### 0001

ⲞⲨⲖⲞⲄⲞⲤ • Ⲛ̄ⲦⲈ ⲠⲠⲈⲦ ⲞⲨⲀⲀⲂ • ⲀⲠⲀ
ⲈⲠⲒⲪⲀⲚⲒⲞⲤ • ⲠⲈⲠⲒⲤⲔⲞⲠⲞⲤ • Ⲛ̄ ⲔⲨⲠⲢⲞⲤ •
Ⲉ ⲀϤⲦⲀⲨⲞϤ Ⲉ ⲦⲂⲈ ⲦⲠⲀⲢⲐⲈⲚⲞⲤ ⲈⲦ
ⲞⲨⲀⲀⲂ ⲘⲀⲢⲒⲀ ⲦⲢⲈϤϪⲠⲈ• ⲠⲚⲞⲨⲦⲈ •
ϨⲘ̄ ⲠⲈϨⲞⲞⲨ Ⲙ̄ ⲠⲈⲤⲢ̄ ⲠⲘⲈⲈⲨⲈ ⲈⲦ
ⲞⲨⲀⲀⲂ • ⲈⲦⲈ ⲤⲞⲨ ϪⲞⲨⲦ ⲞⲨⲈⲒ ⲠⲈ Ⲙ̄
ⲠⲈⲂⲞⲦ• ⲦⲰⲂⲈ • ϨⲚ̄ ⲞⲨⲈⲒⲢⲎⲚⲎ⳿ Ⲛ̄ⲦⲈ
ⲠⲚⲞⲨⲦⲈ⳿ ϨⲀⲘⲎⲚ :-
Ⲁⲗⲏⲑⲱⲥ⳿ ⲱ̄ ⲛⲁⲙⲉⲣⲁⲧⲉ⳿ ⲁ ⲡⲕⲟⲥⲙⲟⲥ ϯ ⲟ̄ⲥⲉ⳿ ⲛ̄
ⲟⲩⲛⲟϭ ⲛ̄ ⲇⲱⲣⲟⲛ⳿ ⲉϥⲟⲩⲁⲁⲃ ⲙ̄ⲡⲟⲟⲩ • Ⲁⲩⲱ̄ ⲁⲙ‐
ⲡⲏⲩⲉ | ϩⲱⲟⲩ⳿ ϣⲱⲡ ⲉ ⲣⲟⲟⲩ⳿ ⲛ̄ ⲟⲩⲉⲛⲉⲭⲉⲣⲟⲛ⳿ ⲉϥⲥⲟⲧⲡ̄ •
ⲉϥⲧⲁⲉⲓⲏⲩ⳿ ⲉ ⲡⲉϩⲟⲩⲟ⳿• ⲙⲁⲗⲗⲟⲛ ⲇⲉ⳿ ϣϣⲉ• ⲉ ⲧⲁⲩⲉ⳿
ⲡϣⲁϫⲉ⳿ ϩⲛ̄ ⲟⲩⲁⲩⲑⲉⲛⲧⲓⲁ ⲉ ⲧⲃⲉ ⲛ̄ ⲧⲁⲉⲓⲟ̄ ⲛ̄ ⲧⲉⲓ ⲡⲁⲣ‐
ⲑⲉⲛⲟⲥ ⲉⲧ ⲟⲩⲁⲁⲃ ⲙⲁⲣⲓⲁ⳿ ⲉⲧ ⲛ︦ⲣ︦ ϣⲁ ⲛⲁⲥ ⲙ̄ⲡⲟⲟⲩ
-Ϫⲉ ⲡⲉⲧ ⲟⲩⲏϩ ϩⲛ̄ ⲙ̄ⲡⲏⲩⲉ • ⲁϥⲟⲩⲱϩ⳿ ϩⲛ̄ ⲧⲉⲥⲕⲁ‐
ⲗⲁϩⲏ⳿ ⲉⲧ ⲟⲩⲁⲁⲃ • ⲁⲥϣⲱⲡⲉ ⲙ̄ ⲙⲁ ⲛ̄ ⲙ̄ⲧⲟⲛ ⲙ̄
ⲡⲛⲟⲩⲧⲉ ⲡⲗⲟⲅⲟⲥ • ⲁⲩⲱ̄ ⲙ̄ ⲙⲁ⳿ ⲛ̄ ⲙ̄ⲧⲟⲛ ⲙ̄ ⲡⲣ̄ⲣⲟ⳿
ⲙ̄ ⲡⲉⲟⲟⲩ • Ⲁⲗⲏⲑⲱⲥ⳿ ⲟⲩⲛⲟϭ ⲛ̄ ϩⲱⲃ ⲛ̄ ϣⲟⲩⲣ ϣⲡⲏⲣⲉ
ⲙ̄ⲙⲟϥ ⲡⲉ ⲡⲧⲩⲡⲟⲥ • ⲛ̄ ⲧⲉⲓ ⲡⲁⲣⲑⲉⲛⲟⲥ⳿ ⲉⲧ ⲟⲩⲁⲁⲃ •-


### 0002

ⲁⲗⲗⲁ | ϯⲡⲁⲣⲁⲕⲁⲗⲉⲓ⳿ ⲙ̄ⲙⲟ⳿ ⲱ̄ ⲧⲡⲁⲣⲑⲉⲛⲟⲥ ⲉⲧ
ⲟⲩⲁⲁⲃ • ⲛ̄ ⲣⲉϥϫⲡⲉ⳿ ⲡⲛⲟⲩⲧⲉ⳿• ⲉ ⲧⲙ̄ ϥⲓⲱⲡ ⲙⲛ̄ ⲧⲁ
ⲙⲛ︦ⲧ︦ϭⲱⲃ • ϫⲉ ⲙⲛ̄ ϭⲟⲙ ⲙ̄ⲙⲟⲓ̄ ⲉ ⲡⲱϩ ⲉ ϩⲣⲁⲓ̄ • ⲉ
ⲑⲁⲯⲓⲥ ⲛ̄ ⲛⲟⲩⲁⲣⲉⲧⲏ ϩⲓⲧⲙ̄ ⲡⲁ ⲕⲟⲩⲓ̄ ⲛ̄ ⲗⲁⲥ⳿ ⲛ̄ ϩⲏⲕⲉ •
Ⲙⲁⲗⲗⲟⲛ ⲇⲉ⳿ ϩⲓⲧⲙ̄ ⲡϭⲱⲟⲩ ⲙ̄ ⲡⲁ ϩⲏⲧ⳿ ⲛ̄ ⲁⲥⲑⲉⲛⲏⲥ •
Ⲁⲗⲗⲁ⳿ ϯⲥⲟⲡⲥ̄ ⲙ̄ⲙⲟ⳿• ⲱ̄ ⲡⲙⲁ̄ ⲛ̄ ⲟⲩⲱϩ ⲙ̄ ⲡ̄ⲙⲟⲛⲟ‐
ⲅⲉⲛⲏⲥ ⲙ̄ ⲡⲉⲓⲱⲧ⳿ ⲉ ⲧⲣⲉ ϯⲧⲟⲟⲧⲉ ⲛⲙ̄ⲙⲁⲓ̄ ϩⲙ̄ ⲡⲉⲛⲧ
ⲁⲓ̄ϩⲓ ⲧⲟⲟⲧ ⲉ ⲣⲟϥ • ⲛ̄ⲧⲁϯ ⲙ̄ ⲡⲁⲟⲩⲟⲓ̄ ⲉ ϩⲟⲩⲛ⳿ ⲉ ⲡⲛⲟϭ
ⲛ̄ ⲑⲩⲥⲁⲩⲣⲟⲥ ⲛ̄ ϣⲟⲩ ⲣ | ϣⲡⲏⲣⲉ ⲙ̄ⲙⲟ ⲛ̄ ⲛⲟⲩⲁⲣⲉⲧⲏ •
Ⲛ̄ⲧⲁϫⲟⲟⲥ ⲛ̄ ⲧⲉⲓ ϩⲉ⳿ ϩⲙ̄ ⲡⲁ ⲗⲁⲥ ⲛ̄ ϩⲏⲕⲉ • ϫⲉ Ⲕⲱⲧⲉ⳿
ⲉ ⲥⲓⲱⲛ ⲛ̄ⲧⲉⲧⲛ̄ϩⲱⲗϭ̄ ⲉ ⲣⲟⲥ • ⲁⲗⲏⲑⲱⲥ⳿ ⲧⲁⲓ ⲧⲉ ⲥⲓⲱⲛ
ⲙ̄ ⲙⲉ • ⲙⲁⲗⲗⲟⲛ⳿ ⲧⲉⲧⲟ⳿ ⲛ̄ ϩⲟⲩⲟ ⲉ ⲥⲓⲱⲛ ⲁⲩⲱ̄ ⲧⲉⲧⲟ⳿
ⲛ̄ ⲛⲟϭ ⲉ ⲑⲓⲗⲏ︦ⲙ︦ ⲛ̄ ⲧⲡⲉ • ⲧⲡⲟⲗⲓⲥ⳿ ⲛ̄ⲧⲁ ⲡϫⲟⲉⲓⲥ⳿ ⲥⲟⲧⲡⲥ̄ •
Ⲉⲡⲓ ⲇⲏ⳿ ⲙ̄ⲡⲉ ⲥⲓⲱⲛ ⲉⲩⲫⲣⲁⲛⲉ⳿ ⲛ̄ ⲛⲉⲣⲱⲙⲉ⳿ ⲛ̄ ⲧⲉⲓ ϩⲉ •
ⲛ̄ⲑⲉ ⲛ̄ ⲧⲉⲓ ⲡⲁⲣⲑⲉⲛⲟⲥ ⲉⲧ ⲟⲩⲁⲁⲃ • Ⲥⲓⲱⲛ ⲙⲉⲛ ⲟⲩⲡⲓⲥⲧⲏ
ⲧⲉ ⲙ̄ ⲡⲟⲗⲓⲥ • ⲉⲥⲕⲏⲧ ⲛ̄ ⲧⲱⲃⲉ ϩⲓ ⲟ̄ⲙⲉ ϩⲓⲧⲛ̄ ⲛⲉϭⲓϫ ⲛ̄
ⲛⲉⲣⲱⲙⲉ • | [Ⲧ]ⲉⲓ ⲡⲁⲣⲑⲉⲛⲟⲥ ⲇⲉ ϩⲱⲱⲥ⳿ ⲙⲛ̄ ⲗⲁⲁⲩ •
ⲛⲁⲉⲓⲙⲉ ⲉ ⲡⲥⲁ⳿ ⲛ̄ ⲧⲉⲥⲥⲛ̄ⲧⲉ • ⲙⲛ̄ ⲧⲟⲓⲕⲟⲇⲏ⳿(sic) ⲉⲧ ⲟⲩⲣ̄
ϩⲱⲃ ⲉ ⲣⲟⲥ ⲛ̄ϩⲏⲧⲥ̄ • ϩⲓⲧⲛ̄ ⲛ̄ϭⲓϫ ⲙ̄ ⲡⲛⲟⲩⲧⲉ ⲡⲛⲟϭ ⲛ̄ ⲧⲉⲭ‐
ⲛⲓⲧⲏⲥ ⲛ̄ ⲧⲡⲉ⳿ ⲙⲛ̄ ⲡⲕⲁϩ • ⲙⲛ̄ ⲛⲉⲧ ⲛ̄ϩⲏⲧⲟⲩ ⲧⲏⲣⲟⲩ •
Ⲑⲓⲗⲏ︦ⲙ︦ ⲟⲛ⳿ ⲛ̄ⲧⲁ ⲡⲣⲉϥⲯⲁⲗⲗⲉⲅ̄ ϫⲟⲟⲥ⳿ ⲉ ⲧⲃⲏⲏⲧⲥ̄ •
ϫⲉ ⲛ̄ⲧⲁ ⲛⲉⲫⲩⲗⲏ⳿ ⲃⲱⲕ ⲉ ϩⲣⲁⲓ ⲉⲙⲁⲩ ⲛⲉⲫⲩⲗⲏ ⲙ̄
ⲡϫⲟⲉⲓⲥ⳿ ⲉⲩⲙⲛ︦ⲧ︦ⲣⲉ ⲙ̄ ⲡⲓ︦ⲏ︦ⲗ︦ • Ⲟⲩ ϭⲉ⳿ ⲡⲉ ⲡϩⲱⲃ • ϫⲉ ⲁ
ⲛⲉⲫⲩⲗⲏ ⲅⲁⲣ⳿ ⲃⲱⲕ ⲉ ϩⲣⲁⲓ ⲉⲙⲁⲩ • ⲁⲗⲗⲁ⳿ ⲁ ⲡⲓⲥⲣⲁⲏⲗ
ⲙ̄ ⲙⲉ | ⲟⲩⲱϩ⳿ ϩⲛ̄ ⲧⲡⲁⲣⲑⲉⲛⲟⲥ • ⲁϥⲧⲟⲩϫⲉ⳿ ⲛⲉⲫⲩⲗⲏ⳿
ⲧⲏⲣⲟⲩ ⲙ̄ ⲡⲕⲁϩ • Ⲕⲁⲛ⳿ ⲉⲕϣⲁⲛϫⲟⲟⲥ ⲛⲁⲓ̄ • ϫⲉ ϩⲉⲛ‐
ⲛⲟϭ ⲛⲉ ⲙ̄ⲡⲁⲧⲣⲓⲁⲣⲭⲏⲥ • ⲁⲛⲟⲕ • ϩⲱⲱⲧ ⲟⲛ⳿ ϯϫⲱ
ⲙ̄ⲙⲟⲥ ϫⲉ ϩⲉⲛⲛⲟϭ ⲛⲉ • Ⲁⲗⲗⲁ⳿ ⲛ̄ ⲥⲉⲛⲁϣⲡⲱϩ⳿ ⲁⲛ⳿
ⲉ ϩⲣⲁⲓ̄ ⲉ ⲡϫⲓⲥⲉ⳿ ⲛ̄ ⲧⲉⲓ ⲡⲁⲣⲑⲉⲛⲟⲥ • Ⲕⲁⲛ⳿ ⲉⲕϣⲁⲛⲉⲓⲛⲉ⳿
ⲉ ⲧⲙⲏⲧⲉ⳿ ⲙ̄ ⲡⲉⲭⲟⲣⲟⲥ⳿ ⲛ̄ ⲧⲙⲛ︦ⲧ︦ⲛⲟϭ ⲛ̄ ⲛⲉⲡⲣⲟⲫⲏⲧⲏⲥ •
ⲥⲉⲧⲁⲉⲓⲏⲩ ⲙⲉⲛ⳿ • ⲕⲁⲧⲁ ⲥⲙⲟⲧ ⲛⲓⲙ • Ⲁⲗⲗⲁ⳿ ⲛ̄ⲥⲉ‐
ⲛⲁϣⲡⲱϩ ⲁⲛ ⲉ ϩⲣⲁⲓ̄ ⲉ ⲡⲧⲁⲉⲓⲟ ⲛ̄ ⲧⲉⲓ ⲡⲁⲣⲑⲉⲛⲟⲥ •
Ⲕⲁⲛ⳿ ⲉⲕϣⲁⲛϫⲱ• ⲉ ⲣⲟⲓ ⲙ̄ ⲡⲧⲁⲉⲓⲟ⳿ | ⲛ̄ ⲙ̄ⲙⲁⲣⲧⲩⲣⲟⲥ
ⲁⲗⲗⲁ⳿ ⲡⲧⲁⲉⲓⲟ ⲛ̄ ⲧⲉⲓ ⲡⲁⲣⲑⲉⲛⲟⲥ⳿ ϫⲟⲥⲉ • ⲉ ϩⲟⲩⲛ ⲉ


### 0003

ⲣⲟⲟⲩ • Ⲕⲁⲛ⳿ ⲉⲕϣⲁⲛϫⲟⲟⲥ⳿ ⲉ ⲛⲁⲡⲟⲥⲧⲟⲗⲟⲥ ϫⲉ ϩⲉⲛⲛⲟϭ
ⲛⲉ • ⲁⲛⲟⲕ ϩⲱ̄ ϯϫⲱ ⲙ̄ ⲡⲁⲓ • ⲁⲗⲗⲁ⳿ ⲛ̄ⲥⲉϣⲏϣ ⲁⲛ⳿•
ⲙⲛ̄ ⲡⲧⲁⲉⲓⲟ⳿ ⲛ̄ ⲧⲉⲓ ⲡⲁⲣⲑⲉⲛⲟⲥ • Ⲟⲩ ⲙⲟⲛⲟⲛ ⲇⲉ ϫⲉ ⲛ̄-
ⲣⲱⲙⲉ • Ⲁⲗⲗⲁ⳿ ⲛ̄ⲕⲉ ⲁⲅⲅⲉⲗⲟⲥ ⲧⲏⲣⲟⲩ ⲛ ⲙ̄ⲡⲏⲩⲉ •
ⲙⲛ̄ ⲗⲁⲁⲩ ⲙ̄ⲙⲟⲟⲩ ϣⲏϣ ⲙⲛ̄ ⲧⲉⲓ ⲡⲁⲣⲑⲉⲛⲟⲥ • ⲉⲓ ⲙⲏ
ⲧⲉⲓ⳿ ⲉ ⲡⲉⲓⲱⲧ⳿ ⲙⲛ̄ ⲡϣⲏⲣⲉ • ⲙⲛ̄ ⲡⲉ ⲡⲛ︦ⲁ︦ ⲉⲧ ⲟⲩⲁⲁⲃ •
Ⲁⲗⲗⲁ⳿ ⲙ̄ⲡⲣ̄ ⲙⲉⲉⲩⲉ⳿ ⲉ ⲣⲟⲓ⳿• ϫⲉ ⲉⲓⲧϭⲁⲉⲓⲟ̄ ⲛ̄ ⲛⲉⲧ
ⲟⲩⲁⲁⲃ • ⲉⲓϫⲱ ⲛ̄ | ⲛⲁⲓ̄ ⲙ̄ⲙⲟⲛ ⲙⲉ ⲅⲉⲛⲉⲧⲟ • Ⲁⲗⲗⲁ⳿
ⲉⲓⲧⲁⲙⲟ ⲙ̄ⲙⲟⲕ⳿ ⲉ ⲡⲧⲁⲉⲓⲟ⳿ ⲛ̄ ⲧⲉⲓ ⲡⲁⲣⲑⲉⲛⲟⲥ ⲉⲧ
ⲟⲩⲁⲁⲃ • ⲛ̄ ⲁⲧⲧⲱⲗⲙ̄ • ⲉⲓⲟⲩⲏϩ • ⲛ̄ⲥⲁ ⲛⲉϣⲁϫⲉ⳿ ⲛ̄
ⲛⲉⲅⲣⲁⲫⲏ⳿ ⲉⲧ ⲟⲩⲁⲁⲃ • ϩⲛ̄ ⲁⲕⲟⲗⲟⲩⲑⲓⲁ⳿ ⲛⲓⲙ ϫⲉ ⲕⲁⲥ
ⲇⲉ⳿ ⲉⲕⲉⲉⲓⲙⲉ⳿ ⲉ ⲧⲙⲉ • ⲉⲓⲧⲉ ⲡⲣⲟⲫⲏⲧⲏⲥ • ⲉⲓⲧⲉ⳿ ⲡⲁⲧⲣⲓ‐
ⲁⲣⲭⲏⲥ • ⲉⲓⲧⲉ⳿ ⲕⲣⲓⲧⲏⲥ • ⲉⲓⲧⲉ ⲁⲡⲟⲥⲧⲟⲗⲟⲥ • ⲉⲓⲧⲉ ⲛⲣ̄‐
ⲣⲱⲟⲩ ⲛ̄ ⲇⲓⲕⲁⲓⲟⲥ • Ϩⲁⲡⲁⲝ ⲁⲡⲗⲱⲥ • ϫⲓⲛ ⲁⲇⲁⲙ⳿
ⲡϣⲟⲣⲡ̄ ⲛ̄ ⲣⲱⲙⲉ ⲁⲩⲱ̄ ⲡϣⲟⲣⲡ̄ ⲛ̄ ⲧⲁⲙⲓ︦ⲟ︦• ϩⲛ̄ ⲛⲉϭⲓϫ
ⲙ̄ ⲡ|ⲛⲟⲩⲧⲉ⳿ ⲡⲡⲁⲛⲧⲟⲕⲣⲁⲧⲱⲣ⳿ ⲉⲩϩⲁⲅⲛⲉⲩⲉ⳿ ⲙ̄ⲙⲟⲟⲩ
ⲧⲏⲣⲟⲩ • ϣⲁ ϩⲣⲁⲓ̄ ⲉ ⲧⲉⲛⲟⲩ • ⲁⲩⲱ̄ ϣⲁ ⲧⲥⲩⲛⲧⲉⲗⲓⲁ⳿
ⲙ̄ ⲡⲁⲓ̄ⲱⲛ⳿ ⲉ ⲧⲣⲉⲩϣⲱⲡⲉ⳿ ⲉⲩⲣ̄ ⲁ̄ⲛⲁϥ ⲙ̄ ⲡⲉⲛⲧⲁ ⲧⲉⲓ
ⲡⲁⲣⲑⲉⲛⲟⲥ ⲙⲓⲥⲉ ⲙ̄ⲙⲟϥ • ⲉⲧⲉ ⲡⲁⲓ̄ ⲡⲉ ⲡⲉⲭ︦ⲥ︦ ⲓ︦ⲥ︦ ⲡⲉⲛ‐
ϫⲟⲉⲓⲥ • ⲁⲩⲱ̄ ⲡⲉⲧ ⲉⲙⲉⲣⲉ ⲛ̄ⲥⲉⲣⲁⲫⲓⲛ ⲉϣϭⲱϣⲧ̄ ⲉ ϩⲟⲩⲛ
ⲉ ϩⲣⲁϥ • ⲁⲩⲱ̄ ⲉⲙⲉⲣⲉ ⲛⲁⲅⲅⲉⲗⲟⲥ⳿ ⲉϣϭⲱϣⲧ̄ ⲉ ⲡⲉϥϩⲟ
ⲛ̄ⲟⲩⲟⲉⲓϣ ⲛⲓⲙ • ⲁ ⲧ̄ⲡⲁⲣⲑⲉⲛⲟⲥ • ⲉⲧ ⲟⲩⲁⲁⲃ ϩⲗⲟⲟⲗⲉ
ⲙ̄ⲙⲟϥ • ϩⲓϫⲛ̄ ⲛⲉⲥϭⲓϫ • ⲁⲩⲱ̄ ⲁⲥϯ ⲉⲕⲓⲃⲉ⳿ ⲉ ϩⲟⲩⲛ⳿ ⲉ
ⲧⲉϥⲧⲁⲡⲣⲟ⳿ ⲛ̄ ⲛⲟⲩⲧⲉ • ⲁϫⲛ̄ ⲇⲓⲥⲧⲁⲍⲉ • ⲉⲁⲥ|ⲧⲟⲗⲙⲁ̂ •
ⲁϫⲛ̄ ϩⲟⲧⲉ⳿• ⲁⲥⲙⲟⲩⲧⲉ ⲉ ⲣⲟϥ ϫⲉ ⲡⲁ ϣⲏⲣⲉ • Ⲁⲩⲱ̄
ⲁϥⲙⲟⲩⲧⲉ ⲉ ⲣⲟⲥ⳿ ϩⲱⲱϥ • ϫⲉ ⲧⲁ ⲙⲁⲁⲩ • Ⲁⲗⲗⲁ⳿
ⲙ̄ⲡⲣ̄ ⲧⲣⲉ ⲟⲩⲁ⳿ ⲥⲱⲧⲙ̄ ⲉ ⲣⲟⲓ̄ ⲉⲓϫⲱ⳿ ⲛ̄ ⲛⲁⲓ̄ • ⲛϥ̄ϫⲟⲟⲥ •
ϩⲙ̄ ⲡⲉϥⲙⲉⲉⲩⲉ⳿ ⲛ̄ ϩⲩⲇⲓⲱⲧⲏⲥ • ϫⲉ ⲉϣϫⲉ ⲧⲉⲓ ⲡⲁⲣⲑⲉ‐
ⲛⲟⲥ⳿ ϫⲟⲥⲉ⳿ ⲛ̄ ⲧⲉⲓ ϩⲉ ⲧⲏⲣⲥ̄ • ⲟⲩⲕ ⲟⲩⲛ⳿ ⲛ̄ ⲟⲩ ⲉ ⲃⲟⲗ
ⲁⲛ⳿ ⲧⲉ⳿ ϩⲙ̄ ⲡⲕⲁϩ • ⲟⲩⲇⲉ⳿ ⲛ̄ ⲟⲩϫⲡⲟ⳿ ⲛ̄ⲣⲱⲙⲉ⳿ ⲁⲛ⳿ ⲧⲉ•
ⲁⲗⲗⲁ⳿ ⲛ̄ⲧⲁⲥⲉⲓ̄ ⲉ ⲃⲟⲗ ϩⲛ̄ ⲧⲡⲉ • ⲕⲁⲧⲁ ⲛ̄ϣⲁϫⲉ ⲛ̄ ϣⲃⲱ
ⲛ̄ ⲛⲉⲥⲭⲓⲥⲙⲁⲧⲓⲕⲟⲥ • ⲙ̄ⲡⲟⲗⲩⲧⲓⲕⲟⲥ • Ⲁⲗⲗⲁ ⲧⲛ̄-
ⲡⲓⲥⲧⲉⲩⲉ⳿ ϩⲛ̄ ⲟⲩϩⲏⲧ⳿ ⲉϥⲟ̄ⲣϫ̄ • ϫⲉ ⲟⲩ ⲉ ⲃⲟⲗ ϩⲙ̄ ⲡⲕⲁϩ•
ⲧⲉ ⲧⲉⲓ ⲡⲁⲣⲑⲉⲛⲟⲥ | ⲁⲩⲱ̄ ⲟⲩϫⲡⲟ̄ ⲧⲉ⳿ • ⲛ̄ⲑⲉ ⲛ̄ⲣⲱⲙⲉ


### 0004

ⲛⲓⲙ⳿• ⲉ ⲃⲟⲗ ϩⲛ̄ ⲟⲩⲉⲓⲱⲧ • ⲙⲛ̄ ⲟⲩⲙⲁⲁⲩ • ⲁⲩⲱ̄ ⲉ ⲃⲟⲗ
ϩⲓⲧⲛ̄ ⲧϭⲟⲙ ⲙ̄ ⲡⲉⲧ ⲭⲟⲣⲏⲅⲉⲓ ⲛⲁⲛ ⲙ̄ ⲡϣⲁϫⲉ • ⲡⲉⲡⲛ︤ⲁ︥
ⲉⲧ ⲟⲩⲁⲁⲃ • ⲧⲛ̄ⲛⲁϯ ⲁⲡⲟⲇⲏⲝⲓⲥ ⲙ̄ ⲡϣⲁϫⲉ ⲉ ⲧⲃⲉ ⲛ̄
ⲉⲓⲟ⳿ⲧⲉ⳿ ⲛ̄ ⲧⲉⲓ ⲡⲁⲣⲑⲉⲛⲟⲥ • ⲙⲛ̄ ⲛ̄ⲉⲓⲟ⳿ⲧⲉ⳿ ⲛ̄ ⲛⲉⲥ ⲉⲓⲟ⳿ⲧⲉ •
Ⲙⲁⲗⲗⲟⲛ ⲇⲉ⳿ ϩⲁⲑⲏ⳿ ⲛ̄ ϩⲙⲉ⳿ ⲥⲛⲟⲩⲥⲉ⳿ ⲛ̄ⲅⲉⲛⲉⲁ • ⲉ
ⲡⲉϫⲡⲟ⳿ ⲛ̄ ⲧⲉⲓ ⲡⲁⲣⲑⲉⲛⲟⲥ • Ⲥⲱⲧⲙ̄ ϭⲉ⳿• ⲉ ⲣⲟⲓ̄ ⲧⲉⲛⲟⲩ⳿
ϩⲛ̄ ⲟⲩϯϩⲧⲏϥ • ⲱ̄ ⲡⲗⲁⲟⲥ ⲙ̄ⲙⲁⲓ̄ ⲛⲟⲩⲧⲉ • ⲁⲩⲱ̄ ⲛ̄ⲧⲉⲧⲛ̄ϯ⳿
ⲛ̄ ⲟⲩϫⲁⲙⲏ⳿ ⲙ̄ ⲡϣⲁϫⲉ • ϫⲉ ⲕⲁⲥ ⲉⲛⲛⲁⲟⲩⲱⲛ⳿ ⲉ
ⲡⲛⲟϭ ⲛ̄ | ⲑⲩⲥⲁⲩⲣⲟⲥ • ⲉⲧ ⲙⲉϩ ⲙ̄ ⲙⲁⲣⲕⲁⲣⲓⲧⲏⲥ ⲙ̄
ⲙⲉ • ⲛ̄ⲧⲛ̄ϩⲱⲗϭ̄ ⲉ ϩ⳿ⲣⲁⲓ̄ ⲉⲙ ⲙⲁⲁϫⲉ ⲙ̄ ⲡⲉⲧⲛ̄ϩⲏⲧ⳿
ⲛ̄ ⲛ̄ϣⲁϫⲉ⳿ ⲉⲧ ⲙⲉϩ ⲛ̄ ϩⲏⲩ ⲛⲓⲙ ⲛ̄ⲧⲉ ⲡⲉⲡⲛⲁ̄ ⲉⲧ
ⲟⲩⲁⲁⲃ • Ϫⲓ̄ ϭⲉ⳿ ⲉ ϩⲣⲁⲓ̄ ⲉ ⲧⲟⲟ̄ⲧⲕ̄ ⲙ̄ ⲡϫⲱⲱⲙⲉ⳿ ⲉⲧ
ⲧⲁⲉⲓⲏⲩ ⲙ̄ ⲡϩⲁⲅⲓⲟⲥ⳿ ⲁⲡⲁ ⲙⲁⲑⲁⲓ̄ⲟⲥ ⲡⲁ ⲧⲉⲓ ⲛⲟϭ
ⲛ̄ⲥⲙⲏ⳿ ⲉⲧ ϯ⳿ ⲥⲟⲉⲓⲧ ϩⲛ̄ ⲛⲉⲩⲁⲅⲅⲉⲗⲓⲥⲧⲏⲥ • Ⲡⲉⲓ ⲁⲕⲣⲓ‐
ⲃⲏⲥ⳿ ⲉⲧ ϩⲟⲧϩⲧ̄ ⲛ̄ ⲙ̄ⲙⲩⲥⲧⲏⲣⲓⲟⲛ⳿ ⲉⲑⲏⲡ • Ⲡⲉⲓ ⲛⲟϭ
ⲉⲧ ϭⲙ̄ϭⲟⲙ • ⲡⲁⲓ̄ ⲉⲛⲧ ⲁϥⲟⲩⲱ̄ⲛϩ̄ ⲛⲁⲛ⳿ ⲉ ⲃⲟⲗ ⲛ̄
ⲧⲅⲉⲛⲉⲁⲗⲟⲅⲓⲁ ⲛ̄ ⲧⲉⲓ ⲡⲁⲣⲑⲉⲛⲟⲥ ⲉⲧ ⲟⲩⲁⲁⲃ | Ⲙⲁⲣⲛ̄‐
ⲛⲟⲓ̄ ⲟⲛ⳿ ⲙ̄ ⲡϣⲁϫⲉ⳿ ⲉⲧ ⲙⲉϩ ⲙ̄ⲙⲩⲥⲧⲏⲣⲓⲟⲛ ⲉⲧ ⲟⲩⲁⲁⲃ •
ⲛ̄ⲧⲉ ⲡⲥⲁϩ ⲛ̄ ⲛ̄ϩⲉⲑⲛⲟⲥ • ⲡⲕⲩⲣⲝ̄ ⲛ̄ ⲧⲙⲛ︦ⲧ︦ⲉⲩⲥⲉⲃⲏⲥ •
ⲡⲥⲁϩ ⲡⲁⲩⲗⲟⲥ • ⲉϥⲱϣ⳿ ⲉ ⲃⲟⲗ • ⲉϥϫⲱ ⲙ̄ⲙⲟⲥ • ϫⲉ
ϥⲟⲩⲟ̄ⲛϩ̄ ⲅⲁⲣ ⲉ ⲃⲟⲗ • ϫⲉ ⲛ̄ⲧⲁ ⲡⲉⲛ ϫⲟⲉⲓⲥ⳿ ϣⲁ⳿ ⲉ ⲃⲟⲗ
ϩⲛ̄ ⲓ̄ⲟⲩⲇⲁ ⲧⲉⲫⲩⲗⲏ⳿ ⲉⲧⲉ ⲙ̄ⲡⲉ ⲙⲱⲩ̄ⲥⲏⲥ ϣⲁϫⲉ⳿ ⲉ ⲧⲃⲉ
ⲟⲩⲏⲏⲃ⳿ ⲉ ⲃⲟⲗ ⲛ̄ϩⲏⲧⲥ̄ • ⲉϥⲟⲩⲟ̄ⲛϩ̄ ⲉ ⲃⲟⲗ⳿ ⲧⲱⲛ⳿ ⲱ̄
ⲡⲥⲟⲫⲟⲥ⳿ ⲡⲁⲩⲗⲟⲥ • ⲁϫⲓⲥ ⲉ ⲣⲟⲓ̄ ϫⲉ ⲛ̄ⲧⲁ ⲡⲉⲛ ϫⲟⲉⲓⲥ⳿
ϣⲁ⳿ ⲉ ⲃⲟⲗ ϩⲛ̄ ⲓ̄ⲟⲩⲇⲁ⳿• ⲛ̄ ⲁϣ ⲛ̄ ϩⲉ • ⲛⲓⲙ ⲡⲉ ⲛ̄ⲧⲁϥ‐
ϩⲉⲣⲙⲏ|ⲛⲉⲩⲉ⳿ ⲙ̄ ⲡⲁⲓ̄ • ⲱ̄ ⲡⲣⲉϥⲧⲁⲙⲓⲉ ⲥⲕⲏⲛⲏ • Ⲁϫⲓⲥ⳿
ⲉ ⲣⲟⲓ̄ ϫⲉ ⲛ̄ⲧⲁⲕϩⲉ • ⲉ ⲣⲟϥ ⲧⲱⲛ⳿ ⲉϥⲟⲩⲟ̄ⲛϩ̄ ⲉ ⲃⲟⲗ ⲛ̄
ⲧⲉⲓ ϩⲉ • ⲉϣϫⲉ Ⲉⲕⲧⲁϫⲣⲏⲩ⳿ ⲉϫⲛ̄ ⲛ̄ϣⲁϫⲉ ⲙ̄ ⲡⲉϥⲉⲓⲱⲧ
ⲓ̄ⲁⲕⲱⲃ ⲉϥⲱϣ⳿ ⲉ ⲃⲟⲗ ⲉϥϫⲱ ⲙ̄ⲙⲟⲥ • ϫⲉ ⲡⲁ ⲙⲁⲥ⳿ ⲙ̄
ⲙⲟⲩⲓ̄ ⲓ̄ⲟⲩⲇⲁ • Ⲁⲩⲱ̄ ⲟⲛ ϫⲉ ⲛ̄ⲛⲉ ⲁⲣⲭⲱⲛ⳿ ⲱϫⲛ̄ ⲉ ⲃⲟⲗ
ϩⲛ̄ ⲓ̄ⲟⲩⲇⲁ • ⲡⲁⲛⲧⲱⲥ ⲉϥϣⲁϫⲉ ⲉ ϩⲉⲛⲉⲣⲱⲟⲩ • ⲙⲛ̄ ϩⲉⲛ‐
ⲥⲧⲣⲁⲧⲏⲅⲟⲥ • ⲛⲁⲓ̄ ⲛ̄ⲧⲁⲩϣⲱⲡⲉ⳿ ⲉ ⲃⲟⲗ ϩⲙ̄ ⲡⲉⲥⲡⲉⲣⲙⲁ
ⲛ̄ ⲓ̄ⲟⲩⲇⲁ⳿ ⲡϣⲏⲣⲉ⳿ ⲛ̄ ⲓ̄ⲁⲕⲱⲃ • Ⲙⲙⲟⲛ • ⲙ̄ ⲡⲁⲓ̄ ⲁⲛ ⲡⲉ⳿
ⲱ̄ ⲡⲉⲧ ϯⲧⲱⲛ ⲛⲙ̄ⲙⲁⲓ̄ • | Ⲁⲗⲗⲁ⳿ ⲟⲩⲉⲛⲧⲁⲓ̄ ϩⲁϩ ⲛ̄ⲁⲡⲟ‐
.


### 0005

ⲇⲏⲝⲓⲥ⳿ ⲉ ⲃⲟⲗ ϩⲛ̄ ⲛⲉⲅⲣⲁⲫⲏ⳿  ⲉⲧ ⲟⲩⲁⲁⲃ • ⲉⲩⲥⲩⲛ‐
ϩⲓⲥⲧⲁ⳿  ⲛ̄ ⲧⲙⲉ⳿ ⲧⲏⲣⲥ̄ ϩⲛ̄ ⲟⲩⲁⲕⲣⲓⲃⲓⲁ • Ⲁⲗⲗⲁ⳿ ⲉⲡⲓ ⲇⲏ⳿
ⲙ̄ ⲡⲕⲁⲓⲣⲟⲥ ⲁⲛ⳿ ⲡⲉ ⲡⲁⲓ̄ ⲙ̄ ⲙⲟⲩⲧⲉ⳿ ⲉ ⲛⲉⲧ ⲟⲩⲁⲁⲃ
ⲧⲏⲣⲟⲩ⳿  ⲉ ⲧⲙⲏⲧⲉ • ⲉ ⲃⲟⲗ ϫⲉ ⲁ ⲡⲛⲁⲩ⳿ ⲡⲣⲟⲕⲟⲡⲧⲉ •
ⲗⲟⲓⲡⲟⲛ ⲇⲉ⳿ ϯⲛⲁϫⲉ ⲡϣⲁϫⲉ⳿  ϩⲛ̄ ⲟⲩⲥⲩⲛⲧⲱⲙⲓⲁ •
ⲛ̄ⲧⲁⲉⲓ⳿  ⲉ ϩⲣⲁⲓ̄ ⲉϫⲙ̄ ⲡⲉⲓ ⲉⲩⲁⲅⲅⲉⲗⲓⲟⲛ ⲛ̄ ⲟⲩⲱⲧ • ⲧⲁ‐
ⲇⲓⲟⲣⲑⲟⲩ ⲛ̄ ⲧⲙⲉ⳿ ⲧⲏⲣⲥ̄ ⲉ ⲃⲟⲗ ⲛ̄ϩⲏⲧϥ̄ • Ⲡⲛ︦ⲛ︦ⲥⲱⲥ
ⲛ̄ⲧⲁⲇⲓⲕⲛⲉⲩⲉ⳿ ⲛⲏ|ⲧⲛ̄ ⲙ̄ ⲡⲃⲓⲟⲥ⳿ ⲛ̄ ⲧⲉⲓ ⲡⲁⲣⲑⲉⲛⲟⲥ • ⲁⲩⲱ̄
ⲛ̄ⲧⲁϯ ⲛ̄ ⲟⲩϫⲱⲕ ⲙ̄ ⲡ̄ϣⲁϫⲉ • Ⲱϣ ⲛⲁⲕ⳿ ⲧⲉⲛⲟⲩ ϩⲙ̄
ⲡⲉⲩⲁⲅⲅⲉⲗⲓⲟⲛ ⲙ̄ ⲡϩⲁⲅⲓⲟⲥ⳿  ⲙⲁⲑⲉⲟⲥ • Ⲥⲱⲧⲙ̄ ⲡⲉϫⲁϥ
ⲡϫⲱⲱⲙⲉ⳿ ⲙ̄ ⲡⲉϫⲡⲟ ⲛ̄ ⲓ︦ⲥ︦ ⲡⲉⲭ︦ⲥ︦ ⲡϣⲏⲣⲉ ⲛ̄ ⲇⲁⲩⲉⲓⲇ •
ⲡϣⲏⲣⲉ ⲛ ⲁⲃⲣⲁϩⲁⲙ • Ϫⲓⲛ ⲧⲱⲛ⳿ ⲉ ⲧⲱⲛ⳿ ⲱ̄ ⲙⲁⲑⲁⲓⲟⲥ •
ϫⲓⲛ Ⲁⲃⲣⲁϩⲁⲙ⳿ ⲡⲉϫⲁⲕ • ϣⲁ ϩⲣⲁⲓ̄ ⲉ ⲇⲁⲩⲉⲓⲇ • ⲙⲛ̄‐
ⲧⲁϥⲧⲉ⳿ ⲛ̄ⲅⲉⲛⲉⲁ • ⲁⲩⲱ̄ Ⲁⲕⲣ̄ ⲇⲁⲩⲉⲓⲇ ⲛ̄ ϣⲟⲣⲡ̄ • ⲉ
ⲁⲃⲣⲁϩⲁⲙ • Ⲥⲱⲧⲙ̄ ϭⲉ⳿ ⲧⲉⲛⲟⲩ | ϯⲛⲁⲧⲁⲙⲟⲕ • Ⲁⲃⲣⲁ‐
ϩⲁⲙ⳿ ⲇⲉ⳿ ⲁϥϫⲡⲟ ⲛ̄ ⲓ̄ⲥⲁⲁⲕ • Ⲓ︦Ⲥⲁⲁⲕ ⲇⲉ⳿ • ⲁϥϫⲡⲟ⳿ ⲛ̄
ⲓ̄ⲁⲕⲱⲃ • Ⲓ̈ⲁⲕⲱⲃ ⲇⲉ⳿  ⲁϥϫⲡⲟ ⲛ̄ ⲓ̄ⲥⲁⲁⲕ (sic) • ⲙⲛ̄ ⲛⲉϥⲥⲛⲏⲩ •
Ⲓ̈ⲟⲩⲇⲁⲥ ⲇⲉ • ⲁϥϫⲡⲟ⳿  ⲙ̄ ⲫⲁⲣⲉⲥ • ⲙⲛ̄ ⲍⲁⲣⲁ⳿ • ⲉ ⲃⲟⲗ
ϩⲛ̄ ⲑⲁⲙⲁⲣ • ϯϩⲧⲏⲕ ⲙ̄ ⲡⲉⲓ ⲙⲁ⳿ ⲕⲁⲗⲱⲥ⳿  ϩⲛ̄ ⲟⲩⲱ̄ⲣϫ̄ •
ⲁϫⲓⲥ⳿ ⲉ ⲣⲟⲓ̄ • ϫⲉ ⲉ ⲧⲃⲉ ⲟⲩ • ⲁϥⲣ̄ ⲡⲙⲉⲉⲩⲉ⳿ ⲛ̄ ⲑⲁⲙⲁⲣ
ⲙ̄ ⲡⲉⲓ ⲙⲁ • ⲙ̄ⲡⲉ ϥⲣ̄ ⲡⲙⲉⲉⲩⲉ⳿ ⲛ̄ⲥⲁⲣⲣⲁ⳿ ⲑⲓⲙⲉ⳿ ⲛⲁⲃⲣⲁ‐
ϩⲁⲙ • ⲟⲩⲇⲉ ⲙ̄ⲡⲉ ϥⲣ̄ ⲡⲙⲉⲉⲩⲉ⳿ ⲛ̄ ⲗⲓⲁ⳿ • ⲙⲛ̄ ϩⲣⲁⲭⲏⲗ •
ⲙⲛ̄ ϩⲣⲉⲃⲉⲕⲕⲁ • ⲛⲉϩⲓⲟ̄ⲙⲉ⳿ ⲉⲧ ⲧⲁ|ⲉⲓⲏⲩ • ⲟⲩⲇⲉ
ⲙ̄ⲡⲉ ϥⲣ̄ ⲡⲙⲉⲉⲩⲉ⳿ ⲛ̄ ⲥⲁⲩⲁ⳿ ⲧϣⲟⲣⲡⲉ⳿ ⲛ̄ⲥϩⲓⲙⲉ⳿ ⲛ̄
ⲓ̄ⲟⲩⲇⲁⲥ • Ⲁⲗⲗⲁ⳿ ⲡⲉϫⲁϥ⳿  ϫⲉ ⲉ ⲃⲟⲗ ϩⲛ̄ ⲑⲁⲙⲁⲣ •
ⲟⲩⲀϣ ⲙ̄ⲙⲓⲛⲉ⳿ ⲧⲉ ⲑⲁⲙⲁⲣ • ⲥⲱⲧⲙ̄ ⲛ̄ⲧⲁⲧⲁⲙⲟⲕ • Ⲛ̄ⲟⲩ
ⲉ ⲃⲟⲗ ⲁⲛ⳿ ⲧⲉ ϩⲙ̄ ⲡⲓ︦ⲏ︦ⲗ︦ • ⲁⲗⲗⲁ⳿ ⲟⲩ ⲉ ⲃⲟⲗ ⲧⲉ ϩⲛ̄
ⲛ̄ⲕⲉ ϩⲉⲑⲛⲟⲥ ⲉⲧⲉ ⲛ̄ ⲥⲉⲟⲟⲩⲛ ⲁⲛ⳿ ⲙ̄ ⲡⲛⲟⲩⲧⲉ • Ⲡⲉϫⲁϥ ϫⲉ
ⲁ ⲓ̄ⲟⲩⲇⲁⲥ • ϫⲓ̄ ⲛ̄ ⲟⲩⲥϩⲓⲙⲉ⳿ ⲛ̄ ⲏⲣ⳿ ⲡⲉϥϣⲣ︦ⲡ︦ ⲙⲓⲥⲉ ⲉ
ⲡⲉⲥⲣⲁⲛ⳿ ⲡⲉ ⲑⲁⲙⲁⲣ • Ⲙⲛ︦ⲛ︦ⲥⲱⲥ ⲁϥⲙⲟⲩ ⲛ̄ϭⲓ ⲏⲣ • ⲁⲩⲱ̄
ⲁϥϫⲓⲧⲥ̄ ⲛ̄ϭⲓ ⲁⲩⲛⲁⲛ⳿ ⲡⲉϥⲥⲟⲛ • Ⲁⲩⲛⲁⲛ ⲇⲉ • ⲁϥ |ⲣ̄
ⲡⲡⲟⲛⲏⲣⲟⲛ⳿ ⲙ̄ ⲡⲙ̄ⲧⲟ⳿ ⲉ ⲃⲟⲗ ⲙ̄ ⲡϫⲟⲉⲓⲥ • ⲁ ⲡⲛⲟⲩⲧⲉ
ⲙⲟⲩⲟⲩⲧ ⲙ̄ⲙⲟϥ • Ⲓ̈ⲟⲩⲇⲁⲥ ⲇⲉ⳿ ⲡⲉϫⲁϥ ⲛ̄ ⲑⲁⲙⲁⲣ • ϫⲉ
ϩⲙⲟⲟⲥ ⲛⲉ⳿ ϩⲙ̄ ⲡⲏⲓ̄ ⲛ̄ ⲛⲟⲩⲉⲓⲟ̄ⲧⲉ⳿ ⲉⲣⲟ̄ ⲛ̄ ⲭⲏⲣⲁ •


### 0006

ϣⲁⲛ ⲧⲉ ⲡⲁ ϣⲏⲣⲉ⳿ ⲥⲏⲗⲱⲙ ⲣ̄ ⲛⲟϭ • ⲛ̄ⲧⲁϫⲓⲧⲉ⳿ ⲛⲁϥ
Ⲛ̄ ⲧⲉⲣⲉ ϩⲉⲛϩⲟⲟⲩ ⲇⲉ⳿ ⲉⲛⲁϣⲱⲟⲩ ⲟⲩⲉⲓⲛⲉ • ⲁⲥⲛⲁⲩ ⲛ̄ϭⲓ
ⲑⲁⲙⲁⲣ ϫⲉ • ⲁ ⲥⲏⲗⲱⲙ ⲡⲉϥϣⲏⲣⲉ⳿ ⲣ̄ ⲛⲟϭ • ⲙ̄ⲡⲉ ϥϫⲓⲧⲥ̄
ⲛⲁϥ • ⲛ̄ ⲥϩⲓⲙⲉ • ⲁⲥϭⲱⲛⲧ̄ ⲉ ⲓ̄ⲟⲩⲇⲁⲥ • ⲉⲡⲓ ⲇⲏ⳿ ⲙ̄ⲡⲉ
ⲕⲉ ⲟⲩⲁ ϫⲓⲧⲥ̄ ⲉ ϩⲙⲟⲟⲥ ⲛⲙ̄ⲙⲁⲥ • ⲉ ⲃⲟⲗ ϫⲉ ⲉⲣϣⲁⲛ
ⲡϩⲁⲓ̄ ⲛ̄ ⲧⲉⲥϩⲓⲙⲉ ⲙⲟⲩ | ⲙ̄ⲡⲉ ⲟⲩⲟ̄ⲉⲓϣ⳿ ⲉⲧ ⲙ̄ⲙⲁⲩ •
ⲟⲩⲕ ⲉⲧⲉⲓ⳿ ⲙⲛ̄ϭⲟⲙ ⲉ ⲧⲣⲉ ⲕⲉ ⲟⲩⲁ⳿ ϫⲓⲧⲥ̄ • ϫⲓⲛ ⲙ̄ ⲡⲉⲓ
ⲛⲁⲩ • ⲉⲓ ⲙⲏ ⲧⲓ⳿ ⲡⲥⲟⲛ ⲙ̄ ⲡⲉⲛⲧ ⲁϥⲙⲟⲩ • Ⲗⲟⲓⲡⲟⲛ⳿ ⲛ̄
ⲧⲉⲣⲉ ⲥⲛⲁⲩ • ϫⲉ ⲁ ⲓ̄ⲟⲩⲇⲁⲥ⳿ ⲣ̄ ϩⲁⲗ ⲙ̄ⲙⲟⲥ • ⲁⲥⲥⲱⲧⲙ̄ •
ϫⲉ ϥⲛⲏⲩ ⲉ ϩⲣⲁⲓ̄ ϩⲛ̄ ⲧⲉϩⲓⲏ̄ ⲉ ⲧⲣⲉ ϥⲃⲱⲕ ⲉ ϩⲱⲱⲕⲉ • ⲛ̄
ⲛⲉϥⲉⲥⲟⲟⲩ • Ⲁⲥⲧⲱⲟⲩⲛ⳿ ⲛ̄ϭⲓ ⲑⲁⲙⲁⲣ • ⲁⲥⲕⲱ ⲉ ⲡⲉⲥⲏⲧ
ⲙ̄ ⲡⲉⲥⲭⲏⲙⲁ⳿ ⲛ̄ ⲧⲙⲛ︦ⲧ︦ⲭⲏⲣⲁ ⲉⲧⲧⲟ̄ ϩⲓⲱⲱⲥ Ⲁⲥϫⲓ⳿
ⲛⲁⲥ⳿ ⲛ̄ ⲟⲩⲥⲭⲏⲙⲁ ⲙ̄ ⲡⲟⲣⲛⲏ • ⲁⲥϩⲱⲃⲥ̄ ⲙ̄ ⲡⲉⲥϩⲟ •
ⲁⲥϩⲙⲟⲥ ϩⲁϩⲧⲛ̄ ⲡϩⲟⲟⲩⲧⲛ̄ ⲙ̄ | ⲙⲟⲟϣⲉ • ⲛ̄ ⲧⲉⲣⲉ ⲓ̄ⲟⲩⲇⲁⲥ
ⲇⲉ⳿ ⲛⲁⲩ⳿ ⲉ ⲣⲟⲥ • ⲉϥⲙⲉⲉⲩⲉ ϫⲉ ⲟⲩⲡⲟⲣⲛⲏ ⲧⲉ • ⲙ̄ⲡⲉ
ϥⲥⲟⲟⲩⲱ̄ⲛⲥ̄ ⲅⲁⲣ • ϫⲉ ⲛⲉ ⲁⲥϩⲱⲃⲥ̄ ⲙ̄ ⲡⲉⲥϩⲟ • ⲗⲟⲓⲡⲟⲛ⳿
Ⲙⲛ︦ⲛ︦ⲥⲁ ⲡϫⲱⲕ ⲛ̄ ⲛ̄ϣⲁϫⲉ⳿ ⲉⲛⲧⲁϥϫⲟⲟⲩ ⲛⲁⲥ ⲙⲛ̄ ⲛⲉ
ⲛⲧⲁⲥϫⲟⲟⲩ ϩⲱⲱⲥ • ⲁϥϯ ⲛⲁⲥ ⲙ̄ ⲡⲁⲣⲏⲃ • ⲁϥⲃⲱⲕ ⲉ
ϩⲟⲩⲛ ϣⲁ ⲣⲟⲥ ⲙⲛ︤ⲛ︥ⲥⲱⲥ⳿ ⲁϥⲙⲟⲟϣⲉ ⲉ ⲧⲉϥϩⲓⲏ̄ • Ⲁⲩⲱ
ⲛ̄ ⲧⲉⲣⲉ ϥⲃⲱⲕ⳿ ⲉⲛⲉⲥⲟⲟⲩ ⲁϥⲧⲛ̄ⲛⲟⲟⲩ ⲛⲁⲥ ⲙ̄ ⲡⲙⲁⲥ ⲛ̄
ⲃⲁⲁⲙⲡⲉ • ⲙ̄ⲡ ⲟⲩϩⲉ⳿ ⲉ ⲣⲟⲥ⳿ ⲉⲧⲁϥⲛⲁⲥ • Ⲁ ⲡⲣⲱⲙⲉ •
ⲗⲟⲓⲡⲟⲛ⳿ | ϣⲓⲛⲉ • ϫⲉ ⲉϥⲧⲱⲛ⳿ ⲧⲉⲓ ⲡⲟⲣⲛⲏ • ⲉⲧ ϩⲙⲟⲟⲥ
ⲙ̄ ⲡⲉⲓ ⲙⲁ • ⲡⲉϫⲁⲩ ⲛⲁϥ ϫⲉ ⲙⲛ̄ ⲡⲟⲣⲛⲏ ⲙ̄ ⲡⲈⲓ ⲙⲁ •
Ⲁⲗⲏⲑⲱⲥ ⲛⲁⲛⲟⲩ ⲡⲇⲓⲏ̄ⲅⲏⲙⲁ • ⲁⲩⲱ̄ ⲡⲛⲟⲏ̄ⲙⲁ⳿ ϩⲟⲗϭ̄
ⲉⲙⲁⲧⲉ • Ⲁⲗⲗⲁ⳿ ⲙ̄ ⲡⲛⲁⲩ ⲁⲛ⳿ ⲡⲉ⳿• ⲙ̄ ⲡⲉⲣⲓⲗⲁⲙⲃⲁⲛⲉ
ⲙ̄ⲙⲟϥ ⲧⲉⲛⲟⲩ • ⲉ ⲃⲟⲗ ϫⲉ ⲛ̄ⲛⲉ ⲛⲣⲁⲕⲧⲛ̄ ⲉ ⲕⲉ ⲥⲁ⳿• Ⲉⲣⲉ
ⲑⲁⲙⲁⲣ ϫⲓ⳿ ⲙ̄ ⲡⲧⲩⲡⲟⲥ ⲛ̄ ⲧⲉⲕⲕⲗⲏⲥⲓⲁ⳿ ⲛ̄ ⲛⲉⲭⲣⲏⲥⲧⲓⲁ‐
ⲛⲟⲥ • Ⲉⲣⲉ ⲓ̄ⲟⲩⲇⲁⲥ⳿ ϩⲱⲱϥ • ϫⲓ ⲙ̄ ⲡⲧⲩⲡⲟⲥ • ⲙ̄ ⲡⲉⲓⲱⲧ
ⲡⲡⲁⲛⲧⲟⲕⲣⲁⲧⲱⲣ • ⲉⲣⲉ | ⲡϣⲟⲙⲧ̄ ⲙ̄ ⲙⲛ︦ⲧ︦ⲣⲉ ⲛ̄ⲧⲁϥ‐
ⲧⲁⲁⲩ ⲛ̄ ⲑⲁⲙⲁⲣ ⲧⲛ̄ⲧⲱⲛ⳿ ⲉ ⲡⲉⲓⲱⲧ • ⲙⲛ̄ ⲡϣⲏⲣⲉ • ⲙⲛ̄
ⲡⲉⲡⲛ︦ⲁ︦ ⲉⲧ ⲟⲩⲁⲁⲃ • Ⲡⲣⲱⲙⲉ ⲛ̄ϣⲱⲥ ⲛ̄ⲧⲁ ⲓ̄ⲟⲩⲇⲁⲥ ⲧⲛ̄‐
ⲛⲟⲟⲩϥ ϣⲁ ⲑⲁⲙⲁⲣ • ⲙⲛ̄ ⲡⲙⲁⲥ⳿ ⲛ̄ ⲃⲁⲁⲙⲡⲉ • ⲡⲉ
ⲙⲱⲩ̄ⲥⲏⲥ • ⲡⲃⲁⲁⲙⲡⲉ⳿ ⲡⲉ ⲡⲛⲟⲙⲟⲥ • ⲛ̄ⲧⲁϥⲧⲁⲁϥ • ⲙ̄ⲡⲉ
ⲥϫⲓⲧϥ̄ ⲛ̄ϭⲓ ⲑⲁⲙⲁⲣ • ⲁⲗⲗⲁ ⲁⲥⲁⲙⲁϩⲧⲉ ⲙ̄ ⲡⲉⲧ ⲛ̄


### 0007

ⲧⲟⲟⲧⲥ̄ • Ⲉⲣⲉ ⲧⲉⲕⲕⲗⲏⲥⲓⲁ⳿ ϫⲱ ⲙ̄ⲙⲟⲥ ϫⲉ ⲧⲡⲓⲥⲧⲓⲥ ⲛ̄ⲧⲉ
ⲧⲣⲓⲁⲥ⳿ ⲉⲧ ⲟⲩⲁⲁⲃ ⲣⲱϣⲉ⳿ ⲉⲧⲟⲩϫⲟⲓ̈ • ⲙⲛ̄ ⲛⲁϣⲏⲣⲉ •
Ⲙⲛ︦ⲛ︦ⲥⲁ ϩⲉⲛϩⲟⲟⲩ | ⲇⲉ⳿ ⲁⲩϫⲓ̂ ⲙ̄ ⲡⲟⲩⲱ̄ ⲛ̄ ⲓ̄ⲟⲩⲇⲁⲥ ϫⲉ •
ⲉⲓⲥ ⲑⲁⲙⲁⲣ ⲑⲓⲙⲉ ⲙ̄ ⲡⲉⲕϣⲏⲣⲉ⳿ ⲉⲉⲧ⳿ ⲉ ⲃⲟⲗ ϩⲛ̄
ⲟⲩⲡⲟⲣⲛⲓⲁ • Ⲁⲩⲱ̄ ⲛ̄ ⲧⲉⲣⲉ ϥⲥⲱⲧⲙ̄ ⲉ ⲡϣⲁϫⲉ • ϩⲛ̄
ⲟⲩϣⲱⲱⲧ⳿ ⲉ ⲃⲟⲗ • ⲁϥⲟⲩⲉϩⲥⲁϩⲛⲉ⳿ ϫⲉ ⲁⲛⲓⲧⲥ̄ ⲉ ⲃⲟⲗ
ⲛ̄ ⲧⲉⲧⲛ̄ⲣⲟⲕϩⲥ̄ ϩⲛ̄ ⲟⲩⲕⲱϩⲧ̄ • Ⲉⲩϫⲓ⳿ ⲇⲉ ⲙ̄ⲙⲟⲥ ⲉ
ⲃⲟⲗ ⲉ ⲧⲁⲕⲟⲥ • ⲁⲥⲉⲓⲛⲉ ⲙ̄ ⲡϣⲟⲙⲧ̄ ⲙ̄ ⲙⲛ̄ⲧⲣⲉ⳿ ⲉ ⲃⲟⲗ •
ⲉⲧ ⲉⲙⲉⲩϣⲁϫⲉ • ⲙⲁⲗⲗⲟⲛ ⲇⲉ⳿ ⲛⲉⲧ ⲱϣ ⲉ ⲃⲟⲗ
ⲛ̄ ϩⲟⲩⲟ̄ ⲉⲩⲙⲏⲏϣⲉ ⲙ̄ ⲙⲛ︦ⲧ︦ⲣⲉ ⲉⲩϣⲁϫⲉ • ⲉⲧⲉ ⲛⲁⲓ̈
ⲛⲉ ⲡϭⲉⲣⲱⲃ • ⲙⲛ̄ ⲡⲉⲝⲟⲩⲣ • ⲙⲛ̄ ⲡϩⲟⲣⲙⲓⲥⲕⲟⲥ •
ⲉⲧⲉ ⲛⲁⲓ ⲟⲛ⳿ ⲡⲉ ⲡ|ⲣⲁⲛ ⲙ̄ ⲡⲉⲓⲱⲧ⳿ ⲙⲛ̄ ⲡϣⲏⲣⲉ • ⲙⲛ̄
ⲡⲉⲡⲛ︦ⲁ︦ ⲉⲧ ⲟⲩⲁⲁⲃ • Ⲁⲥϫⲟⲟⲩⲥⲟⲩ⳿ ϣⲁ ⲣⲟϥ • ϫⲉ ⲥⲟⲩⲉⲛ⳿
ⲛⲁⲓ̄ • ϫⲉ ⲛⲁ ⲛⲓⲙ⳿ ⲛⲉ • ⲙ̄ⲡⲣ̄ ⲁⲣⲛⲁ⳿ ⲙ̄ ⲡⲛⲟⲩⲧⲉ⳿
ϩⲛ̄ ⲧⲁⲣⲛⲏⲥⲓⲥ ⲙ̄ ⲡⲉⲕⲗⲁⲥ • Ⲁⲩⲱ̄ ⲛ̄ ⲧⲉⲣⲉ ⲓ̄ⲟⲩⲇⲁⲥ⳿
ⲛⲁⲩ ⲉ ⲣⲟⲟⲩ ⲁϥⲥⲟⲩⲱ̄ⲛⲟⲩ • ⲁⲩⲱ̄ ⲁϥϩⲟⲙⲟⲗⲟⲅⲉⲓ⳿ ϫⲉ
ⲛⲟⲩⲓ⳿ ⲛⲉ • ⲙ̄ⲡⲉ ϥⲁⲣⲛⲁ⳿ ⲅⲁⲣ • ⲟⲩⲇⲉ ⲙ̄ⲡⲉ ϥⲙⲉⲣⲉ
ⲡⲉⲟⲟⲩ⳿ ⲉⲧ ϣⲟⲩⲉⲓⲧ ⲛ̄ ⲛⲉⲣⲱⲙⲉ • ⲛϥ̄ⲙⲟⲩⲟⲩⲧ⳿ ⲛ̄ ⲧⲉϥ‐
ϣⲉⲗⲉⲉⲧ • Ⲉⲡⲉⲓ⳿ ⲉⲛⲉ ⲛⲧⲁϥⲟⲩⲱϣ ⲛ︤ⲣ︥ ⲡⲁⲓ ⲁϣ⳿ ⲧⲉ
ⲧⲙⲛ︦ⲧ︦ⲙⲛⲧ̄ⲣⲉ ⲙ̄ ⲡϭⲉⲣⲱⲃ • ⲙⲛ̄ ⲡⲉ | ⲝⲟⲩⲣ • ⲙⲛ̄
ⲡϩⲟⲣⲙⲓⲥⲕⲟⲥ • Ⲙⲏ⳿ ⲙⲛ̄ ϭⲉ⳿ ϭⲉⲣⲱⲃ ϩⲓϫⲙ̄ ⲡⲕⲁϩ • ⲏ̄
ⲝⲟⲩⲣ • ⲏ̄ ϩⲟⲣⲙⲓⲥⲕⲟⲥ • ⲉⲓ ⲙⲏ ⲧⲉⲓ̄ ⲛⲁ ⲓ̄ⲟⲩⲇⲁⲥ ⲙⲁⲩⲁⲁⲩ •
Ⲁⲗⲗⲁ⳿ ⲙ̄ⲡⲉ ϥⲣ̄ⲡⲙⲉⲉⲩⲉ⳿ ⲛ̄ϭⲓ ⲓ̄ⲟⲩⲇⲁⲥ • ⲁⲗⲗⲁ ⲛ̄ⲧⲁϥ‐
ϫⲟⲟⲥ⳿ ⲛ̄ ⲧⲉⲓ ϩⲉ • ϫⲉ ⲁⲥⲧⲙⲁⲉⲓⲟ̄ ⲛ̄ϭⲓ ⲑⲁⲙⲁⲣ • ⲛ̄
ϩⲟⲩⲟ̄ ⲉ ⲣⲟⲓ̄ • Ⲁⲩⲱ̄ ϫⲓⲛ ⲙ̄ⲙⲟⲥ ⲉ ϩⲣⲁⲓ̄ • ⲙ̄ⲡⲉ ⲓ̄ⲟⲩⲇⲁⲥ⳿
ⲥⲟⲩⲉⲛ ⲑⲁⲙⲁⲣ ⲉ ⲉⲛⲕⲟⲧⲕ̄ ⲛⲙ̄ⲙⲁⲥ : Ⲟⲩⲇⲉ⳿ ⲛ̄ⲧⲟⲥ
ϩⲱⲱⲥ • ⲙ̄ⲡⲉ ⲥϩⲱⲧⲣ̄ ⲙⲛ̄ ⲕⲉ ⲟⲩⲁ⳿ ϣⲁ ⲉⲛⲉϩ • Ⲉ ⲧⲃⲉ
ⲧϭⲓⲛⲥⲁϩⲱⲱϥ ⲇⲉ⳿ ⲉ ⲃⲟⲗ ⲙ̄ ⲡⲉⲓ ϩⲱⲃ • ⲙⲛ̄ ⲧⲉⲝⲟⲙⲟ‐
ⲗⲟⲅⲏⲥⲓⲥ ⲛ̄ ⲧⲉϥⲙⲉⲧⲁⲛⲟⲓⲁ • ⲉϫⲙ̄ ⲡⲉⲛ|ⲧ ⲁϥⲁⲁϥ • ⲙⲛ̄
ⲧⲙⲁⲓ̈ ϯϩⲁⲡ ⲛ̄ ⲇⲓⲕⲁⲓⲟⲛ ⲉϫⲙ̄ ⲡⲉϥϫⲡⲓⲟ̄ • ⲁϥⲙⲁⲧⲉ
ⲙ̄ ⲡⲉⲓ ⲧⲁⲉⲓⲟ̄ ⲛ̄ ⲧⲉⲓ ⲙⲓⲛⲉ⳿ ⲉ ⲧⲣⲉ ϩⲉⲛⲉⲣⲱⲟⲩ ϣⲱⲡⲉ⳿
ϩⲙ̄ ⲡⲉϥⲥⲡⲉⲣⲙⲁ • ϣⲁ ϩⲣⲁⲓ̄ ⲉ ⲡⲣ̄ⲣⲟ ⲛ̄ ⲛⲉⲣⲱⲟⲩ⳿ ⲡⲉⲭ︤ⲥ︥
ⲉⲛⲧⲁϥⲡⲓⲣⲉ⳿ ⲛⲁⲛ⳿ ⲉ ⲃⲟⲗ ⲛ̄ϩⲏⲧϥ̄ • ⲕⲁⲧⲁ ⲡϣⲁϫⲉ
ⲙ̄ ⲡⲥⲟⲫⲟⲥ • ⲡⲁⲩⲗⲟⲥ • Ⲙⲛ︦ⲛ︦ⲥⲱⲥ⳿ ⲡⲉϫⲁϥ • ⲁⲥⲙⲓⲥⲉ


### 0008

ⲛ̄ϭⲓ ⲑⲁⲙⲁⲣ ⲛ̄ϣⲏⲣⲉ ⲥⲛⲁⲩ ϩⲓ ⲟⲩⲥⲟⲡ • Ⲁ ⲡϣⲟⲣⲡ̄
ⲥⲟⲟⲩⲧⲛ̄ ⲉ ⲃⲟⲗ ⲛ̄ ⲧⲉϥϭⲓϫ • ⲁ ⲧⲙⲉⲥⲓⲱ̄ ⲙⲟⲩⲣ⳿ ⲉ ⲣⲟⲥ⳿
ⲛ̄ ⲟⲩϩⲱⲥ ⲛ̄ ⲕⲟⲕⲕⲟⲥ • ⲙⲛ︦ⲛ︦ⲥⲱⲥ⳿ ⲁϥⲥⲱⲕ⳿ | ⲛⲁϥ ⲛ̄
ⲧⲉϥϭⲓϫ ⲁ ⲡⲉϥⲥⲟⲛ⳿ ⲉⲓ ⲉ ⲃⲟⲗ • Ⲕⲁⲧⲁ ⲑⲉ ⲛ̄ⲧⲁϥϫⲟⲟⲥ
ⲛ̄ϭⲓ ⲡⲉⲩⲁⲅⲅⲉⲗⲓⲥⲧⲏⲥ ϫⲉ • ⲓ̄ⲟⲩⲇⲁⲥ ⲇⲉ ⲁϥϫⲡⲟ ⲙ̄
ⲫⲁⲣⲉⲥ • ⲙⲛ̄ ⲍⲁⲣⲁ ⲉ ⲃⲟⲗ ϩⲛ̄ ⲑⲁⲙⲁⲣ • ⲙⲁⲣⲛ̄ Ϫⲱⲧⲉ⳿
ⲉ ϩⲟⲩⲛ⳿ ⲉ ⲑⲓⲥⲧⲟⲣⲓⲁ⳿ ⲛ̄ ⲕⲉ ⲕⲟⲩⲓ̈ • ⲧⲁⲣⲉ ⲡϣⲁϫⲉ⳿
ⲙⲟⲟϣⲉ⳿ ⲉ ⲑⲏ • ⲛ̄ⲧⲛ̄ϯ ⲛ̄ ⲟⲩϫⲱⲕ ⲛ̄ ⲑⲓⲥⲧⲱⲣⲓⲁ̄ ϩⲓⲧⲛ̄
ⲛ̄ϣⲁϫⲉ ⲛ̄ϣⲡⲏⲣⲉ⳿ ⲙ̄ ⲡⲉⲩⲁⲅⲅⲉⲗⲓⲥⲧⲏⲥ • ⲙⲁⲑⲁⲓ̄ⲟⲥ • Ϫⲉ
ⲕ̇ⲁⲥ⳿ ⲉⲛⲛⲁⲉⲓⲙⲉ • ϫⲉ ⲡϩⲱⲃ ⲉⲧⲟⲩⲙⲉⲉⲩⲉ ⲉ ⲣⲟϥ • ϫⲉ
ⲟⲩⲥⲱϣ ⲡⲉ • ⲉϥⲟⲩⲟⲛϩ̄ ⲉ ⲃⲟⲗ • ϫⲉ ⲟⲩⲉⲟⲟⲩ ⲛ̄ ϩⲟⲩⲟ̄ ⲡⲉ •
Ⲛ̄ⲧⲁϥⲣ̄ ⲡⲙⲉⲉⲩⲉ | ⲅⲁⲣ ⲁⲛ⳿ ⲛ̄ ⲑⲁⲙⲁⲣ ⲙⲁⲩⲁⲁⲥ ⲙ̄‐
ⲙⲁⲧⲉ • ⲁϥϩⲱ̄ ⲉ ⲣⲟϥ • Ⲁⲗⲗⲁ⳿ ⲛ̄ ⲧⲉⲣⲉ ϥⲣ̄ ϩⲓⲑⲏ⳿ ⲛ̄ ⲟⲩ‐
ⲕⲟⲩⲓ̈ ⲙⲛ︦ⲛ︦ⲥⲁ ⲧⲁⲓ̄ • Ⲡⲉϫⲁϥ • ϫⲉ ⲫⲁⲣⲉⲥ ⲇⲉ⳿• ⲁϥϫⲡⲟ⳿
ⲛ̄ⲉⲥⲣⲱⲙ • Ⲉⲥⲣⲱⲙ ⲇⲉ • ⲁϥϫⲡⲟ⳿ ⲛ̄ⲁⲣⲁⲙ • Ⲁⲣⲁⲙ⳿
ⲇⲉ⳿ ⲁϥϫⲡⲟ⳿ ⲛ̄ⲁⲙⲓⲛⲁⲇⲁⲃ • Ⲁⲙⲓⲛⲁⲇⲁⲃ ⲇⲉ⳿ ⲁϥϫⲡⲟ
ⲛ̄ⲁⲁⲥⲥⲱⲛ • Ⲛⲁⲁⲥⲥⲱⲛ ⲇⲉ⳿ ⲁϥϫⲡⲟ⳿ ⲛ̄ ⲥⲁⲗⲙⲱⲛ •
Ⲥⲁⲗⲙⲱⲛ ⲇⲉ⳿ ⲁϥϫⲡⲟ • ⲛ̄ ⲃⲟⲉⲥ⳿ ⲉ ⲃⲟⲗ ϩⲛ̄ ϩⲣⲁⲭⲁⲃ:-
Ⲛⲁⲛⲟⲩⲥ ⲇⲉ⳿ ⲛⲁⲛ ⲉ ⲧⲣⲉ ⲛⲕⲧⲟⲛ ⲉϫⲙ̄ ⲡϣⲁϫⲉ ⲙ̄ ⲡⲉⲓ
ⲙⲁ • ⲛ̄|ⲉⲓⲙⲉ⳿• ϫⲉ ⲛⲓⲙ ⲡⲉ ϩⲣⲁⲭⲁⲁⲃ • ⲏ̄ ⲟⲩ ⲉ ⲃⲟⲗ
ⲧⲱⲛ ⲧⲉ • Ⲉⲛⲧⲟⲃⲧⲃ̄ ⲁⲛ⳿ ⲛ̄ ϩⲉⲛϣⲁϫⲉ • ⲉ ⲛⲉⲩⲉⲣⲏⲩ •
ⲁⲗⲗⲁ⳿ ⲉⲛⲟⲩⲏϩ⳿ ⲛ̄ⲥⲁ ⲛⲉⲅⲣⲁⲫⲏ⳿ ϩⲛ̄ ⲟⲩⲱ̄ⲣϫ̄ • Ⲛⲓⲙ⳿
ⲧⲉ ϩⲣⲁⲭⲁⲁⲃ • ⲉⲓ ⲙⲏ ⲧⲓ⳿ ϩⲣⲁⲁⲃ ⲧⲡⲟⲣⲛⲏ • ⲧⲁⲓ̄ ⲉⲛ‐
ⲧⲁⲥϣⲱⲡ ⲉ ⲣⲟⲥ ⲛ̄ ⲛ̄ϥⲁⲓ̄ϣⲓⲛⲉ ⲛ̄ ⲓ̄ⲏⲥⲟⲩ • ⲡϣⲏⲣⲉ ⲛ̄
ⲛⲁⲩⲏ • ⲛ̄ⲧⲁϥϫⲟⲟⲩ ⲥⲟⲩ ⲉ ⲙⲟⲩϣⲧ̄ ⲛ̄ ϩⲓⲉⲣⲓⲭⲱ •
Ⲙⲛ︦ⲛ︦ⲥⲁ ⲛ̄ ⲕⲉ ϣⲁϫⲉ ⲧⲏⲣⲟⲩ • ⲉⲛⲧⲁⲩϣⲱⲡⲉ ϩⲛ̄ ⲧⲉⲥ‐
ⲙⲏⲧⲉ⳿ ⲙⲛ̄ ⲛⲉⲣⲱⲙⲉ⳿ ⲉⲧ ⲙ̄ⲙⲁⲩ • ⲁⲥⲛⲁϩⲙⲟⲩ⳿ ⲉ
ⲧϭⲓϫ | ⲛ̄ ϩⲓⲉⲣⲓⲭⲱ̄ • Ⲁⲩⲱ ⲡⲉϫⲁⲥ ⲛⲁⲩ • ϫⲉ ⲛ̄ⲑⲉ
ⲛ̄ⲧ ⲁⲓ̄ⲉⲓⲣⲉ ⲛⲙ̄ⲙⲏⲧⲛ̄ ⲙ̄ ⲡⲉⲓ ⲁⲅⲁⲑⲟⲛ • ⲁⲓ̄ⲧⲟⲩϫⲉ⳿
ⲧⲏⲩⲧⲛ̄ • ⲛ̄ⲧⲱⲧⲛ̄ ϩⲱⲧ ⲧⲏⲩⲧⲛ̄ • ⲉⲧⲉⲧⲛ̄ⲁⲱ̄ⲣⲕ̄ ⲛⲁⲓ̄ • ⲉ
ⲧⲣⲉ ⲧⲉⲧⲛ̄ⲧⲁⲛϩⲟⲓ̄ • ⲙⲛ̄ ⲡⲏⲓ̄ ⲙ̄ ⲡⲁ ⲉⲓⲱⲧ • Ⲛ̄ⲧⲟⲟⲩ ⲇⲉ
ⲁⲩⲱ̄ⲣⲕ • ⲉ ⲁⲩϯ ⲛ̄ ⲟⲩⲙⲁⲉⲓⲛ ⲛⲁⲥ ⲉ ⲧⲣⲉ ⲥⲙⲟⲩⲣ⳿ ⲛ̄
ⲟⲩⲕⲟⲕⲕⲟⲥ⳿ ⲉ ⲛⲉⲥϣⲟⲩϣⲧ̄ ⲛ̄ⲧⲁⲥⲟⲩⲟⲧⲃⲟⲩ ⲉ ⲃⲟⲗ ⲛ̄-
ϩⲏⲧϥ̄ • ϫⲉ ⲛⲉⲣⲉ ⲡⲉⲥⲏⲓ̄ ϩⲓϫⲛ̄ ⲡⲥⲟⲃⲧ̄ • Ⲁⲛⲁⲩ • ⲱ̄ ⲡⲉⲧ‐


### 0009

ⲥⲱⲧⲙ̄ • ϫⲉ ⲉⲣⲉ ⲛⲉⲓ ϣⲁϫⲉ⳿ ⲥⲩⲙⲫⲱⲛⲉⲓ̄ ⲙⲛ̄ ⲛⲉⲩⲉⲣⲏⲩ
ⲛ̄ ⲁϣ ⲛ̄ ϩⲉ :-Ϩⲣⲁⲁⲃ • ⲛⲉ ⲟⲩⲡⲟⲣ|ⲛⲏ̄ ⲧⲉ • ⲉⲥϣⲱⲡ ⲉ
ⲣⲟⲥ⳿ ⲛ̄ ⲟⲩⲟⲛ ⲛⲓⲙ • Ⲑⲁⲙⲁⲣ ϩⲱⲱⲥ ⲛ̄ⲧⲁⲥϫⲓ ⲛⲁⲥ ⲛ̄
ⲟⲩⲥⲭⲏⲙⲁ̄ ⲙ̄ ⲡⲟⲣⲛⲏ̄ • Ϩⲣⲁⲁⲃ • ϩⲟⲙⲟⲓ̈ⲱⲥ • ⲛ̄ⲧⲁⲥ‐
ⲙⲟⲩⲣ⳿ ⲛ̄ ⲟⲩⲕⲟⲕⲕⲟⲥ⳿ ⲉ ⲡⲉⲥϣⲟⲩϣⲧ̄ • ⲁϥϣⲱⲡⲉ ⲛⲁⲥ
ⲙ̄ ⲫⲩⲗⲁⲅⲙⲁⲧⲁ • ⲑⲁⲙⲁⲣ Ϩⲱⲱⲥ⳿ ⲛ̄ⲧⲁⲥⲙⲟⲩⲣ ⲛ̄
ⲟⲩϩⲱⲥ ⲛ̄ ⲕⲟⲕⲕⲟⲥ⳿ ⲉ ⲧϭⲓϫ ⲙ̄ ⲡⲉⲥϣⲏⲣⲉ • Ⲙⲛ︦ⲛ︦ⲥⲁ
ⲧⲣⲉⲩϫⲓ ⲛ̄ ⲧⲡⲟⲗⲓⲥ ⲇⲉ⳿• ⲁⲩⲧⲁⲕⲟⲥ • ⲁⲩϩⲁⲣⲉϩ ⲉ ⲡⲏⲓ̈
ⲛ̄ ϩⲣⲁⲁⲃ • ⲉϥⲟⲩⲟϫ • ⲁⲩⲱ̄ ⲛ̄ⲧⲟⲥ⳿ ⲁⲥⲱⲡ⳿ ⲉ ⲡⲓⲏ︦ⲗ︦ ϣⲁ
ϩⲣⲁⲓ̄ ⲉ|ⲡⲟⲟⲩ ⲛ̄ ϩⲟⲟⲩ • Ⲧⲁⲓ̈ ⲧⲉ ⲧⲡⲟⲣⲛⲏ ⲛ̄ⲧⲁ ⲥⲁⲗⲙⲱⲛ
ϫⲓⲧⲥ̄ ⲛⲁϥ ⲛ̄ ⲥϩⲓⲙⲉ • ⲁϥϫⲡⲟ̄ ⲛ̄ ⲃⲟⲉⲥ⳿ ⲉ ⲃⲟⲗ ⲛ̄ϩⲏⲧⲥ̄ •
Ⲙⲛ︦ⲛ︦ⲥⲱⲥ⳿ ⲡⲉϫⲁϥ • ϫⲉ ⲃⲟⲉⲥ ⲇⲉ • ⲁϥϫⲡⲟ⳿ ⲛ̄ ⲓⲱⲃⲏⲇ
ⲉ ⲃⲟⲗ ϩⲛ̄ ϩⲣⲟⲩⲑ • Ⲱ̄ ⲛⲉⲓ ϩⲃⲏⲩⲉ ⲛ̄ϣⲡⲏⲣⲉ ⲁⲗⲏⲑⲱⲥ •
ⲛ̄ⲣⲉϥⲣ̄ⲛⲟⲃⲉ ⲙ̄ ⲡⲕⲁϩ • ⲛ̄ⲧⲟⲟⲩ ⲛⲉⲛⲁⲛϫⲱϫ ⲛ̄ ⲧⲉ‐
ⲅⲣⲁⲫⲏ • ⲙⲁⲣⲛ̄ⲉⲓⲙⲉ ⲇⲉ⳿ ⲟⲛ ⲙ̄ ⲡⲉⲓ ⲙⲁ • ϫⲉ ⲛⲓⲙ⳿
ⲧⲉ ϩⲣⲟⲩⲑ • ϩⲣⲟⲩⲑ⳿ ⲅⲁⲣ⳿ ⲛ̄ⲟⲩ ⲉ ⲃⲟⲗ ⲁⲛ⳿ ⲧⲉ⳿ ϩⲙ̄
ⲡⲓ︦ⲏ︦ⲗ︦ ⲁⲗⲗⲁ⳿ ⲟⲩ ⲉ ⲃⲟⲗ ⲧⲉ⳿ ϩⲛ̄ ⲛⲉϣⲏⲣⲉ ⲙ̄ ⲙⲱⲁⲃ : |
Ⲙⲱⲁⲃ ⲇⲉ⳿ ⲡⲉ ⲡϣⲟⲣⲡ̄ ⲛ̄ ϣⲏⲣⲉ ⲛ̄ ⲗⲱⲧ • ⲛ̄ⲧⲁϥϫⲡⲟϥ⳿
ⲉ ⲃⲟⲗ ϩⲛ̄ ⲧⲉϥϣⲉⲉⲣⲉ • ⲙ̄ⲙⲓⲛ ⲙ̄ⲙⲟϥ • ⲟⲩ ⲉ ⲃⲟⲗ ⲡⲉ⳿
ϩⲙ̄ ⲡⲉⲥⲡⲉⲣⲙⲁ̄ ⲛ̄ ⲥⲟⲇⲟⲙⲁ⳿ ⲉ ⲧⲃⲉ ⲧⲉϥⲙⲁⲁⲩ • ⲉⲧⲉ
ⲧⲁⲓ̄ ⲧⲉ ⲧⲉⲥϩⲓⲙⲉ ⲛ̄ ⲗⲱⲧ • Ⲧⲥⲱⲧⲙ̄ ⲅⲁⲣ⳿ ⲉ ⲧⲉⲅⲣⲁⲫⲏ⳿
ⲉⲥϫⲱ ⲙ̄ⲙⲟⲥ ϩⲛ̄ ⲟⲩϣⲱⲱⲧ⳿ ⲉ ⲃⲟⲗ • ϫⲉ ⲛ̄ⲛⲉ ⲙⲱⲁⲃⲓⲧⲏⲥ
ⲉϣⲃⲱⲕ⳿ ⲉ ϩⲟⲩⲛ⳿ ⲉ ⲡⲏⲓ̄ ⲙ̄ ⲡⲛⲟⲩⲧⲉ • ⲟⲩⲇⲉ ⲁⲙⲙⲁ‐
ⲛⲓⲧⲏⲥ • Ⲁⲩⲱ̄ ϩⲣⲟⲩⲑ ϩⲱⲱⲥ⳿ ⲟⲩⲙⲱⲁⲃⲓⲧⲏⲥ ⲧⲉ • ⲁⲥ‐
ⲙⲁⲧⲉ⳿ ⲙ̄ ⲡⲉⲓ ⲛⲟϭ ⲛ̄ ⲧⲁⲉⲓⲟ⳿ ⲛ̄ ⲧⲉⲓ ⲙⲓ̈ⲛⲉ • ⲉ ⲧⲣⲉ
ⲡⲉ|ⲭ︦ⲥ︦ ⲉⲓ ⲉ ⲃⲟⲗ ϩⲙ̄ ⲡⲉⲥⲥⲡⲉⲣⲙⲁ • Ⲁⲗⲏⲑⲱⲥ •
ϩⲉⲛⲑⲉⲱ̄ⲣⲓⲁ⳿ ⲛⲉ ⲛⲁⲓ̈ ⲉⲩϫⲓ⳿ ⲉ ϩⲟⲩⲛ⳿ ⲉ ⲡⲉⲛⲱⲛϩ̄ •
ⲙ̄ⲡⲉ ϥϩⲱ ⲇⲉ⳿ ⲟⲛ⳿ ⲉ ⲣⲟϥ ⲉ ⲡⲁⲓ̄ ⲛ̄ϭⲓ ⲡⲉⲩⲁⲅⲅⲉⲗⲓⲥⲧⲏⲥ
ⲙⲁⲑⲁⲓ̈ⲟⲥ • Ⲁⲗⲗⲁ⳿ ⲁϥⲟⲩⲱϩ⳿ ⲟⲛ⳿ ⲉ ⲧⲟⲟⲧϥ̄ • ⲛ̄ⲥⲁ ⲑⲏ⳿•
ⲉϥϫⲱ ⲙ̄ⲙⲟⲥ ϫⲉ ⲓⲱⲃⲏⲇ ⲇⲉ • ⲁϥϫⲡⲟ⳿ ⲛ̄ ⲓ̄ⲉⲥⲥⲁⲓ̄ •
ⲒⲈⲥⲥⲁⲓ̄ ⲇⲉ ⲁϥϫⲡⲟ ⲛ̄ ⲇⲁⲩⲉⲓⲇ • ⲇⲁⲩⲉⲓⲇ ⲇⲉ ⲁϥϫⲡⲟ
ⲛ̄ ⲥⲟⲗⲟⲙⲱⲛ⳿ ⲉ ⲃⲟⲗ ϩⲛ̄ ⲑⲓⲙⲉ⳿ ⲛ̄ ⲟⲩⲣⲓⲁⲥ • Ⲛⲓⲙ ϭⲉ⳿
ⲧⲉ ⲧⲁⲓ̈ • ⲉⲓ ⲙⲏ ⲧⲓ⳿ ⲃⲉⲣⲥⲁⲃⲉⲉ⳿ • ⲁⲗⲗⲁ⳿ ⲉ ⲃⲟⲗ ϫⲉ ⲡⲣⲁⲛ⳿
ⲛ̄ ⲃⲉⲣⲥⲁⲃⲉ⳿ ⲟⲩⲟ̄ⲛϩ̄ ⲉ ⲃⲟⲗ ⲁⲛ⳿ ⲛ̄ | ⲣⲱⲙⲉ ⲛⲓⲙ⳿ • Ⲉ ⲧⲃⲉ


### 0010

ⲡⲁⲓ̄ ⲁϥϫⲟⲟⲥ • ϫⲉ ⲑⲓⲙⲉ ⲛ̄ ⲟⲩⲣⲓⲁⲥ • ⲁⲩⲱ̄ ⲡⲉⲥ ⲕⲉ
ⲣⲁⲛ⳿ ⲙ̄ ⲡⲉϥⲣ̄ ⲡⲉϥⲙⲉⲉⲩⲉ • ⲁⲗⲗⲁ ⲧⲁⲓ̄ⲧⲓⲁ⳿ ⲙ̄ⲙⲁⲧⲉ •
ⲧⲉ ⲛⲧⲁϥⲟⲩⲟⲛϩⲥ̄ ⲉ ⲃⲟⲗ • ⲇⲁⲩⲉⲓⲇ • ⲡⲉϫⲁϥ • ⲁϥϫⲡⲟ
ⲛ̄ ⲥⲟⲗⲟⲙⲱⲛ⳿ ⲉ ⲃⲟⲗ ϩⲛ̄ ⲑⲓⲙⲉ⳿ ⲛ̄ ⲟⲩⲣⲓⲁⲥ • Ⲥⲟⲗⲟⲙⲱⲛ
ⲇⲉ⳿ ⲁϥϫⲡⲟ⳿ ⲛ̄ ϩⲣⲟⲃⲟⲁⲙ • Ϩⲣⲟⲃⲟⲁⲙ⳿ ⲇⲉ⳿ ⲁϥϫⲡⲟ⳿
ⲛ ⲁⲃⲓⲁⲥ • Ⲁⲃⲓⲁⲥ ⲇⲉ • ⲁϥϫⲡⲟ ⲛ ⲁⲥⲁⲫ • Ⲁⲥⲁⲫ ⲇⲉ •
ⲁϥϫⲡⲟ⳿ ⲛ̄ ⲓ̄ⲱⲥⲁⲫⲁⲧ • Ⲓ̈ⲱⲥⲁⲫⲁⲧ ⲇⲉ⳿ ⲁϥϫⲡⲟ⳿ ⲛ̄ ⲓ̄ⲱⲣⲁⲙ •
Ⲓ︦ⲱ|ⲣⲁⲙ ⲇⲉ • ⲁϥϫⲡⲟ⳿ ⲛ̄ ⲟ̄ⲍⲓⲁⲥ • ⲟ̄ⲍⲓⲁⲥ ⲇⲉ • ⲁϥϫⲡⲟ ⲛ̄
ⲓ̄ⲱⲁⲑⲁⲙ • Ⲓ̈ⲱⲁⲑⲁⲙ ⲇⲉ⳿ ⲁϥϫⲡⲟ⳿ ⲛ̄ ⲁⲭⲁⲍ • Ⲁⲭⲁⲍ
ⲇⲉ • ⲁϥϫⲡⲟ ⲛ̄ ⲉⲍⲉⲕⲓⲁⲥ • Ⲉⲍⲉⲕⲓⲁⲥ ⲇⲉ • ⲁϥϫⲡⲟ ⲙ̄
ⲙⲁⲛⲁⲥⲥⲏ • Ⲙⲁⲛⲁⲥⲥⲏ ⲇⲉ• ⲁϥϫⲡⲟ⳿ ⲛ̄ ϩⲁⲙⲱⲥ • Ϩⲁⲙⲱⲥ
ⲇⲉ⳿ ⲁϥϫⲡⲟ⳿ ⲛ̄ ⲓ̄ⲱⲥⲓⲁⲥ • ⲓ̄ⲱⲥⲓⲁⲥ ⲇⲉ⳿ ⲁϥϫⲡⲟ ⲛ̄ ⲓ̄ⲉⲭⲱ‐
ⲛⲓⲁⲥ⳿ ⲙⲛ̄ ⲛⲉϥⲥⲛⲏⲩ ϩⲓ ⲡⲡⲱⲱⲛⲉ⳿ ⲉ ⲃⲟⲗ ⲛ̄ ⲧⲃⲁⲃⲩⲗⲱⲛ •
Ⲙⲛ︦ⲛ︦ⲥⲁ ⲡⲡⲱⲱ̄ⲛⲉ ⲇⲉ⳿ ⲉ ⲃⲟⲗ ⲛ̄ ⲧⲃⲁⲃⲩⲗⲱⲛ • Ⲓ̈Ⲉⲭⲟⲛⲓⲁⲥ •
ⲁϥϫⲡⲟ⳿ ⲛ̄ ⲍⲁⲗⲁ|ⲑⲓⲏⲗ • ⲝⲁⲗⲁⲑⲓⲏⲗ ⲇⲉ⳿ ⲁϥϫⲡⲟ⳿ ⲛ̄
ⲍⲟⲣⲟⲃⲁⲃⲉⲗ • Ⲥⲟⲣⲟⲃⲁⲃⲉⲗ ⲇⲉ⳿ ⲁϥϫⲡⲟ⳿ ⲛ̄ ⲁⲃⲓⲟⲩⲇ •
Ⲁⲃⲓⲟⲩⲇ ⲇⲉ⳿ ⲁϥϫⲡⲟ⳿ ⲛ ⲉⲗⲉⲁⲕⲓⲙ • Ⲉⲗⲉⲁⲕⲓⲙ⳿ ⲇⲉ
ⲁϥϫⲡⲟ⳿ ⲛ̄ ⲁⲍⲱⲣⲁ • Ⲁⲍⲱⲣⲁⲥ ⲇⲉ• ⲁϥϫⲡⲟ⳿ ⲛ̄ ⲥⲁⲇⲱⲕ •
ⲝⲁⲇⲱⲕ ⲇⲉ⳿ ⲁϥϫⲡⲟ⳿ ⲛ̄ ⲁⲭⲓⲙ • Ⲁⲭⲓⲙ ⲇⲉ⳿ ⲁϥϫⲡⲟ
ⲛ̄ ⲉⲗⲓⲟⲩⲇ • Ⲉⲗⲓⲟⲩⲇ ⲇⲉ⳿ ⲁϥϫⲡⲟ⳿ ⲛ̄ ⲉⲗⲉⲁⲍⲁⲣ •
Ⲉⲗⲉⲁⲍⲁⲣ⳿ ⲇⲉ⳿ ⲁϥϫⲡⲟ ⲙ̄ ⲙⲁⲑⲁⲛ • Ⲙⲁⲑⲁⲛ ⲇⲉ
ⲁϥϫⲡⲟ⳿ ⲛ̄ ⲓ̄ⲁⲕⲱⲃ • Ⲓⲁⲕⲱⲃ ⲇⲉ • ⲁϥϫⲡⲟ⳿ ⲛ̄ ⲓⲱⲥⲏⲫ
ⲡϩⲁⲓ̄ ⲙ̄ ⲙⲁⲣⲓⲁ • ⲧⲁⲓ̄ ⲛ̄ⲧⲁⲩϫⲡⲉ ⲡⲉⲭ︦ⲥ︦ ⲓ︦ⲥ︦ ⲉ ⲃⲟⲗ ⲛ̄‐
ϩⲏⲧⲥ̄ :-| Ⲅⲉⲛⲉⲁ⳿ ϭⲉ⳿ ⲛⲓⲙ ϫⲓⲛ ⲁⲃⲣⲁϩⲁⲙ⳿ ϣⲁ ϩⲣⲁⲓ̄
ⲇⲁⲩⲉⲓⲇ ⲙⲛ̄ⲧⲁϥⲧⲉ ⲛ̄ⲅⲉⲛⲉⲁ⳿• Ⲁⲩⲱ̄ ϫⲓⲛ ⲇⲁⲩⲉⲓⲇ •
ϣⲁ ϩⲣⲁⲓ̄ ⲉ ⲡⲡⲱⲱⲛⲉ⳿ ⲉ ⲃⲟⲗ ⲛ̄ ⲧⲃⲁⲃⲩⲗⲱⲛ • ⲙⲛ̄ⲧⲁϥⲧⲉ
ⲛ̄ⲅⲉⲛⲉⲁ • Ⲁⲕⲛⲁⲩ⳿ ⲉ ⲡϣⲁϫⲉ • ϫⲉ ⲛ̄ⲧⲁϥⲕⲁⲧⲁⲛⲧⲁ⳿
ⲉⲩϫⲱⲕ ⲉ ⲃⲟⲗ ⲛ̄ ⲁϣ ⲛ̄ ϩⲉ • Ϩⲙⲉ⳿ ⲥⲛⲟⲟⲩⲥⲉ ⲛ̄ⲅⲉⲛⲉⲁ⳿
ⲛⲉ • ϫⲓⲛ ⲁⲃⲣⲁϩⲁⲙ ϣⲁ ϩⲣⲁⲓ̄ ⲉ ⲡⲉⲭ︦ⲥ︦ • ⲁⲩⲱ̄ ϩⲛ̄ ⲛⲉⲓ
ⲅⲉⲛⲉⲁ ⲧⲏⲣⲟⲩ • ⲛ̄ⲧⲁⲩϣⲱⲡⲉ • ⲙ̄ⲡⲉ ⲡⲉⲩⲁⲅⲅⲉⲗⲓⲥⲧⲏⲥ
ⲣ̄ ⲡⲙⲉⲉⲩⲉ ⲛ̄ ⲗⲁⲁⲩ ⲛ̄ ⲥϩⲓⲙⲉ • ⲉⲓ ⲙⲏ ⲧⲓ⳿ | ⲧⲉⲓ ϥⲧⲟ⳿ ⲛ̄
ⲥϩⲓⲙⲉ⳿ ⲛ̄ⲧⲁⲛⲟⲩⲟⲛϩⲟⲩ ⲉ ⲃⲟⲗ • ⲉⲧⲉ ⲛⲁⲓ̄ ⲛⲉ ⲑⲁⲙⲁⲣ •
ⲙⲛ̄ ϩⲣⲁⲁⲃ • ⲙⲛ̄ ϩⲣⲟⲩⲑ • ⲙⲛ̄ ⲃⲉⲣⲥⲁⲃⲉⲉ • Ⲁⲩⲱ̄
ⲛ̄ⲧⲁϥⲣ̄ ⲡⲉⲩⲙⲉⲉⲩⲉ⳿ ⲁⲛ⳿ ⲉ ⲧⲃⲉ ⲟⲩϩⲱⲃ ⲙ̄ ⲙⲛ︦ⲧ︦ⲣⲉϥ‐


### 0011

ϣⲙ̄ϣⲉ ⲛⲟⲩⲧⲉ • ⲁⲗⲗⲁ⳿ ⲉ ⲧⲃⲉ ⲛⲁⲓ̄ⲧⲓⲁ ⲛ̄ⲧ ⲁⲛϫⲟⲟⲩ ⲛ̄
ϣⲟⲣⲡ̄ • Ⲑⲁⲙⲁⲣ ⲇⲉ⳿ ⲟⲩ ⲉ ⲃⲟⲗ ⲧⲉ⳿ ϩⲛ̄ ⲛⲉⲫⲩⲗⲓⲥⲧⲓⲉⲓⲙ •
ⲛⲥ̄ⲥⲟⲟⲩⲛ ⲁⲛ ⲙ̄ ⲡⲛⲟⲩⲧⲉ • Ⲓⲟⲩⲇⲁⲥ⳿ ϩⲱⲱⲥ⳿ ⲡⲉⲛⲧ ⲁϥ‐
ϣⲱⲡⲉ⳿ ⲛⲙ̄ⲙⲁⲥ ϩⲱⲥ ⲡⲟⲣⲛⲏ⳿ ⲁⲥⲱ̄ ⲉ ⲃⲟⲗ ⲛ̄ϩⲏⲧϥ̄ •
ⲟⲩ ⲉ ⲃⲟⲗ ⲡⲉ⳿ ϩⲙ̄ ⲡⲉⲥⲡⲉⲣⲙⲁ⳿ ⲛ̄ ⲁⲃⲣⲁϩⲁⲙ | ⲡⲉⲧ
ⲥⲙⲁⲙⲁⲁⲧ • ϩⲣⲁⲁⲃ⳿ ϩⲟⲙⲟⲓⲱⲥ⳿ ⲟⲩ ⲉ ⲃⲟⲗ ⲧⲉ⳿ ϩⲛ̄
ⲛⲁⲗⲗⲟⲫⲩⲗⲟⲥ • ⲡⲅⲉⲛⲟⲥ ⲛ̄ ϩⲓⲉⲣⲓⲭⲱ • ⲁⲩⲱ̄ ⲉⲥⲧⲥ̄ⲧⲏⲩ
ⲉ ⲃⲟⲗ ⲉ ⲧⲃⲉ ⲛⲉⲥⲛⲟⲃⲉ • Ⲥⲁⲗⲙⲱⲛ ⲇⲉ⳿ ⲡⲉⲛⲧ ⲁϥϣⲱⲛϥ̄
ⲛⲙ̄ⲙⲁⲥ⳿ ⲁϥϫⲡⲟ⳿ ⲛ̄ ⲃⲟⲉⲥ⳿ ⲉ ⲃⲟⲗ ⲛ̄ϩⲏⲧⲥ̄ ⲉⲩ ⲉ ⲃⲟⲗ
ⲡⲉ⳿ ϩⲛ̄ ⲧⲉⲫⲩⲗⲏ ⲛ̄ ⲓ̄ⲟⲩⲇⲁ :-Ϩⲣⲟⲩⲑ ⲇⲉ⳿ ⲟⲩ ⲉ ⲃⲟⲗ
ⲧⲉ⳿ ϩⲛ̄ ⲙ̄ⲙⲱⲁⲃⲓⲧⲏⲥ • ⲙⲛ̄ ⲛ̄ ⲥⲱⲇⲱⲙⲓⲧⲏⲥ⳿ ⲉⲧ ⲥⲏϣ •
ⲂⲞⲉⲥ⳿ ϩⲱⲱϥ • ⲟⲩ ⲉ ⲃⲟⲗ ⲡⲉ⳿ ϩⲛ̄ ⲧⲉⲫⲩⲗⲏ ⲙ̄ ⲡⲓ︦ⲏ︦︦ⲗ︦
ⲁⲩⲱ̄ ⲟⲩ ⲉ ⲃⲟⲗ ϩⲛ̄ ⲧⲉⲫⲩⲗⲏ⳿ ⲛ̄ ⲟⲩⲱⲧ ⲡⲉ⳿ ⲛ̄ⲧⲉ
ⲓ̄ⲟⲩⲇⲁ ⁖- | ⲂⲈⲣⲥⲁⲃⲉⲉ⳿ ⲇⲉ⳿ ⲟⲛ⳿ ⲟⲩ ⲉ ⲃⲟⲗ ⲧⲉ⳿• ϩⲛ̄
ⲛ̄ϣⲏⲣⲉ ⲛ̄ ⲭⲉⲧ⳿ ⲛⲁⲓ̄ ⲛ̄ⲧⲁⲩⲥⲧⲟⲟⲩ ⲉ ⲃⲟⲗ ϩⲓⲧⲙ̄
ⲡⲛⲟⲩⲧⲉ :-ⲇⲁⲩⲉⲓⲇ ⲇⲉ ϩⲱⲱϥ⳿ ⲟⲩ ⲉ ⲃⲟⲗ ⲡⲉ⳿ ϩⲙ̄
ⲡⲁⲝⲓⲱ̄ⲙⲁ⳿ ⲛ̄ ⲧⲙⲛ̄ⲧⲉⲣⲟ • ⲁⲩⲱ̄ ⲉ ⲃⲟⲗ ϩⲛ̄ ⲧⲉⲫⲩⲗⲏ⳿
ⲛ̄ ⲓ̄ⲟⲩⲇⲁ⳿ • ⲕⲁⲧⲁ ⲧϭⲓⲛϣⲁϫⲉ⳿ ⲙ̄ ⲡⲕⲁⲧⲁⲗⲟⲅⲟⲥ • ⲙ̄
ⲡϩⲁⲅⲓⲟⲥ⳿ ⲛ̄ⲉⲩⲁⲅⲅⲉⲗⲓⲥⲧⲏⲥ • ⲙⲁⲑⲑⲁⲓ̄ⲟⲥ • Ⲛⲁⲓ̄ ⲙⲉⲛ⳿
ⲛ̄ⲧⲁⲩϣⲱⲡⲉ⳿ ⲛ̄ ⲧⲉⲓ ϩⲉ • ϫⲉ ⲕⲁⲥ⳿ ⲛ̄ⲛⲉⲩϫⲓ ⲃⲟⲧⲉ⳿ ⲛ̄ϭⲓ
ⲛ̄ⲇⲓⲕⲁⲓ̄ⲟⲥ⳿ ⲉⲛⲉⲣⲉϥⲣ̄ⲛⲟⲃⲉ • Ⲁⲩⲱ̄ ⲛⲉⲛⲧ ⲁⲩϫⲡⲟⲟⲩ ⲉ
ⲃⲟⲗ ϩⲛ̄ ⲛ̄ⲉⲓⲟⲧⲉ⳿ ⲛ̄ ⲥⲩⲙⲛⲟⲛ⳿ ⲁⲩⲱ̄ ⲛ̄ⲇⲓⲕⲁⲓ̄ⲟⲥ ⲙⲛ̄
ⲡϣⲱⲛϥ̄ ⲉⲧ ⲥⲙⲟⲛⲧ̄ • ⲛ̄|ⲛⲉⲩϫⲓ ⲃⲟⲧⲉ⳿ ⲉⲛⲉ ⲛ̄ⲧⲁⲩϫⲡⲟⲟⲩ⳿
ⲉ ⲃⲟⲗ ϩⲛ̄ ϩⲉⲛϩⲓⲟ̄ⲙⲉ ⲛ ⲁⲧ ϣⲁⲩ • ⲙⲛ̄ ϩⲉⲛⲅⲁⲙⲟⲥ⳿
ⲉⲩⲥⲙⲟⲛ̄ⲧ ⲁⲛ⳿ • ⲛⲁⲓ̄ ⲛ̄ⲧⲁⲩⲉⲓⲁ⳿ ⲧⲟⲟⲧⲟⲩ⳿ ⲛ̄ ⲥⲱⲟⲩ ⲙ̄ⲙⲓⲛ
ⲙ̄ⲙⲟⲟⲩ • Ⲁⲩⲱ̄ ϩⲁϩ ⲛ̄ ⲥⲟⲡ⳿ ⲛⲉⲩⲡⲱⲣϫ̄ ⲙ̄ⲙⲟⲟⲩ ⲉ
ⲃⲟⲗ ⲛ̄ⲛⲉⲧ ϣⲟⲟⲡ ϩⲙ̄ ⲡⲥⲃ̄ⲃⲉ • ⲙⲛ̄ ⲛⲉⲧ ϣⲟⲟⲡ ⲉ ⲃⲟⲗ
ϩⲙ̄ ⲡⲉⲥⲡⲉⲣⲙⲁ⳿ ⲛ̄ ⲁⲃⲣⲁϩⲁⲙ • Ⲁⲩⲱ̄ ϫⲉ ⲕⲁⲥ ⲉⲣⲉ
ⲡϩⲱⲃ ⲟⲩⲱ̄ⲛϩ̄ ⲉ ⲃⲟⲗ ⲛ̄ ⲟⲩⲟⲛ ⲛⲓⲙ ϫⲉ ⲉ ⲧⲃⲉ ⲡⲁⲓ̄
ⲙⲛ̄ ⲕⲉ ⲙⲏⲏ̄ϣⲉ ⲛ̄ϩⲱⲃ ⲛ̄ⲁⲅⲁⲑⲟⲛ⳿ ⲛ̄ⲧⲁⲩϫⲡⲉ⳿ ⲡⲉⲭ︦ⲥ︦ •
ⲉ ⲃⲟⲗ ϩⲛ̄ ϩⲉⲛϩⲓⲟ̄ⲙⲉ⳿ ⲛ̄ ⲧⲉⲓ ⲙⲓⲛⲉ • | Ⲁⲩⲱ ϫⲉ ⲕⲁⲥ⳿
ⲛⲉⲛⲧ ⲁⲩϫⲡⲟⲟⲩ⳿ ⲉ ⲃⲟⲗ ϩⲙ̄ ⲡⲛⲟⲃⲉ • ⲙⲛ̄ ⲛⲉⲛⲧ ⲁⲩϫ‐
ⲡⲟⲟⲩ⳿ ⲉ ⲃⲟⲗ ϩⲛ̄ ⲧⲇⲓⲕⲁⲓⲟⲥⲩⲛⲏ⳿ ⲉⲩⲉⲙⲟⲩⲣ⳿ ⲉ ϩⲟⲩⲛ
ⲉ ⲛⲉⲩⲉⲣⲏⲩ⳿ ϩⲛ̄ ⲟⲩⲙⲛ̄ⲧⲟⲩⲁ⳿• ⲛ̄ ⲟⲩⲱⲧ • ⲛ̄ⲥⲉϣⲱⲡⲉ⳿


### 0012

ⲧⲏⲣⲟⲩ • ⲉⲩⲉⲛⲧⲁⲩ ⲙ̄ⲙⲁⲩ ⲛ̄ ϩⲉⲛϩⲉⲗⲡⲓⲥ⳿ ⲉⲛⲁⲛⲟⲩⲟⲩ •
ⲉ ⲃⲟⲗ ϫⲉ ⲛ̄ⲧⲁϥⲉⲓ ⲉ ⲥⲱⲟⲩϩ ⲉ ϩⲟⲩⲛ⳿ ⲛ̄ ⲛⲉⲧ ϫⲟⲟⲣⲉ
ⲉ ⲃⲟⲗ • ⲙⲛ̄ ⲛⲉⲛⲧ ⲁⲩⲉⲓⲁ⳿ ⲧⲟⲟⲧⲟⲩ⳿ ⲛ̄ ⲥⲱⲟⲩ ⲙ̄ⲙⲓⲛ
ⲙ̄ⲙⲟⲟⲩ • Ⲁⲩⲱ̄ ⲛ̄ⲥⲉϫⲡⲟϥ ⲉ ⲃⲟⲗ ϩⲛ̄ ⲟⲩⲡⲁⲣⲑⲉⲛⲟⲥ⳿
ⲙⲁⲩⲁⲁⲥ • ⲧⲁⲓ̄ ⲛ̄ⲧⲁⲥϫⲡⲟϥ⳿ ⲉ ⲃⲟⲗ ϩⲙ̄ ⲡⲉⲥ|ⲡⲉⲣⲙⲁ⳿
ⲛ̄ ⲅⲉⲛⲟⲥ⳿ ⲥⲛⲁⲩ • ⲉⲩⲙⲏⲣ⳿ ⲉ ϩⲟⲩⲛ⳿ ⲉ ⲛⲉⲩⲉⲣⲏⲩ • Ⲉⲧⲉ
ⲡⲅⲉⲛⲟⲥ ⲡⲉ⳿ ⲛ ⲉⲩⲥⲉⲃⲏⲥ • ⲁⲩⲱ̄ ⲡⲅⲉⲛⲟⲥ ⲛ̄ ⲁⲥⲉⲃⲏⲥ •
Ⲛⲁⲓ̄ ⲙⲉⲛ⳿ ⲛ̄ⲧⲁⲩⲉⲓ⳿ⲁ⳿ ⲧⲟⲟ̄ⲧⲟⲩ ⲛ̄ⲥⲱⲟⲩ • ⲙ̄ ⲡⲉⲓ ⲟⲩⲟ̄ⲉⲓϣ •
ⲉ ⲁⲩⲟⲩϫⲁⲓ̄ ϩⲓⲧⲛ̄ ⲟⲩⲛⲁ • ⲛⲉ ⲉ ⲃⲟⲗ ⲇⲉ̄ ⲟⲛ⳿ ϩⲓⲧⲙ̄
ⲡⲉⲥⲡⲉⲣⲙⲁ⳿ ⲛ̄ ⲧⲇⲓⲕⲁⲓⲟ̄ⲥⲩⲛⲏ • ⲛⲁⲓ̄ ⲉⲧ ⲟⲩⲧⲱⲕ ⲙ̄ⲙⲟⲟⲩ⳿
ⲉ ϩⲟⲩⲛ⳿ ⲉ ⲧϫⲟ⳿• ϩⲓⲧⲙ̄ ⲡⲕⲱⲧ ⲙ̄ ⲡ︦ⲛ︦ⲓ︦ⲏ︦ⲟ︦ⲛ︦• ⲙⲛ̄ ⲛ̄ⲕⲟⲟⲩⲉ⳿
ⲧⲏⲣⲟⲩ ϩⲓⲧⲙ̄ ⲡⲱⲛⲉ⳿ ⲛ̄ ⲕⲟⲟϩ • ⲁⲩⲱ̄ ϫⲉ ⲕⲁⲥ ⲛ̄ ⲛⲉϥ‐
ϣⲟⲩϣⲟⲩ ⲙ̄ⲙⲟϥ | ⲛ̄ϭⲓ ⲡⲥⲃ̄ⲃⲉ • ϫⲉ ⲉ ⲃⲟⲗ ϩⲓ ⲧⲟⲟ̄ⲧϥ̄
ⲙ̄ⲙⲓⲛ ⲙ̄ⲙⲟϥ • ⲛ̄ⲧⲁϥϯ ⲟⲩⲱ̄ ⲛⲁⲛ ⲉ ϩⲣⲁⲓ̄ ⲛ̄ϭⲓ ⲡϣⲏⲛ
ⲙ̄ ⲡⲱⲛϩ̄ ⲡⲉⲭ︦ⲥ︦ • Ⲁⲗⲗⲁ⳿ ϫⲉ ⲕⲁⲥ⳿ ⲉⲩⲛⲁⲉⲓⲙⲉ⳿ ⲛ̄ϭⲓ
ⲛⲉⲛⲧ ⲁⲩⲡⲓⲥⲧⲉⲩⲉ⳿ ⲉ ⲡⲉⲭ︦ⲥ︦ • ⲉ ⲃⲟⲗ ϩⲙ̄ ⲡⲉⲥⲡⲉⲣⲙⲁ⳿
ⲙ̄ ⲡⲓ︦ⲏ︦ⲗ︦ • ϫⲉ ⲡⲱⲛⲉ ⲙ̄ ⲙⲉ⳿ ⲡⲉ ⲡⲥⲱⲧⲡ̄ ⲛ̄ ⲕⲟⲟϩ⳿ ⲉⲧⲉ
ⲡⲉⲛϫⲟⲉⲓⲥ ⲓⲥ̄ ⲡⲉⲭ︦ⲥ︦ ⲡⲉ • ⲁϥⲉⲓ⳿ ϣⲁ ⲣⲟⲛ⳿ ⲉϥϩⲱⲕ⳿ ⲛ̄ⲧϫⲟ⳿
ⲥⲛ̄ⲧⲉ⳿ ⲉ ⲛⲉⲩⲉⲣⲏⲩ • ⲉⲧⲉ ⲡⲥⲃ̄ⲃⲉ ⲡⲉ • ⲙⲛ̄ ⲧⲙⲛ̄ⲧ ⲁⲧ
ⲥⲃ̄ⲃⲉ • ⲧⲇⲓⲕⲁⲓⲟ̄ⲥⲩⲛⲏ⳿ ⲙⲛ̄ ⲧⲁⲛⲟⲙⲓⲁ • ⲁⲩϩⲟⲧⲣⲟⲩ⳿ ⲉ
ϩⲟⲩⲛ⳿ ⲉ ⲛⲉⲩⲉⲣⲏⲩ • ϩⲛ̄ ⲟⲩⲙⲛ̄ⲧⲟⲩⲁ⳿• Ⲡⲉϫⲁϥ ⲇⲉ⳿ ⲟⲛ⳿
ⲛ̄ϭⲓ ⲡⲉⲓ ⲉⲩⲁⲅ|ⲅⲉⲗⲓⲥⲧⲏⲥ⳿ ⲛ̄ ⲟⲩⲱⲧ ⲙⲁⲑⲑⲁⲓ̈ⲟⲥ • ϫⲉ
ⲡⲉϫⲡⲟ ⲇⲉ⳿ ⲛ̄ ⲓ︦ⲥ︦ ⲡⲉⲭ︦ⲥ︦ • ⲛⲉ ⲟⲩ ⲧⲉⲓ ϩⲉ ⲡⲉ :-Ⲱ̄
ⲙⲁⲑⲑⲁⲓ̄ⲟⲥ⳿ ⲡⲁ ⲧⲧⲁⲡⲣⲟ⳿ ⲉⲧ ⲧⲁⲩⲉ ϩⲗⲟϭ̄ ⲛⲓⲙ ⲉ ⲃⲟⲗ
ⲛ̄ⲧⲉ ⲡⲉⲛϫⲟⲉⲓⲥ • ⲁϫⲓⲥ ⲉ ⲣⲟⲓ̄ • ϫⲉ ⲟⲩ ⲡⲉ ⲡⲉⲓ ϣⲁϫⲉ
ⲛ̄ⲧⲁⲕϫⲟⲟϥ⳿ ⲉ ⲑⲁⲏ̄ • ϫⲉ ⲛⲉ ⲟⲩ ⲧⲉⲓ ϩⲉ ⲡⲉ • Ⲉⲓϫⲱ
ⲙ̄ⲙⲟⲥ ⲡⲉϫⲁϥ • ϫⲉ ⲟⲩ ⲉ ⲃⲟⲗ ϩⲙ̄ ⲡⲅⲉⲛⲟⲥ⳿ ⲥⲛⲁⲩ ⲡⲉ •
ⲛ̄ ⲣⲉϥⲣ̄ ⲛⲟⲃⲉ ⲙⲛ̄ ⲛ̄ ⲇⲓⲕⲁⲓⲟⲥ • Ⲛ ⲣⲉϥϣⲙ̄ϣⲉ⳿ ⲛⲟⲩⲧⲉ •
ⲙⲛ̄ ⲛⲉⲧⲉ ⲛ̄ⲥⲉⲥⲟⲟⲩⲛ ⲁⲛ ⲙ̄ ⲡⲛⲟⲩⲧⲉ • Ⲉ ⲧⲃⲉ ⲡⲁⲓ̄ ⲟⲩⲙⲉ⳿
ⲁⲗⲏⲑⲱⲥ⳿ ⲡⲉ ⲡϣⲁϫⲉ ⲙ̄ ⲡ|ϫⲟⲉⲓⲥ • ϫⲉ ⲛ̄ⲧⲁⲓ̄ⲉⲓ ⲁⲛ⳿ ⲉ ⲧⲉ‐
ϩⲙ̄ ⲛ̄ⲇⲓⲕⲁⲓⲟⲥ • ⲁⲗⲗⲁ⳿ ⲛ̄ ⲣⲉϥⲣ̄ ⲛⲟⲃⲉ⳿ ⲉⲩⲙⲉⲧⲁⲛⲟⲓⲁ⳿•
Ⲕⲁⲧⲁ ⲑⲉ • ϫⲉ ⲡⲉϥⲛⲁ̄ ⲉⲧ ⲛⲁϣⲱϥ⳿ ⲡⲟⲣϣ̄ ⲉ ⲃⲟⲗ ϩⲓϫⲛ̄
ⲟⲩⲟⲛ ⲛⲓⲙ • Ϥⲛⲁ⳿ ⲙ̄ ⲡⲇⲓⲕⲁⲓ̄ⲟⲥ • ϥⲕⲱ̄ ⲉ ⲃⲟⲗ ⲙ̄
ⲡⲣⲉϥⲣ̄ ⲛⲟⲃⲉ • Ϥⲙⲉ ⲙ̄ ⲡⲇⲓⲕⲁⲓ̄ⲟⲥ • ϥϣⲛ̄ϩⲧⲏϥ • ϩⲁ


### 0013

ⲡⲣⲉϥⲣ̄ ⲛⲟⲃⲉ • Ϥⲕⲟⲗⲁⲕⲉⲩⲉ ⲙ̄ ⲡⲣⲉϥⲣ̄ ⲛⲟⲃⲉ • ⲁⲩⲱ̄
ϥⲑⲉⲣⲁⲡⲉⲩⲉ⳿ ⲛ̄ ⲛⲉϥⲡⲗⲏⲅⲏ⳿• ⲉⲛⲧ ⲁⲩⲕⲛⲟⲥ • ⲁⲩⲱ̄
ⲁⲩⲗⲟϥⲗⲉϥ • Ⲉ ⲧⲃⲉ ⲡⲁⲓ̄ • ⲙⲛ̄ ⲧⲕ̄ϣⲁϫⲉ ⲙ̄ⲙⲁⲩ ⲉϫⲱ⳿
ⲱ̄ ⲡⲣⲱⲙⲉ • ⲉⲓⲥ | Ⲡⲗⲟⲅⲟⲥ ⲁϥⲣ̄ⲥⲁⲣⲝ̄ • ⲁϥⲟⲩⲱϩ ⲛⲙ̄‐
ⲙⲁⲛ • ϫⲉ ⲕⲁⲥ⳿ ⲉϥⲉⲛⲁ⳿ ⲛ̄ⲣⲱⲙⲉ ⲛⲓⲙ ϩⲓ ⲟⲩⲥⲟⲡ •
ⲛ̄ ⲣⲉϥⲣ̄ ⲛⲟⲃⲉ • ⲙⲛ̄ ⲛ̄ⲇⲓⲕⲁⲓⲟⲥ⳿ • Ⲙⲉϥⲛⲉϫ ⲗⲁⲁⲩ ⲉ ⲃⲟⲗ
ⲙ̄ⲙⲟϥ • ⲉϥⲛⲁϯ ⲙ̄ⲡⲉϥⲟⲩⲟⲓ ⲉ ⲣⲟϥ ϩⲛ̄ ⲟⲩⲙⲉⲧⲁⲛⲟⲓⲁ •
Ϫⲉ ⲕⲁⲥ ⲇⲉ⳿ ⲉⲕⲉⲉⲓⲙⲉ ⲁⲩⲡⲟⲣⲛⲏ⳿ ⲧⲉϩⲥ̄ ⲛⲉϥⲟⲩⲉⲣⲏⲧⲉ
ⲛ̄ ⲥⲟϭⲛ̄ • ⲁⲩⲱ̄ ⲁⲥϥⲟⲧⲟⲩ⳿ ϩⲙ̄ ⲡⲉⲥϥⲱ • ⲁϥϥⲱⲧⲉ⳿ ⲉ
ⲃⲟⲗ ⲛ̄ ⲛⲉⲥⲛⲟⲃⲉ • ⲙⲛ̄ ⲛⲉⲥⲁⲛⲟⲙⲓⲁ • Ⲁⲙⲙⲁⲅⲟⲥ ⲉⲓ̄
ϣⲁ ⲣⲟϥ • ⲁⲩⲟⲩⲱ̄ϣⲧ̄ ⲛⲁϥ • ⲁϥⲁⲁⲩ ⲙ̄ ⲡⲟⲗⲓⲧⲏⲥ ⲛ̄
ⲧⲙⲛ̄ⲧⲉⲣⲟ⳿ ⲛ ⲙ̄ⲡⲏⲩⲉ | Ⲁⲩⲱ̄ ⲡⲉⲓ ϩⲁⲅⲓⲟⲥ⳿ ⲛ̄ ⲉⲩⲁⲅⲅⲉ‐
ⲗⲓⲥⲧⲏⲥ • ⲉⲧ ϣⲁϫⲉ ⲛⲙ̄ⲙⲁⲛ ϩⲙ̄ ⲡⲉⲓ ⲉⲩⲁⲅⲅⲉⲗⲓⲟⲛ⳿ ⲉⲧ
ⲟⲩⲁⲁⲃ ϥⲣ̄ ⲙⲛ︦ⲧ︦ⲣⲉ⳿ ϩⲁ ⲣⲟϥ ⲙ̄ⲙⲓⲛ ⲙ̄ⲙⲟϥ • ϫⲉ ⲟⲩ
ⲧⲉⲗⲱⲛⲏⲥ ⲡⲉ • Ⲁⲩⲱ̄ ⲛ̄ ⲧⲉⲣⲉ ϥⲕⲱ ⲛ̄ⲥⲱϥ • ⲛ̄ ⲧⲙⲛ︦ⲧ︦-
ⲧⲉⲗⲱⲛⲏⲥ ⲁϥⲭⲁⲣⲓⲍⲉ ⲛⲁϥ • ⲙ̄ ⲡⲉⲩⲁⲅⲅⲉⲗⲓⲟⲛ ⲉⲧ
ⲟⲩⲁⲁⲃ • Ⲁⲩⲱ̄ ϣⲁ ϩⲣⲁⲓ̄ ⲉⲩⲗⲩⲥⲧⲏⲥ • ⲛ̄ ⲣⲉϥⲡⲉϩⲧ̄
ⲥⲛⲟϥ ⲉ ⲃⲟⲗ • ⲛ̄ ⲧⲉⲣⲉ ϥⲥⲉⲡⲥⲱⲡϥ̄ ⲙ̄ ⲡⲛⲁⲩ ⲛ̄ ⲧⲉϥ‐
ⲁⲛⲁⲅⲕⲏ ϫⲉ • ⲁⲣⲓ ⲡⲁ ⲙⲉⲉⲩⲉ⳿ ⲡϫⲟⲉⲓⲥ • ⲛ̄ⲧⲉⲩⲛⲟⲩ • ⲁϥ‐
ϫⲓⲧϥ̄ ⲉ ⲡⲡⲁⲣⲁⲇⲓⲥⲟⲥ • Ⲉ ⲧⲃⲉ ⲡⲁⲓ̄ ⲱ̄|ⲡⲣⲱⲙⲉ⳿• ⲙ̄ⲡⲣ̄
ⲉⲓⲁ ⲧⲟⲟⲧⲕ̄ ⲛ̄ⲥⲱⲕ⳿ ⲙⲁⲩⲁⲁⲕ • Ⲕⲁⲛ⳿ ⲛ̄ⲧⲕ̄ ⲟⲩⲡⲟⲣⲛⲟⲥ •
ⲕⲁⲛ ⲛ̄ⲧⲕ̄ ⲟⲩⲣⲉϥⲧⲱⲣⲡ̄ • Ⲕⲁⲛ⳿ ⲉⲕϣⲁⲛϩⲉ⳿ ϩⲛ̄ ⲛⲟⲃⲉ
ⲛⲓⲙ • ⲕⲧⲟⲕ ϣⲁ ⲡϫⲟⲉⲓⲥ ⲙ̄ⲙⲁⲧⲉ • ⲁⲩⲱ̄ ϥⲛⲁⲕⲱ⳿ ⲛⲁⲕ ⲉ
ⲃⲟⲗ • Ⲙⲛ̄ ⲗⲁⲁⲩ ⲅⲁⲣ ⲛ̄ⲛⲟⲃⲉ⳿• ⲟ̄ ⲛ̄ ⲁⲧ ϭⲟⲙ⳿ ⲛ̄ⲛⲁϩⲣⲙ̄
ⲡⲛⲟⲩⲧⲉ • Ⲡⲥⲁⲉⲓⲛ⳿ ⲛ̄ ⲛⲉⲛⲯⲩⲭⲏ • ⲉⲛⲉ ⲓⲟⲩⲱϣ ⲙⲉⲛ
ⲡⲉ⳿ ⲉ ϫⲓ⳿ ⲙ̄ ⲡ̄ϫⲱⲕ ⲧⲏⲣϥ̄ ⲛ̄ ⲧⲁ ⲧⲣⲟⲫⲏ ϩⲛ̄ ⲧⲉⲕⲧⲣⲁ‐
ⲡⲉⲍⲁ⳿ ⲉⲧ ⲙⲉϩ ⲛ̄ⲁⲅⲁⲑⲟⲛ ⲛⲓⲙ ⲛ̄ⲧⲉ ⲡⲉⲡⲛ︦ⲁ︦ ⲉⲧ ⲟⲩⲁⲁⲃ •
ⲱ̄ ⲡϩⲁⲅⲓⲟⲥ ⲙⲁ|ⲑⲁⲓⲟⲥ • Ⲁⲗⲗⲁ⳿ ϯⲑⲉⲱ̄ⲣⲉⲓ⳿ ⲛ̄ ⲕⲉ ⲧⲣⲁ‐
ⲡⲉⲍⲁ⳿ ⲉⲥⲟⲩⲟⲟⲗⲉ ⲉⲙⲁⲧⲉ⳿ ϩⲙ̄ ⲡⲉⲓ ⲥⲁ ⲙ̄ⲙⲟⲓ̄ ⲉⲥⲡⲣⲟ‐
ⲧⲣⲉⲡⲉ⳿ ⲙ̄ⲙⲟⲓ̄ • ⲉ ⲧⲣⲁϯ⳿ ⲙ̄ ⲡⲁ ⲟⲩⲟⲓ̄ ⲉ ϫⲱⲥ • ⲛ̄ⲧⲁϫⲓ
ϯⲡⲉ⳿ ⲙ̄ ⲡⲉϩⲗⲟϭ ⲛ̄ ⲛ̄ϭⲓⲛⲟⲩⲟⲟⲙ • Ⲕⲁⲛ⳿ ⲉϣϫⲉ ⲁⲓ̄ⲥⲉⲓ⳿
ϩⲓⲧⲙ̄ ⲡⲁϣⲁⲓ̄ ⲛ̄ ⲛⲉⲛⲧ ⲁⲓⲟⲩⲟ̄ⲙⲟⲩ • ⲁⲩⲱ̄ ⲁⲕⲧⲥⲓⲟⲓ̄ ⲙ̄
ⲡⲉϩⲗⲟϭ ⲛ̄ ⲛⲉⲕⲁⲅⲁⲑⲟⲛ ⲱ̄ ⲙⲁⲑⲁⲓⲟⲥ⳿ ⲡⲉⲩⲁⲅⲅⲉⲗⲓⲥ‐
ⲧⲏⲥ • ⲁⲗⲗⲁ⳿ ϯⲑⲉⲱ̄ⲣⲉⲓ ⲙ̄ ⲡⲉⲕϣⲃⲏⲣ⳿ ⲉⲩⲁⲅⲅⲉⲗⲓⲥⲧⲏⲥ⳿ •


### 0014

ⲗⲟⲩⲕⲁⲥ⳿ ⲡⲥⲁⲉⲓⲛ⳿ ⲛ̄ ⲛ̄ⲣⲉϥⲧⲁⲗϭⲟ⳿ ⲛ̄ ⲛ̄ϣⲱⲛⲉ ⲧⲏ|ⲣⲟⲩ⳿
ϩⲛ̄ ⲙ̄ ⲡⲁϩⲣⲉ⳿ ⲙ̄ ⲡ︤ⲛ︦ⲓ︥ⲕⲟⲛ • ⲉϥⲕⲁⲗⲉⲓ⳿ ⲙ̄ⲙⲟⲓ̄ • ⲁⲩⲱ̄
ⲉϥⲥⲱⲕ ⲙ̄ⲙⲟⲓ̄ ⲉϫⲙ̄ ⲡⲉⲕⲣⲁⲧⲏⲣ ⲛ̄ ⲧⲉϥⲥⲟⲫⲓⲁ • Ⲕⲁⲓ
ⲅⲁⲣ ⲛ̄ⲣⲙ̄ⲙⲁⲟ⳿ ⲙ̄ ⲡⲉⲓ ⲁⲓ̄ⲱⲛ • ϩⲓⲧⲛ̄ ⲧⲉⲡⲓⲧⲁⲅⲏ • ⲙⲛ̄
ⲡⲉϩⲗⲟϭ ⲛ̄ ⲛ̄ϭⲓⲛⲟⲩⲟⲟⲙ⳿ ⲉⲧ ⲟⲩⲧⲁⲙⲓⲟ⳿ ⲙ̄ⲙⲟⲟⲩ • ϣⲁⲩ‐
ⲟⲩⲱϩ⳿ ⲉ ⲧⲟⲟⲧⲟⲩ⳿ ⲉ ⲟⲩⲱⲙ ⲛ̄ ⲟⲩⲁϣⲏ ⲛ̄ ⲥⲟⲡ • ⲉⲩⲧⲉⲣⲡⲉⲓ
ⲙ̄ⲙⲟⲟⲩ • ⲁⲩⲱ̄ ⲉⲩⲧⲣⲩⲫⲁ⳿ ⲛ̄ ⲑⲏ⳿ ϩⲛ̄ ⲛⲉⲧ ⲛⲁⲧⲁⲕⲟ•
ϯⲡⲁⲣⲁⲕⲁⲗⲉⲓ ⲙ̄ⲙⲟⲕ⳿ ⲱ̄ ⲡϩⲁⲅⲓⲟⲥ⳿ ⲗⲟⲩⲕⲁⲥ⳿ ⲡⲑⲉⲟ̄‐
ⲗⲟⲅⲟⲥ • ⲉ ⲧⲣⲉ ⲕⲕⲱ̄ ⲛⲁⲓ̄ ⲉ ⲃⲟⲗ • ϩⲱⲥ⳿ ⲉ ⲁⲓ̄ⲟⲃϣⲧ̄ ⲉ ⲣⲟⲕ
ϩⲙ̄ ⲡϣⲁ|ϫⲉ⳿ ϣⲁ ⲧⲉⲛⲟⲩ • Ⲁⲗⲗⲁ⳿ ⲙⲁⲧⲥⲁⲃⲟⲓ̄ ⲉ ⲡⲉⲕ‐
ⲗⲟⲅⲟⲥ ⲙ̄ ⲡⲛ︦ⲓ︦ⲕⲟⲛ⳿ ⲛ̄ⲧⲁⲕⲧⲩⲡⲟⲩ ⲙ̄ⲙⲟϥ • ϩⲁ ⲧⲡⲁⲣ‐
ⲑⲉⲛⲟⲥ ⲛ̄ ϣⲟⲩⲡⲣⲟⲥⲕⲩⲛⲉⲓ ⲙ̄ⲙⲟⲥ⳿ ⲛ̄ⲕⲁⲓ̄ⲣⲟⲥ ⲛⲓⲙ •
Ⲁⲓ̄ϫⲟⲟⲥ • ⲡⲉϫⲁϥ ⲛ̄ ⲧⲉⲓ ϩⲉ • ϫⲉ ϩⲙ̄ ⲡⲙⲉϩ ⲥⲟⲟⲩ ⲛ
ⲉⲃⲟⲧ • ⲁⲩϫⲟⲟⲩ⳿ ⲛ̄ ⲅⲁⲃⲣⲓⲏⲗ ⲡⲁⲅⲅⲉⲗⲟⲥ⳿ ⲉ ⲃⲟⲗ ϩⲓⲧⲙ̄
ⲡⲛⲟⲩⲧⲉ⳿ ϣⲁ ⲟⲩⲡⲁⲣⲑⲉⲛⲟⲥ⳿ ⲉ ⲡⲉⲥⲣⲁⲛ⳿ ⲡⲉ ⲙⲁⲣⲓⲁ⳿•
Ⲁϣ⳿ ⲡⲉ ⲡⲙⲉϩ ⲥⲟⲟⲩ⳿ ⲛ̄ ⲉⲃⲟⲧ • ⲱ̄ ⲡⲛⲟϭ ⲛ̄ ⲇⲓⲇⲁⲥⲕⲁ‐
ⲗⲱⲥ • ⲗⲟⲩⲕⲁⲥ⳿ ⲡⲥⲁⲉⲓⲛ • Ⲙⲁ ⲕⲧⲟⲕ⳿ ⲉ ⲡⲁϩⲟⲩ⳿ ⲛ̄ⲟⲩ‐
ⲕⲟⲩⲓ̄ ϩⲙ̄ ⲡϣⲁϫⲉ • ⲁⲩⲱ̄ ⲕⲛⲁⲉⲓⲙⲉ • ϫⲉ ⲁϣ⳿ ⲡⲉ
ⲡ̄|ⲙⲉϩ ⲥⲟⲟⲩ⳿ ⲛ̄ ⲉⲃⲟⲧ • Ⲁⲥϣⲱⲡⲉ ⲇⲉ⳿ ⲛ̄ ⲧⲉⲣⲉ ⲛⲉϩⲟⲟⲩ
ⲙ̄ ⲡϣⲙ̄ϣⲉ⳿ ⲛ̄ ⲍⲁⲭⲁⲣⲓⲁⲥ⳿• ϫⲱⲕ ⲉ ⲃⲟⲗ ϩⲙ̄ ⲡⲣ̄ⲡⲉ •
ⲁϥⲃⲱⲕ ⲉ ϩⲣⲁⲓ̄ ⲉ ⲡⲉϥⲏⲓ̄ • Ⲙⲛ︦ⲛ︦ⲥⲁ ⲛⲉⲓ ϩⲟⲟⲩ ⲇⲉ • ⲁⲥⲱ︦ⲱ︦
ⲛ̄ϭⲓ ⲉⲗⲓⲥⲁⲃⲉⲧ⳿ ⲧⲉϥⲥϩⲓⲙⲉ • ⲁⲩⲱ ⲁⲥϩⲟⲡⲥ̄ ⲛ̄ ϯⲟⲩ ⲛ
ⲉⲃⲟⲧ⳿ ⲉⲥϫⲱ ⲙ̄ⲙⲟⲥ ϫⲉ • ⲧⲁⲓ̄ ⲧⲉ ⲑⲉ⳿ ⲛ̄ⲧⲁ ⲡϫⲟⲉⲓⲥ⳿ ⲁⲁⲥ⳿
ⲛⲁⲓ̄ • ϩⲛ̄ ⲛⲉϩⲟⲟⲩ⳿ ⲛ̄ⲧⲁϥϭⲱϣⲧ̄ ⲉϥⲓ ⲙ̄ ⲡⲁ ⲛⲟϭⲛⲉϭ ⲉ
ⲃⲟⲗ ϩⲛ̄ ⲛⲉⲣⲱⲙⲉ • ϩⲙ̄ ⲡⲙⲉϩ ⲥⲟⲟⲩ ⲇⲉ⳿ ⲛ̄ ⲉⲃⲟⲧ⳿ ⲟⲩⲛ⳿
ⲙⲛ︦ⲛ︦ⲥⲁ ⲧⲣⲉ ⲉⲗⲓⲥⲁⲃⲉⲧ⳿ ⲱⲱ̄• ⲛ̄ⲧⲁ ⲅⲁⲃⲣⲓⲏⲗ • ⲟⲩⲱ̄ⲛϩ̄
ⲉ ⲃⲟⲗ ⲛ̄ ⲧⲡⲁⲣ|ⲑⲉⲛⲟⲥ • Ⲡⲉϩⲟⲟⲩ ⲇⲉ⳿ ⲛ̄ⲧⲁ ⲉⲗⲓⲥⲁⲃⲉⲧ⳿
ⲱ︦ⲱ︦ ⲛ̄ ⲓ̄ⲱϩⲁⲛⲛⲏⲥ⳿ ⲡϩⲏⲃⲥ̄ ⲛ̄ ⲧⲙⲉ⳿ ⲛ̄ϩⲏⲧϥ̄ ⲡⲉ ⲥⲟⲩ
ⲥⲁϣϥ̄ ⲙ̄ ⲡⲉⲃⲟⲧ ⲁⲑⲱⲣ • Ϩⲛ̄ ⲛ̄ⲁⲛⲧⲓⲅⲣⲁⲫⲟⲛ⳿ ⲉⲧ ⲟ̄ⲣϫ̄
ⲛ̄ϩⲉⲃⲣⲁⲓ̄ⲕⲟⲛ⳿ ⲛ̄ⲧⲁⲩⲧⲁⲙⲟⲛ⳿ ⲉ ⲡⲁⲓ̄ • Ⲁⲩⲱ̄ ⲡⲉϩⲟⲟⲩ
ⲛ̄ⲧⲁⲥϫⲡⲟϥ ⲛ̄ϩⲏⲧϥ̄ • ⲡⲉ ⲥⲟⲩ ϫⲟⲩⲧ ⲥⲁϣϥ̄ ⲙ̄ ⲡⲉⲃⲟⲧ⳿
ⲉⲡⲏⲡ • Ⲕⲁⲧⲁ ⲑⲉ ϫⲉ ϥⲟ̄ ⲛ̄ ⲛⲟϭ ⲉ ⲡⲉⲛⲥⲱⲧⲏⲣ • ⲛ̄ϭⲓ
ⲓ̄ⲱϩⲁⲛⲛⲏⲥ ϩⲛ̄ ⲧⲁⲡⲟⲇⲏⲙⲓⲁ⳿ ⲛ̄ ⲧⲥⲁⲣⲝ̄ ⲛ̄ ⲥⲟⲟⲩ⳿ ⲛ̄ ⲉⲃⲟⲧ •
Ⲡⲉϩⲟⲟⲩ ϩⲱⲱϥ ⲛ̄ⲧⲁ ⲧⲡⲁⲣⲑⲉⲛⲟⲥ⳿ ⲱ︦ⲱ︦ ⲙ̄ ⲡⲗⲟⲅⲟⲥ⳿ ⲉⲧ


### 0015

ⲟⲛϩ̄ ⲡⲉ ⲥⲟⲩ ⲥⲁϣϥ̄ | ⲙ̄ ⲡⲉⲃⲟⲧ⳿ ⲡⲁⲣⲙⲟⲩⲧⲉ • ϩⲛ̄ ⲛ̄ⲁⲛ‐
ⲧⲓⲅⲣⲁⲫⲟⲛ • ⲕⲁⲧⲁ ⲧⲥⲩⲛⲅⲣⲁⲫⲏ ⲙ̄ ⲡⲁⲡⲟⲥⲧⲟⲗⲓⲕⲟⲥ⳿
ⲉⲧ ⲧⲁⲉⲓⲏⲩ • ⲡϩⲁⲅⲓⲟⲥ • ⲓ̄ⲟⲡⲡⲏⲗⲏⲧⲟⲥ⳿ ⲡⲉϩⲣⲱⲙⲁⲓ̄ⲟⲥ •
Ⲁⲩⲱ̄ ⲛ̄ ⲧⲉⲣⲉ ϥⲃⲱⲕ ⲛⲁⲥ⳿ ⲉ ϩⲟⲩⲛ ⲙ̄ ⲡⲛⲁⲩ ⲛ̄ ϣⲱⲣⲡ̄
ⲛ̄ϭⲓ ⲅⲁⲃⲣⲓⲏⲗ • ⲉϥⲣⲁϣⲉ • ⲁⲩⲱ̄ ⲉϥⲣⲟⲟⲩⲧ • Ⲡⲉϫⲁϥ ϫⲉ
Ⲭⲁⲓ̄ⲣⲉ⳿ ⲧⲉⲛⲧ ⲁⲥϭⲛ̄ ϩⲙⲟⲧ⳿ ⲡϫⲟⲉⲓⲥ ϣⲟⲟⲡ⳿ ⲛⲙ̄ⲙⲉ •
Ⲭⲁⲓ̄ⲣⲉ⳿ ⲧⲣ̄ⲣⲱ⳿ ⲁⲩⲱ̄ ⲧⲙⲁⲁⲩ ⲙ̄ ⲡⲣ̄ⲣⲟ • Ⲭⲁⲓ̄ⲣⲉ ⲧⲣⲉϥ‐
ϫⲡⲉ⳿ ⲡⲛⲟⲩⲧⲉ • Ⲭⲁⲓ̄ⲣⲉ⳿ ⲧⲉϭⲣⲟⲟⲙ|ⲡⲉ⳿ ⲛ̄ ⲗⲟⲅⲓⲕⲏ⳿•
Ⲭⲁⲓ̄ⲣⲉ⳿ ⲧⲕⲓⲃⲱⲇⲟⲥ⳿ ⲉⲧ ⲧⲱⲟⲩⲛ ϩⲁ ⲡⲣⲉϥⲥⲱⲛⲧ̄ ⲛ̄ ⲛ̄ⲕⲁ
ⲛⲓⲙ • Ⲭⲁⲓ̄ⲣⲉ ⲧⲃⲱ⳿ ⲛ ⲉⲗⲟⲟ̄ⲗⲉ ⲙ̄ ⲙⲉ ⲛ̄ⲧⲁⲥϯ ⲟⲩⲱ̄ ⲙ̄
ⲡⲉⲥⲙⲁϩ ⲛ̄ⲉⲗⲟⲟ̄ⲗⲉ ⲙ̄ ⲡⲉⲓⲱⲧ ⁖-Ⲁⲥϣⲧⲟⲣⲧⲣ̄ ⲇⲉ ⲛ̄ϭⲓ
ⲙⲁⲣⲓⲁ⳿ ⲉϫⲙ̄ ⲡϣⲁϫⲉ • ⲁⲩⲱ̄ ⲉⲛⲉⲥⲙⲟⲕⲙⲉⲕ ⲙ̄ⲙⲟⲥ •
ϫⲉ ⲟⲩⲁϣ ⲙ̄ ⲙⲓⲛⲉ⳿ ⲡⲉ ⲡⲉⲓ ⲁⲥⲡⲁⲥⲙⲟⲥ • ⲡⲉϫⲉ ⲡⲁⲅⲅⲉ‐
ⲗⲟⲥ ⲇⲉ ⲛⲁⲥ • ϫⲉ ⲙ̄ⲡⲣ̄ ⲣ̄ ϩⲟⲧⲉ⳿ ⲙⲁⲣⲓⲁ⳿• ⲁⲣϭⲓⲛⲉ⳿
ⲅⲁⲣ⳿ ⲛ̄ ⲟⲩϩⲙⲟⲧ ⲛ̄ ⲛⲁϩⲣⲙ̄ ⲡⲛⲟⲩⲧⲉ • ⲉⲓⲥ ϩⲏⲏⲧⲉ⳿ ⲅⲁⲣ
ⲧⲉⲛⲁⲱ︦ⲱ︦ ⲛ̄ⲧⲉϫⲡⲟ⳿ ⲛ̄ ⲟⲩϣⲏ|ⲣⲉ⳿ ⲛ̄ⲧⲉⲙⲟⲩⲧⲉ ⲉ ⲡⲉϥⲣⲁⲛ⳿
ϫⲉ ⲓ︤ⲥ︥ • ⲡⲁⲓ̄ ϥⲛⲁϣⲱⲡⲉ⳿ ⲛ̄ ⲟⲩⲛⲟϭ • ⲁⲩⲱ̄ ⲥⲉⲛⲁⲙⲟⲩⲧⲉ⳿
ⲉ ⲣⲟϥ • ϫⲉ ⲡϣⲏⲣⲉ ⲙ̄ ⲡ̄ⲡⲉⲧ ϫⲟⲥⲉ • Ⲧⲟⲧⲉ ⲛ̄ ⲧⲉⲣⲉ
ⲥⲥⲱⲧⲙ̄ ⲉ ⲡϣⲁϫⲉ • ϫⲉ ⲧⲉⲛⲁⲱ︦ⲱ︦ • ⲁⲥϣⲧⲟⲣⲧⲣ̄ ⲛ̄ϭⲓ
ⲧⲡⲁⲣⲑⲉⲛⲟⲥ • ⲁⲩⲱ̄ ⲁⲥⲣ̄ϩⲟⲧⲉ⳿ ⲉⲥⲙⲉⲉⲩⲉ • ϫⲉ ⲉⲥⲛⲁⲩ⳿
ⲉⲩⲫⲁⲛⲧⲁⲥⲓⲁ⳿ ⲛ̄ ϭⲟⲗ • Ⲁⲩⲱ̄ ⲛ̄ⲧⲉⲩⲛⲟⲩ ⲁⲥⲗⲟ⳿• ϩⲁ ⲛⲉⲧ
ϩⲁ ⲛⲉⲥϭⲓϫ • ⲁⲩⲱ̄ ⲁⲥⲥⲡⲟⲩⲇⲁⲍⲉ⳿ ϩⲁ ⲛⲉⲧ ϩⲁ ⲛⲉⲥⲃⲁⲗ•
Ⲁⲩⲱ̄ ⲟⲛ⳿ ⲁⲥⲥⲡⲟⲩⲇⲁⲍⲉ⳿ ⲉ ⲡⲉϣⲗⲏⲗ :-ⲗⲟⲓⲡⲟⲛ⳿ ⲛ̄
ⲧⲉⲣⲉ ⲥ|ϯ ⲛ̄ ⲛⲉⲥⲡⲣⲟⲥⲉⲩⲭⲏ ⲙ̄ ⲡⲛⲟⲩⲧⲉ⳿ ϩⲛ̄ ⲟⲩⲛⲟϭ ⲛ̄
ϣⲧⲟⲣⲧⲣ̄ ⲉ ⲃⲟⲗ ϫⲉ ⲛ̄ ⲧⲉⲥⲥⲩⲛⲏⲑⲓⲁ⳿ ⲁⲛ ⲧⲉ⳿ ⲉ ⲧⲱⲙⲛ︤ⲧ︥
ⲉ ⲣⲱⲙⲉ • Ⲉ ⲃⲟⲗ • ϫⲉ ⲛⲉⲩϣⲉⲉⲣⲉ ϣⲏⲙ⳿ ⲧⲉ ⲉⲥⲥⲟⲃⲕ̄ •
ⲛⲉⲥ ϩⲛ̄ ⲁⲙⲛ̄ⲧⲏ⳿ ⲅⲁⲣ⳿ ⲛ̄ⲣⲟⲙⲡⲉ⳿ ⲙ̄ ⲡⲉⲟⲩⲟ̄ⲉⲓϣ⳿ ⲉⲧ
ⲙ̄ⲙⲁⲩ • Ⲁϥϥⲓ ⲇⲉ⳿ ⲉ ⲃⲟⲗ ⲙ̄ⲙⲟⲥ ⲛ̄ⲑⲟⲧⲉ ⲁⲩⲱ̄ ⲁϥ‐
ϣⲁϫⲉ ⲛⲙ̄ⲙⲁⲥ⳿ ϩⲛ̄ ⲟⲩⲙⲛ︤ⲧ︥ⲣⲙ̄ⲣⲁϣ • ϫⲉ :-Ⲁϩⲣⲟ ⲧⲉ‐
ⲇⲓⲥⲧⲁⲍⲉ⳿ ⲉ ⲡϣⲁϫⲉ ⲱ̄ ⲧⲡⲁⲣⲑⲉⲛⲟⲥ ⲛ̄ ⲧⲉⲥⲟⲟⲩⲛ ⲁⲛ⳿
ϫⲉ ⲙⲛ̄ ⲗⲁⲁⲩ ⲛ̄ ϣⲁϫⲉ⳿ ⲟ̄ ⲛ ⲁⲧ ϭⲟⲙ ⲛ̄ ⲛⲁϩⲣⲙ̄
ⲡⲛⲟⲩ|ⲧⲉ :-ⲡⲓⲥⲧⲉⲩⲉ ⲛⲁⲓ̄ ϫⲉ ⲁⲛⲟⲕ⳿ ⲟⲩⲁ⳿ ⲉ ⲃⲟⲗ ϩⲙ̄
ⲡⲥⲁϣϥ̄ ⲛⲁⲣⲭⲏⲁⲅⲅⲉⲗⲟⲥ ⲉⲧ ⲁϩⲉ ⲣⲁⲧⲟⲩ ⲙ̄ ⲡⲙ̄ⲧⲟ⳿ ⲉ
ⲃⲟⲗ ⲙ̄ ⲡⲛⲟⲩⲧⲉ • ⲛ̄ ⲟⲩⲟ̄ⲉⲓϣ ⲛⲓⲙ • Ⲁⲩⲱ ⲅⲁⲃⲣⲓⲏⲗ


### 0016

ⲡⲉ ⲡⲁ ⲣⲁⲛ • ⲁⲟⲩⲱⲛ ⲛ̄ ⲣⲱ ⲛ̄ⲧⲉϣⲱⲡ ⲉⲣⲟ⳿ ⲛ̄ⲧⲉⲕⲗⲟⲟⲗⲉ⳿
ⲛ̄ ⲟⲩⲟ̄ⲉⲓⲛ • Ⲁⲩⲱ̄ ⲧⲉⲣⲛⲁⲱ︦ⲱ︦ ⲛ̄ⲧⲉϫⲡⲟ ⲛ̄ ⲟⲩϣⲏⲣⲉ •
ⲛ̄ⲧⲉⲙⲟⲩⲧⲉ⳿ ⲉ ⲡⲉϥⲣⲁⲛ⳿ ϫⲉ ⲓ︦ⲥ︦ • ⲡϫⲟⲉⲓⲥ ⲡⲛⲟⲩⲧⲉ⳿ ⲛⲁϯ
ⲛⲁϥ ⲙ̄ ⲡⲉⲑⲣⲟⲛⲟⲥ ⲛ̄ ⲇⲁⲩⲉⲓⲇ ⲡⲉϥⲉⲓⲱⲧ • ⲁⲩⲱ̄
ϥⲛⲁⲣ︤ⲣ︥ⲣⲟ⳿ ⲉϫⲙ̄ ⲡⲏⲓ̄ ⲛ̄ ⲓⲁⲕⲱⲃ ϣⲁ ⲛⲓⲉⲛⲉϩ • ⲁⲩⲱ̄ ⲙⲛ̄
ϩⲁⲏ̄ ⲛⲁϣⲱⲡⲉ⳿ ϩⲛ̄ | ⲧⲉϥⲙⲛ̄ⲧⲉⲣⲟ • Ϣⲱⲡ ⲇⲉ⳿ ⲉⲣⲟ ⲛ̄
ⲛⲁϣⲁϫⲉ⳿ ⲱ̄ ⲧⲡⲁⲣⲑⲉⲛⲟⲥ ⲉⲧ ⲟⲩⲁⲁⲃ ⲙ̄ⲡⲣ̄ ⲁⲛⲇⲓⲗⲓⲅⲉ•
ⲛ̄ⲧⲉ ⲧⲁⲡⲟⲫⲁⲥⲓⲥ⳿ ⲛ̄ⲧⲁⲥϣⲱⲡⲉ⳿ ⲛ̄ ⲍⲁⲭⲁⲣⲓⲁⲥ ϣⲱⲡⲉ⳿
ⲙ̄ⲙⲟ⳿ ϩⲱⲱ̄ⲧⲉ • Ⲁⲗⲗⲁ⳿ ⲉϣϫⲉ • ⲧⲉⲟⲩⲱϣ ⲉ ⲉⲓⲙⲉ⳿ ⲉ
ⲡⲱⲣϫ̄ ⲙ̄ ⲡ̄ϣⲁϫⲉ • ⲧⲱⲟⲩⲛ⳿ ⲛ̄ⲧⲉⲡⲱⲧ ϣⲁ ⲉⲗⲓⲥⲁⲃⲉⲧ •
ⲃⲱⲕ⳿ ϣⲁ ⲧⲟⲩⲥⲩⲅⲅⲉⲛⲏⲥ • ⲃⲱⲕ⳿ ϣⲁ ⲑⲗ̄ⲗⲱ ⲛ̄ ⲁϭⲣⲏⲛ •
ⲃⲱⲕ⳿ ϣⲁ ⲧⲉⲛⲧⲁ ⲛ̄ ⲥⲱⲛⲧ̄ ⲛ̄ ⲛⲉϩⲓⲟ̄ⲙⲉ⳿ ⲱ̄ϫⲛ̄ ⲛ̄ϩⲏⲧⲥ̄ •
ϩⲓⲧⲛ̄ ⲧⲙⲛ̄ⲧϩⲗ̄ⲗⲱ • ⲉⲣϣⲁⲛ ⲃⲱⲕ ⲇⲉ ϣⲁ ⲣⲟⲥ • ⲧⲉⲣⲛⲁ‐
ⲛⲁⲩ ϩⲛ̄ ⲛⲟⲩ|ⲃⲁⲗ • ⲉ ⲡⲃⲱⲱⲣⲉ⳿ⲉ ⲃⲟⲗ ⲛ̄ ⲧⲉⲥⲕⲁⲗⲁϩⲏ •
Ⲁⲩⲱ̄ ⲡϣⲏⲣⲉ ϣⲏⲙ ⲛⲁⲥⲕⲓⲣⲧⲁ⳿ ϩⲛ̄ ⲟⲩⲧⲉⲗⲏⲗ ϩⲣⲁⲓ̄
ⲛ̄ϩⲏⲧⲥ̄ • Ⲁⲩⲱ̄ ⲥⲛⲁⲙⲟⲩϩ ⲉ ⲃⲟⲗ ϩⲙ̄ ⲡⲉⲡⲛ︦ⲁ︦ ⲉⲧ
ⲟⲩⲁⲁⲃ • ⲛⲥ̄ϫⲉ⳿ ⲧⲙⲉ⳿ ⲧⲏⲣⲥ̄ ⲉⲣⲟ • Ⲕⲁⲓ ⲅⲁⲣ⳿
ⲛ̄ⲧⲟⲥ ϩⲱⲱⲥ ⲟⲛ⳿ ⲁⲥ̄ⲱⲱ̄ ⲛ̄ ⲟⲩϣⲏⲣⲉ⳿ ϩⲛ̄ ⲧⲉⲥⲙⲛ︦ⲧ︦‐
ϩⲗ̄ⲗⲱ • ⲁⲩⲱ̄ ⲡⲉⲥⲙⲉϩ ⲥⲟⲟⲩ ⲛ ⲉⲃⲟⲧ ⲡⲉ ⲡⲁⲓ̄ •
Ⲁⲥⲟⲩⲱ̄ϣⲃ̄ ⲛ̄ϭⲓ ⲙⲁⲣⲓⲁ⳿• ⲡⲉϫⲁⲥ ⲙ̄ ⲡⲁⲅⲅⲉⲗⲟⲥ • ϫⲉ
ⲛ̄ ⲁϣ ⲛ̄ ϩⲉ⳿ ⲡⲁⲓ̄ ⲛⲁϣⲱⲡⲉ ⲙ̄ⲙⲟⲓ̄ ⲙ̄ⲡⲉ ⲓⲥⲟⲩⲉⲛ
ϩⲟⲟⲩⲧ • Ⲉⲣϣⲁⲛ ⲧⲁϭⲣⲏⲛ | ⲱ︤ⲱ︥ ⲟⲛ • ⲥⲉϣⲟⲟⲡ ⲛⲁⲥ ⲛ̄ϭⲓ
ⲛ̄ⲥⲱⲛⲧ ⲛ̄ ⲧⲉⲫⲩⲥⲓⲥ • ϩⲓⲧⲙ̄ ⲡⲛⲟⲙⲟⲥ ⲙ̄ ⲡⲅⲁⲙⲟⲥ •
Ⲟⲩϣⲡⲏⲣⲉ ⲙⲉⲛ⳿ ⲡⲉ ⲡϩⲱⲃ ⲉⲛⲧ ⲁϥϣⲱⲡⲉ ⲛ ⲉⲗⲓⲥⲁⲃⲉⲧ •
Ⲁⲗⲗⲁ⳿ ⲡⲉⲧ ⲉⲕⲧⲁϣⲉⲟ̄ⲉⲓϣ ⲙ̄ⲙⲟϥ ⲛⲁⲓ̄ • ϥϩⲓⲧ ⲡⲉ ⲛ̄
ϣⲡⲏⲣⲉ ⲛⲓⲙ • ϩⲓ ⲙⲉⲉⲩⲉ ⲛⲓⲙ • Ⲁϥⲟⲩⲱϩ ⲟⲛ⳿ ⲉ ⲧⲟⲟⲧϥ̄
ⲛ̄ϭⲓ ⲡⲁⲅⲅⲉⲗⲟⲥ • ⲡⲉϫⲁϥ ⲛⲁⲥ ϫⲉ ⲟⲩⲡⲛⲁ̄ ⲉϥⲟⲩⲁⲁⲃ⳿
ⲡⲉⲧ ⲛⲏⲩ ⲉ ϩⲣⲁⲓ̄ ⲉϫⲱ • ⲁⲩⲱ̄ ⲧϭⲟⲙ⳿ ⲙ̄ ⲡⲉⲧ ϫⲟⲥⲉ •
ⲧⲉⲧ ⲛⲁⲣ̄ ϩⲁⲓ̄ⲃⲉⲥ⳿ ⲉⲣⲟ• ⲁⲥⲧⲁϫⲣⲟ ⲇⲉ⳿ ⲛ̄ϭⲓ ⲧⲡⲁⲣ‐
ⲑⲉⲛⲟⲥ • ϫⲉ ⲟⲩⲉⲛϣϭⲟⲙ ⲙ̄ | ⲡⲛⲟⲩⲧⲉ⳿ ⲉ ϩⲱⲃ ⲛⲓⲙ •
Ⲗⲟⲓⲡⲟⲛ⳿ ⲇⲉ ⲡⲉϫⲁⲥ ⲙ̄ ⲡⲁⲅⲅⲉⲗⲟⲥ • ϫⲉ ⲉⲓⲥ ϩⲏⲏⲧⲉ⳿
ⲁⲛⲅ̄ ⲑⲙ̄ϩⲁⲗ ⲙ̄ ⲡϫⲟⲉⲓⲥ • ⲙⲁⲣⲉⲥϣⲱⲡⲉ ⲛⲁⲓ̄ ⲕⲁⲧⲁ
ⲡⲉⲕϣⲁϫⲉ • Ϫⲉ ⲕⲁⲥ⳿ ϭⲉ⳿ ⲛ̄ⲛⲉ ⲛⲣ̄ ϩⲟⲩⲟ̄ ϩⲙ̄ ⲡϣⲁϫⲉ •
ⲉⲡⲓ Ⲇⲏ⳿ ⲁ ⲡⲛⲁⲩ ϣⲱⲡⲉ⳿ • ⲛ̄ⲧⲛ̄ϯ ⲙ̄ ⲡⲉⲛⲟⲩⲟⲓ̄ • ⲉ


### 0017

ϩⲟⲩⲛ⳿ ⲛ̄ⲧⲛ̄ϫⲱⲕ ⲉ ⲃⲟⲗ ⲛⲙ̄ⲙⲩⲥⲧⲏⲣⲓⲟⲛ⳿ ⲉⲧ ⲟⲩⲁⲁⲃ •
Ⲙⲁⲣⲛ̄ϫⲟⲟⲥ⳿ ⲛ̄ ⲧⲉⲓ ϩⲉ • ⲙⲛ̄ ⲧⲙⲁⲕⲁⲣⲓⲁ⳿ ⲉⲗⲓⲥⲁⲃⲉⲧ⳿•
ϫⲉ • Ⲧⲉ ⲥⲙⲁⲙⲁⲁⲧ ⲛ̄ⲧⲟ⳿ ϩⲛ̄ ⲛⲉϩⲓⲟ̄|ⲙⲉ • ⲁⲩⲱ̄ ϥⲥⲙⲁ‐
ⲙⲁⲁⲧ ⲛ̄ϭⲓ ⲡⲕⲁⲣⲡⲟⲥ⳿ ⲛ̄ ϩⲏⲧⲉ • ϫⲉ ⲁⲛⲅ̄ ⲛⲓⲙ • ⲁⲛⲟⲕ
ϫⲉ • ⲉⲣⲉ ⲧⲙⲁⲁⲩ ⲙ̄ ⲡⲁ ϫⲟⲉⲓⲥ⳿ ⲉⲓ ⲉ ⲣⲁⲧ • Ⲁⲗⲏⲑⲱⲥ⳿
ⲛ̄ ⲟⲩⲟ̄ⲉⲓϣ ⲛⲓⲙ⳿• ⲧⲉ ⲥⲙⲁⲙⲁⲁⲧ⳿ ⲛ̄ⲧⲟ ϩⲛ̄ ⲛⲉϩⲓⲟ̄ⲙⲉ •
ⲁⲩⲱ̄ ⲟⲛ ⲧⲉⲛⲧ ⲁⲥⲧⲱⲟⲩⲛ⳿ ϩⲁ ⲡⲉⲧ ⲥⲙⲁⲙⲁⲁⲧ • ⲧⲉⲣⲤ‐
ⲙⲁⲙⲁⲁⲧ⳿ ϩⲛ̄ ⲧⲡⲉ • ⲁⲩⲱ̄ ϩⲓϫⲙ̄ ⲡⲕⲁϩ • Ⲧⲟⲩⲕⲁⲗⲁϩⲏ⳿
ⲥⲙⲁⲙⲁⲁⲧ ϫⲉ • ⲁⲥⲧⲱⲟⲩⲛ ϩⲁ ⲡⲉⲧ ⲙⲟⲩϩ ⲛ̄ ⲧⲡⲉ⳿ ⲙⲛ̄
ⲡⲕⲁϩ • ⲙ̄ ⲯⲓⲥ ⲛ̄ ⲉⲃⲟⲧ • Ⲛⲟⲩⲉⲕⲓⲃⲉ⳿ ⲥⲙⲁⲙⲁⲁⲧ • ⲛⲁⲓ̄
ⲛ̄ⲧⲁⲣⲥⲁⲁⲛϣ̄ | ⲛ̄ϩⲏⲧⲟⲩ ⲙ̄ ⲡⲇⲩⲙⲓⲟⲩⲣⲅⲟⲥ ⲛ̄ ϣⲟⲙⲧⲉ⳿
ⲛ̄ⲣⲟⲙⲡⲉ :-Ⲧⲟⲩⲧⲁⲡⲣⲟ⳿ ⲥⲙⲁⲙⲁⲁⲧ⳿ ⲧⲁⲓ̄ ⲛ̄ⲧⲁⲥϣⲁϫⲉ
ⲙⲛ̄ ⲡϣⲏⲣⲉ ⲙ̄ ⲡⲛⲟⲩⲧⲉ ϩⲛ̄ ⲟⲩϩⲗⲟϭ • Ⲉⲓϣⲁⲛϩⲓ ⲧⲟⲟⲧ⳿
ⲉ ⲟⲛⲟⲙⲁⲍⲉ⳿ ⲛ̄ⲛⲟⲩⲙⲉⲗⲟⲥ ⲧⲏⲣⲟⲩ • ⲛⲁ ⲡϩⲟⲩⲛ⳿ ⲙⲛ̄
ⲛⲁ ⲡⲃⲟⲗ • ⲡⲉⲟⲩⲟ̄ⲉⲓϣ ⲧⲏⲣϥ̄ ⲙ̄ ⲡⲁ ⲱⲛϩ̄ ⲛⲁⲣⲱϣⲉ ⲉ
ⲣⲟⲓ̄ ⲁⲛ⳿ ⲉⲓϫⲱ ⲛ̄ ⲛⲟⲩⲁⲣⲉⲧⲏ⳿ ⲧⲏⲣⲟⲩ :-Ⲁⲗⲗⲁ ϯⲡⲁⲣⲁ‐
ⲕⲁⲗⲉⲓ ⲙ̄ⲙⲟ ⲱ̄ ⲧⲡⲁⲣⲑⲉⲛⲟⲥ ⲛ̄ ⲣⲉϥϫⲡⲉ⳿ ⲡⲛⲟⲩⲧⲉ • ⲉ
ⲧⲣⲉ ⲡⲣⲉⲥⲃⲉⲩⲉ ϩⲁ ⲣⲟⲓ • ⲁⲛⲟⲕ | ⲉⲡⲓⲫⲁⲛⲓⲟⲥ⳿ ⲡⲉⲓ ϩⲙ̄‐
ϩⲁⲗ ⲛ̄ ⲁⲧ ϣⲁⲩ • ⲁⲩⲱ̄ ⲛ̄ⲧⲉⲥⲉⲡⲥ̄ ⲡⲉⲭ︤ⲥ︥ • ⲉϫⲛ̄ ⲛⲁ ⲧⲁ‐
ⲡⲟⲗⲓⲥ ⲧⲏⲣⲟⲩ • ⲙⲁⲗⲗⲟⲛ ⲇⲉ⳿ ϩⲁ ⲧⲟⲓⲕⲟⲩⲙⲉⲛⲏ ⲧⲏⲣⲥ̄ •
ⲧⲉⲣϨⲏⲛ⳿ ⲅⲁⲣ⳿ ⲉ ϩⲟⲩⲛ ⲉ ⲣⲟϥ ⲛ̄ ⲟⲩⲟ̄ⲉⲓϣ ⲛⲓⲙ • ⲁⲩⲱ̄
ⲧⲉⲝⲟⲩⲥⲓⲁ⳿ ⲧⲟ ⲛⲉ • ⲙ̄ ⲡⲁⲣⲁ ⲛⲉⲧ ⲟⲩⲁⲁⲃ ⲧⲏⲣⲟⲩ • ⲉ
ⲥⲟⲡⲥ̄ ⲙ̄ⲙⲟϥ • Ϫⲉ ⲕⲁⲥ • ⲛⲉⲧ ϩⲕⲁⲉⲓⲧ⳿ ⲉϥⲉⲧⲥⲓⲟⲟⲩ ⲛ̄
ⲟ̄ⲉⲓⲕ Ⲛⲉⲧ ϣⲱⲛⲉ ⲉϥⲉⲧⲁⲗϭⲟⲟⲩ • Ⲛⲉⲧ ⲥⲟⲣⲙ̄ ⲉϥⲉⲥⲟⲟⲩ‐
ϩⲟⲩ⳿ ⲉ ϩⲟⲩⲛ ⲉ ⲡⲉϥⲟ̄ϩⲉ⳿ ⲉⲧ ⲟⲩⲁⲁⲃ • Ⲁⲛⲟⲛ ⲇⲉ ϩⲱⲱⲛ
ϩⲓ ⲟⲩⲥⲟⲡ • ⲉϥⲉ|ϯⲑⲉ⳿ ⲛⲁⲛ⳿ ⲉ ⲧⲣⲉ ⲛⲙⲟⲟϣⲉ⳿ ϩⲙ̄ ⲡⲉⲧⲣⲁ⳿‐
ⲛⲁϥ • ⲛ̄ ⲟⲩⲟ̄ⲉⲓϣ ⲛⲓⲙ⳿ ϩⲙ̄ ⲡⲧⲣⲉⲛⲕⲱ ⲛ̄ ⲥⲱⲛ • ⲙ̄
ⲡⲣⲙ̄ ⲛ̄ ⲁⲥ • ⲙⲛ̄ ⲧⲉϥⲕⲁⲕⲓⲁ • Ⲁϩⲣⲟⲕ⳿ ⲉⲕⲡⲉⲣⲓⲥⲡⲁ⳿ ⲛ̄
ⲧⲉⲓ ϩⲉ⳿ ⲧⲏⲣⲥ̄ • ⲁⲩⲱ̄ ⲉⲕϩⲟⲥⲉ⳿ ⲙ̄ ⲡⲣⲱⲙⲉ • ϩⲱ⳿ ⲉ
ⲡⲉϩⲟⲟⲩ • ⲡⲉϩⲟⲟⲩ⳿ ⲉ ⲧⲉϥⲕⲁⲕⲓⲁ • Ϣⲟⲙⲛ︦ⲧ︦ ⲙ̄ⲙⲁϩⲉ
ⲛ̄ ⲕⲁϩ • ⲛⲉⲧϭⲉⲉⲧ⳿ ⲉ ⲣⲟⲕ • ⲁⲩⲱ̄ ⲛ̄ⲥⲉⲛⲉϫ⳿ ϩⲉⲛⲕⲟⲩⲓ̄
ⲛ̄ⲱⲛⲉ⳿ ⲉ ϫⲱⲕ • ⲛ̄ⲥⲉϩⲁⲣⲉϩ⳿ ⲉ ⲧⲉⲕⲥⲁⲣⲝ̄ ⲛ̄ⲉⲃⲓⲏⲛ •
Ⲉⲕⲡⲁⲣⲁⲛⲟⲙⲉⲓ⳿ ⲛ̄ ⲛⲓⲙ • ⲁⲣⲓ ⲡⲙⲉⲉⲩⲉ⳿ ⲙ̄ ⲡϩⲁⲡ | ⲙ̄
ⲡⲛⲟⲩⲧⲉ • ⲙ̄ ⲡⲛⲁⲩ⳿ ⲉⲧⲟⲩⲛⲁⲕⲱⲧⲉ⳿ ⲉ ⲣⲟⲕ ⲛ̄ϭⲓ ⲛⲉ‐


### 0018

ⲛⲧ ⲁⲕⲁⲁⲩ⳿ ⲧⲏⲣⲟⲩ • Ⲁϣ⳿ ⲛ̄ ⲃⲟⲏ̄ⲑⲓⲁ• ⲧⲉⲧ ⲛⲁϣⲱⲡⲉ
ⲛⲁⲕ • Ⲡⲇⲓⲕⲁⲥⲧⲏⲥ⳿ ⲉⲧ ⲙ̄ⲙⲁⲩ • ⲙⲉϥϫⲓ⳿ ⲗⲁⲁⲩ⳿ ⲛ̄ⲉⲛⲕⲁ⳿
ⲛ̄ ⲧⲟⲟⲧⲕ̄ ⲛϥ̄ⲕⲁⲁⲕ ⲉ ⲃⲟⲗ • Ⲁ ⲛⲉⲭⲣⲏⲙⲁ⳿ ϣⲱⲡⲉ⳿
ⲛⲁⲕ⳿ ⲛ̄ ⲁⲡⲟⲗⲁⲩⲥⲓⲥ • ⲁⲩⲱ̄ ⲛ̄ ⲁⲫⲟⲣⲙⲏ ⲛ̄ ⲟⲩⲕⲟⲗⲁⲥⲓⲥ⳿
ϣⲁ ⲉⲛⲉϩ • Ⲁ ⲡⲉⲕⲉⲟⲟⲩ • ⲙⲛ̄ ⲡⲉⲕⲧⲁⲉⲓⲟ̄ ϣⲱⲡⲉ ⲛⲁⲕ⳿
ⲙ̄ ⲡⲣⲟⲇⲓⲇⲟⲩ • ⲛⲅ̄ ⲛⲁϩⲉ⳿ ⲁⲛ⳿ ⲉⲥⲩⲛⲏⲅⲱⲣⲟⲥ • ⲉϥ‐
ⲥⲩⲛⲏⲅⲟⲣⲉⲓ⳿ ϩⲁ ⲣⲟⲕ • ⲕⲟⲕⲙ̄ ⲁⲩⲱ⳿ ⲕϣⲟⲗϩ̄ • ⲕⲟⲟⲛϣ̄ •
ⲉⲓⲥ ⲧⲣⲙ̄ⲉⲓⲏ̄ ⲙ̄ ⲡⲟⲣ|ⲫⲁⲛⲟⲥ • ⲛ̄ⲧⲁⲕ ⲑⲙ̄ⲕⲟϥ • Ⲉⲓⲥ
ⲡⲁϣⲁϩⲟⲙ ⲛ̄ ⲧⲉⲭⲏⲣⲁ⳿ ⲛ̄ⲧⲁⲕⲧⲱⲣⲡ̄ ⲙ̄ ⲡⲉⲥⲏⲓ̄ • Ⲉⲓⲥ
ⲛ̄ϩⲏⲕⲉ⳿ ⲛ̄ⲧⲁⲕϥⲟϭⲟⲩ ⲙ̄ ⲡⲉⲩⲃⲉⲕⲉ • Ⲉⲓⲥ ⲛ̄ϩⲙ̄ϩⲁⲗ ⲛ̄‐
ⲧⲁⲕⲑⲙ̄ⲕⲟⲟⲩ ϩⲛ̄ ⲟⲩⲙⲛ̄ⲧ ⲁⲧ ⲛⲁ • Ϩⲁⲡⲁⲝ ϩⲁⲡⲗⲱⲥ
ⲛ̄ⲛⲟⲃⲉ ⲧⲏⲣⲟⲩ ⲛ̄ⲧⲁⲕⲁⲁⲩ • ⲕⲛⲁϩⲉ⳿ ⲉ ⲣⲟⲟⲩ • ⲉⲩⲟⲩⲏϩ
ⲛ̄ⲥⲁ ⲧⲉⲕⲯⲩⲭⲏ • ⲛ̄ⲑⲉ ⲛ̄ⲧⲁⲕⲁⲁⲩ ⲙ̄ⲙⲟⲥ • Ⲁⲣⲓ
ⲡⲙⲉⲉⲩⲉ⳿ ⲙ̄ ⲡⲉϩⲟⲟⲩ • ⲉⲧ ⲉⲣⲉ ⲧⲟⲣⲅⲏ⳿ ⲛⲁϭⲱⲗⲡ̄ ⲉ ⲃⲟⲗ
ϩⲛ̄ ⲧⲡⲉ • Ⲁⲣⲓ ⲡⲙⲉⲉⲩⲉ⳿ ⲛ̄ ⲧⲡⲁⲣⲣⲟⲩⲥⲓⲁ ⲉⲧ ϩⲁⲉⲟⲟⲩ •
ⲙ̄ ⲡⲉⲭ︦ⲥ︦ • ⲕⲁⲧⲁ ⲑⲉ | ⲉⲧ ⲉϥϫⲱ ⲙ̄ⲙⲟⲥ ⲛ̄ϭⲓ ⲡⲉⲛⲥⲱⲧⲏⲣ •
ϫⲉ ⲛⲉⲛⲧ ⲁⲩⲉⲓⲣⲉ ⲛⲙ̄ⲡⲉⲧ ⲛⲁⲛⲟⲩϥ • ⲉⲩⲁⲛⲁⲥⲧⲁⲥⲓⲥ
ⲛ̄ ⲱ̄ⲛϩ̄ • Ⲁⲩⲱ̄ ⲛⲉⲛⲧ ⲁⲩⲉⲓⲣⲉ ⲛⲙ̄ ⲡⲉⲑⲟⲟⲩ ⲉⲩⲁⲛⲁⲥⲧⲁⲥⲓⲥ
ⲛ̄ ⲕⲣⲓⲥⲓⲥ • Ⲟⲩ⳿ ⲡⲉ ϯⲛⲁϫⲟⲟϥ • ⲱ̄ ⲛⲁ ⲙⲉⲣⲁⲧⲉ • ⲉⲓⲥ
ⲧⲙⲛ̄ⲧⲉⲣⲟ⳿ ⲛ ⲙ̄ⲡⲏⲟⲩⲉ⳿• ⲥⲃ̄ⲧⲱⲧ • ⲉⲓⲥ ⲧⲅⲉϩⲉⲛⲛⲁ ⲟⲛ •
Ⲙⲁⲣⲉ Ⲛ ⲁⲡⲟⲗⲁⲩⲥⲓⲥ⳿ ⲛ̄ ⲧⲙⲛ︦ⲧ︦ⲉⲣⲟ ⲛ ⲙ̄ⲡⲏⲩⲉ⳿ ⲡⲣⲟ‐
ⲧⲣⲉⲡⲉ ⲙ̄ⲙⲟⲕ • Ⲛ̄ⲧⲉ ⲧⲁⲡⲓⲗⲏ ⲙ̄ ⲡⲕⲱϩⲧ̄ ⲛ̄ ⲧⲅⲉϩⲉⲛⲛⲁ⳿
ϣⲧⲣ̄ⲧⲱⲣⲕ̄ • ⲛⲅ̄ ⲕⲟⲧⲕ̄ ⲉ ⲃⲟⲗ ϩⲛ̄ ⲛⲉϩⲃⲏⲩⲉ⳿ ⲙ̄ ⲡⲇⲓⲁ‐
ⲃⲟⲗⲟⲥ • ⲛⲅ̄ ⲙⲟⲟϣⲉ ϩⲙ̄ | ⲡⲉⲧ ⲣ̄ⲁⲛⲁϥ ⲙ̄ ⲡϫⲟⲉⲓⲥ
ⲛ̄ ⲟⲩⲟ̄ⲉⲓϣ ⲛⲓⲙ • Ⲛⲉ ⲕⲗⲏⲣⲟⲛⲟⲙⲉⲓ ⲛ̄ ⲛⲉⲧⲉ⳿ ⲛ̄ⲥⲉ‐
ⲛⲁⲡⲁⲣⲁⲅⲉ⳿ ⲁⲛ⳿ ϣⲁ ⲉⲛⲉϩ ⲛⲁⲓ̄ ⲉⲧⲉ ⲙ̄ ⲡⲉ ⲃⲁⲗ
ⲛⲁⲩ⳿ ⲉ ⲣⲟⲟⲩ • ⲟⲩⲇⲉ ⲙ̄ ⲡⲉⲙⲁⲁϫⲉ⳿ ⲥⲟⲧⲙⲟⲩ⳿ ⲟⲩⲇⲉ⳿
ⲙ̄ⲡ ⲟⲩⲁⲗⲉ⳿ ⲉ ϩⲣⲁⲓ̄ ⲉϫⲙ̄ ⲡϩⲏⲧ ⲛ̄ⲣⲱⲙⲉ • ⲛⲁⲓ̄ ⲛ̄ⲧⲁ
ⲡⲛⲟⲩⲧⲉ⳿ ⲥⲃ̄ⲧⲱⲧⲟⲩ⳿ ⲛ̄ ⲛⲉⲧ ⲙⲉ ⲙ̄ⲙⲟϥ • Ϩⲓⲧⲛ̄ ⲧⲉ‐
ⲭⲁⲣⲓⲥ • ⲙⲛ̄ ⲧⲙⲛ︦ⲧ︦ⲙⲁⲓ̄ⲣⲱⲙⲉ ⲙ̄ ⲡⲉⲛ ϫⲟⲉⲓⲥ ⲓ︦ⲥ︦ ⲡⲉⲭ︦ⲥ︦ •
Ⲡⲁⲓ̄ ⲉ ⲃⲟⲗ ϩⲓ ⲧⲟⲟⲧϥ̄ • ⲉⲣⲉ ⲉⲟⲟⲩ ⲛⲓⲙ⳿ ⲡⲣⲉⲡⲉⲓ ⲛⲁϥ •
ⲙⲛ̄ ⲡⲉϥ|ⲉⲓⲱⲧ⳿ ⲛ̄ ⲁⲅⲁⲑⲟⲥ • ⲙⲛ̄ ⲡⲉⲡⲛ︦ⲁ︦ ⲉⲧ ⲟⲩⲁⲁⲃ
ⲛ̄ ⲣⲉϥⲧⲁⲛϩⲟ • Ⲧⲉⲛⲟⲩ • ⲁⲩⲱ̄ ⲛ̄ⲟⲩⲟ̄ⲉⲓϣ ⲛⲓⲙ ϣⲁ
ⲉⲛⲉϩ • ⲛ̄ ⲉⲛⲉϩ ϩⲁⲙⲏⲛ ⁖-


### 0019

Ⲁⲣⲓ ⲧⲁⲅⲁⲡⲏ⳿ ⲛⲁ ⲉⲓⲟⲧⲉ⳿ ⲙⲛ̄ ⲛⲁ ⲥⲛⲏⲩ • ⲟⲩⲟⲛ ⲛⲓⲙ
ⲉⲧ ⲛⲁⲱϣ ϩⲙ̄ ⲡⲉⲓ ⲕⲉⲫⲁⲗⲁⲓ̄ⲟⲛ ⲛ̄ ϫⲱⲱⲙⲉ • ϣⲗⲏⲗ
ϩⲓϫⲛ̄ ⲧⲉⲛⲙⲁⲓ̄ ⲛⲟⲩⲧⲉ ⲛ̄ⲥⲱⲛⲉ ⲙ̄ ⲙⲁⲓ̄ ⲁⲅⲁⲡⲏ • ⲁⲩⲱ
ⲙ̄ ⲙⲁⲓ̄ ⲡⲣⲟⲥⲫⲟⲣⲁ [erasure of two and a half lines] ϫⲉ
ⲛ̄ⲧⲟⲥ • ⲁⲥϥⲓ ⲡⲉϥⲣⲟⲟⲩϣ⳿ ϩⲛ̄ ⲛⲉⲥϩⲓⲥⲉ ⲙ̄ⲙⲓⲛ ⲙ̄ⲙⲟⲥ
ⲁⲥⲧⲁⲁϥ ⲉ ϩⲟⲩⲛ ⲉ ⲡⲧⲟⲡⲟⲥ [erasure of four lines] Ϫⲉ ⲕⲁⲥ⳿
ⲉⲣⲉ ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ • ⲙⲛ̄ ⲡϩⲁⲅⲓⲟⲥ ⲓ̄ⲱ‐
ϩⲁⲛⲛⲏⲥ ⲙⲛ̄ ⲧⲡⲁⲣⲑ • ⲉⲧ ⲟⲩⲁⲁⲃ ⲙⲁⲣⲓⲁ • ⲛⲁⲡⲁⲣⲁ‐
ⲕⲁⲗⲉⲓ ⲙ̄ ⲡⲉⲭⲥ̄ ⲉ ϩⲣⲁⲓ̄ ⲉ ϫⲱⲥ ⲛϥ̄ⲥⲙⲟⲩ ⲉ ⲣⲟⲥ • ⲙⲛ̄
[erasure of three and a half lines] ⲁⲩⲱ ⲟⲛ ⲉⲩϣⲁⲛⲉⲓ ⲉ ⲃⲟⲗ
ϩⲛ̄ | ⲥⲱⲙⲁ • ⲡⲣⲟⲥ ⲡⲉⲧ ⲕⲏ ⲉ ϩⲣⲁⲓ ⲛ̄ⲣⲱⲙⲉ ⲛⲓⲙ • ⲛ̄ⲧⲉ
ⲡⲛⲟⲩⲧⲉ ⲡⲱϩ ⲙ̄ ⲡⲉⲭⲓⲗⲟⲅⲣⲁⲫⲟⲛ ⲛ̄ ⲛⲉⲩⲛⲟⲃⲉ • ⲛϥ̄ⲥϩⲁⲓ̄
ⲙ̄ ⲡⲉⲩⲣⲁⲛ ⲉ ⲡϫⲱⲱ̄ⲙⲉ ⲙ̄ ⲡⲱⲛϩ̄ ⲛ̄ⲥⲉ ϯⲛⲁⲩ ⲛ̄ ⲛⲁ ⲧⲡⲉ •
ⲛ̄ ϣⲃ̄ⲃⲓⲱ̄ ⲛ̄ ⲛⲁ ⲡⲕⲁϩ • ⲛⲉⲓ ϣⲁ ⲉⲛⲉϩ • ⲉ ⲡⲙⲁ ⲛ̄ ⲛⲉⲓ
ⲡⲣⲟⲥ ⲟⲩⲟ̄ⲉⲓϣ ⲛ̄ⲥⲉϯ ⲛⲁⲩ ⲟⲛ⳿ ⲛ̄ ⲧϣⲃ̄ⲃⲓⲱ̄ ⲙ̄ ⲡⲉⲩⲉⲣⲏⲧ
ⲛ̄ ϣⲉ ⲛ̄ ⲕⲱⲃ ⲛ̄ ⲥⲟⲡ⳿ ϩⲛ̄ ⲑⲓ̈ⲗⲏ︦ⲙ︦ • ⲛ̄ⲧⲡⲉ ⲧⲡⲟⲗⲓⲥ • ⲛ̄
ⲛ̄ⲇⲓⲕⲁⲓ̄ⲟⲥ ⲧⲏⲣⲟⲩ ϩⲁⲙⲏⲛ • ⲉϥⲉϣⲱⲡⲉ
Ⲁⲣⲓ ⲡⲁ ⲙⲉⲉⲩⲉ ϩⲱ ⲛⲁⲅⲁⲡⲏ • ⲁⲛⲟⲕ ⲡⲓⲉⲗⲁⲭ ⲁⲩⲱ̄
ⲡⲓⲁⲧ ⲙ̄ⲡϣⲁ⳿ ⲙ̄ ⲡⲣⲁⲛ ⲉⲧ ϩⲓ ϫⲱϥ [erasure of three lines]
ⲉⲓⲥ ϯⲙⲉⲧⲁⲛⲟⲓⲁ • ⲁⲁⲧ ⲛ̄ ⲣⲙ̄ϩⲉ • ⲁⲓ̄ⲧⲟⲗⲙⲁ ⲁⲓⲥϩⲁⲓ ⲡⲉⲓ
ϫⲱⲱⲙⲉ ⲉⲓϣⲟⲣⲡ ϩⲛ̄ ϩⲣⲓⲧⲉ ⲡⲓⲟⲙ - ϩⲛ̄ ⲧⲙⲉϩ ⲯⲥ
ⲛ̄ ⲣⲟⲙⲡⲉ • ⲛ̄ ⲇⲓⲟⲕⲗⲩ