae ngauni elosi nalup. Ngamaniyae na ayakasi lokwaasea ariyan ngiwaitin daang arai ngamitae ngauni-uni. Ngawasea na atiakito ngamaniyae nguna arai alangirir kech ngamitae ngaarei ka anus. Yaaye ngamaniyae nguna ayei erot lo elosere namaniyat naapolon na ekienyikina ka akai a Akuj. Arai aoyau a erot kangolo ngamitae ngauni. Kitem ngesi amaniyat ngina, arai ngamitae ngoomwon elosi nalup. Neni arai esal a ekidor alowae alo ekienyikina ka akai a Akuj. Arai alangirir a ngiwaitin keng alosal amita apei. ( Ariyan ngamaniyae na ayakasi lokwaasea a erot daang, nabo ariyan alangirir a ngikwaasea kech.) Ani erumor kitem itwaan ngini abalanyany a erot alo elosi lokidor. Arai daang ngamitae ngakan-kapei ka anus. Alolomu na atiakit ngidorin arai ngamitae ngakan. Ngaren ngamaniyae nguna, ayei awas nauriyen arai aoyau ngasentimitae ngatomwon-kan. (Ariyan ngamaniyae araakasi ngiwaitin daang ngamitae ngauni-uni.) Ani erumor kitem ngesi alonis napei alokamanakete amaniyat apei tanang kamanakete nache iwapit erot lo elomarere, toliwor ngamitae ngatomon ka ngaarei ta anus. Amaniyat na esal ngesi epudorere nawas na anikalapatan. Kitem ngesi amaniyat toriam erai abalanyany keng ngamitae ngatomon. Erai aoyau daang a erot alo ekidor napei anawas ana anikalapatan tanang lokwaas lokayaaye amaniyat na esal, erai ngamitae ngatomwon-arei ka ngakan. Ayakasi ngipukei kamanakete ngamaniyae ka kiding alotooma. Echietae asir a ngingolea lokwaasea lu alotooma lu ekienyikina ka erot lo epudorere. Katoriko itwaan ngini ayong kesitor lokidor atopudosi nalaar na anikalapatan. Adukitoe ngamaniyae ngatomwon-uni atapakina nalaar na anikalapatan. Ngaren ngamaniyae nguna, etakitae ngamoru nikalapatan, kiloda alaar. Atiyaara alaar na anikalapatan akidwang na alotooma. Ekeuna ni elomunere nalaar na alotooma. Kitem itwaan ngini alonis a ngidorin aluarei kangulu toliwor ngamitae ngatomwon-kan. Kengarenik ngesi ayong tolot kwap. Ayei neni ekidor lo anikalapatan lo engoliarit kwap. Kitem itwaan ngini aoyau ka abalanyany a ekidor kangolo. Ngamaniyae nauni na ayakasi lokwaas a erot, ka ngikwaasea lu atiakito kesi ta amaniyat naapolon, ariyan daang ka lua ekidor alo alotoo. Arai aoyau daang a erot a ekidor ngamitae ngatomwon-arei ka ngakan tarai abalanyany ngamitae ngatomon ka ngaarei ka anus. Amaniyat naapolon, ka ngipukei ta ngingolea lu echietae ekwaan ka lua ekidor alo alokide. Ayakasi ngadoket ngakan-kaarei na elosere lokidor toyei amaniyat naapolon losal akienyiarit nalaar. Angedakina erot eche tooma alaar napei alokidor alo alokwap tanang lokidor eche lo elomarere nalaar na alotooma, ekwaan ka lua ewae alo alokide. Kitem ngesi alonis a ngirotin kangulu, arai ngamitae ngatomwon-kan. Ani erumor katoriko itwaan ngini ayong lowae loa lokuju, engolik ayong ekidor kaina. Kitem ngesi ekidor ngolo, ariyan ka luche. Ayakasi ngipukei namaniyae na erot a ekidor kangolo lu ekwaan ka luche. Arai aoyau daang a erot kangolo ngamitae ngatomwon-arei ka ngakan tarai abalanyany ngamitae ngatomon ka ngaarei ta anus. Ayakasi ngadoket ngakan-kaarei na elosere lokidor, tokienyiarite amaniyat keng naapolon nalaar. Echietae asir a ngingolea lokwaasea lu alotooma lu akienyikina ka erot. Ayei nalaar na alotooma erot lo akienyiarit kuju. Kitem ngesi tani erot lo alokuju ngolo, arai ngamitae ngatomwon-kan, napei alokidor alo anikalapatan tanang loa lotooma. Katoriko itwaan ngini ayong kesitor lokidor lo alokuju, kelomak nalaar na alotooma. Kitem ngesi ekidor ngolo, ariyan ka ngidorin lua alaar ana anikalapatan. Ngamaniyae na ngikwaasea, ka amaniyat naapolon ta ngikwaasea lu alotooma ariyan ka lua ngidorin aluche. Ayakasi ngipukei namaniyae keng. Arai aoyau daang ngamitae ngatomwon-arei ka ngakan tarai abalanyany ngamitae ngatomon ka ngaarei ta anus. Ayakasi ngamaniyae eriamito. Arai aoyau kech ngamitae ngatomon ka ngaarei tarai abalanyany ngamitae ngaarei ka anus. Akienyiarit amaniyat naapolon nalaar na anikalapatan. Echiekinitae asir a ngingolea lokwaasea a erot. Ayakasi ngadoket ngakan-kauni na elosere lokidor ngolo. Katoriko itwaan ngini ayong kesitor nalaar na alotooma, lokidor lo alokide. Kitem ngesi ekidor, ariyan ka luche. Ngamaniyae na ngikwaasea ka amaniyat naapolon ta ngikwaasea lua lotooma, ariyan ka lua ngidorin aluche. Ayakasi ngipukei eriamito, tani namaniyat naapolon. Arai aoyau daang ngamitae ngatomwon-arei ka ngakan tarai abalanyany ngamitae ngatomon ka ngaarei ta anus. Akienyiarit amaniyat naapolon nalaar na anikalapatan. Echiekinitae asir a ngingolea lokwaasea a erot. Ayakasi ngadoket ngakan-kauni na elosere lokidor ngolo. Ani erumor katoriko itwaan ngini ayong lokidor loa lokwap. Kitem toriam eriyan ka luche. Ayakasi neni dang ngamaniyae na ngikwaasea na isiritoe ngikwaasea lua lotooma, ka amaniyat naapolon ta ngipukei iriamito. Arai aoyau keng daang ngamitae ngatomwon-arei ka ngakan tarai abalanyany ngamitae ngatomon ka ngaarei ta anus. Akienyiarit amaniyat naapolon nalaar na anikalapatan. Echiekinitae asir a ngingolea lokwaasea a erot. Ayakasi ngadoket ngakan-kauni na elosere lokidor ngolo. Nalaar na anikalapatan, ayei imaniyat ni ekobara lokidor lo alaar ana alotooma. Atapakina imaniyat ngini namaniyat naapolon akienyikinit alaar. Neni ngesi elotanarere akiring a ngibaren alu a ngakipeyos ana inomio elemwaaka. Namaniyat naapolon ngina, ayakasi ngimeesae ngiarei lokwaas epei, ngiarei lokwaas loche. Angolanakinio ngibaren lu ipeyeo lomeesae ngulu, kerai lu inomio elemwaaka, kori ngakipeyos na elemarere akisech, kori na atachanot. Nikalapatan ni elosere lokidor lo alokwap, ayakasi ngimeesae ngiarei lowae epei, toyakas ngiarei lowae loche a amaniyat ana ayei lokidor. Araakasi ngimeesae daang lu angolanakinio ngibaren lu ipeyeo, ngikan-kauni. Ngimeesae nguomwon tooma amaniyat, nguomwon nikalapatan. Ngimeesae luomwon lu ayakasi namaniyat na atapakinitae nalaar, lu angolanakinio ngibaren lu epeyeo elemwaaka, akulunitae ngimeesae ngulu anamoru. Arai aoyau kech na alokidiama ngasentimitae ngatomwon-kan. Ariyan ngiwaitin lu alokidiama arai ngasentimitae ngatomwon-kaarei ka ngakan. Ngiboro daang lungolet ngibaren ngulu, ekachio lomeesae ngulu. Akodakinitae ngikodo lomeesae ngulu eriamito. Arai alangirir a ngikodo kangulu ngamilimitae ngatomwon-kaarei ka ngakan. Ekachio akiring a ngakipeyos daang lomeesae ngulu. Ani erumor katoriku itwaan ngini ayong anikalapatan kelomak nalaar na alotooma. Ayakasi ngamaniyae ngaarei na angaara nalaar na alotooma. Akienyiarit apei kuju alodiyete ekidor lo alokwap, tokienyiarite nache kwap alodiyete ekidor lo alokuju. Katolimok itwaan ngini ayong tama, “Amaniyat na ekienyiarit kuju, erai aka ngimurok alu eweikinito akai a Akuj. Ani amaniyat na ekienyiarit kwap, erai aka ngimurok alu eweikinito ekeno a ngakipeyos. Kesi ta lokookeng a Sadok. Kesi make ani a Ngilawi epedorete alosit ngaren Ekapolon Akuj tosuba etich keng.” Kitem itwaan ngini alaar na alotooma. Ariyan ngiwaitin arai ngamitae ngatomwon-kan. Ayei akai a Akuj lowae lo alotoo, toyei ekeno a ngakipeyos ngaren. Ani erumor katoriko ngesi ayong namaniyat na elomarere kai a Akuj, kitem toliwor ngamitae ngaarei ka anus elosi nalup, tarai abalanyany amita apei ka anus alowaitin kadaang. Ayakasi ngadoket na elosere namaniyat na elomarere kai a Akuj. Arai abalanyany a amaniyat kangina ngamitae ngatomon tarai aoyau na elosi nalup ngamitae ngakan-kapei. Ayakasi ngapirio ngaarei lowaitin lu elomarere. Ani erumor katoriko itwaan ngini ayong namaniyat na alokiding, na erai ni italeuno. Kitem ngesi erot lo elosere neni. Arai ngamitae ngauni elosi nalup, tarai abalanyany ngamitae ngakan. Arai alangirir a ngikwaasea ngamitae ngaarei ka anus alowaitin kadaang. Kitem ngesi amaniyat ngina toriam erai aoyau keng ngamitae ngatomwon-arei tarai ewae louriyen ngamitae ngatomon. Ani erumor tolot ngesi lowae lo alotooma noi. Kitem erot lo elosere neni, arai amita apei elosi nalup tarai abalanyany ngamitae ngauni ka anus alowaitin kadaang. Kitem amaniyat ngina toriam ngiwaitin daang eriyan erai ngamitae ngatomon. Ayei amaniyat ngina yaaye amaniyat na alokiding. Sodi katolimok itwaan ngini ayong tama, “Ni italeuno noi nege.” Kitem itwaan ngini awas na alotooma akai a Akuj. Arai alangirir ngamitae ngauni. Ayakasi ngamaniyae naachik eriamito akai a Akuj lokwaasea a awas kangina. Arai abalanyany kech ngamitae ngarei-rei. Adukitoe ngakais nadokok atiakitae ngatiaket ngauni. Atiaket apei ayakasi ngamaniyae ngatomwon-uni. Awas a akai a Akuj na anikalapatan, adiim anatiaket a apei akidwang atiaket na alokidiama, sodi towaatar ngamaniyae anawas peigangitae. Toliwor ani ingolikinio ngawasea a akai a Akuj anikalapatan, tosub elangir ngikwaasea napei alokwap tanang kidiama. Adukitoe ngadoket nabalany ngaarei nawas a akai a Akuj na anikalapatan, kamanakete ngamaniyae. Sodi kikobare anamaniyae ana alokwap ka na alokidiama. Engolik atamar adukitoe ni ikeuna eriamit akai a Akuj. Arai neni ewae lo a ngalup a ngakais ana edukuk ngatiaket ngauni, na ayakasi lokwaasea a akai a Akuj. Ariyan aoyau keng ka akitoe nakitemiet na arai ngamitae ngauni. Arai alangirir a awas ana anikalapatan ngamaniyae ngamitae ngaarei ka anus. Ayei nikoororon kiding ngamaniyae na eriamito akai a Akuj ka ngamaniyae a ngimurok. Arai abalanyany keng ngamitae ngatomon iriamit akai a Akuj. Ayakasi ngidorin lu elomarere namaniyae na ngikwaasea. Ayei ekidor epei kwap akai a Akuj toyei loche kuju. Ewae lo a ngalup lo eriamit anikoororon, arai abalanyany keng ngamitae ngaarei ka anus. Esal a ewae alokooron alotoo akai a Akuj, ayei adukuoru na arai aoyau keng ngamitae ngatomwon-omwon ka ngakan tarai abalanyany ngamitae ngatomwon-uni ka ngakan. Arai alangirir a ngikwaasea keng ngamitae ngaarei ka anus iriamit. Kitem itwaan ngini nikalapatan akai a Akuj toriam erai ngamitae ngatomwon-kan. Napei alokamanakete akai a Akuj kitor nikoororon tanang too ni erai esal, arai ngamitae ngatomwon-kan. Ngaren akai a Akuj ka ewae lokoororon alowaitin kadaang, arai ngamitae ngatomwon-kan. Kitem ngesi aoyau a akai elosi too ka ni itoreeneo alokiding alowaitin kadaang, arai ngamitae ngatomwon-kan. Amaniyat na elomarere kai a Akuj, ka ni italeuno ta ni italeuno noi, esiritoe daang atapitae ngakito napei analup tanang lopukei. Arapitae ngipukei ngulu. Ngikwaasea lua lotooma akai a Akuj napei alokwap tanang kidiama ngidorin, aburuchiaritae a ngiboro alu ichietae alu araakasi ngingolea ka ngiborei lua ngabeben. Alunyitae ngingolea ka ngiborei lua ngabeben iwapasi anamaniyat kadaang. Ayakasi ngiborei ngulu ngireetin ngiarei-rei. Arai ereet lo akienyiarit loongol eka itwaan, tarai loche lo akienyiarit lokitoe alowae aloche eka engatuny. Ekoni neni awadaang alokwaasea a amaniyat napei analup tanang kidiama ngidorin. Ariyan ngapirio na ngidorin a ewae alo italeuno. Ngaren ni elomarere lowae lo italeuno, ayei ibore ni ekoni ekeno a ngakipeyos lo esubunitae a ngakito. Arai aoyau keng na alokidiama amita apei ka anus, tarai abalanyany amita apei. Ngapirio keng na ngiwaitin ka ewae lo a ngalup, ta ngiwaitin keng, asubunitae daang a ngakito. Katolimok itwaan ngini ayong tama, “Emeesa logo ngesi eyei ngaren Ekapolon Akuj.” Ayei ekidor losal a erot alo elomarere ni italeuno, toyei ekidor eche lorot lo elomarere ni italeuno noi. Araakasi ngidorin ngiarei-rei, lu engaanar alokiding. Echiekinitae ngingolea ka ngiborei lua ngabeben lodorin a ewae alo italeuno loger lo echiekinitere tani lokwaasea. Ayei akitoe na arapitere nikalapatan ekidor a amaniyat ana elomarere. Ayakasi ngipukei lokwaasea a amaniyat kangina, nabo etisiritoe ngikwaasea a ngingolea. Ani erumor katoriko itwaan ngini ayong nikalapatan, etoro lorot lo alokwap atolomasi nalaar na anikalapatan. Katoriko nadukuoru na ayei lowae lo alokwap akai a Akuj. Arai aoyau a adukuoru ana ayei kwap kangina ngamitae ngatomwon-kan tarai abalanyany ngamitae ngatomwon-arei ka ngakan. Alowae a epei akienyikina ka nikoororon ni arai ngamitae ngatomon alokwaas a akai a Akuj. Ani alowae aloche akienyiarit ni etoreeneo analaar ana anikalapatan. Adukitoe a ngadoket a ngauni, isiyotoritae na alokidiama naabor ana alokwap. Lowae lo alokwap a adukuoru kangina, ayei erot lo arai abalanyany keng ngamitae ngakan, tarai aoyau ngamitae ngatomwon-kan, toyei ekidor lowae ngolo. Adiding ngamaniyae na ayakasi nadoket na alokidiama adukuoru ngina akidwang na ayakasi nadoket na alokiding ka na alokwap, kainyo esiyotoritae nguna naabor. Ngamaniyae a ngadoket kadaang adukitoe ni ikeuna, peegangitae a ngapirio loger a ngakais anache analaar kangina. Ayei awas na anikalapatan ebakito ka ngamaniyae na ayakasi nalaar na anikalapatan. Epororit awas ngina ngamaniyae a ngamitae a ngatomwon-arei ka ngakan. Ngamaniyae na arekina lokwaas a alaar ana anikalapatan araakasi ngamitae ngatomwon-arei, taraakas ngamaniyae na arekina lokwaas a akai a Akuj ngamitae ngatomwon-kan. Ayei ekidor lo elomarere namaniyae nguna lowae loa lokide elomunio analaar ana anikalapatan. Lowae loa lokuju akai a Akuj, ayei akai ache na ekwaan ka ngina diyete akai na eyei too, losal a akai a Akuj. Ngaren ngamaniyae, ayei erot lo ekwaan ka lo ayei lowae lo alokwap. Ekwaan ngakitemiet kech ka eduke ta ngidorin. Ayei ekidor kwap ngamaniyae alokuju adukuoru, alowae alo alokide alo isiakinea awas. Katolimok itwaan ngini ayong tama, “Italeuno ngakais naarei nugu daang, na alokwap ka na alokuju. Neni ngesi elomarete ngimurok eloose ngaren Ekapolon Akuj akinyam ngakipeyos na italeuno. Neni ngesi ikachakinete ngimurok ngakipeyos na italeuno noi kainyo italeuno ngamaniyae nguna, ngakipeyos a ngalemet ka ngakipeyos na elemarere akisech ta na atachanot. Na elomareta ngimurok ni italeuno, nyepudorete kesi nikalapatan eringa nyebutuno ngiworui kech lusek asubeta etich kidongo neni kainyo italeuno ngiworui ngulu. Esakitae kesi ebutokinosi ngiworui ngiche eringa nyepudoro nikalapatan ni echunakina ngitunga.” Na arumorea itwaan ngini akitem tooma akai a Akuj, abu katoriko ayong kesitor lokidor lo alokide sodi kitem aro na anikalapatan. Tolem ngesi akitoe nakitemiet kitemio ewae lo alokide, arai ngamitae ngamiae ngaarei ka ngatomwon-kan. Kitem ngesi ewae lo alokwap a akitoe keng, arai ngamitae ngamiae ngaarei ka ngatomwon-kan. Sodi kitem ewae lo alokuju a akitoe keng, arai ngamitae ngamiae ngaarei ka ngatomwon-kan. Dio torei kitem ewae lo alotoo a akitoe keng, arai ngamitae ngamiae ngaarei ka ngatomwon-kan. Kitem ngesi ngiwaitin luomwon daang. Ariyan ngiwaitin daang arai ngamitae ngamiae ngaarei ka ngatomwon-kan. Eriwokina awas ngina atiakit ngiboro lu etaleuno ka lupeetaleuno. Ani erumor katoriko itwaan ngini ayong lokidor lo ekienyiarit kide. Engolik ayong akwangis a Akuj a Isirael ebuni alokide. Kirurumaun etoil a Akuj loger a ngitoroi a anam sodi kimau akwangis keng akwap. Engolik ayong akisingolikinet na ekwaan ka nakolong engolikini na abunio Akuj akinyasun Yerusalem. Ekwaan nabo ka akisingolikinet nakolong engolikini ayong alokwaas a angolol a Kebar, abu emasakin nalup tatap ereet ngalup. Kitoru akwangis ngina lokidor lo alokide toloma kai a Akuj. Kekeu etau a Akuj ayong kayaa nalaar na alotooma, engolik akwangis a Akuj ileleba kai. Ani eringa itwaan ngini ewei alodiyete kang, eira ayong etoil a Ekapolon Akuj kesuruorikini alokai keng tama, “Itwaan, nege erai ekicholong kang a apolou, nege edokokinit ayong ngakejen kang, eboikinor kiding Ngisirael jik. Nyeringa nabo Ngisirael isurumete ekiro kang ngileech jik, kori nyeringa nabo ngikapolok kech isurumete ekiro kang ngileech ani ilipeta ngakujo ngache kori ani enukanakineta ngawat a ngikapolok kech nege. Isibakito ngikapolok kech ngakilori kech ka nakang. Kisibaka ngapirio kech ka nakang, abe toliwor awas bon kitiakit ayong ka kesi. Esurumete kesi ekiro kang ngileech a ngakiro anakikadakinete esubete kesi. Kotere nguna, amunyari ayong kesi a angoit kang. Ejoikinit tokona kesi epalikinete akilipit ngakujo nache sodi tachadasi ngawat a ngikapolok kech anikang. Ani kesubakis nguna, eboikin ayong kiding kech jik.” Torubak Ekapolon Akuj ebala, “Iyong itwaan, kisisak Ngisirael ngakiro a akai a Akuj toyena lokojokon eger keng. Kimiek kesi kiruma ngileech kotere ngakiro naaronok asubete kesi. Ani kiruma kesi ngileech kotere daang na asubete, kidodik kesi eger a akai a Akuj, ka eduke keng ta ngidorin keng lulomunet ka lupudoret, ka ekisikwaane keng ta eger lo erekinitere ngiboro daang. Kisisak kesi ngitalio a akai a Akuj daang ka ngakiro na iwapitae. Kigir ngakiro nguna daang kingolikineta kesi eger lo erekinitere sodi kiwapa ngitalio daang. Etal a akai a Akuj logo: Aro daang na iriamit akai a Akuj alokidiama emoru, erai ni italeuno.” Ngakitemiet a ekeno a ngakipeyos nugu, itemio loger lo etemere akai a Akuj. Ewae lo a ngalup a ekeno kiriam, echilitae ni itorete ngakipi, ni erai aoyau na ngalup ngasentimitae ngatomwon-kan tarai abalanyany ngasentimitae ngatomwon-kan, tarai aoyau na alokidiama ekeli lo a ekwaas ngasentimitae ngatomwon-arei ka ngakan. Ewae lo alokwap noi a ekeno napei alokidiama ewae lo esipor, arai aoyau na alokidiama amita apei. Ewae loche, abuaritae naabor alokeli ngasentimitae ngatomwon-kan kiriam, tarai aoyau na alokidiama ngamitae ngaarei. Ewae lo atupit ngolo, abuaritae naabor alokeli ngasentimitae ngatomwon-kan kiriam. Ewae lo alokidiama lo enomeenere ngakipeyos, arai aoyau na alokidiama ngamitae ngaarei. Ngaamwar na ajipito alowaitin aluomwon, aoyak epororito ewae loche alokidiama. Ariyan ngiwaitin lua lokidiama daang, araakasi ngamitae ngakan-kapei. Ariyan tani ngiwaitin lua lokiding daang araakasi ngamitae ngakan-kaarei, toyei ekeli lowaitin lua nikalapatan, lo arai aoyau keng ngasentimitae ngatomwon-arei ka ngakan. (Arai abalanyany ani itorito ngakipi ngasentimitae ngatomwon-kan.) Ngadoket na adokanarere lokeno, ayakasi lowae lo alokide. Katolimok Ekapolon lo erai Ekapolon Akuj ayong tama, “Itwaan, topupok ngakiro nakalimokini ayong iyong. Ngitalio a ekeno a ngakipeyos lugu: Akolongit na itoweyere ekeno, kitaleu kinom ngakipeyos ka awatakin ngaakot a ngibaren alu ipeyeo. Ngilawi lumurok taraakas ngalesea a Sadok make kesi epote ngaren kang akisub etich kang. Adungu ayong Ekapolon lo arai Ekapolon Akuj nguna. Nak kesi emong losorokit kipeyeto toliwor akipeyos a akisech. Ilemuni iyong ngaakot keng ngache kiwasak naamwar naomwon a ekeno, ka ngiwaitin lua lokiding, kisiriam ekeli keng daang. Eger ngolo ngesi itosegea iyong ka akitaleun ekeno a ngakipeyos. Ilemuni iyong emong lo ipeyeo erai akipeyos a akisech, kinom ani eseunitae anikalapatan akai a Akuj. Ani akolongit na etupit ngina, ipeyoe iyong ekoroe lo emam ni ichwangakina toliwor akipeyos a akisech. Kitaleu ekeno a ngaakot a ekoroe loger lo itosegea ana emong. Ani irumori akitoseg ekeno, kipeye emong lo emam ni ichwangakina ka emesek lo emam ni ichwangakina. Yau kesi nia Ekapolon Akuj. Ipurupurakinete ngimurok amakat kidiama kech kepeyokis ayong erai akipeyos. A ngirwa a ngikan-kaarei, ipeyoe iyong akolongit daang akine, ka emong ta emesek toliworos ngakipeyos a akisech. Ejoikinit daang eraakasi lu emam ni ichwangakina. A ngirwa a ngikan-kaarei, itosegete ngimurok ekeno kitaleut kipeyoore. Adaunet a ngirwa alukan-kaarei, elomario nakolongit na ngakan-kauni, kepeyokinete ngimurok ayong ngakipeyos na inomio ka ngakipeyos a ekisil. Sodi katacham ayong esi daang. Ayong Ekapolon lo arai Ekapolon Akuj alimu nguna.” Ani erumor katoriko itwaan ngini ayong katobua lokidor lo alokide akai a Akuj. Agolitoe ekidor ngolo, sodi katolimok Ekapolon Akuj ayong tama, “Idongi ekidor logo egolol, nyengaario, nabo emam itwaan itoruni lokidor logo kainyo etoruni ayong Ekapolon Akuj na arai Akuj a Ngisirael lokidor logo. Idongi egolol. Ekapolon lo epolokinit akwap ngesi bon epedori alomar tanyam akimuj keng na italeuno alongaren kang. Elomari ngesi ka apudor kitor lorot lo anamaniyat anaapolon, lo eyei lowae lo alotooma.” Ani erumor katoriko itwaan ngini ayong kesitor lokidor loa lokwap tanang ngaren akai a Akuj. Ani engolikini, engolik akwangis a Ekapolon Akuj ileleba kai a Akuj. Emasakin ayong nalup tojuk ereet ngalup, sodi katolimok Ekapolon Akuj ayong tama, “Itwaan, topupok lokojokon a ngaki kon, ka akienyikin lokojokon a ngakonyen kon. Topupok ngakiro daang nakalimokini ayong iyong alotalio a akai a Akuj, ta ngikichikichiket daang a etal. Toyen lokojokon ngitunga lu echamakinitae elomunete ka apudonor alokai a Akuj, ka ngitunga lu nyechamakinitae. “Tolimok Ngisirael lukechanak lugu atamar abala ayong Ekapolon lo arai Ekapolon Akuj kona, ee Ngisirael, totubosi ngakiro nakikadakinete na isubete esi daang. Isuruma esi akai kang ngileech ani imiekineta ngitunga a ngakwapea anache lu nyilengeritae elomunete kai kang esaa lo kepeyonokinere ayong nikatoronon ka ngaakot a ngibaren alu ipeyeo. Echwangakis ngitunga kang achamunet kang a ngakiro anakikadakinete esubete. Nyiyokiyete esi ngiboro kang lu italeuno pearai ngitunga lugelayek isiyokiyo. “Tokona bocha, alimu ayong Ekapolon lo arai Ekapolon Akuj atamar emam itwaan a akwap anache ni nyilengeritae, emam itwaan ni nyiwapit ngakiro kang ni elomari kai kang, nyelomari tani itwaan a akwap anache ni elomit kiding ngitunga kang Ngisirael.” Katolimok Ekapolon Akuj ayong tama, “Ngilawi lukolong kangerete ayong aapei ka Ngisirael luche, kilipa ngakujo kech nasubuna, erirae ayong kesi. Eliworosi kesi ngikasubak etich alokai kang toweikis ngidorin ka akisub etich loche a akai kang. Earete kesi ngibaren lu elemunete ngitunga eraakasi ngakipeyos na inomio ka ngakipeyos nache ta akisub etich a ngitunga. Nakaneni, ani kona kolong aweikineta kesi akisilip Ngisirael ngakujo nasubuna, kilomakis Ngisirael nakisech, ekong ayong Ekapolon lo arai Ekapolon Akuj atamar erirae kesi jik. Nyesubete kesi etich kang eraakasi ngimurok kori nyeapiarete loboro kang lu italeuno kori nyelomarete ni italeuno noi. Pearai imiekinio kesi kitiro ngileech a ngakiro anakikadakinete esubete kesi. Aseu ayong kesi toweikis akai, tosuba etich a akai akang daang ka ibore cha daang ni ejoikinit esubio kaneni.” Tolim Ekapolon lo erai Ekapolon Akuj tama, “Nakaneni ngimurok a ekitela a Lawi lu eraakasi ngalesea a Sadok, lukolong edongete tosuba etich alokai kang emunokinito, ngirwa lu kangeritotor ayong Ngisirael luche, kesi epote ngaren kang tosuba etich kang kepeyokis ayong nikatoronon ka ngaakot a ngibaren alu ipeyeo. Kesi make elomarete kai kang tosuba etich kang alokeno kang a ngakipeyos ta akirik akilip alokai kang. Na elomuneta kesi lodorin a alaar ana alotooma, enapete ngiworui lukaanikak. Nyenapete kesi ngiworui lua ngajul a ngamesekin esaa lo esubeta etich analaar ana alotooma kori alokai kang. Enapete kesi ngapukoto nawarui ka ngiworui lu aabor, nabo nyenapete ngarubae sodi nyiinyinyirea. Na epudoreta kesi nalaar na anikalapatan ni eyakasi ngitunga, ebutorete ngiworui lusek asubeta etich kiwaakis namaniyae na italeunitoe. Enapete kesi ngiworui ngiche kikachakis lu italeuno nyeewaneta ngitunga. “Nyebanyete ngimurok ngakies kech kori nyipitunete ngitim tooyaketa. Eirete kesi ngitim. Nyemasete ngimurok emuna na elomareta nalaar na alotooma. Nyiusi emuron aberu na elakitae. Iusi ngesi apese Nasiraelit na nyepero ka ekile sek kori apuserut a emuron aloche. “Itatamete ngimurok ngitunga kang akitiak ibore ni eseg ka ni nyeseg, ni italeuno ka ni nyitaleuno. Na enyounio eburas, etubete ngimurok ngakiro itemem ka ngitalio kang. Irichakinete kesi ngisukukui lu kelipitere ayong itemem ka ngitalio kang ta eger lo asaki ayong. Irichakinete kesi ngasabatoi kang kitaleut. “Nyesakitae ngimurok eliworosi lu nyitaleuno kori akitap itwaan nikatoan. Kaneni dang, ani eliwor apakeng kori itiokeng, lokookeng kori nakookeng, lokaatokeng kori nakaatokeng na nyiusitae, epedori ngesi akitap. Na italeunor ngesi torumor, ejoikinit idari ngirwa ngikan-kaarei. Akolongit na elomarea ngesi nalaar na alotooma akai a Akuj tosub etich alokai a Akuj, ejoikinit ipeye akipeyos a akisech kotere ngesi ilope. Ayong Ekapolon lo arai Ekapolon Akuj alimu nguna. “Emam ngimurok ibore irumete alo Isirael. Kerumete kesi ayong. Emam kesi ibore etiakakinio toliwor ikech, ayong arai ikech. Enyamete kesi ngakipeyos a ngalemet, ka ngakipeyos na elemarere akisech, ka na atachanot ta ibore cha daang ni itegeliaritae alo Isirael kotere ayong. Ngimurok elemarete ngalemet na ekingaren naajokak a ibore kadaang ani kepeyokinio ayong. Ani idorokinete ngitunga ngamugati, nakinae ngimurok amugati na ekingaren erai akipeyos sodi min apiaro kang nawiyei kus. Nyenyamete ngimurok ikeny cha daang kori etiangit lo etoani bon kori lo earete ngitieng luche.” Ani ekorakinio ngitela daang akwap, ejoikinit epewae etiakario toliwor aka Ekapolon Akuj. Eliwor aoyau keng ngakilomitae ngatomon ka ngaarei ta anus tarai abalanyany keng ngakilomitae ngatomon. Eliwor ewae ngolo daang lo italeuno. Alotooma ewae ngolo, etiakunio ewae lo eriyan ngiwaitin daang erai ngamitae ngamiae ngaarei ka ngatomwon-kan, toliwor eka akai a Akuj. Isiriamio neni nikaloloman ni erai abalanyany keng ngamitae ngatomwon-arei ka ngakan. Etiakunio epewae a ewae alo italeuno kangolo, ni erai aoyau ngakilomitae ngatomon ka ngaarei ta anus tarai abalanyany ngakilomitae ngakan todukoe akai a Akuj, ni italeuno noi. Neni eliwor ni italeuno anakwap. Eliwor ika ngimurok a Akuj alu esubete etich a Ekapolon Akuj alokai keng. Neni epete ngakais kech ka ewae lo emini akai a Akuj. Ewae lo idongit eliwor eka Ngilawi alu esubete etich alokai a Akuj. Epete ngirerea lu elomete kesi neni. Arumoret a ewae alo italeuno, totupak ewae eche lo erai aoyau keng ngakilomitae ngatomon ka ngaarei ta anus tarai abalanyany ngakilomitae ngaarei ka anus. Etiakario ewae ngolo min ere lo epedori Esiraelit cha daang akilom. Etiakakinio ekapolon a akwap ngalup. Napei alokukuoru alo alotoo a ewae alo italeuno tolot too tanang nanam a Mediterenian. Ani alokide elosi tanang losal a akwap, sodi toriyanikin aoyau keng ka aoyau a ngiwaitin alu etiakakinitae ngitela a Isirael. Eliwor neni ikeng alo Isirael. Nyeringa nabo ngikapolok kang etikiorete ngitunga kang, pearai imiekinete Ngisirael tolemasi akwap itemem ka ngitela kech. Tolim Ekapolon lo erai Ekapolon Akuj tama, “Etige ngikapolok a Isirael, etemokin robo! Kimiekisi amoitanut ka atikiorit luche. Tosuba na eriyan ka nguna etenooko. Tojongoto akitwarakinit ngitunga kang anakwap kech. Kalimok ayong Ekapolon lo arai Ekapolon Akuj esi nguna. “Totinga ngakitemiet ka ngaratilio na eriyan. “Eriyanikinosi epa na itemere ibore nikoonon ka bas na itemere ibore nialiwan. Omer ngesi itemere. “Ikote ngakitemiet nguna nege: Omer apei eriyan ka epa ngatomon ka bas ngatomon. Ejoikinit ngakitemiet kus ikote nege: Gera ngatomwon-arei eriyan ka chekel apei. Chekel ngatomwon-kapei eriyan ka mina apei. Ejoikinit esi iwapete ngakitemiet nugu kotere ngakipeyos kus: Eliwor ngakanoi akitemiet apei anakan-kapei a epa alotooma omer. Toliwor erau akitemiet apei anakan-kapei a epa alotooma omer. Eliwor akimiet akitemiet apei anatomon a bas alotooma kor (eriyan kor apei ka bas ngatomon kori omer apei). Ilemunete esi amesek apei alotooma ngamesekin ngamiae ngaarei anawiyei a Ngisirael. Ilemunete esi ngakipeyos a ngalemet, ka ngakipeyos na inomio ta ngakipeyos a ekisil sodi kitomookere esi. Alimu ayong Ekapolon lo arai Ekapolon Akuj. “Ejoikinit ngitunga daang anakwap ipotorete ngakipeyos nguna nakis ekapolon a akwap alo Isirael. Eliwor etich a ekapolon kangolo alemun ngakipeyos na inomio, ka ngakipeyos a ngalemet, ka ngakipeyos a emuna kotere ngisukukui lu eanyungarere elap ka ngasabatoi ta ngisukukui luche a Ngisirael. Elemuni ngesi ngakipeyos a akisech, ka ngakipeyos a ngalemet, ka ngakipeyos na inomio ta ngakipeyos a ekisil tomookere Ngisirael.” Tolim Ekapolon lo erai Ekapolon Akuj, “Akolongit na ekingaren a elap alo ekingaren, ipeyoote esi emong losorokit lo emam ni ichwangakina kitaleunere akai a Akuj. Elemuni emuron ngaakot ngache a akipeyos ana akisech kangina, kiwasak nakito a ngidorin a akai a Akuj, ka ngiwaitin luomwon a ekeno a ngakipeyos ka nakito a ekidor a alaar ana alotooma. Akolongit na ngakan-kaarei a elap kangolo, tosubakis ngakiro napei nguna kotere itwaan daang ni asechi peiyechakinit kori ani peayenea, sodi kitaleunere akai a Akuj. “Akolongit na ngatomon ka ngoomwon a elap alo ekingaren, inyamete esi esukukuu a Adeparet. Inyamete esi a ngirwa a ngikan-kaarei ngamugati na emam ekitoe lo itubui. Akolongit ngina ipeyoe ekapolon emong losorokit kotere ngasechesea keng ka ngitunga keng daang. Alorwa alukan-kaarei a esukukuu kangulu, ipeyoe ngesi ngimongin lusorok ngikan-kaarei ka ngimesekin luapolok ngikan-kaarei lu emam ni ichwangakina. Akolongit apei, ipeye ngesi emong epei ka emesek epei. Ipeyoe ngesi tani ekoroe akolongit daang toliwor akipeyos a akisech. Kotere emong cha daang ka emesek cha daang lo ipeyeo, iturukoori ngesi ka ngalitae ngauni a akimiet. “Akolongit na ngatomon ka ngakan a elap alo a ngikan-kaarei, na isiakinea esukukuu a ngalemet, ipeyoe ekapolon a ngirwa lukan-kaarei daang ngakipeyos napei nguna, kotere akipeyos a akisech ka na inomio ta na ngalemet ka akimiet.” Ebala Ekapolon lo erai Ekapolon Akuj kona, “Egolio ekidor lo a alaar ana alotooma lo ingoliarit kide a ngirwa alukan-kapei alu esubere etich, nakaneni engaario akolongit na Sabato ta akolongit na eanyungarere elap. Elomuni ekapolon a akwap analaar ana anikalapatan toloma namaniyat naapolon na eyei lokidor sodi towo anakito a ekidor esaa lo ipeyooto ngimurok ngakipeyos keng na inomio ka na akisech. Ilipi ngesi Akuj kaneni alokidor dio topudo nikalapatan nabo. Imiekinio ekidor engaara tanang ebong. Ejoikinit ngitunga daang a akwap ilipete Ekapolon Akuj alongaren ekidor akolongit daang na Sabato ka na eanyungarere elap. “Akolongit na Sabato, eyauni ekapolon a akwap ngimesekin luuchik ngikan-kapei ka emesek epei lu emam ni ichwangakina toliworos ngakipeyos na inomio. Iturukuuni ngesi emesek ka ngakipeyos a ngalemet ngalitae ngatomon ka ngakan-kaarei ta anus, dio kituruku ngimesekin luuchik ka ibore nicha esaki ngesi. Ejoikinit ngesi iturukuuni akipeyos a ngalemet cha daang ka akimiet ngalitae ngauni. Akolongit na eanyungarere elap, ipeyoe ngesi emong losorokit lo emam ni ichwangakina ka ngimesekin luuchik ngikan-kapei ta emesek lo emam ni ichwangakina. Iturukuuni ngesi emong ka emesek daang, kituruku ka ngakipeyos a ngalemet ngalitae ngatomon ka ngakan-kaarei ta anus, dio kituruku imesek niichi daang ka ngakipeyos nacha esaki ngesi alemun. Ejoikinit ngesi iturukuuni ngakipeyos a ngalemet daang ka akimiet ngalitae ngauni. Epudori ekapolon nikalapatan kitor lorot losek alomunea. “Naeponeta ngitunga a akwap akilip Ekapolon Akuj alosukukui cha kadaang, ngini elomuni alokidor alo alokwap, itori lo alokuju epudori. Ani ngini elomuni alokidor alo alokuju, itori lo alokwap epudori. Emam itwaan epudori alokidor alosek alomunea pearai idiri jik ngaren. Na elomareta kesi tooma, tolomasi ka ekapolon, ani epudorete kirukosi ka ekapolon. Ngirwa lua ngisukukui ka ngirwa lu erekinitae, eliworosi ngakipeyos a ngalemet ngalitae ngatomon ka ngakan-kaarei ta anus na iturukuunio ka emong kori emesek ka ngakipeyos cha daang na esaki itwaan akiturukuunio imesek. Ejoikinit ngakipeyos na ngalemet nguna iturukuunio ka akimiet ngalitae ngauni. “Naesakea ekapolon a akwap alemikin Ekapolon Akuj akipeyos na esaki ngesi ilope alemun, kerai akipeyos na inomio nginerin daang kori na ekisil, engakinio ngesi ekidor lo alokide alaar na alotooma. Ipeyoe ngesi akipeyos ngina loger lo ipeyoeneo akolongit na Sabato sodi togoloi ekidor epudori ngesi nikalapatan.” “Akolongit daang nataparach, ipeyokinio Ekapolon Akuj imesek nia ekaru a epei ni emam ni ichwangakina toliwor akipeyos na inomio nginerin daang. Ipeyeo akipeyos ngina akolongit daang. Iturukoorio ka ngakipeyos a ngalemet na eraakasi ngakiloi ngaarei a ngakiria ta akimiet alita apei na imorikinio ka ngakiria. Eliwor etal a ngakipeyos kanu ekajik. Imesek, ka ngakiria ta akimiet, ipeyonokinio Ekapolon Akuj ataparach daang jik.” Edungunit Ekapolon lo erai Ekapolon Akuj ebala, “Ani ketiakaki ekapolon a akwap lokookeng epei ngalup na eraakasi ngakeng erai ainakinet, eliworosi ngalup nguna kesi irumit edia ngolo anawi. Nakaneni ani ketiakaki ekapolon epei a ngikasubak etich keng ngalup na eraakasi ngakeng erai ainakinet, ebuario toliworos ngaka ekapolon na enangea ekaru lo ebuanarere. Erai ngalup ngaka ekapolon. Talokookeng make epedorete akirum jik. Nyejoikinit ekapolon a akwap edemari ngitunga ngiboro kech. Ngalup na etiakakini ngesi talokookeng kesi nakeng a ilope, sodi nyeeboliar ngesi ngitunga kang todemana ngalup.” Ani erumor katoriko itwaan ngini ayong namaniyae na ingoliarito kwap diyete ekidor lo alokuju alaar na alotooma. Eraakasi nguna ngamaniyae a ngimurok na italeuno. Katodod ngesi ayong wache alotoo ngamaniyae dio katolimok tama, “Nege ngesi esakitere ngimurok itukulaunete akiring na ipeyeo erai ngakipeyos a akisech kori na atachanot, nabo kitaatana ngamugati, sodi nyiipudorere ibore ni italeuno cha daang namaniyat na anikalapatan towan ngitunga.” Ani erumor katoriko ngesi ayong nalaar na anikalapatan kedodik ngiwaitin luomwon a alaar, ayakasi ngalaarin lowaitin luomwon. Ayakasi ngilaarin luuchik lowaitin luomwon a alaar, arai aoyau a apei ngamitae ngatomwon-arei tarai abalanyany ngamitae ngatomon ka ngakan. Ayakasi daang ngawasea na adukitoe a ngamoru eriamito toyakas ngikenoi lu adukitoe nawas. Katolimok itwaan ngini ayong tama, “Ngikenoi lugu itukulaunieta ngikasubak etich a akai a Akuj ngakipeyos a ngitunga.” Katobua itwaan ngini ayong lokidor a akai a Akuj. Aleleunito ngakipi alokwap ekidor eloose kide lowae lo engoliarit akai a Akuj. Aleleunito alokwap ewae lo alokuju akai a Akuj, kiporosi kuju ekeno a ngakipeyos. Katoriko ngesi ayong nikalapatan kesitor lokidor loa lokwap kesirimo nikalapatan lokidor lo anikalapatan lo ingoliarit kide. Aleleunito ngakipi alowae alo alokwap ekidor. Tolem itwaan ngini akitoe keng nakitemiet kitem ngamitae ngamiae ngakan kiwapak ingolol tolot kide katolimok ayong atamar ekek ngakipi, tananga ngakipi lotobolae kang. Sodi kitem ngesi ngamitae ngache ngamiae ngakan tanangut ngakipi nakungin kang. Kitem nabo ngamitae ngache ngamiae ngakan, tanangut ngakipi naabor kang. Kitem nabo ngamitae ngache ngamiae ngakan, totulukuko ngakipi kepiyo ayong akikekin. Totulukuk noi toliwor mati kilulumaar ekwakaye. Katolimok ngesi ayong tama, “Itwaan, ingolik nugu a?” Ani erumor katoriko ngesi ayong lokeli a angolol. Ani anangi ayong neni, engolik ngikito lukaalak alokelio kadaang. Katolimok ngesi ayong tama, “Elelearito ngakipi lowae lo alokide kitoro nadipo a Yorudan tolomasi nanam a Amakat. Na enangeta nakipi nakaabarak a anam, tolilimiketo. Nicha elelearete ngakipi, pena ngitieng ngikitetio daang ka ngikolea. Itililimi angolol ngina ngakipi a anam Katoan. Nicha elelearete toyar ibore daang. Napei aloleleae a Engedi tanang lolelea a Eneglaim, epete ngikechiemak lokwaas a anam. Elokinete kesi ngipuutei kech tooko. Elalakearosi ngikolea kaneni totiata lua anam a Mediterenian. Nakaneni ngakipi na ngayengiyengea ka ngataparin alokwaas a anam, nyitililimio. Kesi eliworosi edupuor a amakat. Erupunete ngikitetio daang a ngikito alokelio ka ngikwaasea a angolol. Nyeokete ngakui kech kori nyengopi ageor pearai ekoniunete ageor nakaabon elap daang kainyo eponito ngakipi kech alokai a Akuj. Eliwor ageor kech akimuj, toliwor ngakui ngakitedeket.” Tolim Ekapolon lo erai Ekapolon Akuj tama, “Lugu kesi eraakasi ngikukuorin a akwap ana etiakakinio ngitela lutomon ka ngiarei a Isirael. Etiakakinio ekitela a Yosep ngiwaitin ngiarei. Totiaka eriyan. Ekongokini kolong ayong taapaakus atamar ainakini kesi akwap toliwor akech. “Alowae alo alokwap eteni ekukuor kide napei ananam a Mediterenian tanang lore a Esilon, tanang napak a Amas, tanang lore a Sedad tanang lorerea a Berosa ka Sibiraim (eyakasi kiding akwap a Damasko ka Amas), tanang lore a Tikon (lo eyei lokukuoru a akwap a Auran). Isiakini ekukuor lo alokwap napei alo Mediterenian tanang lore a Enon, totiaka ngakwapea a Damasko ka Amas alokwap. “Isiakini ekukuor lo alokide alokuju, alokiding Damasko ka Auran, totiak angolol a Yorudan Isirael alotoo ka Gilead alokide, toeka tanang Tamar ananam a Amakat. “Isiakini ekukuor lo alokuju alokwap too, napei alo Tamar tanang lochwae a Kadech ka Meriba, toten kwap too kiwap ekukuor a Misiri ananam a Mediterenian. “Anam a Mediterenian ngesi erai ekukuor alotoo, toten kwap tanang napak a Amas. “Tokorakisi akwap naga ngitela kus. Eliwor akus jik. Ngitunga a akwap anache lu elomito kiding kus tourito ngide kane, etiakakinio kesi dang akwap. Itusubunio kesi Ngisirael nabo eramete kesi dang ekura aapei ka ngitela a Isirael, na etiakere akwap. Itwaan a akwap anache dang, etiakakinio akwap alokiding ekitela lo elomit ngesi. Alimu ayong Ekapolon lo arai Ekapolon Akuj.” Atiakio akwap loger logo itemem ka ngitela. Isiakini ekukuor lo alokwap napei ananam itorit Esilon tanang ni elomarere Amas, toeka tanang lore a Eron (lo eyei lokukuoru a Damasko alokwap ekienyikina ka Amas), napei alokide tanang too, eliwor ewae ngolo eka ekitela a Dan. Ewae lo etupit ngolo eliwor eka ekitela a Acher, napei alokide tanang too. Ewae lo etupit ngolo eliwor eka ekitela a Naputali, napei alokide tanang too. Ewae lo etupit ngolo eliwor eka ekitela a Manase, napei alokide tanang too. Ewae lo etupit ngolo eliwor eka ekitela a Epiraim, napei alokide tanang too. Ewae lo etupit ngolo eliwor eka ekitela a Reuben, napei alokide tanang too. Ewae lo etupit ngolo eliwor eka ekitela a Yuda, napei alokide tanang too. Ewae lo etupit ni atiakakinio ekitela a Yuda, itegeliario. Eliwor abalanyany keng ngakilomitae ngatomon ka ngaarei ta anus napei alokwap tanang kuju. Eriyan aoyau keng na alokide tanang too ka aoyau a ngiwaitin alu atiakakinio ngitela luche. Akai a Akuj ngesi edukokinio lowae lo itegeliaritae ngolo. Kiding ewae lo itegeliaritae ngolo, lo arai ngakilomitae ngatomon ka ngaarei ta anus tarai ewae loche ngakilomitae ngatomon, italeunio toliwor eka Ekapolon Akuj. Etiakakinio ngimurok epewae a ewae alo italeuno kangolo. Napei alokide tanang too, eliwor ewae kech ngakilomitae ngatomon ka ngaarei ta anus. Ani napei alokwap tanang kuju, eliwor ngakilomitae ngakan. Edukokinio akai a Ekapolon Akuj kiding ewae ngolo. Eliwor ewae ngolo eka ngimurok alu italeunitoe alu eraakasi ngalesea a Sadok, alu kolong asubete etich kang emunosi. Nyiwapa kesi ngakiro a Ngisirael aluche na asecheta loger a Ngilawi. Etiakakinio kesi ewae lo itegeliaritae lo ibakito ka Ngilawi, eliwor neni ni italeuno akidwang daang. Etiakakinio Ngilawi ewae lo itegeliaritae alokuju ewae lo echikakinitae ngimurok. Eliwor ngakilomitae ngatomon ka ngaarei ta anus, napei alokide tanang too. Toliwor ngakilomitae ngakan napei alokwap tanang kuju. Ewae lo itegeliaritae kotere Ekapolon Akuj ngesi ejok noi akidwang daang. Emam ewae ngolo lo epedorio agielar kori akilokony kori ainakin itwaan iche. Italeuno ewae ngolo nabo erai eka Ekapolon Akuj. Ewae lo itegeliaritae lo ideuna, lo erai ngakilomitae ngatomon ka ngaarei ta anus tarai ewae loche ngakilomitae ngaarei ka anus, nyitaleuno. Epedorete ngitunga akitiliwor neni ngirerea ka ngawiyei ta ngaroatin. Emini ere kiding neni. Eriyanete ngiwaitin a ere kangolo daang eliworosi ngamitae ngabunge ngaarei ka ngamiae ngaarei ta ngatomwon-kan. Epete ngaroatin lowaitin daang a ere na eraakasi abalanyany ngamitae amiat apei ka ngatomwon-arei ka ngakan. Ewae lo ideun arumoret a akiduk ere alokuju ewae lo italeuno, lo erai ngakilomitae ngakan tarai ewae loche ngakilomitae ngaarei ka anus alokide, tarai nabo alotoo ngakilomitae ngakan, ani ewae loche ngakilomitae ngaarei ka anus, ewae ngolo eliwor ngamanat a ngitunga alu elomito lore. Ngitunga daang lu esubete etich alore lua ngitela a Isirael daang, itaate ngalup nguna. Etiae ani etemio alokiding ewae lo etegeliaritae, ariyan ka ngiwaitin daang araakasi ngakilomitae ngatomon ka ngaarei ta anus imorikinitae ka ewae lo eyei ere. Ewae lo idongit alowaitin kadaang alu italeuno ka lua ere, lo eriyan ngiwaitin daang eraakasi ngakilomitae ngatomon ka ngaarei ta anus napei alokide tanang too, ekienyikina ka ngiwaitin lu atiakakinio ngitela, eliwor ewae ngolo eka ekapolon a akwap. Ewae lo italeuno lo edukitoe akai a Akuj kiding, ka ewae lo a Ngilawi ta ewae lo a ere, epete kiding ewae lo a ekapolon a akwap. Ani ewae lo a ekapolon a akwap emini kiding ewae lo a ekitela a Yuda ka ekitela a Benjamen. Ani ngitela luche lu idongito napei alokide tanang too, eliwor ewae ngolo eka ekitela a Benjamen. Ewae lo etupit ngolo eliwor eka ekitela a Simeon, napei alokide tanang too. Ewae lo etupit ngolo eliwor eka ekitela a Isakar, napei alokide tanang too. Ewae lo etupit ngolo eliwor eka ekitela a Sebulun, napei alokide tanang too. Ewae lo etupit ngolo eliwor eka ekitela a Gad, napei alokide tanang too. Ewae lo etupit Gad alokuju isiakini ekukuor alokuju too napei alo Tamar tanang lochwae a Kadech, napei alokwap too kiwapak ekukuor a Misiri tanang nanam a Mediterenian. Tolim Ekapolon lo erai Ekapolon Akuj tama, “Eger ngolo ngesi etiakakinere ngitela a Isirael akwap na elemarete.” Ngidorin a Yerusalem lugu: Alowae alo alokwap eliwor aoyau a awas ngamitae ngabunge ngaarei ka ngamiae ngaarei ta ngatomwon-kan. Ewae lo alokwap ngolo epete ngidorin nguuni lu eraakasi ekidor a Reuben, ka lo a Yuda ta lo a Lawi. Eliwor aoyau a awas ana alokide ngamitae ngabunge ngaarei ka ngamiae ngaarei ta ngatomwon-kan. Epete ngidorin nguuni lowae ngolo lu eraakasi ekidor a Yosep ka loa Benjamen ta lo a Dan. Eliwor aoyau a awas a ewae alokwap ngamitae ngabunge ngaarei ka ngamiae ngaarei ta ngatomwon-kan. Epete ngidorin nguuni lowae ngolo lu eraakasi ekidor a Simeon, ka loa Isakar ta lo a Sebulun. Eliwor aoyau a awas ana alotoo ngamitae ngabunge ngaarei ka ngamiae ngaarei ta ngatomwon-kan. Epete ngidorin nguuni lowae ngolo lu eraakasi ekidor a Gad, ka lo a Acher ta lo a Naputali. Erai aoyau daang a awas alowaitin aluomwon a ere, erai ngamitae ngabunge ngakan-koomwon. Enyarao ekiro a ere napei tokona jik “Eyei Ekapolon Akuj nege.” Ekaru lo a nguuni lo araakar Yeoyakim ekapolon a Yuda, abu ekapolon a Babilon lo anyaritae Nebukadinesa tangaa ngajorei Yerusalem, sodi kisiriam. Abu Ekapolon kiwaak Yeoyakim lo arai ekapolon a Yuda nakan a Nebukadinesa. Tolema Nebukadinesa tani ngiboro ngiche a akai a Akuj yaa kai a akuj keng, kiwaak ngiboro ngulu lodulae a akuj keng. Abu ekapolon todungok Achipenas lo arai ekapolon a ngikasubak etich atamar toriku Ngisirael epewae lu eraakasi ngika a awi a ekapolon, ka ngikajakaanak. Ngisorok lu emam ni esechech, lukebuseak, lu echwaaka anakiro kadaang, lu eosok, lu isomato, toyenete akisub etich alokai a ekapolon. Tolimok ekapolon Achipenas atamar kitatam kesi akisomare ngakiro ka akiruor angajep a Ngibabiloniae. Todung ekapolon atamar kisumujai kesi akimuj a awi keng, ka akitamat emuna. Asakio kesi kitatamae a ngikaru a nguuni, ani adaunet a ngikaru kangulu, tosuba etich a ekapolon. Ayakasi tani Daniel, ka Anania, ka Mikael ta Asaria lua ekitela a Yuda tooma lotunga lu etatamio ngulu. Abu ekapolon a ngikasubak etich tolimok kesi ngirora. Daniel tanyarae Belitechasa, Anania tanyarae Chadrak, Mikael tanyarae Mechak, ani Asaria tanyarae Abedinego. Nakaneni totiaku Daniel atamar nyenyasun kotere akinyam akimuj a ekapolon, ka akimat emuna lo emaseene ngesi. Abu ngesi tolimok ekapolon a ngikasubak etich ngolo atamar kepaka ngesi anakimuj nyeenyasunor. Abu Akuj kitojok etau a ekapolon kangolo tacham Daniel, kidodiu ngisien ani a Daniel. Tolimok ekapolon ngolo Daniel tama, “Aemit ayong kainyo epedori ekapolon kang lokolong alimuni atamar kiinakin esi akimuj ka emuna keng, aanyungar esi kikarit akidwang ngisorok luche lua anaket kus. Ani kikok neni, emam ibore iratakini ekapolon atubor akou kang.” Sodi tolimok Daniel itwaan ni erumunit ekapolon a ngikasubak etich aweikin Daniel, ka Anania, ka Mikael ta Asaria tama, “Kiningoe kare mono sua ngikasubak etich kon a ngirwa a ngitomon, kiinak ngimomwa atanyama ka ngakipi atamata. Ani erumor kiseme ngireetin kosi alongaren kon, ka ngireetin a ngisorok alu enyamete akimuj naajokon a ekapolon, sodi kitosubakinea sua ngikasubak etich kon ngakiro nakisubakinea, itemem ka nguna ianyungari.” Abu ngesi kiira ngakiro nakech nguna, sodi kining kesi a ngirwa a ngitomon. Adaunet a ngirwa a ngitomon, akilikilete ngawat kech noi, totumito akidwang ngisorok lu anyamete akimuj a ekapolon. Tachada ekaweikinan ngolo akimuj a ekapolon ka emuna lo asakio kesi tamata, nak kesi ngimomwa make. Ani ngisorok luomwon ngulu, kitoosu Akuj kesi noi anakisomare ka achwaanu. Toyen Daniel eger a ngakisingolikinet kadaang, ka akirujare. Ani adaunet a ngirwa alu kolong adungunit ekapolon atamar torikunere kesi ngaren keng, apon torikoroe kesi nia ekapolon Nebukadinesa. Kisiruor ekapolon kesi. Alosorok kangulu kadaang, amam ngiche nabo lu ekote Daniel, ka Anania, ka Mikael ta Asaria. Kanguna, tosuba kesi etich a ekapolon. Anakiroit kadaang a aosou ka achwaanu ana engisi ekapolon kesi, torukau kesi eosok noi idwangito ngikekeriak ka ngimurok a akwap ana apolokinit ngesi, ngakidwanget ngatomon. Torubak Daniel eyei neni tanang ekaru lo ekingaren a ekapolon Korech. Ekaru lo a ngiarei araakar Nebukadinesa ekapolon, abu ngesi kiruja. Kichanakin etau keng, kikoler ngesi. Todung ekapolon atamar tanyaraunae ngikekeriak, ka ngimurok, ka ngikasubak ta ngikelamalamak a akwap a Babilon, tolimokis ngesi atamar anukiro erujaunit ngesi. Pot kesi towaa alongaren ekapolon. Tolimok ekapolon kesi tama, “Erujae ayong, nabo echanakin etau kang esaki akiyen eger a ngakiro ana erujae ayong.” Apot kesi tatachakis ekapolon a Ngaramaik tamasi, “Ee ekapolon, ekapolon toyei jik! Tolimokinae sua ngakiro na irujae iyong, esisakisi sua iyong eger kech.” Tolimok ekapolon kesi tama, “Atiaku ayong atamar kitolimokis esi ayong ngakiro na erujae ka eger kech. Ani pekilimokis, enyilinyilaario nginerin a ngawat kus, toliworos ngawiyei kus asakatan. Ani kilimokis esi ayong ngakiro na erujae ka eger kech, kainakini ayong esi ngainakinet, kainak arimatoi naapolon. Tokona bocha, tolimokinae ayong atamar anukiro erujae ayong, ka eger kech.” Tatachakis nabo kesi ekapolon tamasi, “Kimiek ekapolon kitolimok sua ngikasubak etich keng ngakiro na erujae, esisakisi sua ngesi eger kech.” Sodi tolim ekapolon tama, “Iteni dir, ayeni ayong atamar isakete esi atinenikin nikooyen, kainyo iyenete esi atamar asubakini ayong ngakiro na alimu, atamar ani pekilimokis esi ayong eger a ngakiro ana erujae, eyei esi eriras epei bon lo kerirae ayong esi. Ichamakinosi esi akingalare ayong ka akiruor alioko alongaren kang, isakete atamar minio ngakiro kona ilochotor. Tolimokinae tokona ayong atamar anukiro erujae ayong, atoyenea atamar ipedorete esi alimokin ayong eger a ngakiro kanguna.” Tatachakis ngikoosok a akwap keng ngesi tamasi, “Emam itwaan anakwap ni kilimokini iyong ekapolon lo kirimae ngakiro na isaki iyong akiyen. Emam ekapolon, tani kerai lo epolot noi, tojwono, lo asak akiyen akiroit na ikoni naga alomurok, ka ngikekeriak, ka ngikelamalamak ta ngikapilak. Ibore ni isaki iyong ekapolon lo kirimae, etiono noi emam itwaan kisubakinea iyong. Ngaye robo kerai ngakujo epedorete asubakin ngakiro na ikote nguna. Nakaneni nyirukeenete robo ngakujo ka ngitunga.” Kotere nguna, tongo ekapolon lokojokon noi, todung atamar tamunyarae ngikoosok daang alo Babilon. Apon todungunoe atamar taarae kesi daang aapei ka ta Daniel ka ngipaalon keng. Abu Daniel tolot nia Ariok, alo arai ekarikon a ngasigerea ana eteete ekapolon. Ariok sek alimokinitae atamar taar ngikoosok a Babilon. Kingit Daniel Ariok ngakiro a achwaanu toosokinite tama, “Nyo edungunitor ekapolon ngakiro a amoitanut kona?” Sodi Ariok kisisak Daniel ngakiro nguna. Tolot Daniel atipei nia ekapolon alimokin atamar kidarunae mono, taanyunea ngesi erot lo isisaunea eger a ngakiro ana erujae ekapolon. Tolot Daniel nawi tolimok ngipaalon keng Anania, ka Mikael ta Asaria ngakiro na asubakin. Tolimok Daniel kesi atamar kilipa Akuj na adis kidodiu ngisien, ka alimokin Akuj atamar kiwolu ngakiro namunonoe nguna, sodi nyear kesi aapei ka ngikoosok luche a Babilon. Apon ngakiro namunonoe nguna kiwolokinoe Daniel anakisingolikinet nakwaare. Sodi kipuruu Daniel Akuj na adis. Tama Daniel, “Kipuroe ekiro a Akuj jik ka nabo jik, na erai aosou ka agogongu akeng. Epolokinit ngesi ngirwa ka ngikaru. Itiliwori ngesi itwaan ekapolon, ka alemar niche anapolou. Einanakini lukoosok aosou, nak lukachwaak achwaanu. Iwoluni ngesi ngakiro na erapap namunonoe. Eyeni ngakiro na erapitae anaribu, ibooyete ngesi ka akicha. Kepuruunit ayong iyong, katorima, Akuj kata apaakang. Kitaanyu iyong ayong aosou ka agogongu. Kidodik iyong ayong ngakiro na kisaki sua anikon, kainyo kiteyen iyong sua akiroit a ekapolon.” Tolot Daniel nia Ariok, losek adungokinit ekapolon atamar taar ngikoosok a Babilon. Tolimok tama, “Nyiar ngikoosok a Babilon. Torikoroe ayong nia ekapolon, atolimok ngesi eger a ngakiro ana erujae ngesi.” Atipei toriku Ariok Daniel nia ekapolon Nebukadinesa tolimok ekapolon tama, “Aanyu ayong epei a ngirikon alu eraakasi Ngisirael, lo kilimokini iyong ekapolon lo kirimae, eger a ngakiro ana irujae iyong.” Tolimok ekapolon Daniel (lo enyaritae a echekiro Belitechasa) tama, “Ipedori iyong alimokin ayong ngakiro na erujae ayong ka eger kech a?” Tatachak Daniel tama, “Ekapolon lo kirimae, emam ekooson, kori ekadwaran, kori ekekerian, kori emuron, kori ekesoman ngikanyer lo kilimokini iyong nguna. Nakaneni eyei Akuj nadis na iwoluni ngamunonoe. Kitaanyu ngesi iyong, ekapolon lo kirimae ngakiro na monan esubakinosi. Kalimokini tokona ayong iyong ngakiro na irujae, ngakiro nakisingolikinio iyong ijotoe. “Naijotoo iyong ekapolon lo kirimae, ibu kiruja ngakiro na monan epote. Akuj ngina iwoluni ngamunonoe, abu kidodik iyong ngakiro na monan esubakinosi! Ani eliwor ayong, pekewolokinio ngamunonoe nugu ani aosio noi akidwang ngitunga luche lu eyarete. Erai kewolokinere, toyenea iyong ekapolon lo kirimae eger a ngakiro ana irujae, ka ngitamen kon. “Ekapolon lo kirimae, anakisingolikinet kon, ibu iyong taanyunga ekisikwaane loapolon noi ewei, achai tamalimali, kitubuli na ingolikinea. Akou keng, arai egolit loasegan. Erarum keng ka ngakan, arai akwangat. Aabor keng ka ngikalokoi, arai asuat nanyang. Ngakejen keng arai asuat nakirion, ani ngakichieket keng, araakasi epewae asuat nakirion, taraakas epewae echoto. Ani eringa iyong ikienyikinit kimasun amoru natiapolon bon anakope. Kitel amoru ngina asuat nakirion ka echoto anakichieket a akisikwaanet, tobwang kiela. Atipei abu asuat nakirion, ka echoto, ka asuat nanyang, ka akwangat ta egolit kialaros kikokis ngatunyeny anakirias ngirwa lu elemere ngamanat. Tokuta ekuwam nyiidong tani wadiochichi. Ani amoru na anangi akisikwaanet, toliwor emoru lotiapolon kilelebun akwap wadaang. “Ngakiro na irujae iyong nguna. Kalimokini tokona ayong iyong ekapolon lo kirimae eger a ngakiro kanguna. Ekapolon lo kirimae, irai iyong ekapolon lo ipolot noi alokapolok kadaang. Kitiliwo iyong Akuj a adis ekapolon, kitaanyu apolou, ka ationis ta arimatoi. Kitiliwo ngesi iyong ekapolon a ngitunga kadaang, ka ngitieng daang ta ngikieny. Iyong irai akou a egolit. Ekisidi kon, emini apolou ache na nyepolot loger anakon. Ani adaunet kangina, emini na ngauni na erai apolou a asuat ananyang, na epolokini akwap daang. Ani erumor emini apolou na ngoomwon na egogong ikoni asuat nakirion. Ani kona palem ebwangabwangaa asuat nakirion ibore daang, ebwangabwangaari ngesi ka akiriedakin ngapolosio na ingarenete. Ibu iyong kingolik ngakichieket ka ngimoyo a ngakejen eraakasi epewae echoto, taraakas epewae asuat nakirion. Idodiunit ibore ngini atamar eliwor apolou ngina na etiakak ngaarei, egogonger epewae kikok asuat nakirion, loger losek ingolikinea iyong asuat nakirion imorikina ka echoto. Ani kona araakatar ngimoyo lua ngakejen epewae asuat nakirion taraakas epewae echoto, idodiunit neni atamar egogonger apolou epewae, tapalagag epewae. Ibu nabo iyong kingolik asuat nakirion imorikina ka echoto. Idodiunit ibore ngini atamar ngikapolok a apolou kangina, etamarete emorikisi ngitunga a ngawiyei kech kotere akiutanakin, nakaneni nyepedorete asuat nakirion akimorikin ka echoto. Ngirwa lua ngikapolok kangulu, itowei Akuj a adis apolou na nyinyasunio kori na nyirumete ngitunga ngiche. Ebwangabwangaari ngesi ngapolosio nguna daang kiela, tasalut, kidong ngesi eyei jik. Ibu iyong kingolik eger lo achakunor amoru bon anakope, kitel akisikwaanet na asubunitae a asuat anakirion ka nanyang, ka echoto, ka akwangat ta egolit. Kilimokinit iyong Akuj naapolon ngakiro na esubakinosi monan. Kesisak ayong iyong iyookino, ngakiro na irujae ka eger kech lo erai eka iteni.” Toriedik Nebukadinesa tatap ereet ngalup, sodi todung atamar kipeyoe ngakipeyos ka alemun ngalemunet kotere Daniel. Tolim ekapolon tama, “Iteni dir, Akuj kon erai Akuj a ngakujo, nabo erai Ekapolon a ngikapolok, tarai akewolunon a ngamunonoe, kainyo ipedo iyong akiwolun akiroit namunono naga.” Abu ekapolon kitiliwo Daniel ekarikon, nak ngainakinet nakaalak noi naajokak, kitiliwo ngesi ekarikon a ewae alo anyaritae Babilon, ka akitiliwor ngesi ekaweikinan a ngikoosok kadaang alu a awi a ekapolon. Kona alimokinea Daniel ekapolon ngakiro a Chadrak, ka Mechak ta Abedinego, abu ekapolon toseu kesi toweikis ngakiro a ewae alo anyaritae Babilon. Kidong Daniel ibooyi anawi a ekapolon. Tosubak ekapolon Nebukadinesa ekisikwaane a egolit. Arai aoyau keng ngamitae ngatomwon-arei ka ngakan-kaarei, tarai alangirir ngamitae ngauni. Kitowae ngesi anaro a Dura alowae alo anyaritae Babilon. Sodi todung ekapolon atamar tochunun ngikapolok luuchik a arieng keng daang wapei, lu araakasi ngikaweikinak, ka ngikapolok a ngiwaitin a akwap, ka lu etupito kesi, ka ngikarikok, ka ngikekachak ngaropiyae, ngiketiriyanak ngakiro, ngikatubok ngakiro ta ngikapolok luche daang a akwap. Asakitae kesi pena ni etaleunere akisikwaanet na asubuni ekapolon Nebukadinesa. Na achununotor ngitunga ngulu daang towaa alongaren akisikwaanet na aponitae akitaleun ngina, abu ekaraman elii kirema tama, “Kidungokinitae esi, ee ngitela, ka ngibukui ta ngitunga a ngangajepa a nagelagelae, atamar na iirarea iyong eruye a aburuch, totupuu eruye a ebune, ka ngiburin, ka agita, ta ibore cha daang nikaruon, napei cha isiakinea eruye, ejoikinit esi iriedikete kilipa ekisikwaane a egolit lo etowei ekapolon Nebukadinesa. Itwaan cha daang ni nyeriediki kilip, echakakinio atipei nadui nakariran.” Napei eirareta ngitunga eruye a ngiboro kangulu, apot ngitunga a ngibukui, ka ngitela ka ngitunga a ngangajepa a nagelagelae toriediko kilipa ekisikwaane a egolit lo etoweit ekapolon Nebukadinesa. Esaa ngolo apot Ngibabiloniae ngiche taanyut alolomu na itoroneta Ngisirael ngulu. Tolimokis Ngibabiloniae ekapolon tamasi, “Ekapolon lo erimae toyei jik! Idung iyong ekapolon lo kirimae atamar napei isiakinea eruye, ejoikinit itwaan daang eriediki kilip ekisikwaane a egolit, ani itwaan cha daang ni ewouni ariedik kilip, echakakinio nadui na erirae. Eyakasi Ngisirael ngiche lukolong iseuni iyong topolokis ewae a Babilon. Ngisirael ngulu kesi Chadrak, ka Mechak ta Abedinego. Nyiwapito kesi ngakiro na idunguni iyong, ekapolon lo kirimae. Nyilipito kesi ngakujo kon, kori nyeriedikete kilipa ekisikwaane lo itowei iyong.” Esaa ngolo, tongo ekapolon lokojokon, todung atamar torikunoe ngikiliok luuni ngulu nikeng. Kingit kesi tama, “Chadrak, Mechak, Abedinego, erai mono iteni dir iwounito esi akilip ngakujo kang ka ariedik kilipa ekisikwaane a egolit lo etowo ayong a? Tokona bocha, napei iirareta esi eruye a aburuch, ka ebune, ka ngiburin, ka agita, ta ibore cha daang nikaruon, toriediko kilipa ekisikwaane. Ani kemam kichakakinio esi atipei nadui nakariran. Esibit esi eyei akuj nakiyuuni esi anikang a?” Tatachut Chadrak ka Mechak ta Abedinego tamasi, “Ekapolon lo kirimae, emam ngakiro kipega sua. Ani kepedori Akuj nakilipit sua ayuun sua anadui anakariran ka agogongu kon, epedori ngesi. Nakaneni ani tani pekiyuu, toyen ekapolon lo kirimae atamar nyikilipi sua ngakujo kon, nabo nyikiriedikokini ekisikwaane a egolit lo itowei iyong.” Abu Nebukadinesa tongo lokojokon noi, tonyunyurikin Chadrak, ka Mechak ta Abedinego. Todungok ngesi ngitunga keng atamar kiatakis ngakito a akim ngakiatakinet ngakan-kaarei, torirau noi akidwang nipalem sek. Todungok ngesi ngitunga lukaagongok noi anasigerea keng atamar toena Chadrak, ka Mechak ta Abedinego, tachakakis nadui nakariran. Apon kesi toenae enapito ngiboro kech daang lu araakasi ngichatea, ka ngiworui lukooyak, ka ngapukoto ta ngiboro luche, tachakakinae kesi nadui nakariran. Ani kona adungunitor ekapolon atamar kinokakinae akim torirau noi, tonom asarae ngitunga lu achakakinete kesi nakim, taar. Todoto Chadrak ka Mechak ta Abedinego kiding akim nakariran eringa eenen. Abu Nebukadinesa toriangakin tonyou atipei. Kingit ngesi ngikapolok luuchik a arieng keng tama, “Ikwa meere ta ngitunga nguuni kieni ngoni atachakakisi nasarae a akim a?” Tatachut kesi tamasi, “Ee, iteni dir ekapolon lo kirimae.” Kingis ngesi tama, “Ani nyo eteo ayong ngitunga nguomwon eloose anakim? Nyeenen kesi nabo esibit nyewanan. Ani lo a nguomwon ikoni ikoku a ngakujo.” Abu Nebukadinesa kirudar diyete akituk a adui anakariran, tanyarai tama, “Chadrak! Mechak! Abedinego! Ngikasubak etich a Akuj ana Epol Noi! Topudutu, pot nege!” Apot Chadrak, ka Mechak ta Abedinego topudut anakim. Ngikaweikinak daang, ka ngikapolok a ngiwaitin a akwap, ka lu etupito kesi, ta ngikapolok luche a arieng, apot tochunun akingolikin ngitunga luuni ngulu, taanyungasi atamar nyetapa ngawat kech akim, nabo peaur apuru anikech. Tolim ekapolon tama, “Kipuroe Akuj a Chadrak, ka Mechak ta Abedinego! Ameuni ngesi emalaikat keng toyuu ngitunga lugu lu emunosi ngesi. Awounete kesi akiwap ngakiro na adungunit ayong, tajala akiyar kech, akidwang ariedik ka akilip akuj ache, pearai Akuj nakech bon. “Adungunit tokona ayong atamar ani keyei ebukut kori ekitela kori ngitunga a ngangajepa lu iruorosi imenyarito Akuj a Chadrak, ka Mechak ta Abedinego, enyilinyilaario nginerin kech, tarata ngawiyei kech asakatan. Emam akuj ache nakiyuuni loger logo.” Abu ekapolon kiatak apolou a Chadrak, ka Mechak ta Abedinego toliworos ngikapolok alowae alo anyaritae Babilon. Tomea ekapolon Nebukadinesa akituk naga nia ngibukui, ka ngitela ka ngitunga a ngangajepa a nagelagelae kadaang anakwap, ebala, “Maata! Topupokisi eger a ngakiro anakatalarak, ka ngakitoodikinet nakailiilok nakedodik ayong Akuj na Epol Noi. Epolok noi ngakiro nakatalarak na kidodeanakini Akuj ngoni! Etioko noi ngakitoodikinet nakailiilok na esubi ngesi! Erai apolou keng akajik. Erubi apolou keng analesea kadaang. “Ayong Nebukadinesa, ebooyi niajokon alokai kang, ajakaanit alokai kang ana ekapolon. Eruja ayong akirujare naketubuli. Ani ajotoe, engolik ngakisingolikinet naketubulete. Atodung ayong atamar torikunoe ngikoosok a Babilon daang nikang, kedodikis ayong eger a ngakiro ana erujae. Apon torikunoe ngikekeriak, ka ngimurok, ka ngikapilak, ka ngikesomak ngikanyer, atolimok kesi ngakiro na erujae, nakaneni tokuruwo kesi akisisakin ayong eger kech. Ani ekisidi tolom Daniel (ekiro keng eche ngesi Belitechasa, lo erai ekiro a akuj kang). Eyei etau a ngakujo ana italeuno nikeng, atolimok ayong ngesi ngakiro na erujae atama, ‘Ee Belitechasa, ekapolon a ngikekeriak, ayeni ayong atamar eyei etau a ngakujo ana italeuno nikon, nabo iyeni iyong ngakiro namunonoe daang. Akiroit na erujae ayong naga. Tolimokinae ayong eger keng ngesi nyo.’ “Ngakiro na erujae akou kang ajotoe ayong kesi nugu, na engoliarea ayong, engolik ekitoe lotikooyen noi eyei kiding akwap. Torup ekitoe ngolo talangirir, tanang alemu keng nadis, toliwor itwaan daang anakwap itee. Ebuseak ngakui keng, arait ageor egononoe, tooma keng ayei akimuj na itemokin ngitunga daang anakwap. Eanganarete ngitieng a moding alotorube keng, toduko ngikieny ngakais kech naten keng, sodi tadak ibore ni eyari daang ageor keng. “Ani eringa ayong etami ngakiro a akisingolikinet kangina, engolik ayong ngolo italeuno, lo itee akwap, ebuni anadis. Tolim irema tama, ‘Kitelo ekitoe, totubo ngaten keng. Tararaasi ngakui, kiealasi ageor. Kimiekisi ngitieng kipungaros alokwap keng, toporosi ngikieny anaten keng. Nakaneni kimiekisi atorom analup, ekodakina asuat nakirion ka nanyang. Kimiekisi eperete ka nginyia anaro. “ ‘Kimiekisi ngakop kitapapala itwaan ngini. Kimiekisi ngesi kiruko ka ngitieng alonyia. A ngikaru a ngikan-kaarei, kimiekisi ngitamen keng nyeerata lua itwaan, pearai tarata lua etiengit. Eraakasi nugu ngakiro na adungunete ngulu italeuno, lu iteete akwap. Tokona bocha, kimiekisi ngitunga awadaang toyena atamar Akuj na Epol Noi, eyei agogongu anapolosio kadaang a ngitunga, nabo ipotori ngapolosio nguna nak itwaan cha daang ni esaki ngesi, tani ngitunga lu nyeyenikinitae.’ “Ngakiro na erujae ayong nugu. Tokona bocha Belitechasa, tolimokinae ayong eger kech. Emam ngikoosok kang lu kalimokinete ayong, nakaneni ipedori iyong, kainyo eyei etau a ngakujo ana italeuno nikon.” Daniel lo anyaritae ekiro eche Belitechasa, abu toriangakin iirari ngakiro nguna, totinenik nyiruorikina. Tolimok ekapolon ngesi tama, “Belitechasa, wara ngakiro na erujae ayong ka eger kech nyikiteriangakis iyong.” Tatachak Belitechasa tama, “Ekapolon lo kirimae, arai bo tarai ngakiro na irujae iyong ka eger kech ngaka ngimoe kon dang, meere na eraakasi ngakon! Ibu iyong kingolik ekitoe lokooyen noi lolangir, enangito ngaten keng nakooyak nadis. Etee itwaan daang anakwap ekitoe ngolo. Ebuseak ngakui keng, nabo alal ageor keng noi etemokino akitan ngiborei daang. Eanganarete ngitieng a moding alotorube keng, toduko ngikieny ngakais kech naten keng. “Ekapolon lo kirimae, iyong ngesi ekitoe ngolo! Ipoloor iyong noi igogonger. Ipoloor iyong inangi nadis, ani apolou kon epetakin akwap wadaang. Ani erumor ibu iyong ekapolon kingolik ngolo itee akwap, ngolo italeuno, etiyaun anadis tama, ‘Kitelo ekitoe kinyasu, nakaneni kimiekisi atorom analup. Tokodakis asuat nakirion ka nanyang kiriam, kimiekis kaneni anaro ani eyakasi nginyia. Kimiekisi ngakop kitapapala itwaan ngini, nabo kimiekinae kiruko ka ngitieng a moding a ngikaru a ngikan-kaarei.’ “Ekapolon kang, eger robo a ngakiro ana irujae iyong ngesi logo. Ngakiro nguna adungu Akuj na Epol Noi atamar esubakinosi anikon. Kitwarakinio iyong alotunga, kiruko ka ngitieng a moding. Idaka iyong nginyia loger a emong, kitapapala ngakop akwaan kon. Iboikin iyong loger ngolo a ngikaru a ngikan-kaarei, ani adaunet a ngikaru kangulu, iyenuni iyong atamar Akuj na Epol Noi ngesi eyei agogongu anapolosio kadaang a ngitunga, nabo ipotori ngesi apolou nak itwaan cha daang ni esaki ngesi. Akiroit na adungunio atamar kimiekinae atorom ka ngaten keng analup, erai eger keng atamar kibuakinio iyong apolou kon na iyenea atamar Akuj na Epol Noi, ngesi bon epolokinit akwap daang. Kotere ngakiro nguna, ekapolon lo kirimae, kiira ngakiro nakalimokini. Toisik akisech kon ka aronis kon, tosub nguna eriyan ka akidodiun ngisien alotunga alu ichiakiaritae. Epedorio ngikaru kon lua ajako akitalal!” Apot nguna daang tosubakin ani a Nebukadinesa. Adaunet a ngilapio a ngitomon ka ngiarei, alosi ekapolon Nebukadinesa alokidiama akai keng alo Babilon, abu tama, “Kingolik mono cha iyong Babilon! Ere kang loapolon lokolong aduki ayong a ngikilinga kang, ka akibuseanu ta arimatoi.” Ani eringa ekapolon iruorikinit, totiyaun etoil anadis tama, “Ee ekapolon Nebukadinesa, kiira akiroit nakang naga. Alemar apolou anikon! Kitwarakinio iyong ani eyakasi ngitunga! Irukete iyong ka ngitieng a moding anachokor, tadak nginyia loger a emong! Iboikin iyong loger ngolo a ngikaru a ngikan-kaarei, ani adaunet a ngikaru kangulu toyen atamar Akuj na Epol Noi ngesi eyei agogongu anapolosio kadaang a ngitunga, nabo ipotori apolou nak itwaan cha daang ni esaki ngesi.” Apot ngakiro nguna kiyookinos atipei ani a Nebukadinesa. Kitwarakinae ngesi alotunga toliwor edak nginyia loger a emong. Kitapapala ngakop a adis akwaan keng, tooyaketa ngajul a akwaan keng tabata ngakopir a egole, ani ngimaagor tooyaketa tabata lua ngikieny. Tolim Nebukadinesa tama, “Ani adaunet a ngikaru alukan-kaarei kangulu, engolia ayong kidiama nadis, katobongok ayong aosou kang. Abu epuruu Akuj na Epol Noi, na idwangit ibore daang, ka akidodiun arimatoi ani eyei ngolo eyari nakajik. Epolokini ngesi jik, erubi apolou keng analesea kadaang. Itee ngesi ngitunga daang a akwap atamar eraakasi ngipasiek. Esubi ngesi na esaki aloborei alu a adis, ani alotunga alu eyakasi nakwap, emam ni epedori akitopeg ngesi, kori emam ni ingisi tama, ‘Nyo isubi iyong?’ “Ani napei kabongokinio ayong aosou kang, katobuakin tani arimatoi, ka aruonu ta akibuseanu a apolou. Kepeyout ayong ngikapolok a arieng kang ka ngikajakaanak. Apon katobuakin apolou kang, ataanyu arimatoi naajokon noi akidwang nakolong sek a ekingaren. “Tokona bocha, ayong Nebukadinesa, epuruunit ka akikut ta arima Ekapolon Akuj a adis. Iyookino ibore daang ni esubi ngesi, eriyan, nabo itiditeuni ngesi itwaan daang ni iwoga.” Akolongit apei abu ekapolon Belichasa kipeyou abunget apei a ngitunga alu araakasi ngikajakaanak nakimuj, nabo tamata ka ngesi emuna aapei. Ani eringa emaase, todung ekapolon Belichasa atamar tolemunae ngiboro lua egolit ka lukwangae, lukolong alemuni ekapolon Nebukadinesa lo arai apakeng alokai a Akuj alo Yerusalem. Tolim Belichasa atamar yaunae ngiboro ngulu tamaasa ngesi ka ngikapolok a arieng keng, ka ngaberu keng, ta ngapesur keng a ngabwes. Apon ngiboro lua egolit, ka akwangat ngulu yaunae atipei alokai a Akuj alo Yerusalem. Tamaasa ekapolon, ka ngikapolok a arieng keng, ka ngaberu keng, ta ngapesur keng a ngabwes. Tamata emuna ikusete ngakujo kech na asubunio alogolit, ka akwangat, ka ngasua nanyangayek, ka nakirionok, ka ngakito ta ngamoru. Nipei bore ngini, tatakanu akan a itwaan alosiep a akai igiri ngakiro losiep a akai a ekapolon, ni enwakunit akicha a ngakinwaket lokojokon. Kingolik ekapolon akan ngina igiri. Abu amuny a akwaan a ekapolon topuseania, toriangakin ngesi tolilimiyosi nginerin a akwaan keng sodi tamaranikis ngakungin. Kikalou ekapolon irema, tanyarau ngikekeriak, ka ngimurok ta ngikesomak ngikanyer. Ani epote, tolimok ekapolon ngikoosok lua Babilon ngulu tama, “Itwaan cha daang ni isomakini ngagiran nugu kesisak ayong eger kech, itanapio ngiworui lupusiek-arengak, toinikinae irikot a egolit lomosiring, ani erumor kitiliworoe ekapolon lo a nguuni anapolou.” Apon ngikoosok a ekapolon daang tanyaraunae, nakaneni tokuruwo kesi akisomare ngagiran nguna kori akisisakin ekapolon eger kech. Kotere ni abulitor, abu amuny a ekapolon Belichasa topuseania noi, kialolongo ngikapolok a arieng keng. Ani iirari itiokeng a Belichasa echale a ekapolon ka ngikapolok a arieng keng, toloma kai na emujere tama, “Ayoro ekapolon, agasi atamar toyei! Wara ngatameta kon nyikichan iyong, nabo wara akwaan nyeepuseania. Eyei itwaan napolou kon ni eyei etau a ngakujo ana italeuno. Ngirwa lu araakar apakon ekapolon, arai itwaan ngini nikebe a akou toos, tochwaana, loger a ngakujo. Apakon Nebukadinesa, aseunit ngesi topolok ngikekeriak, ka ngimurok, ka ngikapilak ta ngikesomak ngikanyer. Enyaritae itwaan ngini Daniel. Nakaneni elochit apakon ekiro keng anyarit Belitechasa. Erai ngesi itwaan niajokon a etau, eos, tochwaana anakitenun ngakiro na irujao, ka akisisaun ngakitadapet, ta angichun ngakiro nakaagongok. Kimiek ngesi tanyaraunae kedodik iyong eger a ngagiran kanguna.” Esaa ngolo, torikunoe Daniel ngaren ekapolon, kingit ekapolon ngesi tama, “Iyong kinyaritae Daniel, lo irai epei a ngirikon alu kolong arikuni apakang alo Yuda a? Eira ayong atamar eyei etau a ngakujo ana italeuno tooma kon, nabo ebeyo ekebe iyong akou, toos, tarai lo ichwaana noi. Ngikoosok ka ngimurok na arikunere nege esakio kisomata ka akisisaun eger a ngagiran kanu, apot tokuruwo. Abu eira atamar ipedori iyong akisisaun eger a ngakiro ka angichun ngakiro nakaagongok. Ani kisoma iyong ngagiran nugu tolim eger kech, kitanapio iyong ngiworui lupusiek-arengak a ekapolon, kitanap erikot a egolit alomosiring, nabo iliwor ekapolon lo a nguuni anapolou kana.” Tatachak Daniel Balichasa tama, “Toting ngakon inakinet kori kipoto ebachit kon nak itwaan iche. Tani ikoni neni ekapolon, kesomakini ayong iyong ngagiran nguna, ketenik eger kech. Ee ekapolon, Akuj na Epol Noi ngesi kolong etaanyuni apakon Nebukadinesa apolou, ka ekipur, ta akibuseanu. Kotere apolou na etaanyunio ngesi, apot ngitela daang, ka ngibukui ta ngitunga a ngangajepa a nagelagelae toema tamaranikis. Apedori Nebukadinesa akiar itwaan daang ni esaki ka akimiekin itwaan daang ni esaki akimiekin. Ani itwaan ni esaki akikeun, kitiliwo ngini ekapolon. Ani itwaan ni esaki ngesi atiyaun anapolou, totiyau. Nakaneni ani elomakini ngesi ekinis, kichananer toliwor iwoga, apon ngesi tolemarae alokicholong keng a apolou, ka ajakaanut keng. Kitwarakinae ngesi alotunga, kisikwaanae aosou keng ka na etiengit, kiruko ka ngisikiria a moding, toliwor edak nginyia loger a emong. Kitapapala ngakop a adis akwaan keng, tanang eyenuni atamar Akuj na Epol Noi ngesi epolokinit ngapolosio a ngitunga, nakaneni eseuni ngesi itwaan ni esaki ngesi, nak apolou. Ani iyong Belichasa, irai lokookeng, ibu nyiitiditeun tarai cha iyeni ngakiro nguna daang. Ibu iyong kitopen Ekapolon a adis, ani iyaunea ngiboro a akai a Akuj tamasea emuna, iyong aapei ka ngikapolok a arieng kon, ka ngaberu kon ta ngapesur kon a ngabwes. Nabo kipuruut esi ngakujo na esubunitae anakwangae, ka egolit, ka ngasua nanyangayek, ka nakirionok, ka ngakito ta ngamoru. Ngakujo na nyiteete, kori nyepupete, kori nyeyenete ibore. Ani Akuj na erai nakan keng eyei akianget kon, nabo nikeng eyakasi ngirotin kon daang, towou iyong akidodikin arimatoi! Ngakiro nguna ameunea Akuj akan akigir ngagiran nguna. “Ngagiran na egirio kesi nugu: MENE, MENE, TEKEL ka PERES. Eger a ngakiro kanguna ngesi logo: MENE ngesi atamar emarun. Emaru Akuj ngirwa a apolou kon etasalu. TEKEL ngesi atamar apotis. Kitem iyong anaratilio ayen atamar emam iyong apotis. PERES ngesi atamar akitiak. Atiakakin apolou kon Ngiamed ka Ngipersia.” Anipei kaneni, todung ekapolon Belichasa atamar kitanapae Daniel ngiworui lupusiek-arengak a ekapolon ka erikot a egolit alomosiring. Tolimunoe atamar eliwor Daniel ekapolon lo a nguuni anapolou. Nakwaare a akolongit kangina, taarae ekapolon a Babilonia lo anyaritae Belichasa. Abu ekapolon Dario lo arai Emedit tolema apolou, eraakasi ngikaru keng ngitomwon-kapei ka ngiarei. Totiaku ekapolon Dario atamar aseuni ngikapolok a ngiwaitin a akwap amiat apei ka ngitomwon-arei topolokis akwap keng. Toseu nabo ngikapolok ngiche nguuni, arai Daniel epei aluuni kangulu. Asakitae luuni ngulu topolokis ngikapolok a ngiwaitin a akwap nyeetoniarea ibore idio anakwap. Apon toyenae atipei atamar ejok Daniel noi akidwang ngikapolok luche daang, kainyo ayei etau loajokon nikeng. Tasak ekapolon aseun ngesi topolok akwap daang. Ngikapolok luche ngulu, apot tasaka akiroit na itingakinete Daniel kitongolopeta kotere ngakiro a apolou, nakaneni nyeanyuna kesi ni itoroneta ngesi kori ibore idio ni esechit ngesi, kainyo arai Daniel itwaan ni emunoi. Amam ibore asechit ngesi nabo amam tani ni echwangakinit. Tolimut ngitunga ngulu tamasi, “Emam ibore kipedori ngoni akitingakin Daniel etongolopeta, ngaye kerai ngakiro a etal a Akuj keng.” Apot kesi toloto aanyun ekapolon tamasi, “Ekapolon Dario, kigasi atamar toyei jik! Sua daang lu kipolokinit akwap kon, lu kirai ngikaweikinak, ka ngikapolok a ngiwaitin a akwap, ka lu etupito ngulu ta ngikapolok luche, kichamakin atamar todung iyong akiroit, ani erumor kingolik atamar iwapitae lokojokon. Todung atamar a ngirwa a ngitomwon-uni, emam itwaan ilipa ibore anakuj a adio kori anitwaan a idio, mati iyong ekapolon lo kirimae. Itwaan cha daang ni nyiwapi etal logo, echakakinio nadui a ngingatunyo. Tokona bocha ekapolon Dario, todung akiroit ngina taramak emachar kon nyiilochere, itemem ka etal a Ngiamed ka Ngipersia lo nyilocheeneo.” Kongina bocha, abu ekapolon Dario taramak emachar keng nakiroit na adungunit ngina. Na ayenea Daniel atamar aramakin emachar nakiroit na adungunitoe ngina, abu tolot kai keng. Kidiama akai keng, ayei amaniyat na akienyikinito ngipukei keng Yerusalem. Toriedikeene Daniel kaneni kilip Akuj ngakilipet ngauni akolongit apei, ebuakinit alakara. Kilipeene ngesi loger lopalem sek ilipeenea, engaarit ngipukei a amaniyat keng. Apot ngitunga ngulu tochunun torukaut Daniel ilipit imaimai Akuj keng. Sodi pot kesi nia ekapolon kirirata Daniel kotere ngakiro a etal kangolo tamasi, “Ayoro ekapolon Dario, ikwa nyiramakinit iyong emachar atamar a ngirwa a ngitomwon-uni, emam itwaan tani ipei ni echamunio ilipit ibore iche, akuj ache, kori itwaan iche mati iyong bon ekapolon lo kirimae a? Ikwa pealimunitoe atamar itwaan ni nyiwapi etal logo echakakinio nadui a ngingatunyo a?” Kiik ekapolon tama, “Ee, abeyo neni, itemem ka etal a Ngiamed ka Ngipersia lo nyilocheeneo.” Tolimokis kesi ekapolon tamasi, “Daniel lo erai epei a ngirikon a akwap a Yuda, nyikirima iyong ekapolon, kori nyiwapit akiroit na idunguni iyong taramak emachar kon. Ilipeene ngesi ngakilipet ngauni akolongit apei.” Ani iirari ekapolon ngakiro nguna, kialolong noi. Tasak erot lo eyuunea Daniel. Kirichakin akisak erot ngolo tanang akolong edooyori. Tochunun ngitunga ngulu nia ekapolon Dario tolimokis tamasi, “Ayoro ekapolon, toyen atamar emam etal kori akiroit na edungunio cha daang a Ngiamed ka Ngipersia na epedorio akiloch na edungunio ekapolon.” Abu ekapolon Dario todung akiroit, torikunoe Daniel tachakakinae nadui a ngingatunyo. Tolimok ekapolon Daniel tama, “Akuj kon na isubi iyong etich keng jiik, kimiek kitoyuu.” Apon yaunae amoru kiwaakinae nakituk a adui kangina. Taramak ekapolon emachar keng a ilope, ka lo a ngikapolok a arieng keng, sodi nyeebunio itwaan iche tasak ayuun Daniel. Ani erumor tobongo ekapolon kai keng kikoler akwaar kiiya engerit akimuj. Emam ibore iche nikitalakaret ngesi apon yaunae nikeng. Ani echili nanyang, tonyou ekapolon Dario tolot nadui a ngingatunyo. Ani enanguni diyete adui, kikalou ngesi tanyara Daniel tama, “Daniel, ekasuban etich a Akuj ana eyari! Abu Akuj na isubi iyong etich keng jiik kitoyuu iyong alongatunyo a?” Tatachak Daniel ngesi tama, “Agasi atamar toyei iyong lokirimae jik! Ameuni Akuj kang emalaikat togol ngakituk a ngingatunyo nyakawan ayong. Asubi ngesi kongina kainyo ayeni atamar emam ibore asechit ayong alongaren keng, nabo emam tani ibore kon echwangakinit ayong, ekapolon lo kirimae.” Abu ekapolon talakar noi. Todung ngesi atamar kiriunae Daniel anadui. Kiriunae emam ibore kewan, kainyo egieno ngesi Akuj keng. Todung ekapolon atamar kirumunae lusek eriraate Daniel, tachakakinae kesi ka ngaberu kech ta ngide kech naduon a ngingatunyo. Ani eringa kesi tani nyedo kwap adui, apot ngingatunyo kikamut kesi torwakinos tobilibilaasi ngakoyo kech. Abu ekapolon Dario kigir abarua, kigirak ngitela daang, ka ngibukui ta ngitunga a ngangajepa anagelagelae anakwap kadaang, ebala, “Maata! Adungunit ayong atamar ngitunga daang anapolou kang, echamit emaranikinete tokera Akuj a Daniel. Erai ngesi Akuj na eyari, na erubi jik. Nyinyasunio apolou keng. Emam apolou keng esal. Eyuuni ngesi ka alakun, esubi ngakitoodikinet nakailiilok ka nakatalarak anadis ka akwap. Ayuuni ngesi Daniel nyear ngingatunyo.” Sodi kisikokin Daniel ngirwa lua apolou a Dario ka ekapolon Korech lo a Persia. Ekaru lo ekingaren a ekapolon Belichasa alo a Babilon, kiruja Daniel, kingolik ngakisingolikinet ejotoe. Kigir ngesi ngakiro na erujae, eraakasi nugu eger a ngakiro kadaang ana erujae ngesi. Anakisingolikinet ana engolikini ayong nakwaare, abu ataanyunga ngikuwamea nguomwon aponito alowaitin aluomwon a adis, itukulaunito anam naapolon. Tonyout ngitieng luomwon luapolok ananam, agelaana epei kech daang peekwaan ka loche. Ekwaan lo ekingaren ka engatuny, toyakas ngabeben na ekote na egole. Ani eringa ayong etee, torutoroe ngabeben keng, kikeunae ngesi towo a ngakejen a ngaarei loger a itwaan. Ani erumor nakinae aosou na itwaan. Ekoni etiengit lo a ngiarei ebu loliwo lo awei a ngamuroi. Ekeuna alowae a epei. Ayakasi ngamaran ngauni nakituk keng, akonyit ngesi a ngikel. Tolimokinae ngesi kona, “Tonyou, tanyam akiring nakaalan.” Arumoret kanguna, ani eringa ayong etee, ataanyunga etiengit eche. Ekoni etiengit ngolo eris, ayakasi ngabeben ngoomwon na ekote na ikeny kaku keng, toyakasi ngakies ngoomwon. Ainakinitae ngesi apolou. Arumoret kanguna, anakisingolikinet kang ana akwaar, ataanyunga ayong etiengit lo a nguomwon lo kitubuli tarai lokaagongon ationon. Ayakasi ngesi ngikel lusua apolok, lu iriadarea ibore nicha eari tanyam, ani erumor kipudaa. Agelaana ngesi alotieng aluche uni ani ayakatar ngaamwar ngatomon. Ani eringa eseme ngaamwar nguna, ataanyunga iimwara iche erupunit anaamwar anache tomon. Arupunit iimwara ngini anisek adotunere ngaamwar nache uni ka ngatoroma kech. Ayakasi iimwara ngini ngakonyen na ikote na itwaan, ka akituk na eruoro ngakiro na ngiwog. Ani eringa ayong akienyikinit, kiwaakinae ngikicholongo a apolou neni, tolem lo eyari napei kanuan epei a ngikicholongo kangulu kiboikinor. Akwangak ngiworui keng kea, ani ngitim a akou keng akwaikwayete loger a ngajul a ngamesekin. Ekicholong keng a apolou, arai asarae a akim, araakasi ngakejen a ekicholong akim na enoki. Toleleu angolol a akim alokicholong kangolo. Tosuba ngabunge nakaalak etich keng, towaa ngamilionio alongaren keng. Kiboikinos ngikatubok ngakiro, apon tangaarae ngakitabea. Abu ayong atokienyia kotere echale a ngakiro anaapolok ewojor iimwara niichi kiwoga. Ani eringa akienyiarit, taarae etiengit lo a nguomwon, tachakakinae akwaan keng nasarae a akim sodi kinyasunae. Todemarae ngitieng luche apolou kech, ani kesi ngikulepek, kimiekinae mono eyarete. Anakisingolikinet ana akwaar, ataanyunga lo ekoni itwaan ebunit nikang iriamito ngidowon. Tolot ngesi nia alo eyari napei kanuan, torikunoe ngaren keng. Nakinae ngesi apolou ka akibuseanu ta agogongu, sodi ngitela, ka ngibukui, ta ngitunga a ngangajepa anagelagelae, tosuba etich keng. Erai apolou keng akajik, nyesaluni. Nyinyasunio apolou keng. Ani eliwor ayong Daniel, abu etau kang toriangakin nabo kechan ayong ngakiro a ngakisingolikinet. Ataapia ayong ni ayei epei alu awaasi alongaren Akuj, engit eger a ngakiro kanguna kadaang. Abu ngesi katolimok ayong eger a ngakiro kanguna. Tama, “Ngitieng luapolok omwon lugu, eraakasi ngikapolok nguomwon epote anakwap. Nakaneni erai ngitunga a Akuj ana Epol Noi, einakinio apolou. Epolokinete kesi apolou ngina nakajik.” Atasak ayong akiyen lokojokon dir eger a etiengit alo a nguomwon, alo agelaana noi alotieng aluche. Arai ngesi lo kitubuli, lo iriadari ibore ni eari tanyam. Araakasi ngikel keng asuat nakirion, taraakas ngimaagor asuat nanyang. Ngikel lukeng ngulu, erianakinea ngesi ibore nia eari, ani nipiya kipudaa. Asaki ayong nabo akiyen eger a ngaamwar anatomon ayakasi nakou keng, ka eger a iimwara aniichi ani arai na asakea arupun, todotunos nache nauni. Ayakasi iimwara ngini ngakonyen ka akituk na ewogar. Arai ngesi na kitubuli noi akidwang nache daang. Ani eringa ayong akienyikinit, kitijik iimwara niichi ngitunga a Akuj kidwang. Nakaneni bu ngolo eyari napei kanuan totubok ngitunga a Akuj ana Epol Noi ngakiro. Abu tanang ngirwa lu aanyuneta ngitunga a Akuj apolou. Kesisak ngesi ayong kona, “Etiengit lo a nguomwon, erai apolou na ngoomwon emini nakwap. Egelaaner ngesi anapolosio anache kadaang. Irikari akwap daang, kipudaa, ka abilibilaar. Ani eliwor ngaamwar natomon, alotooma apolou naga, epote ngikapolok ngitomon. Ani erumor totupuu kesi eche, lo nyikwaan ka lukolong engarenete, kidwang ngesi ngikapolok ngulu. Imenyi ngesi Akuj na Epol Noi, ka akituburun ngitunga keng. Tasak akiloch ngirwa a ngisukukui, ka ngitalio a Akuj, topolok ngitunga a Akuj, a ngikaru a nguuni ka ngilapio ngikan-kapei. Nakaneni iriamiriamio nitubet ngakiro, todemarae ngesi apolou keng, kikisarae ka akinyasun jik. Agogongu ka apolou ta akibuseanu a ngapolosio kadaang anakwap, einakinio ngitunga a Akuj ana Epol Noi. Erubi apolou kech jik, toliwor ekapolon daang esubi etich ka akiwap ngakiro kech.” Esal a akiroit kana ngesi logo. Ayong Daniel abu katobul noi atopuseania, nakaneni ewaak ayong ngakiro nguna lotau. Ekaru lo a nguuni lo araakar Belichasa ekapolon, abu ayong Daniel ataanyunga akisingolikinet ache. Anakisingolikinet kana, ayei ayong Susa, ere loapolon a akwap a Elam. Awei alokwaas a angolol a Ulai. Ani engoliari, ataanyunga emesek ewei alokwaas a angolol. Ayakasi emesek ngolo ngaamwar nakooyak ngaarei, aoi apei noi, nabo arupuni ekisidi anache. Engolik emesek ngolo igumonor too, ka kwap, ta kuju. Emam etiengit apedori aweikin ngesi kori abuchar anajwonu keng. Toloma emesek ngolo ekinis ka akisub nacha asaki ngesi. Ani eringa etamanari eger a ngakiro kanguna, bu ekoroe alo too, kibirun peetapit ngalup. Kiding ngakonyen keng ayei aamwara naapolon noi. Tolot nia emesek alo a ngaamwar anaarei, alosek engolikini ayong ewei alokwaas a angolol. Tonyunyurikin ekoroe emesek kitijik niationon. Engolik ayong ekoroe irudar lomesek. Angoikinit ngesi emesek ngolo lokojokon noi, sodi kitijik a ngikilinga keng kadaang tobil ngaamwar a emesek naarei. Tongopik emesek kona eweikini ekoroe. Tadakak ekoroe ngesi kwap kipuda, tongop ikayuunan. Kinisakin ekoroe ngolo noi. Ani ikileenikini ngesi, tobil aamwara keng naapolon. Toruput anados keng ngaamwar ngoomwon na ilereete, ingoliarito lowaitin luomwon a akwap. Ani eyei apei a ngaamwar kanguna, torup iimwara iche nidiochichi, kisikokin topoloor ingoliarit kuju, ka kide ta akwap nakebusean. Topoloor aamwara ngina noi tanang najorei a adis, sodi tachaku alokiding kech ngikanyer epewae kwap kipuda. Kimakou aamwara ngina noi kiwoganak tani ekarikon a ngajorei ana a adis. Abu totubo ngakipeyos nasek epeyonokinio ekarikon a ngajorei ngolo akolongit daang, ka akinyasun akai a Akuj. Kotere asechanu, kiwaakinae ngitunga a Akuj nagogongu a aamwara kangina, aapei ka ngakipeyos na inomio akolongit daang. Tachakunae akilipit na iteni kwap. Nyekuruworo ngesi ngakiro na asaki asubakin. Ani erumor eira ayong ngolo italeuno isuruori loche. Kingit erukitos keng ngesi tama, “Erubakinete ngakiro a akisingolikinet kana ikote nege tanang ori? Ipudao ngasigerea na adis ka akai a Akuj tanang ori?” Eira ayong loche etachuni ebala, “Erubakinete ikote neni peipeyoo ngakipeyos ngabunge ngaarei ka ngamiae ngauni, naka ebong ka na ataparach. Ngirwa ngulu, emam itwaan ipeye ngakipeyos nataparach ka ebong. Ani erumor kitaleunoe akai a Akuj kikok nipalem sek.” Ayong Daniel na engolikinea ngakiro nguna, ani eringa asaki akiyen eger kech, atipei abu ibore ni ekoni itwaan towo alongaren kang. Eira ayong etoil a itwaan enyar anangolol a Ulai ebala, “Gaburiel, kisisak itwaan en eger a akisingolikinet.” Bu Gaburiel towo alo diyete kang. Katobul ayong lokojokon atadakakin kwap. Katolimok ayong Gaburiel tama, “Itwaan, toyen atamar eraakasi ngakiro a akisingolikinet kangina ngaka ngirwa alu a esal.” Ani eringa ngesi kesuruori ayong, erakar ayong alokwap. Nakaneni katorwakin ngesi ayong ketonyou. Ani erumor katolimok tama, “Topupok, kedodikinit ayong iyong ngakiro na esubakinosi kotere angoit a Akuj. Eraakasi ngakiro a akisingolikinet kangina ngaka ngirwa alu a esal. “Emesek lo itee iyong eyakasi ngaamwar ngaarei, eraakasi ngikapolok a Media ka Persia. Erai ekoroe apolou a Giris. Erai aamwara naapolon eyei kiding ngakonyen keng, ekapolon keng lo ekingaren. Aamwara na abila toruput ngaamwar ngoomwon anados keng, eger keng atamar etiak apolou ngina toliwor ngapolosio ngoomwon. Nakaneni nyegogongerosi ngapolosio nguna loger a apolou ana ekingaren. “Ani eapikini ngapolosio nguna adaun, na eronearor akisech kech noi, emini ekapolon lo ebilakinit esingir, tomodeana. Eliwor ngesi lo a agogongu anaationon. Eyauni nginyas luketubulok, nyekuruworete ngesi ngakiro na esubakini daang. Emunyari ngesi ngitunga lu eyenikinitae, ka lua Akuj. Kotere amodeanut keng, epetakin engalas wadaang, iwogakin ngesi ilope alotau keng. Emunyari ngesi ngitunga lukaalak peichikichikit sek. Itijikini ngesi ekapolon lo idwangit ngikapolok luche daang, nakaneni emunyario ngesi, meere a agogongu ana erai aka itwaan. Ngakiro a akisingolikinet a ngakipeyos ana a ataparach ka naka ebong na tokona kisisakin iyong eger kech, eraakasi ngaka iteni. Nakaneni kidaa, kainyo eraakasi ngamunonoe, nabo etinenikinete ngirwa lukaalak nyesubakina.” Ayong Daniel, apot ngakiro katonom atodeakakin a ngirwa a ngikos. Ani erumor atonyou ayong atosub etich a ekapolon. Nakaneni keteriangak ayong akisingolikinet ngina, katokuruwo akiyen eger keng. Ekapolon Dario lokookeng a Asuero, lo arai itwaan a Medi, apolokinit Babilonia. Ekaru lo ekingaren araakar ngesi ekapolon, ayong Daniel aripi ngagiran lokojokon. Abu atoyen kaneni eger a akiroit ana kolong alimokini Ekapolon Akuj ekadwaran Yeremia kotere ngikaru lutomwon-kaarei. Ngikaru ngulu kesi echamit edaunosi eringa Yerusalem nyinyasuna toliwor asakatan. Abu ayong esingolia ereet kang nia Ekapolon lo erai Akuj, atasak ngesi kotere akilip, emaimai aroneene akimuj ka anapit ngiguniae, ebooye alokuruon. Elip ayong Ekapolon Akuj na erai Akuj kang, atolimo ngasechesea, atama, “Ekapolon Akuj Namerikanyer, ipol iyong noi irai naketimon. Irichakinit iyong achamunet kon ka amina na nyedaun ani eyakasi lu kiminasi iyong kiwapito ngitalio kon. “Kisech sua, kisub naaronok kichwangak. Kinger sua nakidungokini iyong atamar atosubakisi, nabo kirea wache ani eyakasi nakolong kidodikini iyong sua atamar iyookino. Kiwou sua akiirar ngakiro a ngikasubak etich kon alu eraakasi ngikadwarak, lu eruorosi ka ngikapolok kosi, ka ngikatukok kosi, ka taapaakosi lungorok ta ngitunga a akwap kosi daang. Kisuruorete kesi sua elimito ekiro kon. Itenoono iyong Ekapolon, nakaneni ileleba ngileech nikosi jiik. Erai akiroit naga aka iteni ani kiya sua daang lu kilomit Yudea, ka ngitunga a ere a Yerusalem, ta Ngisirael daang lu apetakin nakwapea na alo diyete ka nakalonak, kotere naaronok kisubeta kesi iyong. Ee Ekapolon Akuj, eraakasi ngileech ngikosi, ka ngikapolok kosi, ka ngikatukok kosi ta taapaakosi lungorok, kainyo kisechak sua iyong. Iyong Ekapolon, Akuj kosi, irai na ngisien nabo kirimanakini sua, tani bo kingerit sua iyong. Kiwouni sua akiirar ngakiro kon, Ekapolon Akuj na irai Akuj kosi, nakolong kilimokinea atamar ewapa ngitalio lukolong kiinakini iyong sua kitorut nia ngikasubak etich kon a ngikadwarak. Echwangakis Ngisirael daang etal kon, areasi wache, towout akiwap ngakiro kon. Kotere ni kisechakinea sua iyong, kibukok iyong sua ngilam lu igiritae lotal a Musa, a ekasuban etich kon. Iyook iyong nakolong ilimuni atamar kisubakinea sua ka ngikapolok kosi, ani iriraa ere a Yerusalem niaronon noi akidwang ere eche daang anakwap. Kirira iyong sua loger lo igiritere lotal a Musa, toringa sua nyesaka akitojoka anikon, Ekapolon Akuj na irai Akuj kosi, atoreeunos anasechesea kosi, ewapa iyong na iteni. Kotere nguna Ekapolon na irai Akuj kosi, ibu iyong tasak alemar sua nidikil, sodi kikok neni, kainyo isubeene iyong jiik na etenooko, sua ngesi kiwounit akiirar akiroit kon. “Nakaneni tokona Ekapolon lo irai Akuj kosi, idodiuni kolong iyong ationis kon ani ipudunio ngitunga kon alo Misiri, nabo eringa ationis kon itamunitae tani tokona. Kisech sua kisub naaronok. Ee Ekapolon, itemem ka ngitichisio kon lu etenooko, toree angoit kon ka anyunyura alore a Yerusalem, alo erai emukura kon lo italeuno. Kainyo kotere ngasechesea kosi ka naka taapaakosi alungorok, aliworosi ngitunga daang a ngakwapea ana idunyare imenyarito Yerusalem ka ngitunga kon. Kotere ngakiro nguna, ee kare Akuj kosi, kiira akilip kang ka eger lo kemaimaea ayong ekasuban etich kon iyong. Akai kon na italeuno nakolong enyasunio, todukok nabo kikok nikolong sek ekoni. Todukok toyenea itwaan daang atamar iyong irai Akuj. Ee Akuj kang, todeta kare akit kon kiira. Tangaa ngakonyen kon kingolik ngichan lu kianyunit sua aapei ka ere lo erai ekon. Kilipit sua iyong ani iraakar iyong na ngisien, meere kotere ni kisubea sua na iyookino. Ekapolon Akuj, kiira kare ngakiro kosi, Ekapolon Akuj, torimakinae sua. Ee Ekapolon Akuj, kiira ngakiro kosi tosubak idiobore. Ee robo Akuj kang, kotere ekipur kon a ilope, nyiimamak! Erai ere logo ka ngitunga lugu ngikon!” Aringa ayong elipit, alimonori ngasechesea kang ka na ngitunga kang a Ngisirael, emaimai nabo Ekapolon Akuj kotere akai keng na italeuno, ani eringa ayong elipit, Gaburiel lotete sek esiauni ayong engolik anakisingolikinet kang ana ekingaren, kibirun ni ayei ayong eporit. Arai esaa ngolo lo a akipeyos ana ka ebong. Sodi katolimok ngesi ayong tama, “Ee Daniel, abu ayong tokona ainakin iyong aosou ka achwaanu. Natete isiakinea iyong akimaima Akuj, abu Akuj kiik ngakiro kon. Kimina iyong Akuj lokojokon. Kotere ngakiro nguna, abu ayong alimokin iyong ngakiro na atachu ngesi. Todeta tokona akit esisauni ayong eger a ngakisingolikinet. “Ngikaru ngikan-kaarei ngakimararet ngatomwon-kaarei kesi ngikaru lu erekinit Akuj alachakinea ngitunga kon ka ere kon lo italeuno anakisech ka aronis. Erimakinio akisech, sodi kitowae ngakiro na eriyan, kiyookinotor ngakisingolikinet ka ngakiro na edwario. Ani akai a Akuj kitaleunoe. Tomisik ngakiro nugu toyen. Napei edungunere atamar tobongokinoe akiduk Yerusalem, tanang abunet alo ewasakinio akimiet toliwor ekapolon, eraakasi ngikaru ngikan-kaarei. Ebongokinio ere a Yerusalem akiduk a ngikaru a ngitomwon-kapei ka ngiarei. Edukokinio Yerusalem nabo pena ngirotin ka ngaduon a ejie, nakaneni eliworosi ngirwa ngulu lua ngichan. Adaunet a ngikaru kangulu, eario lo iwasakinit Akuj akimiet, a ngakiro ana nyeriyan. Ebuni ajore a ekapolon alokajwon torem Yerusalem kinyasu aapei ka akai a Akuj. Eneteun esal loger a akaale, eyaunit ejie ka nginyas lu atiaku Akuj. Ekapolon ngolo, ibakete ka ngitunga lukaalak lokojokon a ngikaru a ngikan-kaarei. Ani edaun epewae a ngikaru kangulu, etubori ngesi ngakipeyos ka ngadekon. Itowei ngesi Ekenyasunan Loaronon Noi analem a akai a Akuj, min neni tanang ekapolon ngolo ichanyunosi ka esal lo etiakakinit Akuj ngesi.” Ekaru lo a nguuni araakar Korech ekapolon a Persia, apon kidodikinae Daniel akiroit. Belitechasa ngesi ekiro eche alimokinitae Daniel. Arai akiroit ngina aka iteni, nakaneni ationo akiyen. Kisisakinae ngesi toyen anakisingolikinet. Ngirwa ngulu, ealolongi ayong Daniel a ngiukio a nguuni. Emam akimuj nakaabon na anyam ayong. Nyenyama akiring kori nyiira emuna lo epuritoe. Nyiwasakina ayong akimiet ngiukio luuni ngulu. Akolongit na ngatomwon-arei ka ngoomwon a elap alo ekingaren, awei ayong alokwaas a angolol anaapolon enyaritae Tigiri. Ani engoliari ayong, ataanyunga itwaan ni anapit ngiworui lukaanikak, tanapite aruba a egolit alo a akwap a Upas. Amalimali akwaan keng loger a akabulutuneit ana enyaritae berili. Ekoni ereet keng akimileaunet, kikote ngakonyen keng ngakinwaket na enokete. Ngakan ka ngakejen keng, amalimalete loger a asuat ananyang ana ipusitae. Ekoni etoil keng echale a asepich a ngitunga. Ayong bon abu engolik akisingolikinet ngina. Ngitunga luche lu kirukitor ayong, emam ibore apot taanyungasi, nakaneni tobul kesi noi, tamataros akiduk. Apon kemiekin ayong alopei akienyikinit akisingolikinet nakitalari ngina, tolilimiyo akwaan kang. Topuseania ereet kang lokojokon, tosub meere lopalem kang. Ani eirari etoil keng, atadakakin nalup atoper a akook, erakar. Abu akan katorwakin ayong, kekeu atowo a ngakungin ka ngakan, emaranete. Katolimok emalaikat tama, “Daniel, kimina iyong Akuj. Tonyou towo topupok lokojokon ngakiro nakesuruori ayong iyong, kainyo kameunitae ayong nikon.” Ani kesuruori ngesi ayong ngakiro nugu, atonyou ayong atamarani. Katolimok ngesi ayong tama, “Daniel, wara nyiiem. Eirari Akuj akilip kon napei kolong anakolongit ana ekingaren itiditeunor iyong alongaren keng tasak akiyen ngakiro. Akilip nakon ngina abunitor ayong. Emalaikat a akuj a Persia, ketepegi ayong a ngirwa a ngitomwon-arei ka epei. Nakaneni Mikael lo erai epei a ngimalaikae aluapolok, bu kengarak ayong. Emiek ayong ngesi kaina erukito ka emalaikat lo a akuj a Persia. Abu ayong akiteyen iyong ngakiro na eanyunete ngitunga kon monan, kainyo erai akisingolikinet na ianyunga iyong aka ngirwa aluka monan.” Ani kelimu ngesi nguna kerumor, atokienyik ayong kwap, katokuruwo akiruorikin. Abu epei lo ekwaan ka itwaan tatap ngipon kang, atolimok ayong lo awei alo diyete kang atama, “Ee ekapolon kang, kating ayong nikaapilan kotere akisingolikinet naga, nabo alilimiyo akwaan kang. Ekoni ayong ekedalan lo ewei alongaren ekapolon keng. Ekokini ayong kiruoro ka iyong ai? Adaunosi ngikilinga kang, angop tani kona eangakini!” Ngolo ekwaan ka itwaan, katorwakin ayong nabo, sodi pena ayong ngikilinga. Katolimok tama, “Itwaan, kimina iyong Akuj lokojokon, kotere nguna, nyiiem. Kiboikin akaalimon. Togogonger nabo totitinyer.” Ani elimuni ngesi ngakiro nguna, abu ayong atotitinyer, atolimok atama, “Ekapolon kang, tolim ngakiro na isaki iyong alimun, kainyo kitogogong iyong ayong.” Katolimok ngesi ayong tama, “Iyeni iyong ibore ni abunitor ayong nikon a? Nakaneni abongi tokona ayong akitijwore emalaikat lo itee Persia. Ani ketiji kerumor, ebuni emalaikat lo itee Giris. Nakaneni keteyeni ayong iyong ngakiro na igiritae nakitab na a Iteni. Emam iche ni kengarakini mati Mikael lo erai emalaikat lo kitee esi. “Ani alowae kang, ekaru lo ekingaren a ekapolon Dario, alo arai Emedit, abu ayong egang ka akitogogong Mikael. Eraakasi tokona ngakiro nakesisakini ayong iyong ngaka iteni.” Tama emalaikat, “Epolokinete ngikapolok ngiche nguuni Persia. Etupuuni kesi lo a ngoomwon lo ebarit noi akidwang luche daang. Ani egogonger ngesi noi kotere ebari keng, ichichiuni luche daang akitijikin apolou a Giris. “Ani erumor ebuni ekapolon lokajwon noi lo epolokini akwap nakaaloman noi, tosub ibore daang ni esaki ngesi. Tani ikoni neni, ngirwa lu eruunio agogongu keng noi, iealar apolou keng, totiakatiakaar lowaitin luomwon a akwap. Ngikapolok lu nyeraakasi ngalesea keng kesi ilunyokinosi nados keng topolokis. Nakaneni, nyikokini agogongu kech nakolong keng. Kainyo editunio apolou keng nakinae ngitunga lugelayek. “Egogonger ekapolon lo a Misiri. Nakaneni, epei a ngikarikok a ngasigerea keng, egogonger noi akidwang ngesi, nabo epoloor apolou keng noi. Adaunet a ngikaru a ngikos echamakinosi ekapolon a Misiri ka ekapolon a Siria. Itogogongio achamakin ngina a ekamurake, kipoto ekapolon a Misiri nakookeng kiut ekapolon a Siria. Nakaneni nyerubi achamakin ngina, kainyo eario aberu ngina, ka lokile keng, ka lokookech ta ngikasubak etich kech lukolong erukorete ka ngesi. Ngirwa ngulu, eliwor epei a ngiyenet a aberu kangina ekapolon. Itijikini ngesi ngasigerea a ekapolon a Siria toloma tooma awas nakaagongon, kidwang kesi. Iwoki ngesi ngakujo kech tobongorea Misiri. Imoriari ka ngiboro lukaalak a ngaropiyae lu eraakasi ngakwangae, ka egolit, lu edekonokinio ngakujo nguna. Nyeremi ekapolon lo alokuju ekapolon lo alokwap a ngikaru a ngikos. Ani ekisidi, eremi ekapolon a Siria akwap a Misiri, nakaneni elarakin tobong nakwap keng. “Echunakinete talokookeng a ekapolon a Siria ajore natikaalan tangaasi ejie. Eneteunosi kesi loger a akaale, toremo awas nakaagongon a Ngimisiri. Ani engoi ekapolon a Misiri, tonyou tolot kitijik ekapolon a Siria. Echunakini ekapolon a Asiria ajore natiapolon, nakaneni idwangio kesi. Inisakin ekapolon a Misiri ani edwangea ekapolon a Siria. Eari ngesi ngasigerea nakaalak, nakaneni nyerubakini ngesi idwangeene ngimoe keng. “Ebongori ekapolon a Siria tochunak ajore nakaalan noi na idwangit nache kolong a ekingaren. Ani enangi ngirwa lu engaarea ejie, irukunete ka ajore nakaalan noi etingit ngiboro lukaalak lujiet. Ngirwa ngulu, engerete ngitunga lukaalak ekapolon a Misiri. Daniel, ngitunga ngiche lukamoitanak a akwap kon, engerete ekapolon a Misiri kiyookinor akisingolikinet naga, nakaneni idwangio kesi. Isiriami ekapolon a Siria ngasigerea keng ere lo a awas anakaagongon tolema. Nyeweikinete ngasigerea a Misiri ngesi. Tani lukajwok noi anikech, elilimiyorete. Esubea ekaremon a Siria kesi ngakiro nacha esaki asubea, emam itwaan eweikini ngesi. Ewei ngesi anakwap anakebusean, toliwor akwap ngina akeng. “Engaari ekapolon a Siria ajore erukito ka ngasigerea keng daang. Isilete ngesi ka emoit keng tachamakinos. Ipotori ngesi nakookeng kiutae, sodi kinyasunea apolou a emoit keng. Nakaneni tani kikok neni, elarakin. Ani ekisidi, eremi ngesi ngibukui lu elomito lokwaas a anam, kidwang. Nakaneni ekarikon a ngasigerea anagelayek, idwangi ngesi totubo ngiwog lukeng. Ee robo, elemario ekapolon a Siria nidikil kotere ngiwog. Ebongori ekapolon ngolo nawasea nakaagongok a akwap keng, nakaneni idwangio, toliwor esal keng ngolo. “Etupuuni ekapolon eche ngesi, lo emeuni itwaan ni itubuki ngitunga echur kiatakinor ebari a akwap keng. Eario ekapolon ngolo adaunet a ngirwa a ngidikidio, nakaneni nyeario ani engoikinitotor ngitunga, kori nyeario alojie.” Torubak emalaikat isisaunit ngakiro nguna ebala, “Emini ekapolon eche Siria, lo erai itwaan niaronon noi ni nyejoikinit eliwor ekapolon. Ituumwokini ngesi ngitunga tolema apolou a amodeanut. Itwaan daang ni itopegi ngesi, kerai tani ngasigerea kori emuron loapolon a Akuj, ipudaario, taarae. Ingalae ngesi ngibukui luche tachamakinos ka ngesi. Isikokin ngesi togogonger, tani kepolokinit ebukut lo edit. Eremi ngesi ewae a akwap lo eyei ebari, eringa nyelimokina itwaan. Esubi ngakiro na emam tani epei kata apakeng, kori taapaakeng lo asub nakanuan. Ani erumor ekorakini ngesi ngirukitos keng ebari ka ngiboro lu engatari alojie. Erekini ngesi alosit akirem ngawasea nakaagongok, nakaneni nyerubakini akikoanakin neni nikooyen. “Kotere ekileenu echunakini ngesi ajore nakaalan kitijikinio ekapolon a Misiri. Enyouni ekapolon a Misiri kitijik ngesi erikit ajore nakaalan noi, tojwoko noi. Nakaneni idwangio ekapolon a Misiri, kainyo erekinio ngakiro nakingalaet ngesi. Ngulu imujete akimuj keng naajokon, kesi inyasunete ngesi. Eario ngasigerea keng nakaalak, tomiatarae ajore keng. Iboikinosi ngikapolok luarei ngulu kimuja awapei, tarai alotai kech, itamea ipei kech daang niche naaronok. Ingalasi kesi make. Tani kikokis neni, emam ibore eanyunete kesi kainyo eringa ngirwa lukolong arekinitae nyenanga. Ebongori ekapolon a Siria nawi keng, etingit ebari daang lo angatari, esaki akinyasun eger lo elipitotor ngitunga a Akuj. Esubi ngesi ngakiro na esaki akisub, ani erumor tobongo nawi keng. “Ani ekisidi, eremi ngesi Misiri nabo. Alotoru naga, egelaakearosi ngakiro nyikokinete nikolong sek. Epote Ngiroma a ngatubwae anaapolok kitijikis ngesi tobul. “Ebongori ngesi engoit ileleba, tasak akinyasun eger lo elipitotor ngitunga a Akuj. Iwapi ngesi nguna elimokinete ngitunga lukolong angerete akilip ngina. Inyasunete ngasigerea ngache akai a Akuj. Etuborete ngakipeyos na inomio akolongit daang, sodi kitowaa Ekenyasunan Loaronon Noi. Itoboboe ngesi akituk kisoswa lu echwangakinete akilip. Nakaneni ngitunga lu eyenete Akuj kech, itopegete ngesi, nyiloilookinosi. Ani lu eosok anikech, itoosunete luche. Tani ikoni neni, a ngirwa a ngikos, emunyario kesi a akwara ka akim, ka arikonot ta ademaro ebari kech. Ani ngirwa lu earere kesi ngulu, eanyunete akingarakino nadiochichi. Ani lukaalak, imorikinosi ka kesi togeal ibore esakete. Eario ngitunga lukoosok ngiche, nakaneni ikiunosi ngitunga kotere akitu kech, kitaleunos, tarata luasegak, tanang akolongit na esal nakolong etiakunit Akuj. “Esubi ekapolon a Asiria ngakiro nacha ejoikinito ngesi. Iwogakin ngesi kipuruun ebala edwangit ngesi ngakujo daang. Imenyi ngesi Akuj na idwangit ngakujo nache. Isikokin eboyor keng tanang ni eanyunea eriras a Akuj, kainyo ngakiro nakolong erekinitae, ejoikinit esubakinio. Nyekachikini ekapolon ngolo akuj nakolong elipito taapaakeng kori akuj na eminasi ngaberu. Ejamuari ngesi ngakujo nache daang, kainyo etamari ngesi apolot noi akidwang ngakujo nguna daang. Nakaneni eliwor ngesi lo erima akuj na itee ngawasea nakaagongok akidwang ngakujo nguna. Elemikini ngesi Akuj nakolong peelipito taapaakech egolit, ka akwangat, ka ngamoru nakaalak a ngaropiyae ta ebachit lokaalan a ngaropiyae. Ngitunga a akuj anagela kesi eyuunete ngawasea kech nakaagongok. Ani ngulu echamunete apolou keng, eliwor lu erima ngesi lokojokon noi. Itiliwori kesi ngikapolok, tokorak akwap toliwor ebachit kech. “Ani na enangea esal, itijikini ekapolon a Misiri ngesi. Ebuakini ekapolon a Asiria ejie ngolo nikationon ipirakinit loger a ekuwam alo ipiripiri. Eneteari ngaurukukui na irito ngangolei ka ngikameak ngangolei, ta ngatubwae naapolok nakaalak. Eremi ngakwapea nakaalak toneteiar loger a akaale. Eremi tani akwap nakebusean taar ngitunga ngabunge nakaalak. Nakaneni ebuchunosi ngakwapea a Edom ka Moab ta ewae loapolon a Amon. Ngirwa lu eremio ngesi ngakwapea nguna, nyebuchar tani akwap a Misiri. Eliwor ebari a Misiri daang ekeng, egolit ka akwangat ta ngiboro luche kaalak a ngaropiyae daang. Ngitunga a Libia ka lua Kuch*g** iwapete etal keng. Itubulete ngesi ngakiro na epote alo kide ka akwap. Ejii ngesi engoit ileleba tomunya lukaalak. Ani eya nguna daang, itowei ngesi ngieman keng luapolok anakidingos a anam ka emoru lo edukokinitae akai a Akuj. Etoani ngesi emam tani itwaan ipei ni ingarakini.” Tolim emalaikat lo anapit ngiworui lukaanikak tama, “Ngirwa ngulu, etakanuni Mikael, emalaikat loapolon lo erai ngesi itee Isirael. Sodi pena ngichan luaronok noi lu nyepena nakwap napei apeneta ngibukui nakwap. Na enangea ngirwa ngulu, ngitunga daang a akwap kon lu igiritae ngirora kech nakitab a Akuj, eyuunio. Ngikaalak alusek atoaka, eyarunete. Eanyunete ngiche akiyar nakajik, ani ngiche taanyut ngileech nabo kimenyarae jik. Ani lukoosok, imaunete loger a adis. Ani lukolong etatamete luche akisub na eteniyete, imaunete jik loger a ngikanyer.” Katolimok ngesi ayong tama, “Daniel togolok tokona akitab. Kirichak ngakiro nugu kainyo eraakasi ngamunonoe. Togol akitab taramak emachar tanang ngirwa lu esal. Ani eringa ngirwa ngulu nyenanga, ematarosi lukaalak ama ka ama, nabo iatakin aosou.” Ani erumor, abu ayong Daniel ataanyunga ngitunga ngiarei ewaasi alokwaas a angolol, ewei ipei alokwaas a epei a angolol, towei niche alokwaas aloche. Engit ayong itwaan ni ayei kuju angolol ni anapit ngiworui lukaanikak, atama, “Ori edaunotor ngakiro nakitubulete nugu?” Kikea itwaan ni ayei kuju angolol ngini ngakan keng kidiama sodi kikong elimit ekiro a Akuj ana eyari jik. Eira ayong ngesi elimuni tama, “Eliwor ngikaru nguuni ka ngilapio ngikan-kapei. Adaunet a aboliaro a ngitunga a Akuj, tosubakina ngakiro nguna daang.” Eira ayong ngakiro na alimuni ngesi, nakaneni nyeyena ayong eger kech. Kotere ngakiro nguna, engit ayong ngesi atama, “Nakaneni ekapolon a, ikokinete daang esalunete ai?” Tatachu ngesi tama, “Daniel, kape tolot, kainyo imunonitae ngakiro nabo idaitae tanang enangi esal. Ikiunosi ngitunga lukaalak, kitaleunos tosegeta. Nyeyenunete luaronok ngakiro, pearai erubakinete aliwor luaronok noi. Lukoosok make kesi eyenunete. Napei anakolongit ana etuborere ngakipeyos na akolongit ka daang, ngesi atamar napei anakolongit ana a Ekenyasunan Aloaronon Noi, edaunosi ngirwa abunget apei ka ngamiae ngaarei ta ngatomwon-koomwon. Epiaritae noi lu idongete emunoi tanang ngirwa abunget apei ka ngamiae ngauni ka ngatomwon-uni ka ngikan edaunosi! “Ani iyong Daniel, toliwor lo kimunoi tanang losal. Tani kitoana iyong, iyaruni taanyu ebachit kon ngirwa lu esal.” Akiroit naga alimokini Ekapolon Akuj Osea, lokookeng a Beeri, ngirwa lu araakatar Usia, ka Yosam, ka Aas ta Esekia ngikapolok a Yuda, tarai Yeroboam lokookeng a Yewach ekapolon a Isirael. Kisuruor Ekapolon Akuj Osea na ekingaren tolimok tama, “Kape kuut aberu namalaat, toureta ngide lu iwapete elote keng. Aloger alopei kangolo kangero ngitunga kang ayong, aliworosi ngimalaae.” Sodi kuut Osea aberu na anyaritae Gomer, nakookeng a Diblaim. Topoti ngesi kidou idia ni ekingaren. Tolimok Ekapolon Akuj Osea tama, “Tolimok ekiro be ‘Yesireel’ kainyo aapuu ni eriraa ayong ekapolon a Isirael, kotere ngitunga lukolong aari apaakeng Yeu alo Yesireel. Atubori ayong apolou a Yeu. Akolongit ngina, abili ayong akwara a Isirael anadipo a Yesireel.” Topoti Gomer nabo kidou ikoku nipese. Tolimok Ekapolon Akuj Osea tama, “Tolimok ekiro be ‘Nyeminae’ kainyo nyeringa ayong nabo aminakini Ngisirael, kori nyarimakini kesi jik. Nakaneni aminakini ngitunga a Yuda. Ayong Ekapolon Akuj na arai Akuj kech ayuuni kesi, meere a ejie a ngimalea a amod, kori a ngakwaaras, kori a ngangolei, kori a ngikameak ngangolei.” Ani eonikini Gomer ikoku ngini, abu topoti nabo kidou idia. Tolimok Ekapolon Akuj Osea tama, “Tolimok ekiro be ‘Meere ngitunga kang’ kainyo meere esi ngitunga kang, nabo nyarai ayong Akuj kus.” Elalakearosi Ngisirael totiata asinyen a anam na nyimarun, kori nyitemio. Nikolong abalar Akuj kesi, “Meere esi ngitunga kang,” elimokini tama, “Iraakasi esi ngide a Akuj ana eyari!” Imorikinio ngitunga a Yuda ka lua Isirael wapei, sodi toseut ekarikon kech epei. Ikeunosi kesi anakwap kech tajakaana. Ee robo, epoloor akolongit a Yesireel. Tanyarata talokaatokus, “Ngitunga kang” ani tanakaatokus tanyarata “Emina Ekapolon Akuj.” Kimaimaa itiokus, kimaimaa kainyo nyerai ngesi aberu kang, nyarai ayong lokile keng. Kimaimaa sodi tapalik emalaanu tapalik elomit keng. Ani kemam abutori ngiboro keng kidong emuner loger lokolong edounere. Etooni ayong ngesi loger a ariet, esikwaanik ka akwap na iwari niamonan, etaari ngesi akure. Nyekesieniyete tani ngide keng, kainyo auriunio alomalaanu. Kainyo erai itiokech amalaat, ee robo, ngina kolong apotiuni kesi esubi ngileech. Alimuni ngesi alope tama, “Alosi nia ngiminan kang, kesi kainanakinete akimuj ka ngakipi, ka ngajul a ngamesekin, ka ngiworui, ka akimiet ta emuna.” Kotere nguna, eriwokini ayong ngiikwa lorot keng. Adukokini awas eratakinea ngesi, sodi nyeanyunea ni itori. Iwapakini ngesi ngiminan keng, nakaneni nyedoli. Esakari ngesi kesi nakaneni nyeanyuni. Ani erumor elimuni tama, “Abongori lokile lokolong kang a ekingaren. Kainyo ajok kolong ayong kaina akidwang tokona.” Peayeni ngesi atamar ayong kolong ainanakini ngesi ngikinyam, ka emuna, ka akimiet, ka ngakwangae daang ta egolit lo elipitor ngesi Baal. Tokona bocha, ngirwa lua ngalemet, abuari ayong ngikinyam kang, ka emuna, ta ngajul a ngamesekin, ka ngiworui lu adikino erapete amunerer keng. Abutori ayong ngiboro keng, emiek emuner anakonyen a ngiminan keng. Emam itwaan eyuuni ngesi anakan kang. Atubori ayong ngisukukui keng lua ekaru, ka lua ngilapio ta lua Sabato. Atubori ngikiriamisea lua agata keng daang. Enyasuni ngimusabib keng ka ngimeyana lukolong abalar ngesi, “Ibore en katachitotor ngiminan kang.” Etiliwori ngesi amoni kirikasi ngitieng a moding. Erirae ayong ngesi kotere Baal, kainyo enomanakini ngesi Baal emitina, sodi tanap ekababaat ka asir, kiwapak ngiminan keng katachaka ayong. Ayong Ekapolon Akuj alimu nguna Kingolik a, ayaari ayong ngesi nariet, sodi emaima kaina, esuruor ngakiro a aminatoi. Abuakini ayong ngesi ngamusabib kaina sodi etiliwo adipo a Ngichan ekidor a akigieno. Kesuruori ngesi ayong kaina loger lokolong kesuruorea esorokana, ngirwa lu apudunio alo Misiri. Akolongit ngina, kanyarae ngesi ayong “Lokile kang” nyeringa nabo kanyarae “Baal kang.” Atubori ayong ekiro a Baal anakituk keng jik. Akolongit ngina, kichamakin ayong ka ngitieng a moding, ka ngikieny lu eporito ta ngiborei lu eliato analup. Abili ayong akau ka akwara atotubo ejie anakwap. Kemiek esi ibooyete a ekisil akaalimon. Isirael, kaneri ayong iyong jik. Kaneri a ateneanut ka ngakiro na eriyan, ka amina na nyedaun ta ngisien. Kaneri ayong iyong a amuno, kitoyen atamar arai ayong Ekapolon Akuj. Akolongit ngina, eirari ayong ngakilipasinei a ngitunga ka na a Ngisirael. Elakakini adis ngakipi todoto nalup. Ekoniunete ngalup ngalemet, ka emuna ka akimiet. Ewaakini ayong kesi nakwap, tarata lu isikokina. Aminakini lukolong abeyo, “Nyeminae.” Ani lukolong abeyo “Meere ngitunga kang” atamari, “Iraakasi esi ngitunga kang” sodi tamasi kesi, “Irai iyong Akuj kosi.” Katolimok ayong Ekapolon Akuj tama, “Kape nabo tominak aberu na elomito ka ekile lo eminatar. Tominak ngesi loger lo eringaakar ayong amina Ngisirael, tani bo kereara nakujo nache, nabo tominas akipeyonokin ngakujo nasubuna ngarinyo.” Dio bocha atolot atogiel aberu ngina a ngaropiyae a ngatomon ka ngakan, ka ngakiloi amiat ka ngatomwon-kan a erau. Atolimok aberu ngina atama, “Iliwor iyong akang a ngirwa alukaalak. Nyiiliwor amalaat kori nyiicham ekile eche. Ayong dang kasubea iyong ngakiro napei nguna.” Kainyo eger lopei ngolo iboikinotor Ngisirael ngirwa lukaalak emam ekapolon, kori emam ekarikon, emam ngakipeyos, kori ngasenon, emam akaluwat a emuron, kori ngakujo nasubuna. Ekisidi ebongunete Ngisirael tasaka Ekapolon Akuj na erai Akuj kech, tasaka tani Daudi lo erai ekapolon kech. Epote kesi ngaren Ekapolon Akuj emaranete taanyut ajokis keng ngirwa lu isidiuno. Ee Ngisirael, kiirasi akiroit a Ekapolon Akuj. Isuburae Ekapolon Akuj ngitunga lu elomito nakwap ebala, “Emam amuno ka amina anakwap. Nyeyenio Akuj anakwap. Eyei akikong ka akingalare, ka akiar, ka akoko ta elomit. Eatakin asechanu, idoko aaranu naaranu. Igoro robo akwap esutonokini, emunyarosi daang lu elomito nakwap ka ngitieng a moding, ka ngikieny lu eporito, tani ngikolea a anam.” Ebala Ekapolon Akuj kona, “Tochoite iyong itwaan isuburae ngitunga, wara nyiikilak ngitunga, kainyo esi ngimurok ketongolopi. Akwaar ka apaaran itwapitwapete esi aapei ka ngikadwarak kus. Amunyari ayong Isirael na erai itiokus. Amunyar ngitunga kang ani nyekayeneta ayong. Ani aloger ingerioto esi akiyen ayong, kanger ayong esi nyiiliworosi ngimurok kang. Ani aloger kimuriakinea esi etal a Akuj kus, kemuriakinete ayong dang ngide kus. “Nacha eatakinotor ngimurok, kiatakin akisech kech dang anikang. Elochi ayong ekipur kech toliwor ngileech. Abarakis kesi nakisech a ngitunga kang. Esakete kesi ngitunga tosecha noi. Kotere nguna, eanyunete ngimurok eriras lopei eanyunete ngitunga. Erirae ayong kesi kotere elote kech, etatach naaronok nakolong asubete. Imujete kesi nakaneni nyimwokete. Esubete emalaanu nakaneni nyeureasi talalaketa. Kainyo aisikis kesi Ekapolon Akuj, ajoiki kesi emalaanu.” Ebala Ekapolon Akuj, “Emuna longorot ka lokitetet ngesi adema ngitunga kang aosou! Ingisete ngitunga kang akitoe ngakiro, aburo elimokini kesi ngakiro na esakete. Etooliyo emalaanu kesi, aisikis Akuj kech aliworosi ngimalaae. Ipeyoote kesi anaitae a ngimoru, kipeyoto alokidiama ngimukur, ka kwap ngichokei luapolok lu eliarito ngaten kainyo ejok ngitorubei kech! “Kotere ngakiro nguna, arata tanakookus ngamalaae, arata ngaterak kus ngakalomak. Tarai nyerirae ayong tanakookus kotere emalaanu kech, kori nyerirae ngaterak kus kotere elomit kech, kainyo esi ngikiliok ngikulepek ipudonorete ngamalaae na eyakasi ni ilipitere. Nabo ipeyoote ka kesi ngakipeyos a ngakujo anagelayek. Emunyario ngitunga lu emam aosou. “Ee Isirael, tani bo kilomarit lomalaanu wara Yuda nyeeloma nakisech ngina. Tochoite ilomari akilip alo Giligal, kori nyiilot Betapen, kori nyiikong kaina alokiro a Ekapolon Akuj ana eyari. Ichanaka Ngisirael loger a ngisikiria alukaturonok. Apedori tokona ayong akitan kesi loger a ngimesekin aluuchik anachokor a? Emorikinosi Ngisirael ka ngakujo nasubuna. Kimiekisi kesi make. Aliworosi ajore a ngikelewak, talakaros alomalaanu, tojoikis ngileech akidwang arimatoi. Iwokorio kesi tosub ekutarit ekuwam, sodi kiruma ngileech kotere ngakipeyos kech na ipeyonokineta ngakujo nagelayek. Esi ngimurok, kiirasi nugu! Ngisirael, topupokisi! Esi lua awi a ekapolon, topupokisi! Totubo ngakiro eriyan. Iliworosi esi eloit alo Misipa, epuute lo epetakinitae moru a Tabor. Iliworosi akipany nakooyen alore a Aawoi, nakaneni kerirae ayong esi daang. Ayeni ayong Isirael, nyedukit Isirael anikang. Aliwor ngesi amalaat, nyitemokino ngitunga keng kelipete ayong.” Ngakiro naaronok esubete ngitunga, etengero kesi abongun nia Akuj kech. Atingia emalaanu kesi, nyeyenete kesi Ekapolon Akuj. Ekinis a Ngisirael alimo kesi. Ilegeuniyete ngisech kech kesi tadakaros, edakarosi aapei ka ngitunga a Yuda. Eyaanarete kesi ngisipaan a ngamesekin ka ngaatuk asakarea Ekapolon Akuj, nakaneni nyeanyunete ngesi, kainyo aisiki ngesi kesi. Nyeliworo kesi lu emunoi ani a Akuj, kainyo eraakasi ngide kech ngika elomit. Tokona bocha, ngisukukui kech lua elap emunyarete kesi ka ngamanat kech. Tokutakisi aamwara a ejie alo Gibea! Tokutakisi aburuch alo Rama! Tarama elii alo Betapen! Ngitunga a Benjamen, tolomasi lojie! Eliwor Isirael alaireng akolongit na a eriras. Ngisirael, esubakinosi nugu dir! Ebala Ekapolon Akuj kona, “Esiyotoosi ngikarikok a Yuda ekukuoru a akwap abukokini ayong kesi anyunyura kang loger a ngakipi. Ichiekiaritae Isirael, etikioritae anitubet ngakiro, kainyo aneikina ngesi ngakiro napasiek. Ekoni ayong ngakimam ani a Isirael, ekoni ajeme ani a Yuda. “Na engolikinea Isirael edeke keng, kingolik Yuda ngajemei keng, abu Isirael tolot Asiria atamar kengarak ekapolon loapolon, nakaneni nyitojoka ngesi kesi, kori nyitangalekino ngajemei kech. Agirakina ayong Isirael ka Yuda loger a engatuny. Ayong ilope atubonori kesi eala emiek kaneni. Ani eurukukuyori ayong kesi, emam itwaan eyuuni kesi. “Abongori ayong nipalem kang, tanang elimorete akisech kech, katasaka ayong. Tokona ngon mati ketinga ngichan, ngesi isiakineta akisak ayong.” Ebalasi ngitunga, “Potu, kapana atobongosi nia Ekapolon Akuj! Kainyo kiwan ngesi ngoni sodi kitangalekinio. Kiram ngesi ngoni sodi toenea ngajemei yok. Adaunet a ngirwa a ngiarei, kisikwaruni ngesi ngoni. Ani akolongit na ngauni, kiteyaru, sodi atoyareta alongaren keng. Potu atoyena Ekapolon Akuj, erichakinos lokojokon atoyena ngesi. Erai abunere keng niyok aka dir loger a abaiaret. Ebuni niyok loger a akiru, ee robo, loger a akiru ana a ngirupei ana itapapali ngalup.” Nakaneni ebala Ekapolon Akuj, “Anukiro kasubakinea esi Isirael ka Yuda? Amina kus anikang, ikoni edou lo ataparach, ikoni eloch lo engopiari nataparach. Kotere ngakiro nguna, ameu ayong ngikadwarak atotuborea kesi. Amunya ayong kesi a ngakiro a akituk kang. Ilereete ngakiro na asaki ayong. Kainyo asaki ayong amina na nyedaun, meere ngakipeyos a ngibaren. Asaki esi kitoyena ayong, akidwang akipeyonokin ngakipeyos na inomio. “Ani napei anangeta kesi nakwap a Adam, tosecha achamunet nakichamakin ka kesi. Nyeliworo kesi lu emunoi kaina. Erai Gilead ere a ngikasechak, ka ngikaarak. Echunakina ajore a ngimurok loger a ngirukooi alu edukito eperunito itwaan. Earete ngitunga eloose Chekem ni italeunitoe. Ee robo, nguna daang iyechakinito! Engolik ayong ibore niti kitubuli alo Isirael. Aliworosi ngitunga lu nyitaleuno ani ilipitotor ngakujo nagelayek. “Ani eliwor esi ngitunga a Yuda, atiaku ayong akolongit nakeriraa esi dang, kotere nguna isubete.” “Nacha asakea akitajakaan ngitunga kang Isirael, Nacha asakea akitangalekin edeke kech, kileereu aronis a Isirael, ka ngasechesea na esubete kesi. Ingalasi kesi make, ebwangete ngakais tokokoa, nabo etubonokin ngitunga alorotin tokokoa. Nakaneni nyitamunete kesi jik atamar etamunit ayong ngakiro kech daang naaronok. Nakaneni eriama ngasechesea kech kesi, tarai etee ayong kesi.” Ebala Ekapolon Akuj kona, “Italakanarete ngitunga ekapolon a ngakiro kech anaaronok esubete, kitalakasi ngikarikok a ngakiro anaaronok ana etukosi. Eraakasi kesi daang ngikalomak. Erirae arem kech loger a akim alokeno, ana imiekini akepon akikuny tanang ni idorokinio amugati. Akolongit a esukukuu a ekapolon, kilewa emuna ngesi ka ngikarikok luche, kitabangaania emuna kesi. Toriraut kesi a ngakiro ana etukosi loger a ekeno. Tonok angoit kech akwaar kiiya, ani iwalari toliwor asarae. “Kotere arirau a angoit kech, taara ngikapolok kech. Aar kesi ngikapolok kech daang a ngapei-pei, nakaneni emam tani itwaan ipei ni kelipi ayong jik.” Ebala Ekapolon Akuj, “Ikote Ngisirael amugati na nyibelukwaaritae, igienosi kesi ngitela lu iriamito kesi. Nyeyenete kesi atamar ademasi ngibukui kesi ngikilinga, nyeyenete atamar apena ngakorwo nakies kech. Ekinis a Ngisirael ngesi alimo kesi, tarai nyebonguno kesi nikang a Ekapolon Akuj ana arai Akuj kech. Ikoni Isirael akuuri. Ebangaana ngesi itwangi. Enyarit ngesi Misiri jiik, tokeri nia Asiria! Nakaneni apetakini ayong epuute esurum kesi eloose loger a ngikieny. Erirae ayong kesi kotere naaronok esubete. “Oitiakoi! Abe etioko nginyas eanyunete kesi, kainyo kaisikis ayong! Emunyario kesi, kainyo kangero kesi ayong! Adikino ayong ayuuni kesi, nakaneni kamodito kesi ayong. Nyekegoronokinete kesi ayong a ngitai kech, pearai iremasi kimasanakin nalup, loger a ngitunga alu nyeyenete Akuj. Esakete kesi ngikinyam ka emuna na ilipeta, edungudungosi loger a ngitunga alu nyeyenete Akuj. Kangerito kesi ayong! Ayong kolong etopolouni kesi etogogong, tarai kanyoikinito ayong anaaronok. Areasi kesi nia Baal, ikwaan kesi ka akau na emagul. Eario ngikarikok kech alojie kotere ekiwog a ngakituk kech. Ekianatar Ngimisiri kesi.” Ebala Ekapolon Akuj, “Tokutakisi aburuch! Atikokin ngimoe akwap kang loger a ngataruk! Kainyo ngitunga kang, echwangakis achamunet kang. Kegoronokinete kesi ayong ebalasi, ‘Akuj kosi, kiyeni sua Ngisirael iyong,’ tarai angero kesi naajokak. Kotere ngakiro nguna, irisete ngimoe kesi. “Aseunete kesi make ngikapolok, nyitoruno nikang. Toseut ngikarikok peayeni ayong. Tolemut ngakwangae kech ka egolit, tosubuneta ngakujo nasubuna, na inyasunete kesi ngikulepek. Ekoe Samaria, aremokino ayong itaok ni egolit ni ilipit iyong. Ketililito kesi ayong. Ori epalikineta kesi akilipit ngakujo nasubuna. Esubunit Esiraelit akuj na nyerai Akuj. Itaok ni egolit ni ilipitae alo Samaria, ebwangio kielar! Ani itakinete kesi ekuwam, elemete ekuwam lo ipiripiri. Ngikinyam lu nyielarete, nyekoniunete akimuj. Arai tokoniu dang, kenyamito ngitunga a akwap anache. Elikor Isirael ekwaanikin ka ngibukui luche, ekok agulu nabwangang. Esubi Isirael ngakiro keng a ilope loger a asikiria anakaturonon. Alot ngesi Asiria akingarakino. Atach ngibukui luche kiyokiyoto ngesi. Tani bo kegielara kesi lobukui, achunakini ayong kesi atipei erira. Eriabakinosi kesi nikaapilan na ichiekiarea ekapolon a Asiria kesi. “Kona adukioto Ngisirael ngikenoi a ngakipeyos lukaalak lu elemarere ngasechesea, alalaketa ngikenoi lu itosechete kesi. Arai kolong egir ayong ngitalio lukaalak kotere ngitunga lugu, kengerito tamasi ngigelayek. Eminasi kesi akipeyore ngakipeyos, ipeyoote akiring ani erumor tanyama. Nakaneni ayong Ekapolon Akuj nyalakara kotere kesi. Etamuni tokona ayong akisech kech, erira kesi kotere ngasechesea kech. Abuari ayong kesi Misiri toliworos ngikedalak kaina! “Aduko Ngisirael ngakais a ngikapolok, emuriak kesi Akasubunan kech. Aduko ngitunga a Yuda ngirerea lua ngawasea. Nakaneni ameuni ayong akim tonomia ngirerea ngulu, ka ngawasea kech nakaagongok.” Ee Ngisirael, warasi nyiilakarosi! Nyiichurokis loger a ngibukui aluche. Iliworosi esi lu nyikimunoi, ingero esi Akuj kus. Iminakis esi agialanot loger a amalaat, awadaang anidaet ngakanoi. Nyeringa ngitunga eanyunete akimuj anidaet ngakanoi ka nichiet emuna. Engopikini kesi emuna lokitetet. Nyidongete kesi nakwap a Ekapolon Akuj, pearai ebongorete Misiri, tanyama akimuj na italeo akinyam alo Asiria. Anakwap anagela kangina, nyelemikinete kesi Ekapolon Akuj ngakipeyos a emuna, kori nyitalakarete ngakipeyos kech Ekapolon Akuj. Ikokini akimuj kech na ngapunyas. Itwaan daang nicha enyami toliwor ni nyitaleuno. Eliwor akimuj kech aka akoro kech bon, nyeyaario kai a Ekapolon Akuj. Anukiro isubakinete esi na enangea ngirwa a esukukuu, akolongit a akimuj anakaalan a Ekapolon Akuj? Tani kepetarosi kesi tobucharos aloriras, echunakini Misiri kesi tonuk Mempis kesi. Ebari kech lo a ngakwangae, eliwor aka ngirega, ani ngawiyei kech, torup edoan kimuk. Apot ngirwa a eriras, toriamut ngitunga atachanot a ngakiro ana asubete. Eanyuni Isirael nguna na esubakinotor! Kotere alalau a ngasechesea kus, ka amoitanut kus, ibalasi esi, “Ebangaana ekadwaran, itwaan ni erikit etau a Akuj, ekoporito ngikerep.” Kameunit Akuj ayong arai ekadwaran, ekilak ngitunga keng Ngisirael. Tarai nicha etori ayong daang, kilokakinito esi ayong loger a ikeny. Nakwap a Akuj a alope ngesi iremitotor esi ekadwaran keng. Enyasunosi kesi lokojokon kotere naaronok esubete, loger lokolong asubete alo Gibea. Itamuni Akuj aronis kech, kirira kesi kotere ngasechesea kech. Ebala Ekapolon Akuj kona, “Aanyuni kolong ayong Isirael, loger lo eanyunere ngamusabib anariet. Engolikini kolong ayong taapaakech, loger lo egiparere ngameyana na ekoniunete ekingaren. Nakaneni ani epote kesi moru a Peor, kisiakis akilip Baal. Tarata kesi lukikadakinete loger lopei a ngakujo ana eminasi kesi. Eporori ekipur a Isirael loger a ikeny. Engopi akidounun alo Isirael, nyeringa nabo ngaberu epotiyete, nyeringa ngide epotiunio! Tani kitanut kesi ngide, alemari ayong nyeesidong tani ipei. Oitiakoi! Abe etioko nginyas eanyunete na aisikinea ayong kesi!” Engolik ayong ngide a Isirael irikao. Ejoikinit Isirael erikori ngide keng ni earere. Ekapolon Akuj, nyo atamari tosubakinea kesi? Kitokolupan kesi! Kitoonik ngisikin kech! Ebala Ekapolon Akuj kona, “Esiakini aronis kech daang alo Giligal. Inaa kolong aremokinor ayong kesi jik. Kotere ngakiro naaronok asubete kesi, eritari ayong kesi anakwap kang. Nyeringa nabo aminakini kesi jik. Ngikapolok kech daang kangero ayong. Ekok Isirael ekitoe lo etel, lo aoniyosi ngaten na alokwap, nyeringa ekoniuni ageor. Tani keureta kesi ngide, aari ayong ngide kech lu eminae.” Engeri Akuj kang ngitunga keng, kainyo nyiirara kesi ngakiro keng. Eliworosi ewowooto alokiding ngibukui. Ikote Ngisirael emusabib lo erait. Na iatakinor ajako kech, kiatakin ngikenoi a ngakipeyos dang. Na iatakinor akimuj nakwap, kitojokae ngapirio kech nakilipet dang. Eliokoko ngitai kech, kotere ngakiro nguna, kimiekisi kimadasi ibore ni esakete. Ebwangi Ekapolon Akuj ngikenoi a ngakipeyos kech, sodi kinyasu ngapirio kech. Etamarete tokona kesi, “Emam sua ekapolon, ani kiwounitor akiker Ekapolon Akuj. Ani bo dang, nyo adikino ekapolon kisubakinea sua?” Ingamangamasi kesi ngakiro pas, ikongete ngikong ka ngachamunet napasiek. Ngakiro na eriyan, etiliwosi na nyeriyan, aruput loger a edoan alokaaran alomana. Ngitunga a ere a Samaria emaranikinete kotere itaok ni egolit alo Besel. Ikalounete kesi ka ngimurok lu esubete etich a akuj kangina, ikalounete kotere ekipur keng lo angopia. Edakario akuj nasubuna ngina Asiria, toliwor ekod a ekapolon aloapolon. Isurumio Isirael ngileech kotere akuj keng nasubuna. Iwokorio ekapolon kech loger a ikitoe ani ilebolebo anakipi. Ngaitae na ilipeenere alo Apen, ni ilipeeneta Ngisirael ngakujo nasubuna, inyasunio. Erupunete ngiikwa ka edoan alokenoi kech a ngakipeyos. Etamarete kesi ngimoru, “Kidae” tamasi ngimukur, “Toukunos nikosi!” Ebala Ekapolon Akuj kona, “Etige Isirael, napei alorwa a Gibea, irubakinit iyong jiik isecheene. Kidoli iyong ejie alo Gibea. Etijikini ayong ngikasechak lugu, erira kesi. Imorikin ngibukui kitijikis kesi sodi kirirae kesi kotere ngasechesea kech nakaalak. “Ekoni kolong Isirael itaok ni itatamitae ni amina akipudaun ngikinyam. Sodi atoinik ayong akitoe lomosiring keng, etusub ngesi etich loationon. Echili Yuda ngalup, ikusakini Isirael ngalup. Atama ayong, ‘Tochil ngalup, kitak ateneanut, tolem ageor a amina ana nyedaun. Anang ni kisakunea iyong ayong, Ekapolon Akuj kon abu katobukok ayuuno.’ Nakaneni ibu iyong kitak aronis, tolem ngakiro na nyeriyan, tanyam ageor a alioko kon. “Kona igienor iyong ngaurukukui kon, ka alalau a ngasigerea kon, ebuni ejie lotunga kon. Inyasunio ngawasea kon nakaagongok daang. Ikokini akolongit nakolong enyasunea ekapolon Chalman ere a Besaribel alojie, kiriedarae ngide kata itiokech totoaka. Isirael, nguna kesi esubakinosi anikon kotere naaronok na isubak iyong. Napei cha isiakinea ejie, etoani ekapolon a Isirael.” Ebala Ekapolon Akuj kona, “Nakolong araakar Isirael ikoku, amina ayong ngesi, epud alo Misiri erai lokookang. Nacha anyaraa ayong ngesi, tachadar ngesi anikang. Epeyonokinete ngitunga kang Baal kinomanakis ngakujo nasubuna emitina Tarai ayong kolong etatami Isirael akichiakakin. Atadak ayong kesi a ngakan kang, nakaneni nyeyena kesi atamar etangalekini ayong kesi. Atorik ayong kesi a ngisien ka amina. Atadak ayong kesi atatapak natorobu kang, atokudokin etan kesi. “Ebongorete kesi nakwap a Misiri, epolokini Asiria kesi, kainyo awout kesi abongun nikang. Ekulauni akwara alorerea kech, tobwanga ngasua ngidorin kech, tomunya kesi anawasea kech ana edukitoe. Atiakut ngitunga kang arear anikang, isikalouni kesi eegos lo iwokito, nakaneni emam itwaan ikeuni anikech. “Isirael, ekokini ayong kajali iyong ai? Ekokini ayong kaisikini iyong ai? Ekokini ayong kamunyari iyong loger lokolong amunyarea Adma ai? Ekokini ayong kasubea iyong nguna kolong asubea Seboiim ai? Itimete etau kang ngakiro nguna! Etiono amina kamina ayong iyong! Nyekerirae ayong iyong a angoit kang. Nyamunyari ayong Isirael nabo. Kainyo arai ayong Akuj meere itwaan. Ayong na etaleuno, kirukit ka iyong. Nyabuni ayong nikon amunyar iyong. “Kewapakinete ngitunga kang ayong na erurumakinea ayong loger a engatuny, ani a ngimoe kech. Ikirukiruunosi ngide kang alo too potu nikang. Epote kesi alo Misiri ekerete tamaranete loger a ngikieny. Potu alo Asiria loger a ngakurio. Abuuni ayong kesi nawiyei kech. Ayong Ekapolon Akuj alimu nguna.” Ebala Ekapolon Akuj kona, “Keriam Ngisirael ayong kotere alioko a amodeanut. Eringa ngitunga a Yuda kangerito ayong, nabo nyakamunosi ayong, Akuj na etaleuno. Napei iwalarea tanang ebong, esubete Ngisirael ngakiro napasiek, na ikote akiyok ekuwam. Iasete kesi alioko ka amoitanut. Achamakinosi ka Asiria, kiwoko akimiet nagielara Misiri.” Isuburae Ekapolon Akuj ngitunga a Yuda. Irirae ngesi Isirael itemem ka elote keng. Etachakini ngakiro na esubete kesi. Apaakech lobe Yakobo elekasi ka lokaatokeng Esau anakook a itiokech. Ani epoloe kileka ka Akuj. Abu ngesi kisilek emalaikat kidwang, kigor ngesi esaki apiaro a emalaikat. Kiriamun ngesi ka Akuj alo Besel, kisuruor Akuj ngesi kaina. Ekapolon Akuj Namerikanyer, enyaritae ekiro keng Ekapolon Akuj Namerikanyer. Tokona bocha esi, tobongutu kingarakisi Akuj kus. Kirichakisi amina ka ngakiro na eriyan. Kidara Akuj kus inaikinito. Ebala Ekapolon Akuj kona, “Eraakasi Ngisirael ngimuchurus lu nyemunoi, eminasi akichiekiar luche a ngakitemiet ana alioko. Ebalasi kesi, ‘Tarai kibarit sua, kibaruni sua ngikulepek ebari kosi.’ Nakaneni ebari ngolo daang, nyepedori akitach akisech kech. Ayong Ekapolon Akuj na arai Akuj kus, nakolong kepuduni esi alo Misiri, ketolomi esi loeman nabo, loger lokolong ilomitotor anariet, ngirwa lu abunio ayong nikus. “Esuruori kolong ayong ngikadwarak, esuruor a ngakitadapet, etalala ngakisingolikinet kech, esitoru ngakisingolikinet lokadwarak. Ani keyei akisech Gilead, iteni etuborio. Ani keringa ngimongin ipeyeo alo Giligal, ngikenoi kech lukipeyoet, ikokinete ngamoru na etukokina naroatin.” Adokini kolong apaakosi Yakobo tolot nakwap a Mesopotamia. Tosub etich kaina taanyunea aberu. Kiyok ngamesekin kotere aberu. Ameari Ekapolon Akuj ekadwaran toyuu Ngisirael alo Misiri. Tochoikin kesi kotere emalaikat. Etongoa Ngisirael Ekapolon Akuj noi, ejoikinit kesi eario kotere akisech kech. Irirae Ekapolon Akuj kesi kotere ngileech lu ainut ngesi. Arai kolong na iruorikinea Epiraim, tamaranikis ngitunga. Epuroi ngesi alo Isirael. Nakaneni tosecha ngitunga kilipa Baal, kotere ngakiro nguna, etoakete. Arubakis kesi esechete, esubete ngakisikwaanet na itokeianario, ngakujo na esubunitae a ekunonoonu, tosubunae anakwangae. Kichieunae daang a ekunonoonu a ngitunga. Ani erumor tamasi kesi, “Kipeyonokisi ngakujo nugu! Tominakisi ngitak lugu!” Kotere ngakiro nguna, ikokinete kesi eloch lo a ataparach, kori ikokinete ngakop na engopiarete nataparach. Ikokinete ekuwam lo ekutario anapieset, kori apuru na itoruni lopuke. Ebala Ekapolon Akuj kona, “Arai ayong Ekapolon Akuj na arai Akuj kus, nakolong kepuduni esi alo Misiri. Nyiyenete esi Akuj ache pearai ayong. Emam esi ekayuunan eche pearai ayong. Ayong kolong kayeni esi anariet, anakwap ana akamu. Nakaneni ani inyakunete esi, kimwoko tajakaana, ipot esi kinisakinos sodi tojongoto akitamunit ayong. Kotere nguna, ekokini ayong anikus engatuny, katoperu alorot loger a eris. Katikokin ayong esi loger a ebu, alo edemaritae ngitak keng. Angarakakiari ayong ngatorobwo kus. Kanyami ayong esi loger a engatuny, katonyilinyili loger a ebu. “Ee Ngisirael, kamunyari ayong esi! Ngae epedori akingarakin esi? Aliwae tokona eyei ekapolon kus, bu kitoyuu esi? Aliwae eya ngikarikok kus daang aponere aikin esi? Ngulu kolong ibalasi esi, ‘Nakinae sua ekapolon, nakinae sua ngikarikok.’ Kalungak ayong esi ngikapolok, atolema kesi a anyunyura kang. “Ingadaaritae akisech a Isirael, imarunitae aronis keng. Ikoni ngesi ikoku ni nyeos ni ewouni apudun anakook a itiokeng. Alemikini ayong kesi ariwo nyeelomareta lokatoak a? Ayuuni ayong kesi anakitu a? Ee akitu, yau ngakiro kon naaronok! Ee akwap a ngikatoak, yau nginyas kon! Emam ayong ibore eringa kesieni. Tani kekilikil Isirael loger a atiriwae, ameuni ayong ekuwam lo a akide, lo ekutuni anariet, kitoon echwaa a Isirael, kijiwa ngileleae keng, tolema ibore keng daang niajokon. Itiri Samaria eriras keng, kainyo kangeri ngesi ayong Akuj keng. Eario ngitunga keng alojie. Etubitubiyo ngide kech luuchik, topuonoroe ngaberu kech na epotiyete.” Wae, Ngisirael, tobongutu nia Ekapolon Akuj ana erai Akuj kus. Kidaka esi akisech kus. Tobongutu nia Ekapolon Akuj, tolimokis ngesi ngakiro nugu, “Tolema akisech kosi daang, tacham akilip kosi. Kipuro sua iyong loger lokolong kilimunio. Nyepedori Asiria ayuun sua, nabo nyikiyuunete sua ngangolei. Nyeringa sua kitamari ngiborei lu kisubi sua ‘Eraakasi lugu ngakujo kosi.’ Nikon eanyuneta ngikokiok ngisien.” Ebala Ekapolon Akuj kona, “Etangalekini akiitiit a ngitunga kang, aminakini ayong kesi lokojokon, kainyo adaun angoit kang anikech. Ekokini ayong ani a Ngisirael ngakop, ekilikiluunete kesi loger a aturot. Ilijarosi ngaten kech nalup loger a ngikito a Babilon. Eliarito ngaten, ibusekearosi loger a ngikito a akimiet, tokukunyuut loger a ngichekereng a Lebanon. Ebongunete kesi pena lotorube kang. Ekilikiluunete loger a amana, taraa ageor loger a emusabib. Ekukunyuunete loger a emuna a Lebanon. Etige Isirael, nyo kon ngakujo nasubuna? Ayong katachanakini esi ngakiro ka akitere esi. Ekoni ayong edome lokaliban, nikang itorunit ageor kus. Nikang ebunitor apiaro kus daang.” Itwaan nicha eos daang, eyenuni ngakiro nugu. Itwaan daang nicha echwaana, toyen ngakiro nugu. Etenooko ngirotin a Ekapolon Akuj, iwapito lu etenooko kesi, toyareta. Nakaneni ilegeunete lukasechak tadakasi, ani nyemisitotor. Akiroit naga alimokini Ekapolon Akuj Yoel lo arai lokookeng a Pesuel. Kiirasi ngakiro nugu, esi ngikasukou. Topupokisi, ngitunga daang lu iyakasi Yuda. Eya ngakiro na ikote nugu na asubakinosi anikus nakanuan a? Kori ngirwa lukolong kata apaakus a? Tolimokisi ngide kus ngakiro nugu, elimokinete kesi ngide kech, tolimokis ngide kech alesit na iwapit nakech. Anyam emaase ngamanat a ngalooso. Ibore ni aisikini emaase lokatubon, tanyam emaase lokaalan. Ibore ni aisikini emaase lakaalan, tanyam emaase lo eporit. Ibore ni aisikini emaase lo eporit, tanyam emaase lokamunyaran. Esi ngikelewak, tonyoutu sodi kikalout, kigoro esi lukamatak emuna lo epuritoe, enyasun ngamusabib na epurere emuna lokitetet. Kainyo abu ajore a emaase nakwap yok, etiono ajore ngina nabo elal noi emam kona imarunio, ekwaka ngikel kech ikote lua engatuny. Enyasut kesi ngimusabib yok, nabo erikasi ngimeyana yok. Abolochiasi kesi ngikito, edong ngaten na alokidiama ekwangak. Kigoro loger a apese ana enapi ngiboro lu igoror na etoanea ekile lo edikino iusi ngesi. Emam ngakiria ka emuna lu ipeyeo alokai a Akuj. Ialolongete ngimurok a Akuj kainyo emam ngalemunet elemikinete Ekapolon Akuj. Emam ibore eringa eyei namanat, ialolongete ngalup kainyo enyasun ngikinyam, aoko ngamusabib nabo aoniyosi ngikito a akimiet. Kialolongo, esi ngiketak, kikaloutu, esi lu iyokiyete ngimusabib, kainyo enyasun ngakanoi ka erau, iteni dir enyasun ngalemet daang anamanat. Aoko ngimusabib ka ngimeyana atoniasi ngalam ka ngingolea ta ngikalalio. Ajongoto ngitunga alakara. Tanapa ngiboro lu igorore kikalout, esi ngimurok lu isubete etich alokeno a ngakipeyos a Akuj. Tolomasi kai a Akuj sodi kialolongo akwaar kiiya kiwala! Kainyo emam ngakiria ka emuna lu ilemikinete esi Akuj kus. Todungutu atamar toronoi akimuj, tanyarautu ngitunga lokiriam! Tochunakisi ngikarikok ka ngitunga daang a Yuda tochunakinos kai a Ekapolon Akuj ana erai Akuj kus sodi kikaloikis ngesi. Aapuu akolongit a Ekapolon Akuj, akolongit na eyaunea Akuj Naationon nginyas. Eroner noi ebuloi a akolongit kangina! Ikwa nyinyasuna ngamanat yok kitee ngoni a? Emam akiena ka alakara alokai a Akuj yok. Abosikis ngikinyam nalup nakoonok. Emam akimuj na ikachakinio lokerui, enyasun ngidulae, emam ibore eyei tooma. Eruosi ngaatuk eriabasi kainyo angopikis nginyia, ichanasi tani ngisipaan a ngamesekin. Kegoronokini ayong iyong Ekapolon Akuj, kainyo aoko nginyia ka ngikito, asubut kenomia akim. Kigoronokinete iyong tani ngitieng lu alomoding, kainyo aoko ngayana. Tokutak aburuch, taram eli, alo Sion emoru a etal. Tamaranikisi ngitunga daang a Yuda! Kainyo aapuu akolongit a Ekapolon akuj. Eliwor akolongit a aribu nabo kidiisikinite, epete ngidowon nabo kirioner akwap chuch! Ebuni ajore nakaalan a emaase, loger a aribu ana epetakin lomoru, elal ajore na emaase ngina noi nabo etiono, emam ibore iche ekok neni nakanuan, nakaneni emam nabo iche ni ikokini neni. Enyami emaase ngolo ngikito loger a akim. Ikoni akwap alongaren kech amana a Eden, ikoni akwap anaabor kech ariet nakoonon. Emam ibore ebuchi kesi. Ikwaan kesi ka ngangolei, nabo ekerete loger a ngangolei ana ejie. Ani na eporioto kesi tananga naitae a ngimoru, ikoni erue kech lo a ngakejen a ngaurukukui ana irito ngangolei, eruosi kesi loger a nginyia alu enomit akim. Erekina kesi loger a ajore anakaalan ana esukit ejie. Ebuli ngitunga na ingolikineta kesi, esechasi ngitunga daang ngireetin. Eloose kesi ngaren loger a ngitunga alu ejwoko, edokete kesi ngawasea loger a ngasigerea. Erubakinito daang eloose ngaren nakaneni nyereasi alorot, kori emam lo epedori akinang loche elosi epei kech daang iwapit erot keng, nakaneni emam ibore iratakini kesi. Ematarosi kesi lore, ekerete anawasea, edokete ngakais sodi tolomasi kitoro lopukei a ngakais loger a ngikokolak. Emaranikini akwap na eapuuneta kesi, emaranikini tani adis. Eribokini akolong ka elap, nabo tojongoto ngikanyer akicha. Ikeuni Ekapolon Akuj ngakiro na edungokini ngasigerea keng. Elalak ngasigerea na iwapito ngakiro keng, nabo etioko. Eliwor akolongit a Ekapolon Akuj naketubulon! Ngae epuun akolongit ngina? Ebala Ekapolon Akuj, “Tani tokona tolunga ngasechesea kus dir, tobongut nikang, ironeenete akimuj ka akigoro ta akialolong. Kikokisi ngitunga lu ibeleto ngitai kus, idodiunito akialolong kus, nyitemokino akichil ngiworui bon.” Tobongutu nia Ekapolon Akuj ana erai Akuj kus. Ejakaana ngesi nabo erai na a ngisien, nyengoyeene ngesi atipei, nabo iyoonokini ngakichikakinet keng, esaki ngesi jiik arimakin ngasechesea, meere akirirare. Kori robo epedori Ekapolon Akuj na erai Akuj kus akiloch ngakiro keng, sodi kitopia esi kiinak akimuj nakaalan, tolemikineta esi ngesi ngakiria ka emuna. Tokutakisi aburuch alomoru a Sion, tolimokisi ngitunga atamar torono akimuj, nabo tolimokis atamar kiriama wapei! Kisiriamariama ngitunga daang wapei, kisiriamariama kesi lokiriam a Akuj, yautu ngikasukou, kisiriamariama ngide, ka luuchik lu enakete. Tani ngitunga lu been aringa iutasi, ejoikinit eisikinete ngakais kech pot. Kimiekisi ngimurok lu esubete etich a Ekapolon Akuj alokiding ekeno a ngakipeyos a Akuj anikalapatan akai a Akuj, kikalout. Kimiekisi kilipa tamasi, “Torimak ngitunga kon Ekapolon Akuj. Tochoite ichamuni ngibukui luche kimenyete sua, sodi kitokianatar ebalasi, ‘Nyaani Akuj kech?’ ” Sodi tominak Akuj akwap keng, torimak ngesi ngitunga keng. Tatachak Ekapolon Akuj kesi tama, “Kainakini tokona ayong esi ngakiria, ka emuna ta akimiet, sodi kimwoko. Nyeringa nabo ngibukui luche kimenyete esi jik. Etwarakini ayong emaase lo abuni alokwap, atachada nialonan anikus. Etwarakini ayong ngiche kech toloto nariet. Itwarakinio ngajorei na ingarenete tolomasi nanam a Amakat. Ani ngajorei na isidiyete, itwarakinio tolomasi nanam a Mediterenian. Ebosunete ngawat kech nakatoak. Enyasuni ayong kesi kotere ngakiro daang na kisubeta kesi esi. “Esi ngalup, warasi nyikibul, nakaneni talakaros sodi tarama elale, kotere ngakiro daang na kisubea esi Ekapolon Akuj. Esi ngitieng, warasi nyikibul, elibito ngaroatin, akoniut ngikito ageor, nabo alalaketa ngameyana ka ngamusabib. “Talakaros robo ngitunga a Sion, talakaros kotere ngakiro daang na kisubea esi Ekapolon Akuj na erai Akuj kus. Kiinu ngesi esi akiru na a ngirupei na itemokino, kiinu ngesi esi akiru na a ngakiporosea na isiauni akiram ka na erami ekisidi. Ilelebun ngimomwa lojemu lu eramere, nakaneni ilelebun emuna ka akimiet loboro. Kabuakini ayong esi ibore daang nikolong erikari emaase anamanat kus. Ayong kolong ameuni ajore kang nikus. Ianyunete tokona esi akimuj nakaalan tanyama kimwoko. Ipuruunete esi Ekapolon Akuj na erai Akuj kus, na kisubea esi ngakiro naajokak noi. Nyeringa ngitunga kang imenyio nabo jik. Sodi toyena esi Ngisirael atamar ayei ayong kiding kus, nabo toyena atamar ayong Ekapolon Akuj, ngesi arai Akuj kus, emam Akuj ache. Nyeringa ngitunga kang imenyio nabo jik.” “Ani ekisidi, abukokini ayong itwaan daang etau kang, edwarete ngide kus lusapa ka lupesur. Irujaate ngikasukou kus, taanyungasi ngisorok kus ngakisingolikinet a Akuj. Ngirwa ngulu, abukokini ayong etau kang tani lokasubak etich kus lukiliok ka luberu. “Nakaneni asubi ayong ngakitoodikinet nakailiilok anadis ka akwap daang, epete ngaakot ka akim ta apir a apuru. Isirionio akolong chuch, erenger elap puu kikok ngaakot, eringa akolongit naationon noi naketubulon a Ekapolon Akuj nyenanga. Nakaneni ani itwaan ni ilipi enyarit ekiro a Ekapolon Akuj, eyuunio. Loger lo alimunio Ekapolon Akuj kona, ‘Epuunosi ngitunga ngiche alo Yerusalem, eyuunosi ngitunga lu aseuni ayong.’ ” Ebala Ekapolon Akuj kona, “Abuuni ayong ajokis a Yuda ka Yerusalem, ngirwa ngulu ka akolongit ngina, esiriamiriami ngibukui daang, sodi ayau kesi nadipo a Eriras. Erirae ayong kesi kaina kotere ngakiro daang na asubeta kesi ngitunga kang. Apetasi kesi Ngisirael nakwapea nagelayek, sodi totiakanakinos kesi akwap kang Isirael. Eleto kesi ngisigira esakete akiyen atamar, ngae anikech itiliwori ngitunga kang ngirikon keng. Agielarete kesi ngide lusapa togieleta ngamalaae, ani lupesur togieleta emuna lo epuritoe. “Nyo tokona isakete esi asubea ayong, esi Tiro ka Sidon, ta ngiwaitin daang a akwap a Pilistia? Eyei ibore kang isakete esi akitach a? Ani kitach, katachakini ayong esi atipei! Kainyo ilemasi esi ngaropiyae kang ka egolit, nabo iyaasi ebari kang nakais a ngakujo kus. Igielasi esi ngitunga a ngirerea a Yuda ka Yerusalem, igielakis Ngigirik ani isaketa achadar kesi anakwap kech. Abuuni tokona ayong kesi anakwapea ana kolong igielarete esi kesi. Kasubea ayong esi ngakiro nakolong isubeta esi kesi. Agielari ayong talokookus ka tanakookus, atogielak ngitunga a Yuda. Egielakinete kesi ngitunga a Sabea, lu eraakasi ngitunga a akwap ana elona noi. Ayong Ekapolon Akuj alimu nguna. “Tolimokisi ngibukui akiroit naga, ‘Tonyoutu lojie, tanyarautu ngikiliok lukajwok, tochunakisi ngasigerea kus daang tonyout toloto! Kitiaka ngasua nakiteat toliworos ngilengea lujiet, ani ngilengea lulemet ngamanat, kipenae toliworos ngakwaaras. Ejoikinit tani nipalag etamari, ‘Arai ayong ekajwon.’ Potu atipei ngibukui daang, tochununos alowaitin kadaang sodi atochunakinos nadipo.’” Tomeu kare Ekapolon Akuj ajore kon bu kitiji kesi. “Ejoikinit ngibukui daang enyounete, sodi potu nadipo a eriras. Eboikin ayong Ekapolon Akuj inaa, erira ngibukui daang lu echununa alowaitin kadaang. Eroko kesi noi, totubosi kesi loger a ngimomwa alu etubio na elemere ngamanat. Tochiutu loger a ngamusabib ana echiyo anibore anichiet emuna ileleba, tanang emuna lo epuritoe ipichun tobukor.” Eyakasi ngasepicho a ngitunga nadipo a eriras. Neni ngesi eapuunea akolongit a Ekapolon Akuj. Eribokini akolong ka elap, sodi tojongoto ngikanyer akicha. Irurumae Ekapolon Akuj alomoru a Sion, ikeari etoil keng alo Yerusalem, emaranikinete akwap ka adis. Nakaneni Akuj erai akaean a Ngisirael, nabo iyoki ngesi ngitunga keng. “Sodi toyena esi Ngisirael atamar ayong arai Ekapolon Akuj na arai Akuj kus. Eboi ayong alo Sion, alo erai emoru kang lo etal, Eliwor Yerusalem ere a etal, nyeringa nabo ngitunga a ngakwapea anache elemarete ere ngolo jik. “Ngirwa ngulu, ilelebun emuna lomoru, nabo toleleta ngakile alomukur. Epete ngakipi nakaalak nangololin daang a Yuda. Eleleuni eitanit alokai a Ekapolon Akuj, sodi tolelek adipo a Ngiwo. “Eliwor Misiri ariet, nabo toliwor Edom aro pas, kainyo etijiete kesi ngitunga a akwap a Yuda, sodi taara ngitunga lu amam ibore asechito. Nakaneni ibooyete ngitunga alo Yuda ka Yerusalem nakajik, ebusi ayong ngaakot alo aario. Nyemiekini lu esechito. Nakaneni eboikin ayong, Ekapolon Akuj moru a Sion.” Eraakasi ngakiro nugu ngaka Amos alo arai epei a ngikeyokok a ere a Tekoa. Ngikaru ngiarei eringa arikirikokin a akwap, kidodik Akuj Amos ngakiro nugu kotere Isirael, ngirwa lu araakar Usia ekapolon a Yuda, tarai Yeroboam lokookeng a Yoach ekapolon a Isirael. Tolim Amos tama, “Irurumae Ekapolon Akuj alo Sion, egiro etoil keng alo Yerusalem. Aono achokor, aoko nginyia alomoru a Karimel.” Siria Ebala Ekapolon Akuj kona, “Kona esecheeneta ngitunga a Damasko jiik, nyabuari ayong eriras kech, kainyo epudaarete kesi ngitunga a Gilead a amoitanut. Kotere ngakiro nguna, ameuni akim kai a ekapolon Asael, sodi enom ngawasea nakaagongok a Benadad. Abwangabwangaari ayong ngidorin a Damasko, atolema ngitunga lu ibooyete anadipo a Apen ka ekapolon a Beseden. Erikio ngitunga a Siria tarata ngirikon anakwap a Kir.” Pilistia Ebala Ekapolon Akuj kona, “Kona esecheeneta ngitunga a Gasa jiik, nyabuari ayong eriras kech, kainyo ewokorete kesi ngitunga etia ni etia, togielasi lotunga a Edom toliworos ngikedalak. Kotere ngakiro nguna, ameuni ayong akim nawasea a Gasa, tonomia ngawasea keng nakaagongok. Ekisari ayong ngitunga lu elomito lore a Achidod, ka lu epolokinito ere a Achikelon. Erirae ayong ere a Ekiron, emunyario Ngipilisti lupiyayek daang.” Tiro Ebala Ekapolon Akuj kona, “Kona esecheeneta ngitunga a Tiro jiik, nyabuari ayong eriras kech, kainyo arikete kesi ngitunga etia ni etia togielasi lotunga a Edom, nyiitamut kesi achamunet a ekaitotoonu nakolong ekongete kesi. Kotere ngakiro nguna, ameuni ayong akim nawasea a Tiro tonomia ngawasea keng nakaagongok.” Edom Ebala Ekapolon Akuj kona, “Kona esecheeneta ngitunga a Edom jiik, nyabuari ayong eriras kech, kainyo erisete kesi talokaatokech a ngakwaaras, emam ngisien. Totinenik angoit kech eyei, ee robo, torubak anyunyura kech jik. Kotere ngakiro nguna, ameuni ayong akim lore a Teman. Enomi ayong ngawasea nakaagongok a Bosira.” Amon Ebala Ekapolon Akuj kona, “Kona esecheeneta ngitunga a Amon jiik, nyabuari ayong eriras kech, kainyo apuonorete kesi ngaberu na epotiyete na alomito Gilead alojiesinei alu asaketa anyaar ngikukuorin kech. Kotere ngakiro nguna, ameuni ayong akim nawasea a Raba, tonomia ngawasea keng nakaagongok. Emini echale akolongit na ejie, toneteun ejie loger a ekuwam aloapolon. Erikio ekapolon kech aapei ka ngikarikok keng.” Ebala Ekapolon Akuj kona, “Kona esecheeneta ngitunga a Moab jiik, nyabuari ayong eriras kech, kainyo enomete kesi ngakoyo a ekapolon a Edom toliworos ekuron. Apot nyeeriakas ekasian ngolo. Kotere ngakiro nguna, ameuni ayong akim nakwap a Moab, sodi enom ngawasea nakaagongok a ere a Kerios. Etoakete Ngimoab alochale a ejie, alokiding akirema ka erue a aburuch. Atubori ekapolon alokiding kech ataar ngikarikok a akwap daang.” Yuda Ebala Ekapolon Akuj kona, “Kona esecheeneta ngitunga a Yuda jiik, nyabuari ayong eriras kech, kainyo angero kesi etal a Ekapolon Akuj, nyirichakina ngakitatamet keng. Etooliyosi ngakujo na alioko kesi, nakolong ewapito taapaakech lungorok. Kotere ngakiro nguna, ameuni ayong akim nakwap a Yuda, tonomia ngawasea nakaagongok a Yerusalem.” Ebala Ekapolon Akuj kona, “Kona esecheeneta Ngisirael jiik, nyabuari ayong eriras kech, kainyo agielanarete kesi ngulu etenooko, lu akuruwori akitach ngamichae kech. Egielanarete lukebootok lu akuruwo akitach ngaropiyae a ngamuk. Ipudaate kesi lukebootok loger a apua. Ijukarito lu ichanasi alorot. Iteperete ekile ka apakeng akedalan apei, ani aloger kangolo, kinyasut ekiro kang lo italeuno. Eperete kesi alokenoi a ngakipeyos kadaang, topetakis ngiworui lu edemunitae ngikebootok idaritere tatacheta ngamichae. Alotooma akai a akuj kech, emaase kesi emuna lo idiaunete alotunga alu earito ngamichae kech. “Tarai kolong amunyari ayong Ngiamor kotere kesi. Ngiamor lu aoyak loger a ngichekereng togogong loger a ngichokei. Enyasu ayong ageor alokidiama ka ngaten na ngalup. Kepuduni kolong ayong esi alo Misiri, katorik anariet a ngikaru a ngitomwon-omwon sodi tolemareta akwap a Ngiamor. Aseuni kolong ayong talokookus ngiche toliworos ngikadwarak, ani ngisorok kus ngiche toliworos lu ikongito akitaleun ani a Akuj. Peekote neni dir Ngisirael a?” “Nakaneni ngitunga lu ekongito akitaleun ani a Akuj, ipot esi kitamata emuna, dio todungokis ngikadwarak tamasi, ‘Nyiidwar.’ “Kingolikisi, katikokini ayong esi nalup, loger a aurukuk ana inuito ngalemet. Edolio tani lukapiranak, elilimiyorete lua ngikilinga, nyeyuunosi tani lukajwok. Nyeweikini ekajwon a ngimalea a amod. Nyeyuun tani ni epirana, kori nyeyuun tani ni emeat angole. Tani asiger nakaadengan alokiding luche lukajwok, echakakini ngiboro nalup tamatar akolongit ngina. Ayong Ekapolon Akuj alimu nguna.” Ee Ngisirael, topupokisi akiroit naga, na alimu Ekapolon Akuj kotere ebukut lokolong epuduni ngesi alo Misiri. “Esi make kayeni ayong alobukui a ngakwapin kadaang. Kotere ngakiro nguna, kerirae ayong esi kotere aronis kus daang. “Enyounete ngitunga ngiarei alotoru peetukito sek akiriamun a? Irurumakini engatuny anamoni peirumunit ibore a? Ingoorakini itaok a engatuny ani eurenea peirumunit ibore a? Isurumi eloit ikeny peelokakinitae a? Edetakin eloit peisurumit ibore a? Ekutakinio aburuch a ejie alore peemito ngitunga a? Epote ngakiro naaronok lore peerai Ekapolon Akuj emeunit a? Iteni Ekapolon lo erai Ekapolon Akuj, nyesubakini ngakiro nyidodikina ngikadwarak, lu eraakasi ngikasubak etich keng. Na irurumakinea engatuny, ngae nyeemi? Na iruorikinea Ekapolon lo erai Ekapolon Akuj, ngae nyedwari?” Tolimokisi lu elomito nakais a ngikapolok alo Achidod ka Misiri kona, “Tochunakinos lomoru lu iriamito akwap a Samaria, kingolikis ekurikur lo eyei neni, ta ngitunga lu ichiekiaritae kaneni.” Ebala Ekapolon Akuj kona, “Nyeyenete ngitunga lugu akisub ngakiro na iyookino. Ngiboro lukokoa ka lu edemunitae ngitunga kesi ilelebito nakais kech naapolok. Kotere ngakiro nguna, iriamete ngimoe akwap kech, tobwanga ngawasea kech nakaagongok, sodi tokokoa ngakais kech naapolok.” Ebala Ekapolon Akuj kona, “Eger lo ekopunio ekeyokon ngakejen a ibarasit ngaarei, kori echilet a akit a ibarasit anakituk a engatuny, eger lopei ngolo eyuunere Ngisirael lupiyayek lu elomito Samaria. Ngisirael lu tokona ileteletasi alokicholongo aluapolok ajokak.” Ebala Ekapolon Akuj na irai Akuj Namerikanyer, “Kiira sodi kichikichik ngalesea a Yakobo, atamar akolongit na eriraa ayong Ngisirael kotere ngasechesea kech, enyasuni ayong ngikenoi a ngakipeyos lu eyakasi Besel. Etuborio ngaamwar a ngikenoi tachakakin nalup. Ayatari ngakais na akiporo aapei ka na akamu. Eukorio ngakais na itokorianitae a ngikel a etom. Inyasunio ngakais naapolok daang. Ayong Ekapolon Akuj alimu nguna.” Topupokisi ngakiro nugu, esi ngaberu a Samaria, na itumito kwa ngaatuk a akwap a Bachan na enakunito. Iboliatar esi lu ibato ngakan, kichiekiasi ngikebootok, kisuruorete talokilekus ibalasi, “Inunae sua emuna atamata!” Ekong Ekapolon lo erai Ekapolon Akuj anakitaleuno keng ebala, “Eponito ngirwa lu kiurukukuorere esi a ngikodo, kikokis esi daang ngikolea alokodo. Kisitorio esi lopukei, itwaan daang kidooria lopuke kimasar nikalapatan.” Ebala Ekapolon lo erai Ekapolon Akuj, “Ngisirael, potu robo Besel tosecha. Kapesi Giligal kiatakis akisech. Kasiosi yautu ngibaren kipeyoto ataparach daang kipotonosi ngalemunet adaunet a ngirwa a nguuni kadaang. Kasiosi tolemikisi Akuj ngamugati kus toliworos ngakipeyos nabuakinet alakara. Kiwojokinotor kwa napalem sek iminatar akiwojo! “Ayong kolong etongopi akimuj alorerea kus nyiijapareta esi ngakituk, nakaneni towout esi abongun nikang. “Ayong kolong eratakini akiru nyeeram tarai edongit ngilapio nguuni tolemae ngamanat. Toliwor ameuni akiru lore epei, tongop alore aloche. Toliwor ameuni akiru mana apei, tooniyo amana na nyeriamuna akiru. Kirit akure ngitunga alorerea a ngiche, tasakasi ngakipi lore lopei, takada kesi ngakipi. Nakaneni towout esi abongun nikang. “Abu ayong katopet esi a eron a akoro ka eloch. Etoon ayong ngimanikorea kus ka ngamanat a ngimusabib. Kirikasi ngimases ngimeyana ka ngikito kus a akimiet. Nakaneni towout esi abongun nikang. “Atomeu edeke loaronon nikus lo ikwaan ka lokolong a Misiri, ataar ngisorok kus a akwara, atolema ngangolei kus. Etuup ngikumes kus ebose a ngawat anakatoak. Nakaneni towout esi abongun nikang. “Abu ayong atomunya ngiche kus loger lokolong amunyarea Sodom ka Gomora. Ani esi lu ibuchunosi anidiochichi, ikwaan ka akitoe na akopunio anakim. Nakaneni towout esi abongun nikang. Ee Ngisirael, tokona bocha, kasubakinea ayong esi nugu. Ani aloger kasubakinea nugu, kasiosi robo kiteutu Akuj kus!” Akuj kolong asubuni ngimoru, tosub ekuwam. Ngesi idodeanakini itwaan ngitamen keng. Ibele apaaran toliwor akwaar, ipudae ngesi ngaitae a akwap. Enyaritae ngesi Ekapolon Akuj Namerikanyer. Ee Ngisirael, kiirasi akiroit naga nakaeonokini ayong esi egoro: Adakar, nyeringa enyouni, Isirael na ikwaan ka apese. Emiekin eperi analup, angop itwaan itonyouni. Ebala Ekapolon lo erai Ekapolon Akuj, “Ere a Isirael lo emeari ngasigerea abunget apei lojie, ebongunete ngasigerea amiat apei. Ani lo emeari ngasigerea amiat apei, ebongunete ngitomon.” Isuruori Ekapolon Akuj Ngisirael ebala, “Tasakae ayong sodi toyara. Nakaneni nyikisakasi ayong Besel, nabo nyiilomasi Giligal kori nyiituborosi toloto Beer-cheba, kainyo erikio ngitunga a Giligal, nabo eliwor Besel pas.” Tasaka Ekapolon Akuj toyara, nyeenganyunor loger a akim tomunya Ngisirael. Tonomia ngitunga a Besel tongop itwaan itudunge. Wae! Ibatasi esi ngakiro na eriyan adwaraketa ekokis apid, ipudaasi nguna etenooko! Ekapolon Akuj asubi ngikanyer, tosub ngakanyer ka ngikaremok. Ibelukaanari ngesi aribu nakirion toliwor ataparach, kitiribok apaaran toliwor akwaar. Enyaraununi ngakipi a nganamea, tobukok nakwap. Enyaritae ngesi Ekapolon Akuj. Isimiliaununi nginyas totikokin lua ngikilinga, kinyasu ngawasea kech nakaagongok. Iremito esi itwaan ni ikilaari ngakiro na nyeriyan, iremito itwaan ni iruoro iteni. Ipudaasi esi lukebootok idemasi ngalemet kech. Todukito ngakais a ngamoru ana ibesitae. Kotere ngakiro nguna, nyilomete esi nakais na iduko esi a ngamoru ana ibesitae, kori nyimaase emuna a ngamanat anaajokak a ngimusabib ana itakinito esi. Kainyo ayeni ayong alalau a ngasechesea kus ka aronis a ngasechesea kus. Esi lu iboliatar lu etenooko, tolemete ibore nikidiakitere, toreasi lua ngichan anakiro ana eriyan. Kotere ngakiro nguna, ililingi itwaan ni echoikina ngirwa ngulu, kainyo eliworosi ngirwa luaronok! Tasaka naajokak toyareta, meere naaronok. Sodi kirukioto esi ka Ekapolon Akuj Naationon loger lo ibalatar kirukit. Toremokinos naaronok, tominakis naajokak. Kirichakisi nguna eriyan alokesio. Tokona ngon, Ekapolon Akuj Namerikanyer, isieniyete Ngisirael lupiyayek. Ebala Ekapolon Akuj Namerikanyer, “Emini akiutere lowaitin daang a ere, etamario alorotin kadaang a ere, ‘Oitiakoi kare! Oitiakoi kare!’ Enyaraunio tani ngiketak kigoro, aapei ka ngikunonoi a akigoro. Emini akiutere namanat a ngimusabib daang. Esubakinosi nguna daang na etorunio ayong kiding kus.” Alimu Ekapolon Akuj nguna. Wae, abe etioko ngakiro eanyunete ngitunga lu imuit akolongit a Ekapolon Akuj! Nyo kiinuni esi akolongit a Ekapolon Akuj? Erai aribu, meere akicha. Ikwaanikin ka itwaan ni ematara alongatuny ani eringa kituturiakin ebu! Kori ikwaanikin ka itwaan ni elomuni kai, ani eringa egongakin losiep a akai, tokony emun! Akolongit a Ekapolon Akuj, eyauni aribu, meere akicha. Irioner akolongit ngina, nyimauni akwangis. Ebala Ekapolon Akuj kona, “Aremokino ayong ngikiriamisea lua akilip kus, kakadakinito ayong nyakajoikinito. Tani kilemikis esi ayong ngakipeyos kus na inomio ka ngalemet, nyachamuni ayong. Ani ngibaren luatumak ipeyoenete esi eraakasi ngakipeyos a ekisil, nyengolikini jik. Tachadasi echale a ngieosio kus anikang, nyapupokini erue a ngagitae kus. Nakaneni kimiekisi ngakiro na eriyan toleleta loger a ngakipi. Ani ateneanut tolele loger a angolol ana ileleba. “Ee Ngisirael, ayakasi kolong sek ngakipeyos kipeyonokinete esi ayong ngikaru lutomwon-omwon anariet a? Totinga tokona ngakujo kus na isubakis esi, nabe Sakus na erai ekapolon ka Kaiwan na erai akuj nakanyerit. Kotere ngakiro nguna, ketiliwori ayong esi ngirikon kitorikor yaaye Damasko.” Ekapolon Akuj na enyaritae Akuj Namerikanyer alimu nguna. Oitiakoi! Abe etioko nginyas eanyunete ngulu eyakasi najako alo Sion, ka ngulu ibooyete akaalimon alomoru a Samaria, esi ngitunga lu kiyenikinitae anakwap kana ana eyenikinitae anakwapea kadaang, lu erai nikus emotuununosi Ngisirael! Kapesi kingolikisi ere a Kaline, ani erumor toloto lore loapolon lobe Amas, sodi toremoros lore a Ngipilisti lobe Gas. Ejokak kesi akidwang Yuda ka Isirael a? Epol akwap kech akidwang nakus a? Wae! Itolonito esi akolongit naaronon ngina, tarai itaapuunito a ngakiro ana isubete. Oitiakoi! Abe etioko nginyas ianyunete esi lu iperete alokitandae alu itokorianitae a ngikel a etom, lu itorwaanarete ngawat alokicholongo aluapolok, tanyamete akiring a ngimesekin aluuchik ka na ngitak. Iminasi esi akirok ngieosio loger lokolong a Daudi, tosuba ngagitae na eeore. Imaase esi emuna a ngatubwae, kiwasas ngamieta nakaakunyok, tarai nyigorosi esi kotere nginyas a Isirael! Kotere ngakiro nguna, iliworosi tokona esi lu ekingaren kirikio. Esalunete ngisukukui kus ka ngajakoi. Ekapolon Akuj Namerikanyer, ekong a ekiro keng ebala, “Kakadakinit ayong ekinis a Ngisirael, aremokino ayong ngakais kech naapolok, epotokini ayong ngimoe ere kech loapolon ka ibore daang ni eyei tooma.” Ani keyakasi ngikiliok ngitomon lu idongito nawi apei, etoakete daang. Eyenet a itwaan ani atoana, ni erai ngesi enuki akwaan, ipuduni akwaan alokai. Ingisi ngesi itwaan ni eringa eyei kai tama, “Eyei itwaan iche eringa irukito ka iyong a?” Tatachu ni eyei kai tama, “Mam.” Sodi tolim eyenet tama, “Kililing! Atochoito kilimuni tani ni erai ekiro a Ekapolon Akuj.” Kainyo napei cha edungunio Ekapolon Akuj akiroit, eukorio ngakais naapolok ka naachik kielaros. Eporeenete ngangolei anatabab a? Echileenete ngitunga anam a ngimongin a? Nakaneni ilocho esi ngakiro na eriyan aliworosi akisierit nakaaran, ani ageor a ateneanut kisikokis apid. Iwojosi esi ani ilemareta Lodebar. Ibalasi esi, “Eyakasi sua ngikilinga lu kilemarea ere a Karnaim.” Ebala Ekapolon Akuj Namerikanyer, “Ee Ngisirael, kingolikisi a, etonyouni ayong ebukut torem akwap kus, kichiekiarete kesi esi napei anapak a Amas alokwap, tanang nangolol a Araba alokuju.” Ngakiro nugu kedodikini ayong Ekapolon lo erai Ekapolon Akuj. Engolikini ayong ngesi esubuni ngimases arumoret a nginyia a ekapolon atuboro toruput lukiteat. Na engolikinea ayong ngimases irikarete ibore nikaliban a akwap daang, atolim ayong atama, “Wae Ekapolon lo irai Ekapolon Akuj, kemaimai kare iyong! Torimak ngitunga kon. Ikokinete Ngisirael epuunosi ai? Ediseak kesi nabo epalag!” Torei Ekapolon Akuj anakiro kanguna tama, “Mam, nyesubakinosi nguna.” Ngakiro nugu kedodikini ayong Ekapolon lo erai Ekapolon Akuj. Engolik ayong ngesi enyarauni eriras a akim, tonomia anam naapolon nabo tonomia akwap. Sodi atolim ayong atama, “Wae, Ekapolon lo irai Ekapolon Akuj, kemaimai kare iyong! Torimak ngitunga kon. Ikokinete Ngisirael epuunosi ai? Ediseak kesi nabo epalag!” Torei Ekapolon lo erai Ekapolon Akuj anakiro kanguna tama, “Nyesubakinosi tani nguna.” Kedodik ayong Ekapolon nugu. Engolik ayong ngesi ewei alokwaas a awas ana adukitoe itemitoe a auno anakitemiet. Atingit ngesi auno ngina a akan keng. Kengit ngesi ayong tama, “Amos, nyooni itee iyong?” Atatachu ayong atama, “Auno nakitemiet.” Sodi tolim ngesi tama, “Kingolik a, alemuni ayong auno naga kidodiu atamar nyeteniyete kesi. Nyeringa nabo ayong alakakini kesi nyirira. Ni ilipeeneta ngalesea a Isaka itiliworio alaireng. Ni ilipeeneta Ngisirael, itiliworio asakatan. Anyoikini ayong awi a ekapolon Yeroboam atomunya a akwara.” Ani erumor tomea Amasia lo arai emuron a Besel ngitunga nia Yeroboam alo arai ekapolon a Isirael tama, “Kitukor iyong Amos ngakiro naaronok alokiding ngitunga kon. Akuruwosi ngitunga ngakiro keng nakenyasunak. Ebala Amos kona, ‘Eari akwara Yeroboam, eliworosi Ngisirael ngirikon torotokis anakwap kech.’ ” Sodi tolimok Amasia Amos tama, “Ee ekadwaran, kape tobong nakwap a Yuda, kape todwar kaina kimujea. Tochoite nabo idwari alore alo a Besel kalo, kainyo erai nege ni ilipeenea ekapolon nabo erai akai na ilipeeneta ngitunga a akwap kana.” Tatachak Amos Amasia tama, “Meere ayong ekadwaran, kori nyarai ayong epei a alu a atukuoru a ngikadwarak. Arai ekeyokon a ngibaren nabo arai eketeon a ngikito. Nakaneni kalemari kolong Ekapolon Akuj ayong anakiwapit ngibaren, katolimok tama, ‘Kape todwar alotunga kang, Ngisirael.’ Tokona bocha, kiira akiroit a Ekapolon Akuj. Abe ibala iyong ayong, ‘Nyiidwar ani a Ngisirael. Tojongo alimitor ngalesea a Ngisirael ngakiro naaronok.’ Tokona bocha Amasia, ebala Ekapolon Akuj ngakiro kon kona, ‘Eliwor aberu kon amalaat alore, eario talokookon ka tanakookon a akwara, tokorakinae akwap kon ngitunga luche. Itoanikini iyong ilope nakwap na nyitaleuno. Erikio Ngisirael dir nakwap ache, torotokis anakwap kech.’ ” Kedodik ayong Ekapolon lo erai Ekapolon Akuj ngakiro nugu. Engolik ayong akikap a ageor. Kengit ngesi ayong tama, “Amos nyooni itee iyong?” Atatachu ayong atama, “Akikap a ageor.” Sodi katolimok Ekapolon Akuj ayong tama, “Adolu esal a ngitunga kang a Ngisirael. Nyeringa nabo ayong alakakini kesi nyirira. Akolongit ngina, ilochosi ngieosio a akai a ekapolon toliworos akiutere. Epetakinosi ngawat nakatoak wadaang. Echakario nikalapatan ekiilingat.” Topupokisi esi lu ibato ngakan, tasakete amunyar ngikebootok anakwap, ibalasi, “Kori edaunor esukukuu a ngirwa alu eanyungarere elap, atogielareta ngikinyam yok. Ori edaunor akolongit a Sabato esiakisi egielit yok? Sodi engalata ngitunga a ngakitemiet ana alioko, elocho ngakitemiet engalaata ngikagielak. Atogielasi ngakanoi ngadikidio a ngaropiyae anakaalak. Atasakutu ngikebootok ngidi lu epiyo akitach ngamichae kech, lu epiyo akitach tani ngamuk nadetae, atogiela kesi toliworos ngikedalak yok.” Ekong Ekapolon Akuj ngina iwogar Isirael, ebala, “Iteni, nyekemuriakinete ayong ngakiro na esubete kesi. Kotere nguna, erikirikokini akwap, tosutonok itwaan daang ni eyei nakwap. Emaranikini akwap daang, ekurupupuuni sodi todipaar nabo loger a angolol a Nili alo Misiri.” Ebala Ekapolon lo erai Ekapolon Akuj kona, “Akolongit ngina, etodooyori akolong naparan lotingilan etiribok akwap naparan. Elochi ngisukukui kus tarata asutonokin, elochi ngieosio kus daang tarata akigoro. Ketanapi esi ngiguniae anaaborin, sodi ketulur. Kesikwaanikini esi ka ngikauriak lu igorosi ani atoanea idia ni idounitoe erai ipei bon. Eliwor akolongit ngina aka apipilu tanang losal. “Eponito ngirwa lu ayaunea ayong eron a akoro nakwap. Meere robo akoro a akimuj kori meere akure a ngakipi, pearai nakiiraret ngakiro a Ekapolon alo erai Ekapolon Akuj. Elomarete ngitunga awowoot napei ananam a apei tanang nache, napei alokwap tanang kide. Eliworosi ateni ama, ateni ama, esakete akiroit a Ekapolon Akuj, nakaneni nyeanyunete. “Akolongit ngina, iridakinete ngisorok lukiliok ka luberu lu ekilikilete kotere akure. Ngulu ikongete a ngakujo a Samaria ebalasi, ‘Ekong tani Akuj a Dan,’ kori ‘Ekong tani Akuj a Beer-cheba,’ edakarosi ngitunga ngulu nyenyounete nabo.” Engolik ayong Ekapolon Akuj ewei alokwaas a ekeno a ngakipeyos. Tolim ngesi tama, “Taram ngakies a ngapirio a akai a Akuj sodi tamaranikis ngatoroma, toukok ngapirio nguna nakies a ngitunga. Ani ngulu idongete ataar a akwara nyeebuchar tani ipei, nyeepuun tani ipei. Tani keboka ngapanya toloto lokatoak, edoli akan keng kesi tout. Tani kedokasi nadis, atiyauni ayong kesi. Tani keduka anaita a emoru a Karimel, asakari kesi erum kaina. Tani keduka kesi anituluk a anam, adungokini emun loapolon a anam tokony kesi. Tani keriko ngimoe tarata ngirikon, adunguni atamar taarae a akwara. Ayong cha ka kesi jik anaaronok, meere anaajokak.” Ekapolon Akuj Namerikanyer, etapi ngalup torikirikokis. Kikalout daang lu elomito neni. Ekurupupuuni akwap daang todipaar nabo loger a angolol a Nili alo Misiri. Edukit Ekapolon Akuj awi keng nadis, tarap akwap a adis. Echunanakini ngesi ngakipi a nganamea sodi tobukok nakwap. Enyaritae ekiro keng Ekapolon Akuj! Ebala Ekapolon Akuj kona, “Ngisirael, nyo kitiakit esi ka ngitunga a Kuch*g** anikang? Pekelong epuduni ayong Ngipilisti alo Kirete, epud ngitunga a Siria alo Kir, loger lo kepudunio esi alo Misiri a? Kingolik a, iteete ngakonyen a Ekapolon alo erai Ekapolon Akuj, iteete apolou a Isirael nakasechan. Enyasuni ayong ngesi tongopia anakwap. Nakaneni nyamunyari ngalesea a Yakobo daang. “Kingolik a, adunguni ayong akiroit, eakaekak Isirael alokiding ngibukui, loger a ngikinyam anapieset atolema luaronok daang. Ngikasechak daang alotunga kang, eari akwara, ngulu kesi lu ebalasi, ‘Nyikiriamun ka naaronok.’ ” Ebala Ekapolon Akuj kona, “Enangi akolongit na etonyounio ayong apolou a Daudi na ikoni akai na aukor. Adukokini ayong ngikwaasea keng, atobuak loger. Adukokini ayong tobong loger lokolong keng a angorot. Sodi tolemareta Ngisirael akwap a Edom nasek edongit, ka ngibukui daang lukolong araakasi ngikang.” Ekapolon Akuj alimu nguna, nabo esubakini nguna. Ebala Ekapolon Akuj kona, “Eponito ngirwa lu ekokioto ngikinyam atipei akidwang ngirwa lulemet. Ekokete ngamusabib nakaalak noi na engopi tani kona echiunere emuna. Idokudokuun emuna lokitetet alomoru alu erupunitotor ngimusabib, eleleuni emuna ngolo alomukur. Abuakini ayong ngitunga kang Ngisirael ekeny kech, toduko kesi nabo ngirerea lukolong enyasuna tokitetenuut, sodi toloma neni. Itakinete kesi ngamanat a ngimusabib tamata emuna kech. Itakinete ngamanat tanyama ngalemet. Adupakini ayong ngitunga kang nakwap kech, nyeringa kesi nabo editunio anakwap ana kolong ainakini ayong kesi.” Ekapolon Akuj na erai Akuj kus alimu nguna. Ngakiro na adwari Obadia nugu. Eraakasi ngakiro na alimuni Ekapolon lo erai Ekapolon Akuj kotere Edom. Kiira ngoni ngakiro na ayaunio ani a Ekapolon Akuj. Ameun emeanara lobukui, ebala, “Tonyoutu! Tonyoutu etijikisi Edom!” Isuruori Ekapolon Akuj Edom ebala, “Ayoro, ketiditeuni ayong iyong alobukui, kimenyario daang iyong. Kingal iyong ekinis kon, idukit ere loapolon natabab nakaagongok, ilomit iyong kidiama lomoru, sodi tolim alotau kon tama, ‘Ngae katiyauni ayong nalup?’ Tani kiporonori kidiama loger a egole, tosub idukit akai lokanyer, katiyauni ayong iyong. “Na eponeta ngikokolak nakwaare, ikwa nyelemanarete ibore ni esakete bon a? Na engerioto ngitunga ngamusabib, ikwa nyimianakinete ngapei-pei a? Ani iyong, kimunyasi ngimoe kon pil. Ngalesea a Esau, kikokoe esi, kidemar ebari kus! Kingalata esi ngikibaket kus daang, kiritasi kesi esi anakwap kus. Kitijikis esi ngitunga lu ngoon ichamatar, ngipaalon lu ngoon imoreta esi atubwa, kesi kilokakis esi eloit, ebalasi, ‘Etor bo aosou kech ai?’ “Akolongit na eriraa ayong Edom, amunyari ngikiliok keng lukoosok, enyasu aosou kech daang. Ee Teman, ebuli ngikiliok kon lukajwok, sodi taarae ngasigerea daang a Edom. “Kotere amoitanut kus ani kata lokaatokus ngalesea a Yakobo, kititingio esi ngileech kikisar anakwap jik. Ipotu esi tachadakinos akolongit na ewoketa ngimoe ebarit kech, tobwanga ngitunga lugelayek ngidorin kech tokorakinos ebarit a Yerusalem. Ipotu esi kikwaanikinos ka ngimoe ngulu. Peachamitae esi ichurosi kotere ngichan a talokaatokus alu a Yuda. Peachamitae esi ilakarosi kotere akolongit na nginyas kech. Peachamitae esi ikianatar kesi anariaba kech. Peachamitae esi ilomunete lore a ngitunga kang akolongit na aanyunitotor ngakiro naaronok. Peachamitae esi iwaasi ani ichiereta ngirotin akirumun lu esakete akisii. Peachamitae esi ipotorete lu apuunosi nakis ngimoe kech akolongit a ariaba kech. “Aapuu akolongit na atubio ayong Ekapolon Akuj ngakiro a ngibukui kadaang. Ngakiro na isuba esi kesi kisubere esi dang. Kibongokinete esi ngakiro na isubete. Ngitunga kang, kona imaasa esi ibore niadwaran alokopo a eriras alomoru kang alo italeuno, emaase ngibukui daang lu kiriamito esi, emaase kesi kitereterokinos engobarete tosub pekeyakasi kolong. “Epete ngide lu epuunosi moru a Sion, eliwor neni ni italeuno. Elemarete ngitunga a Yakobo akwap na erai akech. Ikokinete ngitunga a Yakobo akim, ee robo, ikokinete ngitunga a Yosep asarae. Emunyarete kesi ngitunga a Esau, loger lo enomiarea akim ngatunyeny. Enomiarete kesi tomunyasi, emam ngitunga epuun alotunga a Esau, kainyo ayong Ekapolon Akuj alimu nguna. “Ngitunga lu epote alokuju Yuda kesi elomete nakwap a Edom. Ngulu epote anaukon ana alo too kesi elemarete Pilistia. Elemarete Ngisirael akwap a Epiraim. Elemarete ngitunga a Benjamen akwap a Gilead ka Samaria. Ngasigerea a Ngisirael alu alokwap alu araakasi ngirikon, kesi ebongete toremo Poenike tanang kwap nibe Sarepas. Ngirikon lu eponito alo Yerusalem lu ayakasi Saride, elemarete ngirerea lu alokuju Yuda. Ngitunga a Yerusalem lu idwangete edokarete moru a Sion topolokis Edom. Ekapolon Akuj alope ngesi eliwor ekapolon.” Tolimok Ekapolon Akuj Yona lo arai lokookeng a Amitai, akiroit naga tama, “Tonyou, tolot Ninewi, lore loapolon ngolo tolimo eriras lo ebunit nikeng, kainyo engolik ayong atamar aroner ere ngolo noi.” Nakaneni tonyou Yona tolot Tarchich esaki akilany Ekapolon Akuj. Tolot ngesi Yopa toriam atubwa na anyounit alosit Sipania. Tatach ngesi ngaropiyae nadoket, toloto ka ngitunga lu ayakasi natubwa, esaki akilany Ekapolon Akuj. Nakaneni tachaku Akuj ekuwam lotiapolon nanam, tokulau anam lokojokon, tonyou atubwa abwanga. Toema ngitunga lu adokito atubwa, kikaloik itwaan daang akuj keng. Apot kesi tachakakis ngiboro lu ewokit atubwa nakipi esakete tooker atubwa. Alomarit sek Yona tooma atubwa, kinapakin tanakak ngaju. Bu ekamean atubwa nikeng tolimok ngesi tama, “Etige ekajoton, nyo isubi iyong? Tonyou tanyara akuj kon! Tokona ngon epedori kingarak ngoni nyikimunyar.” Tolimonokinos ngitunga lu adokito atubwa make tamasi, “Potu atarama ekura atoyeneta itwaan ni kirikok ngoni ngakiro naaronok nugu.” Tarama kesi ekura, toliwor ngakiro ngaka Yona. Sodi tolimokis kesi Yona tamasi, “Tolimokinae, ngae kirikok sua ngakiro naaronok nugu? Nyo isubi iyong? Anikwap ibunitor iyong? Irai iyong ebukut ali?” Tolimok Yona kesi tama, “Arai ayong Eburaniait. Elipit ayong Ekapolon Akuj, Akuj a adis, nakolong asubi akwap ka anam.” Tolimok Yona kesi atamar asiit ngesi ani a Ekapolon Akuj. Tobul ngitunga ngulu lokojokon, tolimokis ngesi tamasi, “Anukiro nugu isubak iyong!” Tokulau anam noi, sodi tolimokis kesi Yona tamasi, “Anukiro tokona kisubakinea sua iyong toyonea anam?” Tatachu Yona tama, “Tadakarae ayong kimasakis nanam, toyon anam, kainyo ayeni ayong atamar ayong ayaunit ekuwam lotiapolon logo nikus.” Kaneni dang, apot ngitunga ngulu kigurokis atubwa lokojokon esakete akijukar lokwar, nakaneni kipiyo, kainyo abu anam tokulau lokojokon noi. Dio kikaloikis kesi Ekapolon Akuj ebalasi, “Ee Ekapolon Akuj, kimaimai sua iyong nyikimunya sua kotere akitu a itwaan kaen, nyikipaik sua ngaakot keng, kainyo iyong Ekapolon Akuj isubak nugu. Eraakasi nugu ngaka akiding kon.” Ani erumor tadakut kesi Yona kimasakis nanam, toyon anam atipei. Kotere ngakiro nguna, toema kesi Ekapolon Akuj lokojokon, kipeyokis Ekapolon Akuj akipeyos kikongo atamar kisubi etich keng. Toseu Ekapolon Akuj ekolia lotiapolon kiliko Yona. Kiboi Yona anakook a ekolia ngirwa nguuni, akwaar ka apaaran. Kilip Yona Ekapolon Akuj na erai Akuj keng anakook a ekolia ebala, “Ee Ekapolon Akuj, abu ayong katanyar iyong anariaba kang, kiik iyong ayong. Kekaloik alokatoak, ibu iyong kiira etoil kang. Kimasakini iyong ayong nituluk kitachakak lotau anam keriam ayong ngakalel, kitorut ngitoroi daang kidiama kang. Sodi atolim ayong atama, ‘Kachakar ayong alongaren kon, ikwa nyengolikini ayong nabo akai kon na italeuno a?’ Kitorut ngakipi kidiama kang katogita ayong. Katoburuchiasi ayong ngakipi. Kilogalogakin esirite nakou kang. Atanang ayong natoroma a ngimoru. Atanang nakwap na egolol ngidorin jik. Nakaneni iyong Ekapolon Akuj na irai Akuj kang, ibu kitobuu ayong anakipany. Na erogakinea etau kang, etamu ayong Ekapolon Akuj, tanangu akilip kang nikon, alokai kon ana italeuno. Ngulu ilipito ngakujo napasiek, aisikis amuno kech na iteni. Nakaneni kepuruuni iyong a ngieosio kepeyokini ayong iyong ngakipeyos, katolemik ibore ni ekong alemun. Ebunit ayuuno ani a Ekapolon Akuj!” Ani erumor kisuruor Ekapolon Akuj ekolia. Tolekak ekolia Yona nakwap nakoonon. Kisuruor Ekapolon Akuj Yona na ngaarei tolimok akiroit naga, “Tonyou, tolot Ninewi, lore loapolon ngolo, tolimo ngakiro nakalimokini ayong iyong.” Sodi tonyou Yona tolot Ninewi, loger losek alimunitor Ekapolon Akuj. Apolot ere a Ninewi, arai ngirwa nguuni elosere napei alowae a epei tanang loche. Kisiak Yona alomar lore. Adaunet a akolongit a apei elosi ngesi, toowanik tama, “Idongit ngirwa ngitomwon-omwon tomunyarae Ninewi!” Tonupa ngitunga a Ninewi ngakiro a Akuj. Tolimut kesi atamar toronoi akimuj, tanapae ngiguniae napei ani eyenikinitae tanang ni nyeyenikinitae. Tananga ngakiro nguna nia ekapolon a Ninewi, tonyou ngesi alokicholong keng a apolou, tobuto eworu keng sodi tanap ngiguniae kiboikin lokuruon. Todung ngesi akiroit yaarae lotunga a Ninewi ebeyo, “Adungut ekapolon ka ngikapolok keng luuchik kona: Warasi itwaan cha daang, kori etiengit, kori ibarasit nyiir ibore. Warasi kesi nyiimuja kori nyeemata ngakipi. Pearai tanapa ngitunga daang ka ngitieng ngiguniae, kigoronok itwaan daang Akuj nikationon. Ee robo, torei itwaan daang alorotin keng aluaronok, tachaka amoitanut keng. Tokona ngon epedori Akuj kiloch ngitamen keng tojongo angoit lokojokon, nyikimunyaror ngoni.” Ani ingolikini Akuj ngakiro na asubakinete kesi, ka eger lo areeunotor kesi alorotin kech aluaronok, abu kiloch ngitamen keng nyiirira kesi loger losek abalar asubakini. Toronikis ngakiro nguna Yona lokojokon, tongo. Sodi kilip ngesi Ekapolon Akuj tama, “Kelipit iyong Ekapolon Akuj, meere ngakiro nakolong alimuni ayong nugu eringa ayei nakwap kang a? Ngakiro nguna kolong ekirikirakinor ayong atodok atolot Tarchich! Kainyo ayeni ayong atamar irai iyong Akuj na aminatoi tarai na ngisien, irai jiik na nyingoyeene atipei, tarai jiik naajokon, na ilocheene ngitamen kon sodi nyiirira. Ee Ekapolon Akuj, tokona bocha, tolema akiyar kang. Kemaimai atamar ejoikinit ayong atoani akidwang akiyar.” Tatachu Ekapolon Akuj tama, “Isubak iyong naajokak ani ingoitor a?” Ani erumor topudo Yona nikalapatan a ere tolot lowae lo alo kide, adukokin egaach keng, ka akiboikin lotorube a egaach idarit akingolikin ngakiro na esubakinere ere. Nakaneni tomeu Ekapolon Akuj ekitoe kiturup, tarap Yona a etolim keng, kiboikinor Yona niajokon. Talakar Yona noi kotere ekitoe ngolo. Ani akolongit nache ebayi tomeu Ekapolon Akuj ekurut kirika ekitoe ngolo tooniyo. Ani ipiripiruuni akolong, tomeu Akuj ekuwam lokariran a akide tonom akou a Yona tasak akirakar, kimu ngesi akitu, sodi tama, “Ejoikinit ayong atoani akidwang akiyar.” Nakaneni tolimok Akuj Yona tama, “Nyo kon ekitoe ingoitor iyong kotere ngakiro keng?” Tatachu Yona tama, “Ejoikinit ayong angoi, atongo tanang atoani!” Tolimok Ekapolon Akuj ngesi tama, “Kisienit iyong ekitoe, tarai nyesuba iyong etich keng, kori nyiturupuna, ekitoe lokolong arupuni a apei kwaar, tongopia nabo akwaar apei. Ani nyo bo pekesieniyo ayong Ninewi? Ere loapolon ngolo, lo eyakasi ngide ngabunge amiat apei ka ngatomwon-arei lu nyepedorete akiyen atamar nyaani akan na erai teten ka na erai kedieny, toyakas ngibaren lukaalak!” Ngirwa lu araakatar Yosam ka Aas, ta Esekia ngikapolok a Yuda, abu Ekapolon Akuj tolimok ekadwaran Mika akiroit keng. Arai Mika itwaan a ere a Moreches. Kidodik Ekapolon Akuj Mika ngakiro nugu daang, na araakasi ngaka Samaria ka Yerusalem. Kiirasi nugu esi ngibukui daang. Topupokisi nugu, esi daang lu ilomito nakwap. Ekapolon lo erai Ekapolon Akuj, iruorikini ngakiro kus naaronok. Iruorikini ngesi alokai keng. Kingolik a, ebunit Ekapolon Akuj anadis. Etiyaun ngesi tolot alokidiama ngimoru. Ekeiarete ngimoru alokwap ngakejen keng, loger a amonok ana imakinio nakim. Toleleasi nadipoe loger a ngakipi ana echakuna anakope. Esubasi nugu daang kotere aronis ka akisech a Isirael. Ngae epaikinio akisech a Isirael? Meere Samaria ere loapolon a? Ngae epaikinio ngakiro na ilipitor Yuda ngakujo nagelayek? Meere Yerusalem akwaan a? Tokona bocha, ebala Ekapolon Akuj kona, “Etiliwori ayong Samaria ngamoru na etukokina naroatin. Toliwor ni itaeneo ngimusabib. Abukokini ayong ngamoru keng nadipo, atokut ngapirio keng. Abwangabwangaari ngakujo keng nasubuna daang. Inomio ngadekon a akai keng na etachere ngamalaae a ngakais a ngakujo. Enyasuni ayong ngakujo keng nasubuna daang. Ani kona angatarea ngesi ngadekon anaropiyae ana atachere ngamalaae, elemarete ngimoe ngaropiyae nguna tobuasi namalaae awache.” Sodi tolim Mika tama, “Kotere nguna, ekalouni ayong atosutonok, alosi aturi atomuner. Aawanikini loger a ekolowo, arukini loger a ekalees. Kainyo nyengalekinete ngajemei a Samaria. Edikino tani Yuda eanyuni ngichan lupei ngulu. Anangut nginyas tani Yerusalem ni elomito ngitunga kang.” Nyiilimok ngimoe yok alo Gas atamar kidwang ngoni. Warasi nyiikalout. Ngitunga a Bes Leapira, kipunupunokinos anapua. Ngitunga a Chapir, todokisi imuner, kirumito ngileech. Esi lu ilomito Saanan, nyiipudut nikalapatan a ere. Ani iirarete akigoro alo Betesel, toyena atamar emam ni eyuunere kaina. Idarito ngitunga a Maros aanyun ngakiro naajokak. Kainyo ayau Ekapolon Akuj ngakiro naaronok aapikis Yerusalem. Esi lu ilomito Lakich, toinikisi ngangolei naurukukui. Esi kolong isiakinete ngasechesea na esubete ngitunga a Yerusalem, kainyo isubete esi ngasechesea na esubete Ngisirael. Tokona bocha ngitunga a Yuda, tajala ere a Moreches Gas. Elarakinosi ngikapolok a Isirael alo Akisib. Ngitunga a Marecha, kipotokini Ekapolon Akuj esi lomoit nabo, lo elemari ere kus. Eloose ngikarikok a Isirael lukaruok toduka anaburibur ana eyei Adulam. Ngitunga a Yuda, toluro kotere ngide kus lu iminasi esi, kimiekis ngakies kus epalor loger ana atarukot, kainyo erikorio ngide kus tarata ngirikon. Oitiakoi! Abe etioko nginyas eanyunete ngitunga lu etukosi naaronok, lu itamete naaronok, nyiirete ngaju. Ani napei cha iwalarea, ani eanyunete erot, tosubakis nguna sek atukito. Na imueta kesi ngamanat, todemasi ngitunga. Na imueta ngakais, tolemasi. Emam itwaan kori iborosit a awi a itwaan ni idongi. Ebala bocha Ekapolon Akuj kona, “Ayoro esi, atukit ayong ayaun ngakiro naaronok nikus, na emam kona igakinete esi, nyeringa nabo esi inisasi kainyo ilomarete esi lochan. Na enangea akolongit ngina, kiramakinete esi ngitunga eeos lo kirasitotor, kimodete esi a eeos alo igorore ebalasi, ‘Kimunyar ngoni muny! Epoto Ekapolon Akuj akwap yok akoraki lukolong kirikete ngoni kirai ngirikon.’ ” Kotere ngakiro nguna, na enangea ngirwa lu ebuakinere ngitunga a Ekapolon Akuj akwap, engopi ikakorakinan ngalesea kus akwap. Ebalasi ngitunga ayong, “Tojongo adwaranakin sua. Tojongo adwaranakin sua ngakiro nguna daang. Nyikisurumi Akuj sua ngileech. Ikokinio ngakiro nu elimunio ani a Ngisirael ai? Ajongo palem Ekapolon Akuj akiteun ngakiro a? Nikeng dir eponitotor nugu a?” Tolim Ekapolon Akuj tama, “Nyesuruoreene sek ayong lu etenooko niajokon a? “Nakaneni inyoikis esi ngitunga kang loger a ngimoe. Na ebongunioto ngitunga alojie itamito atamar emam ngache anawi, ikwa idarito esi kaneni abutor ngikotio kech. Ani ngaberu a ngitunga kang, itwarakis esi anawiyei kech ana eminasi. Ani ngide kech, idemasi esi apiaro kang jik. Tonyoutu toloto, emam nege ni eringa eyuunere. Kotere nginyas a ngasechesea kus, enyasun nege lokojokon. “Ani kebu itwaan ni edai apula ka alioko tama, ‘Adwari ayong atamar ianyunete esi ajako a emuna ka epurot.’ Ekadwaran lo ikoni ngolo ngesi esakete ngitunga lugu! “Kachunakini ayong esi daang wapei, ee robo, esi Ngisirael lu eringa idongito. Kachunakini ayong esi loger a ngamesekin ana echunakinitae nanok. Ilelebun ngitunga nakwap kus loger a achokor ana ileleba ngamesekin.” Engauni Akuj kesi kipud anaenanot. Ebwangunosi kesi alore topudut alodorin a ere. Ekapolon Akuj na erai Akuj kech, ingarenikini toriko kesi. Sodi atolim ayong atama, Topupokisi ngikarikok a Isirael! Ikwa meere esi ejoikinit iyenete ngakiro na eriyan a? Esi lu iremokino naajokak tominas naaronok. Esi lu iyangete ngitunga kang eyarete, tobolochiasi akiring anakoyo kech. Esi lu inyamete ngawat a ngitunga kang, toyanga kesi, tobela ngakoyo, totubutubuoto kesi loger a akiring ana amot. Enangi ngirwa lu ikalounioto esi, kikaloikis Ekapolon Akuj, nakaneni nyikiirari ngesi esi. Idai ngesi ereet keng anikus, kainyo isuba esi naaronok. Ebala Ekapolon Akuj kona kotere lu ibatanarete ngitunga keng, elimonokinete ngulu isumujete kesi ebalasi, “Ekisil.” Ani lu nyisumujete kesi, tasaka akitijwore. Elimokinit Ekapolon Akuj kesi kona, “Esi ngikadwarak, eliwor akwap akwaar anikus, emam akisingolikinet. Emini aribu nikus, nyipedorete akidwar. Edooyori akolong anikus, Irioner apaaran anikus.” Irumete ngikadwarak ngileech, etingi ngimurok etimoi kainyo emam ngakiro atachaki Akuj kesi. Nakaneni ani eliwor ayong, kelelebit Ekapolon Akuj etau keng, ka agogongu ka ngakiro na eriyan ta atitinyu, na alimokinea Ngisirael ngasechesea kech. Topupokinae, esi ngikarikok a Ngisirael, esi lu iremokino ngakiro na eriyan, lu ilochito naajokak toroketa. Idukete esi Yerusalem, ere a Akuj, toduko naakot na ibukonorete ka nakiro na nyeriyan. Be mati ngikarikok keinakin ibore nidiaket, ngesi etubioto ngakiro a ngitunga. Mati ngimurok ketach, ngesi itatameta ngitunga. Mati ngikadwarak keinakin ngaropiyae, ngesi edwareta. Tabalas daang kirukit ka Ekapolon Akuj. Iruorosi kesi ebalasi, “Ikwa nyikirukit sua ka Ekapolon Akuj a? Emam naaronok kianyunor sua.” Tokona bocha, kotere esi, echilio ngalup a Sion loger a amana, eliwor Yerusalem ngamoru na etukokina, ani emukura a akai a Akuj, eliwor amoni. Ngirwa lu isidiunosi, emoru lo edukokinitae akai a Akuj, eliwor emoru lo ewoi akidwang luche. Ilengi ngimukur daang. Eropuunete ngibukui daang moru ngolo. Epote ngibukui lukaalak tamasi, “Potu apana moru a Ekapolon Akuj, kapana kai a Akuj a Isirael. Kitatamea ngesi ngoni eboyor keng, ewapeta ngirotin keng. Kainyo ngakitatamet a Ekapolon Akuj, eponito alo Yerusalem. Eponito ngakiro keng alo Sion.” Etubi ngesi ngakiro a ngibukui alukaalak. Etiakuni ngesi ngakiro a ngakwapea anaapolok, ana eapiyete ka na eloka. Itiakete kesi ngilengea kech tarata ngirokonin. Kitiaka ngakwaaras kech tarata ngilengea luiriet ngikito. Emam ngibukui elemunete ngakwaaras sodi tangaasi ejie. Nyeringa nabo echunio ngajorei. Iboikin itwaan daang akaalimon, kwap ngimusabib keng ka ngimeyana, emam ibore nabo iteriangakini kesi. Alimu Akuj Namerikanyer nguna. Kainyo ngibukui daang iwapito ngakiro a ngakujo kech. Nakaneni kiwapi ngoni jik ngakiro a Ekapolon Akuj ana erai Akuj yok. Ebala Ekapolon Akuj kona, “Ngirwa lu isidiunosi, achununi ayong ngikangwalak, achununi lukolong etwarakini, achununi lukolong awani ayong. Ani lu engwalito, eliworosi kesi idongito, Ani ngulu etwarakinio, eliworosi ebukut lo eyenikinitae. Apolokini ayong kesi alomoru a Sion, napei alorwa kangulu jik.” Ani bo iyong Yerusalem, lo irai aita na iteo Akuj ngitunga keng loger a ekeyokon. Kibongokini iyong apolou anakwap ana kolong arai akon. Nyo bo igoror iyong iremar? Emam iyong ekapolon a? Atoana ekesuruoron kon a, iriabar iyong loger a aberu ana eriaba esaki akidoun a? Kasiosi ngitunga a Yerusalem, toriabakinos toliata, loger a ngaberu ana eriabasi akidoun, kainyo inyounete tokona alore toloto toloma naroatin. Iloose esi Babilon. Nakaneni kiyuuni esi Ekapolon Akuj kaina, anakwap a ngimoe kus. Achunakin ngibukui lukaalak akitijikin esi, ebalasi, “Ejoikinit Yerusalem inyasunio, kingolikini ngoni a ngakonyen yok!” Nakaneni nyeyenete ngibukui ngulu ngitamen a Ekapolon Akuj. Nyiteete atamar kichunun kesi loger a ngakies a ngimomwa ana echunio lopem tadaae. Ebala Ekapolon Akuj, “Ngitunga a Yerusalem, tonyoutu tadaa ngimoe kus! Ketogogongi ayong esi loger a emong alo erai ngaamwar keng ngakwangae, tarai ngakejen ngasua nanyangayek. Ipudaarete esi ngibukui lukaalak, sodi kiinut ayong ebari lokolong angatarete kesi. Toliwor ebari kech ekang ana arai Ekapolon a akwap kadaang.” Ngitunga a Yerusalem, tochunakisi ngajorei kus! Kiriama ngoni ngimoe! Etijikis kesi ekarikon a Ngisirael. Ebala Ekapolon Akuj kona, “Betleem lo a Epirasa, idit iyong alorerea a Yuda. Tarai nikon aseunea ayong ekapolon a Ngisirael, lokolong araakasi taapaakeng ngikapolok napei kolong kanuan.” Ejali Ekapolon Akuj ngitunga keng tanang aberu na eriaba idouni ikoku nisapat. Sodi ngitunga a ekapolon ka daang lu eraakasi ngirikon, ebuario kiruko ka ngitunga kech. Erupuni ngesi epolokinit ngitunga keng a agogongu ana eanyuni ani a Ekapolon Akuj, ana erai Akuj alope. Eyauni ngesi ekisil. Naitijikinioto ngitunga a Asiria ngitunga yok, kikekis ngalaarin tolomut nawiyei, kimeari ngoni ngikarikok yok lukajwok kitijikis kesi. Ebwangete ngajorei kech ngitunga a Asiria. Ee robo, ebwangete akwap a Nimurod a ejie. Kiyuunete kesi ngoni ani a ngitunga a Asiria nakitijikinioto ngitunga a Asiria ngoni kipudata akwap yok. Ani Ngisirael lupiyayek, ikokinete ngakop naketililimok, na epetakini Akuj lobukui lukaalak. Ikokinete ngakop na eyakasi lonyia. Igienokinosi kesi Akuj, meere itwaan. Epete Ngisirael lupiyayek lobukui ka ngitela lukaalak, kikokis engatuny alokiding ngitieng a amoni. Ikokinete itaok a engatuny alokiding ngisipaan a ngamesekin. Elomuni ngesi namesekin toporokin, ani erumor tonyilinyilia tongop kona edemunio. Ebwangete Ngisirael ngimoe kech, tomunyasi ngimoe kech daang. Ebala Ekapolon Akuj kona, “Ngirwa ngulu, etwarakini ayong ngangolei kus na ejie. Enyasu ngaurukukui kus na irito ngangolei. Enyasuni ayong ngirerea a akwap kus, atouko ngawasea kus nakaagongok daang. Enyasuni ngiborei lu isubatar esi, kemiek esi emam ngikadwarak. Enyasuni ayong ngakujo kus nasubuna. Enyasuni tani ngamoru a ngapirio kech anakitaleuno. Nyeringa nabo esi ilipete ngiboro lu isubete esi a ngakan kus. Adituni ayong anakwap kus ngapirio a Achera na erai akuj kus nasubuna. Enyasuni ngirerea kus. Angoi ayong noi erira ngibukui daang lu awounete akiwap ngakiro kang.” Kiirasi ngakiro na elimunit Ekapolon Akuj. Tonyou kare Ekapolon Akuj, tolimo ngakiro kon kiirasi ngimoru. Kimiek ngimukur kiirasi etoil kon. Esi ngimoru, esi ngapirio na itoweito akwap nakanuan, kiirasi eburas a Ekapolon Akuj. Kainyo isuburae ngesi ngitunga keng. Ititae ngesi ngitunga keng. Ebala Ekapolon Akuj, “Ekoe ngitunga kang, anukiro kasubakinitor? Anukiro ketuburunitor? Tolimokinae robo! Abe karikuni bo kolong anakwap a Misiri katoyuu anarikonot, sodi atomeu Musa ka Aron ta Miriam kitoriko esi. Ekoe ngitunga kang, kitamutu ngakiro nakolong atukit Balak lo arai ekapolon a Moab asubea esi, ka ngakiro na atachakini ngesi Balaam lo arai lokookeng a Beor. Kitamutu ngakiro nakolong asubasi alorot napei anadakar a Aawoi tanang Giligal. Sodi toyeneta ngakiro asubi ayong, katoyuunea esi.” Nyo ainuni ayong Ekapolon Akuj, na abunio akilip ngesi, Akuj na eyei nadis? Ekoe, ainuni ngitak luajokak lu eraakasi ekaru epei epeyok a? Ekoe, elakar Ekapolon Akuj, karikok ayong ngimesekin ngabunge a? Kori kainu ngakalel a akimiet a ngikito a? Epotori ikoku kang ni ekingaren kotere akisech kang a? Mam jik. Kidodik Ekapolon Akuj ngoni ibore ni ejok. Ibore ni esaki ngesi aniyok ngesi atamar atosuba na eriyan, atarata ngitunga lukimunoi, nabo eruko ka Akuj yok kitiditeuna. Erai akiker Ekapolon Akuj aosou. Elimokinit ngesi ngitunga a ere ebala, “Topupokisi, esi ngitunga a ekitela a Yuda, esi lu kachunakinit ayong lore. Ayeni atamar nawiyei a luaronok eyei ebari lomoduna ka ngakitemiet na ingalaare ngitunga. Ibore aremokino ayong ngini. Ekokini ayong alakakini itwaan ni etingit ngakitemiet ka ngamoru na ingalaa luche ai? Emoitaka ngikabarak kus noi! Iraakasi esi daang ngikaliokok. Emodeaka ngakituk kus. Kotere nguna, esiak ayong akidet esi ka amunyar esi kotere ngasechesea kus. Imujete, nakaneni nyimwokete, nabo kipedokin akoro noi. Iwokete ngiboro, nakaneni nyikachakinete. Ani ibore ni ikachakinete dang, elemario alojie. Itakinete ngikinyam, nakaneni nyilemete ngalemet. Ichiunete akimiet alokito, nakaneni nyiwosakinosi. Ichiunete emuna alomusabib nakaneni nyimaase. Esubakinosi nguna kainyo iwapa esi eboyor loaronon a ekapolon Omri ka lokookeng Aab. Irubakis esi iwapito ngakiro nakolong kech, kotere nguna, kamunyari ayong esi, kimenyarete esi ngitunga daang. Kitokianatar ngibukui awadaang.” Oitiakoi! Ekok ayong itwaan ni enyamit akoro, ni elunyun kegeror ageor daang, nabo kelemiar ngalemet daang. Edepar ngamusabib daang, nyingolikini ameyan nakaabon tani apei. Emam itwaan ni emuno Akuj ni eringa eyei nakwap. Emam ni etenoono alotunga. Idarit itwaan daang akiar niche. Elokit itwaan daang lokaatokeng. Eyenikinitae kesi kotere akisub naaronok. Ngikaweikinak ka ngikatubok ngakiro, esakete ibore nidiaket. Elimunete lu eyenikinitae naaronok na esakete sodi totuko aapei. Ni ebeyo ejok anikech ikwaan ka ngirega. Ni ebeyo etenoono anikech ikwaan ka alaar na ngiikwa. Anang akolongit na eriras kech, loger lokolong eruorotor ngikadwarak, lu eraakasi ngiketeok kech. Ebiler tokona kesi. Nyiinup ngakiro a itwaan aniche. Wara nyiigienokin lopae kon. Tobunak akituk tani ani eyei ngina imoreta ejomu. Kainyo ngirwa lugu imenyarito ngisapa taapakech, enyoikinito ngapesur taitiokech, tonyoikis ngaterak taataakech. Ngimoe a itwaan kesi ngitunga lupei a awi keng. Nakaneni eteuni ayong Ekapolon Akuj. Edari ayong Akuj kang, egienokin ayong ngina kayuununi ayong. Iirari Akuj kang ngakiro kang. Ngimoe kang, warasi nyikikianatar ayong! Tani kadakara ayong, anyouni. Tani kebooyi anaribu, eliwor Ekapolon Akuj akicha kang. Anaikini ayong anyunyura a Ekapolon Akuj, kainyo asechak ayong ngesi, tanang ni kaikinea ngesi ayong sodi totub ngakiro kang. Kayauni ngesi ayong nakicha ataanyunga ayong ayuuno keng. Ingolikinete ngimoe kang nguna sodi kiruma ngileech. Ngimoe ngulu lukolong kakianatar ayong ebalasi, “Nyaali Ekapolon Akuj kon?” Eupi ngakonyen kang akisemere kesi esaa lo ipudaare loger a echoto alorot. Ngitunga a Yerusalem, epote ngirwa lu ibongokinioto esi akiduk ngawasea kus! Ngirwa ngulu, enyaario ekukuor kus. Ebongunete ngitunga kus awadaang. Enyounete alo Asiria ana eyei kide, ka Misiri na eyei kwap, ka ngiwaitin a angolol Eupurate, ka ekwakaye nganamea ta ngimoru lualonak. Nakaneni eliwor akwap ariet kotere aronis a ngitunga alu elomito nakwap. Ekapolon Akuj, kiyok ngitunga kon loger lo iyokiyo ekeyokon ngamesekin keng a aburo, ngitunga lukolong iseuni iyong. Tani bo kelomito make nariet, iriamito kesi ngalup naajokak, kimiek toloto tadaka amelu alo Bachan ka Gilead loger lokolong a angorot. Ekapolon Akuj, tosubakinere sua ngakiro nakailiilok loger lokolong isubea ngirwa lu kipudunio sua alo Misiri. Ingolikinete ngibukui ngakiro nugu kiruma ngileech tani keraakasi lua ngikilinga. Ebunete kesi ngakituk ka ngaki kotere ebuloi. Eliarete analup loger a ngimunio, ee robo, loger a ngiborei alu eliato. Epudunete anawasea kech ebulit emaranete. Ereeunosi nia Ekapolon Akuj ana erai Akuj yok, ebulit noi. Ee Ekapolon Akuj, Emam kare Akuj ache na ikoni iyong, na irimanakini akisech a ngitunga kon alupiyayek. Nyirubakini iyong ingoit jik, kainyo kitalakarit iyong amina na nyedaun. Kidodikini iyong sua ngisien nabo, ipudaari aronis kosi a ngakejen. Ichakakini iyong ngasechesea kosi daang nanam nituluk! Idodiuni iyong amina kon na nyedaun analesea a Aburaam ka Yakobo, loger lokolong ikongokinio iyong taapaakosi lukolong ngorok napei kolong kanuan. Eraakasi nugu ngakiro na adwario kotere Ninewi. Eraakasi ngakiro na edodikinio Naum lo abunit alo Elikoch. Erai Ekapolon Akuj, Akuj na etereku, tatachanakini ngakiro. Etachanakini ngakiro tonyunyura. Iriraene ngesi ngimoe keng, nabo enyunyuranakin kesi. Nyengoyeene Ekapolon Akuj atipei nabo erai ngesi na ngikilinga aluationok. Nyelakanakini ngesi lu esechito eloose nyirira. Elosi ngesi alokuwam alo ipiripiri. Eraakasi ngidowon apua a ngakejen keng. Ikilakini ngesi anam toon! Itooni ngesi ngangololin daang. Tooniyosi ngaroatin a Bachan. Tokwangia emoru a Karimel tongopiasi ngatur a Lebanon. Erikirikokinete ngimoru alongaren keng, tokeiasi ngimukur. Emaranikini akwap alongaren keng, ee robo, emaranikini akwap ka ibore daang ni eyei neni. Ngae eweikini angoit keng? Ngae enaikini apipilu a anyunyura keng? Ebukuno anyunyura keng loger a akim. Ebwangi ngesi ngatabab kiela. Ejok Ekapolon Akuj, erai ngesi awas nakaagongon akolongit na a ngichan, echoikinit ngulu emotunosi nikeng akimech. Emunyari ngesi ngimoe keng, loger a akaale ana eneteuna. Irisi ngimoe keng tanang naribu. Anukiro itukotor esi Ekapolon Akuj? Kimunyari ngesi esi. Emam itwaan itepegakini Ekapolon Akuj ngaarei Loger a ngiikwa alu ekodakina, imunyarosi, ee robo, loger a ngatunyeny ana eokito. Meere nikus kolong abunio itwaan ni atuki ngakiro naaronok ani a Ekapolon Akuj sodi kitam aronis a? Isuruori Ekapolon Akuj Ngisirael ebala, “Tani kejwoko ngitunga a Asiria talalak, emunyario tongopiasi. Tani bo ketaanyunit ayong esi apipilu, nyabongokini nabo. Angedangedaari ngamasea nakienitotor kesi esi, atachaka ngarukanes nakienitere esi.” Adungu Ekapolon Akuj nugu kotere Asiria, “Ekisari ekiro kus nyeerubak elimitoe. Atubori ngakujo kus nasubuna ka na itekeiaritae na eyakasi nakais a ngakujo kus. Kabokakini esi ngalielin kainyo nyechamit iyarete!” Kingolik, emotuno emeanara alomoru, eyaunit ngakiro naajokak, elimorit ekisil! Ee Yuda, kirichak ngisukukui kon, kirichak ngakikongiet kon. Nyeringa nabo luaronok kinyoikinete iyong. Amunyar kesi jik! Ninewi, adolu ekealaran kon! Toweik nikiratakinet ngimoe! Tochoik erukudi! Tonyou lojie! ( Anang Ekapolon Akuj ni ebuunea akibuseanu a Isirael tobong lopit lo kolong ekoni eringa ngimoe nyengatara ngiboro keng.) Erengak ngaupwala a ngikajwok keng, enapito ngiworui luarengak puu. Enyounito kesi lojie! Ewaliwalete ngaurukukui kech loger a asarae! Eporoporote ngangolei kech! Amotun ngaurukukui kech lorotin enyunyurasi, etubonorosi alokiding ere. Imileasi loger a ngakinwaket, ibironorosi loger a akimilea. Anyarae ngikaweikinak, imatamatasi eloose, ikirikiraarosi nawas, etowaa egaach lo esipokinio ngakito nabwanget awas. Angaar ngidorin lua angolol daang, abul ngitunga a awi a ekapolon. Arikor aberu a ekapolon, ekunuasi ngikasubak etich keng loger a ngakurio, iwokito ngakan. Ikoni Ninewi abwel na elakakinit ngakipi elelearete. Igorosi kesi ebalasi “Towo! Towo!” Tamam itwaan ingoliuni akamaluwot. Tangatasi ngakwangae! Tangatasi egolit! Ileleba ebari lore! Eyei ibore nikaalan a ngaropiyae daang. Abwangabwangaar! Alaireng ka nginyas! Alilimiyosi ngitai amaranikis ngakungin, apipileketa ngachirin, akwangiasi ngireetin daang! Aliwae eyei lo ikwaan ka akai a ngingatunyo, ni erai aurienet a ngitak a ngingatunyo, ni eyaununi engatuny akimuj keng, kiboikinos ngitak keng akaalimon? Enyilinyili engatuny akiring na itemokino kotere ngitak keng, sodi kirumak angatuny akiring. Ilelebi ngaburiburio keng akimuj, kileleb akai keng akiring na enyilinyilitae Ebala Akuj Namerikanyer, “Kingolik a, kiroa ayong ka iyong. Enomi ayong ngaurukukui kon a akim. Emunyari akwara ngitak kon, katodema ngiboro lu kolong ingatari. Nyeringa nabo iirario ngakiro a ngimeanara kon.” Oitiakoi! Abe etioko nginyas eanyuni ere lokaaran! Engalas ka ngiboro lungatara ileleba! Nyesaluni angatanar ngiboro! Kiira erue a ngalita, ngakilelei irimete, kuturkutur a ngangolei, aporopor a ngaurukukui! Aneteunosi ngikameak ngangolei, ewaliwali ekileng, ipeka akwara! Aar ngajorei, atukokin ngawat, nyimarun ngawat nakatoak, ilegeete ngawat nakatoak ngitunga! Esubasi nguna daang kotere amalaat na idwangit nache daang. Amalaat nabe Ninewi, ikwaan ka aberu na ibus tarai akasuban. Aloki ngesi ngibukui a emalaanu keng, kingala ngitunga a asubanu keng. Ebala Akuj Namerikanyer kona, “Ninewi, kanyoik ayong iyong! Kabutori ngiworui kidong imuner, kisemoto ngibukui amunerer kon, kisemoto ngapolosio ngileech kon. Kemasakini iyong asakatan, katosubea ngakiro na ngimeny toliwor iyong kisemoo. Ngitunga daang lucha kingolikinete iyong, toriangakinos kikutukutoosi ebalasi, ‘Wae, idaun cha iyong Ninewi a! Ngae kikalounio iyong? Aliwae esakario ngikesililingak kon?’ ” Ninewi, ijok iyong akidwang Tebes a? Ere lo edukitoe lokwaas a angolol a Nili. Ere lo iriamito ngakipi. Anam iratakinit ngimoe anikeng, ngakipi eraakasi ngawasea keng! Apolokinit ngesi Kuch*g** ka Misiri, amam esal a apolou keng. Put ka Libia ebakito ka ngesi. Tarai arikio ngitunga a Tebes tarata ngirikon. Edichio ngide kech totoaka anakiluguchaet a ngirotin kadaang. Ngikiliok keng lu erimae torikoroe eenitae a ngiriko, tokoranakinos ngitunga lu arikete. Ninewi, ikokini iyong dang itwaan ni irakarit epurot, kibileri iyong tasak amatar lomoe kon. Ngawasea kon nakaagongok daang, ikokinete ngimeyana lu eraito ngameyana, ani iukuukokinio tararakin nakituk a ekanyaman! Kingolik mono iyong ngasigerea kon, ngaberu cha ngaberu alokiding kus! Engaamete ngidorin a akwap kon, alongaren ngimoe kon, amunya akim ngasua na iriwokinitae. Tookutu ngakipi kidaruneta kiriamio, kitogogongo ngawasea kus, kichiaka echoto kinoma ematapar, tolemutu ngakito nasubet ematapar! Neni ngesi kimunyakini esi akim, kirikari esi akwara. Kimunyario esi loger a amelu ana emunyari emaase. Toureas loger a emaase, ee robo, talalaketa loger a lodete! Italalaate esi ngimuchurus kus, kidwanga tani ngikanyer a adis! Angopiasi tokona loger a ngimases alu epetarete ngabeben toporosi. Ikote ngikarikok kus asepich a emaase na ilulo anawasea akolongit na akatorot. Ani ipiripiruuni akolong, toporosi. Emam itwaan eyeni ni alot! Ee ekapolon a Asiria, ejotoote ngikeyokok kon, ani ngikarikok kon, ajotoorosi jik. Apetakin ngitunga kon lomoru, angop itwaan echunakini kesi. Emam kona kitedekuunio iyong, emam ngajemei kon kona itedekio. Daang lu iirarete ngakiro a nginyas kon, tarama ngakan elakara. Kainyo eyei dir itwaan tani ipei ni abu tobuchun anamoitanut kon ana nyedaun a? Eraakasi nugu ngakiro a Ekapolon Akuj na adwaritae, kidodikinae ekadwaran Abakuk. Wae, Ekapolon Akuj, egoro ayong tanang ori asaki akingarakino towounite iyong akiirar? Ikwa apedori ayong aawanikin atama, “Eyei amoitanut,” Towou iyong ayuun sua. Nyaanu ngakiro kisiteo iyong ayong naaronok? Nyo kitaanyunitor iyong ayong ngichan lugu? Nginyas ka ademanu eyakasi ngaren kang. Eburas ka ekurikur wadaang. Elagalagakin etal. Nyeringa ngakiro na eriyan iwapitae. Irikato luaronok lu etenooko, sodi kibukakinae ngakiro na eriyan. Tatachu Ekapolon Akuj tama, “Kingolik kiding ngibukui, Kuumwok nakitalareta ngakiro na ingolikini. Asubakini ayong ngakiro ngirwa lu iyarea iyong na nyinupi iyong na iirarea. Kingolik a, etonyou ayong Ngibabiloniae. Ebukut lokaadengan lo ikirikirana. Itorete kesi kiding akwap daang, tolemasi ngakwapea na nyeraakasi ngakech. Eraakasi kesi ngitunga lu kitoemete nabo kitubulete. Esibit kesi ngikulepek eraakasi etal, ka ngakiro na eriyan. “Epiraka ngangolei kech akidwang ngirisae, ededeng idwangito ngipeei lu enyamit akoro. Inisuna ngikameak ngangolei kech, eponito anikalonan. Epiraka loger a egole alo eporokino akimuj. “Eponito ngajorei kech a amoitanut, ani eringa eponito tobul itwaan daang. Elalak ngirikon kech etia asinyen. Iyenyete kesi ngikapolok, imenyarito ngikarikok. Ekianatar ngawasea nakaagongok, kainyo etukokinete ngalup lokwaasea kech, sodi tolemasi. Ani erumor topiasi akwap loger a ekuwam, dio torotokis. Ngikasechak kesi ani itiliworitotor ngikilinga kech akuj kech.” Irai iyong Ekapolon Akuj napei anakisiakinet, Akuj na italeuno, nyitoaneene iyong. Ee Ekapolon Akuj, iseu iyong Ngibabiloniae akirirare sua, iyong na irai ataaba. Itogogong kesi kideseta sua atorikinotor. Iyong na ikiuna ngakonyen noi nyingolikinete aronis, nyitamari iyong ititinyikini kiseme asechanu. Nyo bo ililingea iyong tarai na itee ngitunga luaronok emunyarete lu etenooko? Isikwaan iyong ngitunga ka ngikolea lua anam, kori ngiborei lu eliato analup lu emam ekarikon. Irumunete Ngibabiloniae kesi daang a ngikodo kiurukukuut nikalapatan a ngipuutei kech, sodi talakaros kiwangakis. Ipeyonokinete kesi ngipuutei kech kinomanakis tani emitina, kainyo einakinito ngipuutei kesi ajako nabo enyamete akimuj nalok. Eliworosi tokona kesi ngikaarak jik a? Tomunyasi ngibukui emam ngisien a? Aliwor ayong eketeon, adokari ayong lopem lo iteere edaru ngakiro nakalimokini Ekapolon Akuj, ka ngakiro na etachuni ngesi kotere eburas kang. Katatachak ayong Ekapolon Akuj tama, “Kigir ngakiro nakedodikini ayong iyong nakitab ilereete kisomaunere atipei. Eringa akisingolikinet idarit esaa keng, ikirikiruna tosubakin, nyeliwor alioko. Ani pekedolu atipei, kidaru. Esubakin dir, nyetinenikini. Karika a, itwaan cha daang ni nyetenoono, nyeyari, Ani ni etenoono, eyari kotere anupit keng.” Ingalana ebari, nyerubete ngitunga lukenisak. Epol ebele kech ikwaan ka ni elomete ngikatoak, nyimwokeenete loger a akitu. Echunete kesi ngibukui daang tarata ngikech, kitiliwosi ngitunga ngikech a ngikulepek. Nyedikino ngitunga lurikon ngulu ekianatar kesi a? Sodi tarata ebalasi, “Oitiakoi! Abe etioko nginyas ianyunete esi, ngitunga lu ichunete ngiboro lu nyerai ngikus! Ibarakinete esi namichae tanang ori?” Akolongit apei, kingoikinete esi ngitunga lu kimichaate esi, epote kitamaranikis esi, kitodemasi ngiboro. Kona ingatareta esi ngiboro a ngibukui alukaalak, engatarete ngitunga daang lupiyayek ngiboro kus, kotere ngitunga lu iar esi, ka amoitanut na isubeta esi akwap ka ngirerea ka ngitunga daang lu elomito neni. Oitiakoi! Abe etioko nginyas ianyuni iyong, itwaan ni itabari awi kon a eger aloaronon, sodi kikek akai kidiama nyeedolioto naaronok! Irek iyong ngakiro na eyaunete ngileech nawi kon. Ilem nginyas kon a ilope ani imunyarea ngibukui lukaalak. Ijal iyong akiyar kon. Isikalou iyong tani ngamoru a ngawasea, kikamasi ngakito na iriwokinitae nakais. Oitiakoi! Abe etioko nginyas ianyuni iyong, itwaan ni idukokini ere a ngaakot, sodi kitowo a aronis! Kingolik a, edaikin etich a ngibukui nakim, ichidarito kesi ngakiinyir pas. Nia Akuj Namerikanyer eponitotor nguna. Ilelebun akwap ngitunga lu eyenete ekipur a Ekapolon Akuj, loger lo ilelebakatar ngakipi nanam. Oitiakoi! Abe etioko nginyas ianyuni iyong, itwaan ni itamasi ngikidunyet anyunyura kon, kisiraka kesi loger epurot, sodi kingolikinea kesi emuner! Kidakakinosi iyong ngileech akidwang arimatoi, imasi iyong kitereter! Kitamasi iyong Ekapolon Akuj eriras kon, sodi tarapa ngileech arima kon! Amoitanut nakolong isubea iyong Lebanon, kibongokini tokona iyong. Imunyari kolong iyong ngitieng, kitubulete tokona ngitieng iyong, kotere ngaakot a ngitunga ka amoitanut nakolong isubea iyong akwap ka daang lu elomito neni. Nyo eanyunio anakuj anasubuna? Ana erai itwaan asubuni, asuat na itiakitae, eketataman a alioko! Nyo igieno ekasubunan a akuj kangina tarai asubu ngesi akuj na nyejaki tani akituk? Oitiakoi! Abe etioko nginyas ianyuni iyong, itwaan ni isuruori akitoe ibala, “Tokienyu!” Tama niti ilimokini amoru na imuleleara “Tonyou!” Eyakasi ngakiro kidodikini akuj nasubuna a? Kingolik a, eburuchiarit egolit ka akwangat, emam akianget alotooma keng. Eyei Ekapolon Akuj kai keng na italeuno, kimiek ngitunga daang a akwap kililinga chek alongaren keng. Akilip a ekadwaran Abakuk naga. Ee Ekapolon Akuj, eira ayong ngakiro na isub iyong, kabul noi. Tobongok nabo ngitichisio ngulu ngikaru lu kiyarea sua lugu, kisileereu alokaru alukosi kalugu, kitamu akisienut tani ananyunyura. Ebunit Akuj alo Edom. Ebunit Akuj na italeuno alomoru a Paran. Imukit akibuseanu keng adis, ileleba ekipur keng nakwap. Ikwaan akwangis keng ka akimilea imileaununi akan keng akicha, neni idaitere agogongu keng. Eyei edeke loaronon ngaren keng, totupite akitu anaabor. Na ewaar ngesi, torikirikok akwap, ani ekienyuuni, tamaranikis ngibukui, sodi kielar ngimoru lukajik, ngimukur lukajik, kiiloros nalup. Ikote ngirotin keng nikolong ngorot. Engolik ayong ngawiyei a Kuchan eriabasi, engolik ngieman Midian emaranete. Ee Ekapolon Akuj, ngangololin kolong inyunyurikina iyong a? Ngangololin kolong ingoikinit iyong a? Nganamea kolong kitelemarito iyong a? Idokit iyong ngidowon, kitiliwo ekuwam loapolon aurukuk kon na idwangea iyong kon. Ilemuni iyong akau kon todupak ngimalea. Tapak akwap a ngangololin. Nakingolikineta iyong ngimoru, torikirikokis. Tobukun ngakipi anadis, tokurupupuut ngakipi na alokwap, tonyout ngitoroi lukoapolok. Kitiirakinos akolong ka elap ani eyakasi, kotere akimilea a ngimalea kon alu eporito, ka akipeka a akwara kon ana ekwaikwai. Itoruni iyong kiding akwap inyunyura, kipuda ngibukui a angoit. Ipuduni iyong bu ayuun ngitunga kon. Bu ayuun ekapolon a Yuda loseuna. Kipudaa iyong ekarikon aluaronok, napei alomosiring tanang nakejen. Igumi iyong a ngimalea kon ekarikon a ngasigerea keng, lokolong abuni apetar sua ikoni ekuwam lo ipiripiri, Echuruno loger alu ichiakiarito ngikebootok epali. Ipudae iyong anam a ngangolei kon, kitor lotoroi lu aneteuna. Na eirarea ayong nguna, atamaranik, tamaranikis ngipon kang kotere aemit, kerum ayong emudekeke, tolilimiyosi ngakejen kang. Eboikin ayong ekiilingat edaru akolongit a ngichan na iriraa Akuj ngitunga lu kitijiete ngoni. Tani bo kemam ngameyana ekokito, kori kemam ageor eyei lomusabib, tani bo kedakara ageor a akimiet, tani bo pekekokito ngamanat akimuj, tani bo kemunyara ngamesekin daang, tani bo kibooyete nganokin a ngaatuk kongina, alakar ayong ani a Ekapolon Akuj, epuruu Akuj nakayuuni ayong. Ekapolon Akuj, na erai Ekapolon ngesi erai ngikilinga kang. Itipiranit ngakejen kang loger a agete, ketodoki ngesi ayong ngimoru. Akiroit a Ekapolon Akuj naga, na alimokinio Sepania lokookeng a Kuchi, alo arai lokookeng a Gedalia, alo arai lokookeng a Amaria, alo arai lokookeng a Esekia. Ngirwa ngulu, Yosia lokookeng a Amon ngesi arai ekapolon a Yuda. Ebala Ekapolon Akuj kona, “Amunyari ayong ibore daang anakwap, amunyari ngitunga, ka ngitieng, ka ngikieny ta ngikolea. Edwangi ayong luaronok. Ekisari ngitunga anakwap. Ayong Ekapolon Akuj alimu nguna. “Erirae ayong ngitunga a Yerusalem ka lua Yuda daang a atwaret. Ekisari anakwap ibore nipiya a Baal, ka ngirora a ngimurok alu esubete etich a Baal. Amunyari daang lu edokete kidiama ngakais akilip akolong, ka elap ta ngikanyer. Amunyari daang lu ikongete ebalasi kaminasi ayong, tarai ikongete a ekiro a Molek. Amunyari daang lu abongosi akamaluwot, lu nyeringa kewapito ayong, daang lu nyakasakuunete ayong kori nyekengiseenete ngakiro.” Kililinga robo alongaren Ekapolon lo erai Ekapolon Akuj! Kainyo anang akolongit na etubio ngesi ngakiro. Esaki Ekapolon Akuj akitiliwor ngitunga keng ngakipeyos, anyarau ngimoe akirem Yuda. Ebala Ekapolon Akuj kona, “Akolongit na a akipeyos ngina, erirae ngikaweikinak ka talokookeng a ekapolon, ta daang lu esubete ngitalio lugelayek. Akolongit ngina erirae ayong daang lu ilipito loger a ngitunga alu nyeyenete Akuj. Erirae tani lu ilelebete ngakais a ngikapolok ngiboro alu a erukoonu ka engalas.” Ebala Ekapolon Akuj kona, “Akolongit ngina, iirario akigoro alokidor a Ekolia, kiirarae elii alowae alokitetet a ere, kiirarae agiro ekokoriuni alomukur. Kikaloutu, esi lu ilomito kwap ere, kainyo etoakete ngimuchurus daang, emunyarosi daang lu itemete ngaropiyae. “Esaa ngolo erim ayong Yerusalem a akinwaket, erira ngulu ibelobelosi anajako niti ebalasi, ‘Emam ibore esubakini Ekapolon Akuj, nyesubakini naajokak, nyesubakini naaronok.’ Engatario ebari kech kinyasunae ngakais kech. Edukete ngakais nakaneni nyelomete, itaate kesi ngamusabib nakaneni nyemaase emuna kech.” Aapuu akolongit naapolon a Ekapolon Akuj, aapuu ikirikiruna atipei. Edwarer akolongit ngina, itoowanikini tani ngikiliok lukajwok. Eliwor akolongit ngina aka anyunyura, eliwor aka ngichan ka ariaba, eliwor aka nginyas ka amunyaro, eliwor aka aribu kinyikok, eliwor aka ngidowon ka akirionut, akolongit na ekutakinere aburuch taramae elii a ejie, kitijikinoe ngirerea lua ngawasea anakaagongok ka ngipemin lukooyak. Ebala Ekapolon Akuj kona, “Ayauni ayong ngakiro naaronok lotunga, kitwapatwapa kesi loger a ngimuduk. Kainyo kasechakis kesi ayong, ebukor ngaakot kech loger a ngakipi, tobosa ngawat kech loger a ngachin.” Akolongit na anyunyura a Ekapolon Akuj ngina, nyeyuunete kesi tani ngakwangae ka egolit kech. Emunyari Ekapolon Akuj akwap daang a anyunyura keng ana ikwaan ka akim. Atipei jik, etubori ngesi akiyar a itwaan kadaang ani eyei nakwap. Etige, ebukut lo nyikitimete ngileech! Tochunakinos wapei toriangakinos, eringa esi nyekutara loger a ngatunyeny ana ekutari ekuwam, eringa angoit nakamoitanan a Ekapolon Akuj nyedoluno nikus, eringa akolongit a anyunyura a Ekapolon Akuj, nyedoluno nikus. Tasaka Ekapolon Akuj, esi daang lu itiditeuna anakwap, lu iwapito ngakiro na edunguni ngesi. Tosuba ngakiro na eteniyete, kitiditeunos alongaren Ekapolon Akuj. Tokona ngon ipuunosi aloriras, akolongit na anyunyura a Ekapolon Akuj. Emam itwaan idongi lore a Gasa, eliwor Achikelon alaireng. Iritario ngitunga a Achidod lotingilan, kiritarae lua Ekiron alore kech. Oitiakoi! Abe etioko nginyas ianyunete esi Ngipilisti, esi ngitunga lu ilomito lokwaas a anam. Atubu Ekapolon Akuj akiroit anikus. Kimunyari ngesi esi nyiidong tani ipei. Ee ekwaas a anam, iliwor iyong achokor, todukoe ngakais a ngikeyokok ka nganokin a ngamesekin. Ngitunga a Yuda lupiyayek kesi elomete lokwaas a anam, kiyoko ngibaren kech neni, sodi topero nakais na eyakasi Achikelon. Kainyo Ekapolon Akuj na erai Akuj kech, itamuni kesi tobuak najako kech. Ebala Akuj Namerikanyer kona, “Eira ayong eger lo erasitotor Ngimoab ngitunga kang, ka ekiyeny a Ngiamon, erasito kesi ngitunga kang, kiwojos atamar kidemari akwap kech. Tokona bocha, loger araakar ayong Akuj Namerikanyer na ayari, na arai Akuj a Isirael, ikwaanikin Moab ka Sodom, kikwaanikin Amon ka Gomora. Eliwor akwap ngapanya a edoot kinyasun torup edoan awadaang. Ngitunga kang lupiyayek, engatarete ngiboro kech.” Nguna kesi eliworosi ebachit kech kotere ekinis kech, kainyo akianatar kesi kiwoganakis ngitunga a Akuj Namerikanyer. Emoitanikini Ekapolon Akuj kesi, kitiliwo ngakujo daang a akwap pas. Eriedikokinete ngibukui daang ngesi kilipa anakwapea kech. Ee ngitunga a Kuch,*g** kimunyario esi daang a akwara kang. Emunyari Ekapolon Akuj Asiria Itiliwori Ninewi alaireng, akwap nakoonon na erai ariet. Neni eurienikinosi ngisipaan a ngibaren ka ngitieng a moding. Elomete ngataruk ka tanapupu naitae a ngapirio. Erukinete tatula alopidinga, torukis ngikuruka alodorin, kainyo achaoror ngakais kech na ngakito a ngichekereng. Ere loti kolong ajakaanit logo, loti kolong ebooyi akaalimon ebala, “Ayong bon, emam eche.” Nyelo aliwor alaireng, aurienet a ngitieng! Itwaan cha daang ni inutuni, toriangakin kimungumungak akou. Oitiakoi! Abe etioko nginyas eanyuni Yerusalem! Ere lokechanan kinyasuna, ere lo ichiekiarit ngitunga keng. Emam akiroit iirari, nyechamuni akikilakino. Nyigieno ngesi Ekapolon Akuj, nyirudar nia Akuj keng. Ikote ngikarikok keng ngingatunyo lu irurumaate, ngikatubok ngakiro keng ikote ngipeei lu enyamit akoro lu nyisiwalakinete akoit. Eroko ngikadwarak keng nyekachito ngakiro, emodeaka. Enyasut ngimurok ibore ni italeuno, asecha kesi etal. Ekapolon Akuj na eyei lore ngolo, etenoono, nyesubi naaronok. Ataparach daang, esubi nguna eriyan nyichwangakini jik. Nakaneni ngitunga lu nyetenooko, nyitimete ngileech. Ebala Ekapolon Akuj kona, “Amunya ayong ngibukui. Enyasu ngirerea kech. Etiliwo ngawasea kech ka ngipemin asakatan. Aliworosi ngirerea kech alaireng, emam itwaan eringa elosi alorotin. Atama ayong, ‘Kaemete kesi ayong dir, echamunete ngitunga kang akikilakino, sodi nyiinyasunere akwap kech.’ Tongero neni noi toroketa, tosuba naaronok loger lopalem.” Ebala Ekapolon Akuj kona, “Tokona bocha, kidarunae ayong. Akolongit na anyounio atolimo. Kainyo atiaku ayong achunakin ngibukui, atochunak ngapolosio, sodi atobukok kesi anyunyura kang, atotikok apotis a angoit kang daang. Inyasunio akwap daang a anyunyura kang ana ikoni akim. “Ee robo, ngirwa ngulu, elochi ayong ekiruor a ngibukui tojoker, sodi katanyarata kesi ayong, tosuba etich kang iwapito ngakiro kang. Ngitunga kang lu epetara, lu kelipito ayong epote tani a ekwakaye ngangololin a Kuch,*g** kainut ayong ngakipeyos. “Akolongit ngina, nyikirumete esi ngileech ani kolong kingerioto ayong. Kainyo alemari ayong alokiding kus lukenisak ka lu iwogasi. Nyiiliworotor esi nabo lu iwojosi alomoru kang alo italeuno. Kiruki ayong ka esi lu ipalaaka kitiditeuna. Ianyunete esi ni iyuunotor alokiro a Ekapolon Akuj. Ngulu idongete Isirael, nyesubete naaronok nabo nyiruorosi alioko kori nyitoruni alioko nakituk kech. Edakasi kesi topero akaalimon, emam itwaan itoemi kesi.” Ee Isirael, kimaritetek, Ee Isirael, kirema! Ee Yerusalem, talakar kipurok a etau kon kadaang! Alema Ekapolon Akuj eriras kon, achakaki ngimoe kon kwap. Ekapolon Akuj na erai ekapolon a Isirael, irukito ka iyong, nyeringa nabo iyong iemi naaronok. Akolongit ngina, elimokinio Yerusalem kona, “Ee ere a Yerusalem, nyiem! Wara ngakan kon nyiirum emudekeke! Irukito iyong ka Ekapolon Akuj na erai Akuj kon, erai ngesi akajwon na idwangea iyong ngimoe kon. Elakar ngesi kotere iyong, kitikitetenuni ngesi iyong a amina keng. Eeokini ngesi imaritete kotere iyong, loger a akolongit ana a esukukuu.” Ebala Ekapolon Akuj kona, “Etongopia ayong akolongit na ngichan, sodi nyikitingeta iyong ngileech. Ngirwa ngulu, erirae ayong ngitunga daang lu kichiekiarito iyong. Ayuuni lu engwalito daang, atobuu ngirikon nawi. Elochi ngileech kech toliwor ekipur, ipuruunete ngitunga daang anakwap kesi. Ngirwa ngulu, kabuuni esi nawi, kachununi ayong esi wapei. Ketiliwori esi lu kiyenikinitae kipuruun alotunga kadaang anakwap. Ketajakaani esi nabo.” Ekapolon Akuj alimu nguna. Ekaru lo a ngiarei araakar Dario ekapolon a Persia, akolongit na ekingaren a elap alo a ngikan-kapei, abu Ekapolon Akuj tolim akiroit kisitoru nia ekadwaran Agai. Asaki Ekapolon Akuj akiroit ngina kisisakinae Serubabel lo arai lokookeng a Chealitiel, lo arai ekaweikinan a Yuda, ka emuron a Akuj loapolon lo anyaritae Yochua lokookeng a Yeosadak. Tolimok Akuj Namerikanyer Agai tama, “Abe ebalasi ngitunga lugu eringa ngirwa lu ebongokinere akiduk akai kang nyenanga.” Ani erumor tolimok Ekapolon Akuj ngitunga akiroit naga, kisitoru nia ekadwaran Agai ebala, “Ngitunga kang, nyo ibooyoto esi anakais anaajokak, kimiekinito akai kang erai asakatan? Kingolikisi tokona esi ngakiro a eboyor kus! Itakis esi nakaalak, nakaneni ilema nadikidio. Imujete akimuj, nakaneni nyimwokete. Imaase emuna, nakaneni nyikiupi. Inapete ngiworui, nakaneni nyemokearosi ngawat. Ani ngini esubi etich, esibit iwaanakini ngaropiyae lochue lopedepedo. Ikwa nyitamakinete kolong esi toyeneta ibore ni esubatar ngakiro nugu anikus a? Kapesi tokona lomukur yaut ngakito tobongokinioto akiduk akai ngina, sodi atalakaror ayong kelipere kaneni. “Igienosi kolong esi akilem ngalemet nakaalak, ilema nadikidio. Ani na iyauneta esi ngalemet nawi, atokuta ayong nikalonan. Nyoni asubea ayong kongina? Erai ni imiekinitotor esi akai kang erai asakatan, tarai esubi ipei kus daang etich alokai keng. Ibore ngini ngesi emamakar akiru, nabo ngesi emamakar ibore erupunit anakwap. Ayau ayong eron nakwap. Ayau eron lomukur, ka lomanikorea, ka namanat a ngimusabib, ka na ngikito a akimiet, ka nginyia, ka ngitunga, ka ngibaren, ta ibore cha daang ni itakinete esi.” Serubabel lokookeng a Chealitiel, ka emuron loapolon anyaritae Yochua lokookeng a Yeosadak ta ngitunga daang lupiyayek, apot tosuba nguna alimokinit Ekapolon Akuj na erai Akuj kech. Tosuba tani nguna alimokini ekadwaran Agai lo ameuni Ekapolon Akuj na erai Akuj kech. Apot ngitunga tokera Ekapolon Akuj. Ani erumor, abu Agai lo arai emeanara a Ekapolon Akuj tolimok ngitunga ngakiro a Ekapolon Akuj tama, “Alimu Ekapolon Akuj kona, ‘Kirukit ayong ka esi.’ ” Abu Ekapolon Akuj kitalaka ngitai a ngitunga tolemunos akisub etich keng. Ngitunga ngulu kesi Serubabel lo aweikinit Yuda, ka Yochua lo arai emuron loapolon, ta ngitunga daang lupiyayek. NOTE TEXT MISSING Pot kesi akisub etich lo ebongokinere akiduk akai a Akuj Namerikanyer, ana erai Akuj kech, akolongit na ngatomwon-arei ka ngoomwon a elap alo a ngikan-kapei a ekaru alo a ngiarei araakar Dario ekapolon a Persia. Akolongit na ngatomwon-arei ka apei a elap alo a ngikan-kaarei a ekaru alopei kangolo, abu Ekapolon Akuj kiruor nabo kisitoru akiroit keng nia ekadwaran Agai. Tolimok Akuj Agai atamar kisuruor Serubabel lo arai ekaweikinan a Yuda, ka emuron loapolon a Akuj Yochua, ta ngitunga daang lupiyayek tolimok kesi kona, “Akai a Akuj nakolong a ekingaren a, ngae anikus eringa itamunit akibuseanu nakolong keng? Ingolikinito tokona esi atamar ikoni ai? Ikwa nyesibit tokona anikus ibore pasit a? Tani kikoni neni, ejoikinit iyong Serubabel ititinyer. Iyong Yochua dang, totitinyer. Totitinyeketo esi ngitunga daang a akwap. Tosuba etich kainyo kirukit ayong Akuj Namerikanyer ka esi. Nakolong ipudunioto esi alo Misiri, abu ayong kechikichik esi atamar kiruki ka esi jiik. Eringa ayong kirukit ka esi, warasi nyieam.” Ebala Akuj Namerikanyer kona, “Eringa cha wadio ani erumor etamaranik adis ka akwap, anam ka akwap nikoonon. Etamaranikini ngibukui daang, yaunae ebari kech daang nege, sodi esubus ayong akai naga. Erai akwangat ka egolit daang anakwap ekang. Eliwor akai a Akuj nakitetet na ibus noi akidwang nakolong a ekingaren. Neni ngesi etajakaanea ayong ngitunga kang kiboikinos nikaalimon. Ayong Akuj Namerikanyer ngesi alimu nguna.” Akolongit na ngatomwon-arei ka ngoomwon a elap alo a ngikan-koomwon a ekaru alo a ngiarei alo araakar Dario ekapolon a Persia, tolimok Ekapolon Akuj Namerikanyer ekadwaran Agai akiroit naga. Tolimok kona, “Tolimok ngimurok totiakut akiroit naga. Ekoe, kelemu mono itwaan akiring na italeunitoe kilukak loworu keng, ikwa ta ketap eworu ngolo amugati, kori atap, kori emuna, kori akimiet, kori akimuj cha nache daang, esibit esi eliwor akimuj na etapio ngina na italeunitoe a?” Tatachut ngimurok tamasi, “Mam jik.” Kingit Agai kesi nabo tama, “Ani bo keliwor itwaan ngini ni nyitaleuno ani atapea ekatoan, ani erumor tatap apei a ngamuja kanguna. Eliwor akimuj ngina dang na nyitaleuno a?” Tatachut ngimurok tamasi, “Ee.” Sodi tatachak Agai kesi tama, “Ebala Ekapolon Akuj ikokinete neni ngitunga a akwap kana ka etich daang a ngakan kech. Ngakipeyos na ipeyeete kesi alokenoi daang, nyitaleuno.” Ebala Ekapolon Akuj, “Kitama lokojokon ngakiro napei tokona jik esubakinosi. Ani eringa amoru nyidokokino namoru nache alokai a Akuj, ekoni eboyor kus ai? Iloose esi natukiet a epeipe isakete ariamun ngakiloi ngamiae ngaarei, nakaneni toriamut amiat apei. Toloto akiwoun ngalitae amiat apei anichiet emuna, nakaneni kiwout ngalitae ngatomwon-omwon. Abu ayong kataram esi a eron a akoro, ka eloch ta ngamoru a akiru, enyasu ibore daang nikolong itakinito esi. Ani ikoni neni dang, ipot esi towout abongun nikang. Erai tokona akolongit naga na ngatomwon-arei ka ngoomwon, elap lo a ngikan-koomwon, akolongit na arumorere akiduk ngapirio na itoweito akai a Akuj. Kidarutu tokona kingolikis ngakiro na esubakinosi napei tokona jik. Tani tokona kemam ngikinyam idongito lokerui, tamam ngamanat a ngimusabib, ka ngimeyana, ka ngalam ta ngikito a akimiet lu ekokito, kapiari ayong esi napei tokona jik.” Abu Ekapolon Akuj kisuruor Agai na a ngaarei akolongit na ngatomwon-arei ka ngoomwon a elap kangolo, tama, “Tolimok Serubabel ekaweikinan a Yuda atamar edikino ayong etamaranikini adis ka akwap, sodi etukumiyo ngikicholongo a ngapolosio, ka akinyasun ngikilinga a ngapolosio a ngibukui. Ebelukwaari ngaurukukui ka ngikameak kech. Edakarosi ngangolei ka ngikameak kech. Serubabel, ekasuban etich kang, akolongit ngina, kaseuni ayong iyong topolok a ekiro kang. Iyong ngesi kaseu ayong.” Akuj Namerikanyer alimu nguna. Elap lo a ngikan-kauni a ekaru alo a ngiarei alo araakar Dario ekapolon a Persia, abu Ekapolon Akuj tolimok ekadwaran Sekaria lokookeng a Berekia, tarai etatait a Ido, akiroit. Tolimok Akuj Namerikanyer Sekaria atamar tolimok ngitunga tama, “Ayong Akuj Namerikanyer, angoikinit kolong taapaakus noi. Nakaneni abala tokona ayong, tobongutu nikang, atobongu ayong nikus. Nyiikokis taapaakus lukolong alimokinete ngikadwarak atamar toisikis elote kech loaronon ka ngakiro naaronok asubete kesi nakaneni towout kesi akiirar ka akiwap ngakiro kang, ayong Akuj Namerikanyer. Taapaakus a, nyaalu tokona? Ani bo ngikadwarak, ikwa nyedauna kolong a? Apon taapaakus nyiirirae ani angerioto ngitalio ka ngakichikichiket kang nakolong adungokini ayong kesi esitoru lokadwarak lu araakasi ngikasubak etich kang a? Ngirwa ngulu, apot tolunga ngasechesea tamasi, ‘Kisubea sua Akuj Namerikanyer nguna etemokino kisubea itemem ka elote kosi ka nguna kisubi sua. Nguna dir abu ngesi tosubak.’ ” Akolongit na ngatomwon-arei ka ngoomwon a elap alo a ngitomon ka epei (alo enyaritae Chebat), a ekaru alo a ngiarei alo araakar Dario ekapolon, ayong ekadwaran Sekaria, abu Akuj katolimok akiroit. Nakwaare, engolik itwaan edokit angole naarengan. Awei ngesi alokiding ngikito lube talopara alu ayakasi nadipo. Kaku keng, ayakasi ngangolei nache naarengak, ka namugeyek ta naakwaak. Engit ayong ngesi atama, “Ekaapaan, nyo eger a ngangolei kanu?” Tatachu ngesi tama, “Kedodikini ayong iyong eger kech. Lugu kesi lu amea Ekapolon Akuj akireb akwap.” Tolimokis ngangolei emalaikat ngolo tamasi, “Kirim sua akwap daang. Kianyu atamar idatakinit akwap daang echakina chek.” Sodi tolim emalaikat tama, “Ee Akuj Namerikanyer, ingoik iyong Yerusalem ka ngirerea a Yuda a ngikaru a ngitomwon-kaarei tokona. Idarete tokona kesi a ngikaru a ngiai nabo eringa iyong nyidodikina kesi ngisien?” Abu Ekapolon Akuj tatachak emalaikat ngolo ngakiro na abalasi alotau keng chuu. Katolimok ayong emalaikat ngolo atamar atolimo ngakiro na alimu Akuj Namerikanyer ebala, “Keterekuyarit ayong Yerusalem lokojokon. Angoikinit ayong ngibukui lu ibooyete nikaalimon. Iteni dir angoikini ayong Ngisirael wadio, nakaneni apot ngibukui ngulu kitorono noi ngichan a ngitunga kang. Kotere nguna, abongu ayong Yerusalem edodik ere ngolo ngisien. Edukokinio akai kang neni, esiakin akitem ni edukokinio alore alokitetet.” Ani erumor katolimok ayong emalaikat ngolo atamar atolimo akiroit nache naga, “Ebala Akuj Namerikanyer kona, ‘Ilelebun ajako lorerea kang. Ayong Ekapolon Akuj engarakini nabo ere a Yerusalem. Ee robo, aseuni ayong ere a Yerusalem toliwor ngesi erai ere kang.’ ” Engolia ayong nabo ataanyunga ngaamwar ngoomwon. Engit ayong emalaikat lo kiruoror atama, “Nyo eger a ngaamwar kanu?” Katatachak ngesi tama, “Eraakasi ngaamwar nugu ngibukui lukolong ealarete Yuda ka Isirael ta Yerusalem.” Ani erumor kedodik Ekapolon Akuj ayong ngiketiekak ngasua nguomwon. Engis ayong atama, “Nyo eponito ngitunga lugu akisub?” Tatachu ngesi tama, “Eponito ngitunga lugu akitubul ka amunyar ngibukui lukajwok lukolong aremete akwap a Yuda, topetasi ngitunga keng.” Engolia ayong, sodi ataanyunga itwaan etingit auno nakitemiet. Engit ayong ngesi atama, “Aliwae ilosi iyong?” Katatachak ngesi ayong tama, “Alosi akitem aoyau ka aurianut a Yerusalem.” Emalaikat losek kiruoro ka ayong, kisiriamia eche lo abunit nikeng. Tolimok emalaikat losek kiruoro ka ayong emalaikat loche tama, “Tamatar tolimok esorokit yege atamar elalak ngitunga lu elomete Yerusalem ka ngibaren, engopi kona edukokinio ngawasea. Ebala Ekapolon Akuj aliwor ngesi awas a akim, etee ngiwaitin daang a ere kangolo, nabo aliwor akibuseanu alotooma keng.” Ebala Ekapolon Akuj kona, “Wae, wae, tamataros anakwap ana alokwap, ana kolong kapetaritor ayong esi lowaitin daang a akwap. Atipei! Esi daang lu ilomito nakwap a Babilon, tosiwa tobongosi Yerusalem.” Akuj Namerikanyer naketaanyu ayong ekipur keng, kamea ayong alimun ngakiro nugu kotere ngibukui lu angatarete ngiboro a ngitunga keng, “Itwaan ni kitapi esi, ekok ibore ni kechum ayong nakongu. Iteni dir, asubakini ayong kesi, ngitunga lukolong araakasi ngikasubak etich kech, engatarete ngiboro kech.” Eger ngolo ngesi iyeneta esi atamar Akuj Namerikanyer ngesi kameunit ayong. Tolim Ekapolon Akuj tama, “Esi ngitunga a Yerusalem, toeokisi talakaros kainyo abunit ayong akiruk ka esi!” Ngirwa ngulu, epote ngibukui lukaalak nia Akuj Namerikanyer toliworos ngitunga keng. Irukete esi ka ngesi toyena atamar ngesi kameuni ayong nikus. Eliwor Yuda dir eka Ekapolon Akuj anakwap keng ana italeuno, toseu nabo Yerusalem. Esi ngitunga daang, kililinga chek alongaren Ekapolon Akuj, kainyo ebunit ngesi anakibooyet keng ana italeuno. Anakisingolikinet a ache, kedodik ayong Ekapolon Akuj emuron loapolon enyaritae Yochua ewei alongaren emalaikat a Ekapolon Akuj. Aloteten keng, engolik Ekipe ewei esaki akititakin Yochua. Tolimok emalaikat a Ekapolon Akuj Ekipe ngolo tama, “Iyong Ekipe, nyope kikilakinea Ekapolon Akuj iyong! Ee robo, kikilak iyong Ekapolon Akuj nakolong aseuni Yerusalem. Ikoni itwaan en akitoe na akopunio anakim.” Awei Yochua alongaren emalaikat enapit ngiworui lu iunukat. Tolimok emalaikat ngirukitos keng tama, “Talachasi ngiworui lu iunukat enapit ngesi lugu.” Ani erumor tolimok ngesi Yochua tama, “Alema ayong akisech kon sodi kainak iyong ngiworui lukiteat tanap.” Tolimok ngesi kesi tama, “Tobutokisi ngesi apukot naasegan nakou.” Apot kesi kikokis neni, kitanapa ngesi apukot naasegan ka ngiworui, towei emalaikat a Ekapolon Akuj kaneni. Kichikichik emalaikat Yochua tama, “Akuj Namerikanyer ebala, ani kiwap iyong ngirotin kang kiira ngakiro nakalimokini ayong, ipolokini iyong awi kang ka ngalaarin. Eirari ayong ngakilipasinei kon, loger lo apupio ngakilipasinei a ngimalaikae alu ewaasi alongaren kang. Topupok robo Yochua, iyong lo irai emuron loapolon a Akuj, topupokisi esi dang ngimurok luche lu irukito ka ngesi, lu iraakasi emachar a ngirwa aluajokak isidiuno. Edodiuni ayong ekasuban etich kang lo enyaritae Ateni! Toyena atamar ewaak ayong ngaren Yochua amoru apei na eyakasi ngireetin ngikan-kaarei. Egerokini ayong ngagiran kidiama keng, sodi atolema akisech a akwap kana a akolongit a apei. Ee robo, ayong Akuj Namerikanyer ngesi alimu nguna. Akolongit ngina, enyarauni ipei kus daang ekidunyet keng, kiboikinos nikaalimon namanat a ngimusabib ka ngimeyana.” Emalaikat losek kiruoro ka ayong, bu nabo ketekienyu loger lo itekienyunere itwaan ni ejotoe. Sodi kengit tama, “Nyo itee iyong?” Atatachu ayong atama, “Etee ayong ni esipor ataa, ni esubunitae a egolit bon. Eyei atubwa kidiama keng. Ni esipor ataa, eyakasi ngataae ngakan-kaarei. Ayei nikoororon ni irepakinio awaru na inokanakinio. Diyete ni esipor ataa neni, ayakasi ngikito a akimiet ngiarei, epei teten, loche kedieny.” Engit ayong emalaikat atama, “Ekaapaan, nyo eger a ngakiro kanu?” Kengit ngesi ayong tama, “Ikwa nyiyeni iyong a?” Atatachak ayong atama, “Ee, nyayeni ayong ekaapaan.” Katolimok ayong emalaikat atamar atolimok Serubabel akiroit a Ekapolon Akuj na ebala, “Meere ngikilinga, meere agogongu pearai etau kang ngesi idwangea iyong.” Akuj Namerikanyer alimu nguna. Kiatak tama, “Be nyo mono iyong emoru apolon? Alongaren Serubabel iliwor iyong aro. Isiakini iyong adukuoru nakitetet a akai a Akuj. Ani idukokini iyong amoru na esal iremarete ngitunga tamasi, ‘Ibus kare, kibuser kare!’ ” Abu Ekapolon Akuj nabo katolimok ayong akiroit ache tama, “Ngakan a Serubabel kesi adukokis ngateak a akai kana, nakaneni ngakan keng erumorete akiduk. Ani esubakin nguna, eyenunete ngitunga kang atamar ayong Akuj Namerikanyer ngesi kameuni iyong nikech. Katolimok ayong emalaikat tama, “Eraakasi ngataae nakan-kaarei nguna ngakonyen ngakan-kaarei a Ekapolon Akuj na iteete akwap wadaang.” Emenyarito ngitunga adukuoru a akai a Akuj ani ilagilagitere eduke, nakaneni elakarosi kesi na ingolikineta Serubabel erubakinit akiduk akai a Akuj.” Engit ayong ngesi atama, “Ani nyo eger a ngikito a akimiet alu ibakit epei aloteten kibakite loche alokedieny ani esipor ataa. Ani nyo eger a ngaten anaarei a ngikito a akimiet aluarei eyakasi diyete ngiporotoi luarei a egolit lu eleleunitor akimiet.” Kengit ngesi ayong tama, “Ikwa nyiyeni iyong a?” Atatachak ayong atama, “Ee, nyayeni ayong ekapolon kang.” Abu ngesi katolimok ayong tama, “Eraakasi lugu ngitunga luarei lu aseu Ekapolon anakwap kadaang, kidokak akimiet nakies tosuba etich.” Ani engoliari ayong nabo, ataanyunga akitab na eporit alokidiama. Kengit ayong emalaikat ngolo tama, “Nyo itee iyong?” Atatachu ayong atama, “Etee ayong akitab na eporit alokidiama, erai aoyau keng ngamitae ngakan-koomwon, tarai aurianut ngamitae ngoomwon ka anus.” Abu ngesi katolimok ayong tama, “Tooma akitab ngina igiritae ngilam lu ineinearete akwap daang. Ewae epei a akitab igiritae atamar itwarakinio ngikokolak daang anakwap. Ani ewae loche, igiritae atamar ngitunga daang lu ikongete iruorosi alioko, esubere ngakiro napei nguna. Ebala Akuj Namerikanyer ngesi alope ayauni ngilam ngulu, tolomasi kai a ekokolan kadaang ka itwaan daang ni ikongi kiruor alioko elimit ekiro kang. Iboikinosi ngilam ngulu nakais kech, sodi tonomiasi ngakais nguna wadaang, ngakito ka ngamoru aapei.” Bu nabo emalaikat nikang tama, “Kingolia taanyunga ibore ni ebunit!” Engit ayong atama, “Nyooni ngini?” Tatachu ngesi tama, “Erai ibore ngini akikap na eyei akisech a akwap kadaang.” Ayei akikap apukenit na asubunitae anasuat anaapotion. Ani iwolorio apukenit, engolik ayong aberu ibooyi alotooma akikap ngina. Katolimok ayong emalaikat tama, “Eweikinit aberu naga aronis.” Ani erumor kijukak emalaikat ngolo aberu ngina nakikap, tonikenik akikap. Ani engoliari kidiama, ataanyunga ngaberu ngaarei eporunito ni ayei ayong, atia ngabeben kech na kata pelekuto, tolemut kesi akikap topororeta. Engit ayong emalaikat atama, “Aliwae eyaarito kesi akikap?” Katatachak tama, “Eyaarito Babilonia, todukokis akai keng. Ani erumor akai ngina, esipokinio akikap neni.” Ataanyunga ayong akisingolikinet ache. Anakisingolikinet kana, ataanyunga ngaurukukui ngoomwon itorunito napak a ngimoru a ngiarei alu a asuat ananyang. Aurukuk na ekingaren, erito ngangolei naarengak. Aurukuk na ngaarei, erito ngangolei nakirionok. Aurukuk na ngauni, erito ngangolei naakwaak, ani na ngoomwon, erito ngangolei nakapelo. Abu ayong engit emalaikat ngolo atama, “Ekaapaan, nyo eger a ngaurukukui kanu?” Katatachak ngesi ayong tama, “Eraakasi ngaurukukui nugu ngikuwamea lu eponito alowaitin aluomwon. Ayakasi kesi ngaren Ekapolon Akuj lo epolokinit akwap daang, nakaneni anyout tokona arotokis. Aurukuk na erito ngangolei nakirionok, alosi lowae lo alokwap ateni Babilonia. Aurukuk na erito ngangolei naakwaak, alosi too. Ani na erito ngangolei nakapelo, alosi kuju.” Ebunyakina ngangolei nguna asakete alosit akireb akwap. Tama emalaikat, “Kapesi torebo akwap!” Toloto kesi torebo akwap. Ani erumor kirema emalaikat kirema tama, “Kingolik a! Ngangolei na aloose Babilonia, esiapakis anyunyura a Ekapolon Akuj.” Katolimok ayong Ekapolon Akuj akiroit tama, “Tolema ngainakinet na eyaunete ngirikon. Elidai ka Tobija ta Yedaya lu apote alo Babilonia kesi eyaunete ngiboro ngulu. Kape akolongit napei ngina nawi a Yosia, lokookeng a Sepania. Akwangat ka egolit lo idiauni iyong anikech, tosubakinea ekiraun sodi kiwaak nakou a emuron aloapolon alo enyaritae Yochua, lokookeng a Yeosadak. Tolimok ngesi atamar ebala Akuj Namerikanyer kona, ‘Kingolik a, itwaan ni enyaritae Ateni, iniapar ani eyei kaneni, katodukok ayong Ekapolon Akuj akai. Ngesi eduki akai ngina. Erimae ngesi ani eraakar ekapolon, kiboikin lokicholong keng a apolou, topolok ngitunga keng. Diyete ekicholong a apolou a ekapolon kangolo, iboikin emuron loapolon, tosuba luarei ngulu etich aapei, isilito.’ Iwaakinio ekiraun ngolo kai kang toliwor itamunitere Elidai, ka Tobija, ka Yedaya ta Yosia lokookeng a Sepania.” Ngitunga lu elomito nialonan, epote kingarakis akiduk akai a Ekapolon Akuj. Ani esubakinosi nguna, iyenunete esi atamar Akuj Namerikanyer ngesi kameuni ayong nikus. Esubakinosi nguna daang erai kiwap esi lokojokon etoil a Ekapolon Akuj ana erai Akuj kus. Ekaru lo a nguomwon lo araakar Dario ekapolon, akolongit na ngoomwon a elap alo a ngikan-koomwon (alo enyaritae Kisilep), abu Ekapolon Akuj katolimok ayong Sekaria akiroit. Apot ngitunga a ere a Besel tomeasi ngitunga kech kirukosi ka Chareser ta Regemelek, toloto kai a Akuj Namerikanyer akilip Ekapolon Akuj apiaro, ka akingit ngimurok a akai a Akuj Namerikanyer ka ngikadwarak akiroit naga, “Ejoikinit kirubakini asutonokin ka aroneenen akimuj elap lo a ngikan loger lo ngoon sek kisubeene a ngikaru a ngikaalak tanang tokona a?” Katolimok ayong Akuj Namerikanyer akiroit tama, “Tolimok ngitunga daang a akwap ka ngimurok atamar nakolong aroneeneto kesi tosutonokis elap lo a ngikan ka lo a ngikan-kaarei alokaru alu ngoon tomwon-kaarei a, arai kolong ayong dir aroneeneto a? Nakolong emujeta kesi tamaase, pearai ibore ngini akimwonut kech a ngikulepek a?” Ngakiro nguna kesi nakolong kilimokini esi Ekapolon Akuj kisitoru nia ngikadwarak ngirwa lu ajokieta ngakiro daang alo Yerusalem kileleba ngitunga. Ngirwa ngulu, ayakasi ngitunga lukaalak lorerea lu edunyatar Yerusalem, ka ewae lo alokuju ta ngaukon na alo too. Abu Ekapolon Akuj kesuruor ayong Sekaria katolimok akiroit naga tama, “Kolong kanuan, adungokini ayong ngitunga kang atama, ‘Totubo ngakiro eriyan, nabo tapataketa tarata lu kisienito luche. Nyiichiakiasi ngapuseru, ka ngide lukokiok, ka ngitunga a akwap anache lu irukito ka esi ta itwaan cha daang ni ibat ngakan. Kori nyeesak itwaan anikus asubea niche naaronok.’ “Nakaneni apot ngitunga towout akiirar, tobobongo a akisianu kech togolo ngaki kech nyiirareta. Tonineketa ngitai kech kikokis aput. Towout kesi akiirar akitatamet a Etau a Akuj Namerikanyer na esitorunio lokadwarak lukolong ngorok. Kotere ngakiro nguna, abu Akuj Namerikanyer tongoik kesi.” Tolim Akuj Namerikanyer tama, “Ani kona anyaraa ayong kesi towout akiirar, abu ayong atowou akikere nakanyaraata kesi ayong. Nakaneni abu ayong atopeta kesi kirukosi ka ekuwam lo ipiripiri topetakin lobukui lusek peayenete kesi. Ani erotokinete kesi, kidong akwap erai alaireng, tongop itwaan etoronor kaneni. Ee robo, akwap nasek kebusean abu toliwor alaireng.” Katolimok ayong Akuj Namerikanyer akiroit tama, “Kaminarit ayong Yerusalem lokojokon noi, nabo anyunyurikina ayong ngimoe keng lokojokon. Abonguni ayong Yerusalem, emoru kang lo italeuno, eboikin neni. Enyarao ere a Yerusalem, Ere lo emunoi, emoru a Akuj Namerikanyer, enyarao emoru lo italeuno. Ngikasukou ka ngakimak, ingolikinio nabo ibooyete alorotin a Yerusalem, etingit ipei kech daang aburo na ichogaa kotere amojongu. Ilelebunosi ngide lusapa ka lupesur lorotin a ere toboliata. “Alotunga alupiyayek, esibit ngakiro nugu nyesubakinosi. Ani anikang, esubakinosi. Ayuuni ayong ngitunga kang anakwap ana alo kide ka na alo too, etolom lore a Yerusalem. Eliworosi kesi ngitunga kang, atoliwor ayong Akuj kech. Apolokini ayong kesi arai lokamunoi atarai lo etiriyanit ngakiro. “Totitinyeketo! Ipupete tokona esi ngakiro nakolong kilimokinete ngikadwarak ngirwa lukolong esiakinere adupakin ngateak a akai kang na abongokinere akiduk akai a Akuj Namerikanyer. Ani eringa ngirwa ngulu, amam itwaan asaki akirumun itwaan kitusub etich tamam egielit a ngibaren. Amam ekisil ani a ngimoe kainyo abu ayong eteremok ngitunga daang. Nakaneni napei tokona jik, nyasubea ayong ngitunga lupiyayek alotunga kalu ngakiro nakolong asubea luche. Ayauni tokona ayong ekisil nakwap. Etepi akiru loger lopalem sek, tokoko ngamanat, taraa ngamusabib. Etaanyuni ayong lupiyayek alobukut kalo nguna daang tarata ngakech. Esi ngitunga a Yuda ka Isirael! Ngirwa lu ngoon adaunosi, ikote esi ekitetemes a ngitunga alu ilamitae alobukui. Nakaneni kayuuni tokona ayong esi, toliworos ekitetemes a ngitunga alu epiaritae. Nyieam robo, totitinyeketo!” Ebala Akuj Namerikanyer kona, “Nakolong ketongoeta ayong taapaakus, abu ayong atotiaku asubea kesi ngakiro naaronok, atowou akiloch ngatameta kang, tongop kona kesieniyete kesi ayong. Aloger alopei kangolo, atiaku ayong asubea ere a Yerusalem naajokak ka ngitunga a Yuda aapei. Kotere nguna, totitinyeketo! Ngakiro nugu ejoikinit esi isubete, tolimok ipei kus daang itwaan niche ngakiro na iteni. Ani ngikatubok ngakiro kus, tarata jiik etubete ngakiro eriyan, ngakiro na eyaunete ekisil. Nyiituk asubea niche naaronok, nabo nyiiminak akikong kotere alioko, kainyo aremokino ayong Ekapolon Akuj nguna.” Akuj Namerikanyer, abu katolimok ayong Sekaria akiroit tama, “Aroniet akimuj na elap alo a nguomwon ka na elap alo a ngikan, ka na elap alo a ngikan-kaarei ta na elap alo a ngitomon, eliworosi ngisukukui a alakara ka akimaritetere alotunga a Yuda. Kotere nguna, tominakisi ngakiro na iteni ka ekisil.” Ebala Akuj Namerikanyer kona, “Epote ngirwa lu eponeta ngitunga a ngirerea alukaalak Yerusalem. Elimokinete lu eponito alore a epei lu eponito alore aloche tamasi, ‘Kilipi sua Akuj Namerikanyer atolimokisi atamar kisaki apiaro. Potu apana!’ Ee robo, epote ngitunga lukaalak ka ngibukui lukajwok Yerusalem akilip ayong Akuj Namerikanyer esakete apiaro. Ngirwa ngulu, ngitunga ngitomon a ngakwapea anache, epote Loyaudit epei tamasi, ‘Kisaki sua erukosi ka esi, kainyo kiira atamar irukito esi ka Akuj.’ ” Elimunit Ekapolon Akuj akiroit na ebala, “Erirae ayong akwap a Adirak ka ere a Damasko. Ere loapolon a akwap a Siria, erai eka Ekapolon Akuj loger a ngitela a Isirael kadaang. Ere a Amas dang, lo eyei lokukuoru a Adirak, erai ekeng. Ngirerea a Tiro ka Sidon dang ka aosou kech, eraakasi ngikeng. Aduko ngitunga a ere a Tiro ngawasea naapolok na eyuunotor, asenokis akwangat etia apua ka egolit lo etia asakatan alorotin. Nakaneni kingolik a, elemari Ekapolon ibore a Tiro daang, tachakak ebari keng nanam, sodi kinom ere. “Eemi ere a Achikelon na eanyungarea nguna. Ani Gasa, kibelebel eriaba. Ee robo, tani Ekiron, kainyo engopete nguna igieno ngesi. Etubor apolou alore a Gasa, tongopa ngitunga alore a Achikelon. Ngitunga lu inyialakina ngajul kesi elomete Achidod. Atubori ekinis a Ngipilisti. Achakari anakituk kech akiring na eyakasi ngaakot, atodema alokel kech akimuj na italeo akinyam. Eliworosi lupiyayek ngitunga kang, kikokis emachar epei alo Yuda. Ngitunga lua Ekiron, ikokinete Ngiebus. Ayong alope etee akwap kang, eratak ngasigerea nyeetubonorosi kaneni. Emam ekechiekiaran eringa ebuni lotunga kang, kainyo engolik tokona a ngakonyen kang eger lo aboliare kesi.” Ee ngitunga a Sion, talakaros kichurokis! Ee ngitunga a Yerusalem, kiremasi lokojokon! Kingolikisi a, ebunit ekapolon kus, ebunit ichuruno ani edwangea! Nakaneni epalaana, edokit esikiria, isikiria ni erai itasikiria. Etubori ngaurukukui a ejie alo Isirael. Tolema ngangolei a ejie alo Yerusalem. Ebilibilaario ngakwaaras na ejiere. Isisili ngesi ngibukui. Epetakin apolou keng wadaang, napei ananam a apei tanang nache. Epetar napei anangolol a Eupurate tanang losal a akwap. Ebala Ekapolon Akuj kona, “Kotere achamunet nakichamakin ayong ka esi, achamunet na eyookinio a ngaakot, alakakini ayong ngitunga kus anarikonot ana ikoni aaut na emam ngakipi. Esi ngirikon lu ianyut ibore ni igienosi, tobongutu nawasea kus nakaagongok. Kalimokinit tokona atamar kabuakini naajokak ngabuakinet ngaarei. Kainyo akudok ayong Yuda loger a akau kang. Etiliwo Isirael ngimalea kang a amod. Etiliwori Sion akwara etijio ngitunga a Giris.” Ee robo, eriki Ekapolon Akuj ngitunga keng. Egumari ngimalea keng loger a akimilea. Ekapolon lo erai Ekapolon Akuj, ekutakini aburuch, kirukut ka ekuwam lo ipiripiri, lo ekutunit alokuju. Akuj Namerikanyer, itee ngitunga keng. Emunyarete ngitunga ngulu ngimoe kech. Iwangakinete kesi alojie, loger a ngitunga alu irakarit epurot, kiyesasi ngaakot a ngimoe kech. Eleleunete loger a ngaakot a ngakipeyos, ana ebukunio anatubwa tobukokinae lokeno a ngakipeyos. Akolongit ngina, Ekapolon Akuj na erai Akuj kech, eyuuni kesi, loger lo eyuunea ekeyokon esipanit keng. Imaunete kesi anakwap keng loger a asir ana eyei lokiraun. Ee robo, ejoker wadaang a akwap kibuser! Edwarunete ngisapa ka ngapesur kotere alalau a akimuj ka emuna lokitetet. Kilipa Ekapolon Akuj akiru na ngirupei. Ngesi eyaununi ngidowon a akiru. Ngesi eyaununi ekidam kiturup ngamanat kotere itwaan daang. Ingalaate ngamuk na ilamilamere kesi, alioko isemeete ngimurok anamaliteny. Ani lua ngakies, irujaate alioko. Ani lu isililingete ngitunga, erai akisililing kech apasit. Ngakiro nguna erimitotor ngitunga a Yuda akwap loger a ngamesekin ana echakara. Aanyut kesi ngichan ani emamakar ekeyokon. Angoit ayong eleleba kotere ngikeyokok lugelayek lu epolokinito ngitunga kang. Ichiekiarito kesi ngitunga kang, erirae ayong kesi. Ayong Akuj Namerikanyer, eyoki ngitunga a Yuda lu eraakasi ngamesekin kang. Etiliwori kesi angole kang nakapiranan alojie. Alotunga a Yuda, epete ngikapolok ngigelagelae. Epete lu ikote amoru naapolon igangit akai, ka lu ikote apir a eam, ta lu egogong loger a akau ana ejie. Ejiete ngitunga a Yuda loger a ngitunga alukajwok kipudata ngimoe kech alochoto a ngirotin. Ejiete kesi kainyo ayong Ekapolon Akuj kirukit ka kesi. Emunyarete kesi tani lu edokito ngangolei. “Etogogongi ayong ngitunga a Yuda. Ayuuni ayong Ngisirael, lu eraakasi alesit a Yosep. Kesieniyete kesi ayong atobua nawiyei kech. Tosub nyengero kolong ayong kesi. Kainyo ayong arai Ekapolon Akuj na arai Akuj kech. Atachuni ayong ngakilipasinei kech. Ikokinete Ngisirael ngikajwok alojie. Elakarosi loger a ngitunga alu emasito emuna. Ingolikinete ngide kech nguna talakaros, kilelebun alakara lotai kech, kotere daang na asub ayong Ekapolon Akuj. “Anyarauni ayong ngitunga kang atochunak wapei. Kainyo ayuu ayong kesi, talalaketa loger lokolong sek. Tani kolong kealarit ayong kesi lobukui, tani anakwapea anakalonak ketamunete ayong. Idongete kesi ka ngide kech eyarete tobongosi nawiyei kech. Abuuni ayong kesi alo Misiri, achununi anakwap a Asiria. Toloma nakwap a Gilead ka Lebanon, kilelebun todidinger akwap. Ani itorete kesi nanam a ngichan, arami ayong Ekapolon Akuj ngitoroi, toon nituluk a angolol a Nili. Etuborio ekinis a Asiria, sodi torotok apolou a Misiri. Etogogongi ayong ngitunga kang. Iwapete kesi ngakiro kang ketalakasi ayong. Ayong Ekapolon Akuj alimu nguna.” Ee Lebanon! Tangaa ngidorin kon, sodi tonomia akim ngichekereng kon! Ee ngidomou, kigoro tosutonokisi, kainyo aukor ngichekereng. Enyasun ngikito lukebuseak! Ngichokei a Bachan, kigoro tosutonokis kainyo atub amoni nakamutonon. Kiira akigoro na esutonokineta ngikarikok. Adaun ekipur kech! Kiira ngingatunyo irurumaate. Enyasun amoni a angolol a Yorudan. Katolimok ayong Ekapolon Akuj na erai Akuj kang tama, “Toliwor iyong ekeyokon a ngamesekin ana elosio akingol. Ngulu egielete ngamesekin nguna, nyeriangakinosi na engoleta. Ani ngulu agialarete, etamarete, ‘Ekapolon Akuj kipuroe! Kibar tokona sua!’ Tani ngikeyokok a ngamesekin kanu, nyisieniyete ngamesekin nguna.” ( Tolim Ekapolon Akuj tama, “Nyeringa nabo ngitunga a akwap kana kesiniyete ayong. Ewaakini itwaan daang kwap ekarikon keng, ewaak itwaan daang kwap ekapolon keng. Ichiakiarete ngikapolok akwap, nakaneni nyayuuni ayong ngitunga anakan kech.”) Abu ayong atoliwor ekeyokon a ngamesekin ana adikino engolio, kainyo apot ngimuchurus a ngamesekin kegira ayong lotich. Atoting ayong ngaburoi ngaarei. Atanyara apei “Ajokis” atanyara nache “Akimorikin” sodi atolot akiyok ngamesekin. A elap a epei, ataar ayong ngikeyokok nguuni luaronok. Apot kesi katakadakis ayong, katoremokinos kesi dang ayong. Atolimok ayong ngamesekin atama, “Nyaliwor ayong ekeyokon kus. Kimiekisi lu ejoikinit etoakete totoaka, ani lu ejoikinit emunyarosi tomunyaros! Ani lupiyayek tomunyaros make.” Atolem ayong aburo kang na anyaritae “Ajokis” atobil kidodiu atamar abil achamunet nakolong achamakin Ekapolon Akuj ka ngitunga keng. Tobilae achamunet ngina akolongit napei ngina. Ani ngimuchurus a ngamesekin lu keteete ayong, apot toyena atamar abu Ekapolon Akuj kiruor anakiro ana asubi ayong. Ani erumor atolimok ayong kesi atama, “Ani kingolikinito atamar itemokino, kitanyamae ayong ngaropiyae na eyokiyo. Ani kingolikinito atamar nyikitanyamete, totinga.” Apot kesi ketemokis ayong ngakabelebele a ngaropiyae ngatomwon-uni toliworos ngaropiyae ketanyamete kesi ayong. Katolimok ayong Ekapolon Akuj tama, “Kiwaak ni iwaanakinio ngaropiyae a akai a Akuj.” Arai ngaropiyae na ketanyamio ayong nguna na itemokino kotere etich a akai a Akuj. Atolema ayong ekachak ni iwaanakinio ngaropiyae a akai a Akuj. Ani erumor atobil ayong aburo na ngaarei na anyaritae “Akimorikin” sodi tobilar akimorikin a Yuda ka Isirael. Abu nabo Ekapolon Akuj kesuruor ayong tama, “Toliwor nabo ekeyokon, nakaneni toliwor tokona ekeyokon loaronon! Kainyo ayauni ayong nakwap ekeyokon lo nyechoikinit amesek na echakara, kori nyesakari na ewoliyorit, kori nyitedeki na edeak, kori nyitani na nyedeaka, pearai enyami naatumak kibeibe tani ngimolokony. Oitiakoi kare ekeyokon loaronon, lo imiekini ngamesekin keng! Nyope edungio ekileng akan keng, ani akongu keng na aloteten topuyokinae! Nyope elilimiyorea akan keng, tomudukan akongu keng na aloteten.” Erai akiroit naga aka Ekapolon Akuj kotere Isirael. Ekapolon Akuj nakolong apetakini adis, tosub akwap, ka ainakin itwaan akiyar, ebala, “Edikino ayong etiliwori Yerusalem ekopo a emuna. Tamata ngibukui lu idunyatar kimatamatakinos loger a ngitunga alu irakarit epurot. Ani eremio ere a Yerusalem, eremio tani ngirerea daang a akwap a Yuda. Akolongit ngina, etiliwori ayong Yerusalem amoru naapotion alotunga kadaang. Daang lucha esakete adakun amoru ngina, ewanasi. Eremete ngibukui daang ere ngolo. Akolongit ngina, etubuli ayong ngangolei daang sodi esikerepik ngikameak ngangolei daang. Achoikini ayong ngitunga a Yuda, nakaneni etumudukani ngangolei a ngimoe kech. Ngesi etamareta ngimacharin a Yuda, ‘Ngitunga lu elomito Yerusalem, eanyunete ngikilinga ani eyei Akuj Namerikanyer na erai Akuj kech.’ “Akolongit ngina, esikwaanikini ayong ngimacharin a Yuda ka akim na enoki anakito. Ee robo, kori ikokinete akim na enoki alokiding amana na ebwangit. Emunyarete kesi ngibukui daang lu idunyatar. Nakaneni ibooyete ngitunga a Yerusalem alore kech nikaalimon. “Esidwangi ayong mono ngajorei a Yuda, sodi nyiidwang ekipur a ngalesea a Daudi ka lo a ngitunga a Yerusalem, nyiidwang lo a ngitunga aluche a ekitela a Yuda. Akolongit ngina, etowei ayong aupwal kiriam ngitunga a Yerusalem, toliwor ni epalag noi anikech, egogonger kikok ekapolon Daudi. Erikete ngalesea a Daudi kesi loger a emalaikat a Ekapolon Akuj, kikokis Akuj alope. Akolongit ngina, enyasuni ayong ebukut daang lo eremi Yerusalem. “Ngalesea a Daudi ka ngitunga luche a Yerusalem, elelebikini ayong etau lo a ngisien ka lo a akilip. Eanyungarete kesi lokolong echumete, kikaloikis loger a ngitunga alu igorosi kotere ikoku kech ni erai ipei bon, kori ikalounete lokojokon loger a itwaan ani igoror iuriuna ni ekingaren eriaba. Akolongit ngina, emini akigoro naaronon noi Yerusalem na ikoni akigoro a Adad-rimon anaro a Megido. Igoro akwap daang etia ni etia, igorosi ngimacharin daang a ngapei-pei, ngikiliok a akech, ngaberu a akech. Emachar a Daudi, ngikiliok a akech, ngaberu a akech. Emachar a Nasan, ngikiliok a akech, ngaberu a akech. Emachar a Lawi, ngikiliok a akech, ngaberu a akech. Emachar a Chimei, ngikiliok a akech ngaberu a akech. Igorosi ngimacharin daang lu idongete, ngikiliok a akech, ngaberu a akech.” Ebala Akuj Namerikanyer kona, “Akolongit ngina, engaario eitanit kitaleu ngalesea a Daudi ka ngitunga a Yerusalem anakisech kech ka amina ngakujo nagelayek. Ngirwa ngulu, ekisari ayong ngirora a ngakujo anasubuna kadaang anakwap, tojongoi alimit kesi anakwap nabo jik. Atubori ayong anakwap itwaan daang ni iwoga ebala arai ekadwaran, emoria aapei ka etau a ekimue a ngakujo anasubuna. Ani kemin itwaan iche ni erubakinit edwari, ilamete apakeng ka itiokeng lukolong auriyete ngesi tamasi, ‘Nyiyari iyong kainyo iruoro iyong alioko ilimit ekiro a Ekapolon Akuj.’ Ani kedwar ngesi, ichumete apakeng ka itiokeng. Akolongit ngina, irumete ekadwaran daang ngileech kotere ngakisingolikinet na edwarea ngesi. Nyenapi ngesi eworu lo a ngajul esaki akingalare ngitunga. Pearai elimuni tama, ‘Meere ayong ekadwaran. Arai ayong eketan ngamanat, ngesi ayaritor napei kolong a ekiditeu.’ Ani kingit itwaan ngesi tama, ‘Ngaka inyo ngaporos na eyakasi nakwaan kon nugu?’ Etachakini ngesi tama, ‘Aanyuni ayong alokai alopae kang.’ ” Ebala Akuj Namerikanyer kona, “Tonyou kare, akwara! Kikeun kichum ekeyokon kang. Ee robo, ekeyokon lo esubi etich kang. Taara ekeyokon, topetaros ngamesekin. Etorwaari ayong akan kang etijik ngitunga lupalag. Anakwap kadaang, anatiaket anauni a Ngisirael anakwap, emunyarosi ngatiaket ngaarei, kidong atiaket apei bon. Atiaket napei idongi ngina, etemi ayong ka akitoseg loger lo itosegea itwaan akwangat, ee robo, loger lo itosegere egolit. Kelipete kesi ayong kaneni, sodi atatachu ayong ngakilipasinei kech. Atamari ayong, ‘Eraakasi lugu ngitunga kang.’ Etamarete kesi, ‘Ekapolon Akuj erai Akuj kosi.’ ” Kingolikisi a, enangi akolongit a Ekapolon Akuj na ekorere ebari lo angatario anikus, tokorae iteete esi. Echununi Ekapolon Akuj ngibukui daang toremo Yerusalem. Elemario ere ka ngakais kus, totikoonoroe ngaberu kus. Erikio epewae a ngitunga a Yerusalem, ani luche lu idongete, nyichiekete nikalapatan a ere. Ani erumor enyouni Ekapolon Akuj kitiji ngibukui ngulu, loger lo itijio akolongit na ejie. Akolongit ngina, ewei ngesi alomoru a ngikito a akimiet alo eyei kide Yerusalem. Etiakio emoru ngolo ngatiaket ngaarei napei alo kide tanang too, min adipo naapolon kiding. Eteni epewae emoru kwap, toten ewae loche kuju. Imatarosi esi kitoro nadipo na etiakit emoru ngaarei. Imatarosi esi loger lokolong amatarotor taapaakus na arikirikokinea akwap ekaru lo araakar Usia ekapolon a Yuda. Ebuni Ekapolon Akuj, na erai Akuj kus, kirukut ka ngulu italeuno daang. Akolongit ngina, nyemini akatorot kori eloch. Erubakini akwap erai apaaran jiik. Ekapolon Akuj bon eyeni ngirwa ngulu. Nyemini apaaran kori akwaar, kainyo tani ebong, erubakini akicha eyei. Ngirwa ngulu, eleleunete ngakipi na akiyar alo Yerusalem. Ngakipi nguna epewae, elelekinete nanam a Amakat ani epewae tolelekis anam a Mediterenian. Erubakinete ngakipi nguna eleleete nakamu ka nakiporo. Ekapolon Akuj bon eliwor ekapolon a akwap kadaang. Akolongit ngina eliwor Ekapolon Akuj apei bon, nabo eliwor ekiro keng epei bon. Akwap daang, napei alo Geba alokwap tanang Rimon alokuju, eliwor aro nilapat. Edirisi Yerusalem kilany akwap daang na idunyatar. Enyouni ekukuor a ere kangolo alokidor a Benjamen tanang lokidor Lokiitoret lokolong sek ayei ekidor eche. Enyouni nabo alopem a Ananel tanang loboro luchiet ngamusabib a ekapolon. Elomete ngitunga lore a Yerusalem kainyo nyeringa ere ngolo epete ngilam. Ee robo, elomete ngitunga neni nikaalimon. Ngitunga daang lu epote akitijwore ngitunga a Yerusalem, edekakinosi ngidekesinei lukaarak lugu. Ebosete ngawat kech eringa eyarete. Ebosete ngakonyen kech eringa eyakasi nachukulei a ngakonyen, ani ngangajepa tobosa eringa eyakasi nakituk kech. Akolongit ngina, eyauni Ekapolon Akuj ebuloi loaronon noi, kitijik ipei kech daang erukitos keng. Itijikini Yuda Yerusalem. Engatarete kesi ebari a ngibukui kadaang alu idunyatar akwap a Yuda. Echunakinete kesi egolit ka akwangat ta ngiworui lukaalak noi. Edeke lokaaran ngolo, etingi tani ngangolei, ka ngitieng lu ikwaan ka ngisikiria, ka ngikaala, ka ngisikiria ta ngitieng daang lu eyakasi nadakar a ngimoe. Ani erumor itwaan daang ni epuun alobukui alu epote akitijwore ngitunga a Yerusalem, eliwor eloseene Yerusalem ekaru daang, akilip Akuj Namerikanyer ka alakar kotere esukukuu a Ngikalea. Ani kewou ebukut eche anakwap alosit Yerusalem akilip Akuj Namerikanyer nyerami akiru akwap kech. Ani kewout Ngimisiri asubakin esukukuu a Ngikalea, etingi edeke lopei kaaran lo etingi ngibukui lu ewounete asubakini esukukuu ngolo. Eriras ngolo eanyunete ngitunga a Misiri ka ngibukui daang lu ewounete asubakin esukukuu a Ngikalea. Akolongit ngina, igirakinio lokaadongoi a ngangolei ngakiro nugu, “Italekinitoe Ekapolon Akuj.” Ani ngamoti na eyakasi kai a Akuj, ikokinete ngatubwae na eyakasi ngaren ekeno a ngakipeyos. Italeunio amot daang alore a Yerusalem ka akwap a Yuda, toliwor ilipitere Akuj Namerikanyer. Ngitunga lu elemuununete ngakipeyos, ikulaate akiring a ngakipeyos. Akolongit ngina, emam ngimuchurus epete kai a Ekapolon alo erai Akuj Namerikanyer. Eraakasi nugu ngakiro a Akuj na adwario kotere Isirael, tolimo Malaki. Ebala Ekapolon Akuj kona, “Kamina ayong esi jiik. Nakaneni ingitasi esi ibalasi, ‘Kimina iyong sua kwaai?’ ” Tatachu Ekapolon Akuj tama, “Ikwa pearai Esau lokaatokeng a Yakobo a? Abu ayong atominak Yakobo atoremokin Esau. Enyasu ayong akwap keng na ngimukur etiliwo aka ngikolowoi alu a ariet.” Ani kelimut Ngiedomae lu eraakasi ngalesea a Esau tamasi, “Enyasun ngirerea kosi, nakaneni kibongokini sua akiduk.” Elimuni Akuj Namerikanyer tama, “Kimiekisi kesi tobongokis akiduk, ayatari ayong nabo. Kiruorotor ngitunga kesi tamasi, ‘Akwap aronon, ngitunga lu enyunyurikina Ekapolon Akuj jik.’ ” Esi Ngisirael, ingolikinete esi ngakiro nguna a ngakonyen kus a ngikulepek, sodi tolimut tamasi, “Epol Ekapolon Akuj napei anakwap a Isirael tanang nakwapea nache!” Elimokinit Akuj Namerikanyer ngimurok ebala, “Ekerit ikoku apakeng, ani ekasuban etich ekerit ekapolon keng. Ani karai ayong apakus, nyo bo pekikeritotor esi ayong? Ani karai ayong ekapolon kus, nyo bo pekikeritotor esi ayong? Tatachutu mono esi ngimurok lu kimenyarito ayong! Ingitasi esi ibalasi, ‘Kimenyarit sua iyong kwaani?’ Kimenyarito esi ayong ani kilemanakineta ngakipeyos a akimuj ana inyasuna. Nakaneni ingitasi esi ibalasi, ‘Kinyasu sua ngakipeyos kwaani?’ Inyasut ani imenyaritotor ekeno a ngakipeyos kang. Na irikunioto esi ibarasit nimuduk akipeyore, ikwa meere ibore ngini akiroit aronon a? Nabo a, na irikunioto esi ngibaren luangwalak ka lu edeakasi kipeyokis ayong, ikwa meere ibore ngini akiroit aronon a? Kirumak iyong ekapolon kon ibarasit ni ikoni ngini, nyejoikinete ngesi ngakiro kon, kori nyikiminakini ngesi iyong.” Tokona bocha esi ngimurok a Akuj, kilipa Akuj Namerikanyer sodi tojoker ngesi aniyok. Ani kitingito esi akipeyos na ikoni ngina anakan kus, eminakini ngesi tani ipei kus dir a? Ebala Akuj Namerikanyer kona, “Arai bo toyei ipei kus dang ni egoli ngidorin a akai a Akuj, nyiinokakineta esi akim pas alokeno kang! Nyakajoikinito ayong ngakiro kus, kotere ngakiro nguna, nyachamuni ayong ngakipeyos anakan kus. Ngitunga a ngibukui kadaang anakwap, napei anajipunet a akolong tanang nadooyoret, ituruunito ekiro kang. Kenomanakinete kesi ayong emitina awadaang enyarito ekiro kang, nabo kepeyonokinete ngakipeyos na ikiuna, kainyo ituruunitoe ekiro kang anikech. Nakaneni nyikikerito esi ayong na ibalatar erai ekeno kang epasit, kimenyarito ngakipeyos na ipeyoenete esi kaneni. Ibalasi esi, ‘Kituburut sua ngakiro nugu lokojokon,’ toliworos kinyaiyonorete ayong. Kirikonokinete esi ayong ngibaren lu ianyunete a erukoonu, kori lukangwalak kori lukadeakak. Ekoe, isakete esi ayong atolema ngibaren ngulu anakan kus a? Ayong Akuj Namerikanyer alimu nguna. Ilamam ekaliokon lo eyei ibarasit nikile losipanit keng, kikong ngesi atamar alemikini Ekapolon, ani erumor kipeyok ngesi ibarasit ni eyei akemer. Kingolik a, arai ayong ekapolon lo apol noi, nabo ekeritae ekiro kang alobukui kadaang. Ayong Akuj Namerikanyer alimu nguna.” Akuj Namerikanyer elimokinit ngimurok ebala, “Ee ngimurok, kadungokinit tokona ayong esi kona. Ejoikinit esi kikerete ayong a ngakiro ana isubete. Ani pekiirasi esi ngakiro kang, ayauni ayong ngilam nikus. Elami ayong ngiboro lu ianyunete esi toyareta. Iteni dir, elam kolong ayong ngiboro ngulu kainyo nyirichakinito esi ngakiro kang alotai kus. Kingolikisi a, erirae ayong ngide kus, ani esi ngikulepek, kachakea ngawar a ngibaren alu ipeyoenete esi loreetin. Ketwarakini ayong esi anikang. Eger ngolo iyeneta esi atamar kainak ayong esi etal logo, torubea achamunet kang jik nakolong kichamakin ayong ka esi ta ngalesea a Lawi. “Anachamunet ana Ngilawi kangina, echikakini kolong ayong kesi akiyar ka ekisil. Etaanyu ayong kesi nguna, katorimatar ayong. Ngirwa ngulu, toliworos kesi lu karimasi ayong, katokear. Ngakitatamet na iyookino etorunito nakituk kech. Emam na ichwangakina na etorut nangajepa kech. Eruko ayong ka kesi a ekisil ka ateneanut. Toreeut kesi lukaalak anakisech. Ejoikinit ngimurok itatamete aosou a Akuj na iteni. Toloto ngitunga nikech akitatama na asaki ayong, kainyo eraakasi kesi ngimeanara a Akuj Namerikanyer.” Ebala Ekapolon Akuj Namerikanyer kona, “Nakaneni ireasi tokona esi ngimurok alorot, ilegeut esi ngitunga lukaalak kotere ngakiro na itatamete esi. Isecha esi achamunet nakolong kichamakin ayong ka Lawi. Ayong dang, emiekini Ngisirael kimenyarete esi kisuruma ngileech kainyo nyiwapa esi ngirotin kang. Nabo ipot esi kipakasi ngitunga ngiche nyiitatam etal eriyan.” Ekoe, ikwa meere apayok epei a? Ikwa meere kolong Akuj apei kisubuni ngoni daang a? Ani nyo kichwangakinea ngoni achamunet nakichamakinor ngoni, emenyarito achamunet na kolong achamakin Akuj ka taapaayok? Echwangakis ngitunga a Yuda achamunet nasek achamakina ka Akuj kech. Asuba kesi alo Isirael ka Yerusalem ngakiro nakikadakinete. Enyasu Yuda akai a Akuj, na emina Ekapolon Akuj. Eutasi ngikiliok ngaberu na ilipito ngakujo nagelayek. Kimiekisi Ekapolon Akuj tolema alotunga a Isirael, itwaan ni esubi ngakiro naaronok nguna. Warasi ngesi nabo nyeeyau ngakipeyos na eyauni ebukut yok nia Ekapolon Akuj Namerikanyer. Ibore nabo iche isubete esi en. Ilelebete esi ekeno a Ekapolon Akuj ngakiyo ani igorotor esi tokunuas, kainyo nyeringa ngesi echamuni ngakipeyos na iyaununete esi. Ingitasi esi ibalasi, “Nyope echamunea ngesi?” Erai ni eyenea Ekapolon Akuj atamar erai ngesi ekaanyunan a achamunet ana kolong ichamakinosi iyong ka aberu nakolong iusi iyong isorokana. Idepa iyong achamunet nakolong ichamakinosi ka ngesi, tarai kolong ikongi iyong alongaren Akuj atamar iliwor lo imuno ngesi. Ikwa kolong pekitiliwori Akuj esi luarei etau epei ka akwaan apei a? Ikwa meere kolong Akuj apei kisubi ngoni kiteyar kotere akianget keng a? Ekoe, nyo kolong asaki ngesi asubea nguna kongina? Asubi ngesi kongina atourieta ngoni ngide lu eraakasi dir ngitunga a Akuj. Kotere nguna, kirichakisi atamar emam tani ipei ni edepari achamunet na kolong achamakinosi ka aberu na eusi alosorokane keng. Ebala Ekapolon Akuj na erai Akuj a Isirael kona, “Aremokino ayong elakit. Aremokino ayong eger lo emoitanikinea ekile aberu keng. Wara nyiidepa achamunet kon nakolong ibalar iyong iliwor lokimuno aberu kon.” Ituburut esi Ekapolon Akuj a ngakiro kus. Tani ikoni neni, ingitasi esi ibalasi, “Kitubur sua ngesi kwaani?” Ituburut esi ngesi ani ibalatar, “Itwaan daang ni esubi naaronok, ejoikinit Ekapolon Akuj, nabo emina Ekapolon Akuj ngesi.” Kori ani ibalatar, “Aliwae eyei Akuj a ngakiro ana eriyan?” Tatachu Ekapolon Akuj Namerikanyer tama, “Kingolik a, ameari ayong emeanara kang kengarenik ayong tolot asubakin erot kang. Ekapolon lo isakete esi, ebuni kai keng atipei. Emeanara lo kimuit esi akingolikin, ebuni tolimo achamunet kang.” Ngae epedori anaikin akolongit na ebunio ngesi? Ngae epuun na etakanunea ngesi? Ikokini ngesi akim na itosegi ngasua. Ee robo, ikokini esabuni a ekelotan ngiworui. Ebuni ngesi akirirare loger a itwaan ani itosegi ka akiput akwangat. Italeuni ngesi ngimurok kikiunos, loger lo itosegea eketiakan akwangat ka egolit. Italeuni ngesi ngimurok, yauneta nia Ekapolon Akuj ngakipeyos na itemokino. Ani ikokini neni, ngakipeyos a ngitunga a Yuda ka Yerusalem, ejoikinete Ekapolon Akuj loger lokolong ajoikinitotor a angorot. Ebala Ekapolon Akuj Namerikanyer kona, “Ani erumor ataapuu ayong nikus kerira. Nyamamakini alimor ngakiro a ngikapilak, ka ngikalomak, ka ngikengalak, ka lu emodeenete ngikasubak etich kech itanyamete ngaropiyae, ka lu eboliatar ngapuseru, ka ngikokiok, ka lu eboliatar ngitunga a akwap anache ta daang lu nyakakerito ayong. “Ni araakar ayong Ekapolon Akuj na nyelocho ngesi eringaakar esi ngalesea a Yakobo nyemunyara. Ireasi esi alotalio kang iwout akiwap loger lokolong areatar taapaakus. Tokona, tobongutu nikang, katobongok ayong esi. Nakaneni ingitasi esi ibalasi, ‘Kikokini sua kibonguni nikon ai?’ Kengisit ayong esi abala, ‘Epedori itwaan akoko ngiboro a Akuj a?’ Mam jik. Tani kikoni neni, ikokoa esi ngiboro kang. Ingitasi esi ibalasi, ‘Kikoni sua kikokoi ngiboro kon ai?’ Ikokoyete esi ngiboro kang analemunet a apei anatomon ta ngadekon kus nache. Ani kona ikokoeta esi ngiboro kang, elam ebukut kus daang etia ni etia. Yautu alemunet apei anatomon na itemokino lokeru kang, minio akimuj kai kang. Toroae ayong a eger kangolo, kingolikis pekangaari ngipidinga a adis katobukok esi apiaro nakaalan noi. Ekilakini ayong ngikur lukanyamak ngalemet kus sodi nyiinyasut nabo. Erayete ngimusabib kus kigononoto. Toliworos ngibukui daang ebalasi kipiaritae esi, kainyo eliwor akwap kus akwap a ajokon.” Ebala Ekapolon Akuj kona, “Kiruorotor esi ayong niaronon, tabalas ‘Anukiro kiruoror sua iyong?’ Ibalasi esi, ‘Erai akisub etich a Akuj akituburuna pas. Nyo kianyuni ngoni erai kiwap ngakiro na elimunit ngesi, kori nyo kianyuni erai kidodik ngesi atamar kiriangakina ngoni ana kisub? Abe kitee bo ngoni atamar ngitunga lukenisak kesi epiaritae. Meere ajako bon eanyunito ngitunga luaronok, pearai tani na iningioto kesi Akuj, tobucharos.’ ” Apot ngitunga lu ekerito Ekapolon Akuj kiana make, kiira Ekapolon Akuj ngakiro na eanete kesi. Kiwaakinae akitab ngaren Ekapolon Akuj, kigirae ngakiro a ngitunga kadaang alu akerito ngesi, toriakas. Ebala Ekapolon Akuj Namerikanyer kona, “Eliworosi kesi ngikang dir akolongit na anyounio ayong atosubak akiroit. Kesieniyete kesi ayong, loger lo isieniyo apa lokookeng lo esubi etich keng. Topedoreta ngitunga kang nabo akiyen ibore ni etiakit itwaan ni etenoono ka niaronon, itwaan ni esubi etich a Akuj ka ni nyesubi etich a Akuj.” Ebala Ekapolon Akuj Namerikanyer kona, “Kingolikisi a, ebunit akolongit na erirae loger a ekeno alokariran. Lukenisak daang ka luaronok, echakakinio neni tonomia loger a nginyia. Enomiari napei anatorom tanang nateni, emam ibore idongi. Nakaneni ani esi lu ikerito ekiro kang, erupuni agogongu kang nakayuunan anikus loger a akolong, sodi yau akitangalekino ikoni ngamorokin a akolong. Ipudunete esi ichurosi loger a ngitak alu engaunitae ananok. Akolongit ngina, ipudaarete esi luaronok, ikokinete kesi apua alokwap ngakejen kus. Alimu ayong Ekapolon Akuj Namerikanyer. “Kitamutu ngakitatamet a ekasuban etich kang Musa, ka ngitalio ka ngakichiket na adungokini ayong ngesi alomoru a Sinai kotere Ngisirael daang. “Kingolikisi a, ameuni ayong nikus ekadwaran Elija eringa akolongit naapolon naketubulon a Ekapolon Akuj nyenanga. Ereeuni ngesi ngitai a ngikauriak nia ngide kech, toreeu lua ngide nia ngikauriak kech. Ani kemam, abuni ayong enyasu akwap kus a ngilam.” Erai akitab naga aka ngirora lu ngika ta apaakeng a Yesu Kiristo alo erai ales a Daudi ka ales a Aburaam. Auruni Aburaam Isaka, touriu Isaka Yakobo, touriu Yakobo Yuda ka ngikaitotoi keng. Touriu Yuda Peres ka Sera (anyaritae itiokech Tamar). Touriu Peres Esiron. Touriu Esiron Ram. Touriu Ram Aminadab. Touriu Aminadab Nachon. Touriu Nachon Salimon. Touriu Salimon Boas (anyaritae itiokeng a Boas Raab). Touriu Boas Obed (anyaritae itiokeng a Obed Rus). Touriu Obed Yese. Touriu Yese ekapolon Daudi. Touriu Daudi Solomon (arai sek itiokeng a Solomon aberu a Uria). Touriu Solomon Reoboam. Touriu Reoboam Abija. Touriu Abija Asa. Touriu Asa Yeochapat. Touriu Yeochapat Yoram. Touriu Yoram Usia. Touriu Usia Yosam. Touriu Yosam Aas. Touriu Aas Esekia. Touriu Esekia Manase. Touriu Manase Amon. Touriu Amon Yosia. Auruni Yosia Yeoyakin ka ngikaitotoi keng ngikaru lu arikere Ngisirael nakwap a Babilon. Na arikorere ngitunga Babilon, touriu Yeoyakin Chealitiel. Touriu Chealitel Serubabel. Touriu Serubabel Abiud. Touriu Abiud Eliakim. Touriu Eliakim Asor. Touriu Asor Sadok. Touriu Sadok Akim. Touriu Akim Eliud. Touriu Eliud Eleasar. Touriu Eleasar Matan. Touriu Matan Yakobo. Touriu Yakobo Yosep ekile a Mariam ana arai itiokeng a Yesu alo enyaritae Kiristo. Nakaneni ayakasi ngalesea ngatomon ka ngoomwon napei ana Aburaam tanang Daudi. Ayakasi ngalesea ngache ngatomon ka ngoomwon napei ana Daudi tanang ngikaru lu arikere Ngisirael nakwap a Babilon. Ayakasi ngalesea ngache ngatomon ka ngoomwon napei alokaru alu arikonot kangulu tanang ngirwa lu edounere Kiristo. Ekoni akidounet a Yesu Kiristo nege. Anerit Yosep itiokeng a Yesu na enyaritae Mariam. Ani eringa kesi nyepero, apon Mariam toyenae atamar epoti ngesi ikoku kotere agogongu a Etau a Akuj. Yosep ngolo anerit ngesi asubeene jiik ngakiro nguna iyookino. Kona peasakea ngesi Mariam eriamuni ngileech, abu nyisileereu ngakiro nguna, tasak atiaka ka Mariam ekiilingat. Ani eringa ngesi itami ngakiro nguna, bu Emalaikat a Akuj nikeng kisuruja ngesi tama, “Iyong Yosep lo irai eka a ales a Daudi, nyiiker akuut Mariam, kainyo erai agogongu a Etau a Akuj apotio ngesi. Idouni ngesi ikoku nisapat ni ilimokini iyong ekiro be Yesu, kainyo eyuuni ngesi ngitunga keng anasechesea kech.” Asubasi nugu daang sodi kiyookinotor nguna kolong alimuni Ekapolon Akuj alokadwaran keng tama: “Epoti apese na nyepero ka ekile a ache kidou ikoku nisapat, ni enyarao Imanuel” (ngesi atamar, “Kirukit ngoni ka Akuj”). Na akienyunea Yosep kiuut Mariam loger lo alimokinea Emalaikat a Akuj. Nyepero Yosep ka Mariam eringa idia nyidouno. Tolimok Yosep ngesi ekiro be Yesu. Edounio Yesu alore a Betleem anakwap a Yudea, arai Erode ekapolon. Napei edounere ngesi, pot ngikoosok alo kide lu aosokinito akisemere ngikanyer tanangut lore a Yerusalem. Kingitas tamasi, “Nyaani ikoku ni edoun toliwor Ekapolon a Ngiyaudi? Kingolikini sua etop keng ejupuni alo kide, apotu akilip ngesi.” Na eirarea ekapolon Erode ngakiro nguna abu ngesi kialolongo ka ngitunga a Yerusalem daang. Tochunak ngesi ngimurok luapolok ta ngiketatamak a etal wapei kingit kesi tama, “Aliwae idounere Kiristo?” Tatachakis ngesi tamasi, “Idounio ngesi alore a Betleem anakwap a Yudea. Egirit ekadwaran a Akuj kona: ‘Esi ngitunga a Betleem, lu iyakasi nakwap a Yuda, nyemenitae ere kus alorerea aluapolok a Yuda. Kainyo ebuni ekarikon anikus. Ngolo epolokini Ngisirael lu eraakasi ngitunga kang.’ ” Tanyara Erode ngipeyok lukoosok kipaka nikech make sodi tongichu anikech esaa ngolo ajupunea etop. Tomea kesi Betleem kichikak tama, “Kapesi tongichutu ngakiro daang a ikoku. Ani ianyunete ngesi kitolimokis ayong dang sodi atolot akilip ngesi.” Torotokis kesi na arumoreta ekiruor ka Erode. Toeka etop ngolo sek engolikinete kesi ejupuni ngaren kech tanang nawi na ayei ikoku. Talakaros kesi lokojokon noi na engolikineta etop ngolo. Tolomasi kesi kai kingolikis ikoku ka itiokeng Mariam. Toriediko kilipa ngesi. Ani erumor, tangaasi ngichuei kech tolemikis ngesi ngainakinet nugu, egolit ka ekinyaate lokakukunyon ta eche lo ekukuny todwar. Kichikichikak Akuj kesi kisuraja atamar nyeebongosi ni eyei Erode. Apot kesi kinachasi ebongete nakwap kech. Arotokinet kech, bu emalaikat a Akuj nia Yosep kisuruja tama, “Tonyou toriko ikoku ka itiokeng towot Misiri, kiboi kaina tanang akolongit nakalimokinea ayong iyong atamar torotok, kainyo esaki Erode akiar ikoku.” Tonyou Yosep toriko ikoku ka itiokeng tolot Misiri nakwaare. Kiboikin ngesi inaa tanang ngirwa lu atoanea Erode. Asubasi nugu daang sodi kiyookinotor nguna kolong alimuni Ekapolon alokadwaran keng ebala: “Anyarauni Lokookang alo Misiri.” Na ayenunea Erode atamar kengalata ngipeyok lusek apote alo kide, abu tongo lokojokon. Tolim ngesi atamar taarae ngide daang lusapa lu araakasi ngikaru ngiarei ta lu aringa nyeliworo ngikaru ngiarei, alo Betleem ka ngirerea lu kidunyet keng. Tosub ngesi nguna itemem ka ngakiro naalimokinete ngesi ngipeyok iwapap ka esaa ngolo ajupunea etop. Aloger kalo kiyookinos ngakiro nakolong alimuni ekadwaran a Akuj Yeremia ebala: “Eirario echale alore a Rama, etoil a itwaan igoro, kisutusuta noi. Igoro Rael kotere ngide keng. Tonger ngesi akisililingo. Kainyo amunyar ngide keng muny.” Ekisidi a akitu a Erode, bu emalaikat a Akuj nia Yosep kisuruja alo Misiri tolimok tama, “Tonyou toriko ikoku ka itiokeng tobong nakwap a Isirael kainyo atoaka ngulu kolong asakete akiar ikoku.” Tonyou Yosep toriko ikoku ka itiokeng a ikoku tobongio nakwap a Isirael. Na eirarea ngesi atamar elunyokin Arikelau nados ka apa keng aliwor ekapolon a Yudea, toker Yosep akilom neni. Naechikakinea Akuj Yosep ngakiro nakaalak isurujae, abu ngesi tolot Galilaya. Tolom ngesi lore lo anyaritae Nasaret, sodi kiyookinotor ngakiro nakolong alimunete ngikadwarak a Akuj atamar: “Enyarao ngesi itwaan a Nasaret.” Ngirwa ngulu bu Yoana Ekebatisan tolomak akitatam anariet a akwap a Yudea ebala, “Tolunga ngasechesea kus kainyo aapuu apolou a Akuj.” Yoana ngesi lokolong eruoro ekadwaran a Akuj Isaya ngakiro keng nakolong abalar: “Etoil a itwaan ani echala anariet ebala: ‘Tosubakisi erot a Ekapolon. Kitenikisi erot lo itori ngesi!’ ” Anapit Yoana aruba ka ngiworui lu adonyunitoe angajul a ngikaala. Ainikinit aruba namuny naabor. Anyameene ngimases ka akimiet a ao. Aloseenete ngitunga a Yerusalem nikeng ka lu apote alowaitin kadaang a akwap a Yudea ta ngalupio daang na aya diyete angolol a Yorudan. Tolimosi ngasechesea kech kibatisae anangolol a Yorudan. Na engolikinea Yoana Ngiparisayo ka Ngisadukayo lukaalak epote nikeng esakete akibatiso a ngakipi, tolim ngesi tama, “Esi lu ikote ngarewa, ngae kichikichiki esi atamar ipedorete abuchar aloriras alo ebunit? Tosuba ngitichisio lu itodiunete atamar ilunga esi dir ngasechesea kus. Nyiitamasi kori ipuunosi aloriras ani iraakatar ngalesea a Aburaam, kainyo kalimokinit esi dir atamar epedori Akuj asubakin Aburaam ngide anamoru kanu. Edikino aep iteli ngikito alokwap anaten, ekitoe daang lo nyekoniuni ageor naajokon itelio tachakakinae nakim. Kebatisae ayong esi a ngakipi idodiunit akibatiso ngina atamar ilunga esi ngasechesea kus. Nakaneni ngolo ebuni ekisidi kang, epolot noi kedwangit ayong. Nyitemokino ayong tani akodi ngamuk keng. Kibatisae ngesi esi a Etau a Akuj ka akim. Etingit ngesi adaet esaki adaun ngichok a ngakanoi. Iwaakini ngesi ngakanoi lokeru keng nakaneni kinom ngatunyeny a akim ana nyedunge jik.” Torotok Yesu alo Galilaya tanang Yorudan esaki Yoana kibatisa ngesi. Nakaneni asaki Yoana akiratakin ngesi tolim tama, “Ejoikinit iyong kibatisae ayong. Nyo ibunitor iyong nikang?” Tatachak Yesu ngesi tama, “Kimiek atosuba kona tokona, kainyo aloger kalo kisubakini ngoni daang na esaki Akuj.” Tacham Yoana nguna. Napei arumoror akibatisare Yesu, topud ngesi anakipi. Sodi tangaar adis kingolik ngesi Etau a Akuj lo ikoni akuuri etiyaun todo kidiama keng. Kiirarae etoil anadis ebala, “Lokookang lominat ngesi lo, ketalakarit ngesi ayong.” Sodi toreea Etau a Akuj Yesu nariet kiningio ngesi Ekipe kaina. Na aronitor Yesu ngakwaarisea ka ngapaaranisea ngatomwon-omwon, tanyam akoro. Bu Ekipe nikeng tolimok ngesi tama, “Ani kirai iyong Lokookeng a Akuj, kitiliwo chene ngamoru nugu akimuj.” Tatachak Yesu ngesi tama, “Igiritae nakitab a Akuj kona: ‘Nyeyari itwaan a akimuj bon pearai eyari kotere akiroit daang na itoruni nakituk a Akuj.’ ” Sodi toriko Ekipe ngesi Lore a Yerusalem, lo italeunitoe, kitowo ngesi analem a akai a Akuj, tolimok tama, “Ani kirai iyong Lokookeng a Akuj kimasar chene kwap, kainyo igiritae kona: ‘Elimokini Akuj ngimalaikae keng kikamut kesi iyong a ngakan kech, nyeenang amoru akeju kon.’ ” Tatachak Yesu tama, “Igiritae nabo kona: ‘Nyiining Ekapolon Akuj kon.’ ” Toriko Ekipe Yesu moru lokooyen noi kidodik ngesi ngapolosio daang a ngakwapea ka apolou kech. Tolim Ekipe tama, “Kainakini ayong iyong nugu daang kiriedik iyong kilip ayong.” Sodi tatachak Yesu tama, “Kape iyong Esiitan. Igiritae kona: ‘Kilip Ekapolon lo erai Akuj kon, sodi tosub etich keng bon!’ ” Sodi toisik Ekipe Yesu, pot ngimalaikae kingarakis ngesi. Ani iirari Yesu atamar aen Yoana alojela, tolot ngesi Galilaya. Abu ngesi nyiiboikin Nasaret, nakaneni tolot akiboi alore a Kaperinaum alo eyei diyete anam a Galilaya. Erai neni akwap a Sebulun ka Naputal. Asubasi nugu sodi kiyookinitor nguna kolong alimuni ekadwaran a Akuj Isaya ebala: “Ngitunga a akwap a Sebulun ka akwap a Naputal, lowae lo a anam, ekwakaye a Yorudan, ka Galilaya, akwap na ibooyoto ngibukui lu nyerai Ngiyaudi. Ngitunga ngulu eyakasi naribu, ingolikinete akicha naapolon. Ngulu eyakasi nakwap na aribu ana erai akitu, ekwangikini akicha.” Napei ngina jik, tolomak Yesu akitatam ebala, “Tolunga ngasechesea kus, kainyo aapuu Apolou a Akuj.” Na alosio Yesu alokwaas a anam a Galilaya, abu kingolik ngikaitotoi ngiarei lu araakasi ngikechiemak a ngikolia, Simon (lo enyaritae Petero) ka lokaatokeng lo anyaritae Andirea, echakete epuute nanam. Tolimok Yesu kesi tama, “Kiwapakinae ayong sodi ketatam esi akirum ngitunga loger lo irumeta ngikolia.” Kimiekis kesi ngipuutei kech atipei sodi kiwapakis ngesi. Na arotokinio ngesi ngaren kaneni, kingolik ngikaitotoi ngiche ngiarei, Yakobo ka Yoana lu eraakasi talokookeng a Sebedayo. Ayakasi kesi ka apakech Sebedayo natubwa edonyete ngipuutei kech. Tanyara Yesu kesi. Tonyout kesi atipei kimiekis apakech anatubwa sodi kiwapakis Yesu. Erimit Yesu ngiwaitin daang a akwap a Galilaya itatami anakais a Atuk. Alimonori ngesi Ngakiro Naajokak a Apolou a Akuj, nakaneni etojokeene ngidekesinei ka ngilekesinei alotunga. Tokeikin ekipur keng nakwap daang a Siria. Sodi inunae ngesi ngitunga ngulu adeakasi ngidekesinei lugelagelae kangulu echanasi, ta lu ariabasi. Kitojok Yesu ngulu daang ekerepikinit, kangulu erakanarosi, ta ngulu angwalito. Kiwapak asepich a ngitunga ngina abuni alo Galilaya ka ngirerea Lutomon, Yesu. Apote ngiche alore a Yerusalem, ka akwap a Yudea ta lu aponito a ekwakaye angolol a Yorudan. Na engolikinea Yesu asepich a ngitunga, todoka kidiama emoru kiboikin. Tochunun ngirukitos keng nikeng sodi tolomak ngesi akitatam kesi ebala: “Epiarit Akuj ngulu eyenete atamar eringa kesi nyenupa ngakiro a Akuj. Kainyo erai Apolou a Akuj akech. Epiarit Akuj ngulu ialolongete. Kainyo isililingi Akuj kesi. Epiarit Akuj ngulu epalaaka anikeng. Kainyo eanyunete kesi nguna ichikakinit Akuj. Epiarit Akuj ngulu iitanito akiwap ngakiro na echamit Akuj, loger a itwaan ani enyamit akoro ka akure. Kainyo isimwonio kesi noi. Epiarit Akuj ngulu isieniyenete luche. Kainyo isienio kesi. Epiarit Akuj ngulu ikiuna ngitai. Kainyo eanyungarete kesi Akuj. Epiarit Akuj ngulu esakete akisisil ngitunga. Kainyo enyarae Akuj kesi ngide keng. Epiarit Akuj ngulu eboliare ani iwapitotor ngakiro na echamit Akuj. Kainyo erai Apolou a Akuj akech. “Kipiarit Akuj esi lu kingeritoe, kitoboliare nabo kitingakin ngakiro naaronok kotere ayong. Talakaros kichuro, kainyo eyei ebachit loapolon nadis kidaritere esi. Aboliatar kolong ngitunga ngikadwarak a Akuj lungorok loger lopei ngolo. “Ikwaan esi ka amakat alotunga a akwap. Nakaneni ani kepener amakat, emam kona itababaruunio nabo. Eliwor ngesi ibore pasit, echakario kipudata ngitunga. “Ikwaan esi ka akicha alotunga a akwap. Ere ngolo edukokinitae kidiama emoru, ileere. Emam itwaan inokakini ataa sodi tobuburik atubwa. Iwaakinio ni ikeuna kinwakunea ngitunga daang alokai. Aloger alopei kangolo, ejoikinit akicha kus ekwanguni alotunga sodi taanyungareta kesi ngitichisio kus luajokak, kipuruut Apakus lo eyei nadis. “Nyiitamasi kori abunit ayong akikisar etal a Musa ka ngakitatamet a ngikadwarak a Akuj. Peabunit akikisar pearai akitemokin kesi toriyana. Kalimokinit ngakiro na iteni atamar, ani eringa adis ka akwap eya, emam ibore kori akiroit tani nadiochichi a etal na ikisario eringa nyitemokino kona esakitere. Kaneni, itwaan cha daang ni esechi akiroit tani nadiochichi a etal, kitatam luche atamar tosuba kongina, enyarao ngesi itwaan niichi Anapolou a Akuj. Nakaneni itwaan cha daang ni irichakini etal kitatam luche atamar tosuba kongina, enyarao ngesi niapolon Anapolou a Akuj. Kalimokinit esi atamar ani pekidwang ngakiro kus na a ateneanut nguna a ngiketatamak a etal ka Ngiparisayo, nyipedorete esi alomar Napolou a Akuj. “Iirasi esi ebeyo alimokinitae kolong ngitunga atamar, ‘Nyiiar. Itwaan daang ni eari niche irirao’. Nakaneni kalimokinit tokona atamar, itwaan cha daang ni engoikini lokaatokeng irirao. Itwaan cha daang ni emori lokaatokeng erikunio nitubet ngakiro. Itwaan cha daang ni elimokini lokaatokeng atamar erai ekabangabangat, ejoikinit echakakinio nakim ngina nyedunge. Nakaneni ani kiyaa iyong ainakinet kon nia Akuj kiwaak lokeno lo ipeyonokinere Akuj, sodi kitam iyong atamar kingoikinit iyong lokaatokon kotere ichebore, kimiek ainakinet kon alongaren ekeno lo ipeyonokinere Akuj. Tolot atipei kisila ka lokaatokon ani erumor tobong tolemik Akuj ainakinet kon. “Ani esaki itwaan akititakin iyong kiteriko nitubet ngakiro, topupokinos ka ngesi alorot eringa nyenanga nitubet ngakiro. Ani kinanga esi nitubet ngakiro, kimiekinea ngesi iyong ekatubon ngakiro lo elimokini ngasigerea atamar kitoinikis iyong lojela. Kalimokinit ayong iyong atamar, nyipuduni iyong kaneni jik, mati kitach amicha kon kisunyak daang pil. “Iirasi atamar abeyo, ‘Nyiilom’. Nakaneni kalimokinit esi tokona atamar, itwaan daang ni ingolikini aberu tasak akiper ka ngesi, aliwor ngesi ekaloman alotau keng. Ani kitosech iyong akongu kon na aloteten, tout tochaka. Ejoikinit ekinier kon epei engwali, akidwang akwaan kon daang echakakinio nanam na a akim. Ani kitosech iyong akan kon na aloteten, totub tochaka. Ejoikinit ekinier kon epei engwali akidwang akwaan kon daang echakakinio nanam na a akim. “Alimunitoe nabo atamar, ‘Itwaan daang ni elaki aberu keng ejoikinit einakini ngesi abarua a elakit.’ Nakaneni kalimokinit tokona atamar, ani kelak itwaan aberu keng, peelomit aberu, asech ngesi ani etiliworea aberu ngina akaloman erai kiuut ekile eche. Ekile lo iuusi aberu ngina, dang eliwor ekaloman. “Iirasi esi atamar alimokinitae kolong ngitunga atamar ebeyo, ‘Nyiikong pas, nakaneni tosubak nguna ikong iyong ani a Ekapolon Akuj atamar isubakini’. Nakaneni kalimokinit esi tokona atamar, nyiikongo jik. Nyiikongo tani adis, kainyo erai ekicholong lo Apolou a Akuj. Nyiikongo tani ngalup, kainyo erai neni ichiekit Akuj. Nyiikongo tani Yerusalem, kainyo erai ere a Ekapolon a loapolon. Nyiikongo tani akou kon, kainyo nyipedori iyong akitokwang kori akisirion etimat tani epei. Tolim atamar: ‘Kongina’ kori ‘Meere kongina’. Ngakiro ngache na iatakini iyong eponito ani a Ekipe. “Iirasi atamar abeyo: ‘Etachakin akongu nakongu nache, sodi totachakin ekelae lokelae loche’. Nakaneni kalimokinit tokona esi atamar, nyiitachak ngakiro naaronok na kisubakinea iyong itwaan. Ani kibap iyong itwaan namatengen na aloteten, toreik na alokedieny dang kibap. Ani kititak iyong itwaan kitoriko nitubet ngakiro kotere eworu kon lo alotooma, nak ngesi tani lo alokidiama. Ani kitingak iyong itwaan akiwok eegos keng a akilomitait a apei, kiwok a ngakilomitae a ngaarei. Ani kilip iyong itwaan ibore, nak ngesi. Ani kesaki itwaan akiar amicha anikon, nyiimik ibore ni esaki. “Iirasi esi atamar abeyo, ‘Tominakisi ngipaalon kus toremokinos ngimoe kus’. Kalimokinit esi tokona atamar: tominakisi ngimoe kus kilipakisi Akuj ngulu kiboliatar esi. Sodi toliworotor esi ngide ka Apakus alo eyei nadis. Kainyo itachai ngesi akolong kotere ngitunga daang, luajokak ka luaronok. Itetepi ngesi akiru kotere lu esubete naajokak ka lu esubete naaronok. Ikokini Akuj kiinakini esi ebachit kiminasi esi ngitunga lukiminasi esi make ai? Esubete tani ngiketubukok echur kongina. Ani kimalaate esi ngipaalon kus make, anijokis idwangitotor esi luche? Esubete tani ngulu nyerai Ngiyaudi nguna. Ejoikinit esi ikiuna loger lo ikiunakar Apakus anadis! “Warasi nyiiwap ngitalio a Akuj alotunga sodi kipuruunere esi. Ani kiwap esi kitaanyungareta ngitunga, nyianyunete esi ebachit ani ka Apakus alo eyei nadis. “Nakaneni na iinakinea iyong ngikebootok ibore kon, nyiipetak ngakiro nguna lotunga loger lo esubete ngikamodeanak anakais a Atuk ka ngirotin. Esubete kesi nguna sodi kipuruunioto ngitunga. Kalimokinit esi ngakiro na iteni atamar, aanyut kesi ebachit kech lo itemokino. Nakaneni na iinakinea iyong ngikebootok ibore kon, tochoik nyeeyen akan na alokedieny ibore ni esubi na aloteten. Ejoikinit erai akiroit kon bon a ilope. Nakaneni Apa kon ngolo itee ibore ngini isubi iyong idait, kiinakini iyong ebachit. “Ani ilipete esi, warasi nyiikokis ngikamodeanak. Eminasi kesi anyounun akilip anakais a Atuk ka lowaitin a ngirotin, ni epedoreta ngitunga daang aanyungar kesi. Kitamutu nugu, aanyut kesi ebachit kech lo itemokino. Nakaneni na ilipea iyong, toloma namaniyat a akai kon togolok ekidor, kilip Apakon ngolo nyiteo. Nakaneni Apakon ngolo itee ibore ngini isubi iyong idait, kiinakini iyong ebachit. “Anakilip kon, wara nyiilimu ngakiro nakaalak napasiek loger lo esubete Ngibukui lu nyerai Ngiyaudi. Itamito kesi atamar kori iirari Akuj ngakiro nakaalak ilipitotor kesi. Nyiikwaanikinosi ka kesi. Eyeni Apakus nguna isakete esi tani eringa esi nyilipa ngesi. Ejoikinit esi ilipete kona: ‘Apa kosi lo eyei nadis: Ekiro kon kipuroe. Apolou kon bu. Echami kon tosubakin kanege anakwap kona esubar anadis. Nakinae akolongit na akimuj kosi na itemokino. Torimakinae ngasechesea kosi kona kirimanakinea sua lu kisechanakinete sua. Nyikilomak sua nakiningo nakaagongon, nakaneni toyuunae a Lokipe.’ “Ani kirimanakis esi luche ngasechesea na kisechanakinete esi, kirimakini esi dang Apakus lo eyei nadis. Nakaneni ani pekirimakis esi luche ngasechesea kech, nyikirimakini esi Apakus lo eyei nadis ngasechesea kus. “Ani kiron esi, nyiitasionokinosi loger lo itasionotor ngikamodeanak. Eloose kesi ebilakinito ngireetin sodi toyenunea itwaan daang atamar eronito kesi. Kalimokinit esi dir atamar, aanyut kesi ebachit kech lo itemokino. Ani ironete esi, kilotasi ngireetin kus sodi kikiarasi ngitim kus. Sodi nyeyeneta luche atamar ironito esi. Apakus ngolo nyiteo ngesi bon eyeni. Nakaneni Apakus ngolo itee ibore ni isubi iyong idait, kiinakini iyong ebachit. “Nyiiwaa ebari kus kanege anakwap ani epedoreta ngakimam ka ekut akinyasun. Epedorete ngikokolak dang aemakin tokokoa. Ejoikinit iweyete ebari kus anadis ani nyinyasuneta ngakimam ka ekut. Nyepedorete ngikokolak dang aemakin tokokoa. Kainyo epete ngitai kus ni eyei ebari kus. “Ikote ngakonyen kus ataa a akwaan. Ani kejokak ngakonyen kus, eyei akicha nakwaan daang. Ani keroko ngakonyen kus, eyei aribu nakwaan daang. Ani kerai akicha na eyei nikus aribu, etia akirionut eyei naribu ngina ai? “Emam itwaan eliwor ekasuban etich a ngikapolok a ngiarei, eremokin epei sodi tominak loche, kori epupi ngakiro a epei dio kimenya loche. Nyipedorete esi akiwap Akuj ta ebari kus. “Ngakiro nugu kesi kalimokinitor esi atamar, kuriasi nyiiriabasi kotere akimuj na isakete esi ka ibore ni imaase esi toyareta. Nyiiriabasi tani kotere ngiworui lu inapete esi. Ani ikoni dang, nyejok akiyar nyidwangit akimuj a? Ani nabo dang, nyejok akwaan nyidwangit ngiworui a? Kingolikisi ngikieny lu eporito. Nyitaate kesi, kori nyelemete, kori nyikachete ngalemet lokerui. Nakaneni itani kesi Apakus lo eyei nadis! Nyikichoikinit esi Akuj noi nyidwangito ngikieny a? Ngae anikus ani keriabakin epedori akiatakin ngirwa ngiche loboyor keng? “Nabo, nyo iriabatar esi kotere ngiworui? Kingolikisi eger lo epolooto ngatur na amoni, emam etich esubete kesi kori nyedonyonokinosi ngiworui kech. Nakaneni kalimokinit ayong esi atamar, tani Solomon dang, lo arai ekabaran noi, peayakasi ngiworui lukesuparak lu ekote tani aturot apei. Akuj alope isubusi nginyia lu a amoni, nginyia lu elibito akolongit na ani moi tongopiasi kinomae alokeno. Ikoni eger lo epedori ngesi akitanap esi ai? Etige esi ngitunga lu inupito wadiochichi! “Tokona, nyiiriabasi ibaasi ekoe nyo kinyami, kori nyo kimasi, kori nyo kinapi. Kainyo esakete ngibukui lu nyerai Ngiyaudi ngiboro lu daang. Eyeni Apakus lo eyei nadis atamar isakete esi ngiboro lugu daang. Nakaneni tasaka mono ekingaren Apolou keng ka ngakiro na esaki ngesi anikus, sodi kiinakini ngesi esi ngiboro luche lu daang. Nyiiriabasi kotere ngakiro na ka moi, kainyo nyikiyeni ngichan luka moi. Ejoikinit ngichan lu a akolongit a apei itemokinosi. “Nyiirirata luche sodi nyikirira esi Akuj, kainyo kirirae Akuj esi aloger alopei iriraata esi luche. Kirirae ngesi esi a ngitalio alupei iriraata esi luche. Nyo iteo iyong ekame anakongu a lokaatokon, tarai nyitee iyong atagoroit na eyei nakongu kon? Ikokini iyong ilimokini lokaatokon tama, ‘Kimiek kare atolema ekame anakongu kon’. Tarai eyei iyong ilope atagoroit nakongu kon ai? Iyong ekamodeanan! Tolema mono ekingaren atagoroit na eyei nakongu kon, topedorea akingolikin ka alemar ekame lo eyei nakongu a lokaatokon. “Nyiinakis ngingokwo ibore niasegan, kori nyiichakakis ngiputiro ngamoru nakaalak a ngaropiyae enyaritae ngalului. Kainyo ipudaarete kesi sodi toreunos kitonyilinyilaasi. “Kilipas nakaneni ianyunete. Tasaka nakaneni iriamunete. Kidongodongo nakaneni kingaario esi. Kainyo itwaan daang ni ilipa einakinio, ani ngini esaki eanyuni, nakaneni engaario ekidor kotere ngini idongidongi. Eyei epei anikus, taapa, lo einakini ikoku keng amoru na ilipea ngesi amugati a? Kori einakini ngesi emun na ilipea ngesi ekolia a? Tani iyenete esi luaronok ainakin ngide kus ibore niajokon, nyepedori Apakus lo eyei nadis ainakin esi ngiboro luajokak ngulu ilipasi a? Tosubeta luche nguna isakete esi kesi kitosubeta esi. Nguna kesi idodiunit etal a Musa ka ngakitatamet a ngikadwarak a Akuj. “Tolomasi kitoro lokidor lokaadingan, kainyo ebalany ekidor lo elosere lonyas, nabo elolom erot lo eteni inaa, elalak lu itorete neni. Nakaneni ediding ekidor lo a akiyar. Erot lo eteni inaa etieno nakaneni ekidioko ngitunga lu eanyunete. “Tochoikinos ani eya ngikadwarak lukaliokok. Epote kesi nikus epataka ikote ngamesekin nakaneni alotai ikote kesi ngipeei lukanyamak. Iyenete esi kesi kanguna esubete. Nyerayete ngitiira ngamusabib, kori nyekokete ngimomwa ngameyana. Ekoniuni ekitoe loajokon ageor naajokon nakaneni ekitoe loaronon ekoniuni ageor naaronon. Emam ekitoe loajokon lo ekoniuni ageor naaronon. Emam ekitoe loaronon lo ekoniuni naajokon. Ekitoe daang lo nyekoniuni ageor naajokon eyapario sodi tochakakinae nakim. Kongina, iyenunete esi ngikadwarak lukaliokok a ngakiro ana esubete kesi. “Meere itwaan daang ni kanyarit ayong ebala: ‘Ekapolon, Ekapolon’ epedori alomar Napolou a Akuj, nakaneni eraakasi ngulu make esubete nguna esaki Apakang ngolo eyei nadis atamar tosuba. Na enangea Akolongit ngina, kalimokinete lukaalak tamasi: ‘Ekapolon, Ekapolon, kidwari sua akiroit a Akuj a Ekiro kon. Kitwaranakini sua ngipean sodi atosuba ngakitoodikinet nakailiilok nakaalak a Ekiro kon.’ Nakaneni alimokini ayong kesi atama, ‘Nyakayeni ayong esi. Kotosi anikang esi ngitunga luaronok!’ “Kongina, itwaan daang ni iirari ngakiro nakang nu nabo kiwapak, ikoni itwaan nikooson ni aduki akai lokitela. Taram akiru kilelebun ngangololin. Tokutak ekuwam akai ngina nakaneni nyeukoro kainyo adukokinitae lokitela. Nakaneni itwaan daang ni iirari akiroit kang sodi nyiiwap, ikoni itwaan nikabangaanan ni aduki akai keng nasinyonoit. Taram akiru kilelebun ngangololin. Tokutak ekuwam akai ngina sodi toukor. Nakaneni aukor akai ngina tarabokoikin niaronon noi.” Na arumorea Yesu ekiruor ngakiro nugu, tatalasi ngitunga daang ngakiro a ekitatame keng. Peekoni ngesi ngiketatamak a etal, nakaneni etatami ngesi a apolou anatikationon. Na atiyaunor Yesu alomoru, kiwapu ngesi asepich a ngitunga. Sodi bu itwaan ni adeaka enomokere toriedik alongaren keng tama, “Ekapolon, ani kisaki iyong akitangalekin ayong, ipedori.” Kitorwaa Yesu akan keng tatap ngesi. Tolimok ngesi tama, “Asaki akitangalekin iyong, tojoker.” Atipei tangalek enomokere a itwaan kangini. Tolimok Yesu ngesi tama, “Ayoro, wara nyiilimok itwaan tani ipei nakaneni kape lomuron a akai a Akuj kiseme ngesi iyong, sodi tolem akipeyos loger lokolong alimunitor Musa, toyenea itwaan daang atamar ijoker iyong.” Na alomunea Yesu lore a Kaperinaum, kisiriamia ekarikon a ngasigerea a Ngiroma kimaima tama, “Ekapolon, edeaka ekasuban etich kang eperi anawi, eriab noi nyepedori tani anyoun.” Tolim Yesu tama, “Alosi ayong etangalek ngesi.” Tolim ekarikon a ngasigerea tama, “Meere kongina Ekapolon. Nyitemokino iyong ibuni toloma kai kang. Tolim tokona iyong akiroit, sodi tojoker ekasuban etich kang. Ayong dang, arai ekarikon loochi lo kapolokinito luche nabo eya ngasigerea na aweikinit ayong. Na alimokinea epei atama, ‘Kape!’ tolot. Kori na alimokinea loche atamar: ‘Bua’, bu. Nabo na alimokinea ekasuban etich kang atama, ‘Tosubak kona’, sodi tosubak loger ngolo.” Tatalasi Yesu ngakiro nguna na eirarea, sodi tolimok ngitunga lu ewapito ngesi tama, “Kalimokinit ayong esi atamar, nyaanyuna nakanuan itwaan tani alo Isirael ni enupit noi loger lo. Kalimokinit ngakiro na iteni dir atamar epote ngikaalak alo kide ka too kiboikinos ka Aburaam ka Isaka ta Yakobo kimuja Anapolou a Akuj. Nakaneni lu ejoikinit eya napolou, echakakinio kesi naribu, kigoro tokiricha ngikel kaneni.” Tolimok Yesu ekarikon a ngasigerea tama, “Kape nawi, esubakin na inupit iyong anikon.” Sodi tojoker ekasuban etich a ekapolon kangolo esaa ngolo. Sodi tolot Yesu nawi a Petero toriam nakamuran a Petero eperi irakarit arukum. Toting Yesu akan keng, tangalek arukum keng. Sodi tonyou kisiak akisimuj ngesi. Na awaria, apot ngitunga yaut nia Yesu ngitunga lukaalak lu akoporito ngikerep, sodi kitwarak Yesu ngipean ngulu a akiroit ana alimuni, nabo kitangalek daang lu adeakasi. Asubi ngesi kona sodi kiyookinotor nakolong alimuni ekadwaran a Akuj Isaya ebala: “Ngesi elope etwaranakini ngilekesinei yok nabo tolema ngidekesinei daang.” Na engolikinea Yesu asepich a ngitunga na eriamit ngesi, tolimok ngesi ngirukitos keng atamar toloto ekwakaye anam. Bu eketataman a etal nikeng tolim tama, “Eketataman, kewapi ayong iyong awadaang ani iteni.” Tatachak Yesu ngesi tama, “Eya takwee ngatabab na eduketa, tani ngikieny lu eporito eya ngakais, nakaneni Lokookeng a Itwaan bon ngesi emam ni icholongi kiangarea.” Tolim eche a ngirukitos keng tama, “Ekapolon, kimiekinae mono atolot atonuk apakang.” Tatachak Yesu ngesi tama, “Kiwapakinae ayong. Kimiek ngulu ikote ngikatoak tonuka ngikatoak kech.” Todoka Yesu natubwa kirukosi ka ngirukitos keng. Atipei tokut ekuwam loapolon ananam, tokuut ngitoroi kilapanakinos natubwa, tonyou atubwa abukor. Nakaneni ajotoe Yesu. Toloto ngirukitos a Yesu nikeng kitokienyut ngesi tamasi, “Ekapolon, toyuunae kare sua dikino kitoaki.” Tatachak Yesu kesi tama, “Nyo kibulitor esi kona? Abe edit anupit kus.” Tonyou ngesi kikilak ekuwam ka ngitoroi lu akuunito kisililing. Kililing wadaang tachakin chek. Tatalasi ngitunga daang ngakiro nguna kingitas tamasi, “Ani itwaan ikoni ne en? Epupete ngesi tani ekuwam ka ngitoroi a?” Na anangea ngesi ekwakaye anam nakwap a Ngigerasi, kiriamun ngesi ka ngitunga ngiarei lu akoporito ngikerep, eponito analielin. Adedeng ngitunga ngulu noi. Kotere adedengu kech, amam itwaan etoreene lorot ngolo. Atipei kiremasi kesi lokojokon tamasi, “Eya iyong ngakiro ka sua Lokookeng a Akuj a? Ibu iyong aboliar sua eringa esaa nyenanga a?” Nipei neni ayei atwom nakaalan a ngiputiro na adaka. Kimaimaa ngipean Yesu tamasi, “Ani kisaki iyong akitwarakin sua, kimiekinae atolomasi natwom a ngiputiro ngin.” Tolimok Yesu kesi tama, “Kapesi.” Sodi topudosi kesi tolomasi loputiro. Kipiiri atwom daang tochakun anakope toloma tooma nanam, tanyam daang anam. Kipiirioto ngikeyokok a ngiputiro lore. Kisisata kesi ngakiro daang, tani na asubakinosi alotunga aluarei akoporito ngikerep. Toloto ngitunga daang a ere aanyun Yesu. Na anyungareta ngesi, kimaimaa ebaasi torotok anakwap kech. Todoka Yesu natubwa kiwaar ananam tobongo lore keng. Sodi kilepulepuut ngitunga ngiche nia Yesu itwaan niangwalan ni aperi alojemu. Na ayenea Yesu atamar enupito kesi lokojokon, tolimok ekile loangwalan tama, “Totitinyer lokooku, arimakin ngasechesea kon.” Tolimokinos ngiketatamak a etal make tamasi, “Imenyi itwaan en Akuj.” Kona ayenea Yesu na etamete kesi tolimok tama, “Nyo itameta esi ngakiro naaronok na ikote nguna? Nyoni etieno, alimokin ekangwalan atamar, ‘Arimakin ngasechesea kon’ kori atamar ‘Tonyou, torotok’? Asaki ayong esi toyena atamar eyei Lokookeng a Itwaan agogongu anakwap na erimakinea ngasechesea.” Tolimok ekangwalan ngolo tama, “Tonyou, tolema ejemu kon, tolot nawi.” Tonyou itwaan ngini, tolot nawi keng. Tobul asepich a ngitunga na engolikineta nguna. Kipuruut Akuj ani ainakinea ngitunga agogongu na ikoni ngina. Torotok Yesu kaneni ani eringa elosi alorot, taanyunga eketubukon echur lo anyaritae Matayo, ibooyi alokai ana etubukio ngesi ngitunga echur. Tolimok Yesu ngesi tama, “Kiwapakinae ayong.” Tonyou Matayo kiwapak ngesi. Ani imuji Yesu alokai a Matayo, pot ngiketubukok echur lukaalak ka ngikasechak kiboikinos ka Yesu ta ngirukitos keng kimuja aapei. Na engolikineta Ngiparisayo ngiche ngakiro nguna, kingita ngirukitos a Yesu tamasi, “Nyo imujeta eketataman kus ka ngiketubukok echur ta ngikasechak?” Sodi ani iirari Yesu ngakiro kech tatachak tama, “Ngitunga lu nyedeakasi nyesakete eketedeakan. Lu edeakasi kesi esakete. Kapesi tongichitu na itatamete ngagiran na ebalasi: ‘Apatanu ngesi asaki ayong, meere ngakipeyos a ibarasit’. Nyebuno ayong anyarare luajokak. Abuni anyarare lukasechak.” Pot ngirukitos a Yoana Ekebatisan nia Yesu kingita tamasi, “Abe kironeene sua ka Ngiparisayo akimuj a ngirwa. Nyo peeroneeneto ngirukitos kon?” Tatachak Yesu tama, “Itamito esi atamar ialolongete ngitunga lu enyaraunitae nakuuta eringa erukito ka ekeutan a? Mam jik! Nakaneni enangi akolongit na erikorere ekeutan anikech sodi toroneeneto kesi ngirwa ngulu. “Emam itwaan edapi eworu longorot a aworu anakitetet kainyo echikin aworu ngina aloworu alongorot kangolo kitabalanyany apedot a eworu. Kori emam itwaan tani ipei ni epedori akiturakin emuna lo aringa epurio lotuo longorot. Ani kiturak, ebwangabwangaar etuo sodi tobukor emuna, nabo kinyasun etuo. Nakaneni iturakinio emuna lo eringa epurio lotuo lokitetet nyiinyasunotor etuo ka emuna aapei.” Ani eringa Yesu iruoro ngakiro nguna, bu ekapolon a akai a Atuk nikeng toriedik alongaren keng tama, “Atoana nakookang, nakaneni bua kare kidokok akan nakou keng sodi toyar ngesi.” Tonyou Yesu kirukosi ka ngesi ta ngirukitos keng daang. Ayei neni aberu na echanito ngaakot na aropiyete a ngikaru a ngitomon ka ngiarei, toropun alokaku a Yesu tatap echilet a eworu keng. Etami ngesi ebala, “Ani cha katap eworu keng, ajoker jik.” Toreeun Yesu kingolik ngesi tama, “Nyiem nakooku, kiteyar iyong anupit kon.” Tojoker aberu ngina esaa lopei ngolo. Na anangunea Yesu nawi a ekapolon a akai a Atuk kangolo, kingolik ngesi ngikaeok lu aponito akinuk ikoku ka ngitunga lu achalasi. Tolim ngesi tama, “Topudosi esi daang nikalapatan. Nyetoanit ikoku nipese en, ejotoe ngesi!” Tokianatar kesi daang ngesi. Napei epudorere ngitunga nikalapatan, toloma Yesu namaniyat na ayei ikoku nipese, toting ngesi akan keng sodi kitonyou. Tokeikin ngakiro nguna lowaitin daang a akwap. Torotok Yesu kaneni. Ani elosi alorot kiwapakis ngesi ngimuduk ngiarei. Kiremasi ebalasi, “Kisienoi sua Lokookeng a Daudi.” Na alomarea Yesu kai, pot ngimuduk luarei ngulu nikeng. Kingit ngesi kesi tama, “Inupito esi atamar apedori ayong akitangalekin esi a?” Tatachut kesi tamasi, “Ee, Ekapolon!” Dio tatap Yesu ngakonyen kech tama, “Tosubakin kona inupitotor esi.” Tojoketa ngakonyen kech kingolikis akwap. Kichikichikak Yesu kesi lokojokon tama, “Warasi nyiilimokis nugu itwaan iche.” Nakaneni torotokis kesi tokeikis ngakiro a Yesu lowaitin daang a akwap kangina. Na arotokinioto ngitunga, yaut ngitunga ngiche itwaan nia Yesu ni peeruoro ani akoporitotor ngikerep. Nakaneni napei etwarakinere ngipean, kiruorik itwaan ngini, tatalasi ngitunga daang ngakiro nguna tamasi, “Nyeanyuna sua nakanuan ngakiro na ikote nugu alo Isirael!” Nakaneni tamasi Ngiparisayo, “Erai lokapolon a ngipean eanyunitor ngesi agogongu na itwaranakinea ngipean.” Erimit Yesu ngirerea daang ka ngadakarin. Etatami anakais a Atuk kech Ngakiro Naajokak a Apolou a Akuj. Nakaneni etangalenokini ngidekesinei ka ngilekesinei daang alotunga. Na engolikinea ngesi asepich a ngitunga, kisienoto kesi ngesi noi ani echanatar tamam kona ingarakinotor, loger a ngamesekin ana emam ekeyokon. Sodi tolimok ngesi ngirukitos keng tama, “Elalak ngalemet, nakaneni ekidioko ngulu esubete etich. Kilipa robo elope a ngalemet tomea ngikalemak lukaalak lu echunakinete ngalemet keng.” Tanyarau Yesu ngirukitos keng lutomon ka ngiarei tochunak wapei, sodi kitogogong kesi topedoreta akitwarakin ngipean ka akitangalekin ngidekesinei ka ngilekesinei daang. Ngirora a ngimeanara alutomon ka ngiarei kesi lu: lo ekingaren ngesi Simon (lo anyaritae Petero) ka lokaatokeng Andirea, Yakobo ka lokaatokeng Yoana lu araakasi ngide a Sebedayo, Pilip ka Bartolomayo, Tomas ka Matayo loketubukon echur, Yakobo lokookeng a Alipayo ka Tadayo, Simon lo a atukuoru enyaritae Salote, ta Yuda Isikariote lo arikokini Yesu ngitunga. Tomea Yesu lutomon ka ngiarei lugu kichikak tama, “Nyiiloto nakwapea a ngibukui alu nyerai Ngiyaudi kori lorerea a Ngisamariae. Erai ejoikinit iloose lotunga a Isirael lu ikote ngamesekin na echakara. Iloose kitatama ibalasi, ‘Aapuu Apolou a Akuj.’ Kitojoka lu edeakasi, kiteyarutu lukatoak, kitangalekisi lu a enomokere, kitwarakisi ngipean. Iriamut esi pas, kongina pei kipotosi esi dang pas. Nyiitinga ngaropiyae alochuei a ngiworui kus. Nyiitinga echue lo ilipanarotor analosit kus, kori ngamuk, kori aburo, kori nyiilemasi eworu eche. Ejoikinit ekasuban etich einakinio ibore ni esaki. “Nainangeta esi lore kori nadakar, tasaka keyei itwaan ni echamit akitepeyon esi, kiboikinos ka ngesi tanang akolongit na inyouneto kaneni. Na ilomareta esi kai, tamasi, ‘Min ekisil nikus’. Ani kitepeyon esi ngitunga a akai kangina, kitemokin emalas lota kus a ekisil. Ani pekitepeyon esi, tobuasi emalas kus. Nakaneni ani keya ngitunga a awi kori ere lu nyikitepeyonete kori nyikipupokinete esi, torotokisi kaneni tokurwosi ngalup a ngakejen akamaluwot kidodiu ibore ngini atamar esechito kesi. Kalimokinit ngakiro na iteni atamar, akolongit na a Eriras isieniyete Akuj ngitunga a Sodom ka Gomora, kidwang ngitunga a ere kangolo. “Topupokisi, kamearit ayong esi loger a ngamesekin ana eya kiding ngipeei. Ejoikinit esi iliworosi lukachwaak loger a ngimunio nabo lukaalimok loger a ngakurio. Tochoikinos alotunga kainyo eya lukirumunete esi kitorikosi nitubet ngakiro nabo kibungaate kesi esi anakais a Atuk. Kirikorio esi kititae alokarikok ka ngikapolok sodi tolimokineta esi kesi ka lu nyerai Ngiyaudi Ngakiro Naajokak a Akuj. Nakirikorere esi akititare, kuriasi ngakiro nyeeriab ngitai kus atamar anukiro ilimunete, kori ilimunete kwaai. Naenangea esaa ngolo, tolimutu nakitoodikinio esi atamar tolimut. Kainyo ngakiro na ilimunete esi meere ngakus, erai ngaka a Etau ka Apakus. “Ipotorete ngitunga ta lokaatokech taarae nabo taapa ipotorete ngide kech loger ngolo. Enyoikinete ngide ngikauriak kech kipotosi sodi taarae. Kiremokinosi esi ngitunga daang kotere ayong. Nakaneni ngini enaikini tanang losal, eyuunio. Ani kiboliatar kesi esi alore a eche, toloto lore loche. Kalimokinit iteni dir atamar, nyirumorete etich kus alorerea a Isirael kadaang eringa Lokookeng a Itwaan nyebonguno. “Emam ni itatamio ni idwangit eketataman keng, kori emam ekasuban etich lo idwangit ekapolon keng. Itemokino ni itatamio ikwaanikin ka eketataman keng, kori ekasuban etich ikwaanikin ka ekapolon keng. Ani kenyaritae ekapolon a awi Beelsebul, enyarao ngitunga a awi kangina a ngirora aluaronok noi. “Nakaneni nyiikear ngitunga kainyo emam ibore ni erapap ni nyileereuni, kori emam ibore ni idaitae ni nyetakanuni. Ngakiro nakalimok ayong esi anaribu tolimosi esi anakicha, nabo nguna iirasi esi iruoroe imunonitae kikeutu esi anatuk. Nyikear ngulu earete akwaan bon nakaneni nyepedorete akiar etau. Ejoikinit kikeri lo epedori akinyasun akwaan ka etau ananam ana a akim. Egielio tanangolengor ngaarei a adurur, nakaneni emam tani ipei kech ni echakakin nalup peeyeni Apakus. Imarunitae tani ngitim daang anakies kus. Nakaneni nyieam! Ijokak esi noi idwangito ngikieny ngulu lu elalak. “Itwaan cha daang ni elimori alongaren ngitunga atamar arai ngesi itwaan kang, alimori ayong dang ngesi alongaren Apakang alo eyei nadis. Nakaneni itwaan cha daang ni epegi alongaren ngitunga atamar meere ngesi itwaan kang, apegi ayong dang alongaren Apa kang lo eyei nadis atamar nyayeni ngesi. “Nyiitamasi robo kori abuni ayong ayaun ekisil nakwap. Mam! Nyabunit ayong ayaun ekisil pearai arem. Abunit ayong akiteremokin lusapa ka ta apakech, lupesur ka taito kech, ngaterak ka taata kech. Ngimoe luaronok a itwaan kesi ngitunga lupei a awi keng. “Nyitemokino itwaan ni emina apakeng ka itiokeng noi akidwang ayong eliwor erukitos kang. Nyitemokino ni emina lokookeng kori nakookeng kesidwang ayong eliwor erukitos kang. Nyitemokino itwaan ni nyiwoki apir keng kewapak ayong eliwor erukitos kang. Itwaan cha daang ni esaki akirichun akiyar keng, ebukori, nakaneni ni ejali akiyar keng kotere ayong, irichuni. “Itwaan cha daang ni kitepeyoni esi, ketepeyon tani ayong, nakaneni ni ketepeyoni ayong, etepeyon tani lokolong kameuni ayong. Itwaan cha daang ni itepeyoni emeanara a Akuj ani eraakar ngesi emeanara a Akuj, emorete ka ngesi ebachit keng. Itwaan cha daang ni itepeyoni itwaan niajokon ani ejokia ngesi, emorete ka ngesi ebachit keng. Kalimokinit ngakiro na iteni atamar, itwaan cha daang ni itamasi epei a luuchik kalu ngakipi ani eraakar erukitos kang, eriamuni ngesi ebachit keng.” Na arumorea Yesu akichikakin ngirukitos keng lutomon ka ngiarei ngakiro nguna, torotok kaneni tolot akitatam alorerea alu ayakasi diye neni. Na eirarea Yoana Ekebatisan alojela ngakiro na asubi Kiristo, tomea ngirukitos ngiche nia Kiristo. Apot kingita Yesu tamasi, “Iyong ngesi lokolong abala Yoana ebuni kori ejoikinit sua kidari itwaan iche?” Tatachak Yesu tama, “Tobongosi tolimokisi Yoana na iirasi ka na ingolikis. Ngimuduk engolikis akwap, ngikangwalak eloose, lu edeakasi enomokere etangalekin ajoketa, ngikinim epupete, eteyarun ngikatoak, ani ngikebootok itatamio tokona Ngakiro Naajokak. Epiarit Akuj noi itwaan ni nyeketongoyae ayong.” Ani eringa ngirukitos a Yoana eloose na abongoreta, tolomak Yesu akisiruor asepich a ngitunga ngakiro a Yoana ebala, “Nailooso esi nia Yoana na ayakar nariet, isakete esi akingolikin nyo? Akuyen na eloiloi ekuwam a? Nyo ilosito esi akingolikin? Itwaan ni anapit ngiworui lukaanikak esiritoe a? Toyena atamar lu enapito loger ngolo ibooyete anakais a ngikapolok. Tolimokinae kare, nyo kolong isakete esi akingolikin? Ekadwaran a Akuj a? Ee, nakaneni kalimokinit atamar ingolikis esi lo idwangit tani ekadwaran a Akuj. Kainyo Yoana ngesi lo elimunit Akuj anagiran ebala: ‘Ngesi erai emeanara kang, ameari ngesi kingarenik iyong tolot tosubak erot kon.’ Kalimokinit ngakiro na iteni atamar, alotunga kadaang alu edoun nakanuan, emam lo epolot idwangit Yoana Ekebatisan. Tani ikoni neni, ngini edit noi apolou a Akuj, epolot akidwang Yoana. Napei kolong isiakini Yoana Ekebatisan akitatam tanang akolongit na, aliwor apolou a Akuj aka a ekurikur nabo itepegio, nabo eningo ngikadedengak alemar a ekileenu kech. Kolong eringa ngirwa lu a Yoana, eruorosi ngikadwarak a Akuj daang nabo egiritae Lotal a Musa ngakiro a apolou a Akuj. Ani kisakete akinup ngakiro na eruorosi kesi, Yoana ngesi Elija lo adwaritae atamar ebuni. Ani keya ngaki, kiira robo. “Tokona, nyo esikwaanea ayong ngitunga a ngirwa kalu? Ikote kesi ngide lu ibooyete anagielet a ngiboro. Enyaraate epewae kech luche tamasi, ‘Kikutakini sua aburuch, nakaneni nyimwomworikina esi. Kisutonokini sua nakaneni nyikalouno esi’. Na abunio Yoana, aroneene nabo nyeemasi emuna lo epuritoe, tamasi ngitunga daang ekoporito ngesi ngikerep. Na abunio Lokookeng a Itwaan, emuji nabo tamasi, tama itwaan daang, ‘Kingolikisi itwaan en! Edakana ngesi nabo ematana emuna lo epuritoe, erai nabo epae a ngiketubukok echur ka ngitunga luasechak’. Nakaneni aosou a Akuj eyenunio atamar erai na iteni alotichisio keng.” Kikilak Yesu ngitunga a ngirerea alu kolong asubea ngakitoodikinet nakailiilok kainyo awounete akilung ngasechesea kech. “Oitiakoi! Abe etioko nginyas eanyunete ngitunga a Korasin ka Betisaida dang! Kainyo arai kolong tosubae ngakitoodikinet nakailiilok na asubasi anikus alo Tiro ka Sidon, kenapito kesi ngiworui lukoris nabo tojuko ekuron kidodiunotor atamar alunga kesi ngasechesea kech. Kalimokinit ngakiro na iteni atamar isieniyete Akuj ngitunga a Tiro ka Sidon akolongit na a Eriras akidwang esi. Esi ngitunga a Kaperinaum! Isakete esi tanang ekipur kus kidiama nadis a? Kichakakinio esi tooma nanam na a akim. Kainyo arai kolong tosubae ngakitoodikinet nakailiilok na asubasi anikus alo Sodom, keringa ere ngolo eyei tani tokona. Kitamutu iteni atamar isieniyete Akuj ngitunga a Sodom akolongit na a Eriras akidwang esi!” Esaa ngolo tolim Yesu tama, “Apa, Ekapolon a adis ka kwap. Kabuakinit iyong alakara kainyo idodik iyong lu nyeosok ngakiro na idaitae ani eyakasi lukebe a ngakies ka lukoosok. Kongina Apa, isub iyong nguna daang loger lo ichamitor iyong alope a ajokis kon. Kainaki ayong Apakang ngiboro daang. Emam itwaan eyeni Lokookeng atamar ngesi ngae, mati Apa, nabo emam itwaan eyeni atamar Apa ngesi ngae mati Lokookeng kangulu daang esaki Lokookeng akidodikin Apakeng. “Potu nikang esi daang lu kinuit eegos, kesiangari ayong esi. Kiwoko eegos kang, kitatamas anikang kainyo apalaana ayong nabo etiditeuna nakaneni iangarete esi. Kainyo eegos lo kainakini ayong esi eook, nabo ngolo kesiwoki ayong esi, ebeben.” Ngirwa ngulu kitoro Yesu ka ngirukitos keng lomanikor a ngimomwa akolongit na Sabato. Anyamit ngirukitos keng akoro, tolomakis abiluunun ngakies a ngimomwa toninata, tanyama. Na engolikineta Ngiparisayo ngakiro nguna, kingita Yesu tamasi, “Nyo esubeta ngirukitos kon na engeritoe alotal esubio akolongit na a Sabato?” Tatachak Yesu tama, “Nyisoma esi nakolong asubi Daudi ka ngitunga keng na anyamea akoro a? Toloma ngesi kai a Akuj sodi tanyama ka ngirukitos keng ngamugati na epeyokinitere Akuj. Arono Alotal kech enyamete ngamugati nguna, araakasi ngimurok a akai a Akuj make achamakinitae enyamete. Nyisoma esi Alotal a Musa atamar akolongit na Sabato nyiwapeenete ngimurok a akai a Akuj etal, nakaneni nyesechito a? Kalimokinit atamar eyei ibore nege ni epolot ni idwangit akai a Akuj. Arai toyenete esi eger a ngagiran ana ebaasi, ‘Nyasaki ayong ngakipeyos a ibarasit nakaneni asaki apatanu’, pekiriraenete esi lu nyesechito. Kainyo Lokookeng a Itwaan ngesi erai Ekapolon a Sabato.” Torotok Yesu kaneni toloma kai a Atuk. Nakaneni ayei itwaan neni ni angwalit akan. Aya ngitunga ngiche lu asakete akititakin Yesu a ibore a idio ani ichwangakini, apot kingita ngesi tamasi, “Ejoikinit alotal yok itangalekinio akolongit na Sabato a?” Tatachak Yesu tama, “Ngae anikus erai ani kechakakin amesek keng nakipany nakooyen akolongit na Sabato, nyirumuni kikeu? Nakaneni ejok itwaan noi idwangit amesek! Nakaneni echamakinitae alotal ingarakinio itwaan akolongit na Sabato.” Sodi alimokin itwaan ngini tama, “Kitorwaa akan kon.” Abu kitorwaa akan keng sodi tojoker kikok nache. Sodi topudosi Ngiparisayo toloto totuko eger lo eareta Yesu. Na eirarea Yesu atamar etukitoe akiar ngesi, abu torotok kaneni sodi kiwapakis ngitunga lukaalak ngesi. Kitojok ngesi daang lu adeakasi nabo kichikichik kesi atamar nyeelimokis luche atamar ngesi erai ngae. Asubi ngesi nguna kiyookinotor nakolong alimuni ekadwaran a Akuj Isaya ebala: “Ekasuban etich kang lo, lo aseu ayong, lo amina ayong, nabo lo ketalakarit. Ameuni Etau kang bu nikeng. Sodi tolimokinea ngitunga a ngibukui alu nyerai Ngiyaudi daang eboyor a akitiriyan ngakiro. Nyepegi ngesi kori nyirema. Nyiirema iruoro alorotin. Eliwor ngesi lo epalaana kangulu palag nakaneni epataner kangulu emam ibore. Erubakini ngesi tanang iyookin na eriyan kidwanga na nyeriyan. Ngibukui lu nyerai Ngiyaudi daang, igienosi ngesi.” Sodi apot ngitunga ngiche yaut nia Yesu itwaan nimuduk nipeeruoro ani akoporitotor ngikerep. Kitojok Yesu itwaan ngini sodi kiruorik nabo taanyunga tani akwap. Abu asepich a ngitunga tatalasi na asubi Yesu. Sodi kingitas tamasi, “Erai cha dir ngesi lokookeng a Daudi a?” Ani iirareta Ngiparisayo ngakiro nguna, apot tatachut ebaasi, “Erai Beelsebul ekapolon a ngipean ngesi itaanyunit ngesi agogongu na itwaranakinea ngipean.” Kona ayenea Yesu na etamete kesi, abu tolimok kesi tama, “Akwap na etiakatiakatar ngitunga tojwoto make, inyasun akwap ngina. Kori ani ketiakatiakasi ngitunga a ere a epei kori a apeiwi tojioto make, ialarosi kesi. Ani kitwarakin Esiitan bon, idodiunit ibore ngini atamar etiakatiaka apolou keng, nakaneni nyerubakini jik. Ibaasi esi etwaranakini ayong ngipean kotere agogongu na aanyuni ani a Beelsebul. Ngae itaanyuununi ngirukitos kus agogongu na itwaranakineta ngipean? Ngakiro na esubete ngirukitos kus idodiunito atamar isechito esi jik. Meere kongina. Etau a Akuj kainakinit ayong agogongu na etwarakinea ngipean, idodiunit ibore ngini atamar abu Apolou a Akuj nikus. “Emam itwaan elomakini itwaan nikajwon anawi keng, tolema ngiboro keng daang mati mono keen itwaan nikajwon ani ekisidi torem ngiboro a awi keng daang. “Itwaan ni nyibakit alowae kang karemokino ayong. Itwaan ni nyekengarakinit ayong akichun, ialanari, nakaneni kalimokinit atamar erimakinio ngitunga ngasechesea ka ngakiro naaronok daang na imenyatar kesi, nakaneni itwaan cha daang ni elimuni naaronok imenyi Etau a Akuj, nyerimakinio jik. Itwaan daang ni elimuni naaronok imenyi Lokookeng a Itwaan erimakinio, nakaneni itwaan cha daang ni elimuni naaronok imenyi Etau a Akuj nyerimakinio, jik ngirwa lu, kori tani lumonan. “Ani ibala taanyu ageor naajokon ejoikinit eyei ekitoe loajokon lo ekilikili. Ani keyei iyong ekitoe loaronon ianyuni ageor naaronon. Eyenio ekitoe a ageor ana ekoniuni. Esi lu iroko ikote ngarewa! Ipedorete alimun naajokak kwai taraakas esi ngitunga luaronok? Kainyo elimuni akituk a itwaan ngakiro na eupiyarito etau keng. Itwaan niajokon esubi ngakiro naajokak kotere ni ejokia etau keng. Itwaan niaronon esubi ngakiro naaronok kotere ni eronia etau keng. “Nakaneni kalimokinit atamar, akolongit na eriras, isisauni itwaan daang akiroit naaronon daang nakolong eruoro. Kainyo ngakiro kon kesi kiriraare iyong, kesi itodiunete atamar isechit iyong kori nyisechit.” Sodi tolimut ngiketatamak ngiche a etal ka Ngiparisayo ngiche tamasi, “Eketataman, kisaki sua iyong tosubak akitoodikinet nakailiilon.” Nakaneni tatachak Yesu kesi tama, “Eroko noi ngitunga a ngirwa kalu nyekerito tani Akuj. Esakete kesi kidodikinae akitoodikinet nakailiilon. Nakaneni emam akitoodikinet ache nakailiilon na idodikinio kesi mati nakolong a ekadwaran a Akuj Yona. Kona kolong aperio Yona nakook a ekolia a loapolon ngirwa nguuni akwaar ka apaaran, eperi Lokookeng a Itwaan dang tooma nalup ngirwa nguuni akwaar ka apaaran. Akolongit na a eriras, enyounete ngitunga a Ninewi kirirata esi, kainyo alungete kesi ngasechesea kech na kolong eirareta Yona itatami kesi ngakiro a Akuj. Kalimokinit ayong esi nabo atamar, eyei ibore nege ni epolot ni idwangit tani Yona. Akolongit na a eriras enyouni akapolon a akwap a Cheba kirira esi, kainyo anyouni kolong ngesi anakwap keng tolot erot lokooyen noi ebunit akiirar akitatamet na aosou a ekapolon Solomon. Nakaneni kalimokinit ayong esi atamar, eyei ibore nege ni epolot ni idwangit tani Solomon! “Naepudorea Ekipe anitwaan, tolot kitor nariet esaki ni iangarea. Ani pekeanyu ni iboikin, elimuni tama, ‘Abongori kai na ngoon alomit’. Ani ebonguni ngesi toriam itwaan ikoni akai na emam ibore eyei, kepiar keseger. Sodi tolot toriku ngipean ngiche ngikan-kaarei luaronok noi lu idwangito tani ngesi, sodi pot kiboikinos nitwaan. Nakaneni ani ekisidi, eroner itwaan ngini noi kidwang ni kolong ngorot. Nugu kesi esubakin alotunga aluaronok a ngirwa kalu.” Ani eringa Yesu isuruori asepich a ngitunga, pot itiokeng ka ngikaitotoi a Yesu. Towaa anikalapatan esakete akisuruor ngesi. Tolimok itwaan ipei alu ayakasi neni ngesi tama, “Ayoro, ewaasi itiokon ka talokaatokon anikalapatan esakete akisuruor iyong.” Tatachak Yesu ngesi tama, “Ngae erai itiokang? Tangae eraakasi talokaatokang?” Sodi todod ngirukitos keng tama, “Kingolikisi! Lugu kesi eraakasi itiokang ka ngikaitotoi kang. Itwaan cha daang ni esubi na esaki Apakang lo eyei nadis, ngesi erai lokaatokang ka nakaatokang ta itiokang.” Akolonngit napei ngina topudo Yesu alokai kangina, tolot kiboikin lokwaas a anam. Kotere asepich a ngitunga na achunakina neni, todoka ngesi kiboikin natubwa, towo asepich ngina alokwaas a anam. Kitatam ngesi kesi ngakiro nakaalak a ngakitadapet tama, “Ayei kolong eketan lo alosi akitare. Na ealakinea ngikinyam mana, apot ngikinyam ngiche kialakin lorot, sodi kidepasi ngikieny. Apot ngiche kialakin nalup na ewarawarakina kidiama natabab. Toruput ngikinyam atipei kainyo pealalak ngalup. Ani erirauni akolong, tonom ngimomwa luuchik ngulu, nabo kotere nipeapisitotor ngaten apot tooniyosi. Apot ngikinyam ngiche kialakin tooma lookwa. Ani erupunete ngiikwa torida ngimomwa lu arupunito. Nakaneni kialakinos ngikinyam ngiche nalup naajokak, toruput ngimomwa topolout, tokoniut ngiche amiat apei, ngiche ngitomwon-kapei, ngiche ngitomwon-uni.” Na arumorea Yesu, tolim tama, “Ani keya ngaki kiira robo.” Sodi pot ngirukitos a Yesu nikeng kingita ngesi ebaasi, “Nyo isuruorea iyong ngitunga a ngakitadapet?” Tatachak Yesu kesi tama, “Kidodikin esi aosou a ngakiro a namunonoe a Apolou a Akuj, nakaneni nyidodikinitae kesi. Kainyo itwaan cha daang ni eyei ibore, einakinio ni elal, sodi talalaror ibore keng noi. Nakaneni itwaan ni emam ibore eyei, edemario tani nidiochichi ni etingit. Esuruori ayong kesi a ngakitadapet, toliwor iteete nakaneni nyebwangasi ngitamen toyena ngakiro, nabo epupete nakaneni nyechoiyarete kori nyeyenunete. Etemokin anikech nakolong alimuni ekadwaran a Akuj Isaya ebala: ‘Ipupokinete lokojokon, nakaneni nyiyenunete. Ingolikinete lokojokon, nakaneni nyebwangasi ngitamen toyena ngakiro. Kainyo earit ngitunga lu abangaanut. Egolito ngaki kech, nabo arapa ngakonyen kech. Arai nyikote neni, kingolikinito a ngakonyen kech. Kori kiirarito a ngaki kech, nabo kitamunito alotamen kech. Ebala Akuj, kereuna kesi nikang, nabo ketangalekinit ayong kesi’. “Etia ekeny lo eyei esi ai? Iteete ngakonyen kus nabo epupete ngaki kus. Kalimokinit ngakiro na iteni atamar ngikadwarak a Akuj ngikaalak ka ngitunga a Akuj, asakete noi akingolikin na ingolikis esi, nakaneni nyingolikina, nabo asakete akiirar na ipupete esi, nakaneni nyiirara. “Topupokisi, sodi toyeneta eger a ngakitadapet a eketan. Lu iirarete akiroit a Apolou a Akuj nakaneni nyechoiyasi, ikwaan ka ngikinyam lu ealakinosi lorot. Ani ebuni Ekipe tolema akiroit na eyei lotai kech. Isikwaanitae ngikinyam lu ealakinosi natabab, ka ngitunga lu iirarete akiroit tonupa a alakara napei iirareta. Nakaneni nyelomari akiroit lotai kech lokojokon kori nyenupete akiroit ngina nikooyen. Na ichanere kesi kori na eboliare kotere akiroit ngina, sodi toisikis kesi atipei. Isikwaanitae ngikinyam lu ealakinosi tooma lookwa ka ngitunga lu iirarete akiroit, nakaneni ngichan a eboyor a akwap ka aminakinit ebari, nyisirichakinete kesi akiroit ngina, nakaneni tongopa ngakiro naajokak anakiroit kangina. Ngikinyam lu ealakinosi nalup naajokak, ikote ngitunga lu iirarete akiroit tochoiasi, tokoniut ageor ngiche amiat apei, ngiche ngatomwon-kapei, ngiche ngatomwon-uni.” Tolimok Yesu kesi ngakitadapet ngache ebala, “Ikoni Apolou a Akuj ne. Etakini itwaan ngikinyam luajokak mana keng. Ani nakwaare, ejotoe itwaan daang, bu emoit kitak edoan kiding ngakanoi, sodi tolot. Na arupuneta ngikinyam kibutungiasi ngakanoi, abu edoan dang tatakanu. Pot ngikasubak etich a itwaan kangini tolimokis ngesi tamasi: ‘Ekapolon, be ajokak bo ngikinyam lu ngoon itakini iyong mana kon, aliwae abunio edoan lo?’ Tatachak tama: ‘Emoit ngesi kesubi ngakiro nu.’ Kingita ngikasubak etich ngesi nabo tamasi, ‘Isaki tokona iyong sua atorutosi edoan a?’ Tatachak tama, ‘Mam, kimiekisi, kainyo kilomasi esi akirut edoan ipedorete arutun tani ka ngakanoi aapei. Kimiekisi ngakanoi ka edoan toruput daang aapei tanang ngirwa lu elemere. Sodi atolimok ayong ngikalemak atamar, torutut mono edoan sodi totukonokis a ngaenet kinomae, ani erumor tochunakinae ngakanoi kikachakinae lokeru kang.’ ” Tolimok Yesu kesi akitadapet ache ebala, “Ikoni Apolou a Akuj ne. Alemuni itwaan echokit a ekoropus kitak mana keng. Edit echokit a ekoropus noi idwangit ngichok daang nakaneni ani kerupu, topoloor noi kidwang ngikito luuchik daang. Eliwor ekitoe pot ngikieny toduko ngakais naten keng.” Tolimok Yesu kesi nabo akitadapet tama, “Ikoni Apolou a Akuj ne. Alemuni aberu ekitoe lo itubui ngamugati kimorik ka ngakiria anadepe tanang ebui wadaang.” Esuruori Yesu asepich a ngitunga ngakiro nugu daang a ngakitadapet nyelimuno ngesi akiroit tani apei na nyerai ngakitadapet. Asubi ngesi kona kiyookinotor nakolong alimuni ekadwaran a Akuj ebala: “Esuruori kesi a ngakitadapet. Alimokini kesi ngakiro na nyeyenuna napei kolong anakisiakinet a akwap.” Na asikinea Yesu asepich a ngitunga toloma tooma kai, pot ngirukitos keng nikeng tamasi, “Tolimokinae sua ngakitadapet a edoan alomana atamar ngesi nyo.” Tatachak Yesu tama, “Itwaan ni etakini ngikinyam luajokak ngesi Lokookeng a Itwaan. Amana ngesi akwap. Ngikinyam luajokak kesi ngitunga lu a Apolou a Akuj. Edoan kesi ngitunga lu a Ekipe. Emoit lo etakini edoan ngesi Ekipe. Akilem ngesi esal a akwap. Ngikalemak kesi ngimalaikae. Loger lo echunakinere edoan kinomae anakim, esubakinosi na ikote neni akolongit na a esal. Emeuni Lokookeng a Itwaan ngimalaikae keng tochunakis daang lu itosechenete luche ka ngikasechak daang, kipudunoe Anapolou a Akuj. Sodi tachakakis kesi nakim nakariran, kigoro kaina tokiricha ngikel. Min akicha na ikoni na akolong lotunga a Akuj Anapolou ka Apakech. Ani keya ngaki, kiira robo! “Ikoni Apolou a Akuj ibore nikaalan a ngaropiyae emurakina mana. Kiyookin itwaan sodi tonuk nabo. Talakar noi, tolot, togiela ibore daang ni etingit ngesi. Ani erumor, tobongo togiel amana ngina. “Ikoni Apolou a Akuj ne. Esaki emuchurut ngamoru a ngaropiyae enyaritae ngalului. Na eanyunea ngesi apei naajokon noi, tolot, togiela ibore keng daang. Ani erumor bu togiel amoru nakaalan a ngaropiyae enyaritae alulu ngina. “Ikoni nabo Apolou a Akuj ne. Achakakinete ngikechiemak ngiche epuute kech nanam lo erumuni ngikolia ngigelagelae. Na ilelebunor epuute ngikolia, kiriut kesi lokwaas, kiboikinos sodi totiakatiakata ngikolia. Kiwaanakis luajokak nasaaja kech ani luaronok tochakanasi. Ikokinete ngakiro neni akolongit na a esal. Eloose ngimalaikae totiakut ngitunga luaronok alotunga alu ajokak sodi tachakakinae kesi nakim ni igorotor tokiricha ngikel.” Kingit Yesu kesi tama, “Iyena esi ngakiro nu a?” Tatachakis tamasi, “Ee, kiyen.” Tatachak Yesu tama, “Idodiunito ngakiro nu atamar, eketataman a etal daang lo itatama Anapolou a Akuj, ikoni elope a akai lo ipuduni ngiboro lukiteat ka lungorok alopem.” Na arumorea Yesu akisisaun ngakitadapet nguna, abu torotok kaneni, tobongo lore lokolong apolounio. Kitatam alokai a Atuk, nakaneni daang lu apupete ngesi apot toiliilikis ngakiro keng. Kingitas ebaasi, “Aliwae aanyunea itwaan en aosou na ka ngakitoodikinet nakailiilok nu? Meere ngesi lokookeng a ekile alo kechian ngiboro a? Nyerai Mariam itiokeng a? Nabo ikwa meere talokaatokeng kesi Yakobo ka Yosep ka Simon ta Yuda a? Ikwa meere tanakaatokeng na elomito ne a? Aliwae aanyunea ngakiro nu daang?” Apot tongero ngesi jik kanguna. Tolimok Yesu kesi tama, “Ipuruunitoe ekadwaran awadaang pearai lore keng ka ngitunga a awi keng make nyipuruunete.” Aloger amamakar kesi anupit, nyesuba Yesu ngakitoodikinet nakailiilok alalak kaneni. Ngirwa ngulu, kiira Erode lo arai ekapolon a Galilaya ngakiro a Yesu. Tolimok Erode ngikasubak etich keng tama, “Erai itwaan en Yoana Ekebatisan ayaru anakitu ngesi esubea ngakitoodikinet nakailiilok nu.” Kainyo alimunit sek Erode atamar kirumunae Yoana, toenae a ngiriko sodi toinikinae lojela. Asubi ngesi nguna kotere Erodia, aberu a lokaatokeng alo anyaritae Pilip. Kainyo alimonokini sek Yoana Ekebatisan Erode tama, “Nyejoikinit iyong itiliwori Erodia aberu kon.” Asaki Erode akiar ngesi nakaneni toem Ngiyaudi kainyo abaasi kesi Yoana erai ekadwaran a Akuj. Akolongit na etamunitere akidounet a Erode, abu nakookeng a Erodia kidonga alongaren ngipeyok daang. Talakar Erode noi. Kikong ngesi ebala ainakini nakookeng ibore daang ni esaki. Tolim ngesi loger lo alimokinitor itiokeng tama, “Nakinae tokona kona akou a Yoana Ekebatisan anatubwa!” Kialolong ekapolon, nakaneni kotere akichikakinet na alimuni ngesi alongaren ngipeyok keng daang, tolim ngesi atamar tosubakinae nguna asaki apese ngina. Sodi apon Yoana totubunoe akou alojela. Yaunae akou keng eyei tooma natubwa nakinae apese, sodi yaa nia itiokeng. Pot ngirukitos a Yoana kilepulepoosi akwaan keng, tonuka, ani erumor toloto tolimokis Yesu. Na eirarea Yesu ngakiro a Yoana, torotok kaneni kiwaar a atubwa tolot alopei nariet. Na eirareta ngitunga ngakiro nguna, apot toisikis ngirerea kech kiwapakis ngesi iriwokina ekwaas a anam. Na adokunea Yesu anatubwa, kingolik asepich a ngitunga. Kisieneto ngesi ngitunga noi dio kitojok ngulu adeakasi. Na anangea ebong, pot ngirukitos keng nikeng tamasi, “Awar tokona, tarai ne ariet. Kimiek ngitunga toloto nadakarin togiela akimuj na enyamete.” Tatachak Yesu kesi tama, “Nyechamit kesi eloose, nakisi esi kesi ibore idio ninyamat!” Tatachakis kesi tamasi, “Ngamugati ngakan ka ngikolia ngiarei make eya ne.” Tama Yesu, “Yautu nege.” Tolimok ngesi ngitunga atamar kiboikinos lonyia. Sodi tolem ngamugati nakan nguna ka ngikolia luarei tokienyia kidiama nadis, tobuak Akuj alakara. Tonyilinyili ngamugati nak ngirukitos keng, sodi tokorakis ngirukitos keng ngitunga. Kimuj itwaan daang kimwon. Sodi tolemut ngirukitos keng ngategerin ngatomon ka ngaarei na eleleba akimuj na apiyanun. Araakasi ngikiliok lu emujete ngabunge ngakan, peimarunitae ngaberu ka ngide. Todungok Yesu ngirukitos keng atamar todokasi natubwa kingarenikis toloto ekwakaye anam eringa ngesi etinenikinit akisuruor ngitunga tolooso. Na arumorea alimokin ngitunga atamar toloto, todoka ngesi moru alopei akilip. Ayei Yesu alopei inaa na awaria. Esaa ngolo alona atubwa ayei kiding anam ebapabapate ngitoroi kainyo akutunit ekuwam anakan ana aloose kesi. Ani enangi ni ebayiarea bu Yesu nikech elosi alokidiama ngakipi. Ani ingolikinete ngirukitos keng ngesi elosi alokidiama ngakipi apot tobul, tolimut ebaasi, “Erai Ekipe,” sodi kiremasi ebulit. Tolimok Yesu kesi atipei tama, “Totitinyeketo. Nyieam, ayong itwaan.” Sodi tolim Petero tama, “Ekapolon, ani kerai iyong dir, tolimokinae ayong dang abu nikon alosi alokidiama ngakipi.” Tatachak Yesu tama, “Bua!” Todoku Petero anatubwa kisiak alosit nia Yesu alokidiama ngakipi. Na akutakinea ngesi ekuwam abu toem kisiakis ngakipi akilikor ngesi. Kikalou tama, “Toyuunae Ekapolon.” Atipei todol Yesu ngesi kikamu tama, “Etia ekiditeu a anupit kon ai? Nyo ingayakinitor iyong?” Ani edokarete Yesu ka Petero natubwa, toper ekuwam. Apot ngirukitos lu ayakasi natubwa kilipa Yesu tamasi, “Irai iyong dir Lokookeng a Akuj.” Todokasi ekwakaye anam todokut anakwap a Genesaret. Na ayeneta ngitunga a akwap kangina Yesu, tokeikis akiroit neni atamar yaunae ngikadeakak. Apon yaunae ngikadeakak a akwap kangina daang nia Yesu. Sodi kimaimae ngesi tamarae kimiek lu adeakasi tatapa tani ekwaas a eworu keng. Tojokearos daang lu atapete eworu keng. Pot Ngiparisayo ka ngiketatamak a etal alo Yerusalem kingita Yesu tamasi, “Nyo nyiwapitotor ngirukitos kon ngitalio lu kolong kata apaayok? Nyilotanarete kesi ngakan kech eringa nyimuja!” Tatachak Yesu kesi tama, “Nyo bo iwapitotor esi ngitalio kus nakaneni nyiwapito etal a Akuj? Kainyo alimuni Akuj tama, ‘Toker apakon ka itiokon,’ nabo tama, ‘Itwaan daang ni elimit apakeng ka itiokeng anaaronok, ejoikinit eario.’ Nakaneni itatamete esi ibaasi ani keyei itwaan ibore ni esaki akingarakinea apakeng ka itiokeng, nakaneni tama ngesi, ‘Alemik ibore en Akuj,’ nyitemokino ngesi ekeri apakeng. Aloger kangolo, ingero esi Etal a Akuj sodi kiwapeta ngitalio kus. Esi ngikamodeanak! Iteni dir, ngakiro nakolong adwari Isaya anikus tama, ‘Ebala Akuj, kakerito ngitunga lu ayong a ngakituk, nakaneni eloka ngitai kech anikang. Kelipito kesi ayong pas, kainyo itatamete ngitalio a ngitunga kitusubut ngitalio a Akuj.’ ” Tanyarau Yesu asepich a ngitunga nikeng tama, “Topupokisi nabo toyeneta! Meere ibore ni elomari nakituk a itwaan epedori akitoron ngesi, pearai ibore ni epuduni anakituk keng itoroni ngesi.” Pot ngirukitos nikeng tamasi, “Iyeni iyong atamar ekadakinito Ngiparisayo ngakiro na ilimuni iyong a?” Tatachak Yesu kesi tama, “Ekitoe daang lo nyitakina Apakang lo eyei nadis, erutorio.” Tolimok Yesu kesi tama, “Tojongoto akachit kesi! Eraakasi kesi ngikarikok a ngimuduk, na erikio emuduk emuduk loche, echakakinosi kesi daang nakipany.” Kikeu Petero tolim tama, “Kitatamikinae sua eger a ngakitadapet kanu atoyena.” Tolimok Yesu kesi tama, “Ikwa eringa esi dang nyeosuno kidwanga ngitunga luche a? Nyiyenete esi atamar ibore ni elomari nakituk a itwaan elomari nakook sodi topudo anakwaan a? Nakaneni ibore ni epuduni anakituk a itwaan ebunit alotau keng. Ngakiro na ikote nu kesi itoronete itwaan. Kainyo lotau ngesi eponitotor ngitamen luaronok lu ikote akiar, elomit ka akiper ka itwaan ni nyiutut ka iyong, akoko, alioko, eswamit. Ngakiro na ikote nu kesi itoronete itwaan, meere akimuj nyilatara ngakan loger lo ibaatar esi.” Torotok Yesu kaneni toten nakwap na eyei diye ngirerea lu a Tiro ka Sidon. Abu aberu apei na arai Akanaanit na alomit nakwap ngina bu nikeng. Kimaima ngesi irema tama, “Ekaapaan, Lokookeng a Daudi! Kisienoi ayong! Ichanit nakookang Ekipe noi.” Nakaneni nyelimokina Yesu ngesi akiroit, tani apei. Pot ngirukitos keng nikeng kimaimaa ngesi tamasi, “Kitwarak aberu na tolot! Kainyo kiwapit ngesi ngoni eyaunit echale!” Tatachak Yesu tama, “Kameunio ayong lotunga a Isirael make, lu ikote ngamesekin na echakara.” Esaa ngolo bu aberu tadakakin nakejen keng, tolim tama, “Kingarakinae ayong ekaapaan!” Tatachak Yesu tama, “Nyejoikinit akimuj a ngide echakakinio ngingokwo.” Tatachak aberu tama, “Iteni ekaapaan, nakaneni enyamete tani ngingokwo akimuj na ebucheene ilope tochakar na imuja alomeesa.” Nakaneni tatachak Yesu tama, “Irai iyong aberu na inupit lokojokon noi! Kisubakinere iyong na isaki daang.” Esaa lopei ngolo tojoker ikoku keng. Torotok Yesu kaneni, kitor nanam a Galilaya. Dio todoka moru kiboikin. Bu asepich a ngitunga nia Yesu eyaunito ngikangwalak ka ngimuduk ka ngikechodok ka lu nyiruorosi ta lukaalak lu adeakasi ngidekesinei ngigelagelae. Kiwaakis ngikadeakak nakejen keng sodi kitojok ngesi kesi. Tatalasi ngitunga ngakiro nguna na engolikineta lu nyiruorosi iruorikinete, ka lu angwalak erotokinete ka lukechodok ejokearosi, ka lumuduk ingolikinete, sodi kipuruut kesi Akuj a Isirael. Tanyarau Yesu ngirukitos keng ni ayei ngesi tolimok tama, “Kesienito ayong ngitunga lu kainyo kiruk ayong ka kesi ngirwa nguuni. Nakaneni emam tokona kesi akimuj enyamete. Nyasaki ayong akimiekin kesi eloose eringa nyisimuja, kainyo epedorete akirakanar alorot eloose nawiyei kech.” Kingita ngirukitos keng tamasi, “Nyai ni kilemunea ngoni akimuj anariet kana na itemuni asepich na daang?” Kingit Yesu kesi tama, “Ngai ngamugati itingito esi?” Tatachakis tamasi, “Ngakan-kaarei ka ngikolia luuchik ngidikidio.” Nakaneni tolimok Yesu asepich a ngitunga atamar kiboikinos kwap. Sodi tolem ngamugati nakan-kaarei ka ngikolia, tobuak Akuj alakara. Ani erumor tonyilinyili sodi nak ngirukitos keng tokorakis ngitunga. Kimuja kesi daang kimwoko. Sodi tolemut ngirukitos keng ngategerin ngakan-kaarei na eleleba akimuj na apiyanun. Ngitunga lu emujete akimuj ngina araakasi ngikiliok ngabunge ngoomwon, emam itwaan emarit ngaberu ka ngide. Tolimok Yesu ngitunga atamar toloto, ani erumor todoka natubwa toten nakwap a Magadan. Pot Ngiparisayo ka Ngisadukayo nia Yesu esakete akining ngesi. Tolimokis tamasi, “Tosubak ngakitoodikinet nakailiilok na itodiunito atamar ibunit iyong ani a Akuj.” Nakaneni tatachak Yesu kesi tama, “Esaa lo iraraa akolong adooyor ilimunete esi tamasi, ‘Ejoker akolongit ani erengikinitor adis’. Nabo nataparach elilim ilimunete esi tamasi, ‘Erami akiru akolongit na kainyo erengikinit adis kidiisikinite akwap’. Ipedorete esi ayenun ngakiro na adis kotere akitere ngidowon. Nakaneni nyo tokona peiyenuneta esi ngakitoodikinet nakailiilok na itodiunitae ngirwa lu! Eroko noi ngitunga a ngirwa kalu nyekerito tani Akuj! Esakete kesi kidodikinae ngakitoodikinet nakailiilok! Nakaneni emam ngakitoodikinet ngache nakailiilok idodikinio kesi mati nakolong a ekadwaran a Akuj Yona.” Sodi kimiek ngesi kesi torotok. Na adokareta ngirukitos a Yesu ekwakaye anam, kimuriak kesi akiting ngamugati. Tolimok Yesu kesi tama, “Tochoikinos anakiro anaaronok a Ngiparisayo ka Ngisadukayo ana ikote ekitoe lo itubui ngamugati.” Tolomakis kesi ekiruor make ebalasi, “Elimunit ngesi nu kainyo emam ngamugati kitingit ngoni.” Ayeni Yesu ngakiro na eruorosi kesi sodi kingit kesi tama, “Nyo iruorotor esi make ibaatar emam ngamugati itingito? Etia ekiditeu a anupit kus ai? Eringa esi nyeyenuna a? Nyitamunito esi nakolong anyilinyilia ayong ngamugati ngakan kotere ngitunga ngabunge ngakan a? Ngai kolong ngategerin ilelebete esi? Ani bo ngamugati nakan-kaarei na anyilinyili kotere ngitunga ngabunge ngoomwon? Ngai ngategerin ilelebete esi? Kainyo peiyeneta esi atamar meere kotere ngakiro a ngamugati kesuruorea ayong esi? Tochoikinos anakiro anaaronok a Ngiparisayo ka Ngisadukayo ana ikote ekitoe lo itubui ngamugati.” Nakaneni toyena ngirukitos keng atamar meere ngakiro a ekitoe alo itubui ngamugati echikichikea ngesi kesi nakaneni araakasi ngakiro a ngakitatamet a Ngiparisayo ka Ngisadukayo. Torotok Yesu tolot nakwap na ayei diyete ere a Kaisaria Pilipi. Kingit ngesi ngirukitos keng kaneni tama, “Ebaasi mono ngitunga Lokookeng a Itwaan ngesi ngae?” Tatachakis tamasi, “Ebaasi ngiche Yoana Ekebatisan. Ebaasi ngiche erai Elija. Tabaas ngiche irai iyong Yeremia kori epei a ngikadwarak a Akuj.” Kingit kesi tama, “Ani bo esi, ibaasi esi ayong ngesi ngae?” Tatachak Simon Petero tama, “Irai iyong Kiristo, Lokookeng a Akuj ana eyari.” Tatachak Yesu tama, “Kongina robo Simon, lokookeng a Yoana! Kipiaritae iyong noi. Erai meere itwaan kidodikini iyong ngakiro na iteni na ikote nguna nakaneni erai Apakang lo eyei nadis kitodikini iyong. Kalimokinit iyong Petero atamar, ekiro kon Petero, ngesi atamar ataaba. Nakaneni nataaba na ngesi adukokini ayong ekanisa kang. Nyepedori tani akitu akuruwor jik! Kainakini iyong ngingaet lu Apolou a Akuj. Daang na ingeri iyong anakwap, engerio tani anadis. Daang na ichamuni iyong anakwap, echamunio anadis.” Nakaneni tolimok Yesu ngirukitos keng atamar nyeelimokis itwaan tani ipei atamar arai ngesi Kiristo. Tolomak Yesu esaa ngolo alimonokin ngirukitos keng ngakiro na eleerete ebala, “Ejoikinit ayong alosi Yerusalem, katoboliatar ngikasukou a Atuk ka ngimurok luapolok a akai a Akuj ta ngiketatamak a etal. Kaario ayong ani akolongit na a ngauni ayaruni.” Tachada Petero ngesi nikeng bon tolomak akikilakin tama, “Meere kongina Ekapolon! Nyesubakinosi nguna anikon jik!” Torei Yesu tolimok Petero tama, “Koto anikang Esiitan! Nyo kiretakinitor iyong ayong? Meere nia Akuj eponitotor ngitamen lukon lu, eponito alotunga.” Nabo tolimok Yesu ngirukitos keng tama, “Itwaan daang ni esaki akiwapakin ayong, ejoikinit ejalun bon sodi toriong apir keng bu kewapak ayong. Kainyo itwaan cha daang ni esaki akirichun akiyar keng, ebukori. Nakaneni ni ejali akiyar keng kotere ayong, eyari. Nyoni eanyuni itwaan erai kitiliwo ngesi ibore daang nia akwap ikeng nakaneni tobukor anakiyar? Mam jik! Emam ibore ipotori ngesi kilokonyuunio akiyar keng. Kainyo dikino Lokookeng a Itwaan ebuni a Apolou anaketimon ka Apakeng erukito ka ngimalaikae keng. Sodi tatach itwaan daang itemem ka etich keng. Kalimokinit ayong esi atamar eya ngiche nege lu nyetoakete eringa nyeanyungara Lokookeng a Itwaan ebuni erai Ekapolon.” Adaunet a ngirwa a ngikan-kapei, abu Yesu toriko Petero ka Yakobo ta Yoana lu araakasi ngikaitotoi, todokasi kesi make kidiama emoru lokooyen. Kibelei Yesu iteete kesi. Tokwanger ereet keng tomilimil loger a akolong. Tokwangeta ngiworui keng loger a akicha. Sodi kingolikis ngirukitos luuni ngulu Musa ka Elija iruorosi ka Yesu. Tolimok Petero Yesu tama, “Ekapolon, ejok noi ani kiyakar ngoni ne. Ani kichamit iyong, adukokini ayong ngakais ngauni ne, apei akon, apei aka Musa, nache aka Elija.” Ani eringa ngesi iruorikinit, totiyaun edou loakwaan noi tarap kesi. Kiirasi kesi etoil alodou kangolo ebala, “Lokookang lominat ngesi lo. Ketalakarit ngesi ayong. Topupokisi ngesi!” Na eirareta ngirukitos etoil, tadakakinos kwap, tobul noi. Bu Yesu tatap kesi tama, “Tonyoutu. Tojongoto aemit.” Ani ingoliarete kesi, emam itwaan iche engolikis mati Yesu bon. Ani etiyaate alomoru, todungok Yesu kesi ngakiro na abala, “Nyiilimokis itwaan tani ipei akitoodikinet na ingolikis esi anakisingolikinet a Akuj tanang akolongit na iteyarunere Lokookeng a Itwaan.” Kingita ngirukitos Yesu tamasi, “Nyo ebaatar ngiketatamak a etal ejoikinit Elija ebuni ekingaren?” Tatachak Yesu kesi tama, “Iteni ebuni Elija ekingaren sodi tosubak ngakiro daang kitiriyan. Nakaneni kalimokinit atamar abu kolong Elija nakaneni emam itwaan ayen ngesi. Tosubeta ngitunga ngesi ngakiro daang na asakete asubea, loger lo moi eboliatar tani Lokookeng a Itwaan.” Nakaneni toyena ngirukitos keng atamar eruoro ngesi ngakiro a Yoana Ekebatisan. Na abongoreta kesi nasepich a ngitunga, bu ekile eche nia a Yesu toriedik alongaren keng tolim tama, “Ekapolon, kingarak lokookang edeak! Irakanar ngesi lokojokon, echakanakin nakim ka nakipi. Ayaunit ayong ngesi lorukitos kon, nakaneni nyitojoka kesi ngesi.” Tatachu Yesu tama, “Iraakasi esi ngitunga lu iroko noi nyinupito ngakiro a Akuj. Ejoikinit ayong kiruki ka esi tanang ori? Anaikini ayong ngakiro kus tanang ori? Yautu idia ngini ne.” Todungok Yesu Ekipe atamar tolom ani a idia! Tojoker ngesi esaa ngolo. Potu ngirukitos a Yesu ni ayei ngesi elope kingita tamasi, “Nyo pekitwarakinea sua Ekipe?” Tatachak Yesu kesi tama, “Erai ni nyinupitotor esi lokojokon. Kalimokinit ayong esi dir atamar, tani kedit anupit kus ketia echokit a ekoropus, ilimokinete emoru lo tamasi, ‘Kape kane, toten ama’ sodi torotok. Ipedorete akisub daang! [ Akilip na eronere akimuj ngesi epedori akitwarakin Ekipe lo ikoni lo. Emam ibore iche epedori!]” Na achununotor ngirukitos daang wapei alo Galilaya, tolimok Yesu kesi tama, “Aapuu ni erikokinere Lokookeng a Itwaan ngitunga lu earete ngesi. Nakaneni akolongit na a ngauni iteyarunio ngesi.” Apot ngirukitos kialolongo noi. Na ananguneta Yesu ka ngirukitos keng Kaperinaum, pot ngikalemak a ngaropiyae a ekanisa nia Petero kingita tamasi, “Ebukeene Eketataman lokus echur a akai a Akuj a?” Tatachak Petero kesi tama, “Ee, ebukeene.” Naalomarea Petero kai, kiruorik Yesu ekingaren tama, “Simon! Esibit iyong kwaai? Ngae ebuki echur a ngikapolok a ngakwapea kanu? Ngikulepek a akwap kori ngitunga a akwap anache?” Tatachak Petero ngesi tama, “Ngitunga a akwap anache.” Tatachu Yesu tama, “Idodiunito ngakiro nguna atamar, nyechamit ngikulepek a akwap ebukete echur. Kona nyikisakea kesi toronikis ngakiro nu, kape nanam, tochakak ekorobich nakipi. Ekolia lo irumuni iyong ekingaren, tangaa akituk keng toriam ngaropiyae na itemokino iyong ka ayong kiwaakini kai a Akuj, naa kesi ngaropiyae nguna tatachea echur yok!” Esaa ngolo pot ngirukitos a Yesu nikeng kingita tamasi, “Ngae epolot noi anapolou a Akuj?” Sodi tanyarau Yesu ikoku kitowo alongaren kech, dio alimuni tama, “Kalimokinit ngakiro na iteni dir atamar ani pekilochosi esi kikokis ngide luuchik, nyilomarete napolou a Akuj. Itwaan ni epolot noi Anapolou a Akuj ngesi ngini itiditeun kikok ikoku niichi en. Itwaan cha daang ni itepeyoni ikoku niichi ni ikoni en a ekiro kang, ketepeyon tani ayong. “Itwaan cha daang ni itesechi ipei a luuchik kanupito ayong kalu, ejoikinit eenikinio akiries lomosiring tochakakinae nanam nituluk. Oitiakoi! Etioko nginyas epote nakwap kainyo epete ngakiningioto na epedorete akitapalikin ngitunga anupit kech! Ngakiro na ikote nguna esubakin ngirwa daang, nakaneni etioko nginyas eanyunete ngitunga lu irokunito ngakiningioto nguna! “Ani kitosech iyong akan kon kori akeju kon, totubo tochaka. Ejoikinit ilomari nakiyar ingwalit akan kori akeju idwangit achakakino nakim na nyedunge eyakasi ngakejen daang ka ngakan. Ani kitosech iyong akongu kon, touto tochaka. Ejoikinit ilomari nakiyar idoony idwangit achakakino nanam na akim eyakasi ngakonyen daang. “Tochoito imenyarete tani ipei a luuchik kalu. Kalimokinit ayong esi atamar, erukito ngimalaikae kech ngirwa daang ka Apakang lo eyei nadis. [ Kainyo abuni Lokookeng a Itwaan ayuun lu echakara.] “Esibit esi ikokini itwaan ni eyakasi ngamesekin amiat apei, dio tochakar apei ai? Imiekini ngesi nache natomwon-koomwon ka ngakan-koomwon edakasi akook a emoru sodi tasaka napei na echakara. Kalimokinit ayong esi atamar, ani keanyu amesek ngina, elakar noi kotere amesek napei ngina kidwang epit anatomwon-koomwon ka ngakan-koomwon peachakara. Aloger alopei kangolo, nyesaki Apakus lo eyei nadis tani ipei a luuchik kalu tochakar. “Ani kisechakini iyong lokaatokon, kape nikeng kidodik ngesi atamar esechit ngesi. Nakaneni tolimok anikeng bon, iraakasi esi luarei make. Ani kiira ngesi ngakiro kon, iyuu iyong lokaatokon ibuu. Nakaneni ani pekiira ngesi ngakiro kon, kape nabo nikeng irikit itwaan ipei kori ngiarei, sodi tarauneta ngakiro daang na esechit ngesi na aanyut ngitunga ngiarei kori nguuni, loger lo igiritere nagiran. Ani pekiira ngesi ngakiro kech, yaa ngakiro daang lotunga a ekanisa. Ani esal kanguna, ani pekiira ngakiro a ngitunga a ekanisa, kisikok ngesi itwaan ni nyenupit Akuj kori eketubukon echur. “Nakaneni kalimokinit ayong esi daang atamar: daang na ingerete esi anakwap, engerio tani ka ama anadis. Nakaneni na ichamunete esi anakwap, echamunio tani anadis. Nabo kalimokinit ayong esi atamar, na epupokinotor ngiarei kus kane anakwap kotere ibore ni ilipasi esi, kisubakinea esi Apakang lo eyei nadis. Kainyo na iriamiriameta ngiarei kori nguuni wapei kotere ekiro kang, kirukit ayong ka kesi kaneni.” Bu Petero nia Yesu kingit tama, “Ekapolon arimakini ayong lokaatokang lo kasechanakini ayong jiik ngarimanakinet ngai? Ngakan-kaarei ngakimarunet ngakan-kaarei a?” Tatachu Yesu tama, “Mam, meere ngakan-kaarei nakaneni erai ngatomwon-kaarei ngakimarunet ngakan-kaarei. Kainyo ikoni Apolou a Akuj ne. Ayei kolong ekapolon lo asaki akimichare ngamichae na aarito ngikasubak etich keng. Napei esiakinea ngesi akimichare, torikunoe epei lo aarit ngaropiyae ngabunge ngatomon. Amam ekasuban etich ngolo ngaropiyae nakaalak na etemokino etachea amicha keng. Nakaneni todung ekapolon ngolo atamar togielarae ngesi ka aberu ka ngide ta awi keng daang taraut ngirikon sodi tatachere amicha. Toriedik ekasuban etich kimaima ekapolon tama: ‘Kiapakinae kare! Atachi ayong amicha kon daang’. Kisieni ekapolon ngolo ekasuban etich keng torimak, tajalak amicha keng, sodi kimiek ngesi tolot. “Topudo ekile ngolo nikalapatan torukau ekasuban etich loche lorukitos keng lo aarit ngadinari amiat apei anikeng. Torwakin ngesi tomied ebala, ‘Tatach amicha kang daang’. Tadakakin ekasuban etich lorukitos keng ngolo nalup toriedik kimaima ngesi tama, ‘Kiapakinae kare. Kimiekinae katachakini ayong iyong amicha kon daang’. Nakaneni towou ngesi arimakin loche, tama toinikisi loche lojela tanang ni etachea amicha keng. Na engolikineta ngikasubak etich luche ngakiro na asubakin, apot tongoa noi sodi toloto tolimokis ekapolon ngakiro daang na asubasi. Sodi tanyarau ekapolon ekasuban etich tooma akai tolimok tama, ‘Irai iyong ekasuban etich loaronon, kajalakini ayong iyong amicha kang daang kotere ani kimaimaea iyong ayong. Ejoikinit iyong dang kisieni ekasuban etich erukitos kon loger lo kisienio iyong ayong.’ Tongo ekapolon noi sodi torikok ekasuban etich ngolo asiger a ejela toenae tanang akolongit na etachea amicha keng daang.” Tolim Yesu ngakiro narumoret ebala, “Ngakiro napei nguna ngesi kisubea esi Apakang lo eyei nadis erai pekerimaki ipeikus lokaatokeng alotau keng kadaang.” Na arumorea Yesu ekiruor ngakiro nu, torotok alo Galilaya, toten nakwap a Yudea todoka ekwakaye a angolol a Yorudan. Kiwapak asepich a ngitunga nakaalan ngesi kitojok ngesi kesi kaina. Pot Ngiparisayo ngiche esakete akining ngesi kingita tamasi, “Echamakinitae alotal yok elaki ekile aberu keng kotere ibore cha daang ni aronikini ngesi a?” Tatachu Yesu tama, “Nyisoma esi ngagiran na ebaasi, kolong anakisiakinet, asubuni Akuj ekile ka aberu a? Sodi tolim Akuj tama, ‘Kotere ngakiro nguna, eisikini ekile apakeng ka itiokeng, sodi kiruko ka aberu keng, tarautu kesi luarei ngipei’. Nakaneni nyeringa kesi nabo eraakasi ngitunga ngiarei, nakaneni erai itwaan ipei. Nyejoikinit itwaan etiaki ngini kolong emorik Akuj.” Kingita Ngiparisayo ngesi tamasi, “Nyo bo alimunitor Musa atamar ani kesaki itwaan akilak aberu keng ejoikinit igirakini abarua na elakit, totiakatar.” Tatachu Yesu tama, “Kichamakini Musa esi ilakete ngaberu kus kainyo egogong esi ngakies emam kona kitatamio. Nakaneni peekote ngakiro nguna neni nakolong asubunere akwap. Kalimokinit ayong esi atamar, itwaan cha daang ni elaki aberu keng peelomit aberu, sodi kiuut aberu ache, eliwor ngesi ekaloman.” Tolimokis ngirukitos keng ngesi tamasi, “Ani kikote neni ngakiro a ekile ka aberu echamit peiutanario.” Tatachak Yesu kesi tama, “Meere akitadapet na aka itwaan kadaang. Erai aka ngulu ainaki Akuj ngakiro nguna. Kainyo egelagela ngakiro napenyechamit ngitunga iutanareta. Ngiche eraakasi ni kolong edounere ikote neni. Ngiche ngitunga kolong esikokinete neni. Ngiche erai nyiutarete kotere Apolou a Akuj. Kimiekisi ngulu iwapito akitatamet ngina kiwapa.” Torikut ngitunga ngiche ngide nia Yesu esakete ngesi kidokok ngakan keng kidiama kech sodi kilipak. Nakaneni kikilakis ngirukitos keng ngitunga. Tama Yesu, “Kimiekisi ngide luuchik pot nikang. Nyiiratakis kesi kainyo erai Apolou a Akuj aka ngulu ikote lu.” Kidokok ngakan keng nakies kech, ani erumor torotok kaneni. Abuni kolong itwaan nia Yesu kingit tama, “Eketataman, nyo niajokon ejoikinit ayong asubi ataanyunea akiyar na nyedaun?” Tatachak Yesu tama, “Nyo kingisitor iyong ayong atamar nyoni ejok? Eyei epei bon lo ejok. Kiwap ngitalio a Akuj kisaki aanyun akiyar.” Tatachu tama, “Alutalio?” Tatachak Yesu tama, “Nyiiar, nyiilom, nyiikoko, nyiiruor ngakiro na eraakasi alioko. Toker apakon ka itiokon, sodi tominak ekidunyet kon loger lo iminar iyong elope akwaan kon.” Tatachu ekile ngolo tama, “Erichunit ayong ngitalio ngulu daang. Nyo iche echamit ayong asubi?” Tolimok Yesu ngesi tama, “Ani kisaki iyong araun itwaan ni ikiuna noi, kape togiela ibore daang ni itingit iyong, tokoranak ngikebootok ngaropiyae, sodi min ebari kon kidiama nadis. Ani erumor bu kiwapak ayong.” Na eirarea ekile ngolo nguna, torotok esinyit kainyo abarit ngesi noi. Tolimok Yesu nabo ngirukitos keng tama, “Kalimokinit ayong esi ngakiro na iteni dir abala: egogong noi ngikabarak alomar Napolou a Akuj. Alimunit nabo na abala, ebeben ekaal akitor napedot a emutu idwangit eger lo elomarea ekabaran Napolou a Akuj.” Na eirareta ngirukitos keng nguna, toiliilikis noi kingita tamasi, “Ani ngae epedori ayuun?” Tokienyik Yesu kesi tatachak tama, “Nyepedorosi nguna alotunga, nakaneni ani a Akuj, epedorosi ngakiro daang.” Tolim Petero ngakiro na ekeunit tama, “Tokona abe kiisik bo kolong sua ibore daang kiwapak iyong. Nyoni kianyuni sua?” Tolimok Yesu kesi tama, “Toyena atamar akolongit na iboikinor Lokookeng a Itwaan Napolou keng, kilochoi ibore daang toliwor ikitetet, tani esi dang lutomon ka ngiarei lu iraakasi ngirukitos kang, iboikinosi lokicholongo ngitomon ka ngiarei a Napolou, kirirata ngitela lutomon ka ngiarei a Isirael. Itwaan daang ni aisiki awi keng, kori ngikaitotoi ka ngakaitotoi keng, kori apa ka itiokeng, kori ngide, kori ngamanat keng kotere ayong, einakinio ngainakinet nakaalak na idwangito amiat apei taanyunite akiyar na nyedaun. Nakaneni ngikaalak lu ingarenete tokona, isidiyorosi, ngikaalak lu isidiyete tokona, ingarenikinete. “Ikoni Apolou a Akuj ne. Eswakakini elope a amana nataparach elilim akigir ngikasubak etich alomana keng. Tocham akitach kesi ngaropiyae a akolongit a apei eriyan. Sodi tolimok kesi atamar toloto akisub etich alomana. Tobong nabo ngisaae nguuni toten ni agielanareta ngitunga ngiboro sodi kingolik ngitunga ngiche ewaasi emam ibore esubete. Tolimok kesi tama: ‘Kapesi esi dang tosuba etich alomana, sodi katatach ayong esi ngaropiyae na eriyan’. Sodi toloto kesi. Na anangea ngisaae ngikan-kapei ka nabo ngikan-koomwon, tosub ngesi ngakiro napei nguna. Ani nabo ewari enangi ngisaae ngitomon ka epei, tobongo nabo ni egieleta ngitunga ngiboro, toriam ngitunga ngiche ewaasi kaneni. Kingit kesi tama, ‘Nyo ibooyoto esi apaaran juui emam ibore isubete?’ Tatachakis tamasi, ‘Emam robo itwaan kigir sua akisub etich’. Tolimok kesi tama: ‘Kapesi esi dang tosuba etich alomana’. “Naawaria, tolimok elope a amana itwaan ni aweikinit luche tama: ‘Tanyara ngikasubak etich kitanyam ngaropiyae a etich kech, kisiak alu esidiyete, tasal alu engarenete’. Nakinae ngitunga lu esiakinete etich ngisaae ngitomon ka epei ngaropiyae a akolongit a apei. Sodi ani epote ngitunga lu ekingaren, kitama ebaasi kori kiinakinio ngaropiyae nakaalak, nakaneni nakinae kesi dang ngaropiyae a akolongit a apei. Tolooso kesi ngaropiyae ni eyei elope a amana kisuburata. Tolimokis tamasi: ‘Ngitunga lu esidiun lugu asubete etich esaa epei bon, tarai kisubi sua etich atoditasi akolong daang erirae, nyo bo itachea iyong kesi ngaropiyae na eriyan ka nakosi?’ Tatachak elope a amana epei kech tama: ‘Topupok ekone. Nyekamodit ayong iyong. Ichamuni tete iyong akisub etich akolongit apei a ngaropiyae a akolongit a apei. Tolema tokona ngaropiyae a etich kon tolot nawi. Achamunit ayong ainakin itwaan ni ta esidiun en na etia nakainak iyong. Nyejoikinit ayong asubea ngaropiyae kang ngakiro na asaki a? Kori eyei iyong etereku kotere apatanu kang?’ ” Tolim Yesu ngakiro narumoret tama, “Lu esidiyete kesi ingarenikinete, lu ingarenete, isidiyorosi.” Na alosio Yesu Yerusalem, toriko ngirukitos lutomon ka ngiarei tochada kisuruor anikech make eloose alorot tolimok tama, “Topupokisi! Kilosi tokona ngoni Yerusalem ni erikorere Lokookeng a Itwaan lomurok luapolok a akai a Akuj ka ngiketatamak a etal. Irirate kesi ngesi taara. Sodi erikorio ngesi lobukui lu nyerai Ngiyaudi, sodi tokienatar ngibukui ngulu ngesi kibungata nabo taramakis napir. Nakaneni ani enangi akolongit na a ngauni, kiteyarunae.” Sodi bu aberu a Sebedayo nia Yesu ka talokookeng luarei, toriedik alongaren keng, sodi kilip ngesi ibore ni asaki. Kingit Yesu ngesi tama, “Nyo isaki iyong?” Tatachak ngesi tama, “Kichikakinae kare ayong atamar ani iliwor iyong Ekapolon, iboikinosi ngide lukang lu ka iyong, epei nakan na aloteten, loche nakan na alokedieny.” Tatachak Yesu talokookeng a aberu kangina tama, “Nyiyenete esi na ilipasi. Ipedorete esi akimat ekopo lo aboliaro lo edikino ayong amasi a?” Tatachut tamasi, “Kipedori.” Tolimok Yesu kesi tama, “Iteni ipedorete esi akimat ekopo lo amasi ayong. Nakaneni meere ayong aseuni atamar ngae iboikin teten kori kedieny kang. Eraakasi ngiwaitin ngulu ngika ngulu eseunit Apakang.” Ani iirarete ngirukitos luche lutomon ngakiro nguna, apot tongoikis ngikaitotoi luarei ngulu. Sodi tanyarau Yesu kesi daang tochunak wapei tolimok tama, “Iyenete esi atamar epolokinito ngikapolok a ngibukui alu nyerai Ngiyaudi ngitunga kech. Nabo epolokinito ngikarikok kesi noi. Nyejoikinit ngakiro ikokinete neni anikus. Ani kesaki ipei kus araun ekapolon, ejoikinit eliwor ekasuban etich aluche. Kori ani kesaki ipei kus aliwor lo ingareni, ejoikinit eliwor ekasuban etich kus. Loger a Lokookeng a Itwaan alo peabunit asubakino etich nakaneni akisub etich nabo tajal akiyar keng sodi talachunea ngitunga lukaalak.” Na arotokineto Yesu ka ngirukitos keng alo Yeriko, ewapit asepich a ngitunga kesi. Ebooyete ngitunga ngiarei lumuduk alokwaas a erukudi. Naeirareta kesi atamar itorunit Yesu diye neni, kiremasi ebalasi, “Lokookeng a Daudi! Kisienoi sua Ekapolon!” Kikilakis ngitunga kesi esakete kililinga. Nakaneni kiremasi kesi lokojokon noi ebalasi, “Lokookeng a Daudi! Ekapolon! Kisienoi sua!” Towo Yesu tanyara kesi. Kingit tama, “Nyo isakete esi katosubakinea ayong esi?” Tatachakis tamasi, “Ekapolon, kisaki sua tangaar ngakonyen engolikisi akwap.” Kisieni Yesu kesi, sodi tatap ngakonyen kech, kingolikis kesi akwap atipei, sodi kiwapakis ngesi. Na apikineta kesi Yerusalem, tananga Betipage ni eyei emoru a ngikito a akimiet. Tomea Yesu ngirukitos keng ngiarei kingarenikis. Tolimok tama, “Kapesi nadakar na eyei ngaren kus. Napei inangeta neni, iriamunete asikiria na eenitae erukito ka itasikiria keng. Talachutu kesi taramut nege. Ani kelimu itwaan idio ngakiro, tolimokisi ngesi tamasi, ‘Ekapolon ngesi esaki kesi’, nakaneni ebuuni atipei.” Asubasi nugu sodi kiyookinotor nakolong alimuni ekadwaran a Akuj ebala: “Tolimokisi ngitunga a ere a Sion atamar. Kingolikisi, ebunit Ekapolon kus nikus! Epalaana edokit esikiria. Edokit isikiria ni erai itasikiria.” Sodi toloto ngirukitos tosuba nasek alimokinit Yesu kesi atamar tosuba. Apot taramut asikiria ka itasikiria topetakis ngiworui kech kidiama keng sodi todoka Yesu kiboikin. Topetak asepich a ngitunga ngiworui kech lorot, toyeput luche ngakui a ngikito topetakis lorot. Kirema asepich a ngitunga alu engarenete Yesu ka lu atupito ebalasi: “Kipuruunoe Lokookeng a Daudi! Topia Akuj ngolo ebunit a ekiro a Ekapolon! Kipuruunoe Akuj.” Na alomarea Yesu Yerusalem tochalakis ngitunga daang alore kingitas ebaasi, “Ngae en?” Tatachu asepich a ngitunga tama, “Erai logo ekadwaran a Akuj Yesu, ngolo a Nasaret ana a Galilaya.” Toloma Yesu kai a Akuj kitwarak ngitunga daang lu agielanarete kalu agielete ngiboro kaneni. Kibelukwaa ngimeesae alu abwangeenete ngaropiyae ka ngikicholongo alu agielanarete ngakurio. Tolimok kesi tama, “Igiritae nagiran atamar ebala Akuj, ‘Enyarao Akai kang akai nakilipet.’ Nakaneni itaraut esi aburibur na eduketa ngirukooi.” Pot lumuduk ka lukangwalak nikeng alokai a Akuj, sodi kitangalek ngesi kesi. Nakaneni tongoa ngimurok luapolok a akai a Akuj ka ngiketatamak a etal na engolikineta ngakiro naajokak asubi ngesi. Nabo eremasi ngide kigoros alokai a Akuj ebaasi, “Kipuruunoe Lokookeng a Daudi.” Kingita kesi Yesu tamasi, “Ipupi iyong ngakiro na iruorosi kesi a?” Tatachak Yesu tama, “Ee, apupi. Nyisoma esi ngagiran na ebaasi: ‘Itatam iyong ngide lukechiatak ka luenakete alimun ekipur lokebusian a?’ ” Toisik Yesu kesi torotok alore tolot nadakarin a Betania, toper neni. Na abongorea Yesu lore ataparach nache, tanyam akoro alorot. Kingolik emeyen alokwaas a erot. Sodi tolot lokitoe ngolo, nakaneni emam ibore ariamu mati ngakui make. Sodi tolimok ekitoe tama, “Nyikoniuni ageor nabo jik.” Tooniyo ekitoe ngolo atipei. Na engolikineta ngirukitos keng ngakiro nguna apot toiliilikis kingitas tamasi, “Ekokini emeyen eoni atipei ai?” Tatachak Yesu kesi tama, “Kalimokinit ngakiro na iteni atamar, ani inupito esi peingayasi, ipedorete asubakin na asubak ayong alokitoe kalo. Meere nugu make. Ipedorete tani alimokin emoru lo tamasi, ‘Toditun tochakakin nanam,’ nakaneni ikokini neni. Ani kinupito esi, ianyunete ibore daang ni isakete ilipito.” Tobongu Yesu kai a Akuj, pot ngimurok luapolok a Akai a Akuj ka ngikasukou a Atuk ni etatamea ngesi kingita tamasi, “Anipolou isubea iyong ngakiro nu? Ngae kitaanyuni iyong apolou na?” Tatachak Yesu kesi tama, “Kengisi ayong dang esi akiroit apei bon. Ani kitachut esi, kalimokini ayong esi apolou na asubea ayong ngakiro nu. Aliwae aanyunea Yoana apolou na ibatisaa ngitunga a ngakipi, nia Akuj kori lotunga?” Tolomakis akingitanar make ebalasi, “Ekoe, kitamari ai? Ani kitama ngoni, ‘Aanyuni ani a Akuj,’ kingisi ngesi ngoni tama, ‘Ani nyo bo peinupeta esi ngakiro a Yoana?’ Nakaneni kiemit ngoni ngitunga nyikipedori alimun atamar, ‘Aanyuni alotunga,’ kainyo eyenete ngitunga daang dir atamar arai Yoana ekadwaran a Akuj.” Sodi tatachakis kesi Yesu tamasi, “Nyikiyeni sua.” Tolimok Yesu dang kesi tama, “Nyakalimokini ayong dang esi atamar anipolou asubea ayong ngakiro nu. “Ibalasi tokona esi ai? Ayei itwaan ni ayakasi talokookeng ngiarei. Tolot ni ayei loapolon tama: ‘Lokoku, kape tosub etich alomana akolongit na.’ Tatachak tama: ‘Nyalosi ayong,’ nakaneni ani ekisidi tocham, dio alosit mana. Sodi tolot apakech ni ayei loche tolimok ngakiro napei nguna. Tatachu ngesi tama: ‘Ee apa, alosi’, nakaneni nyeloto. Ali alode aluarei kangulu abu tosubak na asaki apa keng?” Tatachakis tamasi, “Loapolon.” Sodi tolimok Yesu kesi tama, “Kalimokinit esi atamar, ngiketubukok echur ka ngamalaae kesi isiaunete tolomasi napolou a Akuj eroko esi. Kainyo abuni Yoana Ekebatisan nikus kidodik esi erot lo itemokino iwapete, nakaneni nyenupa esi ngakiro keng. Nakaneni apot ngiketubukok echur ka ngamalaae tonupa ngakiro keng. Tani na ingolikineta esi nugu, nyilocho esi ngitamen kus tonupa ngesi.” Tolim Yesu tama, “Topupokisi akitadapet ache. Etae itwaan ipei amana a ngikito enyaritae ngimusabib todukok awas kisiriam. Toboka ngesi akipany kiwaak iborosit nichiet emuna a ageor a ngikito kangulu, sodi todukok epem. Toisikinea ngesi ngiketak ngulu amana ngina, tonyou tolot wache. Na anangea ngirwa lulemet amana, tomea ngesi ngikasubak etich keng loketak esaki kidiekis ngesi epewae a ngalemet. Apot ngiketak kirumut ngikasubak etich keng, kibungata epei, taara eche, kimasa loche a ngamoru. Tomea nabo elope a amana ngikasubak etich lukaalak lu edwangito lusek a ekingaren, tosubeta nabo ngiketak ngikasubak etich ngulu napeikiro nguna. Ekisidi kadaang, abu tomea lokookeng ni ayakasi kesi ebala, ‘Ekerete kesi dir lokookang’. Nakaneni na engolikineta ngiketak lokookeng a elope a amana apot tolimokin make tamasi: ‘Lokookeng lo. Potu ataara toliworor amana ayok!’ Apot kirumut ngesi, kipudosi nikalapatan a amana sodi taarakis neni.” Kingit Yesu tama, “Anukiro esubakinea elope a amana kangina ngiketak ngulu na ebongunio ngesi?” Tatachakis tamasi, “Eari ngesi dir ngitunga luaronok ngulu sodi nak amana ngiketak ngiche lu einakinete ngesi epewae a ngalemet esaa lo itemokino.” Tolimok Yesu kesi tama, “Nyisoma esi na igiritae nagiran a? ‘Amoru nakolong angerete ngikadukok ebalasi erono ngesi tokona ajoker noi edwang daang. Ekapolon ngesi asubi nugu. Eraakasi ngakiro nakatalarak na kitee ngoni!’ ” Kiatak Yesu tama, “Kalimokinit ngakiro na iteni atamar, elemario apolou a Akuj anikus nakinae ngitunga lu isileereunete ngitichisio lu ajokak. [ Ani kedakakin itwaan namoru ngina etiakatiakar a ngalooso, ani itwaan ni echakakin amoru ngina kidiama keng, iriari ngesi kikok apua.”] Na eirareta ngimurok luapolok a akai a Akuj ka Ngiparisayo ngakitadapet na eruoro Yesu, toyena atamar eraakasi kesi eruoror Yesu kongina. Apot tasaka akirumun ngesi. Nakaneni toema asepich a ngitunga kainyo ayenete ngitunga atamar erai Yesu ekadwaran a Akuj. Kisuruor Yesu nabo ngitunga a ngakitadapet kona, “Ikoni Apolou a Akuj ne. Ayei ekapolon lo edorokini akimuj a akuuta alokookeng. Tomea ngikasubak etich keng tanyarata ngitunga lu anyaraunitae nakimuj, nakaneni towout daang aponere. Sodi tomea ngikasubak etich tolimok ngakiro na elimokinete ngipeyok ebalasi: ‘Akono akimuj kang tokona. Angol ngimongin kang ka ngaatuk nakatumak. Asubakin ibore daang eriyan. Potu nakimuj a akuuta’. Nakaneni ngitunga lu anyaraunitae ngulu nyemisikina ngakiro nguna, toloto lotichisio kech. Tolot iche mana keng, iche lodukan keng. Kirumut luche ngikasubak etich kideta sodi taara kesi. Tongo ekapolon noi, tomea ngajorei keng, taara ngitunga lu aarete ngikasubak etich keng, sodi kinoma ere kech. Tanyarau ngikasubak etich keng tolimok tama, ‘Anang esaa lo imujere akimuj a akuuta nakaneni peetemokino eboyor alu anyaraunitae nakuuta. Tokona, kapesi lorotin tanyarata ngitunga lu cha iriamunete esi daang’. Apot ngikasubak etich toloto lorotin tochunakis ngitunga lu cha ariamunete kesi daang, luajokak ka luaronok, kilelebun ngitunga kai na akuuta ngina. “Kirimo ekapolon isemee ngipeyok ngulu sodi kingolik itwaan ipei ni peanapit ngiworui lu iutare. Kingit ekapolon ngesi tama, ‘Ekone, ikokini iyong ilomuni nege peinapit ngiworui lu iutare ai?’ Tachakin itwaan ngini chek. Tolimok ekapolon ngikasubak etich tama, ‘Toena ngesi ngakan ka ngakejen, sodi tochakasi nikalapatan naribu. Kigor kaina tokirich ngikel keng.’ ” Tolim Yesu ngakiro narumoret tama, “Enyaritae lukaalak, nakaneni ekidioko lu eseunio.” Toloto Ngiparisayo atuko eger lo eloketa Yesu a ngakiro ana elimuni. Tomeasi ngirukitos kech ngiche ka ngitunga a atukuoru ka Erode nia Yesu. Tolimokis Yesu tamasi, “Eketataman, kiyeni sua atamar iruoro iyong ngakiro na iteni. Nabo itatami iyong ngakiro na iteni na echamit Akuj alotunga nyimisit iyong ngakiro na itamete ngitunga kainyo nyikachit iyong keyenikinitae itwaan kori kemam. Tolimokinae sua, esibit iyong ejoikinit alotal kosi kibukokini sua ekapolon a Ngiroma echur kori emam?” Kona ayenea Yesu atamar kalokitae a ngakiro anaaronok, tolim tama, “Esi ngikamodeanak! Nyo kilokitotor esi ayong? Kidodikinae chene aropiyat nabuket echur!” Inut ngesi aropiyat, sodi kingit kesi tama, “Eka ngae ereet lo ka ekiro lo?” Tatachut tamasi, “Ngika a ekapolon a Ngiroma”. Sodi tolimok Yesu kesi tama, “Ani keraakasi, nakisi ekapolon a Ngiroma ibore ni erai ikeng, nakis Akuj ni erai ika Akuj.” Tatalasi kesi ngakiro nguna na eirareta, toisikis Yesu kaneni torotokis. Akolongit napei ngina, pot Ngisadukayo ngiche nia Yesu (ebaasi kesi nyeyarunete ngikatoak). Tolimokis tamasi, “Eketataman, abala kolong Musa, ani ketoana itwaan ni emam ngide, ejoikinit lokaatokeng irumi aberu ngina, sodi touriut ngide lu eliwor ngika ngolo atoani. Ayakasi kolong ngikaitotoi ngikan-kaarei lu alomito ne. Kuuta loapolon totoan nyeanyuna ngide, sodi kirum lokaatokeng aberu ngina. Tosubakin ngakiro napei nguna ani eyei lokaatokeng lo a ngiarei, ka lo a nguuni, ta kesi daang lukan-kaarei. Ani ekisidi totoan aberu ngina. Tokona, ani akolongit na eyaruneta ngikatoak, eliwor ngesi aberu a ngae? Kainyo arai ngesi aberu alukan-kaarei kangulu kadaang.” Tatachak Yesu kesi tama, “Ichwangakinito esi nguna dir ani nyiyeneta esi ngagiran kori agogongu a Akuj! Kainyo na eyaruneta ngikatoak, ikokinete kesi ngimalaikae lu eya nadis nakaneni nyiusio kori nyiutanarete. Nabo akiroit na ebeyo eyarunete ngikatoak, nyisoma esi na kolong kilimokini Akuj a? Alimuni tama, ‘Arai ayong Akuj ka Aburaam ka Akuj a Isaka ta Akuj a Yakobo’. Erai ngesi Akuj alu eyarete, meere alu etoakito.” Tatala asepich a ngitunga akitatamet keng na eirareta ngakiro nguna. Na eirareta Ngiparisayo atamar esililing Yesu Ngisadukayo, tochunakin wapei, sodi tasak epei kech lo arai eketataman a etal akilok Yesu a ngakiro. Kingit tama, “Eketataman, alital epolot noi alotalio kadaang?” Tatachak Yesu ngesi tama, “Tominak Ekapolon Akuj kon a etau kon kadaang ka akiyar kon daang ta ngitamen kon daang. Etal lo epolot noi ngesi lo. Lo a ngiarei lo epolot lo ikwaan ka lo ekingaren ebala, ‘Tominak ekidunyet kon loger lo iminar iyong ilope akwaan kon.’ Etal a Musa daang ka ngakitatamet a ngikadwarak a Akuj iwapap ka ngitalio luarei lugu.” Na achunakinotor Ngiparisayo wapei, kingit Yesu kesi tama, “Esibit esi Kiristo ngesi ngae? Erai ngesi ales a ngae?” Tatachakis tamasi, “Erai ales a Daudi.” Kingit Yesu tama, “Ani nyo bo edodikinea Etau a Akuj Daudi atamar tanyara ngesi, Ekapolon? Alimuni Daudi tama: ‘Alimokini Ekapolon Akuj Ekapolon kang tama, kiboikin ne lowae kang lo aloteten tanang ewaakini ngimoe kon kwap ngakejen kon.’ Ani kenyarit Daudi ngesi Ekapolon, ikokini nabo Kiristo eliwor ales a Daudi ai?” Emam itwaan atachaki Yesu akiroit tani apei, akolongit napei ngina, emam itwaan asak akingit Yesu akiroit ache jik. Kisuruor Yesu asepich a ngitunga ka ngirukitos keng. Tolimok tama, “Ngiketatamak a etal ka Ngiparisayo kesi echamakinitae itatamete etal a Musa. Ejoikinit inupete nabo kiwapa ibore daang ni cha kilimokinete kesi esi atamar tosuba. Nakaneni nyiisisata ngakiro na esubete kesi, kainyo nyiwapito kesi ngakiro na itatamete. Ikote kesi ngitunga lu isiwokito luche ngiegosio luapotiok lu nyedakun tarai nyesakete kesi ngikulepek akingarakin kesi akiwok ngiegosio ngulu. Esubete kesi ngakiro daang esakete ngitunga kingolikis. Kingolikisi ngatoron naapolok na igiritae ngakiro a Akuj na enapito kesi aloreetin kech ka nakan! Kingolikisi tani eger lo isanisanitotor kesi kwap ngiworui kech. Eminasi akiboi aniajokon imujere, nabo esakete akiboi alokicholongo aluajokak anakais a Atuk. Esakete kimalae a arimatoi ani egielanareta ngitunga ngiboro nabo esakete kitanyarae, ‘Eketataman’. Nyechamit esi kinyarao: ‘Eketataman’, kainyo iraakasi esi daang ngikaitotoi lu eyei Eketataman epei bon. Nabo nyechamit esi inyaraate itwaan kane anakwap: ‘Apa’, kainyo eyei esi Apakus epei bon lo eyei nadis. Kori nabo nyechamit kinyarao: ‘Ekarikon’, kainyo epei bon Ekarikon kus ngesi Kiristo. Lo epolot noi anikus ejoikinit eliwor ekasuban etich kus. Kainyo itwaan cha daang ni itopolouno, itiditeunio, ani ni itiditeuna, itopolounio. “Oitiakoi! Abe erokearosi nginyas ianyunete esi ngiketatamak a etal ka Ngiparisayo! Esi ngikamodeanak! Igolosi esi ngitunga anapolou a Akuj, nakaneni nyilomete esi dang kori nyingakinete tani lu esakete alomar! [ Abe erokearosi ngakiro na ianyunete esi ngiketatamak a etal ka Ngiparisayo! Esi ngikamodeanak! Idemete esi ngapuseru ngiboro kech, ani erumor, kinisakinos ilipito nikooyen akiding pas. Kotere nguna, eroner eriras kus noi.] “Oitiakoi, Abe etioko nginyas eanyunete ngiketatamak a etal ka Ngiparisayo! Esi ngikamodeanak! Idokete esi nganamea pot anakwap anakalonan kitoro nakwapea nakaalak sodi taanyuneta itwaan ipei ni kiwapi esi. Ani kiwapi itwaan ngini esi, kitiliwosi ngesi nikaronon noi ni elosi nakim na nyedunge kidwang aronis keng tani nakus! “Oitiakoi! Abe etioko nginyas ianyunete esi ngikarikok lu ikwaan ka ngitunga lumuduk! Itatamete esi ibalasi, ‘Ani kikong itwaan akai a Akuj, mam ngakiro. Nakaneni ani kikong ngesi egolit lo eyei kai a Akuj, erono.’ Esi ngikabangabangae lumuduk! Anibore epolot, egolit kori akai a Akuj na italeuni egolit? Nabo itatamete esi ibalasi: ‘Ani kikong itwaan ekeno lo ipeyonokinere Akuj, mam ngakiro. Nakaneni ani kikong itwaan ainakinet na eyei lokeno lo ipeyonokinere Akuj, erono.’ Abe ikote esi ngimuduk dir! Anibore epolot, ainakinet kori ekeno lo ipeyonokinere Akuj lo erai ngesi italeunit ainakinet? Aloger kangolo, ani kikong itwaan ekeno lo ipeyonokinere Akuj, ekong ngesi tani ngainakinet daang na eya nakipeyoet, kori ani kikong itwaan akai a Akuj, ekong ngesi tani Akuj na ibooyi kaneni. Kori ani kikong itwaan Adis, ekong ngesi ekicholong a Apolou a Akuj kangina ibooyi kaneni. “Abe erokearosi noi ngakiro na ianyunete esi ngiketatamak a etal ka Ngiparisayo! Esi ngikamodeanak! Ilemanakinete esi Akuj tani alemikinet apei anatomon a ngikito alu itoboboote akimuj. Nakaneni nyirichakinito esi ngakitatamet naapolok a etal na ikote akitiriyan ngakiro ka akisienut ta ngakiro na iteni. Ejoikinit esi isubete nugu peijamuarito ngache. Oitiakoi! Abe etioko nginyas ianyunete esi! Ngikarikok lu ikote ngitunga lumuduk! Igaalionorete esi eechut anakipi ana imaase, nakaneni kilikete bo ekaal! “Oitiakoi! Abe etioko nginyas ianyunete esi ngiketatamak a etal ka Ngiparisayo! Esi ngikamodeanak! Ikote esi ngikopoi ka ngatubwae na ilasio nikalapatan bon nakaneni ileleba tooma kus ademanu ka aronis. Wae! Eparisayot lo ikoni itwaan nimuduk! Kilota mono ibore ni eyei tooma ekopo, sodi tosegeror nikalapatan dang! “Oitiakoi! Abe etioko nginyas ianyunete esi ngiketatamak a etal ka Ngiparisayo! Esi ngikamodeanak! Ikote esi ngalielin na ipuchitae ekwang, etakanete kesi atamar ejok anikalapatan, nakaneni tooma ileleba ngakoyo a ngikatoak ta ekabose daang. Aloger alopei kangolo, ejoikinito ngawat kus nikalapatan ngitunga, nakaneni ileleba amodeanut ka ngasechesea tooma kus. “Oitiakoi! Abe etioko nginyas ianyunete esi ngiketatamak a etal ka Ngiparisayo! Esi ngikamodeanak! Ibokete esi ngalielin naajokak kotere ngikadwarak a Akuj nabo itisirete esi ngalielin kangulu kolong ebooyete eboyor loajokon, tabaasi nabo: arai kolong atoyakas ngirwa lu kata apakosi pekisubit na asubete kesi ani aareta ngikadwarak a Akuj. Ichamut esi dir atamar iraakasi ngalesea kangulu aarete ngikadwarak a Akuj. Tosuba tanai napei nguna torumosi nakolong esiakinete ta apaakus! Etige esi luaronok lu ikote ngalesea a ngimunio ka ngarewa! Ikokinete esi ibucharosi aloriras alo a anam a akim ai? Kaneni kalimokinit esi atamar ameuni ayong nikus ngikadwarak ka ngikoosok ta ngiketatamak. Iarete esi ngiche kech, iramakinete ngiche napirio, ibungaate ngiche anakais a Atuk kus nabo irimete esi ngirerea iboliatar kesi. Kotere nguna, kirirao esi ani iareta ngitunga lu nyesechito, akisiakin anaaret ka Abel alo peasechit tanang naaret a Sekaria lokookeng a Barakia lokolong iarete esi alokiding Akai a Akuj ka ekeno lo ipeyonokinere Akuj. Kalimokinit ngakiro na iteni dir atamar, irirao ngitunga a ngirwa kalu kotere nguna daang! “Wae! Ngitunga a Yerusalem! Ngitunga a Yerusalem lu iarete ngikadwarak a Akuj nabo kimasa ngimeanara lu ameuni Akuj nikus a ngamoru! Ngiai ngirwa asakea ayong akilogakin ngakan kang lotunga kus daang, loger lo iudanakinea akokoroit ngitak keng tooma ngabeben keng, nakaneni nyechamuna esi asubi ayong kongina! Kemiekinea tokona ayong esi akai kus ibooyi kongin. Kalimokinit esi atamar, napei tokona jik, nyikingolikinete esi ayong nabo tanang akolongit na itamareta: ‘Epiarit Akuj ngolo ebunit a ekiro a Ekapolon.’ ” Torotok Yesu alokai a Akuj, ani eringa elosi, pot ngirukitos keng ni ayei ngesi kidodikis ngesi eger lo edukitere akai a Akuj. Nakaneni tolim tama, “Iteete esi nugu daang, kori ai? Kalimokinit ngakiro na iteni atamar, emam tani amoru apei kane na idongi edukokina, eukorio ngamoru daang.” Na ebooyo Yesu alomoru a ngikito a akimiet, pot ngirukitos keng kingita ngesi anikech make tamasi, “Tolimokinae sua atamar ori esubakinotor nu daang, nabo nyoni esubakin toyenunere atamar anang abongun kon ka esal a akwap.” Tatachak Yesu tama, “Tochoikinos! Kuriasi itwaan nyikingal esi! Epote ngikaalak iruorosi a ekiro kang ebalasi, ‘Ayong arai Kiristo.’ Ingalaate kesi ngitunga lukaalak. Iirarete esi echale a ejie alodiye, nabo iirarete ngakiro a ejie anikalonan. Nakaneni kuriasi nyikibul, kainyo esubakinosi ngakiro na ikote nguna, nakaneni nyidodiunito kesi atamar anang esal. Ejikinosi ngitunga a akwap aapei kalu anache, ngitunga a ekapolon a epei eremete ngitunga a ekapolon aloche. Emini eron a akoro ka amaran a akwap lowaitin ngigelagelae. Eliwor ngakiro nguna akisiakinet a aboliaro loger a ariaba ana ekingaren ana edolio ikoku akidouno. “Dio kirumun esi kitoboliare sodi kitaar. Kiremokinosi esi ngitunga a ngakwapea kadaang kotere ayong. Epalikinete ngikaalak anupit Akuj ngirwa ngulu. Elimonorosi ngitunga make sodi toremonokinos make. Nabo epote ngikadwarak lukaalak lukaliokok kingalata ngitunga lukaalak. Kona ekeikinotor naaronok akwap daang, elilimiyorete lukaalak tapalikis amina. Nakaneni ngini enaikini tanang losal, eyuunio. Ngakiro Naajokak a Apolou a Akuj nu itatamio anakwapea kadaang toyeneta ngitunga daang, ani erumor tanang esal. “Ingolikinete ‘Ekenyasunan Loaronon noi’ ewei ani italeunitoe, loger lokolong alimunitor ekadwaran a Akuj Daniel. (Toyen ekesoman atamar nyo eger a ngakiro kanu!) Ejoikinit lu eyakasi nakwap a Yudea ematarosi lomoru. Itwaan ni edokit kidiama akai keng nyeetiyaun alemar ibore ni eyei kai. Itwaan ni eyei mana nyejoikinit ebongori alemun eworu keng. Erokearosi noi ngakiro ngirwa ngulu ani a ngaberu ana epotiete ka na itanakete. Kilipa Akuj nyimatarosi ngirwa lu akiporo kori akolongit na a Sabato. Kainyo erokearosi noi ngichan ngirwa ngulu kidwanga daang lu apean nakwap napei kolong anakisiakinet tanang tokona. Kori nyepete nabo jik ngichan lu ikote ngulu. Nakaneni atub kolong Akuj ngirwa ngulu. Arai kolong nyiikok neni, kemam itwaan epuun. Nakaneni kotere ngitunga keng luseuna, atub kolong Akuj ngirwa ngulu. “Ani kilimok esi itwaan tama, ‘Kingolikisi a! Kiristo lo!’ kori tama: ‘Nye ye’, nyiinupa ngakiro keng. Kainyo epote ta Kiristo lukaliokok ka ngikadwarak lukaliokok. Esubete kesi ngakitoodikinet nakailiilok ka nakatalarak esakete akingalare tani ngitunga luseuna a Akuj, erai kepedorete akingalare. Kiirasi! Kalimok ayong esi nu eringa ngirwa ngulu nyenanga. “Kori ani kilimokis esi ngitunga tamasi: ‘Ayoro, eyei ngesi ama nariet’, nyiilot inaa, kori ani ketamasi: ‘Ayoro, edukit kane.’ Kuriasi nyiinupa! Kainyo ikoni abunere a Lokookeng a Itwaan eger lo imiliaunea napei alo kide tanang too. “Nicha eyei ibore nikatoan, ngesi ni iudakina ngataruk. “Atipei na edaunotor ngichan a ngirwa kangulu, eribokini akolong, tojongo elap akicha. Echakunosi ngikanyer anadis, nabo emaranikini agogongu daang nakaninikan eyei kidiama. Nakaneni etakanuni akitoodikinet a Lokookeng a Itwaan anadis. Ikalounete ngibukui daang anakwapea na ingolikineta Lokookeng a Itwaan etiyaun eyei lodowon a adis, etiyaun ngesi a agogongu ka apolou naapolon noi. Ekutakinio aburuch sodi tomea ngesi ngimalaikae keng lowaitin daang a akwap sodi tochunut ngitunga luseuna a Akuj alowae a epei a akwap tanang lowae loche. “Kimiekisi ngakiro a emeyen kitatama esi. Na epuseakuuneta ngaten keng tokilikiluut sodi kiniapasi ngakui, iyenunete atamar aapuu akamu. Aloger alopei kangolo, na ingolikineta esi ngakiro nu daang toyena atamar aapiki ngesi adolun. Kalimokinit ngakiro na iteni dir atamar esubakinosi ngakiro nu daang eringa epewae a ngitunga alu tokona eyarete nyetoaka. Edaun adis ka akwap, nakaneni nyedaunosi ngakiro kang jik. “Nakaneni emam itwaan eyeni akolongit ngina kori esaa atamar enangi ori, nyeyenete tani ngimalaikae anadis kori nyeyeni Lokookeng a Akuj. Apa bon ngesi eyeni. Ikwaanikin abunere a Lokookeng a Itwaan ka ngirwa lu kolong a Noa. Kolong eringa nyenanga ngirwa lu aburuchiareta ngakipi akwap, emujete ngitunga, tamaase. Eutanarete ngikiliok nabo epotonorio ngapesur kuutae tanang akolongit na alomarea Noa tooma natubwa. Nyeyenuna kesi jik na asubasi tanang epote ngakipi tomunyasi kesi daang. Ikokinete ngakiro neni na ebunio Lokookeng a Itwaan. Esaa ngolo, esubete ngitunga ngiarei etich alomana. Elemario ipei kimiekinae niche. Eriamunio ngaberu ngaarei iriete, elemario apei, kimiekinae nache. “Kiboikinos robo irichuna kainyo nyiyenete esi akolongit na ebunio Ekapolon kus. Nakaneni kalimokinit ngakiro na iteni atamar arai toyeni elope a awi akwaar na ebunio ekokolan, kekieny ngesi kiteu ekokolan nyeelom nawi keng. Kotere nguna, ejoikinit tani esi dang iboikinosi isubakina eriyan, kainyo ebuni Lokookeng a Itwaan esaa lo nyitamitotor esi atamar ebuni ngesi. “Ngae tokona erai ekasuban etich lokooson lo emunoi? Ngesi ngolo alimoki ekapolon keng atamar topolok ngikasubak etich luche, nanak kesi akimuj na enangea esaa. Elakar noi ekasuban etich ngolo na ebongunio ekapolon nawi toriam ngesi iwapit nguna! Kalimokinit ngakiro na iteni dir atamar, elimokini ekapolon ngolo ekasuban etich ngolo atamar topolok ebari keng daang. Nakaneni ani kerai ngesi ekasuban etich loaronon, etamari ngesi kori nyebonguni ekapolon keng atipei. Elomakini ngesi akibungare ngikasubak etich luche, nabo kimuja ngesi ka akimat aapei kalu ilewat. Ebonguni ekapolon a ekasuban etich kangolo akolongit ache a esaa alo nyeyenea ngesi atamar ebuni. Iteli ekapolon ngolo ngesi tapak ngaarei, kikwaanikinos ngesi ka ngikamodeanak. Min ngesi ni igoror sodi tokirich ngikel. “Akolongit ngina, ikokini Apolou a Akuj ne. Ayakasi kolong ngapesur ngatomon na alemunete ngataae kech, toloto akisiriamiar ekeutan. Abangaaka ngakan, toosok nache nakan. Tolemasi nakan nabaang ngataae kech nakaneni emam akimiet apot totinga. Totinga nakoosok ngataae kech ka ngiboro lu eleleba akimiet. Totinenik ekeutan abunere, kisiakis ngapesur akilura, tojotooros. “Nakaneni ani enangi kiding akwaar, tochalu echale ebala: ‘Ekeutan lo! Potu kisiriama!’ Tonyout ngapesur natomon nguna tosubanakis ngataae kech. Sodi tolimokis nabaang nakoosok tamasi: ‘Nakinae sua akimiet nakus epewae kainyo ekot ngataae kosi adungere.’ Tatachut nakoosok tamasi, ‘Mam jik! Mam na itemokino esi ka sua. Kapesi lodukan togielut nakus.’ Toloto ngapesur nabaang akigiel akimiet. Ani arotokinet kech, todolu ekeutan. Ngapesur nakan na edarito esubakina eriyan, tolomasi ka ngesi kai na eutare sodi togoloi ekidor. “Ani ekisidi, todolut ngapesur nache tanyaras ebaasi, ‘Ekapolon! Ekapolon! Tangaarae sua atolomutu’. Tatachak ekile lo euta tama: ‘Iteni dir, nyakayeni ayong esi jik.’ ” Sodi torumo Yesu ebala, “Kiboikinos robo irichuna, kainyo nyiyenete akolongit kori esaa. “Akolongit ngina ikokini Apolou a Akuj ne. Ayei kolong itwaan ipei ni anyouni alosit. Tanyara ngesi ngikasubak etich keng tolimok atamar toweikis ebari keng. Tokorak ngesi ipei kech daang itemit ka aosou keng. Tokorak epei ngaropiyae ngabunge ngakan, loche ngabunge ngaarei, ta loche abunget apei. Ani erumor, tonyou ngesi tolot. Tolot ekasuban etich lo ainakinitae ngaropiyae ngabunge ngakan tosubea ngaropiyae keng emuchuruseenu taanyu nabo ngaropiyae ngabunge ngakan ngache. Konginapei, ekasuban etich lo ainakinitae ngaropiyae ngabunge ngaarei, toriam nabo ngaropiyae ngabunge ngaarei. Nakaneni tolot ekasuban etich lo ainakinitae ngaropiyae abunget apei, tobokak akipany nalup, sodi kiwaa ngaropiyae a ekapolon keng. “Adaunet a ngirwa alukaalak, tobong ekapolon a ngikasubak etich kangulu sodi tolomak akimar ngaropiyae ka kesi aapei. Bu ekasuban etich lo ainakinitae ngaropiyae ngabunge ngakan kipoto ngaropiyae ngabunge ngakan nache. Tolim tama: ‘Ekapolon, kiinakini iyong ayong ngaropiyae ngabunge ngakan. Kingolik a! Ariam ayong ngaropiyae ngache ngabunge ngakan nyenu.’ Tolim ekapolon keng tama, ‘Ejok noi ekasuban etich lo kimunoi. Kona iliworor iyong lo kimunoi kitalala ibore niichi, kewaakini iyong topolok nikaalan. Bua atalakaros ka ayong aapei’. Bu ekasuban etich lo ainakinitae ngaropiyae ngabunge ngaarei tama, ‘Ekapolon, kiinakini iyong ayong ngaropiyae ngabunge ngaarei. Kingolik a! Ariam ayong ngaropiyae ngabunge ngaarei ngache nyenu.’ Tolim ekapolon keng tama: ‘Ejok noi ekasuban etich loajokon nabo lo kimunoi. Iliwor iyong lo kimunoi italala ibore niichi, kewaakini iyong topolok nikaalan. Bua atalakaros ka ayong aapei.’ Sodi bu ekasuban etich lo ainakinitae ngaropiyae abunget apei tama: ‘Ekapolon, ayeni ayong atamar irai iyong itwaan nikaadengan. Ilemi iyong ngalemet ani nyitakinit iyong, nabo ichuni ngimomwa ani nyitakina iyong ngikinyam. Aemi ayong, sodi atolot ewaa ngaropiyae kon analup. Kingolik a! Nakon kesi nu.’ Tolim ekapolon keng tama, ‘Irai iyong ekasuban etich loaronon lokalany! Iyeni iyong atamar alemi ayong ani nyitakina nabo achuni ngimomwa ani nyialakina ngikinyam a? Ani kikote neni a, nyo peiwaakinea iyong ngaropiyae kang nabengki ani abonguni ayong atoriam kiatakin? Tokona a, tolemasi ngaropiyae anikeng sodi nakis ngolo eya ngaropiyae ngabunge ngatomon. Kainyo itwaan daang ni eyei ibore, einakinio ni elal ni idwangi ibore ni esakit ngesi. Nakaneni itwaan ni emam ibore eyei, edemario tani nidiochichi ni etingi. Ani eliwor ekasuban etich lo erai pas lo, tochakasi ngesi nikalapatan naribu, kigor kaina tokirich ngikel.’ “Naebunio Lokookeng a Itwaan erai Ekapolon kirukut ka ngimalaikae daang, iboikin ngesi lokicholong keng a Apolou. Echununosi ngitunga a ngakwapea kadaang ngaren keng. Sodi totiak ngesi kesi ngatiaket ngaarei loger lo etiakea ekeyokon ngamesekin ka ngakinei. Isibaki ngamesekin aloteten sodi kisibak ngakinei alokedieny keng. Sodi tolimok Ekapolon ngitunga lu eya teten keng tama, ‘Potu esi lukipiarit Apakang! Potu Napolou na itegeliaritae kotere esi napei kolong anasubakinet a akwap. Kainyo kanyamit ayong akoro, sodi kisimuja esi ayong. Kanyamit akure, kitamat esi ayong. Arai epeyonon, kitepeyon esi anawiyei kus. Amam ibore anapit kitanap esi ayong ngiworui. Adeaka ayong sodi kitochoikis esi ayong, nabo ayei lojela pot esi aanyun ayong.’ “Sodi etachakinete lu etenoono eboyor ngesi tamasi, ‘Ori Ekapolon kiteo sua iyong kinyamit akoro esumuja, kori kinyamit akure ainakisi ngakipi? Ori kiriamunea sua iyong irai epeyonon etepeyono anawiyei kosi, kori emam ibore inapit etanapa ngiworui? Ori kingolikinea sua iyong ideaka kori kienitae alojela apotu aanyun?’ Etachuni Ekapolon tama, ‘Kalimokinit ngakiro na iteni atamar na isubeta esi nugu epei a ngikaitotoi kang a luuchik kalu, kisubeta esi ayong!’ Sodi elimokini lu alokedieny keng tama: ‘Kapesi anikang, esi lu kilamit Akuj. Kapesi nakim na nyedunge na esubakinitae kotere Ekipe ka ngimalaikae keng! Kanyamit ayong akoro, nakaneni nyisimuja esi ayong. Kanyamit akure nabo nyitamata esi ayong. Arai ayong epeyonon nakaneni nyitepeyono esi ayong anawiyei kus, nabo amam ibore anapit nakaneni nyitanapa esi ayong ngiworui. Adeaka nabo kaenitae alojela, nakaneni nyechoikina esi ayong.’ Etachakinete ngesi tamasi, ‘Ori Ekapolon kiteo sua iyong kinyamit akoro kori kinyamit akure kori irai epeyonon kori emam ibore inapit kori ideaka kori kienitae alojela, nakaneni atowoutu sua akingarakin iyong?’ Etachakini Ekapolon kesi tama, ‘Kalimokinit ngakiro na iteni atamar, na iwouneta esi akingarakin epei a ngikaitotoi kang a luuchik kalu, iwounito akingarakin ayong.’ Eyaario ngulu loriras lokajik. Nakaneni eloose lu etenoono eboyor nakiyar nakajik.” Na arumorea Yesu akitatam ngakiro nugu daang, tolimok ngirukitos keng tama, “Iyenete esi atamar edong ngirwa ngiarei tanang akolongit na esukukuu alo enyaritae Adeparet, sodi torikoe Lokookeng a Itwaan taramakinae napir.” Sodi apot ngimurok luapolok a akai a Akuj ka ngikasukou a Atuk kiriamariama aapei kai a Emuron a Loapolon enyaritae Kayapa, totuko eger lo irumuneta Yesu peeyenio sodi taareta. Tamasi kesi, “Nyejoikinit kirumuni ngesi ngirwa lu esukukuu kainyo elomakinete ngitunga ekurikur.” Ayei Yesu Betania kai a Simon, a itwaan ani adeaka sek enomokere. Ani eringa Yesu imuji, bu aberu nikeng etingit echupa lokooyen enyaritae alabasita lo ileleba akimiet nakaakunyon na egielio a ngaropiyae anakaalak noi, dio tobukok akimiet nakou a Yesu. Nakaneni tongoa ngirukitos keng na engolikineta nguna. Kingitas ebaasi, “Nyo inyasunitere akimiet nakaakunyon naga kona? Adikino akimiet na peegielario a ngaropiyae anakaalak sodi nakinae ngikebootok ngaropiyae a?” Kona ayenea Yesu na eruorosi kesi, kingit kesi tama, “Nyo ichaneta esi aberu na? Kasubakinea ngesi ayong etich loajokon noi. Irukito esi ka ngikebootok jiik, nakaneni nyikiruki ayong ka esi jiik. Abukokini ngesi akimiet nakaakunyon nakwaan kang sodi katonukere ayong. Kalimokinit esi ngakiro na iteni atamar, wadaang ni cha itatamere Ngakiro Naajokak a Akuj anakwapea, elimorio aberu na kotere ngakiro na asub ngesi nu.” Tolot Yuda Isikariote lo erai epei a ngirukitos alutomon ka ngiarei lomurok luapolok a akai a Akuj, kingit kesi tama, “Kiinakinete esi ayong nyo karikok ayong esi Yesu?” Kimarut kesi ngaropiyae ngatomwon-uni sodi nakis ngesi. Akolongit ngina tasak Yuda jik erot lo erikokinea kesi Yesu. Akolongit na ingareni akolongit na esukukuu a Ngamugati Anapadok, pot ngirukitos a Yesu kingita ngesi tamasi, “Aliwae isaki iyong sua atoloto atosubakineta akimuj a esukukuu a Adeparet?” Tatachak kesi tama, “Kapesi nitwaan idio a ere, tolimokis ngesi tamasi, ‘Ebala Eketataman anang esaa lokimuja ngesi ka ngirukitos keng akimuj a esukukuu a Adeparet alokai kon.’ ” Tosuba ngirukitos loger lo alimokinitor Yesu, tosubakis akimuj a esukukuu a Adeparet. Na anangea ebong, kiboikinos Yesu ka ngirukitos lutomon ka ngiarei kimuja. Ani eringa imujete, tolim Yesu tama, “Kalimokinit esi ngakiro na iteni atamar, karikokini epei kus ayong ngitunga.” Apot ngakiro nguna tonoma ngirukitos keng na eirareta tolomakis akingitanar ngesi a ngapeipei ebalasi, “Ekapolon! Kori erai robo ayong?” Tatachak Yesu kesi tama, “Lo ilumokinit amugati tooma natubwa ka ayong aapei ngesi karikokini ayong ngitunga. Etoani Lokookeng a Itwaan loger lo igiritere nagiran, nakaneni etioko nginyas lu eriamuni itwaan ni erikokini Lokookeng a Itwaan ngitunga! Kejoikinit kolong itwaan ngini peidounitoe!” Sodi abu Yuda lokarikokinan Yesu ngitunga tolim tama, “Eketataman, kori robo ayong?” Tatachak Yesu ngesi tama, “Ilim iyong.” Ani eringa imujete, tolem Yesu amugati kilip ebuakinit Akuj alakara, sodi tonyilinyili, nak ngirukitos keng tama, “Totinga tanyama, akwaan kang ngesi na.” Sodi tolem ngesi ekopo, kilip ebuakinit Akuj alakara, nak kesi. Tolim tama, “Tamata esi daang. Ngaakot kang nu na iyookinete achamunet a Akuj, eraakasi kesi ebukorosi kotere arimakino a ngasechesea a ngitunga alukaalak. Kalimokinit esi ngakiro na iteni atamar, nyamasi nabo jik emuna lo epuritoe lo tanang akolongit ngina amasea emuna lo epuritoe lokitetet ka esi aapei Anapolou ka Apakang.” Sodi toeokis eos ani erumor, torotokis toloto moru lo a ngikito a akimiet. Tolimok Yesu kesi tama, “Nakwaare a akolongit kana, kikadakinete esi daang ngakiro kang, kitoisikis ayong bon, kainyo igiritae nagiran kona, ‘Eari Akuj ekeyokon, sodi topetar esipanit a ngamesekin.’ Nakaneni naketeyarunea Akuj ayong, kengarenikini ayong esi atolot Galilaya.” Tolimok Petero Yesu tama, “Nyekaisikini ayong iyong jik, tani kiisikis luche daang!” Tolimok Yesu Petero tama, “Kalimokinit ngakiro na iteni atamar, takae nakwaare, eringa ekokoroit nyerukino, ilimuni iyong ngalimunet ngauni atamar nyikiyeni ayong.” Tatachak Petero tama, “Nyalimuni ayong atamar nyakayeni iyong jik, tani ketamar kaario ayong ka iyong aapei!” Apot ngirukitos luche daang tolimut ngakiro napei nguna. Apot Yesu ka ngirukitos keng toloto ni anyaritae Getisemane, tolimok kesi tama, “Kiboikinos esi nege atolot ayong ama elip.” Toriko ngesi Petero ka talokookeng a Sebedayo luarei. Toriaba ngakiro etau keng nabo kisialolongo noi. Sodi tolimok kesi tama, “Kanomito ayong ngakiro nu etau edikino tani kaarete! Kiboikinos nege atokienya ka ayong aapei.” Torotok ngesi ngaren wadio, tadakakin kwap kijuuru, sodi kilip tama, “Apa, ani kepedor, tolema kare ekopo lo aboliaro lo anikang, nakaneni meere loger lo asaki ayong, pearai lo isaki iyong.” Sodi tobongu toriam ngirukitos luuni ejotoote, kingit Yesu Petero tama, “Nyo peikienyeta esi luuni ka ayong tani a esaa a epei bon? Tokienya, kilipa sodi nyianyunosi ka akiningo. Echamit etau nakaneni nyechamit akwaan.” Tolot Yesu nabo inaa kilip ebala, “Apa, ani pekelemar ekopo lo anikang, tosubakin na ichamit iyong.” Tobongu Yesu nabo toriam ngirukitos ejotoote. Apot kesi tokuruwo akikieny. Toisik Yesu kesi nabo, tolot kilip na a ngauni, elimuununi ngakiro napei nguna. Sodi tobongu lorukitos keng kingit tama, “Eringa esi natete ijotoote iangarito a? Kingolikisi a! Anang esaa lo erikorere tokona Lokookeng a Itwaan napolou a ngikasechak. Tonyoutu atoloto. Kingolikisi a! Lokarikokini ayong ngitunga ngesi lo adolu.” Ani eringa Yesu iruoro, todol Yuda lo erai epei a ngirukitos alutomon ka ngiarei. Arukito ngesi ka ajore a ngitunga alu atingito ngilengea ka ngiseboe. Ameunito kesi ngimurok luapolok a akai a Akuj ka ngikasukou a Atuk. Alimokinit lo arikokinit ngesi ngitunga ebala, “Itwaan ngini emalae ayong atonuak, ngesi ngolo, kirumutu ngesi!” Kidira Yuda jik nia Yesu tolim tama, “Eketataman, min ekisil nikon, dio tonuak ngesi.” Tatachak Yesu tama, “Kiburuburak mono iyong nguna ekone!” Pot kesi kirumut Yesu totinga lokojokon. Tout epei kangulu arukito ka Yesu ekileng totubo akit a ekedalan a Emuron a Loapolon a akai a Akuj. Tolimok Yesu ngesi tama, “Kirepak ekileng kon nakiroru, kainyo daang lu elemunete ekileng etoanikinete lokileng. Nyiyeni iyong atamar apedori ayong alimokin Apakang atamar kingarakinae sodi tomeu ngesi atipei ngajoresio a ngimalaikae ngatomon ka ngaarei a? Ani kikokis neni, ikokinete ngagiran iyookin na ebalasi, ejoikinit nu esubakin ai?” Tolimok Yesu ajore ngina tama, “Nyo tokona iponitotor esi itingito ngilengea ta ngiseboe akirumun ayong ikwa ibore esibit arai ayong erukoot? Ngirwa daang eboyeene ayong alokai a Akuj etatami nakaneni nyirumuna esi ayong. Nakaneni asubakin nugu daang kiyookinotor na egirete ngikadwarak a Akuj nagiran.” Sodi tamataros ngirukitos daang toisikis ngesi. Apot ngitunga lu erumunete Yesu torikosi ngesi kai a Kayapa alo arai Emuron Loapolon a akai a Akuj. Achunakina ngiketatamak a etal ka ngikasukou a Atuk neni. Kiwap Petero Yesu echadakina tanang nalaar a akai a Emuron a Loapolon a akai a Akuj. Toloma ngesi tooma nalaar kiboikinos ka ngasigerea, idarunit na esubakinosi. Toripa ngimurok luapolok a akai a Akuj ka ngikasukou a Atuk daang ngakiro na alioko na itinganakinete Yesu, sodi taareta ngesi. Nakaneni emam na aanyut kesi, tarai bo anyounete lukaalak kisudioto ngesi ngakiro. Ekisidi tonyout ngitunga ngiarei tamasi, “Abala itwaan en, apedori akibwang akai a Akuj atodukok nabo a ngirwa nguuni atorumo.” Tonyou Emuron Loapolon a akai a Akuj kingit Yesu tama, “Eya ngakiro isaki iyong atachun alotitas alo kititakinitere iyong kalo a?” Nakaneni kililing Yesu chek. Kisuruorik nabo Emuron Loapolon a akai a Akuj ngesi tama, “Kotere ekiro a Akuj ana eyari, kesikongi ayong iyong, tolimokinae sua kirai iyong Kiristo, Lokookeng a Akuj.” Tatachak Yesu ngesi tama, “Kesi nguna ilimu iyong. Nakaneni kalimokinit ayong esi daang atamar, napei tokona jik, ingolikinete esi Lokookeng a Itwaan ibooyi alowae alo aloteten a Akuj Anaapolon Noi, nabo ebuni alotooma ngidowon a Adis.” Na eirarea Emuron Loapolon a akai a Akuj ngakiro nu, tochilichili ngiworui keng tama, “Kiirasi ngimeny keng! Nyeringa nabo kisaki ngikaanyunak ngiche! Iirasi tokona esi ngimeny keng. Ibalasi tokona esi ai?” Tatachut tamasi, “Esechit ngesi, ejoikinit eario.” Sodi kimaanakis ngakimul loreet keng, nabo kideta ngesi. Kingita lu ebapanarete ngesi tamasi, “Todwar chene Kiristo! Tolimokinae sua itwaan ni kirami iyong!” Na ebooyo Petero alotooma alaar, kitoru apese neni na arai akasuban etich a Emuron a Loapolon a akai a Akuj, tolimok ngesi tama, “Irukito iyong dang ka Yesu lo a Galilaya?” Nakaneni topeg ngesi alongaren kech kadaang. Tatachak tama, “Nyayeni ayong ngakiro na iruoro iyong.” Tolot ngesi lokidor a alaar. Kingolik nabo apese ache nakasuban etich ngesi sodi tolimok ngitunga luka neni tama, “Awaasi ngesi ka Yesu lo a Nasaret.” Topeg nabo Petero tama, “Ekong jik, nyayeni ayong itwaan ngini!” Adaunet a esaa alodiochichi, pot ngitunga lu awaasi kaneni nia Petero tamasi, “Irai iyong dang epei kech dir, kainyo idodiunit tani ekiruor kon.” Sodi tama Petero, “Ekong jik kataar ibore, eruoro ayong ngakiro na iteni! Nyayeni ayong itwaan ngini.” Toruk ekokoroit esaa lopei ngolo. Dio kitam Petero ngakiro nasek alimokinit ngesi Yesu Abala: “Ani eringa ekokoroit nyerukino, ilimuni iyong ngalimunet ngauni atamar nyikiyeni ayong.” Topudo ngesi nikalapatan, kikalou lokojokon. Nataparach elilim, apot ngimurok luapolok a akai a Akuj daang ka ngikasukou a Atuk totuko eger lo eareta Yesu. Toena ngesi a ngiriko, sodi torikosi nia Pilato alo arai ekapolon a Ngiroma. Na ayenea Yuda lo arikokini Yesu ngitunga atamar erirae Yesu, abu tokii kotere akisech keng sodi tobua ngaropiyae natomwon-uni lomurok luapolok a akai a Akuj ka ngikasukou a Atuk. Tolim ngesi tama, “Asech ayong ani arikokinea itwaan ni nyesechit ngitunga taarae.” Tatachut kesi tamasi, “Eraakasi nguna ngaka akiding kon, emam sua itwaan ekachit nguna!” Kimasak Yuda ngaropiyae kwap tooma akai a Akuj, dio arotokin tolot tomied. Tolemut ngimurok luapolok a akai a Akuj ngaropiyae nguna tamasi, “Eraakasi nu ngaropiyae a ngaakot, nakaneni nyechamakinitae alotal yok ebuakinio kai a Akuj.” Tachamakin kesi atamar kigielea ngaropiyae nguna Amana a Ekayen Ngamoti, sodi tomuranakinae ngitunga lu nyerai ngikulepek a akwap kangina. Ngakiro nguna ngesi enyaritere amana ngina: “Amana a ngaakot” tani tokona. Nakaneni kiyookin na alimuni ekadwaran Yeremia ebala, “Tolemasi kesi ngaropiyae natomwon-uni (ekimar lo achamunito Ngisirael atachakin ngesi), togieleta amana a ekayen ngamoti, loger lo kadungokinitor Ekapolon ayong.” Towo Yesu alongaren ekapolon a Ngiroma lo engitanari ngesi ebala, “Iyong irai ekapolon a Ngiyaudi a?” Tatachak Yesu tama, “Ee, nyenguna ilimu iyong.” Nakaneni nyetachea Yesu ngakiro na etitaata ngesi ngimurok luapolok a akai a Akuj ka ngikasukou a Atuk. Sodi kingit Pilato ngesi tama, “Nyipupi iyong ngakiro nakititaare iyong nu a?” Nakaneni towou Yesu atachun tani akiroit apei, sodi tatalasi ekapolon a Ngiroma ngakiro nguna noi. Akolongit daang na esukukuu a Adeparet, alachanakini ekapolon a Ngiroma itwaan ipei alojela ni alimunete ngitunga atamar talachakinae. Ngirwa ngulu, ayei itwaan niaronon niyanat ni aenitae alojela, anyaritae ekiro keng Yesu Baraba. Na achunakinor asepich a ngitunga kingit Pilato kesi tama, “Ngae isakete esi atalachak, Yesu Baraba kori Yesu lo enyaritae Kiristo?” Ayeni ngesi dir atamar arikunito kesi Yesu nikeng ani erakaritor kesi etereku kotere Yesu Kiristo. Na ebooyo Pilato alokai keng ana eriras, tomeu aberu keng itwaan tama, “Kimiek itwaan ngini nyesechit, kainyo erujae ayong been nakwaare atoriab noi kotere ngesi.” Apot Ngimurok Luapolok a akai a Akuj ka ngikasukou a Atuk kitutuko asepich a ngitunga tolimokis Pilato atamar talachakinae Baraba sodi taarae Yesu. Nakaneni kingit ekapolon a Ngiroma kesi tama, “Ngae aluarei kalu isakete esi atalachak ayong?” Tatachut tamasi, “Baraba!” Kingit Pilato kesi tama, “Tokona, ekokini ayong Yesu lo enyaritae Kiristo ai?” Tatachut daang tamasi, “Taramakisi ngesi napir!” Nakaneni kingit Pilato tama, “Nyo niaronon esubit ngesi?” Sodi tochalut kesi noi kiremasi tamasi, “Taramakisi ngesi napir!” Na engolikinea Pilato atamar nyejoikinit nabo eruoro ani edikino ngitunga elomakineta ekurikur, abu tolem ngakipi kilotarea ngakan keng alongaren ajore ebala, “Nyakapaikinio ayong akitu a itwaan ka en! Esi isubakis nu!” Tatachu asepich a ngitunga tama, “Kimiek eriras a akitu keng toliwor ekosi ka ngide kosi!” Sodi talachak Pilato Baraba, dio alimun atamar kidetae Yesu a ngamunyororoi, ani erumor, kipotoroe taramakinere napir. Torikosi ngasigerea a Pilato Yesu tanang kai a ekapolon a Ngiroma, tochunun asepich a ngitunga daang kiriam ngesi. Tobutosi ngiworui keng sodi kitanapa ngesi eworu loarengan puu. Kidanyakis apukot a ngiikwa kitanapa ngesi anakou, sodi kipeakis aburo nakan keng na aloteten, ani erumor toriediko alongaren keng tokienatar ngesi ebaasi, “Kimiekisi Ekapolon a Ngiyaudi kipuruunoe!” Kimaakis ngesi ngakimul, tolemut aburo tarama ngesi nakou. Na arumoreta akianar ngesi, talachasi eworu ngolo sodi kitanapa ngesi ngiworui lukeng. Dio torikosi ngesi nikalapatan aramakin napir. Ani eringa kesi eloose, kiriamunos ka itwaan ni abuni alo Kurene ni enyaritae ekiro keng Simon, sodi kitingakis ngasigerea ngesi akiwok apir a Yesu. Tanangut ni enyaritae Gologota, eger keng atamar, “Nia Akulului a Akou.” Nakis kesi Yesu kaneni emuna lo epuritoe lo imorikina ka apid. Nakaneni na eirea ngesi, towou akimat. Taramakis ngesi napir, dio tokora ngiworui keng emoriate tobolos. Ani erumorosi nguna, kiboikinos kesi neni kiteto ngesi. Egiritae ngakiro na etitakinitere ngesi tatapakinae kidiama akou keng igiritae kona: “Yesu ngesi lo, ekapolon a Ngiyaudi.” Sodi taramakis ngirukooi ngiarei ka ngesi napirio, epei lowae lo aloteten keng, epei lowae lo alokedieny keng. Kimungumunga lu etorununete neni ngakies kech, iyenyete Yesu ebaasi, “Ibala ngoon iyong ibwangi akai a Akuj sodi todukok nabo ache a ngirwa a nguuni! Toyuun chene kirai iyong Lokookeng a Akuj! Totiyaun tokona anapir!” Tokienatar ngimurok luapolok a akai a Akuj ka ngiketatamak a etal ta ngikasukou a Atuk, apot tokienatar Yesu loger lopei ngolo ebalasi, “Ayuuni ngoon luche, nakaneni nyeyuun ngesi elope! Nyerai ngesi ekapolon a Ngisirael a? Ani ketiyaun ngesi anapir tokona, kinupi ngoni ngakiro keng. Enupit ngesi Akuj, nabo ebala arai ngesi Lokookeng a Akuj. Ataanyutu chene kesaki Akuj ayuun ngesi tokona!” Tani ngirukooi lu aramakinio ka Yesu napirio, kiyenya ngesi loger ngolo. Na anangea naparan lotingilan, toribok akwap daang chuch tanang adaunet a ngisaae a nguuni. Na anangea ngisaae ngikan-koomwon, kikalou Yesu kirema tama, “Eloi, Eloi, lema sabakisani.” Eger keng atamar, “Akuj kang, Akuj kang, nyo kiisikinea?” Kiirasi ngitunga ngiche lu awaasi kaneni tamasi, “Enyarit ngesi Elija!” Tamatar ipei kech tolem ibore niyebuk kirepak tooma lomuna loadwaran lo epuritoe todupak ngaren akitoe, sodi tasak atamar tamat ngesi. Nakaneni tamasi luche, “Ataanyutu chene kebuni Elija ayuun ngesi!” Kirema Yesu kirurumak totoan. Toberes awaru nakooyen na eneno alokai a Akuj ngaarei napei alokidiama tanang kwap. Tamaranik akwap sodi tapakas ngatabab. Tangaar ngalielin kiteyarunae ngitunga a Akuj lukaalak lu atoakito. Torotokis kesi analielin, ani na ayarunea Yesu anakitu, toloto ngitunga ngulu Lore Lo italeunitoe, kingolikis ngitunga lukaalak kesi kaneni. Na anyungareta ekarikon a ngasigerea ka ngasigerea na arukito ka ngesi iyokiyete Yesu eger lo amaranikinea akwap, ka ngakiro nache daang asubasi, tobul kesi noi tamasi, “Kerai itwaan en Lokookeng a Akuj dir!” Eteete ngaberu nakaalak na achadakina kaneni Yesu. Ewapuunete kesi Yesu alo Galilaya ingaranakinete ngesi. Araakasi kesi Mariam Magadalene, ka Mariam itiokeng a Yakobo ka Yosep ta itiokech a ngide a Sebedayo. Na anangea ebong, todol itwaan nikabaran a akwap a Arimatea enyaritae ekiro keng Yosep, arai ngesi dang erukitos a Yesu. Tolot ngesi nia Pilato dio atamar asaki akwaan a Yesu. Todung Pilato atamar nakinae Yosep akwaan a Yesu. Sodi tolema Yosep akwaan a Yesu, toenik loworu lodapal lokitetet loajokon. Kitoperik tooma naliel nakeng a elope, na aringa ngesi ebokakini nataaba. Sodi kikokorik amoru naapolon nakituk a aliel, torotok ngesi. Ebooyete Mariam Magadalene ka Mariam nache kaneni, iteete aliel. Na ewalarea akolongit nache, na erai Sabato kiriama ngimurok luapolok a akai a Akuj ka Ngiparisayo ta Pilato tamasi, “Ekapolon, kitamunit atamar ngoon eringa ekaliokon ngolo eyari, eruoro ebala keteyarunio ngesi ekisidi a ngirwa a nguuni. Todung iyong atamar kiyokoi aliel keng lokojokon tanang akolongit na a ngauni, sodi nyepedoreta ngirukitos keng alosit akokoyar akwaan keng, ani erumor tolimokis ngitunga atamar eteyarun ngesi. Eroner alioko na esal idwangi tani na ekingaren.” Tolimok Pilato kesi tama, “Torikosi ngasigerea kiteto aliel lokojokon.” Sodi torotokis kesi togolo aliel kimuleleasi, kimiekis ngasigerea iteete. Adaunet a Sabato, akiwalaret a akolongit ana a Jumapili, apot Mariam Magadalene ka Mariam nache toloto akingolikin aliel. Tamaranik akwap atipei bu emalaikat a Ekapolon anadis kikokoriyo amoru lokwaas sodi kiboikin kidiama keng. Akwang ngesi ekoni akimileaunet, nabo ngiworui keng akwangak kea. Tobul ngitunga lu eyokiyete aliel tamaranikis, kikokis ngitunga lu etoakito. Kisuruorik emalaikat ngaberu tolimok tama, “Kuriasi nyieam, ayeni ayong atamar isakete esi Yesu lo ngoon aramakinio napir. Emam ngesi kane, ayaru ngesi loger lokolong alimunitor. Potu kingolikisi ni ngoon aperio ngesi ne. Kapesi tokona atipei sodi tolimokis ngirukitos keng tamasi: ‘Ayaru ngesi.’ Elosi tokona Galilaya ingareni esi. Ingolikinete esi ngesi kaina. Kitamutu nakalimok ayong esi.” Sodi torotokis kesi analiel atipei eemito, talakara noi. Tamataros alimokin ngirukitos a Yesu ngakiro nguna. Kiriamun Yesu ka kesi atipei tolimok tama, “Ekisil min nikus.” Sodi pot nikeng toriediko, tatapa ngakejen keng kilipa. Tolimok Yesu kesi tama, “Kuriasi nyieam. Kapesi tolimokisi ngikaitotoi kang atamar toloto Galilaya, kaanyungarete kesi ayong kaina.” Na arotokinioto ngaberu, tobongo ngasigerea ngache nakeyokok aliel lore tolimokis ngimurok luapolok a akai a Akuj ngakiro daang na asubakinosi. Kiriamariama ngimurok luapolok a akai a Akuj ka ngikasukou a Atuk, totuko. Tolemut ngaropiyae nakaalak nakis ngasigerea. Sodi tamasi, “Itamarete esi apote ngirukitos keng been nakwaare ijotoote esi tokokoiasi akwaan keng. Kainyo ani kiira ekapolon a Ngiroma nguna, kitunupi sua ngesi atamar nyisechito esi, nakaneni emam ngache kichanete esi.” Tolemasi ngasigerea ngaropiyae kiwapa ngakiro na alimokinitae. Eraakasi ngakiro nguna kesi ekeikinito Ngiyaudi wadaang tanang akolongit na. Toloto ngirukitos lutomon ka epei moru a akwap a Galilaya nisek alimokinit Yesu kesi atamar toloto. Kilipa kesi ngesi na engolikineta, tani ikote neni, ayakasi ngiche angayakinito. Taapu Yesu diye kech tolimok tama, “Kainakin ayong apolou daang anadis ka akwap. Kapesi lotunga daang lu eya nakwapea daang kitaraut kesi ngirukitos kang, kibatisata kesi alokiro ka Apa ka Lokoku ta Etau a Akuj. Nabo kitatama kesi akiwap ngakiro daang nakadungok ayong esi kitatama. Nakaneni toyena atamar kiruki ayong ka esi ngirwa daang tanang esal a akwap.” Eraakasi nugu Ngakiro Naajokak a Yesu Kiristo a Lokookeng a Akuj. Esiakinete loger lokolong egiritere nakitab a ekadwaran a Akuj Isaya atamar, “Ebala Akuj kona, ‘Ameari ayong emeanara kang kingarenik iyong kitosubak iyong erot!’ Etoil a itwaan ani echala anariet ebala, ‘Tosubakisi erot Ekapolon, kitenikisi erot lo itori ngesi!’ ” Abuni Yoana anariet ibatisae ngitunga kitatami ebala, “Tolunga ngasechesea kus kibatisae sodi kitorimakinea Akuj esi ngasechesea kus.” Aloseenete ngitunga a akwap a Yudea nikeng ka ngitunga daang a ere a Yerusalem. Tolimosi ngasechesea kech kibatisae anangolol a Yorudan. Anapit Yoana ngiworui lu adonyunitoe a ngajul a ngikaala. Anapit aruba namuny anaabor. Anyameene ngimases ka akimiet a ao. Kitatam ngesi ngitunga ebala, “Itwaan ngini ebuni ekisidi kang epolot noi kedwangit ayong, nyitemokino ayong tani akudokin atalachak ngarukanes a ngamuk keng. Kebatisae ayong esi a ngakipi, nakaneni kibatisae ngesi esi a Etau a Akuj.” Ngirwa ngulu, torotok Yesu alore a Nasaret a akwap a Galilaya, sodi kibatisa Yoana ngesi alo Yorudan. Napei apudunio Yesu anakipi, kingolik ngesi adis engaar, sodi totiyaun Etau a Akuj ikoni akuuri todo kidiama keng. Abu etoil anadis tama, “Irai iyong Lokookang lominat. Kitalakarit iyong ayong.” Sodi toreea Etau a Akuj Yesu atipei nariet, kiboi kaina ngirwa ngitomwon-omwon iningit Esiitan. Ayakasi neni tani ngitieng a amoni, nakaneni engaranakinete ngimalaikae ngesi. Ekisidi a aenet a Yoana alojela, tolot Yesu Galilaya, itatami Ngakiro Naajokak a Akuj ebala, “Anang esaa, aapuu Apolou a Akuj! Tolunga ngasechesea kus sodi tonupa Ngakiro Naajokak a Akuj!” Na alosio Yesu alokwaas a anam a Galilaya, kingolik ngikechiemak a ngikolia ngiarei, Simon ka Andirea lo arai lokaatokeng, echakete epuute nanam. Tolimok Yesu kesi tama, “Kiwapakinae ayong sodi ketatam esi akirum ngitunga loger lo irumeta ngikolia.” Kimiekis kesi ngipuutei kech atipei sodi kiwapakis ngesi. Na arotokinio ngesi ngaren wadio, kingolik nabo ngikaitotoi ngiarei, Yakobo ka Yoana lu eraakasi talokookeng a Sebedayo. Ayakasi kesi tooma natubwa edonyete ngipuutei kech. Tanyara Yesu kesi napei aanyungarea. Kimiekis kesi apa kech anatubwa ka ngikasubak etich, sodi kiwapakis kesi Yesu. Tananga Yesu ka ngirukitos keng lore lo anyaritae Kaperinaum. Na anangea akolongit a Sabato, toloma Yesu kai a Atuk tolomak akitatam. Toiliilik ngitunga daang eger lo etatamea ngesi, kainyo peekoni ngesi ngiketatamak a etal, nakaneni etatami ngesi a Apolou anakaagongon. Tolom itwaan ni akoporito ngikerep atipei tooma kai a Atuk kikalou tama, “Wae! Eya iyong ngakiro ka sua Yesu lo a Nasaret a? Ibu iyong amunyar sua a? Ayeni atamar iyong ngesi ngae, irai iyong emeuna a Akuj lo italeuno!” Todungok Yesu Ekipe tama, “Kililing sodi tolom anitwaan kaen!” Kitamaranik Ekipe itwaan ngini noi kirakar. Sodi kirema kikalou lokojokon, sodi topudo. Toiliilikis ngitunga daang ngakiro nguna tolimonokinos make tamasi, “Anukiro nugu? Ekoe, eraakasi ngakitatamet kiteat a? Edungonokini itwaan en ngipean ngakiro nakaneni epupete ngesi tani ngipean!” Tokeikin ekipur a Yesu atipei lowaitin daang a akwap a Galilaya. Topudut Yesu ka ngirukitos keng alokai a Atuk toloto kidirasi jik nawi a Simon ka Andirea. Arukito kesi ka Yakobo ta Yoana. Napei adolunio Yesu tolimokinae atamar eperi nakamuran a Simon irakarit arukum noi. Tolot Yesu aanyun aberu ngina, toting akan kitonyou. Tangalek arukum keng. Sodi tonyou tolomak akisimuj kesi. Awariet na adoyorea akolong, apot ngitunga yaut nia Yesu daang lu adeakasi ka ngulu akoporito ngikerep. Tochunakinos ngitunga daang a ere kangolo ngaren ekidor. Nabo kitangalek Yesu ngitunga ngikaalak lu adeakasi ngidekesinei ngigelagelae. Kitwarak Yesu ngipean ngikaalak. Nakaneni nyechamakina elimunete akiroit kainyo ayenete kesi ngesi. Nataparach elilim, eringa nyipiripiruna, tonyou Yesu topudo sodi tolot niasilon akilip. Nakaneni toloto Simon ka ngirukitos luche akisak ngesi, ani na anyuneta ngesi, tolimokis tamasi, “Kisakete iyong ngitunga daang.” Nakaneni tatachak Yesu tama, “Potu apana lorerea luche dang lukidunyet etatama kaina, kainyo nguna ngesi abunitor ayong.” Erimit Yesu ngiwaitin daang a akwap a Galilaya itatami anakais a Atuk, kitwaranakini ngipean. Sodi bu itwaan ni adeaka enomokere toriedik alongaren Yesu kimaima lokojokon tama, “Ani kisaki iyong akitangalekin ayong, ipedori.” Kisieni Yesu itwaan ngini kitorwaa akan keng tatap ngesi. Tolimok tama, “Asaki ayong akitangalekin iyong, tojoker!” Tangalek enomokere a itwaan kangini atipei, tojoker ngesi. Todungok Yesu ngesi atamar tolot atipei. Kichikichik tama, “Ayoro, wara nyiilimok itwaan tani ipei, nakaneni kape lomuron a akai a Akuj kiseme ngesi iyong. Sodi tolem akipeyoet loger lokolong alimunitor Musa, toyenea itwaan daang atamar ijoker iyong.” Nakaneni tolot itwaan ngini tokeik akiroit ngina wadaang. Kiruor ngesi ngakiro nakaalak noi tokuruwo Yesu kona elomuni lore iteete ngitunga, pearai ebooyi ngesi aniasilon, sodi pot ngitunga neni alowaitin kadaang. Tobongo Yesu lore a Kaperinaum ekisidi a ngirwa a ngidikidio. Sodi kiirasi ngitunga atamar eyei ngesi nawi. Nakaneni tochununos ngitunga lukaalak noi kilelebunos akai tanang nikalapatan a ekidor. Na etatamea Yesu kesi ngakiro a Akuj, kilepulepuut ngitunga nguomwon itwaan niangwalan nia Yesu. Nakaneni kotere asepich a ngitunga na alal, apot nyeriamut nikaaloman ni eyaareta ngesi nikeng. Nakaneni todokasi topedo kidiama a akai ana ayei Yesu. Na apedunioto epuke, kiyoliut itwaan ngini iteperikinitoe lojemu keng. Na ayenea Yesu atamar enupito kesi lokojokon, tolimok ekile loangwalan tama, “Lokoku, arimakin ngasechesea kon.” Epewae a ngiketatamak a etal lu ebooyete kaneni kitama ebalasi, “Nyo iruoror itwaan en kona? Imenyarit ngesi Akuj! Emam itwaan epedori arimakin ngasechesea mati Akuj bon!” Toyen Yesu atipei nguna etamete kesi tolimok tama, “Nyo itameta esi nguna? Nyoni etieno, alimokin ekangwalan atamar, ‘Arimakin ngasechesea kon,’ kori atamar, ‘Tonyou, tolema ejemu kon torotok’? Asaki ayong esi toyena atamar eyei Lokookeng a Itwaan agogongu anakwap na erimakinea ngasechesea.” Sodi tolimok ekangwalan ngolo tama, “Kalimokinit iyong atamar tonyou tolema ejemu kon tolot nawi!” Tonyou itwaan ngini atipei iteete ngitunga daang tolema ejemu keng tolot. Toililikis ngitunga daang ngakiro nguna kipuruut Akuj ebalasi, “Ekoe, nyaanyuna na ikote nugu a ache!” Tolot Yesu nabo lokwaas a anam a Galilaya. Pot ngitunga lukaalak neni tolomak ngesi akitatam. Ani eringa elosi alorot taanyunga eketubukon echur lo anyaritae Lawi lokookeng a Alipayo ibooyi alokai ana edieununea ngesi ngaropiyae a echur. Tolimok Yesu ngesi tama, “Kiwapakinae ayong.” Tonyou Lawi kiwapak ngesi. Ani ekisidi emuji Yesu alokai a Lawi. Ewapito ngiketubukok echur lukaalak ka ngikasechak. Kiboikinos Yesu ka ngirukitos keng kimuja aapei. Ngiketatamak a etal ngiche lu eraakasi Ngiparisayo naengolikineta Yesu imujete ka ngikasechak ta ngiketubukok echur, kingita ngirukitos a Yesu tamasi, “Nyo imujeta ngesi ka ngiketubukok echur ta ngikasechak?” Sodi na eirarea Yesu ngakiro kech tolimok tama, “Ngitunga lu nyedeakasi nyesakete eketedekan, lu edeakasi kesi esakete. Nyebuno ayong anyarare luajokak. Abuni anyarare ngikasechak.” Ngirwa ngiche, aroneenete ngirukitos a Yoana Ekebatisan ta Ngiparisayo akimuj. Pot ngitunga ngiche kingita Yesu tamasi, “Abe eroneenete ngirukitos a Yoana Ekebatisan kalu a Ngiparisayo akimuj, nyo peeroneeneto ngirukitos kon akimuj?” Tatachak Yesu tama, “Itamito esi atamar nyimujete ngitunga lu enyaraunitae nakuuta eringa erukito ka ekile lo iuta a? Mam jik! Ani eringa erukito ka ekile lo iuta, nyepedorete akiron akimuj. Nakaneni enangi akolongit na erikorere ekile lo iuta anikech, sodi toroneeneto kesi akimuj ngirwa ngulu. “Emam itwaan edapi eworu longorot a aworu anakitetet. Ani kesub itwaan kongina, echikin aworu ngina aloworu kangolo kitabalanyany apedot a eworu. Kori emam itwaan tani ipei ni epedori akiturakin emuna lo aringa epurio tooma lotuo longorot, ani kiturak, ebwangabwangaari emuna etuo ngolo sodi tobukor emuna nabo kinyasun etuo. Nakaneni iturakinio emuna lo aringa epurio lotuo lokitetet.” Kitoro Yesu ka ngirukitos keng lomanikor a ngimomwa akolongit na a Sabato. Tolomakis ngirukitos keng abiluunun ngakies a ngimomwa. Sodi kingita Ngiparisayo Yesu tamasi, “Ayoro, nyo esubeta ngirukitos kon na engeritoe esubio alotal akolongit na a Sabato?” Tatachak Yesu kesi tama, “Nyisoma esi nakolong asubi Daudi ka ngitunga keng na asaketa ibore ninyamat na anyamea akoro a? Sodi ngesi alomar kai a Akuj, ngirwa lu araakar Abiasar Emuron Loapolon a akai a Akuj, sodi tanyam ngamugati na alemikinitae Akuj. Araakasi ngimurok a akai a Akuj make achamakinitae alotal enyamete ngamugati nguna nakaneni abu Daudi tanyam sodi nak tani ngirukitos keng.” Tolim Yesu ngakiro narumoret tama, “Asubio Sabato kotere itwaan meere itwaan kotere Sabato. Kanguna, Lokookeng a Itwaan ngesi erai Ekapolon a Sabato.” Toloma nabo Yesu kai a Atuk. Ayei neni itwaan ni angwalit akan. Ayakasi ngitunga ngiche lu asakete aripun ibore idio ni ichwangakini Yesu topedoreta akititakin, kiteto kesi ngesi ediye esakete akingolikin kitojoki ngesi itwaan ngini akolongit na a Sabato. Tolimok Yesu itwaan ni angwalit akan tama, “Bua ngaren nege.” Sodi kingit ngitunga tama, “Echamakina Alotal yok esubio naajokak kori naaronok akolongit na Sabato? Akiteyar itwaan kori amunyar?” Nakaneni kililinga kesi emam akiroit alimut. Tokienyik Yesu kesi daang engoit, ani nabo ikoni neni dang, kisieneto kesi ngesi ani agogongioto ngakies tosechito. Sodi tolimok itwaan ngini tama, “Kitorwaa akan kon.” Ani itorwaari ngesi akan, tojoker. Nakaneni topudosi Ngiparisayo Alokai a Atuk toloto totuko ka ngitunga a atukuor ka Erode eger lo eareta Yesu. Torotok Yesu kaneni ka ngirukitos keng aapei tananga lokwaas a anam sodi kiwapuut kesi asepich a ngitunga. Aponito ngitunga ngulu alo Galilaya ka Yudea, ka Yerusalem ka akwap a Idumea, ka ekwakaye a angolol a Yorudan ta akwap a ngirerea a Tiro ka Sidon. Bu asepich ngina daang nia Yesu kainyo eirarito ngakiro daang nasek asubi Yesu. Kona alalaketa ngitunga noi, sodi tolimok Yesu ngirukitos keng atamar yaut atubwa apei diye sodi nyerideta ngesi ngitunga. Kona etojokea ngesi ngitunga ngikaalak, kidingidingas daang lu adeakasi esakete akitap ngesi. Nakaneni na engolikineta ngitunga lu akoporito ngikerep ngesi, tadakakin kwap ngaren keng kiremasi ebalasi. “Irai iyong Lokookeng a Akuj!” Todungok Yesu ngipean atamar nyeelimokis itwaan tani ipei atamar ngesi arai ngae. Todoka Yesu moru, tanyarau ngitunga lu asakit ngesi. Pot ngitunga ngulu neni. Toseu ngesi ngitunga ngitomon ka ngiarei tanyara kesi ngimeanara. Tolimok tama, “Kaseu ayong esi eruko ka ayong nabo kameari ayong esi akitatam. Emini esi agogongu na itwarakineta ngipean.” Ngirora a ngimeanara alutomon ka ngiarei aseuni ngesi kesi lu: Simon (alimokini Yesu ngesi ekiro be Petero), Yakobo ka lokaatokeng Yoana, eraakasi talokookeng a Sebedayo lu alimokini (Yesu ekiro be Boaneriges, ngesi atamar, “Talokookeng a Agiro”), Andirea ka Pilip ka Bartolomayo ka Matayo ka Tomas ka Yakobo lokookeng a Alipayo ka Tadayo ka Simon lo a atukuor anyaritae Salote, ka Yuda Isikariote, lo arikokini Yesu ngitunga. Sodi tolot Yesu nawi. Tochunun nabo asepich a ngitunga natikaalan, tongopik tani Yesu ka ngirukitos keng kona imujete. Ani iirarete ngitunga keng ngakiro nguna apot toloto arikor ngesi kainyo abalasi ngitunga, “Ekerepik ngesi!” Abalasi ngiketatamak a etal ngiche lu apote alo Yerusalem, “Ekapolon a ngipean Beelsebul eyei tooma keng! Erai lokapolon a ngipean ngesi eanyunitor ngesi agogongu na itwarakinea ngipean.” Tanyarau Yesu kesi tolimok a ngakitadapet tama: “Ikokini Esiitan itwarakin bon ai? Akwap na etiakatiakatar ngitunga tojwoto make, inyasun akwap ngina. Kori ani ketiakatiakasi ngitunga apeiwi tojwoto make, ialarosi kesi. Nakaneni ani kenyoikin Esiitan bon, sodi totiakitiak apolou keng, nyerubakini jik apolou ngina, esaluni. “Emam itwaan elomakini itwaan nikajwon anawi keng tolema ngiboro keng daang mati mono keen itwaan nikajwon, ani ekisidi tolema ngiboro a awi keng daang. “Kalimokinit ngakiro na iteni atamar, erimakinio ngitunga ngasechesea ka ngakiro naaronok daang na imenyatar kesi. Nakaneni itwaan cha daang ni elimuni naaronok imenyi Etau a Akuj, nyerimakinio jik, kainyo asech ngesi akisech napenyerimakinio.” ( Alimuni Yesu nguna kainyo abalasi ngitunga ngiche, “Ekoporito ngesi ngikerep.”) Todolut itiokeng ka ngikaitotoi a Yesu, towaa anikalapatan a akai tomeasi itwaan anyarare Yesu. Ebooyi asepich a ngitunga kaneni eriamit Yesu alowaitin kadaang. Tolimokis ngesi tamasi, “Ayoro, eyakasi itiokon ka talokaatokon nikalapatan kisakete iyong.” Tatachak Yesu kesi tama, “Ngae erai itiokang, tangae eraakasi talokaato kang?” Tokienyik ngitunga lu eriamito ngesi tama, “Kingolikisi, lugu kesi eraakasi itiokang ka ngikaitotoi kang! Itwaan cha daang ni esubi na esaki Akuj, ngesi erai lokaatokang ka nakaatokang ta itiokang.” Tolomak Yesu akitatam nabo alokwaas a anam a Galilaya. Kotere asepich a ngitunga na achunakina neni, todoka Yesu natubwa kiboikin. Towo asepich a ngitunga alokwaas a anam. Kitatam ngesi kesi ngakiro nakaalak a ngakitadapet tolimok tama: “Topupokisi! Ayei kolong itwaan ni alosi akitare. Na elakinea ngesi ngikinyam mana, apot ngikinyam ngiche kialakin lorot, sodi kidepasi ngikieny. Apot ngiche kialakin nalup na ewarawarakina kidiama natabab. Toruput ngikinyam atipei kainyo pealalak ngalup. Sodi na ariraunea akolong tonom ngimomwa luuchik ngulu, nabo kotere nipeapisitotor ngaten apot tooniyosi. Apot ngikinyam ngiche kialakin tooma lookwa. Ani erupunete ngiikwa torida ngimomwa lu arupunito sodi nyekoniut ngimomwa. Nakaneni kialakinos ngikinyam ngiche nalup naajokak, toruput ngimomwa topolout, tokoniut ngimomwa: ngiche ngitomwon-uni, ngiche ngitomwon-kapei, ngiche amiat apei.” Sodi tolim Yesu ngakiro narumoret tama, “Ani keya ngaki nakiiraret, kiira robo!” Na ebooyo Yesu alopei, kirukut ngirukitos lutomon ka ngiarei ka epewae asepich a ngitunga anasek etatami ngesi tolimokis ngesi atamar kisaki kesi atoyena eger a ngakitadapet. Tatachak Yesu kesi tama, “Kidodikin esi ngakiro namunonoe a Apolou a Akuj. Nakaneni epupete ngitunga luche ngakiro nguna daang a ngakitadapet, sodi toliwor, ‘Iteete cha iteete, nakaneni nyeyenete, epupete cha epupete nakaneni nyechoiarete. Arai kikoni neni, kereuna kesi nia Akuj, nakaneni kerimaki ngesi kesi.’ ” Sodi kingit Yesu kesi tama, “Nyiyenete esi eger a ngakitadapet kanu a? Ikokinete esi iyenete eger a ngakitadapet a ngache ai? Itae eketan Akiroit a Akuj. Ikote ngitunga ngiche ngikinyam lu ealakinosi lorot, napei iirareta kesi Akiroit a Akuj, bu Esiitan tolema akiroit na eyei lotai kech. Ikote ngitunga ngiche ngikinyam lu ealakinosi natabab. Napei iirareta kesi Akiroit a Akuj tonupa a alakara. Nakaneni nyenupete kesi lokojokon kori nyenupete akiroit ngina nikooyen. Na ichanere kesi kori na eboliare kotere akiroit ngina, dio toisikis kesi atipei. Ikote ngitunga ngiche ngikinyam lu ealakin tooma lookwa. Eraakasi ngulu ngitunga lu iirarete akiroit, nakaneni ngichan a eboyor a akwap ka aminakinit ebari ta ngiboro luche daang lu iterekuyarito kesi, nyisirichakinete kesi akiroit ngina nakaneni tongopa ngakiro naajokak anakiroit kangina. Ngikinyam lu ealakinosi nalup naajokak ikote ngitunga lu iirarete akiroit tonupa, ani erumor tokoniut ageor, ngiche ngatomwon-uni, ngiche ngatomwon-kapei, ngiche amiat apei.” Torubak Yesu isuruori kesi ebala, “Ekoe, eyei itwaan ni inokakini ataa tobuburik atubwa kori kiwaak kwap ekitanda a? Meere kongina, iwaakinio ni ikeuna. Kainyo emam ibore ni idaitae ni nyetakanuni, kori emam ibore ni erapap ni nyileereuni. Ani keya ngaki nakiiraret kiira robo!” Tolimok nabo tama, “Tochoikisi nguna ipupete! Ngitalio lupei iriraata esi luche kesi lupei kirira esi Akuj nabo kirirao esi niaronon noi. Itwaan ni eyei ibore, einakinio nikaalan, itwaan ni emam ibore, edemario tani nidiochichi ni etingit.” Tolim Yesu tama, “Ikoni Apolou a Akuj itwaan ni itakini ngikinyam mana keng. Ejotoe ngesi nakwaare ani esaa lo a apaaran tokienyu. Ngirwa ngulu daang, erupete ngikinyam keng topolout nakaneni nyeyeni ngesi erupe kech. Iturupunete ngalup ngikinyam tokoniut ageor. Ekingaren isiauni kibutungia ani erumor kiala sodi tokon emwae. Na ekokioto ngimomwa, elemuni elope ekileng kitelio ngimomwa, kainyo anang ngirwa lu elemere.” Kingit Yesu tama, “Nyo kisikwaanea Apolou a Akuj? Isikwaanio ka akitadapet ani? Ikoni nege. Elemuni itwaan echokit a ekoropus kitak mana keng. Edit echokit a ekoropus noi idwangit ngichok daang. Nakaneni ani kerupu, topoloor noi kidwang ngikito luuchik daang. Epete ngaten nalangir toduko ngikieny ngakais naten na eya lotorube.” Etatami Yesu ngitunga a ngakitadapet a ngache anakaalak ana ikote nguna, kiruor a eger kadaang alo apedorete kesi akiyen. Esuruori ngesi kesi ngakiro daang a ngakitadapet. Nakaneni ani erukito ka ngirukitos keng make, esisaununi ngakiro daang ileerete. Atabong a akolongit kangina, tolimok Yesu ngirukitos keng tama, “Kapana ewaaros atodokasi ekwakaye anam.” Sodi toisikis kesi asepich a ngitunga kaneni. Tolomasi ngirukitos a Yesu natubwa na ebooyo ngesi kirukosi. Aya ngatubwae ngache dang neni. Atipei tokut ekuwam loapolon ananam. Tokuut ngitoroi kilapakinos natubwa tonyout ngakipi akilelebun natubwa. Ayei Yesu naabor a atubwa ajotoe icholongit aworu. Kitokienyut ngesi ngirukitos keng tamasi, “Eketataman, nyikikachit iyong sua kimunyar a?” Tonyou ngesi kikilak ekuwam tama, “Kililing chek!” Sodi alimokin ngitoroi tama, “Topero!” Toper ekuwam tachakin wadaang chek. Kingit Yesu ngirukitos keng tama, “Nyo kibulitor esi kona? Ikwa eringa esi nyenupa?” Tobul kesi noi kingitas make tamasi, “Ani itwaan ikoni nege en? Epupete ngesi tani ekuwam ka ngitoroi!” Tananga Yesu ka ngirukitos keng ekwakaye a anam a Galilaya nakwap a Ngigerasi. Napei atiyaunor Yesu anatubwa, kiriamun ka itwaan ni akoporito ngikerep ni abunit analielin, eboyeene ngesi analielin. Amam itwaan apedori akien ngesi a ngiriko, aeneeneo ngakejen ka ngakan keng ngirwa ngikaalak nakaneni angedengede ngesi ngiriko jiik ta ngasua na a ngakejen keng. Kipiyo ngesi ngitunga daang emam tani ipei abu kipiu ngesi. Erimit ngesi ngalielin ka ngimoru akwaar ka apaaran irema todungudungo bon a ngamoru. Na engolikinea ngesi Yesu eringa elona, kipiiri toriedik anakejen keng, sodi kirema ngesi lokojokon tama, “Eya iyong ngakiro ka ayong Yesu, Lokookeng a Akuj, Anaapolon noi a? Kotere ekitimoi a Akuj, kemaimai iyong atamar nyikiboliar kare cha ayong!” ( Alimuni kongina kainyo abala Yesu, “Ekipe, tolom anitwaan kaen!”) Kingit Yesu ngesi tama, “Ngae ekiro kon?” Tatachak itwaan ngini tama, “Ekiro kang ngesi Ajore, kainyo kilalak sua!” Kimaima ngesi Yesu atamar nyiitwarak ngipean ngulu anakwap kangina. Nakaneni ayei neni atwom nakaalan a ngiputiro na adaka akook a emoru. Kimaima ngipean Yesu tamasi, “Kimiekinae sua atoloto atolomasi loputiro.” Kimiek ngesi kesi toloto, topudosi kesi tolomasi loputiro. Kipiiri atwom daang, na asibit ngabunge ngaarei, tachakun anakope toloma tooma nanam, tanyam daang anam. Kipiirioto ngikeyokok a ngiputiro lore kisisata ngakiro nguna alore ka ngadakarin nguna. Toloto ngitunga aanyun ngakiro nguna asubakinosi, ani na aponeta nia Yesu, taanyungasi itwaan ni etwaranakinio ngipean ibooyi anakejen a Yesu, enapit ngiworui nabo tojokak ngitamen keng. Apot kesi daang toema. Apot lusek aanyungarete tolimokis ngitunga ngakiro naasubakinosi anitwaan ani akoporito ngikerep ka ngakiro a ngiputiro. Sodi tolimokis kesi Yesu atamar torotok anakwap kech. Ani eringa Yesu edoki atubwa, kimaima ngesi itwaan nisek akoporito ngikerep tama, “Kimiekinae erukosi ka iyong!” Nakaneni towou Yesu tolimok ngesi tama, “Tobongo iyong lotunga a awi kon kisisak kesi nguna kisubea iyong Ekapolon ka eger lo kingarakinea ngesi iyong niajokon.” Tobongo itwaan ngini kitor kiding Ngirerea Lutomon daang isisae nguna asubea Yesu ngesi. Toiliilikis daang lu eirarete ngakiro nguna. Kiwaar Yesu ananam tobongo lokwaas loche a anam. Tochunun asepich a ngitunga nakaalan kaneni kiriam ngesi. Todol Yairo lo erai ekapolon a akai a Atuk. Naengolikinea ngesi Yesu, tadakakin kwap toriedik anakejen keng kimaima ngesi noi tama, “Edeak ikoku kang nipese ekot akitu, bua kare kidokok ngakan kon kidiama keng dio tojoker ngesi toyar!” Tonyou Yesu kirukosi ka ngesi. Sodi kiwapak asepich a ngitunga Yesu kiriam ngesi a ngiwaitin kadaang. Ayei neni aberu na ariaba noi ani aropiyoto ngaakot a ngikaru a ngitomon ka ngiarei, echanito aberu ngina ngimurok lukaalak. Kisunya ngesi ngaropiyae keng daang alomurok, nakaneni esikonokin edeke keng jiik towou angalekin. Eirarit sek ngesi ngakiro a Yesu sodi toropun alotunga, bu alokaku a Yesu tatap eworu keng. Etami ngesi ebala, “Ani cha katap eworu keng, ajoker jik.” Tatap ngesi echilet a eworu a Yesu sodi totubos ngaakot atipei. Toyen ngesi alotau keng atamar angaleki edeke keng. Toyen Yesu atipei atamar kepudo agogongu epewae anikeng. Sodi torei ngesi anasepich a ngitunga kingis tama, “Ngae atapi eworu kang?” Tatachakis ngirukitos keng ngesi tamasi, “Itee cha iyong dang eger lokiriamitotor iyong ngitunga. Nyo tokona ingitar iyong atamar ngae kitapi iyong?” Nakaneni tongolengolek Yesu esaki aanyungar itwaan ni atapi ngesi. Toyen aberu ngakiro nguna asubakin anikeng. Bu ngesi eemit emarani tadakakin kwap toriedik alongaren Yesu kisisak ngesi ngakiro daang na eraakasi ngaka iteni. Tolimok Yesu ngesi tama, “Nakoku, kiteyar iyong anupit kon. Kape nikaalimon tojoker ibore ni kiriebi iyong.” Ani eringa Yesu iruoro nguna, pot ngimeanara ngiche anawi a Yairo. Tolimokis kesi Yairo tamasi, “Atoana nakookon. Nyo ichanea iyong Eketataman nabo?” Nyekachikina Yesu ngakiro na eruorosi kesi. Sodi tolimok Yairo tama, “Nyiem tonup.” Nyechamuna ngesi itwaan iche irukorete ka ngesi mati Petero ka Yakobo ta lokaato keng Yoana. Tananga kesi nawi a Yairo ni engolikinea Yesu ngitunga echalasi, kigoros lokojokon esutonokinete. Toloma ngesi tooma kingit kesi tama, “Ekainyo echale lo? Nyoni igorotor esi? Nyetoanit ikoku en, ejotoe ngesi!” Tokianatar kesi daang ngesi. Kipudo ngesi kesi daang nikalapatan. Tolomasi ngesi ka Yairo ka itiokeng a ikoku ta ngulu arukito ka ngesi namaniyat na ayei ikoku. Toting Yesu akan a ikoku tama, “Talisa koum,” ngesi atamar, “Ikoku pese, kalimokinit atamar tonyou!” Tonyou ikoku atipei torotok. (Arai ngesi ngikaru ngitomon ka ngiarei.) Apot nguna tatalasi ngitunga daang! Nakaneni kichikichik Yesu kesi atamar nyeelimokis itwaan tani ipei ngakiro nguna. Tolimok ngesi kesi tama, “Nakisi ikoku akimuj tanyam.” Torotok Yesu kaneni tobong lore lokolong apolounio. Arukito ngesi ka ngirukitos keng aapei. Akolongit na a Sabato, tolomak ngesi akitatam alokai a Atuk. Nakaneni toiliilikis ngitunga lukaalak lu ayakasi neni ngakiro na etatami ngesi kingitas tamasi, “Aliwae aanyunea ngesi aosou naga? Nyo itusubi ngesi ngakitoodikinet nakailiilok nugu? Meere ngesi lopalem kechian ngiboro, lo erai lokookeng a Mariam a? Ikwa meere talokaato keng kesi Yakobo ka Yosep ka Yuda ta Simon a? Ikwa meere tanakaato keng na elomito nege a?” Apot tongero ngesi jik kanguna. Tolimok Yesu kesi tama, “Ipuruunitoe ekadwaran a Akuj awadaang pearai ngitunga a ere keng ka ngiyenet keng ta ngitunga a awi keng make nyipuruunete.” Peapedori ngesi akisub ngakitoodikinet nakailiilok kaina mati akidokokin ngakan lotunga ngidikidio make lu adeakasi tojoketa. Tatalasi ngesi noi ngakiro napeanupitotor ngitunga ngakiro keng. Sodi kirim Yesu ngadakarin na ayakasi neni itatami ngitunga. Tanyarau ngesi ngirukitos keng lutomon ka ngiarei tochunak wapei dio tomea a ngaarei-rei. Kitogogong ngesi kesi topedoreta apolokin ngipean sodi todungok kesi tama, “Warasi nyiitinga ibore idio analosit kus, mati aburo bon nyiilemasi amugati kori echue lo ilipanarotor kori nyiiwaakis ngaropiyae lochuei a ngiworui. Tanapa ngamuk, nakaneni nyiinap eworu eche.” Tolim nabo tama, “Ani akai na ilomarete esi kitepeyon, kiboikinos nawi ngina tanang akolongit na inyouneto kaneni. Nakaneni ani kinang esi ni eya ngitunga lu nyikitepeyonete, kori nyikipupokinete esi, torotokisi alore kangolo tokurosi ngalup a ngakejen akamaluwot kidodiu ibore ngini atamar esechito kesi!” Sodi toloto kesi akitatam ngitunga atamar tolunga ngasechesea kech. Kitwarakis kesi ngipean ngikaalak. Tobukokis akimiet lokadeakak lukaalak dio kitojoka kesi. Kiira ekapolon Erode ngakiro nguna daang kainyo akeikina ekipur a Yesu wadaang. Abalasi ngitunga ngiche, “Erai itwaan en Yoana Ekebatisan ayaru, ngesi esubea ngakitoodikinet nakailiilok nugu.” Nakaneni abalasi ngiche, “Erai ngesi Elija.” Tamasi ngiche, “Erai ngesi ekadwaran a Akuj lo ikoni epei a ngikadwarak alu kolong ngorok.” Na eirarea Erode ngakiro nguna tolim tama, “Erai itwaan en Yoana Ekebatisan! Etutubo kolong ayong ngitunga akou keng nakaneni ayaru tokona ngesi!” Adunguni sek Erode atamar kirumunae Yoana toenae a ngiriko sodi toinikinae lojela. Asubi ngesi nguna kotere Erodia, na etiliwori ngesi aberu keng tarai sek arai aberu a lokaatokeng alo anyaritae Pilip. Kainyo alimokini sek Yoana Ekebatisan Erode tama, “Nyejoikinit iyong itiliwori aberu alokaatokon akon!” Nakaneni emanit Erodia Yoana Ekebatisan asaki akiar nakaneni peapedori ngesi akisub nguna kotere Erode. Akerit Erode Yoana Ekebatisan kainyo ayeni ngesi atamar arai Yoana itwaan niajokon ni ebekoono. Sodi kimiek ngesi nyear. Amina ngesi akipup ngakiro keng. Tani ikoni neni, ealolongeene ngesi noi akolongit cha daang na eirarea ngakiro na eruoro ngesi. Apeikolongit, tatakanu erot eche. Akolongit na etamunitere akidounet a Erode, kipeyou ngikapolok a arieng ka ngikarikok a ngasigerea ta ngitunga luyenan alo Galilaya. Tolom nakookeng ka Erodia tooma kidonga. Talakaros Erode ka ngipeyok keng noi. Kingit ekapolon Erode nakookeng tama, “Nyoni isaki iyong ayong kainak iyong? Kainakini ayong iyong ibore cha daang ni isaki iyong.” Kikong tolimok tama, “Ekong jik, kainakini iyong ibore daang ni isaki iyong, tani kitama iyong isaki epewae a apolou kang!” Nakaneni tolot apese ngina ni eyei itiokeng kingit tama, “Nyoni elipakin?” Tatachu itiokeng tama, “Kilipakin akou a Yoana Ekebatisan.” Tobongo apese atipei tolimok ekapolon Erode tama, “Nakinae tokona kona akou a Yoana Ekebatisan anatubwa.” Kialolong ekapolon noi, nakaneni kotere akichikakinet na alimuni ngesi alongaren ngipeyok keng daang, nyengero ngesi akisub nguna asaki apese ngina. Sodi tomea ngesi asiger atipei tolimok atamar totub akou a Yoana Ekebatisan. Tolot ngolo lojela totub akou a Yoana Ekebatisan, sodi yau asiger ngina akou anatubwa nak apese, sodi yaa apese nia itiokeng. Na eirareta ngirukitos a Yoana ngakiro nguna, pot kesi kilepulepoosi akwaan keng, tonuka. Tobongut ngimeanara ngulu tolimokis Yesu ngakiro daang na asubete kesi ka na etatamete. Ayakasi ngitunga lukaalak aponeenete tobongete, tongopik Yesu ka ngirukitos keng kona imujete. Tolimok Yesu kesi tama, “Potu apana wache ni esil sodi eangareta wadio.” Sodi kiwaaros kesi a atubwa toloto niasilon. Taanyungasi ngitunga lukaalak kesi enyounete toyana atipei atamar kesi ngesi ta ngae. Sodi tonyout kesi alorerea kadaang kingarenikis iwapito ekwaas a anam, kisiaut akinang neni eringa Yesu ka ngirukitos keng. Na adokunea Yesu anatubwa kingolik asepich a ngitunga. Kisieneto ngesi ngitunga noi kainyo ekote kesi ngamesekin na emam ekeyokon. Tolomak akitatam kesi ngakiro nakaalak. Na anangea ebong, pot ngirukitos keng nikeng tamasi, “Awar tokona tarai nege ariet. Kimiek ngitunga toloto namanat ka ngadakarin na aapiyete, togiela akimuj na enyamete.” Tatachak Yesu kesi tama, “Nakisi esi kesi ibore idio ninyamat.” Tatachakis tamasi, “Isaki iyong sua atoloto atogiela akimuj a ngadinari a ngamiae a ngaarei esimuja kesi a?” Sodi kingit Yesu kesi tama, “Ngamugati ngaai eyakasi nege, kapesi taanyutu.” Na aanyuneta kesi apot tamasi, “Ngamugati ngakan ka ngikolia ngiarei eya nege.” Tolimok Yesu ngirukitos keng atamar kisiboikis ngitunga a ngalooso lonyia lu apuseaka. Sodi kiboikinos ngitunga a ngalooso, ngiche amiat apei ka ngiche ngitomwon-kan. Sodi tolem Yesu ngamugati nakan nguna ka ngikolia luarei. Tokienyia kidiama nadis tobuak Akuj alakara. Tonyilinyili ngamugati nak ngirukitos keng sodi tokorakis ngirukitos keng ngitunga. Totiak ngesi ngikolia luarei dang tokoranakinae ngitunga. Kimuj itwaan daang kimwon. Sodi tolemut ngirukitos keng ngategerin ngatomon ka ngaarei na eleleba ngamugati ka ngikolia lu apiyanun. Araakasi ngikiliok lu emujete kaneni ngabunge ngakan. Esaa lopei esuruorea Yesu ngitunga sodi tolooso, tolimok ngirukitos keng atamar todokasi natubwa kingarenikis toloto Betisaida ekwakaye anam. Na arumorea alimokin kesi atamar toloto, todoka ngesi moru akilip. Na anangea ebong, ayei atubwa kiding anam toyei Yesu alopei ni achadakina ananam. Toyen ngesi atamar keburu ngirukitos keng akigur ngakito nameet atubwa, kainyo amearito kesi atubwa lowae lo akutunitor ekuwam. Ani enangi ni abaiarea, bu Yesu nikech elosi alokidiama ngakipi. Akot ngesi akiporor kesi, nakaneni kingolikis kesi ngesi elosi alokidiama ngakipi. Kiremasi kesi ebulit tamasi, “Erai Ekipe!” Tobul kesi daang na engolikineta ngesi. Kisuruorik Yesu kesi atipei tama, “Totitinyeketo! Nyieam! Ayong itwaan!” Sodi todoka ngesi natubwa ni ayakasi kesi, toper ekuwam. Tatalasi ngirukitos keng ngakiro nguna noi, kainyo nyitamuna kesi atamar nyoni esimujere ngabunge ngakan. Peapedorete ngitamen kech akiyen ngakiro nguna. Todokasi ekwakaye anam todokut anakwap a Genesaret. Toinikis kesi atubwa neni. Na adokuneta kesi anatubwa, toyena ngitunga Yesu atipei. Sodi tamataros kesi topetakin akwap ngina wadaang. Nicha eirareta kesi atamar eyei Yesu neni, yaunae ngikadeakak lu eperete alojem kech. Nakaneni wadaang ni alosi Yesu kerai nadakarin kori lorerea kori namanat, ayaunete ngitunga ngikadeakak nigielet ngiboro sodi kimaimae ngesi tamarae kimiek kesi tatapa tani ekwaas a eworu keng. Tojokearos daang lu atapete eworu keng. Apot Ngiparisayo ka ngiketatamak a etal ngiche lu apote alo Yerusalem tochunun kiriama Yesu. Togipasi kesi atamar emujete epewae a ngirukitos keng akimuj eringa nyilotara ngakan loger lo esakitere alotal, ngesi atamar, peelotarito kesi ngakan loger lopalem ebalasi Ngiparisayo ngitunga ejoikinit ilotarete. Kainyo iwapito Ngiparisayo ka Ngiyaudi luche daang ngakitatamet nakolong eraakasi ngaka ta apakech. Nyimujete kesi eringa nyilotara ngakan kech niajokon. Kori nyimujete kesi ibore ni egielunitae eringa nyilotara mono. Nakaneni iwapito ngitalio lukaalak lu aanyut kesi. Ngitalio ngulu ngesi lu ikote akiyen erot loajokon lokilotaret ngikopoi ka ngamoti ka ngiboro lua ngasua. Sodi kingita Ngiparisayo ka Ngiketatamak a etal Yesu tamasi, “Nyo nyiwapitotor ngirukitos kon ngakitatamet nakolong araakasi ngaka ta apaayok? Nakaneni nyo imujeta kesi eringa nyilotara ngakan kech loger lo echamakinit etal?” Tatachak Yesu kesi tama, “Iteni dir ngakiro kus nakolong adwari Isaya! Iraakasi esi ngikamodeanak loger lo egiritor ngesi kona: ‘Ebala Akuj, kakerito ngitunga lu ayong a ngakituk, nakaneni eloka ngitai kech anikang. Kelipito kesi ayong pas, kainyo itatamete kesi ngitalio a ngitunga kitusubut ngitalio a Akuj!’ “Ideparete esi akiwap etal a Akuj dio kiwapa ngakitatamet a ngitunga.” Sodi tolimok Yesu kesi tama, “Eyei esi erot eche lo a aosou lo ipedoreta asegarit Alotal a Akuj sodi kiwapeta ngakitatamet kus a ngikulepek. Kainyo kidungokinit esi Musa ebala, ‘Toker apakon ka itiokon,’ nakaneni, ‘Ngini iruoror apakeng ka itiokeng ngakiro naaronok, eario.’ Nakaneni itatamete esi atamar ani keyei itwaan ibore ni ingarakinea apakeng ka itiokeng, nakaneni tama, ‘Erai ibore ni enyaritae Koriban’ (eger keng atamar elemikinitae Akuj,) abe emam ngakiro erai pekingarak ngesi apakeng ka itiokeng. Aloger kangolo, ngakiro na itatamete esi luche itiliworete Akiroit a Akuj apasit. Nakaneni eya ngakiro nache nakaalak na ikote nguna na isubete esi.” Sodi tanyarau Yesu asepich a ngitunga nikeng nabo tolimok tama, “Topupokinae daang ayong toyeneta. Emam ibore nia anikalapatan ni elomari nakituk a itwaan ni epedori akitoron ngesi. Pearai ibore ni epuduni anakituk keng epedori akitoron ngesi.” [ Ani keya ngaki nakiiraret, kiira robo!] Ani erotokini ngesi anasepich a ngitunga toloma kai, tamasi ngirukitos keng kisaki kitatamikin eger a ngakitadapet kanguna. Tolimok Yesu kesi tama, “Ikwa nyichwaaka esi dang nyidwangito luche a? Nyiyenete esi a? Emam ibore nia anikalapatan ni elomari nakituk a itwaan kitoron ngesi, kainyo nyelomari lotau keng pearai elomari nakook sodi topudo anakwaan.” (Alolimune keng kongina, asaki Yesu toyenae dir atamar epedorio akinyam ngamuja daang.) Sodi tolim nabo tama, “Erai ibore ni epuduni alotooma etau a itwaan ngesi itoroni ngesi. Kainyo erai tooma lotau a itwaan ngesi eponitotor ngitamen luaronok lu epedorete akitusub ngesi ngakiro naaronok na ikote akoko, akiar, elomit, etereku ta ngakiro nache naaronok na ikote nugu, engalas, aloloat, arorokanut, eswamit, ekinis ta ekiwaanu, ngakiro naaronok nu daang eponito alotau a itwaan sodi kitorono ngesi.” Sodi torotok Yesu kaneni toten nakwap na ayei diye ngirerea a Tiro ka Sidon. Toloma ngesi kai nakaneni peasaki ngesi itwaan tani ipei toyen atamar eyei ngesi neni. Nakaneni peapedori ngesi akiduk kaneni. Kiira aberu na akoporito ikoku keng ngikerep ngakiro a Yesu. Bu ngesi nikeng atipei tadakakin nakejen keng. Pearai aberu ngina Ayaudit. Arai ngesi aka a akwap a Siria a ekitela alo enyaritae Poinike. Kimaima ngesi Yesu esaki kitwarak ngipean ani a nakookeng. Nakaneni tatachak Yesu tama, “Kimiek mono esimuj ngide. Nyejoikinit akimuj a ngide echakakinio ngingokwo.” Tatachu aberu ngina tama, “Ekaapaan, nakaneni enyamete tani ngingokwo lu eya kwap emeesa akimuj na epiyanunete ngide!” Sodi tolimok Yesu ngesi tama, “Kotere akiroit na itachu iyong ngina, tobongo nawi. Apudosi ngipean anikoku kon!” Tolot ngesi nawi torukau ikoku keng eperi alojemu. Kebu Ekipe dir topudo anikeng. Torotok Yesu anakwap ana ayei diye ere a Tiro kitor lore lo enyaritae Sidon ka akwap a Ngirerea a Lutomon tanang nanam a Galilaya. Yaut ngitunga ngiche nikeng itwaan nikinim ni peapedori tani akiruorikin. Kimaimaa kesi Yesu tamasi kidokok itwaan ngini akan keng topia. Nakaneni toriko Yesu ngesi bon tachada alotunga. Kirepak ngimoyo keng naki a itwaan kangini. Kimaak ani erumor tatap angajep a itwaan kangini. Kingolia Yesu kidiama nadis sodi kirema noi tolimok itwaan ngini tama, “Epipasa,” eger keng atamar, “Tangaar!” Tangaar ngaki, talaki angajep, sodi kiruorik niajokon. Sodi kichikichik Yesu ngitunga atamar nyeelimokis itwaan iche ngakiro nguna, nakaneni ani edungokini ngesi kesi atamar nyeelimosi ngakiro nguna, tolomakis kesi ekiruor lokojokon noi. Sodi tatalasi daang lu eirarete ngakiro nguna tamasi, “Kingolikisi eger lo esubea ngesi ibore daang niajokon!” Topodokis kesi ebaasi, “Epedori ngesi akisiirar lukinim ngakiro ka akisuruorikin lu nyiruorosi sek!” Ngirwa ngulu, tochunakin asepich a ngitunga ache nakaalan wapei. Ani engopokini ngitunga ibore ni enyamete, tanyarau Yesu ngirukitos keng ni ayei ngesi tolimok tama, “Kesienito ayong ngitunga lu kainyo kiruk ayong ka kesi ngirwa nguuni, nakaneni emam tokona kesi akimuj enyamete. Ani kemiek ayong kesi toloto nawiyei eringa nyimuja, irakanarosi alorot kainyo eponito ngiche anikalonan noi.” Kingita ngirukitos keng ngesi tamasi, “Nyai nikilemunea ngoni akimuj anariet kana na itemokin asepich naga daang?” Kingit Yesu tama, “Ngai ngamugati itingito esi?” Tatachakis tamasi, “Eraakasi ngamugati ngakan-kaarei.” Tolimok Yesu asepich a ngitunga atamar kiboikinos kwap. Sodi tolem ngamugati nakan-kaarei tobuak Akuj alakara. Ani erumor tonyilinyili nak ngirukitos keng dio atamar tokorakis ngitunga. Tosuba ngirukitos keng loger ngolo. Atingito kesi ngikolia luuchik ngidikidio. Kilip Yesu kotere ngulu dang dio alimokin ngirukitos keng atamar tokorakis ngitunga. ani erumor todokasi ka ngirukitos keng natubwa atipei totena nakwap a Dalimanusa. Pot Ngiparisayo ngiche nia Yesu tolomakis apega ka ngesi. Kona asaketa akining ngesi, apot tolimokis atamar, tosubak ngakiro nakailiilok na idodiunito atamar ebunit ngesi ani a Akuj. Nakaneni topodok Yesu noi tama, “Nyo esaketa ngitunga a ngirwa kalu aanyungar ngakitoodikinet nakailiilok? Kalimokinit ngakiro na iteni atamar emam ngakitoodikinet ngache nakailiilok na idodikinio kesi!” Kimiek ngesi kesi, torotok todoka natubwa kiwaar ekwakaye anam. Kimuriakinito ngirukitos a Yesu akiting ngamugati na itemokino. Atingito kesi amugati apei bon anatubwa. Kichikichik Yesu kesi tama, “Tochoikinos anakiro anaaronok a Ngiparisayo ka Erode ana ikote ekitoe lo itubui ngamugati.” Tolomakis kesi ekiruor make ebalasi: “Elimunit ngesi nugu kainyo emam ngamugati kitingit ngoni.” Ayeni Yesu ngakiro na eruorosi kesi sodi kingit kesi tama, “Nyo iruorotor esi make ibaatar emam ngamugati itingito? Eringa esi nyeyena kitamut a? Ikwa nyichwaaka esi a? Eya esi ngakonyen nyiteete esi a? Eya esi ngaki nyipupete esi a? Nyitamunito esi nakolong anyilinyilea ayong ngamugati ngakan kotere ngitunga ngabunge ngakan a? Ngai kolong ngategerin ilemunete esi na eleleba akimuj na apiyanun?” Tatachut tamasi, “Ngatomon ka ngaarei.” Kingit Yesu tama, “Ani bo nakolong anyilinyilea ayong ngamugati ngakan-kaarei kotere ngitunga ngabunge ngoomwon. Ngai kolong ngategerin elelebun ngamugati na achakanarosi kidepunae?” Tatachut kesi tamasi, “Ngakan-kaarei.” Kingit Yesu kesi tama, “Eringa esi nyeyena a?” Tanangut kesi Betisaida. Yaut ngitunga ngiche emuduk nia Yesu kimaima ngesi tamasi tatap. Toriko Yesu emuduk ngolo akan kipudo anadakar. Kimaak ngesi ekile ngolo nakonyen dio kidokok ngesi akan kingit tama, “Eyei ibore idio itee iyong a?” Tokienyia ekile ngolo kidiama tolim tama, “Etee ayong ngitunga nakaneni ikwaan kesi ka ngikito eloose.” Tatap Yesu nabo ngakonyen a ekile kangolo. Esaa ngolo topochu ekile ngolo ngakonyen. Tojoketa ngakonyen keng kingolik ibore daang lokojokon. Sodi tolimok Yesu ngesi atamar tolot edungokinit ebala, “Nyiibongo nadakar.” Sodi torotokis Yesu ka ngirukitos keng toloto nadakarin na ayakasi diyete Kaisaria Pilipi. Kingit ngesi kesi alorot tama, “Ebaasi mono ngitunga ayong ngesi ngae?” Tatachakis tamasi, “Ebaasi ngiche irai iyong Yoana Ekebatisan. Tabaas ngiche irai iyong Elija. Tabaas nabo ngiche irai iyong epei a ngikadwarak a Akuj.” Kingit kesi tama, “Ani bo esi. Ibaasi esi ayong ngesi ngae?” Tatachak Petero tama, “Irai iyong Kiristo.” Tolimok Yesu kesi tama, “Nyiilimokis itwaan tani ipei atamar ayong ngesi ngae.” Tolomak Yesu akitatam ngirukitos keng tama: “Eboliare Lokookeng a Itwaan lokojokon noi. Engerete ngesi Ngikasukou a Atuk ka Ngimurok Luapolok a akai a Akuj ta ngiketatamak a etal. Eario ngesi, ani akolongit na a ngauni eyaruni.” Tolimok ngesi kesi ngakiro nguna ileerete toyena. Nakaneni tachada Petero ngesi kikilak. Nakaneni torei Yesu kingolik ngirukitos keng sodi kikilak Petero tama, “Esiitan, koto kane. Meere nia Akuj eponitotor ngitamen lukon lugu, eponito alotunga!” Sodi tanyarau Yesu asepich a ngitunga ka ngirukitos keng neni tama, “Itwaan daang ni esaki akiwapakin ayong, ejoikinit ejalun bon sodi kiwok apir keng sodi kewapak ayong. Kainyo itwaan cha daang ni esaki akirichun akiyar keng, ebukor, nakaneni ni ejali akiyar keng kotere ayong ka ngakiro naajokak a Akuj, eyari. Nyoni eanyuni itwaan erai kitiliwo ngesi ibore daang a akwap ikeng, nakaneni tobukor anakiyar? Emam ibore eanyuni ngesi! Emam ibore ni ipotori ngesi kilokonyuunio akiyar keng. Itwaan ni irumito ngileech kotere ayong ka akiroit kang alorwa aluaronok engeritotor ngitunga Akuj kalu, irumete tani Lokookeng a Itwaan ngileech kotere ngesi ngirwa lu ebunio a Apolou anaketimon ka Apakeng erukito ka ngimalaikae lu italeunitoe.” Sodi torubak Yesu iruoro ebala, “Kalimokinit esi atamar eya ngiche nege lu nyetoakete jik eringa nyeanyungara Apolou a Akuj ebuni a agogongu.” Adaunet a ngirwa a ngikan-kapei, toriko Yesu Petero ka Yakobo ta Yoana todokasi kesi make kidiama emoru lokooyen. Kibelei Yesu iteete kesi, sodi tokwangeta ngiworui keng kea, emam itwaan anakwap ni epedori akilotar ngiworui keng tokwangeta kongina. Sodi kingolikis ngirukitos luuni ngulu Elija ka Musa iruorosi ka Yesu. Tolimok Petero Yesu tama, “Eketataman, ejok noi ani kiyakar ngoni nege! Kidukokini sua ngakais ngauni nege, apei akon, apei aka Musa, apei aka Elija.” Kona abulitor Petero ka ngirukitos luche noi, tongopikis ngesi ngakiro elimuni. Sodi totiyaun edou tarap kesi a etorube keng, kiirasi kesi etoil alodou kangolo ebala, “Lokookang lominat ngesi lo, topupokisi ngesi!” Nipei bore ngini tongolengolekis kesi, nakaneni nyingolikina itwaan iche pearai Yesu bon lo arukito ka kesi. Ani etiyaate kesi alomoru todungok Yesu tama, “Nyiilimokis itwaan tani ipei nguna ingolikis esi tanang akolongit na eyarunea Lokookeng a Itwaan.” Kiwapa kesi ngakiro na adungokini ngesi, nakaneni tolomakis akingitanar make ebalasi, “Nyo, mono erai ‘ayarun’?” Sodi kingita kesi Yesu tamasi, “Nyo ebalatar ngiketatamak a etal ejoikinit Elija ebuni ekingaren?” Tatachu ngesi na abala, “Iteni ebuni Elija ekingaren sodi tosubak ngakiro daang kitiriyan. Ani nyo bo elimunitere anagiran atamar eboliare Lokookeng a Itwaan noi sodi tongeroi? Nakaneni kalimokinit esi atamar abu kolong Elija sodi tosubeta ngitunga ngesi ngakiro daang na asakete asubea loger lo elimunitere ngakiro keng anagiran.” Na abongoreta nia ngirukitos aluche, kingolikis asepich a ngitunga iriamit kesi toya ngiketatamak a etal ngiche lu apegasi ka kesi. Na engolikineta ngitunga Yesu, apot toriangakinos noi, sodi tamataros ni ayei ngesi kimalata. Kingit Yesu ngirukitos keng tama, “Nyo ipegasi esi ka kesi?” Tatachu itwaan ipei anasepich a ngitunga tama, “Eketataman, ayaunit ayong lokookang nikon kainyo etingit ngesi Ekipe lopenyisuruori. Na ekopunio ngesi Ekipe tadakakin nalup, nabo tokuut ngikurudoi anakituk, tokirich ngikel, nabo tokuta akwaan daang. Alimokinit tani ngirukitos kon atamar kitwarakisi Ekipe, nakaneni tokuruwo kesi akitwarakin.” Tolimok Yesu kesi tama, “Iraakasi esi ngitunga lu nyinupito Akuj! Ejoikinit ayong kiruki ka esi tanang ori? Anaikini ayong ngakiro kus tanang ori? Yautu idia nege!” Yaut kesi idia nia Yesu. Ani napei engolikinea Ekipe Yesu, abu tadakak idia nalup kirakar, kibelobelokin elakakinit ngikurudoi anakituk. Kingit Yesu apakeng a idia tama, “Ngirwa ngiai ekonea edia logo nege?” Tatachak tama, “Napei kolong a ekiditeu keng. Ngirwa ngikaalak echakanakini Ekipe ngolo ngesi nakim ka nakipi esaki akiar. Kisienoi kare sua kingarakinae, erai kipedori!” Tolim Yesu tama, “Aawa, erai kipedori! Epedorosi ngakiro daang anitwaan ani enupit.” Atipei kirema apakeng a edia tama, “Anupit cha nakaneni kitunupae noi!” Na engolikinea Yesu atamar achunun asepich a ngitunga daang nikech, abu todungok Ekipe ngolo tama, “Iyong Ekipe lokinim lo nyiruoro, kadungokinit iyong atamar tolom alodia kalo, wara nyiiloma nabo nikeng jik!” Kibap Ekipe edia ngolo tadakakin kwap kirakar sodi kirema, topudo. Kikok edia ngolo ekatoan, sodi tamasi ngitunga daang, “Atoana ngesi!” Nakaneni toting Yesu akan keng sodi kitonyou towo. Na alomarea Yesu tooma, kingita ngesi ngirukitos keng anikeng bon tamasi, “Nyo pekitwarakinea sua Ekipe?” Tatachak Yesu kesi tama, “Akilip bon itwarakini Ekipe lo ikoni lo, emam nabo ibore iche itwarakini.” Torotokis Yesu ka ngirukitos keng kaneni kitoro Galilaya, peasaki Yesu ngitunga toyena atamar ayei ngesi neni. Ekonea neni, etatami ngesi ngirukitos keng ebala, “Erikokinio Lokookeng a Itwaan ngitunga lu earete nakaneni akolongit na a ngauni eyaruni.” Nyeyenuna kesi ngakitatamet nguna, nakaneni toema kesi akingit ngesi. Tanangut kesi Kaperinaum, ani elomarete tooma kai, kingit Yesu ngirukitos keng tama, “Anukiro takae ipegasi esi alorot?” Kililinga kesi chek kainyo apegasi sek kesi alorot asakete akiyen itwaan ni epolot noi. Kiboikin Yesu tanyarau ngirukitos lutomon ka ngiarei tolimok tama, “Itwaan cha daang ni esaki akingaren, ejoikinit isidiyor toliwor ekasuban etich aluche kadaang.” Toriku ikoku niichi kitowo alongaren kech, kilogak ikoku ngakan tolimok kesi tama, “Itwaan cha daang ni itepeyoni ipei a ngide a luuchik kalu a ekiro kang, ketepeyon ayong, ani ngini ketepeyoni ayong, etepeyon tani lokolong kameuni ayong.” Tolimok Yoana ngesi tama, “Eketataman, kingolikini sua itwaan itwarakini ngipean a agogongu a ekiro kon etengero sua kainyo meere ngesi iyok.” Tolimok Yesu kesi tama, “Nyiitengero kainyo emam itwaan esubi ngakitoodikinet nakailiilok a agogongu a ekiro kang ani nabo ekisidi keruoror ayong naaronok. Kainyo itwaan cha daang ni nyikitepegi ngoni erai iyok. Kalimokinit ngakiro na iteni atamar, itwaan cha daang ni kitamasi esi ngakipi ani iraakatar ngikang, eriamuni ngesi ebachit keng. “Itwaan daang ni itosechi ipei a luuchik kanupito ayong kalu, ejoikinit eenikinio akiries lomosiring tachakakinae nanam. Nakaneni ani kitosech iyong akan kon totubo! Ejoikinit ilomari nakiyar ingwalit akan idwangit achakakino nanam na akim ana nyedunge eyakasi ngakan daang. [ Ngikuru lu enyamete kesi kaneni nyetoakete, nabo akim na enomi kesi kaneni, nyedunge.] Ani kitosech iyong akeju kon, totubo! Ejoikinit ilomari nakiyar ingwalit akeju idwangit achakakino nanam a akim eyakasi ngakejen daang. [ Ngikuru lu enyamete kesi kaneni, nyetoakete, nabo akim na enomi kesi kaneni, nyedunge.] Ani kitosech iyong akongu kon, touto! Ejoikinit ilomari napolou a Akuj idoony, idwangit achakakino nanam na a akim eyakasi ngakonyen daang. Ngikuru lu enyamete kesi kaneni, nyetoakete, nabo akim na enomi kesi kaneni, nyedunge. “Itojokio itwaan daang a akim loger lo itojokere ngakipeyos a amakat.” “Ejok amakat, nakaneni ani kepener amakat, emam kona itababaruunio nabo.” “Min amakat nikus, sodi kiruko esi isilito.” Torotok Yesu kaneni toten nakwap a Yudea, todoka ekwakaye angolol a Yorudan. Apot nabo ngasepicho a ngitunga tochunun ni ayei ngesi, sodi kitatam kesi kona palem sek. Pot Ngiparisayo ngiche esakete akining ngesi kingita tamasi, “Tolimokinae sua, echamakinitae alotal ekile elaki aberu keng a?” Tatachak Yesu ingisit tama, “Alital kolong kilimokinit esi Musa?” Tatachut kesi ebalasi, “Alimunit kolong Musa atamar epedori itwaan akigir abarua a elakit sodi totiakas ka aberu keng.” Tolimok Yesu kesi tama, “Kigirakinit Musa esi etal logo kainyo egogong esi ngakies emam kona kitatamio. Nakaneni kolong anakisiakinet, ngirwa lu asubere akwap, ‘Asubakini Akuj ekile ka aberu. Kotere ngakiro nguna, eisikini ekile apakeng ka itiokeng sodi kiruko ka aberu keng, sodi taraut kesi luarei ngipei!’ Nakaneni nyeringa kesi nabo eraakasi ngitunga ngiarei, pearai itwaan ipei. Nyejoikinit itwaan etiaki ngini kolong emorik Akuj.” Na abongoreta kesi tolomasi kai, kingita ngirukitos a Yesu ngesi akiroit ngina. Tolimok kesi tama, “Itwaan cha daang ni elaki aberu keng kuut aberu ache, aliwor ekaloman asechaki aberu keng. Kongina pei, ani kenger aberu ekile keng tacham ekile eche, alom ngesi asechaki ekile keng.” Torikut ngitunga ngiche ngide nia Yesu esakete ngesi kidokok ngakan keng kidiama ngakies kech. Nakaneni kikilakis ngirukitos keng ngitunga. Na engolikinea Yesu kesi ikote neni, tongo noi tolimok ngirukitos keng tama, “Kimiekisi ngide pot ne! Nyiiratakis kesi kainyo erai Apolou a Akuj aka ngulu ikote lugu. Kalimokinit ngakiro na iteni atamar, itwaan cha daang ni nyechamuni Apolou a Akuj loger lo echamunitor ikoku niichi, nyelomari jik Napolou ngina.” Sodi tadaku ngesi ngide kidokonok ngakan keng kidiama kech, topia. Na anyounio Yesu torotok, tomotun itwaan toriedik alongaren keng kingit tama, “Eketataman loajokon, ekokini ayong abili aanyun akiyar na nyedaun ai?” Kingit Yesu ngesi tama, “Nyo kinyaritor iyong ayong ekajokon? Emam itwaan ejok mati Akuj bon. Iyeni iyong ngitalio lugu: ‘Nyiiar, nyiilom, nyiikoko, nyiiruor ngakiro na eraakasi alioko, nyiingala, toker Apa kon ka itiokon.’ ” Tolim ekile ngolo tama, “Eketataman, napei kolong a ekiditeu kang, erichunit ayong ngitalio lu daang.” Tokienyik Yesu ngesi a amina tama, “Eroko ibore ipei bon. Kape togiela ibore daang ni itingit iyong tokoranak ngikebootok ngaropiyae sodi min ebarit kon nadis, ani erumor bu kiwapak ayong.” Na eirarea ekile ngolo nguna, torotok esiliyorit kainyo abarit ngesi noi. Tokienyik Yesu ngirukitos keng kisemok tolimok kesi tama, “Egogong noi ngikabarak alomar Napolou a Akuj!” Toililikis ngirukitos keng ngakiro nugu, nakaneni torubak Yesu iruoro ebala, “Ngide kang, egogong noi ngikabarak alomar Napolou a Akuj! Ebeben ekaal akitor napedot a emutu idwangit eger lo elomarea ekabaran Napolou a Akuj.” Toililikis ngirukitos keng ngakiro nguna kingitanaros make tamasi, “Ani ngae epedori ayuun?” Tokienyik Yesu kesi tatachak tama, “Nyepedorosi nguna alotunga, nakaneni ani a Akuj, epedorosi ngakiro daang.” Sodi tolim Petero ngakiro na ekeunit tama, “Tokona, abe kiisik bo kolong sua ibore daang kiwapak iyong.” Tolimok Yesu kesi tama, “Kalimokinit esi atamar itwaan daang ni aisiki awi keng, kori ngikaitotoi ka ngakaitotoi keng, kori apa ka itiokeng, kori ngide keng kori ngamanat keng kotere ayong ka Ngakiro Naajokak a Akuj, einakinio ngainakinet nakaalak tokona na eraakasi ngainakinet amiat apei a ngakais, ngikaitotoi, ngakaitotoi, taito ka ngide ta ngamanat imorikina ka aboliaro, nabo ani ngirwa lu esal eanyuni akiyar na nyedaun. Nakaneni ngikaalak lu ingarenete tokona, isidiyorosi, nabo lu isidiyete tokona, ingarenikinete.” Ani eloose Yesu ka ngirukitos alorot etenete Yerusalem, kingarenik Yesu. Abulit ngirukitos keng toemito tani ngitunga lu ewapito ngesi. Tachada Yesu nabo ngirukitos lutomon ka ngiarei tolimok ngakiro na esubakinere ngesi. Tolimok Yesu kesi tama, “Topupokisi, kilosi tokona ngoni Yerusalem ni erikere Lokookeng a Itwaan Lomurok luapolok a Akai a Akuj ka ngiketatamak a etal. Irirate kesi ngesi taara. Sodi torikoroe lobukui lu nyerai Ngiyaudi. Ekianatar ngesi ngitunga ngulu kimaanakis ngakimul, kideta sodi taara, nakaneni ani enangi akolongit na a ngauni, toyaru.” Sodi pot Yakobo ka Yoana lu eraakasi ngide a Sebedayo nia Yesu tamasi, “Eketataman, eyei ibore kilipit iyong kitosubakinea.” Kingit Yesu kesi tama, “Nyo ngini?” Tatachut tamasi, “Na iboikinor iyong lokicholong lo a Apolou kon, kimiek sua eboikinos ka iyong aapei, epei nakan kon na aloteten, loche nakan na alokedieny.” Tolimok Yesu kesi tama, “Nyiyenete esi na ilipasi. Ipedorete esi akimat ekopo lo aboliaro lo amasi ayong a? Ipedorete esi akibatiso loger lo ejoikinit kebatisaare ayong a?” Tatachakis tamasi, “Kipedori.” Tolimok Yesu kesi tama, “Iteni ipedorete esi akimat ekopo lo aboliaro lo amasi ayong nabo kibatisae loger lo kebatisaare ayong. Nakaneni meere ayong aseuni atamar ngae iboikin teten kori kedieny kang. Eraakasi ngiwaitin ngulu ngika ngulu eseunit Akuj.” Na eirareta ngirukitos luche tomon ngakiro nguna, apot tongoikis Yakobo ka Yoana. Nakaneni tanyarau Yesu kesi daang tochunak wapei tolimok tama, “Iyenete esi atamar epolokinito ngulu ejoikinit eraakasi ngikapolok a ngibukui alu nyerai Ngiyaudi ngitunga kech nabo epolokinito ngikarikok kesi noi. Nyejoikinit ngakiro ikokinete neni anikus. Ani kesaki ipei kus araun ekapolon, ejoikinit eliwor ekasuban etich aluche kadaang, kori ani kesaki ipei kus aliwor ni ingareni, ejoikinit eliwor ekasuban etich kadaang. Kainyo peabuni kolong Lokookeng a Itwaan asubakino etich, pearai akisub etich nabo, tajal akiyar keng sodi talakunea ngitunga lukaalak.” Tanangut Yeriko. Torotokis Yesu ka ngirukitos keng ta asepich a ngitunga. Ebooyi itwaan ipei nimuduk nianyaritae Baritimayo lokookeng a Timayo alorukudi ilipanar. Na eirarea ngesi atamar Yesu lo a Nasaret ngesi ngolo, tolomak akirema ebala, “Yesu Lokookeng a Daudi, kisienoi ayong!” Apot ngitunga ngikaalak kikilakis ngesi tolimokis atamar kililing. Nakaneni kirema ngesi lokojokon noi tama, “Lokookeng a Daudi, kisienoi ayong!” Towo Yesu sodi tama, “Tanyarautu!” Tanyaraut kesi ekile lomuduk ngolo tamasi, “Talakar, tonyou kinyarit ngesi iyong.” Tachaka ngesi eworu keng, tokuraun atipei tolot nia Yesu. Kingit Yesu ngesi tama, “Nyoni isaki iyong katosubakinea?” Tatachak emuduk ngolo tama, “Eketataman, asaki tojoketa ngakonyen engolik akwap.” Tolimok Yesu ngesi tama, “Kape kitojok iyong anupit kon.” Kingolik ngesi akwap atipei kiwapak Yesu alorot. Na apikineta kesi Yerusalem, eya diyete ngirerea a Betipage ka Betania, apot tananga ni ayei emoru a ngikito a akimiet. Tomea Yesu ngirukitos keng ngiarei kingarenikis. Tolimok tama, “Kapesi nadakar na eyei ngaren kus, na inangeta neni, iriamunete itasikiria ni eringa nyedoka a ache eenikinitae neni. Talachutu taramut nege. Ani kingit esi itwaan idio atamar nyo isubeta kongina, tolimokisi atamar Ekapolon ngesi esaki itasikiria nakaneni ebuuni atipei.” Sodi toloto toriamut itasikiria einikinitae lokidor diyete erot loapolon. Ani eroko elachete, kingita ngitunga lu awaasi kaneni tamasi, “Nyo ilacheta esi itasikiria?” Tatachut kona alimokinitor kesi Yesu, sodi kimiekis ngitunga ngulu kesi toloto. Taramut itasikiria nia Yesu, sodi topetakis ngiworui kech kidiama itasikiria sodi todoka Yesu kiboikin. Topetakis ngitunga lukaalak ngiworui kech lorot toyeput luche ngakui a ngikito alu ayakasi namanat topetakis lorot. Kiremasi ngitunga lu engarenete ka lu atupito Yesu ebalasi, “Kipuruunoe Akuj! Topia Akuj ngolo ebunit a ekiro a Ekapolon! Topia Akuj apolou ka apayok Daudi alo erai ekapolon! Kipuroe Akuj!” Na alomarea Yesu Yerusalem toloma kai a Akuj kiseme wadaang. Kona awaritor, topudo Yesu toloto ka ngirukitos keng lutomon ka ngiarei Betania. Na abongunioto kesi alo Betania akolongit nache, tanyam Yesu akoro. Kingolik emeyen anialonan eya ngakui, tolot akiro keya ngameyena. Ani enangi lokitoe ngolo, toriam ngakui make kainyo pearai ngirwa ngulu lu ekonio ageor. Tolimok Yesu emeyen ngolo tama, “Emam itwaan enyami ageor kon nabo jik!” Sodi kiirasi ngirukitos keng ngakiro na alimuni ngesi nguna. Na ananguneta Yerusalem toloma Yesu kai a Akuj kitwarak ngitunga daang lu agialanarete ka lu agielete ngiboro kaneni. Kibelukwaa ngimeesae alu abwangeenete ngaropiyae ka ngikicholongo alu agialanarete ngakurio. Nyechamakina kesi tani itwaan ipei epudorea ibore nikalapatan a akai a Akuj. Sodi kitatam ngesi ngitunga ebala, “Igiritae nagiran atamar ebala Akuj, ‘Enyarao Akai kang akai na ilipeta ngitunga a ngibukui kadaang.’ Itaraut esi aburibur na eduketa ngikokolak!” Na eirareta Ngimurok Luapolok a akai a Akuj ka ngiketatamak a etal ngakiro nguna, tolomakis akisak erot lo eareta Yesu. Akerito kesi ngesi kainyo atalarito asepich a ngitunga ngakitatamet keng. Na awaria, torotokis Yesu ka ngirukitos keng alore kangolo. Na etorunioto lorot ngolo nataparach, kingolikis emeyen ngolo keono deu napei anaten. Na etamunea Petero ngakiro nasek asubasi, tolimok Yesu tama, “Eketataman, kingolik emeyen lobeen ilami iyong lo keoniyo!” Tatachak Yesu kesi tama, “Tonupa Akuj. Kalimokinit ngakiro na iteni dir atamar, epedori itwaan cha daang alimokin emoru atamar toditun tachakakin nanam erai pekengayat ngesi alotau keng. Ani kenup ngesi atamar esubakinio, iteni esubakin. Kotere nguna kalimokinit atamar, na ilipeta esi isakete ibore, tonupa atamar ianyut, nakaneni kiinakinio esi ibore daang ni ilipasi. Ani na inyouneto esi sodi kilipa, torimakisi itwaan daang ni eyei ibore kisechakinit esi, sodi kitorimakinea esi Apakus lo eyei nadis ngasechesea daang na isubito esi. [ Ani pekirimakis esi luche ngasechesea kech, nyikirimakini esi Apakus lo eyei nadis ngasechesea kus.”] Todolut kesi nabo Yerusalem. Na alosio Yesu alokai a Akuj, pot Ngimurok Luapolok a akai a Akuj ka ngiketatamak a etal ta ngikasukou a Atuk ni ayei ngesi, kingita tamasi, “Anipolou isubea iyong ngakiro nugu? Ngae kitaanyuni iyong apolou naga?” Tolimok Yesu kesi tama, “Kengisi ayong esi akiroit apei bon, ani kitachut esi, kalimokini ayong esi apolou na asubea ayong ngakiro nugu. Tolimokinae ayong nianyunea Yoana apolou na ibatisaa ngitunga a ngakipi, nia Akuj kori lotunga?” Kingitanaros make ebalasi: “Ekoe, kitamari ai? Ani kitama ngoni aanyuni ani a Akuj, kingisi ngesi ngoni tama, ‘Ani nyo bo peinupeta esi ngakiro a Yoana?’ Nakaneni ani kitama ngoni, ‘Aanyuni alotunga...’” (Aemito kesi ngitunga peapedorete atamar aanyuni alotunga, kainyo ayenete ngitunga daang dir atamar arai Yoana ekadwaran a Akuj.) Sodi tolimut kesi tamasi, “Nyikiyeni sua.” Tolimok Yesu kesi tama, “Nyakalimokini ayong dang esi atamar anipolou asubea ayong ngakiro nugu.” Sodi kisuruor Yesu kesi a ngakitadapet tama: “Etae kolong itwaan amana a ngikito alu enyaritae ngimusabib, todukok awas kisiriam. Toboka ngesi akipany kiwaak iborosit nichiet emuna a ngamusabib a ngikito kangulu, sodi todukok epem. Toesikinea ngesi ngiketak ngulu amana ngina, tonyou ngesi anawi tolot nakwap ache. Na anangea ngirwa lulemet ngamusabib, tomea ngesi ekedalan keng tolot loketak ngulu esaki kidiakis ngesi epewae a ngalemet. Apot ngiketak kirumut ekedalan ngolo, kibungata, kitwarakis tobongo a ngakan anikirion. Sodi tomea elope a amana ekedalan eche. Kibungata ngolo akou sodi toboliatar niaronon noi. Tomea elope a amana ekedalan eche, sodi taara ngolo. Tosubeta nabo luche lukaalak ngakiro napei nguna, kibungata ngiche ka akiar ngiche. Lo edongit nyemeara ngesi lokookeng lominat bon. Ekisidi kadaang, abu tomea lokookeng ni ayakasi ngiketak ebala, ‘Ekerete kesi dir lokookang.’ Nakaneni tolimokin ngiketak make tamasi, ‘Lokookeng lo, potu ataara toliworor amana ayok!’ Apot kirumut lokookeng a elope a amana taara, kipudosi akwaan keng nikalapatan a amana a ngimusabib.” Kingit Yesu tama, “Anukiro esubakini elope a amana? Ebonguni ngesi taar ngitunga ngulu, nak amana ngiketak ngiche. Isomata esi dir ngagiran nugu a? ‘Amoru nakolong angerete ngikadukok ebalasi erono ngesi tokona ajoker noi edwang daang. Ekapolon ngesi asubi nugu. Eraakasi ngakiro nakatalarak na kitee ngoni!’ ” Tasaka ngikapolok a Ngiyaudi akirumun Yesu kainyo ayenete atamar alimunit ngesi ngakitadapet nguna kotere kesi. Nakaneni tokera kesi asepich a ngitunga, torotokis toisikis ngesi. Tomearae Ngiparisayo ngiche ka ngitunga ngiche a atukuor ka Erode akilok Yesu a ngakiro ana elimuni. Pot nikeng tamasi, “Eketataman, kiyeni sua atamar iruoro iyong ngakiro na a iteni peimisit ngakiro na itamete ngitunga. Nyikachit iyong keyenikinitae itwaan kori kemam, nabo itatami iyong ngakiro na iteni na echamit Akuj alotunga. Tolimokinae sua, echamakinitae alotal kibukokini ngoni ekapolon a Ngiroma echur kori emam? Kibuki ngoni echur kori emam?” Toyen Yesu atamar kalokitae ngesi tolim tama, “Nyo kilokitotor esi ayong? Yautu pan aropiyat engolik.” Inunae ngesi aropiyat. Kingis ngesi tama, “Eka ngae ereet lo ka ekiro lo?” Tatachut tamasi, “Ngika a ekapolon a Ngiroma.” Tolimok Yesu tama, “Ani kikote neni, nakisi ekapolon a Ngiroma ibore ni erai ikeng, nakis Akuj ni erai ika Akuj.” Tatalasi kesi ngakiro nguna. Sodi Ngisadukayo lu ebaasi nyeyarunete ngikatoak pot nia Yesu tamasi, “Eketataman, igirakinit kolong Musa lotal ebala: ‘Ani ketoana itwaan toisik aberu emam ngide, ejoikinit lokaatokeng irumi aberu ngina sodi touriu ngide lu eliwor ngika ngolo atoani.’ Ayakasi kolong ngikaitotoi ngikan-kaarei, kuuta loapolon totoan nyeanyuna ngide. Kirum lo a ngiarei aberu ngina, totoan ngesi dang nyeanyuna ngide. Tosubakin ngakiro napei nguna ani eyei lokaatokeng lo a nguuni dang, abu ngesi toliwor aberu a ngikaitotoi alukan-kaarei kangulu kadaang, dio totoaka nyeanyuna ngide. Ani ekisidi totoan aberu ngina. Tokona a, akolongit na eyaruneta ngikatoak, eliwor ngesi aberu a ngae? Kainyo arai ngesi aberu alukan-kaarei kangulu kadaang.” Tatachak Yesu kesi tama, “Ichwangakinito esi nguna dir! Iyenete esi ibore nikisichwangakinit esi a? Erai ni nyiyeneta esi ngagiran kori agogongu a Akuj. Kainyo na eyaruneta ngikatoak. Ikokinete kesi ngimalaikae lu eya nadis, nyiutanarete. Nabo akiroit ngina ebeyo eyarunete ngikatoak, nyisoma esi anakitab ana igirit Musa ngakiro a amoni anaarirae a? Igiritae neni atamar alimokini Akuj Musa tama, ‘Arai ayong Akuj ka Aburaam ka Isaka ta Yakobo.’ Erai ngesi Akuj alu eyarete meere Akuj alu etoakito. Ichwangakinito esi dir!” Bu eketataman a etal neni kiira kesi ebolosi. Toyen ngesi atamar atachaki Yesu Ngisadukayo niajokon, sodi bu kingit ngesi tama, “Alital epolot noi alotalio kadaang?” Tatachak Yesu tama, “Lo epolot noi ngesi lo: ‘Topupokisi Ngisirael! Ekapolon Akuj yok ngesi bon erai Ekapolon. Tominak Ekapolon Akuj kon a etau kon kadaang, a akiyar kon kadaang, a ngitamen kon kadaang ta ngikilinga kon daang.’ Lo a ngiarei loapolon ngesi lo: ‘Tominak ekidunyet kon loger lo iminar iyong ilope akwaan kon.’ Emam etal eche epolot noi idwangit luarei lu.” Tolimok eketataman lo etal ngolo Yesu tama, “Ejok noi Eketataman! Iyook iyong ngakiro na ibala Ekapolon bon ngesi erai Akuj, nakaneni emam Akuj ache pearai ngesi bon. Nabo ejoikinit itwaan eminakini Akuj a Etau keng kadaang ka ngitamen keng daang ta ngikilinga keng daang, nabo ejoikinit eminakini ekidunyet keng loger lo eminar ngesi eboyor keng a ilope. Ejok akiwap ngakiro naarei nugu idwangit tani alemikin Akuj ngakipeyos a ngibaren ka ngainakinet nache.” Na ayenea Yesu atamar atachu ngesi nguna a aosou, tolimok tama, “Nyilona iyong Anapolou a Akuj.” Arumoret kanguna, emam nabo itwaan asak akingit ngesi ngakiro ngache. Na etatamea Yesu alotooma akai a Akuj kingit tama, “Nyo ebaatar ngiketatamak a etal erai Kiristo ales a Daudi? Edodikini Etau a Akuj Daudi alimun tama: ‘Alimokini Ekapolon Akuj Ekapolon kang tama, kiboikin nege lowae lo aloteten kang, tanang eewaakini ngimoe kon kwap ngakejen kon!’ Ani kenyarit Daudi elope ngesi ‘Ekapolon’, ikokini nabo Kiristo eliwor ales a Daudi ai?” Apupokinit asepich a ngitunga ngakiro a Yesu a alakara. Na etatamea Yesu kesi tolimok tama, “Tochoikinos aloketatamak a etal, eminasi kesi akirimit akwap enapito ngiworui lukooyak, nabo kimalae a arimatoi ani egieleta ngitunga ngiboro. Eseunete kesi niajokon ni iboikinosi anakais a Atuk ka ni imujere. Edemete kesi ngapuseru ngiboro kech, ani erumor, kinisakinos ilipito nikooyen akiding pas. Eroner eriras kech noi!” Na ebooyo Yesu alodiyete asaduku a ngaropiyae, etee ngitunga iwaanakinete ngaropiyae nasaduku. Kiwaakis ngikabarak ngaropiyae nakaalak noi. Sodi bu apuserut nakebootonit kiwaak ngadururio ngaarei na eraakasi ekimar kech atongkol. Tochunak Yesu ngirukitos keng wapei tolimok tama, “Kalimokinit ayong esi atamar ewaak apuserut nakebootonit naga ngaropiyae nakaalak noi nasaduku na idwangito na a ngitunga aluche kadaang. Kainyo ngitunga ngulu daang ewaanakinete ngaropiyae analalau a ebari kech. Nakaneni ngesi, aloboot keng, ewaak daang na atingit, ajal tani napalem eyaritor.” Na apudorea Yesu alokai a Akuj, abu epei a ngirukitos keng tolimok tama, “Eketataman, kingolik a! Abe kitalakarete ngamoru nugu ka ngakais nugu!” Tatachak Yesu tama, “Itee iyong ngakais naapolok nugu a? Emam tani amoru apei kane na idongi edukokina, eukorio ngamoru daang.” Ebooyi Yesu alomoru a ngikito a akimiet ibakito ka akai a Akuj. Pot Petero ka Yakobo ka Yoana ta Andirea neni kingita ngesi tamasi, “Tolimokinae sua atamar ori esubakinotor nugu daang, nyo esubakin toyenere atamar anang akolongit na esubatar ngakiro nugu?” Tolimok Yesu kesi tama, “Tochoikinos warasi itwaan nyikingal esi. Epote ngikaalak iruorosi a ekiro kang ebalasi, ‘Ayong ngesi ngolo!’ Ingalaate kesi ngitunga ngikaalak. Warasi nyikibul na iirareta esi echale a ejie alodiye nabo kiirasi ngakiro a ejie anikalonan. Esubakinosi ngakiro na ikote nguna nakaneni nyidodiunito kesi atamar anang esal. Ejikinosi ngitunga a akwap aapei ka lu anache, ngitunga a ekapolon a epei, eremete ngitunga a ekapolon aloche. Emaranikini akwap alowaitin alugelagelae nabo emini eron a akoro. Eliwor ngakiro nguna akisiakin a aboliaro, loger a ariaba ana ekingaren edolokini ikoku akidouno. “Tochoikinos esi kainyo eya ngitunga lu kirumunete esi kiterikosi nikititaare. Kibungaate kesi esi anakais a Atuk nabo kitoweyo alongaren ngikatukok ka ngikapolok kotere ayong, sodi tolimokineta kesi Ngakiro Naajokak a Akuj. Nakaneni ani mono ekingaren, ejoikinit Ngakiro Naajokak itatamio ngitunga daang. Ani nakirumunere esi kitorikor akititare ani kititaare, warasi ngakiro nyeeriab ngitai kus atamar anukiro ilimunete. Na enangea esaa ngolo, tolimutu nakidodikinio. Kainyo ngakiro na ilimunete esi meere ngakus, eraakasi ngaka a Etau a Akuj. Ipotorete ngitunga talokaato kech taarae nabo taapa ipotorete ngide kech loger ngolo. Enyoikinete ngide ngikauriak kech kipotosi sodi taarae. Kiremokinosi esi ngitunga daang kotere ayong. Nakaneni ngini enaikini tanang losal, eyuunio. “Ingolikinete ‘Ekenyasunan Loaronon noi’ ewei ani nyejoikinit ngesi emini.” (Toyen ekesoman atamar: nyo eger a ngakiro kanu!) “Ejoikinit lu eyakasi nakwap a Yudea ematarosi lomor. Itwaan ni edokit kidiama akai keng, nyeetiyaun esakit alomar tooma kai alemun idiobore ni etingi. Itwaan ni eyei mana nyejoikinit ebongori alemun eworu keng. Erokearosi ngakiro noi ngirwa ngulu ani a ngaberu ana epotiete ka na itanakete! Kilipa Akuj nyeesubakin ngakiro nguna ngirwa lu a akiporo! Kainyo erokearosi noi ngichan a ngirwa kangulu kidwanga daang lu apean nakwap napei kolong asubakinea Akuj akwap tanang tokona. Kori nyepete nabo jik ngichan lu ikote ngulu. Nakaneni atub kolong Akuj ngirwa ngulu. Arai kolong nyiikok neni, kemam itwaan epuun. Nakaneni kotere ngitunga keng luseuna, atub kolong Akuj ngirwa ngulu. “Ani kilimok esi itwaan tama, ‘Kingolikisi a, Kiristo ngesi lo!’ Kori tama, ‘Kingolikisi a, nyeye!’ Nyinupa ngakiro keng. Kainyo epote ta Kiristo lukaliokok ta ngikadwarak a alioko, tosuba ngakitoodikinet nakailiilok ta nakatalarak esakete akingalare tani ngitunga luseuna a Akuj, erai kepedorete akingalare. Tochoikinos! Kalimok ngakiro daang eringa ngirwa ngulu nyenanga. “Ngirwa lu edaunotor ngichan ngulu, eribokini akolong, tojongo elap akicha. Echakunosi ngikanyer anadis nabo emaranikini agogongu daang nakaninikan na eyei kidiama. Sodi tatakanu Lokookeng a Itwaan etiyaun eyei lodowon, etiyaun ngesi a agogongu anaationon noi ka apolou. Emeari ngesi ngimalaikae keng lowaitin daang a akwap, sodi tochunut ngitunga luseuna a Akuj alowae a epei a akwap tanang lowae loche. “Kimiekisi ngakiro a emeyen kitatam esi. Na epuseakuuneta ngaten keng tokilikiluut sodi tolibut ngakui, iyenunete atamar aapuu akiporo. Aloger alopei kangolo, na ingolikineta ngakiro nguna daang esubakinosi, toyena atamar aapiki ngesi adolun. Kalimokinit ngakiro na iteni dir atamar esubakinosi ngakiro nguna daang eringa epewae a ngitunga alu tokona eyarete nyetoaka. Edaun adis ka akwap nakaneni nyedaunosi ngakiro kang jik. “Nakaneni emam itwaan eyeni akolongit ngina kori esaa atamar enangi ori, nyeyenete tani ngimalaikae anadis, kori nyeyeni tani Lokookeng a Akuj, Akuj Apa bon ngesi eyeni. Kiboikinos irichuna sodi tokienya kainyo nyiyenete akolongit na enangea esaa ngolo. Ikokini itwaan ni anyouni alosit anawi keng kimiek ngikasubak etich keng toweikis ngakiro anawi keng daang, kidodik ipei kech daang etich lo esubi. Ani erumor tolimok ekeyokon a ekidor atamar kitee awi lokojokon. Tochoikinos robo irichuna, kainyo nyiyenete akolongit na ebunio elope a awi, kerai ebong kori kedil akwaar kori na ebayiarea kori na ipiripiruunea akolong. Tokienya robo ani kebu atipei nyikiriam esi ijotoote. Nakalimokinit ayong esi, alimokinit ngitunga daang: Kiboikinos irichuna!” Edongit ngirwa ngiarei tanang akolongit na esukukuu alo anyaritae Adeparet ka lo a Ngamugati Anapadok. Apot ngimurok luapolok a akai a Akuj ka ngiketatamak a etal tasaka erot lo irumuneta Yesu peeyenio, sodi taara. Tamasi kesi, “Nyejoikinit kirumuni ngesi ngirwa lu a esukukuu, kainyo elomakinete ngitunga ekurikur.” Ayei Yesu Betania kai a Simon, itwaan ni adeaka sek enomokere. Ani eringa Yesu imuji, bu aberu etingit echupa lokooyen lo enyaritae alabasita lo eleleba akimiet nakaakunyon na enyaritae nardo.*g** Arai akimiet ngina na elalak ngaropiyae egielere. Tobwang ngesi echupa ngolo dio tobukok akimiet nakou a Yesu. Tongoa ngitunga ngiche lu ayakasi neni kingitanaros ebalasi, “Nyo enyasunere akimiet nakakukunyon naga? Adikino akimiet naga peegielario a ngadinari ana iporito ngamiae ngauni sodi nakinae ngikebootok ngaropiyae a?” Kisuburata kesi aberu ngina niaronon. Nakaneni tolim Yesu tama, “Kimiekisi ngesi. Nyo ichaneta esi ngesi? Kasubakinea ngesi ayong etich loajokon noi. Irukito esi ka ngikebootok jiik ipedorete akingarakin esaa daang lo cha isaketa. Nakaneni nyikiruki ayong ka esi ngirwa daang. Asubaki ngesi ngakiro na epedori. Abukokini ngesi akimiet nakakukunyon nakwaan kang sodi katonukere ayong. Tokona, kalimokinit iteni dir atamar, wadaang nicha itatamere Ngakiro Naajokak a Akuj anakwapea, elimorio aberu naga kotere ngakiro na asub ngesi nugu.” Sodi tolot Yuda Isikariote lo erai epei a ngirukitos alutomon ka ngiarei, lomurok luapolok a akai a Akuj, arikokin kesi Yesu. Talakaros noi iirarete ngakiro keng, kichikakis ngesi atamar kiinakini ngaropiyae. Sodi tolomak Yuda akisak erot lo erikokinea kesi Yesu. Akolongit na ingareni akolongit na esukukuu a Ngamugati Anapadok, na engolere ngimesekin lu enyamio akolongit a Adeparet, kingita ngirukitos a Yesu ngesi tamasi, “Aliwae isaki iyong sua atoloto atosubakineta iyong akimuj a esukukuu a Adeparet?” Sodi tomea Yesu ngiarei kech ebala: “Kapesi lore, kisiriamuuni esi ekile lo edakit alupe a ngakipi. Kiwapakisi ngesi tanang kai na elomari ngesi. Tolimokis ilope a akai tamasi, ‘Ebala Eketataman kingitutu iyong keyei amaniyat na imujeta ngesi ka ngirukitos keng akimuj a esukukuu a Adeparet?’ Kidodikini ngesi esi amaniyat naapolon na esubakinitae alokidiama akai, nabo iriamunete ngiboro daang esubakinitae.” Torotokis ngirukitos keng toloto lore, toriamut ibore daang ikoni ni alimokinitor Yesu kesi. Tosubakis akimuj a esukukuu a Adeparet. Na anangea ebong, kirukut Yesu ka ngirukitos lutomon ka ngiarei. Ani eringa imujete, tolim Yesu tama, “Kalimokinit esi ngakiro na iteni dir atamar, karikokini epei kus ayong ngitunga, ngolo ngesi lo kimuji ka ayong aapei.” Tonoma ngirukitos keng ngakiro nguna ngitai tolomakis akingitanar ngesi a ngapeipei tamasi, “Kori erai robo ayong?” Tatachak Yesu kesi tama, “Erai epei kus alutomon ka ngiarei, ngesi lo ilumokini amugati tooma natubwa ka ayong aapei. Etoani Lokookeng a Itwaan eger lo igiritere nagiran, nakaneni etioko nginyas lu eriamuni itwaan ngini erikokini Lokookeng a Itwaan ngitunga! Kejoikinit kolong itwaan ngini peidounitoe!” Ani eringa imujete, tolem Yesu amugati kilipak ebuakinit Akuj alakara. Tonyilinyili sodi nak ngirukitos keng ebala, “Totinga tanyama, akwaan kang ngesi naga.” Sodi tolem ekopo, kilip ebuakinit Akuj alakara, nak kesi dio tamata daang. Tolim Yesu tama, “Ngaakot kang nugu na abukor kotere ngitunga lukaalak, erai kesi iyookinete achamunet a Akuj. Kalimokinit esi ngakiro na iteni dir atamar nyamasi nabo jik emuna lo epuritoe lo tanang akolongit na amasea emuna lo epuritoe lokitetet Anapolou a Akuj.” Sodi toeokis kesi eos ani erumor, toloto moru a ngikito a akimiet. Tolimok Yesu kesi tama, “Irotokinete esi daang kotere ayong, kainyo igiritae nagiran atamar, ‘Eari Akuj ekeyokon, sodi kialaros ngamesekin daang.’ Nakaneni naketeyarunea ayong Akuj, kengarenikini ayong esi atolot Galilaya.” Tolimok Petero Yesu tama, “Nyakaisikini ayong iyong jik, tani kiisikis luche daang!” Tolimok Yesu Petero tama, “Kalimokinit ngakiro na iteni dir atamar, takae nakwaare eringa ekokoroit nyerukino ngarukinet ngaarei, ilimuni iyong ngalimunet ngauni atamar nyikiyeni ayong.” Tatachak Petero iricha tama, “Nyalimuni ayong atamar nyakayeni iyong jik, tani ketamar kaario ayong ka iyong!” Tolimut ngirukitos luche daang ngakiro napei nguna. Tanangut kesi nakwap na anyaritae Getisemane, sodi tolimok Yesu ngirukitos keng tama, “Kiboikinos nege eringa ayong elipit.” Toriko ngesi Petero ka Yakobo ta Yoana. Toriaba ngakiro etau keng kisialolongo noi, sodi tolimok kesi tama, “Kanomito ayong ngakiro etau edikino tani kaarete. Kiboikinos nege tokienya.” Torotok ngesi ngaren wadio, tadakakin kwap sodi kilip atamar ani kepedor, nyeanyun ngesi ka aboliaro naaronon ngina. Kilip ngesi tama, “Apa, Apakang! Epedorosi ngakiro daang anikon. Tolema ekopo lo aboliaro lo anikang. Nakaneni meere loger lo asaki ayong, pearai lo isaki iyong.” Sodi tobong Yesu torukau ngirukitos luuni ejotoote. Tolimok ngesi Petero tama, “Simon, ijotoe iyong a? Nyikienyete esi tani esaa epei a?” Tolimok kesi tama, “Tokienya, kilipa sodi nyianyunosi ka akiningo. Echamit etau nakaneni nyechamit akwaan.” Tolot ngesi nabo inaa kilip elimuununi ngakiro napei nguna. Sodi tobong lorukitos keng toriam ejotoote, tokuruwo kesi akikieny. Nakaneni tongopikis kesi ngakiro na elimokinete ngesi. Na abongunio na a ngauni, abu tolimok kesi tama, “Eringa esi natete ijotoote, iangarito a? Arumor! Anang esaa! Kingolikisi a! Erikio tokona Lokookeng a Itwaan napolou a ngikasechak. Tonyoutu atoloto. Kingolikisi a, lokarikokinit ayong ngitunga ngesi lo!” Ani eringa Yesu iruoro, todolu Yuda lo erai epei a ngirukitos alutomon ka ngiarei. Arukito ngesi ka ajore naatingit ngilengea ka ngiseboe. Ameunito kesi Ngimurok Luapolok a Akai a Akuj ka ngiketatamak a etal ta ngikasukou a Atuk. Alimokini sek lo arikokini ngesi ajore tama, “Itwaan ngini emalae ayong atonuak, ngesi ngolo, kirumutu ngesi, torikosi ichoikinito lokojokon.” Napei adolunio Yuda, tolot nia Yesu tama, “Eketataman!” Sodi tonuak ngesi. Sodi kirumut kesi Yesu totinga lokojokon. Nakaneni tout epei kangulu awaasi kaneni ekileng totubo akit a akedalan a Emuron a Loapolon a akai a Akuj. Sodi Yesu kingit kesi tama, “Nyo tokona iponitotor esi itingito ngilengea ka ngiseboe akirumun ayong ikwa ibore esibit arai ayong erukoot? Kirukit ayong ka esi ngirwa daang etatami alokai a Akuj, ipot esi nyikirumut ayong. Nakaneni ejoikinit ngagiran iyookin.” Sodi toisikis ngirukitos daang ngesi, tamataros. Ayei esorokit epei lo anapit eworu epei, kiwapite Yesu. Tasaka ngitunga akirumun ngesi, nakaneni abu toisik eworu keng kipiiri emuner. Sodi torikoroe Yesu kai a Emuron a loapolon a akai a Akuj, ni ayakasi ngimurok luche daang luapolok a akai a Akuj ka ngiketatamak a etal ta ngikasukou a Atuk. Kiwap Petero Yesu echadakina toloma tooma nalaar a Emuron a Loapolon a akai a Akuj kiboikinos ngesi ka ngasigerea kipiera akim. Toripa Ngimurok Luapolok a akai a Akuj ka ngitunga daang a Atuk ngakiro naaronok ani a Yesu, sodi taareta ngesi, nakaneni emam na aanyut kesi. Kisudo ngikaanyunak lukaalak ngakiro kotere Yesu, nakaneni nyikwaanikina ngakiro kech. Sodi tonyout ngitunga ngiche kisudokineta ngesi ngakiro ebalasi: “Kiira sua ebala, ‘Abwangi Akai na a Akuj na adukete ngitunga naga sodi atodukok ache a ngirwa a nguuni na nyepedorete ngitunga akiduk.’ ” Nakaneni emam ngakiro kangulu na apot kikwaanikin. Tonyou Emuron Loapolon a akai a Akuj alokiding kech kadaang, kingit Yesu tama, “Eya ngakiro isakit iyong atachun alotitas alo kititakinitere iyong kalo a?” Nakaneni kililing Yesu chek, emam akiroit atachu. Kingit nabo Emuron Loapolon a akai a Akuj tama, “Iyong irai Kiristo, Lokookeng a Akuj ana epuruunitoe a?” Tatachak Yesu tama, “Ayong ngolo, nabo ingolikinete Lokookeng a Itwaan ibooyi alowae alo aloteten a Akuj Anaapolon noi nabo irukunete ka ngidowon a adis!” Tochilichili Emuron Loapolon a akai a Akuj ngiworui tama, “Nyeringa nabo kisaki ngikaanyunak ngiche! Iirasi esi ngimeny keng. Ibalasi tokona esi ai?” Tolimut daang engerito ebalasi: esechit ngesi ejoikinit eario. Tolomakis epewae kech akimaanakin Yesu, kimukoe ngesi ereet taramae, sodi tolimokinae tamarae, “Toyen itwaan ni kirami iyong!” Sodi torikosi ngesi ngasigerea sodi kibapanasi. Ani eringa Petero eyei tooma nalaar, kitoru apese neni naarai akasuban etich a Emuron a Loapolon a akai a Akuj. Ani ingolikini ngesi Petero ipiara, abu tokienyik ngesi tolim tama, “Irukito iyong dang ka Yesu lo a Nasaret.” Nakaneni topeg ngesi tama, “Nyayeni ayong... kori nyetamunit tani ngakiro na iruoro iyong.” Sodi topudo Petero nikalapatan. Toruk ekokoroit esaa lopei ngolo. Kingolik apese na arai akasuban etich ngesi kaneni tolimok nabo lu awaasi kaneni tama, “Erai lo epei kech!” Nakaneni topeg Petero nabo. Adaunet a esaa alodiochichi, pot ngitunga lu awaasi kaneni kititakis Petero nabo ebalasi, “Irai iyong dang epei kech dir, kainyo ibunit iyong dang alo Galilaya.” Sodi tolim Petero tama, “Ekong jik kataar ibore, eruoro ayong ngakiro na iteni dir! Nyayeni ayong itwaan ni ilimito esi!” Sodi esaa lopei ngolo, toruk ekokoroit na a ngaarei. Sodi kitam Petero ngakiro na alimokini Yesu ngesi ebala, “Ani eringa ekokoroit nyerukino na a ngaarei, ilimuni iyong ngalimunet ngauni atamar nyikiyeni ayong.” Sodi kikalou ngesi lokojokon. Kiriamariama Ngimurok Luapolok a akai a Akuj ka ngikasukou a Atuk ka ngiketatamak a etal ta ngitunga a Atuk daang atipei totuko. Toena kesi Yesu a ngiriko, sodi torikosi nia Pilato. Kingit Pilato ngesi tama, “Iyong irai ekapolon a Ngiyaudi a?” Tatachak Yesu tama, “Ee, nyenguna ilimu iyong.” Kititakis Ngimurok Luapolok a akai a Akuj Yesu a ngakiro anakaalak, sodi kingit Pilato ngesi nabo tama, “Emam ngakiro itachuni iyong a? Topupok robo ngakiro daang nakititakinitere iyong!” Towou Yesu nabo atachun akiroit tani apei, tatalasi Pilato ngakiro nguna. Akolongit daang na esukukuu alo Adeparet, alachanakini Pilato itwaan ipei ni alimunete ngitunga atamar talachakinae alojela. Ngirwa ngulu aenitae itwaan ni anyaritae Baraba aapei ka ngirukooi lu aarete ngitunga ngirwa lu ekurikur. Na achunakinotor ngitunga alimokin Pilato tosub ngakiro napalem sek esubi, kingit Pilato kesi tama, “Isakete esi atalachak ngolo erai ekapolon a Ngiyaudi a?” Ayeni ngesi dir atamar arikunito Ngimurok Luapolok a Akai a Akuj Yesu nikeng ani ayakar kesi etereku ani a Yesu. Nakaneni apot Ngimurok Luapolok a akai a Akuj kichuchukis ngitunga atamar tolimokis Pilato atamar talachak Baraba. Kingit nabo Pilato ngitunga tama, “Tokona, isakete esi ekokinea ayong ngolo inyarito esi ekapolon a Ngiyaudi ai?” Tachalut tamasi, “Taramakisi napir!” Kingit Pilato tama, “Nyo niaronon esechit ngesi?” Tachalakis kesi noi ebalasi, “Taramakisi ngesi napir!” Aloger alo asakea Pilato akitalakar ngitunga, abu ngesi talachak Baraba. Sodi atamar kidetae Yesu ani erumor torikoroe aramakin napir. Torikosi ngasigerea Yesu tanang tooma akai naapolon a ekapolon a Ngiroma sodi tanyaraut luche arukito ka kesi tochunun neni. Kitanapae Yesu eworu lopus-arengan. Kidanyakinae apukot a ngiikwa, kitanapae ngesi anakou. Sodi tolomakis kesi akimalare ngesi ebalasi, “Kimiekisi Ekapolon a Ngiyaudi kipuruunoe.” Tarama ngesi nakou a aburo, kimaanakis, toriediko alongaren keng ipuruunito. Na arumoreta akianar ngesi, talachasi eworu lopus-arengan ngolo sodi kitanapa ngesi ngiworui lukeng. Sodi torikosi ngesi nikalapatan aramakin napir. Kiriamun ka itwaan ni anyaritae Simon lorot. Abunit ngesi anariet alosi lore. Sodi kitingakis ngasigerea ngesi akiwok apir a Yesu. (Arai Simon eka a akwap a Kurene, tarai nabo apakeng ka Alekisanda ta Rupus). Torikosi Yesu ni anyaritae Gologota, eger keng atamar, “Nia Akulului a Akou.” Tasaka kesi kaneni ainakin ngesi emuna lo epuritoe lo emorikinitae ka ekinyaate lo ekukuny todwar, nakaneni towou Yesu akimat. Sodi taramakis ngesi napir, tokora ngiworui keng emariate tobolos esaki itwaan daang aanyun eworu lo elemari. Aramakinio ngesi napir ngisaae nguuni a ataparach. Egiritae ngakiro na etitakinitere ngesi kona: “Ekapolon a Ngiyaudi.” Taramakis ngirukooi ngiarei ka Yesu napirio aapei, epei lowae lo aloteten keng, epei lowae lo a alokedieny keng. [ Aloger kangolo, kiyookin ngagiran na igiritae kona, “Emorikinitae ngesi ka ngirukooi aapei.”] Kimungumunga ngitunga lu etorunete neni ngakies kech iyenyete ngesi ebalasi: “Goe! Be ibala ngoon iyong ibwangi Akai a Akuj sodi todukok ache nabo a ngirwa a nguuni a? Toyuun pan totiyaun anapir!” Tokianatar Ngimurok Luapolok a akai a Akuj ka ngiketatamak a etal Yesu loger lopei ngolo ebalasi, “Ayuuni ngoon luche nakaneni nyeyuun ngesi elope! Ataanyutu pan Kiristo lo erai Ekapolon a Ngiyaudi etiyaun anapir tokona sodi atonupa ngoni ngakiro keng!” Sodi kiyenya tani luarei Yesu, lu aramakinitae ka ngesi napirio. Na anangea naparan lotingilan toribok akwap daang chuch tanang adaunet a ngisaae a nguuni. Na anangea ngisaae ngikan-koomwon, kikalou Yesu kirema tama, “Eloi, Eloi, lema sabakisani?” Eger keng atamar, “Akuj kang, Akuj kang, nyo kiisikinea?” Kiirasi ngitunga ngiche lu awaasi kaneni tamasi, “Topupokisi, enyarit ngesi Elija!” Topeunea ipei kech ibore niyebuk kirepak lomuna loadwaran apuritoe ngolo, todupak ngaren akitoe sodi kikea ngesi kiwaak lopon a Yesu ebala, “Ataanyutu panite kebuni Elija atiyaun ngesi anapir!” Kirurumak Yesu totoan. Toberes aworu nakooyen eneno alokai a Akuj ngaarei napei alokidiama tanang kwap. Na anyungarea ekarikon a ngasigerea lo awei alongaren apir eger lo atoani Yesu, tolim ngesi tama, “Kerai itwaan en Lokookeng a Akuj dir!” Eteete ngaberu ngache na achadakina kaneni Yesu. Arai kesi ta Mariam Magadalene, Salome ka Mariam itiokeng a Yosep ka Yakobo loochi. Ewapuunete kesi Yesu alo Galilaya ingaranakinete ngesi. Ayakasi ngaberu nakaalak neni nasek apote ka ngesi alo Yerusalem. Na anangea ebong a akolongit ana Asubakin, (ngesi akolongit na ingareni Sabato), todolu Yosep lo a Arimatea. Arai ngesi itwaan ni ayenikinitae Anatuk nabo edarit ngesi abunere a apolou a Akuj. Tolot Yosep nia Pilato peemit dio atamar asaki akwaan a Yesu. Toriangakin Pilato noi na eirarea atamar ketoana Yesu. Tanyara ekarikon a ngasigerea kingit keberakina Yesu akitu. Na eirarea Pilato ngakiro a ekapolon kangolo, tolimok Yosep atamar tolema akwaan a Yesu. Togielu Yosep eworu lodapal lokooyen totiyau akwaan a Yesu toinik loworu ngolo, sodi kitoperik naliel naabokakinitae nataaba. Kikokorik ngesi amoru naapolon nakituk a aliel. Taanyungasi Mariam Magadalene ka Mariam itiokeng a Yakobo ni eteperikinio akwaan a Yesu. Adaunet a Sabato, apot Mariam Magadalene ka Mariam itiokeng a Yakobo ta Salome toloto akigiel akimiet nakakukunyon esakete alosit akiwasakin nakwaan a Yesu. Toloto kesi naliel Jumapili nataparach napei ipiripiruuni akolong. Ani eloose alorot kingitanaros make ebalasi, “Ngae kingarakini ngoni akikokoriyor amoru anakituk a aliel?” (Apolot amoru ngina noi). Ani ingoliarete kesi, taanyungasi amoru ngina kikokoriyor. Sodi tolomasi kesi naliel, taanyungasi edia lo anapit ngiworui luakwaak kea ibooyi alowae alo aloteten a aliel, tobul kesi noi. Tolimok kesi tama, “Kuriasi nyiiriangakinosi. Ayeni ayong atamar isakete esi Yesu lo a Nasaret, longoon aramakinio napir. Emam ngesi kane, eteyarun! Kingolikisi a, ningoon eteperikinitoe ngesi nege. Kapesi tokona tolimokisi Petero ka ngirukitos luche ngakiro nugu tamasi: ‘Elosi ngesi Galilaya kingareni esi! Ianyungarete esi ngesi kaina loger lokolong kilimokinitor ngesi esi.’ ” Sodi topudosi kesi nikalapatan kipiirioto analiel emaranete, tobulite. Nyelimokina kesi itwaan tani ipei ngakiro nguna kainyo abulit kesi. [ Na ayarunea Yesu Jumapili nataparach, kidodiun Yesu ani a Mariam Magadalene ana kolong epudori ngesi ngipean ngikan-kaarei. Tolot ngesi tolimok ngirukitos keng lu egorosi kialolongete, ani iirarete kesi ngesi ebala eyari Yesu engolik ngesi, nyenupa kesi ngakiro keng. Ani erumor, tatakanu Yesu alorukitos keng a ngiarei a eger a eche. Aloose ngirukitos keng lowae lo a ngadakarin. Tobongosi kesi sodi tolimokis luche, nakaneni nyenupa kesi. Esal kanguna kadaang tatakanu Yesu ani a ngirukitos alutomon ka epei imujete. Kikilak kesi ani peanupeta ngakiro keng ka akichananu kech ani awouneta akinup ngakiro alu aanyunete ngesi eyari. Tolimok kesi tama, “Kapesi nakwapea daang kitatama ngitunga daang ngakiro naajokak. Itwaan cha daang ni enupi kibatisae eyuun. Nakaneni ngini nyenupi, irirao. Eanyunete ngikanupak agogongu na esubeta ngakitoodikinet nakailiilok ikote nugu, itwaranakinete ngipean a ekiro kang. Iruorosi ngabukui nakiteat, ani kirumut kesi ngimunio kori kemat ekitoe lokangedaran, nyewanasi. Idokokinete kesi ngikadeakak ngakan, tangalekis.” Arumoret a ekiruor a Ekapolon Yesu ka kesi, yaarae ngesi kidiama nadis kiboikin lowae lo a aloteten a Akuj. Toloto ngirukitos keng akitatam wadaang. Tosub Ekapolon Yesu etich ka kesi aapei, sodi kisileereu atamar eraakasi ngakitatamet kech ngaka iteni kotere ngakitoodikinet nakailiilok asubete kesi.] Ayong Luka ngesi kegirakinit iyong Teopilo abarua naga: Apot ngikegirak lukaalak kigira lokojokon ngakiro na asubasi aniyok. Egirete kesi nakilimokinete ngoni ngikaanyunak ngulu aanyunete ngakiro nu anakisiakinet, nabo kitatamete akiroit a Akuj. Tokona bocha ekile lo kirimae lo, kona esemo ayong ngakiro nugu daang anakisiakinet, engolik atamar ejoikinit kegirak iyong ngakiro nu iwapap. Sodi toyenea iyong ngakiro na iteni ka nguna kadaang kolong kitatamio iyong. Kolong ngirwa lu araakar Erode ekapolon a akwap a Yudea, ayei emuron a akai a Akuj lo anyaritae Sekaria. Arai ngesi eka a atukuoru a ngimurok alu anyaritae Abia. Anyaritae aberu keng Elisabet, arai ayenet a Aron alo arai emuron. Ebooyete kesi daang eboyor lo atenoono alongaren Akuj, nabo ewapito jik ngitalio ka ngakichiket daang a Ekapolon. Amam ibore asechito. Amam kesi ngide kainyo akolupana Elisabet, nabo amojongito kesi daang kwasiarei. Akolongit apei asubi Sekaria etich keng alongaren Akuj, kainyo araakasi ngirwa esubea atukuoru keng etich ngulu. Taramae ekura toseunae Sekaria loger losek iwapito ngimurok, toloma kai a Akuj kinom emitina alokeno alo ipeyonokinere Akuj, nakaneni elipit asepich a ngitunga anikalapatan esaa lo enomere emitina. Bu emalaikat a Ekapolon ni ayei ngesi alotooma kaneni, towo alowae alo aloteten a ekeno alo enomanakinere Akuj emitina. Na engolikinea Sekaria ngesi, abu tobul, tamaranik. Nakaneni tolimok emalaikat ngesi tama, “Nyiem Sekaria! Eira Akuj akilip kon, aberu kon Elisabet idouni ikoku nisapat. Ilimokini iyong ngesi ekiro be Yoana. Ilakar iyong noi na idounere ngesi, nabo elakarosi ngitunga lukaalak noi na idounere ngesi! Kainyo eliwor ngesi itwaan niapolon ani a Ekapolon Yesu. Nyejoikinit ngesi emasi emuna lo epuritoe kori epurot. Ilelebun Etau a Akuj nikeng eringa tani eyei nakook a itiokeng, nabo ebuuni ngesi Ngisirael lukaalak nia Ekapolon alo erai Akuj kech. Ingarenikini ngesi Ekapolon Yesu, etitiny nabo togogong loger a ekadwaran a Akuj Elija. Imorikini ngesi taapa ka ngide kech tachamunos, nabo ereeuni ngesi ngitunga lu engerito Akuj toosokioto anateneanut, nabo kiten ngitunga a Ekapolon Yesu anikeng.” Tolimok Sekaria emalaikat tama, “Ekokini ayong abili akiyen atamar eraakasi ngakiro nu ngaka iteni ai? Arai ayong ekasukout nabo emojongit aberu kang dang.” Tolimok emalaikat ngesi tama, “Ayong Gaburiel, lo awei alongaren Akuj na kameuni ayong katolimok iyong akiroit naajokon naga. Nakaneni abe nyinupit tokona iyong akiroit kang, na iyookin apei kwaar. Kingolik a! Kona tokona nyinupitor, nyiruorikini iyong, ichakin chek, tanang akolongit na iyookinor akichikakinet kang anikon.” Nakaneni tamasi ngitunga lu aringa idarito Sekaria, “Ekoe, nyo atinenikinio itwaan en nikooyen alotooma akai a Akuj!” Topud ngesi nikalapatan ililingi echakina chek, sodi toyena kesi atamar keanyunga ngesi ngakisingolikinet alokai a Akuj. Ani echakina ngesi chek kongina, kisuruor kesi a ngakan. Ani edaun ngirwa lu esubea ngesi etich alokai a Akuj, tobongo Sekaria nawi. Ani ekisidi, topoti Elisabet aberu keng, nyerotokino anawi keng ngilapio ngikan. Tolim ngesi tama, “Kengarak ayong Akuj alema ngileech kang alotunga!” Nakaneni na anangea elap lo a ngikan-kapei epoti Elisabet, tomea Akuj emalaikat lo anyaritae Gaburiel tolot nakwap a Galilaya, lore lo anyaritae Nasaret. Ayei akiroit na asaki ngesi alimokin apese na nyepero ka ekile a ache na anerit ekile lo anyaritae Yosep. Arai Yosep eyenet a Ekapolon Daudi. Arai ekiro a apese kangina Mariam. Toloma emalaikat tooma kai, kimala tama, “Ejok Mariam a! Irukito iyong ka Ekapolon nabo kipia ngesi iyong!” Tosur etau a Mariam noi kotere emalas ngolo. Tolomak akitam ebala, “Ekoe, emalas erai nyo lo?” Tolimok emalaikat ngesi tama, “Nyiem Mariam, kainyo kisichanyu iyong Akuj ajokis keng. Kingolik a, ipoti iyong kidou ikoku nisapat, ilimokini iyong ngesi ekiro be Yesu. Eyenikinio ngesi sodi tanyarae Lokookeng a Akuj a Naapolon noi. Itiliwori Akuj ngesi Ekapolon loger ka apaakeng Daudi. Eliwor ngesi Ekapolon a ngalesea kadaang a Yakobo jik, nabo apolou keng nyesaluni!” Tolimok Mariam emalaikat tama, “Arai ayong apese na nyepero ka ekile a ache, ikokinete ngakiro nu esubakin ai?” Tatachak emalaikat tama, “Etiyaun Etau a Akuj nikon, nabo kimuki iyong agogongu a Akuj a Naapolon Noi loger a Etorube, kotere nguna, eliwor lo idounio lo italeuno, Lokookeng a Akuj. Nakaneni toyen atamar ayenet kon Elisabet, tani kemojongit dang, epoti ngesi ikoku nisapat, nakaneni erai elap lo a ngikan-kapei a apoti keng lo, nangoon anyaritae akolup. Kainyo emam ibore ni ekuruwori Akuj asubakin.” Tolim Mariam tama, “Arai ayong akasuban etich a Ekapolon, kimiek kikokis anikang loger lotete ilimuni iyong.” Ani erumor, torotok emalaikat. Nakaneni ngirwa lupei ngulu, torotok Mariam atipei toten akwap ache na ayakasi ngaukon, tanang lore a akwap a Yudea. Toloma ngesi kai a Sekaria, kimala Elisabet. Ani iirari Elisabet emalas a Mariam, abu ikoku ni apoti ngesi kikolianar anakook keng kilelebun Elisabet Etau a Akuj sodi kirema ngesi lokojokon tama, “Iyong bon kipiarit Akuj anaberu kadaang! Epiarit Akuj tani ikoku ni idouni iyong! Ekoe nyo esubatar ngakiro naapolok nu anikang, ebunitor tani itiokeng a Ekapolon kang nikang? Kainyo na eirarea ayong emalas kon abu ikoku ni apoti ayong kikolianar a alakara. Ilakara iyong lokojokon noi, kainyo inupit iyong atamar iyookin akiroit a Ekapolon anikon!” Tolim Mariam tama: “Epuruunit ayong Ekapolon lokojokon, alakara ayong noi kotere Akuj na erai Akayuunan kang, kainyo ketam ngesi ayong akasuban etich keng na apalaana! Napei tokona jik, kanyaraate ngitunga daang ayong ngina kapiaritae. Kainyo Akuj Naapolon Noi, kasubea ayong ngakiro naapolok. Italeuno ekiro keng. Isienito ngesi ngulu daang ekerito ngesi, analesea kadaang. Itorwaari ngesi akan keng, tosub ngitichisio luapolok, epetari ngesi lu inisasi anakiro kadaang a na ereto kesi. Ekota ngesi ngikapolok lu apolok noi anapolosio kech, etiliwo ngesi lu itiditeuna ngikapolok. Elelebik ngesi lu enyamit akoro ngiboro luajokak, nakaneni erita lu ebarito, arotokis a ngakan a nikirion. Erichak ngesi akichikakinet nakolong echikakini taapayok, nabo engarak ngesi Ngisirael, ngitunga a ekitela keng. Etamu ngesi atamar kesienit Aburaam nabo isienito ngesi tani ngalesea daang ka Aburaam jik!” Kiboi Mariam anawi a Elisabet ngilapio nguuni, ani erumor, tobongo nawi keng. Abu kitemokin ngirwa lu idounio Elisabet ikoku keng, kidou ngesi ikoku nisapat. Ani iirarete ngikidunyet keng ka ngiyenet keng eger lo engarakinea Ekapolon Akuj ngesi, apot talakaros daang ka ngesi aapei. Na anangea akolongit na a ngakan-kauni, tasaka ngitunga akilenger idia. Asakete alimokin ngesi ekiro ka apakeng Sekaria. Nakaneni towou itiokeng tolim tama, “Mam! Enyarao ekiro keng Yoana.” Apot ngitunga tachalakis tamasi, “Abe emam bo itwaan ni iyanasi ka esi enyaritae a ekiro kangolo!” Sodi toketut apakeng kingita ekiro lo achamit ngesi tolimokinae idia. Kidodiu atamar yaunae ibore ni igirakini, sodi kigirak ngesi kona: “Enyaritae ekiro keng Yoana.” Tatalasi ngitunga daang ngakiro nguna. Esaa lopei ngolo, kiruorik Sekaria ipuruunit Akuj. Apot ngitunga daang lu alomito diyete neni toema noi, sodi tokeikin akiroit ngina naukon daang a Yudea. Ngulu daang eirarete akiroit ngina apot kitama alotai kech tamasi, “Ekoe, ikokini monan idia en ai?” Kainyo etakani dir atamar eyei apolou a Ekapolon nikeng. Kilelebun Etau a Akuj nia Sekaria, apakeng a Yoana, tolim akiroit a Akuj tama: “Potu epuruutu Ekapolon, Akuj a Isirael! Lo abuni akingarakin ngitunga keng talachak kesi. Kiinak ngoni Ekayuunan Lokaagongon, lo ebuni anales a ekasuban etich keng Daudi. Nugu kesi nakolong alimuni ngesi kisitoru lokadwarak keng lu ebekooko. Kichikakinit ngesi ngoni atamar kiyuuni alomoe yok, ka agogongu ka ngulu kiremokino ngoni. Ebala ngesi kesieniyete taapayok, sodi etam achamunet keng na italeunitoe nakolong ekongio. Abu Akuj kikong ani ka apaayok Aburaam atamar, kiyuuni ngesi ngoni alomoe yok, sodi elipeta ngoni ngesi pekibulit. Sodi atoliworotor ngoni lukitaleuno, lu kitenooko anikeng, ngirwa daang lu kiyarea ngoni. Iyong ikakoku, kinyarao ekadwaran a Akuj ana Epolot Noi, ingarenikini iyong Ekapolon Yesu, kitenik erot keng, tolimok ngitunga keng atamar eyuunio kesi ani erimakinere ngasechesea kech. Kainyo elilim Akuj yok kisieni ngoni. Kiyuuni ngesi ngoni a eger alo ikoni akwangis a achaunet a akolong. Tokwanger kinwaku lu ibooyete anaribu, nabo lu erapit aribu a akitu. Kiyok elote yok, atarata lukisilit.” Abu idia ngini topolou, nabo toosor noi. Kiboi anariet tanang akolongit na edodikinor ngesi Ngisirael. Ngirwa ngulu todung ekapolon a Ngiroma Augosto atamar kigirae ngirora a ngitunga a ngakwapea kadaang kimarae. Ekimar lo ekingaren ngolo egiritae kaneni, na araakar Kirenio ekapolon a Ngiroma anakwap a Siria. Sodi toloto ngitunga daang akigiro, itwaan daang tolot nikolong edounere! Tonyou Yosep dang alore a Nasaret alo eyei nakwap a Galilaya, tolot lore a Betleem, nakwap a Yudea, nikolong edounere ekapolon Daudi. Tolot Yosep inaa ani araakar ngesi ales a Daudi. Sodi tolot ngesi kigirere aapei ka Mariam na anerit. Nabo apoti Mariam. Ani na ayakatar kesi Betleem, abu tanang ngirwa keng lu idounio. Kidou ngesi lokookeng lo a ekingaren, kilogak ngiworui a ikoku a niichi, kiteperik ngesi nateger na emaseta ngaatuk, kainyo adiding akai a ngipeyok. Ayakasi ngikeyokok nakwap ngina lu akienyete anaro iyokiyete ngibaren kech nakwaare. Apot kesi kingolikis emalaikat a Ekapolon ebunit nikech, abu akwangis a Ekapolon tokwangu alowaitin kadaang, sodi apot kesi toema noi. Nakaneni tolimok emalaikat kesi tama, “Nyieam! Kainyo kainunit ayong esi ngakiro naajokak na italakarete ngitunga daang. Kainyo akolongit naga, edoun Ekayuunan kus alore a Daudi, Kiristo lo erai Ekapolon! Iyenete a eger kalo: iriamunete ikoku niichi ni imukokinitae ngawarui eperi anateger ana emaseta ngaatuk!” Nakaneni pot ngimalaikae lukaalak anadis atipei kimorikin ka emalaikat ngolo, toeokis ipuruunito Akuj ebalasi: “Kipuruunoe Akuj alokidiama nadis! Taanyut ngitunga a akwap ekisil, ngitunga lu italakarito ngesi!” Na arotokinioto ngimalaikae tobongosi nadis, apot ngikeyokok tolimonokin make tamasi, “Potu apana Betleem ataanyutu ngakiro nguna kesubasi, nakilimok ngoni Ekapolon.” Apot torotokis kikomakis toriamut Mariam ka Yosep ta ikoku niichi ni aperi anateger. Ani ingolikinete ngikeyokok ngesi, apot tolimokis kesi ngakiro na alimokinit kesi emalaikat anikoku kangini. Ngitunga daang lu eirarete, tatalasi ngakiro na alimokinete kesi ngikeyokok. Nakaneni abu Mariam kitam ngakiro nguna daang kiwaak lotau keng lokojokon noi. Apot ngikeyokok ngulu tobongosi eeosi, ipuruunito Akuj kotere ngakiro daang na eirarete ta na engolikinete dang, kona ekoneta daang eger lo alimokinitor emalaikat. Adaunet a ngirwa a ngikan-kauni na etemokinor akilenger ikoku, tolimokis ekiro be Yesu, loger losek anyaritor emalaikat ngesi eroko nyepotiuno. Nakaneni tanang akolongit na itosegere Mariam ka Yosep, loger lokolong alimunitere Alotal a Musa. Apot kesi toloto Yerusalem yaasi idia inaa ngaren Ekapolon ebaasi toliwor ikeng, kona igiritere Lotal a Ekapolon kona: “Ikoku daang nisapat ni idounio ekingaren, eliwor ni italeuno a Ekapolon.” Tolemut kesi ngakurio ngaarei kori ta kidomelio ngaarei, kipotosi erai akipeyoet a Akuj loger lo elimunitere Alotal a Ekapolon. Ngirwa ngulu ayei itwaan ipei ni alomit Yerusalem enyaritae Simeon. Arai ngesi itwaan ajokon ni akerit Akuj, edarit ngesi Isirael eyuunio, nabo ayei Etau a Akuj nikeng. Nakaneni alimokinit ngesi Etau a Akuj atamar nyetoani eroko nyingolikina Kiristo lokolong echikakinitae atamar emeunio. Bu ngesi kai a Akuj erikit Etau a Akuj, sodi apot ngikauriak a Yesu yaut ngesi tooma akai a Akuj esakete akitalere loger lo elimunitoe Alotal. Tadaku Simeon ikoku a ngakan keng kipuruu Akuj ebala: “Iyook tokona iyong Ekapolon akichikakinet kon, kimiek ekasuban etich kon tolot a ekisil. Kainyo aanyunga ayong ayuuno kon a ngakonyen kang a elope, ngina kolong isubakini iyong alongaren ngakonyen a ngitunga kadaang. Toliwor akwangis na idodiunit erot kon alobukui alu nyerai Ngiyaudi, nabo yau ekipur kon lotunga kon a Isirael.” Nakaneni tatalasi apakeng ka itiokeng ngakiro na eruoro Simeon ani a Yesu. Topia Simeon kesi tolimok Mariam itiokeng tama, “Aseu Akuj ikoku en sodi kinyasunotor lukaalak nabo toyuunotor lukaalak alo Isirael. Sodi toliwor ngesi emachar lo ebunit Anakuj sodi kiruorotor ngesi ngitunga lukaalak kitopega, sodi kileereuneto ngakiro na imunonito kesi. Tani iyong alope, kiriebete iyong ngichan etau tosub kichumitae a akwara.” Ayei akadwaran a Akuj anyaritae Ana, nakookeng a Panuel, arai ngesi aka a ekitela a Acheri. Amojongit ngesi noi, nabo eboito ngesi ka lokile keng ngikaru ngikan-kaarei na eusere. Arai ngesi apuserut na araakasi ngikaru keng ngitomwon-kauni ka nguomwon. Pearotonokini ngesi alokai a Akuj, apaaran ka akwaar elipit ngesi Akuj jiik, aroneene akimuj, nabo kilipite. Esaa ngolo abu ngesi todol tobuak Akuj alakara. Abu ngesi tolimok ngitunga daang ngakiro a ikoku. Ngitunga ngulu kesi lu edarito ngirwa lu eyuunea Akuj Yerusalem. Na arumoreta ngakiro daang loger lokolong alimokinitere alotal a Ekapolon, apot tobongosi nakwap a Galilaya toloto nawi kech na ayei lore a Nasaret. Abu ikoku ngini topolou togogonger, nakaneni aos ngesi noi nabo apiarit Akuj noi lokojokon. Ekaru daang aloseenete ngikauriak a Yesu Yerusalem Losukukuu lo anyaritae Adeparet. Na araakar Yesu ngikaru ngitomon ka ngiarei, toloto kesi losukukuu kona palem. Ani edaunosi ngirwa a esukukuu, apot tobongosi nawi nakaneni abu idia Yesu kidong Yerusalem. Nabo ngitunga lukeng ngulu peayenete ngakiro nguna, etamete kesi atamar kori erukito ngesi ka ngikalotok, na alooso kesi akolongit ngina daang, sodi tolomakis kesi akisak ngesi kiding ngiyenet ka ngipaalon kech. Apot nyeanyut ngesi, nakaneni tobongosi Yerusalem akisak ngesi. Akolongit na a ngauni apot toriamut ngesi alotooma Akai a Akuj, ibooyete ka Ngiyaudi lu araakasi ngiketatamak, epupi na eruorosi kesi nabo kingitanari kesi ngakiro. Tatalasi daang lu eirarete ngakiro keng eger lo atachanakinea ngesi kesi ngakiro a aosou. Ani ingolikinete ngikauriak keng ngesi, tatalasi noi ngakiro nguna tolimok itiokeng ngesi tama, “Ikakoku, nyo kisubea iyong sua kona? Kialolongi ayong ka apakon noi kisaki iyong.” Tatachak kesi tama, “Nyo kisaketa esi ayong? Nyiyenete esi atamar ejoikinit ayong ayei nawi ka Apakang a?” Nakaneni nyeyena kesi ngakiro na alimokini ngesi kesi. Abu Yesu tobongosi ka kesi Nasaret kiboikinos ka kesi epupi ngakiro kech. Nakaneni abu itiokeng toting ngakiro nguna daang alotau keng kirichak. Abu Yesu topolou, nabo toos, italakarit Akuj ka ngitunga. Ekaru lo a ngitomon ka ngikan na araakar Tiberio ekapolon a Ngiroma, tarai Pontio Pilato ekapolon a akwap a Yudea, tarai Erode ekapolon a akwap a Galilaya, nabo Pilip lokaatokeng arai ekapolon a akwap a Iturea ka akwap a Tirakoniti, nabo arai Lisania ekapolon a akwap a Abilene, araakasi Anas ka Kayapa Ngimurok Luapolok a akai a Akuj. Ngirwa ngulu ngesi abunio akiroit a Akuj nia Yoana lokookeng a Sekaria, eyei nariet. Tolot Yoana tanangeene akwap daang na edunyasi ka Yorudan, itatami ngitunga ngakiro a Akuj ebala, “Tolunga ngasechesea kus kibatisae a ngakipi, kitorimakinea Akuj ngasechesea kus.” Araakasi nu na egiritae nakitab a ekadwaran Akuj Isaya: “Etoil a itwaan ani echala anariet ebala: ‘Tosubakisi erot a Ekapolon, kitenikisi erot lo itori ngesi! Ejoikinit ngadipoe daang ilelebio, ejoikinit ngaukon ka ngimoru topunyipunyarae, ejoikinit ngirotin lu kelugulugok itenikinio kitenaros, nabo ngirotin lu engarab tosubakinae toruruseta. Nabo ngitunga daang eanyunete ayuuno a Akuj!’ ” Apot ngitunga lukaalak pot nia Yoana kibatisae a ngakipi. Kingit Yoana kesi tama, “Esi lu ikote ngarewa, ngae kichikichiki esi atamar ipedorete abuchar aloriras a Akuj alo ebunit? Tosuba ngitichisio lu idodiunito atamar ilunga esi dir ngasechesea kus. Tojongoto ekiruor atamar iraakasi esi ngide ka a Aburaam. Abala ayong esi a! Epedori Akuj asubakin Aburaam ngide anamoru kanu! Edikino aep iteli ngikito anaten, ekitoe daang lo nyekoni ageor naajokon itelunio tachakakinae nakim.” Kingita ngitunga ngesi tamasi, “Kikokini tokona sua aliwae?” Tatachak ngesi tama, “Itwaan cha daang ni eya ngiworui ngiarei ejoikinit nak itwaan cha daang ni emam, ani nabo ni eyei akimuj kitomor luche.” Apot ngiketubukok echur ngiche pot nikeng esakete kibatisae a ngakipi. Kingita ngesi tamasi, “Eketataman, kikokini sua aliwae?” Tolimok kesi tama, “Nyiilemanasi na idwangito nakolong kilimokinio.” Apot ngasigerea ngache kingita tamasi, “Ani bo sua? Kikokini aliwae?” Tatachak kesi tama, “Nyiidemasi itwaan tani ipei ngaropiyae a areit, kori nyiirirata a ngakiro ana eraakasi alioko, nabo kitemokin ngaropiyae na kitachanakinio esi alotich kus.” Tolomakis ngitunga akitam atamar kori erai Yoana Kiristo lo abeyo emeunio. Sodi tolimok Yoana kesi daang tama, “Kebatisae ayong esi a ngakipi, nakaneni ebuni lo epolot noi kedwangit ayong, nyitemokino ayong tani alachakini ngarukanes a ngamuk keng. Kibatisae ngesi esi a Etau a Akuj ka akim. Etingit ngesi adaet anakan keng esaki adaun ngakanoi, nabo iwaakini lokeru keng, nakaneni kinom ngatunyeny a akim ana nyedunge jik.” Alorotin alukokaalak, abu Yoana kichikichik ngitunga na etatamea kesi Ngakiro Naajokak a Akuj. Nakaneni eruoro Yoana atamar esechit ekapolon Erode ani alemarea aberu a lokaatokeng na enyaritae Erodia, kitarau aberu keng, nabo ayakasi ngakiro nakosoche aronok asubit Erode. Ani bo kanguna kadaang, tosub Erode niaronon noi ani ainikinea Yoana lojela. Na arumorere akibatisare ngitunga daang a ngakipi, apon Yesu dang kibatisae a ngakipi. Ani na elipitor Yesu, tangaar adis, sodi bu Etau a Akuj min kidiama keng ikoni akuuri. Abu etoil anadis tama, “Irai iyong Lokookang lominat. Alakara ayong kotere iyong.” Arai Yesu ngikaru ngitomwon-uni na esiakinea etich keng. Etamito ngitunga atamar kori erai ngesi lokookeng a Yosep, alo arai lokookeng a Eli, alo arai lokookeng a Matati, alo arai lokookeng a Lawi, alo arai lokookeng a Meliki, alo arai lokookeng a Yanai, alo arai lokookeng a Yosep, alo arai lokookeng a Matatiya, alo arai lokookeng a Amos, alo arai lokookeng a Naum alo arai lokookeng a Esili, alo arai lokookeng a Nagai, alo arai lokookeng a Maat, alo arai lokookeng a Matatiya, alo arai lokookeng a Semei, alo arai lokookeng a Yosek, alo arai lokookeng a Yoda, alo arai lokookeng a Yoanani, alo arai lokookeng a Resa, alo arai lokookeng a Serubabel, alo arai lokookeng a Sealitel, alo arai lokookeng a Neri, alo arai lokookeng a Meliki, alo arai lokookeng a Adi, alo arai lokookeng a Kosam, alo arai lokookeng a Elimadam, alo arai lokookeng a Eri, alo arai lokookeng a Yochua, alo arai lokookeng a Elieser, alo arai lokookeng a Yorim, alo arai lokookeng a Matati, alo arai lokookeng a Lawi, alo arai lokookeng a Simeon, alo arai lokookeng a Yuda, alo arai lokookeng a Yosep, alo arai lokookeng a Yonam, alo arai lokookeng a Eliakim, alo arai lokookeng a Melea, alo arai lokookeng a Mena, alo arai lokookeng a Matata, alo arai lokookeng a Natan, alo arai lokookeng a Daudi, alo arai lokookeng a Yese, alo arai lokookeng a Obed, alo arai lokookeng a Boas, alo arai lokookeng a Salimon, alo arai lokookeng a Nachon, alo arai lokookeng a Aminadab, alo arai lokookeng a Adimin, alo arai lokookeng a Arin, alo arai lokookeng a Esiron, alo arai lokookeng a Peres, alo arai lokookeng a Yuda, alo arai lokookeng a Yakobo, alo arai lokookeng a Isaka, alo arai lokookeng a Aburaam, alo arai lokookeng a Tera, alo arai lokookeng a Naor, alo arai lokookeng a Serug, alo arai lokookeng a Reu, alo arai lokookeng a Peleg, alo arai lokookeng a Eber, alo arai lokookeng a Chela, alo arai lokookeng a Kainan, alo arai lokookeng a Aripakisad, alo arai lokookeng a Chem, alo arai lokookeng a Noa, alo arai lokookeng a Lamek, alo arai lokookeng a Metusela, alo arai lokookeng a Enok, alo arai lokookeng a Yared, alo arai lokookeng a Malaleli, alo arai lokookeng a Kainan, alo arai lokookeng a Enoch, alo arai lokookeng a Seti, alo arai lokookeng a Adam, alo arai lokookeng a Akuj. Abonguni Yesu alo Yorudan elomarit Etau a Akuj ileleba, toreea ngesi Etau a Akuj nariet, ni eningio ngesi Ekipe a ngirwa a ngitomwon-omwon. Na aronitor Yesu ngirwa ngulu daang, abu akoro tanyam ngesi na adaunotor ngirwa ngulu. Tolimok Ekipe ngesi tama, “Ani kirai iyong Lokookeng a Akuj, kibele chene ngamoru nugu toliworos akimuj.” Tatachak Yesu ngesi tama, “Igiritae nakitab a Akuj kona, ‘Nyeyari itwaan a akimuj bon!’ ” Toriko Ekipe Yesu ni ikeuna, kidodik ngesi atipei ngapolosio daang a akwap. Tolimok Ekipe Yesu tama, “Kainakini ayong iyong agogongu naga ka ebarit logo daang, kainakinio kolong ayong daang, kaneni apedori ayong ainakin itwaan ni asaki ainakin. Ibore en daang eliwor ikon kilip iyong ayong.” Tatachak Yesu ngesi tama, “Igiritae kona, ‘Kilip Ekapolon lo erai Akuj kon sodi tosub etich keng bon!’ ” Sodi toriko Ekipe ngesi Yerusalem kitowo ngesi analem a Akai a Akuj tolimok tama, “Ani kirai iyong Lokookeng a Akuj, kimasar kwap kane. Kainyo igiritae kona, ‘Emeuni Akuj ngimalaikae keng kitochoikis iyong.’ Ebala nabo dang, ‘Kikamunete kesi iyong a ngakan kech nyenang amoru akeju kon.’ ” Tatachak Yesu ngesi tama, “Igiritae kona, ‘Nyiining Akuj Ekapolon na erai Akuj kon.’ ” Ani erumori Ekipe akining Yesu a ngirotin kadaang, abu ngesi toisik Yesu wadio. Tobongo Yesu Galilaya eyei agogongu a Etau a Akuj nikeng. Tokeikin ngakiro keng neni daang. Etatami ngesi anakais ana Atuk, kipuruut ngitunga daang ngesi. Tolot Yesu lore a Nasaret nikolong apolounio, ani akolongit na Sabato tolot kai a Atuk loger lopalem sek. Abu ngesi tonyou akisomare ngagiran sodi nakinae ngesi akitab na a ekadwaran Isaya. Kiwolo ngesi akitab tangau ni igiritae atamar, “Eyei Etau a Ekapolon nikang, kapia ngesi ayong, sodi etatamea Ngakiro Naajokak a Akuj lokebootok. Kamea ngesi ayong alimokin luenan atamar elachakinio kesi, ka angaar ngakonyen a ngimuduk, ta alachakin lu isibuusikinito ngimoe kech, ka alimor atamar anang ekaru lo eyuunea Ekapolon ngitunga keng.” Togol Yesu akitab, nak ekiyaka, sodi kiboikin. Topochokis ngitunga daang lu ayakasi kai a Atuk ngesi ngakonyen. Kisian ngesi kesi ebala, “Eyookinosi ngagiran nugu akolongit na, kona tete iirareta esi isomao.” Apot ngitunga daang kipuro ngesi nabo tatalasi ngakiro naajokak na eruoro ngesi. Tamasi kesi, “Meere lo lokookeng a Yosep a?” Tolimok Yesu kesi tama, “Ayeni atamar ilimunete esi ngakamatak na ebalasi, ‘Kitedek emuron bon.’ Nabo itamarete esi ayong, ‘Tosub alore kon kalo nguna ngoon isubi alo Kaperinaum.’ ” Kalimokinit esi atamar, “Nyelimoritae ekadwaran a Akuj alore a adakar keng. Topupokinae esi ayong: Kalimokinit atamar ayakasi ngapuseru nakaalak Isirael ngirwa lukolong a ekadwaran a Akuj Elija, na angopea akiru ngikaru nguuni ka ngilapio ngikan-kapei, bunio eron a akoro loaronon noi. Apon Elija nyeemear tani ni eyei apei kanguna alo Isirael, mati ni a apuserut a apei ana alomit Sarepita, nakwap a Sidon. Nabo ayakasi ngitunga lukaalak lu adeakasi enomokere alo Isirael ngirwa lu a ekadwaran a Akuj Elicha, nakaneni amam kesi tani epei lo apon kitojokae mati Naaman lo a akwap a Siria.” Ani iirarete ngitunga lu ayakasi kai a Atuk ngakiro nguna, tongoa kilelebunos. Tonyout kibwatasi Yesu tachadasi alore, ani enangete kidiama aukot na a ngirerea, tasaka akikokoriyor Yesu kaneni. Nakaneni abu Yesu kitor kiding ajore tolot. Tolot Yesu nakwap a Galilaya tanang lore lo anyaritae Kaperinaum, ni etatamea ngitunga akolongit na a Sabato. Tatala ngitunga ekitatame keng, kainyo etatami ngesi a apolou anakationon. Ayei itwaan ni akoporito ngikerep tooma kai a Atuk, abu ngesi kirema tama, “Wae! Eya iyong ngakiro ka sua Yesu lo a Nasaret a? Ibu iyong amunyar sua a? Ayeni ayong atamar iyong ngesi ngae: Irai iyong emeuna lo italeuno a Akuj!” Todungok Yesu Ekipe tama, “Kililing sodi tolom anitwaan kaen!” Tadakak Ekipe itwaan ngini kwap kiding ajore sodi topud Ekipe anikeng emam naaronok asubea ngesi. Tatalasi ngitunga daang ngakiro nguna tolimonokinos make tamasi, “Anukiro nugu? Kainyo edungonokini itwaan en ngipean aniationon atamar topudutu anitwaan sodi topudut dir!” Apot ngakiro a Yesu tokeikinos akwap ngina wadaang. Topud Yesu alokai a Atuk toloma nawi a Simon. Erakarit nakamuran a Simon arukum lokojokon, sodi tolimokinae Yesu ngakiro a elekes keng. Tolot Yesu towo alodiye nakamuran a Simon. Tolimok arukum ngina atamar toisik itwaan ngini, tojoker nakamuran a Simon atipei tolomak akisimuj kesi. Adooyoret a akolong, apot daang lu adeakasi ngipaalon kech ngidekesinei ngikaalak, yaut kesi nia Yesu kitojokae. Kidokok ngesi kesi daang ngakan kitangalek. Tani ngipean apot topudut alotunga iremasi, ebalasi, “Irai iyong Lokookeng a Akuj!” Kikilanak Yesu daang nyiisuruorik tani epei kainyo ayenete kesi atamar Yesu ngesi erai Kiristo. Ani iwalari, torotok Yesu alore tolot nariet. Apot ngitunga tolomakis akisak ngesi, ani eanyunete, tasaka akiratakin ngesi nyeelot wache. Nakaneni tolimok Yesu kesi tama, “Ejoikinit ayong etatami Ngakiro Naajokak a Apolou a Akuj tani alorerea aluche, kainyo nguna kolong kameuni ayong Akuj akisub.” Sodi kitatam ngesi Anakais a Atuk a akwap a Yudea. Akolongit apei, awei Yesu alokwaas a Anam a Genesaret, sodi pot ngitunga kijukunos nikeng kiriama ngesi esakete akiirar ngakiro a Akuj. Kingolik Yesu ngatubwae ngaarei ewaasi alokwaas a anam, amam ngikechiemak a ngikolia anatubwae kanguna, alosito kesi akilotar ngipuutei kech. Toloma Yesu natubwa apei, na arai aka Simon, tolimok ngesi tama, “Kijuka tachadar a lokwaas wadio. Kiboikin Yesu natubwa kitatam ngitunga.” Na arumorea Yesu ekiruor, tolimok ngesi Simon tama, “Kijuka atubwa tanang nituluk, sodi tachakakis ngipuutei kus nanam kichiemuneta ngikolia.” Tatachak Simon tama, “Eketataman, kisub sua etich loationon akwaar kiiya kiwala, nakaneni emam ibore kirum jik. Tokona bocha ani kibala iyong neni, achakakini ayong ngipuutei nanam.” Apot tachakakis ngipuutei nanam, kirumut ngikolia lukaalak noi lokojokon, tonyout tani ngipuutei kech achila. Sodi apot tanyarata talopae kech lu ayakasi natubwa nache atamar pot kingarakis kesi. Apot kesi kileleba ngatubwae naarei nguna ngikolia pich, taapik tani ngatubwae akiibakin nakipi. Ani ingolikini Simon Petero ngakiro na asubasi abu ngesi toriedik alongaren Yesu tolimok tama, “Ekapolon, tachadar iyong anikang, kainyo arai ayong itwaan nikasechan!” Apot ngakiro a ngikolia alukaalak erumunete kesi tatalasi ngesi ka luche arukitotor. Tatalasi ngakiro nguna tani Yoana ka Yakobo, ka talokookeng a Sebedayo lu arukito ka Simon. Tolimok Yesu Simon tama, “Nyiem iyong, napei tokona jik, irumete esi ngitunga loger lo irumere ngikolia.” Kijukasi ngatubwae lokwaas a anam, kimiekis ibore daang kiwapakis Yesu. Achekolongit ayei Yesu lore eche lo ayei itwaan ni adeaka enomokere. Ani ingolikini ngesi Yesu, tadakakin bon ngaren Yesu kimaima tama, “Ekapolon, ani kisaki iyong akitangalekin ayong ipedori!” Kitorwaa Yesu akan keng tatap ngesi. Tolimok tama, “Asaki ayong akitangalekin iyong, tojoker!” Atipei tangalek enomokere a itwaan kangini. Kichikichik Yesu ngesi tama, “Nyiilimok itwaan tani ipei, nakaneni kape lomuron a akai a Akuj kiseme ngesi iyong, sodi tolem akipeyoet loger lokolong alimunitor Musa, toyenea itwaan daang atamar ijoker iyong.” Nakaneni abu akiroit a Yesu tokeikin wadaang, sodi bu asepich a ngitunga nikeng akiirar ngakiro keng, nabo kitangalekinoe ngidekesinei kech. Nakaneni aloseene ngesi nariet ni elipea Akuj. Akolongit apei na etatamea Yesu ngitunga, ebooyete Ngiparisayo ngiche ka ngiketatamak a etal. Aponito kesi alorerea kadaang a ngakwapea a Galilaya ka Yudea ta Yerusalem. Ayei agogongu a Akuj nia Yesu sodi kitangalekinio ngesi lu adeakasi. Sodi apot ngitunga ngiche kilepulepuut itwaan niangwalan eperi alojemu, apot tasaka ayaar ngesi tooma kai, kiteperikis ngesi ngaren Yesu. Nakaneni kotere asepich a ngitunga na alal, apot nyeeriamut nikaaloman ni eyaareta ngesi tooma. Apot todokasi kilepulepoosi kidiama akai, topedo inaa, kiyoliut itwaan ngini iteperikinitoe lojemu keng, kiwaakinae ngesi ngaren Yesu lo ayei kiding ngitunga. Na engolikinea Yesu atamar enupito kesi lokojokon, tolimok ekile ngolo tama, “Ekile, arimakin ngasechesea kon.” Apot ngiketatamak a etal ka Ngiparisayo kingitanaros make ebalasi, “Ngae en imenyi Akuj loger lo en? Emam itwaan epedori arimakin ngasechesea mati Akuj bon!” Kona ayenea Yesu na etamete kesi, tolimok kesi tama, “Nyo itameta esi ngakiro na ikote nguna? Nyoni etieno, alimokin ekangwalan atamar, ‘Arimakin ngasechesea kon’ kori atamar, ‘Tonyou torotok?’ Asaki ayong esi toyena atamar eyei Lokookeng a Itwaan agogongu anakwap na erimakinea ngasechesea.” Tolimok ekangwalan ngolo tama, “Kalimokinit iyong atamar, ‘Tonyou tolema ejemu kon, tolot nawi!’ ” Tonyou itwaan ngini atipei alongaren kesi daang tolema ejemu keng losek aperio, tolot nawi, ipuruunit Akuj. Tatalasi ngitunga daang ngakiro nguna tobul noi! Kipuruut Akuj ebaasi, “Ekoe! Kingolik akolongit na ngakiro naapolok!” Ani erumor nguna, torotok Yesu sodi taanyunga eketubukon echur lo anyaritae ekiro keng Lawi, ibooyi alokai ana ediaununea ngesi ngaropiyae a echur. Tolimok Yesu ngesi tama, “Kiwapakinae ayong.” Tonyou Lawi, toisik ibore daang, kiwapak ngesi. Sodi tosubak Lawi akimuj alokai keng kisimuj Yesu, ayakasi neni ngiketubukok echur lukaalak ta ngitunga luche ebooyete ka ngesi imujete. Apot Ngiparisayo ngiche ka Ngiketatamak a etal lu arukito ka kesi kingunungunokis kingita ngirukitos a Yesu tamasi, “Nyo imujeta esi ka ngiketubukok echur ka ngikasechak?” Tatachak Yesu kesi tama, “Ngitunga lu nyedeakasi nyesakete eketedekan, lu edeakasi kesi esakete. Nyebuno ayong anyarare luajokak, abuni anyarare ngikasechak, sodi tolunga ngasechesea kech.” Tolimokis ngitunga ngiche Yesu tamasi, “Ngirwa ngiche, aroneenete ngirukitos a Yoana akimuj nabo ilipeenete dang, tani ngirukitos a Ngiparisayo esubete loger ngolo, abe imujete bo ngirukitos kon nabo tamaase!” Tatachak Yesu kesi tama, “Itamito esi atamar nyimujete ngitunga lu enyaraunitae nakuuta akimuj eroko erukito kesi ka ekeutan a? Mam, nyikote nguna neni! Nakaneni enangi akolongit na erikorere ekeutan anikech sodi toroneeneto ngirwa ngulu.” Tolimok Yesu kesi nabo ngakitadapet nu: “Emam itwaan echiluni eworu lokitetet tadapak loworu longorot. Ani kesub itwaan kongina, echilichilar eworu lokitetet, nabo awaru na achilun, nyikwaanikin ka nangorot. Kori emam tani itwaan ipei ni epedori akiturakin emuna lo aringa epurio, kiturak lotuo longorot. Ani kiturak, ebwangabwangari emuna etuo ngolo, sodi tobukor emuna, nakaneni kinyasun etuo. Nakaneni iturakinio emuna lo aringa epurio lotuo lokitetet! Kori emam tani itwaan esaki emuna lo aringa epurio, kengoba longorot. Elimuni tama, ‘Longorot ngesi ejok.’ ” Kitoro Yesu ka ngirukitos keng lomanikor a ngimomwa akolongit na a Sabato. Tolomasi ngirukitos keng tobilut ngakies a ngimomwa toninata, tanyama. Tolimut Ngiparisayo ngiche tamasi, “Nyo esubeta ngirukitos kon ngakiro na engeritoe alotal esubio akolongit na a Sabato?” Tatachak Yesu kesi tama, “Nyisoma esi nakolong asubi Daudi ka ngitunga keng na anyamea akoro a? Alomari ngesi kai a Akuj sodi tolem ngamugati na epeyokinitere Akuj, tanyam sodi nak tani ngirukitos keng. Arono alotal itwaan iche enyami ngamugati nguna, araakasi ngimurok a akai a Akuj make achamakinitae enyamete.” Tolim Yesu ngakiro narumoret tama, “Lokookeng a Itwaan ngesi erai Ekapolon a Sabato.” Tolot Yesu akolongit ache a Sabato kai a Atuk kitatam ngitunga. Ayei itwaan neni ni angwalit akan na aloteten. Asakete ngiketatamak a etal ngiche ka Ngiparisayo aripun ibore idio ni ichwangakini Yesu topedoreta akititakin, nakaneni eteete kesi ngesi ediye esakete akingolikin kitojoki ngesi itwaan akolongit na a Sabato. Ayeni Yesu na etamete kesi, tolimok ngesi itwaan ni angwalit akan tama, “Tonyou bu ngaren ne. Tonyou ekile ngolo tolot towo kaneni.” Kingit Yesu kesi tama, “Kengisit esi: nyo echamakinitae alotal esubio akolongit na a Sabato? Akingarakin kori akiwan? Akiteyar itwaan kori amunyar?” Torei ngesi tokienyik kesi daang dio alimokin itwaan ngini tama, “Kitorwaa akan kon.” Na etorwaarea itwaan ngini akan keng, tojoker. Tongoa kesi lokojokon noi, totuko esakete aanyun ibore ni esubakineta kesi Yesu. Tolot Yesu esaa ngolo moru akilip, kiboi ngesi kaneni akwaar kiiya kiwala, ilipit Akuj. Na ewalarea, tanyarau Yesu ngirukitos keng nikeng, toseu ngitomon ka ngiarei tanyara kesi ngimeanara: Simon, (lo alimokini Yesu ekiro be Petero) ka lokaatokeng Andirea, Yakobo ka Yoana, Pilip ka Bartolomayo, Matayo ka Tomas, ka Yakobo lokookeng ka Alipayo ka Simon (lo a atukuoru a Salote), ka Yuda lokookeng a Yakobo ka Yuda Isikariote lo erai ngesi arikokini Ekapolon Yesu ngitunga. Na akokoriunioto Yesu ka ngimeanara keng alomukura, towo Yesu anatorite ka ngimeanara keng lukaalak. Ayei neni asepich a ngitunga alu aponito alowaitin kadaang a Yudea, ka Yerusalem ta lokwaasea a ngadakarin a naapolok ka ta Tiro ka Sidon, apote kesi daang akiirar akiroit a Yesu nabo asakete lu adeakasi akitojoko. Kitojokae ngitunga daang lu ebapito ngipean. Asaki asepich daang a ngitunga akitap Yesu, kainyo ayei agogongu na apedori akitangalekin kesi daang nia Yesu. Tokienyik Yesu ngirukitos keng tama, “Kipiaritae esi ngikebootok; kainyo erai apolou a Akuj akus! Kipiaritae esi lu kinyamit akoro tokona. Kisimwonio esi! Kipiaritae esi lu igorosi tokona, ikieniyete esi. “Kipiaritae esi nakiremokinotor ngitunga kitotiakasi, kitongero jik kori kitoron esi kotere Lokookeng a Itwaan! Talakaros na esubatar nguna daang, kichuro ilakara, kainyo eyei ebachit loapolon nadis lo kidaritere esi. Tani kolong taapakech asubeta ngikadwarak a Akuj ngakiro napei nguna. “Oitiakoi! Abe etioko nginyas lu ianyunete esi lu ibarito tokona, kainyo emam ibore echanasi esi tokona. Oitiakoi! Abe etioko nginyas lu ianyunete esi lu ijakaanito tokona, kinyami esi akoro! “Oitiakoi! Abe etioko nginyas lu ianyunete esi daang lu tokona kipuruunitoe, kainyo epuruunito tani kolong taapakus ngikadwarak a Akuj lukaliokok. “Nakaneni kalimokinit esi daang ngulu kipupete, tominakisi ngimoe kus, tosubeta naajokak ngulu kiremokino esi. Topiasi ngulu kilamete esi, kilipakisi Akuj ngulu kiboliatar esi. Ani kibap iyong itwaan namatengen, toreik nache dang kibap, na elemarea itwaan eworu kon lo alokidiama, nak ngesi tani lo alotooma. Nak itwaan daang ibore ni kilipit iyong, ani kelema itwaan ibore kon, nyiisak atamar kinyakak ngesi iyong. Tosubeta luche nguna isakete esi kesi kitosubeta esi. “Naiminatar esi lu kiminasi esi make, ikokinio esi kipiario ai? Eminasi tani ngikasechak lu eminasi kesi! Ani kisubeta esi naajokak lu kisubeta esi naajokak, ikokinio esi kipiario ai? Esubete tani ngikasechak nguna! Ani kipotosi esi ngiboro kus nakis lu iyenete esi atamar epedorete akitach, ikokinio esi kipiario ai? Eareenete tani ngikasechak amicha ani eya luche, esakete tatachakinae lu eriyan ka lukolong kech alemario! Nyiikokis neni, ejoikinit iminakinete ngimoe kus tosubeta naajokak, na iinakineta ibore warasi nyiisaka atamar tatacha kesi. Kiinakini esi ebachit lotiapolon nakaneni iliworosi ngide a Akuj a Naapolon Noi, kainyo asubea ngesi naajokak lu ejamuarito ngesi ka luaronok. Min akisienut nikus kona eyakar Apakus akisienut. “Nyiirirata luche, sodi nyikirira esi Akuj. Nyiitoron luche, sodi nyikitoron esi Akuj. Torimakisi luche, nakaneni kirimakini esi dang Akuj. Kipotosi ngiboro kus nakis luche, kiinakini Akuj esi ngiche lukokaalak, kilelebikin sodi kipichun ngakan kus tongop kona itingete. Etiae lo iinakinete esi itwaan niche, ngesi ngolo kiinakinea Akuj esi.” Tolimok Yesu kesi a ngakitadapet tama, “Nyepedori emuduk akirik emuduk loche, ani cha keriko echakakinosi daang nakipany. Emam itwaan ni itatamio ni idwangit eketataman keng, nabo ngini itatamio na erumorea nguna itatamio, ikwaanikin ka eketataman keng. “Nyo iteeo iyong ibore niichi anakongu alokaatokon, nakaneni nyitee iyong ibore niapolon ni eyei nakongu kon? Kori ikokini iyong ilimokini lokaatokon tama, ‘Lokaatokang, kimiek kare atolema ibore niichi ni eyei nakongu kon,’ tarai nyitee iyong ibore niapolon ni eyei nakongu kon ai? Iyong ekamodeanan! Tolema mono ekingaren ibore niapolon ni eyei nakongu kon, topedorea akingolikin ibore niichi ni eyei nakongu alokaatokon tolema. “Emam ekitoe loajokon lo ekoniuni ageor naaronon, kori ekitoe loaronon lo ekoniuni ageor naajokon. Ekitoe daang eyeneeneo kotere ageor na ekoniuni, nyipedori iyong alemun ngameyana alotiir, kori nyipedori alemun ngamusabib alosekon. Itwaan niajokon aloger a ajokis a etau keng, esubi ngakiro na etakanete ejokak. Itwaan niaronon aloger a aronis a etau keng esubi ngakiro na etakanete atamar eroko, kainyo elimuni akituk a itwaan nguna eupiarito etau keng. “Nyo kinyaritotor esi ayong, ‘Ekapolon, Ekapolon’, nakaneni nyinupito nguna kalimokinit ayong esi? Itwaan daang ni ebuni nikang, kiira ngakiro kang nabo kiwapak, kedodikini ekikwaane keng. Ikoni ngesi itwaan ni aduki akai, tobok ngesi noi kiilok ngateak lokojokon. Na eponeta ngakalel tananga akai a agogongu, nyeukor akai ngina kainyo edukuk kolong lokojokon. Nakaneni ngini cha daang iirari akiroit kang sodi nyiiwapak, ikwaan ka itwaan ni aduki akai nalup na eringa nyeboka lokojokon. Na anangeta ngakalel na ekingaren tarabokoikin atipei, tarabokoikin niaronon noi!” Na arumorea Yesu akisuruor ngitunga ngakiro nguna daang, abu toten Kaperinaum. Ayei ekarikon a ngasigerea a Ngiroma lo adeaka ekasuban etich lo amina ngesi noi. Adikino ekasuban etich ngolo tani etoani. Ani iirari ekapolon ngolo ngakiro a Yesu, tomea ngikasukou a Ngiyaudi nia Yesu kepedori abunere kitangalek ekasuban etich keng. Na ananguneta nia Yesu, apot kimaimaa noi tolimokis tamasi, “Ejoikinit itwaan en dir ingarakini iyong, kainyo emina ngesi ngitunga a ebukut yok nabo kidukok ngesi sua akai a Atuk.” Sodi kirukosi Yesu ka kesi aapei. Na anangeta diye awi a ekapolon a arieng kangolo, tomeu ngesi talopae keng pot alimokin Yesu akiroit ebalasi, “Ekapolon, tojongo akituburuna. Nyitemokino iyong ibuni tolom kai kang, nyitemokino tani ayong abuni nikon. Tolim tokona iyong akiroit sodi tojoker ekasuban etich kang. Ayong dang arai lo atupit ngikapolok luche, nabo eya ngasigerea na aweikinit ayong. Na alimokinea logo atamar, ‘Kape!’ tolot. Kori na alimokinea ngol atamar, ‘Bua!’ bu. Nabo na alimokinea ekedalan kang atamar, ‘Tosubak kona!’ sodi tosubak loger ngolo.” Tatalasi Yesu ngakiro nguna daang na eirarea, sodi torei kingolik asepich a ngitunga na ewapit ngesi, tolimok tama, “Nyeanyuna ayong nakanuan tani alo Isirael itwaan ni enupit noi loger logo!” Na abongoreta ngitunga lu ameunitae nawi a ekapolon, apot toriamut ekedalan ngolo kejoker. Ani ekisidi, abu Yesu tolot lore eche anyaritae Nain, arukito ngesi ka ngirukitos keng ta asepich a ngitunga na ewapit kesi. Na anangunea lorot lolomunet lore, ayakasi neni ngitunga lu elepilepito itwaan nikatoan esakete apudorea nikalapatan. Arai ngesi lokookeng a apuserut lo edounitoe erai epei bon. Arukito ngesi ka asepich a ngitunga a ere kangolo. Na engolikinea Ekapolon apuserut ngina, abu kisieni ngesi, tolimok tama, “Tojongo akigoro.” Tolot Yesu taapia nibore ni elepilepitoe tatap, sodi towaa ngitunga lu adakito. Tolim Yesu tama, “Edia, kalimokinit iyong atamar tonyou!” Abu edia lokatoan ngolo tonyou kiboikin tolomak akiruoro, sodi kipoto Yesu ngesi nak itiokeng. Tobul kesi daang, kipuruut Akuj ebalasi, “Abu ekadwaran a Akuj loapolon atakanuu anikosi!” Tolimut nabo tamasi, “Abu Akuj ayuun ngitunga keng!” Tokeikin ngakiro na a Yesu nugu nakwap a Yudea ka ngiwaitin keng daang. Na alimokineta ngirukitos a Yoana ngesi ngakiro nguna daang, sodi tanyarau Yoana ngiarei kech tomea kesi nia Ekapolon Yesu akingit ngesi ebalasi, “Iyong ngesi kolong abala Yoana ibuni, kori ejoikinit sua kidari itwaan iche?” Na ananguneta kesi nia Yesu, tolimokis tamasi, “Kimeunit sua Yoana Ekebatisan akingit iyong atamar irai iyong ngolo abala ngesi ebuni, kori kidari sua itwaan iche?” Ani esaa lopei ngolo, kitangalek Yesu ngitunga lukaalak ngilekesio ka ngidekesinei, tani lu ebapito ngipean luaronok, nabo tangaa ngakonyen a ngimuduk kingolikis akwap. Tatachak Yesu ngimeanara a Yoana tama, “Tobongosi kisisakisi Yoana ngakitoodikinet na ingolikis ka ngakiro na iirasi. Ngimuduk engolikis akwap, ngikangwalak eloose, lu edeakasi enomokere etangalekin ajoketa, epupete ngikinim, eteyarun ngikatoak, nabo itatamio ngikebootok Ngakiro Naajokak. Epiarit Akuj noi itwaan ni nyeketongoyae ayong!” Na arotokinioto ngimeanara a Yoana, tolomak Yesu akisuruor asepich a ngitunga ngakiro a Yoana. Tolimok tama: “Nailooso esi nia Yoana na ayakar nariet, isakete esi akingolikin nyo? Akuyen na eloiloi ekuwam a? Nyo ilosito esi akingolikin? Itwaan ni anapit ngiworui lukaanikak lu esiritoe a? Toyena atamar lu enapito loger ngolo nabo lu ibooyete ejakaanito ngirwa daang ibooyete anakais a ngikapolok! Tolimokinae kare, nyo kolong isakete esi akingolikin? Ekadwaran a Akuj a? Ee, nakaneni kalimokinit atamar ingolikis esi lo idwangit tani ekadwaran a Akuj. Kainyo Yoana ngesi lo elimunit Akuj anagiran ebala: ‘Ngesi erai emeanara kang, ameari ngesi kingarenik iyong tolot tosubak erot kon.’ ” Kalimokinit esi atamar, “Alotunga kadaang alu edoun nakanuan, emam lo epolot idwangit Yoana. Tani ikoni neni, ngini edit noi Anapolou a Akuj, epolot idwangit Yoana.” Ani iirarete ngitunga daang ka ngiketubukok echur ngakiro nguna, kipuruut Akuj kainyo anupito kesi ngitalio lu a iteni a Akuj, sodi kibatisa Yoana kesi a ngakipi. Nakaneni tongero Ngiparisayo ka ngiketatamak a etal ngitalio a Akuj, towout tani esaki Yoana akibatisare kesi a ngakipi. Torubak Yesu iruoro ebala, “Tokona, nyo esikwaanea ayong ngitunga a ngirwa kalu? Ikote kesi nyo? Ikote kesi ngide lu ibooyete anigielet ngiboro. Enyaraate epewae kech luche tamasi: ‘Kipot sua atokutakisi aburuch, nakaneni nyimomwarikina esi! Kipot atosutuonokisi, nakaneni nyikalouno esi!’ Abuni Yoana Ekebatisan eroneene nyeemasi emuna lo epuritoe, tamasi esi, ‘Ekoporito ngesi ngikerep!’ Abuni Lokookeng a Itwaan imuji nabo tamasi dio tamasi esi, ‘Kingolikisi itwaan en a! Edakana ngesi nabo ematana emuna lo epuritoe, erai nabo ngesi epae a ngiketubukok echur ta ngikasechak!’ Nakaneni aosou a Akuj idodiunitae atamar erai aka iteni ani eya ngulu daang aanyut aosou ngina.” Kitepeyon itwaan ipei ni arai Eparisayot Yesu anawi keng kisimuj. Sodi tolot Yesu nawi keng kiboikin kimuj. Alore kangolo, ayei aberu apei na arai akasechan lokojokon. Na eirarea atamar imujete Yesu aapei ka Eparisayot anawi keng, abu ngesi yau echupa lokooyen enyaritae alabasita, ileleba akimiet nakaakunyon. Bu towo alodiyete ngakejen a Yesu igoro, nabo kidokanakinos ngakiyo keng nakejen a Yesu. Sodi kisuta ngakejen a ngitim keng tonuak sodi kiwasak akimiet. Na engolikinea Eparisayot lo etepeyonit Yesu nguna, abu kitam bon tama, “Arai tarai ekile lo dir ekadwaran a Akuj, keyenit atamar aniberu na etapit ngesi naga, keyeni atamar erai ngesi akasechan!” Tolimok Yesu ngesi tama, “Eyakasi ayong ngakiro na asaki alimokin iyong.” Kiik Simon tama, “Awaa, Eketataman, tolimokinae robo.” Tolim Yesu tama, “Ayei itwaan ni ayakasi ngitunga ngiarei lu aarito amicha keng. Emichat ngesi epei ngadinari ngamiae ngakan, emichat loche ngadinari ngatomwon-kan. Amam tani ipei ni apedori atachakin ngesi amicha keng, sodi torimak ngesi kesi daang kwasiarei ngamichae keng. Aluarei kangulu, ngae emina ngesi noi?” Tatachak Simon tama, “Etamit ayong atamar lo arimakinio amicha nakaalan.” Tolimok Yesu ngesi tama, “Ilim iyong iyook.” Sodi torei ngesi nia aberu tolimok Simon tama, “Ingolik iyong aberu naga? Abuni ayong nawi kon, nakaneni nyeinakina iyong ayong ngakipi elotarea ngakejen kang, nakaneni elota ngesi ngakejen kang a ngakiyo keng, nabo kisuta a ngitim keng. Nyimala iyong ayong kitonuak, nakaneni idodiunit ngesi arimatoi keng anikang ani enuanakinea ngesi ngakejen kang jiik natakae abunio ayong. Nyiwasakina iyong akimiet nakou kang, nakaneni ewasak ngesi ngakejen kang akimiet nakaakunyon. Kotere nguna kalimokinit iyong atamar, idodiunit ibore ni idodiunitor ngesi amina lokojokon noi kongina atamar arimakin ngasechesea keng nakaalak. Itwaan cha daang ni arimakin wadio, idodiuni amina nadiochichi.” Sodi tolimok Yesu aberu ngina tama, “Arimakin ngasechesea kon.” Tolomakis ngitunga lu erikato emeesa alimonokin make tamasi, “Ekoe, ngae itwaan ni epedori tani arimakin ngasechesea en?” Nakaneni tolimok Yesu aberu tama, “Kiteyar iyong anupit kon, kape nikaalimon.” Adaunet a ngirwa a ngiche, kitor Yesu nadakarin ka ngirerea, itatami ngitunga Ngakiro Naajokak a Apolou a Akuj. Arukito ka ngirukitos keng lutomon ka ngiarei. Arukito kesi ka ngaberu ngache dang nasek etwarakinio ngipean kitangalekinoe ngidekesinei: araakasi kesi Mariam na arai ekiro keng Magadalene na etwarakinio ngipean lukan-kaarei anikeng, nabo Joana, aberu a Chusa, lo arai ekasuban etich ani etubeeneo Erode ekies ka Susan ta ngaberu nache nakaalak na engarakinito Yesu ka ngirukitos keng a ngiboro kech. Pot ngitunga nia Yesu alowaitin kadaang a ngirerea, ani echunun asepich a ngitunga nikeng, tolimok Yesu kesi ngakitadapet nugu tama: “Ayei kolong itwaan ni alosi akitare ngikinyam keng. Naelakinea ngesi ngikinyam mana, kialakin ngiche lorot, apon kipudae, sodi pot ngikieny kidepasi. Apot nabo ngiche kialakin nalup na ewarawarakina kidiama natabab, ani na arupuneta ngimomwa, apot tooko kainyo peasisik ngalup. Apot ngikinyam ngiche kialakin tooma ngiikwa, sodi toruput ngiikwa ka kesi aapei torida ngimomwa. Nabo apot ngiche kialakin nalup naajokak toruput topolout, tokoniu emwae epei amiat apei.” Tolimok Yesu kesi tama, “Ani keya ngaki nakiiraret, kiira robo!” Ani ingisete ngirukitos a Yesu ngesi eger a ngakitadapet kanguna, tatachak Yesu kesi tama, “Kidodikin esi aosou na a ngakiro anamunonoe a Apolou a Akuj, nakaneni iirarete ngitunga luche a ngakitadapet. Sodi kiteeto nakaneni nyeyenete, topupokis nakaneni nyechoiyarete.” Tolimok Yesu kesi tama, “Eger a ngakitadapet ngesi logo: ngikinyam kesi akiroit a Akuj. Ngikinyam lu ealakinosi lorot ikwaan ka ngitunga lu iirarete, nakaneni bu Ekipe tolema akiroit alotai kech, sodi nyenupa toyuunere. Ngikinyam lu ealakinosi natabab ikwaan ka ngitunga lu iirarete akiroit talakaros, nakaneni nyenupete kesi akiroit ngina lokojokon, enupete cha wadio ani enangi ngirwa lu iningere, sodi tapalikis. Ngikinyam lu ealakinosi lookwa ikwaan ka ngitunga lu iirarete akiroit, nakaneni ngichan a eboyor a akwap ka aminakinit ebari, nyisirichakinete kesi akiroit ngina, nakaneni tongopa ngakiro naajokak anakiroit kangina. Ngikinyam lu ealakinosi nalup naajokak ikwaan ka lu iirarete akiroit kirichakis tonupa jik a ngitai aluajokak, tanaikis jik kileereut ngakiro naajokak aloboyor kech, loger lo ekonio ekitoe ageor. “Emam itwaan inokakini ataa sodi tobuburik atubwa kori kiwaak kwap ekitanda. Iwaakini ni ikeuna, sodi kiteeto ngitunga na elomareta tooma kai. “Kainyo emam ibore ni idaitae ni nyetakanuni, kori ibore daang ni erapap ni nyileereuni sodi kimau akicha. “Tochoikinos robo eger lo ipupete, kainyo itwaan cha daang ni eyei ibore, einakinio ni elal, ani itwaan cha daang ni emam ibore eyei, edemario tani nidiochichi itamit ngesi atamar atingit.” Pot itiokeng ka ngikaitotoi a Yesu nikeng, nakaneni todidinger neni tongopik kesi kona eapiarete nikeng kotere asepich a ngitunga. Tolimok itwaan iche Yesu tama, “Ewaasi itiokon ka talokaatokon anikalapatan esakete akisuruor iyong.” Tolimok Yesu kesi daang tama, “Itiokang ka ngikaitotoi kang kesi ngulu eirasi ngakiro a Akuj kiwapa.” Alomarete Yesu ka ngirukitos keng aapei natubwa akolongit apei, tolimok kesi tama, “Kapana ewaaros atodokasi ekwakaye anam.” Sodi kisiakis akijukakin atubwa nanam. Ani eringa kesi eya nanam, kinapakin Yesu tojotoor. Tokut ekuwam lokaalan ananam, nakaneni kilelebun ngakipi natubwa. Taanyut kesi ngichan lokojokon. Toloto ngirukitos a Yesu nikeng kitokienyut ngesi tamasi, “Ekapolon! Ekapolon! Dikino sua kimunyar.” Tonyou Yesu kikilak ekuwam lo akutunit ka ngitoroi lu akuunito. Toper ekuwam tachakin wadaang chek. Tolimok Yesu ngirukitos keng tama, “Nyaani anupit kus tokona?” Nakaneni tatalasi kesi ngakiro nguna nabo toema sodi tolimonokin make tamasi, “Ani itwaan ikoni ne en? Ikilanakini ekuwam ka ngitoroi sodi topupokis ngesi!” Tananga Yesu ka ngirukitos keng ekwakaye anam a Galilaya nakwap a Ngigerasi. Na atiyaunor Yesu anatubwa, kiriamun ka itwaan ni akoporito ngikerep ni abunit alore. Peanapit ngesi ngiworui ngirwa lukaalak nabo eboyeene ngesi analielin angerit awi. Ani ingolikini ngesi Yesu, kirema lokojokon noi tadakakin nakejen a Yesu, kirema tama, “Eya iyong ngakiro ka ayong Yesu Lokookeng a Akuj a Naapolon noi a? Kemaimai iyong atamar nyikiboliar kare cha ayong!” Alimuni kongina kainyo adungokini Yesu ngipean atamar topudut anikeng. Akoponorete ngesi ngikerep ngirwa ngikaalak, tani keen ngesi a ngiriko ngakejen ka ngakan, angedengedaanari ngesi ngiriko ngulu, kipiiri nariet kotere agogongu a ngikerep kangulu. Kingit Yesu ngesi tama, “Ngae ekiro kon?” Tatachak itwaan ngini tama, “Ekiro kang ngesi legion”, kainyo alomarito ngipean lukaalak nikeng. Kimaimaa ngipean Yesu tolimokis atamar nyechakak kesi nadui nakooyen. Nakaneni nipei neni, ayei atwom nakaalan a ngiputiro adaka akook a emoru. Apot ngipean kimaimaa Yesu tamasi, “Kimiekinae atolomasi loputiro.” Abu ngesi tacham. Sodi topudut ngipean anitwaan kangini, tolomasi loputiro, abu atwom daang kipiiri tachakun anakope toloma tooma nanam, tanyam daang anam. Kingolikis ngikeyokok a ngiputiro ngakiro na asubasi sodi kipiirioto kisisata ngakiro nguna alore ka ngadakarin. Toloto ngitunga aanyun ngakiro na asubakinosi. Pot nia Yesu toriamut itwaan ni etwarakinio ngipean ibooyi anakejen a Yesu, enapit ngiworui nabo tojokak ngitamen keng. Apot kesi daang toema. Apot ngikaanyunak tolimokis ngitunga eger lo etojokere itwaan ni akoporito ngikerep. Sodi apot ngitunga a akwap a Ngigerasi tolimokis Yesu atamar torotok tolot wache, kainyo apot kesi tobul noi. Todoka Yesu natubwa tobongo. Sodi kimaima itwaan ni etwarakinio ngipean Yesu tama, “Kimiekinae ayong erukosi ka iyong!” Nakaneni towou Yesu tolimok ngesi tama, “Tobong iyong nawi kon kisisak ngitunga nguna kisubea iyong Akuj.” Tobongo ngesi kitor kiding ere elimonokini ngitunga daang nguna asubea Yesu ngesi. Na abongorea Yesu lokwaas loche a anam, abu asepich a ngitunga kisiriam ngesi, kainyo edarito ngesi atamar bu. Sodi todolu ekile lo enyaritae Yairo, arai ngesi ekapolon a akai a Atuk. Tadakakin ngesi nakejen a Yesu, kimaima Yesu noi ebala, “Bua apana nawi kang. Kainyo nakookang na erai apei bon edeak ekot akitu.” Arai ngikaru keng ngitomon ka ngiarei. Ani eringa Yesu elosi, ejukanarete ngitunga ngesi alowaitin kadaang. Ayei neni aberu na echana noi ani aropiyoto ngaakot ngikaru ngitomon ka ngiarei. Kisunya ngesi ngiboro keng daang alomurok, nakaneni amam tani itwaan ipei ni apedori akitangalekin edeke keng. Bu ngesi erukito ka asepich a ngitunga toropun alokaku a Yesu, sodi tatap ngesi echilet a eworu a Yesu, atipei totubos ngaakot. Kingis Yesu tama, “Ngae katapi ayong?” Topega ngitunga daang, sodi tolimok Petero tama, “Eketataman, kiriamito iyong ngitunga lu daang nabo kijukanarete.” Nakaneni abu Yesu tolim tama, “Katapit ayong itwaan, ayeni ayong dir kainyo apudo agogongu na akitangalekinet anikang.” Toyen aberu ngina atamar nyapedori ngesi akimunon ngakiro nguna, sodi bu emarani, tadakakin kwap ngaren Yesu. Dio kisisak ngitunga daang ibore ni atapea ngesi Yesu, ka eger lo angalekinio ngesi atipei. Tolimok Yesu ngesi tama, “Nakoku, kiteyar iyong anupit kon. Kape nikaalimon.” Ani eringa Yesu iruoro nguna, bu emeanara anawi a Yairo. Tolimok ngesi Yairo tama, “Atoana nakookon, nyiichan Eketataman nabo.” Nakaneni kiira Yesu ngakiro nguna tolimok Yairo tama, “Nyiem, tonup iyong, ejoker ngesi.” Na anangea ngesi kai, nyechamuna ngesi ngitunga elomarete ka ngesi tooma, mati Petero ka Yoana ta Yakobo, ta apa ka itiokeng a ikoku. Nakaneni egorosi daang, tosutonokinete. Tolimok Yesu kesi tama, “Tojongoto akigoro, nyetoana ngesi, ejotoe!” Tokianatar kesi daang ngesi kainyo ayenete atamar atoana. Toting Yesu akan a ikoku, tolimok tama, “Tonyou ikakoku!” Sodi toyaru, tonyou atipei, tolimok Yesu ngikauriak keng atamar nakis akimuj adio nanyamat. Tatalasi ngikauriak a ikoku ngakiro nguna noi, nakaneni kichikichik Yesu kesi tama, “Nyiilimokis itwaan tani ipei ngakiro na asubakinosi.” Tanyara Yesu ngirukitos keng lutomon ka ngiarei tochunak wapei, sodi kitogogong kesi topedoreta apolokin ngipean daang kitwarakineta, nabo kitangalekinioto ngidekesinei. Sodi tomea kesi akitatam ngitunga ngakiro na a Apolou a Akuj, nabo kitangalekis lu adeakasi. Tolimok Yesu kesi tama, “Nyiitinga idiobore analosit kus, kerai aburo kori echue kori akimuj kori ngaropiyae kori nyiikoda eworu eche. Ani akai na ilomarete kitepeyon, kiboikinos nawi ngina tanang akolongit na inyounioto alore kangolo, ni cha nyikitepeyoneta esi ngitunga, torotokisi alore kangolo tokurosi ngalup a ngakejen akamaluwot kidodiu ibore ngini atamar esechito kesi.” Torotokis ngirukitos a Yesu kitoro nadakarin daang itatamete Ngakiro Naajokak a Yesu Kiristo nabo kitangalenokinete ngitunga awadaang. Na eirarea Erode lo arai ekapolon a Galilaya ngakiro daang na asubakin, kibiler ngesi noi kainyo abaasi ngitunga ngiche, “Yoana Ekebatisan ngesi ayaru!” Tolimut ngiche tamasi, “Elija ngesi ngolo atakanuu,” nabo abaasi ngiche, “Epei a ngikadwarak alu kolong ngorok ngesi ayaru.” Tolim Erode tama, “Abe etutubori bo kolong ayong ngitunga akou a Yoana. Ngae tokona itwaan ni eira ayong ngakiro keng en?” Nakaneni tasak ngesi aanyun Yesu. Apot ngimeanara ngulu tobongut tolimokis Yesu ngakiro daang na asubete kesi. Sodi toriko ngesi kesi toloto make lore lo anyaritae Betisaida. Na eirarea asepich a ngitunga ngakiro nguna, kiwapak Yesu. Sodi kitepeyon Yesu kesi, tolimok ngakiro na a Apolou a Akuj, nabo kitojok lu adeakasi. Na esiakinea akolong adooyor, pot ngirukitos a Yesu lutomon ka ngiarei nikeng tamasi, “Kimiek ngitunga toloto nadakarin ka ngamanat na aapiyete, sodi tasakasi akimuj ka niperot, kainyo esil akwap na.” Nakaneni tatachak Yesu kesi tama, “Nakisi esi kesi idiobore ninyamat.” Tatachut kesi tamasi, “Emam ibore eyei sua pearai ngamugati ngakan ka ngikolia ngiarei make. Isaki iyong sua atoloto atogiela akimuj na itemokino asepich a ngitunga na daang a?” ( Ayakasi neni ngikiliok ngabunge ngakan.) Tolimok Yesu ngirukitos keng tama, “Totiakatiakata ngitunga kisiboikis a ngalooso ana erai apei ngitunga ngitomwon-kan.” Na esiboikineto ngirukitos keng ngitunga daang, sodi tolem Yesu ngamugati nakan nguna ka ngikolia luarei, tokienyia kidiama nadis, tobuak Akuj alakara, tonyilinyili ngamugati nak ngirukitos keng, sodi tokorakis ngirukitos keng ngitunga. Kimuj itwaan daang kimwon, sodi tolemut ngirukitos keng ngategerin ngatomon ka ngaarei na eleleba akimuj na apiyanun. Akolongit apei na elipitor Yesu alopei, pot ngirukitos keng nikeng. Abu kingit kesi tama, “Ebaasi mono ngitunga ayong ngesi ngae?” Sodi tatachakis tamasi, “Ebaasi ngiche irai Yoana Ekebatisan, tabaasi ngiche irai iyong Elija, tabaasi ngiche epei a ngikadwarak a Akuj alu kolong ngorok ngesi ayaru!” Sodi kingit kesi tama, “Ani bo esi, ibaasi esi ayong ngesi ngae?” Tatachak Petero tama, “Iyong irai Kiristo a Akuj!” Nakaneni kichikichik Yesu kesi tolimok tama, “Kuriasi nyiilimokis itwaan tani ipei akiroit ngina.” Tolimok tama, “Eboliare Lokookeng a Itwaan lokojokon noi. Engerete ngesi ngikasukou a Atuk ka Ngimurok Luapolok a akai Akuj ta ngiketatamak a etal. Eario ngesi ani akolongit na ngauni, eyaruni.” Tolimok kesi daang tama, “Itwaan cha daang ni esaki akiwapakin ayong, ejoikinit ejalun bon, sodi kiwok apir keng ngirwa daang kewapak ayong. Kainyo itwaan daang ni esaki akirichun akiyar keng, ebukori, nakaneni ni ejali akiyar keng kotere ayong, eyari. Nyoni eanyuni itwaan erai kitiliwo ngesi ibore daang anakwap ikeng nakaneni tobukor anakiyar? Emam jik ebachit eriamuni! Itwaan ni itimi alimor ayong ka ngakiro kang, tani Lokookeng a Itwaan dang itimi alimor ngesi na ebunio Lokookeng a Itwaan Anapolou keng ka Apolou ka Apakeng ta ngimalaikae lubekon aapei. Kalimokinit esi ngakiro na iteni atamar, eya ngiche nege lu nyetoakete jik eringa nyeanyungara Apolou a Akuj.” Adaunet a ngirwa a ngikan-kauni, ekisidi a alimuni ngakiro nguna, toriko Yesu Petero ka Yoana ta Yakobo todokasi kidiama emoru kilipa. Ani eringa Yesu ilipit, kibelei ereet keng, apot ngiworui keng tokwangeta kea. Nipei bore ngini, ayakasi neni ngikiliok ngiarei lu eruorosi ka ngesi, arai kesi Musa ka Elija. Kesi ngulu atakanuunete anapolou a adis, sodi kiruoro kesi ka Yesu ngakiro a akitu keng loger lo irikakinea etich a Akuj kotere atoanere alo Yerusalem. Aperete Petero ka ngirukitos luche ajotoote ngaju nakatoak, nakaneni apot tokienyut kingolikis apolou a Yesu ka ngikiliok luarei ngulu ewaasi ka ngesi aapei. Na arotokinioto ngitunga ngulu toisikis Yesu, tolimok Petero ngesi tama, “Eketataman, ejok kona kiyakar ngoni nege! Kimiek sua atodukokisi ngakais ngauni, apei akon, nabo apei aka Musa, nache aka Elija.” (Peayeni ngesi dir nguna eruoro.) Ani eringa ngesi iruoro, totiyaun edou tarap kesi a etorube keng. Tobul ngirukitos keng na arapea kesi edou. Sodi kiirasi kesi etoil alodou kangolo ebala, “Lokookang lominat ngesi lo, ngesi lo aseuni ayong, topupokisi ngesi!” Ani ililingi etoil, kidong Yesu erai epei bon. Apot ngirukitos a Yesu kililinga chek a ngakiro kanguna kadaang. Emam itwaan alimokis ngakiro na engolikinete kesi, tani wadiochichi. Na anangea akolongit na a ngaarei, totiyaunos Yesu ka ngirukitos keng luuni alomoru, sodi kiriamun Yesu ka asepich a ngitunga. Abu itwaan ipei tachalak anasepich a ngitunga tama, “Eketataman, kingolik a, kemaimai iyong atamar bu cha taanyu lokookang, lo erai epei bon! Na ebapea Ekipe ngesi, kitamaranik, kibusok nalup igoro, nabo tokuut ngikurudoi dang anakituk keng, kirakanar ngesi torieb lokojokon, nakaneni nyeisikini atipei! Emaimai ayong ngirukitos kon atamar kitwarakis Ekipe anikeng, nakaneni tokuruwosi kesi.” Tatachak Yesu tama, “Iraakasi esi ngitunga lu iwoliorito Anakuj nabo nyinupito ngakiro a Akuj! Ejoikinit ayong kiruki ka esi tanang ori? Anaikini ayong ngakiro kus tanang ori?” Ani erumor tolimok itwaan ngini tama, “Toriku lokookon nege.” Ani eringa edia ebunit, tadakakin nalup kirakar. Abu Yesu kikilak Ekipe loaronon ngolo kitojok edia, dio kipoto nak apakeng. Tatala ngitunga daang agogongu na a Akuj ngina. Ani eringa ngitunga etalarito ngakiro daang na asubi Yesu, tolimok ngesi ngirukitos keng tama, “Kiirasi ngakiro nakalimokinit ayong esi nu lokojokon! Ipotorio Lokookeng a Itwaan torikokinae ngitunga taara.” Nakaneni peayenete ngirukitos keng atamar anukiro eruoro ngesi. Emunonitae kesi ngakiro nguna sodi nyeyenuneta, toema kesi akingit ngesi ngakiro nguna. Topegakinos ngirukitos a Yesu make esakete akiyen itwaan ni epolot noi anikech. Na ayenea Yesu nguna etamete kesi, abu toriku ikoku niichi, sodi kitowo alodiye keng, tolimok tama, “Itwaan cha daang ni itepeyoni ikoku niichi ni ikoni en a ekiro kang, ketepeyon ayong, ani ngini ketepeyoni ayong, etepeyon tani lokolong kameuni ayong. Kainyo ngolo itiditeuna anikus, ngesi epolot noi.” Tolimok Yoana ngesi tama, “Ekapolon, kingolikini sua itwaan itwaranakini ngipean a agogongu a ekiro kon, etengero sua kainyo meere ngesi iyok.” Tolimok Yesu Yoana ka ngirukitos luche tama, “Nyiitengero kainyo itwaan cha daang ni nyikitepegi esi erai ikus.” Na apikinea ngirwa lu adikino Yesu ebongio kidiama nadis, abu ngesi totiaku atamar alosi Yerusalem. Tomea Yesu ngitunga ngiche kingarenikis toloto kesi tolomasi nadakar ache alo Samaria, asubakin ibore daang toriyan kotere Yesu. Towout ngitunga kaneni akitepeyon Yesu alotoru ngina alosiet Yerusalem. Na engolikineta ngirukitos a Yesu lu araakasi Yakobo ka Yoana ngakiro nu, tamasi, “Ekapolon, isaki iyong atotiyautu akim anadis tomunya ngitunga lua?” Torei Yesu kikilak kesi. Toloto kesi lore eche lo ayei ngaren. Ani eringa kesi eya lorot, tolimok ekile eche Yesu tama, “Kewapi ayong iyong awadaang ani iteni.” Tolimok Yesu ngesi tama, “Eya takwee ngatabab na eduketa, tani ngikieny lu eporito eya ngakais, nakaneni Lokookeng a Itwaan bon ngesi emam ni icholongi kiangarea.” Tolimok Yesu ekile eche tama, “Kiwapakinae ayong.” Sodi tolim ngolo tama, “Ekapolon, kimiekinae mono atolot atonuk apakang.” Tatachak Yesu ngesi tama, “Kimiek ngulu ikote ngikatoak tonuka ngikatoak kech. Kape iyong sodi kitatam ngakiro a Apolou a Akuj.” Tolim ekile eche tama, “Kewapakini ayong iyong Ekapolon, nakaneni kimiekinae mono amin atama ngitunga kang kidongo robo.” Tolimok Yesu ngesi tama, “Itwaan daang ni isiakini akirem ngalup akitare, torubak ingolianari kaku, nyitemokino eanyuni Apolou a Akuj.” Ani ekisidi toseu Ekapolon ngitunga ngitomwon-kaarei ka ngiarei tomea a ngiarei-rei kingarenikis toloto lorerea daang ka akwap na asaki ngesi elope alosit. Tolimok ngesi kesi tama, “Elalak ngalemet nakaneni ekidioko lu esubete etich. Kilipa robo elope a ngalemet tomea ngikalemak lukaalak lu echunakinete ngalemet keng. Kapesi! Toyena atamar kamearit ayong esi nakwap loger a ngimesekin alu eya kiding ngipeei. Nyiitinga etokole a ngaropiyae, kori echue lo ilipanarotor, kori ngamuk, warasi nyiiwa alorot kiruoro ka itwaan. Akai daang na ilomarete, tamasi mono ekingaren, ‘Min ekisil nawi naga.’ Ani keyei itwaan ni emina ekisil anawi kangina, emini ekisil ngolo nikeng, ani kemam, nyemini ekisil ngolo neni. Kiboikinos kai ngina tamata ka akimuj ibore daang nikiinakinio, kainyo ngini esubi etich, echamit etachio. Nyiirimo akwap itubonorosi anakais a ngitunga. Adakar daang na ilomarete esi kitepeyonere, tanyama akimuj daang na kiinakinio esi. Kitojoka lu edeakasi alore kangolo, tolimokisi ngitunga lu kaneni tamasi, ‘Aapuu Apolou a Akuj nikus.’ Ere daang lo inangete esi nyikitepeyon, torotokisi ani inangete lorotin tamasi, ‘Tani apua a ere kus na etapunito ngakejen kosi, kitwaari sua kotere ni isechitotor esi. Nakaneni toyena atamar aapuu Apolou a Akuj nikus!’ Kalimokinit ayong esi dir atamar isieniyete Akuj ngitunga a Sodom Akolongit na a Eriras kidwang lu a ere kangolo! “Oitiakoi! Abe etioko nginyas lu eanyunete ngitunga a Korasin ka Betisaida dang! Kainyo arai kolong tosubae ngakitoodikinet nakailiilok na asubasi anikus alo Tiro ka Sidon, kenapito kesi ngiworui lukoris sodi tojuko ekuron kidodiunotor atamar alunga kesi ngasechesea kech! Isieniyete Akuj ngitunga a Tiro ka Sidon Akolongit na Eriras kidwang esi. Esi ngitunga a Kaperinaum! Isakete esi tanang ekipur kus kidiama nadis a? Kichakakinio esi tooma nanam na a akim!” Tolimok ngimeanara keng tama, “Itwaan cha daang ni epupi ngakiro kus, epupi tani nakang, itwaan cha daang ni kingeri esi, kanger tani ayong, ani ngini kangeri ayong, anger tani lokolong kameuni ayong.” Tobongut ngitunga lutomwon-kaarei ka ngiarei elakara noi. Tamasi, “Ekapolon, apot tani ngipean topupokis ngakiro kosi nakilimokinea sua kesi ngakiro a ekiro kon!” Tolimok Yesu kesi tama, “Engolikini ayong Esiitan ibirun anadis loger a akimilea. Topupokisi! Kainak ayong esi agogongu topedoreta esi akipudare ngimunio ka ngikuutanea sodi kipiyosi agogongu daang na a Emoit, nabo emam ibore kiwani esi. Nakaneni warasi nyiilakarosi ani kipupeto esi ngipean, echamit ilakarosi ani igiritere ngirora kus nadis.” Esaa lopei ngolo tolom Etau a Akuj nia Yesu kitalaka lokojokon, tolim tama, “Apa, Ekapolon a adis ka kwap! Kabuakinit iyong alakara kainyo ipudok iyong lu nyeosok ngakiro na idaitae ani eyakasi lukebe a ngakies ka lukoosok. Kongina Apa, isub iyong nguna daang loger lo ichamit iyong alope.” Tolim Yesu tama, “Kainaki ayong Apakang ngiboro daang: emam itwaan ni eyeni Lokookeng atamar ngesi ngae, mati Apa, nabo emam itwaan ni eyeni atamar Apa ngesi ngae, mati Lokookeng ka ngulu daang esaki Lokookeng akidodikin Apa keng.” Torei lowae lo ayakasi ngirukitos keng kisuruorik anikech make tama, “Kipiaritae esi noi ani ingolikineta na ingolikis! Kainyo asakete kolong ngikadwarak a Akuj ka ngikapolok lukaalak akingolikin na ingolikis esi, nakaneni nyingolikina, nabo asakete akiirar na ipupete esi, nakaneni nyiirara.” Sodi bu eketataman a etal eche nia Yesu esaki akilok ngesi a ngakiro. Kingit tama, “Eketataman, ekokini ayong ariamuni akiyar na nyedaun ai?” Kingit Yesu ngesi tama, “Nyo igiritae nagiran? Anukiro isoma iyong anagiran?” Tatachak ekile ngolo tama, “Echamit iyong iminakini Akuj Ekapolon kon a etau kon kadaang, ka akiyar kon daang, ka ngikilinga kon daang ta ngitamen kon daang, ‘Nabo echamit iyong iminakini ekidunyet kon loger lo iminar iyong akwaan kon a ilope.’ ” Tatachak Yesu ngesi tama, “Ilim iyong nguna iyook, tosub nguna sodi toyar.” Nakaneni asaki eketataman a etal ngolo akidodiun atamar arai ngesi itwaan ni nyasechit, sodi kingit Yesu tama, “Ngae erai ekidunyet kang?” Tolimok Yesu ngesi tama, “Ayei itwaan iche anyouni alo Yerusalem eteni Yeriko, kituumokis ngirukooi alorot, kibungata talachasi ibore daang ni anapit. Kimiekis kaneni ekot akitu. Sodi kitoru emuron a akai a Akuj lorot ngolo elosi, ani ingolikini itwaan ngini, abu ngesi kinacha kitor wache. Itwaan a ekitela a Lawi dang lo arai ekasuban etich Alokai a Akuj, abu kitoru lorot ngolo loger a loche, ani ingolikini itwaan eperi alorot, sodi kinacha kitor wache. Nakaneni bu Esamariat iwapit erot ngolo dio kingolik ngesi itwaan ngini eperi alorot, abu kisieni lokojokon. Tolot Esamariat diyete itwaan ngini, abu kidokanak akimiet ta emuna najemei keng, sodi toen. Kidokok ngesi itwaan ngini losikiria keng tanang kai a ngipeyok, kitan ngesi itwaan ngini kaneni. Ataparach nache, tolem ngesi ngadinari ngaarei, nak itwaan ni aweikinit akai a ngipeyok tama, ‘Kirichak itwaan en, kitan, ani abonguni ayong katachakini ayong iyong ibore daang ni enyami ngesi.’ ” Tolimok Yesu ngesi tama, “Esibit tokona iyong alotunga aluuni kalu, ngae edodiuni dir atamar arai ekidunyet a itwaan ani ebungato ngirukooi?” Tolim eketataman a etal tama, “Erai ngolo edodiuni akisienut anikeng.” Tolimok Yesu ngesi tama, “Kape iyong dang tosub na ikote nguna.” Na alooso Yesu ka ngirukitos keng, kitoro lore eche lo etepeyonea ngesi aberu na anyaritae Marita. Ayei Marita nakaatokeng na anyaritae Mariam na ebooyi alodiye ngakejen a Ekapolon Yesi iirakinit ngakiro na etatami ngesi. Nakaneni kisileleny Marita etich lokaalan asubi, sodi tolot ni ayakasi luche tama, “Ekapolon, nyikironikinit iyong nikaisikinea ayong nakaatokang asubi etich bon a? Tolimok iyong ngesi bu kengarak ayong!” Tolimok Ekapolon ngesi tama, “Marita yaa! Ichana iyong, nabo iriaba kotere ngakiro nakokaalak, nakaneni akiroit apei bon ngesi esakio. Aseu Mariam ibore ni itemokino, nabo nyelemario anikeng.” Akolongit apei elipit Yesu awache. Ani erumori, abu epei a ngirukitos a Yesu tolimok ngesi tama, “Ekapolon, kitatamae sua akilip loger lokolong etatamea Yoana ngirukitos keng.” Tolimok Yesu kesi tama, “Ejoikinit esi ilipete kona: ‘Apa: Ekiro kon kipuroe. Apolou kon bu. Nakinae ngirwa daang akimuj kosi na itemokino. Torimakinae ngasechesea kosi, kona kirimanakinea sua daang lu kisechanakinete sua. Nyikilomak sua nakiningo nakaagongon.’ ” Sodi tolimok Yesu ngirukitos keng tama, “Kori eyei ipei kus ni elosi ni eyei lopae keng nakwaare dio tolimok ngesi tama, ‘Ekone, nakinae ayong ngamugati kon ngauni ataar amicha. Abu lopae kang lo erai ekaloton nawi kang, nakaneni emam ayong akimuj na iinakini ngesi!’ Ani bo ketachu lopae kon alotooma akai tama, ‘Nyikichan ayong! Agol tete ayong ekidor, kiper ayong ka ngide kang, emam robo tokona ayong kona anyouni kainak iyong idiobore.’ Iteni dir, kalimokinit ayong iyong atamar tani pekenyou ngesi sodi kiinak iyong amugati ani eraakar lopae kon, nakaneni enyouni ngesi kiinak iyong ibore daang ni isaki, ani nyikitimio iyong adupakin anyarit ngesi. Nakaneni kalimokinit ayong esi abala: Kilipas nakaneni kiinakinio, tasaka nakaneni ianyunete, kidongodongo nakaneni kingaario esi. Kainyo itwaan daang ni ilipa einakinio, ani ngini esaki eanyuni, nakaneni engaario ekidor kotere ngini idongidongi. Eyei epei anikus taapa, lo einakini ikoku keng emun nailipea ngesi ekolia a? Kori einakini ngesi ekuutan na ilipea ngesi abeeye a? Tani iyenete esi luaronok ainakin ngide kus ibore niajokon, nyepedori Apakus lo eyei nadis ainakin Etau keng ngulu ilipasi a?” Nakaneni etwarakini Yesu ngipean lu etengerito itwaan akiruorikin, na apudoreta ngipean, tolomak itwaan ngini ekiruor, tatala asepich a ngitunga ngakiro nguna, nakaneni tolimut ngiche tamasi, “Erai Belesebul ekapolon a ngipean itaanyunit ngesi agogongu na itwarakinea ngipean.” Asakete ngitunga ngiche akilok ngesi sodi tolimokis atamar tosubak akitoodikinet nakaililon toyeneta atamar ebunit ngesi ani a Akuj. Nakaneni ayeni Yesu na etamete kesi tolimok tama, “Akwap na etiakatiakatar ngitunga tojwoto make, inyasun akwap ngina, ani ketiakatiakasi ngitunga a awi aapei, ialarosi kesi. Ani ketiakatiaka Apolou a Esiitan tojwoto ngajorei keng make, ikokini Apolou keng erubakini ai? Ibaasi esi etwaranakini ayong ngipean kotere agogongu na aanyuni ani a Belesebul. Ani ketwaranakini ayong kona, ikwaanakinete ngirukitos kus itwaranakinete ai? Idodiunito ngirukitos kus atamar isechito esi jik! Ani kerai akan a Akuj etwaranakinea ayong ngipean, idodiunit ibore ngini atamar abu Apolou a Akuj nikus. “Naiyokio ekile lokajwon awi keng etingit ngiboro keng daang lu ejie, mam ibore elemari ngiboro keng. Nakaneni ani na ebunio ekile lokajwon noi kitijik nabo kidwang ngesi, echunari ngakwaaras daang na igieno ngolo idwangi ngesi, sodi totiakatiaka ngiboro lu engatari ngesi. “Itwaan daang ni nyibakit alowae kang, karemokino ayong, nabo itwaan ni nyekengarakinit ayong akichun, ialarit ngesi. “Naepudorea Ekipe anitwaan, tolot kitor nariet esaki ni iangarea. Ani pekeanyu ngesi ni iboikin, elimuni tama, ‘Abongori kai nangoon alomit!’ Sodi ebongori ngesi toriam itwaan ikoni akai na epiaritae keseger. Sodi tolot toriku ngipean ngiche ngikan-kaarei luaronok noi lu idwangito ngesi, sodi pot kiboikinos nitwaan. Nakaneni ani ekisidi, eroner itwaan ngini noi kidwang nikolong ngorot.” Na alimunio Yesu kongina, abu aberu kikea etoil keng alokiding asepich a ngitunga tolimok ngesi tama, “Elakara noi aberu nakolong kidouni iyong, sodi kitanak!” Nakaneni tatachak Yesu tama, “Iteni dir, elakarosi noi lu iirarete akiroit a Akuj sodi tonupa!” Na eriamitor asepich a ngitunga Yesu, kianua ngesi tama, “Abe eroko ngitunga a ngirwa kalu noi! Esakete kesi kidodikinae akitoodikinet nakaililon, nakaneni emam akitoodikinet ache nakaililon na idodikinio kesi mati nakolong a Ekadwaran a Akuj Yona. Loger lokolong araakar ekadwaran Yona akitoodikinet a ngitunga a akwap a Ninewi, loger lopei ngolo, Lokookeng a Itwaan dang eliwor akitoodikinet a ngitunga a ngirwa kalu. Akolongit na a eriras, enyouni akapolon a akwap a Cheba sodi kirira ngitunga lu a ngirwa kalu, kainyo anyouni kolong ngesi anakwap keng tolot erot lokooyen noi ebunit akiirar ngakitatamet na aosou a ekapolon Solomon, nakaneni kalimokinit ayong esi atamar eyei ibore nege ni epolot ni idwangit tani Solomon. Akolongit na eriras, enyounete ngitunga a Ninewi kirirata esi, kainyo alungete kesi ngasechesea kech nakolong eirareta Yona itatami kesi ngakiro a Akuj, nakaneni kalimokinit ayong esi atamar eyei ibore nege ni epolot ni idwangit tani Yona! “Emam itwaan ni inokakini ataa sodi kiwaa, kori tobuburik atubwa, iwaakinio ni ikeuna sodi kiteeto ngitunga na elomareta tooma kai. Ikote ngakonyen kus ataa a akwaan, ani kejokak ngakonyen kus, eyei akicha nakwaan daang, nakaneni ani keroko ngakonyen kus, eyei aribu nakwaan daang. Tochoikinos sodi toliwor akicha eyei tooma kus, meere aribu. Nakaneni ani keyei akicha nakwaan daang, emam aribu eyei tani edit, echai wadaang ikoni ataa na echai anikus.” Na arumorea Yesu ekiruor, abu Eparisayot tolimok ngesi atamar asaki emuja ka ngesi, sodi toloma kai kiboikin kimuj. Abu Eparisayot toriangakin na engolikinea Yesu imuji eringa nyilotara ngakan. Sodi tolimok Ekapolon Yesu ngesi tama, “Tokona, ikote esi Ngiparisayo ekopo ka atubwa na ilasio nikalapatan bon nakaneni tooma kus ileleba ademanu ka aronis. Ngikamodeanak! Meere Akuj na asubi nikalapatan ngesi asubi tooma dang a? Nakaneni nakisi ngiboro lu eya tooma ngikopoi kus ka ngatubwae ngikebootok sodi toseger ibore daang anikus. “Oitiakoi! Abe etioko nginyas lu ianyunete esi Ngiparisayo! Ilemanakinete esi Akuj alemikinet apei anatomon a ngikito alu itoboboote akimuj, nakaneni nyirichakinito esi akitiriyan ngakiro niajokon nabo nyiminasi esi Akuj. Ejoikinit esi isubete ngakiro nugu daang peijamuarito ngache. “Oitiakoi! Abe etioko nginyas ianyunete esi Ngiparisayo. Iminasi esi akiboyonokin lokicholongo luajokak anakais a Atuk, nabo kimalae a arimatoi ani egieleta ngitunga ngiboro. Oitiakoi! Abe etioko nginyas ianyunete esi. Ikote esi ngalielin na nyileerete, eloose ngitunga alokidiama peeyenete.” Abu epei a ngiketatamak a etal tolimok ngesi tama, “Eketataman, na ilimunio iyong kongina, kimor iyong tani sua dang!” Tatachak Yesu tama, “Oitiakoi! Abe etioko nginyas ianyunete esi dang ngiketatamak a etal! Ikote esi ngitunga, lu isiwokito luche ngiegosio lu apotiok lu nyedakun tarai nyisakete esi ngikulepek akingarakin kesi akiwok ngiegosio ngulu. Oitiakoi! Abe etioko nginyas ianyunete esi! Iboka esi ngalielin naajokak kotere ngikadwarak a Akuj kus, ngikadwarak a Akuj lu aarete taapaakus. Nakaneni idodiunit ibore ngini atamar ichamut esi na asubete taapaakus, kainyo aarete kesi ngikadwarak a Akuj, sodi toboka esi ngalielin kech. Kotere nguna abu Akuj Nakooson tolim tama, ‘Ameari ngikadwarak kang ka ngimeanara nikech, earete ngiche, toboliatar ngiche.’ Nakaneni ngitunga a ngirwa kalu irirao kotere ni aareta ngikadwarak daang a Akuj napei kolong asubakinere akwap, akisiakin anaaret a Abel tanang aaret a Sekaria, lokolong aarakinio kiding akai a Akuj ka ekeno lo ipeyonokinere Akuj. Ee robo, kalimokinit ayong esi ngakiro na iteni atamar, irirao ngitunga a ngirwa kalu kotere nguna daang! “Oitiakoi! Abe etioko nginyas ianyunete esi ngiketatamak a etal. Iwaa esi engaet lo elomarere naosou. Nyilomarete bo tani esi ngikulepek, nakaneni iratakis esi tani ngulu esakete alomar!” Ani erotokini Yesu kaneni, apot ngiketatamak a etal ka Ngiparisayo tolomakis akisuruor ngesi niaronon noi nabo kingita ngesi ngakiro nakaalak noi. Alokito kesi ngesi esakete aripun keya ngakiro naaronok na epedori ngesi alimun. Tochununos ngitunga lukaalak noi nia Yesu kidingidingakinos tolomakis akichakachaka. Esaa ngolo tolimok Yesu ngirukitos keng tama, “Tochoikinos anakiro a naaronok a Ngiparisayo ana ikote ekitoe lo itubui ngamugati, Ibore ngini ngesi amodeanut. Emam ibore ni erapap ni nyileereuni, kori emam ibore ni idaitae ni nyetakanuni. Ngakiro na ilimunete esi anaribu iirarete ngitunga anakicha, nabo nguna ingaingaasi esi igolito ngidorin a ngakais, ikeunio Anatuk. “Ngipaalon kang, kalimokinit esi atamar nyiikear lu earete akwaan bon nakaneni emam ibore iche aronon esubakinete. Kedodikini ayong esi ngini ejoikinit esi ikerete, tokera Akuj na epedori akiar nabo eyei agogongu na epedorea achakakin nanam na a akim. Ngesi kalimokinitor esi ngakiro na iteni dir atamar tokera ngesi! “Egielio tanangolengor ngikan a atongkol. Nakaneni nyimuriakinit Akuj tani ipei kech. Imarunitae tani ngitim daang a ngakies kus. Nakaneni nyieam. Ijokak esi noi idwangito tani ngikieny ngulu lukaalak! “Kalimokinit esi atamar, itwaan cha daang ni elimor alotunga atamar ngesi itwaan kang, elimori Lokookeng a Itwaan ngesi dang alongaren ngimalaikae a Akuj, nakaneni itwaan cha daang ni epegi alotunga atamar meere ngesi itwaan kang, epegi Lokookeng a Itwaan dang ngesi alongaren ngimalaikae a Akuj atamar nyayeni. “Itwaan daang ni elimuni naaronok imenyi Lokookeng a Itwaan, erimakinio, nakaneni ngini imenyi Etau a Akuj nyerimakinio jik. “Nakirumuneta kesi esi kitorikut nakais na Atuk, kori lokapolok, kori lokarikok, kuriasi nyeeriab ngakiro ngitai kus atamar anukiro ilimunete esi kori ilimunete kwaai. Kainyo Etau a Akuj ngesi kitatami esi esaa ngolo ngakiro na ilimunete.” Abu itwaan anasepich a ngitunga tolimok Yesu tama, “Eketataman tolimok lokaatokang atamar katotiakak ayong ngibaren epewae lukolong kiisikinea sua apakosi.” Tatachak Yesu ngesi tama, “Ekile, ngae kainakini ayong apolou na eriraa kori na katiakanakinea esi luarei ngibaren?” Sodi tolimok ngesi ngitunga daang tama, “Kiyokos, nabo tochoikisi ngakiro a amonis, kainyo meere nalalau a ngiboro alu etingit itwaan ngesi eyei akiyar keng, tani kebarit ngesi kwaani.” Sodi tolimok Yesu kesi ngakitadapet nugu tama: “Ayei kolong ekabaran lo ayei amana na ekoneene tobwang noi ngimomwa luajokak. Abu kisiak akitam bon tama, ‘Emam ayong ekeru loapolon lo ewaakini ngimomwa kang daang. Ekokini ai?’ Tolim bon tama, ‘Abwangi ngikerui kang sodi atoduk luapolok lu ewaakini ngimomwa kang ka ngiboro luche daang. Ani erumor, atolimokin ayong elope atamar, Ee rocha ekeny ajokon! Eyei tokona ayong ibore niajokon daang ni asaki alokaru alukaalak. Eboikin jik eanga, emuj, atamat, nabo atalakar!’ Sodi tolimok Akuj ngesi tama, ‘Ibangaana iyong! Nakwaare a akolongit kana elemario etau kon, ngae tokona etingi ngiboro daang lu ingadaarit iyong kotere akiyar kon?’ ” Ani ekisidi tolim Yesu tama, “Ikote neni ngulu iweito ebari kech kitaraut eka ngawat kech make, nakaneni nyebarito kesi alongaren Akuj.” Tolimok Yesu ngirukitos keng tama, “Ngakiro nugu ngesi kalimokinitor esi atamar, kuriasi nyiiriabasi kotere akimuj na isakete esi toyareta, kori kotere ngiworui lu isakete esi akinap. Kainyo akiyar kus ejok idwangit tani akimuj, nabo akwaan kus ejok idwangit tani ngiworui. Kingolikisi ngikuruka: nyitaate kesi kori nyelemete, emam kesi ngikerui, Akuj alope itani kesi! Kichoikinitae esi noi idwangito tani ngikieny! Ngae anikus keriabakin epedori akiatakin ngirwa ngiche loboyor keng? Nakaneni na nyipedoreta tani ngakiro na nyegogong nguna, nyo nabo itameta ibore niche dang? Kingolikisi eger lo erupeta ngatur na amoni: emam etich lo esubanakinosi kesi kori nyedonyonokinosi ngiworui kech. Nakaneni kalimokinit ayong esi atamar, tani Solomon dang, lo arai ekabaran noi, peayakasi ngiworui lukesuparak lu ekote ngatur nugu. Akuj alope ngesi isiki nginyia lu a amoni, nginyia lu elibito tokona ani moi tongopiasi, sodi kinomae alokeno. Etia eger lo epedori ngesi akisik esi ai? Etige esi ngitunga lu inupito wadiochichi! “Tokona, nyiiriabasi ibaasi ekoe nyo kinyami kori nyo kimasi. ( Kainyo esakete ngibukui lu nyerai Ngiyaudi ngiboro lu daang). Eyeni Apakus atamar isakete esi ngiboro lugu daang. Nakaneni tasaka apolou keng aloboyor kus, sodi kiinakini ngesi esi ngiboro lugu daang. “Nyieam esi ngitunga lukidio! Kainyo esaki Apakus ainakin esi Apolou keng. Togielasi ibore kus daang ni itingito esi, ani erumor nakis ngikebootok ngaropiyae. Tosubakisi ngichuei lu nyengorotokete. Kiwaa ebari kus anadis, ni nyediteunea tani wadiochichi, kainyo emam ekokolan eapiari nikech, nabo emam ngakimam inyasunete kesi. Kainyo epete ngitai kus ni eyei ebari kus. “Kiboikinos isubakina kotere daang na esubakinosi, ienito ngiworui kus nabo kinokakis ngataae kus, ikote ngikasubak etich lu idarito ekapolon kech, ebonguni anakuuta. Ani ebuni ngesi idongodongokini, tangakis kesi ngesi ekidor atipei na edolunio. Elakarosi noi ngikasubak etich lu erukauni ekapolon kech ibooyete irichuna na ebongunio ngesi! Kalimokinit esi atamar, enapi ngesi eworu lokoret akimuj, kisiboik kesi kwap tokorak akimuj. Elakarosi kesi noi na erukaunea ngesi idarito irichuna, tani kedolu ngesi kiding akwaar kori ekisidi! Nabo toyena atamar arai toyeni elope a awi esaa lo ebunio ekokolan, kechoiki ngesi kidaru ekokolan nyeebwang akai keng. Tani esi dang, kiboikinos irichuna kainyo ebuni Lokookeng a Itwaan esaa lo nyitamitotor esi atamar ebuni ngesi.” Kingit Petero Yesu tama, “Ekapolon, kilimokinit iyong sua make akitadapet naga kori ilimokinit iyong ngitunga daang?” Tatachak Ekapolon tama, “Ngae tokona erai ekasuban etich lokooson lo emunoi? Ngesi ngolo alimoki ekapolon atamar topolok etich daang a awi, nabo nanak ngikasubak etich luche akimuj kech esaa lo echamitere. Elakar noi ekasuban etich ngolo na ebongunio ekapolon ngolo nawi toriam ngesi iwapit nguna! Kalimokinit ngakiro na iteni dir atamar elimokini ekapolon ngolo ekasuban etich ngolo atamar topolok ebari keng daang. Nakaneni ani ketama ekasuban etich ngolo elope kori kengop ekapolon keng, eloka ngirwa ebongunio, elomakini akibungare ngikasubak etich luche, ngikiliok ka ngaberu, nabo kimuj, tamat, kilewa dang. Ebonguni ekapolon a ekasuban etich kangolo akolongit ache a esaa alo nyeyenea ngesi atamar ebuni. Iteli ekapolon ngolo ngesi tapak ngaarei, kikwaanikinos ngesi ka lu nyerai ngikanupak. “Nakaneni ekasuban etich lo eyeni na echamit ekapolon keng sodi nyiiboikin ngesi irichakina tosub nguna, idesio lokojokon. Nakaneni lo nyeyeni nguna echamit ekapolon keng, nabo tosub ibore ni echamit ekapolon keng idesea ngesi, idesio loge. Itwaan ni einakinio nakaalak ejoikinit idodiuni nakaalak, itwaan ni einakinio nakaalak noi, ejoikinit idodiuni nakaalak noi. “Abu ayong ayau akim akwap, esibit cha tonokunite akim ngina! Eyei akibatisare na ejoikinit ayong kebatisao, nakaneni kariabete ayong ngakiro nguna etau tanang ni erumorotor nguna! Itamito esi atamar abuni ayong nakwap ayaun ekisil a? Mam, meere ekisil ayaunit pearai atiaka. Akisiakin tokona jik, etiakasi ngitunga ngikan anawi a apei, eremokin nguuni ngiarei, eremokin ngiarei nguuni. Eremokinosi taapa ngide kech, nabo eremokin ngide dang taapakech, nabo eremokinosi taito tanakookech, nabo eremokinosi tanakookech taito kech, eremokinosi taata ngaterak kech, eremokinosi ngaterak taata kech.” Tolimok Yesu nabo asepich a ngitunga tama, “Naianyungareta esi edou ilirakin too, itamarete esi atipei dikino akiru erami, dio kikok neni. Na ekutunea ekuwam lo akamu, tamasi esi, ibooyi akwap torirau, dio kikok neni. Esi ngikamodeanak! Ingolikinete esi akwap ka adis, sodi todwara eger kech, nyo tokona peiyeneta esi eger a ngirwa kalu? “Nyoni peitiakuneta esi ngikulepek na itemokino esi isubete? Ani esaki itwaan akititakin iyong kitoriko nitubet ekies, topupokinos eringa esaa lo kititakinere iyong nyenanga. Ani pekikok neni, kirikori ngesi iyong lokatubon ngakiro, dio kitorikok iyong ekatubon ngakiro ngasigerea nakiinikinete iyong lojela. Kalimokinit ayong iyong atamar nyilomuni iyong kaneni jik, mati kitach amicha kon kisunyak pil.” Esaa ngolo ayakasi ngitunga neni lu alimokinete Yesu eger lo aarea Pilato ngitunga a Galilaya na alemikinitotor kesi Akuj ngakipeyos. Tatachak Yesu kesi tama, “Esibit esi keroko noi ngitunga lua Galilaya ngulu ani aarere loger ngolo a? Itamito esi atamar idodiunito nguna atamar eroko kesi noi idwangito ngitunga luche daang a Galilaya a? Meere kongina! Kalimokinit ayong esi atamar ani pekilunga ngasechesea kus, itoakete tani esi daang loger kech. Ani bo ngitunga lutomon ka ngikan-kauni lu adakakin aita a akai alo Siloam taar? Esibit esi idodiunito nguna atamar eroko kesi noi idwangito ngitunga luche daang lu ibooyete alo Yerusalem a? Meere kongina! Kalimokinit ayong esi atamar ani pekilunga esi ngasechesea kus, itoakete tani esi loger kech.” Nakaneni abu Yesu tolimok kesi a ngakitadapet tama: “Ayei emeyen lo arupunit alomana a itwaan. Abu ngesi tolot asakar ngameyena lomeyen, nakaneni nyeriamuna tani apei. Sodi tolimok ngesi eketeon a amana tama, ‘Toyen kona, abuneene ayong nege a ngikaru a nguuni asaki ngameyena lomeyen logo, nakaneni nyeriamuna ayong ngameyena tani ngakidio. Totubo! Nyo erupunitor kane ijujuea ngakipi analup pas?’ Sodi tatachak eketeon a amana kangina ngesi tama, ‘Ekapolon, kimiek mono ekaru logo bon, aboki ayong adui naten keng sodi atobukok ngasike. Ani kekoniu emeyen ngameyena ekaru lo moi, ejok robo, ani kemam, totub iyong ngesi.’ ” Akolongit apei na a Sabato etatami Yesu ngitunga anakai a Atuk. Ayei aberu neni na ebapit Ekipe lo etedeakakinit ngesi ngikaru ngitomon ka ngikan-kauni, akudokina egur keng peapedori ngesi aruar torikin tani wadio. Na engolikinea Yesu ngesi, abu tanyara ngesi tama, “Aberu, kilachakin iyong alodeke alo ideaka iyong, ijoker!” Sodi kidokok Yesu ngakan keng kidiama keng, atipei torikin tojoker, nabo kipuruu Akuj. Nakaneni abu ekapolon a akai a Atuk tongo, kainyo etojoki Yesu itwaan akolongit na a Sabato, dio tolimok luche tama, “Eyakasi ngirwa ngikan-kapei lu echamit ngoni kisubea etich, ejoikinit ipote ngirwa ngulu kitojok, meere akolongit na a Sabato!” Tatachak Ekapolon ngesi tama, “Etige esi ngikamodeanak! Abe erai bo epedori itwaan daang anikus akipudun emong kori esikiria keng ananok, sodi kitwara akitamat akolongit na a Sabato. Eyei tokona ne aberu na erai ales a Aburaam na eenit Esiitan ngikaru ngitomon ka ngikan-kauni, nyejoikinit elachakinio ngiriko keng akolongit na a Sabato a?” Na alimunio Yesu kongina, kiruma ngimoe keng daang ngileech. Nakaneni talakaros ngitunga kainyo asubi Yesu ngakiro naajokak na asubi ngesi. Kingit Yesu tama, “Ikoni Apolou a Akuj ai? Isikwaanio ka nyo? Ikoni ne. Elemuni itwaan echokit a ekoropus sodi kitak mana keng, ani erupuni, topoloor noi toliwor ekitoe, pot ngikieny toduko ngakais naten keng.” Nabo kingit Yesu tama, “Nyo tokona esikwaanea ayong Apolou a Akuj? Ikoni ne. Ikoni ekitoe lo itubui ngamugati lo alemuni aberu sodi kimorik ka ngakiria anadepe, tanang ebui wadaang.” Abu Yesu tolot kitor lorerea ta ngadakarin itatami ngitunga na alosio Yerusalem. Kingit itwaan iche Yesu tama, “Ekapolon, ngitunga ngidikidio make kesi epedorete ayuun a?” Tatachak Yesu kesi tama, “Kirichakinos esi ngikulepek akitor lokidor lokaadingan, kainyo kalimokinit ayong esi atamar, ngitunga ngikaalak etamarete atolomasi tooma, nakaneni nyepedorete. Enyouni elope a awi sodi togol ekidor, iwaasi esi anikalapatan tolomakis akidongodong ekidor ibaasi, ‘Ekapolon, tangaarae sua atolomutu!’ Etachuni ngesi tama, ‘Nyayeni ayong ni iponitotor esi!’ Sodi itachakinete esi ngesi tamasi, ‘Kimuji kolong sua nabo atamaase ka iyong aapei, itatami iyong alore kosi.’ Elimuni nabo tama, ‘Nyayeni ayong ni iponitotor esi, kotosi anikang, esi ngitunga lu isubete naaronok!’ Ikalounete esi noi tokiricha ngikel kus, naingolikineta esi Aburaam ka Isaka ka Yakobo ta ngikadwarak daang Anapolou a Akuj, ani esi kitochakar nikalapatan! Epote ngitunga alowaitin kadaang a akwap sodi kiboikinos kimuja Anapolou a Akuj. Nakaneni lu ingarenikinete lu tokona isidiyete, ani ngulu tokona ingarenete, isidiyorosi.” Esaa ngolo dio pot Ngiparisayo ngiche nia Yesu tolimokis ngesi tamasi, “Ejoikinit iyong torotok kane toten wache, kainyo esaki Erode akiar iyong.” Tatachak Yesu kesi tama, “Kapesi tolimokisi itwaan ni ikoni kwee ngini kona, ‘Etwaranakini ayong ngipean nabo etangalenokini ngidekesinei dang akolongit naga ta moi, ani akolongit na a ngauni atorumo etich kang.’ Nakaneni ejoikinit akolongit na alosi ka moi ta akolongit nache kayaaye, nyejoikinit ekadwaran a Akuj eario a wache mati ere a Yerusalem bon. “Etige ngitunga a Yerusalem lu iarete ngikadwarak a Akuj, nabo kimasa a ngamoru ngimeanara lu ameuni Akuj nikus! Ngiai ngirwa asakea ayong akilogakin ngakan kang lotunga kus daang loger lo iudakinea akukut ngitak keng tooma nabeben keng, nakaneni nyechamuna esi asubi ayong kongina! Kemiekinea tokona ayong esi Akai kus. Kalimokinit ayong esi ngakiro na iteni atamar, nyikingolikinete esi ayong nabo tanang akolongit apei na itamareta, ‘Epiarit Akuj ngolo ebunit a ekiro a Ekapolon.’ ” Akolongit apei a Sabato, tolot Yesu akimuj anawi a ekapolon a eche a Ngiparisayo, nakaneni eteete ngitunga Yesu lokojokon. Bu itwaan ni abuto ngakejen ka ngakan nia Yesu. Sodi kingit Yesu Ngiketatamak a etal ka Ngiparisayo tama, “Echamakina alotal yok itojokio itwaan akolongit na a Sabato, kori emam?” Nakaneni kililinga kesi tachakin chek. Toting Yesu itwaan ngini kitangalek, ani erumor kimiek ngesi tolot. Sodi tolimok Yesu kesi tama, “Ngae anikus nyiriuni lokookeng kori emong keng alokare na echakakinor neni akolongit na a Sabato?” Nakaneni emam akiroit atachakis kesi Yesu kanguna. Kingolik Yesu eger lo aseuneta ngipeyok ngiche ngikicholongo luajokak sodi tolimok kesi daang a ngakitadapet tama: “Ani kinyarauni iyong itwaan nakuuta, wara nyiiboikin lowae loajokon kainyo epedori ayakau itwaan iche ni epolot ni kidwangit iyong ni enyaraunitae, sodi na ebunio lo kirumunit esi daang, dio kitolimok iyong tama, ‘Tonyou kimiek lo kiboikin nege.’ Nakaneni kirumete iyong ngileech sodi min kiboikin lowae lo ipasakinitae, nakaneni ani kirumunio iyong, kape dio kiboikin ni ipasakinitae, sodi ani ebuni lokirumunit iyong tama, ‘Bua niajokon nege lopae kang’, ianyuni iyong arimatoi alopeyok aluche kadaang kotere nguna. Kainyo itwaan daang ni itopolouno, itiditeunio, ani ni itiditeuna, itopolounio.” Tolimok Yesu lo erumunit ngesi tama, “Naidorokinio iyong akimuj na apaaran kori na a ebong, kuria nyiirum talopae kon kori talokaatokon kori ngiyenet kon kori ngikudunyet kon lu ebarito, kainyo kirumunete kesi dang iyong, sodi tatachakis nakolong isubea iyong kesi. Ani idorokini iyong akimuj, kirum ngikebootok ka ngikechodok ka ngikangwalak ta ngimuduk. Sodi kitopiar iyong kainyo emam kesi ibore kiinakinete iyong. Kitachi iyong Akuj akolongit ngina eyaruneta ngitunga luajokak anakitu.” Ani iirari ipei a ngitunga alu ebooyete imujete ka Yesu ngakiro nguna, tolimok Yesu tama, “Elakarosi noi ngulu iboikinosi kimuja Anapolou a Akuj!” Nakaneni abu Yesu tolimok ngesi tama, “Ayei kolong itwaan ni edorokini akimuj nakaalan, tanyarau ngitunga lukaalak nakimuj. Na anangea esaa ngolo a akimuj, tomea ngesi ekasuban etich keng tanyarau ngitunga lu epeyounitoe tama, ‘Potu kainyo asubakin ibore daang arumor!’ Nakaneni tolomakis daang alimuunun a ngapei-pei atamar nyikilosi! Tolimok lo ekingaren ekasuban etich ngolo tama, ‘Agielit ayong amana, asaki atolot engolik. Abala ayong iyong kimiekinae atolot.’ Tolim nabo loche tama, ‘Agielit ayong ngimongin ngitomon lupalem itaate, alosi ayong atoroea akitare, abala ayong iyong kimiekinae atolot.’ Sodi loche tolimok tama, ‘Aringa been ayong eutari, kotere ngakiro nguna nyapedori ayong alosit.’ Nakaneni tobongo ekasuban etich ngolo dio alimokin ekapolon keng ngakiro nguna daang. Abu ekapolon a awi kangina tongo noi tolimok ekasuban etich keng tama, ‘Tonyou atipei kirimok ngirotin daang ka kiding ngakais a ere kalo, sodi toriku nege ngikebootok ka ngikechodok ka ngimuduk ta ngikangwalak.’ Na arumorea ekasuban etich ngolo nguna daang, tolimok ekapolon keng tama, ‘Ekapolon, asubak ayong daang kona ibaar iyong, nakaneni eringa nege elolom.’ Sodi tolimok ekapolon ekasuban etich tama, ‘Kape lorotin a ngadakarin ka ngirotin lukaadingak, toriku ngitunga pot kilelebunor akai kang. Kalimokinit ayong esi atamar, emam tani ipei kangulu epeyounitoe ni epedori akiir akimuj kang!’ ” Alosi asepich a ngitunga ka Yesu aapei. Sodi torei Yesu tolimok kesi tama, “Itwaan cha daang ni ebuni nikang nyeliwor ngesi erukitos kang mati kaminaki ngesi ayong noi kidwang apakeng ka itiokeng ka aberu keng ka ngide keng ka talokaato keng ka tanakaato keng ta akiyar keng a ilope. Itwaan cha daang ni nyiwoki apir keng a ilope sodi bu kewapak ayong, nyeliwor ngesi erukitos kang jik. “Ani keyei ipei kus ni esaki akiduk akai nakooyen a epem, iboikin ngesi ekingaren dio kimaru etiae a ngaropiyae a na edukere, toyen keya ngaropiyae na itemokino arumorea etich. Ani pekikok neni, ipiyori ngesi arumor akai nasek adukokin ngateak. Elomakinete ngitunga daang lu iteete ngesi akianar ngesi. Sodi tamasi, ‘Esiakini kolong itwaan en akiduk, nakaneni epiyo arumor etich keng!’ Ani kerotoki ekapolon ka ajore a ngitunga ngabunge ngatomon tasak akitojwore ekapolon lo ebunit akitojuore ngesi erikit ajore a ngitunga ngabunge ngatomwon-arei, iboikin ngesi mono kitam kepedori ngesi ejie ka ekapolon loche ngolo. Ani pekepedori, emeari ngitunga kisiriamiasi ekapolon loche eringa elona kingita ibore ni esaki ngesi kainakin kisileta.” Torumo Yesu na eruoro ebala, “Aloger alopei kangolo, emam tani ipei anikus ni eliwor erukitos kang mati kipoto ibore ni etingit ngesi. “Ejok amakat, nakaneni ani kepener amakat, emam kona itababaruunio nabo. Nyejoikina imorikinio ka ngalup kori ka ngasike, echakario. Ani keya ngaki, kiira robo!” Akolongit apei na alooso ngiketubukok echur ka ngikasechak ngiche akiirar ngakiro a Yesu, tolomakis Ngiparisayo ka ngiketatamak a etal akingununguno tamasi, “Ekoe! Abe epeyonito bo itwaan en ka ngikasechak nabo imujete ka kesi!” Tolimok Yesu kesi ngakitadapet nugu tama: “Abala ayong esi a! Ani keya itwaan ngamesekin amiat apei, tachakar amesek apei, ikokini ngesi ai? Imiekini ngesi ngatomwon-kan-koomwon ka ngakan-koomwon anachokor sodi tolot tasaka na achakara tanang eanyuni. Ani na aanyunea, elakar ngesi noi toriongak loseget keng. Na enangea ngesi nawi keng tanyarau ngipaalon keng ka ngikudunyet keng wapei tama, ‘Potu atalakaros ka ayong aapei, kotere ni aanyunea ayong amesek kang na achakara!’ Aloger alopei kangolo, kalimokinit atamar emini alakara nadis kotere itwaan ipei nikasechan ni elungi akisech keng, kidwang luche lutomwon-kan-koomwon ka ngikan-koomwon lu etenooko, nakaneni nyesakete kesi akilung akisech kech. “Kori ikokini aberu na atingit ngaropiyae ngatomon na echakaror apei ai? Inokakini ngesi ataa topia akai, sodi tolomak akisak wadaang lokojokon tanang eanyuni. Na aanyunea, tanyara ngipaalon keng ka ngikudunyet keng wapei tama, ‘Atalakaros ka ayong aapei kainyo aanyu aropiyat natete achakara!’ Aloger alopei kangolo, kalimokinit ayong esi atamar, elakarosi ngimalaikae a Akuj kotere itwaan ipei nikasechan ni elungi akisech keng.” Tolim Yesu tama, “Ayei kolong ekile lo ayakasi ngide lusapa ngiarei. Tolimok loochi ngesi tama, ‘Apa, totiakakinae tokona ayong ngibaren epewae lu cha kitiakakini.’ Sodi totiakak itwaan ngini ngide luarei ngulu ngibaren keng. Nakaneni adaunet a ngirwa a ngidikidio, tochunak loochi ngolo ngibaren lu atiakakinio daang, towot akwap ache naalonon, na anangea nakwap ngina kirika ngibaren keng a elomit ka eboyor loaronon. Na erikarea ngibaren daang, tolom eron a akoro nakwap ngina, sodi tongopik ngesi ibore enyami, tolot ngesi akisub etich a itwaan a iche a akwap kangina, toriko itwaan ngini mana keng akisiyok ngiputiro. Kimuu ngesi akinyam ngapocho a ngimare na anyamete ngiputiro nakaneni emam itwaan ainakini ngesi tani ngadikidio. Ani ekisidi kitama ngesi tama, ‘Imujete ngikasubak etich lu eya nawi ka apakang akimuj kimwoko, sodi topiyanut, nakaneni kaarit ayong akoro kane! Anyouni ayong atolot nika apakang atolimok atama: “Apa, asechit ayong ani a Akuj ka iyong. Nyikinyar nabo ayong ikoku kon, kitosubunae ayong ekasuban etich kon.”’ Tonyou ngesi tolot nika a apakeng. “Ani eroko elona, kingolik apakeng ngesi, kisieni, kikomak kisiriamia kimala niajokon. Tolimok edia ngolo apakeng tama, ‘Apa, asechit ayong ani a Akuj ka iyong, nyejoikinit iyong kinyarae ayong lokookon nabo.’ Nakaneni tolimok apakeng ngikasubak etich keng tama, ‘Kapesi atipei yautu eworu loajokon kitanapa. Kiwaakisi ekababaat lokimoin keng sodi kitanapa ngamuk. Taramut itaok niatuman ataarakisi, sodi atanyama atalakaros! Kainyo ikoni lokookang lo itwaan nikolong abu totoan, nakaneni ayaru tokona, kori itwaan nikolong abu tongop, nakaneni atakanuu tokona.’ Sodi tolomakis kesi akimuj talakaros. “Esaa lopei ngolo, ayei edia loapolon mana. Ani ebonguni na aapuunea nawi, abu kiira ngitunga eeosi kidongaate. Sodi tanyara ngesi ekasuban etich epei kingit tama, ‘Anukiro nu?’ Tatachak ekasuban etich ngesi tama, ‘Lokaatokon abongu nawi, dio tama apakon taara itaok niatuman, kainyo abongu ngesi niajokon emam ngache naaronok.’ Tongo edia loapolon noi towou alomar tooma nawi, sodi topud apakeng nikalapatan kimaima ngesi tama, ‘Tolom kare tooma nawi.’ Tatachak ngesi apakeng tama, ‘Toyen kona, ngikaru lukaalak lu daang asub ayong etich kon loger a ekedalan kon, nakaneni nyengero ayong akiwap ngakiro kon daang. Nyo kiinak iyong ayong? Mam tani nia ikale kiinak atanyama ka ngipaalon kang! Nakaneni lokookon logo abu ngesi kisunyak ngibaren kon daang namalae, ani tokona ebonguni ngesi nawi, dio taarak iyong ngesi itaok niatuman!’ Sodi tatachak apakeng ngesi tama, ‘Lokooku, ngirwa daang kirukit ngoni, nabo ibore daang ni atingit ayong erai ikon. Nakaneni ejoikinit ngoni kipeyoe tokona atalakaros, kainyo ekoni lokaatokon itwaan niatoanit, nakaneni ayaru ngesi tokona, achakara ngesi, nakaneni atakanuu tokona.’ ” Tolimok Yesu ngirukitos keng tama, “Ayei itwaan nikabaran, nabo ayei ngesi ekaweikinan etich keng. Tolimokinae ekabaran tamarae eboliar ekaweikinan etich ngaropiyae keng, sodi tanyarau ekapolon ngesi kingit tama, ‘Anukiro nugu na apupi ayong atamar isubi iyong? Kidodikinae chene ayong ekimar a ngiboro kang daang kainyo nyeringa nabo iyong iliwor ekasuban etich kang.’ Sodi kitama ekaweikinan etich ngolo tama, ‘Kalachakini tokona ayong ekapolon alotich kang, ekokini ayong ai? Meere ayong itwaan nia ngikilinga ni apedori akitare nabo ketimit ayong akilipanar. Nakaneni ayeni tokona ayong na asubakini! Asaki ayong aanyun ngipaalon lu moi ketepeyonete ayong anawiyei kech nakalachakinere ayong alotich alo aweikinit.’ Tanyarau ngesi ngitunga daang lu emichat ngesi ngaropiyae a ekapolon keng. Tanyaraunu angapeipei kingit lo a ekingaren tama, ‘Ngai ngaropiyae kimichat iyong ekapolon kang?’ Tatachak tama, ‘Alemarit ayong ngamoti amiat apei a akimiet.’ Tolimok ekaweikinan etich ngolo tama, ‘Ekimar a ngaropiyae kon logo, kiboikin kwap kigirak ngatomwon-kan.’ Sodi kingit loche tama, ‘Ngai ngaropiyae kimichatae iyong?’ Tatachak tama, ‘Ngichuei abunget apei a ngakanoi.’ Tolimok ekaweikinan a etich ngolo tama, ‘Ekimar a ngaropiyae kon lo, kiboikin sodi kigirak ngamiae ngakan-kauni!’ Abu ekapolon kipuruu ekaweikinan etich loaronon ngolo kotere asubi nguna eosokinit, kainyo ngitunga a akwap eosok noi ana esubete idwangito ngulu eraakasi ngika Akuj lu eya nakicha.” Nabo tolim Yesu tama, “Nakaneni kalimokinit atamar: toelokinos a ebari a akwap alo ianyut esi. Ani kedaun ngibaren kus anakwapea kanu, kipeyounio esi anakais ana ibooyere jik. Itwaan cha daang ni irichuni nadikidio, irichuni tani nakaalak: itwaan cha daang ni nyirichuni nadikidio, nyirichuni tani nakaalak. Ani tokona pekirichuna iyong ani itingitor ebari a akwap, ngae kijokokini iyong ebari lo a iteni? Ani pekirichunit iyong ibore a itwaan a niche, ngae kiinakini iyong ni erai ikon a ilope? “Emam ekasuban etich lo eliwor ekedalan a ngikapolok a ngiarei, eremokin epei sodi tominak loche, kori epupi ngakiro a epei dio kimenya na aloche. Nyipedorete esi akiwap Akuj ta ebari kus.” Na eirareta Ngiparisayo ngakiro nguna daang, apot tokienatar Yesu, kainyo aminasi kesi ngaropiyae noi. Tolimok Yesu kesi tama, “Iraakasi esi ngitunga lu itojokasi make anakonyen a ngitunga, nakaneni eyeni Akuj ngitai kus, kainyo ibore ni itamete ngitunga ebaasi ejok, erono ani a Akuj. “Etatamio kolong etal a Musa ka ngagiran a ngikadwarak a Akuj tanang ngirwa lukolong a Yoana Ekebatisan. Napei alorwa kangulu jik, itatamio Ngakiro Naajokak a Apolou a Akuj nabo esaki itwaan daang alomar Napolou ngina a ekileenu keng. Nakaneni ebeben adis ka akwap angopiar, idwangit etal tani lodiochichi noi lo ikoni akemer ikisario. “Itwaan daang ni elaki aberu keng, sodi kiut aberu ache, aliwor ekaloman asechaki aberu keng. Ekile lo iusi aberu nakolong alak lokile keng, erai ekaloman. “Ayei kolong itwaan ni abarit, tanapite ngiworui lukaanikak esiritoe, kibooye ejakaana, elakara ngirwa daang. Ayei neni dang ekebootonit lo anyaritae Losaro. Erikarito ngesi ngajemei akwaan daang korot, arikununio ngesi lokidor a itwaan anikabaran kangini. Eitanit ngesi akinyam akimuj na achakuunun alomeesa a ekabaran kangolo. Aponeenete tani ngingokwo akime ngajemei keng. Abu ekebootonit ngolo totoan, sodi yaasi ngimalaikae ngesi kiboikin diyete Aburaam, anadis. Abu ekabaran dang totoan, sodi tomurae. Ariaba ngesi noi lokojokon ani ayakasi ngikatoak. Nakaneni kingolia ngesi kidiama taanyunga Aburaam anialonan noi, ka Losaro irudakina diyete keng. Sodi tolomak anyarit ebala, ‘Apa Aburaam, kisieni kare ayong! Tomeu Losaro kilumok ekimoin keng nakipi ngadi, sodi kitililim angajep kang, kainyo kapipilikinit ayong noi akim na!’ Nakaneni abu Aburaam tolimok ngesi tama, ‘Lokooku, toyen atamar ibooyi kolong iyong niajokon iriamunit ibore daang, toriamunete Losaro ibore daang niaronon, ejakaana tokona ngesi kanege, nakaneni iyei iyong lochan iriaba. Kanguna kadaang, eyei nege aaut nakooyen na iriwokina kiding yok, sodi ngulu esakete atamar kirotokini kane apotu nikus, nyepedorete, kori lu esakete aponere kaina nikosi ne, nyepedorete.’ Tatachak ekabaran ngolo ngesi tama, ‘Nakaneni kemaimai cha ayong iyong apa Aburaam atamar tomea Losaro nawi ka apa kang, ni eya talokaato kang lukan: kimiek ngesi tolot kichikichik kesi atamar nyeepot nanam na a akim ka ariaba naga.’ Tolimok Aburaam ngesi tama, ‘Eya talokaatokon etal a Musa ta ngagiran a ngikadwarak a Akuj, kimiek talokaatokon kiirasi anikech.’ Tatachak ekabaran ngolo tama, ‘Nyitemokino nguna apa Aburaam! Nakaneni ani kelot itwaan idio ni ayaru anakitu nikech, iteni eisikinete kesi ngasechesea kech.’ Tatachak Aburaam ngesi tama, ‘Ani pekiirasi Musa ka ngikadwarak a Akuj, nyepedorete akinup tani keyaru itwaan anakitu.’ ” Tolimok Yesu ngirukitos keng tama, “Iteni dir epote ngakiningioto na epedorete akitosech ngitunga, nakaneni etioko nginyas eanyuni itwaan ni eyauni ngakiro nguna! Ejoikinit eenikinio akiries lomosiring tachakakinae nanam, akidwang ngesi akitosech ipei aluuchik kalu. Tochoikinos kanguna isubete esi! “Ani kisechakini iyong lokaatokon, kikilak ngesi, ani kelimo tolung ngasechesea, torimak ngesi. Ani kisechak ngesi iyong ngasechakinet ngakan-kaarei akolongit apei, sodi bu nikon ngabunet ngakan-kaarei tama, ‘Alimo ayong ngasechesea kang alung, ejoikinit iyong irimakini ngesi.’ ” Tolimokis ngimeanara Ekapolon tamasi, “Kitunupae sua noi.” Tatachak Ekapolon kesi tama, “Ani kedit anupit kus ketia echokit a ekoropus, ilimokinete esi ekitoe lo tamasi, ‘Toditun anaten, sodi min torup ananam!’ Nakaneni ikokini neni. “Ani keyei ipei kus ni eyei ekasuban etich lo itae kori iyoki ngamesekin. Na ebunio ngesi alomana, itamari iyong ngesi kiboikin kwap atipei kimuj a? Mam jik! Erai ilimokini iyong ngesi tama, ‘Kidorok akimuj, tanap eworu lokipoet sodi kiyuun ayong ibore daang, kidarou mono atorumo ayong akimuj ka akimat ngakipi, ani erumor kimuj iyong ka akimat ngakipi.’ Nakaneni nyebuakinio ekasuban etich ngolo alakara ana asub ngesi, kori ai? Ikote neni tani anikus, na irumoreta esi nguna daang kilimokinio atamar tosuba, tamasi, ‘Kirai sua ngikasubak etich lupasiek, kisub sua na kichamakinitae kisubi.’ ” Na alosio Yesu atenea Yerusalem, kitor kiding Samaria ka Galilaya. Na alomarea ngesi nadakar ache, kiriamun ngesi ka ngitunga ngitomon lu adeakasi enomokere, awaasi kesi echadakina. Kiremasi tamasi, “Ekapolon Yesu! Kisienoi kare sua!” Na engolikinea Yesu kesi tolimok tama, “Kapesi esi sodi kisemoto ngimurok a akai a Akuj.” Na anangeta lorot eloose, apot tangalekis tojokearos. Nakaneni epei kech na ayenea atamar angaleki edeke keng, tobongo ipuro Akuj irema. Abu tadakakin kwap nakejen a Yesu, tolimok Yesu atamar alakara ngesi noi. Arai itwaan ngini Esamariat. Tolimok Yesu tama, “Meere takae ngikiliok ngitomon kesi etojokio a? Nyaalu tokona lukan-koomwon? Nyoni eraakar itwaan a akwap anache bon ngesi ebonguni abuakin Akuj alakara?” Tolimok Yesu ngesi tama, “Tonyou tolot ijoker iyong ani inupitor.” Kingita Ngiparisayo ngiche Yesu tamasi, “Kori ebunio Apolou a Akuj,” abu tatachak kesi tama, “Nyebuni Apolou a Akuj kotere ngakitoodikinet sodi toyenere. Mam itwaan ni etamari, ‘Kingolik nyelo kane!’ kori, ‘Nyeye kaama!’ kainyo eyei Apolou a Akuj nikus.” Sodi tolimok Yesu ngirukitos keng tama, “Enangi ngirwa lu isaketa esi akingolikin akolongit tani apei a Lokookeng a Itwaan, nakaneni nyingolikinete jik. Epete lu kilimokinete esi tamasi, ‘Kingolikisi ama!’ kori ‘Kingolikisi nege!’ Nakaneni nyiilot kori nyiiwapakis kesi. Kainyo ikoni abunere a Lokookeng a Itwaan eger lo imiliaunea niakwaan alowae a epei tanang lowae loche sodi tokwangik adis daang. Nakaneni ejoikinit ngesi mono eboliare lokojokon, nabo tongero ngitunga a ngirwa kalu. Ikwaanikinosi ngakiro a ngirwa a Lokookeng a Itwaan ka nakolong a ngirwa a Noa. Emuji itwaan daang tamasi, eutanarete ngikiliok nabo epotonorio ngapesur kuutae, tanang akolongit na alomarea Noa tooma natubwa dio tomunyasi ngakipi ngitunga luche daang. Ikwaanikinosi ka ngirwa lukolong a Loti, emujete ngitunga daang tamaase, agielete nabo togielanarete, etaate nabo todukete. Nakaneni akolongit na arotokinio Loti alo Sodom sodi totiyaun akim ka akibirit anadis, tarama loger a akiru dio tomunyasi kesi daang. Ikokinete ngakiro neni na etakanunea Lokookeng a Itwaan. “Akolongit ngina nyejoikinit itwaan ni eyei kidiama kai etiyaun alemun ngiboro keng lu eya tooma kai. Kongina pei, itwaan ni eyei mana dang, nyejoikinit ngesi ebongori kai. Kitamutu aberu a Loti! Itwaan cha daang ni esaki akirichun akiyar keng, ebukori, ni ejali akiyar keng, irichuni. Kalimokinit ayong esi atamar, akolongit ngina nakwaare, eperete ngitunga ngiarei alokitanda a epei: elemario ipei, kimiekinae niche. Eriamunio ngaberu ngaarei iriete aapei: elemario apei, kimiekinae nache. [ Eriamunio ngikiliok ngiarei esubete etich, alomana: elemario epei kimiekinae loche.”] Kingita ngirukitos keng ngesi tamasi, “Aliwae Ekapolon?” Tatachak Yesu tama, “Ni eyei ibore nikatoan ngesi iudakina ngataruk.” Sodi tolimok Yesu kesi ngakiro a ngakitadapet esaki akitatam kesi atamar ejoikinit ilipete Akuj jiik nyeesak akisur ngitai. Tolim tama, “Ayei ekatubon ngakiro a ere eche lo peakerit Akuj kori peamisit ngesi tani ngitunga. Ayei apuserut lore ngolo na abuneene nikeng esaki kainakin ibore keng tama, ‘Totub akiroit na kitiaki ayong ka itwaan nikititar!’ Nakaneni torubak ekatubon ngakiro ngolo nikooyen akitiak kesi, nakaneni ani ekisidi dio tama, ‘Tani pekakerit ayong Akuj kori pekemisit ngitunga, nakaneni kona kechanea ayong apuserut naga, atubi ayong ekies eriyan kainyo ani pekekok neni, ebuneene ngesi jiik akichan ayong ketubur!’ ” Sodi torubak Ekapolon, iruoro tama, “Kiirasi na alimuni ekatubon ngakiro loaronon. Ani bo Akuj, nyepedori ngesi asubakinea niajokon ngiseuna keng lu igoronokinete ngesi apaaran ka akwaar esakete akingarakino a? Etinenikini ngesi akingarakin kesi a? Kalimokinit ayong esi atamar, einakini ngesi kesi ibore ni esakete atipei. Nakaneni eriamuni Lokookeng a Itwaan ngitunga a akwap enupito na ebunio ngesi a?” Kisisau Yesu ngakitadapet nugu kotere ngitunga lu ebaasi kijokak kesi, kimenyarito ngitunga luche daang: “Aloose kolong ngikiliok ngiarei kai a Akuj akilip, arai epei Eparisayot, tarai loche eketubukon echur. Towo Eparisayot a akeng kilip tama, ‘Kabuakinit iyong Akuj alakara kainyo meere ayong itwaan nikamonan, kori ekademan, kori ekaloman kona a ngitunga aluche kadaang. Kepuruunit ayong iyong kainyo nyikikwaan ayong ka eketubukon echur ngol. Aroneene ngaronet ngaarei alorwa alukan-kaarei, nabo kalemanakini iyong alemunet apei anatomon a ibore kadaang ani aanyuununi ayong.’ Towo eketubukon echur anialonan nyirereero ngesi tani kidiama nadis, nakaneni abu ngesi taramarama erarum keng, tolim tama, ‘Ee Akuj, kisienoi ayong ekasechan!’ Kalimokinit esi atamar, eketubukon echur ngolo ngesi alot nawi keng imarakinitae atamar etenoono alongaren Akuj, meere Eparisayot, kainyo itwaan daang ni itopolouno, itiditeunio, ani ni itiditeuna, itopolounio.” Torikut ngitunga ngiche ngide kech nia Yesu esakete ngesi kidokok ngakan kidiama ngakies kech. Nakaneni kikilakis ngirukitos keng ngitunga na engolikineta eyaunito ngide, sodi tanyarau Yesu ngide nikeng tolim tama, “Kimiekisi ngide luuchik pot nikang! Nyiiratakis kesi kainyo erai Apolou a Akuj aka ngulu ikote lu. Kalimokinit ngakiro na iteni atamar, itwaan cha daang ni nyechamuni Apolou a Akuj loger lo echamunitor ikoku niichi, nyelomari jik Napolou ngina.” Kingit ekapolon eche a Ngiyaudi Yesu tama, “Eketataman loajokon, ekokini ayong abili aanyun akiyar na nyedaun ai?” Kingit Yesu ngesi tama, “Nyo kinyaritor iyong ayong ekajokon? Emam niajokon pearai Akuj bon. Iyeni iyong ngitalio lu ebaasi: ‘Nyiiar, nyiilom, nyiikoko, nyiiruor ngakiro na eraakasi alioko, toker apakon ka itiokon.’ ” Tolimok itwaan ngini tama, “Eketataman, napei kolong a ekiditeu kang, erichunit ayong ngitalio lu daang.” Na eirarea Yesu ngakiro nguna, tolimok ngesi tama, “Eroko iyong ibore ipei bon. Kape togiela ibore daang ni itingit iyong, sodi tokoranak ngikebootok ngaropiyae sodi min ebarit kon nadis. Ani erumor, bu kiwapak ayong.” Na eirarea ngesi ngakiro nguna, torotok esiliyorit kainyo abarit ngesi noi. Taanyunga Yesu ngesi kesiliyo tolim tama, “Egogong noi ngikabarak alomar Napolou a Akuj! Ebeben ekaal akitor napedot a emutu idwangit eger lo elomarea ekabaran Napolou a Akuj.” Apot ngitunga lu eirarete nguna kingita ngesi tamasi, “Ngae tokona epedori ayuun?” Tatachak Yesu kesi tama, “Na nyepedorosi alotunga, epedorosi ani a Akuj!” Tolimok Petero ngesi tama, “Tokona! Abe kiisik bo kolong sua ibore daang kiwapak iyong.” Tolim Yesu tama, “Kalimokinit ngakiro na iteni dir atamar, itwaan daang ni eisikini awi, kori aberu, kori ngikaitotoi, kori ngikauriak, kori ngide kotere akisak Apolou a Akuj, einakinio ngainakinet nakaalak ngirwa lu tokona lu ani ngirwa lu a esal, eanyuni akiyar na nyedaun.” Toriko Yesu ngirukitos keng lutomon ka ngiarei tachada tolimok kesi tama, “Topupokisi! Kilosi tokona ngoni Yerusalem, nabo ngakiro daang na egirete ngikadwarak a Akuj ani a Lokookeng a Itwaan, iyookinosi. Erikorio ngesi nia ngibukui alu nyerai Ngiyaudi, tokienatar ngesi, kibungata nabo kimaanakis ngesi ngakimul. Nabo kideta a ngamunyororoi, sodi taara, nakaneni ani enangi akolongit na a ngauni kiteyarunae ngesi toyar.” Nakaneni nyitamuna ngirukitos keng ngakiro na eruoro ngesi tani ekidioko, edaitae eger a ngakiro kanguna anikech peayenete atamar anukiro eruoro Yesu. Na abunio Yesu tanangu diyete Yeriko, ebooyi itwaan nimuduk alodiyete erot ilipanar. Na eirarea ngesi asepich a ngitunga itorunete diye, kingis tama, “Nyoni en?” Tolimokinae ngesi tamarae, “Yesu lo a Nasaret ngesi itorunit diye ne.” Sodi kirema ngesi tama, “Yesu! Lokookeng a Daudi! Kisienoi kare ayong!” Ngitunga lu engarenete kisuburakis ngesi tamasi, “Kililing iyong.” Nakaneni abu ngesi kirema lokojokon tama, “Lokookeng a Daudi! Kisienoi kare ayong!” Towo Yesu tama, “Tanyarautu itwaan nimuduk ngini torikutu nikang.” Na apuunea diyete keng, kingit Yesu ngesi tama, “Nyoni isaki iyong ayong katosubakinea iyong?” Tatachak tama, “Ekapolon, asaki tojoketa ngakonyen engolik akwap.” Tolimok Yesu ngesi tama, “Kingolik akwap! Kitojok iyong anupit kon.” Kingolik ngesi akwap atipei kiwapak Yesu, ebuakinit Akuj alakara. Na engolikinea asepich a ngitunga ngina, kipuruu Akuj. Kitor Yesu kiding Yeriko elosi. Ayei neni itwaan ni anyaritae Sakayo, arai ngesi ekapolon a ngiketubukok echur nabo arai ekabaran. Asaki ngesi akiyen Yesu atamar erai itwaan ni ikoni ai, nakaneni kona aurianea ngesi, tongop kona eanyungari Yesu ani alalaketa ngitunga. Sodi kipiiri ngesi kingarenik asepich a ngitunga dio todoka kidiama lokitoe esaki aanyungar Yesu itoruni lorot ngolo. Na anangea Yesu neni, kingolia kidiama tolimok Sakayo tama, “Totiyaun atipei Sakayo, apeyoni ayong akolongit naga anawi kon.” Totiyaun Sakayo atipei dio kitepeyon ngesi Yesu a alakara. Ngitunga daang lu eteete ngesi, tolomakis akingununguno tamasi, “Alot itwaan en apeyon anawi a ekasechan!” Tonyou Sakayo towo tolimok Ekapolon tama, “Topupok Ekapolon! Atiaki ayong ngibaren kang ainak ngikebootok epewae, ani keyei kolong itwaan engalaarit ayong ibore, abuakini ngabuakinet ngoomwon.” Tolimok Yesu ngesi tama, “Abu ayuuno nawi nakon akolongit na, kainyo erai ekile logo dang ales a Aburaam. Kainyo abuni Lokookeng a Itwaan akisak ka ayuun ni echakara.” Ani eringa ngitunga epupete nguna, tolomak ngesi akisuruor kesi a ngakitadapet. Aapiarito kesi Yerusalem tarai etamito ngitunga atamar kori dikino Apolou a Akuj etakanuni atipei. Tolim Yesu tama, “Ayei kolong ekapolon lo anyouni tolot nakwap nakalonan noi esaki ketiliwor ekapolon, ani erumor tobongu nawi keng. Sodi tanyarau ngesi ngikasubak etich keng ngitomon eroko ngesi nyerotokino, tokorak kesi ngaropiyae itiriyanit tolimok tama, ‘Tosubeta nugu emuchuruseenu kiatakin ngirwa lu amamakar ayong.’ Nakaneni aremokino ngitunga a akwap keng ngesi, tomeasi ngitunga nia ateni ngesi tamasi, ‘Nyikichamit sua itwaan en eliwor ekapolon kosi.’ “Apon kitiliworoe ekapolon ani erumor tobongu nawi. Tanyarau ngesi ngikasubak etich keng lu ainakinit ngesi sek ngaropiyae atamar pot taanyu ngesi etiae a ngaropiyae anakeriamut. Bu lo ekingaren nikeng tolimok tama, ‘Ekapolon, ariam ayong ngaropiyae ngache na idwangito nangoon kiinakini iyong ayong ngakidwanget ngatomon’. Tolim ngesi tama, ‘Ejok noi ekasuban etich loajokon! Kona ikiunor iyong anibore a niichi, ipolokini iyong ngirerea ngitomon.’ Sodi bu nabo lo a ngiarei tama, ‘Ekapolon, ariam ayong ngaropiyae na idwangito nangoon kiinakini iyong ayong ngakidwanget ngakan.’ Tolimok ngolo tama, ‘Ipolokini iyong ngirerea ngikan.’ Bu ekasuban etich loche tama, ‘Ekapolon, ngaropiyae kon nu kane, edait ayong alotooma awaru. Kaemi ayong iyong kainyo irai iyong itwaan nikaadengan. Ilemari ibore ni nyerai ikon, nabo ilemi iyong ngalemet na nyitakina iyong.’ Tolimok ngesi ekasuban etich tama, ‘Irai iyong ekasuban etich loaronon! Kerirae ayong iyong a ngakiro ana tokona ilimuni iyong!’ Iyeni iyong atamar arai ayong itwaan nikaadengan ni alemari ibore ni nyerai ikang, nabo atolemi ngalemet na nyitakina ayong. Ani kikote neni a, nyo peiwaakinea iyong ngaropiyae kang nabengki? Arai kikok iyong neni kariamunit ayong kiatakin na abongunio. Tolimok lu awaasi kaneni tama, ‘Tolemasi ngaropiyae nguna anikeng sodi nakis ekasuban etich lo eyakasi ngaropiyae na idwangito nache ngakidwanget ngatomon.’ Tolimokis ngesi tamasi, ‘Ekapolon, eyakasi ngesi sek ngatomon!’ Tatachak ngesi tama, ‘Kalimokinit ayong esi atamar itwaan daang ni eyei ibore, einakinio ni elal. Nakaneni itwaan ni emam ibore, edemario tani nidiochichi ni etingit! Ani eliwor ngimoe kang lu nyesakete ayong atoliwor ekapolon kech, yautu kesi nege ataara alongaren kang!’ ” Na alimunio Yesu nguna, sodi tolot Yerusalem kingarenik kesi. Na apikinea ngesi ngirerea a Betipage ka Betania lu ayakasi diye emoru a ngikito a akimiet, tomea ngesi ngirukitos ngiarei kingarenikis. Tolimok tama, “Kapesi nadakar na eyei ngaren kus, ani ilomarete neni, iriamunete itasikiria ni eringa nyedoka a ache eenikinitae neni. Talachutu taramut nege. Ani kingit esi itwaan idio tama, ‘Nyo ilacheta esi itasikiria?’ Tolimokisi ngesi atamar esaki Ekapolon.” Toloto kesi toriamut ibore daang ikoni eger lo alimokinitor kesi Yesu. Ani eroko elachete itasikiria, kingita ngikulepek a itasikiria kesi tamasi, “Nyo ilacheta esi itasikiria?” Tatachut kesi tamasi, “Esaki Ekapolon”, sodi taramut kesi itasikiria nia Yesu. Dio kidokokis ngiworui kech kidiama itasikiria, kingarakis Yesu todokarea kidiama itasikiria. Ani na alosio itasikiria ni adokit Yesu, topetakis ngitunga ngiworui kech lorot. Na aapuunea Yesu Yerusalem ni etiyaaror erot lotenet lowae a emoru a ngikito a akimiet, tolomak asepich a ngirukitos keng abuakin Akuj alakara ka akipuruun Akuj iremasi lokojokon kotere ngakiro nakailiilok aanyungarete kesi ebalasi: “Epiarit Akuj Ekapolon lo ebuni a ekiro a Akuj! Ekisil min nadis, nakaneni Akuj epolot dir!” Tolimokis Ngiparisayo ngiche lu ayakasi nasepich a ngitunga Yesu tamasi, “Eketataman, kikilak ngirukitos kon kililinga!” Tatachak Yesu tama, “Kalimokinit atamar, ani kililinga kesi, echalakinete ngamoru nu.” Taapia Yesu lore, ani na engolikinea, kikalou kotere ngitunga a ere kangolo, ebala, “Arai bo dang toyenete esi akolongit na ibore ni ejoikinit isilere! Nakaneni nyipedorete tokona esi akiyen! Epote ngirwa lu kirikauneta esi ngimoe kus kitolukut sodi kiratakis esi kitoroosi a ngiwaitin kadaang. Kinyasunete kesi esi ka ngide kus lu eya tooma nawasea kus, emam amoru tani apei imiekinio esipo, kainyo peiyenete esi esaa lo abunio Akuj ayuun esi!” Toloma Yesu kai a Akuj kitwarak ngimuchurus, tolimok kesi tama, “Igiritae nagiran atamar ebala Akuj, ‘Enyarao Akai kang Akai nakilipet.’ Nakaneni iloch tokona esi itaraut aburibur na eduketa ngirukooi!” Etatami Yesu alokai a Akuj ngirwa daang. Asakete Ngimurok luapolok a akai a Akuj ka ngiketatamak a etal, ta ngikarikok a ngitunga akiar Yesu, nakaneni tongopik kesi kona earete kainyo apupete ngitunga daang ngakiro keng, amam tani ipei asaki akiroit tani apei tobuchar. Akolongit apei na ayakar Yesu tooma kai a Akuj itatami ngitunga Ngakiro Naajokak, pot Ngimurok Luapolok a akai a Akuj ka ngiketatamak a etal ta ngikasukou a Atuk nikeng kingita tamasi, “Tolimokinae mono iyong sua atamar anipolou isubea iyong ngakiro nu? Ngae kitaanyuni iyong apolou na?” Tatachak Yesu kesi tama, “Kengisi ayong dang esi akiroit. Tolimokinae chene esi ayong, aliwae aanyunea Yoana apolou na ibatisaa ngitunga a ngakipi, nia Akuj kori lotunga?” Tolomakis akingitanar make ebalasi, “Ekoe, kitamari ai? Ani kitama ngoni, ‘Aanyuni ani a Akuj,’ kingisi ngesi ngoni tama, ‘Ani nyo bo peinupeta esi ngakiro a Yoana?’ Nabo ani kitama ngoni, ‘Aanyuni alotunga,’ kimasi ngoni asepich a ngitunga a ngamoru kainyo eyenete kesi dir atamar arai Yoana ekadwaran a Akuj.” Sodi tatachakis kesi tamasi, “Nyikiyeni sua ni keanyunea.” Tolimok Yesu kesi tama, “Nyakalimokini ayong dang esi atamar anipolou asubea ayong ngakiro nu.” Abu Yesu tolimok ngitunga ngakitadapet nugu tama: “Etae kolong itwaan amana a ngikito alu enyaritae ngimusabib, sodi toisikinea amana ngina ngiketak tonyou ngesi anawi kichuar. Na anangea ngirwa lulemet amana, tomea ngesi ekedalan keng tolot loketak ngulu esaki atamar kidiau epewae a ngalemet. Kirumut kesi ekedalan ngolo, kibungata sodi kitwarakis tobongo a ngakan anikirion. Tomea ngesi ekedalan eche, nakaneni kibungata ngiketak ngulu ngesi dang, tosubeta niaronon, kitwarakis ngesi tobongo a ngakan anikirion. Tomea nabo ekedalan lo a nguuni, kibungata ngesi dang ngiketak, kitwarakis alomana. Tolim elope a amana tama, ‘Ekokini ayong ai? Ameari ayong Lokookang lominat, epedorete kesi akiker ngesi!’ Nakaneni na engolikineta ngiketak a amana ngesi tolimokin make tamasi, ‘Lokookeng lo! Potu ataara toliwor amana ayok!’ Kipudosi ngesi nikalapatan a amana taarakis neni.” Kingit Yesu kesi tama, “Tokona a, anukiro esubakinea elope a amana ngiketak ngulu? Eari ngesi ngiketak a amana kangina na ebunio sodi nak ngiketak ngiche amana ngina.” Na eirareta ngitunga nguna, tamasi, “Wae, abe ejoikinit peikokinete neni!” Tokienyik Yesu kesi kingit tama, “Nyo tokona eger a ngagiran ana igiritae kona? ‘Amoru nakolong angerete ngikadukok ebaasi erono, ngesi tokona ajoker noi edwang daang.’ Ani kedakakin itwaan namoru ngina, etiakatiakar a ngalooso, ani itwaan ni echakakin amoru ngina kidiama keng, iriari ngesi kikok apua.” Asakete ngiketatamak a etal ka Ngimurok Luapolok a Akai a Akuj akirumun Yesu kaneni, kainyo ayenete atamar esisauni ngesi ngakitadapet nguna itepegitor kesi. Nakaneni tokera kesi akirumun ngesi kotere ngitunga. Nakaneni tasaka kesi erot lo irumuneta ngesi torikosi lokapolok a Ngiroma. Todiaka kesi ngirototin nakis ngaropiyae ani erumor tomeasi akilok Yesu a ngakiro ana elimuni. Toloto kesi nikeng emodito esibit eraakasi ngitunga luajokak. Tolimokis ngirototin ngulu Yesu tamasi, “Eketataman, kiyeni sua atamar ngakiro na iruoro iyong ka na itatami iyong eraakasi ngaka iteni. Nyikachit iyong keyenikinitae itwaan kori kemam, nakaneni itatami iyong ngakiro na esakit Akuj alotunga. Tolimokinae sua atamar ejoikinit Alotal kosi kibukokini sua ekapolon a Ngiroma echur kori emam?” Kona ayenea Yesu atamar kalokitae ngesi a ngakiro kanguna, dio tolimok kesi tama, “Kidodikinae chene aropiyat.” Sodi kingit Yesu kesi tama, “Eka ngae ereet ka ekiro lu eya kidiama lu?” Tatachut tamasi, “Ngika ekapolon a Ngiroma.” Sodi tolimok Yesu kesi tama, “Ani kikote neni, nakisi ekapolon a Ngiroma ibore ni erai ikeng, nakis Akuj ni erai ika a Akuj.” Tongopik kesi ibore ni elokuneta ngesi kaneni alongaren ngitunga. Kililinga chek, etalarito ngakiro na atachuni ngesi nguna. Pot Ngisadukayo ngiche nia Yesu. Ebaasi kesi nyeyarunete ngikatoak. Kingita kesi Yesu tamasi, “Eketataman, igirakinit kolong Musa lotal kona, ‘Ani ketoana itwaan toisik aberu keng emam ngide, ejoikinit lokaatokeng irumi aberu ngina sodi touriut ngide lu eliworosi ngika ngolo atoani.’ Ayakasi kolong ngikaitotoi ngikan-kaarei, kuuta loapolon totoan nyeanyuna ngide. Kirum lo a ngiarei aberu ngina, ta nabo tani lo a nguuni. Tosubakin napeikiro nguna alokaitotoi alukan-kaarei kangulu kadaang, totoaka nyeanyuna ngide. Ani ekisidi, abu aberu ngina dang totoan. Tokona a, na enangea akolongit na eyaruneta ngitunga daang, eliwor aberu aka ngae? Kainyo arai ngesi aberu alukan-kaarei kangulu kadaang.” Tatachak Yesu kesi tama, “Iutasi ngikiliok ka ngaberu a ngirwa kalu, nakaneni ngikiliok ka ngaberu na ejoikinit iteyarunio sodi kibooyoto monan ngirwa lu epote, nyiutanarete kori nyiusio. Ikokinete kesi ngimalaikae nakaneni nyetoakete jik. Eraakasi kesi ngide a Akuj ani eyaruneta. Nakaneni idodiunit Musa dang atamar ngulu etoakito iteyarunio toyara, anagiran ana igiritae ngakiro a ekitoe alo anoki, alimuni ngesi ngakiro a Ekapolon tama, ‘Ekapolon ngesi erai Akuj ka Aburaam, Akuj a Isaka ta Akuj a Yakobo.’ Erai ngesi Akuj alu eyarete, meere Akuj alu etoakito, kainyo eyarete daang anikeng.” Kiruorikis ngiketatamak a etal ngiche tamasi, “Eketataman, itachu iyong niajokon!” Toema kesi akingit Yesu ngakiro ngache. Kingit Yesu kesi tama, “Nyo ebaatar ngitunga erai Kiristo alesit a Daudi? Kainyo abala Daudi elope anakitab ana a Ngieosio kona, ‘Alimokini Akuj Ekapolon Ekapolon kang tama, kiboikin ne lowae kang lo aloteten tanang na edwangea ngimoe kon pena kwap ngakejen kon!’ Ani kenyarit Daudi ngesi ‘Ekapolon’, ikokini nabo Kiristo eliwor ales a Daudi ai?” Na apupokinitor asepich a ngitunga Yesu, tolimok ngesi ngirukitos keng tama, “Tochoikinos aloketatamak a etal, eminasi kesi akirimit akwap enapito ngiworui lukooyak, nabo kimalae a arimatoi ani egieleta ngitunga ngiboro. Eseunete kesi niajokon ni iboikinosi anakais a Atuk ka ni imujere. Edemete kesi ngapuseru ngiboro kech, ani erumor, kilipa nikooyen iwogasi akiding pas! Eroner eriras kech noi!” Kingolia Yesu kingolik ngikabarak iwaanakinete ngaropiyae nasaduku a ngaropiyae na ayei tooma akai a Akuj. Kingolik ngesi tani apuserut na ebootonit iwaakini ngadururio ngaarei. Tolim Yesu tama, “Kalimokinit ayong esi atamar ewaak apuserut nakebootonit na ngaropiyae nakaalak nasaduku na idwangito na a ngitunga aluche kadaang. Kainyo ngitunga ngulu daang ewaanakinete ngaropiyae analalau a ebari kech. Nakaneni ngesi aloboot keng, ewaak daang na atingit ajal tani napalem eyaritor.” Eruorosi ngiche ngakiro a akai a Akuj ebaasi ejok noi isubusitae a ngamoru. Eruorosi kesi tani ngakiro a ngalemikinet ana alemikinio Akuj. Tolim Yesu tama, “Nugu daang na iteete esi, enangi akolongit na nyidongio tani amoru apei ni tokona eya nege, eukorio ngamoru daang.” Kingita tamasi, “Eketataman, ori esubakinotor ngakiro nugu? Nyoni esubakin toyenere atamar anang akolongit na esubatar ngakiro nu?” Tolimok Yesu kesi tama, “Tochoikinos kuriasi itwaan nyikingala esi. Epote ngikaalak iruorosi a ekiro kang ebaasi, ‘Ayong ngesi ngolo!’ Kori atamar, ‘Anang esaa!’ Nakaneni tochoito iwapakinete kesi. Kuriasi nyikibul na iirareta esi ngakiro a ejie ka ekurikur, esubakinosi ngakiro na ikote nguna, nakaneni nyidodiunito kesi atamar anang esal.” Kianua Yesu ebala, “Ejikinosi ngitunga a akwap aapei ka lua akwap anache. Eremete ngitunga a ekapolon a epei ngitunga a ekapolon aloche. Emaranikini akwap alowaitin alugelagelae nabo emini eron a akoro ka ngidekesinei daang luaronok, epete ngakitoodikinet naationok nadis iteemete ngitunga. Nakaneni ani eringa ngakiro nugu daang nyesubakina, kirumunio esi, kitoboliare noi, kititao esi anakais a Atuk, kitoinikin lojela dio kitorikor kitowei alongaren ngikarikok ka ngikapolok kotere ayong. Eliwor alolom na ilimoreta esi Ngakiro Naajokak a Yesu Kiristo ngina. Kuriasi ngakiro nyeeriab ngitai kus ibaasi anukiro ilimunete kori ilimunete kwaai, kainyo kainakini ayong esi ngakiro ka aosou na emam tani ipei a ngimoe kus ni epedori akituluny kori apega ngakiro na ilimunete esi. Kipotorete esi ngikauriak kus, ka talokaato kus ka ngiyenet ka talopae kus nabo epedorete tani epewae kus aaro. Kiremokinosi esi ngitunga daang kotere ayong. Nakaneni emam tani etimat epei lo a ngakies kus lo echakar. Ani kititinyikis esi nugu, iyuunete esi ngitai kus. “Naingolikineta esi Yerusalem irikaunito ngajorei a ngimoe, toyena esi atamar edikino inyasunio atipei. Ejoikinit lu eyakasi nakwap a Yudea ematarosi lomoru, nabo lu eyakasi lore ejoikinit erotokinete, nabo lu echadakina alore, ejoikinit nyeelomut tooma lore. Kainyo eliworosi ngirwa ngulu ‘Lu a Eriras,’ kiyookinotor na igiritae nagiran. Erokearosi noi ngakiro ngirwa ngulu ani a ngaberu ana epotiete ka na itanakete! Epete ngakiro naaronok nakwap na, nabo emini anyunyura a Akuj lotunga lugu! Ichumio ngiche kech a ngilengea taarae, erikio ngiche nakwapea nache, ipudaate ngibukui luche Yerusalem tanang ngirwa lu edaunor apolou a ngitunga alu nyerai Ngiyaudi. “Epete ngakitoodiunet naparing nakolong ka elap ta ngikanyer. Elomakinete ngibukui daang ariaba nabo toema akulare a anam ka aruore na elelea. Ebuli ngitunga niaronon idarito ngakiro na epote nakwapea daang, kainyo emaranikini agogongu daang nakaanikan ka na eyei kidiama. Sodi etakanuni Lokookeng a Itwaan kingolikinae ngesi ebunit alotooma ngidowon ka agogongu naapolon ta akwangis a apolou. Ani enangi ngirwa lu iyookinotor ngakiro nguna daang, kikeasi ngakies kus kidiama towaa, kainyo aapuu ayuuno kus.” Abu Yesu tolimok kesi ngakitadapet nugu tama: “Kitama mono esi eger a emeyen ka ngikito luche daang. Na ingolikineta esi ngakui kech kimineut, iyenunete atamar aapuu akiporo. Aloger alopei kangolo, na ingolikineta esi ngakiro nguna esubakinosi, toyena atamar aapuu Apolou a Akuj abunere. “Kalimokinit ngakiro na iteni dir atamar esubakinosi ngakiro nguna daang eringa epewae a ngitunga alu tokona eyarete nyetoaka. Edaun adis ka akwap nakaneni nyedaunosi ngakiro kang jik. “Tochoikinos! Kuriasi akimwonut ka elewas ta ngichan a eboyor a akwap nyikitumosi esi, tanang akolongit ngina atipei peiyenete esi, loger a elokit alo irumi ibore atipei. Epote ngakiro nguna lotunga daang anakwap. Kiboikinos irichuna nabo kilipa ngirwa daang sodi taanyuneta agogongu na ipuunotor anakiro kadaang ana esubakinosi, dio towaatar alongaren Lokookeng a Itwaan.” Ngirwa ngulu, etatami Yesu jiik alokai a Akuj, ani naewaria topudo ngesi tolot akiper moru a ngikito a akimiet. Aloseenete ngitunga daang nataparach kai a Akuj akipup ngakiro keng. Aapikinit ngirwa lu esukukuu a Ngamugati a Napadok, lu eraakasi ngika a esukukuu alo enyaritae Adeparet. Aemito Ngimurok Luapolok a akai a Akuj ka ngiketatamak a etal, ngitunga. Sodi tasaka kesi erot lo irumuneta Yesu taara. Sodi toloma Esiitan nia Yuda, ngolo anyaritae Isikariote, arai ngesi epei a ngirukitos alutomon ka ngiarei. Sodi tolot Yuda kiana ka Ngimurok Luapolok a akai a Akuj ta ngikapolok a ngasigerea ana eteete akai a Akuj eger lo erikokinea ngesi kesi Yesu. Talakaros kesi kichikakis ngesi atamar kiinakini ngaropiyae. Sodi Yuda tacham ngaropiyae tolomak akisak erot lo erikokinea kesi Yesu peeyenete ngitunga. Tanang akolongit na a Ngamugati a Napadok, akwaar na engolere imesek ngini enyamio akwaar a esukukuu a Adeparet. Tomea Yesu Petero ka Yoana tolimok tama: “Kapesi tosubakisi akimuj na a esukukuu a Adeparet, dio atanyama.” Kingita ngesi tamasi, “Aliwae isaki iyong sua atoloto atosubakineta?” Tolimok tama, “Topupokisi! Na ilomareta esi lore, kisiriami esi ekile lo edakit alupe a ngakipi. Kiwapakisi ngesi tanang kai na elomari ngesi, sodi tolimokis esi elope a akai kangina tamasi, ‘Ebala Eketataman kingita iyong keyei wadio nikaaloman ni imujeta ngesi ka ngirukitos keng akimuj a esukukuu a Adeparet.’ Kidodikini ngesi esi amaniyat naapolon na esubakinitae alokidiama akai. Iriamunete esi eya ngiboro daang, tosubakisi akimuj kaneni.” Toloto kesi toriamut ibore daang ikoni ni alimokinitor Yesu kesi, sodi tosubakis akimuj a esukukuu a Adeparet. Na anangea esaa, kiboikinos Yesu ka ngimeanara keng kimuja. Tolimok kesi tama, “Kemuit ayong noi akimuj ka esi akimuj a esukukuu alo Adeparet eringa ngitunga nyeboliara ayong! Kalimokinit ayong esi atamar nyemuji ayong akimuj na nabo jik tanang akolongit na eriyanea dir eger keng Anapolou a Akuj.” Tolem Yesu ekopo lo ayei emuna lo epuritoe, kilipak Akuj tolim tama, “Totinga tomora. Kainyo kalimokinit ayong esi atamar nyamasi emuna lo epuritoe nabo napei tokona jik tanang na ebunio Apolou a Akuj.” Sodi tolem amugati kilip Akuj, tonyil nak kesi ebala, [“Akwaan kang nakiinakin esi ngesi naga. Tosuba kona kitamunitotor ayong.” Aloger alopei kangolo, na adaunor akimuj, nak kesi ekopo tama, “Ekopo logo ngesi achamunet a Akuj nakitetet na eyookin a ngaakot kang anabukorosi kotere esi.] “Wae, kingolikisi mono esi a! Ngolo karikokini ayong ngitunga kiboi ka ayong kane alomeesa! Etoani Lokookeng a Itwaan kona etiakunitor Akuj, nakaneni etioko nginyas eriamuni itwaan ni erikokini ngesi ngitunga!” Tolomakis akingitanar make atamar ngae anikech esubakini ngakiro nguna. Topegakinos ngirukitos keng atamar ngae epolot noi anikech. Tolimok Yesu kesi tama, “Epolokinito ngikapolok a ngibukui alu nyerai Ngiyaudi ngitunga kech. Nabo ngulu eweikinito kesi enyaritae, ‘Ngipaalon a ngitunga.’ Nakaneni nyejoikinit ngakiro ikokinete neni anikus, ejoikinit ni epolot anikus ikwaanikin ka ni edit, ani ni epolot, ejoikinit ikwaanikin ka ekasuban etich. Ngae epolot, ngini ibooyi alokwap imuji, kori ngini ekoranakini ngesi akimuj? Erai ngini ibooyi alokwap imuji. Ekoni tokona ayong alokiding kus ekakoran. “Kiruk ngoni napei kolong jik anakiningioto kang kadaang. Kona ketiliworea ayong Apakang Ekapolon, ketiliwori ayong esi dang ngikapolok. Imujete esi akimuj ka akimat ngakipi alomeesa kang, Anapolou kang. Iboikinosi tani lokicholong kirirata ngitela lutomon ka ngiarei a Isirael. “Ayoro Simon, topupok mono iyong! Achamakin Esiitan akining esi sodi totiaku luajokak ani eya luaronok loger a eketan alo edauni ngichok a ngakanoi anasiina. Nakaneni kelipak ayong iyong Simon sodi nyiilochokin anupit kon. Ani na ibongunio iyong nikang, ejoikinit iyong itogogongi talokaato kon.” Tatachak Petero ngesi tama, “Ekapolon, alemuna ayong alosit ka iyong kerai lojela kori atoakere ka iyong aapei!” Tolimok Yesu ngesi tama, “Kalimokinit ayong iyong Petero atamar, ani eringa ekokoroit nyerukino atabong naga, ilimuni iyong ngalimunet ngauni atamar nyikiyeni ayong.” Kingit Yesu kesi tama, “Nakolong kamearea ayong esi emam etokole kori echue kori ngamuk, ayei ibore ichanasi esi a?” Tatachut tamasi, “Amam ibore kichana.” Tolim Yesu tama, “Nakaneni tokona, ejoikinit itwaan cha daang ni eyei etokole kori echue etingi, ani ngini emam ekileng ejoikinit egielari eworu keng sodi togiel ekileng. Kainyo kalimokinit ayong esi atamar, ejoikinit ngagiran na igiritae kona iyookinosi anikang, ‘Emarunio ngesi ka ngirukooi aapei.’ Kainyo iyookinosi nguna egiritae kotere ayong.” Tolimokis ngirukitos keng tamasi, “Ekapolon! Kingolik a! Eyakasi ngilengea ngiarei ne!” Tatachak tama, “Arumor!” Torotok Yesu alore tolot moru a ngikito a akimiet loger lopalem sek. Kirukosi ka ngirukitos keng aapei. Na anangea ngesi neni, tolimok kesi tama, “Kilipa sodi nyiilomasi nakiningioto.” Sodi torotok ngesi anikech ani enangi ni ebayi ni edoe amoru na imasario, sodi toriedik ngesi kilip. Tolim tama, “Apa, ani kichamit iyong, tolema kare ekopo lo anikang. Nakaneni meere kona achamit ayong pearai tosubakin na ichamit iyong.” [ Bu emalaikat anadis kitogogong ngesi. Kilip ngesi lokojokon eriaba noi, ekote ngakiinyir keng ngaakot idokasi nalup.] Na anyounio Yesu ani elipitor, tobongo torukau ngirukitos keng kejotoorosi, kituburut ngakiro na anomito kesi ngitai. Tolimok kesi tama, “Nyo ijotooto esi? Tonyoutu kilipa, sodi nyianyunosi ka akiningo.” Ani eringa Yesu iruoro, todolu asepich a ngitunga. Yuda lo arai epei a ngirukitos alutomon ka ngiarei, ngesi arikit kesi. Sodi tolot ngesi nia Yesu tonuak. Sodi tolim Yesu tama, “Yuda, irikokinit iyong Lokookeng a Itwaan ngitunga a akinu a?” Na ayeneta ngirukitos a Yesu nguna adikino esubakin, kingitas tamasi, “Ekapolon, ejoikinit sua kiteli kesi a ngilengea a?” Kitel epei kech ekedalan a Emuron a Loapolon a akai a Akuj nakit na aloteten totubo. Nakaneni tolim Yesu tama, “Arumor!” Tatap ngesi akit a itwaan kangini, kitangalek. Tolimok Yesu Ngimurok Luapolok ka ngikapolok a ngasigerea ana eteete akai a Akuj ta ngikasukou a Atuk lu aponito akirumun ngesi tama, “Nyo tokona iponitotor esi nikang itingito ngilengea ka ngiseboe ikwa ibore esibit arai ayong erukoot? Kirukit ayong ka esi ngirwa daang alokai a Akuj, nakaneni peisakete esi akirumun ayong. Nakaneni erai tokona esaa kus lo isubeta etich a apolou a aribu logo.” Kirumut kesi Yesu torikosi kai a Emuron a Loapolon a Akai a Akuj, ewapit Petero kesi echadakina. Enokakinitae akim kiding alaar, sodi tolot Petero kimorikin kangulu ebooyete kaneni irikaunito akim. Na engolikinea ngesi apese apei na asubi etich kaneni ibooyi alodiye akim, abu tokienyik ngesi tolim tama, “Arukito itwaan en dang ka Yesu!” Nakaneni topeg Petero tama, “Iyong aberu na, nyayeni ayong ngesi!” Ani ekisidi wadio, toyen ekile eche Petero tolim tama, “Irai iyong dang epei kech dir!” Nakaneni tatachu Petero tama, “Ekile, nyarai ayong!” Adaunet a esaa epei, bu itwaan iche kirichakin jik lokojokon ebala, “Arukito itwaan en ka Yesu dir kainyo erai ngesi dang itwaan a Galilaya!” Sodi tatachu Petero tama, “Nyayeni ayong ngakiro na iruoro iyong!” Toruk ekokoroit atipei eringa ngesi iruoro. Torei Ekapolon Yesu tokienyik Petero, dio Petero kitam ngakiro nasek alimokini ngesi Ekapolon ebala, “Ani eroko ekokoroit nyerukino atabong naga ilimuni iyong ngalimunet ngauni atamar nyikiyeni ayong.” Topudo Petero sodi kikalou lokojokon. Tokienatar ngitunga lu eratakinito Yesu ngesi sodi kibungata. Kimuko ereet keng kingita ngesi tamasi, “Ngae kirami iyong? Todwar chene!” Tolimonokis ngesi ngakiro nakaalak na a ngiyeny. Na ewalarea, kiriamariama ngikasukou a Atuk ka ngimurok luapolok a akai a Akuj ta ngiketatamak a etal, sodi torikoroe Yesu Natuk kech. Kingita ngesi tamasi, “Tolimokinae mono iyong sua, iyong ngesi irai Kiristo a?” Tatachak tama, “Tani kalimok ayong esi nyinupete esi ngakiro kang, ani tani kengit ayong esi akiroit nyitachunete esi. Nakaneni napei tokona jik, iboikin Lokookeng a Itwaan lowae lo aloteten a Akuj Anapolon Noi.” Kingitas daang tamasi, “Iyong tokona irai Lokookeng a Akuj a?” Tatachak kesi tama, “Ilimut esi atamar ayong ngesi arai.” Tolimut kesi tamasi, “Ekoe, eya nabo ngakiro ngache esakio akiyen a! Kiira ngoni ngikulepek ngakiro na alimu ngesi!” Tonyout ngitunga a Atuk daang torikosi Yesu nia Pilato. Nakaneni tolomakis akititare ngesi ebalasi: “Kiriamuni sua itwaan en ingalae ngitunga a akwap kosi, kitengerit sua abukonokin ekapolon a Ngiroma echur, nabo ebala ngesi arai ekapolon, Kiristo.” Kingit Pilato Yesu tama, “Iyong irai ekapolon a Ngiyaudi a?” Tatachak Yesu tama, “Nyenguna ilimu iyong.” Sodi tolimok Pilato Ngimurok Luapolok a akai a Akuj ka asepich a ngitunga tama, “Emam ibore niaronon esubit itwaan en ni echamit ititaare.” Nakaneni kirichakinos kesi jik ebalasi, “Echuumi ngesi ngitunga a ngakiro ana itatami ngesi alowaitin kadaang a Yudea. Esiakini kolong alo Galilaya, nakaneni anangu tani nege dang.” Na eirarea Pilato nguna, kingis tama, “Erai itwaan en ika Galilaya a?” Na ayenea ngesi atamar ebunit Yesu anakwap a ekapolon Erode, abu tolim atamar torikoroe Yesu nia Erode. Ayei Erode Yerusalem ngirwa ngulu. Talakar Erode noi ani engolikinea Yesu kainyo apupi sek ngesi ngakiro a Yesu, nabo ngirwa ngikaalak, emuit ngesi aanyun Yesu. Asaki ngesi aanyungar Yesu esubakini ngakitoodikinet nakailiilok ngadi. Sodi kingitana Erode Yesu ngakiro nakaalak, nakaneni kililing Yesu chek. Tonyout Ngimurok Luapolok a akai a Akuj ta ngiketatamak a etal kititakis Yesu lokojokon noi. Tokienatar Erode ka ngasigerea keng Yesu sodi tosubeta ngakiro na a ngileech. Ani erumor, kitanapa eworu loajokon tobuasi nia Pilato. Akolongit ngina, toelokinos Erode ka Pilato, aremokino sek kesi ekingaren. Tochunak Pilato Ngimurok Luapolok a akai a Akuj ka ngikapolok a ngitunga wapei, tolimok kesi tama, “Irikunete esi itwaan en nikang ibaasi ichuumi ngesi ngitunga. Engichingich tokona ayong ngesi alongaren kus, nakaneni emam ngakiro naaronok na ititata esi ngesi na esubit ngesi. Emam tani Erode dang ibore niaronon aripu anikeng, ngesi abuunea ngesi niyok. Emam ibore niaronon asubaki ngesi ni ejoikinit earere. Atamari ayong kidetae ngesi kimiekinae tolot.” [ Kainyo ngirwa daang lua esukukuu a Adeparet, alachanakini Pilato eenat epei.] Tachalu asepich daang a ngitunga tama, “Taara itwaan en! Kisaki sua Baraba talachakinae!” ( Aenitae Baraba alojela kotere ekurikur lo esiakini ngesi alore, nakaneni aarit nabo tani itwaan.) Kona asakea Pilato alachakin Yesu, kisuruorik nabo asepich a ngitunga. Nakaneni tachalut tamasi, “Taramakisi napir!” Kingit Pilato kesi na a ngauni tama, “Nyo niaronon esubit ngesi? Emam ibore niaronon aripu ayong ni ejoikinit ngesi earere! Atamari ayong kidetae ngesi sodi talachakinae tolot.” Nakaneni torubakis kesi echalasi noi ebaasi ejoikinit Yesu eramakinio napir, ani esal tosubakin ngakiro loger lo asakete kesi. Totub Pilato ngakiro atamar tosubae loger lo asakete kesi. Talachak itwaan ni asakete kesi talachakinae, ngesi lo aenikinitae lojela kotere ngakiro a ekurikur ka na a akiar. Dio toriko ngesi Yesu nia ngitunga kangulu tosubeta kesi ngesi nguna echamito. Ani na arikitotor kesi Yesu, kiriamunos ka itwaan ni anyaritae Simon lo arai eka akwap a Kurene. Abunit ngesi anadakar ana achadakina alore. Torwakinos ngesi sodi toriongakis apir loseget keng kiwapak Yesu. Kiwapak asepich a ngitunga nakaalan Yesu. Ayakasi ngaberu kiding kech na egorosi, nabo tosutonokinete kotere ngesi. Nakaneni torei Yesu kingolik kesi tolimok tama, “Ngaberu a ere a Yerusalem! Nyiigor kotere ayong, nakaneni kigoro kotere ngide kus ka esi. Kainyo epote ngirwa lu etamareta ngitunga, ‘Epiaritae noi ngaberu nakolup ka nguna nyidouno ngide ta nguna nyitanaka!’ Ngirwa ngulu ngesi elimokineta ngitunga ngimoru tamasi, ‘Toukunos nikosi!’ Nabo tolimokis ngaukon tamasi, ‘Kidae sua!’ Ani kasubeta kesi ayong lokikwaan ka ekitoe lokaapalan kona, anu kisubeta kesi esi lu ikwaan ka ekitoe lokoonon?” Kirumut ngitunga ngiche ngiarei lu araakasi ngirukooi, taara ka Yesu aapei. Na anangeta ni enyaritae, “Akulului a Akou”, taramakis Yesu napir ka ngirukooi luarei ngulu, epei lowae lo aloteten, ani loche lowae lo alokedieny. Tolim Yesu tama, “Apa! Torimak kesi ani nyeyeneta na esubete.” Totiakanakinos kesi ngiworui keng a akilere ngisigira. Awaasi ngitunga kaneni iteete ngesi, akienatar ngikapolok a Ngiyaudi ngesi ebalasi: “Ayuuni ngoon ngesi luche, kimiekisi toyuun ngesi bon, kerai ngesi erai Kiristo a Akuj!” Tokienatar ngasigerea dang ngesi. Pot nikeng nakis ngesi emuna lo epuritoe, tolimokis tamasi, “Toyuun bon kirai iyong ekapolon a Ngiyaudi!” Egiritae ngakiro nugu atapakinitae kidiama napir lo aramakinio ngesi, “Logo ngesi erai ekapolon a Ngiyaudi.” Kiyeny ngesi epei a ngirukooi alu aramakinitae ka ngesi neni tama: “Ikwa meere iyong irai Kiristo? Toyuun bon, kitoyuu tani sua dang!” Nakaneni kikilak ngesi loche tama, “Nyikerit iyong Akuj a? Kiriratae iyong ka ngesi aapei. Nakaneni kiriratae ngoni dir kotere ngakiro na kisubi ngoni, nakaneni emam itwaan en ngakiro naaronok asubaki,” sodi tolimok ngesi Yesu tama, “Kitamunae ayong Yesu, na ibongunio iyong irai Ekapolon.” Tolimok Yesu ngesi tama, “Kalimokinit ayong iyong atamar kipeni ayong ka iyong najako a Akuj akolongit na!” Na anangea ngisaae ngikan-kapei naparan lotingilan, kirionik akwap daang chuch tanang ngisaae ngikan-koomwon esongi akolong. Tochil awaru na enenekino kai a Akuj ngachilet ngaarei. Kikalou Yesu kirema tama, “Apa! Ewaak ayong etau kang nikon!” Na alimunio nguna dio totoan. Na anyungarea ekarikon a ngasigerea na asubakinosi, kipuruu Akuj ebala, “Kejok itwaan en dir!” Na anyungareta ngitunga lu achunakina neni ngakiro na asubakinosi, tobongosi nawiyei kech eramaramate ngirarumo ani anomitotor ngakiro nguna ngitai. Daang lu anaikina ka Yesu imorikina ka ngaberu na ewapuunete ngesi alo Galilaya, awaasi echadakina iteete ngakiro nguna daang. Ayei itwaan neni ni anyaritae Yosep ni abunit alore a Arimatea anakwap a Yudea. Arai ngesi itwaan a Atuk, nabo ajok totenoono. Peachamunit ngesi ngakiro na asaket kesi asubea Yesu. Edarit ngesi abunere a Apolou a Akuj. Tolot ngesi nia Pilato atamar asaki akwaan a Yesu. Sodi totiyau ngesi akwaan a Yesu toenik loworu lodapal lokooyen, sodi kitoperik naliel na abokakinitae nataaba, ni amam itwaan iche sek anukakinitae. Arai akolongit ngina Ijumaa, nakaneni aapikinit akinang akolongit na a Sabato. Kirukosi ngaberu nasek ewapuunete Yesu alo Galilaya ka Yosep dio taanyungasi aliel ka eger lo eperikinere akwaan a Yesu naliel. Tobongosi kesi nawiyei kech tosubakis akimiet nakakukunyon na iwasakinete nakwaan keng. Kiangasi kesi akolongit na a Sabato loger lo igiritere lotal a Musa. Toloto ngaberu naliel nataparach elilim akolongit na a Jumapili, etingito akimiet nakakukunyon na asubakinito. Toriamut amoru kikokoriyor anakituk a aliel, sodi tolomasi tooma, nakaneni nyeriamuna kesi akwaan a Ekapolon Yesu. Na awaatar kesi kaneni engayakinito eger a ngakiro kanguna, nipei bore ngini towaa ngikiliok ngiarei lu anapito ngiworui luakwaak kea alodiye kech. Kijuuruoto ngaberu nguna ebulit noi, kingita ngikiliok ngulu kesi tamasi, “Nyo isaketa esi itwaan ni eyari lotunga lu etoakito? Emam ngesi kane, ayaru. Kitamutu nakolong kilimokini ngesi esi na ayakar ngesi Galilaya ebala, ‘Ejoikinit Lokookeng a Itwaan erikokinio ngitunga lukasechak, eramakinio ngesi napir, dio toyaru akolongit na a ngauni.’ ” Kitamut ngaberu nguna ngakiro a Yesu, tobongut analiel, tolimokis ngirukitos lutomon ka epei daang ta ngitunga luche daang ngakiro nguna daang. Araakasi ngaberu nguna Mariam Magadalene, Joana, ka Mariam itiokeng a Yakobo, tolimokis kesi ka ngaberu nache arukitotor, tolimokis ngimeanara ngakiro nguna daang. Nakaneni abaasi ngimeanara kori araakasi ngakiro na alimunete ngaberu nguna ngapasiek, apot kesi nyeenupa ngakiro kech. Tonyou Petero kipiiri naliel. Sodi tokudokin toripak, kingolik ngawarui nasek aenitere make analiel, emam nabo ichebore. Tobongo ngesi nawi engayat atamar anukiro kepot tosubakinos. Akolongit napei ngina, aloose ngirukitos a Yesu ngiarei nadakar enyaritae Emaus, na erai ngakilomitae ngakan-kaarei alo Yerusalem. Alimonokinosi kesi ngakiro daang na asubakinosi. Ani na eruorotor kesi kiyanete, todol Yesu kesi kirukosi aapei. Taanyungasi kesi ngesi, nakaneni kibiler ibore kesi nyeyana ngesi. Kingit Yesu kesi tama, “Anukiro na ianete esi analosit kus nu?” Towaa kesi esiliyorito. Kingit epei kech lo anyaritae Kilopa ngesi tama, “Iyong bon irai epeyonon alo Yerusalem lo nyiyeni ngakiro na asubasi kaneni ngirwa lupei been lua?” Kingit tama, “Anukiro nguna?” Tatachakis tamasi, “Ngakiro na asubere Yesu lo a Nasaret. Arai itwaan ngini ekadwaran a Akuj dir, lo asubi ngakiro nakitalarete nabo kitatami ngakiro nakationok alotunga ka Akuj. Atiakunete Ngimurok kosi luapolok a akai a Akuj ka ngikapolok atamar ejoikinit ngesi eario. Taramakis ngesi napir. Kitamit sua atamar kori ngesi eyuuni Ngisirael! Kanguna kadaang, erai tokona akolongit na a ngauni napei ngoon aarere ngesi naga. Kitoriangakis sua ngaberu ngache na eraakasi ngarukitos kosi, aloose kesi naliel nataparach elilim, nakaneni nyeanyuna kesi akwaan keng. Tobongut kesi ebaasi kingolikini akisingolikinet a ngimalaikae alu kilimokinete atamar eyari Yesu! Toloto ngiche kosi naliel torukaut ikoni eger losek abaatar ngaberu, nakaneni nyingolikina ngesi.” Sodi tolimok Yesu kesi tama, “Etige ngikabangabangae, abe etioko esi ngitai, nyinupete atipei ngakiro na alimunete ngikadwarak a Akuj! Nyiyenete esi atamar ajoikinit Kiristo eboliare sodi tolomarea napolou keng a?” Kisisak Yesu kesi ngakiro daang na egiritae nagiran elimunitoe kotere ngesi, kisiak anakitabea a Musa tanang nagiran a ngikadwarak kadaang. Na anangeta kesi diyete ere lo aloose, tasak Yesu akiporor, nakaneni kiratakis kesi ngesi tamasi, “Bua toper nawi kosi kainyo awaar, ariboki akwap.” Sodi tolot ngesi toloma tooma, kiboikinos ka kesi. Ani iboikinosi Yesu ka kesi akimuj alomeesa, tolem amugati dio tobuak Akuj alakara, sodi tonyil ngesi amugati, nak kesi. Tobwangas ngakies kech sodi toyena ngesi, nakaneni abu ngesi tongop topuripuriakin. Tolimonokinos kesi tamasi, “Ekoe, ikwa ngesi mono kejoikinitotor ngakiro ngitai yok lokojokon na kisuruorea ngesi ngoni alorot nabo kitatamik ngagiran a?” Tonyout kesi atipei tobongosi Yerusalem. Torukaut ngirukitos lutomon ka epei ka ngitunga luche echunakina wapei, tolimut tamasi, “Ayaru Ekapolon dir! Atakanuu engolik Simon ngesi!” Kisisakis ngirukitos luarei ngulu kesi ngakiro na asubakinosi alorot, ka eger lo ayeneta kesi Ekapolon na anyilea amugati. Ani eringa kesi isisaunito nguna, towo Ekapolon atipei alokiding kech tolimok tama, “Ekisil min nikus.” Tobul kesi noi tamasi kori kingolik Ekipe. Nakaneni tolimok ngesi kesi tama, “Anukiro eriebete ngitai kus? Nyo itiakitotor esi ngitai ngaarei? Kingolikisi ngakan kang ka ngakejen kang, sodi toyena atamar ayong ngesi itwaan en. Totingae ayong sodi kitoyan, kainyo emam Ekipe akwaan ka ngakoyo loger lo tokona kiteeto esi ayong eyakasi.” Na alimunio nguna, kidodik ngesi kesi ngakan ka ngakejen keng. Aringa kesi jik nyenupa, alakara kesi noi etalarito ngakiro a Yesu. Kingit kesi tama, “Eyei ibore idio nege ninyamat a?” Nakis kesi ngesi epewae a ekolia alo akonit. Kidiau ngesi tanyam alongaren kech. Tolimok kesi tama, “Ngakiro nu kesi nakolong kalimokinit ayong esi eringa kirukit: Ngakiro daang na egiritae kotere ayong Alotal a Musa ka ngagiran a ngikadwarak a Akuj, ta ngieosio, ejoikinit daang iyookinosi.” Sodi tobwangas ngakies kech toyena ngagiran. Tolimok kesi tama, “Nugu kesi na igiritae atamar, ejoikinit Kiristo eboliare sodi toyaru akolongit na ngauni. Ejoikinit itatamio ngibukui daang atamar tolunga ngasechesea, sodi torimak Akuj ngasechesea kech a ekiro a Yesu. Kisiakis akitatam kane alo Yerusalem. Iraakasi esi ngikaanyunak a ngakiro kanu. Ameuni ayong nikus ibore ni kichikak Apa esi. Nakaneni ejoikinit esi idarunete kane alore tanang akolongit na ianyuneta esi agogongu na ebunit alokidiama.” Sodi toriko ngesi kesi nikalapatan a ere toloto tananga Betania. Kikea ngesi ngakan keng kaneni topia kesi. Ani eringa ngesi egatakinit kesi, torotok ngesi anikech kikiarae alongaren kech, yaarae kidiama nadis. Kilipa kesi ngesi ani erumor tobongosi Yerusalem elakara noi, dio tolomasi akibooyere alokai a Akuj ebuakinito Akuj alakara. Kolong eringa akwap nyesubakina, ayei Akiroit, arukito Akiroit ngina ka Akuj, nabo arai Akiroit ngina Akuj. Arukito Akiroit ka Akuj napei kolong anakisiakinet. Asubi Akuj ibore daang anikeng, emam ibore tani ipei ni asubio emam ngesi. Ayei akiyar nikeng, sodi toliwor akiyar ngina akicha alotunga. Echai akicha anaribu nakaneni nyerapa aribu akicha. Ameuni Akuj itwaan ni anyaritae Yoana. Abuni ngesi alimokin ngitunga ngakiro a akicha, sodi kiirareta ngakiro nguna tonupa. Pearai ngesi akicha, nakaneni abuni ngesi akiruor ngakiro a akicha. Akicha na erai aka iteni dir naga, akicha na abuni nakwap tochaa anitwaan kadaang. Ayei Akiroit nakwap, tani bo kolong kesubit Akuj akwap anikeng dang, peayenete ngitunga a akwap ngesi. Abuni nakwap keng, nakaneni nyechamuna ngitunga keng ngesi. Nakaneni daang lu achamunete ngesi, ngulu enupete ngakiro keng, ainakin agogongu na eliworotor ngide a Akuj. Pearaunete kesi ngide a Akuj ani auriunere kona palem sek, meere ekile auriuni kesi, Akuj ngesi erai Apakech. Toliwor Akiroit ngina itwaan eruko ka ngoni erai lo ajakaanit noi eruoro ngakiro na iteni. Engolikisi ngoni apolou keng na aanyuni ngesi ani eraakar Lokookeng a Akuj ana erai Apa, lo edounio erai epei bon. Alimuni Yoana ngakiro keng kirema tama, “Logo ngesi lo kolong eruoro ayong ngakiro keng atamar ebuni ekisidi kang, nakaneni epolot kedwangit ayong, kainyo ayei ngesi kolong tani eringa ayong nyidouno.” Kianyu ngoni daang ajokis a Akuj alobari keng, kiinanakini ngesi ngoni ajokis keng na iyatanakin jiik. Ainakini Akuj ngitunga etal kitoru nia Musa, nakaneni etorunete ajokis ka ngakiro na iteni nia Yesu Kiristo. Emam itwaan nakanuan ni aanyunga Akuj, Lokookeng lo erai epei bon lo eriyan ka Apakeng nabo irudakina lorarum ka Apakeng, ngesi kitodik ngoni Akuj. Tomeasi ngikapolok a Ngiyaudi lu ayakasi Yerusalem ngimurok a akai a Akuj ka ngikengarakinak kech atamar kingita Yoana ebalasi, “Iyong irai ngae?” Nyewouna Yoana atachakin kesi ngakiro. Tolim ngakiro na eleerete tama, “Meere ayong arai Kiristo.” Kingita ngesi tamasi, “Iyong ngesi ngae? Irai iyong Elija a?” Tatachak Yoana tama, “Meere.” Sodi kingita tamasi, “Irai iyong ekadwaran ngolo a?” Tolim tama, “Meere ayong.” Sodi tolimokis tamasi, “Tolimokinae robo iyong sua atamar iyong ngesi ngae. Kisaki sua atoloto atolimokisi lu kimeunito sua. Ibala tokona iyong ai?” Tatachak Yoana kesi ngakiro nakolong alimuni ekadwaran Isaya ebala, “Ayong ngesi etoil a itwaan ani echala anariet, Kitenikisi erot lo itori Ekapolon!” Sodi kingita ngimeanara lu aponito Aloparisayo, Yoana tamasi, “Nyo bo ibatisa iyong ngitunga pekirai iyong Kiristo, kori Elija kori ekadwaran a Akuj ngolo?” Tatachak Yoana tama, “Ebatisae ayong a ngakipi, nakaneni ewei itwaan alokiding kus ni nyiyenete esi. Ngesi ngolo kesidiun ayong, nakaneni nyitemokino ayong tani alachakini ngarukanes a ngamuk keng.” Asubasi nguna daang alo Betania, kide angolol a Yorudan, ni ebatisaa Yoana ngitunga. Akolongit na atupit ngina, taanyunga Yoana Yesu ebunit nikeng. Sodi tolim tama, “Kingolikisi a! Imesek a Akuj ngin ni elemari ngasechesea a ngitunga anakwap! Logo ngesi longoon eruoro ayong ngakiro keng abala, ‘Ebuni itwaan ekisidi kang, epolot ngesi noi kedwangit ayong, kainyo ayei kolong sek ngesi eringa ayong nyidouno.’ Peayeni ayong atamar ngesi ngae, nakaneni abuni ayong ebatisae a ngakipi sodi eteyenunea ngesi Ngisirael.” Tolim Yoana ngakiro na aanyuni ngesi tama, “Engolik Etau a Akuj etiyaun anadis ikoni akuuri min kidiama keng. Peayeni ayong dang ngesi, nakaneni Akuj nakameuni ayong ebatisa a ngakipi, ngesi kalimokini tama, ‘Itwaan ni ingolikini iyong Etau a Akuj etiyaun min kidiama keng ngesi ibatisae a Etau a Akuj.’ Engolik ayong, nakaneni kalimokinit atamar ngesi erai Lokookeng a Akuj.” Akolongit na atupit ngina, awaasi Yoana ka ngirukitos keng ngiarei aapei. Sodi kingolik ngesi Yesu elosi, Tolim tama, “Kingolikisi a! Imesek a Akuj ngin.” Kiirasi ngirukitos luarei ngulu ngakiro na eruoro ngesi, sodi kiwapakis Yesu. Toreun Yesu kingolik kesi iwapito ngesi kingit tama, “Nyo isakete esi?” Tatachut tamasi, “Rabi, aliwae ibooyo iyong?” (Akiroit be Rabi ngesi atamar, “Eketataman”.) Tatachak tama, “Potu taanyutu.” (Arai ngisaae ngitomon a asonget a akolong.) Kirukosi ka ngesi taanyut ni ebooyo, kiboyoto ka ngesi akwaar ngina. Epei aluarei apupete ngakiro a Yoana sodi kiwapakis Yesu ngesi Andirea lokaatokeng a Simon Petero. Kiriamun ngesi ka Simon lokaatokeng atipei tolimok tama, “Kianyu lo iwasakinitae akimiet.” (Ngesi atamar, “Kiristo”.) Sodi toriko ngesi Simon nia Yesu. Tokienyik Yesu ngesi tolimok tama, “Iyong kinyaritae Simon lokookeng a Yoana, kinyarao iyong ekiro be Kepa.” (Ekiro be Kepa ngesi atamar Petero kori “ataaba”.) Akolongit na atupit ngina, asaki Yesu alosit Galilaya. Kiriamun ka Pilip dio tolimok tama, “Kiwapakinae!” ( Arai Pilip itwaan a ere a Betisaida, alo alomito Andirea ka Petero). Kiriamun Pilip ka Nasaniel tolimok ngesi tama, “Kianyu sua itwaan nikolong egiri Musa ngakiro keng nakitab a etal, nabo egirete ngikadwarak dang ngakiro keng. Erai ngesi Yesu, lo a Nasaret, lokookeng a Yosep.” Kingit Nasaniel tama, “Ekoe! Eyei ibore idio kajokon ebuni anakwap a Nasaret a?” Tolimok Pilip ngesi tama, “Bua taanyu.” Ani ingolikini Yesu Nasaniel ebunit nikeng tolim ngakiro keng tama, “Kingolikisi a! Erai itwaan en Isiraelit dir lo emam amodeanut anikeng!” Kingit Nasaniel ngesi tama, “Ikokini iyong kiyeni ayong ai?” Tatachak Yesu tama, “Ani eroko Pilip nyenyara iyong, na iyakar iyong kwap ekitoe lo ikwaan ka emeyan, ketee ayong iyong.” Tatachu Nasaniel tama, “Eketataman, iyong ngesi irai Lokookeng a Akuj! Iyong ngesi irai Ekapolon a Isirael!” Tolim Yesu tama, “Tokona inupitor iyong ni abalar ayong kengolikini iyong alokwap ekitoe lo ikwaan ka emeyan a? Ianyungari iyong ngakiro naapolok noi na idwangito nugu!” Sodi alimokin kesi tama, “Kalimokinit ngakiro na iteni dir atamar, ingolikinete adis engaar, nabo ngimalaikae a Akuj edokete kidiama ka atiyaun nia Lokookeng a Itwaan.” Akolongit na a ngauni, eutae alore a Kana anakwap a Galilaya. Ayei itiokeng a Yesu neni. Anyaraunitae Yesu dang ka ngirukitos keng nakuuta ngina. Ani edaun emuna lo epuritoe, tolimok itiokeng a Yesu ngesi tama, “Adaun emuna kech lo epuritoe.” Tatachak Yesu itiokeng tama, “Akimat, ibala tokona iyong ekokini ayong ai? Eringa esaa kang nyenanga.” Tolimok itiokeng a Yesu ngikasubak etich tama, “Tosuba daang na kilimokini ngesi esi.” Ayakasi neni ngamoti nalupei ngakan-kapei na eraakasi ngadepe ngaarei kori ngauni ilelebitae. Ewaakinitae neni eraakasi ngakilotanaret loger lo echamakinitor etal a Ngiyaudi. Tolimok Yesu ngikasubak etich tama, “Kileleba ngamoti nugu ngakipi.” Apot kileleba kipichunos, tolimok Yesu kesi tama, “Tookutu nakis ekapolon a akuuta.” Nasi kesi ngesi ngakipi, na apot kibelos toliwor emuna lo epuritoe nguna, nakis ekapolon kiir. Peayeni ngesi ni etoruni emuna ngolo, (nakaneni ayenete ngikasubak etich lu aokunete ngakipi ni etoruni), sodi tanyara ekapolon ekeutan, tolimok tama, “Ekoreene itwaan daang emuna loajokon ekingaren, ani eupi ngitunga lokojokon, tokor ngesi loapenan. Nakaneni irichu iyong emuna loajokon tani tokona!” Akitoodikinet nakaililon ngina ngesi erai na a ekingaren na asubi Yesu alore a Kana anakwap a Galilaya. Sodi kidodiu ngesi apolou keng, nabo tonupa ngirukitos keng ngesi. Arumoret nguna, toloto Yesu ka itiokeng, ka ngikaitotoi keng, ta ngirukitos keng Kaperinaum, kiboikinos inaa ngirwa ngidikidio. Kona aapikinitor ngirwa a esukukuu a Adeparet, tolot Yesu Yerusalem. Toriam ngesi ngitunga lu agialanarete ngaatuk, ka ngamesekin ka ngakurio ta ngulu ebwangete ngaropiyae ibooyete alokai a Akuj. Tosubak ngesi amunyororo sodi kitwarak ngibaren daang alotooma akai a Akuj, ngamesekin ka ngaatuk. Tobuko ngesi ngaropiyae alu abwangete ngaropiyae, nabo kibelukwaa ngimeesae kech. Sodi tolimok ngitunga lu agialanarete ngakurio tama, “Kipudosi ngiborei lugu kane! Nyiitiliwosi Akai ka Apakang akai nagielet ngiboro!” Kitamut ngirukitos keng atamar igiritae nagiran kona, “Eger lo aminar ayong akai kon, kanomit ayong loger a akim!” Kingita ngikapolok a Ngiyaudi Yesu tamasi, “Ani kitoodikinet nakaililon isubakini iyong kidodik sua atamar kichamakinitae iyong dir isubi ngakiro nugu?” Tatachak Yesu tama, “Tobwanga Akai na a Akuj naga dio atodukok ayong atorumo a ngirwa a nguuni.” Kingita kesi ngesi tamasi, “Ekoe! Akai na adukio a ngikaru ngitomwon-omwon ka ngikan-kapei, ngesi ibala iyong idukokini a ngirwa a nguuni a?” Nakaneni arai akai na alimit Yesu ngakiro a akwaan keng. Na ayarunea ngesi, kitamut ngirukitos keng atamar abala kolong neni, sodi tonupa ngagiran ka ngakiro na alimuni Yesu. Na ayakar Yesu Yerusalem ngirwa lua esukukuu a Adeparet, tonupa ngitunga lukaalak ngakiro keng kotere ngakitoodikinet nakailiilok na asubi ngesi. Nakaneni peamuno Yesu kesi, kainyo ayeni ngesi ngitamen a ngitunga kadaang lokojokon. Peasaki ngesi itwaan tolimok ngesi ngakiro a ngitunga, kainyo ayeni ngesi na eya lotai kech. Ayei itwaan ni arai ekapolon a Ngiyaudi anyaritae Nikodemo, lo arai Eparisayot. Akolongit apei tolot nia Yesu nakwaare tolimok tama, “Rabi, kiyeni atamar irai iyong eketataman lo ibuni ani a Akuj, kainyo emam itwaan ni esubi ngakitoodikinet nakailiilok na isubi iyong nugu, peerukito ngesi ka Akuj.” Tatachak Yesu ngesi tama, “Kalimokinit ngakiro na iteni dir atamar, ani pekidoun itwaan na a ngaarei, nyeanyuni Apolou a Akuj.” Kingit Nikodemo tama, “Ikokini itwaan idounio kerau ekasukout ai? Elomari nakook a itiokeng kidounoe na a ngaarei a?” Tatachak Yesu ngesi tama, “Kalimokinit iyong ngakiro na iteni atamar, ani pekidoun itwaan a ngakipi ka Etau a Akuj, nyelomari Napolou a Akuj. Idounio itwaan eyei apakeng ka itiokeng, nakaneni ni idounio a agogongu a Etau, erai ika Etau. Nyikitalasi ngakiro nugu ani kalimokinitor atamar ejoikinit kidounio na a ngaarei. Ekusi ekuwam lowae locha ekutari, nakaneni ipupi iyong ekuse keng, nakaneni nyiyeni ni ekutunitor kori ni ekutarit. Aloger alopei kangolo, ikoni neni itwaan daang ni idounio na a ngaarei kotere agogongu a Etau a Akuj.” Kingit Nikodemo ngesi tama, “Ikokinete ngakiro nugu esubakin ai?” Tatachak Yesu ngesi tama, “Ikwa nyiyeni tani iyong lo irai eketataman loapolon alo Isirael ngakiro nugu a? Kalimokinit ngakiro na iteni dir atamar, kiruoro sua na kiyeni ka na kingolik, nakaneni nyechamuna esi nakilimok sua esi. Nakalimokinea ayong esi ngakiro na a ngakwapea kanu, nyiinupa esi, ikokinete esi inupete kalimok ngakiro na eponito anadis ai? Emam itwaan iche alot kidiama nadis, pearai Lokookeng a Itwaan bon lo atiyaun anadis.” Loger lokolong ekearea Musa emun lo a asuat kiwaak nakitoe anariet, loger lopei ngolo, ejoikinit Lokookeng a Itwaan ikeario, sodi itwaan daang ni enupi ngesi, taanyu akiyar na nyedaun. Kona kolong aminar Akuj ngitunga a anakwap, tolemik ngesi Lokookeng lo edounitoe erai epei bon, sodi ani itwaan daang ni enupi ngakiro keng, nyeebukor, nakaneni toriam akiyar na nyedaun. Kainyo peameuni Akuj Lokookeng lotunga a akwap toliwor ekeriran kech, pearai toliwor Ekayuunan kech. Itwaan cha daang ni enupit Lokookeng a Akuj nyirirao, ani cha daang ni nyenupit, erirae tani tokona, kainyo nyenupa ngesi Lokookeng a Akuj lo erai epei bon. Ikoni eriras nege: abu akicha nakwap, nakaneni tominakis ngitunga aribu kisidwanga akicha, kainyo asubete kesi ngakiro naaronok. Itwaan daang ni esubi ngakiro naaronok, eremokino akicha kori nyebuni nakicha, kainyo nyesaki eboyor keng loaronon ileereuni. Nakaneni itwaan cha daang ni esubi ngakiro na a iteni, ebuni nakicha, sodi kitatakanuut ngakiro na esubi ngesi atamar enupit ngesi Akuj. Arumoret kanguna, toloto Yesu ka ngirukitos keng nakwap a Yudea. Kiboyoto mono ka kesi kaina, ibatisae ngitunga. Ebatisae Yoana dang ngitunga alo Ainoni ani aapi alo Salim. Kona ayakatar ngakipi nakaalak inaa, toloto ngitunga nikeng kibatisa ngesi. ( Ngirwa ngulu, aringa Yoana nyeenikina lojela). Tolomakis ngirukitos ngiche a Yoana apega ka Eyaudit epei kotere ngakiro a etal alo ilotare. Sodi toloto nia Yoana tolimokis tamasi, “Eketataman, itamunit iyong itwaan ningoon iyakasi ka iyong ekwakaye a angolol a Yorudan, dio kiruor iyong ngakiro keng a? Abe ibatisae ngesi ngitunga tokona, nabo alot ngitunga daang nikeng!” Tatachak Yoana tama, “Emam itwaan eriamuni ibore pearai ni einakini Akuj ngesi. Iyenete esi ngikulepek atamar alimuni ngoon ayong sek atama, ‘Meere ayong Kiristo, nakaneni kameunio ayong engareniu ngesi.’ Ekeutan ngesi elope a ateran, nakaneni elakar lopae keng a ekeutan na epupio ekeutan iruoro. Nguna kesi etemokis alakara kang. Ejoikinit ngesi eyenikinio dio atoliwor ayong lo nyekayenikinitae.” Lo ebunit alokidiama, epolot noi idwangit daang. Lo ebunit anakwap, erai eboyor keng eka akwap, nabo iruoro ngakiro a akwap. Ni ebunit anadis ngesi epolokinit daang. Iruoro ngesi na engolik ka na eira, nakaneni emam itwaan tani ipei ni echamunit ngakiro keng. Nakaneni itwaan cha daang ni echamunit ngakiro keng, idodiunit ngesi atamar Akuj ngesi erai aka iteni. Iruoro lo ameuni Akuj ngakiro a Akuj, kainyo ilelebi Akuj ngesi Etau keng peitemit. Emina Apa Lokookeng, nabo ainaki ngesi ibore daang. Ni enupit Lokookeng eyei ngesi akiyar na nyedaun, ni nyenupit Lokookeng nyeanyuni akiyar, nakaneni emini anyunyura a Akuj nikeng. Kiirasi Ngiparisayo atamar ibatisae Yesu ngitunga, nakaneni eyakasi ngesi ngirukitos lukaalak lu idwangito lua Yoana. ( Nakaneni peebatisae Yesu elope, arai ngirukitos keng ebatisaate.) Ani iirari Yesu ngakiro nguna, torotok anakwap a Yudea tobongo Galilaya, asaki ngesi akitor nakwap a Samaria. Sodi tanang ngesi lore a Samaria lo enyaritae Sikar, diyete amana ngina kolong ainakinit Yakobo lokookeng Yosep. Ayei akar a Yakobo neni. Kiboikin Yesu diyete akar ani aburunitor noi anisek alosio. Arai ngisaa ngikan-kapei a apaaran. Bu aberu Nasamariat akuok ngakipi. Tolimok Yesu tama, “Nakinae ngakipi atamat.” ( Alosito ngirukitos a Yesu lore akigiel akimuj.) Tatachak aberu ngina tama, “Abe irai bo iyong Eyaudit, atarai ayong Asamariat, nyo kilipitor iyong ayong ngakipi namatan?” (Alimunit kongina kainyo peachamam Ngiyaudi ka Ngisamariae peamatasi tani ngakipi.) Tatachak Yesu ngesi tama, “Arai toyeni iyong ainakinet a Akuj ka lo kilipit iyong ngakipi namatan, kilipit iyong sodi kiinak iyong ngakipi na a akiyar.” Tolimok aberu ngina ngesi tama, “Lokaapaan lo, abe emam iyong bo atubwa naokiet, tarai nabo ewoi akar. Aliwae ianyunea iyong ngakipi na a akiyar nguna? Itamit iyong atamar ipolot idwangit apaakosi Yakobo a? Apaakosi Yakobo ngesi kolong kiinakini sua akar naga, nikolong tani amaseene ngesi elope nege ka ngide keng ta ngibaren.” Tatachak Yesu ngesi tama, “Itwaan cha daang ni emasi ngakipi nugu, enyami akure nabo, nakaneni itwaan cha daang ni emasi ngakipi na iinakini ayong ngesi, nyenyami akure jik, kainyo ngakipi na iinakini ayong ngesi eliworosi eitanit alotooma keng toit jik, nakis ngesi akiyar na nyedaun.” Tolimok aberu ngina ngesi tama, “Ekaapaan, nakinae ngakipi nguna sodi nyakanyam akure nabo, kori nyaabongu nege akuok.” Tolimok Yesu ngesi tama, “Kape, tanyarau lokile kon kirukut nege.” Tatachak aberu ngesi tama, “Emam ayong ekile eyei.” Tatachak Yesu tama, “Ilim iyook atamar emam ekile, kainyo ayakasi iyong ngikiliok ngikan, lo tokona tani irukitotor iyong meere lokile kon. Ilim iyong nguna iyook.” Tolim aberu ngina tama, “Ekaapaan, ayen atamar irai iyong ekadwaran a Akuj. Elipeenete ta apaakosi Ngisamariae Akuj alomoru kalo, nakaneni ibaasi esi Ngiyaudi ejoikinit ngitunga ilipete Akuj alo Yerusalem.” Tolimok Yesu ngesi tama, “Naberu na, tonup ngakiro kang, enangi esaa lo nyilipeta ngitunga Akuj Apa alomoru kalo kori alo Yerusalem. Nyiyenete esi Ngisamariae ngolo ilipito. Kiyeni sua Ngiyaudi ngolo kilipit, kainyo ebunit ayuuno Aloyaudi. Nakaneni enangi esaa, tani tokona anang esaa lo ilipeta ngitunga lu ilipito Apa na iteni dir, ilipete a Etau alo iteni dir. Ilipete eger lo esaki Apa kesi ilipitotor na iteni. Akuj ngesi Etau, erai agogongu a Etau bon ngesi epedoreta ngitunga akilip ngesi na iteni.” Tolimok aberu ngesi tama, “Ayeni ayong atamar ebuni Kiristo. Na ebunio ngesi, kilimokini ngoni ngakiro daang.” Tatachak Yesu tama, “Ayong ngesi lokiruoro ka iyong logo.” Esaa lopei ngolo tobongut ngirukitos keng, tatalasi kesi ngakiro na eruorotor ngesi ka aberu, nakaneni emam tani erukitos epei lo engit aberu ngina tama, “Nyo isaki iyong?” Kori lo engit Yesu tama, “Nyo iruorotor iyong ka aberu?” Sodi toisik aberu ngina alupe keng na a ngakipi, tolot lore tolimok ngitunga kaina tama, “Potu mono esi taanyutu itwaan nikalimokini ayong ngakiro daang nakolong asubi ayong. Ekoe, meere ngesi erai Kiristo a?” Sodi torotokis kesi alore toloto nia Yesu. Kimaimaa Yesu ngirukitos keng tamasi, “Eketataman, kimuj kare!” Nakaneni tatachak tama, “Eyei ayong akimuj nanyamat na nyiyenete esi.” Sodi kingitanaros ngirukitos keng make tamasi, “Ekoe! Eyei itwaan kebu inu ngesi akimuj adio a?” Tolimok Yesu kesi tama, “Akimuj kang ngesi akiwap naechamit lokolong kameuni ayong, nabo erikak etich keng. Ikwa nyitamanarete esi, ‘Idongit ngilapio nguomwon sodi tolemikinae ngamanat a?’ Abala ayong esi a! Kingolikisi mono esi ngamanat, akoko kesi etemokin akilem! Loger lo eriamunea ekaleman ngaropiyae na etachio ngesi nabo tochunak ngimomwa keng, ikote ngikanupak elomarete nakiyar na nyedaun neni, sodi talakaros eketan ka ekaleman aapei. Kainyo eka iteni ekiruor lo ebeyo, ‘Itae itwaan ipei sodi tolem niche.’ Kamea ayong esi toloto tolema ngamanat na nyitakina esi, asubete ngiche etich nakaneni iyara esi kotere etich lo esubete kesi.” Tonupa Ngisamariae lukaalak luayakasi lore ngolo ngakiro a Yesu kotere ngakiro na alimuni aberu ngina tama, “Kalimoki ayong Yesu ngakiro daang nakolong asubi.” Pot Ngisamariae kimaimaa Yesu atamar kiboikinos ka kesi, kiboikin Yesu neni ngirwa ngiarei. Tonupa ngitunga ngiche lukaalak kotere akitatamet keng, sodi tolimokis aberu tamasi, “Meere tokona ngakiro kon make kinupitor sua, kiira tani sua dang, nakaneni kiyen dir atamar ngesi dir erai Ekayuunan a ngitunga a akwap.” Adaunet a ngirwa aluarei kangulu, torotok Yesu kaneni tolot Galilaya. Kainyo alimuni sek Yesu elope tama, “Nyipuruunitoe ekadwaran a Akuj anakwap ana erai akeng a elope.” Na anangunea Yesu Galilaya, kitepeyono ngitunga a akwap kangina niajokon kainyo alosito sek kesi Losukukuu a Adeparet, lo ayei Yerusalem. Eteete sek kesi alo Yerusalem ibore daang niasubi Yesu alosukukuu. Sodi tobongo nabo Yesu Kana, na a akwap a Galilaya, ni ebeleo ngesi ngakipi taraut emuna lo epuritoe. Ayei ekapolon a arieng neni lo adeaka lokookeng alo Kaperinaum. Ani iirari ngesi atamar abu Yesu anakwap a Yudea anangu Galilaya, tolot kimaima atamar tolot Kaperinaum kitangalek lokookeng lo adikino etoani. Tolimok Yesu ngesi tama, “Ani pekingolikis ngakitoodikinet nakailiilok ka nakatalarak, nyinupete jik.” Tatachak ekapolon ngolo ngesi tama, “Ekapolon, bua kare apana eringa lokookang nyetoana.” Tolimok Yesu ngesi tama, “Kape, eyari lokookon!” Sodi tonup ekapolon ngolo ngakiro na alimokini Yesu ngesi, dio tolot. Ani eringa elosi nawi, kisiriama ngikasubak etich keng ngesi tolimokis tamasi, “Ajoker tokona lokookon!” Kingit ngesi kesi esaa lo esiakinea ajoker. Sodi tolimokis tamasi, “Been ngisaa a apaaran ngikan-kaarei adaunor elekes keng.” Sodi kitam apakeng a edia kangolo atamar esaa ngolo alimokinea Yesu ngesi tama, “Eyari Lokookon.” Sodi tonupa ngesi ka ngiyenet keng daang ngakiro a Akuj. Arai nguna ngakitoodikinet nakailiilok na a ngaarei na asubi Yesu na abunio anakwap a Yudea elosi Galilaya. Arumoret kanguna, tolot Yesu Yerusalem losukukuu a Ngiyaudi. Diyete ekidor a ngamesekin alo Yerusalem, ayei abwel na a ngagulei a ngakan. Enyaritae a ngabukui a Ngieburaniae Betisasa. Tooma nagulei nguna, ayei asepich nakaalan a ngikadeakak eperete, ngimuduk ka ngikechodok ta ngikangwalak. [Edarito kesi ngakipi ichulumakinio. Kainyo esaa eche abuneene emalaikat a Akuj toloma nabwel ngina akichulumakin ngakipi. Itwaan cha daang ni engarenikini alomar nakipi ekisidi a akichulumakino, tangalek edeke keng daang.] Nakaneni ayei itwaan neni ni adeaka a ngikaru a ngitomwon-uni ka ngikan-kauni. Kingolik Yesu ngesi eperi, sodi toyen atamar kedeaka itwaan ngini a ngirwa ngikaalak kingit tama, “Isaki iyong kitangalekin a?” Tatachak ekadeakan ngolo tama, “Lokile lo, na ichulumakinere ngakipi, emam ayong itwaan ni kelomakini ayong nabwel, na asakea ayong alomar, kisiau itwaan iche toloma eringa ayong.” Tolimok Yesu ngesi tama, “Tonyou tolema ejemu kon, torotok.” Tojoker itwaan ngini atipei tolema ejemu keng torotok. Asubasi ngakiro nguna akolongit na a Sabato, sodi tolimokis Ngiyaudi itwaan ni etangalekinio tamasi, “Erai akolongit na Sabato, nyechamitae alotal idakit iyong ejemu kon.” Tatachu itwaan ngini tama, “Itwaan niketangalekini ayong edeke ngesi kalimokini ayong atamar atolema ejemu kang atolot.” Kingita ngesi tamasi, “Ngae kilimokini iyong atamar tolema ejemu kon tolot?” Nakaneni peayeni itwaan ni etangalekinio atamar Yesu ngesi ngae, kainyo abu Yesu torotok ani ayei asepich a ngitunga kaneni. Ani ekisidi, toriam Yesu ngesi alotooma akai a Akuj, tolimok tama, “Ayoro, ijoker iyong tokona. Nyiisub akisech nabo, sodi nyianyun ka ngakiro naaronok noi.” Sodi tolot itwaan ngini tolimok Ngiyaudi atamar Yesu ngesi etangalekini edeke keng. Sodi tolomakis Ngiyaudi aboliar Yesu ani asubea nguna akolongit na a Sabato. Tatachak Yesu kesi tama, “Esubi Apakang etich jiik, ejoikinit ayong dang asubi etich.” Kotere ngakiro na alimuni Yesu nguna, tasaka Ngiyaudi akiar ngesi jik. Erai ni asechea ngesi etal a Sabato sodi nabo dang tanyara Akuj Apakeng, dio kidodiu neni atamar eriyan ngesi ka Akuj. Sodi tatachak Yesu kesi tama, “Kalimokinit esi ngakiro na iteni dir atamar, nyesubi Lokookeng a Akuj akiroit na erai akeng a ilope pearai esubi ngesi na itee Apakeng esubi. Nguna esubi Apakeng ngesi tani esubi Lokookeng. Kainyo emina Apa Lokookeng nabo idodikini ngesi daang naesubi ngesi alope. Idodikini ngesi ngitichisio luapolok noi lu idwangito lugu. Esubi ngesi sodi kitatalasi esi daang. Aloger alopei iteyarunea Apa ngikatoak toyara, iteyari Lokookeng ngulu esaki. Kori nyirirae Apa elope itwaan, nakaneni ainaki Lokookeng agogongu daang na irira, sodi kipuruut ngitunga daang Lokookeng loger lo ipuruunitotor Apa. Itwaan cha daang ni nyipuruunit Lokookeng, nyipuruunit Apa lokolong ameuni ngesi. “Kalimokinit esi ngakiro na iteni dir atamar, itwaan cha daang ni eira ngakiro kang nabo tonup ngolo kolong kameuni ayong, eyei akiyar na nyedaun. Nyirirao ngesi, nakaneni etor nakitu toloma nakiyar. Kalimokinit ngakiro na iteni dir atamar, monan ngicherwa, tani tokona adol ngirwa ngulu, iirarete ngikatoak etoil a Lokookeng a Akuj, nakaneni ngulu iirarete, eyarete. Kona eraakar Apa akisiakinet a akiyar, aloger alopei kangolo, etiliwo ngesi Lokookeng akisiakinet a akiyar. Nabo ainaki ngesi Lokookeng agogongu na irira ngitunga, kainyo erai ngesi Lokookeng a Itwaan. Warasi ngakiro nugu nyikitalasi, enangi monan ngirwa lu iirareta ngikatoak daang etoil keng, tolomut analielin kech, ngulu esubete naajokak iteyarunio, toyara, ngulu esubete naaronok iteyarunio, kirirae. “Emam ibore asubi ayong a apolou kang a ilope. Erirae ayong loger lokalimokinitor Akuj, sodi toliwor akirirare kang na etenoono, kainyo nyasaki ayong akisub na achamit ayong, pearai naechamit lokolong kameuni ayong. “Ani kalim ayong ngakiro na eraakasi ngakang a ilope, nyenupio ngakiro na alimuni ayong atamar eraakasi ngaka iteni. Nakaneni eyei eche lo iruoro ngakiro kang, nabo ayeni ayong atamar ngakiro kang na iruoro ngesi eraakasi ngaka iteni. Imearito esi ngitunga nia Yoana sodi kiruoror ngesi ngakiro na iteni. Meere atamar egeno ayong ngakiro na elimunete ngitunga, alimunit nugu sodi toyuunotor esi. Ekoni Yoana ataa na enoki nabo kimaunite, talakaros esi wadio kotere akicha keng. Nakaneni alimoro kang epolot noi idwangit na a Yoana. Kainyo ngitichisio lukedodik ayong Apa atamar atorumo, ngitichisio ngulu ngesi asubi ayong tani tokona, kesi elimorito atamar Apa kameuni ayong. Nabo Apa lokolong kameuni ayong ngesi kalimorit ayong. Nyiirara esi nakanuan etoil keng, kori nyingolikina esi ereet keng. Nyinupete esi ngakiro keng kainyo nyinupito lokolong ameuni ngesi. Isemeete esi ngagiran kainyo itamito esi atamar kori ianyunete akiyar na nyedaun anikech, nakaneni igiritae ngakiro kang nagiran nguna! Nakaneni nyichamito esi aponere nikang taanyut akiyar. “Nyasaki ayong kepuruut ngitunga. Nakaneni ayeni ayong atamar esi kesi ta ngae. Ayeni ayong atamar nyiminasi esi Akuj alotai kus. Abu ayong a apolou ka Apakang, nakaneni nyechamuna esi ngakiro kang. Ani kebu itwaan iche a ekileenu keng a ilope, ichamunete esi ngakiro keng. Iminasi esi akipuro make, nakaneni nyisakete esi ekipur lo a Akuj ana erai apei bon, ikokinete tokona esi inupete ai? Nyiitamasi robo kori ayong ketitakini esi ani ka Apakang. Musa lopei igenosi esi ngesi kititakini esi. Arai tonupito esi dir ngakiro a Musa, kinupito tani nakang, kainyo egiri Musa ngakiro kang. Nakaneni kona nyinupitotor esi ngakiro na egiri ngesi, ikokinete inupete ngakiro kang ai?” Arumoret kanguna, abu Yesu tobongo ekwakaye a anam a Galilaya (ngina erai ekiro eche Tiberia.) Kiwapak asepich a ngitunga ngesi, kainyo engolenakinete ngakitoodikinet nakailiilok na etangalenokinio ngesi ngikadeakak. Abu Yesu todoka kidiama moru kiboikinos ka ngirukitos keng aapei. Nabo aapuunit esukukuu a Ngiyaudi lo arai Adeparet. Nakaneni abu Yesu kingolia, taanyunga ajore nakaalan ebunit nikeng, sodi kingit Pilip tama, “Aliwae kigielea ngoni akimuj na itemokin ngitunga lugu daang?” ( Alimuni ngesi nguna iningit Pilip, kainyo ayeni ngesi nguna esubakini.) Tatachak Pilip ngesi tama, “Tani kegiel ngamugati a ngadinari a ngamiae a ngaarei, nyitemokin ngitunga lugu tani keanyu itwaan daang nadiochichi.” Abu epei a ngirukitos keng lo anyaritae Andirea, lokaatokeng a Simon Petero tolimok tama, “Eyei edia nege lo etingit ngamugati ngakan ka ngikolia ngiarei, nakaneni nyitemokinosi ngitunga lukaalak lugu.” Tolimok Yesu kesi tama, “Kisiboikisi ngitunga.” (Alibit neni noi.) Nakaneni kiboikinos ngikiliok lu araakasi ngabunge ngakan. Sodi tolem Yesu ngamugati, kilipak ebuakinit Akuj alakara, sodi tokorak ngitunga lu ebooyete kaneni. Tokor ngikolia dang loger ngolo, taanyut ngitunga etiae lo asakete. Na emwoketa daang, tolimok Yesu ngirukitos keng tama, “Kideputu ngakimwoket na idongito, nyechakar tani apei.” Sodi kideput daang, kileleba ngategerin ngatomon ka ngaarei a akimuj ana apiyanun anamugati anasek kan anyamete ngitunga. Na engolikineta ngitunga ngakitoodikinet nakailiilok na asubi Yesu, apot kesi tamasi, “Iteni dir logo ngesi ekadwaran lokolong abeyo ebuni nakwap!” Ayeni Yesu atamar adikino kesi irumunete ngesi kitingakis aliwor Ekapolon, nakaneni abu ngesi tolot moru alopei. Na anangea ebong, toloto ngirukitos keng nanam, sodi todokasi natubwa tobongosi ekwakaye anam toloto Kaperinaum. Abu akwap kirioner eringa Yesu nyenanguna nikech. Esaa ngolo, tokut ekuwam lotiapolon kitukuu ngakipi. Apot ngirukitos taramasi atubwa ngakilomitae ngoomwon kori ngakan kingolikis Yesu elosi alokidiama ngakipi keapuu natubwa. Toema noi. Tolimok Yesu kesi tama, “Nyieam, ayong itwaan!” Nakaneni asakete kesi ngesi tolom tooma natubwa, nakaneni tanang atubwa atipei nakwap na aloose kesi. Akolongit nache, toyen ajore na ayei sek ekwakaye a anam atamar atubwa apei bon ayei neni. Ayenete kesi atamar nyirukoro Yesu ka ngirukitos keng anatubwa, erai ngirukitos keng make apot toloto. Nakaneni pot ngatubwae ngache alo Tiberia tanangut lokwaas a anam diyete nisek emujea asepich a ngitunga ngamugati naelipakini Ekapolon Yesu. Na ayenunea asepich a ngitunga atamar emam Yesu ka ngirukitos keng kaneni, todokasi kesi natubwae toloto Kaperinaum esakete Yesu. Ani eriamunete ngitunga Yesu a ekwakaye anam, kingita tamasi, “Eketataman, ibuni iyong nege ori?” Tatachak Yesu tama, “Kalimokinit esi ngakiro na iteni dir atamar, kisakete esi ayong kotere ngamugati na inyamete esi kimwoko, meere kotere ngakitoodikinet nakailiilok. Nyiisuba etich kotere akimuj na inyasun, tosuba etich kotere akimuj na a akiyar ana nyedaun. Lokookeng a Itwaan ngesi kiinakini esi akimuj ngina, kainyo ewaak Akuj Apa emachar lo eminar ngesi nikeng.” Sodi kingita ngesi tamasi, “Kikoni tokona sua kisubi ngitichisio a Akuj ai?” Tatachak Yesu tama, “Etich a Akuj logo, tonupa ngakiro alo kolong ameuni Akuj.” Tatachakis tamasi, “Akitoodikinet ani nakaililon isubakini iyong sodi engolikisi sua atonupeta ngakiro kon? Nyo isubakini iyong? Anyamete ta apaakosi akimuj anyaritae manna anariet loger lo igiritere nagiran kona, ‘Ainakini ngesi kesi akimuj na abuni anadis tanyama.’ ” Tolimok Yesu kesi tama, “Kalimokinit ayong esi ngakiro na iteni dir atamar, ‘Ibore nikiinakini esi Musa, meere akimuj na abuni anadis, Apakang ngesi kiinakini esi akimuj na iteni dir naebunit anadis.’ Kainyo akimuj nakiinakini esi Akuj ngesi lokolong abuni anadis, sodi nak ngitunga a akwap akiyar.” Tolimokis tamasi, “Ekapolon, nanakinae sua akimuj naga jiik.” Tolimok Yesu kesi tama, “Ayong ngesi arai akimuj na a akiyar, ni ebuni nikang, nyenyami akoro, ni enupi ngakiro kang, nyenyami akure jik. Tokona a, kalimokini ayong esi atamar, kianyungasi esi ayong nakaneni nyinupito ngakiro kang. Itwaan cha daang nikainakini ayong Apakang, ebuni nikang. Nyangeri ayong itwaan tani ipei ni ebuni nikang, kainyo peabuni kolong ayong anadis akisub na asaki ayong, abuni akisub na esaki lokolong kameuni ayong. Nakaneni nyesaki lokolong kameuni ayong atamar atachaka tani ipei kangulu kainaki ngesi ayong, nakaneni ejoikinit eteyaruni daang toyara akolongit na esal. Kainyo na esaki Apakang ngesi atamar ngitunga daang luanyungarete Lokookeng a Akuj sodi tonupa ngakiro keng, eanyunete akiyar na nyedaun, nabo eteyaruni ayong kesi akolongit na esal.” Nakaneni apot Ngiyaudi kingunungunokis ani abalar ngesi, “Ayong arai akimuj na abuni anadis.” Sodi tamasi kesi, “Ikwa meere itwaan en Yesu lokookeng a Yosep lo kiyeni ngoni apakeng ka itiokeng a? Nyo tokona ebalar ngesi abe abuni anadis?” Tatachak Yesu kesi tama, “Toisikisi akingununguno make. Emam itwaan tani ipei ni ebuni nikang mati kiriu Apa ngesi nikang, Apa lokolong kameuni ayong. Eteyaruni ayong itwaan ngini akolongit na a esal. Egirete ngikadwarak kona, ‘Itatami Akuj ngitunga daang.’ Itwaan daang ni epupi ngakiro ka Apa, nabo kitatami anikeng, ebuni nikang. Nyidodiunit ibore ngini atamar eyei itwaan engolik Apa, ngolo ebunit ani a Akuj ngesi bon engolik Apa. Kalimokinit esi ngakiro na iteni dir atamar, ngini enupit ngakiro a Akuj eyei akiyar na nyedaun. Ayong ngesi arai akimuj na akiyar. Anyamete ta apaakus akimuj na anyaritae manna anariet, totoaka. Nakaneni itwaan ni enyami akimuj ngina ebunit anadis, nyetoani jik. Ayong ngesi arai akimuj na a akiyar na abuni anadis. Ani kenyam itwaan akimuj ngina, nyetoani jik. Akwaan kang ngesi erai akimuj na alemuni ayong kotere akiyar a ngitunga a akwap.” Tolomakis Ngiyaudi apega make ebalasi, “Ikokini itwaan en kiinakini ngoni akwaan keng be atanyama ngoni ai?” Tolimok Yesu kesi tama, “Kalimokinit ngakiro na iteni dir atamar, ani pekinyam esi akwaan a Lokookeng a Itwaan, nabo tamata ngaakot keng, nyianyunete esi akiyar. Itwaan cha daang ni enyami akwaan kang nabo tamat ngaakot kang, eanyuni akiyar na nyedaun, nabo eteyaruni ayong ngesi akolongit na esal. Kainyo akwaan kang ngesi erai akimuj na iteni, nabo ngaakot kang kesi erai namatan dir. Itwaan cha daang ni enyami akwaan kang, nabo tamat ngaakot kang, iboikin tooma kang, nabo eboikin ayong tooma keng. Apa lo eyari ngesi kameuni ayong, nabo ayari tani ayong dang kotere ngesi. Aloger alopei kangolo eyari tani nikanyami ayong. Nakaneni akimuj naga ngesi na abuni anadis, nyikoni ngamugati nakolong anyamete ta apaakus sodi totoaka. Itwaan ni enyami akimuj naga eyari jik.” Eruoro Yesu ngakiro nguna alotooma akai a Atuk na etatamea ngesi ngitunga alo Kaperinaum. Na eirareta ngirukitos keng lukaalak ngakiro nguna, apot tamasi, “Abe etiono akitatamet na noi. Ngae epupokini?” Nakaneni toyen Yesu atamar ingunungunosi ngirukitos keng kotere akiroit ngina, sodi tolimok kesi tama, “Akiroit naga kironik esi a? Ikokinete esi arai kingolikis Lokookeng a Itwaan ebongori kidiama nikolong ayei ngesi ekingaren ai? Etau a Akuj ngesi eyauni Akiyar. Emam ibore esubakini agogongu a itwaan. Ngakiro nakalimok esi nugu kesi eraakasi Etau a Akuj ka akiyar. Nakaneni eya ngiche kus lunyenupito.” (Kainyo ayeni Yesu anakisiakinet atamar tangae nyenupete, nabo ngae erikokini ngesi ngitunga.) Sodi keatak tama, “Ngakiro nguna ngesi kalimokinitor esi atamar emam itwaan ni ebuni nikang mati kiriu Apa ngesi.” Tobongosi ngirukitos a Yesu lukaalak toisikis ngesi kotere ngakiro nguna. Sodi kingit Yesu ngirukitos lutomon ka ngiarei tama, “Ani bo esi, isakete esi dang alosit a?” Tatachak Simon Petero ngesi tama, “Ekapolon, nika ngae kilosi? Eya iyong ngakiro na a akiyar ana nyedaun. Nakaneni kinup sua, nabo kiyen atamar iyong irai lo italeuno a Akuj.” Tatachak Yesu tama, “Kaseu ayong esi iraakasi ngitomon ka ngiarei, kori ai? Nakaneni ekipeik tokona epei kus!” Eruoro ngesi ngakiro a Yuda, lokookeng a Simon Isikariote. Kainyo Yuda lo arai epei a ngirukitos alutomon ka ngiarei, adikino erikokini Yesu ngitunga. Arumoret kanguna, alosi Yesu alo Galilaya. Peerimit ngesi akwap a Yudea, kainyo asakete Ngiyaudi akiar ngesi. Nabo aapikinit Esukukuu a Ngiyaudi lo anyaritae Ngikalea, nakaneni apot ngikaitotoi keng tolimokis ngesi tamasi, “Tonyou kane torotok anakwap kana, tolot nakwap a Yudea, sodi taanyuneta ngirukitos kon ngitichisio lu isubi iyong. Emam itwaan idait na esubi erai kesaki ngesi katoyenikin. Kona isubea iyong ngakiro nugu, kimiek ngitunga daang a ngakwapea toyena!” ( Peanupito tani ngikaitotoi keng ngakiro keng.) Tolimok Yesu kesi tama, “Eringa akolongit kang na etenoono nyedolo. Akolongit daang etenoono anikus. Nyikiremokinosi esi ngitunga a akwap, nakaneni karemokinosi ayong kainyo etoodenakini ayong kesi atamar erono eboyor kech. Kapesi esi losukukuu, nyalosi ayong losukukuu ngolo kainyo eringa akolongit kang na etenoono nyedolo.” Tolim ngesi nguna ani erumor tasal alo Galilaya. Ekisidi a alosiet a ngikaitotoi keng losukukuu, abu Yesu dang tolot edukit peeyenio. Tasaka ngikapolok a Ngiyaudi ngesi losukukuu, ingitanarosi ebalasi, “Nyaali ngesi?” Engainga asepich a ngitunga noi ebala epewae, “Erai ngesi itwaan niajokon,” tamasi ngiche, “Mam”, tamasi nabo ngiche, “Ibatarit ngesi ngitunga.” Nakaneni emam itwaan ni eruoro ngakiro keng ileerete, kainyo aemito kesi ngikapolok a Ngiyaudi. Na anangea kiding Esukukuu, tolot Yesu tooma kai a Akuj, tolomak akitatam ngitunga. Tatalasi Ngiyaudi ngakiro nguna tolimut tamasi, “Ekoe! Ikoni itwaan en eyeni ngakiro nakaalak nugu toringa ngesi nyitatama ai?” Tatachak Yesu kesi tama, “Naetatami ayong meere ngakang, eponito ani a Akuj ana kameuni ayong. Itwaan cha daang ni esaki akisub na esaki Akuj, eyenuni keraakasi ngakiro na etatami ayong nia Akuj eponitotor kori atamar eruoro ayong na eraakasi ngakang a ilope. Itwaan ni iruoro ngakiro na eraakasi ngakeng bon, esaki kepuruun. Nakaneni ni esaki kipuruunoe lokolong ameuni ngesi, etenoono eboyor keng, nabo emam ngesi amodeanut. Kiinak kolong Musa esi etal, kori ai? Nakaneni emam tani ipei kus ni erichak etal a Musa. Nyo tokona isaketa esi akiar ayong?” Sodi tatachu asepich a ngitunga tama, “Kibapit karika iyong Ekipe. Ngae esaki akiar iyong?” Tatachak Yesu tama, “Asubakini ayong akitoodikinet nakaililon apei, nakaneni kitatalasi esi daang ngakiro nguna. Kidungokini kolong Musa esi atamar kilengera ngide kus: (nakaneni meere kolong Musa esiakini ngakiro nguna, araakasi ta apaakus esiakinete), ilengerenete esi ikoku nisapat akolongit na a Sabato. Ani kilengerio ikoku nisapat akolongit na a Sabato nyinyasunor etal a Musa, nyo bo kingoikinitotor esi ayong ani etojokea itwaan akolongit na Sabato? Nakaneni nyiirirata ana iteete, kirirata ana eraakasi ngaka iteni.” Apot ngitunga epewae luayakasi Yerusalem tamasi, “Ekoe! Meere itwaan ni esakete ngikapolok akiar en a? Kingolikisi a! Iruoro ngakiro keng daang epupete ngitunga, emam tani itwaan ipei ni alimuni akiroit naaronon anikeng! Kori eyenete robo ngapolon dir atamar erai ngesi Kiristo? Nakaneni na ebunio Kiristo, emam itwaan eyeni ni ebunio. Abe kiyeni bo sua daang ni ebunitor itwaan en.” Na etatamea Yesu alokai a Akuj, kirema tama, “Kiyenete esi ayong dir a? Iyenete esi tani ni abunitor ayong a? Peabuni ayong a apolou kang a ilope. Ngolo kameuni ayong erai lo a iteni, nakaneni nyiyenete esi ngesi. Ayeni ayong ngesi, kainyo abuni anikeng, nabo ngesi kameuni ayong.” Sodi tasaka akirumun ngesi, nakaneni emam itwaan abu tatap ngesi kainyo aringa esaa keng nyedolo. Nakaneni tonupa ngitunga lukaalak ngesi tamasi, “Naebunio Kiristo, esubi ngesi ngakitoodikinet nakailiilok nakaalak na idwangito na asub itwaan en a?” Kiirasi Ngiparisayo asepich a ngitunga ingaingaa ngakiro a Yesu, sodi tomeasi kesi ka Ngimurok Luapolok a akai a Akuj ngasigerea akirumun Yesu. Tolim Yesu tama, “Eringa cha wadio kirukit ka esi aapei, sodi atolot nia alo kolong kameuni ayong. Kisakete esi ayong nakaneni nyikianyunete kainyo nyiloose esi ni ateni ayong.” Kingitanaros Ngiyaudi make ebalasi, “Aliwae niti edikino ngesi elosi ni nyikianyunea ngoni ngesi nege? Elosi ngesi lorerea a Ngigirik lu ibooyoto Ngiyaudi, sodi kitatam Ngigirik a? Ebala ngesi kisaki ngoni nakaneni nyikianyuni. Ekoe, eger tokona a ngakiro kanu ngesi nyo?” Akolongit naapolon na arai na esal a Esukukuu, tonyou Yesu kirema tama, “Itwaan cha daang ni enyamit akure, bu nikang tamat. Loger lo igiritere nagiran atamar, ‘Itwaan cha daang ni enupi ngakiro kang, eleleunete ngangololin a ngakipi ana akiyar alotau keng.’ ” Alimunit Yesu nguna kotere Etau a Akuj lo eanyunete daang lu enupete ngakiro keng. Ngirwa ngulu, aroko Etau a Akuj nyipotoro, kainyo aringa Yesu nyeyaruna kipuroe. Ani iirarete epewae a ngitunga ngakiro nguna, tamasi, “Erai itwaan en dir ekadwaran a Akuj!” Tamasi ngiche, “Erai ngesi Kiristo!” Nakaneni tamasi ngiche, “Nyebuni Kiristo alo Galilaya. Igiritae nagiran atamar erai Kiristo ales a ekapolon Daudi, nabo idounio alo Betleem alore alo kolong ebooyo Daudi.” Sodi totiak asepich a ngitunga kotere Yesu. Asakete epewae kech akirumun ngesi, nakaneni amam tani ipei abu kirum ngesi. Na abongoreta ngasigerea, kingita Ngimurok Luapolok a Akai a Akuj ka Ngiparisayo tamasi, “Nyo peirikunioto esi ngesi?” Tatachut ngasigerea nguna tamasi, “Emam itwaan nakanuan ni eruoro eger lo iruoror itwaan en!” Kingita Ngiparisayo tamasi, “Kingal ngesi esi dang a? Eyei itwaan tani ipei ni iirasi esi alokapolok a Ngiyaudi kori Ngiparisayo atamar anup ngakiro keng a? Nyeyeni asepich a ngitunga na etal a Musa, kotere nguna, ilamit kesi Akuj!” Epei a Ngiparisayo enyaritae Nikodemo, lokolong sek alosit nia Yesu, tolimok kesi tama, “Nyikipedori ngoni Alotal yok akirirare itwaan eringa mono nyiirara ngakiro keng, sodi toyenae ibore ni esubit ngesi.” Tatachut kesi tamasi, “Aawa, ikwa ibunit iyong dang alo Galilaya a? Kiseme ngagiran lokojokon taanyu atamar emam ekadwaran a Akuj lo ebuni alo Galilaya.” nakaneni tolot Yesu moru a ngikito a akimiet. Nataparach elilim, kiswakak ngesi toloma kai a Akuj, tochunun ngitunga daang kiriama ngesi. Kiboikin ngesi kitatam kesi. Torikut ngiketatamak a etal ka Ngiparisayo aberu na alomit nia Yesu, kitowaa ngesi alongaren kech. Tolimokis Yesu tamasi, “Eketataman, erumunio aberu naga elomit. Kitatami sua Musa Alotal atamar ejoikinit aberu na ikoni naga imasio a ngamoru totoan. Ibala tokona iyong ai?” Alimunito kesi nguna esakete akining Yesu, sodi taanyuneta ibore idio ni ititakineta ngesi. Nakaneni kijuuru Yesu kigirak ngalup a ekimoin. Ani eringa ewaasi kaneni ingitanarete ngesi ngakiro, tonyou Yesu tolimok kesi tama, “Ani keyei ipei kus ni nyesecha nakanuan, kisiak akimas ngesi a amoru.” Sodi kijuuru nabo, kigirak ngalup a ekimoin. Ani iirarete kesi ngakiro nguna, torotonokis a ngapeipei, kisiakis alokasukou tanang losal kech. Kidong Yesu alopei, ka aberu na awei kaneni ngina. Kikeu Yesu akou kingit aberu ngina tama, “Akimat, nyaalu kesi! Emam tani itwaan ipei edong akirirare iyong a?” Tolimok tama, “Emam, ekaapaan.” Tatachak Yesu ngesi tama, “Aawa, nyekerirae tani ayong dang iyong, kape, nakaneni wara nyiisech nabo.”] Kiruoro Yesu ka Ngiparisayo nabo. Tolim tama, “Ekoni ayong akicha a akwap. Itwaan cha daang nikewapakini ayong, eanyuni akicha na a akiyar, nakaneni nyelosi anaribu jik.” Tolimokis Ngiparisayo ngesi tamasi, “Abe iruoro bo tokona iyong ngakiro kon a ilope, ikwa eraakasi ngakiro na iruoro iyong ngapasiek.” Tatachak Yesu tama, “Meere kongina, tani keruoro ayong ngakiro kang a ilope, na alimunit ayong eraakasi ngaka iteni, kainyo ayeni ayong nikolong abunio, nabo ayeni ni ateni. Nyiyenete esi nikolong abunio ayong, kori nyiyenete ni ateni. Irirate esi iwapito epit a ngitunga, emam itwaan erirae ayong. Nakaneni ani kerirae ayong, erai eriras kang lo a iteni, kainyo meere ayong bon erirae, kirukit ayong ka Apakang lokolong kameuni ayong. Igiritae Lotal kus atamar anikiruor ngikaanyunak ngiarei akituk apei, iyookino na iruorosi kesi. Eruoro ayong ngakiro kang a ilope, nakaneni iruoro tani Apakang lokameuni ayong ngakiro kang.” Kingita tamasi, “Aliwae eyei Apakon?” Tatachak Yesu tama, “Nyikiyenete esi ayong kori nyiyenete tani Apakang. Arai kitoyenete ayong, kiyenete tani Apakang dang.” Eruoro Yesu ngakiro nguna daang na etatamea alokai a Akuj, anamaniyat ana ewaanakinio ngasadukui a ngaropiyae. Emam itwaan erum ngesi, kainyo aringa esaa lo irumunere nyedolo. Tolimok Yesu kesi nabo tama, “Arotokini ayong atoten wache. Kisakete esi ayong nakaneni itoakete esi alosech kus. Nyiloose esi ni alosi ayong.” Sodi tolimut ngikapolok a Ngiyaudi tamasi, “Abe ebala ngesi nyikilosi ngoni ni elosi ngesi. Ekoe, idodiunit ibore ngini atamar eara ngesi bon totoan a?” Tatachak Yesu kesi tama, “Iponito esi alokwap kane, abunit ayong alokidiama. Iraakasi esi ngika akwap kana, meere ayong eka akwap kana. Ngakiro nguna ngesi kalimokinitor esi atamar itoakete esi alosech kus. Itoakete esi dir alosech kus erai pekinupa atamar, ‘Arai Ayong Lo arai Ayong.’ ” Kingita ngesi tamasi, “Ngae iyong?” Tatachak Yesu kesi tama, “Ayong ngesi lotete kalimok ayong esi anakisiakinet. Eya ayong ngakiro kus nakaalak na ejoikinit alimuni keriraa esi. Nakaneni lokolong kameuni ayong erai lo a iteni, nakaneni alimokini ayong ngitunga ngakiro na eira ayong anikeng make.” Peayenete kesi atamar esuruori Yesu kesi ngakiro ka Apa. Sodi tolimok Yesu kesi tama, “Na ikeareta esi Lokookeng a Itwaan, iyenunete esi atamar, ‘Erai Ayong Lo arai Ayong’, dio iyenunete esi atamar emam ibore ni erai ikang bon a ilope asubi ayong nakaneni alimuni ayong nakalimokini Apa ayong make. Nakaneni kirukit ayong ka lokameuni ayong, nyimiekina ngesi ayong alopei bon, kainyo asubeene ayong jiik na italakarete ngesi.” Tonupa ngitunga lukaalak lu eirarete Yesu elimuni ngakiro nugu. Sodi tolimok Yesu Ngiyaudi lu anupete ngesi tama, “Ani kiwapakis esi ngakiro kang kirichut, iraakasi ngirukitos kang dir, iyenunete ngakiro na iteni, nabo kilachakinete esi ngakiro na iteni dir.” Tatachut kesi tamasi, “Kirai sua ngalesea a Aburaam, nabo nyerauna sua ngirikon a itwaan a iche nakanuan. Nyo tokona ibalar iyong, ‘Kilachakinio?’ ” Tolimok Yesu kesi tama, “Kalimokinit ngakiro na iteni dir atamar, itwaan daang ni esubi akisech, erai erikot a akisech. Nyiiboi erikot anawi ngirwa daang, nakaneni ikoku ngesi ibooyi anawi jiik. Ani kilachak esi Lokookeng a Akuj, iraunete esi ngitunga lu ilachakina dir. Ayeni ayong atamar iraakasi esi ngalesea a Aburaam. Nakaneni isakete akiar ayong ani nyichamuneta ngakiro kang. Eruoro ayong ngakiro nakedodik ayong Apakang, nakaneni isubete esi nakilimok esi apakus.” Tatachakis tamasi, “Apakosi ngesi Aburaam.” Tolimok Yesu kesi tama, “Arai taraakas esi ngide a Aburaam dir, kisubito esi ngitichisio lu ikote lukolong asubi ngesi. Abe isakete esi akiar ayong ani kalimokinea ayong esi ngakiro na iteni na eirari ayong ani a Akuj. Nyesuba Aburaam ngakiro na ikote neni! Isubete esi ngitichisio lukolong asubi apakus.” Tatachakis tamasi, “Akuj bon erai Apakosi, kirai sua ngide keng dir.” Tolimok Yesu kesi tama, “Arai tarai Akuj Apakus dir, kiminasi esi ayong kainyo abuni ayong ani a Akuj, ayei tokona nege. Nyebuno ayong a ekileenu kang a ilope, ngesi kameuni ayong. Nyo nyiyeneta esi ngakiro nakalimokinit ayong esi? Erai ni nyinaikineta esi akiirar akiroit kang. Iraakasi esi ngide ka Apakus Ekipe, nabo isakete esi akiwap etereku ka apakus. Arai ngesi ekaaran tani kolong anakisiakinet, nyibaki ngesi anakiro ana a iteni jik, kainyo emam ngakiro na iteni anikeng. Na elimunio ngesi ngakiro na eraakasi alioko, elimuni kainyo eraakasi ngakiro na enaikinit ngesi, kainyo ngesi ekaliokon, nabo isiakinit alioko anikeng. Nakaneni eruoro ayong ngakiro na iteni, ibore ngini ngesi peinupitotor esi ngakiro kang. Ngae anikus epedori akidodiun atamar asechit ayong? Ani keruoro ayong ngakiro na iteni, nyo bo peinupeta esi ngakiro kang? Itwaan ni erai ika Akuj, epupi ngakiro a Akuj. Nakaneni nyiraakasi esi ngika a Akuj, ibore ngini nyipupeto esi ngakiro kang.” Kingita Ngiyaudi Yesu tamasi, “Nyikiyookinit sua atamar irai iyong Esamariat, nabo kikoporit iyong Ekipe a?” Tatachak Yesu kesi tama, “Emam Ekipe kakoporit ayong, akerit ayong Apakang, nakaneni nyikikerito esi ayong. Nyasaki ayong ekipur kang a ilope, eyei lo esaki, ngolo ngesi erai ekeriran. Kalimokinit esi ngakiro na iteni dir atamar, ani kiwapak itwaan ngakitatamet kang, nyetoani jik.” Tolimokis ngesi tamasi, “Kiyen tokona sua dir atamar kikoporit iyong Ekipe! Atoani kolong Aburaam, totoaka ngikadwarak a Akuj dang, nakaneni abe ibala bo tokona iyong itwaan daang ni iwapit ngakitatamet kon, nyetoani jik. Sodi tolot itwaan daang nawi keng, Atoani kolong apakosi Aburaam. Esibit ipolot iyong idwangit Aburaam a? Atoakete tani kolong ngikadwarak a Akuj. Abe ibala tokona iyong irai iyong nyo?” Tatachak Yesu tama, “Ani kepuruuno ayong bon, erai ekipur kang eka pas, lokepuruunit ayong ngesi Apakang lo ibalasi esi Akuj kus. Nyiyenete esi ngesi nakanuan, nakaneni ayeni ayong ngesi. Anikalimu ayong atamar nyayeni ngesi, aliwor ayong ekaliokon loger kus, nakaneni ayeni ayong ngesi nabo ewapit akiroit keng. Alakara Apakus Aburaam esaki aanyungar akolongit na abunio ayong, abu taanyunga talakar.” Tolimut Ngiyaudi tamasi, “Ani eringa iyong tani nyenanga ngikaru ngitomwon-kan, ianyunga iyong Aburaam a?” Tatachak Yesu tama, “Kalimokinit ngakiro na iteni dir atamar, kocholong eringa Aburaam nyidouno, ‘Ayei Ayong’.” Sodi kideput kesi ngamoru esakete akimasea ngesi, nakaneni toduk Yesu torotok alokai a Akuj. Na alosio Yesu, abu taanyunga itwaan ni edounitoe emudukana. Kingita ngirukitos keng tamasi, “Eketataman, akisech a itwaan kaen kori na a ngikauriak keng edounere ngesi emudukana?” Tatachak Yesu kesi tama, “Nyitorunit amudukanut keng nakisech keng kori nakisech a ngikauriak keng. Emudukana ngesi sodi kileereunio agogongu a apolou a Akuj esubi etich anikeng. Ejoikinit ngoni kisubi etich kangolo kameuni ayong eringa nyewara, ani enangi nakwaare emam itwaan esubi etich jik. Ani aringa ayong ayei nakwap, ayong ngesi arai akicha a akwap.” Na arumorea alimun nguna, kimaak Yesu ngakimul kwap, tomunak echoto ka ngakimul, tomiatak echoto nakonyen a emuduk kangolo sodi tama, “Kape kilota ereet kon anabwel enyaritae Siloam,” (eger a ekiro kangolo ngesi atamar, “Emearitae.”) Sodi tolot itwaan ngini kilota ereet tobongu itee akwap. Sodi kingitas ngikidunyet keng ka luche lusek engolenakinete ngesi ilipanar tamasi, “Ekoe! Meere itwaan en nipalem ibooyi ilipanar a?” Tamasi ngiche “Erai ngesi,” nakaneni tamasi luche, “Alioko, meere ngesi, ikwaan ka ngesi.” Tolim itwaan ngini tama, “Ayong ngesi itwaan.” Kingita ngesi tamasi, “Erai nyo tokona kisitee iyong akwap?” Tatachu ngesi tama, “Itwaan ni enyaritae Yesu ngesi amunakini echoto katomiatak ayong nakonyen, katolimok atamar atolot nabwel na enyaritae Siloam elota ereet kang. Abu ayong atolot, ani napei elotarea ayong, engolik akwap.” Kingita tamasi, “Aliwae eyei ngesi?” Tatachu ngesi tama, “Nyayeni ayong.” Sodi torikosi itwaan nisek amudukana nia Ngiparisayo. Arai akolongit na amunakinea Yesu echoto dio tangaa ngakonyen keng Sabato. Sodi kingita Ngiparisayo itwaan ngini nabo eger lo angarotor ngakonyen keng kingolik ngesi akwap. Tolimok tama, “Amiatakini ngesi echoto nakonyen kang, sodi elota ayong ereet kang, tokona etee ayong akwap.” Tolimut Ngiparisayo ngiche tamasi, “Itwaan ni esubi kona nyebunit ngesi ani a Akuj, kainyo nyiwapit ngesi etal a Sabato.” Nakaneni tamasi ngiche, “Ikokini itwaan niasechan esubi ngakitoodikinet nakailiilok na ikote nugu ai?” Sodi totiakas kesi ngaarei. Kingita nabo Ngiparisayo itwaan ngini tamasi, “Ibala iyong angaari ngesi ngakonyen kon kingolikis akwap. Tokona a, eya iyong ngakiro ilimuni anikeng a?” Tatachak ngesi tama, “Erai ekadwaran a Akuj.” Nakaneni towout ngikapolok a Ngiyaudi akinup atamar edounio kolong itwaan ngini emudukana, nakaneni itee tokona akwap. Tanyaraut kesi ngikauriak keng sodi kingita tamasi, “Erai logo lokookus a? Ibalasi esi edounio emudukana. Ekokini tokona ngesi ingolikini akwap ai?” Tatachut ngikauriak keng tamasi, “Kiyeni sua atamar erai ngesi lokookosi, nabo edounio ngesi emudukana. Nakaneni nyikiyeni sua ibore ni isitee ngesi tokona akwap, kori nyikiyeni sua atamar ngae angaari ngakonyen keng kingolikinea ngesi akwap. Kingita ngesi, abe epolot bo epedori atachun!” Alimunete ngikauriak keng ngakiro nguna kainyo aemito kesi ngikapolok a Ngiyaudi, kainyo atukito Ngiyaudi atamar anikelimu itwaan atamar Yesu erai Kiristo, itwarakinio itwaan ngini alokai a Atuk. Ngakiro nguna ngesi abaatar ngikauriak keng, “Abe epol bo ngesi, kingita!” Tanyaraut itwaan nisek amudukana ngini na a ngaarei tolimokis tamasi, “Kikong alongaren Akuj atamar ilimuni iyong ngakiro na iteni! Kiyeni sua atamar ekasechan itwaan ni angaari ngakonyen kon.” Tatachu itwaan ngini tama, “Nyayeni ayong kerai ngesi ekasechan kori meere ekasechan. Ibore ipei ayeni, arai ayong emuduk, nakaneni akienyi tokona.” Kingita tamasi, “Kikokini ngesi iyong ai? Ekokini ngesi engaari ngakonyen kon kingolikinea iyong akwap ai?” Tatachak tama, “Kalimok tete ayong esi, towout esi akiirar. Nyo tokona nabo isaketa akiirar? Kori isakete esi dang araun ngirukitos keng?” Kitepeniyasi kesi ngesi tamasi, “Iyong irai erukitos keng, kirai sua ngirukitos a Musa. Kiyeni sua atamar eruorosi Akuj ka Musa, nyikiyeni sua itwaan ngini tani ni abunio!” Tatachu itwaan ngini tama, “Kitalarete chanai ngakiro nugu! Ibalasi esi nyiyenete ni ebunitor ngesi, nakaneni angaari ngesi ngakonyen kang engolik akwap! Kiyeni ngoni atamar nyepupi Akuj ngakiro a ngikasechak, epupi ngakiro alu ekerito ngesi, nabo tosubete na esaki ngesi kesi tosuba. Napei kolong anakisiakinet a akwap, nyiirara atamar eyei itwaan ni angaa ngakonyen a itwaan ani edounitoe emudukana. Arai nyebunite itwaan ngini ani a Akuj, pekesubaki ibore tani ipei.” Tatachakis tamasi, “Kidounio kolong iyong topolou anakisech, ikwa ipedori iyong akitatam sua a?” Sodi kitwarakis ngesi alokai a Atuk. Ani iirari Yesu atamar etwarakin itwaan ngini, kingit ngesi na eriamunotor tama, “Inupit iyong ngakiro a Lokookeng a Itwaan a?” Tatachak itwaan ngini tama, “Lokile lo, tolimokinae atamar ngesi erai ngae sodi atonupea ayong ngakiro keng!” Tolimok Yesu ngesi tama, “Iberakin tete iyong aanyungar ngesi, nabo ngesi lo tokona iruorosi ka iyong logo.” Tolim itwaan ngini tama, “Anup ayong Ekapolon!” Sodi toriedik ngesi alongaren Yesu. Tolim Yesu tama, “Abuni ayong nakwap naga akirirare, sodi taanyungareta ngimuduk, nabo luche lu iteete taraut ngimuduk.” Epewae a Ngiparisayo lu arukito ka ngesi na eirareta nguna, kingitas tamasi, “Ekoe, ibala tokona iyong kimudukaka sua dang a?” Tatachak Yesu tama, “Arai tomudukaka esi, kemam esi akisech. Ani kona tokona ibaatar esi iteete, idodiunito nguna atamar, eringa esi iraakasi ngikasechak.” Tolim Yesu tama, “Kalimokinit esi ngakiro na iteni dir atamar itwaan ni nyelomari nanok a ngamesekin kitor lokidor, nakaneni kitor wache, ngesi ekokolan nabo erukoot. Itwaan ni elomari kitor lokidor ngesi erai ekeyokon. Engakini ekagolon ngesi ekidor, epupete ngamesekin etoil keng, enyarae ngesi ngamesekin a ngirora kech, kitwara nikalapatan. Na itwarunea ngesi ngamesekin nikalapatan, ingarenikini ngesi sodi kiwapakis ngamesekin kainyo eyenete etoil keng. Nyiwapakinete kesi epeyonon, nakaneni ematarosi, kainyo nyeyenete kesi ngitoilio a ngipeyok.” Tolimok Yesu kesi akisikwaanet naga, nakaneni nyeyena kesi ngakiro na alimunit ngesi. Sodi tolim Yesu nabo tama, “Kalimokinit ngakiro na iteni dir atamar ayong arai ekidor a ngamesekin. Ngitunga daang lukolong kengareniunete ayong, araakasi ngikokolak ka ngirukooi, nabo apot ngamesekin nyiirasi kesi. Ayong arai ekidor, itwaan cha daang ni elomuni kitoru nikang, eyuunio, elomuni nabo topudo, dio kitanae. Erai ebunitor ekokolan akoko ka akiar ta akinyasun. Abuni ayong sodi toriamuneta esi akiyar, akiyar na erai aka dir. “Ayong arai ekeyokon loajokon lo ajalit akiyar kang kotere ngamesekin. Na ingolikinea ekedalan epeot ebunit, imiekini ngesi ngamesekin kipiiri, kainyo meere ngesi ekeyokon lo erai ngamesekin ngakeng. Nakaneni erwakin epeot ngamesekin totiakatiaka kiala. Ematar ekedalan kainyo ngesi ekedalan, nakaneni nyekachit ngakiro a ngamesekin. Ayong arai ekeyokon loajokon, ngulu eraakasi ngikang, ayeni, nabo ngulu eraakasi ngikang, kayenete ayong. Loger lopei kayenea ayong Apakang, atoyeni ayong dang Apakang. Nakaneni alemun ayong atajal akiyar kang kotere ngamesekin. Eyakasi ngamesekin kang ngache na emam ananok kana. Ejoikinit ayong ayauni kesi dang kiirasi etoil kang, sodi toliwor esipanit epei ka ekeyokon epei. “Kamina ayong Apakang anialemunor ayong atajal akiyar kang, sodi ataanyunea nabo akiyar ngina. Emam itwaan elemari akiyar anikang. Ajali ayong elope loger lo asakitor. Apedori ayong akijal, apedori ariamun nabo. Nguna ngesi kadungoki ayong Apa atamar atosub.” Nakaneni totiakas ngitunga nabo kotere ngakiro nguna. Apot ngikaalak kech tamasi, “Ekoporit ngesi Ekipe! Ikeripikinit itwaan en. Nyo ipupeto esi ngakiro keng?” Nakaneni abalasi ngiche, “Nyiruoro itwaan ni ekoporit Ekipe kona! Ikokini Ekipe engaari ngakonyen a emuduk ai?” Ngirwa lu akiporo, ayei Esukukuu lo ilipakinitere Akai a Akuj alo Yerusalem. Alosi Yesu alokai a Akuj ani a ngagulei a Solomon, pot ngitunga kiriama ngesi kingita tamasi, “Kitangayae iyong sua tanang ori: tolimokinae sua ngakiro na ileerete dir kirai iyong Kiristo?” Tatachak Yesu tama, “Kalimok tete ayong esi, nakaneni nyenupa esi ngakiro kang. Ngitichisio lu asubi ayong a agogongu ka Apakang, kesi idodiunito atamar ayong arai ngesi, nakaneni nyinupito esi kainyo meere esi ngamesekin kang. Epupete ngamesekin kang etoil kang, nakaneni ayeni ayong kesi, nabo kewapuunete kesi ayong. Ainakini ayong kesi akiyar na nyedaun, nyechakarosi kesi jik, nabo emam itwaan kademari ayong anakan kang. Apakang lo kainakini ayong idwangit daang, nabo emam itwaan ni epedori akopor anakan ka Apakang. Ayong ka Apakang kirai ngipei.” Kideput ngitunga nabo ngamoru tasaka akimas ngesi. Tolimok Yesu kesi tama, “Asub ayong ngitichisio lukaalak luajokak anikus, lu eponito ani ka Apa. Alotichisio kangulu kadaang a, ali isaketa esi akimas ayong a ngamoru?” Tatachakis tamasi, “Nyikisaki sua akimas iyong a ngamoru a etich a loajokon, pearai kisaki akimas iyong ani imenya iyong Akuj! Abe irai bo iyong itwaan, nyo isakea iyong aliwor Akuj!” Tatachak Yesu kesi tama, “Igiritae Lotal kus atamar ebala Akuj, ‘Iraakasi esi ngakujo.’ Kiyeni atamar eraakasi na igiritae ngaka iteni jik, sodi tanyara Akuj ngitunga ngulu ngakujo, ngitunga lukolong alimokinio ngakiro nguna. Ani lo erai ayong, kaseu ayong Apakang katomeu nakwap. Nyoni bo tokona ibaatar esi emenyi ayong Akuj ani abalar arai ayong Lokookeng a Akuj? Nyiinupa robo ngakiro kang erai pekasubi ayong ngitichisio luesaki Apakang atosub. Nakaneni ani kasub ayong ngitichisio, tonupa kesi erai tani pakinupete ngakiro kang. Sodi toyeneta esi dir atamar eyei Apa nikang, nabo ayei ayong nika Apa.” Tasaka kesi nabo akirumun Yesu, nakaneni tobuchar ngesi anikech. Tobongo Yesu nabo ekwakaye a angolol a Yorudan nikolong sek esiakinea Yoana akibatisare ngitunga, dio kiboikin neni. Toloto ngitunga ngikaalak nikeng, tolimut tamasi, “Nyesuba Yoana ngakitoodikinet nakailiilok, nakaneni ngakiro daang na itwaan kaen na eruoro ngesi, eraakasi iteni.” Sodi tonupa ngitunga lukaalak ngakiro keng kaneni. Adeaka itwaan ni anyaritae Losaro ni alomit Betania. Arai Betania ere lo alomito Mariam ka Marita nakaatokeng. ( Arai Mariam ngina nakolong ewasakini Ekapolon Yesu akimiet nakakukunyon nakejen, sodi kisuta a ngitim keng, arai lokaatokeng Losaro adeaka.) Sodi apot ngikaitotoi keng tomeasi itwaan nia Yesu tama, “Ekapolon, edeak lopae kon lo imina iyong.” Ani iirari Yesu ngakiro nguna, tolim tama, “Meere edeke a Losaro lo etoanea ngesi, erai lo ipuruunere Akuj, erai edeke ngolo eanyunea Lokookeng a Akuj ekipur.” Amina Yesu Marita ka nakaatokeng ta Losaro. Nakaneni ani iirari ngesi atamar edeak Losaro, abu toper neni ngirwa ngiarei. Sodi ani ekisidi tolimok ngirukitos keng tama, “Potu atobongosi nakwap a Yudea.” Tolimokis ngirukitos keng tamasi, “Eketataman, ngoon ngirwa lupei lugu, asakete ngitunga kaina akimas iyong a ngamoru, isaki tokona iyong nabo alosit inaa?” Tatachak Yesu tama, “Erai ngisaa a apaaran ngitomon ka ngiarei, kori ai? Ani elosi itwaan naparan, nyibusokin ngesi, kainyo itee akicha a akwap kana. Nakaneni ani elosi itwaan nakwaare, ibusokin kainyo emam akicha anikeng.” Tolim Yesu nguna ani erumor kiatak tama, “Ejotoe lopae yok Losaro, nakaneni alosi ayong etekienyu ngesi.” Tatachut ngirukitos keng tamasi, “Ekapolon, ani kejotoe ngesi ejoker.” Nakaneni eruoro Yesu atamar atoana Losaro dio tamasi kesi kori ejotoe. Sodi tolimok Yesu kesi ngakiro na ileerete tama, “Atoana Losaro. Nakaneni alakara ayong kotere esi anipakirukitor ayong ka ngesi, sodi tonupeta esi. Potu apana nikeng.” Sodi tolimok Tomas (lo enyaritae emuut) ngirukitos luche tama, “Potu daang erukosi ka Eketataman sodi atotoaketa ka ngesi aapei!” Na adolunio Yesu, torukou Losaro kenuk keper naliel ngirwa nguomwon. Aapi Betania asibit ngakilomitae ngauni alo Yerusalem, aponito ngitunga a Yudea lukaalak akisililing Marita ka Mariam totikokis ngitai kotere akitu alokaatokech. Na eirarea Marita atamar ebunit Yesu, tolot kisiriamia ngesi, nakaneni kidong Mariam kai. Tolimok Marita Yesu tama, “Ekapolon, arai toyei iyong nege, peketoanit lokaatokang! Nakaneni ayeni ayong atamar tani tokona dang, kiinakini Akuj iyong ibore daang ni ilipi iyong.” Tolimok Yesu ngesi tama, “Eyaruni lokaatokon.” Tatachak Marita ngesi tama, “Ayeni ayong atamar eyaruni akolongit na esal.” Tolimok Yesu ngesi tama, “Ayong ngesi arai ayarun ka akiyar, itwaan cha daang ni eyari tonupite ngakiro kang, nyetoani jik, nakaneni itwaan cha daang ni eyari katonupite ayong, nyetoani jik. Inupit iyong ngakiro nugu a?” Tatachak tama, “Ee, Ekapolon, anupit ayong atamar iyong irai Kiristo, Lokookeng a Akuj, lokolong abeyo ebuni nakwap.” Na arumorea Marita alimun nguna, tobongo dio tanyara nakaatokeng Mariam nikeng bon tolimok tama, “Eyei Eketataman nege kingita iyong.” Na eirarea Mariam nguna, tonyou atipei tolot kisiriamia ngesi. ( Aringa Yesu nyenanguna nadakar, aringa eyei ni esiriamea Marita ngesi.) Nakaneni ngitunga lu arukito ka Mariam isililingete etikokinito etau, apot kingolikis eger lo apudorea ngesi nikalapatan atipei. Kiwapakis ngesi ebaasi kori elosi ngesi akigoro analiel. Todol Mariam ni ayei Yesu napei engolikinea, kibusokin diyete ngakejen keng tama, “Ekapolon, arai toyei ngoon iyong nege, peketoanit lokaatokang!” Kingolik Yesu ngesi igoro, kingolik tani eger lo egorotor ngitunga lu ewapito ngesi, toriabakin Yesu kialolong noi. Kingit kesi tama, “Aliwae inukakinito esi ngesi?” Tatachut tamasi, “Ekapolon, bua taanyunga.” Kikalou Yesu. Tamasi ngitunga, “Taanyungasi mono esi eger lokeminar ngesi!” Nakaneni apot epewae kech tamasi, “Ekoe! Abe angaari bo ngoon ngakonyen a emuduk. Peadikino ngesi iratakini akitu a Losaro a?” Tolot Yesu naliel erubakinit ialolongi. Arai aliel ataaba na abokitae tarapakinae amoru nakituk. Todungok Yesu kesi tama, “Tolemasi amoru!” Tatachu Marita nakaatokeng kangolo atoanit tama, “Ekapolon, iwuaruni niabosan kainyo aper tokona naliel ngirwa nguomwon!” Tolimok Yesu ngesi tama, “Pekalimokinit tete ayong iyong atamar ani kinup, ingolikini apolou a Akuj a?” Apot tolemasi amoru, tokienyia Yesu kidiama tama, “Apa, kabuakinit ayong iyong alakara ani kipupio iyong ayong. Ayeni atamar kipupi iyong ayong ngirwa daang. Nakaneni alimunit nugu kotere ngitunga lugu, sodi tonupeta kesi atamar iyong kimeuni ayong.” Alimunet nguna, kirema tanyara tama, “Losaro, topud nikalapatan!” Topud ekatoan ngolo nikalapatan, einikinitae ngakan keng ka ngakejen ngiworui lu aliel, nabo abutarit eworu ereet keng. Tolimok Yesu kesi tama, “Talachasi kimiekis tolot.” Na engolikineta ngitunga lukaalak luaponito nia Mariam na asubi Yesu, apot tonupa. Nakaneni tolot epewae kech nia Ngiparisayo alimokin na asubi Yesu. Sodi tochunakinos Ngimurok Luapolok a akai a Akuj ta Ngiparisayo Natuk tamasi, “Ekoe, kikoni ai? Kingolikisi mono esi ngakitoodikinet nakailiilok esubi itwaan en! Ani kiisik ngoni ngesi esubi nugu, enupete ngitunga daang ngakiro keng, sodi epote Ngiroma kinyasut akai a Akuj ka ngitunga a akwap yok!” Tolim epei kech lo enyaritae Kayapa, lo arai Emuron Loapolon ekaru ngolo tama, “Ibangaaka mono esi a? Nyiyenete esi atamar ejoikinit itwaan ipei etoani kotere ngitunga luche sodi nyinyasunotor ngitunga a akwap daang a?” Nakaneni, peeruoro ngesi ngakiro na eraakasi ngakeng a ilope. Kona araakar ngesi Emuron Loapolon ekaru ngolo, adwari ngesi atamar etoani Yesu kotere Ngiyaudi, meere kotere Ngiyaudi make, nakaneni echunakini wapei ngide a Akuj daang lu ialara taraut ngipei. Akolongit napei ngina jik, totuko ngikapolok a Ngiyaudi eger lo eareta Yesu. Sodi abu Yesu nyelot ileere anakwap a Yudea, nakaneni torotok kaneni tolot nakwap na ayei diyete ariet, sodi tanang lore lo anyaritae Epiraim, kiboikinos ka ngirukitos keng neni. Nakaneni aapikinit ngirwa a esukukuu a Ngiyaudi alo a Adeparet. Torotokis ngikaalak anamanat toloto Yerusalem akitosega loger a etal a Musa, eringa akolongit a esukukuu nyenanga. Asakete kesi Yesu, ani na eriamitotor kesi kai a Akuj, kingitanaros make ebalasi, “Esibit esi kwaai? Ebuni ngesi Losukukuu kori emam?” Adungunito Ngimurok Luapolok a akai a Akuj ta Ngiparisayo akiroit atamar, ani keyei itwaan ni eyeni ni eyei Yesu, ejoikinit elimori sodi kirumuneta kesi ngesi. Ani eringa ngirwa ngikan-kapei tanang esukukuu lo enyaritae Adeparet, abu Yesu tolot Betania, ni ebooyo Losaro losek eteyaruni Yesu anakitu. Kidorokinoe ngesi akimuj kaneni, akoranakini Marita ngitunga akimuj. Arukito Losaro ka ngipeyok lu emujete ka Yesu alomeesa. Sodi tolem Mariam akimiet nakakukunyon elalak ngaropiyae egielere enyaritae nardo*g** tobukok nakejen a Yesu, dio akisutar a ngitim keng. Tokukunyu akimiet ngina alokai awadaang. Nakaneni epei a ngirukitos a Yesu lo enyaritae Yuda Isikariote, ngolo arikokini ngesi ngitunga, tolim tama, “Nyo peagialarere akimiet nakakukunyon naga a ngadinari a ngamiae a ngakan-kapei, sodi nakinae ngikebootok?” Pealimunit ngesi nguna ani esienitotor ngikebootok, eruoro ngesi nguna ani araakar ekokolan. Akodit ngesi echue lo a ngaropiyae, alemanari ngaropiyae alochue kangolo. Tolim Yesu tama, “Kimiekisi ngesi! Kimiekisi kiwaa naetingit kotere akolongit nakanukere ayong. Irukito esi ka ngikebootok jiik, nakaneni nyikiruki ayong ka esi jiik.” Kiira asepich a ngitunga atamar eyei Yesu Betania, toloto kesi daang inaa. Pealoose kesi inaa aanyun Yesu bon, asakete tani aanyun Losaro lo eteyaruni Yesu anakitu. Sodi totuko Ngimurok Luapolok akiar Losaro dang, kainyo kotere ngesi, angerete Ngiyaudi lukaalak kesi sodi tonupa ngakiro a Yesu. Akolongit na a ngaarei, kiira asepich a ngitunga alu aponito Losukukuu lo anyaritae Adeparet atamar ebunit Yesu Yerusalem. Sodi toyeput kesi ngangolea toloto kisiriamiasi ngesi echalasi ebalasi, “Kipuruunoe Akuj! Topia Akuj ngolo ebunit a ekiro a Ekapolon a Isirael!” Taanyu Yesu itasikiria todoka kidiama keng loger lo igiritae nagiran kona, “Nyieam ngitunga a ere a Sion! Ekapolon kus logo ebunit, edokit itasikiria.” Peetamunito ngirukitos keng akiroit ngina akolongit ngina, nakaneni na ayarunea Yesu a apolou a Akuj, apot kitamut atamar egiritae nguna nagiran loger ngolo, na nguna ngesi asubeta kesi ngesi. Kisisata ngitunga lu arukito ka Yesu na anyaraa Losaro analiel kiteyaru, ngakiro daang na asubasi kotere ngakiro nguna, tolot asepich a ngitunga kisiriama Yesu, kainyo eirarete atamar asubi ngesi akitoodikinet nakaililon ngina. Apot Ngiparisayo tolimokinos make tamasi, “Taanyungasi tokona eger lo angopea ngoni ibore nikisubi. Kingolikisi a! Ewapakis ngitunga daang ngesi!” Arukito Ngigirik ngiche ka ngitunga lu aloose Yerusalem akilip Akuj akolongit na esukukuu. Toloto kesi nia Pilip (alo erai itwaan a Betisaida ana a akwap a Galilaya), tolimokis tamasi, “Ekile, kisaki sua aanyun Yesu.” Tolot Pilip tolimok Andirea, sodi toloto kesi kwasiarei tolimokis Yesu. Tatachu Yesu tama, “Adol tokona esaa lo eanyunea Lokookeng a Itwaan apolou naapolon noi. Kalimokinit ayong esi ngakiro na iteni dir atamar, idongi ekinyamit a ngakanoi erai ekinyamit, erai pekitakin nalup totoan! Ani ketoana, erupuni tokon talalar. Itwaan cha daang ni emina akiyar keng, ebukor, nakaneni ni eremokin akiyar keng anakwap kana, irichuni anakiyar ana nyedaun. Itwaan cha daang ni esaki akisub etich kang, ejoikinit kewapi ayong, sodi min ekasuban etich kang ni ayei ayong. Nabo ani kesub itwaan etich kang, ipuruuni Apakang ngesi. “Eriebete tokona ngakiro etau kang, ekoe atamari tokona ai? Ekoe, atamari, ‘Apa, toyuunae alochan alu a esaa kalo a’? Nakaneni abe erai bo kolong ibore abunio ayong ngini sodi atanaikinea ngichan lu esaa kalo. Apa, yau ekipur lokiro kon!” Sodi tolim etoil anadis ebala, “Etiliwo ayong ngolo lo ipuruunitoe, nakaneni ekokini neni nabo.” Kiira asepich a ngitunga alu awaasi kaneni etoil ngolo, tamasi ngiche kech arai agirokin, tabalasi nabo ngiche, “Emalaikat esuruori ngesi!” Tolimok Yesu tama, “Peeruoro etoil ngolo kotere ayong, eruoro kotere esi. Adol tokona esaa lo iriraare ngitunga a akwap kana, iritario tokona ekapolon a akwap kana. Ani nakekearere ayong kidiama anakwap, eriuni ngitunga daang nikang.” ( Analimun nguna, edodiunit ngesi eger a akitu ana etoani ngesi.) Tatachakis ngitunga tamasi, “Igiritae Lotal atamar eyari Kiristo jik. Nyoni bo ibalar iyong ejoikinit Lokookeng a Itwaan ikeario? Lokookeng a Itwaan ngolo ngesi ngae?” Tatachak Yesu tama, “Eringa cha mono wadio irukito esi ka akicha. Torubakisi iloose eringa akicha eyei, sodi nyikidol esi aribu. Itwaan ni elosi nakwaare nyeyeni ni eteni. Tonupa ngakiro a akicha eringa eyakasi, sodi taraut esi ngitunga a akicha.” Na alimunio Yesu nguna, dio arotokin toduk nyeanyuneta ngitunga. Tani na asubea ngesi ngakitoodikinet nakailiilok nguna alotunga, nyenupa kesi ngakiro keng. Asubasi nguna sodi kiyookinotor ngakiro nakolong alimuni ekadwaran Isaya ebala: “Ekapolon Akuj, ngae anupi ngakiro nakilimuni sua? Ngae edodik Ekapolon agogongu keng?” Nakaneni nyenupa kesi kainyo abala Isaya nabo ngakiro ngache kona, “Ekokis kesi ngitunga lu etumudukan Akuj ngakonyen kech, nabo agol Akuj ngitamen kech, sodi nyingolikineta a ngakonyen kech, kori nyeyenuneta kesi a ngitamen kech, nakaneni nyereunosi nikang, ebala Akuj, sodi etangalek ayong kesi.” Alimuni Isaya nugu kainyo engolikini apolou a Yesu, sodi kiruor ngakiro keng. Tani kikote neni, tonupa ngikapolok a Ngiyaudi lukaalak ngakiro a Yesu. Nakaneni kotere ni aemitotor Ngiparisayo, nyelimoro kesi, kainyo akerito atamar nyikitwarakin alokai a Atuk. Kainyo aminasi kesi ekipur a ngitunga akidwang ekipur a Akuj. Kirema Yesu tama, “Itwaan cha daang ni enupit ngakiro kang, enupit tani ngakiro alo kameuni ayong, meere nakang make. Itwaan cha daang nikaanyunga ayong, aanyunga tani lokolong kameuni ayong. Abu ayong nakwap ekoni akicha, sodi ani itwaan cha daang ni enupi ngakiro kang, nyidongi naribu. Ani kiira itwaan ngakitatamet kang nyiiwapak, nyerirae ayong ngesi. Peabuni kolong ayong akirirare ngitunga a akwap, abuni ayuun. Itwaan cha daang ni kangeri ayong, nyeechamu ngakitatamet kang, eyei ngesi ekeriran. Ngakiro na eruoro ayong ngesi iriraate ngesi akolongit na a esal! Eraakasi na eruoro ayong ngaka iteni kainyo nyeruoro ayong naeraakasi ngakang a ilope, erai Apakang lo kameuni ayong, ngesi adungu ngakiro na ejoikinit alimuni kana ejoikinit eruoro. Nabo ayeni ayong atamar eyaunito ngakiro na adungu ngesi akiyar na nyedaun. Na alimuni ayong kesi nakalimoki Apakang atamar tolim.” Arai akolongit apei edongit tanangea esukukuu lo anyaritae Adeparet. Ayeni Yesu atamar adol esaa lo erotokinio ngesi anakwap kana tolot nika Apakeng. Amina ngesi jiik ngitunga lu eraakasi ngikeng anakwap kana, tasak tokona ngesi akidodikin kesi atamar amina kesi tanang losal. Emujete Yesu ka ngirukitos keng akimuj naka ebong. Alomarit Ekipe lotau a Yuda, lokookeng a Simon Isikariote, edodikinit ngesi atamar torikok Yesu ngitunga. Ayeni Yesu atamar kainaki ngesi Apakeng agogongu daang, ayeni tani atamar abunit ngesi ani a Akuj, nabo abongori nia Akuj. Sodi tonyou Yesu ani ayei emeesa, talachu eworu keng lo a alokidiama tolem ataulo kilogak naabor. Sodi tobukok ngakipi natubwa, tolomak akilotar ngakejen a ngirukitos keng, ani erumor, kisuta a ataulo ana elogakinit naabor. Ani enanguni nia Simon Petero kingit ngesi Yesu tama, “Ekapolon, ilotari cha iyong dir ngakejen kang a?” Tatachak Yesu ngesi tama, “Nyiyeni tokona iyong na asubi ayong, iyenuni iyong ekisidi.” Tolimok Petero ngesi tama, “Emam esaa tani epei lo ilotarea iyong ngakejen kang jik!” Tatachak Yesu ngesi tama, “Ani pekelota ayong ngakejen kon, nyiliwor nabo iyong erukitos kang jik!” Tolimok Simon Petero tama, “Ekapolon, nyiilota robo ngakejen kang make, kilotarae ngakan ka akou dang!” Tolimok Yesu tama, “Itwaan ni elota akwaan keng daang eseg ngesi. Nyesaki akilotar nabo mati kerai akilotar ngakejen make. Isegak esi daang, isegak esi daang mati epei bon.” ( Ayeni Yesu itwaan ni erikokini ngesi ngitunga, ngesi abalar, “Isegak esi daang mati epei kus bon.”) Na arumorea Yesu akilotar ngakejen kech tanap eworu keng lo alokidiama tolot kiboikin ni ayei emeesa. Kingit kesi tama, “Iyena esi ngakiro nakasubea ayong esi a? Kinyarito esi ayong Eketataman ka Ekapolon, iyookinito esi nguna, kainyo ayong ngesi ngolo. Elota tokona ayong Ekapolon kus ka Eketataman kus ngakejen kus. Ejoikinit ilotanarosi esi dang ngakejen kus make. Kedodikinit tokona ayong esi ekitetemes logo sodi tosubeta esi na tokona kasubea ayong esi. Kalimokinit ayong esi ngakiro na iteni dir atamar, emam ekasuban etich lo idwangit ekapolon keng, nabo emam emeanara lo idwangit ngolo emearit ngesi. Iyenut esi nugu tokona, ani kisuba kongina, ilakarosi! “Nyalimunit ngakiro nugu kotere esi daang, ayeni ayong ngulu aseu, sodi kiyookinotor ngagiran na igiritae kona, ‘Itwaan nikimori ka ayong akimuj kang, kanyoiki karemokin.’ Kalimokinit tokona ayong esi nugu eringa ngakiro nguna nyesubakina, sodi ani kesubakin, tonupeta esi atamar, ‘Erai Ayong Lo erai Ayong.’ Kalimokinit esi ngakiro na iteni atamar, itwaan cha daang ni itepeyoni itwaan ni ameari ayong, ketepeyon tani ayong, ni ketepeyoni ayong, etepeyon tani lokameuni ayong.” Alimunet a Yesu nguna, tonoma ngakiro etau, tolimok kesi ngakiro na ileerete tama, “Kalimokinit ngakiro na iteni dir atamar, karikokini epei kus ayong ngitunga.” Tatalasi ngirukitos a Yesu ngakiro nguna tokianyanakinos peeyenete atamar ngae abala ngesi. Epei a ngirukitos a Yesu, ngolo amina ngesi, ebooyi alo diyete Yesu. Sodi toketu Simon Petero ngesi tama, “Kingit ngesi atamar ngakiro a ngae iruoro ngesi.” Sodi kirudar erukitos ngolo diyete Yesu kingit tama, “Ekapolon, ngae ibala iyong?” Tatachak Yesu tama, “Itwaan ngini ainakini ayong amugati na elumokini tooma natubwa ngesi ngini.” Tolem ngesi amugati nak Yuda lokookeng a Isikariote. Ani napei ediaunea Yuda amugati, toloma Esiitan nikeng. Tolimok Yesu ngesi tama, “Kiburuburak atipei na isaki akisub!” Emam tani ipei alu emujete ani ayei emeesa ni ayeni ibore alimunio Yesu ngakiro nguna. Kona araakar Yuda itwaan ni atingit echue a ngaropiyae, kitama ngirukitos luche atamar kori alimokinit Yesu ngesi atamar tolot togiel akimuj a esukukuu, kori elimokinit ngesi atamar, nak ngikebootok ngaropiyae. Kidiau Yuda amugati dio arotokin. Arai akwap akwaar. Na arotokinio Yuda, tolim Yesu tama, “Itatakanuunio tokona apolou a Lokookeng a Itwaan, tani tokona dang atakanuu apolou a Akuj anikeng. Ani ketakanuu apolou a Akuj anikeng, itatakanuuni Akuj alope apolou a Lokookeng a Itwaan anikeng, kitatakanu atipei. Ngide kang, eringa cha mono wadiochichi kirukit ayong ka esi. Kisakete esi ayong, nakaneni kalimokini tokona ayong esi nakolong alimokini ngikapolok a Ngiyaudi atamar, ‘Nyiloose esi ni alosi ayong.’ Nakaneni kainakini tokona esi etal lokitetet tominakinos make loger lokaminar ayong esi, tominakinos esi kongina. Ani kiminakinosi esi make, eyenete ngitunga daang atamar esi ngirukitos kang.” Kingit Simon Petero ngesi tama, “Ekapolon, aliwae ilosi iyong?” Tatachak Yesu tama, “Nyikiwapakini iyong ayong anialosi ayong tokona, nakaneni kiwapakini iyong ayong ekisidi.” Kingit Petero ngesi tama, “Ekapolon nyo pekewapakinea ayong iyong tokona a? Alemuna ayong atoanere kotere iyong!” Tatachak Yesu tama, “Ilemuna iyong dir atoanere kotere ayong a? Kalimokinit ayong iyong ngakiro na iteni dir atamar, ani eringa ekokoroit nyerukino, ilimuni iyong ngalimunet ngauni atamar nyikiyeni ayong.” Tolimok Yesu kesi tama, “Kiapakisi ngitai kus, nyialolong, tonupa ngakiro a Akuj, tonupa nakang dang. Eyakasi ngakais nakaalak nawi ka Apakang, arai tamam, pekalimokinit ayong esi atamar alosi ayong inaa atosubak ngawiyei kus. Ani kalot ayong asubakin ni ilomete esi, abonguni nabo katoriko esi ni amini ayong, sodi ni ayei ayong, pena esi dang. Iyenete esi erot lo idiri ni ateni ayong.” Tolim Tomas tama, “Ekapolon, nyikiyeni sua ni ilosi iyong, kikokini sua kiyeni erot lokinangea inaa ai?” Tatachak Yesu tama, “Ayong ngesi arai erot, ayong ngesi arai akiyar, nabo ngakiro kang kesi eraakasi ngaka iteni, nyelosi itwaan nika Apa mati kitoru nikang.” Tolimok kesi tama, “Kona tokona kiyeneta esi ayong, iyena esi tani Apakang. Napei tokona jik, iyena esi ngesi nabo ingolikis dang.” Tolimok Pilip Yesu tama, “Ekapolon, kidodikinae sua Apa, nguna make kitemunete sua.” Tolimok Yesu ngesi tama, “Pilip, ikwa ngirwa lukirukitor ayong ka esi daang, eringa iyong nyeyena ayong a? Itwaan cha daang ni kengolik ayong, engolik tani Apakang, nyo bo tokona ibalar iyong, ‘Kidodikinae Apa?’ Ikwa nyinupit iyong Pilip atamar ayei ayong nika Apa, nabo eyei Apa nikang a?” Tolimok Yesu ngirukitos keng tama, “Meere ngakiro nakalimok ayong esi ngakang a ilope, Apakang lo ibooyi alotooma kang ngesi esubi etich keng. Tonupa ngakiro kang nakalimokinea atamar ayei ayong tooma Apa, nabo eyei Apa tooma kang, ani pekinupa kotere nguna, tonupa ngakiro kang kotere ngitichisio luasubi ayong. “Kalimokinit esi ngakiro na iteni dir atamar, itwaan cha daang ni enupi ngakiro kang, esubi ngitichisio luasubi ayong, esubi tani luapolok noi lu idwangito lukang, kainyo alosi ayong nika Apa. Ianyunete esi ibore daang ni ilipasi a ekiro kang, sodi tatakanuunea apolou ka Apa ani a Lokookeng. Ibore cha daang ni ilipasi esi ilimito ekiro kang, kainakini ayong esi. “Ani kiminasi esi ayong, irichakinete ngitalio kang. Elipi ayong Apa, kiinak esi Ekengarakinan lo ibooyete ka esi jiik. Erai ngesi Etau a Akuj lo idodiuni ngakiro na iteni na a Akuj. Nyechamunete ngitunga a akwap kainyo nyingolikinete kori nyeyenete, nakaneni iyenete esi ngesi kainyo irukito ka esi nabo emini ngesi tooma kus. “Nyakaisikini ayong esi ikokianito, abonguni nikus. Eringa cha mono wadiochichi ani erumor nyekengolikinete ayong ngitunga a akwap, nakaneni kingolikinete esi ayong, nabo kotere ni ayarea ayong, iyarete esi dang. Na enangea akolongit ngina, iyenunete esi atamar ayei ayong nika Apakang, nabo iyakasi esi nikang loger lo ayakar ayong nikus. “Itwaan cha daang ni achamu ngitalio kang nabo kiwapite, ngesi kamina ayong. Eminakini Apakang itwaan cha daang nikamina ayong, aminakini ayong dang ngesi nabo edodiun anikeng.” Tolim Yuda (meere Isikariote) tama, “Ekapolon, ikokini iyong idodiun anikosi, meere alotunga a akwap ai?” Tatachak Yesu tama, “Itwaan cha daang nikamina ayong, irichakini ngakitatamet kang. Eminakini Apakang ngesi, nabo kiponi ayong ka Apakang eboikinos nikeng. Itwaan cha daang ninyakamina ayong, nyirichakinit ngakitatamet kang. Nakaneni meere ngakitatamet na iirasi esi nugu ngakang, eponito anika Apakang alo kameuni ayong. “Kalimokinit ayong esi nguna eringa kirukit ka esi. Kitatami esi Ekengarakinan, lo erai Etau a Akuj ngakiro daang, emeuni Apa ngesi alokiro kang. Kisitamuni tani ngesi esi daang nakalimok ayong esi. “Kemiekinea ayong esi ekisil, erai ekisil ngolo ekang, nyikoni ekisil lo a ngitunga a akwap. Kiapakisi ngitai kus nyialolongo, kori nyieam. Iirasi esi kalimokini ayong esi abala, ‘Alosi ayong nakaneni abonguni nikus.’ Arai kitominas esi ayong, kilakarosi kainyo alosi ayong nika Apa alo epolot kedwangit ayong. Kalimok tokona ayong esi nguna eringa nyesubakina, sodi ani naesubakinotor, tonupa. Nyikiruoro ayong ka esi nikooyen, kainyo ebunit ekapolon a akwap kana. Nakaneni emam ngesi agogongu anikang, nakaneni ejoikinit ngitunga a akwap eyenete atamar amina ayong Apa, ngakiro nguna ngesi asubea ayong ngakiro daang loger lo kadungokinitor ngesi ayong atamar atosub. Tonyoutu atoloto kane. “Ayong ngesi arai ekitoe a emusabib lo a iteni lo akoniuni ageor, Apakang ngesi eketan. Echakari ngesi ateni daang na eyei tooma kang na nyekoneene, nabo igiaragiarari ngesi ateni daang na ekoneene, sodi kilijaunea tokonio nabo ageor ache. Isegeta esi a ngakitatamet ana ketatam ayong esi. Kiboikinos nikang, eboikin ayong nikus atarata ngipei. Nyekoniuni ateni bon, ekoniuni erai kemin lokitoe, aloger alopei kangolo, nyikoniunete esi ageor pekipean nikang. “Ayong ngesi ekitoe, esi ngaten. Itwaan cha daang ni iboikin tooma kang, nabo ayong tooma keng, ekoniuni ageor nakaalan, kainyo emam ibore isubete esi amam ayong. Itwaan cha daang ni nyiboikin tooma kang, echakario loger a ateni toon. Ngaten na aoko ikote nguna, echununio tachakakinae nakim, kinomae. Ani kipena esi tooma kang, nabo pena ngakiro kang tooma kus, kilipas ibore daang ni isakete nakaneni kiinakinio. Kotere nguna, ipuruunio Apakang ani ikoniuneto esi ageor nakaalan, nabo aloger kangolo, iraunete esi ngirukitos kang dir. Kamina ayong esi loger lo kaminar ayong Apakang, kiboikinos namina kang. Ani kirichakis esi ngitalio kang, kaminakini ayong esi dir loger lo ewapitor ayong ngitalio ka Apakang sodi katominak ngesi ayong. “Kalimok ayong esi nugu sodi minio alakara kang nikus, nabo talakaros esi noi. Etal lokadungokinit ayong esi ngesi lo, tominakinos make loger lokaminar ayong esi. Emam amina naapolon na idwangit na ejalea itwaan akiyar keng kotere ngipaalon keng. Iraakasi esi ngipaalon kang erai kisuba nakadungok ayong. Nyakanyarae tokona nabo esi ngikasubak etich jik, kainyo nyeyeni ekasuban etich na esubi ekapolon keng. Nakaneni iraakasi tokona esi ngipaalon kang, ani kalimokinea ayong esi ngakiro daang na eira ayong ani ka Apakang. Nyeseuna esi ayong, kaseu ayong esi sodi atama toloto lotich, tokoniut ageor nakaalan na nyedaun. Sodi kiinakinea Apa esi ibore daang ni ilipasi esi a ekiro kang. Kadungok ayong esi nugu atamar tominakinos esi make. “Ani kiremokin esi ngitunga a akwap, toyena atamar karemokinosi ayong kolong sek ekingaren. Arai taraakas esi ngitunga a akwap, kiminasi esi ngitunga kainyo ikote esi kesi. Nakaneni kaseuni ayong esi anakwap kana, meere esi ngitunga a akwap kana, erai ibore ngini ngesi kiremokinotor esi ngitunga a akwap. Kitamutu nakolong kalimokini ayong esi abala, ‘Emam ekasuban etich lo idwangit ekapolon keng.’ Ani kaboliatotor kesi ayong, kiboliatar esi dang, ani kirichakinito ngakitatamet kang, irichakinete nakus dang. Nakaneni esubete kesi nugu daang anikus ani iraakatar esi ngitunga kang, nakaneni nyeyenete kesi lo kameuni ayong. Arai nyaabu ayong esiruor kesi, pekeyan kesi atamar kisechit. Nakaneni nyelimunete tokona kesi atamar emam kesi akisech eyei. Itwaan cha daang nikaremokino ayong, eremokino tani Apakang. Arai nyaasub ayong anikech ngakiro na emam itwaan iche asub nakanuan, kemam kesi akisech. Kona engolikineta kesi na asubi ayong, karemokinosi ayong ka Apakang aapei. Nakaneni asubakinosi nugu kiyookinotor nakolong igiritae Lotal kech kona, ‘Karemokinosi kesi ayong pas.’ “Ebuni Ekengarakinan, Etau a Akuj, lo idodiuni ngakiro a Akuj na a iteni nabo ngesi ebunit ani ka Apa. Ameuni ayong ngesi ani ka Apa, iruoro ngesi ngakiro kang. Iruorosi esi dang ngakiro kang kainyo kirukit ayong dang ka esi napei anakisiakinet. “Kalimok esi ngakiro nugu sodi nyiwolioreta esi ananupit kus. Kitwarakinio esi anakais a Atuk. Nabo enangi ngirwa lu itamea itwaan daang nikiari esi atamar kori asubakinit Akuj etich lotiajokon. Kisubeta esi ngitunga ngakiro nguna kainyo eringa kesi nyeyena Apakang kori ayong. Nakaneni kalimok ayong esi nguna sodi ani na enangeta ngirwa lu kisubeta kesi esi ngakiro nguna, toyeneta esi atamar abu kolong sek ayong katolimok. “Pekalimokini ayong esi nguna kolong anakisiakinet kainyo aringa ngoni kirukit. Nakaneni alosi tokona ayong ni eyei lokolong kameuni ayong, nakaneni emam tani ipei kus ni kengisi ayong atamar aliwae alosi ayong. Kona tokona kalimokinea ayong esi nugu, ialolongo esi noi. Nakaneni kalimokinit ngakiro na iteni dir atamar ejok anikus alosi ayong, kainyo ani pekalot ayong, nyebuni Ekengarakinan nikus. Nakaneni ani kalot ayong, ameuni ayong ngesi nikus. Ani kebu ngesi, idodikini ngitunga a akwap atamar ichwangakinito kesi ngakiro a akisech, ka ngakiro na eteniyete ta ngakiro a eriras a Akuj. Ichwangakinito kesi ngakiro a akisech kainyo nyenupito ngakiro kang, ichwangakinete kesi ngakiro na eteniyete kainyo alosi ayong nika Apakang, nakaneni nyikingolikinete esi ayong nabo jik, ichwangakinito kesi ngakiro a eriras kainyo erirae kolong ekapolon a akwap kana. “Eringa eya nakaalak asaki ayong alimokin esi, nakaneni alalaketa tokona noi nyitamunete daang. Na ebunio Etau a Akuj lo idodiuni ngakiro na iteni a Akuj, kiteyenuni ngesi esi ngakiro daang na iteni. Nyiruoro ngesi naeraakasi ngakeng a ilope, kilimokini esi na eira ngesi, nabo kilimokini esi ngakiro na eponito. Kepuruuni ngesi ayong, kainyo iropori ngesi ngakiro naeraakasi ngakang kitolimok esi. Ibore daang ni etingit Apa erai ikang, ngesi kalimokinitor atamar iropori Etau a Akuj ngakiro na eraakasi ngakang kitelimok esi. “Eringa cha mono wadiochichi ani erumor nyikingolikinete esi ayong nabo jik, nabo ani ekisidi cha wadio kingolikis esi ayong.” Kingitanaros ngirukitos keng ngiche make tamasi, “Ekoe! Nyo tokona eger a ngakiro kanu? Anukiro nugu ebala ngesi eringa cha mono wadiochichi ani erumor nyikingolik ngoni ngesi, nabo ani ekisidi cha wadiochichi engolikisi ngoni ngesi. Nabo dang ebala ngesi, ‘Erai ni alosio ayong nika Apa.’ Nyo tokona eger a ibore be ‘eringa cha mono wadiochichi’ kaen? Kikuruwosi ngakiro na iruoro ngesi!” Toyen Yesu atamar asakete kesi akingit ngesi ngakiro, dio tolimok tama, “Abala tete ayong, ‘Eringa cha mono wadiochichi ani erumor nyikingolikinete esi ayong, nabo ani ekisidi cha wadiochichi kingolikinete esi ayong.’ Ngakiro nugu kesi ingitanarosi esi a? Kalimokinit esi ngakiro na iteni dir atamar ikalounete esi tosutonokis, nakaneni elakarosi ngitunga a akwap, emini esi esinyoi, esi nakaneni ibelo asinyit kus toliwor alakara. Na apikinea aberu akidoun, ialolongi ngesi kainyo adol esaa lo a ariaba, na idounio ngesi ikoku, imuriakini ngesi ariaba keng, elakar ngesi kainyo edou ikoku apudu nikalapatan. Ikote ngakiro neni anikus, ialolongete esi tokona, nakaneni kaanyuni ayong esi nabo, sodi talakaros ngitai kus noi, alakara ngina, emam itwaan epedori alemar anikus. “Naenangea akolongit ngina, emam ibore kilipete esi ayong. Kalimokinit ngakiro na iteni dir atamar, kiinakini esi Apa ibore daang ni ilipete esi ilimito ekiro kang. Emam ibore ilipasi esi ilimito ekiro kang tanang tokona, kilipas nakaneni ianyunete sodi kitemokin alakara kus. “Kalimok tokona ayong esi ngakiro nugu a ngakisikwaanet, nakaneni edoli ngirwa lu nyikiruoror ayong ka esi a ngakisikwaanet, nakaneni kalimokini ayong esi ngakiro ka Apa na ileerete. Na enangea ngirwa ngulu, ilipete esi ngesi ilimito ekiro kang, nyalimuni ayong atamar elipi ayong ngesi ibore kotere esi. Kainyo Apa alope ngesi kimina esi. Kimina ngesi esi kainyo kiminasi esi ayong, nabo inupa esi atamar abuni ayong ani a Akuj. Abuni ayong ani ka Apa abu nakwap, nakaneni aisikini tokona ayong akwap atolot nika Apa.” Sodi tolimokis ngirukitos keng ngesi tamasi, “Abe iruoro bo tokona iyong ngakiro na ileerete, nyiruoro a ngakisikwaanet. Kiyeni tokona sua atamar iyeni iyong ngakiro daang. Emam tani ibore ejoikinitor itwaan kingisi iyong akiroit. Kitunup sua ibore ngini atamar ibunit iyong ani a Akuj.” Kingit Yesu tama, “Inupa esi tokona a? Abala ayong esi a! Enangi esaa, anang tani tokona esaa lo ialarotor esi, itwaan daang elosi nawi keng, kimiekis ayong bon, nakaneni nyedongi ayong bon kainyo kirukit ayong ka Apakang. Kalimok ayong esi nugu sodi kisileta ani irauneta esi ngipei ka ayong. Kiboliatar esi ngitunga a akwap. Nakaneni totitinyoketa! Epiu ayong ngakiro a akwap!” Na arumorea Yesu alimun ngakiro nguna, kingolia kidiama tolim tama, “Apa, adol esaa. Kipuruu iyong Lokookon dio kipuruu Lokookon iyong. Kainyo iinak iyong ngesi apolou na epolokinio ngitunga daang, sodi nak ngesi lu iinak iyong ngesi, akiyar na nyedaun. Akiyar na nyedaun ngesi kiyeneta ngitunga iyong Akuj na iteni na irai apei bon, nabo toyenuneta Yesu Kiristo lokolong imeuni iyong. Edodik ayong ngitunga apolou kon kanege anakwap, nabo arumo ayong etich lokiinakini iyong ayong akisub. Ee Apa! Kipuruunoe tokona ayong anikon. Kipuruunoe a ekipur alo kolong kirukitor ka iyong eringa akwap nyesubuna. “Keteyen iyong ngitunga lukolong kiinakini iyong ayong anakwap kana. Araakasi kesi ngikon sodi kiinak iyong ayong. Ewapakis kesi akiroit kon, nakaneni ayan tokona kesi atamar ibore daang nikiinakini iyong ayong ebunit anikon. Alimok ayong kesi ngakitatamet nakilimokini iyong ayong, nakaneni achamut kesi. Ayena kesi iteni dir atamar abuni ayong anikon, nabo anupa atamar kimeuni iyong ayong. “Elipakinit ayong kesi. Nyelipakinit ayong ngitunga a akwap, elipakinit lukiinakini iyong ayong, kainyo eraakasi kesi ngikon. Ngitunga daang lueraakasi ngikang, eraakasi ngikon, nabo daang lueraakasi ngikon, eraakasi ngikang, sodi kidodiun apolou kang anikech. Abunit tokona ayong nikon. Nyeringa tokona nabo ayong ayei nakwap, nakaneni eringa kesi eyakasi nakwap. Ee Apa Lo italeuno, tochoik iyong kesi lokojokon kotere agogongu a ekiro kon, ekiro lokolong kiinakini iyong ayong, kitiliwo kesi ngipei loger lokiraakar ngoni ngipei. Nakirukitor ka kesi, achoikinit ayong kesi a agogongu a ekiro kon, ekiro ngolo kiinakini iyong ayong. Achoik ayong kesi, emam tani ipei ni achakar, mati lokolong aseunio tachakar, sodi kiyookinotor ngagiran. Abunit tokona ayong nikon, alimunit ayong ngakiro nugu kanege anakwap sodi talakarotor kesi noi. Ainak ayong kesi akiroit kon, aremokinosi ngitunga a akwap kesi, kainyo meere kesi ngitunga a ngakwap. Nyekelipit iyong atamar tolema kesi anakwap, kelipit iyong atamar tochoik kesi Alokipe. Meere kesi ngika akwap, loger lo nyaraakar ayong dang itwaan a akwap. Kitaleu kesi anakiroit ana iteni, akiroit kon ngesi erai iteni. Aloger alo kolong kimeunea iyong ayong nakwap, amea ayong dang kesi nakwap. Etaleun ayong anikon kotere kesi, sodi kitaleunos kesi dang anakiro ana iteni. “Nyelipakinit ayong kesi make, elipakinit tani luenupete ngakiro kang kotere ngakitatamet a ngikanupak. Elipit ayong atamar taraut kesi ngipei. Ee, Apa! Loger lo iyakar iyong nikang, ayong dang ayei nikon, pena kesi dang niyok, sodi tonupa ngitunga a akwap atamar iyong kimeuni ayong. Ainakini ayong kesi ekipur lopei kiinakini iyong ayong, sodi taraut kesi ngipei loger lokiraakar ngoni ngipei. Amini ayong nikech, min iyong nikang, sodi toliworotor kesi ngipei jik, sodi toyenuneta ngitunga a akwap atamar iyong kimeuni ayong, nabo imina iyong kesi loger lokiminar ayong. “Ee Apa! Kiinak iyong kesi ayong, nakaneni asaki ayong eruko ka kesi ani amini ayong, sodi kingolikineta kesi ekipur kang lokiinakini iyong ayong, kainyo kimina iyong ayong tani kolong eringa akwap nyesubakina. Ee Apa lo eteniyete ngakiro! Nyikiyenete iyong ngitunga a akwap, nakaneni kayeni ayong iyong, nabo ayan ngitunga lugu atamar iyong kimeuni ayong. Ketaanyu ayong iyong kesi nakaneni arubakini akikwaanakin neni, sodi minio amina nakiminar iyong ayong nikech, nabo aminio ayong dang nikech.” Na alimunio Yesu ngakiro na elipitor nguna, torotokis ka ngirukitos keng totenikis ekipor lo enyaritae Kediron. Ayei neni amana, tolomasi Yesu ka ngirukitos tooma mana ngina. Ayeni Yuda lo arikokini Yesu ngitunga neni, kainyo aloseenete Yesu ka ngirukitos keng inaa jiik. Toloto Yuda ka ngasigerea a Ngiroma ta ngasigerea ngache naeyokiyete akai a Akuj, kirukosi mana. Ameunito kesi ngimurok luapolok ka Ngiparisayo. Atingito ngitunga ngulu ngiboro daang luejie ka ngataae ta ngakinwaket. Kona ayenea Yesu ngakiro daang na esubakinio anikeng, dio tachadun ngaren ani ayakasi luche kingit kesi tama, “Ngae isakete esi?” Tatachut tamasi, “Yesu lo a Nasaret, ngesi kisaki.” Tolim tama, “Ayong lo.” Awei Yuda lo arikokini Yesu ngitunga ka kesi aapei. Na alimokinea Yesu kesi tama, “Ayong lo,” kiyotosi kaku sodi tadakakinos kwap. Kingit Yesu kesi nabo tama, “Ngae isakete esi?” Tolimut tamasi, “Yesu lo a Nasaret ngesi kisaki.” Tolimok Yesu kesi tama, “Abe kalimok bo tete ayong esi atamar ayong lo. Ani kisakete esi ayong, kimiekisi luche lugu toloto.” ( Alimuni ngesi nugu sodi kiyookinotor ngakiro nasek alimuni ngesi ebala, “Apa, emam lukolong kiinakini iyong ayong luachaka tani ipei.”) Tout Simon Petero ekileng lo atingit kitel ekedalan epei a Emuron a Loapolon a akai a Akuj nakit na aloteten. Anyaritae ekedalan ngolo Malko. Tolimok Yesu Petero tama, “Kirepak ekileng kon nisek eyei! Itamit iyong atamar nyamasea ayong ekopo lo aboliaro lokainaki ayong Apakang loa?” Apot ngasigerea a Ngiroma ka ekapolon kech ta ngasigerea a Ngiyaudi kirumut Yesu toena, torikosi ngesi mono ekingaren nia Anas kainyo arai ngesi lokamuran a Kayapa alo arai Emuron Loapolon ekaru ngolo. Arai Kayapa losek etutuki Ngiyaudi atamar ejoikinit itwaan ipei etoani kotere ngitunga daang. Ewapito Simon Petero ka erukitos eche Yesu. Kona ayenea Emuron Loapolon a akai a Akuj erukitos loche ngolo, tolomasi ngesi ka Yesu tooma nalaar a akai a Emuron a Loapolon kangolo. Kidong Petero towo anikalapatan a ekidor. Sodi tobongo erukitos loche ngolo tani lokidor kisuruorik apese na eyoki ekidor dio arikor Petero tooma. Kingit apese na eyoki ekidor Petero tama, “Meere iyong epei a ngirukitos a Yesu a?” Tatachak Petero tama, “Mam, nyarai ayong.” Kona alilimuunitor akatorot, kinokakis ngikasubak etich ka ngasigerea akim. Eriamito kesi akim ipiarasi. Sodi tolot Petero dang towo kaneni kipier akim. Kingitana Emuron Loapolon a akai a Akuj Yesu ngakiro a ngirukitos keng ka ngakitatamet keng. Tatachak Yesu tama, “Kiruoro ayong ka itwaan daang ngakiro na ileerete, ngirwa daang etatami ayong anakais a Atuk ka akai a Akuj dang ni eriameenete Ngiyaudi daang. Emam akiroit alim ayong emunonit. Nyo tokona kingichingicha iyong ayong? Kingita ngitunga lungoon eirasi ngakiro kang atamar abala ayong ai. Eyenete kesi ngakiro na eruoro ayong.” Na alimunio Yesu nguna, abu asiger apei kibap ngesi tama, “Nyo isuruorea iyong Emuron Loapolon a Akuj kona?” Tatachak Yesu tama. “Ani kasechit ayong, tolimok iyong ngitunga ibore ni asechit ayong. Ani pekasechit ayong, nyo kibapea iyong ayong?” Sodi tama Anas torikosi ngesi eringa eenen nia Kayapa, Emuron Loapolon a akai a Akuj. Aringa Petero ewei kaina ipiara. Sodi kingita luche tamasi, “Meere iyong dang epei a ngirukitos a itwaan kangini a?” Topeg Petero tama, “Mam, nyarai ayong.” Tolim ekedalan epei a Emuron a Loapolon a akai a Akuj lo arai eyenet a itwaan ani eteli Petero akit tama, “Abe esibit bocha ketee ayong iyong alomana ka ngesi?” Tolim Petero nabo tama, “Mam”, sodi toruk ekokoroit atipei. Nataparach elilim, torikoroe Yesu alokai a Kayapa totenere kai naapolon a Ekapolon a Ngiroma aloochi enyaritae Pilato. Nyelomara ngikapolok a Ngiyaudi tooma kai ngina kainyo asakete kesi akitaleun tanyameta akimuj a esukukuu alo enyaritae Adeparet. Sodi topudo Pilato nikalapatan kingit kesi tama, “Anukiro ititakinitotor esi itwaan en?” Tatachakis tamasi, “Arai nyesubite ngesi naaronok, pekirikunit ngesi nikon.” Tolimok Pilato kesi tama, “Kasiosi robo esi torikosi ngesi kititata loger a etal kus.” Tatachakis Ngiyaudi tamasi, “Nyikichamakinitae sua kititae itwaan ataara.” ( Asubakinosi nguna sodi kiyookinotor ngakiro na alimuni Yesu idodiunit atamar akitu ikoni ai, etoani ngesi.) Tobongo Pilato tooma kai naapolon tanyara Yesu kingit ngesi tama, “Iyong ngesi irai ekapolon a Ngiyaudi a?” Tatachak Yesu kingit tama, “Eraakasi ngakiro nakingisit iyong ayong nugu ngakiro kon a ilope, kori ngitunga ngiche kilimokinete iyong ngakiro kang?” Tatachak Pilato kingit tama, “Esibit iyong arai ayong Eyaudit a? Eraakasi ngitunga kon ka Ngiyaudi ta Ngimurok Luapolok a akai a Akuj kesi kirikunete iyong nikang. Nyo isubit iyong?” Tolim Yesu tama, “Nyerai apolou kang aka akwap kana. Arai tarai apolou kang aka akwap kana, kejito ngirukitos kang kotere ayong, nakaneni pekerumunito ayong Ngiyaudi. Nyerai apolou kang dir aka akwap kana!” Sodi kingit Pilato Yesu tama, “Ikwa irai iyong ekapolon a?” Tatachak Yesu tama, “Ilimu iyong atamar arai ayong ekapolon. Abuni kolong ayong kedoun anakwap kana kotere ibore ipei, atamar eruor ngakiro na iteni. Itwaan cha daang ni emina ngakiro na iteni, epupi ngakiro kang.” Kingit Pilato tama, “Nyo erai iteni?” Ani kelimu nguna kerumor, tobongo Pilato nia Ngiyaudi tolimok tama, “Emam akisech tani edit na aripu ayong anitwaan kaen na etita ngesi. Nakaneni echamakina alotal kus alachanakini ayong jiik ngirwa lu a Esukukuu a Adeparet itwaan ipei ni eenitae. Isakete esi atalachak ekapolon a Ngiyaudi a?” Tachalut kesi tamasi, “Mam, meere ngesi, kisaki talachak Baraba!” (Arai Baraba erukoot.) Sodi Pilato atamar torikoroe Yesu kidetae a amunyororo. Kidanyakis ngasigerea apukot na a ngiikwa, tobutokis nakou keng, kitanapa ngesi eworu lokooyen lopus-kirion. Sodi pot nikeng kimalata tamasi, “Ekapolon a Ngiyaudi toyei!” Sodi toloto kibapanasi ngesi. Topudo Pilato nikalapatan nabo tolimok asepich a ngitunga tama, “Abala ayong esi a! Arikuni ayong itwaan en nikus, kedodik esi atamar emam akiroit naaronon na aanyu ayong anikeng.” Sodi topud Yesu nikalapatan enapit apukot a ngiikwa, ta eworu lokooyen lopus-kirion. Tolimok Pilato kesi tama, “Kingolikisi a! Itwaan ngesi en!” Na engolikineta Ngimurok Luapolok ka ngasigerea a akai a Akuj ngesi, tachalut tamasi, “Taramakisi ngesi napir! Taramakisi ngesi napir!” Tolimok Pilato kesi tama, “Torikosi robo esi taramakis napir, emam robo ayong akiroit naaronon erira ngesi.” Tatachut Ngiyaudi tamasi, “Eyei sua etal lo igiritae atamar ejoikinit ngesi etoani kainyo abala ngesi arai Lokookeng a Akuj.” Na eirarea Pilato kesi elimunete akiroit ngina, tobul ngesi noi. Toloma Pilato nabo tooma akai naapolon kingit ngesi Yesu tama, “Aliwae ibunitor iyong?” Nakaneni kililing Yesu. Tolimok Pilato ngesi tama, “Iwounit iyong ekiruor ka ayong a? Nyiyeni iyong atamar eyei ayong agogongu nakalachakinea iyong kori nakaramakinea iyong napir a?” Tatachak Yesu tama, “Emam iyong agogongu tani nadiochichi anikang, pearai nakiinakini iyong Akuj, nakaneni itwaan nikarikokini ayong iyong ngesi esechit noi.” Na eirarea Pilato ngakiro nguna, tasak lokojokon alachakin Yesu, nakaneni apot Ngiyaudi tachalakis tamasi, “Ani kilachak iyong ngesi, meere iyong lopae keng a ekapolon a Ngiroma! Itwaan daang ni ebala abe arai ngesi ekapolon, erai ngesi emoit a ekapolon a Ngiroma!” Na eirarea Pilato nguna, abu toriko Yesu nikalapatan, kiboikin ngesi lokicholong lotubet ekies ani enyaritae “Amoru etokokino,” (kori a ngabukui a Ngieburaniae anyaritae “Gabasa.”) Arai naparan lotingilan a akolongit ana ingareni esukukuu lo a Adeparet. Tolimok Pilato Ngiyaudi tama, “Kingolikis a! Ekapolon kus lo!” Tachalut tamasi, “Taara! Taara kare! Taramakisi napir!” Kingit Pilato kesi tama, “Isakete esi ayong ataramak ekapolon kus napir a?” Tatachakis Ngimurok Luapolok a akai a Akuj tamasi, “Ekapolon a Ngiroma bon ngesi erai ekapolon kosi!” Sodi torikok Pilato Ngiyaudi Yesu esaki taramakis napir. Sodi torikosi kesi Yesu. Topudo ngesi eriongit apir keng tanang ni enyaritae, “Akulului a Akou.” (Enyaritae a ngabukui a Ngieburaniae “Gologota.”) Taramakis ngesi ka ngitunga ngiche ngiarei neni, ipei lokwaas epei, ipei nabo lokwaas loche, Yesu kiding. Kigir Pilato ngakiro na ikote nege dio atamar taramakinae napir, “Yesu lo a Nasaret, ekapolon a Ngiyaudi.” Nakaneni apot Ngiyaudi lukaalak kisomata ngakiro nguna, kainyo aapi ni aramakinitae Yesu alore. Egiritae ngakiro nguna a ngabukui a Ngieburaniae ka Ngiroma ta Ngigirik. Tolimokis Ngimurok Luapolok a akai a Akuj Pilato tamasi, “Nyiigir atamar, ‘Ekapolon a Ngiyaudi, kigir atamar ngesi lo abala arai ekapolon a Ngiyaudi.’ ” Tatachak Pilato tama, “Egir ayong nguna loger lo egir.” Na arumoreta ngasigerea aramakin Yesu napir, tolemut ngiworui keng totiaka ngatiaket ngoomwon, tolema asiger apei atiaket apei. Tolemut tani eworu keng lokooyen lo ebutubutaara napei alokidiama tanang kwap, amam atorosit na elachanarere. Tolimokinos ngasigerea tamasi, “Nyikichilichil, elekisi ngisigira ataanyutu kerauni eka ngae.” Asubete kongina sodi kiyookinotor ngagiran nakolong egirio atamar, “Atiakete ngiworui kang, kileeto eworu kang ngisigira.” Ngakiro napei nguna kesi asubete ngasigerea. Itiokeng a Yesu ka nakaatokeng a itiokeng a Yesu, ka Mariam aberu a Kilopa ta Mariam Magadalene kesi awaasi alo diyete apir a Yesu. Kingolik Yesu itiokeng ka erukitos lo amina ngesi ewaasi kaneni. Tolimok ngesi itiokeng tama, “Akimat, kingolik a, lokookon lo.” Ani erumor, tolimok Yesu erukitos ngolo tama, “Kingolik a, itiokon naga.” Napei ngina jik, toriko erukitos ngolo akimat ngina nawi keng. Ayeni Yesu atamar arumor tokona ngakiro daang. Kona asakea ngesi kiyookinos ngakiro nakolong egirio, tolim ngesi tama, “Kanyam akure.” Ayei atubwa neni na eleleba emuna lo epuritoe loadwaran, sodi kirepakis ibore niyebuk tooma emuna loadwaran ngolo, nabo todupakis ibore ngini ngaren akitoe a isopo,*g** kikekis ngesi kiwaakis lopon keng. Ani emasi Yesu emuna loadwaran ngolo, tolim ngesi tama, “Arumor.” Sodi kijuuru totoan. Sodi tolimokis ngikapolok a Ngiyaudi Pilato atamar tobilae ngakejen a ngitunga alu aramakinitae napirio sodi totiyaunere kesi anapirio. Asakete kesi tosubae kongina kainyo arai akolongit ngina Ijumaa, nakaneni peachamito kesi ngawat epete napirio akolongit na enyaritae Sabato. Arai sabato ngina na Esukukuu alo a Adeparet. Sodi torotokis ngasigerea tobila ngakejen a itwaan ani a ekingaren ka loche, lu aramakinitae ka Yesu napirio. Na anangeta nia Yesu, toriamut ketoana, nyebila kesi ngakejen keng. Nakaneni kichum ngesi asiger apei losiep, tobukun ngaakot ka ngakipi atipei. ( Eruor lo aanyuni ngakiro nguna esubakinosi, sodi tonupeta esi ngakiro keng. Eraakasi ngakiro na alimuni ngesi ngaka iteni, nabo eyeni ngesi atamar iruoro ngakiro na iteni.) Asubasi nugu sodi kiyookinotor ngakiro na igiritae kona, “Emam akoit keng ngina ebilio.” Nabo igiritae ngagiran ngache kona, “Ingolikinete ngitunga ngesi lokolong echumete.” Ani erumor ngakiro nguna, tolot Yosep lo arai itwaan a akwap ka Arimatea nia Pilato atamar asaki akwaan a Yesu. (Arai Yosep a Yesu nakaneni peayenete ngitunga kainyo aemit ngesi ngikapolok a Ngiyaudi.) Tolimok Pilato ngesi atamar tolema akwaan a Yesu, sodi tolot ngesi tolema. Kirukosi Nikodemo ka Yosep, Nikodemo ngolo ngesi lokolong abunit nia Yesu nakwaare. Atingit ngesi ngakiloi esibit ngatomwon-uni a echuchuka ka ekinyaate lokaakunyon emorikina wapei. Tolemasi kesi akwaan a Yesu, toena a ngawarui, nabo kiwaakis ekitoe lokakukunyon ngolo tooma ngawarui keng, kainyo arai etal a Ngiyaudi akisub kongina na esaketa akinuk itwaan. Ayei amana ni aramakinitae Yesu. Tooma amana ngina ayei aliel nakitetet na aringa itwaan nyenukakina a ache. Tonukakis Yesu neni kainyo arai akolongit ngina na ingareni Sabato, tarai nabo dang aapi aliel ngina alo diyete kaneni. Jumapili nataparach elilim eringa eribokinit, kiswakak Mariam Magadalene. Tanang naliel kingolik amoru naapolon kelemar anakituk a aliel. Tamatar ngesi tanang nia Simon Petero ka erukitos loche, erukitos lo amina Yesu. Tolimok ngesi kesi tama, “Kelemar akwaan a Ekapolon analiel, nyikiyeni nikiwaakin!” Torotok Petero ka erukitos loche ngolo kiwapakis erot toloto naliel. Kipiirioto daang kwasiarei, nakaneni kipiiri erukitos loche ngolo lokojokon kilany Petero, kingarenik kisiau naliel. Tokudokin ngesi toripak, kingolik ngawarui eperete, nakaneni nyelomara ngesi tooma. Todolu Simon Petero lo ewapit ngesi, tolot toloma tooma naliel kingolik ngawarui eperete, nakaneni peaperi awaru nasek elogakinitae nakou a Yesu ka ngawarui nache. Ayei nikeng bon achadakina, nabo tobilakina. Sodi toloma erukitos loche dang losek esiauni naliel kingolik, tonup dir. ( Nakaneni aringa kesi nyeyana ngagiran na egiritae atamar ejoikinit eyaruni.) Sodi torotokis ngirukitos ngulu toloto nawiyei kech. Nakaneni awei Mariam anikalapatan a aliel igoro. Ani na egoror, tokudokin toripak tooma aliel. Sodi kingolik ngimalaikae ngiarei lu anapito ngiworui luakwaak ibooyete. Ebooyi epei alowae alo a akou, kibooye loche alowae alo a ngakejen, anisek anukakinitae akwaan a Yesu. Kingita kesi ngesi tamasi, “Akimat, nyo igoror iyong?” Tatachu tama, “Abe kelemar bo akwaan a Ekapolon kang, nakaneni nyayeni ayong nikiwaakin!” Na alimunio ngesi nguna, torei kingolia kaku, kingolik Yesu ewei kaneni, peayeni ngesi atamar Yesu ngesi ngolo. Kingit Yesu ngesi tama, “Akimat, nyo igoror iyong? Ngae isaki iyong?” Abala Mariam kori erai itwaan ngini eketeon a amana, tolimok tama, “Lokaapaan lo, ani kerai iyong ilemarit ngesi, tolimokinae ni iwaakinit sodi atolot ayong atolema ngesi.” Tanyara Yesu tama, “Mariam!” Torei ngesi tolim a ngabukui a Ngieburaniae tama, “Raboni!” (Eger keng atamar, “Eketataman.”) Tolimok Yesu ngesi tama, “Nyikiting, kainyo eringa ayong nyebongo nika Apakang. Nakaneni tolot lokaitotoi kang, tolimok kesi atamar alosi ayong nawi ka Apakang, kangolo erai Apa kus, Akuj kang, nabo tarai Akuj kus.” Tolot Mariam Magadalene tolimok ngirukitos a Yesu atamar engolik ngesi Ekapolon. Sodi tolimok Mariam kesi ngakiro na alimokini Yesu ngesi. Atabong a Jumapili, eriamiriamito ngirukitos a Yesu tooma kai, egolito ngidorin daang ani aemitotor kesi ngikapolok a Ngiyaudi. Bu Yesu towo alokiding kech, tolimok tama, “Ekisil min nikus.” Ani erumori alimun ngakiro nguna, kidodik kesi ngakan keng ka esiep keng. Talakaros ngirukitos a Yesu noi na engolikineta Ekapolon. Tolimok Yesu kesi nabo tama, “Ekisil min nikus. Kona kolong kameunea ayong Apakang, kameari ayong dang esi.” Na alimunio ngesi nguna, dio kiangak kidiama kech, tolimok tama, “Taanyutu Etau a Akuj. Ngitunga daang lu irimakinete esi ngasechesea kech, erimakinio, ngulu daang nyirimakinete esi ngasechesea kech, nyerimakinio.” Pearukito Tomas (lo enyaritae Emuut) lo arai epei a ngirukitos alutomon ka ngiarei a Yesu ka luche na abunio Yesu. Sodi tolimokis ngirukitos luche Tomas tamasi, “Kianyunga sua Ekapolon!” Tolimok Tomas kesi tama, “Ani pekaanyunga ngaporos a ngisumarea anakan keng, sodi atatap neni a ekimoin kang, nyanupi ayong.” Adaunet a ngirwa a ngikan-kauni, ayakasi nabo ngirukitos keng tooma kai arukito ka Tomas dang. Bu Yesu egolol ekidor towo alokiding kech, tolimok tama, “Ekisil min nikus.” Sodi tolimok Yesu Tomas tama, “Kiwaak ekimoin kon nege tatap ngakan kang, sodi kitorwaa tani akan kon tatap esiep kang. Nyiiliwor itwaan nikangayan, toliwor nikanupan!” Tolim Tomas tama, “Ekapolon kang! Akuj kang!” Tolimok Yesu Tomas tama, “Inup tokona iyong ani kingolikinea ayong a? Epiaritae noi lu enupete ngakiro kang eringa nyingolikina ayong!” Asubi Yesu ngakitoodikinet nakailiilok ngache nakaalak alongaren ngirukitos keng, nyigiritae ngakiro nguna nakitab naga. Nakaneni igiritae nugu tonupeta esi atamar Yesu erai Kiristo Lokookeng a Akuj, sodi ani kinupa esi ngakiro keng, taanyut akiyar anikeng. Ani erumor nguna, kidodiun Yesu nabo alorukitos keng na ayakatar nanam na enyaritae Tiberia. Ekokini ngesi idodiun nege. Ayakasi ngitunga lugu wapei, Simon Petero ka Tomas (lo anyaritae Emuut,) Nasaniel (lo arai itwaan a akwap a Kana ana eyei Galilaya,) ka talokookeng a Sebedayo, ta ngirukitos ngiche ngiarei nabo. Tolimok Simon Petero luche tama, “Alosi ayong akichiem.” Tolimut luche tamasi, “Kirukori tani sua dang ka iyong.” Toloto kesi akichiem edokito atubwa. Nakwaare kiiya, emam ibore erumut kesi. Ani nataparach ipiripiruuni akolong, bu Yesu towo alokwaas a ngakipi. Nakaneni nyeyana ngirukitos keng atamar ngesi ngolo. Sodi kingit Yesu kesi tama, “Ngikiliok! Eyei ibore idio irumut esi a?” Tatachut tamasi, “Emam jik.” Tolimok Yesu kesi tama, “Tachakakisi epuute kus lowae lo a aloteten a atubwa, irumunete esi ngikolia.” Tachakakis epuute kech neni sodi kirumut ngikolia lukaalak noi, kipiyo tani akirikin tooma natubwa. Tolimok erukitos lo amina Yesu Petero tama, “Erai ngesi Ekapolon!” Na eirarea Petero atamar erai ngesi Ekapolon, kilogakin eworu keng lodapal, (kainyo amam ibore anapit ngesi ekingaren) dio toloma nakipi. Pot ngirukitos luche tanangut lokwaas a atubwa, irito epuute lo eleleba ngikolia, kainyo aapiyete kesi alokwaas a ngakipi araakasi ngamitae amiat apei. Na ananguneta nikalapatan, kingolikis ngatotol na anokete, eya ngikolia kidiama kech ka ngamugati dang. Tolimok Yesu kesi tama, “Yautu epewae a ngikolia alu tokona irumunete esi.” Todoka Simon Petero natubwa, kiriu epuute lo eleleba ngikolia luapolok luaraakasi amiat apei ka ngitomwon-kan ka nguuni. Tani na alalaketa kongina, nyechila epuute ngolo jik. Tolimok Yesu kesi tama, “Potu kimuja.” Emam tani epei a ngirukitos keng lo asak akingit ngesi tama, “Ngae iyong?” Kainyo ayenete kesi atamar erai ngesi Ekapolon. Sodi tolot Yesu tolem ngamugati, nak kesi, dio nabo nak ngikolia dang kongina. Arai atakanuunet a Yesu na a ngauni alorukitos keng ngina, ekisidi a ayarunet keng. Na erikareta kesi akimuj, kingit Yesu Simon Petero tama, “Simon Lokookeng a Yoana, kimina iyong ayong noi idwangit lugu a?” Tatachak tama, “Ee, Ekapolon, iyeni iyong atamar kamina ayong iyong.” Tolimok Yesu ngesi tama, “Kitan ngimesekin kang.” Kingit na a ngaarei tama, “Simon Lokookeng a Yoana, kimina iyong ayong a?” Tatachak tama, “Ee, Ekapolon, iyeni iyong atamar kamina ayong iyong.” Tolimok Yesu ngesi tama, “Tochoik ngamesekin kang.” Kingit Yesu nabo na a ngauni tama, “Simon lokookeng a Yoana, kimina iyong ayong a?” Kialolong Petero ani engisea Yesu ngesi na a ngauni ebala, “Kimina iyong ayong a?” Sodi tolimok ngesi Yesu tama, “Ekapolon, iyeni iyong ngakiro daang, nabo iyeni iyong atamar kamina ayong iyong!” Tolimok Yesu ngesi tama, “Kiyok ngamesekin kang. Kalimokinit ngakiro na iteni dir atamar, kolong eringa iyong isorokona, isubanakin iyong tonyou tolot ni isaki alosit. Na imojongea iyong, ikeari iyong ngakan, bu itwaan niche kitoenik iyong ngiworui sodi kitoriko ni nyisakit iyong alosit.” ( Alimuni Yesu nguna erai eger a akitu ana etoani Petero yaunea ekipur nia Akuj.) Ani erumor, tolimok Yesu ngesi tama, “Kiwapakinae!” Torei Petero kingolik erukitos loche iwapit kesi, erukitos ngolo ngesi lo amina Yesu, lo erudakina nia Yesu na emujeta akimuj naka ebong, kingit tama, “Ekapolon, ngae kirikokini iyong ngitunga?” Na engolikinea Petero erukitos ngolo, kingit Yesu tama, “Ekapolon, ani bo logo, ikokini ai?” Tatachak Yesu ngesi tama, “Ani kasaki ayong ngesi toyar tanang ayong abuni, nyo kon nguna? Kiwapakinae iyong ayong!” Tokeikin akiroit ngina lorukitos a Yesu daang atamar nyetoani erukitos ngolo. Nakaneni pealimunit Yesu atamar nyetoani ngesi, arai abala, “Ani kasaki ayong ngesi toyar tanang na abunio ayong, nyo kon nguna?” Erukitos a Yesu ngolo ngesi eruoro ngakiro nugu sodi kigir dang. Kiyeni atamar eraakasi ngakiro na alimuni ngesi ngaka iteni. Eyakasi ngitichisio lukaalak lu asubi Yesu. Arai kigirae daang angapei-pei, kelalaketa ngakitabea pekitemokin tani akwap daang. Kegirakinit iyong Teopilo. Anakitab kang ana a ekingaren, egiri ayong ngitichisio daang lu asubi Yesu ka ngakiro na etatami ngesi na esiakinea etich keng tanang akolongit na ayaarere kidiama nadis. Ani eringa ngesi nyeyaara nadis, kichikichik ngesi ngitunga lu aseuni ngesi toliworos ngimeanara keng, a agogongu a Etau a Akuj. A ngirwa a ngitomwon-omwon ekisidi a akitu keng, kidodiun ngesi anikech ngakidodiunet ngakaalak, sodi toyana daang dir atamar eyari ngesi. Taanyungasi kesi ngesi nabo kiyana ka kesi ngakiro a Apolou a Akuj. Ani na achunakinotor kesi wapei, todungok ngesi ngakiro na abala, “Nyiirotokis alo Yerusalem, nakaneni kidarutu ainakinet nakalimok ayong esi, ainakinet nakichikak esi Apa. Kibatisae Yoana esi a ngakipi, nakaneni ani adaunet a ngirwa a ngidikidio, kibatisao esi a Etau a Akuj.” Na eriameta ngimeanara aapei ka Yesu, kingita ngesi tamasi, “Ekapolon, inyiakakini iyong tokona Ngisirael Apolou kech a?” Tolimok Yesu kesi tama, “Apakang ngesi erekinit ngisaae ka ngirwa a apolou keng, nyerai esi echamit iyenete atamar ori esubakinotor. Nakaneni na ebunio Etau a Akuj nikus, kilelebun esi agogongu. Iliworosi ngikaanyunak kang lu iruorosi ngakiro kang alo Yerusalem ka Yudea ka Samaria ta ngiwaitin daang a akwap.” Alimunet nguna, yaarae ngesi kidiama nadis ekienyikinito kesi. Sodi edou kimuk ngesi tongopia. Ani eringa kesi ekienyiyarito kidiama na alosio ngesi, towaa ngitunga ngiarei atipei alo diyete kech enapito ngiworui luakwaak. Sodi tamasi, “Ngitunga a Galilaya, nyo iwaatar esi kaneni ikienyiyaritotor kidiama? Yesu lo ayaar nadis anikus lo, ebonguni loger lopei ianyungareta esi ngesi elosi nadis.” Tobongosi kesi Yerusalem na aponeta alo Moru a ngikito a akimiet alo arai akilomitait apei alore. Na ananguneta kesi lore, sodi todokasi kai na alokidiama na apereenete kesi. Araakasi kesi Petero ka Yoana ka Yakobo ka Andirea ka Pilip ka Tomas ka Bartolomayo ka Matayo ka Yakobo lokookeng a Alipayo ka Simon lo a atiakaru a Salote ta Yuda lokookeng a Yakobo. Achunanakinosi kesi ilipito aapei ka ngaberu ngache ka Mariam itiokeng a Yesu ka ngikaitotoi keng. Adaunet a ngirwa a ngidikidio, eriamito ngikanupak lu asibit amiat apei ka ngitomwon-arei. Sodi tonyou Petero tolim tama, “Ngikaitotoi kang, ajoikinit ngagiran iyookinosi loger lokolong adwarea Etau a Akuj ani a Daudi ngakiro a Yuda alo arikokini Yesu ngitunga lu erumunete. Arai Yuda erukitos yok kainyo aseunitae atosuba ka ngoni etich.” ( Togiel ngesi amana a ngaropiyae ana aanyuni alotich keng a loaronon, totoan ngesi alomana kangina tobulor akook keng, topudut ngiboro a akook keng daang nikalapatan. Kiirasi ngitunga daang lu alomito Yerusalem ngakiro nguna, dio tanyarata amana ngina, “Akel Dama,” na erai eger keng atamar, “Amana na a ngaakot.”) “Kona igiritere nakitab a Ngieosio, ‘Ibooyi akai keng kongin, nyeelom itwaan neni.’ Igiritae nabo wache kona, ‘Kilunyokin itwaan iche tosub etich keng.’ “Tokona bocha, ejoikinit itwaan ngini erai ipei a ngitunga alu kolong kirukit ka ngoni ngirwa daang lukolong kirukitor ngoni ka Ekapolon Yesu, napei kolong ebatisaa Yoana ngitunga, tanang akolongit na alemarere Yesu aniyok yaarae nadis. Ipei a ngitunga kangulu ngesi ejoikinit eliwor ni kianyuni ka ngoni atamar eteyarunio Yesu.” Sodi tolimunoe ngitunga ngiarei, Yosep lo anyaritae Barisaba (lo arai ekiro eche Yusito) ka Matia. Sodi kilipa kesi tamasi, “Ekapolon, iyeni iyong etau a itwaan kadaang, kidodikinae tokona sua alotunga aluarei kalu ni iseu iyong akisub etich erai emeanara sodi kilunyokin lotich lo aisikini Yuda torei tolot ni asaki ngesi.” Tarama kesi ekura esakete aseun itwaan ipei. Toseunae Matia kimorikin ka ngimeanara lutomon ka epei. Na anangea akolongit na Pentekost, achunakina ngikanupak daang wapei. Sodi kiirasi atipei ibore eruuno anadis ni ekoni ekuse a ekuwam a loapolon, sodi tokeikin wadaang a akai ana ebooyoto kesi. Taanyungasi kesi ngiborei lu ekote ngasarae a akim epetarosi pena nakies a ngitunga kadaang. Kilelebun kesi daang Etau a Akuj tolomakis ekiruor a ngabukui a ngagelagelae loger lo edodikinitor kesi Etau a Akuj. Ayakasi Ngiyaudi lu alomito Yerusalem lu erichakinito akilipit Akuj, aponito kesi alobukui kadaang anakwap. Na eirareta kesi echale ngolo, tochunun asepich a ngitunga. Talakaros kesi daang noi kainyo apupi ipei kech ngikanupak iruorosi ngabukui a akwap kech. Tatalasi kesi ngakiro nguna noi kipurokis tamasi, “Eraakasi ngitunga lu iruorosi kona lu ngika Galilaya, kori ai? Nyo tokona kipupio ngoni kesi iruorosi a ngabukui a akwap yok? Kiponit sua ngiche alo Pariti ka Medi ka Elam, ka Mesopotamia ka Yudea ka Kapadokia, ka Ponto ka Asia, ka Pirugia ka Pamupulia ka Misiri ta ngiwaitin a Libia lu eya diyete Kurene. Kirai sua ngiche ngipeyok lu kiponit alo Roma, lu kirai Ngiyaudi ka ngibukui lu nyerai Ngiyaudi lu areunosi akilip Akuj a Ngiyaudi. Kiponit sua ngiche alo Kirete ka Arabia, kipupi sua daang kesi iruorosi a ngabukui kosi ngakiro natenoyek a Akuj!” Tolomakis kesi akingitanar make etalarito ngakiro nguna kibilerite tamasi, “Nyo eger a ngakiro kanu?” Nakaneni tokienatar ngiche tamasi, “Ilewat ngitunga lugu emuna lokitetet!” Sodi towaa Petero ka luche lutomon ka epei tolomak akitatam ngitunga irema ebala, “Ngikaitotoi, Ngiyaudi ka esi daang lu ilomito nege Yerusalem, topupokisi ngakiro kang lokojokon. Nyilewat ngitunga lu loger lo itamitotor esi kainyo erai tokona ngisaae nguuni a ataparach. Nakaneni ngakiro nu kesi nakolong eruoro ekadwaran a Akuj Yoel ebala, ‘Ebala Akuj, ngirwa lu esal, abukokini ayong itwaan daang Etau kang. Ngide kus, lusapa ka lupesur, edwarete. Eanyungarete ngisorok kus ngakisingolikinet a Akuj, Irujaate ngikasukou kus. Ee robo, tani ngikasubak etich kang, lukiliok ka luberu, abukokini ayong Etau kang ngirwa ngulu, sodi todwara. Asubi ayong ngakitoodikinet nakailiilok alokidiama nadis ka ngakitoodikinet nakatalarak kane alokwap, epete ngaakot ka akim ta apuru na eenikina. Isirionio akolong chuch, erenger elap puu kikok ngaakot, eringa akolongit naketubulon a Ekapolon nyenanga. Sodi ani itwaan daang ni ilipi enyarit ekiro a Ekapolon Akuj, eyuunio.’ “Topupokisi mono esi ngakiro nu ngikiliok a Isirael! Yesu lo a Nasaret arai itwaan ni eleere apolou a Akuj anikeng dir ani asubea Akuj ngakitoodikinet nakailiilok ka nakatalarak anikeng. Iyenete esi ngikulepek nguna kainyo asubasi alokiding kus. Iwapap ka eger lo ereat Akuj, atiakunit Akuj alope atamar kirikokinio esi Yesu. Sodi taara esi ngesi ani imiekineta ngitunga lu asechak eramakinete napir. Nakaneni kiteyaru Akuj ngesi talachak anagogongu a akitu kainyo peapedori akitu akien ngesi. Kainyo alimuni Daudi ngakiro keng tama, ‘Etee ayong Ekapolon alongaren kang ngirwa daang, eyei ngesi nakan kang na aloteten, kegangit ayong nyariangakin. Kotere nguna, talakar etau kang, sodi nabo emaritete a alakara, ebooyi ayong eya na egieno, kainyo nyikimiekini iyong ayong ani eya ngikatoak, kori nyichamakini iyong ekasuban etich kon lo emunoi ebosi analiel. Kidodik iyong ayong ngirotin lu enangere nakiyar, atalakar ayong noi ani kirukitor ka iyong.’ “Ngikaitotoi kang, asaki ayong kesisak esi ngakiro ka apaayok ekapolon Daudi, ngakiro na ileerete dir. Atoani ngesi tonukae nabo eyei aliel keng ni kiya ngoni ne tanang akolongit na. Nakaneni kona araakar Daudi ekadwaran a Akuj, ayeni atamar ekongi sek Akuj atamar etiliwori epei a ngalesea keng ekapolon, kilunyokin nados keng. Toyen Daudi ngakiro na edikino esubasi monan, sodi kiruor ngakiro a akiteyaruno a Kiristo na abalar, ‘Peemiekinio ngesi ani eya ngikatoak, nyebosa akwaan keng analiel.’ Eteyaru Akuj Yesu lopei ngolo, nakaneni kirai sua daang ngikaanyunak ana asubasi. Kikearae ngesi tanang nakan na aloteten a Akuj, Apa keng, taanyu anikeng Etau a Akuj loger lo echikakinitere. Erai tokona ibore ni iteete esi topupete Etau keng lo abuku Akuj. Kainyo meere kolong Daudi alosi kidiama nadis, pearai ngesi alimuni tama, ‘Ekapolon ngesi alimokini Ekapolon kang tama, kiboikin ne teten kang tanang na ewaakinea ayong ngimoe kon kwap nakejen kon toreu iyong.’ “Ejoikinit tokona Ngisirael daang eyenete dir atamar Yesu lo iramakinete esi napir ngolo ngesi etiliwo Akuj, Ekapolon ka Kiristo!” Na eirareta ngitunga ngakiro nguna, tonoma ngakiro ngitai sodi kingita Petero ka ngimeanara luche tamasi, “Kikokini tokona sua ai, ngikaitotoi?” Tolimok Petero kesi tama, “Ejoikinit ipei kus daang elungi ngasechesea keng sodi kibatisae a ekiro a Yesu Kiristo sodi kitorimakin ngasechesea kus, sodi taanyuneta esi ainakinet a Akuj, ngesi Etau a Akuj. Kainyo arai kolong akichikakinet ngina akus, ka ngide kus, ka daang lu eloka, ta daang lu enyarauni Ekapolon Akuj yok nikeng.” Kisuruor Petero kesi ngakiro nakaalak kichikichik tama, “Toyuunos aloriras alo eanyunete ngitunga luaronok a ngirwa kalu!” Tonupa ngikaalak ngakiro keng kibatisae akolongit ngina. Kiatakin ngitunga esibit ngabunge ngauni lokanupak akolongit ngina. Torubakis kesi daang epupete ngakitatamet a ngimeanara ka aponenere lokiriam a ngikanupak ka anyameenen akimuj a ngikanupak ta akilipeenen. Asubasi ngakitoodikinet nakailiilok ta nakatalarak nakaalak ani a ngimeanara sodi tobul itwaan daang. Torubakis ngikanupak eraakasi ngipei, ekorete ngiboro kech daang. Togielanasi kesi ngibaren ka ngiboro kech, totiakanakinae ipei kech daang ngaropiyae, etiae lo iitanit ngesi. Ngirwa daang eriameenete kesi kai a Akuj, nabo emujeenete kesi aapei anawiyei kech. Emujete kesi elakara noi nabo peamonitotor ngamuja kech, epuruunito kesi Akuj, nabo tominakinito ngitunga daang. Ani akolongit daang, kiatanak Ekapolon natiakaru kech ngulu ayuununio. Akolongit apei, toloto Petero ka Yoana kai a Akuj ngisaae ngikan-koomwon na erai ngesi elipenere. Ayei itwaan ni angwalit napei kolong edounere lokidor lo anyaritae Ekidor Lokebusean. Akolongit daang ayaanario ngesi lokidor ngolo akilipanar ngaropiyae alotunga alu alomanarete kai a Akuj. Na engolikinea ngesi Petero ka Yoana ekoto alomar, kilip kesi ibore idio. Tokienyikis kesi ngesi dio tama Petero, “Tokienyikinae sua!” Sodi tokienyik ngesi kesi, ebala kori eyei ibore idio einakinete kesi ngesi. Nakaneni tolimok Petero ngesi tama, “Emam ayong ngaropiyae atingit, nakaneni kainakini ayong iyong ibore ni atingit, alokiro a Yesu Kiristo alo a akwap a Nasaret, kadungokinit ayong iyong atamar tonyou torotok!” Sodi toting ngesi akan keng na aloteten kitonyou kitowo. Togogongioto ngakejen keng ka ngitobolae atipei, topor ngesi towo dio tolomak alosit. Sodi tolomasi ngesi ka kesi kai a Akuj elosi, toporoporoe ka akipuruunit Akuj. Kingolikis ngitunga ngesi kaneni elosi kipuruunite Akuj, ani na ayeneta ngesi atamar erai itwaan ni palem iboyeene Alokidor Alokebusian ilipanar, toriangakinos kesi daang tatalasi nakesubakinosi anikeng. Ani eringa itwaan ngini erukito ka Yoana ka Petero ani anyaritae ngagulei a Solomon, tatalasi ngitunga daang ngakiro nguna tomotunos ni aya kesi. Na engolikinea Petero ngitunga, tolimok kesi tama, “Ngisirael, nyo kitalaritor esi akiroit na? Nyo kikienyikinitotor esi sua kwa ibore esibit erai agogongu kosi, kori ni kirichakinitor sua ngikulepek etal a Akuj ngesi kitonyounio sua itwaan en torotok! Erai Akuj na Aburaam ka Isaka ka Yakobo ka Akuj kata apaayok ngesi ainaki Ekasuban etich keng Yesu apolou a Akuj. Nakaneni irikokinete esi ngesi ngikapolok a akwap nabo tongero alongaren Pilato tani na atiakunea Pilato atamar ajoikinit elachakinio. Ipot esi tongero lo italeuno, kimaimaa Pilato ibaasi talachak ekaaran ngitunga. Taara esi lokitanangi nakiyar, sodi kiteyaru Akuj ngesi, kirai sua ngikaanyunak kanguna. Erai agogongu a ekiro keng ngesi aanyunea itwaan niangwalan en ngikilinga. Na ianyungasi esi nabo toyena, asubasi ani anupitere ekiro keng. Erai anupit ngakiro a Yesu ngesi etojoki ngesi loger lo iteeto esi daang. “Ngikaitotoi kang, ayeni tokona ayong atamar na isubeta esi ka ngikapolok kus Yesu, isubete peiyenete. Alimuni kolong Akuj kanuan alokadwarak kadaang atamar eboliare Kiristo keng. Kiyook Akuj ngakiro nguna alorot kangolo. Tolunga robo ngasechesea kus toreunos nia Akuj sodi kikisarere ngasechesea kus. Ani kikokis esi neni, epote ngirwa lu ilakarator esi noi ani a Ekapolon sodi tomeunere Kiristo lokolong aseunio lo erai Yesu. Ejoikinit ngesi iboikin kidiama nadis tanang ngirwa lu itiliworere ibore daang ikitetet, loger lokolong alimunio Akuj ani a ngikadwarak keng alu italeuno alu kolong kanuan. Kainyo alimuni Musa tama, ‘Emeuni Ekapolon Akuj kus ekadwaran nikus loger lo kameunea ayong, eliwor ngesi epei kus. Echamit esi iwapete ngakiro daang na kilimokini ngesi esi atamar tosuba. Itwaan daang ni nyiwapi ngakiro a ekadwaran, ipakario alotunga a Akuj kinyasunae.’ Eruorosi ngikadwarak a Akuj daang napei a Samuel ka luche esidiun ngesi, eruorosi daang ngakiro na esubasi ngirwa lu. Eraakasi ngakiro na echikakini Akuj ngikadwarak ngakus, nabo erai achamunet na achamunotor Akuj kata apaakus, akus dang. Kona alimokinea ngesi Aburaam tama, ‘Apiari ayong ngitunga daang anakwap a ngalesea kon.’ Sodi kiteyaru Akuj Ekasuban etich keng dio tomeu nikus mono ekingaren sodi kitopia esi ani ereunea ipei kus daang alorotin keng aluaronok.” Ani eringa Petero ka Yoana isuruorete ngitunga, todolut Ngimurok a akai a Akuj ngiche ka ekarikon a ngasigerea ana eyokiyete akai a Akuj ta Ngisadukayo ngiche. Akadakinito kesi ngakiro nguna kainyo etatamete ngimeanara luarei ngulu ngitunga atamar ayaru Yesu, edodiunit ibore ngini atamar eyarunete ngikatoak. Sodi kirumunae kesi toenikinae lojela tanangea ataparach nache kainyo abu towar. Nakaneni tonupa lukaalak eirarete ngakiro nguna, dio talalaketa ngikiliok tanang ngabunge esibit ngakan. Ani iwalari, apot ngikapolok a Ngiyaudi ka ngikasukou a Atuk ta ngiketatamak a etal tochunakin Yerusalem. Kiriamariama kesi ka Emuron Loapolon lo anyaritae Anas, ka Kayapa, ka Yoana, ka Alekisanda ta luche lu arai ngiyenet a Emuron a Loapolon. Kitowaa ngimeanara alongaren kech kingita tamasi, “Ikokinete esi isubete nu ai? Anigogongu isubeta esi nu kori ekiro a ngae isubeta esi nu?” Tatachak Petero kesi ileleba Etau a Akuj tama, “Ngikapolok a ngitunga ka ngikasukou a Atuk, ani kerai kingitanarete esi sua akiroit naajokon asuba anitwaan ani a angwalan kaen, ka eger lo etangalekinere ngesi, ejoikinit esi daang ka Ngisirael daang iyenete atamar ewei itwaan en alongaren kus ejok noi kotere agogongu a ekiro a Yesu alo a Nasaret alo iramakinete esi napir dio kiteyaru Akuj. Yesu ngesi lokolong igiritae ngakiro keng nagiran kona, ‘Amoru na ingerete esi ngikadukok ngesi tokona aliwor naajokon noi edwang daang.’ Eanyunio ayuuno anikeng bon kainyo anakwap kadaang, emam nabo ekiro eche lo kiinak ngoni Akuj atoyuunotor.” Tatalasi ngikasukou a Atuk ngakiro a atitinyu a Petero ka Yoana kainyo peesomato kesi. Toyena atamar arukito sek kesi ka Yesu. Nakaneni na engolikineta itwaan ni etangalekinio ewaasi ka kesi, kililinga chek. Sodi tamarae kesi topudosi alokai a Atuk dio kidongo ngikasukou ianete make. Kingitas tamasi, “Kikokinea ngitunga lu ai? Eyenete ngitunga daang alo Yerusalem atamar asuba kesi ngakitoodikinet nakailiilok nugu nakaneni nyikipegi ngoni nguna. Nakaneni ani kisaki akiroit naga nyepetakin lotunga, echikichika ngitunga lu sodi nyiisuruor nabo itwaan iche alokiro a Yesu.” Sodi tanyaraut kesi nabo Natuk dio kichikichika atamar nyechamit kesi nabo jik iruorosi kori itatamete a ekiro a Yesu. Nakaneni tatachut Petero ka Yoana tamasi, “Totiakutu esi ngikulepek atamar ibore ni etenoono alongaren Akuj, ngesi akiwap ngakiro a Akuj kori akiwap nakus? Kainyo nyikipalikini sua akiruor na kingolik ka nakiira.” Sodi kichikichika kesi ngikasukou a Atuk lokojokon ani erumor talachakis toloto. Kingolikis kesi atamar nyikipedori akirirare kesi kainyo epuruunito ngitunga daang Akuj ana asubakinosi. Arai itwaan ni asubere ngakitoodikinet nakailiilok nugu ni eporito ngikaru keng ngitomwon-omwon. Napei alachakinere kona, tobongosi kesi lorukitos kech sodi tolimokis kesi ngakiro na alimokinete kesi Ngimurok Luapolok a Akuj ka ngikasukou a Atuk. Na eirareta ngikanupak nguna, tochunakin daang wapei kilipa Akuj tamasi, “Ekapolon ka ekasuban a adis ka ngalup ka anam ta ibore daang ni eyei tooma! Iyong kolong itilimuni ekasuban etich kon, apaakosi Daudi alimun a agogongu a Etau a Akuj tama, ‘Nyo alemaritotor ngibukui lu nyerai Ngiyaudi? Nyo atukioto ngitunga ngakiro na eraakasi ngapasiek? Eriamiriamete ngikapolok a ngakwapea, tochunakin ka ngikarikok wapei, akitopeg Ekapolon Akuj ka Kiristo keng.’ Kainyo erai iteni dir eriamiriamete Erode ka Pontio Pilato ka ngibukui lu nyerai Ngiyaudi ka Ngisirael lore akitopeg Yesu, Ekasuban etich kon lo italeunitoe lo itiliwori iyong Kiristo. Achunakinosi kesi akisub ibore daang ni kolong itiakuni iyong a agogongu kon ka echami kon atamar esubakin. Tokona Ekapolon, kingolik cha iyong eger lo esaketa kesi akitoem sua, sodi kitochamak sua ngikasubak etich kon eruoro ngakiro kon a atitinyu. Kitorwaa akan kon kitangalek ngitunga, nabo kimiek ngakitoodikinet nakatalarak ka nakailiilok tosubas alokiro a ekasuban etich kon alo erai Yesu lo italeunitoe.” Na arumoreta kesi akilip, tamaranik ni elipitotor kesi. Kilelebun kesi daang Etau a Akuj tolomakis akitatam ngakiro a Akuj a atitinyu. Nakaneni arai asepich a ngikanupak lu etamete ka anupit ngakiro ngapei. Amam tani ipei abala arai ngiboro keng ngikeng a ilope, nakaneni amoreenete kesi ngiboro daang lu atingito. Tolimonosi ngimeanara ngakiro a ayarun a Ekapolon Yesu a agogongu anaationon noi sodi topia Akuj kesi daang lokojokon noi. Emam itwaan anikech ni echana. Nakaneni lu aya ngamanat kori ngakais, togielasi yautu ngaropiyae na ariamunete, nakis ngimeanara, sodi tokoranakinae itwaan ngaropiyae loger lo eitanitor. Ayei itwaan a ales a Lawi lo edounio anakwap a Kupuro, anyaritae ngesi Yosep. Anyarito ngimeanara ngesi Barinaba (eger keng atamar “Ngolo kitalakari”), agielari ngesi amana keng yau ngaropiyae nak ngimeanara. Nakaneni togielasi ekile lo anyaritae Anania ka aberu keng Sapira iborosit kech. Tachamakin ngesi ka aberu keng totiaka ngaropiyae kidaa epewae sodi nakis nache ngimeanara. Tanyara Petero ngesi tama, “Anania, nyo imiekinea iyong Esiitan kilomakini iyong sodi kingala iyong Etau a Akuj ani idaea epewae a ngaropiyae ana ianyuni iyong alomana kon? Ani eringa iyong nyegielara iborosit ngini, arai ikon, ani na igielarea iyong, arai ngaropiyae ngakon. Ani nyo bo itiakunea iyong akisub ngakiro na ikote ne? Meere ngitunga ingalat iyong, erai Akuj ingalat iyong!” Napei eirarea Anania ngakiro nguna, kitelokin kwap totoan. Tobul ngitunga daang lu eirarete ngakiro nguna. Tolomut ngisapa kimuko akwaan keng, yaasi nikalapatan, tonuka. Adaunet a ngisaaa esibit nguuni, tolom aberu keng neni peeyeni nguna apot tosubakin. Kingit Petero ngesi tama, “Tolimokinae kerai ngaropiyae daang na ianyunete iyong ka ekile kon aniborosit kus kesi nu?” Tatachu ngesi tama, “Ee, eraakasi daang nu.” Sodi kingit Petero ngesi tama, “Nyo itiakuneta iyong ka ekile kon akining Etau a Akuj? Topupok mono iyong! Eyakasi tokona ngitunga lu tete aloose akinuk ekile kon lokidor kiyaarete iyong dang!” Kitelokin Sapira ngaren ngakejen a Petero totoan. Naalomuneta ngisapa ngulu, torukaut ketoana. Sodi yaarae ngesi nikalapatan tonukakinae diyete ekile keng. Tobul ngitunga a ekanisa ka luche daang lu eirarete ngakiro nguna. Apot ngimeanara tosuba ngakitoodikinet nakailiilok ka nakatalarak nakaalak alotunga. Eriameenete ngikanupak daang tooma Nagulei a Solomon. Emam itwaan niche ni pearai ekanupan ni asaki akimorikin ka kesi. Tani kikoni neni, epuruunito kesi ngitunga luche lu pearai ngikanupak. Eatanakin ngitunga lukaalak lokanupak, asepich a ngaberu ka ngikiliok lu anupete ngakiro a Ekapolon. Kotere na asubete ngimeanara, yaarae ngitunga lorotin kisinapakinae lokitandae ka lojemu, sodi ani itoruni Petero neni, min etorube keng ni eya ngiche kech. Potu ngasepicho a ngitunga alorerea alu edunyasi ka Yerusalem. Yaut kesi lu edekasi kori lu akoporito ngikerep sodi kitojokae kesi daang. Sodi toting Emuron Loapolon a akai a Akuj ka ngirukitos keng daang, ta atukuoru a Ngisadukayo etereku noi kotere ngimeanara, sodi kirumut kesi ngimeanara toena alojela. Nakaneni tangaa emalaikat a Ekapolon ngidorin a ejela toriko ngimeanara nikalapatan dio tolimok kesi tama, “Kapesi towaa alokai a Akuj sodi tolimokis ngitunga daang ngakiro a akiyar anakitetet kana.” Kiwapakis ngimeanara ngakiro nguna, tolomasi kai a Akuj nataparach elilim tolomakis akitatam. Tochunakis Emuron Loapolon a akai a Akuj ka ngirukitos keng ngikasukou a Ngiyaudi lua Atuk daang wapei lokiriam loapolon. Dio tomeasi kesi ngitunga lojela esakete ngimeanara torikunoe ngaren kech. Nakaneni na anangeta lu amearitae lojela, torukaut kesi emam kaneni. Sodi tobongosi kesi alimokin lu eriemito neni, tamasi, “Kiriamuni sua ejela egolol, towaas lu eyokiyete ngidorin. Nakaneni ani nakingaarea, emam itwaan kirukau sua eyei tooma!” Na eirarea ekarikon a ngikeyokok a akai a Akuj ka Ngimurok Luapolok ngakiro nguna, toriangakinos itapoit peeyenete na asubakinosi. Bu itwaan ipei tolimok kesi tama, “Topupokisi! Ngitunga lu iinikinito esi lojela, eyakasi tokona kai a Akuj itatamete ngitunga!” Sodi tolot ekarikon alu eyokiyete akai a Akuj ka ngasigerea keng kai a Akuj torikut kesi. Nakaneni nyiirumut kesi itingaunito kainyo akerito ebaasi kori kichakete ngitunga a ngamoru. Torikutu kesi kitowaa Anatuk. Tolimok Emuron Loapolon a akai a Akuj tama, “Kidungokini kolong sua esi atamar nyiitatam a ekiro a itwaan kaen, nakaneni kingolikisi mono tokona esi ngakiro na isuba esi! Ikeikis esi ngakiro na itatamete wadaang a Yerusalem, nabo isakete esi atamar sua kiari ngesi!” Tatachut Petero ka ngimeanara luche tamasi, “Ejoikinit sua kiwapi ngakiro a Akuj, meere na a ngitunga. Eteyaruni Akuj kata a apaayok Yesu na iramakineta esi napir taara. Ngolo ngesi lokolong ekeuni Akuj kisibak anakan keng analoteten, toliwor Ekarikon ka Ekayuunan sodi taanyuneta Ngisirael elunge ngasechesea kech torimakinae. Kirai sua ngikaanyunak a ngakiro kanu, sua ka Etau a Akuj, lo erai ainakinet a Akuj ani eya ngulu iwapete ngakiro keng.” Na eirareta ngitunga a Atuk ngakiro nguna, tongoa noi tasaka atamar taarae ngimeanara. Nakaneni tonyou epei a Ngiparisayo lo anyaritae Gamaliel towo, arai ngesi eketataman a etal nabo arimasi ngitunga toyenikinitetei noi. Todungu ngesi atamar torikoroe ngimeanara nikalapatan, sodi tolimok ngesi ngitunga lu aya Natuk tama, “Ngisirael, tochoikinos kotere ngakiro na isakete esi asubea ngitunga lu. Iyenete esi atamar kolong ngicherwa, abuni Seuda ebala arai ngesi itwaan ni kekileenikinit, sodi kiwapakis ngesi ngitunga esibit ngamiae ngoomwon. Nakaneni taarae ngesi dio kialaros ngirukitos keng daang, tongopia atiakaru keng. Arumoret kanguna, bu Yuda lo a akwap a Galilaya ngirwa lu emarere ngitunga, kiwapakis ngesi ngitunga lukaalak, nakaneni taarae ngesi dang kialaros ngirukitos keng. Kongina bocha tani tokona dang anakiro kanu, kalimokinit ayong esi atamar warasi nyiisubeta ngitunga lu idiobore. Kimiekisi kesi make! Ani keraakasi ngakiro na erekinito kesi lotunga eponitotor, engopiarete, nakaneni ani keraakasi nia Akuj eponitotor, nyipedorete esi akidwang kesi. Kori isubunete tani esi itijiete Akuj!” Tachamut ngitunga daang a Atuk ngakiro na alimuni Gamaliel. Sodi tanyaraut ngimeanara ngulu, todungunoe atamar kidetae ani nabo kichikichikae atamar nyiitatam nabo a ekiro a Yesu, ani erumor kimiekinae toloto. Topudosi ngimeanara Anatuk elakara noi kainyo emaru Akuj kesi lu itemokino eboliare kiruma ngileech kotere ekiro a Yesu. Torubakis ngimeanara itatamete akolongit daang ngakiro Naajokak a Yesu alo erai Kiristo, alokai a Akuj ka ngawiyei a ngitunga. Ani ekisidi na eatakinotor ngikanupak, min enguringur nia ngikanupak alu eruorosi ngabukui a Ngigirik ka lu eruorosi ngabukui a Ngieburaniae. Abalasi lu eruorosi Ngagirik nyemisitae ngapuseru kech esaa lo ekorere akimuj ngirwa daang. Sodi tanyaraut ngimeanara ngikanupak wapei tolimut tamasi, “Nyejoikinit ngoni kipasakini akitatam ngakiro a Akuj dio atolomakisi atiakatiak ngaropiyae. Tokona bocha ngikaitotoi kang, toseutu alokiding kus ngitunga ngikan-kaarei lu ipuruunitoe, lu ileleba Etau a Akuj ka aosou sodi ainakisi etich ngolo. Nakaneni ejoikinit ngoni kirichakini akilip ka etich lo itatamere ngakiro a Akuj.” Talakar asepich daang a ngikanupak kotere akiroit ngina. Toseut kesi Sitepano, lo arai itwaan ni anupit noi nabo kileleba Etau a Akuj. Toseut nabo dang Pilip ka Pirokoni ka Nikanora ka Timona ka Parimena ta Nikolao lo a akwap a Antiok lokolong ebelo toliwor eka edin a Ngiyaudi. Nakis kesi ngimeanara ngitunga ngulu, sodi kilipa ngimeanara kidokokis ngakan kech nakies a ngitunga kangulu. Sodi tokeiar akiroit a Akuj. Kiatakinos ngirukitos a Yesu lu aya Yerusalem talalakearos atipei, kiwapakis tani ngimurok a Akuj lukaalak Ngakiro Naajokak a Akuj. Tosub Sitepano lo ayei ajokis a Akuj ka agogongu ngakitoodikinet nakatalarak noi ka nakailiilok alotunga. Sodi kitopega ngitunga ngiche Sitepano. Araakasi ngitunga ngulu lu aya kai apei a Atuk na anyaritae, “Akai a Atuk na erai aka ngitunga alu Elachakina dir,” aponito ngitunga ngulu alo Kurene ka Alekisandaria ka Kilikia ta Asia. Nakaneni nak Etau a Akuj Sitepano aosou lokojokon noi toliwor na iruorikinea ngesi, tongop kesi kona itopegete. Sodi nakis kesi ngitunga ngiche ngaropiyae imunonito tamareta, “Kiira sua Sitepano imenyi Musa ka Akuj!” Sodi kichuchukis kesi ngitunga ka ngikasukou a Atuk ta ngiketatamak a etal. Kirumut kesi ngesi torikosi Natuk. Torikunoe Natuk ngikaanyunak lukaliokok lu eruorosi ebalasi, “Nyepalikini itwaan en jik akimeny ni italeuno nege ka etal a Musa. Kainyo kiira sua ngesi ebala abe inyasuni Yesu lo a Nasaret lo nege, sodi kibele ngitalio lukolong kianyuni ngoni ani a Musa!” Tokienyikis ngitunga daang lu ebooyete Anatuk Sitepano, dio taanyungasi kesi ereet keng ikoni lo emalaikat. Sodi kingit ngesi Emuron Loapolon a Akuj tama, “Iteni ngakiro nu a?” Tatachak Sitepano tama, “Ngikaitotoi kata apakang, topupokisi mono esi ngakiro kang! Atakanuuni kolong Ekapolon Akuj a akwangis ani eyei apayok Aburaam na ayakar nakwap a Mesopotamia, eringa nyewoto tolom Aran. Tolim Akuj tama, ‘Toisik akwap kon ka ngitunga kon sodi tolot nakwap nakedodikini ayong iyong.’ Sodi taramak ngesi anakwap a Ngikalidayo tolot tolom Aran. Ani atoanet ka apakeng, kitaramak Akuj ngesi kitanangu nakwap na tokona ilomito esi naga. Nyeinakina Akuj ngesi tani ewae lodiochichi a akwap kana toliwor akeng, tani kikoni neni, kichikak Akuj ngesi atamar eliwor akeng ka ngalesea keng, tarai tani amam ngesi ikoku ngirwa ngulu. Alimokini Akuj ngesi tama, ‘Eraunete ngalesea kon ngipeyok anakwap a ache, eliworosi kesi ngikedalak sodi toboliare a ngikaru a ngamiae a ngoomwon. Erirae ayong ngitunga a akwap ana erauneta kesi ngirikon, ani ekisidi epudunete kesi anakwap kangina sodi kelipa ayong kane.’ Sodi kichikak ngesi Aburaam achamunet na a akilengero. Toliwor Aburaam apakeng a Isaka sodi kilenger ngesi akolongit na a ngakan-kauni aabor a akidoun. Ani ekisidi toliwor Isaka apakeng a Yakobo, nabo touri Yakobo ta apayok lutomon ka ngiarei. “Kona erakaritor ta apayok etereku kotere Yosep, togielasi ngesi toliwor ekedalan anakwap a Misiri. Nakaneni arukito ngesi ka Akuj toyuu ngesi alochan keng kadaang. Tominak Akuj ngesi kitaanyu ajokis ka aosou ani a Parao alo arai ekapolon a Misiri. Kitiliwo tani Parao ngesi ekapolon a akwap kangina ka awi keng daang. Sodi tolom eron a akoro wadaang a Misiri ka Kanaan, pena ngichan luaronok noi. Tongopik ta apaayok akimuj, na eirarea Yakobo atamar eyei akimuj Misiri, tomea ngesi ta apayok alosiet kech na ekingaren. Alosiet kech na a ngaarei, kitoyen Yosep ngikaitotoi keng, nabo toyen Parao ngitunga a Yosep. Ani ekisidi, tomea Yosep ngitunga nika apakeng ka ngiyenet keng daang eraakasi alomachar kech ngitomwon-kaarei ka ngikan, ebala potu Misiri. Kongina, tolot Yakobo Misiri ni atoaketa ngesi kata apaayok luche. Yaarae ngawat kech tanang Chekem, tomurakinae naliel nakolong agieluni Aburaam alokitela ka Amor alo Chekem, a ngaropiyae a ngakaalak. “Naadolio ngirwa lu iyookinere akichikakinet nakolong echikakini Akuj Aburaam, eatakina ekimar a ngitunga yok alo Misiri alalak noi. Ekisidi, tolomak ekapolon eche lopeayeni Yosep apolokin Misiri. Tosubea ngitunga a ekitela yok ngakiro naaronok noi. Toboliar ngesi ta apayok ani abalar ejoikinit eisikinete ngide kech luuchik anikalapatan sodi totoaketa. Kidounoe Musa ngirwa ngulu, arai ngesi ikoku nikebusean. Kitanae ngesi a ngilapio a nguuni anawi ka apa keng, na epudunere ngesi nikalapatan, kirapu nakookeng a Parao ngesi kitanu ikwa ikoku keng. Kitatamae Musa ngakiro daang na aosou a akwap a Misiri dio, toyenikinae noi a ngakiro ka ngitichisio. “Naanangeta ngikaru a Musa ngitomwon-omwon, tolot ngesi aanyun ngitunga keng lu eraakasi Ngisirael. Kingolik ngesi epei kech eboliar Emisirit, sodi toik ngesi itwaan ngini taar Emisirit. ( Etamit Musa atamar kori eyenunete ngitunga keng atamar esubea Akuj ngesi etich lo eyuunea kesi, nakaneni nyeyena kesi kongina.) Akolongit na a ngaarei, kingolik Ngisirael ngiarei ejiete. Tasak akitiak kesi kisila tama, ‘Ngikiliok, iraakasi esi ngikaitotoi, nyo tokona isaketa esi awana make?’ Nakaneni kijuka lo etiji loche Musa lokwaas tolimok tama, ‘Ngae kitiliwori iyong ekapolon ka ekatubon ngakiro kosi?’ Kingit tama, ‘Isaki iyong akiar ayong loger lobeen iarea Emisirit a?’ Na eirarea Musa ngakiro nguna, todoki alo Misiri tolot tolom nakwap a Ngimidian. Touriu kaina ngide ngiarei. “Adaunet a ngikaru a ngitomwon-omwon, tatakanu emalaikat a Akuj ani a Musa anasarae ana anokea akim anamoni ana ayei nariet, diyete emoru a Sinai. Toiliilikis Musa na aanyungari, sodi tolot diyete amoni kingolikinea lokojokon. Nakaneni kiira ngesi etoil a Ekapolon Akuj ebala, ‘Ayong ngesi Akuj kata apaakon, Akuj ka Aburaam ka Isaka ta Yakobo.’ Tobul Musa tamaranik, nyesaka nabo akienyikin. Tolimok Ekapolon ngesi tama, ‘Tobuto ngamuk kon kainyo italeuno neni iwaar iyong. Engolik ayong dir eger lo eboliare ngitunga kang alo Misiri. Eira ayong akigoro kech nakaneni atiyaun ayong ayuun. Kiirak tokona, kameari ayong iyong Misiri.’ “Musa ngesi lokolong angerete Ngisirael. Kingita tamasi, ‘Ngae kitiliwori iyong ekapolon ka ekatubon ngakiro kosi?’ Ngesi lo ameuni Akuj apolokin ngitunga ka alachakin ingarakina ka emalaikat lo atakanuuni anikeng anamoni ana anoki. Ariki ngesi ngitunga kipudo alo Misiri, tosub ngakitoodikinet nakailiilok ka nakatalarak alo Misiri ka anam a Chamu ta lu asubi a ngikaru ngitomwon-omwon anariet. Musa ngolo ngesi lo alimokini Ngisirael tama, ‘Emeuni Akuj ekadwaran keng nikus, loger lokolong kameunea ayong sodi toliwor ngesi epei a ngitunga kus.’ Musa ngesi lokolong achunakina ka Ngisirael nariet. Arukito ngesi kaina kata apaayok ta emalaikat lo eruorosi ka ngesi alomoru a Sinai, dio taanyu ngesi Ngakiro a Akuj na a akiyar, kikobak ngoni. “Towout ta apayok akiwap ngakiro keng. Tongero ngesi kiitana atamar atobongo Misiri. Sodi tolimokis kesi Aron tamasi, ‘Tosubakinae sua ngakujo na kirikete. Nyikiyeni atamar anukiro asubakin ani eyei Musa alo kolong kirikuni kipud alo Misiri.’ Neni ngesi asubakineta kesi ekisikwaane a itaok, tolemikis ngakipeyos ani erumor tolomakis ekimuje erimasi ibore ni asubete kesi ngikulepek. Sodi torei Akuj anikech kimiek kesi ilipito ngikanyer lu eya nadis, loger lo igiritere nakitab a ngikadwarak kona, ‘Ngisirael! Meere kolong ayong kingolanakinete esi ka akipeyonokin ngibaren a ngikaru a ngitomwon-omwon anariet. Iwokito esi eam a akuj be Molek, ka ekisikwaane a ekanyerit a akuj kus anabe Repa, ngikisikwaane lu isubi iyong ngesi lu ilipi iyong. Kotere nguna kemiekini kitorik nikalonan noi ni idwangit Babilon.’ “Atingito ta apaayok eam lo edodiunit atamar arukito Akuj ka kesi anariet. Asubio loger lo alimokinea Akuj Musa atamar tosub. Tosubun dir lopit lokolong edodikinitere. Apot ta apaayok lu aanyunete eam ngolo ani kata apaakech, totinga eam ngolo na alooso kesi ka Yochua sodi toloma nakwap na etwarakinea Akuj ngibukui lusek alomito neni. Sodi kidong eam ngolo neni tanang ngirwa lua Daudi. Tominak Daudi Akuj sodi tolimok ngesi Akuj atamar asaki atosubak Akuj a Yakobo ni iboikin. Nakaneni arai Solomon ngesi adukokini ngesi akai. “Nakaneni nyibooyi Akuj naapolon noi anakais ana esubete ngitunga, loger lo ebalar ekadwaran a Akuj, ‘Ebala Ekapolon, nadis eyei ekicholong kang lo eboyonokin ayong anapolou kang, nabo akwap ngesi echiakit ayong. Akai na ikoni ai kidukokinete esi ayong? Aliwae eboikin ayong eangarea? Meere kolong ayong asubi ngiboro lu daang a?’ ” Torubak Sitepano ebala, “Wae, abe egogong esi ngakies! Eroko ngitai kus loger a ngibukui alu nyerai Ngiyaudi nabo nyiirarete ngakiro a Akuj. Ikwaan esi ka ta apaakus. Ngirwa daang itopegete esi Etau a Akuj. Eyei ekadwaran a Akuj edio lo peaboliatar ta apaakus a? Aarete kesi ngimeuna a Akuj lukolong kanuan alimorete abunere a Ekasuban etich alo etenoono. Nakaneni tokona, irikokis esi ngesi ngitunga sodi taara. Esi kolong ianyunete ngitalio a Akuj lu kiinakinete ngimalaikae, nakaneni nyiwapa esi ngitalio ngulu!” Na eirakineta ngitunga a Atuk ngakiro a Sitepano, tongoa noi tokiricha ngikel enyunyurasi. Nanakeni tokienyia Sitepano nadis ileleba noi Etau a Akuj. Sodi kingolik akwangis a Akuj ka Yesu ewei anakan ana aloteten a Akuj ana erai Apa. Tolim tama, “Kingolikisi a, engolik adis engaar ka Lokookeng a Itwaan ewei alowae alo aloteten a Akuj!” Nakaneni kikalout kesi kiremasi togolo ngaki a ngakan kech. Dio toporokis kesi ngesi atipei, kipudosi ngesi nikalapatan a ere kimasa a ngamoru. Kimiekineta ngikaanyunak esorokit lo anyaritae Saul ngiworui kech sodi kiratak. Ani eringa kesi echakachakaate ngesi a ngamoru, tanyara Sitepano Akuj ebala, “Ekapolon Yesu, kideu etau kang!” Toriedik ngesi kirema tama, “Ekapolon! Nyiimaru akisech naga anikech!” Na alimunio nguna, dio totoan. Sodi tojoik Saul ni aarere Sitepano. Akolongit napei ngina toboliare noi ngikanupak lu ayakasi Yerusalem. Kialaros ngikanupak daang totena nakwap a Yudea ka Samaria. Ngimeanara make nyialara. Tonuka ngitunga lu elipito Akuj Sitepano kigoro lokojokon esutonokinete. Nakaneni tasak Saul akinyasun ngikanupak, tolomanak anakais kirum ngikiliok ka ngaberu toen daang alojela. Toloto ngikanupak lu ealarosi wadaang itatamete Ngakiro Naajokak. Tolot Pilip lore loapolon alo Samaria kitatam ngakiro a Kiristo alotunga alu aya neni. Tomisik asepich a ngitunga ngakiro na eruoro Pilip lokojokon, apupokinito ngakiro keng, kiteete ngakitoodikinet nakailiilok asubi ngesi. Topuduunut ngipean alotunga alukaalak iremasi, dio kitojok lu angwalito ka lu echodosi. Talakaros ngitunga a ere kangolo. Alomit itwaan ni anyaritae Simon neni, atalanari ngesi ngitunga a Samaria kotere amuronot keng. Abala ngesi arai itwaan ni kayenikinitae, ayenikinito ngesi ngitunga daang alore, lu eyenikinitae ka lu nyeyenikinitae, abalasi, “Erai ngesi agogongu na a Akuj na enyaritae, ‘Agogongu Naapolon.’ ” Ayenikinito ngitunga ngesi kainyo a ngirwa a ngikaalak, atalanarete kesi ngakiro a amuronot keng. Nakaneni na anupeta kesi ngakiro a Apolou a Akuj na etatami Pilip a ekiro a Yesu, kibatisae ngikiliok ka ngaberu. Tonup Simon dang. Ani kibatisae kerumor, torubak erukito ka Pilip, etalarito ngakitoodikinet nakailiilok ka nakatalarak na etee ngesi. Na eirareta ngimeanara lu aya Yerusalem atamar achamut ngitunga a Samaria ngakiro a Akuj, tomeasi Petero ka Yoana inaa. Na anangeta Petero ka Yoana inaa, kilipakis ngikanupak esakete taanyut Etau a Akuj. Kainyo amam tani ipei kech ni alomarit Etau a Akuj. Arai akibatisare bon ebatisatae kesi a ekiro a Ekapolon Yesu. Sodi kidokokis Petero ka Yoana ngakan kidiama ngakies kech, taanyut kesi Etau a Akuj. Na anyungarea Simon atamar aanyut ngikanupak Etau a Akuj ani edokonokinioto ngimeanara ngakan nakies kech, tolemik ngesi Petero ka Yoana ngaropiyae, tolim tama, “Kimiekinae ayong dang ataanyu agogongu na sodi taanyunea itwaan ni edokokini ayong ngakan kang nakou keng Etau a Akuj.” Nakaneni tatachak Petero ngesi tama, “Kimiek ngaropiyae kon tobukoros ka iyong aapei kainyo itamit iyong atamar kori egielio ainakinet a Akuj a ngaropiyae! Emam ni ingichakin iyong alotich kalo, kori emam tani itwaan kimarunit iyong alotich kosi kainyo nyetenoono etau kon ani a Akuj. Tolung robo aronis nakon na sodi kilip Ekapolon kitorimak iyong ngitamen luaronok lu. Kainyo engolik ayong atamar ileleba iyong aronis a etereku nabo kienit iyong akisech.” Sodi Simon tolimok Petero ka Yoana tama, “Wae, kilipa kare Ekapolon kotere ayong sodi nyesubakinosi ngakiro na ilimut esi anikang tani wadiochichi.” Na arumoreta kesi alimun ngakiro a Yesu na ayenete kesi ka akitatam Ngakiro Naajokak a Ekapolon, tobongosi Petero ka Yoana Yerusalem. Ani eloose alorot, kitatama Ngakiro Naajokak anadakarin anakaalak Alosamaria. Tolimok emalaikat a Ekapolon Pilip tama, “Tosubakin sodi tolot kuju, tomea erot lo isiakini alo Yerusalem tanang Gasa.” (Emam itwaan itoreene lorot lo ngirwa lu.) Sodi tosubakin Pilip tonyou tolot. Esaa lopei ngolo, ayei itwaan a Isopia ni edongitoe, alosi ngesi nawi keng. Arai ngesi ekapolon lo aweikinit ngaropiyae daang a aberu ana apolokinit Isopia. Alosit sek ngesi Yerusalem akilip, ani esaa ngolo, adokit ngesi aurukuk na erito ngangolei keng abongi nawi. Ani na alosio ngesi, esomae akitab a ekadwaran Isaya. Tolimok Etau a Akuj Pilip tama, “Kape toloma naurukuk na irito ngangolei ngin.” Tamatar Pilip torukau ngesi isomae akitab a ekadwaran Isaya. Kingit ngesi tama, “Iyeni iyong ngakiro na isomae iyong nu a?” Tatachu itwaan ngini tama, “Ekokini ayong ayeni emam itwaan ni kesisakini ai?” Sodi tolimok ngesi Pilip atamar todoka naurukuk kiboikinos ka ngesi. Ngagiran a Akuj na esomae ngesi kesi nu, “Ekoni ngesi amesek na ejukitae akingol, ekoni ngesi imesek ni nyeruo echudio ngajul. Nyelimuno ngesi akiroit tani apei. Etaanyunio ngesi ngileech, nyiirirae a ngakiro ana eriyan. Emam itwaan etamari eya ngesi ngalesea, kainyo alemar akiyar keng anakwap.” Kingit ekapolon lo edongitoe ngolo Pilip tama, “Ngakiro a ngae iruoro ekadwaran a Akuj lo? Elimunit ngesi ngakiro na eraakasi ngakeng a ilope kori ngakiro na eraakasi ngaka itwaan a iche?” Sodi tolomak Pilip ekiruor napei anagiran kanguna jik, tolimok ngesi Ngakiro Naajokak a Yesu. Ani iwapito erot, tanangut ni aya ngakipi sodi tolim ekapolon ngolo tama, “Ngakipi nu, nyoni keratakini ayong nyekebatisae?” [ Tolimok Pilip tama, “Kibatisao iyong kinup a etau kon kadaang.” Tolim Ekapolon ngolo tama, “Anup ayong atamar Yesu Kiristo ngesi erai Lokookeng a Akuj.”] Todung ekapolon ngolo atamar kitowae aurukuk na erito ngangolei. Totiyaunos kesi kwasiarei tolomasi nakipi sodi kibatisa Pilip ngesi. Na apudunioto kesi anakipi, kitorotok Etau a Ekapolon Pilip toten wache. Nyeanyungara nabo ekapolon ngolo Pilip, nakaneni tolot elakara noi. Tolot Pilip tanang Asoto, kitor ngesi lorerea daang itatami Ngakiro Naajokak tanang tani Kaisaria. Ngirwa lupei ngulu, torubak Saul iricha niationon atamar aari ngirukitos a Ekapolon. Tolot ngesi ni Emuron a Loapolon atamar asaki ngabaruae na idodiunito atamar kachamakinitae ngesi alosi nakais a Atuk na eya Damasko. Sodi ani kerukau ngesi ngaberu ka ngikiliok lu iwapito Erot a Ekapolon, kirum dio toriku Yerusalem. Ani eapiari Saul lore a Damasko, tokwangu akicha anadis atipei kiriam ngesi alowaitin kadaang. Tadakakin ngesi kwap kiira etoil ebala, “Saul, Saul, nyo kiboliar iyong ayong?” Kingis Saul tama, “Iyong ngesi ngae, Ekapolon?” Tatachu etoil tama, “Ayong ngesi Yesu lo kiboliar iyong. Nakaneni tonyou tolot lore sodi kitolimokin kaina na ejoikinit iyong isubakini.” Towaa ngikiliok lu aloose ka ngesi kililinga chek. Kiirasi kesi etoil nakaneni emam itwaan aanyungasi. Tonyou Saul analup ani ebala engolik akwap, nyingolikina ibore tani ipei. Sodi totinga kesi ngesi akan torikoroe Damasko. Tomudukan ngesi a ngirwa a nguuni, ngirwa ngulu daang, emam ibore ni emuj ngesi kori niamat. Ayei erukitos a Yesu Damasko lo anyaritae Anania. Taanyunga ngesi akisingolikinet a Akuj. Anakisingolikinet kangina, tanyara Ekapolon ngesi tama, “Anania!” Tatachu ngesi tama, “Ayei ayong nege Ekapolon.” Tolimok Ekapolon ngesi tama, “Tosubakin tolot Lorot lo erikino, kingitu anawi a Yuda itwaan ni ebunit alo Tariso ni enyaritae Saul. Ilipit ngesi, aanyungari ngesi anakisingolikinet a Akuj itwaan enyaritae Anania elomuni sodi kidokok ngakan keng nakou keng dio taanyungarea ngesi akwap nabo.” Tatachak Anania tama, “Ekapolon, kalimokis ayong ngitunga lukaalak ngakiro a itwaan kaen ka ngakiro naaronok noi na asubea ngesi ngitunga kon alo Yerusalem. Abu ngesi nege edungokinito Ngimurok Luapolok atamar kirum daang lu ilipito elimito ekiro kon.” Nakaneni tolimok Ekapolon tama, “Kape cha iyong, kainyo aseu ayong ngesi toliwor iborosit kang, sodi tolimo ekiro kang alobukui alu nyerai Ngiyaudi ka ngikapolok kech ta Ngisirael. Kainyo edodikinit ayong ngesi atamar ejoikinit ngesi eboliare noi kotere ekiro kang.” Sodi tolot Anania toloma kai ngina. Ani erumor kidokok ngakan keng nakou a Saul tama, “Lokaatokang Saul, Ekapolon lo erai Yesu elope, lo atakanuuni anikon na iyakar iyong lorot ibunit nege. Ngesi kameu ayong sodi taanyungarea iyong akwap nabo, ani nabo dang, kilelebun Etau a Akuj nikon.” Tachakun ibore ni ikoni ngikabebekwa a ngikolia anakonyen keng atipei sodi taanyunga ngesi akwap nabo. Tonyou ngesi sodi kibatisae. Ani erumori akimuj, topwatun akwaan. Arukito Saul ka ngikanupak lu aya Damasko a ngirwa a ngidikidio. Kidira ngesi nakais a Atuk tolomak akitatam atamar arai Yesu Lokookeng a Akuj. Tatalasi ngitunga ngakiro keng na eirarete tamasi, “Ekoe, meere itwaan en nikolong aareene lu alimito ekiro be Yesu alo Yerusalem a? Ikwa meere kolong abunitor ngesi nege akirumun ngitunga ngulu sodi toriko Lomurok Luapolok a?” Nakaneni torubak Saul itatami a agogongu noi kisipiyo ngesi Ngiyaudi lu alomito Damasko ngakiro tongopa naetachunete ani achiununea ngesi ngakiro na idodiunito atamar erai Yesu Kiristo. Adaunet a ngirwa a ngikaalak, kiriamariama Ngiyaudi sodi totuko akiar Saul, nakaneni tolimokinae ngesi atamar etukito kesi. Akwaar ka apaaran, kiyoko kesi ngidorin a ere esakete akiar ngesi. Nakaneni tadakut ngesi ngirukitos keng nakwaare anakikap kiyooliut ani aorori anawas kimiekis anikalapatan. Tolot Saul Yerusalem esaki akiruk ka ngirukitos a Yesu. Nakaneni nyenupa kesi atamar arai ngesi erukitos a Yesu, sodi toema kesi daang ngesi noi. Nakaneni bu Barinaba akingarakin ngesi toriko ni aya ngimeanara. Kisisak kesi eger lo engolikinea Saul Ekapolon alorot ka atamar esuruori ngesi Ekapolon. Tolimok nabo kesi eger lo etatamea Saul a atitinyu a ekiro a Yesu na ayakar Damasko. Sodi kiruko Saul ka kesi ani aloose kadaang alo Yerusalem. Kitatam ngesi a atitinyu a ekiro a Ekapolon. Eanete ngesi nabo topega tani ka Ngiyaudi lu eruorosi ngabukui a Ngigirik, nakaneni tasaka kesi akiar ngesi. Na ayeneta ngikanupak ngakiro nguna, torikosi ngesi tanang Kaisaria dio kimiekis ngesi elosi Tariso. Sodi min ekisil lokanupak daang alo Yudea ka Galilaya ta Samaria. Kiatakin ngikanupak talalaketa kona engarakinitor kesi Etau a Akuj nabo torikite Ekapolon. Tolot Petero wadaang. Ani akolongit apei, tolot aanyun ngitunga a Akuj lu ayakasi lore a Lida. Toriam itwaan ni anyaritae Ainea kaina. Angwalit Ainea peapedori anyoun alokitanda a ngikaru a ngikan-kauni. Tolimok Petero ngesi tama, “Ainea, kitojok iyong Yesu Kiristo, tonyou tosubak ekitanda kon.” Tonyou Ainea atipei. Na anyungareta ngitunga daang lu alomito Lida ka Charon Ainea, apot toreunos nia Ekapolon. Alo Yopa, ayei aberu na arai akanupan anyaritae Tabisa. (Enyaritae ekiro keng a ngabukui a Ngigirik Dorikas, eger keng atamar “agete”.) Asubeene ngesi ngakiro naajokak nakaalak nabo apatana noi engaranakini ngikebootok. Ngirwa ngulu, todekakin ngesi totoan, arumoret akilotar ngesi, kinapakinae akwaan keng namaniyat na alokidiama akai. Kona ayakar Lida diyete Yopa, ani iirarete ngirukitos a Yesu atamar eyei Petero Lida, tomeasi ngitunga ngiarei akimaima ngesi tamasi, “Bua kare cha nikosi atipei.” Sodi tosubakin Petero kirukosi ka kesi. Na adolunio ngesi, torikoroe kai na ayei kidiama. Towaa ngapuseru daang kiriama ngesi igorosi ka akidodeanakin ngesi ngiworui lu enapitae alotooma ka nikalapatan lu adonyonokini kesi Dorikas ngirwa lu ayarea. Nakaneni kipudo Petero kesi daang nikalapatan dio toriedik kilip, ani erumor torei nakwaan a Dorikas tama, “Tabisa, tonyou!” Tokienyu ngesi ani eanyungari Petero, kiboikin. Taapia Petero nikeng, toting akan kitonyou. Ani erumor, tanyarau ngesi ngikanupak daang ka ngapuseru sodi nak ngesi kesi Dorikas eyari. Tokeikin ngakiro nguna lowaitin daang a Yopa sodi tonupa ngitunga ngikaalak Ekapolon. Kiboi Petero alo Yopa ngirwa ngikaalak anawi a Simon alo amureene ngilowi. Ayei itwaan Kaisaria ni anyaritae Korinelio, arai ngesi ekarikon a ngasigerea ana anyaritae “Ajore a Italia.” Arai ngesi itwaan ni erichakinit ngitalio a Akuj nabo kilipito ka ngitunga a awi keng daang Akuj. Engaranakini ngesi noi Ngiyaudi lukebootok nabo elipeene Akuj jiik. Areet a akolong apei, ngisaae ngikan-koomwon, taanyunga ngesi akisingolikinet a Akuj. Anakisingolikinet kangina, taanyunga emalaikat a Akuj elomuni tanyara ngesi tama, “Korinelio!” Tokienyik ngesi emalaikat ngolo ebulit, kingit tama, “Nyo Ekapolon?” Tatachak emalaikat tama, “Elakara Akuj noi kotere akilipit kon ka apatanu na iinanakinea iyong ngikebootok ngiboro, nakaneni kitam ngesi iyong tokona. Tomea tokona ngitunga Yopa tanyaraut itwaan ni enyaritae Simon Petero. Epeyonit ngesi anawi a ekasuban ngilowi enyaritae Simon alo elomit lokwaas a anam.” Ani na arotokinio emalaikat, tanyarau Korinelio ngikasubak etich a awi keng ngiarei ka epei a ngasigerea ana eyokiyete ngesi, itwaan ni erichakinit etal a Akuj. Tolimok kesi na asubakinosi dio tomea kesi Yopa. Akolongit na a ngaarei na alooso kesi alorot taapiyasi Yopa, todoka Petero kidiama akai naparan lotingilan esaki akilip. Tanyam ngesi akoro kiitan akimuj nanyamat. Ani eringa akimuj ipoo, taanyunga ngesi akisingolikinet a Akuj. Taanyunga ngesi adis kengaar, totiyaun ibore ni ikoni awaru naapolon iyoliunitoe a ngiwaitin a nguomwon kwap. Ayakasi nawaru ngina ngitieng ngigelagelae lu eloose a ngakejen a ngoomwon ka lu eliato ta ngikieny lu alomoding. Tolimok etoil ngesi tama, “Tonyou Petero taar sodi tanyam!” Nakaneni tolim Petero tama, “Mam, Ekapolon! Nyenyama ayong nakanuan ibore ni nyitaleunitoe kori ni inyasuna.” Tolimok nabo ngesi etoil tama, “Wara nyiitama ibore ni ebala Akuj ejok be inyasuna.” Asubakinosi nguna ngasubakinet ngauni sodi tobuarae awaru ngina nadis. Ani eringa Petero engayat atamar nyo eger a akisingolikinet kangina, kepot ngitunga lu ameunit Korinelio kingitut awi a Simon. Awaasi kesi esaa ngolo alokidor a awas. Kiremasi kesi tanyaras ebaasi, “Eyei epeyonon nege enyaritae Simon Petero a?” Ani eringa Petero esaki akiyen eger a akisingolikinet kangina, tolimok Etau a Akuj ngesi tama, “Topupok a, eya ngikiliok nguuni nege kisakete iyong. Tonyou tokona totiyaar kwap. Wara nyiiwou akirukor ka kesi kainyo ayong ameunit kesi.” Sodi totiyaar Petero tolimok ngitunga ngulu tama, “Ayong ngesi itwaan ni isakete esi. Anukiro iponitotor esi nege?” Tatachut kesi tamasi, “Ekarikon a ngasigerea kosi lo enyaritae Korinelio ngesi kimeunit sua. Erai ngesi itwaan niajokon ni ilipit Akuj nabo erimasi ngesi ngitunga daang a Ngiyaudi lokojokon. Alimokini ngesi emalaikat a Akuj atamar kipeyou iyong nawi keng sodi kiirarea ngesi ngakiro na ilimuni iyong.” Kilom Petero ngitunga ngulu nawi topero neni akwaar ngina. Ani iwalari, tonyou ngesi kirukosi ka kesi ta ngikanupak ngiche lu alomito Yopa. Akolongit nache, tananga Kaisaria. Edarit Korinelio ngesi kaina, erukito aapei ka ngiyenet keng ta ngipaalon lu epeyeunit ngesi. Ani elomuni Petero nawi, kisiriamia Korinelio tadakakin kwap diyete ngakejen keng, kijuuru esibit ilipit ngesi. Nakaneni kitonyou Petero ngesi tolimok tama, “Tonyou, arai ayong dang itwaan.” Torubak Petero iruorosi ka Korinelio eloose alomar kai. Ani elomarete tooma kai, torukaut ngitunga ngikaalak echunakina. Tolimok kesi tama, “Iyenete esi daang atamar alotalio alu echikakini Akuj Ngiyaudi, nyechamitae Eyaudit epeyonete kori irukete ka ngibukui lu nyerai Ngiyaudi. Nakaneni kedodik ayong Akuj atamar nyejoikinit ayong abala nyitaleuno, kori inyasuna itwaan iche. Kotere nguna, na imeuneta esi ngitunga anyarare ayong, atacham ayong abunere. Kengisit tokona ayong esi, nyoni imeunitotor esi ngitunga nikang?” Tolim Korinelio tama, “Arai esaa lo tokona lo, ngirwa nguuni kolong adaun, ngesi elipitor ayong alo kai kang ngisaae ngikan-koomwon areet a akolong. Napei ngina, towo itwaan ni anapit ngiworui lu akwaak alongaren kang, tolim tama, ‘Korinelio, eira Akuj akilip kon nabo engolik apatanu kon na iinanakinea iyong ngikebootok ngiboro. Tomea itwaan Yopa ni eyei itwaan ni enyaritae Simon Petero. Epeyonit ngesi a nawi a Simon alo erai ekasuban ngilowi, alo elomit lokwaas a anam.’ Sodi atomeu ayong ngitunga nikon atipei. Ejok noi ani ibunio. Kiya tokona sua daang nege ngaren Akuj, kisaki akiirar nakidungok iyong Ekapolon atamar tolim.” Tolomak Petero ekiruor tama, “Ayen tokona iteni dir atamar nyetiakit Akuj ngitunga. Itwaan cha daang ni ilipit ngesi ka akisub na eteniyete, echamuni ngesi peekachit atamar erai ebukut ali. Iyenete esi akiroit na ayaari Akuj lotunga a Isirael, itatami Ngakiro Naajokak a ekisil ani a Yesu Kiristo. Iyenete esi akiroit nateno na etatamio awadaang a akwap a Yudea napei esiakinea alo Galilaya na arumorea Yoana akitatam ngakiro a akibatiso. Iyenete esi Yesu lo a Nasaret lo aseuni Akuj kilelebik Etau a Akuj ka agogongu. Aloseene ngesi wadaang, esubi naajokak ka akitojok daang lu aenit Ekipe a agogongu keng, kainyo arukito Akuj ka Yesu. Kirai sua ngikaanyunak a ngakiro kadaang ana asubi ngesi anakwap a Ngiyaudi ka Yerusalem. Taara ngesi taramakis napir. Nakaneni kiteyaru Akuj ngesi akolongit na a ngauni kidodiu ngesi, meere alotunga kadaang, nakaneni kidodiu anikosi alu kolong kiseuni Akuj atoliworos ngikaanyunak. Ngulu kesi lu emujete ka akimat ka ngesi ekisidi a ayarun keng. Kidungokini ngesi sua atamar etatama ngitunga ngakiro naajokak nabo atolimosi atamar ngesi lo aseu Akuj aliwor ekatubon ngakiro a ngulu eyarete ka ngulu atoaka. Eruorosi ngikadwarak a Akuj daang ngakiro keng ebaasi itwaan daang ni enupi ngesi, erimakinio ngasechesea keng kotere agogongu a ekiro keng.” Ani eringa Petero iruoro, toloma Etau a Akuj lotunga lu apupete ngakiro nguna. Nakaneni tatalasi ngikanupak Luyaudi lu apote alo Yopa ngakiro na etaanyunea Akuj ngibukui lu nyerai Ngiyaudi dang ainakinet a Etau keng. Kainyo eirarete kesi iruorosi a ngabukui anagelayek ipurosi apolou a Akuj. Dio Petero tolim tama, “Aanyut ngitunga lu Etau a Akuj loger lo kianyunea ngoni. Eyei tokona itwaan iratakini kesi nyiibatisae a ngakipi a?” Sodi todung ngesi atamar kibatisae kesi a ekiro a Yesu Kiristo. Dio tolimokis kesi Petero atamar topeyono ka kesi a ngirwa a ngidi. Kiirasi ngimeanara ka ngikanupak luche lu aya lowaitin daang a Yudea atamar aanyut ngibukui lu nyerai Ngiyaudi dang akiroit a Akuj. Na alosio Petero Yerusalem, kisuburata ngitunga lu abaasi ejoikinit ngibukui lu nyerai Ngiyaudi ilengerio tamasi, “Ipeyonit iyong anawi a ngibukui alu nyilengeritae nabo nyerai Ngiyaudi, be kimuja iyong tani ka kesi!” Sodi kisisak Petero kesi ngakiro daang na asubakin napei anakisiakinet tama, “Naelipitor ayong alore a Yopa, ataanyunga akisingolikinet a Akuj. Ataanyunga ayong ibore etiyaun, ekoni ibore ngini awaru naapolon, eyoliunitoe alowaitin a nguomwon anadis, sodi towo alo diyete kang. Esemok ayong tooma lokojokon sodi engolik ngibaren ka ngitieng a moding ka lu eliato ka ngikieny lu alomoding. Eira ayong etoil kalimokini tama, ‘Petero, tonyou taar sodi tanyam!’ Nakaneni atolim ayong atama, ‘Emam, Ekapolon! Nyenyama ayong nakanuan akimuj na nyitaleunitoe kori na inyasuna.’ Tolim etoil nabo anadis tama, ‘Wara nyiitama ibore ni ebala Akuj ejok be inyasuna.’ Tosubakin ngakiro nguna ngasubakinet ngauni, sodi tobuarae ngiboro ngulu daang nadis. Esaa lopei ngolo, todolut ngikiliok nguuni lu ameunitae nikang alo Kaisaria tanangut kai na ebooyo ayong. Katolimok ayong Etau a Akuj atamar kirukosi ka kesi nyiiwou alosit. Erukosi ayong ka ngikanupak lukan-kapei lu alo Yopa tanang Kaisaria. Sodi atolomasi sua daang kai a Korinelio. Kisisak ngesi sua eger lo aanyungarea ngesi emalaikat ewei alokai keng dio tama, ‘Tomea itwaan tolot Yopa ni eyei itwaan enyaritae Simon Petero. Kilimokini ngesi iyong ngakiro na kiyuunete iyong ka ngitunga a awi kon daang.’ Ani na alomakinea ayong akiruor, tolom Etau a Akuj nikech loger lokolong alomunea niyok anakisiakinet. Sodi etamu ayong nakolong alimuni ekapolon ebala, ‘Ebatisae Yoana a ngakipi, nakaneni kibatisao esi a Etau a Akuj.’ Kileereu dir atamar ainakini Akuj ngibukui lu nyerai Ngiyaudi ngulu ainakinet napei kiinakini ngoni na kinupea ngoni Ekapolon Yesu Kiristo. Arai ayong ngae, dikino asaki akiratakin Akuj?” Na eirareta kesi nguna, tojongoto akiburare dio kipuruut Akuj ebaasi, “Ikwa keinaki Akuj bo tani ngibukui lu nyerai Ngiyaudi alolom na elungeta ngasechesea kech sodi toyara!” Toloto ngikanupak ngiche lu ealarosi kotere aboliaro na esiakini na aarere Sitepano tananga Poinike ka Kupuro ta Antiok itatamete ngakiro nguna ani eya Ngiyaudi make. Nakaneni aya ngikanupak ngiche lu apote alo Kupuro ka Kurene, toloto kesi Antiok kitatama ani aya ngibukui lu nyerai Ngiyaudi dang, elimonokinete kesi Ngakiro Naajokak a Yesu Kiristo. Arukito kesi ka agogongu a Ekapolon, tonupa ngitunga lukaalak noi toreunos nia Ekapolon. Kiirasi ngikanupak lu aya Yerusalem ngakiro nguna. Sodi tomeasi kesi Barinaba tolot Antiok. Ani na adolio ngesi neni, sodi torukau Akuj kepia ngitunga, talakar ngesi noi kimaima kesi ebala torubakis jik iwapito Ekapolon na a iteni. Arai Barinaba itwaan niajokon ni eleleba Etau a Akuj nabo tonupite noi ngakiro a Akuj. Tachamut ngitunga lukaalak Ekapolon. Sodi tolot Barinaba Tariso tasaka Saul. Ani na eriamunotor ka ngesi, toriko Barinaba Saul toloto Antiok. A ekaru a epei, kiriamuunun kesi luarei ka ngikanupak, sodi kitatama ngitunga lukaalak. Antiok ngesi esiakinere anyarare ngikanupak Ngikiristoi. Ngirwa ngulu, tonyout ngikadwarak a Akuj ngiche alo Yerusalem toloto Antiok. Tonyou epei kech enyaritae Agabo todwar a agogongu a Etau a Akuj ebala emini eron a akoro nakwap wadaang. (Min akoro ngina na araakar Kilaudio ekapolon a Ngiroma.) Totiakut ngirukitos a Yesu atamar ejoikinit ipei kech daang elemuni ibore ni epedori alemun sodi kingarakinere ngikanupak lu alomito Yudea. Tosubakis kesi nguna loger ngolo. Ani erumor, nakis Barinaba ka Saul ngaropiyae tamasi inasi ngikasukou a ekanisa alo Yudea. Ngirwa lupei ngulu, tolomak ekapolon a akwap a Palestina lo enyaritae Erode, aboliar Ngikiristoi ngiche. Tolim ngesi atamar kichumae Yakobo lokaatokeng a Yoana a ekileng sodi taarae. Ani na engolikinea ngesi atamar ajoikis Ngiyaudi ngakiro nguna, dio ngesi atamar kirumutu Petero dang. (Asubasi ngakiro nguna ngirwa lu esukukuu a Ngamugati Anapadok.) Na erumunere Petero, toinikinae lojela ni eyokiyoto ngajorei ngoomwon a ngasigerea, aya ngitunga nguomwon najore apei a ngasigerea. Asaki Erode akirirare ngesi alongaren ngitunga adaunet a esukukuu a Adeparet. Sodi toinikinae Petero lojela, nakaneni elipito ngitunga a ekanisa Akuj lokojokon kotere ngesi. Nakwaare a akolongit ana adikino Erode ipudunio ngesi toriko ngaren ngitunga, aperi Petero alokiding ngasigerea ngaarei. Aenitae ngesi a ngiriko a ngiarei, nakaneni ayakasi ngasigerea nache lokidor a awas a ejela iyokiyete. Napei ngina, towo emalaikat a Akuj alo diyete keng. Tokwangu akicha alojela. Toting emalaikat eseget a Petero kitokienyu tama, “Tonyou atipei!” Talachunos ngiriko anakan a Petero tachakakinos kwap. Tolim emalaikat tama, “Toen aruba kon dio tanap ngamuk kon.” Kikok Petero neni. Dio tolimok ngesi emalaikat tama, “Kilogak eworu nakwaan kon bu kiwapak ayong.” Kiwapak Petero ngesi topudosi alojela peeyeni atamar erai dir ibore ngini emalaikat, abala ngesi kori etee ngakisingolikinet a Akuj. Kitoro kesi lokidor lo ekingaren alotooma ejela, kitoro tani lo a ngiarei, tanangut jik lokidor lo a ngasua lo epudorere nikalapatan tolomarere lore. Tangaar ekidor ngolo bon topudosi kesi nikalapatan. Kiwapakis kesi erot, ani napei ngina, toisik emalaikat Petero. Sodi toyen Petero ngakiro na asubakin anikeng tolim tama, “Ayen tokona atamar eraakasi ngakiro nu iteni! Ameuni Ekapolon emalaikat keng ayuun ayong nyekawan Erode kori nyeechanyu ibore daang ni esakete Ngiyaudi atamar katosubakinere ayong.” Na ayenea ngesi nguna, tolot nawi a Mariam, itiokeng a Yoana Mariko. Achunakina ngitunga lukaalak inaa ilipito. Kidongodongok Petero ekidor lo anikalapatan, sodi bu apese na arai akedalan a awi kangina anyaritae Roda angaar ekidor. Toyen ngesi etoil a Petero talakar noi tamatar tooma nyengaara ekidor, tolot tolimok ngitunga atamar ewei Petero anikalapatan. Tolimokis ngitunga ngesi tamasi, “Ekoe, abe kikoporito iyong ngikerep!” Nakaneni torubak ngesi ebala erai iteni. Sodi tatachut kesi tamasi, “Erai emalaikat keng.” Nakaneni torubak Petero jik idongidongi ekidor. Ani engaarete kesi ekidor, kingolikis ngesi sodi tatalasi kesi ngakiro nguna. Kikea ngesi akan esaki kesi kililinga. Sodi kisisak kesi eger lo epudunio ngesi Ekapolon alojela. Tolim tama, “Tolimokisi nugu Yakobo ka ngikanupak luche.” Dio torotok ngesi toten wache. Na ewalarea, tobul noi ngasigerea tolomasi angaya ebalasi, “Ekoe, anukiro kesubakin ani a Petero?” Todung Erode atamar tasakunae ngesi nakaneni tongop ngesi jik. Sodi tama ngesi kingichingichae ngasigerea ani erumor dio adungun atamar taarae. Arumoret kanguna, torotok Erode alo Yudea tolot akiboi mono alo Kaisaria. Angoikinit Erode ngitunga a ngirerea a Tiro ka Sidon. Sodi toloto kesi aapei aanyun ngesi, kisiaut mono kesi kisila ka Bilasito lo eyoki akai a ekapolon, esakete ngesi kingarak kesi. Dio toloto nia Erode tamasi kisaki esila ka ngesi kainyo aanyunete ngitunga a akwap kech akimuj anakwap ka Erode. Akolongit na aseunitae atamar iriemere, tanap Erode ngiworui lu eraakar ngesi ekapolon, kiboikin ngesi lokicholong lo eraakar ngesi ekapolon. Kisuruorik ngesi ngitunga. Tachalut ngitunga tamasi, “Meere itwaan iruoro, erai akuj.” Kitedekak emalaikat a Akuj Erode atipei tadakakin kwap kainyo nyitiliworo ngesi ekipur ngolo eka a Akuj. Tanyama ngesi ngikur totoan. Nakaneni torubak akiroit a Akuj ekeikina akwap daang kiatakin noi. Tobongut Barinaba ka Saul alo Yerusalem na arumoreta etich kech. Kirukut kesi ka Yoana Mariko. Ayakasi ngikadwarak a Akuj ka ngiketatamak lokanupak lu eya Antiok. Araakasi kesi Barinaba ka Simeon lo enyaritae nabo Lokirion ka Lukio lo abuni alo Kurene ka Manaen losek apolounete ka ekapolon Erode ta Saul. Ani na asubeeneta kesi etich a Akuj toroneenete akimuj, tolimok kesi Etau a Akuj tama, “Tosekinae ayong Barinaba ka Saul tosuba etich lo anyarakinit ayong kesi.” Toroneeneto kesi akimuj sodi kilipa, kidokokis ngakan nakies kech epiarito ani erumor kimiekis toloto. Na amearea Etau a Akuj Barinaba ka Saul, toloto kesi Seleukia. Kiwaaros a atubwa kaina tananga lokwar lo elukakina kiding anam na enyaritae Kupuro. Na adolioto Salami, kitatama akiroit a Akuj anakais a Atuk. Arukito kesi ka Yoana Mariko engarakinit kesi etich. Kitoro kesi kiding ekwar lo elukakina kiding anam ngina tanangut ni anyaritae Papo. Toriamut kesi ekekerian kaneni lo anyaritae Bari-Yesu, arai ngesi Eyaudit lo etingakina atamar arai ngesi ekadwaran a Akuj. Arai ngesi lopae keng a ekapolon a ekwar kangolo lo anyaritae Serigio Paulo, alo arai itwaan nikooson noi. Tanyarau ekapolon ngolo Barinaba ka Saul ni ayei ngesi kainyo asaki ngesi akiirar akiroit a Akuj. Nakaneni kitopeg kesi ekekerian enyaritae Elimas (enyaritae ngesi kongina a Ngagirik,) asaki ngesi ekapolon ngolo nyereeun toliwor Ekiristoit. Nakaneni Saul lo enyaritae nabo dang Paulo, tokienyik ekekerian ngolo lokojokon ileleba Etau a Akuj. Sodi tama, “Iyong lokookeng a Ekipe lo iremokino ibore daang ni ejok! Irono iyong noi imodeana, nabo isaki jiik akiloch ngakiro a Ekapolon na iteni toliworos alioko! Kirirae iyong Ekapolon tokona, imudukani iyong sodi nyianyunga akicha a apaaran a ngirwa.” Tarap ibore ni ikoni aribu ka eloch ngakonyen keng atipei, torotok ngesi itwapi tasak itwaan ni eriki ngesi akan. Na aanyungarea ekapolon ngolo na asubakin, tonup ngakiro a Akuj kainyo atalarito ngesi noi ngakiro na Ekapolon na etatamio. Ani alo Papo, todokasi Paulo ka ngirukitos keng natubwa kiwaaros tananga lore a Periga lo ayei Pamupulia. Toisik Yoana Mariko kesi kaneni sodi tobongo Yerusalem. Tonyout alo Periga tanangut lore a Antiok lo eyei Pisidia, ani akolongit na a Sabato, tolomasi kai a Atuk kiboikinos. Ani erumorete akisomare ngakiro Alotal a Musa ka ngagiran a ngikadwarak a Akuj, tomeasi ngikarikok a akai a Atuk itwaan nikech ebaasi, “Ngikaitotoi, kisaki sua esi kiruoro ka ngitunga keyei akiroit adio na ingarakineta esi kesi.” Tonyou Paulo kikea akan keng esaki ngitunga kililinga dio tolomak ekiruor tama, “Ngitunga kang a Isirael ka daang lu nyerai Ngiyaudi lu eya nege taraakas lu ilipito Akuj, topupokisi ngakiro kang! Aseuni Akuj a Ngisirael ta apayok kitogogong kesi noi na ebooyoto alo Misiri ana arai meere akwap kech. Kipud Akuj kesi anakwap a Misiri a agogongu keng, tanaik ngesi ngakiro kech anariet a ngikaru a ngitomwon-omwon. Tomunya ngesi ngibukui ngikan-kaarei lu aya nakwap a Kanaan dio akitiliwor ngitunga keng ngikulepek a akwap kangina. Asubasi ngakiro nguna daang a ngikaru a ngamiae a ngoomwon ka ngitomwon-kan. “Ani erumor, tosek kesi ngikatubok ngakiro tanang ngirwa lua ekadwaran a Akuj Samuel. Ani na atamareta kesi kisaki ekapolon, tosek Akuj kesi Saul lokookeng a Kichi lo a ekitela a Benjamen, toliwor ekapolon kech a ngikaru a ngitomwon-omwon. Alemaret kangolo, kitiliwo Akuj Daudi ekapolon kech. Tolim Akuj ngakiro a Daudi tama, ‘Aanyu ayong atamar erai Daudi lokookeng a Yese itwaan ni amina ayong. Erai ngesi itwaan ni esubi daang na asaki ayong tosub.’ Yesu lo arai ales a Daudi ngesi etiliwori Akuj Ekayuunan a Ngisirael loger losek echikakinitor ngesi. Ani eringa Yesu nyisiakina etich keng, etatami Yoana Ngisirael daang atamar ejoikinit ereunosi alosech kech sodi kibatisae. Ani na adikino Yoana erumorea etich keng, kingit ngitunga tama, ‘Ibalasi esi kori ayong ngesi ngae? Meere ayong ngesi lo idarito esi. Nakaneni topupokisi! Ebuni ngesi ekisidi kang, nabo nyitemokino ayong tani aliwor ekedalan keng atobutuunu ngamuk keng.’ “Ngisirael, lu iraakasi ales a Aburaam ka ngibukui daang lu nyerai Ngiyaudi lu eya nege ilipito Akuj. Erai niyok ngesi eyaunitae akiroit na ayuuno naga! Kainyo peayenete ngitunga lu alomito Yerusalem ka ngikarikok kech atamar erai ngesi Ekayuunan. Kori nyeyana kesi tani ngakiro na a ngikadwarak a Akuj na isomaanete ngirwa daang lua Sabato. Dio kiyookis kesi ngakiro na a ngikadwarak a Akuj ani erirata Yesu. Ani tani na angopikinea kesi ibore ni elimuneto atamar taarae ngesi, apot kesi tolimokis Pilato atamar taar ngesi. Ani na asubeta kesi ngakiro daang na igiritae atamar esubere ngesi, totiyaut ngesi anapir sodi tonuka. Nakaneni kiteyaru Akuj ngesi, tatakanuunu ngesi a ngirwa alukaalak ani eya lu kolong aloseenete ka ngesi alo Galilaya tanang Yerusalem. Eraakasi tokona kesi ngikaanyunak keng alotunga a Isirael. Kiya tokona sua nege alimokin esi Ngakiro Naajokak nakolong echikakini Akuj ta apayok atamar asubakini, asubaki tokona ngesi aniyok alu kirai ngalesea keng ani eteyarunea Yesu. Loger lo igiritere lokidor lo a ngiarei a akitab a ngieosio kona, ‘Irai iyong Lokookang, aliwor ayong Apakon akolongit na.’ Ngakiro nu ngesi alimuni Akuj kotere akiteyarun ngesi nyiinyasun, ‘Kapiari ayong esi dir a eger alo italeuno tarai lo a iteni, alo kolong echikakinit ayong Daudi.’ Aloger alo igiritere nagiran ngache atamar, ‘Nyichamuni iyong ekasuban etich kon lo etenoono inyasun.’ Kainyo asubi Daudi ibore daang ni asaki Akuj tosub eringa eyari. Ani erumor totoan, tonukakinae nalielin kata a apaakeng, tobos akwaan keng analiel kinyasun. Nakaneni nyesubakina nguna ani alo eteyaruni Akuj. Toyena dir ngikaitotoi kang atamar, erai Yesu ngesi kitatamere esi ngakiro na a arimakino ngasechesea. Nabo itwaan daang ni enupi ngakiro keng, elachakinio dir alosech kadaang alu peadikino etal a Musa kilachakinea esi. Tochoikinos robo sodi nyeesubakin na alimunete ngikadwarak a Akuj anikus ebalasi, ‘Abala ayong esi ngikemenyak a! Kitalarete esi ngakiro nu tobukoros! Kainyo ngakiro na tokona asubi ayong eraakasi na nyinupete esi, tani kisisak esi itwaan!’ ” Ani epudorete Paulo ka Barinaba anakai a Atuk, kimaimaa ngitunga kesi ebalasi tobongut nabo a Sabato na atupit ngina sodi tolimokineta kesi nabo ngakiro nguna. Ani na arotokinioto ngitunga alo kiriam kangolo, apot Ngiyaudi lukaalak ka ngibukui lu nyerai Ngiyaudi, lu areeun lodin a Ngiyaudi kiwapakis Paulo ka Barinaba. Kisuruoro kesi ngimeanara ingarakinito ebalasi echamit erubakinete akiboi anajokis a Akuj. Akolongit a Sabato na a ngaarei, pot ngitunga lukaalak noi alore kangolo akiirar ngakiro a Akuj. Na engolikineta Ngiyaudi asepich a ngitunga ngina, toting kesi etereku noi. Kiyenya kesi Paulo nabo kitopega ngakiro keng daang. Sodi kiruoro jik Paulo ka Barinaba a atitinyu tamasi, “Achamit akiroit a Akuj kilimokinio mono esi ekingaren. Nakaneni kona ingeritotor esi nabo itusubuna nyejoikinit esi ianyunete akiyar na nyedaun, kiisikini sua esi atoloto ni eya ngibukui lu nyerai Ngiyaudi. Kainyo etal logo ngesi kichikak sua Ekapolon Akuj kona, ‘Kaseu ayong esi kikokis akicha alobukui alu nyerai Ngiyaudi, toliworos erot a ayuuno a ngiwaitin kadaang a akwap.’ ” Na eirareta ngikubui lu nyerai Ngiyaudi ngakiro nguna, talakaros sodi kipuruut akiroit a Akuj. Ani lu aseunitae kotere akiyar na nyedaun, toliworos ngikanupak. Tokeikin akiroit a Ekapolon lowaitin daang a akwap kangina. Nakaneni kichuchukis Ngiyaudi ngikapolok a ere ka ngaberu nayanat na elipeenete Akuj na araakasi ngaka ngibukui alu nyerai Ngiyaudi. Tolomakis aboliar Paulo ka Barinaba kitwarakis anakwap kech. Tokurosi ngimeanara ngulu ngalup a ngakejen akamaluwot, kidodiu ibore ngini atamar esechito kesi dio toloto Ikonio. Alakara noi ngikanupak lu aya Antiok eleleba Etau a Akuj. Tosubakin na ikote napei nguna alo Ikonio, tolomasi Paulo ka Barinaba kai a Atuk kiruoro a atitinyu sodi tonupa Ngiyaudi lukaalak ka ngibukui lu nyerai Ngiyaudi ngakiro a Akuj. Nakaneni kichuchukis Ngiyaudi lu peanupito ngibukui lu nyerai Ngiyaudi kiteremokis ngikanupak. Kiboikinos ngimeanara inaa nikooyen. Kiruoro a atitinyu ngakiro a Ekapolon alo edodiuni atamar araakasi ngakiro na a ajokis a Akuj eruorosi kesi ngaka iteni ani aanyuneta kesi agogongu na esubeta ngakitoodikinet nakailiilok ka nakitalarete. Totiakas ngitunga a ere kangolo ngaarei, kibaka epewae alowae a Ngiyaudi, luche lowae a ngimeanara. Sodi ngibukui lu nyerai Ngiyaudi, imorikina ka Ngiyaudi aapei ka ngikarikok kech, totiakut atamar kiboliar ngimeanara emasa tani a ngamoru. Na eirareta ngimeanara ngakiro nguna, tonyout ikirikirasi toloto lorerea a Lusitura ka Deribe, lu eya nakwap a Lukonia ta ngakwapea nache na erikaunito ngina. Kitatama kesi kaina Ngakiro Naajokak. Alo Lusitura, ayei itwaan nikolong kidounio engwalit, nakaneni nyenyouno ngesi torotok nakanuan. Apupokinit itwaan ngini ngakiro a Paulo na etatamea. Tokienyik Paulo ngesi lokojokon ani eyenuni atamar enupit itwaan ngini epedori ajoker, kirema tama, “Tonyou towo!” Tonyou itwaan ngini dio arotokin. Ani eanyungari asepich a ngitunga kangulu na asubakini Paulo, tolomakis achala a ngabukui kech eraakasi Ngalukoniae tamasi, “Ekokis ngakujo ngitunga apot niyok!” Tolimokis Barinaba ekiro be Seus, ani Paulo, tolimokis ekiro be Erimes kainyo ngesi etenikinit eruoro. Abu emuron a akuj anasubuna be Seus ana achadakina akai keng nikalapatan a ere, yau ngimongin ka ngatur a ngikito lokidor kainyo asakete ngesi ka ngitunga alemikin ngimeanara ngakipeyos. Na eirareta Barinaba ka Paulo na asakete kesi asubakin, tochilichilaasi ngiworui kech tamataros tolomasi tooma nasepich a ngitunga echalasi ebalasi, “Nyo isubeta esi nu? Kirai sua dang ngitunga loger kus! Kiponit sua nege alimor Ngakiro Naajokak, areeun esi aloborei alu pasiek kalu pot nia Akuj ana eyari, ana kolong asubi adis ka akwap ka anam ta ngiborei daang lu eya nikech. Kolong kanuan, achamakinit ngesi ngitunga daang tosuba nguna ejoikinito kesi. Nakaneni edodiuunu ngesi ngirwa daang atamar ekoni ngesi aliwae kotere naajokak na esubeene ngesi kotere esi. Itetepi akiru anadis, eya ngirwa lu ilemeta esi ngamanat, ianyunete esi akimuj nabo talakaros ngitai kus.” Tani na alimunioto ngakiro nguna, ationo anikech akiratakin ngitunga ngulu nyeelemikis kesi ngakipeyos. Pot Ngiyaudi ngiche alore a Antiok alo a akwap a Pisidia ka ere a Ikonio. Kisupa kesi ngitunga kibaka ka kesi. Sodi kimasa kesi Paulo a ngamoru kiriyasi ngesi tochadasi alore ebaasi kori ketoana. Nakaneni ani echununosi ngikanupak kiriama ngesi, tonyou ngesi dio tobongo lore. Akolongit na atupit ngina, tonyout ngesi ka Barinaba toloto Deribe. Kitatama Paulo ka Barinaba Ngakiro Naajokak alo Deribe sodi tonupa ngitunga lukaalak ngakiro a Yesu. Ani erumor tobongosi kesi Lusitura ka Ikonio ta lore a Antiok lo eyei nakwap a Pisidia. Kitogogongo kesi ngikanupak ichikichikete atamar torubakis enupito Akuj na iteni. Kitatama kesi ebalasi, “Kianyuni ngoni ngichan lukaalak sodi atolomareta Napolou a Akuj.” Toseut kesi ngikasukou alokanisae kadaang kilipanakis Akuj eroneenete, ani erumor kimiekineta kesi Ekapolon lo egienokino kesi. Kitoro kesi nakwap a Pisidia, tanangut Pamupulia. Arumoret akitatam alore alo enyaritae Periga, toloto kesi Atalia. Kiwaaros a atubwa kaina tobongosi Antiok, nisek emiekinere kesi tochoik Akuj a ajokis keng kotere etich lo tokona arumorete kesi. Na adolioto kesi Antiok, tochunakis ngitunga a ekanisa daang wapei sodi tolimokis kesi ngakiro daang na asubi Akuj anikech ka eger lo etunupea ngesi ngibukui lu nyerai Ngiyaudi ngakiro a Akuj. Kiboikinos kesi ka ngikanupak kaneni nikooyen. Pot ngitunga ngiche alo Yudea tanangut Antiok dio tolomakis akitatam ngikanupak ebalasi, “Nyikiyuunio esi jik mati kilenger loger lo igiritere Lotal a Musa.” Kiburata kesi noi ka Paulo ta Barinaba kotere ngakiro nguna. Sodi totiakunae atamar ejoikinit Paulo ka Barinaba ta ngikanupak lu a Antiok epewae eloose Yerusalem sodi taanyut ngimeanara ka ngikasukou kotere ngakiro nguna. Tomeasi kesi ngitunga a ekanisa. Ani na alooso kesi itorito Poinike ka Samaria, tolimosi eger lo areunotor ngibukui lu nyerai Ngiyaudi nia Akuj. Talakaros ngikanupak noi kotere ngakiro nguna. Na adolunioto kesi Yerusalem, kipeyout kesi ngitunga a ekanisa ka ngimeanara ka ngikasukou a ekanisa. Tolimokis Paulo ka Barinaba kesi ngakiro daang na asubete kesi ka Akuj aapei. Nakaneni tonyout ngikanupak ngiche lu eraakasi ngika a atukuoru a Ngiparisayo tamasi, “Ejoikinit ngibukui lu nyerai Ngiyaudi ilengerio, dio tolimokinae atamar kiwapa etal a Musa.” Tochunakinos ngimeanara ka ngikasukou aripun akiroit ngina. Arumoret a ekiruor alokooyen, tonyou Petero towo tama, “Ngikaitotoi kang, iyenete esi atamar ngirwa lukaalak ngoon adaunosi, kaseuni ayong Akuj anikus sodi etatam Ngakiro Naajokak alobukui alu nyerai Ngiyaudi sodi kiirareta kesi ngakiro a Akuj tonupa. Sodi Akuj na eyeni ngitamen a itwaan kadaang, kidodiu atamar ejoikinit ngibukui lu nyerai Ngiyaudi dang enupete ani etaanyunea kesi Etau a Akuj loger lo kitaanyunea ngoni. Nyetiaka ngesi ngoni ka kesi, arimakini ngesi ngasechesea kech ani anupeta Ngakiro a Akuj. Nyo tokona isaketa esi akining Akuj ani iaseta ngakiro nakagogongok ikote eegos lokanupak? Ikwa kolong peakuruworete ta apayok ka ngoni dang akirichun ngakiro na ikote eegos nguna? Meere kongina! Kinupi ngoni ngakiro a Akuj sodi kitoyuun a ajokis a Ekapolon Yesu, loger lo enupeta kesi dang.” Kililinga ngitunga daang alokiriam chek epupokinito Paulo ka Barinaba isisaunito ngakiro daang nakailiilok ka nakitalarete na asubete kesi ka Akuj aapei alobukui alu nyerai Ngiyaudi. Na arumoreta kesi ekiruor, kiruorik Yakobo tama, “Topupokisi mono esi ngakiro kang ngikaitotoi kang! Esisau tokona Simon eger lo esiaunea Akuj kidodiu amina keng alobukui alu nyerai Ngiyaudi ani aseunea anikech ngitunga lu eliworosi ngikeng. Nakaneni eraakasi ngakiro a ngikadwarak a Akuj ngapei ka nguna, loger lo igiritere kona, ‘Ebala Ekapolon, arumoret kanguna, abonguni, sodi atobuu apolou a Daudi. Adukokini akai keng na enyasun, sodi etenik nabo togogonger. Sodi poneta ngitunga daang nikang, ngibukui daang lu nyerai Ngiyaudi lu anyarau ayong tarata ngikang. Ebala Ekapolon neni lo kolong etaanyuni ngitunga ngakiro nu a angorot.’ ” Keatak Yakobo tama, “Tokona, engolikinit ayong atamar ejoikinit pekichani ngibukui lu nyerai Ngiyaudi lu ereeunosi nia Akuj. Nakaneni egirakisi kesi abarua atamar nyeenyam akimuj daang na inyasuna ani eraakar aka amuronot. Tochoikinos alomalaanu ka elomit. Nyeenyam etiengit lo amiedio. Nyeenyam ngaakot. Kainyo esomae etal a Musa nikooyen anakais a Atuk ngirwa daang a Sabato nabo etatam ngakiro a etal alorerea kadaang.” Apot ngimeanara ka ngikasukou a ekanisa ta ngitunga daang a ekanisa, totiakut atamar kiseuni ngitunga alokiriam kangolo sodi tomearae kirukosi ka Paulo ta Barinaba toloto Antiok. Toseut kesi ngikiliok ngiarei lu ayenikinitae alokanupak, araakasi kesi Yuda lo anyaritae Barisaba ta Sila. Tomeasi kesi nakis abarua na egiritae kona, “Sua ngimeanara ka ngikasukou a ekanisa lu kirai talokaatokus, kimalae esi ngikaitotoi lu nyirai Ngiyaudi lu iyakasi lore a Antiok ka ngakwapea a Siria ta Kilikia. Kiira sua atamar kichanete esi ngitunga ngiche lu apote anikosi kisialolong esi a ngakiro ana eruorosi kesi. Nakaneni emam ngakiro kilimokinit sua kesi. Nakaneni kiriama tokona sua kichamakin daang aapei aseun ngitunga atomeutu nikus. Irukunete kesi ka Barinaba ta Paulo lu kimina sua noi. Ejalito kesi akiyar kech ani esubeta etich a Ekapolon yok Yesu Kiristo. Kimeunit tokona sua Yuda ka Sila lu kisisakinete esi ngakiro napei kigirit sua nu. Kidodik sua Etau a Akuj atamar nyikiatakini esi ngakiro ngache nakationok ikote eegos mati ngitalio lu make, lu echamit esi irichunete. Nyiinyam akiring na emurotere. Nyiinyam ngaakot. Nyiinyam akiring a ibarasit ani emiedio. Tochoikinos alomalaanu ka elomit. Eliwor iwapito esi na eriyan erai kichoikis esi nyiisuba nguna. Kibooyoto niajokon.” Tomearae ngitunga ngulu toloto Antiok ni achunakineta kesi ngikanupak daang sodi nakis abarua ngina. Na esomaata ngitunga abarua ngina, talakaros noi kotere ngakiro na engarakinete kesi nguna. Yuda ka Sila lu araakasi kwasiarei ngikadwarak a Akuj kiruoro ka kesi akooyen ingarakinito kesi a ngakiro a Akuj kitogogongo. Ani arumoret akiboi kaneni nikooyen, kimiekis ngikanupak kesi toloto a ekisil sodi tobongosi ni aya lukolong ameunete kesi. [ Nakaneni kidong Sila neni.] Kibooyoto Paulo ka Barinaba alo Antiok. Kimorikin kesi ka luche lukaalak kitatama ka akiruoro akiroit a Ekapolon. Adaunet a ngirwa a ngiche, tolimok Paulo Barinaba tama, “Potu atobongosi ataanyutu ngikaitotoi yok alore kadaang alo kolong kitatamea ngoni akiroit a Ekapolon sodi ataanyutu eger lo erubakinitotor kesi enupito.” Asaki Barinaba kirukosi kesi ka Yoana Mariko, nakaneni kingolik Paulo atamar nyejoikinit Yoana Mariko irukorete ka kesi kainyo abongi kolong sek ngesi toisik kesi alo Pamupulia. Awouni ngesi akiruk ka kesi tanang etich edaun. Kiburata kesi lokojokon kotere ngakiro nguna totiakas. Toriko Barinaba Mariko kiwaaros toloto Kupuro. Toseu Paulo Sila, ani arumoret a ngimeanara alimokin kesi atamar taanyut ajokis a Akuj, torotokis. Kitor ngesi Siria ka Kilikia, ingaranakini ngitunga a ekanisa a ngakiro a Akuj. Tolot Paulo tanang Deribe ka Lusitura ni alomit ekiristoit anyaritae Timoteo. Arai itiokeng dang akiristoit na arai Ayaudit, tarai apakeng Egirikit. Ngikanupak daang lu ayakasi Lusitura ka Ikonio epurosi Timoteo noi. Kona asakea Paulo akirik Timoteo, abu kilenger ngesi kainyo ayenete Ngiyaudi daang lu alomito nalup nguna atamar arai apakeng a Timoteo Egirikit. Na etorioto kesi lorerea, tolimokis ngikanupak ngitalio lu adungunete ngimeanara ka ngikasukou a ekanisa alo Yerusalem atamar kirichakinae, sodi tolimokis kesi ngimeanara atamar kiwapa ngitalio ngulu. Sodi kingarakinos noi ngitunga a ekanisa alopit a anupit kech nabo kiatanakinos ngirwa daang talalaketa. Kitoro kesi nakwapea a Pirugia ka Galatia kainyo eratakini kesi Etau a Akuj nyiitatam ngakiro a Akuj anakwap a Asia. Na anangeta kesi lokukuor lo asalunitor Musia, tasaka alomar nakwap a Bitunia. Nakaneni kitonger kesi Etau a Yesu. Sodi kidirasi kesi kitoro Musia, toloto Turoa. Nakwaare a akolongit kangina, taanyunga Paulo itwaan a akwap a Makedonia anakisingolikinet a Akuj ewei imaimai ngesi ebala, “Bua kare Makedonia kingarakinae sua!” Napei aanyungarea Paulo ngakisingolikinet a Akuj nguna, atosubakin sua atonyoutu atoloto Makedonia kainyo kipotu atotiakutu atamar kinyara sua Akuj etatama Ngakiro Naajokak alotunga a akwap kangina. Atodoka sua atubwa alo Turoa ewaaros jik atananga Samoturake. Ani akolongit nache, atananga Nepoli. Ani kirotokini kaneni, atananga Pilipi lo erai ere loapolon lo ibakit alowae kangolo a akwap a Makedonia. Erai nabo dang akwap ngina na epolokinito Ngiroma. Eboyoto sua ngirwa ngikaalak kaina. Akolongit na a Sabato, atopudosi sua alokidor a alaar a ere atoloto lokwaas a angolol. Kibala sua kori eyei neni ni achunakina Ngiyaudi ilipito Akuj. Eboikinos sua eana ka ngaberu na achunakina neni. Ngipei a ngitunga alu apupete ngakiro kosi ngesi Ludia na abunit alore a Tuatira. Agielanari ngesi ngiworui lupus-kirionok. Arai ngesi aberu na elipeene Akuj. Tangaa Ekapolon ngitamen keng sodi topupok ngakiro na eruoro Paulo tonup. Arumoret a akibatisare ngesi ka ngitunga a awi keng, kitolimok ngesi sua tama, “Ani kingolikinito esi dir atamar anupit ayong Ngakiro a Ekapolon, potu apana nawi kang.” Kimaima sua atoloto. Akolongit apei na kilosio sua ni ilipeenere Akuj, eriamun ka apese na arai akedalan na akoporito ngikerep lu etodwarete ngesi ngakiro namonan esubakin. Aanyuniyete ngitunga lu arikito apese ngina ngaropiyae nakaalak ani adwarea ngesi ngakiro. Kiwapak ngesi Paulo ka sua echala ebala, “Eraakasi ngitunga lu ngikasubak etich a Akuj ana Epolot Noi! Kilimonokinete kesi esi eger lo iyuunotor!” Ekoanakini ngesi neni ngirwa ngikaalak. Ani apei kwaar, takadakis Paulo ngakiro nguna noi torei tolimok ngipean lu akoporito apese ngina tama, “Kadungokinit ayong esi a ekiro a Yesu Kiristo atamar topudutu anapese kana!” Topudut ngipean anapese kangina esaa lopei ngolo. Na ayenuneta ngitunga lu arikito apese ngina atamar atoania erot losek aanyununeta kesi ngaropiyae, kirumut Paulo ka Sila. Kiriyasi kesi ngaren ngikapolok lukatubok ekies lu aya ni agielanarere ngiboro. Torikut kesi lokatubok ngakiro alu araakasi Ngiroma tamasi, “Eraakasi ngitunga lu Ngiyaudi nabo ichanete kesi ngitunga alore kosi. Itatamete kesi ngitalio lu nyikichamakinitae sua Ngiroma kirichuni kori kiwapi.” Tonyoik asepich a ngitunga daang akidet Paulo ka Sila. Sodi tochilichilaasi ngikatubok ngakiro ngiworui a Paulo ka Sila nabo todungut atamar kidetae kesi a akulit. Ani kides lokojokon kerumor, toinikinae lojela. Todungokinae asiger a ejela atamar tochoik kesi lokojokon noi. Na adungokinere ngakiro nguna, toinik asiger a ejela kesi kai na alotooma ejela. Toinik ngakejen kech nakito nalangir naapotiok. Na aapikinea kiding akwaar, elipito Paulo ka Sila nabo aeosi ngieosio a Akuj. Apupete ngitunga luche lu aenitae ka kesi ngieosio kech. Napei ngina, tamaranik akwap noi tamaranik tani ni adukokinitae ejela. Tangaaros ngidorin daang atipei nabo tachakun ngiriko alotunga kadaang alu aenitae. Ani ekienyuni asiger a ejela torukau ngidorin daang engaara, tama ngesi kori kesiwa ngitunga lu aenitae daang. Tout ngesi ekileng keng tasak akichumakin. Nakaneni tachalak Paulo irema ebala, “Wara nyiiwana! Kiya sua daang nege!” Tolimok asiger itwaan atamar kainu ataa. Tamatar asiger tooma tadakakin diyete nakejen a Paulo ka Sila emarani. Sodi toriko asiger kesi nikalapatan kingit tama, “Ngikiliok, ekokini ayong aanyuni ayuuno ai?” Tatachakis tamasi, “Tonup ngakiro a Ekapolon Yesu, nakaneni iyuun iyong aapei ka ngitunga a awi kon.” Sodi tolimokis ngesi ka ngitunga daang lu aya nawi keng Ngakiro a Ekapolon. Esaa lopei ngolo nakwaare, toriko asiger kesi kilota ngajemei kech. Kibatisae ngesi atipei ka ngitunga a awi keng daang. Sodi toriko ngesi Paulo ka Sila nawi keng nak akimuj tanyama. Talakaros ngesi ka ngitunga a awi keng ani anupeta ngakiro a Akuj. Ani iwalari, tomeut ngikatubok ngakiro ngasigerea ebalasi, “Kimiekisi ngitunga ngulu toloto.” Tolimok asiger a ejela Paulo ngakiro nguna tama, “Ameut ngikatubok ngakiro itwaan ebaasi kitalachakin iyong ka Sila. Topudosi robo toloto niajokon.” Nakaneni tolimok Paulo kesi tama, “Kideese kesi sua pas alongaren ngitunga. Amam ibore nikisech sua nabo kirai sua Ngiroma. Dio kitoenikis kesi sua lojela. Esakete tokona kesi alachakin sua ekiilingat. Emam! Kimiekisi kesi pot kipudosi sua.” Toloto ngasigerea na ameunitae tolimokis ngikatubok ngakiro nguna. Toema ngikatubok ngakiro na eirareta atamar erai Paulo ka Sila Ngiroma. Sodi toloto kesi todiaka Paulo ka Sila esakete torimakis kesi. Ani erumor torikosi kesi alojela tolimokis atamar toloto wache. Torotokis Paulo ka Sila alojela toloto nawi a Ludia. Torukaut kesi ngikanupak kaneni, kisuruoro ngakiro a Akuj na ingarakinete, ani erumor torotokis. Torotokis kitoro Amupipolia ka Apolonia tanangut Tesalonike ni ayei akai a Atuk. Tolot Paulo kai a Atuk lopit lopalem sek. Topegas ngesi ka ngitunga kaneni a ngirwa a nguuni alu enyaritae ngasabatoi ka akisisaun ngagiran nabo kidodik kesi atamar ajoikinit Kiristo eboliare ani erumor toyaru. Tolimok Paulo kesi tama, “Yesu lo kalimokinit ayong esi ngakiro keng lo, ngesi erai Kiristo.” Tonupa epewae kech ngakiro nguna sodi kibaka alowae a Paulo ka Sila. Tonupa tani ngaberu na ayenikinitae nakaalak ka Ngigirik lukaalak lusek elipito Akuj. Nakaneni toting Ngiyaudi etereku. Tochunakis ngitunga lu elato pas alorotin toliwor ibore ajore. Kitachalut kesi ngitunga a ere daang. Toremo kesi awi a itwaan ani enyaritae Yason, esakete aanyun Paulo ka Sila torikut nikalapatan ni aya ngitunga. Ani na angopikineta Paulo ka Sila kesi, kiriyasi Yason ka ngikanupak ngiche lokapolok a ere echalasi ebalasi, “Ngitunga lu ebelukwaasi akwap daang lugu, apot tokona nege. Etepeyon Yason kesi anawi keng. Esechito kesi daang ngitalio a ekapolon a Ngiroma ani ebalatar abe eyei ekapolon eche lo enyaritae Yesu.” Tachalut ngitunga ka ngikapolok a ere na eirareta ngakiro nguna. Kitolemut ngikapolok a ere Yason ngaropiyae na asakitae sodi talakakinere kesi, ani erumor, talakakinae kesi toloto. Ani napei eliwor akwaar, tolimokis ngikanupak Paulo ka Sila atamar toloto Berea. Na anangeta neni, tolomasi kai a Atuk. Aminasi ngitunga kaneni akiirar ngakiro peekote lu aya Tesalonike. Eitanito kesi noi ngakiro na apupete. Kisomata kesi ngagiran ngirwa daang esakete akiyen keraakasi ngaka iteni ngakiro na eruoro Paulo. Tonupa ngikaalak ngakiro a Akuj. Tonupa ngaberu a Ngigirik nakaalak na erimae ka ngikiliok a Ngigirik dang lukaalak. Nakaneni ani iirarete Ngiyaudi lu aya Tesalonike atamar itatami nabo Paulo ngakiro a Akuj alo Berea, toloto inaa sodi tolomakis akichuchere ka akichuum ngitunga. Torikosi ngikanupak ngulu Paulo atipei tolot nakan na a ekwaas a anam. Nakaneni kidongo Sila ka Timoteo Berea. Tananga ngikanupak lu etenarito Paulo Atene. Ani erumor tobongosi Berea alimokin Sila ka Timoteo atamar esaki Paulo kesi toloto ni eyei ngesi atipei. Ani eringa Paulo idarit Sila ka Timoteo alo Atene, toriaba noi ngakiro a ngakujo anasubuna ana eleleba lore ngolo. Topega ngesi ka Ngiyaudi ta ngibukui lu nyerai Ngiyaudi lu elipeenete Akuj alokai a Atuk. Topega ngirwa daang tani ka ngitunga lu aponeenete ni agielanarere ngiboro. Topega ngesi ka ngiketatamak ngiche enyaritae Ngipikuro ka Ngisitoik kingitas ngiche kech tamasi, “Abe abaangu ani mono esaki lo alimun?” Tatachut luche tamasi, “Abe esibit bo iruoro ngakiro a ngakujo peyok.” Alimuunete kesi nguna kainyo etatami Paulo ngakiro a Yesu ka akiteyaruno. Kirumut kesi Paulo torikosi Natuk na eriamit moru lo enyaritae Areopago. Sodi tolimut tamasi, “Kisaki sua atoyena akitatamet nakitetet ilimit iyong naga. Ngakiro ngache na iruoro iyong, nyiirara sua a ache nakaneni kisaki atoyena eger kech.” ( Ngitunga a akwap a Atene ka ngitunga lu nyerai ngika a akwap kangina lu alomito neni, aminasi noi ekiruor jiik ka akipup ngakiro nakiteat.) Towo Paulo alongaren ngitunga a Atuk tolim tama, “Ayen ayong atamar alopit kadaang, ikerito esi ngitunga a Atene ngakujo nasubuna. Alimunit ayong nguna kainyo na alosio ayong alore kus, ni ilipeeneta esi ngakujo nasubuna, atorukau ekeno lo ipeyonokinere Akuj lo egiritae ngakiro nu, ‘NIA AKUJ ANA NYEYENIO.’ Nakaneni ngina tokona ilipito esi peiyenete ngesi ketatami ayong esi. Akuj nakolong asubi akwap ka ibore daang ni eyei nakwap, kona eraakar ngesi Ekapolon a adis ka ngalup, nyibooyi anakais ana edukete ngitunga. Emam ibore esubanakinete ngitunga ngesi kainyo emam ibore ichana ngesi. Erai tani ngesi nabo itaanyunit ngitunga daang akiyar ka akianga ta ibore daang. Asubuni ngesi ngibukui daang a ngitunga anitwaan a ipei sodi kitolom kesi lowaitin daang a akwap. Aree kolong ngesi ekingaren etiae a ngikaru kech ka ngiwaitin lu elomete ngibukui. Ekokini ngesi neni sodi tasaketa kesi Akuj, dio kiyookinotor erai itwangete esakete ngesi. Tani ikoni neni dang, nyelona Akuj aniyok kadaang, kona alimunio itwaan ebala, ‘Nikeng ngesi kiyarea ngoni, nabo atoloose ka ayakau.’ Loger lopei alimunioto ngikegirak kus ngiche a ngieosio ebalasi, ‘Kirai ngoni dang ngalesea keng.’ Kona kiraakar ngoni ngalesea a Akuj, nyejoikinit ngoni kitami atamar kori ikoni Akuj egolit, kori akwangat na elalak ngaropiyae kori amoru na itiakitae a ekunonoonu ka aosou a ngitunga. Nyimarit Akuj ngikaru lu peayeneta ngesi ngitunga. Nakaneni adungoki tokona ngitunga daang awadaang atamar tolunga ngasechesea kech. Kainyo aseu ngesi akolongit na irira ngitunga daang a akwap alorot alo eriyan. Erai itwaan ni aseu ngesi irirae ngitunga a akwap. Etunup ngesi ngitunga daang ngakiro nguna ani eteyarunea itwaan ngini!” Ani iirarete kesi ngakiro a ayaruni, tokienatar ngiche kech ngesi, nakaneni tolimut epewae tamasi, “Kisaki sua eirasi iyong nabo iruoro ngakiro nguna.” Sodi torotok Paulo alokiriam kangolo. Pot ngitunga ngiche kiruko ka kesi tonupa ngakiro a Akuj. Ipei kech anyaritae Donisio lo arai itwaan a Atuk ka aberu enyaritae Damari ta ngitunga luche. Arumoret kanguna, torotok Paulo alore a Atene tolot Korinto. Kiriamun ngesi ka Eyaudit lo enyaritae Akula kaneni lo edounitoe anakwap a Ponto. Aringa sek ngesi epote ka aberu keng na anyaritae Prisila, apote kesi anakwap a Italia kainyo adungunit ekapolon a Ngiroma lo enyaritae Kaisari Kilaudio atamar torotokis Ngiyaudi daang alo Roma. Tolot Paulo aanyun kesi, sodi kibooyoto aapei ka kesi kainyo arai ayaritotor kesi daang ngieman lu asubeenete togielanasi. Apegaanasi Paulo ka ngiche alokai a Atuk ngirwa daang lu eraakasi ngika Sabato, esaki akitunup Ngiyaudi ka Ngigirik ngakiro a Akuj. Na adolunioto Sila ka Timoteo alo Makedonia, tolomak Paulo akitatam ngakiro a Akuj ngirwa daang. Kidodenak Ngiyaudi atamar Yesu ngesi erai Kiristo. Na etopegeta kesi ngesi tolomakis akimeny ngesi, dio kidodiu atamar angerit ngakiro nguna a akilakalakaar ngiworui keng sodi tolimok kesi tama, “Ani kibukorosi esi, eliworosi ngakiro nguna ngaka a akibuu kus! Emam na kapaikinio ayong. Alosi tokona ayong jik lobukui lu nyerai Ngiyaudi.” Sodi torotok ngesi kaneni tolot kiboi anawi a itwaan ani nyerai Eyaudit enyaritae Tito Yusuto. Elipeene ngesi Akuj nabo ayei akai keng diyete akai a Atuk. Abu Kirispo lo arai ekapolon a akai a Atuk tonup ngakiro a Akuj ka ngitunga a awi keng daang. Topupokis Ngikorintoi ngiche dang ngakiro a Paulo, tonupa sodi kibatisae. Akolongit apei nakwaare, taanyunga Paulo akisingolikinet a Akuj. Anakisingolikinet kangina, tolimok Ekapolon Paulo tama, “Wara nyiem, torubak iruoro nabo wara nyiililing, kainyo kirukit ayong ka iyong. Emam itwaan kiwani iyong kainyo elalak ngitunga kang lu eya lore lo.” Sodi kiboi Paulo kaneni ekaru epei ka ngilapio ngikan-kapei, itatami ngitunga akiroit a Akuj. Na araakar Galio ekapolon a akwap a Akaya, kiriamariama Ngiyaudi kirumut Paulo torikosi nitubet ekies akititare. Tamasi, “Isupi itwaan en ngitunga esaki kilipa Akuj a erot alo nyechamakinitae Alotal!” Ani eringa Paulo nyiruorikina, tolimok Galio Ngiyaudi tama, “Arai tarai ibore en ni esechit itwaan idiobore kori ichwangakinit, kejoikinit ayong anaikini ngakiro nakus esi Ngiyaudi. Nakaneni kona ipegatar esi ngakiro ka ngirora lu eraakasi ngika a etal kus, torumosi esi ngikulepek ngakiro nguna. Nyaliwor ayong ekatubon a ngakiro ana ikote nguna!” Kitwarak ngesi kesi a nitubet ekies. Kirumut kesi daang Sositene lo arai ekapolon a akai a Atuk kibungata alongaren nitubet ekies. Nakaneni nyemisikina Galio ngakiro nguna tani wadiochichi. Kiruko Paulo ka ngikanupak lu aya Korinto ngirwa ngikaalak. Ani erumor totiakas ka kesi, todokasi ngesi ka Prisila ta Akula natubwa kiwaaros Siria. Ani eringa nyedokara natubwa alore alo a ekwaas a anam ana anyaritae Kenikirea, totuboe ngitim keng kotere ngakiro nasek echikakinit ngesi Akuj. Na anangeta Epeso, toisik Paulo Prisila ka Akula kaneni. Toloma ngesi kai a Atuk topega ka Ngiyaudi. Tolimokis ngitunga ngesi atamar kiboikin neni nikooyen nakaneni towou ngesi. Tani ikoni neni, tolimok ngesi kesi na anyounio tama, “Ani kerai echami a Akuj, abonguni ayong nege.” Sodi todoka ngesi natubwa alore alo a ekwaas a anam enyaritae Epeso. Na anangea ngesi Kaisaria, tolot Yerusalem sodi kimala ngitunga a ekanisa ani erumor tolot Antiok. Ekisidi a aperor inaa ngirwa ngikaalak, torotok sodi kitor Galatia ka Pirugia itogogongi ngikanupak daang a ngakiro a Akuj. Ngirwa ngulu, abu Eyaudit lo enyaritae Apolo lo edounitoe alo Alekisandaria, bu Epeso. Ayenikinitae ngesi noi a ekiruor, nabo ayeni ngagiran lokojokon. Etatamitae ngesi noi epit a Erot a Ekapolon. Kiruor ngesi ngakiro a Yesu esibit ebobokinito ngesi ngakiro nguna noi. Kitatam ngesi ngakiro a Yesu kiyoonok tarai bo akibatisare a Yoana bon ngesi ayeni ngesi. Tolomak ngesi akiruor a atitinyu alokai a Atuk. Naeirareta Prisila ka Akula ngakiro keng, torikosi ngesi nawi kech kisisakis ngesi lokojokon epit a Erot a Akuj. Sodi totiaku Apolo atamar alosi Akaya, kingarakis ngesi ngikanupak lu aya Epeso ani egireta abarua nia ngikanupak alu aya Akaya atamar kipeyout ngesi. Na anangea inaa, kingarak noi lu aliworosi ngikanupak kotere ajokis a Akuj. Kainyo etepegi ngesi Ngiyaudi niationon kidwang alongaren ngitunga. Kidodenak kesi dir ani egiritae nagiran atamar erai Yesu Kiristo. Ani eringa Apolo eyei Korinto, torotok Paulo toped akwap na alona alokwaas a anam sodi tanangu Epeso. Torukau ngesi ngikanupak ngiche kaina kingit tama, “Ianyut kolong esi Etau a Akuj na kolong inupeta?” Tatachut kesi tamasi, “Nyiirara sua tani atamar eyei Etau a Akuj.” Kingit Paulo kesi tama, “Ani kibatiso kolong kibatisao esi?” Tatachut kesi tamasi, “Kibatisao sua akibatisare na a Yoana.” Tolim Paulo tama, “Erai akibatiso a Yoana aka lu alungete ngasechesea kech. Sodi tolimok ngesi Ngisirael atamar tonupa ngakiro alo etupuuni ngesi, ngesi atamar, tonupa ngakiro a Yesu.” Ani iirarete kesi nguna, kibatisae kesi a ekiro a Ekapolon Yesu. Kidokok Paulo ngakan keng nakies kech, sodi taanyut kesi Etau a Akuj. Kiruoro kesi a ngabukui anagelagelae. Sodi tolimosi tani akiroit a Akuj. Araakasi kesi daang ngikiliok esibit ngitomon ka ngiarei. A ngilapio a nguuni, aloseene Paulo kai a Atuk kiruoro ka ngitunga etitiny ngesi. Eaneenete ngesi ka kesi esaki akitunup kesi ngakiro a Apolou a Akuj. Nakaneni echanaka ngiche kech, towout akinup. Sodi kimenya kesi alongaren ngitunga daang kotere epit a Erot a Ekapolon. Sodi totiakas Paulo ka kesi toriko ngikanupak toliwor isuruori ngirwa daang anakai anakaaloman a Turano ana etatamere ngitunga. Torubak ngesi ikoni neni a ngikaru a ngiarei. Sodi ngitunga daang lu alomito nakwap a Asia, Ngiyaudi ka ngibukui lu nyerai Ngiyaudi, apot kiirasi ngakiro a Ekapolon. Asubi Akuj ngakitoodikinet nakailiilok nabo tarai naparing anakan a Paulo. Tolemuunut ngitunga ngawarui nasek atingeene ngesi ka na asubeenea etich yaasi lokadekak. Sodi tojoketa ngikadekak nabo topudosi ngipean anikech. Apot Ngiyaudi ngiche lu erimito akwap itwaranakinete ngipean tasaka akitwarakin ngipean elimito ekiro a Ekapolon Yesu. Tolimokis kesi ngipean tamasi, “Kadungokinit ayong esi a ekiro a Yesu alo iruoro Paulo ngakiro keng.” Araakasi ngitunga lu ekote neni ngide ngikan-kaarei lusapa a Eyaudit alo enyaritae Sikepa alo arai Emuron Loapolon a akai a Akuj. Nakaneni tolimok kesi Ekipe tama, “Ayeni ayong Yesu nabo ayeni tani ngakiro a Paulo, nakaneni ani esi a, iraakasi ta ngae?” Togirakin itwaan ni akoporito ngikerep kesi kibunga lokojokon, kidwang daang. Tamataros kesi alokai keng echilichilaara ngiworui toya ngajemei. Apot ngitunga daang lu alomito Epeso lu araakasi Ngiyaudi ka lu nyerai Ngiyaudi aapei kiirasi ngakiro nguna. Sodi tobul kesi daang noi nabo kipuruut kesi ekiro a Ekapolon Yesu. Pot ngikanupak lukaalak tolimonosi ka akisileereun alotunga ngakiro nasek asubete kesi. Tochunakis ngikaalak ngakitabea kech na amuroeneto kinomae alongaren ngitunga. Kimara kesi ngaropiyae na kolong kegielere ngakitabea nguna, toliwor etiae kech ngaropiyae ngabunge ngatomwon-kan. Alopit a loationon kalo, tokeikin akiroit a Ekapolon wadaang nabo kisikokin togogonger. Akikokinet a ngakiro kanguna neni, totiaku Paulo alosit kitor Makedonia ka Akaya, toten Yerusalem. Tolim tama, “Ani kalot inaa, anangi tani Roma.” Sodi tomea ngesi ngikengarakinak keng ngiarei lu enyaritae Timoteo ka Erasito esaki kingarenikis toloto Makedonia. Kidong ngesi nakwap a Asia mono. Ngirwa ngulu, pena ngichan luaronok Epeso kotere epit a Erot alo a Ekapolon. Ayei eketiakan ngasua epei lo enyaritae Demeterio. Asubeene ngesi ngikais luuchik lu eraakasi ekitetemes a akai a Akuj kech beru ana enyaritae Aritemi. Aanyuniyete Demeterio ka ngikasubak etich keng ngaropiyae nakaalak alotich kangolo. Tochunak Demeterio kesi ka ngitunga luche lu asubeenete etich lo ikoni ngolo wapei tolimok tama, “Ngikiliok, iyenete esi atamar etich loyok lo ngesi kiyaritor ngoni. Iirasi tokona esi nabo ingolikis ngakiro na esubi Paulo. Meere nege Epeso bon esubea, esubi alowaitin kadaang a Asia. Esup ngesi ngitunga ebata ebala meere ngakujo na esubete ngitunga ngakujo dir. Echanakin tokona etich yok edikino itoronio. Meere kongina dang bon, nakaneni itiliwori tani eger ngolo akai a akuj yok anaberu anaapolon ana enyaritae Aritemi apasit. Eliwor emam nabo itwaan erima akuj naberu na ilipito ngitunga daang alo Asia ka ngakwapea daang!” Na eirarea asepich a ngitunga ngakiro nguna, tongoa noi tolomakis achala ebalasi, “Epol noi Aritemi naka Epeso!” Tokeikin ekurikur lore wadaang. Kirumut ngitunga Gayo ka Arisitariko lu araakasi Ngimakodeniae ngiarei lu arukito ka Paulo, tamataros ka kesi tananga nakeor. Asaki Paulo elope alosit nasepich a ngitunga ngina, nakaneni kiratakis ngikanupak. Ngikapolok ngiche dang a akwap a Asia lu araakasi ngipaalon keng, tomeasi ngitunga ni ayei ngesi imaimayete ebaasi nyeelot nakeor. Esaa lopei ngolo, tachalut ngitunga daang lu eriamiriamito neni, tachalut ngiche tolimut ngakiro be ati, tachalut luche tolimut ngache, kainyo ebilerit kesi peayenete lukaalak ibore ni achununitere wapei. Etamito ngitunga ngiche atamar kori Alekisanda aya ngakiro ani etowoeta Ngiyaudi ngesi alongaren ngitunga. Sodi kikea Alekisanda akan kisililing ngitunga, sodi tasak akiruorikin ngakiro na eyuunor. Ani na ayeneta kesi atamar erai ngesi Eyaudit, tachalut daang aapei a ngisaae a ngiarei elimito ngakiro ngapei ebalasi, “Epol noi Aritemi na a Epeso!” Ani esal, topedo ekegiran a ere akisililing ngitunga. Tolim tama, “Ngikiliok lu iyakasi Epeso! Eyeni itwaan daang atamar erai lore a Epeso ngesi edukokinitae akai ka Aritemi ana epol noi, nabo nege ngesi echoikinitere ngamoru na kolong achakun anadis. Emam itwaan epegi ngakiro nguna. Ejoikinit tokona esi ililingete nyiimatakinosi nakiro atipei. Irikut esi ngitunga lugu nege tarai bo nyekokoa ngiboro a ngakais a akuj yok kori nyiimenya tani ngakais a akuj yok anaberu. Ani kesakete Demeterio ka ngikasubak etich keng akititare itwaan idio eya ngikatubok ngakiro ka ngirwa lu iriameenere nitubet ekies. Ejoikinit kesi ititasi kaina. Ani keya na iitanito esi, erumorio alokiriam a ngitunga kadaang alo echamakinitae. Erai epedorio akititakin ngoni tamarae kisiakini ekurikur kotere ngakiro na asubasi kane akolongit naga. Emam ngakiro natenoyek na kisiakinere ekurikur lo nabo emam ngakiro na eriyan na kilimuni ngoni atopuunotor.” Na arumorea alimun nguna, kieala ngitunga. Adaunet a ekurikur, tochunak Paulo ngikanupak wapei kisuruor ngakiro a Akuj na ingarakinete, dio alimokin atamar kidongo niajokon. Dio tonyou tolot Makedonia. Kitor ngesi lowaitin ngulu kingaranak ngitunga noi a ngakiro a Akuj. Dio tanang Akaya, toper neni ngilapio nguuni. Ani na anyounitor ngesi alosit Siria, tongich atamar etukito Ngiyaudi asubea ngesi naaronok. Sodi totiaku ngesi abongor kitor Makedonia. Kirukosi ngesi ka Sopater lokookeng a Pirio lo abuni alo Berea. Luche nabo lu erukoreta ngesi araakasi ta Arisitariko ka Sekudo lu apote alo Tesalonike, Gayo lo abunit alo Deribe, Timoteo ka Tukiko ta Turopimo lu apote anakwap a Asia. Kingarenikis kesi kidarut sua alo Turoa. Atodokasi natubwa alo Pilipi adaunet a esukukuu a Ngamugati Anapadok. Ani ekisidi a ngirwa a ngikan, atoriamutu kesi alo Turoa. Atopero neni ngirwa ngikan-kaarei. Atabong apei akolongit na arai Jumamos, atochunakinos sua wapei akinyam Akimuj a Ekapolon. Kisuruor Paulo kesi tanang kiding akwaar kainyo asaki ngesi arotokin akolongit na atupit ngina. Anokete ngataae nakaalak anamaniyat ana alokidiama ana kiriamiriamit sua. Ebooyi edia epei lo enyaritae Eutuko alopuke a akai ana eruoror Paulo. Ani eringa Paulo iruoro nikooyen, kilurut Eutuko ngaju naapotiok dio tojotoor. Tachakun ngesi anamaniyat ana a ngauni alokidiama. Tadakunae ngesi ketoana. Nakaneni totiyaun Paulo kwap toriedik, tadaku edia ngolo dio tonuak. Tolim tama, “Warasi nyikibul, eringa ngesi eyari!” Sodi tobongo ngesi todoka kidiama tonyil amugati tanyam. Arumoret akiruoro ka kesi nikooyen tanang ni ipiripirunea, torotok Paulo. Torikosi ngitunga ngulu edia ngolo nawi eyari dio, talakaros noi. Engarenikisi sua atodokasi natubwa ewaaros Aso, ni kisakea etororeta Paulo. Kilimokinit ngesi sua atamar etorutu ngesi kaneni, kainyo alosi ngesi inaa a ngakejen. Ani kiriamuni sua ngesi alo Aso, todoku ngesi natubwa na kiya sua sodi atonyoutu kaneni atoloto Mitulene. Ani kinyouni kaina akolongit na a ngaarei, atanangutu ni ekienyikinit akwap a Kio. Akolongit na a ngauni atanangutu nakwap na enyaritae Samos. Ani akolongit na a ngoomwon atanangutu Mileto. Atiakunit Paulo alosit ngaren a atubwa nyiitor Epeso, sodi nyeerubak eyei nakwap a Asia. Ekirikira ngesi asaki akinang Yerusalem akolongit na a Pentekost, erai kepedori. Tomea Paulo itwaan alo Mileto alimokin ngikasukou a ekanisa alo Epeso atamar pot kiriamun ka ngesi. Ani na ananguneta kesi ni ayei ngesi, tolimok kesi tama, “Iyenete esi atamar kirukit ayong ka esi jiik napei kolong jik anangunea ayong nakwap a Asia. Abu ayong etiditeun noi nabo egor asubi etich a Ekapolon ngirwa lu ariabar noi kotere eger lo kalokitotor Ngiyaudi. Nakaneni emam akiroit na ejok anikus na akerit ayong alimokin esi na eruoror ka akitatam ani eriameenete ngitunga ka ngawiyei kus. Echikichiki ayong Ngiyaudi ka ngibukui lu nyerai Ngiyaudi atamar ejoikinit elungete ngasechesea kech toreunos Nakuj sodi tonupa ngakiro a Ekapolon Yesu. Nakaneni, alosi ayong tokona Yerusalem ewapit ngakiro a Etau a Akuj. Nyayeni ayong ngakiro na kianyunor kaina. Ayeni ayong atamar kechikichikit Etau a Akuj ebala kedarit ayong alore kadaang aenanot alojela ka ngichan. Nakaneni epasakinit ayong akiyar kang, ibore ni eitanit ayong noi ngesi arumor etich lokolong kedodikini Ekapolon Yesu atamar atosub. Etich ngolo ngesi alimor Ngakiro Naajokak a ajokis a Akuj. “Tokona, ayeni ayong atamar emam tani ipei anikus, esi lukolong ketatami ayong ngakiro a a apolou a Akuj ni kiriamun ka ayong. Kalimokinit tokona esi dir atamar ani kebukor tani ipei kus, emam na kapaikinio ayong. Kainyo nyeema ayong alimokin esi ngakiro daang na esaki Akuj. Kirichunos esi make. Kirichutu tani ngitunga a ekanisa lu kitaanyu esi Etau a Akuj sodi tochoikis. Tochoikisi ngitunga a ekanisa a Akuj lu aanyuni ngesi kotere akitu a Lokookeng. Ayeni ayong atamar na arotokinio ayong, epote ngitunga lukaadengak nikus lu ikote ngipeei. Nyelakakinete kesi akinyasun ngikanupak. Enangi ngirwa lu isudioto ngiche anikus sodi kibatasi ngikanupak kiwapakis kesi. Nakaneni kiboikinos robo irichuna, iyenete atamar egoro ayong akwaar ka apaaran etatami ipei kus daang a ngikaru a nguuni. “Kemiekinea tokona ayong esi Akuj na kichoikini esi. Kemiekinea tani ngakiro na ajokis keng na eraakasi kesi kitogogongete esi sodi kirumeta apiaro aapei ka daang lu etoseg Akuj. Nyirakara ayong etereku lo asakea alemar asuat nakwangat elalak ngaropiyae kori egolit kori eworu anitwaan a idio. Iyenete esi ngikulepek atamar asubi ayong etich a ngakan anakang kanu, sodi ataanyu ibore ni kiyarea ayong ka ngirukitos kang. Anakiro kanguna kadaang, kedodik ayong esi atamar ejoikinit isubete etich kingarakineta lu ichanasi. Kitamutu ngakiro nakolong alimuni Ekapolon Yesu ebala, ‘Ejok noi akipotor idwangit akidiaun!’ ” Na arumorea Paulo alimun nguna, toriediko ka kesi daang kilipa. Egorosi kesi daang na anuakineta ngesi tolimokis atamar tolot niajokon. Tosuros kesi ngitai noi ani alimunio ngesi atamar nyeanyungarete kesi ngesi nabo jik. Sodi kitenasi kesi ngesi toloto natubwa. Nakilimokinea sua kesi atamar kidongo niajokon, ewaaros jik atananga ni anyaritae Kos. Akolongit na a ngaarei, atananga Rode sodi atorotokisi kaneni atananga Patara. Atorukautu atubwa na alosi Poinike. Atodokasi natubwa ngina ewaaros. Atanangutu ni atakanea Kupuro, atamana alowae alo a atoo edirasi Siria. Atotiyaunos sua alore alo ayei lokwaas a anam enyaritae Tiro kainyo asakio atiyaun ngiboro anatubwa. Atorukautu sua ngikanupak ngiche, eruko ka kesi a ngirwa a ngikan-kaarei. Kiruoro ngikanupak ngulu a agogongu a Etau a Akuj tolimokis Paulo atamar nyeelot Yerusalem. Nakaneni ani na adaunotor ngirwa lu kirukitor sua ka kesi, atonyoutu atoloto nisek kilosi. Kitenasi kesi daang sua erukito ka ngaberu kech ta ngide atopudosi alore tanang nasinyonoit na a ekwaas a anam na kiriedikio sua elipa Akuj. Ani erumor atotiakas ka kesi, atodokasi sua natubwa sodi tobongosi kesi nawiyei. Atotena sua ngaren ewaaros alo Tiro atananga Tolemais ni kimalaa sua ngikanupak, eruko ka kesi akolongit apei. Akolongit na atupit ngina, atorotokisi sua atananga Kaisaria. Atepeyono sua kaneni anawi a Pilip alo ketataman ngakiro a Akuj. Arai ngesi epei a ngitunga alukan-kaarei alu aseunitae toliworos ngikengaranakinak alo Yerusalem. Ayakasi ngesi ngapesur a ngaracha ngoomwon na adwareenete. Nakisalitor sua kaina ngirwa ngikaalak, todolu ekadwaran a Akuj lo enyaritae Agabo lo abuni anakwap a Yudea. Na abunio ni kiya sua, tolem aruba na aenitor Paulo ngiworui keng sodi toenea ngakan ka ngakejen keng a ilope sodi tolim tama, “Elimunit Etau a Akuj kona, eenete Ngiyaudi elope a aruba kana alo Yerusalem loger lo. Erikokinio ngesi ngibukui lu nyerai Ngiyaudi.” Nakiirarea sua ngakiro nu, emaima sua ka ngitunga luche Paulo atamasi nyeelot Yerusalem. Tatachu ngesi tama, “Anukiro nu? Nyo iruorotor esi kona isurioto etau kang? Nyachamunit ayong aenanot bon alo Yerusalem, achamu tani atoanere kotere ekiro a Ekapolon Yesu.” Emaimaa sua ngesi kitokuruwo. Sodi atajalutu atamasi, “Kimiekisi tosubakin kona echamitor Ekapolon.” Adaunet a ngirwa a ngikaalak, atoena ngiboro kosi atoloto Yerusalem. Erukosi sua ka ngikanupak ngiche lu aya Kaisaria kiterikosi kesi sua nawi a Minasoni alo erai itwaan a Kupuro. Arai ngesi ekanupan napei kolong jik. Nakinangunea sua Yerusalem, kipeyout ngikanupak a alakara. Akolongit nache, erukosi sua ka Paulo aanyun Yakobo. Ayakasi ngikasukou daang a ekanisa neni. Kimala Paulo kesi, ani erumor kisisak ngakiro daang na asubi Akuj ani a ngibukui alu nyerai Ngiyaudi kotere etich lo asubi ngesi. Na eirareta kesi ngakiro keng, kipuruut daang Akuj. Ani erumor tolimokis Paulo tamasi, “Lokaatokosi a ekiro a Yesu, kingolik mono iyong eger lo anupeta Ngiyaudi lukaalak ngakiro a Akuj, nabo irichakinito kesi etal lokojokon. Alimokinitae kesi atamar itatami iyong Ngiyaudi daang lu elomito nakwapea a ngibukui alu nyerai Ngiyaudi atamar toisikis etal a Musa. Abe ibala iyong kesi nyiilengera ngide kech, kori nyiiwap ngitalio lua Ngiyaudi. Erai iirarete kesi dir atamar idolu iyong nege. Ejoikinit tokona ikokinio ai? Kiwap ngakiro na kilimokini sua iyong. Eya ngikiliok nguomwon nege lu ikongito. Kirukosi ka kesi kitalei tosegeta sodi tatach iyong ngaropiyae nakitaleere esi, ani erumor tabanyae ngakies kech. Ani kikok iyong neni, eyenuni itwaan daang atamar meere ngaka iteni ngakiro nangoon kiruorotor iyong ngitunga. Eyenete tani atamar irichunit iyong elope etal a Musa. Nakaneni ani alowae a ngikanupak alu nyerai Ngiyaudi, kigirak sua kesi abarua kilimokinit atamar kitiaku sua atamar nyeenyam akimuj na a amuronot kori ngaakot kori akiring a ibarasit ani emiedio, nabo tochoikinos alomalaanu ka elomit.” Sodi toriko Paulo ngikiliok ngulu ani akolongit na atupit ngina, kitalei ka kesi aapei. Sodi toloma ngesi kai a Akuj tolimok ngitunga etiae a ngirwa alu irikari akitaleun na itosegetar kesi, ka akipeyos na elemunio kotere ipei kech daang. Na aapikinea ngirwa lukan-kaarei ngulu adaun, kingolikis Ngiyaudi ngiche apote anakwap a Asia Paulo alokai a Akuj. Kichuchukis kesi asepich daang a ngitunga dio kirumut Paulo. Tachalakis kesi tamasi, “Ngisirael! Kingarakinae kare! Ekile lo ngesi lopalem eloseene wadaang itatami ngitunga daang atamar tongero Ngisirael ka etal a Musa ta akai a Akuj naga. Tani tokona, ariku ngesi ngibukui ngiche lu nyerai Ngiyaudi tooma akai a Akuj kinyasut niasegan ne!” ( Alimunete kesi nguna kainyo aanyungarete sek kesi Turopimo lo ebunit alo Epeso erukito ka Paulo alore. Sodi tamasi kesi kori kebu Paulo toriko ngesi kai a Akuj.) Tosuros ngitunga daang a ere sodi tamataros aapei kirumut Paulo kiriyasi nikalapatan a akai a Akuj. Togolokinoe ngidorin a akai a Akuj atipei. Ani eringa kesi esakete akiar Paulo, tolot itwaan alimokin ekarikon a ngasigerea a Ngiroma atamar alomakis ngitunga daang a Yerusalem ekurikur. Kirukosi ngesi ka ngikarikok ngiche lu atupito ngesi ta ngasigerea toloto Yerusalem atipei. Na engolikineta ngitunga ngulu ekarikon ngolo ka ngasigerea, tojongoto akibungare Paulo. Tolot ekarikon nia Paulo kirum ngesi, dio alimokin ngasigerea atamar toena ngesi a ngiriko a ngiarei. Ani erumor kingis tama, “Ngae itwaan en, ani nyoni esubit ngesi?” Tachalu asepich a ngitunga tolimut ngiche ngachekiro, tolimut ngiche ngache. Kona achalatar ngitunga alokurikur kangolo, tongopik ekarikon a ngasigerea atamar anukiro kesubasi. Sodi tolimok ngesi ngasigerea atamar torikosi Paulo kai na eyokiyete ngasigerea. Kirukosi ka kesi ani enangi nidokaret kai, sodi tadakasi ngesi ngasigerea kainyo adedeng asepich a ngitunga noi. Ewapito ngitunga daang kesi echalasi ebalasi, “Taara!” Na asaketa ngasigerea akilomakin Paulo kai na eyokiyete kesi, tolimok Paulo ekarikon a ngasigerea tama, “Eya ngakiro asaki ayong alimokin iyong.” Kingit ekarikon a ngasigerea ngesi, tama, “Ikwa iyeni iyong Ngagirik a? Ikwa meere iyong itwaan ni ngoon a Misiri alomakini akitojwore arieng sodi toriko ngirukooi ngabunge ngoomwon lu atingito ngatomean nariet a?” Tatachak Paulo tama, “Arai ayong Eyaudit lo kedounio alo Tariso ana a akwap a Kilikia, arai ayong itwaan a ere alo eyenikinitae. Kimiekinae kare ayong esuruor ngitunga.” Tachamak ekarikon a ngasigerea a Ngiroma ngesi akisuruor ngitunga. Sodi towo Paulo anidokaret dio kikea akan keng kisililing ngitunga. Na elilingeta kesi, kisuruorik Paulo kesi a Ngaeburaniae. Tolim ngesi tama, “Ngisapanet kang kata apakang, topupokisi kesisak esi ngakiro na idodiunito atamar nyasechit ayong!” Na eirareta kesi ngesi isuruori kesi a Ngaeburaniae, kililinga kesi chek. Sodi torubak Paulo iruoro tama, “Arai ayong Eyaudit lo kedounio alo Tariso anakwap a Kilikia, nakaneni apolouni ayong kane alo Yerusalem ketatami Gamaliel. Ketatam ayong ngitalio kata apaayok lokojokon, nabo amina ayong akilipit Akuj noi loger lo tokona ilipitotor esi daang lu iyakasi nege. Abolianar ayong ngitunga lu ewapito epit a Erot a Yesu sodi ataar. Erumuununi ayong ngaberu ka ngikiliok atoenanak lojela. Eyenete ngikasukou daang a Atuk ka Emuron Loapolon a akai a Akuj atamar eraakasi ngakiro nguna ngaka iteni. Kegiranakinete kesi ayong ngabaruae atolosio lotunga yok lu eraakasi Ngiyaudi lu alomito Damasko. Sodi atolot ayong inaa akirumun ngitunga lu ewapito epit a Erot sodi atoriku kesi Yerusalem eenitae a ngiriko, toboliare. “Ani na alosio ayong aapiarea Damasko naparan lotingilan, tokwangu akicha na akwaan kea anadis atipei keriam ayong alowaitin kadaang. Atadakakin ayong kwap eira etoil ebala, ‘Saul, Saul! Nyo kiboliar iyong ayong?’ Engit ayong atama, ‘Iyong ngesi ngae, Ekapolon?’ Katolimok ngesi ayong tama, ‘Ayong ngesi Yesu lo a Nasaret lo kiboliar iyong.’ Kingolikis ngitunga lu kirukitor ayong akicha nakaneni nyiirara kesi etoil a itwaan ani kesuruori ayong. Engit ayong ngesi atama, ‘Ekokini tokona ayong ai Ekapolon?’ Katolimok ayong Ekapolon tama, ‘Tonyou tolot Damasko sodi kitolimokin kaneni ibore daang ni esaki Akuj iyong tosub.’ Atomudukan ayong kotere akicha na akwaan kea ngina. Sodi katorikosi ayong ngirukitos kang akan tanang Damasko. “Ayei itwaan ni anyaritae Anania lore ngolo ni erichunit noi etal a Ngiyaudi. Epuruunito ngesi Ngiyaudi daang lu alomito neni. Bu ngesi ni ayei ayong towo alo diyete kang dio tama, ‘Lokaatokang Saul, taanyunga akwap nabo!’ Napei ngina ataanyunga ayong akwap nabo atokienyik ngesi. Tolim ngesi tama, ‘Kiseu iyong Akuj kata apaayok akiyen na echamit ngesi. Sodi kingolik iyong Ekasuban etich keng lo etenoono, nabo kiira iyong etoil keng a elope na eruoror. Kainyo iliwor iyong ekaanyunan keng tolimok itwaan daang nguna ingolik iyong nabo iira. Nyo tokona nabo eringa iyong idarit? Tonyou kibatisae sodi kilip ngesi kitorimak iyong ngasechesea kon.’ “Atobongo ayong Yerusalem ani eringa ayong elipit alokai a Akuj, ataanyunga akisingolikinet a Akuj. Engolik ayong Ekapolon lo kalimokini ebala, ‘Tonyou atipei torotok kane alo Yerusalem, kainyo nyenupete ngitunga kane ngakiro kang na ilimokini iyong.’ Atatachak ayong ngesi atama, ‘Ekapolon, eyenete kesi dir atamar aloseene ayong nakais a Atuk erumuunu lu anupito ngakiro kon edet. Ani na aarere Sitepano lo alimonokini ngitunga ngakiro kon, ayei ayong dang neni kajoikinit ni aarere ngesi nabo eratakinit ayong ngiworui alu aarete ngesi.’ Katolimok ayong Ekapolon tama, ‘Kape kainyo kameari ayong iyong nialonan ni eya ngibukui lu nyerai Ngiyaudi.’ ” Topupokis ngitunga ngakiro a Paulo tanang na alimunio ngesi ngakiro nguna. Esaa ngolo tolomakis kesi daang achala noi ebalasi, “Kidonyosi kare! Nyechamit ngesi imiekinio toyar!” Achalasi kesi kiwakiwakete ngiworui kech nabo tokurwonorete ngalup kidiama. Tolimok ekarikon a ngasigerea a Ngiroma ngasigerea atamar torikosi Paulo kai na eyokiyete kesi, sodi kideta ngesi tongichut ibore ni echalatar Ngiyaudi kotere ngesi. Nakaneni na aeneta ngasigerea ngesi esakete akidet, kingit Paulo ekarikon loochi awei kaneni tama, “Kichamakinitae mono esi ideese itwaan a akwap a Roma, eringa nyengichuna ibore ni esechit a?” Na eirarea ekarikon loochi ngakiro nguna, tolot nia ekarikon a ngasigerea kingit ngesi tama, “Ikokini tokona iyong ai? Erai itwaan ngini ika a akwap a Roma!” Sodi tolot ekarikon a ngasigerea nia Paulo kingit tama, “Tolimokinae ayong kirai iyong itwaan a akwap a Roma?” Tatachak Paulo tama, “Ee.” Tolim ekarikon a ngasigerea tama, “Aliwor ayong itwaan a akwap a Ngiroma ani ainakinea ngikapolok a arieng ngaropiyae nakaalak.” Tatachu Paulo tama, “Arai ayong itwaan a akwap a Roma kainyo araakasi ngikauriak kang dang ngitunga a akwap a Roma.” Tobongosi ngitunga lu asakete akingitanar ngesi ngakiro atipei. Toem tani ekarikon a ngasigerea na ayenea atamar erai Paulo lo aenitae itwaan a akwap a Roma. Asaki ekarikon a Ngiroma akiyen dir ibore ni etitakinitotor Ngiyaudi Paulo. Akolongit na atupit ngina, tolim ngesi atamar talacharae ngiriko anakan a Paulo, sodi tolimok ngesi Ngimurok Luapolok ka ngitunga daang a Atuk atamar kiriamariama. Sodi toriko ngesi Paulo kitowo alongaren kech. Tokienyik Paulo ngitunga a Atuk tama, “Ngitunga kang a Isirael! Ebooyi ayong ani a Akuj a etau ajokon tanang akolongit na tokona naga.” Todungok Emuron a Akuj Loapolon anyaritae Anania ngitunga lu awaasi alo diyete Paulo atamar kibapa ngesi nakituk. Tolimok Paulo ngesi tama, “Kibapi iyong dang Akuj, iyong lo ikoni arotat na ipuchakinitae emunyen lo akwaan! Ibooyi iyong kane isaki akirirare ayong a epit a etal tarai bo isech iyong dang etal ani idungokinea kesi atamar kebapa ayong!” Tolimokis Paulo ngitunga lu aya diyete keng tamasi, “Iyenyi iyong Emuron a Akuj Loapolon a?” Tatachu Paulo tama, “Ngitunga kang a Isirael, peayeni ayong atamar erai ngesi Emuron Loapolon. Igiritae nagiran kona, ‘Nyiiruoror ekapolon a ngitunga kon ngakiro naaronok.’ ” Na ayenea Paulo atamar araakasi ngitunga ngiche a Atuk Ngisadukayo taraakas luche Ngiyaudi, kirema Anatuk tama, “Ngitunga kang a Isirael! Arai ayong Eparisayot, lokookeng a Ngiparisayo. Ketitakinitae ayong kane kainyo anupit ayong atamar eyarunete lu atoaka.” Napei alimunio ngesi ngakiro nguna, tolomakis Ngisadukayo ka Ngiparisayo akiburare, sodi totiakas ngitunga a Atuk ngaarei. ( Erai ebalasi Ngisadukayo nyeyarunete ngitunga lu atoaka, ebalasi nabo dang emam ngimalaikae ka ngiborei lusubuna lu emam ngawat. Nakaneni enupito Ngiparisayo nauni nguna daang.) Tachalut ngitunga lokojokon noi! Sodi tonyout ngiketatamak a etal ngiche lu eraakasi ngika a atukuoru a Ngiparisayo kitongolopa luche epegasi ebalasi, “Emam ibore ni ichwangakinit itwaan en! Ngae tokona eyeni ejok kisuruorite ngesi dir ibore ni emam akwaan kori emalaikat!” Kisikokin eburas toroner noi sodi kitapo tani ekarikon a ngasigerea tama kori edikino ngitunga enyilinyilaarete Paulo. Todungok ngesi ngasigerea atamar toloto Natuk torikosi Paulo kai na eyokiyete kesi. Nakwaare a akolongit ana atupit ngina, towo Ekapolon Yesu alo diyete Paulo tama, “Wara nyiem! Iruoro iyong ngakiro kang kanege alo Yerusalem nabo ejoikinit iyong ikokini neni tani alore a Roma.” Ataparach a akolongit ana atupit ngina, tochunakinos Ngiyaudi ngiche totuko. Kikongo kesi ebaasi emam ibore ni kinyami kori ni kimasi eringa nyeara Paulo. Eporito ngitunga lu atukito aapei ngitomwon-omwon. Dio toloto kesi Lomurok Luapolok ka ngikasukou a Atuk tamasi, “Kikong sua aapei atamar nyikimuji eringa nyeara Paulo. Tomeasi tokona esi ka ngitunga a Atuk itwaan ni eyei ekarikon a ngasigerea a Ngiroma ibalasi isakete esi Paulo torikunoe ni iyakasi esi. Kitosubutu esi eya ngakiro na isakete esi angichun ani keng lokojokon. Nakaneni kidaruni sua ngesi ataara eringa nyenanguna nege.” Nakaneni kiira lochien a Paulo ngakiro nguna tolot kai na eyokiyete ngasigerea dio kisisak Paulo ngakiro nguna. Sodi tanyarau Paulo epei a ngikarikok alu atupito ekarikon tolimok tama, “Toriko edia lo ni eyei ekarikon a ngasigerea, eya ngakiro esakit ngesi akisisakin ekarikon.” Toriko asiger ngina edia ngolo tanang nia ekarikon a ngasigerea, dio alimun tama, “Kanyarae ayong Paulo lo eenitae katolimok atamar toriku edia lo nikon kainyo eya edia lo ngakiro na esaki akisisakin iyong.” Toting ekarikon a ngasigerea edia ngolo akan tochada kingit tama, “Anukiro isaki iyong alimokin ayong.” Tolim edia tama, “Etukito ngikapolok daang a Ngiyaudi aapei ebaasi kilimokinete moi iyong atamar esakete kesi Paulo torikoroe Natuk. Itusubunete kesi kori eya ngakiro na esakete angichun ani keng lokojokon. Nakaneni tochoite iikini ngakiro kech kainyo eya ngikiliok lu iporito ngitomwon-omwon lu edukete kidarut ngesi. Ikongito kesi atamar emam ibore ni enyamete kori ni emaase eringa nyeara Paulo. Idarito tokona kesi akiar ngesi, eraakasi ngakiro na ilimuni iyong kesi make idarito.” Tolim ekarikon a ngasigerea tama, “Nyiilimok itwaan iche atamar kisisak iyong ayong ngakiro nu.” Kimiek ngesi edia ngolo tolot. Sodi tanyarau ekarikon a ngasigerea ngikarikok lu etupito ngesi ngiarei tolimok tama, “Toseutu atipei ngasigerea ngamiae ngaarei ka ngasigerea ngache ngatomwon-kaarei na edokito ngangolei ta ngache ngamiae nabo ngaarei na ejiete a ngakwaaras. Kisiakis kesi anyoun alosit Kaisaria ngisaa nguuni a akwaar. Tosubakisi ngangolei na edokari Paulo dang sodi kitumosi kesi niajokon tanang nia ekapolon a Ngiroma lo enyaritae Pelis lo epolokinit Palestina.” Kigir ekarikon a ngasigerea abarua kona, “Ayong Kilaudio Lusia ngesi kegirakinit iyong ekapolon lo kiyenikinitae, Pelis. Kemalae! Erumunete Ngiyaudi itwaan en tonyout akiar. Eira ayong atamar erai ngesi itwaan a akwap a Roma sodi atoloto ayong ka ngasigerea atoyuutu ngesi. Atoriko ayong ngesi Natuk asaki aanyun ibore ni ititaare ngesi. Ataanyu ayong atamar ititakinitae ngesi kotere ngikodikodea lu eraakasi ngika a etal kech. Nakaneni emam ibore ni esechit ngesi ni ejoikinit eenere alojela kori earere. Ani nakalimokinere ayong atamar etukitoe akiar ngesi, atotiaku ayong atipei atamar ameuni ngesi nikon. Alimok ayong ngitunga lu ititakinito ngesi atamar kiruoro ngakiro na ititakinitotor ngesi alongaren kon.” Sodi torikosi ngasigerea Paulo loger lo alimokinitere. Torikosi ngesi nakwaare tananga Antipatro. Akolongit na atupit ngina, tobongut ngasigerea na aloose a ngakejen toisikis lu adokito ngangolei irukorete ka ngesi. Torikosi ngesi Kaisaria kipotosi abarua nakis ekapolon a Palestina ani erumor kimiekis Paulo anikeng. Kisoma ekapolon abarua sodi kingit Paulo ewae lo ebunitor ngesi. Na ayenea ngesi atamar ebunit alo Kilikia, tolim tama, “Eirari ayong ngakiro kon moi epote ngitunga lu kititakinito iyong.” Dio tolim ngesi atamar kiyokoi Paulo alokai ana kolong aduki Erode. Adaunet a ngirwa a ngikan, bu Emuron Loapolon lo anyaritae Anania ka ngikasukou ngiche ta ekeruoron kech a etal enyaritae Teritulo, tanangut Kaisaria. Toloto nia ekapolon a akwap kangina kisisakis ngesi ngakiro na ititakinitotor kesi Paulo. Sodi tanyaraunae Paulo tolom. Tolomak Teritulo akisisaun ngakiro na etitakinitor ngesi kona, “Ekapolon lo kiyenikinitae! Kotere ni iraakar iyong itwaan nikooson, kianyu sua ekisil lo a ngirwa alukaalak. Nabo iloch iyong ngakiro nakaalak ajoketa anakwap kosi. Kijoikinito sua ngakiro nu awadaang ka ngirwa daang nabo kilakara noi anikon. Nakaneni kona nyasakea akitadaun esaa kon, kemaimai iyong atamar kiira kare a apatanu kon ngakiro kosi a aurianut. Kiyen sua atamar erai itwaan en nikechanan noi. Isianakini ngesi ekurikur Aloyaudi kadaang ka ngakwapea daang nabo ngesi erai ekarikon a atukuoru ana a Nginasaret. Asaki ngesi tani akinyasun akai a Akuj sodi erumutu sua ngesi. [Atasaka akititakin ngesi Alotal kosi nakaneni bu ekarikon a ngasigerea lo anyaritae Lusia toriko ngesi anikosi a ekileenu. Sodi todung Lusia atamar ejoikinit ngitunga lu ititakinito ngesi epote nikon.] Ani kingichingich iyong ngesi, iyenuni iyong elope ngakiro daang na kititakinitor sua ngesi.” Kikobasi Ngiyaudi dang ngakiro nguna tamasi eraakasi daang ngaka iteni. Todod ekapolon ngolo Paulo esaki kiruorik. Tolim Paulo tama, “Kona ayenea atamar irai iyong ekatubon ngakiro a ngitunga a akwap kana ngirwa lukwokaalak, eruorikini tokona ayong ngakiro na ayuunor alakara. Ipedori iyong dang angichun atamar esibit tokona ngirwa ngitomon ka ngiarei adaun napei ngoon alosio ayong Yerusalem akilip Akuj. Emam itwaan tani ipei arukaut Ngiyaudi kipega ka ayong alokai a Akuj. Nyerukauna kesi alomakinit ayong tani akikurukur ngitunga anakais a Atuk kori alowae a eche a ere. Emam tani ibore ni idodiunit atamar eraakasi ngakiro na ketitaata kesi ayong ngaka iteni. Ngakiro ngapei achamuni ayong alongaren kon, elipit ayong Akuj kata apayok, nabo ewapit a Erot alo ebaasi kesi erai eka a alioko. Anupit ayong tani ngakiro daang na igiritae Lotal a Musa ka ngakitabea na a ngikadwarak a Akuj. Anupit ayong dang ngakiro na a Akuj napei enupito ngitunga lu, na ikote na a atamar, eyarunete ngitunga daang lu atoaka, luajokak ka luaronok. Erichakina ayong ngirwa daang akiboi a etau ajokon ani a Akuj ka ngitunga. “Naaperorea ayong alo Yerusalem ngikaru ngikaalak, atobongo inaa aina ngitunga kang ngaropiyae nabo atolemuunu ngakipeyos. Ani na asubea ayong nu, katorukaut kesi ayong alokai a Akuj na arumorea akitosega alotal. Amam asepich a ngitunga kirukitor ayong kori amam tani ekurikur. Nakaneni aya Ngiyaudi ngiche lu aponito anakwap a Asia neni. Ejoikinit kesi epote ngaren kon ne tolimut keyei ibore niketitakinitotor kesi ayong. Kori kimiek ngitunga lu tolimut kesi ibore ni echwangakini ayong na awaar Anatuk, erai ibore ipei bon eremari ayong na awaar alongaren kech atolim atama, ‘Kititaate esi ayong akolongit na ani anupitor ayong atamar eyarunete lu atoaka.’ ” Sodi Pelis lo ayeni lokojokon epit a Erot, togol ekiruor ngolo. Tolimok kesi tama, “Atubi ayong ngakiro na ititator esi na ebunio Lusia lo erai ekarikon a ngasigerea.” Todungok ngesi ekarikon a ngasigerea loochi lo eyoki Paulo atamar kiyok ngesi lokojokon, nakaneni kimianak kilaana wadio, nabo kimiek tani ngipaalon keng inanakis ibore keyei ni esakete ainakin. Ekisidi a ngirwa a ngikaalak, kirukut Pelis ka aberu keng Durusila, na arai Ayaudit. Tomea Pelis itwaan anyarare Paulo sodi topupokis kesi ngakiro na eruoro Paulo aloboyor alo enupere Yesu Kiristo. Nakaneni ani eringa Paulo iruoro ngakiro a ajokis ka achoikin akwaan anakiro anaaronok, ta Akolongit namonan iriraare ngitunga, tobul Pelis tolim tama, “Kape tokona. Ani kemin kona kianyun ka iyong, kinyarae sua iyong nabo.” Esaa lopei ngolo, etamit ngesi atamar kori kainakini Paulo ngaropiyae ngadi. Kotere ngakiro nguna dang, anyaraununi ngesi Paulo a ngirwa akiruor ka ngesi. Adaunet a ngikaru a ngiarei, kilunyokin Pesto Porikio nados a Pelis toliwor ekapolon a Palestina. Kona asakea Pelis Ngiyaudi daang tominakis ngesi, toisik ngesi Paulo alojela. Ekisidi a ngirwa a nguuni alu anangunea Pesto nakwap ngina, tonyou alo Kaisaria toten Yerusalem, tolimokis Ngimurok Luapolok ka ngikapolok a Ngiyaudi atamar kititakinit kesi Paulo. Kimaimaa Pesto, ebaasi kimiek Paulo torikoroe Yerusalem. Erai atukito kesi aarakin ngesi lorot. Tatachak Pesto tama, “Kona eenitere Paulo alojela alo Kaisaria tarai edikino ayong abongi inaa atipei, kimiekisi ngikapolok kus erukosi ka ayong Kaisaria sodi kititakis ngesi keyei ibore esechit.” Kiruko Pesto ka kesi kaina ngirwa esibit ngikan-kauni kori ngitomon, ani erumor tonyou tolot Kaisaria. Ani iwalari, kiboikin ni etubio ngakiro dio alimun atamar torikunoe Paulo tooma. Na adolunio Paulo, towaa Ngiyaudi lu apote alo Yerusalem kirikaut ngesi kititakis a ngakiro anaaronok anakaalak. Nakaneni emam ibore edodiunit atamar eraakasi ngakiro nguna ngaka iteni. Nakaneni tolim Paulo ngakiro keng tama, “Emam ibore ni asech ayong Alotal a Ngiyaudi kori alokai a Akuj kori ani a ekapolon a Ngiroma.” Nakaneni kona asakea Pesto akitalakar Ngiyaudi, kingit Paulo tama, “Isaki iyong alosit Yerusalem kititakin kaina alongaren kang a?” Tolim Paulo tama, “Awei ayong alongaren ngikatubok a ngakiro alu a akwap a Roma, lu eraakasi nikech ejoikinit ayong ketitaare. Emam ibore asechakinit ayong Ngiyaudi, loger lo iyenea iyong dang. Ani kasechit ayong etal kori kasubit naaronok na ejoikinit kaarere, nyasaki ayong atobuchar. Nakaneni kerai ngakiro na eraakasi alioko ketitaata kesi ayong, emam itwaan karikori ayong nikech. Asaki ayong katorikor nia ekapolon a Ngiroma.” Ani erumori Pesto akiruor ka ngitunga a Atuk, tatachu tama, “Ilim iyong atamar isaki alosit lokapolon a Ngiroma, nakaneni ilosi nikeng.” Adaunet a ngirwa a ngiche, kirukut ekapolon lo anyaritae Agiripa ka aberu keng Berinike pot Kaisaria akilomun Pesto lotich. Na aperoreta kesi inaa ngirwa ngikaalak, kisisak Pesto ekapolon ngolo ngakiro a Paulo tama, “Eyei itwaan ne nikolong aisikini Pelis eenitae alojela, ani na alosio ayong Yerusalem, katolimokis ayong Ngimurok Luapolok ka ngikasukou a Atuk atamar esechit ngesi, nakaneni tasaka ayong erira ngesi. Nakaneni atatachak ayong kesi atamar nyenaito Ngiroma akimiekin itwaan kititae eringa mono nyisiriama ka ngitunga lu ititakinito ngesi sodi taanyu ngesi alimun ngakiro na eyuunor. Na ananguneta kesi ne, nyemamakina nabo ayong. Akolongit na a ngaarei, eboikin ayong ni etubeenere ekies sodi atama torikunoe itwaan ngini tooma. Na anyouneto ngiketitak keng, nyelimuno ngakiro naaronok anikeng loger losek etamitor ayong atamar kori elimunete. Topega Paulo ka kesi ngakiro a ngakujo kech ka ngakiro a itwaan ani atoana anyaritae Yesu, nakaneni abe ebala Paulo eyari. Peayeni ayong kona angichuni eger a ngakiro kanu. Sodi engit ayong Paulo kesaki alosit Yerusalem kititae kaina a ngakiro kanu. Nakaneni towou Paulo. Dio tolim ngesi atamar ejoikinit ngesi kaenio tanang ekapolon a Ngiroma etubi ngakiro na ititaare ngesi. Sodi atodungok ayong ngasigerea atamar kiyoko ngesi tanang erikorio nia ekapolon a Ngiroma.” Tolimok Agiripa Pesto tama, “Asaki ayong akiirar ngakiro a itwaan kaen.” Tatachak Pesto tama, “Iirari iyong ngakiro keng moi.” Ani iwalari, pot Agiripa ka Berinike inyiakanarete ngitunga ikusete kesi noi. Tolomasi kesi kai naapolon na eriameenete ngitunga erukito ka ngikarikok a ngasigerea ka ngitunga lu ayenikinitae alore kangolo. Todung Pesto atamar torikunoe Paulo, sodi torikunoe Paulo kai ngina. Tolim Pesto tama, “Ekapolon Agiripa ka esi daang lu iyakasi ka sua ne, itwaan ni ewei alongaren kus en, ititaate Ngiyaudi daang lu eya nege ka lu eya Yerusalem. Echalasi kesi ebaasi nyejoikinit ngesi eyari! Nakaneni emam ibore ni angichu ayong ni itemokino ngesi earere. Ani kona alimunio ngesi elope atamar alosi nia ekapolon a Ngiroma, atiaku ayong atamar erikorio ngesi nia ekapolon a Ngiroma. Kangopikis ayong ngakiro keng na ileerete na egirakini ayong ekapolon a Ngiroma. Ngakiro nguna ngesi arikunitor ayong ngesi ngaren kus, tarai cha noi ngaren iyong ekapolon Agiripa! Sodi ani kingichingich iyong ngakiro keng, ataanyu ayong ngakiro na egirakini. Kainyo nyejok ayong atamari torikosi itwaan ni eenitae erai peileerete ngakiro na ititaare ngesi.” Tolimok Agiripa Paulo tama, “Kiruorik iyong ngakiro na eraakasi ngakon.” Kikea Paulo akan kisisau ngakiro na eyuunor tama, “Ekapolon Agiripa! Aanyunit ayong ekeny ajokon akolongit na ani eraakar ni iyei iyong atachea ngakiro na ketitakinitotor Ngiyaudi, kainyo ayeni ayong atamar iyeni iyong lokojokon ngitalio daang a Ngiyaudi ka ngakiro na epegaanasi kesi. Kemaimai bocha tokona ayong iyong atamar totinenik ipupi ngakiro nugu. “Eyenete Ngiyaudi daang ngakiro a elote kang napei kolong aringa ayong adit. Eyenete kesi epit lo ebooyo ayong anakwap kang, ani erumor ebooyi alo Yerusalem. Kayan kesi ayong nakanuan, arai tani tasakete alimor, ketamarito napei kolong jik, arai ayong epei a Ngiparisayo alu irichito noi ngakiro a ngakujo yok. Nakaneni awei tokona ayong kane ketitao ani egienor akichikakinet nakolong echikakini Akuj ta apayok, akichikakinet napei igienosi ngibukui yok lutomon ka ngiarei aanyun, ilipito Akuj akwaar ka apaaran. Ekapolon lokiyenikinitae! Ketitaate ayong Ngiyaudi kotere ni egienor ngakiro nguna! Nyo kigogongikinit esi lu iyakasi nege peinupeta atamar iteyaruni Akuj ngitunga lu atoaka? “Etamit kolong ayong elope atamar ejoikinit asubi nakaalak na etepeniarea ngakiro a Yesu alo a Nasaret niapenan. Ngakiro nguna ngesi asubi ayong alo Yerusalem. Ketutuko Ngimurok Luapolok sodi atoenene ngitunga a Akuj lukaalak alojela. Ani na atubere atamar eario, atacham ayong dang atamar taarae. Aboliar ayong kesi jiik anakais a Atuk asaki atamar tongero anupit ngakiro a Akuj. Anyunyurikina ayong kesi noi aloseene tani lorerea a ngakwapea anache aboliar kesi. “Eraakasi ngakiro nguna ngesi alosio ayong Damasko eya ngakiro na ketutukito Ngimurok Luapolok. Ekapolon lokiyenikinitae, arai naparan lotingilan ngesi aanyungarea ayong akicha naakwaan kea na idwangit akwangis keng tani na a akolong, ekwanguni alo kidiama keriam ayong ka ngitunga lu kirukitor alowaitin kadaang. Atadakakin sua daang kwap, sodi eira ayong etoil kesuruorikini ayong a Ngaeburaniae ebala, ‘Saul, Saul, nyo kiboliar iyong ayong kona? Iwana iyong bon loger a esikiria alo epetepete akitoe naita na idesere.’ Engit ayong ngesi atama, ‘Ngae iyong Ekapolon?’ Sodi katatachak Ekapolon tama, ‘Ayong ngesi Yesu lo iboliar iyong. Nakaneni tonyou towo. Edodiun ayong anikon kainyo asaki aseun iyong toliwor ekasuban etich kang. Ilimokini iyong luche na ingolik iyong anikang akolongit naga ka nakedodikini ayong iyong monan. Kayuuni ayong iyong alotunga a Isirael ta ngibukui lu nyerai Ngiyaudi, lu kameari ayong iyong nikech. Ingaari iyong ngakonyen kech, toreunos kesi anaribu nakicha nabo toreunos anagogongu a Esiitan pena nia Akuj. Sodi ani kenupa kesi ngakiro kang, erimakinio ngasechesea kech dio toliworos ngipei ka ngitunga a Akuj luseuna.’ “Ani kanguna Ekapolon Agiripa, abu robo ayong atacham akiwapakin ngakiro a ngakisingolikinet ana kedodikinio anadis. Atolomak ayong mono ekingaren akitatam ngitunga lu aya Damasko, ka lu aya Yerusalem ka akwap daang a Yudea ta ngibukui lu nyerai Ngiyaudi dang. Etatam ayong kesi atamar ejoikinit elungete ngasechesea kech sodi toreunos nia Akuj dio tosuba ngitichisio lu idodiunete atamar alunga kesi ngasechesea kech. Eraakasi ngakiro nguna ngesi kerumuneta ayong Ngiyaudi naayakar kai a Akuj, tasaka akiar. Nakaneni kengarak ayong Akuj tanang akolongit napei tokona na. Ibore ngini ngesi awaar ayong kane alimokinit ngitunga daang ngakiro kang, luuchik ka luapolok aapei. Ngakiro na eruoro ayong ngesi na kolong pei alimunito ngikadwarak a Akuj ka Musa atamar esubakinosi, ngakiro nguna ngesi na abeyo ejoikinit Kiristo eario toliworor lo a ekingaren eyaruni, sodi tolimorea atamar, eanyunete Ngiyaudi ka ngibukui lu nyerai Ngiyaudi ayuuno, na isikwaanitae ka akicha.” Ani na esisaunea Paulo ngakiro na eyuunor aloger kalo, kikilak Pesto ngesi tama, “Kikerepik iyong Paulo! Kitokopo iyong ni isomator noi ngikerep!” Tatachu Paulo tama, “Nyekekerepikinit ayong ekapolon lokiyenikinitae! Eraakasi ngakiro na eruoro ayong ngaka iteni dir. Ekapolon Agiripa, kesuruori ayong iyong ngakiro nu daang a atitinyu kainyo iyeni iyong ngakiro nu daang. Ayeni ayong atamar emam akiroit na tani apei na nyiyeni iyong kainyo emam na asuba anirapap! Ekapolon Agiripa, inupit iyong ngakiro a ngikadwarak a Akuj a? Ayeni ayong atamar inupit!” Tolimok Agiripa Paulo tama, “Itamit iyong atamar kori kitiliwori iyong ayong ekiristoit a esaa alouriyen kalo a?” Tatachak Paulo tama, “Tani keuriana kori kewoi, elipit ayong Akuj atamar toliworos iyong ka luche lu eya ne daang Ngikiristoi loger kang, tarai bocha nyikeenio esi kwa ayong!” Sodi tonyout ngikapolok Agiripa ka Pesto ka Berinike naarai aberu ka Agiripa ta ngitunga luche daang. Ani na arotokinioto kesi, tolimokin make tamasi, “Emam ibore esechit itwaan en ni echamit earere kori eenikinere lojela.” Tolimok Agiripa Pesto tama, “Arai nyeesaki itwaan en alosit nia ekapolon a Ngiroma, kelachakin.” Na atiakunere atamar kilosi sua nakwap a Italia, apon tolimokinae Yulius atamar toweik Paulo ka ngitunga ngiche lu aenitae. Arai Yulius ekarikon a ajore ana enyaritae, “Ajore a ekapolon a Ngiroma.” Atodokasi sua natubwa ani enyaritae Adaramito. Anyounit atubwa ngina alosit lorerea lu aya lokwaas a anam ana a akwap a Asia, ewaaros sua a atubwa kangina. Kirukit sua ka Arisitariko lo arai Emakedoniat lo abuni alo Tesalonike. Akolongit na a ngaarei, atodokutu alore a Sidon. Tapataner Yulius ani a Paulo, tachamak ngesi elosi aanyun ngipaalotin keng sodi nakis ngesi ibore ni kichana ngesi. Atonyoutu sua kaneni ani kona akutunitor ekuwam, tanang atubwa kosi lokwar lo elukakina kiding anam lo enyaritae Kupuro anakan ana peakutunitor ekuwam. Totubor atubwa kosi alowae a anam alo ayei nakwapea a Kilikia ka na a Pamupulia atanangutu lore lo ayei lokwaas a anam ana enyaritae Mura, lo a akwap a Lukia. Torukau ekarikon a ngasigerea atubwa na abuni alo Alekisandaria na ateni nakwap a Italia, kidokok sua natubwa ngina. Kiwaar atubwa kosi a ngirwa a ngikaalak, iyapi wadio. Sodi ataapiasi sua lore a Nido kichana noi. Kona kitukuruworea sua ekuwam akidirar nakan ngina, atamana sua Kirete anakan ana erapap alokuwam, etoro lodoket lo eremokino nanam na enyaritae Salimone. Kinapakin atubwa kosi ekwaas a anam. Kiwaar atubwa ngina kichani noi sodi atanangutu lodoket a atubwa lo enyaritae “Ngidoketa Ajokak”, diyete ere lo a Lasea. Ebooyoto sua nikooyen kaneni tadaun tani Akolongit na Aronere. Toroner alosit a atubwa na ekokineta ngakiro neni. Kichikichik Paulo kesi tama, “Ngikiliok, engolikinit ayong atamar eroner alosit yok napei kane jik. Inyasun atubwa ka ngiboro, nabo kipedori ngoni dang amunyar.” Nakaneni topupok ekarikon a ngasigerea ngakiro a ekamean a atubwa ka na a elope a atubwa nyekachik ngakiro a Paulo. Kona peajokia edoket ngolo ibooyere ngirwa lua aibach, tasaka ngitunga ngikaalak alosit ngaren, ani kikok neni, tananga Poinike kiboikinos inaa ngirwa lu aibach. Erai Poinike edoket a akwap a Kirete, lo eyei kwap too ka kuju too. Nakaneni na esiakinea ekuwam akutun wadio anakan ana aloteten a atoo, tamasi ngitunga kori kitemokin esaa lo enyouneto kesi. Kikeut kesi ibore niapotion etoweit atubwa sodi tomeasi kesi atubwa kinapakin ekwaas a anam a akwap a Kirete. Nakaneni tokut ekuwam loationon, lo enyaritae “Ekuwam lo ekutunit alo too anakan ana Lokedieny” atipei iwasiunit alokwar alo elukakina kiding anam. Kibap ekuwam ngolo atubwa, ani kona akuruworor akidirakin atubwa lokuwam, atojongoto sua amere atubwa toliwor ijukit ekuwam. Eyookinos sua wache ni erapap alokuwam na kimanea sua alokwar alo elukakina kiding anam lo enyaritae Kauda anakan ana ibakit aloteten keng, alo kide. Ani kinangi neni, kichan sua noi atubwa naachi na ainikinitae natubwa, ani bocha erumor, erumutu. Kidokunae atubwa naachi ngina tooma natubwa sodi toenae atubwa a ngaunoi lokojokon. Aemito kesi abaasi kori enangete atubwa ngalup naukur a ekwaas a akwap a Libia. Sodi totiyaut kesi awaru a atubwa na ijukit ekuwam, kimiekis atubwa ijukit ekuwam. Na esikokinor ekuse a ekuwam, tolomakis kesi achakanakin ngiboro ngiche lu ewokit atubwa nakipi, akolongit na a ngauni, tolomakis kesi achakanakin ngiboro a atubwa epewae lu ikote ngaunoi ka ngawarui nanam. Nyeanyungara sua akolong kori ngikanyer a ngirwa a ngikaalak. Torubak ekuwam ekutunit noi. Atamasi sua kori nyeringa nabo kiyari. Ani na ebooyoto kesi nikooyen eringa nyimuja, towo Paulo alokiding kech tama, “Ngikiliok, arai ngoon kiirasi esi ngakiro kang nyenyouno alo Kirete, pekebukoro ngiboro yok daang kona. Nakaneni kemaimai ayong esi atamar totitinyoketo! Emam esi tani itwaan ipei ni etoani, erai atubwa bon ngesi inyasun. Abuni been emalaikat a Akuj kang ana elipit ayong nakwaare, sodi katolimok ayong tama, ‘Nyiem Paulo! Iwei iyong alongaren ekapolon a Ngiroma. Kotere ni kiminar iyong Akuj, ebuchunosi ngitunga daang lu irukito ka iyong!’ Totitinyoketa robo tokona ngikiliok, kainyo anupit ayong ngakiro a Akuj atamar ikokinete nguna eger lo kalimokinio ayong. Nakaneni ekutari ekuwam atubwa yok tanang lokwar eche lo elukakina kiding anam.” Nakwaare a akolongit ana a ngatomon ka ngoomwon, ejukit ekuwam atubwa kosi ananam a Mediterenian. Na adilio akwaar, togipasi ngitunga lu aweikinito atubwa atamar aapia atubwa nalup nakoonok. Sodi kitemo kesi aoyau a anam a auno ana ainikinitae ibore niapotion. Torukaut eraakasi ngimitae ngitomwon-omwon. Ani ekisidi nabo kitemo, torukaut eraakasi ngimitae ngitomwon-uni. Toema kesi tamasi kori edikino atubwa ebwangakin natabab. Kiyoolikis kesi ngiboro lu apotiok nguomwon nakipi anaabor a atubwa sodi towaar atubwa. Tagata kesi atamar kiwala atipei. Sodi tasaka ngitunga lu aweikinito atubwa akisii. Totiyaasi kesi atubwa nakipi tosub iyoolionokinete kesi ngiborei lu apotiok nakipi alongaren atubwa. Nakaneni tolimok Paulo ekarikon a ngasigerea ka ngasigerea tama, “Ani pekiboikinosi ngitunga lu eweikinito atubwa tooma natubwa, nyiiunosi esi.” Sodi totubo ngasigerea ngaunoi na aenitere atubwa naachi, kimiekis kesi atubwa ngina ijukarete ngakipi. Ani na apikinea akiwalar, kimaima Paulo kesi daang esaki kimuja tama, “Ibooyoto esi a ngirwa a ngitomon ka nguomwon emam ibore inyam. Tokona, kemaimai ayong esi kimuja adio kimuj sodi toyareta. Emam ibore kiwani esi tani wadiochichi.” Alimunet kongina, tolem Paulo amugati tobuak Akuj alakara iteete kesi daang. Tonyil ngesi amugati ngina dio tanyam. Topwatun kesi daang ngitai kimuja tani akimuj. Arai ekimar kosi kadaang alu kidokit atubwa ngina ngitunga ngamiae ngaarei ka ngitomwon-kaarei ka ngikan-kapei. Na emuja itwaan daang toup akimuj, tachakakis ngakanoi daang nanam kainyo asakete atubwa tooker. Na ewalarea, tokuruwo ngitunga lu aweikinito atubwa akiyen ekwaas a anam ngolo. Sodi kingolikis apas na ejuarit. Totiakut kesi atamar etoweikisi atubwa neni erai kepedor. Sodi totubo kesi ngiborei lu apotiok etoweito atubwa kimiekis ananam. Ani esaa lopei ngolo, talachut ngaunoi na eenito ngakito nameet atubwa. Dio kikeut kesi awaru na ayei ngaren atubwa esakete ekuwam kijuka atubwa ngaren. Nakaneni, kipotu sua edirasi lokwaas a anam. Nakaneni kikungokin atubwa nalup naukur kimak kaneni. Kitijakin ewae lo alongaren nalup tojongo tani akiloiloo. Kona akutunitor ekuwam noi, tobwangabwangata ngitoroi ewae lo aabor a atubwa. Totuko ngasigerea akiar ngitunga daang lu aenitae sodi nyiitapatapaareta kesi lokwaas a anam sodi tosiwa. Nakaneni kona asakea ekarikon a ngasigerea ayuun Paulo, kitonger kesi akikokin neni. Abu ngesi todung atamar tachakakinos ngitunga daang lu eyenete akitapatap nanam kitapatapaasi lokwaas a anam. Ani erumor, totupakis luche etingito ngakito nadapal ka ngakabelekeke a atubwa. Erai eger ngolo ngesi kinangea sua daang lokwaas a anam niajokon. Nakinangea sua lokwaas a anam niajokon, atoyena atamar enyaritae akwap ngina Malita. Kitepeyono sua ngitunga a akwap kangina niajokon. Esiakinit akiru akitep alilim akwap sodi kinokakis kesi akim kitanyaraut sua daang epiararos niajokon. Kikeyanu Paulo ngakito ani eringa iwaanakini nakim, toliau emun anakito na ewarakinea akim kilogakin nakan a Paulo. Na engolikineta ngitunga a akwap kangina emun iyoloyolo anakan a Paulo, tolimokinos make tamasi, “Abe erai itwaan en ekaaran, tani ngoon kebuchuna ngesi ananam, nyechamit Akuj na enyaritae Akatubon ngakiro eyari.” Nakaneni tarachak Paulo emun ngolo nakim nabo nyekonya emun ngolo ngesi. Tamasi kesi kori ebui akwaan keng, kori dikino tani edakakin kwap atipei totoan. Ani na edareta kesi nikooyen kingolikis atamar emam ngakiro asubakin anikeng, kilochosi tamasi, “Abe erai itwaan en Akuj!” Diyete neni, aya ngamanat a Pubulis alo arai ekapolon a ekwar kangolo alo elukakina kiding anam. Kitepeyon ngesi sua niajokon atarata ngipeyok keng a ngirwa a nguuni. Aperi apakeng a Pubulis irakarit arukum, kiuruto. Toloma Paulo kai na aperio ekasukout ngolo kilip Akuj. Ani erumor, kidokok ngakan keng nakou a ekasukout, sodi tojoker ekasukout ngolo. Akikokinet neni, pot ngitunga daang lu adekasi alokwar kangolo kitojok Paulo. Kiinakis ngitunga ngulu sua ngainakinet nakaalak. Ani nakinyounio sua alosit, kiinakis kesi sua akimuj nakaalan nanyamat alorot. Adaunet a ngilapio a nguuni, tonyou nabo alotoru kosi atodokasi natubwa na enyaritae “Ngakujo na Imuunitae” na abunit alore a Alekisandaria. Awei atubwa ngina alo Malita ngirwa daang lu aringaakar akwap iibachikinit. Atananga lore a Sirakusa, atopero inaa ngirwa nguuni. Atonyoutu kaneni elodasi atananga lore lo enyaritae Regio. Akolongit na atupit ngina, tokut ekuwam anakan ana aloteten a atoo. Adaunet a ngirwa a ngiarei, atanangutu lore a Potoli. Atorukautu sua ngikanupak kaneni lu kilimokinete sua atamar atepeyono ka kesi a ngirwa a ngikan-kaarei. Ani erumor, atanangutu sua Roma. Na eirareta ngikanupak lu eya Roma atamar kiponit sua, pot kisiriama sua anigielet ngiboro ani enyaritae Agialaru a Apio ka nikimujet ni enyaritae Ngiotelio Luuni. Na engolikinea Paulo kesi, tobuak Akuj alakara, topwatun etau lokojokon. Nakinangunea Roma, kimiekinae Paulo ibooyi anikeng bon erukito ka asiger na iyoki ngesi. Adaunet a ngirwa a nguuni, tochunak Paulo wapei ngikapolok a Ngiyaudi lu aya neni. Ani iriamiriamete kesi, tolimok Paulo tama, “Ngitunga kang Ngisirael, tani kemam naaronok asubit ayong alotunga kang kori tani pekechwangakinit ngitalio kata apaayok, apon kerumun ayong alo Yerusalem katorikokin Ngiroma. Nakengitanareta kesi ayong ngakiro tongichut atamar emam ibore ni asechit ayong, tasaka kesi alakakin ayong. Nakaneni na etopegeta Ngiyaudi ngakiro nguna, engolik ayong atamar ejoikinit alosi aanyun ekapolon a Ngiroma, tani kemam ngakiro naaronok etitakinea ngitunga a akwap kang. Eraakasi ngakiro nguna ngesi asakea ayong aanyun ka esi eruoro, kainyo eraakasi ngakiro na igienosi Ngisirael ngesi kaenitere ayong a erikot kalo.” Tolimokis kesi ngesi tamasi, “Emam abarua nakigirakin sua alo Yudea, kori emam tani ekanupan abu nege akisisare ngakiro a ngikapolok a Ngiyaudi kori akiruoror iyong ngakiro naaronok. Nakaneni kisaki sua akiirar ngakiro kon, kainyo kiyeni atamar itopegete ngitunga awadaang ngakiro a atukuoru ana iloma iyong kana.” Ani kanguna, kichikakinos kesi ka Paulo erwait lo iriamiriameta. Ani enangi akolongit ngina, pot elalak noi ni ebooyo Paulo. Napei nataparach jik tanang nakwaare, kisisak ngesi kesi ngakiro naajokak a apolou a Akuj. Tasak ngesi akitunup kesi ngakiro a Yesu ani alimuununio ngakiro a etal a Musa ka ngagiran a ngikadwarak a Akuj. Tonupa ngiche ngakiro keng, nakaneni nyenupa ngiche. Sodi topegakinos kesi make tonyout torotokis naarumorea Paulo alimun akiroit apei na abala, “Eraakasi ngaka iteni ngakiro na alimuni Etau a Akuj anakituk a ekadwaran a Akuj Isaya tolimok ta apakus! Kainyo alimuni ngesi tama, ‘Kape tolimok ngitunga lu tama, Ipupokinete lokojokon nakaneni nyiyenunete, ingolikinete lokojokon nakaneni nyebwangasi ngakies toyena. Kainyo esiwaa kolong Akuj ngitamen a ngitunga kalu, agol ngesi ngaki kech, agol tani ngakonyen kech. Arai nyikote neni, keanyungarito ngakonyen kech, kiirarito ngaki kech, keyan ngakiro alotamen kech, ebala Akuj, kereuna kesi nikang, sodi etojok ayong kesi.’ ” Sodi torumo Paulo ekiruor a ngakiro ana alimuni tama, “Toyena robo atamar ayuuno na itorunit nia Akuj, esiporor lobukui lu nyerai Ngiyaudi. Epupokinete kesi!” [ Na arumorea Paulo alimun nguna, torotokis Ngiyaudi iburaate make.] Kiboi Paulo alokai ana atacheene ngaropiyae a ngikaru a ngiarei. Dio kirumuunu ngesi ngitunga daang lu aponenete aanyuunun ngesi kaneni. Kitatam ngesi ngakiro a apolou a Akuj ka ngakiro a Ekapolon Yesu Kiristo. Kitatam ngesi lokojokon a atitinyu emam ibore iratakinit. Ayong Paulo ekasuban etich a Yesu Kiristo ngesi egirunit abarua naga. Arai ayong nabo emeanara lo kanyarae Akuj katoseu atoliwor eketataman a Ngakiro a Naajokak keng. Kolong kanuan, echikakini Akuj ngitunga Ngakiro Naajokak nu ani a ngikadwarak keng, loger lo igiritere Nagiran na italeuno. Eraakasi ngakiro nguna na a Lokookeng, Ekapolon yok Yesu Kiristo. Alopit keng alo araakar itwaan, edounio ngesi erai ales a Daudi. Alopit a akitaleuno a Etau ani araakar ngesi Akuj, edodiunio dir a agogongu anaationon noi atamar erai ngesi Lokookeng a Akuj ani ayarunea. Kotere ngesi, kangaru ayong Akuj a ajokis keng ketarau emeanara, sodi atoreunea ngitunga a ngibukui kadaang tonupa ka akiker Akuj. Ngitunga ngulu ngesi esi dang lu iyakasi Roma, lu kinyara Akuj toliworos ngika Yesu Kiristo. Kegirakinit tokona esi daang lu iyakasi Roma, lu kimina Akuj kitoseu toliworos ngitunga keng. Kimiekisi Akuj Apayok ka Ekapolon yok Yesu Kiristo kitaanyu esi ajokis ka ekisil. Abuakinit ayong Akuj kang alakara mono ekingaren ani a Yesu Kiristo kotere esi daang, kainyo eirasi ngitunga a ngakwapea kadaang anupit kus. Eyeni Akuj atamar eraakasi naalimu ayong ngaka iteni, Akuj ngina ngesi naasubi ayong etich keng a etau kang kadaang etatami Ngakiro Naajokak a Lokookeng. Eyeni Akuj atamar ketamunit ayong esi esaa daang lo elipea ayong. Elipit ayong Akuj atamar ani kerai echami keng, kainak ayong alolom naabunio nikus tokona. Nakaneni kemuit ayong aanyun ka esi noi, sodi atomoreta apiaro na etau a Akuj na itogogongi ngitai kus noi. Ngakiro nguna ngesi atamar, kingarakin ayong ka esi aapei, kengarak ayong anupit kus, nabo kingarak esi nakang. Asaki ayong esi ngikaitotoi kang toyena atamar akot ayong ngirwa ngikaalak abunere aanyun esi, nakaneni keratakinit ibore tani tokona. Asaki ayong ataanyu ngikanupak anikus dang loger lo aanyunea alobukui alu nyerai Ngiyaudi. Kainyo alemuna ayong kotere ngitunga daang, lu aosut kalu eringa ebangaaka, lu isomato kalu nyisomato. Eraakasi nguna ngesi kemuitor akitatam esi lu iyakasi Roma Ngakiro Naajokak. Nyeketimit ayong atamar eraakasi Ngakiro Naajokak agogongu a Akuj na eyuunea daang lu enupete, Ngiyaudi mono ekingaren ta ngibukui lu nyerai Ngiyaudi dang. Kainyo idodiunito dir Ngakiro Naajokak eger lo imarunea Akuj atamar erai ngitunga lu etenoono eboyor anikeng, kotere epit a anupit napei anakisiakinet tanang losal. Loger lo igiritere nagiran kona, “Itwaan ni etenoono eboyor ani a Akuj kotere anupit, eyari.” Etoodiun anyunyura a Akuj anadis atamar, engerit Akuj ngasechesea ka aronis daang a ngitunga alu itengerito ngakiro na iteni ayenunio kotere eboyor kech loaronon. Kainyo daang na a Akuj na epedorio akiyen, ileerete anikech kainyo Akuj bon etatakanu. Napei kolong esubuni Akuj akwap, eboyor keng lo nyiteo lo ikoni agogongu keng nanyedaun ka ni araakar ngesi Akuj, eleereu atakanuu. Ayan ngitunga ngakiro nguna aloboro alu asubuni Akuj. Nakaneni emam ngakiro ngache na elimunete kesi sodi toyuunotor! Eyenete kesi Akuj, nakaneni nyekerito loger lo esakitor ngesi kesi katokear, kori nyebuanakinete kesi ngesi alakara. Nakaneni eraakasi ngakiro na itamete kesi ngapasiek, ani nabo ngitamen kech, erioketa kolong chuch. Ebalasi kesi kiosok, nakaneni ebangaaka, adepasi kesi akilip Akuj na eyari jik, aliworosi ilipito ngakujo nasubuna na eraakasi ekisikwaane a ngitunga alu etoakeenete, kori ekisikwaane a ngikieny, kori lo a ngitieng kori lo a ngimunio. Kotere nguna, ajal Akuj ngitunga ngulu emiek esubete emalaanu lo eminasi ngitai kech. Tosubeta ngawat kech ngakiro na a ngileech. Edeparete kesi akinup ngakiro a Akuj na iteni sodi tonupa ngakiro na eraakasi alioko. Ekerito kesi nabo ilipito ibore nisubuna todepasi Akasubunan alope na erai ngesi ejoikinit ipuruunio jik! Aamen. Kona esubeta nguna, areiki Akuj kesi kiwapa etereku lo a ngileech. Tani ngaberu dang eboliatar eberuane kech, aliworosi itopereeneo a eger alopalem nyepereeneto ngitunga. Aloger alopei kangolo, adepasi ngikiliok dang apereenen ka ngaberu loger lopalem, aliwor imuit akiteper ngikiliok luche. Esubanakinotor ngikiliok make ngakiro na a ngileech, sodi kotere nguna, taanyut kesi eriras a ngakiro ana esecheenete. Kona angerioto ngitunga akiyen Akuj, emiekinea Akuj kesi ngitamen lu inyasuna, sodi tosubeta kesi ngakiro na nyejoikinit esubete. Elelebun nikech ngakiro naaronok daang, na ikote aronis ka etereku ka nginyas ka arorokanut noi ka akiar ka eburas ka engalas ta akitoronit luche. Iturumosi kesi ka aswama, eraakasi kesi ngitunga lu eremokino Akuj. Iyenyasi kesi make, inisasi kesi ka akiwoga. Eminasi noi akisub naaronok nabo nyepupete ngakiro a ngikauriak kech. Emam ngakiro ekachito ngitai kech, nyiwapete ngakichikakinet kech. Nyepataka kesi ani eya luche kori nyisieniyete luche. Eyenete kesi atamar elimunitoe alotal a Akuj atamar ngitunga lu esubete kongina, etoakete. Tani ikote neni, meere atamar kesi make esubete ngakiro nguna, nakaneni itoodikinito kesi tani luche atamar ejok ngakiro nguna. Ekone yaa, ani kirirae iyong luche, emam jik ngakiro na ilimuni iyong toyuunor tani kirai iyong ngae, kainyo na irira iyong luche ani erumor tosub ngakiro napei esubete kesi, irira iyong elope bon. Kiyeni atamar iyookinit Akuj na irira ngitunga lu esubete ngakiro na ikote nu. Nakaneni iyong ekone, isubi iyong ngakiro na irira luche! Itamit iyong atamar ipuun aloriras a Akuj a? Kori imenyarit iyong ni ejokia Akuj noi enaikinit nabo totitinyikinite. Iteni dir iyeni iyong atamar epatana Akuj, kainyo esaki ngesi areeun iyong tolung ngasechesea kon. Nakaneni etioko esi ngitai nabo ichanaka esi noi. Ani ikoneta neni, itoronete esi noi eriras kus Akolongit na etakanuunea anyunyura a Akuj ka eriras keng lo etenoono. Kainyo einakini Akuj itwaan daang ebachit itemem ka na asub ngesi. Erubakinito ngitunga ngiche esubete naajokak esakete ekipur ka arimatoi ta akiyar nanyedaun, eanyunete kesi akiyar nanyedaun. Nakaneni edingaka ngitunga ngiche nabo nyiwapito nguna iteni, pearai iwapito naaronok, eanyunete kesi anyunyura a Akuj ta angoit keng. Eanyuni itwaan daang ni esubi naaronok ngichan ka ariaba, eanyunete mono Ngiyaudi ka nabo tani ngibukui lu nyerai Ngiyaudi. Nakaneni itaanyuni Akuj daang lu esubete naajokak ekipur ka arimatoi ta ekisil. Eanyunete Ngiyaudi mono ani erumor taanyut ngibukui lu nyerai Ngiyaudi dang. Kainyo irirae Akuj ngitunga daang a epit a epei. Nyeyenete ngibukui lu nyerai Ngiyaudi etal a Musa. Esechete kesi sodi tobukoros ani nyeyeneta etal. Eyenete Ngiyaudi etal, esechete kesi kirirae a etal. Kainyo meere akipup ngakiro a etal ngesi imarunere ngitunga atamar etenoono eboyor ani a Akuj, nakaneni erai akiwap na edungunitoe Alotal. Nyeyenete ngikubui lu nyerai Ngiyaudi etal, nakaneni na esubeta kesi na edungunitoe alotal kotere ni ebalar kesi ibore tosuba kongina, itoodiunit ibore ngini atamar, eyenete kesi etal alotai kech, tani pekeyenete kesi etal. Itoodiunit eboyor kech atamar igiritae etal lotai kech. Itoodiunito ngitamen kech dang atamar eraakasi nguna ngaka iteni kainyo idodikinete kesi ngitamen ngiche atamar esechito kesi nabo idodikinete ngiche atamar nyesechito. Aloger kangolo, iwapap ka Ngakiro Naajokak na etatami ayong nu, ikokinete ngakiro neni Akolongit na irira Akuj ani a Yesu Kiristo ngakiro daang na imunonito ngitunga. Ani bo iyong? Abe ibala iyong arai Eyaudit a? Igieno iyong etal kiwoga ibala abe irukito ka Akuj, iyeni iyong na esaki Akuj iyong tosub nabo itatama iyong Alotal aseun na eteniyete, iyeni iyong atamar irai iyong ekarikon a ngimuduk nabo ikoni akicha ani kangulu eya naribu. Irai iyong ekarionokinan ngikabangabangae nabo eketataman alu emam ibore eyenete ikote ngide luuchik. Erai Lotal ngesi eyei aosou ka ngakiro na iteni daang. Itatami iyong luche, nyo peitatamar iyong bon? Ilimorit iyong ibala, “Nyiikoko”, nakaneni anibo iyong, ikokoyeene iyong a? Ibala iyong, “Nyiilom”, nakaneni ilomeene iyong a? Iremokino iyong ngakujo nasubuna, tarai bo ibarit iyong ani ikokoea ngiboro lu eya nakais a ngakujo anasubuna. Iwoga iyong ibala abe iyeni etal a Akuj, ikwa nyiyeni iyong atamar imenyarit iyong Akuj na ichwangakinea iyong etal keng a? Igiritae nagiran a Akuj kona, “Iruorotor ngibukui lu nyerai Ngiyaudi Akuj ngakiro naaronok kotere esi Ngiyaudi.” Ani kiwap iyong etal, erai akilengero kon naajokon. Nakaneni ani kichwangak iyong etal, kejoikinit kolong iyong tani pekilengerio. Ani kirichak ebukut lo nyerai Eyaudit ni nyilengeritae ngakiro na edungokinitae Alotal, ikwa nyisikokini Akuj ngesi itwaan ni ilengeritae tani pekilengeritae a? Loger ngolo, kirirate esi ngibukui lu nyerai Ngiyaudi ani ichwanganakineta esi etal. Tani ta kigirakinitae esi etal ngolo nabo kilengeritetei. Nakaneni iwapito ngibukui lu nyerai Ngiyaudi etal erai tani bo pekilengeritae kesi dang. Eya daang, ngae mono erai Eyaudit dir lo ilengeritae na iteni? Meere ebukut lo erai Eyaudit anikalapatan, lo erai akilengero keng ibore ni etakani anikalapatan. Eyaudit lo a iteni dir ngesi lo ebele Akuj asubu ilengeritae etau keng. Erai ibore ngini etich a Etau a Akuj, meere lo a etal alo igiritae. Itwaan ni ikoni neni, eanyunit ekipur keng ani a Akuj, meere lotunga eanyunitor. Eyei ibore idwangitor Eyaudit ebukut loche a? Kori ejok robo akilengero noi? Ee, ejok a ngiwaitin kadaang! Mono ekingaren, eteyenuni Akuj Ngiyaudi ngakiro keng. Ani ejok bo toya ngiche kech luaronok lu nyirichunito ngakiro nguna? Itoodiunit neni atamar epalikini Akuj aliwor naajokon na irichunit ngitalio keng a? Meere kongina! Erai Akuj na iteni, tani keliokono itwaan daang. Loger lo igiritere nagiran kona, “Echamit eyenunio atamar ilimuni iyong ngakiro na eteniyete na iruorikinea. Echamit iyong ipiyori ngakiro nakititakinitere iyong.” Nakaneni a, ani kitoodiunit aronis yok atamar esubi Akuj na eteniyete a, kitamari ngoni ai? Kitamari ngoni abe esubi Akuj naaronok ani kirira ngoni a? (Eruoro cha ayong nugu lokiruor a itwaan.) Nyikote neni! Arai tarai Akuj na nyitiriyani ngakiro lokojokon, ikokini ngesi irirae ngitunga a akwap ai? Kori ilimuni iyong tama, “Ani kisileereunit ni nyerichunitor ayong etal a Akuj atamar ejok Akuj noi, sodi kitiliwo ibore ngini ngesi akapolon noi, ikwa nyejoikinit bo ayong kerirao atamar arai ekasechan”. Ikoni ibore ngini atamar, “Atosuba naaronok sodi ataanyuneta naajokak!” Abe ngesi kiyenyeta sua ngiche kirirate ebalasi abe kitatami sua kongina. Irirao kesi loger lo ejoikinitor iriraare. Ekoe, kijokak tokona ngoni Ngiyaudi kidwangit ngibukui lu nyerai Ngiyaudi a? Mam jik! Ketoodik sek ayong esi atamar ikwaan Ngiyaudi ka ngibukui lu nyerai Ngiyaudi eraakasi daang ngikasechak. Loger lo igiritere kona, “Emam itwaan ni ejok, emam itwaan ni eos kori emam ni esaki Akuj. Areasi daang ani a Akuj echwangakis daang, emam itwaan etenoono, emam tani ipei. Ianete kesi ngakiro naaronok noi nakaarak, eliokoko kesi noi, elimito ngakituk kech ngakiro naaronok na ikote akisierit a emun, ileleba ngilam nakituk kech. Ekeraka ngakejen kech, esakete akinyasun ka akiar ngitunga, ani wadaang ni eloose kesi, ichanete ngitunga ka akinyasuunun. Nyeyenete kesi erot lo erai eka a ekisil, nabo nyeyenete kesi jik epit lo erai ekeret Akuj.” Kiyeni atamar eraakasi ngakiro a etal ngaka ngulu iwapito etal, sodi tongopea itwaan ni elimuni ngakiro na eyuunor nabo peneta ngitunga daang a akwap loriras a Akuj. Kainyo emam itwaan imaruni Akuj atamar etenoono anikeng ani irichunitor etal. Erai etal lo itoodikini itwaan atamar asub akisech. Nakaneni esileereun tokona epit lo imarunea Akuj atamar etenoono eboyor yok anikeng, erai pekekachitae epit a etal. Achamunito ngikadwarak a Akuj ka ngakiro na egiritae Lotal atamar ikote nguna neni. Itiliwori Akuj ngitunga lu etenoono eboyor anikeng kotere epit lo enupitotor ngakiro a Yesu Kiristo. Ikwaanakini Akuj neni ani eya daang lu enupito, erai peipakarit nabo ngiche, asecha daang aloketa Anakuj ana epedori ayuun. Nakaneni kotere ajokis a Akuj, imaruni Akuj kesi atamar etenoono eboyor kech ani anupeta ngakiro a Yesu Kiristo na elachakinete kesi dir. Alemuni Akuj Kiristo sodi taarae torimakinere ngasechesea a ngitunga ani anupeta kesi ngakiro keng. Ekokini Akuj neni sodi kitoodiunea ngesi atamar erai ngesi lo etenoono eboyor keng anikeng. Kolong sek, anaikinit Akuj peakachit ngasechesea a ngitunga. Ani tokona ngirwa lu, alema ngasechesea a ngitunga sodi kitoodiunea eger lo eraakar lo etenoono eboyor nabo itiliwori itwaan daang ni enupi ngakiro a Yesu ni etenoono eboyor keng ani a Akuj. Tokona a, nyo ejoikinit ngoni kiwogar? Emam! Kotere nyo? Erai nikirichunea ngoni etal a? Mam! Erai nikinupitor ngoni ngakiro a Akuj. Kainyo eliwor itwaan ni etenoono eboyor ani a Akuj kotere anupit keng, meere kotere akirichun etal. Kori erai robo Akuj aka Ngiyaudi make? Kori erai aka ngibukui alu nyerai Ngiyaudi dang. Ee robo, erai ngesi Akuj a ngibukui alu nyerai Ngiyaudi dang. Erai Akuj apei, nakaneni imaruni ngesi Ngiyaudi atamar etenoono eboyor kech anikeng kotere anupit kech. Imaruni tani ngibukui lu nyerai Ngiyaudi atamar etenoono eboyor kech kotere anupit kech. Ekoe, itoodiunito nguna atamar kipalikini ngoni ngakiro a etal ani kiraakar ngikanupak a? Mam jik, kiliwor ngoni lu kirichunit etal. Kitamari tokona ngakiro a Aburaam alo erai apaayok ai? Ani kolong ketenoono ani a Akuj kotere ngitichisio keng, kepedo ngesi akiwoga, nakaneni nyiwoga ngesi ani a Akuj. Kainyo igiritae nagiran kona, “Anupi Aburaam ngakiro a Akuj sodi kimaru Akuj ngesi atamar erai itwaan ni etenoono eboyor.” Itwaan ni esubi etich itanyamio ngaropiyae. Nyimarunitae ngaropiyae nguna atamar eraakasi ebachit keng. Meere kongina, eraakasi na ejoikinit itanyamio. Nakaneni itwaan ni igieno eger lo enupitor ngesi Akuj na erimakinea lu nyenupito, emina Akuj anupit a itwaan kangini. Dio tomisik Akuj itwaan ngini atamar etenoono eboyor. Ngakiro nguna ngesi kolong eruoro Daudi ebala epiaritae itwaan ni emaru Akuj atamar etenoono, peekachitae ngitichisio keng. Alimunit Daudi tama, “Epiaritae ngulu arimakin nguna ichwanganakinete, kesi ngulu aburuchiar ngasechesea kech! Epiaritae itwaan ni nyimari Akuj ngasechesea keng!” Erai apiaro nakolong alimit Daudi aka ngulu ilengeritae make a? Mam! Erai aka ngulu nyilengeritae dang. Kainyo kilimu ngagiran na igiritae kona, “Anupi Aburaam ngakiro a Akuj, sodi kotere anupit keng, kimaru Akuj ngesi atamar erai itwaan ni etenoono.” Ori kolong asubatar ngakiro nguna? Asubasi nguna kilenger Aburaam kori eringa nyilengera? Asubasi eroko ngesi nyilengera, meere kilenger ngesi kerumor. Elengerio ngesi ekisidi, kidodiu akilengero keng atamar kotere ni anupitor Aburaam, emarunit Akuj ngesi atamar erai itwaan ni etenoono, tani eringa ngesi nyilengera. Kaneni, arai Aburaam apakeng kadaang alu enupete Akuj, kimaru Akuj kesi atamar etenooko, tani pekilengeritae kesi. Erai ngesi apakeng tani alu ilengeritae, alu erai ani kilengeritae dang, iwapito ekitetemes a anupit ana kolong ewapit apayok Aburaam eringa nyilengera. Na echikakinea Akuj Aburaam ka ngalesea keng atamar eliwor akwap akeng, peechikakini ani ewapitor Aburaam etal, erai ni anupitor ngesi ngakiro a Akuj sodi kimaru Akuj ngesi atamar erai itwaan ni etenoono eboyor. Kainyo arai tarai lu iwapito etal kesi eliwor ngikerumak akwap, kerai anupit a itwaan aka kongin nabo kerai akichikakinet a Akuj aka pas. Eyauni etal anyunyura a Akuj, nakaneni ni emam etal, emam akisech. Kotere nguna, erai akichikakinet aka a anupit, sodi toliworor akichikakinet ngina einakinit Akuj ngalesea daang a Aburaam pas, meere lu iwapito etal make, erai tani lu enupito ngakiro a Akuj kona kolong ka Aburaam, kainyo Aburaam ngesi erai apayok, kona igiritere nagiran atamar, “Ketiliwo iyong apa keng a ngibukui alukaalak.” Erai anupit a Aburaam na iteni noi ani a Akuj ana anupit Aburaam, Akuj ngina iteyaruni ngikatoak nabo edunguni akiroit sodi tatakanu ibore nisek amam. Anupi Aburaam kigienokin, tani emam ibore ni ajoikinit ngesi igienor, sodi toliwor ngesi apakeng a ngibukui alukaalak. Loger lo igiritere kona, “Elalakearosi ngalesea kon toriyanikinos ka ngikanyer.” Adolokinit ngesi ngirwa ngulu ngikaru amiat apei. Nakaneni peangayat ngesi anupit keng na etamea eger a akwaan keng ana abu tolilimiyo, kori eboyor a Sara ana akolupana. Nyepalikina ngesi anupit keng nabo nyengayakina akichikakinet a Akuj. Kitogogong ngesi anupit keng noi sodi kipuruu Akuj. Anupit ngesi dir atamar epedori Akuj asubakin nguna daang echikakinit ngesi. Ibore ngini ngesi emarunitor Akuj Aburaam ani anupitor atamar, “Erai lo etenoono.” Peegiritae ngakiro nabe, “Emarunio atamar etenoono” kotere ngesi bon. Egirio kotere ngoni dang lu kimarun atamar etenoono eboyor yok. Ngoni lu kinupit Akuj na eteyaruni Yesu Ekapolon yok. Epotorio ngesi kotere ngasechesea yok taarae. Aponi kiteyarunae ngesi toyar sodi atachamunotor ngoni ka Akuj. Kona aliworor eboyor yok lo etenoono ani Akuj ani kinupitor ngoni, kisil ngoni ka Akuj ani Ekapolon yok Yesu Kiristo. Kotere ni kinupitor ngoni ngakiro a Yesu, kiwaak ngesi ngoni najokis a Akuj, na erai ngesi kiyarea ngoni. Aloger kangolo, kiwoga ngoni kotere akigieno na kimorea ngoni ekipur a Akuj! Meere tani kotere nguna make, kilakara ngoni alochan yok kiyeni atamar kititinyer ngoni erai kinaik ngichan, kichamuni ngoni Akuj kotere anaikinit, sodi ani kichamuni ngoni Akuj, egienokinos ngoni ngesi. Nyikitaanyuni ngoni akigieno ngina ngileech kainyo abukokin ngitai yok amina lokojokon a Etau a Akuj, alo erai ainakinet nakiinak ngoni Akuj. Ani kolong eringa ngoni kipalag, totoan Kiristo kotere ngoni lupekinupit Akuj a esaa alo aseunit Akuj. Etieno itwaan atoanere kotere itwaan ni etenoono. Ngaye robo kesak itwaan atoanere kotere itwaan niajokon. Nakaneni kitoodik Akuj ngoni dir eger lo kiminar ngesi ngoni, ani kolong atoanea Kiristo kiringa kirai ngikasechak! Kotere akitu keng, kimaru Akuj ngoni atamar etenoono eboyor anikeng. Kiyuun tokona ngoni ananyunyura a Akuj noi! Kirai kolong ngoni ngimoe a Akuj, nakaneni kiliwor tokona ngipaalon keng kotere akitu a Lokookeng. Kona tokona kiraunea ngoni ngipaalon a Akuj, kiyuuni ngoni Kiristo lokojokon noi ani eyarea. Meere nguna make, kilakar ngoni ana asubi Akuj ani a Ekapolon yok Kiristo alo tokona kitiliwo ngoni ngipaalon a Akuj. Itwaan ipei ngesi ayauni akisech nakwap. Sodi kirukut akisech keng ka akitu. Kotere nguna, akeikin akitu lotunga daang ani asechea itwaan daang. Ayei kolong akisech nakwap eringa Akuj nyeinakina Musa etal. Nakaneni ni emam etal, emam itwaan imarit ngasechesea. Nakaneni napei kolong a ngirwa a Adam tanang ngirwa a Musa, ajoikinit ngitunga daang etoakete. Tani ngulu nyesecha lopit lopei asechea Adam, ani angerio akiwap ngakiro na adungokinit Akuj. Arai Adam akisikwaanet a itwaan ani ebuni ekisidi. Nakaneni nyikwaan luarei ngulu, kainyo ainakinet a Akuj na a pas, nyikwaan ka akisech a Adam. Erai iteni dir atamar atoakete ngitunga lukaalak kotere akisech a itwaan anipei kangini. Nakaneni etenoono ajokis a Akuj noi. Etenoono tani ainakinet keng na a pas na eanyunete ngitunga lukaalak kotere ajokis a itwaan a ipei, Yesu Kiristo. Nyikwaan ainakinet a Akuj ka akisech na asechi itwaan nipei ngini, kainyo na asechea itwaan ipei, kirira Akuj ngesi tama erai ekasechan. Ani na asecheta ngitunga lukaalak, yau Akuj ainakinet na a pas na erai ngesi kimarunere ngoni atamar nyikisechit. Erai iteni dir atamar kotere akisech a itwaan a ipei, apot ngitunga toliworos etoakete kotere itwaan nipei ngini. Nakaneni, eteniyete dir ngakiro naasubi itwaan ipei ni erai Yesu Kiristo. Daang lu imarunio atamar etenoono eboyor kech ani a Akuj, taanyut ajokis lokojokon noi, eanyunete akiyar aloboyor kech ani a Kiristo. Tokona bocha, kona erirare ngitunga daang kotere akisech a itwaan a ipei, aloger alopei kangolo, na asubakinere akiroit apei na etenoono, elachakin itwaan daang dir taanyu akiyar. Ani kona aliworotor ngitunga daang ngikasechak kotere ni angerio itwaan ipei akiwap ngakiro na alimokinitae aloger alopei kangolo, imaruni Akuj kesi atamar etenoono eboyor kotere ni ewapea itwaan ipei na alimokinitae. Esiakini Akuj etal sodi kiatakinotor ngakiro naaronok. Ani iatakinosi ngasechesea, kiatakin tani ajokis a Akuj noi. Kongina bocha, loger lopei ayaunea eboyor a akisech akitu, kongina pei, eyaunit ajokis a Akuj eboyor lo etenoono anikeng. Eboyor ngolo kiriki ngoni nakiyar nanyedaun kotere Yesu Kiristo, Ekapolon yok. Kitamari tokona ngoni ai? Ejoikinit ngoni kirubakini kirai ngikasechak sodi kiatakinor ajokis a Akuj a? Meere kongina jik! Kikoni ngoni ngitunga lu kitoaka alosech, kirubakinit kirai ngikasechak ai? Kainyo iyenete esi dir atamar nakibatisaare ngoni emorikin ka Yesu Kiristo, kibatisao ngoni emorikin ka akitu keng. Na kibatisaare ngoni, ekokisi ngitunga lu kitoaki ka ngesi kitomur aapei. Sodi kona kolong eteyarunere Kiristo a ekipur a Apa, ataanyuneta ngoni dang akiyar nakitetet. Kainyo kona kiliworor ngoni ngipei ka ngesi tosub kitoaka loger lokolong atoanea ngesi, aloger alopei kangolo, kiliwor ngoni ngipei ka ngesi ani kiteyarunere loger lokolong eteyarunere ngesi. Kiyeni atamar kikok ngoni lu atoana eboyor yok longorot aramakin ka Kiristo napir, sodi kinyasunere epit a akisech, nyikiliworor nabo ngoni ngirikon a akisech. Kainyo itwaan na etoanea, elachakin dir nyeringa nabo erai ekasechan. Kona kikokinea ngoni lu kitoaka ka Kiristo aapei. Kinupit ngoni atamar kiyari ngoni dang ka ngesi. Kainyo kiyeni ngoni atamar eteyarun Kiristo nyeringa etoani nabo, arai akitu na atoani ngesi, nakidwanget jik akitu. Ani kona atoanea ngesi atoanet apei totoaniarea akisech, eyari tokona ngesi erukito ka Akuj aapei. Aloger alopei kangolo, ejoikinit tokona esi dang iyenunete atamar ikokis esi lu atoaka eboyor kus nyisechete. Ikokis esi lu iyarete ka Akuj aapei ani imorikinotor ka Yesu Kiristo. Nyejoikinit nabo esi isecheenete toliwor iwapito etereku a ngawat kus. Warasi nyiijal tani ekinier epei a ngawat kus toliwor ibore ni esubere naaronok ka akisech. Ejoikinit esi ijalasi ani a Akuj loger a ngitunga alu eteyarun toyara, sodi tajalakis ngesi eboyor kus daang toliwor esubere nguna eteniyete ani a Akuj. Nyejoikinit akisech kiriki esi, kainyo nyeringa esi iwapito ngakiro a etal, iwapito esi ngakiro a ajokis a Akuj. Kitamari tokona ngoni ai? Ejoikinit kisechi ani eraakar meere ngakiro a etal kiwapit ngoni, erai na a ajokis a Akuj kiwapit a? Mam jik! Iyenete esi dir atamar na ijalatar esi toliworos ngirikon lu iwapito ngakiro a itwaan aniche, iraakasi esi dir ngirikon a ekapolon alo iwapito esi ngakiro keng, kiraakasi ngirikon a akisech ana eyauni akitu, kori ngirikon a akiwapit na kilimokinitae, na erai ngesi eyauni ateneanut. Nakaneni, kibuakini Akuj alakara! Kainyo tani kolong sek kiraakasi esi ngirikon a ngasechesea, iwapa esi a ngitai kus kadaang ngakiro na iteni nakolong kitatamio. Kilachakinio esi dir tojongoto asecheenen sodi toliworos ngirikon a eboyor alo etenoono ani a Akuj. ( Alimunit ayong nugu a ngabukui anapalem sek iruorosi ngitunga luche dang, kotere apalagagu kus.) Kolong sek ijaluna esi iraakasi lu kitikit emalaanu ka erukoonu loaronon erupunit anikus. Aloger alopei kangolo, tajalunos esi jik tarata ngirikon a eboyor alo etenoono ani a Akuj, toliworos lu italeuno. Nairaakatar esi ngirikon a ngasechesea, peiwapito esi eboyor lo etenoono ani a Akuj. Nyo kolong ipot esi taanyut na isubeta ngakiro na tokona kitimito esi? Esalunete ngakiro nguna anakitu! Nakaneni kilachakin tokona esi nyeringa iwapito akisech, irata esi ngirikon a Akuj. Ibore ni ianyut esi ngesi akitaleuno ani a Akuj, na erai esal keng ngesi akiyar nanyedaun. Kainyo akitu ngesi kitachakinio kotere akisech, nakaneni akiyar nanyedaun ngesi erai ainakinet a Akuj na a pas ani a Yesu Kiristo, Ekapolon yok. Ngikaitotoi kang, ayeni ayong atamar iyenete esi dir na asaki ayong alimun, kainyo iyenete esi daang ngakiro a etal. Iwapete ngitunga ngakiro a etal ngirwa daang lu eringa kesi eyareta. Erai tokona kilimuni ekitetemes anaberu ana iusitae, echamakinitae Alotal ngesi irukete ka ekile keng ngirwa daang lu eyarea ekile, nakaneni ani ketoana ekile keng, nyeringa nabo aberu ngina iwapit ngakiro a etal kangolo. Ani kechamu aberu ngina echekile eringa lokile keng eyari, eliwor ngesi akaloman. Nakaneni ani ketoana lokile keng, echamakinitae Alotal ekile eche iusi ngesi. Ani kuut ngesi ekile eche, meere ngesi akaloman. Ikote ngakiro neni anikus ngikaitotoi kang. Ikokis esi ngitunga lu itoaka alopit a ngakiro a etal kainyo iraakasi esi epewae a akwaan a Kiristo. Iliworosi tokona esi ngipei ka lokolong eteyarunio sodi tosubakinea Akuj etich loajokon. Kainyo nakolong kibooyo ngoni lopit lopalem sek, toroner etereku yok noi kisikokin anawat yok ani ayakar etal, sodi atoliworos ngoni kisubi ngakiro na erikito akitu. Nakaneni kilachak tokona ngoni Akuj anakiro a etal, kainyo kikok ngoni ngitunga lu kilachun anakiro ana kolong kienito. Nyejoikinit tokona ngoni nabo kisubi etich kiwapit ngakiro nakolong ngorok egiritae Lotal, nakaneni ejoikinit kisubi etich alopit a Etau a Akuj. Kitamari tokona ngoni abe kori ikwaan etal ka akisech a? Mam jik! Erai etal kolong ketoodikini ayong atamar akisech ngesi nyo. Arai kolong nyigiritetei Lotal kona, “Wara nyikiraka etereku kotere ibore a itwaan aniche,” pekayeni ayong ngakiro a etereku kangolo. Kotere epit a akichikakinet kangina, aanyu akisech eger lo isiakinea ngiterekui lugelagelae anikang. Ani emam etal, ikoni akisech ibore ni etoanit. Ayakasi kolong ngirwa lu ayarea ayong dang peayeni etal. Nakaneni na ayenunea ayong akichikakinet a Akuj, abu akisech tatakanu, ekok ayong ibore ni atoana. Sodi akichikakinet na kolong asakitae yau akiyar, yau akitu alowae kang. Taanyu akisech eger lo kengalaa ayong anakichikakinet kikok ibore ni kaar ayong. Nakaneni erai etal lo ebekoono nabo ebekoono akichikakinet dang, erai na etenoono na ejok. Tokona, idodiunit ibore ngini atamar ibore niajokon ngini kaari ayong a? Mam jik! Akisech ngesi kaari ayong. Etoruni akisech esubi nguna lotal loajokon yau akitu nikang, sodi toyeneta dir ngitunga atamar akisech ngesi nyo. Ani kanguna kotere akichikakinet, kitoodiunere akisech atamar erono noi lokojokon. Kiyeni ngoni atamar erai etal eka a Etau a Akuj, nakaneni arai ayong itwaan nikarikit akisech. Nyayeni ayong ngakiro naasubi kainyo nyasubeene ayong na asaki akisub, erai na aremokino ngesi asubeene. Kona eraakar na nyasaki ayong akisub ngesi asubeene, itoodiunit ibore ngini atamar achamunit ayong atamar etenoono etal. Nakaneni meere ayong asubi ngakiro nguna, erai akisech na eyei tooma kang ngesi ketusubi ayong kongina. Ayeni ayong atamar emam ibore ajokon eyei tooma kang, ngesi atamar, tooma nakwaan kang, kainyo, tani ta kemuit ayong akisub naajokak, nyapedori ayong akisub. Nyasubi ayong naajokak na asaki akisub, nakaneni asubi naaronok na nyasaki ayong akisub. Ani kasubi ayong na nyasaki akisub, itoodiunit ibore ngini atamar meere ayong asubi nguna, erai akisech na eyei nikang. Nakaneni aanyu ayong atamar eyei etal lo ikoni lo nikang, naasakea ayong akisub ibore niajokon, toliwor ibore niaronon bon ngesi asubakini ayong. Eminarit etau kang etal a Akuj lokojokon. Nakaneni, etee ayong ngakiro a etal a eche alo egealana anakwaan kang, etal lo ejiete ka etal lo kajoikinit ayong. Ketiliworito nguna ayong erikot a etal alo a akisech alo eyei nakwaan kang. Wae! Ekoe aluchan lu katingito ayong lu? Ngae kayuuni ayong anakwaan ana karikit nakitu kana? Abuakinit Akuj alakara noi kotere Ekapolon Yesu Kiristo lo kiyuunor ngoni! Ikoni tokona eboyor kang ne, ayong elope anaosou kang, ewapit etal a Akuj, nakaneni ani aloger alo araakar itwaan, ewapit etal a akisech. Emam eriras eringa eyei ni eya ngulu erukito aapei ka Yesu Kiristo. Kainyo etal a Etau a Akuj lo kitaanyuni akiyar kotere akimorikin ka Yesu Kiristo aapei, kalachaki ayong dir nyewapit etal a akisech ka akitu. Nanyesubakina etal, kotere asechanu a eboyor a itwaan, tosubak Akuj. Kirira ngesi akisech aloboyor a itwaan ani ameunea Lokookeng, lo abuni ikwaan eboyor keng ka lo a ngikasechak, sodi totuborea ngesi akisech. Asubi Akuj nguna sodi kiyookinotor ngakiro na eteniyete Alotal, kiyookin aniyok alu kiyari kiwapit epit a Etau a Akuj, meere epit a eboyor yok. Kainyo lu ibooyete iwapito na esakete ngawat kech, erikito ngitamen kech ngakiro na esakete ngawat kech. Ani lu ibooyete iwapito na itoodikinit Etau a Akuj, erikito ngitamen kech na esaki Etau a Akuj. Ani kiriko iyong ngakiro a eboyor a akwaan, ianyuni akitu. Ani kirik iyong Etau a Akuj, ianyuni akiyar ka ekisil. Nakaneni eliwor itwaan emoit a Akuj, erai kerik ngesi eboyor lo erai eka a akwaan, kainyo nyiwapit ngesi etal a Akuj, iteni dir, emam ngesi kona iwapi. Ngitunga lu iwapito ngakiro na esaki eboyor a ngawat kech, nyitalakarete Akuj. Nakaneni nyibooyete esi loger lo esakea esi eboyor a ngawat kus kibooyoto, erai ibooyete esi loger lo kitoodikinit Etau a Akuj, erai robo kiboi Etau a Akuj anikus. Itwaan cha daang ni emam Etau a Kiristo, meere ika Kiristo. Nakaneni ani keyei Kiristo tooma kus, erai Etau a Akuj akiyar anikus kainyo etenoono eboyor kus ani a Akuj, erai tani ketoaka ngawat kus kotere akisech. Ani keyei Etau a Akuj ana eteyaruni Kiristo nikus, eanyunete ngawat kus dang nakasechak akiyar ani eyei lo kolong eteyaruni Kiristo, ani eyakar Etau keng nikus. Tokona bocha ngikaitotoi, eya na ejoikinit ngoni kiwapi, nakaneni meere akiwap na esaki eboyor yok ngoni atosuba. Kainyo ani kiboikinosi esi iwapito na esaki eboyor a ngawat kus, itoakete esi. Nakaneni ani kitapalik esi etau a Akuj asecheenen, iyarete. Ngitunga lu erikit Etau a Akuj, eraakasi talokookeng a Akuj. Kainyo Etau lo ianyut esi ani a Akuj nyikitiliwori esi ngirikon sodi tokurieketa, erai kitiliwori esi ngide a Akuj, nabo kotere agogongu a Etau a Akuj, ekaloutu ngoni atanyarata Akuj atamasi, “Apa! Apakang!” Imorikin Etau a Akuj kalu yok kitoodiu atamar kirai ngoni ngide a Akuj. Kona kiraakar ngoni ngide a Akuj, kianyuni ngoni ibore ni idaritor Akuj ngitunga keng esaki apiarea kesi, nabo kianyuni ka Kiristo aapei ibore ni idaritor ngesi Akuj. Kainyo ani kiboliare ngoni loger lokolong aboliare Kiristo, kianyuni ngoni dang apolou keng. Esibit ayong nyitemio ngichan lua ngirwa kalu ka apolou nakitoodikinio ngoni. Idarit ibore daang nikolong asubuni Akuj imuit noi akingolikin Akuj itoodiuni talokookeng. Kainyo etiliworio kolong ibore ni asubunio daang ipasit, peasakete kesi kikokis neni, nakaneni arai Akuj asaki kikokis neni. Tani kikote neni, ayei eger lo egienore atamar eyuunio monan ibore daang nisubuna, nyinyasun aloriras, nakaneni elachakinio dir taanyut apolou na a ngide a Akuj. Kainyo kiyeni ngoni atamar tanang tani tokona, eriab ibore nisubuna daang loger a aberu ana edikino idouni. Nakaneni meere ngiboro lusubuna make eriabasi, tani ngoni lu kianyu Etau a Akuj erai ainakinet a Akuj na ekingaren, kiriaba alotai yok erai kidarit Akuj kitiliwo ngoni talokookeng ka alachakin eboyor yok dir. Kainyo erai akigieno kolong ngesi kiyuunere ngoni, nakaneni ani kianyunga ngoni ibore ni kigieno, nyeringa ibore ngini erai akigieno, kainyo ngae igieno atamar aanyuni ibore ni etee? Nakaneni ani kigienokin ngoni ibore ni nyikitee, kidaruni ngoni ibore ngini kinaikinit. Aloger alopei kangolo, kingaranakini ngoni dang Etau a Akuj, tani kisechaka ngoni, kainyo nyikiyeni ngoni eger lo ejoikinit kilipi, Etau a Akuj ngesi ilipit Akuj kotere ngoni, eriaba elimit ngakiro na nyikiyeni ngoni ngikulepek. Ani Akuj na eripit ngitai a ngitunga, eyeni ngitamen a Etau alo a Akuj kangolo, kainyo ilipanakini Etau ngolo ngitunga a Akuj, itemem ka ngakiro na echamit Akuj. Kiyeni ngoni atamar anakiro kadaang, esubi Akuj naajokak ani eya ngulu eminasi ngesi, lu anyara ngesi kotere echami keng. Ngitunga lukolong sek ayeni ngesi ankisiakinet, abu nabo toseu kikwaanikin ka Lokookeng. Sodi toliworor Lokookeng lo a ekingaren, alokaitotoi alukaalak. Sodi tanyara Akuj lukolong ayeni. Ani lu anyarae ngesi, kimaru atamar etenoono eboyor anikeng, sodi taanyut kesi ka ngesi apolou aapei. Anakiro kanguna kadaang, anu ngache kilimuni? Ani kibakit Akuj alowae yok, ngae iche kitepegi ngoni? Nyisieno Akuj tani Lokookeng lo arai epei bon, abu tajal ngesi kotere ngoni daang! Kona kiinakinea ngesi ngoni Lokookeng a, nyikiinakini ngesi ngoni tani ngiboro luche daang pas a? Ngae ititakini ngitunga lu aseu Akuj? Alimu Akuj alope atamar nyesechito kesi! Ngae tokona irirae kesi? Erai Kiristo kolong atoani, nabo toyaru ngesi alokatoak, ibooyi tokona anakan ana aloteten a Akuj. Ngesi kilipakinit ngoni! Nyo epedori akitiak ngoni ka amina a Kiristo? Ngichan kitiakete a? Kori ngakiro nakationok, kori aboliaro, kori eron a akoro, kori eboot, kori ni ekot akiwan, kori akitu? Kona igiritere nagiran kona, “Ekotoi sua jiik akiar kotere esi, kikok sua ngamesekin na esakio akingol.” Nakaneni kipiuni ngoni ngakiro daang kotere ngesi lo kimina ngoni! Kainyo ayeni ayong atamar emam ibore kitiaki ngoni ka amina keng, nyikitiaki akitu kori akiyar, kori ngimalaikae, kori ngapolosio a adis kori agogongu ache na tokona eyei nadis kori namonan ebuni, kori kidiama nadis kori tooma nalup, emam ibore nisubuna daang nikitiaki ngoni ka amina a Akuj na erai ayok kotere Ekapolon yok Yesu Kiristo. Eruoro ayong ngakiro na eraakasi ngaka iteni, arai ayong itwaan a Kiristo dir nyeruoro alioko. Ketoodikinit ayong Etau lo kang, erikit Etau a Akuj atamar nyeruoro ayong alioko. Asaki ayong alimun kona, ealolongi ayong noi nabo kariebete ngakiro etau kotere ngitunga a ebukut kang, lu eraakasi ngipei ka ayong! Arai tani kingarakinete ngakiro nu kesi, kejoikinit tani ayong kelamio atotiakas ka Kiristo. Eraakasi kesi Ngisirael, eraakasi dir ngide a Akuj, nabo edodikin apolou a Akuj. Echikakin ngesi ka kesi achamunet, sodi todungok kesi etal, aanyut kesi akilip na erai aka iteni nabo aanyut ngakichikakinet a Akuj dang, eraakasi kesi ngalesea kata apaayok alu eraakasi Ngieburaniae lu ayenikinitae. Tani Kiristo dang aloger alo araakar ngesi itwaan, arai eka a ebukut kech. Kimiekisi Akuj na epolokinit daang kipuruunoe jik! Aamen. Nyabala ayong abukor akiroit a Akuj, kainyo meere Ngisirael daang eraakasi ngitunga a Akuj. Kori nyeraakasi daang ngide a Aburaam ani eraakatar ngalesea keng. Alimokini Akuj Aburaam tama, “Erai nia Isaka ngesi elimitere ngalesea kon.” Itoodiunit ibore ngini atamar ngide daang lu idounio nyelimuno Akuj, nyerai ngide a Akuj. Eraakasi ngide lu idounio na elimunio Akuj kesi eraakasi ngalesea a Akuj na iteni dir. Kainyo alimuni kolong Akuj akichikakinet keng a ngakiro kanu, “Akolongit ngina eseunitae, abonguni ayong, sodi kidou Sara ikoku nisapat.” Meere tani nguna make, kainyo tani talokookeng a Rebeka luarei, epei apakech, ngesi apaayok Isaka. Nakaneni sodi toyenunere atamar epedori Akuj aseun kona esakitor, tani eringa ngikaitotoi ngulu nyidouno, nabo ani eringa nyetiakuna naajokak ani eya naaronok, tolimok Akuj Rebeka tama, “Esubi edia loapolon etich aloochi.” Kaneni erai aseuno a Akuj na iwapap ka eger lo anyara ngesi alope, meere kotere ngakiro na esubete ngitunga. Loger lo igiritere nagiran kona, “Aminakini ayong Yakobo, atoremokin Esau.” Ekoe kitamari tokona ai? Kejongoto ngakiro a Akuj aliwor na eteniyete a? Mam jik! Kainyo alimokini ngesi Musa tama, “Arimakini ayong itwaan daang ni asaki arimakin, kesieni ayong itwaan daang ni kesieni.” Kanguna, esubasi daang kotere akisienut a Akuj meere na esaki itwaan kori na esubi, nakaneni erai nakisienut a Akuj bon. Kainyo igiritae nagiran kona ngakiro a ekapolon a akwap a Misiri alo enyaritae Parao, “Ketiliwori ayong iyong ekapolon asaki iyong tosub etich lo itoodiuni agogongu kang. Sodi tokeik iyong ekipur kang nakwap daang.” Tokona bocha, itoodiuni Akuj akisienut anitwaan kadaang ani esaki nabo itininiki etau a itwaan kadaang ani esaki akitininik. Kingisete esi ayong tamasi, “Ani kikote neni, ikokini Akuj eanyuni atamar esechit itwaan ai? Ngae engeri ngakiro na echamit Akuj?” Nakaneni ekone iyong tokona irai nyo isaki akitepeg Akuj? Nyingisi amot nalupe itwaan ni ayeuni tama, “Nyo kolong kiyeunea iyong ayong kona?” Kainyo itwaan nikayen ngamoti, eyee ngamoti a echoto loger lo esaki ngesi. Kori eyeuni tani ngamoti ngaarei a echoto a epei, toyeu apei na ejok noi sodi toyeu nache napasit. Ikote tani ngakiro ani a Akuj neni. Asaki ngesi akidodiun anyunyura keng ka agogongu keng. Nakaneni anaikinit ngesi noi totitinyik ngakiro kangulu adikino eanyunete anyunyura keng, ngulu ejoikinit inyasunosi. Asaki ngesi akisileereun eger lo epoloo ngesi noi, nabo kitaanyun ngoni ngitunga lu kisienit ngesi ngakiro nguna. Ngoni lu kisubakin ataanyutu apolou keng. Kainyo kirai ngoni ngitunga lu anyarae ngesi meere lu kinyaraunio Aloyaudi make, erai tani lu anyaraunio alobukui alu nyerai Ngiyaudi. Ngakiro nguna ngesi na elimunit Akuj anakitab a Osea ebala, “Ngitunga lu nyerai ngikang, anyarae ayong, ‘Ngitunga kang.’ Ngibukui a akwap ana kolong peamina ayong anyarae ‘Ngiminan kang.’ Ani nipei kolong alimonokinere kesi tamarae, ‘Meere esi ngitunga kang,’ enyarao kesi kaneni talokookeng a Akuj ana eyari.” Eremari kolong ekadwaran a Akuj Isaya tolim ngakiro a Ngisirael tama, “Tani kelalak Ngisirael ketia asinyen na eyei nanam, ngipiyayek kech eyuunio, kainyo erumori Ekapolon akirirare ngitunga daang a akwap atipei.” Erai Isaya kolong alimuni ekingaren tama, “Arai kolong nyeepiyanu Akuj na idwangit agogongu keng na ibore kadaang ngide ngiche lu eraakasi ngalesea yok, kikokinit ngoni ngitunga a ere a Sodom kalu a ere a Gomora.” Ekoe kitamari tokona ai? Kitamari kona, emaru Akuj ngibukui lu nyerai Ngiyaudi lu peasakete achamun ka Akuj atamar etenoono eboyor ani a Akuj kotere anupit, tarai ngitunga a Akuj lu asakete akiwap etal lo itiliwori kesi lu etenoono eboyor ani a Akuj, apot kibatar alotal. Nyoni ebatarotor? Erai ni nyigienokino kesi anupit, egienosi ngitichisio lu asubete. Sodi tadakakinos kesi kidiama “amoru na edakanari” na erai ngesi igiritae nagiran kona, “Kingolikisi, ewaakini ayong amoru Sion na edakanari ngitunga, ataaba na ibusokini kesi. Nakaneni itwaan cha daang ni enupi ngakiro keng nyirumete ngileech jik.” Ngikaitotoi kang! Agasi cha ayong a etau kang kadaang atamar toyuun cha ngitunga a ebukit kang! Ayeni ayong atamar ilipito kesi Akuj lokojokon noi, nakaneni nyerai akilip kech na eyeneta ngakiro na iteni. Eringa kesi nyeyenuna eger lo imarunea Akuj ngitunga atamar etenoono eboyor anikeng, aliworosi kesi esakete akiwaakin erot lo erai ekech a ngikulepek. Sodi towout kesi achamun erot a Akuj lo imarunea ngitunga atamar etenoono eboyor kech. Kainyo Kiristo erai esal a etal, sodi ani itwaan daang ni enupi, imarunio atamar etenoono eboyor ani a Akuj. Egiri kolong Musa ngakiro na imarunere itwaan atamar etenoono eboyor ani a Akuj kotere ni iwapitor etal. Kigir tama, “Itwaan cha daang ni iwapi ngakiro na edungunit etal, eyari.” Nakaneni ngakiro nu kesi igiritae kotere eger lo erai imarunere itwaan atamar etenoono eboyor ani Akuj, “Wara nyiitama alotau kon bon ibala, Ekoe ngae elosi kidiama nadis?” (ngesi atamar, atiyaun Kiristo kwap). “Kori wara nyiinis ibala, ekoe ngae elomari nalup?” (ngesi atamar akiteyarun Kiristo). Ngakiro na igiritae kesi nu, “Eya ngakiro a Akuj diye kon, eya nakituk kon nabo eya lotau kon”, ngesi atamar, ngakiro a anupit ana kitatami sua. Ani kilimu iyong a akituk atamar Yesu ngesi Ekapolon, sodi tonup alotau kon atamar eteyaruni kolong Akuj ngesi, kiyuunio iyong. Kainyo enupi itwaan alotau keng, sodi kimaru Akuj ngesi atamar etenoono eboyor anikeng, ani erumor tolim a akituk keng sodi toyuunere. Igiritae nagiran kona, “Itwaan cha daang ni enupi ngakiro keng, nyirumete ngileech.” Eraakasi ngakiro nguna ngaka ngitunga kadaang, kainyo nyetiakak Ngiyaudi ka ngitunga a ngibukui alu nyerai Ngiyaudi. Akuj ngesi napei erai Ekapolon kadaang, nabo einakini daang lu enyarito nesi ebari keng. Loger lo igiritere nagiran kona, “Itwaan daang ni enyarae Ekapolon Akuj atamar kengarak, eyuunio.” Nakaneni ikokinete kesi enyaraate ngesi atamar kingarak ai, toringa nyenupa ngakiro keng? Ani ikokinete kesi enupete toringa nyiirara ngakiro a Akuj ai? Ani ikokinete kesi iirarete ngakiro a Akuj erai pekelimor ai? Ani ikokinete ngakiro a Akuj elimorio erai pekemearitae ngikasubak etich ai? Loger lo igiritere nagiran kona, “Ejok noi ebune kangulu eyaunito Ngakiro Naajokak!” Nakaneni meere daang achamut Ngakiro Naajokak. Eruoro kolong ekadwaran a Akuj Isaya elope ebala, “Ekapolon, ngae anupi ngakiro na kitatami sua?” Tokona bocha, itoruni akinup nakiirar ngakiro a Akuj, nabo itorunete ngakiro a Akuj nakitatam Kiristo. Nakaneni engita cha ayong, “Nyiirara mono cha kesi dir ngakiro a Akuj a?” Iteni dir, eirarito kona igiritere nagiran atamar, “Apetarosi ngakiro na eruorosi kesi tokeikin ngakwapea wadaang, tananga ngakiro kech losal a akwap.” Engita nabo ayong atamar peayenete dir Ngisirael a? Musa elope ngesi lo esieuni tatachu tama, “Kesirakari ayong esi etereku kotere ngitunga lu nyesibito tani echebukut, sodi tongoikis esi lokojokon, ebukut a ngikabangabangae.” Nabo tolim tani Isaya ngakiro a atitinyu tama, “Kaanyut ayong ngitunga lukolong pekasakete, atakanuuni ayong ani eya ngulu kolong pekengitasi ayong.” Nakaneni ani anakiro a Ngisirael tolim tama, “Apaaran juui, ebakinit ayong ngakan emaimai ngitunga lu nyepupete ngakiro taraakas luketulunyak ngakan.” Tokona, kengisit ayong esi, “Ekoe kenger Akuj ngitunga keng a?” Mam jik! Arai ayong Esiraelit, ales a Aburaam, itwaan a ebukut a Benjamen. Nyengero Akuj ngitunga keng lukolong aseuni anakisiakinet. Iyenete esi na igiritae wache a ngagiran eger lo emaimaea Elija Akuj kotere Ngisirael tama, “Ekapolon, aar kesi ngikadwarak kon, nabo enyasut ngikenoi lu kipeyokinere iyong ngakipeyos. Ayong bon elope edongit, nabo esakete kesi akiar ayong dang.” Nakaneni a, anukiro atachakini ngesi Akuj? Tatachak Akuj ngesi tama, “Eya ngitunga kang ngabunge ngakan-kaarei lu eringa nyilipa akuj nasubuna enyaritae Baal.” Ikwaan ngakiro nguna ka na a ngirwa alu tokona kalu. Eringa eya ngitunga lupiyayek lu aseu Akuj kotere ajokis keng. Eseunit ngesi kesi kotere ajokis keng, meere kotere ngakiro na asuba kesi, kainyo arai toseuniye Akuj ngitunga kotere ngakiro naajokak na esubete kesi, pekerai ajokis keng ajokis na iteni. Abe nyo tokona? Nyeanyuna Ngisirael ibore ni kolong asakete. Eraakasi ngitunga lupiyayek kolong aseuni Akuj make kesi aanyunete, kainyo akinimanete luche towout akiirar ngakiro a Akuj na anyaritor kesi. Loger lo igiritere nagiran kona, “Esiwaa kolong Akuj ngitamen kech, etililimiyo ngitai kech, tani nakolongit na, nyeanyungarete kesi kori nyingolikinete.” Alimunit nabo Daudi ebala, “Toliwor akinumnum kech elokit lo isurumi kesi, kibusokinos neni sodi kirirae! Kimiekisi ngakonyen kech tarap aribu, nyeanyungareta kesi, nabo toliworos kesi ekudonokinosi eriabasi ngirwa daang.” Kengisit tokona nabo ayong esi kona, nakolong adakarotor Ngiyaudi a, apot tomunyar a? Mam jik! Aanyunete ngibukui lu nyerai Ngiyaudi ayuuno ani asecheta Ngiyaudi. Sodi kirakarea Ngiyaudi etereku alobukui alu nyerai Ngiyaudi. Kotere akisech a Ngiyaudi, aanyut ngitunga daang a akwap agatakino naajokon noi. Ani kitaanyunit ibore ni ikoni eboot kech a ngitai ngibukui lu nyerai Ngiyaudi agatakino naajokon noi, ejoker agatakino ngina noi erai keanyut Ngiyaudi daang ayuuno! Kesuruori tokona ayong esi ngibukui lu nyirai Ngiyaudi, ani aringa ayong arai lo kamearitae lobukui lu nyerai Ngiyaudi, alakara ayong noi kotere etich kang. Kori apedori tani akisirakar ngitunga kang etereku sodi toyuunotor ngiche kech. Kainyo ani kerai ni angerio Akuj Ngiyaudi ngesi achamunotor ngibukui lu nyerai Ngiyaudi ka Akuj, ikokini ai na echamunea Akuj kesi? Ikokinete ngikatoak lu ayarut! Ani kisiaun amugati epewae nakinae Akuj, eliwor tani amugati daang akeng. Ani kelemun ngaten a ekitoe na eya tooma ngalup nakinae Akuj, eliwor tani ngaten na alokidiama dang ngaka a Akuj. Ani kechiatar epewae a ngaten a ekitoe a akimiet, lo itakinit itwaan mana, nakaneni tolemunae ateni a ekitoe a akimiet lo erai eka moding, tokodakinae nikeng, ikote esi ngibukui lu nyirai Ngiyaudi ekitoe a akimiet, lo erai eka moding. Ianyut tokona esi dang akiyar naajokon a Etau a Akuj, na erai aka Ngiyaudi. Nakaneni nyejoikinit tokona esi imenyete lu ekokis ngaten na achiatar, nyo tokona inisatar esi? Ikote esi ateni na alokidiama, nyigangito esi ngaten na alokwap, ngaten na alokwap kesi kigangito esi. Nakaneni ilimuni iyong tama, “Iteni cha, nakaneni atuborio ngaten sodi atorupunea ayong anados kech.” Eraakasi nguna iteni! Ekokinete kesi ngaten na achiatario ani peanupeta, sodi kidong iyong neni ani inupitor. Nakaneni wara nyiinis kotere nguna, ejoikinit iemi. Kainyo ani kolong pekisienito Akuj Ngiyaudi lu ikote ngaten na eraakasi ngaten dir, esibit iyong isieni iyong ngesi a? Toyen anakiro kanguna atamar erai Akuj naajokon ka nakadedengan. Ededeng ngesi ani eya lu adakarosi, nakaneni ejok anikon, erai kirubak iyong anajokis keng. Nakaneni anipekirubak, kichiatario iyong dang. Tani Ngiyaudi dang ani kilochosi tonupa ngakiro a Akuj, ebuakinio kesi nikolong ayakasi, kainyo epedori Akuj akikokin neni. Ikote esi ngibukui lu nyirai Ngiyaudi ateni a ekitoe a akimiet alo alomoding, lo echiatario, sodi toropakinae lokitoe eche a akimiet itakinitae mana, losek nyimorikina ka ngesi. Ikote Ngiyaudi ekitoe lo etakinitae ngolo, nakaneni ebeben ani a Akuj akimorikin nabo ngaten na echiatara nu ka ekitoe lo erai ekech. Ngikaitotoi kang, eya ngakiro namunonoe na eraakasi ngaka iteni na asaki ayong esi toyena sodi tojongoto akitam atamar kori iosok esi. Meere akichananu a Ngiyaudi aka jik, emini tanang ngirwa lu itemokinor ekimar a ngibukui alu nyerai Ngiyaudi alu enupete ngakiro a Akuj. Eliwor ngirwa ngulu ngesi eyuunere Ngisirael daang. Loger lo igiritere nagiran atamar, “Ebuni Ekayuunan alo Sion, elemari aronis analesea a Yakobo. Kichikakin ayong ka kesi ngakiro nu na arimakinea ayong ngasechesea kech.” Kona angerioto Ngiyaudi Ngakiro Naajokak, aliworosi kesi ngimoe a Akuj kotere esi ngibukui lu nyirai Ngiyaudi. Nakaneni kotere nikolong aseunea kesi Akuj, eraakasi kesi ngipaalon a Akuj kotere ta apakech. Kainyo Akuj nyilochi ngakiro ani eya lukolong aseuni ngesi topia. Ani esi ngibukui lu nyirai Ngiyaudi, ingerete kolong sek esi Akuj, nakaneni ianyut tokona esi akisienut a Akuj ani angerioto Ngiyaudi Akuj. Aloger alopei kangolo, kotere akisienut na ianyut esi, angero tokona Ngiyaudi Akuj, sodi taanyuneta kesi dang tokona akisienut. Kainyo aen Akuj ngitunga daang ani engeritotor ngesi, sodi kisieniyoto ngesi ngitunga daang. Ekoe, ejok noi ebari a Akuj! Nabo echwaana ngesi noi toos! Ngae epedori akisisaun ngakiro na edungunit ngesi? Ngae epedori akiyen eboyor keng? Loger lo igiritere nagiran atamar, “Ngae eyeni ngitamen a Ekapolon? Ngae epedori akitatam ngesi? Ngae alemiki ngesi ibore idio, ni ejoikinit ngesi etachi?” Kainyo erai kolong ngesi asubi ibore daang nabo erai agogongu keng ayakatar ngiboro daang, eraakasi ngikeng. Min apolou nia Akuj jik! Aamen. Kongina bocha ngikaitotoi kang, kotere ni ejokia ajokis a Akuj aniyok noi, kemaimai ayong esi atamar, kimiekisi Akuj kibele ngitamen kus, tarata esi ngakipeyos na eyarete ani a Akuj, na italeunitoe kotere etich keng, nabo na ejoikinito Akuj. Akilip na iteni na ejoikinit esi iinakinete ngesi ngina. Warasi nyikwaanikinosi ngakiro na isubete esi ka na a ngitunga a akwap, kimiekisi Akuj kibele ngitai kus ani ilochokinotor ngitamen kus. Sodi topedoreta esi akiyen ngakiro na echamit Akuj. Toyena esi atamar nyoni ejok kori ejoikinit Akuj kori nyoni ikiuna. Ani kotere ajokis na aanyuni ayong ani a Akuj, kalimokinit ayong esi daang atamar, warasi robo nyiitamasi abe kipolok erai ikeunakasi. Nakaneni kitama na itemem ka esi, nabo kitemos alopit alo eriyan ka anupit na ianyut esi ani a Akuj. Elalak nginerin a akwaan, eyeni ekinier daang etich lo esubi. Aloger alopei kangolo, tani kilalak ngoni, kimorikin ngoni ka Kiristo kirau akwaan apei, ekok itwaan daang ekinier ani eyei niche. Nakaneni, ejoikinit ngoni kilemuni ngainakinet yok nagelagelae alopit a ajokis ana kiinak ngoni Akuj. Ani kerai ainakinet a itwaan ngesi akiruor Ngakiro a Akuj, ejoikinit ngesi iruoro alopit a anupit ana aanyu, ani kerai akisub etich, ejoikinit ngesi esubi etich, ani kerai akitatam, ejoikinit ngesi itatami, ani kerai akitogogong luche, ejoikinit ngesi ikokini neni. Ani itwaan cha daang ni ipotori ibore nak niche, ejoikinit itomori a apatanu. Ani ni epolokinit luche, ejoikinit esubi etich lokojokon. Ani itwaan cha daang ni ingarakini luche ani isienitotor, ejoikinit ingarakini elakara. Ejoikinit amina kus erai naka dir na emam amodeanut tani nadiochichi. Toremokin ibore niaronon, toneikin niajokon. Tominakin make lokojokon kona iraakatar esi ngikaitotoi lukiristoi, nabo tominakisi akitoodiun atamar ikerer esi make. Kiberaketa alotich alo isubete warasi nyiikalanyaketa. Tosuba etich a Ekapolon a ngitai alu elemuna dir. Talakaros kotere ngakiro na igienosi esi, totitinyikisi ngichan, nabo kilipeeneta jiik. Kitomora ngikiristoi lu ichanasi ibore ni itingito esi, kilomuunutu ngipeyok nawiyei kus a apatanu. Topiasi lu kiboliatar esi. Ee robo, tagata atamar topiarae kesi, meere kilamae. Talakaros aapei kangulu elakara, kikaloutu kangulu igorosi. Tochoikisi ngitunga daang a epit a epei. Tojongoto akiwoga, ejoikinit iliworosi ngipaalon alu itasionosi. Warasi nyiitamasi kori iosok esi. Ani kisubea itwaan iyong ngakiro naaronok, wara nyiitachak. Tasak akisub ngakiro na ejoikinito ngitunga daang. Anakiro cha kadaang ana eraakasi ngaka akiding kon, tasak lokojokon akisilit ka ngitunga daang. Ngipaalon kang luminan, warasi nyiitachakis ngakiro naaronok na kisubere esi, nakaneni, kimiekineta Akuj nguna kainyo igiritae nagiran kona, “Ebala Ekapolon, eraakasi ngakiro a atachanakin naaronok ngaka a akiding kang, ayong ngesi atachakini.” Ani eya nguna daang, igiritae nagiran atamar, “Ani kenyamit emoit kon akoro, kisimuj, ani kenyamit akure, kitamat, kainyo ani kikok iyong neni, irumete ngesi ngileech, tosub iwaak ngatotol na enokete nakou keng.” Wara ngakiro naaronok nyikipiyosi iyong, kipiu naaronok anaajokak. Ejoikinit itwaan daang iwapit ngakiro a ngitunga alu esubete etich a arieng, kainyo erai nia Akuj ngesi itorunit apolou daang, ani lu eraakasi ngikapolok, Akuj ngesi ereikinit kesi apolou. Kotere ngakiro nguna, itwaan cha daang ni engeri ngakiro a ngikapolok, engerit ngakiro na adungu Akuj, ani ni ikoni neni, eanyuni eriras lo erai ekeng a ilope. Kainyo nyeemete lu esubete naajokak ngikapolok, ngitunga lu esubete naaronok kesi eemete. Tokona, isaki iyong nyiem ekapolon a? Tosub naajokak, sodi kipuruu ngesi iyong, kainyo erai ngesi ekasuban etich a Akuj, lo esubi etich ngolo kotere iyong. Nakaneni ani kisub iyong naaronok, toem ngesi, kainyo epedori ngesi dir akirirare iyong. Erai ngesi ekasuban etich a Akuj nakaneni itemonokini eriras a Akuj ani eya ngulu esubete naaronok. Kotere nguna, ejoikinit iwapi ngakiro a ngikapolok, meere kotere akerit eriras a Akuj bon, erai tani ni kitoodikinitor iyong etau kon atamar kikok neni. Eraakasi ngakiro napei nguna ngesi ibukioto esi echur, kainyo esubete ngikapolok etich a Akuj na esubeta ngitichisio kech. Nakisi itwaan daang ibore ni erai ikeng, tobukokisi lu esakete echur, echur, tobuko ngaropiyae na esakio tobuko aloboro kus, ani ni ejoikinit erimae, kitoodiutu arima anikeng. Warasi nyeemin ibore iche kiding kon ka itwaan niche, mati aminakin bon. Itwaan cha daang ni emina itwaan niche, iwapit ngakiro a etal. Kainyo ngitalio lu ebeyo, “Nyiilom, nyiiar, nyiikoko, nyikiraka etereku”, ka luche daang, eya lotal lopei lo, “Tominak ekidunyet kon loger lo iminar iyong ilope akwaan kon.” Itwaan ni emina ekidunyet keng, nyesubea niaronon. Kotere ngakiro nguna, erai amina akirichun etal daang. Kanguna kadaang, iyenete esi atamar alurwa tokona lu, eraakasi tokona ngirwa lu lukienyunet anaju, kainyo aapuu noi ni edikino ngoni kiyuunea Akuj edwang nikolong sek kinupea ngoni ngakiro a Akuj. Esibit tokona adil akwaar edikino iwalari. Ejoikinit tokona ngoni kipalikini ngakiro daang na a aribu, atanapa ngiboro a ejie lu eraakasi ngika a akicha. Ejoikinit eboyor yok eliwor loajokon lo ikoni lo elosere anakicha, lo nyiturukitoe ka ngakiro naaronok na ikote amera kori elewas ka emalaanu, kori eboyor lo a ngileech ta eburas kori etereku. Nakaneni tanapa ngiboro a ejie lu eraakasi ngika Yesu Kiristo, sodi tapalikis akachit ngakiro a eboyor kus alokasechan ka akisub na isakete esi akisub. Tachamutu itwaan ni nyenupit lokojokon anikus, nakaneni warasi nyiitopega ngesi anakiro ana itamit ngesi atamar ayeni. Etiakatiaka ngitunga, epedori itwaan ipei akinyam ibore cha daang. Nakaneni ani itwaan ni nyenupit lokojokon, epedori ta akinyam ngikito a moding make. Itwaan ni enyami akimuj daang, nyejoikinit imenyari itwaan ni nyenyami. Ani ngini nyenyameene akiring, nyejoikinit irirae ni enyami akimuj daang, kainyo achamu Akuj ngesi. Ngae iyong irirae ekasuban etich a itwaan aniche? Erai Ekapolon keng etiakuni atamar ewei ngesi kori edakara. Nakaneni, esubi ngesi niajokon kainyo Ekapolon elope ngesi ingarakini ngesi tosub niajokon. Etamari ta itwaan iche kori ejok akolongit apei idwangit ngirwa luche, tarai etamari niche ikwaan ngirwa daang. Ejoikinit itwaan daang eseuni na ejoikinito ngesi. Itwaan cha daang ni itojokit akolongit apei noi, ikokini neni erai itoodiunit arima ani a Ekapolon. Itwaan cha daang ni enyami ibore enyami erai itoodiunit arima ani a Ekapolon, kainyo ebuakini ngesi Akuj alakara kotere akimuj. Itwaan cha daang ni engeri akinyam ngamuja ngache, ikokini neni itoodiunit arima ani a Ekapolon, sodi tobuak Akuj alakara. Emam ngoni itwaan eyari kotere ngesi bon, nabo emam ngoni itwaan ni etoani kotere ngesi bon. Ani kiyari ngoni, erai Ekapolon kiyarea. Ani kitoaka ngoni erai Ekapolon ngesi kitoakea ngoni. Erai bocha ani kiyari ngoni kori kitoaka, kirai ngoni ngika Ekapolon. Kainyo atoani Kiristo nabo toyaru sodi toliworor Ekapolon alu eyarete ka lukatoak. Ani iyong lo nyinyameene akiring, nyo irira iyong lokaatokon? Ani iyong lo inyameene ibore daang, nyo imenyaritor iyong lokaatokon? Kiwei ngoni daang alongaren Akuj sodi kirira ngesi. Kainyo igiritae nagiran kona, “Ebala Ekapolon, kona araakar ayong Akuj na ayari, eriediki itwaan daang alongaren kang, sodi tolim itwaan daang atamar arai Ayong Akuj.” Isisakini ipei yok daang Akuj ngakiro na asubi ngesi. Tokona bocha, tapalikisi akirira make. Ejoikinit ngoni kitiekuni atamar nyikisubakini ibore ni isichwangakini lokaatoyok kori ni edakakini ngesi nakisech. Ayeni ayong, nabo kedodik Ekapolon Yesu dir atamar emam epit a ibore ni erono, nakaneni ani ketama itwaan erono ibore be ati anikeng, eliwor ibore ngini niaronon anikeng. Ani kinyam iyong ibore ni ekadakinit lokaatokon, ikoni ibore ngini ni nyimina iyong lokaatokon. Wara akimuj na inyami iyong nyinyasu itwaan nikolong atoanea Kiristo! Wara ngitunga nyiitoron ibore ni kijoikinit iyong. Kainyo meere apolou a Akuj aka ekimuje ka emase, nakaneni erai eka ateneanut ka ekisil ta alakara nakitaanyuni Etau a Akuj. Ani na esubea itwaan etich a Kiristo alopit kalo, ejoikini Akuj ka ngitunga eboyor keng. Kongina bocha, ejoikinit ngoni ngirwa daang kineikina akiwapit ngakiro na erikito ekisil kanguna kingarakinete ngoni. Warasi nyiinyasut nguna asub Akuj kotere akimuj. Epedorio akimuj ngamuja daang, nakaneni erai akisech akinyam ibore ni itosechi itwaan niche. Ejoikinit ipalikini akinyam akiring kori akimat emuna lo epuritoe kori akisub ibore cha daang ni edakari lokaatokon. Kiwap iyong na inupit anakiro kanu, eraakasi ngaka akiding kon ka Akuj. Ejok itwaan erai ani ketiaku na esubakini, nyengayak nabo alotau keng! Nakaneni ani kengayat ngesi ibore ni ejoikinit enyami, irirae Akuj ngesi na enyamea, kainyo nyesubi ngesi ngakiro nguna ani enupitor. Nabo ibore daang ni nyesuba kotere anupit, erai akisech. Ani ngoni lu kinupit dir, ejoikinit kingarakini lupalag dir alochan kech. Warasi nyikiminak eboyor yok a ngikulepek. Ejoikinit ipei yok daang italakari erukitos keng anakiro anaajokak esubi sodi kisikokinea ngesi anupit keng. Kainyo peamina kolong Kiristo eboyor keng a elope, erai ekoni eger lo igiritere nagiran kona, “Aliwor ngiyeny lu kiyenyere esi ngikang.” Kainyo daang nakolong egirio, egirio erai kitatamere ngoni, sodi ataanyutu ngakiro na kigienokin kotere anaikinit ka akingarakina na kianyunit anagiran. Kimiekisi Akuj na erai nikeng itorunit anaikinit ka akingarakin, kitiliwo ngitamen kus ngipei ani iwapitotor ekitetemes a Yesu Kiristo, sodi kipuruunioto esi daang a etoil a epei Akuj na erai Apakeng a Ekapolon yok Yesu Kiristo. Tachamun make robo kotere apolou a Akuj, kona kolong kichamunea esi Kiristo. Kainyo kalimokinit ayong esi ngakiro na iteni atamar asubi kolong Kiristo etich ani a Ngiyaudi, sodi kidodiu ibore ngini atamar ngaka iteni ngakiro a Akuj. Sodi kiyookinotor ngakichikakinet nakolong echikakini ngesi ta apayok, nabo kipuruuneto ngibukui lu nyerai Ngiyaudi dang Akuj kotere akisienut keng. Loger lo igiritere nagiran kona, “Kotere nguna, kepuruuni iyong ani eya ngibukui lu nyerai Ngiyaudi, ekusi ayong ekiro kon.” Igiritae nabo nagiran kona, “Talakaros esi ngikubui lu nyirai Ngiyaudi, talakaros ka ngitunga a Akuj aapei!” Igiritae nabo kona, “Esi ngibukui daang lu nyirai Ngiyaudi, kipuruutu Ekapolon, esi ngitunga daang kipuruutu!” Alimuni nabo Isaya tama, “Ebuni itwaan ni erai ales a Yese, epolokini ngesi ngibukui lu nyerai Ngiyaudi, igienokinosi kesi ngesi.” Kimiekisi Akuj na erai nikeng itorunit akigienokin kileleb esi alakara ka ekisil kotere ni inupitotor esi ngesi. Kisikokin akigieno kus kotere agogongu a Etau a Akuj. Ngikaitotoi kang, ayeni ayong elope atamar ijokak esi noi, ayeni nabo tani atamar iosok esi noi ipedorete akitatama make. Nakaneni eyakanara ngakiro nakegirak ayong esi anabarua kana peaemit sodi kesitamunea esi ngakiro ngache. Ekokini ayong neni kotere ajokis naketaanyu ayong Akuj ketiliwor ekasuban etich a Yesu Kiristo alobukui kadaang alu nyerai Ngiyaudi. Etatami ayong Ngakiro Naajokak a Akuj arai emuron a akai a Akuj sodi toliworos ngibukui lu nyerai Ngiyaudi ngakipeyos na echamunit Akuj, na etaleu Akuj a Etau keng. Kona kimorikinor ayong ka Yesu Kiristo, enisar ayong etich lo a Akuj lo asubi ayong. Emam ibore iche alimuni ayong mati ni asub ayong ani a Kiristo, topedoreta ngibukui lu nyerai Ngiyaudi kiwapa ngakiro a Akuj. Asubi ngesi nguna anakiro ka ngitichisio, kotere agogongu a ngakitoodikinet anakailiilok ka nakatalarak, nabo kotere agogongu a Etau a Akuj. Sodi atolot ayong napei alo Yerusalem tanang Iluriko, etatam ayong noi Ngakiro Naajokak a Kiristo. Ibore ni eitanit ayong noi ngesi akitatam Ngakiro Naajokak alowaitin alu eringa ngitunga nyiirara ngakiro a Kiristo, sodi nyaaduk nabo ayong naduket nakolong aduki itwaan niche. Kona igiritere nagiran atamar, “Daang lu nyelimokina ngakiro kang ingolikinete, ani lu eringa nyiirara eyenete.” Ngakiro nguna ngesi keratakinere ayong ngirwa lukaalak nyaabu nikus. Ani kona tokona arumorea ayong etich alowaitin kalu, nabo kona kolong asakitor ayong ngirwa ngikaalak abunere inaa aanyun esi, etamit atamar abuni tokona. Asaki etoru nikus naalosio ayong Sipania, sodi kingarakis esi ayong analosit kangina, erai kilakar mono ka esi aapei wadio. Nakaneni, alosi tokona ayong Yerusalem atingit ngiboro lu ingarakinotor ngitunga a Akuj kaina. Kainyo atiakut ngitunga a ngikanisae alu eya Makedonia ka Akaya adekuunun ngiboro lu ingarakinere ngitunga a Akuj lu iboosit lu eya Yerusalem. Kesi ngikulepek atiakunete kongina, nakaneni ani bo kikote neni dang, ejoikinit kesi ingarakinete ngikebootok ngulu. Ani aliworotor ngibukui lu nyerai Ngiyaudi ngipei ka Ngiyaudi eanyunete apiaro a Etau, ejoikinit kesi dang ingarakinete Ngiyaudi ngiboro luyaret lu eraakasi Akuj einakinit kesi. Ani karumo ayong etich ngolo, ainak kesi ngiboro daang lu adekunio kotere kesi, abuni ayong aanyun esi naalosio Sipania. Naabunio ayong nikus, ketaanyuni esi apiaro naajokon noi na Kiristo. Kemaimai esi ngikaitotoi kang atamar, kotere Ekapolon yok Yesu Kiristo ka amina na kitaanyunit Etau a Akuj, elipa ka ayong aapei kilipakinito ayong. Kilipa sodi katoyuun ayong alotunga alu nyenupito alu eya Yudea, nabo tachamuneta ngitunga a Akuj lu eya Yerusalem ngakiro na asubi ayong. Nakaneni abuni ayong nikus alakara noi ani kerai echami a Akuj, eanga ayong niajokon nakipeyonitor ka esi. Kimiekisi Akuj na erai nikeng itorunit ekisil daang kiruko ka esi daang. Aamen. Kalimokinit ayong esi atamar erai nakaatoyok Poebe na esubi etich alokanisa a Kenikirea itwaan ajokon. Kitepeyono ngesi a ekiro a Ekapolon, loger lo ejoikinit ngitunga a Akuj esubete, kingarakisi ngesi erai keyei ibore idio iitanit ngesi anikus, kainyo arai kolong ngesi apae naajokon alotunga alukaalak kengarakinit tani ayong. Kimalakinae Pirisila ka Akula, na kisubi ka ayong aapei etich a Yesu Kiristo, ajalito kesi akiyar kech kotere ayong. Alakara ayong noi kotere kesi, meere ayong dang bon, elakara tani ngitunga daang a ngikanisae a ngibukui alu nyerai Ngiyaudi. Kimalata tani ngitunga a ekanisa lu iriameenete nawi kech. Kimalakinae Epaneto lopae kang lominat, lo erai ngesi kolong esiauni anakwap a Asia akinup ngakiro a Kiristo. Kimalakinae Mariam naasub etich lokojokon noi kotere esi. Kimalakinae tani Aduroniko ka Junia, Ngiyaudi lukolong kienitae ka ayong aapei. Ayenikinitae kesi alomeanara, nabo aliworosi kesi ngikiristoi eringa ayong nyeliworo. Kimalakinae Ampuliato, lopae kang lominat ani kiraakar ngipei ani a Ekapolon. Kimalakinae tani Urubano, lo kisubi ka ayong etich a Kiristo aapei, kimalakinae tani lopae kang lominat Sitaku. Kimalakinae Apele lo eningitoe kemina dir Kiristo. Kimalakinae ngitunga a awi a Arisitobulo. Kimalakinae Erodina, itwaan a akwap kang, ka ngitunga daang a awi a Narikis lu emorikin ka Ekapolon. Kimalakinae Turupena ka Turuposa lu esubete etich a Ekapolon ka lopae kang Peris lo asub nakaalak kotere Ekapolon. Kimalakinae Rupo, ekiristoit lo eyenikinitae alotich a Ekapolon ka itiokeng na erai itiokang. Kimalakinae Asunikirito, Pilegoni, ka Erimes, ka Patiroba, ka Erima ta ngikaitotoi lukiristoi daang erukito ka kesi. Kimalakinae Pilologo ka Julia, Neera ka nakaatokeng ta Olumpa ta ngitunga daang a Akuj lu erukito ka kesi. Kimalas esi make itoodiunito atamar iminan. Kimalaate esi ngitunga daang a ekanisa a Kiristo. Ngikaitotoi kang, kemaimai esi atamar tochoikinos ani eya lu etiakatiakaate ngitunga nabo kitosecha, engerito ngakiro nakolong kitatamio esi. Warasi nyiruko ka ngitunga ngulu. Kainyo nyesubete ngitunga lu ikote neni etich a Kiristo, erai etich losaket akimuj ngesi esubete. Iruorosi kesi ngakiro nakaabok, todiakito ngitunga esakete aaruar ngitai a ngitunga alu nyemodeaka! Eira itwaan daang eger lo iwapitotor esi ngakiro a Akuj, nakaneni alakara ayong noi kotere ngakiro nguna. Asaki ayong esi toosokioto noi anakiro anaajokak, sodi nyikilimun anakiro anaaronok. Ani Akuj na erai nikeng itorunit ekisil, nyemamakini akinyasun Esiitan toreut esi. Kimiekisi ajokis a Ekapolon yok Yesu min nikus. Kimalae esi Timoteo lo kisubi ka ayong etich aapei, kimalaate tani Lukio ka Yason ta Sosipatiro lu eraakasi ngitunga a akwap kang. Tani ayong Teritio lo egiri abarua na, kemalae a ekaitotonu alo a Kiristo. Kimalae esi Gayo lo apeyonit ayong anawi keng ka ngitunga a ekanisa daang lu iriamito nawi keng. Kimalae esi Erasito lo erai ekatingan a ngaropiyae a ere kalo ka lokaatokosi Kwarito. [ Kagatakinit esi daang ajokis a Ekapolon yok Yesu Kiristo. Aamen.] Kimiekisi epuruutu Akuj! Epedori ngesi akiturubakin esi inupito jik Ngakiro Naajokak a Yesu Kiristo na etatami ayong, ka ngakiro na iteni nakolong emunonitae nakaneni edodiun tokona. Nakaneni tokona, esileereun ngakiro na iteni nguna anagiran a ngikadwarak a Akuj ani nabo kotere ngakiro na adunguni Akuj na nyesaluni, eteyenun ngitunga a ngibukui alukaalak sodi tonupeta kesi daang ngakiro a Akuj kiwapa. Kimiekisi ekipur lo itorunit nia Yesu Kristo, min nia Akuj ana erai ngesi bon eos noi! Aamen. Erai ayong Paulo lo kanyarao kotere echami a Akuj atoliwor emeanara a Yesu Kiristo, ka lokaato yok Sositene kigirunit abarua naga, Kigirakinit ngitunga a ekanisa a Akuj lu eya Korinto. Esi daang lukitaleun ani irauneta ngipei ka Yesu Kiristo, kitanyarae tarata ngitunga a Akuj. Kigirakinit tani ngitunga daang lu ilipito Ekapolon yok Yesu Kiristo awadaang, lo erai Ekapolon yok ka kesi aapei! Kimiekisi Akuj Apayok ka Ekapolon Yesu Kiristo kitaanyut esi ajokis ka ekisil. Abuanakini ayong Akuj alakara jiik kotere ni kitaanyunea esi ajokis ani a Yesu Kiristo. Kainyo kitaanyun esi ibore daang ani irauneta ngipei ka Kiristo, iyena esi tani ekiruor nabo iosokioto noi. Irubakis esi tani inupito ngakiro a Kiristo lokojokon. Nakaneni emam apiaro ache eringa esi iitunito, eringa esi idarito Ekapolon yok Yesu Kiristo idodiunio. Kiturubakini ngesi esi inupito tanang losal, sodi kitoriamunere esi emam akisech, Akolongit na Ekapolon yok Yesu Kiristo. Kipedori ngoni amuno Akuj dir, Akuj nakolong kinyarae esi tarata ngipei ka Lokookeng Yesu Kiristo, Ekapolon yok. Ngikaitotoi kang, kemaimai ayong esi daang a ekiro a Ekapolon Yesu Kiristo atamar topupokinos anakiro kadaang ana ianete esi. Warasi nyeemin atiakatiaka kiding kus. Kimorikinos toliworos ngipei alotamen kus ka ibore ni isakete esi akisub. Kainyo kalimokis ayong ngitunga ngiche a awi a Kileo ngakiro na ileerete ngikaitotoi kang atamar iburaenete esi. Asaki ayong alimun atamar iruorosi esi daang ngakiro nagelagelae. Elimuni ipei tama, “Arai ayong ika Paulo,” tolim iche tama, “Arai ayong ika Apolo,” tolim iche tama, “Arai ayong ika Kepa,” ani iche tama, “Arai ayong ika Kiristo.” Etiakatiaka Kiristo a? Erai Paulo kolong aramakinio napir kotere esi a? Kibatisao kolong esi toliworos ngirukitos a Paulo a? Abuakinit ayong Akuj alakara ani kolong nyibatisaa ayong esi mati Kirispo ka Gayo. Emam itwaan elimuni atamar kibatisakinio esi lokiro kang. ( Kori mono ebatisae ayong tani Sitepanas ka ngitunga a awi keng nakaneni nyetamunit ayong itwaan iche ebatisae ayong.) Pekameari ayong Kiristo akibatisare, kameari ayong atolimo Ngakiro Naajokak a Yesu Kiristo. Nabo, etatam ayong peegienokino ngaososio a ngitunga sodi nyeliworor akitu a Kiristo anapir ibore ni emam agogongu. Kainyo eraakasi ngakiro na a akitu a Kiristo anapir abaangu ani eya ngulu ebukoro. Nakaneni aniyok alu kiyuununio, eraakasi agogongu a Akuj. Igiritae nagiran kona, “Enyasuni ayong aosou alukoosok nabo aree aosou alu isomato.” Tokona bocha, nyaai tokona ni eyei ekooson ka ekesoman? Kori eketepegan lo a ngirwa kalu? Edodiu Akuj atamar erai aosou a akwap kana abaangu! Kainyo kotere aosou a Akuj, etukuruwo ngesi ngitunga a akwap akiyen ngesi a aosou kech a ngikulepek. Nakaneni, atiakuni Akuj atamar ayuuni ngitunga lu enupete a epit alo akitatam ngakiro a Akuj alo ebaasi ngikoosok erai “abangaanut”. Esakete Ngiyaudi aanyungar ngakitoodikinet nakailiilok tonupeta, ani Ngigirik tasaka aosou. Ani ngoni, kitatami ngakiro a Kiristo alo aramakinio napir, ngakiro na isichwangakinete Ngiyaudi nabo eraakasi abangaanut ani a ngibukui alu nyerai Ngiyaudi. Nakaneni ani lu anyara Akuj, Ngiyaudi ka ngibukui lu nyerai Ngiyaudi aapei, eraakasi ngakiro nugu Kiristo, lo erai agogongu ka aosou a Akuj. Kainyo ibore ni esibit abangaanut a Akuj, erai aosou na idwangit aosou a ngitunga, ani ibore ni esibit apalagu a Akuj, egogong noi idwangit agogongu a ngitunga. Ngikaitotoi, kitamutu atamar ngirwa lu kinyarare esi, alopit alo iraakatar esi ngitunga, meere ngikaalak kus aosok kori araakasi ngikapolok. Eyachakini Akuj toseu na ebaasi ngitunga eraakasi abangaanut sodi kisurumea ngikoosok ngileech. Aseuni nabo Akuj na itamito ngitunga a akwap atamar epalag sodi kisurumea ngileech lu ebaasi kigogong. Aseu Akuj na ejamuarito ngitunga a akwap ka akimenyarit nabo itamito atamar eraakasi pas, sodi kinyasunea na itamito ngitunga a akwap atamar etenooko. Eger kanguna ngesi atamar emam itwaan epedori akiwoga ani a Akuj. Nakaneni kitiliwo Akuj esi ngipei ka Yesu Kiristo, nabo etiliwo Akuj Kiristo aosou yok, kotere ngesi, kisisil ngoni ka Akuj, atarata ngitunga a Akuj kitoyuun. Nakaneni igiritae nagiran kona, “Itwaan cha daang ni esaki akiwoga, kiwog ani eya nguna asub Ekapolon.” Ngikaitotoi kang, nakolong abunio nikus akitatam esi ngakiro na iteni namunonoe a Akuj, peeruoro ayong achii ngakiro a epit aloajokon kori a aosou. Kainyo etusubun ayong anikus emam ibore ayeni, mati akiyen Kiristo bon lokolong aramakinio napir. Nakolong kirukitor ayong ka esi, apalag ayong nabo amarani lokojokon noi aemit, ngakiro naalimorit ayong ka na etatami ngitunga, peeruoro ayong a epit alo echiere ngakiro a aosou, araakasi ngakitatamet nguna na edodiunit Akuj atamar eraakasi na iteni a ngakitoodikinet anakaalak ka agogongu a Etau a Akuj. Ekokini ayong neni sodi kigienokinotor esi ananupit kus agogongu a Akuj, meere aosou a ngitunga. Tani kikote neni, esuruori ayong lu ikiuna dir ananupit kech ngakiro na aosou, nakaneni meere aosou ngina na a akwap kana, kori meere tani ngaka ngikapolok a akwap kana, ngapolon na engopiari apolou kech. Aosou naalimorit ayong ngesi aosou a Akuj na imunonitae eweitae alotunga, nakaneni aseuni kolong ngesi eringa tani akwap nyesubuna, toliwor na kipuruunitere ngoni. Emam ngikapolok lua ngakwapea kanu lu ayenete ngakiro a aosou kangina. Arai kolong toyenete kesi, pekeramakinito Ekapolon a ekipur napir. Nakaneni, ikote nguna eger lo igiritere nagiran kona, “Ngakiro nakolong nyeanyungara akongu a ache kori nyiirara akit, ngakiro na nyimuito etau a itwaan, nguna ngesi asubaki Akuj kotere lu eminasi ngesi.” Nakaneni erai ngoni ngesi kiteyenuni Akuj ngakiro namunonoe, kotere Etau keng. Ingichingichi Etau ngakiro daang, tani ngakiro a Akuj na iweitae lokojokon. Kona eraakar itwaan etau keng a ilope eyeni ngakiro keng, loger lopei ngolo, Etau a Akuj bon ngesi eyeni ngakiro a Akuj. Nyeanyuna kolong ngoni etau a akwap kana, erai kianyuni ngoni Etau lo abuni ani a Akuj sodi kitoyenea Etau ngolo ngoni nakitaanyu ngoni Akuj. Tokona bocha, nyikiruoro sua ngakiro na itatamio a aosou a ngitunga, nakaneni kiruoro a ngakiro ana itatami Etau a Akuj, erai kisisanakini lu aanyut Etau ngolo ngakiro a Akuj na iteni. Itwaan cha daang ni nyeanyuna Etau a Akuj, nyeanyuni ngainakinet na a Etau a Akuj. Nyeyenuni itwaan ni ikoni ngini ngainakinet nguna eraakasi anikeng ngakiro pasiek, kainyo lu eraakasi ngika Etau make kesi eyenunete ajokis a ngakiro kanguna. Itwaan cha daang ni aanyu Etau a Akuj, epedori ayenun aronis ka ajokis a ibore kadaang, nakaneni emam itwaan epedori akirirare ngesi. Loger lo igiritere nagiran kona, “Ngae eyeni ngitamen a Ekapolon? Ngae epedori akisuruor ngesi torik?” Nakaneni eya ngitamen a Kiristo niyok. Ngikaitotoi kang, peasaki ayong akisuruor esi loger a ngitunga alu aanyut Etau a Akuj. Kesuruori ayong esi loger a ngitunga alu a akwap, kainyo ikote esi ngide luuchik ananupit kus. Tosubut ngakiro nguna ibore ni ketamasi ayong esi ngakile, meere akitanyam akimuj nakaagongon, kainyo eringa esi nyitemokino akiirar ngakiro nguna. Tani tokona, eringa esi nyitemokino akiirar ngakiro nguna, kainyo eringa esi ibooyete lopit a ngitunga a akwap ani eringa esi iraakatar lu kirakarit etereku ka lu iburaate make. Ikwa nyidodiunito nguna atamar iraakasi esi ngitunga a akwap kana, lu ibooyete loger a ngitunga a akwap a? Naelimunio ipei kus tama, “Arai ayong eka Paulo,” sodi tama niche, “Arai ayong ika Apolo”, ikwa nyidodiunit ibore ngini atamar eringa esi ibooyete loger a ngitunga a akwap kana a? Tokona mono a, Apolo ngesi ngae? Nabo Paulo ngesi ngae? Kirai sua ngikasubak etich a Akuj lu kingarakini esi tonupeta ngakiro a Akuj. Esubi ipei kosi daang etich lokolong edodikini Ekapolon atamar tosub. Etakini ayong ekinyamit, tobukok Apolo ngakipi, nakaneni Akuj ngesi iturupuni ekinyamit. Ngini itakini ka ngini ebukokini ngakipi, emam itwaan ekachit ngakiro kech. Akuj alope na eturupuni ngesi etenoono. Eriyan itwaan ni itae ka ni ebukokini ngakipi, einakini Akuj ipei kech daang ebachit itemem ka etich lo esubi ngesi. Kainyo kirai sua ngikaitotoi lu kisubi etich aapei ka Akuj, iraakasi esi amana keng. Nabo iraakasi esi akai a Akuj. Kotere ainakinet a ajokis a Akuj, esiak ayong eduke, loger a ekadukon alo echoiyarit eduke, nakaneni eduki itwaan iche nateak nakolong esiakini ayong. Kainyo emam eduke eche nabo isiakini itwaan mati lokolong esiakin, ngesi Yesu Kiristo. Nadukoru ngina, edukete ngiche a egolit kori akwangat na elalak ngaropiyae, kori ngamoru ngache naajokak noi. Ani ngiche, toduko a ngakito, kori a nginyia, kori ngakasirim. Etakanuuni etich a itwaan kadaang Akolongit na isileereunio Kiristo, kainyo Akolongit ngina, isileereuni akim etich a itwaan kadaang. Itemi akim ngina etich a itwaan taanyu atamar ikoni etich a itwaan ai! Ani pekenomia akim ibore nikolong aduki itwaan ngini, eanyuni ekadukon ebachit. Nakaneni ani kenomia ibore ni aduki itwaan ngini, nyeanyuni ngesi ebachit, nakaneni eyuun ngesi elope, kikok ibore ni abuchun anakim. Iyenete esi dir atamar iraakasi esi akai a Akuj, nabo ibooyi Etau a Akuj anikus! Ani robo kinyasu itwaan akai a Akuj, inyasuni ngesi dang Akuj, kainyo italeuno akai a Akuj, nabo iraakasi esi ngikulepek akai keng. Warasi nyiingalasi! Ani kitamit itwaan anikus atamar aos ngesi kotere epit lo a ngakwapea kanu, ejoikinit ngesi ebangaaner sodi tooseror na iteni. Kainyo aosou a ngakwapea kanu erai abangaanut ani a Akuj. Loger lo igiritere nagiran kona, “Irumuni Akuj ngikoosok kisalu anamodeanut kech.” Igiritae nabo nagiran ngache kona, “Eyeni Ekapolon atamar eraakasi ngitamen alukoosok ngipasiek.” Emam robo tokona itwaan epedori akiwoga kotere ngakiro na esubete ngitunga, kainyo erai ibore daang ikus: eraakasi Paulo ka Apolo ta Petero ngikus. Eraakasi ngakwapea nugu ta akiyar ka akitu, ka ngakiro na a ngirwa kalu ka namonan isidiunosi, eraakasi nugu daang ngakus, nakaneni iraakasi esi ngika Kiristo, tarai Kiristo eka a Akuj. Ejoikinit esi iyenunete atamar kirai sua ngikasubak etich a Kiristo lu kiseun atoweikisi ngakiro namunonoe a Akuj na eraakasi ngaka iteni. Ejoikinit ekasuban etich lo ikoni ngolo erai lo emunoi. Nyakachit ayong kirirata esi ayong kori kerirata tani ngitunga a ngakwapea, nyerira tani ayong elope bon. Emam alotau kang ibore ni esibit asechit ayong, nakaneni nyidodiunit ibore ngini atamar ekiuna ayong. Ekapolon ngesi epedori akirirare ayong. Tokona, nyejoikinit iriraate itwaan eringa Akolongit na eriras nyenanga. Ejoikinit eriras lo esal imiekinere Ekapolon tanang Akolongit na ebunio. Inwakuni ngesi na iweitae anaribu nabo kisileereu ngakiro na imunonito ngitunga alotamen kech. Sodi taanyu itwaan daang ani a Akuj ekipur lo itemokino ngesi. Ngikaitotoi kang, eraakasi ngakiro ka Apolo ka nakang naalimu ayong ekitetemes anikus, kotere ekitetemes kang ka lo ka Apolo, asaki ayong esi toyena eger a ngakisikwaanet ana ebeyo, “Kiwapa ngitalio loger lo igiritere.” Nyejoikinit tani ipei kus iwogar itwaan ipei, kimenya niche. Ngae ebala ijok iyong idwangit luche? Meere kolong Akuj kiinakini iyong ibore daang ni itingit a? Ani kolong kiinakinitae iyong, nyo iwogar iyong tosub kolong pekiinakinio? Imwoko kolong esi a? Iliworosi kolong esi ngikabarak a? Iliworosi esi ngikapolok tarai eringa sua nyeliworo ngikapolok a? Wae, esibit cha taraut esi ngikapolok atoliworos sua ka esi ngikapolok aapei. Kainyo esibit kijamuarit Akuj sua ngimeanara kitiliwo ngitunga lu esakio akiar alongaren ngitunga, sodi toliwor kiteete ngimalaikae ka ngitunga. Kirai sua ngikabangabangae kotere Kiristo, nakaneni iosok esi imorikina aapei ka Kiristo! Kipalag sua, nakaneni igogong esi! Kirimae esi, kimenyaritetei sua. Kinyamit sua akoro ka akure tani tokona, emamuuna ngiworui, kibapanario nabo kirimit akwap. Kituburuna sua kisubi etich lokaagongon a ngakan kosi. Ani kimorio sua, atopiasi itwaan ngini, ani nakiboliare sua, atanaikisi. Ani nakimorere sua, atatachakisi sua ngitunga ngakiro naajokak. Kikok sua asakatan alotunga a akwap, kikok tani ekabose a akwap anitwaan kadaang! Nyekegirakinit ayong esi ngakiro nugu ani asakea kiruma esi ngileech, nakaneni egir ayong nugu asaki atamar ketatam esi loger a ngide kang aluminan. Kainyo tani kirikito esi ngitunga ngabunge ngatomon aloboyor kus a ekiristoonu, erai apakus epei bon, kainyo aloboyor kus alo iliworotor esi ngipei ka Yesu Kiristo, aliwor ayong apakus ani kainunea esi Ngakiro Naajokak. Kemaimai bocha ayong esi atamar kiwapa ekitetemes kang. Kotere ngakiro nguna, ameunit ayong Timoteo nikus. Erai ngesi lokookang lominat lo amuno ayong aloboyor alo ekiristoonu. Kisitamuni ngesi esi ngakiro daang na ewapit ayong anakiyar anakitetet ana kiraakar ayong ngipei ka Yesu Kiristo. Eboyor ngolo ngesi etatami ayong alokanisae kadaang, awadaang. Iwogasi ngiche kus ani ebaatar kori nyeringa ayong abuni aanyun esi. Nakaneni ani kechamit Ekapolon, abuni ayong nikus atipei sodi ataanyu ayong elope agogongu nakeanyut ngitunga lu iwogasi, meere ngakiro na iruorosi kesi. Kainyo meere Apolou a Akuj aka ekiruor pas, erai agogongu. Anukiro kijoikinito esi, ayong abunere kedet esi kori abunere nikus a etau alo a amina ka apatanu. Elimitoe atamar abe eyei emalaanu loaronon noi nikus lo idwangit tani lo a ngibukui alu nyerai Ngiyaudi. Kalimokin ayong atamar abe epereenete ikoku ka aberu a apakeng! Ikokinete tokona esi iwogasi ai? Achamit esi ialolongete dio kikotasi itwaan ni asubi ngakiro nguna tojongo arukit ka esi. Ayong alowae kang erai tani kalona a akwaan anikus, kirukit ayong ka esi kaina a etau. Ani aloger ekonea ayong itwaan ni ayei neni, erira ayong itwaan ni asubi ngakiro naaronok na a ngileech ikote nguna. Naichununotor esi wapei a ekiro a Ekapolon Yesu, atorukito ayong ka esi aapei a etau, ani kotere agogongu a Ekapolon Yesu, tolemikisi itwaan ngini Esiitan sodi kinyasu akwaan keng, toyuunor etau keng Akolongit na a Ekapolon. Nyejoikinit esi inisasi! Iyenete esi ngakisikwaanet na ebeyo, “Ekitoe lodiochichi lo itubui ngamugati, itubui ngakiria daang na inyalakinitae.” Tolemasi ngasechesea nangorok na ikote ekitoe lo itubui ngamugati, sodi tarata lu ikiuna, lu ikote ngakiria a ngamugati anakitetet ana emam itwaan iwaakinit ekitoe lo itubui. Loger lo ayenea ayong atamar ikote esi neni, kainyo alemun Kiristo lo erai Imesek ni italeunitoe a esukukuu a Adeparet, aliwor akipeyos yok. Nyikilakar kitamunit esukukuu a Adeparet, a ngamugati ana eya ekitoe lo itubui ngamugati lo erai akisech ka aronis. Nakaneni atalakaros kitamunit akolongit na a ngamugati ana emam ekitoe lo itubui, amugati ngina ngesi na erai akikiuna ka ngakiro na iteni dir. Anabarua ana kolong kegirakinit ayong esi, kalimokinit ayong esi atamar nyiimorikinosi ka ngitunga lu eminasi emalaanu. Pekesuruori ayong esi ngakiro a ngitunga alu nyerai ngikanupak alu eminasi emalaanu kori lukadakak kori ngikokolak kori lu ilipito ngakujo nasubuna, kainyo arai tarai ngulu abala ayong esi nyiimorikinotor, kejoikinit esi irotokinete anakwap kana jik. Nakalimokinit ayong esi ngesi na abala, warasi nyiimorikinosi ka itwaan ni ebala arai lokaatokus nakaneni emina ngesi emalaanu nabo edakana, kori ilipit ngakujo nasubuna, kori eswamana kori ilewana kori erai ekokolan. Wara nyiiboikin kimuja ka itwaan ni ikoni ngini. Nyo kang ngitunga lu nyeraakasi ngikanupak, eriraa ayong? Ikwa meere lu eyakasi tooma ekanisa ejoikinit esi iriraate a? Akuj irirae lu eyakasi nikalapatan a ekanisa. Loger lo igiritere nagiran kona: “Kitwarakisi itwaan niaronon anikus.” Ani keyei ipei kus akiroit na esakea akititakin ekiristoit loche, nyo nitibore erikitor ngesi ngesi lotunga lu nyerai ngikanupak akititare peimiekinea ngikiristoi totubo ngakiro nguna? Ikwa nyiyenete esi atamar iriraate ngitunga a Akuj akwap a? Tokona, ani kiriraate esi akwap a, ikwa nyitubete esi tani ngakiro nadikidio a? Ikwa nyiyenete esi atamar kirirae ngoni ngimalaikae a? Ani ikokinete ngakiro a ngakwapea kanu kikuruworete ngoni ai? Ikwa na eponeta ngakiro na ipegakinosi esi, iyaarete esi totubo ngitunga lu nyerai ngikanupak a? Alimunit cha ayong nugu kirumeta esi ngileech! Iteni dir, eyei cha tokona ngon itwaan ipei ni eos anikus ni epedori akitub ngakiro na epegatar ngikiristoi. Abe aliwor erikori ekiristoit epei loche akititare sodi kimiek lu nyerai ngikanupak etubete ngakiro keng! Iteni dir, idodiunit ibore ni ititatar esi make atamar kikuruwosi esi na ejoikinit isubete. Nyejoikinit esi kisechanakinio a? Nyejoikinit esi kidemio ngiboro a? Nakaneni, abe isechakinosi esi make nabo idemanarosi ngiboro, tani lu kata lokaatokus! Iyenete esi dir atamar nyeanyunete ngikaronok Apolou a Akuj. Warasi nyiingalasi make kainyo ngitunga lu iwapito emalaanu, kori lu ilipito ngakujo nasubuna, kori ngikalomak kori ngikiliok lu iiunete ngikiliok luche, kori ngikokolak kori lukadakak, kori lukelewak kori ngikaswamak ta ngikademak, emam itwaan ani eya ngulu ni irumi Apolou a Akuj. Ekote kolong ngichekus neni. Nakaneni ekisar kolong ngasechesea anikus irata esi ngitunga lu italeuno a Akuj. Ichamunosi esi ka Akuj kotere Ekapolon Yesu Kiristo ka Etau a Akuj yok. Elimuni itwaan iche tama, “Kachamakinitae ayong asubi ibore daang.” Iteni, nakaneni meere ibore daang ejok kotere iyong. Apedori ta ayong atamar kachamakinitae asubi ibore daang, nakaneni nyachamuni ayong ibore iche ketiliwori ayong erikot keng. Elimuni itwaan iche tama, “Erai akimuj aka akook, nabo erai akook aka akimuj.” Iteni, nakaneni inyasuni Akuj kesi daang. Meere akwaan a itwaan asubet ngakiro naaronok na ikote emalaanu, erai asubet etich a Ekapolon sodi tosub Ekapolon etich anakwaan. Akuj nakolong eteyaruni Ekapolon Yesu kiteyaruni tani ngoni a agogongu keng. Iyenete esi atamar eraakasi ngawat kus nginerin a Kiristo. Esibit esi apedori ayong alemun ekinier a akwaan a Kiristo etiliwo ekinier a itwaan ani imalaikinit a? Mam jik! Kori nyiyenete esi atamar itwaan ni imorikini akwaan keng ka na a amalaat, eliwor akwaan apei ka nakeng. Igiritae nagiran ngakiro na ileerete atamar, “Eliwor luarei ngulu akwaan apei.” Nakaneni ni imorikin ka Ekapolon Yesu, eliwor akwaan apei ka ngesi. Tapalikisi elomit ka emalaanu jik! Akisech nache daang na esubi itwaan, nyinyasuni akwaan keng, nakaneni itwaan ni elomit kori imalaikinit, esechakinit akwaan keng a ilope. Nyiyenete esi atamar eraakasi ngawat kus akai a Etau a Akuj alo ibooyi anikus, nabo kitaanyuni kolong esi Akuj a? Nyiraakasi esi ngikus a ngikulepek, nakaneni iraakasi ngika a Akuj, kigieluni kolong ngesi esi a ibore aniapolon. Nakaneni ejoikinit isubeta ngawat kus etich lo ipuruunere Akuj. Asaki tokona ayong atachun ngakiro nakolong igirito esi. Esubi itwaan niajokon erai pekiuta. Nakaneni kona elalaketa ngitunga lu imalaikinit ka ngikalomak, ejoikinit ekile daang emini aberu keng a elope, nabo ejoikinit aberu daang emini ekile keng a alope. Tosubea ekile aberu ngakiro na eraakar ekile, tosubea aberu dang alokile keng ngakiro na eraakar aberu, tosub itwaan daang na esaki niche. Nyepolokinit aberu akwaan keng a alope, nakaneni ekile keng epolokinit, aloger alopei kangolo, nyepolokinit ekile akwaan keng a elope, erai aberu keng epolokinit. Warasi nyeewou ipei akitoper niche, mati sek ichamakina esi atamar nyiperete ngirwa ngiche isakete akilip Akuj. Nakaneni ani erumor, toperionoto loger lopalem sek. Ani kikokis esi neni, kiratakinio esi nyikining Esiitan erai pekipedorete esi anaikin etereku. Kalimokinit ayong esi na echamit iwapete, nyadungunit ayong atamar tosuba kongina. Esibit ayong kikote ngitunga daang ayong, nakaneni egealana ainakinet na ainaki Akuj itwaan daang. Einakinio itwaan ipei ainakinet naga, nakinae niche ainakinet ache. Tokona, alimunit ngakiro nugu kotere lu nyiutara ka ngapuseru, ejoikinit esi irubakinete akiboi make loger kang. Nakaneni ani kemam esi kona itikokinete etereku kus, ejoikinit iutarete kainyo ejok akiutar idwangit etereku lo ipeyipeyi akwaan. Ani alotunga alu iutarito, eya ngakiro na adungunit, meere ayong adungunit, erai Ekapolon Yesu. Nyeisik aberu ekile keng, nakaneni ani keisiki, ejoikinit iboikin emam ekile kori tobongok lokile keng, nabo ekile nyejoikinit elaki aberu keng. Ani luche, alimokinit ayong atamar (ayong elope alimunit, meere Ekapolon Yesu), ani kiusit ekiristoit aberu na nyerai akiristoit, sodi tachamite ngesi akiruk ka ngesi, nyejoikinit ekile ngolo elaki aberu ngina. Ani aberu nakiristoit na iusit ekile lo nyerai ekiristoit sodi tacham ekile ngolo akiruk ka ngesi, nyejoikinit aberu ngina eisikini ekile ngolo. Kainyo echamuni Akuj ekile lo nyerai ekiristoit ani imorikinotor ka aberu keng, ani aberu na nyerai akiristoit, echamuni Akuj ani imorikinotor ka ekile keng lokiristoit. Arai kolong nyikote ngakiro neni, kikote ngide kech ngide a ngitunga alu nyenupito Akuj. Ani kona tokona ekokineta ngakiro neni, etaleunosi kesi. Kaneni dang, ani kesaki itwaan ni nyerai ekiristoit atamar atotiakas ka nikiristoit, kimiekisi totiakas. Ani kikokis ngakiro neni, epedori ekiristoit kerai ekile kori aberu, akisub na esaki. Kinyar Akuj esi sodi kibooyoto a ekisil. Ikokini iyong iyeni dir aberu nakiristoit atamar nyiyuuni iyong ekile kon ai? Kori ikokini iyong iyeni dir ekile lokiristoit atamar nyiyuuni iyong aberu kon ai? Ejoikinit itwaan daang ibooyi loger lokolong ainakinea Ekapolon ngainakinet, ikoni nikolong anyaraa ngesi Akuj. Etal ngolo ngesi etatami ayong alokanisae kadaang. Ani kechamu itwaan ni ilengeritae Akuj, nyiitingakin robo atamar nyekelengeritae, ani kechamu itwaan ni nyilengeritae Akuj, nyechamit ngesi ilengera. Kainyo nyemisit Akuj kilengeritae itwaan kori kemam, ibore ni etenoono ngesi akiwap ngitalio a Akuj. Kiboikin itwaan daang loger lokolong anyaraunea Akuj ngesi. Irai kolong iyong ekedalan na kinyaraa Akuj a? Emam ngakiro, nakaneni ani kipedori iyong alachakin, kikok ngitunga luche, talachakin. Kainyo ekedalan lo anyara Ekapolon, erai itwaan a Ekapolon Yesu ni elachakina, aloger alopei kangolo itwaan ni elachakina ni anyara Kiristo, erai ekedalan keng. Kigieluni kolong Akuj esi a ibore aniapolon nakaneni nyiiraut robo ngikedalak a ngitunga. Ngikaitotoi kang, ejoikinit ipei kus daang erukito ka Akuj loger lopei kolong kinyaraa ngesi esi. Asaki tokona ayong atachun ngakiro nakolong igirito esi kotere ngitunga lu nyiutarito. Emam ngakiro nakadungoki ayong Ekapolon Yesu kotere kesi. Nakaneni alimunit ayong nugu arai itwaan ni epedorio akinup ngakiro kotere ni kesienitor ayong Ekapolon Yesu. Nakaneni, kotere ngichan lu eya ngirwa lugu, etamit ayong atamar ejoikinit itwaan ibooyi loger lo ikoni. Eyei iyong aberu a? Wara robo nyisak akitwarakin. Eringa iyong nyiutara? Wara robo nyiisak aberu. Nakaneni ani kiuta iyong, nyesecha iyong, nabo ani kius apese na nyiusitae sek, emam akisech esubit ngesi. Nakaneni esibit cha ayong tobuchunos esi alochan alu a ngirwa kadaang alu eanyunete lu iutarete. Ngikaitotoi kang, na asaki ayong alimun kesi nugu: ekidioko ngirwa lu idongito. Napei tokona jik, kiboyoto lu iutarito ikwa ngitunga lu nyiutarito. Ani lu igorosi tosubut nyesurur ngitai, ani lu ekianasi tosubut nyelakara, ani lu egielete ngiboro, tosubut ngiboro lu egielete kesi meere ngikech. Ani lu eya ngakiro esubete anakwap, tosubut nyekachito kesi noi na esubete, kainyo anang eboyor lo tokona a akwap kana ni edaunor. Asaki ayong esi tapalikis ariaba ngakiro. Imuit ekile lo nyiutara akisub etich a Ekapolon Yesu, ani esakea ngesi akitalakar Ekapolon. Nakaneni ani ekile lo euta, imuito ngakiro na ngakwapea kanu, ani esakea akitalakar aberu keng. Sodi kikok ngesi lo iriyaritae alowaitin a ngiarei. Ani aberu na nyiusitae kori apese, imuit akisub etich a Ekapolon kainyo esaki ngesi akitaleun akwaan keng ka etau aapei. Nakaneni imuito aberu na iusitae ngakiro a akwap kainyo esaki akitalakar ekile keng. Alimunit ayong nugu meere kotere akiratakin esi, pearai asaki akingarakin esi, tosuba ibore ni etenoono ka ni iyookino, sodi tolemunos jik akisub etich a Ekapolon emam ibore iche iukito. Ani keyei ekile lo nyejoikinit atiaka ka apese nasek enerit ngesi akiut, tarai eyeni ekile ngolo atamar ekot etereku a akwaan keng akitosechakin apese ngina, ejoikinit kesi iutasi loger lo esakitor ngesi. Nyeliworosi nguna akisech. Nakaneni ani ketiaku ekile bon emam itwaan itingakinit atamar nyeutari, ani ketitinyiki ngesi etereku a akwaan totiaku na esubi, ani kikote neni, ejok erai pekiut ngesi apese ngina. Nakaneni ekile lo iutari, esubi niajokon, ani lo nyiutari, esubi niajokon noi akidwang lo iutari. Irukete aberu ka ekile keng ngirwa daang lu eyarea ekile keng. Nakaneni ani ketoana ekile keng, epedori ngesi achamun ekile lo cha esaki ngesi, kerai ekile ngolo ekiristoit. Elakar aberu ngina noi erai pekius nabo. Eraakasi nguna na etami ayong, nakaneni ayeni ayong atamar eyei ayong dang Etau a Akuj. Asaki tokona ayong atachun ngakiro nakolong igirito esi kotere ngamuja a ngakujo anasubuna. Eraakasi ngaka iteni dir ngakiro na ebeyo, “Kiosok ngoni daang”. Nakaneni aosou na ikoni ngina, isinisakini itwaan, nakaneni amina itenikini itwaan. Itwaan cha daang ni itamit atamar ayeni ibore, nyeyeni loger lo ejoikinitor ngesi eyeni. Nakaneni itwaan ni emina Akuj, eyeni Akuj. Tokona bocha, ani anakiro a akimuj ana elemikinio ngakujo nasubuna, kiyeni ngoni atamar erai akuj nasubuna ekisikwaane a ibore ani emamuuna. Kiyeni ngoni atamar eyei Akuj apei bon. Tani ta keya ngiborei be, “ta ngakujo,” kerai nadis kori nakwap, kori tani kelalak nabe ta, “ngakujo” kori lube ta, “ngikapolok,” nakaneni eyei ngoni Akuj apei bon, na erai Apa, na erai akasubunan a ngiboro kadaang nabo ngesi kiyarea ngoni. Eyei ngoni tani Ekapolon epei bon, ngesi Yesu Kiristo lo erai ngesi kolong asubunere ngiboro daang nabo ngesi kiyarea ngoni. Nakaneni meere itwaan daang eyeni ngakiro na eraakasi iteni nugu. Anaikis kolong ngitunga ngiche ngakujo nasubuna aliwor enyamete akimuj na elemikinitae kesi tani tokona itamito atamar kori erai akimuj ngina aka a akuj anasubuna. Kona epalagagea anupit kech, itamito kesi atamar kori kinyasuni kesi akimuj ngina. Nakaneni nyepedori akimuj akitaapiyar ngoni nia Akuj. Emam ibore kiituni ngoni erai pekinyam, nabo, emam ibore kianyuni ngoni erai kinyam. Nakaneni tochoikinos, warasi eboyor kus lo nyikachitotor esi na iseunete nyiisichwangak lu epalag ananupit kech. Ani bo ejok kingolik itwaan ni epalag ananupit keng iyong lo ebeyo “ekooson” imuji alokai ana a akuj anasubuna, ikwa nyelomakini itwaan ngini akinyam akimuj a ngakujo anasubuna kotere ngakiro nguna a? Sodi itwaan nipalag ananupit keng ngini, lo erai lokaatokon lokolong atoanea Kiristo, tobukor ananupit kotere “aosou” kon! Aloger kangolo, isechanakinete esi Kiristo ani isechanakineta ngikaitotoi kus lukiristoi tosub iwana esi anupit kech napalag. Nakaneni bocha, ani kerai akimuj itosechi lokaatokang, nyanyami ayong akiring nabo jik sodi nyeesecha lokaatokang. Ikwa meere ayong itwaan ni asubi ngakiro na asaki akisub a? Ikwa meere ayong emeanara a? Ikwa nyeanyungara ayong Yesu lo erai Ekapolon yok a? Nabo ikwa nyiraakasi esi lu ichamunete Akuj ani kitatamea sua esi ngakiro a Ekapolon a? Tani pekachamunito luche ayong atamar arai emeanara, iyenete esi ngikulepek atamar arai ayong emeanara! Kotere eboyor kus lo imorikinotor esi ka Ekapolon Yesu, idodiunit ibore ngini dir atamar arai ayong emeanara. Ngakiro na atachakini ayong lu kengichingichete ayong kesi nugu. Nyechamit ayong kainakinio akimuj ka ibore ni amasi kotere etich lo asubi a? Nyechamit ayong asubi na ikote na esubete ngimeanara luche atorik aberu nakiristoit wadaang ni ateni loger kech ka ngikaitotoi a Ekapolon Yesu ta Petero a? Kori erai Barinaba bon ka ayong echamit kisubi etich atoyareta? Ikwa meere etich lo esubi asiger ngesi eanyunitor ngesi akimuj na eyarea a? Eketan ali nyenyami ageor na enyaritae ngamusabib na ekoniunete ngikito lu itakinit ngesi mana keng? Ekeyokon ali nyemasi ngakile a ngibaren keng? Ekoe, eruoro ayong ngakiro nugu loger lo iruorotor ngitunga luche a? Ekoe, ikwa nyigiritae Lotal kongina a? Igiritae Lotal lo a Musa kona, “Wara nyiigol ngakituk a ngimongin alu elemere ngamanat kitonger adak.” Tokona, eraakasi ngakiro a ngimongin ngesi ekachit Akuj a? Ikwa meere ngakiro yok eruoro ngesi naalimunio nguna a? Egirio nguna dir kolong kotere ngoni. Itwaan ni itae ka itwaan ni elemi, esubete etich kech igienosi atamar kimori ngalemet. Ani kitakinit sua ekinyamit lo etau nikus, erono kianyu sua ngiboro luyaret anikus a? Ani kesakete luche ngiboro ngulu anikus, ikwa nyejoikinit sua noi kisaki a? Nakaneni nyesaka sua ngiboro kus loger ngolo. Nakaneni kititinyik sua ngakiro daang sodi tongop eger lo kiratakinea Ngakiro Naajokak a Kiristo. Iteni dir iyenete esi atamar ngitunga lu esubete etich alokai a Akuj, eanyunete akimuj alokai a Akuj, ani lu elemunete ngakipeyos alokeno alo ipeyonokinere Akuj, eanyunete kesi dang epewae a ngakipeyos. Aloger alopei kangolo, adungu Ekapolon Yesu atamar ejoikinit lu itatamete Ngakiro Naajokak eanyuununete ibore ni eyareta kaneni. Nakaneni nyesaka ayong ngakiro nguna tani wadiochichi, kori nyegiri tani tokona ayong asaki atamar ekok neni. Nyasubi ayong nguna jik tani kaar ibore! Emam itwaan eree ngakiro na ejoikinit iwogar toliworos ngapasiek. Nyejoikinit ayong ewoga ani etatamea Ngakiro Naajokak. Kainyo kadungokin kolong ayong atamar ekok neni. Oitiakoi! Abe etioko nginyas aanyuni ayong erai peketatam Ngakiro Naajokak! Arai kolong tarai ayong aseunit etich lo akisub, kasak ayong atamar katatach ngaropiyae, pearai asubi tokona ayong etich lo ani adungunio Akuj atamar tosub. Nyo tokona katachio ayong? Ibore ni katachio ayong ngesi akitatam Ngakiro Naajokak pas, erai peasaki atamar ataanyu ibore iche alotich alo akitatam Ngakiro Naajokak. Nakaneni, tani pekarai ayong ekedalan a itwaan a idio, aliwor ayong ekedalan a itwaan kadaang sodi tarauneta ngikaalak ngikanupak. Ani nakirukitor ka Ngiyaudi, ebooyi ayong loger a Eyaudit, asaki kesi taraut ngikanupak. Ani tani pekarikit ayong Etal a Musa, ebooyi ayong asibit karikit etal ngolo nakirukitor ka lu erikit etal ngolo, asaki kesi taraut ngikanupak. Aloger alopei kangolo, nakirukitor ka ngibukui lu nyerai Ngiyaudi, ebooyi ayong loger a ebukut alo nyerai Eyaudit asaki kesi taraut ngikanupak. Nyidodiunit ibore ngini atamar nyewapit ayong Etal a Akuj, ewapit ayong dir etal a Kiristo. Ani alotunga alupalag ananupit, abu ayong atapalagag loger lopei kech sodi atoreunea kesi toliworos ngikanupak. Nakaneni, kikwaanikin ayong ka ngitunga daang anakiro kadaang sodi atoyuunea ngiche kech a eger kadaang alo cha epedor. Asubi ayong nugu daang kotere Ngakiro Naajokak, sodi katopiarere a ngakiro kanguna. Iteni dir iyenete esi atamar elalak ngikakerak lu isiakinete akerit, nakaneni epei kech bon eanyuni ebachit. Irichakin ekakeran daang totionik akiker esaki kainakin apukot na nyerubi, nakaneni kisaki ngoni ebachit lokajik. Ibore ngini ngesi akerea ayong edirarit nirumoret, ibore ngini ngesi ekonea ayong ekajwon ngigum lo nyaramanari ngakan pas. Edichi ayong akwaan kang atoboliar sodi tanaikinea eboyor daang, asaki nyakanger ayong lokolong anyarauni luche nakerit. Asaki ayong esi kitamut ngikaitotoi kang ngakiro kata apaayok alu kolong arikit Musa. Ayuunit edou kesi daang sodi totenikis anam a Chamu niajokon. Ebatisao kesi daang toliworos ngipei ka Musa ananam ka edou ngolo. Apot daang kimuja akimuj napei a etau ngina. Tamata nabo tani ngakipi na etau nguna, kainyo amaase kesi anataaba ana etau kangina, ataaba ngina ngesi Kiristo elope. Tani kikote neni, nyesuba kesi lukaalak ngakiro na ejoikinito Akuj, sodi topetakin ngawat alu atoakete ariet wadaang. Tokona, eraakasi ngakiro nugu daang ekitetemes aniyok, kitoriangakis ngoni nyikimua ngakiro naaronok loger lokolong kech, kori nyikilip ngakujo nasubuna loger lokolong elipitotor ngiche kech. Loger lo igiritere nagiran kona, “Eboikinosi ngitunga kimuja nabo tamata ani erumor tonyout kidongata emerasi.” Nyejoikinit ngoni kilomi, loger lokolong asubete ngiche kech, sodi totoaketa ngitunga ngabunge ngatomwon-arei ka ngauni akolongit apei. Nyejoikinit ngoni kiningi Ekapolon, loger lokolong asubete ngiche kech, sodi kirikasi kesi ngimunio. Nyejoikinit ngoni kingurungura, loger lokolong engurunguratar ngiche kech, sodi tomunya Emalaikat a Akitu. Asubasi ngakiro nguna daang anikech toliworos ekitetemes ani eya luche, sodi kigirae toliwor nakiteriangakinete ngoni, kainyo aaput tokona ngirwa lu esal. Itwaan cha daang ni itamit atamar awei lokojokon, ejoikinit echoikin sodi nyeedakar. Akiningo daang na ichanyut esi, ikwaan ka napalem sek ichanyunete ngitunga luche. Nakaneni irichakini Akuj akichikakinet keng, nyepedori ngesi achamakin esi kiningio akidwang na inaikinete esi. Esaa lo kiningere esi, kitaanyuni ngesi esi agogongu na ititinyikinioto, sodi kitaanyu esi erot lo ibuchunotor. Tokona bocha ngipaalon luminan, tojongoto akilipit ngakujo nasubuna. Kesuruori ayong esi loger a ngitunga alu iosok, kitemo esi ngikulepek na alimu ayong. Nakibuakinea ngoni Akuj alakara na kimasea emuna lo epuritoe a ekopo alo itamunitere ngaakot a Kiristo, nyikimorikin ngoni atarata ngipei a ngaakot a Kiristo a? Ani nakinyilea ngoni ngamugati, atanyama, nyikimorikin ngoni atarata ngipei a akwaan a Kiristo a? Kona eraakar amugati ngina apei, kirai ngoni daang tani kilalak akwaan apei, kainyo kimori ngoni daang amugati apei. Kitamasi eboyor a Ngisirael, lu enyamete ngakipeyos na elemikinitae Akuj, emorikina ka ngakipeyos na ipeyokinitere Akuj. Esibit tokona asaki ayong atamar akuj nasubuna kori akimuj na elemikinitae ngesi, erai ibore iche ajokon a? Mam jik! Asaki ayong alimun atamar, akipeyos na ipeyoete ngitunga lu nyerai ngikanupak, elemikinitae ngipean, meere Akuj. Nyasaki ayong esi tochamas ka ngipean. Nyipedorete esi amasea ekopo lo emasea Ekapolon sodi nabo tamaasa lo a ngipean dang, nyipedorete esi akimuj Alomeesa a Ekapolon ani nabo kimuja alomeesa a ngipean. Kori kisaki robo ngoni Ekapolon Yesu kiraka etereku? Kitamit ngoni atamar kori kigogong ngoni noi kidwangit ngesi a? Ibalasi esi, “Kichamakinitae sua kisubi ibore daang.” Iteni nguna, nakaneni meere ibore daang ejok. “Kichamakinitae sua kisubi ibore daang”, nakaneni meere ibore daang kingarakini. Nyejoikinit itwaan engichit ngakiro na ejoikinito ngesi bon, nakaneni ejoikinit engichit ngakiro na ejoikinito itwaan niche. Ipedorete esi akinyam ibore daang ni egielanario anagielet ngiboro, nyingitanarosi atamar ejok kori emam. Kainyo igiritae nagiran kona, “Erai akwap ka ibore daang ni eyei nakwap ika a Ekapolon.” Ani kitepeyon esi itwaan ni nyerai ekanupan tochamut esi alosit nawi keng, tanyama ibore daang ni kiinakinio esi, warasi nyingitanarosi ngakiro ngache ani irichakinitotor anupit kus. Nakaneni ani kilimok esi itwaan atamar, “Alemikinitae akimuj na ngakujo nasubuna,” warasi nyiinyam akimuj ngina kotere itwaan ni kilimok esi ngini ka ngakiro na eya lotau keng dang, meere nguna atamar kotere ngakiro na eya lotai kus, pearai na eya lotau a itwaan aniche. Epedori itwaan iche alimun tama, “Nyo ketengeritotor ayong ngakiro na eya lotau a itwaan aniche akisub naasaki? Naabuakinea ayong Akuj alakara kotere akimuj kang, nyo ketepenitor ayong itwaan niche kotere akimuj naabuakinea Akuj alakara?” Nakaneni ibore daang ni isubete esi, kerai ni inyamete kori ni imaase, tosuba daang ipuruunito Akuj. Kiboyoto eboyor lo nyeyauni ngichan Loyaudi kori lobukui lu nyerai Ngiyaudi kori lotunga a ekanisa a Akuj. Tosuba napei asubi ayong, asaki ayong talakar itwaan daang anakiro ana asubi, nyasaki ayong nakajoikinito ayong elope bon, asaki na ejok alotunga kadaang sodi toyuunotor kesi. Kirokosi eboyor kang loger lopei erokoritor ayong lo a Kiristo. Kepuruunit ayong esi ani kitamunitotor esi ayong ngirwa daang nabo iwapito esi ngakiro nakolong ketatami ayong esi. Nakaneni asaki ayong esi toyena atamar epolokinit Kiristo itwaan daang, epolokinit ekile aberu keng, nabo epolokinit Akuj Kiristo. Nakaneni ekile daang lo ilipi kori iruoro ngakiro a Akuj enapit ibore anakou, imenyarit Kiristo. Ani aberu na ilipi kori iruoro ngakiro a Akuj emam ibore enapit anakou, imenyarit ekile keng. Emam ibore etiakit ngesi ka aberu na ebanyaritae ngitim. Ani pekenap aberu ibore anakou, esibit ejok tani ebanyari ngitim keng. Ani kona eronia aberu ebanyi akou keng kori echudari ngitim keng, ejoikinit enapi ibore anakou keng. Nyejoikinit ekile enapi ibore anakou keng kainyo erai ngesi ekisikwaane a Akuj nabo isileereunit ekipur a Akuj. Nakaneni aberu isileereunit ekipur a ekile, kainyo peasubunio kolong ekile anaberu, nakaneni aberu asubunio alokile. Kori peasubunio ekile kotere aberu, pearai aberu asubunio kotere ekile. Ejoikinit aberu enapi ibore anakou kotere ni epolokinitor ekile keng, nabo kotere ngimalaikae dang. Ani kaneni dang, alongaren Ekapolon Yesu, igieno aberu ekile nabo igieno ekile aberu. Loger lokolong asubunere aberu alokile, aloger alopei kangolo, aberu idouni ekile, nakaneni erai Akuj eyakar ibore daang. Totiakutu esi ngikulepek kejok aberu ilipi Akuj emam ibore enapit anakou. Ikwa nyikiyeni tani ngoni sek atamar epenikinito ekile ngitim lu kooyak a? Nakaneni isibusito aberu ngitim lukooyak. Etooyae Akuj ngitim keng toliworos kesi erapito akwaan keng. Nakaneni ani keyei itwaan ni epega ngakiro nugu, daang na apedori alimun ngesi na abala emam sua kori ngitunga a ngikanisae a Akuj ngitalio ngiche anakilip. Ani anakiro ana tokona alimuni kanu, nyekepuruuni ayong esi. Nyekepuruuni ayong esi kainyo eroko ngakiro na esubeenete ngitunga a ngikanisae kus na iriamiriameta. Akiroit na a ekingaren, kalimokin ayong atamar nairiameta esi, itiakanasi esi ipegasi. Anupit ayong atamar epewae a ngakiro kanguna eraakasi iteni. ( Ayeni ayong dir atamar ejoikinit atiakatiaka eyei nikus sodi tatakanuuneta lu etenooko.) Nairiameta esi wapei, meere akimuj a Ekapolon inyamete esi. Kainyo na imujeta esi, elomakini itwaan daang akinyam akimuj keng, sodi tanyam ngiche akoro, kirakarito ngiche epurot. Emam esi ngawiyei kus na imujeta nabo tamaasa a? Kori kijoikinit esi akimenyar ngitunga a ekanisa a Akuj nabo kisuruma lu emam ibore etingito ngileech? Anu isakete esi ayong katolimok esi anakiro kanguna? Ejoikinit ayong kepuruuni esi a? Mam jik! Kainyo aanyuni kolong ayong ani Ekapolon Yesu ngakitatamet nakalimokini ayong esi, na atamar na arikokinere Ekapolon Yesu ngitunga, abu tolem amugati, tobuak Akuj alakara, tonyil, sodi tama, “Akwaan kang naga, na erai akus. Kikwaanakisi nege kitamunito ayong.” Aloger alopei kangolo, naarumoreta akinyam akimuj, tolem ekopo sodi tama, “Erai ekopo lo achamunet a Akuj nakitetet na eyookin a ngaakot kang. Nacha imaasa esi, tamaseta kitamunitotor ayong.” Idodiunit ibore ngini atamar esaa daang lo inyameta esi amugati naga nabo tamaasa ekopo lo, ilimorito esi akitu a Ekapolon Yesu tanang na ebunio ngesi. Kongina bocha, ani kenyam itwaan idio amugati a Ekapolon kori kemasea ekopo keng a eger alo ejamuaritor Ekapolon, asechaki ngesi akwaan a Ekapolon ka ngaakot keng. Tokona bocha, ejoikinit itwaan daang iningo mono ilope bon, ani erumor tanyam amugati nabo tamasea ekopo. Kainyo ani kenyam ngesi amugati kori kemasea ekopo eringa nyeyena lokojokon eger a akwaan a Ekapolon Yesu, isichanyuna ngesi bon ilope eriras na enyamea amugati, tamasea ekopo. Ngakiro nguna ngesi epalagageta ngikaalak kus, todeakas, nabo atoaka ngiche kus. Arai eningos ngoni make, pekichanyu eriras a Akuj. Nakaneni na kiriraa ngoni Ekapolon Yesu, kitatamio ngoni atojokearator, sodi nyikirirae ngoni ka ngitunga lu nyerai ngikanupak aapei. Tokona bocha ngikaitotoi kang, nairiamiriameta esi akinyam akimuj a Ekapolon Yesu, kidarunos daang. Ani keyei itwaan ni enyamit akoro, ejoikinit ngesi imuji anawi sodi nyiichanyut esi eriras a Akuj na iriamiriameta. Ani ngakiro nache, kesisakini ayong esi nakiriamiriamea. Asaki tokona ayong atachun ngakiro nakolong igirito esi kotere ngainakinet a Etau a Akuj. Asaki ayong esi toyena ngakiro nugu lokojokon ngikaitotoi kang. Iyenete esi atamar kolong eringa esi nyeliworo ngikanupak, ibatara esi lokojokon ilipito ngakujo nasubuna na nyeyarete. Nakaneni toyena atamar emam itwaan anikus ni erikit Etau a Akuj ni elimuni tama, “Kilamae Yesu!” nabo emam itwaan elimuni tama, “Yesu erai Ekapolon,” erai pekerikit ngesi Etau a Akuj. Egelagela ngainakinet a Etau a Akuj, nakaneni erai Etau epei lo ipotonori. Egelagela ngirotin lusubet etich, nakaneni Ekapolon epei ngesi esubio etich keng. Egelagela ngirotin lu kisubea ngoni etich, nakaneni erai Akuj apei na itaanyuni itwaan daang aosou kotere etich ngolo. Etakanuuni ayakau a Etau a Akuj anitwaan a erot a echegela, kingarakinea luche daang. Elimokini Etau a Akuj itwaan ipei ngakiro na a aosou, ani niche tolimok ngakiro na a achwaanu, loger lo echamitor Etau lopei ngolo. Etau lopei ngolo, itiliwori itwaan ipei ikanupan, sodi kitaanyu itwaan niche agogongu na itojokea ngikadeakak. Itaanyuni itwaan ipei agogongu na esubea ngakitoodikinet nakailiilok, kitaanyu iche agogongu nairuoror ngakiro a Akuj, kitaanyu iche agogongu na etiakunea ngainakinet na eraakasi ngaka a Etau a Akuj ka na nyerai ngaka a Etau a Akuj. Kitaanyu iche agogongu nairuoror ngabukui nagelayek, ani iche kitaanyu aosou na isisaunea eger a ngabukui kanguna. Nakaneni erai Etau lopei ngolo ngesi esubi nguna daang, loger lo esaki ngesi, itaanyuni ngesi itwaan daang ainakinet nagela. Ikoni Kiristo akwaan na elalak nginerin, erai ngesi akwaan apei tani kelalak nginerin. Aloger alopei kangolo, ngoni daang, kirai Ngiyaudi kori ngibukui lu nyerai Ngiyaudi, kirai ngirikon kori ngitunga lu nyikienitae, kibatisak Etau nakwaan apei, nabo kikok ngoni lu kitamas Etau lopei ngolo. Kainyo meere ekinier epei bon eyei nakwaan, nakaneni elalak nginerin. Arai kolong tolimuni akeju tama, “Kona nyaraakar ayong akan, meere ayong ngipei ka akwaan,” pekiratak ibore ngini ngesi aliwor ekinier a akwaan. Ani arai tolim akit tama, “Kona nyaraakar ayong akongu, meere ayong ngipei ka akwaan,” pekiratak ibore ngini ngesi aliwor ekinier a akwaan. Arai tarai akwaan daang akongu bon, kikok iirari ai? Nabo arai tarai akit bon, kikok inguuni ai? Nakaneni bocha tokona, ewaakini Akuj ekinier daang nakwaan loger lo asakitor ngesi. Kemam akwaan eyei arai kolong tarai wadaang ekinier epei! Nakaneni bocha tokona, eya nginerin lukaalak tarai akwaan apei. Nakaneni nyelimokini akongu akan tama, “Nyakasaki ayong iyong!” Kori nyelimokini akou ngakejen tama, “Nyakasaki ayong esi!” Eya daang, nyesubi akwaan etich emam nginerin a akwaan lu kimenit ngoni kibala epalag. Kichoikinit ngoni noi nginerin lu emenitae, ani nginerin luche luajokak noi erichutu lokojokon noi, akidwang nginerin luche. Nakaneni asubi kolong Akuj akwaan lokojokon sodi torimare tani nginerin a akwaan lu ipasakinitae, tongopea eger lo esibitor akwaan etiakatiaka, nakaneni erukito nginerin keng daang aapei ingaranakin. Naepipilearor epewae a akwaan, epipilearosi nginerin luche dang ka ngesi aapei. Ani kipuruun ekinier epei, ipuruunio nginerin luche dang ka ngesi aapei. Iraakasi esi daang akwaan a Kiristo, nabo erai ipei daang ekinier a akwaan kangina. Alokanisa a ngitunga a Akuj, ewaak Akuj daang wapei: Mono ekingaren ngimeanara, lu a ngiarei ngikadwarak a Akuj, lua nguuni, ngiketatamak, ka ngulu esubete ngakitoodikinet nakailiilok, kiwaput lu eyei agogongu na itojoketa ngikadeakak kori akingarakin luche kori akirik luche kori akiruor a ngabukui anagelayek. Nyeliworosi daang ngimeanara kori ngikadwarak a Akuj kori ngiketatamak. Meere itwaan daang eyei agogongu na esubea ngakitoodikinet nakailiilok kori akitojok ngidekesinei kori akiruor ngabukui nagelayek kori akisisaun eger a ngabukui kanguna. Tominakisi noi ngainakinet natenoik. Nakaneni, kedodikini tokona ayong esi erot lo ejok noi. Apedori ayong akiruor ngabukui a ngitunga ka na a ngimalaikae dang, ani kemam ayong amina, ekoni ayong ibore ni eruo pas loger a ekaadongot. Nabo, apedori ayong aanyun ainakinet na eruoror akiroit a Akuj niajokon noi, atoyen ngakiro na imunonitae daang ka ibore daang. Apedori ayong aanyun anupit daang na esiyotokinio ngimoru, nakaneni ani kemam ayong amina, arai ayong pas. Apedori ayong akipotor ibore daang ni atingit, nabo atacham tani akwaan kang inomio, nakaneni ani kemam ayong amina, emam naajokak aanyuni ayong. Etitiny amina tapatana, emam amina etereku ka ngiwog kori ekinis, nyesubi amina ngakiro na a ngileech kori nyerorokana kori nyengoyeene atipei, nyimari amina ngakiro naaronok. Nyelakar amina kotere naaronok nakaneni elakar kotere ngakiro na a iteni. Imuki amina ngakiro daang, enupi ngakiro daang, igienokin ngakiro daang nabo etitinyikini ngakiro daang. Nyesaluni amina. Epalikinio ngainakinet na edwarere ngakiro. Etuborosi ngainakinet nakiruoret ngabukui nagelayek. Engopiyarete ngainakinet na a aosou. Kainyo kiyeni ngoni epewae a aosou atodwarete ngakiro epewae, nakaneni ani ebuni ibore ni ikiuna, tongopia ni erai epewae. Nakolong araakar ayong ikoku, eruoro ayong nikoku, ayeni ngakiro nikoku, nabo etami ngakiro loger a ikoku. Ani kona tokona araunea itwaan apolon, apalik ayong ngakiro a ekiditeu. Ikoni tokona ibore ni kitee ngoni etorube lo emuimui inwakunit akiyo, na enangea ngirwa ngulu, kianyungari ngoni ngesi a ngakonyen yok. Ayeni tokona ayong ngakiro epewae make, na enangea ngirwa ngulu, ayenuni daang, loger lo eyenea Akuj ngakiro kang daang. Ani ngirwa lu tokona lugu, erubakinete nauni nugu eya, anupit ka akigieno ta amina, nakaneni na etenoono kanguna kadaang ngesi amina. Erai amina ejoikinit esi isakete noi. Kimiekisi ngainakinet a Etau kimua esi lokojokon, tarai noi ainakinet na edwarere akiroit a Akuj. Itwaan ni edwari a ngabukui anagelayek, nyisuruori ngitunga luche, erai Akuj isuruori, kainyo emam itwaan eyeni ngakiro nairuoro ngesi. Iruoro ngesi ngakiro na iteni namunonoe, a agogongu a Etau a Akuj. Nakaneni ni edwari ngakiro a Akuj, isuruori ngitunga ingarakinit ka akitogogong ta akisiengun. Itwaan ni edwari ngabukui nagelayek, ingarakina bon, nakaneni ni iruoro ngakiro a Akuj, ingarakinit ngitunga a ekanisa daang. Asaki ayong esi daang kiruoro a ngabukui anagelayek, nakaneni ejok noi ianyunete esi ainakinet na idwareta ngakiro a Akuj. Kainyo itwaan ni iruoro ngakiro a Akuj, ejok noi idwangit ni iruoro ngabukui nagelayek, mati keyei itwaan ni ikobuni ngakiro a ngabukui kanguna, sodi kingarakinere ngitunga daang a ekanisa. Tokona ngikaitotoi a, nyo niajokon ianyunete esi erai kabu ayong nikus eruor a ngabukui anagelayek? Emam jik ibore ajokon, mati robo kedodik ayong esi akidodiunet a Akuj kori aosou kori ngakiro a Akuj na edwaritae kori akitatamet. Kitemo mono cha iyong ngakiro a ngiboro a ngiche alu ikote ebune kori agita, ikokini itwaan iropori eeos erai pekitenun eruye lokojokon ai? Ani pekekutaki eketuruon aburuch lokojokon, ngae elemuni ngiboro a ejie? Aloger alopei kangolo, ikokini itwaan eyenuni ngakiro na iruoro iyong ai, erai pekileerete ngakiro nairuoro iyong a ngabukui anagelayek? Engopikinete ngakiro kus lokuwam! Elalak ngabukui anakwap, nakaneni emam ngabukui na nyeya eger kech. Nakaneni ani napenyayenea ayong ngabukui na iruoroe, eliwor itwaan ni iruoro itwaan nigela anikang atoliwor ayong itwaan nigela anikeng. Ani kona kimuitor esi aanyun ngainakinet a Etau a Akuj, ejoikinit esi irichakinosi noi akingarakin lu elemuna akingarakin ngitunga a ekanisa a Akuj. Itwaan ni iruoro a ngabukui anagelayek, ejoikinit robo ilipa ainakinet na isisaunea nguna iruoro ngesi. Kainyo ani kelip ayong loger ngolo, ilipit cha dir etau kang, nakaneni nyimorikina ka ngitamen kang. Ejoikinit tokona ayong ekokini ai? Elipi ayong a etau kang, nakaneni elipi nabo a ngitamen kang. Aeokini ayong a etau kang, nakaneni aeokini tani a ngitamen kang. Naibuakinea iyong Akuj alakara a etau bon, ikokini itwaan niche ni eyei lokiriam ngolo elimuni tama, “Aamen” anakilip ana ibuakinitor iyong Akuj alakara kangina ai? Emam ngesi kona eyeni nguna iruoro iyong. Tani kejok akilip na ibuakinitor iyong Akuj alakara, nyingarakinit itwaan niche ngini jik. Abuakinit ayong Akuj alakara ani eruoror a ngabukui anagelayek akidwang esi daang. Nakaneni ani nailipitere Akuj, ejoikinit ayong eruoro ngakiro ngakan na eyenio, sodi etatamea luche, akidwang akiruor ngakiro ngabunge a ngabukui anagelayek. Nyiikokis ngide alotamen kus ngikaitotoi kang. Kikokisi ngide anakiro anaaronok, nakaneni toliworos ngitunga luapolok alotamen kus. Igiritae nagiran kona, “Ebala Ekapolon, alotunga alu iruorosi ngabukui nagelayek, anakituk a ngitunga a akwap a ache, esuruori ayong ngitunga lugu nakaneni nyepupokinete ngitunga ngakiro kang.” Tokona bocha, ainakinet na iruorore ngabukui nagelayek, eraakasi ngakiro na idodikinitae lu nyerai ngikanupak, meere ngikanupak. Erai ainakinet na iruorore ngakiro a Akuj aka ngikanupak, meere aka lu nyerai ngikanupak. Ani tokona kiriamariam ngitunga a ekanisa daang wapei tolomakis akiruor ngabukui nagelayek, sodi tolomut ngitunga ngiche, kori lu nyerai ngikanupak, ikwa nyetamarete kesi kikeripikinit esi a? Nakaneni ani kiruoro itwaan daang ngakiro a Akuj na elomunea itwaan iche ni nyerai ekanupan kori ni nyitatamitae ngakiro a Akuj, echamuni ngesi atamar arai ekasechan kotere ngakiro na iirari. Iriraate ngesi ngakiro daang na iirari, isileereunio ngitamen keng lumunonoe daang, sodi toriedik ngesi ilipit Akuj tama, “Iteni dir eyei Akuj nege kirukit ka ngoni!” Ngikaitotoi kang, abala ayong nege. Nairiameta esi akilip, eyei itwaan iche eeos, eyei iche akitatamet, iche akidodiunet a Akuj, iche ngakiro a ngabukui anagelayek, ani nabo iche akilokony na iruoroe. Ejoikinit ibore daang ni esubio erai ni ingarakini ngitunga a ekanisa. Ani keya ngitunga lu iruorosi a ngabukui anagelayek, echamit eraakasi ngiarei kori nguuni make iruorosi, tolim ipei ani erumor totupak niche, sodi kisisau nabo itwaan iche nairuoroe. Nakaneni ani kemam itwaan ni isisauni, ejoikinit itwaan ni iruoro a ngabukui anagelayek ililingi chek sodi kiruoro ka Akuj keng make. Ejoikinit ngiarei kori nguuni lu aanyut akiroit a Akuj iruorosi sodi kitemo luche na iruorosi kesi. Nakaneni ani keanyu itwaan ni eyei lokiriam akiroit a Akuj, ejoikinit itwaan ni iruoro ililingi. Kainyo ipedorete esi daang akiruor ngakiro a Akuj, tolim ipei ani erumor totupak niche, sodi kitatamar itwaan daang kingarakinor. Ainakinet nakiruoret ngakiro a Akuj, ejoikinit eweikinit itwaan ni eyei ainakinet ngina, kainyo nyesaki Akuj ngoni apena lokurikur, esaki atopupos nabo esilito. Loger a ngitunga a Akuj kadaang alu a ngikanisae, ejoikinit ngaberu ililingete chek alokiriam. Nyechamakinitae kesi iruorosi, loger lo engeritere kesi Alotal a Ngiyaudi eliworosi ngakapolok. Ani keya ngakiro na esakete kesi akiyen, ejoikinit ingitunete alokiliok kech anawiyei. Erai ekiruor a aberu alokanisa ibore a ngileech. Kori itamito robo esi atamar ebunit akiroit a Akuj anikus? Kori erai kolong esi make ebunitor? Ani kitamit itwaan atamar arai ngesi emeuna a Akuj kori aanyunit ainakinet a Etau, ejoikinit eyeni atamar erai nakegirak ayong esi na edungunit Ekapolon. Ani kewou ngesi akiirar nugu, nyiirasi esi dang nakeng. Tokona bocha ngikaitotoi, ejoikinit esi kimui akiruor akiroit a Akuj, nakaneni nyiitenger itwaan akiruor ngabukui nagelayek. Ejoikinit ibore daang esubio alorot aloajokon alo eriyan. Asaki tokona ayong ngikaitotoi kang akisitamun esi Ngakiro Naajokak nakolong ketatami, dio tachamut esi nabo erai tokona ni ewaar anupit kus neni. Ngakiro Naajokak a Yesu Kiristo ketatami ayong esi ngesi nguna. Kiyuunete esi Ngakiro Naajokak nguna erai kirubakis esi inupito, ngaye robo kerai kolong anupit kus apasit. Abu ayong kesiporok esi nguna atenooko noi na aanyuni ayong, atamar atoani Kiristo kotere ngasechesea yok, kona igiritere nagiran, atamar tonukae ngesi nabo kiteyarunae adaunet a ngirwa a nguuni, kona igiritere nagiran atamar, atakanuuni ngesi ani a Petero ani erumor tatakanu alomeanara alutomon ka ngiarei. Sodi tatakanu ngesi atipei alorukitos keng alu idwangito ngamiae ngakan. Eringa ngikaalak kech eyarete, tani bo ketoakito ngiche dang. Sodi tatakanu ngesi ani a Yakobo ani ekisidi tatakanu ani eya ngimeanara daang. Ani ekisidi kadaang tatakanu ngesi tani anikang, alo ekoni itwaan ni edounio eringa ngirwa lukidounet nyitemokino. Kainyo arai ayong loochi noi alomeanara, nyejoikina tani kanyarao emeanara, kainyo aboliar kolong ayong ngitunga a ekanisa a Akuj. Nakaneni arai ayong itwaan ni arai kotere ajokis a Akuj, nakaneni pearai ajokis nakeng ngina anikang aka pas. Ani kikote neni dang, asub ayong etich lokojokon noi akidwang ngimeanara luche daang, nyerai ayong elope asubi nguna bon, nakaneni arai ajokis a Akuj ketusubi ayong kongina. Tokona bocha, keraakasi kesi etatamete kori ayong, nguna kesi kitatami sua daang nabo kesi inupito esi. Ani kona tokona itatamere atamar ayaru Kiristo anakitu, ikokinete ngiche kus ebaasi abe nyeyarunete ngikatoak ai? Ani keraakasi nguna iteni, idodiunit ibore ngini atamar nyiteyaruna kolong Kiristo. Ani pekiteyarunitae kolong Kiristo, eraakasi ngakiro na kitatami sua ngapasiek nabo erai anupit kus dang apasit. Kanguna kadaang, kiliwor sua ani a Akuj ngitunga lu kiruoro alioko kainyo alimuni ngesi atamar eteyaru Kiristo, nakaneni ani kerai iteni atamar nyeyarunete ngikatoak, ikwa nyiteyarunit ngesi Kiristo. Kainyo ani pekiteyarunio ngikatoak, ikwa nyiteyarunitae tani Kiristo. Ani pekiteyarunitae Kiristo, erai anupit kus apasit nabo eringa asechanu eyei nikus. Idodiuni ibore ngini dang atamar ebukoro ngikanupak daang lu atoaka. Ani kerai kigienor ngoni Kiristo akiyar a ngirwa kalu make, ejok ngoni kitasenokin noi akidwang itwaan daang anakwap. Nakaneni ngakiro na iteni ngesi na atamar eteyarun Kiristo sodi kidodiun dir atamar iteyarunio tani lu atoaka. Kona etorunio akitu nitwaan, loger lopei ngolo, itoruni akiteyaruno nitwaan. Kona etoaketa ngitunga daang ani eraakatar ngipei ka Adam, aloger alopei kangolo, eyarunete daang ani eraakatar ngipei ka Kiristo. Nakaneni iteyarunio itwaan daang alopit keng, isiauni mono Kiristo, ani ngirwa lu ebunio ngesi, toyarut lu eraakasi ngikeng. Ani na enangea esal, ebuakini Kiristo Akuj Apa apolou erai kinyasu mono ngesi arikoru daang ka ngapolosio ta agogongu a arieng kadaang. Kainyo echamit Kiristo epolokini tanang ni iwaakinea Akuj ngimoe daang kwap nakejen keng, toreu ngesi. Emoit lo esal idwangio ngesi akitu. Kainyo igiritae nagiran kona, “Ewaakini Akuj ngiboro daang kwap nakejen keng.” Ileerete nguna dir atamar ngakiro be “ngiboro daang” nyimarunito Akuj alope, na iwaakini ngiboro daang kwap Kiristo. Nakaneni na elemunere ngiboro daang topolok Kiristo, ani ngesi elope, Lokookeng a Akuj, iwaakin kwap Akuj, nakolong ewaakini ngiboro daang kwap keng, sodi topolok Akuj daang. Ani kemam ayarun a, nyo igienosi ngitunga lu ibatisao a ngirora a ngikatoak aanyun? Ani pekeyarunete ngiche iteni dir loger lo ebalatar ngiche, nyo ibatisaare ngitunga ngulu a ngirora a ngikatoak? Ani bo ngoni a, nyo kikonea ngoni esaa daang ngitunga lu ekotoi akiwan? Ngikaitotoi kang, ekotoi ayong akiar jiik! Ekinis lo kenisar ayong esi ani kiraakar ngipei ani a Yesu Kiristo Ekapolon yok, kesi ketilimunito ayong nugu. Arai kolong etijite ayong “Ngitieng a moding” kane alo Epeso kotere etereku a ngitunga, kerai nyo aanyunit ayong? Nakaneni ani pekiteyarunio ngikatoak, kimiekisi robo kikokis eger lo elimunitere a ngakisikwaanet kona, “Kimiekisi emuja nabo atamata, kainyo kitoaki moi.” Warasi nyikingalae, “Inyasunete ngirukitos luaronok itwaan niajokon”. Kikokisi ngitunga lu iriangut ajoketa ngakies, sodi tapalikis ngasechesea. Alimuni ayong ngakiro na kisurumete esi ngileech atamar nyeyenete ngiche kus Akuj. Ingita itwaan iche tama, “Ikokinete ngikatoak eyarunete ai? Epete kesi ngawat nayesiyek ai?” Atige ekabangabangat! Naitakinea iyong ekinyamit, ani peketoana mono, nyerupuni. Erai ibore ni itakini iyong ekinyamit, kerai ta lo a ngakanoi kori ekinyamit eche, nyikoni ekitoe lo erupuni ekisidi. Einakini Akuj ekinyamit ngolo akwaan na esaki ngesi alope, eanyuni ekinyamit daang akwaan keng a elope. Meere ngawat a ngiborei kadaang ngapei. Eraakasi ngawat a ngitunga ngapei, eraakasi na a ngitieng ngapei, eraakasi na a ngikieny ngapei nabo na a ngikolia dang eraakasi ngapei. Eya ngawat na alokidiama ka ngawat na alokwap. Akibuseanu na erai aka ngawat ana alokidiama, etiakak ka na a angawat ana a alokwap. Egeal akibuseanu a akolong, egeal akibuseanu a elap, egeal akibuseanu a ngikanyer, ani ngikanyer make, etiakatiaka akibuseanu kech. Ikokinete ngakiro neni na eyaruneta ngikatoak. Enukio akwaan erai ibore ni inyasun, ani na iteyarunere nyinyasun. Enukio akwaan erono, kiteyarunae ibus. Na enukere erai akwaan na a nginerin, na iteyarunere, erai akwaan na a etau. Ani kona eyakar akwaan na a nginerin, eyei tani akwaan na a etau. Kainyo igiritae nagiran kona, “Asubunio Adam itwaan nia ekingaren eyari”, nakaneni Adam lo esal lo eyari ngesi Etau a Akuj lo kitaanyuni akiyar. Nakaneni meere akwaan na a etau isiauni kingareniu, nakaneni na a nginerin isiauni ani erumor totupuu na a etau. Adam lo ekingaren lo asubunio analup, abuni analup. Abuni Adam lo a ngiarei anadis. Ngitunga lu eraakasi ngika ngalup, ikote lo asubunio analup. Ngitunga lu eraakasi ngika a adis ikote lo abuni anadis. Loger lo kikwaanea ngoni ka itwaan ni asubunio analup, kikwaanikin ngoni tani ka Itwaan ni ebuni anadis. Tokona ngikaitotoi, ngakiro na asaki ayong alimun ngesi na abala, ibore nikolong etoruni nakwaan ka ngaakot, nyirumi Apolou a Akuj, ani ni inyasun, nyirumi ni nyinyasun. Topupokisi katolimok ngakiro na imunonitae na eraakasi ngaka iteni nugu, nyikitoaki ngoni daang, erai kilochio ngoni daang atipei loger lo irwapakinea akongu, na ekutakinere aburuch na a esal. Kainyo na erukinio aburuch, iteyarunio ngikatoak a ngawat ana nyetoakete nabo sodi kiloch ngoni. Kainyo ejoikinit ibore ni inyasun ilochio toliwor ni nyinyasun, akwaan na etoani, ejoikinit ilochio toliwor na nyetoani. Nakaneni na ikokineta ngakiro neni, toliwor elocho ni inyasun aliwor ni nyinyasun, sodi kiyookin ngagiran na igiritae kona, “Enyasun akitu epiun arumor!” “Kipiun tokona iyong akitu. Emam iyong agogongu na ipedorea akiwan itwaan.” Eanyuni akitu agogongu keng na kiwanea ani a akisech, sodi taanyu akisech agogongu keng alotal. Nakaneni kibuakini Akuj na kisipiuni ngoni alakara ani a Ekapolon Yesu Kiristo! Tokona bocha ngikaitotoi kang luminan, torubakisi itionikinito ngakiro daang. Kirichakinos tosuba etich a Ekapolon iyenete atamar nyeliwor etich a Ekapolon lo isubete esi eka pas. Anakiro ana kolong kigirakinitae esi kotere ngaropiyae na edekio akingarakinea ngitunga lua akwap a Yudea, ejoikinit esi isubete naalimokini ayong ngitunga a ngikanisae a akwap a Galatia atamar tosuba. Akolongit a Jumapili daang, ejoikinit ipei kus daang ikachakini ngaropiyae ngadi itemem ka ngaropiyae na enyami ngesi, sodi nyeelemere ngaropiyae naabunio ayong. Naabunio ayong, ainakini ayong ngitunga lu iseut esi ngabaruae na eyaareta ngalemunet nguna Yerusalem. Ani kejoikinit ayong dang alosi, kirukori ayong ka kesi. Abuni ayong nikus erai ketor mono Makedonia, keburakinit akitor Makedonia. Kori kiruki ayong ka esi a ngirwa a ngiche, kori tani kiruki aapei ngirwa daang lu a aibach. Ani erumor kingarakis esi ayong atolot ni cha alosi. Nyasaki ayong akitorun nikus ekirikira epor atolot wache. Asakit akiruk ka esi wadio erai kachamaki Ekapolon Yesu. Nakaneni ebooyi ayong kane alo Epeso tanang akolongit na Pentekost. Elolom nege noi kotere etich loajokon lo asubi ayong, nakaneni elalak bo tani ngiketepegak. Ani kebu Timoteo nikus, tochoikisi nyichanakin na irukitotor ka esi kainyo esubi etich a Ekapolon loger kang. Nakaneni nyejoikinit eyei itwaan ni imenyarit ngesi. Ejoikinit ingarakinete ngesi analotoru keng niajokon sodi tobongunio ni ayei ayong. Kainyo edarit ayong ngesi ka ngikaitotoi yok aapei. Ani lokaatoyok Apolo, emaima ayong ngesi noi abala kirukut ka ngikaitotoi luche nikus, nakaneni nyesaki ngesi abunere tokona, nakaneni ebuni ngesi erai kemin kona ebuni. Tochoikinos, torubakisi inupito, totitinyeketo nabo togogongioto. Tosuba ibore ni isubete daang a amina. Iyenete esi ngakiro a Sitepanas ka ngitunga a awi keng, kesi eraakasi ngikiristoi lu a ekingaren alo Akaya nabo alemun kesi akingarakin ngitunga a Akuj. Kemaimai ayong esi ngikaitotoi kang atamar, kiwapa arikoru a ngitunga alu ikote ngulu, nabo ka itwaan niche daang ni esubi etich ka kesi aapei. Alakara ayong noi ani aponeta Sitepanas ka Porutanato ta Akaiko. Etemokis kesi na adikino esi isubakinete, nabo ilakarosi esi kotere kesi loger lo alakaror ayong kotere kesi. Ejoikinit kitamunit ngitunga lu ikote lugu. Kimalaate esi ngitunga a ekanisa daang lu eya Asia. Akula ka Prisila ka ngikiristoi daang lu eya nawi kech, kimalaate esi lokojokon. Kimalaate ngikaitotoi daang. Kimalas esi make inuanakinosi a aminanu. Egiri ayong nugu a akan kang a ilope! Kimalae Paulo. Ilamam itwaan cha daang ni nyemina Ekapolon! Marana ta, Ekapolon kosi, bua! Kimiekisi ajokis a Ekapolon Yesu kiruko ka esi. Kiruko daang ka amina kang ani a Yesu Kiristo. Erai ayong Paulo lo arai emeanara a Yesu Kiristo kotere echami a Akuj, ta Lokaato yok Timoteo, kesi kigirunit abarua naga. Kigirakinit ngitunga a ekanisa a Akuj lu eya Korinto ta ngikanupak daang lu eya wadaang alo Akaya: Kagatakinit esi ajokis ka ekisil a Akuj Apayok ta Ekapolon Yesu Kiristo. Atobuakisi Akuj na erai Apakeng a Ekapolon yok Yesu Kiristo alakara. Erai ngesi Apa lo a ngisien, Akuj na erai nikeng itoronit akingarakino daang! Kingarakini ngesi ngoni alochan yok kadaang, sodi engarakineta luche lu eanyunito ngichan ngigelagelae. Erai kingarakinit kesi kotere akingarakinit napei kianyuni ngoni ani a Akuj. Kona kianyunitor ngoni ngichan lukaalak lua Kiristo, loger lopei ngolo, kianyuni ngoni akingarakino a Akuj kotere Kiristo. Ani kianyu sua ngichan, kianyuni kotere akingarakino kus ka ayuuno. Ani kingarakin sua, kingarakinio esi dang sodi taanyut atitinyu na inaikineta ngichan lupei kinaikinit sua dang. Nakaneni nyilochokin ngitamen kosi lu kigienor sua esi, kiyeni sua atamar eger lopei ianyunitotor esi ngichan ka sua aapei, ianyunete esi dang akingarakino napei kianyunit sua. Kisaki sua esitamutu esi, ngikaitotoi, ngichan lu kianyuni sua anakwap a Asia. Kianyunit sua ngichan luaronok noi atamasi kori nyeringa tani kiyari. Tosub kidungokin sua atamar kitaar. Nakaneni asubakinosi nguna sodi nyikigienokin sua agogongu kosi a ngikulepek, nakaneni egienokinos Akuj bon na iteyaruni ngikatoak. Kitoyuu ngesi sua alochan aluaronok a akitu, nakaneni kiyuuni, nakaneni kigienokin sua ngesi atamar kiyuuni ngesi sua nabo, erai kingarakinito esi sua a eger alo kilipakinitotor. Nakaneni etachunio ngakilipet kosi nakaalak, nabo kipiari Akuj sua, nabo ilipete lukaalak ebuakinito Akuj alakara kotere sua. Kiwoga sua a ibore a ipei. Kidodikinito sua ngakiro na eya lotai kosi atamar eboyor kosi anakwap kana ka erukitene kosi ka esi, arai lo etenoono dir loajokon kotere agogongu a ajokis a Akuj, meere kotere aosou a ngitunga. Kigirikanit esi ngakiro na ipedorete akisomare toyena. Etamit atamar iyenete lokojokon, kainyo tanang tokona, kiyana esi ayong wadio. Kiyeni atamar Akolongit na Ekapolon Yesu, kiwogatar esi dang sua loger lo kiwogar sua esi. Ayeni ayong dir atamar areat sek abunere nikus sodi kitopiarere esi ngapiaret ngaarei. Kainyo asakit ayong akitorun nikus alosi Makedonia ka na abongunio, sodi kingarakis esi ayong analosit kang anaalosio Yudea. Tokona a, nakolong areator ayong kongina, asibit ayong itwaan nikeitiiton a? Ngakiro kang na areat ayong a, areat ayong kotere ni eyakar ibore ni keterekuyarit a? Sodi toliwor eikini atama, “Ee” ka “Emam” akiikinet apei a? Ani kona iruoror Akuj ngakiro na iteni dir, meere ngakiro nakechikak ayong esi na akiikin atamar, “Ee” ka atamar “Emam” aapei. Kainyo Yesu Kiristo Lokookeng a Akuj lo etatami Sila ka Timoteo ta ayong elope ngakiro keng anikus, meere ngesi lo erai, “Ee” ka “Emam” aapei. Nakaneni erai ngesi ngirwa daang “Ee” a Akuj. Kainyo ngesi erai “Ee” a ngakichikakinet kadaang a Akuj. Ngakiro nguna ngesi kitamanarea “Aamen” kitorunit nikeng, epuruutu Akuj. Erai Akuj alope kitunup sua ka esi aapei eger a akiyar ana kiraakar ngipei ka Kiristo, erai Akuj alope kitiliwo ngibekon. Kimacharik ngesi ngoni emachar lo erai ekeng, nabo kitaanyu ngoni Etau keng alotai yok erai ngesi eweikinit daang na kidaritor ngesi ngoni. Alimit ayong Akuj abala ngesi erai akaanyunan kang, eyeni ngesi etau kang! Asaki ayong esi tobuchunos, ibore ngini ngesi peabunio ayong Korinto. Nyikisaki sua akitingakin esi na ejoikinit inupete, kiyeni sua atamar iweikinito esi dir anupit kus. Nakaneni, kisubi sua ka esi etich aapei kotere alakara kus. Nakaneni atiaku ayong atamar nyabuni nabo nikus akisialolong esi. Kainyo ani kesialolong ayong esi, ngae idongi ketalakarit ayong? Erai nabo ngitunga lupei esialolong ayong ngulu. Ngakiro nguna ngesi kegirakinitor ayong esi abarua ngina, peasaki ayong abunere nikus kesialolong esi ngitunga lupei ejoikinit ketalakarete. Kainyo ayeni ayong dir atamar naalakaror ayong, ilakarosi esi daang. Kegirakini ayong esi kanomito ngakiro etau kesigor ngakiyo cholae, peasaki ayong akisialolong esi, nakaneni asaki ayong esi toyena eger lo kamina ayong esi daang. Ani keyei itwaan itongoit niche, meere ayong ketongoit, erai esi daang kitongoit, kori itongoit epewae kus. (Alimunit ayong nguna kainyo nyasaki adedenger noi anikus.) Itemokino atamar erirata ngikaalak kus itwaan ngini a eger kangolo. Tokona bocha, ejoikinit esi irimakinete ngesi kingarakis sodi nyialolongio jik kinyasun. Kemaimai tokona ayong esi kidodikis ngesi atamar iminasi esi ngesi dir. Kegirakini ayong esi abarua ngina erai asaki akiyen dir eger lo ipedorete esi akiwap ngakiro nakalimokini ayong esi. Nairimakineta esi itwaan a ngakiro ana asub ngesi, arimakini ayong dang ngesi. Kainyo naarimakinea ayong, erai keyei ibore ni ejoikinit arimakini, asubi ayong nguna ani a Yesu Kiristo, kotere esi, sodi tongopikinea Esiitan eger lo kidwangea ngoni, kainyo kiyeni ngoni ngakiro na ereat ngesi. Naanangunea ayong Turoa akitatam Ngakiro Naajokak a Kiristo, atoyen atamar kengaa Ekapolon erot lo esubere etich keng kaina. Nakaneni ealolong ayong noi kainyo nyeriamuna ayong lokaatokang Tito. Sodi atolimok ayong ngitunga lu kaina atamar kidongo robo ani erumor atolot ayong Makedonia. Nakaneni kilakara noi ani a Akuj! Kainyo kirikit ngesi ngoni jiik anakipiun ana a Yesu Kiristo. Erai ngesi kipetaritor ngoni ngakiro na iteni a Kiristo tokeikin wadaang loger a aurus anakakukunyon. Kainyo kikoni ngoni aurus nakakukunyon noi na alemiki Kiristo Akuj, aurus ngina ekeikina ni eya ngulu eyuununio kangulu ebukoro. Kangulu ebukoro, ikoni aurus ngina ekabose lo kitulari kitaar, nakaneni ani ngulu eyuunio, erai aurus a akiyar. Ngae tokona epedori akisub etich lo ikoni lo? Nyikikoni sua ngitunga luche lu itisibito ngakiro a Akuj ibore ni emuchuruseenu. Nakaneni kona eraakar Akuj kimeunit sua, kiruoro sua na iteni dir anikeng kirai ngikasubak etich a Kiristo. Esibit tokona nabo ibore en kiwoga sua a? Tokona a, kisaki sua kigirakin ngabaruae nakiyeneta esi sua. Kori kigirakis esi sua ngabaruae nakiyenere, loger a ngitunga aluche a? Esi ngikulepek iraakasi abarua na kitingit sua, na igiritae lotai kus sodi toyenea itwaan daang kisoma. Etakani dir atamar Kiristo elope ngesi egiri abarua naga sodi kiinak sua ayautu. Nyigiritae a ewino igiritae a Etau a Akuj ana eyari, nabo meere namoru nadapal igiritae, igiritae lotai a ngitunga. Kilimunit sua kongina ani kigienor Akuj ani a Kiristo. Emam anikosi ibore nikitilimuni sua atamar kipedori sua akisub etich logo. Erai nakiyeni sua akisub nakianyunit ani a Akuj, ngesi kiteyenunit sua akisub etich anachamunet anakitetet, ana erai meere etal lo igiritae nakaneni erai Etau a Akuj. Erikit etal lo igiritae akitu, nakaneni erikit Etau a Akuj akiyar. Akulitae kolong etal namoru nadapal, dio kileereu akwangis a Akuj na epotorere etal. Tani kolong kerai akwangis ngina na edauni, emaunit akwangis ngina noi tokuruwo tani ngitunga a Isirael aanyungar ereet a Musa kotere ni emaunitor. Ani kolong kirukunito etal lo erikit akitu ka akimaunit na ikoni ngina, etenoono noi akwangis na erai aka a Etau a Akuj! Ani kolong kepolok ngitichisio lu arikito eriras, etakani dir atamar epolok ngitichisio lu erikito ayuuno! Elunyokin tokona akwangis na epol noi nados ana kolong ngorot, ana adaun akwangis keng. Kainyo ani kolong keyei apolou nibore nia ngirwa a ngidikidio, epol noi akwangis kangini erubi jik! Kona eraakar na kigieno ngoni nguna, emam ibore kikerit ngoni. Nyikikoni ngoni Musa lo arapi ereet keng a aworu sodi nyeanyungareta ngitunga a Isirael akwangis edaun sodi tongopea. Nakaneni agolol dir ngitamen kech, tani tokona, eringa ngitamen kech erapit awaru napei ngina, esaa lo isomaata kesi ngakitabea na a achamunet anangorot. Kainyo erai nia Kiristo bon elacharere awaru ngina. Tani tokona, na isomaata kesi etal a Musa, eringa awaru erapit ngitamen kech. Nakaneni elemario awaru keng na ereyaror itwaan nia Ekapolon. Tokona a, lo elimitoe anagiran kanu ebeyo “Ekapolon” ngesi Etau a Akuj, ani ni eyei Etau a Ekapolon, eyei alachakin dir. Tokona a, ngoni daang lu nyerapap ngireetin, kinwakunit akwangis a Ekapolon loger a akiyo. Ani akwangis napei ngina ebunit ani a Ekapolon alo erai Etau, kibele ngoni ekwaanikinos ka ngesi anakwangis ana etenoono noi. Kiinak ngoni Akuj etich lo kotere ngisien keng, nakaneni nyejoikinit ngoni kilelenyi. Kipalik sua ngakiro na imunonitae kana a ngileech daang. Kipalik sua amodeanut ka akibatanar Akiroit a Akuj, nakaneni kisileereu sua ngakiro na a iteni ani kisubea naeraakasi ngaka iteni. Kisaki ngitunga daang pena ngitai luajokak anikosi, alongaren Akuj. Kainyo ani kerapap ngakiro naajokak kitatami sua, erapap ani eya ngulu ebukoro make. Nyenupito kesi kainyo etiribok akuj naaronon nasubuna a akwap kana ngitamen kech. Iratakinit ngesi kesi nyeanyungasi akicha na imakinit kesi, akicha na itorunit Nakiro Naajokak a apolou a Kiristo, alo ikwaan ka Akuj per. Kainyo meere ngakiro kosi a ngikulepek kitatami sua, kitatami sua ngakiro a Yesu Kiristo atamar erai Ekapolon. Ataraakas sua ngikulepek lu kisubanakini ngesi etich. Akuj na alimuni tama, “Imauni akicha anaribu,” ngesi napei esimauni akicha alotai yok. Arai kitaanyuni ngesi ngoni aosou na a apolou a Akuj na imaunit aloreet a Kiristo. Nakaneni ngoni lu kianyu ebari lo etau, kikoni ngamoti nalupei. Sodi tatakanunea dir atamar erai agogongu nateno aka a Akuj, meere ayok a ngikulepek. Kianyunit sua ngichan ngirwa daang, nakaneni nyikiarit ngitai. Esaa eche eya nakingaya, nakaneni nyikilounete ngakiro atapalikisi ngakiro nguna, elalak ngimoe kosi, nakaneni nyengopi cha ekone, ani tani kiwaneneo ngawanet nakaalak, nyikinyasunio sua. Kiwokit sua akitu a Yesu ngirwa daang anawat kosi anapalag, sodi tatakanunea tani akiyar keng anawat kosi. Aloboyor kosi kadaang, ekotoi sua akiar kotere Yesu, sodi tatakanunea akiyar keng anawat kosi anapalag kanu. Idodiunit ibore ngini atamar eyei akitu nikosi, nakaneni eyei akiyar nikus. Igiritae nagiran kona, “Eruoro ayong kainyo anupit.” Alotau alopei a anupit kangolo, kiruoro sua dang kainyo kinupit. Kiyeni sua atamar Akuj nakolong eteyaruni Ekapolon Yesu, kiteyaruni sua dang ka Yesu, sodi kiyaa ngesi sua aapei ni eyei ngesi. Esubasi nugu daang kotere esi, ani na iatakinotor ngitunga lu eanyunete ajokis a Akuj talalaketa, ilipete kesi noi ebuakinito Akuj alakara a apolou keng. Kotere nugu, nyikipalikini ngakiro nugu jik. Tani kinyasuna ngawat kosi na anikalapatan, itiliwonorio ngawat kosi na alotooma ngakitet a ngirwa. Ekidioko ngichan lu kianyunit ngoni, nabo eraakasi ngikadaunak, nakaneni kiinunete ngoni apolou naajokon na erai aka jik, na etenoono noi idwangit ngichan. Ngiboro lu nyetakanete kesi kitee sua lokojokon, meere lu etakanete. Ibore ni iteeo, ekidioko ngirwa iteere, nakaneni erubi ibore ni nyiteeo nakajik. Kainyo kiyeni ngoni atamar na inyasunere eam lo tokona kibooyo ngoni logo, lo erai akwaan yok, kitaanyuni ngoni Akuj ni kiboikin anadis, akai nakajik na nyesubio a ngakan. Nakaneni kirurumae tokona ngoni kiitanit noi atamar kitobutakin akai yok na a adis. Ejoikinit ngoni dir kibutario kongina sodi nyikiwo alongaren Akuj emam ibore kinapit. Ani eringa kirukit ka eam lo a akwap logo, kirurumae esibit kichakiyaritae. Meere atamar kisaki sua atotiakas ka akwaan na a ngakwapin naga, nakaneni erai kisaki kitobutakin na a adis. Sodi kibeleo akiyar ibore ni erai ikenyasunan. Akuj ngesi kireik ngoni akilocho naga, nabo kitaanyu ngesi ngoni Etau keng toliwor ngesi eweikinit daang nakidaritor ngesi ngoni. Nakaneni kititiny ngoni ngirwa daang. Kiyeni atamar ani cha eringa kiya nawi na a akwaan kana, kiloka anawi ana a Ekapolon. Kainyo erai akiyar yok aka a anupit, meere na igienore ibore ni iteeo. Kititiny ngoni lokojokon nabo esibit emiekisi awi na a akwaan sodi eruko ka Ekapolon anawi keng. Kanguna kadaang, kisaki atosuba na ejoikinito ngesi kerai anawi yok kane, kori kaama. Kainyo kiwei ngoni daang alongaren ekicholong a Kiristo lo a eriras, kirira ngesi ngoni. Eanyuni itwaan daang na itemem ka nakolong asubea ngesi akwaan keng na a akwap kana, kerai naaronok kori naajokak. Kiyeni sua atamar nyoni ekeritere Ekapolon. Kotere nguna, kisaki sua akimaima luche. Kiyeni sua Akuj lokojokon noi, nakaneni etamit atamar kiyenete esi dang ayong alotai kus. Nyiitamasi robo kori kisaki sua akiwoganakin esi, pearai kisaki sua toyenut ibore ni ejoikinit iwogatar kotere sua. Sodi topedoreta esi akibut ngakiro a ngitunga alu inisatar eboyor a ngitunga lo anikalapatan, peekachito lo a etau. Ani kesibit kikoporito sua ngikerep, kikoni neni kotere Akuj. Ani kejok sua ngakies, ikote neni sodi kingarakinotor esi. Kirikit sua amina na a Kiristo. Kona tokona kiyenea sua atamar atoani itwaan ipei kotere ngitunga daang, idodiunito ngakiro nguna atamar emorete daang akitu keng. Atoani ngesi kotere daang sodi ani ngulu eyarete, nyeerubakis eyarete a akiding kech make. Nakaneni ejoikinit kesi eyarete kotere lokolong atoani ani nabo kiteyarunae toyar kotere kesi. Nyeringa tokona ngoni nabo jik kirirae itwaan a eboyor alo a ngitunga. Tani kolong kirirat ngoni Kiristo aloboyor a ngitunga, nyeringa tokona nabo ngoni kikoni neni. Naimorikinotor itwaan ka Kiristo, aliwor ngesi itwaan nikitetet, adaun nangorok, apotu nakiteat. Akuj ngesi esubi nugu daang, nakolong kichamakin ka ngoni ani a Kiristo. Nakaneni kidodik ngesi ngoni etich lo kichamakinor ka luche. Ngakiro na kitatamea sua ngesi nakibala etiliwori Akuj ngitunga daang ngipaalon keng ani a Kiristo. Nyimara Akuj ngasechesea kech, nabo kitaanyu ngesi ngoni Ngakiro na elimorito eger lo itiliwonorea ngesi kesi ngipaalon keng. Kirai sua lu kiweikinit a Kiristo, nabo Akuj alope imaimai ngitunga anikosi. Kimaimai sua esi kotere Kiristo, tachamunos ka Akuj! Amam Kiristo akisech. Nakaneni etaanyuni Akuj ngesi akisech sodi ani kimorikin ngoni ka ngesi, ataanyuneta ngoni dang ateneanut a Akuj. Alotich alo kisubi ngoni ka Akuj aapei, kimaimai sua esi lu ianyut ajokis a Akuj atamar warasi nyeliwor apasit. Kiirasi na elimunit Akuj kona, “Abu ayong eira ngakiro kon esaa lo itemokino, sodi kengarak iyong akolongit na a ayuuno.” Topupok a! Esaa lo itemokino ngesi lo, akolongit na ayuuno ngesi naga! Emam itwaan kisaki sua kingolik atamar esechech etich kosi. Nakaneni kisaki sua akisub ngakiro na nyibatarete ngitunga. Nakaneni anakiro kadaang ana kisubi sua, kidodiunit sua atamar kirai ngikasubak etich a Akuj ani kinaikinea atitinyikin aboliaro ka ariaba ta ngichan. Kides sua, kien alojala, kisuburae, kitusub sua etich loationon nabo kikieny kiiya, nabo kiron akimuj. Kidodiun atamar kirai ngikasubak etich a Akuj kotere akikiuna kosi, ka aosou ka atitinyikin ta apatanu, ka Etau a Akuj, ka amina na emam amodeanut, ka ngakiro na a iteni ta agogongu a Akuj. Ateneanut erai iborosit yok a ejie, ni kiramari ngoni ka nikigakinea. Kirimae sua nabo kimenyaritetei, kiyenyio sua nabo kipuruunitetei. Kitisibitae sua ngikaliokok, tarai bo kiruoro sua ngakiro na eraakasi iteni, kisibit lu nyikiyenio, tarai bo kiyenikinitae lokojokon, kisibit lu kitoaka, nakaneni kiyari sua loger lo kiteeto esi. Ani tani kidesio, nyikitoaki sua. Tani kialolongi, kilakara sua jiik, esibit kibootonit, nakaneni kitabari sua ngitunga ngikaalak, esibit emam sua ibore kitingit, tarai bo kitingit ibore daang. Ngipaalon luminan lu iyakasi Korinto! Kilimok sua esi ngakiro kosi daang, kisunyak sua esi ngakiro daang na a ngitai kosi. Meere sua kimikit esi ngakiro na eya lotai kosi, esi kesi kimikito sua ngakiro na eya lotai kus. Kesuruori tokona ayong esi kona a ngide kang: kisunyakinae sua ngakiro daang na eya lotai kus loger lo kisunyakinea sua esi nakosi! Warasi nyiisak akikwaanikin ka ngitunga lu nyenupito Akuj. Ikokinete ngakiro na eteniyete ikwaanikin ka na ichwangakina ai? Ikokini akicha ikwaanikin ka aribu ai? Ikokini Kiristo epupokin ka Ekipe ai? Nyoni emorete ekanupan ka lo nyerai ekanupan? Ikokini Akai a Akuj imorikin ka ngakujo nasubuna ai? Kainyo kirai ngoni akai Akuj ana eyari! Loger lo alimunio Akuj tama, “Alomi ayong ni eya ngitunga kang sodi eboikin kiding kech, aliwor ayong Akuj kech, eliworosi kesi ngitunga kang.” Nakaneni ebala Ekapolon, “Torotokisi anikech, totiakas ka kesi, nyiitap ibore nia nginyas, dio katacham ayong esi. Aliwor ayong Apakus, iliworosi esi ngide kang, talokookang ka tanakookang, alimu Akuj Naationon.” Ngipaalon luminan, eraakasi ngakichikakinet nugu daang ngayok. Tokona bocha, ejoikinit ngoni kikiun ani eya daang na inyasunete akwaan ka etau. Atoliworos lu kitaleuno ani kibooyo kikerit Akuj. Kimiekisi ngakiro kosi pena lotai kus. Emam itwaan kisechak sua, emam itwaan kiwan sua, kori emam itwaan kingalaa sua ibore. Nyalimunit ayong nguna asaki akirirare esi, kainyo, kona sek alimunio, kimina sua esi noi kirai ngipei erai kiyari kori kitoaka. Kamuno ayong esi noi, kisuparito esi ayong lokojokon! Alochan kosi kadaang, aringa ayong atitiny noi, alakara ayong lokojokon noi. Tani kinangu sua Makedonia kerumor, nyiangara sua. Aya ngichan wadaang, kitongolopete ngitunga, tobulite ngitai. Nakaneni, Akuj na ingaranakini lu itasionosi, abu kingarak sua ani abunio Tito. Meere abunere keng bon ngesi kingarakini sua, pearai kilakar tani kotere eger lo ingarakineta esi ngesi. Kitolimok sua eger lo kimuitor esi noi aanyun ka ayong, ka eger lo ialolongeto esi. Kitolimok tani eger lo isaketa esi aiikin ayong, nakaneni alakar ayong tokona noi. Kainyo tani kolong kialolongito esi kotere abarua nakang ngina, nyariaba ayong abala nyo kolong egirea. Kedikino ayong ariaba na engolikinea atamar ialolong esi wadio kotere abarua ngina. Nakaneni alakara ayong tokona, meere ani ialolongioto esi kotere ayong, pearai ani ilungeta esi naaronok kotere akialolong ngina. Kitojok Akuj eger lo ialolongioto esi ngolo sodi nyiichanyut esi naaronok kotere sua. Kainyo akialolong na itojoki Akuj, erukito ka akilung naaronok na eyaunete ayuuno, nabo emam ibore eriabae iitonorio kaneni! Nakaneni erikit akialolong na erai aka akwap akitu. Taanyungasi na asubi Akuj anakialolong anakus kana: iliworosi tokona esi ngitunga lu irichakina nabo iitanito akidodiun atamar nyisechito esi! Iliworosi esi ngitunga lu kikadakinito naaronok, lu irianganakinosi iemito, lu irichunito etich nabo isakito akirirare naaronok! Idodiunosi esi atamar nyisechito esi anakiro kanguna kadaang. Nakaneni, ani tani kegirit ayong abarua ngina, peegirit kotere itwaan ni asechit kori ni asechakinitae. Egiri ayong sodi kileereunio dir ani a Akuj eger lo irichatar esi kotere sua. Ngakiro nguna kesi kitililimete sua ngitai. Meere akitililim ngitai bon, pearai kipotu tani atalakaros kotere eger lo alakara Tito, ani ingarakineta esi daang ngesi italakarito. Kepuruunit sek ayong esi anikeng, nakaneni nyisuruma esi ayong ngileech. Kisuruori sua esi ngakiro na iteni jiik, aloger alopei kangolo, aliwor ekipur lo kepuror ayong esi ani a Tito lo a iteni. Nakaneni kiminak ngesi esi lokojokon noi, erai itamunit ngesi eger lo isaketa esi daang akiwap ngakiro keng, ka eger lo isiriameta esi ngesi ikerito tamaranete. Alakara ayong noi ayeni atamar apedori akigienokin esi jik anakiro kadaang. Ngikaitotoi kosi, kisaki sua esi toyena na etemok ajokis a Akuj alokanisae alu eya Makedonia. Eningitoe ngikanupak lu kaina lokojokon noi a ngichan alu aanyunete, nakaneni alakara kesi noi apataka anakipotonor kech ngiboro, tarai bo arai kesi ngikebootok. Kalimokinit ayong esi dir atamar alemunete kesi na apedorete alemun, tolemut tani elalak noi idwangito na ajoikinit elemunete. Kotere echami kech a ngikulepek, kimaimayete kesi sua nabo kitodiaka esakete kimarunae kesi dang toliworos ingaranakinete ngitunga a Akuj lu eya nakwap a Yudea. Pekitamit sua sek atamar ikokinete neni! Alemunosi kesi mono ani a Ekapolon, ani erumor, tolemun kesi anikosi dang kotere echami a Akuj. Sodi echikichika sua Tito lo esiakini etich lo atamar torubak esubi sodi torumo etich loteno lo a amina logo. Ijoketa esi noi anibore kadaang, ijoketa ananupit, ka ekiruor ka aosou ka eger lo kimuitor akingarakin ta eger lo kiminatar esi sua. Nakaneni kisaki sua esi tapataketa tani aloger alo amina kalo. Emam ngakiro na adungunit ayong atamar kiwapa esi. Nakaneni asaki akidodikin esi eger lo iitanitotor luche akingarakin sodi atoyenunea kerai amina kus na iteni dir. Iyenete esi ajokis a Ekapolon yok Yesu Kiristo. Tani kebarit ngesi loger lo ebaritor, abu ngesi tarau ekebootonit kotere esi, sodi tabareta esi ani aliworor ngesi ekebootonit. Esibit ayong torumosi esi tokona etich longoon isiakinete ekaru lobeen adaun. Esi lu ekingaren isakete asubakin kongina nabo kisiaut achamun. Torumosi robo tokona etich ngolo! Toliworos ngitunga lu kimuit arumor etich ngolo loger lokolong kimuitor akisiakin, nakaneni tosuba nguna itemem ka ibore ni itingito esi. Ani kimuit iyong akipotor, echamuni Akuj ainakinet kon itemen ka ibore ni isaki iyong akipotor, meere ibore ni emam iyong. Nyasaki ayong akitalalare ngichan kus sodi kianguneta luche. Erai asaki atochoikisi eriyane ka ateneanut a ngakiro. Kingarakisi lu ichanasi ani tokona itingitotor esi ibore nikaalan. Sodi ani moi eanyunete kesi dang ngiboro lukaalak, kingarakis esi alochan kus. Sodi toriyanea eboyor lo ingarakinotor esi. Loger lo igiritere nagiran kona, “Itwaan ni achununi nakaalak, pealalak nakeng noi. Ani itwaan ni achununi nadikidio, peakidioko nakeng noi.” Kibuakinit sua Akuj alakara noi ani imuitor Tito lokojokon akingarakin esi loger lo kimuitor sua! Achamunet keng ngakiro kosi, kimuu ngesi noi akingarakin sodi tacham ngesi elope abunere nikus. Kimeunit sua ngesi ka lokaatoyok epei lo eyenikinitae alokanisae kadaang kotere etich lo itatamea ngakiro naajokak a Akuj. Ani eya nguna, aseut ngesi ngitunga a ngikanisae eruko ka sua na kisubea etich loajokon lo kotere ekipur a Ekapolon ka nabo akidodiun atamar kisaki sua akingarakin. Kichoikinit sua atamar nyikiruorotor ngitunga ngiche sua niaronon kotere eger lo kiweikinitor sua etich lo a apatanu lo. Kainyo kisaki sua akisub na iyookino, meere alongaren Ekapolon bon, nakaneni tani alongaren ngitunga. Kongina bocha, kimeunit sua lokaatokosi ka kesi. Kining sua ngesi ngirwa ngikaalak kirukau atamar erai ngesi itwaan ni emina noi akingarakin. Ani kona tokona kimunor ngesi esi noi, esaki ngesi nabo noi akingarakin esi. Ani alowae a Tito, erai ngesi erukitos kang lo kisubi ka ayong etich kingarakinit esi. Ani alowae a ngikaitotoi aluche alu erukito ka ngesi, emeunitae kesi alokanisae sodi taanyunea Kiristo ekipur. Kidodikisi kesi amina kus sodi toyeneta ngitunga daang a ngikanisae atamar kiyookinit sua ngakiro na kiwogar kotere esi. Nyejoikinit karika tani ayong kegirakini esi ngakiro a ngiboro alu emeanario lotunga a Akuj alu eya Yudea. Ayeni ayong atamar ichamito esi akingarakin, ngesi ewogar ayong anikus kotere nguna alotunga a Makedonia. Alimokini ayong kesi atama, “Napei alokaru alobeen adaun, esakito ngitunga a Akaya akingarakin.” Etonyou alemun kus ngikaalak kech. Ameunit tokona ayong ngikaitotoi lu sodi nyeeliworosi ngakiro na kiwogar sua esi ngapasiek. Nakaneni tolemunos esi akingarakin kesi loger lo alimunitor ayong. Nakaneni, ani kiruku ayong ka ngitunga lua Makedonia atorukautu esi nyesubakina ngakiro kus eriyan, kirumete sua ngileech lokojokon, arai mono pekilimu ngakiro a ngileech kus, ana kimunor sua esi noi! Engolik bocha ayong atamar ejoikinit ameuni ngikaitotoi lugu toberunos nikus sodi tosubakis mono ngakiro a ngainakinet ana kichikakinete esi ayong atamar ilemunete sodi atoriam ayong ibore ngini na abunio, nabo ileereuni atamar ipotonorete esi ani isakitotor, meere ani kitingakinitere. Kitamutu atamar itwaan ni itae ngikinyam ngidikidio, elemi ngalemet ngadikidio, nakaneni itwaan ni itae ngikinyam lukaalak, elemi ngalemet nakaalak. Ejoikinit itwaan daang robo ipotori ibore loger lo atiakunea ngesi, meere ekadakinit ngesi akipotor kori itingakinitae, kainyo emina Akuj itwaan ni ipotori ibore elakara. Nakaneni epedori Akuj ainakin esi nakaalak na idwangito na isakete esi. Sodi taanyununeta esi jiik daang na isakete esi, nabo taanyut elalak noi idwangito tani na isakete esi kotere asubea naajokak. Loger lo igiritere nagiran kona, “Ipotonori ngesi a apataanu, nak ngikebootok erubi ajokis keng jik.” Nakaneni Akuj na erai ngesi inanakini eketan ngikinyam lu itao ka ngamugati na enyamio, kiinakini esi tani ngikinyam daang lu isakete sodi kiturup nabo kitaanyu esi ngalemet nakaalak anapatanu kus. Kitabari ngesi esi jiik sodi tapatakerator esi ngirwa daang, sodi tobuakineta ngikaalak Akuj alakara kotere ngainakinet kus naanyut kesi anikosi. Kainyo etich lo isubete esi logo, ingarakini ngitunga a Akuj alochan kech. Nakaneni nabo dang, ebuakinete ngikaalak Akuj alakara lokojokon noi. Ani kotere na ileereunioto alotich alo kisubi sua kalo, ebuakinete ngikaalak Akuj alakara ani ineikinotor esi anupit ngakiro naajokak a Kiristo, na ilimorito esi, ka apatanu kus na imoreta esi ka kesi ta ngitunga luche. Nakaneni kilipakinete kesi esi kiminasi kotere ajokis naajokon noi na ianyut esi ani a Akuj. Atobuakisi Akuj alakara noi kotere ainakinet keng na emam ibore itemere! Kemaimai ayong Paulo esi, ayong lo ebeyo alilim nabo apatana nakirukitor ka esi nakaneni atodedeng nanyikirukitor ka esi. Kemaimai ayong esi kotere apatanu ka ajokis na Kiristo atamar nyikitingakis kare atamar atodedenger naabunio nikus, kainyo ayeni ayong atamar apedori adedenger kotere lu ebalasi kisubi sua ngakiro kiwapit eboyor a ngitunga a akwap kana. Kibooyi dir anakwap kana, nakaneni nyikiji ejie a akwap kana. Meere ngiboro lu kijio lua akwap kana nakaneni eraakasi ngiboro a Akuj lujiet lu kinyasununea ngawasea nakaagongok. Kinyasunea apega na alioko, kitiyauni kwap ibore daang ni inisa ni ekot akitopeg aosou a Akuj, kisaluni ngitamen daang sodi etokera Kiristo. Ani erumor esi akidodiun atamar ineikina dir akiwapit nguna kilimokinio, kirirae lu engerito akiwap na elimokinitae. Isemeete esi ngiboro lua anikalapatan. Eyei itwaan idio ni itamit atamar arai ngesi ika Kiristo a? Ani kikote neni a, ejoikinit ngesi itamakini nabo ngakiro a eboyor keng, kainyo kirai sua dang ngika Kiristo loger lo eraakar ngesi. Kainyo nyekerumito ayong ngileech, tani kewoga ayong noi kotere apolou na kianyu sua ani a Ekapolon, apolou na kitowoea sua esi, meere na kinyasunea. Nyasaki ayong tosub asaki akitubul esi a ngabaruae kang. Elimuni itwaan iche tama, “Kinomete ngakiro a ngabaruae a Paulo etioko, nakaneni ani kirukit ngoni ka ngesi, epalag ngesi na eraakasi ngakiro keng natenoyek.” Ejoikinit itwaan ni ikoni ngini eyenuni atamar nyetiakak ngakiro nakigiri sua nabaruae kosi nakilokia ka nakisubi sua nakirukitor ka esi. Nakaneni bo dang, nyikisaki sua akimarun kori akikwaanikin ka lu ejapunito. Ebangaaka ngitunga ngulu noi! Abe esiakis kesi eboyor lo itemotor kesi make, nabo irirasi kesi kotere eboyor lo erai ekech a ngikulepek! Ani cha eliwor sua, nyikiwoga sua noi akidwang eger lo ejoikinit kiwoga, eliwor ekiwog kosi lo itemem ka etich lo kidodik sua Akuj. Epei a ngitichisio kangulu ngesi lo kisubi sua anikus. Ani kona iyakatar esi logerin ngulu, pekiporit sua ngigerin ngulu nakiponea nikus kiyaunit Ngakiro Naajokak a Kiristo. Nakaneni nyikiwoga sua kotere etich lo asuba luche akidwang ngigerin lu kidodik sua Akuj. Pearai kigasi sua atamar kisikokin anupit kus sodi atopedoreta sua akisub etich lo etenoono anikus, itemem ngirwa daang ka ngigerio lu kidodik sua Akuj. Sodi etatama Ngakiro Naajokak anakwapea anache ana eloka anikus dio nyikiwogar etich lo esuba alomana a itwaan aniche. Nakaneni igiritae nagiran kona, “Itwaan cha daang ni esaki akiwoga, ejoikinit iwoga kotere ngakiro na asubaki Ekapolon.” Kainyo meere itwaan ni ipuruuno bon ngesi itojokitae, erai ngini ipuruunit Ekapolon. Esibit cha ayong tanaikis esi ngakiro kang tani bo tani kabangaana ayong wadio. Ekoe, tanaikisi kare! Katingit ayong etereku kotere esi ani araakar itwaan a Akuj. Ikote esi apese na nyepero ka ekile a ache, na enerit ekile epei bon akuut, lo erai Kiristo. Nakaneni aemit ayong esibit edikino ngitamen kus ibatarosi sodi tapalikis esi amuno ka anupit Kiristo lokojokon, loger lokolong engalaa emun Awa a alioko ana a amodeanut keng. Kainyo iminasi esi anaikin ngakiro a itwaan cha kadaang ani ebuni nikus akitatam ngakiro a Yesu a eche, meere lo kitatami sua ngakiro keng. Ichamunete esi tani etau eche ka ngakiro naajokak ngache na etiakak ka Etau a Akuj lokolong ianyunete esi anikosi! Nyetamit ayong atamar ayong ngesi adit noi ani eya ngulu iyenikinito esi noi inyarito be “ngimeanara!” Ngaye robo kerai ewae a ekiruor itamarete esi nyayeni ekiruor, nakaneni aos ni erai aosou. Kisileereunit sua ngakiro nugu daang anikus awadaang jiik. Emam ibore ketelem ayong esi naketatamea esi Ngakiro Naajokak a Akuj. Etiditeun ayong sodi kitoyenikinere esi. Kori robo kechwangakinit ayong kotere nguna? Naasubea ayong etich anikus, ngitunga a ngikanisae aluche kesi katacheenete ayong. Kikok ibore ngini ni ademi ayong kesi ngiboro sodi kengarakinea esi. Nakirukitor ngoni, nyichana ayong esi asaki kingarakis na echenar ngaropiyae. Apot ngikaitotoi lu apote alo Makedonia kainut ayong ibore daang ni eitanit. Loger lo a ngirwa kangulu ta lumonan isidiunosi, nyekechani ayong esi jik! Loger lo anupitor ayong iteni dir ngakiro na Kiristo, kechikakinit esi atamar emam alowaitin kadaang a Akaya ni isililingere ngiwog lukang lugu. Alimunit mono ayong nugu ani nyakaminar esi a? Eyeni Akuj atamar kamina ayong esi! Arubakini ayong asubi naasubi tokona sodi tongopik luche ebaasi kesi, “ngimeanara” ibore ni iwogatar ebaasi kisubi kesi dang etich loger kosi. Eraakasi ngitunga ngulu ngimeanara lukaliokok lu itusubuna ngimeanara a Kiristo. Karika, emam nguna nakitalarete! Nger tani Esiitan dang kitusubun emalaikat a akicha! Nakaneni nyetiono ngikasubak etich keng akitusubun ngikasubak etich lu etenooko dir. Ani arumoret kanguna, eanyunete kesi na itemem kana esubete kesi. Alimunit nabo kona, nyeetama itwaan kori arai ayong ekabangabangat. Nakaneni ani kitamito esi kongina, tachamunae robo arai ekabangabangat sodi toyakar ayong dang ibore idio ni enisar. Nyerai na tokona eruoro ayong na esaki Ekapolon eruor. Anakiro ana ngiwog kanu, eruoro ayong loger a ekabangabangat. Nakaneni kona eyakatar lukaalak lu iwogasi kotere ngakiro na eboyor a ngitunga, ewoga ayong dang kongina. Esi ngesi iosok noi, ibore ngini ngesi iminatar esi akipup ngakiro a ngikabangabangae! Inaikinito esi ngakiro a itwaan kadaang ani kitiliworit esi ngikedalak kori ani kitoosor kori ani kilokit esi kori ani kimenyarit esi kori ani kibapabapae esi. Kerumito ayong ngileech achamuni atamar kipalag sua pekipedori akisub nguna! Nakaneni ani keyei itwaan ni esaki akiwoga kotere ibore idio, eruoro cha ayong nugu loger a ekabangabangat, eyei ayong dang ibore ni ewogar. Eraakasi kesi Ngieburaniae a? Arai ayong dang. Eraakasi kesi Ngisirael a? Arai ayong dang. Eraakasi kesi ngalesea ka Aburaam a? Arai ayong dang. Eraakasi kesi ngikasubak etich a Kiristo a? Ekoe asub ayong itwaan ni ikerepikinit ani eruoror kona! Arai ayong ekasuban etich loajokon noi lo edwangit kesi! Ationikinit ayong noi akisub etich, kaen ayong alojala ngaenet ngakaalak, kedesitae lokojokon noi, nabo akot akitu jiik. Kebungaare ayong Ngiyaudi a ngaburoi ngakibungaet ngakan, karamete ngaramet ngatomwon-uni ka ngakan-koomwon. Kedeese ayong Ngiroma a ngalita ngakideset ngauni. Katachak a ngamoru achaket apei. Kabuko ayong atubwa ngabukoret ngauni. Ebooyi ayong anakipi apaaran juui ka akwaar kiiya. Analooso kang anakaalak, kichanyuunun ayong ka ngichan ngigelagelae lua ngakalel ka lua ngirukooi ka lua a Ngiyaudi ta lua ngibukui lu nyerai Ngiyaudi. Aya ngichan lorerea ka nariet ka nganamea ta ngikaitotoi lukamodeanak. Asub ayong etich echanakin. Akieny ayong ngirwa ngikaalak nyejotooro. Kanyam ayong akoro ka akure. Aroneene ayong akimuj a ngirwa a ngikaalak ebooyi anikalapatan emam ngiworui. Kanguna kadaang, kesibuusikinit ayong akolongit daang etich lo a ngikanisae aluche kadaang. Ani epalag itwaan apalag ayong dang. Ani na esechea itwaan kariebete ayong ngakiro keng etau. Ani kejoikinit ayong ewoga, ewoga kotere ngakiro na idodiunito apalagu kang. Akuj na erai Apakeng a Ekapolon Yesu, na erai ngesi epiarit nakajik, eyeni atamar nyeruoro ayong alioko. Naayakar ayong Damasko, abu ngolo aweikinit akwap ngina ngirwa lua ekapolon Areta, tolimok ngikeyokok atamar keteut ayong alodorin a ere kerumut. Nakaneni apon keyeeliun ayong kesitor kidiama awas dio atobuchar. Ewoga cha ayong tani kemam ibore elemunete ngiwog. Nakaneni alimuni tokona ngakiro a ngakitoodikinet ana ketaanyuni Ekapolon. Ayeni ayong itwaan iche nikiristoit ni akoporio yaarae nadis na alokidiama noi ngikaru ngitomon ka nguomwon kolong adaunosi. (Nyayeni ayong atamar kesubakina nguna kori keraakasi ngakisingolikinet a Akuj, Akuj bon eyeni). Alimuni nabo, ayeni ayong itwaan ni akoporio yaarae najako a Akuj. (Kaneni nabo, nyayeni ayong atamar kesubakina nguna kori keraakasi ngakisingolikinet a Akuj, Akuj bon eyeni.) Kiira ngesi kaina ngakiro namunonoe na emam kona elimunio. Tokona bocha, ewogar ayong itwaan ni ikoni ngini, nakaneni nyewoga ayong kotere ayong elope, pearai ewoga kotere ngakiro na idodiunito apalagu kang. Arai kolong atasaki ayong akiwoga, pakarai ayong ekabangabangat kainyo keraakasi ngakiro na iteni ngesi eruoro ayong. Nyewoga ayong kainyo nyasaki itwaan idio ketojok ayong noi akidwang na itee ngesi ka na epupi anikang. Nakaneni ani asakere ngakitoodikinet a Akuj nakaalak nguna nyeketajaput ayong enisakin, apon ketaanyun ayong apipilu anakwaan na ikoni eekwae, ameuni Esiitan apipilu ngina kedet ayong sodi nyeenisakin noi. Elipi ayong Ekapolon ngakilipet ngauni kotere apipilu ngina asaki atamar kitwarak anikang. Nakaneni katatachak ngesi ayong tama, “Ajokis kang ngesi kitemokino iyong, kainyo etenoono agogongu kon noi na ipalagagea iyong.” Alakara bocha tokona ayong noi enisa anapalagu kang sodi minio agogongu a Kiristo nikang. Nakaneni bocha, alakara ayong anapalagu ka ngiyeny ka ngichan ka aboliaro ta ariaba kotere Kiristo. Kainyo erai na apalagagea ayong ngesi agogongio. Asub ayong ekabangabangat, nakaneni erai esi kisikokis ayong neni. Esi kesi ejoikinit kipuruunete ayong. Kainyo tani karai ayong epasit, emam ibore kedwangitotor ayong “ngimeanara” lu iyenikinito esi noi ngulu. Asubasi kolong ngakitoodikinet nakailiilok ka nakatalarak anikus na idodiunito atamar arai ayong emeanara lo a iteni dir. Asubasi nguna a atitinyu noi. Nakaneni a, nyoni kingopikinit esi noi akidwang ngitunga a ngikanisae aluche? Mati robo cha eger lo nyichana ayong esi asaki kingarakis ayong. Torimakinae kare kasechakinit esi kotere nguna. Edikino tokona ayong abuni nikus abunet na a ngauni, nakaneni nyekechani ayong esi. Kainyo meere ngaropiyae kus asaki ayong, kasaki esi ngikulepek. Ani bo ikoni dang, erai palem ngikauriak itangatarete ngide kech ngibaren, meere ngide itangatarete ngikauriak kech. Alakar ayong noi erai kalem ibore daang ka akiyar kang dang aapei tadaun kotere esi sodi kengarakinea esi. Kiminakinete esi ayong wadio ani kaminar ayong esi lokojokon a? Ichamunete robo tokona esi atamar nyichana ayong esi. Nakaneni etamari itwaan iche amodeana ayong ngesi kengalaa esi a alioko. Nakaneni a, eya ngimeuna lu ameuni ayong nikus asaki akitiliwor esi ngirikon a? Emaimai ayong Tito asaki tolot, sodi atomeu nabo nikus ekaitotoit eche lokiristoit kirukut ka ngesi. Nakaneni a, kitoosor esi Tito a? Ikwa nyiyenete esi atamar kirikit sua Etau lopei ngolo, nabo erai elote kosi epei a? Kori itamito robo esi atamar kisaki sua kaneni kadaang eger lo kiyuunor anikus. Meere kongina! Kiruoro sua loger lo esakitor Kiristo sua eruoro alongaren Akuj. Ani ibore ni kisubi sua daang ngikaitotoi luminan, erai ikingarakinet esi. Etekerikinit cha ayong esibit naabunio nikus, arukauni eboyor kus paikoni lo asaki ayong katorukaunea esi ikote, nabo irukaunete esi eboyor kang peikoni ni isakete esi kikok. Etekerikinit ayong esibit arukauni anikus eburas ka etereku ka anyunyura ka adinga ka ekiyeny ka aswam ka ekinis ta ekurikur. Ketekerikinit ayong esi abunet namoi abunio ayong, kesurumi ayong Akuj kang ngileech alongaren kus, sodi egor ayong kotere ngikaalak lukolong asechete nakaneni awout akilung naaronok naasubete kesi, na ikote emalaanu ka elomit, ta amera kech. Alotoru tokona kang na a ngauni naabunio ayong aanyun esi naga. “Echamit ngakiro na ititakinitere itwaan eya ngikaanyunak ngiarei kori nguuni lu ibusete ngakiro”, loger lo igiritere nagiran. Asaki ayong alimokin lukolong asecha ekingaren ka nabo luche daang, alimuni kolong ayong ekingaren abunet naabunio nikus na a ngaarei, nakaneni alimuni tokona ayong nabo ayei nikalonan. Abunet naabunio ayong, emam itwaan ebuchar aloriras. Ianyungarete esi ngikulepek atamar iruoro Kiristo anikang. Ani anikus, nyerai Kiristo lo epalag nakaneni esubi agogongu keng etich anikus. Kainyo tani kolong keramakinitae ngesi napir kotere apalagu, eyari ngesi kotere agogongu a Akuj. Kipalag sua dang ani kimorikinor ka ngesi, nakaneni kiruki sua ka esi atomora agogongu a Akuj anakiyar keng. Kiningos esi make sodi kitemos, taanyut panite kibooyete esi inupito Akuj. Iyenete esi dir atamar eyei Yesu Kiristo nikus a? Ani pekiyenete, kipiyo esi anupit. Etamit ayong atamar iyenete esi atamar meere sua ngitunga lu kipiyo eboyor a anupit. Kilipit sua Akuj atamar nyiisecha esi jik, nakaneni meere tatakanunea atamar kipiu sua ngakiningito. Erai tosubeta esi na iyookino tani kesibit kipiyo sua eboyor lo a anupit. Kainyo nyikipedori akitopeg ngakiro na iteni, erai kisaki akiikin. Kilakara sua ani kipalagagea, nakaneni igogong esi, Kilipit sua atamar toliworos esi lu ikiuna. Tokona bocha, egiri ayong abarua na ayei nialonan, sodi nyeadedenger na abunio nikus, erai asubea etich apolou nakainakini Ekapolon. Ee robo, apolou nakingarakinet meere nakinyasunet. Tokona ngikaitotoi, kiboikinos niajokon! Toliworos lu ikiuna, kiwapa ngakiro nakechikichikak, topupokinos esi, kibooyoto a ekisil. Nakaneni ianyunete esi amina a Akuj ka ekisil. Kimalas a emalas alo a ekiristoonu. Kimalaate esi ngitunga daang a Akuj. Agasi atamar ajokis a Ekapolon Yesu Kiristo, ka amina a Akuj ka arukit aapei ka Etau a Akuj, kiruko ka esi daang. Paulo ngesi igirunit abarua naga, meere itwaan anyarae Paulo. Erai Yesu Kiristo ka Akuj Apa lo eteyaruni Kiristo ngesi anyarae toliwor emeanara. Imalaate ngikaitotoi daang lu kirukit ka ayong kane ngitunga a ngikanisae lu eya Galatia. Agasi atamar kitaanyu esi Akuj Apayok ka Ekapolon Yesu Kiristo ajokis ka ekisil. Alemun Kiristo kotere ngasechesea yok erai iwapit ngakiro a Akuj yok ana erai Apa, sodi kitoyuunea ngoni anakiro anaaronok a ngirwa kalu. Min apolou nikeng nakajik! Aamen. Katalarito ayong ngakiro kus! Abe imiekis esi atipei lokolong kinyarae esi a ajokis a Kiristo, sodi kiwapa ngakiro naajokak ngache nagelayek. Emam “ngakiro naajokak ngache,” nakaneni alimunit ayong nugu kainyo eya ngitunga ngiche lu kichanete esi esakete akiloch ngakiro naajokak a Kiristo. Ani kitatam esi epei kosi kori emalaikat lo ebunit anadis ngakiro nagelayek na nyikote na kitatami sua esi, ejoikinit ngesi eliwor lo ilamam! Kilimu kolong sek sua, nakaneni alimunit tokona ayong nabo, ani keyei itwaan idio ni kitatami esi ngakiro ngache na nyikote nakolong inupa esi, ejoikinit ngesi eliwor lo ilamam! Ekoe, esibit tokona ibore en asaki ayong akitalakar ngitunga a? Mam jik! Erai Akuj ngesi asaki ayong akitalakar! Asaki ayong katoyenikis ngitunga a? Arai atoringa ayong ekoni neni, pekaraunit ayong jik ekasuban etich a Kiristo. Ngikaitotoi kang, asaki toyena atamar meere ngakiro naajokak etatami ayong na eraakasi ngitunga irokunito. Peanyuni ayong ngakiro nguna ani a itwaan, kori emam itwaan ketatam ayong. Yesu elope ngesi kedodikini ayong. Kilimokin esi ngakiro a eboyor kang kolong eringa ayong ewapit edin a Ngiyaudi. Aboliar ayong ngitunga a ekanisa a Akuj lokojokon, asaki akinyasun jik. Ewapit ayong edin a Ngiyaudi noi akidwang nginaket kang daang, nabo dang, erichakinit ayong noi ngitalio kata apaakang. Nakaneni katoseu Akuj ayong a ajokis keng kolong eringa ayong tani nyidouno. Sodi katanyara a ajokis keng ani naatiakunea ngesi akidodikin ayong Lokookeng sodi etatamea ayong ngibukui lu nyerai Ngiyaudi Ngakiro Naajokak keng, amam ngakiro engituuni ayong alotunga. Nyeloto ayong tani Yerusalem ni aya ngulu kolong aberakin aliwor ngimeanara. Esiauni mono ayong atolot Arabia ani erumor atobong nabo Damasko. Arai adaunet a ngikaru a nguuni ngesi alosio ayong Yerusalem aanyun ka Petero, sodi atopero ayong inaa ngirwa ngitomon ka nguomwon. Nyeanyuna ayong ka emeanara eche mati Yakobo, lo erai lokaatokeng a Ekapolon Yesu. Eraakasi ngakiro na egiri ayong ngaka iteni. Eyeni Akuj atamar nyeruoro ayong alioko! Ani erumor atolot ayong nakwapea a Siria ka Kilikia. Pekayenete ayong ngikiristoi a ngikanisae alu aya Yudea ngirwa ngulu. Araakasi ngakiro ngapei make ayenete kesi, na eruorosi luche ebalasi, “Itwaan nikolong kiboliar ngoni, itatami tokona ngakiro a Akuj nakolong asaki akinyasun!” Sodi kipuruut kesi Akuj kotere ayong. Adaunet a ngikaru a ngitomon ka nguomwon abu nabo ayong atobongosi ka Barinaba Yerusalem, kirukit ka Tito. Alosi ayong ani kedodikinea Akuj atamar tolot. Eriamariama ayong ka ngikarikok a ekanisa make, sodi atolimok kesi Ngakiro Naajokak a Yesu Kiristo na etatami ayong ngibukui lu nyerai Ngiyaudi. Asubi ayong kongina sodi nyeeliwor etich lokolong asubi ayong ka lo tokona asubi ayong epasit. Emam itwaan etingak erukitos kang Tito atamar kilengerae, tani bo kerai ngesi Egirikit dang, nakaneni bo dang, aya ngitunga lu etingakina najore kosi lu asakete akilenger Tito. Alomunito ngitunga ngulu najore kosi esakete aripun eger lo kiraakar sua ngitunga lu kilachakina dir ani a Yesu Kiristo. Asakete kesi akitiliwor sua ngirikon, nyechamuna sua ngakiro kech tani wadiochichi, kainyo kisaki sua esi torubakis iwapito ngakiro a Akuj na eraakasi ngaka iteni. Nakaneni ani ngitunga lu ayenikinitae, alimunit ayong nugu kainyo nyakachit ayong atamar kerai ta kesi ngae, meere akwaan a itwaan nikalapatan ngesi emisit Akuj. Alimunit ayong atamar emam lu ayenikinitae ngulu ngakiro nakiteat naketeyenut ayong. Ani ikote neni, engolikinete kesi atamar kameari ayong Akuj akitatam ngibukui lu nyerai Ngiyaudi Ngakiro Naajokak, loger lo etiliworere Petero eketataman Ngiyaudi Ngakiro Naajokak. Kotere agogongu a Akuj, ketiliworio ayong emeanara a Akuj alobukui alu nyerai Ngiyaudi, aloger alo etiliworere Petero emeanara a Yesu Aloyaudi. Toyena Yakobo ka Petero ta Yoana dang lu ayeninikitae atamar eraakasi ngapirio atamar kainaki ayong Akuj etich lo etenoono logo. Sodi atotinga ayong ka Barinaba kesi ngakan emalata, kidodiu ibore ngini atamar kirai sua daang ngitunga ngipei. Atachamakinos atamar kisubi sua etich alobukui alu nyerai Ngiyaudi, tosuba kesi Aloyaudi. Akiroit apei bon kichikakis kesi sua ebaasi etamutu ngikebootok lu ayakasi najore kech, nguna kesi kemuit ayong akisub jiik. Nakaneni naabunio Petero Antiok, etopeg ayong ngesi alotunga kainyo echwangakinit ngesi dir. Ani eringa ngitunga ngiche ameuni Yakobo nyedoluno, emujeenete Petero ka ngikaitotoi a ngibukui alu nyerai Ngiyaudi. Nakaneni naadoluneto ngitunga ngulu, tapalik ngesi akimujeenen ka kesi, kainyo aemit ngesi ngitunga lu asakete ngibukui lu nyerai Ngiyaudi kilengerae. Toema ngikaitotoi lu eraakasi Ngiyaudi ka Petero aapei, kibata tani Barinaba akurianu kech. Ani engolikini ayong atamar nyetenoono eboyor kech nyiwapap dir ka ngakiro naajokak a Yesu, atolimok ayong Petero alongaren kech daang atama, “Irai iyong Eyaudit, nakaneni ibooyi ngoon iyong loger a ebukut alo nyerai Eyaudit, meere loger a Eyaudit. Ikokini tokona iyong itingakini ngibukui lu nyerai Ngiyaudi kiboikinos loger a Ngiyaudi ai?” Iteni dir, kidounio ngoni kirai Ngiyaudi, meere, “Ngibukui lu nyerai Ngiyaudi lukasechak,” loger lo enyaritere kesi kongina. Nakaneni kiyeni ngoni dir atamar imarunio itwaan atamar etenoono dir ani a Akuj kotere ni enupea ngesi Yesu Kiristo, meere ani esubea na esakit etal. Kinup sua dang Yesu Kiristo sodi atachamunotor ka Akuj ani kinupitor Kiristo, meere akisub na esakit etal. Kainyo emam itwaan echamunosi ka Akuj ani esubea na esakit etal. Ani kerai nakisakea ngoni achamun ka Akuj ani kiliworor ngipei ka Kiristo, sodi tatakanu atamar kirai ngoni ngikasechak loger lopei a ngibukui alu nyerai Ngiyaudi, idodiunit ibore ngini atamar Kiristo ngesi erikit akisech a? Mam jik! Ani kalomak nabo ayong akirokun ngakiro a etal alo kolong ealari, ekoni ayong itwaan ni echwangakinit etal. Ani alowae alo etal, ekok ayong itwaan nikaar etal, sodi ebooyo ani a Akuj. Kitoaka ayong ka Kiristo aapei anapir keng. Nyeringa tokona erai ayong bon ayari, pearai Kiristo eyari anikang. Akiyar na tokona ayari ayong naga, ayari anupit Lokookeng a Akuj, lo kamina ayong sodi tajal akiyar keng kotere ayong. Nyasaki ayong akinger ajokis a Akuj. Nakaneni ani kechamunosi itwaan ka Akuj kotere etal, idodiunit ibore ngini atamar ketoani kolong Kiristo pas! Etige Ngigalatiae, ngikabangabangae! Ngae kirakari esi? Esisao kolong alongaren kus ngakiro na ileerete na atoanea Yesu Kiristo anapir! Tolimokinae mono esi ayong akiroit napei naga, ianyunete esi Etau a Akuj ani isubeta ngakiro na esakit etal kori na iirareta ngakiro naajokak tonupa? Nyo kitabangaanit esi kona? Isiakinete kolong esi kirikit Etau a Akuj, isakete tokona esi arumor a agogongu kus a ngikulepek a? Tokona, aliwor ngichan daang lukolong ianyunete esi ngika pas a? Nyetamit atamar ikote neni! Ikwa kitaanyuni esi Akuj Etau keng ka akisub ngakitoodikinet nakailiilok anikus ani isubeta esi na esakit, etal kori na iirareta esi ngakiro naajokak tonupa? Kitamasi eger ka Aburaam, loger lo igiritere nagiran kona, “Anupi ngesi Akuj ani kotere anupit ngina, tacham Akuj ngesi atamar etenoono eboyor keng.” Echamit esi iyenete robo atamar ngalesea ka Aburaam na iteni dir kesi ngitunga lu enupito Akuj. Aberakinoi kolong akidwar anagiran atamar echamuni Akuj ngibukui lu nyerai Ngiyaudi kotere eger a anupit. Sodi tolimok Akuj Aburaam Ngakiro Naajokak anagiran tama, “Epiari Akuj ngitunga daang kotere iyong.” Anupi Aburaam Akuj, topiarae, nakaneni daang lu enupete Akuj, epiario loger keng. Ilamam ngitunga daang lu igienosi akiwapit etal, kainyo igiritae nagiran kona, “Itwaan cha daang ni nyenupi ngakiro daang na igiritae nakitab a etal, ilamam!” Tokona, etakani dir atamar emam itwaan echamun ka Akuj kotere etal. Kainyo igiritae nagiran kona, “Itwaan ni echamuni Akuj kotere anupit keng, ngesi bon eyari.” Nakaneni etiakak etal ka anupit. Erai ikoni eger lo igiritere nagiran kona, “Itwaan cha daang ni esubi ibore daang ni esakit etal, eyari.” Kilachuni ngoni Kiristo alolamit a etal, ani etiliworea ngesi ngilam lu araakasi ngiyok ngikeng, kainyo igiritae nagiran kona, “Ilamit Akuj itwaan daang ni inenekino lokitoe.” Asubasi ngakiro nguna sodi taanyuneta ngibukui lu nyerai Ngiyaudi apiaro ani a Yesu Kiristo. Apiaro ngina ngesi nakolong echikakini Akuj Aburaam, sodi ataanyuneta ngoni Etau lokichikakini Akuj ani kinupitor. Ngikaitotoi kang, esisauni ekitetemes lo iyenete esi daang, ngitunga ngiarei na echamuneta akiroit kikongo, emam ipei kech ni esaki akiloch ngakiro nguna kori akisech ngache. Tokona, ekong Akuj ka Aburaam ta ales keng echikakin. Nyigiritae nagiran elalak atamar, “Ngalesea”, nakaneni erai, “ales”, ngesi atamar itwaan ipei bon ni erai Kiristo. Eger a ngakiro ana asaki alimun ngesi lo atamar, ekongete Akuj ka Aburaam sodi kichikak atamar etemokini ngakiro nguna. Nyinyasuni etal lo esidiun ngikaru ngamiae ngoomwon ka ngatomwon-uni achamunet ngina, kikisa akikonget a Akuj. Kainyo ani kerai ainakinet a Akuj aka etal, ikwa nyeringa erai aka achamunet. Nakaneni, arai kotere achamunet ngesi ainakinea Akuj Aburaam ainakinet ngina. Kerai tokona kolong etal eka inyo? Eatakinio etal sodi kidodiunea akichwangakinet nakaneni asakio torubak eyei tanang ngirwa lu ebunio ales a Aburaam nakolong arai ngesi ekongokinit Akuj achamunet. Ayaunete ngimalaikae etal ngolo sodi kikob itwaan. Nakaneni emam ekekoban esakitae ani eraakar itwaan ipei, nakaneni erai Akuj apei. Idodiunit tokona ibore ngini atamar engerit etal ngachamunet a Akuj a? Mam jik! Kainyo arai kolong taanyunito ngitunga etal lo eyauni akiyar, kechamuna itwaan daang ka Akuj ani iwapea etal ngolo. Nakaneni igiritae nagiran atamar eraakasi ngitunga daang ngikasechak, nakaneni erai lu enupete ngakiro a Yesu Kiristo kesi einakinio ainakinet na ichikakinitae. Kolong eringa ngirwa lu enupitere Akuj nyenanga, kikoni ngoni ngitunga lu kienit etal, tanang ngirwa lukidodikinere ngoni eger lo kinupea ngakiro a Akuj. Nakaneni arai kolong etal kirikit ngoni tanang ngirwa lu abunio Kiristo, sodi atachamunotor ngoni ka Akuj kotere nikinupitor ngakiro keng. Kona tokona anangea ngirwa lu enupitere Akuj, nyeringa tokona nabo etal kirikit ngoni. Erai ni inupitotor esi Akuj ngesi iraakatar esi talokookeng a Akuj, ani iraakatar ngipei ka Yesu Kiristo. Kibatisao kolong esi tarata ngipei ka Kiristo, ikokis tokona esi ngitunga lu inap eboyor a Kiristo a elope. Nakaneni emam ibore etiakit Ngiyaudi ka ngibukui lu nyerai Ngiyaudi, ngirikon ka ngitunga lu nyerai ngirikon, ngikiliok ka ngaberu, iraakasi esi daang ngipei ani imorikinotor ka Yesu Kiristo. Ani kiraakasi esi ngitunga a Kiristo, iraakasi esi ngalesea ka Aburaam, kotere nguna, ianyunete esi nakichikak Akuj. Nakaneni alimuni ayong kona, ani eringa ekeruman a ebari ka apakeng erai ikoku, emam ibore etiakit ngesi ka ekedalan, tani kerai ebari daang ekeng. Ani eringa edit, eya ngitunga lu erikito ngesi echoikinito ebari keng tanang ngirwa lu etiakunit apakeng. Aloger alopei kangolo, nakolong kikonea ngoni ngide, kirai ngoni ngirikon a ngipean alu epolokinito ngakwapea nugu. Ani enangi akolongit na achamitae, tomeu Akuj Lokookeng. Kidou ngesi aberu sodi kiboi iwapit etal a Ngiyaudi, ekokini neni sodi talachunea lu ewapito etal, sodi atoliworotor ngoni talokookeng a Akuj. Kona iraakatar esi talokookeng, ameu Akuj Etau a Lokookeng tooma ngitai yok, Etau lo epodonokini ebala, “Apa, Apakang.” Kongina bocha, nyeringa tokona iyong irai ekedalan, iliwor ikoku. Ani kirai iyong ikoku keng, irumi iyong daang na idaritor Akuj talokookeng. Kolong sek eringa esi nyeyenuna Akuj, iraakasi esi ngirikon a ngakujo anasubuna. Ani kona tokona iyenuneta esi Akuj, nabo kiyenu Akuj esi, nyo nabo isaketa esi abongor lopean lupasiek lu kisieniyete ngulu? Nyo isaketa esi nabo aliwor ngirikon kech? Abe imisikinito esi akirichit ngirwa ngiche, ngilapio, ngakamusio ka ngakiporosea ta ngikaru. Ketubulito ayong ngakiro kus! Idodiunit tokona ibore ngini atamar aliwor etich daang lokolong asubi ayong anikus epasit a? Kemaimai ayong esi ngikaitotoi kang atamar kikwaanikinos kare ka ayong, kainyo kikwaan ayong dang ka esi. Nyesechakina esi ayong. Iyenete esi atamar ketatami ayong esi ngakiro naajokak kolong ekingaren ani adeakar. Nakaneni tani nakechanitor ayong esi noi a edeke kang, ipot esi nyikimenyasi ayong kori nyikingeor. Arai ipot esi kitopeyon ayong loger lo itopeyoneta emalaikat lo ebunit anadis, kitopeyon esi ayong loger lo itopeyoneta Yesu Kiristo. Ilakara esi lokojokon noi! Anukiro apotu? Alimuni ayong atamar, kikutunito esi ngakonyen kus kiinakis ayong, arai topedorete akikokin neni. Aliwor tokona ayong emoit kus ani kalimokinea esi ngakiro na iteni a? Kiminasi esi ngitunga luche ngulu, nakaneni nyikiminasi naajokak. Esakete kesi akitiak ayong ka esi sodi tominakineta esi kesi. Tokona, ejok aminanu kongina kotere eboyor loajokon, eraakasi nguna ngaka iteni ngirwa daang, meere nakirukitor ayong ka esi bon. Ngide kang luminan! Loger lo eriabar aberu esaa lo esakea akidoun, ariaba ayong dang kongina kotere esi, tanang akolongit na ileereunio Kiristo anikus. Arai bo tokona atorukito ka esi dang! Kaanyu cha ayong eger lo ejoikinit kesuruorea esi kainyo ketubulito ayong ngakiro kus! Kimiekisi kengit esi lu isakete kiwapa ngakiro a etal. Isakete esi kiirasi ngakiro na igiritae Lotal a? Igiritae atamar aya Aburaam ngide lusapa ngiarei, arai ipei ika aberu ana arai akedalan, tarai niche ika aberu anakuuta. Edounio lokookeng lo aberu anakedalan loger lopalem idounere ngide luche, nakaneni edounio lokookeng lo aberu anakuuta ani echikakinea Akuj atamar idounio. Eraakasi ngakiro nugu ngakisikwaanet, ikwaan ngaberu naarei nguna ka ngachamunet ngaarei. Ngina idounio ngide keng eraakasi ngikedalak ngesi Agar, ikwaan ngesi ka achamunet na a Emoru a Sinai. Ikwaan Agar ka Emoru a Sinai lo eyei nakwap ka Arabia. Erai Agar ekitetemes a ere a Yerusalem alo a ngirwa kalu, alo eraakatar ngitunga lu eya neni daang ngirikon. Nakaneni elachakina dir Yerusalem lo a adis, nakaneni ngesi erai itioyok. Kainyo igiritae kona, “Talakar iyong nakolup na nyidoununi! Kirema sodi kimaritetek ilakara, iyong na nyeriabakina a ache! Kainyo eanyuni aberu nakolong aisikinio ngide lukaalak, akidwang lu a aberu ana iusitae.” Iraakasi tokona esi ngikaitotoi kang, ngide a Akuj kotere akichikakinet keng, loger lokolong a Isaka. Ngirwa ngulu, aboliar edia lo edounio loger a ngide aluche lo edounio kotere agogongu a Etau a Akuj, ikote ngakiro neni tani tokona. Nakaneni anukiro igiritae nagiran? Igiritae kona, “Kitwarak aberu nakedalan ka lokookeng, kainyo nyirumete lokookeng a aberu anakedalan ka lokookeng a aberu anakuuta ngibaren ka apakech aapei.” Tokona bocha ngikaitotoi kang, meere ngoni ngide a aberu anakedalan, nakaneni kirai ngide a aberu anakuuta. Kilachak Kiristo ngoni nyikiliwor ngirikon! Kiboikinos tokona robo iraakasi ngitunga lu ilachakina, warasi nyiliworosi ngirikon nabo. Topupokisi! Kalimokinit ayong Paulo esi atamar, ani kichamut esi kilenger, idodiunit ibore ngini atamar emam ibore niajokon ianyunito esi ani a Kiristo. Alimokini nabo ayong itwaan ni echamuni akilengero atamar echamit ngesi iwapi etal daang. Itiakasi esi ka Kiristo, lu isakete achamun ka Akuj ani iwapitotor etal. Ipakarosi esi anajokis a Akuj. Ani alowae kosi, kigieno sua atamar kichamun ka Akuj. Ibore nikidarit sua ngini a agogongu a Etau a Akuj alo esubi etich ani kinupitor sua Akuj. Kainyo nakimorikinor ngoni ka Yesu Kiristo, nyikitiakak ngoni erai kilengeritae kori kemam, anupit na idodiuna anamina ngesi bon itemokino. Ajok kolong eboyor kus etenikina! Ngae kitapalikini esi akiwap ngakiro na iteni? Ekokini ngesi kisupi esi ai? Meere ngisup ngulu eka ngolo kinyarit esi. “Ekitoe lodiochichi lo itubui ngamugati, itubui ngakiria daang etia ni etia.” Nakaneni eringa ayong kegieno esi. Kotere nikimorikinor ngoni ka Ekapolon Yesu, kegieno ayong esi ayeni atamar emam ibore kiree esi. Itwaan cha daang ni kichani esi, irirae Akuj, tani kerai ngesi ngae. Ani alowae kang, ngikaitotoi, ani karubak ayong etatami atamar ejok akilengero, nyo eringa kaboliare ayong? Arai taraakas nguna ngaka iteni, pekeyaunito ngakiro na akitu a Kiristo alomusalaba na etatami ayong ngichan. Esibit cha ayong totubos ngitunga lu kichanete esi, kimiekisi totubos make! Ani eliwor esi ngikaitotoi kang, kinyarao kolong esi toliworos lu ilachakina. Nakaneni warasi alachakina na nyeeliwor ibore ni iwapeta esi ngakiro a etereku aloaronon. Ejoikinit esi ingaranakinosi ani ichamatar. Kainyo echunakinitae ngakiro a etal daang Lotal epei, “Tominak ekidunyet kon loger lo iminar iyong akwaan kon a ilope.” Ani kiboyoto esi ikonyakonyasi nabo towanas loger a ngitieng, tochoikinos robo sodi nyiinyasunosi make. Ngakiro na eraakasi kesi alimunit ayong nugu, kimiekisi Etau a Akuj torik eboyor kus, sodi nyiiwap nabo esi jik eboyor a etereku a ngawat. Kainyo ngakiro na iterekuyarito eboyor a itwaan meere kesi na iterekuyarito Etau a Akuj, ani na iterekuyarito Etau a Akuj, meere kesi na iterekuyarito eboyor a itwaan. Eremem luarei ngulu, nakaneni idodiunit ibore ngini atamar nyikipedori ngoni akisub na kisaki akisub. Ani kirikit esi Etau a Akuj, nyikirikit esi etal. Ileerete ngakiro na esubasi aloboyor a itwaan. Etakanuunete anakiro ana ikote elomit, emalaanu, ngakiro a ngileech, akilipit ngakujo nasubuna ka akapel. Eremonokinoi tongolopae, arorokanut, angoyeenen, abolo, atiakatiaka ka akipakanar ngajorei kotere ayan, etereku, elewas, amera a ekimuje ta ngakiro nache naaronok na ikote nugu. Kechikichiki ayong esi nabo loger lokolong aberakinor akichikichik, atamar nyeanyunete lu esubete ngakiro nguna apolou a Akuj. Nakaneni ngakiro na itorunito loboyor lo kirikitor Etau a Akuj kesi amina, alakara, ekisil, anaikinit ngakiro, ajokis, apatanu, aliwor nikimunoi, akitiditeuna ta akiapunit ngakiro. Emam etal engerit ngakiro nguna. Ngitunga lu eraakasi ngika Yesu Kiristo, ekokis ngitunga lu atoana eboyor kech ka etereku kech loaronon daang. Kitaanyu ngoni Etau a Akuj akiyar, ejoikinit ngesi tani erikit eboyor yok. Nyejoikinit ngoni kiwoga, kori kibenya make kori kiterekuyanar. Ngikaitotoi kang, ani kesech itwaan idio anikus, ejoikinit esi lu eyei Etau a Akuj irikinete ngesi. Nakaneni ejoikinit esi isubete kongina a apalaanut. Tochoikinos esi sodi nyikining esi dang. Kingaranakinos make nakitingeta ngichan, sodi kiyookineto etal a Kiristo. Ani kitamit itwaan atamar arai ngesi ekapolon, tarai itwaan nipasit, ingala ngesi bon. Ejoikinit itwaan daang itemi eboyor keng lokojokon. Ani kejok eboyor keng, sodi kinisakin ngesi a ibore ani asub ngesi, tojongo akisikwaan ibore ni asub ngesi ka ibore ni asub itwaan niche. Kainyo ejoikinit itwaan daang itiri ngichan keng a ilope. Ejoikinit itwaan ni itatamio ngakiro a Akuj emorete ka lo itatami ngesi ngiboro luajokak daang lu etingit itwaan ngini. Warasi nyiingalasi make, emam itwaan emodi Akuj. Kainyo elemi itwaan ngalemet na itemem ka ibore ni itakini ngesi. Itwaan ni iroki naaronok aloboyor keng, eanyuni ngakiro na ikote ngalemet nakikusaunete. Ani kiwap ngesi ngakiro a Etau Akuj, eanyuni alotau kangolo ngakiro na ikote ngalemet a akiyar ana nyedaun. Warasi robo nyikibur akisub naajokak, kainyo ani pekilou esi akisub naajokak, enangi akolongit nakianyunea ngoni ngakiro na ikote ngalemet. Tokona bocha, ani keyei kona kikoni, echamit ngirwa daang kisubea ngitunga daang naajokak, tarai cha noi lu kirai ka ngoni ngikanupak aapei. Kingolikisi eger lokegirakinea ayong esi ngagiran naapolok a akan kang a ilope! Ngitunga lu esakete kitojokae kesi kitinganakinete esi atamar kilenger. Esubete kesi kongina sodi nyeboliare kotere ni atoanea Yesu anapir. Nyiwapito tani lu ilengeritae etal, erai esakete kesi esi kilenger sodi kiwogatar ni kilengereta esi. Ani alowae kang, erai akitu naatoanea Ekapolon Yesu Kiristo anapir ngesi bon ewogar ayong. Kotere ni atoanea Kiristo anapir, ikoni eboyor loaronon ibore ni atoana anikang nabo ekoni ayong ibore nikatoan anakwap. Nyekachitae erai kilengeritae itwaan kori kemam, ibore ni esakitae ngesi itwaan aliwor nikitetet. Ani lu iwapito etal lo aloboyor kech, agasi atamar kiruko ka ekisil ta ngisien, meere kesi dang make, tani ngitunga lu eseunit Akuj daang! Ani arumori tokona, nyasaki itwaan kechan nabo, kainyo idodiunito ngaporos na eya nakwaan nakang atamar arai ayong ekasuban etich a Yesu. Ngikaitotoi kang, agasi ayong atamar kiruko esi daang ka ajokis a Ekapolon yok Yesu Kiristo. Aamen. Ayong Paulo lo arai emeanara a Yesu Kiristo kotere echami a Akuj, ngesi kegirakinit esi abarua naga. Kegirakinit esi ngitunga a Akuj lu iyakasi Epeso, lu iliworosi lu kimunoi dir ani imorikinotor aapei ka Yesu Kiristo. Agasi atamar kitaanyu esi Akuj Apayok ka Ekapolon Yesu Kiristo ajokis ka ekisil. Kimiekisi atobuakisi Akuj na erai Apakeng a Ekapolon yok Yesu Kiristo alakara! Kainyo kipia ngoni ani kimorikinor aapei ka Kiristo, kitaanyu ekeny daang lo Etau a Akuj lo eyei wadaang a adis. Kolong eringa tani akwap nyesubuna, kiseuni Akuj ngoni atoliworos ngikeng ani kimorikinor aapei ka Kiristo, sodi atoliworotor ngoni lu kitaleuno nabo lu nyikisechit anikeng. Kotere amina keng atiakuni kolong Akuj a angorot akitaraun ngoni ngide keng ani a Yesu Kiristo, amina ngesi nguna nabo asakit kikokis neni. Kimiekisi epuro Akuj kotere apolou a ajokis keng, kotere nikiinakinea ngesi ngoni Lokookeng lominat pas! Kotere ni atoanea Kiristo, kilachakin ngoni, ngesi atamar, kirimakin ngasechesea yok. Etenoono dir ajokis a Akuj, nakitaanyuni ngesi ngoni lokojokon noi, elal noi emam ibore itemere! Kotere aosou ka achwaanu, asubakini Akuj nakolong atiakunit. Sodi kiteyen ngoni ngakiro namunonoe nakolong areat ngesi atamar eyookini ani a Yesu Kiristo. Ngakiro na ereat Akuj nguna, na iyookinosi na enangea ngirwa lu esakit Akuj, ngesi echunakini wapei ngiborei daang lu eya nadis ka lu eya kwap, erai Kiristo ngesi erai ekarikon kech. Esubasi ngakiro daang loger lo ereat Akuj ka lo etiakunit ngesi, nakaneni kiseuni ngoni Akuj atarata ngitunga keng kotere echami keng lokimorikinor ngoni aapei ka Kiristo, itemem ka nakolong sek atiakunit ngesi anakisiakinet. Kimiekisi sua lukolong kisiauni akigienokin Kiristo epuro apolou a Akuj! Iliworosi esi dang ngitunga a Akuj na iirareta ngakiro na iteni a Akuj, Ngakiro Naajokak nakitaanyunete esi ayuuno. Inupete esi ngakiro a Kiristo, sodi kitogerak Akuj esi agerasit a Etau keng ani kitaanyunea esi Etau keng lokolong kichikakinit. Etau a Akuj ngesi kiweikinit ngoni atoyeneta atamar kianyuni daang nakolong echikakinit Akuj ngitunga keng. Itoodiunito nguna atamar itaanyuni Akuj lu eraakasi ngikeng alachakino nakajik. Kimiekisi epuro apolou keng! Kotere nguna, napei kolong eirarea ayong atamar inupa esi ngakiro a Ekapolon Yesu nabo iminasi ngitunga daang a Akuj, nyepalikina ayong abuakinit Akuj alakara kotere esi. Ketamunit ayong esi anakilipet kang nabo elipit Akuj a Ekapolon yok Yesu Kiristo, Apa lo epol atamar kitaanyu esi Etau a Akuj. Kitiliwori Etau ngolo esi lukoosok sodi kidodik esi Akuj, toyenuneta esi ngesi. Agasi ayong atamar tangaar ngitamen kus taanyungareta akicha keng. Sodi toyeneta esi ngakiro na igienoi nakinyarak ngesi esi, ka etiae lo ejokia noi apiaro na ichikakinit ngesi ngitunga keng. Ka eger lo etenoonio noi apolou keng na esubi etich aniyok alu kinupit Akuj. Ikwaan agogongu na esubi etich aniyok ka agogongu nakaagongon noi nakolong eteyaruni Kiristo anakitu, kisiboik ngesi nakan na aloteten a adis. Ani eyei ngesi kaina, epolot ngesi noi idwangit ngikapolok daang lu eya nadis kalu eya nalup, idwangit ngapolon ka ngationisio daang. Eyenikinitae ekiro keng noi akidwang ngirora luche daang lu iturutoe anakwap kana ka nache monan isidiun. Etook Akuj ibore daang nia Kiristo topolok ngesi, epotor ngesi ainakin ngitunga a ekanisa erai Ekapolon. Eraakasi ngitunga a ekanisa akwaan a Kiristo, eten Kiristo ngitunga a ekanisa ani eraakar ngesi etemok ibore daang awadaang. Kolong ekingaren, ikote esi lu atoakito ngitai kotere ngakiro na ichwangakinito ka ngasechesea kus. Ngirwa ngulu, iwapito esi eboyor loaronon a akwap, iwapito Ekipe lo epolokinit ngipean daang lu irimito kidiama, ngesi epolokinit ngitunga lu nyenupito Akuj. Kikwaan tani kolong ngoni daang ka kesi, kiboi kiwapit eboyor loaronon a etereku, kisubi ngoni na ajoikinito ngawat ka ngitamen yok. Kiboi ngoni ananyunyura a Akuj loger a ngitunga aluche kadaang. Nakaneni emam ibore itemere ngisien a Akuj nabo etiono amina nakiminar ngesi ngoni, tani kolong nakikonea ngoni ngitunga lukatoak kotere ngasechesea yok, kiteyaru ngesi ngoni ka Kiristo aapei. Erai ajokis a Akuj ngesi kiyuunere esi. Kona kimorikinor ngoni ka Yesu Kiristo aapei, kiteyaru Akuj ngoni ka ngesi eboikinos nadis. Asubi ngesi nguna kidodiunea ngirwa lumonan isidiunosi eger lo etionio noi ajokis keng anamina ana kidodikinit ngesi ngoni ani a Yesu Kiristo. Kainyo kiyuun esi a ajokis a Akuj ani inupitotor Akuj. Nyianyunete esi ani eyakatar ngakiro itionikinete, erai ainakinet a Akuj. Nyitorunit tani lotichisio lu isubete esi, sodi tongop itwaan ibore ni inisar. Kirai ngoni ngisubuna a Akuj, ani kona kimorikinor ngoni ka Yesu Kiristo aapei, echamit ngoni kiboi eboyor loajokon lokolong kirekinit ngesi ngoni atamar eboikinos. Kitamutu atamar ikote kolong esi ngibukui lu nyirai Ngiyaudi ai, esi lu kinyarito Ngiyaudi “lu nyikilengeritae” Ngiyaudi lu elimokina atamar, “kilengeritae” (taraakas ngakiro nguna na esubeta ngitunga ngawat kech). Toyena atamar itiakara esi ani a Kiristo ngirwa ngulu. Iraakasi esi ngitunga lugelayek peimorikina ka ngitunga luseuna a Akuj. Pekimarunitae esi anachamuneta ana ekongokini Akuj ngitunga keng. Ibooyete esi anakwap kana emam ibore igienosi nabo amam Akuj anikus. Nakaneni tokona, kona irauneta esi ngipei ka Yesu Kiristo, kitapuun esi lukolong iloka diyete Akuj kotere ngaakot a Kiristo na abukorosi. Kainyo kiinu ngoni Kiristo elope ekisil ani emorikinea ngesi Ngiyaudi ka ngibukui lu nyerai Ngiyaudi toliworos ngipei. Kotere ni atoanea ngesi, achaka ngesi aremo nakolong ekoni awas nakitiakit ngoni. Kitongopea ngesi etal a Ngiyaudi ka ngakichiket keng ta ngikitetio daang a ngitalio, sodi kitiliworea ngesi ngibukui luarei ngulu ngitunga ngipei lu emorikin ka ngesi aapei, kikok eyauni ekisil neni. Kotere ni atoanea Kiristo anapir, enyasu ngesi aremo kech, nabo emorik ngibukui ngulu arata ngipei sodi tobuu kesi nia Akuj. Kongina bocha, abuni Kiristo kitatam esi ngibukui lu nyirai Ngiyaudi lusek iloka ani a Akuj, Ngakiro Naajokak a ekisil, kitatam tani Ngiyaudi lu aapiyete ani a Akuj. Ngoni daang lu kirai Ngiyaudi ka ngibukui lu nyerai Ngiyaudi kiponi nia Akuj Apayok a Etau a epei kotere Kiristo. Tokona bocha, nyeringa nabo esi ngibukui lu nyerai Ngiyaudi iraakasi ngipeyok kori ngitunga lugelayek, iliworosi tokona esi ngipei ka ngitunga a Akuj nabo ngiyenet a Akuj. Iraakasi esi dang epewae a aduket ana kolong esiakinete ngimeanara ka ngikadwarak a Akuj, Yesu Kiristo elope ngesi amoru naapolon igangit akai na edukio ngina. Erai Ngesi igangit akai ngina daang kiten sodi topolooror toliwor akai a Akuj na italeuno. Kotere ni imorikinotor esi ka ngesi aapei. Kidukio esi dang aapei ka luche toliworotor ni ibooyo Akuj a Etau keng. Kotere nguna, elipit ayong Paulo Akuj. Ayong lo arae eenat kotere Kiristo ka esi ngibukui lu nyiraakasi Ngiyaudi. Iirasi esi iteni atamar kotere ajokis a Akuj, ketaanyun ayong etich lo atosub niajokon kengarakinea esi. Edodiuni Akuj ngakiro namunonoe nugu sodi ketoyen ayong. (Egirit ayong eger a ngakiro kanguna a aurianut, ani kisomata esi ngakiro na egir ayong, iyenunete esi eger lo ayenea ayong ngakiro namunonoe a Kiristo.) Pekolong sek alimokinitae ngitunga ngakiro namunonoe nguna, nakaneni kotere agogongu a Etau a Akuj, edodik tokona Akuj ngimeanara lu italeuno ka ngikadwarak keng. Ngakiro namunonoe nguna kesi na ikote nege kotere ngakiro naajokak, epiari Akuj ngibukui lu nyerai Ngiyaudi dang ka Ngiyaudi aapei. Eraakasi kesi dang ngika a akwaan anapei kangina nabo emorete akichikakinet nakolong ekongio Akuj ani a Yesu Kiristo. Aliwor ayong eketataman ngakiro a Akuj kotere ajokis a Akuj na emam ache ikwaanatar, naketaanyuni ngesi ayong a agogongu ana esubea ngesi etich. Tani karai ayong lo nyekayenikinitae noi akidwang ngulu italeuno a Akuj daang lu nyeyenikinitae, abu Akuj kainak ayong ajokis na etatamea ngibukui lu nyerai Ngiyaudi ebari a Kiristo lo nyengichunio etiae keng, sodi esingolik ngitunga daang eger lo ichichiyere namunonoe kolong areat Akuj. Emunonit kolong Akuj na erai Akasuban a ibore kadaang ngakiro nugu ngirwa daang. Arai ekokini ngesi neni sodi ani ngirwa lu tokona lugu, toyeneta ngapolosio a ngimalaikae ka ngationisio a adis aosou a Akuj nagelagela, alotunga a ekanisa. Asubi Akuj nguna kotere ngakiro nakajik na areat ngesi, na eyookini ngesi ani a Yesu Kiristo, Ekapolon yok. Nyikiriaka ngoni alosit nia Akuj a atitinyu ani kimorikinor aapei ka Kiristo, atonupa ngakiro keng. Tokona bocha, kemaimai esi atamar warasi ngakiro na kaboliare ayong kotere esi nyiilout ngitai kus, kainyo eraakasi ngakiro nguna nakingarakinet esi. Kotere nguna, ariediki ayong alongaren Akuj Apa, na erai ngesi isiakinit ngalesea ka ngiborei daang lu eya nadis ka nakwap. Elipit Akuj atamar kitaanyu esi agogongu a Etau keng, alobari alo a apolou keng, sodi kitenik agogongu ngina ngitai kus totitinyeketo. Elipit nabo ayong atamar tolom Kiristo lotai kus ani inupitotor esi ngakiro keng. Elipit ayong atamar tosubut esi lu ilijakina ngaten ka ngatiak kus namina, sodi taanyuneta esi ka ngikanupak daang agogongu na iyeneta eger lo epoloo noi amina a Kiristo emam kona itemio awoyau ka aurianut a ngiwaitin keng kadaang. Ee, toyeneta esi amina a Kiristo na idwangit aosou daang, sodi kilelebun ateneanut a Akuj daang nikus. Epuro lo epedori asubakin nakaalak na idwangito na kilipa ngoni kori nakitamit, kotere agogongu keng na esubi etich aniyok. Kimiekisi Akuj tagatae alotunga a ekanisa ka nia Kiristo, ngirwa daang, nakajik! Aamen. Tokona, kemaimai ayong lo kaenitae kotere ni asubea etich a Ekapolon esi atamar, kibooyoto eboyor lo itemem ka eger lokolong kinyaraa esi Akuj. Toliworos jiik ngitunga lu itiditeuna ka lukaalimok ta lu etitinyonokinete ngakiro. Kidodiutu atamar iminan esi ani inaikineta ngakiro na ichwanganakinete luche. Kirichakisi aliwor ngipei kirikit Etau a Akuj a ekisil alo kimorikinit esi aapei. Eyei akwaan apei ka Etau a Akuj epei, loger lo eraakar akigieno nakinyaraa esi Akuj apei. Eyei Ekapolon epei, apei akiroit na anupitae ka akibatiso apei, eyei Akuj apei na erai Apakeng a ngitunga kadaang, na erai Ekapolon kadaang, esubi etich ani eya daang nabo eyei nibore daang. Aanyu ipei yok daang ajokis erai ainakinet, itemem ka na epotori Kiristo. Loger lo igiritere nagiran kona, “Naalosio ngesi kidiama, toriko ngirikon lukaalak, dio ainanakin ngitunga ngainakinet.” Tokona nyoni idodiunit atamar “alosi kidiama?” Idodiunit atamar esiauni ngesi totiyaar kwap nalup. Nakaneni ngolo atiyaun kwap ngesi lopei alosi kidiama, kipor tani adis, sodi minio ngesi wadaang a akwap. Erai ngesi “ainanakini ngitunga ngainakinet”, aseuni ngiche toliworos ngimeanara, toliworos ngiche ngikadwarak a Akuj, toliworos ngiche ngiketutukok ngakiro a Akuj, toliworos ngiche ngikeyokok ngitunga a ekanisa ta ngiche toliworos ngiketatamak. Asubi ngesi kongina sodi tosubakinotor ngitunga keng lubekon kitemokinotor akisub etich lo erai eka a ekiristoonu, sodi kitenikineta akwaan a Kiristo. Sodi atoliworotor ngoni daang ngipei ani kinupitor ngakiro a Akuj ka nikiyenea Lokookeng a Akuj, kiliwor ngoni ngitunga lu kipol, lu kianyu dir ateneanut na Kiristo. Sodi atojongoto nabo ngoni aliwor ngide lu irianarete ngitunga lukamodeanak a ngakitatamet kech ana a alioko, ingalaanario ama ka ama. Meere kongina, ejoikinit kiruoro iteni a amina etenikinos aloboyor kadaang ekokisi Kiristo lo erai ekarikon. Kotere nikirikitor ngesi ngoni, erekin nginerin daang a akwaan wapei, nabo totingakis ngisigerememea lu eya nakwaan daang. Sodi ani na esubea ekinier daang etich loger lo esakitere, isikokin daang kitenikin kotere amina. Tokona bocha, kechikichiki ayong esi a Ekiro a Ekapolon atamar, nyiirubakis ibooyete loger a ngibukui alu nyerai Ngiyaudi, lu eraakasi ngitamen kech ngipasiyek, nabo ariboki achwaanu kech. Eloka kesi anakiyar a Akuj, kotere abaangu ka akichananu. Emam ngakiro eringa itimete kesi, alomakis akiwapit etereku a ngawat emerasi ta eboyor loaronon a emalaanu, emam ibore ekachito. Nakaneni pekolong itatamasi esi ngakiro a Kiristo na ikote neni! Iirasi esi ngakiro keng dir ani kona iraakatar ngirukitos keng, apon esi kitatam ngakiro na iteni na eya nia Yesu. Tokona, tapalikisi eboyor kus lokolong ngorot, lo erai ibooyoto esi loger lokolong ibooyoto, eboyor longorot lokolong enyasunit etereku keng lokengalan. Ejoikinit ngitai kus ka ngitamen kus eliworosi lukiteat, nabo echamit esi ikokinete lu inapito eboyor lokitetet, lo esubunitae alokikwaane a Akuj nabo idodiuna anakiyar ana iteni ana etenoono tarai na italeuno. Tojongoto robo akiruoro alioko! Ejoikinit itwaan daang isuruori ekidunyet keng ngakiro na iteni, kainyo kirai ngoni ngipei anakwaan a Kiristo. Ani kingo iyong, wara akingo kon nyikitesech iyong nabo wara nyiingo apaaran juui tanang edoyori akolong. Wara nyiitaanyu Ekipe nikaaloman aloboyor kon. Ejoikinit ekokolan epalikini akoko dio tosub etich loajokon a ngakan keng sodi taanyunea ibore ni ingarakinea ngikebootok. Warasi ngakituk kus nyeelimut ngakiro naaronok, nakaneni kiruoro naajokak na ingarakinete luche loger lo esakitotor, sodi tojoikis na ilimuni iyong lu iirarete. Warasi nyiisialolong Etau a Akuj, kainyo Etau a Akuj ngesi erai agerasit a Akuj na eyei nikus, ngesi kiweikinit esi atoyeneta atamar enangi Akolongit na elachakinea Akuj daang lu agieli ngesi. Tapalikisi ngiman daang ka anyunyura ta angoit. Tapalikisi echale ka ekiyeny ta aremo daang. Ajoikinit esi iliworosi lukapatanak, lu elilim ngitai ani eya luche, nabo torimanakinos make, loger lokirimakinea esi Akuj ani a Kiristo. Kona iraakatar esi ngide a Akuj luminan, ejoikinit esi ikwaanikinosi ka ngesi. Ejoikinit amina eriki eboyor kus, loger lokiminar ngoni Kiristo tolem akiyar keng kotere ngoni, erai alemunet nakakukunyon nabo akipeyos na italakari Akuj. Kona iraakatar esi ngikanupak, nyechamit ngakiro na elomit, ka emalaanu ta arorokanut elimunio anikus. Kori nyitemokino esi iruorosi ngakiro nakenyasunak kori na a ngimeny ta na a aratanu. Ejoikinit esi ibuakinete Akuj alakara. Toyena atamar emam nikaloman kori nimalaat ta itwaan ni etereku (kainyo ikoni etereku akilipit ngakujo nasubuna) ni elomari napolou a Kiristo ka na a Akuj. Warasi itwaan nyikingal esi a ngakiro anapasiyek, ngakiro napei nugu ngesi eanyuneta ngitunga lu nyerai ngikanupak anyunyura a Akuj. Tojongoto arukit ka ngitunga lu ikote neni. Iyakasi kolong esi naribu, nakaneni kona irauneta ngitunga a Ekapolon, ipean esi nakicha. Ejoikinit tokona esi ibooyete loger a ngitunga alu eya nakicha. Kainyo akicha ngesi itatakanuuni ngakiro naajokak dir ka na eteniyete ta na iteni. Tasaka akiyen na italakarete Ekapolon. Warasi nyiisuba ngakiro napasiyek na esubete ngitunga, ngakiro na eraakasi ngaka aribu. Nakaneni ejoikinit iwolunete kikilakis. ( Kainyo kitimi tani akiruor ngakiro na esubete kesi imunonito.) Ani kidodiun ngakiro daang anakicha, etakanuni dir eboyor kech lo a iteni, kainyo ibore daang ni idodiunio kileereu, eliwor akicha. Nguna ngesi igiritere nagiran kona, “Tonyou iyong ekajoton, toyaru, sodi kinwaku akicha a Kiristo.” Tokona, tochoikinos a eger alo ibooyoto esi. Nyiboikinosi loger a ngikabangabangae, kiboikinos loger a ngikoosok. Tosuba naajokak esaa daang lo ianyuneta nikaaloman, kainyo eraakasi ngirwa lugu luaronok. Nyiibangaketa robo, nakaneni tasaka akiyen na esaki Ekapolon Akuj esi tosuba. Tapalikisi elewas a epurot, kainyo erai ibore ngini ni inyasuni eboyor kus, nakaneni ejoikinit esi kilelebun Etau a Akuj. Kiruoro a ngakiro a ngieosio ka ngiitesio ta ngieosio a Etau a Akuj, toeonokisi Akuj ngiitesinei ka ngieosio, ibuakinito Ekapolon alakara alotai kus. Tobuakisi Akuj Apa alakara ngirwa daang kotere ibore daang, alokiro a Ekapolon yok Yesu Kiristo. Kidodenakinos arimatoi ani ikeritotor esi Kiristo. Esi ngaberu, kiwapa ngakiro a ngikiliok kus loger lo iwapitotor na a Ekapolon Yesu. Kainyo epolokinit ekile aberu keng loger lo epolokinitor Kiristo ngitunga a ekanisa, nabo erai Kiristo Ekayuunan a ngitunga a ekanisa alu eraakasi akwaan keng. Kona iwapitotor ngitunga a ekanisa ngakiro a Kiristo, loger lopei ngolo, ejoikinit ngaberu iwapete ngakiro kata lokile kech anakiro kadaang. Esi ngikiliok, tominakisi ngaberu kus loger lo aminar Kiristo ngitunga a ekanisa sodi tolemun totoan kotere kesi. Asubi ngesi kongina sodi kitiliwo ngitunga a ekanisa lu italeuno ani a Akuj, kotere akiroit keng, erai kitoseg mono ani ilotarere a ngakipi. Sodi taanyunea ngesi ngitunga a ekanisa lu italeuno, lu ikiuna emam aporos, kori akemer kori nginyas ngiche luaronok. Echamit ngikiliok eminakinete ngaberu kech loger lo eminatar kesi ngawat kech a ngikulepek. Ekile lo emina aberu keng, eminin ngesi bon. ( Emam itwaan nakanuan eremokino akwaan keng, erai ngesi eketanan nabo tochoik loger lo echoikinitor Kiristo ngitunga a ekanisa: kainyo kikoni ngoni nginerin a akwaan keng.) Loger lo igiritere nagiran kona, “kotere nguna, eisikini ekile apakeng ka itiokeng, sodi kimorikin ka aberu keng, dio toliworos luarei ngulu ngipei.” Eya ngakiro na iteni namunonoe idodiunitae anagiran kanu, na ayeni ayong atamar eraakasi ngakiro a Kiristo ka ngitunga a ekanisa. Nakaneni eraakasi tani ngakus, ejoikinit ekile daang emina aberu keng loger lo eminar ngesi akwaan keng a ilope, nabo ejoikinit aberu daang ekeri lokile keng. Esi ngide, kiwapa ngakiro a ngikauriak kus ani a Ekapolon Yesu, kainyo ejok akikokin neni. Etal lo ekingaren lo iatakinitae akichikakinet a apiaro ngesi lo ebeyo, “Toker apakon ka itiokon, sodi taanyunea naajokak, nabo kiboi nikooyen anakwap.” Ani esi ngikauriak a ngide, warasi nyiitongoeneta ngide kus, erai ejoikinit esi itanunete kesi irikinito nabo kitatamete alokiristoonu. Esi ngikedalak, kiwapa ngakiro a ngitunga alu kipolokinito esi iemito nabo tamaranete, tosuba kongina ejoikinit ngitai kus, esibit Kiristo ngesi isubanakinete esi kongina. Nyiisuba robo kongina esaa lo kiteere bon ani isaketa esi kesi kitominakis esi, nakaneni tosuba na esaki Akuj a ngitai kus kadaang, iraakasi ngikedalak a Kiristo. Tosuba etich kus lo iraakatar esi ngikedalak ilakara, esibit isubete esi etich a Kiristo, meere lo a ngitunga. Toyena atamar etachi Ekapolon Yesu itwaan daang a etich aloajokon esubi, kerai ekedalan kori lo nyerai ekedalan. Esi ngikapolok, tosubeta ngikedalak kus napei nguna tojongoto akitukurian. Toyena atamar erai Ekapolon kus ka lo a ngikedalak kus epei anadis, imarunit ngesi ngitunga daang atamar ikwaan. Arumoret kanguna, togogongioto ani imorikinotor ka Ekapolon Yesu nabo kotere agogongu keng nakationon. Totinga ngiboro daang lujiet lukiinak esi Akuj, sodi kipiunioto esi ngakiro naaronok nakilokitor Ekipe. Kainyo nyikiji ngoni ka ngitunga nakaneni kiji ka ngipean luaronok lu eya nadis, ngikapolok, ngikarikok ta ngipean luaronok lu epolokinito ngakwapea na a aribu nugu. Kotere nguna, totinga tokona ngiboro a Akuj lujiet! Sodi ani enangi akolongit naaronon, kipiunioto esi Ekipe alojie, ani esal a ejie, kidongo esi iweikinito ejie. Tokona, toweikisi ejie a ngakiro ana iteni ikote aruba na iinikinito esi naabor, kikokis ngakiro na eteniyete ibore ni inapito esi alorarum iyuunitotor erarum. Kikok eger lo kimuitor esi alimor Ngakiro Naajokak a ekisil ngamuk na inapito esi. Kitiliwosi anupit ngakiro a Akuj aupwal ngirwa daang, kainyo ngesi igakineta esi ngimalea a amod lukakwanak lu egumuununi Ekipe. Sodi tachamut ayuuno ikoni apukot na a ngasua, ani akiroit a Akuj ikoni ekileng lo kiinakini esi Etau a Akuj. Tosuba nguna daang ilipito, isakete Akuj kingarak. Kilipeeneta jiik loger lo kirikitor Etau a Akuj. Kotere nguna kirichakinos warasi ngakiro nyikilout ngitai, kilipa jiik kotere ngikanupak daang. Kilipakinae tani ayong, sodi kedodikin ayong ngakiro na alimuni na asakea akiruorikin, sodi eruor ayong a atitinyu nabo esileereu ngakiro namunonoe anakiro ana ajokak a Akuj. Kotere ngakiro naajokak nugu, aweikinit ayong Akuj tani tokona kaenitae alojela. Kilipa sodi eruoror ayong ngakiro naajokak loger lo echamit eruoro. Kisisakini esi Tukiko ngakiro kang toyeneta na asubi ayong. Erai ngesi lokaatoyok lo eminae nabo ekasuban etich a Ekapolon lo emunoi. Ngakiro nguna ngesi ameunitor ayong ngesi nikus, kisisak esi eger lo kibooyo sua daang kane nabo kingarak esi talakaros. Agasi atamar Akuj Apa ka Ekapolon Yesu Kiristo, kitaanyut ngikaitotoi lukiristoi daang ekisil ka amina ta anupit ngakiro a Akuj. Agasi atamar taanyut esi daang ajokis a Akuj, esi lu iminasi Ekapolon yok Yesu Kiristo a amina ana nyedaun. Ayong Paulo ka Timoteo lu kirai ngikasubak etich a Yesu Kiristo kesi kigirunit abarua naga. Kigirakinit esi ngikanupak lu iyakasi Pilipi, lu imorikinosi aapei ka Yesu Kiristo, ka esi ngikarikok ta lu ingarakinito ngitunga a ekanisa. Kigatakinit esi ajokis ka ekisil a Akuj Apayok ka Ekapolon Yesu Kiristo. Abuanakini ayong Akuj kang alakara esaa daang loketamunea esi, ani esaa lo kelipanakinea ayong esi daang, elipeene ayong alakara. Kainyo kingarakis esi ayong alotich alo a akitatam ngakiro naajokak napei ana kolongit ana ekingaren tanang tokona. Nakaneni ayeni ayong dir atamar, Akuj nakolong esiakini etich loajokon lo anikus, erubakini esubi naajokak tanang Akolongit na a Yesu Kiristo. Ketamunit ayong esi jiik! Kotere nguna, itemokino ayong etami ngakiro kus loger lo tokona etamea. Kainyo ianyut esi daang ka ayong aapei ajokis naketaanyu ayong Akuj, napei ana tokona kaenitere ayong alojela ka tani nakolong pekaenitere ayong na eruoror ngakiro naajokak etenik lokojokon. Akuj ngesi eyeni atamar eruoro ayong ngakiro na iteni na abalar itorunit amina nakaminar esi daang lotau a Yesu Kiristo a elope. Elipit atamar torubak amina kus iatanakin talalar, imorikina aapei ka aosou na iteni ta ayenut ngakiro lokojokon, sodi toseuneta esi ngakiro naajokak noi. Dio toliworor eboyor kus lo ikiuna emam akisech tani edit Akolongit na Kiristo. Eupiyarete eboyor kus ngakiro naajokak na iteni na eraakasi Yesu Kiristo bon itatakanuuni, sodi kikusere ka akipur Akuj. Ngikaitotoi kang, asaki ayong esi toyena atamar ngakiro daang na asubakin anikang, kengarakis ayong noi akikobar ngakiro naajokak toyenunae. Kotere nguna, ayena ngikeyokok a akai a ekapolon ka luche daang eya nege atamar kaenitae ayong alojela ani araakar ekasuban etich a Kiristo. Anupa tani ngikaitotoi ngikaalak Ekapolon Yesu lokojokon ani kaenitere ayong alojela, atitinyoketa tani dang jiik itatamete ngakiro a Akuj peemito. Iteni dir, eya ngiche kech lu itatamete ngakiro a Kiristo eyei ibore ni iterekuyarit nabo kiburuate. Nakaneni, itatamete luche ngakiro a Kiristo ani ejoikinitotor ngitai kech. Esubete ngulu nguna kotere amina, kainyo eyenete kesi atamar ketaanyu Akuj ayong etich lo aikinitor ngakiro naajokak. Itatamete luche ngakiro a Kiristo ani ebolotor, nyitatamete kotere ni eminatar, ebaasi kesi kori ketaanyunete ayong ngichan ngiche eringa kaenitae alojela. Etamario tokona ai! Alakara ayong erai kitatamete ngitunga ngakiro a Kiristo a ngirotin kadaang, kerai alotai ajokak kori alotai aronok. Arubakini ayong alakara kotere nguna, kainyo ayeni ayong atamar kalachakinio kotere ni ilipitotor esi ka ni kengarakinea Etau a Yesu Kiristo. Ngakiro na kemuito ayong noi nabo na egieno ayong ngesi na atamar nyekeruma ayong ngileech alotich kang tani wadiochichi. Nakaneni asaki ayong atotitinyer jiik ka tokona dang, sodi kipuruunere Kiristo aloboyor kang kadaang, erai kayari ayong kori katoana. Kainyo, akiyar ngesi nyo? Ani alowae kang, erai akiyar Kiristo. Eyauni akitu ngakiro naajokak noi. Nakaneni ani karubak ayong ayari sodi atosubea etich lo ejok noi, nyayeni ayong atamar nyoni ejok, akiyar kori akitu. Keriyaritae ayong a ngiwaitin a ngiarei. Asaki ayong noi aisikin eboyor lo atolot eruko ka Kiristo, ibore ejok noi ngini, nakaneni ejok noi anikus erai karubak ayong ayari. Anupit ayong dir akiroit ngina, kotere anupit ngina, ayeni atamar arubakini kirukit ka esi daang, sodi kengarak esi torotokis ngaren nabo talakaros ananupit kus. Sodi ani nakirukio ayong ka esi nabo, minio esi ibore ni iwogatar kotere ayong aloboyor alo imorikinotor esi aapei ka Yesu Kiristo. Tokona, akiroit nateno ngesi na ejoikinitor eboyor kus ikokini eger lo echamakinitae anakiro ana ajokak a Yesu Kiristo. Sodi ani kabu ayong aanyun esi kori pekabu, eirarea ayong atamar eteniyete ngakiro a eboyor kus ipuposi esi daang. Eira tani atamar ikote esi lu itijiete Ekipe aapei kotere ni inupitotor ngakiro naajokak. Warasi nyieam ngimoe kus, erai ejoikinit ititinyekerosi jiik. Kidodikini esi ibore ngini atamar ebukorosi kesi sodi kidwanga esi kainyo Akuj ngesi kitaanyunit esi agogongu na idwangeta. Kainyo esi kesi ianyut ajokis na isubeta etich a Kiristo, meere kotere ni inupeta ngakiro keng bon, nakaneni erai tani nikiboliare kotere ngesi. Ipedorete tokona akimorikin ka ayong alojie. Ejie ngolo ngesi lopei kolong iteete ayong aji, ani kona tokona nabo ipupioto, ngesi lo tokona aringa ayong aji. Abala ayong esi a, etenikin eboyor kus ani a Kiristo a, nabo atikoki amina keng ngitai kus a? Abala ayong esi a, kitiliwo esi Etau a Akuj ngipei a? Isienonosi esi make ani ichamatar a? Kitemokisi alakara kang ani iliworotor ngitunga a ngitamen a ngipei, imoreta amina apei nabo tarata ngipei alotai ka ngitamen kus. Warasi nyiisuba ibore idio a adinga ana ibolotor kori ni kiterekuyaritor atamar kiteyenikin, nakaneni kitiditeunos esi ani eya luche, erai itamito jiik atamar ejokak luche kidwangito esi. Nakaneni nyiirichut ngakiro na eraakasi ngakus make, kirichutu tani na a ngitunga aluche. Kikokis ngakiro na iwapito esi aloboyor kus napei kolong ewapit Yesu Kiristo: Tani na ayakar eboyor a Akuj ngirwa daang, nyeneikina ngesi a ekileenu keng, aliwor lo ikwaan ka Akuj. Akidwang nguna, tajal ngesi daang na atingit, sodi kikwaanikinos ka ekedalan. Kikok ngesi itwaan, sodi tatakanu a ekikwaane a itwaan. Etiditeuna ngesi arai lo iwapit ngakiro daang tanang akolongit na a akitu keng, na atoanea ngesi anapir. Kotere nguna, kiteyaru Akuj ngesi kikea kiwaak kidiama noi, sodi nak ngesi ekiro lo idwangit ngirora daang. Sodi ngisubuna daang lu eya nadis ka ngitunga lu eya nakwap ta lu eya tooma nalup, toriediko alongaren Yesu, idodiunito arimatoi anikeng. Elimuni angajep daang atamar erai Yesu Kiristo Ekapolon, kotere apolou a Akuj Apa. Tokona bocha ngipaalon luminan, kona kolong iwapitotor esi ngakiro kang jiik nakirukitor ayong ka esi, ejoikinit tokona esi iwapete ngakiro kang lokojokon ani tokona nyikirukitor ngoni. Torubakisi isubete etich iemito, tamaranete sodi kiyookineto ayuuno kus. Kainyo esubi Akuj jiik etich anikus akitachamun esi ka akisiwap esi na esaki ngesi. Tosuba ngakiro daang emam enguringur ka eburas, sodi toliworotor esi lu nyisechito nabo nyimodeaka, ngide a Akuj lu ikiuna, lu ibooyete anakwapea ana eyakasi ngitunga lua nginyas, lukasechak. Ejoikinit esi imaunete anikech loger lo imaunitotor ngikanyer anakwap, itionikinito akiwapit ngakiro naajokak a akiyar. Ani kikokis esi neni, etakanunete ngakiro na enisar ayong kotere esi akolongit na Kiristo, kainyo itodiunete nguna atamar akiricha nakolong ericha ayong ka etich lo asubi, nyeliworosi ngika pas. Kori dikino ngaakot kang ebukorio toliwor akipeyos a ngalemunet ana ilemunito esi ani inupitotor Akuj. Ani robo kikote neni, alakara ayong nabo kilakara ka esi daang aapei. Aloger alopei kangolo, ejoikinit esi dang ilakarosi sodi atalakar ayong dang ka esi aapei. Ani kerai echami a Ekapolon Yesu, etamit ayong atamar apedori ameun Timoteo nikus atipei, sodi atalakaror ayong eirari ngakiro kus. Ngesi bon kimina esi loger lo kaminar ayong nabo ngesi emina aweikinit ngakiro kus. Irichito ngitunga luche daang ngakiro kech a ngikulepek, nyekachito etich a Yesu Kiristo. Iyenete esi ngikulepek eger eteniyoto ngakiro a Timoteo, kisub ayong ka ngesi etich a ngakiro ana ajokak aapei, loger a ikoku ka apakeng. Kotere nguna, ameuni ayong ngesi nikus napei ayenea atamar ikokinete ngakiro kang ai. Etamit ayong atamar kengarakini Ekapolon Yesu abu ayong elope nikus atipei. Engolik ayong atamar echamit ameuni lokaatoyok Epapirodito nikus. Erai ngesi lo kisubi ka ayong etich aapei kitiji Ekipe, nabo arai ngesi emeuna kus lo kengarakini ayong ngiboro lu echana. Iburakinit ngesi aanyun esi daang noi nabo ialolongi ngesi kainyo iirasi esi atamar adeaka ngesi. Adeaka ngesi iteni dir akot tani akitu. Nakaneni kisieni Akuj ngesi, nakaneni meere ngesi bon, kisieni Akuj tani ayong, sodi nyealolongio ayong noi. Keburakinit ayong noi ameun ngesi nikus sodi talakaros esi nabo na ianyungareta ngesi, sodi atojongo ayong akialolong. Kitepeyono robo ngesi a alakara kadaang, ani eraakar lokaatokus ani a Ekapolon. Kidodiutu arimatoi alotunga kadaang alu ikote ngesi, kainyo ajali ngesi akiyar keng sodi tonyou akitu kotere etich a Kiristo, sodi kengarak ngesi ayong a erot alo peipedorete esi ani ilokiata. Eya daang ngikaitotoi kang, talakaros ani imorikinitor esi aapei ka Ekapolon Yesu. Nyakaburuni abongokin nakolong sek egiri, kainyo kiyuunete nguna esi. Tochoikinos alotunga alu esubete ngakiro naaronok, alu ikote ngingokwo, ngitunga lu eneikina adungudung ngawat. Ngoni kianyu akilengero na iteni, meere kesi. Kainyo kilipit Akuj a Etau keng, nabo kilakara ani kimorikinor aapei ka Yesu Kiristo. Nyikigieno ngakiro na a akwaan anikalapatan. Arai atasaki, kegienokin ayong dang ngakiro na ikote nguna. Ani kitamit itwaan atamar egienokin ngakiro a akwaan anikalapatan, erai ayong echamit ekokini neni noi. Kelengerio ayong akolongit na a ngikan-kauni nakedounere. Kedounio ayong arai Esiraelit, lo a ekitela a Benjamen, arai Eburaniait lokadir. Ani alowae alo erai eka akiwapit etal, arai ayong Eparisayot, nabo erichakina ayong lokojokon noi atoboliar tani ngitunga a ekanisa. Arai tarai itwaan ni etenoono eboyor keng kotere ni iwapitor ngitalio, kemam ayong ibore asechit. Nakaneni daang nakolong etamit ayong atamar eraakasi ngakajokak, engolik ayong atamar eraakasi ngapasiek kotere Kiristo. Meere nguna make, emarunit ayong ibore daang atamar erai pas kotere ibore niajokon noi, ni erai ngesi akiyen Yesu Kiristo, Ekapolon kang. Alung ayong ngiboro daang kotere ngesi, ekokis daang anikang ngachin, sodi ataanyunea ayong Kiristo nabo emorikinotor ka ngesi jik. Nyeringa nabo ayong asaki ateneanut na ewapitor etal, aanyu tokona ayong ateneanut na itorunit nanupit ngakiro a Kiristo. Ateneanut na itorunit nia Akuj na erai aka anupit. Daang na asaki ayong ngesi akiyen Kiristo ka aanyungar agogongu a ayarun keng, aboliaro ka ngesi aapei ka akikwaanikin ka ngesi anakitu keng, erai egieno atamar keteyarunio ayong dang. Nyewoga ayong abala epiu daang arumor kori aliwor lo ekiuna. Arubakinit erichakina sodi ataanyunea ebachit lo ketiliworea ayong Kiristo ekeng. Tarai bocha dir ngikaitotoi kang, nyetamit ayong atamar aanyu ayong ebachit ngolo. Erai ibore ipei ngesi asubi ayong, kemuriakinete ayong na eya naabor kang, sodi erichakin aanyun na eya ngaren kang. Nakaneni akeri ayong ngaren asaki aanyun ebachit, lo erai ngesi kitaanyunitor Akuj akiyar na a alokidiama ani a Yesu Kiristo. Echamit ngoni lu kitenikin dir alokiristoonu yok ikokinete ngakiro yok neni. Nakaneni ani kegelaaka ngakiro itamete ngiche kus, isileereuni Akuj nguna anikus. Kanguna kadaang, atotena ngaren a ngitalio alusek ngoon kiwapit tanang tokona. Ngikaitotoi kang, torubakisi kisisaate ayong. Kona kidodikinea sua esi ekitetemes loajokon, topupo ngakiro alu iwapito ekitetemes ngolo. Kalimok kolong sek ayong esi ngakiro nguna ngalimokinet ngakaalak, abongokini tokona nabo egoro, eya lukaalak lu eremokino aloboyor kech Kiristo lo aramakinio napir. Edaikin ngulu daang lonyas, ngakookies kech kesi eraakasi akuj kech. Inisatar kesi ngakiro na eraakasi ngileech, eraakasi ngakiro a eboyor aloaronon bon itamete kesi. Nakaneni kirai ngoni ngitunga a adis, kimuit noi Ekapolon Yesu Kiristo ebuni anadis. Ilochi ngesi ngawat yok napalag na epedorete akitu sodi kisikok akwaan keng a apolou, kotere agogongu na echunakinea ngesi ibore daang topolokinio. Tokona bocha ngikaitotoi kang luminan, kamina ayong esi noi nabo edakuna etau kotere esi! Alakara ayong noi kotere esi nabo enisa kotere esi! Ngikaitotoi luminan, ejoikinit esi irubete itionikinito eboyor kus ani a Ekapolon kongina. Kemaimai ayong esi Eudia ka Sunitike atamar tachamunos kare ani iraakatar ngikaitotoi ani a Ekapolon Yesu. Ani iyong dang lokaatokang lokamuno, asaki ayong iyong kingarak ngaberu nugu, kainyo kisub ayong ka kesi etich lokojokon kitatami ngakiro naajokak, ka Kilemenit aapei ta ngirukitos luche daang kisubea etich, lu igiritae ngirora kech nakitab a Akuj na a akiyar. Agasi atamar talakaros esi jiik ani imorikinotor ka Ekapolon aapei. Alimunit ayong nabo, talakaros! Tapataketa alotunga kadaang. Aapiki Ekapolon Yesu abunere! Warasi nyiiriabasi kotere ibore idio, nakaneni anakilipet kus kadaang, kilipa Akuj ibore ni isakete esi, kilipeeneta jiik a ngitai alu idodiunito alakara. Sodi ekisil a Akuj, lo idwangit ngaososio daang a ngitunga, tochoik ngitai ka ngitamen kus niajokon ani imorikinotor aapei ka Yesu Kiristo. Ani eya daang ngikaitotoi kang, kimiekisi ngitamen kus toupiasi ngakiro naajokak na erikito ekipur, ngakiro na iteni, na iyookino, na ikiuna, naajokak ta na idodiunito arimatoi. Kiwapa nakolong itatamasi esi toyena anikang, napei alokiruor kang tanang tani na asubeene ayong. Sodi kiruko esi ka Akuj na kitaanyuununi esi ekisil. Aloboyor kang alo kimorikinor aapei ka Yesu Kiristo, alakara ayong noi kotere esi. Kainyo adaunet a ngirwa a ngikaalak, ipot esi nabo kidodiut atamar eringa kitamunito. Nyabala ayong ipotu kolong esi tapalikis akitan ayong, amam esi kona idodiunete. Nyalimunit ayong nugu ani eitanitor ibore idio, kainyo etatama kolong ayong atamar ketemokino ibore ni atingit. Ayen ayong eboyor lo eboikin keboosit kori abarit. Etatama ayong ngakiro namunonoe nguna, sodi ani a wadaang ka esaa daang, atoliwor ayong lo ketemokino ibore erai emwonit kori kanyamit akoro, arai atingit ibore nikaalan noi kori niichi noi. Eyei ayong ationis na asubea ngakiro daang kotere agogongu naketaanyuni Kiristo. Nakaneni, isubete esi niajokon ani kingarakineta ayong alochan kang. Iyenete esi Ngipilipi dir atamar nakolong arotokinio ayong alo Makedonia ngirwa lukolong esiakinea ayong akitatam Ngakiro Naajokak, esi make iraakasi ngitunga a ekanisa lu kingarakinete ayong. Arai esi make kiinanakinete ayong ngaropiyae na echana. Ngirwa ngikaalak, kiinunete esi ayong ngaropiyae na echanar ngaropiyae alo Tesalonike. Meere atamar asaki ayong aanyuunun ngaropiyae, pearai asaki ayong talalaketa ngitichisio luajokak kilimitere esi. Aanyu tokona ayong ngiboro daang lu ayaunio anikus, nabo elalak kesi noi idwangito tani lukolong eitanit ayong! Etemokin tokona ngiboro daang lukolong asaki ayong nangoon kainunea Epapirodito ngainakinet kus. Ikote kesi ngalemikinet nakakukunyok elemikinitae Akuj, ngakipeyos naajokak, echamunit Akuj. Kiinakini esi Akuj kang ibore daang ni isakete alobari keng aloationon noi, kisitoru nia Kiristo. Eliwor apolou nakajik aka a Akuj yok ana erai Apa! Aamen. Emalae ngitunga daang lu eraakasi ngika Akuj ani eraakatar ngika Yesu Kiristo. Kimalaate esi ngikaitotoi lu kirukit ka ayong kane. Kimalaate esi ngitunga a Akuj daang lu kirukit ka ayong kane, tarai cha noi lu eraakasi ngika akai a ekapolon a Ngiroma. Agasi atamar kiruko esi daang ka ajokis a Ekapolon yok Yesu Kiristo. Erai ayong Paulo lo arai emeanara a Yesu Kiristo kotere echami a Akuj, ta lokaatoyok Timoteo kigirunit abarua naga. Kigirakinit esi ngitunga a Akuj lu iyakasi Kolosai, lu iraakasi ta lokaatokosi lu kimuno sua ani kiliworor ngipei ani a Kiristo. Kigasi atamar kitaanyu esi Akuj Apayok ajokis ka ekisil. Kibuanakini sua Akuj na erai Apakeng a Ekapolon yok Yesu Kiristo alakara jiik nakilipanakinea sua esi. Kainyo kiira sua eger lo inupitotor esi ngakiro a Yesu Kiristo ka eger lo iminatar esi ngitunga a Akuj daang. Nakolong sek isiauneta esi akiirar Ngakiro Naajokak na iteni, ipot esi kiirasi atamar eyei ibore nikigieno ngoni atamar kianyuni. Nakaneni iwapap ibore ngini kidekinitae ngoni anadis ka anupit ta amina yok. Erubakinito Ngakiro Naajokak irokete apiaro nabo epetar anakwapea kadaang, loger lokolong apetarotor anikus napei kolong a akolongit ana a ekingaren iirareta esi ngakiro a ajokis a Akuj sodi toyenut dir eger lo ikote. Itatamasi kolong esi ngakiro na a ajokis a Akuj ani eyei Epapuras, erukitos kosi lokimina sua noi. Erai ngesi lo esubi etich a Kiristo emunokinitae, kotere sua. Kilimok ngesi sua ngakiro a amina ana kitaanyu esi Etau a Akuj. Kotere nguna, kilipanakini sua esi jiik napei kolong kiirarea ngakiro kus. Kilipit sua Akuj kileleb esi aosou ka achwaanu toyena ngakiro na echamit ngesi, nabo kitaanyu esi aosou ka akeleanut na itorunit nia a Etau a Akuj. Sodi topedoreta esi akiboi loger lo esaki Ekapolon nabo tosubeta jiik na ejoikinito ngesi. Itorunete ngakiro naajokak nagelagelae loboyor kus, nabo iyenunete esi Akuj lokojokon noi. Agasi atamar togogongioto esi a ationis ana itorunit napolou a Akuj, sodi tanaikineta esi ngakiro daang ititinyikinito. Sodi nabo talakaros ibuakinito Akuj alakara. Akuj nakolong kimarakini esi dang nakiro nakolong etiliworit ngesi ngaka ngitunga keng, Anapolou ana a akicha. Kiyuuni kolong ngesi ngoni anationis a aribu, sodi kiwaak ngesi ngoni niajokon nia a apolou a lokookeng alominat, lo erai ngesi kilachakinere ngoni, ngesi atamar, kitorimakinere ngoni ngasechesea yok. Erai Kiristo ekikwaane lo etakani a Akuj ana nyetakani. Ngesi erai Lokookeng a Akuj lo ekingaren, lo epolot idwangit ngiborei lusubuna daang. Kainyo ngesi kolong asubea Akuj ibore daang ni eyei nadis ka nakwap, ngiboro lu etakanete ka lu nyetakanete, imorikina aapei ka ngationisio a adis, ngikapolok, ngikarikok ta lu eweikinito akwap. Asubi kolong Akuj ibore daang anikeng, kotere ngesi. Ayei kolong sek Kiristo eringa ibore daang nyesubuna. Eyei ibore daang nipalem sek eyei ani imoratar ka ngesi. Ngesi erai akou a akwaan keng, ana erai ngitunga a ekanisa, isiakinit akiyar a akwaan anikeng. Ngesi erai Edia lo ekingaren lo ayaruni, sodi toliworor ngesi lo ingareni aloboro kadaang. Kainyo atiakuni kolong Akuj alope atamar eyei ateneanut daang a Akuj ni eyei Lokookeng. Sodi totiaku Akuj atamar kotere Lokookeng, echamun ngesi ka ngitunga daang a akwap, kainyo esili Akuj kotere ngaakot a Yesu na abukorosi anapir, tachamunos ngesi ka ngiboro daang lu eya nakwap ka nadis. Iloka kolong esi dang ani a Akuj nabo iraakasi esi ngimoe kotere ngakiro naaronok na isubete esi kitamete. Nakaneni, kotere ni atoanea Lokookeng, kitiliwo Akuj esi ngipaalon keng sodi kiyaunea esi nikeng iraakasi lubekon, lu ikiuna ka lu emam akisech. Ejoikinit bocha esi irubakinete aloboyor alo etenoono eriyan nabo nyejoikinit esi kiteriangakinio anakigieno ana kolong ianyunete esi na iirareta Ngakiro Naajokak. Ngakiro Naajokak nguna ngesi araakar ayong Paulo ekasuban etich, Ngakiro Naajokak na etatam ngitunga daang anakwap. Alakara tokona ayong kotere ni kaboliare kotere esi. Kainyo ariaba nakariabea ayong akwaan, engarakinit akiyookin na iituno ani aboliare Kiristo kotere akwaan keng, ngesi ngitunga a ekanisa. Aliwor ayong ekasuban etich a ngitunga a ekanisa a Akuj, ana ketaanyuni ayong akisub etich lo kengarakinitor esi. Etich ngolo ngesi lo a akitatam ngakiro keng lokojokon, ngakiro nguna ngesi nakolong emunonit ngesi nakanuan alotunga kadaang, nakaneni edodik tokona ngesi ngitunga keng. Ereat Akuj atamar etoyen ngitunga keng ngakiro keng namunonoe na etionio apolou na erai aka ngitunga kadaang. Nakaneni ngakiro namunonoe ngesi na atamar eyei Kiristo nikus, idodiunit ibore ngini atamar ianyunete esi dang apolou a Akuj. Nakaneni kitatami sua ngakiro a Kiristo anitwaan kadaang. Kikilanakini nabo kitatami itwaan daang a aosou kadaang, sodi ayauneta itwaan daang nia Akuj erai ni etenikin eboyor keng ani emorikinotor ka Kiristo. Kotere nguna, asubi ayong etich, ericha, a ationis anakaagongon ketaanyunit Kiristo ana esubi etich anikang. Asaki ayong esi toyena eger lo erichar ayong asubi etich anikus, kotere ngitunga a Laodikea ka luche daang lu eringa nyiriemuna ka ayong. Asubi ayong kongina sodi totitinyekerotor kesi noi nabo toliworotor ngipei a echami sodi kitenikinor eboyor kech lokojokon ani eyeneta na eraakasi ngaka iteni dir. Kotere eger ngolo, eyenete kesi ngakiro namunonoe a Akuj, na eraakasi Kiristo elope. Ngesi erai engaet lo engauni aosou ka achwaanu naajokon noi na idait Akuj. Tokona, kalimokinit ayong esi atamar warasi nyikingal esi itwaan idio a ngakiro ana eraakasi alioko, tani kesibit ejokak kwaani. Kainyo, tani kalona ayong anikus a akwaan, kirukit ayong ka esi a etau. Nakaneni alakara ayong noi ani eteeo eboyor kus etenoono lokojokon ani iraakatar esi ngipei inupito Kiristo. Kona ichamuneta esi Yesu Kiristo lo erai Ekapolon, kiboyoto irukito ka ngesi aapei. Tosubutu lu ilijakina ngaten tooma keng. Totionikisi akiboi anikeng nabo togogongioto ananupit kus loger lokolong kitatamere. Toliworos lu ileleba alakara. Tochoikinos robo warasi itwaan idio nyikirik esi kotere engalas lopasit a aosou a ngitunga, lo itorunit nakitatameta na ikobete ngitunga eraakasi ngaka ngipean alu a akwap, nyitorunito nia Kiristo. Kainyo eyei eboyor daang lo a Akuj nakwaan a Kiristo, nakaneni kitaanyun akiyar daang ani imorikinotor esi ka ngesi. Epolot ngesi noi idwangit ngipean daang ka ngikapolok daang. Kilenger esi ani imorikinotor aapei ka Kiristo. Meere kotere akilengero na a ngitunga, nakaneni erai akilengero na Kiristo, ana erai alachakino anagogongu a eboyor alo a ngasechesea. Kainyo kinukio ka Kiristo anakibatisare, anakibatisare anapei kangina, iyarut esi ka Kiristo aapei ani inupitotor atamar etiono noi Akuj na eteyaruni ngesi. Iraakasi kolong esi ngitunga lu imudukaka alotai kotere ngasechesea kus ka nabo ni iraakatar esi ngibukui lu nyerai Ngiyaudi, amam esi etal iwapito. Nakaneni kiteyaru tokona esi Akuj aapei ka Kiristo. Kirimak Akuj ngoni ngasechesea yok daang, atach ngesi ngamichae yok nakolong egiritae ka ngitalio kech sodi kikisa jik ani aramakinea napir. Kipiu Yesu ationis a ngipean ka ngikapolok anapir kangina, kitiliwo kesi ibore ni ekianatar ngitunga, erikit ngesi kesi anajore ana edwangea ngesi kesi anapir. Kotere nguna, warasi robo itwaan nyikilomak esi lotalio a ngimujen kori a ibore ani matat, kori ngirwa lu kinyakanaret, kori esikukuu a elap alokitetet kori akolongit a Sabato. Eraakasi ngakiro nguna daang etorube a ngakiro anamonan epote, Kiristo ngesi erai ngakiro na iteni. Warasi nyikirira esi itwaan ni ebala ajok ngesi ani aanyungarea ngakisingolikinet a Akuj, nabo toneikina akisudokinit akitiditeuna ka akilipit ngimalaikae. Inisa itwaan ni ikoni neni pas kotere ngitamen keng a ilope. Aisiki ngesi Kiristo lo erai akou a akwaan kangina. Kotere erike lo a Kiristo, itanio akwaan daang kimorikin aapei ka nginerin ta ngamori keng, sodi topolounio loger lo esakitor Akuj. Itoaka esi ka Kiristo aapei kilachakin ani eya ngipean lu epolokinito akwap. Nyo tokona nabo ibooyoto esi ikwa ibore esibit iraakasi esi ngitunga a akwap kana. Nyo iwapitotor esi ngitalio lu ikote lu ebeyere “Nyiitinga en”, “Nyiira ngin”, “Nyiitapa niche”? Eraakasi nguna daang ngakiro a ngiboro alu inyasuunun nakitingea ngoni, eraakasi kesi ngitalio ka ngakitatamet na irokete ngitunga. Iteni dir, esibit ngitalio a aosou a eger alo eneikina ngitunga akilip ngimalaikae, ka akisudokinit akitiditeuna, ka aboliar ngawat niaronon, nakaneni nyejok kesi alowae alo erai eka a atitinyikin etereku a ngawat loaronon. Kona kiteyarunere esi ka Kiristo toyara, tasaka ngakiro na eya nadis, ni ibooyo Kiristo anapolou keng, anakan ana aloteten a Akuj. Kiitana ngakiro na eya kidiama, meere ngakiro na eya nakwap nege. Kainyo itoaka esi, nakaneni edae akiyar kus ka Kiristo aapei ani a Akuj. Akiyar kus na iteni dir ngesi Kiristo, ani na etakanunea ngesi, itakanunete esi dang ka ngesi aapei sodi toliworos ngikapolok ka ngesi aapei! Echamit esi ipalikinete etereku loaronon lo eyei nawat kus lo erikit eboyor loaronon ikoni emalaanu, ngakiro na a ngileech, arorokanut, etereku loaronon ta adakanu (kainyo ikoni adakanu akilipit akuj nasubuna). Kotere ngakiro nguna enyunyurikin Akuj lu nyiwapete ngakiro keng. Ibooyete kolong esi dang iwapito ngakiro na ikote nguna nakolong aupiyaritotor kesi eboyor kus. Nakaneni tapalikisi tokona ngakiro nu daang, na eraakasi angoit, ka anyunyura, ka arorokanut ta aremo. Nyejoikinit ngiyeny ka ngakiro na a ngileech elimunete ngakituk kus. Warasi nyiingalasi make, kainyo itubosi kolong esi eboyor kus longorot ka ngakiro daang na enait ngesi nakaneni irokut esi eboyor lokitetet. Eboyor ngolo ngesi erubakinit Akuj Akasubunan itenenakini kikwaanikin ka ngesi, sodi toyeneta esi Akuj lokojokon noi. Kotere nguna, nyeringa etiakitae ngibukui lu nyerai Ngiyaudi ka lu eraakasi Ngiyaudi, lu ilengeritae ka lu nyilengeritae, lu isomato ka lu nyisomato, ngipeyok ka lukulepek a akwap, ngirikon ka lu elachakina. Nakaneni erai Kiristo eka daang nabo eyei nika daang. Iraakasi esi ngitunga a Akuj, kimina ngesi esi kitoseu toliworos ngikeng. Tokona bocha, ejoikinit esi iliworosi ngitunga lu a ngisien, lukapatanak lu itiditeuna, toliworos lukalilimok ta lu inaikinito ngakiro. Tanaikisi ngakiro aluche nabo torimanakinos make erai kingolik itwaan atamar eyei ibore kasechakinit itwaan niche. Ejoikinit esi irimanakinosi make loger lo kirimakinea esi Ekapolon. Anakiro kanguna kadaang, kirichakisi echami lo erai ngesi imorikini ibore daang niajokon toliwor ipei. Kiriki esi ekisil lo kitaanyuni Kiristo anakiro ana itiakunete esi atamar kiwapi, kainyo ekisil ngolo ngesi kinyarare esi toliworos akwaan apei. Nabo toliworos lu ilimununete atamar kilakara. Echamit ngakiro a Kiristo epete nikus a ationis a aosou keng kadaang, kitatamas nabo kichikichikas make kotere aosou daang. Toeonokisi Akuj ngieosio ka ngiitesinei ka ngieosio a Etau a Akuj erai ibuakinito alakara alotai kus. Ani ibore daang ni isubete esi kori ni ilimunete, tosuba daang a ekiro a Ekapolon Yesu, ibuakinito Akuj Apa alakara ani a Yesu. Esi ngaberu, kiwapa ngakiro a ngikiliok kus, kainyo ejoikina esi isubete kongina ani iraakatar ngakiristoi. Esi ngikiliok, tominakisi ngaberu kus nabo tochoito iliworosi lukaadengak anikech. Esi ngide, kiwapa ngakiro a ngikauriak kus jiik ani iraakatar esi ngikiristoi, kainyo ngakiro ejoikinito Akuj nguna. Esi ngikauriak, warasi nyiiliworosi lu itililiyete ngide kus, kainyo ilounete kesi ngakiro ngitai. Esi ngikedalak, kiwapa ngakiro a ngikapolok kus alu a akwap anakiro kadaang, meere esaa lo kiteeto kesi esi bon ani isaketa esi kesi kitominakis esi, nakaneni tosuba a ngitai kus kadaang ani ikeritotor esi Ekapolon Yesu. Ibore daang ni isubete esi, tosuba a ngitai kus kadaang, esibit etich a Ekapolon Yesu isubete esi, meere lo a ngitunga. Toyena atamar kiinakini Ekapolon Yesu esi ebachit lo idaritor ngesi ngitunga keng, kainyo Ekapolon Kiristo ngesi isubanakinete esi etich. Nakaneni itwaan ni esubi naaronok, etachio itemem ka aronis keng, kainyo irirae Akuj itwaan daang a eger a epei. Esi ngikapolok, tosubeta ngikedalak kus ngakiro na eteniyete na eriyan. Toyena atamar eyei esi dang Ekapolon nadis. Kilipeeneta jiik, nabo tochoikinos esaa lo ilipeta, ibuakinito Akuj alakara. Kilipakinae tani sua dang, sodi kitaanyunea Akuj alolom naajokon nakitatamea ngakiro keng naajokak namunonoe a Kiristo, kainyo ngakiro nguna ngesi tokona kaenitere ayong alojela. Kilipa robo sodi eruor ayong ngakiro na ileerete loger lo echamit ayong eruoror. Toliworos lukoosok anakiro ana isubeta esi lu nyeraakasi ngikanupak, isubete naajokak jiik naianyuneta nikaaloman. Ejoikinit ekiruor kus jiik erai loajokon lokesuparan, nabo ejoikinit esi iyenunete eger lo itachakineta itwaan daang akiroit na iyookino. Lokaatokosi lominat Tukiko, lo erai ekasuban etich lo emunoi nabo kisubi ka sua etich a Ekapolon Yesu aapei, ngesi kisisakini esi ngakiro kang daang. Ngakiro nguna ngesi ameunitor ayong ngesi nikus sodi talakarotor esi ani iirareta eger kirotokinitor sua daang ngaren. Erukito ngesi ka Onesimo, lokaatokosi lominat lo kimuno sua, lo erai epeikus. Kisisakinete kesi esi ngakiro daang na asubasi kane. Kimalae esi Arisitariko lo kienitae ka ayong aapei alojela. Kimalae esi tani Mariko lokeyaakeng a Barinaba. (Kilimokin esi ngoon ekingaren eger lo ipeyouneto Mariko erai kiriamunosi ka ngesi). Kimalae esi Yochua lo enyaritae nabo Yusuto. Luarei ngulu make kesi eraakasi lu areunosi alodin a Ngiyaudi, lu kisubi ka ayong etich a Apolou a Akuj, nakaneni kengarakis kesi ayong lokojokon noi. Kimalae esi Epapuras, erai ngesi dang epeikus nabo ekasuban etich a Yesu Kiristo. Kilipanakini ngesi esi jiik lokojokon, ilipit Akuj atamar torubakis itionikinito ekiristoonu iraakasi lu ipoloto inupito ngakiro a Akuj noi nabo iwapito na echamit Akuj. Apedori ayong alimokin esi atamar asubi ngesi etich lokationon kotere esi ka ngitunga a Laodikea ka Ierapoli. Kimalaate esi Luka, emuron lominat ka Demas dang. Kimalata ngikaitotoi luminan lu eya Laodikea ka Nimipa ta ngitunga a ekanisa daang lu iriameenete kai keng. Ani irumorete esi akisomare abarua naga, kitaanyutu tani ngitunga a ekanisa a Laodikea kisomata. Ani esi dang, kisomata abarua na kiinunete esi ngikaitotoi lu a Laodikea. Tolimokisi Arikipo kona, “Echamit irumori etich a Ekapolon Yesu lokolong kiinakinio iyong atamar tosub.” Ayong elope egiri nugu a akan kang, kemalae ayong Paulo. Warasi nyikimuriak eger lo kaenitere ayong alojela! Agasi atamar kiruko ka ajokis a Akuj. Ayong Paulo ka Silipano ta Timoteo kigirakinit esi ngitunga a ekanisa lu iyakasi Tesalonike abarua naga. Ngulu eraakasi ngika a Akuj Apa ka Ekapolon Yesu Kiristo. Kigasi atamar taanyut esi ajokis ka ekisil. Kibuanakini sua Akuj alakara kotere esi daang nabo kilimit esi jiik nakilipeenea. Kainyo kitamunit sua ani a Akuj Apayok eger lo idodiuneta esi atamar inupito ngakiro a Akuj kotere na isubete esi, ka eger lo kitusubea esi amina kus etich lokojokon, ka nabo eger lo etenoonio akigieno na igienosi esi Ekapolon yok Yesu Kiristo. Ngikaitotoi kosi, kiyeni sua atamar kimina esi Akuj nabo kiseu esi aliwor ngikeng a alope. Kainyo nakolong kitatamea sua esi Ngakiro Naajokak, pekitatami a ngakiro anapasiyek. Arai kitatami sua esi a ationis ka Etau a Akuj, kinupit dir atamar eraakasi ngakiro nguna na iteni. Iyenete esi eger lokolong kibooyo sua ka esi, ebooyoto ka esi erai kingarakinit. Kisisata esi sua ka Ekapolon Yesu, ani tani na ichanatar esi noi, ipot esi tachamut ngakiro naajokak a alakara ana itorunit Lotau a Akuj. Kotere nguna, tarautu esi ekitetemes alokanupak kadaang alu eya Makedonia ka Akaya. Nakaneni apetar ngakiro na Ekapolon anikus apetakin Makedonia ka Akaya, nabo dang, apetakin tani ngakiro na inupitotor esi ngakiro a Akuj wadaang. Emam robo tokona ibore iche echamit sua kilimuni. Iruorosi ngitunga ngulu daang eger lo kipeyeuneto esi sua nakiponea sua aanyun esi, ka eger lo ireunotor esi anakilip ngakujo nasubuna, toreunos akiwap Akuj na iteni na eyari sodi kidarut Lokookeng ebuni anadis, Lokookeng Yesu, lokolong eteyaruni Akuj nabo kiyuuni ngoni ananyunyura a Akuj ana ebunit. Ngikaitotoi kang, iyenete esi ngikulepek atamar pearai aponere kosi nikus aka pas. Iyenete esi eger lo kiboliare sua nabo kiyeny alo Pilipi eringa nyenanguna Tesalonike nikus nege. Ani tani nakitepegere sua noi, kiinak Akuj sua atitinyu nakitatamea Ngakiro keng Naajokak. Kainyo nyerai na kimaimaea sua esi na eraakasi alioko kori ngitamen luaronok, kori nyikisaki sua akimod itwaan tani ipei. Erai kiruoro sua jiik loger lo esaki Akuj eruoro, kainyo kiyenik ngesi sua achamu atamar kichikakin Ngakiro Naajokak. Nyikisaki sua akitalakar ngitunga, nakaneni kisaki akitalakar Akuj na erai ngesi eyeni na eya lotai kosi. Iyenete esi dir atamar pekiponi sua nikus kitobobot ngakituk esupareta esi, kori pekiruoro ngakiro na a amodeanut atarapeta etereku kosi, Akuj erai akaanyunan! Pekisaki sua ekipur anitwaan kori anikus kori alotunga aluche, tani kona kiraakar sua ngimeanara a Kiristo lu echamit kisaki ngiboro ngidi anikus, kipataka sua anikus loger a aberu ka ngide keng. Kimina sua esi noi atasaka tani akimorikin ka esi Anakiro Anaajokak a Akuj ka eboyor kosi dang. Ngakiro nguna ngesi kiminar sua esi! Ngikaitotoi kang, itamunito esi eger lo kisubea sua etich loketuburunan! Kisubi sua etich naparan ka nakwaare nakitatamea esi Ngakiro Naajokak sodi nyikichan sua itwaan tani ipei anikus. Iyenete esi nabo eyeni tani Akuj atamar erai eboyor kosi anikus a ngikanupak lo ikiuna, iyookin ka lo nyesechech. Iyenete esi atamar kisubea sua ipei kus daang ngakiro na ikote na esubea apa ngide keng a elope. Kitalakari sua esi eteyono ngitai kus nabo atorubakisi kichikichiki esi atamar kiboyoto eboyor lo italakari Akuj nakinyarauni esi Napolou keng ka ekipur. Nabo eyei akiroit ache nakibuanakinea sua Akuj alakara. Nakolong kiinunea sua esi Ngakiro a Akuj, ipot esi kiirasi sodi tonupa eraakasi ngakiro a Akuj, meere na a ngitunga. Eraakasi kesi dir ngakiro a Akuj. Kainyo asubi Akuj etich anikus alu inupito. Ngikaitotoi kosi, ngakiro napei kolong asubakinosi alotunga a ngikanisae a Akuj alu eya Yudea kesi asubakinosi anikus. Asubasi nguna alotunga alu eya inaa alu eraakasi ngika Yesu Kiristo. Kiboliatar esi ngitunga a akwap kus loger lokolong aboliatar kesi Ngiyaudi, lukolong aarete Ekapolon Yesu ka ngikadwarak a Akuj nabo kitoboliatar sua dang! Eronikinito Akuj ngitunga ngulu nabo eremem kesi ka itwaan daang! Asakete kesi tani akiratakin sua nyikitatam ngibukui lu nyerai Ngiyaudi ngakiro na eyuunotor. Kotere eger ngolo, erikakis etiae a ngasechesea kadaang anu esubeenete kesi jiik. Tokona adolu anyunyura a Akuj nikech! Ani eliwor sua ngikaitotoi, nakitiakar sua ka esi wadio, pekitiakak alotamen, arai kitiakak a ngawat, kipot sua eitutu esi noi nabo atasaka noi aanyun ka esi! Kisaki sua abonguni nikus. Asaki ayong elope abunere nikus ngabunet ngaarei, nakaneni kiratak sua Esiitan. Abala ayong esi a! Nyoni kitamarea sua kipiu naaronok nakiwaar alongaren Ekapolon Yesu na ebongunio ngesi? Esi ngikulepek kesi kinisar sua, esi kesi kigieno nabo kitalakarito sua. Iteni dir, esi kesi kinisar sua nabo esi kitalakarito sua! Ani ekisidi, engolikisi sua atamar nyeringa nabo kidari. Kipot atotiakutu atamar kidongi Atene make sodi atomeutu lokaatokosi Timoteo lo kisubi ka sua etich a Akuj kitatami Ngakiro Naajokak a Kiristo. Kimeuni sua ngesi kingarak esi totioketo ananupit kus, sodi nyeepalik tani ipei kus anupit ngakiro a Akuj kotere ngichan lugu. Iyenete esi ngikulepek atamar eraakasi ngichan ngulu lu esakit Akuj ngoni ataanyutu. Kainyo nakolong kirukitor sua ka esi, kisiauni sua alimokin esi atamar adikino sua kiboliare. Ani kona iyeneta esi dang, ngakiro napei nguna kesi apot tosubakin. Ngakiro nguna ngesi ameunea ayong Timoteo nikus. Nyesaka nabo ayong arubakin edarit, sodi atomeu ayong ngesi angichun eboyor a anupit kus. Kainyo kingayat sua atamar kori robo kining esi Ekipe sodi toliworor etich lokolong kisubi sua anikus daang epasit! Abongu tokona Timoteo kisisak ngesi sua ngakiro naketalakarak na a anupit ka amina kus. Kilimok ngesi sua atamar kitamunito esi sua jiik nabo ebala kimuit esi aanyun ka sua loger lo kimuitor sua aanyun ka esi. Nakaneni ngikaitotoi kosi, kilakar sua alochan ka aboliaro kosi kotere anupit kus. Kainyo kiyari tokona ngoni erai kitionikinito esi aloboyor kus aliwor ngipei ka Ekapolon Yesu. Kibuakini tokona sua Akuj kosi alakara kotere esi. Kibuakinit sua ngesi alakara kotere esi lu eraakasi kesi kitalakarito sua na kiyakar nikeng. Kirubakinit kilipit Akuj alakara nakwaare ka naparan a ngitai kosi kadaang ataanyun ka esi sodi etaanyuneta esi ibore ni iituno ananupit kus. Kilipit Akuj na erai Apakosi alope ka Ekapolon kosi Yesu atamar kitenik erot lo kiponea sua nikus! Kigasi atamar kitalala Akuj etiae a amina ana iminatar esi make kikok amina nakiminar sua esi lokojokon noi. Kotere ngakiro nguna, kingarakini ngesi esi sodi toliworos esi lu ikiuna ka lu italeuno ani a Akuj ana erai Apa, na ebongunio Ekapolon yok Yesu kirukut ka daang lu eraakasi ngikeng. Eya daang ngikaitotoi kang, itatamasi esi anikosi eger lo ejoikinit esi ibooyoto sodi kitalakasi Akuj. Iteni dir, iboyeenete esi eger ngolo. Kilipit tokona sua esi nabo kimaimai a ekiro a Ekapolon Yesu atamar tosuba naajokak noi. Kainyo iyenete esi ngakiro nakichikichiki sua esi kotere apolou a Ekapolon Yesu. Esaki Akuj esi toliworos lu italeuno nabo lu ipalikis emalaanu. Ejoikinit ekile daang eyenuni eger lo iboyoto ka aberu keng a erot alo ebekoono ka lo a arimatoi, meere kotere etereku loaronon, loger a ngibukui alu nyerai Ngiyaudi alu nyenupito ngakiro a Akuj. Anakiro kanu, warasi robo itwaan nyeesechak ekiristoit loche kori nyiitoosor. Kilimok kolong sek sua esi nguna ekingaren, nabo echikichika esi lokojokon atamar irirae Akuj lu esubete nguna. Pekinyarae Akuj ngoni akiboi alomalaanu, nakaneni akiboi kirai lukitaleuno. Kanguna bocha, itwaan cha daang ni engeri ngakitatamet nugu nyengerit ngesi itwaan, engerit Akuj na erai ngesi kitaanyuni esi Etau keng. Nyejoikinit sua kigirakini esi ngakiro a amina ngikaitotoi lu eraakasi ngikanupak. Kitatam Akuj esi ngikulepek eger lo ejoikinit esi iminin make. Ngakiro napei nguna ngesi isubeta esi ngikaitotoi daang lu eya Makedonia. Tokona bocha ngikaitotoi, kilipakinit esi atamar tosuba tani na idwangito nguna. Tasaka eboyor loajokon lo emam eburas, totionik itwaan daang ngakiro na eraakasi ngakeng a ilope, nabo tosub etich a ngakan keng a ilope loger lokolong sek kilimokinitor sua esi. Kotere eger ngolo kipuruunete esi lu nyerai ngikiristoi sodi tojongoto esi akiitanit atamar kiinakis ngitunga luche ngiboro lu ichanasi esi. Ngikaitotoi kosi, kisaki sua esi toyena ngakiro na iteni kotere lu atoaka, sodi nyialolong esi loger alu emam ibore igienosi. Kinupit sua atamar atoani Yesu toyaru, nakaneni kinupit sua atamar ebuari Akuj Yesu ka daang lu atoakete enupito ngakiro keng, ebuari nikeng. Eraakasi ngakiro na tokona kitatami sua esi na a Ekapolon Yesu, ngoni lu eringa kiyari akolongit na ebunio Ekapolon Yesu, nyikingarenikini lukolong atoaka. Iremari Akuj lokojokon todung akiroit, iruorikini emalaikat loapolon kiirasi ngitunga erue a aburuch a Akuj. Sodi totiyaun Ekapolon Yesu anadis. Eyarunete mono ekingaren lu atoaka enupito ngakiro a Kiristo, ani ngoni lu kiyari ngirwa ngulu kichunario ka kesi aapei alodowon eriama ka Ekapolon Yesu alo kidiama. Sodi eruko ngoni ka Ekapolon Yesu jiik. Tokona bocha, kitoyono esi ngitai aluche a ngakiro kanu. Ngikaitotoi kang, nyejoikinit ayong tani kegirakini esi ngakiro a ngirwa kori ngikaru lu esubakinotor ngakiro nugu. Kainyo iyenete esi ngikulepek lokojokon atamar Akolongit na ebunio Ekapolon Yesu, ebuni nakwaare loger a ekokolan. Ani na iruorotor ngitunga ebaasi, “Isilitae emam ngache aronok,” nakaneni elomakinete kesi lochan atipei! Isiakinete ngichan ngulu atipei loger a ariaba ana eriabakin aberu atipei na esakea akidoun, nakaneni nyebucharosi ngitunga alochan kangulu. Nakaneni ani esi ngikaitotoi, nyibooyete esi esibit iyakasi naribu, nabo nyiiriangakinosi esi Akolongit na ebunio Ekapolon Yesu, loger lo ebunio ekokolan. Iraakasi esi daang ngitunga lu ibooyete iminasi ngakiro na esubio anakicha, esaa lo a apaaran. Nyikiboi ngoni loger a ngitunga alu eminasi jiik akisub ngakiro nakwaare kori anaribu. Tokona bocha, nyejoikinit ngoni kitumor kiperi loger aluche, ejoikinit kikienyi nabo atoliwor lu kitemit ngakiro. Nakwaare ngesi eperioneto ngitunga, nakwaare ngesi emaseeneta ngitunga epurot kilewa. Kona kiraakar ngoni ngitunga lu kiboi kisubi ngakiro naparan, ejoikinit kirai ngitunga lu kitemit ngakiro. Kitiliwosi anupit ka amina Akuj, ibore ni iyuuneta esi ngawat kus, nabo kitiliwosi ayuuno na anupit yok apukot. Pekiseuni kolong ngoni Akuj sodi echanyutu anyunyura keng, nakaneni ataanyutu ayuuno ani a Ekapolon yok Yesu Kiristo, lokolong atoani kotere ngoni sodi eboyoto ngoni ka ngesi aapei na ebunio ngesi, erai kiyari ngoni kori kitoakit. Kongina bocha, kitalakanaros make nabo kingarakinos make loger lopei tokona isubete. Kimaimai sua esi ngikaitotoi kosi atamar kidodiutu arimatoi na itemokino ani eya ngulu esubete etich ani iyakasi esi, ngulu kirikito nabo kichikichikete esi aloboyor alo a ekiristoonu. Kidodikisi kesi arimatoi lokojokon noi nabo tominakisi kesi kotere etich lo esubete. Kisila esi make. Kimaimai sua esi ngikaitotoi kosi atamar kisuruoro lu engerito akisub etich kech toliwor esubete, kitoyono ngitai alukakurianak, kingaranakisi lupalag, tanaikisi ngakiro a ngitunga kadaang. Warasi ngitunga nyeetachanakis ngakiro naaronok esubete kesi, nakaneni tasaka ngirwa daang asubanakin naajokak nabo tosubeta ngitunga daang naajokak. Talakaros jiik, kilipeeneta ngirwa daang, tobuakisi Akuj alakara a ibore kadaang. Ngakiro nguna ngesi esaki Akuj aloboyor kus alo imorikinotor esi aapei ka Yesu Kiristo. Warasi nyiisialolong Etau a Akuj, warasi nyiimenyasi ngakiro a Akuj na edwario. Kiningo ngakiro daang, kiwapa naajokak, sodi tapalikis naaronok daang. Kimiekisi Akuj na kitaanyuununi ngoni ekisil kitiliwo esi lu italeuno a erot kadaang nabo tochoik eboyor kus daang, ka etau, ka akiyar ta akwaan toliwor na emam ibore niaronon eyei na ebongunio Ekapolon yok Yesu Kiristo. Esubakini lokinyar esi nguna, kainyo esubakini ngesi na alimu atamar asubakini. Kilipakinae sua dang ngikaitotoi. Kimalata ngikanupak daang a emalas alo a ekiristoonu. Kadungokinit ayong esi kotere apolou na Ekapolon Yesu atamar kisomakisi ngikanupak daang abarua naga. Agasi atamar kiruko esi daang ka ajokis a Ekapolon yok Yesu Kiristo. Ayong Paulo ka Silipano ta Timoteo ngesi kigirakinit esi ngitunga a ekanisa lu iyakasi Tesalonike abarua naga. Ngulu iraakasi ngika a Akuj Apa ka Ekapolon Yesu Kiristo. Kigasi atamar taanyut esi ajokis ka ekisil ani eyei Akuj Apayok ka Ekapolon Yesu Kiristo. Ngikaitotoi, ejoikinit kibuakini Akuj alakara jiik kotere esi. Ejoikinit sua kisubi kongina kainyo inupa esi ngakiro a Akuj lokojokon noi, nabo emina ipei kus luche lokojokon noi. Ngakiro nguna ngesi kinisar sua ngikulepek kotere esi alokanisae a ngitunga a Akuj. Kinisa sua kotere eger lo irubakinitotor esi inaikinito nabo tonupito esaa lo kiboliare, toriabas alochan. Idodiunito ngakiro nguna daang atamar etenoono eriras a Akuj, erai eriras ngolo lo kitaanyuni esi Apolou a Akuj na erai ngesi kiboliare esi. Esubi Akuj na iyookini, itaanyuni ngesi lu kichanete esi ngichan, nabo kisiangari esi lu ichanasi, kisianga sua dang. Esubakini ngesi nguna na etakanunea Ekapolon Yesu anadis ka ngimalaikae keng lukationok, irukunete ka akim a asarae. Irirae ngesi lu engerito Akuj ka lu nyiwapito Ngakiro Naajokak a Ekapolon yok Yesu. Irirao kesi kinyasun nakajik, kipakarae kesi alongaren Ekapolon Yesu ka agogongu keng naationon, na ebunio ngesi Akolongit ngina kipuruut ngitunga keng daang nabo kidodiut daang lu enupito ngakiro a Akuj arimatoi anikeng. Irukete esi dang ka kesi kainyo inupa esi ngakiro naajokak na kilimokini sua esi. Ngakiro nguna ngesi kilipanakinea sua esi jiik. Kilipit sua Akuj kosi sodi kitemok eboyor kus loboyor lo kinyarakinit ngesi esi atamar kiboikinos. Kilipit ngesi kotere agogongu keng atamar kiyook na iitanito esi ani isaketa akisub naajokak nabo torumosi etich kus loa anupit. Alorot kangolo, ipuruunete esi ekiro a Ekapolon yok Yesu, nabo taanyuneta esi dang ekipur anikeng, kotere ajokis a Akuj yok ka na a Ekapolon Yesu Kiristo. Ani anakiro ana a abunere a Yesu Kiristo ka achunakin nakiriamiriamea ngoni ka ngesi aapei. Kemaimai ayong esi ngikaitotoi kang, atamar warasi nyiibatar ngitamen kus atipei kori nyiialolong na iirareta elimunio atamar anang Akolongit a Ekapolon Yesu. Erai ketamar kori kilimuni sua nguna nakidwarea kori nakitatamea kori atamar kigirit sua nabarua. Warasi itwaan idio nyikingal esi a eger a edio. Kainyo nyenangi Akolongit ngina mati mono kenang esal lo engerioto ngitunga Akuj sodi tatakanu Loaronon noi lo erai echakakina nakim nanyedunge. Itopegi ngesi ibore daang ni enyarito ngitunga akuj ka ibore daang ni ilipito ngitunga. Etamari ngesi apolot edwangit ngulu daang. Elomari tani kai a Akuj kiboikin sodi atamar arai ngesi Akuj. Ikwa nyitamunito esi a? Kalimokini kolong ayong esi nugu daang eringa kirukit. Nakaneni eyei ibore ni itangasi nugu asubakin tokona, iyenete tani esi ibore ngini. Ani robo enangi esaa lo itemokino, etakanuni Loaronon ngolo. Tani kikoni neni, loaronon lokolong adukit ngolo, esiak tokona akisub etich, nakaneni nyesubakinio na edikino esubakinio eringa lo itangasit asubakin nyikotara. Sodi tatakanu Loaronon ngolo, nakaneni na ebunio Ekapolon Yesu, eari ngesi a akienget ana itoruni nakituk keng sodi kinyasu ngesi a akwangis ana ebunio ngesi. Ebuni Loaronon Ngolo a apolou a Esiitan sodi tosub ngakitoodikinet nakailiilok ka nakatalarak na eraakasi ngaka alioko daang, ebuni ngesi kingala lu ebukoro a eger kadaang alo aronon. Ebukorosi kesi kainyo peachamunito kesi ngakiro na iteni tominakis sodi toyuunere. Kotere nguna, ereikini Akuj kesi ngakiro na ichwangakina sodi tonupeta kesi na eraakasi alioko. Ngakiro na esubakinosi kesi nugu, daang lu kolong aminakinete akisech towout akinup na iteni, irirao. Ngikaitotoi kang, kibuakinit sua Akuj alakara jiik kotere esi lu iminasi Ekapolon Yesu. Kainyo kiseuni esi Akuj napei anakisiakinet toyuunos a agogongu a Etau a Akuj. Kitiliwo Etau ngolo esi ngitunga keng lubekon kotere ni inupitotor esi ngakiro na iteni. Ngakiro nguna ngesi kinyaraa Akuj esi a Ngakiro a Naajokak ana kitatami sua esi. Kinyarae ngesi esi sodi toriamuneta esi dang apolou a Ekapolon yok Yesu Kiristo. Tokona bocha ngikaitotoi kosi, torubakisi itionikinito ka aneikina ngakiro na iteni na kolong kitatami sua esi, nguna kitatami ka nakigiri nabaruae dang. Kigasi tokona atamar Ekapolon yok Yesu Kiristo elope ka Akuj Apayok na kimina ngoni, sodi kitaanyu atitinyu nanyedaun ka akigieno nakationon anajokis keng, toliwor ngesi ilakarotor esi nabo kingarak esi topedoreta jiik akisub ka akiruor na ejokak. Eya daang ngikaitotoi kang, kilipakinae sua sodi torubakineta ngakiro a Akuj ekeanakin wadaang atipei nabo tachamuneta ngitunga erimasi loger lo kolong ekoneta neni anikus. Kilipa tani sodi kitoyuunea sua Akuj alotunga aluasechak luaronok, kainyo meere itwaan daang enupi ngakiro a Akuj. Nakaneni erai Ekapolon Yesu lo emunoi. Kingarakini ngesi esi kitoyuu Alokipe. Ani a Ekapolon Yesu, kigieno sua esi, nakaneni kiyeni atamar isubete esi nabo irubakinete isubete nakilimokini sua esi. Agasi atamar kitorik Ekapolon Yesu esi toyena lokojokon amina a Akuj ka anaikinit nakitaanyuni Kiristo. Ngikaitotoi kosi, kidungokinit esi a ekiro a Ekapolon yok Yesu Kiristo atamar totiakaros alokaitotoi kadaang alukalany alu nyiwapito ngakiro na kolong kichikakini sua kesi. Iyenete esi ngikulepek atamar ejoikinit esi iwapete ekitetemes kosi. Nakolong kirukitor sua ka esi, pekikalanyaka sua. Emam akimuj a itwaan kimuj sua nyetacha, pearai kipot atosuba etich kituburuna akwaar ka apaaran pekisaki tani ipei kus kichanakin kotere akingarakin sua. Pekisubi sua kongina ani kingolikinitor atamar nyitemokino kilimokini esi atamar kingarakis. Arai kikoni neni ani kisakea esi kiwapa ekitetemes kosi. Nakolong kirukitor sua ka esi, kilimonokini sua esi kona, “Itwaan cha daang ni ewouni akisub etich nyechamit imuji.” Kilimunit sua nguna kainyo kiira atamar eya ngitunga ngiche anikus lu ekalanyaka, emam ibore iche esubete kesi mati alomanakin ngakiro a ngitunga aluche. Alokiro a Ekapolon Yesu Kiristo, kidungokinit sua ngitunga ngulu nabo kichikichiki kibala kiberaketa nabo tosuba etich taanyuneta ibore ni eyareta. Nakaneni ani esi ngikaitotoi, warasi nyikibur akisub naajokak. Kori robo eyei itwaan ni nyiwapi ngakiro nakigirakinit sua esi anabarua kana? Ani kikoni neni, toyena ngesi sodi nyiiruko esi ka ngesi kirumeta ngesi ngileech. Nakaneni nyiitusubut ngesi emoit kus, ejoikinit ichikichikete loger alokaatokus. Agasi tokona atamar Ekapolon Yesu elope lo erai nikeng itorunit ekisil, kitaanyu esi ekisil jiik a erot kadaang, kiruko esi daang ka Ekapolon Yesu. Ayong Paulo egirak nugu a akan kang a ilope. Kemalae ayong esi. Egiranakini ayong ekiro kang losal a ngabaruae kang daang kona, ekigire kang logo. Kagatakinit esi daang ajokis a Ekapolon Yesu Kiristo. Ayong Paulo lo arai emeanara a Yesu Kiristo ani edungunitor Akuj Akayuunan yok ka Yesu Kiristo lo kigieno ngoni, egirunit abarua naga. Egirakinit Timoteo lo erai lokookang dir ananupit ngakiro a Akuj: Agasi atamar kitaanyu Akuj Apa ka Ekapolon yok Yesu Kiristo ajokis ka akisienut ta ekisil. Asaki ayong kiboikin iyong Epeso loger lo kolong kemaimaea ayong iyong nakolong alosio Makedonia. Itatamete ngitunga ngiche kaina ngakiro na eraakasi ngaka alioko, nakaneni ejoikinit iyong idungokini kesi atamar tojongoto akitatam. Tolimok kesi atamar tapalikis akiruor ngakiro napasiyek ka ngirora a ngapolon kech lu emam esal, kainyo erikunito ngakiro nguna eburas. Nyingarakinete ngakiro nguna ngitunga loger lo esakit Akuj, kona kiyenea aloger a anupit. Adungunit ayong ngakiro nugu sodi tatakanunea echami lo ebunit alotau alo ikiuna, ka ngitai luajokak ta anupit na erai aka iteni. Apalikis ngitunga ngiche ngakiro nugu nakaneni ebatarosi aliwor eneikina ekian lo abangaanut. Esakete kesi aliwor ngiketatamak a etal a Akuj nakaneni nyesakete akiyen ngakiro kech a ngikulepek kori tani ngakiro na iruorosi kesi ikileenikinit noi. Kiyeni atamar ejok etal erai kiwap loger lo esakitere kiwapae. Nakaneni ejoikinit ngoni kiyeni atamar nyedungunitoe ngitalio kotere ngitunga luajokak, pearai kotere lu esechito etal ka ngirukooi, kotere lu nyenupito ngakiro a Akuj ka ngikasechak, kotere lu emam edin ka lu iwapito eboyor loaronon, kotere lu earete taapakech kata itiokech, kotere lu eareenete ngitunga luche, edungunitoe etal kotere ngimalaae, ka ngikiliok lu iiununete ngikiliok luche ka ngitunga lu ekokoyanarete luche ka lu iruorotor luche ngakiro na a alioko ta ngulu esubete ibore idio ni ipakara anakiro a Akuj ana iteni. Eya ngakitatamet nguna nakiro naajokak nakedodikinio ayong atamar tolimo, Ngakiro Naajokak na eponito Anakuj ana epol. Abuakinit Yesu Kiristo Ekapolon yok alakara, ngesi ketaanyu ayong agogongu alotich kang. Abuakinit ngesi alakara ani kamunor ayong katoseu atosub etich keng, tani kolong sek kemenyarit ayong ngesi nabo atoboliar ka akiyeny. Nakaneni kesien Akuj ayong kainyo aringa ayong nyenupa ngakiro a Akuj nakaneni peayeni na asubi. Nakaneni keleleb ayong Ekapolon yok Yesu ajokis keng lokojokon noi sodi ketaanyu ayong anupit ka amina na erai ayok ani kimorikinor aapei ka Yesu Kiristo. Eraakasi ngakiro nugu na iteni, na echamit echamunio jik tonupae, abuni Yesu Kiristo nakwapin ayuun ngikasechak. Ayong arai ekasechan loaronon noi. Nakaneni kesieni ayong Akuj sodi kidodiunea Yesu Kiristo atitinyikinit keng daang anikang alo arai ekasechan loaronon noi, toliwor ekitetemes ani eya ngulu enupete monan ngakiro keng sodi taanyut akiyar nanyedaun. Arimatoi ka apolou nakajik, min ni eyei Ekapolon lo nyesaluni, lo nyetoani nabo nyetakani, lo erai ngesi bon erai Akuj! Aamen. Ikakoku Timoteo, kechikakinit ayong iyong etal lo loger a ngakiro ana kolong adwario kotere iyong. Kitiliwo ngakiro nguna ngiboro lujiet lu ijio iyong niajokon, nabo torubak irai ekanupan lo emam naaronok eya lotau. Angerete ngitunga ngiche akiwap ngakiro a ngitai kech sodi kinyasut anupit kech. Ngiche a ngitunga kangulu kesi Umenayo ka Alekisanda lu ainak ayong Esiitan, itatamete nguna kesi tapalikis ngimeny kech. Mono ekingaren, echikichika atamar tolimut ngichan, ka agata, ka akilip ka abuakinit Akuj alakara kotere ngitunga daang, ka ngikapolok ta daang lu eya napolosio, sodi eboyoto ngoni nikaalimon ka ekisil erai kikerit daang Akuj nabo ebooyete eboyor loajokon. Ejok ngakiro na ikote neni nabo italakarete Akuj Akayuunan yok, na esaki itwaan daang toyuunae sodi toyenunea ngakiro na iteni. Kainyo eyei Akuj apei, nabo eyei epei lo imorikinit Akuj ka ngitunga wapei, itwaan ngini ngesi Yesu Kiristo, ngesi ngolo alemun toliwor ekalachunan a ngitunga kadaang. Ngakiro nguna kesi edodiunete na etemokinor esaa atamar, asaki kolong Akuj ngitunga daang toyuunos. Ngesi kameunere ayong atoliwor emeanara ka eketataman a ngibukui alu nyerai Ngiyaudi, atamar atolimo ngakiro na anupit ka na iteni. Nyesudi ayong, eruoro ngakiro na iteni! Awadaang ani ilipitere, asaki ayong ngikiliok lu elemuna ani a Akuj kilipa ikearito ngakan kech, nyeengoa kori nyiiburata. Asaki ayong tani ngaberu toosokis enape ngiboro kech niajokon. Meere akitok ngitim kori akinap ngiriko a egolit kori a ngalului kori ngiworui lukaanikak lukaalak a ngaropiyae. Nakaneni ejoikinit esubete ngakiro naajokak loger a ngaberu ana enupito ngakiro a Akuj. Echamit ngaberu ililingete chek nabo kitiditeunos esaa lo itatamere. Nyachamakinit ayong aberu itatami kori epolokini ekile, echamit ngesi ililingi chek. Kainyo asubunio kolong Adam ekingaren ani ekisidi tosubunae Awa. Nakaneni meere kolong Adam engalao, erai aberu engalao sodi tosech etal a Akuj. Nakaneni eyuun aberu kotere ni idoununio ngide, erai kenaiki ngesi anupit ngakiro a Akuj ka amina ka abekoonut ta ateneanut. Iteni dir ngakiro nugu. Itwaan ni esaki araun ekarikon a ekanisa, iitanit etich loajokon noi. Ejoikinit ekarikon a ekanisa erai itwaan ni emam akisech, ejoikinit erikit aberu apei bon, lo itemit ngakiro, lo iapunit ngakiro nabo kitiriyanite na esubi. Ejoikinit ipeyeununi ngipeyok nawi keng, ejoikinit eyeni akitatam, nyeeliwor itwaan ni emina elewas kori ni ededeng, nakaneni toliwor itwaan nikaalimon nabo ni isilit, nyejoikinit eminakini ngaropiyae. Ejoikinit erai itwaan ni eyeni achoikin ngitunga a awi keng niajokon nabo kitatam ngide keng akiwap ngakiro keng a arimatoi kadaang. Kainyo ani pekeyeni itwaan achoikin ngitunga a awi keng, ikokini ngesi echoikini ngitunga a ekanisa a Akuj ai? Ejoikinit pearai itwaan ni been aringa enupi ngakiro a Akuj, sodi nyedakakin ekinis kirirae loger lo erirare Ekipe. Ejoikinit ngesi erai itwaan ni itojokito ngitunga lu nyenupito ngakiro a Akuj, sodi nyiitoron tolomakinea ngakiro naaronok elokitor ngesi Ekipe. Ejoikinit lu ingarakinito etich alokanisa dang eraakasi luajokak lu eteniyete, nyejoikinit emaase emuna lo epuritoe lokaalan kori iterekuyarito ngaropiyae. Echamit kesi iwapete ngakiro na iteni idodiunitae itojokito ngitai. Echamit kesi eroyo mono, sodi ani kesuba naajokak, kimiekinae tosuba etich. Ejoikinit ngaberu kech dang eraakasi na ejok eboyor nabo nyeliworosi ngakaswamak, ejoikinit eliworosi na itemito ngakiro nabo na emunoi anakiro kadaang. Ejoikinit lo ingarakinit etich alokanisa erikit aberu apei, nabo tochoik ngide keng ka ngitunga a awi keng niajokon. Ngikengarakinak etich a ekanisa lu esubete etich kech niajokon, eyenikinio, nabo dang, epedorete ekiruor eger lo enupitotor kesi ngakiro a Yesu Kiristo a atitinyu. Tani tokona kegirakinit ayong iyong abarua naga, keburakinit abunere ataanyun ka iyong atipei. Nakaneni ani katinenik ayong, ianyuni iyong anabarua kana eger lo echamit ngoni kibooyo alokai a Akuj, na erai ekanisa a Akuj ana eyari. Ikoni akai ngina apir ka ngateak na itoweito ngakiro na iteni. Emam itwaan epega atamar epolok noi ngakiro namunonoe a edin yok. Atakanuni erai itwaan, kidodiu Etau a Akuj atamar erai lo etenoono, sodi taanyungasi ngimalaikae. Kitatamae ngibukui ngakiro keng, tonupa ngitunga ngakiro keng anakwapin kadaang, ani erumor yaarae nadis. Elimunit Etau a Akuj ngakiro na ileerete atamar epalikinete ngitunga ngiche anupit ngakiro a Akuj ngirwa lu esal. Enupete ngakiro a alioko nabo kiwapa ngakitatamet a ngipean. Ngikaliokok lukengalak kesi epetarito ngakitatamet nguna, ikote kesi lu etoakito ngitai, esibit imaditae a asuat anakariran. Itatamete ngitunga lu ikote ngulu atamar erono akuutar, ka akinyam ngamuja ngache. Nakaneni asubi kolong Akuj ngamuja nguna esaki tanyamae, arumoret a akilip ebuakinitae Akuj alakara. Lu ikwaanakinete neni kesi ngikanupak lu ayan ngakiro na iteni. Ejok ibore daang ni asub Akuj, emam ibore ni erai ingerot, nakaneni ejoikinit ibore daang idiaunio ilipitae ka abuakinit Akuj alakara, kainyo Akiroit a Akuj ka akilip itojoki ibore ngini ani a Akuj. Ani kilimok iyong ngikaitotoi ngakiro nugu, iliwor iyong ekasuban etich a Yesu Kiristo loajokon, erai irubakinit iyong akitatam ngakiro a Akuj na iteni na iwapit iyong. Nakaneni tonger ngakiro napasiek na nyerai ngaka edin, na nyejoikinit isisao. Tanaik akiboi eboyor lo iminar Akuj. Ejok noi akitorwaanar akwaan, nakaneni arubakin itatama ngakiro a Akuj, ejok noi a eger kadaang, kainyo kitaanyuni akiyar ngirwa lu tokona lu ka lumonan. Eraakasi ngakiro nugu na iteni dir na echamit echamunio noi tonupae. Kiricha ngoni kisubi etich lokojokon kainyo kigienokino ngoni Akuj na eyari, na erai Akayuunan kadaang, tarai noi lu enupito ngakiro a Akuj. Todungok kesi ngakiro nugu kitatam. Wara itwaan nyikimenya iyong ani iditia, nakaneni toliwor ekitetemes alokanupak kotere ekiruor kon, ka elote, ka amina, ka anupit ta akikiuna. Totionik akisomanakin ngitunga ngakiro a Akuj ka akisuruor ta akitatam, tanang na abunio ayong. Wara nyiipasak ainakinet a Etau a Akuj na eyei nikon, nakolong kitaanyunio iyong na eruorotor ngikadwarak a Akuj sodi kidokokis ngikasukou a ekanisa ngakan kech nakou kon. Tosubeene ngitichisio lugu sodi totionik iyong kesi, sodi kingolikineta daang eger lo isubeta esi etich. Tochoikin iyong ilope, tochoik tani ngakitatamet kon. Torubak jiik isubi ngakiro nugu kainyo kikok iyong neni, iyuun iyong elope nabo toyuu tani lu epupete ngakiro kon. Wara nyiikilak ekasukout, nakaneni kimaima ngesi loger ka apakon. Kisuruor lusorok loger a ngikaitotoi kon, kisuruor ngakimak loger kata itio, ani ngapesur loger a ngakaitotoi kon, erai ikiuna anakiro kadaang. Kidodiu arimatoi anapuseru ana ekokianito. Nakaneni ani keyei apuserut ngide kori ngide a ngide keng, ejoikinit kesi mono itatamasi achoikin ngitunga a awi kech sodi kotere erot ngolo, tatachakis na kolong asubeta kesi ngikauriak kech kata apaakech kata ataa kech, kainyo nguna kesi italakarete Akuj. Nakaneni apuserut na ekokianit na emam itwaan echoikinit, egienokin Akuj nakaneni erubakinit ilipit nabo elimokinit Akuj atamar kengarak ngesi akwaar ka apaaran. Nakaneni apuserut na emerakin, ekok ngesi nakatoan, tani keringa eyari. Kidesik kesi ngakiro nugu sodi tongopea tani itwaan ipei ni itoroni kesi. Nakaneni ani pekechoiki itwaan ngiyenet keng, tarai cha noi ngitunga lua awi keng, anger ngesi anupit ngakiro a Akuj nakaneni erono noi idwangit tani itwaan ni nyerai ekanupan. Wara apuserut na eringa ngikaru keng nyipororo ngitomwon-kapei igirakini ekiro keng lorora a ngapuseru. Nabo dang, toliwor na kolong eusitae akuuset apei. Nabo tarai na ipuroi atamar esubi naajokak, na kolong etanuni ngide keng niajokon, na epeyeununi ngipeyok nawi keng, na asubanakinea ngikiristoi luche ngitichisio lua akitiditeuna, na engaranakini ngitunga lu echanasi nabo amina akisub naajokak. Nakaneni wara nyiigirak ngirora a ngapuseru anasorok, kainyo na ekulaunea etereku a ngawat kech kiburak kesi akiuto nabo, engerete akiwap Kiristo, nakaneni eliworosi ngakasechak ani ichwangakineta akichikakinet na kolong sek echikakinete kesi ngesi ekingaren. Eliworosi kesi tani nakalany na irimito ngawiyei a ngitunga, meere kongina bon, eliworosi ngakaswamak na elomanakinete ngakiro a ngitunga aluche, kiruoro nanyejoikinit kesi iruorosi. Nakaneni kajoikinit ayong iusio ngapuseru nasorok toureta ngide ka achoikin ngiwiyei kech, tongopikinea ngimoe yok naaronok kiruorotor ngoni. Kainyo abongosi ngapuseru ngache akiwapit ngakiro a Esiitan. Ani keyei akiristoit ngayenet na eraakasi ngapuseru, ejoikinit ngesi echoikini kesi nyeliworotor ngichan ngulu ngika ekanisa, sodi tochoikineta ngitunga a ekanisa ngapuseru na ekokianito. Ngikasukou a ekanisa lu esubete etich loajokon noi, ejoikinit etachio ngaropiyae nakaalak na idwangito na aluche, tarai noi lu esubete etich loationon analimonor akiroit ka akitatam. Kainyo igiritae nagiran kona, “Wara nyiitenger emong lo ichiakachiakae ngimomwa adak”, nabo “Ejoikinit ekasuban etich etachio kotere etich keng.” Wara nyiinup ngakiro na ititaare ekasukout mati keya ngikaanyunak ngiarei kori ngikaalak. Kikilak lu esecheenete alongaren ngitunga daang sodi toemeta luche. Kadungokinit ayong iyong ngakiro nugu kechikichiki alongaren Akuj ka Yesu Kiristo ta ngimalaikae lu italeuno atamar kiwap ngakiro nugu wara nyiipasak tani apei kori tominak itwaan iche anibore kadaang ani isubi. Nyiimatakin akidokokin ngakan nakou a itwaan atipei erai isaki tosub etich a Ekapolon Yesu. Wara nyiiloma nasechesea a ngitunga aluche, kiboikin irai itwaan ni ikiuna. Wara nyiimat ngakipi make, nakaneni tamaseene emuna lodiochichi kotere akook kon ka ni idekanakinor iyong jiik. Ileerete ngasechesea a ngitunga a ngiche, erikito kesi loriras, nakaneni etakanunete ngasechesea a ngiche ekisidi. Loger lopei ngolo ileerete ngakiro naajokak, tani nanyileerete, emam kona idayo. Ejoikinit ngikedalak daang ekerete ngikapolok kech sodi tongop ibore ni imenyeta ngitunga Akuj ka ngakitatamet yok. Nyejoikinit ngikedalak lu eraakasi ngikapolok kech ngikiristoi imenyarete kesi ani eraakatar ngikapolok kech ngikaitotoi kech. Erai ejoikinit kesi esubete etich kech lokojokon noi kainyo eraakasi lu ingarakinit etich ngolo ngikanupak lu eminasi kesi. Ejoikinit esi ilimorete nabo kitatama ngakiro nugu. Itwaan cha daang ni itatami ngakiro ngache ngagelayek nabo tongerite ngakiro na iteni a Ekapolon Yesu Kiristo ka ngakitatamet a edin yok, adakakin ekinis nakaneni emam ibore eyeni. Aliwor ngesi itwaan ni emina apega ka eburas a ngakiro anapasiek, nakaneni irokunete nguna etereku, angolopa, ekiyeny ta ngitamen lu etongunere ngakiro naaronok, ka eburas lo nyesaluni lo itorunit lotunga lu agealaketa ngitamen nabo nyeringa enupito ngakiro na iteni. Ebalasi kesi kori eraakasi ngakiro a Akuj nabaret. Iteni, itiliwori edin itwaan ekabaran erai kechamu ngesi atamar ketemokino ibore ni atingit. Kainyo emam kolong ibore kiyauni ngoni nakwapin nugu, nabo emam ibore kilemari anakwapin kanu. Tokona bocha, ani keyei ngoni akimuj ka ngiworui, ejoikinit ngulu kitemokinosi. Nakaneni ngulu esakete toliworos ngikabarak, elomakinete nakiningioto ka etereku loaronon lokaalan lo elokitor kesi Ekipe. Etikiyorete kesi ngakiro nguna kinyasut. Kainyo amina ngaropiyae noi ngesi irokunit ngakiro naaronok daang. Kona eburakinitor ngiche lokojokon aanyun ngaropiyae, kibataros kesi ananupit ngakiro a Akuj sodi kituupa ngitai kech ngichan lukaalak isialolongete kesi. Nakaneni ani iyong lo irai itwaan a Akuj, tochoite ilomari nakiro nguna. Kirichak aliwor lo itenoono, lo imina Akuj, lo inupit ngakiro a Akuj, lo irichit amina, anaikinit ta apatanu. Kirichakin lokojokon anakerit ana enupitere ngakiro a Akuj sodi taanyunea akiyar nanyedaun. Kainyo arai kolong akiyar ngina ngesi kinyarakinit iyong Akuj na kolong ilimunio iyong atamar inup Akuj dir alongaren ngikaanyunak ngikaalak. Alongaren Akuj na itaanyuni ibore daang akiyar ka ngaren Yesu Kiristo lo kolong alimuni ngakiro na iteni alongaren Pontio Pilato, kadungokinit ayong iyong atamar kiwap ngakiro nakilimokinitae nyiitoron tanang Akolongit na etakanunea Ekapolon yok Yesu Kiristo. Itatakanuuni Akuj ngesi esaa lo itemokino, ngesi lo erai bon Ekaweikinan lo epiaritae, Ekarikon lo epolot noi idwangit daang ta Ekapolon lo epolot noi idwangit daang. Ngesi bon nyetoanene, ibooyi anakicha ana emam itwaan eapiyari. Emam itwaan engolik ngesi, emam itwaan ingolikini ngesi jik. Emini nikeng arimatoi ka apolou nakajik! Aamen. Todungok ngitunga lu ebarito anakwap atamar nyiinisakinos, nyiigienokinos ibore ninyerubi ikoni ebari, nakaneni kigienokinos Akuj nakiinakini ngoni ibore daang a alalau atalakarotor ngoni. Ejoikinit kesi esubete naajokak, kirichakis ngitichisio luajokak noi, toliworos lukapatanak lu emorete ka luche ngiboro kech. Kotere eger ngolo iweyete kesi ebari lo eliworo ngesi monan eweeta kesi nikaagongon. Sodi taanyuneta kesi akiyar na erai aka iteni. Timoteo, tochoik nguna kichikakin iyong. Tapalik ngakiro naaronok ka eburas lo a abaangu lo isudete ngitunga ngiche enyarito “Aosou”. Kainyo iwogasi ngiche ebaasi kianyu aosou ngina, nakaneni kotere nguna, apalikis kesi anupit ngakiro a Akuj. Kagatakinit esi daang ajokis a Akuj! Ayong Paulo lo kaseuni Akuj atoliwor emeanara a Yesu Kiristo ngesi egirunit abarua naga. Kaseunio ayong atolimo ngakiro a akiyar ana kolong kichikakinio ngoni ani kimorikinor aapei ka Yesu Kiristo. Kegirakinit ayong iyong lokookang lominat, Timoteo. Agasi atamar kitaanyu Akuj Apa ka Ekapolon yok Yesu Kiristo ajokis ka ngisien ta ekisil. Abuakinit ayong Akuj alakara na erai ngesi asubakinit ayong etich a etau aloajokon, loger lokolong kata apaayok. Abuakinit ngesi alakara esaa daang lo ketamunea ayong esi elipit nakwaare ka naparan. Etamunit ayong ngakiyo kus, nakaneni kemuit ayong aanyun ka esi noi, sodi atalakaror ayong lokojokon noi. Etamunit ayong atamar inupit iyong dir ngakiro a Akuj, anupit na ikoni nakolong ka ataa kon Lois, na ayei tani nia itiokon Eunike. Ayeni ayong atamar eyei tani anupit ngina nikon. Kotere nguna, kesitamunit iyong atamar torubak itiriraunit ainakinet a Etau a Akuj nakitaanyuni iyong Akuj na edokokinio ayong ngakan kang nakou kon. Kainyo nyikitukuriani ngoni Etau lo kitaanyu Akuj, pearai kilelebi ngoni Etau keng agogongu ka amina ta akiapunit ngakiro. Wara robo nyikiruma ngileech akiruoro ngakiro a Ekapolon yok Yesu, kori nyikiruma ngileech kotere ayong lokaenitae kotere Kiristo. Erai ejoikinit iyong dang kiboliare kotere Ngakiro Naajokak, itemem ka agogongu nakitaanyuni Akuj. Kiyuuni ngesi ngoni kitanyarau atarata ngitunga keng a elope, meere kotere na kisub ngoni, erai kotere echami keng a elope ka ajokis. Kitaanyuni ngesi ngoni ajokis keng ani a Yesu Kiristo kolong eringa ngakwapin nyesubuna, nakaneni edodiun tokona aniyok na abunio Ekayuunan yok Yesu Kiristo. Etasalu ngesi agogongu a akitu sodi kotere ngakiro naajokak, kidodiu ngesi akiyar na nyetoakere. Kaseu ayong Akuj atolimo Ngakiro Naajokak arai emeanara ka eketataman, nakaneni erai ngakiro nguna ngesi anaikinitor ayong ngichan lu daang. Nakaneni aringa ayong arai lo egieno noi kainyo ayeni ayong lo amuno nabo ayeni dir atamar epedori ngesi achoikin ayong niajokon tanang Akolongit ngina kasekinit ngesi ayong. Totionik noi ngakiro na iteni nakolong ketatami ayong iyong, toliworos ekitetemes lo iwapit iyong, nabo kirichak anupit ka amina na erai ayok ani kimorikinor aapei ka Yesu Kiristo. Kotere agogongu a Etau a Akuj alo ibooyi aniyok totionik ngakiro naajokak kichikakin iyong. Iyeni iyong atamar kaisikis ayong ngitunga daang anakwap a Asia, kaisikis tani Pugelo ka Erimogene. Agasi atamar kisieni Akuj ngitunga a awi a Onesiporo, kainyo ketalakanari ngesi ayong ngirwa ngikaalak. Nyiruma ngesi ngileech nakaenitere ayong alojela, nakaneni napei anangunea ngesi Roma, tolomak akisak ayong tanang nakaanyunea. Agasi ayong atamar kisieni ngesi Akuj Akolongit ngina! Nabo iyeni dir nakolong kasubea ngesi ayong na ayakar Epeso. Ani eliwor iyong lokookang, totioner togogonger anajokis ana erai ayok ani kimorikinor aapei ka Yesu Kiristo. Ani ngakiro nakolong iirari iyong anikang alongaren ngikaanyunak ngikaalak, kichikak nguna ngitunga lu eyenikinitae lu epedorete akitatam ngitunga luche dang. Tacham kitoboliare iyong dang loger a asiger ana iwapit dir ngakiro a Yesu Kiristo. Asiger na eji niajokon, esaki talakar ekarikon a ajore keng, nyelomakini nabo ngesi akisak ngakiro ngache kimorik ka na ejie. Tani itwaan ni ebolosi ka luche ekerete, nyeanyuni ebachit mati kiwap ngakiro na elimokinitae. Eketan lo asub etich lokationon, ejoikinit eanyuni ngalemet na ekingaren. Kitamana na alimu ayong kainyo kiteyeni iyong Ekapolon Yesu nguna daang. Kitamu Yesu Kiristo lo eteyarunio. Arai ngesi ales a Daudi, loger lo itatamere Anakiro Anaajokak alimorit ayong. Kotere ni etatamea ayong Ngakiro Naajokak, aanyu ayong ngichan nabo kaenitae tani loger a erukoot. Nakaneni emam itwaan eenit akiroit a Akuj. Nakaneni anaikinit ayong ngakiro daang kotere ngitunga a Akuj luseuna, sodi taanyuneta kesi dang ayuuno na ebunit ani a Yesu Kiristo nabo eyaunit apolou na nyedaun. Eraakasi ngakiro nugu na iteni dir, “Ani kitoaka ngoni ka ngesi, kiyari tani ngoni ka ngesi. Ani kirubak ngoni kinaikinit, kiliwor tani ngoni ngikapolok ka ngesi aapei. Ani kinger ngoni ngesi, kingeri ngesi dang ngoni. Ani pekirai ngoni lu kimunoi, erubakini ngesi erai lo emunoi, kainyo nyepedori ngesi amoda bon.” Kisitam ngitunga kon ngakiro nugu, sodi kikilak kesi idesikinit alongaren Akuj atamar tapalikis angolopa. Nyejok echale nakaneni inyasuni tani ngitunga lu epupete. Tasak noi aliwor itwaan niajokon alongaren Akuj, irai ekasuban etich lo nyirumito ngileech kotere etich keng, lo itatami dir ngakiro a Akuj na iteni iyookino. Tapalik ekian loaronon lo erai eka a abaangu, lo echadari ngitunga nialonan ani a Akuj. Ikote ngakitatamet nguna ajeme na inyanyae akiring. Ngitunga ngiarei lu itatamete ngakiro na ikote nguna ngesi Umenayo ka Pileto. Aisikis kesi erot loa ngakiro ana iteni alomakis akikurukur anupit a ngikanupak a ngiche ebaasi kiyaru kolong ngoni arumor. Nakaneni aweet na itemokino nakolong adupakini Akuj, ewei nyiukukokin, kidiama keng igiritae ngakiro nugu, “Eyeni Ekapolon Yesu lu eraakasi ngikeng” nabo, “Itwaan cha daang ni ebala arai ngesi ika Ekapolon Yesu, ejoikinit epalikini akisub naaronok.” Kiyeni ngoni atamar tooma kai naapolon eya ngatubwae nachukul ka ngiboro lugelagelae, eraakasi ngiche ngika a akwangat ana elalak ngaropiyae taraakas ngiche ngika egolit, eraakasi ngiche ngika ngakito taraakas ngiche esubunitae alochoto, eraakasi ngiche ngika a etich ajokon taraakas ngiche ngika a etich alopasit. Ani kitoseg itwaan anakiro a naaronok kanguna kadaang, ikokini iborosit ni esubere ngitichisio luajokak, kainyo erai ngesi lo italeuno, lo ejok ani Ekapolon keng, esakit atamar katosubere etich loajokon daang. Totiak etereku a esorokane sodi kirichu ngakiro na eteniyete na a anupit, na a amina ta na a ekisil, imorikina aapei ka lu enyarito Ekapolon Yesu a ngitai alu ikiuna esakete atamar kingarak kesi. Nakaneni tonger ngakiro na a abaangu napasiek, iyeni iyong atamar erikito kesi eburas. Nyejoikinit ekasuban etich a Ekapolon iburae. Ejoikinit ngesi epataner alotunga kadaang, eketataman loajokon lo etitinyikinit ngakiro, lo epatana na eriyonokinea lu itopegete ngesi, kainyo epedori Akuj akitaanyun kesi alolom na elungeta ngasechesea kech toyenut ngakiro na iteni. Nakaneni eriangunete kesi tobuchunos alolokit a Ekipe, alo kolong adakakin kesi kisiwap ngakiro na achamit ngesi. Kitamutu atamar epete ngakiro nakationok ngirwa lu a esal. Eminakinosi ngitunga make, eminakinete ngaropiyae, iwogasi ka akinisakin, imenyete Akuj, nyekerete ngikauriak kech, nyidodiunete alakara nabo nyikiunosi a naaronok. Epete ngitunga lu nyeminasi luche, lu emam ngisien, ngikaswamak, lu nyitemito ngakiro nabo todedeng, eremokinosi ibore daang ni ejok. Eliworosi ngikamodeanak, luaronok, kisisaka noi. Eminakinosi amera akidwang amina Akuj. Esubunete kesi lu eminasi Akuj, nakaneni engerete agogongu keng. Tochoik ngitunga lu ikote ngulu. Eloloto ngiche kech anakais a ngitunga sodi kirumuunut ngaberu nakabangaanak na ekuruworito ngasechesea nabo torikite etereku a ngawat kech lokaalan, esakete ngaberu nguna jiik akiyen ngakiro daang nakaneni nyepedorete akiyen ngakiro na iteni. Loger lokolong etopegeta Yane ka Yambire Musa, epegasi ngitunga lu dang ngakiro na iteni, ngitunga lu enyasun ngatameta nabo apalikis anupit ngakiro a Akuj. Nakaneni emam ni enangete kesi kainyo eyenuni itwaan daang atamar ebangaaka kesi noi. Ekokinete kolong ngakiro neni ani a Yane ka Yambire. Nakaneni iwap iyong ngakitatamet kang, elote kang ka eger lo asubea ayong ngakiro daang. Iseme iyong eger lo anupitor ayong ngakiro a Akuj, atitinyikinit kang, amina kang ta anaikinit kang, aboliaro kang ka ngichan kang. Iyenete esi daang na asubakin anikang alo Antiok ka Ikonio ta Lusitura ta aboliaro naaronon na anaikini ayong! Nakaneni katoyuu ayong Ekapolon ani eya kesi daang. Itwaan daang ni esaki akiboi eboyor lo eminar Akuj imorikina ka Yesu Kiristo aapei, eboliare. Nakaneni erubakinete ngitunga luaronok ka lukamodeanak aroner noi, ingalaate luche nabo kingalas make. Nakaneni ani eliwor iyong torubak iwapit ngakiro na iteni nakolong kitatamio iyong nabo inupit lokojokon noi. Iyeni iyong atamar ngiketatamak kon kesi ta ngae, nabo iyeni iyong atamar napei kolong irai iyong ikoku, iyeni iyong ngagiran na italeuno a Akuj na apedorete akitaanyun iyong aosou na eyauni ayuuno ani inupea ngakiro a Yesu Kiristo. Itojokit Akuj ngagiran daang nakaneni itemokino itatamere ngakiro na iteni, akikilakin naaronok, ka arionokin na ichwangakina ta akitatam eger loajokon lo ejoikinit ibooyere. Sodi toliworor itwaan ni esubi etich a Akuj ni esubakina eriyan, tosubea etich loajokon daang. Kalimokinit nugu alongaren Akuj ka Yesu Kiristo lo irirae lu eyarete ka lukatoak, ani nabo kona ebunio ngesi aliwor Ekapolon, kadungokinit iyong atamar kitatam ngakiro a Akuj. Toneikin akitatam (arai kitemokino esaa kori pekitemokino), ka akitunup, ka akikilakin ta akitalakar arai itatami iyong ititinyikinit daang. Enangi ngirwa lu nyepupokineta ngitunga ngakiro na eraakasi ngaka iteni, nakaneni eliworosi kesi ngitunga lu ipiyete ngaki, taanyuneta ngiketatamak lukaalak lu isuruorete kesi ngakiro na itemem ka etereku kech. Engerete kesi akipup ngakiro na iteni sodi kiwapa ngakiro na alioko. Nakaneni ejoikinit iyong ichoikina anakiro kadaang, tanaik ngichan, tosub etich loa eketataman Ngakiro Naajokak, sodi tosub etich kon daang irai ekasuban etich a Akuj. Ani eliwor ayong, anang esaa lo ketiliworere ariwo, anang tokona esaa lo atoanea ayong. Erichakin ayong niajokon anabolo, emitak ayong akerit, nabo erichu anupit ngakiro a Akuj. Nakaneni kedaritere tokona ayong ebachit lo ipiunere naaronok lo einanakinio itwaan ni etenoono, ebachit lo kainakini ayong Ekapolon Yesu lo erai Ekeriran lo etenoono, Akolongit ngina, meere ayong dang bon, nakaneni einakini daang lu eminasi ngesi, idarito atamar tatakanu. Kikirikirakin abunere nikang atipei. Aminaki Demas ngakiro a ngakwapin kanu kaisiki ayong alo Tesalonike. Alot Kiresite Galatia nabo alot Tito Dalimatia. Luka bon kirukit ka ayong. Taanyu Mariko kirukut ka iyong, kainyo epedori ngesi akingarakin ayong alotich. Amea ayong Tukiko alot Epeso. Ani ibuni inunae eworu lo alokidiama lokolong aisikini ayong alo Turoa ani eyei Karipo, inunae tani ngakitabea dang, tarai cha noi na esubitae a amuny. Kasubea ayong Alekisanda loketiakan ngasua ngakiro naaronok noi, esubea ngesi Ekapolon na itemem ka nakasubea ngesi ayong. Tochoik tani iyong ngesi lokojokon noi, kainyo ngesi kolong etepegi ngakiro kosi a adedengu. Emam itwaan kaiki ayong nakolong a ekingaren alimunio ayong ngakiro na ayuunor, apot daang katoisikis ayong. Agasi atamar nyiimaru Akuj atamar esechito kesi kotere ngakiro nguna! Nakaneni kirukit ayong ka Ekapolon Yesu ketogogong, sodi etatam ayong Ngakiro Naajokak daang kiirareta ngibukui lu nyerai Ngiyaudi, sodi katoyuun ayong nyakaarere. Kayuuni Ekapolon Yesu ayong anakiro a naaronok kadaang, kayaa niajokon Napolou keng na a adis. Emini ekipur nikeng nakajik! Aamen. Kimalakinae Prisila ka Akula ta ngitunga a awi a Onesiporo. Edong Erasito Korinto, atoisik ayong Turopimo alo Mileto ani adeakar. Kikirikirakin abunere eringa ngirwa lu a akatorot nyenanga. Kimalaate iyong Ebulo ka Pudes ka Lino ta Kilaudia, kimalaate tani ngikaitotoi luche kiristoi daang. Min Ekapolon Yesu lotau kon. Kagatakinit esi daang ajokis. Ayong Paulo lo arai ekasuban etich a Akuj, ka emeanara a Yesu Kiristo ngesi egirunit abarua naga. Kaseunio ayong engarak ngitunga lu aseuni Akuj tonupeta lokojokon nabo etoyen kesi ngakiro na iteni ka eger lo itemokino ngitunga a Akuj ibooyete. Ngakiro nguna kesi igienore akiyar nanyedaun. Akuj ngina nyisudeene, ngesi kolong kichikakini ngoni akiyar naga a angorot eringa akwap nyesubakina. Kidodiu ngesi ngakiro nguna anakiroit keng na etemokinor esaa lo kolong asakit ngesi. Kareikinio ayong ngakiro nguna, nakaneni etatami ayong ani kadungokinea Akuj Akayuunan yok. Egirakinit ayong Tito lo erai lokookang dir anakiro a Akuj ana kinupit ngoni daang. Agasi atamar kitaanyu Akuj Apa ka Yesu Kiristo Ekayuunan yok ajokis ka ekisil. Kaisikini ayong iyong alo Kirete, tosubak ngakiro daang na aroko nyesubakina, nabo toseu ngikasukou a ngikanisae alorerea kadaang loger lo kolong kalimokinitor. Ejoikinit ekasukout a ekanisa peitoronitae, ejoikinit erikit aberu apei bon. Ejoikinit ngide keng eraakasi lu enupito ngakiro a Akuj nabo nyeeliworosi kesi lua nginyas kori lu nyepupete ngakiro. Kona epolokinitor ekarikon a ekanisa etich a Akuj, nyejoikinit ngesi itoronitae. Nyejoikinit ngesi erai itwaan nikewogan kori ni edesem etau, kori nikelewan kori nikaadengan, kori ni iterekuyarito ngaropiyae. Ejoikinit ngesi erai itwaan ni ipeyoununi ngipeyok anawi, nabo tarai itwaan ni emina ngakiro naajokak. Ejoikinit erai itwaan ni iapunit ngakiro, ka ni etenoono, ta ni italeuno tochoikinite ngakiro. Ejoikinit ngesi etionikini jiik anupit ngakiro a Akuj na iteni loger lo itatamere. Aloger kangolo, epedori ngesi akitititiny luche a akitatamet ana iteni ani nabo dang kisileereu ngakiro na ichwangakinito lu epegasi ngakiro a Akuj. Kainyo eyakasi ngikaalak lu engerito Akuj, ngitunga lu iruorosi ngakiro napasiek, kingalaate ngitunga, tarai cha noi lu areeunosi alodin a Ngiyaudi. Ejoikina kesi isililingio, kainyo echana kesi ngitunga a ngawiyei anakaalak ani itatameta ngakiro na nyejoikinit itatamete, esubete kesi kongina ani esaketa aanyun ngaropiyae na a ngileech. Itwaan a Kirete elope niarai epei a ngikadwarak kech, ngesi alimuni ngakiro na iteni tama, “Eliokoko ngitunga a Kirete ngipean, ikote ngitieng luaronok nabo dang, edakaka takalanyaka.” Eraakasi ngakiro nguna iteni. Ejoikinit iyong ikilakini kesi lokojokon toliworotor kesi ngikanupak luajokak lu nyeneikina anupit ngakiro napasiek na isisaate Ngiyaudi ka ngitalio a ngitunga alu angero ngakiro na iteni. Ikiuna ibore daang alotunga alu ikiuna, nakaneni emam ibore ikiuna alotunga alu eroko alu nyenupito ngakiro a Akuj, kainyo aroketa kolong ngitamen kech ka ngitai. Iwogasi ngitunga ngulu atamar kiyeni ngakiro a Akuj, nakaneni idodiunit eboyor kech atamar nyeyenete. Kikadakinete kesi nabo nyepupete ngakiro, nyepedorete kesi asubakin ibore niajokon tani wadiochichi. Nakaneni ejoikinit iyong itatami ngakiro na ejokak. Tolimok ngikasukou toliworos lu etikokinito ngakiro, lukoosok nabo kiapunito ngakiro. Toliworos lu itemokino dir ananupit kech, ka amina ta anaikinit. Aloger alopei kangolo, tolimok ngakimak kibooyoto loger a ngaberu ana arimatoi. Nyeeliworosi ngakaswamak kori ngakamatak epurot. Ejoikinit itatamete ngakiro na ejokak, sodi kitatameta ngaberu nasorok aminakin ngikiliok kech ka ngide, toliworos na iapunito ngakiro, kikiuna, ngaberu nakeberak na epupete ngakiro a ngikiliok kech, sodi tongopea itwaan iruoror ngakiro a Akuj niaronon. Aloger alopei kangolo, kichikichik lusapa toliworos lu iapunito ngakiro. Anakiro kadaang, toliwor iyong elope ekitetemes a eboyor a loajokon. Toliwor lo itenoono nabo totenooko ngakiro na itatami iyong. Kiruor ngakiro naajokak na emam aratanu, kirumeta ngimoe kon ngileech ani engopeta ngakiro naaronok kiruorotor ngoni. Ejoikinit ngikedalak iwapete ngakiro a ngikapolok kech sodi kitalakasi kesi anakiro kadaang. Nyejoikinit kesi elunyanakinete kesi ngakiro kori tokokoa ngiboro kech. Erai ejoikinit kesi idodiunete atamar ejokak kesi jiik nabo emunoi, sodi kipuruunere ngakitatamet a Akuj a Akayuunan yok anibore kadaang ani esubete kesi. Kainyo edodiu Akuj ajokis keng na eyuunere ngitunga daang. Kitatami ajokis ngina ngoni atamar atapalikisi ekibooye loaronon ka etereku a akwap, sodi eyaputu ngakiro, erichunos nabo eboikinos eboyor lo kinupitor Akuj anakwap, kiboi kidarit akolongit naajokon ngina nakigieno ngoni, akolongit na etakanunea akwangis a Ekapolon Akuj yok ka Ekayuunan Yesu Kiristo. Alemun kolong ngesi kotere ngoni sodi kitoyuu anaronis kadaang, nabo kitiliwo ngitunga lukikiuna lu kirai ngikeng make, nabo kiitanit akisub naajokak. Kitatam ngakiro nugu ichikichiki ngitunga kikilakinite a apolou kadaang. Wara itwaan tani ipei nyikimenya iyong. Kisitam ngitunga kiwapa ngakiro a ngikarikok ka ngikapolok, tokera kesi nabo tasaka akisub etich loajokon daang. Tolimok kesi atamar nyiruorotor itwaan tani ipei ngakiro naaronok, nakaneni ejoikinit isilito nabo tapataka. Ejoikinit jiik eraakasi ngitunga lu elilim alotunga kadaang. Kainyo kolong ngoni dang kibangaaka, pekipupi ngakiro, nabo kibatara. Kineikina kolong ngoni dang arorokanut nabo kimera a ngikitetio kadaang. Kiboi ngoni kirai ngitunga lu a anyunyura ka etereku, kiremokino ngitunga ngoni nabo atoremokino ngoni kesi. Nakaneni na atakanunea ajokis ka amina a Akuj a Akayuunan yok, kitoyuu ngesi ngoni. Meere kotere ngakiro ngache naajokak nakisubi ngoni ngikulepek, nakaneni erai ngisien keng a ilope ngesi kiyuunea ngesi ngoni, kotere Etau a Akuj lokitaanyunit ngoni akidouno nakitetet ka eboyor lokitetet ani kilotarea ngoni. Kilelebi ngoni Akuj Etau keng noi ani a Yesu Kiristo Ekayuunan yok, sodi kotere ajokis keng atachamunotor ngoni ka Akuj ataanyuneta akiyar nanyedaun nakigieno ngoni. Eraakasi ngakiro nugu na iteni. Asaki ayong iyong toneikin ekiruor ngakiro nugu, sodi topedoreta ngitunga lu enupito Akuj tominakis akisub ngakiro naajokak na ingarakinete itwaan daang. Nakaneni totiak apega na a abaangu, ka ekian ngakiro a ngirora alukaalak kata apaa yok ka eburas, ta angolopa kotere ngakiro a etal. Eraakasi ngakiro nguna napasiek na nyikingarakinete. Kikilak itwaan ni irokunit ekurikur akikilakinet na ekingaren ka na a ngaarei. Ani erumor, wara nabo nyiibongok ngesi. Iyeni iyong atamar itwaan ni ikoni neni erono nabo erai ekasechan, nakaneni eyeni ngesi dang ilope atamar asubi naaronok. Ani kameu ayong Aritemas ka Tukiko nikon, kikirikiruun bu kitaanyu alo Nikopoli, kainyo asaki ayong akiboi kaina ngirwa lua akatorot. Kirichakin akingarakin eketataman a etal Senas ka Apolo analotoru kech. Ani keyei ibore ni ichanasi, ejoikinit iyong isakakini. Ejoikinit ngitunga yok itatamasi akisub ngitichisio luajokak, taanyuneta ngiboro lu iitanitae, meere akiboi pas. Kimalaate iyong ngitunga daang lu kirukit ka ayong. Kimala ngipaalon kosi lu enupito ngakiro a Akuj. Kagatakinit esi daang ajokis a Akuj. Ayong Paulo lokaenitae alojela kotere Yesu Kiristo ngesi kigirunit ka Timoteo lokaatoyok abarua naga. Kigirakinit iyong lopae kosi Pilemon lo kisubi ka sua etich aapei, kigirakinit tani ngitunga a ekanisa lu iriameenete kai kon, ka iyong nakaatokosi Apia, ta Arikupo lo kirai ka sua asiger. Agasi atamar kitaanyu esi Akuj Apa yok ka Ekapolon yok Yesu Kiristo ajokis ka ekisil. Esaa daang lo elipeenea ayong, abuanakini Akuj alakara nakalimuununio iyong. Kainyo apupi ayong atamar imina iyong Ekapolon yok Yesu ka ngitunga a Akuj daang. Elipit ayong Akuj atamar anupit na inupitor iyong ka sua aapei ngakiro a Akuj, kitoosuni iyong lokojokon anakiro anaajokak kadaang ana kianyu ngoni ani kimorikinor aapei ka Kiristo. Alakar ayong noi lokaatokang lominat nabo atitinyer kotere amina kon! Alakarosi ngitai a ngikanupak kadaang kotere iyong. Kotere nguna, adikino tani ayong atitinyer noi ani iraakar iyong lokaatokang ani a Kiristo, kedesik iyong atamar tosub na ejoikinit isubi. Nakaneni kona kaminar ayong iyong, ejoikinit ayong kemaimai iyong. Asubi ayong kongina tani kerai ayong Paulo itwaan, lo arai ekasukout, nakaneni kaenitae tani tokona alojela kotere Yesu Kiristo. Kemaimai tokona ayong iyong kotere Onesimo lo erai lokookang ani a Kiristo, kainyo aliwor ayong apa keng anakiro a Akuj nakaenitere alojela. Kolong sek arai ngesi itwaan nipasit anikon, nakaneni epedori tokona ngesi akingarakin iyong ka ayong. Abuunit tokona ayong ngesi nikon, nakaneni emina etau kang ngesi noi. Asakit akiratakin eruko ka ayong kane, eringa kaenitae alojela kotere ngakiro a Akuj, sodi kengarakinea ngesi ayong ani emamakar iyong kona kingarakini ayong. Nakaneni, nyasaki ayong ketingak iyong kingarak ayong, arai asaki ayong kingarak iyong ayong ani ichamitor. Tokona, emam ibore asubi ayong eringa iyong nyechamuna. Kori robo kerai kolong ibore ni arotokinio Onesimo anikon wadio atamar tobongunio nikon nakajik. Meere tokona ngesi ekedalan bon, ajoker noi edwang tani ekedalan, erai ngesi lokaatoyok lominat ani a Kiristo! Ejok ngesi anikang noi, nakaneni ejoker noi tani anikon erai ekedalan nabo tarai lokaatokon ani Ekapolon Yesu! Nakaneni ani kiyeni iyong atamar arai ayong erukitos kon, kitepeyon ngesi loger lo kitepeyonea iyong ayong. Ani keyei ibore nikisechakinit ngesi iyong, kori ani kearit ngesi amicha kon, kimaru atamar ayong atachi. Kingolik a, ayong elope ngesi egir nugu, “Ayong Paulo ngesi katachi iyong.” (Nyejoikinit robo tani ayong kesitamuni iyong atamar amicha kang na iarit iyong ngesi akiyar kon a elope). Aa robo lokaatokang, kingarakinae kare ayong anakiro kanguna ani a Ekapolon Yesu, kimiek kare etau kang talakar kotere iyong ani iraakar lokaatokang ani a Kiristo. Ayeni ayong dir tokona egiri nugu atamar ichamuni iyong ngakiro nakalimok ayong iyong, ayeni nabo atamar isubi tani na idwangito nakalimok. Ani eya nguna, tasakakinae ni eboikin kainyo etamit atamar kona ilipitotor esi, etachi Akuj ngakilipet kus kadaang, sodi ketanangu ayong nikus. Kimalae iyong Epapuras lokienitae ka ayong alojela kotere Kiristo, kimalaate tani ta Mariko, ka Arisitariko, ka Demas ta Luka, eraakasi kesi lu kisubi ka ayong etich aapei. Kagatakinit esi daang ajokis a Ekapolon Yesu Kiristo. Kolong a angorot, eruorosi Akuj ka ta apaayok alokadwarak a Akuj ngirwa ngikaalak, a ngirotin a ngikaalak. Nakaneni ngirwa lu esal lu, kisuruor ngesi ngoni ani a Lokookeng. Erai ngesi kolong asubea Akuj akwap, sodi toseu ngesi Akuj toliwor ekeruman a ibore kadaang topolok. Inwakunit ngesi akwangis na ipuruore Akuj, nabo ngesi ka Akuj alope, ikwaan per. Itoweit ngesi akwap a agogongu a akiroit keng. Ani arumoret a akitaanyun ngitunga arimakino a ngasechesea kech, kiboikin nadis lowae lo a aloteten a Akuj, ana epol. Toliwor ngesi loapolon noi lo idwangit ngimalaikae loger lopei tani epolotor ekiro keng. Kainyo nyelimokina Akuj tani epei a ngimalaikae keng tama, “Irai iyong Lokookang. Aliwor ayong Apakon akolongit na.” Kori nyelimuno Akuj alomalaikat tani epei tama, “Aliwor Apakeng, toliwor ngesi Lokookang.” Nakaneni ani eapuuni Akuj ameun Lokookeng lo ekingaren nakwap, tolim ngesi tama, “Ejoikinit ngimalaikae a Akuj daang ilipete ngesi.” Nakaneni alowae a ngimalaikae tolim Akuj tama, “Itusubuni Akuj ngimalaikae keng ngikuwamea, ani ngikasubak etich keng tosubut ngasarae a akim.” Nakaneni ani alowae a Lokookeng, tolim Akuj tama, “Apolou kon Akuj, erai na nyedaun jik! Ipolokinit iyong ngitunga kon a eboyor alo etenoono. Imina iyong ngakiro na eteniyete nakaneni iremokino na ichwangakina. Kotere nguna, kiseu iyong Akuj na erai Akuj kon kitalaka noi kitaanyu ekipur loajokon noi lo idwangit lo a ngirukitos kon.” Tolim ngesi nabo tama, “Iyong Ekapolon ngesi kolong isubakini akwap anakisiakinet nabo isubakini iyong adis a ngakan kon. Engopiarete kesi nakaneni idongi iyong. Edaudaunosi daang loger a ngiworui. Ibilanakini iyong kesi loger a eworu. Ilochio kesi loger a ngiworui alu enapio ngiche. Nakaneni idongi iyong ikoni neni jik, nabo nyedaun akiyar kon.” Nyelimokina Akuj tani epei a ngimalaikae keng tama, “Kiboikin lowae lo akan kang ana aloteten, tanang na ewaakinea ayong ngimoe kon kwap nakejen toreu iyong kesi.” Eraakasi ngimalaikae ngiborei lu emam ngawat lu esubete etich a Akuj sodi kingarakis lu eyuunio. Kotere nguna, ejoikinit kirichakini lokojokon na kolong kiirari sodi nyikibatar. Kainyo araakasi ngakiro na kolong esuruorete ngimalaikae ta apaayok na iteni. Nakaneni itwaan daang ni awouni akiwap ngakiro nguna kori akirichakin, aanyuni eriras lo etemem ka akisech keng. Kikokini tokona ngoni kipuun erai kipasak ayuuno naationon ikoni na ai? Ekapolon kolong elope esiauni kiruor ngakiro a ayuuno kangina. Ani lu eirarete ngakiro keng kitunupa sua atamar eraakasi na iteni. Kitiliwo Akuj dang ngakiro nguna ngaka iteni ani asubea ngakitoodikinet daang nakailiilok ka nakitalarete. Sodi totiakanak ngesi ngitunga ngainakinet a Etau a Akuj loger lo asakitor ngesi. Nyelemuna Akuj ngimalaikae atamar topolokis ngakwapea nakiteat na eraakasi ngaka monan, ngakwapea na kilimit ngoni. Igiritae nagiran ngache kona, “Etige Akuj, nyo mono tokona itwaan itamitor iyong ngakiro keng? Nyo imisitor iyong ngakiro a itwaan? Ani cha mono wadio, kitiliwo iyong ngesi ni idwangito ngimalaikae. Kitiliwo iyong ngesi Ekapolon lo erimae, kipuruunitetei. Sodi kitopolok iyong ngesi ibore daang.” Ebeyo etiliwori Akuj itwaan “ekapolon a ngiboro kadaang,” emam nabo iche ipakaritae. Tani bo kikote neni dang, nyikitee tokona ngoni itwaan epolokinit ibore daang. Nakaneni kitee ngoni Yesu lo kolong etiliworio mono cha wadio lo idwangito ngimalaikae sodi aloger a ajokis a Akuj, totoan ngesi kotere itwaan daang. Kitee tokona ngoni ngesi itiliworio ekapolon lo erimae, kipuruunitetei ani ariabar ngesi totoan. Etemokino ani Akuj ana kolong asubi ibore daang, nabo ngesi iratakinit ibore daang itiliwori Yesu lo ikiuna kotere ariaba keng. Sodi yau ngesi ngide a Akuj lukaalak kipuruunoe ka ngesi aapei. Kainyo Yesu ngesi erikit kesi nayuuno. Itosegi ngesi ngitunga anasechesea kech, sodi peneta ngesi kalu asegeta daang Apa epei. Ngakiro nguna ngesi nyitimitor Yesu anyarare kesi ngikaitotoi keng. Alimokinit ngesi Akuj tama, “Alimokini ngikaitotoi kang na isubak iyong. Kepuruuni iyong ani iriamiriamito kesi.” Elimunit dang ebala, “Egienokin ayong Akuj.” Elimunit nabo ngesi ebala, “Kirukit ayong kane ka ngide lu kainaki Akuj.” Kona eraakatar lu enyarit ngesi ngide ngitunga lu eya ngawat ka ngaakot, kikwaanikin Yesu elope ka kesi, kiruko ka kesi erai itwaan. Asubi ngesi nguna kongina sodi kinyasunea Ekipe lo erai ngesi epolokinit akitu ani kikok neni talachak lu kolong araakasi jiik ngirikon aloboyor kech ani akeritotor akitu. Kainyo ileere atamar peabuni ngesi akingarakin ngimalaikae, pearai ikoni eger lo igiritere nagiran kona, “Ingarakini ngesi ngalesea ka Aburaam.” Idodiunit ibore ngini atamar ajoikinit ngesi ikwaanikin ka ngikaitotoi keng alorotin kadaang. Toliworor ngesi Emuron Loapolon a akai a Akuj lo emunoi ka lo angisien alotich a Akuj, sodi torimakinere ngasechesea a ngitunga. Epedori tokona ngesi akingarakin lu iningitoe, kainyo eningitoe ngesi dang elope torieb. Ngikaitotoi kang lukiristoi lu kinyar Akuj! Kitama ngakiro a Yesu alo kolong ameuni Akuj toliwor Emuron Loapolon a akai a Akuj a anupit ana kilimorit ngoni. Arai ngesi lo amuno Akuj na kolong aseuni ngesi akisub etich lo, loger lo kolong araakar Musa lo emunoi alotich keng, Alokai a Akuj. Ipuruunio noi itwaan ni aduki akai kidwang akai ngina. Aloger alopei kangolo, ipuruunio Yesu noi kidwang Musa. Erai ibore be akai daang itwaan eduki, nabo Akuj ngesi erai akadukon a ngiboro kadaang. Arai Musa ekasuban etich lo emunoi alokai a Akuj. Eruoro ngesi epit a ngakiro ana elimuni Akuj ekisidi. Nakaneni Kiristo ngesi emunoi ani eraakar Lokookeng a Akuj lo epolokinit akai a Akuj. Kiliwor ngoni akai keng erai kirubak ngoni kititiny ka anupit dir na kigieno ngoni. Kongina bocha, loger lo elimunitor Etau a Akuj kona, “Ani kiirasi etoil a Akuj akolongit na, nyiichanaketa loger lokolong kata apaakus na angerioto Akuj. Nyiisuba na ikote na kolong asubete kesi akolongit ngina anariet, na eningitotor kesi Akuj. Ebala Akuj, keningete kesi ayong kaina katoroanasi, tarai bo aanyungarito kesi na asubi ayong a ngikaru a ngitomwon-omwon. Sodi atongoik ayong ngitunga ngulu atama, ‘Esecheenete ngitunga lu jiik, nabo engereenete ngakiro na adungunit ayong atamar kiwapa.’ Nakaneni atongo ayong ekong atama, ‘Nyelomarete kesi jik nakwap na adikino ayong esiangunea kesi!’ ” Tochoikinos mono esi ngikaitotoi sodi nyeemin kiding kus itwaan niaronon a etau noi ni nyenupit ngakiro a Akuj, nakaneni tasak atiakar ani a Akuj ana eyari. Nakaneni kingaranakinos esi make akolongit daang eringa cha akiroit be “Akolongit na” elimitoe. Sodi nyeemin nikus itwaan ni ingalae akisech, kichananer. Kainyo kimorikina ngoni ani a Kiristo erai kirubak ngoni jik kiwapit ka akinup dir kona kolong a ekingaren. Igiritae nagiran kona, “Ani kiirasi esi etoil a Akuj akolongit na, nyiitogogongo ngitai kus, kona kolong kata apaakus, na angerioto kesi Akuj.” Tangae kolong ngitunga lu eirarete etoil a Akuj dio tongero ngesi? Araakasi kesi daang lu kolong arikori Musa alo Misiri. Tangae kolong angoikinit Akuj ngikaru ngitomwon-omwon? Angoikinit ngitunga lu asechito lu atoakete anariet. Na ekongio Akuj kichikak kesi tama, “Nyelomarete kesi nakwap na esiangunea ayong kesi”, ngakiro kolong kata ngae eruoro Akuj? Eruoro ngakiro kangulu angerete ngesi. Kingolik tokona ngoni atamar pealomarete kesi nakwap ngina, kainyo peanupito kesi ngakiro a Akuj. Nakaneni tokona, ani eringa akichikakinet nalomaret nikiangaret keng eyei, ejoikinit ngoni kichoikin sodi nyeerukaun tani ipei yok kebuchar anakichikakinet anakisiangarere. Kainyo kiira ngoni Ngakiro Naajokak a Akuj loger lo eirareta kesi. Nakaneni na eirareta kesi ngakiro nguna, emam ibore niajokon aanyut kesi kainyo awounete achamun akiroit ngina tonupa. Ani ngoni lu kinupit ngakiro a Akuj, kianyuni akisiangaro na kichikakini Akuj. Ikoni eger lo alimuni ngesi tama, “Ekongi ayong anangoit kang, ‘Nyelomarete kesi nakwap na adikino ayong esiangunea kesi!’ ” Alimuni ngesi nguna tani sek edauna etich keng napei kolong jik asubea ngesi akwap. Kainyo igiritae wache anagiran ngakiro a akolongit ana a ngikan-kaarei kona, “Sodi kianga Akuj alotichisio keng kadaang akolongit na a ngakan-kaarei.” Alimunitoe ngakiro napei nguna nabo kona, “Nyelomarete kesi nakwap na adikino ayong esiangunea kesi.” Peanyunete kolong lu eirarete Ngakiro Naajokak a Akuj ekingaren akisiangaro ngina kotere ni peanupitotor ngakiro a Akuj. Nakaneni eyakasi ngiche lu echamakinitae eanyunete. Idodiunitae nu ani aseunea Akuj achekolongit na enyaritae “Akolongit na.” Ngirwa ngikaalak ekisidi, kiruor ngesi ngakiro a akolongit kangina ani a Daudi anagiran anatete kanu, “Ani kiirasi esi etoil a Akuj akolongit na, nyiitogogongo ngitai kus.” Arai kisianga Yochua ngitunga loger lo echikakinitor Akuj, pekiruorit Akuj ekisidi ngakiro a akolongit a ache. Kongina bocha, eringa eyei akiangar lotunga a Akuj na ikoni akiangar na eangarea Akuj akolongit na ngikan-kaarei. Kainyo, itwaan cha daang ni eanyuni akiangarit nakichikakinit Akuj, iangari alotich keng loger lo eangarea Akuj alo keng. Ejoikinit tokona robo ngoni kirichakin atolomasi nakiangar sodi nyeewolio tani itwaan ipei loger lo kolong awoliyoreta kesi ani peanupitotor ngakiro a Akuj. Eyari Akiroit a Akuj eyei agogongu. Idwangit akwanis keng tani na a ekileng alo ipenitae ngiwaitin ngiarei. Edungi tanang tani ni etiakatar etau ka nikiyenget kori ni etiakatar ngakoyo ka akimiet a ngakoyo. Eyenuni ngitamen ka ngakiro na iitanito ngitunga. Emam ibore idayo ani eyei Akuj, ileere ibore daang ni esubit ngesi etakani anikeng. Erai ngesi kilimokini ngoni ngakiro daang na kisubi. Ejoikinit ngoni kirubakini jik kinupit ngakiro a Akuj. Kainyo eyei Emuron yok Loapolon noi lo anangit Nakuj, lo erai Yesu lokookeng a Akuj. Erai Emuron yok loapolon a Akuj lo isieni eboyor a apalagu yok. Emuron Loapolon a Akuj ngolo, eningitoe alowaitin kadaang loger yok nakaneni nyesecha ngesi. Atotitinyeketo robo erudaros napolou na a ajokis a Akuj. Kianyuni ngoni ngisien kaneni ka ajokis na kingarakini ngoni esaa lokiitanitor. Eseunio Emuron Loapolon a akai a Akuj daang, sodi tosubanakinea Akuj etich kotere ngitunga, tolemuununea ngalemunet ka ngakipeyos kotere ngasechesea. Kona epalagagea ngesi elope a ngirotin a ngikaalak, epataner ngesi alukabangaanak ka lu ichwanganakinete. Ani kona epalagagea ngesi elope, ipeye ngesi ngakipeyos, meere kotere ngasechesea a ngitunga make, erai kotere tani ngasechesea keng a elope. Nyeseun itwaan bon tama kepuruun atoliwor Emuron Loapolon a akai a Akuj, erai Akuj alope enyarae itwaan kitiliwo Emuron Loapolon a Akai a keng, loger lo kolong a Aron. Aloger alopei kangolo, nyesaka Kiristo kepuruun ngesi atoliwor Emuron Loapolon a Akuj, arai Akuj alimokini ngesi tama, “Irai iyong Lokookang, aliwor ayong akolongit na Apakon.” Tolim nabo ngesi na igiritae wache tama, “Iliwor iyong emuron a akai a Akuj jik. Iwapap ka eger a Emuron a akai a Akuj alo enyaritae Melikisedek.” Na ebooyo Yesu anakwap, agasi ngesi Akuj kilipeene irema, kigoro ngakiyo cholae ani a Akuj ana adikino eyuuni ngesi anakitu. Kona etiditeunor ngesi tomina Akuj noi, kiira Akuj ngakiro keng. Nakaneni tani bo erai ngesi Lokookeng a Akuj dang, etatama ngesi akiwap ngakiro a eger alo aboliare. Na etiliworere ngesi lo ikiuna, toliwor akisiakinet a ayuuno ana nyedaun kadaang alu iwapete ngesi, sodi tolim Akuj atamar erai ngesi Emuron Loapolon a akai a Akuj iwapap ka eger a emuron akai a Akuj alo enyaritae Melikisedek. Eya nakaalak na ejoikinit kilimuni anakiro kanu, nakaneni etiono akisisakin esi kainyo nyebeben esi akiyen. Napei kolong jik ajoikinit esi iliworosi ngiketatamak, nakaneni eringa esi isakete itwaan iche kitatam esi ngakiro na isiaunio kitatamae anakiroit a Akuj. Ajoikinit esi ikote ngitunga lu imujete akimuj, nakaneni ikote tokona esi ngitunga lu emaase ngakile. Itwaan daang ni eringa emasi ngakile, eringa erai ikoku, nyeyeni eger a ngakiro ana eteniyete ka na ichwangakina. Nakaneni, erai akimuj aka ngitunga aluapolok alu ayan kolong epit lo etiaketa ngakiro naajokak ka naaronok. Atoloto tokona ngaren emiekisi ngakiro na isiaunio kitatam anakiroit a Akuj. Nyejoikinit tokona nabo kibongokini etatama ngakiro na kolong esiaunio akitatam na ikote na akilung ngakiro na erikito akitu dio atonupa ngakiro a Akuj. Nyikibongok akitatam ngakiro a akibatiso ka akidokokin ngakan, ka ayarun a ngikatoak ta eriras lonyedaun. Atoloto ngaren! Kikokini neni erai kichamak Akuj. Ikokinete ngitunga lu eyenete ngakiro a Akuj nasek anupito kesi elungete nabo akisech kech ai? Ayakasi sek kesi nakicha a Akuj, eirito kesi ainakinet a Akuj sodi taanyut tani Etau a Akuj. Apot toyena aloboyor kech atamar ejok akiroit a Akuj ka nabo agogongu a akwap ana isidiun. Ani erumor tapalikis kesi anupit ngakiro a Akuj! Etieno abuun kesi tolunga ngasechesea kech nabo, kainyo eramakinito kesi nabo Lokookeng a Akuj napir itaanyunito ngesi ngileech lu ileerete. Epiari Akuj ngalup na ijijiyete ngakipi a akiru ana erami sodi kituruput ngalup nguna ngikinyam lu iteyarito ngitunga. Nakaneni ani keruput ngiikwa ka edoan, eliworosi pas. Eliwor ibore ni edikino Akuj ilami sodi kinyasunae a akim. Nakaneni ani tani kiruoro kona ngipaalon luminan, kigieno sua lokojokon ngakiro a eboyor kus. Kiyeni atamar ianyutu esi apiaro naajokon noi na a ayuuno kus. Kainyo meere Akuj na nyitiriyani ngakiro. Nyimuriakini ngesi etich lo isubete esi, kori amina na idodiunete esi ani ingarakineta nabo toringa ingarakinito lu italeuno a Akuj. Ibore ni kimuit sua ngesi akingolikin atamar erubakinit ipei kus daang irichakina jik sodi toliworotor ngakiro na igienosi esi ngaka iteni. Nyikisaki sua esi takalanyeketa, nakaneni kisaki esi tarata lu inupito ngakiro a Akuj, nabo inaikinito sodi taanyuneta nakichikak Akuj. Na echikakinea Akuj Aburaam akichikakinet, kona amamakar iche apolot edwangit ngesi, tolim ngesi ekiro keng a alope na ekongio. Tolim ngesi tama, “Kechikakinit iyong atamar kapiari iyong kainak ngalesea nakaalak.” Na anaikinea Aburaam nguna, sodi taanyu na echikakinit Akuj. Na ikongio itwaan, elimuni ekiro a itwaan ani epolot noi idwangit ngesi, dio torumo akikong ngina ngakiro daang na epegae. Arumori Akuj akichikakinet keng a akikong, aloger kangolo kidodik ngesi ileere lu echikakinitae atamar nyilochi ngesi na esaki ngesi. Nakaneni eya ngakiro naarei nu, akichikakinet ka akikong, nyilochokinosi kori nyelimunio Akuj alioko jik. Nakaneni ngoni lu kolong kibuchun nakiyar keng, kianyu atitinyu nakirubakinea kiwapit akigieno na eyei ngaren yok. Etenoono dir akigieno ngina alotau yok loger a amoru ana itowei atubwa ananam. Iporit akigieno ngina aworu na iriwokina kiding Akai na a Akuj na eyei nadis, tanang tooma. Esiau Yesu aloma inaa kotere ngoni, nakaneni aliwor Emuron Loapolon a akai a Akuj nakajik, iwapap ka eger a emuron a akai a Akuj aloapolon alo enyaritae Melikisedek. Arai Melikisedek ekapolon a akwap a Salem, tarai Emuron Loapolon a akai a Akuj Anaapolon Noi. Ani na abongunio Aburaam alojie alo aarea ngikapolok a ngakwapea anache, kiriamuni ngesi ka Melikisedek lo apiari ngesi nak Aburaam ngesi alemikinet apei anatomon a ngiboro kadaang alu atingit ngesi. (Eger lo ekingaren a ekiro be Melikisedek ngesi atamar “Ekapolon a ateneanut” na kona araakar ngesi ekapolon a akwap a Salem, ekiro nabo keng eyei eger lo atamar, “Ekapolon a Ekisil”.) Nyelimitoe apakeng ka itiokeng kori nyelimitoe tani ngiyenet keng, kori nyelimunitoe tani atamar edounio kori atoani wori. Ikwaan ngesi ka Lokookeng a Akuj, nabo erubakini erai emuron a akai a Akuj jik. Kitama mono esi eger lo ayenikinitere ngesi noi. Ainakini Aburaam lo erai apaayok loapolon ngesi alemikinet apei anatomon a ngiboro kadaang alu aanyuni ngesi alojie. Kiyen dang atamar Alotal yok, echamakinit ngide a Lawi lu eraakasi ngimurok a akai a Akuj idiaunete alemunet apei anatomon alotunga a Isirael. Ikote kesi neni tarai bo ngitunga ngulu ngika a akwap kech. Ani nabo eraakasi ngitunga a akwap kech, eraakasi nabo dang ngalesea ka Aburaam. Pearai Melikisedek ales a Lawi, nakaneni ediauni alemunet apei anatomon ani a Aburaam sodi topia ngesi lo kolong aanyuni ngakichikakinet a Akuj. Idodiunito ngakiro nguna atamar epolot noi lo epiari idwangit lo epiario. Alowae a ngimurok a akai a Akuj, idiaunete ngitunga lu etoakeenete alemunet apei anatomon, nakaneni alowae a Melikisedek, ediauni itwaan ni eyari alemunet apei anatomon loger lo igiritere nagiran. Ikoni ibore ngini atamar, na alemunea Aburaam alemunet apei anatomon, abu Lawi dang (lo idiaunete ngalesea keng alemunet apei anatomon) tolem. Kainyo aringa Lawi nyidouno, nakaneni ikoni ibore ngini atamar aringa ngesi eyei nakwaan ka apaakeng Aburaam na eriamunotor ngesi ka Melikisedek. Ainakini Akuj Ngisirael etal iwapap ka eger a ngimurok a akai a Akuj alu a ekitela a Lawi. Arai kolong kikiuna etich lo a ngimurok a akai a Akuj, pakesakitae emuron eche a akai a Akuj lo etupuuni Melikisedek ebuni, meere lo etupuuni Aron. Kainyo na ilochere Ngimurok Luapolok a akai a Akuj, ejoikinit etal dang ilochio. Ani Ekapolon yok lo elimunitere ngakiro nu, arai eka a ekitela a eche, emam itwaan iche alokitela keng arai emuron a akai a Akuj. Eyenio daang atamar edounio ngesi erai eka a ekitela a Yuda, tarai bo nyelimuno Musa ekitela ngolo na eruoror ngakiro a ngimurok a akai a Akuj. Ileereunete ngakiro nguna noi na ebunio emuron a Akai a Akuj eche lo ikwaan ka Melikisedek. Pealiwor Melikisedek Emuron Loapolon a akai a Akuj a eger a ngitalio a ngitunga nakaneni aliwor kotere agogongu na akiyar ana nyesaluni. Kainyo igiritae nagiran atamar, “Iliwor iyong emuron loapolon a akai a Akuj jik, iwapap ka eger a emuron a akai a Akuj alo enyaritae Melikisedek.” Nakaneni ikisario etal longorot, kainyo amam ibore kitaanyuni arai pas. Kainyo amam ibore ikiuni etal a Musa. Kianyu tokona ngoni akigieno naajokon noi nakirudunor ngoni nia a Akuj. Ani kanguna dang, eyei akikong a Akuj. Nakolong aliwonorotor luche ngimurok a akai a Akuj, amam ngikong. Nakaneni ekongi Akuj na aliworor Yesu emuron a akai a Akuj tolim tama, “Ekong Ekapolon nakaneni nyilochi ngitamen keng, ‘Iliwor iyong emuron a akai a Akuj jik.’ ” Ibore ni etiakit nguna loger ngolo ngesi etiliwo Yesu ekaweikinan a achamunet anaajokon noi. Eya nabo ngakiro ngache na etiakito, alalak ngimurok a akai a Akuj luche ngulu, kainyo atoakeenete, peadikino erotokinito jiik akisub ngitichisio kech. Nakaneni nyikwaan Yesu ka kesi, eyari ngesi jik nabo aliwor ngesi emuron a akai a Akuj jiik. Kongina bocha, epedori ngesi jiik ayuun daang lu epote nia Akuj itorunito nikeng, kainyo eyari ngesi jik ilipeene Akuj kotere kesi. Nakaneni Yesu tokona erai Emuron Loapolon a akai a Akuj lokingarakini ngoni nakichanar. Erai ngesi lo italeuno, lo nyichwanganakini kori nyesecheene, atiak ngesi ka ngikasechak epuruun ka akikear kidiama adis. Nyejoikinit mono ngesi ipeyoe Akuj akolongit daang kotere ngasechesea keng ani erumor kipeye kotere lu a ngitunga aluche, loger lo a Ngimurok Aluapolok a akai a Akuj aluche. Alemuni kolong ngesi akipeyos apei kotere ngitunga daang, nakolong alemunor elope. Alotal a Musa, eseunio ngitunga lu nyikiuna tarata ngimurok luapolok a akai a Akuj. Nakaneni akichikakinet a Akuj na echikakinio kikongoi ekisidi a etal, ngesi eseunitere Lokookeng a Akuj lo kolong ekiuna jik. Akiroit nateno na tokona kiruoro ngesi na kibala, eyei ngoni Emuron Loapolon a akai a Akuj lo ibooyi alowae alo aloteten a ekicholong alo a apolou a Akuj anadis. Esubi ngesi etich lo Emuron a Loapolon a akai a Akuj ani Italeuno Noi, erai neni tooma eam lo a iteni lo aduki Ekapolon, meere ngitunga. Eseunio Emuron Loapolon a Akai Akuj daang alemikin Akuj ngalemikinet ka ngakipeyos. Aloger alopei kangolo, ejoikinit Emuron Loapolon a akai a Akuj ngolo dang eyei ibore ni elemuni. Arai kolong tarai ngesi eka akwap, pekeliworo ngesi emuron a akai a Akuj, kainyo eya ngimurok luche a akai a Akuj lu elemuunete ngalemikinet iwapap ka eger a etal a Ngiyaudi. Erai etich kech lo eraakatar ngimurok a akai a Akuj ekitetemes ka etorube ana eya nadis. Ekote ngakiro neni tani kolong ani a Musa. Nakolong aapikinea asubakin Eam ngolo, tolimok Akuj tama, “Tosubak ibore daang itemem ka ekitetemes lo kidodikinio iyong alomoru.” Nakaneni ainakin tokona Yesu etich loajokon noi lo idwangit lokech, toliwor Emuron Loapolon a akai a Akuj, loger lo ejokia noi achamunet na etachamunea ngesi Akuj ka ngitunga keng, kainyo erai aka ngakichikakinet ana a ngakiro anaajokak. Arai kolong nyeesechech achamunet na a ekingaren, pakesakitae nabo na a ngaarei. Nakaneni abala Akuj esechito ngitunga keng na alimunio tama, “Ebala Ekapolon epote ngirwa lu kichikakinor ayong ka Ngisirael, ka ngitunga a ekitela a Yuda, achamunet nakitetet. Nyikokini achamunet na kichamakin ayong kata apaakech akolongit na atingea ngakan atoriku alo Misiri. Kona pearubakineta kesi iwapito ngakiro na kichamakin ayong ka kesi, abu ayong nyaamisik kesi. Ebala Ekapolon, ngirwa lu monan epote, achamunet na ngesi kichamakin ayong ka Ngisirael. Eteyenuni ngitalio kang alotamen kech, nabo egiri lotai kech. Aliwor ayong Akuj kech, nabo eliworosi kesi ngitunga kang. Emam itwaan itatami itwaan a akwap keng, kori emam ni elimokini lokaatokeng tama, ‘Toyenu Ekapolon.’ Kainyo kayenunete ayong ngitunga daang, luapolok ka luuchik. Arimakini ayong kesi ngasechesea kech, nabo nyetamuni ngasechesea kech jik.” Iruoroe ngakiro a achamunet anakitetet ani etongorotonio Akuj na a ekingaren, nakaneni ibore ni engorotoni totoania, engopiari atipei. Achamunet na ekingaren, ayakasi ngitalio a eger alo ilipere ka ni italeuno ni ilipeenere ni erai ngitunga adukete. Adukio eam lo anyarao ewae lo anikalapatan ni italeuno. Tooma keng ayei ni asipor ataa ka emeesa lo ayakasi ngamugati na alemanakinio Akuj. Naabor a awaru ana a ngaarei, ayei Eam lo anyaritae lo Italeuno Noi. Tooma eam ngolo, ayei ekeno lo ipeyonokinere Akuj lo enomere ngikinyaatei, lo abutakinitae egolit. Ayei nabo dang Asaduku na a Achamunet na abutakinitae egolit nabo toyei achupa naapolon a egolit na ayei akimuj na enyaritae manna. Tooma achupa ngina, ayei tani aburo a Aron na eminiaunit ngakui ta nabo ngamoru ngaarei elolotae kigirae ngitalio. Kidiama Asaduku ngina ayakasi ngiborei lua ngabeben lu esileereunito ayakau a Akuj, apetakina ngabeben kech ni arimanakinere ngasechesea. Nakaneni nyerai tokona esaa lo isisaunere ngakiro daang. Asubio ngakiro nguna daang loger ngolo. Toliwor epit a ngimurok a akai a Akuj aloseenen akolongit daang akisub etich kech anikalapatan a eam, nakaneni erai Emuron Loapolon a akai a Akuj bon elomari tooma eam alomaret apei a ekaru a epei. Eyaari ngesi ngaakot nak Akuj kotere ngasechesea keng ka ngasechesea na asechete ngitunga peeyenete atamar kisechit. Kitatami ngoni Etau a Akuj a eger a ngakiro kanguna kadaang atamar eringa erot lo elomarere ni Italeuno Noi nyengaara arai keringa cha eam lo anikalapatan ewei. Eraakasi ngakiro nguna ngakisikwaanet a ngakiro ana a ngirwa kalu. Idodiunito atamar ngakipeyos ka ngalemunet na elemanakinio Akuj, nyitiliworete ngitai a ngitunga alu ilipito Akuj lu ikiuna, kainyo eraakasi ngakiro ngaka ngimujen ka ibore matat ta ngakiro ngache nakaalak na italeunere ngitalio. Eraakasi ngulu daang ngitalio lu italeunitere akwaan nakaneni engopiarete na isiakinea Akuj eboyor lokitetet. Nakaneni abu kolong Kiristo lo erai Emuron Loapolon a akai a Akuj a ngakiro anaajokak adolut ne. Esubi ngesi etich keng aloeam alo ejok noi nabo kikiuna noi, lo nyesubio a ngakan a ngitunga. Ngesi atamar, meere eka ngakwapea ana kolong asubio kanu. Alomari kolong Yesu ni Italeuno Noi alomaret apei bon, nabo dang, peatingit ngesi ngaakot a ngakinei kori na a ngaatuk esaki alemun erai ngakipeyos. Alomari ngesi a ngaakot keng a elope sodi kitoyuu ngoni jik. Iwasakinio ngitunga lu esechito etal ngaakot a ngakinei ka ngimongin ta ngimuudui a itaok ani epeitoe, sodi tomookere ngawat kitaleunos. Nakaneni, esubasi ngakiro natenoik noi anaakot a Kiristo! Kotere agogongu a Etau a Akuj alokajik, alemun Kiristo ani a Akuj toliwor ngakipeyos na ikiuna. Itosegete ngaakot keng ngitai yok alotalio alu pasiek, sodi atosubeta ngoni etich a Akuj ana eyari. Kotere nguna, Kiristo ngesi eree ngakiro a achamunet anakitetet, sodi taanyuneta lu anyarae Akuj apiaro nakajik nakichikak Akuj. Esubakinio nguna kainyo ayei akitu na elachakini ngitunga dir kitulung naaronok na asubete kesi eringa achamunet na a ekingaren eyei. Ani anakichikakinet ana irumea itwaan ibore, echamunio ngakiro a akichikakinet kangina erai keyen dir atamar atoana itwaan nilope a ibore. Emam itwaan echamuni ngakiro a akichikakinet ana irumea itwaan ibore mati ketoana ilope, kainyo emam ibore esubakini akichikakinet ngina eringa ilope a ibore kangini eyari. Erai ngesi tani kolong peachamunere ngakiro a achamunet ana a ekingaren eringa ngaakot nyebukoro. Alimokini mono Musa ngitunga ngakiro daang na adungunitoe loger lo egiritere Lotal. Sodi tolem ngesi ngaakot a ngitak ka ngakinei kimorik ka ngakipi, ani erumor tolem ateni a ngakui a ekitoe alo enyaritae isopo*g** ka etesiro lotiarengan dio kiwasak nakitab a etal ka ngitunga daang. Tolim tama, “Ngaakot nu kesi iyookinete achamunet na kidungok esi Akuj atamar kiwapa.” Kiwasak Musa ngaakot loeam ka ngiboro daang lu elipeenere, lopit lopei ngolo. Ikongina bocha, italeunio ibore daang a ngaakot iwapap ka eger lopalem a etal a Akuj, nabo erai mati kebukor ngaakot ngesi erimakinere ngasechesea. Ajoikinit ngiboro lu eraakasi ekitetemes alu eya nadis italeunio loger ngolo. Nakaneni, italeunio ngiboro lu eraakasi ngika a adis a ngakipeyos ana ejokak noi idwangito nguna. Kainyo pealomari Kiristo ni italeuno ni adukete ngitunga erai ekitetemes ani a iteni. Nakaneni alomari ngesi nadis ni tokona ewaar ngesi alongaren Akuj kotere ngoni. Elomanari Emuron Loapolon a akai a Akuj a Ngiyaudi ni Italeuno Noi alomaret apei a ekaru a epei etingit ngaakot a etiengit. Nakaneni pealomari Kiristo neni sodi tolemunor ngalemunet ngakaalak, kainyo arai kikote neni, keboliatere ngesi ngaboliaret ngakaalak napei kolong asubakinere akwap. Nakaneni abu tokona ngesi ekisidi kanguna kadaang abunet apei, tolema akisech kotere ngakipeyos keng a elope. Etoani itwaan daang atoanet apei ani erumor kirira Akuj. Alopit alopei kangolo alemunio Kiristo dang alemunet apei dio toliwor akipeyos na elemari ngasechesea a ngikaalak. Etakanuni ngesi na a ngaarei, meere kotere ngasechesea, nakaneni erai ayuun lu idarito ngesi. Nyerai etal a Ngiyaudi ekitetemes lo ka dir a ngakiro ana eraakasi ngaka iteni. Ikoni etorube a ngakiro anaajokak monan epote. Elemuununio ngakipeyos nguna jiik, ngikaru daang. Ikokini tokona etal itiliwori ngitunga lu epote nia Akuj lu ikiuna kotere eger a ngakipeyos kanu ai? Arai kolong dir kitosegae ngitunga lu elipito Akuj alosech kech, pakeringa kesi eyenete atamar kirai ngikasechak nabo kepalikinito jik alemuunun ngakipeyos. Nakaneni ngakipeyos na elemuununio ngikaru daang nguna, isitamunito ngitunga ngasechesea kech. Kainyo nyelemarete ngaakot a ngimongin ka ngakinei ngasechesea a ngitunga. Ibore ngini ngesi kolong alimunio Kiristo na abunio nakwap tama, “Nyesaka iyong ngalemunet kori ngakipeyos, nakaneni isubak iyong akwaan kon kotere ayong. Nyikijoikinito iyong ngibaren lukipeyokinitere iyong, kori ngalemunet na elemarete ngasechesea. Sodi atolim ayong atama, ‘Ee Apa, ayong lo, asaki akisub na ichamit iyong, loger lo igiritere ngakiro kang, nakitab na a etal.’ ” Alimuni mono ngesi tama, “Nyisaki iyong kori nyikijoikinito ngakipeyos ka ngalemikinet, kori tani ngibaren lu kipeyoore iyong ka ngalemikinet na elemarete ngasechesea.” Alimuni ngesi nguna tarai bo alemuununio ngakipeyos nguna daang iwapap ka etal. Sodi tolim ngesi tama, “Ee Apa, ayong lo, asaki akisub na ichamit iyong.” Abu Akuj kimiek ngakipeyos na kolong ngorok dio kilunyok akipeyos a Kiristo ni kolong ayakasi nguna. Kona asubea Yesu lo erai Kiristo na kolong asaki Akuj ngesi tosub, kitaleunio ngoni daang alosech a akwaan keng ana alemuni ngesi alemunet apei nakajik. Emuron a akai a Akuj daang esubeene etich akolongit daang nabo ipeyoe ngakipeyos ngapei ngakipeyoet ngakaalak, nakaneni nyelemarete ngakipeyos nguna ngasechesea. Nakaneni alemuni Kiristo akipeyoet apei kotere ngasechesea. Arai akipeyoet ngina na etenoono jik dio ani erumor kiboikin ngesi nakan na aloteten a Akuj. Idarit tokona ngesi kaina Akuj iwaakini ngimoe keng kwap nakejen keng dio toreu ngesi. Kotere akipeyos apei, etiliwo ngesi lu etaleunio alosech lu ikiuna. Kitunupit ngoni dang Etau a Akuj na alimunio mono tama, “Ebala Ekapolon, ngirwa lu monan epote, achamunet nakichamakin ayong ka kesi. Eteyenuni ngitalio kang alotai kech, nabo egiri lotamen kech.” Sodi tolim tama, “Nyetamuni nabo jik ngasechesea kech ka ngakiro na ichwanganakinete kesi.” Nakaneni na erimakinere ngulu, nyechamakinitae nabo eyei akipeyos a ngasechesea. Tokona bocha ngikaitotoi, kigienokin ngoni alomar ni Italeuno Noi kotere ngaakot a Yesu. Kingak ngesi ngoni erot lokitetet, erot lo erai eka akiyar, erot ngolo ngesi lo a awaru anakooyen, ngesi atamar, erai akwaan keng a elope. Eyei ngoni Emuron Loapolon noi lo eweikinit ngitunga a Akuj. Ejoikinit tokona ngoni kirudun nia Akuj a ngitai aluajokak alu enupito ngakiro a Akuj dir. Erudun a ngitai alu etaleun alosech ka ngawat na elotar a ngakipi anaasegak. Atorubakisi anakigieno ana kilimorit ngoni, kainyo eraakasi ngakiro nakichikak ngoni Akuj ngaka iteni. Atasaka epit lo kichoanakinor ngoni make, engaranakin ngoni make kidodianakin amina ka akisub naajokak. Nyikipalik akiriamuunun wapei loger a ngiche. Nakaneni engaranakin jiik kona aapunea Akolongit na a Ekapolon. Emam akipeyos ache eyei erai kiyechak ngoni atorubakisi kisecheene tarai kitoyen ngoni sek ngakiro na iteni. Ibore ni idongi ngesi akidarun a ebuloi eriras a Akuj ka akim naka monan na emunyari daang lu itopegete Akuj! Itwaan daang ni asechi etal a Musa, aareeneo emam ngisien arai kelimut ngikaanyunak ngiarei kori ngikaalak atamar esechit ngesi. Ekoe, ani bo itwaan ni imenyarit Lokookeng a Akuj ka ajamuar ngaakot a achamunet a Akuj ana kolong etaleuni ngesi? Eroner noi eriras lo eanyuni itwaan ni iyenyi Etau a Akuj lo erai eka a ajokis a Akuj! Kainyo kiyeni lo kolong abala, “Atachakini ayong, atachakini ayong,” ka nabo lo abala, “Irirae Ekapolon ngitunga keng”. Nakaneni erai ibore niaronon noi aanyun eriras a Akuj ana eyari! Kitamutu na kolong asubakinosi na kolong a ekingaren na ianyungareta esi akicha a Akuj. Tani na ichanyuneta esi nakaalak kiboliare ngirwa ngulu, ipot esi tanaikis. Ani awache kiyenyio esi kitoboliare alongaren ngitunga, ani nabo awache isakete esi akimorikin kangulu asubere ngakiro nguna. Kisienito esi lu aenitae alojela ani nakidemarere esi ngiboro kus, ipot esi tanaikis nguna a alakara, kainyo iyenete esi atamar itingito esi ibore niajokon noi ni nyedaun jik. Nakaneni warasi nyiipalikis na igienosi esi kainyo kesi kitaanyunete esi ebachit loapolon noi. Ejoikinit esi inaikinito ngakiro sodi tosubeta na echamit Akuj, nabo taanyuneta nakichikak ngesi esi. Kainyo igiritae nagiran kona, “Eringa cha mono wadio, sodi bunio ngolo kabunon, nyerubakini ngesi. Nakaneni enupete ngitunga kang lu etenoono eboyor kech ngakiro kang dio toyara, nakaneni ani kerea ipei kech tobongo, nyakajoikinete ayong ngakiro keng.” Meere ngoni ngitunga lu kirea atobongosi sodi atobukoros, nakaneni kirai ngitunga lu kinupit ngakiro a Akuj lu kiyuun. Anupit ngakiro a Akuj ngesi akiyen dir atamar eraakasi ngakiro na kigieno ngoni ngaka iteni, erai ngesi akinup dir ngakiro a ngiboro alu nyikitee ngoni. Erai epit a anupit kech ngesi kolong achamununea Akuj ngitunga lu kolong ayarete kanuan. Erai epit a anupit kiyenea ngoni atamar asubi Akuj akwap a akiroit keng. Sodi tosubunae ibore ni iteeo aloboro alu nyetakanete. Arai epit a anupit ngesi etelemuni Abel ngakipeyos naajokak noi na edwangito na Kain. Kotere anupit keng, tachamu Akuj ngesi atamar erai itwaan ni etenoono eboyor keng kainyo arai Akuj alope bon achamuni ngalemunet keng. Kotere ananupit keng, eringa Abel iruoro tokona, tani kolong ketoanit. Arai epit a anupit ngesi kolong peatoanea Enok. Nakaneni yaarae ngesi kidiama nia Akuj, emam itwaan aanyu ngesi, kainyo ayaarit Akuj ngesi kidiama. Igiritae nagiran atamar ani eringa Enok nyeyaara kidiama, etalakarit ngesi Akuj. Emam itwaan italakari Akuj erai pekenupit ngesi, kainyo itwaan cha daang ni ebuni nia Akuj, echamit enupi atamar eyei Akuj, nabo einakini lu esakete ngesi daang ebachit. Arai epit a anupit ngesi echikichikea Akuj Noa ngakiro na adikino esubakinosi tarai peetee ngesi. Ewapakini ngesi ngakiro a Akuj sodi toduk atubwa na ayuunere ngesi ka ngitunga a awi keng. Kotere nguna, kirirae ngitunga a ngakwapea, dio taanyu Noa eboyor lo etenoono lo itorunit nanupit. Arai epit a anupit ngesi ewapakinea Aburaam ngakiro a Akuj na anyaraare tamarae tolot nakwap na asaki Akuj ainakin toliwor akeng. Towot ngesi anakwap keng peeyeni ni eteni. Arai epit a anupit ngesi ebooyo ngesi loger a epeyonon anakwap ana echikakinit Akuj. Eboyeene ngesi aloeman loger a Isaka ka Yakobo alu aanyunete akichikakinet napei ngina ani a Akuj. Kainyo edarit Aburaam ere lo edukuk dir imijakina, lo erai Akuj alope etemi dio akiduk. Arai epit a anupit ngesi auriunea ngesi ikoku, tarai amojongit Aburaam noi nabo tasalunite tani Sara. Anupit ngesi atamar irichakini Akuj akichikakinet keng. Anitwaan anipei kaen, ani ekoni ekatoan, ngesi aponeta ngalesea nakaalak loger a alalau a ngikanyer anadis, nabo lu emam ekimar loger a asinyen ana a ekwaas a anam. Arai epit a anupit ngesi atoaketa ngitunga ngulu daang. Peanyunete kesi ngiboro lu echikakinit Akuj, nakaneni epouworete ngiboro ngulu eringa eloka, tachamut dir atamar kiya kesi nakwap na loger a ngipeyok kori ngitunga lu ilato. Kiyeni tokona dir atamar ngitunga lu iruorosi ngakiro na ikote nguna, elimunete atamar kiitanit kesi akwap na erai akech a ngikulepek. Nyerubakinete kesi itamete ngakiro a akwap ana kolong aisikinete. Arai kolong kitamete, keyei kona ebongorete. Nakaneni arai akwap naajokon noi eitanito kesi, akwap na a adis. Ibore ngini ngesi nyitimitor Akuj ni enyaritotor kesi ngesi Akuj kech, kainyo asubaki ngesi kesi ere. Arai epit a anupit ngesi kolong alemunea Aburaam lokookeng Isaka toliwor akipeyos, na eningitor Akuj ngesi. Aburaam kolong ngesi echikakinit Akuj akichikakinet, nakaneni achamunit ngesi alemun lokookeng lo arai epei bon toliwor akipeyos. Alimokini Akuj ngesi tama, “Erai nia Isaka ngesi ianyunea iyong ngalesea nakechikakini ayong iyong.” Etemit Aburaam atamar epedori Akuj akiteyarun Isaka, kikok ekitetemes ngolo atamar, aanyuni Aburaam Isaka nabo tarai sek atoanit. Arai epit a anupit ngesi echikakinea Isaka Yakobo ka Esau atamar eliworosi lu epiaritae. Arai epit a anupit ngesi apiarea Yakobo talokookeng a Yosep daang eringa nyetoana. Togongakin ngesi naburo keng sodi kilip Akuj. Arai epit a anupit ngesi alimunio Yosep na aapikinea akitu atamar erotokinete monan Ngisirael alo Misiri, dio nabo dang kichikak kesi eger lo enukere ngakoyo keng. Arai epit a anupit ngesi edaeta ngikauriak a Musa ngesi a ngilapio a nguuni na edounere. Kingolikis kesi atamar erai ngesi ikoku nikebusean, dio nyekera kesi akinger ngakiro na adungunit ekapolon a Misiri. Arai epit a anupit ngesi angerio Musa anyarao lokookeng a nakookeng a ekapolon a Misiri na apolounio. Totiaku ngesi atamar katoboliare ka ngitunga a Akuj aapei akidwang amera anakisech wadio. Kitem ngesi atamar ejok kiboliare dio kimenyar kotere Kiristo idwangit ebari daang lo eyei Misiri. Arai akienyikinit ngesi ebachit lo eanyuni monan. Arai epit a anupit ngesi arotokinio Musa alo Misiri peemit atamar engoi ekapolon a Misiri. Towou ngesi abongor ikwa ibore esibit etee ngesi Akuj na nyetakani. Arai epit a anupit ngesi esiakinea ngesi Adeparet ka eger lo adungunio ngesi atamar kiwasanakisi ngaakot kidiama ngidorin, sodi nyearea Emalaikat lo a akitu ngide lusapa lu ekingaren alokolea kadaang a Ngisirael. Arai epit a anupit ngesi kolong etorioto Ngisirael Nanam a Chamu, ikwa ibore esibit aloose anikalapatan. Na asaketa ngitunga a Misiri akitor neni, tomunyasi kesi daang ngakipi. Arai epit a anupit ngesi aukuorotor ngawasea a Yeriko na erimioto Ngisirael a ngirwa a ngikan-kaarei. Arai epit a anupit ngesi pearere amalaat na enyaritae Raab aapei ka lu angerete Akuj, kainyo epeyeuni ngesi ngirototin a Isirael niajokon. Ekoe, anu ngache alimuni? Emam esaa tokona lo itemokino alimuni na kata Gideon ka Barak, ka Samson ka Yepita, ka Daudi ka Samuel ta ngikadwarak a Akuj. Arai epit a anupit ngesi etijioto kesi ngibukui lu a ngakwapea anache kidwanga. Asubete kesi ngakiro na ateniyete eriyan sodi taanyut na echikakini Akuj. Agolete kesi ngakituk a ngingatunyo, etudungeete ngakimea nakarirak, dio tobuchun na adikino earere a ngilengea. Apalag kesi, nakaneni togogongioto. Ajioko kesi noi kidwanga ngajorei na a ngakwapea anache tobwanga. Kotere epit a anupit, aanyunete ngaberu ngitunga kech lusek anupito kainyo apon kiteyerunae. Ani luche lu peasakete talachakinae, totoaka eboliare kainyo asakete kesi kiteyarun atolomareta nakiyar naajokon noi. Akianare ngiche sodi kidetae, ani ngiche toenae a ngiriko torikoroe lojela. Achakio kesi a ngamoru, tapakae a ngilengea ta akichum taarae! Erimito kesi akwap enapito ngilowi a ngamesekin ka ngakinei, ebootonit kesi, aboliare nabo kichanitetei. Ajokak kesi noi edwangito ngikajokak a akwap kana! Elato kesi anarieta ka ngimoru loger a ngikepasak, kiboyoto alotooma ngatabab ka ngaduon. Ayenikinitae ngitunga ngulu daang atamar ekilenikinit kotere epit a anupit kech! Nakaneni ani tani kikoni neni, emam tani ipei kech ni abu taanyu na echikakinitae, kainyo kirekinit kolong ngoni Akuj ibore niajokon noi. Ayeni ngesi atamar eliworosi kesi lu ikiuna kirukit ka ngoni aapei. Ani alowae yok, eyakasi ngikaanyunak lukaalak lu kiriamito ngoni, nakaneni tokona, atochakasi ibore daang ni kiratakinit ngoni ka akisech daang na erubit aniyok, atamataros tokona erinyakinos anakerit ana eyei ngaren yok. Ejoikinit tokona ngoni kikenyikini Yesu lo erai ngesi kolong esiakini anupit yok nabo ngesi itasaluni. Kotere alakara na ayeni ngesi atamar aanyuni, tanaik ngesi atoanere anapir! Nyemisikina ngesi ngileech lu aanyuni, nakaneni ibooyi tokona ngesi alowae alo aloteten a ekicholong a apolou a Akuj. Kitama daang na aanyuni Yesu, eger lo anaikinea ngesi ngakiro daang na aremitotor ngikasechak! Warasi nyiiar ngitai tolilimiosi. Kainyo alopit alo irichatar esi akinger akisech, eringa esi nyirichakina tanang tani kiario. Kaneni a, kimuriakis esi ngakiro nakitalakarete ngitai nakilimitor esi Akuj atamar iraakasi talokookeng a? “Ikakoku, nyiimisik nakirikinio iyong Akuj, nabo nyiar etau nakikilakinea ngesi iyong. Kainyo erionokini Ekapolon itwaan daang ni emina ngesi, nabo idesi itwaan daang ni echamuni ngesi atamar erai ikoku keng.” Tanaikisi daang na eriebete ngitai kus iyenete atamar eraakasi ngakiro na kitatamete esi, idodiunito na kiriebete esi ngitai atamar kimarunit Akuj esi atamar iraakasi talokookeng. Eyei ikoku nakanuan ni nyidesit apakeng a? Ani pakidesio esi lopit a ngide keng aluche kadaang, idodiunit ibore ngini atamar nyikote esi ngide lu a akai, ikote esi ngide a akeor. Aloger kata a apayok alu kuurunete ngoni, kideese kesi ngoni sodi atokera ngoni kesi. Kongina pei, ejoikinit ngoni kikeri noi Apayok alopit a etau sodi atoyareta! Kiriraate ngoni ta apayok lu kuurunete ngoni a ngirwa a ngidikidio make, alopit alo ajoikinit kesi, nakaneni kirirae ngoni Akuj sodi ataanyuneta ngoni akitaleuno keng. Nakiriraare ngoni, esubuni mono ibore nikitisinyi ngoni, meere ni kitalakari. Ani ekisidi, ngulu etenikin loger ngolo, eanyunete ebachit lo ekisil lo erai eboyor lo etenoono. Kikeutu ngakan kus na eburunit, sodi kitogogongo ngakungin kus na emaranete! Torubakisi iloose alorotin alu itenikina, sodi nyengwaleta ngakejen kus na ichodosi esi, nakaneni toliworos na engalekinete. Tasaka akisil ka itwaan daang, nabo tasaka akiboi eboyor lo italeuno, ani kiitun eboyor ngolo, emam itwaan eanyungari Ekapolon. Tochoikinos sodi nyiibatarosi anajokis a Akuj. Warasi nyeemin itwaan ni ikoni ekitoe loadwaran lo erupuni sodi kisiak ngichan, toliworos ngikaalak lu nyitaleuno kotere ngichan ngulu. Warasi nyeemin itwaan nimalaat kori ni nyekerit Akuj loger a Esau, alo kolong agialari apolou keng na araakar ikoku ni ekingaren kotere akimujet apei bon. Iyenete esi atamar asaki ngesi ekisidi atamar katopia apakeng, nakaneni tongeroi ngesi kainyo amam ngesi kona ilochi nasek apon tosubae. Asaki ngesi noi katopiar sodi kigor tani ngakiyo cholae. Nyepona esi loger lo kolong aponeta Ngisirael. Nyepona esi nibore ni epedorio akitap, kori ni ikoni emoru a Sinai lo ewari asarae, kori aribu ka akirionut kori ekuwam, kori ekuse a aburuch ta echale a etoil. Na eirareta ngitunga etoil, tamasi nyikisaki eirasi achekiroit, kainyo amam kona enaikinete kesi akiroit na adungunitoe atamar, “Ani tani kerai etiengit etapi emoru, echamit imasio a ngamoru totoan.” Arai na eteete naketubulok noi dio tolim Musa tama, “Kabul ayong noi aem!” Nakaneni ipot esi moru a Sion, ni eyei ere lo a Akuj ana eyari. Inanga esi Yerusalem lo erai ere a Akuj, ni echunakina ngimalaikae lukaalak lu emam ekimar. Ipot esi ni echunakina talokookeng a Akuj lu a ekingaren lu igiritae ngirora kech nadis. Ipot esi nia Akuj ana irirae ngitunga daang ka ngitai a ngitunga aluajokak alu etiliwor lu ikiuna. Ipot esi nia Yesu alo aree achamunet nakitetet nabo ta ngaakot na abukor na kichikakinito ngiboro luajokak noi lu idwangito ngaakot a Abel. Tochoikinos robo warasi nyiingero akiirar ngakiro kangolo iruoro. Ani pekeyuuna lu kolong awounete akiirar na echikichikere kane anakwap, kikokini ngoni kiyuun ai, arai kinger akiirar nakichikichikea lo abuni anadis? Etamaranikini etoil keng akwap ngirwa ngulu. Nakaneni echikak tokona ngesi atama, “Meere akwap bon etamaranikini nabo, etamaranikini adis dang.” Akiroit be “nabo” idodiunit dir atamar itamaranikinio ngiboro lu asubitae tolemarae, sodi ani ngiboro lu nyitamaranikinio, kidongo. Atobuakisi robo Akuj alakara kainyo kianyuni ngoni Apolou na nyitamaranikinio. Atalakaros elipa Akuj a erot alo ejoikinit ngesi, kirima ngesi atokerito, kainyo erai Akuj yok akim nakinyasuni dir. Torubakisi iminan make loger a ngikaitotoi alukiristoi. Warasi nyikimuriak akipeyounun ngipeyok, kainyo a epit kangolo, epeyounete ngitunga ngiche ngimalaikae peeyenete. Kitamutu lu eenitae alojela tosub kienitae esi ka kesi aapei. Kitamutu lu eboliare tosub kiboliare esi ka kesi aapei. Ejoikinit akuuta erimasi ngitunga daang, toliwor ekile ka aberu lu irichuna. Irirae Akuj lukiliok ka luberu lu epereenete peiutut, ta ngikalomak. Nyiiliworosi ngitunga lu eminasi ngaropiyae. Kitemokin esi ngiboro lu itingito. Kainyo alimu Akuj alope ebala, “Nyekemiekini jik, kori nyakachakari.” Ngesi kititinyoror atolimutu atamasi, “Ekapolon ngesi kengarakini ayong, nyaemi. Anukiro kasubakinea ayong itwaan?” Kitamutu ngikarikok kus lu kolong kilimokinete esi ngakiro a Akuj. Kitama epit a elote kech sodi kirokut anupit kech. Yesu Kiristo ngesi erai lopei been ka akolongit na ta lokajik. Warasi ngakitatamet ngakaalak nagelagelae kitowoliorete esi alorot alo etenoono. Ejoikinit ngitai yok itogogongio a ajokis a Akuj, meere a ngitalio alu a epit a akimuj. Emam itwaan ni ewap ngitalio ngulu ni apot kingarakis. Nyechamit ngimurok a akai a Akuj lu esubete etich ani ilipitotor Ngiyaudi Akuj enyamete akipeyos na ipeyokinitoe Akuj. Eyauni Emuron Loapolon a akai a Akuj a Ngiyaudi ngaakot a ngitieng ni Italeuno Noi sodi tolemu ngalemikinet kotere ngasechesea. Nakaneni ipeyoe akiring a ngitieng kangulu anikalapatan a adakar. Ibore ngini ngesi atoanea Yesu dang anikalapatan a ere, sodi kitiliworea ngitunga lu ikiuna anakisech a ngaakot keng a elope. Atoloto tokona ngoni nikeng nikalapatan a adakar, sodi ataanyutu ka ngesi ngileech aapei. Kainyo emam ngoni ere lokajik kane anakwap. Kidarit ngoni ere lo ebuni. Epuruutu robo ngoni jiik Akuj toliwor akipeyos yok ani a Yesu. Ibore ngini ngesi ekipur lo elimunete ngitunga lu elimorito ekiro keng. Warasi nyikimuriak akisub naajokak ingaranakinosi, kainyo nguna eraakasi ngalemunet na ejoikinito Akuj. Tokera ngikarikok kus kiwapa ngitalio kech. Echoikinito kesi ngitai kus nakwaare ka naparan, nabo elimuunete ngakiro a etich alo asubete kesi alongaren Akuj. Ani kiwap esi ngakiro kech, esubete kesi etich kech elakara. Ani pekiwap ngakiro kech, esubete etich ialolongete nakaneni emam ibore ianyunete esi alopit kangolo. Torubakisi kilipakinito. Kiyeni sua dir atamar ejok sua ngitai, kainyo kisaki atosuba ibore ni eriyan jiik. Kemaimai esi noi atamar kilipakinae Akuj sodi abunio nikus atipei. Eteyaru Akuj Ekapolon yok Yesu lo erai Ekeyokon Loapolon a ngamesekin ani abukorea ngaakot keng na eyookinete achamunet nakajik. Kimiekisi Akuj na a ekisil kiinak esi ibore daang niajokon ni isakete esi tosubeta na echamit ngesi. Kimiekisi ngesi nabo dang tosub na echamit ngesi anikosi, ani a Yesu alo erai Kiristo. Nabo kipuruunoe Yesu Kiristo jik nakajik! Aamen. Kemaimai esi ngikaitotoi kang atamar tanaikisi kare topupokis ngakiro nakitititinyete nu. Kainyo nyewoi abarua nakegirak ayong esi naga. Asaki ayong esi toyena atamar alachakin lokaatoyok Timoteo alojela. Ani kebu ngesi atipei, kirukuni ayong ka ngesi na abunio aanyun esi. Kimalata ngikarikok kus daang ka ngitunga a Akuj daang. Kimalaate esi ngikaitotoi lu eponito alo Italia. Kigasi atamar kiruko esi daang ka ajokis a Akuj. Ayong Yakobo ekasuban etich a Akuj ka lo a Ekapolon Yesu Kiristo ngesi egirunit abarua naga. Emalae ngitela lutomon ka ngiarei lu epetakina nakwapea daang. Ngikaitotoi kang, talakaros noi na kitingeta esi ngakiningioto nagelagelae, kainyo iyenete esi atamar na ipiunio anupit kus ngakiningioto, kitaanyuni esi anaikinit. Toyena dir atamar kigangi esi anaikinit kus jik, toliworotor lu ikiuna nabo lu itemokino, emam ibore iituno. Ani keyei ipei anikus ni emam aosou, ejoikinit ngesi ilipi Akuj na einakini ngesi, kainyo einanakini Akuj ngitunga daang a apatanu ka ajokis. Nakaneni ani na ilipea iyong, ejoikinit inupi dir emam ibore ingayat. Itwaan cha daang ni engayat, ikoni ngitoroi a anam lu ijukit ekuwam ilapanarosi. Nyeetama itwaan ni ikoni neni kori eyei ibore aanyuni ani a Ekapolon Yesu, kainyo erai ngesi itwaan ni etiakit ngitai ngaarei, esadanakini alorotin kadaang. Ekiristoit lo ibootonit, ejoikinit elakar na ikeunea ngesi Akuj, ani lokabaran ejoikinit elakar na etiyaunea ngesi Akuj. Kainyo engopiyari ekabaran loger a aturot ana a amoni. Ejupuni akolong erirae noi tonom ekitoe, eraraunosi ngatur tongopia asir keng. Aloger alopei kangolo, inyasun ekabaran esaa lo esubea etich keng. Epiaritae itwaan ni enaikini ngakiningioto kitiru kainyo ani kitiru ngesi einakinio ebachit lo akiyar, lo echikakini Akuj lu eminasi ngesi. Ani kining itwaan, nyejoikinit elimuni tama, “Akuj ngesi keningit.” Kainyo nyiningete Akuj ngakiro naaronok, nabo emam itwaan iningi ngesi. Nakaneni iningio itwaan na iriarea ngesi nabo tominu etereku keng loaronon. Sodi etereku ngolo ani kiraka itwaan, irokuni akisech, ani kemasikin akisech nitwaan, irokuni akitu. Warasi nyikingalae ngikaitotoi kang luminan! Ebunit ainakinet daang naajokon na ikiuna anadis, ebunit Anakuj ana kolong asubuni ibore ni echai anadis daang. Nyibelo ngesi jik kori nyerea min etorube. Kotere echami keng a ilope, abu ngesi kitaanyu ngoni akiyar keng anakiroit ana iteni, sodi atarauneta ngoni lu kingareni aloborei kadaang alu asubi ngesi. Ngikaitotoi kang luminan, toyena ngakiro nugu! Ejoikinit itwaan daang erai ni ikirikira apupokin, nakaneni toliwor ni edidis akiruorikin nabo nyeengo atipei. Kainyo nyitaanyuni angoit itwaan ngakiro a Akuj na eteniyete. Nakaneni totiakisi ngakiro na a ngileech ka naaronok daang tachadasi nialonan. Tokera Akuj tachamut akiroit na iwaakini ngesi lotai kus, na epedori ayuun esi. Ejoikinit isubete na elimunito ngakiro a Akuj, meere akipup bon, toliworos ingalasi make. Itwaan cha daang ni epupi ngakiro a Akuj nakaneni nyeesub loger lo elimunitotor ngakiro a Akuj, ikoni itwaan ni isemee ereet keng anakiyo. Isemo ngesi niajokon ani erumor torotok, sodi kimuriak atipei eger lota ekoni. Nakaneni itwaan cha daang ni isemee etal lo ikiuna lokojokon lo elachanakini ngitunga dir, ngini erubakini irichunit nabo nyerai lo epupi dio kimuriak, nakaneni esubi loger lo elimunitotor ngakiro a Akuj, epiari Akuj itwaan ngini anakiro ana esubi. Ani keyei itwaan ni itamit atamar ewapit ngakiro a edin, nakaneni nyiiyapunite ngesi angajep keng anakiro a naaronok, erai edin keng pas nabo ingala ngesi bon. Edin loajokon lo ikiuna alongaren Akuj Apa ngesi lo, ngesi lo a achoikin ngikokiok ka ngapuseru alochan kech ka akirichun iyong ilope nyikitoron ngakiro a akwap. Ngikaitotoi kang, kona inupitotor esi Ekapolon yok Yesu Kiristo lo erai Ekapolon a apolou, warasi nyiitiakatiakata ngitunga kotere asir kech. Kainyo ani kebu ekabaran lo enapit ekabaabat lo egolit ka ngiworui lukaanikak ajokak lokiriam kus, sodi tolom ekebootonit dang lo enapit ngiworui lu ekorisiuna. Ani kidodiu iyong arimatoi ani eyei lo enapit ngiworui luajokak sodi tolimok tama, “Kiboikin lokicholong loajokon logo,” nakaneni tolimok ekebootonit tama, “Towo kaama, kori kiboikin kwap nege diyete ngakejen kang,” tokona, nyipakanara cha esi ngitunga a, nabo itiakuunut ngakiro alotamen aluaronok a? Topupokisi ngikaitotoi kang luminan! Aseu Akuj ngitunga lu ibootonit anakwapea kanu sodi toliworos ngitunga lu enupito ngakiro a Akuj lokojokon noi, nabo taanyut apolou na echikakini ngesi lu eminasi ngesi. Nakaneni ijamuarito esi ngikebootok! Tokona, meere ngikabarak kichekiyarito esi nabo kesi kirito esi nitubet ekies a? Ikwa meere kesi imenyete ekiro loajokon kilimokin esi a? Isubete esi na iyookino erai kiwap ngakiro a etal a Apolou a Akuj loger lo igiritere nagiran kona, “Tominak ekidunyet kon loger lo iminar iyong akwaan kon a ilope.” Nakaneni ani kiminakis esi ngitunga kotere esire kech, isechito esi nakaneni kirirae esi etal atamar iraakasi lu isechito etal. Itwaan cha daang ni esechi etal epei, esechi daang. Kainyo lopei kolong alimuni tama, “Nyiilom,” ngesi nabo abala, “Nyiiar.” Tani pekilom iyong, isech iyong etal erai kiar. Kanguna kiruoro nabo tosuba ngakiro loger a ngitunga alu irirao a etal alo kilachakini ngoni dir. Kainyo aloriras a Akuj, nyisieni Akuj itwaan ni nyisieno ngitunga luche, nakaneni idwangito ngisien eriras. Ngikaitotoi kang, nyoni ajokis a itwaan ani elimuni atamar arai ngesi ekanupan tarai nyidodiunito ngakiro na esubi ngesi kongina? Epedori anupit ngina ayuun ngesi a? Ani keya ngikaitotoi ka ngakaitotoi na emam ngiworui ka akimuj nanyamat. Nyoni ikajokon ilimokineta esi kesi tamasi, “Kipiari esi Akuj! Kipiara akim sodi kimuja niajokon!” Tarai nyeinakina esi kesi ngiboro lu eyareta? Ikoni anupit neni, ani kerai anupit bon inupit iyong tamam ibore ni isubi, ikoni anupit ngina ibore nikatoan. Nakaneni elimuni itwaan iche tama, “Erai itwaan ipei ikanupan, erai niche nikasuban ngitichisio.” Ngakiro na atachakini ayong ngesi nugu, “Kidodikinae ayong eger lo eliworor itwaan ekanupan emam ngitichisio esubi. Kedodikini ayong iyong eger lo araakar ayong ekanupan a ngitichisio alu asubi.” Inupit iyong atamar erai Akuj apei bon a? Itemokino nguna! Nakaneni enupito tani ngipean kongina, nabo emaranete a ebuloi. Etige ekabangabangat! Isaki iyong kidodikin atamar erai anupit na emam ngitichisio pas a? Ekokini kolong apaayok Aburaam echamun ka Akuj ai? Achamun kotere ngitichisio keng, na alemunea ngesi lokookeng Isaka kiwaak lokeno lo ipeyonokinere Akuj. Ingolik tokona a? Anupit keng ka ngitichisio keng, asubete daang etich aapei, aliwor anupit keng na ikiuna kotere ngitichisio keng. Sodi kiyookinos ngagiran na igiritae kona, “Anupi Aburaam ngakiro a Akuj, kotere anupit keng, kimaru Akuj ngesi atamar erai itwaan ni etenoono.” Kotere nguna tanyarae Aburaam lopae keng a Akuj. Ianyungasi tokona a, echamun itwaan ka Akuj kotere ngitichisio keng, meere kotere anupit keng bon. Ekote ngakiro neni tani ani a amalaat ana anyaritae Raab. Achamunosi ngesi ka Akuj kotere ngitichisio keng, ani etepeyonea ngikarebok lu a Isirael nabo kingarak kesi tosiwa a erot a eche. Tokona bocha, loger lo ikonea akwaan na etoanit emam Etau a Akuj, anupit dang ikoni na etoanit emam ngitichisio. Ngikaitotoi kang, nyejoikinit ngikaalak kus eliworosi ngiketatamak. Loger lo iyeneta esi atamar kirirao ngoni ngiketatamak lokojokon noi akidwang luche. Kainyo elalak ngakiro na kichwanganakini ngoni daang. Ani keyei itwaan ni nyichwanganakini anakiro ana iruoro, erai ngesi itwaan ni ikiuna ni epedori akirichun akwaan keng daang. Kirepanakini ngoni akitoe lokume a asikiria kisaki kiwap ngakiro yok, nakaneni kipedori ngoni akisiitor ngesi ni kisaki. Kingolikisi tani atubwa, tani kepolot kwaani, nabo kijukite ekuwam loapolon, eyei ikiguriet niichi ni epedorea ekeguron areere. Eger a angajep dang ngolo, erai ngesi ibore nidiochichi, nakaneni epedori alimun ngakiro nakationok noi na a ngiwog. Toyen cha eger lo epedorea ekatwanyit a akim anomiar amoni daang etia ni etia! Ikoni angajep dang akim. Erono noi lokojokon, eyei ngesi nawat yok nabo ekeikinit aronis nawat yok daang. Enomianari eboyor yok daang a akim ana ebunit anakim ana nyedungeene. Epedori itwaan akitapatanuun nabo etapatanu ngitieng luche daang, ngitieng a amoni ka ngikieny, ngiborei lu eliato ta ngikolea. Nakaneni emam itwaan apedo akitapatanuun angajep. Erono angajep nyirichun jik, nabo ileleba akisierit nakaaran. Erai ngesi kibuanakinea ngoni Akuj Apa na erai Ekapolon yok alakara nabo ngesi kilamea ngitunga lu kolong asubuni Akuj ikwaan ka ngesi. Itorunito ngakiro napiaret ka nakilamet nakituk apei. Ngikaitotoi kang, nyejoikinit nguna ikokinete neni! Epedori eitanit a elelea a epei aitun ngakipi nakaalimok ka nakaabarak imorikina a? Ngikaitotoi kang! Nyepedori ekitoe lo ikwaan ka emeyen akonere ageor a ngikito a akimiet, nyepedori emusabib akonere ngameyana, kori nyepedori elelea lokaabaran aleleun ngakipi nakaalimok. Eyei itwaan anikus ni eos tochwaana a? Echamit ngesi idodiuni a eboyor keng a loajokon ka ngitichisio keng luajokak lu itiditeunor ngesi nabo toos. Nakaneni ani kileleba ngitai kus arorokanut, aremo ka abolo na idingatar, tojongoto akiwoga kitiliwosi ngakiro na iteni alioko. Nyebunit aosou na ikoni ngina anadis, erai aka akwap kana, nyerai aka a Etau a Akuj, erai aka a Ekipe. Ni eyei arorokanut ka adinga, eya nginyas dang ka ngakiro naaronok daang. Nakaneni mono ekingaren, ikiuna aosou na ebunit alokidiama, nabo erai aka ekisil ka apalaanut ta aelo. Erai na ileleba ngisien ka ngakiro naajokak nakaalak, emam akipakarit ngitunga ngiche, kori amodeanut. Erai ajokis ngalemet a ngikinyam alu itaate lu eminasi ekisil. Nyai ni ebunitor ejie ka eburas lu eya kiding kus? Itorunito lotereku kus lo isaketa esi amera, etereku ngolo itibitibi ngawat kus. Isakete esi ngiboro nakaneni nyianyunete, sodi tasaka esi akiar. Kimuyete esi ngiboro lokojokon noi, nakaneni nyianyunete, sodi kiburata esi nabo tojwoto. Nyianyunete esi ibore ni isakete kainyo nyilipa esi Akuj ibore ngini. Ani na ilipeta esi, nyianyunete kainyo eroko na ilipitotor, ilipasi esi ngiboro sodi tomeratar esi. Abe iraakasi esi ngitunga lu nyikimunoi! Nyiyenete esi atamar aelokin ka ngitunga a akwap erai aliwor emoit a Akuj a? Itwaan cha daang ni esaki aliwor epae a ngitunga a akwap, eliwor emoit a Akuj. Nyiitamasi kori ngaka alioko ngakiro na igiritae nagiran kona, “Iterekuyarit ngesi Etau lo ewaak Akuj niyok.” Nakaneni egogong noi ajokis na kitaanyunit Akuj, loger lo igiritere nagiran kona, “Itopegi Akuj lu inisasi, nakaneni itaanyuni lu itiditeuna ajokis.” Tokona bocha, kiwapa ngakiro a Akuj. Kitopega Ekipe, nakaneni ematar ngesi ani iyakasi esi. Taapuutu nia Akuj, dio taapuu ngesi dang nikus. Kilotasi ngakan kus esi ngikasechak! Kitaleutu ngitai kus esi ngikamodeanak! Kialolongo, kigoro nabo tosutonokis, kilocho akiana kus toliwor akigoro, nabo alakara kus toliwor akimoore! Kitiditeunos alongaren Akuj, nakaneni kikeuni ngesi esi. Ngikaitotoi kang! Nyiitoronasi esi make. Itwaan cha daang ni itoronit lokaatokeng lokiristoit kori ni irirae, itoronit ka akirirare etal. Ani kirirae iyong etal, ikwa nyeringa iyong irai ekewapan etal, nakaneni iliwor iyong ekeriran. Akuj bon erai akepotoron a etal ka akeriran. Ngesi bon epedori ayuun ka amunyar. Itamit iyong atamar iyong ngesi ngae, iriraa iyong ekidunyet kon? Topupokisi mono esi ngakiro kang, esi lu ibalasi, “Akolongit na kori moi, kilosi lore eche, eboikinos inaa ekaru epei sodi atolomakisi egielit, atoriamutu ngaropiyae nakaalak.” Nyiyenete esi tani atamar ikokini eboyor kus moi ai! Ikote esi eloch lo etakanuni kotere esaa lodiochichi ani erumor tongopiya. Ejoikinit iyong ilimuni kona, “Ani kechamit Ekapolon, kiyari sodi atosuba nugu ka ngun.” Nakaneni inisasi tokona esi nabo iwogasi, ngiwog lu ikote ngulu daang, eroko. Tokona bocha, itwaan ni nyesubi ngakiro naajokak na ejoikinit ngesi esubi, erai ekasechan. Ani tokona esi ngikabarak, topupokisi ngakiro kang! Kigoro tosutonokis kotere ngichan lu ianyunete esi! Abosia ebari kus, nabo amunyasi ngiworui kus ngakimam. Erika egolit kus ka akwangat ekut. Ekut ngolo ngesi idodiuni atamar isechito esi, nakaneni enomiari ngawat kus loger a akim. Ingadaasi esi ebari kus alalaar ngirwa lu esal lugu. Itowosotor esi ngitunga lu esubete etich anamanat kus emam ngaropiyae itanyam. Topupokisi ngakiro na iburaata kesi! Akigoro kangulu elemete ngamanat kus, anang naki a Akuj Namerikanyer. Ibooyete esi anakwapea kanu anajako ka amera, itutumasi esi kotere akolongit na kingolere. Irirata esi nabo iar itwaan ni etenoono nakaneni nyikitepegi ngesi esi. Ngikaitotoi kang, totitinyikisi robo ngichan tanang na ebunio Ekapolon Yesu. Kingolikisi eger lo etitinyikinitor eketan idarit amana keng ebwangi ngalemet naajokak. Idari ngesi akiru na a erupe ka na a akiporo etitinyikinit. Ejoikinit esi dang ititinyikinete. Torubakisi igienosi lokojokon, kainyo aapuu akolongit na ebongunio Ekapolon. Ngikaitotoi kang, tojongoto akiburare make sodi nyikirira esi Akuj. Aapuu Ekeriran, edikino etakanuni. Ngikaitotoi kang, kitamutu ngikadwarak a Akuj lu eruorosi elimito ekiro a Ekapolon. Toyena atamar eraakasi kesi ekitetemes a atitinyikinit ngichan. Kibala ngoni araakasi kesi lu apiaritae ani anaikineta. Iirasi esi ngakiro a atitinyikinit ka Yob, nabo iyenete esi na asubea Ekapolon ngesi adaunet kanguna. Kainyo ileleba akisienut ka ajokis nia Ekapolon. Kanguna kadaang ngikaitotoi kang, tochoito ikongete anakiro ana ichikakinete. Tochoito ikongete adis kori ngalup kori ibore niche daang. Tolim tama, “Ee” na iikinitor ngakiro, kori “Mam” na ingeritor, sodi nyikirira iyong Akuj. Eyei itwaan alokiding kus ni ichana a? Ejoikinit ngesi ilipi. Eyei itwaan idio elakara a? Ejoikinit ngesi eokini ipuruunit Akuj. Eyei itwaan idio ni edeaka? Ejoikinit ngesi enyarae ngikasukou a ekanisa kilipakis ngesi sodi kiwasakis akimiet elimito ekiro a Ekapolon. Akilip enupitae itangalekini itwaan ni edeak, itojoki Ekapolon ngesi, nabo ani kesechit ngesi, erimakinio ngasechesea na esubit ngesi. Tokona bocha, tolimonokinos ngasechesea kus make sodi kilipanakinos make sodi kitojok. Akilip a itwaan aniajokon, eyei agogongu na epedori akisub nakaalak. Arai Elija itwaan loger lopei yok. Kilip ngesi lokojokon noi atamar nyeeram akiru, nakaneni mam akiru abu taram a ngikaru a nguuni ka ngilapio ngikan-kapei. Kilip ngesi nabo taram akiru nakaalan tokon ageor. Ngikaitotoi kang! Ani kibatar ipei kus anakiro ana iteni sodi tobuu itwaan iche ngesi, kitamutu nugu, itwaan cha daang ni ereuni ekasechan aloboyor keng aloaronon, eyuuni etau a ekasechan kangolo anakitu torimakinere ngasechesea nakaalak. Ayong Petero lo arai emeanara a Yesu Kiristo ngesi egirunit abarua naga. Egirakinit ngitunga luseuna a Akuj lu edokinito epetakina wadaang a akwap a Ponto, ka Galatia, ka Kapadokia, ka Asia ta Bitunia. Kiseunio esi ani achamitor Akuj Apa, nabo kitiliwo Etau a Akuj ngitunga lu italeuno, sodi kiwapa Yesu Kiristo nabo kitowatakin ngaakot keng. Agasi atamar taanyut esi ajokis ka ekisil lokojokon noi. Atobuakisi Akuj ka Apa a Ekapolon yok Yesu Kiristo alakara! Kona kisienitor ngoni ngesi noi, kitaanyu ngesi ngoni akiyar nakitetet ani eteyarunea Yesu Kiristo. Kitaanyu ngesi ngoni akigieno na a akiyar, nakaneni kiitanit ngoni aanyun apiaro na idaritor Akuj ngitunga keng. Kidaritor ngesi esi anadis, ni nyeboseta kori nyiinyasunotor kori nyeengopiareta. Eraakasi kesi ngakus, esi lu kichoikinit Akuj a agogongu keng niajokon kotere ayuuno na edikino idodiunio ngirwa lu a esal. Talakaros kotere nugu, tani bo kedikino tokona dang ialolongete wadio kotere ngakiningioto nagelagelae na kichanere. Eraakasi nguna tatakanunea anupit kus atamar erai na iteni. Tani egolit lo epedorio akinyasun, eroyeeneo a akim, nakaneni anupit kus na ejok noi idwangit egolit, ejoikinit eroyo sodi tanaikinea. Sodi taanyuneta esi ekipur ka apolou ta arimatoi Akolongit na idodiunere Yesu Kiristo. Iminasi esi ngesi tani pakianyungarito, nabo inupito esi ngakiro keng tani tokona peiteete ngesi. Nakaneni ilakarosi esi lokojokon noi a alakara ana a ekipur ana emam kona isisaunio, kainyo ianyunito esi ayuuno a ngitai kus, na erai ngesi inupitotor esi. Erai ngakiro nugu ngesi kolong esemooto ngikadwarak a Akuj lokojokon, nabo tongicha ngakiro a ayuuno kangina, sodi todwara kesi ngakiro a ainakinet ana adikino Akuj kiinakini esi. Asakete kesi angichun atamar esubakinosi ngakiro nguna ori ka atamar esubakinosi kwaani. Esaa ngolo ngesi lo kolong edodikinit kesi Etau a Akuj lo ayei tooma keng, edwari ngakiro na enaikini Kiristo na eboliare ka ekipur lo iwapit aboliaro. Edodikini Akuj ngikadwarak lu atamar pearai etich kech lo ingarakinotor kesi ngikulepek, nakaneni arai lo kingarakinet esi. Ekote neni na eruorotor kesi ngakiro na tokona iirasi esi ani eya ngikiyaka lu alimorete Ngakiro Naajokak kotere agogongu a Etau a Akuj alo ameunio anadis. Ngakiro nguna ngesi esakete tani ngimalaikae akiyen. Tokona bocha, kiboikinos erikino ngitamen kus. Kirichunos, kigienokinos noi apiaro na ianyunete esi na idodiunere Yesu Kiristo. Kiwapa ngakiro a Akuj loger a ngide keng, warasi nyiiwapa eboyor loaronon lo kolong sek iwapito a abangaanut. Ejoikinit esi iraakasi lu italeuno anakiro kadaang ana isubete esi, loger lo italeunookor Akuj na kinyarae esi. Igiritae nagiran kona, “Toliworos lu italeuno kainyo etaleuno ayong.” Inyarito esi ngesi Apa na ilipeta Akuj na irirae ngitunga daang a eger a epei, itemem ka na asub itwaan daang. Tokona bocha, kiboyoto eboyor kus daang kane anakwapin ikerito ngesi. Kainyo iyenete esi ibore ni kolong atachario sodi kitalachakinere esi dir aloboyor alopasit kolong irokunete esi ani kata apaakus. Pearai ibore ngini ni epedorio akinyasun, loger a akwangat kori egolit, nakaneni kitaleunio ngoni a ngaakot anatenoyek a Kiristo alo ekoni imesek ni emam ni ichwangakina kori ni emam akemer. Aseuni kolong Akuj ngesi eringa ngakwapin nyesubakina nabo edodiunio ngirwa lu a esal lugu kotere ngoni. Kotere ngesi, inupito esi ngakiro a Akuj ana kolong eteyaruni ngesi sodi kitaanyu ngesi ekipur, sodi toliworos lu inupito nabo kigienos ngakiro a Akuj. Kona tokona italeunotor esi ani iwapeta ngakiro na iteni, nabo iminakis dir ngikaitotoi luche, tominakinos esi make lokojokon a ngitai kus kadaang. Kainyo kidoun esi nakitetet iraakasi ngide lu nyetoakete, meere lu etoakete, kotere akiroit na eyari nabo na nyedaun a Akuj. Loger lo igiritere nagiran kona, “Ikote ngitunga daang nginyia, nabo ikoni ekipur kech dang ngatur. Eoniyorete nginyia, nabo eraraun ngatur, nakaneni erubi akiroit a Ekapolon jik.” Akiroit naga ngesi Ngakiro Naajokak na kolong kilimokinio esi. Tapalikisi tokona robo ngakiro naaronok daang na ikote alioko ka amodeanut ka arorokanut ta ngakiro na eraakasi ngaka ngiyeny daang. Kikokisi ngide luuchik lu imuito ngakile, toliworos esi dang lu kimuito ngakiro a Akuj, sodi topolout esi ani imaasa sodi kitoyuunere. Loger lo igiritere nagiran kona, “Ianyut esi ngikulepek eger lo ejokia Ekapolon.” Potu nia Ekapolon, amoru na eyari na angerete ngitunga ebalasi erono, nakaneni aseuni Akuj aliwor naajokon. Potu nikeng loger a ngamoru ana eyarete, sodi kitodukere esi akai a Akuj na etau, na erai ngesi isubeta esi etich iraakasi ngimurok a akai a Akuj lu italeuno nabo lu elemuununete ngakipeyos a etau na italakarete Akuj ani a Yesu Kiristo. Kainyo igiritae nagiran kona, “Aseuni ayong amoru naajokon, na ewaakini ayong Sion toliwor amoru na igangit akai, ani itwaan cha daang ni enupi ngakiro keng, nyirumete ngileech.” Etenoono amoru ngina noi anikus alu inupito, nakaneni ani ngulu nyenupito, “Amoru na kolong angerete ngikadukok ebaasi erono, ngesi tokona ajoker noi edwang daang.” Nabo igiritae nagiran ngache kona, “Amoru naga ngesi edakari ngitunga, ataaba na ibusokini kesi.” Adakarosi kesi kainyo awounete akinup akiroit a Akuj, achamit Akuj kesi kikokis neni. Nakaneni iraakasi esi ebukut lo eseunitae, ngimurok a Ekapolon, ebukut lo italeuno, ngitunga a Akuj a alope lu aseun tolimosi Ngakiro Naajokak a Akuj ana kolong kinyarae esi anaribu kilomak nakicha keng naajokon noi. Peiraakasi kolong esi sek ngitunga a Akuj, nakaneni iliworosi tokona ngitunga keng, peiyenete kolong esi sek akisienut a Akuj, nakaneni ianyut tokona esi ngisien keng. Kemaimai ayong esi ngipaalon kang lu ikote ngitunga lu ibooyete anakwap ana nyerai akech nabo ikote ngitunga lu edokinito anakwapin kanu! Tongero etereku a ngawat lo erai ngesi ichani etau. Ejoikinit eboyor kus alobukui alu nyerai Ngiyaudi erai loajokon noi sodi ani kiruorotor kesi esi atamar isechito, toyana kesi ngakiro naajokak isubete esi sodi kipuro Akuj Akolongit na ebunio. Kotere ni iwapitotor esi ngakiro a Akuj, tokera ngitunga lu eraakasi ngikapolok daang. Tokera ekapolon a Ngiroma lo epolokinit luche daang, tokera tani ngikapolok lu aseu ekapolon lo epolokinit kesi akirirare lu esubete naaronok ka akipuruun lu esubete naajokak. Kainyo esaki Akuj esi tosuba ngakiro naajokak sodi kililingeta chek lu kiruorotor esi ngakiro na a abaangu. Kibooyoto loger a ngitunga alu elachakina dir, nakaneni warasi alachakina kus nyeeliwor ngesi idaitotor esi akisech, nakaneni kibooyoto loger a ngikasubak etich a Akuj. Kidodikisi ngitunga daang arimatoi, tominakisi lu eraakasi ngikanupak loger kus, tokera Akuj nabo kidodikis ekapolon a Ngiroma arimatoi. Kiwapa esi ngikasubak etich ngakiro a ngikapolok kus nabo kidodiutu arimatoi daang anikech, meere ani eya lu ajokak ka lukapatanak make, nakaneni tani ani eya lukaadengak. Kainyo kipiari esi Akuj erai kinaikis esi ni kiriebi kotere ni kiboliare pas a ngakiro ana echamit Akuj. Kainyo nyoni ikajokon ianyunete esi erai kinaikis kibungao ani isechitotor? Nakaneni ani kinaikis esi ngichan tani na isubeta ngakiro na iyookino, kipiari esi Akuj kotere nguna. Kainyo ngakiro nguna ngesi kinyarare esi, kainyo aboliare Kiristo dang kotere esi, sodi totupeta esi dang ngesi lo erai ekitetemes. Nyesecha ngesi, nabo emam itwaan eira ngesi nakanuan elimuni alioko. Na amorere ngesi, nyemoro ngesi itwaan, na echanere ngesi, nyitoema ngesi itwaan, pearai abu ngesi kigienokin Akuj na erai akatubon ngakiro na eteniyete. Kiristo elope ngesi ewoki ngasechesea yok anakwaan keng alokidiama apir, sodi atotoaka ngoni anakiro a ngasechesea nabo atoyara ana etenooko. Kitangalekin esi kotere ngajemei keng. Ikote kolong esi ngamesekin na awoliyorete alorot, nakaneni kibuun tokona esi kiwapa Ekeyokon ka Ekachoikinan a ngitai kus. Esi dang ngaberu, kiwapa ngakiro a ngikiliok kus, sodi ani keya ngikiliok ngidi lu nyenupito ngakiro a Akuj, tonupeta ani iteeto eboyor kus. Emam ngakiro tani pakilimut esi akiroit, kainyo ingolikinete atamar erai eboyor kus loa arimatoi, tarai lo ikiuna. Warasi enape kus nyeeliwor lo isirioto esi nikalapatan a ngawat, lo ikoni eger lo itokioto esi ngitim, kori akisir a ngasua a egolit kori akinap ngiworui lu esiritoe. Ejoikinit akibuseanu kus erai na ebunit alotau, akibuseanu na nyinyasun na etau alokapatanan nabo kisilite, akibuseanu na ikoni ngina ngesi ejoikinit Akuj noi. Kainyo ngaberu na kolong ngorok egienosi Akuj, esubusasi ani ewapitotor ngakiro a ngikiliok kech. Ekoni Sara neni, ewapi ngesi ngakiro a Aburaam sodi tanyara ngesi ekapolon keng. Iraakasi tokona esi tanakookeng, erai kisuba na iyookino nabo kemam ibore ikerito. Esi dang ngikiliok, ani ibooyete ka ngaberu kus, toyena lokojokon atamar epalag kesi. Kidodikisi kesi arimatoi, kainyo eanyunete kesi dang ka esi aapei ainakinet a Akuj na a akiyar. Tosuba kongina sodi nyengerere ngakilipet kus. Esal, alimuni kona, ejoikinit esi daang eraakasi ngakiro a ngitai kus ngapei. Tominakinos make loger a ngikaitotoi, nabo tapataketa toliworos lu itiditeuna. Nyiitachakis ngakiro naaronok nakisubere kori ngichen lu kichenere, nakaneni ejoikinit itachi a apiaro, kainyo apiaro kolong kichikakini esi Akuj na kinyaraa esi. Loger lo igiritere nagiran kona, “Itwaan cha daang ni esaki aminakin akiyar nabo tasaki aanyun naajokak, ejoikinit epalikini akiruor ngakiro naaronok nabo tapalik akisud ngakiro. Ejoikinit epalikini akisub naaronok tosub naajokak, ejoikinit esaki ekisil a etau keng kadaang. Kainyo itee Akuj lu etenooko nabo epupi ngakilipet kech, nakaneni itopegi Akuj lu esubete naaronok.” Ngae kiwani esi erai kimuit esi akisub na iyookino? Nakaneni ani tani kiboliare esi ani isubeta na etenooko, kipiaritae esi noi! Warasi nyiikear itwaan idio, nabo nyeeriab ngitai kus ngakiro. Nakaneni kipuruutu Kiristo alotai kus ani eraakar Ekapolon. Toliworos jiik isadito atachakin itwaan daang ngakiro na kingisi esi esaki kisisaut ngakiro na igienosi esi, nakaneni kikokisi neni a apatanu ka arimatoi. Kitojoka ngitai kus, sodi ani kiyenyio, kirumeta ngileech lu kiruorotor esi ngakiro naaronok ani iraakatar ngirukitos a Yesu, tongopikis kesi ngakiro na elimunete. Kainyo ejok kiboliare ani isubea naajokak, keraakasi nguna na echamit Akuj, akidwang aboliaro kotere akisub naaronok. Kainyo atoani kolong Kiristo atoanet apei kotere ngasechesea, totoan itwaan niajokon kotere ngikasechak, sodi kitorikio nia Akuj. Aario Kirisio erai itwaan, nakaneni kiteyarunae erai etau, ani aloboyor alo araakar ngesi etau, tolot ngesi kitatam ngikaram lu eenikinitae lojela. Eraakasi ngulu ngitai alu awounete akiwap ngakiro a Akuj na atitinyikinitor ngesi idarit Noa torumo akiduk atubwa. Ngitunga ngidikidio lu aya natubwa ngina, lu araakasi ngikan-kauni make, kesi ayuunio anakipi, ana arai ekitetemes a akibatiso ana tokona kiyuununea esi Akuj. Meere akibatiso alemar elos lo eyei nakwaan, nakaneni erai akichikakinet na echikakinio Akuj a etau aloajokon. Kiyuun esi kotere akiteyaruno a Yesu Kiristo, alo alot nadis, ibooyi tokona anakan ana aloteten a Akuj, epolokinit ngimalaikae daang, ka ngapolosio na eya nadis ta ngationisio. Kona aboliare Kirisio, ejoikinit esi dang itamete loger lopei etami ngesi, kainyo itwaan cha daang ni eboliare akwaan keng, epalikini akisech. Napei tokona jik, ejoikinit bocha esi kirikito ngakiro na echamit Akuj, nakaneni meere kiterik etereku a ngawat. Adaun kolong esaa lokooyen isubete esi ngakiro na eminasi ngibukui lu nyerai ngikanupak akisub. Ibooyete esi alomalaanu ka etereku a ngawat ka elewas ka amera a ekimuje ka na emasere epurot, ta nabo aronis na ilipitere ngakujo nasubuna. Nakaneni etalarito tokona lu nyerai ngikanupak ngakiro na nyeringa esi imorenakinosi ka kesi anamera ka eboyor loaronon, kotere nguna kiyenyete kesi esi. Nakaneni isisaunete kesi ngakiro nguna alongaren Akuj na esadit akirirare lu eyarete ka lu atoaka. Kainyo ngakiro nguna ngesi kolong etatamere tani lu atoaka Ngakiro Naajokak, ngulu eriratae eringa eyarete loger lo iriraare itwaan daang, sodi ani aloboyor kech alo etau kiboyoto kesi loger lo ibooyo Akuj. Aapuu esal a ibore kadaang. Kotere nguna, ejoikinit esi iyapunito ngakiro nabo tosubakina lokojokon, sodi topedoreta akilip. Anakiro kanguna kadaang, tominakinos make lokojokon, kainyo erapiyari amina ngasechesea nakaalak. Kipeyounutu esi luche nawiyei kus emam enguringur. Ejoikinit itwaan daang ingarakini niche a ainakinet ana ainaki ngesi Akuj, loger a ngikaweikinak alu ajokak eweikinito ngainakinet a Akuj. Itwaan cha daang ni itatami, ejoikinit itatami ngakiro a Akuj, itwaan cha daang ni esubi etich a Akuj, ejoikinit esubi a ngikilinga alu ainaki Akuj, sodi kipuruunoe Akuj a ibore kadaang, ani a Yesu Kiristo. Akuj ngina ngesi na erai ekipur ka agogongu ngakeng nakajik. Aamen. Ngipaalon kang luminan, warasi nyikitalasi ngakiro nakaapilak kiriebete esi, tosub kori eyakasi ngakiro ngache naparing esubasi anikus. Nakaneni ejoikinit ilakarosi ani kiboliare esi dang kona aboliare Kiristo, sodi talakarotor esi noi na idodiunere ekipur keng. Kipiaritae esi noi erai kiyeny ani iraakatar ngirukitos a Kiristo, idodiunit ibore ngini atamar eyei Etau a Akuj lo a ekipur nikus. Ani keyei esi lo eboliare, warasi nyeboliare kotere ni eraakar ekaaran kori ekokolan kori erukoot kori lo ematanakin ngakiro a ngitunga aluche. Nakaneni ani keboliare ngesi ani eraakar ekiristoit, nyiruma ngileech kotere nguna, nakaneni tobuak Akuj alakara ani enyaritere ngesi a ekiro a Kiristo. Anang esaa lo isiakinea eriras, nakaneni isiaunio mono kirirae ngitunga lu ilipito Akuj. Ani mono kisiak aniyok a, ikokini na enangea nia ngitunga alu nyenupito Ngakiro Naajokak na itorunito nia Akuj ai? Loger lo igiritere nagiran kona, “Etiono ngitunga luajokak ayuuno, ani ikokinete ngikasechak lu engerito Akuj ai?” Tokona bocha, lu eboliare ani echamitor Akuj atamar toboliare, ejoikinit esubete naajokak sodi kigienokinotor Akuj Akasubunan kech jik, na irichit jiik asubakin na elimuni atamar asubakini. Ngikasukou a ekanisa! Ayong lo arai ekasukout loger kus ngesi kemaimai. Arai ayong ekaanyunan a aboliaro ana aboliare Kirisio, nabo aanyuni apolou na idodiunio. Kemaimai ayong esi atamar toliworos ngikeyokok a ngamesekin ana kiinakini esi Akuj nabo tochoikisi ichamito, loger lo esakitor Akuj, meere kitingakinitae. Warasi nyiisuba etich kotere ni kitanyamere ngaropiyae, nakaneni tosuba kotere ni iminatar. Warasi nyiipolokis a ekileenu lu ebeyo tochoikis esi, nakaneni toliworos ekitetemes anamesekin. Ani na etakanunea Ekeyokon Loapolon, ianyunete esi ekiraun a ekipur lo nyengopiari akwangis keng. Aloger alopei kangolo, ejoikinit esi dang lusorok iwapete ngakiro a ngikasukou. Ejoikinit esi daang iliworosi lu itiditeuna ani eya luche sodi kingaranakinotor, kainyo igiritae nagiran a Akuj kona, “Itopegi Akuj lu iwogasi, nakaneni itaanyunit lu itiditeuna ajokis.” Ejoikinit robo esi itiditeunosi anakan a Akuj anakaagongon kingarakini, sodi kikeunea ngesi esi esaa lo esakitor ngesi. Kimiekineta ngesi ngichan kus daang, kainyo kiinakini ngesi esi ibore ni isakete. Tosubakinos lokojokon, sodi tokienya irichuna! Kainyo irimit emoit kus Ekipe akwap loger a engatuny alo irurumae esaki itwaan ni enyami. Warasi nyiilochokinosi ananupit kus sodi kitopega ngesi, kainyo iyenete esi atamar eanyunito lu eraakasi ngikanupak loger kus ngichan lu ikote lupei ngulu anakwapin kadaang. Nakaneni ani kiboliare esi wadiochichi, Akuj na a ajokis kadaang, na kinyarae esi taanyut ekipur keng lo nyedaun ani imorikinotor aapei ka Kiristo, ngesi kitiliwori esi lu ikiuna, ka lu akigang, ka akitogogong ta akiturubakin igienosi Kiristo. Emini agogongu nikeng jik! Aamen. Silipano ngesi kengarakinit ayong akigirakin esi abarua nauriyen naga, erai ngesi lokaatokang lo amuno ayong. Asaki ayong akitalakar ngitai kus nabo katolimok atamar erai akiroit na a ajokis a Akuj naga aka iteni. Torubakisi iwapito ajokis ngina. Ngitunga daang lu aseuni Akuj kwa esi, kimalaate esi kane alo Babilon. Kimalae esi tani lokookang Mariko. Kimalas niajokon kotere amina na ekiristoonu. Kagatakinit esi lu iraakasi ngika Kiristo ekisil. Ayong Simon Petero lo arai ekasuban etich ka emeanara a Yesu Kiristo ngesi egirunit abarua naga. Egirakinit ngulu etunup Akuj dir ngakiro keng loger lopei yok, kotere ateneanut a Akuj yok ka Ekayuunan Yesu Kiristo. Agasi atamar taanyut ajokis ka ekisil lokaalan noi ani iyeneta Akuj ka Ekapolon yok Yesu. Kotere agogongu a Akuj, kianyu ngoni ibore daang ni kisaki sodi atopedoreta akiboi eboyor lokikerea Akuj. Aloger alo kiyenea ngoni ngolo kolong kinyarae ngoni ataanyutu ekipur ka ajokis keng. Alorot kalo, kiinak ngoni Akuj ngainakinet naajokak noi na kolong kichikakini ngesi ngoni. Sodi topedoreta esi abuchun alotereku alo inyasuni ngitunga a akwap kotere ngainakinet nugu. Dio taanyuneta esi eboyor lo ikoni lo Akuj. Kotere napei nguna, kirichakinos kiatakis ajokis nanupit kus, kiatakisi aosou najokis kus, kiatakisi akiapunit ngakiro naosou kus, kiatakisi anaikinit nakiapunit kus ngakiro, kiatakisi aminakinit kus Akuj nanaikinit, kiatakisi amina a ekaitotoonu namina kus Akuj, kiatakisi amina namina a ekaitotoonu. Ngakiro naajokak nguna ngesi echamakina esi ianyunete. Ani kianyut esi nguna elalak noi, kitiliworete esi ngitunga lukaturonok, lu ejok eboyor anakiyen Ekapolon yok Yesu Kiristo. Kainyo itwaan cha daang ni emam ngakiro nguna, ikoni emuduk lo emam ibore itee. Emuriak ngesi atamar arimakin kolong ngasechesea keng nangorok. Tokona bocha ngikaitotoi kang, kirichakinos lokojokon akitiliwor anyaritono a Akuj ka aseuno keng ibore ni erubi anikus jik, ani kikokis esi neni, nyipalikinete esi anupit kus. Aloger kangolo, iliworosi esi dir lu kichamakin ilomarete Napolou a Akuj na nyedaun na a Ekapolon yok ka Ekayuunan Yesu Kiristo. Nakaneni kesitamununi ayong esi jiik ngakiro nugu, tani sek kiyenete esi, nabo tonupito lokojokon ngakiro na ianyut. Engolikinit ayong atamar itemokino ayong kesitamuni iyong ngakiro nugu na eringaakar ayari. Ayeni ayong atamar kitiaka atipei ka akwaan nakatoan naga, loger lo kalimokinea Ekapolon yok Yesu Kiristo dir. Erichakin robo ayong noi asakakin esi erot lo itamuneta ngakiro nugu jiik, katoana ayong kerumor. Nakitatamea sua esi atamar ebuni Ekapolon yok Yesu Kiristo a agogongu anakationon, pekisuruori sua esi a ngakiro na a alioko. Kingolik sua apolou keng a ngakonyen kosi a ngikulepek. Kiya sua neni na edodikinea Akuj Apa ngesi arimatoi nabo kitaanyu ekipur. Tolim Akuj na erai Ekipur lo Epol noi tama, “Lokookang lo amina ayong ngesi lo, alakara ayong kotere ngesi!” Kiirari sua ngikulepek etoil keng ebuni anadis, nakirukitor sua ka ngesi alomoru a Akuj. Nakaneni kinupi tokona ngoni dir ngakiro na eruorosi ngikadwarak a Akuj. Ejoikinit esi iwapete ngakiro nugu kainyo ikote ataa na inwakunit ni eribokinit tanang ni echilea akwaar sodi kimau akwangis a etop alo a ataparach alotai kus. Kanguna kadaang, toyena atamar emam itwaan epedori bon akisisaun akiroit na edwaritae Anagiran. Kainyo emam nakanuan ngakiro a Akuj na adwar itwaan loger lo echamit ngesi ilope. Nakaneni eruorosi ngitunga ngakiro a Akuj loger lo edodikinitor Etau a Akuj. Kolong sek atakanuunete ngikadwarak lu a alioko alotunga. Aloger alopei kangolo, etakanuunete ngiketatamak lukaliokok anikus. Eropunete kesi ngakitatamet na a nginyas na eraakasi alioko, nabo engerete Ekapolon Yesu lo kolong alachuni kesi, sodi tomunyarator kesi atipei. Tani kikoni neni, iwapete ngikaalak ngakiro kech naaronok. Kotere ngakiro na esubete kesi, iruorotor ngiche Erot loa iteni ngakiro naaronok. Kotere etereku kech loaronon, ebarakinete kesi nakiro napasiek na irokete kesi. Alalaketa tokona ngirwa lu esaditor Ekeriran kech, nabo ekienyi Ekenyasunan kech nyeperi jik! Nyejaluna Akuj ngimalaikae lu asechete, abu tachakak kesi nanam na akim, eenitae kesi anaribu kangina idarito Akolongit na Eriras. Nyejaluna Akuj ngitunga lu kolong sek aya nakwap, pearai abu yau ngakipi na aburuchiarete akwap a ngitunga aluaronok. Noa lo etatami ngakiro na etenooko ka ngitunga luche lukan-kaarei kesi ayuuni ngesi make. Erirae Akuj ngitunga a ngirerea a Sodom ka Gomora, tonomia kidong ekuruon bon. Kitiliwo ngakiro kech ekitetemes kanguna esubakinosi alotunga alu engerito Akuj. Toyuu ngesi Loti lo arai itwaan etenoono. Ealolongi ngesi kotere eboyor a ngitunga aluaronok. Ebooyi itwaan ni atenoono ngini anikech, nabo ealolongi ngesi ngirwa daang kotere ngakiro naaronok na apupi ngesi kitee kesi esubete. Nakaneni eyeni Akuj ayuun ngitunga lu eminasi ngesi anakiningioto kech nabo eyeni aisikin luaronok ananyunyura tanang Akolongit na Eriras, tarai cha noi lu iwapito etereku loaronon a ngawat nabo kimenyarito apolou a Akuj. Eraakasi ngiketatamak lukaliokok ngulu lu ikileenikinit nabo kiwogas, nabo nyekerito kesi ngisubuna lu ipuroi lu eya kidiama, nakaneni erai iyenyete kesi. Tani ngimalaikae lu etiono noi apolou kech idwangit na a ngiketatamak alukaliokok kangulu, nyititaate kesi a ngiyeny alongaren Ekapolon. Nakaneni itwangete ngitunga lu loger a ngitieng a moding, alu eurunio sodi kirumunae ka akiar, ematanakinosi kesi ngakiro daang na nyeyenete iyenyasi. Inyasunio kesi loger a ngitieng a amoni, nakaneni eboliare kesi dang loger lo eboliatar kesi luche. Eminasi kesi akisub ibore daang naparan ileere, kitemuneto etereku a ngawat kech. Eraakasi kesi ngitunga lupasiek ileechikinit na imujeta ka esi, kainyo ejoikinito kesi jiik ngirotin kech lu a amodeanut! Emam ichebore eminasi kesi akitere akidwang ngaberu na imalaikinit, nyienguni jik etereku lo imuitor kesi akisech. Ibatanarete kesi ngitunga lupalag. Anaikis kolong ngitai kech adakanu. Ilamit Akuj kesi! Adepasi kesi erot lo itenene awoliyosi, ewapakis erot lo ewapi Balaam lokookeng a Beor, lo amina ngaropiyae na adikino ngesi eanyuni ani esubea naaronok sodi kikilakinae ngesi kotere akisech keng. Kiruorik esikiria keng loger a itwaan kitapalik ngakiro na esikerepikinito ngesi. Ikote ngitunga ngulu ngileleae lu kijuasi, ikote ngidowon lu ekutanari ekuwam. Asubaki kolong Akuj ni epete kesi anaaut ana eribokinit nikirion chuch. Iruorosi kesi ngakiro napasiek iwogasi, nabo ibatanarete kesi a etereku aloaronon a ngawat kech, ngulu aringa ebuchunosi alokasechak. Ichikakinito kesi luche atamar eraunete ngitunga lu alachakin dir nakaneni toringa kesi ngikulepek nyelachuna anakiro anakenyasunak, kainyo erai itwaan erikot a ibore kadaang ani eneikin ngesi. Ani kebuchun ngitunga anakiro anakenyasunak a akwap, aloger alo eyeneta kesi dir Ekapolon ka Ekayuunan yok Yesu Kiristo, nabo tobongokis kesi akisub ngakiro nguna sodi tokuruwo kesi akipiun naaronok, erono eboyor lo ekisidi a ngitunga kangulu akidwang lo ekingaren. Kejoikinit kolong kesi peeyenunete erot lo etenoono, akidwang akiyen ani erumor tongero akichikakinet na italeuno adungokinio kesi. Nguna asubasi anikech idodiunito atamar eraakasi ngaka iteni ngakisikwaanet nugu, “Ebongokini iingok akinyam ngalekan keng,” nabo, “Eputir lo elotar aseger, abongo akimodamoda alochoto.” Ngipaalon kang luminan, erai abarua na a ngaarei kegirak ayong esi naga. Anabaruae anaarei kanu, kesitam ayong esi ngakiro nugu asaki akiteriengun ngitamen luajokak anikus. Asaki ayong esi kitamut ngakiro na kolong eruorosi ngikadwarak a Akuj lukabekoonok, ka ngakiro na adunguni Ekapolon ka Ekayuunan, kitaanyut esi ngimeanara. Mono ekingaren, ejoikinit esi iyenete atamar ngirwa lu esal, epote ngitunga ngiche lu iwapete etereku loaronon a ngawat kech. Kikianatar kesi esi nabo ingitasi ebalasi, “Abe echika kolong ngesi atamar abonguni a? Nyali tokona? Atoaka tani ta apayok, nakaneni ikoni ibore daang eger lo kolong sek asubere akwap!” Iyachakinito kesi ajamuarit ngakiro na adungunio Akuj akiroit kolong kanuan sodi tosubunae adis ka akwap. Asubunio akwap anakipi, erai ngakipi asubere, nakaneni erai nabo ngakipi, ngakipi na kolong aburuchiarito akwap, ngesi enyasunere akwap na kolong ngorot. Nakaneni adis ka akwap na tokona eyakasi, erai akiroit napei edungunit Akuj ngina eyakatar, sodi kinyasunere a akim. Iwaakinitae kesi idarito akolongit na iriraare ngitunga lu nyilipito Akuj kinyasunae. Ngipaalon kang luminan, warasi ibore ipei nyikimuriak! Alongaren Akuj, emam ibore etiakit akolongit apei ka ngikaru abunget apei, eraakasi luarei ngulu anikeng ngipei. Nyetinenikini Akuj nyesubakina ngakiro na echikak ngesi, loger lo itamitotor ngiche. Nakaneni enaikinit ngesi ngakiro kus kainyo nyesaki itwaan tani ipei inyasun, nakaneni esaki daang tolunga ngasechesea kech. Enangi Akolongit na ebunio Ekapolon Yesu peeyenio loger a ekokolan. Ikilauni adis lokojokon Akolongit ngina sodi tongopia. Enomiari ibore ni eyei nadis daang tomunyar. Epuripuriakin akwap ka ibore daang ni eyei nakwap. Kona inyasunere ngiboro lugu daang a eger kalo, ejoikinit esi iliworosi ngitunga lu ikote ai? Ejoikinit eboyor kus erai lo italeuno lo iminatar esi Akuj. Tosuba kongina idarito Akolongit a Akuj nabo kirichakinos esi sodi taapuunea ngesi atipei, Akolongit na enomiarea adis nabo kinyasun, nabo itokeari amonis ibore daang ni eyei nadis. Nakaneni kidarit ngoni ibore ni kichikak Akuj, adis nakitetet ka akwap nakitetet na eya ngakiro na etenooko. Tokona bocha ngipaalon kang luminan, ani idarito akolongit ngina, kirichakinos kitorukau ngesi esi isilito, emam akemer kori ibore ichwangakinito alongaren Akuj, sodi kisila ka ngesi. Toyena atamar erai anaikinit a Akuj ni esakea esi taanyut alolom na iyuunotor, loger lopei kolong kigirakinitor esi lokaatoyok lominat Paulo, a aosou ana etaanyuni ngesi Akuj. Ngakiro nugu ngesi elimuununi ngesi anabaruae kadaang ana kigiranakini esi kotere ngakiro nugu. Eya ngakiro ngache nabaruae keng na etiono akiyen na isisaate lukabangaanak ka lu nyeyenikina ngakiro nguna, kisisata eraakasi alioko, loger lo ilochieneto ngagiran nache. Sodi kinyasun kesi ngikulepek kotere nguna. Nakaneni ani esi ngipaalon kang, iyenete esi sek nugu. Tochoikinos robo sodi nyikibatasi esi ngakiro na ichwanganakinete ngikasechak, sodi kibataros esi aloboyor kus aloajokon. Nakaneni torubakisi irotokinito ngaren niajokon anajokis ka aosou a Ekapolon yok ka Ekayuunan Yesu Kiristo. Emini ekipur nikeng tokona ka jik! Aamen. Eraakasi ngakiro na kigirakinit sua esi nugu na a Akiroit ana a Akiyar. Ayei Akiroit ngina napei kolong anakisiakinet. Kiira sua nabo kianyunga a ngakonyen kosi. Iteni dir, kianyunga sua ngesi nabo atap ngakan kosi. Na atakanuunea akiyar naga, ataanyungasi sua. Nakaneni kiruoro sua ngakiro keng nabo kilimokinit esi ngakiro a akiyar ana nyedaun ana ayei nika Apa nabo kiteyenun ngoni. Kilimokinit sua esi dang nakianyunga ka nakiira sodi pot esi emorikin ka sua alokuruke alo kirukitor ka Apa ta Lokookeng Yesu Kiristo. Kigirakinit sua esi nugu sodi kitemokinor alakara kosi. Tokona, ngakiro na kiira sua ani a Lokookeng nabo atolimokisi esi kesi atamar Akuj erai akicha, nakaneni emam aribu tani nadiochichi eyei nikeng. Ani robo kitama ngoni kirukit ka ngesi, tarai nabo kiboi anaribu, kiruoro ngoni alioko nabo nyikisubi na eraakasi iteni. Nakaneni ani kiboi ngoni anakicha, loger lopei eyakar ngesi nakicha, kichamun ngoni, nabo kitosegete ngoni ngaakot a Yesu, alo erai Lokookeng, anakisech kadaang. Ani kilim atamar emam ngoni akisech, kingala ngoni make, nabo emam ngakiro na eraakasi ngaka iteni aniyok. Nakaneni ani kilimok ngoni Akuj ngasechesea yok, irichuni ngesi akichikakinet keng sodi tosub na iyookino, kirimakini ngesi ngoni ngasechesea yok sodi kitoseg ngoni anakiro ana kichwanganakini kadaang. Ani kilim ngoni atamar eringa nyesecha, kiteliokon ngoni Akuj, nabo emam akiroit keng aniyok. Ngide kang, kegirakinit ayong esi nugu sodi nyiisecha esi, nakaneni ani kesech itwaan idio, eyei epei lo imaimai Akuj Apa kotere ngoni, ngesi Yesu Kiristo, lo etenooko ngakiro keng dir. Kainyo erai Kiristo elope ngesi kirimakinere ngoni ngasechesea yok, nabo meere ngasechesea yok make, pearai tani ngasechesea a ngitunga kadaang. Ani kiwap ngoni ngitalio lu edungunit Akuj, kiyeni ngoni dir atamar kiyenu ngesi. Ani kebala itwaan ayeni ngesi, nakaneni nyiwapite ngitalio lu edungunit ngesi, eliokono itwaan ni ikoni neni nabo emam ngakiro na iteni eyeni ngesi. Nakaneni itwaan cha daang ni iwapi akiroit keng ngesi ni aliwor amina na eminar ngesi Akuj na ikiuna. Eger lo ngesi kiyenea dir atamar kirai ngoni ngipei ka Akuj, itwaan cha daang ni ebala kirukit aapei ka Akuj, ejoikinit iboikin loger lopei ebooyo Yesu Kiristo. Ngipaalon kang luminan, meere etal a ngakiro ana kegirakinit ayong esi kanu ekitetet, erai etal longorot, lo iirasi esi napei kolong anakisiakinet. Etal longorot ngesi lo a ngakiro ana kolong sek iirasi esi. Nakaneni erai tokona etal lo kegirakinit ayong esi ekitetet, kainyo etakanete ngakiro keng na iteni ani a Kiristo ka esi dang. Kainyo akadaunan aribu nabo imaunit akicha na iteni. Itwaan cha daang ni ebala ayei nakicha, nakaneni toremokino lokaatokeng, eringa eyei naribu tani tokona. Itwaan cha daang ni emina lokaatokeng, eyei nakicha, nakaneni emam ibore anikeng ni itesechi itwaan niche. Nakaneni itwaan cha daang ni eremokino lokaatokeng, eyei naribu, elosi ngesi anaribu nabo nyeyeni ni elosi kainyo etumudukan ngesi aribu. Kegirakinit ayong esi ngide kang, kainyo arimakin ngasechesea kus kotere Kiristo. Kegirakinit ayong esi taapa, kainyo iyenete esi lo kolong ayei napei anakisiakinet. Kegirakinit ayong esi ngisorok, kainyo ipiut esi Ekipe. Kegirakinit ayong esi ngide kang, kainyo iyenete esi Apa. Kegirakinit ayong esi taapa, kainyo iyenete esi lo kolong ayei napei anakisiakinet. Kegirakinit ayong esi ngisorok, kainyo igogong esi, ibooyi akiroit a Akuj anikus nabo ipiut esi Ekipe. Warasi nyiiminakis ngakiro a akwap kori ngiborei lu daang lua akwap. Ani kiminakis esi ngakiro a akwap, nyiminasi esi Akuj Apa. Ibore daang ni erai ika akwap, ibore niaronon ni iterekuyarit akwaan, ibore ni iteete ngitunga ka ni esakete, ka ibore daang anakwap ni iwogatar ngitunga, emam tani ipei ni ebunit ani a Apa, ebunit daang anakwap. Edaun akwap ka ibore daang ni eyei nakwap ni iterekuyarit ngitunga, nakaneni ibooyi itwaan ni esubi na echamit Akuj jik. Ngide kang, aapuu esal! Kilimokin esi atamar ebuni Eketepegan a Kiristo, nakaneni atakanuut tokona ngiketepegak lukaalak a Kiristo, kotere nguna kiyeni atamar aapuu esal. Pearaakasi ngitunga lugu dir ngipei ka ngoni, ngakiro nguna kesi kiisikineta ngoni, arai kolong tarai ngipei ka ngoni, kidongoto eruko ka ngoni. Nakaneni arotokinete kesi sodi kileereunio dir atamar amam tani epei anikech arai iyok. Nakaneni elelebik Yesu Kiristo Etau a Akuj nikus, kotere nguna, iyenete esi ngakiro daang. Kegirakinit bocha tokona ayong esi, meere ni nyiyeneta esi ngakiro na iteni, erai ni iyeneta esi, nabo iyenete esi atamar emam alioko na ebuni anakiro ana iteni. Ngae tokona erai ekaliokon? Ngesi itwaan daang ni ebala meere Yesu Kiristo. Erai itwaan ni ikoni neni Eketepegan a Kiristo, engerit ngesi Akuj Apa ka Lokookeng. Kainyo itwaan cha daang ni engerit Lokookeng a Akuj, engerit tani Akuj Apa, itwaan cha daang ni echamunit Lokookeng a Akuj, echamunit tani Akuj Apa. Tokona bocha, kirichakisi alotai kus ngakiro na kolong iirarete esi anakisiakinet, ani kirichakis esi ngakiro na kolong iirarete anakisiakinet nguna, iboikinosi esi jiik iraakasi ngipei ka Lokookeng a Akuj ta Akuj Apa. Akiyar na nyedaun ngesi kichikak Kiristo ngoni. Kegirakinit ayong esi nugu kotere lu esakete akingalare esi. Ani eliwor esi, kileleb esi Kiristo Etau keng. Na eringaakar Etau keng eyei nikus, nyejoikinit esi isakete itwaan ni kitatami. Kainyo kitatami esi Etau keng ngakiro daang, nakaneni eraakasi ngakiro na kitatami ngesi esi ngaka iteni, meere alioko. Kiwapa robo ngakitatamet a Etau a Akuj sodi toliwor irukito aapei ka Kiristo. Kongina ngide kang, kiruko aapei ka ngesi, sodi ani Akolongit na etakanuunea, atotitinyeketo ngoni noi nyikiruma ngileech atasaka adukakin ngesi na ebunio. Iyenete esi atamar erai Kiristo lo etenoono, ejoikinit robo esi iyenete atamar itwaan daang ni esubi ngakiro na eteniyete, erai ikoku a Akuj. Kingolikisi eger lo kiminar ngoni Akuj Apa lokojokon noi! Eger lo epolookor amina ngina noi ngesi kinyaritere ngoni ngide a Akuj, iteni dir, kirai ngoni. Ngakiro nguna ngesi pekiyeneta ngoni ngitunga a akwap, nyeyena kesi Akuj. Ngipaalon kang luminan, kirai tokona ngoni ngide a Akuj, nakaneni eringa tokona nyileereuno dir atamar kiliwor ngoni nyo. Nakaneni kiyeni ngoni atamar na etakanuunea Kiristo, kikwaanikin ngoni ka ngesi kainyo kianyungari ngoni dir eger lo ikoni ngesi. Itwaan daang ni igieno Kiristo loger ngolo, ibooyi erai lo ikiuna loger lopei eraakar Kiristo lo ikiuna. Itwaan cha daang ni esecheene, asech etal a Akuj, kainyo akisech ngesi akisech etal. Iyenete esi atamar atakanuuni Kiristo sodi tolemarea ngasechesea, nabo emam akisech tani nadiochichi anikeng. Nakaneni itwaan daang ni erukito aapei ka Kiristo, nyerubakinit esecheene, nakaneni itwaan cha daang ni erubakinit esecheene, eringa nyeanyungara ngesi kori nyeyena ngesi. Ngide kang! Warasi itwaan nyikibata esi. Itwaan cha daang ni esubi ngakiro na iyookino, erai itwaan ni etenoono, loger lopei eraakar Kiristo lo etenoono. Itwaan cha daang ni erubakinit esecheene, erai ika Ekipe, kainyo asechi kolong Ekipe napei anakisiakinet. Akiroit kolong naga atakanuunea Lokookeng a Akuj, akinyasun ngitichisio a Ekipe. Itwaan cha daang ni erai ikoku a Akuj nyerubakinit esecheene, kainyo eyei eboyor a Akuj nikeng, ani kona eraakar Akuj Apakeng, nyerubakini ngesi esecheene. Ibore en ngesi dir etiakit ngide a Akuj ka ngide a Ekipe. Itwaan daang ni nyesubi ngakiro na iyookino kori ni nyemina lokaatokeng, meere ikoku a Akuj. Ngakiro na kolong iirarete esi anakisiakinet kesi nugu, ejoikinit kiminakin. Nyejoikinit ngoni kikokini Kain, arai ngesi eka Ekipe nabo taar ngesi lokaatokeng Abel. Arai nyo aarea ngesi lokaatokeng? Arai ni arokiata ngakiro na asubi ngesi, totenooko na asubi lokaatokeng. Warasi nyiiriangakinosi ngikaitotoi kang, erai kiremokinosi esi ngitunga a akwap. Kiyeni ngoni atamar kiisik akitu sodi apotu nakiyar, ani kiminar ngikaitotoi yok. Itwaan cha daang ni nyemina, eringa eyei nagogongu a akitu. Itwaan cha daang ni eremokino lokaatokeng, erai ekaaran, nabo iyenete esi atamar nyeanyuni ekaaran akiyar na nyedaun. Kikokini ngoni kiyenuni atamar echami ngesi nyo nege, ajali Kiristo akiyar keng kotere ngoni. Ejoikinit robo ngoni dang kijali akiyar yok kotere ngikaitotoi yok! Ani kingolik ekabaran atamar ichana lokaatokeng, nakaneni toniniker etau keng nyiisien lokaatokeng, ikokini ngesi etamari amina Akuj ai? Ngide kang, nyejoikinit amina yok erai ngakiro na iruoroe pas, ejoikinit erai amina na iteni na idodiun alotichisio. Eger lo, robo, ngesi kiyenunea ngoni atamar eraakasi ngakiro yok na iteni, eger lo ngesi kititinyokeror ngoni alongaren Akuj. Ani kidodikinito ngoni ngitai yok atamar kisechit ngoni, kiyeni ngoni atamar epolot Akuj idwangit ngitai yok, nabo eyeni ngesi ibore daang. Kongina bocha ngipaalon kang luminan, ani pekidodikinito ngoni ngitai yok atamar kisechit ngoni, kititiny ngoni alongaren Akuj. Kianyuni ngoni anikeng ibore daang ni kilipi, kainyo kiwap ngakiro na edungunit ngesi nabo kisubi ngakiro na ejoikinito ngesi. Edungunit ngesi atamar atonupa ngoni Lokookeng Yesu Kiristo nabo atominakinos make, loger lopei kidungokinea ngoni Kiristo. Itwaan cha daang ni iwapi ngitalio a Akuj, ibooyete aapei ka Akuj nabo ibooyete Akuj ka ngesi aapei. Ani kotere Etau lo kitaanyu ngoni Akuj, kiyeni atamar kiboi aapei ka Akuj. Ngipaalon kang luminan, warasi nyiinupa ngakiro kadaang alu ebalasi eyei kesi Etau a Akuj, nakaneni kiningo toyena kebunit dir etau lo ebalasi kesi eyei nikech ani a Akuj. Kainyo apetakin ngikadwarak lukaliokok wadaang. Ikokinete esi iyenete kerai dir Etau a Akuj nege, itwaan daang ni elimunit atamar abuni Yesu Kiristo erai itwaan, eyei Etau lo ebunit ani a Akuj. Nakaneni itwaan daang ni ebala nyikote ngakiro nguna ani a Yesu neni, emam Etau lo ebunit ani a Akuj anikeng. Erai etau lo eyei nikeng lo ebunit ani a Eketepegan a Kiristo, iirarete kolong esi atamar ebuni nakaneni eyei nakwap tokona. Ngide kang, iraakasi esi ngika Akuj, nabo ipiut ngikadwarak lukaliokok kainyo egogong noi Etau lo eyei nikus akidwang etau kangulu eraakasi ngika akwap. Iruorosi ngikadwarak lukaliokok ngulu ngakiro na eraakasi ngaka akwap, nabo epupete ngitunga a akwap ngakiro kech kainyo eraakasi kesi ngika akwap. Nakaneni kirai ngoni ngika Akuj. Itwaan cha daang ni eyeni Akuj epupi ngakiro yok, itwaan cha daang ni nyerai ika Akuj, nyepupi ngakiro yok. Eger lo robo ngesi kipedorea ngoni akiyen ibore ni etiakit Etau lo erai eka iteni ka lo erai eka alioko. Ngipaalon luminan, atominakinos, kainyo ebunit amina ani a Akuj. Itwaan cha daang ni emina, erai ikoku a Akuj nabo eyeni Akuj. Itwaan cha daang ni nyemina, nyeyeni Akuj kainyo Akuj ngesi erai amina. Nakaneni kidodiu Akuj atamar kimina ngoni ani ameunea Lokookeng nakwap, sodi ataanyuneta ngoni akiyar anikeng. Amina ngesi na, meere atamar kiminak ngoni Akuj, nakaneni atamar kimina ngesi ngoni sodi tomeu Lokookeng toliwor ngesi kirimakinere ngoni ngasechesea yok. Ngipaalon luminan, ani kerai eger lo kiminar ngoni Akuj, ejoikinit robo ngoni kiminakin make. Emam itwaan engolik Akuj nakanuan, nakaneni ani kiminakin ngoni make, kiboi ngoni ka Akuj aapei, nabo eliwor amina keng na itemokino aniyok. Kiyeni ngoni dir atamar kiboi aapei ka Akuj nabo iboi Akuj aapei ka ngoni, ani kitaanyunea ngesi ngoni Etau keng. Kingolik ngoni nabo kilimok luche atamar ameuni Akuj Apa Lokookeng toliwor Ekayuunan a ngitunga a akwap. Ani kelimu itwaan atamar erai Yesu Lokookeng a Akuj, ibooyete ngesi ka Akuj aapei nabo ibooyi Akuj ka ngesi aapei. Nakaneni kiyeni ngoni ngikulepek nabo kinupit atamar kimina ngoni Akuj. Akuj ngesi amina, ani itwaan cha daang ni ibooyi anamina ibooyete aapei ka Akuj nabo ibooyi Akuj ka ngesi aapei. Itemokin amina aniyok sodi atotitinyikerotor ngoni Akolongit na Eriras, nakaneni kititinyer ngoni kainyo ikwaan akiyar yok anakwap kana ka na a Kiristo. Emam ebuloi eyei namina, itwarakini amina na iteni dir ebuloi daang. Tokona bocha, eringa amina a itwaan ani ebulit nyeliworo na itemokino dir, kainyo eriras ngesi eyaunit ebuloi. Kirai ngoni lu kimina kainyo kimina kolong sek ngoni Akuj. Ani kebala itwaan amina Akuj, nakaneni toremokino lokaatokeng, erai ngesi ekaliokon. Kainyo nyepedori ngesi aminakin Akuj na nyeanyungara, erai pekemina ngesi lokaatokeng lo aanyunga. Etal lo kidungok ngoni Kiristo ngesi logo, itwaan cha daang ni emina Akuj ejoikinit eminakini lokaatokeng dang. Itwaan cha daang ni enupit atamar erai Yesu Kiristo, erai ikoku a Akuj, ani itwaan cha daang ni emina apa, emina ikoku keng dang. Eger lo ngesi kiyenea dir atamar kimina ngide a Akuj, erai ni kiminar Akuj nabo ewapito ngitalio keng. Kainyo aminakin Akuj ngesi ngoni akiwap ngitalio keng. Nakaneni nyetioko ngitalio keng aniyok, kainyo epedori ikoku a Akuj daang akipiun ngakiro a akwap. Nakaneni kipiuni ngoni ngakiro a akwap kotere anupit yok. Ngae ipiuni ngakiro a akwap? Erai itwaan bon ni enupit atamar Yesu erai Lokookeng a Akuj. Yesu Kiristo ngesi lo abuni kibatisa a ngakipi ana ebatisaare ngesi ka ngaakot na atoanea. Peabuni ngesi akibatisare a ngakipi make, nakaneni abuni kibatisa a ngakipi ka ngaakot. Idodiunit Etau a Akuj elope atamar eraakasi nugu iteni, kainyo Etau a Akuj erai iteni. Eyakasi ngikaanyunak nguuni, Etau a Akuj, ka ngakipi ta ngaakot. Echamuna luuni ngulu daang anakiro kanguna. Ani kinupeene ngoni ngalimoret a ngitunga, epolok noi ngalimoret a Akuj. Ngalimoret na kilimok ngoni Akuj kesi ngakiro a Lokookeng. Itwaan cha daang ni enupi ngakiro a Lokookeng a Akuj, eyeni ngakiro keng alotau, nakaneni itwaan cha daang ni nyenupit Akuj, eteliokon ngesi, kainyo nyenupa ngesi ngakiro na alimuni Akuj ani a Lokookeng. Ngakiro nguna ngesi nugu, kitaanyu Akuj ngoni akiyar na nyedaun, nakaneni isiakinit akiyar ngina ani eyei Lokookeng a Akuj. Itwaan cha daang ni erukito ka Lokookeng a Akuj, aanyu akiyar naga, itwaan cha daang ni nyerukito ka Lokookeng a Akuj, nyeanyuna akiyar. Kegirakinit ayong esi nugu sodi toyenuneta atamar ianyut esi akiyar na nyedaun, esi lu inupito ngakiro a Lokookeng a Akuj. Kititiny ngoni alongaren Akuj kainyo kiyeni ngoni atamar kipupi ngesi ngoni arai kilip ibore daang ni itemem ka ngakiro na echamit ngesi. Epupokini ngesi ngakiro yok esaa daang lo kilipea ngoni ngesi, ani kona kiyenea ngoni atamar eraakasi ngakiro nugu ngaka iteni, kiyeni tani atamar kiinakini ngesi ngoni ibore ni kilipi ngoni ngesi. Ani kingolik iyong lokaatokon esubi akisech na nyeyauni akitu, ejoikinit iyong ilipi Akuj kitaanyu ngesi akiyar. Alimunit ngakiro nguna kotere lu nyeyaunete ngasechesea kech akitu. Nakaneni eyei akisech na eyauni akitu, nakaneni nyabala ayong kilipa Akuj kotere ngina. Eraakasi naaronok daang akisech, nakaneni eyei akisech ache na nyeyauni akitu. Kiyeni atamar emam ikoku a Akuj ni erubakinit esecheene, kainyo echoikinit Lokookeng a Akuj ngesi, nabo nyewani Ekipe ngesi. Kiyeni ngoni atamar kirai ngika Akuj nabo kiyeni atamar epolokinit Ekipe akwap daang. Kiyeni ngoni atamar abu Lokookeng a Akuj kitoosu ngoni atoyeneta Akuj na iteni. Kiboi ngoni aapei ka Akuj na iteni, kimorikina ka Lokookeng Yesu Kiristo. Akuj naga ngesi erai aka iteni, nabo ngesi erai akiyar na nyedaun. Ngide kang, tochoikinos anakujo ana a alioko! Ayong Ekasukout egirakinit akimat naseuna ka ngide kon lu amina ayong noi, abarua naga. Meere ayong bon kamina, pearai kiminasi esi ngitunga daang lu eyenete ngakiro na iteni, kainyo erubete ngakiro na iteni aniyok nabo kirubi ka ngoni nakajik. Kigasi atamar kitaanyu esi Akuj Apa ka Yesu Kiristo Lokookeng ajokis ka akisienut ta ekisil, kigasi atamar toliworos ngayok ani a iteni dir ka aminatoi. Abu ayong atalakar noi na arukaunea ngide kon ngiche iwapito ngakiro na iteni, loger lo kidungokinea Akuj Apa yok. Kemaimai tokona iyong akimat naminat atamar atominakinos. Nyeraakasi ngakiro na kemaimaea ayong iyong nugu ngaka etal kitetet, eraakasi na etal alo kiyeni ngoni napei kolong anakisiakinet. Amina na eruoro ayong naga ngesi atamar, ejoikinit ngoni kiboi kiwapit ngitalio a Akuj. Etal lo iirasi esi dang napei kolong anakisiakinet ngesi lo a atamar ejoikinit esi daang ibooyete iminakina. Apetakin ngikengalak lukaalak ngakwapea daang, ngitunga lu nyenupito atamar abuni kolong Yesu Kiristo erai itwaan. Itwaan ni ikoni ngini erai ekaliokon nabo Eketepegan a Kiristo. Tochoikinos robo nyeebukor ebachit lo isubeta esi etich nyianyut, nakaneni ejok ianyunete ebachit kus daang. Itwaan daang ni nyiwapi ngakitatamet a Kiristo, toliwor edeparit emam Akuj anikeng. Itwaan cha daang ni iwapi ngakitatamet nguna, eyei Akuj Apa ka Lokookeng nikeng. Tokona bocha, ani kebu itwaan nikus ni nyeyaunit ngakitatamet nugu, nyipeyout ngesi nawiyei kus, nyiilimut tani tamasi, “Kiruko ka ekisil.” Kainyo itwaan ni egatakinit ngesi ekisil eliwor erukitos keng anakiro anaaronok esubi ngesi. Eyakasi ngakiro nakaalak asaki alimokin esi, nakaneni nyasaki egirak nabarua. Erai asaki abunere ataanyun eana a ngakituk, sodi atalakarotor lokojokon noi. Kimalaate iyong ngide anakaatokon anaseuna. Ayong Ekasukout kegirakinit iyong Gayo lopae kang lo amina dir abarua naga. Lopae kang lo amina, kelipakinit atamar tojoketa ngakiro daang anikon, agasi atamar tojoker akwaan kon, loger lo ejokia etau. Alakar ayong noi na adolunioto ngikaitotoi lukiristoi ngiche sodi katolimokis ayong atamar imina iyong dir ngakiro na iteni, loger lo iwapitor iyong ngirwa daang ngakiro na iteni. Emam ibore ketalakari ayong akidwang akiirar atamar ibooyete ngide kang anakiro ana iteni. Lopae kang lo amina, kimunoi iyong alotich alo isubea iyong ngikiristoi luche, tani lu eraakasi ngipeyok. Alimonokis kesi ngitunga a ekanisa kane ngakiro a amina kon. Kingarak kare kesi torubakis eloose analotoru kech a erot alo ejoikinit Akuj. Kainyo esiakinete kesi akisub etich a Kiristo engerito akidiaun ngiboro lu a ngitunga alu nyeraakasi ngikanupak. Ejoikinit robo ngoni ngikiristoi kingarakini ngitunga lugu, sodi atosubeta ngoni dang etich lo a ngakiro ana iteni. Egirakini ayong ngitunga a ekanisa abarua nauriyen, nakaneni towou Diotirepe lo emina aliwor ekarikon kech amisikin ngakiro na alimuni ayong. Na abunio ayong, alimori ngakiro daang na esubi ngesi, ngakiro naaronok na kiruoror ngesi sua ka na isudi! Nakaneni meere nguna make asubi ngesi, nyitopeyoni tani ngikiristoi lukaitotoi na eponeta, nabo iratakinit tani lu esakete akitopeyon kesi, nabo esaki akikotar kesi alokanisa! Lopae kang lo amina, wara nyiisisa ibore ni erono, nakaneni kisisa ni ejok. Itwaan cha daang ni esubi naajokak erai ika Akuj, itwaan cha daang ni esubi naaronok nyeanyungara Akuj. Ipuruunit itwaan daang Demeterio, elimorito tani ngakiro na iteni ngesi. Nabo kiatak sua dang ekipur kosi, iyenete esi atamar eraakasi na kiruoro sua ngaka iteni. Eyakasi ayong ngakiro nakaalak asaki alimokin, nakaneni nyasaki akigir ngakiro nguna nabarua. Etamit atamar kianyun ka iyong atipei sodi eana a ngakituk. Kagatakinit ekisil. Kimalaate ngipaalon kon. Kimala ngipaalon kosi daang a ngapeipei. Ayong Yuda ekasuban etich a Yesu Kiristo atarai lokaatokeng a Yakobo ngesi egirunit abarua naga. Egirakinit lu anyara Akuj, lu ibooyete anamina a Akuj Apa tochoikinite Yesu Kiristo. Agasi atamar toliwor akisienut ka ekisil ta amina ngakus lokojokon noi. Ngipaalon kang lu amina, erichakina kolong ayong akigirakin esi ngakiro a ayuuno ana erai ayok kadaang. Engolik ayong atamar echamit kegirakini, sodi kemaima totitinyeketo ijiete kotere anupit na etaanyu Akuj ngitunga keng akitaanyunet apei torumor. Kainyo aropun ngitunga ngiche lu nyenupito ngakiro a Akuj. Elocho kesi ngakiro a ajokis a Akuj yok toliwor kesi esubeta ngakiro naaronok, nabo engerito kesi Yesu Kiristo lo erai bon Ekarikon ka Ekapolon yok. Kolong kanuan, adwario Anagiran eriras, lo eanyunete kesi. Kainyo tani kiyenete esi nugu daang, asaki ayong akisitamun esi eger lo ayuunea Ekapolon Ngisirael alo Misiri, nakaneni ani ekisidi tomunya lu awounete akinup. Kitamutu ngimalaikae lu adeparete apolou nasek edodikinitae sodi toisikis kesi ni kolong sek eboyoto, eenit Akuj kesi a ngiriko alu nyelachakin jik anaribu ana isidaritor Akuj kesi Akolongit Naapolon na a eriras. Kitamutu tani Sodom ka Gomora ta ngirerea luche lu edunyatar, asubete ngitunga a ngirerea kangulu ngakiro napei asubete ngimalaikae ngulu nabo aminasi kesi emalaanu ka etereku a ngawat logela, eriabasi kesi aloriras a akim ana nyedaun idodikinit eriras ngolo kesi ngakiro na a ngakonyen. Aloger alopei kangolo, eya ngitunga ngulu ngakiro na itamete na etiliwosi kesi lu esechanakinete ngawat kech, emenyasi kesi apolou a Akuj nabo iyenyete ngisubuna lu ipuroi lu eya kidiama. Nyesuba tani emalaikat loapolon Mikael kongina. Na eburaata ngesi ka Ekipe, na apegatar ngesi ka Ekipe kotere atamar ngae elemari akwaan a Musa, nyitorono Mikael Ekipe kiyeny nakaneni abu tama, “Kikilakini iyong Ekapolon!” Nakaneni ematanakinosi ngitunga ngulu ngakiro na nyeyenete iyenyasi, ani ngakiro na itwanganakinosi kesi loger a ngitieng, ngesi ngakiro napei inyasunete kesi. Oitiakoi! Abe etioko nginyas eanyunete kesi! Ewapa kesi erot lopei kolong a Kain. Kotere ngaropiyae, aneikinosi kesi ngasechesea na kolong asechi Balaam. Echanaketa kesi loger a Kora, nakaneni amunyarosi kesi loger keng. Kotere amera na echalatar kesi, ikote kesi ngakemera a asakatan na iriamiriameta ka esi akinyam akimuj a Ekapolon. Irichito kesi ngakookies kech make. Ikote kesi ngidowon lu ijukit ekuwam nakaneni emam akiru eyaunete. Ikote kesi ngikito lu nyekoniunete ageor tani ngirwa lu ekonitor ageor, ikote ngikito lu aditun anaten, nakaneni aoko jik. Ikote kesi ngitoroi a anam lu ekulaate, nabo ileerete ngakiro kech na a ngileech loger a ngikurudoi. Ikote kesi ngikanyer lu ilato, lu asubaki Akuj nikirion chuch ni epete kesi jik. Arai kolong Enok itwaan nia ngikan-kaarei napei ani eyei Adam, ngesi kolong adwari ngakiro kech a angorot tama, “Kingolikisi a, epote Ekapolon ka ngimalaikae keng lukaalak lu italeuno akirirare ngitunga daang, kirira kesi daang kotere ngakiro naaronok asubete kesi ka nabo ngakiro naaronok daang eruorotor ngesi ngikasechak!” Engolopasi ngitunga lugu ngirwa daang, nabo itoronito luche, iwapito kesi etereku kech loaronon, iwogasi kesi nabo ediakito ngitunga ngiche esakete ariamun ibore anikech. Nakaneni ngipaalon kang, kitamutu na kolong sek kilimokinete ngimeanara a Ekapolon yok Yesu Kiristo. Kilimokinete esi tamasi, “Na enangea ngirwa lu esal, epote ngitunga lu kikianatar esi, eraakasi kesi ngitunga lu iwapito etereku kech loaronon.” Ngitunga ngulu ngesi irokunete atiakatiaka, erikit kesi etereku kech lo a akwap, nabo emam Etau a Akuj anikech. Nakaneni ani esi ngipaalon kang, torubakisi idukosi lokojokon ananupit kus ana italeuno. Kilipa kotere agogongu a Etau a Akuj, nabo torubakisi iyakasi namina a Akuj, erai idarito esi Ekapolon yok Yesu Kiristo kitaanyuni esi akiyar na nyedaun kotere akisienut keng. Kisieneto ngitunga lu ichanasi, toyuutu luche ani ikopuneto anakim. Ani eya ngiche, kidodiutu ngisien ka aemit aapei. Nakaneni toremokinos tani ngiworui kech lu etoron etereku kech loaronon. Nika ngolo epedori akiratakin esi nyiidakarosi, nabo kiyau esi emam akisech napolou keng, nika ngina bon erai Akuj Akayuunan yok ani a Yesu Kiristo Ekapolon yok, min ekipur ka apolou, ka agogongu ta apolokinit alokaru kadaang, napei tokona ta nakajik! Aamen. Erai akitab naga aka ngakiro ana kolong edodiuni Yesu Kiristo. Aanyuni ngesi ngakitoodikinet nguna ani a Akuj, sodi kidodikinea ngesi ngikasubak etich keng ngakiro na ajoikinit esubakinosi atipei. Tomea Kiristo emalaikat keng nia ekasuban etich keng Yoana, kitoyen ngesi ngakiro nguna, nakaneni eruoro Yoana daang nakolong engolikini. Eraakasi nugu ngakiro na isisaunit ngesi na eponito ani a Akuj, ka nabo ngakiro na iteni na idodiunit Yesu Kiristo. Epiaritae itwaan ni isomae akitab naga, epiaritae tani lu epupete ngakiro na edwaritae nugu ka akiwap na igiritae nakitab naga! Kainyo aapuu esaa lo esubakinotor ngakiro nugu daang. Ayong Yoana egirakinit abarua naga ngitunga a ngikanisae alukan-kaarei eyakasi Asia: Kagatakinit ajokis ka ekisil a Akuj, na tokona eyei, na kolong ayei nabo namoi ebuni. Kagatakinit tani ajokis ka ekisil a ngiborei a Akuj alu emam ngawat alukan-kaarei alu eya ngaren ekicholong keng, kagatakinit tani nguna eponito ani a Yesu Kiristo alo erai ekaanyunan a Akuj lo emunoi, lo erai lo ekingaren iteyarunio alokatoak, lo erai ngesi epolokinit ngikapolok daang a akwap kana. Kimina ngesi ngoni, nabo kotere akitu keng, kiyuu ngesi ngoni anasechesea yok sodi kitiliwo ngesi ngoni ngimurok a Akuj lu kisubi etich a Akuj ka apakeng. Min ekipur ka apolou nia Yesu Kiristo nakajik! Aamen. Kingolik a, ebunit ngesi alodowon! Ingolikini itwaan daang, tani lukolong echumete ngesi. Igorotor ngesi ngitunga daang anakwapea kadaang. Ikokinete nguna neni! Elimunit Ekapolon Akuj Naationon, na tokona eyei, na kolong ayei ka namoi ebuni ebala, “Ayong ngesi arai na ekingaren ka na esal.” Arai ayong Yoana lokaatokus, ani araakar erukitos a Kiristo, kirai ayong ka esi ngipei kinaikinit aboliaro na eanyunito ngulu eraakasi ngika a apolou keng. Ayei ayong Patimos, ni arai ekwar a anam, ayei neni kainyo etatami sek Ngakiro a Akuj ka ngakiro na iteni kedodikini Yesu. Akolongit a Ekapolon, ayei ayong agogongu a Etau a Akuj, eira alokaku kang etoil loapolon noi lo ikoni loa aburuch kesuruori. Tolim tama, “Kigir daang na itee iyong nakitab, sodi yaa akitab ngina lokanisae lua ngirerea alukan-kaarei kalu: Epeso ka Simurina ka Perigamon ka Tuatira ka Saride ka Piladelipia ta Laodikea.” Atorei ayong asaki akingolikin itwaan ni kesuruori ayong, sodi engolik ayong ngasua na a egolit ngakan-kaarei na idokonokinio ngataae. Nakaneni ayei ibore ni asibit itwaan kiding kech, enapit ngiworui lu anangito kwap ngakejen nabo elogakinit aruba a egolit lorarum keng. Akwang ngitim keng ekote ngajul a ngamesekin, kori akwang kea, nabo anokete ngakonyen keng kona a akim. Amalimalete ngakejen keng ekote akwangat na kipusio nabo kileliae anakim. Ekoni eruye a etoil keng lo a ngakipi ana echakuna alokidiama akope. Atingit ngesi ngikanyer ngikan-kaarei anakan keng ana aloteten sodi topud ekileng lo ekwaka ngiwaitin ngiarei anakituk keng. Akwang ereet keng ekoni akolong na enoki naparan lotingilan. Na engolikinea ayong ngesi, atadakakin kwap diyete ngakejen keng loger a itwaan anikatoan. Kidokok ngesi akan keng na aloteten nakou kang tama, “Nyiem! Ayong ngesi lo ekingaren ka lo a esal. Ayong ngesi lo ayari! Atoanit ayong, nakaneni ayari tokona ayong nakajik! Apolokinit ayong akitu ka ni eya ngikatoak. Kigir tokona na itee iyong, ngiboro lu eraakasi ngesi itee iyong tokona kangulu esubakinosi ekisidi. Eger a ngakiro ana munonoe a ngikanyer alukan-kaarei itee iyong anakan kang ana aloteten, ka ngasua na a egolit nakan-kaarei ngesi nugu, eraakasi ngikanyer lukan-kaarei ngimalaikae a ngikanisae alukan-kaarei, ani ngasua na egolit nakan-kaarei, eraakasi ngikanisae lukan-kaarei. “Kigirak emalaikat lo a ekanisa alo a Epeso kona: Eraakasi ngakiro nugu ngaka ngolo etingit ngikanyer ngikan-kaarei anakan keng ana aloteten, ngesi ngolo nabo elosi alokiding ngasua na a egolit nakan-kaarei. Ayeni ayong ngakiro kon daang, ayeni ayong atamar itionik iyong akisub etich lokojokon noi nabo inaik nakaalak. Ayeni ayong atamar nyinaikini iyong ngakiro a ngitunga aluaronok, nabo iroana iyong tani lu ebaasi kirai ngimeanara a Akuj tarai nyeraakasi. Iyen iyong kesi atamar eraakasi ngikaliokok. Inaikinit iyong, kiboliare iyong kotere ayong, nakaneni nyesuro iyong etau kon. Nakaneni eitunit ayong nugu anikon, ipalik iyong amina ayong loger lokolong kon a ekingaren. Nakaneni kitam nikolong iyei iyong eroko nyedakara! Tolung ngasechesea kon tosub nakolong isubi iyong ekingaren. Ani pekilung iyong ngasechesea kon, abuni ayong nikon atolema asuat na itoweit ataa kon ani eyei. Nakaneni kajoikinito ayong ngakiro nugu anikon: iremokino iyong na esubete Nginikolai loger lo aremokinookor ayong dang. “Ani keya iyong ngaki nakiiraret, kiira robo ngakiro na elimokinit Etau a Akuj ngitunga a ngikanisae! “Ani ngulu ipiunete naaronok, achamakini ayong enyamete ageor a ekitoe a akiyar alo erupunit Alomana a Akuj. “Kigirak emalaikat lo a ekanisa alo a Simurina kona: “Eraakasi ngakiro nugu ngaka ngolo erai lo ekingaren ka lo a esal, ngolo atoani, toyaru. Ayeni ayong ngichan kon, ayeni ayong atamar kibootonit iyong, nakaneni irai karika cha iyong ekabaran! Ayeni ayong ngakiro naaronok nakiruorotor iyong ngitunga lu ebaasi kirai Ngiyaudi tarai nyeraakasi, eraakasi kesi ngitunga lu eraakasi ngika Esiitan! Wara nyiem ibore idio ni kiboliare iyong. Topupokisi a! Kining esi Ekipe esaki esi ngiche toinikinae lojela, nakaneni irikarete ngichan kus ngirwa ngitomon. Warasi nyikingero ayong tani kiar, sodi kainak ayong esi akiyar erai ebachit lo ipiuneto esi. “Ani keya ngaki, kiira robo ngakiro na elimokinit Etau a Akuj ngitunga a ngikanisae! “Ani ngulu ipiunete, nyewani akitu na a ngaarei. “Kigirak emalaikat lo a ekanisa alo a Perigamon kona: “Eraakasi ngakiro nugu ngaka ngolo etingit ekileng lokakwanan lo ekwaka ngiwaitin ngiarei. Ayeni ayong ni ibooyo iyong, ibooyi iyong ani eyei ekicholong a apolou a Esiitan. Inupit iyong ngakiro kang dir, nakaneni nyepalikina iyong anupit ngakiro kang tani ngirwa lu aarere Antipas, ekaanyunan kang lo amuno ayong, taarae kaina ibooyo Esiitan. Nakaneni eya ayong ngakiro nadikidio eitunit anikon: eya ngiche kus lu iwapito ngakitatamet a Balaam, lo etatami Balak areere Ngisirael kitosech ani emaimaea kesi akinyam akimuj na alemikinitae ngakujo nasubuna ta emalaanu. Aloger alopei kangolo, eya ngitunga nikus lu iwapito ngakitatamet a Nginikolai. Tolunga tokona ngasechesea kus! Ani pekikokis neni, abuni nikus atipei etiji ngitunga ngulu a ekileng alo epuduni anakituk kang. “Ani keya ngaki, kiira robo ngakiro na elimokinit Etau a Akuj ngitunga a ngikanisae! “Ani ngulu ipiunete, ainakini epewae a akimuj ana iweitae enyaritae manna. Nabo ainakini ipei kech amoru nakwaan na igiritae ekiro lokitetet lo emam itwaan eyeni mati itwaan ni einakinio. “Kigirak emalaikat a ekanisa alo eyei Tuatira kona: “Eraakasi ngakiro nugu ngaka Lokookeng a Akuj, alo enokete ngakonyen loger a asarae a akim, nabo imaunito ngakonyen keng loger a akwangat ana ipusitae. Ayeni ayong na isubi iyong. Ayeni ayong amina kon, ka eger lo imuno iyong ngakiro kang, esube kon etich, ta anaikinit kon. Ayeni ayong atamar isubi iyong nakaalak na idwangito nakolong isubi ekingaren. Nakaneni ngakiro nugu ngesi eitunit ayong anikon, abe inaikinit iyong ngakiro a aberu anabe Yesebel, ana ebala arai akadwaran a Akuj. Ibatarit ngesi ngikasubak etich kang a ngakiro ana itatami esaki kesi toliworos ngimalaae nabo tanyama akimuj na elemikinitae ngakujo nasubuna. Atinenik ayong asaki ngesi tolung ngasechesea keng, nakaneni nyesaki ngesi apalikin emalaanu keng. Nakaneni achakakini ayong ngesi lokitanda lo eriabatar ngesi noi ka lukolong alometa. Asubi ayong nguna tokona erai pekelunga kesi ngakiro naaronok asubete ka ngesi. Aari ayong tani ngirukitos keng, sodi toyena ngitunga a ngikanisae kadaang atamar ayong ngesi ayeni ngitamen a itwaan kadaang ka ngakiro na esaki ngesi. Atachi ayong itwaan daang itemem ka na asubi ngesi. “Nakaneni nyiiwapa esi luche lu iyakasi Tuatira akitatamet naaronon naga, eringa esi nyeyenuna ngakiro na enyarito ngiche, ‘Ngakiro namunonoe noi a Esiitan.’ Kalimokinit ayong esi atamar emam eogos eche ewaakini ayong nikus. Nakaneni kirichakisi lokojokon na ianyut esi tanang ngirwa lu abunio ayong. Ani ngulu ipiunete, lu erubakinete esubete na asaki ayong tanang losal, etiliwori ayong kesi ngikapolok a ngibukui. Epolokinete kesi ngibukui a asuat anakapis, topetasi loger lo ebwangatar ngamoti nalupei kiealaros. Kikok eger lo aanyunea ayong dang apolou anika apakang. Ainakini ayong kesi etop lo a ataparach. “Ani keya ngaki, kiira robo ngakiro na elimokinit Etau a Akuj ngitunga a ngikanisae! “Kigirak emalaikat a ekanisa alo a Saride kona: “Eraakasi ngakiro nugu ngaka ngolo eya ngiborei a Akuj lu emam ngawat ngikan-kaarei ka ngikanyer lukan-kaarei. Ayeni ayong na isubi iyong, ayeni ayong atamar kiyenikinitae iyong atamar iyari tani bo tani kitoanit! Nakaneni tonyou sodi kigang ibore ni eringa itingit eroko nyetoniara jik, kainyo engolikini ayong atamar eringa ibore ni isub iyong nyeliworo ni ikiuna dir ani a Akuj kang. Kitam robo nakolong kitatamio ka nakolong iirari iyong, kiwap nguna tolung ngasechesea kon. Ani pekinyou iyong, abuni ayong nikon loger a ekokolan, nakaneni nyiyenuni iyong tani esaa lo abunio ayong. Nakaneni eya ngidikidio kus alo Saride lu itesegito ngiworui kech. Kiruki ayong ka esi inapito ngiworui luakwaak, kainyo ejoikinit esi ikokinete neni. Ani kipiut esi, kitanapio ngiworui luakwaak loger logo, nakaneni nyikisario ngirora kus anakitab ana a akiyar. Alimuni ayong alongaren Apakang ka ngimalaikae keng ileere atamar iraakasi esi ngikang. “Ani keya ngaki, kiira ngakiro na elimokinit Etau a Akuj ngitunga a ngikanisae! “Kigirak emalaikat a ekanisa alo eyei Piladelipia kona: “Eraakasi ngakiro nugu ngaka ngolo italeuno lo eraakasi ngakiro keng na a iteni. Etingit ngesi engaet lo erai eka Daudi, ani na engaarea ngesi ekidor, emam itwaan epedori akigol. Ani na egolio ngesi, emam itwaan epedori angaar. Ayeni ayong na isubi iyong, ayeni ayong atamar ipolot cha iyong wadio. Iwap iyong akitatamet kang nyengero iyong ayong. Angaa ayong ekidor alongaren kon lo emam itwaan epedori akigol. Topupok mono iyong! Nakaneni epote ngitunga lu eraakasi ajore a Esiitan toriediko alongaren kon, ngikaliokok lu ebaasi kirai Ngiyaudi tarai nyeraakasi. Eyenunete daang atamar kamina ayong iyong. Kona iwapeta esi nakadungok ayong esi atamar tanaikisi, kayuuni ayong esi dang ngirwa lua ngichan alu epote nakwap akining ngitunga daang anakwap. Abunit ayong atipei. Tochoik ibore ni itingit iyong, sodi nyikidema iyong itwaan ebachit lo ipiunio iyong naaronok. Ngulu ipiunete, etiliwori ayong kesi ngapirio na erubito alokai a Akuj kang, nakaneni nyepudunete nabo kaneni jik. Egirakini nabo ayong kidiama kech ekiro a Akuj kang ka ekiro a ere a Akuj kang, Yerusalem lokitetet, lo etiyaun anadis ebunit Anakuj kang. Egirakini ayong tani kidiama kech ekiro kang lokitetet. “Ani keya ngaki, kiira robo ngakiro na elimokinit Etau a Akuj ngitunga a ngikanisae! “Kigirak emalaikat a ekanisa alo eyei Laodikea kona: “Eraakasi ngakiro nugu ngaka Aamen, ekaanyunan lo emunoi nabo eraakasi ngakiro keng ngaka iteni dir, lo erai ngesi esiakinea ibore daang ni asubuni Akuj. Ayeni ayong na isub iyong. Ayeni ayong atamar nyiyono iyong kori nyimona. Arai bo toyono kori tomona dang! Nakaneni kona iyakar iyong nakidingos, nyimona kori nyiyono, kemaari ayong iyong anakituk kang! Abe ibala iyong, ‘Abarit ayong atingit ibore daang, emam ibore echana.’ Ikwa nyiyeni iyong atamar ipalag iyong, ejoikinit iyong irai lo isienit ngitunga, ekebootonit, emuduk nabo imuner! Nakaneni kalimokinit atamar togiel egolit loasegan anikang, sodi toliwor iyong ekabaran dir. Togiel tani eworu loakwaan tanap sodi tarap ngileech lu imunerea iyong. Togiel tani ekitoe lo iwaakinio nakonyen kon sodi taanyungarea akwap. Ekilakini ayong nabo erirae daang lu amina ayong. Kirichakin tokona robo iyong tolung ngasechesea kon. Topupok mono iyong! Awei ayong alokidor edongidongi, ani kiira itwaan etoil kang tangaa ekidor, alomuni ayong kai keng emuja ka ngesi, sodi kimuja ngesi ka ayong. Ani ngulu ipiunete, achamuni ayong kesi iboikinosi diyete kang anapolou kang, loger lokolong epiunio ayong sodi eboyoto tokona ka Apakang anapolou keng. “Ani keya ngaki, kiira robo ngakiro na elimokinit Etau a Akuj ngitunga a ngikanisae!” Nipei bore ngini, engolik ayong akisingolikinet a Akuj ache, sodi ataanyunga ekidor lo angaara anadis. Ani etoil lo aruo loger a aburuch, losek eirari ayong kesuruori ayong, tolim tama, “Bua nege, sodi kedodik na ejoikinit esubakinosi ekisidi kanu.” Katorik ayong Etau a Akuj esaa lopei ngolo. Ama nadis, ayei ekicholong lo ebooyo itwaan iche. Amalimali ereet a itwaan kangini ekoni amoru nakamalamalan enyaritae alumas ta naarengan puu tarai naajokon. Ayei alokakinet a Ekipe na ekwaan ka amoru napus-aliban eriemit alokakinet a Ekipe ngina ekicholong a apolou awadaang. Ayakasi ngikicholongo ngiche ngitomwon-arei ka nguomwon lu eriamito ekicholong lo a apolou. Ebooyete ngikasukou ngitomwon-arei ka nguomwon alokicholongo kangulu enapito ngiworui luakwaak nabo tanapito ngikiraunea lua egolit anakies. Emilea ewae lo ayei ekicholong lo a apolou ngolo, nabo agiro neni tobelanakini Ekipe. Enokakinitae ngakinwaket ngakan-kaarei, na eraakasi ngiborei ngikan-kaarei a Akuj lu emam ngawat. Ayei tani ngaren ekicholong ngolo ibore ni ekoni anam na a akiyo, ekoni amoru nakaparaparan noi. Alowaitin kadaang alu ekicholong a apolou a Akuj, ayakasi ngitieng nguomwon lu ayarete lu eriamito ekicholong ngolo. Abutakina kesi ngakonyen naabor ka ngaren. Ekwaan ni ekingaren ka engatuny, ekwaan nia ngiarei ka emong, ekwaan ereet ani a nguuni ka ereet a itwaan, ekwaan nia nguomwon ka egole lo aporit. Epei a ngitieng aluomwon ayarete kangulu ayakasi ngabeben ngakan-kapei, abutarito kesi ngakonyen alotooma ka nikalapatan. Eeosi nakwaare ka naparan nyetubete eeos jik ebaasi: “Italeuno Akuj noi, na erai Ekapolon Akuj Naationon, nakolong ayei, na tokona eyei ka namoi emini.” Eeonokinete ngitieng luomwon ayarete, ngolo eyei lokicholong a apolou ngieosio lu a ekipur ka arimatoi, ebuanakinete ngesi lo eyari nakajik ngolo alakara. Na ikokineta kesi neni, tadakakinos ngikasukou lutomwon-arei ka nguomwon kwap ngaren lo ibooyi alokicholong, sodi kilipa ngolo eyari nakajik. Iwaakinete kesi ngikiraunea kech ngaren ekicholong lo a apolou sodi tamasi, “Ekapolon kosi ka Akuj kosi! Ejoikinit iyong ianyuni ekipur ka arimatoi ta apolou. Kainyo isubi kolong iyong ngiboro daang, ani kotere echami kon, toliworos kesi ngiborei lu eyarete.” Ataanyunga ayong akitab anakan ana aloteten kangolo ibooyi alokicholong a apolou, kebutakina ngagiran lowae lo alokidiama ka lo alotooma sodi togoloi a ngigoliet a ngikan-kaarei. Sodi engolik ayong emalaikat lo a ngikilinga, lo alimuni irema ebala, “Ngae ejoikinit ebwangi ngigoliet lukan-kaarei sodi tangaa akitab?” Nakaneni amam itwaan anadis kori anakwap kori alotooma ngalup ani eya ngikaram ni engaari akitab sodi kingolik tooma keng. Ekalou ayong lokojokon noi kainyo angopi itwaan ni ejoikinit engaari akitab ngina kori akingolikin tooma. Sodi katolimok ekasukout epei tama, “Wara nyiigor. Kingolik a! Epiu engatuny lo a ekitela a Yuda lo erai ales a Daudi, ibore daang, sodi tobwangea ngesi ngigoliet lukan-kaarei nabo tangaa akitab.” Sodi engolik ayong Imesek a Akuj ewei alokiding ekicholong a apolou, eriamito ngesi ngitieng luomwon ayarete ka ngikasukou. Tosub kear Imesek ngini. Ayakasi ngaamwar ngakan-kaarei ka ngakonyen ngakan-kaarei, lu eraakasi ngiborei a Akuj ngikan-kaarei lu emam ngawat, lu amearitae lowaitin a akwap daang. Tolot Imesek tolema akitab anakan ana aloteten kangolo ibooyi alokicholong a apolou. Napei alemarea ngesi akitab ngina, tadakakinos ngitieng luomwon ayarete ka ngikasukou lutomwon-arei ka nguomwon ngaren Imesek. Atingit ipei kech daang agita ka ngatubwae a egolit na elelebitae emitina, arai ibore ngini ngakilipet a ngitunga a Akuj. Toeokis kesi eeos lokitetet tamasi: “Ejoikina iyong ilemari akitab tobwang ngigoliet. Kainyo kiario kolong iyong, ani kotere akitu nakon ngina igielak iyong Akuj ngitunga a ngitela kadaang, ngabukui ka ngakwapea ta ngibukui daang. Itiliwo iyong kesi apolou a ngimurok alu esubete etich a Akuj yok, nakaneni epolokinete kesi ngakwapea.” Engolia ayong nabo, eira etoil a ngimalaikae alu eraakasi ngabunge ka ngalupui eeosi! Erikaunito kesi ekicholong a apolou ka ngitieng luomwon ayarete ta ngikasukou. Eremasi kesi ebalasi: “Ejoikinit Imesek nikolong aario eanyuni apolou ka ebari ka aosou ta agogongu, ka arimatoi ka ekipur ta apiaro!” Eira ayong ngiborei anadis, anakwap ka tooma ngalup ta tooma nganamea, ngiborei lu eyarete daang anakwap, aeosi ebalasi, “Agasi apiaro ka arimatoi ka ekipur ta agogongu nakajik, min ni eyei ngolo ibooyi alokicholong a apolou ka Imesek!” Tatachut ngitieng luomwon ayarete tamasi, “Aamen!” Tadakakinos ngikasukou kwap kilipa. Ani erumor engolik Imesek a Akuj ebwangi egoliet lo ekingaren alukan-kaarei tangaa, sodi eira ayong epei a ngitieng aluomwon ayarete elimuni a etoil alo ikoni agirokinet tama, “Bua!” Ani engoliari ayong, ataanyunga angole naakwaan. Atingit itwaan ni adokit angole ngina akau, dio nakinae ngesi ekiraun. Tarama ngesi angole esaki aliwor ekedwangan lo idwangi. Dio tobwang Imesek egoliet lo a ngiarei, sodi eira ayong etiengit lo ayari lo a ngiarei ebala, “Bua!” Topud angole ache naarengan. Nakinae ekamean a angole kangina apolou na ayaunea ejie nakwap, sodi taaras ngitunga make. Nakinae ngesi ekileng loapolon. Dio tobwang Imesek egoliet lo a nguuni, sodi eira ayong etiengit lo a nguuni lo eyari ebala, “Bua!” Ani engoliari ayong, ataanyunga angole nakirion. Atingit ekamean a angole kangina ngaratilio ngaarei anakan keng. Eira ayong ibore ni asibit etoil eruuni alotieng aluomwon ayarete kangulu ebala, “Akitemiet apei a ngakanoi a ngaropiyae a akolongit a apei, ka ngakitemiet ngauni a ngimomwa a ngaropiyae a akolongit a apei. Nakaneni wara nyiinyasu akimiet a a ngikito a emuna!” Dio tobwang Imesek egoliet lo a nguomwon tangaa, eira ayong etiengit lo eyari lo a nguomwon ebala, “Bua!” Ani engoliari ayong, ataanyunga angole napus-akwaan ikwa ekuron. Anyaritae ekiro a itwaan ani adokit angole ngina Akitu, nabo atupit ngesi Akwap a ngikatoak anaabor. Tachamakinae kesi epolokinete ewae epei aluomwon a akwap, sodi taara kotere ejie ka eron a akoro ka edeke ta ngitieng a moding. Dio tobwang Imesek egoliet lo a ngikan tangaa. Ataanyunga ayong alotooma ekeno lo ipeyonokinere Akuj ngitai kangulu kadaang aario ani etatameta akiroit a Akuj ta ni araakatar ngikaanyunak a Kiristo. Tachalut kesi iremasi ebalasi, “Ekapolon Akuj Noationon Noi, na italeuno tarai kon na iteni! Eliwor ori monan itubio iyong ngakiro a ngitunga a akwap sodi kirira iyong kesi ani kiareta sua?” Nakinae ipei kech daang eworu loakwaan, tolimok kesi atamar kiangasi cha mono wadio, tanang itemokin etiae a ngikasubak etich ka ngikaitotoi kech lu eario, loger lo aarere kesi dang. Sodi ataanyunga ayong Imesek ebwangi egoliet lo a ngikan-kapei tangaa. Tamaranik akwap lokojokon, kirioner akolong chuch, sodi torenger elap puu loger a ngaakot. Tachakun ngikanyer kwap nalup, loger a ngameyena anaajonak ana echakuunun alokitoe na ekutakinea ekuwam loapolon. Tongopia adis loger a akitab ana ebilakinitae, sodi tolemarae emoru daang ka ekwar a anam ani sek ayakasi. Dio ngikapolok ka ngikarikok a ngitunga ka lu a ngasigerea ka ngikabarak ka ngitunga lu eyenikinitae ta nabo ngitunga luche daang, erikot ka lo nyerai erikot, toduka anatabab ka tooma ngamoru na ayakasi lomoru. Tanyarata kesi ngimoru ka ngatabab tamasi, “Totikoe sua kidaa anakonyen kangolo ibooyi alokicholong ka anyunyura a Imesek! Akolongit naaronon a anyunyura ngesi naga, ngae tokona eweikini?” Arumoret kanguna, ataanyunga ayong ngimalaikae nguomwon ewaasi alowaitin aluomwon a akwap. Eratakinito kesi ekuwam alowaitin aluomwon kangulu sodi nyekutak ekuwam akwap kori anam kori ekitoe. Ataanyunga ayong emalaikat eche ebuni alokide etingit egoliet lo a Akuj ana eyari. Kirema ngesi tanyara ngimalaikae luomwon lu ainakinit Akuj agogongu na inyasuneta akwap ka anam. Tolim emalaikat tama, “Nyiinyasut akwap ka anam ta ngikito mati mono kimacharik ngoni ngikasubak etich a Akuj yok emachar loreetin.” Katolimokin ayong atamar arai ekimar alu amacharikinitae emachar a Akuj loreetin kech 144,000. Araakasi kesi ngika a ngitela alutomon ka ngiarei a Isirael. Lu araakasi ngika a ekitela a Yuda, araakasi ngabunge ngatomon ka ngaarei, lu araakasi ngika a ekitela a Reuben, araakasi ngabunge ngatomon ka ngaarei, lu ekitela a Gad araakasi ngabunge ngatomon ka ngaarei, lu ekitela a Acheri, araakasi ngabunge ngatomon ka ngaarei, lu ekitela a Naputal, araakasi ngabunge ngatomon ka ngaarei, lu ekitela a Manase, araakasi ngabunge ngatomon ka ngaarei, lu ekitela a Simeon, araakasi ngabunge ngatomon ka ngaarei, lu ekitela a Lawi, araakasi ngabunge ngatomon ka ngaarei, lu ekitela Isakar, araakasi ngabunge ngatomon ka ngaarei, lu ekitela a Sabulon, araakasi ngabunge ngatomon ka ngaarei, lu ekitela a Yosep, araakasi ngabunge ngatomon ka ngaarei, lu ekitela a Benjamen, araakasi ngabunge ngatomon ka ngaarei. Arumoret kanguna engolia ayong, sodi ataanyunga asepich a ngitunga, amam itwaan apedori akimarun ngitunga daang! Araakasi kesi lu aponito alobukui kadaang ka ngitela daang ka ngakwapea daang ta ngabukui daang, sodi towaa kesi alongaren ekicholong lo apolou ka ngaren Imesek, enapito ngiworui luakwaak, totingito ngakui anakan kech. Tachalut kesi iremasi ebalasi, “Ebunit ayuuno ani a Akuj yok, ana ibooyi alokicholong a apolou, ka nia Imesek!” Towaa ngimalaikae daang kiriama ekicholong lo a apolou ka ngikasukou ta ngitieng luomwon lu ayarete. Sodi tadakakinos kesi kwap kijuuroto alongaren ekicholong a apolou, kilipa Akuj, eeosi ebalasi, “Aamen! Agasi apiaro ka ekipur ta aosou ka abuakinit Akuj alakara ka arimatoi ta apolou toliwor aka Akuj yok jik! Aamen!” Kengit ayong epei a ngikasukou tama, “Tangae ngitunga lu enapito ngiworui luakwaak lugu, ani aliwae eponitotor kesi?” Atatachak ayong atama, “Nyayeni ayong ekaapaan. Iyong ngesi iyeni.” Katolimok ngesi ayong tama, “Ngitunga lugu kesi apuunosi anaboliaro anaaronon noi. Elotasi kesi ngiworui kech a ngaakot a Imesek, akwangeta. Ibore ngini ngesi ewaatar kesi alongaren ekicholong a Akuj, esubete etich keng naparan ka akwaar alokai a Akuj. Eyuuni ngolo ibooyi alokicholong kesi ani eyakar ngesi neni. Nyenyami kesi akoro ka akure nabo jik, nyenomi kesi akolong kori nyichanyun ka nikariran, kainyo Imesek ni erai ngesi ekidingikino lokicholong a apolou, eliwor ekeyokon kech, eriki ngesi kesi lolelea a ngakipi ana a akiyar. Emiatari Akuj kesi ngakiyo anakonyen kech.” Na abwangea Imesek egoliet lo a ngikan-kaarei tangaa, kililing ibore daang anadis chek a anus a esaa. Dio ataanyunga ayong ngimalaikae ngikan-kaarei lu ewaasi alongaren Akuj, nakinae kesi ngaburucho ngakan-kaarei. Bu emalaikat eche lo atingit itubwa a egolit ni inomere emitina, towo alokeno alo ipeyonokinere Akuj. Nakinae ngesi emitina lokaalan kimorik aapei ka ngakilipet a ngitunga a Akuj, sodi tolem eraakasi ngakipeyos alokeno a egolit alo ipeyonokinere Akuj alo eyei ngaren ekicholong a apolou. Topuruu apuru a emitina anakan a emalaikat alo awei alongaren Akuj, kidir apuru kidiama imorikina ka ngakilipet a ngitunga a Akuj. Dio tolem emalaikat itubwa ni inomere emitina, kilelebik akim na ebunit alokeno alo ipeyonokinere Akuj, sodi tachakak nakwap. Togirok akwap, tobelak Ekipe, kimileau nabo tamaranik akwap. Tasaka ngimalaikae lukan-kaarei lu atingito ngaburucho ngakan-kaarei akutakin ngaburucho nguna. Tokutak emalaikat lo ekingaren aburuch keng. Totiyaun ngamoru a akiru ka akim, imorikina ka ngaakot tobukun kwap. Tonom atiaket apei ana a ngauni a akwap ka ngikito ta nginyia lukalibak daang. Dio tokutak emalaikat lo a ngiarei aburuch keng. Ibore ni asibit emoru loapolon anoki, tachakakinae nanam. Kibelei atiaket apei ana a ngauni a anam toliwor ngaakot, totoaka atiaket apei ana a ngauni a ngitieng kadaang alu ayarete ayakasi nanam, kinyasunae atiaket apei ana a ngauni a ngatubwae. Tokutak emalaikat lo a nguuni aburuch keng. Etop loapolon lo anoki loger a akinwaket, tachakun anadis, tachakakin natiaket apei ana a ngauni angangololin ka ngileleae a ngakipi. (Enyaritae ekiro a etop kangolo “Adwaris.”) Kibelei atiaket na a ngauni a ngakipi todwarer, sodi totoaka ngitunga lukaalak ani amaasa ngakipi nguna, kainyo apot kibelos todwaraketa. Dio tokutak emalaikat lo a nguomwon aburuch keng. Taramae atiaket na a ngauni a akolong ka na a elap ta na a ngikanyer sodi tongopia atiaket na a ngauni a akicha anikech. Tongopia akicha a atiaket ana a ngauni a apaaran ka atiaket na a ngauni a akwaar. Dio engolia ayong, eira egole lo aporit alokiding adis irema ebala, “Oitiakoi kare! Abe etioko nginyas eanyunete lu ibooyete anakwap esaa lo ekutakineta ngimalaikae luuni idongito ngaburucho kech!” Dio tokutak emalaikat lo a ngikan aburuch keng. Ataanyunga ayong etop lo achakun kwap, sodi nakinae engaaret lo a adui ana nyesaluni. Tangaa etop adui na nyesaluni, toneteun apuru anadui kangina na ikoni apuru a adui anaapolon inokakinitae akim. Kisirionik apuru a adui kangina akolong ka kidiama. Topudut ngimases anapuru kangina pena nakwap, nakinae agogongu na ikoni na a ngikuutanea. Tolimokinae atamar nyiinyasut nginyia kori ngikito, kori ibore cha daang nipus erupunit. Nakaneni tamarae kesi towana ngitunga make lu emam emachar a Akuj aloreetin kech. Tachamakinae kesi eboliatar ngitunga ngulu a ngilapio a ngikan, nakaneni nyear kesi. Ekoni apipilu a aboliaro kech na a ekuutan na ekonyea itwaan. Esakete kesi akitu ngilapio lukan ngulu nakaneni nyeanyunete, esakete kesi atamar atotoaka nakaneni ipungar akitu anikech. Tosubut ngimases ngangolei na esukito ejie. Anapito kesi anakies kech ngikiraunea lu esibit ngika a egolit, ekote ngireetin kech ngireetin a ngitunga. Ekote ngitim kech ngitim a ngaberu, kikote ngikel kech ngikel a ngingatunyo. Arapitae ngirarumo kech a ibore ani ikoni aupwal a asuat. Aruo etoil a ngabeben kech ikwa eruye a ngaurukukui ana irito ngangolei nakaalak ekerete alojie. Ayakasi kesi ngikosiman lu a ngiikwa loger a ekuutan, eraakasi ngikosiman ngulu ngesi ewaneeneta kesi ngitunga a ngilapio a ngikan. Eyei ekapolon lo epolokinit kesi, ngesi emalaikat lo eweikinit adui na nyesaluni. Enyaritae ekiro keng a Ngaeburaniae Abadon, ani kotere Ngagirik enyaritae Apolion, (eger keng atamar, “Ekamunyaran”). Adaunosi nginyas lu ekingaren, eringa ngiche ngiarei isidiuno. Ani erumor tokutak emalaikat lo a ngikan-kapei aburuch keng. Eira ayong etoil anaamwar anaomwon a egolit ana a ekeno a ngakipeyos a Akuj, alo ayei ngaren Akuj. Tolimok etoil ngolo emalaikat lo a ngikan-kapei tama, “Talachak ngimalaikae luomwon lu eenikinitae nangolol naapolon a Eupurate!” Talachakinae ngimalaikae luomwon ngulu. Asadito kesi kotere esaa ka akolongit ka elap ta ekaru lo eareta atiaket apei ana a ngauni a ngitunga kadaang. Katolimokin ekimar a ngajorei ana adokito ngangolei: arai ngalupui ngamiae ngaarei. Ani anakisingolikinet kesingolikini Akuj, ataanyunga ngangolei ka ngikameak ngangolei. Anapito kesi alorarumo ngasua naarengak ikote akim, topuseaka loger a adis, nabo tanyangaka loger a akibirit. Ekote ngakies a ngangolei kanguna ngakies a ngingatunyo. Apudunit akim ka apuru ta akibirit anakituk kech. Taara atiaket na a ngauni a ngitunga ngakiro nakesiak nugu, akim ka apuru ta akibirit, na apudunito anakituk a ngangolei. Kainyo ayei agogongu a ngangolei kanguna nakituk kech ka ngikosiman kech. Ekote ngikosiman kech ngimunio lu eya ngakies, nakaneni ewaneeneta kesi ngitunga. Ani ngitunga luche daang lu nyeara ngakiro nakesiak nguna, nyereuna kesi aloborei alu kolong asubete kesi ngikulepek. Nyepalikina kesi akilip ngipean, kori ngakujo nasubuna a egolit, kori akwangat na elalak ngaropiyae, kori ngasua nanyangayek, kori ngamoru ka ngakito, na eraakasi ngiboro lu emam ibore eanyungarete kori iirarete kori nyeloose. Kori nyelungete kesi akiar na eareeneta ngitunga kori akapel na esubatar kori emalaanu kori akoko kech. Sodi ataanyunga ayong emalaikat eche lo a ngikilinga etiyaun anadis. Etanapitae ngesi edou kiriamite alokakinet a Ekipe akou keng. Ekoni ereet keng akolong, kikote ngakejen keng ngapirio a akim. Atingit ngesi akitab naachi anakan keng, engaara. Kitowo ngesi akeju keng na a aloteten nanam, kitowo akeju na a alokedieny nalup nakoonok, sodi tanyarai ngesi irema, loger a ngingatunyo alu irurumaate. Na anyaraa ngesi, kiroposi ngagirokinet nakan-kaarei togirokis. Ani napei eruorikineta kesi, atasak ayong akigirakin. Nakaneni eira ayong etoil anadis elimuni tama, “Kimunon ngakiro na alimunete ngagirokinet nakan-kaarei, wara nyiigirak nakitab!” Sodi emalaikat lo aanyungari ayong ewei ananam ka akwap nikoonon kikea akan keng na aloteten nadis sodi kikong a ekiro a Akuj ana eyari nakajik, ana kolong asubi adis ka akwap ka anam ta ibore daang ni eyei tooma kech. Tolim emalaikat tama, “Adaun ngirwa lukolong arubakinitere idaritae! Nakaneni esaa lo ekutakinea emalaikat lo a ngikan-kaarei aburuch keng, iyookini Akuj ngakiro keng namunonoe na erekinit, loger lokolong alimokinea ngikasubak etich keng, lu eraakasi ngikadwarak a Akuj.” Sodi kesuruorik nabo ayong etoil losek eirari ayong iruoro anadis tama, “Kape tolema akitab na engaara na eyei nakan a emalaikat alo ewei ananam ka ngalup nakoonok.” Atolot ayong ni eyei emalaikat ngolo atolimok atamar kainak ayong akitab naachi ngina. Katolimok ngesi ayong tama, “Tolema tanyam, edwarer anakook kon, nakaneni eboboor anakituk kon loger a ao.” Atolema ayong akitab naachi ngina anakan keng sodi atanyam, abob noi anakituk kang ekoni ao. Nakaneni ani keliko ayong kerumor, todwarer anakook kang. Dio katolimokin ayong tamarae, “Ejoikinit iyong nabo idwari ngakiro a Akuj ani eya ngitunga a ngakwapea ka ngibukui ka ngabukui ta ngikapolok.” Kainakin ayong asuat na itemere ibore, sodi katolimokin tamarae, “Kape kitem akai a Akuj ka ekeno lo ipeyonokinere Akuj, sodi kimaru lu ilipito alokai a Akuj. Nakaneni nyiitem ngiwaitin lu anikalapatan a akai a Akuj, kainyo ainakin ngiwaitin ngulu ngitunga lua ngibukui aluche, ngulu ipudaate ere lo italeuno ngolo a ngilapio a ngitomwon-omwon ka ngiarei. Ameari ayong ngikaanyunak kang ngiarei enapito ngikuniae, elimorete kesi ngakiro kang ngirwa lu eraakasi abunget apei ka ngamiae ngaarei ka ngatomwon-kapei ngulu.” Ngikaanyunak luarei ngulu ngesi ngikito luarei a akimiet ka ngataae naarei ewaasi alongaren Ekapolon lo epolokinit akwap. Ani kesak itwaan akiwan kesi, elomuni akim anakituk kech sodi tomunya ngimoe kech. Ani kotere erot ngolo, eario itwaan cha daang ni esaki akiwan kesi. Eyei kesi agogongu na egolioto adis, nyeeram akiru esaa lo iruorotor kesi ngakiro a Akuj. Eyei kesi tani agogongu na ibeloto ngileleae daang lu a ngakipi toliworos ngaakot, nabo eyei kesi agogongu na eyauneta ngakiro nakesiak nakwap, esaa daang lo esaketa kesi. Nakaneni na erumoreta ekiruor ngakiro nguna, ejiete kesi ka etiengit lo epuduni anadui ana nyesaluni. Idwangi ngesi kesi sodi taar, topero ngawat kech alorot a ere aloapolon, alo kolong aramakinere Ekapolon kech Yesu napir. Isikwaanitae ekiro a ere kangolo ka Sodom, kori Misiri. Ngitunga lu eponito anakwapea kadaang ka ngitela daang ka ngabukui daang ka ngibukui daang, isemeete ngawat kech a ngirwa a nguuni ka anus, nakaneni nyechamunete kesi enukio. Elakarosi ngitunga a akwap kotere akitu a ngitunga aluarei kalu. Ichurokinete kesi nanakinos ngiboro, kainyo echanito sek ngikadwarak luarei ngulu ngitunga a ngakwapea noi. Adaunet a ngirwa a luuni ka anus kangulu, toloma akianget na a akiyar ana abunit ani a Akuj nikech. Tonyout kesi towaa. Ngitunga daang lu aanyungarete kesi, tobul lokojokon noi. Dio kiirasi ngikadwarak a Akuj luarei ngulu etoil lo erema elimokini kesi anadis tama, “Potu kidiama nege!” Toloto kesi kidiama nadis eya lodou, iteete ngimoe kech. Esaa lopei ngolo, tamaranik akwap lokojokon, kinyasunae ewae epei a ngiwaitin alutomon a ere. Totoaka ngitunga ngabunge ngakan-kaarei na amaranikinea akwap. Tobul ngitunga luche daang noi, kipuruut Akuj na a adis. Adaunosi ngakiro naaronok na a ngaarei, nakaneni etupuunete ngakiro naaronok na a ngauni atipei! Sodi tokutak emalaikat lo a ngikan-kaarei aburuch keng, kiirarae ngitoilio lu eremasi anadis ebalasi, “Erai tokona apolou na epolokinere akwap aka Ekapolon yok ka Kiristo keng, nakaneni epolokini ngesi nakajik!” Sodi ngikasukou lutomwon-arei ka nguomwon lu ebooyete alokicholongo kech alongaren Akuj tadakakin kwap ijuuruyete sodi kilipa Akuj, ebalasi: “Ekapolon Akuj Naationon, na tokona iyei ka nakolong iyei! Kibuakinit iyong alakara noi ani ianyunea apolou kon naapolon noi nabo isiak iyong apolokin! Angoyete lu nyeraakasi ngikanupak kilelebun, kainyo anang ngirwa a anyunyura kon, ngirwa lu iriraare ngikatoak. Anang ngirwa lu ipotorere ebachit, nakinae ngikadwarak, lu eraakasi ngikasubak etich kon, ka ngitunga kon daang ta lu kikerito iyong, napei aluuchik tanang ni luapolok. Anang ngirwa lu inyasunere lu inyasunito akwap!” Tangaarae akai a Akuj na eyei nadis, sodi taanyungarae asaduku na a Achamunet keng alokai keng. Sodi min akimileare ka agiro ka abelanakin a Ekipe ka amaran a akwap ta akiru naapolon na a ngamoru. Dio tatakanu ibore iche niapolon niliwo anadis. Ayei aberu na anapit akolong nabo ayei elap kwap ngakejen keng nabo ayei ekiraun a ngikanyer alutomon ka ngiarei nakou keng. Aapikinit ngesi akidoun, toriabakin ngesi noi kikalou esaki akidoun. Tatakanu nabo ibore iche niliwo anadis. Ayei emun loapolon loarengan lo ayakasi ngakies ngakan-kaarei ka ngaamwar ngatomon, toya ngikiraunea ngipei-pei nakies nakan-kaarei keng. Kiriu ngesi a ekosim keng atiaket apei ana a ngauni a ngikanyer kadaang alu ayakasi nadis sodi tachaku kesi kwap. Towo ngesi alongaren aberu esaki akinyam ikoku keng napei idounere. Dio kidou ngesi idia ni epolokini akwap daang a asuat anakapis. Nakaneni tokoporoe ikoku Nakuj ni eyei ekicholong keng a apolou. Tamatar aberu tolot nariet, ni asubakini Akuj kotere ngesi, ni echoikinere ngesi a ngirwa a 1,260. Sodi kisiak ejie anadis. Kitijikis Mikael ka ngimalaikae keng emun loapolon ka ngimalaikae keng aapei, nakaneni kidwangae emun loapolon, kikotarae ngesi ka ngimalaikae keng tamarae nyeringa iboikinosi nadis. Tachakarae emun loapolon kwap, emun lokolong ngorot ngolo, lo enyaritae Ekipe, kori Esiitan, lokolong engalae ngitunga daang anakwap. Tochakunae ngesi ka ngimalaikae keng daang nakwap. Sodi eira ayong etoil anadis ebala, “Abu tokona ayuuno na ebunit ani a Akuj! Edodiu tokona Akuj agogongu keng na eraakar Ekapolon! Edodiu tokona Kiristo apolou keng! Kainyo lokolong awei alongaren Akuj yok ititae ngikaitotoi yok akwaar ka apaaran, achakun kwap. Epiut ngikaitotoi yok ngesi a ngaakot a Imesek ka ngakiro na iteni na etatamete kesi, kainyo ajalito kesi akiyar kech tanang tani ni atoaketa. Ani kotere nguna, talakaros esi daang anadis, talakaros ka luche daang ibooyete kaneni! Oitiakoi! Abe etioko nginyas epete nakwap ka anam! Kainyo abu Ekipe nikus, nabo engoit noi kainyo eyeni ngesi atamar ekidioko ngirwa keng lu idongito.” Na ayenea emun loapolon atamar kachakun ngesi kwap, tolomak akirisit aberu na edouni idia. Nakinae aberu ngina ngabeben ngaarei na a egole aloapolon sodi topororea nikeng nariet, ni eyuunere ngesi alomun a ngikaru a nguuni ka anus. Toleku emun loapolon ngolo akaale a ngakipi na ikoni na a angolol, tasak atamar kiwokosi ngakipi aberu ngina. Nakaneni kingarakis ngalup aberu, tangaama ngalup tongobasi ngakipi na alekuni emun anakituk keng. Tongoik emun loapolon aberu, tolot akitojwore ngalesea keng ka nabo lu iwapito ngitalio a Akuj, nabo tonupito dir ngakiro na iteni na esileereuni Yesu. Towo emun loapolon alokwaas a anam. Sodi ataanyunga etiengit epuduni ananam. Ayakasi ngaamwar ngatomon ka ngakies ngakan-kaarei, ayakasi ngikiraunea ngitomon naamwar natomon nguna. Ayakasi nabo ngirora ngikan-kaarei lu kiyenyet Akuj nakies nakan-kaarei nguna. Ekoni etiengit ngolo eris, ekote ngakejen keng na a ebu alokaadengan, nabo ekoni akituk na a engatuny. Nak emun loapolon ngolo etiengit agogongu keng ka ekicholong keng lo a apolou ka apolou keng na epol noi. Asibit akou apei a etiengit kangolo na ayei ajeme naaronon, nakaneni angalekinit ajeme ngina. Tatalasi ngitunga daang anakwap ngakiro a etiengit kangolo sodi kiwapakis ngesi. Kilipa ngitunga daang emun loapolon ngolo kainyo ngesi ainakini etiengit ngolo apolou. Kilipa kesi tani etiengit ebalasi, “Ngae ikoni etiengit? Ngae itiji ngesi?” Tachamakinae etiengit ngolo iwoga a ngakiro ana iyenyea Akuj, tachamakinae nabo dang epolokini loger ngolo a ngilapio a ngitomwon-omwon ka ngiarei. Tolomak ngesi akimeny Akuj ka ekiro a Akuj, ka ni ibooyo Akuj ta daang lu ibooyete anadis. Tachamakinae ngesi itiji ngitunga a Akuj nabo kidwang kesi, nabo nakinae apolou na epolokinio ekitela daang ka ngakwapea daang ka ngabukui daang ta ngibukui daang. Ilipete ngitunga daang lu eya nakwap ngesi, mati lu kolong egirio ngirora kech nakitab na a akiyar na a Imesek ani kolong aario. Egirio kolong ngirora ngulu eringa akwap nyesubakina. “Ani keya ngaki, kiira robo! Itwaan cha daang ni ejoikinit irumunio torikoe, ejoikinit erikio, itwaan cha daang ni ejoikinit eario a ekileng, ejoikinit eario a ekileng. Echamit ngitunga lu a Akuj eliworosi lu etitinyikinito noi nabo lu enupito.” Sodi ataanyunga ayong etiengit eche lo alomuni analup. Ayakasi ngaamwar ngaarei na ekote ngaamwar a imesek, nabo eruoro ngesi loger a emun aloapolon. Kotere apolou daang na aanyuni ngesi ani a etiengit alo ekingaren, kidesik etiengit lo a ngiarei ngolo akwap daang ka ngitunga lu ibooyete anakwap akilip etiengit lo ekingaren, lo angaleki ajeme. Tosub etiengit lo a ngiarei ngakitoodikinet nakailiilok nakaalak, totiyau ngesi tani akim anadis totiyau kwap alongaren itwaan daang. Sodi kingala ngesi ngitunga daang lu ebooyete anakwap kotere ngakitoodikinet nakailiilok na achamakinio ngesi esubi alongaren etiengit lo a ekingaren. Tolimok etiengit kesi atamar tosubakis ekisikwaane lo itamununeta kesi etiengit lo awanio a ekileng sodi toyar. Tachamakinae etiengit lo a ngiarei iangakini akiyar ni eyei ekisikwaane losubuna lo a etiengit alo a ekingaren, sodi kiruorikinea ekisikwaane losubuna ngolo nabo taar daang lu nyilipete ngesi. Kidesik ngesi ngitunga daang, luapolok ka luuchik, ngikabarak ka ngikebootok, ngirikon ka lu nyerai ngirikon, atamar tamacharikinae emachar nakan kech na aloteten kori loreetin kech. Amam itwaan epedori akigiel ibore kori agielar emam emachar lo ekiro kangolo, lo erai ekiro a etiengit kori ekimar a ekiro keng. Eraakasi ngakiro nugu na esakete aosou. Itwaan cha daang ni echwaana, epedori akiyen ekimar a etiengit, kainyo erai ekimar ngolo ekiro a itwaan. Ekimar a ekiro kangolo ngesi 666. Sodi engolia ayong, ayei Imesek ni awei alomoru Sion. Arukito ngesi ka ngitunga lu araakasi 144,000 lu igiritae ekiro keng ka ekiro ka Apakeng loreetin kech. Sodi eira ayong etoil anadis lo aruo loger a ngakipi ana echakuna anakope nabo ekoni abelakinet a Ekipe nakaruon noi. Ekoni etoil lo aruo ngitoilio a ngikaeok alu idese ngagitae. Awaasi ngitunga ngulu alongaren ekicholong lo a apolou ka ngitieng lu ayarete luomwon ta ngikasukou. Amam ngitunga ngiche apedorete akiyen eeos ngolo mati ngitunga ngulu lu araakasi 144,000 lu alachunio anakwap. Ngitunga ngulu kesi lu nyepero ka ngaber a ache, kitaleunos a erot kangolo. Iwapito kesi Imesek awadaang ani cha elosi. Alachun kesi ani eya ngitunga luche, aliworosi lu a ekingaren lu elemikinio Akuj ka Imesek. Nyelimuno kesi alioko a ache, kainyo emam akemer a akisech eyei nikech. Dio ataanyunga ayong emalaikat eche eporit alokidiama. Ayakasi ngesi Ngakiro Naajokak a akiyar ana nyedaun asaki alimokin ngitunga daang a akwap ka ebukut daang ka ekitela daang ka ngabukui daang ta ngakwapea daang. Kirema ngesi tama, “Tokera Akuj sodi kipuruut ngesi! Kainyo anang tokona esaa lo irira ngesi ngitunga. Kilipa lokolong asubuni adis ka akwap ka anam ta ngileleae a ngakipi!” Kiwapak emalaikat lo a ngiarei lo a ekingaren ebala, “Aukor! Iteni dir, aukor Babilon naapolon! Ngitunga a Babilon lukolong etamaase ngitunga a ngakwapea kadaang emuna lo epuritoe, emuna lo adwaran lo a etereku a emalaanu kech!” Kiwapak emalaikat lo a nguuni luche luarei, irema ebala, “Itwaan cha daang ni ilipit etiengit ka ekisikwaane keng losubuna, sodi tamacharikinae emachar loreet keng kori nakan keng, emasi ngesi elope emuna lo epuritoe lo a Akuj, emuna lo a angoit keng, lo abukoki ngesi engoit noi lokopo lo a anyunyura keng! Daang lu emaase emuna ngolo, eboliare anakim ka akibirit, alongaren ngimalaikae lu italeuno ka Imesek. Idaui apuru a akim ana eboliare kesi kidiama nakajik. Ngitunga lu ilipito etiengit ka ekisikwaane losubuna ka itwaan daang ni emacharikinitae emachar a ekiro keng, nyiengunete akwaar ka apaaran.” Echamit ngitunga a Akuj eliworosi lu etitinyikinito, lu iwapito ngitalio a Akuj nabo tonupito ngakiro a Yesu. Sodi eira ayong etoil anadis ebala, “Kigirak nugu! Epiaritae lu etoakete alotich a Ekapolon napei tokona jik!” Elimunit Etau a Akuj ebala, “Iteni dir! Iengunete kesi alotichisio kech aluketuburunak kainyo irukete kesi ka ngitichisio lukolong asubete kesi.” Dio engolia ayong, engolik edou loakwaan. Engolik lo ebooyi alodou kangolo ikoni Lokookeng a Itwaan. Anapit ngesi ekiraun lo a egolit anakou keng, totingite ekileng lokakwanan anakan keng. Sodi tolom emalaikat eche alokai a Akuj sodi tanyara lo ebooyi alodou irema ebala, “Tolem ekileng kon lolemet tolemea ngalemet, kainyo anang esaa, akoko ngalemet anakwap!” Sodi kimasa lo ebooyi alodou ekileng keng lolemet nakwap, sodi tolemae ngalemet na a akwap. Sodi ataanyunga ayong emalaikat eche epuduni alokai a Akuj ana eyei nadis, atingit ngesi dang ekileng lolemet lokakwanan. Sodi bu nabo emalaikat eche alokeno alo ipeyonokinere Akuj, emalaikat ngolo ngesi epolokinit akim. Tanyara ngesi lo atingit ekileng lolemet loakwanan irema ebala, “Tolem ekileng kon lolemet totub ngamusabib a ngimusabib a akwap, kainyo akoko ngamusabib!” Sodi kimasa emalaikat ekileng keng nakwap, totub ngamusabib alomusabib, sodi tachakak niborosit nichiet emuna ni erai anyunyura na engoitor Akuj noi. Tochuae ngamusabib aniborosit anichiet ayei nikalapatan a ere, toleleu akaale a ngaakot na asaluni ani ebayi ngakilomitae ngamiae ngauni, tarai atulukuk keng ngamitae ngaarei. Sodi ataanyunga ayong ibore iche niliwo niapolon nabo nikitalari. Ayakasi ngimalaikae ngikan-kaarei ka ngakiro nakesiak ngakan-kaarei. Araakasi ngakiro nakesiak na araakasi na a esal, kainyo eraakasi kesi idodiunitor Akuj angoit keng jik. Sodi ataanyunga ayong ibore ni ekoni anam na a akiyo na imorikina ka akim. Ataanyunga ayong tani lu edwangete etiengit ka ekisikwaane keng losubuna ta ngolo erai ekiro keng ekimar. Awaasi kesi ananam ana a akiyo, etingito ngagitae na ainakini kesi Akuj nabo aeosi eeos a Musa alo erai ekasuban etich a Akuj, ka eeos a Imesek: “Ekapolon Akuj Naationon, epolok ngitichisio kon noi kitalarete! Ekapolon a akwap, eteniyete ngirotin kon dir eraakasi lu a iteni! Ngae nyikikeri iyong Ekapolon? Ngae ewouni akipuruun ekiro kon? Iyong bon italeuno. Epote ngitunga a ngakwapea kadaang sodi kilipa iyong, kainyo iteete ngitunga daang ngitichisio kon lu eriyan.” Arumoret kanguna, ataanyunga ayong akai a Akuj na eyei nadis engaar, eyei eam a Akuj tooma keng. Tolomut ngimalaikae lukan-kaarei alokai a Akuj, kirukut ka ngakiro nakesiak nakan-kaarei. Anapito ngiworui lu akwaak kea tanapito ngarubae na a egolit alorarumo kech. Nak epei a ngitieng aluomwon alu ayarete ngimalaikae lukan-kaarei ngatubwae nakan-kaarei na a egolit. Eleleba ngatubwae nguna anyunyura a Akuj ana eyari nakajik. Kilelebun apuru kai a Akuj na abuni alokipur a Akuj ka agogongu keng. Amam itwaan epedori alomar kai a Akuj tanang adaunet a ngakiro anakesiak anakan-kaarei a ngimalaikae alukan-kaarei kangulu. Sodi eira etoil alokai a Akuj elimokini ngimalaikae lukan-kaarei ngulu irema tama, “Kapesi tobukokisi ngatubwae nakan-kaarei a anyunyura a Akuj nakwap!” Tolot emalaikat lo a ekingaren tobukok atubwa keng nakwap. Tatakanuut ngajemei nakariabak noi ani eya ngulu ayei emachar a etiengit ka ngulu elipete ekisikwaane keng losubuna. Sodi tobukok emalaikat lo a ngiarei atubwa keng nanam. Kikokis ngakipi ngaakot a itwaan anikatoan sodi totoan ibore nikayaran daang eyei nanam. Dio tobukok emalaikat lo a nguuni atubwa keng nangololin ka ngileleae a ngakipi, sodi kilochos kesi toliworos ngaakot. Eira ayong emalaikat lo eweikinit ngakipi elimuni tama, “Ikongina Akuj na italeuno, na iyei ka nakolong iyei! Eraakasi ngakiro na idunguni iyong na etenooko. Abukorete kesi ngaakot a ngitunga a Akuj ka na a ngikadwarak a Akuj, nakaneni iinak iyong kesi ngaakot tamata. Aanyut kesi na ejoikinit eanyunete!” Sodi eira ayong etoil alokeno alo ipeyonokinere Akuj ebala, “Ekapolon Akuj Naationon Noi! Etenooko dir ngakiro na idunguni iyong eraakasi na iteni dir!” Dio tobukok emalaikat lo a nguomwon atubwa keng nakolong, sodi tachamakinae akolong enomi ngitunga a amonis keng anakariran. Tonom kesi amonis nakariran sodi kimenya kesi ekiro a Akuj ana epolokinit ngakiro nakesiak nugu. Nakaneni towout kesi akilung ngasechesea kech, kipuro ngesi. Sodi tobukok emalaikat lo a ngikan atubwa keng lokicholong a apolou a etiengit. Toribok ni apolokinit etiengit ngolo chuch, sodi tokonya ngitunga ngangajepa kech eriabasi, sodi kimenya kesi Akuj na a adis kotere ariaba ka ngajemei kech. Nakaneni towout kesi akilung eboyor kech loaronon. Sodi tobukok emalaikat lo a ngikan-kapei atubwa keng nangolol naapolon enyaritae Eupurate. Kijua angolol, tosubakinor erot lo a ngikapolok alu epote alokide. Dio ataanyunga ayong ngipean nguuni lu ikote ngakidodoka. Alomunito anakituk a emun aloapolon, ka akituk a etiengit ka akituk a ekadwaran alokaliokon. Eraakasi kesi ngipean alu esubete ngakitoodikinet nakailiilok. Eloose ngipean luuni lugu daang lokapolok a ngakwapea, echunun kesi wapei tojioto Akolongit naapolon a Akuj Anaationon Noi. “Topupok! Abuni ayong loger a ekokolan! Epiaritae noi itwaan ni ekienyi irichakinit ngiworui keng, sodi nyilaa ngesi emuner taanyu ngileech alokiding ngitunga!” Sodi tochunut ngipean ngikapolok wapei ni enyaritae a Ngaeburaniae Arimagedon. Sodi tobuko emalaikat lo a ngikan-kaarei atubwa keng kidiama. Kiruorik etoil alowae alo ekicholong alo a apolou, alokai a Akuj, irema ebala, “Asubakin!” Kimileu akwap togirok ka abelakin, nabo tamaranik lokojokon. Nyemaranikina akwap loger ngolo a ache nakolong jik asubunere itwaan, amaranikin a akwap ngina ngesi erono noi idwangit daang! Tapak ere loapolon ngapaket ngauni, kinyasun ngirerea a ngakwapea kadaang. Nyimuriakina Akuj ere loapolon enyaritae Babilon. Kitamat ngesi emuna a ekopo keng, emuna lo epuritoe lo a anyunyura keng. Tongopiyasi ngikwarin daang a anam, topuripuriakin ngimoru daang. Totep akiru na a ngamoru ngitunga, erai apotis a amoru a apei ngakiloi ngatomwon-kan, kilama ngitunga ngulu Akuj kotere ngamoru na akiru nakesiak nguna, kainyo araakasi ngakiro nakesiak nguna naaronok noi. Sodi bu epei a ngimalaikae alukan-kaarei alu atingito ngatubwae nakan-kaarei katolimok ayong tama, “Bua sodi kedodik eger lo iriraare amalaat na eyenikinitae, ere loapolon lo edukitoe diyete ngangololin nakaalak. Asubete ngikapolok a ngakwapea emalaanu ka ngesi nabo kilewa ngitunga a ngakwapea ani amaasa emuna lo epuritoe lo emalaanu keng.” Katorik ayong Etau a Akuj kayaa emalaikat nariet. Ataanyunga ayong kaina aberu na ebooyi alotiengit alo a arengan alo egiritae akwaan wadaang ngirora lu imenyere Akuj. Ayakasi etiengit ngolo ngakies ngakan-kaarei ka ngaamwar ngatomon. Anapit aberu ngina ngiworui lupusiek arengak ka luarengak puu nabo asirit a ngiboro alu abutakina egolit ka ngamoru nakaalak a ngaropiyae ta ngache nakaalak a ngaropiyae enyaritae ngalului. Atingit ngesi ekopo lo a egolit lo eleleba anyunyura ka ngakiro naaronok na idodiunito elomit keng. Egirakinitae loreet keng ekiro lo eya ngakiro namunonoe, “Babilon naapolon, itiokeng a ngamalaae kadaang ka ngakiro daang naaronok anakwap.” Sodi ataanyunga aberu ngina ilewato ngaakot a ngitunga a Akuj ka ngitunga daang lu aario ani achamitotor Yesu. Na aanyungarea ayong ngesi, katatalasi ngakiro nguna noi. Kengit emalaikat tama, “Nyo kitalaritotor iyong ngakiro nugu? Kalimokini ayong iyong ngakiro namunonoe a aberu kangina ka etiengit lo iwokit ngesi, etiengit lo a ngakies anakan-kaarei ka ngaamwar natomon. Ayari kolong etiengit ngolo, nakaneni nyeringa eyari, edikino epuduni anadui nakaneni elosi kinyasunae. Ngitunga lu ibooyete anakwap lukolong nyigira ngirora kech nakitab na a akiyar napei kolong anakisiakinet, etalarete daang ngakiro nguna na ingolikineta etiengit ngolo. Ayari kolong, ani erumor totoan. Eriangakinosi kesi na ingolikineta etakanuni nabo. “Esakete ngakiro nugu aosou ka achwaanu. Eraakasi ngakies nakan-kaarei ngimoru ngikan-kaarei lu ibooyo aberu. Eraakasi kesi dang ngikapolok ngikan-kaarei, adaunosi ngikan a ngikapolok alukan-kaarei kangulu, eringa epei epolokinit, nabo eringa loche nyebuno. Ani kebu ngesi, epolokini mono cha wadio. Ani etiengit lokolong ayari nakaneni nyeringa tokona eyari, erai ngesi ekapolon lo a ngikan-kauni, lo erai epei alukan-kaarei nakaneni eliwor lo inyasunio. “Eraakasi ngaamwar natomon na ianyunga iyong ngikapolok ngitomon lu nyisiekina apolokin, nakaneni echamakinio epolokinete aapei ka etiengit a esaa a epei. Erai ibore ni esakete lutomon ngulu ipei, nabo einakinete etiengit ngolo agogongu ka apolou kech daang. Ejiete kesi ka Imesek, nakaneni ipiunete Imesek ka lu kolong anyarae ngesi toseu, lu iwapito ngesi dir na iteni, ipiunete kainyo erai Imesek Ekapolon lo idwangit ngikapolok luche daang nabo Ekarikon lo idwangit ngikarikok luche daang.” Katolimok tani emalaikat ngolo ayong tama, “Ngakipi na ianyungari iyong amalaat ibooyo, erai ngakwapea ka ngitunga ka ngibukui ta ngabukui. Ngaamwar natomon ka etiengit lo ianyungari iyong, eremokinosi amalaat elemarete ibore daang ni etingit ngesi kimiekis ngesi emuner. Enyamete akiring keng kinyasut ngesi a akim. Kainyo ewaak Akuj lotai kech ekimue lo esubeta na esakit Akuj, kainyo echamunosi kesi make nakis etiengit agogongu na epolokinio tanang ni eliworotor ngakiro a Akuj ngaka iteni. “Erai aberu na ianyungari iyong ere loapolon lo epolokinit ngikapolok a ngakwapea.” Arumoret kanguna, ataanyunga ayong emalaikat eche etiyaun anadis. Apol noi apolou keng, sodi kinwaku akwangis keng akwap wadaang. Kirema ngesi lokojokon tama, “Aukor ngesi! Aukor Babilon naapolon! Aliwor tokona ni ibooyoto ngipean ka ngipara, aliwor ni ibooyoto ngikieny luaronok italeo akinyam ka lu kikadakinete noi. Kainyo amat ngibukui daang emuna keng lo epuritoe, lo erai emuna loadwaran lo a etereku a emalaanu keng. Aloma ngikapolok a ngakwapea ka ngesi. Abara ngimuchurus a ngakwapea kotere etereku keng lo emam kona etitinyikinio.” Sodi eira ayong nabo etoil eche iruoro anadis ebala, “Topudutu ngitunga kang! Topudutu anikeng! Nyiimorikinosi esi ka ngesi isubete ngasechesea keng, sodi nyikiriraare esi ka ngesi aapei! Kainyo ekokis ngasechesea keng na edokokin anang kidiama nadis, nakaneni eringa Akuj itamunit eboyor keng loaronon. Tosubeta napei kisubea ngesi esi, tatachakisi anikeng ngatachakinet ngaarei, nguna asubi ngesi daang. Kilelebikisi ekopo keng emuna loadwaran noi lo idwangit lokolong kipurokinit ngesi esi. Kitaanyutu ngesi ngichan ka ariaba na itemem ka ekipur ta ajako nakolong aanyunit ngesi. Kainyo itami ngesi ebala: ‘Ebooyi ayong akapolon kane! Meere ayong apuserut, nyasutonokini ayong jik!’ Kotere nguna, ichanyuni ngesi akolongit apei ngakiro nakesiak, edeke ka ariaba ta akoro. Inomio ngesi a akim, kainyo Ekapolon Akuj na irirae ngesi, etiono.” Ngikapolok a ngakwapea lukolong alomete ka ngesi nabo kiboyoto alotereku, ikalounete kisutusuta na ingolikineta apuru na idaaui anakim ana enomi ere ngolo. Ewaasi kesi echadakina nikalonan noi kainyo ekerito aboliaro ka ngesi aapei. Etamarete, “Oitiakoi kare! Abe eroko ngakiro nugu noi! Ere a Babilon daang lo eyenikinitae epolot etia ni etia, erirakin a esaa a epei bon a?” Igorotor ngimuchurus a akwap tosutonokineta, kainyo emam itwaan eringa egieli ngiboro kech, emam itwaan egieli egolit kech ka akwangat na elalak ngaropiyae ka ngamoru na elalak ngaropiyae ta ngamoru elalak ngaropiyae na enyaritae ngalului, nyeringa egielio ngiworui kech ludielet ka lupusiek-arengak ka lunyusuk ta luarengak. Nyeringa egielio ngiboro lugelagelae lua ngakito ana elalak ngaropiyae ka ngiboro lua ngikel a etom, ka ngikito lu elalak ngaropiyae ka ngamaritoi ka asuat nanyang ta ngamoru na ikwaan ka akaleuleu. Nyeringa egielio ekitoe loongor-nyang lo itoboboe akimuj ka lo itukukunyi akimuj ka emitina, ka ekinyaate lokakukunyon todwar ta eche lokakukunyon, ka emuna lu epuritoe ka akimiet ka ngakiria ka ngakanoi ka ngaatuk ka ngamesekin ka ngangolei ka ngaurukukui, ka ngikedalak ta tani ngitai a ngitunga. Tolimokis ngesi ngimuchurus tamasi, “Angopiasi ngiboro daang luajokak lukolong kimuit iyong aanyun, adaun ebari kon daang ka akibuseanu kon, nakaneni nyianyuni iyong kesi nabo!” Echadakinosi ngimuchurus lukolong abarete ani asubeta emuchuruseenu alore kangolo, towaa anialonan, kainyo ekerito kesi ariaba ka ngesi aapei. Igorosi kesi nabo tosutonokis, sodi tolimut tamasi, “Oitiakoi kare! Abe eroko ngakiro na apot lore lo a apolon logo! Anapit kolong ngesi ngawarui nadapal, napusiek-arengak ka naarengak puu, nabo tobutakina ngiboro lua egolit ka ngamoru na elalak ngaropiyae ta ngamoru na elalak ngaropiyae na enyaritae ngalului! Sodi tongopia ebari ngolo daang a esaa a epei!” Ngikapolok a ngatubwae daang ka lu adokito ngatubwae ka lu esubete etich anatubwae, ta lu eyarakinito nanam, towaa anialonan, sodi kiremasi na aanyungareta apuru na idaui anakim ana enomi ere ngolo tamasi, “Emam ere eche nakanuan lo ikoni ere loapolon logo!” Tobukokis apua nakies kech, kikalout ka asutonokina ebalasi, “Oitiakoi kare! Abe eroko ngakiro na apot lore loapolon logo! Erai ngesi ere lo abarakinete daang lu ameto ngatubwae kech ananamea! Nakaneni angopiki ngesi ibore daang a esaa a epei!” Talakar adis ani enyasunor ngesi! Talakaros ngitunga a Akuj ka ngimeanara ta ngikadwarak a Akuj! Kainyo erira Akuj ngesi kotere nakisubea ngesi esi! Dio kikeu emalaikat epei loti a ngikilinga amoru na etia akiries naapolon sodi achakakin nanam ebala, “Ikokinio ere loapolon a Babilon ewatario kwap nege, sodi nyeanyungar nabo! Eruye a ngagitae ka na a ngitoilio a ngitunga alu ekusete ebune ka aburuch, nyeringa iirario anikon nabo! Emam ekadukon lo eyeni akiduk ibore tani ipei emini nikon. Emam tani itwaan iirari eruye a akiries! Nyeringa nabo akicha a ataa etakanuni alotooma kon, nyeringa nabo ngitoilio a ngikiliok alu iutasi ka ngaberu na iusio iirario anikon. Araakasi ngimuchurus kon ngikapolok anakwapea kadaang, nabo kotere amuronot na a alioko, kingalata ngitunga daang lua ngakwapea!” Kirirae Babilon kainyo arukaunio ngaakot a ngikadwarak ka ngitunga a Akuj, alore. Iteni dir, ngaakot kadaang alu aario anakwap. Arumoret kanguna, eira ibore ni ikoni echale loapolon a asepich a ngitunga anadis ebala, “Kipuroe Akuj! Eraakasi ayuuno ka ekipur ta agogongu ngaka a Akuj yok. Eraakasi ngakiro na edunguni ngesi na iteni na eriyan! Enyasu ngesi amalaat nakolong enyasunit ngitunga a akwap a emalaanu keng. Erira Akuj ngesi ani aarea ngikasubak etich keng.” Kiremasi kesi nabo tamasi, “Kipuroe Akuj! Idaui apuru na a akim ana enomi ere loapolon ngolo kidiama nakajik!” Kibusokinos ngikasukou lutomwon-arei ka nguomwon ka ngisubuna lu ayarete nguomwon kwap sodi kilipa Akuj, na ebooyi alokicholong a apolou keng. Tolimut tamasi, “Aamen! Kipuroe Akuj!” Sodi eira ayong etoil alokicholong a apolou a Akuj ebala “Kipuro Akuj yok, ngikasubak etich keng daang ka ngitunga daang, luuchika ka luapolok aapei, lu ikerito ngesi!” Sodi eira ibore ni ikoni echale lo asepich a ngitunga, lo ikoni eruye a ngakipi ana imasuna anakope, nabo ikoni abelakinet a Ekipe nakaruon. Eira ayong kesi elimunete tamasi, “Kipuroe Akuj! Kainyo Ekapolon Akuj Naationon na erai Akuj yok ngesi erai Akarikon! Atalakaros atagata ngesi, epuro apolou keng! Kainyo anang esaa lo a akuuta a Imesek, asubakin ateran na iusio idarit ngesi. Ainakin ngesi ngiworui luajokak kamalamalak.” (Ngakiro naajokak esubete ngitunga a Akuj kesi eraakasi ngiworui luajokak). Sodi katolimok ayong emalaikat tama, “Kigir nugu: Epiaritae noi lu anyaraun nakimuj a akuuta a Imesek a Akuj.” Sodi kiatak emalaikat tama, “Ngakiro nugu ngesi na iteni a Akuj.” Ebusokin ayong kwap diye ngakejen keng asaki akilip ngesi, nakaneni katolimok ngesi ayong tama, “Nyiikok neni! Arai ayong dang ekasuban etich loger kon ka ngikaitotoi kon, kirichakinit ngoni daang ngakiro na iteni na edodiuni Yesu. Kilip iyong Akuj!” Kainyo ngakiro na iteni edodiuni Yesu ngesi adwarete ngikadwarak a Akuj. Sodi ataanyunga ayong adis engaar, ayei angole naakwaan inaa. Anyaritae ekamean angole ngina, lo Emunoi dir lo a Iteni. Erai ngesi ekeriran ka ekajwon a eboyor alo etenoono. Ekote ngakonyen keng asarae a akim nabo anapit ngesi ngikiraunea lukaalak anakou keng. Egiritae ekiro kidiama keng, nakaneni emam itwaan eyeni atamar erai ekiro ngolo nyo mati ngesi bon elope. Anapit ngesi eworu lo abutarito ngaakot. Ekiro keng ngesi, “Akiroit a Akuj.” Ewapito ngasigerea a adis ngesi edokito ngangolei naakwaak tanapito ngiworui lu italeuno luakwaak kea. Apudununi ekileng lokakwanan anakituk a ekamean angole kangolo lo idwangea ngesi ngibukui a ngakwapea. Epolokini ngesi kesi a asuat anakapis ka akichii emuna lo epuritoe niborosit nichiet emuna, erai iborosit ngini nia anyunyura ana engoitor Akuj Naationon. Egiritae ekiro logo kidiama eworu keng ka ngakejen keng, “Ekarikon lo idwangit ngikarikok daang ka Ekapolon lo idwangit ngikapolok daang.” Sodi ataanyunga ayong emalaikat ewei anakolong. Kirema ngesi tolimok ngikieny daang lu aporito alokidiama tama, “Potu! Tochunakinos wapei kotere esukukuu loapolon a Akuj! Potu tanyama ngaringo a ngikarikok ka ngikarikok a ngasigerea ka ngasigerea ka ngaringo a ngangolei ka na a ngikameak ngangolei ta na a ngitunga kadaang, alu eraakasi ngirikon ka lu nyeraakasi ngirikon ta luuchik ka luapolok!” Sodi ataanyunga ayong etiengit ka ngikarikok a ngakwapea ka ngasigerea kech echunakin akitojwore lo ameat angole ka ngasigerea keng. Kirumunae etiengit ngolo toenae aapei ka ekadwaran lokaliokon lo asubi ngakitoodikinet nakailiilok alongaren keng. (Ngakitoodikinet nakailiilok nguna ngesi engalaa ngesi lu eyei emachar a etiengit ka lu elipito ekisikwaane losubuna a etiengit kangolo.) Etiengit ngolo ka ekadwaran lokaliokon, tachakakinae eyarete nanam na a akim na itonoki akibirit. Taarae ngasigerea keng a ekileng alo epuduni anakituk kangolo ameat angole. Sodi tanyama ngikieny daang ngaringo kech kimwoko. Sodi ataanyunga ayong emalaikat etiyaun anadis, etingit anakan keng engaaret a adui ana nyesaluni ka erikot loapotion. Kirum emalaikat ngolo emun loapolon, emun lokolong ngorot, lo erai Ekipe kori lo erai ekiro keng eche Esiitan, sodi toen ngesi ngikaru 1,000. Tachakak emalaikat ngesi nadui na nyesaluni, togol adui sodi kimulelea, nyiingala ngesi ngibukui nabo jik tanang ngikaru 1,000 edaun. Nakaneni ani adaunet a ngikaru kangulu, talachakinae ngesi mono wadio. Sodi ataanyunga ayong ngikicholongo a apolou a Akuj, ani lu ebooyete kaneni, nakinae agogongu na iriraata. Ataanyunga ayong tani ngitai alu kolong atuborio ngakies kotere ni iruorotor ngakiro na iteni na edodiuni Yesu ka akiroit na a Akuj. Nyilipa kesi etiengit kori ekisikwaane keng losubuna, kori nyemacharikina kesi tani emachar a etiengit loreetin kech kori nakan kech. Toyarut kesi topolokis kesi aapei ka Kiristo ngikaru abunget apei. (Nyeyaruna ngikatoak luche tanang ngikaru lu eraakasi 1,000 edaunosi). Ayarunet na ekingaren eyaruneta ngikatoak ngesi naga. Epiaritae lu epete nayarun na ekingaren a ngikatoak, elakarosi lokojokon noi. Emam akitu na a ngaarei agogongu anikech. Eliworosi kesi ngimurok a Akuj ka lu a Kiristo, nabo epolokinete kesi ka ngesi aapei a ngikaru 1,000. Ani adaunet a ngikaru alu eraakasi 1,000, elachakinio Esiitan ani eenikinitae, elosi ngesi kingala ngibukui lu epetakina nakwap daang, na eraakasi Gog ka Magog. Echunakini Esiitan kesi wapei kotere ejie, elalakearosi kesi totiata asinyen na eyei lokwaas a anam. Topetakin kesi nakwap wadaang sodi kiriama adakar a ngitunga a Akuj ka ere lo emina ngesi. Nakaneni totiyaun akim anadis sodi tomunya kesi. Dio tachakakinae Ekipe lo engalae kesi nanam na a akim ana itonoki akibirit, nisek achakakinio etiengit ka ekadwaran lokaliokon, sodi toboliare kesi akwaar ka apaaran, nakajik. Sodi ataanyunga ayong ekicholong lo apolou akwang topolot, ataanyunga tani lo ebooyi alokicholong kangolo. Tongopiasi akwap ka adis alongaren keng nakaneni nyeanyungara nabo jik. Sodi ataanyunga ayong ngikatoak, luuchik ka luapolok ewaasi daang aapei alongaren ekicholong a apolou. Tangaarae ngakitabea, sodi tangaarae nabo akitab ache, akitab na a akiyar. Kirirae ngikatoak itemem ka na asubete kesi, loger lo igiritere nakitabea. Dio kipud anam ngikatoak lu ayakasi tooma keng. Kipudut akitu ka akwap a ngikatoak ngikatoak lu atingito. Sodi kirirae daang itemem ka na asubete kesi. Dio tachakakinae akitu ka akwap na eyakasi ngikatoak nanam na a akim. (Anam na akim naga ngesi erai akitu na a ngaarei). Itwaan cha daang ni nyerukaunio ekiro keng igiritae nakitab na a akiyar, tachakakinae nanam na a akim. Dio ataanyunga ayong adis nakitetet ka akwap nakitetet. Tongopia adis na a ekingaren nabo topuripuriakin anam. Sodi ataanyunga ayong ere lo italeunitoe, Yerusalem lokitetet, etiyaun anadis ani a Akuj, esubakinitae eriyan, ekoni ateran na enapit esaki aanyun ka lokile keng. Eira ayong etoil lo eruoro alokicholong alo apolou irema ebala, “Kingolik a! Eboikin Akuj kiding ngitunga. Iboikin kiding kech, eliworosi kesi ngitunga keng, eliwor ngesi Akuj kech. Emiatari ngesi ngakiyo daang anakonyen kech. Engopi akitu jik, engopi apipilu ka akigoro ta ariaba. Angopia eboyor lokolong ngorot.” Dio tolim lo ebooiy alokicholong a apolou tama, “Kingolik a! Etiliwo tokona ayong daang ngakitet!” Katolimok nabo ngesi ayong tama, “Kigirak nugu, kainyo eraakasi ngakiro nugu ngaka iteni nanupat.” Sodi tolim ngesi tama, “Arumor! Ayong ngesi lo ekingaren ka lo a esal, nabo arai akisiakinet ka asalun. Ainakini ayong itwaan daang ni enyamit akure, ngakipi na nyetachio na a elelea alo a akiyar. Itwaan cha daang ni epiu, eanyuni nugu, Aliwor ayong Akuj keng, dio toliwor ngesi lokookang. Nakaneni ngitunga lukakurianak ka lu elimonorosi ka lu ibatara Anakuj ka lukaarak ka lumalaae ka lu emuroote ka lu ilipito ngakujo nasubuna ka lukaliokok daang, ni erai akwap kech ngesi anam na enoki akim ka akibirit, na erai akitu na a ngaarei.” Epei a ngimalaikae a lukan-kaarei alu atingito ngatubwae na eleleba ngakiro nakan-kaarei nakesiak na a esal, bu nikang tama, “Bua kedodik ateran, aberu a Imesek a Akuj.” Katorik ayong etau a Akuj, kayaa emalaikat kidiama emoru lotikooyen. Kedodik ayong Yerusalem, ere lo italeuno, epuduni anadis ani a Akuj, nabo etokwaikwai akwangis a Akuj. Ekwaikwai ere ngolo loger a amoru anakaalan a ngaropiyae, na ikoni amoru nakamalamalan enyaritae alumas nabo alilii loger a akiyo. Apolot awas keng awoi noi, ayakasi ngidorin ngitomon ka ngiarei lu apolokinito ngimalaikae ngitomon ka ngiarei. Egiritae ngirora a ngitela a lutomon ka ngiarei a Ngisirael lodorin. Ayakasi ngidorin nguuni lowaitin daang, ayakasi nguuni kide, ayakasi nguuni kwap, ayakasi nguuni kuju, toyakas nguuni too. Adukitoe awas a ere kangolo kidiama ngamoru ngatomon ka ngaarei na esiakinitere akiduk. Egiritae ngamoru nguna ngirora ngitomon ka ngiarei a ngimeanara a Imesek. Atingit emalaikat lo kiruoro ka ayong asuat nakapis na a egolit, nakitemiet ere ka ngidorin keng, ta awas keng. Ikwaan ngiwaitin a ere daang pulure, awoyau ka aurianut. Kitem emalaikat ere a asuat anakapis keng anakitemiet, arai awoyau keng ngakilomitae ngabunge ngaarei ka ngamiae ngoomwon alowaitin ka kidiama ta kwap. Kitem emalaikat awas dang, arai awoyau keng na alokidiama ngimitae ngitomwon-kapei a akitemiet ana etemio ngesi. Adukitoe awas a ngamoru anaarengak kaalak a ngaropiyae, nakaneni adukitoe ere a egolit bon, alo amalimali loger a akiyo. Ngamoru na isiakinitere akiduk awas a ere, asiritoe a ngamoru anagelagelae ana elalak ngaropiyae. Amoru na ekingaren isiakinitere akiduk awas arai nakamalamalan enyaritae alumas arai na a ngaarei apus-arengan, arai na a ngauni amoru nakaagongon noi, arai na a ngoomwon napus-aliban, enyaritae na a ngikan saridoniki, arai na ngikan-kapei naarengan, arai na a ngakan-kaarei nanyang, enyaritae na a ngakan-kauni berili, enyaritae na a ngakan-koomwon topas, enyaritae na a ngatomon kirisopiraso, enyaritae na a ngatomon ka apei yasinito, tanyaritetei na a ngatomon ka ngaarei amesisto. Ani ngidorin lutomon ka ngiarei araakasi ngamoru nakamalamalak elalak ngaropiyae enyaritae ngalului ngatomon ka ngaarei. Asubunitae ekidor epei analulu a apei. Arai erot lo a ere egolit bon, atakani yaaye kona a akiyo. Nyeanyungara ayong akai a Akuj alore, kainyo akai a ere kangolo ngesi Ekapolon Akuj Naationon Noi ka Imesek. Nyesakit ere ngolo akolong kori elap lu inwakunete, kainyo akwangis a Akuj ngesi inwakunit, nabo Imesek ngesi erai ataa keng. Eloose ngibukui kotere akicha keng, nabo eyaunete ngikarikok a ngakwapea ebari kech nikeng. Engaarosi ngidorin a ere apaaran daang, nyegolio jik kainyo emam akwaar kaina. Eyaunete kesi apolou ka ebari a ngibukui alu nyerai Ngiyaudi tooma ere. Nakaneni emam ibore nia nginyas ni elomari tooma ere ngolo, kori itwaan daang ni esubi ngakiro na a ngileech ka ni iruoro alioko. Ngulu igiritae ngirora kech nakitab na a akiyar na a Imesek, kesi elomarete lore. Abu emalaikat kedodik ayong angolol a ngakipi ana a akiyar emalimali loger a akiyo, eleleunit alokicholong a apolou a Akuj ka loa Imesek. Kitoru kiding erot lo a ere. Ayei ekitoe lo akiyar lokeku lokayaaye ka lokalaalo a angolol, akoniununi ekitoe ngolo ageor akoniunet ngatomon ka ngaarei ekaru epei, akoniet apei, elap epei. Eraakasi ngakui keng ekitoe lo itojoki ngibukui. Emam ibore daang ni ilamit Akuj ni emini lore ngolo. Emini ekicholong lo a apolou a Akuj ka lo a Imesek lore ngolo nakaneni ilipete ngikasubak etich keng ngesi. Ingolikinete ereet keng, nabo igirakinio ekiro keng loreetin kech. Nyemini akwaar nabo jik, kori nyesakete kesi akicha a ataa kori na a akolong kainyo Ekapolon Akuj ngesi eliwor akicha kech, nabo epolokinete kesi eraakasi ngikapolok nakajik. Sodi katolimok ayong emalaikat tama, “Eraakasi ngakiro nugu na iteni nanupan. Ekapolon Akuj na einakinit ngikadwarak Etau keng, ngesi ameu emalaikat keng akidodikin ngikasubak etich keng na ejoikinit esubakinosi atipei.” Ebala Yesu, “Topupok a! Abunit atipei! Epiaritae lu iwapito ngakiro na edwaritae na eyakasi nakitab naga!” Ayong Yoana ngesi eira nabo engolik ngakiro nugu daang. Ani na arumorea ayong akipup ka akingolikin kesi, ebusokin ayong kwap diye ngakejen a emalaikat alo kedodikini ayong ngakiro nugu, sodi atasak ayong akilip ngesi. Nakaneni katolimok ngesi ayong tama, “Nyiikok neni! Arai ayong dang ekasuban etich loger kon ka ngikaitotoi kon lu eraakasi ngikadwarak a Akuj ka nabo luche daang lu iwapito ngakiro na eyakasi nakitab naga. Kilip iyong Akuj!” Katolimok tama, “Wara nyiimunon ngakiro na edwaritae anakitab kana kainyo aapuu ni edikino ngakiro nugu daang esubakinotor. Itwaan cha daang ni erono, ejoikinit erubakini esubi naaronok, ani itwaan cha daang nia nginyas, ejoikinit erubakini erai nia nginyas. Itwaan cha daang niajokon, ejoikinit erubakini esubi naajokak, ani itwaan cha daang ni italeuno, ejoikinit erubakini erai ni italeuno.” Ebala Yesu, “Topupok a! Abunit atipei, kirukunit ka ebachit lo ainakini itwaan daang itemem ka na asubi ngesi. Ayong ngesi lo ekingaren ka lo a esal, akisiakinet ka esal.” Epiaritae lu ilotarete ngiworui kech tosegeta tachamakinae enyamete ageor na a ekitoe alo a akiyar nabo kitoro lodorin tolomasi lore. Nakaneni eyakasi lu ikote ngingokwo nikalapatan a ere, ka lu emuroote, ka lumalaae ta lukaarak, ka lu ilipeenete ngakujo nasubuna ta lu eliokoko, tominas alioko. “Ayong Yesu ngesi ameu emalaikat alimokin esi ngitunga a ngikanisae ngakiro nugu. Arai ayong ales a Daudi, ayong ngesi etop lokanokan a ataparach.” Ebalasi Etau a Akuj ka ateran, “Bua!” Itwaan daang ni iirari nguna, echamit elimuni tama, “Bua!” Bu itwaan cha daang ni enyamit akure. Itwaan cha daang ni esaki ngakipi na akiyar, tolema pas. Echikichiki ayong Yoana daang lu iirarete ngakiro na edwaritae na eyakasi nakitab naga, itwaan cha daang ni iatakini ibore iche nakiro nugu, iatakini Akuj nikeng eriras a ngakiro anakesiak isisaunitae anakitab kana. Ani kelema itwaan idio akiroit adio anakiro ana edwaritae anakitab kana, edemari Akuj ngesi ekimar keng lo a ageor ana a ekitoe alo a akiyar, ka ere lo italeuno lo isisaunitae anakitab kana. Ani ngini iruoro eger a ngakiro kanguna kadaang ebala, “Iteni dir! Abunit atipei!” Kikokis neni. Bua Ekapolon Yesu! Agasi ajokis a Ekapolon Yesu min nikus kadaang. Aamen.