### 0001

ⲞⲨⲖⲞⲄⲞⲤ • Ⲉ ⲀϤⲦⲀⲨⲞϤ • Ⲛ̄ϬⲒ ⲠⲈⲚ ⲠⲈⲦ
ⲞⲨⲀⲀⲂ Ⲛ̄ ⲈⲒⲰⲦ ⲈⲦ ⲦⲀⲈⲒⲎⲨ ⲔⲀⲦⲀ ⲤⲘⲞⲦ
ⲚⲒⲘ • ⲀⲠⲀⲔⲨⲢⲒⲖⲖⲞⲤ • ⲠⲀⲢⲬⲎⲈⲠⲒⲤⲔⲞⲠⲞⲤ
Ⲛ̄ ⲢⲀⲔⲞⲦⲈ • Ⲉ ⲀϤⲦⲀⲨⲞϤ Ⲉ ⲠⲦⲀⲈⲒⲞ Ⲛ̄-
ⲦⲈⲦⲞ̄ Ⲙ̄ ⲠⲀⲢⲐⲈⲚⲞⲤ Ⲛ̄ ⲞⲨⲞⲈⲒϢ ⲚⲒⲘ •
ⲐⲀⲄⲒⲀ⳿ ⲘⲀⲢⲒⲀ • ⲦⲢⲈϤϪⲠⲈ ⲠⲚⲞⲨⲦⲈ • ϨⲚ̄
ⲞⲨⲘⲈ • ⲈϤⲞⲨⲰ̄ⲚϨ̄ Ⲉ ⲂⲞⲖ Ⲙ̄ ⲠⲈⲤⲚⲞϬ Ⲛ̄
ⲈⲞⲞⲨ • ⲘⲚ̄ ⲠⲦⲀⲈⲒⲞ⳿ Ⲛ̄Ⲧ ⲀⲤϪⲒⲦϤ̄ Ⲉ ⲂⲞⲖ
ϨⲒⲦⲘ̄ ⲠⲚⲞⲨⲦⲈ :- ϨⲚ̄ ⲞⲨⲈⲒⲢⲎⲚⲎ Ⲛ̄ⲦⲈ
ⲠⲚⲞⲨⲦⲈ ϨⲀⲘⲎⲚ ⁖-
Ⲱ̄ ⲛⲁ ⲙⲉⲣⲁⲧⲉ⳿ ⲡⲗⲁⲟⲥ ⲙ̄ ⲙⲁⲓ̄ⲛⲟⲩⲧⲉ • ⲁⲟⲩⲱⲛ⳿ ⲛⲙ̄‐
ⲙⲁⲁϫⲉ ⲙ̄ ⲡⲉⲧⲛ̄ϩⲏⲧ⳿ ⲛ̄ⲧⲉⲧⲛ̄ⲥⲱⲧⲙ̄ ⲉ ⲡⲧⲁⲉⲓⲟ ⲛ̄ ⲧⲙⲁⲁⲩ
ⲙ̄ ⲡⲛⲟⲩⲧⲉ • ⲧⲣ̄ⲣⲱ̄ ⲛ̄ ⲛⲉϩⲓⲟ̄ⲙⲉ⳿ ⲧⲏⲣⲟⲩ ⲁⲩⲱ ⲧϣⲉⲗⲉⲉⲧ
ⲙ̄ⲙⲉ • Ⲧⲉⲛⲧⲁ ⲡϣⲏⲣⲉ ⲙ̄ ⲡⲛⲟⲩⲧⲉ⳿ ⲕⲁⲧⲁⲝⲓⲟⲩ ⲙ̄ⲙⲟϥ •
ⲁϥⲉⲓ⳿ ⲁϥⲟⲩⲱϩ⳿ ϩⲛ̄ ⲧⲉⲥⲕⲁⲗⲁϩⲏ ⲙ̄ ⲯⲓⲥ⳿ ⲛ̄ⲉⲃⲟⲧ⳿ ⲁⲥϫ‐
ⲡⲟϥ ⲛⲁⲛ ϩⲛ̄ ⲃⲏⲑⲗⲉⲉⲙ • ⲁⲥϭⲟⲟⲗⲉϥ ⲛ̄ ϩⲉⲛⲧⲟⲉⲓⲥ •
ⲁⲥⲕⲱ ⲙ̄ⲙⲟϥ ϩⲛ̄ ⲟⲩⲟ̄ⲙϥ̄ ⲛ̄ ⲧⲃ̄|ⲛⲏ• ⲁ ϩⲉⲛⲍⲱⲟⲛ⳿ ⲛⲁⲩ
ⲉ ⲣⲟϥ ⲁⲩⲥⲟⲩⲱⲛϥ̄ • ⲁⲩⲱ̄ ⲁⲩⲣ̄ ϩⲁⲓ̄ⲃⲉⲥ⳿ ⲉ ⲣⲟϥ • Ⲁⲣ‐
ⲥⲟⲟⲩⲧⲛ̄ ⲉ ⲃⲟⲗ ⲙ̄ ⲡⲟⲩϭⲃⲟⲓ̄ ⲛ̄ ⲟⲩⲛⲁⲙ • ⲁⲣⲁⲙⲁϩⲧⲉ
ⲙ̄ⲙⲟϥ ⲁⲣϫⲧⲟϥ⳿ ϩⲙ̄ ⲡⲟⲩϭⲃⲟⲓ̄ ⲛ̄ϩⲃⲟⲩⲣ • Ⲁⲣⲣⲓⲕⲉ ⲙ̄
ⲡⲟⲩⲙⲁⲕϩ̄ ⲙⲛ̄ ⲡⲟⲩⲃⲱ⳿ ⲉ ⲧⲟⲗⲙ̄ ⲉ ⲡⲉⲥⲏⲧ⳿ ⲉ ϫⲱϥ •
ⲁⲣϯⲡⲓ⳿ ⲉ ⲣⲱϥ ⲙ̄ ⲡⲉⲧ ⲉⲣⲉ ⲡⲉⲓⲱⲧ⳿ ϯⲡⲉⲓ⳿ ⲉ ⲣⲱϥ⳿ ϩⲛ̄
ⲙ̄ⲡⲏⲩⲉ • ⲁⲣⲕⲁⲁϥ ϩⲓϫⲛ̄ ⲛⲟⲩⲡⲁⲧ • ⲁϥϥⲓ̄ ⲛ̄ ⲛⲉϥⲃⲁⲗ
ⲉ ϩⲣⲁⲓ̄ ϩⲁ ⲡⲟⲩϩⲟ • Ⲁϥⲥⲟⲟⲩⲧⲛ̄ ⲉ ⲃⲟⲗ ⲛ̄ ⲧⲉϥϭⲓϫ •
ⲁϥ|ϭⲱⲡⲉ⳿ ⲛ̄ ⲧⲟⲩⲉⲕⲓⲃⲉ • ⲁϥⲱϥ⳿ ⲉ ϩⲟⲩⲛ ⲉ ⲣⲱϥ ⲙ̄
ⲡⲉⲣⲱⲧⲉ⳿ ⲉⲧ ϩⲟⲗϭ̄ ⲉϩⲟⲩⲉ ⲟⲩⲙⲁⲛⲛⲁ • Ⲁ ⲡⲉⲥⲧⲟⲓ̄ ⲛ̄
ⲧⲟⲩⲑⲩⲥⲓⲁ⳿ ϩⲗⲟϭ ⲛⲁϥ • ⲉϩⲟⲩⲉ ⲡⲉⲥϯ ⲛⲟⲩϥⲉ⳿ ⲛ̄ ⲧⲉⲑⲩ‐


### 0002

ⲥⲓⲁ⳿ ⲛ̄ ⲛⲱϩⲉ • Ⲛ̄ ⲧⲉⲣⲉ ϥⲥⲱ⳿ ϩⲛ̄ ⲛ̄ ⲟⲩⲉⲕⲓⲃⲉ ⲛ ⲁⲧ ⲧⲱⲗⲙ̄
ⲁϥⲙⲟⲩⲧⲉ ⲉⲣⲟ • ϫⲉ ⲧⲁ ⲙⲁⲁⲩ • Ⲁⲙⲏⲓ̄ⲧⲛ̄ • ⲛ̄ⲧⲉⲧⲛ̄‐
ⲛⲁⲩ⳿ ⲉ ⲡⲛⲟⲩⲧⲉ ⲉϥⲙⲟⲩⲧⲉ⳿ ⲉ ⲙⲁⲣⲓⲁ⳿ ϫⲉ ⲧⲁ ⲙⲁⲁⲩ
ⲉϥϯⲡⲓ⳿ ⲉ ⲣⲱⲥ • Ⲁⲩⲱ ⲉⲛⲉⲥϯⲡⲓ⳿ ⲉ ⲣⲱϥ ϩⲱⲱⲥ ⲉⲥ‐
ⲙⲟⲩⲧⲉ⳿ ⲉ ⲣⲟϥ ⲛ̄ ⲛⲁⲩ ⲛⲓⲙ | ϫⲉ ⲡⲁ ϫⲟⲉⲓⲥ ⲁⲩⲱ̄
ⲡⲁ ϣⲏⲣⲉ ⲉⲥⲟⲩⲱ̄ϣⲧ̄ ⲛⲁϥ : Ⲙ̄ ⲡⲛⲁⲩ ⲅⲁⲣ⳿ ⲉϣⲁⲥϯ ⲉⲕⲓⲃⲉ
ⲛⲁϥ • ⲛⲉϣⲁⲥⲣⲓⲕⲉ ⲙ̄ ⲡⲉⲥⲙⲁⲕϩ̄ ⲉ ⲡⲉⲥⲏⲧ ⲛⲁϥ ⲉϥⲁϩⲉ
ⲣⲁⲧϥ̄ • ⲛ̄ⲑⲉ ⲛ̄ ⲟⲩⲡⲩⲣⲅⲟⲥ • Ⲡⲛ︦ⲛ︦ⲥⲱⲥ ⲟⲛ ϣⲁⲥⲟⲩⲱϣⲧ̄
ⲛⲁϥ • ⲉⲥϫⲱ̄ ⲙ̄ⲙⲟⲥ • ϫⲉ ⲡⲁ ϫⲟⲉⲓⲥ • ⲁⲩⲱ̄ ⲡⲁ ϣⲏⲣⲉ •
Ⲉⲓⲧⲁ ⲙⲛ︦ⲛ︦ⲥⲁ ⲛⲁⲓ̄ • ⲁⲥⲁⲙⲁϩⲧⲉ⳿ ⲛ̄ ⲧⲉϥϭⲓϫ • ⲁⲥⲥⲱⲕ
ⲙ̄ⲙⲟϥ ϩⲛ̄ ⲛⲉϩⲓⲟⲟⲩⲉ • ⲉⲥϫⲱ ⲙ̄ⲙⲟⲥ ϫⲉ • ⲡⲁ ϣⲏⲣⲉ
ⲉⲧ ϩⲟⲗϭ̄ • ⲙⲟⲟ̄ϣⲉ⳿ ⲕⲟⲩⲓ̄ • ⲕⲟⲩⲓ̄ ⲛ̄ⲑⲉ ⲛ̄ ⲛ̄ϣⲏ|ⲣⲉ⳿ ⲕⲟⲩⲓ
ⲧⲏⲣⲟⲩ ⲉⲩⲧⲥⲁⲃⲟ ⲙ̄ⲙⲟⲟⲩ⳿ ⲉ ⲙⲟⲟϣⲉ • Ⲛ̄ⲧⲟϥ ⲇⲉ⳿ ϩⲱⲱϥ
ⲡⲛⲟⲩⲧⲉ ⲙ̄ⲙⲉ ⲓ︦ⲥ︦ • ⲁϥⲟⲩⲁϩϥ̄ ⲛ̄ⲥⲱⲥ • ⲛϥ̄ϣⲧⲣ̄ⲧⲱⲣ⳿
ⲁⲛ⳿• ⲉϥⲧⲟϭⲥ̄ ⲉ ⲛⲉϥⲕⲟⲩⲓ̄ ⲛ̄ϭⲟⲡ • ⲉϥϥⲓ⳿ ⲟⲩⲱϩ • ⲟⲩⲱϩ •
Ⲉϥⲁϣⲉ⳿ ϩⲛ̄ ⲛⲉϩⲟⲓⲧⲉ ⲙ̄ ⲙⲁⲣⲓⲁ⳿ ⲧⲉϥⲙⲁⲁⲩ ⲛ̄ϭⲓ ⲡⲉⲧ
ⲉⲣⲉ ⲡⲧⲏⲣϥ̄ • ⲁϣⲉ ⲙ̄ⲙⲟϥ • Ⲉⲛⲉϣⲁϥϥⲓ⳿ ⲛ̄ ⲛⲉϥⲃⲁⲗ
ⲉ ϩⲣⲁⲓ̄ ϩⲁ ⲡⲉⲥϩⲟ • ⲛ̄ϭⲓ ⲡⲉⲧ ⲉⲣⲉ ⲡⲧⲏⲣϥ̄ ⲁϣⲉ ⲙ̄ⲙⲟϥ •
ⲁⲩⲱ̄ ⲉϥⲥⲙⲟⲛⲧ̄ ⲉ ⲧⲃⲏⲏⲧϥ̄ • Ⲉⲛⲉϣⲁⲥϫⲓⲧϥ̄ ⲟⲛ ⲛⲥ̄ⲧⲁⲗⲟϥ •
ⲛⲥ̄ⲙⲟⲟϣⲉ ⲛⲙ̄ⲙⲁϥ • Ⲁⲙⲏⲓⲧⲛ̄ • ⲱ̄ ⲛⲉϩⲓⲟⲙⲉ ⲧⲏⲣⲟⲩ |
ⲛ̄ⲧⲉⲧⲛ̄ⲛⲁⲩ ⲉ ⲙⲁⲣⲓⲁ • ⲉⲣⲉ ⲡⲛⲟⲩⲧⲉ⳿ ⲡⲟⲣϫ̄ ⲉ ⲡⲉⲥⲥⲡⲓⲣ
ⲉϥϥⲓ ⲙ̄ ⲡⲉϥϩⲟ⳿ ⲉ ϩⲣⲁⲓ̄ • ⲉϥϯⲡⲓ⳿ ⲉ ⲣⲱⲥ • Ⲙⲟⲟϣⲉ •
ⲙⲟⲟϣⲉ ⲧϣⲉⲉⲣⲉ ⲛ̄ ⲥⲓⲱⲛ • ⲉⲓϣⲁϫⲉ⳿ ⲉⲣⲟ⳿ ⲱ̄ ⲙⲁⲣⲓⲁ⳿ • ⲉⲓⲥ
ⲡⲣ̄ⲣⲟ ⲡⲉⲭⲥ̄ ϩⲓ ϫⲱ • Ⲁϥϣⲱⲡⲉ ⲅⲁⲣ ⲛⲉ⳿ ⲛ̄ϭⲓ ⲡⲣ̄ⲣⲟ
ⲡⲉⲭ︦ⲥ︦ • ⲁϥϩⲙⲟⲟⲥ⳿ ϩⲓ ϫⲱ • Ⲁϥⲣ̄ ϣⲃⲏⲣ⳿ ⲣ̄ ϩⲱⲃ ⲛⲙ̄ⲙⲉ⳿
ⲛ̄ϭⲓ ⲡⲉⲓⲱⲧ • Ⲁϥⲣ̄ ⲥⲩⲅⲅⲉⲛⲏⲥ⳿ ⲛⲙ̄ⲙⲉ ⲛ̄ϭⲓ ⲡϣⲏⲣⲉ •
Ⲁϥⲣ̄ ⲁⲧ ⲡⲱⲣϫ̄ ⲉⲣⲟ⳿ ⲛ̄ϭⲓ ⲡⲉⲡⲛ︦ⲁ︦ ⲉⲧ ⲟⲩⲁⲁⲃ • Ⲛⲁⲅⲅⲉ‐
ⲗⲟⲥ ϩⲩⲡⲟⲧⲁⲥⲥⲉ ⲛⲉ⳿ ϫⲉ ⲁϥⲙⲉⲣⲓ|ⲧⲉ • ⲁϥϭⲟⲓ̄ⲗⲉ⳿ ⲉⲣⲟ⳿
ⲉ ⲧⲃⲉ ⲡⲟⲩⲧⲃ̄ⲃⲟ • Ⲛ̄ⲧⲟ⳿ ⲅⲁⲣ ⲙⲁⲩⲁⲁⲧⲉ⳿ ⲡⲉⲛⲧ ⲁⲣϭⲛ̄
ϩⲙⲟⲧ⳿ ⲛ̄ ⲛⲁϩⲣⲙ̄ ⲡⲛⲟⲩⲧⲉ • ϩⲛ̄ ⲛⲉϩⲓⲟ̄ⲙⲉ⳿ ⲧⲏⲣⲟⲩ • ϫⲉ
ⲡϫⲟⲉⲓⲥ ϣⲟⲟⲡ ⲛⲙ̄ⲙⲉ • Ⲁⲣϥⲓ ⲛ̄ ⲛⲟⲩϭⲓϫ⳿ ⲉ ϩⲣⲁⲓ̄ •
ⲙⲛ̄ ⲛⲟⲩϭⲃⲟⲓ̄ ⲉ ⲧϫⲟⲥⲉ • ⲁⲣϫⲓ ⲛ̄ⲧ ⲙ̄ ⲡⲛⲟⲩⲧⲉ ⲡⲉⲓⲱⲧ •
ⲛ̄ⲑⲓⲕⲱⲛ ⲙ̄ ⲡⲉϥϣⲏⲣⲉ • ⲁⲣⲧⲁⲗⲟⲥ⳿ ϩⲓϫⲛ̄ ⲧⲟⲩⲁⲡⲉ • ⲉⲣⲉ
ⲡⲉⲡⲛⲁ̄ ⲉⲧ ⲟⲩⲁⲁⲃ ϫⲓ ⲙⲟⲉⲓⲧ ϩⲏⲧⲉ • ⲉⲣⲙⲟⲟϣⲉ⳿ ⲉ ⲃⲟⲗ


### 0003

ϩⲛ̄ ⲧⲟⲓⲕⲟⲩⲙⲉⲛⲏ ⲧⲏⲣⲥ̄ • ⲉⲣⲧⲁϣⲉⲟ̄ⲉⲓϣ • ⲉⲣϫⲱ ⲙ̄ⲙⲟⲥ •
ϫⲉ | Ⲥⲟⲩⲱ̄ⲛϥ̄ ⲛⲏⲧⲛ̄ • ϫⲉ ⲛ̄ⲧⲟϥ • ⲡⲉ ⲡϣⲏⲣⲉ • ⲛ̄ ⲟⲩⲱⲧ
ⲛ̄ⲧⲉ ⲡⲛⲟⲩⲧⲉ • ⲛ̄ⲧ ⲁⲓϫⲡⲟϥ • Ⲱ̄ ⲙⲁⲣⲓⲁ⳿• ⲁⲓ̄ⲉⲓⲙⲉ • ϫⲉ
ⲉⲣⲧⲏⲕ ⲛ̄ ϩⲏⲧ ⲉϫⲛ̄ ⲛⲟⲩⲥⲙⲟⲧ • Ϫⲉ ⲥϩⲓⲙⲉ ⲛⲓⲙ ⲛ̄ⲧ ⲁϥ‐
ⲁⲓ̄ⲧⲉⲓ (sic) ⲙ̄ ⲡⲛⲟⲩⲧⲉ⳿ ⲛ̄ⲧⲁϥϯ ⲛⲁϥ (sic) ⲙ̄ ⲡϣⲓ ⲛ̄ ⲧ̄ⲙⲛ̄ⲧ‐
ⲣⲱⲙⲉ • Ⲛ̄ⲧⲟ⳿ ⲇⲉ⳿ ⲛ̄ⲧ ⲁⲣⲁⲓ̄ⲧⲉⲓ ⲙ̄ⲙⲟϥ ⲛ̄ ⲟⲩⲙⲛ̄ⲧⲥⲁⲃⲉ •
ⲁϥϯ ⲛⲉ⳿ ⲙ̄ ⲡⲉϥⲇⲱⲣⲟⲛ⳿ ⲉⲧⲉ ⲡⲉϥϣⲏⲣⲉ ⲡⲉ • Ⲁⲣϩⲕⲟ •
ⲁϥϯ⳿ⲛⲉ⳿ ⲙ̄ⲡⲉⲣⲱⲧⲉ⳿ ⲛ̄ ⲛⲟⲩⲉⲕ|ⲓⲃⲉ⳿ ϩⲛ̄ ⲙ̄ⲡⲏⲟⲩⲉ •
Ⲛⲧⲁⲩϫⲡⲟ⳿ ϩⲓⲧⲛ̄ ⲉⲩϩⲁ • ⲛ̄ⲧⲟ ϩⲱⲱⲧⲉ⳿ ⲁⲣϫⲡⲟ⳿ ⲙ̄
ⲡⲛⲟⲩⲧⲉ ⲡⲣ̄ⲣⲟ ⲛ̄ ⲛⲁ ⲧⲡⲉ • ⲙⲛ̄ ⲛⲁ ⲡ̄ⲕⲁϩ • Ⲛ̄ⲧⲁⲣⲁⲡⲟ‐
ⲧⲁⲥⲥⲉ ⲙ̄ ⲡⲕⲟⲥⲙⲟⲥ ⲙⲛ̄ ⲧⲉϥϩⲩⲗⲏ • ⲁ ⲡⲛⲟⲩⲧⲉ ϩⲱⲱϥ
ⲭⲁⲣⲓⲍⲉ ⲛⲉ⳿ ⲛ̄ ⲧ̄ⲡⲉ • ⲙⲛ̄ ⲡⲕⲁϩ • Ⲉⲛⲉϣⲁⲣⲕⲱⲗϫ̄ ⲛ̄
ⲛⲟⲩⲡⲁⲧ • ⲙ̄ ⲡⲟⲩϣⲏⲣⲉ • ⲛ̄ⲧⲉⲟⲩⲱϣⲧ̄ ⲛⲁϥ • Ⲁⲩⲱ
ⲛ̄ⲧⲉⲩⲛⲟⲩ ϣⲁⲣⲉ ⲛⲁⲅⲅⲉⲗⲟⲥ • ⲟⲩⲱϣⲧ̄ ⲛⲉ⳿ ϩⲱⲟⲩ • Ⲱ̄
ⲙⲁⲣⲓⲁ • ⲙⲁⲁⲃⲉ • ⲙⲛ̄ ⲯⲓⲧⲉ⳿ ⲛ̄ⲣⲟⲙⲡⲉ • ⲁⲣ|ϫⲟⲕⲟⲩ⳿
ⲉ ⲃⲟⲗ ⲉⲣⲉ ⲡⲛⲟⲩⲧⲉ⳿ ϯ ⲉⲟⲟⲩ ⲛⲉ • ⲧⲁⲩⲉ⳿ ⲛ̄ ⲟⲩⲙⲩⲥⲧⲏ‐
ⲣⲓⲟⲛ⳿ ⲉ ⲣⲟⲓ̄ ⲱ̄ ⲙⲁⲣⲓⲁ • Ⲥⲱⲧⲙ̄ ⲡⲉϫⲁⲥ⳿ ⲁⲛⲟⲕ ϯⲛⲁ
ⲧⲁⲙⲟⲕ • Ⲁⲓ̄ⲉⲥⲩⲭⲁⲍⲉ ⲙ̄ⲙⲟⲓ̄ ϫⲓⲛ ⲧⲁ ⲙⲛ̄ⲧⲕⲟⲩⲓ̄ •
Ⲁⲓ̄ⲁⲡⲟⲧⲁⲥⲥⲉ ⲙ̄ ⲡⲕⲟⲥⲙⲟⲥ ⲙⲛ̄ ⲧⲉϥϩⲩⲗⲏ • Ⲁ ⲧⲁⲕⲁ‐
ⲗⲁϩⲏ⳿ ⲙⲟⲟϣⲉ⳿ ⲉ ⲃⲟⲗ ⲁϫⲛ̄ ϩⲟⲟⲩⲧ • Ⲁ ⲛⲁⲉⲕⲓⲃⲉ⳿ ⲣ̄
ⲥⲁⲓ̄ⲣⲉ • Ⲙ̄ⲡ ⲉⲓϣⲁϫⲉ⳿ ⲙⲛ̄ ϩⲣ̄ϣⲓⲣⲉ • Ⲙ̄ⲡ ⲉⲓϯⲧⲕⲁⲥ
ⲉⲓⲙⲓⲥⲉ • Ⲙⲡ ⲉⲓϣⲗⲁϩ• ⲉⲓⲛⲁⲩ ⲉ ⲡⲁ | ϣⲏⲣⲉ • Ⲙ̄ⲡ
ⲓ̄ⲉⲓⲙⲉ • ϫⲉ ⲛ̄ⲧⲁⲓ︦ⲱ︦ⲱ︦ ⲙ̄ⲙⲟϥ ⲉ ⲃⲟⲗ ⲧⲱⲛ • Ⲁⲓ̄ⲉⲓⲙⲉ
ⲇⲉ⳿ ⲛ̄ⲧⲟϥ ϫⲉ ⲟⲩⲛⲟⲩⲧⲉ⳿ ⲡⲉ ⲛ̄ⲧ ⲁⲓ̄ϫⲡⲟϥ • Ⲁ ⲅⲁⲃⲣⲓⲏⲗ
ⲡⲁⲣⲭⲁⲅⲅⲉⲗⲟⲥ⳿ ⲣ̄ ϩⲟⲧⲉ • ⲉϥⲧⲁϣⲉⲟ̄ⲉⲓϣ ⲛⲁⲓ̄ ⲛ̄ⲛⲁⲓ̄ •
ⲉϥⲥⲟⲟⲩⲛ ϫⲉ ⲟⲩϩⲱⲃ ⲛ̄ ⲃⲣ︤ⲣⲉ ⲡⲉ • Ⲁⲛⲟⲕ ⲇⲉ ⲙ̄ⲡ
ⲉⲓⲣ̄ϩⲟⲧⲉ • ⲁⲗⲗⲁ ⲁⲓ̄ⲧⲉⲗⲏⲗ • ⲉⲓⲥⲟⲟⲩⲛ ⲙ̄ ⲡⲣⲁϣⲉ • ⲛ̄ ⲧⲉⲣⲉ
ϥⲁⲥⲡⲁⲍⲉ ⲙ̄ⲙⲟⲓ̄ • ⲉϥⲥⲧⲱⲧ • ⲁⲩⲱ̄ ⲁⲓⲙⲟⲩϩ ⲛ̄ ⲟⲩⲛⲟϥ •
Ⲁϥⲉⲓ⳿ ⲡⲉϫⲁⲥ ⲛ̄ϭⲓ ⲙⲁⲣⲓⲁ • ⲁϥⲟⲩⲱⲛ ⲛ̄ ⲧⲁ | ⲧⲁⲡⲣⲟ •
ⲁϥⲡⲱⲧ⳿ ⲉ ⲡⲉⲥⲏⲧ⳿ ⲉ ⲧⲁ ⲕⲁⲗⲁϩⲏ⳿• ⲁⲩⲱ̄ ⲡⲁⲣⲭⲁⲅⲅⲉⲗⲟⲥ⳿
ⲉⲧ ⲟⲩⲁⲁⲃ • ⲅⲁⲃⲣⲓⲏⲗ • ⲉⲛ ⲉϥⲗⲟϫⲧ̄ ⲉ ⲣⲟⲓ̄ ⲡⲉ • ⲉϥⲣ̄
ϩⲙ̄ⲙⲉ ⲙ̄ⲙⲟⲓ̄ • ⲁⲩⲱ̄ ⲉϥϩⲩⲡⲉⲣⲏⲧⲉⲓ̄ • ⲙ̄ ⲡⲉⲧ ϩⲙ̄ ⲡⲁ
ⲥⲁ ⲛ ϩⲟⲩⲛ • Ⲉⲛⲉϣⲁⲓ̄ϩⲩⲙⲛⲉⲩⲉ⳿ ⲉ ⲡⲛⲟⲩⲧⲉ • ⲛ̄
ⲧⲉⲩϣⲏ • ϣⲁⲣⲉ ⲛⲁⲅⲅⲉⲗⲟⲥ⳿ ϩⲩⲙⲛⲉⲩⲉ ⲛⲙ̄ⲙⲁⲓ̈• ⲙ


### 0004

ⲡⲛⲁⲩ ⲟⲛ⳿ ⲉϣⲁⲓ̄ⲕⲱⲗϫ̄ ⲛ̄ ⲛⲁ ⲡⲁⲧ ⲛ̄ ϣⲱⲣⲡ̄ • ϣⲁⲣⲉ
ⲛ̄ϭⲟⲙ⳿ ⲛ ⲙ̄ⲡⲏⲩⲉ • ⲟⲩⲱ̄ϣⲧ̄ ⲙ̄ ⲡⲉⲧ ϩⲙ̄ ⲡⲁ ⲥⲁ ⲛ ϩⲟⲩⲛ •
Ⲙ̄ ⲡⲛⲁⲩ ⲛ̄ ϫⲡ̄ ϣⲟⲙⲧⲉ • ϣⲁ|ⲣⲉ ⲧⲉ ⲧⲣⲓⲁⲥ • ϯ ⲛⲁⲓ̄ ⲛ̄
ⲟⲩϭⲟⲙ • ϣⲁ ϫⲡ̄ⲥⲟ⳿ ⲙ̄ ⲡⲉϩⲟⲟⲩ • ⲟⲩⲧⲉⲗⲏⲗ ⲙⲛ̄ ⲟⲩ‐
ⲟⲩⲛⲟϥ • ⲛⲉⲧ ϣⲟⲟⲡ ⲛⲁⲓ̄ • Ⲙ̄ ⲡⲛⲁⲩ⳿ ⲉⲓⲛⲁⲟⲩⲱⲙ •
ⲟⲩⲙⲁⲛⲛⲁ ⲙ̄ ⲙⲁⲣⲕⲁⲣⲓⲧⲏⲥ⳿ ⲛⲉⲧ ⲛⲏⲩ ⲛⲁⲓ̄ • Ϩⲙ̄
ⲡⲣⲏ⳿ ⲟⲛ⳿ ⲉϥⲛⲁϩⲱⲧⲡ̄ • ⲟⲩⲙⲁⲛⲛⲁ⳿ ⲛ̄ ⲥϯ ⲛⲟⲩϥⲉ ⲡⲉ •
Ⲙ︦ⲡ ⲓⲉⲓⲙⲉ • ϫⲉ ⲡⲉ ϯϩⲩⲙⲛⲉⲩⲉ⳿ ⲉ ⲣⲟϥ • ⲡⲕⲟⲥⲙⲟⲥ⳿
ⲧⲏⲣϥ̄ ϯ ⲉⲟⲟⲩ ⲛⲁϥ • Ⲁⲩⲱ̄ ⲛⲁⲓ ⲧⲏⲣⲟⲩ ⲁⲓ̄ⲉⲓⲙⲉ⳿ ⲉ
ⲣⲟⲟⲩ ⲁⲩⲱ̄ ⲁⲓ̄ⲙⲉⲧⲉⲭⲉ⳿ ⲉ ⲣⲟⲟⲩ • Ⲁⲩⲱ̄ ⲁ ⲡⲕⲟⲥⲙⲟⲥ
ⲧⲏⲣϥ̄ ϯ ⲉⲟⲟⲩ ⲛⲁⲓ • ⲁⲩⲱϣ ⲉ ⲃⲟⲗ • ϫⲉ ⲕⲁ|ⲗⲱⲥ •
ⲧⲡⲁⲣⲑⲉⲛⲟⲥ⳿ ⲁⲣϫⲱ ⲉ ⲣⲟⲛ ⲛ̄ ⲧϭⲓⲛⲉⲓ⳿ ϣⲁ ⲣⲟⲛ ⲙ̄
ⲡⲉⲛ ⲥⲱⲧⲏⲣ ⲡⲉⲭ︦ⲥ︦ • Ⲕⲁⲗⲱⲥ ⲧⲉⲛ̄ⲧ ⲁⲥⲙ̄ⲡϣⲁ ⲛ̄ ϣⲱⲡ
ⲉ ⲣⲟⲥ ⲙ̄ ⲡⲉⲑⲣⲟⲛⲟⲥ ⲙ̄ ⲡⲛⲟⲩⲧⲉ • Ⲕⲁⲗⲱⲥ ⲧⲉⲛ̄ⲧ
ⲁⲥⲧⲟⲩϫⲟ⳿ ⲙ̄ ⲡⲕⲟⲥⲙⲟⲥ ⲧⲏⲣϥ̄ • ϩⲓⲧⲛ̄ ⲧⲉⲥϭⲓⲛϫⲡⲟ •
Ⲕⲁⲗⲱⲥ ⲧϣⲉⲉⲣⲉ ϣⲏⲙ ⲙ̄ ⲡⲁⲣⲑⲉⲛⲟⲥ • ⲉⲣⲉ ⲡⲛⲟⲩⲧⲉ⳿
ⲟⲩⲏϩ ⲛⲙ̄ⲙⲁⲥ • Ⲕⲁⲗⲱⲥ ⲧⲙⲁⲁⲩ⳿ ⲛⲙ̄ⲙⲟⲛⲁⲭⲟⲥ ⲧⲏ‐
ⲣⲟⲩ ⲙⲛ̄ ⲙ̄ⲙⲟⲛⲁⲭⲏ⳿ ⲧⲏⲣⲟⲩ • | Ⲁⲣⲃⲉⲗ⳿ ⲧⲙⲛ︦ⲧ︦ⲣⲱⲙⲉ
ⲧⲏⲣⲥ̄ • ⲉⲥⲥⲟⲛϩ̄ ⲛ̄ ⲧⲟⲟⲧϥ̄ ⲙ̄ ⲡⲇⲓⲁⲃⲟⲗⲟⲥ • Ⲁⲣⲙⲉⲥⲧⲉ⳿
ⲡⲃⲓⲟⲥ⳿ ⲙ̄ ⲡⲅⲁⲙⲟⲥ • Ⲁⲣⲉⲣⲙⲁⲁⲩ ⲙ̄ ⲡⲡⲁⲧϣⲉⲗⲉⲉⲧ
ⲙ̄ ⲙⲉ • Ⲡⲟⲩⲥⲱⲙⲁ⳿ ⲁϥϭⲃ̄ⲃⲉ ϩⲛ̄ ⲛⲁⲥⲕⲏⲥⲓⲥ • Ⲡⲟⲩⲡⲛ︦ⲁ︦
ⲇⲉ⳿ ⲁϥⲧⲉⲗⲏⲗ • ϫⲉ ⲡⲛⲟⲩⲧⲉ ϣⲟⲟⲡ ⲛⲙ̄ⲙⲉ • Ⲉϣϫⲉ
ⲁ ⲡⲉⲧ ⲥⲟⲩⲧⲱⲛ ⲙⲉⲣⲓⲧⲉ • ⲉⲓⲉ⳿ ⲙⲛ̄ ⲗⲁⲁⲩ ⲛⲁϭⲱ ⲉⲓ
ⲙⲏ ⲧⲉⲓ ⲛ̄ⲥⲉϩⲩⲡⲟⲧⲁⲥⲥⲉ ⲛⲉ :-Ⲉϣϫⲉ ⲁⲛⲟⲩⲉⲣⲏⲧⲉ
ⲧⲱⲟⲩⲛ ϩⲁ ⲡⲛⲟⲩⲧⲉ • ⲉϥϩⲛ̄ ⲧⲟⲩ|ⲕⲁⲗⲁϩⲏ⳿ ⲉⲧ ⲧⲃ̄ⲃⲏⲩ •
Ⲉⲓⲉ⳿ ⲟⲛⲧⲱⲥ • ⲥⲉϣⲟⲟⲡ ⲛ̄ⲥⲧⲩⲗⲗⲟⲥ ϩⲛ̄ ⲧⲙⲏⲧⲉ⳿ ⲛ̄
ⲑⲓⲗⲏ︦ⲙ︦ ⲛ̄ ⲧⲡⲉ • Ⲉϣϫⲉ ⲁⲛⲟⲩⲉⲣⲏⲧⲉ⳿ ⲧⲱⲟⲩⲛ⳿ ϩⲁ
ⲡⲛⲟⲩⲧⲉ⳿ ⲉϥⲟ⳿ ⲛ̄ ⲕⲟⲩⲓ̈ • Ⲉⲓⲉ⳿ ⲟⲛⲧⲱⲥ⳿ ⲧⲉ ⲁϩⲉ ⲣⲁⲧⲉ⳿
ⲧⲉⲛⲟⲩ ϩⲁⲧⲙ̄ ⲡⲉⲑⲩⲥⲓⲁⲥⲧⲏⲣⲓⲟⲛ ⲙ̄ ⲡⲟⲩϣⲏⲣⲉ • Ⲉϣϫⲉ
ⲁⲣϩⲱⲃⲥ̄ ⲙ̄ ⲡⲉϥϩⲟ • ϩⲛ̄ ⲛⲟⲩϩⲟⲓ̄ⲧⲉ⳿ ⲉ ⲧⲃⲉ ⲡⲁⲏⲣ • ⲏ̄
ⲡϫⲁϥ ⲉⲧ ⲛ̄ ⲃⲟⲗ • Ⲉⲓⲉ⳿ ⲟⲛⲧⲱⲥ⳿ ⲛⲉⲭⲉⲣⲟⲩⲃⲓⲛ • ⲙⲛ̄
ⲛⲉⲍⲉⲣⲁⲫⲓⲛ⳿ ⲁϩⲉ ⲣⲁⲧⲟⲩ ϩⲓϫⲙ̄ ⲡⲉⲑⲩⲥⲓⲁⲥ|ⲧⲏⲣⲓⲟⲛ⳿
ⲉⲩϩⲱⲃⲥ̄ ⲙ̄ ⲡⲟⲩϩⲟ⳿ ϩⲙ̄ ⲡⲧⲁⲁⲧⲉ ⲛ̄ ⲛⲉⲩⲧⲛϩ̄ • Ⲉϣϫⲉ
ⲁⲣⲧⲱⲟⲩⲛ⳿ ϩⲁ ⲣⲟϥ ϩⲙ̄ ⲡⲟⲩϩⲁⲙⲏⲣ ⲙⲛ̄ ⲛⲟⲩⲡⲁⲧ •


### 0005

Ⲉⲓⲉ⳿ ⲟⲛⲧⲱⲥ⳿ ⲧⲉϩⲙⲟⲟⲥ ⲧⲉⲛⲟⲩ⳿ ϩⲓϫⲛ̄ ⲟⲩⲑⲣⲟⲛⲟⲥ
ⲛ̄ ⲉⲟⲟⲩ • ⲉⲣⲉ ⲛⲉⲭⲉⲣⲟⲩⲃⲓⲛ ⲙⲛ̄ ⲛⲉⲍⲉⲣⲁⲫⲓⲛ⳿ ⲁϩⲉ
ⲣⲁⲧⲟⲩ⳿ ⲉⲣⲟ⳿ ⲉⲩϩⲩⲙⲛⲉⲩⲉ⳿ ⲉ ⲡⲉⲛⲧ ⲁⲣϫⲡⲟϥ • Ⲉϣϫⲉ⳿
ⲁⲣⲧⲙ̄ⲙⲟϥ ⲛⲉⲣⲱⲧⲉ⳿ ϩⲛ̄ ⲛⲟⲩⲉⲕⲓⲃⲉ ⲙ̄ ⲡⲁⲣⲑⲉⲛⲓⲕⲟⲛ •
Ⲉⲓⲉ⳿ ⲟⲛⲧⲱⲥ⳿ ⲡⲉϥⲥⲱⲙⲁ ⲛ̄ ⲛⲟⲩⲧⲉ • ⲙⲛ̄ ⲡⲉϥⲥⲛⲟϥ ⲉⲧ |
ⲧⲁⲉⲓⲏⲩ • ⲥⲉϯ ⲙ̄ⲙⲟϥ ⲉ ⲧⲟⲩⲧⲁⲡⲣⲟ • Ⲟⲩ ⲡⲉ ⲡⲧⲁⲉⲓⲟ⳿
ⲉⲧ ⲟⲩⲛⲁϣⲉⲛⲧϥ̄ ⲛ̄ ⲛⲁϩⲣⲉ • Ⲱ ⲧⲉ ⲥϩⲓⲙⲉ⳿ ⲛ̄ ⲧⲁ ⲧⲡⲉ
ⲙⲛ̄ ⲡⲕⲁϩ • ⲙⲛ̄ ⲛⲉⲫⲱⲥⲧⲏⲣ ⲙⲛ̄ ⲛⲁⲅⲅⲉⲗⲟⲥ⳿ ⲉⲧ ϩⲙ̄
ⲡϫⲓⲥⲉ⳿ ϩⲩⲡⲟⲧⲁⲥⲥⲉ ⲛⲁⲥ • ⲉ ⲧⲃⲉ ⲡⲉⲧ ⲟⲩⲏϩ ⲛ̄ϩⲏⲧⲥ̄ •
Ⲥⲱⲧⲙ̄ ⲉ ⲡⲉⲧ ϩⲓ ⲟⲩⲛⲁⲙ⳿ ⲙ̄ ⲡⲉϥⲉⲓⲱⲧ⳿ ϩⲛ̄ ⲙ̄ⲡⲏⲩⲉ⳿
ⲉϥⲙⲟⲩⲧⲉ⳿ ⲉ ⲙⲁⲣⲓⲁ⳿ ϫⲉ ⲧⲁ ⲙⲁⲁⲩ • ⲉϥⲥⲱⲧⲙ̄ ⲛ̄ⲥⲁ
ⲓ̈ⲱⲥⲏⲫ ϩⲙ̄ ⲙⲛ̄ⲧⲥⲧ̄ⲙⲏⲧ ⲛⲓⲙ • ⲛ̄ⲑⲉ ⲛ̄ ⲟⲩⲉⲓ|ⲱⲧ • ⲛ̄ⲁⲅ‐
ⲅⲉⲗⲟⲥ ϩⲩⲡⲉⲣⲏⲧⲉⲓ ⲙ̄ⲙⲟϥ • ⲛ̄ⲧⲟϥ ϩⲱⲱϥ⳿ ϥϩⲩⲡⲟⲧⲁⲥⲥⲉ⳿
ⲛ̄ ⲧⲉϥⲙⲁⲁⲩ ⲕⲁⲧⲁ ⲥⲁⲣⲝ̄ • Ⲛⲁⲓ ⲇⲉ ⲧⲏⲣⲟⲩ⳿ ⲁⲩϣⲱⲡⲉ
ⲙ̄ⲙⲟ⳿ ⲱ̄ ⲙⲁⲣⲓⲁ⳿ ⲧⲡⲁⲣⲑⲉⲛⲟⲥ ⲉⲧ ϫⲏⲕ ⲉ ⲃⲟⲗ • Ⲁⲙⲏⲓ̄ⲧⲛ̄
ⲱ̄ ⲛⲉϩⲓⲟⲙⲉ⳿ ⲧⲏⲣⲟⲩ• ⲉⲧ ⲉⲡⲓⲑⲩⲙⲉⲓ ⲉ ⲧⲙⲛ̄ⲧⲡⲁⲣⲑⲉⲛⲟⲥ •
ⲛ̄ⲧⲉⲧⲛ̄ⲕⲱϩ⳿ ⲉ ⲡⲉⲥⲙⲟⲧ⳿ ⲙ̄ ⲙⲁⲣⲓⲁ⳿ ⲧⲙⲁⲁⲩ ⲙ̄ ⲡⲁ ϫⲟⲉⲓⲥ •
ⲛ̄ⲧⲉⲧⲛ̄ⲑⲉⲱ̄ⲣⲉⲓ ⲛ̄ ⲧⲉⲥϭⲓⲛⲟⲩⲱⲙ⳿ ⲉⲧ ϫⲁϫⲱ • ⲙⲛ̄ ⲧⲉⲥ‐
ϭⲓⲛⲉⲛⲕⲟⲧⲕ̄ ϩⲓ ⲡⲉⲥⲏⲧ • | Ⲙ︦ⲡⲉ ⲥⲉⲡⲓⲑⲩⲙⲉⲓ ⲉ ⲗⲁⲁⲩ⳿ ⲉ
ⲡⲁ ⲡⲉⲓ ⲕⲟⲥⲙⲟⲥ ⲡⲉ • Ⲉⲛ ⲉⲣⲉ ⲡⲉⲥⲣ̄ ⲡⲙⲉⲉⲩⲉ⳿ ϣⲟⲟⲡ
ⲛ̄ ⲛⲁⲩ ⲛⲓⲙ⳿ ϩⲛ̄ ⲧⲧⲁⲡⲣⲟ • ⲛ̄ ⲛⲉⲟⲩⲏⲏⲃ • Ⲙ︦ⲡⲉ ⲥϫⲱⲕⲙ̄
ϩⲛ̄ ⲟⲩⲥⲓⲟⲟⲩⲛ̄ ⲉⲛⲉϩ : Ⲙ︦ⲡⲉ ⲥϯ ⲛ̄ ⲟⲩⲕⲟⲥⲙⲏⲥⲓⲥ ⲉ ⲣⲟⲥ⳿
ⲉⲛⲉϩ • Ⲙ̄ⲡⲉ ⲥϣⲟⲩϣⲟⲩ ⲙ̄ⲙⲟⲥ⳿ ⲉⲛⲉϩ⳿ ϩⲛ̄ ⲟⲩϩⲃ̄ⲥⲱ ⲛ̄
ϩⲟⲓ̄ⲧⲉ ⲛ̄ⲑⲉ ⲛ̄ ⲛⲉϩⲓⲟ̄ⲙⲉ⳿ ⲧⲏⲣⲟⲩ • ⲙ̄ ⲙⲁⲓ̄ ϣⲟⲩϣⲟⲩ :
Ⲙ︦ⲡⲉ ⲥϫⲓ ϯⲡⲉ⳿ ⲛ̄ ⲏⲣⲡ̄ ⲉⲛⲉϩ • [Ⲉⲛⲉⲥϩⲙⲟⲟⲥ ⲛ̄ ⲛⲁⲩ
ⲛⲓⲙ • ⲉⲣⲉ ⲡⲉⲥϩⲟ⳿ ⲕⲧⲏⲩ | ⲉ ⲡⲥⲁ ⲛ̄ⲧ ⲁⲛⲁⲧⲟⲗⲏ • ⲉⲥ‐
ϭⲱϣⲧ̄ ⲉ ⲡⲉⲥⲇⲩⲙⲓⲟⲩⲣⲅⲟⲥ⳿ ⲛ̄ ⲛⲁⲩ ⲛⲓⲙ • Ⲙ︦ⲡⲉ ⲥⲁ‐
ⲡⲁⲛⲧⲁ⳿ ⲉ ϩⲟⲟⲩⲧ⳿ ⲉⲛⲉϩ • ⲉⲓ ⲙⲏ ⲧⲉⲓ⳿ ⲡⲉⲥⲉⲓⲱⲧ • ⲙⲛ̄
ⲧⲉⲥⲙⲁⲁⲩ ⲙⲛ̄ ⲛⲉⲥⲥⲛⲏⲩ • Ⲉ ⲧⲃⲉ ⲡⲁⲓ̈ ⲛ̄ ⲧⲉⲣⲉ ⲅⲁⲃⲣⲓⲏⲗ⳿
ϣⲁϫⲉ ⲛⲙ̄ⲙⲁⲥ ⲁⲥϣⲧⲟⲣⲧⲣ̄ ⲉϫⲙ̄ ⲡϣⲁϫⲉ ϫⲉ ⲛ ⲁϣ
ⲛ̄ ϩⲉ⳿• ⲡⲁⲓ̈ ⲛⲁϣⲱⲡⲉ ⲙ̄ⲙⲟⲓ̈ ⲙ̄ⲡⲉ ⲓⲥⲟⲩⲉⲛ ϩⲟⲟⲩⲧ̄
ⲉⲛⲉϩ • Ⲡⲉϫⲁϥ ⲛⲁⲥ⳿ ⲛ̄ϭⲓ ⲅⲁⲃⲣⲓⲏⲗ • ϫⲉ ⲟⲩⲡⲛ︦ⲁ︦ ⲉϥ‐
ⲟⲩⲁⲁⲃ ⲡⲉⲧ ⲛⲏⲩ ⲉ ϩⲣⲁⲓ̄ ⲉ ϫⲱ • ⲁⲩⲱ̄ ⲧϭⲟⲙ⳿ ⲙ̄ ⲡⲉⲧ
ϫⲟⲥⲉ⳿ ⲧⲉⲧ ⲛⲁⲣ̄ ϩⲁⲓⲃⲉⲥ ⲉⲣⲟ • | Ⲉ ⲧⲃⲉ ⲡⲁⲓ ⲡⲉⲧⲉ‐


### 0006

ⲛⲁϫⲡⲟϥ ⲱ̄ ⲙⲁⲣⲓⲁ ⲛ̄ⲧⲟϥ ⲡⲉⲧⲉ ϣⲁϥⲉⲗⲉⲩⲑⲉⲣⲟⲩ ⲙ̄
ⲡⲅⲉⲛⲟⲥ ⲛ̄ ⲁⲇⲁⲙ • ϩⲓⲧⲙ̄ ⲡⲉϥⲥⲱⲙⲁ ⲛ̄ ⲛⲟⲩⲧⲉ • ⲙⲛ̄
ⲡⲉϥⲥⲛⲟϥ ⲉⲧ ⲧⲁⲉⲓⲏⲩ • Ⲡⲉⲧ ⲉⲣⲛⲁϫⲡⲟϥ ⲱ̄ ⲙⲁⲣⲓ̄ⲁ⳿
ⲧⲡⲁⲣⲑⲉⲛⲟⲥ • ⲛ̄ⲧⲟϥ ⲡⲉⲛⲧ ⲁϥⲡⲗⲁⲥⲥⲉ ⲛ ⲟⲩⲟⲛ ⲛⲓⲙ
ϩⲛ̄ ⲛⲉϥϭⲓϫ ⲛ̄ ⲛⲟⲩⲧⲉ • Ⲉⲣⲉ ⲡⲟⲩⲣ̄ ⲡⲙⲉⲉⲩⲉ ⲛⲁϣⲱⲡⲉ
ⲉϥϩⲏⲡ ⲛ̄ ⲁϣ ⲛ̄ ϩⲉ • ⲏ̄ ⲉⲩⲛⲁⲣ̄ ⲡⲟⲩⲱⲃϣ̄ ⲛ̄ ⲁϣ ⲛ̄ ϩⲉ
ⲱ̄ ⲧⲡⲁⲣⲑⲉⲛⲟⲥ ⲛ̄ ⲥⲁⲃⲉ • ⲉⲩⲧⲁⲩⲟ⳿ ⲙ̄ ⲡⲟⲩⲣⲁⲛ ϩⲛ̄ ⲧⲟⲓ̄‐
ⲕⲟⲩⲙⲉⲛⲏ ⲧⲏⲣⲥ̄ • ϩⲓϫⲛ̄ ⲧⲉ ⲧⲣⲁⲡⲉⲍⲁ ⲉⲧ ⲟⲩⲁⲁⲃ • ϩⲓⲧⲛ̄
ⲛⲉⲉⲡⲓⲥⲕⲟⲡⲟⲥ | ⲙⲛ̄ ⲛⲉⲡⲣⲉⲥⲃⲩⲧⲉⲣⲟⲥ • ⲉⲩϫⲱ ⲙ̄ⲙⲟⲥ •
ⲛ̄ ⲧⲉⲓ ϩⲉ Ϫⲉ ⲉ̄ⲛⲉⲓ̄ⲣⲉ ⲙ̄ ⲡⲙⲉⲉⲩⲉ⳿ ⲙ̄ ⲡⲉⲕϫⲡⲟ ⲉ̄ⲧ
ⲟⲩⲁ̄ⲁⲃ • ϩⲙ̄ ⲙⲁⲣⲓ︦ⲁ︦ ⲧⲡⲁⲣⲑⲉⲛⲟⲥ • Ⲛⲁⲓ︦ⲁ︦ⲧⲉ ⲛ̄ⲧⲟ ⲱ̄
ⲙⲁⲣⲓ︦ⲁ︦ ⲡϣⲟⲩϣⲟⲩ ⲛ̄ ⲛⲁⲅⲅⲉⲗⲟⲥ • ⲧⲗⲁⲗⲓ︦ⲁ︦ ⲛ̄ ⲛⲁⲣⲭ‐
ⲁⲅⲅⲉⲗⲟⲥ • ⲡϩⲩⲙⲛⲟⲥ ⲛ̄ ⲛⲉⲭⲁⲓ̄ⲣⲟⲩⲃⲓ̄ⲛ • ⲙⲛ̄ ⲛⲉ‐
ⲍⲉⲣⲁⲫⲓ̄ⲛ • ⲧϭⲓ̄ ⲛ ϩⲱⲥ ⲛ̄ ⲛⲉⲧ ⲟⲩⲁ̄ⲁⲃ ⲧⲏⲣⲟⲩ • Ϩⲙ̄
ⲡⲉϩⲟⲟⲩ ⲛ̄ⲧⲁⲣϫⲡⲟ ⲙ̄ ⲡϣⲏⲣⲉ ⲙ̄ ⲡⲛⲟⲩⲧⲉ ⲡⲉⲧ ϣⲟⲟⲡ
ϫⲓ⳿ⲛ ⲉⲛⲉϩ • ⲡⲉⲧⲉ ⲙⲛ̄ ⲧϥ̄ⲁⲣⲭⲏ ⲟⲩⲇⲉ ϫⲱⲕ • Ⲁⲩⲱ
ⲁⲛⲥⲱⲧⲙ̄ ⲉ ϩⲉⲛϩⲩⲙⲛⲟⲥ ⲛ̄ ⲣⲁϣⲉ • ϩⲓ⳿ ⲥⲙⲟⲩ • ϩⲛ̄
ⲧⲉⲥⲧⲣⲁⲧⲓ̄ⲁ ⲛ̄ ⲧⲡⲉ ϫⲉ • ⲡⲉⲟ̄ⲟⲩ ⲙ̄ | ⲡⲛⲟⲩⲧⲉ ϩⲛ̄ ⲛⲉⲧ
ϫⲟⲥⲉ • ⲧⲉϥⲉⲓⲣⲏⲛⲏ ϩⲓ̄ϫⲙ̄ ⲡⲕⲁϩ • ϩⲛ̄ ⲛ̄ⲣⲱⲙⲉ ⲙ̄
ⲡⲉϥⲟⲩⲱϣ • Ⲁⲛⲗⲁⲟⲥ ⲧⲏⲣⲟⲩ ⲛⲁⲩ ⲉ ⲡⲉⲟⲟⲩ ⲙ̄ ⲡⲛⲟⲩⲧⲉ
ⲡⲉⲛⲧ ⲁⲣϫⲡⲟϥ • ⲉ ⲧⲃⲉ ⲡⲁⲓ ⲧⲉⲥⲙⲁⲙⲁⲁⲧ ⲛ̄ⲧⲟ ϩⲛ̄ ⲛⲉ
ϩⲓ︤ⲟ︥ⲙⲉ • ⲁⲩⲱ̄ ϥⲥⲙⲁⲙⲁⲁⲧ ⲛ̄ϭⲓ ⲡⲕⲁⲣⲡⲟⲥ ⲛ̄ ϩⲏⲧⲉ •
Ⲱ̄ ⲧⲛ̄ⲧⲁ ⲧⲉⲥⲕⲁⲗⲁϩⲏ ϣⲱⲡ ⲉ̄ ⲣⲟⲥ ⲙ̄ ⲡⲉⲓ̄ ⲁⲧ ϣⲟⲡϥ̄ •
Ⲛⲁⲓⲁ̄ⲧⲉ ⲛ̄ⲧⲟ ⲱ̄ ⲧⲡⲁⲣⲑⲉⲛⲟⲥ • ϫⲉ ⲁ̄ ⲧⲟⲩⲙⲏⲧⲣⲁ ⲉϣ‐
ⲧⲱⲟⲩⲛ ⲉ ϩⲣⲁⲓ̄ • ϩⲁ ⲡⲉⲧ ⲉⲣⲉ ⲧⲡⲉ⳿ ⲟ̄ ⲛⲁϥ ⲛ̄ ⲑⲣⲟⲛⲟⲥ •
ⲉⲣⲉ ⲡⲕⲁϩ⳿ ⲟ̄ ⲛⲁϥ ⲛ̄ ϩⲩⲡⲟⲡⲟⲇⲓⲟⲛ • ⲕⲁⲧⲁ | ⲑⲉ ⲛ̄ⲧⲁϥ‐
ϫⲟⲟⲥ ϫⲉ ⲧⲡⲉ⳿ ⲡⲉ ⲡⲁ ⲑⲣⲟⲛⲟⲥ • ⲁⲩⲱ̄ ⲡⲕⲁϩ⳿ ⲡⲉ
ⲡϩⲩⲡⲟⲡⲟⲇⲓⲟⲛ⳿ ⲛ̄ ⲛⲁ ⲟⲩⲉⲣⲏⲧⲉ • ⲛ̄ⲧⲟ⳿ Ⲇⲉ⳿ ⲁⲧⲟⲩ‐
ⲕⲁⲗⲁϩⲏ⳿ ϣⲱⲡⲉ ⲙ̄ ⲡⲉ • ⲁⲩⲱ̄ ⲛ̄ ⲕⲁϩ • ϫⲉ ⲁⲧⲟⲩⲙⲏⲧⲣⲁ⳿
ϣⲱⲡ ⲉ ⲣⲟⲥ ⲙ̄ ⲡⲉⲧ ⲙⲟⲩϩ ⲛ̄ ⲧⲡⲉ⳿ ⲙⲛ̄ ⲡⲕⲁϩ • Ⲉⲣⲉ
ⲛⲓⲙ⳿ ⲧⲛ̄ⲧⲱⲛ ⲉⲣⲟ⳿• ⲱ̄ ⲧⲡⲁⲣⲑⲉⲛⲟⲥ ⲛ̄ ⲥⲁⲃⲏ • ⲱ̄ ⲧⲉⲓ
ⲛⲟϭ ⲛ̄ ϣⲡⲏⲣⲉ • ⲙⲛ̄ ⲡⲉⲓ ⲛⲟϭ ⲛ̄ ⲑⲁⲩⲙⲁ • Ϩⲛ̄ ⲧⲡⲉ
ⲙⲉⲛ⳿ ⲟⲩ ⲁⲧ ⲙⲁⲁⲩ ⲡⲉ ϩⲙ̄ ⲡⲕⲁϩ ⲇⲉ • ⲟⲩⲁⲧⲉⲓⲱⲧ | ⲡⲉ •
ⲟⲩϫⲟⲉⲓⲥ ⲡⲉ̄ ϩⲛ̄ ⲧⲡⲉ • ⲟⲩⲙⲟⲛⲟⲅⲉⲛⲏⲥ ⲡⲉ⳿ ϩⲓϫⲙ̄ ⲡⲕⲁϩ •


### 0007

Ⲛ̄ ϯⲛⲁϩⲱ⳿ ⲁⲛ⳿ ⲉ ⲣⲟⲓ⳿ ⲱ̄ ⲧⲡⲁⲣⲑⲉⲛⲟⲥ⳿ ⲉⲧ ⲟⲩⲁⲁⲃ •
ⲉⲓⲙⲁⲕⲁⲣⲓⲍⲉ ⲙ̄ⲙⲟ • ⲙ̄ ⲡⲁ ϩⲏⲧ ⲛⲁⲉϣⲛⲟⲓ̄ ⲁⲛ⳿ ⲙ̄
ⲡⲁ ⲛⲟϭ ⲛ̄ ϫⲓⲥⲉ • ⲱ̄ ⲧⲉⲛⲧ ⲁⲥϩⲗⲟⲟ̄ⲗⲉ⳿ ⲙ̄ ⲡⲉⲧ ⲉⲣⲉ
ⲛ̄ⲍⲉⲣⲁⲫⲓⲛ ⲁϩⲉ ⲣⲁⲧⲟⲩ ⲉ ⲣⲟϥ • Ⲉⲣⲉ ⲁϣ⳿ ⲛ̄ ⲗⲁⲥ⳿
ⲛ̄ ⲥⲁⲣⲝ̄ ⲛⲁϣϣⲁϫⲉ • ⲉ ⲡⲟⲩⲛⲟϭ ⲛ̄ ϫⲓⲥⲉ • Ⲱ̄ ⲫⲓⲗⲁ‐
ⲥⲧⲏⲣⲓⲟⲛ ⲉⲣⲉ ⲡⲕⲱϩⲧ̄ ⲙⲟⲩϩ • ϩⲓ ϫⲱϥ • ⲁⲩⲱ̄ ⲉⲛϥ̄ⲣⲟⲕϩ̄
ⲁⲛ⳿ • | Ⲱ̄ ⲡⲙⲁ⳿ ⲛ̄ ⲟⲩⲱϩ ⲙ̄ ⲡⲛⲟⲩⲧⲉ • ⲁⲩⲱ̄ ⲡⲉϥⲙⲁ⳿
ⲛ̄ ϣⲱⲡⲉ :-Ⲱ̄ ⲡⲉⲧ ⲉⲣⲉ ⲡⲉⲡ̄ⲣⲟⲫⲏⲧⲏⲥ⳿ ⲱϣ⳿ ⲉ ⲃⲟⲗ
ⲉ ⲧⲃⲏⲏ̄ⲧⲥ̄ • ϫⲉ Ⲧⲁⲓ̄ ⲧⲉ ⲧⲡⲩⲗⲏ⳿ ⲙ̄ ⲡϫⲟⲉⲓⲥ • ⲉⲣⲉ
ⲛ̄ⲇⲓⲕⲁⲓⲟⲥ⳿ ⲛⲏⲩ• ⲉ ϩⲟⲩⲛ ⲛ̄ϩⲏⲧⲥ̄ • Ⲁ ⲡϫⲟⲉⲓⲥ ϭⲱϣⲧ̄
ⲉ ⲃⲟⲗ ϩⲛ̄ ⲧⲡⲉ⳿ ⲉϫⲛ̄ ⲧⲟⲓⲕⲟⲩⲙⲉⲛⲏ⳿ ⲙ̄ ⲡⲉϥϩⲉ⳿ ⲉ ⲡⲉⲧ
ⲧⲛ̄ⲧⲱⲛ ⲉⲣⲟ⳿ ϩⲙ̄ ⲡⲅⲉⲛⲟⲥ ⲧⲏⲣϥ̄ • ⲛ̄ ⲛⲉϩⲓⲟⲙⲉ • ⲉ ⲧⲃⲉ
ⲡⲁⲓ̄ ⲁϥϭⲟⲓ̄ⲗⲉ⳿ ⲉⲣⲟ ⲙ̄ ⲡⲉϥⲙⲟⲛⲟⲅⲉⲛⲏⲥ ⲛ̄ ϣⲏⲣⲉ :-
Ⲭⲁⲓⲣⲉ⳿ ⲧⲙⲁⲁⲩ ⲙ̄ ⲡϫⲟⲉⲓⲥ • | ⲧⲉⲛⲧ ⲁⲥϭⲛ̄ ϩⲙⲟⲧ ⲛ̄
ⲛⲁϩⲣⲙ̄ ⲡⲛⲟⲩⲧⲉ • Ⲭⲁⲓⲣⲉ⳿ ⲡⲉⲥⲙⲟⲩ ⲙⲛ̄ ⲡⲣⲁϣⲉ • ⲙⲛ̄
ⲡⲟⲩⲛⲟϥ • Ⲭⲁⲓⲣⲉ⳿ ⲡⲡⲁⲗⲗⲁⲇⲓⲟⲛ⳿ ⲙ̄ ⲡⲣ̄ⲣⲟ ⲙ̄ ⲙⲉ :-
Ⲭⲁⲓⲣⲉ⳿ ⲡⲉⲣⲅⲁⲥⲧⲏⲣⲓⲟⲛ ⲙ̄ ⲡⲥⲁⲉⲓⲛ ⲙ̄ ⲙⲉ • Ⲭⲁⲓⲣⲉ⳿
ⲧⲉⲛⲧ ⲁⲥⲙⲓⲥⲉ ⲛⲁⲛ ⲙ̄ ⲡⲱⲛϩ̄• ⲉⲥⲟ̄ ⲙ̄ ⲡⲁⲣⲑⲉⲛⲟⲥ •
Ⲱ̄ ⲡⲉⲓ ⲙⲩⲥⲧⲏⲣⲓⲟⲛ⳿ ⲉⲑⲏⲡ⳿ ⲛⲁ ⲙⲉⲣⲁⲧⲉ⳿ ⲉⲧⲟⲩⲟ̄ⲛϩ̄
ⲉ ⲃⲟⲗ ϩⲛ̄ ⲧⲡⲉ :-Ϫⲓⲛ ⲧⲉϩⲟⲩⲉⲓⲧⲉ⳿ ⲛ̄ⲧⲁ ⲡⲛⲟⲩⲧⲉ ⲧⲁⲙⲓⲟ⳿
ⲛ̄ ⲧⲡⲉ⳿ ⲙⲛ̄ ⲡⲕⲁϩ ⲛ̄ⲥⲟⲟⲩ ⲛ̄ϩⲟⲟⲩ • Ⲁⲩⲱ̄ ⲁϥⲙ̄ⲧⲟⲛ⳿
ⲙ̄ⲙⲟϥ ⲉ ⲃⲟⲗ | ϩⲛ̄ ⲛⲉϥϩⲃⲏⲩⲉ⳿ ⲧⲏⲣⲟⲩ • ϩⲙ̄ ⲡⲙⲉϩ
ⲥⲁϣϥ̄ ⲛ̄ϩⲟⲟⲩ • Ϩⲣⲁⲓ̄ ⲇⲉ⳿ ⲟⲛ⳿ ϩⲛ̄ ⲥⲟⲩ ⲥⲁϣϥ̄ ⲙ̄ ⲡⲉⲃⲟⲧ⳿
ⲛ̄ ⲃⲣ︤ⲣⲉ • ⲕⲁⲧⲁ ⲡⲛⲟⲙⲟⲥ⳿ ⲛ̄ ⲛⲉϩⲣⲱⲙⲁⲓ̈ⲟⲥ • ⲉⲧⲉ ⲥⲟⲩ
ⲥⲁϣϥ̄ ⲡⲉ⳿ ⲙ̄ ⲡⲉⲃⲟⲧ⳿ ⲡⲁⲣⲙⲟⲩⲧⲉ ⲛ̄ⲧⲁ ⲡⲉⲛϫⲟⲉⲓⲥ⳿ ⲉⲓ⳿
ⲉ ⲡⲉⲥⲏⲧ⳿ ⲉ ⲃⲟⲗ ϩⲛ̄ ⲧⲡⲉ • ⲁϥϫⲓ ⲥⲁⲣⲝ̄ ϩⲛ̄ ⲧⲉⲓ ⲡⲁⲣ‐
ⲑⲉⲛⲟⲥ :-Ⲱ̄ ⲧⲡⲁⲣⲑⲉⲛⲟⲥ⳿ ⲛ̄ ⲥⲁⲃⲏ⳿ • ϯⲡⲁⲣⲁⲕⲁⲗⲉⲓ
ⲙ̄ⲙⲟ ϫⲓ⳿ ⲡⲉϩⲙⲟⲧ⳿ ⲙ̄ ⲡⲛⲟⲩⲧⲉ⳿• ⲉⲧⲉ ⲡⲟⲩϣⲏⲣⲉ ⲡⲉ
ⲉ ϩⲣⲁⲓ ⲉ ϫⲱⲛ • ⲛⲉϥⲕⲁ⳿ ⲛⲉⲛⲛⲟⲃⲉ ⲛⲁⲛ ⲉ ⲃⲟⲗ • Ⲁⲩⲱ̄
ⲛϥ̄ⲛⲁϩⲙⲉⲛ ⲉⲛⲉⲡⲓⲃⲟⲩ|ⲗⲏ⳿ ⲧⲏⲣⲟⲩ ⲙ̄ ⲡⲁⲛⲧⲓⲕⲓⲙⲉⲛⲟⲥ •
ⲡⲇⲓⲁⲃⲟⲗⲟⲥ :-Ⲁⲓ̄ⲟ⳿(sic) ϣⲟⲡⲛ̄ ⲉ ⲣⲟⲕ⳿ ⲧⲏⲣⲛ̄ • ⲙⲏ ⲡⲟⲧⲉ⳿
ⲛ̄ⲧⲉ ⲡⲇⲓⲁⲃⲟⲗⲟⲥ ⲣⲁϣⲉ ⲙ̄ⲙⲟⲛ • ⲛϥ̄ⲥⲟⲕⲛ̄ ⲛⲙ̄ⲙⲁϥ⳿
ⲉ ⲡⲉⲥⲏⲧ⳿ ⲉ ⲧⲅⲉϩⲉⲛⲛⲁ⳿ ⲛ̄ ⲥⲁⲧⲉ :-Ⲱ̄ ⲙⲁⲣⲓⲁ⳿ ⲧⲉⲣϩⲏⲛ⳿
ⲉ ϩⲟⲩⲛ⳿ ⲉ ⲡⲣ̄ⲣⲟ⳿ ⲡⲉⲭ︦ⲥ︦ ⲁⲩⲱ ϥⲛⲁϫⲓ⳿ ⲛ̄ⲛⲟⲩⲥⲟⲡⲥ̄ ⲉ


### 0008

ϫⲱⲛ • ϫⲉ ⲡⲟⲩϣⲏⲣⲉ ⲡⲉ • ⲁⲩⲱ̄ ⲡⲟⲩⲙⲉⲣⲓⲧ ⲡⲉ :-Ⲛⲧⲟ⳿
ⲅⲁⲣ⳿ ⲁⲣϫⲡⲟϥ ⲁϥⲙⲟⲩⲧⲉ⳿ ⲉⲣⲟ⳿ ϫⲉ ⲧⲁ ⲙⲁⲁⲩ • Ⲟⲩⲛⲟϭ
ⲅⲁⲣ⳿ ⲁⲗⲏⲑⲱⲥ ⲡⲉ ⲡⲟⲩⲧⲁⲉⲓⲟ⳿ ⲱ̄ ⲙⲁⲣⲓⲁ⳿ ⲧⲡⲁⲣⲑⲉⲛⲟⲥ •
ⲙ̄ ⲡⲁⲣⲁ | ⲛⲉϩⲓⲟ̄ⲙⲉ⳿ ⲧⲏⲣⲟⲩ • ⲙ̄ ⲡⲕⲟⲥⲙⲟⲥ • ϫⲉ ⲁ ⲡⲉ‐
ⲛⲧ ⲁϥϯ ⲛⲓϥⲉ⳿(sic) ⲉ ⲍⲱⲛⲧ ⲛⲓⲙ⳿• ⲙⲟⲩⲧⲉ⳿ ⲉⲣⲟ⳿ ϫⲉ ⲧⲁ
ⲙⲁⲁⲩ :-Ⲧⲉϫⲟⲥⲉ ⲙ̄ ⲡⲁⲣⲁ ⲛⲉⲭⲉⲣⲟⲩⲃⲓⲛ ⲙⲛ̄ ⲛⲉ‐
ⲍⲉⲣⲁⲫⲓⲛ • Ⲧⲉⲥⲙⲁⲙⲁⲁⲧ ⲙ̄ ⲡⲁⲣⲁ ⲛⲉⲑⲣⲟⲛⲟⲥ • ϫⲉ
ⲁ ⲡⲉⲭ︦ⲥ︦ ⲙⲉⲣⲓⲧⲉ • ⲁϥϭⲟⲓ̄ⲗⲉ⳿ ⲉⲣⲟ Ϩⲓⲧⲛ̄ ⲛⲉⲡⲣⲉⲥⲃⲓⲁ⳿
ⲛ̄ ⲧⲉⲧⲟ̄ ⲙ̄ ⲡⲁⲣⲑⲉⲛⲟⲥ⳿ ⲛ̄ ⲟⲩⲟⲉⲓϣ ⲛⲓⲙ⳿ ⲑⲁⲅⲓⲁ⳿ ⲙⲁⲣⲓⲁ⳿
ⲉⲥⲉⲓⲣⲉ ⲙ̄ⲙⲟⲟⲩ ϩⲁ ⲣⲟⲛ • ⲛ̄ ⲛⲁϩⲣⲙ̄ ⲡⲉⲥϣⲏⲣⲉ ⲙ̄
ⲙⲉⲣⲓⲧ⳿ ⲓ︦ⲥ︦ ⲡⲉⲭ︦ⲥ︦ ⲡⲉⲛϫⲟⲉⲓⲥ • ϫⲉ ⲕⲁⲥ
[The rest is wanting]