መጽሐፈ፡ ምሥጢር፡

text of chapters 1-4 provided as transcribed for the TraCES project

Introduction

Enumeration of the 27 (?) heresies described in this work

Against Sabellius ምዕራፍ፡ ፩፡ ምንባብ፡ ዘስብከተ፡ ጌና፡ በስመ፡ እግዚአብሔር፡ ሥሉስ፡ ዘኢይትሌለይ፡ ኅቡዕ፡ ዘኢይትረአይ፡ ምሉዕ፡ ዘኢይትነከይ፡ ጕንደ፡ ሃይማኖት፡ ዘኢይትወቀይ። መዝገበ፡ በረከት፡ ውስተ፡ ልበ፡ መሀይምናን፡ ዘይትወደይ፡ ዘአሐደ፡ ይሰገድ፡ ወአሐደ፡ ይሴባሕ፡ ወአሐደ፡ ይጼለይ፡ ሎቱ፡ ስብሐት፡ በምድር፡ ወበሰማይ፡ በባሕር፡ ወበቀላይ፡ ለዓለመ፡ ዓለም፡ አሜን። መጽሐፈ፡ ምሥጢር፡ ዘይትነገር፡ ለመሀይምናን፡ ወአኮ፡ ለኢመሀይምናን፡ እስመ፡ ኢአደሞሙ፡ ለዳታን፡ ወአቤሮን፡ ምስፍናሁ፡ ለሙሴ፡ እስከ፡ አብቀወት፡ ምድር፡ ወውሕጠቶሙ፡ ወኢኮነ፡ ሠናየ፡ ቅድመ፡ አዕይንቲሆሙ፡ ለደቂቀ፡ ቆሬ፡ እስከ፡ ወጽአት፡ እሳት፡ እመዓጥኒሆሙ፡ ወበልዐቶሙ። ተግሣጸ፡ ኤልያስ፡ ነቢይ፡ ኮኖሙ፡ ሰቆራረ፡ ለአክዓብ፡ ወለኤልዛቤል፡ እስከ፡ በልዑ፡ ከለባት፡ አብድንቲሆሙ፡ ወተሐጽባ፡ ዘማት፡ በደሞሙ። ትንቢተ፡ ሚክያስ፡ አሕመመ፡ ልቦ፡ ካዕበ፡ እስመ፡ ተአመነ፡ በትንቢተ፡ ሴዴቅያስ፡ እስከ፡ ቈስለ፡ በሐጸ፡ ሶርያ፡ ወሞተ። ወለእግዚእነሂ፡ ይቤልዎ፡ ኦ፡ ዐቃቤ፡ ሥራይ፡ ፈውስ፡ ርእሰከ። ካዕበ፡ ይቤልዎ፡ በመልአኮሙ፡ ለአጋንንት፡ ያወጽኦሙ፡ ለአጋንንት። ወዓዲ፡ ይቤልዎ፡ በመባሕተ፡ መኑ፡ ትገብር፡ ዘንተ፡ ከመዝ፡ ወአብጽሕዎ፡ እስከ፡ ለሞት፡ ወመጠውዎ፡ ለቅንዋተ፡ መስቀል። ወለጴጥሮስኒ፡ ተቃወመ፡ ትምህርቶ፡ ሲሞን፡ መሠርይ፡ ዘሰማርያ፡ ወዐርገ፡ ውስተ፡ አየራት፡ በኃይለ፡ አጋንንት፡ መስሕታን፡ ወወድቀ፡ እም፡ ውስተ፡ ምጽንዓት፡ በኃይለ፡ መንፈስ፡ ቅዱስ፡ ዘኅዱር፡ ላዕለ፡ ጴጥሮስ። ወለጳውሎስኒ፡ ይቤልዎ፡ ምንተ፡ ይብል፡ ዝ፡ ዘራዔ፡ ነቢብ። ለሊሁኒ፡ ይቤ፡ ለአይሁድኒ፡ ይመስሎሙ፡ ዘነአብድ፡ ወለአረሚኒ፡ ዘንጌጊ፡ ወለነሰ፡ ለእለ፡ አመነ፡ ኃይለ፡ እግዚአብሔር፡ ውእቱ። እስመ፡ ሰብእሰ፡ ያበድር፡ ጽልመተ፡ እምነ፡ ብርሃን፡ እስመ፡ ይትከሠት፡ ኃጣውኢሆሙ፡ በከመ፡ ይቤ፡ እግዚእነ፡ እስመ፡ ኵሉ፡ ዘእኩይ፡ ምግባሩ፡ ይጸልዕ፡ ብርሃነ። ንሕነሰ፡ ንሰብክ፡ ሥሉሰ፡ ዘኢይቶሳሕ፡ ጽሙረ፡ ዘኢይትሌለይ። በከመ፡ አብ፡ ብርሃን፡ ወልድኒ፡ ብርሃን፡ ዘያበርህ፡ ለኵሉ፡ ዓለም። በከመ፡ ወልድ፡ ብርሃን፡ መንፈስ፡ ቅዱስሂ፡ ዘበ፩፡ ሱራሄ፡ ወጸዳል። በከመ፡ አብ፡ እሳት፡ ዘኢይትገሠሥ፡ ወልድኒ፡ እሳት፡ ዘኢይትለከፍ። በከመ፡ ወልድ፡ እሳት፡ ዘኢይትለከፍ፡ መንፈስ፡ ቅዱስሂ፡ እሳት፡ ዘበላህበ፡ ሃይማኖቱ፡ አርሰና፡ ለቤተ፡ ክርስቲያን። በከመ፡ አብ፡ ኃይል፡ ዘኢያስተርኢ፡ ወልድኒ፡ ኃይል፡ ዘኢይትከሠት፡ ዘእንበለ፡ ዳእሙ፡ በሥጋዌሁ። ወበከመ፡ ወልድ፡ ኃይል፡ ዘኢይትከሠት፡ መንፈስ፡ ቅዱስሂ፡ ኃይል፡ ዘይጸውራ፡ ለቤተ፡ ክርስቲያን፡ ከመ፡ ኢትትገፍታእ፡ እም፡ ትንሣኤ፡ ዕልዋን። በከመ፡ አብ፡ አምላክ፡ ፍጹም፡ ወልድሂ፡ አምላክ፡ ፍጹም። በከመ፡ ወልድ፡ አምላክ፡ ፍጹም፡ መንፈስ፡ ቅዱስሂ፡ አምላክ፡ ፍጹም፡ ዘበአሐዱ፡ ራእይ። ንንግርኬ፡ ዘለፋሆሙ፡ ለረሲዓን፡ ስብልያኖስ፡ ይቤ፡ አብ፡ ወወልድ፡ ወመንፈስ፡ ቅዱስ፡ ፩፡ ገጽ። ንሕነሰ፡ ንብል፡ ፫፡ ገጽ፡ ወ፩፡ ራእይ፡ ፫፡ አካል፡ ወ፩፡ አምላክ፡ ፫፡ አስማት፡ ወ፩፡ እግዚአብሔር። አቡርዮስ፡ ይቤ፡ አብ፡ ወወልድ፡ ወመንፈስ፡ ቅዱስ፡ ዘዘዚአሁ። ንሕነሰ፡ ንብል፡ አብ፡ ወወልድ፡ ወመንፈስ፡ ቅዱስ፡ ፩፡ አምላክ፡ ወ፩፡ ራእይ፡ ወአሐቲ፡ መንግሥት፡ ወአሐቲ፡ ሥምረት። አርዮስ፡ ይቤ፡ ፍጡር፡ ውእቱ፡ ክርስቶስ። ንሕነሰ፡ ንብል፡ ኢፍጡር፡ ወኢግቡር፡ ኢንቱግ፡ ወኢብዑድ፡ እም፡ ህላዌ፡ አቡሁ። ንስጥሮስ፡ ይቤ፡ ወልድ፡ ከመ፡ ፩፡ እም፡ ነቢያት፡ ወሶበ፡ ተራከቦ፡ ወልደ፡ እግዚአብሔር፡ በውስተ፡ ዮርዳኖስ፡ ኮነ፡ አምላከ፡ በጸጋ። ንሕነሰ፡ ንብል፡ አምላክ፡ ውእቱ፡ እም፡ ቅድመ፡ ዓለም፡ ወእስከ፡ ለዓለም፡ ዘዕሩይ፡ ምስለ፡ አብ፡ በመለኮቱ። ፎጢኖስ፡ ይቤ፡ ለፌ፡ እማርያም፡ ህላዌሁ፡ ለወልደ፡ እግዚአብሔር፡ ወአኮ፡ እም፡ ትካት። ንሕነሰ፡ ንብል፡ ህላዌሁ፡ ውእቱ፡ እም፡ ቅድመ፡ አዝማን፡ ወመዋዕል፡ እም፡ ቅድመ፡ ሰዓት፡ ወዕለት፡ ወበደኃሪ፡ መዋዕል፡ ተሠገወ፡ እማርያም፡ ቅድስት፡ ድንግል፡ ዘእንበለ፡ ዘርዐ፡ ብእሲ፡ በእንተ፡ መድኃኒትነ። አርጌንስ፡ ይቤ፡ የሐጽጽ፡ ወልድ፡ እም፡ አብ፡ ወኢይሬእዮ፡ ወየሐጽጽ፡ መንፈስ፡ ቅዱስ፡ እም፡ ወልድ፡ ወኢይክል፡ ነጽሮቶ። ንሕነሰ፡ ንብል፡ አልቦ፡ መዐርግ፡ ውስተ፡ ሥላሴ፡ ኢሑጻጼ፡ ወኢፍድፋዴ፡ አላ፡ ዘውግ፡ በመለኮት፡ ወእኁዛን፡ በጽምረት። ወቦ፡ እለ፡ ይቤሉ፡ ተመይጠ፡ ቃለ፡ መለኮት፡ ለከዊነ፡ ሰብእ። ንሕነሰ፡ ንብል፡ ኢተመይጠ፡ ቃለ፡ መለኮት፡ እም፡ ህላዌሁ፡ አላ፡ ተዋሐደ፡ ዘእንበለ፡ ቱሳሔ፡ ወኮነ፡ ጽሙረ፡ ዘእንበለ፡ ሙያጤ። ወቦ፡ እለ፡ ይቤሉ፡ ለፌ፡ እም፡ ጥምቀተ፡ ክርስቶስ፡ ክዋኔሁ፡ ለመንፈስ፡ ቅዱስ። ንሕነሰ፡ ንብል፡ እም፡ ቅድመ፡ ዓለም፡ ሀሎ፡ ወይሄሉ፡ እስከ፡ ለዓለም። ቢቱ፡ ይቤ፡ ይመጽእ፡ ወልድ፡ ዘእንበለ፡ አቡሁ፡ ለፍዳ፡ ኃጥአን፡ ወለዕሤተ፡ ጻድቃን። ንሕነሰ፡ ንብል፡ ይመጽኡ፡ አብ፡ ወወልድ፡ ወመንፈስ፡ ቅዱስ፡ ከመ፡ ይኰንኑ፡ ሕያዋነ፡ ወሙታነ፡ በ፩፡ ዐውድ፡ ወበአሐቲ፡ ሙቃስ። አንጢዲቆማርያጦስ፡ ይቤሉ፡ ዘውእቶሙ፡ ፀረ፡ ማርያም፡ እም፡ ድኅረ፡ ወለደቶ፡ ማርያም፡ ለመድኃኒነ፡ ተደመረት፡ ምስለ፡ ዮሴፍ። ንሕነሰ፡ ንብል፡ ወላዲተ፡ እግዚአብሔር፡ ይእቲ፡ ማርያም፡ እም፡ ድኅረ፡ ወለደቶ፡ ነበረት፡ በድንግልና፡ እስከ፡ ለዓለም። አውጣኪ፡ ይቤ፡ ሥጋሁ፡ ለክርስቶስ፡ ኢኮነ፡ ድኩመ፡ ከመ፡ ሥጋነ፡ ወኢሐመ። ንሕነሰ፡ ንብል፡ ሥጋሁ፡ ለክርስቶስ፡ ደክመ፡ ወሐፈወ፡ ርኅበ፡ ወጸምአ፡ ሐመ፡ ወሞተ፡ በሥጋዌሁ፡ ወአልቦ፡ ዘተርፎ፡ እም፡ ሕገ፡ ሰብእ፡ ዘእንበለ፡ ኃጣውእ፡ ባሕቲቶን። ሳዊሮስ፡ ጳጳስ፡ ዘሕንድክያ፡ ወታኦዶስዮስ፡ ዘእለስክንድርያ፡ ይቤሉ፡ ሐመ፡ ወልደ፡ እግዚአብሔር፡ በኵርሕ፡ ወሞተ፡ ዘእንበለ፡ ፈቃዱ። ንሕነሰ፡ ንብል፡ ሐመ፡ በፈቃዱ፡ ወሞተ፡ በሥምረቱ፡ ወተንሥአ፡ በኃይለ፡ መለኮቱ። ወካዕበ፡ አቡርዮስ፡ ይቤ፡ አልቦቱ፡ ልብ፡ ወነፍስ፡ ለትስብእተ፡ ክርስቶስ፡ ወመለኮቱ፡ ኮኖ፡ ህየንተ፡ ነፍስ፡ ወልብ። ንሕነሰ፡ ንብል፡ ቦቱ፡ ነፍስ፡ ሰብአዊ፡ ወቦቱ፡ ልቡና፡ ጠባይዓዊ፡ ወካዕበ፡ ቦቱ፡ ዕበይ፡ መለኮታዊ፡ ወቦቱ፡ ክሂል፡ እግዚአብሔራዊ። አፍቲክስ፡ ይቤ፡ ሥጋሁ፡ ለክርስቶስ፡ ወረደ፡ እም፡ ሰማይ። ንሕነሰ፡ ንብል፡ ሥጋሁ፡ ለክርስቶስ፡ ወነፍሱ፡ እም፡ ጠባይዐ፡ ፍጥረቱ፡ ለአዳም፡ ዘነሥአ፡ ዘእንበለ፡ ዘርዐ፡ ብእሲ፡ ዘእም፡ ባሕቲታ፡ ንጽሕት፡ ድንግል፡ ገሊላዊት፡ ማርያም። መንክዮስ፡ ይቤ፡ ምትሐት፡ ሥጋሁ፡ ለክርስቶስ፡ ወአኮ፡ ሥጋ፡ እጓለ፡ እመ፡ ሕያው። ንሕነሰ፡ ንብል፡ ፍጹም፡ ትስብእቱ፡ ለክርስቶስ፡ ሥጋ፡ እንተ፡ ትትገሠሥ፡ ወአጽም፡ ዘያጸንዓ፡ ለማኅፈደ፡ ሥጋ፡ ደም፡ እንተ፡ ትትከዐው፡ አሥራወ፡ ወአምትንት፡ መዓሥረ፡ ሥጋዌ፡ ጸጕር፡ ሠርፀ፡ ድማኅ፡ ወሐንገዝ፡ ነፍስ፡ እንተ፡ ኢታስተርኢ፡ ወመንፈሰ፡ ሕይወት፡ እንተ፡ ትሌቡ፡ ወትትናገር፡ ወአጽፋር፡ ሠርፀ፡ አጻብዕ፡ ዘአእዳው፡ ወአእጋር። አርሲስ፡ መናፍቃን፡ ይቤሉ፡ ወረደ፡ ውስተ፡ ሲኦል፡ በነፍስ፡ ወሥጋ። ንሕነሰ፡ ንብል፡ ወረደ፡ ውስተ፡ ሲኦል፡ ቃለ፡ መለኮት፡ ምስለ፡ ነፍስ፡ ባሕቲታ፡ ወለሥጋሰ፡ አውረድዋ፡ እም፡ ዲበ፡ መስቀል፡ ዮሴፍ፡ ወኒቆዲሞስ፡ ወጠብለልዋ፡ በልብሰ፡ ገርዜን፡ ወወደይዋ፡ ውስተ፡ ከርሠ፡ መቃብር፡ ይእቲኒ፡ ነበረት፡ ባሕቲታ፡ እንበለ፡ ነፍስ፡ እስከ፡ አመ፡ ትንሣኤሁ። ወመለኮቱሰ፡ ምስለ፡ ነፍስኒ፡ ሀለወ፡ እም፡ ሥጋሁኒ፡ ኢተፈልጠ፡ ወበየማነ፡ አብኒ፡ ኮነ፡ ግጽወ፡ በከመ፡ ህላዌሁ፡ ዘእም፡ ቅድም፡ እስመ፡ ይመልዕ፡ በኵለሄ፡ ወይሄሉ፡ ውስተ፡ ኵሉ። ልዮን፡ ሊቀ፡ ጳጳሳት፡ ዘሮሜ፡ ይቤ፡ የሐጽጽ፡ ትስብእት፡ እመለኮት። ንሕነሰ፡ ንብል፡ ኢየሐጽጽ፡ ትስብእቱ፡ ለክርስቶስ፡ እመለኮቱ፡ እም፡ ድኅረ፡ ፩፡ ከዊን። ማኅበረ፡ ኬልቄዶን፡ ይቤሉ፡ መለኮት፡ ወትስብእት፡ በክልዔ፡ ፍናው፡ ወበክልዔ፡ ሥርዓት። ንሕነሰ፡ ንብል፡ አምላክ፡ ዘተሰብአ፡ እማርያም፡ ድንግል፡ ፩፡ አምላክ፡ ወ፩፡ ሥምረት። ወቦ፡ እለ፡ ይቤሉ፡ አርአያሁ፡ አዕረገ፡ ዲበ፡ ዕፀ፡ መስቀል፡ ወአኮ፡ ውእቱ፡ ዘተቀነወ። ንሕነሰ፡ ንብል፡ ውእቱ፡ ኢየሱስ፡ ክርስቶስ፡ ለቤዛ፡ ብዙኃን፡ ተጸፍዐ፡ እም፡ ገብረ፡ ሊቀ፡ ካህናት፡ ወበዐውደ፡ ጲላጦስ፡ ተቀሥፈ፡ ወበሐጻውንት፡ ተቀነወ፡ ወበኵናተ፡ ለንጊኖስ፡ ተረግዘ። ወካዕበ፡ ዓዲ፡ ቦ፡ እለ፡ ይቤሉ፡ ከመ፡ ይከውን፡ ንሥአተ፡ መንፈሰ፡ ሕይወት፡ ውስተ፡ ሥጋሆሙ፡ ለሕፃናት፡ እም፡ ንፍሐተ፡ መንፈሱ፡ ለእግዚአብሔር፡ በከመ፡ ኮነ፡ ላዕለ፡ አዳም። ንሕነሰ፡ ንብል፡ እስመ፡ ጸአተ፡ ነፍስ፡ ወሥጋ፡ እም፡ ሐቌ፡ ብእሲ፡ በዘርዐ፡ ሙላድ፡ ይትዐቈር፡ ውስተ፡ ማኅፀነ፡ ብእሲት፡ ወእምኔሃኒ፡ ይከውን፡ ቱሳሔ፡ ጠባይዕ፡ ዘሥምረተ፡ ብእሲ፡ ወብእሲት፡ ዘበትእዛዘ፡ እግዚአብሔር፡ ይከውን፡ ተሥዕሎ፡ እመሂ፡ ዘሮስ፡ ወእመሂ፡ ዘወለት። ወዓዲ፡ ይቤ፡ አርጌንስ፡ አዕዳል፡ ዘአልበሶሙ፡ እግዚአብሔር፡ ለአዳም፡ ወለሔዋን፡ ሥጋ፡ ውእቱ፡ ዘላዕሌነ፡ እንተ፡ ባቲ፡ ናንሶሱ፡ ንሕነ፡ ወአኮ፡ አዕዳለ፡ አነዳ፡ ዘአምእስት። ንሕነሰ፡ ንብል፡ ቦሙ፡ ሥጋ፡ እም፡ ቅድም፡ እም፡ አመ፡ ተልሕኩ፡ ወዘአልበሶሙሰ፡ እግዚአብሔር፡ ልብሰ፡ አዕዳል፡ ውእቱ፡ ዘአምእስት፡ ልብሰ፡ ኂስ፡ በእንተ፡ ዘአስተሐቀሩ፡ ትእዛዞ። ወቦ፡ እለ፡ ይብሉ፡ እፎ፡ የኀድር፡ ኃይለ፡ መለኮት፡ ዘሰማየ፡ ሰማያት፡ ኢያገምሮ፡ ውስተ፡ ቤተ፡ ክርስቲያን፡ እንተ፡ ተገብረት፡ በእደ፡ እጓለ፡ እመ፡ ሕያው፡ ዘንስቲት፡ ትርብዕተ፡ ገበዋቲሃ። ወካዕበመ፡ ይቤሉ፡ ይክልኑ፡ ኅብስት፡ ከዊነ፡ ሥጋሁ፡ ለክርስቶስ፡ ወወይነ፡ ምሥጢርኒ፡ ከዊነ፡ ደሙ። ንሕነሰ፡ ንብል፡ የኀድር፡ ኃይለ፡ መለኮት፡ ውስተ፡ ቤተ፡ ክርስቲያን፡ ከመ፡ ይቀድሳ፡ በደሙ፡ እንዘ፡ ኢየዐርቅ፡ ህላዌሁ፡ በጽርሐ፡ አርያም። ወኅብስትኒ፡ ይትመየጥ፡ ለከዊነ፡ ሥጋሁ፡ እም፡ ከዊነ፡ ኅብስት፡ ዘልማድ፡ ወወይንኒ፡ ይትመየጥ፡ ለከዊነ፡ ደም፡ እም፡ ከዊነ፡ ወይን፡ ዘልማድ፡ ሶበ፡ ይትቄደስ፡ በርደተ፡ መንፈስ፡ ቅዱስ። ወቦ፡ እለ፡ ይቤሉ፡ ከመ፡ ተፀርዐት፡ ኦሪት፡ በምጽአተ፡ ወንጌል፡ ወበጠለ፡ ትንቢተ፡ ነቢያት፡ በስብከተ፡ ሐዋርያት፡ ወተሥዕረት፡ ሰንበት፡ በእሑደ፡ ትንሣኤ። ንሕነሰ፡ ንብል፡ ከብረት፡ ኦሪት፡ በስብከተ፡ ወንጌል፡ ተለዐሉ፡ ነቢያት፡ በትምህርተ፡ ሐዋርያት፡ ተከለለት፡ ሰንበተ፡ አዕርፎ፡ ዘእም፡ ፍጥረተ፡ ዓለም፡ በሰንበተ፡ ትንሣኤ፡ ዘመድኅነ፡ ዓለም። ወቦ፡ ካዕበ፡ ዘሮፀ፡ ዜና፡ ውስተ፡ እዘኒነ፡ ከመ፡ ይትከሀዱ፡ በእንተ፡ ማርያም፡ ወመስቀል፡ መንፈቆሙ፡ እንዘ፡ ይብሉ፡ ተዐቢ፡ ማርያም፡ እንተ፡ ወለደቶ፡ እም፡ ዕፀ፡ መስቀሉ፡ ወመንፈቆሙሂ፡ ይቤሉ፡ የዐቢ፡ መስቀሉ፡ ዘተጠምቀ፡ በደመ፡ ሕማማቲሁ። ንሕነሰ፡ ንብል፡ ነአምን፡ በማርያም፡ ከመ፡ ወላዲተ፡ እግዚአብሔር፡ ይእቲ፡ ወነአምን፡ በመስቀሉ፡ ከመ፡ ማዕተበ፡ ብርሃን፡ ውእቱ፡ ዘተቀደሰ፡ በደመ፡ ትስብእተ፡ መለኮቱ። ፍልብያኖስ፡ ይቤ፡ ክልዔ፡ ገጸ፡ መለኮቱ፡ ወትስብእቱ፡ ለመድኃኒነ፡ ክርስቶስ። ንሕነሰ፡ ንብል፡ በ፩፡ ገጽ፡ ወበ፩፡ ህላዌ፡ ትስብእቱ፡ ወመለኮቱ፡ ለአምላክነ። መቅዶንዮስ፡ ይቤ፡ መንፈስ፡ ቅዱስ፡ ፍጡር፡ ውእቱ፡ አብሰ፡ ወወልድ፡ ዕሩያን፡ ወኅቡራን። ወንሕነሰ፡ ንብል፡ መንፈስ፡ ቅዱስ፡ ኢፍጡር፡ ወኢግቡር፡ ወኢነኪር፡ እምነ፡ አብ፡ ወወልድ፡ አላ፡ አሐዱ፡ ራእይ፡ ወአሐዱ፡ ህላዌ፡ ዘአብ፡ ወወልድ፡ ወመንፈስ፡ ቅዱስ። ሰዱቃውያን፡ ወእለ፡ ከማሆሙ፡ ይቤሉ፡ አልቦ፡ ትንሣኤ፡ ምዉታን። ንሕነሰ፡ ንብል፡ ቦ፡ ትንሣኤ፡ ሙታን፡ ወቦ፡ ፍዳ፡ ለኃጥአን፡ ወዕሤት፡ ለጻድቃን። ንግባእኬ፡ ኀበ፡ ጥንተ፡ ነገር፡ ከመ፡ ንዝልፎ፡ ለሰባልዮስ፡ ዘይቤ፡ አብ፡ ወወልድ፡ ወመንፈስ፡ ቅዱስ፡ ፩፡ ገጽ። እፎኬ፡ ይትበሀል፡ ፩፡ ገጽ፡ ህላዌሁ፡ ለሥሉስ፡ ዘበእንቲአሁ፡ ይነግራ፡ መጻሕፍት፡ በበጾታሆን። ቀዳሜ፡ ኵሉ፡ ትብል፡ ቅድስት፡ ኦሪት፡ ወይቤ፡ እግዚአብሔር፡ ንግበር፡ ሰብአ፡ በአርአያነ፡ ወበአምሳሊነ። ኢይቤ፡ ባሕቲቱ፡ አብ፡ በአርአያየ፡ ወበአምሳልየ፡ ከመ፡ ዘባሕቲቱ፡ አብ፡ ወኢይቤ፡ በአርአያከ፡ ወበአምሳሊከ፡ ከመ፡ ዘባሕቲቱ፡ ወልድ። ወዓዲ፡ ኢይቤ፡ በአርአያሁ፡ ወበአምሳሊሁ፡ ከመ፡ ዘባሕቲቱ፡ ለመንፈስ፡ ቅዱስ፡ አላ፡ ይቤ፡ በአርአያነ፡ ወበአምሳሊነ። አእምርኬ፡ ከመ፡ በአርአያ፡ እግዚአብሔር፡ ተሥዕለ፡ እጓለ፡ እመ፡ ሕያው። ወካዕበመ፡ አእምር፡ ግጻዌሁ፡ ለትሥልስተ፡ መለኮት። ዳዊትኒ፡ ይቤ፡ ገጸ፡ ዚአከ፡ አኀሥሥ፡ እግዚኦ፡ ያቀድም፡ ኀበ፡ አብ። ኀሠሥኩ፡ ገጸከ፡ ያተሉ፡ ኀበ፡ ወልድ። ወኢትሚጥ፡ ገጸከ፡ እም፡ ገብርከ፡ ያሤልስ፡ ኀበ፡ መንፈስ፡ ቅዱስ፡ ናሁኬ፡ ጽሕቀ፡ ነቢይ፡ ለኀሢሠ፡ ገጸ፡ ሥላሴ። ወዘሰ፡ ይሜህር፡ ፩፡ ገጸ፡ ኢጥሙቅ፡ ወኢቅቡዕ፡ ወኢክርስቱን፡ ውእቱ። ወዓዲ፡ ተብህለ፡ በመዝሙር፡ ዘበሃሌሉያ፡ የማነ፡ እግዚአብሔር፡ ገብረት፡ ኃይለ። ዝኒ፡ በእንተ፡ አብ። የማነ፡ እግዚአብሔር፡ አልዐለተኒ። ዝኒ፡ በእንተ፡ ወልድ፡ እስመ፡ ዘበትስብእተ፡ መለኮቱ፡ ለክርስቶስ፡ ኮነ፡ ልዕልናሁ፡ ለእጓለ፡ እመ፡ ሕያው፡ በከመ፡ ይቤ፡ አግዚእነ፡ በወንጌል፡ እስመ፡ ወልደ፡ እግዚአብሔር፡ ወልደ፡ እጓለ፡ እመ፡ ሕያው፡ ውእቱ። ወዓዲመ፡ ይሤልስ፡ ወይቤ፡ የማነ፡ እግዚአብሔር፡ ገብረት፡ ኃይለ። ዝኒ፡ በእንተ፡ መንፈስ፡ ቅዱስ። ኃይልሰ፡ ይተረጐም፡ በጽንዐ፡ መለኮተ፡ እግዚአብሔር፡ ዘይሬኢ፡ ወዘኢያስተርኢ፡ ዘይገሥሥ፡ ወዘኢይትገሠሥ፡ ዘይቀኒ፡ ወዘኢይትቀነይ። ናሁኬ፡ ነገርነ፡ ጾታሁ፡ ለሥላሴ። ወለትምህርተ፡ ሰባልዮስ፡ ሲኦል፡ ጐሥዐቶ፡ ወገሃነም፡ ቄኦ፡ ዘእም፡ እስትንፋሰ፡ አፉሁ፡ ለሰይጣን። ወጽአ፡ ወተዘርዐ፡ ውስተ፡ ልበ፡ ፅቡሳነ፡ ኅሊና፡ በቈለሂ፡ ወልህቀሂ፡ ወፈረየ፡ ሦከ፡ ኃጢአት። ወበእንተዝ፡ ሐመት፡ ቤተ፡ ክርስቲያን፡ ምስለ፡ ደቂቃ። ኦ፡ ሰባልዮስ፡ አርዌ፡ ምድርኑ፡ ሦጠ፡ ሕምዞ፡ ውስተ፡ ልብከ፡ ወሚመ፡ አፍዖትኑ፡ እስመ፡ ትብል፡ በአፉከ፡ በስመ፡ አብ፡ ወወልድ፡ መንፈስ፡ ቅዱስ፡ ካዕበመ፡ ትብል፡ ፩፡ ገጽ። ወእመሰ፡ ፩፡ ገጽ፡ መኑኬ፡ አብ፡ ወመኑ፡ ወልድ፡ ወመኑ፡ መንፈስ፡ ቅዱስ። ወእመሂ፡ ትብል፡ አብኒ፡ ውእቱ፡ ወልድኒ፡ ውእቱ፡ መንፈስ፡ ቅዱስኒ፡ ውእቱ፡ መኑኬ፡ ፈናዊ፡ ወመኑ፡ ተፈናዊ። ናሁኬ፡ በእንተ፡ ርእሱ፡ ወበእንተ፡ አቡሁ፡ ይነግር፡ ወልደ፡ እግዚአብሔር፡ እንዘ፡ ይብል፡ እስመ፡ አብ፡ ዘፈነወኒ፡ የዐቢ፡ እም፡ ኵሉ። ወበእንተ፡ መንፈስ፡ ቅዱስ፡ ይብል፡ ወእፌኑ፡ ለክሙ፡ ጰራቅሊጦስሃ። ናሁኬ፡ ይሰምዮ፡ ካልዐ፡ ለመንፈስ፡ ቅዱስ። ወካዕበመ፡ ይነግር፡ በእንተ፡ አቡሁ፡ እንዘ፡ ይብል፡ ካልዕ፡ ሰማዕትየ፡ ውእቱ፡ አብ፡ ዘፈነወኒ። ወካዕበ፡ ይብል፡ አልቦ፡ ዘይክል፡ መጺአ፡ ኀቤየ፡ እመ፡ ኢሰሐቦ፡ አብ። ወበእንተ፡ ርእሱኒ፡ ይነግር፡ እንዘ፡ ይብል፡ ወአልቦ፡ ዘይክል፡ መጺአ፡ ኀበ፡ አብ፡ ዘእንበለ፡ እንተ፡ ኀቤየ። ወካዕበ፡ ይቤ፡ ተኀድጉኒ፡ ባሕቲትየ፡ ወትዘረዉ፡ ዘዘዚአክሙ፡ ወኢኮንኩ፡ ባሕቲትየ፡ እስመ፡ አብ፡ ምስሌየ። ወካዕበ፡ ይቤ፡ ወለዘሰ፡ አፍቀረኒ፡ ያፈቅሮ፡ አቡየ፡ ወንመጽእ፡ ወነኀድር፡ ምስሌሁ፡ ወንገብር፡ ምዕራፈ፡ ኀቤሁ። ናሁኬ፡ ይነግር፡ በእንተ፡ ዘለክልዔ፡ ወአኮመ፡ ዘለአሐዱ፡ ሶበ፡ ይብል፡ ንመጽእ፡ ወነኀድር፡ ምስሌሁ። ወካዕበመ፡ ይነግር፡ በእንተ፡ መንፈስ፡ ቅዱስኒ፡ ወይቤ፡ አነ፡ እስእሎ፡ ለአብ፡ ይፈኑ፡ ለክሙ፡ ጰራቅሊጦስሃ፡ መንፈሰ፡ ጽድቅ፡ ዘኢይክል፡ ዓለም፡ ነሢኦቶ። ናሁ፡ ያኤምር፡ በዝ፡ ጾታ፡ ሥላሴ። ወልድ፡ ሰአሎ፡ ለአቡሁ፡ ከመ፡ ይፈንዎ፡ ለጰራቅሊጦስ፡ ወጰራቅሊጦስ፡ ተፈነወ፡ ኀበ፡ ሐዋርያት። ወዓዲ፡ ይቤ፡ ኵሎ፡ ዘነገርኩክሙ፡ ኢትክሉ፡ ጸዊሮቶ፡ ይእዜ፡ ወመጺኦ፡ ውእቱ፡ ጰራቅሊጦስ፡ ዘይፌኑ፡ አብ፡ በስምየ፡ ያጤይቀክሙ፡ ኵሎ፡ ወያዜክረክሙ። ወካዕበ፡ ይብል፡ በእንቲአሁ፡ ወበእንተ፡ አቡሁ፡ ውስተ፡ ኦሪትክሙ፡ ጽሑፍ፡ ስምዐ፡ ፪፡ ሰብእ፡ ወ፫፡ እሙን፡ ውእቱ፡ ወአነ፡ ሰማዕት፡ ለርእስየ፡ ወሰማዕትየ፡ አብ፡ ዘፈነወኒ። ወካዕበ፡ ይቤ፡ በእንተ፡ ጰራቅሊጦስ፡ ወመጺኦ፡ ጰራቅሊጦስ፡ ዘአነ፡ እፌኑ፡ ለክሙ፡ እም፡ ኀበ፡ አብ፡ ውእቱ፡ ሰማዕትየ፡ ዘይወጽእ፡ እም፡ ኀበ፡ አብ፡ መንፈሰ፡ ጽድቅ፡ ወአንትሙኒ፡ ሰማዕትየ፡ ከመ፡ እም፡ ትካት፡ ሀሎ፡ ምስሌየ። በእንተ፡ አቡሁ፡ ወበእንተ፡ ርእሱ፡ ይነግር፡ እንዘ፡ ይብል፡ ኵሎ፡ ዘሰማዕኩ፡ በኀበ፡ አቡየ፡ እነግር፡ ወኢይነግር፡ ዘእም፡ ኀቤየ፡ ወኢምንተኒ፡ ወቃለ፡ ዚአየ፡ ዘትሰምዑ፡ ኢኮነ፡ ዚአየ፡ ዘእንበለ፡ ቃሉ፡ ውእቱ፡ ለአብ፡ ለዘፈነወኒ። ወበእንተ፡ ጰራቅሊጦስኒ፡ ይቤ፡ ወመጺኦ፡ ውእቱ፡ መንፈሰ፡ ጽድቅ፡ ይመርሐክሙ፡ ኀበ፡ ጽድቅ፡ እስመ፡ ኢይነግር፡ ዘእም፡ ኀቤሁ፡ ዘሰምዐ፡ ዳእሙ፡ ይነግር፡ ወዘይመጽእ፡ ይነግረክሙ። ውእቱ፡ ኪያየ፡ ይሴብሕ፡ እስመ፡ እም፡ ዚአየ፡ ይነሥእ፡ ወይነግረክሙ፡ ኵሎ። ኵሉ፡ ዘቦ፡ ለአቡየ፡ ዚአየ፡ ውእቱ፡ ወበእንተ፡ ዝንቱ፡ እብለክሙ፡ እም፡ ዚአየ፡ ይነሥእ፡ ወይነግረክሙ። ጳውሎስኒ፡ ይቤ፡ አሐዱ፡ እግዚአብሔር፡ ወአሐዱ፡ ኅሩይ፡ ማእከለ፡ እግዚአብሔር፡ ወሰብእ፡ ኢየሱስ፡ ክርስቶስ፡ ዘኮነ፡ ሰብአ፡ ወመጠወ፡ ርእሶ፡ ቤዛ፡ ኵሉ። ወካዕበ፡ ይቤ፡ ኵልክሙ፡ ዘንተ፡ ኀልዩ፡ ዘከመ፡ ገብረ፡ ኢየሱስ፡ ክርስቶስ፡ ዘውእቱ፡ አርአያ፡ ገጹ፡ ለእግዚአብሔር። አእምርኬ፡ ከመ፡ ሰመዮ፡ ጳውሎስ፡ ለወልድ፡ አርአያ፡ ገጹ፡ ለእግዚአብሔር። እመሰኬ፡ ፩፡ ገጽ፡ እም፡ ይቤ፡ ገጹ፡ ለእግዚአብሔር፡ እስመ፡ አርአያ፡ ገጹ፡ ለእግዚአብሔር፡ ብሂል፡ ወልድ፡ ይመስሎ፡ ለአቡሁ። ወበእንተዝ፡ ይቤ፡ እግዚእነ፡ በወንጌል፡ ዘርእየ፡ ኪየየ፡ ርእዮ፡ ለአቡየ፡ ዮሐንስኒ፡ ይቤ፡ ደቂቅየ፡ ዘንተ፡ እጽሕፍ፡ ለክሙ፡ ከመ፡ ኢተአብሱ፡ ወእመኒ፡ ቦ፡ ዘአበሰ፡ ጰራቅሊጦስ፡ ብነ፡ ኀበ፡ አብ፡ ኢየሱስ፡ ክርስቶስ። ንዑኬ፡ ንጸውዖሙ፡ ለነቢያተ፡ እግዚአብሔር፡ ከመ፡ ያርድእዎሙ፡ ለሐዋርያተ፡ ኢየሱስ፡ ክርስቶስ፡ በዘሊፈ፡ ትምህርቱ፡ ለሰባልዮስ። ትብል፡ ቅድስት፡ ኦሪት፡ ይቤ፡ እግዚአብሔር፡ ናሁ፡ ኮነ፡ አዳም፡ ከመ፡ ፩፡ እምኔነ፡ ያእምር፡ ሠናየ፡ ወእኩየ፡ ዮጊ፡ ያሌዕል፡ እዴሁ፡ ወይበልዕ፡ እም፡ ውእቱ፡ ዕፀ፡ ሕይወት፡ ወየሐዩ፡ ለዓለም። ወሶበሰኬ፡ ፩፡ ገጸ፡ ሥላሴ፡ እም፡ ይቤ፡ አዳም፡ ኮነ፡ ከማየ። ወዘይቤሰ፡ አዳም፡ ኮነ፡ ከመ፡ ፩፡ እምኔነ፡ በእንተ፡ ትስብእቱ፡ ለክርስቶስ፡ ዘውእቱ፡ ሥጋ፡ አዳም፡ ዘነበረ፡ በየማነ፡ እግዚአብሔር። ወካዕበ፡ ትቤ፡ ቅድስት፡ ኦሪት፡ ወይቤ፡ እግዚአብሔር፡ ንዑ፡ ንረድ፡ ወንክዐው፡ ነገሮሙ፡ ኢይሳምዑ፡ እስመ፡ አሐዱ፡ ዘመድ፡ እሙንቱ። ወካዕበ፡ ትቤ፡ ወአውረደ፡ እግዚአብሔር፡ ላዕለ፡ ሰዶም፡ ወገሞራ፡ እሳተ፡ ወተየ፡ እም፡ ኀበ፡ እግዚአብሔር፡ እም፡ ሰማይ። ናሁኬ፡ ያጤይቅ፡ ወያሌቡ፡ ከመ፡ አሐዱ፡ እም፡ ካልዑ፡ አውረደ፡ እሳተ፡ እም፡ ሰማይ፡ ሶበ፡ ይብል፡ ወአውረደ፡ እግዚአብሔር፡ እም፡ ኀበ፡ እግዚአብሔር። ወካዕበ፡ ትቤ፡ ወነበቦ፡ እግዚአብሔር፡ ለሙሴ፡ ወይቤሎ፡ በሎሙ፡ ለደቂቀ፡ እስራኤል፡ ያንጽሑ፡ ርእሶሙ፡ ዮም፡ ወጌሰመ፡ ይሕጽቡ፡ አልባሲሆሙ፡ ወይጽንሑ፡ ድልዋኒሆሙ፡ ለአመ፡ ሣልስት፡ ዕለት፡ እስመ፡ በሣልስት፡ ዕለት፡ ይወርድ፡ እግዚአብሔር፡ ኀበ፡ ደብረ፡ ሲና። ናሁኬ፡ ዜነወ፡ ወልድ፡ ርደቶ፡ ለአብ፡ ከመ፡ የሀብ፡ ሕገ፡ ለሙሴ። ወካዕበ፡ ትቤ፡ ቅድስት፡ ኦሪት፡ ወአስተርአዮ፡ እግዚአብሔር፡ ለአብርሃም፡ በኀበ፡ ዕፀ፡ ምንባር፡ እንዘ፡ ይነብር፡ ኀበ፡ ኆኅተ፡ ሐይመት፡ ቀትረ። ወሶበ፡ አልዐለ፡ አዕይንቲሁ፡ ወነጸረ፡ ወናሁ፡ ፫፡ ዕደው፡ ይቀውሙ፡ መልዕልቴሁ፡ ወሰገደ፡ ውስተ፡ ምድር፡ ወይቤሎሙ፡ አጋእዝትየ፡ እመ፡ ረከብኩ፡ ሞገሰ፡ በቅድመ፡ አዕይንቲክሙ፡ ናምጽእ፡ ማየ፡ ወንሕፅብ፡ እገሪክሙ፡ ወታጽልሉ፡ ታሕተ፡ ዕፅ፡ ወናምጽእ፡ ኅብስተ፡ ወትብልዑ፡ ወእምዝ፡ ተሐውሩ፡ ኀበ፡ ኀለይክሙ፡ እም፡ ከመ፡ ግኅሥክሙ፡ ኀበ፡ ገብርክሙ። ወይቤልዎ፡ ግበር፡ በከመ፡ ትቤ። ዳዊትኒ፡ ይቤ፡ ይቤሎ፡ እግዚእ፡ ለእግዚእየ፡ ንበር፡ በየማንየ። መኑኬ፡ እግዚኡ፡ ለዳዊት፡ ዘእንበለ፡ ዳእሙ፡ ቅዱሰ፡ እስራኤል። ዘንተሰ፡ ይቤ፡ በእንተ፡ ወልድ፡ ዘነበረ፡ በየማነ፡ አቡሁ። ወእምዝ፡ ያተሉ፡ ወይብል፡ እስከ፡ አገብኦሙ፡ ለጸላዕትከ፡ ታሕተ፡ መከየደ፡ እገሪከ። ዝኒ፡ በእንተ፡ ሰቃልያን። በትረ፡ ኃይል፡ ይፌኑ፡ ለከ፡ እግዚአብሔር፡ እም፡ ጽዮን። ወዝኒ፡ ኃይለ፡ ሃይማኖት፡ ዘዕፀ፡ መስቀል። ወትኴንን፡ በማእከለ፡ ጸላእትከ። ዝኒ፡ ዐውደ፡ ምኵናን፡ ዘዕለተ፡ ፍዳ። ምስሌከ፡ ቀዳማዊ፡ በዕለተ፡ ኃይል። ዕለተ፡ ኃይልሰ፡ መንግሥት፡ እንተ፡ ትመጽእ፡ በስመ፡ እግዚአብሔር፡ ወኃይል፡ እንተ፡ ትገፈትኦሙ፡ ለዕልዋነ፡ ሃይማኖት። በብርሃኖሙ፡ ለቅዱሳን። ዝኒ፡ ስነ፡ ብርሃን፡ ዘዕሤተ፡ ጻድቃን፡ እስመ፡ ምግባሩ፡ ለጻድቅ፡ ያበርህ፡ ሎቱ። ወለድኩከ፡ እም፡ ከርሥ፡ እም፡ ቅድመ፡ ኮከበ፡ ጽባሕ። ዝኒ፡ ይተረጐም፡ በሥምረተ፡ መለኮት፡ እስመ፡ ከርሥ፡ መዝገበ፡ ኅሊናሁ፡ ለብእሲ። ወወልድኒ፡ ኅሊናሁ፡ ለአብ፡ እስመ፡ አልቦ፡ ኅሊና፡ ላዕለ፡ አብ፡ ዘኢሀሎ፡ ላዕለ፡ ወልድ። ወበእንተዝ፡ ይቤ፡ ወለድኩከ፡ እም፡ ከርሥ፡ ልደት፡ ውሳጤያዊት፡ ወአኮ፡ አፍኣዊት። ወእም፡ ቅድመ፡ ኮከበ፡ ጽባሕሰ፡ ዘይቤ፡ በእንተ፡ ብርሃን፡ ዘፍጥረተ፡ ዓለም፡ በከመ፡ ጽሑፍ፡ ዘይብል፡ ወይቤ፡ እግዚአብሔር፡ ለይኩን፡ ብርሃን፡ ወኮነ፡ ብርሃነ። እስመ፡ ጽባሕ፡ ቀዳሚት፡ ሰዓት፡ ይእቲ፡ ዘመዐልት፡ ወብርሃንኒ፡ ቀዳሚ፡ ግብሩ፡ ውእቱ፡ ዘፍጥረተ፡ ዓለም። ወካዕበ፡ ይተረጐም፡ ኮከበ፡ ጽባሕ፡ ለሰይጣን፡ በእንተ፡ ዘቀደመ፡ ተፈጥሮ፡ በዕለተ፡ እሑድ። ወድቀቱሰ፡ ኮነ፡ በዕለተ፡ ረቡዕ። ወበእንቲአሁ፡ ይቤ፡ ኢሳይያስ፡ ነቢይ፡ ለምንትኬ፡ ወድቀ፡ ኮከበ፡ ጽባሕ፡ ዘይሠርቅ፡ ሶበ፡ ይገውሕ፡ እስመ፡ ይቤ፡ አነብር፡ መንበርየ፡ መልዕልተ፡ አርዮብ፡ ወአዐርግ፡ ውስተ፡ ምጽንዓት፡ ወእትሜሰሎ፡ ለልዑል። ወመትልወ፡ ቃለ፡ ዳዊት፡ ይቤ፡ መሐለ፡ እግዚአብሔር፡ ወኢይኔስሕ፡ አንተ፡ ካህኑ፡ ለዓለም፡ በከመ፡ ሢመቱ፡ ለመልከጼዴቅ። ዘንተ፡ ይቤ፡ በእንተ፡ ቍርባነ፡ ወንጌል፡ ዘበኅብስተ፡ ሥርናይ፡ ወወይን፡ ትብል፡ ቅድስት፡ ኦሪት፡ መልከጼዴቅ፡ አውጽሐ፡ ኅብስተ፡ ወወይነ፡ ወካህኑ፡ ለእግዚአብሔር፡ ውእቱ። ወካዕበ፡ ይቤ፡ በወንጌል፡ ነሥአ፡ ኅብስተ፡ አእኰተ፡ ወባረከ፡ ወፈተተ፡ ወወሀቦሙ፡ ለአርዳኢሁ፡ ወይቤሎሙ፡ ንሥኡ፡ ብልዑ፡ ዝ፡ ውእቱ፡ ሥጋየ። ወከማሁ፡ ጽዋዐኒ፡ ባሪኮ፡ ይቤሎሙ፡ ንሥኡ፡ ስትዩ፡ ዝ፡ ጽዋዕ፡ ደምየ፡ ውእቱ፡ ኢይሰቲ፡ እንከ፡ እም፡ ዝንቱ፡ አጺረ፡ ፍሬ፡ ወይን፡ እስከ፡ አመ፡ እሰትዮ፡ ሐዲሰ፡ በመንግሥተ፡ አቡየ። ወበእንተዝ፡ ይቤ፡ ጳውሎስ፡ ወለዘሰ፡ በመሐላ፡ ሤሞ፡ ይቤ፡ አንተ፡ ካህኑ፡ ለዓለም፡ በከመ፡ ሢመቱ፡ ለመልከጼዴቅ፡ ወኢይቤ፡ በከመ፡ ሢመቱ፡ ለአሮን። ንትመየጥኬ፡ ኀበ፡ ቃለ፡ መዝሙር፡ ዘይቤ፡ እግዚአብሔር፡ በየማንከ። ናሁኬ፡ አጠየቀነ፡ ነቢረ፡ መንፈስ፡ ቅዱስ፡ በየማነ፡ ወልድ፡ ወበጥንተ፡ መዝሙር፡ ይቤ፡ ይቤሎ፡ እግዚእ፡ ለእግዚእየ፡ ንበር፡ በየማንየ፡ እንዘ፡ ያኤምር፡ ነቢረ፡ ወልድ፡ በየማነ፡ አብ። ወእም፡ ድኅሬሁ፡ ይብል፡ በቃለ፡ ዝ፡ መዝሙር፡ እግዚአብሔር፡ በየማንከ። አርአየኬ፡ ህላዌ፡ ሥላሴ፡ በበጾታሁ፡ ወትሥልስተ፡ መለኮት፡ በበኁባሬሁ። ዘሰ፡ ኢይሌቡ፡ በዝኒ፡ ኢይሌቡ፡ ወዘኒ፡ ይትከሀድ፡ በዝኒ፡ ይትከሀድኑ። ኢሳይያስኒ፡ ይቤ፡ ወእምዝ፡ በዓመተ፡ ሞተ፡ ዖዝያን፡ ንጉሥ፡ ርኢክዎ፡ ለእግዚአብሔር፡ ጸባዖት፡ ይነብር፡ ዲበ፡ መንበሩ፡ ነዋኅ፡ ወልዑል፡ ወምሉዕ፡ ቤተ፡ ስብሐቲሁ። ወሱራፌል፡ ይቀውሙ፡ ዐውዶ፡ ወለለ፩፩፡ ዘበበ፮፡ ክነፊሆሙ፡ ወተለዐለ፡ መርፈቀ፡ ኆኅት፡ እም፡ ቃል፡ ዘይኬልሑ፡ ወይብሉ፡ ቅዱስ፡ ቅዱስ፡ ቅዱስ፡ እግዚአብሔር፡ ጸባዖት፡ ፍጹም፡ ምሉዕ፡ ሰማያተ፡ ወምድረ፡ ቅድሳተ፡ ስብሐቲከ። ወብሂለ፡ ቅዱስሰ፡ ለእመ፡ ፩፡ ገጽ፡ ውእቱ፡ ወ፩ሂ፡ እም፡ በቍዖሙ፡ ወእመ፡ አብዝኁሂ፡ እም፡ ፈድፈዶሙ፡ አላ፡ ከመ፡ ያጠይቁ፡ ጾታ፡ ሥላሴ፡ ወሀቡ፡ ፫፡ ቅዳሴያተ። ወብሂለ፡ እግዚአብሔር፡ ጸባዖት፡ ዘ፩፡ ጊዜ፡ አመሩ፡ ጽምረተ፡ መለኮት። ዳንኤልኒ፡ ይቤ፡ ወአምጽኡ፡ መናብርተ፡ ለብሉየ፡ መዋዕል፡ ወሥዕርተ፡ ርእሱ፡ ጸዓዳ፡ ከመ፡ ፀምር፡ ወአዕይንቲሁ፡ ከመ፡ ነደ፡ እሳት፡ ወፈለገ፡ እሳት፡ ይውኅዝ፡ ቅድሜሁ። ወአምጽኡ፡ መጻሕፍተ፡ ወከሠትዋ፡ በቅድመ፡ እግዚአብሔር፡ ወለመጽሐፈ፡ ሕይወትሰ፡ ከሠትዋ፡ እንተ፡ ባሕቲታ። ወመጽአ፡ ወልደ፡ እጓለ፡ እመ፡ ሕያው፡ ወነበረ፡ ኀበ፡ ብሉየ፡ መዋዕል። ናሁኬ፡ ነበረ፡ ፩፡ ኀበ፡ ካልዑ፡ ወፍካሬሁሰ፡ ወልድ፡ ኀበ፡ አቡሁ። ወበዝኒ፡ ኢትሌቡኑ፡ ኦ፡ ዕዉረ፡ ልብ። ወካዕበ፡ ይቤ፡ ዳንኤል፡ አመ፡ ፲ወ፰፡ ዓመት፡ በ፳፡ ጽባሕ፡ በረቡዐ፡ ሠርቀ፡ ወርኅ፡ ቀዳሚ፡ ሀለውኩ፡ አነ፡ ኀበ፡ ፈለግ፡ ዐቢይ፡ ወነጸርኩ፡ ብእሴ፡ ዘይለብስ፡ በድነ፡ ወቅኑት፡ ውስተ፡ ሐቌሁ፡ በወርቀ፡ አፌዝ፡ ወነፍስቱሂ፡ ከመ፡ ተርሴስ። ዘንተ፡ ይቤ፡ በእንተ፡ ወልድ፡ ዘለብሰ፡ ሥጋ፡ መዋቴ። ደገመ፡ ወይቤ፡ ናሁ፡ ከመ፡ አምሳለ፡ ወልደ፡ እጓለ፡ እመ፡ ሕያው፡ ገሰሰኒ፡ ከናፍርየ፡ ከሠትኩ፡ አፉየ፡ ወነበብኩ። ዘንተ፡ ይቤ፡ በእንተ፡ አብ። ኢይቤ፡ ወልደ፡ እጓለ፡ እመ፡ ሕያው፡ አላ፡ ይቤ፡ አምሳለ፡ ወልደ፡ እጓለ፡ እመ፡ ሕያው፡ እስመ፡ በአምሳለ፡ እግዚአብሔር፡ ተፈጥረ፡ እጓለ፡ እመ፡ ሕያው። ወዓዲ፡ ሥልሰ፡ ይቤ፡ ወዳግመ፡ ገሠሠኒ፡ ከመ፡ ራእየ፡ ብእሲ፡ ወአጽንዐኒ። በእንተ፡ ወልድሰ፡ ይብል፡ ዘይለብስ፡ በድነ፡ እንዘ፡ ያኤምር፡ ትስብእቶ። ወበእንተ፡ አብኒ፡ ይብል፡ አምሳለ፡ እጓለ፡ እመ፡ ሕያው። በእንተ፡ መንፈስ፡ ቅዱስኒ፡ ይብል፡ ከመ፡ ራእየ፡ ብእሲ። ናሁኬ፡ አግኀሦሙ፡ እም፡ ተሰብኦ፡ ለአብ፡ ወለመንፈስ፡ ቅዱስ። ወባሕቱ፡ ነገረ፡ አርአያ፡ ወአምሳለ፡ በከመ፡ ንቤ፡ ቀዳሚ። ሕዝቅኤልኒ፡ ይቤ፡ ወመጽአ፡ ዝኩ፡ ብእሲ፡ ዘይለብስ፡ ጶደሬ፡ ወቅናት፡ ውስተ፡ ሐቌሁ፡ ተሠጥወ፡ ወይቤ፡ ገበርኩ፡ በከመ፡ አዘዝከኒ። ናሁኬ፡ ያወሥእ፡ ወልድ፡ ለአቡሁ፡ በእንተ፡ ዘፈጸመ፡ ትእዛዞ። ወልብሰ፡ ጶደሬሰ፡ ሥጋ፡ ንጽሕት፡ ይእቲ፡ እንተ፡ ኢረስሐት፡ እስመ፡ ጶደሬ፡ ስሙ፡ ለልብሰ፡ ሜላት፡ ንጹሕ። ወካዕበ፡ ይቤ፡ ሕዝቅኤል፡ ወይቤሎ፡ ለብእሲ፡ ዘይለብስ፡ ጶደሬ፡ ባእ፡ ማእከለ፡ ሠረገላ፡ ዘታሕተ፡ ኪሩብ፡ ወምላዕ፡ እዴከ፡ አፍሐመ፡ እሳት፡ ወዝርዎ፡ ውስተ፡ ሀገር። ወበአቱሰ፡ ለወልድ፡ ማእከለ፡ ኪሩብ፡ ነቢር፡ ኀበ፡ ህላዌ፡ አቡሁ። ወዘሪወ፡ አፍሐመ፡ እሳትኒ፡ መንፈስ፡ ቅዱስ፡ ውእቱ፡ ዘወረደ፡ ላዕለ፡ ሐዋርያት፡ ከመ፡ ዘእሳት፡ እስመ፡ ሠለስቲሆሙ፡ ዲበ፡ ሠረገላ፡ ኪሩቤል፡ ይነብሩ። ወብሂለ፡ እሳትሰ፡ አብኒ፡ እሳት፡ በከመ፡ ይቤ፡ ሙሴ፡ እስመ፡ እግዚአብሔር፡ አምላክነ፡ እሳት፡ ውእቱ፡ ዘይወጽእ። ወልድኒ፡ እሳት፡ በከመ፡ ይቤ፡ ኢሳይያስ፡ ወተፈነወ፡ ኀቤየ፡ ፩፡ እም፡ ሱራፌል፡ ዘውስተ፡ እዴሁ፡ ፍሕም፡ ነሥአ፡ በጕጠት፡ ፍሕመ፡ እም፡ ውስተ፡ ምሥዋዕ፡ ወአልከፈኒ፡ ከናፍርየ። ወዓዲመ፡ መንፈስ፡ ቅዱስ፡ እሳት፡ እስመ፡ ወረደ፡ በጽርሐ፡ ጽዮን፡ ከመ፡ ዘእሳት፡ በከመ፡ ጽሑፍ፡ በግብረ፡ ሐዋርያት። ናሁኬ፡ አብጻሕኩ፡ ለክሙ፡ ስምዐ፡ እም፡ ቃለ፡ ኦሪት፡ ወነቢያት፡ ወእም፡ ቃለ፡ ወንጌል፡ ወሐዋርያት። ወእመሰ፡ ትትከሀዱኒ፡ በእንተ፡ ገጽ፡ ወመልክዕ፡ ያዕቆብኒ፡ ይቤ፡ ርኢክዎ፡ ለእግዚአብሔር፡ ገጸ፡ በገጽ፡ ወድኅነት፡ ነፍስየ። ካዕበ፡ ትቤ፡ ቅድስት፡ ኦሪት፡ እንዘ፡ ትነግር፡ ከመ፡ ተምዐ፡ እግዚአብሔር፡ ዲበ፡ አሮን፡ ወማርያም፡ እኅቱ፡ ወይቤሎሙ፡ እመቦ፡ ዘኮነ፡ ነቢየ፡ እምኔክሙ፡ በራእይ፡ አስተርኢ፡ ሎቱ፡ ወበሕልም፡ እትናገሮ፡ አኮ፡ ከመ፡ ቍልዔየ፡ ሙሴ፡ ዘእትናገሮ፡ ገጸ፡ በገጽ፡ ወአፈ፡ በአፍ። ዳዊትኒ፡ ይቤ፡ ገጸ፡ ዚአከ፡ አኀሥሥ፡ እግዚኦ፡ ወኀሠሥኩ፡ ገጸከ፡ ወኢትሚጥ፡ ገጸከ፡ እም፡ ገብርከ። ወካዕበ፡ ይቤ፡ ሚጥ፡ ገጸከ፡ እም፡ ኃጢአትየ። ወዓዲ፡ ይቤ፡ ወኢትሚጥ፡ ገጸከ፡ እምኔየ። ወካዕበ፡ ይቤ፡ ገጹ፡ ለእግዚአብሔር፡ ኀበ፡ እለ፡ ይገብሩ፡ እኩየ፡ ወዓዲ፡ ይቤ፡ ኢትግድፈኒ፡ እም፡ ቅድመ፡ ገጽከ፡ ወዓዲ፡ ይቤ፡ አይቴኑ፡ አሐውር፡ እመንፈስከ፡ ወአይቴኑ፡ እጐይይ፡ እም፡ ቅድመ፡ ገጽከ። እግዚእነሂ፡ ይቤ፡ በወንጌል፡ ዘሰ፡ ክህደኒ፡ በገጸ፡ ሰብእ፡ እክህዶ፡ አነኒ፡ በቅድመ፡ አቡየ፡ ዘበሰማያት። ዘሰ፡ አምነኒ፡ በገጸ፡ ሰብእ፡ አነኒ፡ አአምኖ፡ በገጸ፡ አቡየ፡ ዘበሰማያት። ወካዕበ፡ ይቤ፡ ኅድግዎሙ፡ ለእሉ፡ ሕፃናት፡ ወኢትክልእዎሙ፡ መጺአ፡ ኀቤየ፡ እስመ፡ መላእክቲሆሙ፡ ዘልፈ፡ ይሬእዩ፡ ገጾ፡ ለአቡየ፡ ዘበሰማያት። ጳውሎስኒ፡ ይቤ፡ ዝ፡ ውእቱ፡ አርአያ፡ ገጹ፡ ለእግዚአብሔር። ወበእንተ፡ ርእሱኒ፡ ይቤ፡ ዳንኤል፡ ወሥዕርተ፡ ርእሱ፡ ጸዓዳ፡ ከመ፡ ፀምር። ሰሎሞንኒ፡ ይቤ፡ ርእሱ፡ ወርቀ፡ ቄፋዝ፡ ወድላሌሁ፡ ጸሊም፡ ከመ፡ ቋዕ። በእንተ፡ ዓይንኒ፡ ንንግር፡ ይቤ፡ ዳዊት፡ እስመ፡ አዕይንቲሁ፡ ለእግዚአብሔር፡ ኀበ፡ ጻድቃኑ፡ ወእዝኑሂ፡ ኀበ፡ ስእለቶሙ። ወካዕበ፡ ይቤ፡ አዕይንቲሁኒ፡ ኀበ፡ ነዳይ፡ ይኔጽራ፡ ወቀራንብቲሁኒ፡ የሐትቶ፡ ኢሳይያስኒ፡ ይቤ፡ ቦኑ፡ ኢይሬኢ፡ በአዕይንትየ፡ ወቦኑ፡ ኢይሰምዕ፡ በእዝንየ። ወባሕቱ፡ ኃጢአትክሙ፡ ይቀውም፡ ማእከሌየ፡ ወማእከሌክሙ፡ ይቤ፡ እግዚአብሔር። ወካዕበ፡ ይቤ፡ አሌ፡ ሎሙ፡ ለእለ፡ ያስተእኅዙ፡ ቤተ፡ ምስለ፡ ቤት፡ ወለእለ፡ ያስተቃርቡ፡ ገራህተ፡ ምስለ፡ ገራህት፡ ከመ፡ ይቅስጡ፡ ዘኮነ፡ እም፡ ገራህተ፡ ቢጾሙ፡ ከመ፡ ተሰምዐ፡ ዝንቱ፡ ነገር፡ ውስተ፡ እዝነ፡ እግዚአብሔር፡ ፀባዖት። ካዕበ፡ ይቤ፡ ዳዊት፡ አጽምዕ፡ እግዚኦ፡ እዝነከ፡ ወስምዐኒ፡ ኀቤየ። ወካዕበ፡ ይቤ፡ ወይኩን፡ እዝንከ፡ ዘያጸምእ፡ ቃለ፡ ስእለትየ። ናሁኬ፡ ተዐውቀ፡ ከመ፡ ቦቱ፡ ለእግዚአብሔር፡ ዐይን፡ ወቀራንብት፡ ወአእዛን። ወዓዲ፡ ይነግራ፡ መጻሕፍት፡ ከመ፡ ቦቱ፡ አእዳው፡ ትብል፡ ቅድስት፡ ኦሪት፡ ሶበ፡ ፈጸመ፡ እግዚአብሔር፡ ተናግሮቶ፡ ለሙሴ፡ ወሀቦ፡ ጽላተ፡ ዘኪዳን፡ ወጽላተ፡ ዘትእዛዝ፡ እለ፡ ጽሑፋት፡ በአጻብዒሁ፡ ለእግዚአብሔር። ወካዕበ፡ ይቤሎ፡ እግዚአብሔር፡ ለሙሴ፡ አነ፡ እሠይም፡ ገጽየ፡ ውስተ፡ ስቍረተ፡ ኰኵሕ፡ ወእሤወር፡ በእዴየ። ወካዕበ፡ ይቤ፡ በነቢይ፡ ሰማይኒ፡ መንበርየ፡ ወምድርኒ፡ መከየደ፡ እገርየ፡ አየኑ፡ ቤተ፡ ተሐንጹ፡ ሊተ፡ ለምዕራፍየ፡ ይቤ፡ እግዚአብሔር። አኮኑ፡ እደውየ፡ ገብራ፡ ዘ፡ ኵሎ። ዳዊትኒ፡ ይቤ፡ ሰማያት፡ ይነግራ፡ ስብሐተ፡ እግዚአብሔር፡ ወግብረ፡ እደዊሁ፡ ያየድዓ፡ ምጽናዓት። ወዓዲ፡ ተብህለ፡ በመዝሙር፡ ዮድ፡ እደዊከ፡ ገብራኒ፡ ወለሐኳኒ። ወዓዲ፡ ተብህለ፡ ፈኑ፡ እዴከ፡ እም፡ አርያም። ወዓዲ፡ ተብህለ፡ መዝራዕትከ፡ ምስለ፡ ኃይል፡ ጸንዐት፡ እዴከ፡ ወተለዐለት፡ የማንከ። ወካዕበ፡ ዓዲ፡ ተብህለ፡ ትርከቦሙ፡ እዴከ፡ ለኵሎሙ፡ ፀርከ። ወትትራከቦሙ፡ እዴከ፡ ለኵሎሙ፡ ጸላዕትከ። ወዓዲ፡ ተብህለ፡ ህየኒ፡ እዴከ፡ ትመርሐኒ፡ ወታነብረኒ፡ የማንከ። ወዓዲ፡ ተብህለ፡ እስመ፡ አንተ፡ ረዳእየ፡ እግዚኦ፡ ውስተ፡ እዴከ፡ አማሐፅን፡ ነፍስየ። ወዓዲ፡ ተብህለ፡ እዴከ፡ ሠረወቶሙ፡ ለፀር፡ ወተከልከ፡ ኪያሆሙ፡ ሣቀይኮሙ፡ ለአሕዛብ፡ ወሰደድኮሙ፡ ዘአኮ፡ በኲናቶሙ፡ ወረስዋ፡ ለምድር፡ ወመዝራዕቶሙኒ፡ ኢያድኀኖሙ። ዘእንበለ፡ የማንከ፡ ወመዝራዕትከ፡ ወብርሃነ፡ ገጽከ። ወዓዲ፡ ተብህለ፡ አንተ፡ ፈጠርከኒ፡ ወወደይከ፡ እዴከ፡ ላዕሌየ። ወዓዲ፡ ተብህለ፡ ለምንት፡ እግዚኦ፡ ትመይጥ፡ እዴከ፡ ወየማንከ፡ ማእከለ፡ ሕፅንከ፡ ለግሙራ። ወዓዲ፡ ይቤ፡ አንተ፡ አቅደምከ፡ ሣርሮታ፡ ለምድር፡ ወግብረ፡ እደዊከ፡ እማንቱ፡ ሰማያት። ወበኢሳይያስኒ፡ ይቤ፡ እዴከ፡ ሣረረታ፡ ለምድር፡ ወየማንከ፡ አጽናዐቶ፡ ለሰማይ። እመኑኬ፡ ከመ፡ ቦቱ፡ ለእግዚአብሔር፡ አእዳው፡ ወመዝራዕት፡ ወአጻብዕ። ወበእንተ፡ አንፍኒ፡ ትብል፡ ቅድስት፡ ኦሪት፡ ወአጼነወ፡ እግዚአብሔር፡ መዐዛ፡ መሥዋዕቱ፡ ለኖኅ። ወበእንተ፡ እንግድዓኒ፡ ትብል፡ ወጾሮሙ፡ በእንግድዓሁ፡ እግዚአብሔር፡ ባሕቲቱ፡ መርሖሙ። ወበእንተ፡ ሐቌ፡ ወገበዋት፡ ይቤ፡ ኢሳይያስ፡ ዘይቀንት፡ ጽድቀ፡ ውስተ፡ ሐቌሁ፡ ወይትዐጸፍ፡ ርትዐ፡ ውስተ፡ ገቦሁ። ዳንኤልኒ፡ ይቤ፡ ወቅኑት፡ ሐቌሁ፡ በወርቀ፡ አፌዝ። አቡቀለምሲስኒ፡ ይቤ፡ ወቅኑት፡ ውስተ፡ ሐቌሁ፡ በቅናት፡ ዘወርቅ። ወካዕበ፡ ይቤ፡ ወጽሑፍ፡ ውስተ፡ ገቦሁ፡ ዘይብል፡ ንጉሠ፡ ነገሥት፡ ወእግዚአ፡ አጋእዝት። ወበእንተ፡ አእጋርኒ፡ ትነግር፡ ቅድስት፡ ኦሪት፡ ዘከመ፡ ይቤሎ፡ እግዚአብሔር፡ ለሙሴ፡ ንሣእ፡ በትረ፡ እምነ፡ ደብተራ፡ ዘመርጡል፡ ወዝብጥ፡ ኰኵሐ፡ ኀበ፡ ይቀውማ፡ እገሪሁ፡ ለእግዚአብሔር፡ ለፌ፡ ወለፌ። ወካዕበ፡ ትቤ፡ ወርእዩ፡ መካነ፡ ኀበ፡ ይቀውም፡ እግዚአብሔር፡ ዘእስራኤል፡ ዘታሕተ፡ እገሪሁ፡ ከመ፡ ግብረተ፡ ግንፉል፡ ዘሰንፔር፡ ወከመ፡ ርእየተ፡ ጽንዐ፡ ሰማይ፡ ሶበ፡ ሐወጹ። ዳዊትኒ፡ ይቤ፡ ወንሰግድ፡ ውስተ፡ መካን፡ ኀበ፡ ቆመ፡ እግረ፡ እግዚእነ። ካዕበ፡ ይቤ፡ ይቤሎ፡ እግዚእ፡ ለእግዚእየ፡ ንበር፡ በየማንየ፡ እስከ፡ አገብኦሙ፡ ለጸላዕትከ፡ ታሕተ፡ መከየደ፡ እገሪከ። ወዓዲ፡ ይቤ፡ አጽነነ፡ ሰማያተ፡ ወወረደ፡ ወቆባር፡ ታሕተ፡ እገሪሁ። ዘካርያስኒ፡ ይቤ፡ ወይቀውማ፡ እገሪሁ፡ ለእግዚአብሔር፡ ውስተ፡ ደብረ፡ ዘይት። እግዚእነሂ፡ ይቤ፡ በወንጌል፡ ኢትምሐሉ፡ በሰማይ፡ እስመ፡ መንበሩ፡ ለእግዚአብሔር፡ ውእቱ፡ ወኢበምድር፡ እስመ፡ መከየደ፡ እገሪሁ፡ ለእግዚአብሔር፡ ይእቲ። እንከሰ፡ ንትመየጥኬ፡ ኀበ፡ አፍ። ትነግር፡ ቅድስት፡ ኦሪት፡ ዘከመ፡ ይቤ፡ እግዚአብሔር፡ አጽምዕ፡ ሰማይ፡ ወእንግርከ፡ ወትስማዕ፡ ምድር፡ ቃለ፡ አፉየ። ወካዕበ፡ ይቤ፡ በመዝሙር፡ ይኄይሰኒ፡ ሕገ፡ አፉከ፡ እም፡ አእላፍ፡ ወርቅ፡ ወብሩር። ወዓዲ፡ ይቤ፡ በእንተ፡ ዳዊት፡ ወኢይሔሱ፡ ዘወጽአ፡ እም፡ አፉየ፡ ምዕረ፡ መሐልኩ፡ ለቅዱስየ፡ ከመ፡ ለዳዊት፡ ኢይሔስዎ። ወዓዲ፡ ይቤ፡ ወተዘከሩ፡ መንክሮ፡ ዘገብረ፡ ተአምሪሁ፡ ወኵነኔ፡ አፉሁ። ወዓዲ፡ ይቤ፡ ኢሳይያስ፡ እስመ፡ አፉሁ፡ ለእግዚአብሔር፡ ነበበ፡ ከመዝ። ወቃለ፡ መዝሙር፡ ይነግር፡ ካዕበ፡ እንዘ፡ ይብል፡ በቃለ፡ እግዚአብሔር፡ ጸንዓ፡ ሰማያት፡ ወእም፡ እስትንፋሰ፡ አፉሁ፡ ኵሉ፡ ኃይሎሙ። ወዓዲ፡ ይቤ፡ ይገንዩ፡ ለከ፡ እግዚኦ፡ ኵሎሙ፡ ነገሥተ፡ ምድር፡ እስመ፡ ሰምዑ፡ ኵሎ፡ ቃለ፡ አፉከ። ናሁኬ፡ አብጻሕነ፡ ለከ፡ ስምዐ፡ እመጻሕፍት፡ ከመ፡ ቦቱ፡ ለእግዚአብሔር፡ ፍጹመ፡ መልክአ፡ እጓለ፡ እመ፡ ሕያው። ኅድግ፡ እንከሰ፡ ኦ፡ ንፉቅ፡ ዕልወተ፡ ዘላዕሌከ፡ እመን፡ በሥላሴ፡ ወተጋነይ፡ ለግጻዌ፡ መለኮት። ወእመሰ፡ አጥባዕከ፡ በኑፋቄከ፡ ይከውን፡ መክፈልትከ፡ ምስለ፡ እለ፡ ኢተጠምቁ፡ ወርስትከኒ፡ ምስለ፡ ተንበላት፡ ወኢትትኌለቍ፡ ምስለ፡ አባግዐ፡ መርዔቱ፡ ለክርስቶስ። እንከሰ፡ ንብል፡ ስብሐት፡ ለአብ፡ ለዘፈነወ፡ ወልዶ፡ ውስተ፡ ማኅፀነ፡ ድንግል። ወሰጊድ፡ ለወልድ፡ ዘተሠገወ፡ እምኔሃ፡ አኰቴት፡ ለመንፈስ፡ ቅዱስ፡ ለዘቀደሳ፡ ወአንጽሓ፡ ወአጽንዓ። ወካዕበ፡ ንብል፡ ስብሐት፡ ለአብ፡ ለዘስምዐ፡ ኮነ፡ በእንተ፡ ወልዱ፡ በውስተ፡ ምጥማቃት። ወሰጊድ፡ ለወልድ፡ ለዘተጠምቀ፡ በውስተ፡ ዮርዳኖስ። አኰቴት፡ ለመንፈስ፡ ቅዱስ፡ ለዘነበረ፡ ዲቤሁ፡ በርእየተ፡ ርግብ። ወዓዲ፡ ንብል፡ ስብሐት፡ ለአብ፡ ለዘተሣሃለነ፡ በሞተ፡ ወልዱ። ወሰጊድ፡ ለወልድ፡ ለዘጥዕመ፡ ሞተ፡ በእንተ፡ መድኃኒትነ። አኰቴት፡ ለመንፈስ፡ ቅዱስ፡ ለዘአብጠሎ፡ ለሥልጣነ፡ ሞት፡ በሞተ፡ ኢየሱስ፡ ክርስቶስ። ወዓዲ፡ ንብል፡ ስብሐት፡ ለአብ፡ ለዘአንሥኦ፡ ለወልድ፡ እሙታን። ወሰጊድ፡ ለወልድ፡ ለዘነበረ፡ በየማነ፡ አቡሁ። አኰቴት፡ ለመንፈስ፡ ቅዱስ፡ ለዘወረደ፡ ላዕለ፡ ሐዋርያት፡ በጽርሐ፡ ጽዮን። ወእምዝኒ፡ ንብል፡ ስብሐት፡ ለአብ፡ ለዘይወርድ፡ በግርማ፡ መንግሥቱ። ወሰጊድ፡ ለወልድ፡ ለዘያቀውም፡ አባግዐ፡ በየማኑ፡ ወአጣሌ፡ በፀጋሙ። አኰቴት፡ ለመንፈስ፡ ቅዱስ፡ ለዘይፈድዮ፡ ለኵሉ፡ በከመ፡ ምግባሩ። ለዓለም፡ አሜን፡ ወአሜን፡ ለይኩን። ተፈጸመ፡ ዘለፋሁ፡ ለሰባልዮስ፡ መጽሐፈ፡ ሕግ፡ ዘእም፡ ብሉይ፡ ወእም፡ ሐዲስ፡ ዘይነግር፡ በእንተ፡ ስምዐ፡ ሥሉስ፡ ጸልዩ፡ ወባርኩኒ፡ ሊተ፡ ለጊዮርጊስ፡ ዘጽሕቁ፡ ለተናግሮ፡ እንዘ፡ ጽቡስ፡ በእንተ፡ ቅንዐተ፡ ሃይማኖት፡ ለለባስያነ፡ መንፈስ፡ ቅዱስ፡ አሜን።

Against ʾAburyos, i.e. Apollinarius ምዕራፍ፡ ፪፡ ምንባብ፡ ዘብርሃን፡ ፩፡ በስመ፡ ሥሉስ፡ ቅዱስ፡ ኅቡረ፡ ህላዌሁ፡ ዘኢይትፈለጥ፡ ወኢይቶሳሕ፡ ዘአሐደ፡ ይሰገድ፡ ወአሐደ፡ ይሴባሕ፡ ዲበ፡ ሠረገላ፡ ነፋሳት፡ ዐውደ፡ ፀሐይ፡ ዘይዌጥሕ፡ ዘያሠርቆ፡ በኀዋኅወ፡ ሰማይ፡ ኃይለ፡ ነፋስ፡ እንዘ፡ ይነፍሕ፡ ወነበልባለ፡ ፀሐይ፡ እንዘ፡ ይትራዋሕ፡ ወለዐውደ፡ ቀመሩ፡ ለወርኅ፡ ዘይዌስኮ፡ ብርሃነ፡ ለለጽባሕ፡ እስከ፡ ይመልዕ፡ ጥንቁቀ፡ በዕለተ፡ ገሐህ፡ እም፡ ከርሠ፡ ደመናት፡ ነጠብጣበ፡ ዝናማት፡ ዘይቀድሕ፡ ጸዳለ፡ መባርቅት፡ እንዘ፡ ይትጋዋሕ፡ ወቃለ፡ ነጐድጓድ፡ እንዘ፡ ይኬልሕ፡ ሎቱ፡ ስብሐት፡ ለመኰንነ፡ ኵሉ፡ ፍጥረት፡ ለዓለመ፡ ዓለም፡ አሜን፡ ወአሜን። ንጽሕፍ፡ እንከ፡ ዘለፋሁ፡ ለአቡርዮስ፡ ዘይቤ፡ አብ፡ ወወልድ፡ ወመንፈስ፡ ቅዱስ፡ ዘዘዚአሁ። እፎኬ፡ ደፈርከ፡ ኦ፡ አቡርዮስ፡ ከመ፡ ትበል፡ አብሂ፡ በምኵናኑ፡ ወበሥርዓቱ፡ ወልድሂ፡ በምኵናኑ፡ ወበሥርዓቱ፡ መንፈስ፡ ቅዱስሂ፡ በምኵናኑ፡ ወበሥርዓቱ። መቅድመሰኬ፡ ፍታሕ፡ ላዕለ፡ ርእስከ። ወእመሰ፡ ሠለስቱ፡ ሥርዓተ፡ ሥላሴ፡ መኑኬ፡ ፈጠረከ፡ ወመኑኬ፡ ገብረከ። ትብልኑ፡ አብ፡ ፈጠሮ፡ ለርእስየ፡ ወወልድ፡ ለሐኮ፡ ለእዴየ፡ ወመንፈስ፡ ቅዱስ፡ አጽንዖ፡ ለእገርየ። ናሁኬ፡ ገበርከ፡ ፍልጠተ፡ ውስተ፡ መልክእከ። ወካዕበመ፡ ትብልኑ፡ አብ፡ አምላከ፡ ሥጋየ፡ ወወልድ፡ አምላከ፡ ነፍስየ፡ ወመንፈስ፡ ቅዱስ፡ አምላከ፡ አእጽምትየ፡ ወአሥራውየ። ናሁኬ፡ ዘረውከ፡ ርእሰከ፡ በከመ፡ ዘረውከ፡ ጽምረተ፡ ሥላሴ። ወዓዲመ፡ ትብልኑ፡ ከመ፡ አብ፡ ሰማያተ፡ ገብረ፡ ወወልድኒ፡ ምድረ፡ ሣረረ። ወመንፈስ፡ ቅዱስሂ፡ አቀመ፡ ባሕረ። ወእመሰ፡ ዘንተ፡ ትብል፡ ኮንከ፡ ሱታፌ፡ ትምህርቶሙ፡ ለማርያን፡ እስመ፡ ይቤልዎ፡ ነገሥተ፡ አረሚ፡ ለቅዱሰ፡ እግዚአብሔር፡ ጊዮርጊስ፡ አእምር፡ ጊዮርጊስ፡ ከመ፡ አጵሎን፡ ሰማያተ፡ ገብረ፡ ወኤራቅሊስ፡ ምድረ፡ ሣረረ፡ ሰቀማንድሮስ፡ ወአቴና፡ ፀሐየ፡ ሠርዑ፡ ወአርዌውስ፡ ወሶፎ፡ ባሕረ፡ አቀሙ። ናሁኬ፡ ኮንከ፡ መትልወ፡ ትምህርቶሙ፡ ለረሲዓን፡ ወከፈልኮ፡ ለጽምረተ፡ ሥላሴ፡ ከመ፡ አማልክተ፡ አሕዛብ። ሰብልያኖስ፡ ቶስሐ፡ ሥላሴ፡ በኢያእምሮ። ወአንተኒ፡ ዘረውከ፡ ሥላሴ፡ በኢለብዎ። ሰብልያኖስ፡ ኀበረ፡ ሥርዐተ፡ ምስለ፡ ተንበላት፡ ወአንተሂ፡ ኀበርከ፡ ሥርዓተ፡ ምስለ፡ መምለክያነ፡ ጣዖት፡ ለእለሰ፡ ብዙኅ፡ አማልክቲሆሙ፡ ብዙኅ፡ አጋንንቲሆሙ። ለሰብልያኖስ፡ ዘለፈቶ፡ ቅድስት፡ ኦሪት፡ ሶበ፡ ትነግር፡ እንዘ፡ ትብል፡ ይቤ፡ እግዚአብሔር፡ ንግበር፡ ሰብአ፡ በአርአያነ፡ ወበአምሳሊነ። ወለከሂ፡ ዘለፈተከ፡ ሶበ፡ ታየድዕ፡ እንዘ፡ ትብል፡ ስማዕ፡ እስራኤል፡ ፩፡ እግዚአብሔር፡ አምላክከ፡ ኢኮነ፡ ፪፡ ወኢ፫። ዘንተ፡ ዘይቤ፡ አኮ፡ ከመ፡ ያጽርዕ፡ ትሥልስተ፡ አላ፡ ከመ፡ ያስተዋኅድ፡ ጽምረተ፡ ሥላሴ። ለሰብልያኖስ፡ አውቀይነ፡ ልሳኖ፡ ሶበ፡ ንብል፡ በስመ፡ አብ፡ ወወልድ፡ ወመንፈስ፡ ቅዱስ፡ በበግጻዌሁ፡ ወለከሂ፡ ፈጸምነ፡ አፉከ፡ ሶበ፡ ንብል፡ ፩፡ አምላክ፡ በህላዌሁ። ለሰብልያኖስ፡ ዘለፍናሁ፡ ከመ፡ ኢያስተዋሕድ፡ ግጻዌ፡ መለኮት፡ ወለከሂ፡ ከላዕናከ፡ ከመ፡ ኢታስተባዕድ፡ ሥላሴ። ኦ፡ አቡርዮስ፡ እፎኬ፡ ትከፍሎ፡ ለዘኢይትከፈል፡ ወእፎ፡ ትሌልዮ፡ ለዘኢይትሌለይ። ኦ፡ አቡርዮስ፡ እፎ፡ ትነፍቆ፡ ለዘኢይትነፈቅ፡ ወእፎ፡ ትዘርዎ፡ ለዘኢይዘረው። ኦ፡ አቡርዮስ፡ እፎ፡ ታስተባዕድ፡ ለዘኢይትበዐድ፡ ወእፎ፡ ታስተርሕቅ፡ ለዘኢይርሕቅ። ኦ፡ አቡርዮስ፡ እፎኬ፡ ትብል፡ ነኪር፡ ፩፡ እም፡ ፩፡ ወይትፈለጥ፡ ካልዑ፡ እም፡ ሣልሱ። ሠፀርከ፡ ርእሰከ፡ በሰይፈ፡ መለኮት፡ ወመተርከ፡ ልሳነከ፡ በመጥባሕተ፡ ወንጌል። ትብልኑ፡ በእንተ፡ አብ፡ ወወልድ፡ ወመንፈስ፡ ቅዱስ፡ ከመ፡ እሳት፡ ወነፋስ፡ ወማይ። እመሂ፡ ሰመይኮሙ፡ እሳተ፡ ፩፡ ውእቱ፡ እሳተ፡ ሕይወት፡ ዘያውዒ፡ ሦከ፡ ኃጢአቶሙ፡ ለመሀይምናን። ወእመሂ፡ አስተማሰልኮሙ፡ በነፋስ፡ ፩፡ መንፈስ፡ እሙንቱ፡ ህላዌሆሙ፡ ዘኢይትገሠስ። ወእመሂ፡ አስተማሰልኮሙ፡ በቀላየ፡ ማይ፡ ፩፡ ውእቱ፡ ባሕረ፡ ምሕረት፡ ዘበስመ፡ ዚአሁ፡ ተጠመቅነ። ኢተኀሊ፡ ላዕለ፡ ሥርዓተ፡ ሥላሴ፡ በግዕዘ፡ ፫፡ ጠባይዕ፡ ዘዘከርናሆሙ፡ ዘ፩፡ ውዑይ፡ ወ፩፡ ቈሪር፡ ወ፩፡ ርጡብ። በከመ፡ አብ፡ ፀሐይ፡ ዘዘልፈ፡ ያበርህ፡ ወልድኒ፡ ፀሐይ፡ ዘዘልፈ፡ ያበርህ፡ ዲበ፡ ቅዱሳን፡ መንፈስ፡ ቅዱስኒ፡ ፀሐይ፡ ዘያሠረግዋ፡ ለቤተ፡ ክርስቲያን። ወበከመ፡ አብ፡ ይነብር፡ ዲበ፡ ሠረገላ፡ ኪሩቤል፡ ወልድኒ፡ ይነብር፡ በየማኑ፡ ዲበ፡ ፬፡ እንስሳሁ፡ ወከመ፡ ወልድ፡ ይነብር፡ ዲበ፡ እንስሳሁ፡ መንፈስ፡ ቅዱስሂ፡ ይሤለስ፡ ዲበ፡ መንበረ፡ ስብሐቲሁ። ወበከመ፡ አብ፡ ለሐኮ፡ ለአዳም፡ ወልድኒ፡ ገብሮ፡ በአርአያሁ፡ ወበአምሳሊሁ። ወበከመ፡ ወልድ፡ ገብሮ፡ በአርአያሁ፡ ወበአምሳሊሁ፡ መንፈስ፡ ቅዱስሂ፡ ፈጠሮ፡ በመልክአ፡ ዚአሁ። ወበከመ፡ አብ፡ አስተንፈሰ፡ በአፈ፡ ነቢያት፡ ወይቤ፡ ወለድኩከ፡ እም፡ ከርሥ፡ እም፡ ቅድመ፡ ኮከበ፡ ጽባሕ። ወካዕበ፡ ይቤ፡ በአፈ፡ ኢሳይያስ፡ ናሁ፡ ይሌቡ፡ ቍልዔየ፡ ይትሌዐል፡ ወይከብር፡ ወያነክሩ፡ አሕዛብ፡ በእንቲአሁ። ወካዕበመ፡ ይቤ፡ አነ፡ እከውኖ፡ አባሁ፡ ወውእቱኒ፡ ይከውነኒ፡ ወልድየ። በአፈ፡ ዖዝያን፡ ይቤ፡ እም፡ ግብጽ፡ ጸዋዕክዎ፡ ለወልድየ፡ ዝ፡ ስምዐ፡ አብ፡ በእንተ፡ ወልዱ፡ ዘበነቢያቲሁ፡ ዘተየድዐ። ወካዕበመ፡ ወልድሂ፡ አስተንፈሰ፡ በአፈ፡ ነቢያቲሁ፡ በእንተ፡ አቡሁ፡ ወይቤ፡ እግዚአብሔር፡ ይቤለኒ፡ ወልድየ፡ አንተ፡ ወአነ፡ ዮም፡ ወለድኩከ፡ ሰአል፡ እምኔየ፡ እሁበከ፡ አሕዛበ፡ ለርስትከ፡ ወምኵናኒከኒ፡ እስከ፡ አጽናፈ፡ ምድር። በእንተ፡ ርእሱኑ፡ ይነግር፡ በእንተ፡ ሕማማቲሁ፡ እንዘ፡ ይብል፡ ተካፈሉ፡ አልባስየ፡ ለርእሶሙ፡ ወተዐፀዉ፡ ዲበ፡ አራዝየ። ወካዕበ፡ ይቤ፡ ቀነዉኒ፡ እደውየ፡ ወእገርየ፡ ወኆለቁ፡ ኵሎ፡ አእጽምትየ። ወካዕበመ፡ ይቤ፡ ወወደዩ፡ ሐሞተ፡ ውስተ፡ መብልዕየ፡ ወአስተዩኒ፡ ብሂአ፡ ለጽምዕየ። በአፈ፡ ኢሳይያስኒ፡ ይቤ፡ ወመጠውኩ፡ ዘባንየ፡ ለመቅሠፍት፡ ወመላትሕየ፡ ለጽፍዐት፡ ወኢሜጥኩ፡ ገጽየ፡ እም፡ ኀፍረተ፡ ምራቅ። ዝ፡ ስምዐ፡ ቃሉ፡ ለወልድ፡ በእንተ፡ ርእሱ፡ ወበእንተ፡ አቡሁ፡ ዘተየድዐ፡ በአፈ፡ ነቢያቲሁ። ወበእንተ፡ መንፈስ፡ ቅዱስሂ፡ ይነግር፡ እንዘ፡ ይብል፡ መንፈሰ፡ እግዚአብሔር፡ ዘላዕሌየ፡ ዘቀብዐኒ፡ እዜንዎሙ፡ ለነዳያን፡ ፈነወኒ፡ እስብክ፡ ግዕዛነ፡ ለፂውዋን። ዝሰ፡ ቃለ፡ ተነብዮ፡ በእንተ፡ መንፈስ፡ ቅዱስ፡ ዘወረደ፡ ላዕሌሁ፡ በርእየተ፡ ርግብ። እዜንዎሙ፡ ለነዳያን፡ ፈነወኒ፡ ብሂል፡ ከመ፡ እኩን፡ መምህረ፡ ለአሕዛብ፡ እስመ፡ አሕዛብ፡ በመዋዕለ፡ ትካት፡ ነዳያን፡ እም፡ ቃለ፡ እግዚአብሔር፡ ግዩራን፡ እም፡ ሕገ፡ ኦሪት። ወእስብክ፡ ግዕዛነ፡ ለፂውዋን፡ ብሂል፡ ለእለ፡ ተፄወዉ፡ እም፡ አምልኮ፡ እግዚአብሔር፡ ውስተ፡ አምልኮ፡ ጣዖት። ወካዕበመ፡ ይቤ፡ በእንተ፡ መንፈስ፡ ቅዱስ፡ ላዕለ፡ አግብርትየ፡ ወአእማትየ፡ እሠውጥ፡ እምነ፡ መንፈስየ፡ ዲበ፡ ኵሉ፡ ዘሥጋ፡ ወእሁብ፡ ትእምርተ፡ በሰማይ፡ በላዕሉ፡ ወመንክረ፡ በምድር፡ በታሕቱ። ዝኒ፡ ቃለ፡ ተነብዮ፡ ዘኢዩኤል፡ በእንተ፡ መንፈስ፡ ቅዱስ፡ ዘወረደ፡ ላዕለ፡ ሐዋርያት፡ በጽርሐ፡ ጽዮን፡ ወላዕለ፡ እሙሂ፡ ለኢየሱስ፡ ወላዕለ፡ አንስትኒ፡ እለ፡ ተለዋሁ፡ ወተልእካሁ፡ በንዋዮን። ወመንፈስ፡ ቅዱስ፡ አስተንፈሰ፡ በአፈ፡ ነቢያት፡ ወይቤ፡ አነ፡ አስተባዛኅኩ፡ ራእየ፡ ነቢያት፡ ወበእደ፡ ነቢያት፡ ተመሰልኩ። ወካዕበ፡ ይቤ፡ እወዲ፡ ሕግየ፡ ውስተ፡ ልቦሙ፡ ወእጽሕፍ፡ ውስተ፡ እንግድዓሆሙ፡ እሙንቱሂ፡ ይከውኑኒ፡ ሕዝብየ፡ ወአነሂ፡ እከውኖሙ፡ አምላኮሙ። ወካዕበ፡ ይቤ፡ በአፈ፡ ኢሳይያስ፡ ኀበ፡ መኑ፡ አዐርፍ፡ ዘእንበለ፡ ኀበ፡ የዋህ፡ ወትሑት፡ ወጽምው፡ ዘይርዕድ፡ እም፡ ቃልየ። ዘንተ፡ ነገረ፡ በእንተ፡ ርእሱ። ወበእንተ፡ አብኒ፡ ይቤ፡ ኅሥዎ፡ ለእግዚአብሔር፡ ወእም፡ ከመ፡ ረከብክምዎ፡ ጸውዕዎ፡ ወእም፡ ከመ፡ ቀረብክሙ፡ ኀቤሁ፡ ይኅድግ፡ ኃጥእ፡ ፍኖቶ፡ ወብእሲ፡ ዐማፂ፡ ምግባሮ። ወካዕበመ፡ ይቤ፡ ፍርህዎ፡ ለእግዚአብሔር፡ ኵልክሙ፡ ቅዱሳኒሁ፡ እስመ፡ አልቦሙ፡ ተጽናስ፡ ለእለ፡ ይፈርህዎ። ወበእንተ፡ ወልድኒ፡ ይቤ፡ ቡሩክ፡ ዘይመጽእ፡ በስመ፡ እግዚአብሔር። ወካዕበመ፡ ይቤ፡ እግዚአብሔርሰ፡ እም፡ ቴማን፡ ይመጽእ፡ ወቅዱስኒ፡ እም፡ ደብረ፡ ፋራን። ከደነ፡ ሰማያተ፡ ሥኑ፡ ወመልዐ፡ ምድረ፡ ስብሐቲሁ። ወካዕበመ፡ ይቤ፡ ወይወርድ፡ ከመ፡ ጠል፡ ውስተ፡ ፀምር። ወከመ፡ ነጠብጣብ፡ ዘያንጠበጥብ፡ ዲበ፡ ምድር። ወበአፈ፡ ኢሳይያስኒ፡ ይቤ፡ መጽአ፡ ይጠባሕ፡ ከመ፡ በግዕ፡ ወከመ፡ በግዕ፡ ዘኢይነብብ፡ በቅድመ፡ ዘይቀርፆ፡ ከማሁ፡ ኢከሠተ፡ አፉሁ፡ በሕማሙ፡ እስመ፡ ይነሥእዋ፡ ለፍትሑ፡ ወኢየአምርዋ፡ ለልደቱ፡ በኃጢአተ፡ ሕዝብየ፡ በጽሐ፡ እስከ፡ ለሞት፡ ወበእንተ፡ ትንሣኤሁኒ፡ ይቤ፡ ወተንሥአ፡ እግዚአብሔር፡ ከመ፡ ዘንቃህ፡ እም፡ ንዋም፡ ወከመ፡ ኃያል፡ ዘኅዳገ፡ ወይን። ወበእንተ፡ ዕርገቱኒ፡ ይቤ፡ ተለዐለ፡ ዘይኴንና፡ ለምድር። ናሁኬ፡ አስተንፈሰ፡ ሥላሴ፡ በአፈ፡ ነቢያቲሁ፡ እንዘ፡ ያርኢ፡ ፍናወ፡ ነገር፡ በበህላዌሁ። ተኀፈርኬ፡ ኦ፡ አቡርዮስ፡ ዘትቤ፡ አብ፡ ወወልድ፡ ወመንፈስ፡ ቅዱስ፡ ዘዘዚአሁ። ስማዕኬ፡ ኦ፡ ድንቅው፡ እንዘ፡ ብከ፡ እዝን፡ ዘይቤ፡ እግዚእነ፡ በወንጌል፡ ዘርእየ፡ ኪያየ፡ ርእዮ፡ ለአቡየ። ናሁኬ፡ ፩፡ ራእይ። ወካዕበመ፡ ይቤ፡ አነ፡ ወአብ፡ ፩፡ ንሕነ። ናሁኬ፡ ፩፡ ህላዌ። ወካዕበመ፡ ይቤ፡ በከመ፡ አብ፡ ሕያው፡ አነሂ፡ ሕያው፡ በእንተ፡ አብ። ነዋኬ፡ ፩፡ ሕይወት። ወዓዲ፡ ይቤ፡ እመቦ፡ ዘሰአልክምዎ፡ ለአብ፡ በስምየ፡ ይገብር፡ ለክሙ፡ ከመ፡ ይሰባሕ፡ አብ፡ በወልዱ። ወእመሂ፡ ሰአልክሙኒ፡ በስመ፡ አቡየ፡ እገብር፡ ለክሙ። ናሁኬ፡ ፩፡ ሥምረት። ወዓዲመ፡ ይቤ፡ አነሂ፡ አቡክሙ፡ ወአቡየሂ፡ አቡክሙ። ወበእንተ፡ መንፈስ፡ ቅዱስሂ፡ ይቤ፡ ዘኢተወልደ፡ እማይ፡ ወእመንፈስ፡ ኢይክል፡ በዊአ፡ ውስተ፡ መንግሥተ፡ ሰማያት። ናሁኬ፡ ፩፡ ወሊድ። ወዓዲመ፡ ይቤ፡ ወበከመ፡ አብ፡ ያነሥኦሙ፡ ለምውታን፡ ወየሐይዎሙ፡ ወከማሁ፡ ወልድኒ፡ ያሐዩ፡ ለዘፈቀደ። ናሁኬ፡ ፩፡ ሥልጣን። ዓዲመ፡ ይቤ፡ ወኵሉ፡ ዘቦ፡ ለአቡየ፡ ዚአየ፡ ውእቱ። ወለአቡሁኒ፡ ይቤሎ፡ ወኵሎ፡ ዘዚአየ፡ ዚአከ፡ ውእቱ፡ ወዘዚአከኒ፡ ዚአየ። ናሁኬ፡ ፩፡ እግዚእ። ወዓዲመ፡ ይቤ፡ ወበከመ፡ የአምረኒ፡ አብ፡ አነሂ፡ አአምሮ፡ ለአብ። ናሁኬ፡ ፩፡ አእምሮ። ወዓዲመ፡ ይቤ፡ ወአልቦ፡ ዘይክል፡ መጺአ፡ ኀቤየ፡ እመ፡ ኢሰሐቦ፡ አቡየ፡ ዘፈነወኒ። ወበካልዕኒ፡ ገጽ፡ ይብል፡ ወአልቦ፡ ዘይክል፡ መጺአ፡ ኀበ፡ አብ፡ ዘእንበለ፡ እንተ፡ ኀቤየ። ናሁኬ፡ ፩፡ ጸውዖ። ወካዕበ፡ ይቤሎሙ፡ ለአይሁድ፡ ኢኪያየ፡ ተአምሩ፡ ወኢአቡየ፡ ሶበሰ፡ ኪያየ፡ አእመርክሙኒ፡ እም፡ አእመርክምዎ፡ ለአቡየ፡ ናሁኬ፡ ፩፡ አዑቆ። ወዓዲመ፡ ይቤ፡ ዘተወክፎ፡ ለዘፈነውኩ፡ ኪያየ፡ ተወክፈ፡ ወዘኪያየ፡ ተወክፈ፡ ተወክፎ፡ ለዘፈነወኒ። ናሁኬ፡ ፩፡ ተወክፎ፡ ወዓዲመ፡ ይቤ፡ አመ፡ ተለዐለ፡ ወልደ፡ እጓለ፡ እመ፡ ሕያው፡ ውእተ፡ አሚረ፡ አሜሃ፡ ተአምሩ፡ ከመ፡ አነ፡ ውእቱ፡ አኮ፡ ዘእም፡ ኀቤየ፡ ዘእነግር፡ በከመ፡ መሀረኒ፡ አብ፡ ከማሁ፡ እነግር፡ ወእብል፡ ዘፈነወኒ፡ ሀሎ፡ ምስሌየ፡ ኢየኀድገኒ፡ ባሕቲትየ፡ እስመ፡ አነ፡ ሥምረቶ፡ እገብር። ናሁኬ፡ ፩፡ ትምህርት። ወካዕበመ፡ ይቤሎሙ፡ ለአርዳኢሁ፡ ውእተ፡ አሚረ፡ ተአምሩ፡ ከመ፡ አነ፡ በአብ፡ ወአብ፡ ብየ፡ ወአንትሙሂ፡ ብየ፡ ወአነሂ፡ ብክሙ። ናሁኬ፡ ፩፡ ኁባሬ። ወካዕበ፡ ይቤ፡ እንዘ፡ ያስተበቍዕ፡ ኀበ፡ አቡሁ፡ በእንተ፡ አርዳኢሁ፡ በከመ፡ አንተ፡ አብ፡ ምስሌየ፡ ብየ፡ ወአነሂ፡ ምስሌከ፡ ብከ፡ ወከመ፡ ይኩኑ፡ እሙንቱኒ፡ ፩፡ ብነ፡ ከማነ፡ ከመ፡ ይእመን፡ ዓለም፡ ከመ፡ አንተ፡ ፈነውከኒ። ናሁኬ፡ ፩፡ ድማሬ። ወካዕበ፡ ይቤሎሙ፡ ለአርዳኢሁ፡ ዘኪያክሙ፡ ሰምዐ፡ ኪያየ፡ ሰምዐ፡ ወዘኪያየ፡ ሰምዐ፡ ሰምዖ፡ ለዘፈነወኒ። ናሁኬ፡ ፩፡ አእምሮ። እንከሰ፡ ፈጸምነ፡ በእንተ፡ ጽምረተ፡ አብ፡ ወወልድ። ወበእንተ፡ መንፈስ፡ ቅዱስኒ፡ ንንግር፡ በከመ፡ አሰንሰለ፡ ወአስተአኀዘ፡ ወልደ፡ እግዚአብሔር፡ ህላዌ፡ ዚአሁ፡ ምስለ፡ አቡሁ፡ ከማሁ፡ አሰንሰለ፡ ወአስተአኀዘ፡ ጳውሎስ፡ ህላዌ፡ መንፈስ፡ ቅዱስ፡ ምስለ፡ አብ፡ ወወልድ፡ ስማዕ፡ ዘይቤ፡ በመልእክቱ፡ ወአልቦ፡ ዘየአምር፡ ኅሊናሁ፡ ለብእሲ፡ ዘእንበለ፡ መንፈሱ፡ ለብእሲ፡ ዘላዕሌሁ፡ ወለነሰኬ፡ ኅሊናሁ፡ ለእግዚአብሔር፡ ብነ፡ ዘይከሥት፡ ኅቡዓቲሁ፡ ይፈትን፡ ማዕምቅቲሁ፡ እስመ፡ ኅሊናሁ፡ ለእግዚአብሔር፡ ብሂል፡ ማእምረ፡ ኅቡዓቲሁ፡ ብሂል፡ እስመ፡ ኢሀሎ፡ ኅሊና፡ ላዕለ፡ አብ፡ ዘኢሀሎ፡ ላዕለ፡ ወልድ፡ ወኢሀሎ፡ ኅሊና፡ ላዕለ፡ ወልድ፡ ዘኢሀሎ፡ ላዕለ፡ መንፈስ፡ ቅዱስ፡ እስመ፡ አሐደ፡ ይኄልዩ፡ ወአሐቲ፡ መለኮቶሙ። ወካዕበ፡ ይቤ፡ ጳውሎስ፡ ወአልቦ፡ ዘይክል፡ ብሂለ፡ እግዚእ፡ ኢየሱስ፡ ክርስቶስ፡ ዘእንበለ፡ በመንፈስ፡ ቅዱስ፡ ወአልቦ፡ ዘይብል፡ ውጉዝ፡ ኢየሱስ፡ ክርስቶስ፡ ዘእንበለ፡ በቤልሆር። ወመክፈልታተ፡ ሱታፌ፡ ጸጋ፡ ህልው፡ ለዝንቱ፡ ፩፡ መንፈስ፡ ቅዱስ፡ ወመክፈልታተ፡ ሱታፌ፡ ተልእኮ፡ ህልው፡ ለዝንቱ፡ ፩፡ እግዚእ፡ ወመክፈልታተ፡ ሱታፌ፡ ምግባረ፡ ሠናይ፡ ህልው፡ ለዝንቱ፡ አምላክ፡ ዘይገብር፡ ኵሎ፡ ውስተ፡ ኵሉ፡ እስመ፡ ለለዘዘዚአሁ፡ ጸጋሁ፡ በመንፈስ፡ ቅዱስ። ወእግዚእነሂ፡ ይቤ፡ በወንጌል፡ ወብየ፡ ብዙኅ፡ ነገር፡ ዘእነግረክሙ፡ ወባሕቱ፡ ኢትክሉ፡ ጸዊሮቶ፡ ይእዜ። ወመጺኦ፡ ወእቱ፡ መንፈሰ፡ ጽድቅ፡ ይመርሐክሙ፡ በኵሉ፡ ጽድቅ፡ እስመ፡ ኢይነግር፡ ዘእም፡ ኀቤሁ፡ ወዘሰምዐ፡ ዳእሙ፡ ይነግር፡ ወዘይመጽእ፡ ይነግረክሙ፡ ወይዜንወክሙ፡ ውእቱ። ኪየየ፡ ይዌድስ፡ ውእቱ፡ ወይሴብሕ፡ እስመ፡ እምዚአየ፡ ይነሥእ፡ ወይነግረክሙ፡ ወይዜንወክሙ፡ ኵሎ። አእምርኬ፡ ኦ፡ አብድ፡ ሶበ፡ ይብል፡ እም፡ ዚአየ፡ ይነሥእ፡ ወያዜክረክሙ፡ ኵሎ፡ ያኤምረክሙ፡ ከመ፡ ቃለ፡ ወልድ፡ ቃለ፡ ትምህርቱ፡ ለጰራቅሊጦስ። በእንተ፡ አቡሁሰ፡ ይቤ፡ ኵሎ፡ ዘሰማዕኩ፡ በኀበ፡ አብ፡ እነግር። ወበእንተ፡ መንፈስ፡ ቅዱስኒ፡ ይቤ፡ ዘእም፡ ዚአየ፡ ይነሥእ፡ ወያዜክረክሙ፡ ኵሎ። ናሁኬ፡ ጽምረተ፡ ሥላሴ፡ በአሐቲ፡ ሥርዓት፡ ወአልቦ፡ ተፍላጥ፡ ኀበ፡ ኀልዮ፡ ወነቢብ፡ ወአልቦ፡ ተውላጥ፡ ኀበ፡ ግጻዌ፡ ወጸዳል። እመንኬ፡ ኦ፡ ረሲዕ፡ ከመ፡ ኢሀሎ፡ ዕበይ፡ ላዕለ፡ አብ፡ ዘኢሀሎ፡ ላዕለ፡ ወልድ፡ ወኢሀሎ፡ ዕበይ፡ ላዕለ፡ ወልድ፡ ዘኢሀሎ፡ ላዕለ፡ መንፈስ፡ ቅዱስ። ዝክረ፡ ሃይማኖቶሙ፡ ለረሲዓን፡ ሰቆራር፡ በኀበ፡ እግዚአብሔር፡ ወቃለ፡ አፉሆሙ፡ ዘምሉዕ፡ ጽርፈተ፡ ያረኵሳ፡ ለጥምቀቶሙ፡ ድምጸ፡ ትምህርቶሙ፡ የሀውካ፡ ለቤተ፡ ክርስቲያን፡ ወነሶሳወ፡ እገሪሆሙ፡ ያረኵሳ፡ ለምድር። ሰብልያኖስ፡ ቶስሐ፡ ግጻዌ፡ መለኮት፡ ወአቡርዮስ፡ ዘረወ፡ ጽምረተ፡ ሥላሴ፡ ክልዔሆሙ፡ ደቂቀ፡ ገሃነም፡ ኮኑ፡ ምጥዋነ፡ ለመንጸፈ፡ ደይን። ወለዘሂ፡ የአምን፡ በሃይማኖቶሙ፡ ኢታብኦ፡ ውስተ፡ ቤትከ፡ ወበሐሂ፡ ጥቀ፡ ኢትበሎ። ኢትንበር፡ ደወለ፡ ቀልቀል፡ ምስለ፡ ጸላዒከ፡ ከመ፡ ኢያጽድፍከ፡ ወኢትባእ፡ ውስተ፡ ዐዘቃተ፡ ዓምዓም፡ ከመ፡ ኢየኀጥከ። ኢትትዐረኮ፡ ለተኵላ፡ ከመ፡ ኢየኀጥከ፡ ወኢትቅንት፡ ከይሴ፡ ውስተ፡ ሐቌከ፡ ከመ፡ ኢያሕስም፡ ላዕሌከ። ኢትዕንቆ፡ ለአፍዖት፡ ውስተ፡ ክሳድከ፡ ከመ፡ ኢያሕምምከ፡ በሕምዙ። ወኢትደዮ፡ ውስተ፡ ሕፅንከ፡ ለአቅራብ፡ ከመ፡ ኢያመምትከ፡ በዘነቡ። ኢተሀብ፡ ቅድሳተ፡ ለከለባት፡ ወኢትደይ፡ ባሕርየከ፡ ቅድመ፡ አሕርው። ወእመ፡ ብከ፡ ልብስ፡ ንጹሕ፡ ኢታቅርቦ፡ ኀበ፡ ጸለሎ፡ መቅጹት፡ ከመ፡ ኢይደይ፡ ውስቴቱ፡ ጽልመቶ። ወለእመ፡ አጥረይከ፡ ዕንቈ፡ ክቡረ፡ ኢትዝግቦ፡ ውስተ፡ መሬት፡ ከመ፡ ኢያደምኖ፡ በርስሐቱ። መሰልነ፡ ለከ፡ ዘንተ፡ ምዕዳነ፡ በእንተ፡ ተራሕቆ፡ እም፡ ዕልዋን፡ እስመ፡ ፍትሐ፡ ኵነኔ፡ ወጽአ፡ ላዕሌሆሙ፡ እም፡ ኀበ፡ እግዚአብሔር፡ በከመ፡ ጽሑፍ፡ ውስተ፡ መጽሐፈ፡ ኦሪት፡ ወወጽአ፡ ወልደ፡ ብእሲት፡ እስራኤላዊት፡ ወአቡሁሰ፡ ግብጻዊ፡ ወሰመየ፡ ስሞ፡ ለእግዚአብሔር፡ ወልዳ፡ ለእንታክቲ፡ ብእሲት፡ እስራኤላዊት፡ ወረገመ። ወአምጽእዎ፡ ኀበ፡ ሙሴ። ወስማ፡ ለእሙ፡ ሰሎሚት፡ ወለተ፡ ዳቤር፡ ዘእም፡ ነገደ፡ ዳን። ወወደዮ፡ ውስተ፡ ሞቅሕ፡ እስከ፡ ይኴንኖ፡ በትእዛዘ፡ እግዚአብሔር። ወነበቦ፡ እግዚአብሔር፡ ለሙሴ፡ ወይቤሎ፡ አውጽኦ፡ ለዘረገመ፡ አፍኣ፡ እም፡ ትዕይንት፡ ወይደዩ፡ እደዊሆሙ፡ ላዕለ፡ ርእሱ፡ ኵሎሙ፡ እለ፡ ሰምዕዎ፡ ወይገርዎ፡ በዕብን፡ ኵሉ፡ ተዓይን። ወነገሮሙ፡ ሙሴ፡ ለደቂቀ፡ እስራኤል፡ ወአውፅእዎ፡ ለዘጸረፈ፡ አፍኣ፡ እም፡ ትዕይንት፡ ወወገርዎ፡ በዕብን፡ ወሞተ፡ በትእዛዘ፡ አምላከ፡ ያዕቆብ። ወእግዚእነሂ፡ ይቤ፡ በወንጌል፡ ይኄይስ፡ ይእስሩ፡ በክሳዱ፡ ማሕረፀ፡ አድግ፡ ወያስጥምዎ፡ ውስተ፡ ልጐተ፡ ቀላየ፡ ባሕር። ናሁኬ፡ ትእዛዘ፡ ሞት፡ ወጽአ፡ ላዕለ፡ ዕልዋነ፡ ሃይማኖት፡ በብሉይኒ፡ ወበሐዲስኒ። ወበነቢይኒ፡ ይነግር፡ በእንተ፡ ቅንዐተ፡ ሃይማኖት፡ ወይቤ፡ ማሕረሰክሙኒ፡ አንህቡ፡ ለመጥባሕት፡ ወማዕፀደክሙኒ፡ አግብሩ፡ ረምኀ፡ የዋህኒ፡ ለይኩን፡ መስተባእሰ፡ ድኩምኒ፡ ለይበል፡ ጽኑዕ፡ አነ። ዳዊትኒ፡ ይቤ፡ አኮኑ፡ ጸላዕተከ፡ ጸላዕኩ፡ እግዚኦ፡ ወተመንሰውኩ፡ በእንተ፡ ፀርከ። ፍጹመ፡ ጽልዐ፡ ጸላዕክዎሙ፡ ወኮኑኒ፡ ፀርየ። ወጴጥሮስኒ፡ ርእሰ፡ ሐዋርያት፡ ይቤሎ፡ ለቀሌምንጦስ፡ ተቃተል፡ በሰይፈ፡ ሐጺን፡ ከሐድያነ፡ ወዕልዋነ፡ እለ፡ ኢየአምኑ፡ በክርስቶስ፡ ወምላሕ፡ ሰይፈከ፡ በእንተ፡ ሃይማኖት፡ ፍጽምት። ወካዕበመ፡ ይቤ፡ ሰሎሞን፡ ቅትል፡ ረሲዓነ፡ በቅድመ፡ ንጉሥ፡ ወይኩን፡ ንጹሐ፡ መንበሩ። መኑኬ፡ ረሲዕ፡ ዘእንበለ፡ ዳእሙ፡ ዕልዋነ፡ ሃይማኖት፡ እለ፡ ረስዑ፡ አምልኮ፡ እግዚአብሔር፡ ዘተወፈዩ፡ እም፡ ሐዋርያት። ወለንጉሥኒ፡ ኢይደልዎ፡ ትዕግሥት፡ በእንተ፡ ቅንዐተ፡ ሃይማኖት። ቈስጠንጢኖስ፡ ተወደሰ፡ በእንተ፡ ስደቱ፡ ለአርዮስ፡ ወበእንተ፡ ጉባኤሆሙ፡ ለማኅበረ፡ ኒቂያ፡ ዘውእቶሙ፡ ፫፻፲ወ፰፡ እስከ፡ ነበረ፡ ክርስቶስ፡ ማዕከሌሆሙ፡ እንዘ፡ ኢየአምርዎ፡ ከመ፡ ፩፡ እምኔሆሙ። አቀመ፡ ለርእሱ፡ ቈስጠንጢኖስ፡ ንጉሥ፡ ዝክረ፡ ውዳሴ፡ ለትውልደ፡ ትውልድ፡ እስመ፡ በመዋዕሊሁ፡ ሥርዓተ፡ ሃይማኖት፡ ረትዐት። ወበመዋዕሊሁ፡ አስተርአየ፡ መስቀለ፡ ክርስቶስ፡ ዝሕነ፡ ማዕበለ፡ ዕልዋን፡ ወኀድአ፡ ትንሣኤ፡ መዋግድ፡ ዘመናፍቃን፡ ወቆመ፡ ርቱዐ፡ ሠርዌ፡ ሐመራ፡ ለቤተ፡ ክርስቲያን። አንፈርዐፁ፡ ኖሎተ፡ አባግዕ፡ ዘውእቶሙ፡ ኤጲስቆጶሳት፡ እለ፡ ተቀደሱ፡ በእስትንፋሰ፡ አፉሁ፡ ለኢየሱስ፡ ክርስቶስ። በከመ፡ ኮነት፡ ውድስተ፡ መንግሥተ፡ ቈስጠንጢኖስ፡ በእንተ፡ ሥርዓተ፡ ማኅበር፡ ዘኮነ፡ በመዋዕሊሁ፡ ወኮነት፡ ዝልፍተ፡ መንግሥተ፡ መርቅያን፡ ንጉሠ፡ ሮሜ፡ ዘአፍቀረ፡ ሃይማኖተ፡ ንስጥሮስ፡ እንተ፡ ወጠንዋ፡ ታስሮስ፡ ወዲድሮስ፡ ወከልዐ፡ እግዚአብሔር፡ አቅሞታ፡ ለይእቲ፡ ሃይማኖት፡ በአስተፋጥኖ፡ ሞቱ፡ ለንስጥሮስ። ወእምዝ፡ ተመይጠ፡ ኀበ፡ ሃይማኖተ፡ ልዮን፡ ወአቀመ፡ ላቲ፡ ለይእቲ፡ ሃይማኖት፡ ኤጲስቆጶሳተ፡ ፮፻፴ወ፮፡ እንዘ፡ ይኄሊ፡ በልቡ፡ ከመ፡ ትኩን፡ ካዕበተ፡ እማኅበረ፡ ኒቅያ። ወበዝኁ፡ ቈናጽል፡ ወውኅደት፡ ሃይማኖት፡ በዝኁ፡ ተኳልው፡ ወተዘርዉ፡ አባግዐ፡ ምሥጢር። በዝኁ፡ ሰባክያነ፡ ሐሰት፡ ወተግሕሰ፡ እም፡ ጉባዔሆሙ፡ ጸጋ፡ መንፈስ፡ ወኮነ፡ ምስለ፡ ዲዮስቆሮስ፡ ቅዱስ፡ ቀናዒ፡ በእንተ፡ ሃይማኖት፡ ዘተመልሐ፡ ጥረሲሁ፡ ወተነጽየ፡ መብዝኅተ፡ ጽሕሙ። ዘለፋሁ፡ ለመርቅያን፡ ናሁ፡ ክሡት፡ እንከ፡ ይእዜ፡ በኀበ፡ መሀይምናን፡ በእንተ፡ ሃይማኖቱ፡ ጽይዕት፡ ወበእንተ፡ እምነቱ፡ ርኵስት፡ እስመ፡ ዝክረ፡ ረሲዓን፡ ለዓለም፡ ይሄሉ፡ ዘምስለ፡ ዘለፋ፡ ወጽዕለት። ናሁ፡ ካዕበ፡ ዝክረ፡ ሃይማኖቱ፡ ለቈስጠንጢኖስ፡ ነያ፡ እስከ፡ ዮም፡ ዘምስለ፡ ውዳሴ፡ ወስብሐት፡ እስመ፡ ዝክረ፡ ጻድቅ፡ ካዕበ፡ ለዓለመ፡ ዓለም፡ ይሄሉ፡ ዘምስለ፡ አእኵቶ፡ ወአስተብጽዖ፡ ወወድሶ። ወእምዝ፡ ሠርዑ፡ ማኅበረ፡ ቅዱሳን፡ እለ፡ በኒቅያ፡ ሃይማኖተ፡ ርትዕተ፡ ለኵሉ፡ ሕዝበ፡ ክርስቲያን፡ ከመዝ፡ ኀብሩ፡ ወይቤሉ፡ እም፡ ኀበ፡ ቈስጠንጢኖስ፡ ንጉሥ፡ ግሩም፡ ረከብነ፡ መባሕተ፡ ከመ፡ ናስተናሥኣ፡ ወናጽንዓ፡ ለቤተ፡ ክርስቲያን፡ በሃይማኖተ፡ ኢየሱስ፡ ክርስቶስ። ወለዘዐለወ፡ ዘንተ፡ ይትኀበዮ፡ ሰይፍ፡ አሜን፡ ወአሜን። ተፈጸመት፡ ዛቲ፡ ድርሳን፡ እንተ፡ ተጽሕፈት፡ ለዘለፋ፡ አቡርዮስ፡ ረድአ፡ ሰይጣን፡ አጽሐፍክዋ፡ አነ፡ ጊዮርጊስ፡ ምስኪን፡ ወበእንበይነ፡ ኃጢአትሂ፡ ምኑን፡ ወበእንበይነ፡ እምነትየሂ፡ ዘእም፡ ሕዝበ፡ ናዝራውያን፡ ወእንበይነ፡ ጥምቀትየሂ፡ ወልደ፡ ሐዋርያት፡ ዐቢየ፡ ክርስቲያን፡ ቅኑት፡ በኃይለ፡ ሃይማኖት፡ ወኅቱም፡ በቅብዐ፡ በለሶን። ስብሐት፡ ለአብ፡ ወወልድ፡ ወመንፈስ፡ ቅዱስ፡ ለዓለመ፡ ዓለም፡ አሜን።

Against Arius ምዕራፍ፡ ፫፡ ዘኖላዊ፡ ምንባብ፡ ፩፡ በስመ፡ እግዚአብሔር፡ እም፡ ቅድመ፡ ዓለም፡ ሥላሴሁ፡ ዘአኅበረ፡ እንበለ፡ ቱሳሔ፡ ህላዌሁ፡ ዘደመረ። ዘኢኮነ፡ ፍጡረ፡ ወኢግቡረ፡ ወኢኮነ፡ ብዑደ፡ ወኢነኪረ፡ ዘእንበለ፡ ዓምድ፡ ወሰዋቅ፡ ሰማየ፡ ዘፈጠረ፡ ምድረ፡ ርግዕተ፡ በዘባነ፡ ባሕር፡ ዘአንበረ። ዐውደ፡ ፀሐይ፡ ወወርኅ፡ ከመ፡ መጽሔት፡ ዘቀመረ፡ ዘሠርዐ፡ ሎሙ፡ ሠረገላ፡ ነፋሳት፡ መጻውረ፡ ዘገብረ፡ ሎሙ፡ በገጸ፡ ሰማይ፡ ምሕዋረ፡ እንዘ፡ ይሜግብዎሙ፡ መላእክት፡ ወይመርሕዎሙ፡ ከዋክብት፡ እመንገለ፡ ጽባሕ፡ ለመንገለ፡ ዐረብ፡ አንጻረ፡ ሎቱ፡ ስብሐት፡ ለእግዚአ፡ ብርሃናት፡ ለዓለመ፡ ዓለም፡ አሜን። ንንግር፡ እንከ፡ ዘለፋሁ፡ ለአርዮስ፡ ዘበዲቁናሁ፡ አሥረፀ፡ ዕልወተ፡ ወበቅስናሁ፡ ፈረየ፡ ሦከ፡ ኃጢአት። አርዮስ፡ ሠረገላሁ፡ ለሰይጣን፡ ወሱታፌሆሙ፡ ለአጋንንት። አርዮስ፡ ሙሱነ፡ ኅሊና፡ ወጽልኅወ፡ ልብ፡ ወሕሡመ፡ ሃይማኖት። አርዮስ፡ ጽዩአ፡ ከናፍር፡ ወቍሱለ፡ ልሳን፡ ዘሐመ፡ በሕምዘ፡ ግዘት። አርዮስ፡ ርጉም፡ በአፈ፡ እግዚአብሔር፡ ጸባዖት፡ ዘረገማ፡ ለአርዌ፡ ምድር፡ ወይቤላ፡ ርግምተ፡ ኩኒ፡ እም፡ ኵሉ፡ እንስሳ፡ ወእም፡ ኵሉ፡ አራዊተ፡ ምድር፡ በእንግድዓኪ፡ ሑሪ፡ ወመሬተ፡ ብልዒ፡ ኵሎ፡ መዋዕለ፡ ሕይወትኪ። አስተፃርር፡ ማእከሌኪ፡ ወማእከለ፡ ብእሲት፡ ማእከለ፡ ዘርዕኪ፡ ወማእከለ፡ ዘርዓ፡ ውእቱ፡ ለይዕቀብ፡ ርእሰኪ፡ ወአንቲኒ፡ ዕቀቢ፡ ሰኰናሁ። ደቂቀ፡ አርዮስ፡ የዐቅቡ፡ ሰኳንወ፡ እመቦ፡ ዘረከቡ፡ እም፡ ቢጸ፡ ትሑታን፡ ከመ፡ ይሚጥዎ፡ ኀበ፡ ግዕዞሙ። ወንሕነኒ፡ ነዐቅብ፡ ርእሶ፡ እመቦ፡ ዘረከብነ፡ እመምህራኒሆሙ፡ ከመ፡ ንምትር፡ ርእሶሙ፡ ወናውቂ፡ ልሳኖሙ። አርዮስ፡ ኢፍሉጥ፡ ወኢሊሉይ፡ እም፡ ዲያብሎስ፡ ዘወድቀ፡ እም፡ ጾታ፡ መላእክት። አርዮስ፡ ኢብዑድ፡ ወኢነኪር፡ እም፡ አርዌ፡ ምድር፡ ዘአስሐታ፡ ለሔዋን። አርዮስ፡ ምቱር፡ በሰይፈ፡ እሳት፡ ዘይወጽእ፡ እም፡ አፉሁ፡ ለኢየሱስ፡ ክርስቶስ። አርዮስ፡ ሥርው፡ መሪር፡ ዘበቈለ፡ በእስክንድርያ፡ ወተመልሐ፡ በጽንዐ፡ ሃይማኖቶሙ፡ ለ፫፻፲ወ፰፡ ማኅበረ፡ ቅዱሳን። ወጥንተ፡ ነገሩሰ፡ ኮነ፡ በመዋዕሊሁ፡ ለዲዮግልድያኖስ፡ ዕልው፡ ዘአዘዘ፡ ይዕፅዉ፡ አብያተ፡ ክርስቲያናት፡ ወያርኅዉ፡ አብያተ፡ ጣዖት። ሦዐ፡ ለአጋንንት፡ ወተቀንየ፡ ለግልፎ። አዘዘ፡ ስደተ፡ ለኤጲስቆጶሳት፡ ወመጻእርተ፡ ኵነኔ፡ ዕፁበ፡ ላዕለ፡ መሀይምናን። እለሂ፡ ተመይጡ፡ ኀበ፡ አምልኮቱ፡ ሕስምት፡ ሦዑ፡ ለአጋንንት፡ እም፡ ፍርሀተ፡ ኵነኔ፡ ወእለሂ፡ ተሰዱ፡ ተኀብኡ፡ ውስተ፡ አድባር፡ ወበአታት፡ ወግበበ፡ ምድር። ወእለሂ፡ ተርፉ፡ ውሑዳን፡ ውስተ፡ አብያተ፡ ክርስቲያን፡ አሕሰሙ፡ ሃይማኖተ፡ ኵሉ፡ ነበበ፡ በከመ፡ ፈቀደ፡ ወመሀረ፡ በከመ፡ ኀለየ። ወእምዝ፡ ተሰምዐ፡ ድምጸ፡ ዕልወቱ፡ ለአርዮስ፡ እንዘ፡ ዓዲሁ፡ ዲያቆን፡ ወይቤ፡ ክርስቶስ፡ ፍጡር፡ ውእቱ፡ ለመድኃኒተ፡ ዓለም፡ ዘተፈጥረ። ወሶበ፡ ሰምዐ፡ ዘንተ፡ አውገዞ፡ ጴጥሮስ፡ ወሰደዶ፡ አፍኣ፡ እም፡ ቤተ፡ ክርስቲያን። ወሖረ፡ አርዮስ፡ ኀበ፡ አኪላስ፡ ወእለእስክንድሮስ፡ ቀሳውስት፡ ወሰአሎሙ፡ ያስተብቊዕዎ፡ ለጴጥሮስ፡ ሊቀ፡ ጳጳሳት፡ ከመ፡ ይፍትሖ፡ እም፡ ግዘቱ። ወሖሩ፡ እሙንቱ፡ ቀሳውስት፡ ኀበ፡ ጴጥሮስ፡ ሊቀ፡ ጳጳሳት፡ ሰገዱ፡ ወአስተብቍዕዎ፡ በእንተ፡ አርዮስ፡ ከመ፡ ይፍትሖ፡ እማእሠረ፡ ግዘቱ። ወአበዮሙ፡ ጴጥሮስ፡ እንዘ፡ ይብል፡ አርዮስ፡ ፍሉጥ፡ ወሊሉይ፡ እም፡ ስብሐተ፡ ኢየሱስ፡ ክርስቶስ። ወእሙንቱሂ፡ አንኁ፡ አስተብቍዖ፡ በእንተ፡ አርዮስ፡ እንዘ፡ ይመስሎሙ፡ ከመ፡ ይትመየጥ፡ ኀበ፡ ርትዕት፡ ሃይማኖት። ወሶበ፡ አጽሐብዎ፡ ብዙኀ፡ አዘዘ፡ ጴጥሮስ፡ ከመ፡ ይትገኀሡ፡ ሕዝብ፡ ወይትርፉ፡ ምስሌሁ፡ አኪላስ፡ ወእለእስክንድሮስ። ወይቤሎሙ፡ አስተርአየኒ፡ በዛቲ፡ ሌሊት፡ እግዚእየ፡ ኢየሱስ፡ ክርስቶስ፡ በአምሳለ፡ ሕፃን፡ ብሩህ፡ ወይቈጽር፡ ገጾ፡ እም፡ ኀዘን፡ ወይለብስ፡ ሥጡጠ፡ አልባሰ፡ ወይእኅዝ፡ ሥጠተ፡ ልብሱ፡ በክልዔ፡ እደዊሁ። ወእቤሎ፡ ኦ፡ እግዚእየ፡ መኑ፡ ሠጠጦ፡ ለልብስከ። ወይቤለኒ፡ አርዮስ፡ ሠጠጦ፡ ለልብስየ፡ ዑቅ፡ ኢትትወከፎ፡ እስመ፡ ሀሎ፡ ጽባሐ፡ ያስተብቍዑከ፡ በእንቲአሁ፡ ዘከፈለኒ፡ እመለኮተ፡ አቡየ፡ ኢይትዌከፎ፡ መለኮተ፡ አቡየ፡ ውስተ፡ መንግሥቱ። ወእምዝ፡ ወእምዝ፡ ኀደጉ፡ አስተብቍዖቶ፡ ለሊቀ፡ ጳጳሳት፡ እሙንቱ፡ ቀሲሳን። ወእምድኅረዝ፡ ተፈነዉ፡ ጠርባናሳተ፡ ሜትራይቁይ፡ ዘውእቶሙ፡ ጋላት፡ በትእዛዘ፡ ዲዮግልድያኖስ፡ ከሀዲ፡ ከመ፡ ይምትሩ፡ ርእሶ፡ በእንተ፡ ዘቤዘዎሙ፡ ለፄዋ፡ መርሞንቄ። ወብፁዕ፡ ጴጥሮስሰ፡ ፈጸመ፡ ስምዐ፡ ዘበሰይፍ፡ ወተከለለ፡ በስመ፡ ኢየሱስ፡ ክርስቶስ፡ ወአንፈሰ፡ እም፡ ዝ፡ ዓለም። ወድኅሬሁ፡ ተሰይመ፡ አኪላስ፡ ወሖረ፡ አርዮስ፡ ወአስተብቍዖ፡ ለአኪላስ፡ ከመ፡ ይፍትሖ፡ እም፡ ግዘቱ፡ እንተ፡ ረገሞ፡ ጴጥሮስ። ወፈትሖ፡ እም፡ ግዘቱ፡ ወሴሞ፡ ቀሲሰ፡ ወእም፡ ዝ፡ ገብአ፡ ኀበ፡ እበዱ፡ ዘትካት። ወለዲዮግልድያኖስኒ፡ ገፍትኦ፡ እግዚአብሔር፡ እመንበረ፡ መንግሥቱ፡ ወአዖሮ፡ በመንኰራኵረ፡ ወርቅ፡ ክልዔ፡ አዕይንቲሁ፡ ዘልገሰ፡ ኵለንታሁ፡ ወአጸየ፡ ልሳኑ፡ ወተስዕረ፡ እመንግሥቱ፡ ወነበረ፡ እንዘ፡ ይስእል፡ ምጽዋተ፡ በአስኳተ፡ አንጾኪያ። ወነግሠ፡ ህየንቴሁ፡ ቈስጠንጢኖስ፡ ዘእም፡ ሥርወ፡ መንግሥተ፡ ሮሜ፡ ዝሐነ፡ ሞገደ፡ ዕልዋን፡ ወኀድአ፡ ማዕበለ፡ ኃጢአት፡ አንፈሰት፡ ቤተክርስቲያን። ወተግህደ፡ ሃይማኖተ፡ ክርስቶስ፡ ወተጋብኡ፡ ኤጲስቆጶሳት፡ ፫፻፲ወ፰፡ በደብረ፡ ኒቅያ፡ እንተ፡ ይእቲ፡ ቢታንያ፡ እመ፡ አህጉር፡ ወምስሌሆሙ፡ ቈስጠንጢኖስ፡ ግሩም፡ ወመዋዒ። ወአውገዝዎ፡ ለአርዮስ፡ ዘሰመዮ፡ ለፈጣሪ፡ ፍጡረ። ወአውገዙ፡ ኵሎ፡ ዘየአምን፡ በሃይማኖቱ፡ ወሰደድዎ፡ እም፡ አግባዐ፡ መርዔቱ፡ ለክርስቶስ። ወእም፡ ድኅረ፡ ጕንዱይ፡ መዋዕል፡ ሖረ፡ ኀበ፡ ካልዕ፡ ንጉሥ፡ ወተማኅፀነ፡ ቦቱ፡ እንዘ፡ ይብል፡ አስተብቍዖሙ፡ ለካህናተ፡ እለእስክንድርያ፡ በእንቲአየ፡ ከመ፡ ይሳተፉኒ፡ በጸሎት፡ ወበቍርባን፡ ወአነሂ፡ አኀብር፡ ሃይማኖተ፡ ምስሌሆሙ። ወለአከ፡ ሎቱ፡ ንጉሥ፡ እንዘ፡ ይብል፡ ሥረዩ፡ ሎቱ፡ ለአርዮስ፡ ምግባራቲሁ፡ ዘትካት፡ ወውእቱኒ፡ የኀብር፡ ሃይማኖተክሙ፡ ወተሳተፍዎ፡ ጸሎተ፡ ወቍርባነ። ወለአኩ፡ ካህናተ፡ እለእስክንድርያ፡ ኀበ፡ ንጉሥ፡ እንዘ፡ ይብሉ፡ አርዮስ፡ የኀብእ፡ ጽልሑተ፡ ውስተ፡ ልቡ፡ ለለስደቱ፡ ይትጋነይ፡ ወይቤ፡ እትመየጥ፡ ለለበአቱ፡ ይትከሀድ፡ ወይገብእ፡ ኀበ፡ ዘትካት፡ ህላዌሁ። ጴጥሮስ፡ አውገዞ፡ ወሰደዶ፡ እም፡ ቤተ፡ ክርስቲያን። ወአኪላስ፡ ተወክፎ፡ ሶበ፡ ተጋነየ፡ ሎቱ፡ ወሤሞ፡ ቀሲሰ። ወእምዝ፡ አፈድፈደ፡ ጸሪፈ፡ ላዕለ፡ ክርስቶስ፡ ወሰደደ፡ መሀይምናነ፡ በመዋዕለ፡ መምለክያነ፡ ጣዖት። እለስክንድሮስ፡ አውገዞ፡ ወተጋነየ፡ ሎቱ፡ ወፈትሖ። ወካዕበ፡ አሕሠመ፡ ሃይማኖተ፡ ከመ፡ ቀዲሙ፡ ፫፻፲ወ፰፡ ኤጲስቆጶሳት፡ አውገዝዎ፡ ወሣልሱ፡ ዝንቱ፡ እንዘ፡ ይትጋነይ። ወንጉሥሰ፡ አስተብቍዖሙ፡ ብዙኀ፡ በመልእክቱ፡ ከመ፡ ይሳተፍዎ። ወእሙንቱኒ፡ እም፡ ፍርሀተ፡ ንጉሥ፡ ይቤሉ፡ ይግበር፡ እግዚአብሔር፡ ከመ፡ ይደሉ። ውእቱኒ፡ ይጹም፡ ወይጸሊ፡ ሰቡዐ፡ መዋዕለ፡ ወንሕነኒ፡ ንገብር፡ ከማሁ። ወወሀብዎ፡ ዕድሜ፡ መዋዕል፡ ለተሳትፎ፡ ጸሎት፡ ወቍርባን፡ እስከ፡ ዕለተ፡ እሑድ። ወበዕለተ፡ እሑድ፡ መጽአ፡ ኀቤሆሙ፡ ውስተ፡ ቤተ፡ ክርስቲያን፡ ተሰርጊዎ፡ አልባሰ፡ ቀደውተ፡ ወቆመ፡ ንስቲተ፡ ጊዜ፡ ጸሎት። ወእምዝ፡ ተሀውከ፡ ከርሡ፡ ወወጽአ፡ ጽሚተ፡ ወሖረ፡ ውስተ፡ ዐጸደ፡ ምኵሳሕ፡ ወነበረ፡ ከመ፡ ያኵስሕ፡ ወወጽአ፡ አማዑቱ፡ ወተክዕወ፡ ኵሉ፡ ንዋየ፡ ውስጡ። ወሶበ፡ ጐንደየ፡ መጺአ፡ ውስተ፡ ቤተ፡ ክርስቲያን፡ ተበሀሉ፡ ካህናት፡ ርኢናሁ፡ ለአርዮስ፡ ጊዜ፡ ጸሎት፡ ወይእዜሰ፡ አይቴኑ፡ ሖረ። ሑሩ፡ ወጸውዕዎ፡ ለነሢአ፡ ቍርባን፡ ከመ፡ ኢይትመዐዕ፡ ንጉሥ፡ ላዕሌነ። ወሶበ፡ ሖሩ፡ ለጸውዖቱ፡ ረከብዎ፡ ምውተ፡ ውስተ፡ መካነ፡ ኵስሕ፡ እንዘ፡ ክዕው፡ አማዑቱ፡ ወኵሎ፡ ንዋየ፡ ውስጡ። ወአንከሩ፡ ወሰብሕዎ፡ ለእግዚአብሔር፡ ዘአድኀኖሙ፡ እም፡ ሱታፌሁ፡ ለንፉቀ፡ ሃይማኖት። ወተፈጸመ፡ ላዕሌሁ፡ ለአርዮስ፡ ቃለ፡ ነቢይ፡ ዘይቤ፡ ሞቱ፡ ለኃጥእ፡ ጸዋግ። ወበካልዕኒ፡ ይብል፡ ግሩም፡ መቅሠፍተ፡ መዐትከ፡ ላዕለ፡ ኃጥአን። ጳውሎስኒ፡ ይቤ፡ በአምጣነ፡ ታጸንዕ፡ ልበከ፡ ወኢትኔስሕ፡ ትዘግብ፡ ለከ፡ መቅሠፍተ። በዘከመዝ፡ ኀሣር፡ ኮነ፡ ሞቱ፡ ለአርዮስ። እፎኬ፡ ይቤ፡ አርዮስ፡ ፍጡር፡ ውእቱ፡ ክርስቶስ። ውእቱሰ፡ ፩ደ፡ ጥንተ፡ ይሬሲ፡ ህላዌ፡ ዘመለኮትኒ፡ ወዘትስብእትኒ፡ እስመ፡ ህላዌ፡ መለኮትሰ፡ እም፡ ቅድመ፡ ዕለት፡ ወሰዓት፡ እም፡ ቅድመ፡ አዝማን፡ ወዓመታት፡ እም፡ ቅድመ፡ ኵሉ፡ ዘግቡር፡ ወፍጡር። ህልው፡ አብ፡ በአብናሁ፡ ወኢይትመየጥ፡ ለከዊነ፡ ወልድ፡ ወኢለከዊነ፡ መንፈስቅዱስ፡ ህልው፡ ወልድ፡ በወልድናሁ፡ ወኢይትመየጥ፡ ለከዊነ፡ አብ፡ ወኢለከዊነ፡ መንፈስ፡ ቅዱስ። ህልው፡ መንፈስቅዱስ፡ በመንፈስቅዱስናሁ፡ ወኢይትመየጥ፡ ለከዊነ፡ አብ፡ ወኢለከዊነ፡ ወልድ። አልቦ፡ ቀዲመ፡ ህላዌ፡ ለአብ፡ እም፡ ወልድ፡ ኢመጠነ፡ ቅጽበተ፡ ዐይን፡ ወኢመጠነ፡ ነበስባሰ፡ ቀራንብት። አልቦ፡ ቀዲመ፡ ህላዌ፡ ለወልድ፡ እም፡ ቅድመ፡ መንፈስቅዱስ፡ ወኢመጠነ፡ ሩጸተ፡ መባርቅት፡ ወኢመጠነ፡ ጥፍሐተ፡ አክናፈ፡ አንስርት። ኢሀሎ፡ ዕበይ፡ ላዕለ፡ አብ፡ ዘኢሀሎ፡ ላዕለ፡ ወልድ፡ ዘእንበለ፡ ተሰምዮ፡ አብ፡ ባሕቲቱ። ወኢሀሎ፡ ትሕጻጽ፡ ላዕለ፡ ወልድ፡ እም፡ ዕበየ፡ ክብር፡ ዘአቡሁ፡ ዘእንበለ፡ ተሰምዮ፡ ወልድ፡ ባሕቲቱ። ወኢሀሎ፡ ኑታጌ፡ ስብሐት፡ ላዕለ፡ መንፈስቅዱስ፡ ዘእንበለ፡ ተሰምዮ፡ መንፈስ፡ ባሕቲቱ። ረከብናሁ፡ ለአብ፡ እንዘ፡ ይሰመይ፡ አበ፡ ለወልዱ። ፍጡራነ፡ ዝ፡ ዓለም፡ ኢነአምር፡ ዘከመ፡ እፎ፡ ወለዶ፡ እስመ፡ አልቦቱ፡ እም፡ አሜሃ፡ ወኢሥጋዌ፡ ለዘርዐ፡ ሙላድ። ኢተልሕኰ፡ አሜሃ፡ አበ፡ ኵልነ፡ አዳም፡ ወኢወጽአት፡ እም፡ ገቦሁ፡ እመ፡ ኵልነ፡ ሔዋን። ወዓዲመ፡ ረከብናሁ፡ ለመንፈስቅዱስ፡ እንዘ፡ ይሰመይ፡ መንፈስቅዱስ፡ ዘአልቦቱ፡ አብ፡ ወኢወልድ፡ በግዕዘ፡ መለኮቱ፡ ወባሕቱ፡ ወለነሰ፡ ወለደነ፡ በጥምቀተ፡ ማይ፡ በግዕዘ፡ መለኮቱ። አብሂ፡ ወለደነ፡ ወልድሂ፡ ወለደነ፡ መንፈስቅዱስሂ፡ ወለደነ። በእንተ፡ አቡሁሰ፡ ወበእንተ፡ ርእሱ፡ ይቤ፡ አነኒ፡ አቡክሙ፡ አቡየሂ፡ አቡክሙ። ወበእንተሂ፡ መንፈስቅዱስ፡ ይቤ፡ ዘኢተወልደ፡ እማይ፡ ወእመንፈስ፡ ኢይክል፡ በዊአ፡ ውስተ፡ መንግሥተ፡ እግዚአብሔር፡ እስመ፡ ዘተወልደ፡ እም፡ ሥጋ፡ ሥጋ፡ ውእቱ፡ ወዘተወልደ፡ እመንፈስ፡ መንፈስ፡ ውእቱ፡ በከመ፡ አብ፡ ወለደነ፡ በብዝኀ፡ ኂሩቱ፡ ወልድሂ፡ ወለደነ፡ በብዝኀ፡ ምሕረቱ። በከመ፡ ወልድ፡ ወለደነ፡ በብዝኀ፡ ምሕረቱ፡ መንፈስቅዱስሂ፡ ወለደነ፡ በብዝኀ፡ ሣህሉ፡ ወዕበየ፡ ጸጋሁ። በከመ፡ አብ፡ ሕያው፡ ወልድሂ፡ ሕያው፡ በእንተ፡ አብ። ወበከመ፡ ወልድ፡ ሕያው፡ መንፈስቅዱስሂ፡ ሕያው፡ ወማሕየዊ፡ በእንተ፡ አባግዒሁ፡ ለወልድ። በከመ፡ አብ፡ አፍቀረነ፡ ወኢምሕኮ፡ ለወልዱ፡ ዘያፈቅር፡ እምኔነ፡ ወልድሂ፡ አፍቀረነ፡ ወመጠወ፡ ነፍሶ፡ ለቤዛ፡ አባግዒሁ። ወበከመ፡ ወልድ፡ አፍቀረነ፡ ወመጠወ፡ ነፍሶ፡ ቤዛ፡ አባግዒሁ፡ መንፈስቅዱስሂ፡ አፍቀረነ፡ ወኢያስተተ፡ ወሪደ፡ ኀበ፡ አባግዒሁ፡ ተአሠርነ፡ በአኅባለ፡ ሥላሴ፡ ወተሞቃሕነ፡ በስንሳሌሁ፡ ዘኢይትሌለይ፡ ወተቀነውነ፡ በቅንዋተ፡ ፍቅሩ፡ ዘኢይትመላሕ፡ እም፡ አልባቢነ። አኀዝናሁ፡ ወኢነኀድጎ፡ ውእቱሂ፡ አፍቀረነ፡ ወኢይገድፈነ። አስመክነ፡ ዲቤሁ፡ በሃይማኖት፡ ወኢንትገኀሥ፡ እምኔሁ፡ ለይምን፡ ወለፅግም። አንበርናሁ፡ ከመ፡ ሕልቀት፡ ውስተ፡ ልብነ፡ ወከመ፡ ማዕተብ፡ ውስተ፡ መዝራዕትነ። ወደይናሁ፡ ከመ፡ ባሕርይ፡ ውስተ፡ አስከሬነ፡ ልብነ፡ ወከመ፡ መካልየ፡ ወርቅ፡ ውስተ፡ መዝገበ፡ ኅሊናነ። ለበስናሁ፡ ከመ፡ ሞጣሕት፡ ወተአጸፍናሁ፡ ከመ፡ አጽፈ፡ ሜላት። ቀነትናሁ፡ ከመ፡ ሰይፍ፡ ዘሐራ፡ ነገሥት፡ ወወልተውናሁ፡ ከመ፡ ወልታ፡ መዊዕ፡ ዘድልው፡ ለንዋየ፡ ጸብዕ፡ እስመ፡ መልዐ፡ ውስተ፡ ልብነ፡ ፍቅረ፡ ዚአሁ፡ ከመ፡ ተከዜ፡ ግዮን፡ በወርኀ፡ ኤሉል። ወከመ፡ ተከዜ፡ ዮርዳኖስ፡ ዘጊዜ፡ ማእረር። ከመ፡ ተከዜ፡ ጤግሮስ፡ አሜ፡ ክረምት፡ ወከመ፡ ተከዜ፡ ኤፍራጥስ፡ አመ፡ ይሰዊ፡ ሥርናይ። ሰቀዮ፡ ለልብነ፡ በአፍላገ፡ ወንጌል፡ ወአፅበቶ፡ ለሐመርነ፡ ውስተ፡ ቀላየ፡ ሃይማኖት። መስቀረ፡ ገብረ፡ እም፡ ዕፀወ፡ ሊባኖስ፡ ዘውእቶሙ፡ ነቢያት፡ አዕፁቀ፡ አብርሃም፡ ይስሐቅ፡ ወያዕቆብ። ወኖትያተሂ፡ አርአየ፡ እለ፡ ይትኬወሩ፡ ውስተ፡ ባሕረ፡ ዓለም፡ ፲ወ፪፡ ዕደወ፡ ኃይል፡ ዘእም፡ ፲ወ፪፡ ሕዝበ፡ ዲዮስጶራ፡ ዘውእቶሙ፡ ሐዋርያት። ወለመርድአ፡ ግብር፡ ዘይተግህ፡ ለሥርዓተ፡ አሕማር፡ ዘሃይማኖት፡ ኀረየ፡ ፩፡ ወሬዛ፡ ዘእምነ፡ ተርሴስ፡ ዘቂልቅያ፡ ዘእም፡ ሕዝበ፡ ብንያም፡ ዘውእቱ፡ ጳውሎስ፡ ዘጽሑፍ፡ ዜናሁ፡ ውስተ፡ መጽሐፈ፡ አብረክሲስ፡ እንተ፡ ይእቲ፡ መጽሐፈ፡ ዜናሆሙ፡ ለሐዋርያት። ወህየንተ፡ መቃድፍ፡ አርአየ፡ ፸፡ ዕደወ፡ እለ፡ ይትራድኡ፡ ለአርውፆ፡ ሐመር። ንግባእኬ፡ ኀበ፡ ዘለፋሁ፡ ለአርዮስ፡ ዘይቤ፡ ፍጡር፡ ውእቱ፡ ክርስቶስ። ኦ፡ ዕዉረ፡ ልብ፡ አርዮስ፡ ትብልኑ፡ ከመ፡ ክርስቶስ፡ ፍጡር፡ ውእቱ፡ ዘበእንቲአሁ፡ ተብህለ፡ በነቢይ፡ እም፡ ቅድመ፡ ፀሐይ፡ ሀሎ፡ ስሙ። ወካዕበ፡ ይቤ፡ ወለድኩከ፡ እም፡ ከርሥ፡ እም፡ ቅድመ፡ ኮከበ፡ ጽባሕ። ለሊሁኒ፡ ይቤ፡ በወንጌል፡ ሰብሐኒ፡ አባ፡ በስብሐቲከ፡ ዘሀሎ፡ ምስሌከ፡ እም፡ ቅድመ፡ ይትፈጠር፡ ዓለም። ወመጽአ፡ ቃል፡ እም፡ ሰማይ፡ ዘይብል፡ ሰባሕኩከሂ፡ ወዓዲ፡ እሴብሐከ። እመሰ፡ ፍጡር፡ ውእቱ፡ ክርስቶስ፡ እም፡ አይቴ፡ እም፡ ተረክበ፡ ስብሐቲሁ፡ እም፡ ቅድመ፡ ፍጥረተ፡ ዓለም። ወእመሂ፡ ኢተሰብሐ፡ እም፡ ቅድመ፡ ይትፈጠር፡ ዓለም፡ እም፡ ኢይቤሎ፡ አቡሁ፡ ሰባሕኩከሂ፡ ወዓዲ፡ እሴብሐከ። በእንተሰ፡ ህላዌ፡ መለኮት፡ ይቤ፡ በአፈ፡ ነቢይ፡ እም፡ ቅድመ፡ ዓለም፡ ወለደኒ፡ እም፡ ቅድመ፡ ያስተርኢ፡ ጽንዐ፡ ሰማያት፡ ወእም፡ ቅድመ፡ ይጣዕጥዕ፡ መሠረተ፡ አውግር። ወበእንተኒ፡ ህላዌ፡ ትስብእት፡ ትብል፡ ቅድስት፡ ኦሪት፡ ወይቤ፡ እግዚአብሔር፡ አዳም፡ ኮነ፡ ከመ፡ ፩፡ እምኔነ። በእንተ፡ ልደቱ፡ ዘእም፡ አብ፡ ይቤ፡ ዮሐንስ፡ ወንጌላዊ፡ ቀዳሚሁ፡ ቃል፡ ውእቱ፡ ወውእቱ፡ ቃል፡ እም፡ ኀበ፡ እግዚአብሔር፡ ውእቱ፡ ወእግዚአብሔር፡ ውእቱ፡ ቃል፡ ወከማሁ፡ እም፡ ቀዲሙ፡ ኀበ፡ እግዚአብሔር፡ ውእቱ፡ ወኵሉ፡ ቦቱ፡ ኮነ፡ ወዘእንበሌሁሰ፡ አልቦ፡ ዘኮነ። ስማዕ፡ ዘንተ፡ ቃለ፡ ወንጌላዊ፡ እስመ፡ ዘመለኮት፡ ይትናገር፡ ወያቀድም፡ ወይብል፡ ቀዳሚሁ፡ ቃል፡ ውእቱ። ቃለ፡ ይሰምዮ፡ ለወልድ፡ በእንተ፡ ዘይዜኑ፡ ትእዛዘ፡ አብ፡ በከመ፡ ይቤ፡ ለሊሁ፡ ኵሎ፡ ዘሰማዕኩ፡ በኀበ፡ አብ፡ እነግር። ወእምዝ፡ ያተሉ፡ ወይብል፡ ወውእቱ፡ ቃል፡ እም፡ ኀበ፡ እግዚአብሔር፡ ውእቱ። ዝኒ፡ ከመ፡ እም፡ ኀበ፡ እግዚአብሔር፡ ውእቱ፡ ይነግር፡ ወከመ፡ ኢታምስሎሙ፡ ነቢበ፡ ዘበእዝን፡ ወመልክእ፡ አልቦ፡ ይሤልስ፡ ወይብል፡ ወእግዚአብሔር፡ ውእቱ፡ ቃል። አንሥአ፡ ርእሰ፡ ኅሊናሁ፡ ንጽሕት፡ ወንጌላዊ፡ ከመ፡ ይትናገር፡ ልዑላተ፡ ወይቤ፡ ዘቦቱ፡ ኵሉ፡ ኮነ። ወዘእንበሌሁሰ፡ አልቦ፡ ዘኮነ። ናሁኬ፡ አለበወ፡ ወአጠየቀ፡ ከመ፡ አልቦ፡ ዘገብረ፡ አብ፡ ዘእንበለ፡ ወልድ። ከመ፡ ለሊሁ፡ ቃል፡ ውእቱ፡ ዜነወ። ወከመ፡ ምስለ፡ አብኒ፡ እም፡ ቅድመ፡ ዓለም፡ ህልው፡ አይድዐ። ወከመ፡ ለሊሁኒ፡ ቃለ፡ እግዚአብሔር፡ ውእቱ፡ ነገረ። ወከመ፡ ፍጥረተ፡ ዓለምኒ፡ ዘእንበለ፡ ወልድ፡ አልቦ፡ ዘኮነ፡ አጠየቀ። ሰይፈ፡ ልሳኑ፡ ለዮሐንስ፡ ወንጌላዊ፡ መተረ፡ ልሳኖ፡ ለአርዮስ፡ ዘይነብብ፡ ጽርፈተ፡ ላዕለ፡ አምላክነ። ስማዕኬ፡ ኦ፡ አርዮሳዊ፡ ዘከመ፡ ይቤልዎ፡ አይሁድ፡ ለእግዚእነ፡ ፶፡ ዓመት፡ አልብከ፡ አብርሃምሃ፡ ርኢከ፡ ወነሥኡ፡ ዕብነ፡ ካዕበ፡ ከመ፡ ይውግርዎ። ይኄይስ፡ እበደ፡ ዚአሆሙ፡ እም፡ እበደ፡ ዚአከ። አማንኬ፡ ይቤሉ፡ በእንተ፡ ትስብእቱሰ፡ ይደምጽ፡ እስመ፡ ፴ወ፫፡ ዓመቱ፡ ለኢየሱስ፡ እስከ፡ አመ፡ ተሰቅለ። አማንኬ፡ የሐጽጽ፡ ፴፡ እም፡ ፶፡ ኁልቈ፡ ዓመተ፡ ልደቱ፡ ዘእማርያም፡ ወኢያእመሩ፡ ልደቶ፡ ዘእም፡ አብ፡ ወመሰሎሙ፡ ወልደ፡ ዮሴፍ፡ ውእቱ። ርእዩ፡ እሞ፡ ምድራዊተ፡ ወኢርእዩ፡ አቡሁ፡ ሰማያዌ፡ ርእዩ፡ ውርዙቶ፡ ዘበሥጋ፡ ወኢያእመሩ፡ ህላዌሁ፡ እም፡ ቅድመ፡ ዓለም። ርእይዎ፡ እንዘ፡ ይረፍቅ፡ ምስለ፡ ኃጥአን፡ ወይትገሰስ፡ በእደ፡ ዘማዊት፡ ወኢርእይዎ፡ እንዘ፡ ይጼዓን፡ ዲበ፡ ኪሩቤል፡ ወይትቄደስ፡ እም፡ ሱራፌል። መጽአ፡ ኀቤሆሙ፡ በትሕትና፡ ከመ፡ ኢያእምርዎ፡ ወኢያስተርአዮሙ፡ በዕበየ፡ መለኮቱ፡ ከመ፡ ኢይለብውዎ። ወባሕቱ፡ ደጐፆሙ፡ በሐጸ፡ ቃል፡ ሶበ፡ ይብል፡ ዘእንበለ፡ ይትወለድ፡ አብርሃም፡ ሀሎኩ፡ አነ። መሰሎሙ፡ ከመ፡ ዘአብደ፡ ወተሐዘብዎ፡ ከመ፡ ዘሐሰወ። ወበእንተዝ፡ ነሥኡ፡ ዕብነ፡ ከመ፡ ይውግርዎ። ወአንተሰኬ፡ ኦ፡ አርዮስ፡ ትብል፡ እንከ፡ ክርስቲያናዊ፡ አነ፡ ወጥሙቅ። ወእመሰ፡ ክርስቲያናዊ፡ አንተ፡ በስመ፡ መኑ፡ ተጠመቀ፡ በስመ፡ አብኑ፡ ዘእንበለ፡ ወልድ። ናሁኬ፡ ኢይደሉ፡ ተጠምቆ፡ ዘእንበለ፡ በሥላሴ፡ በከመ፡ ይቤ፡ በወንጌል፡ እንዘ፡ ታጠምቅዎሙ፡ በሉ፡ በስመ፡ አብ፡ ወወልድ፡ ወመንፈስቅዱስ። ወእመሂ፡ ትብል፡ ተጠመቁ፡ በስመ፡ አብ፡ ፈጣሪ፡ ወበስመ፡ ወልድ፡ ፍጡር፡ ናሁኬ፡ አሕሠምከ፡ ጥምቀተከ፡ እስመ፡ ረሰይከ፡ ጸጋ፡ ጥምቀትከ፡ ላዕለ፡ ፍጡራን። ወበእንተ፡ ቀሪበ፡ ቍርባንኒ፡ ትብልኑ፡ እበልዕ፡ ሥጋ፡ እጓለ፡ እመ፡ ሕያው፡ ዘእንበለ፡ ኃይለ፡ መለኮት፡ ወእሰቲ፡ ደመ፡ ሰብእ፡ ዘእንበለ፡ ቱሳሔ፡ መንፈስቅዱስ። ኮንከ፡ ነሣቲሃ፡ ለሕግ፡ እስከ፡ ለገሲሰ፡ አብድንተ፡ ሰብእ፡ ታረኵስ፡ ኦሪት፡ እፎኬ፡ እንከ፡ ለበሊዐ፡ ሥጋ፡ ሰብእ። እመሰ፡ ይደልዎ፡ ለሰብእ፡ በሊዐ፡ ሥጋሆሙ፡ ለቅዱሳን፡ ወእም፡ ደለዎሙ፡ ለእስራኤል፡ በሊዐ፡ ሥጋሁ፡ ለሙሴ፡ እስመ፡ ውእቱ፡ መጋቤ፡ ሕጎሙ፡ ወተመጣዌ፡ ኦሪቶሙ። ወእም፡ ደለወነ፡ ለነሂ፡ ከመ፡ ንብላዕ፡ ሥጋሆሙ፡ ለሐዋርያት፡ ወከመ፡ ንስቲ፡ ደሞሙ፡ ለአርዳአ፡ ኢየሱስ፡ ክርስቶስ። እመሰ፡ ይትቄደስ፡ ሥጋሁ፡ ለፍጡር፡ በደመ፡ ፍጡራን፡ እም፡ ተቀደሱ፡ አበው፡ በደመ፡ አቤል፡ ወእም፡ ድኅኑ፡ በሞቱ፡ እም፡ ፍትሐ፡ ኵነኔ፡ ዘወጽአ፡ ላዕለ፡ አዳም። ወጽአ፡ ትእዛዝ፡ እም፡ ኀበ፡ እግዚአብሔር፡ ኀበ፡ አብርሃም፡ ከመ፡ ይሡዖ፡ ለይስሐቅ፡ ወልዱ። ወሶበ፡ ተኀበለ፡ ለሕርደቱ፡ ወመልሐ፡ መጥባሕቶ፡ ለጠቢሕ፡ አኅደጎ፡ ቃለ፡ እግዚአብሔር፡ ከመ፡ ኢይጥብሖ። ወአውረደ፡ ሎቱ፡ ቤዛሁ፡ በግዐ፡ እስመ፡ እሙር፡ ውእቱ፡ በመጽሐፈ፡ ሕግ፡ ወሥርዓት፡ ወኢእዙዝ፡ በሊዐ፡ ሥጋሁ፡ ለእጓለ፡ እመ፡ ሕያው። ወጥብሐተ፡ በግዕሰ፡ ወብልዐተ፡ ሥጋሁ፡ ልማድ፡ ውእቱ። እመሂ፡ ለበሊዕ፡ ወእመሂ፡ ለሠዊዕ። አዘዞ፡ እግዚአብሔር፡ ከመ፡ ያመክሮ፡ ወይቤሎ፡ ሡዕ፡ ወልደከ፡ ዘታፈቅር፡ ይስሐቅሃ። ወካዕበመ፡ ይቤሎ፡ ኢታውርድ፡ እዴከ፡ ላዕለ፡ ወልድከ፡ አእመርኩ፡ ከመ፡ ታፈቅረኒ። ቀዲሙሰ፡ ኢያእመረኑ፡ እግዚአብሐር፡ ከመ፡ ያፈቅሮ፡ አብርሃም፡ ሐሰ፡ ሎቱ። ወባሕቱ፡ ኀደገ፡ ለነ፡ ትእምርተ፡ ከመ፡ ናእምር፡ ዘከመ፡ ያፈቅሮ፡ አብርሃም፡ ለእግዚአብሔር፡ ከመ፡ ኢንበል፡ በምንትኬ፡ አፍቀሮ፡ እግዚአብሔር፡ ለአብርሃም፡ ድንግልኑ፡ ውእቱ፡ አው፡ መነኰስ፡ ሰማዕትኑ፡ ውእቱ፡ አው፡ መስተጋድል፡ በለቢሰ፡ ጻማ። ረከብነኬ፡ በኀበ፡ አብርሃም፡ ገድለ፡ ኵሎሙ፡ ቅዱሳን፡ ቀንዐ፡ ለአምልኮ፡ እግዚአብሔር፡ ወአውዐየ፡ ቤተ፡ አማልክተ፡ አበዊሁ፡ ምስለ፡ ጣዖታቲሆሙ። ወበእንተዝ፡ ኮነ፡ አቡሁ፡ ለሙሴ፡ ዘአውጽአ፡ እሳተ፡ እማዕጠንታቲሆሙ፡ ለደቂቀ፡ ቆሬ፡ እስከ፡ በልዐቶሙ። ወካዕበ፡ ኮነ፡ አቡሁ፡ ለኤልያስ፡ ዘአውዐዮሙ፡ ለ፪፡ አርእስተ፡ ፶፡ ዕደው፡ በአውርዶ፡ እሳት፡ እም፡ ኀበ፡ አግዚአብሔር፡ ዘውእቶሙ፡ ሐራ፡ ንጉሥ፡ መምለክያነ፡ ጣዖት። ወወጽአት፡ ትእዛዝ፡ እም፡ ኀበ፡ አግዚአብሔር፡ ላዕለ፡ አብርሃም፡ ከመ፡ ይጻእ፡ እም፡ ቤተ፡ አቡሁ፡ ወእም፡ ብሔረ፡ ሙላዲሁ። ወወጽአ፡ እንዘ፡ ይትፌሣሕ፡ በእግዚአብሔር። ወበእንተዝ፡ ተሰምየ፡ አቡሆሙ፡ ለመነኰሳት፡ ዘቦሙ፡ ትእዛዝ፡ ለኀዲገ፡ አበው፡ ወውሉድ፡ ወለኀዲገ፡ አዝርዕት፡ ወገራውህ። ተመከረ፡ በሂደተ፡ ብእሲቱ፡ ሳራ፡ እም፡ ኀበ፡ ፈርዖን፡ ንጉሠ፡ ግብጽ፡ ወእም፡ አቤሜሌክ፡ ንጉሠ፡ ጌራራ። ወበእንተዝ፡ ኮነ፡ አቡሆሙ፡ ለግፉዓን። አዘዞ፡ እግዚአብሔር፡ ከመ፡ ይትገዘር፡ አመ፡ ፺ወ፱፡ ዓመታቲሁ፡ ወኢኀፈረ፡ ከሢተ፡ ዕርቃኖ፡ ለተከስቦ፡ ከመ፡ ደቂቅ። በእንተዝ፡ ተሰምየ፡ አቡሆሙ፡ ለሕፃናት፡ ወኢፈርሀ፡ ሕማመ፡ ተወቅዮ፡ ቍልፈተ፡ ነፍስቱ፡ እንዘ፡ አረጋዊ፡ ውእቱ። ወበእንተዝ፡ ተሰምየ፡ አቡሆሙ፡ ለሰማዕታት፡ እስመ፡ ኢየሐጽጽ፡ ሕማመ፡ ግዝሮሙ፡ ለአእሩግ፡ እም፡ ሕማመ፡ ኅርደቶሙ፡ ለንዑሳን። ተአዘዘ፡ ከመ፡ ይሡዖ፡ ለይስሐቅ፡ ወልዱ፡ ዘያፈቅር፡ ወኢምሕኮ፡ አብርሃም፡ ለወልዱ፡ ዘያፈቅር፡ አብደረ፡ ይግበር፡ ትእዛዘ፡ እግዚአብሔር፡ እም፡ ይምሐኮ፡ ለይስሐቅ፡ ወልዱ። ተሐበለ፡ ከመ፡ ይሕርዶ፡ ወአስከቦ፡ ከመ፡ ይዝብሖ። ወአውረደ፡ እግዚአብሔር፡ በሐኰ፡ ጸዓዳ፡ ለተውላጠ፡ ይስሐቅ፡ ወልደ፡ አብርሃም። እግዚአብሔርኒ፡ ኢምሕከ፡ ወልዶ፡ ዘያፈቅር፡ ወፈነዎ፡ ከመ፡ ይሠገው፡ እም፡ ዘርዐ፡ ይስሐቅ፡ ወልደ፡ አብርሃም፡ ዘውእቱ፡ በግዕ፡ በኀበ፡ ኢሳይያስ፡ ወዮሐንስ። ኅብስተ፡ ሥርናይኒ፡ ወሞጻሕተ፡ ወይን፡ በኀበ፡ መልከጼደቅ። ላሕም፡ መግዝዕ፡ በኀበ፡ ሉቃስ፡ ወመሥዋዕት፡ ንጹሕ፡ በኀበ፡ ኵሎሙ፡ ሐዋርያት፡ ዘአዘዘ፡ ከመ፡ ያዕርጉ፡ ለሥርየተ፡ ኃጢአተ፡ ኵሎሙ፡ አሕዛብ፡ እምሥራቀ፡ ፀሐይ፡ እስከነ፡ ዐረብ፡ እም፡ አጽናፈ፡ ሰሜን፡ ወእስከ፡ ደቡብ። አእመረኬ፡ ፈጣሪ፡ ከመ፡ ኢይትቄደስ፡ ሰብእ፡ በቍርባነ፡ ሥጋሁ፡ ለሰብእ፡ ዘእንበለ፡ በቍርባነ፡ ሥጋሁ፡ ለወልደ፡ እግዚአብሔር፡ ወተሠገወ፡ እም፡ ውሉደ፡ ሰብእ። አእመረኬ፡ ሕያው፡ ዘኢይመውት፡ ከመ፡ ኢይትቄደስ፡ እጓለ፡ እመ፡ ሕያው፡ በቍርባነ፡ ደሙ፡ ለእጓለ፡ እመ፡ ሕያው፡ ዘእንበለ፡ በቍርባነ፡ ደሙ፡ ለወልደ፡ አምላክ፡ ሕያው፡ ዘተሠገወ፡ እም፡ እጓለ፡ እመ፡ ሕያው። ዝኩ፡ ሕያው፡ ዘኢይመውት፡ ለብሰ፡ ሥጋ፡ ዘይመውት። ዝኩ፡ ኃይል፡ ዘኢይማስን፡ ለብሰ፡ ሥጋ፡ ዘይማስን። ለውእቱ፡ ሥጋ፡ ዘይማስን፡ ረሰዮ፡ ነባቤ፡ ዘኢይማስን። ኀደረ፡ ለሐኵሁ፡ ለአዳም፡ ኀበ፡ ወለተ፡ አዳም፡ ዘበ፷ወ፪፡ ትውልድ። አኮ፡ ዘአምጽአ፡ ሥጋ፡ ንጽሕተ፡ ለርእሱ፡ እም፡ ሰማየ፡ ሰማያት፡ ከመ፡ ይሠገው፡ ባቲ፡ አላ፡ ለሊሁ፡ ኃይል፡ ወረደ፡ እንዘ፡ ኢየሐጽጽ፡ እም፡ ህላዌሁ። ወረደ፡ እንዘ፡ ኢይትሐወስ፡ ወረደ፡ እንበለ፡ ድምጽ። ኀደረ፡ ውስተ፡ ማኅፀነ፡ ድንግል፡ እንዘ፡ ኢይትጋባእ፡ በሙላድ፡ ወኢይትዔለድ፡ በማኅፀን፡ ተሠገወ፡ ፈጣሪ፡ እም፡ ወለተ፡ ፍጡራን። ኢዕፁብ፡ ሎቱ፡ ለነዳቂ፡ ኀዲር፡ ኀበ፡ ዘነደቀ፡ ጽርሕ፡ ኢኀሣር፡ ሎቱ፡ ለለሓኲ፡ ለቢሰ፡ ሥጋ፡ ዘለሐኵ። ንግባእኬ፡ ኀበ፡ ዘለፋሁ፡ ለአርዮስ፡ ኦ፡ አርዮስ፡ ሠርፀ፡ ዕልወት፡ ትብሎኑ፡ ለፈጣሪ፡ ፍጥረተ፡ ዘይቤ፡ አነ፡ ወአብ፡ ፩፡ ንሕነ፡ ፍጡርኑ። ወዘይቤ፡ ዓዲ፡ ወዘኪያየ፡ ሰምዐ፡ ሰምዖ፡ ለዘፈነወኒ፡ ወዘኪያየ፡ ክሕደ፡ ክሕዶ፡ ለዘፈነወኒ። ወዓዲመ፡ ይቤ፡ አልቦ፡ ዘይክል፡ መጺአ፡ ኀበ፡ አብ፡ ዘእንበለ፡ እንተ፡ ኀቤየ። ወካዕበመ፡ ይቤ፡ ኵሉ፡ ዘዚአከ፡ ዚአየ፡ ውእቱ፡ ወዚአየኒ፡ ዚአከ፡ ውእቱ። ወዓዲመ፡ ይቤ፡ ኵሉ፡ ዘቦ፡ ለአቡየ፡ ዚአየ፡ ውእቱ። ወዓዲመ፡ ይቤ፡ በከመ፡ አብ፡ ሕያው፡ አነሂ፡ ሕያው፡ በእንተ፡ አብ፡ ወዘበልዐ፡ ሥጋየ፡ የሐዩ፡ በእንቲአየ። ናሁኬ፡ አስተሳተፈነ፡ ሕያው፡ ወማኅየዊ፡ በበሊዐ፡ ሥጋሁ፡ ምስለ፡ መለኮተ፡ ዚአሁ፡ ወረሰየነ፡ ሱቱፋነ፡ ለሕይወተ፡ ዚአሁ፡ በከመ፡ ይቤ፡ ዮሐንስ፡ ወንጌላዊ፡ በውስተ፡ መልእክቱ፡ ቀዳማይ፡ ወሱታፌነሰ፡ ምስለ፡ አብ፡ ወምስለ፡ ወልዱ፡ ኢየሱስ፡ ክርስቶስ። ንሕነሰ፡ ነአምነክሙ፡ ሥጋሁ፡ ለክርስቶስ፡ ፍጡር፡ ውእቱ፡ ዘእም፡ ሥርወ፡ አዳም፡ ወሔዋን፡ ወመለኮቱሰ፡ ለሐኲሁ፡ ውእቱ፡ ለአዳም፡ ወገባሪሃ፡ ለሔዋን። ወሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢተገምረ፡ በማኅፀን። ወሶበሂ፡ ኢኮነ፡ መለኮቱ፡ ፈጣሬ፡ እመ፡ ኢተረክበ፡ ማኅተመ፡ ድንግልናሃ፡ ለእሙ፡ እም፡ ድኅረ፡ ልደቱ። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢተሐቅፈ፡ በአብራክ፡ ወእመ፡ ኢተገሰ፡ በአእዳው። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢያንቅዐ፡ ሐሊበ፡ ድንግልና፡ እም፡ አጥባተ፡ ወለት፡ እንተ፡ ኢተአምር፡ ብእሴ። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢልህቀ፡ በበሕቅ። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢይቤ፡ ዘእንበለ፡ ይትወለድ፡ አብርሃም፡ ሀሎኩ፡ አነ። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢኮነ፡ ስምዐ፡ አብ፡ በእንቲአሁ፡ እንዘ፡ ይብል፡ ዝንቱ፡ ውእቱ፡ ወልድየ፡ ዘአፈቅር፡ ሎቱ፡ ስምዕዎ። ወዓዲመ፡ እም፡ ኢነበረ፡ ዲቤሁ፡ መንፈስቅዱስ፡ በርእየተ፡ ርግብ፡ ዘሥጋ። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢሰአለ፡ ማየ፡ ለጽምኡ፡ እም፡ ሳምራዊት። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢረሰዮ፡ ለማይ፡ ወይነ፡ በቃና፡ ዘገሊላ። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢገሰሰት፡ እንተ፡ ይውሕዛ፡ ደም፡ ዘፈረ፡ አልባሲሁ፡ ወኃጥእትኒ፡ እገሪሁ። ወሶበሰ፡ ኢኮነ፡ መለኮቱ፡ ፈጣሬ፡ እም፡ ኢይቤ፡ በእንተ፡ ዘገሰሰቶ፡ ልብሶ፡ አእመርኩ፡ ከመ፡ ኃይል፡ ወጽአ፡ እምኔየ። ኃይለ፡ ይሰምዮ፡ ለመለኮቱ፡ ወበኃይለ፡ መለኮቱ፡ አይበሰ፡ ነቅዐ፡ ደማ። ወእም፡ ኢይቤ፡ ካዕበ፡ በእንተ፡ ኃጥእትኒ፡ እንተ፡ ገሰሰት፡ እገሪሁ፡ ተኀድገ፡ ለኪ፡ ኀጢአትኪ። መኑ፡ ይክል፡ ኀዲገ፡ ኃጢአት፡ ዘእንበለ፡ እግዚአብሔር፡ ባሕቲቱ። ወሶበሰ፡ ኢኮነ፡ ሥጋዌሁ፡ ፍጡረ፡ እመ፡ ኢጸውዓ፡ ለወለተ፡ ኢያኢሮስ፡ ወለትየ፡ እንዘ፡ ይብል። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢያንሥኣ፡ ሕያውታ፡ እም፡ ድኅረ፡ ሞተት። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢገብረ፡ ጽቡረ፡ ውስተ፡ መሬተ፡ ምድር፡ በምራቁ። ወሶበ፡ ኢኮነ፡ መለኮቱ፡ ፈጣሬ፡ እም፡ ኢከሠተ፡ አዕይንቲሁ፡ ለዘዕዉሩ፡ ተወልደ፡ በቅብዐተ፡ ምራቁ። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢኖመ፡ በከርሠ፡ ሐመር፡ እንዘ፡ ይትነሥኡ፡ መዋግድ። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢያዝሐና፡ ለባሕር፡ በተግሣጸ፡ ነፋሳት። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢደክመ፡ በሐዊረ፡ ፍኖት። ሶበሰ፡ ኢኮነ፡ መለኮቱ፡ ፈጣሬ፡ እም፡ ኢያሕየዎሙ፡ ለስቡራነ፡ እግር፡ ወእም፡ ኢያጒየዮሙ፡ ከመ፡ ሩጸተ፡ ኀየል። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢርኅበ። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢያጽገቦሙ፡ ለ፶፻፡ ዕደው፡ በኀምስ፡ ኅብስት፡ ወበ፪፡ ዓሣት። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢበከየ፡ በእንተ፡ ሞተ፡ አልዓዛር። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢያውጽኦ፡ በጽዋዔ፡ እም፡ ከርሠ፡ ዝሕር። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢተጽዕነ፡ ዲበ፡ እድግት፡ ወዕዋላ። ሶበሂ፡ ኢኮነ፡ መለኮቱ፡ ፈጣሬ፡ እም፡ ኢተሰብሐ፡ እም፡ አፈ፡ ደቂቅ፡ ወሕፃናት። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢተጸፍአ፡ እም፡ አግብርተ፡ ሊቃነ፡ ካህናት። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢያግብአ፡ እዝኖ፡ ለዘመተሮ፡ ጴጥሮስ፡ በመጥባሕት። ወሶበሰ፡ ኢኮነ፡ ሥጋዌሁ፡ ፍጡረ፡ እመ፡ ኢቆመ፡ ቅድመ፡ ዐውደ፡ ጲላጦስ። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢይቤሎ፡ ለጲላጦስ፡ ወሶበሰ፡ ኮነ፡ እምዝ፡ ዓለም፡ መንግሥትየ፡ እም፡ ተበአሱ፡ ወእም፡ ተቃተሉ፡ ሊተ፡ ወዓልያንየ፡ ከመ፡ ኢያግብኡኒ፡ አይሁድ፡ ኀቤከ። ሶበሰ፡ ኢኮነ፡ ሥጋዌሁ፡ ፍጡረ፡ እመ፡ ኢሰለብዎ፡ አልባሲሁ፡ ሐራ፡ ጲላጦስ። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢኀፈረ፡ ፀሐይ፡ ነጽሮቶ፡ ዕርቃኖ፡ ወእም፡ ኢሠወረ፡ ብርሃኖ፡ በአጽልሞተ፡ ዓለም። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢይቤ፡ አምላኪየ፡ አምላኪየ፡ ነጽረኒ፡ ወለምንት፡ ኀደገኒ። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢይቤ፡ ካዕበ፡ አባ፡ ውስተ፡ እዴከ፡ አማኀፅን፡ ነፍስየ። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢጥዕመ፡ ሞተ፡ በሥጋ። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢያንቀልቀላ፡ ለምድር፡ ወእም፡ ኢሰጠጦ፡ ለመንጦላዕተ፡ ቤተ፡ መቅደስ። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢተረግዘ፡ በኵናተ፡ ሐራዊ። ወሶበሂ፡ ኢኮነ፡ መለኮቱ፡ ፈጣሬ፡ እመ፡ ኢያንቅዐ፡ ኰኵሐ፡ ንጥበተ፡ ደሙ፡ ወእም፡ ኢያንሥአ፡ ሙታነ፡ ጠለ፡ ምሕረት፡ ዘውኅዘ፡ እም፡ ገቦሁ። ወሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢኖመ፡ ውስተ፡ ከርሠ፡ መቃብር፡ ከመ፡ አብድንተ፡ ትካት። ወሶበሂ፡ ኢኮነ፡ መለኮቱ፡ ፈጣሬ፡ እመ፡ ኢሦጣ፡ ለነፍሱ፡ ውስተ፡ ሥጋሁ፡ ለአንሥኦ፡ በከመ፡ ይቤ፡ ለሊሁ፡ ለልየ፡ እሜጥዋ፡ በፈቃድየ። ብውሕ፡ ሊተ፡ አንብራ፡ ወካዕበ፡ ብውሕ፡ ሊተ፡ አንሥኣ። ወዘንተ፡ ትእዛዘ፡ ነሣእኩ፡ በኀበ፡ አቡየ። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢረፈቀ፡ ምስለ፡ አርዳኢሁ፡ ለበሊዐ፡ ማዕድ፡ በምሴተ፡ እሑድ፡ እንተ፡ ባቲ፡ ተንሥአ። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢነፍሐ፡ ውስተ፡ ገጾሙ፡ ለአርዳኢሁ፡ እንዘ፡ ይብል፡ ንሥኡ፡ መንፈሰ፡ ቅዱሰ፡ ለእለ፡ ኀደግሙ፡ ኀጢአት፡ ይትኀደግ፡ ሎሙ፡ ወለእለ፡ ኢኀደግሙ፡ ኢይትኀደግ፡ ሎሙ። ሶበሰ፡ ኢኮነ፡ ሥጋዌሁ፡ ፍጡረ፡ እም፡ ኢያንበረ፡ እዴሁ፡ ላዕለ፡ ሐዋርያቲሁ፡ በከመ፡ ሥርዓተ፡ መምህራን፡ ላዕለ፡ አርዳእ። ወሶበሂ፡ ኢኮነ፡ መለኮቱ፡ ፈጣሬ፡ እም፡ ኢተጽዕነ፡ በደመና፡ እሳት፡ ወእም፡ ኢተለዐለ፡ ውስተ፡ ኑኃ፡ አርያም፡ ወእም፡ ኢነበረ፡ በየማነ፡ አቡሁ። ነገርነኬ፡ በእንተ፡ ህላዌ፡ መለኮቱ፡ ወትስብእቱ፡ እም፡ ድኅረሰ፡ ሥጋዌሁ፡ ኢንቤሎ፡ ወልደ፡ እግዚአብሔር፡ በመለኮቱ፡ ወወልደ፡ እጓለ፡ እመ፡ ሕያው፡ በትስብእቱ። ድንግልኒ፡ ወለደት፡ ዘኢዚአሃ፡ መለኮተ፡ በዘዚአሃ፡ ሥጋ፡ ምስለ፡ ዘዚአሃ፡ ሥጋዌ። አብኒ፡ ወለደ፡ ዘኢዚአሁ፡ ሥጋ፡ በዘዚአሁ፡ መለኮት፡ ምስለ፡ ዘዚአሁ፡ ኃይል፡ ዘህሉና፡ አምላክ። ልደትሰ፡ ቀዳማዊ፡ ባሕቲቱ፡ እግዚአብሔር፡ ዘእም፡ ባሕቲቱ፡ እግዚአብሔር፡ ብርሃን፡ ዘእም፡ ብርሃን፡ እሳተ፡ ሕይወት፡ ዘእም፡ እሳተ፡ ሕይወት፡ ወልድ፡ ሕያው፡ ዘእም፡ ሕያው፡ አብ፡ ኢፍጡር፡ ዘእም፡ ኢግቡር፡ ዘኢያስተርኢ፡ እምዘይትኔጸር፡ ዘኢይትገሠሥ፡ እምዘኢይትለከፍ፡ ዘኢይነዲ፡ እምዘኢይጼነስ፡ ዘኢይመውት፡ እምዘኢይማስን፡ ዘኢይበሊ፡ እምዘኢይትነሠት፡ ዘኢይነውም፡ እምዘኢይዴቅስ፡ ዘኢይዴምን፡ እምዘኢይጸልም፡ ዘኢይትሌቦ፡ እምዘኢይጤየቅ፡ ዘኢይትበዐድ፡ እምዘኢይትዌለጥ፡ ዘኢይደክም፡ እምዘኢይፀብስ፡ ዘኢይትቤቀል፡ እምዘኢይትቄየም፡ ዘኢይቀብል፡ እምዘኢየሐጽጽ፡ ዘኢይረኵስ፡ እምዘኢይረስሕ። በእንተ፡ መንፈስቅዱስ፡ ንነግር፡ ከመ፡ ኢሕጹጽ፡ ውእቱ፡ በዕበየ፡ ስን፡ በአካል፡ ወበመልክዕ፡ እም፡ ሕሉና፡ አብ፡ ወወልድ፡ ኢፍሉጥ፡ ውእቱ፡ ወኢሊሉይ፡ ውእቱ፡ ኢነኪር፡ ውእቱ፡ ወኢብዑድ፡ ውእቱ፡ ስብሐቲሁ፡ ከመ፡ ስብሐቲሆሙ፡ ወመልክዐ፡ ገጹ፡ ዘከመ፡ አርአያሆሙ። እኁዛን፡ በጽምረት፡ ወድሙራን፡ በተዋሕዶ፡ ግልቡባን፡ በነደ፡ እሳት፡ ወክዱናን፡ በሥዋሬ፡ ኅቡዓን፡ በእንጡላዔ። ኢርኩባን፡ በኀልዮ፡ ወክቡታን፡ በምሥጣሬ። ልዑላን፡ እምሰማየ፡ ሰማያት፡ ወዕሙቃን፡ እምቀላየ፡ ቀላያት። ወስፉሐን፡ እም፡ አጽናፈ፡ አጽናፍ፡ አኮ፡ በኩፋሌ፡ አላ፡ በኁባሬ፡ አኮ፡ በተሌልዮ፡ አላ፡ በጽምረተ፡ ህላዌ። ስብሐት፡ ለሥላሴሆሙ፡ ዘኢይዘረው፡ አኰቴት፡ ለድማሬሆሙ፡ ዘኢይቶሳሕ፡ ዕበይ፡ ለህላዌሆሙ፡ ዘኢይትከፈል፡ ለዓለመ፡ ዓለም። አሜን፡ ወአሜን። ተፈጸመ፡ ዘለፋሁ፡ ለአርዮስ፡ ዐላዊ፡ ዘበጽልሑተ፡ ልቡ፡ ጕሕላዊ፡ አሰረ፡ ሰይጣን፡ ተላዊ፡ ለመራዕየ፡ ከለባት፡ ኖላዊ፡ ዘነበበ፡ ጽርፈተ፡ ላዕለ፡ መለኮተ፡ ኢየሱስ፡ ገሊላዊ፡ ይቤ፡ ጊዮርጊስ፡ ሰግላዊ፡ ዘበሃይማኖቱ፡ ክርስቲያናዊ፡ ዘበሕገ፡ ሙሴ፡ ኦሪታዊ፡ ወዘበክርስቶስ፡ ወንጌላዊ፡ ዘበማኅተሙ፡ መስቀላዊ፡ ዘበተከንሶ፡ መርጡላዊ፡ ዘበቅብዐ፡ ጥምቀቱ፡ ናዝራዊ፡ ወበምግባሩሰ፡ ኃጥእ፡ ወዘማዊ፡ ስብሐት፡ ለእግዚአብሔር፡ ሕያው፡ ወማሕየዊ፡ ለዓለመ፡ ዓለም፡ አሜን፡ ወአሜን።

Against Nestorius ምዕራፍ፡ ፬፡ ምንባብ፡ ዘጌና፡ ፩፡ በስመ፡ እግዚአብሔር፡ አብ፡ ጥንተ፡ ህላዌሁ፡ ዘኢይትረከብ። ወኢይትኌለቍ፡ በሐሳብ፡ ወበስመ፡ ዋሕድ፡ ወልዱ፡ ዘህልው፡ ምስሌሁ፡ ዘእንበለ፡ ያስተርኢ፡ ስነ፡ አርዮብ፡ ወእም፡ ቅድመ፡ ይዕመቅ፡ ባሕረ፡ ናጌብ፡ ወበደኃሪ፡ መዋዕል፡ እማኅፀነ፡ ድንግል፡ ዘሠረፀ፡ እንበለ፡ ዘርዕ፡ ወሰብሳብ፡ በከመ፡ ውእቱ፡ የአምር፡ በዘዚአሁ፡ ጥበብ፡ ወበስመ፡ ጰራቅሊጦስ፡ መንፈሰ፡ ጽድቅ፡ ፈታኔ፡ አልባብ፡ ዘሀሎ፡ እም፡ ትካት፡ ኑኀ፡ ሰማያት፡ እንበለ፡ ይትረበብ፡ ወስፍሐ፡ ምድር፡ እንበለ፡ ይትረሀብ። እም፡ ቅድመ፡ ይትአመር፡ ሠርቅ፡ ወዐረብ፡ ሰሜን፡ ወደቡብ፡ ኢመስዕ፡ ወኢአዜብ፡ ዘኢይትበሀል፡ ዝ፡ ቀዳማዊ፡ ወዝ፡ ካዕብ፡ ሥላሴ፡ ድሙር፡ ፈጣሬ፡ ኵሉ፡ ዓለም፡ በአሐቲ፡ ምክር፡ ወበአሐቲ፡ ንባብ። ንጽሕፍ፡ እንከ፡ ዘለፋሁ፡ ለንስጥሮስ፡ ዘይቤ፡ ወልድ፡ ከመ፡ አሐዱ፡ እም፡ ነቢያት። ወዝኬ፡ ውእቱ፡ ምክንያተ፡ ክህደቱ፡ አንበሩ፡ መጽሐፈ፡ ዕልወት፡ በመዋዕለ፡ ትካት፡ ታስሮስ፡ ወዲድሮስ፡ ኤጲስቆጶሳት፡ እንተ፡ ትብል፡ ከመ፡ ዝ፡ አሐዱ፡ ወልድ፡ ዘባሕርይ፡ ወአሐዱ፡ ዘበጸጋ። ወሶበ፡ ተራከቦ፡ ወልደ፡ እግዚአብሔር፡ በውስተ፡ ዮርዳኖስ፡ ረሰዮ፡ አምላከ፡ ዘበጸጋ፡ ይብልዎ፡ ለኢየሱስ፡ ክርስቶስ። ወረከቦ፡ ንስጥሮስ፡ ለዝንቱ፡ መጽሐፈ፡ እበድ፡ ውስተ፡ መዛግብተ፡ ስህተቶሙ፡ ለእሙንቱ፡ ኤጲስቆጶሳት፡ ሠምረ፡ ባቲ፡ በልቡ፡ ወአፍቀራ፡ በኅሊናሁ፡ ወባሕቱ፡ ኢያግሀደ፡ እስከ፡ አመ፡ ተሠይመ፡ ሊቀ፡ ጳጳሳት፡ ዘቍስጥንጥንያ። ወበ፩፡ እመዋዕል፡ ኮነ፡ ጉባኤ፡ ለመሀይምናን፡ ከመ፡ ይንሥኡ፡ ቍርባነ፡ በዕለተ፡ በዓል። ወመጽአት፡ አሐቲ፡ ብእሲት፡ እንተ፡ ኢነጽሐት፡ እም፡ ደመ፡ ትክቶሃ፡ በአፍቅሮ፡ ቤተክርስቲያን፡ ከመ፡ ትትመጠው፡ ቍርባነ። ወርእዩ፡ ሕዝብ፡ እንዘ፡ ይትገሐሣ፡ ጽላሎተ፡ መንፈስቅዱስ፡ ከመ፡ መዐዝረ፡ ፀሐይ፡ ወአምጽእዋ፡ ሕዝብ፡ ወአቀምዋ፡ ቅድመ፡ ንስጥሮስ፡ ዘውእቱ፡ በትረያርክ። ወይቤላ፡ ንስጥሮስ፡ ንግርኒ፡ ኦ፡ ብእሲቶ፡ ምንትኑ፡ ርኵስኪ፡ ወምንተኑ፡ ገበርኪ፡ እስከ፡ ነፍጸ፡ ጽላሎተ፡ መንፈስቅዱስ፡ እምኔኪ። ወትቤሎ፡ ይእቲ፡ ብእሲት፡ አልቦ፡ ዘገበርኩ፡ አበሳ፡ ወኢምንተኒ። ወባሕቱ፡ መጻእኩ፡ ዝየ፡ ምስለ፡ መሀይምናን፡ እንዘ፡ ኢይነጽሕ፡ እም፡ ደመ፡ ርኵስየ፡ በአፍቅሮ፡ ቤተክርስቲያን። ተምዕዐ፡ ሊቀ፡ ጳጳሳት፡ ወአዘዘ፡ ይስቅልዋ፡ ቍልቍሊተ፡ እንዘ፡ ክሡት፡ ዕርቃነ፡ ሥጋሃ፡ ወይቤ፡ እመሰ፡ እግዚአብሔር፡ ተወልደ፡ እማርያም፡ በሥጋሃ፡ እፎኬ፡ እም፡ አስተታ፡ መንፈስቅዱስ፡ ለዛቲ፡ ብእሲት። እመሰ፡ እግዚአብሔር፡ ተወልደ፡ እም፡ ብእሲት፡ እም፡ ተቀደሰ፡ ርኩሶን፡ ለኵሎን፡ አንስት፡ በእንቲአሃ፡ ለማርያም። ወአዘዘ፡ ከመ፡ ይቅረቡ፡ ኀቤሃ፡ ኵሉ፡ ሕዝብ፡ ወይትፍኡ፡ ምራቆሙ፡ ውስተ፡ መካነ፡ ኀፍረታ፡ እንዘ፡ ይብሉ፡ ውጉዝ፡ ዘየአምን፡ ከመ፡ እግዚአብሔር፡ ተወልደ፡ እም፡ ብእሲት፡ በዝ፡ ሥጋ። ርጉም፡ ዘየአምን፡ ከመ፡ እግዚአብሔር፡ ተወልደ፡ ወተፀውረ፡ በማኅፀነ፡ ሙላድ፡ ወተሳተፎሙ፡ ለሕፃናት፡ በተሴስዮ፡ ሐሊበ፡ አጥባት፡ ወበኵሉ፡ ሥርዓተ፡ ኀሪሶን፡ ለአንስት። ወገብሩ፡ ሕዝብ፡ በከመ፡ አዘዞሙ። ወሀሎ፡ አሜሃ፡ ዮሐንስ፡ ጠርዘቤጤር፡ ዘበትርጓሜሁ፡ ቀሲስ፡ ቀርበ፡ ኀቤሃ፡ ለብእሲት፡ ኵንንት። ሰዓመ፡ በአፉሁ፡ በአፉሁ፡ ኀፍረተ፡ ሥጋሃ፡ እንዘ፡ ይብል፡ አንሰ፡ አአምን፡ ከመ፡ እግዚአብሔር፡ ተወልደ፡ እም፡ ብእሲት፡ በዝ፡ ሥጋ። አንሰ፡ አአምን፡ ከመ፡ እግዚአብሔር፡ ተፀውረ፡ በማኅፀነ፡ ሙላድ። አንሰ፡ አአምን፡ ከመ፡ እግዚአብሔር፡ ተሐፅነ፡ በሐሊበ፡ ድንግልና፡ ወተሳተፎሙ፡ ለሕፃናት፡ በሥርዓተ፡ ደቂቅ፡ ወፈጸመ፡ ኵሎ፡ ሕገ፡ ሰብእ፡ ዘእንበለ፡ ኃጢአት፡ ባሕቲታ። ወሀለወት፡ ሥዕላ፡ ለማርያም፡ ውስተ፡ ገጸ፡ መካን፡ ዘቤተ፡ መቅደስ፡ ወጸውዐቶ፡ አፈ፡ ወርቅ፡ እንዘ፡ ትብል፡ ወበእንተዝ፡ ተሰምየ፡ ዮሐንስ፡ አፈ፡ ወርቅ። በከመ፡ ያዕቆብ፡ ተሰምየ፡ እስራኤልሃ፡ በአፈ፡ እግዚአብሔር፡ ወከማሁ፡ ዮሐንስኒ፡ ተሰምየ፡ አፈ፡ ወርቅ፡ በአፈ፡ ሥዕላ፡ ለማርያም። ወአነኒ፡ እብል፡ በእንቲአሁ፡ አማንኬ፡ አፈ፡ ወርቅ፡ ወአፈ፡ ዕንቍ፡ ዘኢኀፈረ፡ ስዒመ፡ አንቀጸ፡ ሥጋሃ፡ ለትክት፡ በእንተ፡ ፍቅረ፡ ልደተ፡ አምላክ፡ እም፡ ድንግል። አማንኬ፡ አፈ፡ ጳዝዮን፡ ወአፈ፡ ባሕርይ፡ ዘያሠረግዋ፡ ለቤተ፡ ክርስቲያን፡ በምድራሳቲሁ። አማንኬ፡ አፈ፡ መዓር፡ ወአፈ፡ ሶከር፡ ዘይሰቅዮሙ፡ ለመሀይምናን፡ በጣዕመ፡ ቃሉ። አማንኬ፡ አፈ፡ አፈው፡ ወአፈ፡ ርኄ፡ ዘያስተፌሥሖሙ፡ ለአባግዐ፡ ምሥጢር፡ በመዐዛ፡ ትምህርቱ። አማንኬ፡ አፈ፡ ሰይፍ፡ ወአፈ፡ መጥባሕት፡ ዘይመትር፡ ዐላውያነ፡ በሥልጣነ፡ ግዘቱ። አማንኬ፡ ዓምድ፡ ዘኢያንቀለቅል፡ ወመሠረት፡ ዘኢይትነሠት። አማንኬ፡ ሐመር፡ ዘኢይሰበር፡ እም፡ ትንሣኤ፡ መዋግድ፡ ወኖትያዊ፡ ዘይጸብት፡ ውስተ፡ ቀላየ፡ ሃይማኖት። አማንኬ፡ ጥቅም፡ ዘኢይንሕል፡ ወማኅፈድ፡ ጽኑዕ፡ ቅድመ፡ ገጸ፡ ጸላዒ። እንከሰ፡ ንንግር፡ ዘለፋሁ፡ ለንስጥሮስ፡ አኮኬ፡ ዘተመይጠ፡ እም፡ እበዱ፡ አላ፡ አግሀደ፡ መጽሐፈ፡ ዕልወቶሙ፡ ለታስሮስ፡ ወዲድሮስ፡ መምህራነ፡ እበድ፡ ወደረሰ፡ ባቲ፡ በዲበ፡ አትራኖስ። እፈርህኬ፡ ከመ፡ እትናገር፡ ዘከመ፡ ይቤ፡ ወይርዕዳ፡ አብራክየ፡ እም፡ ዝክረ፡ ሃይማኖቱ፡ ሕስምት። መሪረ፡ ኮነ፡ ለአፉየ፡ ከመ፡ ደመ፡ ዕጕስታር፡ ወፄኦ፡ ለአንፍየ፡ ከመ፡ አብድንተ፡ ከለባት፡ ግዱፋን። ኮኖን፡ ለገበዋትየ፡ ከመ፡ ቅትረተ፡ ሐጻውንት፡ ርሱን። ወለእገርየኒ፡ ከመ፡ ኪደተ፡ አፍሐም፡ ብቁጽ። አደንገፆ፡ ለልብየ፡ ቃለ፡ አፉሁ፡ ዘምሉዕ፡ ጽርፈተ፡ ወአንሶጠጦ፡ ለሥዕርትየ፡ ትምህርተ፡ ሃይማኖቱ፡ ዘምኑን፡ በኀበ፡ ሰብእ፡ ወሰቆራር፡ በኀበ፡ እግዚአብሔር። አንሰ፡ እም፡ ፈተውኩ፡ ከመ፡ እስዐም፡ አፉሁ፡ ለዮሐንስ፡ አፈ፡ ወርቅ፡ ዘሰዓመ፡ ኀፍረተ፡ ሥጋሃ፡ ለ፡ እንተ፡ ይውኅዛ፡ ደም። ኀለየ፡ ቅድስናሃ፡ ለማርያም፡ ወላዲተ፡ አምላክ፡ ወኢኀለየ፡ በእንተ፡ ርኵሳ፡ ለትክት። ኀለየ፡ በእንተ፡ ሥጋዌ፡ መለኮት፡ ወኢኀለየ፡ በእንተ፡ ኀሣረ፡ ርእሱ፡ እስመ፡ ጽሑፍ፡ በውስተ፡ ሕግ፡ ዘይብል። እመቦ፡ ብእሲት፡ እንተ፡ ይውኅዛ፡ ደም፡ ወነበረት፡ እንዘ፡ ይትከዓዋ፡ ደም፡ እም፡ ነፍስታ፡ ሰቡዐ፡ መዋዕለ፡ ውእቱ፡ ዘትክቶሃ፡ ወኵሎ፡ ዘገሰሳ፡ ርክስ፡ ውእቱ፡ እስከ፡ ሰርክ። ወኵሉ፡ ዘላዕሌሁ፡ ሰከበት፡ እንዘ፡ ትክት፡ ይእቲ፡ ርክስ፡ ውእቱ፡ ወኵሉ፡ ዘገሰሰ፡ ዐራታ፡ ይሕጽብ፡ አልባሲሁ፡ ወይትሐጸብ፡ ሥጋሁ፡ ወርኩስ፡ ውእቱ፡ እስከ፡ ሰርክ። እስከ፡ ለገሲሰ፡ ዓራታ፡ ለትክት፡ ታረኵስ፡ ቅድስት፡ ኦሪት፡ እፎኬ፡ ለዘለከፎ፡ ነቅዐ፡ ደማ፡ አኮ፡ በአስተቃልሎ፡ ሕገ፡ ሙሴ፡ ዘገብረ፡ ዘንተ፡ ዮሐንስ፡ አላ፡ በቅንዐተ፡ ሃይማኖት። አርኰሶ፡ ለንስጥሮስ፡ እም፡ ደመ፡ ርኵሶን፡ ለአንስት፡ ስዒሞቱ፡ ለዮሐንስ፡ ኮኖ፡ ዕሤተ፡ ተስፋ፡ ዘኢሐጸ፡ እም፡ ስዒመ፡ ከርሳ፡ ለማርያም፡ ወላዲተ፡ አምላክ፡ ወእም፡ ስዒመ፡ ከናፍሪሃ፡ እለ፡ ሰዓማሁ፡ ለአማኑኤል፡ በእንተ፡ ስዒመ፡ ኀፍረታ፡ ለብእሲት። በከመ፡ ኢረኵሰ፡ ዘፈረ፡ ልብሱ፡ ለኢየሱስ፡ ሶበ፡ ገሰሰቶ፡ እንተ፡ ይውኅዛ፡ ደም፡ እስመ፡ ወጽአ፡ ኃይል፡ እምኔሁ፡ ወአይበሰ፡ ነቅዐ፡ ደማ፡ ከማሁ፡ ኢያርኰሶ፡ ለዮሐንስ፡ ስዒመ፡ አንቀጸ፡ ሥጋሃ፡ ለትክት፡ እስመ፡ ወጽአ፡ ኃይለ፡ ሃይማኖት፡ እም፡ አፉሁ፡ ወአይበሶ፡ ለውኂዘ፡ ፈለገ፡ ሙስና፡ ዘውእቱ፡ ትምህርተ፡ ንስጥሮስ፡ ዐላዊ። ንትመየጥኬ፡ ኀበ፡ ነገረ፡ እበዲሁ፡ ለንስጥሮስ፡ ለእመ፡ ነገርናሁ፡ ንፈርህ፡ በእንተ፡ ቃለ፡ ጽርፈት፡ ዘወጽአ፡ እም፡ አፉሁ። ለእመ፡ ኀደግናሁ፡ ይጸንዕ፡ ሥርወ፡ ትምህርቱ፡ ውስተ፡ ልበ፡ ጽቡሳነ፡ ኅሊና። ስምዑ፡ ንንግርክሙ፡ ዜናሁ፡ ለንስጥሮስ፡ ርኵስ፡ ዘለብሳ፡ ለመርገም፡ ከመ፡ ልብስ፡ ወተአጽፋ፡ ከመ፡ ሞጣሕት፡ ዘዐጠቃ፡ ለኃጢአት፡ ከመ፡ ቅናት፡ ዘይቀንት፡ ዘልፈ፡ ዘቦአ፡ ሕምዘ፡ ግዘት፡ ከመ፡ ማይ፡ ውስተ፡ አማዑቱ፡ ወከመ፡ ቅብዕ፡ ውስተ፡ አእፅምቲሁ። ወእምዝ፡ ተጋብኡ፡ በእንቲአሁ፡ ኤጲስቆጶሳት፡ ፪፻፡ በኤፌሶን፡ ወጸውዕዎ፡ ውስተ፡ ማኅበሮሙ፡ ወገሠጽዎ፡ በእንተ፡ ስሕተቱ፡ ወአግዘፈ፡ ልቦ፡ ወኢተመይጠ፡ እም፡ ክህደቱ፡ ወይቤ፡ እንበለ፡ ፍርሀት፡ ወልድ፡ ፩፡ ዘባሕርይ፡ ወ፩፡ ዘበጸጋ፡ ወሶበ፡ ተራከቦ፡ ወልደ፡ እግዚአብሐር፡ በውስተ፡ ዮርዳኖስ፡ ኮነ፡ አምላከ፡ በጸጋ፡ ይቤሎ፡ ለኢየሱስ፡ ክርስቶስ። ወሰአልዎ፡ ኤጲስቆጶሳት፡ ከመ፡ ይትመየጥ፡ እም፡ ስህተቱ፡ ወአበዮሙ። ወአውገዝዎ፡ ኀቢሮሙ፡ በአፈ፡ መንፈስቅዱስ፡ ወሰደድዎ፡ እም፡ ቤተክርስቲያን፡ ወአውገዙ፡ ኵሎ፡ ዘአምነ፡ በሃይማኖተ፡ ዚአሁ፡ ወኵሎ፡ ዘየሐውር፡ በሕሠመ፡ አምልኮቱ። ወአንበርዎ፡ ውስተ፡ መንበረ፡ ጵጵስናሁ፡ ለመክስምያኖስ፡ ዘውእቱ፡ ቀናዒ፡ በእንተ፡ ሃይማኖት፡ ወቀዋሚሃ፡ ለቤተ፡ ክርስቲያን። ወእም፡ ድኅረ፡ ሞተ፡ ንስጥሮስ፡ ሠምረ፡ መርቅያን፡ ንጉሥ፡ በሃይማኖቱ፡ ወመንግሥትሰ፡ ዘኢዚአሁ፡ እስመ፡ አፍቀረቶ፡ ብርክልያ፡ ወለተ፡ ንጉሥ፡ ወአንገሠቶ፡ ህየንተ፡ አቡሃ፡ አርቃድዮስ። ወእማሰ፡ አውዶክስያ፡ ዘሰደደቶ፡ ለዮሐንስ፡ አፈ፡ ወርቅ፡ ዘሞተ፡ በስደት፡ በውስተ፡ ግዘት። ወሠምረ፡ ንጉሥ፡ በሃይማኖተ፡ ንስጥሮስ፡ ዐላዊ። ወፈቀደ፡ ይግበር፡ ማኅበረ፡ ከመ፡ ያስተጻንዓ፡ ለሃይማኖቱ፡ ርኵስት፡ ወኢያብሖ፡ እግዚአብሔር፡ ከመ፡ ይግበር፡ ፈቃዶ፡ ወአስተፋጠነ፡ ቀቲሎቶ፡ ለንስጥሮስ። ወእምዝ፡ ሶበ፡ ተኀፍረ፡ ንጉሥ፡ በእንተ፡ ሞተ፡ ንስጥሮስ፡ ገብአ፡ ኀበ፡ ሃይማኖተ፡ ልዮን፡ ወአስተጋብአ፡ ሎቱ፡ ኤጲስቆጶሳተ፡ ፮፻፴ወ፮። ወልዮንሰ፡ እንዘ፡ በደዌሁ፡ ሀሎ፡ እንተ፡ ባቲ፡ ይመውት። ወዝ፡ ውእቱ፡ ሃይማኖቱ፡ ለንስጥሮስ፡ ርኩሰ፡ ከናፍር፡ ወርኩሰ፡ ሃይማኖት። ይቤ፡ በቃለ፡ እበድ፡ ዘሰ፡ ተወልደ፡ እማርያም፡ ወልደ፡ ዮሴፍ፡ ውእቱ፡ ወሶበ፡ ተራከቦ፡ ወልደ፡ እግዚአብሔር፡ በውስተ፡ ዮርዳኖስ፡ ረሰዮ፡ አምላከ፡ በጸጋ። ኦ፡ ንስጥሮስ፡ ስማዕ፡ ዘይቤ፡ ወንጌላዊ፡ ወከመዝ፡ ውእቱ፡ ልደቱ፡ ለኢየሱስ፡ ክርስቶስ፡ ሶበ፡ ፈሀራ፡ ዮሴፍ፡ ለእሙ፡ ማርያም፡ ዘእንበለ፡ ይቅረባ፡ ተረክበት፡ ፅንስተ፡ እመንፈስቅዱስ፡ እስመ፡ ጻድቅ፡ ውእቱ፡ ዮሴፍ፡ ወኢፈቀደ፡ ያስተዋድያ፡ አብደረ፡ ይኅድጋ፡ ጽሚተ። ወእንዘ፡ ዘንተ፡ ይኄሊ፡ ናሁ፡ አስተርአዮ፡ መልአከ፡ እግዚአብሔር፡ ለዮሴፍ፡ ወይቤሎ፡ ዮሴፍ፡ ወልደ፡ ዳዊት፡ ኢትፍራህ፡ ነሢኦታ፡ ለማርያም፡ ፍህርትከ። እስመ፡ ዘይትወለድ፡ እምኔሃ፡ እመንፈስቅዱስ፡ ውእቱ። ወናሁ፡ ትወልድ፡ ወልደ፡ ወትሰምዮ፡ ስሞ፡ ኢየሱስሃ፡ እስመ፡ ውእቱ፡ ያድኅኖሙ፡ ለሕዝቡ፡ እም፡ ኃጢአቶሙ፡ ወዝ፡ ኵሉ፡ ዘኮነ፡ ከመ፡ ይብጻሕ፡ ቃለ፡ እግዚአብሔር፡ ዘይትፌጸም፡ ዘነበበ፡ በአፈ፡ ነቢይ፡ ዘይቤ፡ ናሁ፡ ድንግል፡ ትፀንስ፡ ወትወልድ፡ ወልደ፡ ወይሰምዩ፡ ስሞ፡ አማኑኤል፡ ዘበትርጓሜሁ፡ እግዚአብሔር፡ ምስሌነ። ሉቃስኒ፡ ይቤ፡ ወበሳድስ፡ ወርኅ፡ ተፈነወ፡ ገብርኤል፡ መልአክ፡ እም፡ ኀበ፡ እግዚአብሔር፡ ሀገረ፡ ገሊላ፡ እንተ፡ ስማ፡ ናዝሬት፡ ኀበ፡ ድንግል፡ እንተ፡ ተፍህረት፡ ለብእሲ፡ ዘስሙ፡ ዮሴፍ፡ ዘእም፡ ቤተ፡ ዳዊት፡ ወስማ፡ ለይእቲ፡ ድንግል፡ ማርያም። ቦአ፡ መልአክ፡ ኀቤሃ፡ ወይቤላ፡ ተፈሥሒ፡ ፍሥሕት፡ እግዚአብሔር፡ ምስሌኪ፡ ወቡሩክት፡ አንቲ፡ እም፡ አንስት። ወርእያ፡ ደንገፀት፡ እም፡ ቃሉ፡ ወትቤሎ፡ እፎኑ፡ ዘከመዝ፡ አምኃ፡ ከመ፡ ዝኑ፡ እንጋ፡ ይትአምኁ። ወይቤላ፡ መልአክ፡ ኢትፍርሂ፡ ማርያም፡ እስመ፡ ረከብኪ፡ ሞገሰ፡ በኀበ፡ እግዚአብሔር። ወናሁ፡ ትፀንሲ፡ ወትወልዲ፡ ወልደ፡ ወትሰምዪዮ፡ ስሞ፡ ኢየሱስ፡ ውእቱ፡ ዐቢይ፡ ወይሰመይ፡ ወልደ፡ እግዚአብሔር፡ ልዑል፡ ወይሁቦ፡ እግዚአብሔር፡ አምላክ፡ መንበረ፡ ዳዊት፡ አቡሁ፡ ወይነግሥ፡ ለቤተ፡ ያዕቆብ፡ ለዓለም፡ ወአልቦ፡ ማኅለቅት፡ ለመንግሥቱ። ወትቤሎ፡ ማርያም፡ ለመልአክ፡ እፎ፡ ይከውነኒ፡ ዝንቱ፡ እንዘ፡ ኢየአምር፡ ብእሴ። አውሥኣ፡ መልአክ፡ ወይቤላ፡ መንፈስቅዱስ፡ ይመጽእ፡ ላዕሌኪ፡ ወኃይለ፡ ልዑል፡ ይጼልለኪ። ወዘኒ፡ ይትወለድ፡ እምኔኪ፡ ቅዱስ፡ ውእቱ፡ ወይሰመይ፡ ወልደ፡ እግዚአብሔር፡ ልዑል። ስማዕ፡ ኦ፡ ንስጥሮስ፡ ዐላዊ፡ ለእመሁ፡ ክርስቲያናዊ፡ አንተ፡ እመን፡ በወንጌላውያን። ወእመሰ፡ ኢኮንከ፡ ክርስቲያናዌ፡ አንተ፡ ይኄይሰከ፡ ኢተጠምቆ፡ እም፡ ታርኩስ፡ ቤተ፡ መቅደሱ፡ ለእግዚአ፡ ብሔር፡ በሃይማኖትከ፡ ጽይእት፡ በከመ፡ ይቤ፡ ጳውሎስ፡ በእንተ፡ ሰብእ፡ ዕብራውያን፡ ወሎሙሰ፡ ኢበቍዖሙ፡ ቃል፡ ዘሰምዑ፡ እስመ፡ ኢተቶስሐ፡ ልቦሙ፡ በሃይማኖት። ለእመ፡ ኢበቍዖሙ፡ ለሕዝበ፡ እግዚአብሔር፡ ዐቂበ፡ ሕገ፡ ሙሴ፡ ዘእንበለ፡ አሚን፡ በወልደ፡ እግዚአብሔር፡ እፎ፡ እንከ፡ ለከ፡ ይበቍዐከ፡ ለሮማዊ፡ ቈላፍ፡ ወክፍቱር፡ እም፡ ሥርወ፡ አረሚ፡ ፍጥረትከ፡ ተሰምዮ፡ ክርስቲያናዊ፡ ባሕቲታ፡ ዘእንበለ፡ ሃይማኖተ፡ ክርስቶስ፡ በከመ፡ ይቤ፡ ጳውሎስ፡ ወማኅለቅቱሰ፡ ለጽድቅ፡ አሚን፡ በክርስቶስ። ወአንተሰ፡ ተመሰልከ፡ ተክለ፡ ዘእንበለ፡ ውኂዝ፡ ወዐዘቅተ፡ ዘእንበለ፡ ማይ። ንጉሠ፡ ዘእንበለ፡ ጌራ፡ መንግሥት፡ ሐራዌ፡ ዘእንበለ፡ ንዋየ፡ ሐቅል፡ ደመና፡ ዘእንበለ፡ ዝናም፡ ወሰዊተ፡ ዘእንበለ፡ መስለብት፡ አበ፡ ዘእንበለ፡ ሀብተ፡ ሲሳይ፡ ወእመ፡ ዘእንበለ፡ አጥባዕት፡ ንድቀ፡ ዘእንበለ፡ ተድባብ፡ ወኆኅተ፡ ዘእንበለ፡ ማዕፆ። መርዓዌ፡ ዘእንበለ፡ አክሊል፡ ወመርዓተ፡ ዘእንበለ፡ ባዝግና፡ ካህነ፡ ዘእንበለ፡ ኤፉድ፡ ምሥዋዐ፡ ዘእንበለ፡ ቍርባን፡ ኖትያዌ፡ ዘእንበለ፡ ሥርዓተ፡ ሐመር፡ ወምሥያጣዌ፡ ዘእንበለ፡ ንዋይ፡ ሠረገላዌ፡ ዘእንበለ፡ ድርዐ፡ ሐጺን፡ ወፈረሳዌ፡ ዘእንበለ፡ ኵያንው። እፎ፡ ተኀረይከ፡ ለጵጵስና፡ ዘኢተቀደስከ፡ በማኅተመ፡ ክርስትና፡ እፎ፡ ተኀረይከ፡ ለተክህኖ፡ ዘኢተሠርጐከ፡ በተአምኖ። ኦ፡ ንስጥሮስ፡ ታስሮስ፡ ኀደገ፡ ለከ፡ ዕልወቶ፡ ወዲድሮስ፡ አስተሳተፈከ፡ በእበዱ። ኦ፡ ንስጥሮስ፡ ሲኦል፡ ሐፀነተከ፡ በአጥባቲሃ፡ ወገሃነም፡ አልሐቀተከ፡ በሐሊበ፡ ሙስናሃ። ቤልሆር፡ ለብሰከ፡ ከመ፡ ልብስ፡ ወአንተኒ፡ ተዐጸፍኮ፡ ከመ፡ ሞጣሕት። አርዌ፡ ምድር፡ ዘአስሐታ፡ ለሔዋን፡ ወደየ፡ ሕምዘ፡ ውስተ፡ አፉከ፡ ወአንተኒ፡ ቀነትኮ፡ ከመ፡ ቅናት። ቃለ፡ ታስሮስ፡ ወዲድሮስ፡ ሆኮ፡ ለከርሥከ፡ ከመ፡ እንተ፡ ማሕምም። ፀነስከ፡ በጻዕር፡ ወወለድከ፡ ኃጢአተ፡ ግበ፡ ከረይከ፡ ወደኀይከ፡ ወወደቀ፡ ውስቴቱ፡ ወኢተንሣእከ። ሕምዘ፡ አፍዖትኑ፡ ነቅዐ፡ እም፡ ሐቌ፡ አቡከ፡ ወአርዌ፡ ምድርኑ፡ ቦአ፡ ውስተ፡ ማኅፀነ፡ እምከ፡ ከለባትኑ፡ ሐፀኑከ፡ በሐሊብ፡ ርኩስ፡ ወመራዕየ፡ አሕርውኑ፡ አልሐቁከ፡ ውስተ፡ ጽቡረ፡ ምዕኖ፡ ዘያንገረግሩ፡ ውስቴቱ። ቈናጽልኑ፡ ገብሩ፡ በዓለ፡ አመ፡ ዕለተ፡ ኅርሳ፡ ለእምከ፡ ወሚመ፡ ተኵላተ፡ ዐረብ፡ አመ፡ ዕለተ፡ ሙላድከ። ርኵስት፡ ይእቲ፡ ሰዓት፡ እንተ፡ ባቲ፡ ተፀነስከ፡ ርግምት፡ ይእቲ፡ ዕለት፡ እንተ፡ ባቲ፡ ተወለድከ። ኦ፡ ንስጥሮስ፡ እፎ፡ ደፈርከ፡ ከመ፡ ትበሎ፡ ለወልደ፡ እግዚአብሔር፡ ወልደ፡ ዮሴፍ፡ ወመነ፡ ትብሎ፡ ለአምላከ፡ ነቢያት፡ ከመ፡ ፩፡ እም፡ ነቢያት። አነክር፡ ትዕግሥቶ፡ ለእግዚአብሔር፡ እፎኬ፡ ዘኢተሰጠት፡ ምድር፡ ዘትከይዳ፡ ከመ፡ ተሐጥከ፡ ሶበ፡ ትትናገር፡ ዘንተ። እፎኬ፡ ዘኢንሕሉ፡ ምጽናዓተ፡ ሰማያት፡ ወዘኢያንቀልቀሉ፡ መሠረታተ፡ አውግር፡ ከመ፡ ይድብዩከ፡ ሶበ፡ ትትናገር፡ ዘንተ። እፎኬ፡ ዘኢፈልሑ፡ አብሕርተ፡ ገሃነም፡ ወዘኢዐርጉ፡ አንቅዕተ፡ ሲኦል፡ ከመ፡ ያስጥሙከ። እፎኬ፡ አርመመ፡ ሚካኤል፡ ዐቃቢሃ፡ ለቤተክርስቲያን፡ ሶበ፡ ትትናገር፡ ዘንተ። እፎኬ፡ አርመመ፡ ገብርኤል፡ ዘአሐሰውከ፡ ስብከቶ፡ ዘይቤላ፡ ለማርያም፡ መንፈስቅዱስ፡ ይመጽእ፡ ላዕሌኪ፡ ወኃይለ፡ ልዑል፡ ይጼልለኪ፡ ወዘኒ፡ ይትወለድ፡ እምኔኪ፡ ቅዱስ፡ ውእቱ፡ ወይሰመይ፡ ወልደ፡ ልዑል። ወአንተሰ፡ ሜጥኮ፡ በግዕዝከ፡ ኀበ፡ ዘርዐ፡ ሙላድ፡ ለትሠሮ፡ ሙላድከ፡ እም፡ ገጸ፡ ምድር፡ ወይደምሰስ፡ ስምከ፡ እመጽሐፈ፡ ሕይወት። ዝ፡ መርገም፡ አኮ፡ ለከ፡ ለባሕቲትከ፡ አላ፡ ለኵሎሙ፡ ለእለ፡ የአምኑ፡ በሃይማኖትከ። ሰማዕነ፡ ዜና፡ በእንተ፡ ደቂቅከ፡ ከመ፡ ይብልዋ፡ ለማርያም፡ ወላዲተ፡ መድኅን፡ ወኢይብልዋ፡ ወላዲተ፡ አምላክ። ወለወልዳሂ፡ ይቤልዎ፡ ከመ፡ ፩፡ እም፡ ነቢያት። በመኑኬ፡ ያስተማስልዎ፡ እለ፡ ይቤልዎ፡ ከመ፡ ፩፡ እም፡ ነቢያት። በአዳምኑ፡ ዘወጽአ፡ እም፡ ገነተ፡ ተድላ፡ በዐሊወ፡ ትእዛዙ፡ ለእግዚአብሔር። ወሚመ፡ በአቤል፡ ዘኢኮነ፡ ክዕወተ፡ ደሙ፡ ለቤዛ፡ ብዙኃን። በሄኖክኑ፡ ዘነሥአ፡ ብእሲተ፡ እንተ፡ ስማ፡ እድኒ፡ ወወለደቶ፡ እምኔሃ፡ ለማቱሳላ፡ በሩካቤ፡ ሥጋ፡ ወሚመ፡ በኖኅ፡ ዘገብረ፡ ሎቱ፡ መስቀረ፡ እም፡ ፍርሀተ፡ አይኅ። ድኅነ፡ በእንተ፡ ኂሩቱ፡ ምስለ፡ ብእሲቱ፡ ወደቂቁ፡ ወአንስትያ፡ ደቂቁ፡ ወኢያድኀኖሙ፡ ለኃጥአን፡ በከመ፡ ክርስቶስ፡ አድኀነ። ዓዲመ፡ በመኑ፡ ያስተማስልዎ፡ በአብርሃምኑ፡ ዘክህደ፡ በእንተ፡ ሳራ፡ ከመ፡ ኢኮነቶ፡ ብእሲቶ፡ እም፡ ፍርሀተ፡ ፈርዖን፡ ንጉሠ፡ ግብጽ፡ ወሚመ፡ በይስሐቅ፡ ወልዱ፡ ዘክህደ፡ ውእቱሂ፡ በእንተ፡ ርብቃ፡ ከመ፡ ኢኮነቶ፡ ብእሲቶ፡ እም፡ ፍርሀተ፡ አቤሜሌክ፡ ንጉሠ፡ ጌራራ። ወዓዲመ፡ በመኑ፡ ያስተማስልዎ፡ ከመ፡ ፩፡ እም፡ ነቢያት። በያዕቆብኑ፡ ዘነሥአ፡ ሎቱ፡ ክልዔ፡ አንስትያ፡ አዋልዲሁ፡ ለላባ፡ ልያሃ፡ ወራሔልሃ፡ ወገብረ፡ ሎቱ፡ ክልዔ፡ ዕቁባተ፡ አእማቲሆን፡ ባላሃ፡ ወዘለፋሃ፡ ወሚመ፡ በዮሴፍ፡ ወልዱ፡ ዘአውሰበ፡ ወለቶ፡ ለጴጥፋራ፡ ሣውዕ፡ ዘኤልዩጶሊስ፡ ዘውእቱ፡ ካህነ፡ አማልክት። ዓዲመ፡ በመኑ፡ ያስተማስልዎ፡ ከመ፡ ፩፡ እም፡ ነቢያት፡ በሙሴ፡ ዘይበሎ፡ እግዚአብሔር፡ ሑር፡ ተወሰክ፡ ኀበ፡ ሕዝብከ፡ ወዕርግ፡ ኀበ፡ ደብረ፡ ናባው፡ ዘሞአብ፡ ወሙት፡ በህየ፡ እስመ፡ ኢቀደስክሙኒ፡ በኀበ፡ ማየ፡ ቅስት። ወሚመ፡ በአሮን፡ ዘገብረ፡ ስብኮ፡ ዘላህም፡ ወይቤ፡ ናሁ፡ አማልክቲከ፡ እስራኤል። ዓዲመ፡ በመኑ፡ ያስተማስልዎ፡ ከመ፡ ፩፡ እም፡ ነቢያት፡ በዳዊትኑ፡ ዘአበሰ፡ አበሳ፡ ዘለሞት፡ በብእሲተ፡ ኦርዮ፡ ዘአቅተለ፡ ኪያሁኒ። ወሚመ፡ በሰሎሞን፡ ወልዱ፡ ዘ፮፻፡ አንስትያሁ፡ ወ፫፻፡ ዕቁባቲሁ፡ ዘነሥአ፡ እምነ፡ ኵሉ፡ አዋልደ፡ ነገሥት፡ አሕዛብ፡ እስከ፡ አትለዋሁ፡ ድኅረ፡ አማልክተ፡ አበዊሆን። ወዓዲመ፡ በመኑ፡ ታስተማስልዎ፡ ከመ፡ ፩፡ እም፡ ነቢያት፡ በኤልያስኑ፡ ዘጐየ፡ እም፡ ገጸ፡ ኤልዛቤል፡ ወይቤ፡ ኮንየ፡ እንከሰ፡ እግዚኦ፡ ከመ፡ እሙት፡ እስመ፡ ኢይኄይስ፡ እምነ፡ አበውየ፡ ወሚመ፡ በኤልሳዕ፡ ረድኡ፡ ዘአፀወ፡ ኆኅተ፡ ቤቱ፡ እም፡ ፍርሀተ፡ ላእከ፡ ንጉሠ፡ እስራኤል፡ እስመ፡ ይቤ፡ ንጉሥ፡ ሕያው፡ እግዚአብሔር፡ ከመ፡ ኢይበይት፡ ዮም፡ ርእሱ፡ ለኤልሳዕ፡ ዲበ፡ ክሳዱ። ወዓዲመ፡ በመኑ፡ ያስተማስልዎ፡ ከመ፡ ፩፡ እም፡ ነቢያት፡ በኢሳይያስኑ፡ ዘይቤ፡ በእንተ፡ ርእሱ፡ እስመ፡ ርኩስ፡ ከናፍርየ፡ ወማእከለ፡ አሕዛብ፡ ዘርኩስ፡ ከናፍሪሆሙ፡ ሀሎኩ፡ አነ። ወሚመ፡ በኤርምያስ፡ ዘአስተብቍዖ፡ ለሰዴቅያስ፡ ከመ፡ ኢይሚጦ፡ ውስተ፡ ዐዘቅት፡ ዓምዓም። ፳፫፡ ወዓዲመ፡ በመኑ፡ ያስተማስልዎ፡ ከመ፡ ፩፡ እም፡ ነቢያት፡ በነቢያተ፡ ፋርስኑ፡ ዘፄወዎሙ፡ ስልምናሶር፡ ወሚመ፡ በነቢያተ፡ ባቢሎን፡ እለ፡ ቀነዮሙ፡ ናቡከደነጾር፡ ዘወድቁ፡ ውስተ፡ ፄዋዌ፡ በኃጢአተ፡ አበዊሆሙ፡ ወነበሩ፡ ማእከለ፡ ርኵሶሙ፡ ለአሕዛብ። ዓዲመ፡ በመኑ፡ ያስተማስልዎ፡ ከመ፡ ፩፡ እም፡ ነቢያት፡ በዮሐንስኑ፡ መጥምቅ፡ ዘለሊሁ፡ ስምዐ፡ ኮነ፡ በእንተ፡ ኢየሱስ፡ ክርስቶስ፡ እንዘ፡ ይብል፡ ይመጽእ፡ እም፡ ድኅሬየ፡ ዘይጸንዐኒ፡ ዘኢይደልወኒ፡ እፍታሕ፡ ቶታነ፡ አሣእኒሁ፡ እም፡ እገሪሁ። ወሶበ፡ ርእዮኒ፡ አንጸረ፡ ወይቤ፡ ነዋ፡ በግዑ፡ ለእግዚአብሔር፡ ዘየአትት፡ ኃጢአተ፡ ዓለም፡ ዝ፡ ውእቱ፡ ዘእቤለክሙ፡ አነ፡ በእንቲአሁ፡ ይመጽእ፡ እም፡ ድኅሬየ፡ ዘሀሎ፡ እም፡ ቅድሜየ፡ እስመ፡ እም፡ ቅድሜየ፡ ውእቱ። በልደትሰኬ፡ በሥጋ፡ ቀደሞ፡ ዮሐንስ፡ ለኢየሱስ፡ ፮፡ አውራኀ። ወበእንተ፡ ልደቱ፡ ዘእም፡ አብ፡ ይቤ፡ ይመጽእ፡ እም፡ ድኅሬየ፡ ዘሀሎ፡ እም፡ ቅድሜየ፡ እስመ፡ እም፡ ቅድሜየ፡ ውእቱ። በእንተ፡ ኃጣውአ፡ ነቢያትኒ፡ ዘዘከርነ፡ ቦ፡ እለ፡ በዐሊወ፡ ትእዛዝ፡ ወቦ፡ እለ፡ በሩካቤ፡ ሥጋ፡ ዘበሕግ። ወቦ፡ እለ፡ በዝሙት። ወቦ፡ እለ፡ በኢያድኅኖ፡ ባዕዳን፡ ዘእንበለ፡ ርእሶሙ። ወቦ፡ እለ፡ በፍርሀተ፡ ኵነኔ። ዘንተ፡ ኵሎ፡ ዘዘከርነ፡ አኮ፡ ከመ፡ ንዝልፎሙ፡ እስመ፡ ምሕረተ፡ እግዚአብሔር፡ ምስሌሆሙ። አላ፡ ከመ፡ ናዑቅ፡ ከመ፡ አልቦ፡ ሰብእ፡ ዘእንበለ፡ ኃጢአት፡ ኢነቢይ፡ ወኢሐዋርያ፡ ዘእንበለ፡ ኢየሱስ፡ ክርስቶስ፡ ባሕቲቱ፡ ዘኢተረክበ፡ ሐሰት፡ ውስተ፡ አፉሁ፡ ወኢትዕግልት፡ ውስተ፡ እዴሁ፡ ኢርስሐት፡ ውስተ፡ ሥጋሁ፡ ወኢጽልሑት፡ ውስተ፡ ሕሊናሁ፡ በከመ፡ ይቤ፡ በመዝሙር፡ ወአሠምሮ፡ ለእግዚአብሔር፡ እም፡ ላህም፡ ጣዕዋ፡ ዘኢያብቈለ፡ ቀርነ፡ ወጽፍረ። ወአሠምሮ፡ ለእግዚአብሔር፡ ይተረጐም፡ በሥምረተ፡ አብ፡ ኀበ፡ ሡዐተ፡ ወልዱ፡ ወጣዕዋ፡ ይተረጐም፡ በቅድስት፡ ድንግል፡ ዘወለደቶ፡ ለመግዝዕ፡ ዘአልቦ፡ ትዕግልት፡ ውስተ፡ እዴሁ፡ ወኢቀርነ፡ ትዕቢት፡ ውስተ፡ ድማሁ። መጽአ፡ ይጠባሕ፡ ከመ፡ በግዕ፡ ወከመ፡ በግዕ፡ ዘኢይነብብ፡ በቅድመ፡ ዘይቀርፆ፡ ከማሁ፡ ኢከሠተ፡ አፉሁ፡ በሕማሙ። አማንኬ፡ ኢየሱስ፡ ክርስቶስ፡ አምላክ፡ ዘእንበለ፡ ዐመፃ፡ ወሰብእ፡ ዘእንበለ፡ ኃጢአት። በግዕ፡ ንጹሕ፡ ዘእንበለ፡ ርስሐት፡ ወላህም፡ መግዝዕ፡ ዘእንበለ፡ ነውር። ኅብስት፡ እፉይ፡ ዘእንበለ፡ ግማኔ፡ ወሞጻሕተ፡ ወይን፡ ጽሩይ፡ ዘእንበለ፡ ጣሕል። ዕጣን፡ ውኩፍ፡ ወስኂን፡ ዘያንጸበርቅ። ካህን፡ ዘእንበለ፡ ጌጋይ፡ ዘያስተሠሪ፡ ኃጣውአ፡ ሕዝብ። ንጉሥ፡ ዘኢያደሉ፡ ለገጽ፡ ኢለባዕል፡ ወኢለገጸ፡ ነዳይ። እፎኬ፡ ይሰምይዎ፡ አምላከ፡ በጸጋ። ምንተኬ፡ አዕበይዎ፡ እም፡ ነቢያት፡ እስመ፡ ለሙሴኒ፡ ይቤሎ፡ እግዚአብሔር፡ ረሰይኩከ፡ አምላኮ፡ ለፈርዖን፡ ወአሮን፡ እኁከ፡ ይኩን፡ ለከ፡ ነቢየ። ወበእንተ፡ ነቢያትኒ፡ ይቤ፡ አንሰ፡ እቤ፡ አማልክት፡ አንትሙ፡ ወደቂቀ፡ ልዑል፡ ኵልክሙ። በእንተ፡ ሐዋርያትኒ፡ ይቤ፡ እግዚአብሔር፡ ቆመ፡ በማእከለ፡ አማልክት፡ ወይኴንን፡ በማኅበረ፡ አማልክት። ዘንተ፡ ይቤ፡ በእንተ፡ ዘቆመ፡ ወልድ፡ ማእከለ፡ አርዳኢሁ፡ በዊኦ፡ እንተ፡ ዕፅው፡ ኆኅት፡ በምሴተ፡ እሑድ፡ እንተ፡ ባቲ፡ ተንሥአ። ፳፮፡ ወበእንተ፡ ሰመዮ፡ ወልደ፡ እግዚአብሔርኒ፡ ዘበጸጋ፡ ይቤሎ፡ እግዚአብሔር፡ ለፈርዖን፡ ፈንዎሙአ፡ ለሕዝብየ፡ እስመ፡ ወልድየ፡ ውእቱ፡ ወበኵርየ፡ እስራኤል። ወእመሰ፡ አበይከ፡ ፈንዎቶሙ፡ እቀትሎ፡ ለወልድከ፡ ዘበኵርከ። እግዚእነሂ፡ ይቤ፡ በወንጌል፡ አነሂ፡ አቡክሙ፡ ወአቡየሂ፡ አቡክሙ። ዮሐንስኒ፡ ይቤ፡ ለእለሰ፡ ተወክፍዎ፡ ወሀቦሙ፡ ሥልጣነ፡ ውሉደ፡ እግዚአብሔር፡ ይኩኑ፡ እለ፡ አምኑ፡ በስሙ፡ እለ፡ ኢኮኑ፡ እምነ፡ ዘደም፡ ወኢእምነ፡ ፈቃድ፡ እም፡ ፍትወት፡ ዘሥጋ፡ ወኢእም፡ ሥምረተ፡ ብእሲ፡ ወብእሲት፡ አላ፡ እም፡ እግዚአብሔር፡ ተወልዱ። ጴጥሮስኒ፡ ይቤ፡ ይትባረክ፡ እግዚአብሔር፡ ዘወለደነ፡ በብዝኀ፡ ምሕረቱ፡ ወለተስፋ፡ እንተ፡ ባቲ፡ ነሐዩ፡ በተንሥኦቱ፡ ለእግዚእነ፡ ኢየሱስ፡ ክርስቶስ። ጳውሎስኒ፡ ይቤ፡ ወከመሰ፡ ውሉድ፡ አንትሙ፡ ናሁ፡ ፈነወ፡ እግዚአብሔር፡ መንፈሰ፡ ወልዱ፡ ውስተ፡ ልብክሙ፡ ዘይጸርሕ፡ ወይብል፡ አባ፡ ወአቡየ። ወካዕበ፡ ይቤ፡ ጳውሎስ፡ እስመ፡ ኵሎሙ፡ እለ፡ ይገብሩ፡ ዘመንፈሰ፡ እግዚአብሔር፡ ውሉደ፡ እግዚአብሔር፡ እሙንቱ። ወአኮ፡ መንፈሰ፡ ቅኔ፡ ዘነሣእክሙ፡ በዘትፈርሁ፡ አላ፡ ነሣእክሙ፡ መንፈሰ፡ ውሉድ፡ በዘትጼውዕዎ፡ ለአቡክሙ፡ እስመ፡ መንፈስ፡ ዘምስለ፡ ነፍስትነ፡ ሰማዕትነ፡ ከመ፡ ውሉደ፡ እግዚአብሔር፡ ንሕነ። ወእም፡ ከመሰ፡ ውሉዱ፡ ወራስያኒሁ፡ ለእግዚአብሔር፡ ንሕነ፡ ወመዋርስቲሁ፡ ለክርስቶስ፡ ንሕነ። ካዕበ፡ ይቤ፡ ዮሐንስ፡ በውስተ፡ መልእክቱ፡ አኃዊነ፡ ንትፋቀር፡ በበይናቲነ፡ እስመ፡ ተፋቅሮ፡ እም፡ እግዚአብሔር፡ ውእቱ። ወኵሉ፡ ዘይትፋቀር፡ እም፡ እግዚአብሔር፡ ውእቱ፡ ተወልደ። ናሁኬ፡ ነገርናክሙ፡ በእንተ፡ እለ፡ ተሰምዩ፡ ውሉደ፡ እግዚአብሔር፡ በጸጋ፡ ወበእንተሂ፡ እለ፡ ተሰምዩ፡ አማልክተ፡ በሀብተ፡ መንፈስቅዱስ። ዳዊትኒ፡ ይቤ፡ አምጽኡ፡ ለእግዚአብሔር፡ ውሉደ፡ አማልክት። አምጽኡ፡ ለእግዚአብሔር፡ ዕጕለ፡ ሐራጊት። ትብል፡ ቅድስት፡ ኦሪት፡ አማልክተ፡ ኢትሕሚ፡ ለመኰንነ፡ ሕዝብከ፡ እኪተ፡ ኢትበሎ። ወእግዚእነሂ፡ ይቤ፡ በቃለ፡ ኪዳን፡ ዘፈጠርከ፡ ኅሊናተ፡ ርቱዐተ፡ ለእለ፡ የአምኑ፡ ብከ፡ ትሁብ፡ ከመ፡ እም፡ ሰብእ፡ ይኩኑ፡ አማልክተ። ናሁኬ፡ ነገርናከ፡ ኦ፡ አብድ፡ በእንተ፡ እለ፡ ተሰምዩ፡ አማልክተ፡ በጸጋ፡ ወበእንተሂ፡ እለ፡ ተሰምዩ፡ ውሉደ፡ እግዚአብሔር፡ በሀብተ፡ መንፈስቅዱስ፡ እለ፡ በብሉይኒ፡ ወእለ፡ በሐዲስኒ። ወበእንተሰ፡ ከዊነ፡ ወልደ፡ እግዚአብሔር፡ ዘበህላዌ፡ ኅድጉ፡ ሎቱ፡ ለኢየሱስ፡ ክርስቶስ። ተኀፈርኬ፡ ኦ፡ ንስጥሮስ፡ ዘትብሎ፡ ለወልደ፡ እግዚአብሔር፡ ወልደ፡ ዮሴፍ፡ ውእቱ። ናሁኬ፡ ይጸርሕ፡ አቡሁ፡ እንዘ፡ ይብል፡ ዝንቱ፡ ውእቱ፡ ወልድየ፡ ዘአፈቅር፡ ወሎቱ፡ ስምዕዎ። ተኀፈርኬ፡ ኦ፡ ንስጥሮስ፡ ዘትብሎ፡ ለወልደ፡ አምላክ፡ ተወልደ፡ በሩካቤ። ናሁኬ፡ ይኬልሕ፡ ኢሳይያስ፡ እንዘ፡ ይከውን፡ ስምዐ፡ በእንተ፡ ልደቱ፡ ወይቤ፡ ናሁ፡ ድንግል፡ ትፀንስ፡ ወትወልድ፡ ወልደ፡ ወወሊዳ፡ ትሰምዮ፡ ስሞ፡ አማኑኤል። ተኀፈርኬ፡ ኦ፡ ንስጥሮስ፡ ዘትብሎ፡ ለአማኑኤል፡ ተፀንሰ፡ በዘርዐ፡ ብእሲ። ናሁኬ፡ ይነግር፡ በእንቲአሁ፡ ዳዊት፡ ነቢይ፡ እንዘ፡ ይብል፡ ይወርድ፡ ከመ፡ ጠል፡ ውስተ፡ ፀምር፡ ወከመ፡ ነጠብጣብ፡ ዘያንጠበጥብ፡ ዲበ፡ ምድር። ወይሠርፅ፡ ጽድቅ፡ በመዋዕሊሁ፡ ወብዙኅ፡ ሰላም፡ እስከ፡ የኀልፍ፡ ወርኅ። ወይኴንን፡ እም፡ ባሕር፡ እስከ፡ ባሕር፡ ወእም፡ አፍላግ፡ እስከ፡ አጽናፈ፡ ዓለም። ይገንዩ፡ ቅድሜሁ፡ ኢትዮጵያ። ወጸላዕቱሂ፡ ሐመደ፡ ይቀምሑ። ወዘይቤሰ፡ ይወርድ፡ ከመ፡ ጠል፡ ውስተ፡ ፀምር፡ ርደተ፡ ወልደ፡ እግዚአብሔር፡ ኀበ፡ ማርያም፡ ድንግል፡ ከመ፡ ይቤ፡ እግዚአብሔር፡ በዳግም፡ ሕግ፡ አጽምዕ፡ ሰማይ፡ ወእንግርከ፡ ከመ፡ ትስማዕ፡ ምድር፡ ቃለ፡ አፉየ፡ ወትሰፈዎ፡ ከመ፡ ዝናም፡ ለነገርየ፡ ወይረድ፡ ከመ፡ ጠል፡ ነቢብየ። ፀምርሰ፡ ይተረጐም፡ በቅድስት፡ ድንግል። ወጠልኒ፡ በቃለ፡ እግዚአብሔር፡ ዘኀደረ፡ ውስተ፡ ማኅፀና። በከመ፡ ሰአለ፡ ጌዴዎን፡ ትእምርተ፡ እም፡ ኀበ፡ እግዚአብሔር፡ እንዘ፡ ይብል፡ ናሁ፡ አነ፡ እሰፍሕ፡ ፀምረ፡ ብዙተ፡ በውስተ፡ ዐውድ። ወእም፡ ከመ፡ ወረደ፡ ጠል፡ ውስተ፡ ፀምር፡ ባሕቲቱ፡ ወኩሉ፡ ምድር፡ ይቡስ፡ አአምር፡ እንከ፡ ከመ፡ ታድኅኖሙ፡ ለእስራአል፡ በከመ፡ ትቤ። ወኮነ፡ ከማሁ። ወጌሠ፡ ገዴዎን፡ በሳታኒ፡ ወአፀሮ፡ ለውእቱ፡ ፀምር፡ ወወጽአ፡ ማይ፡ እም፡ ውእቱ፡ ፀምር፡ ወመልዐ፡ አይገነ። ወይቤ፡ ጌዴዎን፡ ለእግዚአብሔር፡ ኢትትመዐዕ፡ በመዐት፡ ላዕሌየ፡ ወእነግረከ፡ ካዕበ፡ አሐተ፡ ፀምር፡ ይኩን፡ ይቡሰ፡ እንተ፡ ባሕቲቱ፡ ወውስተ፡ ኵሉ፡ ምድር፡ ይረድ፡ ጠል። ወገብረ፡ ከማሁ፡ እግዚአብሔር፡ በይእቲ፡ ሌሊት፡ ወኮነ፡ ይቡሰ፡ ፀምር፡ ባሕቲቱ፡ ወውስተ፡ ኵሉ፡ ምድር፡ ወረደ፡ ጠል። መድፍን፡ ኅቡዕ፡ ውስተ፡ ከርሠ፡ መጻሕፍት፡ ዝጉብ፡ ወኢይሬእዮ፡ ዕዉረ፡ ልብ። ቃለ፡ ቀርን፡ ይጸርሕ፡ በአፈ፡ ነቢያት፡ ወሐዋርያት፡ ወኢይበውእ፡ ውስተ፡ እዝነ፡ ድንቅወ፡ ኅሊና። መናስግተ፡ ሐጺን፡ እመ፡ ጸንዐ፡ ይትረኀው፡ በእደ፡ ነሀቢ። ወመዐፁተ፡ ብርትኒ፡ ይትመሰዋ፡ በእሳተ፡ ምንሀብ፡ ወልበ፡ አብድሰ፡ አልቦ፡ ዘይክል፡ አርኅዎቶ፡ ኢበቃለ፡ ጥበብ፡ ወኢበቃለ፡ መጻሕፍት። አንብቦ፡ መጻሕፍትሰ፡ ከመ፡ ነበስባሰ፡ ነፍስ፡ ውስተ፡ አፉሁ፡ ለአብድ፡ ይትሜካሕ፡ በአንብቦታ፡ ወኢየአምር፡ ዘውሳጢታ። ይመስል፡ ዘይሬኢ፡ መዛግብተ፡ ቤተ፡ ንጉሥ፡ ዕፅወ፡ ወኢቦአ፡ እንተ፡ ውሳጢቱ። ምንተ፡ ያወሥኦ፡ ለዘይሴአሎ፡ በእንተ፡ ንዋየ፡ ነገሥት። እለሂ፡ ይሰመዩ፡ መምህራነ፡ እንዘ፡ ዕሩቃን፡ እሙንቱ፡ እም፡ አእምሮ፡ መጻሕፍት፡ ኢፍድፉዳን፡ እሙንቱ፡ እም፡ ዳጎኖሙ፡ ለሰብአ፡ አዛጦን፡ ወእም፡ አጵሎኖሙ፡ ለነገሥተ፡ አረሚ፡ እለ፡ ግልቡባን፡ በሥራያት፡ ወንቡራን፡ ዲበ፡ መንፀፈ፡ ሜላት። ወእንተ፡ ውስጦሙሰ፡ እምነ፡ ዕፀው፡ ግዙማን፡ ወእምነ፡ አእጽምተ፡ እንሰሳ፡ ርኩሳን፡ እለ፡ ያዐርጉ፡ ሎሙ፡ ዕጣነ፡ ወሰንበልተ፡ ወኢይበውእ፡ መዐዛ፡ ዕጣን፡ ውስተ፡ አንፎሙ። ኢይበልዑ፡ እምነ፡ መሳብሕተ፡ መሥዋዕቶሙ፡ ወኢይሰትዩ፡ እምነ፡ ወይነ፡ ሞጻሕቶሙ። ወኢይረድእዎ፡ ለዘይትአመን፡ ወኢያኀስሙ፡ ዲበ፡ ዘይገፍዖሙ፡ ዘበከ፡ ይሰመዩ፡ አማልክተ። ወከማሁ፡ እሉኒ፡ መምህራን፡ ዘበከ፡ ይሰመዩ፡ መምህራነ፡ ዘእሙንቱ፡ ጽሙአን፡ እም፡ ቃለ፡ እግዚአብሔር፡ እፎ፡ እንከ፡ ያረውይዎ፡ ለዘመጽአ፡ ኀቤሆሙ። ወእመሂ፡ አስተይዎ፡ ያሰትይዎ፡ ማየ፡ ሕሙገ፡ ወማየ፡ ሙሱነ፡ ዘኢተቀድሐ፡ እም፡ አፈ፡ ነቢያት፡ ወሐዋርያት። እስመ፡ ነቢያትኒ፡ ኢኮኑ፡ መምህራነ፡ በሥምረተ፡ ርእሶሙ፡ ዘእንበለ፡ በመባሕተ፡ መንፈስቅዱስ። ወለሐዋርያትኒ፡ ኢአብሖሙ፡ ለምህሮ፡ ዘእንበለ፡ ይንሥኡ፡ መንፈሰ፡ ቅዱሰ። ወእም፡ ከመ፡ ሰትይዎ፡ ለመንፈስቅዱስ፡ መሀሩ፡ ዘበጽድቅ፡ ወሰበኩ፡ በርትዕ። ወይእዜሰ፡ ይሰመዩ፡ መምህራነ፡ እለ፡ ኢጥዕምዋ፡ ለቃለ፡ እግዚአብሔር፡ ወእለ፡ ኢልህቁ፡ በአጥባቲሃ፡ ለቤተክርስቲያን፡ ወይፈቅዱ፡ ይዝርዉ፡ አባግዐ፡ መርዔቱ፡ ለክርስቶስ። ንትመየጥኬ፡ ኀበ፡ ፍካሬሃ፡ ለፀምረ፡ ጌዴዎን፡ ሰፍሐ፡ ጌዴዎን፡ ፀምረ፡ ንጹሐ፡ እንተ፡ ኢተአንመት፡ ወሰአለ፡ ትእምርተ፡ እም፡ ኀበ፡ እግዚአብሔር፡ ከመ፡ ይረድ፡ ጠል፡ ውስተ፡ ፀምር፡ እንዘ፡ ኵላ፡ ምድር፡ ይብስት፡ እም፡ ነጠብጣበ፡ ዝናም፡ ወገብረ፡ እግዚአብሔር፡ በከመ፡ ይቤ፡ ጌዴዎን። ወበእንተዝ፡ አኅበረ፡ ዳዊት፡ ተነብዮ፡ እንዘ፡ ይብል፡ ወይወርድ፡ ከመ፡ ጠል፡ ውስተ፡ ፀምር። ርደተ፡ ጠልሰ፡ ኀበ፡ ፀምር፡ ባሕቲታ፡ እንዘ፡ ይብስት፡ ኵላ፡ ምድር፡ ይተረጐም፡ በርደተ፡ ጠለ፡ መለኮት፡ ውስተ፡ ማኅፀነ፡ ድንግል፡ እንዘ፡ ኵሎን፡ አንስት፡ ኢልኩፋት፡ እማንቱ፡ በነጠብጣበ፡ ኃይል፡ ዘአርያም። ወካዕበመ፡ ሰአለ፡ ጌዴዎን፡ ከመ፡ ይረድ፡ ጠል፡ ውስተ፡ ኵሉ፡ ምድር፡ ወትኩን፡ ይብስተ፡ ባሕቲታ፡ ፀምር፡ ወገብረ፡ ዓዲ፡ እግዚአብሔር፡ በከመ፡ ይቤ፡ ጌዴዎን። ዝኒ፡ ይተረጐም፡ በነጠብጣበ፡ ዘርዐ፡ ሙላድ፡ ዘልማድ፡ ዘይከውን፡ ውስተ፡ ማኅፀኖን፡ ለአንስተ፡ ኵሉ፡ ዓለም። ወድንግልሰ፡ ንጽሕት፡ ሕርምት፡ ይእቲ፡ እም፡ ውእቱ፡ ነጠብጣበ፡ ዘርዕ፡ ኢልክፍት፡ ይእቲ፡ እም፡ ግማኔ፡ ወኢርስሕት፡ ይእቲ፡ በጥልቀተ፡ ሥጋ። በከመ፡ ቀዲሙ፡ ተወልደ፡ ባሕቲቱ፡ እግዚአብሔር፡ ዘእም፡ ባሕቲቱ፡ እግዚአብሔር፡ ወበዳግም፡ ተወልደ፡ ባሕቲቱ፡ ወልደ፡ እግዚአብሔር፡ ዘእም፡ ባሕቲታ፡ ወለተ፡ ዳዊት። በቀዳሚ፡ ተወልደ፡ ዘኢያስተርኢ፡ እምዘ፡ ኢያስተርኢ፡ ወበደኃሪ፡ ተወልደ፡ ዘኢይትለከፍ፡ እሳተ፡ ሕይወት፡ እም፡ እንተ፡ ትትገሠሥ፡ ሥጋ። በቀዳሚ፡ ተወልደ፡ ዘኢይትዐወቅ፡ ጥንተ፡ ህላዌሁ፡ ወበደኃሪ፡ ተወልደ፡ ፈጣሬ፡ አዝማን፡ ወወሳኔ፡ ዓመታት፡ እም፡ ወለት፡ ነአስ፡ ዘ፲ወ፭፡ አክራሚሃ። ዘቀዳሚ፡ ልደቶ፡ አመሥጠረ፡ ወዳኃሪ፡ ልደቶ፡ አመንከረ። ዘቀዳሚ፡ ልደቶ፡ ጠብለለ፡ በመግነዘ፡ ኅቡዓቲሁ፡ ከመ፡ ኢናእምሮ፡ ፍጡራን። ወዘደኃሪ፡ ልደቶ፡ ከሠተ፡ ለኖሎት፡ ወአስተርአየ፡ ለመሰግላን፡ ኢኮነ፡ እም፡ ቅድመ፡ ዝ፡ ወኢእምድኅረዝ፡ ልደተ፡ ብእሲ፡ እም፡ ብእሲት፡ ዘእንበለ፡ ዘርዐ፡ ብእሲ። አኮ፡ ዘሐጸ፡ ፍና፡ ትስብእት፡ በእንተ፡ ዘአልቦ፡ አብ፡ በዲበ፡ ምድር፡ አላ፡ ፍጹመ፡ ተሰብአ፡ ዘእም፡ ባሕቲታ፡ ብእሲት፡ ኮነ፡ ፍጹመ፡ ብእሴ። በከመ፡ ወጽአት፡ ፍጽምት፡ ብእሲት፡ እም፡ አጽመ፡ ገቦሁ፡ ለአዳም፡ እንዘ፡ አልባቲ፡ እም፡ ወኢሐጸ፡ ፍና፡ ትስብእት፡ እም፡ ጠባይዐ፡ አንስት፡ እለ፡ እም፡ ድኅሬሃ። በከመ፡ ኢሐጸ፡ አጽመ፡ ገበዋቲሁ፡ ለአዳም፡ እም፡ ዘቀዲሙ፡ ህላዌ፡ በእንተ፡ ዘተንሥአ፡ እምኔሁ፡ ፩፡ አጽም፡ ለሕንጻ፡ ሥጋሃ፡ ለሔዋን። ከማሁ፡ ኢሐጸ፡ ማኅተመ፡ ድንግልናሃ፡ ለማርያም፡ በእንተ፡ ዘወለደቶ፡ ለወልደ፡ አምላክ፡ ሕያው። በከመ፡ ኢረከቦ፡ ለአዳም፡ ሕማመ፡ ፃዕር፡ እንዘ፡ ይትነቀል፡ አጽመ፡ ገቦሁ፡ እስመ፡ ወሀቦ፡ እግዚአብሔር፡ ዐቢየ፡ ሕድመተ። ወከማሁ፡ ኢረከባ፡ ሕማመ፡ ወሊድ፡ ለድንግል፡ እንዘ፡ ዕፅው፡ ማኅተመ፡ ሥጋሃ። ተቀሐዎ፡ ሰይጣን፡ ለእግዚአብሔር፡ ወፈቀደ፡ ያቅም፡ ስብሐተ፡ ለርእሱ። ኀሠሠ፡ ዘኢይደልዎ፡ ወኀለየ፡ ዘኢይሜጥኖ። አማንኬ፡ ይደልዎ፡ ኀሣር፡ ለዘመጠነዝ፡ ዕቡይ። አማንኬ፡ ይደልዎ፡ መንጸፈ፡ ደይን፡ ለዘመጠነዝ፡ መኰንነ፡ ዓመፃ። አማንኬ፡ ይደልዎ፡ መዋቅሕተ፡ እሳት፡ ለዘከመዝ፡ ዕቡየ፡ ኅሊና። ወእምዝኒ፡ አኮ፡ ዘነስሐ፡ አላ፡ ቦአ፡ ውስተ፡ አርዌ፡ ምድር፡ ወአልሖሰሰ፡ ውስተ፡ እዘኒሃ፡ ለሔዋን፡ ወአምከራ፡ በዘትሰደድ፡ እም፡ ገነት፡ ወአስተባውሃ፡ ለበሊዐ፡ ዕፀ፡ ዕልወት፡ ወአሰፈዋ፡ ለከዊነ፡ አምላክ። ወሶበ፡ ሰምዐት፡ ትእዛዞ፡ ተጸርዐ፡ ትእዛዘ፡ እግዚአብሔር፡ ፈጣሪሃ። ወአዳምኒ፡ ሶበ፡ ሰምዐ፡ ትእዛዘ፡ ሔዋን፡ ብእሲቱ፡ ሰሰለ፡ ጸጋ፡ እግዚአብሔር፡ እም፡ ላዕሌሁ። መንክርኬ፡ ፍትሐ፡ ኵነኔሁ፡ ለእግዚአብሔር፡ እስመ፡ ይቤሎ፡ ለአዳም፡ አይቴ፡ ሀሎከ፡ ወይቤ፡ አዳም፡ ቃለከ፡ ሰማዕኩ፡ እንዘ፡ ታንሶሱ፡ ውስተ፡ ገነት፡ ወተኀባእኩ፡ እስመ፡ ዕራቅየ፡ ሀሎኩ። ወይቤሎ፡ እግዚአብሔር፡ ለአዳም፡ መኑ፡ አይድአከ፡ ከመ፡ ዕራቀከ፡ አንተ፡ ሶበ፡ አኮ፡ ዘበላዕከ፡ ዘንተ፡ ዕፀ፡ ዘአነ፡ ከላእኩከ። ወይቤ፡ አዳም፡ ብእሲትየ፡ እንተ፡ ወሀብከኒ፡ ምስሌየ፡ ትንበር፡ ይእቲ፡ ወሀበተኒ፡ ወበላዕክዎ። ወይቤላ፡ እግዚአብሐር፡ ለብእሲት፡ ዘንተኑ፡ ገበርኪ፡ ወትቤ፡ ብእሲት፡ አርዌ፡ ምድር፡ አስፈጠተኒ። ወይቤላ፡ እግዚአብሔር፡ ለአርዌ፡ ምድር፡ ርግምተ፡ ኩኒ፡ እም፡ ኵሉ፡ አርዌ፡ ምድር፡ በእንግድዓኪ፡ ሑሪ፡ ወመሬተ፡ ብልዒ። ቀደመ፡ እግዚአብሔር፡ ረጊሞታ፡ ለአርዌ፡ ምድር፡ ወኢተሰአላ፡ በእንተ፡ አበሳሃ፡ ዘከመ፡ ተስእሎሙ፡ ለአዳም፡ ወለሔዋን፡ እስመ፡ አእመረ፡ ከመ፡ መሠረተ፡ ኃጢአት፡ እም፡ አርዌ፡ ምድር፡ ወጽአ። ዓዲመ፡ ተቀሐዎ፡ እግዚአብሔር፡ ለሰይጣን፡ በከመ፡ አምጽአ፡ ሞተ፡ ሰይጣን፡ በምክረ፡ እምነ፡ ሔዋን፡ ወከማሁ፡ አምጽአት፡ ሕይወተ፡ እግዝእትነ፡ ማርያም፡ በከመ፡ ተሰደድነ፡ በእንተ፡ ብእሲት፡ ኮነ፡ ልጹቃነ፡ መንገለ፡ እግዚአብሔር፡ በብእሲት። በከመ፡ አሰፈዎሙ፡ ዲያብሎስ፡ ከዊነ፡ አምላክ፡ ለአዳም፡ ወለሔዋን፡ ከማሁ፡ አሰፈዋ፡ ገብርኤል፡ ለማርያም፡ ወሊደ፡ አምላክ፡ በሥጋሃ። በከመ፡ ኄሰነ፡ እግዚአብሔር፡ በበሊዐ፡ ዕፀ፡ ዕልወት፡ ከማሁ፡ ተሣሃለነ፡ እግዚአብሔር፡ በዕፀ፡ መስቀሉ። በከመ፡ ተከሥተ፡ ዕርቃነ፡ አዳም፡ ማእከለ፡ ዕፀዊሃ፡ ለገነት፡ ከማሁ፡ ተከሥተ፡ ዕርቃነ፡ ትስብእቱ፡ ለመድኃኒነ፡ ማእከለ፡ ጉባኤሆሙ፡ ለማኅበረ፡ እስራኤል። በከመ፡ ወጽአ፡ ፍትሐ፡ ኵነኔ፡ ሞት፡ እም፡ ኀበ፡ ልዑል፡ ላዕለ፡ አዳም፡ እንዘ፡ ይብል፡ እስመ፡ መሬት፡ አንተ፡ ወውስተ፡ መሬት፡ ትገብእ፡ እንተ፡ እምኔሃ፡ ተንሣእከ፡ ከማሁ፡ ወጽአ፡ ፍትሐ፡ ኵነኔ፡ ሞት፡ እም፡ ኀበ፡ ሐና፡ ወቀያፋ፡ ላዕለ፡ መድኃኒነ፡ እስመ፡ ይቤሉ፡ ሕግ፡ ብነ፡ ወበሕግነ፡ ርቱዕ፡ ይሙት፡ እስመ፡ ወልደ፡ እግዚአብሔር፡ ረሰየ፡ ርእሶ። በከመ፡ ሤሞሙ፡ እግዚአብሔር፡ ለኪሩቤል፡ ወሱራፌል፡ ከመ፡ ይዕቀቡ፡ ፍኖተ፡ ዕፀ፡ ሕይወት፡ ከመ፡ ኢይግባእ፡ አዳም፡ ውስተ፡ ርስቱ፡ ከማሁ፡ ተደመሩ፡ ዐቀብተ፡ መቃብር፡ እም፡ ሐራ፡ ጲላጦስ፡ ወሊቃነ፡ ካህናት፡ ከመ፡ ኢይምጽኡ፡ አርዳኢሁ፡ ወኢይሥርቅዎ፡ ሌሊተ፡ ወኢይበሉ፡ ተንሥአ፡ እሙታን። በከመ፡ ኢክህሉ፡ ኪሩቤል፡ ወሱራፌል፡ ከሊኦቶ፡ ለአዳም፡ ከመ፡ ኢይባእ፡ ውስተ፡ ገነት፡ አመ፡ ተሣሃሎ፡ እግዚአብሔር፡ በሞተ፡ ወልዱ። ከማሁ፡ ኢክህሉ፡ ሐራ፡ ጲላጦስ፡ ወሊቃነ፡ ካህናት፡ ከሊኦቶ፡ ለእግዚእነ፡ ተንሥኦ፡ እሙታን፡ ወነቢረ፡ በየማነ፡ አቡሁ። ኦ፡ ንስጥሮስ፡ ዐላዊ፡ እፎ፡ ኢብህመ፡ አፉከ፡ ወኢጠግዐ፡ ልሳንከ፡ ውስተ፡ ጕርዔከ፡ ሶበ፡ ትቤሎ፡ ለፈጣሪ፡ ወልደ፡ ዮሴፍ። ሚ፡ መጠን፡ ኖኀ፡ ትዕግሥቱ፡ ለእግዚአብሔር፡ ወአርምሞተ፡ ክብሩ፡ ዘኢያዕፀዎ፡ ለእስትንፋሰ፡ አፉከ፡ እም፡ ድኅረ፡ ትቤ፡ ዘንተ። ሚ፡ መጠን፡ ኑኀ፡ ትዕግሥቱ፡ ለእግዚአብሔር፡ ዘጸንሐከ፡ መጠነ፡ ዕድሜ፡ ዓመታቲከ። አንሰኬ፡ እም፡ ፈታሕኩ፡ ከመ፡ ይኩን፡ ሕጹጸ፡ ሥቃየ፡ ኵነኔሆሙ፡ ለእለ፡ ሰቀልዎ፡ እም፡ ሥቃየ፡ ኵነኔከ። እሙንቱሰ፡ በኢያእምሮ፡ አሕመምዎ፡ እንዘ፡ ይመስሎሙ፡ ዘይቀንዑ፡ ለመንግሥተ፡ እግዚአብሔር። በከመ፡ ይቤ፡ ለሊሁ፡ በዕለተ፡ ሕማሙ፡ አመ፡ ጸአተ፡ ነፍሱ፡ ሥረይ፡ ሎሙ፡ አባ፡ እስመ፡ ዘኢየአምሩ፡ ይገብሩ። ጳውሎስኒ፡ ይቤ፡ ሶበሰ፡ አእመሩ፡ እም፡ ኢሰቀልዎ፡ ለእግዚአ፡ ስብሐት። ኦሪትኒ፡ ትቤ፡ ወኢኀለይዎ፡ ከመ፡ ያእምርዎ፡ ወኢየአምርዎ፡ በመዋዕል፡ ዘይመጽእ። አንተሰኬ፡ ኦ፡ ንስጥሮስ፡ አእመርከ፡ ቃለ፡ ነቢያት፡ ወተሠየምከ፡ መምህረ፡ ለትምህርተ፡ ሐዋርያት። ተዘርዐ፡ ሥርናይ፡ ውስተ፡ ልብከ፡ ወረሰይኮ፡ ክርዳደ፡ በእከየ፡ ኅሊናከ። ሐረገ፡ ወይን፡ በቈለ፡ ውስተ፡ አጸድከ፡ ወፈረየ፡ ሦከ፡ በቃለ፡ ትምህርትከ። ኵሎሰ፡ ክህድከ፡ ወበእንተ፡ ቃለ፡ ወንጌላውያንኒ፡ ትትከሐድኑ። ስማዕ፡ ዘይቤ፡ ወየአክል፡ ፴፡ ክረምቱ፡ ለኢየሱስ፡ ወልደ፡ እግዚአብሔር፡ ወይመስሎሙ፡ ወልደ፡ ዮሴፍ፡ ውእቱ፡ ወልደ፡ ኤሊ። ሶበሰኬ፡ ኢየሱስ፡ ወልደ፡ ዮሴፍ፡ እም፡ ኢይቤ፡ ወይመስሎሙ፡ ወልደ፡ ዮሴፍ፡ ውእቱ። ወካዕበ፡ ይቤ፡ ወንጌላዊ፡ ወአመ፡ ኮነ፡ ፍጹመ፡ ሎቱ፡ ፲ወ፪፡ ክረምቱ፡ ለኢየሱስ፡ ዐርጉ፡ ካዕበ፡ ለበዓል፡ ኢየሩሳሌም፡ በከመ፡ ያለምዱ፡ ወሰሊጦሙ፡ ግብሮሙ፡ አተዉ። ወሕፃንሰ፡ ኢየሱስ፡ ነበረ፡ ኢየሩሳሌም፡ ወኢያእመሩ፡ ዮሴፍ፡ ወእሙ፡ ወይመስሎሙ፡ ዘበፍኖት፡ ሀሎ፡ ምስለ፡ ሰብእ፡ ወበጺሖሙ፡ ኀሠሥዎ፡ በዕለታ፡ ኀበ፡ አዝማዲሁ፡ በኀበ፡ እለ፡ የአምርዎ፡ ወኢረከብዎ፡ ተሰውጡ፡ ኀበ፡ አዝማዲሁ፡ በኀበ፡ እለ፡ የአምርዎ፡ ወኢረከብዎ፡ ተሰውጡ፡ ኢየሩሳሌም፡ ይኅሥሥዎ። ወእምዝ፡ በሣልስታ፡ ረከብዎ፡ በምኵራብ፡ እንዘ፡ ይነብር፡ ማእከለ፡ ሊቃውንት፡ ወያጸምዖሙ፡ ወይሴአሎሙ፡ ወያነክርዎ፡ ኵሎሙ፡ እለ፡ ሰምዕዎ፡ ጥበቦ፡ ወአውሥኦቶ። ወሶበ፡ ረከብዎ፡ ደንገጹ፡ ወትቤሎ፡ እሙ፡ ወልድየ፡ ለምንት፡ ረሰየከነ፡ ከመዝ፡ እስመ፡ ናሁ፡ አነኒ፡ ወአቡከኒ፡ ሰራህነ፡ እንዘ፡ ነኀሥሠከ። ወይቤሎሙ፡ ምንተ፡ ተኀሥሡኒ፡ ኢያእመርክሙኑ፡ ከመ፡ ዘውስተ፡ ቤተ፡ አቡየ፡ ሀሎኩ። ወትቤሎ፡ እሙ፡ ለኢየሱስ፡ ሠራህነ፡ እንዘ፡ ነኀሥሠከ፡ አነኒ፡ ወአቡከኒ። ይእቲሰኬ፡ ዘበአማን፡ እሙ፡ ወዮሴፍሰ፡ አኮ፡ አቡሁ፡ እም፡ ዘርዐ፡ ሙላድ፡ አላ፡ አቡሁ፡ በዘመደ፡ ሥጋ። እስመ፡ አበ፡ አቡሃ፡ ለማርያም፡ ወአበ፡ አቡሁ፡ ለዮሴፍ፡ አኃው፡ እሙንቱ። ወበእንተዝ፡ ወሀብዋ፡ ለማርያም፡ ከመ፡ ይዕቀባ፡ በንጽሕ፡ እስከ፡ አመ፡ ያሰተዋስብዎሙ፡ ዘበሕግ፡ በከመ፡ ተአዘዘ፡ ሎን፡ ለአዋልደ፡ ሰለጰአድ፡ እም፡ ኀበ፡ እግዚአብሔር፡ ከመ፡ ይንሥኣ፡ ርስተ፡ አቡሆን፡ ወይትዋሰባ፡ ኀበ፡ ቤት፡ ዘቅሩቦን፡ ዘእም፡ ነገደ፡ አቡሆን፡ ከመ፡ ኢይትፋለስ፡ ርስት፡ እም፡ ነገድ፡ ኀበ፡ ካልዕ፡ ነገድ። ፶፡ ወለማርያምኒ፡ አልባቲ፡ እኅው፡ ወኢእኅት፡ እስመ፡ ኢወለዱ፡ አቡሃ፡ ወእማ፡ ዘእንበለ፡ ባሕቲታ፡ ወበእንተዝ፡ ወሀብዋ፡ ለዮሴፍ፡ ኪያሃ፡ ከመ፡ ኢይትፋለስ፡ ርስተ፡ አቡሃ፡ ኀበ፡ ካልዕ፡ ነገድ። እስመ፡ ዮሴፍ፡ ወማርያም፡ ክልዔሆሙ፡ ዘርዐ፡ ዳዊት፡ እሙንቱ። ወበእንተዝ፡ ትቤሎ፡ ሰራህነ፡ እንዘ፡ ነኀሥሠከ፡ አነሂ፡ ወአቡከሂ። አዝመረ፡ ወልደ፡ እግዚአብሔር፡ በአቡሁ፡ ሰማያዊ፡ ወይቤ፡ ኢያእመርክሙኑ፡ ከመ፡ ዘውስተ፡ ቤተ፡ አቡየ፡ ሀሎኩ። እስመ፡ ቤተ፡ መቅደስ፡ ቤተ፡ አቡሁ፡ ይእቲ፡ በከመ፡ ይቤ፡ ወንጌላዊ፡ ወገብረ፡ መቅሠፍተ፡ ጥብጣቤ፡ ዘሐብል፡ ወሰደደ፡ እም፡ ኵራብ፡ እለ፡ ይሠይጡ፡ አልህምተኒ፡ ወአባግዐኒ፡ ወዘረወ፡ ወርቆሙ፡ ለመወልጣን፡ ወገፈትአ፡ ማዕዳቲሆሙ፡ ወመናብርቲሆሙኒ፡ ለእለ፡ ይሠይጡ፡ ርግበ። ወይቤ፡ ሎሙ፡ ኢትረስዩ፡ ቤተ፡ አቡየ፡ ቤተ፡ ምሥያጥ። ቤትየሰ፡ ቤተ፡ ጸሎት፡ ይሰመይ፡ ወአንትሙሰ፡ ረሰይክምዎ፡ በአተ፡ ሠረቅት፡ ወጕሕልያ። ንግባእኬ፡ ኀበ፡ ጥንተ፡ ዜና፡ ዘንጽሕት፡ ድንግል፡ ወዘእኁሃ፡ አረጋዊ፡ ቦአት፡ ወለተ፡ ዳዊት፡ ኀበ፡ ወልደ፡ ዳዊት። ቦአት፡ ርግብ፡ ንጽሕት፡ ኀበ፡ በግዕ፡ የዋህ። ቦአት፡ መጽሐፍ፡ ኅትምት፡ ኀበ፡ ብእሲ፡ ዘኢይክል፡ አንብቦታ። በከመ፡ ይቤ፡ ኢሳይያስ፡ ነቢይ፡ ወወሀብዎ፡ ለብእሲ፡ ዘኢይክል፡ መጽሐፈ። ወይቤ፡ ኢይክል፡ አንብቦታ። መጽሐፍሰ፡ ኅትምት፡ ይተረጐም፡ በቅድስት፡ ድንግል፡ ወሀብትሂ፡ እንተ፡ ተውህበት፡ ይተረጐም፡ በተወፍዮታ፡ እም፡ ቤተ፡ መቅደስ፡ ውስተ፡ ቤተ፡ ዮሴፍ። ወብሂለ፡ ኢየአክል፡ አንብቦታሰ፡ ይተረጐም፡ በኢቀሪበ፡ ሥጋሃ፡ ወበኢያእምሮ፡ ፅንሳ። በከመ፡ ይቤ፡ ወንጌላዊ፡ ወኢያእመራ፡ ዮሴፍ፡ እስከ፡ አመ፡ ወለደቶ። ወዘእንበለ፡ ይቅርባ፡ ተረክበት፡ እንዘ፡ ፅንስት፡ እመንፈስቅዱስ። ዛቲ፡ ይእቲ፡ ፅፀ፡ ጳጦስ፡ እንተ፡ ወለደቶ፡ ለእሳተ፡ መለኮት፡ እንተ፡ ዕፃ፡ ኢውዕየ፡ ወእሳቱ፡ ኢጠፍአ። ዛቲ፡ ይእቲ፡ በትረ፡ ሃይማኖት፡ ዘበእንቲአሃ፡ ይቤ፡ ኢሳይያስ፡ ትወጽእ፡ በትር፡ እም፡ ሥርወ፡ ዕሤይ፡ ወየዐርግ፡ ጽጌ፡ እም፡ ጕንዱ፡ ወየዐርፍ፡ ዲቤሁ፡ መንፈሰ፡ እግዚአብሔር። ዛቲ፡ ይእቲ፡ ተቅዋም፡ ዘወርቅ፡ ዘ፯፡ ማኅተዊሃ፡ ዘውእቶሙ፡ ፭፡ መጻሕፍተ፡ ሙሴ፡ ምስለ፡ ወንጌለ፡ መለኮት፡ ወምስለ፡ ቃለ፡ ትምህርቶሙ፡ ለሐዋርያት። ፯፡ መሳውር፡ ዘዲቤሃ፡ ፯፡ ሥዩማነ፡ ቤተ፡ ክርስቲያን። ወቅብዐ፡ ዘይትሰ፡ ኃይለ፡ ሃይማኖት፡ ውእቱ። ወፈትለ፡ ማኅቶትኒ፡ ኅሊና፡ ልብ፡ ውእቱ፡ ዘይትሜጠዎ፡ በአሚን፡ ለብርሃነ፡ ክርስቶስ። ወበእንተዝ፡ ይቤ፡ ዮሐንስ፡ አቡቀለምሲስ፡ ከመዝ፡ ይቤ፡ ዘይነብር፡ ማእከለ፡ ሰብዑ፡ ማኅትው፡ ዘወርቅ፡ ወያጸንዕ፡ በእደዊሁ፡ ፯፡ ከዋክብተ፡ ውእቱ፡ ኢየሱስ፡ ሊቀ፡ ማኅበርነ፡ አበ፡ መንፈስነ፡ ውእቱ፡ ኢየሱስ፡ ክርስቶስ፡ ሠርዌ፡ እምነትነ፡ ዐምደ፡ ሃይማኖት፡ ውእቱ፡ ኢየሱስ፡ ክርስቶስ፡ አበ፡ መንፈስነ። ወልደ፡ እግዚአብሔር፡ በህላዌሁ፡ ወወልደ፡ እጓለ፡ እመ፡ ሕያው፡ በሥጋዌሁ፡ ዕሩየ፡ ክብር፡ ወስብሐት፡ ምስለ፡ ዘወለዶ፡ የሀሉ፡ ምስሌነ፡ ወምስለ፡ ኵልክሙ፡ ለዓለመ፡ ዓለም፡ አሜን። ተፈጸመ፡ ዘለፋሁ፡ ለንስጥሮስ፡ ሙሱነ፡ ኅሊና፡ ዘአርኰሶ፡ ለጵጵስና፡ ወነሠቶ፡ ለጥምቀተ፡ ክርስትና፡ ይቤ፡ ጊዮርጊስ፡ ለቤተ፡ ክርስቲያን፡ ምስኪና፡ ዘልህቀ፡ በዔላማ፡ ወተሐጽነ፡ በምዕዋና፡ ዘይሰብክ፡ ሃይማኖተ፡ በርእሰ፡ መዓዝና፡ ወበእንተ፡ ማርያምሂ፡ ውእቱ፡ ጸዋሬ፡ ዜና፡ ከመ፡ ወለደት፡ አምላከ፡ በድንግልና፡ ወለዛቲ፡ መጽሐፍ፡ አስተሣነያ፡ በሕርትምና፡ እንዘ፡ ጽቡስ፡ ውእቱ፡ በልቡና፡ ወአዘዘ፡ ከመ፡ ትትነበብ፡ በዕለተ፡ ጌና፡ ስብሐት፡ ለእግዚአብሔር፡ ለዘይመጽእ፡ በደመና፡ ለዓለመ፡ ዓለም፡ አሜን። ምራፍ፡ ፭፡ ምንባብ፡ ዘልደት፡ በስመ፡ እግዚአብሔር፡ ዘይተዋሐድ፡ በትሥልስት፡ ወይሤለስ፡ በተዋሕዶት፡ ኅቡረ፡ ህሉና፡ ዕሩየ፡ መለኮት፡ ዘኢይትበሀሉ፡ ፫፡ አማልክት፡ አላ፡ ፩፡ አምላክ፡ እስመ፡ እኁዛን፡ በጽምረት፡ ወድሙራን፡ በአሐቲ፡ ሥምረት፡ እንጡሉዓን፡ በመብረቀ፡ ስብሐት፡ ወግልቡባን፡ በእሳት፡ ዘኢይቀድም፡ ፩፡ እም፡ ካልዑ፡ ወካልዑ፡ እም፡ ሣልሱ፡ ኢመጠነ፡ ሩፀተ፡ ነፋሳት፡ ወኢመጠነ፡ ቅጽበተ፡ አዕይንት፡ ዘአሐደ፡ ይሰገድ፡ እም፡ ኀበ፡ ሰብእ፡ ወመላእክት፡ ሎቱ፡ ግናይ፡ ለቀዳማዊ፡ ዘእንበለ፡ ጥንት፡ ወደኃራዊ፡ ዘእንበለ፡ ተፍጻሜት፡ ለዓለመ፡ ዓለም፡ አሜን። ንጽሕፍ፡ እንከ፡ ዘለፋሁ፡ ለፎጢኖስ፡ ዘይቤ፡ ለፌ፡ እማርያም፡ ህላዌሁ፡ ለክርስቶስ፡ ወአኮ፡ እም፡ ከሓ፡ ዘህሉና፡ አብ። ለፎጢኖስ፡ ወለአርዮስ፡ ወለስብልያኖስ፡ አሐቲ፡ ፍትወተ፡ ኅሊናሆሙ። ወእመሰ፡ በአፉሆሙ፡ ኢኀብሩ፡ ፍካሬ፡ ሃይማኖት፡ ወበዓይነ፡ ልቡናሰ፡ ይትናጸሩ፡ ለአእክዮ፡ ህላዌ፡ ወለአሕጽጾ፡ ክዋኔሁ፡ ለወልድ፡ እምአብ። አርዮስ፡ ይቤ፡ ፍጡር፡ ውእቱ፡ ክርስቶስ፡ ዘተወልደ፡ እማርያም፡ በእንተ፡ መድኃኒትነ፡ እስመ፡ ይትሔዘቦ፡ ልቡ። በከመ፡ ተፈጥረ፡ አዳም፡ እመሬተ፡ ምድር፡ ወበከመ፡ ተፈጥረት፡ ሔዋን፡ እም፡ አጽመ፡ ገቦሁ፡ ለአዳም፡ ወከማሁ፡ ተፈጥረ፡ ክርስቶስ፡ እማኅፀነ፡ ድንግል፡ ወተወልደ፡ በእንተ፡ መድኃኒትነ፡ ይቤ። ናሁኬ፡ አርአየ፡ ፍና፡ ነገሩ፡ ከመ፡ በትእዛዘ፡ አብ፡ ተፈጥረ፡ እማርያም፡ ድንግል። ስብልያኖስ፡ ይቤ፡ አብ፡ ከመ፡ ብእሲ፡ ወልድ፡ ከመ፡ ንባበ፡ ልሳኑ፡ ወመንፈስ፡ ቅዱስ፡ ከመ፡ እስትንፋሰ፡ አፉሁ። ወበእንተዝ፡ ይቤ፡ ፩፡ ገጽ፡ ግጻዌሰ፡ ባሕቲቱ፡ አቀመ፡ በአብ፡ ወለወልድኒ፡ ረሰዮ፡ ከመ፡ እንተ፡ ንባብ፡ ዘበእዝን፡ ይደምጽ፡ ወኢያስተርኢ፡ ለዓይን። ወለመንፈስቅዱስሂ፡ ረሰዮ፡ ከመ፡ እስትንፋሰ፡ አፍ፡ ዘኢይትከሀል፡ ለነጽሮ፡ ወኢይትአመር፡ ኀበ፡ ዓይ፡ የሐውር። ወከመ፡ ቦቱ፡ መልክእ፡ ለወልድ፡ ወለመንፈስቅዱስ፡ በከመ፡ መልክአ፡ አብ፡ አብጻሕነ፡ ስምዐ፡ መጻሕፍት። ወሀሎ፡ ጽሑፍ፡ ውስተ፡ መጽሐፈ፡ ዘለፋሁ። ፎጢኖስ፡ ይቤ፡ ለፌ፡ እማርያም፡ ክዋኔሁ፡ ለወልድ፡ እንዘ፡ ይትሔዘብ፡ ውእቱኒ፡ ከመ፡ ቃለ፡ ገብርኤል፡ ዘመልእክተ፡ አብ፡ ተፀንሰ፡ እማርያም፡ ወኢይቤ፡ ወልድ፡ ዘህልው፡ ምስለ፡ አብ፡ ተሰብአ፡ እማርያም፡ በብሥራተ፡ ገብርአል፡ መልአክ። ናሁኬ፡ ኀበረ፡ ግዕዘ፡ እበዶሙ፡ ለሠለስቲሆሙ፡ ኵሎሙ፡ አረዩ፡ ወኅቡረ፡ ዐለዉ። ኦ፡ ፎጢኖስ፡ ምንትኑ፡ ረባሕ፡ ለከ፡ ለእመ፡ ታመልኮ፡ ለወልድ፡ ለዘተወልደ፡ እም፡ ብእሲት፡ ለእመ፡ ኢኮነ፡ ውእቱ፡ ፍጹመ፡ ወልደ፡ እግዚአብሔር። ኦ፡ ፎጢኖስ፡ ምንትኑ፡ ረባሕ፡ ለከ፡ ለእመ፡ ታመልኮ፡ ለፍጡር፡ እንዘ፡ ይትሔዘብ፡ ልብከ፡ ከመ፡ ኢህልው፡ ውእቱ፡ እም፡ ቅድመ፡ ዓለም። ኦ፡ ፎጢኖስ፡ ዘነበ፡ ከልብ፡ ዘተሎከ፡ አሰሮ፡ ለአርዮስ፡ ርእሰ፡ ዕልዋን፡ ዘይቤሎ፡ ለፈጣሪ፡ ፍጥረተ፡ ወአንተኒ፡ ትቤ፡ ለፌ፡ እማርያም፡ ህላዌሁጽ፡ አርዮስ፡ ቀደመከ፡ በዕልወት፡ ወአንተኒ፡ ተለውኮ፡ በጽርፈት። አርዮስ፡ ኮነከ፡ ርእሰ፡ በሙስና፡ ትምህርት፡ ወአንተኒ፡ ኮንከ፡ ዘነበ፡ በሙስና፡ ልብከ፡ እስመ፡ ኀበ፡ ቦአ፡ ርእስ፡ ህየ፡ ይተሉ፡ ዘነብ። ኦ፡ ፎጢኖስ፡ ተክለ፡ ሐሰት፡ ዘበታሕቱ፡ ኢትደይ፡ ሥርወ፡ ትክለትከ፡ ወበዘላዕሉ፡ ኢትጽገይ፡ ወኢይኩን፡ ብከ፡ ፍሬ፡ እስከ፡ ለዓለም። ኦ፡ ፎጢኖሰ፡ እም፡ አይቴ፡ ሰተይከ፡ ጽዋዐ፡ ሙስና፡ ዘምሉዕ፡ ሕምዘ፡ አንኮለሎ፡ ለልብከ፡ በእንባዜ፡ ስሕተት፡ ወከደኖ፡ ለቀራንብቲከ፡ በብፃወ፡ ኃጣውእ። ኦ፡ ፎጢኖስ፡ አርዌ፡ ጸዋግ፡ እም፡ አይቴ፡ ረከበከ፡ ነዓዊ፡ መሪር፡ ወነደፎ፡ ለልብከ፡ በአሕፃ፡ ስሕተቱ፡ ዘምሉዕ፡ ጽርፈተ፡ ወወደየ፡ ሕምዘ፡ ውስተ፡ ልብከ፡ ወእምዝ፡ ኢኀለይከ፡ ዘትትናገር፡ ወኢያእመርከ፡ ዘትትናበብ። ወትቤ፡ በነገረ፡ ዐመፃ፡ ክርስቶስ፡ ለፌ፡ እማርያም። እም፡ ኀየሰከ፡ ተዓጽዎ፡ ከናፍር፡ ወብህመተ፡ ልሳን፡ እም፡ ትንብብ፡ ዘንተ፡ ነገረ። እም፡ ኄሰከ፡ ኢወጺእ፡ እም፡ ሐቌ፡ አቡከ፡ ወኢረጊዕ፡ በውስተ፡ ማኅፀና፡ ለእምከ፡ እም፡ ትንብብ፡ ዘንተ፡ ነገረ። እም፡ ኄሰከ፡ ተአጽዎ፡ ማኅፀና፡ ለእምከ፡ ከመ፡ ኢታስተርኢ፡ በሙላድ፡ እም፡ ትንብብ፡ ዘንተ፡ ነገረ፡ በከመ፡ ይቤ፡ አግዚእነ፡ በእንተ፡ ይሁዳ፡ እም፡ ኄሶ፡ ለውእቱ፡ ብእሲ፡ ሶበ፡ ኢተወልደ። ፰፡ እም፡ ኀየሰከ፡ ከዊነ፡ ሐውልተ፡ ፄው፡ ከመ፡ ብእሲተ፡ ሎጥ፡ ወከዊነ፡ አርዌ፡ ገዳምኒ፡ ከመ፡ ናቡከደናጾር፡ እም፡ ትንብብ፡ ዘንተ፡ ነገረ። እም፡ ኀየሰከ፡ ኢሀልዎ፡ እም፡ ሀልዎ፡ እም፡ ትንብብ፡ ዘንተ፡ ነገረ። ኦ፡ ፎጢኖስ፡ ኮንከ፡ እንዚራሁ፡ ለሰይጣን፡ ወአስተንፈሰ፡ ውስተ፡ አፉከ፡ በእስትንፋሰ፡ አፉሁ፡ ወኮንከ፡ መሰንቆሁ፡ ለመንፈሰ፡ ሐሰት፡ ወደጐፀከ፡ በድኅንፃሁ፡ ወኮንከ፡ አርጋኖነ፡ አጋንንት፡ በዘይገብሩከ፡ ተውኔተ፡ በከመ፡ ፈቀዱ። ኮንከ፡ ሠረገላሁ፡ ለሰይጣን፡ ወተፅፅነ፡ ላዕሌከ፡ እንዘ፡ ይቀንየከ፡ በልጓመ፡ ቅኔሁ፡ ፀመደከ፡ ከመ፡ አባዕር፡ ወአንበረ፡ አርዑቶ፡ ውስተ፡ ክሳድከ። ወአውጽአከ፡ እም፡ ግብርናተ፡ ሤጠ፡ ደሙ፡ ለክርስቶስ፡ ወረሰየከ፡ ገብረ፡ ሎቱ። ወይቤለከ፡ ከሐድ፡ ልደቶ፡ ለክርስቶስ፡ ዘእም፡ ቅድመ፡ ዓለም፡ ወበል፡ ለፌ፡ እማርያም፡ ክዋኔሁ። ፱፡ ትትሔዘብኑ፡ ከመ፡ ቃለ፡ ገብርኤል፡ ተሠገወ፡ እማርያም፡ ወኢተአምርኑ፡ ከመ፡ እግዚአ፡ ገብርኤል፡ ተሰብአ፡ እምኔሃ። ፈነወ፡ ገብሮ፡ ኀበ፡ አመቱ፡ ከመ፡ ያብስራ፡ ብስራተ፡ ሥጋዌሁ። ወይቤላ፡ ተፈሥሒ፡ ፍሥሕት፡ እግዚአብሔር፡ ምስሌኪ፡ ወናሁ፡ ትፀንሲ፡ ወትወልዲ፡ ወልደ። ወትቤሎ፡ እፎኑ፡ ይከውነኒ፡ ዝንቱ፡ እንዘ፡ ኢየአምር፡ ብእሴ። ናሁኬ፡ እሙነ፡ ተናገረት፡ ወለተ፡ ዳዊት፡ እስመ፡ ኢሰምዐት፡ እም፡ ቅድመዝ፡ ዘከመዝ፡ ፅንሰ። ወበእንተዝ፡ ኢኄሳ፡ መልአክ፡ በከመ፡ ኄሶ፡ ለዘካርያስ፡ አላ፡ ይቤላ፡ መንፈስቅዱስ፡ ይመጽእ፡ ላዕሌኪ። ናሁኬ፡ ፩፡ ጾታ፡ ሥላሴ፡ ዘይቄድሳ፡ ከመ፡ ትኩን፡ ማኅደረ፡ መለኮት። ካዕበ፡ ይቤላ፡ መልአክ፡ ወኃይለ፡ ልዑል፡ ይጼልለኪ። ናሁ፡ ዝኒ፡ ካልዕ፡ ጾታ፡ ሥላሴ፡ ዘያጸንዓ፡ ለከዊነ፡ እመ፡ ወልዱ። ፲፡ ወዓዲመ፡ ይቤላ፡ መልአክ፡ ወዘኒ፡ ይትወለድ፡ እምኔኪ፡ ቅዱስ፡ ውእቱ፡ ወይሰመይ፡ ወልደ፡ ልዑል፡ ወይሁቦ፡ እግዚአብሔር፡ አምላክ፡ መንበረ፡ ዳዊት፡ አቡሁ። ናሁኬ፡ ሣልስ፡ ጾታ፡ ዘተወልደ፡ እም፡ ድንግል። ፲፩፡ ወበእንተ፡ መንፈስቅዱስኒ፡ ይቤ፡ ይመጽእ፡ ላዕሌኪ፡ ወኢይቤ፡ ይሠገው፡ እምኔኪ። ወበእንተ፡ አብኒ፡ ይቤ፡ ወኃይለ፡ ልዑል፡ ይጼልለኪ፡ ወኢይቤ፡ ይትወለድ፡ እምኔኪ። ወበእንተ፡ ወልድሰ፡ ይቤ፡ ወዘኒ፡ ይትወለድ፡ እምኔኪ፡ ቅዱስ፡ ውእቱ፡ ወይሰ፡ መይ፡ ወልደ፡ ልዑል፡ ወይሁቦ፡ እግዚአብሔር፡ አምላክ፡ መንበረ፡ ዳዊት፡ አቡሁ። በእንተ፡ ልደቱ፡ እም፡ አብ፡ ይቤ፡ ወይሰመይ፡ ወልደ፡ ልዑል፡ ወበእንተ፡ ልደቱ፡ እም፡ ድንግል፡ ይቤ፡ ወይሁቦ፡ እግዚአብሔር፡ አምላክ፡ መንበረ፡ ዳዊት፡ አቡሁ፡ እስመ፡ እም፡ ዘርዐ፡ ዳዊት፡ ይእቲ፡ ማርያም፡ በከመ፡ ይቤ፡ ጳውሎስ፡ ገብሩ፡ ለክርስቶስ፡ ዘተሠይመ፡ ሐዋርያሁ፡ ወተፈልጠ፡ ለትምህርተ፡ እግዚአብሔር፡ ዘአቅደመ፡ ነጊረ፡ በአፈ፡ ነቢያቲሁ፡ ወበመጻሕፍቲሁ፡ ቅዱሳት፡ በእንተ፡ ወልዱ፡ ዘተወልደ፡ ወመጽአ፡ እም፡ ዘርዐ፡ ዳዊት፡ በሥጋ፡ ሰብእ። ወአርአየ፡ ከመ፡ ወልደ፡ እግዚአብሔር፡ ውእቱ፡ በኃይሉ፡ ወበመንፈስ፡ ቅዱስ። ፲፪፡ ናሁኬ፡ ያኤምረከ፡ ጳውሎስ፡ ሶበ፡ ይብል፡ ወመጽአ፡ እም፡ ዘርዐ፡ ዳዊት፡ በሥጋ፡ ሰብእ፡ እስመ፡ ዘቅድመ፡ ሀሎ፡ ሐወጻ፡ ለቤተ፡ ዳዊት፡ ኢሥግው፡ እም፡ ትካት፡ ተሠገወ፡ እም፡ ወለተ፡ ዳዊት። ወበእንተዝ፡ ይቤ፡ ወመጽአ፡ እም፡ ዘርዐ፡ ዳዊት፡ በሥጋ፡ ሰብእ፡ ወአርአየ፡ ከመ፡ ወልደ፡ እግዚአብሔር፡ በኃይሉ፡ ወበመንፈስ፡ ቅዱስ። ፲፫፡ ካዕበ፡ ይቤ፡ ነቢይ፡ እግዚአብሔርሰ፡ እም፡ ቴማን፡ ይመጽእ፡ ወቅዱስኒ፡ እም፡ ደብረ፡ ፋራን። ፋራን፡ ይተረጐም፡ በጣዕዋ፡ ወጣዕዋኒ፡ ይተረጐም፡ በንጽሕት፡ ድንግል። ከደነ፡ ሰማያተ፡ ሥኑ፡ ዝኒ፡ ይተረጐም፡ በኃይለ፡ መለኮቱ፡ ዘዕሩይ፡ ምስለ፡ አቡሁ፡ ወመልዐ፡ ምድረ፡ ስብሐቲሁ። ወዝኒ፡ ይተረጐም፡ በእንተ፡ ገቢረ፡ መንክራቲሁ፡ ዘተሰብከ፡ ውስተ፡ ኵሉ፡ አጽናፈ፡ ዓለም፡ በከመ፡ ይቤ፡ ነቢይ፡ ውስተ፡ ኵሉ፡ ምድር፡ ወጽአ፡ ነገሮሙ፡ ወእስከ፡ አጽናፈ፡ ዓለም፡ በጽሐ፡ ነቢቦሙ። ፲፬፡ ወካዕበ፡ ይቤ፡ በነቢይ፡ ቡሩክ፡ ዘይመጽእ፡ በስመ፡ እግዚአብሔር፡ ባረክናክሙ፡ እም፡ ቤተ፡ እግዚአብሔር፡ እግዚአብሔር፡ እግዚእ፡ አስተርአየ፡ ለነ። ወዓዲ፡ ይቤ፡ ዘይነብር፡ ዲበ፡ ኪሩቤል፡ አስተርአየ። መኑኬ፡ ዘርዕዮ፡ ለእግዚአብሔር፡ ዘእንበለ፡ በሥጋዌሁ፡ በከመ፡ ይቤሎ፡ ለሙሴ፡ አልቦ፡ ዘርዕየ፡ ገጽየ፡ ዘየሐዩ። ፲፭፡ ዳዊትኒ፡ ይቤ፡ በእንተ፡ ርደተ፡ መለኮት፡ ኀበ፡ ማርያም፡ ወይወርድ፡ ከመ፡ ጠል፡ ውስተ፡ ፀምር። ወከመ፡ ነጠብጣብ፡ ዲበ፡ ምድር፡ ወይሠርፅ፡ ጽድቅ፡ በመዋዕሊሁ። ወብዙኅ፡ ሰላም፡ እስከ፡ የኀልፍ፡ ወርኅ። ወይኴንን፡ እም፡ ባሕር፡ እስከ፡ ባሕር፡ ወእም፡ አፍላግ፡ እስከ፡ አጽናፈ፡ ዓለም። ይገንዩ፡ ቅድሜሁ፡ ኢትዮጵያ፡ ወጸላዕቱሂ፡ ሐመደ፡ ይቀምሑ። ነገሥተ፡ ተርሴስ፡ ወደሰያት፡ አምኃ፡ ያበውኡ። ነገሥተ፡ ሳባ፡ ወዐረብ፡ ጋዳ፡ ያመጽኡ። ፲፮፡ ናሁኬ፡ አግሀደ፡ ቃለ፡ መዝሙር፡ ርደተ፡ ወልደ፡ እግዚአብሔር፡ ኀበ፡ ማርያም፡ ሶበ፡ ይብል፡ ወይወርድ፡ ከመ፡ ጠል፡ ውስተ፡ ፀምር፡ ወከመ፡ ነጠብጣብ፡ ዘያንጠበጥብ፡ ዲበ፡ ምድር። ወእምዝ፡ ያተሉ፡ ወይብል፡ ወይሠርፅ፡ ጽድቅ፡ በመዋዕሊሁ። በከመ፡ ይቤ፡ ጳውሎስ፡ ወማኅለቅቱሰ፡ ለጽድቅ፡ አሚን፡ በክርስቶስ። ሠረፀ፡ ጕንደ፡ መስቀል፡ ለምለማ፡ አዕፁቂሁ። ተሠፀረ፡ ጕንደ፡ ጣዖት፡ ወተቀጥቀጠ፡ ግልፎ፡ አማልክት፡ ሠረፀ፡ በረከተ፡ ወንጌል፡ ወተጸርአ፡ መርገመ፡ ኦሪት። ሠረፁ፡ መሀይምናን፡ ወተዘርዉ፡ ሰቃልያን። ሠረፁ፡ ካህናተ፡ ምሥጢር፡ ወተደምሰሱ፡ ገነውተ፡ አማልክት። ወብዙኅ፡ ሰላም፡ እስከ፡ የኀልፍ፡ ወርኅ፡ እስመ፡ አውራኂሁኒ፡ አውራኀ፡ ሰላም፡ ወዓመታቲሁኒ፡ ዓመታተ፡ ሣህል፡ ወምሕረት። ወይኴንን፡ እም፡ ባሕር፡ እስከ፡ ባሕር፡ ወእም፡ አፍላግ፡ እስከ፡ አጽናፈ፡ ዓለም። ዝኒ፡ በእንተ፡ መንግሥቱ፡ ሰፋኒት፡ ውስተ፡ ኵሉ፡ አጽናፈ፡ ዓለም። ፲፯፡ ይገንዩ፡ ቅድሜሁ፡ ኢትዮጵያ፡ ዝኒ፡ በእንተ፡ አሚነ፡ ሃይማኖቶሙ፡ ዘእንበለ፡ ሐዋርያ። ሰብአ፡ ሮሜ፡ አሕመምዎሙ፡ ለጴጥሮስ፡ ወለጳውሎስኒ፡ ወቀተልዎሙ፡ በኀሣር፡ ወእም፡ ድኅረዝ፡ አምኑ፡ በስብከቶሙ። ሰብአ፡ ሕንደኬ፡ ዘሐቁ፡ አነዳሁ፡ ለቶማስ፡ ወወደዩ፡ ወይነ፡ ወፄወ፡ ውስተ፡ ቍሰሊሁ፡ እስከ፡ ትውዒ፡ ነፍሱ፡ ወትትመሠው፡ ሥጋሁ፡ እስከ፡ አመ፡ ተሣሃሎ፡ እግዚአብሔር፡ ወፈወሶ፡ ከመ፡ ዘኢሐመ። ወእም፡ ድኅረዝኒ፡ ረገዝዎ፡ በ፬፡ ኩያንው፡ ወቀተልዎ፡ በመልዕልተ፡ ደብር፡ ወእም፡ ድኅረዝ፡ አምኑ፡ በስብከቱ። ፲፰፡ ወማርቆስ፡ ወንጌላዊ፡ ሰበከ፡ በአድያመ፡ ግብጽ፡ ወእለእስክንድርያ፡ ሰሐብዎ፡ ውስተ፡ ኰኵሕ፡ እንዘ፡ ይብሉ፡ ንስሕቦ፡ ለዳቤላ፡ ዘላህም፡ ወተክዕወ፡ ደሙ፡ ውስተ፡ አስኳት፡ ወሞተ፡ ጽዑረ፡ ሞተ፡ ወእም፡ ድኅረዝ፡ አምኑ፡ በስብከቱ። እንድርያስ፡ ሐዋርያ፡ ቦአ፡ ሀገረ፡ በላዕተ፡ ሰብእ፡ ወደዩ፡ ሐብለ፡ ውስተ፡ ክሳዱ፡ ወሰሐብዎ፡ ውስተ፡ አዕባን፡ በሊሐት፡ እስከ፡ ይትቤጸል፡ ሥጋሁ፡ ወእም፡ ድኅረዝ፡ አምኑ፡ በስብከቱ። ወእምዝ፡ ቦአ፡ ውስተ፡ ካልዕ፡ ውእቶሙኒ፡ አዕረግዎ፡ ዲበ፡ መስቀል፡ ወኰነንዎ፡ ዐቢየ፡ ኵነኔ፡ እስከ፡ ትወፅእ፡ መንፈሱ፡ ወእም፡ ድኅረዝ፡ አምኑ፡ በስብከቱ። ፲፱፡ ማትያስ፡ ሐዋርያ፡ ቦአ፡ ሀገረ፡ ደማስቆ፡ ገብሩ፡ ሎቱ፡ ዐራተ፡ ዘሐጺን፡ ወአስከብዎ፡ ዲቤሁ፡ አንደዱ፡ እሳተ፡ ላዕሌሁ፡ እስከ፡ ይትሌዐል፡ ነበልባሉ፡ መጠነ፡ ፲ወ፭፡ በእመት፡ ወነበሩ፡ ከመዝ፡ እንዘ፡ ያነድዱ፡ እስከ፡ ፳ወ፭፡ ጽባሕ፡ ወአልቦ፡ ዘለከፎ፡ ወእም፡ ድኅረዝ፡ አምኑ፡ በስብከቱ። ፳፡ ዮሐንስ፡ ወንጌላዊ፡ ቦአ፡ ሀገረ፡ እስያ፡ ወኀደረ፡ ውስተ፡ ቤተ፡ ሮምና፡ ወአሕመመቶ፡ በቅኔ፡ መሪር፡ እንዘ፡ ይትቀነይ፡ ላቲ፡ በቤተ፡ ምንዳድ፡ ወይእቲኒ፡ እንዘ፡ ትዘብጦ፡ ዘእንበለ፡ ምሕረት፡ ወአጽሐፈት፡ በላዕሌሁ፡ መጽሐፈ፡ ግብርናት፡ ወለለጽባሑ፡ ነበረት፡ እንዘ፡ ታመነድቦ፡ በመቅሰፍት፡ ወእም፡ ድኅረዝ፡ አምነት፡ በስብከቱ፡ ሶበ፡ ርእየት፡ መንክራቲሁ። ወሰብአ፡ ሀገርኒ፡ አንሥኡ፡ መራደ፡ ላዕሌሁ፡ ወላዕለ፡ ዲዮስቆሪዶስ፡ መኰንን፡ ዘአምነ፡ በስብከተ፡ ዚአሁ፡ ወበዝግሐተ፡ መዋቅሕትኒ፡ አመንደብዎ፡ እለ፡ አስርሆሙ፡ ምክረ፡ ሰይጣን፡ ወእም፡ ድኅረዝ፡ አምኑ፡ በስብከቱ። ፳፩፡ ፊልጶስኒ፡ ሐዋርያ፡ ቦአ፡ ሀገረ፡ አፍራቅያ፡ ወሰበከ፡ ሎሙ፡ በስመ፡ ኢየሱስ፡ ክርስቶስ። ወእምዝ፡ ነደ፡ ልቦሙ፡ በመዐት፡ ወአዕረግዎ፡ ዲበ፡ መስቀል፡ ወሰቀልዎ፡ ቍልቍሊተ፡ ወቀሠፍዎ፡ ዐቢየ፡ መቅሠፍተ፡ እስከ፡ ትወጽእ፡ መንፈሱ። ወዓዲ፡ ፈቀዱ፡ ያንድዱ፡ እሳተ፡ ላዕለ፡ ሥጋሁ፡ ወመሠጦ፡ መልአከ፡ እግዚአብሔር፡ ወእም፡ ድኅረዝ፡ አምኑ፡ በስብከቱ። ፳፪፡ ወንጌላዊ፡ ሉቃስ፡ ቦአ፡ ሀገረ፡ ሮሜ፡ ምስለ፡ ጴጥሮስ፡ መምህሩ፡ ወእም፡ ድኅረ፡ ሞቱ፡ ለጴጥሮስ፡ ነበረ፡ እንዘ፡ ያጸንዕ፡ ስብከቶ፡ ወያጸንዖሙ፡ ለመሀይምናን። ወእምዝ፡ አኀዞ፡ ኔሮን፡ ንጉሥ፡ ወቀሠፎ፡ በጥብጣቤ፡ እስከ፡ ይውኅዝ፡ ደሙ፡ ከመ፡ ማይ። ወአዘዘ፡ ይምትሩ፡ መዝራእቶ፡ ዘየማን፡ እንተ፡ ባቲ፡ ይጽሕፍ፡ መንክራተ፡ እግዚአብሔር፡ ወመንክራቲሆሙ፡ ለሐዋርያት። ወበዕለተ፡ ክላሌሁ፡ መተሩ፡ ርእሶ፡ ዘበሰይፍ፡ ወእም፡ ድኅረዝ፡ አምኑ፡ በስብከቱ። ፳፫፡ ማቴዎስ፡ ወንጌላዊ፡ ቦአ፡ ሀገረ፡ ካህናት፡ ወእም፡ ድኅረዝ፡ ቦአ፡ አጰንጌ፡ ወዖደ፡ ውስተ፡ በሐውርተ፡ ባርትያ፡ ወመተሩ፡ ርእሶ፡ በመጥባሕት፡ ወእም፡ ድኅረዝ፡ አምኑ፡ በስብከቱ። ፳፬፡ ታዴዎስ፡ ሐዋርያ፡ ቦአ፡ ሀገረ፡ ሶርያ፡ ወገብረ፡ ባቲ፡ መንክራተ። ወሶበ፡ ዜነዎ፡ ለወሬዛ፡ ዘብዙኅ፡ ጥሪቱ፡ ከመ፡ ኢይትከሀሎ፡ ጸዲቅ፡ ዘእንበለ፡ በመንኖ፡ ንዋይ፡ ተምዐ፡ ውእቱ፡ ወሬዛ፡ ወሐነቆ፡ ለታዴዎስ፡ እስከ፡ ፈቀደት፡ ትጻእ፡ ዓይኑ፡ እምንዳቤ፡ ሕንቀት፡ ወበይእቲ፡ ሰዓት፡ አኅለፈ፡ ገመለ፡ እንተ፡ ስቍረተ፡ መርፍእ፡ ካዕበ፡ ወሥልሰ፡ በእንተ፡ ዘለፋሁ፡ ለባዕል። ወእም፡ ድኅረዝ፡ አምኑ፡ በስብከቱ። ፳፭፡ ወለኢየሩሳሌም፡ ብዙኅ፡ ደመ፡ ነቢያት፡ ተክዕወ፡ ባቲ፡ እም፡ ደመ፡ ኢሳይያስ፡ ነቢይ፡ እስከ፡ ደመ፡ ዘካርያስ፡ ወልደ፡ በራክዩ። ወዓዲ፡ እስከ፡ ደመ፡ ዮሐንስ፡ መጥምቅ፡ ዘውእቱ፡ ተፍጻሜተ፡ ነቢያት። ወዓዲ፡ ተክዕወ፡ ላዕሌሃ፡ ደመ፡ ሕፃናተ፡ ገሊላ፡ እለ፡ ኢያእመሩ፡ ርስሐተ፡ ዝ፡ ዓለም፡ እስከ፡ ቄሐት፡ ምድር፡ እም፡ ደሞሙ፡ ወእስከ፡ ጻዕደወት፡ ዓዲ፡ እምነ፡ ነጸፍጻፈ፡ ሐሊበ፡ እማቲሆሙ። ፳፮፡ ወእም፡ ኵሉሰ፡ ዘየዐቢ፡ ተክዕወ፡ ላዕሌሃ፡ ደመ፡ ኢየሱስ፡ ክርስቶስ፡ ደም፡ ነባቢ፡ ዘይጸርሕ፡ ኀበ፡ አቡሁ፡ እንዘ፡ ይሰክዮሙ፡ ለእለ፡ ከዐውዎ፡ ወያስተሠሪ፡ ሎሙ፡ ኃጣውኢሆሙ፡ ለእለ፡ ይትመጠውዎ፡ በአሚን። ፳፯፡ ወዓዲ፡ ተክዕወ፡ ላዕሌሃ፡ ደመ፡ እስጢፋኖስ፡ ወደመ፡ ያዕቆብ፡ ወልደ፡ እልፍዮስ፡ በውግረተ፡ እብን። ወደመ፡ ያዕቆብ፡ ወልደ፡ ዘብዴዎስ፡ ዘበሰይፍ፡ ወደመ፡ ያዕቆብ፡ እኁሁ፡ ለእግዚእነ፡ በአጽድፎ፡ እም፡ ርእሰ፡ ተድባበ፡ ቤተ፡ መቅደስ። ወደመ፡ ስምዖን፡ ወልደ፡ ቀለዮጳ፡ በዲበ፡ መስቀል። ወበዝኒ፡ ኵሉ፡ ዘተክዕወ፡ ደመ፡ ቅዱሳን፡ አኮ፡ ዘኮነ፡ ሙያጤሃ፡ ሠናይ፡ እስመ፡ ዐዘቅተ፡ ደም፡ ይእቲ። ፳፰፡ ወበርተሎሜዎስኒ፡ ቦአ፡ ሀገረ፡ እልዋኅ፡ ወሰበከ፡ ወንጌለ፡ ጸጋሁ፡ ለኢየሱስ፡ ክርስቶስ፡ ወበጽሐ፡ ኀበ፡ ንስማኦፊን፡ ወኒኦኒዶስ፡ አህጉር፡ ዐበይት፡ እለ፡ ሕኑፃን፡ በማዕዶተ፡ ባሕር፡ መልኡ፡ ውስተ፡ ሠቅ፡ ኆፃ፡ ወወደይዎ፡ ውስቴቱ፡ ለንጹሕ፡ ሐዋርያ፡ ወወረውዎ፡ ውስተ፡ ባሕር፡ ወፈጸመ፡ ስምዖ፡ በሰላመ፡ እግዚአብሔር፡ ወእምድኅረዝ፡ አምኑ፡ በስብከቱ። ወኵሎን፡ እንከ፡ አህጉር፡ አሐቲ፡ አሐቲ፡ እምኔሆን፡ እም፡ ድኅረ፡ አሕመማሁ፡ ለሐዋርያሆን፡ አው፡ ወእም፡ ድኅረ፡ ቀተላሁ፡ ለዘሰበከ፡ ሎን፡ የአምና፡ በትምህርቱ፡ ሶበ፡ ተዘከራ፡ መንክራተ፡ እንተ፡ ገብረ፡ በውስቴቶን፡ አው፡ ሶበ፡ ርእያ፡ ተአምረ፡ በላዕለ፡ ሥጋሁ፡ ለሐዋርያ። ፴፡ ወሀገርነሰ፡ ኢትዮጵያ፡ አኮ፡ ከማሁ፡ ኢያንሶሰዋ፡ እግረ፡ ሐዋርያት፡ ዲቤሃ፡ ወኢተገብረ፡ መንክራተ፡ እግዚእ፡ በውስቴታ፡ አላ፡ አምነቶ፡ በዜና፡ ወተወክፈቶ፡ በድምጽ። ወበእንተዝ፡ ይቤ፡ ነቢይ፡ አዕጻዳተ፡ ኢትዮጵያ፡ ይደነግጻ፡ ይደነግጻ፡ ለአሚን፡ ወኢያገዝፋ፡ ክሳደ፡ ልቦን፡ ለኢአሚን። ይደነግጻ፡ ለሰሚዐ፡ ቃለ፡ እግዚአብሔር፡ ወኢይመይጣ፡ እዝኖን፡ እም፡ አጽምኦ፡ ትእዛዛቲሁ። ይደነግጻ፡ በንስሓ፡ ከመ፡ ይትመየጣ፡ እም፡ ሕራማቲሆን፡ ዘትካት። ወይረውፃ፡ ኀበ፡ አምልኮቱ፡ ለክርስቶስ። ወበካልዕኒ፡ ይብል፡ አንተ፡ ሰበርከ፡ ርእሰ፡ ከይሲ፡ በውስተ፡ ማይ። ርእሰ፡ ከይሲ፡ ይተረጐም፡ በሰቢረ፡ ርእሰ፡ ኅሊናሁ፡ ለሰይጣን። ወአንተ፡ ቀጥቀጥከ፡ አርእስቲሁ፡ ለከይሲ። ወቅጥቃጤሁሰ፡ ለርእሰ፡ ከይሲ፡ ከመ፡ ኢይትነሣእ፡ ዳግመ፡ ወከመ፡ ኢንትመየጥ፡ ንሕነኒ፡ ውስተ፡ አምልኮቱ፡ ነኀልዮ፡ ከመ፡ ዘሞተ፡ ወኢንዝክሮ፡ ከመ፡ ዘሀሎ። ወወሀብኮሙ፡ ሲሳዮሙ፡ ለሕዝበ፡ ኢትዮጵያ። ዝኒ፡ በእንተ፡ ቍርባነ፡ ሥጋሁ፡ ወደሙ፡ ለወልደ፡ እግዚአብሔር፡ ዝ፡ ውእቱ፡ ሲሳየ፡ ጻድቃን፡ ዘለዓለመ፡ ዓለም፡ እስመ፡ አልቦ፡ ዘይክል፡ ነሢአ፡ ቍርባን፡ ዘእንበለ፡ ይትነዛኅ፡ በማየ፡ ጥምቀት፡ ወይትኀተም፡ በቅብዐ፡ በለሶን። ወአልቦ፡ ዘይክል፡ ነሢአ፡ ጥምቀት፡ ዘእንበለ፡ ያውግዞ፡ ለሰይጣን፡ ወይቀጥቅጦ፡ ርእሶ፡ በኃይለ፡ ሃይማኖት። ወበካልዕኒ፡ ይብል፡ ይምጽኡ፡ ተናብልት፡ እም፡ ግብጽ፡ ኢትዮጵያ፡ ታበጽሕ፡ እደዊሃ፡ ኀበ፡ እግዚአብሔር። ወዝኒ፡ ትንቢት፡ በእንተ፡ ሢመተ፡ እዴሆሙ፡ ለጳጳሳተ፡ ኢትዮጵያ፡ ከመ፡ እመንበረ፡ ማርቆስ፡ ውእቱ፡ ይነግር። ወምክንያተ፡ እምነቶሙሰ፡ ለሰብአ፡ ኢትዮጵያ፡ ከመዝ፡ ውእቱ፡ እመንግሥተ፡ አርዌ፡ እስከ፡ ርደታ፡ ለንግሥተ፡ አዜብ፡ ኀበ፡ ሰሎሞን፡ ወልደ፡ ዳዊት፡ ከመ፡ ትስማዕ፡ ጥበቢሁ፡ ነበሩ፡ በሕገ፡ አሕዛብ፡ እንዘ፡ ያመልኩ፡ ምሕራማተ፡ ጣዖት፡ ዘዘዚአሁ። ወአመ፡ ተመይጦታ፡ ለንግሥተ፡ አዜብ፡ አምጽአት፡ ሎሙ፡ ዜና፡ ኦሪት፡ እም፡ ኢየሩሳሌም፡ ወነበሩ፡ በሕገ፡ አይሁድ፡ እም፡ አሜሃ፡ እስከ፡ ምጽአተ፡ ክርስቶስ፡ እንዘ፡ ይትቀነዩ፡ ለትእዛዘ፡ ሕግ፡ ወሥርዓት፡ ወእንዘ፡ ይፀመዱ፡ ለዐቂበ፡ ሰንበታቲሁ፡ ለእግዚአብሔር። ወበእንተዝ፡ ይቤ፡ ኢሳይያስ፡ ወለእመ፡ ገብኡ፡ እም፡ ካልዕ፡ ሕዝብ፡ ወተቀንዩ፡ ሎቱ፡ ወአፍቀሩ፡ ስመ፡ እግዚአብሔር፡ ወኮንዎ፡ አግብርቲሁ፡ ወአእማቲሁ፡ ለኵሎሙ፡ እለ፡ የዐቅቡ፡ ሰንበታትየ፡ ወኢያረኵሱ፡ ወይትዔገሡ፡ በሥርዓትየ፡ አበውኦሙ፡ ውስተ፡ ደብረ፡ መቅደስየ፡ ወአስተፌሥሖሙ፡ በቤተ፡ ጸሎትየ፡ ወይከውን፡ ኅሩየ፡ መሥዋዕትየ፡ ወቍርባንየ፡ ወቤትየሰ፡ ቤተ፡ ጸሎት፡ ይሰመይ፡ ይቤ፡ እግዚአብሔር፡ ለኵሉ፡ አሕዛብ። ወበሆሴዕኒ፡ ይቤ፡ እሬስዮ፡ ሕዝብየ፡ ለዘኢኮነ፡ ሕዝብየ፡ ወእሬስያ፡ ፍቅርትየ፡ ለ፡ እንተ፡ ኢኮነት፡ ፍቅርትየ፡ ወይከውኑ፡ ውሉደ፡ እግዚአብሔር፡ ሕያው፡ በብሔር፡ በኀበ፡ ይቤልዎሙ፡ ኢኮንክሙ፡ ውሉደ፡ እግዚአብሔር። ወምክንያተ፡ እምነቶሙሰ፡ በእግዚእ፡ ኮነ፡ አመ፡ ርደቱ፡ ለሕፅዋ፡ ለሕንደኬ፡ ንግሥተ፡ ኢትዮጵያ፡ ከመ፡ ይስግድ፡ ለበዓለ፡ ፋሲካ፡ ውስተ፡ ኢየሩሳሌም። ወእመቦ፡ ዘአምነ፡ በውስተ፡ አሕዛብ፡ በሕገ፡ አይሁድ፡ ወለለበዓለ፡ ፋሲካ፡ ይወርድ፡ ኢየሩሳሌም፡ እስመ፡ ኢይከውኖ፡ ገቢረ፡ ሥርዓተ፡ ፋሲካ፡ በሀገሩ፡ ዘእንበለ፡ ኀበ፡ መካን፡ ዘተሰምየ፡ ስመ፡ እግዚአብሔር። ወበእንተዝ፡ ጽሑፍ፡ ውስተ፡ ወንጌለ፡ ዮሐንስ፡ ዘይብል፡ ወቦ፡ እም፡ ውስተ፡ አረሚኒ፡ እለ፡ ዐርጉ፡ ይስግዱ፡ ለበዓል፡ ወሖሩ፡ እሙንቱሂ፡ ኀበ፡ ፊልጶስ፡ ዘቤተ፡ ሳይዳ፡ ዘገሊላ፡ ወይቤልዎ፡ እግዚኦ፡ ንፈቅድ፡ ንርአዮ፡ ለኢየሱስ። ወሖረ፡ ፊልጶስ፡ ወነገሮ፡ ለእንድርያስ። ወሖሩ፡ እንድርያስ፡ ወፊልጶስ፡ ወነገርዎ፡ ለኢየሱስ። ወአውሥአ፡ እግዚእ፡ ኢየሱስ፡ ወይቤሎሙ፡ በጽሐ፡ ጊዜሁ፡ ከመ፡ ይሰባሕ፡ ወልደ፡ እጓለ፡ እመ፡ ሕያው። ዝ፡ ብሂል፡ በጽሐ፡ ጊዜሁ፡ ከመ፡ ይእመኑ፡ ብየ፡ አሕዛብ፡ ወይሰብሑኒ። ወበምክንያተ፡ ዝንቱ፡ ነገር፡ ወረደ፡ ሕጽዋ፡ ለሕንደኬ፡ ንግሥተ፡ ኢትዮጵያ፡ ከመ፡ ይስግድ፡ ለበዓለ፡ ኢየሩሳሌም፡ በከመ፡ ጽሑፍ፡ ውስተ፡ ግብረ፡ ሐዋርያት። ወነበቦ፡ መልአከ፡ እግዚአብሔር፡ ለፊልጶስ፡ ወይቤሎ፡ ተንሥእ፡ ወሑር፡ ጊዜ፡ ቀትር፡ ፍኖተ፡ በድው፡ ዘያወርድ፡ እም፡ ኢየሩሳሌም፡ ለጋዛ። ወተንሥአ፡ ወሖረ፡ ወረከበ፡ ብእሴ፡ እም፡ ሕዝበ፡ ኢትዮጵያ፡ ሕፅዋ፡ ለሕንደኬ፡ ንግሥተ፡ ኢትዮጵያ፡ ወመጋቢሃ፡ ውእቱ፡ ለኵሉ፡ ብሔረ፡ ጋዛ፡ ወሖረ፡ ኢየሩሳሌም፡ ይሰግድ። ወእንዘ፡ ይገብእ፡ ነበረ፡ ዲበ፡ ሠረገላሁ፡ ወያነብብ፡ መጽሐፈ፡ ኢሳይያስ፡ ነቢይ፡ ወይቤሎ፡ መንፈስቅዱስ፡ ለፊልጶስ፡ ሑር፡ ትልዎ፡ ለዝንቱ፡ ሠረገላ። ወሮፀ፡ ፊልጶስ፡ ወበጽሐ፡ ወሰምዖ፡ እንዘ፡ ያነብብ፡ መጽሐፈ፡ ኢሳይያስ፡ ነቢይ፡ ወይቤሎ፡ ፊልጶስ፡ ተአምርኑ፡ እንከ፡ ዘታነብብ። ወይቤሎ፡ ሕፅው፡ በአይቴ፡ አአምር፡ ለእመ፡ አልቦ፡ ዘመሀረኒ። ወአስተብቍዖ፡ ለፊልጶስ፡ ከመ፡ ይዕርግ፡ ወይንበር፡ ኅቡረ፡ ኀቤሁ። ወነገረ፡ መጽሐፍሰ፡ ኀበ፡ ያነብብ፡ ከመዝ፡ ይብል፡ ከመ፡ በግዕ፡ ዘኢይነብብ፡ በቅድመ፡ ዘይቀርጾ፡ ከማሁ፡ ኢከሠተ፡ አፉሁ፡ በሕማሙ። ወተንሥአ፡ ኵነኔሁ፡ ወመኑ፡ ይነግር፡ ልደቶ፡ እስመ፡ ተአተተ፡ እምድር፡ ሕይወቱ። ወተመይጠ፡ ኀበ፡ ፊልጶስ፡ ውእቱ፡ ሕፅው፡ ወይቤሎ፡ ብቍዐኒ፡ ንግረኒ፡ በእንተ፡ መኑ፡ ይብል፡ ነቢይ፡ ከመዝ፡ በእንተ፡ ርእሱኑ፡ ወሚመ፡ በእንተ፡ ካልዕ። ወከሠተ፡ አፉሁ፡ ፊልጶስ፡ ወአኀዘ፡ ይምሀሮ፡ በእንተ፡ ኢየሱስ፡ ወይፈክር፡ ሎቱ፡ በውእቱ፡ መጽሐፍ። ወእንዘ፡ የሐውሩ፡ በጽሑ፡ ኀበ፡ ማይ። ወይቤሎ፡ ውእቱ፡ ሕፅው፡ ነዋ፡ ማይ፡ ወመኑ፡ ይከልአኒ፡ ተጠምቆ። ወአዘዘ፡ ያቅሙ፡ ሠረገላሁ፡ ወአቀሙ፡ ወወረዱ፡ ኅቡረ፡ ኀበ፡ ማይ፡ ፊልጶስ፡ ወውእቱ፡ ሕፅው፡ ወአጥመቆ። ወወጺኦሙ፡ እማይ፡ መንፈሰ፡ እግዚአብሔር፡ መሠጦ፡ ለፊልጶስ፡ ወኢርእዮ፡ እንከ፡ ውእቱ፡ ሕፅው፡ ወአተወ፡ ብሔሮ፡ እንዘ፡ ይትፌሣሕ። ወበዜና፡ ዚአሁ፡ አምኑ፡ ሰብአ፡ ኢትዮጵያ፡ በወንጌለ፡ ጸጋሁ፡ ለኢየሱስ፡ ክርስቶስ። ወበእንተ፡ ከዊነ፡ ዐቢየ፡ ክርስቲያንሰ፡ ስእኑ፡ ምክንያተ፡ እስመ፡ ኢኮነ፡ ካህነ፡ ውእቱ፡ ሕፅው፡ ከመ፡ ያጥምቆሙ። ወእም፡ ድኅረ፡ ብዙኅ፡ ዓመታት፡ ወጕንዱይ፡ አክራም፡ ወጽአ፡ ነጋዲ፡ እም፡ ጢሮስ፡ ምስለ፡ ክልዔ፡ ደቂቁ፡ ስመ፡ ፩፡ ፍሬምናጦስ፡ ወስመ፡ ካልዑ፡ ሲድራኮስ። ወእምዝ፡ ደወየ፡ ውእቱ፡ ነጋዲ፡ ወሞተ፡ በውስተ፡ መርሶ፡ ሐይቀ፡ ባሕር፡ ዘጽንፈ፡ ብሔረ፡ ኢትዮጵያ። ወአምጽእዎሙ፡ ለእሙንቱ፡ ደቂቅ፡ እለ፡ አስማቲሆሙ፡ ሲድራኮስ፡ ወፍሬምናጦስ፡ ወአቀምዎሙ፡ ቅድመ፡ ንጉሠ፡ ኢትዮጵያ፡ ወአፍቀሮሙ፡ ንጉሥ፡ ወደመሮሙ፡ ምስለ፡ ደቂቀ፡ መንግሥት፡ ወነበሩ፡ እንዘ፡ ያነክሩ፡ ግዕዞሙ፡ ለሰብአ፡ ኢትዮጵያ። ወይቤሉ፡ እፎኬ፡ አምኑ፡ እስመ፡ ይሬእይዎሙ፡ እንዘ፡ ይገብሩ፡ ምጽላየ፡ ከመ፡ ይስግዱ፡ ለአስማተ፡ ሥላሴ። ወዲበ፡ አርእስተ፡ አንስቲያሆሙኒ፡ ይሬአዩ፡ ትእምርተ፡ መስቀል፡ ያነክሩ፡ ጥቀ፡ ፈድፋደ፡ ወየአኵትዎ፡ ለእግዚአብሔር፡ እስመ፡ ከፈሎሙ፡ እምነተ፡ ዘእንበለ፡ ስብከት፡ ወተመጥዎ፡ ሃይማኖትኒ፡ ዘእንበለ፡ ሐዋርያ፡ በከመ፡ ይቤ፡ ኢሳይያስ፡ ነቢይ፡ ሕዝብ፡ እለ፡ ኢዜነውዎሙ፡ በእንቲአሁ፡ ያእምርዎ፡ ሀለዎሙ፡ ወእለሂ፡ ኢለበውዎ፡ ከመ፡ ይጠይቅዎ። ወእግዚእነሂ፡ ይቤ፡ በወንጌል፡ ሶበ፡ ርኢከኒሁ፡ አመንከኒ፡ ቶማስ። ብፁዓንሰ፡ እንዘ፡ እለ፡ ኢይሬእዩኒ፡ የአምኑ። ንትመየጥኬ፡ ኀበ፡ ጥንተ፡ ነገሮሙ፡ ለፍሬምናጦስ፡ ወለሲድራኮስ፡ ወነበሩ፡ ውስተ፡ ጽርሐ፡ ንጉሥ፡ አምጣነ፡ ሕያው፡ ውእቱ፡ ነጋሢ። ወሶበ፡ አልጸቀ፡ ለመዊት፡ ረሰዮሙ፡ አግዐዝያነ፡ ወአብሖሙ፡ ይሑሩ፡ ኀበ፡ ፈቀዱ። ወሲድራኮስ፡ አተወ፡ ኀበ፡ ሀገሩ፡ ጢሮስ፡ ወፍሬምናጦስኒ፡ ሖረ፡ ኀበ፡ ሊቀ፡ ጳጳሳት፡ ዘእለስክንድርያ፡ ከመ፡ ይኅሥሥ፡ ምክንያተ፡ ድኅነቶሙ፡ ለሰብአ፡ ኢትዮጵያ። ወዜነወ፡ ፍጹመ፡ እምነቶሙ፡ ዘእንበለ፡ ትምህርተ፡ ሐዋርያት። ወአንከረ፡ ሊቀ፡ ጳጳሳት፡ በእንተ፡ ዘኮነ፡ እምነቶሙ፡ ዘእንበለ፡ ስብከት፡ ወአእኰቶ፡ ለእግዚአብሔር። ወይቤሎ፡ ለፍሬምናጦስ፡ አንተ፡ ኩኖሙ፡ ኖላዌ፡ እስመ፡ ኪያከ፡ አልሀቀ፡ እግዚአብሔር፡ ወተመየጥ፡ ኀቤሆሙ። ወአንበረ፡ እዴሁ፡ ዲበ፡ ርእሱ፡ ወጸለየ፡ ጸሎተ፡ ተክሬዝ፡ ዘሢመተ፡ መጥሮቦሊለጥ፡ ዘውእቱ፡ ጳጳስ። ወጽአ፡ ፍሬምናጦስ፡ ብሔረ፡ አግዓዚ፡ ወአጥመቆሙ፡ በስመ፡ አብ፡ ወወልድ፡ ወመንፈስቅዱስ። ወሤመ፡ ሎሙ፡ ኤጲስቆጶሳተ፡ ቀሳውስተ፡ ወዲያቆናተ። ውእቶሙኒ፡ አፍቀርዎ፡ ከመ፡ አቡሆሙ፡ ወአክበርዎ፡ ከመ፡ አምላኮሙ፡ ወሰመይዎ፡ አባ፡ ሰላማ፡ እስመ፡ ሰላመ፡ አምጽአ፡ ሎሙ። ወጸአቱሰ፡ ኮነ፡ በመንግሥተ፡ አብርሃ፡ ወአጽብሃ፡ እለ፡ ተወክፍዋ፡ ለትምህርተ፡ ጽድቅ፡ ከመ፡ ምድር፡ ጽምእት፡ እንተ፡ ትሰቲ፡ ዝናመ፡ ተፈሢሓ። ወእም፡ ድኅረ፡ ጕንዱይ፡ መዋዕል፡ ወብዙኅ፡ ክረምት፡ ወእም፡ ድኅረ፡ ኀለፉ፡ ብዙኃን፡ ነገሥተ፡ አኵሱም፡ መጽኡ፡ ቅዱሳነ፡ ሮም፡ ምስለ፡ ንጉሦሙ፡ ወመሳፍንቲሆሙ፡ ወመኳንንቲሆሙ፡ ምስለ፡ ካህናቲሆሙ፡ ወመሥዋዕቲሆሙ፡ ምስለ፡ ንዋየ፡ ቅድሳቲሆሙ፡ ወመጻሕፍቲሆሙ፡ ወምስለ፡ ሕዘቢሆሙ። ወጸአቶሙሰ፡ ኮነ፡ በመንግሥተ፡ አልአሚዳ፡ ወልደ፡ ሰልአዶባ። ደንገፀት፡ ምድር፡ እም፡ ጸአቶሙ፡ ወተከውሰት፡ አድያመ፡ ኢትዮጵያ፡ እስመ፡ መሰሎሙ፡ ዘወጽኡ፡ ለወሪሰ፡ ሀገሮሙ፡ ወለአንሥኦ፡ መራድ፡ ላዕሌሆሙ። ወውእቶሙሰ፡ አርአዩ፡ ኃይለ፡ ሃይማኖቶሙ። ቦ፡ እለ፡ አፍለሱ፡ አድባረ። ወቦ፡ እለ፡ አፍለሱ፡ ባሕረ። ወቦ፡ እለ፡ ዘርዕዎ፡ ለሥርናይ፡ በነግህ፡ ወወደይዎ፡ ውስተ፡ ምክያድ፡ በጊዜ፡ ሠርክ፡ ምክያዱኒ፡ ዲበ፡ ዕፀ፡ ገራይ፡ እንዘ፡ ቈጽለ፡ ዕፀው፡ ኢይትነገፍ፡ ወአባዕሪሁኒ፡ ኢይጸድፉ። ወፍሬ፡ ሥርናይሰ፡ ወረደ፡ ወኮነ፡ ክምረ፡ ውስተ፡ ዐውድ፡ ወኀሠሩሰ፡ ተገድፈ፡ ውስተ፡ ቈጽለ፡ ኦም። ሐረጽዎ፡ ለሥርናይ፡ ወበጽሐ፡ ለመሥዋዕተ፡ ሠርክ። ወቦ፡ እለ፡ ተከሉ፡ ዕፀ፡ አውልዕ፡ በጊዜ፡ ነግህ፡ ዲበ፡ ኰኵሕ፡ ልሙጽ፡ በቈለ፡ በጊዜሃ፡ ወኮነ፡ ዕፀ፡ ዐቢየ፡ የብሰ፡ ጕንዱ፡ በፈቃደ፡ እግዚአብሔር፡ ሠፀርዎ፡ ወአንደድዎ፡ ወዐቈሩ፡ ፍሕሞ፡ በልብስ፡ ረቂቅ፡ ወበጽሐ፡ ለዕጣነ፡ ሠርክ። ወቦ፡ እለ፡ አስተናገሩ፡ ምውተ፡ እም፡ ድኅረ፡ ሞተ። ወቦ፡ እለ፡ ዐቈሩ፡ ማየ፡ በመንፌ፡ ወኢተክዕወ፡ ማዩ፡ ወአእተውዎ፡ ለመልእክተ፡ ቤተክርስቲያን፡ ወለሥርዓተ፡ ቍርባን። ወቦ፡ ዘተገንዘ፡ እምኔሆሙ፡ በእደ፡ መላእክት፡ ደነነ፡ ዓምደ፡ ዕብን፡ ዐቢይ፡ ዘይትሌዓል፡ ኑኁ፡ እምነ፡ ጸድፍ፡ ዐቢይ፡ ወተመጠወ፡ ሥጋሁ፡ እማዕዶተ፡ ፈለግ፡ ወቆመ፡ ርቱዐ፡ ወኮነ፡ በድነ፡ ቅዱስ፡ ውስተ፡ ድማሁ፡ ለዓምደ፡ ዕብን፡ እስከ፡ ዮም። ወአሠረ፡ ግንዘቱኒ፡ ናሁ፡ ያስተርኢ፡ ውስተ፡ ኰኵሕ፡ ልሙጽ፡ ከመ፡ ዘተሥዕለ፡ በእደ፡ ኬንያ፡ ጠቢብ። ወቦ፡ እምኔሆሙ፡ እለ፡ አብርሃ፡ ዐሥሩ፡ አጻብዐ፡ እደዊሆሙ፡ ወዐሥሩ፡ አጻብዐ፡ እገሪሆሙ፡ ከመ፡ ማኅቶተ፡ መብረቅ፡ እንዘ፡ ሀለዉ፡ ቀዊሞሙ፡ ጊዜ፡ ጸሎት። ወቦ፡ እምኔሆሙ፡ እለ፡ ተከብቱ፡ እም፡ ገጸ፡ ሞት፡ ወድኅኑ፡ በጸጋ፡ እግዚአብሔር። ወቦ፡ እምኔሆሙ፡ ዘቀደመ፡ ወጺአ፡ ውስተ፡ ሀገርነ፡ ወተመይጠ፡ ኀቤሆሙ፡ ወዜነዎሙ፡ ዜና፡ ኂሩታ፡ ለኢትዮጵያ፡ ዘከመ፡ አምነት፡ በክርስቶስ፡ ዘእንበለ፡ ስብከተ፡ ሐዋርያት። ወእምዝ፡ ነደ፡ አባላቲሆሙ፡ ለእሙንቱ፡ ቅዱሳን፡ በላህበ፡ ሃይማኖቱ፡ ለክርስቶስ፡ ወወጽኡ፡ ውስተ፡ ሀገርነ፡ ምስለ፡ ኵሉ፡ ቍስቋሶሙ። ተቀደሰት፡ ምድር፡ በኪደተ፡ እግሮሙ፡ ወተሐደሳ፡ አዕጻዳቲሃ፡ በነሶሳዎሙ፡ ወተክዕወ፡ ውስተ፡ አድያሚሃ፡ መዐዛ፡ ቃሎሙ። ወእመንግሥተ፡ እልአሚዳ፡ ወልደ፡ ሰልአዶባ፡ እስከ፡ መንግሥተ፡ ካሌብ፡ ወልደ፡ ታዜና፡ ነበሩ፡ ውስተ፡ ቤተ፡ ቀጢን፡ አማኅቢሮሙ፡ እንበለ፡ ፍልጠት፡ እንዘ፡ ያሬእዩ፡ ስነ፡ ጽድቆሙ፡ ከመ፡ ከዋክብት፡ ብሩሀት፡ ዘያንበለብሉ፡ በገጸ፡ ሰማይ፡ ወከመ፡ ዕፀወ፡ ገነት፡ ምዑዛን፡ ዘዘዚአሁ፡ ሥነ፡ ጽጌሆሙ፡ ወዘዚአሁ፡ አስካለ፡ ፍሬሆሙ። ወከመ፡ አዕባነ፡ ሕንደኬ፡ ጽዱላን፡ ዘዘዚአሁ፡ ሥነ፡ ሞገሶሙ፡ ወዘዘዚአሁ፡ ኅበሪሆሙ። ወከመ፡ አፈዋተ፡ ርኄ፡ ጽዑጥ፡ ዘይትዐቀብ፡ በቀርነ፡ ቅብዕ፡ ዘጽዮን። ከመ፡ አዕማደ፡ ባሕርይ፡ እለ፡ ስፉራን፡ ዲበ፡ ዕብነ፡ ሰንፔር፡ ወከመ፡ ዕብነ፡ ጳዝዮን፡ ዘአስተጣበቅዕዎ፡ በወርቅ፡ ጽሩይ፡ ዘእምፓሩሄም። ኮንዋ፡ ሰርጐ፡ ለምድረ፡ አኵሱም፡ ከመ፡ ባዝግና፡ ወርቅ፡ ዲበ፡ ርእሰ፡ ነገሥት፡ ወከመ፡ ሕልቀተ፡ ክብር፡ ዘውስተ፡ አጻብዒሆሙ፡ ለመሳፍንተ፡ ምድር። ወአወፈይዋ፡ መጻሕፍተ፡ ሕጎሙ፡ ወሥርዐቶሙ፡ ወአስተጻንዕዋ፡ በትእዛዘ፡ ትምህርቶሙ፡ ለሐዋርያተ፡ ክርስቶስ። ወመክብበ፡ መጻሕፍቲሃሰ፡ ዘብሉይ፡ ተዐልዋ፡ እም፡ ዕብራይስጢ፡ ኀበ፡ ግዕዝ፡ በመዋዕሊሃ፡ ለንግሥተ፡ አዜብ፡ እንተ፡ ሐወጸቶ፡ ለሰሎሞን። ወበእንተዝ፡ ኮነ፡ ጽሩየ፡ ፍካሬሆሙ፡ ለመጻሕፍተ፡ ነቢያት፡ ዘውስተ፡ ብሔረ፡ አግዐዚ፡ እስመ፡ በሕገ፡ አይሁድ፡ ነበሩ፡ እም፡ ቅድመ፡ ልደተ፡ ክርስቶስ። ወእመሰኬ፡ አዕለውዎ፡ እም፡ ድኅረ፡ ልደተ፡ ክርስቶስ፡ እሜጡ፡ ሰቃልያን፡ ቃለ፡ ጽድቅ፡ ውስተ፡ ስምዐ፡ ሐሰት። ወከመ፡ ተዐልዋ፡ መጻሕፍተ፡ ነቢያት፡ እም፡ ዕብራይስጢ፡ ኀበ፡ ግዕዝ፡ ትረክብ፡ ትእምርቶ፡ በውስተ፡ መጽሐፈ፡ ነገሥት፡ ዘይብል፡ ትርጓሜ፡ ነገረ፡ ዕብራይስጢ፡ ኀበ፡ ግዕዝ፡ ኤሎሄ፡ ብሂል፡ አምላክ፡ አዶናይ፡ ብሂል፡ እግዚእ፡ ጸባዖት፡ ብሂል፡ ዘኃይላት። ወመጻሕፍቲሃሰ፡ ለሐዲስ፡ ለምድርነ፡ ኢትዮጵያ፡ ተዐልዋ፡ እም፡ ሮማይስጢ፡ ኀበ፡ ግዕዝ፡ እም፡ ቅድመ፡ ያስተርኢ፡ ሃይማኖተ፡ ንስጥሮስ፡ ወእም፡ ቅድመ፡ ይትፈጠር፡ ሃይማኖተ፡ ልዮን፡ ወእም፡ ቅድመ፡ ይትጋብኡ፡ ማኅበረ፡ ከለባት፡ ዘውእቶሙ፡ ኤጲስቆጶሳት፡ ዘኬልቄዶን። ወበእንተዝ፡ ኮነ፡ ፍካሬ፡ መጻሕፍቲሃ፡ ለብሔረ፡ አግዓዚ፡ ዘብሉይኒ፡ ዘሐዲስኒ፡ ንጡፍ፡ ከመ፡ ወርቅ፡ ወፍቱን፡ ከመ፡ ብሩር፡ ወንጹሕ፡ ከመ፡ ሐሊብ፡ ዘአልቦ፡ ቱሳሔ። ወአመኒ፡ ይወርድ፡ ንጉሠ፡ ኢትዮጵያ፡ ውስተ፡ ኢየሩሳሌም፡ ወይነግድ፡ ንጉሠ፡ ሮሜኒ፡ እም፡ ቍስጥንጥንያ፡ ወየሐውር፡ ንጉሠ፡ ኢትዮጵያ፡ ምስለ፡ ሊቀ፡ ጳጳሳት፡ ዘእለስክንድርያ። ወይመጽእ፡ ንጉሠ፡ ሮሜሂ፡ ምስለ፡ ሊቀ፡ ጳጳሳት፡ ዘቍስጥንጥንያ፡ ወይትራከቡ፡ በቤተ፡ አባ፡ ሲኖዳ። ወይብል፡ ንጉሠ፡ ሮሜ፡ ምስለ፡ ሊቀ፡ ጳጳሳት፡ ዘቍስጥንጥንያ፡ ዚአነ፡ ሃይማኖት፡ ይኄይስ። ወይብል፡ ካዕበ፡ ንጉሠ፡ ኢትዮጵያ፡ ምስለ፡ ሊቀ፡ ጳጳሳት፡ ዘእስክንድርያ፡ እንቲአነ፡ ሃይማኖት፡ ትኄይስ፡ ወትሤኒ። አንትሙሰ፡ ሰብአ፡ ሮሜ፡ ገበርክሙ፡ ፍልጠተ፡ ማእከለ፡ ትስብእቱ፡ ወመለኮቱ። ከፈልክምዎ፡ ለዘኢይትከፈል፡ ወአንቃዕክምዎ፡ ለዘኢይትሌለይ። ወእምዝ፡ ይነውኅ፡ ጋዕዝ፡ በእንተ፡ ተስናነ፡ ነገርኒ፡ ወበቃለ፡ መጻሕፍትኒ፡ እስመ፡ ትውፊተ፡ መጻሕፍቲሆሙኒ፡ ዘብሉይ፡ ኮነ፡ አመ፡ ርደታ፡ ለንግሥተ፡ አዜብ፡ ውስተ፡ ኢየሩሳሌም፡ ወትውፊተ፡ መጻሕፍቲሃሰ፡ ዘሐዲስ፡ ኮነ፡ አመ፡ ጸአቶሙ፡ ለቅዱሳነ፡ ሮሜ። ወእምዝ፡ ይመውዕዎሙ፡ መምህራነ፡ ኢትዮጵያ፡ ለመምህራነ፡ ሮሜ፡ እስመ፡ መጻሕፍቲሆሙ፡ ኀየላ፡ እመጻሕፍተ፡ ኵሉ፡ አጽናፈ፡ ዓለም። ወበእንተዝ፡ ይቤ፡ ኢሳይያስ፡ ያመጽኡ፡ መጻሕፍተ፡ እማዕዶተ፡ አፍላገ፡ ኢትዮጵያ። ወእምዝ፡ ይከውኖሙ፡ ኀፍረተ፡ ወያበዝኁ፡ ካሕደ፡ ወይብሉ፡ ዲበ፡ ዘወረደ፡ መንፈስቅዱስ፡ ዲበ፡ ምሥዋዒሁ፡ እም፡ ሊቃነ፡ ጳጳሳተ፡ ዚአነ፡ ወእም፡ ሊቃነ፡ ጳጳሳተ፡ ዚአክሙ፡ ይኩን፡ መዊዕ። ወእምዝ፡ ይቄድስ፡ ሊቀ፡ ጳጳሳተ፡ ሮሜ፡ ውስተ፡ ፩፡ ምሥዋዕ፡ ወሊቀ፡ ጳጳሳተ፡ እስክንድርያኒ፡ ውስተ፡ ፩፡ ምሥዋዕ፡ በቅድመ፡ መለካውያን፡ ወያዕቆባውያን፡ በቅድመ፡ አይሁድ፡ ወተንባላት፡ ወአረሚ። ወእምዝ፡ ይወርድ፡ ገሀደ፡ ውስተ፡ ምሥዋዒሁ፡ ለሊቀ፡ ጳጳሳተ፡ እለእስክንድርያ፡ መንፈስቅዱስ፡ በርእየተ፡ ርግብ፡ ጸዓዳ፡ ገበዋቲሁ፡ ዘሐመልማለ፡ ወርቅ፡ ወክነፊሁ፡ ዘመዓዝረ፡ ፀሐይ፡ ወዘነቡ፡ ዘአዝፋረ፡ መባርቅት። ከርሡ፡ ወእንግድዓሁ፡ ዘዕንቍ፡ ኢያስጲድ፡ ወሰርዲኖ። ክሳዱ፡ ከመ፡ ብርሃን፡ ዘለንጳስ፡ ገጹ፡ ዘሜሎስ፡ ወአዕይንቲሁ፡ ዘጳዝዮን፡ ወዲበ፡ ርእሱ፡ ትእምርተ፡ መስቀል፡ ዘማዕተበ፡ ብርሃን፡ ወዲበ፡ ውእቱ፡ ማዕተበ፡ ብርሃን፡ ሥዕለ፡ ገጸ፡ በግዑ፡ ዘይጸርሕ፡ ወይብል፡ አነ፡ ውእቱ፡ ኢየሱስ፡ ክርስቶስ፡ ናዝራዊ፡ አምላኮሙ፡ ለናዝራውያን። ወእምዝ፡ ይትፌሣሕ፡ ንጉሠ፡ ኢትዮጵያ፡ ወይዌውዕ፡ በቃለ፡ ይባቤ፡ ምስለ፡ ሕዘቢሁ። ወሊቀ፡ ጳጳሳተ፡ እለእስክድርያኒ፡ ምስለ፡ ኤጲስቆጶሳተ፡ ግብጽ፡ ወምስለ፡ ኵሉ፡ መምህራኒሆሙ፡ ይትፌሥሑ፡ ቦሙ፡ ለሰብአ፡ ኢትዮጵያ፡ እስመ፡ በቃለ፡ መጻሕፍቲሆሙ፡ ኮነ፡ ሥምረተ፡ እግዚአብሔር። በእንተዝ፡ ይቤ፡ ኢሳይያስ፡ ወይትሜክሑ፡ ግብጽ፡ በኢትዮጵያ፡ እስመ፡ ሰብአ፡ ግብጽ፡ ወኢትዮጵያ፡ ሱቱፋነ፡ ሃይማኖት፡ ወኅቡራነ፡ ክህነት፡ እሙንቱ። ወእምዝ፡ ይለብሱ፡ ኀፍረተ፡ ወኀሣረ፡ ሰብአ፡ ሮሜ፡ ምስለ፡ ሊቀ፡ ጳጳሳቲሆሙ፡ ወምስለ፡ ንጉሦሙ። ምስለ፡ ኤጲስቆጶሳቲሆሙ፡ ወምስለ፡ ኵሉ፡ ተዐይነ፡ ማኅበሮሙ። ወበእንተዝ፡ ይቤ፡ ዳዊት፡ ይገንዩ፡ ቅድሜሁ፡ ኢትዮጵያ። ወጸላዕቱሂ፡ ሐመደ፡ ይቀምሑ። አማንኬ፡ ይገንዩ፡ ቅድሜሁ፡ ኢትዮጵያ። ወጸላዕቱሂ፡ ሐመደ፡ ይቀምሑ። አማንኬ፡ ይገንዩ፡ ቅድሜሁ፡ ኢትዮጵያ፡ በእንተ፡ ዘከፈሎሙ፡ መዊዐ፡ በቃለ፡ መጻሕፍት፡ ከመ፡ ያስተኀፍርዎሙ፡ ለዐበይተ፡ ሮሜ። አማንኬ፡ ዘይቤ፡ ወጸላዕቱሂ፡ ሐመደ፡ ይቀምሑ። ዝኒ፡ በእንተ፡ ኀሣረ፡ ስብከቶሙ፡ ለመለካውያን፡ እስመ፡ መለካውያን፡ ብሂል፡ ሰብአ፡ ንጉሥ፡ ብሂል፡ ወአኮ፡ ሰብአ፡ ኢየሱስ፡ ክርስቶስ፡ እስመ፡ ኀበ፡ ሠምረ፡ መርቅያን፡ ንጉሥ፡ ኮነ፡ ተመይጦቶሙ፡ በእንተ፡ ፍርሀተ፡ ኵነኔ፡ ወስደት። ወበእንተዝ፡ ተሰምዩ፡ ንጉሣውያነ፡ ወአኮ፡ ክርስቶሳውያነ፡ እስመ፡ መላኪ፡ ብሂል፡ ንጉሥ፡ በልሳነ፡ ዐረብ፡ እስመ፡ ስመ፡ ሃይማኖቶሙ፡ ያዐውቅ፡ ካሕዶሙ፡ እስመ፡ ማዕተብ፡ ትእምርተ፡ መስቀል፡ አድለው፡ ለንጉሥ፡ እም፡ ያድልው፡ ለእግዚአብሔር። ንትመየጥኬ፡ ኀበ፡ ነገረ፡ ዜናሆሙ፡ ለንጉሠ፡ ሮም፡ ወለሊቀ፡ ጳጳሳተ፡ ቍስጥንጥንያ፡ ወለኵሉ፡ ማኅበረ፡ ተዓይኒሆሙ፡ ዘከመ፡ ይኔስሑ፡ ወይትመየጡ፡ እም፡ ሃይማኖቶሙ፡ ርኵስት፡ ሶበ፡ ይሬእዩ፡ ርደተ፡ መንፈስቅዱስ፡ ዲበ፡ ምሥዋዒሁ፡ ለሊቀ፡ ጳጳሳተ፡ እለስክንድርያ፡ ወይዌርዉ፡ መጻሕፍቲሆሙ፡ ውስተ፡ ቀላየ፡ ባሕር፡ ዘውእቱ፡ መጻሕፍተ፡ ሐሰት፡ ዘአስተንፈሰ፡ ሰይጣን፡ ውስተ፡ አፉሆሙ። ወዓዲ፡ ይረግምዎ፡ ለልዮን፡ አቡሆሙ፡ ዘመሀሮሙ፡ ዕልወተ። ወእምዝ፡ ይከውን፡ ፍቅር፡ ወስንዕ፡ ወሰላም፡ ማእከለ፡ ንጉሠ፡ ኢትዮጵያ፡ ወማእከለ፡ ንጉሠ፡ ሮም፡ ዘውእቱ፡ ወልደ፡ አንበሳ። ወይገብእ፡ ምኵናነ፡ ኢየሩሳሌም፡ ኀበ፡ ንጉሠ፡ ሮም፡ ወምኵናነ፡ ምሥር፡ ወግብጽ፡ ኀበ፡ ንጉሠ፡ ኢትዮጵያ። ወእምዝ፡ የአትዉ፡ ለለአህጉሪሆሙ፡ በሰላም፡ በከመ፡ ነገረ፡ አባ፡ ሲኖዳ፡ ርእሰ፡ መነኮሳት፡ ወአበ፡ ባሕታውያን። ወለብሂለ፡ ይገንዩ፡ ቅድሜሁ፡ ኢትዮጵያ፡ ወጸላዕቱሂ፡ ሐመደ፡ ይቀምሑ፡ ካዕበ፡ ዓዲ፡ ቦቱ፡ ትርጓሜ፡ እስመ፡ ፈላስያነ፡ ኢትዮጵያ፡ እለ፡ ይወርዱ፡ ኢየሩሳሌም፡ ይገንዩ፡ ወያስተበርኩ፡ ውስተ፡ ቤተልሔም፡ ኀበ፡ ተወልደ። ወይገንዩ፡ ወይሰግዱ፡ ወይትሐፀቡ፡ ውስተ፡ ፈለገ፡ ዮርዳኖስ፡ ኀበ፡ ተጠምቀ። ይገንዩ፡ ወይሰግዱ፡ ውስተ፡ መካነ፡ ቀራንዮ፡ ኀበ፡ ተሰቅለ። ወካዕበ፡ ዓዲ፡ ይገንዩ፡ ወይትማሐለሉ፡ ዘምስለ፡ ገዓር፡ ወብካይ፡ ውስተ፡ መካነ፡ ጎልጎታ፡ ኀበ፡ ተቀብረ፡ ስምዐ፡ ኮኑ፡ እለ፡ ህየ፡ ነበሩ። ወይቤሉ፡ በማኅትወ፡ ፋሲካ፡ ዘቅድመ፡ ትንሣኤ፡ እንተ፡ ይእቲ፡ ሰንበተ፡ ቀዳም፡ ዘሰሙነ፡ ሕማማቲሁ፡ ይከውን፡ ጉባኤ፡ ክርስቲያን፡ ውስተ፡ መካነ፡ ጎልጎታ፡ ወይሰቅሉ፡ ቀናዲለ፡ በበጾታሆሙ። ቅድመ፡ የዐውዱ፡ ሰብአ፡ ሮም፡ ወመለካውያን፡ ወኢያስተርኢ፡ ማኅቶተ፡ ብርሃን፡ በዑደቶሙ፡ ወይወፅኡ፡ ኅፉራኒሆሙ። ወእምዝ፡ የዐውዱ፡ ኢትዮጵያ፡ ወግብጽ፡ ወሶርያ፡ ወአርማንያ፡ ወማሮና። ወለእመ፡ አልቦ፡ ኢትዮጵያዊ፡ ምስሌሆሙ፡ ኢያስተርኢ፡ ማኅቶተ፡ ብርሃን፡ ውስተ፡ ቀናድሊሆሙ፡ ወእመሂ፡ ቦ፡ ኢትዮጵያዊ፡ ምስሌሆሙ፡ ወኢይነብር፡ ማኅቶተ፡ ብርሃን፡ ዘእንበለ፡ ኀበ፡ ቀንዲል፡ ዘኢትዮጵያ። ወእመሂ፡ አፍለስዎ፡ በዓሙ፡ መስተካህዳን፡ ኀበ፡ ካልዕ፡ ገጸ፡ መካን፡ ይተልዎ፡ ገጸ፡ እግዚአብሔር፡ ወያስተርኢ፡ ዲቤሁ፡ ማኅቶተ፡ ብርሃን። ናሁ፡ አብጻሕነ፡ ለክሙ፡ ስምዐ፡ በእንተ፡ ዕበያ፡ ወክብራ፡ ለኢትዮጵያ። እስመ፡ ቦ፡ እለ፡ ዜነዉነ፡ ከመ፡ ኀጥኡ፡ ሰብአ፡ ግብጽ፡ እም፡ ፈላስያነ፡ ኢትዮጵያ፡ ወዖዱ፡ ባሕቲቶሙ፡ ወኢያስተርአየ፡ ሎሙ፡ ማኅቶተ፡ ብርሃኖሙ። ወእምዝ፡ ይቤልዎሙ፡ ተንበላት፡ እለ፡ ይቀንይዎሙ፡ ናሁኬ፡ አሕሰምክሙ፡ ሃይማኖተክሙ፡ ወበእንተዝ፡ ኢያስተርአየ፡ ለክሙ፡ ማኅቶተ፡ አምላክክሙ፡ እንከሰኬ፡ ንመይጠክሙ፡ ኀበ፡ ሃይማኖትነ። ወበከዩ፡ ሰብአ፡ ግብጽ፡ እንዘ፡ ይብሉ፡ ኅድጉነ፡ ንስቲተ፡ ከመ፡ ንስአሎ፡ ለአምላክነ። ወእምዝ፡ ሶበ፡ ኀደግዎሙ፡ ሖሩ፡ ኀበ፡ መቃብሪሁ፡ ለ፩፡ ፈላሲ፡ እም፡ ሰብአ፡ ኢትዮጵያ፡ ከረዩ፡ ወአውጽኡ፡ አእጽምቲሁ፡ ወቈጸርዎ፡ በልብሶሙ፡ ወዖድዎ፡ ለመቃብረ፡ እግዚእነ፡ በከመ፡ ያለምዱ፡ ለለዓመት። ወአስተርአየ፡ ማኅቶተ፡ ብርሃን፡ ውስተ፡ ቀንዲል። ወእምዝ፡ ተፈሥሑ፡ ሰብአ፡ ግብጽ፡ በእግዚአብሔር፡ ዘረድኦሙ። ወተንባላትሂ፡ ኀደግዎሙ፡ ከመ፡ ይንበሩ፡ በሃይማኖቶሙ። ንትመየጥኬ፡ ኀበ፡ ዘለፋሁ፡ ለፎጢኖስ፡ ዘእም፡ ረሳዕናሁ፡ በበአተ፡ ነገር፡ ውስተ፡ ካልዕ፡ ፍና። ንበሎኬ፡ ለፎጢኖስ፡ ኦ፡ ፎጢኖስ፡ ከልብ፡ ዘአብደ፡ ያደውዮ፡ ለዘነሰኮ፡ ወበፅዑር፡ ደዌ፡ ይመውት፡ ዘለከፎ፡ በአስናኒሁ። ወከማሁ፡ ዘሂ፡ ይሰምዕ፡ ትምህርተከ፡ ይደዊ፡ በሕማመ፡ ስሕተትከ፡ ይበውእ፡ ሕምዘ፡ ግዘት፡ ውስተ፡ ልቡ፡ ዘይሰብር፡ አእጽምተ፡ ወይመትር፡ አማዑተ። ኦ፡ ፎጢኖስ፡ እፎኑ፡ ትብሎ፡ ለፌ፡ እማርያም፡ ህላዌሁ፡ ለክርስቶስ፡ ዘበእንቲአሁ፡ ይቤ፡ አብ፡ በመጽሐፈ፡ ሕግ፡ አዳም፡ ኮነ፡ ከመ፡ ፩፡ እምኔነ። ዳዊትኒ፡ ይቤ፡ ወእም፡ ቅድመ፡ ፀሐይ፡ ሀሎ፡ ስሙ። ዮሐንስኒ፡ ወንጌላዊ፡ ይቤ፡ ቀዳሚሁ፡ ቃል፡ ውእቱ፡ ወውእቱ፡ ቃል፡ ኀበ፡ እግዚአብሔር፡ ውእቱ፡ ወእግዚአብሔር፡ ውእቱ፡ ቃል። ወከማሁ፡ እም፡ ቀዲሙ፡ ኀበ፡ እግዚአብሔር፡ ውእቱ። ናሁኬ፡ ይነግር፡ ቅድመ፡ ህላዌሁ፡ ምስለ፡ አብ። ወእምዝ፡ ያተሉ፡ እንዘ፡ ይብል፡ ዘቦቱ፡ ኵሉ፡ ኮነ፡ ወዘእንበሌሁሰ፡ አልቦ፡ ዘኮነ። ናሁኬ፡ አግሀደ፡ ከመ፡ አልቦ፡ ዘተገብረ፡ በህላዌ፡ ባሕቲቱ፡ አብ፡ ዘእንበለ፡ ጽምረተ፡ ወልድ። ወበእንተዝ፡ ይቤ፡ ዘእንበሌሁሰ፡ አልቦ፡ ዘኮነ። ካዕበ፡ ይቤ፡ ዮሐንስ፡ በውስተ፡ መልእክቱ፡ ዝ፡ ውእቱ፡ ቀደማዊ፡ ዘሰማዕነ፡ ወዘርኢነ፡ ወዘጠየቅነ፡ ወገሰሳ፡ እደዊነ፡ በእንተ፡ ነገረ፡ ሕይወት፡ ወሕይወትኒ፡ ተዐውቀት፡ ለነ። ጳውሎስኒ፡ ይቤ፡ ኢየሱስ፡ ክርስቶስ፡ ዘትማልም፡ ወዮም፡ ወክመ፡ ውእቱ፡ እስከ፡ ለዓለም። ማርቆስኒ፡ ይቤ፡ ቀዳሚሁ፡ ለወንጌል፡ ኢየሱስ፡ ክርስቶስ፡ በከመ፡ ጽሑፍ፡ ውስተ፡ መጽሐፈ፡ ነቢያት። ካዕበ፡ ይቤ፡ በወንጌል፡ ለእግዚአብሔርሰ፡ አልቦ፡ ዘርእዮ፡ ግሙራ፡ ወባሕቱ፡ ወልድ፡ ዘሀሎ፡ ውስተ፡ ሕጽኑ፡ ውእቱ፡ ነገረነ። ይሁዳኒ፡ ይቤ፡ ወአዘክረክሙ፡ ፈቀድኩ፡ ወታእምሩ፡ ምዕረሰ፡ ከመ፡ ኢየሱስ፡ አድኀነ፡ ሕዝቦ፡ እምድረ፡ ግብጽ፡ ወበዳግምሰ፡ ለእለ፡ ኢአምኑ፡ አጥፍኦሙ፡ ካዕበ፡ ይቤ፡ ዳዊት፡ ምስሌከ፡ ቀዳማዊ፡ በዕለተ፡ ኃይል፡ በብርሃኖሙ፡ ለቅዱሳን። ለሊሁኒ፡ ይቤ፡ ወልድ፡ ሰብሐኒ፡ አባ፡ በስብሐትየ፡ ዘሀሎ፡ ምስሌከ፡ እም፡ ቅድመ፡ ይትፈጠር፡ ዓለም። በዝኒ፡ ኢትሌቡኑ፡ ኦ፡ ፎጢኖስ፡ ዕዉረ፡ ልብ፡ ትትከሐድኑ፡ በእንተ፡ ህላዌሁ፡ ዘእም፡ ቅድመ፡ ዓለም። ኦ፡ ፎጢኖስ፡ ተክለ፡ ሐሰት፡ ተመላሕከ፡ እም፡ ሥርወ፡ ሕያዋን፡ ወተተከልከ፡ ውስተ፡ አእፃዳቲሆሙ፡ ለዐፀውተ፡ ሲኦል። ወንሕነሰ፡ ነአምን፡ ከመ፡ አብ፡ ህልው፡ ምስለ፡ ወልዱ፡ ወምስለ፡ መንፈስቅዱስ። አኮ፡ ለመርድአ፡ ግብር፡ ዘወለዶ፡ ለወልዱ፡ ወአኮ፡ ለአስተዋጽኦ፡ ኪን፡ ወተግባር፡ ዘተደመረ፡ ህላዌሁ፡ ለመንፈስቅዱስ፡ ውስተ፡ ህላዌሁ፡ አላ፡ ፩፡ እሙንቱ፡ ኅቡራነ፡ ህላዌ፡ ወኅቡራነ፡ ግዕዝ፡ ወሥርዓት። ኢርኩባን፡ ለጠባይዐ፡ ፍጥረት፡ ኢልኩፋን፡ ለግሰተ፡ አጻብዕ፡ ኢያስተርእዩ፡ ለንጻሬ፡ ወኢይትሌበዉ፡ ለእማሬ። ኢይትከወሱ፡ በቱሳሔ፡ ወኢይትፈለጡ፡ በቡዓዴ፡ ወኢይትሌዐሉ፡ በፍድፋዴ። ወኢየሐጽጹ፡ በኑታጌ። ኅሩም፡ አብ፡ ዘኢያስተርኢ፡ በህላዌሁ፡ ዘእንበለ፡ ዳእሙ፡ በራእየ፡ ትንቢት፡ ለነቢያቲሁ። ኅሩም፡ ወልድ፡ ዘኢያስተርኢ፡ በመለኮቱ፡ ዘእንበለ፡ በትስብእቱ። ኅሩም፡ መንፈስቅዱስ፡ ዘኢያስተርኢ፡ በካልዕ፡ ግርማሁ፡ ዘእንበለ፡ ዳእሙ፡ በንጻሬ፡ ዘይትፈቀድ፡ በዘይረድኦሙ፡ ለቅዱሳን። ወሶበ፡ ርእየ፡ እግዚአብሔር፡ ከመ፡ ኢበቍዐ፡ ደመ፡ አቤል፡ ጻድቅ፡ ለሥላጤ፡ ዕዳሁ፡ ለአዳም፡ ኢሰኪቦቱ፡ ለይስሐቅ፡ ዲበ፡ ምሥዋዕ፡ ዘነደቀ፡ አቡሁ፡ ወኢደመ፡ ናቡቴ፡ እስራኤላዊ፡ ዘተቀትለ፡ በእንተ፡ አጸደ፡ ወይኑ፡ ኢደመ፡ ኢሳይያስ፡ ዘሰጠቅዎ፡ ለለክፍል፡ በሞሰርተ፡ ዕፅ፡ ወኢደመ፡ ኤርምያስ፡ ዘወደይዎ፡ ውስተ፡ ዓዘቅተ፡ ዓምዓም፡ ሶበ፡ ተነበየ፡ በእንተ፡ ፄዋዌ። ወእም፡ ድኅረ፡ ሚጠተ፡ ፄዋዌ፡ ወገርዎ፡ በአእባን፡ ሶበ፡ ይብል፡ አምላክ፡ ወልደ፡ አምላክ። ወይቤሉ፡ ዝንቱ፡ ውእቱ፡ ነገሩ፡ ለኢሳይያስ፡ አብዱ፡ ላዕሌሁ፡ ወቀተልዎ። ወዓዲ፡ ኢበቍዐ፡ በአተ፡ ፫፡ ደቂቅ፡ ውስተ፡ እቶነ፡ እሳት፡ ዘባቢሎን፡ ዘአፍልሕዎ፡ በተይ፡ ወፒሳ፡ ወአስፈሊጦን፡ ወአቀላሚዶን፡ እስከ፡ ተለዐለ፡ ነበለባሉ፡ እም፡ አፈ፡ እቶን፡ ፵ወ፱፡ በእመት። ወኢበአተ፡ ዳንኤል፡ ውስተ፡ ግበ፡ አናብስት፡ ርኁባን። ሶበ፡ ኀየለ፡ መዳልወ፡ ኃጢአቶሙ፡ ለአዳም፡ ወለሔዋን፡ እመዳልወ፡ ጽድቆሙ፡ ለነቢያት፡ ወእመዳልወ፡ ደሞሙ፡ ለቅዱሳነ፡ ልዑል፡ እስመ፡ ምክንያተ፡ ጸአቶሙ፡ እም፡ ገነት፡ ለአዳም፡ ወለሔዋን፡ ኮነ፡ በፈቲወ፡ ከዊነ፡ አምላክ። ርእየ፡ እግዚአብሔር፡ ከመ፡ ኢይሠልጥ፡ ዕዳሁ፡ ለፈቲወ፡ ከዊነ፡ አምላክ፡ ዘእንበለ፡ ዳእሙ፡ በደመ፡ አምላክ፡ ከመ፡ ኢይሠልጥ፡ ዕዳሁ፡ ለፈቲወ፡ ከዊነ፡ አምላክ፡ ዘእንበለ፡ ዳእሙ፡ በደመ፡ አምላክ። ኀደረ፡ አቡሃ፡ ለሔዋን፡ ኀበ፡ ወለተ፡ ሔዋን፡ ጽሕቀ፡ አቡሁ፡ ለአዳም፡ ለከዊነ፡ ዳግም፡ አዳም። ናሁኬ፡ ያርኢ፡ እንዘ፡ ይትፋለስ፡ በረከተ፡ እግዚአብሔር፡ እም፡ ሕዝብ፡ ውስተ፡ ሕዝብ። መሥዋዕተ፡ አቤል፡ ተወክፈ፡ ወዘቃየልሰ፡ ኢተወክፈ፡ ወበእንተዝ፡ በቅንዓት፡ ቀተሎ፡ ቃየል፡ ለአቤል፡ በቀለ፡ ደሙ፡ ጸርሐ፡ ወሰከየ፡ እኅዋሁ፡ ኀበ፡ እግዚአብሔር፡ እስከ፡ ረገማ፡ እግዚአብሔር፡ ለምድር፡ ዘይገብር፡ ቃየል። ወበእንተዝ፡ አስተማሰለ፡ ጳውሎስ፡ ደመ፡ ኢየሱስ፡ ክርስቶስ፡ በደመ፡ አቤል፡ ጻድቅ፡ ወይቤ፡ በንዝኀተ፡ ደም፡ ነባቢ፡ ዘይኄይስ፡ እም፡ ተናግሮ፡ እም፡ ዘአቤል። ወእም፡ ድኅረ፡ ሞቱ፡ ለአቤል፡ ተወልደ፡ ሴት፡ ዘበትርጓሜሁ፡ ተክለ፡ ህየንተ፡ አቤል፡ ዘቀተሎ፡ ቃየል፡ ወበእንተዝ፡ አዕረፈ፡ በረከተ፡ አቤል፡ ላዕለ፡ ደቂቀ፡ ሴት። ወዘርዐ፡ ቃየልሰ፡ ኮነ፡ ለመርገም፡ ወለድምሳሴ፡ እም፡ ገጸ፡ ምድር። ወለደ፡ ኖኅ፡ ፫፡ ደቂቀ፡ ሴምሃ፡ ወካምሃ፡ ወያፌትሃ። ወለካምሰ፡ ውኅደት፡ በረከቱ፡ ወለያፌትሂ፡ ይቤሎ፡ ለያርኅብ፡ እግዚአብሔር፡ ምድረ፡ ለያፌት። ወለሴምሰ፡ ይቤሎ፡ አቅዲሙ፡ እም፡ በረከተ፡ ያፌት፡ ይትባረክ፡ እግዚአብሔር፡ አምላኩ፡ ለሴም። ወእም፡ ድኅረ፡ በረከተ፡ ያፌትኒ፡ አትለወ፡ ወይቤ፡ ለይኅድር፡ እግዚአብሔር፡ ውስተ፡ ቤቱ፡ ለሴም። ናሁ፡ ተመክዐበ፡ በረከት፡ ወተዐውቀ፡ ከመ፡ የኀድር፡ እግዚአብሔር፡ ውስተ፡ ቤቱ፡ ናሁኬ፡ ፈለሰት፡ በረከት፡ ኀበ፡ ቤተ፡ ሴም። ወለደ፡ አብርሃም፡ እስማዔልሃ፡ እም፡ አጋር፡ ግብጻዊት፡ ወይስሐቅሃ፡ ዘበርስዓን፡ እም፡ ሳራ፡ ወለተ፡ አቡሁ። ዮቃጢንሃ፡ ወዝንባሪሃ፡ ወያክሶንሃ፡ ወማይዳንሃ፡ ወኢዮዝባቅሃ፡ ወሴሐሃ፡ እም፡ ኬጡራ። ወፈለሰት፡ በረከት፡ ኀበ፡ ይስሐቅ፡ ወልደ፡ ሳራ፡ እስመ፡ ይቤሎ፡ እግዚአብሔር፡ ለአብርሃም፡ እም፡ ይስሐቅ፡ ይሰመይ፡ ለከ፡ ዘርዕ። ወለደ፡ ይስሐቅ፡ ዔሳውሃ፡ ወያዕቆብሃ። ወይቤ፡ እግዚአብሔር፡ በአፈ፡ ነቢይ፡ ያዕቆብሃ፡ አፍቀርኩ፡ ወዔሳውሃ፡ ጸላዕኩ። ናሁኬ፡ ተግሕሰ፡ በረከተ፡ እግዚአብሔር፡ እም፡ ዔሳው፡ ኀበ፡ ያዕቆብ። ወለደ፡ ያዕቆብ፡ ፲ወ፪፡ ደቂቀ፡ ወለለ፡ ፩፡ ፩፡ አርአየ፡ ያዕቆብ፡ በረከቶሙ፡ ከመ፡ ሀብተ፡ ጸጋ፡ ዘይደልዎሙ። ለይሁዳሰ፡ ይቤሎ፡ ይሁዳ፡ ሰብሑከ፡ አኀዊከ፡ እደዊከ፡ ዲበ፡ ዘባኖሙ፡ ለጸላዕትከ። ይሰግዱ፡ ለከ፡ ደቂቀ፡ አቡከ፡ ይሁዳ፡ እጓለ፡ አንበሳ፡ ሰከብከ፡ ወኖምከ፡ ከመ፡ አንበሳ፡ ወከመ፡ እጓለ፡ አንበሳ፡ አልቦ፡ ዘያነቅሀከ። ኢይጠፍእ፡ ምልክና፡ እም፡ ይሁዳ፡ ወምስፍና፡ እም፡ አባሉ፡ እስከ፡ አመ፡ ይረክብ፡ ዘጽኑሕ፡ ሎቱ። ውእቱ፡ ተስፋሆሙ፡ ለአሕዛብ፡ የሐጽብ፡ በወይን፡ ልብሶ፡ በደመ፡ አስካል፡ ሰንዱኖ። የአሥር፡ በሐረገ፡ ወይን፡ አድጎ፡ ወበዕፀ፡ ኤሎቅ፡ ዕዋሎ። ፍሡሐት፡ እም፡ ወይን፡ አዕይንቲሁ፡ ወጸዓዳ፡ ከመ፡ ሐሊብ፡ ስነኒሁ። ናሁኬ፡ አስተርአየ፡ ትእምርተ፡ መንግሥቱ፡ ለክርስቶስ፡ ውስተ፡ ቤተ፡ ይሁዳ። ወይሁዳኒ፡ ወለደ፡ ዛራሃ፡ ወፋሬስሃ፡ እም፡ ትዕማር፡ ብእሲተ፡ ኤር፡ ወአውናን። ወፋሬስኒ፡ ወለዶ፡ ለኤስሮም፡ ወኤስሮምኒ፡ ወለዶ፡ ለአራም፡ ወአራምኒ፡ ወለዶ፡ ለአሚናዳብ፡ ወአሚናዳብኒ፡ ወለዶሙ፡ ለነአሶን፡ ወለኤልሳቤጥ፡ ብእሲተ፡ አሮን፡ ካህን። ወነአሶንሰ፡ መልአከ፡ ኃይሎሙ፡ ውእቱ፡ ለቤተ፡ ይሁዳ፡ ወውእቱ፡ ወለዶ፡ ለሰሎሞን። ወሰሎሞንኒ፡ ወለዶ፡ ለባዖስ፡ እምረአብ፡ ዘማ፡ ዘኢያሪኮ፡ እንተ፡ ይእቲ፡ ደወለ፡ ጋይ። ወባዖስኒ፡ ወለደ፡ ኢዮቤድሃ፡ እምነ፡ ሩት፡ ሞአባዊት፡ ወኢዮቤድኒ፡ ወለደ፡ ዕሤይሃ። ወዕሤይኒ፡ ወለደ፡ ኤልያብሃ፡ በኵረ፡ ወአሚናዳብሃ፡ ካልዐ፡ ስማዕሃ፡ ሣልሶ፡ ናትናኤልሃ፡ ራብዖ፡ ራዳይሃ፡ ኀምሶ፡ ነአሶንሃ፡ ሳድሶ፡ ዳዊትሃ፡ ሳብዖ። ወይቤሎ፡ እግዚአብሔር፡ ለሳሙኤል፡ ምላዕ፡ ቀርነ፡ ቅብዕ፡ ወሑር፡ ኀበ፡ ቤተልሔም፡ ወባእ፡ ቤተ፡ ዕሤይ፡ ወአነ፡ አርእየከ፡ ዘኀረይኩ፡ እም፡ ደቂቁ። ወበጽሐ፡ ሳሙኤል፡ ውስተ፡ ቤተልሔም፡ ወቦአ፡ ውስተ፡ አጸዱ፡ ለዕሤይ፡ ወይቤሎ፡ አምጽዖሙ፡ ለደቂቅከ፡ ወአምጽኦ፡ ለኤልያብ፡ ወይቤ፡ ሳሙኤል፡ ዝኑ፡ መሲሑ፡ ለእግዚአብሔር። ወይቤ፡ እግዚአብሔር፡ አኮ፡ ዘንተ፡ ዘኀረየኩ። ወካዕበ፡ አምጽኦ፡ ሳሙኤል፡ ለአሚናዳብ፡ ወአርአዮ፡ ቅድመ፡ እግዚአብሔር፡ ወይቤ፡ እግዚአብሔር፡ ለዝኒ፡ ኢኀረይክዎ። ወአምጽኦሙ፡ ዕሤይ፡ ለስድስቲሆሙ፡ ደቂቁ፡ ወኢያስተርአየ፡ ገጸ፡ እግዚአብሔር፡ ምስሌሆሙ፡ በቅድመ፡ ሳሙኤል። ወይቤሎ፡ ሳሙኤል፡ ለዕሤይ፡ ኢሀሎኑ፡ ለከ፡ ካልዕ፡ ዘእንበለ፡ እሉ። ወይቤሎ፡ ዕሤይ፡ ለሳሙኤል፡ ሀሎ፡ ወልድ፡ ንኡስ፡ ዘይሬዒ፡ መራዕየ፡ አባግዕየ። ወይቤሎ፡ ሳሙኤል፡ ለአክአብ፡ ያምጽእዎ፡ ፍጡነ። ወአምጽእዎ፡ ለዳዊት፡ ወአቀምዎ፡ ቅድመ፡ ሳሙኤል። ወይቤሎ፡ እግዚአብሔር፡ ለሳሙኤል፡ ዝ፡ ውእቱ፡ ዘእቤለከ። ተንሥእ፡ ቅብዖ። ወበካልዕኒ፡ ይብል፡ ወረከብክዎ፡ ለዳዊት፡ ገብርየ፡ ወቀባዕክዎ፡ ቅብዐ፡ ቅዱሰ። እስመ፡ እዴየ፡ ትረድኦ፡ ወመዝራዕትየ፡ ታጸንዖ፡ ወኢይበቍዕ፡ ጸላዒ፡ በላዕሌሁ፡ ወውሉደ፡ ዐመፃ፡ ኢይደግም፡ አሕምሞቶ። ወእመትሮሙ፡ ለፀሩ፡ በቅድመ፡ ገጹ። ወአኀሥሮሙ፡ ለጸላዕቱ። ወሣህልየሰ፡ ወጽድቅየ፡ ምስሌሁ፡ ወበስምየ፡ ይትሌዓል፡ ቀርኑ። ወእሠይም፡ ውስተ፡ ባሕር፡ እዴሁ፡ ወውስተ፡ አፍላግ፡ የማኖ፡ ውእቱ፡ ይብለኒ፡ አቡየ፡ አንተ፡ ወአነሂ፡ በኵርየ፡ እሬስዮ፡ ወልዑል፡ እም፡ ነገሥተ፡ ምድር። ወበካልዕኒ፡ ይብል፡ ወአነ፡ አበቍል፡ ቀርነ፡ ለዳዊት፡ ወአስተዴሉ፡ ማኅቶተ፡ ለመሲሕየ፡ ወአለብሶሙ፡ ኀፍረተ፡ ለጸላዕቱ፡ ወቦቱ፡ ይፈሪ፡ ቅድሳትየ፡ ወበካልዕኒ፡ ይብል፡ ወይገብር፡ ምሕረቶ፡ ለመሲሑ፡ ለዳዊት፡ ወለዘርዑ፡ እስከ፡ ለዓለም። ኢሳይያስኒ፡ ይቤ፡ ትወጽእ፡ በትር፡ እም፡ ሥርወ፡ ዕሤይ፡ ወየዓርግ፡ ጽጌ፡ እም፡ ጕንዱ፡ ወየዐርፍ፡ ዲቤሁ፡ መንፈሰ፡ እግዚአብሔር። ናሁኬ፡ ፈለሰት፡ በረከተ፡ እግዚአብሔር፡ ኀበ፡ ቤተ፡ ዳዊት። ቀርነ፡ ቅብዕ፡ ፈልሐ፡ ዲበ፡ ርእሱ፡ ወበትረ፡ መንግሥት፡ ሠረፀት፡ እም፡ ቤቱ። ወእም፡ ዘርዐ፡ ዚአሁ፡ አንሥአ፡ ለነ፡ እግዚአብሔር፡ ቀርነ፡ መድኃኒትነ። ወዓዲ፡ ኢቦአ፡ ውስተ፡ አዕጻዳቲሆሙ፡ ለነገሥተ፡ ገሊላ፡ ኢኀረያ፡ ለወለተ፡ ሄሮድስ። ወለተ፡ ነዳያን፡ ኀረየ፡ እም፡ ወለተ፡ ዐበይቶሙ፡ ለነገሥተ፡ ይሁዳ፡ እንዘ፡ እግዚአብሔር፡ ውእቱ፡ ውስተ፡ ማኅፀነ፡ ብእሲት፡ ኀደረ። ወሶበሂ፡ አፍቀረ፡ ወፈተወ፡ ሥና፡ ኢያዕረጋ፡ ሰማያተ፡ ከመ፡ ትኩኖ፡ እመ፡ በጽርሐ፡ አርያም፡ አላ፡ ለሊሁ፡ ወረደ፡ ወኀደረ፡ ውስተ፡ ቤተ፡ ዮሴፍ፡ ፀራቢ። ኢያንበራ፡ ዲበ፡ ሰረገላ፡ ዘኪሩቤል፡ ከመ፡ ትፅንሶ፡ በህየ፡ አላ፡ ለሊሁ፡ ኀደረ፡ ውስተ፡ ማኅፀና፡ እንዘ፡ ሀለወት፡ በሀገረ፡ ገሊላ፡ እንተ፡ ስማ፡ ናዝሬት። ኢያስተሳተፋ፡ በዕበዩ፡ አመ፡ ሥጋዌሁ፡ ወኢይቤሎ፡ ለገብርኤል፡ አምጽኣ፡ ዝየ፡ ለድንግል፡ ከመ፡ ትፁረኒ፡ በከርሣ፡ ፱፡ አውራኃ፡ አላ፡ ለሊሁ፡ ተሳተፈ፡ ትሕትናሃ፡ ወረደ፡ ምስለ፡ ገብርኤል፡ ወቦአ፡ ውስተ፡ ቤተ፡ ንዴታ። ወሶበ፡ ይቤላ፡ መልአክ፡ መንፈስቅዱስ፡ ይመጽእ፡ ላዕሌኪ፡ ተቀደሰት፡ በርደተ፡ መንፈስቅዱስ፡ ለከዊነ፡ እመ፡ አምላክ። ወሶበ፡ ደገመ፡ ብሂሎታ፡ ኃይለ፡ ልዑል፡ ይጼልለኪ፡ ጸንዓት፡ ለጸዊረ፡ ወልድ፡ ዋሕድ፡ በኃይለ፡ አቡሁ፡ ሰማያዊ። ወሶበ፡ ይቤላ፡ ወዘኒ፡ ይትወለድ፡ እምኔኪ፡ ቅዱስ፡ ውእቱ፡ ወይሰመይ፡ ወልደ፡ ልዑል። ውእቱ፡ ዘይትወለድ፡ እምኔሃ። አዕረገት፡ ሕሊናሃ፡ ውስተ፡ ጽርሐ፡ አርያም፡ ኀበ፡ ሀሎ፡ ወልድ፡ ምስለ፡ አቡሁ። ውእቱኒ፡ አጽነነ፡ ሰማያተ፡ ወወረደ፡ ወሦጠ፡ ርእሶ፡ ውስተ፡ ማኅፀና። ወካዕበ፡ ትቤሎ፡ ድንግል፡ ለመልአክ፡ ይኩነኒ፡ በከመ፡ ትቤለኒ። ውእተ፡ ጊዜ፡ ተሠገወ፡ ቃል፡ እምኔሃ። ኢያምጽአ፡ ምስሌሁ፡ አመ፡ ሥጋዌሁ፡ ፬፡ እንስሳሁ፡ ርእያ፡ ከመ፡ ኢትደንግፅ፡ ወነጺራ፡ ከመ፡ ኢትፍራህ። ኀደገ፡ ህየ፡ ሰማያውያነ፡ እለ፡ በሥርዓተ፡ ሰማይ፡ ዕቁባነ። ወገብረ፡ በዝየ፡ ሥርዓተ፡ ምድራዊተ፡ ዘይበቍዕ፡ ለመልእክተ፡ ቅዱሳን። ህየ፡ ህልው፡ በየማነ፡ አቡሁ፡ ወበዝየ፡ ህልው፡ በውስተ፡ ማኅፀነ፡ እሙ። ህየ፡ ባሕቲቱ፡ ኃይል፡ ዘኢያስተርኢ፡ ወበዝየ፡ ኃይል፡ ዘኢይትገሰስ፡ ምስለ፡ ሥጋሁ፡ ዘይትገስስ። ህየ፡ መጾር፡ ፬፡ እንስሳ፡ ዘሥዕለ፡ እሳት፡ ወበዝየ፡ ፬፡ መጾር፡ ጠባይዕ፡ ዘፍና፡ ትስብእት። ህየ፡ አብ፡ ዘእንበለ፡ እም፡ ወበዝየ፡ እም፡ ዘእንበለ፡ አብ፡ ምድራዊ። ህየ፡ ገብርኤል፡ ይቀውም፡ በፍርሀት፡ ወበዝየ፡ ገብርኤል፡ ያበስር፡ በትፍሥሕት። ህየ፡ ስብሐተ፡ ልደት፡ እም፡ አብ፡ ወኢያስተርኢ፡ ዘይትነከር፡ በጽርሐ፡ አርያም፡ ወዝየ፡ ስብሐተ፡ ልደት፡ እም፡ ድንግል፡ ዘይትነከር፡ በቤተልሔም። ህየ፡ መዓዛ፡ ዕጣን፡ ይትቄረብ፡ በስያሐ፡ ወርቅ፡ እም፡ ካህናት፡ ሰማያውያን፡ ወበዝየ፡ ይትቄረብ፡ ወርቅ፡ ወከርቤ፡ ወስኂን፡ እም፡ ሰብአ፡ ሰገል። ህየ፡ ኪሩቤል፡ ወሱራፌል፡ ይርዕዱ፡ እም፡ ግርማሁ፡ ወበዝየ፡ ማርያም፡ ተሐቅፎ፡ ወሰሎሜ፡ ትትለአኮ። ህየ፡ ንጥረ፡ መባርቅት፡ ያንበሰብሱ፡ ቅድሜሁ፡ ወላህበ፡ እሳት፡ ይወጽእ፡ እም፡ ጽርሑ፡ ወበዝየ፡ አድግ፡ ወላህም፡ ያስተማውቅዎ፡ በእስትንፋሶሙ። ህየ፡ መንበረ፡ እሳት፡ ወበዝየ፡ ጎለ፡ ዕብን። ህየ፡ ጸፍጸፈ፡ ሰማይ፡ ዘዕብነ፡ በረድ፡ ወበዝየ፡ ምጽንጋዕ፡ ዘአልህምት። ህየ፡ ኢየሩሳሌም፡ እንተ፡ በሰማያት፡ መካነ፡ ትጉሃን፡ ወበዝየ፡ በዓት፡ ማኅደሮሙ፡ ለኖሎተ፡ እንስሳ። ህየ፡ ብሉየ፡ መዋዕል፡ ዘዳንኤል፡ ዘኢይትዐወቅ፡ ኑኃ፡ መዋዕሊሁ፡ ወዝየ፡ ዮሴፍ፡ አረጋይ፡ ይጸውሮ፡ ዘበአቅመ፡ እጓለ፡ እመ፡ ሕያው፡ ሐሳበ፡ ዓመታቲሁ። ሶበሰ፡ በጽርሐ፡ አርያም፡ ፀንሰቶ፡ እም፡ ኮና፡ ክብረ፡ ወልዕልና፡ ለባሕቲታ። ንሕነሰ፡ እም፡ ኢረከብነ፡ በቍዔተ፡ በልዕልናሃ። ምንተ፡ ነአምር፡ ምሥጢረ፡ ዘበሰማያት፡ ይትገበር፡ ወምንተ፡ ንሬኢ፡ ኅቡአተ፡ ዘበአርያም፡ ሀሎ። ሶበሂ፡ ዲበ፡ ሠረገላ፡ ኪሩቤል፡ ወለደቶ፡ መኑ፡ እም፡ ርእየ፡ ሑቃፌሁ፡ ወመኑ፡ እም፡ ገሰሶ፡ ሥጋዌሁ። ሶበሂ፡ ኢያንሶሰወ፡ ዲበ፡ ምድር፡ መኑ፡ እም፡ አርአየ፡ አሠረ፡ ተጠምቆ፡ ወላዕለ፡ መኑ፡ እምኮነ፡ ስምዐ፡ አብ፡ እንዘ፡ ይብል፡ ዝንቱ፡ ውእቱ፡ ወልድየ፡ ዘአፈቅር፡ ወሎቱ፡ ስምዕዎ፡ ወዲበ፡ ርእሰ፡ መኑ፡ እም፡ ወረደ፡ መንፈስቅዱስ፡ በርእየተ፡ ርግብ፡ ጸዓዳ። ወእመሰ፡ ኢያስተርአየ፡ ጾታ፡ ሥላሴ፡ በስመ፡ መኑ፡ እም፡ ተጠመቅነ። ወበእንበይነዝ፡ ይቤሎሙ፡ ለአርዳኢሁ፡ ሑሩ፡ ወስብኩ፡ ውስተ፡ ኵሉ፡ አጽናፈ፡ ዓለም፡ ወእንዘ፡ ታጠምቅዎሙ፡ በሉ፡ በስመ፡ አብ፡ ወወልድ፡ ወመንፈስቅዱስ። ወከመ፡ ኢይበሉ፡ መኑ፡ አብ፡ ወመኑ፡ ወልድ፡ ወመኑ፡ መንፈስቅዱስ፡ አርአየ፡ ጾታ፡ ሥላሴ፡ በፈለገ፡ ዮርዳኖስ። ወእመሂኬ፡ ኢወርዘወ፡ በአምጣነ፡ ብእሲ፡ ወኢያስተርአየ፡ በአካለ፡ እጓለ፡ እመ፡ ሕያው፡ መኑ፡ እም፡ ሐመ፡ በእንተ፡ መድኃኒትነ። ናሁኬ፡ ከብረ፡ እጓለ፡ እመ፡ ሕያው፡ እም፡ ትጉሃነ፡ ሰማይ፡ እስመ፡ እግዚአብሔር፡ ተወልደ፡ እም፡ ብእሲት። ወበእንተዝ፡ ይቤ፡ ጳውሎስ፡ ዘአኮ፡ መላእክተ፡ ተወክፈ፡ አላ፡ ዘርዐ፡ አብርሃም፡ አልዐለ። ወይእዜኒ፡ ፈጺመነ፡ ዘለፋሁ፡ ለፎጢኖስ፡ ንግበር፡ በዓለ፡ ሥጋዌሁ፡ ለወልደ፡ አምላክ፡ ንትጋነይ፡ ለማኅፀን፡ እንተ፡ ጾረቶ፡ ወንስግድ፡ ለአብራክ፡ እለ፡ ሐቀፋሁ፡ ንዘምር፡ ለአጥባት፡ እለ፡ ሐፀናሁ፡ ወናእኵት፡ ለአእዳው፡ እለ፡ ለከፋሁ፡ ወንየብብ፡ ለከናፍር፡ እለ፡ ሰዓማሁ፡ ንሰብሕ፡ ምስለ፡ ኖሎት፡ ወነአምኅ፡ ምስለ፡ ሰብአ፡ ሰገል። ናንክርኬ፡ ከመ፡ ዮሴፍ፡ ንትለአክ፡ ከመ፡ ሰሎሜ፡ ናስተብርክ፡ ውስተ፡ ጎል፡ ኀበ፡ ሰከበ፡ ናንገርግር፡ ውስተ፡ ምጽንጋዕ፡ ኀበ፡ ተጠብለለ፡ ወንበል፡ ስብሐት፡ ለእግዚአብሔር፡ በሰማያት፡ ወሰላም፡ በምድር፡ ለዘሠመሮ፡ ለሰብእ፡ እግዚአብሔር፡ ኮነ፡ ሰብአ፡ ወወለተ፡ እጓለ፡ እመ፡ ሕያው፡ ኮነት፡ እመ፡ እግዚአብሔር፡ ሎቱ፡ ስብሐት፡ ወላቲ፡ ስግደት፡ ለዓለመ፡ ዓለም፡ አሜን፡ ወአሜን። ተፈጸመ፡ ዘለፋሁ፡ ለፎጢኖስ፡ ሐረገ፡ ገሞራ፡ ለሐብለ፡ ሃይማኖት፡ ዘመተራ፡ ለመለኮተ፡ ወልድ፡ ዘአስተናከራ፡ ለቤተክርስቲያን፡ ዘአስተሐቀራ፡ ይቤ፡ ጊዮርጊስ፡ ዘሀገረ፡ አምሐራ፡ ወልደ፡ ትምህርቶሙ፡ ለካህናተ፡ ደብተራ፡ ለፍኖተ፡ ሃይማኖት፡ ዘአፍቀራ፡ ሰአሉ፡ ሎቱ፡ አባግዐ፡ ምሥጢር፡ ውሉደ፡ ቅድስት፡ ቍልብንጥራ። ከመ፡ ታስተሥሪ፡ ኃጣውኢሁ፡ ድንግል፡ ኀበ፡ በኵራ፡ በዝኒ፡ ዓለም፡ ከመ፡ ትባልሖ፡ እመከራ፡ ወበዘይመጽእ፡ ዓለም፡ ከመ፡ ታብኦ፡ ውስተ፡ ማኅደራ፡ ወታብልዖ፡ እማዕደ፡ ሕይወት፡ ዘነከራ፡ ታስትዮ፡ እም፡ ወይነ፡ ምሥጢራ፡ ወታግሕሦ፡ እም፡ አንቀጸ፡ ደይን፡ ከመ፡ ኢይርአይ፡ ግሙራ፡ ዘንተ፡ መጽሐፈ፡ አዘዘ፡ ከመ፡ ይትነበብ፡ በዕለተ፡ ተዝካራ፡ አመ፡ ፳ወ፱፡ ለታኅሣሥ፡ እንተ፡ ባቲ፡ አስተርአየ፡ ዕበየ፡ ክብራ፡ ወተሰብሐ፡ ስነ፡ ምግባራ፡ ለዓለመ፡ ዓለም፡ አሜን፡ ወአሜን።

Against Photinus

Against Origen

On the Virgin

Against Bitu

Against the Antidicomarianites

On the holy orders

Against Eutyches (also ʾAftikis)

Against Severos, bishop of the Indies and Theodosios of Alexandria

Against ʾAburyos, i.e. Apollinarius

Against Eutyches (also ʾAftikis)

Against the Manichaeans

Against ʾArsis, i.e. heretics

Against Leo

Against the Council of Chalcedon

Against the Phantasiasts

Against Origen

Against the abrogation of the observation of Sabbath

Against those who deny the immortality of the soul

Against Flavian

Against Macedonius

Against those who deny the resurrection of the dead