Chronicle of Zarʾa Yāʿqob

በስመ፡ ግፃዌ፡ ሠላስ፡ ዕሩያነ፡ ክብር፡ ወንግሥ፡ አብ፡ ወወልድ፡ ወመንፈስ፡ ቅዱስ። እዌጥን፡ አንሰ፡ ከመ፡ እንብብ፡ ወአከርትስ። ኵሎ፡ ሥርዓታቲሁ፡ ለእግዚእነ፡ ወመሢሕነ፡ ዘርአ፡ ያዕቆብ፡ዘተሰምየ፡ ቈስጠንጢኖስ፡ ወልደ፡ ማርያም፡ ክቡር፡ ኢየሱስ፡ ክርስቶስ፡ ይረስዮ፡ ጽድቆ፡ ወመንግሥቶ፡ ከመ፡ ይትዋረስ፡ በከመ፡ ሕሊናሁ፡ ይፈቅድ፡ ወየኃሥሥ። ወይሡጥ፡ ካዕበተ፡ ፀጋሁ፡ ላዕለ፡ ወልዱ፡ ልብነ፡ ድንግል፡ ሐዲስ፡ ለረኪበ፡ ፍድፉድ፡ ዕበይ፡ ወሞገስ፡ በከመ፡ ተሰውጠ፡ ካዕበተ፡ መንፈሱ፡ ለኤልያስ፡ ላዕለ፡ ኤልሳዕ፡ ረድኡ፡ ጊዜ፡ ዓርገ፡ ላዕለ፡ በአፍራሰ፡ መንፈስ። ወያንኅ፡ መዋዕሊሁ፡ እስከ፡ ኅልፈተ፡ ሰማይ፡ ወየብስ፡ አሜን።

ወኮነ፡ በመዋዕሊሁ፡ ለንጉሥነ፡ ዘርአ፡ ያዕቆብ፡ዓቢይ፡ ወረዓድ፡ ላዕለ፡ ኵሉ፡ ሰብእ፡ ዘኢትዮጵያ፡ በእንተ፡ ፍትሐ፡ ኵነኔሁ፡ ወኃይሉ። ወፈድፋደሰ፡ በእንተ፡ እለ፡ ይብሉ፡ ሰብእ። ሰገድነ፡ ለደሰክ፡ ወለዲያብሎስ። ወያረስሕዎሙ፡ ለብዙኃን፡ ኅሩያን፡ በነገረ፡ ሐሰቶሙ፡ ወሰቦ፡ ሰምዓ፡ ንጉሥ፡ ዘንተ፡ ነገረ ፡ ኰነኖሙ፡ ለእሉ፡ በስምዓ፡ እሉ፡ ሐሳውያን፡ አምሒሎ፡ በስመ፡ እግዚአብሔር፡ እንዘ፡ ይብል፡ ደመ፡ ዚአሆሙ፡ ይረሲ፡ ላዕሌክሙ፡ ዘንተሰ፡ ዘገብረ፤

ንጉሥ፡ ቀኒዖ፡ በእንተ፡ እግዚአብሔር፡ እስከ፡ ለውሉዱ፡ ኢመሀኮሙ፡ ለኵሎሙ፡ እለ፡ ተሰምዩ፡ አስማቲሆሙ፡ገላውዴዎስ፡ወዓምደ፡ ማርያም፡ ዘርአ፡ አብርሃም፡ ወበትረ፡ ጽዮን፡ ወለአዋልዲሁ፡ እለ፡ ይብልዎን፡ ድል፡ ሰምራ፡ ሮም፡ ገነየላ፡ወ አደል፡ መንግሣ።ወለብዙኃንሂ፡ እለ፡ ኢያእመርኩ፡ ቦእምኔሆሙ፡ እለ፡ ሞቱ፡ ወቦ፡ እምኔሆን፡ እለ፡ ሐይዋ፡ እኅዋኒሆሙሰ፡ ለኵሎሙ፡ ሞቱ።

ወውእተ፡ ጊዜ፡ ተነግረ፡ ዓዋጂ፡ በሰቀላ፡ እንዘ፡ ይትበሃል፡ ኦሕዝበ፡ ክርስቲያን፡ ዘከመ፡ ይገብር፡ ሰይጣን፡ ሶበ፡ አሕደግናሆሙ፡ ለኵሎሙ፡ ሰብእ፡ እምአምልኮ፡ ጣዖት። ወእምሰጊድ፡ ለደሰክ፡ ወለዲኖ፡ ይእዜሰ፡ ቦአ፡ ውሰተ፡ ቤትነ፡ ወአስሐተ፡ ውሉደነ፡ ወኰነኖሙ፡ ብዙኃ፡ ኵነኔ። ወአርአይዎሙ፡ ለኵሎሙ፡ ሠራዊት፡ ቅሰፈታተ፡ ቊስላቲሆሙ፡ ወምንዳቤያቲሆሙ፡ ወበእንተዝ፡ በከዩ፡ ኵሉ፡ ሕዝብ፡ ሶበ፡ ነገርዎሙ፡ ወአርአይዎሙ፡ ዘንተ፡ ኵሎ፡ ወአዘዝዎሙ፡ ከመ፡ ይግበሩ፡ ምሕላ፡ ወከመ፡ ይጽሐፉ፡ ውስተ፡ ፍጽሞሙ፡ እንዘ፡ ይብሉ፡ ዘአብ፡ ወወልድ፡ ወመንፈስ፡ ቅዱስ። ወበእደዊሆሙ፡ ዘየማን፡ እንዘ፡ ይብሉ፡ ክህድክዎ፡ ለዲያብሎስ፡ በክርስቶስ፡ አምላክ። ወበፀጋማይ፡ እዶሙ፡ ክህድክዎ፡ ለደሰክ፡ ርጉም፡ አነ፡ ገብራ፡ ለማርያም፡ እሙ፡ ለፈጣሬ፡ ኵሉ፡ ዓለም። ወዘንተ፡ ዘኢገብረ፡ ይትበርበር፡ ቤቱ፡ ወይትኰነን፡ ሥጋሁ፡ እንዘ፡ ይብል፡ አዘዘ፡ ንጉሥ፡ በውስተ፡ ኵሉ፡ ዓለም።

ለዘርአ፡ ጽዮንሰ፡ ዘተሰምየ፡ ዘርአ፡ ሰይጣን፡ በነቢበ፡ ሐሰት፡ ዘአቅተለ፡ ብዙኃነ፡ መነኮሳተ፡ ወደባትረ፡ ወኵሎ፡ ዕደ፡ ወአንስተ፡ ሶበ፡ ከሠተ፡ ሎቱ፡ እግዚአብሔር፡ ብዙኃ፡ ዓመፃሁ። አመንኰስዎ፡ ወአግዓዝዎ፡ ውስተ፡ ሐይቅ።

ወበውእቱ፡ መዋዕል፡ ነበረ፡ ዓቃቤ፡ ሰዓት፡ አምኃ፡ ጽዮን፡ ዘያፈቅሮ፡ ጥቀ፡ ንጉሥነ። ወሶበ፡ ይወፅእ፡ ወይበውእ፡ ውስተ፡ ቤቱ፡ አልቦ፡ ዘይሬእዮ፡ እምሰብእ፡ ወኀበ፡ ማኅደሩሂ፡ አልቦ፡ ዘይበጽሕ፡ ዘእንበለ፡ ሕፃናት፡ ፪፡ አው፡ ፫፡ ወልፁቅ፡ ማኅደሩ፡ ምስለ፡ ጀጐል፡ ዘንጉሥ። ወሶበ፡ ረከቦ፡ ነገር፡ ይጼውዕ፡ ፩፡ እመነኮሳቲሁ፡ ምእመነ። ወይልእክ፡ ኀበ፡ ዘፈቀደ፡ ዘቅሩብ፡ ወዘርኁቅ። ዝኵሉ፡ በእንተ፡ ክብረ፡ መንግሥት፡ እስመ፡ ይቀርብ፡ ውእቱ፡ ኵሎ፡ ጊዜ፡ ኀበ፡ ንጉሥ፡ ወከማሁ፡ ኵሎሙ፡ ውስጥ፡ ብላቴኖች፡ ኢይትራከቡ፡ ምስለ፡ ሰብእ፡ ወአብያትሂ፡ አልቦሙ፡ ወይነብሩ፡ ወትረ፡ ውስተ፡ ውስጥ።

ወሶበ፡ ይወፅኡ፡ መንገለ፡ አፍአ፡ ምስለ፡ መልከኛ፡ ይወፅኡ፡ ወይገብኡ፡ እሙንቱ፡ ንዑሳን። ወኢየአምሩ፡ አንስተ። ወኢይትላጸዩ፡ ሥዕርተ፡ ርእሶሙ፡ ዘእንበለ፡ በትእዛዘ፡ ንጉሥ፡ ወኢይለብሱ፡ ርሱሐ። ወሶበ፡ በጽሑ፡ ኀበ፡ ቤተ፡ ባዕዳን፡ ለበሊዕ፡ ወለሰትይ፡ ወለተናግሮ፡ ይኴንኖሙ፡ ወይቀትልዎሙ፡ ለእሉሂ፡ ወለእለ፡ አግብእዎሙ።

ብሕት፡ ወደድሰ፡ ዘየማን፡ ወዘፀጋም፡ አልቦ፡ በውእቱ ፡ መዋዕል። ባሕቱ፡ ነበራ፡ እንዘ፡ ይኤዝዛ፡ ፪ቲ፡ አሕት፡ አዋልደ፡ ንጉሥ፡ በየማን፡ መድኅን፡ ዘመዳ፡ ወበፀጋም፡ ብርሃን ፡ ዘመዳ። እምድኅረ፡ አሰርዎ፡ ወኰነንዎ፡ ለምታ፡ ዓምደ፡ መስቀል፡ ዘተሰምየ፡ ድኅረ ፡ ዓምደ፡ ሰይጣን፡ ሶበ፡ ሰምዓ፡ ንጉሥ፡ ላዕሌሁ፡ ነገረ፡ ዓመፃ፡ ብዙኃ፡ ወነገረ፡ ማዕሌት፡ ዘገብረ፡ ወዘሐለየ፡ በልቡ፡ እንበለ፡ ድልወቱ። ዘኢይሔልዮ፡ ልበ፡ እጓለ፡ አመሕያው፡ ዘከመ፡ ሐለየ፡ ዲያብሎስ፡ ርጉም፡ ዘኢይደሉ፡ ነጊረ፡ ወበእንተዝ፡ አውደቆ፡ እግዚአብሔር፡ እመንበሩ፡ ወአሕሠሮ፡ ፈድፋደ። ከማሁ፡ ለውእቱኒ፡ ዓምደ፡ ሰይጣን፡ አውደቆ፡ አምላከ፡ እስራኤል።

ወካልአኒ፡ ኃጢአተ፡ ገብረ። አውሰበ፡ ውእቱ፡ ሰሪቆ፡ አሐተ፡ ብእሲተ፡ እንዘ፡ ምተ፡ እስራኤላዊት፡ ውእቱ፡ ወሀቦ፡ ለአምኃ፡ ኢየሱስ፡ ጻሰርጔ፡ ያውስባ። ወሰሚዓ፡ ብእሲቱ፡ብርሃን፡ ዘመዳ፡ ብርሃን፡ ዘመዳ፡ ነገረት፡ ለአቡሃ፡ ንጉሥ። ወሶበ፡ ተስእሎ፡ ዘንተ፡ ነገረ፡ አምነ፡ ውእቱኒ፡ ከመ፡ ገብረ፡ ዘንተ፡ ኃጢአተ። ወበእንተዝ፡ ገብረ፡ ንጉሥ፡ ጉባኤ፡ ብዙኃ፡ ሠራዊተ። ወከሠተ፡ ኵሎ፡ ኃጢአቶ፡ በቅድሜሆሙ። ወእምዝ፡ አዘዘ፡ ከመ፡ ይፍትሑ፡ ላዕሌሁ፡ ፍትሐ፡ ሞት፡ ዘከመ፡ ይደልዎ። ወበፍትሐ፡ እሉ፡ ከረዩ፡ ምድረ፡ ወደርበይዎ፡ ለውእቱኒ። ወለአምኃ፡ ኢየሱስኒ፡ ጻሰርጔ። ወለኖብሂ፡ ንቡረ፡ እድ፡ ዘደብረ፡ ዳሞ፡ ወምንኵስናሁ፡ ደብረ፡ በኵር፤ ዘተሳተፈ፡ ምስሌሆሙ፡ ሰመይዎ፡ ስሞ፡ ከበሮ፡ ሰይጣን፡ ወደበይዎ፡ ኅቡረ።

ለዓምደ፡ ሰይጣንሰ፡ አግዓዝዎ፡ ምድረ፡ አምሐራ፡ ወኢየአምር፡ መኑሂ፤ መካኖ፡ ዘእንበለ፡ ንጉሥ፡ ባሕቲቱ፡ ለአምኃ፤ ኢየሱስኒ፡ ወለኖብ፡ ዘይቤልዎ፡ ከበሮ፡ ሰይጣን፡ አግዓዝዎሙ፡ ምድረ፡ ወለኢሳይያስሰ፡ ብሕት፡ ወደድ፡ እምቅ ድመ፡ ዓምደ፡ ሰይጣን፡ እንዘ፡ ሀለወ፡ ንጉሥነ፡ ምድረ፡ አምሐራ፡ ዘትሰመይ፡ ቅሰት። ሰማዕኩ፡ በዕዝንየ፡ ርእየሰ፡ ኢርኢኩ፡ ወኢነበርኩ፡ አኃዝዎአ፡ በህየ፡ ወወደዩ፡ ውስተ፡ ክሣዱ ፤ ጋጋ፡ ዓቢየ፡ ዘሐፂን፡ ወአግዓዝዎ፡ በእንተ፡ ዓመፃሁ፡ ወሰድዎ፡ መካን፡ ኢያእመርኩ፡

እምድኅረ፡ ዓምደ፡ ሰይጣንሰ፡ ዘተሰይመ፡ ብሕት፡ ወደድ፡ ነት፡ ኢረከብኩ፡ ዘእንበለ፡ እላ፡ ፪ቲ፡ አሐት፡ እንዘ፡ ይኤዝዛ፡ ዘነበራ፡ በቤት፡ ብሕት፡ ወደድ። ወከማሆን፡ ለኵሎን፡ አኃቲሆን፡ ሤሞን፡ ንጉሥ፡ አቡሆን፡ ውስተ፡ ኵሉ፡ ምድረ፡ ኢትዮጵያ፡ በታሕቴሁ፡ በትግራይ፡ ድል፡ ሠምራ፡ ወበአንጎት፡ ባሕር፡ መንግሣ፡ ወበግድም፡ ሶፍያ፡ ወበኢፋት፡ አመተ፡ ጊዮርጊስ። ወበሸዋ፤ ሮም፡ ገነየላ፡ ወበዳሞት፡ መድኅን፡ ዘመዳ። ወበቤገምድር፡ ዓባለ፡ ማርያም፡ በገኝ፡ አጽናፍ፡ ሰገዱ፡ ወለተ፡ እኅቱ፡ ይእቲ፡ ለንጉሥ፡ ወበካልእሰ ፡ ብሔር፡ ኢያአመርኩ፡ ስሞን፡ ለእለ፡ ተሰይማ።

ወእምድኅሬሆንሰ፡ አኀዘ፡ ንጉሥ፡ ኵሎ፡ ሢመታተ፡ ኢትዮጵያ፡ ውስተ፡ እዴሁ፡ ወሤመ፡ አደክሸትነት፡ ውስተ፡ አህጉር፡ እንዘ፡ ይብል፡ በሸዋ፡ ራቅ፡ ማሰሬ። ወበፈጠጋር፡ አዛዢ፡ ወረሰይክዎ፡ መልከኛ፡ ለዓምደ፡ ሚካኤል፡ በኵሉ፡ ምድረ፡ ፈጠጋር። ወሢመተሂ፡ ወሀብክዎ፡ ፈረገለ፤ አድምነት፡ በደዋሮ፡ አውራሪ፡ በጅር፡ ወበምድረ፡ ግብርሂ፤ ሄገኖ፡ ወበወጅሂ፡ ሄገኖ፡ በዳሞት፡ ዕራቅ፡ ማሰሬ፡ በጐዣም፡ ራቅ፡ ማሰሬ፡ በቤገምድር፡ ራቅ፡ ማሰሬ፡ በትግሬ፡ ራቅ፡ ማሰሬ፡ በቅዳ፡ ራቅ፡ ማሰሬ፡ በአንጎት፡ ራቅ፡ ማሰሬ። በአምሐራሰ፡ ይቤልዎ፡ ጸሕፈላም፡ በገኝ፡ ወበግድም፡ ወበኢፋት፡ ይቤልዎሙ፡ ለእሉ፡ ራቅማሰራ፡

ወርዕዱ፡ ኵሉ፡ ሰብእ፡ እምግርማ፡ መንግሥቱ። ወእምዕበየ፡ ኃይሉ፡ ወኀበ፡ ሐድያሰ፡ ገራድ፡ ሶበ፡ ለአኩ፡ ቃለ፡ ሐፄ፡ እንዘ፡ ይብሉ፡ ነዓ፡ ውስተ፡ ዴዴነአ፡ ፀዊረከ፡ አ፡ መንግሠአ። ወይቤ፡ ውእቱ፡ ሐድያ፡ ገራድ፡ ዘስሙ፡ ማሂኮ፡ ወልዱ፡ ለገራድ፡ ምሕመድ፡ ወእኁሃ፡ ለኢቴ፡ ዣን፡ ዜላ፡ ንግሥት፡ በቀኝእ፡ በአልቲሀት፡ ኢይመጽእአ፡ አንሰአ፡ ኀበ፡ ዴዴክሙአ፡ ወኢይወጽእ፡ እምብሔርየአ፡ እንዘ፡ ይብል፡ ከመዝ፡ ለአከ፡ ውእቱኒ፡ ወአበየ፡ ቃለ፡ ንጉሥ።

ወሰሚዖ፡ ከመ፡ ዓለወ። መጽአ፡ ፩፡ ብእሲ፡ እምሥዩማነ፡ ሐድያ፡ ዘይብልዎ፡ ገንይቾ፡ ገራድ፡ ኀበ፡ ንጉሥ፡ እንዘ፡ ይጐጉዕ። ወነገረ፡ ለንጉሥ፡ ኵሎ፡ ዕበዶ፡ ለሐድያ፡ ገራድ። ወይቤ፡ ውእቱሰ፡ ሠርዓ፡ ሥርዓተ፡ ፀብዕ፡ ብዙኃ፡ ወለአከ፡ ኀበ፡ አደል፡ ከመ፡ ይምጻእ፡ ወይትራድኦ፡ ለአጥፍኦ፡ ምድረ፡ ደዋሮ፡ ወባሊ። ወይቤሎ፡ ንጉሥ፡ ለገዳይቶ፡ ገራድ፡ መኑ፡ ኃብረ፡ ምስሌሁ፡ ኵሎሙኑ፡ ሰብአ፡ ሐድያ፡ ወሚመ፡ መንፈቆሙኑ፡ እፎ፡ ይኄይስ፡ ምክር፡ በዘንገብር፡ ወይቤ፡ ውእቱ፡ እለ፡ ኀብሩሰ፡ ምስሌሁ። ጉዶላ፡ ገራድ፡ ወዲሆ፡ ገራድ፡ ወሐደቦ፡ ገራድ፡ ወገነዞ፡ ገራድ፡ ወሰጋ፡ ገራድ፡ ወገብ፡ ገራድ፡ ወቀብዔን፡ ገራድ፡ ወጎገለ፡ ገራድ፡ ወሀለብ፡ ገራድ፡ እሉ፡ ኵሎሙ፡ እለ፡ ሀለዉ፡ ምስሌሁ። ወምክሩሂ፡ ይኄይስ፡ ኦእግዚእየ፡ ከመ፡ የምጽእዎ፡ ለገራድ፡ ባሞ፡ እኅወ፡ አቡሁ ፡ እምደጌን፡ ወይሢምዎ፡ በዝየ፡ ከመ፡ ይሠዓር፡ ምክሩ ፡ ወኃይሉ፡ ለማሒኮ፡ ገራድ፡ ሐድያ።

ወውእተ፡ ጊዜ፡ ሰሚዖ፡ ምክሮ፡ ለገዳይቾ፡ ገራድ፡ አዘዘ፡ ንጉሥነ፡ ዘርአ፡ ያዕቆብ፡ ከመ፡ ያምጽእዎ፡ በጒጒዓ፡ ለገራድ፡ ባሞ፡ እምድረ፡ ዴገን፡ ዘነበረ፡ ቦቱ፡ ወሶቤሃ፡ አምጽእዎ፡ ፍጡነ፡ ወሤምዎ፡ ሐድያ፡ ገራድነት፡ እንዘ፡ ሀለዉ፡ ደብረ፡ ብርሃን፡ ወወሀብዎ፡ ብዙኃ ፡ አልባሰ፡ ሠርጒ፡ ሎቱኒ፡ ወለገዳይቾ፡ ወፈነውዎሙ፡ ምስለ፡ ብዙኅ፡ ሠራዊት፡ እለ፡ ይሰመዩ፡ በፀር፡ ሾተል፡ እምሀገረ፡ ዳሞት። ወተአዘዙ፡ ኵሉ፡ ሰብአ፡ ደዋሮ፡ ወባሊ ። ወይቤልዎሙ፡ ዑቁኬ፡ ኢያምሥጥክሙ፡ ወኢይሑር፡ ኀበ፡ ምድረ፡ አደል፡ ወእምድኅረዝ፡ ጠቅዑ፡ መጥቅዓ፡ ወተጋብኡ፡ ብዙኃን፡ መነኮሳት፡ ወካህናት፡ ወአዘዝዎሙ፡ ከመ ፡ ይግበሩ፡ ምሕላ፡ በበአብያተ፡ ክርስቲያናቲሆሙ፡ በውሂበ፡ ብዙኅ፡ ዕጣን፡ ወበውሂበ፡ አልባስ፡ ለነዳያን፡ ወለምስኪናን፡ ወበይእቲ፡ ዕለት፡ እምድኅረ፡ ፍጻሜ፡ ዕጣን፡ ርኢኩ፡ ራእየ፡ እንዘ፡ ይብል፡ ንጉሥነ፡ ዘርአ፡ ያዕቆብ፡ ነገረ፡ ለቅዱሳን፡ አምጽእዎ፡ ኀቤየ፡ ለውእቱ፡ ዕልው፡ አሲሮሙ፡ በጽኑዕ፡ ሐብል፡ ወንፅሕዎ፡ በቅድሜየ፡ ከመዝ፡ አሰተርአየትኒ፡ ሊተ፡ እግዝእትነ፡ ማርያም፡ በዛቲ፡ ሌሊት፡ በሕልምየ፡ ከመ፡ ይትፈጸም፡ ሊተ፡ ዝንቱ፡ ራእይየ። ጸልዩ፡ ወሰአሉ፡ ኀበ፡ እግዚአብሔር፡ አምላኪየ።

ዝንቱሰ፡ ሐድያ፡ ገራድ፡ ባሞ፡ ሖረ፡ ወበጽሐ፡ ውስተ፡ ሀገሩ፡ ምስለ፡ ኵሎሙ፡ ሐራ፡ ዘወሀብዎ፡ ንጉሥ፡ ወአሜሃ፡ ተቀበልዎ፡ ኵሎሙ፡ ሥዩማን፡ እለ፡ ዓለዉ፡ ቀዳሚ፡ ወገብኡ፡ ውስተ፡ እደዊሁ፡ ወሶበ፡ ሰምዓ፡ ዘንተ፡ ነገረ፡ ማሒኮ፡ ምስለ፡ እሊዓሁ፡ እንዘ፡ ይፈቅድ፡ ይሑር፡ መንገለ፡ አደል። ወተለውዎ፡ ዳሞ፡ ኃዳሪ፡ እስከ፡ በጽሑ፡ ምድረ፡ ስጋ፡ ወበህየ፡ ረከብዎ፡ በዊአ፡ አምባ። ውእቱሰ፡ ዘረወ፡ ውስተ፡ ፍኖቶሙ፡ ብዙኃ፡ ንዋም፡ እመነ፡ መርዌ፡ ወግምጃ፡ ወተሳዋፊ፡ ከመ፡ አይትልውዎ፡ በነሢአ፡ ውእቱ፡ ንዋይ። እሙንቱሰ፡ ኢተመይጡ፡ ውስተ፡ ንዋዩ፡ አላ፡ ዴገንዎ፡ በጽኑዕ፡ ወቦኡ፡ ኀበ፡ ቦአ፡ አምባ፡ ዚአሁ፡ ወቀተልዎ፡ ወመተሩ ፡ ርእሶ፡ ዓዲ፡ እደዊሁ፡ ወእገሪሁ ፡

ወበጽሐ፡ ፍጡነ፡ ዝንቱ፡ ዜና፡ ኀበ፡ ንጉሥ፡ ወተፈሥሐ፡ በእንተዝ፡ ንጉሥሂ፡ ወሠ ራዊቱ፡ ወገብሩ፡ ከመ፡ ሰሙነ፡ ፋሲካ፡ በማሕሌት፡ ብዙኅ፡ ወበዘፈን። ወአእኰትዎ፡ ለእግዚአብሔር፡ ብዙኃ፡ ኵሎሙ፡ ቅዱሳን፡ በእንተ፡ ዘሰምዓ፡ ጸሎቶሙ፡ ወጸሎት፡ መሢሑ፡ ዘርአ፡ ያዕቆብ፡ ወአውደቆ፡ ለፀሩ፡ ፍጡነ፡ እንበለ፡ ጐንድዮ፡

ወእምዝ፡ መጽአ፡ ውእቱ፡ ሐድያ፡ ገራድ፡ ወእሉ፡ ዳሞት፡ ኃዳሪ፡ ፀዊሮሙ፡ ርእሶ፡ ለውእቱ፡ ዕልው፡ ዘተመትረ፡ ምስለ፡ እደዊሁ፡ ወእገሪሁ። ወቆሙ፡ ቅድመ፡ ንጉሥ፡ ወተናገሩ፡ ኵሎ፡ ዘከመ፡ ኮነ። ወሶቤሃ፡ ባረኮሙ፡ ንጉሥ፡ ለሐድያ፡ ገራድ፡ ወለገዳይቾ፡ ገራድ፡ ወለዳሞት፡ ኃዳሪ። ወወሀብዎሙ፡ መብልዓ፡ ወመስቴ፡ ዘዘዚአሆሙ፡ በበመፍቅዶሙ። ለውእቱኒ፡ ዓላዊ፡ ሰቀሉ፡ ርእሶ፡ እደዊሁኒ፡ ወእገሪሁኒ፡ በቀንዕ፡ ደጅ፡ በግራ፡ ደጅ፡ በሠርጉን፡ ደጅ። ወበበሊዖቱ፡ ተፈሥሑ፡ አክልብት፡ ወአዝዕብት፡ ወተፈጸመ፡ ራእዩ፡ ለንጉሥነ፡ ዘርአ፡ ያዕቆብ፡ ዘአርአየቶሙ፡ እግዝእትነ፡ ቅድስት፡ ድንግል፡ ማርያም፡ እምቅድመ፡ ይኩን፡ ዝንቱ፡ ኵሉ፡

ወእምድኅረ፡ ኅዳጥ፡ መዋዕል፡ ፈነዎሙ፡ ለኵሎሙ፡ በበብሔሮሙ፡ በውሂበ፡ አልባሰ፡ ሠርጒ፡ ዘዘዚአሆሙ። ለገዳይቾ፡ ገራድሰ፡ አዘዙ፡ ሎቱ፡ ከመ፡ ኢይምልኮ፡ ሐድያ፡ ገራድ፡ እስከ፡ ውሉደ፡ ውሉዱ። ወለዘቀተሎሂ፡ ለማሒኮ፡ ሐድያ፡ ገራድ፡ በፀር፡ ሾተል፡ ወሀብዎ፡ ጉልተ፡ በውስተ፡ ሀገሩ። ወስብሐት፡ ለእግዚአብሔር፡ ዘረድኦ፡ ለንጉሥነ፡ ዘርአ፡ ያዕቆብ። እስከ፡ ሞአ፡ ፍጡነ፡ በእደ፡ ገብሩ። ወከማሁ፡ ይርድኦ፡ ለንጉሥነ፡ ልብነ፡ ድንግል፡ ወልዱ፡ ወፍቁር። ወእምገጸ፡ ምድር፡ ጸላእቶ፡ ይሠሩ። ወበልቦሙ፡ እንዘ፡ ይጸልዑ፡ መንግሥቶ፡ ወያስቈርሩ በአፍአ፡ ኪያሁ፡ ይድኅሩ፡ ይደደቆሙ፡ ሞት፡ ኀበ፡ ወዓሉ፡ ወኃደሩ፡ አሜን።

ወእምዝ፡ አዘዘ፡ ንጉሥነ፡ ዘርአ፡ ያዕቆብ፡ በደብረ፡ ብርሃን፡ ከመ፡ ይጽናዕ፡ ጃጐል፡ ወማገሩሂ፡ ከመ፡ ይጽናዕ፡ በበ፲፡ ወከማሁ፡ ይኑኅ፡ ቆሙ። ወአርአያሁኒ፡ ይኩን፡ ፀዓዳ፡ ወለሐናፅያንኒ፡ አዘዝዎሙ፡ ለእመ፡ ጸነ፡ ከመ፡ ያርትዑ፡ ራቅ፡ ማሰሮችሰ፡ ዘየማን፡ ወዘፀጋም፡ ኢይልበሱ፡ ቀማይሲሆሙ፡ እስከ፡ ይትፌጸም፡ ውእቱ፡ ግብረ፡ ጃጐል፡ ወዣን፡ ማሰሬሂ፡ ከመሆሙ፡ ኢይልበሱ፡ እለ፡ ይሰርሑ፡ ጃጐለ፡ ወሰቀላሂ፡ ዓቢየ፡ አዘዙ፡ ከመ፡ ይስርሑ፡ በቤቱ፡ አንበሳ፡ ደጅ፡ ዘነዊኅ፡ ቆሙ፡ በዘይበውእ፡ ወይወፅእ፡ ንጉሥ፡ ተጽዒኖ፡ ዲበ፡ ፈረሱ፡ ወበሽልማት፡ ደጅሰ፡ ንዑስ፡ ሰቀላ፡ ወበመብልዕ፡ ደጅ፡ ከማሁ፡ ወበፀርዋጀት፡ ደጅ፡ አልቦቱ፡ ሰቀላ፡ ወአልቦ፡ ዘይበውእ፡ ውስቴታ፡ ዘእንበለ፡ ዓቃቤ፡ ሰዓት፡ ወሕፃናት፡ ወማዕድ። ካልእሰ፡ ለእመ፡ ቀርበ፡ ይረግዝዎ፡ በኵናት።

ወቤተ፡ ንጉሥሂ፡ አዘዘ፡ ከመ፡ ይስርሑ፡ በጽኑዕ፡ ወያሠንዩ፡ ገቢሮቶ። ወመስቀለሂ፡ ዘወርቅ፡ ገብሩ፡ ላዕሌሁ። ወእምአሜሃ፡ ተወጥነ፡ ገቢረ፡ መስቀል፡ በቤተ፡ ንጉሥ። በቀዳሚሰ፡ ኢይገብሩ። ወበተሕተ፡ ቤተ፡ ንጉሥሂ፡ ፫ደበና፡ ተከሉ። ወለማእከላይ፡ ደበና፡ ይብልዎ፡ ዱለት፡ ቤት። ወለየማናይ፡ ይብልዎ፡ በዓለ፡ ግምጃ፡ ደበና፡ ለፀጋማይሰ፡ ይብልዎ፡ አቄት፡ ደበና። ወሐፁረ፡ ገጽኒ፡ ሀሎ፡ በየማን፡ ወበፀጋም፡ ልፁቀ፡ እምደበና፡ እስከ፡ ጀጐል፡ ወነዊኅ፡ ውእቱ፡ ጥቀ፡ ቆሙ፡ ወይትዓረይ፡ ምስለ፡ ጀጐል። ወለ፩ዕፅ፡ ዘሕፁረ፡ ገጽ፡ ወዘጃጐል፡ ይጸውርዎ፡ ፪ሰብእ፡ አው፡ ፫እምክበደ፡ ኑኁ፡ ወግዘፉ፡ እንዘ፡ ያመጽእዎ፡ እምድረ፡ ዜጋ፡ ወበውስተ፡ ውእቱ፡ ሕፁር፡ ኢያትረፉ፡ ምንትኒ፡ ስቊረተ፡ ከመ፡ ኢይርአይ፡ ቦቱ፡ ኵሉ፡ ዐይነ፡ ሰብእ፡ ወያስተላጽቅዎሙ፡ ለእሙንቱ፡ አዕፃው፡ በበይናቲሆሙ፡ ጥቀ፡ ወማእሶሙኒ፡ ይከልዑ፡ እምላዕሌሆሙ፡ ለእሉ፡ አዕፃው፡ ከመ፡ ይኩኑ፡ ጽዕድዋነ፡ ከመ፡ በረድ። ወኑኀ፡ ቆሙኒ፡ ለውእቱ፡ ሐፁር፡ ቦ፡ እለ፡ ይብሉ፡ ይከውን፡ ፳እመተ፡ ወቦ፡ እለ፡ ይብሉ፡ ፲ወ፭፡ እመተ፡ አንሰ፡ በእዴየ፡ ኢሰፈርክዎ።

ወካዕበ፡ ገብሩ፡ ካልአ፡ ሐፁረ፡ ገጽ፡ ዘይወስድ፡ ወያበጽሕ፡ እምቤተ፡ ንጉሥ፡ እስከ፡ አንቀጸ፡ ቤተ፡ ክርስቲያን፡ ዘደብረ፡ ብርሃን፡ በየማን፡ ወበፀጋም፤ ውእቱ፡ ሐፁር፡ ዘተገብረ፡ ኢይርአይዎ፡ ለንጉሥ፡ ጊዜ፡ ይበውእ፡ ወይወጽእ፡ ወአልቦ፡ ዘየሐውር፡ ውስተ፡ ይእቲ፡ ፍኖት፡ ዘእንበለ፡ ንጉሥ፡ ባሕቲቱ፡ ወዘእንበለ፡ ዓቃቤ፡ ሰዓት፡ ወዘውስጥ፡ ብላቴኖች፡ ንዑሳን፡ ወበጊዜ፡ ቊርባንሂ፡ ሶበ፡ ይበውእ፡ ንጉሥነ፡ አልቦ፡ ዘይበውእ፡ እምደብተራ፡ ዘእንበለ፡ መዘምራን፡ ወመነኮሳት፡ ወመምህራን፡ ዘደብረ፡ ሊባኖሰ፡ ወደብረ፡ ማርያም፡ ወዘቢዘን። ወዘደብረ፡ ገሊላ፡ ዘሃሎሌ፡ ወዘቀየጻ፡ ወዘመለጎ፡ ወዘደረባ፡ ዓባይ፡ ወዘፀዓዳ፡ አምባ። ወዘዋልድባ፡ ዘደብረ፡ ማርያም፡ ገርዓልታ፡ ወዘሕንጻ፡ ማርያም፡ ወካልአንሰ፡ እለ፡ ኢያእመርኩ፡ አስማቲሆሙ፡ እለ፡ ኢይበልዑ፡ ሥጋ፡ ወኢይሰትዩ፡ ሜሰ።

ባሕቱ፡ ይጼውዕዎሙ፡ በበዓላት፡ ለደብተራ፡ ዘኵሎሙ፡ መካናት፡ ዘደብረ፡ ብርሃን፡ ወዘደብረ፡ ነጐድጓድ፡ ወየለባሽ፡ ወዘጋርማ። ወዓዲ፡ ዘኢየሱስ፡ ደብተራ፡ ወዘግምጃ፡ ቤት፡ ማርያም፡ ወዘመስቀል፡ ወያውልዕዎሙ፡ ውስት፡ ቅኔ። ወሶበ፡ በጽሐ፡ ጊዜ፡ ቊርባን፡ ይፌንውዎሙ፡ በበመካናቲሆሙ፡ በከመ፡ እቤ፡ ቀዳሚ፡ ወአልቦ፡ ዘይበውእ፡ ኀበ፡ ገባሬ፡ ሠናይ፡ ዘእንበለ፡ ዓቃቤ፡ ሰዓት። ወ፪፡ ደቂቁ፡ እለ፡ ስሞሙ፡ ገብረ፡ አልፋ፡ ወተክለ፡ ማርያም፡ ወሊቀ፡ ደብተራ፡ ገብረ፡ ኢየሱስ። ወ፩፡ ነዳይ፡ ዘስሙ፡ ይስሐቅ፡ ወኢይትከሀን፡ ዘእንበለ፡ እሉ፡ ፭፡ በዕለተ፡ ቦአ፡ ንጉሥ፡ ውስተ፡ ቊርባን። ወሶበ፡ ወጽአ፡ እምቊርባን፡ ይጼውዕዎሙ፡ ለእሙንቱ፡ ደብተራ፡ እለ፡ ወዐሉ፡ ውስተ ፡ መሕሌት፡ ወያበውእዎሙ፡ ውስተ፡ መካበብያ፡ ዘቤተ፡ ንጉሥ። ወለ፫፡ ደበና፡ ላዕሌሆሙ፡ እንተ፡ ማእከሌሆሙ፡ ኃሊፎሙ፡

ወይሰምይዎ፡ ለውእቱ፡ መካን፡ ላዕላይ፡ ፊት፤ ወለታሕታይሰ፡ ደበነ፡ ምቅዋመ፡ ዣን፡ ቤት፡ ጠባቂ፡ ይብልዎ፡ ታሕታይ፡ ፊት። ወበውእቱ፡ ላዕላይ፡ ፊት፡ ያበልዕዎሙ፡ ለእሙንቱ፡ ደብተራ፡ እለ፡ ጸውዕዎሙ፡ መብልዓ፡ ዘዘዚአሁ፡ በበመፍቅዶሙ፡ ወስቴኒ፡ ከማሁ፡ ምዉቀ፡ ወቈሪረ፡ ይሁብዎሙ፡ ብዙኃ፡ ወዘተርፈ፡ እምኅብስት ፡ ወሜስ፡ ይጸውሩ፡ ወየሐውሩ፡ ውስተ፡ ማኅደሪሆሙ። ወውእቱ፡ ማዕደ፡ ኅብስት፡ ወሜስ፡ ይበውእ፡ እምነ፡ ቤተ፡ ፈጠጋር፡ ወእምቤተ፡ ግራ፡ በአልቲሐት፡ እምቤተ፡ ግብር፡ ዘየማን፡ ወዘፀጋም፡ ያበውኡ፡ እሙንቱ፡ ማዕደ። ወአልቦ፡ ዘይክል፡ ኈልቆቶ፡ ለኵሉ፡ ሥርዓተ፡ ማዕድ፡ ዘእንበለ፡ ንጉሥ።

ወለጸላሂ፡ ፩፡ ስሙ፡ ጽሩይ፤ ወለካልእ፡ ጸላ፡ ስሙ፡ ኢታርፍድ። ወለሣልስ፡ ጸላ፡ ስሙ፡ ጸላ፡ ሐፄ፤ ወለውእቱሰ፡ ጸላ፡ ሐፄ፡ ኢይሁብዎ፡ ለሰብእ፡ ዘእንበለ፡ በቃለ፡ ንጉሥ፡ ዘአዘዘ፤ ወለጸጅ፡ የሐዣ፡ ይብልዎ፡ ጸጅ፡ አበዛ፡ ወለኵሎሙ፡ ፄዋ፡ በፀርዋጅት፡ በድል፡ ደመና፡ ወበድል፡ ሾተል፡ ወለዘፈቀዱ፡ ኵሉ፡ ያበልዕዎሙ፡ እምውእቱ፡ ማዕድ፡ ዘተሠርዐ።