### 0001

ⲞⲨⲄⲀⲞⲨⲄⲎⲤⲒⲤ Ⲛ̄ⲦⲈ ⲠⲚ̄ ⲠⲈⲦ ⲞⲨⲀⲀⲂ
Ⲛ Ⲓ̈ⲰⲦ ⲀⲘⲀ ⲮⲞⲦⲈ ⲠⲚⲞϬ Ⲛ̄ ⲈⲠⲒⲤⲔⲞⲠⲞⲤ
Ⲛ̄ ⲦⲠⲞⲖⲒⲤ ⲠⲤⲞⲒ̈ • Ⲛ̄ⲦⲀϤⲦⲀⲨⲞⲤ ⲆⲈ Ⲛ
ϢⲰⲢⲠ︥ Ⲛ̄ⲦⲔⲨⲢⲒⲀⲔⲎ • Ⲛ̄ ⲦⲈⲢⲈ ⲀⲢⲒⲀⲚⲞⲤ
Ⲡ̄ϨⲎⲄⲈⲘⲰⲚ Ⲛ ⲐⲨⲂⲀⲈⲒⲤ ⲦⲚ̄ⲚⲞⲞⲨ Ⲛ̄ⲤⲰϤ
ⲈⲂⲒ Ⲛ̄ ⲦⲈϤⲀⲠⲈ Ⲉ̄ ⲀϤⲠⲀⲢⲀⲔⲀⲖⲒ Ⲛ̄ ⲠⲂⲈ-
ⲗⲈⲦⲀⲢⲒⲞⲤ Ⲛ̄ ⲠⲢ̄ⲢⲞ ⲘⲚ̄ ⲘⲘⲀⲦⲞⲒ̈ Ⲛ ⲠϨⲎ-
ⲄⲈⲘⲰⲚ Ⲉ̄ ⲦⲢⲈⲨⲔⲀⲦⲬⲈ Ⲙ̄ⲘⲞϤ Ⲉ ⲀϤⲢ̄
ⲦⲈⲨϢⲎ ⲦⲎⲢⲤ̄ • ⲈϤϨⲞⲘⲈⲖⲒⲈ ⲠⲖⲀⲞⲤ •
ϨⲚ̄ ⲞⲨⲈⲒⲢⲎⲚⲎ ϨⲀⲘⲎⲚ •
Ⲧϣⲓⲛⲉ ⲉ ⲣⲱⲧⲛ̄ ⲱ̄ ⲛⲁϣⲏⲣⲉ ⲙ̄ⲙⲉⲣⲓⲧ • ⲁⲩⲱ ⲛⲁϣⲉⲉⲣⲉ •
ⲁⲩⲱ ϯⲁⲥⲡⲁⲍⲉ ⲙ̄ⲙⲱⲧⲛ̄ ϩⲓ̈ ⲟⲩⲥⲟⲡ • ϩⲛ̄ ⲟⲩⲁⲥⲡⲁⲥⲙⲟⲥ
ⲛ̄ⲧⲉ ⲡⲛⲟⲩⲧⲉ • Ⲧϩⲱⲛ ⲅⲁⲣ ⲉ ⲧⲟⲟⲧ ⲧⲏⲩⲧⲛ̄ ⲙ̄ⲡⲟⲟⲩ ⲛ̄
ϩⲛ̄ⲉⲛⲧⲟⲗⲏ ⲛ̄ⲧⲉ ⲡⲱⲛϩ̄ : ⲉ ⲧⲣⲉ ⲧⲉⲧⲙⲙⲟⲟϣⲉ ⲛ̄ϩⲏⲧⲟⲩ
ⲛ̄ ⲟⲩⲟⲉⲓϣ ⲛⲓⲙ • ⲁⲩⲱ ⲛ̄ⲧⲉⲧⲛ̄ϭⲱ ⲉⲧⲉⲧⲛ̄ⲉⲓⲣⲉ ⲙ̄ ⲡⲁ
ⲙⲉⲉⲩⲉ : ⲉⲓ̈ⲥⲟⲟⲩⲛ ⲙ̄ ⲡⲁⲓ̈ ϫⲉ ⲛ ϯⲛⲁⲕⲧⲟⲓ̈ ⲁⲛ ϣⲁ
ⲣⲱⲧⲛ̄ ϩⲛ̄ ϯⲥⲁⲣⲝ̄ ϣⲁ ⲉⲛⲉϩ :-Ⲱ̄ ⲛⲁϣⲏⲣⲉ ⲙⲙⲉⲣⲓⲧ
ⲙⲓϣⲉ ⲉ ⲣⲱⲧⲛ̄ ϩⲛ̄ ⲟⲩϭⲓⲙⲙⲓϣⲉ ⲉⲛⲁⲛⲟⲩⲥ : ϫⲉ ⲟⲩⲁⲅⲱⲛ
ⲉϥϣⲟⲃⲉ ⲡⲉ ⲡⲁⲅⲱⲛ ⲙ̄ ⲡⲉⲓ̈ ⲕⲟⲥⲙⲟⲥ • Ⲟⲩⲟⲓ ⲙ̄ ⲡⲉⲧ
ⲛⲁⲟⲩⲁϩϥ̄ ⲛ̄ⲥⲱϥ ⲙⲛ̄ ⲛⲉϥϩⲃⲏⲩⲉ ⲉⲑⲟⲟⲩ • Ⲟⲩⲟⲓ ⲛ̄
ϩⲟⲩⲟ̄ ⲛ̄ ⲛⲉⲧ | ⲕⲱ ⲛϩ̄ⲧⲏⲩ ⲉ ⲛⲉⲧ ϣⲁⲩⲃⲱⲕ ⲛ̄ⲥⲉⲕⲁⲁⲩ •
ⲉⲓⲧⲉ ⲕⲱⲧ • ⲉⲓⲧⲉ ⲧⲱϭⲉ • ⲉⲓⲧⲉ ϩⲱⲃ ⲛⲓⲙ ⲛ̄ϭⲓⲛϭⲟⲛⲥ̄ •


### 0002

Ⲉⲓⲥ ϩⲏⲏⲧⲉ ⲅⲁⲣ ⲧⲉⲧⲛ̄ⲛⲁⲩ ⲉ ⲣⲟⲓ̈ ⲙ̄ⲡⲟⲟⲩ • ⲕⲁⲛ ⲁⲓ̈ⲣ̄ ϩⲛ̄
ⲡⲉⲧⲛⲁⲛ̄ⲟⲩϥ • ⲕⲁⲛ ⲁⲓ̈ⲣ̄ ϩⲛ̄ϫⲓ̈ⲛϭⲟⲛⲥ̄ • ⲏ̄ ϩⲛ̄ ⲡⲉⲑⲟⲟⲩ
ⲉⲓ̈ⲥ ϩⲏⲏⲧⲉ ⲁⲩⲧⲛ̄ⲛⲟⲟⲩ ⲛ̄ⲥⲱⲓ̈ ⲉ ⲃⲓⲧ ⲛ̄ⲧⲉ ⲧⲏⲩⲧⲛ̄ ϩⲓⲧⲛ̄
ⲡⲓⲉⲣⲟ ⲛ̄ⲁⲥⲉⲃⲏⲥ • Ⲧⲣ̄ ⲙⲛ̄ⲧⲣⲉ ⲛⲏⲧⲛ̄ ϫⲉ ϫⲓⲛ ⲛ̄ⲧⲁ
ⲙⲛ︦ⲧ︦ⲕⲟⲩⲓ̈ ϩⲁϩ ⲛ̄ⲥⲟⲡ ϣⲁⲣⲉ ⲡⲁⲅⲅⲉⲗⲟⲥ ⲙ̄ ⲡϫⲟⲉⲓⲥ
ⲟⲩⲱⲛϩ̄ ⲉ ⲣⲟⲓ̈ ⲉⲓ̈ⲙⲟⲟⲛⲉ ⲛⲛⲉⲥⲟⲟⲩ ⲙ̄ ⲡⲁ ⲓⲱⲧ ⲁⲩⲱ
ⲙⲉϥⲗⲟ ⲉϥⲧⲁⲩⲟ̄ ⲉ̄ ⲣⲟⲓ̄ ϩⲛ̄ ⲧⲁⲡⲩⲝⲓⲟⲛ • ϣⲁⲛ ϯⲁⲡⲟ‐
ⲥⲧⲏⲑⲓⲍⲉ ⲛ ⲛⲉⲥϩⲁⲓ ⲧⲏⲣⲟⲩ • Ⲉⲓⲥ ϩⲏⲏⲧⲉ ϭⲉ ⲧⲉⲛⲟⲩ ϩⲓⲧⲛ̄
ⲡⲟⲩⲉϩⲥⲁϩⲛⲉ ⲙ̄ ⲡⲛⲟⲩⲧⲉ ⲡⲁⲅⲁⲑⲟⲥ ⲁⲓ̈ⲟⲩⲱ̄ ⲉⲓⲉⲓ̈ⲙⲉ
ⲧⲉⲛⲟⲩ • ϫⲉ ⲥⲉⲛⲁⲡⲱϩⲧ̄ ⲉ ⲃⲟⲗ ⲙ̄ ⲡⲁ ⲥⲛⲟϥ ⲉϫⲙ̄ ⲡⲣⲁⲛ
ⲉⲧ ϩⲟⲗϭ̄ ⲛ̄ⲧⲉ ⲡⲁ ϫⲟⲉⲓⲥ ⲓ︦ⲥ︦ ⲡⲉⲭ︦ⲥ︦ Ⲕⲁⲑⲉ ⲛⲧⲁⲩϭⲗ̄ⲡ
ⲡⲁⲓ ⲛⲁⲓ ⲉ ⲃⲟⲗ ⲁⲗⲗⲁ ϯⲣ̄ ϩⲟⲧⲉ ⲉ̄ ⲧⲃⲉ ⲧⲉϩⲓⲏ̄ ⲉ ϯⲛⲁⲃⲱⲕ
ϣⲁ ⲡⲛⲟⲩⲧⲉ ⲛ̄ϩⲏⲧⲥ̄ • ⲙⲛ̄ ⲛ̄ⲇⲩⲛⲁⲙⲓⲥ | ⲉⲧ ⲁϩⲉ ⲣⲁⲧⲟⲩ
ⲛ̄ϩⲏⲧⲥ̄ : ⲉ ⲃⲟⲗ ϫⲉ ⲁⲛⲅ̄ ⲟⲩⲥⲁⲣⲝ̄ ϩⲓ̈ ⲥⲛⲟϥ ϩⲱ ⲛ̄ⲑⲉ
ⲛ ⲟⲩⲟⲛ ⲛⲓ̈ⲙ ⲁⲩⲱ ⲙⲛ̄ ⲁⲧ ⲛⲟⲃⲉ ⲛ̄ⲥⲁ ⲡⲛⲟⲩⲧⲉ
ⲙⲁⲩⲁⲁϥ :-Ⲁⲩⲱ ⲛ̄ⲛⲟⲙⲟⲥ ⲛⲧⲁⲩⲕⲁⲁⲩ ⲛⲁⲛ ⲉ ϩⲣⲁⲓ̈
ϩⲛ̄ ⲛⲉⲑⲩⲥ . . . ⲛ̄ ⲧⲉⲕⲕⲗⲏⲥⲓⲁ • ⲉⲩⲥⲏϩ ⲛⲁⲛ Ⲥⲉϫⲱ
ⲙ̄ⲙⲟⲥ ϫⲉ ϣϣⲉ ⲉ ⲡⲉⲡⲓⲥⲕⲟⲡⲟⲥ ⲙ̄ⲡ ⲟⲩⲧⲁϩⲟϥ ϩⲛ̄
ⲗⲁⲁⲩ ⲛ̄ϩⲱⲃ • Ⲉⲓⲉ ⲛⲓ̄ⲙ ⲧⲉⲛⲟⲩ ⲡⲉⲧ ⲉⲣⲉ ⲡⲛⲟⲩⲧⲉ
ⲛⲁϫⲡⲓⲟϥ ⲁⲛ ⲉ ⲧⲃⲉ ⲛⲉϥⲛⲟⲃⲉ : Ϥϫⲱ ⲙ̄ⲙⲟⲥ ⲅⲁⲣ ϫⲉ
ϣⲁ ϩⲣⲁⲓ̈ ⲉⲩϣⲁϫⲉ ⲛ ⲟⲩⲱⲧ ⲛ̄ ϫⲓϩⲣⲁϥ ⲉⲧ ⲉⲣⲉ ⲡⲣ̄ⲱⲙⲉ
ⲛⲁϫⲟⲟϥ • ϥⲛⲁϯ ⲗⲟⲅⲟⲥ ϩⲁ ⲣⲟⲟⲩ ϩⲛ̄ ⲡⲃⲏⲙⲁ ⲛ̄ ⲁⲧ
ϫⲓ̈ ϩⲟ ⲙ̄ ⲡⲛⲟⲩⲧⲉ ⲡⲡⲁⲛⲧⲱⲕⲣⲁⲧⲱⲣ • Ⲡⲙⲁ ⲉⲧⲉ ⲙⲛ̄
ⲣⲁⲛ ϩⲓ̈ ⲥⲭⲏⲙⲁ ⲛⲁϯ ϩⲏⲩ ⲙ̄ⲙⲟⲛ • ⲁⲗⲗⲁ ⲉⲣⲉ ⲡⲟⲩⲁ
ⲡⲟⲩⲁ ⲛⲁϫⲓ ⲕⲁⲧⲁ ⲛⲉϥϩⲃⲏⲩⲉ :-Ⲱ̄ ⲛⲁϣⲏⲣⲉ ⲥⲟⲩⲛ̄
ⲧⲙⲉⲧⲁⲛⲟⲓ̈ⲁ ⲛ̄ⲧⲉⲧⲛ̄ⲧⲉϭ ⲧⲏⲩⲧⲛ̄ ⲉ ⲣⲟⲥ ⲛ̄ⲧⲉⲧⲛ̄ⲙⲟⲟϣⲉ
ⲕⲁⲧⲁ ⲛⲉⲥϩⲃⲏⲩⲉ : Ⲉ ⲃⲟⲗ ϫⲉ ⲛⲉϩⲓ̈ⲟⲟⲩⲉ ⲛ̄ⲃⲱⲕ ϣⲁ
ⲡⲛⲟⲩⲧⲉ ϩⲟⲥⲉ • ⲁⲩⲱ ⲥⲉϩⲉϫϩⲱϫ :-|ⲁⲩⲱ ⲥϭⲏⲩ ⲛ̄ϭⲓ
ⲧⲡⲩⲗⲏ ⲉⲣⲉ ⲡϫⲟⲉⲓⲥ ϫⲓ ⲛⲛⲉϥⲥⲱⲧⲡ̄ ⲉ̄ ⲣⲟⲥ • ⲕⲁⲧⲁ
ⲡϣⲁϫⲉ ⲙ̄ ⲡⲱⲛⲉ ⲙ̄ ⲙⲉ ⲙⲁⲑⲁⲓⲟⲥ ⲡⲉⲩⲁⲅⲅⲉⲗⲓ̄ⲥⲧⲏⲥ :
ⲕⲁⲓ ⲙⲁⲗⲓⲥⲧⲁ ϯⲛⲟϭ ⲛ̄ ϩⲟⲧⲉ ⲛ̄ ϯϭⲟⲧ ⲙⲛ̄ ⲧⲛⲟϭ ⲛ̄
ⲟⲣⲉⲃⲥ̄ ⲛ̄ ⲡⲓ̈ ⲉⲣⲟ ⲛ̄ ⲕⲱϩⲧ̄ ⲉⲧ ⲃⲓ̈ ϩⲟⲉⲓ̈ⲙ ϩⲟⲉⲓ̈ⲙ • Ⲡⲁⲓ
ⲉⲧⲉ ⲙⲛ̄ ⲗⲁⲁⲩ ⲛⲁϣ︦ⲣ︦ ⲃⲟⲗ ⲉ ⲣⲟϥ ⲙⲛ̄ ⲡⲉϥϫⲟⲩϥ ⲏ̄
ⲡⲉϥⲣⲱⲕϩ̄ • Ⲉ ⲃⲟⲗ ϫⲉ ⲉⲓⲧⲉ ⲇⲓⲕⲁⲓⲟⲥ ⲉⲓⲧⲉ ⲣϥ︦ⲣ︦ ⲛⲟⲃⲉ •


### 0003

ⲥⲉⲛⲁϫⲱⲗⲕ̄ ϩⲙ̄ ⲡⲓ̈ ⲉⲣⲟ ⲛ̄ ⲕⲱϩⲧ̄ ⲙ̄ⲡⲁⲧ ⲟⲩⲡⲱϩ ⲉ̄ ⲡⲃⲏⲙⲁ
ⲉⲧ ϩⲁ ϩⲟⲧⲉ • Ⲱ̄ ⲡⲉⲓ̈ ⲃⲏⲙⲁ ⲉⲧ ⲙⲉϩⲛ̄ ⲥⲧⲱⲧ ϩⲓ ⲛⲉϩϣⲗ̄ϩϥ̄ •
Ⲱ̄ ⲡⲓ̈ ⲃⲏⲙⲁ ⲛ ϩⲟⲧⲉ ϣⲁⲣⲉ ⲟⲩⲟⲛ ⲛⲓ̈ⲙ ⲁϩⲉ ⲣⲁⲧϥ̄ ⲉ ⲣⲟϥ
ϩⲛ̄ ⲟⲩϩⲟⲧⲉ ⲙⲛ̄ ⲟⲩⲥⲧⲱⲧ ⲙⲛ̄ ⲟⲩϩⲃⲁ ⲙⲛ̄ ⲟⲩϣⲧⲟⲣⲧⲣ̄ ⲙⲛ̄
ⲟⲩϩⲓⲟⲩⲉ ⲛ̄ⲡⲁⲧ ⲉ ϩⲟⲩⲛ ϩⲛ̄ ⲛⲉⲩⲉⲣⲏⲩ • Ⲟⲩⲟⲓ̈ ⲛ̄ⲁⲓ̈ ⲱ̄ ⲛⲁ‐
ϣⲏⲣⲉ ⲙ̄ⲡⲁϯⲁϩⲉ ⲣⲁⲧ ⲉ ⲣⲟϥ ϩⲱ ⲉⲓⲕⲏ ⲕⲁ ϩⲏⲩ ⲉⲣⲉ ⲛⲁ‐
ⲡⲣⲁⲝⲓⲥ ⲉⲑⲟⲟⲩ ⲁϩⲉ ⲣⲁⲧⲟⲩ ⲉ ⲣⲟⲓ ⲛ ⲡⲉⲥⲙⲟⲧ ⲛ̄ⲧⲁⲓ‐
ⲁⲁⲩ ⲙ̄ⲙⲟⲥ ⲉⲓϭⲱϣⲧ̄ ⲛ̄ⲥⲱⲟⲩ • Ⲟⲩⲟⲓ ⲛⲁⲓ ⲙ̄ ⲡⲛⲁⲩ ⲉⲧ
ⲉⲣⲉ ⲡⲁ ϩⲟⲣⲁⲧⲟⲥ ⲙ̄ ⲙⲉ ⲡⲉⲡ|ⲡⲣⲟⲕⲛⲱⲥⲧⲏⲥ (sic) ⲙ̄ ⲡⲧⲏⲣϥ̄
ⲛⲁϯ ϩⲁⲡ ⲉ ⲣⲟⲓ̈ • Ⲟⲩⲟⲓ̈ ⲛⲁⲓ ⲛ̄ ⲡⲛⲁⲩ ⲉⲧ ⲉⲣⲉ ⲡⲓ̈ ⲁⲧ
ϭⲱⲛⲧ̄ ⲛⲁϭⲱⲛⲧ̄ ⲉ ⲣⲟⲓ̈ • ⲛϥ̄ϫⲟⲟⲥ ⲛⲁⲓ ϫⲉ ⲱ̄ ⲡϩⲗ̄ⲗⲟ
ⲛ ⲟⲩⲁ ⲙⲛ̄ ⲛⲉϥⲥⲕⲓⲙ : Ⲱ̄ ⲡⲓ̈ ⲣⲁⲛ ⲙⲛ̄ ⲡⲓ̈ ⲥⲭⲏⲙⲁ : ϫⲉ
ⲭⲣⲏⲥϯⲁⲛⲟⲥ • ⲏ̄ ϫⲉ ⲉⲡⲓⲥⲕⲟⲡⲟⲥ ⲛϥ̄ⲛⲁϯ ϩⲏⲩ ⲙ̄ⲙⲟⲛ
ⲁⲛ • Ⲉⲓⲥ ⲛⲉⲛⲛⲟⲃⲉ ⲁϩⲉ ⲣⲁⲧⲟⲩ ⲉ ⲣⲟⲛ ⲟⲩⲁ ⲟⲩⲁ ⲛ̄ⲑⲉ
ⲛ̄ⲧⲁⲛⲁⲁⲩ ⲙ̄ⲙⲟⲥ : Ⲁⲣⲁ ⲉⲛⲛⲁϫⲟⲟⲥ ϫⲉ ⲟⲩ • Ⲙⲏ ⲣⲱ
ⲛⲛⲁⲧⲱⲙ ⲁⲛ ⲛ̄ⲧⲛ̄ ⲧⲙ̄ ϭⲛ̄ ⲟⲩϣⲁϫⲉ ⲉ ϫⲟⲟϥ : ⲙ̄ ⲡⲉϩⲟⲟⲩ
ⲉⲧ ⲙ̄ⲙⲁⲩ ⲉ ⲡⲧⲏⲣϥ̄ • Ⲁ̄ⲣⲁ ⲟⲩⲛ̄ ⲗⲁⲁⲩ ⲛ̄ ⲁⲣⲛⲏⲥⲓⲥ
ⲛⲁϣⲱⲡⲉ ϩⲁϩⲧⲏϥ ⲙ̄ⲙⲟⲛ • Ⲛ̄ⲛⲁⲣ ⲟⲩ ⲛ̄ⲧⲛ̄ⲁⲣⲛⲁ ϩⲁ
ⲛⲉⲛⲁⲥⲉⲃⲓⲁ • ⲉⲣⲉ ⲛⲁⲅⲅⲉⲗⲟⲥ ⲁϩⲉ ⲣⲁⲧⲟⲩ ⲉ ⲡⲓ ⲃⲏⲙⲁ
ⲉⲧ ϩⲁ ϩⲟⲧⲉ ⲛⲙ̄ⲙⲁⲛ ⲉⲩⲉⲗⲉⲭⲉ ⲙ̄ⲙⲟⲛ ϩⲓⲧⲛ̄ ⲡⲉⲛ‐
ⲁⲅⲅⲉⲗⲟⲥ ⲛ̄ⲑⲉ ⲛ ⲟⲩⲁⲛⲧⲓⲇⲓ̈ⲕⲟⲥ :-ϫⲉ ⲡⲓ̈ ⲛⲟⲃⲉ ⲡⲁⲓ̈
ⲛ̄ⲧⲁⲕⲁⲁϥ ⲛ̄ ⲁϣ ⲛ̄ ϩⲟⲟⲩ • ⲁⲩⲱ ⲛ̄ ⲁϣ ⲛ̄ ϩⲉ ⲁⲓⲁϩⲉ
ⲣⲁⲧ ⲉ ⲣⲟⲕ • Ⲱ̄ ⲟⲩⲟⲓ ⲛ̄ⲣⲱⲙⲉ ⲛⲓⲙ ⲉⲧ ⲉⲣⲉ ⲡⲉϥ‐
ⲁⲅⲅⲉⲗⲟⲥ • ⲛⲁϭⲗⲡ̄ ⲡⲉϥϣⲓⲡⲉ ⲉ ⲃⲟⲗ ϩⲓ ⲡⲃⲏⲙⲁ ⲙ̄
ⲡⲉⲭⲥ̄ | ⲙ̄ ⲡⲉⲙ̄ⲧⲟ ⲉ ⲃⲟⲗ ⲛ̄ ⲡⲛⲟⲩⲧⲉ ⲙⲛ̄ ⲛⲉϥⲁⲅⲅⲉ‐
ⲗⲟⲥ ⲙⲛ̄ ⲛ̄ⲧⲁⲝⲓ̈ⲥ ⲛ̄ ⲙ̄ⲡⲏⲩⲉ : Ⲟⲩⲟⲓ̈ ⲛ̄ ⲟⲩⲉ̄ⲡⲓⲥⲕⲟⲡⲟⲥ
ⲛϥ̄ϯ ⲥⲃⲱ ⲁⲛ ⲙ̄ ⲡⲉϥⲗⲁⲟⲥ ⲕⲁⲗⲱⲥ ⲙⲛ̄ ⲧⲉϥⲡⲟⲗⲓⲥ
ⲙⲛ̄ ⲡⲉⲥⲧⲟϣ : ϫⲉ ⲥⲉⲛⲁϫⲛ̄ⲟⲩϥ ⲉ ⲣⲟⲟⲩ ⲡⲁⲛⲧⲱⲥ :
Ⲁⲩⲱ ⲟⲛ ⲉϥⲱⲃϣ̄ ⲙ̄ⲙⲟϥ ⲉ̄ ⲛⲉⲕⲕⲗⲏⲥⲓ̈ⲁ ⲙ̄ ⲡⲛⲟⲩⲧⲉ
ⲉⲩⲟ ⲛ̄ϫⲁⲓ̈ⲉ : ⲁⲩⲱ ⲛⲉⲭⲏⲣⲁ ⲙⲛ̄ ⲛ̄ⲟⲣⲫⲁⲛⲟⲥ : Ⲟⲩⲟⲓ̈
ⲛ ⲟⲩϩⲏⲅⲟⲩⲙⲉⲛⲟⲥ ⲉϥⲛⲁϣⲓ̈ⲡⲉ ϩⲏⲧϥ̄ ⲛ̄ ⲟⲩⲣⲙ̄ⲙⲁⲟ
ⲛϥ̄ⲧⲁⲕⲉ ⲧⲙⲉ • ⲁⲩⲱ ⲛϥ̄ϭⲉⲉⲙⲉ ⲡϩⲁⲡ : ⲛϥ̄ϯⲥⲟ ⲉ ϣⲱⲱⲧ
ⲉ ⲃⲟⲗ ⲛ̄ ⲡϣⲁϫⲉ ⲛ̄ ⲧⲙⲉ : Ⲛ̄ ⲛϥ̄ⲟⲃϣ̄ ⲉ ⲛⲉⲧ ϥ̄ⲛⲁⲩ
ⲉ ⲣⲟⲟⲩ ⲙⲛ̄ ⲛⲉⲧⲟⲩⲛⲁⲛ̄ⲧⲟⲩ ⲛ ⲛⲁϩⲣⲁϥ : Ⲟⲩⲟⲓ̈ ⲛ̄


### 0004

ⲟⲩⲕⲣⲓⲧⲏⲥ ⲉϥⲛⲁϭⲉⲉⲙⲉ ⲡϩⲁⲡ ⲛ̄ ⲟⲩϩⲏⲕⲉ ⲉ ⲧⲃⲉ ⲇⲱⲣⲟⲛ •
ⲛϥ̄ϫⲓ̈ ⲙ̄ ⲡϩⲟ ⲛ ⲟⲩⲣⲙ̄ⲙⲁⲟ ⲛϥ̄ⲧϭⲁⲓⲉ ⲡϩⲏⲕⲉ ϫⲉ ⲙ̄ⲛ‐
ⲧⲁϥ ⲉ ϯ: Ⲟⲩⲟⲓ̈ ϩⲛ̄ ⲟⲩⲟⲓ̈ ⲉϥⲕⲏϥ ⲛ̄ ⲟⲩⲗⲁⲓ̈ⲕⲟⲥ ⲉϥⲛⲁⲧⲁϩϥ̄
ⲛ̄ ⲗⲁⲁⲩ ⲛ̄ ϩⲱⲃ ⲉ ⲡⲁ ⲧⲉⲕⲕⲗⲏⲥⲓ̈ⲁ ϩⲱⲥ ⲉϥⲟⲩⲱϣ ⲉ̄ ⲣ̄
ⲕⲣⲓⲧⲏⲥ ⲉ ⲣⲟⲥ : ⲏ ⲉ ϫⲉ ⲉϥⲉⲕⲣⲓ̈ⲛⲉ ⲛⲉ ⲛ̄ ⲗⲁⲁⲩ ⲛ̄
ⲧⲁⲝⲓⲥ ⲉ ⲡⲁ ⲧⲉⲕⲕⲗⲏⲥⲓ̈ⲁ ⲡⲉ : Ⲙⲁⲣⲉ ⲛ̄ⲗⲁⲓ̈ⲕⲟⲥ ⲥⲁϩⲱⲟⲩ
ⲉ ⲃⲟⲗ ⲙ̄ | ⲡⲓ̈ ϩⲱⲃ ⲡⲁⲓ̈ ⲙ̄ⲡⲣ̄ ⲧⲁⲗⲉ ⲗⲁⲁⲩ ⲛ̄ ⲕⲣⲓ̈ⲙⲁ ⲉ
ⲣⲱⲧⲛ̄ ϩⲁϩⲧⲙ̄ ⲡⲛⲟⲩⲧⲉ : Ⲟⲩⲟⲓ̈ ϩⲛ̄ ⲟⲩⲟⲓ̈ ⲉϥⲕⲏⲃ • ⲛ̄
ⲟⲩⲁⲡⲉ ⲛ ⲥⲟⲟⲩϩⲉ̄ ⲉⲧⲉ ⲡⲓ̈ⲱⲧ ⲡⲉ ⲛ̄ ⲟⲩⲙⲟⲛⲁⲥⲧⲏⲣⲓ̈ⲟⲛ •
ⲡⲁⲓ ⲉⲧ ϯ ⲛ̄ ⲛⲉϩⲃⲏⲩⲉ̄ ⲙ̄ ⲡⲛⲟⲩⲧⲉ ⲉ ⲃⲟⲗ ϩⲁ ⲭⲣⲏⲙⲁ •
ⲏ ϩⲛ̄ ⲕⲉ ⲛ̄ⲕⲁ • ⲏ ⲉϥⲥⲟⲟⲩⲛ̄ ⲉ ϩⲟⲓ̈ⲛⲉ ϩⲛ̄ ⲛⲉⲥⲛⲏⲩ ⲉⲩϯ
ⲛⲟⲩϭⲥ̄ ⲙ̄ ⲡⲛⲟⲩⲧⲉ ⲉϥϯⲥⲟ ⲉ̄ ⲧⲙ̄ ⲛⲟϫⲟⲩ ⲉ ⲃⲟⲗ ϩⲛ̄
ⲧⲥⲩⲛⲁⲅⲱⲅⲏ : Ⲟⲩⲟⲓ̈ ⲛ̄ ⲟⲩⲡⲣⲉⲥⲃⲩⲧⲉⲣⲟⲥ ⲉϥⲱⲃϣ̄ ⲙ̄-
ⲙⲟϥ ⲉ ⲡⲉϥⲗⲁⲟⲥ ⲛϥ̄ϫⲡⲓⲟ ⲙ̄ⲙⲟⲟⲩ ⲁⲛ • ⲟⲩⲇⲉ ⲛϥ̄ϯ
ⲥⲃⲱ ⲛⲁⲩ ⲁⲛ ⲉ ⲛⲉⲧ ⲣ̄ ⲛⲟⲃⲣⲉ ⲛ ⲛⲉⲩⲯⲩⲭⲏ : ⲥⲉⲛⲁϫ‐
ⲛⲟⲩϥ ⲡⲁⲛⲧⲱⲥ ⲉ ⲛⲉⲯⲩⲭⲏ̄ ⲙ̄ ⲡⲉϥⲗⲁⲟⲥ ⲛϥ̄ϯ ⲗⲟⲅⲟⲥ
ϩⲁ ⲣⲟⲟⲩ : Ⲟⲩⲟⲓ̈ ⲛ̄ ⲟⲩⲇⲓⲁⲕⲟⲛⲟⲥ ⲉϥⲃⲏⲗ ⲉ ⲃⲟⲗ ϩⲓϫⲙ̄
ⲡⲉⲑⲩⲥⲓⲁⲥⲧⲏⲣⲓⲟⲛ : ⲁⲩⲱ ⲉϥⲟⲩⲱⲙ ⲛ̄ ⲛⲉⲛ̄ⲕⲁ ⲛ̄ ⲧⲉⲕ‐
ⲕⲗⲏⲥⲓⲁ • ⲉϥⲉⲓⲣⲉ ⲛ ⲛⲉϩⲃⲏⲩⲉ ⲛ ⲡⲛⲟⲩⲧⲉ ϩⲛ̄ ⲟⲩⲁⲙⲉⲗⲓ̈ⲁ:
Ⲟⲩⲟⲓ̈ ⲛ̄ ⲟⲩⲗⲁⲓ̈ⲕⲟⲥ ⲉϥⲡⲟⲣⲛⲉⲩⲉ ⲏ ⲉϥⲉⲓⲣⲉ ⲛ̄ ϩⲛ̄ϩⲃⲏⲩⲉ
ⲙⲛ̄ ⲧⲡⲁⲣⲁⲃⲁⲧⲏⲥ • Ⲛ̄ ⲉⲩϭⲱϣⲧ̄ ⲉϫⲛ̄ ⲛⲉⲩⲥⲙⲟⲧ ϩⲛ̄
ⲟⲩⲙⲛ︦ⲧ︦ ⲁⲧ ϣⲓⲡⲉ : ⲙⲛ̄ ⲛⲉⲧ ⲛⲟⲩϫ ⲛ̄ ⲛⲉⲩⲉⲡⲓ̈ⲑⲩⲙⲓ̈ⲁ
ⲉϫⲙ̄ ⲡⲕⲁϩ | ⲙⲛ̄ ⲛⲉⲧ ⲉⲣⲉ ⲛⲉⲩϭⲓϫ ⲟ ⲛⲁⲩ ⲛ̄ϣⲉⲗⲉⲉⲧ •
ⲙⲛ̄ ⲛⲉⲧ ϫⲱϩⲙ̄ ⲙ̄ⲙⲟⲟⲩ ⲙⲛ̄ ⲛ̄ⲧⲃ̄ⲛⲟⲟⲩⲉ ⲛ̄ ⲁⲗⲟⲅⲟⲛ:-
Ⲛⲁⲓ̈ ⲛ̄ ϯⲙⲓⲛⲉ ⲛⲉⲧ ⲥⲱⲱϥ ⲙ̄ ⲡⲣ̄ⲡⲉ ⲙ̄ ⲡⲛⲟⲩⲧⲉ : Ⲛⲁⲓ̈
ⲟⲛ ⲛⲉⲧ ⲉⲣⲉ ⲡⲛ̄ⲟⲩⲧⲉ ⲛⲁⲧⲁⲕⲟⲟⲩ ϩⲙ̄ ⲡⲉⲡⲛⲁ̄ ⲛ̄ ⲣⲱϥ •
ⲙⲛ̄ ⲡⲉⲗϩⲱⲃ ⲛ̄ ⲧⲉϥⲟⲣⲅⲏ • Ⲙ̄ⲡⲱⲣ ⲛⲁϣⲏⲣⲉ ⲙ̄ⲡⲣ̄
ⲕⲱϩ ⲉ ⲛⲁⲓ̈ ϫⲉ ⲛⲛⲉ ⲡⲛⲟⲩⲧⲉ ⲃⲉⲧ ⲧⲏⲩⲧⲛ̄ ⲉ ⲃⲟⲗ ϩⲛ̄
ⲟⲩϭⲉⲡⲏ̄ : Ⲙ̄ⲡⲣ̄ ⲣ̄ ⲁⲙⲉⲗⲏⲥ ⲉ̄ ⲣⲱⲧⲛ̄ ⲟⲩⲁⲧ ⲧⲏⲩⲧⲛ̄ • ϫⲉ
ⲛⲁⲙⲉⲗⲓ̈ⲁ ⲧⲏⲣⲟⲩ ⲙ̄ ⲡⲓ̈ ⲕⲟⲥⲙⲟⲥ ϩⲛ̄ⲕⲟⲗⲁⲥⲓⲥ ⲛⲉ ϩⲙ̄
ⲡⲉⲱⲛ ⲉⲧ ⲛⲏⲩ • ⲁⲩⲱ ⲧⲛ̄ⲥⲟⲟⲩⲛ ⲧⲏⲣⲛ̄ ϫⲉ ⲡⲥⲁⲣⲝ̄
ⲟⲩϭⲱⲃ ⲧⲉ • Ⲙⲛ̄ϭⲟⲙ ⲛ̄ⲧⲛ̄ⲯⲩⲭⲏ ⲛⲉⲃⲓⲏⲛ ⲉ ⲃⲓ̈ ϩⲁ ⲛⲥⲏϣⲉ
ⲙ̄ ⲡϫⲟⲉⲓ̈ⲥ ⲉⲧ ϥ̄ⲛⲁⲧⲟⲩ (sic) ⲉ ϫⲱⲛ ϩⲛ̄ ⲟⲩϩⲁⲡ ⲛ̄ⲇⲓⲕⲉⲟⲛ ⲉ
ⲧⲃⲉ ⲛⲉⲛ̄ⲛⲟⲃⲉ : Ⲉϣⲱⲡⲉ ⲛϣⲁⲛⲙⲟⲩⲛ ⲉ ⲃⲟⲗ ϩⲛ̄ ⲛⲉⲛ‐


### 0005

ⲛⲟⲃⲉ • ϣⲁⲣⲉ ⲡⲛⲟⲩⲧⲉ ϯϩⲓⲥⲉ ⲛⲁⲛ ⲛ̄ϩⲟⲩⲟ ϩⲛ̄ ⲛ̄ⲃⲁⲥⲁⲛⲟⲥ
ⲉⲧ ⲉϥⲛⲁⲛ̄ⲧⲟⲩ ⲉ ϫⲱⲛ • Ⲱ̄ ⲛⲁϣⲏⲣⲉ ⲑⲁⲏ̄ ⲙ̄ ⲡⲟⲩⲁ
ⲡⲟⲩⲁ ⲛⲏⲩ ⲛⲁϥ ⲛ̄ⲧⲁϩⲉ ϩⲱⲱⲧ ⲟⲛ̄ ⲛⲡⲟⲟⲩ • ϯⲥⲟⲟⲩⲛ
ⲅⲁⲣ ϫⲉ ⲉⲩⲛⲁϫⲓⲧⲧ̄ ⲉ ⲣⲁⲧϥ̄ ⲛ̄ ⲡϩⲏⲅⲉⲙⲱⲛ ⲛϥ̄ⲕⲁⲧⲁ‐
ⲕⲣⲓⲛⲉ | ⲙⲙⲟⲓ ϩⲁ ⲡⲣⲁⲛ ⲙ̄ ⲡⲁ ϫⲟⲉⲓⲥ ϫⲉ ⲉⲓⲉⲕⲁⲁϥ
ⲛ̄ⲥⲱⲓ̈ • Ⲁⲗⲗⲁ ⲛⲛⲉ ϣⲱⲡⲉ ⲙ̄ⲙⲟⲓ ⲉ ⲧⲣⲁⲕⲁⲁϥ ⲛ̄ⲥⲱⲓ̈ •
ϯⲥⲃ̄ⲧⲱⲧ ⲛ̄ⲧⲟϥ ⲛ̄ⲥⲉϣⲱⲱⲧ ⲉ ⲃⲟⲗ ⲙ̄ ⲡⲁ ⲙⲁⲕϩ̄ ϩⲁ
ⲡⲣⲁⲛ ⲙ̄ ⲡⲁ ⲣ̄ⲣⲟ ⲙ ⲙⲉ • ⲁⲩⲱ ⲡⲁ ⲥⲱⲣ̄ ⲓⲥ̄ ⲡⲉⲭⲥ̄ :-
Ⲉ ⲧⲃⲉ ⲡⲁⲓ ϯⲱ̄ⲣⲕ̄ ⲉ ⲣⲱⲧⲛ̄ ⲱ̄ ⲛⲁϣⲏⲣⲉ ⲙ̄ⲙⲉⲣⲓⲧ ⲉ
ⲧⲣⲉ ⲧⲉⲧⲛ̄ϭⲱ ⲉⲧⲉⲧⲛ̄ⲉⲓⲣⲉ ⲙ̄ ⲡⲁ ⲙⲉⲉⲩⲉ ⲕⲁⲧⲁ ⲟⲩⲁⲅⲁⲡⲏ
ⲛⲧⲉ ⲡⲛⲟⲩⲧⲉ : ⲁⲩⲱ ⲛ̄ⲧⲉⲧⲛ︦ⲣ︦ ⲁⲡⲁ ⲧⲟⲟⲧ ⲧⲏⲩⲧⲛ̄ ⲉ̄ ⲣ̄
ϩⲱⲃ ⲉ ⲡⲉⲧⲛ̄ⲟⲩϫⲁⲓ̈ ⲙ̄ⲙⲓⲛ ⲙ̄ⲙⲱⲧⲛ̄ • ϫⲉ ⲡⲟⲩϫⲁⲓ
ⲛⲣⲱⲙⲉ ⲛⲓ̈ⲙ ⲡⲉ ⲣ̄ ⲡⲛⲟⲙⲟⲥ ⲙ̄ ⲡⲛⲟⲩⲧⲉ • Ⲡⲉⲧ ⲛⲁⲣ̄
ⲡⲛⲟⲙⲟⲥ ⲅⲁⲣ ⲟⲩϣⲃ︦ⲣ︦ ϩⲱⲱϥ ⲉ ⲡⲛⲟⲩⲧⲉ ⲡⲉ ⲉⲓ̈ⲧⲉ ϩⲙ̄
ⲡⲓ̈ ⲉ̄ⲱⲛ ⲉⲓⲧⲉ ϩⲛ̄ ⲡⲕⲉ ⲟⲩⲁ : Ⲡⲉⲧ ⲛⲁⲡⲁⲣⲁⲃⲁ ϭⲉ ⲙ̄
ⲡⲛⲟⲙⲟⲥ ⲟⲩϫⲁϫⲉ ⲡⲉ ⲉ ⲡⲛⲟⲩⲧⲉ ϩⲙ̄ ⲡⲓ̈ ⲁⲓⲱⲛ ⲙⲛ̄ ⲡⲉⲧ
ⲛⲏⲩ • Ⲁⲧⲉⲧⲛ̄ⲥⲱⲧⲙ̄ ϩⲱⲧ ⲧⲏⲩⲧⲛ̄ ⲉ ⲧⲉⲫⲱⲛⲏ ⲙ̄ ⲡⲉⲩ‐
ⲁⲅⲅⲉⲗⲓⲟⲛ ϩⲛ̄ ⲟⲩⲙⲁ ⲙⲉⲛ ⲉϥⲙⲁⲕⲁⲣⲓⲍⲉ ϩⲛ̄ ⲕⲉ ⲙⲁ
ⲇⲉ ⲉϥⲥⲁϩⲟⲩ • ⲁⲩⲱ ⲉϥϭⲟⲛⲧ̄ ⲉϥⲛⲟϭⲛⲉϭ • Ⲟⲩⲙⲁ ⲙⲉⲛ
ϫⲉ ⲛ̄ⲁⲓ̈ⲁⲧⲟⲩ ⲛ̄ ⲛ̄ϩⲏⲕⲉ • ⲉⲧⲉ ⲡⲁⲓ̈ ⲡⲉ ϫⲉ ⲙⲡ ⲟⲩⲕⲁ
ⲡⲛⲟⲙⲟⲥ ⲙ̄ ⲡⲛⲟⲩⲧⲉ | ⲛⲥⲱⲟⲩ • Ⲟⲩⲟⲓ̈ ⲇⲉ ⲛ ⲛⲉ ⲛ̄ⲧⲁ
ⲡⲕⲟⲥⲙⲟⲥ ⲣ̄ ϩⲁⲗ ⲙ̄ⲙⲟⲟⲩ ϩⲙ̄ ⲡⲡⲉⲧ ϣⲟⲩⲉⲓⲧ : Ⲉⲧⲉ
ⲛ̄ⲣϥ̄ϫⲓ̈ⲟⲩⲉ ⲛⲉ ⲙⲛ̄ ⲛ̄ⲣϥ̄ϩⲱⲧⲃ̄ ⲙⲛ̄ ⲙ̄ⲡⲟⲣⲛⲟⲥ • ⲙⲛ̄
ⲛ̄ⲟⲉⲓⲕ • ⲙⲛ̄ ⲙ̄ⲙⲁⲅⲟⲥ • ⲙⲛ̄ ⲛⲉⲫⲁⲣⲙⲁⲅⲟⲥ • ⲙⲛ̄
ⲛ̄ⲃⲁⲗⲃⲗ̄ ⲕⲱⲱⲥ • ⲙⲛ̄ ⲛ̄ⲣϥ̄ ⲛ̄ⲣⲱⲙⲉ ⲉ ϩⲟⲩⲛ • ⲙⲛ̄ ⲛ̄
ⲣϥ̄ϭⲱⲣϭ̄ ϩⲙ̄ ⲡⲁⲡⲟⲧ • ⲛⲉⲧ ⲉⲣⲉ ⲧⲉⲩϩⲉⲗⲡⲓⲥ ϣⲟⲟⲡ
ϩⲛ̄ ⲡⲣⲱⲙⲉ ⲙ̄ⲙⲁⲅⲟⲥ • ⲉⲩⲕⲱ ⲛ̄ ϩⲧⲏⲩ ⲉ ⲣⲟⲟⲩ ⲏ̄ ϫⲉ
ⲛ̄ⲧⲟⲟⲩ ⲛⲉⲧ ⲕⲱ ⲛⲁⲩ ⲛ ⲟⲩⲧⲁϫⲣⲟ ϩⲛ̄ ⲧⲉⲩⲑⲗⲓ̈ⲯⲓⲥ :-
Ⲱ̄ ⲛ̄ⲁⲑⲏⲧ ⲁⲩⲱ̄ ⲛⲁⲧ ⲥⲃⲱ • ⲁⲩⲱ ⲛⲁⲛⲟⲏ̄ⲧⲟⲥ : Ⲁϫⲓⲥ
ⲉ ⲣⲟⲓ̈ ϫⲉ ⲛ̄ ⲁϣ ⲛ̄ ϩⲉ • ⲉⲣϣⲁⲛ ⲡⲛⲟⲩⲧⲉ ⲟⲩⲱϣ ⲉ
ⲉⲓ̈ⲛⲉ ⲛ̄ ⲟⲩϣⲱⲛⲉ ⲉ̄ϫⲙ̄ ⲡⲣⲱⲙⲉ ⲉⲩⲇⲟⲕⲓⲙⲁⲥⲓ̈ⲁ • ⲙⲛ̄
ⲟⲩⲥⲃⲱ ⲛⲁϥ • ⲙⲏ ⲟⲩⲛ̄ ⲣⲱⲙⲉ ⲛ̄ ⲕⲁϩ ϩⲓ̈ ⲕⲣ̄ⲙⲉⲥ
ⲛⲁϣⲃⲓⲧⲥ̄ ⲙ̄ⲙⲁⲩ • ⲏ ⲛϥ̄ⲕⲧⲟ ⲛ ⲡⲟⲩⲉϩⲥⲁϩⲛⲉ ⲙ̄ ⲡⲛⲟⲩⲧⲉ
ⲉ ⲡⲁϩⲟⲩ • Ⲁⲗⲗⲁ ⲙ̄ ⲙⲛ̄ⲧⲣϥ︤ⲣ︥ϩⲁⲗⲁ • ⲙⲛ̄ ⲛ̄ⲕⲟⲧⲥ̄


### 0006

ⲙ̄ ⲡⲇⲓ̈ⲁⲃⲟⲗⲟⲥ ⲛⲉⲧ ⲥⲱⲕ ⲙ̄ ⲡⲣⲱⲙⲉ ⲉ ⲡⲁϩⲟⲩ ⲁⲩⲱ
ⲉⲩⲥⲱⲃⲉ ⲛⲥⲁ ⲡⲟⲩⲁ ⲡⲟⲩⲁ ⲉϥⲟⲩⲱϣ ⲉ ϫⲓⲧⲟⲩ ⲉ ⲡⲉ‐|
ⲥⲏⲧ ⲉ ⲡϩⲓ̈ⲧ ⲉⲧ ⲉϥⲛⲁⲃⲱⲕ ⲉ ⲡⲉⲥⲏⲧ ⲉ̄ ⲣⲟϥ :-ⲉ ⲧⲃⲉ
ⲧⲉϥⲙⲛ︦ⲧ︦ ⲁⲧ ⲥⲱⲧⲙ̄ • Ⲉⲓⲥ ϩⲏⲧⲉ ϭⲉ ⲧⲉⲛⲟⲩ ⲧⲉⲧⲛ̄ⲛⲁⲩ
ⲉ ⲣⲟⲓ ⲉⲓϣⲟⲟⲡ ϩⲛ̄ ⲧⲉⲧⲛ̄ⲙⲏⲧⲉ ⲙⲡⲟⲟⲩ • ⲉⲓⲟⲩⲱϣ ⲉⲥⲓ̈
ⲙ̄ ⲡⲉⲧⲛ̄ⲟⲩⲣⲟⲧ • ⲙⲛ̄ ⲡⲉⲧⲛ̄ϩⲟ ⲉⲧ ϩⲟⲗϭ̄ • Ⲱ̄ ⲛⲁϣⲏⲣⲉ
ⲕⲉ ⲕⲟⲩⲓ ⲛⲁⲡⲣⲏⲧⲉ ⲧⲉ • ⲛⲧⲉ ⲙ̄ⲙⲁⲧⲟⲓ̈ ⲙ̄ ⲡϩⲏⲕⲉⲙⲱⲛ
ϫⲓⲧⲧ ⲉ ⲣⲁⲧϥ̄ ⲡⲣⲟⲥ ⲧⲉϥⲕⲉⲗⲉⲩⲥⲓⲥ • Ⲁⲩⲱ ⲉⲓⲥ ⲡϩⲏ‐
ⲅⲉⲙⲱⲛ ⲛⲏⲩ ⲉ ⲃⲟⲗ ϩⲛ̄ ⲥⲓ̈ⲟⲟⲩⲧ ⲛϥ̄ⲃⲱⲕ ⲉ ⲧⲕⲱⲟⲩ •
ⲥⲉⲛⲁϫⲓⲧ ⲉ ⲣⲁⲧϥ̄ ⲛ̄ⲥⲉϥⲓ ⲛ̄ ⲧⲁ ⲁⲡⲉ • ϩⲙ̄ ⲡⲙⲁ ⲉⲧ
ⲙ̄ⲙⲁⲩ • ⲉϫⲙ̄ ⲡⲣⲁⲛ̄ ⲛⲙ̄ⲙⲁⲛⲟⲩⲏⲗ • ⲉⲧⲉ ⲡⲁⲓ ⲡⲉ
ⲉϣⲁⲩⲟⲩⲁϩⲙϥ̄ ϫⲉ ⲡⲛⲟⲩⲧⲉ ⲛⲙ̄ⲙⲁⲛ :-Ⲁⲅⲱⲛⲓ̈ⲍⲉ ⲱ̄
ⲛⲁϣⲏⲣⲉ ⲛⲧⲉⲧⲛ̄ⲙⲟⲟϣⲉ ϩⲛ̄ ⲛⲉϩⲓ̈ⲟⲟⲩⲉ ⲙ̄ ⲡϫⲟⲉⲓⲥ • ⲁⲩⲱ
ⲛⲉϥⲉⲛ̄ⲧⲟⲗⲏ ⲙ̄ⲡⲣ̄ ⲕⲁⲁⲩ ⲛ̄ⲥⲱⲧⲛ̄ ⲉ ⲡⲧⲏⲣϥ̄ • ϫⲉ
ⲛⲛⲉⲧⲛ̄ⲉⲓⲛⲉ ⲉ ϫⲱⲓ̈ ⲛⲙ̄ⲙⲏⲧⲛ̄ ⲛ̄ ⲟⲩⲛⲟϭ ⲛ̄ ⲕⲣⲓ̈ⲙⲁ ⲛ ⲁⲧ
ⲕⲱ ⲉ ⲃⲟⲗ • Ϥⲥⲏϩ ⲅⲁⲣ ϫⲉ ⲡϣⲏⲣⲉ ⲛⲁⲧ ⲥⲱⲧⲙ̄ ϩⲙ̄
ⲡⲧⲁⲕⲟ : ⲁⲩⲱ ⲡⲧⲁⲕⲟ ⲡⲁ ⲡⲇⲓ̈ⲁⲃⲟⲗⲟⲥ ⲡⲉ ⲙⲛ̄ ⲛⲉϥ‐
ⲇⲁⲓⲙⲱⲛ • | ⲧⲙⲛ︦ⲧ︦ⲣ︦ⲣⲟ ⲇⲉ ⲛ̄ⲧⲟⲥ ⲛ̄ ⲙ̄ⲡⲏⲩⲉ̄ • ⲛ̄ⲧⲁ
ⲡⲛⲟⲩⲧⲉ ⲥⲃ̄ⲧⲱⲧⲥ̄ ⲛ̄ ⲛⲉⲧ ⲛⲁⲣ̄ ⲡⲉϥⲟⲩⲱϣ • ⲕⲁⲧⲁ ⲑⲉ
ⲛ̄ⲧ ⲁϥϫⲟⲟⲥ ϩⲙ̄ ⲡⲉⲩⲁⲅⲅⲉⲗⲓ̈ⲟⲛ ⲛ̄ ⲕⲁⲧⲁ ⲙⲁⲑⲉⲟⲥ ϫⲉ
ⲉⲓⲥ ⲧⲉⲕⲙⲁⲁⲩ ⲙⲛ̄ ⲛⲉⲕⲥⲛⲏⲩ ⲁϩⲉ ⲣⲁⲧⲟⲩ ϩⲓ̈ ⲡⲥⲁ ⲃⲟⲗ
ⲉⲩⲟⲩⲉϣ ⲛⲁⲩ ⲉ ⲣⲟⲕ • ⲛ̄ⲧⲟϥ ⲇⲉ ⲡⲉϫⲁϥ ϫⲉ ⲡⲉⲧ ⲛⲁ
ⲉⲓⲣⲉ ⲛ̄ ⲡⲟⲩⲱϣ ⲙ̄ ⲡⲁ ⲓ̈ⲱⲧ ⲉⲧ ϩⲛ̄ ⲙ̄ⲡⲏⲩⲉ ⲡⲁⲓ ⲡⲉ
ⲡⲁ ⲥⲟⲛ ⲁⲩⲱ ⲧⲁ ⲥⲱⲛⲉ ⲁⲩⲱ ⲧⲁ ⲙⲁⲁⲩ Ⲛ̄ ⲧⲉⲓ ϩⲉ ⲟⲛ
ϥⲛⲁⲡⲉⲉⲛⲉ ⲡϣⲁϫⲉ ⲛϥ̄ϫⲟⲟⲥ ⲛ̄ ⲛⲉⲧ ⲛⲁⲕⲱ ⲛⲥⲱⲟⲩ ⲙ̄
ⲡⲛⲟⲙⲟⲥ ⲙⲛ̄ ⲛⲉⲡⲣⲟⲫⲏⲧⲏⲥ ϫⲉ ⲡⲉⲧ ⲛⲁⲉⲓⲣⲉ ⲁⲛ ⲙ̄
ⲡⲟⲩⲱϣ ⲙ̄ ⲡⲁ ⲓ̈ⲱⲧ ⲉⲧ ϩⲛ̄ ⲙ̄ⲡⲏⲩⲉ ⲡⲁⲓ̈ ⲡⲉ ⲡⲁ ϫⲁϫⲉ •
ⲁⲩⲱ ⲛ̄ⲑⲉ ⲛⲧⲁϥⲙⲉⲥⲧⲱⲓ ⲁⲛⲟⲕ ϩⲱⲱⲧ ⲟⲛ ϯⲛⲁ‐
ⲙⲉⲥⲧⲱϥ :-Ⲛ̄ⲑⲉ ⲛ̄ⲧⲁϥⲁⲣⲛⲁ ⲙⲙⲟⲓ ϩⲙ̄ ⲡⲉⲓ̈ ⲕⲟⲥⲙⲟⲥ
ⲁⲛⲟⲕ ϩⲱ ϯⲛⲁⲁⲣⲛⲁ ⲙ̄ⲙⲟϥ ϩⲙ̄ ⲡⲁⲓⲱⲛ ⲛ̄ ⲁⲧ ⲟⲩⲱ̄
ⲙ̄ ⲡⲙ̄ⲧⲟ ⲉ ⲃⲟⲗ ⲛ̄ ⲛ̄ⲁⲅⲅⲉⲗⲟⲥ • Ⲁⲩⲱ ⲛⲑⲉ ⲛⲧⲁϥⲟⲃϣϥ̄
ⲉ ⲡⲁ ⲛⲟⲙⲟⲥ ⲉ ⲧⲙ̄ ϩⲁⲣⲉϩ ⲉ ⲣⲟϥ • ⲁⲛⲟⲕ ϩⲱ ϯⲛⲁⲟⲃϣⲧ̄
ⲉ ⲣⲟϥ ⲉϥϣⲟⲟⲡ ϩⲙ̄ ⲡⲕⲁⲕⲉ ⲉⲧⲉ ⲙⲛ̄ ⲗⲁⲁⲩ ⲛ ⲟⲩⲟⲉⲓⲛ
ⲛ̄ϩⲏⲧϥ̄ :-Ϥϫⲱ ⲅⲁⲣ ⲙ̄ⲙⲟⲥ ϩⲛ̄ ⲧⲉϥⲧⲁⲡⲣⲟ ⲛ̄ ⲁⲧ ϫⲓ


### 0007

ϭⲟⲗ • ϫⲉ ⲙ̄ⲡⲣ̄ ⲙⲉⲣⲉ ⲡⲕⲟⲥⲙⲟⲥ ⲟⲩⲇⲉ ⲛⲉⲧ | ϩⲙ̄ ⲡ‐
ⲕⲟⲥⲙⲟⲥ • ϫⲉ ⲡⲕⲟⲥⲙⲟⲥ ⲛⲁⲡⲁⲣⲁⲅⲉ ⲙⲛ̄ ⲧⲉϥⲉⲡⲓ̈ⲑⲩⲙⲓⲁ •
ⲛ̄ⲑⲉ ⲅⲁⲣ ⲛ̄ ⲟⲩⲣⲱⲙⲉ ⲛⲧⲁⲩⲧⲉϣ ⲡⲉϥⲁϩⲉ ⲛⲁϥ • ⲙ̄ⲡ ⲟⲩ‐
ⲧⲁⲙⲟϥ ϫⲉ ϣⲁ ⲁϣ ⲛ̄ ⲟⲩⲟⲉⲓϣ ⲕⲛⲁⲙⲟⲩ • ⲟⲩⲇⲉ ⲙ̄ⲡ ⲟⲩ‐
ⲧⲁⲙⲟϥ ϫⲉ ϣⲁ ⲁϣ ⲛ̄ϩⲟⲟⲩ ⲡⲉⲧ ϩⲓⲧⲟⲩⲱⲕ ⲛⲁⲙⲟⲩ •
ⲧⲁⲓ ⲧⲉ ⲑⲉ ⲛ̄ ⲡⲕⲟⲥⲙⲟⲥ ⲙⲛ̄ ⲗⲁⲁⲩ ⲥⲟⲟⲩⲛ ⲛ̄ ⲧⲙⲉϩ
ⲛ̄ ⲟⲩϫⲱⲕ ⲛ̄ ⲧⲥⲩⲛⲧⲉⲗⲓⲁ • ⲉⲓ ⲙⲏ ⲧⲉⲓ • ⲡⲉⲧ ϩⲟⲣⲓⲍⲉ ⲛ
ⲧⲙⲉϩ ⲛ̄ ⲟⲩϫⲱⲕ ⲡⲛⲟⲩⲧⲉ ⲡⲡⲁⲛⲧⲱⲕⲣⲁⲧⲱⲣ: ⲙⲛ̄ ⲗⲁⲁⲩ
ⲛ̄ ⲕⲧⲏⲥⲓⲥ ⲛⲁϭⲱ ⲛ̄ ⲟⲩⲉϣ ⲛ̄ⲡⲁⲣⲁⲅⲉ ⲉⲓ ⲙⲏ ⲧⲉⲓ ⲡⲛⲟⲩⲧⲉ
ⲡⲇⲉⲥⲡⲟⲧⲏⲥ ⲙ̄ ⲡⲧⲏⲣϥ̄ • ⲡϫⲟⲉⲓⲥ ⲛ̄ ⲛ̄ⲕⲁ ⲛⲓⲙ ⲛⲉⲧ
ϣⲟⲟⲡ ⲙⲛ̄ ⲧⲁⲩϣⲱⲡⲉ • Ⲁⲩⲱ ⲛⲁⲓⲁⲧⲟⲩ ⲛ̄ⲛⲉⲧ ⲛⲁⲙⲟⲩ ϩⲛ̄
ⲡϫⲟⲉⲓⲥ ϫⲓⲛ ⲧⲉⲛⲟⲩ ϣⲁ ⲉⲛⲉϩ ⲛ̄ ⲉⲛⲉϩ :-Ⲟⲩⲟⲓ̈ ⲇⲉ ⲛ
ⲛⲉⲧ ⲛⲁⲙⲟⲩ ϩⲛ̄ ϩⲉⲛⲡⲉⲑⲟⲟⲩ • ϫⲉ ⲙⲛ̄ ⲗⲁⲁⲩ ⲙ ⲙ̄ⲉ‐
ⲧⲁⲛⲟⲓⲁ ⲕⲏ ⲛ̄ⲁⲩ ⲉ̄ ϩⲣⲁⲓ̈ ⲛ̄ ⲕⲉ ⲥⲟⲡ : ⲁⲗⲗⲁ ⲡⲛⲟⲃⲉ
ⲙⲛ̄ ⲧⲁⲛⲟⲙⲓⲁ ⲙⲛ̄ ⲛ̄ⲕⲉ ⲙⲓⲛⲉ ⲛ ⲁⲥⲉⲃⲓⲁ ⲛ̄ⲧⲁⲩⲁⲁⲩ
ⲛⲉⲧ ⲟⲩⲛⲁϫⲓ ⲙ̄ ⲡⲉⲩⲧϭⲁⲓⲟ ⲁⲩⲱ ⲡⲙⲟⲩ ⲡⲉⲧ ⲛⲁⲙⲟⲟϣⲉ
ϩⲁ ⲧⲉⲩϩⲏ : Ϥϫⲱ ⲅⲁⲣ ⲙ̄ⲙⲟⲥ ϩⲛ̄ ⲛⲉⲯⲁⲗⲙⲟⲥ • ϫⲉ
ⲡⲙⲟⲩ ⲡⲉⲧ ⲙⲟⲟⲛⲉ ⲙ̄ⲙⲟⲟⲩ :-Ⲁⲩⲱ ⲟⲛ ϫⲉ ⲛⲉⲧ ⲙⲟⲥⲧⲉ
ⲙ̄ ⲡⲇⲓ̈ⲕⲉⲟⲥ | ⲛⲁⲣ̄ ⲛⲟⲃⲉ :-Ϣⲁϥϫⲟⲟⲥ ⲟⲛ̄ ϩⲛ̄ ⲛ̄ ⲕⲁⲑⲟ‐
ⲗⲓ̇ⲕⲟⲛ • ϫⲉ ⲡⲉⲧ ⲙⲟⲥⲧⲉ ⲙ̄ ⲡⲉϥⲥⲟⲛ̄ ⲟⲩⲣϥ̄ϩⲉⲧⲃ̄ ⲣⲱⲙⲉ
ⲡⲉ :-Ⲉⲓ ⲟⲩⲏⲣ ϩⲱⲱϥ ⲡⲉ ⲡⲉⲕⲣⲓ̈ⲙⲁ ⲙ̄ ⲡⲉⲧ ⲙⲟⲥⲧⲉ
ⲙ ⲡⲛⲟⲩⲧⲉ ⲛⲧⲁϥⲧⲁⲙⲓ̈ⲟϥ • Ⲁⲩⲱ ⲣⲱⲙⲉ ⲛⲓ̈ⲙ ⲉ̄ⲧ ⲣ̄
ⲛⲟⲃⲉ • ϥⲙⲟⲥⲧⲉ ⲙ ⲡⲛⲟⲩⲧⲉ ⲛⲧⲁϥⲧⲁⲙⲓ̈ⲟϥ • ⲛⲉⲧⲉ̄ ⲥⲉ‐
ⲙⲟⲥⲧⲉ ⲁⲛ ⲙ̄ ⲡⲉⲭⲥ̄ ⲓⲥ̄ ⲙⲉⲩⲣ̄ ⲛⲟⲃⲉ :-Ⲧϫⲱ ⲛⲏⲧⲛ̄
ⲙ̄ ⲡϣⲁϫⲉ ⲛ̄ ⲧⲙⲉ ϫⲉ ⲉⲧⲉⲧⲛ̄ϣⲁⲛⲙⲉϣⲧ̄ ⲧⲉⲧⲛ̄ⲥⲩⲛⲏ‐
ⲇⲩⲥⲓⲥ ⲙ̄ⲙⲓ̈ⲛ ⲙ̄ⲙⲱⲧⲛ̄ ⲣⲱⲙⲉ ⲛⲓ̈ⲙ ⲛ̄ⲣϥ︦ⲣ︦ ⲛⲟⲃⲉ •
ⲙⲟⲥⲧⲉ ⲛ ⲧⲉϥⲯⲩⲭⲏ ⲙ̄ⲙⲓⲛ ⲙ̄ⲙⲟϥ • Ⲛ ⲁϣ ⲇⲉ ⲛ̄ ϩⲉ
ⲉⲣⲉ ⲡⲣⲱⲙⲉ ⲛⲁⲙⲉⲥⲧⲉ ⲧⲉϥⲯⲩⲭⲏ ⲙ̄ⲙⲓⲛ ⲙ̄ⲙⲟϥ •
ⲁⲗⲗⲁ ⲡⲟⲗⲗⲁⲅⲓⲥ ⲛ̄ⲧⲉ ⲟⲩⲁ ϫⲟⲟⲥ ⲛⲁⲓ̈ ϫⲉ ⲙⲉⲛ ⲗⲁⲁⲩ
ⲙⲟⲥⲧⲉ ⲛ ⲧⲉϥⲯⲩⲭⲏ ⲉⲛⲉϩ : ϯⲥⲟⲟⲩⲛ̄ ⲙ̄ ⲡⲁⲓ̈ ϩⲱ ⲁⲗⲗⲁ
ⲥⲙⲛ̄ ⲡⲕ̄ⲛⲟⲩⲥ ⲛⲁⲓ̈ ⲱ̄ ⲡⲥⲟⲛ ⲛ̄ ϩⲁⲡⲗⲟⲩⲥ :-Ⲟⲩⲣⲱⲙⲉ
ⲙ̄ⲡⲟⲟⲩ ⲉϥϫⲱ ⲙ̄ⲙⲟⲥ ϫⲉ ⲉⲓ̈ⲑⲁⲗⲡⲓ̈ ⲛ̄ ⲧⲁ ⲯⲩⲭⲏ •
ⲉϥⲟⲩⲱⲙ • ⲁⲩⲱ ⲉϥⲥⲱ ⲛ̄ ⲛⲉϥϩⲟⲟⲩ ⲧⲏⲣⲟⲩ • ϩⲟⲧⲁⲛ ⲇⲉ
ⲉϥϣⲁⲛⲙⲟⲩ ϣⲁⲩϫⲓ ⲛ ⲧⲉϥⲯⲩⲭⲏ ⲛ̄ⲥⲉⲁⲁⲥ ⲛ̄ ϩⲩⲗⲏ


### 0008

ⲛ̄ ⲡⲕⲱϩⲧ̄ • ⲁⲩⲱ ⲛ̄ϩⲣⲉ ⲙ ⲡⲃⲛ̄ⲧ ⲉ ⲧⲃⲉ ⲛ̄ⲛⲟⲃⲉ ⲛⲧⲁϥ|ⲁⲁⲩ
ⲙ̄ ⲡⲉⲩⲟⲉⲓϣ ⲉϥϩⲙ̄ ⲡⲕⲟⲥⲙⲟⲥ • Ϥ̄ϫⲱ ⲅⲁⲣ ⲙ̄ⲙⲟⲥ ⲛ̄ⲧⲟϥ
ϩⲛ̄ ⲧⲉϥⲙⲛ︤ⲧ︥ⲁⲑⲏⲧ ϫⲉ ϯⲙⲉ ⲛ ⲧⲁ ⲯⲩⲭⲏ • ⲉϥⲙⲉ
ⲛ ⲣ̄ ⲛⲟⲃⲉ ⲉ ⲣⲟϥ ⲙ̄ⲙⲏⲛⲉ :-Ⲁⲩⲱ ⲛϥ̄ⲥⲟⲟⲩⲛ̄ ⲁⲛ ϫⲉ ⲛⲉⲧ
ⲉϥⲉⲓⲣⲉ ⲙⲙⲟⲟⲩ ⲙⲙⲏⲛⲉ • ⲥⲉⲥϩⲁⲓ ⲙ̄ⲙⲟⲟⲩ ϩⲛ̄ ϩⲉⲛ̄ⲥϩⲁⲓ̈
ⲉ̄ⲙⲉⲩⲣ̄ ⲁⲥ : ⲟⲩⲇⲉ ⲉⲙⲉⲩϩⲣⲏⲥⲥⲉ ⲁⲗⲗⲁ ϩⲉⲛⲥϩⲁⲓ ⲙ̄
ⲡⲛ︦ⲓ︦ⲕⲟⲛ ⲛⲉ : ⲉⲩⲥϩⲁⲓ̈ ⲛ ⲛⲉⲛⲛ̄ⲟⲃⲉ ⲛϩⲏⲧⲟⲩ ⲟⲩⲁ ⲟⲩⲁ :
ⲉⲡⲓ̈ ⲇⲏ ⲟⲩⲉⲧ ⲡⲛⲟⲃⲉ ⲡⲛⲟⲃⲉ • ⲁⲩⲱ ⲕⲁⲧⲁ ⲑⲉ ⲉⲧ
ⲟⲩϣⲟⲃⲉ ⲉ ⲛⲉⲩⲉⲣⲏⲩ • ⲧⲁⲓ̈ ⲧⲉ ⲑⲉ ⲉⲧ ⲟⲩⲟϣ ⲛ̄ϭⲓ ⲛ̄‐
ⲕⲟⲗⲁⲥⲓⲥ ⲁⲩⲱ ⲉⲩϣⲟⲃⲉ ⲉ̄ ⲛⲉⲩⲉⲣⲏⲩ • ⲭⲱⲣⲓⲥ ⲛ̄ϣⲁⲃⲉ
ϩⲟ ⲉ ⲧϩⲓ ⲛⲉϩⲓⲟⲟⲩⲉ ⲙⲛ̄ ⲇⲓ̈ⲙⲱⲣⲓⲥⲧⲏⲥ ⲛ̄ ⲁⲧ ⲛⲁ • ⲙⲛ̄
ⲛ̄ⲇⲉⲕⲁⲛⲟⲥ ⲉⲧⲉ ⲙⲛ̄ ⲙⲟⲣⲫⲏ ⲙ̄ⲙⲟⲟⲩ ⲉⲩϩⲓϫⲛ̄ ⲛ̄ⲕⲟ‐
ⲗⲁⲥⲓⲥ • ⲉⲩⲧⲟ ⲉ ⲡⲟⲩⲁ ⲡⲟⲩⲁ ϩⲛ̄ ⲟⲩⲙⲛ︦ⲧ︦ ⲁⲧ ⲛⲁ ⲙⲛ̄
ⲟⲩⲛⲟϭ ⲛ̄ ⲟⲣⲅⲏ • Ⲁⲣⲓ ⲡⲙⲉⲉⲩⲉ ϫⲉ ⲡⲓ̈ⲱⲧ ⲛ̄ⲣϥ︦ⲣ︦ ⲛⲟⲃⲉ
ⲛⲓⲙ • ⲙⲟⲟϣⲉ ⲉϥϯ ⲕⲟⲧⲥ̄ • ⲁⲩⲱ ⲉϥⲗ̄ϩⲡⲙ ⲛ̄ⲑⲉ ⲛ
ⲛⲓⲙⲟⲩⲓ̈ • Ⲉϥⲕⲱⲧⲉ ϩⲛ̄ ⲛⲉϥⲡⲁϣ • ⲁⲩⲱ ⲉϥⲛⲏⲩ ϩⲛ̄
ϩⲁϩ ⲛ̄ⲥⲙⲟⲧ • ⲉϥⲟⲩⲱϣ ⲉⲱⲙⲕ̄ ⲛ̄ ⲛⲉⲛⲯⲩⲭⲏ: Ⲁⲩⲱ
ⲉⲣⲉ ⲛϩⲁϭⲉ ⲙ̄ ⲡⲙⲟⲩ ⲛ̄ ⲧⲟⲟⲧϥ̄ ⲉϥⲛⲏⲩ ⲉ ϩⲟⲩⲛ | ⲉ ⲡϩⲏⲧ
ⲙ̄ ⲡⲣⲱⲙⲉ • ⲉϥϫⲟ ⲛ̄ϩⲏⲧϥ̄ ⲙ̄ ⲡⲡⲁⲑⲟⲥ ⲛ̄ ⲧⲕⲁⲕⲓ̈ⲁ •
ⲁⲩⲱ ⲉϥϭⲉⲡⲏ ⲉ̄ϫⲙ̄ ⲡⲣⲱⲙ̄ⲉ ϩⲛ̄ ⲧⲉϥⲙⲛ︦ⲧ︦ⲕⲟⲩⲓ ϩⲛ̄
ⲟⲩⲙⲛ︦ⲧ︦ⲁⲧϣⲓⲡⲉ • Ϥⲛⲏⲩ ϩⲛ̄ ⲟⲩⲙⲛ︦ⲧ︦ⲣϥ̄ⲟⲩⲱϩⲙ̄ ϩⲁ ⲡϩⲟ
ⲛ̄ ⲛ̄ⲛⲟϭ ⲉ ⲣⲟϥ : Ⲙⲛ︦ⲛ︦ⲥⲱⲥ ϥⲛⲏⲩ ϩⲛ̄ ⲟⲩⲉⲡⲓⲑⲩⲙⲓⲁ
ⲛ̄ⲃⲁⲗ • ⲙⲛ̄ ⲟⲩⲕⲱϩ ⲛ̄ ϩⲏⲧ • Ϥⲛⲏⲩ ⲟⲛ ϩⲛ ⲟⲩⲙⲛ︦ⲧ︦‐
ϫⲁⲧⲟⲩⲁ ⲙⲛ̄ ⲟⲩⲙⲛ︤ⲧ︥ϫⲁⲥⲓ̈ϩⲏⲧ • ⲙⲛ̄ ⲟⲩⲉⲟⲟⲩ ⲉϥϣⲟⲩⲉⲓⲧ •
ⲙⲛ̄ ⲟⲩϫⲱϩⲙ̄ ⲙⲛ̄ ⲟⲩⲙⲛ︦ⲧ︦ⲗⲁⲙⲁϩⲧ̄ • ⲙⲛ̄ ⲟⲩⲙⲛ︦ⲧ︦ⲣϥ̄‐
ⲃⲗ̄ⲓⲏⲥⲧⲓ̈ⲁ ⲉ ⲃⲟⲗ : ⲙ[ⲛ̄] ⲙⲁⲓ (?) ⲧⲥⲩⲛⲁⲝⲓⲥ • ⲛⲟⲩⲁϩⲓⲏⲧ ϩⲛ̄
ⲟⲩⲡⲟⲣⲛⲓⲁ • ⲙⲛ̄ ⲟⲩⲙⲛ︦ⲧ︦ⲛⲟⲉⲓⲕ • ⲙⲛ̄ ⲟⲩⲙⲛ︦ⲧ︦ⲙⲁⲅⲟⲥ :
ⲛⲁⲓ ⲧⲏⲣⲟⲩ ϣⲁⲩϣⲱⲡⲉ ⲙ̄ ⲡⲣⲱⲙⲉ • ϩⲛ̄ ⲧⲉϥϣⲟⲣⲡ̄
ⲉⲛϩⲩⲗⲏⲕⲓⲁ : ⲙⲛ̄ ⲧⲉϥⲙⲉϩ ⲥⲛ̄ⲧⲉ : Ϩⲟⲧⲁⲛ ⲇⲉ ⲉϥϣⲁⲛⲉⲓ
ⲉ ⲧⲙⲉϩ ϣⲟⲙⲧⲉ ⲛϩⲩⲗⲏⲕⲓⲁ ⲉⲧⲉ ⲧⲙⲛ︦ⲧ︦ϩⲗ̄ⲗⲟ ⲧⲉ :
ϣⲁⲣⲉ ⲡⲇⲓⲁⲃⲟⲗⲟⲥ ⲟⲩⲱϩ ⲉ̄ ⲣⲟϥ ⲛ̄ ⲧⲕⲁⲧⲁⲗⲁⲗⲓⲁ • ⲙⲛ̄
ⲧⲙⲛ︦ⲧ︦ⲕⲟⲩⲓ̈ ⲛ̄ ϩⲏⲧ • ⲙⲛ̄ ⲧⲙⲛ︦ⲧ︦ⲣϥ̄ⲱⲣⲕ̄ ⲛ̄ ⲛⲟⲩϫ • ϩⲙ̄
ⲡⲧⲣⲉ ⲡⲉϥⲥⲱⲙⲁ ⲕⲁ ϭⲟⲙ ⲉ ⲃⲟⲗ ⲛϥ̄ⲉⲓⲙⲉ ϫⲉ ⲧⲙⲛ︦ⲧ︦-
ϩⲗ̄ⲗⲟ ⲧⲉ : Ⲁⲩⲱ ϣⲁϥⲧⲣϥ̄ϣⲱⲡⲉ ⲉϥϩⲟⲕⲣ̄ ϩⲁ ⲡⲉϩⲕⲟ


### 0009

ⲙⲛ̄ ⲡⲓ̈ⲃⲉ ⲛ̄ⲑⲉ ⲛ ⲛⲓ̈ⲟⲩϩⲟⲟⲣ : Ⲛⲁⲓ̈ ⲙⲛ̄ ⲛⲓⲕⲟⲟⲩⲉ ϣⲁⲣⲉ
ⲡⲇⲓⲁⲃⲟ|ⲗⲟⲥ ⲁⲁⲩ ⲙ̄ ⲡⲣⲱⲙⲉ ϩⲛ̄ ⲧⲉϥⲙⲉϩ ϣⲟⲙⲧⲉ ⲛϩⲩ‐
ⲗⲩⲕⲓⲁ : ⲁⲗⲗⲁ ⲛⲁⲓ̈ⲁⲧϥ̄ ⲙ̄ ⲡⲣⲱⲙⲉ ⲉⲧ ⲉⲣⲉ ⲡⲇⲓⲁⲃⲟⲗⲟⲥ
ⲛⲁⲡⲓ̈ⲣⲁⲍⲉ ⲙ̄ⲙⲟϥ • ⲛϥ̄ϫⲣⲟ ⲉ ⲣⲟϥ ϩⲓⲧⲛ̄ ⲧⲙⲉⲧⲁⲛⲟⲓ̈ⲁ :
ϫⲉ ⲟⲩⲛⲟϭ ⲡⲉ ⲡⲉϥⲃⲉⲕⲉ ϩⲁϩⲧⲙ̄ ⲡⲛⲟⲩⲧⲉ ⲙ̄ ⲡⲉϩⲟⲟⲩ
ⲙ̄ ⲡⲉϥⲉⲓ ⲉ ⲃⲟⲗ ϩⲛ̄ ⲥⲱⲙⲁ :-Ⲱ̄ ⲛⲁϣⲏⲣⲉ ⲙⲙⲉⲣⲓⲧ •
ⲧⲉⲧⲛ̄ⲛⲁⲩ ϫⲉ ⲉⲓⲥ ⲡⲟⲩⲟⲉⲓⲛ ⲁϥⲥⲱⲣ • ⲁⲩⲱ ⲁ ⲡⲣⲏ ⲁⲣⲭⲓ̈
ⲛ̄ ϣⲁ • Ⲙⲁⲣⲛ̄ ⲧⲁⲗⲟ ⲉ ϩⲣⲁⲓ̈ ⲛ̄ ⲧⲉⲡⲣⲟⲥⲫⲟⲣⲁ ⲉⲧ ⲟⲩⲁⲁⲃ
ϫⲉ ⲁ ⲡ̄ⲛⲁⲩ ϣⲱⲡⲉ ⲛ̄ⲧⲛ̄ϫⲓ ⲉ ⲃⲟⲗ ϩⲛ̄ ⲙ̄ⲙⲩⲥⲧⲏⲣⲓⲟⲛ
ⲉⲧ ⲟⲩⲁⲁⲃ ⲡⲥⲱⲙⲁ ⲙⲛ̄ ⲡⲉⲥⲛⲟϥ ⲙ̄ ⲡⲉⲭⲥ̄ ⲙ̄ⲡⲁⲧ ⲟⲩⲃⲓ̈ⲧ
ⲛ̄ⲧⲟⲟⲧ ⲧⲏⲩⲧⲛ̄ • ϫⲉ ⲉⲓⲥ ⲡⲃⲉⲗⲉⲧⲁⲣⲓⲟⲥ ⲛ̄ ⲡⲣ̄ⲣⲟ ϣⲁϫⲉ
ⲙⲛ̄ ⲙ̄ⲙⲁⲧⲟⲓ̈ ⲙ̄ ⲡϩⲏⲅⲉⲙⲱⲛ ϫⲉ ⲙⲁⲣⲉⲛ̄ⲃⲓⲧϥ̄ ⲛ̄ⲧⲛ̄ⲃⲱⲕ
ϫⲉ ⲁ ⲡⲟⲩⲟⲉⲓⲛ ϣⲁ • Ⲛ ⲧⲉⲣ ϥ̄ϫⲉ ⲛⲁⲓ̈ ⲇⲉ ⲛϭⲓ ⲡⲙⲁ‐
ⲕⲁⲣⲓⲟⲥ ⲁⲡⲁ ⲯⲟⲧⲉ : ⲡⲉⲡⲓⲥⲕⲟⲡⲟⲥ ⲁϥⲥⲫⲣⲁⲅⲓⲍⲉ ⲙ‐
ⲡⲗⲁⲟⲥ ⲛ̄ ϣⲟⲙⲧ̄ ⲛ̄ ⲥⲟⲡ ⲉ ⲡⲣⲁⲛ ⲙ̄ ⲡⲓⲱⲧ ⲙⲛ̄ ⲡϣⲏⲣⲉ
ⲙⲛ̄ ⲡⲉⲡⲛⲁ̄ ⲉⲧ ⲟⲩⲁⲁⲃ • Ⲁⲩⲱ ⲁϥⲥⲩⲛⲁⲅⲉ ⲙ̄ⲙⲟⲟⲩ •
ⲁϥϯ ϯⲣⲏⲛⲏ ⲛⲁⲩ • ⲁϥⲕⲁⲁⲩ ⲉ ⲃⲟⲗ ⲁⲩⲃⲱⲕ ⲉ ⲛⲉⲩⲏⲓ̈
ⲉⲩϯ ⲉⲟⲟⲩ ⲙ̄ ⲡⲉϥϫⲟⲉⲓ̈ⲥ ⲓⲥ̄ ⲡⲉⲭⲥ̄ : Ⲡⲁⲓ ⲉ ⲃⲟⲗ ϩⲓ
ⲧⲟⲟⲧϥ̄ ⲡⲉⲟⲟⲩ ⲛⲁϥ ⲙⲛ̄ ⲡⲉϥⲓ̈ⲱⲧ ⲛ̄ ⲁⲅⲁⲑⲟⲥ ⲙⲛ̄ ⲡⲉⲡⲛⲁ̄
ⲉⲧ ⲟⲩⲁⲁⲃ ϣⲁ ⲉⲛⲉϩ ⲛ̄ ⲉⲛⲉϩ ϩⲁⲙⲏⲛ •