### 0001

(-Fol. 34-) ⲫⲃⲓⲟⲥ ⲛⲛⲓⲁⲅⲓⲟⲥ ⲛⲣⲱⲙⲁⲓⲟⲥ ⲙⲁⲝⲓⲙⲟⲥ ⲛⲉⲙ ⲇⲟⲙⲉⲧⲓⲟⲥ
ⲛⲉⲛϣⲏⲣⲓ ⲛⲟⲩⲁⲗⲉⲛⲧⲓⲛⲟⲥ ⲡⲟⲩⲣⲟ ⲛⲛⲓⲣⲱⲙⲁⲓⲟⲥ ⲉⲧⲁⲩϫⲱⲕ ⲙⲡⲟⲩⲃⲓⲟⲥ
ⲉⲑⲛⲁⲛⲉϥ ⲉⲑⲙⲉϩ ⲛⲁⲣⲉⲧⲏ ⲛⲓⲃⲉⲛ ⲉⲁⲩϫⲱⲕ ⲉⲃⲟⲗ ⲛⲛⲓⲉⲛⲧⲟⲗⲏ ⲧⲏⲣⲟⲩ ⲛⲧⲉ
ⲛⲓⲉⲩⲁⲅⲅⲉⲗⲓⲟⲛ ⲉⲑⲟⲩⲁⲃ ⲡⲓⲟⲩⲁⲓ ⲙⲉⲛ ⲛϧⲏⲧⲟⲩ ⲉⲧⲉ ⲙⲁⲝⲓⲙⲟⲥ ⲡⲉ ⲁϥⲙⲧⲟⲛ
ⲙⲙⲟϥ ⲛⲥⲟⲩ ⲓ̄ⲇ︦ ⲙⲡⲓⲁⲃⲟⲧ ⲧⲱⲃⲓ ⲙⲓⲭⲉⲧ ⲇⲉ ⲉⲧⲉ ⲇⲟⲙⲉⲧⲓⲟⲥ ⲡⲉ ⲛⲥⲟ ⲓ︦ⲍ︦
ⲙⲡⲁⲓⲁⲃⲟⲧ ⲣⲱ ⲟⲛ ⲉⲁϥϩⲓⲥⲧⲟⲣⲉⲓⲛ ⲙⲙⲟϥ ⲛϫⲉ ⲁⲃⲃⲁ ⲡϣⲟⲓ ⲡⲓⲣⲉⲙ ⲕⲱⲛⲥ‐
ⲧⲁⲛⲧⲓⲛⲟⲩⲡⲟⲗⲓⲥ ⲟⲩⲟϩ ⲡⲓϣⲟⲣⲡ ⲛⲇⲓⲁⲕⲱⲛ ⲉⲧⲁϥϣⲱⲡⲓ ϧⲉⲛ ϣⲓⲏⲧ ⲛⲁϩⲣⲁϥ
ⲛⲁⲃⲃⲁ ⲙⲁⲕⲁⲣⲓⲟⲥ ⲡⲓⲣⲱⲙⲓ ⲛⲧⲉ ⲫ︦ϯ︦ ⲛⲉⲙ ⲁⲃⲃⲁ ⲓⲥⲓⲇⲱⲣⲟⲥ ⲫⲁⲓ ⲉⲧⲁϥ‐
ⲙⲧⲟⲛ ⲙⲙⲟϥ ⲉϥⲟⲓ ⲛⲇⲓⲁⲕⲱⲛ ⲟⲩⲟϩ ⲁⲩⲑⲱϣ ⲛⲁⲃⲃⲁ ⲙⲟⲩⲥⲏ ⲡⲓⲭⲁⲙⲉ
ⲛⲧⲉϥϣⲉⲃⲓⲱ. ⲉⲧⲁϥⲥϧⲉ ⲫⲃⲓⲟⲥ ⲇⲉ ⲛⲛⲁⲓⲁⲅⲓⲟⲥ ⲛⲑⲟϥ ⲁⲃⲃⲁ ⲡϣⲟⲓ ⲉⲟⲩⲉⲣ
ⲫⲙⲉⲩⲓ ⲁϥⲭⲁϥ ϧⲉⲛ ϯⲉⲕⲕⲗⲏⲥⲓⲁ ⲉⲟⲩϩⲏⲩ ⲛⲟⲩⲟⲛ ⲛⲓⲃⲉⲛ ⲉⲑⲟⲩⲱϣ ⲉⲱⲛϧ
ⲕⲁⲧⲁ ⲫ︦︦ϯ︦.


### 0002

ⲁⲙⲱⲓⲛⲓ ⲧⲏⲣⲟⲩ ⲙⲫⲟⲟⲩ ⲱ ⲛⲁⲓⲟϯ ⲉⲑⲟⲩⲁⲃ ⲟⲩⲟϩ (-verso-) ⲛⲑⲉⲟⲫⲟ‐
ⲣⲟⲥ ⲛⲧⲉⲧⲉⲛⲑⲱⲟⲩϯ ⲉⲣⲟⲓ ϧⲉⲛ ⲟⲩϯ ϩⲑⲏϥ ⲛⲧⲁϫⲱ ⲉⲣⲱⲧⲉⲛ ⲛⲛⲓⲁⲣⲉⲧⲏ
ⲛⲉⲙ ⲛⲓϣⲫⲏⲣⲓ ⲛⲉⲙ ⲛⲓϫⲟⲙ ⲛⲧⲉ ⲛⲁⲓⲁⲅⲓⲟⲥ ⲛⲣⲱⲙⲁⲓⲟⲥ ⲙⲁⲝⲓⲙⲟⲥ ⲛⲉⲙ
ⲇⲟⲙⲉⲧⲓⲟⲥ ⲛⲉⲛϣⲏⲣⲓ ⲛⲟⲩⲁⲗⲉⲛⲧⲓⲛⲟⲥ ⲡⲓⲙⲁⲓ ⲛⲟⲩϯ ⲛⲟⲩⲣⲟ. ⲁⲥϣⲱⲡⲓ ⲇⲉ
ϧⲉⲛ ⲡⲥⲏⲟⲩ ⲛⲁⲃⲃⲁ ⲙⲁⲕⲁⲣⲓⲟⲥ ⲫⲏ ⲉⲑⲟⲩⲁⲃ ⲙⲡ︦ⲛ︦ⲁ︦ⲧⲟⲫⲟⲣⲟⲥ ⲡⲓⲣⲱⲙⲓ
ⲛⲧⲉ ⲫ︦ϯ︦ ⲫⲁⲓ ⲉⲧⲁ ⲧⲁⲣⲭⲏ ⲛϣⲓⲏⲧ ϣⲱⲡⲓ ⲉⲃⲟⲗϩⲓⲧⲟⲧϥ ⲛⲑⲟϥ ⲅⲁⲣ ⲡⲉ
ⲉⲧⲁϥⲉⲣ ϣⲟⲣⲡ ⲛⲧⲱϫⲓ ⲙⲡⲁⲓⲓⲁϩ ⲁⲗⲟⲗⲓ ⲛⲧⲉ ⲡⲟ︦ⲥ︦ ⲥⲁⲃⲁⲱⲑ ⲉⲧⲉ ϣⲓⲏⲧ
ⲡⲉ ϣⲁⲧⲉϥⲭⲱ ⲛϧⲏⲧϥ ⲙⲡⲕⲁⲣⲡⲟⲥ ⲛϯⲙⲉⲧⲁⲛⲟⲓⲁ ⲙⲙⲏⲓ ϩⲓⲧⲉⲛ ⲫ︦ϯ︦. ⲱ
ⲡⲓⲧⲱⲟⲩ ⲉⲧⲥⲙⲁⲣⲱⲟⲩⲧ ⲛⲧⲉ ϣⲓⲏⲧ ⲡⲓⲧⲱⲟⲩ ⲉⲧⲁ ⲫ︦ϯ︦ ϣⲱⲡⲓ ϩⲓϫⲱϥ ⲛⲉⲙ
ⲛⲉϥⲁⲅⲅⲉⲗⲟⲥ ⲱ ⲡⲓⲧⲱⲟⲩ ⲛⲣⲉϥⲭⲁ ⲛⲟⲃⲓ ⲉⲃⲟⲗ ⲱ ⲡⲓⲧⲱⲟⲩ ⲉⲧⲁϥⲑⲣⲉ ⲛⲓ‐
ⲣⲉϥⲉⲣ ⲛⲟⲃⲓ ⲛⲁⲩ ⲉⲫ︦ϯ︦ ⲱ ⲛⲉⲙ ⲡⲁⲓⲧⲱⲟⲩ ⲙⲡ︦ⲛ︦ⲁ︦ⲧⲓⲕⲟⲛ ⲫⲁⲓ ⲉⲧⲁϥⲑⲣⲉ
ⲡⲁⲓⲏⲓ ⲧⲏⲣϥ ⲙⲟϩ ⲛⲥⲑⲟⲓ ⲛⲟⲩϥⲓ ϩⲓⲧⲉⲛ ⲛⲓⲉⲩⲭⲏ ⲛⲧⲉ ⲛⲓⲁⲅⲓⲟⲥ ⲉⲧϣⲟⲡ
ⲛϧⲏⲧϥ ⲱ ⲛⲉⲙ ⲡⲁⲓⲧⲱⲟⲩ ⲉⲑⲟⲩⲁⲃ ⲛⲧⲉ ⲡⲓϩⲟⲥⲉⲙ ⲫⲁⲓ ⲉⲧⲁϥϣⲱⲡⲓ ⲛⲟⲩ‐
ϩⲟⲥⲉⲙ ⲙⲡ︦ⲛ︦ⲁ︦ⲧⲓⲕⲟⲛ ⲉϥⲓⲱⲓ ⲉⲃⲟⲗ ⲛⲛⲓⲑⲱⲗⲉⲃ ⲛⲧⲉ ϯⲯⲩⲭⲏ. (-fol. 35-) ⲁⲓ‐
ⲛⲁϣⲫⲓⲣⲓ ⲉⲑⲃⲉ ⲡⲓⲧⲁⲓⲟ ⲉⲧⲁϥⲧⲁϩⲟⲕ ⲛⲁϣ ⲛⲣⲏϯ ⲱ ⲡⲓⲧⲱⲟⲩ ⲉⲧⲧⲁⲓⲏⲟⲩⲧ
ⲛⲧⲉ ⲡⲓϩⲙⲟⲩ ⲫⲁⲓ ⲉⲧⲁ ⲟⲩⲙⲏϣ ⲛϩⲙⲟⲩ ⲛⲧⲉ ⲡⲓⲕⲁϩⲓ ⲛⲗⲟⲅⲓⲕⲟⲛ ⲫⲓⲣⲓ
ⲉⲃⲟⲗ ⲛϧⲏⲧϥ ⲕⲁⲧⲁ ϯⲙⲉⲧⲙⲉⲑⲣⲉ ⲛⲧⲉ ⲡⲉⲛⲥⲱⲧⲏⲣ ⲛⲁⲓ ⲉⲧⲁⲩϫⲟⲩⲕⲉⲣ ⲛⲛⲓ‐


### 0003

ⲯⲩⲭⲏ ⲉⲧⲁⲩⲗⲱϥ ϧⲉⲛ ⲛⲓⲁⲛⲟⲙⲓⲁ. ⲱ ⲡⲓⲧⲱⲟⲩ ⲉⲑⲟⲩⲁⲃ ⲛⲧⲉ ϣⲓⲏⲧ ⲫⲙⲁ
ⲛⲑⲱⲟⲩϯ ⲛⲧⲉ ⲛⲓⲁⲅⲅⲉⲗⲟⲥ ⲛⲉⲙ ⲛⲓⲣⲱⲙⲓ ⲉⲟⲩⲥⲟⲡ ϫⲉ ϩⲓⲛⲁ ⲛⲧⲁϫⲟⲥ ϧⲉⲛ
ⲟⲩϣⲱⲧ ⲉⲃⲟⲗ ⲡⲓⲧⲱⲟⲩ ⲫⲁⲓ ⲉⲧⲁϥⲑⲣⲉ ⲛⲓⲥⲓⲛⲱⲟⲩⲓ ⲛⲣⲉϥϩⲱⲗⲉⲙ ⲛⲉⲙ ⲛⲏ
ⲉⲧⲁⲩⲓⲣⲓ ⲛϩⲁⲛ ϩⲏⲟⲩⲓ ⲉⲩⲧⲁⲥⲑⲏⲟⲩⲧ ⲉⲃⲟⲗ ϣⲱⲡⲓ ⲡⲣⲟⲫⲏⲧⲏⲥ ⲟⲩⲟϩ
ⲛⲣⲉϥⲥⲁϫⲓ ⲛⲉⲙ ⲫ︦ϯ︦ ⲡⲓⲇⲏⲙⲓⲟⲩⲣⲅⲟⲥ ⲧⲉⲣⲙⲏⲛⲓⲁ ⲅⲁⲣ ⲛϣⲓⲏⲧ ⲡⲉ ⲫⲙⲁ
ⲛⲑⲱⲟⲩϯ ⲛⲛⲏ ⲉⲧⲕⲱϯ ⲛⲥⲁ ⲫ︦ϯ︦ ϧⲉⲛ ⲡⲟⲩϩⲏⲧ ⲧⲏⲣϥ ⲛⲁⲓ ⲉⲧⲁ ⲫ︦ϯ︦ ⲡⲓⲗⲟ-
ⲅⲟⲥ ⲑⲱⲟⲩϯ ⲙⲙⲱⲟⲩ ⲉϧⲟⲩⲛ ϧⲉⲛ ⲡⲓϥⲧⲟⲩ ⲗⲁⲕϩ ⲛⲧⲉ ⲡⲕⲁϩⲓ ϩⲓⲧⲉⲛ ϯⲥⲙⲏ
ⲉⲑⲟⲩⲁⲃ ⲛⲧⲉ ⲡⲓⲉⲩⲁⲅⲅⲉⲗⲓⲟⲛ ⲫⲁⲓ ⲉⲧϫⲱ ⲙⲙⲟⲥ ϫⲉ ⲫⲏ ⲉⲑⲙⲉⲓ ⲙⲙⲟϥ
ⲙⲁⲣⲉϥϫⲟⲗϥ ⲉⲃⲟⲗ ⲟⲩⲟϩ ⲛⲧⲉϥⲱⲗⲓ ⲙⲡⲉϥⲥⲧⲁⲩⲣⲟⲥ ⲛⲧⲉϥⲙⲟϣⲓ ⲛⲥⲱⲓ
ϧⲉⲛ ⲫⲁⲓ ⲅⲁⲣ ⲁϥⲭⲱ ⲛϧⲏⲧⲟⲩ ⲛⲛⲓⲙⲕⲁϩ ⲛⲧⲉ ⲡⲉϥⲥⲧⲁⲩⲣⲟⲥ ⲉⲑⲟⲩⲁⲃ
ϩⲓⲧⲉⲛ ⲡⲉϥⲃⲱⲕ ⲁⲃⲃⲁ ⲙⲁⲕⲁⲣⲓⲟⲥ (-verso-) ⲫⲁⲓ ⲉⲧⲟⲓ ⲛⲧⲩⲡⲟⲥ ⲛⲱⲟⲩ ϧⲉⲛ
ϩⲱⲃ ⲛⲓⲃⲉⲛ ϫⲉ ϩⲓⲛⲁ ϧⲉⲛ ϯϫⲟⲙ ⲛⲧⲉ ⲡⲓⲥⲧⲁⲩⲣⲟⲥ ⲉⲑⲟⲩⲁⲃ ⲛⲧⲟⲩϭⲟϫⲓ ⲛⲥⲁ
ϯϫⲟⲙ ⲧⲏⲣⲥ ⲛⲧⲉ ⲡⲓⲁⲛⲧⲓⲕⲉⲓⲙⲉⲛⲟⲥ ⲉⲃⲟⲗϧⲉⲛ ⲡϣⲁϥⲉ. ϩⲓⲛⲁ ⲇⲉ ⲛⲧⲁϣ‐
ⲧⲉⲙⲱⲥⲕ ϧⲉⲛ ⲡⲁⲓⲥⲁϫⲓ ⲙⲡⲁⲓⲣⲏϯ ⲟⲩⲟϩ ⲛⲧⲁⲭⲱ ⲛⲥⲱⲓ ⲙⲡⲥⲁϫⲓ ⲛⲧⲉ
ϯϩⲩⲡⲟⲑⲉⲥⲓⲥ ⲉⲧⲁⲛⲭⲁⲥ ⲉϧⲣⲏⲓ ⲛϣⲟⲣⲡ ϯⲛⲁⲕⲟⲧⲧ ϩⲓϫⲉⲛ ⲡⲓⲡⲣⲟⲕⲉⲓⲙⲉ‐
ⲛⲟⲛ ⲛⲧⲁⲥⲁϫⲓ ⲕⲁⲧⲁ ⲫⲏ ⲉⲧⲉ ⲡⲓⲡⲛⲁ ⲉⲑⲟⲩⲁⲃ ⲛⲁⲉⲣⲭⲩⲣⲟⲕⲉⲓⲛ (sic)
ⲙⲙⲟϥ ⲛⲏⲓ.


### 0004

ⲉⲡⲓⲇⲏ ⲁⲥϣⲁⲛϣⲱⲡⲓ ⲛⲧⲁⲓⲥⲱⲧⲉⲙ ⲉⲁⲃⲃⲁ ⲙⲁⲕⲁⲣⲓⲟⲥ ⲡⲓⲣⲱⲙⲓ ⲛⲧⲉ ⲫ︦ϯ︦
ⲉϥⲥⲁϫⲓ ⲛⲉⲙ ⲛⲓϧⲉⲗⲗⲟⲓ ⲛⲉϣⲁϥϫⲟⲥ ⲛⲱⲟⲩ ϫⲉ ⲁⲙⲱⲓⲛⲓ ⲛⲧⲉⲧⲉⲛⲛⲁⲩ
ⲉⲡⲓⲙⲁⲣⲧⲩⲣⲓⲟⲛ ⲛⲧⲉ ⲛⲓⲕⲟⲩϫⲓ ⲛϣⲉⲙⲙⲱⲟⲩ ⲡϩⲱⲃ ϩⲓ ⲁⲛⲁⲅⲕⲏ ⲉⲣⲟⲓ ϧⲉⲛ
ⲟⲩⲭⲟϩ ⲛⲧⲉ ⲫ︦ϯ︦ ⲛⲧⲁⲟⲩⲱⲛϩ ⲉⲃⲟⲗ ⲛⲑⲙⲉⲧϫⲱⲣⲓ ⲛⲛⲁⲓⲁⲅⲓⲟⲥ ⲛⲉⲙ ⲧⲟⲩⲡⲟ‐
ⲗⲓⲧⲉⲓⲁ ⲉⲑⲛⲁⲛⲉⲥ. ⲁⲥϣⲱⲡⲓ ⲇⲉ ⲉϥⲟⲓ ⲛⲟⲩⲣⲟ ⲛϫⲉ ⲟⲩⲁⲗⲉⲛⲧⲓⲛⲟⲥ ⲡϣⲏⲣⲓ
ⲙⲡⲓϣⲁⲙϣⲉ ⲛⲟⲩϯ ⲛⲟⲩⲣⲟ ⲓⲟⲩⲃⲓⲁⲛⲟⲥ ⲫⲁⲓ ⲉⲧⲁϥϣⲟⲣϣⲉⲣ ⲛⲛⲓⲉⲣⲫⲏⲟⲩⲓ
ⲧⲏⲣⲟⲩ ⲛⲧⲉ ⲛⲓϣⲁⲙϣⲉ ⲉⲓⲇⲱⲗⲟⲛ ⲉⲧⲥⲟϥ ⲁϥⲫⲱⲣⲕ ⲙⲡⲥⲱϫⲡ ⲛⲛⲟⲩⲥⲉⲛϯ
ⲛⲉ ⲟⲩⲟⲛ ⲟⲩⲛⲓϣϯ ⲛϩⲉⲓⲣⲏⲛⲏ ϣⲟⲡ (-fol. 36-) ⲡⲉ ϧⲉⲛ ⲛⲓⲉⲕⲕⲗⲏⲥⲓⲁ ⲛⲧⲉ ⲫϯ
ⲉⲧϣⲟⲡ ϧⲉⲛ ϯⲟⲓⲕⲟⲩⲙⲉⲛⲏ ϩⲱⲥⲧⲉ ⲛⲧⲟⲩⲙⲟⲩϯ ⲉⲣⲟϥ ⲛⲑⲟϥ ⲟⲩⲁⲗⲉⲛⲧⲓⲛⲟⲥ
ϫⲉ ⲕⲱⲛⲥⲧⲁⲛⲧⲓⲛⲟⲥ ⲛⲃⲉⲣⲓ ⲗⲟⲓⲡⲟⲛ ⲁϥⲉⲛ ⲛⲉϥϣⲏⲣⲓ ⲉⲡϣⲱⲓ ⲛⲕⲁⲗⲱⲥ ⲙⲁ‐
ⲝⲓⲙⲟⲥ ⲛⲉⲙ ⲇⲟⲙⲉⲧⲓⲟⲥ ⲛⲉⲙ ⲧⲟⲩⲕⲟⲩϫⲓ ⲛⲥⲱⲛⲓ ϧⲉⲛ ⲙⲉⲧϣⲁⲙϣⲉ ⲛⲟⲩϯ
ⲛⲓⲃⲉⲛ ⲛⲉⲙ ϯⲥⲃⲱ ⲉⲑⲛⲁⲛⲉⲥ ϧⲉⲛ ϩⲁⲛ ⲯⲁⲗⲙⲟⲥ ⲛⲉⲙ ϩⲁⲛ ⲛⲏⲥⲧⲉⲓⲁ ⲛⲉⲙ
ϩⲁⲛ ϣⲗⲏⲗ ⲛϫⲱⲣϩ ⲛⲉⲙ ⲙⲉⲣⲓ ⲛⲉⲙ ϩⲁⲛ ⲙⲉⲗⲉⲧⲏ ⲉⲩⲙⲏⲛ ⲉⲃⲟⲗ
ϩⲱⲥⲧⲉ ⲛⲧⲉ ⲡⲓⲡⲁⲗⲁⲧⲓⲟⲛ ⲉⲣ ⲙⲫⲣⲏϯ ⲛⲟⲩⲙⲟⲛⲁⲥⲧⲏⲣⲓⲟⲛ ⲙⲙⲟⲛⲁ‐
ⲭⲟⲥ ϧⲉⲛ ⲛⲉϥⲉϩⲟⲟⲩ ⲟⲩⲟϩ ⲛⲁϥⲑⲣⲟ ⲙⲙⲱⲟⲩ ⲡⲉ ⲉⲉⲣⲁⲥⲕⲉⲓⲛ ⲧⲏⲣⲟⲩ ⲓⲥ‐
ϫⲉⲛ ⲡⲟⲩⲕⲟⲩϫⲓ ϣⲁ ⲡⲟⲩⲛⲓϣϯ ⲙⲫⲣⲏϯ ⲛϩⲁⲛ ⲥⲱⲧⲡ ⲙⲙⲟⲛⲁⲭⲟⲥ ⲥⲭⲉ‐
ⲇⲟⲛ ⲛⲧⲟⲩⲙⲟⲩϯ ⲉⲛⲁⲓⲁⲅⲓⲟⲥ ϩⲓⲧⲉⲛ ⲟⲩⲟⲛ ⲛⲓⲃⲉⲛ ⲓⲥϫⲉⲛ ⲉⲩⲟⲓ ⲛⲕⲟⲩϫⲓ ϫⲉ


### 0005

ⲛⲓϧⲉⲗⲗⲟⲓ ⲉⲑⲃⲉ ⲛⲟⲩϩⲃⲏⲟⲩⲓ ⲉⲑⲛⲁⲛⲉⲩ ⲛⲉⲙ ⲡⲟⲩⲥⲙⲟⲧ ⲛϣⲁⲙϣⲉ ⲛⲟⲩϯ.
ⲗⲟⲓⲡⲟⲛ ϧⲉⲛ ⲡϫⲓ ⲛⲑⲣⲉ ⲛⲁⲓⲙⲁⲕⲁⲣⲓⲟⲥ ⲙⲁⲝⲓⲙⲟⲥ ⲛⲉⲙ ⲇⲟⲙⲉⲧⲓⲟⲥ ⲁⲓⲁⲓ
ⲟⲩⲟϩ ⲛⲧⲟⲩϭⲓ ⲡⲣⲟⲕⲟⲡⲏ ϧⲉⲛ ⲛⲓϩⲃⲏⲟⲩⲓ ⲉⲑⲛⲁⲛⲉⲩ ⲕⲁⲧⲁ ⲫ︦ϯ︦ ⲁⲩⲕⲱϯ
ⲛⲥⲁ ⲫⲃⲓⲟⲥ ⲛⲛⲓⲁⲅⲅⲉⲗⲟⲥ ⲉⲧⲉ ϯⲙⲉⲧⲙⲟⲛⲁⲭⲟⲥ ⲧⲉ (-verso-) ⲟⲩⲟϩ ⲛⲁⲩ‐
ⲥⲟϭⲛⲓ ⲡⲉ ⲛⲉⲙ ⲛⲟⲩⲉⲣⲏⲟⲩ ⲉⲩϫⲱ ⲙⲙⲟⲥ ϫⲉ ⲁⲛⲛⲁϣⲫⲱⲧ ⲛⲁϣ ⲛⲣⲏϯ
ⲛⲧⲉⲛⲉⲣ ⲙⲟⲛⲁⲭⲟⲥ. ⲟⲩⲟϩ ⲡⲉϫⲉ ⲡⲓⲕⲟⲩϫⲓ ⲙⲡⲓⲛⲓϣϯ ϫⲉ ⲙⲁⲣⲉⲛϫⲉⲙ
ⲗⲱⲓϫⲓ ⲙⲡⲉⲛⲓⲱⲧ ⲟⲩⲟϩ ⲛⲧⲉⲛϫⲟⲥ ⲛⲁϥ ϫⲉ ⲁⲛⲛⲁϩⲱⲗ ⲉⲛⲓⲕⲁⲓⲁ ⲛⲧⲉⲛ‐
ϣⲗⲏⲗ ϧⲉⲛ ⲡⲧⲟⲡⲟⲥ ⲛⲛⲉⲛⲓⲟϯ ⲉⲑⲟⲩⲁⲃ ⲛⲉⲡⲓⲥⲕⲟⲡⲟⲥ ⲟⲩⲟϩ ⲁϥϣⲁⲛ‐
ⲭⲁⲛ ⲉⲃⲟⲗ ⲡⲓⲙⲁ ϫⲉ ⲉⲧⲉⲛⲟⲩⲁϣϥ ⲧⲉⲛⲛⲁϩⲱⲗ ⲉⲣⲟϥ. ⲉⲧⲁⲩⲥⲟϭⲛⲓ ⲇⲉ
ⲉⲡⲟⲩⲓⲱⲧ ⲁϥⲁⲓⲧⲟⲩ ⲛⲣⲉⲙϩⲉ. ⲛⲉ ⲟⲩⲟⲛ ⲟⲩⲡⲣⲉⲥⲃⲩⲧⲉⲣⲟⲥ ⲇⲉ ⲉϥϣⲟⲡ ϧⲉⲛ
ⲡⲧⲟⲡⲟⲥ ⲙⲡⲡ︦ⲏ︦ ⲛⲉⲡⲓⲥⲕⲟⲡⲟⲥ ⲉⲡⲉϥⲣⲁⲛ ⲡⲉ ⲓⲱⲁⲛⲛⲏⲥ ⲉⲟⲩⲙⲟⲛⲁⲭⲟⲥ ⲡⲉ
ⲟⲩⲟϩ ⲫⲁⲓ ⲛⲁⲣⲉ ⲛⲓⲟⲩⲣⲱⲟⲩ ⲥⲟϭⲛⲓ ⲉⲣⲟϥ ⲡⲉ ⲛⲟⲩⲙⲏϣ ⲛⲥⲟⲡ ⲛⲉⲙ ⲛⲓⲉⲡⲓⲥ‐
ⲕⲟⲡⲟⲥ ⲛⲧⲉ ⲡⲓⲙⲁ ⲉⲧⲉⲙⲙⲁⲩ. ⲉⲧⲁⲩϫⲓⲙⲓ ⲟⲩⲛ ⲛⲟⲩⲉϩⲟⲟⲩ ⲉϥⲑⲏϣ ⲛϫⲉ
ⲛⲁⲓⲙⲁⲕⲁⲣⲓⲟⲥ ⲁⲩϯ ϩⲓⲱⲧⲟⲩ ⲛϩⲁⲛ ϩⲃⲱⲥ ⲉⲛⲁⲛⲉⲩ ⲟⲩⲟϩ ⲁⲩⲁⲗⲏⲓ ⲉⲛⲟⲩϩ‐
ⲑⲱⲣ ⲁⲩⲓ ⲉⲃⲟⲗ ϫⲉ ⲁⲩⲛⲁϣⲉ ⲛⲱⲟⲩ ⲉⲛⲓⲕⲁⲓⲁ ⲉϣⲗⲏⲗ ϧⲉⲛ ⲡⲧⲟⲡⲟⲥ ⲛⲛⲉⲛ‐
ⲓⲟϯ ⲉⲑⲟⲩⲁⲃ ⲛⲉⲡⲓⲥⲕⲟⲡⲟⲥ. ⲉⲧⲁⲩϣⲉ ⲇⲉ ⲛⲱⲟⲩ ⲉⲛⲓⲕⲁⲓⲁ ⲁⲩϫⲓⲙⲓ ⲙⲡⲓ‐
ⲡⲣⲉⲥⲃⲩⲧⲉⲣⲟⲥ ⲉⲑⲟⲩⲁⲃ ⲓⲱⲁⲛⲛⲏⲥ ⲫⲏ ⲉⲧⲁⲛⲉⲣ ϣⲟⲣⲡ ⲛ-(-fol. 37-) ⲫⲓⲣⲓ


### 0006

ⲉⲣⲟϥ ⲟⲩⲟϩ ⲁϥϣⲟⲡⲟⲩ ⲉⲣⲟϥ ϧⲉⲛ ⲟⲩⲙⲉⲧⲣⲉⲙⲣⲁⲩϣ ⲛⲉⲙ ⲟⲩⲧⲓⲙⲏ ⲟⲩⲟϩ
ⲁⲩⲧⲁⲙⲟϥ ⲉⲡⲓⲣⲏϯ ⲉⲧⲟⲩⲟⲩⲱϣ ⲉⲉⲣ ⲙⲟⲛⲁⲭⲟⲥ. ⲛⲑⲟϥ ⲇⲉ ϩⲓⲧⲉⲛ ⲡⲓϩⲙⲟⲧ
ⲛⲧⲉ ⲫ︦ϯ︦ ⲛⲁϥⲉⲣⲇⲟⲕⲓⲙⲁⲍⲉⲓⲛ ⲙⲡⲟⲩⲙⲉⲩⲓ ⲡⲉ ϩⲓⲛⲁ ⲛⲧⲉϥⲉⲙⲓ ⲁⲕⲣⲓⲃⲱⲥ
ⲉⲛⲟⲩⲙⲉⲩⲓ ⲙⲡⲁⲧⲉϥϫⲉ ϩⲗⲓ ⲛⲥⲁϫⲓ ⲛⲱⲟⲩ ϩⲟⲧⲉ ⲇⲉ ⲉⲧⲁϥⲛⲁⲩ ⲉⲧⲟⲩⲡⲣⲟ‐
ϩⲁⲓⲣⲉⲥⲓⲥ ⲉⲥⲥⲟⲩⲧⲱⲛ ⲉϧⲟⲩⲛ ⲉⲫϯ ⲁϥⲣⲁϣⲓ ⲉⲙⲁϣⲱ ⲟⲩⲟϩ ⲁϥϯ ⲛⲟⲙϯ
ⲛⲱⲟⲩ. ⲛⲑⲱⲟⲩ ⲇⲉ ⲛⲁⲩϯ ϩⲟ ⲉⲣⲟϥ ⲡⲉ ϩⲓⲛⲁ ⲛⲧⲟⲩϣⲱⲡⲓ ϧⲁⲧⲟⲧϥ ⲛⲑⲟϥ
ⲇⲉ ⲙⲡⲉϥⲉⲣⲁⲛⲉⲭⲉⲥⲑⲁⲓ ⲛⲱⲟⲩ ⲉϥϫⲱ ⲙⲙⲟⲥ ϫⲉ ϯⲉⲣ ϩⲟϯ ϧⲁ ⲧϩⲏ
ⲙⲡⲉⲧⲉⲛⲓⲱⲧ ⲡⲟⲩⲣⲟ ϯⲛⲁϣⲉⲣ ⲡⲁⲓϩⲱⲃ ⲫⲁⲓ ⲁⲛ ⲁⲗⲗⲁ ⲓⲥϫⲉ ⲧⲉⲧⲉⲛⲟⲩⲱϣ
ⲉⲉⲣ ⲙⲟⲛⲁⲭⲟⲥ ⲧⲱⲟⲩⲛ ⲛⲧⲉⲧⲉⲛϣⲉ ⲛⲱⲧⲉⲛ ⲉϯⲥⲩⲣⲓⲁ ⲁⲓⲥⲱⲧⲉⲙ ⲉⲑⲃⲉ ⲟⲩⲁ‐
ⲛⲁⲭⲱⲣⲏⲧⲏⲥ ⲛⲧⲉ ⲡⲓⲙⲁ ⲉⲧⲉⲙⲙⲁⲩ ⲉϥϣⲟⲡ ϧⲉⲛ ⲟⲩⲡⲉⲧⲣⲁ ϩⲓϫⲉⲛ ⲫⲓⲟⲙ
ⲟⲩⲟϩ ⲫⲁⲓ ⲁ ⲡⲉϥⲥⲱⲓⲧ ⲙⲁϩ ϯⲥⲩⲣⲓⲁ ⲧⲏⲣⲥ ⲛⲉⲙ ϯⲡⲁⲗⲁⲓⲥⲧⲓⲛⲏ ⲉⲡⲉϥⲣⲁⲛ
ⲡⲉ ⲁⲅⲁⲃⲟⲥ ⲉⲟⲩⲣⲉⲙ ⲧⲁⲣⲥⲟⲥ ⲡⲉ ⲛⲧⲉ ϯⲕⲓⲗⲓⲕⲓⲁ. ⲫⲁⲓ ⲇⲉ ⲛⲁϥⲟⲛⲓ ⲙⲡⲁⲩ‐
ⲗⲟⲥ ϧⲉⲛ ⲡⲉϥⲛⲁϩϯ ⲛⲉⲙ ⲛⲉϥϩⲃⲏⲟⲩⲓ. ⲓⲥϫⲉ ⲟⲩⲛ ⲡⲓϩⲱⲃ ⲣⲁ ⲛⲱⲧⲉⲛ
ⲙⲁϣⲉ ⲛⲱⲧⲉⲛ ⲉⲡⲉϥⲙⲁ. (-verso-) ⲉⲧⲁⲩⲥⲱⲧⲉⲙ ⲇⲉ ⲁⲩⲣⲁϣⲓ ⲉⲙⲁϣⲱ
ⲟⲩⲟϩ ϧⲉⲛ ⲫⲁⲓ ⲁϥϣⲗⲏⲗ ⲉϫⲱⲟⲩ ⲁϥⲧⲫⲱⲟⲩ ⲉⲃⲟⲗ ϧⲉⲛ ⲟⲩϩⲉⲓⲣⲏⲛⲏ.
ⲛⲑⲱⲟⲩ ⲇⲉ ⲁⲩϣⲉ ⲛⲱⲟⲩ ⲉⲃⲟⲗϩⲓⲧⲟⲧϥ ϧⲉⲛ ⲛⲟⲩⲛⲓϣϯ ⲛⲣⲁϣⲓ ⲟⲩⲟϩ


### 0007

ⲙⲡⲟⲩⲟⲩⲁϩ ⲧⲟⲧⲟⲩ ⲉϣⲉ ⲉⲧⲟⲩⲡⲟⲗⲓⲥ ⲉⲛⲁⲩ ⲉⲛⲟⲩⲓⲟϯ ⲁⲗⲗⲁ ⲁⲩϩⲱⲗ ⲉϯ‐
ⲥⲩⲣⲓⲁ ϧⲉⲛ ⲟⲩⲥⲱⲟⲩⲧⲉⲛ ⲉⲧⲁⲩϣⲓⲛⲓ ⲇⲉ ⲛⲥⲁ ⲡⲉⲑⲟⲩⲁⲃ ⲁⲅⲁⲃⲟⲥ ⲁⲩⲧⲁⲙⲱⲟⲩ
ⲉⲡⲉϥⲙⲁ ⲟⲩⲟϩ ⲉⲧⲁⲩⲉⲣⲁⲡⲁⲛⲧⲁⲛ ⲉⲣⲟϥ ⲁϥϣⲟⲡⲟⲩ ⲉⲣⲟϥ ϧⲉⲛ ⲟⲩⲛⲓϣϯ
ⲛⲣⲁϣⲓ ⲛⲑⲱⲟⲩ ⲇⲉ ⲁⲩⲧⲁⲙⲟϥ ⲉϩⲱⲃ ⲛⲓⲃⲉⲛ. ⲡⲓϧⲉⲗⲗⲟ ⲟⲩⲛ ⲛⲑⲉⲟⲫⲟⲣⲟⲥ
ⲉⲧⲉⲙⲙⲁⲩ ⲉⲧⲁϥⲛⲁⲩ ⲉⲧⲟⲩⲁⲅⲁⲡⲏ ⲉϧⲟⲩⲛ ⲉⲫϯ ⲥⲁⲧⲟⲧϥ ⲁϥϯ ⲉϫⲱⲟⲩ
ⲙⲡⲓⲥⲭⲏⲙⲁ ⲉⲑⲟⲩⲁⲃ ⲛⲧⲉ ⲛⲓⲙⲟⲛⲁⲭⲟⲥ ⲛⲧⲉ ϯⲥⲩⲣⲓⲁ. ⲛⲓⲙⲟⲛⲁⲭⲟⲥ ⲅⲁⲣ
ⲛⲧⲉ ⲡⲓⲙⲁ ⲉⲧⲉⲙⲙⲁⲩ ⲥⲉⲉⲣⲫⲟⲣⲉⲓⲛ ⲁⲛ ⲙⲙⲁⲣϭⲛⲁϩ ⲟⲩⲇⲉ ϧⲱⲕ ⲁⲗⲗⲁ
ⲟⲩϩⲉⲃⲥⲱ ⲛⲭⲁⲙⲉ ⲡⲉ ⲉⲧⲟⲩⲉⲣⲫⲟⲣⲉⲓⲛ ⲙⲙⲟⲥ ⲫⲁⲓ ⲅⲁⲣ ⲡⲉ ⲡⲥⲭⲏⲙⲁ
ⲛⲛⲁ ϯⲥⲩⲣⲓⲁ ⲡⲉ. ⲗⲟⲓⲡⲟⲛ ϯⲧⲁⲙⲟ ⲙⲙⲱⲧⲉⲛ ⲕⲁⲧⲁ ⲫⲣⲏϯ ⲉⲧⲁⲩϫⲟⲥ ⲛⲏⲓ
ⲛⲑⲱⲟⲩ ⲛⲁⲓⲁⲅⲓⲟⲥ ϫⲉ ϩⲟⲧⲉ ⲉⲧⲁϥⲛⲟⲩⲓ ⲉⲉⲙⲧⲟⲛ ⲙⲙⲟϥ ⲛϫⲉ ⲡⲓϧⲉⲗⲗⲟ
ⲉⲑⲟⲩⲁⲃ ⲁⲅⲁⲃⲟⲥ (-fol. 38-) ⲁⲛϣⲉⲛϥ ϫⲉ ⲁϫⲉ ⲟⲩⲥⲁϫⲓ ⲛⲁⲛ ⲡⲉⲛⲓⲱⲧ ⲉⲑ‐
ⲟⲩⲁⲃ ⲛⲧⲉⲛ ⲱⲛϧ ⲉⲣⲟϥ ⲙⲉⲛⲉⲛⲥⲱⲕ. ⲛⲑⲟϥ ⲇⲉ ⲡⲉϫⲁϥ ⲛⲁⲛ ϫⲉ ⲁⲓⲛⲁⲩ ⲉⲣⲟⲓ
ϧⲉⲛ ⲡⲁⲓⲉϫⲱⲣϩ ⲉⲓⲟϩⲓ ⲉⲣⲁⲧ ϩⲓϫⲉⲛ ⲧⲁⲓⲡⲉⲧⲣⲁ ⲉⲧⲥⲁ ⲣⲏⲥ ⲙⲙⲟⲛ ϩⲱⲥ ⲉⲓ‐
ⲛⲁⲩ ⲉⲟⲩⲙⲟⲛⲁⲭⲟⲥ ⲉϥⲟϩⲓ ⲉⲣⲁⲧϥ ⲙⲡⲁⲙⲑⲟ ⲉⲃⲟⲗ ⲉⲟⲩⲣⲱⲙⲓ ⲡⲉ ⲉϥϣⲏⲟⲩ
ⲉⲣⲉ ⲟⲩⲟⲛ ϩⲁⲛ ϩⲃⲱⲥ ⲧⲟⲓ ⲉϫⲱϥ ⲉⲩⲟⲓ ⲛϧⲓⲣϧⲓⲣ ⲛⲭⲁⲙⲉ ⲛⲉⲙ ⲟⲩⲕⲗⲁϥⲧ
ϩⲓϫⲉⲛ ⲧⲉϥⲁⲫⲉ ⲉⲣⲉ ⲟⲩⲟⲛ ϩⲁⲛ ⲥⲧⲁⲩⲣⲟⲥ ⲧⲟⲓ ⲉⲣⲟⲥ ⲉⲣⲉ ⲟⲩⲟⲛ ⲟⲩϣⲃⲱⲧ
ⲛⲃⲁⲓ ϧⲉⲛ ⲧⲉϥϫⲓϫ ⲛⲉⲙ ⲟⲩⲥⲧⲁⲩⲣⲟⲥ. ϧⲉⲛ ⲡϫⲓ ⲛⲑⲣⲓⲛⲁⲩ ⲉⲣⲟϥ ⲁⲓⲉⲣ ϩⲟϯ


### 0008

ⲛⲑⲟϥ ⲇⲉ ⲁϥϧⲱⲛⲧ ⲉⲣⲟⲓ ⲁϥⲉⲣⲁⲥⲡⲁⲍⲉⲥⲑⲁⲓ ⲙⲙⲟⲓ ⲟⲩⲟϩ ⲡⲉϫⲁϥ ⲛⲏⲓ ϫⲉ
ⲕⲥⲱⲟⲩⲛ ϫⲉ ⲁⲛⲟⲕ ⲛⲓⲙ. ⲡⲉϫⲏⲓ ⲛⲁϥ ϫⲉ ⲙⲙⲟⲛ ⲡⲁⲓⲱⲧ ⲉⲑⲟⲩⲁⲃ. ⲡⲉϫⲁϥ
ⲛⲏⲓ ϫⲉ ⲁⲛⲟⲕ ⲡⲉ ⲙⲁⲕⲁⲣⲓⲟⲥ ⲡⲓⲣⲉⲙ ⲛⲭⲏⲙⲓ ⲉⲧⲁⲓⲓ ⲉⲑⲁϩⲉⲙ ⲛⲉⲕϣⲏⲣⲓ
ⲛⲧⲁⲟⲗⲟⲩ ϩⲁⲣⲟⲓ ⲉϧⲣⲏⲓ ⲉⲭⲏⲙⲓ. ⲡⲉϫⲏⲓ ⲛⲁϥ ϫⲉ ⲭⲛⲁⲟⲗⲧ ⲛⲉⲙⲱⲟⲩ ⲁⲛ
ⲁⲛⲟⲕ ⲡⲁⲓⲱⲧ. ⲡⲉϫⲁϥ ⲛⲏⲓ ϫⲉ ⲙⲙⲟⲛ ⲁⲗⲗⲁ ϯⲧⲁⲙⲟ ⲙⲙⲟⲕ ϫⲉ ⲙⲉⲛⲉⲛⲥⲁ
ⲕⲉⲅ̄ ⲛⲉϩⲟⲟⲩ ⲭⲛⲁⲙⲧⲟⲛ ⲙⲙⲟⲕ ⲟⲩⲟϩ ⲛⲧⲉⲕϣⲉ ⲛⲁⲕ ϩⲁ ⲡⲟ︦ⲥ︦ ⲟⲩⲟϩ ⲡⲟⲩⲣⲟ
ⲛⲁⲟⲩⲱⲣⲡ ⲛⲥⲁ ⲛⲉϥ‐ (-verso-) ϣⲏⲣⲓ ϫⲉ ⲛⲧⲉϥⲟⲗⲟⲩ ⲉⲕⲱⲛⲥⲧⲁⲛⲧⲓⲛⲟⲩ‐
ⲡⲟⲗⲓⲥ ⲗⲟⲓⲡⲟⲛ ⲁⲛⲁⲩ ϩⲟⲛϩⲉⲛ ⲉⲧⲟⲧⲟⲩ ϩⲓⲛⲁ ⲛⲧⲁⲩⲓ ⲉϧⲣⲏⲓ ⲉⲭⲏⲙⲓ ⲛⲧⲁⲩ‐
ϣⲱⲡⲓ ϧⲁⲧⲟⲧ ϫⲉ ⲫ︦ϯ︦ ⲡⲉ ⲉⲧⲁϥⲑⲁϩⲙⲟⲩ ⲛⲏⲓ ⲉϩⲁⲛ ϣⲏⲣⲓ. ⲓⲥ ϩⲏⲡⲡⲉ ⲟⲩⲛ
ⲁⲓϫⲟⲥ ⲛⲁⲕ. ⲟⲩⲟϩ ⲛⲁⲓ ⲉⲧⲁϥ ϫⲟⲧⲟⲩ ⲛⲏⲓ ⲁϥⲉⲣ ⲁⲑⲟⲩⲱⲛϩ ⲉⲃⲟⲗ ϩⲁⲣⲟⲓ.
ϯⲛⲟⲩ ϫⲉ ⲛⲁϣⲏⲣⲓ ϯⲧⲁⲙⲟ ⲙⲙⲱⲧⲉⲛ ϫⲉ ⲓⲥ ⲟⲩⲙⲏϣ ⲛⲉϩⲟⲟⲩ ϯⲥⲱⲧⲉⲙ
ⲉⲡϣⲉⲛⲛⲟⲩϥⲓ ⲙⲡⲓⲣⲱⲙⲓ ⲉⲧⲉⲙⲙⲁⲩ ⲁⲃⲃⲁ ⲙⲁⲕⲁⲣⲓⲟⲥ ⲟⲩⲟϩ ϧⲉⲛ ⲫⲁⲓ
ϯϫⲱ ⲙⲙⲟⲥ ⲛⲱⲧⲉⲛ ϫⲉ ⲉϣⲱⲡ ⲛⲧⲉ ⲡⲟⲩⲣⲟ ⲉⲙⲓ ⲉⲣⲱⲧⲉⲛ ϥⲛⲁⲭⲁ ⲑⲏⲛⲟⲩ
ⲙⲡⲁⲓⲙⲁ ⲁⲛ ⲗⲟⲓⲡⲟⲛ ⲙⲉⲛⲉⲛⲥⲁ ⲡϫⲱⲕ ⲉⲃⲟⲗ ⲙⲡⲁⲃⲓⲟⲥ ⲙⲁϣⲉ ⲛⲱⲧⲉⲛ
ⲉϧⲣⲏⲓ ⲉⲭⲏⲙⲓ ϣⲱⲡⲓ ⲛⲱⲧⲉⲛ ϧⲁⲧⲉⲛ ⲡⲉⲑⲟⲩⲁⲃ ⲁⲃⲃⲁ ⲙⲁⲕⲁⲣⲓⲟⲥ ϣⲁⲧⲉ
ⲡⲟ︦ⲥ︦ ϫⲉⲙ ⲡⲉⲧⲉⲛϣⲓⲛⲓ. ⲛⲁⲓ ⲇⲉ ⲉⲧⲁϥϫⲟⲧⲟⲩ ⲛⲱⲟⲩ ⲛϫⲉ ⲡⲓϧⲉⲗⲗⲟ ⲁⲅⲁⲃⲟⲥ
ⲁϥⲙⲧⲟⲛ ⲙⲙⲟϥ ϧⲉⲛ ⲟⲩϩⲉⲓⲣⲏⲛⲏ ⲛⲉ ⲁⲩⲉⲣ ⲋ ⲅⲁⲣ ⲛⲣⲟⲙⲡⲓ ⲡⲉ ⲉⲩϣⲟⲡ


### 0009

ⲛⲉⲙⲁϥ ⲟⲩⲟϩ ⲁ ⲡⲉϥⲡ︦ⲛ︦ⲁ︦ ⲕⲱⲃ ⲉϩⲣⲏⲓ ⲉϫⲱⲟⲩ ⲙⲫⲣⲏϯ ⲉⲧⲁ ⲡⲓⲡ︦ⲛ︦ⲁ︦ ⲛⲧⲉ
ⲏⲗⲓⲁⲥ ⲕⲱⲃ ⲉϫⲉⲛ ⲉⲗⲓⲥⲁⲓⲟⲥ ⲙⲡⲓⲥⲏⲟⲩ.
ⲁⲩⲓⲥ ϫⲉ ⲟⲩⲛ ⲛⲧⲉⲛⲧⲁⲙⲱⲧⲉⲛ (-fol. 39-) ⲉⲛⲓⲙⲏⲓⲛⲓ ⲛⲉⲙ ⲛⲓϣⲫⲏⲣⲓ
ⲛⲉⲙ ⲛⲓϩⲙⲟⲧ ⲛⲧⲁⲗϭⲟ ⲉⲧⲁ ⲫϯ ⲉⲣⲉⲛⲉⲣⲅⲉⲓⲛ ⲙⲙⲱⲟⲩ ⲉⲃⲟⲗϩⲓⲧⲉⲛ ⲛⲉⲛ‐
ϫⲓϫ ⲛⲛⲁⲓⲁⲅⲓⲟⲥ ϩⲱⲥⲧⲉ ⲛⲧⲉ ⲡⲟⲩⲥⲱⲓⲧ ⲥⲱⲣ ⲉⲃⲟⲗ ϧⲉⲛ ϯⲡⲁⲗⲁⲓⲥⲧⲓⲛⲏ
ⲧⲏⲣⲥ ⲛⲉⲙ ϯⲭⲱⲣⲁ ⲧⲏⲣⲥ ⲛⲧⲉ ϯⲡⲓⲥⲓⲇⲓⲁ ⲉⲑⲃⲉ ⲛⲓⲧⲁⲗϭⲟ ⲉⲧⲟⲩⲓⲣⲓ
ⲙⲙⲱⲟⲩ ϧⲉⲛ ⲛⲏ ⲉⲧϣⲱⲛⲓ ϧⲉⲛ ⲫⲣⲁⲛ ⲙⲡⲉⲛⲟ︦ⲥ︦ ⲡⲭ︦ⲥ︦ ⲟⲩⲙⲏϣ ⲅⲁⲣ
ϧⲉⲛ ⲛⲏ ⲉⲧⲉ ⲛⲓⲡ︦ⲛ︦ⲁ︦ ⲛⲁⲕⲁⲑⲁⲣⲧⲟⲛ ⲛⲉⲙⲱⲟⲩ ⲁⲩϣⲁⲛⲥⲱⲧⲉⲙ ⲉⲡⲟⲩⲣⲁⲛ
ⲙⲙⲁⲩⲁⲧϥ ϣⲁⲩⲓ ⲉⲃⲟⲗϩⲓⲱⲧⲟⲩ ⲟⲩⲟϩ ⲛⲧⲟⲩⲟⲩϫⲁⲓ ⲥⲁⲧⲟⲧⲟⲩ ϩⲓⲧⲉⲛ ⲡϩⲙⲟⲧ
ⲛⲧⲉ ⲫ︦ϯ︦ ⲡⲉⲛⲥⲱⲧⲏⲣ. ⲥⲱⲧⲉⲙ ⲉⲧⲁⲓⲛⲓϣϯ ⲛϣⲫⲏⲣⲓ ⲉⲧⲁⲥϣⲱⲡⲓ ⲉⲃⲟⲗϩⲓⲧⲟ‐
ⲧⲟⲩ. ⲁⲩⲉⲛ ⲟⲩⲣⲱⲙⲓ ϣⲁⲣⲱⲟⲩ ⲉⲃⲟⲗϧⲉⲛ ⲁⲥⲕⲁⲗⲱⲛ ⲉⲣⲉ ⲟⲩⲟⲛ ⲟⲡ︦ⲛ︦︦ⲁ︦
ⲛⲣⲉϥϣⲓⲛⲓ ⲛⲉⲙⲁϥ. ⲉⲧⲓ ⲟⲩⲛ ⲉϥⲟⲩⲏⲟⲩ ⲙⲡⲓⲙⲁ ⲛϣⲱⲡⲓ ⲛⲧⲉ ⲛⲁⲓⲁⲅⲓⲟⲥ
ⲁϥⲱϣ ⲉⲃⲟⲗϧⲉⲛ ⲟⲩⲛⲓϣϯ ⲛϧⲣⲱⲟⲩ ⲉϥϫⲱ ⲙⲙⲟⲥ ϫⲉ ⲱ ⲃⲓⲁ ⲛⲧⲟⲧⲕ ⲙⲁ‐
ⲕⲁⲣⲓⲟⲥ ⲡⲓⲣⲉⲙ ⲛⲭⲏⲙⲓ ⲡⲓⲁⲛⲁⲭⲱⲣⲏⲧⲏⲥ ⲁⲛⲭⲁ ⲛⲓϣⲁϥⲉⲩ ⲛⲧⲉ ⲭⲏⲙⲓ
ⲛⲁⲕ ⲁⲕⲓ ⲉⲡⲁⲓⲙⲁ ⲟⲛ ⲟⲩⲟϩ ⲓⲥ ϩⲏⲡⲡⲉ ⲓⲥ ⲛⲉⲕϣⲗⲏⲗ ⲥⲉϯ ϧⲓⲥⲓ ⲛⲁⲛ ⲙⲡⲁⲓ‐
ⲕⲉⲙⲁ ⲉⲕϯ ⲛⲧⲟⲧⲕ ⲛⲉⲙ ⲛⲁⲓⲣⲱⲙⲁⲓⲟⲥ. (-verso-) ⲫⲁⲓ ⲇⲉ ⲉⲧⲁϥϫⲟϥ ⲁϥⲓ
ⲉⲃⲟⲗϧⲉⲛ ⲡⲓⲣⲱⲙⲓ ⲛϫⲉ ⲡⲓⲡ︦ⲛ︦ⲁ︦ ⲛⲁⲕⲁⲑⲁⲣⲧⲟⲛ ⲟⲩⲟϩ ⲟⲩⲟⲛ ⲛⲓⲃⲉⲛ ⲉⲧⲁⲩⲥⲱ‐
ⲧⲉⲙ ϯ ⲱⲟⲩ ⲙⲫ︦ϯ︦. ⲛⲉ ⲟⲩⲟⲛ ⲟⲩⲕⲟϩ ⲛⲧⲱⲟⲩ ⲇⲉ ⲡⲉ ϧⲉⲛ ⲡⲓⲙⲁ ⲛⲙⲟϣⲓ (sic)


### 0010

ⲉⲑⲛⲁ ⲉϧⲟⲩⲛ ⲉⲓⲕⲟⲛⲓⲟⲛ ⲉⲣⲉ ⲟⲩⲟⲛ ⲟⲩⲛⲓϣϯ ⲛⲇⲣⲁⲕⲱⲛ ϣⲟⲡ ⲛϧⲏⲧϥ ⲟⲩⲟϩ
ⲫⲁⲓ ⲛⲉϣⲁϥⲧⲁⲕⲉ ⲟⲩⲙⲏϣ ⲛⲧⲉ ⲛⲓⲣⲱⲙⲓ ⲉⲑⲙⲟϣⲓ ϧⲉⲛ ⲡⲓⲙⲁ ⲛⲙⲟϣⲓ
ⲉⲧⲉⲙⲙⲁⲩ. ϩⲟⲧⲉ ⲉⲧⲁ ⲛⲁ ⲓⲕⲟⲛⲓⲟⲛ ⲛⲁⲩ ⲉⲡⲓⲧⲁⲕⲟ ⲉⲧϣⲟⲡ ⲁⲩϩⲱⲗ ϣⲁ
ⲛⲓⲁⲅⲓⲟⲥ ⲉⲩⲧⲁⲙⲟ ⲙⲙⲱⲟⲩ ⲉⲡⲧⲁⲕⲟ ⲛⲧⲉ ⲡⲓⲑⲏⲣⲓⲟⲛ ⲉⲧϩⲱⲟⲩ ⲉⲧⲉⲙⲙⲁⲩ.
ⲧⲟⲧⲉ ⲁ ⲡⲓⲙⲁⲕⲁⲣⲓⲟⲥ ⲙⲁⲝⲓⲙⲟⲥ ⲥϧⲉ ⲟⲩⲕⲟⲩϫⲓ ⲛⲥϧⲁⲓ ⲉϥϫⲱ ⲙⲙⲟⲥ ϫⲉ
ϧⲉⲛ ⲫⲣⲁⲛ ⲙⲡⲟ︦ⲥ︦ ⲥⲁⲃⲁⲱⲑ ⲫ︦ϯ︦ ⲛⲁⲃⲃⲁ ⲙⲁⲕⲁⲣⲓⲟⲥ ⲛⲉⲙ ⲁⲃⲃⲁ ⲁⲅⲁⲃⲟⲥ
ⲡⲉⲛⲓⲱⲧ ⲛⲓⲣⲱⲙⲓ ⲉⲧⲉⲣⲫⲟⲣⲉⲓⲛ ⲙⲡⲭ︦ⲥ︦ ⲡⲓⲗⲟⲅⲟⲥ ⲛⲧⲉ ⲫⲓⲱⲧ ϫⲉ ⲉϣⲱⲡ
ⲛⲧⲟⲩⲉⲛ ⲡⲁⲓⲕⲟⲩϫⲓ ⲛⲥϧⲁⲓ ⲉⲣⲱϥ ⲙⲡⲉⲕⲙⲟϩ ⲛⲑⲟⲕ ϧⲁ ⲡⲓⲇⲣⲁⲕⲱⲛ ⲉⲕⲉⲓ
ⲉⲃⲟⲗ ⲉⲣⲉ ⲣⲱⲕ ϣⲟⲧⲉⲙ ⲛⲧⲉⲕⲉⲛⲕⲟⲧ ϧⲉⲛ ⲑⲙⲏϯ ⲙⲡⲓⲙⲁ ⲛⲙⲟϣⲓ ⲛⲧⲉⲕϣ‐
ⲧⲉⲙⲕⲓⲙ ⲉⲣⲟⲕ ⲉⲃⲟⲗϧⲉⲛ ⲡⲓⲙⲁ ⲉⲧⲉⲙⲙⲁⲩ ϣⲁⲧⲉ ⲛⲓϩⲁⲗⲁϯ ⲛⲧⲉ ⲧⲫⲉ
ⲟⲩⲱⲙ ⲛⲛⲉⲕⲁϥⲟⲩⲓ. ⲉⲧⲁⲩϭⲓ ⲇⲉ ⲙⲡⲓⲥϧⲁⲓ ⲁⲩⲧⲏⲓϥ ⲛ‐(-fol. 40-) ⲟⲩⲣⲱⲙⲓ
ⲉⲁϥⲧⲁⲗⲟϥ ⲉⲟⲩϩⲑⲟ ⲁϥϩⲱⲗ ⲁϥⲭⲱ ⲙⲡⲓⲥϧⲁⲓ ϩⲓ ⲣⲱϥ ⲙⲡⲓⲃⲏⲃ ⲛⲧⲉ ⲡⲓⲑⲏ‐
ⲣⲓⲟⲛ ⲟⲩⲟϩ ⲁϥⲫⲱⲧ ⲥⲁⲧⲟⲧϥ. ⲱ ⲛⲉⲙ ϯϣⲫⲏⲣⲓ ⲉⲧⲁⲥϣⲱⲡⲓ ⲙⲡⲓⲛⲁⲩ
ⲉⲧⲉⲙⲙⲁⲩ ⲡⲓⲇⲣⲁⲕⲱⲛ ⲅⲁⲣ ⲉⲧϩⲱⲟⲩ ϧⲉⲛ ϯⲟⲩⲛⲟⲩ ⲉⲧⲉⲙⲙⲁⲩ ⲥⲁⲧⲟⲧϥ
ⲁϥⲓ ⲉⲃⲟⲗϧⲉⲛ ⲡⲉϥⲃⲏⲃ ⲟⲩⲟϩ ⲛⲁϥⲉⲛⲕⲟⲧⲉϥ ϩⲓⲱⲟⲩ (sic) ⲧⲡⲉ ϧⲉⲛ ⲑⲙⲏϯ
ⲙⲡⲓⲙⲁ ⲛⲙⲟϣⲓ ⲉⲩⲉⲣⲑⲉⲱⲣⲉⲓⲛ ⲙⲙⲟϥ ⲛϫⲉ ⲟⲩⲟⲛ ⲛⲓⲃⲉⲛ ϩⲱⲥⲧⲉ ⲛⲏ
ⲉⲑⲟⲩⲏⲟⲩ ⲙⲙⲟϥ ⲛⲟⲩⲉϩⲟⲟⲩ ⲙⲙⲟϣⲓ ⲛⲧⲟⲩⲓ ϣⲁⲧⲟⲩⲛⲁⲩ ⲉⲣⲟϥ ⲛϥϣⲕⲓⲙ


### 0011

ⲉⲣⲟϥ ⲁⲛ ϩⲟⲗⲱⲥ ⲉⲃⲟⲗϧⲉⲛ ⲡⲉϥⲙⲁ ⲉⲩϩⲓ ⲱⲛⲓ ⲉⲣⲟϥ ⲟⲩⲟϩ ⲛⲁⲩϯ ⲱⲟⲩ
ⲙⲫ︦ϯ︦ ⲫⲏ ⲉⲧⲓⲣⲓ ⲛⲛⲓϣⲫⲏⲣⲓ ϧⲉⲛ ⲛⲏ ⲉⲑⲟⲩⲁⲃ ⲛⲧⲁϥ. ⲟⲩⲣⲱⲙⲓ ⲇⲉ ϩⲱϥ
ⲁϥⲓ ⲉⲃⲟⲗϧⲉⲛ ⲗⲩⲥⲧⲣⲁ ⲉⲛⲁⲩ ⲉϯϣⲫⲏⲣⲓ ⲉⲧⲁⲥϣⲱⲡⲓ ⲛⲁⲣⲉ ⲡⲉϥⲥⲱⲙⲁ
ⲧⲏⲣϥ ⲕⲏⲕ ⲛⲥⲉϩⲧ ⲡⲉ ⲟⲩⲟϩ ⲉⲧⲁϥⲓ ϣⲁ ⲛⲏ ⲉⲑⲟⲩⲁⲃ ϧⲉⲛ ⲡⲉϥϫⲓ ⲛⲛⲁⲩ
ⲉⲣⲱⲟⲩ ⲙⲙⲁⲩⲁⲧϥ ⲉⲃⲟⲗϩⲓⲧⲉⲛ ⲡⲉϥⲛⲓϣϯ ⲛⲛⲁϩϯ ⲁϥⲧⲟⲩⲃⲟ ⲥⲁⲧⲟⲧϥ
ⲉⲃⲟⲗϩⲁ ⲡⲓⲥⲉϩⲧ ⲟⲩⲟϩ ⲛⲁⲣⲉ ⲟⲩⲟⲛ ⲛⲓⲃⲉⲛ ϯ ⲱⲟⲩ ⲙⲡⲉⲛⲟ︦ⲥ︦ ⲓ︦ⲏ︦ⲥ︦ ⲡⲭ︦ⲥ︦ ⲉⲑⲃⲉ
ⲛⲓⲧⲁⲗϭⲟ ⲉⲧⲉϥⲓⲣⲓ ⲙⲙⲱⲟⲩ ϧⲉⲛ ⲛⲉⲛϫⲓϫ ⲛⲛⲁⲓⲙⲁⲕⲁⲣⲓⲟⲥ. ⲁⲩⲉⲛ ⲟⲩⲁⲓ
ⲇⲉ ϣⲁⲣⲱⲟⲩ ⲉⲃⲟⲗϧⲉⲛ ⲙⲁⲕⲇⲁⲗⲁⲛ (-verso-) ⲛⲧⲉ ϯⲡⲓⲥⲓⲇⲓⲁ ⲉⲣⲉ ⲡⲉϥϩⲟ
ⲥⲟⲧⲉⲣ ϩⲓ ⲫⲁϩⲟⲩ ⲙⲙⲟϥ ϩⲓⲧⲉⲛ ⲧⲉⲛⲉⲣⲅⲉⲓⲁ ⲛⲟⲩⲇⲁⲓⲙⲱⲛ ⲓⲥ ⲅ̄ϯ ⲛⲣⲟⲙ‐
ⲡⲓ ⲟⲩⲟϩ ⲉⲧⲁⲩⲛⲁⲩ ⲉⲣⲟϥ ⲛϫⲉ ⲛⲏ ⲉⲑⲟⲩⲁⲃ ⲁⲩⲉⲣ ⲙⲕⲁϩ ⲛϩⲏⲧ ⲉⲙⲁϣⲱ
ⲉⲑⲃⲉ ⲡⲓⲣⲏϯ ⲉⲛⲁϥⲟ ⲙⲙⲟϥ ⲟⲩⲟϩ ⲉⲧⲁⲩϭⲓ ⲛⲟⲩⲕⲟⲩϫⲓ ⲙⲙⲱⲟⲩ ⲁⲩⲉⲣ‐
ⲥⲫⲣⲁⲅⲓⲍⲉⲓⲛ ⲙⲙⲟϥ ϧⲉⲛ ⲫⲣⲁⲛ ⲙⲡⲉⲛⲟ︦ⲥ︦ ⲓ︦ⲏ︦ⲥ︦ ⲡⲭ︦ⲥ︦ ⲁⲩϫⲟϣϥ ⲉϫⲱϥ ⲟⲩⲟϩ
ϧⲉⲛ ϯⲟⲩⲛⲟⲩ ⲁ ⲡⲉϥϩⲟ ⲥⲱⲟⲩⲧⲉⲛ. ⲱ ⲛⲉⲙ ⲛⲁⲓϩⲙⲟⲧ ⲉⲧⲟⲓ ⲛⲛⲓϣϯ ⲉⲧⲁ
ⲡϣⲏⲣⲓ ⲙⲫ︦ϯ︦ ⲁⲓⲧⲟⲩ ⲛⲉⲙ ⲛⲁⲓϣⲏⲣⲓ ⲛⲟⲩⲣⲟ ⲕⲁⲓ ⲅⲁⲣ ϧⲉⲛ ⲟⲩⲙⲉⲑⲙⲏⲓ
ⲛⲏ ⲉⲧⲉⲣⲁⲅⲁⲡⲁⲛ ⲙⲫ︦ϯ︦ ϣⲁϥⲉⲣ ϩⲱⲃ ⲛⲉⲙⲱⲟⲩ ϧⲉⲛ ϩⲱⲃ ⲛⲓⲃⲉⲛ ⲉⲑⲛⲁ‐
ⲛⲉⲩ. ϯϯ ϩⲟ ⲇⲉ ⲉⲣⲱⲧⲉⲛ ⲙⲡⲉⲛⲑⲣⲉ ϩⲗⲓ ⲉⲣ ⲁⲑⲛⲁϩϯ ⲉⲛⲏ ⲉϯ ϫⲱ ⲙⲙⲱⲟⲩ
ⲕⲁⲓ ⲅⲁⲣ ⲁⲛⲟⲕ ϩⲱ ϧⲁ ⲡⲓⲉⲗⲁⲭⲓⲥⲧⲟⲥ ⲡⲓϣⲟⲓ ⲉⲧⲓ ⲉⲓϧⲉⲛ ⲕⲱⲛⲥⲧⲁⲛⲧⲓⲛⲟⲩ‐
ⲡⲟⲗⲓⲥ ϧⲁ ⲧϩⲏ ⲙⲡⲁϯⲉⲙⲓ ⲣⲱ ⲉⲡⲧⲏⲣϥ ϫⲉ ⲁⲣⲉ ϣⲓⲏⲧ ⲛⲑⲱⲛ ⲁⲓⲥⲱⲧⲉⲙ


### 0012

ⲉⲃⲟⲗϩⲓⲧⲉⲛ ⲛⲓⲡⲣⲁⲅⲙⲁⲧⲉⲩⲧⲏⲥ ⲉⲑⲃⲉ ⲛⲓⲧⲁⲗϭⲟⲓ ⲉⲧⲉⲣⲉ ⲛⲁⲓⲁⲅⲓⲟⲥ ⲓⲣⲓ
ⲙⲙⲱⲟⲩ ϧⲉⲛ ⲫⲣⲁⲛ ⲙⲡⲉⲛⲟ︦ⲥ︦ ⲓ︦ⲏ︦ⲥ︦ ⲭ︦ⲥ︦ ⲡⲓⲗⲟⲅⲟⲥ ⲟⲩⲟϩ ⲁⲓϩⲱⲗ ⲉϯⲥⲩⲣⲓⲁ
ⲉⲧⲓ ⲉⲓⲟⲓ (-fol. 41-) ⲛⲕⲟⲥⲙⲓⲕⲟⲥ ϣⲁϯⲛⲁⲩ ϧⲉⲛ ⲛⲁⲃⲁⲗ ⲉⲛⲏ ⲉⲧⲁⲓⲥⲟⲑⲙⲟⲩ
ⲛⲧⲉ ⲡⲁϩⲏⲧ ⲑⲱⲧ ⲉⲁⲓϫⲟⲥ ϧⲉⲛ ⲛⲁⲙⲉⲩⲓ ϫⲉ ⲛⲁⲛⲉ ⲡⲓϫⲓ ⲛⲛⲁⲩ ⲛⲧⲉ ⲛⲓⲃⲁⲗ
ⲉϩⲟⲧⲉ ⲡⲓϫⲓ ⲛⲥⲱⲧⲉⲙ ϧⲉⲛ ⲛⲓⲙⲁϣϫ. ⲓⲥϫⲉⲛ ⲡⲓⲉϩⲟⲟⲩ ⲅⲁⲣ ⲉⲧⲉⲙⲙⲁⲩ ⲉⲧⲁⲓ‐
ⲛⲁⲩ ⲉⲛⲟⲩϩⲃⲏⲟⲩⲓ ⲉⲑⲛⲁⲛⲉⲩ ⲁ ⲡⲁϩⲏⲧ ⲑⲱⲧ ⲉⲉⲣ ⲙⲟⲛⲁⲭⲟⲥ ⲁⲗⲗⲁ ⲙⲡⲓϣ‐
ϫⲉⲙϫⲟⲙ ϣⲁ ⲡⲓⲛⲁⲩ ⲉⲧⲁ ⲫ︦ϯ︦ ⲉⲣⲃⲟⲏⲑⲉⲓⲛ ⲉⲣⲟⲓ ⲁϥⲉⲛⲧ ⲉⲃⲟⲗϧⲉⲛ ⲛⲓϥⲓ
ⲣⲱⲟⲩϣ ⲛⲧⲉ ⲡⲓⲕⲟⲥⲙⲟⲥ ⲁⲓⲓ ⲉϣⲓⲏⲧ. ⲗⲟⲓⲡⲟⲛ ϫⲉ ⲛⲏ ⲉⲧⲁⲓⲥⲟⲑⲙⲟⲩ ϧⲉⲛ
ϯⲥⲩⲣⲓⲁ ⲛⲉⲙ ⲛⲏ ⲉⲧⲁⲓⲥⲟⲑⲙⲟⲩ ϧⲉⲛ ϣⲓⲏⲧ ⲛⲁⲓ ⲁⲓⲥϧⲏⲧⲟⲩ ϩⲓ ⲡⲁⲓϫⲱⲙ.
ϯⲛⲟⲩ ϫⲉ ⲙⲏⲡⲱⲥ ⲛⲧⲁⲱⲥⲕ ϧⲉⲛ ⲡⲓⲥⲁϫⲓ ⲙⲡⲁⲓⲣⲏϯ ⲉⲓⲧⲁϫⲣⲟ ⲛϯⲙⲉⲧ‐
ⲙⲉⲑⲣⲉ ⲛⲧⲁⲉⲣ ⲡⲱⲃϣ ⲛⲛⲓϩⲙⲟⲧ ⲉⲑⲛⲁⲁⲩ ⲗⲟⲓⲡⲟⲛ ⲧⲉⲛⲛⲁⲕⲟⲧⲧⲉⲛ ⲡⲁⲗⲓⲛ
ⲉϫⲉⲛ ⲛⲓϩⲙⲟⲧ ⲛⲧⲁⲗϭⲟ ⲉⲧⲁ ⲡⲭ︦ⲥ︦ ⲡⲉⲛⲛⲟⲩϯ ⲁⲓⲧⲟⲩ ⲉⲃⲟⲗϩⲓⲧⲉⲛ ⲛⲁⲓϣⲏⲣⲓ
ⲛⲟⲩⲣⲟ ⲛⲁⲓ ⲉⲧⲁⲩϯ ⲙⲡⲭ︦ⲥ︦ ϩⲓⲱⲧⲟⲩ ⲙⲫⲣⲏϯ ⲙⲡⲁⲩⲗⲟⲥ ⲛⲉⲙ ⲧⲓⲙⲟⲑⲉⲟⲥ
ⲉⲑⲃⲉ ⲫⲁⲓ ⲁ ϯϫⲟⲙ ⲛⲧⲉ ⲛⲏ ⲉⲧⲉⲙⲙⲁⲩ ⲉⲣ ϩⲱⲃ ϧⲉⲛ ⲛⲁⲓⲕⲉⲭⲱⲟⲩⲛⲓ ⲛⲧⲁⲓ‐
ⲙⲁⲓⲏ.
ⲛⲉ ⲟⲩⲟⲛ ⲟⲩⲡⲣⲉⲥⲃⲩⲧⲉⲣⲟⲥ ⲇⲉ ⲟⲛ ⲡⲉ ϧⲉⲛ ⲅⲁⲃⲁⲗⲗⲱⲛ ϯⲃⲁⲕⲓ ⲛⲧⲉ ⲛⲓ‐
ⲅⲁⲃⲁⲗⲗⲁⲓⲟⲥ ⲉⲡⲉϥⲣⲁⲛ ⲡⲉ ⲍⲁⲭⲁⲣⲓⲁⲥ ⲫⲁⲓ ⲇⲉ ⲁ ⲟⲩⲡⲛⲁ ⲛⲁⲣⲭⲟⲛⲧⲓⲕⲟⲛ


### 0013

ⲙⲙⲏⲓ ⲛⲧⲉ ⲫ︦ϯ︦ ⲉⲣⲉ ⲡⲓⲇⲁⲓⲙⲱⲛ ⲉⲧⲉⲙⲙⲁⲩ ⲓ ⲉϫⲱⲕ ⲛⲧⲉϥϧⲓϯ ⲙⲙⲟⲕ
ⲟⲩⲟϩ ⲛⲥⲉⲉⲙⲓ ⲧⲏⲣⲟⲩ ⲉϯⲥⲟⲣⲙⲉⲥ ⲉⲧⲉⲕⲭⲏ ⲛϧⲏⲧⲥ. ⲧⲟⲧⲉ ⲁϥⲥϧⲉ ⲫⲣⲁⲛ
ⲛⲁⲃⲃⲁ ⲙⲁⲕⲁⲣⲓⲟⲥ ⲥⲁⲃⲟⲗ ⲛϯⲉⲡⲓⲥⲧⲟⲗⲏ ⲁϥⲧⲏⲓⲥ ⲙⲡⲓⲉⲡⲓⲥⲕⲟⲡⲟⲥ ⲟⲩⲟϩ
ⲁϥⲧⲫⲟϥ. ⲱ ϯϣⲫⲏⲣⲓ ⲉⲧⲁⲥϣⲱⲡⲓ ⲙⲡⲓⲛⲁⲩ ⲉⲧⲁ ⲡⲓⲉⲡⲓⲥⲕⲟⲡⲟⲥ ϯ ⲛⲁϥ ⲛϯⲉ‐
ⲡⲓⲥⲧⲟⲗⲏ ⲉϥϫⲱ ⲙⲙⲟⲥ ϫⲉ ⲛⲓⲁⲛⲁⲭⲱⲣⲏⲧⲏⲥ ϣⲓⲛⲓ ⲉⲣⲟⲕ. ⲡⲱⲟⲩ ⲛⲁⲕ ⲡⲭ︦ⲥ︦
ⲡⲓⲗⲟⲅⲟⲥ ⲛⲧⲉ ⲫ︦ϯ︦ ⲛⲉⲙ ⲛⲓϫⲟⲙ ⲉⲧⲉⲕⲟⲩⲱⲛϩ ⲙⲙⲱⲟⲩ ⲉⲃⲟⲗϧⲉⲛ ⲛⲏ ⲉⲧⲟⲓ
ⲛⲁⲕ ⲛⲃⲱⲕ ⲟⲩⲟϩ ⲉⲧϣⲉⲙϣⲓ ⲙⲡⲉⲕⲣⲁⲛ (-verso-) ⲉⲑⲟⲩⲁⲃ ⲟⲩⲇⲉ ⲅⲁⲣ ⲙⲡⲉ
ⲡⲓⲇⲁⲓⲙⲱⲛ ⲉⲧⲉⲙⲙⲁⲩ ⲛⲣⲉϥⲧⲁⲕⲉ ⲯⲩⲭⲏ ⲭⲁϥ ⲣⲱ ϣⲁⲧⲉϥⲱϣ ⲛϯⲉⲡⲓⲥ‐
ⲧⲟⲗⲏ ⲁⲗⲗⲁ ϧⲉⲛ ϯⲟⲩⲛⲟⲩ ⲁϥϥⲱϫⲓ ⲉϫⲱϥ ⲁϥⲣⲁϧⲧϥ ϩⲓϫⲉⲛ ⲡⲕⲁϩⲓ ϧⲉⲛ
ⲑⲙⲏϯ ⲛⲛⲏ ⲉⲧⲟϩⲓ ⲉⲣⲁⲧⲟⲩ ⲟⲩⲟϩ ⲁϥϧⲓϯ ⲙⲙⲟϥ ⲉϥⲉϣ ϧⲣⲱⲟⲩ ⲉⲃⲟⲗ
ⲟⲩⲟϩ ⲁϥⲟⲩⲁϩϥ ⲙⲫⲣⲏϯ ⲛⲟⲩⲟⲩϩⲟⲣ ϩⲱⲥⲧⲉ ⲛⲧⲉ ϯⲃⲁⲕⲓ ⲧⲏⲣⲥ ⲅⲁⲃⲁⲗ‐
ⲗⲱⲛ ⲑⲱⲟⲩϯ ⲉϩⲣⲏⲓ ⲉϫⲱϥ ⲛⲥⲉⲛⲁⲩ ⲉⲣⲟϥ ⲛⲥⲉⲉⲣ ϣⲫⲏⲣⲓ ⲙⲡⲉⲧϣⲟⲩϣⲟⲩ
ⲙⲙⲟϥ ϧⲁϫⲉⲛ ⲟⲩⲕⲟⲩϫⲓ ϫⲉ ⲉⲧⲁⲟⲩϣⲱⲡⲓ ⲙⲙⲟϥ. ⲁϥⲟϩⲓ ⲇⲉ ϧⲉⲛ ⲧⲁⲓⲃⲁ‐
ⲥⲁⲛⲟⲥ ⲙⲡⲁⲓⲣⲏϯ ⲙⲓ︦ⲏ︦ ⲛⲉϩⲟⲟⲩ ⲧⲟⲧⲉ ⲁⲩⲉⲛϥ ϣⲁ ⲛⲓⲁⲅⲓⲟⲥ ⲉϥⲥⲟⲛϩ ⲙⲡⲉ‐
ⲇⲏⲥ. ⲛⲑⲱⲟⲩ ⲇⲉ ⲉⲧⲁⲩⲛⲁⲩ ⲉⲡⲉϥⲧϩⲉⲙⲕⲟ ⲁⲩⲉⲣ ⲙⲕⲁϩ ⲛϩⲏⲧ ⲉⲙⲁϣⲱ
ⲟⲩⲟϩ ⲉⲧⲁⲩϭⲓ ⲛⲟⲩⲕⲟⲩϫⲓ ⲙⲙⲱⲟⲩ ⲁⲩⲉⲣⲥⲫⲣⲁⲅⲓⲍⲉⲓⲛ ⲙⲙⲟϥ ⲁⲩϫⲟϣϥ


### 0014

ⲉϫⲱϥ ϧⲉⲛ ⲫⲣⲁⲛ ⲙⲡⲭ︦ⲥ︦ ⲟⲩⲟϩ ⲥⲁⲧⲟⲧϥ ⲁϥⲟⲩϫⲁⲓ ⲉⲃⲟⲗϩⲁ ⲡⲓⲇⲁⲓⲙⲱⲛ
ⲁϥⲟϩⲓ ⲇⲉ ϧⲁⲧⲉⲛ ⲛⲓⲁⲅⲓⲟⲥ ⲛⲅ̄ ⲛⲉϩⲟⲟⲩ ϣⲁⲧⲟⲩⲧⲥⲁⲃⲟϥ ⲉⲫⲙⲱⲓⲧ ⲛⲧⲉ
ⲡⲓⲟⲩϫⲁⲓ ⲛⲥⲉⲧⲫⲟϥ ϧⲉⲛ ⲟⲩϩⲉⲓⲣⲏⲛⲏ ⲉϥϯ ⲱⲟⲩ ⲙⲫϯ. ϧⲉⲛ ⲛⲁⲓⲧⲁⲗϭⲟ
ⲇⲉ ⲧⲏⲣⲟⲩ ⲉⲧ-(-fol. 43-). -)ϣⲟⲡ ⲉⲃⲟⲗϩⲓⲧⲉⲛ ⲛⲁⲓⲙⲁⲕⲁⲣⲓⲟⲥ ⲙⲡⲟⲩϭⲓⲥⲓ ⲛϩⲏⲧ
ⲉⲡⲧⲏⲣϥ ⲟⲩⲇⲉ ⲛⲁⲩϣⲟⲩϣⲟⲩ ⲙⲙⲱⲟⲩ ⲁⲛ ⲡⲉ ⲟⲩⲇⲉ ⲙⲡⲟⲩϫⲉ ⲟⲩⲥⲁϫⲓ
ⲛⲟⲩⲣⲱⲙⲓ ϧⲉⲛ ⲟⲩⲉⲣ ϣⲓϣⲓ ⲁⲗⲗⲁ ⲛⲁⲩⲑⲉⲃⲓⲟ ⲙⲙⲱⲟⲩ ⲡⲉ ⲥⲁⲡⲉⲥⲏⲧ ⲛⲟⲩⲟⲛ
ⲛⲓⲃⲉⲛ ϩⲱⲥ ⲉⲩϣⲟϣϥ ⲟⲩⲟϩ ⲉⲩⲓⲣⲓ ⲙⲙⲱⲟⲩ ⲛⲁⲧⲉⲙⲡϣⲁ ⲉⲩϫⲱ ⲙⲙⲟⲥ
ⲛⲛⲁⲩ ⲛⲓⲃⲉⲛ ϫⲉ ⲡⲓϩⲙⲟⲧ ⲫⲁ ⲫ︦ϯ︦ ⲡⲉ ⲙⲙⲁⲩⲁⲧϥ ⲁⲛⲟⲛ ⲇⲉ ⲁⲛⲟⲛ ϩⲁⲛ
ϫⲱⲃ ⲟⲩⲟϩ ⲛⲣⲉϥⲉⲣ ⲛⲟⲃⲓ.
ⲛⲉ ⲟⲩⲟⲛ ⲟⲩⲡⲣⲉⲥⲃⲩⲧⲉⲣⲟⲥ ⲇⲉ ϧⲉⲛ ⲥⲉⲗⲉⲩⲕⲓⲁ ⲛⲧⲉ ϯϩⲓⲥⲁⲩⲣⲓⲁ ⲉϣⲱⲡ
ⲛⲧⲉϥⲕⲏⲛ ⲉϥⲉⲣ ϩⲱⲃ ϧⲉⲛ ⲛⲓϩⲃⲏⲟⲩⲓ ⲛⲁⲛⲟⲙⲟⲛ ϣⲁϥϩⲱⲗ ⲛⲧⲉϥⲟϩⲓ ⲉⲣⲁⲧϥ
ⲉⲡⲓⲙⲁ ⲛⲉⲣ ϣⲱⲟⲩϣⲓ ⲛⲧⲉ ⲫϯ ⲛⲁϥⲧⲁⲕⲏⲟⲩⲧ ⲅⲁⲣ ⲡⲉ ⲛⲉⲙ ⲟⲩⲥϩⲓⲙⲓ ⲛⲥⲁ‐
ⲙⲁⲣⲓⲧⲏⲥ. ϩⲱⲥ ⲇⲉ ⲉϥⲙⲏⲛ ⲉⲃⲟⲗ ϧⲉⲛ ⲛⲁⲓⲙⲉⲧⲁⲥⲉⲃⲏⲥ ⲙⲡⲁⲓⲣⲏϯ ⲁ ⲫϯ
ⲟⲩⲱϣ ⲉϩⲓ ⲱⲓϣ ⲛⲛⲏ ⲉⲧⲉ ⲡⲓⲡⲣⲉⲥⲃⲩⲧⲉⲣⲟⲥ ⲉⲧⲉⲙⲙⲁⲩ ⲓⲣⲓ ⲙⲙⲱⲟⲩ ϧⲉⲛ
ϯϩⲓⲥⲁⲩⲣⲓⲁ ⲧⲏⲣⲥ ϫⲉ ϩⲓⲛⲁ ⲛⲧⲉ ⲡⲕⲉⲥⲉⲡⲓ ⲛⲁⲩ ⲛⲧⲟⲩⲉⲣ ϩⲟϯ. ⲗⲟⲓⲡⲟⲛ ϧⲉⲛ
ⲡⲓⲉϩⲟⲟⲩ ⲛⲧⲉ ⲡⲉⲣ ⲫⲙⲉⲩⲓ ⲙⲡⲓⲁⲅⲓⲟⲥ ⲓⲅⲛⲁⲧⲓⲟⲥ ⲁϥⲓⲣⲓ ⲟⲛ ⲙⲡⲁⲓⲣⲏϯ ⲟⲩⲟϩ
ⲙⲉⲛⲉⲛⲥⲱⲥ ⲁϥϣⲉ ⲛⲁϥ ⲟⲛ (-verso-) ⲉϯⲉⲕⲕⲗⲏⲥⲓⲁ ϫⲉ ϩⲓⲛⲁ ⲛⲧⲉϥϣⲉⲙϣⲓ.
ϩⲟⲧⲉ ⲟⲩⲛ ⲉⲧⲁϥⲕⲏⲛ ⲉϥϫⲱ ⲛϯⲉⲩⲭⲏ ⲛⲧⲉ ⲡⲓⲉⲩⲁⲅⲅⲉⲗⲓⲟⲛ ⲙⲉⲛⲉⲛⲥⲁ ⲛⲓ‐


### 0015

ⲧⲱⲃϩ ⲁϥϯ ⲙⲡⲉϥⲟⲩⲟⲓ ⲉⲡⲓⲙⲁ ⲛⲉⲣ ϣⲱⲟⲩϣⲓ ϫⲉ ⲁϥⲛⲁϣⲉⲙϣⲓ ϧⲉⲛ ⲟⲩ‐
ⲙⲉⲧⲁⲧϩⲟϯ. ⲥⲁⲧⲟⲧϥ ⲁ ⲟⲩⲁⲅⲅⲉⲗⲟⲥ ⲛⲧⲉ ⲡⲟⲥ ϣⲁⲣⲓ ⲉⲣⲟϥ ϧⲉⲛ ⲟⲩⲛⲓϣϯ
ⲛⲉⲣϧⲟⲧ ⲉϥⲛⲁϣⲧ ⲉⲙⲁϣⲱ ϩⲱⲥⲧⲉ ⲡⲓϣⲁⲣ ⲛⲧⲉ ⲡⲉϥⲥⲱⲙⲁ ⲛⲟⲩϥⲧ ⲙⲫⲣⲏϯ
ⲛⲟⲩⲁⲥⲕⲟⲥ ⲟⲩⲟϩ ⲥⲁⲧⲟⲧϥ ⲁϥϩⲉⲓ ⲉϫⲉⲛ ⲡⲓⲕⲁϩⲓ ⲁϥⲉⲣ ⲙⲫⲣⲏϯ ⲛⲟⲩⲣⲉϥ‐
ⲙⲱⲟⲩⲧ ⲟⲩⲟϩ ⲁⲩϥⲁⲓ ⲙⲙⲟϥ ⲁⲩϭⲓⲧϥ ⲉⲡⲉϥⲏⲓ ϧⲉⲛ ⲟⲩⲛⲓϣϯ ⲙⲙⲉⲧⲉⲃⲓⲏⲛ.
ⲡⲁⲓ ⲙⲉⲛⲉⲛⲥⲁ ⲓ̄ ⲛⲉϩⲟⲟⲩ ⲁ ⲡⲉϥⲥⲱⲙⲁ ⲧⲏⲣϥ ⲉϥⲉⲣ ϧⲟⲧ ϩⲱⲥⲧⲉ ⲛⲥⲉⲥⲉⲕ
ϥⲉⲛⲧ ⲉⲃⲟⲗ ϩⲁⲣⲟϥ ⲟⲩⲟϩ ⲛⲧⲉ ⲛⲉϥⲕⲁⲥ ⲃⲱϣ ⲉⲃⲟⲗ ⲟⲩⲟϩ ⲛⲁϥϯ ϧⲣⲱⲟⲩ
ⲉⲃⲟⲗ ⲡⲉ ϧⲉⲛ ⲟⲩⲥⲙⲏ ⲉⲥⲉⲛϣⲁϣⲓ ⲙⲡⲓⲉϩⲟⲟⲩ ⲛⲉⲙ ⲡⲓⲉϫⲱⲣϩ ⲉⲑⲃⲉ ϯⲟⲩⲁ‐
ⲙⲉϯ ⲉⲑⲟⲩⲱⲙ ⲛⲥⲱϥ. ⲛⲁϥⲣⲓⲙⲓ ⲇⲉ ⲡⲉ ⲉϥⲉⲣⲟⲙⲟⲗⲟⲅⲉⲓⲛ ⲙⲡⲉⲙⲑⲟ ⲉⲃⲟⲗ
ⲛⲟⲩⲟⲛ ⲛⲓⲃⲉⲛ ⲛⲛⲓⲙⲉⲧⲁⲥⲉⲃⲏⲥ ⲧⲏⲣⲟⲩ ⲉⲧⲁϥⲁⲓⲧⲟⲩ. ⲫⲁⲓ ⲟⲩⲛ ⲁⲩⲧⲁⲗⲟϥ
ⲉϫⲉⲛ ⲟⲩϭⲗⲟϫ ⲁⲩϥⲁⲓ ⲙⲙⲟϥ ϩⲓⲧⲉⲛ ϩⲁⲛ ⲣⲱⲙⲓ (-fol. 44-) ⲁⲩϭⲓⲧϥ ⲉⲣⲁ‐
ⲧⲟⲩ ⲛⲛⲏ ⲉⲑⲟⲩⲁⲃ ⲛⲉⲃⲓⲁⲓⲕ ⲛⲧⲉ ⲫ︦ϯ︦ ⲉⲧϭⲟⲥⲓ. ⲉⲧⲁⲩⲭⲁϥ ⲇⲉ ⲉϧⲣⲏⲓ ⲙⲡⲟⲩ‐
ⲙⲑⲟ ⲁⲩⲉⲣ ⲙⲕⲁϩ ⲛϩⲏⲧ ϧⲉⲛ ⲡϫⲓ ⲛⲑⲣⲟⲩⲛⲁⲩ ⲉⲡⲉϥⲧϩⲉⲙⲕⲟ ⲟⲩⲟϩ ⲛⲁⲩ‐
ϫⲱ ⲙⲙⲟⲥ ⲛⲁϥ ⲡⲉ ϫⲉ ⲟⲩ ⲡⲉ ⲉⲧⲁⲕⲁⲓϥ ϣⲁⲧⲉ ⲫⲁⲓ ϣⲱⲡⲓ ⲙⲙⲟⲕ. ⲛⲑⲟϥ
ⲇⲉ ⲡⲉϫⲁϥ ⲛⲱⲟⲩ ϫⲉ ⲭⲱ ⲛⲏⲓ ⲉⲃⲟⲗ ⲛⲁⲓⲟϯ ⲉⲑⲟⲩⲁⲃ ⲁ ⲡⲭⲥ ⲕⲏⲛ ⲉⲉⲣ
ϣⲟⲣⲡ ⲛⲧⲁⲙⲱⲧⲉⲛ ⲉⲛⲁⲡⲣⲁⲝⲓⲥ ⲉⲧϩⲱⲟⲩ. ⲡⲉϫⲱⲟⲩ ⲛⲁϥ ϫⲉ ϩⲁⲣⲁ ⲁⲕⲥⲟⲩⲱⲛ
(ⲙ)ⲡⲭ︦ⲥ︦ ⲛⲕⲁⲗⲱⲥ ⲟⲩⲟϩ ⲁⲕⲉⲙⲓ ϫⲉ ϥϣⲟⲡ ⲉϥⲛⲁⲩ ⲉⲛⲉⲕϩⲃⲏⲟⲩⲓ ⲉⲧⲉⲕ‐


### 0016

ⲓⲣⲓ ⲙⲙⲱⲟⲩ. ⲡⲉϫⲁϥ ϫⲉ ⲁϩⲏ ⲛⲁⲟ︦ⲥ︦ ⲛⲓⲟϯ ⲁϥϯ ⲥⲃⲱ ⲛⲏⲓ ⲛⲕⲁⲗⲱⲥ. ⲧⲟⲧⲉ
ⲛⲓⲙⲁⲕⲁⲣⲓⲟⲥ ⲛⲁⲑⲗⲩⲧⲏⲥ ⲛⲧⲉ ⲡⲭ︦ⲥ̄ ⲓ︦︦ⲏ︦ⲥ︦ ⲉⲩⲥⲱⲟⲩⲛ ⲙⲫ︦ϯ︦ ϫⲉ ϥⲟⲩⲱϣ ⲁⲛ
ⲛⲧⲉ ϩⲗⲓ ⲧⲁⲕⲟ ⲉϥϭⲁϧⲉⲙ ϧⲉⲛ ⲛⲉϥⲛⲟⲃⲓ ⲁⲗⲗⲁ ⲙⲁⲗⲗⲟⲛ ϥⲟⲩⲱϣ ⲉⲑⲣⲟⲩ‐
ⲕⲟⲧⲟⲩ ϩⲁⲣⲟϥ ⲧⲏⲣⲟⲩ ϧⲉⲛ ⲟⲩⲙⲉⲧⲁⲛⲟⲓⲁ ⲙⲙⲏⲓ ⲁⲩϭⲓ ⲛⲟⲩⲕⲟⲩϫⲓ ⲙⲙⲱⲟⲩ
ⲁⲩⲉⲣⲥⲫⲣⲁⲅⲓⲍⲓⲛ ⲙⲙⲟϥ ϧⲉⲛ ⲫⲙⲏⲓⲛⲓ ⲙⲡⲓⲥⲧⲁⲩⲣⲟⲥ ⲁⲩϫⲟϣϥ ⲉϫⲱϥ
ⲉⲩϫⲱ ⲙⲙⲟⲥ ϫⲉ ⲡⲟ︦ⲥ︦ ⲓ︦ⲏ︦ⲥ︦ ⲡⲭ︦ⲥ︦ ⲡⲓⲥⲏⲓⲛⲓ ⲛⲁⲗⲏⲑⲓⲛⲟⲥ ⲛⲧⲉ ⲛⲉⲛⲯⲩⲭⲏ ⲛⲉⲙ
ⲛⲉⲛⲥⲱⲙⲁ ⲫⲏ ⲉⲑⲟⲩⲱϣ ⲁⲛ ⲛⲧⲉ ϩⲗⲓ ⲧⲁⲕⲟ ϧⲉⲛ ⲛⲏ ⲉⲧⲁⲩⲥⲱⲣⲉⲙ (-verso-)
ⲁⲗⲗⲁ ⲉⲕⲟⲩⲱϣ ⲉⲑⲣⲟⲩⲧⲁⲥⲑⲱⲟⲩ ⲧⲏⲣⲟⲩ ⲉϧⲟⲩⲛ ⲉⲧⲉⲕϣⲁⲓⲣⲓ ⲛⲗⲟⲅⲓⲕⲏ ϩⲓ‐
ⲧⲉⲛ ϯⲙⲉⲧⲁⲛⲟⲓⲁ ⲟⲩⲟϩ ⲛⲧⲉⲥⲟⲩϫⲁⲓ ⲛϫⲉ ⲧⲟⲩⲯⲩⲭⲏ ⲛⲑⲟⲕ ⲉⲕⲉⲉⲣ ⲫⲁϧⲣⲓ
ⲉⲣⲟⲛ ⲧⲏⲣⲟⲩ ϩⲓⲧⲉⲛ ⲛⲓⲉⲩⲭⲏ ⲛⲧⲉ ⲁⲅⲁⲃⲟⲥ ⲡⲉⲛⲓⲱⲧ ⲛⲉⲙ ⲡⲉⲕⲃⲱⲕ ⲙⲁⲕⲁ‐
ⲣⲓⲟⲥ. ⲧⲟⲧⲉ ⲉⲧⲁⲩϫⲱϣ ⲙⲡⲓⲙⲱⲟⲩ ⲉϫⲱϥ ⲟⲩⲟϩ ⲁϥⲟⲩϫⲁⲓ ⲛϫⲉ ⲡⲉϥⲥⲱⲙⲁ
ⲉⲁⲩϣⲱⲟⲩⲓ ⲛϫⲉ ⲛⲉϥⲉⲣϧⲟⲧ ⲁϥⲧⲁⲗϭⲟ. ⲛⲓⲁ(ⲅⲓ)ⲟⲥ ⲇⲉ ⲁⲩⲧⲫⲟϥ ϧⲉⲛ ⲟⲩ‐
ϩⲉⲓⲣⲏⲛⲏ ⲉⲩϫⲱ ⲙⲙⲟⲉ ϥ ϫⲉ ⲓⲥ ϩⲏⲡ(ⲡ)ⲉ ⲁⲕⲟⲩϫⲁⲓ ⲙⲡⲉⲣⲉⲣ ⲛⲟⲃⲓ ϫⲉ
ⲙⲏⲡⲱⲥ ⲛⲧⲉ ⲡϫⲱⲛⲧ ⲙⲫ︦ϯ︦ ⲧⲁϩⲟⲕ ⲟⲛ ⲛⲧⲉⲕⲙⲟⲩ ⲛⲕⲁⲕⲱⲥ. ⲗⲟⲓⲡⲟⲛ ⲁϥϣⲉ
ⲛⲁϥ ⲉⲛⲉⲧⲉⲛⲟⲩϥ ⲉϥⲟⲩⲟϫ ⲟⲩⲟϩ ⲉϥϯ ⲱⲟⲩ ⲙⲫ︦ϯ︦ ⲛⲥⲏⲟⲩ ⲛⲓⲃⲉⲛ ⲉⲑⲃⲉ ⲡⲓⲟⲩ‐
ϫⲁⲓ ⲉⲧⲁϥⲧⲁϩⲟϥ ϩⲓⲧⲉⲛ ⲛⲓϣⲗⲏⲗ ⲛⲧⲉ ⲛⲁⲓⲁⲅⲓⲟⲥ.


### 0017

ⲁⲙⲉⲗⲉⲓ ⲛⲉ ⲟⲩⲟⲛ ⲫⲓⲗⲟⲥⲟⲫⲟⲥ ⲃ︦ ϧⲉⲛ ⲁⲑⲏⲛⲛⲁⲥ ⲛⲉ ϩⲁⲛ ϩⲉⲗⲗⲏⲛⲟⲥ
ⲅⲁⲣ ⲛⲉ ⲉⲧⲁⲩⲥⲱⲧⲉⲙ ⲉⲑⲃⲉ ⲛⲓⲧⲁⲗϭⲟ ⲉⲧϣⲟⲡ ⲉⲃⲟⲗϩⲓⲧⲉⲛ ⲛⲁⲓⲁⲅⲓⲟⲥ ϧⲉⲛ
ϯϫⲟⲙ ⲛⲧⲉ ⲡⲭ︦ⲥ︦ ⲓ︦ⲏ︦ⲥ︦ ⲛⲁⲩϯ ϣⲑⲟⲩⲓⲧ ϧⲁⲣⲱⲟⲩ ⲡⲉ (-fol. 45-) ⲉⲩϫⲱ ⲙⲙⲟⲥ
ϫⲉ ⲛⲓⲙ ϩⲱⲟⲩ ⲛⲉ ⲛⲁⲓ ⲉⲧⲟⲩϫⲱ ⲙⲙⲟⲥ ⲉⲣⲱⲟⲩ ϫⲉ ⲥⲉϩⲓⲟⲩⲓ ⲛⲛⲓⲇⲁⲓⲙⲱⲛ
ⲉⲃⲟⲗϧⲉⲛ ⲛⲓⲣⲱⲙⲓ ⲁⲩϣⲁⲛϣⲗⲏⲗ ⲉϫⲱⲟⲩ ϧⲉⲛ ⲫⲣⲁⲛ ⲙⲡⲭ︦ⲥ︦ ⲙⲏ ⲛⲁⲓ
ⲛⲉ ⲛⲓⲛⲟⲩϯ ⲛⲧⲉ ⲛⲓⲁⲑⲏⲛⲁⲓⲟⲥ. ⲁⲩⲧⲱⲟⲩⲛⲟⲩ ⲇⲉ ⲛϫⲉ ⲛⲓϣⲁⲙϣⲉ ⲉⲓⲇⲱ‐
ⲗⲟⲛ ⲉⲧⲉⲙⲙⲁⲩ ϧⲉⲛ ⲟⲩⲡⲁⲛⲟⲩⲣⲅⲓⲁ ⲛⲭⲣⲟϥ ⲉⲩⲟⲩⲱϣ ⲉⲉⲣⲡⲉⲓⲣⲁⲍⲉⲓⲛ
ⲛⲛⲏ ⲉⲑⲟⲩⲁⲃ ⲁⲩⲱⲗⲕ ⲛⲛⲟⲩϫⲓϫ ⲉⲣⲱⲟⲩ ⲟⲩⲟϩ ⲁⲩⲙⲟⲣⲟⲩ ⲛϩⲁⲛ ⲧⲱⲓⲥ
ⲙⲫⲣⲏϯ ⲛϩⲁⲛ ϭⲁϭⲉⲩ ⲛⲕⲉⲗⲁⲫⲟⲥ ⲟⲩⲟϩ ⲁⲩⲙⲁϣⲑⲁⲙ ⲛⲛⲟⲩⲃⲁⲗ ⲙⲫⲣⲏϯ
ⲛϩⲁⲛ ⲃⲉⲗⲗⲉⲩ ⲉⲩϫⲱ ⲙⲙⲟⲥ ⲙⲡⲁⲓⲣⲏϯ ϫⲉ ⲓⲥϫⲉ ϩⲁⲛ ⲡⲣⲟⲫⲏⲧⲏⲥ ⲛⲉ
ⲟⲩⲟϩ ⲥⲉϩⲓⲟⲩⲓ ⲛⲛⲓⲇⲁⲓⲙⲱⲛ ⲉⲃⲟⲗ ⲥⲉⲛⲁⲉⲙⲓ ⲉⲡⲉⲛϩⲱⲃ. ⲁⲩϭⲓ ⲇⲉ ⲛⲕⲉⲟⲩⲁⲓ
ⲛⲉⲙⲱⲟⲩ ϩⲱⲥ ⲉϥϭⲓ ⲙⲱⲓⲧ ϧⲁϫⲱⲟⲩ ϩⲓ ⲫⲙⲱⲓⲧ. ⲟⲩⲟϩ ⲉⲧⲁⲩⲓ ⲉⲫⲙⲁ
ⲛϣⲱⲡⲓ ⲛⲧⲉ ⲛⲏ ⲉⲑⲟⲩⲁⲃ ⲉⲣⲉ ⲡⲓⲣⲱⲙⲓ ϭⲓ ⲙⲱⲓⲧ ϧⲁϫⲱⲟⲩ ⲁⲩⲕⲱⲗϩ ⲉⲡⲓⲣⲟ.
ⲡⲓⲁⲅⲓⲟⲥ ⲇⲉ ⲇⲟⲙⲉⲧⲓⲟⲥ ⲁϥⲉⲣ ⲟⲩⲱ ⲛⲱⲟⲩ ⲉϥϫⲱ ⲙⲙⲟⲥ ϫⲉ ⲉⲣⲉⲧⲉⲛⲟⲩⲉϣ ⲟⲩ
ⲙⲡⲁⲓⲙⲁ. ⲟⲩⲟϩ ⲡⲉϫⲱⲟⲩ ⲛⲁϥ ϫⲉ ⲉⲧⲁⲛⲓ ϣⲁⲣⲱⲧⲉⲛ ⲛⲓⲁⲅⲓⲟⲥ ⲛⲧⲉ ⲫ︦ϯ︦
ⲉϯϩⲟ ⲉⲣⲱⲧⲉⲛ ϩⲓⲛⲁ ⲛⲧⲉ ⲡⲉⲧⲉⲛⲛⲁⲓ ⲧⲁϩⲟⲛ ⲛⲧⲉⲧⲉⲛϣⲗⲏⲗ ⲉϫⲱⲛ (-verso-)


### 0018

ⲛⲧⲉ ⲡⲓⲟⲩϫⲁⲓ ⲧⲁϩⲟⲛ ϫⲉ ⲟⲩⲏⲓ ⲁⲛⲟⲛ ϩⲁⲛ ϫⲁϭⲟ ⲛⲕⲉⲗⲁⲫⲟⲥ ⲟⲩⲟϩ ⲛⲃⲉⲗⲗⲉ
ⲓⲥ ϩⲏⲡⲡⲉ ⲭⲛⲁⲩ ⲉⲡⲁⲓⲣⲱⲙⲓ ϫⲉ ⲛⲑⲟϥ ⲁϥϭⲓⲙⲱⲓⲧ ⲛⲁⲛ ⲁϥⲉⲛⲧⲉⲛ ⲉⲡⲁⲓⲙⲁ.
ⲡⲉϫⲉ ⲡⲓⲁⲅⲓⲟⲥ ⲇⲟⲙⲉⲧⲓⲟⲥ ⲛⲱⲟⲩ ϧⲉⲛ ⲟⲩⲙⲉⲧⲁⲡⲗⲟⲩⲥ ϫⲉ ⲡⲟ︦ⲥ︦ ⲓ︦ⲏ︦ⲥ︦ ⲡⲭ︦ⲥ︦
ⲉϥⲉⲧⲁⲗϭⲉ ⲑⲏⲛⲟⲩ ⲟⲩⲟϩ ⲉⲥⲉϣⲱⲡⲓ ⲛⲱⲧⲉⲛ ⲙⲫⲣⲏϯ ⲉⲧⲁⲣⲉⲧⲉⲛⲉⲣⲁⲓⲧⲉⲓⲛ.
ⲛϯⲟⲩⲛⲟⲩ ⲇⲉ ⲁⲩⲉⲣ ⲕⲉⲗⲁⲫⲟⲥ ⲟⲩⲟϩ ⲁⲩⲉⲣ ⲃⲉⲗⲗⲉ ⲁ ⲛⲟⲩϫⲓϫ ⲱⲗⲕ
ⲉⲣⲱⲟⲩ ⲉⲁⲩϣⲱⲡⲓ ⲛϫⲁϭⲟ. ⲥⲁⲧⲟⲧⲟⲩ ⲇⲉ ⲁⲩⲱϣ ⲉⲃⲟⲗ ϧⲉⲛ ⲟⲩⲛⲓϣϯ ⲛⲥⲙⲏ
ⲉⲩϫⲱ ⲙⲙⲟⲥ ϫⲉ ⲫⲣⲱⲙⲓ ⲙⲫ︦ϯ︦ ⲛⲁⲓ ⲛⲁⲛ ϫⲉ ⲉⲧⲁⲛⲓ ⲉⲡⲁⲓⲙⲁ ⲉⲉⲣⲡⲉⲓⲣⲁ‐
ⲍⲉⲓⲛ ⲙⲙⲱⲧⲉⲛ. ⲟⲩⲟϩ ⲥⲁⲧⲟⲧⲟⲩ ⲁⲩϩⲓⲧⲟⲩ ϩⲓϫⲉⲛ ⲡⲟⲩϩⲟ ϧⲁⲧⲉⲛ ⲛⲉⲛϭⲁ‐
ⲗⲁⲩϫ ⲛⲛⲏ ⲉⲑⲟⲩⲁⲃ ϧⲉⲛ ⲟⲩⲛⲓϣϯ ⲛⲛⲁϩϯ ⲉⲩϫⲱ ⲙⲙⲟⲥ ϫⲉ ⲧⲉⲛϯ ϩⲟ ⲉⲣⲱ‐
ⲧⲉⲛ ⲛⲁⲓ ⲛⲁⲛ ⲁⲣⲓ ⲃⲟⲏⲑⲉⲓⲛ ⲉⲣⲟⲛ ⲟⲩⲟϩ ⲧⲉⲛⲛⲁϣⲱⲡⲓ ⲛⲭⲣⲓⲥⲧⲓⲁⲛⲟⲥ
ⲓⲥϫⲉⲛ ⲫⲟⲟⲩ ⲉⲃⲟⲗ ⲛⲧⲉⲛⲉⲣ ⲃⲱⲕ ⲙⲡⲭ︦ⲥ︦. ⲟⲩⲟϩ ⲡⲉϫⲉ ⲡⲉⲑⲟⲩⲁⲃ ⲙⲁⲝⲓⲙⲟⲥ
ⲛⲱⲟⲩ ϫⲉ ⲁⲛ ⲧⲉⲧⲉⲛⲛⲁϩϯ ⲧⲁⲫⲙⲏⲓ ϫⲉ ⲓ︦ⲏ︦ⲥ︦ ⲡⲉ ⲡϣⲏⲣⲓ ⲙⲫ︦ϯ︦ ⲡⲉ. ⲛⲑⲱⲟⲩ
ⲇⲉ ⲡⲉϫⲱⲟⲩ ϫⲉ ⲥⲉ ⲧⲉⲛ-(-fol. 46-)ⲛⲁϩϯ ϧⲉⲛ ⲡⲉⲛϩⲏⲧ ⲧⲏⲣϥ ⲛⲉⲛϭⲓⲥⲉⲩ
ⲉⲑⲟⲩⲁⲃ ϫⲉ ⲓ︦ⲏ︦ⲥ︦ ⲡⲉ ⲡϣⲏⲣⲓ ⲙⲫ︦ϯ︦ ⲡⲉ ⲟⲩⲟϩ ⲙⲙⲟⲛ ⲕⲉⲟⲩⲁⲓ ⲉⲃⲏⲗ ⲉⲣⲟϥ.
ⲉⲧⲁⲩⲥⲱⲧⲉⲙ ⲇⲉ ⲉⲛⲁⲓ ⲛϫⲉ ⲛⲓⲉⲃⲓⲁⲓⲕ ⲛⲧⲉ ⲡⲭ︦ⲥ︦ ⲛⲧⲟⲧⲟⲩ ⲛⲛⲏ ⲉⲧⲉⲙⲙⲁⲩ
ⲁⲩϣⲗⲏⲗ ⲉϫⲉⲛ ⲟⲩⲕⲟⲩϫⲓ ⲛⲛⲉϩ ⲁⲩⲧⲏⲓϥ ⲛⲱⲟⲩ ⲉⲩϫⲱ ⲙⲙⲟⲥ ϫⲉ ⲙⲁϣⲉ
ⲛⲱⲧⲉⲛ ⲉⲡⲧⲟⲡⲟⲥ ⲙⲡⲓⲁⲅⲓⲟⲥ ⲗⲉⲱⲛⲧⲓⲟⲥ ⲟⲩⲟϩ ϫⲱⲕⲉⲙ ϧⲉⲛ ⲧⲉϥϣⲱϯ


### 0019

ⲟⲩⲟϩ ⲛⲧⲉⲧⲉⲛⲑⲁϩⲥ ⲑⲏⲛⲟⲩ ϧⲉⲛ ⲡⲁⲓⲕⲟⲩϫⲓ ⲛⲛⲉϩ ⲟⲩⲟϩ ⲧⲉⲛⲛⲁϩϯ ϫⲉ
ⲡⲓⲟⲩϫⲁⲓ ⲛⲁⲧⲁϩⲉ ⲑⲏⲛⲟⲩ. ⲟⲩⲟϩ ⲁⲩⲓⲣⲓ ⲕⲁⲧⲁ ⲫⲣⲏϯ ⲉⲧⲁ ⲛⲓⲁⲅⲓⲟⲥ ϫⲟⲥ
ⲛⲱⲟⲩ ⲟⲩⲟϩ ⲁⲩⲟⲩϫⲁⲓ ϧⲉⲛ ϯϫⲟⲙ ⲛⲧⲉ ⲡⲭ︦ⲥ︦ ⲥⲁⲧⲟⲧⲟⲩ ⲇⲉ ⲁⲩϭⲓ ⲱⲙⲥ
ⲉⲫⲣⲁⲛ ⲙⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ⲟⲩⲟϩ ⲁⲩϣⲱⲡⲓ
ⲛⲭⲣⲓⲥⲧⲓⲁⲛⲟⲥ ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲟⲩⲟϩ ⲁⲩϩⲓ ⲱⲓϣ ⲛϯϣⲫⲏⲣⲓ ⲉⲧⲁⲥ‐
ϣⲱⲡⲓ ⲙⲙⲱⲟⲩ ϧⲉⲛ ⲁⲑⲏⲛⲛⲁⲥ ⲑⲃⲁⲕⲓ ⲛⲛⲓⲁⲑⲏⲛⲛⲁⲓⲟⲥ. ⲓⲥϫⲉⲛ ⲡⲓⲉϩⲟⲟⲩ
ⲇⲉ ⲉⲧⲉⲙⲙⲁⲩ ⲁ ⲟⲩⲙⲏϣ ϣⲱⲡⲓ ⲛⲭⲣⲓⲥⲧⲓⲁⲛⲟⲥ ⲉⲃⲟⲗⲛϧⲏⲧⲟⲩ ⲉⲩϯ ⲱⲟⲩ
ⲙⲫ︦ϯ︦ ⲡⲓⲗⲟⲅⲟⲥ ⲉⲧⲁϥϭⲓ ⲥⲁⲣⲝ. ⲉϣⲱⲡ ⲅⲁⲣ ⲁⲓϣⲁⲛⲟⲩⲱϣ ⲉϫⲱ ⲙⲡⲁϣⲁⲓ
ⲛⲛⲓϩⲙⲟⲧ ⲛⲧⲁⲗϭⲟ ⲉⲧⲁ ⲫ︦ϯ︦ ⲉⲣⲉⲛⲉⲣⲅⲉⲓⲛ ⲙⲙⲱⲟⲩ (-verso-) ϧⲉⲛ ⲛⲉⲛ‐
ϫⲓϫ ⲛⲛⲁⲓⲁⲅⲓⲟⲥ ⲡⲓⲥⲏⲟⲩ ⲛⲁⲙⲟⲩⲛⲕ ⲉⲣⲟⲓ ⲉⲓⲥⲁϫⲓ.
ⲟⲩⲡⲣⲁⲅⲙⲁⲧⲉⲩⲥ ⲅⲁⲣ ⲛⲧⲉ ϯⲃⲁⲕⲓ ⲁⲛⲧⲓⲟⲭⲓⲁ ⲉϥϩⲏⲗ ϣⲁ ⲛⲁⲓⲙⲁⲕⲁ‐
ⲣⲓⲟⲥ ⲕⲁⲧⲁ ⲕⲟⲩϫⲓ ⲉϥϭⲓ ⲥⲙⲟⲩ ⲉⲃⲟⲗϩⲓⲧⲟⲧⲟⲩ ⲉϥⲱⲗⲓ ⲙⲡⲟⲩϩⲱⲃ ⲛϫⲓϫ
ⲛⲧⲟⲧⲟⲩ ⲛⲁⲩⲉⲣ ϩⲱⲃ ⲅⲁⲣ ⲡⲉ ⲉⲛⲓⲥⲭⲟⲗⲁⲕⲓ ⲡⲉ ⲉⲃⲟⲗ ⲟⲩⲛ ϩⲓⲧⲉⲛ ⲡⲉϥⲛⲁϩϯ
ⲉϧⲟⲩⲛ ⲉⲛⲁⲓⲁⲅⲓⲟⲥ ⲁϥⲥϧⲉ ⲡⲟⲩⲣⲁⲛ ⲉⲛⲓⲥⲭⲟⲗⲁⲕⲓ ⲁϥⲁⲓⲧⲟⲩ ⲛⲥⲧⲁⲩⲣⲟⲥ
ϧⲉⲛ ⲑⲙⲏϯ ⲙⲡⲓⲗⲁⲟⲩⲟ ⲛⲧⲉ ⲡⲉϥϫⲟⲓ ϧⲉⲛ ⲡⲓϣϭⲏⲣ ⲛⲧⲉ ⲫⲓⲟⲙ. ⲁⲥϣⲱⲡⲓ
ⲇⲉ ⲉⲣⲉ ⲡⲓϫⲟⲓ ⲭⲏ ϧⲉⲛ ⲕⲱⲛⲥⲧⲁⲛⲧⲛⲟⲩⲡⲟⲗⲓⲥ ⲛⲉⲙ ⲧⲉϥⲡⲣⲁⲅⲙⲁⲧⲉⲓⲁ


### 0020

ⲉⲡϫⲓ ⲛⲧⲏⲓⲥ ⲉⲃⲟⲗ ⲙⲙⲁⲩ ⲉⲡⲉⲓⲇⲏ ⲅⲁⲣ ⲉⲣⲉ ⲡⲓⲗⲩⲙⲏⲛ ⲛⲧⲉ ϯⲃⲁⲕⲓ ⲉϥ‐
ⲭⲏ ϧⲉⲛ ⲧⲉⲥⲙⲏϯ ⲥⲁϧⲟⲩⲛ ⲛⲛⲓⲥⲟⲃⲧ ⲧⲟⲧⲉ ⲟⲩⲛ ⲉⲧⲁϥⲉⲙⲓ ⲛϫⲉ ⲡⲟⲩⲣⲟ ϫⲉ
ⲥⲉⲛⲁϣⲧ ⲛϫⲉ ⲛⲓϩⲱⲓⲙⲓ ⲁϥⲟⲩⲁϩⲥⲁϩⲛⲓ ⲉⲑⲣⲟⲩⲭⲱ ⲛⲛⲓⲉϫⲏⲟⲩ ⲥⲁϧⲟⲩⲛ ⲉⲑⲃⲉ
ⲡⲉⲛϣⲟⲧ ⲛⲛⲓϩⲱⲓⲙⲓ ⲛⲧⲉ ⲫⲓⲟⲙ ϩⲁⲛ ϩⲁⲗⲏⲥⲓⲥ ⲅⲁⲣ ⲛⲃⲉⲛⲓⲡⲓ ⲉⲧϭⲟⲗⲕ ⲉⲡⲓⲙⲁ
ⲛⲓ ⲉϧⲟⲩⲛ ⲗⲟⲓⲡⲟⲛ ⲁⲩⲥⲉⲕ ⲛⲓϩⲁⲗⲏⲥⲓⲥ ⲁⲩⲭⲁ ⲛⲓⲉϫⲏⲟⲩ ⲉϧⲟⲩⲛ ⲉⲑⲣⲟⲩⲙⲟⲛⲓ
ϧⲉⲛ ⲡⲓⲗⲩⲙⲏⲛ. ⲉⲧⲓ ⲟⲩⲛ ⲉϥⲟϩⲓ ⲉⲣⲁⲧϥ ⲛϫⲉ ⲡⲓⲙⲁ‐(-fol. 47-) ⲅⲓⲥⲧⲣⲓⲁⲛⲟⲥ
ⲛⲧⲉ ⲡⲟⲩⲣⲟ ⲛⲉⲙ ⲛⲓⲙⲁⲧⲟⲓ ⲛⲁϥϭⲓ ϩⲣⲁϥ ⲡⲉ ⲛⲉⲙ ⲛⲓⲉϫⲏⲟⲩ ⲉⲑⲙⲟⲛⲓ ⲉϧⲟⲩⲛ
ⲉⲧⲁϥϯ ϩⲑⲏϥ ⲟⲩⲛ ⲁϥⲛⲁⲩ ⲉⲡⲓⲗⲁⲟⲩⲟ ⲛⲧⲉ ⲡⲓϫⲟⲓ ⲉⲧⲁⲛⲉⲣ ϣⲟⲣⲡ ⲛⲫⲓⲣⲓ ⲉⲣⲟϥ
ⲉϥⲫⲟⲣϣ ⲉⲃⲟⲗϩⲓϫⲉⲛ ⲡⲕⲁϩⲓ ⲉⲣⲉ ⲛⲓⲛⲉϥ ⲑⲱⲣⲡ ⲉⲣⲟϥ ⲕⲁⲧⲁ ⲧⲟⲩⲥⲩⲛⲏⲑⲓⲁ
ⲁϥⲛⲁⲩ ⲉⲫⲣⲁⲛ ⲙⲡⲓⲁⲅⲓⲟⲥ ⲙⲁⲝⲓⲙⲟⲥ ⲛⲉⲙ ⲇⲟⲙⲉⲧⲓⲟⲥ ⲉⲩⲥϧⲏⲟⲩⲧ ⲉⲛⲓⲥⲭⲟ‐
ⲗⲁⲕⲓ ⲉⲧⲧⲟⲓ ⲉⲡⲓⲗⲁⲟⲩⲟ. ⲉⲧⲁϥⲱϣ ⲇⲉ ⲛⲛⲓⲣⲁⲛ ⲁϥⲉⲣⲕⲉⲗⲉⲩⲉⲓⲛ ⲉⲑⲣⲟⲩ‐
ⲙⲟⲩϯ ⲛⲁϥ ⲉⲛⲓⲛⲉϥ ⲟⲩⲟϩ ⲡⲉϫⲁϥ ⲛⲱⲟⲩ ϫⲉ ⲟⲩ ⲛⲉ ⲛⲁⲓⲣⲁⲛ ⲉⲧⲥϧⲏⲟⲩⲧ
ϩⲓ ⲛⲉⲧⲉⲛⲗⲁⲟⲩⲟ. ⲡⲉϫⲱⲟⲩ ⲛⲁϥ ϫⲉ ϩⲁⲛ ⲣⲱⲙⲓ ⲛⲉ ⲉⲩⲟⲩⲁⲃ ⲛⲧⲉ ⲫ︦ϯ︦ ⲉⲩ-
ϣ(ⲟ)ⲡ ϧⲉⲛ ⲧⲉⲛⲭⲱⲣⲁ. ⲡⲉϫⲉ ⲡⲓⲙⲁⲅⲓⲥⲧⲣⲓⲁⲛⲟⲥ ⲛⲱⲟⲩ ϫⲉ ⲫⲱⲟⲩ ⲡⲉ
ⲡⲁⲓϫⲟⲓ. ⲡⲉϫⲱⲟⲩ ⲛⲁϥ ϫⲉ ⲙⲙⲟⲛ ⲁⲗⲗⲁ ⲉⲧⲁⲛⲥϧⲉ ⲛⲟⲩⲣⲁⲛ ⲉⲡⲉⲛⲗⲁⲟⲩⲟ
ⲉⲑⲃⲉ ⲛⲟⲩϣⲗⲏⲗ ⲉⲑⲟⲩⲁⲃ ϩⲓⲛⲁ ⲛⲧⲉⲛϫⲓⲙⲓ ⲛⲟⲩⲃⲟⲏⲑⲓⲁ ⲛⲉⲙ ⲡⲉⲛϫⲟⲓ ϧⲉⲛ
ⲡⲉⲛϫⲓ ⲛⲉⲣ ϩⲱⲧ. ⲡⲉϫⲁϥ ⲛⲱⲟⲩ ϫⲉ ⲧⲉⲧⲉⲛⲥⲱ ⲟⲩⲛ ⲙⲡⲟⲩⲙⲁ ⲛⲕⲁⲗⲱⲥ ϫⲉ


### 0021

ⲉⲩϣⲟⲡ ⲑⲱⲛ. ⲡⲉϫⲱⲟⲩ ⲛⲁϥ ϫⲉ ⲥⲉ ⲡⲉⲛⲟ︦ⲥ︦ ⲉⲩϣⲟⲡ ϧⲉⲛ ϯⲥⲩⲣⲓⲁ (-verso-)
ⲧⲟⲧⲉ ⲡⲓⲙⲁⲅⲓⲥⲧⲣⲓⲁⲛⲟⲥ ⲁϥⲟⲩⲁϩⲥⲁϩⲛⲓ ⲉⲥⲱⲛϩ ⲛⲛⲓⲛⲉϥ ⲛⲥⲉϭⲓⲧⲟⲩ ϣⲁ
ⲡⲟⲩⲣⲟ ⲛⲑⲟϥ ⲇⲉ ⲡⲓⲙⲁⲅⲓⲥⲧⲣⲓⲁⲛⲟⲥ ⲁϥⲉⲣ ϣⲟⲣⲡ ⲉⲣⲱⲟⲩ ⲁϥⲧⲁⲙⲉ ⲡⲟⲩⲣⲟ
ⲟⲩⲟϩ ⲁϥϫⲟⲥ ⲉⲑⲣⲟⲩⲉⲛⲁⲩ ⲙⲡⲉϥⲙⲑⲟ ⲫⲣⲁⲛ ⲇⲉ ⲙⲡⲓⲟⲩⲣⲟ ⲉⲧⲉⲙⲙⲁⲩ ⲡⲉ
ⲑⲉⲟⲇⲱⲥⲓⲟⲥ ⲉⲡⲉⲓⲇⲏ ⲅⲁⲣ ⲑⲉⲟⲇⲱⲥⲓⲟⲥ ⲛⲉ ⲟⲩⲅⲉⲛⲟⲥ ⲛⲣⲉⲙ ⲛⲭⲏⲙⲓ ⲡⲉ
ⲫⲁⲓ ⲇⲉ ⲛⲁϥⲟⲓ ⲛⲥⲧⲁⲩⲗⲓⲧⲏⲥ ⲛϣⲟⲣⲡ ⲡⲉ ⲉⲛⲓϩⲑⲱⲣ ⲛⲧⲉ ⲟⲩⲁⲗⲉⲛⲧⲓⲛⲟⲥ
ⲡⲟⲩⲣⲟ ⲁⲓⲥⲁϫⲓ ⲉⲫⲓⲱⲧ ⲛⲛⲁⲓⲁⲅⲓⲟⲥ. ⲉⲧⲁϥⲛⲁⲩ ⲅⲁⲣ ⲉⲑⲉⲟⲇⲱⲥⲓⲟⲥ ϫⲉ ⲟⲩ‐
ⲣⲱⲙⲓ ⲛϫⲱⲣⲓ ⲡⲉ ⲁϥⲑⲁϣϥ ⲛⲁⲣⲭⲱⲛ ⲉϫⲉⲛ ⲛⲓⲙⲁ ⲛϭⲱⲣⲉⲙ ⲧⲏⲣⲟⲩ ⲛⲧⲉ
ⲛⲓϩⲑⲱⲣ ⲉⲧϧⲉⲛ ⲡⲁⲙⲁϩⲓ ⲛⲧⲉ ⲧⲉϥⲙⲉⲧⲟⲩⲣⲟ. ⲗⲟⲓⲡⲟⲛ ⲁ ⲛⲁⲓⲁⲅⲓⲟⲥ ⲛⲉ
ⲁⲩⲉⲣⲁⲡⲟⲧⲁⲍⲉⲥⲑⲁⲓ ⲙⲡⲁⲓⲕⲟⲥⲙⲟⲥ ⲉⲧⲓ ⲉϥⲟⲛϧ ⲛϫⲉ ⲟⲩⲁⲗⲉⲛⲧⲓⲛⲟⲥ ⲡⲟⲩⲓⲱⲧ
ⲛⲟⲩⲣⲟⲙⲡⲓ ⲛⲉϩⲟⲟⲩ ⲉⲧⲁϥⲙⲧⲟⲛ ⲇⲉ ⲙⲙⲟϥ ⲛϫⲉ ⲟⲩⲁⲗⲉⲛⲧⲓⲛⲟⲥ ⲡⲟⲩⲣⲟ
ⲕⲁⲧⲁ ⲛⲓϩⲁⲡ ⲙⲙⲏⲓ ⲛⲁⲧϣϧⲉⲧϧⲱⲧⲟϥ ⲛⲧⲉ ⲫ︦ϯ︦ ⲛⲉⲙ ⲡϯⲙⲁϯ ⲛϯⲥⲩⲅ‐
ⲕⲗⲏⲧⲟⲥ ⲧⲏⲣⲥ ⲁⲩⲑⲱϣ ⲛⲑⲉⲟⲇⲱⲥⲓⲟⲥ ⲡⲓⲥⲧⲁⲩⲗⲓⲧⲏⲥ ⲛⲟⲩⲣⲟ ⲛⲧϣⲉⲃⲓⲱ
ⲛⲟⲩⲁⲗⲉⲛⲧⲓⲛⲟⲥ ⲫⲓⲱⲧ ⲛⲛⲁⲓⲙⲁⲕⲁⲣⲓⲟⲥ ⲙⲁⲝⲓⲙⲟⲥ ⲛⲉⲙ ⲇⲟⲙⲉⲧⲓⲟⲥ ⲕⲁⲧⲁ
ⲫⲣⲏϯ ⲉⲧⲥϧⲏⲟⲩⲧ ϧⲉⲛ ⲛⲓⲓⲥⲧⲟⲣⲓⲁ ⲛⲧⲉ ϯⲉⲕⲕⲗⲏⲥⲓⲁ. ⲉⲧⲁϥⲛⲁⲩ ⲇⲉ ⲉⲛⲓ‐
ⲛⲉϥ ⲉⲩⲥⲟⲛϩ ⲛϫⲉ ⲡⲓⲟⲩⲣⲟ ⲛⲉⲩⲥⲉⲃⲏⲥ ⲑⲉⲟⲇⲱⲥⲓⲟⲥ ⲁϥⲑⲣⲟⲩⲃⲟⲗⲟⲩ ⲉⲃⲟⲗ


### 0022

ⲉϥϫⲱ ⲙⲙⲟⲥ ϫⲉ ⲛⲁϣⲫⲏⲣ ⲙⲙⲉⲗⲟⲥ ⲛⲉ ⲙⲡⲉⲣⲭⲁⲩ ⲉⲩⲥⲟⲛϩ ϫⲉ ϩⲓⲛⲁ
ⲙⲏⲡⲟⲧⲉ ⲛⲧⲉ ⲡⲭ︦ⲥ︦ ϫⲱⲛⲧ ⲉⲣⲟⲓ. ⲟⲩⲟϩ ⲡⲉϫⲉ ⲡⲓϣⲁⲙϣⲉ ⲛⲟⲩϯ ⲛⲟⲩⲣⲟ
ⲛⲱⲟⲩ ϧⲉⲛ ⲟⲩⲙⲉⲧⲣⲉⲙⲣⲁⲩϣ ϫⲉ ⲛⲓⲙ ⲛⲉ ⲛⲓⲣⲱⲙⲓ ⲛⲧⲉ ⲫ︦ϯ︦ ⲉⲧⲉⲧⲉⲛⲥⲱⲟⲩⲛ
ⲙⲙⲱⲟⲩ. ⲡⲉϫⲱⲟⲩ ϫⲉ ⲡⲉⲛⲟ︦ⲥ︦ ⲙⲁⲝⲓⲙⲟⲥ ⲡⲉ ⲡⲓⲟⲩⲁⲓ ⲟⲩⲟϩ ⲇⲟⲙⲉⲧⲓⲟⲥ ⲡⲉ
ⲡⲓⲕⲉⲟⲩⲁⲓ. ⲡⲁⲗⲓⲛ ⲇⲉ ⲟⲛ ⲡⲉϫⲁϥ ⲛⲱⲟⲩ ϫ(ⲉ)... ϩⲁⲛ ⲁϣ ⲛⲣⲏϯ ⲛⲉ ϧⲉⲛ
ⲡⲟⲩⲥⲙⲟⲧ. ⲁⲩⲉⲣ ⲟⲩⲱ ⲡⲉϫⲱⲟⲩ ⲛⲁϥ ϫⲉ ⲡⲓⲟⲩⲁⲓ ⲙⲉⲛ ⲟⲩⲣⲱⲙⲓ ⲉϥⲟⲩⲏⲛ
ⲡⲉ ⲉⲁϥⲉⲣ ⲙⲟⲣⲧ ⲡⲓⲭⲉⲧ ⲇⲉ ⲟⲩⲣⲱⲙⲓ ⲉϥϣⲏⲟⲩ ⲛⲟⲩⲕⲟⲩϫⲓ ⲉⲁϥϩⲓ ⲁⲣⲭⲏ
ⲙⲙⲟⲣⲧ. ⲧⲟⲧⲉ ⲁϥⲉⲣⲕⲉⲗⲉⲩⲉⲓⲛ ⲛϫⲉ ⲡⲟⲩⲣⲟ ⲉⲑⲣⲟⲩϯ ⲛⲅ̄ ⲛⲗⲟⲩⲕⲟϫⲓ
ⲙⲫⲟⲩⲁⲓ ⲫⲟⲩⲁⲓ ⲛⲛⲓⲛⲉϥ ⲛⲥⲉⲭⲁⲩ ⲉⲃⲟⲗ ϧⲉⲛ ⲟⲩϩⲉⲓⲣⲏⲛⲏ. ⲙⲉⲛⲉⲛⲥⲁ ⲛⲁⲓ
ⲁ ⲡⲟⲩⲣⲟ ⲙⲟⲩϯ ⲉⲟⲩⲥⲓⲟⲩⲣ ⲛⲧⲉ ⲡⲓⲡⲁⲗⲁⲧⲓⲟⲛ ⲉⲡⲉϥⲣⲁⲛ ⲡⲉ ⲙⲁⲣⲕⲉⲗⲗⲟⲥ
ⲉⲟⲩⲣⲱⲙⲓ ⲡⲉ ⲉϥϫⲟⲣ ϧⲉⲛ ⲛⲉϥϩⲃⲏⲟⲩⲓ ⲙⲫⲣⲏϯ ⲛⲟⲩⲙⲟⲩⲓ (-verso-) ⲁϥϯ
ⲛⲁϥ ⲛⲟⲩϩⲑⲟ ⲉϥϫⲟⲣ ϧⲉⲛ ⲡⲉϥϫⲟⲙ ⲟⲩⲟϩ ⲁϥⲟⲩⲟⲣⲡϥ ⲉϯⲥⲩⲣⲓⲁ ϩⲓⲛⲁ
ⲛⲧⲉϥⲉⲙⲓ ⲉⲡⲧⲁϫⲣⲟ ⲙⲡⲓϩⲱⲃ ⲙⲡⲁⲧⲉϥⲧⲁⲙⲉ ϯⲟⲩⲣⲱ. ⲟⲩⲟϩ ⲙⲉⲛⲉⲛⲥⲁ
ϩⲁⲛ ⲕⲟⲩϫⲓ ⲇⲉ ⲛⲉϩⲟⲟⲩ ⲁϥⲕⲧⲟϥ ⲛϫⲉ ⲡⲓⲥⲓⲟⲩⲣ ϣⲁ ⲡⲟⲩⲣⲟ ⲉϥϫⲱ ⲙⲙⲟⲥ
(ϫ)ⲉ ⲥⲉϣⲓⲛⲓ ⲉⲣⲟⲕ ⲉⲙⲁϣⲱ ⲛϫⲉ ⲛⲉⲕϣⲏⲣⲓ ⲛⲉⲛⲥⲛⲏⲟⲩ ⲛϯⲟⲩⲣⲱ. ⲡⲟⲩⲣⲟ
ⲇⲉ ⲑⲉⲟⲇⲱⲥⲓⲟⲥ ⲁϥⲣⲁϣⲓ ⲉⲙⲁϣⲱ ⲟⲩⲟϩ ⲁϥⲧⲁⲙⲉ ϯⲟⲩⲣⲱ ⲛⲉⲙ ⲛⲏ ⲉⲧⲉ‐
ⲛⲟⲩϥ ⲧⲏⲣⲟⲩ ⲟⲩⲟϩ ⲁϥϣⲱⲡⲓ ⲛϫⲉ ⲟⲩⲛⲓϣϯ ⲛⲣⲁϣⲓ ϧⲉⲛ ⲡⲓⲡⲁⲗⲁⲧⲓⲟⲛ


### 0023

ⲧⲏⲣϥ ⲙⲡⲓⲉϩⲟⲟⲩ ⲉⲧⲉⲙⲙⲁⲩ. ⲉⲓⲧⲁ ⲙⲉⲛⲉⲛⲥⲁ ϩⲁⲛ ⲕⲟⲩϫⲓ ⲛⲉϩⲟⲟⲩ ⲁ
ⲡⲟⲩⲣⲟ ⲟⲩⲱⲣⲡ ⲛⲧⲟⲩⲙⲁⲩ ⲛⲉⲙ ⲧⲟⲩⲥⲱⲛⲓ ⲉϯⲥⲩⲣⲓⲁ ϫⲉ ⲛⲧⲟⲩⲛⲁⲩ ⲉⲣⲱⲟⲩ
ⲟⲩⲟϩ ⲛⲧⲉ ⲡⲟⲩϩⲏⲧ ⲑⲱⲧ. ⲟⲩⲟϩ ⲁ ⲛⲓⲁⲅⲓⲟⲥ ϯ ⲛⲟⲙϯ ⲛⲧⲟⲩⲙⲁⲩ ⲛⲉⲙ ⲧⲟⲩ‐
ⲥⲱⲛⲓ ⲟⲩⲟϩ ⲁⲩⲧⲫⲱⲟⲩ ϧⲉⲛ ⲟⲩϩⲉⲓⲣⲏⲛⲏ. ⲓⲥϫⲉⲛ ⲡⲓⲉϩⲟⲟⲩ ⲉⲧⲉⲙⲙⲁⲩ ⲁ
ⲛⲓⲣⲉⲙ ⲕⲱⲛⲥⲧⲁⲛⲧⲓⲛⲟⲩⲡⲟⲗⲓⲥ ⲉⲣ ⲡⲓⲙⲱⲓⲧ ϣⲁ ⲛⲓⲁⲅⲓⲟⲥ ⲙⲙⲁ ⲛⲙⲟϣⲓ
ⲙⲡⲓⲉϩⲟⲟⲩ ⲛⲉⲙ ⲡⲓⲉϫⲱⲣϩ ⲉⲩⲓⲛⲓ ϣⲁⲣⲱⲟⲩ ⲛⲟⲩⲟⲛ ⲛⲓⲃⲉⲛ ⲉⲧϣⲱⲛⲓ ⲛⲟⲩ‐
ⲙⲏϣ ⲛⲣⲏϯ ⲛⲉⲙ ⲛⲏ ⲉⲧⲉ ⲛⲓⲡ︦ⲛ︦ⲁ︦ ⲛⲁⲕⲁⲑⲁⲣⲧⲟⲛ (-fol. 49-) ⲛⲉⲙⲱⲟⲩ ⲟⲩⲟϩ
ⲁⲩϣⲁⲛⲫⲟϩ ϣⲁ ⲛⲁⲓⲙⲁⲕⲁⲣⲓⲟⲥ ⲛⲧⲟⲩⲧⲱⲃϩ ⲉϫⲱⲟⲩ ϣⲁⲩⲧⲁⲗϭⲟ ϩⲓⲧⲉⲛ
ⲡⲓϩⲙⲟⲧ ⲛⲧⲉ ⲫϯ ⲡⲉⲛⲥⲱⲧⲏⲣ.
ⲙⲉⲛⲉⲛⲥⲁ ⲛⲁⲓ ⲁ ⲡⲟⲩⲣⲟ ⲑⲉⲟⲇⲱⲥⲓⲟⲥ (ϩ)ⲱⲗ ϣⲁⲣⲱⲟⲩ ϩⲱϥ ϣⲁⲧⲉϥϭⲓ
ⲡⲟⲩⲥⲙⲟⲩ ⲛⲉⲙ ⲡⲟⲩⲥⲟϭⲛⲓ ⲟⲩⲟϩ ⲛⲧⲟⲩⲧⲥⲁⲃⲟϥ ⲉϩⲁⲛ ϩⲃⲏⲟⲩⲓ ⲉⲛⲁⲛⲉⲩ
ⲟⲩⲟϩ ⲉⲩⲉⲣ ⲛⲟϥⲣⲓ ⲛⲧⲉϥⲙⲉⲧⲟⲩⲣⲟ ⲛⲉⲙ ϯⲉⲕⲕⲗⲏⲥⲓⲁ ⲛⲧⲉ ⲫ︦ϯ︦. ϧⲉⲛ ⲛⲁⲓ
ⲇⲉ ⲁⲩⲧⲁϫⲣⲟϥ ⲛⲕⲁⲗⲱⲥ ϧⲉⲛ ⲧⲁϫⲣⲟ ⲛ(ⲓⲃ)ⲉⲛ ⲉⲁⲣⲉϩ ⲫⲛⲁϩϯ ⲛⲛⲓⲕⲁⲓⲁ
ⲟⲩⲟϩ ⲉⲑⲣⲉϥⲭⲁ ⲛⲓϣⲏⲣⲓ ⲛⲧⲉ ϯⲉⲕⲕⲗⲏⲥⲓⲁ ⲉⲩⲧⲁⲓⲏⲟⲩⲧ ⲛⲧⲟⲧϥ ϧⲉⲛ ⲧⲓⲙⲏ
ⲛⲓⲃⲉⲛ. ⲗⲟⲓⲡⲟⲛ ⲉⲧⲁⲩⲟⲩⲱⲛϩ ⲉⲃⲟⲗ ⲛϫⲉ ⲛⲁⲓⲙⲁⲕⲁⲣⲓⲟⲥ ⲉⲩϯ ⲥⲱⲓⲧ ϧⲉⲛ
ϯⲥⲩⲣⲓⲁ ⲧⲏⲣⲥ ⲛⲁϥϩⲏⲗ ϣⲁⲣⲱⲟⲩ ⲛⲑⲟϥ ⲡⲓⲉⲩⲥⲉⲃⲏⲥ ⲛⲟⲩⲣⲟ ⲑⲉⲟⲇⲱⲥⲓⲟⲥ
ⲉϥⲥⲟϭⲛⲓ ⲉⲣⲱⲟⲩ ⲟⲩⲟϩ ⲉϥⲉⲣⲁⲡⲟⲗⲁⲩⲉⲓⲛ ⲛⲧⲟⲩⲥⲃⲱ ⲛⲉⲙ ⲡⲟⲩⲥⲙⲟⲩ ϩⲱⲥ


### 0024

ⲉϥⲥⲱⲟⲩⲛ ϫⲉ ⲑⲱⲟⲩ ⲧⲉ ϯⲙⲉⲧⲟⲩⲣⲟ ϫⲉ ⲅⲁⲣ ⲁⲗⲏⲑⲱⲥ ⲁ ⲡⲉϥϫⲓ ⲛϩⲓ ⲕⲟⲧ
ϣⲱⲡⲓ ⲛⲁϥ ⲛϩⲏⲟⲩ ⲛⲉⲙ ⲟⲩⲥⲃⲱ ⲉⲥⲟⲓ ⲛⲛⲓϣϯ ⲟⲩⲟϩ ϩⲓⲛⲁ ⲛⲧⲁϫⲟⲥ ϧⲉⲛ
ⲟⲩϣⲱⲧ ⲉⲃⲟⲗ ⲉⲧⲁϥϣⲁϣⲛⲓ ⲉⲧⲁⲓⲛⲓϣϯ ⲙⲙⲉⲧⲙⲁⲓ ⲛⲟⲩϯ ⲛⲉⲙ ⲧⲁⲓⲧⲓⲙⲏ
ⲙⲡⲁⲓⲣⲏϯ ⲉϧⲟⲩⲛ ⲉⲛⲓⲉⲕⲕⲗⲏⲥⲓⲁ ⲛⲧⲉ ⲫ︦ϯ︦ (-verso-) ϩⲓⲧⲉⲛ ⲛⲓⲥⲃⲱⲟⲩⲓ ⲛⲱⲛϧ
ⲛⲧⲉ ⲛⲁⲓⲙⲁⲕⲁⲣⲓⲟⲥ ⲟⲩ ⲙⲟⲛⲟⲛ ⲛⲑⲟϥ ⲙⲙⲁⲩⲁⲧϥ ⲁⲗⲗⲁ ⲛⲉⲙ ⲛⲉϥⲕⲉ‐
ϣⲏⲣⲓ ⲟⲛ ⲁⲣⲕⲁⲇⲓⲟⲥ ⲛⲉⲙ ⲟⲛⲟⲣⲓⲟⲥ ⲉⲧⲁϥⲉⲛⲟⲩ ⲉⲡϣⲱⲓ ϩⲱⲟⲩ ϧⲉⲛ ⲧⲁⲓ‐
ⲙⲉⲧⲉⲩⲥⲉⲃⲏⲥ ⲙⲡⲁⲓⲣⲏϯ ⲉⲃⲟⲗϩⲓⲧⲟⲧⲥ ⲛϯⲥⲃⲱ ⲛⲉⲙ ⲡⲓⲥⲙⲟⲧ ⲉⲑⲛⲁⲛⲉϥ ⲛⲧⲉ
ⲛⲁⲓⲙⲁⲕⲁⲣⲓⲟⲥ ⲡⲁⲓⲣⲏϯ ⲟⲛ ⲡⲓⲕⲉⲕⲟⲩϫⲓ ⲑⲉⲟⲇⲱⲥⲓⲟⲥ. ⲙⲉⲛⲉⲛⲥⲁ ⲛⲁⲓ ⲇⲉ
ⲁϥⲙⲧⲟⲛ ⲙⲙⲟϥ ⲛϫⲉ ⲡⲓⲁⲣⲭⲓⲉⲡⲓⲥⲕⲟⲡⲟⲥ ⲛⲧⲉ ⲕⲱⲛⲥⲧⲁⲛⲧⲓⲛⲟⲩⲡⲟⲗⲓⲥ
ⲟⲩⲟϩ ⲡⲁⲛⲧⲱⲥ ⲉⲃⲟⲗϩⲓⲧⲉⲛ ⲧⲁⲓⲗⲱⲓϫⲓ ⲑⲁⲓ ⲉⲧⲁ ⲫ︦ϯ︦ ⲉⲛ ⲛⲁⲓⲁⲅⲓⲟⲥ ⲉϣⲓⲏⲧ
ⲙⲫⲣⲏϯ ⲛⲓⲁⲕⲱⲃ ⲡⲓⲡⲁⲧⲣⲓⲁⲣⲭⲏⲥ ⲉⲧⲁϥⲓ ⲉϧⲣⲏⲓ ⲉⲭⲏⲙⲓ ⲙⲡⲓⲥⲏⲟⲩ ⲛⲑ‐
ⲗⲱⲓϫⲓ ⲙⲡⲓϩⲃⲱⲛ ϣⲁⲧⲉϥⲉⲣ ⲟⲩⲗⲁⲟⲥ ⲉϥⲟϣ ⲛⲧⲉϥⲙⲁϩ ⲡϩⲟ ⲙⲡⲕⲁϩⲓ ⲡⲁⲓ‐
ⲣⲏϯ ϩⲱⲟⲩ ⲛⲁⲓⲁⲅⲓⲟⲥ ⲙⲁⲝⲓⲙⲟⲥ ⲛⲉⲙ ⲇⲟⲙⲉⲧⲓⲟⲥ ⲛⲁⲓϣⲏⲣⲓ ⲛⲟⲩⲣⲟ. ⲛϯ‐
ⲛⲁⲕⲏⲛ ⲁⲛ ⲉⲓⲙⲟⲩϯ ⲉⲣⲱⲟⲩ ϫⲉ ϣⲏⲣⲓ ⲛⲟⲩⲣⲟ ϣⲁⲧⲉ ⲟⲩⲟⲛ ⲛⲓⲃⲉⲛ ⲉⲙⲓ
ⲉⲡⲟⲩⲁⲝⲓⲱⲙⲁ ⲛⲉⲙ ⲡⲟⲩⲃⲓⲟⲥ ⲛⲁⲅⲅⲉⲗⲓⲕⲟⲛ ⲛⲉⲙ ⲛⲟⲩⲡⲟⲗⲓⲧⲉⲓⲁ ⲉⲡⲉⲓⲇⲏ
ⲁⲩⲙⲉⲛⲣⲉ ⲡⲭ︦ⲥ︦ ⲉϩⲟⲧⲉ ⲡⲱⲟⲩ ⲧⲏⲣϥ ⲙⲡⲁⲓⲕⲟⲥⲙⲟⲥ ⲟⲩⲟϩ ⲁⲩⲟⲩⲁϩⲟⲩ ⲛⲥⲱϥ
ϧⲉⲛ (-fol. 50-) ⲡⲟⲩϩⲏⲧ ⲧⲏⲣϥ ⲉⲑⲃⲉ ⲫⲁⲓ ⲛⲑⲟϥ ϩⲱϥ ⲡⲭ︦ⲥ︦ ⲓ︦ⲏ︦ⲥ︦ ⲁϥϯ ⲱⲟⲩ


### 0025

ⲛⲱⲟⲩ ⲁⲗⲏⲑⲱⲥ ϩⲱⲥⲧⲉ ⲉⲑⲣⲉϥⲉⲣⲟⲓⲕⲟⲛⲟⲙⲉⲓⲛ ⲙⲙⲱⲟⲩ ⲉⲑⲣⲟⲩⲓ ⲉϣⲓⲏⲧ
ⲡⲓⲧⲱⲟⲩ ⲉⲑⲟⲩⲁⲃ ⲛⲧⲟⲩϫⲱⲕ ⲉⲃⲟⲗ ⲛϧⲏⲧϥ ⲟⲩⲟϩ ⲛⲥⲉⲕⲱⲧ ⲙⲙⲁⲩ ⲛⲟⲩⲉⲕ‐
ⲕⲗⲏⲥⲓⲁ ϧⲉⲛ ⲡⲟⲩⲣⲁⲛ ⲁⲩⲧⲁϫⲣⲟ ⲛⲧⲉⲥⲥⲉⲛϯ ⲉϩⲣⲏⲓ ⲉϫⲉⲛ ϯⲡⲉⲧⲣⲁ ⲛⲁⲧⲕⲓⲙ
ⲡⲭ︦ⲥ︦ ⲉⲁⲥϣⲱⲡⲓ ⲛⲟⲩⲗⲩⲙⲏⲛ ⲛⲟⲩϫⲁⲓ ⲛⲟⲩⲟⲛ ⲛⲓⲃⲉⲛ ⲉⲑⲛⲁⲕⲟⲧⲟⲩ ϩⲁ ⲫ︦ϯ︦
ⲉⲑⲃⲉ ⲡⲭⲱ ⲉⲃⲟⲗ ⲛⲧⲉ ⲛⲟⲩⲛⲟⲃⲓ ⲁⲗⲏⲑⲱⲥ ⲅⲁⲣ ⲁϥⲟⲩⲛⲟϥ ⲛϫⲉ ⲡⲓⲡⲁⲣⲁ‐
ⲇⲉⲓⲥⲟⲥ ⲛⲑⲉ ⲫ︦ϯ︦ ⲉⲑⲃⲉ ⲡⲓⲥⲱϯ ⲉⲧⲁϥϣⲱⲡⲓ ⲛϯⲯⲩⲭⲏ ⲛⲛⲓⲣⲉϥⲉⲣ ⲛⲟⲃⲓ
ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲟⲩⲟϩ ⲟⲛ ϥⲛⲁⲕⲏⲛ ⲁⲛ ⲉϥϣⲟⲡ ⲛⲗⲩⲙⲏⲛ ⲛⲧⲉ ⲡⲓⲟⲩ‐
ϫⲁⲓ ϣⲁ ⲉⲛⲉϩ ⲛⲧⲉ ⲡⲓⲉⲛⲉϩ. ⲁⲗⲗⲁ ⲙⲁⲣⲉⲛⲧⲁⲥⲑⲟ ⲉϫⲉⲛ ⲧⲁⲫⲟⲣⲙⲏ ⲛⲧϫⲓ
ⲛⲓ ⲉϣⲓⲏⲧ ⲛⲛⲁⲓⲙⲁⲕⲁⲣⲓⲟⲥ.
ϩⲟⲧⲉ ⲟⲩⲛ ⲗⲟⲓⲡⲟⲛ ⲉⲧⲁⲩⲕⲱϯ ⲛⲥⲁ ⲟⲩⲁⲓ ⲉⲑⲣⲟⲩⲫⲟϣⲛⲉϥ ⲛⲁⲣⲭⲓⲉⲡⲓ‐
ⲥⲕⲟⲡⲟⲥ ⲉⲑⲃⲁⲕⲓ ⲛϯⲙⲉⲧⲟⲩⲣⲟ ⲁⲩⲓ ϣⲁ ⲑⲉⲟⲇⲱⲥⲓⲟⲥ ⲛϫⲉ ⲡⲓⲇⲏⲙⲟⲥ ⲧⲏⲣϥ
ⲛⲉⲙ ⲟⲩⲟⲛ ⲛⲓⲃⲉⲛ ⲉⲟⲩⲥⲟⲡ ⲉⲩⲉⲣⲁⲓⲧⲉⲓⲛ ⲙⲙⲟϥ ⲉⲑⲣⲟⲩⲧϩⲉⲙⲥⲟ ⲙⲙⲁⲝⲓ‐
ⲙⲟⲥ ⲛⲁⲣⲭⲓ‐(-verso-) ⲉⲡⲓⲥⲕⲟⲡⲟⲥ ⲛⲧϣⲉⲃⲓⲱ ⲛⲫⲏ ⲉⲧⲁϥⲉⲛⲕⲟⲧ. ⲧⲟⲧⲉ
ⲁϥⲣⲁϣⲓ ⲉⲙⲁϣⲱ ⲛϫⲉ ⲑⲉⲟⲇⲱⲥⲓⲟⲥ ⲡⲟⲩⲣⲟ ⲉϫⲉⲛ ⲡⲁⲓϩⲱⲃ ⲟⲩⲟϩ ⲥⲁⲧⲟⲧϥ
ⲁϥⲟⲩⲱⲣⲡ ⲛⲟⲩⲙⲁⲅⲓⲥⲧⲣⲓⲁⲛⲟⲥ ⲛⲥⲱϥ ⲛⲉⲙ ⲕ︦ⲉ︦ ⲙⲙⲁⲧⲟⲓ ⲉⲁϥⲥϧⲁⲓ ⲙⲡⲓⲉ‐
ⲡⲁⲣⲭⲟⲥ ⲛⲧⲉ ϯⲥⲩⲣⲓⲁ ϫⲉ ϩⲓⲛⲁ ⲛⲧⲉϥⲧⲁϩⲉ ⲛⲓⲁⲅⲓⲟⲥ ⲛⲧⲉϥⲣⲱⲓⲥ ⲉⲣⲱⲟⲩ
ϣⲁⲧⲟⲩⲑⲱⲟⲩϯ ⲛⲛⲓⲉⲡⲓⲥⲕⲟⲡⲟⲥ ⲛⲧⲉ ⲛⲓⲉⲡⲁⲣⲭⲓⲁ. ⲉⲧⲁⲩⲫⲟϩ ⲇⲉ ⲉⲡⲓⲉⲡⲁⲣ‐


### 0026

ⲭⲟⲥ ⲛϫⲉ ⲡⲓⲙⲁⲅⲓⲥⲧⲣⲓⲁⲛⲟⲥ ⲛⲉⲙ ⲛⲓⲙⲁⲧⲟⲓ ⲟⲩⲟϩ ⲉⲧⲁⲩϯ ⲛⲁϥ ⲛⲛⲓⲥϧⲁⲓ
ⲛⲧⲉ ⲡⲟⲩⲣⲟ ⲁϥⲣⲁϣⲓ ⲡⲉϫⲁϥ ⲛⲱⲟⲩ ϫⲉ ⲙⲁⲣⲉⲛⲉⲣ ⲁⲣⲓⲥⲧⲟⲛ ⲙⲫⲟⲟⲩ ϫⲉ
ⲁⲣⲉⲧⲉⲛϧⲓⲥⲓ ϩⲓ ⲡⲓⲙⲱⲓⲧ ⲟⲩⲟϩ ⲣⲁⲥϯ ⲧⲉⲛⲛⲁⲉⲛⲟⲩ ϧⲉⲛ ⲫⲟⲩⲱϣ ⲙⲫ︦ϯ︦.
ⲕⲁⲧⲁ ⲟⲩⲟⲓⲕⲟⲛⲟⲙⲓⲁ ⲟⲩⲛ ⲛⲧⲉ ⲫϯ ⲉⲧⲁⲥⲉⲙⲓ ⲉⲫⲁⲓ ⲛϫⲉ ϯⲥϩⲓⲙⲓ ⲙⲡⲓⲉ‐
ⲡⲁⲣⲭⲟⲥ ⲁⲥⲙⲟⲕⲙⲉⲕ ϫⲉ ⲁⲣⲉ ⲡⲟⲩⲣⲟ ⲛⲁⲱⲗⲓ ⲛⲛⲁⲓⲁⲅⲓⲟⲥ ⲉⲕⲱⲛⲥⲧⲁⲛⲧⲓ‐
ⲛⲟⲩⲡⲟⲗⲓⲥ ⲁⲥⲉⲣ ⲙⲕⲁϩ ⲛϩⲏⲧ ⲉⲙⲁϣⲱ ϫⲉ ⲟⲩⲏⲓ ⲟⲩⲟⲛ ⲛⲧⲁⲥ ⲙⲙⲁⲩ
ⲛⲟⲩⲛⲓϣϯ ⲛⲛⲁϩϯ ⲉϧⲟⲩⲛ ⲉⲣⲱⲟⲩ. ⲟⲩⲟϩ ⲥⲁⲧⲟⲧⲥ ⲁⲥⲟⲩⲱⲣⲡ ⲛⲛⲉⲥϣⲏⲣⲓ
ⲛⲭⲱⲡ ⲛⲉⲙ ⲕⲉⲥⲓⲟⲩⲣ (-fol. 51-) ⲛⲧⲁⲥ ⲙⲡⲓⲉϫⲱⲣϩ ⲁⲩⲧⲁⲙⲉ ⲛⲓⲁⲅⲓⲟⲥ ϫⲉ
ⲓⲥ ⲡⲟⲩⲣⲟ ⲁϥⲟⲩⲱⲣⲡ ⲛⲥⲱⲧⲉⲛ ⲉⲱⲗ ⲑⲏⲛⲟⲩ ⲉⲕⲱⲛⲥⲧⲁⲛⲧⲓⲛⲟⲩⲡⲟⲗⲓⲥ ⲗⲟⲓ‐
ⲡⲟⲛ ⲓⲥϫⲉ ⲧⲉⲧⲉⲛⲟⲩⲱϣ ⲁⲣⲓⲁⲛⲁⲭⲱⲣⲉⲓⲛ ⲛⲱⲧⲉⲛ. ⲉⲧⲁⲩⲥⲱⲧⲉⲙ ⲇⲉ ⲉⲛⲁⲓ‐
ⲥⲁϫⲓ ⲛϫⲉ ⲛⲓⲁⲅⲓⲟⲥ ⲁⲩⲭⲱⲗⲉⲙ ⲙⲙⲱⲟⲩ ⲥⲁⲧⲟⲧⲟⲩ ⲁⲩⲓ ⲉⲃⲟⲗϧⲉⲛ ⲡⲓⲙⲟ‐
ⲛⲁⲥⲧⲏⲣⲓⲟⲛ ⲉⲩϫⲱ ⲙⲙⲟⲥ ϫⲉ ⲫⲁⲓ ⲡⲉ ⲡⲓⲛⲁⲩ ⲉⲧⲁ ⲫ︦ϯ︦ ⲟⲩⲱϣ ⲉⲟⲗⲧⲉⲛ
ⲉⲫⲙⲁ ⲙⲡⲉⲛⲓⲱⲧ ⲁⲃⲃⲁ ⲙⲁⲕⲁⲣⲓⲟⲥ ⲡⲓⲣⲱⲙⲓ ⲛⲧⲉ ⲫ︦ϯ︦ ϧⲉⲛ ⲟⲩⲙⲉⲑⲙⲏⲓ.
ϩⲱⲥ ⲇⲉ ⲉⲩⲙⲟϣⲓ ⲛϫⲉ ⲛⲁⲓⲁⲅⲓⲟⲥ ⲁⲩϫⲓⲙⲓ ⲛⲟⲩϧⲉⲗⲗⲟ ⲙⲙⲁⲛⲉⲥⲱⲟⲩ
ⲉϥϩⲉⲙⲥⲓ ϧⲉⲛ ⲟⲩⲕⲁⲗ(ⲓⲃⲓ) ϧⲉⲛ ⲟⲩⲙⲁ ⲛⲉⲣⲏⲙⲟⲥ ⲁⲩⲭⲟⲡⲟⲩ ϧⲁⲧⲟⲧϥ.
ⲉⲡⲉϥⲣⲁⲥϯ ⲇⲉ ⲁ ⲡⲓⲙⲁⲅⲓⲥⲧⲣⲓⲁⲛⲟⲥ ⲛⲉⲙ ⲛⲏ ⲉⲑⲛⲉⲙⲁϥ ϣⲉ ⲛⲱⲟⲩ ⲉⲡⲓ‐
ⲙⲟⲛⲁⲥⲧⲏⲣⲓⲟⲛ ⲉⲩⲕⲱϯ ⲛⲥⲁ ⲛⲓⲙⲁⲕⲁⲣⲓⲟⲥ ⲟⲩⲟϩ ⲙⲡⲟⲩϫⲉⲙⲟⲩ. ⲧⲟⲧⲉ ⲁ


### 0027

ⲡⲓⲉⲡⲁⲣⲭⲟⲥ ⲟⲩⲁϩⲥⲁϩⲛⲓ ⲉⲕⲱϯ ⲛⲥⲱⲟⲩ ϧⲉⲛ ⲟⲩⲧⲁϫⲣⲟ ϧⲉⲛ ⲙⲁⲓ ⲛⲓⲃⲉⲛ
ⲛⲧⲉ ϯⲥⲩⲣⲓⲁ ⲛⲉⲙ ϯⲡⲁⲗⲁⲓⲥⲧⲓⲛⲏ. ⲉⲑⲃⲉ ⲫⲁⲓ ⲛⲁⲣⲉ ⲛⲁⲓⲁⲅⲓⲟⲥ ⲭⲏⲡ ⲡⲉ
ⲛϩⲁⲛ ⲙⲏϣ ⲛⲉϩⲟⲟⲩ ⲟⲩⲟϩ ⲛⲁⲩϣⲟⲩⲱⲛϩ ⲙⲙⲱⲟⲩ ⲉⲃⲟⲗ ⲁⲛ ⲉⲡⲧⲏⲣϥ ⲡⲉ
(-verso-) ⲉⲑⲃⲉ ϫⲉ ⲛⲁⲩⲥⲱⲟⲩⲛ ⲙⲙⲱⲟⲩ ⲡⲉ ϩⲓⲧⲉⲛ ⲟⲩⲟⲛ ⲛⲓⲃⲉⲛ ⲛⲁ
ϯⲥⲩⲣⲓⲁ ⲛⲉⲙ ⲛⲏ ⲉⲧⲭⲏ ⲙⲡⲉⲥⲕⲱϯ. ⲙⲉⲛⲉⲛⲥⲁ ⲛⲁⲓ ⲁⲩⲧⲱⲟⲩⲛ ϧⲉⲛ ⲟⲩ‐
ⲥⲟϭⲛⲓ ⲛⲧⲉ ⲫϯ ⲛϫⲉ ⲛⲁⲓⲙⲁⲕⲁⲣⲓⲟⲥ ⲁⲩⲃⲁϣⲟⲩ ⲛⲛⲓϩⲃⲱⲥ ⲙⲙⲟⲛⲁⲭⲟⲥ
ⲁⲩⲧⲏⲓⲧⲟⲩ ⲉϧⲣⲏⲓ ⲉϩⲁⲛ ⲥⲟⲕ ⲁⲩⲉⲣⲫⲟⲣⲉⲓⲛ ⲛϩⲁⲛ ϩⲃⲱⲥ ⲛⲕⲟⲥⲙⲓⲕⲟⲛ
ⲟⲩⲟϩ ⲁⲩⲙⲟⲩⲣ ⲛϩⲁⲛ ⲫⲁⲥⲕⲓⲁ ⲉϫⲉⲛ ⲛⲟⲩⲁⲫⲏⲟⲩⲓ ϫⲉ ϩⲓⲛⲁ ⲛⲧⲟⲩϣⲧⲉⲙ‐
ⲥⲟⲩⲱⲛⲟⲩ. ⲧⲟⲧⲉ ⲁⲩⲓ ⲉⲃⲟⲗ ⲗⲟⲓⲡⲟⲛ ⲉⲣⲉ ⲡⲓⲕⲟⲩϫⲓ ⲛⲥⲟⲕ ⲧⲁⲗⲏⲟⲩⲧ ⲉⲣⲱⲟⲩ
ⲉⲣⲉ ⲫⲟⲩⲁⲓ ⲫⲟⲩⲁⲓ ⲉⲣⲫⲟⲣⲉⲓⲛ ⲛⲛⲓϩⲃⲱⲥ ⲛⲕⲟⲥⲙⲓⲕⲟⲛ ⲕⲁⲧⲁ ⲛⲓⲥⲩⲣⲟⲥ ⲟⲩⲟϩ
ⲛⲁⲩⲙⲟϣⲓ ⲉⲩⲧⲱⲃϩ ⲙⲫ︦ϯ︦ ⲉⲩϫⲱ ⲙⲙⲟⲥ ϫⲉ ⲫ︦ϯ︦ ⲙⲡⲉⲛⲓⲱⲧ ⲁⲃⲃⲁ ⲙⲁ‐
ⲕⲁⲣⲓⲟⲥ ⲉⲕⲉϭⲓ ⲙⲱⲓⲧ ϧⲁϫⲱⲛ ⲛⲧⲉⲕⲟⲗⲧⲉⲛ ϣⲁⲣⲟϥ ϧⲉⲛ ⲟⲩϩⲉⲓⲣⲏⲛⲏ.
ⲉⲧⲁⲩⲙⲟϣⲓ ⲇⲉ ⲛⲉϩⲟⲟⲩ ⲃ︦ ⲉϫⲉⲛ ⲛⲉⲛⲥⲫⲟⲧⲟⲩ ⲛⲫⲓⲟⲙ ⲡⲉϫⲉ ⲡⲓⲕⲟⲩϫⲓ
ⲙⲡⲓⲛⲓϣϯ ϧⲉⲛ ⲟⲩⲛⲓϣϯ ⲙⲙⲉⲧϫⲁⲣ ϩⲏⲧ ϫⲉ ϫⲉⲙ ⲛⲟⲙϯ ⲡⲁⲟ︦ⲥ︦ ⲛⲥⲟⲛ ϫⲉ
ϧⲉⲛ ⲫⲟⲩⲱϣ ⲙⲡⲉⲛⲟ︦ⲥ︦ ⲓ︦ⲏ︦ⲥ︦ ⲡⲭ︦ⲥ︦ ⲡⲉⲛⲛⲟⲩϯ ⲛⲧⲁⲫⲙⲏⲓ ⲛⲉⲙ ⲛⲓⲧⲱⲃϩ ⲛⲧⲉ
ⲡⲓⲁⲅⲓⲟⲥ ⲁⲃ‐ (-fol. 52-) ⲃⲁ ⲙⲁⲕⲁⲣⲓⲟⲥ ⲫⲏ ⲉⲧⲁϥⲛⲁⲩ ⲉⲣⲟϥ ϧⲉⲛ ⲡⲓϩⲟ‐
ⲣⲁⲙⲁ ⲛϫⲉ ⲡⲉⲛⲙⲁⲕⲁⲣⲓⲟⲥ ⲛⲓⲱⲧ ⲁⲅⲁⲃⲟⲥ ⲉⲁϥϫⲟⲥ ⲛⲁϥ ϫⲉ ϩⲟⲛϩⲉⲛ


### 0028

ⲉⲧⲟⲧⲟⲩ ⲛⲛⲉⲕϣⲏⲣⲓ ⲙⲉⲛⲉⲛⲥⲱⲕ ⲛⲧⲟⲩⲓ ⲉϧⲣⲏⲓ ⲉⲭⲏⲙⲓ ⲛⲧⲟⲩϣⲱⲡⲓ ϧⲁⲧⲟⲧ
ⲧⲉⲛⲛⲁϩϯ ϫⲉ ⲛⲉϥϣⲗⲏⲗ ⲛⲁϭⲓ ⲙⲱⲓⲧ ⲛⲁⲛ ϣⲁⲧⲉⲛϩⲱⲗ ⲉⲣⲁⲕⲟϯ ⲉⲡⲉϥ‐
ⲙⲁ. ⲙⲁⲣⲉⲛⲙⲟϣⲓ ⲇⲉ ⲟⲩⲛ ⲡⲁⲥⲟⲛ ⲉϫⲉⲛ ⲡⲁⲓⲥⲫⲟⲧⲟⲩ ⲛⲉⲣⲏⲥ ⲛⲧⲉ ⲫⲓⲟⲙ
ϧⲉⲛ ⲟⲩⲙⲟⲩⲛ ⲉⲃⲟⲗ ϣⲁⲧⲉⲛϩⲱⲗ ⲉⲣⲁⲕⲟϯ. ⲙⲏ ⲙⲡⲉⲕⲥⲱⲧⲉⲙ ⲉⲡⲓⲡⲣⲁⲅ‐
ⲙⲁⲧⲉⲩⲧⲏⲥ ⲉⲧⲁϥϫⲟⲥ ⲛⲁⲛ ⲙⲡⲓⲥⲏⲟⲩ ϫⲉ ⲉⲛϣϭⲏⲣ ⲥⲁ ⲡⲁⲓⲥⲫⲟⲧⲟⲩ ⲛⲉⲣⲏⲥ
ⲛⲧⲉ ⲫⲓⲟⲙ ϣⲁⲧⲉⲛϩⲱⲗ ⲉⲣⲁⲕⲟϯ. ⲟⲩⲟϩ ⲡⲉϫⲉ ⲡⲓⲛⲓϣϯ ϫⲉ ⲟⲩⲟϩ ⲁⲛⲛⲁϫⲉⲙ
ⲙⲱⲟⲩ ⲛⲑⲱⲛ ⲛⲧⲉⲛⲥⲱ. ⲡⲉϫⲉ ⲡⲓⲕⲟⲩϫⲓ ⲛⲁϥ ϧⲉⲛ ⲟⲩⲣⲁϣⲓ ⲛⲉⲙ ⲟⲩϩⲉⲗⲡⲓⲥ
ⲉⲥⲧⲁϫⲣⲏⲟⲩⲧ ϫⲉ ⲱ ⲡⲁⲟ︦ⲥ︦ ⲛⲥⲟⲛ ⲭⲛⲁϩϯ ⲁⲛ ϫⲉ ⲟⲩⲟⲛ ϣϫⲟⲙ ⲙⲡⲉⲛ‐
̄ ⲟ︦ⲥ︦ ⲓ︦ⲏ︦ⲥ︦ ⲡⲭ︦ⲥ︦ ⲛⲧⲉϥⲫⲱⲛϩ ⲙⲡⲁⲓⲙⲱⲟⲩ ⲛⲉⲙ ⲛⲁⲓⲡⲉⲧⲣⲁ ⲉϩⲁⲛ ⲗⲓⲙⲛⲏ
ⲙⲙⲱⲟⲩ. ⲡⲉϫⲉ ⲡⲓⲛⲓϣϯ ⲛⲁϥ ϫⲉ ⲥⲉ ⲡⲁⲟ︦ⲥ︦ ϯⲛⲁϩϯ ϫⲉ ⲟⲩⲟⲛ ϣϫⲟⲙ
ⲙⲙⲟϥ ϧⲉⲛ ϩⲱⲃ ⲛⲓⲃⲉⲛ ⲁⲗⲗⲁ ⲭⲱ ⲛⲏⲓ ⲉⲃⲟⲗ ⲡⲁⲥⲟⲛ ϫⲉ ⲁⲓϣⲱϥⲧ ϩⲱ
ϩⲱⲥ ⲣⲱⲙⲓ. (-verso-) ⲙⲉⲛⲉⲛⲥⲁ ⲛⲁⲓⲥⲁϫⲓ ⲇⲉ ⲛⲁⲩⲙⲟϣⲓ ⲡⲉ ϧⲉⲛ ⲟⲩⲣⲁϣⲓ
ⲛⲉⲙ ⲟⲩⲣⲱⲟⲩⲧϥ ⲛϩⲏⲧ ⲉⲩⲑⲉⲗⲏⲗ ⲟⲩⲟϩ ⲉⲩⲥⲙⲟⲩ ⲉⲫ︦ϯ︦ ⲟⲩⲟϩ ⲛⲁⲩϯ ⲛⲟⲙϯ
ⲛⲛⲟⲩⲉⲣⲏⲟⲩ ⲡⲉ ϧⲉⲛ ⲟⲩⲙⲟⲩⲛ ⲉⲃⲟⲗ ⲫ︦ϯ︦ ⲇⲉ ⲉⲧⲁϥϭⲓ ⲙⲱⲓⲧ ⲙⲡⲓ︦ⲥ︦ⲗ︦
ⲙⲡⲓⲥⲏⲟⲩ ϩⲓ ⲡϣⲁϥⲉ ⲛⲉⲙ ϧⲉⲛ ⲫⲓⲟⲙ ⲛⲑⲟϥ ⲟⲛ ⲡⲉ ⲉⲧⲁϥϭⲓ ⲙⲱⲓⲧ ⲛⲛⲁⲓ‐
ⲕⲉⲁⲅⲓⲟⲥ ⲟⲩⲟϩ ⲉϣⲱⲡ ⲁⲩϣⲁⲛⲓⲃⲓ ⲛⲉϣⲁⲩϣⲉ ⲛⲱⲟⲩ ⲉⲫⲓⲟⲙ ⲛⲧⲟⲩⲥⲱ ⲉⲃⲟⲗ‐
ⲛϧⲏⲧϥ ⲉϥϩⲟⲗϫ ⲟⲩⲟϩ ⲛⲁⲩϣⲓⲛⲓ ⲛⲛⲟⲩⲉⲣⲏⲟⲩ ⲁⲛ ⲡⲉ ⲉⲑⲃⲉ ⲫⲁⲓ ϫⲉ ϥϩⲟⲗϫ


### 0029

ⲓⲉ ϥⲉⲛϣⲁϣⲓ. ⲉⲧⲁⲩⲙⲟϣⲓ ⲇⲉ ⲁⲩⲓ ⲉⲃⲟⲗ ⲉϫⲉⲛ ⲟⲩⲕⲟϩ ⲙⲡⲉⲧⲣⲁ ⲉϥⲟⲓ ⲛϫⲁ‐
ϫ(ⲣⲓ)ⲙ ϩⲱⲥⲧⲉ ⲛⲧⲟⲩⲙⲟϣⲓ ϩⲓϫⲉⲛ ⲛⲟⲩϫⲓϫ ⲛⲉⲙ ⲛⲟⲩϭⲁⲗⲁⲩϫ ⲛⲟⲩⲙⲏϣ
ⲛⲥⲟⲡ ⲥⲉⲟϣ ⲅⲁⲣ ⲛϫⲉ ⲛⲓϧⲓⲥⲓ ⲉⲧⲁⲩϣⲟⲡⲟⲩ ⲛϫⲉ ⲛⲁⲓⲙⲁⲕⲁⲣⲓⲟⲥ ϧⲉⲛ ⲛⲓ‐
ⲡⲉⲧⲣⲁ ⲉⲧϧⲟⲥⲓ ⲉⲧⲉⲙⲙⲁⲩ ⲕⲁⲓ ⲅⲁⲣ ⲛⲁⲩⲥⲱⲟⲩⲛ ⲁⲛ ⲡⲉ ϫⲉ ⲉⲩⲛⲁ ⲉⲑⲱⲛ
ⲁⲗⲗⲁ ⲡⲓⲣⲱⲟⲩⲧϥ ⲛϩⲏⲧ ⲛⲧⲉ ⲡⲭ︦ⲥ︦ ⲛⲉⲙ ϯϩⲉⲗⲡⲓⲥ ⲉⲧϧⲉⲛ ⲡⲟⲩϩⲏⲧ ⲛⲁϥ‐
ⲑⲣⲟ ⲙⲡⲓϧⲓⲥⲓ ⲉⲁⲥⲓⲁⲓ ⲛⲁϩⲣⲁⲩ ⲡⲉ. ⲟⲩⲟϩ ⲕⲁⲧⲁ ϯϧⲉ ⲉⲧⲁⲩϫⲟⲥ ⲛⲏⲓ
ⲛⲑⲱⲟⲩ ⲛⲁⲓⲙⲁⲕⲁⲣⲓⲟⲥ ⲉⲧⲁⲩⲙⲟϣⲓ ϣⲁ ⲑ̄ ⲛⲉϩⲟⲟⲩ ⲁⲩϧⲓⲥⲓ (-fol. 53-)
ⲉⲙⲁϣⲱ ⲉⲑⲃⲉ ⲡⲧϩⲉⲙⲕⲟ ⲛⲛⲟⲩϭⲁⲗⲁⲩϫ ⲉⲑⲃⲉ ϫⲉ ϩⲁⲛ ⲣⲱⲙⲓ ⲛⲉ ⲉⲩϫⲏⲛ
ϧⲉⲛ ⲛⲟⲩⲥⲱⲙⲁ ⲛⲥⲉⲕⲉϩ ⲁⲛ ⲉⲛⲁⲓϧⲓⲥⲓ ⲙⲡⲁⲓⲥⲙⲟⲧ. ϩⲟⲧⲉ ⲟⲩⲛ ⲡⲉϫⲱⲟⲩ
ⲉⲧⲁⲛⲁⲗⲏⲓ ⲉϩⲣⲏⲓ ⲉϫⲉⲛ ⲟⲩⲡⲉⲧⲣⲁ ⲉⲥϭⲟⲥⲓ ⲉⲡⲓϩⲟⲩⲟ ⲙⲡⲉⲛϣϫⲉⲙϫⲟⲙ
ⲗⲟⲓⲡⲟⲛ ⲉⲙⲟϣⲓ ϫⲉ ⲁⲗⲗⲁ ⲛⲁⲛϣⲧⲏⲟⲩⲧ ⲡⲉ ⲉϫⲉⲛ ϯⲡⲉⲧⲣⲁ ⲉⲛϧⲟⲥⲓ ⲉⲙⲁ‐
ϣⲱ. ⲁⲧⲉⲧⲉⲛⲛⲁⲩ ⲉⲑⲙⲉⲧϫⲱⲣⲓ ⲛⲛⲁⲓⲁⲅⲱⲛⲓⲥⲧⲏⲥ ⲟⲩⲟϩ ⲛⲁⲑⲗⲏⲧⲏⲥ ⲛⲧⲉ
ⲡⲭ︦ⲥ︦ ⲛⲁⲓ ⲉⲧⲁⲩⲉⲣ ⲙⲁⲣⲧⲩⲣⲟⲥ ⲁⲧϭⲛⲉ ⲫⲉⲛ ⲥⲛⲟϥ ⲉⲃⲟⲗϩⲓⲧⲉⲛ ⲛⲁⲓⲙⲏϣ
ⲛϧⲓⲥⲓ ⲉⲧⲁⲩϣⲟⲡⲟⲩ. ⲗⲟⲓⲡⲟⲛ ⲛⲉⲁⲩⲉⲣ ⲕⲉⲉ̄ ⲛⲉϩⲟⲟⲩ ⲡⲉ ⲉⲩⲥⲏϯ ⲉⲃⲟⲗ ϩⲓϫⲉⲛ
ϯⲡⲉⲧⲣⲁ ⲉⲧⲉⲙⲙⲁⲩ ⲛⲁⲑⲟⲩⲱⲙ ⲟⲩⲟϩ ⲛⲁⲧⲥⲱ ⲉⲩⲣⲟϫⲡ ⲙⲫⲣⲏϯ ⲛϩⲁⲛ
ⲣⲉϥⲙⲱⲟⲩⲧ ⲫ︦ϯ︦ ⲇⲉ ⲫⲏ ⲉⲑⲛⲟϩⲉⲙ ⲛⲛⲏ ⲉⲧⲉⲣ ϩⲉⲗⲡⲓⲥ ⲉⲣⲟϥ ⲛⲥⲏⲟⲩ
ⲛⲓⲃⲉⲛ ⲉϥⲧⲟⲩϫⲟ ⲙⲙⲱⲟⲩ ⲉⲃⲟⲗϧⲉⲛ ⲛⲟⲩⲑⲗⲓⲯⲓⲥ ⲧⲏⲣⲟⲩ ⲫⲏ ⲉⲧⲁϥⲉⲣ


### 0030

ⲫⲙⲉⲩⲓ ⲛⲇⲁⲛⲓⲏⲗ ⲙⲡⲓⲥⲏⲟⲩ ⲁϥⲛⲁϩⲙⲉϥ ⲉⲃⲟⲗϧⲉⲛ ⲣⲱⲟⲩ ⲛⲛⲓⲙⲟⲩⲓ ⲟⲩⲟϩ
ⲁϥⲛⲟϩⲉⲙ ⲛⲓⲱⲛⲁⲥ ⲉⲃⲟⲗϧⲉⲛ ⲑⲛⲉϫⲓ ⲛⲧⲉ ⲡⲓⲕⲏⲧⲟⲥ ⲟⲩⲟϩ ⲉⲧⲁϥⲧⲟⲩϫⲟ ⲛⲥⲟⲩ‐
ⲥⲁⲛⲛⲁ ⲉⲃⲟⲗϧⲉⲛ ⲡⲓϩⲓⲟⲩⲓ ⲉⲡϩⲁⲡ ⲛⲧⲉ ⲫⲙⲟⲩ (-verso-) ⲛⲑⲟϥ ⲟⲛ ⲁϥⲛⲟ‐
ϩⲉⲙ ⲛⲛⲉϥⲉⲃⲓⲁⲓⲕ ⲛⲣⲱⲙⲁⲓⲟⲥ ⲉⲃⲟⲗϧⲉⲛ ⲣⲱⲟⲩ ⲛⲛⲓⲁⲅⲣⲓⲟⲛ ⲛⲧⲉ ⲡⲓⲙⲁ
ⲉⲧⲉⲙⲙⲁⲩ ⲛⲉⲙ ⲛⲓϩⲁⲗⲁϯ ⲛⲟⲩⲁⲙ ⲥⲁⲣⲝ ⲉⲧϩⲓϫⲉⲛ ⲛⲉⲛⲥⲫⲟⲧⲟⲩ ⲛⲫⲓⲟⲙ.
ⲫ︦ϯ︦ ⲛⲧⲉ ⲛⲓϫⲟⲙ ⲫⲏ ⲉⲧⲁϥⲟⲩⲱⲧⲉⲃ ⲛⲉⲛⲱⲭ ⲉⲃⲟⲗ ⲉϣⲧⲉⲙⲑⲣⲉϥⲛⲁⲩ
ⲉⲫⲙⲟⲩ ⲟⲩⲟϩ ⲉⲧⲁϥⲟⲩⲱⲣⲡ ⲛϩⲁⲛ ϩⲁⲣⲙⲁ ⲛⲭⲣⲱⲙ ϣⲁⲧⲟⲩⲱⲗⲓ ⲉⲡϣⲱⲓ
ⲛⲏⲗⲓⲁⲥ ⲫⲏ ⲉⲧⲁϥⲧⲁⲟⲩⲟ ⲙⲡⲉϥⲁⲅⲅⲉⲗⲟⲥ ⲁϥϥⲁⲓ ⲛⲁⲃⲃⲁⲕⲟⲩⲙ ⲉⲃⲟⲗϧⲉⲛ
ⲡⲓⲁⲏⲣ ⲁⲧϭⲛⲉ ϧⲓⲥⲓ ϣⲁⲧⲉϥϭⲓⲧϥ ⲉⲑⲃⲁⲃⲩⲗⲱⲛ ⲉϫⲉⲛ ⲡⲓⲗⲁⲕⲕⲟⲥ ⲛⲧⲉ ⲛⲓⲙⲟⲩⲓ
ⲉⲁϥϯ ⲙⲡⲓⲁⲣⲓⲥⲧ(ⲟⲛ) ⲛⲇⲁ(ⲛⲓⲏⲗ) ⲟⲩⲟϩ ⲡⲁⲗⲓⲛ ⲁϥ(ⲧⲁ)ⲥⲑⲟϥ ⲉϯⲓⲟⲩⲇⲁⲓⲁ
ⲛⲭⲱⲗⲉⲙ ⲕⲁⲓⲡⲉⲣ ⲑⲃⲁⲃⲩⲗⲱⲛ ⲟⲩⲏⲟⲩ ⲛϯⲓⲟⲩⲇⲁⲓⲁ ⲛⲅ̄ ⲛⲁⲃⲟⲧ ⲙⲙⲟϣⲓ
ⲛⲑⲟϥ ⲟⲛ ⲡⲟ︦ⲥ︦ ⲁϥⲟⲩⲱⲣⲡ ⲙⲡⲉϥⲁⲅⲅⲉⲗⲟⲥ ⲁϥⲧⲱⲟⲩⲛ ⲛⲛⲁⲓⲁⲅⲓⲟⲥ ϧⲉⲛ
ⲡⲓⲁⲏⲣ ⲁⲧϭⲛⲉ ϧⲓⲥⲓ ϣⲁⲧⲉϥⲉⲛⲟⲩ ⲉϣⲓⲏⲧ ⲛⲧⲉϥⲭⲁⲩ ϩⲓϫⲉⲛ ϯⲛⲓϣϯ ⲙⲡⲉ‐
ⲧⲣⲁ ⲉⲧⲉ ⲡⲓϫⲟϣϫⲉϣ ⲙⲙⲱⲟⲩ ⲥⲁⲣⲏⲥ ⲙⲙⲟⲥ ⲑⲁⲓ ⲅⲁⲣ ⲁ ⲟⲩⲙⲏⲓⲛⲓ ⲛⲧⲉ
ⲫ︦ϯ︦ ϣⲱⲡⲓ ⲛϧⲏⲧⲥ ⲉϥⲟⲩⲟⲛϩ ⲉⲃⲟⲗ ⲉⲁ ⲡⲓⲃⲱⲕ ⲛⲧⲉ ⲫ︦ϯ︦ ⲁⲃⲃⲁ ⲙⲁⲕⲁⲣⲓⲟⲥ
(-fol. 54-) ⲙⲟⲩϯ ⲉⲣⲟⲥ ϫⲉ ϯⲡⲉⲧⲣⲁ ⲛⲕⲟⲩⲛ ⲛⲉϫⲓ ϣⲁ ⲉϧⲟⲩⲛ ⲉⲫⲟⲟⲩ.


### 0031

ⲙⲁ ϩⲑⲏⲧⲉⲛ ⲉⲣⲟⲓ ϧⲉⲛ ⲟⲩϯ ϩⲑⲏϥ ⲛⲧⲉⲧⲉⲛⲥⲱⲧⲉⲙ ⲉⲧⲁⲓϣⲫⲏⲣⲓ ⲉⲧⲁⲥ‐
ϣⲱⲡⲓ ⲛⲛⲁⲓⲙⲁⲕⲁⲣⲓⲟⲥ ⲕⲁⲧⲁ ⲫⲣⲏϯ ⲉⲧⲁⲩⲧⲁⲙⲟⲓ ⲛⲑⲱⲟⲩ. ⲁⲥϣⲱⲡⲓ ⲅⲁⲣ
ϧⲉⲛ ⲡⲓⲉϫⲱⲣϩ ⲉⲧⲁ ⲫ︦ϯ︦ ⲓⲛⲓ ⲛⲛⲁⲓⲙⲁⲕⲁⲣⲓⲟⲥ ⲉϣⲓⲏⲧ ⲁⲩⲛⲁⲩ ϧⲉⲛ ⲡⲓⲉϫⲱⲣϩ
ⲉⲟⲩⲣⲱⲙⲓ ⲛⲟⲩⲱⲓⲛⲓ ⲉϥⲭⲏ ϧⲉⲛ ⲧⲟⲩⲙⲏϯ ⲉϥⲁⲙⲟⲛⲓ ⲛⲧⲟⲩϫⲓϫ ⲉϥⲥⲱⲕ
ⲛⲉⲙⲱⲟⲩ ϧⲉⲛ ⲡⲓⲁⲏⲣ ϣⲁⲧⲉϥⲉⲛⲟⲩ ⲉϧⲣⲏⲓ ⲉϫⲉⲛ ϯⲡⲉⲧⲣⲁ ⲉⲧⲁⲛⲉⲣ ϣⲟⲣⲡ
ⲛⲫⲓⲣⲓ ⲉⲣⲟⲥ. ϩⲟⲧⲉ ⲟⲩⲛ ⲡⲉϫⲱⲟⲩ ⲉⲧⲁⲛⲧⲱⲟⲩⲛ ϩⲁ ⲛⲁ ⲧⲟⲟⲩ(ⲓ) ⲕⲁⲧⲁ ϯϫⲟⲙ
ⲉⲧⲁ ⲡⲭ︦ⲥ︦ ⲟⲩⲁϩ ⲉⲣⲟⲛ ⲁⲛϫⲉⲙⲧⲉⲛ ϩⲓϫⲉⲛ ϯⲡⲉⲧⲣⲁ ϧⲉⲛ ϣⲓⲏⲧ ⲟⲩⲟϩ ⲉⲧⲁⲛ‐
ϫⲟⲩϣⲧ ⲉⲃⲟⲗ ⲉϫⲉⲛ ⲡⲓⲧⲱⲟⲩ ⲁⲛⲛⲁⲩ ⲉⲡⲓϩⲉⲗⲟⲥ ⲙⲙⲱⲟⲩ ⲛⲉⲙ ϩⲁⲛ ⲕⲟⲩ‐
ϫⲓ ⲛⲥⲓⲗⲟⲩⲕⲓ ⲛⲃⲉⲛⲓ ⲉⲩⲣⲏⲧ ⲛⲉⲙ ϯⲑⲉⲱⲣⲓⲁ ⲛⲧⲉ ⲡⲓⲧⲱⲟⲩ ⲁⲛⲉⲣ ϣⲫⲏⲣⲓ
ⲟⲩⲟϩ ⲁⲛⲉⲣ ⲙⲫⲣⲏϯ ⲉⲁ ⲡⲉⲛϩⲏⲧ ⲥⲓϩⲓ ⲁⲛⲙⲟⲕⲙⲉⲕ ⲉⲃⲟⲗ ⲉⲑⲃⲉ ⲫⲏ ⲉⲧⲁϥ‐
ϣⲱⲡⲓ ⲙⲙⲟⲛ ϫⲉ ⲣⲟⲩϩⲓ ⲙⲉⲛ ⲛⲁⲛⲉⲛⲕⲟⲧ ⲡⲉ ϧⲉⲛ ⲟⲩⲙⲉⲧϫⲱⲃ ϩⲓϫⲉⲛ
ⲡⲓⲭⲣⲟ ⲛⲧⲉ ⲫⲓⲟⲙ (-verso-) ⲉⲛⲥⲱⲧⲉⲙ ⲉⲡⲓϣⲑⲟⲣⲧⲉⲣ ⲛⲧⲉ ⲛⲓϩⲱⲓⲙⲓ
ⲙⲫⲟⲟⲩ ⲇⲉ ϩⲱϥ ⲧⲉⲛⲟϩⲓ ⲉⲣⲁⲧⲉⲛ ϧⲉⲛ ⲟⲩϫⲁⲙⲏ ⲉⲛϫⲉⲙ ⲛⲟⲙϯ ⲟⲩⲟϩ
ⲉⲛⲛⲁⲩ ⲉϩⲁⲛ ⲥⲓⲗⲟⲩⲕⲓ ⲛⲃⲉⲛⲓ ⲛⲉⲙ ϩⲁⲛ ϣⲏⲓ ⲙⲙⲱⲟⲩ ⲛⲉⲙ ϩⲁⲛ ⲕⲉϫⲓ
ⲛⲛⲁⲩ ⲙⲡⲁⲓⲣⲏϯ ⲛϩⲱⲃ ⲛϣⲫⲏⲣⲓ. ⲉⲓⲧⲁ ⲙⲉⲛⲉⲛⲥⲁ ⲟⲩⲕⲟⲩϫⲓ ⲇⲉ ⲉⲛⲥⲟⲙⲥ
ⲉⲙⲛⲏ ⲛⲉⲙ ⲙⲛⲁⲓ ⲟⲩⲟϩ ⲉⲧⲁ ⲫⲛⲁⲩ ⲛⲁϫⲡ ⲉ̄ ϣⲱⲡⲓ ⲁⲛⲛⲁⲩ ⲉⲟⲩⲣⲱⲙⲓ


### 0032

ⲉϥⲥⲱⲕ ϧⲁϫⲱⲟⲩ ⲛϩⲁⲛ ϫⲁⲙⲟⲩⲗ ϧⲉⲛ ϯϧⲉⲗⲗⲟ ⲧⲉⲧϩⲓ ⲫⲣⲏⲥ ⲙⲙⲟⲛ
ⲁⲛⲣⲁϣⲓ ⲉⲙⲁϣⲱ ⲁⲛϫⲉⲙ ⲛⲟⲙϯ ϧⲉⲛ ⲡⲉⲛϩⲏⲧ ⲛⲉⲙ ⲧⲉⲛⲯⲩⲭⲏ. ⲟⲩⲟϩ
ⲉⲧⲁⲛⲓ ⲉⲡⲉⲥⲏⲧ ⲉⲃⲟⲗϩⲓϫⲉⲛ ϯⲡⲉⲧⲣⲁ ⲛⲁⲛϧⲱⲛⲧ ⲙⲙⲟⲛ ⲉⲣⲟϥ ⲡⲉ ϫⲉ ⲛⲧⲉⲛ‐
ϣⲉⲛϥ ϫⲉ ⲡⲁⲓⲙⲁ ⲑⲱⲛ ⲡⲉ. ϩⲟⲧⲉ ⲟⲩⲛ ⲉⲧⲁϥⲛⲁⲩ ⲉⲣⲟⲛ ⲉⲣⲉ ⲛⲓϩⲃⲱⲥ ⲛⲝⲉ‐
ⲛⲓⲕⲟⲥ ⲧⲟⲓ ϩⲓⲱⲧⲉⲛ ⲟⲩⲟϩ ⲉⲣⲉ ⲛⲓⲗⲉⲛⲧⲓⲟⲛ ⲙⲏⲣ ⲉϫⲉⲛ ⲛⲉⲛⲁⲫⲏⲟⲩⲓ ⲁϥⲉⲣ
ϩⲟϯ ⲉⲙⲁϣⲱ ⲟⲩⲟϩ ⲁϥⲉⲣ ϩⲏⲧⲥ ⲛⲫⲱⲧ ⲉϥⲭⲁ ⲛⲓⲧⲉⲃⲛⲱⲟⲩⲓ ⲉⲃⲏⲗ ϫⲉ ⲁⲛϯ
ⲙⲉⲧⲁⲛⲟⲓⲁ ϣⲁⲧⲉϥⲟϩⲓ ⲉⲣⲁⲧϥ. ⲉⲧⲁⲛϧⲱⲛⲧ ⲇⲉ ⲉⲡⲓⲣⲱⲙⲓ ⲁⲛⲥⲁϫⲓ ⲛⲉⲙⲁϥ
ⲡⲉ ⲉⲛϣⲓⲛⲓ ⲙⲙⲟϥ ⲛⲑⲟϥ ⲇⲉ ⲙⲡⲉϥⲉⲙⲓ ⲉⲧⲉⲛϫⲓ ⲛⲥⲁϫⲓ ⲟⲩⲇⲉ ⲁⲛⲟⲛ ϩⲱⲛ
ⲙⲡⲉⲛⲉⲙⲓ (-fol. 55-) ⲉⲑⲱϥ. ⲉⲡϧⲁⲓⲉ ⲇⲉ ⲡⲉϫⲁϥ ⲛⲁⲛ ⲉϥϭⲱⲣⲉⲙ ⲉⲣⲟⲛ ϫⲉ
ⲁⲙⲱⲓⲛⲓ ⲛⲧⲁⲟⲗ ⲑⲏⲛⲟⲩ ⲉⲫⲙⲁ ⲛⲁⲃⲃⲁ ⲙⲁⲕⲁⲣⲓⲟⲥ. ⲁⲛⲣⲁϣⲓ ⲟⲩⲟϩ ⲁⲛ‐
ϫⲉⲙ ⲛⲟⲙϯ ⲉⲙⲁϣⲱ ⲟⲩⲟϩ ⲡⲁⲓⲣⲏϯ ⲁⲛⲟⲩⲁϩⲧⲉⲛ ⲛⲥⲁ ⲡⲓⲣⲱⲙⲓ ⲉⲛϣⲉⲡ
ϩⲙⲟⲧ ⲛⲧⲉⲛ ⲫ︦ϯ︦ ⲟⲩⲟϩ ⲉⲛϯ ⲱⲟⲩ ⲛⲁϥ ϫⲉ ⲁϥϭⲓ ⲙⲱⲓⲧ ϧⲁϫⲱⲛ ⲉⲫⲙⲁ
ⲙⲡⲉϥⲃⲱⲕ. ϩⲟⲧⲉ ⲟⲩⲛ ⲉⲧⲁⲛⲫⲟϩ ϣⲁ ⲡⲓⲡⲣⲟⲫⲏⲧⲏⲥ ⲛⲧⲉ ⲫ︦ϯ︦ ⲁϥϣⲟⲡⲧⲉⲛ
ⲉⲣⲟϥ ϧⲉⲛ ⲟⲩⲙⲉⲧⲣⲉⲙⲣⲁⲩϣ ⲟⲩⲟϩ ⲁϥϣⲓⲛⲓ ⲙⲙⲟⲛ ϫⲉ ⲉⲧⲁⲣⲉⲧⲉⲛⲓ ⲉⲡⲁⲓ‐
ⲙⲁ ⲉⲑⲃⲉ ⲟⲩ ⲛϩⲱⲃ. ⲁⲛⲟⲛ ⲇⲉ ⲁⲛⲉⲣ ⲟⲩⲱ ⲉⲛϫⲱ ⲙⲙⲟⲥ ϫⲉ ⲁⲛⲥⲱⲧⲉⲙ
ⲉⲑⲃⲉ ⲛⲉⲕⲁⲣⲉⲧⲏ ⲛⲉⲙ ϣⲓⲏⲧ ⲁⲛⲓ ϫⲉ ⲛⲧⲉⲛϣⲱⲡⲓ ϧⲁ ⲧⲉⲕⲥⲕⲉⲡⲏ ⲛⲧⲉⲕⲁⲓⲧⲉⲛ


### 0033

ⲙⲙⲟⲛⲁⲭⲟⲥ. ⲛⲑⲟϥ ⲇⲉ ⲁϥⲟϩⲓ ⲉϥϯ ⲛⲓⲁⲧϥ ⲙⲙⲟⲛ ⲛⲕⲁⲗⲱⲥ ⲡⲉϫⲁϥ ⲛⲁⲛ
ϫⲉ ⲧⲉⲧⲉⲛⲛⲁϣϫⲉⲙϫⲟⲙ ⲁⲛ ⲉⲟϩⲓ ϧⲉⲛ ⲡⲁⲓⲙⲁ ϫⲉ ⲟⲩϣⲁϥⲉ ⲡⲉ ⲉϥϧⲟⲥⲓ.
ⲁⲛⲟⲛ ⲇⲉ ⲁⲛϯ ⲙⲉⲧⲁⲛⲟⲓⲁ ⲛⲁϥ ⲉⲛϫⲱ ⲙⲙⲟⲥ ϫⲉ ⲉϣⲱⲡ ⲁⲛϣⲧⲉⲙϫⲉⲙ‐
ϫⲟⲙ ⲛϩⲉⲙⲥⲓ ⲙⲡⲁⲓⲙⲁ ⲧⲉⲛⲛⲁϩⲱⲗ ⲉⲕⲉⲙⲁ (-verso-) ⲙⲟⲛⲟⲛ ⲉⲑⲃⲉ ⲫ︦ϯ︦
ⲙⲡⲉⲣϩⲓⲧⲧⲉⲛ ⲉⲃⲟⲗϩⲁⲣⲟⲕ ⲡⲉⲛⲓⲱⲧ ⲉⲑⲛⲁⲛⲉϥ. ⲁϥⲉⲣ ⲟⲩⲱ ϫⲉ ⲕⲁⲗⲱⲥ ⲓⲥϫⲉ
ⲡⲁⲓⲣⲏϯ ⲡⲉ ⲁⲙⲱⲓⲛⲓ ⲛⲧⲁⲧⲁⲙⲉ ⲑⲏⲛⲟⲩ ⲉⲡⲓⲙⲁ ⲉⲧⲉⲧⲉⲛⲛⲁϣⲱⲡⲓ ⲙⲙⲁⲩ.
ⲟⲩⲟϩ ⲉⲧⲁϥϭⲓⲧⲧⲉⲛ ⲁϥⲉⲛⲧⲉⲛ ⲉϫⲉⲛ ⲟⲩⲡⲉⲧⲣⲁ ⲁϥⲧⲁⲙⲟⲛ ⲉⲡⲓⲣⲏϯ ⲛⲕⲱⲧ
ⲙⲡⲓⲥⲡⲏⲗⲁⲓⲟⲛ ⲛⲉⲙ ⲡⲓϩⲱⲃ ⲛϫⲓϫ ⲕⲁⲧⲁ ϣⲓⲏⲧ.
ⲛⲁⲓ ⲇⲉ ⲧⲏⲣⲟⲩ ⲁ ⲛⲁⲓⲙⲁⲕⲁⲣⲓⲟⲥ ϫⲟⲧⲟⲩ ⲛⲏⲓ ϫⲉ ⲁⲩϣⲱⲡⲓ ⲙⲙⲱⲟⲩ
ⲉⲡⲉⲓⲇⲏ ⲁⲛⲟⲕ ⲟⲩⲣⲉⲙ ⲧⲁⲓⲡⲟⲗⲓⲥ ⲛⲟⲩⲱⲧ ⲛⲉⲙⲱⲟⲩ ⲕⲱⲛⲥⲧⲁⲛⲧⲓⲛⲟⲩ‐
ⲡⲟⲗⲓⲥ. ⲟⲩⲟϩ ϧⲉⲛ ⲛⲁⲓ ⲇⲉ ⲧⲏⲣⲟⲩ ⲛⲁⲩⲧⲁⲣⲕⲟ ⲙⲙⲟⲓ ⲡⲉ ⲛⲟⲩⲙⲏϣ ⲛⲥⲟⲡ
ⲉⲩϩⲟⲛϩⲉⲛ ⲉⲧⲟⲧ ϫⲉ ⲙⲡⲉⲣϫⲉ ϩⲗⲓ ϧⲉⲛ ⲛⲏ ⲉⲧⲁⲛⲧⲁⲙⲟⲕ ⲉⲣⲱⲟⲩ ⲉⲧⲓ
ⲉⲛⲟⲛϧ ⲕⲁⲓ ⲅⲁⲣ ⲉⲛⲉ ⲙⲡⲓⲉⲣ ϣⲟⲣⲡ ⲛⲥⲟⲩⲱⲛⲟⲩ ⲡⲉ ⲛⲁⲩⲛⲁϫⲉ ϩⲗⲓ ϧⲉⲛ
ⲛⲁⲓ ⲛⲏⲓ ⲁⲛ ⲡⲉ ⲁⲗⲗⲁ ⲁⲓⲥⲟⲩⲱⲛⲟⲩ ⲁⲛⲟⲕ ⲟⲩⲟϩ ⲛⲑⲱⲟⲩ ϩⲱⲟⲩ ⲁⲩⲥⲟⲩ‐
ⲱⲛⲧ. ⲉⲡⲉⲓⲇⲏ ⲟⲩⲛ ⲁ ⲡⲓⲡⲣⲟⲫⲏⲧⲏⲥ ⲛⲧⲉ ⲡⲟ︦ⲥ︦ ⲁⲃⲃⲁ ⲙⲁⲕⲁⲣⲓⲟⲥ ⲥⲱⲕ ϧⲁ‐
ϫⲱⲟⲩ ⲛⲛⲉϥϣⲏⲣⲓ ⲙⲡⲣⲟⲫⲏⲧⲏⲥ ⲙⲁⲗⲗⲟⲛ ⲇⲉ ⲛϩⲟⲩⲟ ⲡⲣⲟⲫⲏⲧⲏⲥ ⲁϥⲉⲛ‐


### 0034

ⲟⲩ ⲉϯⲡⲉⲧⲣⲁ. (-fol. 56-) ⲁϥⲧⲁⲙⲱⲟⲩ ⲉⲡⲓⲙⲁ ⲛϫⲁϫ ⲱⲛⲓ ⲟⲩⲟϩ ⲁϥϯ ⲛⲱⲟⲩ
ⲛⲛⲓⲥⲕⲉⲩⲟⲥ ⲛϣⲓⲕⲓ ⲟⲩⲟϩ ⲁϥⲧⲥⲁⲃⲱⲟⲩ ⲉⲧⲁⲣⲭⲏ ⲛϯⲛⲉⲃϯ ⲛⲉⲙ ⲡⲓⲣⲏϯ
ⲛϣⲱⲗⲕ ⲟⲩⲟϩ ⲁϥϯ ⲉⲧⲟⲧⲟⲩ ⲛⲛⲓⲕⲉⲉⲛⲧⲟⲗⲏ ⲧⲏⲣⲟⲩ ⲉⲁϥⲧⲁⲥⲑⲟ ⲉⲡⲉϥⲙⲁ
ⲛϣⲱⲡⲓ ϧⲉⲛ ⲟⲩϩⲉⲓⲣⲏⲛⲏ. ⲛⲓⲁⲅⲓⲟⲥ ⲇⲉ ⲁⲩⲱⲗⲓ ⲉⲃⲟⲗϩⲓϫⲱⲟⲩ ⲛⲛⲓϩⲃⲱⲥ
ⲛⲝⲉⲛⲓⲕⲟⲥ ⲛⲧⲉ ϯⲥⲩⲣⲓⲁ ⲁⲩⲉⲣⲫⲟⲣⲉⲓⲛ ⲙⲡⲓⲥⲭⲏⲙⲁ ⲛⲧⲉ ⲛⲓⲙⲟⲛⲁⲭⲟⲥ
ⲛⲧⲉ ⲡⲓⲙⲁ ⲉⲧⲉⲙⲙⲁⲩ ⲟⲩⲟϩ ⲛⲁⲩϫⲱ ⲙⲙⲟⲥ ⲛⲛⲟⲩⲉⲣⲏⲟⲩ ϫⲉ ⲁⲛⲁⲩ
ⲙⲡⲉⲛⲑⲣⲉ ϩⲗⲓ ⲉⲙⲓ ⲉⲡⲉⲛⲣⲁⲛ ⲟⲩⲇⲉ ϫⲉ ⲛⲁⲛⲟⲓ ⲙⲙⲟⲛⲁⲭⲟⲥ ⲛϣⲟⲣⲡ... ϫⲉ
ⲟⲩ(ⲏ)ⲓ ⲡⲁⲓⲙⲁ ϧⲉⲛⲧ ⲉⲡⲟⲩⲣⲟ... ϩⲟⲧ (sic!) ⲉϯⲥⲩⲣⲓⲁ. ⲗⲟⲓⲡⲟⲛ ⲁⲩⲓⲣⲓ ⲛⲧⲟⲩ‐
ⲥⲡⲟⲩⲇⲏ ⲧⲏⲣⲥ ⲡⲉ ⲉϣⲧⲉⲙⲥⲁϫⲓ ⲛⲉⲙ ϩⲗⲓ ⲛⲣⲱⲙⲓ ⲟⲩⲇⲉ ⲉϩⲓ ⲕⲟⲧ ⲉⲟⲩⲟⲛ
ⲉⲡⲧⲏⲣϥ ⲥⲁⲃⲟⲗ ⲙⲡⲟⲩⲙⲁ ⲛϣⲱⲡⲓ ⲛⲉⲙ ϯⲉⲕⲕⲗⲏⲥⲓⲁ. ⲧⲟⲩⲧⲣⲟⲫⲏ ⲇⲉ ⲛⲉ
ⲡⲓⲱⲓⲕ ⲡⲉ ⲛⲉⲙ ⲡⲓϩⲙⲟⲩ ⲛⲥⲏⲟⲩ ⲛⲓⲃⲉⲛ ⲓⲥϫⲉⲛ ⲉⲧⲁⲩⲓ ⲉϧⲟⲩⲛ ⲉⲡⲃⲓⲟⲥ ⲛϯ‐
ⲙⲉⲧⲙⲟⲛⲁⲭⲟⲥ ⲙⲡⲟⲩϫⲉⲙ ϯⲡⲓ ⲛⲟⲩⲁϥ ⲉⲡⲧⲏⲣϥ ⲟⲩⲇⲉ ⲟⲩⲏⲣⲡ ⲟⲩⲇⲉ
ⲧⲉⲃⲧ ⲟⲩⲟϩ ⲛⲁⲩⲥⲉⲕ ⲃ︦ⲃ︦ ⲛⲥⲏⲟⲩ ⲛⲓⲃⲉⲛ (-verso-) ⲟⲩⲟϩ ⲛⲁⲩⲓⲣⲓ ⲛϩⲁⲛ ⲧⲱⲃϩ
ⲉⲩⲟϣ ⲛⲁⲩϫⲱ ⲇⲉ ⲛⲛⲟⲩⲯⲁⲗⲙⲟⲥ ⲕⲁⲧⲁ ⲋ̄ⲋ̄ ⲛⲗⲉⲝⲓⲥ ⲛⲉⲙ ⲟⲩⲁⲗⲗⲏⲗⲟⲩⲓⲁ
ⲕⲁⲧⲁ ⲡⲉⲑⲟⲥ ⲛⲛⲁ ϯⲥⲩⲣⲓⲁ. ⲁⲩϣⲱⲡⲓ ⲇⲉ ϧⲉⲛ ϣⲓⲏⲧ ⲙⲡⲟⲩⲛⲁⲩ ⲉⲡϩⲟ ⲛϩⲗⲓ
ⲛⲣⲱⲙⲓ ⲉⲡⲧⲏⲣϥ ⲉⲓⲙⲏⲧⲓ ⲉⲟⲩϧⲉⲗⲗⲟ ⲛⲟⲩⲣⲓⲧ ⲉϥⲣⲱⲓⲥ ⲉⲛⲓϩⲟⲥⲉⲙ ⲉϥⲱⲗⲓ


### 0035

ⲙⲡⲟⲩϩⲱⲃ ⲛϫⲓϫ ⲟⲩⲟϩ ⲉϥⲓⲛⲓ ⲛⲱⲟⲩ ⲙⲡⲓⲕⲟⲩϫⲓ ⲛⲱⲓⲕ ⲫⲁⲓ ⲣⲱ ⲟⲛ ⲛⲁϥⲉⲣ‐
ⲇⲓⲁⲕⲟⲛⲉⲓⲛ ⲡⲉ ⲉⲡⲓⲕⲉⲁⲃⲃⲁ ⲙⲁⲕⲁⲣⲓⲟⲥ ⲉⲑⲃⲉ ϫⲉ ⲛⲁϥⲥⲱⲟⲩⲛ ⲙⲙⲟϥ ⲣⲱ
ⲡⲉ ⲓⲥϫⲉⲛ ϣⲟⲣⲡ ⲉϥϩⲏⲗ ϣⲁⲣⲟϥ ⲛⲟⲩⲙ(ⲏ)ϣ ⲛⲥⲟⲡ ⲉϥϭⲓ ⲙⲡⲉϥⲥⲙⲟⲩ.
ⲉϣⲱⲡ ⲇ(ⲉ) ⲁⲣⲉϣⲁⲛ ⲛⲁⲓⲁⲅⲓⲟⲥ ⲓ ⲉϯⲉⲕⲕⲗⲏⲥⲓⲁ ⲛⲁⲩϥⲁⲓ ⲛⲛⲟⲩⲃⲁⲗ ⲉⲡϣⲱⲓ
ⲁⲛ ⲉⲡⲧⲏⲣϥ ⲉⲛⲁⲩ ⲉⲡϩⲟ ⲛϩⲗⲓ ⲁⲗⲗⲁ ⲉⲣⲉ ⲡⲟⲩϩⲟ ⲫⲁϧⲧ ⲉⲡⲉⲥⲏⲧ ⲉϥⲙⲏⲛ
ϣⲁⲧⲟⲩϩⲱⲗ ⲉⲡⲓⲥⲡⲏⲗⲁⲓⲟⲛ ϧⲉⲛ ⲟⲩⲭⲱⲗⲉⲙ ⲛⲉⲙ ⲟⲩϯ ϩⲑⲏϥ ⲕⲁⲓ ⲅⲁⲣ
ⲁⲗⲏⲑⲱⲥ ⲁⲕϣⲁⲛⲛⲁⲩ ⲉⲣⲱⲟⲩ ϧⲉⲛ ⲧⲁⲓⲕⲁⲧⲁⲥⲧⲁⲥⲓⲥ ⲙⲡⲁⲓⲣⲏϯ ⲭⲛⲁϫⲟⲥ
ϫⲉ ⲟⲛⲧⲱⲥ ⲫϯ ϣⲟⲡ ϧⲉⲛ ⲛⲁⲓⲣⲱⲙⲓ ⲕⲁⲓ ⲅⲁⲣ ⲁⲗⲏⲑⲱⲥ ϥϣⲟⲡ ⲛϧⲏⲧⲟⲩ
ⲙⲫⲣⲏϯ ⲛⲏⲗⲓⲁⲥ ⲛⲉⲙ ⲓⲱⲁⲛⲛⲏⲥ. (-fol. 57-) ⲡⲁⲓⲣⲏϯ ϩⲱⲟⲩ ⲛⲁⲓⲁⲅⲓⲟⲥ
ⲛⲁⲣⲉ ⲡⲓⲭⲣⲱⲙ ⲛⲧⲉ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ϣⲟⲡ ⲛϧⲣⲏⲓ ⲛϧⲏⲧⲟⲩ ⲡⲉ ⲉϥⲣⲱⲕϩ
ⲛⲛⲓⲉⲛⲉⲣⲅⲓⲁ ⲉⲧϩⲱⲟⲩ ⲛⲧⲉ ⲡⲓⲡ︦ⲛ︦ⲁ︦ ⲙⲡⲟⲛⲏⲣⲟⲛ ⲛⲁⲓ ⲉⲧⲉⲣⲡⲟⲗⲉⲙⲉⲓⲛ ⲛⲉⲙ
ⲡⲉⲛϣⲗⲟⲗ ⲛⲥⲏⲟⲩ ⲛⲓⲃⲉⲛ ϧⲉⲛ ⲟⲩⲙⲉⲧⲁⲧϣⲓⲡⲓ ⲁⲛⲟⲕ ⲅⲁⲣ ⲁⲛ ⲡⲉ ⲉⲧϫⲱ
ⲙⲙⲟⲥ ⲁⲗⲗⲁ ⲁⲃⲃⲁ ⲙⲁⲕⲁⲣⲓⲟⲥ ⲡⲉ ⲡⲓⲡ︦ⲛ︦ⲁ︦ⲧⲟⲫⲟⲣⲟⲥ ⲡⲉ.
ϩⲟⲧⲉ ⲡⲉϫⲁϥ ⲉⲧⲁⲓϩⲓ ⲕⲟⲧ ⲉⲣⲱⲟⲩ ⲙⲉⲛⲉⲛⲥⲁ ⲅ̄ϯ ⲛⲣⲟⲙⲡⲓ ϩⲓⲛⲁ ⲛⲧⲁⲉⲙⲓ
ⲉⲡⲟⲩϫⲓ ⲛϩⲉⲙⲥⲓ ⲟⲩⲟϩ ⲉⲧⲁ ⲣⲟⲩϩⲓ ϣⲱⲡⲓ ⲡⲉϫⲁϥ ⲡⲉϫⲱⲟⲩ ⲛⲏⲓ ϫⲉ ⲭⲛⲁ‐
ϩⲱⲗ. ⲁⲛⲟⲕ ⲇⲉ ⲡⲉϫⲏⲓ ⲛⲱⲟⲩ ϫⲉ ⲙⲙⲟⲛ ⲁⲗⲗⲁ ⲁⲓⲛⲁⲛⲕⲟⲧ ⲙⲡⲁⲓⲙⲁ.
ⲟⲩⲟϩ ⲁⲩⲭⲱ ⲛⲏⲓ ⲉϧⲣⲏⲓ ⲛⲟⲩⲑⲟⲙ ⲥⲁ ⲟⲩⲥⲁ ⲛⲧⲉ ⲡⲓⲥⲡⲏⲗⲁⲓⲟⲛ ⲟⲩⲟϩ


### 0036

ⲁⲩⲉⲛⲕⲟⲧ ϩⲓ ⲟⲩⲙⲁ ⲟⲩⲟϩ ⲁⲩⲱⲗⲓ ⲛⲛⲟⲩⲑⲱⲕ ⲙⲡⲁⲙⲑⲟ ⲁⲩⲭⲁⲩ ⲉϧⲣⲏⲓ
ⲟⲩⲟϩ ⲛⲁⲩⲭⲱ ⲛⲣⲱⲟⲩ ⲡⲉ ⲉⲧⲁⲩⲉⲣ ⲫⲁⲓ ⲅⲁⲣ ⲉⲑⲃⲉ ⲁϣ ⲛⲁⲓⲧⲓⲁ ⲉⲡⲉⲓⲇⲏ
ⲅⲁⲣ ⲡⲓⲥⲭⲏⲙⲁ ⲛⲧⲉ ⲛⲁ ϯⲥⲩⲣⲓⲁ ⲟⲩⲟⲛ ⲙⲁⲣϭⲛⲁϩ ⲉⲣⲱⲟⲩ ⲁⲛ ⲁⲗⲗⲁ ϩⲁⲛ
ϩⲃⲱⲥ ⲛⲭⲁⲙⲉ ⲛⲉ ⲉⲧⲟⲩⲉⲣⲫⲟⲣⲉⲓⲛ ⲙⲙⲱⲟⲩ. ϩⲟⲧⲉ ⲗⲟⲓⲡⲟⲛ ⲉⲧⲁ ⲛⲁⲓ‐
ⲙⲁⲕⲁⲣⲓⲟⲥ ⲛⲁⲩ ⲉⲡⲟⲩⲓⲱⲧ ⲙⲡ︦ⲛ︦ⲁ︦- (-verso-) ⲧⲟⲫⲟⲣⲟⲥ ⲁⲃⲃⲁ ⲙⲁⲕⲁⲣⲓⲟⲥ
ⲉϥⲉⲣⲫⲟⲣⲉⲓⲛ ⲙⲡⲓϧⲱⲕ ⲛⲉⲙ ϯⲙⲁⲣϭⲛⲁϩ ⲁⲩⲟⲩⲱϣ ϩⲱⲟⲩ ⲉⲙⲟϣⲓ ⲕⲁⲧⲁ
ⲡⲟⲩⲓⲱⲧ ⲉⲑⲣⲟⲩⲙⲟⲣⲟⲩ ⲕⲁⲧⲁ ⲡⲉϥⲥⲙⲟⲧ ⲉⲑⲃⲉ ⲫⲁⲓ ⲁⲩⲓⲛⲓ ⲛⲛⲟⲩϧⲱⲕ
ⲙⲡⲉϥⲙⲑⲟ ⲉⲃⲟⲗ ⲁⲩⲭⲁⲩ ⲉⲡⲉⲥⲏⲧ ⲉⲩⲓⲣⲓ ⲇⲉ ⲛⲫⲁⲓ ⲉⲑⲣⲉϥϣⲗⲏⲗ ⲉϫⲱⲟⲩ
ϩⲓⲛⲁ ⲁⲩϣⲁⲛⲧⲱⲟⲩⲛⲟⲩ ⲛⲧⲟⲩⲙⲟⲣⲟⲩ ⲙⲙⲱⲟⲩ. ⲥⲁⲧⲟⲧϥ ⲇⲉ ⲁϥⲉⲙⲓ ⲉⲫⲁⲓ
ϩⲓⲧⲉⲛ ⲡⲓⲡ︦ⲛ︦ⲁ︦ ⲙⲡⲣⲟⲫⲏⲧⲓⲕⲟⲛ ⲉⲧϣⲟⲡ ⲛϧⲏⲧϥ ⲛϫⲉ ⲫⲏ ⲉⲑⲟⲩⲁⲃ ⲁⲃⲃⲁ
ⲙⲁⲕⲁⲣⲓⲟⲥ ⲟⲩⲟϩ ⲁϥϣⲗⲏⲗ ⲉϫⲱⲟⲩ. ⲁⲓⲧⲱⲃϩ ⲇⲉ ⲙⲫ︦ϯ︦ ⲡⲉϫⲁϥ ϩⲓⲛⲁ
ⲛⲧⲉϥϭⲱⲣⲡ ⲛⲏⲓ ⲉⲃⲟⲗ ⲛⲧⲟⲩϫⲓ ⲛⲉⲣ ϩⲱⲃ ⲁⲥⲟⲩⲱⲛ ⲡⲉϫⲁϥ ⲛϫⲉ ϯⲟⲩⲁϩ ⲥⲟⲓ
ⲟⲩⲟϩ ⲁϥϣⲱⲡⲓ ⲛϫⲉ ⲟⲩⲟⲩⲱⲓⲛⲓ ⲙⲫⲣⲏϯ ⲙⲡⲓⲉϩⲟⲟⲩ ⲛⲑⲱⲟⲩ ⲇⲉ ⲛⲁⲩⲛⲁⲩ
ⲁⲛ ⲡⲉ ⲉⲡⲓⲟⲩⲱⲓⲛⲓ. ϩⲱⲥ ⲉⲩⲙⲉⲩⲓ ⲛⲑⲱⲟⲩ ϫⲉ ⲛⲁⲓⲉⲛⲕⲟⲧ ⲡⲉ ⲁ ⲡⲓⲛⲓϣϯ ⲕⲓⲙ
ⲉⲡⲓⲕⲟⲩϫⲓ ⲁⲩⲧⲱⲟⲩⲛⲟⲩ ⲁⲩⲙⲟⲣⲟⲩ ⲁⲛⲟⲕ ⲙⲉⲛ ⲛⲁⲓⲛⲁⲩ ⲉⲣⲱⲟⲩ ⲡⲉ ⲛⲑⲱⲟⲩ
ⲇⲉ ⲛⲁⲩⲛⲁⲩ ⲉⲣⲟⲓ ⲁⲛ ⲡⲉ ⲁⲩϭⲱⲗⲕ ⲛⲛⲟⲩϫⲓϫ ⲉⲡϣⲱⲓ ⲉⲧⲫⲉ. ⲟⲩⲟϩ ⲁⲓⲛⲁⲩ
ⲉⲛⲓⲇⲁⲓⲙⲱⲛ ⲉⲩⲛⲏⲟⲩ ⲉϫⲉⲛ ⲡⲓⲕⲟⲩϫⲓ ⲙⲫⲣⲏϯ ⲛϩⲁⲛ (-fol. 58-) ⲁϥ ϩⲁⲛ


### 0037

ⲟⲩⲟⲛ ⲙⲉⲛ ⲉⲩⲛⲏⲟⲩ ⲉϫⲉⲛ ⲛⲉϥⲃⲁⲗ ⲛⲉⲙ ⲣⲱϥ ⲟⲩⲟϩ ⲁⲓⲛⲁⲩ ⲉⲟⲩⲁⲅⲅⲉⲗⲟⲥ
ⲛⲧⲉ ⲡⲟ︦ⲥ︦ ⲉⲣⲉ ⲟⲩⲟⲛ ⲟⲩⲥⲏϥⲓ ⲛⲭⲣⲱⲙ ⲛⲧⲟⲧϥ ⲉϥⲧⲁⲕⲧⲉ ϭⲗⲟ ⲉⲣⲟϥ ⲉϥϭⲟϫⲓ
ⲛⲥⲁ ⲛⲓⲇⲁⲓⲙⲱⲛ ⲛⲁⲩϣⲉⲣⲧⲟⲗⲙⲁⲛ ⲁⲛ ⲡⲉ ⲉϧⲱⲛⲧ ⲉⲡⲓⲛⲓϣϯ ⲉⲡⲧⲏⲣϥ. ⲉⲣⲉ
ϣⲱⲣⲡ ⲇⲉ ⲛⲁϣⲱⲡⲓ ⲁⲩⲭⲁⲩ ⲉϧⲣⲏⲓ ⲟⲛ ϩⲱⲥ ϫⲉ ⲉⲩⲛⲁⲉⲛⲕⲟⲧ ⲁⲛⲟⲕ ⲇⲉ ϩⲱ
ⲁⲓⲁⲓⲧ ⲙⲫⲣⲏϯ ϫⲉ ⲉⲓϩⲟⲣⲡ ⲛⲑⲱⲟⲩ ϩⲱⲟⲩ ⲙⲡⲁⲓⲣⲏϯ. ⲟⲩⲟϩ ⲁ ⲡⲓⲛⲓϣϯ ϫⲱ
ⲙⲡⲁⲓⲥⲁϫⲓ ⲛⲟⲩⲱⲧ ⲛⲏⲓ ϫⲉ ⲭⲟⲩⲱϣ ⲛⲧⲉⲛϫⲱ ⲙⲡⲓⲓⲃ︦ ⲙⲯⲁⲗⲙⲟⲥ. ⲡⲉϫⲏⲓ
ϫⲉ ⲥⲉ. ⲟⲩⲟϩ ⲁ ⲡⲓⲕⲟⲩϫⲓ ϫⲱ ⲛⲥ︦ ⲙⲯⲁⲗⲙⲟⲥ ⲛⲋ̄ⲋ̄ ⲛⲗⲉⲝⲓⲥ ⲉⲫⲟⲩⲁⲓ ⲙⲉⲙ
ⲟⲩⲁⲗⲗⲏⲗⲟⲩⲓⲁ ⲟⲩⲟϩ ⲕⲁⲧⲁ ⲗⲉⲝⲓⲥ ⲛⲁϥⲛⲏⲟⲩ ⲉⲃⲟⲗϧⲉⲛ ⲣⲱϥ ⲛϫⲉ ⲟⲩϣⲁϩ
ⲛⲭⲣⲱⲙ ⲟⲩⲟϩ ⲛⲁϥⲛⲁ ⲉⲡϣⲱⲓ ⲉⲧⲫⲉ. ⲡⲁⲓⲣⲏϯ ⲟⲛ ⲡⲓⲛⲓϣϯ ϩⲱⲥⲧⲉ ⲉⲧⲁϥ‐
ⲟⲩⲱⲛ ⲛⲣⲱϥ ⲉⲉⲣⲯⲁⲗⲗⲉⲓⲛ ⲛⲁϥⲛⲏⲟⲩ ⲉⲃⲟⲗϧⲉⲛ ⲣⲱϥ ⲙⲫⲣⲏϯ ⲛⲟⲩⲛⲟϩ
ⲛⲭⲣⲱⲙ ⲟⲩⲟϩ ⲉϥⲛⲁ ⲉⲡϣⲱⲓ ⲉⲧⲫⲉ. ⲁⲛⲟⲕ ⲇⲉ ϩⲱ ⲁⲓϫⲱ ⲛⲟⲩⲕⲟⲩϫⲓ ⲛⲁ‐
ⲡⲟⲥⲧⲏⲑⲏⲥ. ⲉⲧⲁⲓⲛⲁⲩ ⲇⲉ ⲉⲧⲟⲩⲕⲁⲧⲁⲥⲧⲁⲥⲓⲥ ⲛⲉⲙ ⲧⲟⲩϫⲓ ⲛⲉⲣ ϩⲱⲃ ⲉⲑⲛⲁ‐
ⲛⲉⲥ ⲛⲉⲙ ⲡⲓⲛⲓϣϯ ⲛϧⲙⲟⲙ ⲉⲧϣⲟⲡ ⲛϧⲏⲧⲟⲩ ⲉϧⲟⲩⲛ ⲉⲫ︦ϯ︦ (-verso-) ⲁⲓϫⲉⲙ
ϩⲏⲟⲩ ⲉⲣⲱⲟⲩ ⲉⲙⲁϣⲱ ⲟⲩⲟϩ ⲉⲓⲛⲏⲟⲩ ⲉⲃⲟⲗ ⲁⲓϫⲟⲥ ϫⲉ ⲧⲱⲃϩ ⲛϫⲱⲓ.
ⲛⲑⲱⲟⲩ ⲇⲉ ⲁⲩϯϩⲟ ⲉⲣⲟⲓ ⲉⲑⲣⲓϯ ⲉϫⲱⲟⲩ ⲙⲡⲓⲥⲭⲏⲙⲁ ⲟⲩⲟϩ ⲡⲁⲓⲣⲏϯ
ⲁⲓⲑⲉⲧ ⲡⲟⲩϩⲏⲧ ⲁⲓⲧⲏⲓϥ ⲉϫⲱⲟⲩ ⲁⲓⲓ ⲉⲃⲟⲗϩⲓⲧⲟⲧⲟⲩ ϧⲉⲛ ⲟⲩϩⲉⲓⲣⲏⲛⲏ.


### 0038

ⲓⲥ ϩⲏⲡⲡⲉ ⲟⲩⲛ ⲁⲛⲥⲱⲧⲉⲙ ⲉⲡⲓⲛⲓϣϯ ⲁⲃⲃⲁ ⲙⲁⲕⲁⲣⲓⲟⲥ ⲉϥⲧⲁⲙⲟ ⲙⲙⲟⲛ
ⲣⲏⲧⲱⲥ ϫⲉ ⲁ ⲛⲁⲓⲙⲁⲕⲁⲣⲓⲟⲥ ⲉⲣ ⲡⲉⲙⲡϣⲁ ⲙⲡⲓϩⲙⲟⲧ ⲛⲧⲉ ⲡⲓⲡ︦ⲛ︦ⲁ ⲙⲡⲁ‐
ⲣⲁⲕⲗⲏⲧⲟⲛ ⲙⲫⲣⲏϯ ⲛⲟⲩⲭⲣⲱⲙ ⲕⲁⲓ ⲅⲁⲣ ϧⲉⲛ ⲟⲩⲙⲉⲑⲙⲏⲓ ⲉϣⲱⲡ ⲛⲧⲁ‐
ϩⲓ ⲧⲟⲧ ⲉϫⲉⲛ ⲛⲉⲧⲁ ⲡⲓⲛⲓϣϯ ⲉⲧⲉⲙⲙⲁⲩ ϫⲟⲧⲟⲩ ⲛⲏⲓ ⲉⲑⲃⲏⲧⲟⲩ ⲛⲉⲙ ⲛⲏ
ⲉⲧⲁⲓⲛⲁⲩ ⲉⲣⲱⲟⲩ ϩⲱ ϧⲉⲛ ⲛⲁⲃⲁⲗ ⲡⲓⲥⲁϫⲓ ⲛ(ⲉϥ)ⲁ(ϣ)ⲁⲓ ⲉⲡⲓϩⲟⲩⲟ ⲉⲑⲃⲉ
ⲫⲁⲓ ⲁⲓⲭⲱ ⲛⲥⲱⲓ ⲙⲡⲓϩⲟⲩⲟ ⲉⲑⲃⲉ ⲛⲏ ⲉⲧⲟ ⲛⲕⲟⲩϫⲓ ϧⲉⲛ ⲡⲓⲛⲁϩϯ ϩⲓⲛⲁ
ⲛⲧⲁ(ⲩ)ϣⲧⲉⲙⲙⲉⲩⲓ ⲉϯⲙⲉⲑⲙⲏⲓ ϫⲉ ⲟⲩⲙⲉⲑⲛⲟⲩϫ ⲧⲉ ϯⲛⲁϫⲱ ⲛϩⲁⲛ ⲕⲟⲩ‐
ϫⲓ ⲉⲃⲟⲗϧⲉⲛ ϩⲁⲛ ⲙⲏϣ ⲛⲧⲁϯ ⲑⲱϣ ⲉⲡⲓⲥⲁϫⲓ.
ⲡⲓϧⲉⲗⲗⲟ ⲅⲁⲣ ⲛⲣⲱⲙⲓ ⲉⲧⲁⲛⲉⲣ ϣⲟⲣⲡ ⲛⲫⲓⲣⲓ ⲉⲣⲟϥ ϫⲉ ϥⲉⲣⲇⲓⲁⲕⲟⲛⲉⲓⲛ
ⲉⲛⲁⲓⲁⲅⲓⲟⲥ ⲛⲉ ⲟⲩⲙⲁⲓ ⲛⲟⲩϯ ⲡⲉ ⲉⲡⲓϩⲟⲩⲟ ⲟⲩⲟϩ ⲛⲉ ⲟⲩⲟⲛ ⲛⲧⲁϥ ⲛⲟⲩⲛⲓϣϯ
ⲛⲛⲁϩϯ ⲉϧⲟⲩⲛ (-fol. 59-) ⲉⲣⲱⲟⲩ ⲫⲁⲓ ⲟⲩⲛ ⲉⲧⲁ ⲟⲩⲙⲁⲧⲟⲓ ⲱⲗⲓ ⲛⲛⲉϥϭⲁ‐
ⲙⲟⲩⲗ ⲛⲟⲩⲥⲟⲡ ⲛⲭⲃⲁ ⲟⲩⲟϩ ⲉⲧⲁ ⲡⲓⲙⲁⲧⲟⲓ ⲉⲣⲉⲡⲓⲭⲉⲓⲣⲉⲓⲛ ⲉⲡⲓϧⲉⲗⲗⲟ
ⲁϥⲥⲱⲟⲩⲧⲉⲛ ⲁϥϯ ⲛⲟⲩⲕⲟⲩⲣ ϧⲉⲛ ⲧⲉϥⲟⲩⲟϫⲓ ⲛⲟⲩⲓⲛⲁⲙ. ⲡⲓϧⲉⲗⲗⲟ ⲇⲉ
ⲙⲙⲁⲓ ⲛⲟⲩϯ ⲥⲁⲧⲟⲧϥ ⲁϥⲫⲱⲛϩ ⲛϯⲭⲉϯ ⲉⲣⲟϥ ⲉϥϫⲱⲕ ⲉⲃⲟⲗ ⲛϯⲉⲛⲧⲟⲗⲏ
ⲛⲧⲉ ⲡⲓⲉⲩⲁⲅⲅⲉⲗⲓⲟⲛ. ⲧⲟⲧⲉ ⲡⲓⲧⲩⲣⲁⲛⲛⲟⲥ ⲙⲙⲁⲧⲟⲓ ⲁϥⲟⲩⲁϩ ⲧⲟⲧϥ ⲁϥ‐
ⲥⲱⲟⲩⲧⲉⲛ ϧⲉⲛ ⲡⲓⲥⲕⲉⲩⲟⲥ ⲉⲧϧⲉⲛ ⲧⲉϥϫⲓϫ ⲉϧⲟⲩⲛ ϧⲉⲛ ⲡϩⲟ ⲙⲡⲓϧⲉⲗⲗⲟ


### 0039

ⲁϥⲫⲱⲣⲕ ⲙⲡⲉϥⲃⲁⲗ ⲛϫⲁϭⲉ. ⲡⲓϧⲉⲗⲗⲟ ⲇⲉ ⲁϥϣⲉⲡ ϩⲙⲟⲧ ⲛⲧⲉⲛ ⲫ︦ϯ︦ ⲉ
ⲁϥⲙⲡϣⲁ ⲣⲱ ⲁⲩϣⲱϥ ⲙⲡⲉϥⲃⲁⲗ ⲉⲑⲃⲉ ϯⲉⲛⲧⲟⲗⲏ ⲛⲧⲉ ⲡⲓⲉⲩⲁⲅⲅⲉⲗⲓⲟⲛ
ⲛⲧⲉ ⲡⲉⲛⲟ︦ⲥ︦ ⲓ︦ⲏ︦ⲥ︦ ⲡⲭ︦ⲥ︦. ⲁⲥϣⲱⲡ(ⲓ ⲇⲉ ⲛ)ⲁϥ ⲟⲛ ⲛⲟⲩⲥⲟⲡ ⲉⲑⲣⲉϥⲱⲗⲓ ⲛⲛⲓ‐
ⲕⲟⲩϫⲓ ⲛϩⲱⲃ ⲛϫⲓϫ ⲛⲧⲉ ⲛⲁⲓⲙⲁⲕⲁⲣⲓⲟⲥ ⲉⲭⲏⲙⲓ ϫⲉ ϩⲓⲛⲁ ⲛⲧⲉϥⲑⲁⲙⲓⲟ
ⲙⲡⲓⲕⲟⲩϫⲓ ⲛⲱⲓⲕ ⲛⲱⲟⲩ ⲕⲁⲧⲁ ⲧⲉϥⲥⲩⲛⲏⲑⲓⲁ ⲫⲁⲓ ⲇⲉ ⲛⲉ ⲟⲩⲣⲉⲙ ϫⲉⲡⲣⲟ‐
ⲙⲉⲛⲉⲥⲓⲛ ⲡⲉ ϧⲉⲛ ⲡⲑⲟϣ ⲁⲣⲃⲁⲧ ⲉϥϣⲟⲡ ϧⲉⲛ ⲡⲓϯⲙⲓ ⲉⲧⲟⲩⲙⲟⲩϯ ⲉⲣⲟϥ
ϫⲉ ⲡⲓⲛⲟⲩⲃ. ⲙⲉⲛⲉⲛⲥⲁ ⲑⲣⲉϥⲑⲁⲙⲓⲟ ⲇⲉ ⲙⲡⲓⲕⲟⲩϫⲓ ⲛⲱⲓⲕ ⲛⲧⲉ ⲛⲓⲁⲅⲓⲟⲥ
(-verso-) ⲁϥⲉⲡⲧ ⲡⲓϭⲁⲙⲟⲩⲗ ⲁϥⲓ ⲉϣⲓⲏⲧ. ⲉⲧⲁϥⲫⲟϩ ⲇⲉ ⲉⲡⲓⲙⲁ ⲛⲓ ⲉⲡⲉⲥⲏⲧ
ⲉϧⲣⲏⲓ ⲉⲡⲓϩⲉⲗⲟⲥ ⲟⲩⲟϩ ϩⲱⲥ ⲉϥⲙⲟϣⲓ ⲛⲉⲙ ⲡⲓϭⲁⲙⲟⲩⲗ ⲁϥⲫⲟϩ ⲉⲟⲩⲙⲁ
ⲉϥⲟⲓ ⲛϩⲁⲗⲙⲓ ⲟⲩⲟϩ ⲕⲁⲧⲁ ⲟⲩⲥⲩⲛⲁⲛⲧⲏⲙⲁ ⲛⲧⲉ ⲡⲓϫⲁϫⲓ ⲙⲙⲟⲥⲧⲉ ⲡⲉⲑ‐
ⲛⲁⲛⲉϥ ⲛⲓⲃⲉⲛ ⲁϥⲥⲗⲁϯ ⲛϫⲉ ⲡⲓϭⲁⲙⲟⲩⲗ ⲁϥϩⲉⲓ ⲟⲩⲟϩ ⲁ ⲧⲉϥⲫⲁⲧ ⲥⲛⲟⲩⲓ
ⲕⲱϣ ⲉⲡⲓϣⲁⲣ ⲙⲙⲁⲩⲁⲧϥ ⲉⲑⲙⲟⲛⲓ. ϧⲉⲛ ⲡϫⲓ ⲛⲑⲣⲉ ⲫⲁⲓ ϣⲱⲡⲓ ⲁ ⲡⲓϧⲉⲗⲗⲟ
ⲣⲓⲙⲓ ϧⲉⲛ ⲟⲩⲛϣⲁϣⲓ ⲛⲉⲙ ⲟⲩⲛⲓϣϯ ⲛⲉⲙⲕⲁϩ ⲛϩⲏⲧ ϩⲱⲥⲧⲉ ⲛⲧⲉϥⲫⲱϧ
ⲛⲛⲉϥϩⲃⲱⲥ ⲟⲩⲟϩ ⲛⲧⲉϥⲧⲁⲗⲉ ⲕⲁϩⲓ ⲉϫⲉⲛ ⲧⲉϥⲁⲫⲉ ⲉⲑⲃⲉ ϫⲉ ⲛⲉ ⲡⲓϭⲁⲙⲟⲩⲗ
ⲫⲱϣ ⲁⲛ ⲡⲉ ⲉⲑⲃⲉ ⲫⲁⲓ ⲁϥⲉⲣ ⲙⲕⲁϩ ⲛϩⲏⲧ ⲟⲩⲟϩ ⲁϥⲣⲓⲙⲓ. ⲉⲓⲧⲁ ⲁϥϣⲉⲡ
ϩⲙⲟⲧ ⲛⲧⲉⲛ ⲫ︦ϯ︦ ⲉϥϫⲱ ⲙⲙⲟⲥ ϫⲉ ϯϣⲉⲡ ϩⲙⲟⲧ ⲛⲧⲟⲧⲕ ⲡⲁⲟ︦ⲥ︦  ⲓ︦ⲏ︦ⲥ︦ ⲭ︦ⲥ︦


### 0040

ⲫ︦ϯ︦ ⲛⲛⲓⲁⲅⲓⲟⲥ. ⲟⲩⲟϩ ⲉⲧⲁϥⲭⲁ ⲡⲓϭⲁⲙⲟⲩⲗ ⲇⲉ ⲉϥⲥⲏϯ ⲉⲃⲟⲗ ϩⲓϫⲉⲛ ⲡⲕⲁϩⲓ
ⲁϥϩⲱⲗ ⲉⲡⲓⲥⲡⲏⲗⲁⲓⲟⲛ ⲛⲧⲉ ⲛⲁⲓⲙⲁⲕⲁⲣⲓⲟⲥ ⲁϥⲧⲁⲙⲱⲟⲩ ⲉⲫⲏ ⲉⲧⲁϥϣⲱⲡⲓ
ⲙⲙⲟϥ ⲛⲉⲙ ⲡⲓϭⲁⲙⲟⲩⲗ. ⲉⲡⲉⲓⲇⲏ ⲟⲩⲛ ⲙⲡⲟⲩⲉⲙⲓ ⲉⲡⲧⲁϫⲣⲟ ⲙⲡⲓⲥⲁϫⲓ
ⲁⲗⲗⲁ ϧⲉⲛ ⲡϫⲓ ⲛⲑⲣⲟⲩⲛⲁⲩ ⲉⲣⲟϥ ⲉϥⲉⲣⲧⲁⲗⲁⲓⲡⲱⲣⲉⲓⲛ ⲁⲩⲙⲟϣⲓ ⲛⲉⲙⲁϥ.
(-fol. 60-) ⲉⲧⲁⲩⲫⲟϩ ⲇⲉ ⲉⲡⲓⲙⲁ ⲉⲧⲓ ⲉⲩϩⲓ ⲫⲟⲩⲉⲓ ⲙⲡⲓϭⲁⲙⲟⲩⲗ ⲛⲟⲩⲕⲟⲩϫⲓ
ⲁ ⲡⲓϧⲉⲗⲗⲟ ⲣⲓⲙⲓ ⲉⲧⲁϥⲛⲁⲩ ⲉⲣⲟϥ ⲛⲑⲱⲟⲩ ⲇⲉ ϩⲱⲟⲩ ⲛⲏ ⲉⲑⲟⲩⲁⲃ ϧⲉⲛ
ⲡϫⲓ ⲛⲑⲣⲟⲩⲛⲁⲩ ⲉⲡⲓϭⲁⲙⲟⲩⲗ ⲉϥⲣⲁϧⲧ ⲉⲡⲉⲥⲏⲧ ϩⲓϫⲉⲛ ⲡⲕⲁϩⲓ ⲁⲩⲟϩⲓ ⲉⲣⲁ‐
ⲧⲟⲩ ⲁⲩⲧⲱⲃϩ ⲙⲫ︦ϯ︦ ⲟⲩⲟϩ ϧⲉⲛ ⲡϫⲓ ⲛⲑⲣⲟⲩϧⲱⲛⲧ ⲉⲣⲟϥ ⲁϥⲉⲣ ϧⲟϯ ⲁϥⲉϣ
ϧⲣⲱⲟⲩ ⲉⲃⲟⲗ ⲁϥⲧⲉⲙ ⲣⲱϥ ⲉⲡⲓⲕⲁϩⲓ ϩⲱⲥ ⲉϥⲟⲩⲱϣⲧ ⲛⲛⲓⲁⲅⲓⲟⲥ. ⲡⲉϫⲱⲟⲩ
ⲇⲉ ⲙⲡⲓϭⲁⲙⲟⲩⲗ ϫⲉ ⲙⲡⲉⲣⲉⲣ ϩⲟϯ ⲁⲗⲗⲁ ⲧⲱⲛⲕ ⲟϩⲓ ⲉⲣⲁⲧⲕ ϧⲉⲛ ϯϫⲟⲙ
ⲛⲧⲉ ⲫⲏ ⲉⲧⲁϥⲧⲱⲛϥ ⲉⲃⲟⲗϧⲉⲛ ⲛⲏ ⲉⲑⲙⲱⲟⲩⲧ ⲓ︦ⲏ︦ⲥ︦ ⲡⲭ︦ⲥ︦ ⲫ︦ϯ︦ ⲛⲛⲓⲭⲣⲓⲥ‐
ⲧⲓⲁⲛⲟⲥ. ⲟⲩⲟϩ ⲫⲁⲓ ⲉⲧⲁⲩϫⲟϥ ⲁⲩϥⲁⲓ ⲛⲛⲟⲩⲃⲁⲗ ⲉⲡϣⲱⲓ ⲉⲧⲫⲉ ⲉⲩϫⲱ
ⲙⲙⲟⲥ ϫⲉ ⲫ︦ϯ︦ ⲙⲡⲉⲛⲓⲱⲧ ⲁⲃⲃⲁ ⲙⲁⲕⲁⲣⲓⲟⲥ ⲥⲱⲧⲉⲙ ⲉⲣⲟⲛ ⲉⲛⲧⲱⲃϩ
ⲙⲙⲟⲕ ⲡⲓⲙⲁⲓ ⲣⲱⲙⲓ. ϧⲉⲛ ⲟⲩⲉⲝⲁⲓⲡⲛⲁ ⲇⲉ ⲁϥϥⲟϫϥ ⲉⲡϣⲱⲓ ⲛϫⲉ ⲡⲓ‐
ϭⲁⲙⲟⲩⲗ ⲁϥⲟϩⲓ ⲉⲣⲁⲧϥ ⲉϫⲉⲛ ⲛⲉϥϭⲁⲗⲁⲩϫ ⲉϥⲟⲩⲟϫ ⲙⲫⲣⲏϯ ⲓⲥϫⲉⲕ
ⲙⲡⲉϥϩⲉⲓ ⲉⲡⲧⲏⲣϥ. ⲡⲓϧⲉⲗⲗⲟ ⲇⲉ ⲁϥⲟⲩⲱϣⲧ ⲛⲛⲓⲁⲅⲓⲟⲥ ⲉϥϫⲱ ⲙⲙⲟⲥ ϫⲉ
ϥⲥⲙⲁⲣⲱⲟⲩⲧ ⲛϫⲉ ⲓ︦ⲏ︦ⲥ︦ ⲡⲭ︦ⲥ︦ ⲫⲏ (-verso-) ⲉⲧϣⲟⲡ ϧⲉⲛ ⲑⲏⲛⲟⲩ. ⲟⲩⲟϩ ⲉⲧⲓ


### 0041

ⲉⲩⲙⲟϣⲓ ⲉⲡⲓⲙⲁ ⲛϣⲱⲡⲓ ⲉⲟⲩⲥⲟⲡ ⲁ ⲫⲏ ⲉⲑⲟⲩⲁⲃ ⲇⲟⲙⲉⲧⲓⲟⲥ ⲛⲁⲩ ⲉⲡϩⲟ
ⲙⲡⲓϧⲉⲗⲗⲟ ⲉϥⲙⲉϩ ⲛⲓⲧⲉⲛ ⲉⲑⲃⲉ ⲡⲓⲛⲁⲩ ⲉⲧⲁϥⲧⲁⲗⲉ ⲕⲁϩⲓ ⲉϫⲉⲛ ⲧⲉϥⲁⲫⲉ
ϧⲉⲛ ⲡϫⲓ ⲛⲑⲣⲉ ⲡⲓϭⲁⲙⲟⲩⲗ ϩⲉⲓ ⲛⲧⲟⲧϥ ⲁ ⲡⲓⲁⲅⲓⲟⲥ ⲇⲟⲙⲉⲧⲓⲟⲥ ⲁⲙⲟⲛⲓ
ⲙⲡⲓⲗⲁⲕϩ ⲛⲧⲉ ⲡⲓⲫⲟⲣⲕ ⲉⲧⲧⲟⲓ ⲉϫⲱϥ ϩⲱⲥ ⲉϥϥⲱϯ ⲛⲥⲁ ⲡϩⲟ ⲙⲡⲓϧⲉⲗⲗⲟ.
ⲛⲑⲟϥ ⲇⲉ ϩⲱϥ ⲉⲃⲟⲗϩⲓⲧⲉⲛ ⲡⲉϥⲛⲓϣϯ ⲛⲛⲁϩϯ ⲉϧⲟⲩⲛ ⲉⲣⲱⲟⲩ ⲛⲉⲙ ϯϣ‐
ⲫⲏⲣⲓ ⲉⲧⲁϥⲛⲁⲩ ⲉⲣⲟⲥ ⲉⲧⲁⲥϣⲱⲡⲓ ⲉⲃⲟⲗϩⲓⲧⲉⲛ ⲛⲓⲁⲅⲓⲟⲥ ⲉⲑⲟⲩⲁⲃ ⲁϥⲁⲙⲟⲛⲓ
ⲛⲧϫⲓϫ ⲙⲡⲓⲙⲁⲕⲁⲣⲓⲟⲥ ⲁϥⲭⲁⲥ ⲉϫⲉⲛ ⲡⲉϥⲃⲁⲗ ⲉⲑⲙⲟⲕϩ ϩⲱⲥ ⲉϥⲛⲁϭⲓ
ⲉⲡⲉϥⲥⲙⲟⲩ ⲟⲩⲟϩ ⲉⲧⲁ ⲧϫⲓϫ ⲙⲫⲏ ⲉⲑⲟⲩⲁⲃ ϭⲟϩ ⲉⲡⲉϥⲃⲁⲗ ⲥⲁⲧⲟⲧϥ ⲁϥ‐
ⲛⲁⲩ ⲙⲃⲟⲗ. ⲡⲓϧⲉⲗⲗⲟ ⲇⲉ ⲛⲟⲩⲣⲓⲧ ⲉⲧⲉ ⲡⲓⲙⲁⲛϭⲁⲙⲟⲩⲗ ⲡⲉ ⲁϥⲉⲣ ϣⲫⲏⲣⲓ
ⲙⲫⲏ ⲉⲧⲁϥϣⲱⲡⲓ ⲟⲩ ⲙⲟⲛⲟⲛ ϫⲉ ⲁⲩⲧⲟⲩϫⲉ ⲡⲓϭⲁⲙⲟⲩⲗ ⲁⲗⲗⲁ ϫⲉ ⲁϥⲛⲁⲩ
ⲙⲃⲟⲗ ⲥⲁⲧⲟⲧϥ ϧⲉⲛ ⲡϫⲓ ⲛⲑⲣⲉϥϩⲓ ⲧϫⲓϫ ⲙⲡⲓⲁⲅⲓⲟⲥ ⲉϫⲉⲛ ⲡⲉϥⲃⲁⲗ ⲟⲩⲟϩ
ⲁϥϯ ⲱⲟⲩ ⲙⲫ︦ϯ︦ ⲉⲙⲁϣⲱ ⲉϩⲣⲏⲓ ⲉϫⲉⲛ ϯⲇⲱⲣⲉⲁ ⲉⲧⲁⲥⲧⲁϩⲟϥ (-fol. 61-)
ⲟⲩⲟϩ ⲁ ⲛⲏ ⲉⲑⲟⲩⲁⲃ ϩⲟⲛϩⲉⲛ ⲉⲧⲟⲧϥ ⲉⲩϫⲱ ⲙⲙⲟⲥ ϫⲉ ⲁⲛⲁⲩ ⲙⲡⲉⲣⲧⲁⲙⲉ
ϩⲗⲓ ⲉⲫⲁⲓ ⲟⲩⲟϩ ⲟⲛ ⲡⲉϫⲱⲟⲩ ⲛⲁϥ ϫⲉ ⲙⲡⲉⲣⲙⲉⲩⲓ ϫⲉ ⲉⲧⲁ ⲡⲓⲟⲩϫⲁⲓ ⲧⲁ‐
ϩⲟⲕ ⲉⲑⲃⲏⲧⲉⲛ ⲁⲛⲟⲛ ⲅⲁⲣ ⲁⲛⲟⲛ ϩⲁⲛ ⲣⲱⲙⲓ ⲛⲣⲉϥⲉⲣ ⲛⲟⲃⲓ ⲁⲗⲗⲁ ⲉⲧⲁ
ⲫⲁⲓ ϣⲱⲡⲓ ⲉⲃⲟⲗϩⲓⲧⲉⲛ ⲧϫⲟⲙ ⲙⲡⲭ︦ⲥ︦. ⲛⲑⲟϥ ⲇⲉ ⲉⲧⲁϥⲟⲩⲟϩ ⲛⲓⲕⲟⲩϫⲓ
ⲛⲱⲓⲕ ⲉⲃⲟⲗ ⲛⲱⲟⲩ ⲁϥⲧⲁⲥⲑⲟ ⲉⲡⲉϥⲙⲁ ⲛⲉⲣ ϩⲱⲃ ϧⲉⲛ ⲡⲓϩⲟⲥⲉⲙ ⲟⲩⲟϩ ⲉⲧⲁ


### 0042

ⲛⲉϥϣⲫⲏⲣ ⲛⲁⲩ ⲉⲣⲟϥ ⲉⲧⲁ ⲡⲉϥⲃⲁⲗ ⲟⲩⲱⲛ ⲁⲩⲉⲣ ϣⲫⲏⲣⲓ ⲉⲙⲁϣⲱ ⲟⲩⲟϩ
ⲛⲁⲩϣⲓⲛⲓ ⲙⲙⲟϥ ⲡⲉ ϫⲉ ⲡⲱⲥ ⲁⲕⲛⲁⲩ ⲙⲃⲟⲗ. ⲛⲑⲟϥ ⲇⲉ ⲁϥⲧⲁⲙⲱⲟⲩ ϫⲉ
ⲛⲓⲙⲁⲑⲏⲧⲏⲥ ⲛⲧⲉ ⲁⲃⲃⲁ ⲙⲁⲕⲁⲣⲓⲟⲥ ⲛⲉ ⲉⲧ(ⲁⲩ)ⲧⲁⲗϭⲟⲓ ⲟⲩⲟϩ ⲟⲩⲟⲛ ⲛⲓⲃⲉⲛ
ⲉⲧⲁⲩⲥⲱⲧⲉⲙ ⲁⲩϯ ⲱⲟⲩ ⲙⲫ︦ϯ︦. ⲁⲛⲟⲕ ⲅⲁⲣ ϩⲱ ϧⲉⲛ ⲡϫⲓ ⲛⲑⲣⲓⲥⲱⲧⲉⲙ
ⲉⲡⲁⲓⲥⲁϫⲓ ⲙⲉⲛⲉⲛⲥⲁ ⲑⲣⲟⲩⲕⲏⲛ ⲉⲙⲧⲟⲛ ⲙⲙⲱⲟⲩ ⲁⲓϣⲓⲛⲓ ⲛⲧⲟⲧϥ ⲙⲡⲓⲛⲓϣϯ
ⲁⲃⲃⲁ ⲙⲁⲕⲁⲣⲓⲟⲥ ϩⲓⲛⲁ ⲛⲧⲁⲉⲙⲓ ⲉⲡⲓⲧⲁϫⲣⲟ ⲉⲓϫⲱ ⲙⲙⲟⲥ ⲛⲁϥ ⲙⲡⲁⲓⲣⲏϯ
ϫⲉ ⲡⲁⲓⲱⲧ ⲉⲑⲟⲩⲁⲃ ⲁⲓⲥⲱⲧⲉⲙ ⲉⲑⲃⲉ ⲛⲁⲓⲙⲁⲕⲁⲣⲓⲟⲥ ϫⲉ ⲁⲩⲟⲩⲱⲛ ⲙⲫⲃⲁⲗ
ⲛⲟⲩⲃⲉⲗⲗⲉ ⲁⲛ ⲧⲁⲫⲙⲏⲓ ⲧⲉ. ⲡⲉϫⲁϥ ⲛⲏⲓ ϫⲉ ⲁϩⲁ ⲟⲩⲙⲉⲑⲙⲏⲓ ⲧⲉ. ⲁⲛⲟⲕ
ⲇⲉ ⲡⲉϫⲏⲓ ⲛⲁϥ ϩⲱⲥ ⲉⲓⲉⲣ (-verso-) ϣⲫⲏⲣⲓ ϫⲉ ⲟⲛⲧⲱⲥ ⲡⲁⲓϩⲱⲃ ⲟⲩⲛⲓϣϯ
ⲡⲉ. ⲁϥⲉⲣ ⲟⲩⲱ ⲇⲉ ⲡⲉϫⲁϥ ⲛⲏⲓ ϫⲉ ⲙⲙⲟⲛ ⲡⲁϣⲏⲣⲓ ⲫⲁⲓ ⲟⲩⲛⲓϣϯ ⲛϩⲱⲃ
ⲁⲛ ⲡⲉ ⲕⲁⲧⲁ ⲑⲙⲁⲓⲏ ⲙⲡⲓⲛⲓϣϯ ⲛϩⲙⲟⲧ ⲉⲧⲁⲩϭⲓⲧϥ ⲉⲃⲟⲗϩⲓⲧⲉⲛ ⲫ︦ϯ︦ ⲕⲁⲓ
ⲅⲁⲣ ⲁⲩⲉⲣ ⲡⲉⲙⲡϣⲁ ⲛϯϫⲟⲙ ⲉⲧⲭⲏ ⲛⲉⲙ ⲏⲗⲓⲁⲥ ⲛⲉⲙ ⲓⲱⲁⲛⲛⲏⲥ ⲁ ⲡⲭ︦ⲥ︦
ϯ ⲙⲡⲉϥⲉⲣ ϣⲓϣⲓ ⲛⲱⲟⲩ ⲙⲫⲣⲏϯ ⲛⲛⲉϥⲁⲡⲟⲥⲧⲟⲗⲟⲥ ⲉⲑⲃⲉ ϫⲉ ⲙⲡⲟⲩⲕⲱϯ
ⲛⲥⲁ ⲡⲱⲟⲩ ⲧⲏⲣϥ ⲛⲧⲉ ⲡⲁⲓⲕⲟⲥⲙⲟⲥ ⲉⲑⲛⲁⲧⲁⲕⲟ ⲉⲑⲃⲉ ⲡⲱⲟⲩ ⲙⲫⲏ ⲉⲧⲁⲩⲉⲣ
ϩⲉⲗⲡⲓⲥ ⲉⲣⲟϥ ⲡⲭ︦ⲥ︦ ⲕⲁⲓ ⲅⲁⲣ ⲁⲩⲉⲣ ⲙⲫⲣⲏϯ ⲛⲟⲩϣⲟϩ ⲛⲭⲣⲱⲙ ⲉϥϯ
ⲙⲟⲩⲉ ⲉⲙⲁϣⲱ ϩⲱⲥ ⲇⲉ ϣⲁ ⲉϧⲣⲏⲓ ⲉⲡⲓⲕⲉⲛⲓϥⲓ ⲉⲑⲛⲏⲟⲩ ⲉⲃⲟⲗϧⲉⲛ ⲣⲱⲟⲩ
ⲟⲩⲭⲣⲱⲙ ⲉϥⲙⲟϩ ⲡⲉ ϩⲱⲥⲧⲉ ⲁⲩϣⲁⲛⲟⲩⲱⲛ ⲛⲣⲱⲟⲩ ⲉⲉⲣⲡⲣⲟⲥⲉⲩⲭⲉⲥⲑⲁⲓ


### 0043

ⲉⲣⲉ ⲡⲓϣⲁϩ ⲛⲏⲟⲩ ⲉⲃⲟⲗϧⲉⲛ ⲣⲱⲟⲩ ⲙⲫⲣⲏϯ ⲛⲟⲩⲥⲉⲧⲉⲃⲣⲏϫ ⲉϥⲉⲣ ⲟⲩⲱⲓⲛⲓ
ϣⲁ ⲉϩⲣⲏⲓ ⲉⲧⲫⲉ. ⲗⲟⲓⲡⲟⲛ ⲡⲁϣⲏⲣⲓ ⲙⲡⲉⲣⲉⲣ ⲁⲑⲛⲁϩϯ ⲉⲛⲏ ⲧⲏⲣⲟⲩ ⲉⲧⲁⲕ‐
ⲥⲟⲑⲙⲟⲩ ⲉⲑⲃⲏⲧⲟⲩ. ⲁⲛⲟⲕ ⲇⲉ ⲁⲓⲟⲩⲱϣⲧ ⲛⲛⲉϥϫⲓϫ ⲉⲑⲟⲩⲁⲃ ⲉⲓϯ ⲱⲟⲩ
ⲙⲡⲭ︦ⲥ︦ ⲫⲏ ⲉⲧⲓⲣⲓ ⲛⲛⲓϣⲫⲏⲣⲓ ϧⲉⲛ ⲛⲏ ⲉⲧⲓⲣⲓ ⲙⲡⲉϥⲟⲩⲱϣ.
ⲉⲓⲧⲁ ⲙⲉⲛⲉⲛⲥⲁ ⲛⲁⲓ ⲁⲥⲣⲁⲛⲁⲥ ⲛϯ- (-fol. 62-) ⲙⲉⲧⲙⲁⲓ ⲣⲱⲙⲓ ⲛⲧⲉ ⲫ︦ϯ︦
ⲉϯ ⲙⲧⲟⲛ ⲛⲛⲉϥⲉⲃⲓⲁⲓⲕ ⲟⲩⲟϩ ⲉⲟⲩⲟⲑⲃⲟⲩ ⲉⲃⲟⲗϧⲉⲛ ⲡⲁⲓⲕⲟⲥⲙⲟⲥ ⲛⲉⲫⲗⲏⲟⲩ
ⲛⲉⲙ ⲛⲉϥϩⲟϫϩⲉϫ ⲙⲡⲣⲟⲥⲟⲩⲥⲏⲟⲩ ⲟⲩⲟϩ ⲛⲧⲉϥϭⲓⲧⲟⲩ ⲉϧⲟⲩⲛ ⲉⲛⲓⲙⲁ ⲛⲉⲙ‐
ⲧⲟⲛ ⲛⲉⲡⲟⲩⲣⲁⲛⲓⲟⲛ ⲉⲑⲟⲩⲟϣⲥ ⲉⲃⲟⲗϧⲉⲛ ⲡⲓⲟⲩⲛⲟϥ ⲛⲉⲙ ⲡⲓⲑⲉⲗⲏⲗ ⲡⲓⲙⲁ
ⲉⲧⲁϥⲫⲱⲧ ⲉⲃⲟⲗ ⲛϧⲏⲧϥ ⲛϫⲉ ⲡⲓⲙⲕⲁϩ ⲛϩⲏⲧ ⲛⲉⲙ ⲡⲓⲗⲩⲡⲏ (sic) ⲛⲉⲙ ⲡⲓϥⲓ
ⲁϩⲟⲙ. ϧⲉⲛ ⲡⲓⲉϩⲟⲟⲩ ⲟⲩⲛ ⲉⲑⲟⲩⲁⲃ ⲛⲧⲉ ⲡϣⲁⲓ ⲛⲧⲉⲡⲓⲫⲁⲛⲉⲓⲁ ⲉⲧⲉ ⲡϣⲁⲓ
ⲛⲧⲱⲃⲓ ⲡⲉ ⲁϥⲉⲣ ϩⲏⲧⲥ ⲛϫⲉ ⲡⲓⲙⲁⲕⲁⲣⲓⲟⲥ ⲙⲁⲝⲓⲙⲟⲥ ⲛⲉⲛⲕⲟⲧ ⲁϥϣⲱⲛⲓ
ⲁϥⲁⲙⲟⲛⲓ ⲙⲙⲟϥ ⲛϫⲉ ⲟⲩϧⲙⲟⲙ ⲉϥⲟϣ. ϩⲟⲧⲉ ⲟⲩⲛ ⲉⲧⲁϥϩⲣⲟϣ ϧⲉⲛ ⲡⲓ‐
ϣⲱⲛⲓ ⲡⲉϫⲁϥ ϫⲉ ⲁⲣⲓ ϯⲁⲅⲁⲡⲏ ⲙⲟⲩϯ ⲛⲏⲓ ⲉⲡⲉⲛⲓⲱⲧ ⲁⲃⲃⲁ ⲙⲁⲕⲁⲣⲓⲟⲥ.
ⲁⲛⲟⲕ ⲇⲉ ⲁⲓϣⲉ ⲛⲏⲓ ⲁⲓⲙⲟⲩϯ ⲉⲣⲟϥ. ⲉⲓⲧⲁ ⲙⲉⲛⲉⲛⲥⲁ ⲑⲣⲉϥϩⲱⲧⲡ ⲛϫⲉ
ⲫⲣⲏ ⲡⲉϫⲁϥ ⲛⲁⲛ ϫⲉ ⲁϣ ⲛⲛⲁⲩ ⲡⲉ ⲫⲁⲓ. ⲁⲛⲟⲛ ⲇⲉ ⲁⲛⲧⲁⲙⲟϥ ϫⲉ ⲡϫⲱⲕ
ⲙⲡⲓⲉϩⲟⲟⲩ ⲡⲉ. ⲛⲑⲟϥ ⲇⲉ ⲡⲉϫⲁϥ ⲛⲁⲛ ϫⲉ ⲉⲧⲓ ⲕⲉⲕⲟⲩϫⲓ ϯⲛⲁϣⲉ ⲛⲏⲓ ⲉⲡⲁ‐


### 0044

ⲙⲁ ⲛⲉⲙⲧⲟⲛ. ⲉⲣⲉ ⲡⲓⲉϫⲱⲣϩ ⲇⲉ ⲛⲁϣⲱⲡⲓ ⲡⲉϫⲉ ⲡⲉⲛⲓⲱⲧ ⲁⲃⲃⲁ ⲙⲁⲕⲁⲣⲓⲟⲥ
ⲛⲁⲛ ϫⲉ ϭⲉⲣⲟ ⲡⲓϧⲏⲃⲥ ⲟⲩⲟϩ ⲁⲛϭⲉⲣⲱϥ. (-verso-) ⲧⲟⲧⲉ ⲡⲓⲙⲁⲕⲁⲣⲓⲟⲥ
ⲙⲁⲝⲓⲙⲟⲥ ⲁⲩϩⲱⲗⲉⲙ ⲡⲉϥⲛⲟⲩⲥ ⲉϩⲣⲏⲓ ⲉⲧⲫⲉ ⲟⲩⲟϩ ⲛⲁϥϫⲱ ⲙⲙⲟⲥ ⲡⲉ
ϫⲉ ⲟⲩⲱⲣⲡ ⲙⲡⲉⲕⲟⲩⲱⲓⲛⲓ ⲛⲉⲙ ⲧⲉⲕⲙⲉⲑⲙⲏⲓ ⲱ ⲡⲁⲛⲟⲩϯ ⲛⲧⲟⲩϭⲓ ⲙⲱⲓⲧ
ϧⲁϫⲱⲓ ϩⲓ ⲡⲓⲙⲱⲓⲧ ϫⲉ ⲟⲩⲏⲓ ϯⲛⲁϩϯ ϫⲉ ⲭⲛⲁⲥⲟⲩⲧⲉⲛ ⲡⲁⲙⲱⲓⲧ ⲟⲩⲟϩ
ⲛⲧⲉⲕⲛⲁϩⲙⲉⲧ ⲛⲧⲟⲧⲟⲩ ⲛⲧⲉ ⲛⲓⲉⲝⲟⲩⲥⲓⲁ ⲛⲧⲉ ⲡⲭⲁⲕⲓ ⲙⲡⲁⲏⲣ ⲛⲧⲉ ⲛⲓⲡ︦ⲛ︦ⲁ︦.
ⲥⲟⲃϯ ⲛⲛⲁⲛⲁⲩⲃⲉⲛ ϩⲓ ⲛⲉⲕⲙⲱⲓⲧ ⲡⲁⲛⲟⲩϯ ϩⲓⲛⲁ ⲛⲧⲁⲓ ϣⲁⲣⲟⲕ ⲁⲧϭⲛⲉ
ⲕⲱⲗⲩⲥⲓⲥ ϣⲱⲡⲓ ⲛⲏⲓ ⲛⲟⲩϩⲉⲗⲡⲓⲥ ⲛⲧⲉ ⲟⲩϫⲟⲙ ⲓ︦ⲏ︦ⲥ︦ ⲡⲁⲛⲟⲩϯ ϫⲉ ⲛⲑⲟⲕ
ⲡⲉ ⲡⲁⲟⲩⲱⲓⲛⲓ ⲛⲉⲙ ⲡⲁⲛⲟϩⲉⲙ ⲁⲓⲛⲁⲉⲣ ϩⲟϯ ⲁⲛⲟⲕ ϧⲁ ⲧϩⲏ ⲛⲛⲓⲙ. ⲙⲉ‐
ⲛⲉⲛⲥⲁ ⲛⲁⲓ ⲁϥⲭⲁ ⲣⲱϥ ⲛⲟⲩⲕⲟⲩϫⲓ ⲟⲩⲟϩ ⲡⲁⲗⲓⲛ ⲡⲉϫⲁϥ ϫⲉ ⲧⲉⲛ ⲑⲏⲛⲟⲩ
ⲙⲁⲣⲟⲛ ⲉⲃⲟⲗ ⲧⲁⲓ ϩⲏⲡⲡⲉ ⲓⲥ ⲛⲓⲁⲡⲟⲥⲧⲟⲗⲟⲥ ⲛⲉⲙ ⲛⲓⲡⲣⲟⲫⲏⲧⲏⲥ ⲁⲩⲓ ⲉⲟⲗⲧ
ⲉⲃⲟⲗ ⲧⲁⲓ. ⲗⲟⲓⲡⲟⲛ ⲁϥⲭⲁ ⲣⲱϥ. ⲙⲉⲛⲉⲛⲥⲁ ⲕⲉⲕⲟⲩϫⲓ ⲁ ⲫⲏ ⲉⲑⲟⲩⲁⲃ ⲁⲃⲃⲁ
ⲙⲁⲕⲁⲣⲓⲟⲥ ⲛⲁⲩ ⲉⲡⲭⲱⲣⲟⲥ ⲛⲧⲉ ⲛⲏ ⲉⲑⲟⲩⲁⲃ ⲁⲩⲓ ⲛⲥⲱϥ ⲥⲁⲧⲟⲧϥ ⲁϥⲧⲱⲛϥ
ⲛϫⲉ ⲁⲃⲃⲁ ⲙⲁⲕⲁⲣⲓⲟⲥ ⲁϥⲟϩⲓ ⲉⲣⲁⲧϥ ⲉϥⲭⲱ ⲛⲣⲱϥ. ⲉⲧⲁⲓⲛⲁⲩ ⲇⲉ ⲟⲛ
ⲉⲡⲓϧⲏⲃⲥ ⲥⲭⲉ‐ (-fol. 63-) ⲇⲟⲛ ⲁϥϭⲉⲛⲟ ⲡⲉϫⲏⲓ ⲙⲡⲓϧⲉⲗⲗⲟ ⲁⲃⲃⲁ ⲙⲁⲕⲁ‐
ⲣⲓⲟⲥ ϫⲉ ⲭⲟⲩⲱϣ ⲛⲧⲁⲑⲁⲙⲓⲟ ⲡⲓϧⲏⲃⲥ ⲛⲕⲁⲗⲱⲥ. ⲡⲉϫⲁϥ ϫⲉ ⲙⲙⲟⲛ ⲁⲗⲗⲁ
ⲭⲁϥ ⲙⲡⲁⲓⲣⲏϯ. ⲁⲛⲟⲕ ⲇⲉ ⲁⲓϯ ϩⲟ ⲉⲣⲟϥ ⲉⲓϫⲱ ⲙⲙⲟⲥ ϫⲉ ⲁⲣⲓ ⲁⲅⲁⲡⲏ


### 0045

ⲡⲁⲓⲱⲧ ⲙⲧⲟⲛ ⲙⲙⲟⲕ ⲉϫⲉⲛ ϯϭⲟⲗⲃⲓ ⲛⲟⲩⲕⲟⲩϫⲓ. ⲛⲑⲟϥ ⲇⲉ ⲁϥⲉⲣ ⲟⲩⲱ ϫⲉ
ⲭⲁ ⲣⲱⲕ ⲡⲁϣⲏⲣⲓ ϫⲉ ⲡⲥⲏⲟⲩ ⲛⲥⲁϫⲓ ⲁⲛ ⲡⲉ ⲁⲗⲗⲁ ⲙⲁⲗⲗⲟⲛ ⲟⲩⲥⲏⲟⲩ
ⲛⲭⲁ ⲣⲱϥ ⲡⲉ. ⲟⲩⲟϩ ⲛⲁⲣⲉ ⲡⲓⲙⲁⲕⲁⲣⲓⲟⲥ ⲙⲁⲝⲓⲙⲟⲥ ⲥⲁϫⲓ ⲛⲉⲙ ⲟⲩⲁⲓ ϧⲉⲛ
ⲛⲏ ⲉⲑⲟⲩⲁⲃ ⲉϥϭⲛⲟⲩ ⲙⲙⲟϥ ⲉⲫⲣⲁⲛ ⲛⲛⲓⲁⲅⲓⲟⲥ ⲉⲧⲉ ⲙⲡⲉϥⲕⲱϯ ⲁⲛⲟⲛ ⲇⲉ
ⲙⲡⲉⲛⲉⲙⲓ ⲉⲫⲏ ⲉⲧⲉϥϫⲱ ⲙⲙⲟϥ ⲁⲗⲗⲁ ⲡⲓⲡ︦ⲛ︦ⲁ︦ⲧⲟⲫⲟⲣⲟⲥ ⲁⲃⲃⲁ ⲙⲁⲕⲁⲣⲓⲟⲥ
ⲁϥⲧⲁⲙⲟⲛ ϫⲉ ⲛⲁⲩⲧⲁⲙⲟ ⲙⲙⲟϥ ⲡⲉ ⲉⲫⲣⲁⲛ ⲛⲛⲓⲁⲅⲓⲟⲥ ⲉⲧⲉ ⲙⲡⲉϥⲕⲱϯ.
ⲟⲩⲟϩ ⲉⲧⲁⲥⲉⲣϩⲏⲇⲟⲛⲉⲓⲥⲑⲁⲓ ⲛϫⲉ ⲧⲉϥⲯⲩⲭⲏ ⲉⲧⲡⲁⲣⲟⲩⲥⲓⲁ ⲛⲛⲏ ⲉⲑⲟⲩⲁⲃ
ⲥⲁⲧⲟⲧⲥ ⲁⲥϥⲟϫⲥ ⲉⲃⲟⲗϧⲉⲛ ⲡⲓⲥⲱⲙⲁ ϧⲉⲛ ⲟⲩⲣⲁϣⲓ.
ⲫⲁⲓ ⲡⲉ ⲡⲓⲣⲏϯ ⲉⲧⲁϥϫⲱⲕ ⲉⲃⲟⲗ ⲛϫⲉ ⲡⲁⲓⲙⲁⲕⲁⲣⲓⲟⲥ ϧⲉⲛ ⲟⲩϩⲉⲓⲣⲏⲛⲏ
ⲉⲁϥⲙⲧⲟⲛ ⲙⲙⲟϥ ⲛⲉⲙ ⲛⲏ ⲉⲑⲟⲩⲁⲃ ⲧⲏⲣⲟⲩ ⲛⲥⲟⲣ ⲓ︦ⲇ︦ ⲛⲧⲱⲃⲓ. ϩⲟⲧⲉ ⲟⲩⲛ
ⲉⲧⲁⲛⲑⲱⲙⲥ ⲙⲡⲉϥⲗⲉⲓ‐ (-verso-) ⲯⲁⲛⲟⲛ ⲉⲑⲟⲩⲁⲃ ⲟⲩⲟϩ ⲉⲧⲁⲛⲓ ⲉⲡⲉϥ‐
ⲣⲁⲥϯ ⲁϥⲉⲛⲕⲟⲧ ⲁϥϣⲱⲛⲓ ⲛϫⲉ ⲡⲉϥⲙⲁⲕⲁⲣⲓⲟⲥ ⲛⲥⲟⲛ ⲇⲟⲙⲉⲧⲓⲟⲥ ⲁϥⲁⲙⲟⲛⲓ
ⲉϫⲱϥ ⲛϫⲉ ⲟⲩⲛⲓϣϯ ⲛϧⲙⲟⲙ. ⲉⲧⲁϥⲛⲁⲩ ⲇⲉ ⲉⲣⲟϥ ⲛϫⲉ ⲡⲓⲛⲓϣϯ ⲁⲃⲃⲁ
ⲙⲁⲕⲁⲣⲓⲟⲥ ϫⲉ ⲁϥϣⲱⲛⲓ ⲡⲉϫⲁϥ ⲛⲏⲓ ϫⲉ ϩⲉⲙⲥⲓ ⲡⲁϣⲏⲣⲓ ⲛⲧⲉⲕϣⲉⲙϣⲓ
ⲙⲡⲓⲥⲟⲛ ϣⲁⲧⲉⲕϭⲓ ⲙⲡⲉϥⲥⲙⲟⲩ. ⲁⲛⲟⲕ ⲇⲉ ⲁⲓϯ ⲫⲓ ⲉⲛⲉϥϭⲁⲗⲁⲩϫ ⲉⲓϫⲱ
ⲙⲙⲟⲥ ⲛⲁϥ ϫⲉ ⲧⲱⲃϩ ⲉϫⲱⲓ ⲡⲁⲓⲱⲧ ⲉⲑⲟⲩⲁⲃ. ⲉⲡⲉϥⲣⲁⲥϯ ⲇⲉ ⲁϥϩⲣⲟϣ ϧⲉⲛ
ⲡⲓϣⲱⲛⲓ ⲛϫⲉ ⲡⲓⲁⲅⲓⲟⲥ ⲇⲟⲙⲉⲧⲓⲟⲥ ⲟⲩⲟϩ ⲉⲧⲁϥⲫⲟϩ ⲉⲡⲓⲉϫⲱⲣϩ ⲙⲙⲁϩ ⲅ̄


### 0046

ⲁⲓⲛⲁⲩ ⲉⲣⲟϥ ⲉϥϧⲟⲥⲓ ⲡⲉϫⲏⲓ ⲛⲁϥ ϫⲉ ⲭⲟⲩⲱϣ ⲛⲧⲁⲙⲟⲩϯ ⲉⲡⲉⲛⲓⲱⲧ ⲁⲃⲃⲁ
ⲙⲁⲕⲁⲣⲓⲟⲥ. ⲡⲉϫⲁϥ ϫⲉ ⲥⲉ. ⲁⲛⲟⲕ ⲇⲉ ⲁⲓϣⲉ ⲛⲏⲓ ⲁⲓⲙⲟⲩϯ ⲉⲣⲟϥ ⲟⲩⲟϩ ⲉⲧⲓ
ⲉⲓⲙⲟϣⲓ ⲛⲉⲙⲁϥ ϩⲓ ⲡⲓⲙⲱⲓⲧ ⲁϥⲟϩⲓ ⲉⲣⲁⲧϥ ⲛⲟⲩⲛⲓϣϯ ⲛⲛⲁⲩ ⲉϥϫⲟⲩϣⲧ
ⲉⲡⲥⲁ ⲙⲡⲓⲥⲡⲏⲗⲁⲓⲟⲛ ⲟⲩⲟϩ ⲙⲉⲛⲉⲛⲥⲱⲥ ⲁϥⲫⲟⲛϩϥ ⲉⲡⲥⲁ ⲛϯⲁⲛⲁⲧⲟⲗⲏ.
ⲛⲁⲓⲙⲉⲩⲓ ⲁⲛⲟⲕ ⲡⲉ ϫⲉ ⲁⲣⲏⲟⲩ ⲉϥⲧⲱⲃϩ ⲁϣ ⲉϥⲥⲟⲙⲥ ⲉⲡⲭⲱⲣⲟⲥ ⲛⲛⲏ ⲉⲑ‐
ⲟⲩⲁⲃ ⲉⲩⲥⲱⲕ ϧⲁϫⲱⲥ ⲛϯⲙⲁⲕⲁⲣⲓⲟⲥ ⲙⲯⲩⲭⲏ ⲛⲧⲉ ⲡⲓⲁⲅⲓⲟⲥ ⲇⲟⲙⲉⲧⲓⲟⲥ.
ⲁϥⲥⲟⲙⲥ ⲇⲉ ⲉⲡϣⲱⲓ ⲉⲧⲫⲉ ⲁϥϥⲓ ⲁϩⲟⲙ ⲟⲩⲟϩ ⲁϥⲣⲓⲙⲓ (-fol. 64-) ⲉϥϫⲱⲗϩ
ϧⲉⲛ ⲧⲉϥⲙⲉⲥⲧⲉⲛϩⲏⲧ ⲉϥϫⲱ ⲙⲙⲟⲥ ϫⲉ ⲟⲩⲟⲓ ⲛⲏⲓ ⲁⲛⲟⲕ ϫⲉ ⲙⲡⲓⲉⲣ ⲙⲟⲛⲁ‐
ⲭⲟⲥ ⲉⲡⲧⲏⲣϥ ⲛⲁⲓ ⲅⲁⲣ ⲛⲉ ⲛⲓⲙⲟⲛⲁⲭⲟⲥ ⲛⲧⲁⲫⲙⲏⲓ ϫⲉ ϧⲉⲛ ⲟⲩⲕⲟⲩϫⲓ
ⲛⲥⲏⲟⲩ ⲛϩⲟϫϩⲉϫ ⲁⲩϫⲓⲙⲓ ⲙⲡⲓⲙⲱⲓⲧ ⲛⲭⲱⲗⲉⲙ. ⲁⲛⲟⲕ ⲇⲉ ⲉⲧⲁⲓⲛⲁⲩ ⲉⲣⲟϥ
ⲉϥⲣⲓⲙⲓ ⲙⲡⲁⲓⲣⲏϯ ⲁⲓⲧⲱⲙⲧ ⲟⲩⲟϩ ⲡⲉϫⲏⲓ ⲛⲁϥ ϫⲉ ⲟⲩ ⲡⲉ ⲉⲧϣⲟⲡ ⲱ ⲡⲁⲓⲱⲧ
ⲉⲑⲟⲩⲁⲃ. ⲛⲑⲟϥ ⲇⲉ ⲡⲉϫⲁϥ ⲛⲏⲓ ϫⲉ ⲙⲁⲣⲟⲛ ⲡⲁϣⲏⲣⲓ ϫⲉ ⲁ ⲡⲓⲁⲅⲓⲟⲥ ⲇⲟⲙⲉ‐
ⲧⲓⲟⲥ ⲙⲧⲟⲛ ⲙⲙⲟϥ. ⲉⲧⲁⲛⲓ ⲇⲉ ⲉϧⲟⲩⲛ ⲉⲡⲓⲥⲡⲏⲗⲁⲓⲟⲛ ⲁⲛϫⲉⲙϥ ⲉϥϩⲉⲙⲥⲓ
ⲉϥⲟⲩⲉϩ ⲉϧⲟⲩⲛ ϯϫⲟⲓ ⲉⲣⲉ ⲧⲉϥϫⲓϫ ⲥⲛⲟⲩϯ ϭⲟⲗⲕ ⲉϩⲣⲏⲓ ⲉⲧⲫⲉ. ⲉⲧⲁϥϫⲱⲕ
ⲉⲃⲟⲗ ⲙⲡⲁⲓⲣⲏϯ ⲛⲥⲟⲩ ⲓⲍ ⲛⲧⲱⲃⲓ ⲁⲛϭⲓ ⲙⲡⲉϥⲥⲱⲙⲁ ⲉⲑⲟⲩⲁⲃ ⲁⲛϣⲧⲟϥ
ⲉϫⲉⲛ ϯϭⲟⲗⲃⲓ ⲁ ⲫⲏ ⲉⲑⲟⲩⲁⲃ ⲁⲃⲃⲁ ⲙⲁⲕⲁⲣⲓⲟⲥ ⲉⲣ ⲙⲉⲑⲣⲉ ⲛⲁⲃⲃⲁ ⲓⲥⲓ‐


### 0047

ⲇⲱⲣⲟⲥ ϫⲉ ⲛⲓⲧⲁⲝⲓⲥ ⲉⲧⲁⲩⲓ ⲛⲥⲁ ⲧⲯⲩⲭⲏ ⲙⲡⲓⲛⲓϣϯ ⲛⲁⲓ ⲟⲛ ⲛⲉ ⲉⲧⲁⲩⲓ ⲛⲥⲁ
ⲧⲯⲩⲭⲏ ⲙⲡⲉϥⲥⲟⲛ ⲉϥⲭⲏ ⲛⲉⲙⲱⲟⲩ ϩⲱϥ.
ⲓⲥ ϩⲏⲡⲡⲉ ⲟⲩⲛ ⲁⲓⲧⲁⲙⲱⲧⲉⲛ ⲉⲡⲓⲣⲏϯ ⲉⲧⲁ ⲛⲁⲓⲙⲁⲕⲁⲣⲓⲟⲥ ϫⲱⲕ ⲉⲃⲟⲗ
ⲙⲡⲟⲩⲇⲣⲟⲙⲟⲥ ϧⲉⲛ ⲟⲩⲃⲓⲟⲥ ⲛⲁⲅⲅⲉⲗⲓⲕⲟⲛ ⲉⲁⲩⲙⲉⲛⲣⲉ ⲛⲓϧⲓⲥⲓ ⲛⲧⲉ ⲛⲓⲡⲟ‐
ⲗⲓⲧⲉⲓⲁ ⲛⲉⲙ ⲛⲓϩⲟϫϩⲉϫ ⲙⲡⲣⲟⲥ‐ (-verso-) ⲟⲩⲥⲏⲟⲩ ⲁⲩⲁⲙⲟⲛⲓ ⲛⲧⲟⲧⲟⲩ
ϧⲉⲛ ϯϩⲩⲡⲟⲙⲟⲛⲏ ⲉⲁⲩⲉⲣⲁⲅⲱⲛⲓⲍⲉⲥⲑⲁⲓ ⲛⲕⲁⲗⲱⲥ ⲉⲩϭⲟϫⲓ ϧⲉⲛ ⲡⲓⲥⲧⲁ‐
ⲇⲓⲟⲛ ⲛⲧⲉ ϯⲁⲣⲉⲧⲏ ⲉⲩⲥⲱⲟⲩⲧⲉⲛ ⲙⲙⲱⲟⲩ ⲉⲛⲁ ⲧϩⲏ ⲕⲁⲧⲁ ⲡⲥⲁϫⲓ ⲙⲫⲏ
ⲉⲑⲟⲩⲁⲃ ⲛⲁⲡⲟⲥⲧⲟⲗⲟⲥ ⲡⲁⲩⲗⲟⲥ ϣⲁⲧⲟⲩⲧⲁϩⲉ ⲡⲓⲃⲁⲓ ⲛⲧⲉ ⲡⲓⲑⲱϩⲉⲙ ⲉⲧ‐
ⲉⲙⲡϣⲱⲓ ⲟⲩⲟϩ ⲛⲧⲁⲩϣⲱⲡⲓ ⲛⲉⲙ ⲫⲏ ⲉⲧⲟⲩϭⲓ ϣϣⲱⲟⲩ ⲙⲙⲟϥ ⲡⲭ︦ⲥ︦ ⲛⲟⲩⲁ‐
ⲅⲱⲛⲟⲑⲉⲧⲏⲥ ⲙⲙⲏⲓ ⲉⲁⲩⲙⲉⲥⲧⲉ ⲡⲱⲟⲩ ⲛⲧⲉ ⲡⲁⲓⲕⲟⲥⲙⲟⲥ ⲙⲡⲣⲟⲥⲟⲩⲥⲏⲟⲩ
ⲛⲉⲙ ⲛⲓⲁⲡⲟⲗⲁⲩⲥⲓⲥ ⲧⲏⲣⲟⲩ ⲛⲉⲫⲗⲏⲟⲩ ⲉⲑⲛⲁⲕⲱⲣϥ ⲁⲩⲟⲡⲟⲩ ⲉϩⲁⲛ ⲗⲉⲃϣ
ⲟⲩⲟϩ ⲁⲩϣⲱⲡⲓ ⲉⲩⲙⲟⲥϯ ⲙⲡⲁⲓⲕⲟⲥⲙⲟⲥ ⲙⲫⲣⲏϯ ⲛⲟⲩϣⲧⲉⲕⲟ. ⲁⲥϣⲱⲡⲓ ⲇⲉ
ⲛⲟⲩⲥⲟⲡ ϩⲱⲥ ⲉⲓϭⲓ ⲛϩⲣⲁⲓ ⲛⲉⲙⲱⲟⲩ ⲡⲉϫⲏⲓ ⲛⲱⲟⲩ ϫⲉ ⲛⲁⲣⲉⲧⲉⲛⲭⲏ ϧⲉⲛ
ⲕⲱⲛⲥⲧⲁⲛⲧⲓⲛⲟⲩⲡⲟⲗⲓⲥ ⲡⲉ ⲡⲁⲓⲟϯ ⲡⲟⲗⲗⲁⲕⲓⲥ ⲭⲛⲁϫⲉⲙ ⲑⲏⲛⲟⲩ ⲡⲉ ⲉⲣⲉ‐
ⲧⲉⲛⲟⲓ ⲛⲟⲩⲣⲟ ϯⲛⲟⲩ ⲡⲉ. ⲛⲑⲱⲟⲩ ⲇⲉ ⲁⲩⲕⲉⲧ ⲡⲟⲩϩⲟ ⲉⲣⲟⲓ ⲡⲉϫⲱⲟⲩ ⲛⲏⲓ
ϧⲉⲛ ⲟⲩⲙⲉⲧⲣⲉⲙⲣⲁⲩϣ ϫⲉ ⲁⲣⲉ ⲡⲉⲕⲛⲟⲩⲥ ⲭⲏ ⲛⲑⲱⲛ ⲱ ⲡⲓⲥⲟⲛ ⲉⲧⲁⲕϫⲉ
ⲡⲁⲓⲥⲁϫⲓ ⲫⲁⲓ ⲁⲣⲏⲟⲩ ⲡⲁⲛⲧⲱⲥ (-fol. 65-) ⲉϥϧⲉⲛ ⲡⲓⲙⲁ ⲉⲧⲁⲕⲫⲓⲣⲓ ⲉⲣⲟϥ


### 0048

ⲁⲛⲟⲩⲱ ⲉⲛϫⲱ ⲙⲙⲟⲥ ⲛⲁⲕ ⲛⲟⲩⲙⲏϣ ⲛⲥⲟⲡ ⲱ ⲡⲓⲥⲟⲛ ⲡϣⲟⲓ ϫⲉ ⲉⲓⲧⲉ ⲉⲕ‐
ϩⲉⲙⲥⲓ ⲛⲉⲙⲁⲛ ⲉⲓⲧⲉ ⲉⲕⲭⲏ ϧⲉⲛ ⲡⲉⲕⲙⲁ ⲛϣⲱⲡⲓ ⲁⲙⲟⲛⲓ ⲙⲡⲓⲣⲁⲛ ⲛⲟⲩ‐
ϫⲁⲓ ⲛⲧⲉ ⲡⲉⲛⲟ︦ⲥ︦ ⲓ︦ⲏ︦ⲥ︦ ϧⲉⲛ ⲟⲩⲙⲉⲧⲁⲑⲙⲟⲩⲛⲕ ⲕⲁⲓ ⲅⲁⲣ ⲁⲗⲏⲑⲱⲥ ⲉⲛⲁⲣⲉ
ⲡⲓⲣⲁⲛ ⲉⲑⲟⲩⲁⲃ ϧⲉⲛ ⲡⲉⲕϩⲏⲧ ⲡⲉ ⲛⲁⲕⲛⲁϫⲉ ⲡⲁⲓⲥⲁϫⲓ ⲁⲛ ⲡⲉ ⲉⲧⲁⲕϫⲟϥ
ϯⲛⲟⲩ. ⲗⲟⲓⲡⲟⲛ ⲙⲁ ϩⲑⲏⲕ ⲉⲣⲟⲕ ϧⲉⲛ ⲟⲩⲧⲁϫⲣⲟ ⲙⲡⲉⲣⲉⲣ ⲁⲙⲉⲗⲉⲥ ⲉⲡⲓⲣⲁⲛ
ⲛⲟⲩϫⲁⲓ ⲛⲧⲉ ⲡⲉⲛⲟ︦ⲥ︦ ⲓ︦ⲏ︦ⲥ︦ ⲡⲭ︦ⲥ︦ ⲁⲗⲗⲁ ⲁⲙⲟⲛⲓ ⲙⲙⲟϥ ϧⲉⲛ ⲡⲉⲕϩⲏⲧ ⲧⲏⲣϥ
ϧⲉⲛ ⲟⲩⲙⲟⲩⲛ ⲉⲃⲟⲗ ϧⲉⲛ ⲟⲩⲙⲉⲧⲣⲉϥϣⲉⲡ ϧⲓⲥⲓ ϫⲉ ⲟⲩⲏⲓ ⲉϣⲱⲡ ⲛⲧⲉⲛⲉⲣ
ⲁⲙⲉⲗⲉⲥ ⲉⲫⲁⲓ ⲓⲉ ⲁⲕⲙⲏⲛ ⲧⲉⲛⲙⲱⲟⲩⲧ ϧⲉⲛ ⲛⲉⲛⲡⲁⲣⲁⲡⲧⲱⲙⲁ. ⲗⲟⲓⲡⲟⲛ
ⲙⲡⲉⲛⲑⲣⲉⲛⲙⲉⲛⲣⲉ ϯⲡⲁⲣⲣⲏⲥⲓⲁ ⲛⲉⲙ ⲡⲓϭⲓ ϩⲣⲁϥ ⲛⲉⲙ ⲛⲓⲥⲁϫⲓ ⲛⲉⲫⲗⲏⲟⲩ
ⲛⲁⲓ ⲛⲉ ⲉⲧⲧⲁⲕⲟ ⲙⲡⲉⲩⲧⲁϩ ⲧⲏⲣϥ ⲙⲡⲓⲙⲟⲛⲁⲭⲟⲥ ⲕⲁⲧⲁ ϯϧⲉ ⲉⲧⲁⲛⲉⲙⲓ
ⲉⲫⲁⲓ ⲉⲧⲓ ⲉⲛϣⲟⲡ ϧⲉⲛ ϯⲥⲩⲣⲓⲁ ϩⲟⲧⲉ ⲉⲧⲁ ϯⲙⲉⲧⲣⲱⲙⲓ ⲁⲓⲧⲉⲛ ⲛϭⲓ ϩⲣⲁϥ
ⲙⲡⲟⲩⲭⲁⲛ ⲉⲉⲣ ⲫⲙⲉⲩⲓ ⲛⲛⲉⲛⲛⲟⲃⲓ ϯⲙⲉⲧϣⲉⲙⲙⲟ ⲇⲉ ⲛⲉⲙ ⲡⲓⲭⲁ ⲣⲱϥ
ϧⲉⲛ ⲟⲩⲉⲙⲓ ⲛⲉⲙ ⲡⲓϩⲟϫϩⲉϫ (-verso-) ϩⲁⲛ ⲥⲑⲃⲁⲓ ⲛⲧⲉ ⲡⲉⲛϣⲗⲟⲗ ⲛⲉ ⲡⲓ‐
ϩⲟϫϩⲉϫ ⲉⲧⲙⲓⲥⲓ ⲙⲡⲓⲧⲱⲃϩ ϧⲉⲛ ⲟⲩⲧⲟⲩⲃⲟ ⲡⲓⲧⲱⲃϩ ⲉⲑⲙⲓⲥⲓ ⲛϯϩⲟϯ ⲛⲧⲉ
ⲫϯ ⲛⲉⲙ ϯⲁⲅⲁⲡⲏ ⲟⲩⲟϩ ⲛⲁⲓ ⲛⲉ ⲉⲑⲙⲓⲥⲓ ⲙⲡⲓⲣⲱⲙⲓ ϫⲉ ⲟⲩⲏⲓ ⲙⲙⲟⲛ
ⲁⲝⲓⲱⲙⲁ ⲟⲩⲇⲉ ⲙⲉⲧⲣⲁⲙⲁⲟ ⲟⲩⲇⲉ ⲉⲧϫⲱⲣⲓ ⲧⲁⲓⲏⲟⲩⲧ ϧⲁⲧⲉⲛ ⲫϯ ⲁⲗⲗⲁ
ⲟⲩⲯⲩⲭⲏ ⲉⲥⲟⲩⲁⲃ ⲡⲉ ⲉⲧⲉϥⲕⲱϯ ⲛⲥⲱⲥ ⲟⲩⲟϩ ⲧⲉϥⲑⲩⲥⲓⲁ ⲛⲉⲙ ⲡⲉϥϭⲗⲓⲗ


### 0049

ⲡⲉ ⲡⲉⲛⲟⲩϫⲁⲓ. ⲁⲛⲟⲕ ⲁⲓϣⲉⲡ ⲡⲟⲩⲥⲁϫⲓ ⲉⲣⲟⲓ ϧⲉⲛ ⲟⲩⲣⲱⲟⲩⲧϥ ⲛϩⲏⲧ ⲉⲁⲓϯ
ⲙⲉⲧⲁⲛⲟⲓⲁ ⲉⲓϫⲱ ⲙⲙⲟⲥ ϫⲉ ⲭⲱ ⲛⲏⲓ ⲉⲃⲟⲗ ⲛⲁⲓⲟϯ ⲧⲱⲃϩ ⲉϫⲱⲓ.
ⲗⲟⲓⲡⲟⲛ ⲙⲉⲛⲉⲛⲥⲁ ⲟⲩⲣⲟⲙⲡⲓ ⲛⲉϩⲟⲟⲩ ⲛⲧⲉ ⲫⲟⲩⲱⲧⲉⲃ ⲉⲃⲟⲗ ⲛⲛⲁⲓⲙⲁ‐
ⲕⲁⲣⲓⲟⲥ ⲁ ⲡⲓϣⲁϥⲉ ϫⲱⲣϫ ⲛⲕⲁⲗⲱⲥ ⲉⲓⲧⲉ ⲛⲧⲉ ⲡⲓⲧⲱⲟⲩ ⲛⲧⲉ ⲡⲉⲣⲛⲟⲩϫ
ⲉⲓⲧⲉ ⲛⲧⲉ ⲛⲓⲙⲟⲛⲱⲟⲩⲓ ⲉⲧⲥⲏⲣ ⲉⲃⲟⲗ ϧⲉⲛ ⲭⲏⲙⲓ ⲁⲡⲁⲝ ⲁⲡⲗⲱⲥ ⲁ ⲡⲓϣⲁϥⲉ
ϫⲱⲣϫ ⲁⲩⲕⲱⲧ ⲛⲱⲟⲩ ⲛⲟⲩⲛⲓϣϯ ⲛⲉⲕⲕⲗⲏⲥⲓⲁ ⲟⲩⲟϩ ⲁⲩⲑⲱϣ ⲛⲁⲃⲃⲁ ⲓⲥⲓ‐
ⲇⲱⲣⲟⲥ ⲙⲡⲣⲉⲥⲃⲩⲧⲉⲣⲟⲥ ⲁⲛⲟⲕ ⲇⲉ ϩⲱ ϧⲁ ⲡⲓⲁⲧⲉⲙⲡϣⲁ ⲁⲩⲁⲓⲧ ⲛⲇⲓⲁⲕⲱⲛ.
ⲙⲉⲛⲉⲛⲥⲁ ⲛⲁⲓ ⲁ ⲡⲓⲛⲓϣϯ ⲁⲃⲃⲁ ⲙⲁⲕⲁⲣⲓⲟⲥ ⲙⲟⲩϯ ⲉⲃⲟⲗϧⲉⲛ ϯⲉⲕⲕⲗⲏⲥⲓⲁ
ⲉϥϩⲟⲛϩⲉⲛ ⲉϥϫⲱ ⲙⲙⲟⲥ ϫⲉ ⲙⲟⲩϯ ⲉⲡⲁⲓⲧⲟⲡⲟⲥ ϫⲉ (-fol. 66-) ⲑⲣⲁⲟⲩⲏ
ⲛⲛⲓⲣⲱⲙⲁⲓⲟⲥ. ⲁⲩⲉⲣ ⲟⲩⲱ ⲛϫⲉ ⲅ̄ ⲛⲛⲓϣϯ ⲛϧⲉⲗⲗⲟ ⲛⲧⲉ ⲡⲧⲱⲟⲩ ⲙⲡⲉⲣ‐
ⲛⲟⲩϫ ⲉⲧⲁⲩϣⲱⲡⲓ ϧⲁⲧⲟⲧⲉⲛ ⲉⲧⲉ ⲁⲡⲁ ⲡⲁⲙⲱ ⲡⲉ ⲛⲉⲙ ⲁⲡⲁ ⲡⲓϩⲱⲣ ⲛⲉⲙ
ⲁⲡⲁ ⲁⲑⲣⲉ ⲡⲉϫⲱⲟⲩ ⲙⲡⲉⲑⲟⲩⲁⲃ ⲁⲃⲃⲁ ⲙⲁⲕⲁⲣⲓⲟⲥ ϫⲉ ⲙⲡⲉⲕⲉⲙⲓ ⲉⲛⲟⲩ‐
ⲣⲁⲛ ⲡⲉⲛⲓⲱⲧ ⲉⲧⲥⲙⲁⲣⲱⲟⲩⲧ. ⲡⲉϫⲁϥ ⲛⲱⲟⲩ ϫⲉ ⲁϩⲏ ⲁⲗⲗⲁ ⲡⲉⲧⲥϣⲉ ⲁⲛ
ⲡⲉ ⲉⲑⲣⲉⲛⲙⲟⲩϯ ⲉⲫⲣⲁⲛ ⲛⲟⲩⲁⲓ ⲛϧⲏⲧⲟⲩ ⲉϫⲉⲛ ⲡⲓⲧⲟⲡⲟⲥ ⲛⲧⲉⲛⲭⲁ ⲡⲓⲟⲩⲁⲓ
ⲉⲡⲉⲓⲇⲏ ⲁⲩϫⲱⲕ ⲉⲃⲟⲗ ϧⲉⲛ ⲟⲩϩⲩⲡⲟⲙⲟⲛⲏ ⲛⲟⲩⲱⲧ ⲛϧⲏⲧϥ ⲛⲉⲙ ⲛⲟⲩ‐
ⲉⲣⲏⲟⲩ ⲟⲩⲟϩ ⲟⲛ ϫⲉ ϩⲁⲛ ⲥⲛⲏⲟⲩ ⲛⲉ ⲉⲑⲃⲉ ⲫⲁⲓ ⲁⲛⲛⲁⲉⲣⲟⲛⲟⲙⲁⲍⲉⲓⲛ
ⲙⲙⲱⲟⲩ ⲉⲟⲩⲥⲟⲡ ⲛⲉⲙ ⲛⲟⲩⲉⲣⲏⲟⲩ ⲛⲧⲉⲛⲙⲟⲩϯ ⲉⲡⲟⲩⲧⲟⲡⲟⲥ ϫⲉ ⲛⲓⲣⲱ‐


### 0050

ⲙⲁⲓⲟⲥ ⲙⲉⲛⲉⲛⲥⲁ ⲡⲟⲩϫⲱⲕ ⲉⲃⲟⲗ. ⲡⲁⲓⲣⲏϯ ⲣⲱ ⲟⲛ ⲡⲉ ⲉⲧⲁϥⲑⲣⲟⲩⲥϧⲉ
ⲛⲟⲩⲣⲁⲛ ⲉⲡⲓⲇⲓⲡⲧⲩⲭⲟⲛ ϫⲉ ⲛⲉⲛⲓⲟϯ ⲛⲣⲱⲙⲁⲓⲟⲥ ϣⲁ ⲉϧⲟⲩⲛ ⲉⲫⲟⲟⲩ ⲕⲁⲧⲁ
ⲫⲣⲏϯ ⲉⲧⲁⲩⲟⲩⲁϩ ⲥⲁϩⲛⲓ ⲛⲁϥ ⲉⲃⲟⲗϩⲓⲧⲉⲛ ⲫϯ. ⲁϥⲉⲣ ⲙⲉⲑⲣⲉ ⲇⲉ ⲛⲁⲛ ⲟⲛ
ⲙⲫⲁⲓ ⲛϫⲉ ⲁⲃⲃⲁ ⲡⲁⲫⲛⲟⲩϯ ⲡⲓⲙⲁⲑⲏⲧⲏⲥ ⲛⲧⲉ ⲁⲃⲃⲁ ⲙⲁⲕⲁⲣⲓⲟⲥ ⲫⲏ
ⲉⲧⲁϥⲉⲣ ⲓⲱⲧ ⲉϣⲓⲏⲧ ⲙⲉⲛⲉⲛⲥⲱϥ ϫⲉ ϩⲟⲧⲉ ⲡⲉϫⲁϥ ⲉⲧⲁⲛⲕⲱⲧ ⲉϯ‐ (-verso-)
ⲉⲕⲕⲗⲏⲥⲓⲁ ⲁ ⲫ︦︦ϯ︦ ⲟⲩⲁϩ ⲥⲁϩⲛⲓ ⲙⲡⲉⲛⲓⲱⲧ ϩⲓⲧⲉⲛ ⲟⲩⲭⲉⲣⲟⲩⲃⲓⲙ ⲛⲟⲩⲱⲓⲛⲓ
ϫⲉ ⲙⲟⲩϯ ⲉⲡⲁⲓⲙⲁ ⲑⲣⲁⲟⲩⲏ ⲛⲛⲓⲣⲱⲙⲁⲓⲟⲥ ⲟⲩⲟϩ ⲛⲑⲟⲕ ϩⲱⲕ ⲡⲉϫⲁϥ
ⲟⲩⲁϩⲕ ⲛⲥⲱⲓ ⲛⲧⲁⲧⲁⲙⲟⲕ ⲉⲡⲓⲙⲁ ⲉⲧⲟⲩⲛⲁⲙⲟⲩϯ ⲙⲡⲉⲕⲣⲁⲛ ⲉϩⲣⲏⲓ ⲉϫⲱϥ.
ⲗⲟⲓⲡⲟⲛ ⲁ ⲡⲓⲭⲉⲣⲟⲩⲃⲓⲙ ⲥⲱⲕ ϧⲁϫⲱϥ ⲁϥⲉⲛϥ ⲉⲡⲓⲁⲗⲟⲕ ⲛⲉⲣⲏⲥ ⲛⲧⲉ ⲡⲓ‐
ϩⲉⲗⲟⲥ ⲉⲫⲙⲁ ⲙⲡⲓϣⲏⲓ ⲁϥⲟϩⲓ ⲉⲣⲁⲧϥ ⲉϫⲉⲛ ϯⲡⲉⲧⲣⲁ ⲉⲧⲥⲁ ⲡⲉⲙⲉⲛⲧ ⲁϥⲱϣ
ⲛⲁϥ ⲉϥϫⲱ ⲙⲙⲟⲥ ϫⲉ ⲫⲁⲓ ⲡⲉ ⲡⲓⲙⲁ ⲉⲧⲟⲩⲛⲁⲙⲟⲩϯ ⲙⲡⲉⲕⲣⲁⲛ ⲉϩⲣⲏⲓ
ⲉϫⲱϥ ⲡⲓⲙⲁ ⲉⲧⲧⲏ ⲉⲧⲁⲕⲕⲟⲧϥ ⲁⲩⲛⲁⲧⲏⲓϥ ⲛⲛⲓⲣⲱⲙⲁⲓⲟⲥ ϣⲁ ⲉⲛⲉϩ ⲉⲑⲃⲉ
ϫⲉ ⲛⲑⲱⲟⲩ ⲛⲉ ⲛⲓϣⲟⲣⲡ ⲉⲧⲁⲩⲭⲁ ⲥⲱⲙⲁ ⲉϧⲣⲏⲓ ϧⲉⲛ ⲡⲁⲓⲧⲱⲟⲩ ⲉⲑⲟⲩⲁⲃ
ⲉⲁⲩϣⲱⲡⲓ ⲛϣⲟⲣⲡ ⲛⲁⲡⲁⲣⲭⲏ ⲛⲧⲉ ⲛⲉⲕϧⲓⲥⲓ ϧⲉⲛ ⲡⲁⲓⲓⲁϩ ⲁⲗⲟⲗⲓ ⲛⲧⲉ ⲡⲟ︦ⲥ︦
ⲥⲁⲃⲁⲱⲑ ⲫⲁⲓ ⲉⲧⲁⲩⲑⲁϣⲕ ⲛⲟⲩⲱⲓ ⲉⲣⲟϥ ⲟⲩⲟϩ ⲛⲁⲣⲭⲏⲅⲟⲥ ⲉⲧⲉ ⲫⲁⲓ ⲡⲉ
ⲡⲓϣⲗⲟⲗ ⲉⲧⲧⲁⲓⲏⲟⲩⲧ ⲛⲧⲉ ⲛⲓⲙⲟⲛⲁⲭⲟⲥ ⲡⲓⲗⲁⲟⲥ ⲉⲧⲓⲣⲓ ⲙⲫⲟⲩⲱϣ ⲙⲫϯ
ⲟⲩⲟϩ ⲉⲧⲥⲱⲕ ⲛⲛⲉϥⲙⲉⲧϣⲉⲛϩⲏⲧ ⲉϩⲣⲏⲓ ⲉϫⲉⲛ ⲡⲅⲉⲛⲟⲥ ⲛⲛⲓⲣⲱⲙⲓ ⲉⲑⲃⲉ ⲛⲟⲩ‐


### 0051

ⲡⲟⲗⲓⲧⲉⲓⲁ ⲛⲉⲙ ⲛⲟⲩϣⲗⲏⲗ (-fol. 67-) ⲛⲉⲙ ⲛⲟⲩⲉⲣⲙⲱⲟⲩⲓ ⲉⲧⲟⲩⲫⲱⲛ
ⲙⲙⲱⲟⲩ ⲉⲃⲟⲗ ⲙⲡⲓⲉϩⲟⲟⲩ ⲛⲉⲙ ⲡⲓⲉϫⲱⲣϩ ϧⲉⲛ ⲟⲩⲙⲉⲧⲁⲑⲙⲟⲩⲛⲕ ⲉⲑⲃⲉ
ⲛⲓⲣⲉϥⲉⲣ ⲛⲟⲃⲓ ϫⲉ ϩⲓⲛⲁ ⲛⲧⲟⲩⲧⲁⲥⲑⲱⲟⲩ ϩⲁ ⲫ︦ϯ︦ ϧⲉⲛ ⲡⲟⲩϩⲏⲧ ⲧⲏⲣϥ ⲛⲧⲉϥ‐
ⲭⲱ ⲛⲱⲟⲩ ⲉⲃⲟⲗ ⲕⲁⲧⲁ ⲛⲉϥⲙⲉⲧϣⲉⲛϩⲏⲧ ⲉϧⲟⲩⲛ ⲉⲡⲉϥⲑⲁⲙⲓⲟ.
ⲓⲥ ϩⲏⲡⲡⲉ ϫⲉ ⲛⲁⲓⲟϯ ⲉⲑⲟⲩⲁⲃ ⲓⲥ ⲛⲏ ⲉⲧⲁⲓⲛⲁⲩ ⲉⲣⲱⲟⲩ ⲛⲉⲙ ⲛⲏ ⲉⲧⲁⲓ‐
ⲥⲟⲑⲙⲟⲩ ⲁⲓⲧⲁⲙⲱⲧⲉⲛ ⲉⲣⲱⲟⲩ ϧⲉⲛ ⲟⲩⲧⲁϫⲣⲟ ⲗⲟⲓⲡⲟⲛ ⲁⲛⲁⲩ ⲙⲡⲉⲛⲑⲣⲉ
ϩⲗⲓ ⲉⲣ ⲁⲑⲛⲁϩϯ ⲉⲛⲏ ⲉⲧⲁⲓϫⲟⲧⲟⲩ ⲧⲏⲣⲟⲩ ⲉⲑⲃⲉ ⲛⲁⲓⲁⲅⲓⲟⲥ ⲁⲗⲗⲁ ϣⲱⲡ
ⲉⲣⲱⲧⲉⲛ ϧⲉⲛ ⲟⲩϯ ϩⲑⲏϥ ⲛⲛⲏ ⲉⲧⲁⲓϫⲟⲧⲟⲩ ⲉⲑⲃⲏⲧⲟⲩ ϩⲓⲛⲁ ⲛⲧⲉⲧⲉⲛϣⲧⲉⲙϭⲓ
ⲛⲟⲩϩⲁⲡ ⲙⲁⲗⲓⲥⲧⲁ ⲛⲏ ⲉⲧⲁϥϫⲟⲧⲟⲩ ⲛϫⲉ ⲡⲉⲛⲓⲱⲧ ⲙⲡ︦ⲛ︦ⲁ︦ⲧⲟⲫⲟⲣⲟⲥ ⲡⲓⲛⲓϣϯ
ⲁⲃⲃⲁ ⲙⲁⲕⲁⲣⲓⲟⲥ ⲡⲓⲣⲱⲙⲓ ⲉⲧⲉⲣⲫⲟⲣⲉⲓⲛ ⲙⲫ︦ϯ︦ ⲟⲩⲟϩ ⲉⲣⲉ ⲫ︦ϯ︦ ⲙⲉⲓ ⲙⲙⲟϥ
ⲉⲑⲃⲉ ⲡⲉϥⲧⲟⲩⲃⲟ ⲥⲥϧⲏⲟⲩⲧ ⲅⲁⲣ ϫⲉ ⲁⲣⲉϣⲁⲛ ⲛⲓϧⲉⲗⲗⲟⲓ ϩⲓ ⲕⲟⲧ ⲉⲁⲃⲃⲁ
ⲙⲁⲕⲁⲣⲓⲟⲥ ϣⲁϥϭⲓⲧⲟⲩ ⲉⲡⲟⲩⲥⲡⲏⲗⲁⲓⲟⲛ ⲉϥϫⲱ ⲙⲙⲟⲥ ϫⲉ ⲁⲙⲱⲓⲛⲓ ⲛⲧⲉ‐
ⲧⲉⲛⲛⲁⲩ ⲉⲡⲓⲙⲁⲣⲧⲩⲣⲓⲟⲛ ⲛⲧⲉ ⲛⲓⲕⲟⲩϫⲓ ⲛϣⲉⲙⲙⲱⲟⲩ (-verso-) ϩⲟⲡⲱⲥ ⲡⲕⲉ
ⲛⲑⲱⲧⲉⲛ ϩⲱⲧⲉⲛ ⲛⲧⲉⲧⲉⲛⲉⲣⲡⲣⲟⲕⲟⲡⲧⲉⲓⲛ ϧⲉⲛ ⲛⲓⲁⲣⲉⲧⲏ ⲛⲧⲉ ⲛⲏ ⲉⲧⲉⲙ‐
ⲙⲁⲩ ⲛⲁⲓⲁⲅⲓⲟⲥ ⲉⲧⲥⲙⲁⲣⲱⲟⲩⲧ ⲟⲩⲟϩ ⲛⲧⲉⲧⲉⲛⲉⲣ ⲡⲉⲙⲡϣⲁ ⲛϯⲙⲉⲣⲓⲥ ⲛⲉⲙ
ⲡⲓⲕⲗⲏⲣⲟⲥ ⲛⲧⲱⲟⲩ ϧⲉⲛ ⲑⲙⲉⲧⲟⲩⲣⲟ ⲛⲉⲛⲉϩ ⲙⲡⲉⲛⲟ︦ⲥ︦ ⲓ︦ⲏ︦ⲥ︦ ⲡⲭ︦ⲥ︦ ⲁⲛⲁⲩ ϫⲉ
ⲁ ⲡⲓⲛⲓϣϯ ⲁⲃⲃⲁ ⲙⲁⲕⲁⲣⲓⲟⲥ ⲭⲁⲩ ⲛⲧⲟⲧϥ ϩⲱⲥ ⲙⲁⲣⲧⲩⲣⲟⲥ ϧⲉⲛ ⲡϫⲓ


### 0052

ⲛⲑⲣⲉϥϩⲱⲗ ⲉⲡⲓⲥⲡⲏⲗⲁⲓⲟⲛ ⲛⲉⲙ ⲛⲓϧⲉⲗⲗⲟⲓ ⲛⲧⲟⲩϣⲗⲏⲗ ϧⲉⲛ ⲟⲩⲛⲁϩϯ
ⲕⲁⲓ ⲅⲁⲣ ⲁⲩⲉⲣ ⲙⲁⲣⲧⲩⲣⲟⲥ ϧⲉⲛ ⲧⲟⲩⲡⲣⲟϩⲁⲓⲣⲉⲥⲓⲥ ⲁⲧϭⲛⲉ ⲫⲉⲛ ⲥⲛⲟϥ
ⲉⲃⲟⲗϧⲉⲛ ⲡϫⲓ ⲛⲑⲣⲟⲩⲉⲣⲕⲁⲧⲁⲫⲣⲟⲛⲉⲓⲛ ⲛⲑⲙⲉⲧⲟⲩⲣⲟ ⲙⲡⲟⲩⲓⲱⲧ ⲉⲑⲛⲁ‐
ⲧⲁⲕⲟ ⲉⲑⲃⲉ ϯⲙⲉⲧⲟⲩⲣⲟ ⲛⲧⲉ ⲛⲓⲫⲏⲟⲩⲓ ⲛⲉⲙ ⲛⲉⲥⲁⲅⲁⲑⲟⲛ ⲟⲩⲟϩ ⲫⲙⲉⲩⲓ
ⲙⲡⲓⲡⲁⲗⲁⲧⲓⲟⲛ ⲉⲧⲁⲩⲉⲣ ⲡⲉϥⲱⲃϣ ⲛⲉⲙ ⲛⲓϫⲓ ⲛⲟⲩⲱⲙ ⲉⲧⲗⲉⲕⲗⲱⲕ ⲛⲟⲩ‐
ⲙⲏϣ ⲛⲣⲏϯ ⲛⲉⲙ ⲛⲓϩⲟϫϩⲉϫ ϩⲱⲟⲩ ⲉⲧⲁⲩⲉⲣϩⲩⲡⲟⲙⲉⲛⲉⲓⲛ ⲉⲣⲱⲟⲩ ϩⲓ
ⲛⲓⲙⲁ ⲛⲙⲟϣⲓ ⲉⲧϧⲟⲥⲓ ⲛⲧⲉ ⲫⲓⲟⲙ ⲛⲉⲙ ⲡⲕⲓⲛⲇⲩⲛⲟⲥ ⲛⲛⲓϭⲁⲧϥⲓ ⲛⲧⲉ ⲡⲓⲙⲁ
ⲉⲧⲉⲙⲙⲁⲩ ϣⲁⲧⲉ ⲫ︦ϯ︦ ϭⲓ ⲙⲱⲓⲧ ⲛⲱⲟⲩ ϩⲓⲧⲉⲛ ⲧⲉϥⲃⲟⲏⲑⲓⲁ ⲉⲧⲥⲱⲕ ϧⲁϫⲱⲟⲩ
ϣⲁⲧⲉϥⲉⲛⲟⲩ ⲉⲡⲓⲧⲱⲟⲩ ⲛⲧⲉ ϣⲓⲏⲧ ⲉⲫⲙⲁ ⲙⲡⲉⲑⲟⲩⲁⲃ ⲁⲃⲃⲁ ⲙⲁ‐(-fol. 68-)
ⲕⲁⲣⲓⲟⲥ ⲛⲧⲟⲩϫⲱⲕ ⲉⲃⲟⲗ ⲙⲙⲁⲩ ⲉⲑⲃⲉ ⲫⲁⲓ ⲁⲓϫⲟⲥ ϫⲉ ⲁⲩⲉⲣ ⲙⲁⲣⲧⲩⲣⲟⲥ
ⲁⲧϭⲛⲉ ⲥⲏϥⲓ. ⲁⲛϣⲁⲛⲭⲱ ⲅⲁⲣ ⲛⲁⲛ ⲙⲡⲉⲣ ⲫⲙⲉⲩⲓ ⲛⲧⲁⲛⲁⲥⲧⲣⲟⲫⲏ ⲛⲛⲉⲛ‐
ⲓⲟϯ ⲉⲑⲟⲩⲁⲃ ⲧⲉⲛⲛⲁϣⲓⲃϯ ϩⲱⲛ ⲉⲃⲟⲗϩⲁ ⲛⲓⲥⲩⲛⲏⲑⲉⲓⲁ ⲛⲕⲟⲥⲙⲓⲕⲟⲥ ⲟⲩⲟϩ
ⲧⲉⲛⲛⲁϭⲓ ϧⲉⲣⲉⲃ ⲛⲟⲩⲱⲓⲛⲓ ϧⲉⲛ ⲛⲓⲙⲓⲧⲱⲟⲩⲓ ⲛⲧⲉ ⲛⲉⲛⲓⲟϯ ⲙⲙⲁⲕⲁⲣⲓⲟⲥ ⲉⲁⲛ‐
ⲭⲱ ⲛⲥⲱⲛ ⲛⲛⲁ ⲫⲁϩⲟⲩ ⲉⲛⲥⲱⲟⲩⲧⲉⲛ ⲙⲙⲟⲛ ⲉⲛⲁ ⲧϩⲏ ϧⲉⲛ ⲟⲩⲑⲉⲃⲓⲟ ⲙⲙⲏⲓ
ⲛⲉⲙ ⲟⲩⲁⲅⲁⲡⲏ ⲉⲛⲙⲟϣⲓ ϩⲓ ⲛⲟⲩϣⲉ ⲛⲧⲁⲧⲥⲓ ⲛⲁⲧⲥⲱⲣⲉⲙ ⲉⲛϫⲱⲕ ⲉⲃⲟⲗ
ⲛⲛⲓⲛⲟⲙⲟⲥ ⲛⲧⲉ ⲡⲭ︦ⲥ︦ ⲓ︦ⲏ︦ⲥ︦ ⲛⲉⲙ ⲛⲓⲉⲛⲧⲟⲗⲏ ⲛⲁⲅⲅⲉⲗⲓⲕⲟⲛ ⲛⲧⲉ ϯⲙⲉⲧⲙⲟ‐
ⲛⲁⲭⲟⲥ ⲛⲁⲓ ⲉⲧϭⲓ ⲙⲱⲓⲧ ⲛⲁⲛ ϣⲁ ⲫϯ ϧⲉⲛ ⲟⲩⲥⲱⲟⲩⲧⲉⲛ ⲛⲉⲙ ϯϫⲓ ⲛϣⲁϥ‐


### 0053

ⲛⲓ ⲉⲛⲓⲁⲅⲁⲑⲟⲛ ϧⲉⲛ ⲡⲓⲡⲁⲣⲁⲇⲉⲓⲥⲟⲥ ⲕⲁⲓ ⲅⲁⲣ ⲁ ⲛⲉⲛⲓⲟϯ ⲭⲁ ⲡⲓⲕⲟⲩϫⲓ
ⲙⲙⲁ ⲛϣⲱⲡⲓ ⲛⲧⲉ ⲛⲁⲓⲁⲅⲓⲟⲥ ⲛⲧⲟⲧⲟⲩ ⲙⲫⲣⲏϯ ⲛⲟⲩⲉⲕⲕⲗⲏⲥⲓⲁ ⲉⲩϩⲏⲗ
ⲉⲙⲁⲩ ⲕⲁⲧⲁ ⲕⲟⲩϫⲓ ⲉⲩϣⲗⲏⲗ ϧⲉⲛ ⲟⲩⲛⲁϩϯ ⲟⲩⲟϩ ϩⲁⲛ ⲙⲏϣ ⲛⲧⲉ ⲛⲏ
ⲉⲧϣⲱⲛⲓ ⲉⲧϩⲟⲣϣ ϧⲉⲛ ⲛⲟⲩⲥⲱⲙⲁ ⲛⲉⲙ ⲧⲟⲩⲯⲩⲭⲏ ⲉⲓⲧⲉ ϧⲉⲛ ϣⲓⲏⲧ ⲉⲓⲧⲉ
ⲛⲁ ⲡⲧⲱⲟⲩ ⲙⲡⲉⲣⲛⲟⲩϫ ⲉⲓⲧⲉ ⲙⲁⲓ ⲛⲓⲃⲉⲛ ⲁⲩϣⲁⲛⲓ ⲉⲡⲟⲩⲙⲁⲣ (-verso-)
ⲧⲩⲣⲓⲟⲛ ⲛⲥⲉϣⲗⲏⲗ ϣⲁⲩϭⲓ ⲙⲡⲓⲧⲁⲗϭⲟ ⲥⲁⲧⲟⲧⲟⲩ ⲉⲃⲟⲗϩⲓⲧⲉⲛ ⲡⲓϩⲙⲟⲧ ⲛⲧⲉ
ⲡⲉⲛⲟ︦ⲥ︦ ⲓ︦ⲏ︦ⲥ︦ ⲡⲭ︦ⲥ︦ ⲫⲁⲓ ⲉⲧϯ ⲙⲡⲓⲧⲁⲗϭⲟ ⲛⲛⲏ ⲉⲧϣⲱⲛⲓ ⲉⲓⲧⲉ ⲛⲁ ⲡⲓⲥⲱⲙⲁ
ⲉⲓⲧⲉ ⲛⲁ ϯⲯⲩⲭⲏ ϩⲓⲧⲉⲛ ⲛⲓⲡⲣⲉⲥⲃⲉⲓⲁ ⲛⲧⲉ ⲛⲉⲛⲓⲟϯ ⲉⲑⲟⲩⲁⲃ ⲛⲣⲱⲙⲁⲓⲟⲥ
ⲙⲁⲝⲓⲙⲟⲥ ⲛⲉⲙ ⲇⲟⲙⲉⲧⲓⲟⲥ ⲉⲧⲉ ⲡⲥⲱⲧⲏⲣ ⲛⲟⲩⲟⲛ ⲛⲓⲃⲉⲛ ⲡⲉ ⲡⲉⲛⲟ︦ⲥ︦ ⲟⲩⲟϩ
ⲡⲉⲛⲛⲟⲩϯ ⲟⲩⲟϩ ⲡⲉⲛⲥⲱⲧⲏⲣ ⲓ︦ⲏ︦ⲥ︦ ⲡⲭ︦ⲥ︦ ⲫⲁⲓ ⲉⲧⲉⲃⲟⲗϩⲓⲧⲟⲧϥ ⲉⲣⲉ ⲱⲟⲩ ⲛⲓⲃⲉⲛ
ⲛⲉⲙ ⲧⲁⲓⲟ ⲛⲓⲃⲉⲛ ⲛⲉⲙ ⲡⲣⲟⲥⲕⲩⲛⲏⲥⲓⲥ ⲛⲓⲃⲉⲛ ⲉⲣⲡⲣⲉⲡⲉⲓ ⲙⲫⲓⲱⲧ ⲛⲉⲙⲁϥ
ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ⲛⲣⲉϥⲧⲁⲛϧⲟ ⲟⲩⲟϩ ⲛⲟⲙⲟⲟⲩⲥⲓⲟⲥ ⲛⲉⲙⲁϥ ϯⲛⲟⲩ ⲛⲉⲙ
ⲥⲏⲟⲩ ⲛⲓⲃⲉⲛ ⲛⲉⲙ ϣⲁ ⲉⲛⲉϩ ⲛⲧⲉ ⲛⲓⲉⲛⲉϩ ⲧⲏⲣⲟⲩ ⲁⲙⲏⲛ.