ተግሣጸ፡ ሰሎሞን፡ Tagśāṣa Salomon Akademie der Wissenschaften in Hamburg

The text provided in this record has been digitized from modern Vulgata printed editions and converted to XML by the Bm team. For the version digitized from a critical edition visit also https://www.tau.ac.il/~hacohen/Biblia.html.

Hiob-Ludolf-Zentrum für Äthiopistik Die Schriftkultur des christlichen Äthiopiens und Eritreas: Eine multimediale Forschungsumgebung / Beta maṣāḥǝft Hamburg This file is licensed under the Creative Commons Attribution-ShareAlike 4.0.

Work of the literatures of Ethiopia and Eritrea

Definitions of prefixes used.

EnglishGǝʿǝz Created file from google spreadsheet CREATED: text record Corrected relation
Text of the EOTC printed Bible
ተግሣፀ፡ ሰሎሞን፡ እለ፡ እንበለ፡ ኑፋቄ፡ ዘጸሐፉ፡ አዕርክቲሁ፡ ለሕዝቅያስ፡ ንጉሠ፡ ይሁዳ። ክብረ፡ እግዚአብሔር፡ የኀብእ፡ ነውረ፡ ወስብሐተ፡ ንጉሥ፡ ያከብር፡ ገብረ። ሰማይ፡ ልዑል፡ ወምድር፡ ዕሙቅ፡ ወከማሁ፡ ልበ፡ ንጉሥ፡ ኢይትአመር። አጽርዮ፡ ለብሩር፡ ዘኢኮነ፡ ፍቱነ፡ ወይነጽሕ፡ ለከ፡ ንጽሐ፡ ፍጹመ። ቅትል፡ ረሲዓነ፡ እምቅድመ፡ ገጸ፡ ንጉሥ፡ ወይረትዕ፡ መንበሩ፡ በጽድቅ። ወኢትትዓበይ፡ በቅድመ፡ ገጸ፡ ንጉሥ፡ ወኢትጸደቅ፡ በቅድመ፡ እግዚአብሔር፡ ወውስተ፡ መካነ፡ መኳንንት፡ ኢትቁም። ይኄይሰከ፡ ይበሉከ፡ ዕርግ፡ ኀቤነ፡ እምትኅሥር፡ በቅድመ፡ መኰንን፡ ዘርእያ፡ አዕይንቲከ፡ ንግር፡ ወኢትደቅ፡ ውስተ፡ ጋእዝ፡ ፍጡነ። ቅስተ፡ ተዋቀስ፡ ምስለ፡ ቢጽከ፡ ወምሥጢሮሰ፡ ኢትክሥት፡ ከመ፡ ኢትነስሕ፡ በደኃሪትከ። ሶበ፡ ይግእዘከ፡ ዓርክከ፡ ግባእ፡ ድኅሬከ፡ ወኢትትኀየይ፡ ከመ፡ ኢይሒስከ፡ ዓርክከ፡ ወጋእዝከኒ፡ ወጽልእከኒ፡ ኢያርኅቀከ፡ እምኔሁ። እመሰ፡ ከሠትከ፡ ምሥጢሮ፡ ይከውነከ፡ መጠነ፡ ሞት፡ ጸጋ፡ ወታእኃ፡ ያግእዝ፡ አላ፡ ተዓቀብ፡ በርእስከ፡ ከመ፡ ኢትኩን፡ ዝንጉገ፡ ወዕቀብ፡ ፍናዊከ፡ በሥነ፡ ምግባሪከ። ኮለ፡ ወርቅ፡ ውስተ፡ ድደ፡ ብሩር፡ ሰንፀት፡ ከማሁ፡ ብሂለ፡ ቃል፡ በበገጹ። ውዕቦ፡ ወርቅ፡ ውስተ፡ ዕንቈ፡ ሰርድዮን፡ ዘብዜኅ፡ ሤጡ፡ ውዱድ፡ ከማሁ፡ ቃለ፡ ጠቢብ፡ ውስተ፡ ዕዝነ፡ ዘይሰምዕ፡ ሠናይ፡ ውእቱ። ከመ፡ ጸአተ፡ አስሐትያ፡ በማእረር፡ በመርቄ፡ ይደሉ፡ ከማሁ፡ ሐዋርያ፡ ምእመን፡ ለነፍሰ፡ እለ፡ ፈነውዎ፡ ይበቊዕ። ከመ፡ ነፋሳት፡ ወደመናት፡ ዘአልቦሙ፡ ዝንም፡ ወዝናማት፡ እሙራት፡ በመዋዕለ፡ ማእረር፡ ኢይበቊዕ፡ ከማሁ፡ ኵሎሙ፡ እለ፡ ይትሜክሑ፡ በሀብት፡ ሕሰው። በትዕግሥት፡ ሥነ፡ ሕይወት፡ ትነግሥ፡ ልሳን፡ ድክምት፡ ወትሰብር፡ አዕፅምተ። ወልድየ፡ መዓረ፡ እምከመ፡ ረከብከ፡ ብላዕ፡ በዓቅም፡ ከመ፡ ኢትጽገብ፡ ወኢትቂእ። ጒንዱየ፡ አብጽሕ፡ እገሪከ፡ ኀበ፡ ዓርክከ፡ ከመ፡ ኢይጽገብከ፡ ወኢይጽላእከ። በትር፡ ወመቅሠፍት፡ ማኅዘኒ፡ ለልብ፡ ከማሁ፡ ብእሲ፡ ዘይሰምዕ፡ ስምዐ፡ በሐሰት፡ ላዕለ፡ ዓርኩ። ፍኖት፡ እኩይ፡ ወእግረ፡ ኃጥእ፡ ይትኃጐል፡ በዕለት፡ እኪት፡ ከመ፡ ብሒላ፡ ኢይደልዎ፡ ለቊስል፡ ከማሁ፡ ነውር፡ ዘይወርድ፡ ዲበ፡ ሥጋ፡ ማኅዘኒ፡ ለልብ። ከመ፡ ነቀዝ፡ ለዕፅ፡ ወቊንቊኔ፡ ለልብስ፡ ከማሁ፡ ኀዘን፡ ለብእሲ፡ ታማስን፡ ልቦ። ለአመ፡ ርኅበ፡ ጸላኢከ፡ አብልዖ፡ ወለእመ፡ ጸምአ፡ አስትዮ፡ ዘንተ፡ ለእመ፡ ገበርከ፡ አፍሐመ፡ እሳት፡ ታስተጋብእ፡ ዲበ፡ ርእሱ፡ ወእግዚአብሔር፡ የዓሥየከ፡ ሠናያተ። ነፋስ፡ ሰሜናዊ፡ ያነሥእ፡ ደመናተ፡ ወገጸ፡ ዘኢየኃፍር፡ ልሳን፡ ያስኦዝዝ። ይኄይስ፡ ኃዲር፡ ውስተ፡ ማዕዘንተ፡ ናሕስ፡ ንሡት፡ እምስለ፡ ብእሲት፡ ጸአሊት፡ ውስተ፡ ቤት፡ ርሡይ። ከመ፡ ማይ፡ ቈሪር፡ ለነፍስ፡ ጽምእት፡ አዳም፡ ከማሁ፡ ዜና፡ ሠናይ፡ እምድር፡ ርኁቅ። ከመ፡ ዘይፈጽም፡ ዓዘቃተ፡ ወያማስን፡ ሙፃአ፡ ማይ፡ ከማሁ፡ አኮ፡ ሠናይ፡ ይደቅ፡ ጻድቅ፡ በቅድመ፡ ረሲዓን። በሊዐ፡ መዓር፡ ብዙኅ፡ አኮ፡ ሠናይ፡ ወአክብሮ፡ ርቱዕ፡ ቃለ፡ ስቡሐ፡ ወሐቲተ፡ ክብረ፡ ክቡር። ከመ፡ ሀገር፡ እንተ፡ ንህለ፡ ጥቅማ፡ ወአልባ፡ ጥቅም፡ ከማሁ፡ ብእሲ፡ ዘእንበለ፡ ምክር።
ከመ፡ ጠል፡ በማእረር፡ ወዝናም፡ በሐጋይ፡ ከማሁ፡ ለዓብድ፡ አልቦ፡ ምክር። ከመ፡ አዕዋፍ፡ ዘይሠርራ፡ ወሠራርያት፡ ከማሁ፡ መርገም፡ ዘበከንቱ፡ ኢይበጽሕ፡ ኀበ፡ መኑሂ። ከመ፡ ሰውጥ፡ ለፈረስ፡ ወቅትራት፡ ለአድግ፡ ከማሁ፡ በትር፡ ለሕዝብ፡ ኃጥእ። ወልድየ፡ ኢታውሥኦ፡ ለዓብድ፡ በከመ፡ ዕበደ፡ ዚአሁ፡ ከመ፡ ኢትኩን፡ ከማሁ። አላ፡ ተጠሰዎ፡ ለዓብድ፡ በከመ፡ ዕበደ፡ ዚአሁ፡ ከመ፡ ኢይምሰሎ፡ ጠቢበ፡ ለርእሱ። በእግረ፡ ዚአሁ፡ ይገብር፡ ኃሣረ፡ ዘፈነወ፡ መልእክተ፡ በእደ፡ ዓብድ። ካልእ፡ ሐንካስ፡ ወአበሳ፡ እምአፈ፡ ዓብዳን፡ ትወጽእ። ዘይወዲ፡ እብነ፡ ዲበ፡ ሞጸፍ፡ ከማሁ፡ ይመስል፡ ዘይሁብ፡ ለዓብድ፡ ክብረ። አሥዋክ፡ ይበቊሉ፡ ውስተ፡ እደ፡ ሰካር፡ ወተቀንዮ፡ ውስተ፡ እደ፡ ዓብዳን። ብዙኅ፡ ትትሀወክ፡ ሥጋ፡ ኵሉ፡ ዓብድ፡ እስመ፡ ትትወላወል፡ ሕሊናሁ። ከመ፡ ከልብ፡ ዘይገብእ፡ ኢበ፡ ቂያኡ፡ ጽሉአ፡ ይከውን፡ ከማሁ፡ ዓብድ፡ በዕበደ፡ ዚአሁ፡ ዘይትመየጥ፡ ውስተ፡ ኃጢአቱ። ቦ፡ ኀፍረት፡ እንተ፡ ታመጽእ፡ ኃጢአተ፡ ወቦ፡ ኃፍረት፡ ለክብር፡ ወለስብሐት። ርኢኩ፡ ብእሴ፡ ዘይብል፡ ርእሶ፡ ጠቢበ፡ ተስፋ፡ ረከበ፡ እምኔሁ፡ ዓብድ። ወይብል፡ ሀካይ፡ ሶበ፡ ይልእክዎ፡ አንበሳ፡ ሀሎ፡ በውስተ፡ ፍኖት፡ ወውስተ፡ መራኅብት፡ ቀትል። ከመ፡ ማዕዖ፡ እንተ፡ ተዓውድ፡ ውስተ፡ ድርኩኵታት፡ ከማሁ፡ ሀካይ፡ ውስተ፡ ምስካቢሁ። ኀብአ፡ ሀካይ፡ እዴሁ፡ ውስተ፡ ሕፅኑ፡ ወየሐምም፡ አቅርቦ፡ እዴሁ፡ ውስተ፡ አፉሁ። ጠቢብ፡ ለርእሱ፡ ያስተርኢ፡ ሀካየ፡ ወእምዘ፡ ጽጉብ፡ ይወስድ፡ ሲሳየ። ከመ፡ ዘይእኅዝ፡ ዘነበ፡ ከልብ፡ ከማሁ፡ ዘይቀውም፡ በነገረ፡ ባዕድ፡ ከመ፡ እለ፡ ይትፌወሱ፡ ያወጽኡ፡ ቃሎ፡ ለሰብእ። ወዘተቀበሎ፡ ለነገር፡ ይቀድም፡ ወዲቀ፡ ከማሁ፡ ኵሎሙ፡ እለ፡ የሐብሉ፡ አዕርክቲሆሙ። ወእምከመ፡ አእመርዎሙ፡ ይብሉ፡ በብፃው፡ ገበርነ። በኃጢአ፡ ዕፀው፡ ይጠፍእ፡ እሳት፡ ወበብዝኀ፡ ዕፀው፡ ይነድድ፡ እሳት፡ ወኀበ፡ ኢሀሎ፡ መዓትም፡ የኀስእ፡ ጋእዝ። መጥበስ፡ ለአፍሐም፡ ወዕፀው፡ ለእሳት፡ ከማሁ፡ ብእሲ፡ ጸአሊ፡ ለጋእዝ፡ ወለባእስ። ነገረ፡ መንጐራጒራን፡ ድኩም፡ እለ፡ ይዘብጡ፡ ውስተ፡ መዛግብተ፡ ምሕረት። ብሩር፡ ዘይትወሀብ፡ ምስለ፡ ሕብል፡ ከመ፡ ገልዕ፡ ውእቱ፡ ወከመ፡ ብሩረ፡ ተምያን፡ ዘቀፈልዎ፡ ላዕለ፡ ንዋየ፡ ለብሓ፡ ከማሁ፡ ከናፍር፡ ልሙፃት፡ ይከድና፡ ልበ፡ ኅዝንተ። በከናፍሪሁ፡ ዘልፈ፡ ይበኪ፡ ጸላኢ፡ ወበልቡሰ፡ ይገብር፡ ሕብለ። እመ፡ አስተብቊዓከ፡ ጸላኢከ፡ በዓቢይ፡ ቃል፡ ኢትእመኖ፡ እስመ፡ ሰብዑ፡ እከያት፡ ሀለዉ፡ ውስተ፡ ልቡ። ዘየኀበእ፡ ጽልአ፡ ያስተጋብእ፡ ሕብለ፡ ይከሥት፡ አበሳሁ፡ ማእምር፡ በማኅበር። ዘይከሪ፡ ግበ፡ ለቢጹ፡ ይወድቅ፡ ውስቴቱ፡ ወዘያንኰረኵር፡ እብነ፡ ያንኰረኵር፡ ላዕሌሁ። ልሳን፡ ሐሳዊት፡ ትጸልእ፡ ጽድቀ፡ ወአፍ፡ ዘኢያረምም፡ ይገብር፡ ሀከከ።
ወኢትትዓበይ፡ ዘለጌሠም፡ እስመ፡ ኢተአምር፡ ዘትወልድ፡ ሣኒታ። ይወድስከ፡ አፈ፡ ባዕድ፡ ወአኮ፡ አፈ፡ ዚአከ። ክቡድ፡ እብን፡ ወጽንጉፍ፡ ዖረ፡ ኆፃ፡ ወመዓቱ፡ ለብእሲ፡ ዓብድ፡ ይከብድ፡ እምክልኤሆሙ። አልቦ፡ ምሕረት፡ ለብእሲ፡ ቊጡዕ፡ ወለበሊሐ፡ መዓት፡ ወአልቦ፡ ዘይትዔረዮ፡ ለቅንአት። ወይኄይስ፡ ዘለፋ፡ ክሡት፡ እምኅቡእ፡ ፍቅር፡ ይኄይስ፡ ፍቅዓት፡ ዘዓርክ፡ እምሠናይ፡ ስዕመተ፡ ጸላኢ። ነፍስ፡ ጽግብት፡ ጸቃውዐ፡ መዓር፡ ትሜንን፡ ወለነፍስሰ፡ ርኅብት፡ መሪርኒ፡ ጥዑመ፡ ያስተርእያ። ከመ፡ ዖፍ፡ እንተ፡ ትሠርር፡ እማኅደራ፡ ከማሁ፡ ብእሲ፡ ይትቀነይ፡ ሶበ፡ ይነግድ፡ እምብሔሩ። ዕፍረት፡ ወዕጣን፡ ወወይን፡ ያስተሔውዙ፡ ልበ፡ ከማሁ፡ ዘይሰምዕ፡ ምክረ፡ ዓርኩ፡ ወትትከዐው፡ በድቀተ፡ ነፍሱ። ዓርክከ፡ ወዓርከ፡ አቡከ፡ ኢትኅድግ፡ ወቤተ፡ እኁከኒ፡ ኢትባእ፡ በምንዳቤ፡ ዘእንበለ፡ ትንግሮ፡ ቅድመ፡ ይኄይስ፡ ዓርከ፡ ቅሩብ፡ እምእኊ፡ ዘርኁቀ፡ የኀድር። ጠቢበ፡ ኩን፡ ወልድየ፡ ከመ፡ ይትፈሥሐኒ፡ ልብየ፡ ወአርኅቅ፡ እምኔከ፡ ቃለ፡ ዝንጓጔ። ማእምር፡ መጽኣሁ፡ እኩያት፡ ወተኀብአ፡ ወዓብዳንሰ፡ ተቃዊሞሙ፡ ኃጒለ፡ ተፈድዩ። አሰሰል፡ ልብሰከ፡ እስመ፡ ኃለፈ፡ ጸላኢ፡ ዘባዕደ፡ ያማስን። ዘይባርክ፡ ዓርኮ፡ በጽባሕ፡ ዘዓቢይ፡ ቃል፡ እምዘ፡ ይረግም፡ አልቦ፡ ዘየኃድግ። ጻሕጻሕ፡ ያወጽኦ፡ ለብእሲ፡ እምነ፡ ቤቱ፡ በመዋዕለ፡ ክረምት፡ ከማሁ፡ ብእሲት፡ ጸአሊት፡ እምነ፡ ቤት፡ ርሡይ፡ ታወጽኦ፡ ለምታ። ደቡባዊ፡ ነፋስ፡ ጽኑዕ፡ ወበስሙሰ፡ ዘየማን፡ ይሰመይ። ሐፂን፡ ለሐፂን፡ ያበልሖ፡ ወብእሲ፡ ያበልሕ፡ ገጸ፡ ካልኡ። ዘተከለ፡ በለሰ፡ ይበልዕ፡ ፍሬሃ፡ ወዘየዐቅብ፡ እግዚኡ፡ ይከብር። ከመ፡ ኢይትማሰል፡ ገጽ፡ ገጸ፡ ከማሁ፡ ልበ፡ ብእሲኒ፡ ኢይትማሰል። ሲኦል፡ ወማኅጐሊ፡ ኢይጸግቡ፡ ከማሁ፡ አዕንተ፡ ሰብእኒ፡ ኢይጸግባ። ርኩስ፡ በኀበ፡ እግዚአብሔር፡ ምዑክ፡ ዐይን፡ ወእለ፡ ዘእንበለ፡ ትምህርት፡ ኢይእኅዙ፡ ልሳኖሙ። መከራሆሙ፡ ለወርቅ፡ ወለብሩር፡ ርስነት፡ ወብእሲ፡ ይትሜከር፡ በኀበ፡ እለ፡ ይዌድስዎ። ልበ፡ ኃጥእ፡ የኃሥሥ፡ እከየ፡ ወልብ፡ ርትዕት፡ ተኃሥሥ፡ አእምሮ። እመ፡ ቀሠፍኮ፡ ለዓብድ፡ በማእከለ፡ ማኅበር፡ በጽእለት፡ ኢይትአተት፡ ዕበዱ። አእምሮ፡ አእምር፡ መንፈሰ፡ መራዕይከ፡ ወሚጥ፡ ልበከ፡ ለመርዔትከ፡ ወለሙፋረ፡ ዚአከ። እስመ፡ አኮ፡ ለብእሲ፡ ኰንኖ፡ ወኃይል፡ ወኢይትወሀብ፡ እምትውልድ፡ ለትውልድ። ዕፅድ፡ ሣዕረ፡ ወአስተሐምም፡ ዘውስተ፡ ገዳም፡ ሐመልማለ፡ ወአስተጋብእ፡ ሣዕረ፡ ደብር፡ ወተአርር፡ ፍሬ። ከመ፡ ታጥሪ፡ አባግዐ፡ ለልብስ፡ አክብር፡ ፂኦተ፡ ከመ፡ ይብዛኅ፡ መርዔትከ። ወልድየ፡ ዘእምኀቤየ፡ ብከ፡ ቃል፡ ጽንዕት፡ ሕልብ፡ ሐሊበጠሊ፡ ለሕይወትከ፡ ወለሕይወተ፡ ነባሪከ።
ይጐይይ፡ ረሢዕ፡ እንዘ፡ አልቦ፡ ዘይዴግኖ፡ ወጻድቅሰ፡ ከመ፡ አንበሳ፡ ውኩል። በኃጢአተ፡ ረሲዐን፡ መቅሠፍት፡ ይትነሣእ፡ ወብእሲ፡ ጥዩቅ፡ ያጠፍኦ። ጽኑዕ፡ በኃጢአት፡ ይትዔገል፡ ነዳየ፡ ከመ፡ ዝንመ፡ ሞገድ፡ ኢይበቊዕ፡ ከማሁ፡ እለ፡ የኀድጉ፡ ሕገ፡ ወይዌድስዋ፡ ለኃጢአት። እለሰ፡ ያፈቅሩ፡ ሕገ፡ ይጠቅሙ፡ ለርእሶሙ፡ ቅጽረ፡ ወሰብእ፡ እኩያን፡ ኢይሌብዉ፡ ፍትሐ። ወእለሰ፡ የኀሥሥዎ፡ ለእግዚአብሔር፡ ይሴብዉ፡ በኵሉ፡ ጊዜ። ይኄይስ፡ ነዳየ፡ ዘየሐውር፡ በጽድቅ፡ እምባዕል፡ ሐሳዊ። ዘየዓቅብ፡ ሕገ፡ ወልድ፡ ማእምር፡ ወዘሰ፡ ይሬእያ፡ ለዘማይዛወጋ፡ ለሙስና፡ ወያጼእል፡ አባሁ። ዘያበዝኅ፡ ብዕሎ፡ በርዴ፡ ወበትዕግልት፡ ለዘይምሕር፡ ነዳየ፡ ያስተጋብእ። ዘይመይጥ፡ ዕዝኖ፡ ከመ፡ ኢይስማዕ፡ ሕገ፡ ውእቱኒ፡ መነነ፡ ጸሎቶ። ዘያስሕቶሙ፡ ለዕውራን፡ በፍኖት፡ እኪት፡ ውስተ፡ ሙስና፡ ይወድቅ፡ ወዓማፅያንሰ፡ የኃልፉ፡ እንተ፡ ሠናይ፡ ወኢይበውኡ፡ ውስቴታ። ጠቢብ፡ ለርእሱ፡ ብእሲ፡ ባዕል፡ ነዳይ፡ ማእምር፡ ያቅሌልዮ። በረድኤተ፡ ጻድቃን፡ ይከውን፡ ብዙኅ፡ ስብሐት፡ ወበፍናወ፡ ረሲዓን፡ ይትኀጐሉ፡ ሰብእ። ዘይከድን፡ አበሳሁ፡ ኢይረትዕ፡ ፍናዊሁ፡ ወዘሰ፡ ይነግር፡ ወይዘልፍ፡ ገሃደ፡ ይትፈቀር። ብፁዕ፡ ብእሲ፡ ዘይደነግፅ፡ በኵሉ፡ ጊዜ፡ በእንተ፡ ጽድቅ፡ ወጽኑዐ፡ ልብሰ፡ ይወድቅ፡ ውስተ፡ እኩይ። አንበሳ፡ ርኁብ፡ ወተኵላ፡ ጽሙእ፡ ከማሁ፡ መኰንን፡ ረሲዕ፡ ላዕለ፡ ነዳይ፡ ዘይትዔገል፡ እንዘ፡ ነዳይ፡ ውእቱ፡ ሕዝበ፡ ጽኑሰ፡ ይከውን። ንጉሥ፡ ነዳየ፡ አእምሮ፡ ጸባሕተ፡ ዓቢየ፡ ተዓሃሌ፡ ይከውን፡ ወዘሰ፡ ይጸልእ፡ ዓመፃ፡ ብዙኀ፡ መዋዕለ፡ የሐዩ። ብእሲ፡ ዓማፂ፡ ዘይበውእ፡ በደመ፡ ሰብእ፡ ሶበ፡ ይወርድ፡ ውስተ፡ ግብ፡ ኢይእኅዝዎ፡ ብእሲ፡ ዘይትሔበይ፡ ርሱሐ፡ በቀትል፡ ሥሩር፡ ውእቱ፡ ወአኮ፡ ጽኑዕ። መሐር፡ ወልደከ፡ ወያፈቅረከ፡ ወይሁብ፡ ሠርጐ፡ ለነፍስከ፡ ወኢይሰምዕ፡ ዘንተ፡ ሕገ፡ ሕዝብ፡ ዓማፂ። ዘየሐውር፡ በጽድቅ፡ ርዱእ፡ ጠዋየሰ፡ ፍኖተ፡ ዘየሐውር፡ ይጸመር። ዘይትጌበር፡ ገራህቶ፡ ያበዝኅ፡ እክለ፡ ወዘሰ፡ ያበዝኀ፡ ጽርዓተ፡ ይዴግን፡ ንዴተ። ብእሲ፡ ኄር፡ ብዙኀ፡ ይትአኰት፡ ወእኩይሰ፡ ኢይነጽሕ። ኃፊረ፡ ገጽ፡ በፍትሕ፡ አኮ፡ ሠናይ፡ ወዘኢየኃፍር፡ ገጸ፡ ጻድቃን፡ አኮ፡ ኄር፡ ዘከመዝ፡ በፍተ፡ ኅብስት፡ ያገብእ፡ ሰብአ፡ ወይጌጊ። ይጔጒፅ፡ ይብዓል፡ ብእሲ፡ ሐማሚ፡ ወኢየአምር፡ ከመ፡ ብእሲ፡ መኀሪ፡ ይመልኮ። ዘይዘልፍ፡ ፍኖቶ፡ ለሰብእ፡ ይረክብ፡ ክብረ፡ ፈድፋደ፡ እምነ፡ ዘበልሳኑ፡ ያደሉ። ዘይትዔገል፡ አባሁ፡ ወእሞ፡ ወይብል፡ ኢ፡ አበስኩ፡ ዝንቱ፡ ውእቱ፡ ሱታፌሁ፡ ለብእሲ፡ ረሲዕ። ስሱዕ፡ ብእሲ፡ ከነቶ፡ ይፈትሕ፡ ወዘሰ፡ ተወከለ፡ በእግዚአብሔር፡ በአስተሐምሞ፡ ይሄሉ። ወዘይትአመን፡ በትፍሥሕተ፡ ልቡ፡ ዘከመዝ፡ ዓብድ፡ ውእቱ፡ ወዘየሐውርሰ፡ በጥበብ፡ ይድኅን። ዘይሁብ፡ ለነዳይ፡ ጽኑስ፡ ኢይፄነስ፡ ወዘሰ፡ ይመይጥ፡ ዓይኖሙ፡ ውስተ፡ ዓቢይ፡ ተጽናስ፡ ይሄሉ። ውስተ፡ መካነ፡ ረሲዓን፡ ይግዕሩ፡ ጻድቃን፡ ወበኃጒለ፡ ዚአሆሙ፡ ይበዝኁ፡ ጻድቃን።
ይኄይስ፡ ብእሲ፡ ዘይዘለፍ፡ እምብእሲ፡ ጽኑዐ፡ ክሳድ፡ እስመ፡ ግብተ፡ ይነድድ፡ ወአልቦ፡ ፈውስ። ወበተወድሶቶሙ፡ ለጻድቃን፡ ይትፌሥሑ፡ አሕዛብ፡ ወበመኳንንት፡ ረሲዓን፡ ይቴክዙ፡ እደው፡ ጻድቃን። በወልድ፡ ዘያፈቅር፡ ጥበበ፡ ይትፌሣሕ፡ አቡሁ፡ ወዘሰ፡ ይሬኢ፡ ዘማተ፡ ያኃጒል፡ ብዕሎ። ንጉሥ፡ ጻድቅ፡ ያነሥእ፡ ሀገረ፡ ወብእሲሰ፡ ዓማፂ፡ ይነሥት። ዘይሠርዕ፡ በቅድመ፡ ዓርኩ፡ መሥገርተ፡ ይወድዮን፡ ውስቴቱ፡ ለአእጋረ፡ ዚአሁ። በጌጋየ፡ ብእሲ፡ ይበዝኅ፡ መሥገርት፡ ወዘየኃጥእ፡ ብእሲ፡ ውስተ፡ ዓቢይ፡ መሥገርት፡ ይወድቅ፡ ወጻድቅሰ፡ ውስተ፡ ዓቢይ፡ ፍሥሓ፡ ወኃሤት፡ ይሄሉ። የአምር፡ ጻድቅ፡ ፈቲሐ፡ ለነዳይ፡ ወረሲዕሰ፡ ኢየአምር፡ ጠይቆ፡ ወለነዳይሰ፡ ኢይሄልዎ፡ ልብ፡ ወአእምሮ። ሰብእ፡ ጸዋጋን፡ አንደዱ፡ ሀገረ፡ ወጠበብትሰ፡ ሜጡ፡ መዓተ። ብእሲ፡ ጠቢብ፡ ይኴንን፡ አሕዛበ፡ ወብእሲሰ፡ እኩይ፡ ይትመዓፅ፡ ይስሕቅዎ፡ ወኢያኀዝኖ። ሰብእ፡ ሱቱፋን፡ በደም፡ ይጸልኡ፡ ጽድቀ፡ ወራትዓንሰ፡ የኃሥሡ፡ ነፍሰ። ኵሎ፡ መዓቶ፡ ያወጽእ፡ ዐብድ፡ ወጠቢብሰ፡ ይዘግብ፡ ዘእምውስቴቱ። ንጉሥ፡ ዘይሰምዕ፡ ነገረ፡ ግፍዕ፡ ወኵሎሙ፡ እለ፡ ኀቤሁ፡ ዓማፅያን። ለቃሒ፡ ወተለቃሒ፡ ክልኤሆሙ፡ ተራኪቦሙ፡ ይሔውጾሙ፡ እግዚአብሔር፡ ኅቡረ፡ ለክልኤሆሙ። ንጉሥ፡ ዘበጽድቅ፡ ይፈትሕ፡ ለነዳያን፡ መንበሩ፡ በሰላም፡ ለዓለም፡ ይቀውም። ዝብጠት፡ ወተግሣፅ፡ ይሁብ፡ ጥበበ፡ ወልድ፡ ዘይስሕት፡ ያስተኃፍር፡ ዘመዶ። በብዝኆሙ፡ ለረሲዓን፡ ይትገበር፡ ኃጢአት፡ ብዙኅ፡ ወጻድቃንሰ፡ በድቀቶሙ፡ ለእልክቱ፡ ፈራህያነ፡ ይከውኑ። መሃር፡ ወልደከ፡ ወያዓርፈከ፡ ወይሁብ፡ ሠርጐ፡ ለነፍስከ። በኃጢአ፡ መምህር፡ ይበዝኁ፡ ኃጥአን፡ ወኢይሄልዎ፡ መምህር፡ ለሕዝብ፡ ኃጥእ፡ ወዘሰ፡ የዓቅብ፡ ሕገ፡ ወልድ፡ ብፁዕ። በቃል፡ ኢይትመሀር፡ ገብር፡ ጸዋግ፡ ወእመኒ፡ አእመረ፡ ኢይትኤዘዝ። እመኒ፡ ርኢከ፡ ብእሴ፡ ጒጒዐ፡ በቃል፡ አእምር፡ ከመ፡ ቦቱ፡ ተስፋ፡ ለዐብድ፡ እምኔሁ። ነዛህሊል፡ ብእሲ፡ እምንእሱ፡ ይከውን፡ ገብረ፡ ወድኅረ፡ ያኃዝን፡ ርእሶ። ብእሲ፡ መዓትም፡ ይከሪ፡ ጋእዘ፡ ወብእሲ፡ ቊጡዕ፡ ይከሪ፡ ኃጢአተ። ትዕቢት፡ ወጽእለት፡ ቴሕት፡ ብእሴ፡ ወለትሑተ፡ ሕሊናሰ፡ ያቀርቦ፡ እግዚአብሔር፡ ለክብር። ዘይትካፈል፡ ምስለ፡ ሰራቂ፡ ጸልአ፡ ነፍሶ፡ ወለእመ፡ መሐለ፡ አምጽኡ፡ ሎቱ፡ ይምኅል፡ ወዘሰምዐ፡ ኢይነግር፡ በፈሪህ። ወበኀፊረ፡ ገጽ፡ ይትዐቀጽ፡ ወዘሰ፡ ተወከለ፡ በእግዚአብሔር፡ ይትፌሣሕ። ጌጋዩ፡ ለብእሲ፡ ይሁቦ፡ አበሳ፡ ወዘሰ፡ ተአመነ፡ በእግዚአብሔር፡ ይድኅን። ብዙኀን፡ ይትለአኩ፡ ለገጸ፡ መኳንንት፡ ወእምኀበ፡ እግዚአብሔር፡ ይከውን፡ ጽድቁ፡ ወሀብቱ፡ ለብእሲ። ምኑን፡ ብእሲ፡ ጻድቅ፡ በኀበ፡ ብእሲ፡ ገፋዒ፡ ወርኩስ፡ ለኃጥእ፡ ፍኖት፡ ርትዕት።
እመ፡ ቦ፡ ዘረከበ፡ ብእሲተ፡ ጽንዕተ፡ ክብርት፡ ይእቲ፡ እምዕንቊ፡ ክቡር፡ ዘብዙኅ፡ ሤጡ። ለእንተ፡ ከመዝ፡ ብእሲት፡ ይትአመን፡ ባቲ፡ ልበ፡ ምታ፡ እንተ፡ ከመዝ፡ ብእሲት፡ አምሠናይ፡ ምህርካ፡ ኢተሐፅዖ። ትትራድኦ፡ ለምታ፡ ሠናየ፡ በሠናይ፡ ወአኮ፡ እኩየ፡ በእኩይ፡ በኵሉ፡ መዋዕለ፡ ሕይወታ። እንዘ፡ ትባዝት፡ ፀምረ፡ ወአጌ፡ ገብረት፡ ሠናየ፡ በእደዊሃ። ወኮነት፡ ከመ፡ ሐመር፡ እንተ፡ ትትጌበር፡ እምርኁቅ፡ ወታስተጋብእ፡ ኵሎ፡ ብዕለ፡ ወትትነሣእ፡ በሌሊት፡ ወትሁብ፡ ሲሳየ፡ ለሰብአ፡ ቤታ፡ ወግብሮን፡ ለአዋልድ። ርእየት፡ ወፍረ፡ ወተሣየጠት፡ ወእምፍሬ፡ እደዊሃ፡ ተከለት፡ ጥሪተ። አጽኒዓ፡ ወቀኒታ፡ ኀቌሃ፡ አውጽአት፡ እደዊሃ፡ ለግብር። ጥዕመት፡ ከመ፡ ሠናይ፡ ውእቱ፡ ተቀንዮ፡ ለምት፡ ወኢይጠፍእ፡ ኵሎ፡ ሌሊተ፡ ማኅቶታ። ወእሰዊሃ፡ ትሰፍሕ፡ ዲበ፡ ዘይበቊዕ፡ ወእመታ፡ ታጸንዕ፡ ለፈቲል። ወእደዊሃ፡ ፈትሐት፡ ለምስኪናን፡ ወእራኃ፡ ለፍሐት፡ ለነዳያን። ወኢይቴክዝ፡ ምታ፡ በእንተ፡ ቤቱ፡ እመቦ፡ ወእደ፡ ጐንደየ፡ ወኵሎሙ፡ እሊአሃ፡ እሩዛን፡ እሙንቱ፡ በበክልኤ። ክዑበ፡ ከለሜዳ፡ ገብረት፡ ለምታ፡ ዘቢሦስ፡ ወሜላተ፡ ገብረት፡ ላቲ፡ አልባሰ። ወዘያስተርኢ፡ ይከውን፡ ምታ፡ በውስተ፡ አናቅጽ፡ ሶበ፡ ይነብር፡ በውስተ፡ ማኅበር፡ ምስለ፡ ሊቃናተ፡ ምድር። ሰንዱናተ፡ ገብረት፡ ወጸገወቶ፡ ለምታ፡ ወንቊበታተ፡ ለከነዓናውያን፡ አፉሃ፡ ከሠተት፡ ዘበሕግ፡ ወዓቅመ፡ ሠርዓት፡ ለልሳና። ኃይለ፡ ወላህየ፡ ለብሰት፡ ወተፈሥሐት፡ በመዋዕል፡ ደኃርያት። ጽፉቅ፡ በዋዕይ፡ ቤታ፡ ኅብስተ፡ ሀኬት፡ ኢበልዐት፡ ሕግ፡ ወምጽዋት፡ ውስተ፡ አፉሃ፡ ወአፉሃ፡ ፈትሐት፡ በጥበብ፡ ወበሥርዓተ፡ ሕግ። ወምጽዋታ፡ አልሀቀ፡ ውሉዳ፡ ወአብዓላ፡ ወወደሳ፡ ምታ። ብዙኃት፡ አዋልድ፡ አጥረያ፡ ብዕለ፡ ወብዙኃት፡ ገብራ፡ ኃይለ፡ ወአንቲሰ፡ ትፈደፍዲ፡ ወተዓደውኪ፡ ኵሎን። ሕስው፡ አሥምሮ፡ ወምኑን፡ ላህይ፡ እስመ፡ ብእሲት፡ ጠባብ፡ ትትባረክ፡ ወፈራሂተ፡ እግዚአብሔር፡ ይእቲ፡ ትሴባሕ። ሀብዋ፡ እምፍሬ፡ ከናፍሪሃ፡ ወይትአኰት፡ በአናቅጽ፡ ምታ።