### 0001

ⲞⲨⲆⲒⲀⲖⲞⲄⲞⲤ Ⲛ̄ⲦⲈ ⲠⲢⲰⲘⲈ ⲈⲦ ⲪⲞⲢⲒⲚ
ⲠⲈⲬⲤ̄ ϨⲚ̄ ⲞⲨⲘⲈ • ⲠⲠⲀⲦⲢⲒⲀⲢⲬⲎⲤ ⲈⲦ
ⲞⲨⲀⲀⲂ • ⲀⲨⲰ ⲠⲀⲢⲬⲎⲈⲠⲒⲤⲔⲞⲠⲞⲤ Ⲛ̄
ⲀⲚϮⲞⲬⲒⲀ ⲠϨⲀⲄⲒⲞⲤ ⲤⲈⲨⲎⲢⲞⲤ • ⲈⲀϤ-
ⲦⲀⲨⲞϤ Ⲉ ⲦⲂⲈ Ⲙ ⲘⲚ︦Ⲧ︦ϢⲚ̄ϨⲦⲎϤ Ⲛ̄ ⲠⲚⲞⲨⲦⲈ
ⲘⲚ̄ ⲦⲠⲀⲢⲢⲎⲤⲒⲀ Ⲛ ⲠⲀⲢⲬⲀⲄⲄⲈⲖⲞⲤ ⲈⲦ
ⲞⲨⲀⲀⲂ ⲘⲒⲬⲀⲎⲖ ⲀϤϪⲈ ϨⲚ̄ ⲔⲞⲨⲒ ⲆⲈ ⲞⲚ
Ⲉ ⲦⲂⲈ ⲐⲀⲄⲒⲀ Ⲛ ⲔⲨⲢⲒⲀⲔⲎ • Ⲉ ⲂⲞⲖ ϪⲈ
ⲚⲦⲀ ⲠϢⲀ Ⲛ ⲠⲀⲢⲬⲀⲄⲄⲈⲖⲞⲤ ϪⲰⲚϤ̄ Ⲉ
ⲢⲞⲤ Ⲛ̄ ⲦⲈⲢⲞⲘⲠⲈ ⲈⲦ Ⲙ̄ⲘⲀⲨ • ⲀϤϢⲀϪⲈ
ⲆⲈ ⲞⲚ Ⲉ ⲦⲂⲈ ⲘⲀⲐⲀⲒⲞⲤ ⲠⲈⲠⲢⲀⲄⲘⲀ-
ⲦⲈⲨⲦⲎⲤ ⲘⲚ̄ ⲦⲈϤⲤϨⲒⲈ ⲘⲚ̄ ⲚⲈϤϢⲎⲢⲈ
ⲚⲦⲀϤⲦⲀⲨⲈ ⲠⲒ ⲖⲞⲄⲞⲤ ⲆⲈ Ⲛ ⲤⲞⲨ ⲘⲚ︦Ⲧ︦-
ⲤⲚⲞⲞⲨⲤ Ⲛ̄ ⲠⲈⲂⲞⲦ ϨⲀⲐⲰⲢ • ⲈⲢⲈ ⲠⲘⲎⲎϢⲈ
ⲦⲎⲢϤ̄ Ⲛ ⲦⲠⲞⲖⲒⲤ ⲤⲞⲞⲨϨ ⲈⲨⲢ̄ ϢⲀ Ⲛ
ⲠⲀⲢⲬⲀⲄⲄⲈⲖⲞⲤ ⲈⲦ ⲞⲨⲀⲀⲂ ⲘⲒⲬⲀⲎⲖ ϨⲚ̄
ⲞⲨⲈⲒⲢⲎⲚⲎ •
Ⲥⲱⲧⲙ̄ ⲉ ⲡⲉⲯⲁⲗⲙⲱⲇⲟⲥ ⲇⲁ︦ⲇ︦ ⲉϥⲥⲩⲙⲁⲛ̄ⲉ ⲛⲁⲛ ⲉ
ⲧⲣⲉ ⲛⲥⲱⲟⲩϩ ⲧⲏⲣⲉⲛ ⲉ̄ ϩⲟⲩⲛ ⲉ ⲡⲉⲓ ϣⲁ ⲉ̄ⲧ ⲟⲩⲁⲁⲃ
ⲙ̄ⲡⲟⲟⲩ • ⲁⲩⲱ ⲟⲛ ϯⲛⲁⲩ ⲉ ⲡⲉⲓ̈ ϣⲁ ⲉϥⲟ ⲛ ⲥⲛⲁⲩ • ϯⲛⲁⲩ
ⲟⲛ ⲉⲩϫⲁⲙⲏ ⲉⲥϣⲟⲟⲡ ⲉ̄ ⲙⲛ̄ ϩⲁⲧⲏⲩ ⲛ̄ ⲣⲱϩⲧ̄ ϩⲓϫⲱⲛ ⲉ ⲧⲣⲉ


### 0002

ⲥϣⲧⲣ̄ⲧⲱⲣⲛ̄ • ⲁⲗⲗⲁ ⲧⲛ̄ⲥⲃ̄ⲧⲱⲧ ⲉ̄ ϣⲱⲡ ⲉ ⲣⲟⲛ̄ ⲛ̄ⲛⲉⲧ
ⲣ̄ | ⲛⲟⲃⲣⲉ ⲛ̄ ⲧⲛ̄ⲯⲩⲭⲏ ϩⲓ ⲟⲩⲥⲟⲡ ⲉⲓⲧⲉ ⲁⲛⲟⲛ ⲛⲉⲧ
ϣⲁϫⲉ • ⲉⲓⲧⲉ ⲛ̄ⲧⲱⲧⲛ̄ ⲛⲉⲧ ⲥⲱⲧⲙ̄ • Ⲁⲩⲱ ⲡⲁⲛⲧⲱⲥ ⲡⲉⲓ
ϣⲁϫⲉ ⲛⲁϫⲱⲕ ⲉ ⲃⲟⲗ ⲉ ϩⲣⲁⲓ̈ ⲉ ϫⲱⲛ • ϫⲉ ⲟⲩⲁ ⲙⲉⲛ
ⲁϥϯ ϣⲉ • ⲕⲉ ⲟⲩⲁ ⲇⲉ ⲛ ⲥⲉ • ⲕⲉ ⲟⲩⲁ ⲇⲉ ⲙ̄ⲙⲁⲁⲃ •
Ⲉⲓⲥⲟⲟⲩⲛ ϫⲉ ⲛϥ̄ⲟⲩⲏⲩ ⲙ̄ⲙⲟⲛ ⲁⲛ ⲛ̄ϭⲓ ⲡⲣϥ̄ϯ ⲃⲉⲕⲉ
ⲙ ⲙⲉ • ⲡⲉⲛϫⲟⲉⲓⲥ ⲓⲥ̄ ⲡⲉⲭⲥ̄ ⲡϣⲏⲣⲉ ⲙ ⲡⲛⲟⲩⲧⲉ :
ⲉϥϫⲱ ⲙ̄ⲙⲟⲥ ϩⲛ̄ ⲧⲉϥⲧⲁⲡⲣⲟ ⲙ̄ ⲙⲉ • ϫⲉ ⲡⲙⲁ ⲉⲧ
ⲉⲣⲉ ⲥⲛⲁⲩ ⲏ̄ ϣⲟⲙⲧ̄ ⲥⲟⲟⲩϩ ⲛ̄ϩⲏⲧϥ̄ ϩⲙ̄ ⲡⲁ ⲣⲁⲛ •
ϯϣⲟⲟⲡ ⲛⲙ̄ⲙⲁⲩ ϩⲛ̄ ⲧⲉⲩⲙⲏⲧⲉ • ⲛ̄ ϩⲟⲥⲟⲛ ϥ̄ϣⲟⲟⲡ
ϩⲁϩⲧⲛ̄ ⲙ̄ⲡⲟⲟⲩ ⲛ̄ϭⲓ ⲡⲛⲟⲩⲧⲉ • ⲙⲁⲣⲛ̄ϣⲱⲡ ⲉ ⲣⲟⲛ
ⲙ̄ ⲡϣⲁϫⲉ ⲙ̄ ⲡⲛⲟⲩⲧⲉ ⲉϥϫⲱ ⲙ̄ⲙⲟⲥ ⲛⲁⲛ ϩⲛ̄ ⲧⲁⲡⲣⲟ
ⲙ̄ ⲫⲓ̈ⲉⲣⲟⲯⲁⲗⲧⲏⲥ ⲇ︦ⲁ︦ⲇ︦ Ⲡⲉϫⲁϥ ⲅⲁⲣ ϫⲉ ⲥⲣ̄ⲃⲉ ⲛ̄ⲧⲉⲧⲛ̄‐
ⲉⲓⲙⲉ ϫⲉ ⲁⲛⲟⲕ ⲡⲉ ⲡⲛⲟⲩⲧⲉ • ϯⲛⲁϫⲓⲥⲉ ϩⲛ̄ ⲛ̄ϩⲉⲑⲛⲟⲥ
ϯⲛⲁϫⲓⲥⲉ ϩⲙ̄ ⲡⲕⲁϩ • Ⲧⲉⲧⲛ̄ⲥⲟⲟⲩⲛ ⲱ̄ ⲛⲁ ⲙⲉⲣⲁⲧⲉ •
ϫⲉ ⲡϣⲁ ⲙ̄ ⲡⲛ̄ⲟⲩϫⲁⲓ̈ ⲧⲏⲣⲛ̄ ⲡⲉ ⲡⲟⲟⲩ • ⲉⲧⲉ ⲧⲁⲓ̈ ⲧⲉ
ⲧⲕⲩⲣⲓⲁⲕⲏ ⲡⲧⲟⲩϫⲟ ⲛ ⲧⲟⲓ̈ | ⲕⲟⲩⲙⲉⲛ̄ⲏ ⲧⲏⲣⲥ̄ • Ⲡⲇⲓ̈‐
ⲕⲁⲓ̈ⲟⲥ ⲅⲁⲣ ⲡⲉ ⲉ ⲧⲣⲉⲛϫⲉ ϩⲛ̄ⲕⲟⲩⲓ̈ ⲛ̄ ⲉ̄ⲡⲉⲛⲟⲥ ⲉ ⲡⲉⲭⲥ̄ •
ϫⲉ ⲛⲧⲟϥ ⲡⲉⲧ ϣⲟⲟⲡ ϩⲁ ⲑⲏ ⲛ̄ⲛⲉⲱⲛ ⲧⲏⲣⲟⲩ • Ⲧⲥⲱⲧⲙ̄
ⲉ ⲣⲟϥ ⲧⲉⲛⲟⲩ ϩⲙ̄ ⲡⲉⲩⲁⲛⲅⲉⲗⲓ̈ⲟⲛ • ϫⲉ ⲡⲁⲛⲅⲉⲗⲟⲥ
ⲇⲉ ⲛ ⲡϫⲟⲉⲓⲥ ⲁϥⲉⲓ ⲉ ⲡⲉⲥⲏⲧ ⲉ̄ ⲃⲟⲗ ϩⲛ̄ ⲧⲡⲉ • ⲁϥϯ
ⲡⲉϥⲟⲩⲟⲓ̈ ⲁϥⲥⲕⲟⲣⲕⲣ̄ ⲙ̄ ⲡⲱⲛⲉ ⲁϥϩⲙⲟⲟⲥ ⲉ ϩⲣⲁⲓ̈ ⲉ
ϫⲱϥ • ⲡⲉϥⲉⲓ̈ⲛⲉ ⲇⲉ ⲛⲉϥⲟ ⲛⲑⲉ ⲛ ⲟⲩⲉⲃⲣⲏϭⲉ ⲁⲩⲱ
ⲧⲉϥϩⲃ̄ⲥⲱ ⲛⲉⲥⲟⲩⲟ̄ⲃϣ̄ ⲛ̄ⲑⲉ ⲛ̄ ⲟⲩⲭⲓ̈ⲱⲛ • Ⲉⲓⲧⲁ ⲡⲉϫⲁϥ
ⲛ̄ ⲛⲉϩⲓⲟⲙⲉ • ϫⲉ ⲛ̄ⲧⲱⲧⲛ̄ ⲙⲡⲣ̄ ⲣ︤̄ ϩⲟⲧⲉ • ϯⲥⲟⲟⲩⲛ ⲅⲁⲣ
ϫⲉ ⲉⲧⲉⲧⲛ̄ϣⲓⲛⲉ ⲛ̄ⲥⲁ ⲓⲥ̄ ⲡⲉⲧⲧ ⲁⲩⲥⳁⲟ︦ⲩ︥ ⲙ̄ⲙⲟϥ ⲛ︤ϥ︥ ⲙ̄
ⲡⲓ̈ ⲙⲁ ⲁⲛ ⲁϥⲧⲱⲟⲩⲛ ⲅⲁⲣ ⲕⲁⲧⲁ ⲑⲉ ⲛⲧⲁϥϫⲟⲟⲥ •
ⲗⲟⲓⲡⲟⲛ ⲙⲁⲣⲛ︦ⲣ︦ ϣⲁ ⲙ̄ⲡⲟⲟⲩ ϩⲙ̄ ⲡϣⲁ ⲛ̄ ⲧⲁⲛⲁⲥⲧⲁⲥⲓⲥ̄ •
ⲙ̄ ⲡϫⲟⲉⲓⲥ • ⲙⲁⲗⲓⲥⲧⲁ ⲡⲟⲟⲩ ϫⲉ ϥϩⲁϩⲧⲏⲛ ⲛ̄ϭⲓ ⲡϫⲟⲉⲓⲥ
ⲙⲛ̄ ⲡⲉϥⲁⲣⲭⲁⲛⲅⲉⲗⲟⲥ ⲉⲧ ⲧⲁⲓ̈ⲏⲩ ⲙⲓⲭⲁⲏⲗ ⲉϥⲥⲟⲡⲥ̄
ⲙ̄ ⲡⲛⲟⲩⲧⲉ ⲉ ⲧⲣϥ̄ⲕⲱ ⲛⲁⲛ ⲉ ⲃⲟⲗ ⲛ̄ ⲛⲉⲛⲛⲟⲃⲉ • Ⲛ̄ⲧⲟϥ
ⲅⲁⲣ ⲁⲗⲩⲑⲱⲥ • ⲡⲉ ⲡⲥⲟⲡⲥ̄ ⲙ̄ ⲡⲛⲟⲩⲧⲉ ⲉ ϫⲱⲛ ϣⲁⲛⲧ
ⲉϥⲧⲟⲩϫⲟⲛ ϩⲛ̄ ⲑⲗⲓⲯⲓⲥ | ⲛⲓⲙ • ⲉϣϫⲉ ⲧⲉⲧⲛ̄ⲟⲩⲱϣ ⲇⲉ
ⲉ̄ ⲉⲓ̈ⲙⲉ • ϫⲉ ⲛ̄ⲧⲟϥ ⲉⲧ ⲥⲟⲡⲥ̄ ϩⲁ ⲡⲅⲉⲛⲟⲥ ⲧⲏⲣϥ̄ ⲛ̄ ⲁⲇⲁⲙ


### 0003

ⲥⲱⲧⲙ̄ ⲧⲁⲧⲁⲙⲱⲧⲛ̄ • Ⲛⲉⲩⲛ̄ ⲟⲩⲡⲣⲁⲅⲙⲁⲧⲉⲩⲧⲏⲥ ⲇⲉ ϩⲛ̄
ⲧⲉⲭⲱⲣⲁ ⲛ̄ ⲧⲉⲛϯⲕⲏ ⲉ ⲡⲉϥ̄ⲣⲁⲛ ⲡⲉ ⲅⲉⲇⲥⲱⲛ • ⲛⲉⲩⲣ̄‐
ⲙⲙⲁⲟ ⲙ̄ⲙⲁⲧⲉ ⲡⲉ ⲉⲣⲉ ⲟⲩⲛⲟϭ ⲙ̄ ⲡⲣⲁⲅⲙⲁⲧⲓ̈ⲁ ϣⲟⲟⲡ
ⲛⲁϥ • ⲉϥⲉⲓⲣⲉ ⲛ̄ ⲧⲉⲓ̈ ϩⲉ • ⲉϥϣⲱⲡ ⲛ̄ ⲛ̄ⲉⲅⲕⲁ ϯ ⲭⲱⲣⲁ
ⲉϥϫⲓ̈ ⲙ̄ⲙⲟⲟⲩ ⲉ ⲕⲉ ⲭⲱⲣⲁ ⲉϥϯ ⲙⲙⲟⲟⲩ ⲉ̄ ⲃⲟⲗ ⲡⲣⲟⲥ
ⲧⲧⲉⲭⲛⲏ ⲛ̄ ⲧⲙⲛ︦ⲧ︦ⲉ︦ϣⲱⲱⲧ :-Ⲭⲱⲣⲓⲥ ⲛⲁⲓ̈ ⲧⲏⲣⲟⲩ ⲛⲉⲩ‐
ϩⲉⲗⲗⲏⲛ ⲡⲉ • ⲛϥ̄ⲥⲟⲟⲩⲛ ⲁⲛ ⲙ̄ ⲡⲛⲟⲩⲧⲉ :-Ⲉⲧⲉⲓ̈ ⲟⲩⲛ
ⲉϥϣⲟⲟⲡ ϩⲛ̄ ⲧⲙⲛ︦ⲧ︦ϩⲉⲗⲗⲏⲛ • ⲛⲉⲣⲉ ⲡⲛⲟⲩⲧⲉ ⲡⲁⲛⲁϩⲱⲱⲣ
ⲉⲧ ⲙⲉϩ ⲙ̄ ⲙⲛ︦ⲧ︦ϣⲛ̄ϩⲧⲏϥ ⲛⲓ̈ⲙ • ⲡⲉⲧ ⲛⲟⲩϩⲙ̄ ⲛ̄ ⲟⲩⲟⲛ̄
ⲛⲓ̈ⲙ ⲉⲧ ϩⲉⲗⲡⲓ̈ⲍⲉ ⲉ ⲣⲟϥ ⲟⲩⲱϣ ⲉ ⲧⲟⲩϫⲟ ⲙ̄ ⲡⲉⲓ
ⲣⲱⲙⲉ : Ⲁⲥϣⲱⲡⲉ ⲇⲉ ⲙ̄ⲙⲟϥ ⲛ̄ ⲟⲩⲥⲟⲡ ⲁϥⲧⲁⲗⲟ ⲛ̄
ⲧⲉϥⲡⲣⲁⲅⲙⲁⲧⲓ̈ⲁ ⲧⲏⲣⲥ̄ ⲉ ⲡϫⲟⲓ̈ • ⲁϥⲃⲱⲕ ⲉⲩⲡⲟⲗⲓⲥ ϩⲛ̄
ⲧⲉⲭⲱⲣⲁ | ⲛ̄ ⲛⲉⲫⲓ̈ⲗⲓⲡⲡⲟⲥ • ϩⲛ̄ ⲧⲁⲣⲭⲏ ⲙ̄ ⲡⲉⲃⲟⲧ
ϩⲁⲑⲱⲣ ⲉ ⲡⲉⲥⲣⲁⲛ ⲡⲉ ⲅⲁⲗⲟⲛⲓⲁ • ⲉϥⲟⲩⲱϣ ⲉ ϯ ⲉ ⲃⲟⲗ
ⲛ̄ⲧⲉϥⲡⲣⲁⲅⲙⲁⲧⲓⲁ • Ⲉϥⲉⲓⲣⲉ ⲇⲉ ϩⲓ̈ ⲛⲁⲓ̈ ⲁϥ̄ⲡⲱϩ ⲉ̄ ⲡϣⲁ
ⲙ̄ ⲡⲁⲣⲭⲁⲅⲅⲉⲗⲟⲥ ⲉⲧ ⲟⲩⲁⲁⲃ • Ⲣ̄ⲟⲩϩⲉ ⲇⲉ ⲛ ⲥⲟⲩ
ⲙⲛ︦ⲧ︦ⲟⲩⲉ ⲛ ϩⲁⲑⲱⲣ ⲛⲉ ⲡⲗⲩⲭⲛⲓ̈ⲕⲟⲛ̄ ⲡⲉ ⲛ ⲡϣⲁ •
ⲁϥⲛⲁⲩ ⲉ ⲡⲧⲟⲡⲟⲥ ⲉϥⲕⲁⲑⲁⲣⲓⲍⲉ : ⲉϥⲥⲧⲟⲗⲓⲍⲉ ⲁⲩⲱ
ⲉϥⲗⲁⲙⲡⲉⲩⲉ ϩⲓⲧⲛ̄ ⲧⲁϣⲏ ⲛ̄ ⲛⲉⲫⲁⲛⲟⲥ • ⲙⲛ̄ ⲡⲛⲟϭ ⲙ̄
ⲙⲏⲏϣⲉ ⲛ̄ ⲧⲡⲟⲗⲓⲥ ⲉⲩⲥⲟⲟⲩϩ ⲟⲛ̄ ϩⲉⲛϩⲩⲙⲛⲟⲥ ⲙⲛ̄ ϩⲉⲛ‐
ⲯⲁⲗⲙⲟⲥ • ϫⲓⲛⲉ ⲣⲟⲩϩⲉ ϣⲁ ϩⲧⲟⲟⲩⲉ • Ϣⲱⲣⲡ̄ ⲇⲉ ⲛ̄ⲧⲉⲣ
ϥ̄ϣⲱⲡⲉ ⲁⲩⲁⲣ̄ⲭⲓ̈ ⲉ ⲧⲙⲉⲗⲉⲧⲏⲥⲓ̈ⲥ • ⲁ ⲡⲉⲡⲓⲥⲕⲟⲡⲟⲥ ⲙⲛ̄
ⲛⲉⲕⲗⲏⲣⲓ̈ⲕⲟⲥ • ⲁⲩⲱ ⲛ̄ⲁⲣⲭⲱⲛ ⲧⲏⲣⲟⲩ ⲛ̄ ⲧⲡⲟⲗⲓⲥ
ⲥⲱⲟⲩϩ : Ϩⲁⲡⲗⲱⲥ ⲁⲩⲥⲧⲉⲫⲁⲛⲟⲩ ⲛ ⲧⲡⲟⲗⲓⲥ ⲧⲏⲣⲥ̄ ⲙⲛ̄
ⲛⲏⲓ̈ ⲙⲛ̄ ⲛ̄ϩⲓⲣ : Ⲛ̄ ⲧⲉⲣ ϥ̄ⲛⲁⲩ ⲟⲛ ⲛ̄ⲉ ⲛⲁⲓ̈ • ⲁϥⲣ̄
ϣⲡⲏⲣⲉ • ϫⲉ ⲛⲉⲩϩⲉⲗⲗⲏⲛ ⲡⲉ ⲛϥ̄ⲧⲏⲡ ⲁⲛ̄ ⲉ ϩⲱ̄ⲃ ⲛ̄
ⲧⲉⲓ ⲙⲓ̈ⲛⲉ : Ⲁϥⲣ̄ ⲑⲉⲥⲭⲉⲇⲱⲛ ⲉϣϫⲉ ⲛ̄ⲧⲁϥⲡⲱⲱⲛⲉ ⲉ
ⲃⲟⲗ ϩⲙ̄ ⲡⲓⲁⲓⲱⲛ ⲉ ⲡⲕⲉ ⲟⲩⲁ ϩⲓⲧⲛ̄ ⲛⲉ ⲛⲧⲁϥⲛⲁⲩ
ⲉ ⲣⲟⲟⲩ ⲁⲩⲱ ⲛⲉ ⲛ|ⲧⲁϥⲥⲟⲧⲙⲟⲩ : ⲁⲩⲱ ⲁϥϣⲱⲡⲉ ⲉϥⲟ
ⲛ̄ϩⲃⲁ : ⲁϥϯ ⲛⲉϥⲟⲩⲟⲓ̈ ⲇⲉ ⲉ ⲣⲱⲙⲉ ⲥⲛⲁⲩ • ⲁϥϫⲛⲟⲩⲟⲩ
ϫⲉ ⲛⲁ ⲥⲛⲏⲩ • ⲟⲩ ⲡⲉⲧ ϣⲟⲟⲡ ϩⲛ̄ ϯⲡⲟⲗⲓⲥ ⲛ̄ⲥⲁϥ ⲙⲛ̄
ϣⲙ̄ⲧⲉ ⲡⲟⲟⲩ • Ⲛⲣⲱⲙⲉ ⲇⲉ ⲛ̄ⲭⲣⲏⲥϯⲁⲛⲟⲥ ⲁⲩϣⲁϫⲉ
ⲛⲙ̄ⲙⲁϥ ⲉⲩϫⲱ ⲙ̄ⲙⲟⲥ • ϫⲉ ⲡϣⲁ ⲙ̄ ⲡⲁⲣⲭⲁⲅⲅⲉⲗⲟⲥ
ⲙⲓ̈ⲭⲁⲏⲗ ⲡⲉ ⲉⲛⲣ̄ϣⲁ ⲛⲁϥ ϫⲉ ⲛⲧⲟϥ ⲡⲉⲧ ⲥⲉⲡⲥ̄ ⲙ̄


### 0004

ⲡⲛⲟⲩⲧⲉ ⲉ̄ ϩⲣⲁⲓ̈ ⲉ ϫⲱⲛ ϣⲁⲛⲧ ⲉϥⲧⲟⲩϫⲟ ⲛ̄ ⲧⲏⲣⲛ̄
Ⲡⲣⲱⲙⲉ ⲇⲉ ⲡⲉϫⲁϥ ⲛⲁϥ • ⲛ̄ ⲛⲉⲭⲣⲏⲥⲧⲓⲁⲛⲟⲥ ϫⲉ ⲉϥ‐
ⲧⲱⲛ ⲡⲉⲧ ⲙ̄ⲙⲁⲩ ϩⲱⲱϥ ⲧⲁⲥⲡ̄ⲥⲱⲡϥ̄ ⲧⲁⲣϥ̄ⲛⲁϩⲙⲧ̄ ⲉ
ϩⲱⲃ ⲛⲓⲙ ⲉⲑⲟⲟⲩ • Ⲡⲉϫⲉ ⲛ̄ⲣⲱⲙⲉ ⲇⲉ ⲛⲁϥ • ϫⲉ
ⲛⲅ̄ ⲛⲁ̄ⲉϣⲛⲁⲩ ⲁⲛ ⲉ̄ ⲣⲟϥ ⲉⲓ ⲙⲏ ⲧⲉⲓ̈ ⲛⲅ̄ ϣⲱⲡⲉ
ⲛ̄ⲭⲣⲏⲥⲧⲓ̈ⲁⲛⲟⲥ • Ⲁⲗⲗⲁ ⲉⲕϣⲁⲛⲣ̄ ⲭⲣⲏⲥⲧⲓⲁⲛⲟⲥ : ⲛⲅ̄
ⲥⲟⲡⲥ̄ ⲙ̄ⲙⲟϥ ϥⲛⲁⲛ̄ⲁϩⲙⲕ̄ ⲉ ϩⲱⲃ ⲛⲓ̈ⲙ ⲉⲑⲟⲟⲩ • Ⲡⲉ‐
ⲡⲣⲁⲅⲙⲁⲧⲉⲩⲧⲏⲥ ⲇⲉ ⲡⲉϫⲁϥ ⲛⲁⲩ • ϫⲉ ϫⲓ ⲛ̄ⲧⲟⲟⲧⲛ̄
ⲛⲟⲙⲓⲥⲙⲁ ⲥⲛⲁⲩ • ⲟⲩⲁ ⲉ̄ ⲡⲟⲩⲁ • ⲛ̄ⲧⲉⲧⲛ̄ϫⲓⲧ ⲛⲙ̄ⲙⲏⲧⲛ̄
ⲉ ⲡⲧⲟⲡⲟⲥ ⲙ̄ ⲡⲁⲣ|ⲭⲁⲅⲅⲉⲗⲟⲥ ⲙⲓ̈ⲭⲁⲏⲗ • ⲧⲁϣⲱⲡⲉ
ⲛ̄ⲧⲉⲧⲛ̄ϩⲉ • Ⲛⲣⲱⲙⲉ ⲇⲉ ⲡⲉϫⲁⲩ ⲛⲁϥ • ϫⲉ ⲙⲉⲕϣ︦ⲣ︦
ⲧⲛ̄ϩⲉ ⲉⲓ ⲙⲏ ⲧⲉⲓ̈ ⲛ̄ⲧⲉ ⲡⲛ̄ⲓⲱⲧ ⲡⲉⲡⲓⲥⲕⲟⲡⲟⲥ ⲃⲁⲡⲧⲓⲍⲉ
ⲙ̄ⲙⲟⲕ • Ⲛ̄ⲧⲟϥ ⲇⲉ ϩⲓ̈ⲧⲛ̄ ⲧⲉⲡⲣⲟⲛⲟⲓⲁ ⲙ̄ ⲡⲛⲟⲩⲧⲉ ⲉⲧ
ⲧⲱϩⲙ̄ ⲙ̄ⲙⲟϥ : Ⲁϥⲡⲁⲣⲁⲕⲁⲗⲓ̈ ⲙ̄ⲙⲟⲟⲩ ϫⲉ ⲁⲣⲓ̈ ⲧⲁⲅⲁⲡⲏ
ⲛ̄ⲧⲉⲧⲛ̄ϫⲓⲧ ϣⲁ ⲡⲉⲡⲓⲥⲕⲟⲡⲟⲥ : Ⲙ̄ ⲡⲉϥⲣⲁⲥⲧⲉ ⲇⲉ ⲁⲛⲣⲱⲙⲉ
ⲛ̄ ⲧⲡⲟⲗⲓⲥ ⲉⲓⲛⲉ ⲙ̄ⲙⲟϥ ϣⲁ ⲡⲉⲡⲓⲥⲕⲟⲡⲟⲥ • ⲁⲩϫⲱ ⲉ̄
ⲣⲟϥ ⲛ̄ⲑⲉ ⲧⲏⲣⲥ̄ ⲛ̄ⲧⲁⲥϣⲱⲡⲉ ⲙⲙⲟϥ : Ⲡⲉϫⲉ ⲡⲉⲡⲓⲥⲕⲟⲡⲟⲥ
ⲙ̄ ⲡⲉⲡⲣⲁⲅⲙⲁⲧⲉⲩⲧⲏⲥ • ϫⲉ ⲛ̄ⲧⲕ̄ ⲟⲩ ⲉ ⲃⲟⲗ ϩⲛ̄ ⲁϣ ⲙ̄
ⲡⲟⲗⲓⲥ ⲡⲁ ϣⲏⲣⲉ • ⲏ ⲁϣ ⲛ̄ ⲭⲱⲣⲁ : Ⲡⲉⲡⲣⲁⲅⲙⲁⲧⲉⲩⲧⲏⲥ
ⲇⲉ ⲡⲉϫⲁϥ ϫⲉ ⲁⲛⲅ̄ ⲟⲩ ⲉ ⲃⲟⲗ ϩⲛ̄ ⲧⲉⲭⲱⲣⲁ ⲛ ⲧⲉⲛϯⲕⲏ:
̄Ⲡⲉϫⲉ ⲡⲉⲡⲓ̈ⲥⲕⲟⲡⲟⲥ • ϫⲉ ⲛ̄ⲧⲁⲟⲩϣⲱⲡⲉ ⲙ̄ⲙⲟⲕ ⲡⲁ
ϣⲏⲣⲉ ⲉⲕⲟⲩⲱϣ ⲉ ⲡⲱⲱⲛⲉ̄ ⲉ̄ ⲃⲟⲗ ϩⲙ̄ ⲡⲉⲕϣⲙ̄ϣⲉ ⲛⲅ̄
ⲱⲡ ⲉ̄ ⲣⲟⲛ : Ⲡⲉϫⲁϥ ϫⲉ ϩⲓⲧⲛ̄ ⲛⲉⲛ̄ⲧ ⲁⲓ̈ⲛⲁⲩ ⲉ ⲣⲟⲟⲩ
ϩⲛ̄ ⲛⲁⲃⲁⲗ | ⲙⲛ̄ ⲛⲉⲛⲧ ⲁⲓ̈ⲥⲟⲧⲙⲟⲩ ϩⲛ̄ ⲛⲁⲙⲁⲁϫⲉ •
ⲁⲥⲣ̄ⲁⲛⲁⲓ ⲉ ⲡⲱⲱⲛⲉ ⲉ ϩⲟⲩⲛ ⲉ ⲡⲕ̄ϣⲙ̄ϣⲉ : Ⲡⲉϫⲉ ⲡⲉⲡⲓ‐
ⲥⲕⲟⲡⲟⲥ ⲛⲁϥ ϫⲉ ⲕϣⲙ̄ϣⲉ ⲛ ⲛⲓ̈ⲙ ⲛ̄ ⲛⲟⲩⲧⲉ • Ⲡⲉϫⲉ
ⲡϩⲉⲗⲗⲏⲛ ϫⲉ ⲉⲓ̈ϣⲙ̄ϣⲉ ⲙ ⲡⲣⲏ ⲡⲁ ⲡⲉⲓ̈ ⲛⲟϭ ⲛ̄ ⲉ︦ⲟ︦ⲟⲩ •
ϫⲉ ⲛ̄ⲧⲟϥ ⲉⲧ ⲣ̄ ⲟⲩⲟⲉⲓⲛ ⲉ ⲡⲕⲟⲥⲙ̄ⲟⲥ ϩⲛ̄ ⲧⲉϥϭⲟⲙ : Ⲡⲉϫⲉ
ⲡⲉⲡⲓⲥⲕⲟⲡⲟⲥ ⲛⲁϥ ϫⲉ ⲉⲣϣⲁⲛ ⲡⲣⲏ ϩⲱⲧⲡ̄ ⲛ̄ⲧⲉ ⲧⲉⲩ[ϣⲏ]
ϣⲱⲡⲉ • ⲛ̄ⲧⲉ ⲟⲩⲑⲗⲓⲯⲓⲥ ⲧⲁϩⲱⲧⲛ̄ : ⲉⲕⲛⲁϩⲉ ⲉ ⲡⲣⲏ
ⲧⲱⲛ : ⲛϥ̄ⲛⲁϩⲙⲕ̄ ϩⲛ̄ ⲛⲉⲕⲑⲗⲓⲯⲓⲥ : Ⲡⲉϫⲉ ⲡⲉⲡⲣⲁⲅⲙⲁ‐
ⲧⲉⲩⲧⲏⲥ ⲛⲁϥ • ϫⲉ ϯⲥⲟⲡⲥ̄ ⲙ̄ⲙⲟⲕ • ⲙⲁⲣⲉ ⲧⲉⲕⲙⲛ︦ⲧ︦ⲛⲁⲏⲧ
ⲧⲁϩⲟⲓ̈ • ⲛ̄ⲑⲉ ⲛ̄ ⲛ̄ⲣⲱⲙⲉ ⲧⲏⲣⲟⲩ ⲛ ϯⲡⲟⲗⲓⲥ • Ⲡⲉϫⲉ
ⲡⲓⲥⲕⲟⲡⲟⲥ (sic) ⲛⲁϥ ϫⲉ ⲟⲩⲛⲧⲁⲕ ⲥϩⲓ̈ⲙⲉ ⲙⲙⲁⲩ ⲏ̄ ϣⲏⲣⲉ :


### 0005

Ⲡⲉϫⲁϥ ϫⲉ ⲡⲁ ⲓⲱⲧ ⲧⲁ ⲥϩⲓⲙⲉ ⲙⲛ̄ ⲛⲁϣⲏⲣⲉ ϩⲛ̄ ⲧⲁ
ⲡⲟⲗⲓⲥ • Ⲡⲉϫⲉ ⲡⲉⲡⲓⲥⲕⲟⲡⲟⲥ ⲛⲁϥ ϫⲉ ⲉϣϫⲉ ⲥⲉ ⲡⲁ
ϣⲏⲣⲉ : ⲛ ϯⲛⲁⲃⲁⲡϯⲍⲉ ⲙⲙⲟⲕ ⲁⲛ : ⲧⲉⲛⲟⲩ • ⲙⲏ (sic) |
ⲙⲏⲡⲱⲥ ⲛⲥ̄ⲧⲙ̄ ⲡⲉⲑⲉ ⲛⲙ̄ⲙⲁⲕ ⲛ̄ϭⲓ ⲧⲉⲕⲥϩⲓ̈ⲙⲉ • ⲛⲧⲉ
ⲟⲩⲥⲕⲁⲛⲧⲁⲗⲟⲛ ϣⲱⲡⲉ ϩⲛ̄ ⲧⲉⲧⲛ̄ⲙⲏⲧⲉ ⲛⲥ̄ⲡⲱⲣϫ̄ ⲉ ⲃⲟⲗ
ⲙ̄ⲙⲟⲕ • ⲏ̄ ⲛ̄ⲧⲟϥ ⲛⲥ̄ⲧⲣⲉ ⲕⲁⲣⲛⲁ ⲙ̄ ⲡⲃⲁⲡⲧⲓⲥⲙⲁ ⲛ̄‐
ⲧⲁⲕϫⲓⲧϥ̄ • ⲉ ⲃⲟⲗ ϫⲉ ⲛⲧⲁⲧϣⲟⲣⲡ̄ ⲙ̄ ⲡⲁⲣⲁⲃⲁⲥⲓⲥ ϣⲱⲡⲉ
ⲉ ⲃⲟⲗ ϩⲓⲧⲛ̄ ⲧⲉⲥϩⲓⲙⲉ ϫⲓⲛ ⲉ̄ ϣⲟⲣⲡ̄ • Ⲡⲡⲣⲁⲅⲙⲁⲧⲉⲩⲧⲏⲥ
ⲇⲉ ⲛ ⲧⲉⲣ ϥ̄ⲥⲱⲧⲙ̄ ⲉ ⲛⲁⲓ ⲁϥⲗⲩⲡⲉⲓ ⲙ̄ⲙⲁⲧⲉ • ⲙⲛ︦ⲛ︦ⲥⲱⲥ
ⲁϥϫⲓ ⲥⲙⲟⲩ ⲛ ⲧⲟⲟⲧϥ̄ ⲙ̄ ⲡⲉⲡⲓⲥⲕⲟⲡⲟⲥ ⲁϥⲉⲓ ⲉ ⲃⲟⲗ ϩⲓ
ⲧⲟⲟⲧϥ̄ • ⲁϥⲁⲗⲉ ⲉ ⲡⲉϥϫⲟⲓ̈ ⲉ ⲧⲣ ϥ̄ⲃⲱⲕ ⲉ ⲡⲉϥⲏⲓ̈ • Ⲛ̄
ⲧⲉⲣ ϥ̄ⲉⲓ ⲇⲉ ⲉ ⲧⲙⲏⲧⲉ ⲙ ⲡⲡⲉⲗⲁⲅⲟⲥ ⲛ̄ ⲑⲁⲗⲁⲥⲥⲁ • ⲁ
ⲡⲙⲁⲥⲧ ⲡⲉⲧ ⲛⲁⲛⲟⲩϥ ⲛⲓ̈ⲙ ⲡⲇⲓⲁⲃⲟⲗⲟⲥ ⲕⲱϩ ⲉ ⲣⲟϥ
ϩⲛ̄ ⲟⲩⲛⲟϭ ⲛ̄ ⲕⲱϩ ⲙⲛ̄ ⲟⲩⲑⲩⲙⲱⲛ ϫⲉ ⲁϥⲥⲟⲟⲩⲧⲛ̄ ⲙ̄
ⲡⲉϥϩⲏⲧ ⲉ ϩⲟⲩⲛ ⲉ ⲡⲛⲟⲩⲧⲉ • ⲁϥⲕⲧⲟϥ ϣⲁ ⲣⲟϥ ⲉ ⲧⲣⲉ
ϥⲟⲩϫⲁⲓ ⲉ ⲡⲧⲁⲕⲟ • Ⲁⲩⲱ ϩⲓⲧⲙ̄ ⲡⲙⲟⲥⲧⲉ ⲙ ⲡⲉϥϩⲏⲧ
ⲉ ϩⲟⲩⲛ ⲉ ⲣⲟϥ • ⲁϥⲧⲟⲩⲛⲟⲥ ⲟⲩⲛⲟϭ ⲛ̄ ⲭⲓⲙⲱⲛ ⲉ ϩⲣⲁⲓ̈
ⲉ̄ ϫⲱϥ • ⲁⲩⲱ ⲛ̄ϩⲟⲉⲓⲙ ⲛ̄ ⲑⲁⲗⲁⲥⲥⲁ ⲁϥⲧⲣⲉⲩⲛϣⲟⲧ ⲉ
ϩⲣⲁⲓ̈ ⲉϫⲙ̄ ⲡϫⲟⲓ̈ | ϩⲱⲥ ⲧⲉ ⲛϥ̄ⲃⲱⲕ ⲛ̄ϩⲏⲧϥ̄ • Ⲡⲉⲡⲣⲁⲅ‐
ⲙⲁⲧⲉⲩⲧⲏⲥ ϫⲉ ⲁϥⲣ̄ ϩⲟⲧⲉ ⲁⲩⲱ ⲙ̄ⲡⲉ ϥϭⲛ̄ ⲉϥⲛⲁⲉⲣ ⲟⲩ
ⲛⲉϥⲛⲁⲉ̄ⲡⲓⲕⲁⲗⲓⲛ ⲛⲓⲙ • ⲉⲩⲃⲱⲏⲑⲓⲁ ⲛⲁϥ • Ⲁϥⲟⲩⲱϣ
ⲉ ⲃⲟⲗ ⲉϥⲣⲓ̈ⲙⲉ ϫⲉ ⲡⲁ ϫⲟⲉⲓⲥ ⲡⲁⲣⲭⲁⲅⲅⲉⲗⲟⲥ ⲉⲧ
ⲟⲩⲁⲁⲃ ⲙⲓⲭⲁⲏⲗ • ⲃⲟⲏⲑⲓ̈ ⲉ ⲣⲟⲓ̈ ϩⲛ̄ ϯⲛⲟϭ ⲛ̄ ⲁⲛⲁⲅⲕⲏ
ⲉ̄ ϯ ⲛ̄ϩⲏⲧⲥ̄ ⲙⲛ̄ ϯⲛⲟϭ ⲛ̄ⲑⲗⲓⲯⲓⲥ ⲉⲧ ⲕⲱⲧⲉ ⲉ ⲣⲟⲓ̈ •
Ⲱ̄ ⲡⲁ ϫⲟⲉⲓⲥ ⲙⲓⲭⲁⲏⲗ ϯϩⲟⲙⲟⲗⲟⲅⲓ ⲙ̄ⲡⲉⲟⲟⲩ ⲛ̄ⲧⲁⲓⲛⲁⲩ
ⲉ ⲣⲟϥ ϩⲙ̄ ⲡⲉⲕⲧⲟⲡⲟⲥ ϫⲉ • ⲉⲕϣⲁⲛⲛⲁϩⲙⲉⲧ ⲙ̄ ⲡⲉⲓ ⲥⲟⲡ
ϯⲛⲏⲩ ⲙⲛ̄ ⲧⲁ ⲥϩⲓⲙⲉ ⲙⲛ̄ ⲛⲁϣⲏⲣⲉ • ⲛⲧⲛ̄ϣⲱⲡⲉ ⲛ̄‐
ⲭⲣⲏⲥⲧⲓⲁⲛⲟⲥ ϣⲁ ⲡⲉϩⲟⲟⲩ ⲙ̄ ⲡⲉⲛⲙⲟⲩ • Ⲁⲩⲱ ⲛ̄ⲧⲉⲩ‐
ⲛⲟⲩ ⲁⲩⲥⲙⲏ ϣⲱⲡⲉ ϣⲁ ⲣⲟϥ ⲉ ⲃⲟⲗ ϩⲛ̄ ⲧⲡⲉ ⲉⲥϫⲱ
ⲙ̄ⲙⲟⲥ ϫⲉ ⲙⲡⲣ̄ ⲣ̄ ϩⲟⲧⲉ ⲙⲛ̄ ⲡⲉⲑⲟⲟⲩ ⲛⲁⲧⲁϩⲟⲕ • Ⲛ̄-
ⲧⲉⲩⲛⲟⲩ ⲛ̄ⲧⲁ ⲧⲉ ⲥⲙⲏ ϣⲱⲡⲉ ⲁⲩⲛⲟϭ ⲛ̄ ϫⲁⲙⲏ ϣⲱⲡⲉ •
ⲁⲛϩⲟⲉⲓⲙ ⲗⲟ ⲉⲩⲧⲱⲛⲟⲩ ⲛ̄ ⲉ ϩⲣⲁⲓ̈ • ⲁ ⲡϫⲟⲓ ⲁ̄ϩⲉ ⲣⲁⲧϥ̄
ϩⲛ̄ ⲟⲩⲥⲙⲓⲛⲉ • ⲙ̄ⲡⲉ ⲗⲁⲁⲩ ⲛ̄ ⲧⲁⲣⲁⲭⲏ ϣⲱⲡⲉ • Ⲁⲩⲱ
ⲛ̄ⲧⲉⲩⲛⲟⲩ | ϩⲓⲧⲛ̄ ⲧⲉⲭⲁⲣⲓⲥ ⲙ̄ ⲡⲛⲟⲩⲧⲉ ⲙⲛ̄ ⲛ̄ⲥⲟⲡⲥ̄ ⲛ̄


### 0007

ⲱ̄ ⲡⲁ ⲥⲟⲛ • ⲙⲁ ⲛⲓ̈ⲙ ⲉⲧ ⲕ̄ⲛⲁⲃⲱⲕ ⲉ ⲣⲟϥ • ϯⲥⲃ̄ⲧⲱⲧ
ⲉ ⲉⲓ̈ ⲛⲙ̄ⲙⲁⲕ • Ⲁⲩⲱ ⲛ̄ ⲧⲉⲓ̄ ϩⲉ ⲁⲩⲣ̄ ⲡⲉⲩⲥⲟⲃⲧⲉ ⲧⲏⲣϥ̄
ⲁⲩⲁⲗⲉ ⲉ ⲡϫⲟⲓ̈ ⲁⲩⲉⲓ ⲉ ⲧⲡⲟⲗⲓⲥ ⲕⲁⲗⲟⲛⲓⲁ • Ⲁⲩⲱ ⲛ̄
ⲧⲉⲣ ⲁⲩⲁⲡⲁⲛⲧⲁ ⲉ ⲡⲣⲱⲙⲉ ⲥⲛⲁⲩ ⲛ̄ⲭⲣⲏⲥⲧⲓ̈ⲁⲛⲟⲥ : ⲛⲁⲓ̈
ⲉⲧⲟ ⲛⲁϥ ⲛ̄ϫⲁⲩⲙⲟⲉⲓⲧ • ⲛⲉⲛⲧ ⲁϥϭⲛ̄ⲧⲟⲩ ⲟⲛ ⲙ̄ ⲡϣⲟⲣⲡ̄
ⲛ̄ ⲥⲟⲡ • ⲁϥϣⲁϫⲉ ⲛⲙ̄ⲙⲁⲩ • ⲁⲩϫⲓⲧϥ̄ ⲙⲛ̄ ⲧⲉϥⲥϩⲓⲙⲉ
ⲙⲛ̄ ⲛⲉϥϣⲏⲣⲉ ϣⲁ ⲡⲉⲡⲓⲥⲕⲟⲡⲟⲥ • Ⲛ̄ ⲧⲉⲣⲉ ⲡⲉⲡⲓⲥⲕⲟⲡⲟⲥ
ⲇⲉ ⲛⲁⲩ ⲉ ⲣⲟⲟⲩ • ⲁϥⲣⲁϣⲉ ⲙ̄ⲙⲁⲧⲉ ⲉϫⲙ̄ ⲡⲉⲕⲧⲟ ⲛ̄
ⲛⲉⲩⲯⲩⲭⲏ : Ⲁϥϫⲛ̄ⲟⲩⲟⲩ ⲇⲉ ϫⲉ ⲛⲉ ⲁⲧⲉⲧⲛ̄ⲥⲃ̄ⲧⲉ ⲧⲏⲩⲧⲛ̄
ϩⲙ̄ ⲡⲉⲧⲛ̄ϩⲏⲧ ⲧⲏⲣϥ̄ ⲉ̄ ϣⲱⲡⲉ ⲛ̄ⲭⲣⲏⲥϯⲁⲛⲟⲥ • ⲁⲩ‐
ⲟⲩ|ⲱ̄ϣⲃ̄ ⲛⲁϥ ϫⲉ ⲥⲉ ϩⲓⲧⲛ̄ ⲡⲟⲩⲱϣ ⲙ̄ ⲡⲛⲟⲩⲧⲉ ⲙⲛ̄
ⲛⲉⲕϣⲗⲏⲗ ⲧⲛ̄ⲥⲃ̄ⲧⲱⲧ ϩⲓ̈ ⲟⲩⲥⲟⲡ ⲉ ϣⲱⲡⲉ ⲛ̄ⲭⲣⲏⲥϯⲁⲛⲟⲥ •
Ⲧⲟⲧⲉ ⲡⲉⲡⲓⲥⲕⲟⲡⲟⲥ ⲁϥⲧⲣⲉ ⲩⲣ̄ ⲡⲥⲟϥⲧⲉ ⲙ ⲡⲃⲁⲡⲧⲓ̈ⲥⲧⲏ‐
ⲣⲓ̈ⲟⲛ ϩⲙ̄ ⲡⲧⲟⲡⲟⲥ ⲙ̄ ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ • ⲁϥ‐
ⲃⲁⲡϯⲍⲉ ⲙⲙⲟⲟⲩ ⲉ̄ ⲡⲣⲁⲛ ⲙ̄ ⲡⲓⲱⲧ ⲙⲛ̄ ⲡϣⲏⲣⲉ ⲙⲛ̄
ⲡⲉⲡⲛⲁ̄ ⲉⲧ ⲟⲩⲁⲁⲃ ⲧⲉⲧⲣⲓ̈ⲁⲥ ⲛ̄ ϩⲟⲙⲟⲟⲩⲥⲓⲟⲛ • Ⲁⲩⲱ
ⲁϥⲡⲱⲱⲛⲉ ⲛ̄ ⲡⲉϥⲣⲁⲛ ϩⲓϫⲛ̄ ⲧⲕⲟⲗⲩⲙⲃⲏⲑⲣⲁ ⲉⲧ ⲟⲩⲁⲁⲃ
ⲛⲉ ⲡⲉϥⲣⲁⲛ ⲛ̄ϣⲟⲣⲡ̄ ⲡⲉ ⲅⲉⲇⲥⲱⲛ • ⲁϥⲙⲟⲩⲧⲉ ⲉ ⲣⲟϥ
ϫⲉ ⲙⲁⲑⲁⲓⲟⲥ • Ⲁⲩⲱ ⲡⲣⲁⲛ̄ ⲛ̄ ⲧⲉϥⲥϩⲓ̈ⲙⲉ ⲡⲉ ⲧⲟⲩⲗⲏ
ⲁϥⲙⲟⲩⲧⲉ ⲉ ⲣⲟⲥ ϫⲉ ⲉⲓⲣⲏⲛⲏ : Ⲁⲩⲱ ⲡⲉϥϥⲧⲟⲟⲩ ⲛ̄ϣⲏⲣⲉ •
ⲁϥⲙⲟⲩⲧⲉ ⲉ ⲡⲣⲁⲛ̄ ⲙ̄ ⲡⲛⲟϭ ϫⲉ ⲓⲱϩⲁⲛⲛⲏⲥ • ⲁⲩⲱ ⲡⲙⲉϩ
ⲥⲛⲁⲩ ϫⲉ ⲥⲧⲉⲫⲁⲛⲟⲥ • Ⲡⲙⲉϩ ϣⲟⲙⲧ̄ ϫⲉ ⲓⲱⲥⲏⲫ • Ⲁⲩⲱ
ⲡⲙⲉϩ ϥⲧⲟⲟⲩ ϫⲉ ⲇⲁⲛⲓⲏⲗ : Ⲁⲩⲱ ⲙⲛ︦ⲛ︦ⲥⲁ ⲧⲣⲉⲩϫⲓ
ⲃⲁⲡⲧⲓⲥⲙⲁ • ⲁⲩⲱ ⲁⲩⲣ̄ ϫⲟⲩⲱⲧ ⲛ̄ϩⲟⲟⲩ ϩⲛ̄ ⲧⲡⲟⲗⲓⲥ
ⲉⲣⲉ ⲉⲣⲉ (sic) ⲡⲉⲡⲓⲥⲕⲟⲡⲟⲥ ⲅⲁⲑⲩⲅⲓ̈ ⲙ̄ⲙⲟⲟⲩ ϩⲛ̄ ⲛ̄ⲇⲟⲅⲙⲁ
ⲛ̄ ⲧⲡⲓⲥⲧⲓⲥ ⲉⲧ ⲥⲟⲩⲧⲱⲛ :-|Ⲛ̄ⲧⲟϥ ⲇⲉ ⲙⲁⲑⲉⲟⲥ ϩⲓⲧⲛ̄
ⲡⲉϥⲛⲟϭ ⲛ̄ ⲣⲁϣⲉ ⲁϥϯ ⲥⲟⲟⲩ ⲛ̄ ϣⲟ ⲛⲛⲟⲙⲓ̈ⲥⲙⲁ ⲉ ϩⲟⲩⲛ̄
ⲉ ⲡⲧⲟⲡⲟⲥ ⲙ̄ ⲡⲁⲣⲭⲁⲅⲅⲉⲗⲟⲥ ⲙⲓ̈ⲭⲁⲏⲗ ⲉϥϫⲱ ⲙ̄ⲙⲟⲥ
ϫⲉ ⲉⲓ̈ϯ ⲛ̄ ⲛⲁⲓ ⲛ̄ⲥⲱⲧⲉ ϩⲁ ⲧⲁ ⲯⲩⲭⲏ ⲙⲛ̄ ⲧⲁ ⲛⲁϣⲏⲣⲉ :
ϫⲉ ⲕⲁⲥ ⲉⲩⲉϣⲱⲡⲉ ⲙ̄ ⲡⲣⲟⲥⲫⲟⲣⲁ ϩⲛ̄ ⲡⲧⲟⲡⲟⲥ ⲙ̄
ⲡⲁⲣⲭⲁⲅⲅⲉⲗⲟⲥ ϫⲉ ⲛ̄ⲧⲟϥ ⲁϥⲥⲉⲡⲉ̄ ⲡⲉⲭⲥ̄ ϩⲁ ⲣⲟⲓ̈ •
ϣⲁⲛⲧ ⲉϥⲭⲁⲣⲓⲍⲉ ⲛⲁⲓ̈ ⲙ ⲡⲥⲟⲟⲩⲛ̄ ⲧⲁϯ ⲙ̄ ⲡⲁ ⲟⲩⲟⲓ̈
ⲉ ϩⲟⲩⲛ ⲉ ⲣⲟϥ ϩⲱⲥ ⲧⲉ ⲉ̄ ⲧⲣⲁ ⲙ̄ ⲡϣⲁ ⲛ ⲧⲉϥⲭⲁⲣⲓⲥ :
Ⲙⲛ︦ⲛ︦ⲥⲁ ⲛⲁⲓ̈ ⲁϥϫⲓ ⲥⲙⲟⲩ ⲛ̄ ⲧⲟⲟⲧϥ̄ ⲙ̄ ⲡⲉⲛ ⲓⲱⲧ ⲡⲉⲡⲓ‐


### 0008

ⲥⲕⲟⲡⲟⲥ ⲙⲛ̄ ⲧⲉϥⲥϩⲓ̈ⲙⲉ ⲙⲛ̄ ⲛⲉϥϣⲏⲣⲉ • ⲁⲩⲉⲓ ⲉ ⲃⲟⲗ
ϩⲛ̄ ⲧⲡⲟⲗⲓⲥ ⲉⲣⲉ ⲛ̄ ⲁⲣⲭⲱⲛ ⲑⲡⲟ ⲙⲙⲟⲟⲩ ⲉ ⲃⲟⲗ • ⲁⲩⲱ
ⲉⲩⲣⲁϣⲉ ⲛ︤ⲙ︥ⲙⲁⲩ ⲉϫⲙ̄ ⲡⲉⲕⲧⲟ ⲛ̄ ⲛⲉⲩⲯⲩⲭⲏ • Ⲁⲩⲱ
ϩⲓⲧⲛ̄ ⲡⲟⲩⲱϣ ⲙ̄ ⲡⲛⲟⲩⲧⲉ ⲙⲛ̄ ⲡⲉϥⲁⲣⲭⲁⲅⲅⲉⲗⲟⲥ ⲉⲧ
ⲟⲩⲁⲁⲃ ⲙⲓⲭⲁⲏⲗ • ⲁⲩⲉⲓ̈ ⲉ̄ ⲧⲉⲩⲡⲟⲗⲓⲥ ⲉⲩⲣⲁϣⲉ ⲙⲛ̄
ⲛⲉⲩⲣⲱⲙⲉ • ⲁⲩⲱ̄ ⲉⲣⲉ ⲛⲉⲩⲣⲱⲙⲉ ⲣⲁϣⲉ ⲛ︦ⲙ︦ⲙⲁⲩ • |
Ⲙⲛ︦ⲛ︦ⲥⲁ ⲧⲣⲉⲩⲉⲓ̈ ⲇⲉ ⲉ ⲡⲉⲩⲏⲓ̈ ⲁⲩϯ ⲛ̄ ϩⲛ̄ⲛⲟϭ ⲛ̄ⲁⲅⲁⲡⲏ
ⲛ̄ ⲛ̄ϩⲏⲕⲉ ⲙⲛ̄ ⲛⲉⲧ ϣⲁⲁⲧ • Ⲁⲩⲱ ⲛⲉⲩⲙⲁⲕⲁⲣⲓⲍⲉ
ⲙ̄ⲙⲟⲟⲩ ⲛ̄ϭⲓ ⲛⲁ ⲧⲡⲟⲗⲓⲥ ⲧⲏⲣⲥ̄ ⲕⲁⲧⲁ ⲡⲉⲧ ⲥⲏϩ • ϫⲉ
ⲙⲛ̄ ⲗⲁⲁⲩ ⲉϥϩⲏⲡ ⲛϥ̄ⲛⲁⲟⲩⲱⲛϩ̄ ⲉ̄ ⲃⲟⲗ ⲁⲛ : Ⲧⲁⲓ ⲧⲉ
ⲑⲉ ⲛ̄ⲧⲁ ⲛⲓ̈ ⲡⲉⲧ ⲟⲩⲁⲁⲃ ⲣ̄ ⲟⲩⲉⲓ̈ⲛ̄ ϩⲛ̄ ⲛⲉⲩⲁⲣⲉⲧⲏ̄
ⲉⲧ ⲥⲟⲧⲡ̄ • Ⲁⲩⲱ ⲙⲛ︦ⲛ︦ⲥⲁ ⲉⲃⲟⲧ ⲥⲛⲁⲩ ⲁϥⲛ̄ⲕⲟⲧⲕ̄ ⲛ̄ϭⲓ
ⲡⲣⲱ̄ⲙⲉ ⲛ̄ ⲥⲱⲧⲡ̄ ⲙⲁⲧⲑⲁⲓⲟⲥ ⲁϥⲉⲓ ⲛ ϫⲡ̄ ⲙⲛ̄ⲧⲟⲩⲉ
ⲁϥϫⲓ ⲛ̄ ⲡⲃⲉⲕⲉ ⲙ ⲡⲉϩⲟⲟⲩ ⲧⲏⲣϥ̄ • ϩⲓⲧⲛ̄ ⲛ̄ ⲥⲟⲡⲥ̄ ⲙ̄
ⲡⲁⲣⲭⲁⲛⲅⲉⲗⲟⲥ ⲉⲧ ⲟⲩⲁⲁⲃ ⲙⲓⲭⲁⲏⲗ :-ⲙⲛⲛⲥⲁ ϩⲛ̄
ⲕⲟⲩⲓ̈ ⲇⲉ ⲛ̄ϩⲟⲟⲩ ϫⲓⲛⲧ ⲁϥⲙ̄ⲧⲟⲛ ⲙ̄ⲙⲟϥ ⲛ̄ϭⲓ ⲡⲣⲱⲙⲉ
ⲛ̄ ⲥⲱⲧⲡ̄ ⲙⲁⲑⲉⲟⲥ • Ⲁ ⲡϫⲁϫⲉ ⲛ̄ ⲡⲛⲟⲩⲧⲉ ⲙⲛ̄ ⲛ̄ⲣⲱⲙⲉ
ⲁⲩⲱ ⲡⲣϥ̄ϯⲧⲱⲛ ⲙⲛ̄ ⲛ̄ⲁⲅⲅⲉⲗⲟⲥ ⲉⲧⲉ ⲡⲁⲓ ⲡⲉ ⲡⲇⲓ̈ⲁ‐
ⲃⲟⲗⲟⲥ • ⲧⲟⲩⲛⲉⲥ ⲟⲩⲛⲟϭ ⲛ̄ ⲁⲣⲭⲱⲛ ⲛ̄ⲧⲉ ⲧⲡⲟⲗⲓⲥ ⲉϫⲛ̄
ⲧⲉϥⲥϩⲓ̈ⲙⲉ • ⲙⲛ̄ ⲛⲉϥϣⲏⲣⲉ ϩⲛ̄ ⲟⲩⲛⲟϭ | ⲙ̄ ⲙⲛ̄ⲧⲁⲧⲛⲁ
ⲁϥⲃⲓ ⲛ̄ ⲡⲉⲩϭⲓⲛ̄ⲟⲩⲏⲗ ⲛ̄ ⲧⲟⲟⲧⲟⲩ ϩⲛ̄ ⲟⲩϫⲓ ⲛ̄ ϭⲟⲛⲥ̄
ⲁⲩⲱ ⲁϥϩⲁⲣⲡⲁⲍⲉ ⲙ ⲡⲉⲧ ⲛ̄ⲧⲁⲩ ⲧⲏⲣϥ̄ • ϣⲁ ϩⲣⲁⲓ̈ ⲉ
ⲧⲉⲩⲕⲉ ⲁⲡⲟⲩⲑⲩⲕⲏ ⲁϥϥⲓ̈ⲧⲥ̄ ⲛ̄ ⲧⲟⲟⲧⲟⲩ : Ⲓ̈ⲱϩⲁⲛⲛⲏⲥ
ⲇⲉ ⲡⲛⲟϭ ⲛ̄ ⲥⲟⲛ̄ ⲉ̄ⲡⲓ̈ ⲇⲏ̄ ⲛⲉ ⲟⲩⲥⲟⲫⲟⲥ ⲡⲉ : ⲡⲉϫⲁϥ ⲛ̄
ⲧⲉϥⲙⲁⲁⲩ ⲙⲛ̄ ⲛⲉϥⲥⲛⲏⲩ • ϫⲉ ⲧⲱⲟⲩⲛ ⲛ̄ⲧⲛ̄ϫⲱⲕ ⲉ ⲃⲟⲗ
ⲙ̄ ⲡϣⲁϫⲉ ⲛⲧⲁ ⲡⲉⲛ ⲥⲱⲧⲏⲣ ϫⲟⲟϥ ϫⲉ ϩⲟⲧⲁⲛ ⲉⲩϣⲁⲛ‐
ⲡⲱⲧ ⲛ̄ⲥⲱⲧⲛ̄ ϩⲛ̄ ϯⲡⲟⲗⲓⲥ ⲡⲱⲧ ⲉ ϩⲣⲁⲓ̈ ⲕⲉ ⲟⲩⲉⲓ̈ • ⲗⲟⲓⲡⲟⲛ
ⲉⲓⲥ ϩⲏⲏⲧⲉ ⲁⲩⲡⲱⲧ ⲛ̄ⲥⲱⲛ ⲁⲩⲑⲗⲓⲃⲉ ⲙ̄ⲙⲟⲛ̄ ϩⲛ̄ ϯⲡⲟⲗⲓⲥ
ⲙⲁⲣⲛ̄ ⲡⲱⲧ ⲉ̄ ϩⲣⲁⲓ̈ ⲉ ⲕⲉ ⲟⲩⲉⲓ̈ ⲛ̄ⲧⲛ̄ⲟⲩϫⲁⲓ̈ • Ⲉⲓⲥ ϩⲏⲏⲧⲉ
ⲁⲩⲑⲗⲓ̈ⲃⲉ ⲙ̄ⲙⲟⲛ̄ ⲙ̄ ⲡⲁⲓ̈ ⲙⲁ • ⲙⲁⲣⲛ̄ ⲃⲱⲕ ⲉ ⲧⲉⲛⲧⲓ̈ⲁ
ⲧⲡⲟⲗⲓⲥ ⲛ̄ⲧⲛ̄ⲟⲩⲱϩ • ⲛ̄ϩⲏⲧⲥ̄ ⲧⲁⲣⲉⲛⲟⲩϫⲁⲓ̈ • Ⲁⲩⲱ ⲛ̄ ⲧⲉⲓ
ϩⲉ ⲁⲩⲧⲱⲟⲩⲛ ⲁⲩⲃⲓ̈ ⲛ ⲛⲉⲭⲣⲏⲙⲁ ⲙ̄ ⲡⲉⲩⲓ̈ⲱⲧ ⲁⲩ‐
ⲧⲱⲟⲩⲛ̄ • ⲁⲩⲡⲱⲧ ⲉ ϩⲣⲁⲓ̈ ⲉ ⲧⲉⲛⲧⲓⲁ • ⲧⲙⲛ̄ⲧⲣⲟⲡⲟⲗⲓⲥ (sic)
ⲛ̄ ⲧⲉⲭⲱⲣⲁ • ⲁⲩⲟⲩⲱϩ ⲛ̄ϩⲏⲧⲥ̄ : Ⲓ̈ⲱϩⲁⲛⲛⲏⲥ ⲇⲉ ⲙⲛ̄


### 0009

ⲧⲉϥⲙⲁⲁⲩ ⲙⲛ̄ ⲛⲉϥⲥⲛⲏⲩ ⲛⲉⲩϯ ⲛ̄ ϩⲉⲛⲛⲟϭ ⲙ̄ ⲙⲛ̄ⲧⲛⲁ
ⲛ̄ ⲛ̄ϩⲏⲕⲉ ⲙⲛ̄ | ⲛⲉⲧ ⲣ̄ ϭⲣⲱϩ • ⲙⲛ̄ ⲟⲩⲟⲛ ⲛ̄ⲓⲙ ⲉⲧ
ϣⲟⲟⲡ ϩⲛ̄ ϩⲉⲛϣⲱⲛⲉ : Ⲡⲇⲓ̈ⲁⲃⲟⲗⲟⲥ ⲇⲉ ⲡⲙⲁⲥⲧ̄ ⲡⲉⲧ
ⲛⲁⲛⲟⲩϥ • ⲙ̄ⲡⲉ ϥϣ̄ⲃⲓ̈ ⲉ ⲣⲟϥ ⲉϥⲛⲁⲩ ⲉ ⲧⲙ︦ⲛ︦ⲧⲛⲁⲏⲧ
ⲉ̄ⲧ ⲟⲩⲉⲓⲣⲉ ⲙ̄ⲙⲟⲥ : ⲁϥϣⲱⲡⲉ ⲉϥⲗ̄ϩⲏⲙ ⲛ̄ⲑⲉ ⲛ̄ ⲛⲓ̈ⲙⲟⲩⲓ̈ •
Ⲙ̄ⲛⲛⲥⲁ ϩⲛ̄ ⲕⲟⲩⲓ̈ ⲇⲉ ⲛ̄ϩⲟⲟⲩ • ⲁⲩⲥⲩⲗⲁ ⲙ ⲡⲏⲓ̈ ⲛ
ⲟⲩⲁⲣⲭⲱⲛ ⲛ̄ⲧⲉ ⲧⲡⲟⲗⲓⲥ : ⲁⲩⲃⲓ ⲛ̄ ⲟⲩⲛⲟϭ ⲙ̄ ⲡⲣⲉⲧⲏ̄
ⲉⲧⲱϥ ⲧⲉ ⲛ̄ ⲧⲉⲩϣⲏ : Ⲡⲁⲣⲭⲱⲛ ⲇⲉ ⲁϥⲙ̄ (sic) ⲡϩⲱⲃ ⲛ̄ⲁ‐
ϩⲣⲙ̄ ⲡϩⲏⲅⲉⲙⲱⲛ : Ⲡϩⲏⲅⲉⲙⲱⲛ̄ ⲇⲉ ⲁϥϣⲓ̈ⲛⲉ ⲛⲥⲁ ⲡϩⲱⲃ
ⲛ̄ⲧⲟⲟⲧⲟⲩ ⲛ̄ⲛⲉⲡⲣⲟⲝⲓⲙⲟⲥ ⲉⲧ ⲧⲏϣ ⲉ̄ ⲧⲡⲟⲗⲓⲥ ⲕⲁⲧⲁ
ϩⲣⲏⲙⲉ • ⲙⲛ̄ ⲛ̄ϩⲓⲣ ⲙ̄ⲛ ⲛ̄ⲣⲁⲩⲏ̄ ⲉⲩⲣⲟⲉⲓⲥ ⲉ ⲣⲟⲟⲩ • Ϩⲟⲥⲟⲛ
ⲇⲉ ⲉⲩⲉⲓⲣⲉ ϩⲓ̈ ⲛⲁⲓ ⲉⲓⲥ ⲡϫⲁϫⲉ ⲛ̄ⲇⲓⲕⲁⲓⲟⲥⲩⲛⲏ ⲛⲓ̈ⲙ ⲉⲧⲉ
ⲡⲁⲓ̈ ⲡⲉ ⲛⲇⲓ̈ⲁⲃⲟⲗⲟⲥ • ⲁϥⲣ̄ ⲡⲉⲥⲙⲟⲧ ⲛ̄ ⲟⲩⲣϥ̄ⲧⲁϣⲉⲟⲉⲓϣ
ⲁϥⲱϣ ⲉ ⲃⲟⲗ ⲉ̄ϥϫⲱ ⲙ̄ⲙⲟⲥ • ϫⲉ ⲛⲉⲓ̈ ϣⲏⲣⲉ ϣⲏⲙ
ⲛ̄ϣⲙ̄ⲙⲟ • ⲛ̄ ⲡⲉϥⲧⲟⲟⲩ • ⲛ̄ⲧⲁⲩⲉⲓ ⲁⲩⲟⲩⲱϩ ϩⲛ̄ ϯⲡⲟⲗⲓⲥ •
ⲛⲉ ⲛⲧⲁⲩⲥⲩⲗⲁ ⲙ̄ ⲡⲏⲓ ⲛ̄ ⲡⲁⲣⲭⲱⲛ • ⲉⲓⲥ ϩⲏⲏⲧⲉ ⲥⲉⲟⲩⲏϩ
ϩⲛ̄ ⲡϩⲓⲣ ⲙ̄ ⲡⲍⲉⲩⲥ (?) | ⲗⲟⲓⲡⲟⲛ ϣⲓⲛⲉ ⲛ̄ⲥⲱⲟⲩ ⲛ̄ⲧⲉⲧⲛ̄‐
ⲉⲝⲉⲧⲁⲍⲉ ⲙⲙⲟⲟⲩ • ⲁⲩⲱ ⲧⲙⲉ ⲛⲁⲟⲩⲱⲛϩ̄ ⲉ̄ ⲃⲟⲗ •
Ⲛⲧⲉⲩⲛⲟⲩ ⲇⲉ ⲛⲧⲁ ⲡϣⲁϫⲉ ⲥⲱⲣ ⲉ ⲃⲟⲗ ⲁ ⲛⲉⲡⲣⲟⲝⲓⲙⲟⲥ
ⲁⲙⲁϩⲧⲉ ⲙⲙⲟⲟⲩ • ⲁⲩⲡⲁⲣⲁϯⲇⲟⲩ ⲙⲙⲟⲟⲩ ⲛ̄ ⲛⲉϩⲣⲏ‐
ⲡⲁⲣⲓⲟⲥ • Ⲁ ⲛⲉϩⲣⲏⲡⲁⲣⲓ̈ⲟⲥ ϫⲓ̈ⲧⲟⲩ ⲉ ⲣⲁⲧϥ̄ ⲙ̄ ⲡϩⲏⲅⲉ‐
ⲙⲱⲛ ⲉ ⲧⲃⲉ ⲟⲩϩⲱⲃ ⲛ̄ⲥⲉⲥⲟⲟⲩⲛ̄ ⲙ̄ⲙⲟϥ ⲁⲛ • Ⲉⲩⲥⲱⲕ
ⲇⲉ ⲙ̄ⲙⲟⲟⲩ ⲉ ⲃⲟⲗ ϩⲛ̄ ⲧⲁⲅⲟⲣⲁ ⲁⲩⲃⲓ ⲛ̄ⲛⲉⲩⲃⲁⲗ ⲉ ϩⲣⲁⲓ̈
ⲉ̄ ⲧⲡⲉ ⲉⲩϫⲱ ⲙ̄ⲙⲟⲥ • Ϫⲉ ⲡⲛⲟⲩⲧⲉ ⲙ ⲡⲁⲣⲭⲁⲅⲅⲉⲗⲟⲥ
ⲙⲓ̈ⲭⲁⲏⲗ ⲁⲣⲓ ⲛⲁϣⲧⲉ ⲉ̄ ⲣⲟⲛ • ⲕⲥⲟⲟⲩⲛ̄ ⲡⲁ ϫⲟⲉⲓⲥ ⲉ
ϩⲱⲃ ⲛⲓⲙ ϫⲉ ⲛⲧⲛ̄ⲥⲟⲟⲩⲛ̄ ⲙ̄ⲙⲟⲕ ⲁⲛ ϫⲓⲛ ⲧⲉϩⲟⲩⲉⲓⲧⲉ •
ⲧⲉⲛⲟⲩ ⲇⲉ ⲧⲛ̄ϩⲟⲙⲟⲗⲟⲅⲓ ⲙ̄ⲙⲟⲕ ⲙⲛ̄ ⲡⲉⲕⲁⲣⲭⲁⲅⲅⲉ‐
ⲗⲟⲥ ⲙⲓⲭⲁⲏⲗ ϫⲉ ⲛ̄ⲧⲟⲕ ⲡⲉ ⲡⲛⲟⲩⲧⲉ ⲉⲧ ⲟⲛϩ̄ • ϫⲉ
ⲧⲛ̄ⲟⲩⲁⲁⲃ ⲉ ⲡϩⲓ̈ⲗⲁ ⲛ̄ⲛⲟⲩϫ ⲛ̄ⲧⲁⲩⲧⲟϭϥ̄ ⲉ ⲣⲟⲛ ⲙ̄ⲡⲟⲟⲩ •
Ⲡⲁⲣⲭⲁⲅⲅⲉⲗⲟⲥ ⲉⲧ ⲟⲩⲁⲁⲃ ⲙⲓⲭⲁⲏⲗ ⲛ̄ⲧⲁⲛ︤ⲡ︥ⲓⲥⲧⲉⲩⲉ
ⲉ ⲣⲟⲕ ⲙ̄ⲡⲣ̄ ⲕⲁⲁⲛ ⲛ̄ⲥⲱⲕ ϫⲉ ⲛⲧⲟⲕ ⲡⲉⲛⲧ ⲁⲛⲧⲟϭⲛ̄ ⲉ ⲣⲟⲕ
ϫⲓ̈ⲛ̄ ⲡⲛ̄ⲁⲩ ⲛ̄ⲧⲁⲛⲙ̄ⲡϣⲁ ⲛ̄ ⲧⲉⲥⲫⲣⲁⲅⲓⲥ ⲉⲧ ⲟⲩⲁⲁⲃ ⲉⲧ
ϩⲙ̄ ⲡⲉⲭⲥ̄ ⲉⲧⲉ ⲡⲁⲓ ⲡⲉ ⲡⲁⲣⲏⲃ ⲉⲧ ⲟⲩⲁⲁⲃ ⲛ̄ⲧⲉ ⲧⲙⲛ̄ⲧ‐
ⲭⲣⲏⲥϯⲁⲛⲟⲥ • Ⲡⲛⲟⲩⲧⲉ ⲛ̄ⲧⲁⲛ|ⲡⲓⲥⲧⲉⲩⲉ ⲉ ⲣⲟⲕ ⲃⲟⲏⲑⲓ̈


### 0010

ⲉ ⲣⲟⲛ : Ⲛⲁⲓ ⲇⲉ ⲉⲩϫⲱ ⲙ̄ⲙⲟⲟⲩ • ⲁⲩⲥⲙⲏ ϣⲱⲡⲉ ϩⲓ ⲧⲡⲉ
ⲙⲙⲟⲟⲩ ⲉⲥϫⲱ ⲙ̄ⲙⲟⲥ • ϫⲉ ⲙ̄ⲡⲣ̄ ⲣ̄ ϩⲟⲧⲉ ⲱ̄ ⲓ̈ⲱϩⲁⲛⲛⲏⲥ
ⲙⲛ̄ ⲛⲉϥⲥⲛⲏⲩ ϫⲉ ⲙⲛ̄ ⲡⲉⲑⲟⲟⲩ ⲛⲁⲧⲁϩⲱⲧⲛ̄ • ⲁⲛⲟⲕ ⲡⲉ
ⲙⲓ̈ⲭⲁⲏⲗ ⲡⲛ̄ⲧⲁ ⲧⲉⲧⲛ̄ⲉⲡⲓⲕⲁⲗⲓ ⲙⲙⲟϥ : Ⲛ̄ⲧⲟⲟⲩ ⲇⲉ
ⲡⲉϫⲁⲩ ϫⲉ ⲙⲁⲣⲉ ⲡⲉⲕⲛⲁ ⲧⲁϩⲟⲛ • Ⲛ̄ⲧⲟϥ ⲇⲉ ⲡⲉϫⲁϥ
ⲛⲁⲩ ϫⲉ ⲙⲁⲣⲉ ⲡⲉⲧⲛ̄ϩⲏⲧ ⲧⲁϫⲣⲟ ⲛ̄ⲧⲉⲧⲛ̄ ⲧⲙ̄ ⲣ̄ ϩⲟⲧⲉ •
ϯϫⲱ ⲙ̄ⲙⲟⲥ ⲛⲏ̄ⲧⲛ̄ ϫⲉ ⲓ︤ⲥ︥ ⲡⲉⲭ︤ⲥ︥ ⲡⲉⲛⲧⲁ ⲧⲉⲧⲛ̄ϫⲓ
ⲃⲁⲡⲧⲓ̈ⲥⲙⲁ ⲉ ⲡⲉϥⲣⲁⲛ • ϩⲓ̈ ⲧⲟⲟⲧϥ̄ ⲙⲛ̄ ⲡⲉⲑⲟⲟⲩ ⲛⲁⲧⲁ‐
ϩⲱⲧⲛ̄ • ⲁⲗⲗⲁ ϯⲛⲁϭⲱ ⲉⲓⲣⲟⲉⲓⲥ ⲉ̄ ⲣⲱⲧⲛ̄ ⲉⲓⲛⲟⲩϩⲙ̄
ⲙ̄ⲙⲱⲧⲛ̄ ⲛⲁⲩ ⲛⲓⲙ • ⲟⲩ ⲙⲟⲛⲟⲛ ϫⲉ ⲛ̄ⲧⲱⲧⲛ̄ • ⲁⲗⲗⲁ
ⲟⲩⲟⲛ ⲛⲓ̈ⲙ ⲉⲧ ⲛⲁⲉⲡⲓ̈ⲕⲁⲗⲓ̈ ⲛϥ̄ϫⲟⲟⲥ ϫⲉ ⲡⲛⲟⲩⲧⲉ ⲙ︦
ⲡⲁⲣⲭⲁⲅⲅⲉⲗⲟⲥ ⲙⲓ̈ⲭⲁⲏⲗ ⲛⲁ ⲛ̄ⲁⲛ • ϯⲛⲏⲩ ϣⲁ ⲣⲟϥ
ϩⲛ̄ ⲟⲩϭⲉⲡⲏ ϩⲓⲧⲛ̄ ⲡⲟⲩⲉϩⲥⲁϩⲛⲉ ⲛ̄ ⲡⲛⲟⲩⲧⲉ ⲧⲁϯ ⲛⲁϥ
ⲙ̄ ⲡⲉϥⲁⲓⲧⲏⲙⲁ : ⲁⲩⲱ ⲧⲁⲧⲙ̄ ⲕⲁ ⲗⲁⲁⲩ ⲙ̄ ⲡⲉⲑⲟⲟⲩ
ⲉ ⲧⲁϩⲟϥ : | Ⲡⲁⲣⲭⲁⲅⲅⲉⲗⲟⲥ ⲇⲉ ⲙⲓ̈ⲭⲁⲏⲗ ⲛ̄ ⲧⲉⲣ ϥ̄ϫⲉ
ⲛⲁⲓ ⲛⲁⲩ ⲁϥϯ ⲛⲁⲩ ⲛ̄ ϯⲣⲏⲛⲏ ⲁϥϩⲟⲡϥ̄ ⲉ ⲣⲟⲟⲩ • Ⲧⲟⲧⲉ
ⲡⲉϩⲣⲏⲡⲁⲣⲓ̈ⲟⲥ ⲁϥⲛ̄ⲧⲟⲩ ⲛ̄ⲛⲁϩⲣⲙ̄ ⲡϩⲏⲅⲉⲙⲱⲛ ⲉ ⲧⲣϥ̄‐
ⲁⲛⲁⲕⲣⲓⲛⲉ ⲙⲙⲟⲟⲩ • ⲁⲩⲱ ⲛ̄ ⲧⲉⲣⲉ ϥⲧⲁϩⲟⲟⲩ ⲉ ⲣⲁⲧⲟⲩ
ϩⲙ̄ ⲡⲃⲏⲙⲁ ⲡⲉϫⲁⲩ ϩⲓ ⲟⲩⲥⲟⲡ ϫⲉ ⲡⲛⲟⲩⲧⲉ ⲙ̄ ⲡⲁⲣⲭ‐
ⲁⲅⲅⲉⲗⲟⲥ ⲉⲧ ⲟⲩⲁⲁⲃ ⲙⲓⲭⲁⲏⲗ ⲃⲟⲏ̄ⲑⲓ ⲉ̄ ⲣⲟⲛ • ⲛ̄ⲧⲟⲕ
ⲉⲧ ⲥⲟⲟⲩⲛ̄ ⲱ̄ ⲡⲁ ϫⲟⲉⲓⲥ ϫⲉ ⲧⲛ̄ⲟⲩⲁⲁⲃ ⲉ ⲡⲉⲓ̈ ϩⲱⲃ
ⲛ̄ⲧⲁⲩϩⲓⲗⲁ ⲉ ⲣⲟⲛ ⲉ ⲧⲃⲏⲏⲧϥ̄ • ⲁⲗⲗⲁ ⲡⲉⲕⲟⲩⲱϣ ⲡϫⲟⲉⲓⲥ
ⲙⲁⲣⲉϥϣⲱⲡⲉ • Ϩⲛ̄ ⲧⲉⲩⲛⲟⲩ ⲇⲉ ⲉ̄ⲧ ⲙ̄ⲙⲁⲩ ⲛ̄ⲡⲁⲧⲉ
ⲡϣⲁϫⲉ ⲥⲱⲗⲡ̄ ϩⲛ̄ ⲣⲱⲟⲩ • ⲉⲓⲥ ⲡⲁⲣⲭⲁⲅⲅⲉⲗⲟⲥ ⲉ̄ⲧ
ⲟⲩⲁⲁⲃ ⲙⲓ̈ⲭⲁⲏⲗ ⲁϥϫⲓ ⲙ̄ ⲡⲉⲥⲙⲟⲧ ⲛ̄ ⲟⲩⲡⲁⲧⲣⲓⲕⲓ̈ⲟⲥ
ⲛ̄ⲧⲉ ⲡⲣ̄ⲣⲟⲅⲉⲥⲁⲛⲑⲟⲥ ⲡⲣ̄ⲣⲟ ⲛ̄ⲧⲉⲛⲧⲓ̈ⲁⲧⲡⲟⲗⲓⲥ ⲛ̄ ⲧⲉⲭⲱⲣⲁ
ⲁϥⲉⲓ • Ⲡϩⲏⲅⲉⲙⲱⲛ̄ ⲇⲉ ⲛ̄ ⲧⲉⲣ ϥ̄ⲛⲁⲩ ⲉ ⲡⲁⲣⲭⲁⲅⲅⲉⲗⲟⲥ
ⲙⲓⲭⲁⲏⲗ ⲁϥⲙⲟⲟϣⲉ ⲉ ϩⲟⲩⲛ ⲉ ⲣⲟϥ ⲙ̄ ⲡⲉⲥⲙⲟⲧ ⲛ̄ⲧⲉ
ⲅⲉⲥⲁⲛⲑⲟⲥ ⲡⲣ̄ⲣⲟ • Ⲁϥⲧⲱⲟⲩⲛ ⲇⲉ ⲛⲧⲉⲩⲛⲟⲩ ⲁϥⲁϩⲉ
ⲣⲁⲧϥ̄ ϩⲓⲑⲏ ⲙ̄ⲙⲟϥ • ⲉϥϯ ⲙⲁ ⲛ ⲧⲉϥⲧⲁⲝⲓⲥ ⲛ̄ ⲃⲁⲥⲓⲗⲓ‐
ⲕⲟⲛ | ⲉϥϫⲱ ⲙ̄ⲙⲟⲥ ϫⲉ ϯⲡⲁⲣⲁⲕⲁⲗⲓ ⲙⲙⲟⲕ ⲕⲩⲣⲓⲉ
ⲡⲁⲧⲣⲓⲕⲓⲉ ⲧⲁⲣⲕⲉⲓ ⲛⲅ̄ ϩⲙⲟⲟⲥ ϩⲁϩⲧⲏⲓ ⲛ ⲟⲩⲕⲟⲩⲓ̈ • ⲛⲅ̄
ⲥⲱⲧⲙ̄ ⲉ ⲛⲉⲓ ⲁⲡⲟⲗⲟⲅⲓ̈ⲁ • Ⲛ̄ⲧⲟϥ ⲇⲉ ⲡⲁⲣⲭⲁⲅⲅⲉⲗⲟⲥ
ⲉⲧ ⲟⲩⲁⲁⲃ ⲙⲓⲭⲁⲏⲗ ⲉⲡⲓ ⲇⲏ ⲛ̄ⲧⲁϥⲉⲓ ⲣⲱ ⲉ ⲧⲃⲉ ⲡⲁⲓ̈ •


### 0011

ⲁϥϩⲙⲟⲟⲥ ϩⲁ ⲟⲩⲛⲁⲙ ⲛ̄ ⲡϩⲏⲅⲉⲙⲱⲛ ⲁⲩⲱ ⲁ ⲡϩⲏⲅⲉ‐
ⲙⲱⲛ ⲕⲉⲗⲉⲩⲉ ⲉ ⲡⲁⲣϩⲓⲥⲧⲁ ⲛⲁϥ ⲙ̄ ⲡⲉϥⲧⲟⲟⲩ ⲛ̄ϣⲏⲣⲉ
ϣⲏⲙ ϩⲓ ⲟⲩⲥⲟⲡ ⲉ ⲡⲃⲏⲙⲁ • Ⲁⲩⲱ ⲛ̄ⲧⲉⲩⲛⲟⲩ ⲛⲧⲁⲩⲧⲁ‐
ϩⲟⲟⲩ ⲉ ⲣⲁⲧⲟⲩ ⲉ ⲡⲃⲏⲙⲁ ⲙ̄ ⲡⲉϥⲙ̄ⲧⲟ ⲉ̄ ⲃⲟⲗ • ⲁ
ⲡϩⲏⲅⲉⲙⲱⲛ ϣⲁϫⲉ ⲛⲙ̄ⲙⲁⲩ ϩⲛ̄ ⲟⲩϭⲱⲛⲧ̄ ⲙⲛ̄ ⲟⲩⲁⲡⲓ̈ⲗⲩ
ϫⲉ ⲧⲁⲭⲁ ⲟⲩ ⲉ ⲃⲟⲗ ϩⲓⲧⲙ̄ ⲡⲇⲓ̈ⲁⲃⲟⲗⲟⲥ ⲡⲉ ⲡⲉⲓ ϩⲱⲃ •
Ϫⲉ ⲧⲁⲭⲏ ⲁⲛⲓⲛⲉ ⲛⲁⲓ̈ ⲉ ⲡⲉⲓ̈ ⲙⲁ ⲛ̄ ⲧⲉⲡⲣⲉⲧⲏ • ⲛ̄ⲥⲩⲗⲱⲙ
ⲡⲁⲣⲭⲱⲛ ⲛ̄ⲧⲁ ⲧⲉⲧⲛ̄ⲃⲓ̈ⲧⲥ̄ ⲙ̄ⲡⲣ̄ ⲙⲟⲩ ⲕⲁⲕⲱⲥ • ϫⲉ
ⲥⲉⲣ̄ ⲙⲛ̄ⲧⲣⲉ ⲉ ⲣⲱⲧⲛ̄ ϫⲉ ⲛ̄ⲧⲱⲧⲛ̄ ⲡⲉⲛⲧⲁ ⲧⲉⲧⲛ̄ϥⲓ ⲛ̄
ⲧⲉⲡⲣⲉⲧⲏ ⲛ ⲡⲁⲣⲭⲱⲛ • ⲉⲧⲉⲧⲛ̄ ⲧⲙ̄ ⲟⲩⲟⲛϩⲥ̄ ⲛⲁⲓ̈ ⲉ ⲃⲟⲗ•
ⲧⲉⲧⲛⲁⲙⲟⲩ ⲕⲁⲕⲱⲥ • Ⲛ̄ⲧⲟⲟⲩ ⲇⲉ ⲡⲉϫⲁⲩ ϩⲓ ⲟⲩⲥⲟⲡ ⲙ̄
ⲡϩⲏⲅⲉⲙⲱⲛ • ϫⲉ ϥⲟⲛϩ̄ ⲛ̄ϭⲓ ⲡⲛⲟⲩⲧⲉ ⲙⲙⲉ ⲓⲥ̄ ⲡⲉⲭⲥ̄
ⲙⲛ̄ ⲡⲉϥⲁⲣⲭⲁⲅ|ⲅⲉⲗⲟⲥ ⲉ̄ⲧ ⲟⲩⲁⲁⲃ ⲙⲓⲭⲁⲏⲗ • ϫⲉ ⲡⲉⲓ
ϩⲱⲃ ⲉⲧ ⲕ̄ϫⲛⲟⲩ ⲙⲙⲟⲛ ⲉ ⲣⲟϥ ⲙ̄ⲡⲉ ⲛⲕⲩⲛⲱⲛⲉⲓ̈ (sic) ⲉ ⲣⲟϥ
ⲉⲛⲉϩ • ⲟⲩⲇⲉ ⲛⲧⲛ̄ⲥⲱⲟⲩⲛ ⲙ̄ⲙⲟϥ ⲁⲛ • Ϩⲛ̄ ⲟⲩⲙⲉ ⲅⲁⲣ
ⲱ̄ ⲡϩⲏⲅⲉⲙⲱⲛ ⲡⲉϩⲱⲃ ϫⲉ ϫⲓ̈ⲟⲩⲉ ϥ̄ⲟ ⲛⲃⲟⲧⲉ ⲛ ⲛⲁϩⲣⲁⲛ̄
ϩⲓⲧⲛ̄ ⲙ̄ ⲡⲁⲣⲁⲅⲅⲉⲗⲓ̈ⲁ ⲛ̄ ⲛⲉⲛⲓ̈ⲟⲧⲉ ⲙⲛ̄ ⲛⲉⲩⲥⲃⲱ :
Ⲙⲓⲭⲁⲏⲗ ⲇⲉ ⲡⲁⲣⲭⲁⲅⲅⲉⲗⲟⲥ ⲁϥϣⲁϫⲉ ⲙⲛ̄ ⲡϩⲏⲅⲉ‐
ⲙⲱⲛ ⲉϥⲟ ⲙ̄ ⲡⲉⲥⲙⲟⲧ ⲙ̄ ⲡⲡⲁⲧⲣⲓⲕⲓⲟⲥ ϫⲉ ⲉϣⲱⲡⲉ
ⲕⲟⲩⲉϣ ⲧⲙⲉ ⲙⲁⲣⲟⲩ ⲁⲙⲁϩⲧⲉ ⲙ̄ ⲡⲉⲓ̈ ⲕⲟⲩⲓ̈ ⲛ̄ⲥⲟⲛ
ⲛ̄ⲧⲉ ⲛⲉⲓ ⲣⲱⲙⲉ • ⲛⲥⲉϫⲓⲧϥ̄ ⲉ ϩⲟⲩⲛ ⲉ̄ ⲡⲏⲓ̈ ⲙ̄ ⲡⲉⲓ̈ ⲣⲱⲙⲉ
ⲙ ⲡⲣⲟⲥⲑⲩⲣⲟⲥ • ⲡⲁⲓ ⲉ̄ⲧ ⲟ ⲛ̄ ⲁⲅⲣⲓ̄ⲟⲥ ⲉ̄ ϩⲟⲩⲛ ⲉ̄ ⲛⲉⲓ
ⲣⲱⲙⲉ ⲛ ⲁⲧ ⲛⲟⲃⲉ • ⲛϥ̄ⲱϣ ⲉ̄ ⲃⲟⲗ ⲉϥϫⲱ ⲙ̄ⲙⲟⲥ • ϫⲉ
ϩⲙ̄ ⲡⲣⲁⲛ ⲛ̄ ⲓⲥ̄ ⲡⲉⲭⲥ̄ • ⲙⲛ̄ ⲛ̄ⲛⲟϭ ⲛ̄ ϭⲟⲙ ⲛ̄ ⲡⲁⲣⲭ‐
ⲁⲅⲅⲉⲗⲟⲥ ⲙⲓⲭⲁⲏⲗ ⲙⲁⲣⲟⲩⲱⲛϩ̄ ⲉ̄ ⲃⲟⲗ ⲛ̄ϭⲓ ⲧⲉⲡⲣⲉⲧⲏ
ⲛ̄ ⲥⲩⲗⲱⲙ ⲡⲁⲣⲭⲱⲛ ⲛ̄ⲧⲁⲩⲃⲓⲧⲥ̄ ⲡⲁⲓ̈ ⲉⲧⲟⲩϩⲓⲗⲁ ⲉ ⲣⲟⲓ̈
ⲙⲛ̄ ⲛⲁ ⲥⲛⲏⲩ ⲉ ⲧⲃⲏⲏⲧⲥ̄ • ⲁⲩⲱ ϯϫⲱ ⲙ̄ⲙⲟⲥ ⲛⲁⲕ ϫⲉ
ⲧⲙⲉ ⲛⲁⲟⲩⲱⲛϩ̄ ⲉ̄ ⲃⲟⲗ ⲛ̄ⲧⲉⲩⲛⲟⲩ • Ⲁ ⲡϩⲏⲅⲉⲙⲱⲛ |
ⲧⲣⲉ ⲩⲁⲙⲁϩⲧⲉ ⲛ̄ ⲧϭⲓϫ ⲙ̄ ⲡϣⲏⲣⲉ ϣⲏⲙ ⲛ̄ϭⲓ ⲙⲁⲧⲟⲓ
ⲥⲛⲁⲩ ⲙⲛ̄ ϩⲉⲛϩⲩⲡⲉⲣⲉⲧⲏⲥ • ⲁⲩⲃⲱⲕ ⲉ ϩⲟⲩⲛ ⲉ ⲡⲏⲓ̈
ⲙ̄ ⲡⲉⲡⲣⲟⲥⲑⲩⲣⲟⲥ : Ⲁⲩⲱ ⲛ̄ⲧⲉⲩⲛⲟⲩ ⲁϥⲱϣ ⲉ̄ ⲃⲟⲗ ⲛ̄ϭⲓ
ⲡϣⲏⲣⲉ ϣⲏⲙ ⲉϥϫⲱ ⲙ̄ⲙⲟⲥ ϫⲉ ϩⲙ̄ ⲡⲣⲁⲛ ⲛ̄ ⲓⲥ̄ ⲡⲉⲭⲥ̄
ⲡⲛⲟⲩⲧⲉ ⲛ̄ⲛⲁ ⲧⲡⲉ ⲙⲛ̄ ⲛⲁ ⲡⲕⲁϩ • ⲁⲩⲱ ϩⲙ̄ ⲡⲣⲁⲛ
ⲙ̄ ⲡⲁⲣⲭⲁⲅⲅⲉⲗⲟⲥ ⲙⲓ̈ⲭⲁⲏⲗ ⲙⲛ̄ ⲧⲉϥⲛⲟϭ ⲛ̄ ϭⲟⲙ •


### 0012

ⲙⲁⲣⲉ ⲡⲉⲕⲛⲁ ⲧⲁϩⲟⲛ ⲙ̄ⲡⲟⲟⲩ ⲱ̄ ⲡⲛⲟⲩⲧⲉ ⲛⲅ̄ ⲧⲛ̄ⲛⲟⲟⲩ
ⲉ̄ ⲃⲟⲗ ϩⲛ̄ ⲧⲡⲉ ⲙ ⲡⲉⲕⲁⲣⲭⲁⲛⲅⲉⲗⲟⲥ ⲉⲧ ⲟⲩⲁⲁⲃ
ⲙⲓⲭⲁⲏⲗ • ⲛϥ̄ⲟⲩⲱⲛϩ̄ ⲉ̄ ⲃⲟⲗ ⲛ̄ ⲧⲉⲡⲣⲉⲧⲏ ⲛ̄ ⲥⲩⲗⲱⲙ
ⲡⲁⲣⲭⲱⲛ • ϫⲉ ⲛ̄ ϩⲛ̄ⲕⲟⲩⲓ̈ ⲁⲛ ⲛⲉ ⲛ̄ⲥⲏϣⲉ ⲛ̄ⲧⲁⲓ̈ϣⲟⲡⲟⲩ
ⲙⲛ̄ ⲛⲁ ⲥⲛⲏⲩ • ⲉ ⲃⲟⲗ ϩⲓ̈ⲧⲙ̄ ⲡⲉⲓ̈ ⲡⲣⲟⲥⲑⲩⲣⲟⲥ ⲛ̄ ⲁⲧ
ⲛⲁ • Ⲁⲩⲱ ⲛ̄ⲧⲉⲩⲛⲟⲩ ⲛ̄ⲧⲁϥϫⲉ ⲡⲁⲓ̈ ⲁⲩⲥⲙⲏ ϣⲱⲡⲉ ϣⲁ
ⲣⲟϥ ⲙⲛ̄ ⲛⲉⲧ ⲛⲙ̄ⲙⲁϥ • ⲁⲩⲱ ⲛ̄ⲕⲉ ⲙⲁⲧⲟⲓ̈ ⲉⲧ ⲧⲟ ⲉ ⲣⲟϥ
ⲙⲛ̄ ⲛⲁⲛⲟⲩⲣ̄ϣⲉ ⲉⲧ ⲁⲙⲁϩⲧⲉ ⲙ̄ⲙⲟϥ ⲉⲥϫⲱ ⲙ̄ⲙⲟⲥ ⲛ̄
ⲧⲉⲓ ϩⲉ ϫⲉ ⲱ̄ ⲛ̄ⲣⲱⲙⲉ ⲛⲧⲁⲩⲉⲓ̈ ⲉⲩϣⲓ̈ⲛⲉ ⲛⲥⲁ ⲧⲉⲡⲣⲉⲧⲏ
ⲛⲧⲁⲩϥⲓⲧⲥ̄ | ϩⲙ̄ ⲡⲏⲓ̈ ⲛ ⲥⲩⲗⲱⲙ ⲡⲁⲣⲭⲱⲛ • ⲁⲙⲏⲓⲧⲛ̄
ⲉ ⲡⲉⲥⲏⲧ ⲉ ⲡⲉⲓ ⲕⲁⲧⲁⲕⲓⲟⲛ • ⲁⲩⲱ ⲧⲉⲧⲛ̄ⲁϩⲉ ⲉ ⲡⲉⲧⲉ‐
ⲧⲛ̄ϣⲓⲛⲉ ⲛⲥⲱϥ ⲛ̄ⲧⲉ ⲧⲙⲉ ⲟⲩⲱⲛϩ̄ ⲉ ⲃⲟⲗ ⲛ̄ ⲟⲩⲟⲛ ⲛⲓⲙ •
ϫⲉ ⲛⲉⲓ ⲣⲱⲙⲉ ⲟⲩⲁⲁⲃ ⲉ ⲡⲉⲧ ⲟⲩⲁⲡⲟⲧⲉⲓ̈ (sic) ⲙ̄ⲙⲟⲟⲩ ⲉ
ⲣⲟϥ • Ⲁⲩⲱ ⲛⲧⲁ ⲡⲁⲓ̈ ϣⲱⲡⲉ ⲧⲁⲣⲉ ⲧⲙⲉ ⲟⲩⲱⲛϩ̄ ⲉ ⲃⲟⲗ
ϩⲓⲧⲛ̄ ⲛ̄ ⲛⲟϭ ⲛ̄ ϭⲟⲙ ⲛ̄ ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ •
Ⲁⲩⲱ ⲛ̄ⲧⲉⲩⲛⲟⲩ ⲛⲧⲁ ⲡⲙⲏⲏϣⲉ ⲥⲱⲧⲙ̄ ⲉ ⲧⲉⲥⲙⲏ ⲁⲩⲃⲱⲕ
ⲉ̄ ⲡⲉⲥⲏⲧ ⲉ ⲡⲕⲁⲧⲁⲕⲓⲟⲛ : ⲁⲩϭⲓⲛⲉ ⲛ̄ ⲧⲉⲡⲣⲉⲧⲏ ⲙ̄ ⲡⲁⲣ‐
ⲭⲱⲛ̄ : ⲙ̄ ⲡⲉⲥⲏⲧ ⲉ ⲡⲉⲥⲡⲩⲗⲉⲟⲛ ϩⲙ̄ ⲡⲏⲓ̈ ⲛ̄ ⲡⲉⲡⲣⲟⲥ‐
ⲑⲩⲣⲟⲥ ⲛ̄ ⲁⲧ ⲛⲁ ⲡⲁⲓ ⲛ̄ⲧⲁϥϣⲱⲡⲉ ⲛⲟⲩⲁ̄ϩⲓ̈ⲏⲧ ⲉ ϩⲟⲩⲛ
ⲉ̄ ⲛⲉⲓ ϣⲏⲣⲉ ϣⲏⲙ ⲛ̄ ⲁⲧ ⲛⲟⲃⲉ ⲉⲧⲉ ⲓⲱϩⲁⲛⲛⲏⲥ ⲡⲉ ⲙⲛ̄
ⲛⲉϥⲥⲛⲏⲩ • Ⲁⲩⲱ ⲛ̄ⲧⲉⲩⲛⲟⲩ ⲁ ⲡϩⲏⲅⲉⲙⲱⲛ ⲕⲁⲁⲩ
ⲉ ⲃⲟⲗ • ⲁⲩⲃⲱⲕ ⲉ ⲡⲉⲩⲏⲓ̈ ⲁⲩϯ ⲉⲟⲟⲩ ⲙ̄ ⲡⲛⲟⲩⲧⲉ ⲙⲛ̄
ⲡⲉϥⲛⲟϭ ⲛ̄ ⲁⲣⲭⲁⲅⲅⲉⲗⲟⲥ ⲙⲓ̈ⲭⲁⲏⲗ :-Ⲁⲩⲱ ⲛ̄ⲧⲉⲩⲛⲟⲩ
ⲁ ⲡⲁⲣⲭⲁⲅⲅⲉⲗⲟⲥ ϩⲟⲡϥ̄ ⲉ ⲡϩⲏⲅⲉⲙⲱⲛ ⲙⲛ̄ ⲛⲉⲧ ⲁϩⲉ
ⲣⲁⲧⲟⲩ ⲛⲙ̄ⲙⲁϥ ⲁϥⲟⲩⲟⲛϩϥ̄ ⲉ̄ ⲡⲉ|ϥⲧⲟⲟⲩ ⲛ̄ⲥⲟⲛ ⲉⲩⲛⲏⲩ
ⲉ̄ ⲡⲉⲩⲏⲓ̈ ⲁϥϣⲁϫⲉ ⲛⲙ̄ⲙⲁⲩ ⲛ̄ϭⲓ ⲡⲛⲟϭ ⲛ̄ ⲁⲣⲭⲁⲅⲅⲉⲗⲟⲥ
ⲉⲧ ⲟⲩⲁⲁⲃ • ⲁⲩⲱ ⲡⲁⲣⲭⲏⲥⲧⲣⲁϯⲕⲟⲥ ⲛ̄ ⲧϭⲟⲙ ⲛ̄ ⲡϫⲟⲉⲓⲥ
ⲙⲓⲭⲁⲏⲗ ⲉϥϫⲱ ⲙ̄ⲙⲟⲥ: ϫⲉ ⲱ̄ ⲓ̈ⲱϩⲁⲛⲛⲏⲥ ⲙⲛ̄ ⲛⲉϥⲥⲛⲏⲩ
ⲉⲓⲥ ϩⲏⲏⲧⲉ ⲁⲓ̈ⲧⲟⲩϫⲉ ⲧⲏⲩⲧⲛ̄ • ⲁϫⲛ̄ ⲗⲁⲁⲩ ⲙ̄ ⲡⲉⲑⲟⲟⲩ •
Ⲁⲩⲱ ϯⲛⲁⲧⲟⲩϫⲉ ⲧⲏⲩⲧⲛ̄ ⲛ̄ⲕⲉ ⲥⲟⲡ ⲛ̄ⲧⲉⲧⲛ̄ϯ ϣⲓⲡⲉ ⲙ̄
ⲡⲇⲓ̈ⲁⲃⲟⲗⲟⲥ • Ⲁⲩⲱ ⲟⲛ ϯⲛⲁϯ ⲛⲏⲧⲛ̄ ⲛ̄ ⲟⲩⲡⲁⲣϩⲏⲥⲓⲁ
ⲙⲛ̄ ⲟⲩⲙⲛ̄ⲧⲓⲱⲧ ⲛ̄ⲧⲉⲧⲛ̄ϣⲱⲡⲉ ⲛⲁⲡⲉ ⲉϫⲛ̄ ⲛ̄ⲗⲁⲟⲥ
ⲧⲏⲣⲟⲩ • Ⲁⲩⲱ ⲟⲛ ⲛ̄ⲧⲉⲧⲛ̄ϣⲱⲡⲉ ⲛ̄ⲓⲱⲧ ⲙ̄ ⲡⲣ̄ⲣⲟ
ⲅⲉⲥⲁⲛⲑⲟⲥ • Ⲓ̈ⲱϩⲁⲛⲛⲏⲥ ⲇⲉ ⲙⲛ̄ ⲛⲉϥⲥⲛⲏⲩ ⲁⲩϫⲱ


### 0013

ⲉ ⲧⲉⲩⲙⲁⲩ ⲛ̄ ϩⲱⲃ ⲛⲓ̈ⲙ ⲛ̄ⲧⲁⲩϣⲱⲡⲉ ⲙⲙⲟⲟⲩ • Ⲛ̄ⲧⲟⲥ ⲇⲉ
ⲡⲉϫⲁⲥ ϫⲉ ⲙⲁⲣⲉ ⲡⲟⲩⲱϣ ⲙ̄ ⲡϫⲟⲉⲓⲥ ϣⲱⲡⲉ • ⲡⲗⲏⲛ ⲛⲁ
ϣⲏⲣⲉ ⲙ̄ⲡⲣ̄ ⲧⲣⲉ ⲛⲕⲁ ⲧⲟⲟⲧⲛ̄ ⲉ ⲃⲟⲗ ⲉⲛ ⲡⲉⲧⲛⲁⲛⲟⲩϥ
ⲛ̄ ⲟⲩⲟⲉⲓϣ ⲛⲓ̈ⲙ • ϫⲉ ⲕⲁⲥ ⲉⲣⲉ ⲡⲡⲉⲧⲛⲁⲛⲟⲩϥ ϣⲱⲡⲉ ⲙ̄‐
ⲙⲟⲛ ⲛ̄ⲧⲟⲩϫⲏⲩ ϩⲙ̄ ⲡⲓ̈ ⲁⲓⲱⲛ ⲙⲛ̄ ⲡⲉⲧ ⲛⲏⲩ • Ⲁⲥϣⲱⲡⲉ
ⲟⲛ ⲙ̄ⲡⲁⲧⲉ ⲙⲏⲧ ⲛ̄ϩⲟⲟⲩ ⲟⲩⲉⲓⲛⲉ ϫⲓⲛⲧⲁ ⲛⲁⲓ̈ ϣⲱⲡⲉ ⲁ ⲓ̈ⲱ‐
ϩⲁⲛⲛⲏⲥ ⲉⲓ̈ ⲉϥⲡⲁⲣⲁⲅⲓ ϩⲛ̄ | ⲧⲉⲡⲗⲁⲧⲓ̈ⲁ ⲛ ⲧⲡⲟⲗⲓⲥ • ⲁⲩⲱ
ⲁϥⲛⲁⲩ ⲉ̄ ⲣⲱⲙⲉ ⲥⲛⲁⲩ ⲉⲣⲉ ϩⲉⲛ̄ⲇⲩⲙⲓⲟⲥ ⲛ̄ⲧⲉ ⲅⲉⲥⲁⲛⲑⲟⲥ
ⲡⲣ︤ⲣⲟ ⲧⲟ ⲉ ⲣⲟⲟⲩ • ϫⲉ ⲉⲩⲉⲁⲡⲉⲧⲉⲓ̈ ⲙ̄ⲙⲟⲟⲩ ⲛ̄ ϣⲉ
ⲛ̄ϩⲟⲗⲟⲕⲟⲧⲧⲓⲛⲟⲥ ⲉ ⲡⲟⲩⲁ • ⲏ̄ ⲛ̄ⲥⲉϩⲟⲧⲃⲟⲩ • Ⲓ̈ⲱϩⲁⲛⲛⲏⲥ
ⲇⲉ ⲡⲉϫⲁϥ ⲛ̄ ⲙ̄ⲙⲁⲧⲟⲓ̈ • ϫⲉ ⲥⲉϭⲏⲡ ⲟⲛ ⲉ ⲡⲙⲟⲩ ⲏ̄
ⲕⲓⲛⲇⲩⲛⲟⲥ ⲉⲩϣⲁⲛϯ ⲡϣⲏⲧ ⲛ̄ϩⲟⲗⲟⲕⲟⲧϯⲛⲟⲥ • Ⲡⲉϫⲉ
ⲙ̄ⲙⲁⲧⲟⲓ ⲇⲉ ⲛⲁϥ ϫⲉ ⲙⲙⲟⲛ • Ⲡⲉϫⲉ ⲓⲱϩⲁⲛⲛⲏⲥ ϫⲉ
ϭⲱ ⲉ ⲣⲟⲓ ⲛ̄ ⲟⲩⲕⲟⲩⲓ̈ ⲱ̄ ⲛⲉⲥⲛⲏⲩ • Ⲁⲩⲱ ⲛ̄ⲧⲉⲩⲛⲟⲩ
ⲁϥⲃⲱⲕ ⲉ ϩⲟⲩⲛ ⲉ ⲡⲉϥⲏⲓ̈ • ⲁϥⲃⲓ̈ ⲛ̄ ⲡϣⲏⲧ ⲛ̄ ϩⲟⲗⲟⲕⲟⲧ‐
ϯⲛⲟⲥ ⲙⲛ̄ ⲕⲉ ϥⲧⲟⲟⲩ ⲁϥⲧⲁⲁⲩ ⲙ ⲡⲣⲱⲙⲉ ⲥⲛⲁⲩ •
ⲁⲩⲧⲁⲁⲩ ⲛ̄ ⲙ̄ⲙⲁⲧⲟⲓ̈ ⲙ̄ ⲡⲣ̄ⲣⲟ • ⲁⲩⲱ ⲡⲕⲉ ϥⲧⲟⲟⲩ ⲛ̄
ϩⲟⲗⲟⲕⲟⲧϯⲛⲟⲥ ⲁϥⲧⲁⲁⲩ ⲛ̄ ⲙ̄ⲙⲁⲧⲟⲓ̈ • Ⲡⲇⲓⲁⲃⲟⲗⲟⲥ ⲇⲉ
ⲛⲡⲉ (sic) ϥϭⲛ̄ ⲉϥⲛⲁⲣ ⲟⲩ • ⲉϥⲛ̄ⲁⲩ ⲙ ⲙⲛ̄ⲧⲛⲁⲏⲧ ⲉⲧⲟⲩ‐
ⲉⲓⲣⲉ ⲙ̄ⲙⲟⲟⲩ ⲛ̄ϭⲓ ⲡϥ̄ⲧⲟⲟⲩ ⲛ ϣⲏⲣⲉ ϣⲏⲙ • Ⲁⲥϣⲱⲡⲉ
ⲇⲉ ⲙⲛ︦ⲛ︦ⲥⲁ ⲛⲁⲓ̈ ⲁⲩⲣⲱⲙⲉ ϩⲓⲧⲟⲩⲱϥ ⲙ ⲡⲏⲓ̈ ⲛ ⲛⲓ
ⲡⲉⲧ ⲟⲩⲁⲁⲃ • ⲕⲁⲗⲓ ⲛ̄ ⲟⲩϣⲃⲏⲣ ⲛ̄ⲧⲁϥ ⲉ ⲡⲉϥⲏⲓ̈ ⲁϥⲟⲩⲱⲙ •
ⲁϥⲥⲱ ⲛⲙ̄ⲙⲁϥ ϣⲁ ⲣⲟⲩϩⲉ • Ⲡⲣⲱⲙⲉ ⲇⲉ ⲁϥⲧⲱⲟⲩⲛ
ⲁϥⲉⲓ ⲉ ⲃⲟⲗ ϩⲙ̄ ⲡⲏⲓ̈ ⲛ̄ ⲡⲉϥϣⲃⲏⲣ • ⲁϥⲉⲓ ⲉ ⲃⲟⲗ ϩⲛ̄ |
ⲧⲡⲗⲁⲧⲓ̈ⲁ ⲛ̄ ⲧⲡⲟ̄ⲗⲓⲥ • ⲉ ⲧⲣ ϥ̄ⲃⲱⲕ ⲉ ⲡⲉϥⲏⲓ̈ • ⲉⲧⲉⲓ̈ ⲇⲉ
ⲉϥⲙⲟⲟϣⲉ ϩⲛ̄ ⲧⲉϩⲓ̈ⲉ • ⲁⲩⲕⲉⲣⲁⲥⲧⲏⲥ ⲗⲟⲕⲥϥ̄ ⲁϥⲙⲟⲩ •
Ⲛ̄ ⲧⲉⲣⲉ ⲡⲉϩⲣⲏⲡⲁⲣⲓⲟⲥ ⲇⲉ ⲉⲓ ⲉϥⲕⲱⲧⲉ ⲛ̄ ⲧⲉⲩϣⲏ ⲉ ⲧⲃⲉ
ⲧⲕⲁⲧⲁⲥⲧⲁⲥⲓⲥ ⲛ̄ ⲧⲡⲟⲗⲓⲥ • ⲁϥϭⲛ̄ ⲡⲣⲱⲙⲉ ⲉϥⲛⲏϫ ⲉϥ‐
ⲙⲟⲟⲩⲧ • Ⲁϥϫⲉⲣⲉ ⲡϩⲃ︦ⲥ︥︦ ⲇⲉ ⲁϥⲙⲟⲩϣⲧ̄ ⲛ̄ ⲛⲉϥⲥⲱⲙⲁ
ⲧⲏⲣϥ̄ ⲙ̄ⲡⲉ ϥϭⲛ̄ ⲗⲁⲁⲩ ⲙ̄ ⲡⲱⲗϩ̄ ⲛ̄ϩⲏⲧϥ̄ • ⲁϥϯ ⲛ̄
ⲟⲩⲕⲁⲓⲥ ⲉ ⲣⲟϥ ⲁϥⲧⲣⲉ ⲩⲧⲱⲙⲥ̄ ϩⲙ̄ ⲡⲧⲁⲫⲟⲥ • Ⲡⲇⲓⲁ‐
ⲃⲟⲗⲟⲥ ⲇⲉ ⲁϥⲙⲟⲟϣⲉ ϩⲛ̄ ⲧⲡⲟⲗⲓⲥ ⲧⲏⲣⲥ̄ ⲉϥⲧⲁϣⲉⲟ̄ⲉⲓϣ
ⲉϥϫⲱ ⲙ̄ⲙⲟⲥ • ϫⲉ ⲡⲓ̈ ⲫⲑⲟⲛⲟⲥ ϣⲱⲡⲉ ⲉ ⲃⲟⲗ ϩⲓⲧⲙ̄
ⲡⲉⲓ ϥⲧⲟⲟⲩ ⲛ̄ⲥⲟⲛ ⲛ̄ⲧⲁⲩⲉⲓ ⲉ ϯⲡⲟⲗⲓⲥ ⲛ̄ ⲛⲓ ϩⲟⲟⲩ •


### 0014

Ⲛ̄ⲧⲉⲩⲛⲟⲩ ⲇⲉ ⲁ ⲡⲟⲩⲱ ⲃⲱⲕ ϣⲁ ⲡϩⲏⲅⲉⲙⲱⲛ • ⲡϩⲏⲅⲉ‐
ⲙⲱⲛ ⲇⲉ ⲁϥⲙ̄ (sic) ⲡϣⲁϫⲉ ⲛ̄ⲛⲁϩⲣⲙ̄ ⲡⲣ̄ⲣⲟ ⲅⲉⲥⲁⲛⲑⲟⲥ :
Ⲛ̄ⲧⲉⲩⲛⲟⲩ ⲇⲉ ⲛ̄ⲧⲁ ⲡⲣ̄ⲣⲟ ⲥⲱⲧⲙ̄ ⲉ ⲡϣⲁϫⲉ ⲁϥⲟⲩⲉϩ‐
ⲥⲁϩⲛⲉ ⲉ ⲡⲁⲣϩⲓⲥⲧⲁ ⲛⲁϥ ⲙ̄ ⲡⲉϥⲧⲟⲟⲩ ⲛ̄ϣⲏⲣⲉ ϣⲏⲙ
ϩⲓ ⲟⲩⲥⲟⲡ • Ⲙ̄ⲙⲁⲧⲟⲓ ⲇⲉ ⲁⲩϭⲱ ⲡⲉ ⲛⲉⲓ̈ ϣⲏⲣⲉ ϣⲏⲙ •
ⲁⲩϯ ⲛ̄ⲟⲩⲕⲟⲗⲗⲁⲣⲓⲟⲛ | ⲉ ⲡⲉⲩⲙⲁⲕϩ̄ ⲁⲩⲛ̄ⲧⲟⲩ ⲉ ⲃⲟⲗ
ϩⲛ̄ ⲧⲉⲡⲗⲁⲧⲓ̈ⲁ ⲛ ⲧⲡⲟⲗⲓⲥ ⲧⲏⲣⲥ̄ • ⲉ ⲧⲣⲉ ⲩϫⲓ̈ⲧⲟⲩ ⲉ ⲣⲁⲧϥ̄ ⲛ̄
ⲡⲣ̄ⲣⲟ ⲅⲉⲥⲁⲛⲑⲟⲥ : Ⲁⲩⲱ ϩⲛ̄ ⲧⲉⲩⲛⲟⲩ ⲁⲩⲥⲙⲏ̄ ϣⲱⲡⲉ ϣⲁ
ⲣⲟⲟⲩ ⲉⲥϫⲱ ⲙ̄ⲙⲟⲥ ϫⲉ ⲓ̈ⲱϩⲁⲛⲛⲏⲥ ⲙⲛ̄ ⲛⲉϥⲥⲛⲏⲩ ⲙⲡⲣ̄
ⲣ̄ ϩⲟⲧⲉ ⲉⲧⲉⲧⲛ̄ⲃⲏⲕ ϣⲁ ⲡⲣ̄ⲣⲟ : ϫⲉ ⲙⲛ̄ ⲡⲉⲑⲟⲟⲩ ⲛⲁⲧⲁ‐
ϩⲱⲧⲛ̄ • Ⲁ ⲡⲕⲁⲓⲣⲟⲥ ⲙ̄ ⲡϩⲓ̈ⲥⲉ ⲟⲩⲉⲓ̈ⲛⲉ • ⲡⲕⲉⲣⲟⲥ ⲛ̄
ⲧⲙⲛ̄ⲧⲓⲱⲧ ⲁϥϩⲱⲛ ⲉ ⲣⲱⲧⲛ̄ ⲉ ⲃⲟⲗ ϩⲓ̈ⲧⲛ̄ ⲡϫⲟⲉⲓⲥ • Ⲛ̄-
ⲧⲉⲩⲛⲟⲩ ⲁⲩⲉⲓⲛⲉ̄ ⲙⲙⲟⲟⲩ ⲉ ⲣⲁⲧϥ̄ ⲙ̄ ⲡⲣ̄ⲣⲟ : Ⲁⲩⲱ
ⲛⲉⲩⲥⲟⲡⲥ̄ ⲙ̄ ⲡⲛⲟⲩⲧⲉ ⲙⲛ̄ ⲡⲁⲣⲭⲁⲅⲅⲉⲗⲟⲥ ⲉⲧ ⲟⲩⲁⲁⲃ
ⲙⲓ̈ⲭⲁⲏⲗ ⲉ ⲧⲣ ϥ̄ⲧⲟⲩϫⲟⲟⲩ • Ⲁⲩⲱ ⲛ̄ⲧⲉⲩⲛⲟⲩ ⲉⲓⲥ
ⲡⲛ̄ⲟϭ ⲛ̄ ⲁⲣⲭⲁⲅⲅⲉⲗⲟⲥ ⲉ̄ⲧ ⲟⲩⲁⲁⲃ ⲙⲓ̈ⲭⲁⲏⲗ ⲡⲁ ⲡⲣⲁⲛ
ⲉⲧ ϩⲟⲗϭ̄ ϩⲛ̄ ⲧⲧⲁⲡⲣⲟ ⲛ ⲟⲩⲟⲛ ⲛⲓⲙ • Ⲁϥϫⲓ ⲛ ⲡⲉⲥ‐
ⲭⲏⲙⲁ ⲛ̄ ⲟⲩⲛⲟϭ ⲛ̄ ⲥⲇⲣⲁⲧⲏⲗⲁⲧⲏⲥ ⲛ̄ⲧⲉ ⲕⲱⲥⲧⲁⲛϯⲛⲟⲥ
ⲡⲣ̄ⲣⲟ ⲛ̄ ⲛⲉϩⲣⲱⲙⲁⲓⲟⲥ ⲁϥⲉⲓ ⲉ ϩⲟⲩⲛ ⲉⲣⲉ ⲟⲩⲛⲟϭ̇ ⲛ̄
ⲁⲝⲓⲱ̄ⲙⲁ ⲕⲱⲧⲉ ⲉ ⲣⲟϥ :-Ⲡⲣ̄ⲣⲟ ⲇⲉ ⲅⲉⲥⲁⲛⲑⲟⲥ ⲛ̄ ⲧⲉⲣⲉ
ϥⲛⲁⲩ ⲉ ⲣⲟϥ ⲁϥⲧⲱⲟⲩⲛ ⲁϥⲁϩⲉ ⲣⲁⲧϥ̄ ϩⲓ̈ ϩⲏ ⲙⲙⲟϥ :
ⲉϥϯ ⲙⲁ ⲙ ⲡⲉϥⲉⲟⲟⲩ | ⲛ̄ ⲃⲁⲥⲓⲗⲓ̈ⲕⲟⲛ̄ • ⲙⲛ︦ⲛ︦ⲥⲱⲥ ⲁⲩϩ‐
ⲙⲟⲟⲥ ϩⲓ ⲟⲩⲥⲟⲡ • Ⲡⲣ̄ⲣⲟ ⲇⲉ ⲁϥⲕⲉⲗⲉⲩⲉ ⲉ ⲧⲣⲉ ⲩⲉⲓⲛⲉ
ⲉ ϩⲟⲩⲛ ⲙ̄ ⲡⲉϥⲧⲟⲟⲩ ⲛ̄ⲥⲟⲛ ϩ̄ⲓ̈ ⲑⲏ̄ ⲙⲙⲟϥ : Ⲡⲉϫⲉ
ⲡⲣ︤ⲣⲟ ⲇⲉ ⲛⲁⲩ ⲉ ⲧⲃⲉ ⲟⲩ ⲁⲧⲉⲧⲛ̄ⲧⲱⲟⲩⲛ ⲉϫⲙ̄ ⲡⲉⲓ̈
ⲣⲱⲙⲉ ⲁⲧⲉⲧⲛ̄ϩⲱⲧⲃ̄ ⲙ̄ⲙⲟϥ • Ⲁⲩⲟⲩⲱϣⲃ̄ ⲛ̄ϭⲓ ⲡⲉϥⲧⲟⲟⲩ
ⲛ̄ⲥⲟⲛ ϫⲉ ϥⲟⲛϩ̄ ⲛ̄ϭⲓ ⲡⲛ̄ⲟⲩⲧⲉ ⲙⲛ̄ ⲡⲉϥⲛⲟϭ ⲛ̄ ⲁⲣⲭ‐
ⲁⲅⲅⲉⲗⲟⲥ ⲙⲓ̈ⲭⲁⲏⲗ • ϫⲉ ⲡⲓ̈ ⲫⲑⲟⲛⲟⲥ ⲉⲧ ⲕⲧⲱϭⲉ
ⲙ̄ⲙⲟϥ ⲉ ⲣⲟⲛ [erasure] ⲧⲛ̄ⲟⲩⲁⲁⲃ ⲉ ⲣⲟϥ : Ⲡⲣ̄ⲣⲟ ⲇⲉ
ⲁϥⲕⲉⲗⲉⲩⲉ ⲉ ⲧⲣⲉ ⲩⲉⲓⲛⲉ ⲛⲛⲉⲥⲕⲉⲩⲏ̄ ⲛ̄ ⲃⲁⲥⲁⲛⲓⲥⲧⲏⲣⲓⲟⲛ
ⲛ̄ⲥⲉⲃⲁⲥⲁⲛⲓ̈ⲍⲉ ⲙⲙⲟⲟⲩ : Ⲡⲁⲣⲭⲁⲅⲅⲉⲗⲟⲥ ⲇⲉ ⲙⲓ̈ⲭⲁⲏⲗ
ⲉ̄ⲡⲓ̈ ⲇⲏ ⲟⲩⲃⲁⲓ̈ⲣⲟⲟⲩϣ ⲡⲉ ϩⲁ ⲟⲩⲟⲛ ⲛⲓ̈ⲙ ⲉⲧ ⲟ ⲛϩⲙ̄ϩⲁⲗ
ⲛ̄ ⲡϫⲟⲉⲓⲥ ϩⲛ̄ ⲟⲩⲙⲉ : ⲁϥⲣ̄ ϩⲛⲁϥ ⲉⲟⲩⲱ̄ⲛϩ̄ ⲉ ⲃⲟⲗ ⲛ̄
ⲡⲉⲟⲟⲩ ⲛ ⲛⲓ̈ ⲡⲉⲧⲟⲩⲁⲁⲃ • ⲙⲁⲗⲗⲟⲛ ⲇⲉ ⲉ ⲧⲁⲛϩⲟ ⲛ̄


### 0015

ⲧⲡⲟⲗⲓⲥ ⲙ̄ ⲡⲣ̄ⲣⲟ ⲙⲛ̄ ⲡⲙⲏⲏϣⲉ ⲧⲏⲣϥ̄ : ⲙ̄ ⲡⲉⲥⲙⲟⲧ
ⲛ̄ⲧⲁϥⲧⲟⲩϫⲟ ⲛ̄ ⲛⲓⲛⲉⲩⲏ̄ ⲉⲣⲉ ⲡⲉⲥⲙⲏⲏ̄ϣⲉ ⲉⲓⲣⲉ ⲛ̄
ⲙⲛ︦ⲧ︦ⲥⲛⲟⲟⲩⲥ ⲛ̄ ⲧⲃⲁ : Ⲧⲁⲓ ⲟⲛ ⲧⲉ ⲑⲉ ⲛ̄ⲧⲁⲥⲣ̄ⲁⲛⲁϥ
ⲛ̄ ⲡⲛⲟⲩⲧⲉ ⲉ ⲧⲣⲉ ϯ ⲡⲟⲗⲓⲥ ⲟⲩϫⲁⲓ̈ ⲉ ⲡⲧⲁⲕⲟ • | Ⲧⲟⲧⲉ
ⲁϥⲟⲩⲱϣⲃ̄ ⲛ̄ϭⲓ ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲡⲉϫⲁϥ ⲛ̄
ⲅⲉⲥⲁⲛⲑⲟⲥ ϫⲉ ⲟⲩⲙⲁⲉⲓⲛ̄ ϩⲁϩⲧⲏⲛ̄ ϩⲛ̄ ϯ ⲡⲟⲗⲓⲥ • ⲉⲣϣⲁⲛ
ⲟⲩⲁⲛϯⲗⲟⲅⲓⲁ ⲛ̄ ⲧⲉⲓ ⲙⲓ̈ⲛⲉ ϣⲱⲡⲉ • ϣⲁⲛ ⲧⲣⲉ ⲩⲉⲓⲛⲉ
ⲛ̄ ⲡⲉⲛⲧ ⲁϥⲙⲟⲩ ⲛ̄ⲥⲉⲕⲁⲁϥ ⲙ̄ ⲡⲙ̄ⲧⲟ ⲉ ⲃⲟⲗ ⲛ̄ ⲡⲙⲏⲏϣⲉ
ⲧⲏⲣϥ̄ ⲛ̄ ⲧⲡⲟⲗⲓ̈ⲥ ⲛ̄ⲧⲛ̄ϫⲛⲟⲩϥ ϫⲉ ⲟⲩⲡⲉⲛⲧ̄ ⲁϥϣⲱⲡⲉ
ⲙⲙⲟⲕ • ⲁⲩⲱ ⲛ̄ⲧⲉⲩⲛⲟⲩ ϣⲁϥϫⲉ ⲧⲙⲉ ⲙ̄ ⲡⲙ̄ⲧⲟ ⲉ ⲃⲟⲗ
ⲙ̄ ⲡⲙⲏⲏ̄ϣⲉ ⲧⲏⲣϥ̄ • ⲗⲟⲓⲡⲟⲛ ⲙⲁⲣⲟⲩⲉⲓ̈ⲛⲉ ⲙ̄ ⲡⲛ̄ⲧⲁϥ‐
ⲙⲟⲩ ⲛⲧⲛ̄ϫⲛⲟⲩϥ ⲁⲩⲱ ϯϫⲱ ⲙ̄ⲙⲟⲥ ϫⲉ ⲧⲙⲉ ⲛⲁⲟⲩⲱ︦ⲛ︦ϩ︦
ⲉ̄ ⲃⲟⲗ ⲛ̄ⲧⲉ ⲡⲣϥ̄ϫⲓ̈ ϭⲟⲗ ϫⲓ̈ ϣⲓ̈ⲡⲉ : Ⲧⲟⲧⲉ ⲡⲣ̄ⲣⲟ ⲛ̄ ⲧⲉⲣⲉ
ϥ̄ⲥⲱⲧⲙ̄ ⲉ ⲛⲁⲓ̈ ⲛ ⲧⲟⲟⲧϥ̄ ⲙ̄ ⲡⲁⲣⲭⲁⲅⲅⲉⲗⲟⲥ • ⲛⲉϥ‐
ⲥⲟⲟⲩⲛ ⲇⲉ ⲁⲛ̄ ϫⲉ ⲙⲓ̈ⲭⲁⲏⲗ ⲡⲉ • ⲁⲗⲗⲁ ⲛⲉϥϫⲱ ⲙ̄ⲙⲟⲥ
ϫⲉ ⲟⲩⲛⲟϭ ⲛ̄ ⲁⲝⲓⲱ̄ⲙⲁϯⲕⲟⲥ ⲡⲉ ⲛ̄ⲧⲉ ⲡⲣ̄ⲣⲟ • ⲡⲣⲟⲥ ⲑⲉ
ⲛⲧ ⲁⲛ̄ϣⲣⲡ̄ ϫⲟⲟⲥ : Ⲁⲗⲗⲁ ϥ̄ϫⲟⲥⲉ ⲛ̄ϭⲓ ⲡⲁⲣⲭⲁⲅⲅⲉⲗⲟⲥ
ⲛ̄ϩⲟⲩⲉ̄ ⲧⲁⲝⲓⲥ ⲛⲓⲙ ⲛ̄ⲧⲉ ⲡⲉⲓ̈ ⲕⲟⲥⲙⲟⲥ : ⲗⲟⲓⲡⲟⲛ̄ ⲁ ⲡⲣ̄ⲣⲟ
ⲕⲉⲗⲉⲩⲉ ⲛ̄ⲥⲉⲃⲱⲕ ⲉ ⲡⲧⲁ|ⲫⲟⲥ • ⲛ̄ⲥⲉⲛ̄ⲧϥ̄ ⲛ̄ⲥⲉⲕⲁⲁϥ ⲙ̄
ⲡⲉϥⲙ̄ⲧⲟ ⲉ ⲃⲟⲗ : ⲙⲛ̄ ⲡⲙⲏⲏϣⲉ ⲧⲏⲣϥ̄ ⲉⲧ ⲥⲟⲟⲩϩ
ⲉ ⲣⲟϥ • Ⲙⲓⲭⲁⲏⲗ ⲇⲉ ⲡⲁⲣⲭⲁⲅⲅⲉⲗⲟⲥ • ⲁϥⲧⲱⲟⲩⲛ ⲙ̄
ⲡⲉⲙⲧⲟ ⲉ ⲃⲟⲗ ⲙ̄ ⲡⲣ̄ⲣⲟ ⲙⲛ̄ ⲡⲙⲏⲏϣⲉ ⲧⲏⲣϥ̄ ⲛ̄ ⲧⲡⲟⲗⲓⲥ •
ⲁϥⲙⲟⲩⲧⲉ ⲉ ⲡⲕⲟⲩⲓ ⲉⲧ ϩⲛ̄ ⲡⲉϥⲧⲟⲟⲩ ⲛ̄ϣⲏⲣⲉ ϣⲏⲙ
ⲉϥⲟ ⲛ ⲡⲉⲥⲙⲟⲧ ⲛ̄ ⲟⲩⲥⲧⲣⲁⲧⲏⲗⲁⲧⲏⲥ ϫⲉ ⲇⲁⲛⲓⲏⲗ ⲡⲥⲟⲛ
ⲛ̄ ⲓ̈ⲱϩⲁⲛ[ⲛⲏⲥ] ⲁⲙⲟⲩ ⲡⲁ ϣⲏⲣⲉ ⲁϫⲓⲥ ⲛ̄ ⲡⲉⲓ̈ ⲕⲱⲱⲥ
ϫⲉ ⲛⲓ̈ⲙ ⲡⲛ̄ⲧⲁϥϩⲱⲧⲃ̄ ⲙ̄ⲙⲟⲕ ⲁϫⲓ̈[ⲥ] ⲧⲙⲉ ⲙ̄ ⲡⲙ̄ⲧⲟ ⲉ
ⲃⲟⲗ ⲙ̄ ⲡⲣ̄ⲣⲟ ⲙⲛ̄ ⲡⲙⲏⲏϣⲉ ⲧⲏⲣϥ̄ • Ⲡϣⲏⲣⲉ ⲇⲉ ϣⲏⲙ
ⲇⲁⲛⲓⲏⲗ ⲡⲟⲩⲁ ϩⲛ̄ ⲛⲉⲧ ⲟⲩⲃⲁⲥⲁⲛⲓ̈ⲍⲉ ⲙ̄ⲙⲟⲟⲩ • Ⲁϥ‐
ⲧⲱⲟⲩⲛ ⲁϥⲃⲱⲕ ϣⲁ ⲡⲕⲱⲱⲥ • ⲁϥⲁⲙⲁϩⲧⲉ ⲛ̄ ⲧⲉϥϭⲓϫ
ⲉϥϫⲱ ⲙ̄ⲙⲟⲥ • ϫⲉ ⲡⲣⲱⲙⲉ ⲧⲁⲙⲟⲛ ϫⲉ ⲛⲓ̈ⲙ ⲡⲛ̄ⲧ
ⲁϥϩⲱⲧⲃ̄ ⲙ̄ⲙⲟⲕ • ⲁϫⲓ̈[ⲥ] ⲧⲙⲉ ⲙ̄ⲡⲣ̄ ⲕⲁⲁⲩ ⲉ ⲡⲱϩⲉ̄ ⲃⲟⲗ
ⲛ̄ ⲟⲩⲥⲛⲟϥ ⲛ̄ ⲁⲧ ⲛⲟⲃⲉ • ⲉ ⲡϫⲓⲛϫⲏ ⲛ̄ⲧⲉⲕⲁⲫⲟⲣⲙⲏ :
Ⲡⲛⲟⲩⲧⲉ ⲇⲉ ⲡⲁⲅⲁⲑⲟⲥ • ⲁϥⲕⲧⲟ ⲛ̄ ⲧⲉϥⲯⲩⲭⲏ ⲉ̄ ϩⲟⲩⲛ
ⲉ ⲡⲉϥⲥⲱⲙⲁ ⲛ̄ⲕⲉ ⲥⲟⲡ • ⲉ ⲧⲃⲉ ⲡⲟⲩϫⲁⲓ̈ ⲛ̄ ⲡⲟⲗⲓⲥ ⲧⲏⲣⲥ̄


### 0016

ⲙⲛ̄ ⲡⲣ̄ⲣⲟ : Ⲁⲩⲱ ϩⲓⲧⲛ̄ ⲧⲛⲟϭ ⲛ̄ ϭⲟⲙ ⲛ̄ ⲡⲛⲟⲩⲧⲉ ⲙⲛ̄
ⲡⲁⲣⲭⲁⲅⲅⲉ|ⲗⲟⲥ ⲉ̄ⲧ ⲟⲩⲁⲁⲃ ⲙⲓⲭⲁⲏⲗ ⲁ ⲡⲣⲱⲙⲉ ⲱⲛϩ̄
ⲛ̄ ⲕⲉ ⲥⲟⲡ ⲁϥⲱϣ ⲉ ⲃⲟⲗ ϩⲛ̄ ⲧⲙⲏⲧⲉ ⲙ ⲡⲙⲏ̄ϣⲉ ⲧⲏⲣϥ̄
ⲉϥϫⲱ ⲙ̄ⲙⲟⲥ ϩⲛ̄ ⲟⲩⲛ̄ⲟϭ ⲛ̄ ⲥⲙⲏ ϫⲉ ⲟⲩⲟⲓ̈ ⲛⲁⲕ ⲱ̄
ⲅⲉⲥⲁⲛⲑⲟⲥ • ϫⲉ ⲁⲕⲧⲟⲗⲙⲁ ϩⲟⲗⲱⲥ ⲁⲕϩⲙⲟⲟⲥ ϩⲁϩⲧⲏⲛ
ⲡⲛⲟϭ ⲛ̄ ⲥⲧⲣⲁⲧⲏⲗⲁⲧⲏⲥ ⲙ̄ ⲡⲣ̄ⲣⲟ ⲛ ⲛⲁ ⲧⲡⲉ ⲙⲛ̄
ⲛⲁ ⲡⲕⲁϩ ⲡⲁⲣⲭⲁⲅⲅⲉⲗⲟⲥ ⲉⲧ ⲟⲩⲁⲁⲃ ⲙⲓ̈ⲭⲁⲏⲗ • ⲡⲁⲓ̈
ⲉⲧ ⲥⲟⲡⲥ̄ ⲛ̄ ⲟⲩⲟⲉⲓ̈ϣ ⲛⲓ̈ⲙ • ϩⲁ ⲡⲅⲉⲛⲟⲥ ⲧⲏⲣϥ̄ ⲛ̄ ⲛ̄ⲣⲱⲙⲉ
ⲙⲛ̄ ⲛ̄ⲧⲃ̄ⲛⲟⲩⲉ : Ⲁⲩⲱ ⲛⲧⲟϥ ⲉⲧ ⲥⲟⲡⲥ̄ ⲉ ⲧⲃⲉ ⲛⲅⲁⲣⲡⲟⲥ
ⲛ̄ ⲡⲕⲁϩ ϣⲁⲛⲧⲉ ⲡⲛⲟⲩⲧⲉ ⲧⲛ̄ⲛⲟⲟⲩ ⲛ̄ ϯⲱⲧⲉ ⲉⲧ ⲛⲁⲛⲟⲩⲥ
ⲉ ϩⲣⲁⲓ̈ ⲉ ϫⲱⲟⲩ • ⲉ ⲧϭⲓⲛⲱⲛϩ̄ ⲛ̄ ⲛ̄ⲣⲱⲙⲉ ⲙⲛ̄ ⲛ̄ⲧⲃ̄ⲛⲟⲟⲩⲉ :
ⲁⲩⲱ ⲟⲛ ⲉ ⲧⲃⲉ ⲧϭⲓⲛⲱⲛϩ̄ ⲛ̄ⲛⲓⲃⲉ ⲛⲓⲙ ⲉⲧ ⲥⲙⲟⲩ ⲉ
ⲡⲛⲟⲩⲧⲉ : Ⲡⲉϫⲁϥ ⲟⲛ ⲛ̄ϭⲓ ⲡⲉⲛⲧ ⲁϥⲱⲛϩ̄ • ϫⲉ ⲕⲱ ⲛ̄
ⲛⲓⲣⲱⲙⲉ ⲉ ⲃⲟⲗ ⲙ̄ⲟ (sic) ⲛⲥⲉⲟⲩⲁⲁⲃ ⲉ ⲣⲟⲓ̈ • ⲁⲩⲱ ⲡⲁⲣⲭ‐
ⲁⲅⲅⲉⲗⲟⲥ ⲙⲓⲭⲁⲏⲗ ⲛⲁⲧⲁⲙⲟⲕ ⲉ ϩⲱⲃ ⲛⲓ̈ⲙ ⲛ̄ⲧⲁⲩϣⲱⲡⲉ
ⲙ̄ⲙⲟⲓ̈ • Ⲛ̄ⲧⲉⲩⲛⲟⲩ ⲇⲉ ⲁ ⲡⲁⲣⲭⲁⲅⲅⲉⲗⲟⲥ ⲟⲩⲱⲛϩ̄ ⲉ
ⲃⲟⲗ ϩⲙ̄ ⲡⲉϥ|ⲉⲟⲟⲩ ⲛⲁⲅⲅⲉⲗⲓⲕⲟⲛ ⲁϥϩⲱⲗ ⲉ ⲡϫⲓⲥⲉ
ⲉⲣⲉ ⲟⲩⲟⲛ ⲛⲓ̈ⲙ ⲑⲉⲱⲣⲓ̈ ⲙ̄ⲙⲟϥ • ⲁⲩⲱ ⲧⲉⲯⲩⲭⲏ ⲙ̄‐
ⲡⲣⲱⲙⲉ ⲁϥϫⲓ̈ⲧⲥ̄ ⲛⲙ̄ⲙⲁϥ • Ⲙⲛ︦ⲛ︦ⲥⲱⲥ ⲁ ⲡⲁⲣⲭⲁⲅⲅⲉⲗⲟⲥ
ⲙⲓ̈ⲭⲁⲏⲗ • ϣⲁϫⲉ ⲉ ⲡⲉⲥⲏⲧ ⲉϫⲙ̄ ⲡⲣ̄ⲣⲟ ⲙⲛ̄ ⲡⲙⲏⲏ̄ϣⲉ
ⲉϥϫⲱ ⲙ̄ⲙⲟⲥ • ϫⲉ ⲉⲓⲥ ϩⲏ︦ⲏ︦ⲧⲉ : ⲁⲓ̈ⲥⲉⲡⲥ̄ ⲡϫⲟⲉⲓⲥ ϩⲁ
ⲡⲟⲩϫⲁⲓ ⲛ̄ ⲧⲉⲕⲯⲩⲭⲏ ⲙⲛ̄ ⲡⲓ̈ ⲙⲏⲏϣⲉ ⲧⲏⲣϥ̄ ⲛ̄ ⲧⲉⲓ
ⲡⲟⲗⲓⲥ : ⲉ ⲧⲃⲉ ⲛⲓ̈ ϣⲏⲣⲉ ϣⲏⲙ : ⲗⲟⲓⲡⲟⲛ ⲙⲁⲣⲉ ⲓⲱ‐
ϩⲁⲛⲛⲏⲥ ⲙⲛ̄ ⲛⲉϥⲥⲛⲏⲩ ϣ[ⲱ]ⲡⲉ ⲉⲩⲧⲁⲏⲩ (sic) ⲛ̄ⲧⲟⲟⲧⲕ̄
ϫⲉ ⲛⲧⲁⲕⲟⲩϫⲁⲓ̈ ⲙⲛ̄ ⲧⲉⲕⲡⲟⲗⲓⲥ ⲧⲏⲣⲥ̄ ⲉ ⲧⲃⲏⲏⲧⲟⲩ ⲁⲩⲱ
ⲡⲉⲓ̈ ⲕⲉ ⲣⲱⲙⲉ ⲛ̄ⲧⲁⲕϫⲟⲟⲥ ϫⲉ ⲛ̄ⲧⲁⲩϩⲟⲧⲃⲉϥ • ⲛ̄ⲧⲁⲩ‐
ϩⲟⲧⲃⲉϥ ⲁⲛ • ⲁⲗⲗⲁ ⲛ̄ⲧⲁϥⲙⲟⲩ ⲛ̄ⲑⲉ ⲛ ⲟⲩⲟⲛ̄ ⲛⲓ̈ⲙ
ϩⲓⲧⲛ̄ ⲟⲩⲕⲉⲣⲁⲥⲧⲏⲥ : Ⲡⲣ̄ⲣⲟ ⲇⲉ ⲛ̄ ⲧⲉⲣⲉ ⲡⲉϥϩⲏⲧ ϣⲱⲡⲉ
ⲙ̄ⲙⲟϥ • ⲁϥⲧⲱⲟⲩⲛ̄ ⲁϥⲱ̄ⲗⲙ̄ (sic) ⲉ ϩⲟⲩⲛ ⲉⲓ̈ⲱϩⲁⲛⲛⲏⲥ ⲙⲛ̄
ⲛⲉϥⲥⲛⲏⲩ ⲁϥϯⲡⲓ̈ ⲉ ⲣⲱⲟⲩ ⲉϥϫⲱ ⲙ̄ⲙⲟⲥ • ϫⲉ ⲥⲙⲁⲙⲁⲁⲧ
ⲛ̄ϭⲓ ⲧⲟⲩⲛⲟⲩ ⲛ̄ⲧⲁ ⲧⲉⲧⲛ̄ⲉⲓ ⲉ ϩⲟⲩⲛ [ⲉ] ϯ ⲡⲟⲗⲓ̈ⲥ ⲱ̄
ⲓ̈ⲱϩⲁⲛⲛⲏⲥ ⲙⲛ̄ | ⲛⲉϥⲥⲛⲏⲩ ⲛⲁⲓ̈ ⲛ̄ⲧⲁⲛⲙⲉⲉⲩⲉ̄ ⲣⲟⲟⲩ ⲉ̄
ϩⲛ̄ⲡⲉⲑⲟⲟⲩ • ⲉ̄ⲓⲥ ϩⲏⲏ̄ⲧⲉ̄ ⲁ ϩⲛ̄ⲛⲟϭ ⲙ̄ ⲡⲉⲧ ⲛ̄ⲁⲛⲟⲩϥ
ⲧⲁϩⲟⲛ ⲉ ⲧⲃⲏⲏ̄ⲧⲟⲩ • Ⲡⲣ̄ⲣⲟ ⲇⲉ ⲁϥⲧⲣⲉⲩⲥⲧⲉⲫⲁⲛⲟⲩ ⲙ̄


### 0017

ⲡⲉϥⲡⲁⲗⲗⲁⲧⲓⲟⲛ̄ ⲙⲛ̄ ⲧⲡⲟⲗⲓⲥ ⲧⲏⲣⲥ̄ ⲉ ⲁⲩⲥⲧⲟⲗⲓⲍⲉ ⲙ‐
ⲙⲟⲟⲩ • ⲁⲩϣⲱⲡⲉ ⲉⲩⲣⲁϣⲉ ϩⲛ̄ ⲟⲩⲛⲟϭ ⲛ̄ ⲣⲁϣⲉ : ϣⲁ
ⲡϫⲱⲕ ⲉ ⲃⲟⲗ ⲛ̄ ⲥⲁϣϥ̄ ⲛ̄ϩⲟⲟⲩ : Ⲡⲉϫⲉ ⲡⲣ̄ⲣⲟ ⲛ̄ ⲓ̈ⲱ‐
ϩⲁⲛⲛⲏⲥ ϫⲉ ϣⲁϫⲉ ⲁⲩⲱ ⲛ̄ⲧⲛ̄ⲥⲱⲧⲙ̄ ⲛ̄ⲥⲱⲕ ⲧⲏⲣⲛ̄ •
Ⲓ̈ⲱϩⲁⲛⲛⲏⲥ ⲇⲉ ⲡⲉϫⲁϥ ⲙ̄ ⲡⲣ̄ⲣⲟ • ϫⲉ ⲥϩⲁⲓ ⲛ̄ ⲟ[ⲩ]ⲉⲡⲓ‐
ⲥⲧⲟⲗⲏ ⲉ ⲣⲁⲧϥ̄ ⲛ̄ ⲡⲣ̄ⲣⲟ ⲛ̄ ⲛⲉϩⲣⲱⲙⲁⲓⲟⲥ ⲕⲱⲥⲧⲁⲛ‐
ϯⲛⲟⲥ • ⲛϥ̄ⲧⲛ̄ⲛⲟⲟⲩ ⲛⲁⲛ ⲛ̄ⲟⲩⲁⲣⲭⲏⲉⲡⲓⲥⲕⲟⲡⲟⲥ ⲛϥ̄‐
ϩⲁⲅⲓⲁⲍⲉ ⲙ̄ⲙⲟⲛ ⲙⲛ̄ ⲧⲛ̄ⲡⲟⲗⲓⲥ ⲧⲏⲣⲥ̄ : ⲁⲩⲱ ⲛϥ̄ϯ ⲛⲁⲛ
ⲛ̄ ⲛⲉⲧⲛ̄ⲁϩⲉⲛⲁⲩ ⲉ ⲡⲟⲩϫⲁⲓ̈ ⲛ ⲛⲉⲛⲯⲩⲭⲏ : Ⲅⲉⲥⲁⲛⲑⲟⲥ
ⲇⲉ ⲡⲣ︤ⲣⲟ • ⲁϥⲥϩⲁⲓ̈ ⲛⲟⲩⲉⲡⲓⲥⲧⲟⲗⲏ ⲉ̄ ⲣⲁⲧϥ̄ ⲛ̄ ⲕⲱⲥⲧⲁⲛ‐
ⲧⲓ̈ⲛⲟⲥ ⲡⲣ̄ⲣⲟ ⲛ ⲛⲉϩⲣⲱⲙⲁⲓⲟⲥ ⲉⲥⲥⲏϩ ⲛ̄ ⲧⲉⲓ ϩⲉ • Ⲅⲉⲥⲁⲛ‐
ⲑⲟⲥ ⲡⲉⲧ ⲟⲩⲙⲟⲩⲧⲉ ⲉ ⲣⲟϥ ϫⲉ ⲣ̄ⲣⲟ ϩⲛ̄ | ⲧⲉⲛⲇⲓⲕⲏ
ⲉϥⲧⲟⲗⲙⲁ ⲉϥⲥϩⲁⲓ̈ ⲉ ⲣⲁⲧϥ̄ ⲛ̄ ⲡⲛⲟϭ ⲛ̄ ⲣⲣⲟ ⲛ ⲛⲉϩⲣⲱ‐
ⲙⲁⲓ̈ⲟⲥ ⲕⲱⲥⲧⲁⲛⲧⲓⲛⲟⲥ ⲡϩⲙ̄ϩⲁⲗ ⲛ̄ ⲓⲥ̄ ⲡⲉⲭⲥ̄ ⲭⲁⲓⲣⲉⲧⲉ :
Ⲟⲩⲛⲟϭ ⲅⲁⲣ ⲛ̄ ϩⲙⲟⲧ ⲁϥⲧⲁϩⲟⲛ ϩⲓⲧⲛ̄ ⲡⲛⲟⲩⲧⲉ ⲡⲁⲅⲁ‐
ⲑⲟⲥ : ⲉ ⲁϥⲣ̄ ⲡⲉⲛ̄ⲙⲉⲉⲩⲉ ⲁϥⲛ̄ⲧⲛ̄ ⲉ̄ ⲃⲟⲗ ϩⲙ̄ ⲡⲕⲁⲕⲉ
ⲛ̄ ⲧⲙⲛ̄ⲧⲣϥ̄ϣⲙ̄ϣⲉ ⲉⲓ̈ⲇⲱⲗⲟⲛ • ⲁϥⲥⲟⲕⲛ̄ ϣⲁ ⲣⲟϥ • ϩⲓⲧⲛ̄
ⲛⲥⲟⲡⲥ̄ ⲙ̄ ⲡⲉϥⲛⲟϭ ⲛ̄ ⲁⲣⲭⲁⲅⲅⲉⲗⲟⲥ ⲙⲓ̈ⲭⲁⲏⲗ : ⲉ̄
ⲁϥⲁⲁⲛ ⲛⲙ̄ⲡϣⲁ ⲉ ⲧⲣⲉ ⲛⲛⲁⲩ ⲉ ⲣⲟϥ ⲛ̄ ϩⲟ ϩⲓ̈ ϩⲟ : ⲁⲩⲱ
ⲁϥⲧⲣⲉ ⲡⲉⲧ ⲙⲟⲟⲩⲧ ϣⲁϫⲉ ⲛⲙ̄ⲙⲁⲛ ⲛ̄ⲕⲉ ⲥⲟⲡ ⲙⲛ︦ⲛ︦ⲥⲁ
ⲧⲣϥ︦ⲣ︦ ⲕⲱⲱⲥ : ⲁⲩⲱ ⲁϥϩⲱⲗ ⲉ ⲡϫⲓⲥⲉ ϩⲛ̄ ⲟⲩⲉⲟⲟⲩ ⲛ̄ⲛⲁⲩ
ⲉ ⲣⲟϥ ⲧⲏⲣⲉⲛ • ⲗⲟⲓⲡⲟⲛ ⲧⲛ̄ⲡⲁⲣⲁⲕⲁⲗⲓ ⲛ̄ⲧⲉⲕⲙⲛ︦ⲧ︦ϫⲟⲉⲓⲥ
ⲉ ⲧⲣⲉ ⲕⲧⲛ̄ⲛⲟⲟⲩ ⲛ̄ ⲟⲩⲁ̄ ⲛ̄ ⲛ̄ⲛⲟϭ ⲛ̄ ⲉ̄ⲡⲓⲥⲕⲟⲡⲟⲥ ⲛⲁⲛ
ⲟⲁϩⲧⲏⲕ ⲛϥ︦ⲣ︦ ⲟⲩⲟⲉⲓⲛ ⲉ ⲣⲟⲛ ϩⲱⲱⲛ̄ ϩⲛ̄ ⲧⲡⲓ̈ⲥⲧⲓⲥ ⲉⲧ
ⲥⲟⲩⲧⲱⲛ • ⲁⲩⲱ ⲛϥ̄ⲧⲥⲁⲃⲟⲛ ⲉ ⲧⲉϩⲓ̈ⲏ̄ ⲉ ⲧⲣⲉ ⲛ̄ⲃⲱⲕ
ϣⲁ ⲡⲛⲟⲩⲧⲉ ⲛ̄ϩⲏⲧⲥ̄ • ⲁⲩⲱ ⲛϥ̄ϯ ⲛⲁⲛ | ⲛ̄ ⲧⲉⲥⲫⲣⲁⲅⲓⲥ
ⲉⲧ ⲟⲩⲁⲁⲃ • ⲕⲁⲓ ⲅⲁⲣ ⲉⲕϣⲁⲛⲣ̄ ⲡⲓ̈ ⲡⲉⲧ ⲛⲁⲛⲟⲩϥ ⲛⲙ̄‐
ⲙⲁⲛ • ⲕⲛⲁϫⲓ ⲛ̄ ϩⲛ̄ⲕⲗⲟⲙ ⲛ̄ ⲉ︦ⲟ︦ⲟⲩ ϩⲁϩⲧⲏⲛ̄ ⲡⲣ̄ⲣⲟ
ⲙ ⲙⲉ ⲡⲉⲭⲥ̄ ⲉ ⲧⲃⲉ ⲡⲉⲓ ϩⲱⲃ ⲟⲩϫⲁⲓ̈ ⲡⲣ̄ⲣⲟ ⲙ̄ ⲙⲁⲓ
ⲛⲟⲩⲧⲉ ϩⲛ̄ ⲧϭⲟⲙ ⲛ̄ ⲡⲛⲟⲩⲧⲉ : Ⲁⲩⲱ ϩⲛ̄ ⲟⲩⲛⲟϭ ⲛ̄
ⲥⲡⲟⲩⲇⲏ ⲁϥϫⲟⲟⲩ ⲛ ⲛⲉⲥϩⲁⲓ̈ ϣⲁ ⲕⲱⲥⲧⲁⲛⲧⲓⲛⲟⲥ • ⲁϥ‐
ϫⲓⲧⲟⲩ • ⲁⲩⲱ ⲛ̄ ⲧⲉⲣⲉ ϥϫⲓⲧⲟⲩ ⲁϥⲱϣ ⲛ̄ϩⲏⲧⲟⲩ ⲁϥⲣ̄
ϣⲡⲏⲣⲉ ⲛϩⲟⲩⲟ ⲛ ⲧⲛⲟϭ ⲙ̄ ⲙⲛ̄ⲧⲙⲁⲓ ⲣⲱⲙⲉ ⲙ̄ ⲡⲛⲟⲩⲧⲉ
ⲙⲛ̄ ⲧⲙⲛ̄ⲧⲁⲅⲁⲑⲟⲥ ⲙ̄ ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ •


### 0018

ⲁⲩⲱ ϩⲛ̄ ⲟⲩⲛⲟϭ ⲙ̄ ⲙⲛ̄ⲧⲃⲁⲓ̈ⲣⲟⲟⲩϣ ⲁϥⲧⲁⲭⲏ • ⲁϥⲥϩⲁⲓ̈
ϣⲁ ⲡⲛⲟϭ ⲓ̈ⲱϩⲁⲛⲛⲏⲥ ⲡⲁⲣⲭⲏⲉ̄ⲡⲓⲥⲕⲟⲡⲟⲥ ⲛ̄ ⲉⲫⲉⲥⲟⲥ :
ⲛ̄ⲧⲁϥⲥϩⲁⲓ ⲇⲉ ⲙ ⲡⲓ̈ ⲧⲩⲡⲟⲥ Ϩⲁⲑⲏ ⲙⲉⲛ ⲛ̄ϩⲱⲃ ⲛⲓⲙ
ϯⲁⲥⲡⲁⲍⲉ ⲉ ϩⲣⲁⲓ ⲉϫⲛ̄ ⲛⲉⲕϭⲓϫ ⲉⲧ ⲟⲩⲁⲁⲃ • ⲛ̄ⲧⲁⲩⲁ‐
ⲙⲁϩⲧⲉ ⲛ ⲧⲥⲁⲣⲝ̄ ⲉⲧ ⲟⲩⲁⲁⲃ ⲙ̄ ⲡϣⲏⲣⲉ ⲙ̄ ⲡⲛⲟⲩⲧⲉ
ⲭⲁⲓⲣⲉⲧⲉ • Ⲟⲩⲛⲟϭ ⲅⲁⲣ ⲛ̄ ⲣⲁϣⲉ ⲁϥⲡⲱϩ ϣⲁ ⲣⲟⲛ ⲉ
ⲃⲟⲗ ϩⲓ ⲧⲟⲟⲧϥ̄ ⲛ̄ ⲡⲛⲟⲩⲧⲉ | ⲙ̄ ⲙⲉ ⲡⲛ̄ϫⲟⲉⲓⲥ ⲓⲥ̄ ⲡⲉⲭⲥ̄ •
ⲁⲩⲱ ⲁⲛⲟⲛ ϩⲱⲱⲛ̄ ⲉⲓⲥ ϩⲏⲏⲧⲉ ⲁⲛϫⲟⲟⲩ ⲛ ⲡⲣⲁϣⲉ ⲉⲧ
ⲙ̄ⲙⲁⲩ ϣⲁ ⲧⲉⲕⲙⲛ̄ⲧⲓⲱⲧ • ϫⲉ ⲕⲁⲥ ⲉⲕⲉⲣ̄ ϩⲟⲩⲉ ⲣⲁϣⲉ
ⲛⲙ̄ⲙⲁⲛ ϩⲱⲱⲕ • Ⲁⲣⲓⲥ ϭⲉ ⲟⲩⲛ ⲉ ⲧⲃⲉ ⲡⲛⲟⲩⲧⲉ ⲛⲅ̄ⲃⲓ
ϩⲁ ⲟⲩⲕⲟⲩⲓ̈ ⲛϩⲓⲥⲉ ⲛⲅ̄ ⲃⲱⲕ ⲉ ⲧⲡⲟⲗⲓⲥ ⲛ̄ ⲧⲉⲛⲇⲓ̈ⲕⲏ • ⲛⲅ̄
ⲣ̄ ⲡⲁϩⲣⲉ ⲉ ⲛⲉⲧ ⲟⲩⲏϩ ⲛ̄ϩⲏⲧⲥ̄ ϩⲛ̄ ⲧⲉⲥⲃⲱ ⲛ̄ ⲡⲉⲭⲥ̄ •
ⲛⲅ̄ ⲛ̄ⲧⲟⲩ ⲉ ⲃⲟⲗ ϩⲙ̄ ⲡϣⲙ̄ϣⲉ ⲛ̄ ⲛⲓⲇⲱⲗⲟⲛ̄ ⲉⲧ ϫⲁϩⲙ̄
ⲉⲕⲑⲁⲣⲓ̈ ϩⲙ̄ ⲡⲉⲕϩⲏⲧ ⲧⲏⲣϥ̄ ϫⲉ ⲡⲉⲕϩⲓ̈ⲥⲉ ⲛⲁϩⲉ ⲉ ⲃⲟⲗ
ⲁⲛ ⲉ ⲡⲧⲏⲣϥ̄ • ⲁⲗⲗⲁ ϥⲛⲁϣⲱⲡⲉ ⲛⲁⲕ ⲛ̄ ⲟⲩⲕⲗⲟⲙ
ⲛ̄ ⲉⲟⲟⲩ ϩⲁϩⲧⲏⲛ̄ ⲡⲛⲟϭ ⲛ̄ ⲣ̄ⲣⲟ ⲡⲉⲭⲥ̄ • Ⲁⲣⲓⲥ ϭⲉ ⲟⲩⲛ
ⲉ ⲧⲃⲉ ⲡⲉⲭⲥ̄ • ⲡⲁⲓ̈ ⲛⲧⲁϥϣⲡ̄ ϩⲓⲥⲉ ϩⲁ ⲡⲅⲉⲛⲟⲥ ⲧⲏⲣϥ̄
ⲛ̄ ⲁⲇⲁⲙ : ⲛⲅ̄ ⲥⲕⲩⲗⲗⲓ ⲙ̄ⲙⲟⲕ ⲛⲅ̄ ⲃⲱⲕ ⲛⲅ̄ ⲣ̄ ⲡⲁϩⲣⲉ
ⲉ ⲣⲟⲟⲩ ϩⲙ̄ ⲡⲉⲕⲛⲁⲣⲇⲓⲝ ⲙ̄ ⲡ︤ⲛ︥ⲓⲕⲟⲛ ⲁⲩⲱ ⲛⲅ̄ ⲕⲁⲑⲩⲅⲓ
ⲙ̄ⲙⲟⲟⲩ ϩⲛ̄ ⲛ̄ϣⲁϫⲉ ⲛ̄ ⲧⲉⲕⲑⲉⲟⲗⲟⲅⲓⲁ ⲉⲧ ⲟⲩⲁⲁⲃ ⲉⲧ
ⲙⲉϩ ⲉ ⲃⲟⲗ ϩⲙ̄ ⲡⲉⲡⲛ︦ⲁ︦ | ⲉⲧ ⲟⲩⲁⲁⲃ • ⲛⲅ̄ ϯ ⲛⲁⲩ ⲛ̄
ⲧⲉⲥⲫⲣⲁⲅⲓⲥ ⲉⲧ ⲟⲩⲁⲁⲃ ⲉⲧ ϩⲙ̄ ⲡⲉⲭⲥ̄ : ⲛⲅ̄ ⲃⲁⲡⲧⲓⲍⲉ
ⲙ̄ⲙⲟⲟⲩ ⲉ ⲡⲣⲁⲛ̄ ⲙ̄ ⲡⲓ̈ⲱⲧ ⲙⲛ̄ ⲡϣⲏⲣⲉ ⲙⲛ̄ ⲡⲉⲡⲛ︦ⲁ︦
ⲉⲧ ⲟⲩⲁⲁⲃ ⲧⲉⲧⲣⲓⲁⲥ ⲉⲧ ϩⲛ̄ ⲟⲩⲙⲛ︦ⲧ︦ⲟⲩⲁ • ⲁⲩⲱ ⲧⲙⲛ̄ⲧⲟⲩⲁ
ⲉⲥϩⲛ̄ ⲧⲉⲧⲣⲓ̈ⲁⲥ ⲉ̄ⲧ ⲟⲩⲁⲁⲃ ⲛ̄ ϩⲟⲙⲟⲟⲩⲥⲓⲟⲛ • ⲁⲩⲱ ⲡⲁⲓ̈
ⲛⲁϣⲱⲡⲉ ⲛⲁⲕ ⲛ̄ϣⲟⲩϣⲟⲩ ⲛ̄ⲛⲁϩⲣⲙ̄ ⲡⲉⲭⲥ̄ ⲓⲥ̄ ⲙⲛ̄
ⲛⲉϥⲁⲅⲅⲉⲗⲟⲥ ⲉⲧ ⲟⲩⲁⲁⲃ : Ⲡⲣ̄ⲣⲟ ⲇⲉ ⲕⲱⲥⲧⲁⲛϯⲛⲟⲥ
ⲁϥϫⲟⲟⲩ ⲛ ⲧⲉⲡⲓ̈ⲥⲧⲟⲗⲏ ϩⲛ̄ ⲟⲩⲥⲡⲟⲩⲇⲏ ϣⲁ ⲡⲁⲣⲭⲏ‐
ⲉⲡⲓⲥⲕⲟⲡⲟⲥ ⲛ̄ ⲉⲫⲉⲥⲟⲥ : Ⲁⲩⲱ ⲛ̄ ⲧⲉⲣ ϥ̄ϫⲓⲧⲟⲩ ⲁϥⲟϣⲟⲩ
ⲁϥⲣⲁϣⲉ ⲙ̄ⲙⲁⲧⲉ ϩⲙ̄ ⲡⲉⲡⲛⲁ̄ ⲉⲧ ⲟⲩⲁⲁⲃ ⲉ̄ϫⲛ̄ ⲧⲇⲱⲣⲉⲁ
ⲙ̄ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ : ⲙⲛ̄ ⲡⲉⲕⲧⲟ ⲛ ⲧⲡⲟⲗⲓⲥ
ⲉ̄ ϩⲟⲩⲛ̄ ⲉ ⲡⲛⲟⲩⲧⲉ ϩⲓⲧⲛ̄ ⲛ̄ⲥⲟⲡⲥ̄ ⲙ̄ ⲡⲁⲣⲭⲁⲅⲅⲉⲗⲟⲥ
ⲉⲧ ⲟⲩⲁⲁⲃ ⲙⲓⲭⲁⲏⲗ : Ⲁⲩⲱ ⲛⲧⲉⲩⲛⲟⲩ ⲁ ⲡⲁⲣⲭⲏ‐
ⲉⲡⲓ̈ⲥⲕⲟⲡⲟⲥ ϫⲓ̈ ⲛⲙ̄ⲙⲁϥ ⲛ̄ ⲟⲩⲇⲓ̈ⲁⲕⲟⲛⲟⲥ ⲙⲛ̄ ⲡⲣⲉⲥⲃⲩ‐


### 0019

ⲧⲉⲣⲟⲥ ⲥⲛⲁⲩ ⲙⲛ̄ ⲟⲩⲁⲛⲁⲅⲛ̄ⲱⲥⲧⲏⲥ : ⲙⲛ̄ | ϣⲟⲙⲧ̄ ⲛ̄-
ⲯⲁⲗⲧⲏⲥ • ⲙⲛ̄ ⲙⲏⲧⲥⲛⲟⲟⲩⲥ (sic) ⲛ̄ⲫⲓⲗⲟⲡⲱⲛⲟⲥ • ⲁⲩⲱ
ϩⲛ̄ ⲕⲉ ϣⲙ̄ϣⲓⲧ • ⲁⲩⲱ ⲁϥϫⲓ ⲛⲙ̄ⲙⲁϥ ⲛ̄ ⲡⲥⲟϥⲧⲉ ⲧⲏⲣϥ̄
ⲙ̄ ⲡⲃⲁⲡⲧⲓⲥⲧⲏⲣⲓⲟⲛ ⲙⲛ̄ ⲡⲉⲑⲩⲥⲓⲁⲥⲧⲏⲣⲓⲟⲛ • Ⲁⲩⲱ ⲟⲩ‐
ⲧⲣⲁⲡⲉⲍⲁ ⲛ̄ⲛⲟⲩⲃ ⲙⲛ̄ ϥⲧⲟⲟⲩ ⲛ̄ⲡⲟⲧⲏⲣⲓⲟⲛ ⲛ̄ ϩⲁⲧ ⲉⲩ‐
ⲭⲣⲩⲥⲥⲟⲩ ⲉ̄ ⲡⲛⲟⲩⲃ : ⲙⲛ̄ ϩⲛ̄ⲑⲩⲙⲓⲁⲧⲏⲣⲓⲟⲛ ⲛ̄ ⲛⲟⲩⲃ •
ⲙⲛ̄ ⲟⲩⲙⲁⲡⲡⲁ ⲛⲓⲉ̄ⲡ ⲛⲟⲩⲃ ⲛ̄ⲥⲱⲧⲡ̄: ⲙⲛ̄ ϩⲉⲛⲥⲕⲉⲡⲁⲥⲙⲁ
ⲛ̄ ϩⲟⲗⲟⲥⲩⲣⲓⲕⲟⲛ ⲙⲛ̄ ⲡⲉϥⲧⲟⲟⲩ ⲛⲉⲩⲁⲅⲅⲉⲗⲓⲟⲛ ⲙⲛ̄
ⲛⲉⲡⲣⲁⲝⲓⲥ ⲙⲛ̄ ⲡⲁⲡⲟⲥⲧⲟⲗⲟⲥ : ϩⲁⲡⲗⲱⲥ ⲡⲥⲟϥⲧⲉ ⲧⲏⲣϥ̄
ⲙ̄ ⲡⲉⲑⲩⲥⲓⲁⲥⲧⲏⲣⲓ̈ⲟⲛ • ⲁⲩⲱ ⲁⲩϣⲗⲏⲗ ⲉ ⲡϫⲟⲉⲓⲥ ⲁⲩ‐
ⲧⲁⲁⲩ ⲉ̄ ⲧⲉϩⲓⲏ ϩⲛ̄ ⲟⲩⲣⲁϣⲉ : Ⲛ̄ ⲧⲉⲣ ⲟⲩϩⲱⲛ̄ ⲇⲉ ⲉ ϩⲟⲩⲛ̄
ⲉ ⲧⲡⲟⲗⲓⲥ • ⲁⲩⲙⲏⲛⲉⲩⲉ ⲙ ⲡⲁⲣⲭⲏⲉⲡⲓⲥⲕⲟⲡⲟⲥ ⲙ̄
ⲡⲣⲣⲟ : Ⲁⲩⲱ ⲁ ⲡⲣ̄ⲣⲟ ⲙⲛ̄ ⲡⲙⲏⲏϣⲉ ⲧⲏⲣϥ̄ ⲛ̄ ⲧⲡⲟⲗⲓⲥ
ⲉⲓ ⲉ ⲃⲟⲗ ϩⲏⲧϥ̄: ⲁⲩⲟⲩⲱ̄ϣⲧ̄ ⲛⲁϥ ⲁⲩϫⲓ ⲥⲙⲟⲩ ⲛ̄ ⲧⲟⲟⲧϥ̄ •
Ⲁⲩⲱ ⲡⲣ̄ⲣⲟ ϩⲱⲱϥ ⲁϥϫⲓ ⲥⲙⲟⲩ ⲛ̄ⲧ ⲙ̄ ⲡⲁⲣⲭⲏⲉⲡⲓ̈ⲥⲕⲟ‐
ⲡⲟⲥ: | Ⲡⲁⲣⲭⲏⲉⲡⲓⲥⲕⲟⲡⲟⲥ ⲇⲉ ⲛ ⲧⲉⲣ ϥ̄ⲛⲁⲩ ⲉ̄ⲓ̈ⲱϩⲁⲛⲛⲏⲥ
ⲛ̄ⲧⲉⲩⲛⲟⲩ ⲁϥⲁⲥⲡⲁⲍⲉ ⲙ̄ⲙⲟϥ ⲡⲉϫⲁϥ ⲛⲁϥ ϫⲉ ⲕⲁⲗⲱⲥ
ⲡϣⲏⲛ ⲉⲧ ⲛⲁⲛⲟⲩϥ ⲛ̄ ⲣϥ̄ϯ ⲕⲁⲣⲡⲟⲥ ϩⲛ̄ ⲡⲡⲁⲣⲁⲇⲓ̈ⲥⲟⲥ
ⲛ̄ ⲧⲉⲧⲣⲟⲫⲏ • Ⲡⲣ̄ⲣⲟ ⲇⲉ ⲁϥϫⲱ ⲉ ⲡⲁⲣⲭⲏⲉⲡⲓ̈ⲥⲕⲟⲡⲟⲥ
ⲛ̄ⲑⲉ ⲧⲏⲣⲥ̄ ⲛ̄ⲧⲁⲥϣⲱⲡⲉ ϩⲓⲧⲛ̄ ⲓ̈ⲱϩⲁⲛⲛⲏⲥ ⲙⲛ̄ ⲛⲉϥⲥⲛⲏⲩ
ⲉϥϫⲱ ⲙ̄ⲙⲟⲥ • ϫⲉ ⲉ ⲧⲃⲉ ⲡⲁⲓ̈ ⲙⲛ̄ ⲛⲉϥⲥⲛⲏⲩ ⲁ ⲡⲛⲟⲩⲧⲉ
ⲛⲁ ⲛⲁⲛ • Ⲁⲩⲱ ⲛ ⲧⲉⲓ̈ ϩⲉ ⲁϥⲃⲱⲕ ⲉ ϩⲟⲩⲛ ⲉ ⲧⲡⲟⲗⲓⲥ
ϩⲛ̄ ⲟⲩⲛⲟϭ ⲛ̄ ϯⲙⲏ :-Ⲡⲣ̄ⲣⲟ ⲇⲉ ⲁϥⲡⲁⲣⲁⲕⲁⲗⲓ̈ ⲙ̄ⲙⲟϥ
ⲁϥϫⲓⲧϥ̄ ⲉ ϩⲟⲩⲛ ⲉ ⲡⲡⲁⲗⲗⲁⲧⲓⲟⲛ ϫⲉ ⲛⲉ ⲙⲡⲁⲧ ⲟⲩⲕⲉⲧ
ⲉⲕⲕⲗⲏⲥⲓⲁ ϩⲛ̄ ⲧⲡⲟⲗⲓⲥ • Ⲙⲡⲉϥⲣⲁⲥⲧⲉ ⲇⲉ ⲡⲉϫⲉ ⲡⲁⲣⲭⲏ‐
ⲉⲡⲓⲥⲕⲟⲡⲟⲥ ⲙ̄ ⲡⲣ̄ⲣⲟ • ϫⲉ ⲙⲁⲣⲉⲛⲕⲱⲧ ⲛ̄ ⲟⲩⲉⲕⲕⲗⲏⲥⲓⲁ
ϩⲁⲑⲏ ⲛ̄ϩⲱⲃ ⲛⲓ̈ⲙ • Ⲡⲣ̄ⲣⲟ ⲇⲉ ⲡⲉϫⲁϥ ⲙ̄ ⲡⲁⲣⲭⲏⲉⲡⲓ‐
ⲥⲕⲟⲡⲟⲥ • ϫⲉ ⲡⲁ ⲓⲱⲧ ⲟⲩⲛ̄ⲧⲁⲓ̈ ⲟⲩⲙⲁ ⲛ̄ ⲃⲣ︤ⲣⲉ ⲉⲩⲕⲱⲧ
ⲙ̄ⲙⲟϥ • ⲁⲙⲟⲩ ⲛⲅ̄ ⲛⲁⲩ ⲉ ⲣⲟϥ • ⲁⲣⲏⲩ ⲛϥ︦ⲣ︦ ϣⲁⲩ ⲛⲅ̄
ⲁⲁϥ ⲛⲉⲕⲕⲗⲏⲥⲓⲁ : Ⲡⲁⲣⲭⲏⲉⲡⲓⲥⲕⲟ|ⲡⲟⲥ ⲇⲉ ⲁϥⲃⲱⲕ
ⲙⲛ̄ ⲡⲣ̄ⲣⲟ : ⲁϥⲣⲁⲛⲁϥ ⲇⲉ ⲛ ⲡⲁⲣⲭⲏⲉⲡⲓⲥⲕⲟⲡⲟⲥ ⲉⲓ
ⲙⲏ ⲧⲉⲓ̈ ϩⲛ̄ ⲕⲟⲩⲓ̈ ⲙⲙⲁ ⲛ̄ ϫⲟ ⲉⲩϩⲛ̄ ⲧⲙⲏⲧⲉ • ⲁϥⲟⲩⲉϩ‐
ⲥⲁϩⲛⲉ ⲉϣⲣ̄ϣⲱⲟⲩ (sic) • Ⲡⲣ̄ⲣⲟ ⲇⲉ ⲁϥⲕⲩⲣⲓⲥⲥⲉ ϩⲛ̄ ⲧⲡⲟⲗⲓⲥ
ⲧⲏⲣⲥ̄ ϩⲓ̈ ⲟⲩⲥⲟⲡ ⲉ ⲧⲣⲉ ⲟⲩⲟⲛ ⲛⲓ̈ⲙ ⲥⲱⲟⲩϩ ϩⲓ̈ ⲟⲩⲥⲟⲡ


### 0020

ⲛ̄ⲥⲉⲣ̄ ϩⲱⲃ • ⲉⲓⲧⲉ ⲁⲣⲭⲱⲛ ⲉⲓⲧⲉ ⲣⲙ̄ⲙⲁⲟ • ⲉⲓⲧⲉ ϩⲏⲕⲉ
ϣⲁ ϩⲣⲁⲓ̈ ⲉ ⲡⲣ̄ⲣⲟ ⲛⲉϥⲣ̄ ϩⲱⲃ ϩⲛ̄ ⲛⲉϥϭⲓϫ ⲙ̄ⲙⲓⲛ
ⲙ̄ⲙⲟϥ • ϩⲱⲥ ⲉⲩⲥⲟⲟⲩⲛ ϫⲉ ⲥⲉⲛⲁϫⲓ ⲛ ⲡⲉⲩⲃⲉⲕⲉ ϩⲓⲧⲛ̄
ⲡⲉⲭⲥ̄ : Ⲁⲩⲱ ϩⲓⲧⲛ̄ ⲡⲟⲩⲱϣ ⲙ̄ ⲡⲛⲟⲩⲧⲉ ⲁⲩϫⲉⲕ ⲧⲉⲕ‐
ⲕⲗⲏⲥⲓⲁ ⲉ ⲃⲟⲗ ⲛ̄ ϫⲟⲩⲧⲁⲥⲉ ⲛ̄ϩⲟⲟⲩ • Ⲡⲁⲣⲭⲏⲉⲡⲓⲥⲕⲟⲡⲟⲥ
ⲇⲉ ⲁϥϩⲁⲅⲓⲁⲍⲉⲛ ⲡⲧⲟⲡⲟⲥ ⲉ ⲡⲣⲁⲛ ⲛ̄ⲧⲉ ⲑⲉⲟⲇⲟⲕⲟⲥ ⲉⲧ
ⲟⲩⲁⲁⲃ ⲙⲁⲣⲓⲁ • Ϩⲙ̄ ⲡⲧⲣⲉ ⲡⲁⲣⲭⲏⲉⲡⲓⲥⲕⲟⲡⲟⲥ ⲇⲉ
ⲛⲁⲩ ⲉ ⲡⲉϩⲟⲩⲟ ⲛ̄ⲙⲙⲏⲏϣⲉ ⲉⲧ ⲟⲩⲱϣ ⲉ ϫⲓ̈ ⲃⲁⲡⲧⲓⲥⲙⲁ :
Ⲡⲉϫⲁϥ ⲛ̄ ⲡⲣ̄ⲣⲟ ϫⲉ ⲛⲛⲁⲃⲁⲡⲧⲓⲍⲉ ⲙ̄ ⲡⲉⲓ̈ ⲙⲏⲏϣⲉ
ⲧⲱⲛ : ⲛⲉ ⲙⲡⲁⲧ ⲟⲩⲕⲉⲧ ⲉⲕⲕⲗⲏⲥⲓⲁ ⲅⲁⲣ ϩⲛ̄ ⲧⲡⲟⲗⲓⲥ
ⲉⲣⲉ ⲕⲟⲗⲩⲙⲃⲩⲑⲣⲁ ⲛ̄ϩⲏⲧⲥ̄ :-| Ⲁϥⲟⲩⲱ̄ϣⲃ̄ ⲛ̄ϭⲓ ⲡⲥⲟⲫⲟⲥ
ⲉ ⲡⲉϩⲟⲩⲟ̄ ⲓ̈ⲱϩⲁⲛⲛⲏⲥ ⲉϥϫⲱ ⲙ̄ⲙⲟⲥ : ⲛ̄ ⲡⲁⲣⲭⲏⲉⲡⲓ̈‐
ⲥⲕⲟⲡⲟⲥ ⲙⲛ̄ ⲡⲣ︤ⲣⲟ • ϫⲉ ϯⲗⲓⲙⲛⲏ ⲙⲙⲟⲟⲩ ⲉⲧ ⲥⲁ
ⲡⲉⲓ̈ⲏⲃⲧ̄ ⲛ̄ ⲧⲡⲟⲗⲓⲥ • ϯϫⲱ ⲙ̄ⲙⲟⲥ ϫⲉ ⲛⲧⲟⲥ ⲧⲉⲧ ⲛⲁⲙⲁⲧⲉ
ⲙ̄ ⲡⲉⲓ̈ ⲧⲁⲓ̈ⲟ :-Ⲁⲩⲱ ⲛ̄ⲧⲉⲩⲛⲟⲩ ⲁⲩⲥ̄ⲙⲏ̄ ϣⲱⲡⲉ̄ ⲉ ⲃⲟⲗ
ϩⲛ̄ ⲧⲡⲉ ⲉⲣⲉ ⲟⲩⲟⲛ ⲛ︤ⲓ︦ⲙ︥ ⲥⲱⲧⲙ̄ ⲉ ⲣⲟⲥ ⲉⲥϫⲱ ⲙ̄ⲙⲟⲥ
ϫⲉ ⲡⲁⲓ̈ ⲡⲉ ⲛⲧⲁⲩⲧⲟϣϥ̄ ⲉ ⲃⲟⲗ ϩⲓ̈ⲧⲙ̄ ⲡⲛⲟⲩⲧⲉ : ⲱ̄
ⲡⲥⲟⲫⲟⲥ ⲓ̈ⲱϩⲁⲛⲛⲏⲥ ⲡϣⲏⲣⲉ ⲛ̄ ⲛⲁⲡⲟⲥⲧⲟⲗⲟⲥ : Ⲙⲁⲣⲭⲏ‐
ⲉ̄ⲡⲓⲥⲕⲟⲡⲟⲥ ⲇⲉ ⲙⲛ̄ ⲡⲣ̄ⲣⲟ • ⲁⲩⲣⲁϣⲉ ⲙ̄ⲙⲁⲧⲉ ⲉϫⲙ̄
ⲡⲉⲛⲧ ⲁⲩⲥⲟⲧⲙϥ̄ • Ⲁⲩⲱ ⲁⲩⲕⲩⲣⲓⲥⲥⲉ ⲉ ⲧⲣⲉ ⲧⲡⲟⲗⲓⲥ
ⲧⲏⲣⲥ̄ ⲥⲱⲟⲩϩ ⲉϫⲛ̄ ⲧⲗⲓ̈ⲙⲛⲏ̄ ⲙ̄ⲙⲟⲟⲩ ⲛ̄ⲥⲉϫⲓ̈ ⲙ̄ ⲡⲕⲱ
ⲉ̄ ⲃⲟⲗ ⲛ̄ⲛⲉⲩⲛⲟⲃⲉ : Ⲁ ⲡⲁⲣⲭⲏⲉⲡⲓⲥⲕⲟⲡⲟⲥ ⲇⲉ ⲃⲱⲕ
ⲉϫⲛ̄ ⲧⲁⲗⲓ̈ⲙⲓⲏ ⲙ̄ⲙⲟⲟⲩ • ⲁϥⲣ̄ ⲡⲥⲟⲃⲧⲉ ⲧⲏⲣϥ̄ ⲡⲣⲟⲥ
ⲡⲕⲁⲛⲱⲛ ⲛ̄ⲧⲉⲕⲕⲗⲏⲥⲓⲁ : Ⲙⲛ︦ⲛ︦ⲥⲱⲥ ⲁϥϣⲗⲏⲗ ⲉϫⲛ̄ ⲧⲗⲓ̈-
ⲙⲛⲏ ⲉⲣⲉ ⲡⲇⲓ̈ⲁⲕⲟⲛⲟⲥ ⲡⲣⲟⲥⲧⲁ|ⲝⲉ ⲛ̄ⲥⲱϥ ⲕⲁⲧⲁ ⲛ̄ⲧⲱϣ
ⲧⲏⲣⲟⲩ ⲛ̄ ⲧⲕⲟⲗⲩⲙⲃⲏⲑⲣⲁ : Ⲟⲩⲛⲟϭ ⲇⲉ ⲛ̄ϣⲡⲏⲣⲉ
ⲁⲥϣⲱⲡⲉ ⲙ̄ ⲡⲛⲁⲩ ⲉ̄ⲧ ⲙ̄ⲙⲁⲩ • ⲛ̄ ⲧⲉⲣ ⲟⲩⲡⲱϩ ⲇⲉ ⲉ
ⲡϩⲁⲅⲓⲁⲥⲙⲟⲥ • ⲁ ⲡⲙⲏⲏϣⲉ ⲧⲏⲣϥ̄ ⲥⲱⲧⲙ̄ ⲉⲩⲛⲟϭⲛⲟϭ (sic)
ⲛ̄ⲭⲟⲣⲟⲥ ϩⲓⲧⲡⲉ ⲙⲙⲟⲟⲩ • ⲉⲩⲟⲩⲱϩⲙ̄ ⲛ̄ⲥⲁ ⲡϩⲁⲅⲓ̈ⲁⲥⲙⲟⲥ
ⲙⲛ̄ ⲡⲁⲣⲭⲏⲉⲡⲓⲥⲕⲟⲡⲟⲥ : Ⲙⲛ︦ⲛ︦ⲥⲱⲥ ⲁ ⲧⲉⲥⲙⲏ ⲱϣ ⲉ ⲃⲟⲗ
ⲉⲥϫⲱ ⲙ̄ⲙⲟⲥ : ϫⲉ ⲡⲉⲧ ⲛⲁϫⲓ̈ ⲃⲁⲡⲧⲓⲥⲙⲁ ϩⲙ̄ ⲡⲉⲓ̈
ⲙⲟⲟⲩ ϥⲛⲁϫⲓ̈ ⲛ̄ ⲡⲕⲱ ⲉ ⲃⲟⲗ ⲛ̄ ⲛⲉϥⲛⲟⲃⲉ ⲛ̄ϣⲟⲣⲡ̄ :-
Ⲛ̄ ⲧⲉⲣⲉ ⲡⲁⲣⲭⲏⲉⲡⲓⲥⲕⲟⲡⲟⲥ ⲇⲉ ⲧⲉⲗⲓⲟⲩ ⲛ̄ⲛⲉⲩⲭⲏ ⲉⲧ
ⲟⲩⲁⲁⲃ : Ⲁϥⲟⲩⲉϩⲥⲁϩⲛⲉ ⲉ ⲧⲣⲉ ⲡⲙⲏⲏϣⲉ ⲧⲏⲣϥ̄ ⲃⲟϭⲟⲩ


### 0021

ⲉ ⲡⲉⲥⲏⲧ ⲉ ⲧⲗⲓⲙⲛⲏ ⲛ̄ⲥⲉϫⲓ̈ ⲃⲁⲡⲧⲓⲥⲙⲁ ⲧⲏⲣⲟⲩ :-Ⲁⲩⲱ
ⲛⲉⲩⲱϣ ⲉ̄ ⲃⲟⲗ ⲉⲩϫⲱ ⲙ̄ⲙⲟⲥ ϫⲉ ⲛⲃⲁⲡϯⲍⲉ ⲉ ⲡⲣⲁⲛ
ⲛ̄ ⲡⲓ̈ⲱⲧ ⲙⲛ̄ ⲡϣⲏⲣⲉ • ⲙⲛ̄ ⲡⲉⲡⲛⲁ̄ ⲉⲧ ⲟⲩⲁⲁⲃ :-Ⲁⲩⲱ
ⲛ̄ ⲧⲉⲣⲉ ⲡⲣ︤ⲣⲟ ⲙⲛ̄ ⲡⲙⲏⲏϣⲉ ⲧⲏⲣϥ̄ ϫⲓ̈ ⲃⲁⲡⲧⲓⲥⲙⲁ : ⲁ
ⲡⲁⲣⲭⲏⲉⲡⲓ̈ⲥⲕⲟⲡⲟⲥ ϯ ⲛⲁⲩ | ⲛ ϯⲣⲏⲛⲏ • ⲁⲩⲥⲱⲟⲩϩ ⲉ̄
ⲧⲉⲕⲕⲗⲏⲥⲓⲁ • Ⲡⲁⲣⲭⲏⲉⲡⲓⲥⲕⲟⲡⲟⲥ ⲇⲉ ⲁϥϣⲱϥ ⲛ̄ ⲧⲁⲡⲉ
ⲛ ⲓ̈ⲱϩⲁⲛⲛⲏⲥ ⲁϥⲭⲓⲣⲟⲇⲟⲛⲉⲓ̈ ⲙ̄ⲙⲟϥ ⲛ̄ ⲉⲡⲓⲥⲕⲟⲡⲟⲥ
ⲁⲩⲱ̄ ⲡⲉϥⲕⲉ ϣⲟⲙⲛ︤[ⲧ︥] ⲛ̄ⲥⲟⲛ ⲁϥⲭⲓⲣⲟⲇⲟⲛⲓ̈ ⲙ̄ⲙⲟⲟⲩ ⲙ̄
ⲡⲣⲉⲥⲃⲩⲧⲉⲣⲟⲥ • Ⲁⲩⲱ ⲟⲛ ⲛⲉⲩⲛ̄ⲧⲉ ⲡⲣ̄ⲣⲟ ⲟⲩϣⲏⲣⲉ
ⲙⲙⲁⲩ ⲉ ⲡⲉϥⲣⲁⲛ ⲡⲉ ⲁⲭⲓⲗⲗⲁⲥ ⲁϥⲡⲟϣⲛϥ̄ ⲛ̄ ⲇⲓⲁ‐
ⲕⲟⲛⲟⲥ • ⲡⲙⲏⲏϣⲉ ⲇⲉ ⲧⲏⲣϥ̄ ⲛⲉⲩⲧⲉⲗⲗ̄ ⲙ̄ⲙⲟⲟⲩ ϩⲙ̄
ⲡϫⲟⲉⲓⲥ • ⲁⲩⲱ ⲛⲉⲩϫⲱ̄ ⲙ̄ⲙⲟⲥ ϫⲉ ϭⲱϣⲧ̄ ⲛ̄ⲧⲉⲧⲛ̄ⲛⲁⲩ
ⲉ ⲡⲉⲓ ϣⲙ̄ⲙⲟ ⲛⲧⲁϥⲉⲓ ⲉ ϯ ⲡⲟⲗⲓⲥ ⲛ̄ⲥⲉⲱⲡ ⲙ̄ⲙⲟϥ ⲁ
ⲛⲉ ⲡⲧⲏⲣϥ̄ ⲧⲉⲛⲟⲩ ϩⲱⲱϥ ⲉⲓⲥ ϩⲏⲏⲧⲉ ϥϩⲙⲟⲟⲥ ϩⲁϩⲧⲙ̄
ⲡⲁⲣⲭⲏⲉⲡⲓⲥⲕⲟⲡⲟⲥ • ⲁⲩⲱ ϥⲟ ⲛ̄ ⲓ̈ⲱⲧ ⲙ̄ ⲡⲉⲓ̈ ⲙⲏⲏϣⲉ
ⲧⲏⲣϥ̄ : Ⲧⲟⲧⲉ ⲡⲁⲣⲭⲏ̄ⲉⲡⲓⲥⲕⲟⲡⲟⲥ ⲁϥⲃⲓ ⲡⲣⲟⲟⲩϣ ⲛ̄ⲧⲉ‐
ⲡⲣⲟⲥⲫⲟⲣⲁ ⲁϥⲧⲁⲗⲟⲥ ⲉ ϩⲣⲁⲓ ⲉϫⲛ̄ ⲡⲉⲑⲩⲥⲓⲁⲥⲧⲏⲣⲓⲟⲛ
ⲁϥⲡⲣⲟⲥⲫⲉⲣⲓ̈ ⲉ ϫⲱⲥ : | Ⲡⲣ̄ⲣⲟ ⲇⲉ ⲙⲛ̄ ⲡⲙⲏⲏϣⲉ ⲧⲏⲣϥ̄
ⲛⲉⲩⲣ̄ ϣⲡⲏⲣⲉ • ⲉ ⲧⲃⲉ ϫⲉ ⲛⲥⲉⲧⲏⲡ ⲁⲛ ⲉ ϩⲱⲃ ⲛ̄ ⲧⲉⲓ̈
ⲙⲓ̈ⲛⲉ • ⲟⲩⲇⲉ ⲙ̄ⲡ ⲟⲩⲛⲁⲩ ⲉ̄ ⲥⲡⲟⲩⲇⲏ ⲛ ⲧⲉⲓ̈ ⲙⲓ̈ⲛⲉ ⲉⲛⲉϩ:
Ⲛⲉ ⲡⲁⲓ̈ ⲅⲁⲣ ⲡⲉ ⲡϣⲟⲣⲡ̄ ⲛ̄ ⲥⲟⲡ ⲛ̄ⲧⲁⲩⲧⲁⲗⲉ ⲑⲩⲥⲓ̈ⲁ
ⲉ ϩⲣⲁⲓ ϩⲛ̄ ⲧⲉⲭⲱⲣⲁ ⲉⲧ ⲙ̄ⲙⲁⲩ :-Ⲁⲩⲱ ⲁ ⲡⲁⲣⲭⲏ̄‐
ⲉⲡⲓⲥⲕⲟⲡⲟⲥ ⲥⲩⲛⲁⲅⲉ ⲙⲙⲟⲟⲩ ⲧⲏⲣⲟⲩ • ⲁϥϯ ⲛⲁⲩ ⲛ
ϯⲣⲏⲛⲏ ⲁ ⲡⲟⲩⲁ ⲡⲟⲩⲁ ⲃⲱⲕ ⲉ ⲛⲉⲩⲏⲓ̈ • Ⲙⲛ︤ⲛ︥ⲥⲱⲥ ⲁϥⲣ̄
ⲟⲩⲉⲃⲟⲧⲉ ⲛ̄ϩⲟⲟⲩ ϩⲛ̄ ⲧⲡⲟⲗⲓⲥ ⲉⲧ ⲙ̄ⲙⲁⲩ ⲉϥⲕⲁⲑⲩⲅⲓ̈
ⲙⲙⲟⲟⲩ ⲙ ⲙⲏⲏⲛⲉ ⲁⲩⲱ ⲁϥⲧⲥⲁⲃⲟ ⲙ̄ⲙⲟⲟⲩ ⲉ ⲡⲧⲱϣ
ⲧⲏⲣϥ̄ ⲛ̄ ⲧⲉⲕⲕⲗⲏⲥⲓ̈ⲁ : Ⲙⲛ︦ⲛ︦ⲥⲁ ⲛⲁⲓ̈ ⲇⲉ ⲁϥⲕⲧⲟϥ ⲉ
ⲧⲉϥⲡⲟⲗⲓⲥ ϩⲛ̄ ⲟⲩⲉⲓ̈ⲣⲏⲛⲏ :-Ⲡⲣ̄ⲣⲟ ⲇⲉ ⲅⲉⲥⲁⲛⲑⲟⲥ ⲙⲛ̄
ⲡⲙⲏⲏ̄ϣⲉ ⲧⲏⲣϥ̄ ⲛ̄ ⲧⲡⲟⲗⲓⲥ ⲛⲉⲩϯ ⲉⲟⲟⲩ ⲛ̄ ⲓ̈ⲱϩⲁⲛⲛⲏⲥ
ⲙⲛ̄ ⲛⲉϥⲥⲛⲏⲩ • ⲁⲩⲱ ⲛⲉⲩⲡⲣⲟⲕⲟⲡⲧⲉ ϩⲛ̄ ⲧⲉⲥⲃⲱ ⲙ̄
ⲡϫⲟⲉⲓ̈ⲥ : Ⲡϩⲟⲩⲛ ⲇⲉ ⲛ̄ ϩⲛ̄ⲕⲟⲩⲓ̈ ⲛ̄ϩⲟⲟⲩ ⲡⲉϫⲉ ⲡⲉⲡⲓ‐
ⲥⲕⲟⲡⲟⲥ ⲉⲧ ⲟⲩⲁⲁⲃ ⲓ̈ⲱϩⲁⲛⲛⲏⲥ ⲙ̄ ⲡⲣ̄ⲣⲟ • ϫⲉ ⲙⲁ|ⲣⲉⲛ
ⲕⲱⲧ ⲛ̄ⲟⲩⲉⲕⲕⲗⲏⲥⲓⲁ ⲉ ⲡⲣⲁⲛ̄ ⲙ̄ ⲡⲁⲣⲭⲁⲅⲅⲉⲗⲟⲥ ⲉⲧ
ⲟⲩⲁⲁⲃ ⲙⲓⲭⲁⲏⲗ • ϫⲉ ⲛⲧⲟϥ ⲡⲛ̄ⲧⲁⲛⲟⲩϫⲁⲓ̈ ⲧⲏⲣⲛ̄


### 0022

ϩⲓⲧⲛ̄ ⲛⲉϥⲥⲟⲡⲥ̄ • Ⲡⲉϫⲉ ⲡⲣ̄ⲣⲟ ⲇⲉ ⲛⲁϥ ϫⲉ ⲡⲉⲧ ⲕ̄ⲟⲩⲁϣϥ̄
ⲧⲏⲣϥ̄ ⲱ̄ ⲡⲛ̄ⲓⲱⲧ ⲁⲣⲓϥ • ⲁⲩⲱ ⲧⲛⲛⲁⲥⲱⲧⲙ̄ ⲛ̄ⲥⲱⲕ •
Ⲡⲉⲡⲓⲥⲕⲟⲡⲟⲥ ⲇⲉ ⲉⲧ ⲟⲩⲁⲁⲃ ⲓⲱϩⲁⲛⲛⲏⲥ ⲁϥⲟⲩⲉϩ ⲧⲥ︤ⲛ︥ⲧⲉ
ⲛ̄ⲧⲉⲕⲕⲗⲏⲥⲓⲁ ⲉⲧ ⲟⲩⲁⲁⲃ • ⲁⲩⲱ ⲛⲉⲣⲉ ⲛⲁ ⲧⲡⲟⲗⲓⲥ
ⲧⲏⲣⲟⲩ ⲣⲁϣⲉ ⲛⲙ̄ⲙⲁϥ • ⲉⲩϯ ⲧⲟⲟⲧϥ̄ ϩⲛ̄ ϩⲱⲃ ⲛⲓ̈ⲙ
ⲉⲧ ⲉϥⲛⲁⲟⲩⲉϩⲥⲁϩⲛⲉ ⲙⲙⲟⲟⲩ ⲛⲁⲩ • Ⲁⲩⲱ ϩⲛ̄ ⲟⲩⲛⲟϭ
ⲛ̄ ⲥⲡⲟⲩⲇⲏ ⲁϥϫⲱⲕ ⲉ ⲃⲟⲗ ⲛ̄ ⲧⲉⲕⲕⲗⲏⲥⲓⲁ ϩⲛ̄ ϩⲱⲃ ⲛⲓⲙ
ⲁϥϯ ⲡⲉⲥⲗⲱⲃϣ̄ ⲛ̄ ϣⲙⲟⲩⲛ ⲛ̄ⲉⲃⲟⲧ • Ⲡⲉⲡⲓⲥⲕⲟⲡⲟⲥ ⲇⲉ
ⲉ̄ⲧ ⲟⲩⲁⲁⲃ ⲓ̈ⲱϩⲁⲛⲛⲏⲥ ⲁϥϩⲁⲅⲓⲁⲍⲉ ⲙ̄ⲙⲟⲥ ⲉ ⲡⲣⲁⲛ ⲙ̄
ⲡⲁⲣⲭⲁⲅⲅⲉⲗⲟⲥ ⲉⲧ ⲟⲩⲁⲁⲃ ⲙⲓⲭⲁⲏⲗ • ⲉⲁϥⲕⲁⲧⲁⲛⲧⲁ ⲉ
ⲡⲉϩⲟⲟⲩ ⲉ̄ⲧ ⲙ̄ⲙⲁⲩ • ⲛ̄ ⲡϩⲁⲅⲓⲁⲥⲙⲟⲥ ⲛ̄ϭⲓ ⲥⲟⲩ ⲙⲛ︦ⲧ︦‐
ⲥⲛⲟⲟⲩⲥ ⲙ̄ ⲡⲉⲃⲟⲧ ϩⲁⲑⲱⲣ • ⲉⲣⲉ | ⲛⲁ ⲧⲡⲟⲗⲓⲥ ⲧⲏⲣⲥ̄ ⲥⲟⲟⲩϩ
ⲉ ⲣⲟⲥ • ⲗⲟⲓⲡⲟⲛ ⲁ ⲡϣⲁ ϣⲱⲡⲉ ⲛⲁⲩ ⲛ̄ ⲇⲓⲡⲗⲟⲩⲛ • ⲡϣⲁ
ⲙ̄ ⲡⲉϥⲧⲁϩⲟ ⲉ ⲣⲁⲧϥ̄ ⲙⲛ̄ ⲡϩⲁⲅⲓⲁⲥⲙⲟⲥ ϩⲓ̈ ⲟⲩⲥⲟⲡ ϩⲛ̄
ⲧⲉϥⲉⲕⲕⲗⲏⲥⲓⲁ ⲛ̄ ⲃⲣ︤ⲣⲉ : Ⲁⲩⲱ ⲙⲛ︦ⲛ︦ⲥⲁ ⲡϩⲁⲅⲓ̈ⲁⲥⲙⲟⲥ
ⲁ ⲡⲡⲉⲧ ⲟⲩⲁⲁⲃ ⲓ̈ⲱϩⲁⲛⲛⲏⲥ ⲡⲉⲡⲓⲥⲕⲟⲡⲟⲥ ⲃⲱⲕ ⲉ ⲡⲣ̄ⲡⲉ
ⲙⲛ̄ ⲡⲣ̄ⲣⲟ ⲙⲛ̄ ⲡⲙⲏⲏϣⲉ ⲧⲏⲣϥ̄ ⲛ̄ ⲧⲡⲟⲗⲓⲥ ⲁⲩϣⲣ̄ϣⲱⲣϥ̄
ⲁⲩⲱ ⲡⲁⲅⲁⲗⲙⲁ ⲙ ⲡⲍⲉⲩⲥ ⲁⲩⲣⲟⲕϩϥ̄ • ⲁⲩⲱ ⲁ ⲡⲇⲁⲓ‐
ⲙⲱⲛ ⲉⲧ ϭⲁⲗⲱⲟⲩ ⲉ ⲡⲓ̈ⲇⲱⲗⲟⲛ ⲱϣ ⲉ̄ ⲃⲟⲗ ⲉϥϫⲱ
ⲙ̄ⲙⲟⲥ ϫⲉ ⲁⲕⲑⲗⲓⲃⲉ ⲙ̄ⲙⲟⲓ̈ ⲉ ⲡⲉϩⲟⲩⲟ ⲱ̄ ⲓ̈ⲱϩⲁⲛⲛⲏⲥ
ⲁⲕⲛⲟϫⲧ̄ ⲉ̄ ⲃⲟⲗ ϩⲙ̄ ⲡⲁ ⲙⲁⲛⲟⲩⲱϩ • Ⲁⲩⲱ ⲁ ⲡⲣ̄ⲣⲟ
ⲧⲣⲉⲩⲕⲱⲧ ⲙ̄ ⲡⲙⲁ ⲙ̄ ⲡⲣ̄ⲡⲉ ⲛ ⲟⲩⲉⲕⲕⲗⲏⲥⲓⲁ ⲛ ⲗⲁⲙ‐
ⲡⲣⲟⲥ ⲁϥⲧⲣⲉⲩϯ ⲙ̄ ⲡⲣⲁⲛ ⲙ̄ ⲡⲉⲓ̈ ⲙⲛ︦ⲧ︦ⲥⲛⲟⲟⲩⲥ ⲛ̄ⲁⲡⲟ‐
ⲥⲧⲟⲗⲟⲥ • ⲉϫⲱⲥ : Ⲡϩⲁⲅⲓⲟⲥ ⲇⲉ ⲓ̈ⲱϩⲁⲛⲛⲏⲥ ⲛⲉϥⲕⲧⲟ ⲛ
ⲟⲩⲟⲛ ⲛⲓ̈ⲙ ⲉ̄ ϩⲟⲩⲛ̄ ⲉ̄ ⲧⲡⲓⲥⲧⲓⲥ ⲉⲧ ⲥⲟⲩⲧⲱⲛ ⲁⲩⲱ ⲛⲉⲣⲉ
ⲟⲩⲟⲛ ⲛⲓ̈ⲙ ϯ ⲉⲟⲟⲩ ⲙ̄ | ⲙ̄ (sic) ⲡⲛⲟⲩⲧⲉ ⲉ̄ ⲃⲟⲗ ϩⲓ ⲧⲟⲟⲧϥ̄ •
Ⲕⲱⲥⲧⲁⲛϯⲛⲟⲥ ⲇⲉ ⲡⲣ̄ⲣⲟ • ϩⲙ̄ ⲡⲧⲣ ϥ̄ⲥⲱⲧⲙ̄ ⲉ ⲧⲃⲉ
ϩⲱⲃ ⲛⲓ̈ⲙ ⲉⲧ ⲉⲣⲉ ⲓ̈ⲱϩⲁⲛ̄ⲛⲏⲥ ⲉⲓ̈ⲣⲉ ⲙⲙⲟⲟⲩ • ⲁϥϯ
ⲉⲟⲟⲩ ⲙ̄ ⲡⲛⲟⲩⲧⲉ ⲛ̄ϩⲟⲩⲟ : ⲁϥⲥϩⲁⲓ̈ ⲛ ⲟⲩⲉⲡⲓ̈ⲥⲧⲟⲗⲏ ⲉ
ⲣⲁⲧϥ̄ ⲉϥⲡⲁⲣⲁⲕⲁⲗⲓ̈ ⲙ̄ⲙⲟϥ ⲛ̄ϩⲏⲧⲥ̄ ⲉ ⲧⲣ ϥ̄ⲥⲙⲟⲩ ⲉ
ⲣⲟϥ ⲙ̄ ⲧⲉϥⲙⲛ̄ⲧⲣ̄ⲣⲟ ⲧⲏⲣⲥ̄ • Ⲁϥⲙⲟⲩⲧⲉ ⲟⲛ ⲉ ⲣⲟϥ ⲛ̄‐
ϩⲏⲧⲥ̄ • ϫⲉ ⲇⲁⲛⲓ̈ⲏⲗ ⲛ̄ ⲃⲣ︤ⲣⲉ ⲡⲣϥ̄ⲧⲁⲕⲟ ⲛ̄ ⲛ̄ⲛⲓ̈ⲇⲱⲗⲟⲛ :
Ⲧⲉⲭⲱⲣⲁ ⲇⲉ ⲛⲧⲉⲛ̄ⲇⲓ̈ⲕⲏ ⲛⲉⲥϯ ⲉⲡⲁⲛⲁⲓ ⲛ̄ⲛⲉϩⲟⲟⲩ
ⲧⲏⲣⲟⲩ ⲙ̄ ⲡϩⲁⲅⲓⲟⲥ ⲓ̈ⲱϩⲁⲛⲛ̄ⲏⲥ ⲡⲉⲡⲓⲥⲕⲟⲡⲟⲥ ϩⲓⲧⲛ̄ ⲧⲁϣⲏ


### 0023

ⲛ ⲛⲉϣⲡⲏⲣⲉ • ⲉⲧ ⲉⲣⲉ ⲡⲛⲟⲩⲧⲉ ⲉ̄ⲛⲉⲣⲅⲓ̈ ⲙⲙⲟⲟⲩ ⲉ ⲃⲟⲗ
ϩⲓ ⲧⲟⲟⲧϥ̄ • Ⲁⲧⲉⲧⲛ̄ⲛⲁⲩ ϭⲉ ⲱ̄ ⲛⲁⲙⲉⲣⲁⲧⲉ ⲉ ⲧⲛⲟϭ ⲙ̄
ⲙⲛ̄ⲧⲁⲅⲁⲑⲟⲥ ⲙ̄ ⲡⲛⲟⲩⲧⲉ ⲙⲛ̄ ⲡⲛⲟϭ ⲙ̄ ⲡⲁⲣϩⲏⲥⲓⲁ ⲙ̄
ⲡⲁⲣⲭⲁⲅⲅⲉⲗⲟⲥ ⲉⲧ ⲟⲩⲁⲁⲃ ⲙⲓⲭⲁⲏⲗ ⲛ̄ⲑⲉ ⲉⲧ ⲉϥϣⲟⲟⲡ
ⲙⲛ̄ ⲟⲩⲟⲛ̄ ⲛ̄ⲓⲙ̄ ⲉ̄ⲧ ⲣ̄ ϩⲟⲧⲉ ⲉ ϩⲏⲧϥ̄ ⲙ̄ ⲡϫⲟⲉⲓⲥ • ⲁⲩⲱ
ⲉⲧ ϩⲁⲣⲉϩ ⲉ ⲛⲉϥⲉⲛⲧⲟⲗⲏ : | Ϥϫⲱ ⲅⲁⲣ ⲙ̄ⲙⲟⲥ ⲛ̄ϭⲓ
ⲡⲉⲛⲓ̈ⲱⲧ ⲇⲁⲛⲓⲏⲗ ϫⲉ ⲛ ⲡⲉ ⲗⲁⲁⲩ ⲁϩⲉ ⲣⲁⲧϥ̄ ⲛⲙ̄ⲙⲁⲓ̈
ⲛ̄ⲥⲁ ⲙⲓ̈ⲭⲁⲏⲗ ⲡⲉⲧⲛ̄ⲁⲣⲭⲱⲛ : Ⲁⲩⲱ ⲟⲛ̄ ϫⲉ ⲡⲁⲅⲅⲉⲗⲟⲥ
ⲙ̄ ⲡϫⲟⲓ̈ⲥ ⲁϥⲁⲙⲁϩⲧⲉ ⲛ̄ ⲁⲙⲃⲁⲕⲟⲩⲙ • ⲁϥⲛ̄ⲧϥ̄ ⲉ ⲧⲃⲁ‐
ⲃⲩⲗⲱⲛ ⲙⲛ̄ ⲡⲁⲣⲓⲥⲧⲟⲛ ⲉⲧ ⲛ̄ ⲧⲟⲟⲧϥ̄ ⲁϥϫⲓⲧϥ̄ ⲉ ⲡϣⲏⲓ
ⲛ̄ ⲙ̄ⲙⲟⲩⲓ̈ ⲁϥϯ ⲙ̄ ⲡⲁⲣⲓⲥⲧⲟⲛ ⲛ̄ ⲇⲁⲛⲓⲏⲗ :-Ⲡⲉϫⲁϥ
ⲟⲛ ϩⲛ̄ ⲛⲉⲡⲣⲁⲝⲓⲥ • ϫⲉ ⲡⲁⲅⲅⲉⲗⲟⲥ ⲇⲉ ⲙ̄ ⲡϫⲟⲉⲓⲥ ⲁϥ‐
ⲟⲩⲱⲛ ⲛ̄ ⲛ̄ⲣⲟ ⲙ̄ ⲡⲉϣⲧⲉⲕⲟ ⲛⲧⲉⲩϣⲏ ⲁϥⲛ̄ ⲡⲉⲧⲣⲟⲥ ⲉ̄
ⲃⲟⲗ :-Ⲡⲁⲣⲭⲁⲅⲅⲉⲗⲟⲥ ⲉⲧ ⲟⲩⲁⲁⲃ ⲙⲓⲭⲁⲏⲗ ⲡⲉⲧ
ⲇⲓ̈ⲁⲕⲟⲛⲓ ⲉ ⲡⲟⲩⲁ ⲡⲟⲩⲁ ⲛ̄ ⲙ̄ⲙⲁⲣⲧⲏⲣⲟⲥ ϣⲁⲛⲧ ⲟⲩϫⲉⲕ
ⲡⲉⲩⲁⲅⲱⲛ ⲉ ⲃⲟⲗ ⲛ̄ⲥⲉⲃⲱⲕ ⲙ̄ⲡⲏⲩⲉ ϩⲛ̄ ⲟⲩⲉⲟⲟⲩ • Ϩⲓⲧⲛ̄
ⲛ̄ⲥⲟⲡⲥ̄ ⲙ̄ ⲙⲓ̈ⲭⲁⲏⲗ • ⲉⲣⲉ ⲡⲣⲏ ϣⲁ ⲉϫⲙ̄ ⲡⲕⲟⲥ‐
ⲙⲟⲥ ⲧⲏⲣϥ̄ • Ϩⲓⲧⲛ̄ ⲛ̄ⲥⲟⲡⲥ̄ ⲙ̄ ⲙⲓⲭⲁⲏⲗ : ⲉ̄ⲣⲉ ⲧⲛⲟϭ
ⲙ̄ ⲡⲩⲅⲏ ⲛ ⲉⲇⲉⲙ • ⲧⲁⲩⲉ ⲙⲟⲟⲩ ⲉ ϩⲣⲁⲓ̈ ⲉ ⲡⲉϥⲧⲟⲟⲩ
ⲛ̄ⲓ̈ⲉⲣⲟ • Ϩⲓⲧⲛ̄ ⲛ̄ⲥⲟⲡⲥ̄ ⲙ̄ ⲙⲓ̈ⲭⲁⲏⲗ • ⲉⲣⲉ ⲡⲕⲁϩ ϯⲟⲩⲱ̄
ⲙ̄ ⲡⲉϥⲕⲁⲣⲡⲟⲥ Ϩⲓⲧⲙ̄ ⲡⲥⲟⲡⲥ̄ ⲙ̄ ⲙⲓ̈ⲭⲁⲏⲗ • ⲉⲣⲉ |
ⲡⲕⲟⲥⲙⲟⲥ ⲧⲏ̄ⲣϥ̄ ϩⲱⲧⲡ̄ ⲉ ⲡⲛⲟⲩⲧⲉ ⲛⲕⲉ ⲥⲟⲡ ⲁⲩⲱ ⲛⲧⲟϥ
ⲉⲧ ⲛⲟⲩϩⲙ̄ ⲛ̄ ⲟⲩⲟⲛ ⲛⲓ̈ⲙ ⲛ̄ ϭⲟⲣⲉϭⲥ̄ ⲙ̄ ⲡⲇⲓⲁⲃⲟⲗⲟⲥ •
Ⲧⲛ̄ϭⲓⲛⲉ ⲙ ⲡⲥⲟⲡⲥ̄ ⲙ̄ ⲙⲓ̈ⲭⲁⲏⲗ ϩⲙ̄ ⲡⲉⲥⲙⲓ̈ⲛⲉ ⲙ
ⲡⲛ̄ϩⲱⲃ ⲛ̄ϭⲓϫ • Ⲧⲛ̄ϭⲓⲛⲉ ⲛ ⲙ̄ⲙⲛ︦ⲧ︦ϣⲛ̄ϩⲧⲏϥ ⲙ̄ ⲡⲁⲣⲭ‐
ⲁⲅⲅⲉⲗⲟⲥ ϩⲛ̄ ⲧⲙⲟⲧⲛⲉⲥ ⲙ̄ ⲡⲙⲁⲥⲉ ⲙⲛ̄ ⲡⲣⲱⲧ ⲛ̄ ⲛⲉϩⲓⲉⲓⲃ •
Ⲧⲛ̄ϭⲓⲛⲉ ⲙ ⲡⲥⲟⲡⲥ̄ ⲙ̄ ⲙⲓ̈ⲭⲁⲏⲗ ϩⲙ̄ ⲡⲣⲱⲧ ⲛ̄ ⲡⲥⲟⲣⲧ̄
ⲛ̄ⲛⲉⲥⲟⲟⲩ • ⲙⲛ̄ ⲡⲉⲣⲱⲧⲉ ⲛ̄ ⲛ̄ⲃⲁⲁⲙⲡⲉ Ⲧⲛ̄ϭⲓⲛⲉ ⲛ̄
ⲡⲥⲟⲡⲥ̄ ⲙ̄ ⲡⲁⲣⲭⲁⲅⲅⲉⲗⲟⲥ • ϩⲙ̄ ⲡⲣⲱⲧ ⲛ̄ ⲛ̄ⲕⲁⲣⲡⲟⲥ
ⲧⲏⲣⲟⲩ ⲛ ⲧⲥⲱϣⲉ • Ϩⲓⲧⲛ̄ ⲛ̄ⲥⲟⲡⲥ̄ ⲙ̄ ⲙⲓⲭⲁⲏⲗ • ⲉⲣⲉ
ⲛ̄ϣⲏⲛ ϯⲟⲩⲱ̄ ⲙ̄ ⲡⲉⲩⲕⲁⲣⲡⲟⲥ • Ⲧⲛ̄ϭⲓⲛⲉ ⲛ̄ ⲡⲥⲟⲡⲥ̄ ⲙ̄
ⲙⲓⲭⲁⲏⲗ ϩⲛ̄ ⲡⲉⲥⲙⲓⲛⲉ ⲙ̄ ⲡⲉⲗⲟⲟⲗⲉ • ⲙ̄ ⲧⲉⲩⲫⲣⲟⲥⲩⲛⲏ
ⲙ̄ ⲡⲏⲣⲡ̄ • Ⲧⲛ̄ϭⲓⲛⲉ ⲛ̄ ⲡⲥⲟⲡⲥ̄ ⲙ̄ ⲙⲓ̈ⲭⲁⲏⲗ ϩⲙ̄ ⲡⲟⲩⲣⲟⲧ
ⲙ̄ ⲡⲕⲛ̄ⲛⲉ ⲙⲛ̄ ⲡⲉϩⲗⲟϭ ⲛ̄ ⲛ̄ϫⲟⲉⲓⲧ • Ⲧⲛ̄ϭⲓⲛⲉ ⲙ ⲡⲥⲟⲡⲥ̄


### 0024

ⲙ̄ ⲙⲓ̈ⲭⲁⲏⲗ ϩⲙ̄ ⲡϩⲓⲛⲏⲃ ⲙ̄ ⲡⲣⲱⲙⲉ • ⲙⲛ̄ ⲧⲉϥⲁⲛⲁ‐
ⲡⲁⲩⲥⲓⲥ ⲛ̄ⲧⲉⲩϣⲏ • Ⲧⲛ̄ϭⲓⲛⲉ ⲙ̄ ⲡⲥⲟⲡⲥ̄ ⲙ̄ ⲙⲓ̈ⲭⲁⲏⲗ |
ϩⲛ̄ ⲛⲉϫⲏⲩ ⲉⲧ ⲣ̄ ϩⲱⲧ ϩⲛ̄ⲑⲁⲗⲁⲥⲥⲁ ⲉϥⲛⲟⲩϩⲙ̄ ⲙ̄ⲙⲟⲟⲩ •
Ⲧⲛ̄ϭⲓⲛⲉ ⲛ ⲡⲥⲟⲡⲥ̄ ⲙ̄ ⲡⲁⲣⲭⲁⲅⲅⲉⲗⲟⲥ ϩⲙ̄ ⲡϩⲱⲗ ⲉ
ⲡϫⲓⲥⲉ ⲛ̄ ⲛ̄ϩⲁⲗⲁⲧⲉ ⲙⲛ̄ ⲛⲉⲧ ⲙⲟⲟϣⲉ ϩⲓ̈ϫⲙ̄ ⲡⲕⲁϩ •
Ⲧⲛ̄ϭⲓⲛ̄ⲉ ⲛ̄ ⲡⲥⲟⲡⲥ̄ ⲙ̄ ⲙⲓ̈ⲭⲁⲏⲗ ϩⲙ̄ ⲡϩⲱⲧⲣ̄ ⲙ̄ ⲡⲅⲁⲙⲟⲥ
ⲛ̄ ⲥⲉⲙⲛⲟⲛ • ⲉⲩϫⲡⲟ ⲛ̄ ⲛⲉⲩϣⲏⲣⲉ̄ ⲉ̄ ⲡⲉⲥⲙⲟⲩ • Ⲧⲛ̄ϭⲓⲛⲉ
ⲙ̄ ⲡⲥⲟⲡⲥ̄ ⲙ̄ ⲙⲓ̈ⲭⲁⲏⲗ ϩⲙ̄ ⲡⲡⲟⲗⲉⲙⲟⲥ ⲉϥⲡⲁⲧⲁⲥⲥⲉ ⲛ̄
ⲛⲁⲥⲉⲃⲏⲥ • ⲉϥⲥⲙⲓⲛⲉ ⲛ̄ ϯⲣⲏⲛⲏ ⲉϥⲛⲟⲩϩⲙ̄ ⲛ̄ ⲛ̄ⲇⲓⲕⲁⲓⲟⲥ •
Ⲧⲛ̄ϭⲓⲛⲉ ⲛ̄ ⲡⲥⲟⲡⲥ̄ ⲙ̄ ⲙⲓⲭⲁⲏⲗ • ϩⲛ̄ ⲧⲙⲏⲧⲉ ⲛ̄ ϩⲉⲛ‐
ⲥⲛⲏⲩ ⲙⲛ̄ ⲛⲉⲩⲉⲣⲏⲩ ⲉϥϩⲛ̄ ⲧⲉⲩⲙⲏⲧⲉ ϩⲓ ⲟⲩⲥⲟⲡ: Ⲧⲛ̄ϭⲓⲛⲉ
ⲛ̄ ⲡⲥⲟⲡⲥ̄ ⲙ̄ ⲙⲓⲭⲁⲏⲗ ϩⲛ̄ ⲛ̄ⲁⲥⲕⲩⲧⲏⲥ ⲉⲧ ϩⲛ̄ ⲛ̄ⲧⲟⲟⲩ
ⲉϥϯ ϭⲟⲙ ⲛⲁⲩ • Ⲧⲛ̄ϭⲓⲛⲉ ⲙ̄ ⲡⲥⲟⲡⲥ̄ ⲙ̄ ⲙⲓ̈ⲭⲁⲏⲗ ϩⲛ̄
ⲧⲥⲟⲟⲩϩⲥ̄ ⲛ̄ ⲙ̄ⲙⲟⲛⲁⲭⲟⲥ ⲉϥ ⲉϥⲟ (sic) ⲛ ⲉⲓⲣⲏⲛⲓⲕⲟⲥ ϩⲛ̄
ⲧⲉⲩⲙⲏⲧⲉ ϩⲓ ⲟⲩⲥⲟⲡ • Ⲧⲛ̄ϭⲓⲛⲉ ⲛ̄ ⲡⲥⲟⲡⲥ̄ ⲙ̄ ⲡⲁⲣⲭ‐
ⲁⲅⲅⲉⲗⲟⲥ ϩⲙ̄ ⲡⲉϣⲗⲏⲗ ⲛ̄ ⲛⲉⲡⲓⲥⲕⲟⲡⲟⲥ ⲙⲛ̄ ⲛⲉⲡⲣⲉⲥ‐
ⲃⲩⲧⲉⲣⲟⲥ | ⲙⲛ̄ ⲛ̄ ⲇⲓⲁⲕⲟⲛⲟⲥ ϩⲓϫⲛ̄ ⲧⲉⲧⲣⲁⲡⲉⲍⲁ ⲉ̄ⲧ
ⲟⲩⲁⲁⲃ • Ⲧⲛ̄ϭⲓⲛⲉ ⲙ̄ ⲡⲥⲟⲡⲥ̄ ⲙ̄ ⲙⲓ̈ⲭⲁⲏⲗ ϩⲛ̄ ⲧⲉⲥⲙⲏ
ⲛ̄ ⲛⲁⲛⲁⲅⲛⲱⲥⲧⲏⲥ ⲙⲛ̄ ⲛⲉⲯⲁⲗⲧⲏⲥ• ⲉⲩⲧⲁⲩⲟ̄ ⲛ ⲛⲉⲩ‐
ϩⲩⲙⲛⲟⲥ ϩⲛ̄ ⲧⲉⲕⲕⲗⲏⲥⲓ̈ⲁ • Ⲧⲛ̄ϭⲓⲛⲉ ⲛ̄ ⲡⲥⲟⲡⲥ̄ ⲙ̄
ⲙⲓⲭⲁⲏⲗ ⲉϥⲟ ⲙⲙⲟⲧⲛⲉⲥ ⲛⲛⲉⲧ ϩⲟⲥⲉ ⲉϥϯ ϭⲟⲙ ⲛ̄ⲁⲩ :
Ⲧⲛ̄ϭⲓⲛⲉ ⲛ̄ ⲡⲥⲟⲡⲥ̄ ⲙ̄ ⲡⲁⲣⲭⲁⲅⲅⲉⲗⲟⲥ • ⲉϥⲟ ⲛ ⲃⲟⲏ̄ⲑⲓⲁ
ⲛ ⲛⲉⲧ ⲟⲩⲑⲗⲓⲃⲉ ⲙⲙⲟⲟⲩ ϩⲛ̄ ⲛ̄ⲇⲓ̈ⲕⲁⲥⲧⲏⲣⲓⲟⲛ : Ⲧⲛ̄ϭⲓⲛⲉ
ⲛ̄ ⲡⲥⲟⲡⲥ̄ ⲙ̄ ⲙⲓⲭⲁⲏⲗ ⲉϥⲟ ⲛⲁⲛⲁⲡⲁⲩⲥⲓⲥ ⲛ ⲛⲉⲧ ϩⲛ̄
ⲛ̄ⲕⲟⲗⲁⲥⲓⲥ • Ϩⲁⲡⲗⲱⲥ ⲛⲉⲧ ⲟⲛϩ̄ ϥ̄ϯ ϭⲟⲙ ⲛⲁⲩ ϩⲛ̄
ⲛⲉⲩⲁⲛⲁⲅⲕⲏ : Ⲁⲩⲱ ⲛⲉⲧ ⲙⲟⲟⲩⲧ ϥⲡⲁⲣⲁⲕⲁⲗⲓ ⲛ̄ ⲛⲁⲩ
ⲛⲓ̈ⲙ ϩⲁ ⲣⲟⲟⲩ ⲧⲁⲣⲉ ⲡⲛⲟⲩⲧⲉ ⲛⲁ ⲛⲁⲩ • Ⲛⲓⲙ ⲅⲁⲣ ϩⲛ̄
ⲛ̄ⲇⲓ̈ⲕⲁⲓⲟⲥ ⲧⲏⲣⲟⲩ ⲡⲉⲧ ⲙ̄ ⲡⲉ ⲡⲁⲣⲭⲁⲅⲅⲉⲗⲟⲥ ⲙⲓ̈ⲭⲁⲏⲗ
ⲃⲱⲕ ϣⲁ ⲣⲟⲟⲩ ⲛϥ̄ⲃⲟⲏ̄ⲑⲓ ⲉ ⲣⲟⲟⲩ ϩⲛ̄ ⲛⲉⲩⲁⲛⲁⲅⲕⲏ •
Ⲁⲩⲱ ⲛⲓ̈ⲙ ϩⲛ̄ ⲙⲁⲣⲧⲩⲣⲟⲥ ⲧⲏⲣⲟⲩ ⲡⲉⲧ ⲙ̄ ⲡⲉ ⲙⲓ̈ⲭⲁⲏⲗ
ⲃⲱⲕ ϣⲁ ⲣⲟⲟⲩ ⲛϥ̄ϯ ϭⲟⲙ ⲛⲁⲩ • ⲁⲩⲱ ⲛϥ̄ⲛⲁϩⲙⲟⲩ
ϩⲛ̄ ⲛⲉⲩⲑⲗⲓⲯⲓⲥ ⲧⲏⲣⲟⲩ • | Ⲟⲩⲟⲛ ⲅⲁⲣ ⲛⲓ̈ⲙ ⲉⲧ ⲛⲁⲱϣ
ⲉ ϩⲣⲁⲓ̈ ⲉ ⲡⲛⲟⲩⲧⲉ ϩⲙ̄ ⲡⲉⲩϩⲏⲧ ⲧⲏⲣϥ̄ ϣⲁⲣⲉ ⲡⲁⲣⲭ‐
ⲁⲅⲅⲉⲗⲟⲥ ⲁϩⲉ ⲣⲁⲧϥ̄ ⲛⲙ̄ⲙⲁⲩ ⲛϥ̄ⲃⲟⲏ̄ⲑⲓ ⲉ ⲣⲟⲟⲩ • Ⲉⲓⲥ


### 0025

ϩⲏⲏⲧⲉ ϭⲉ ⲱ̄ ⲛⲁⲙⲉⲣⲁⲧⲉ ⲁⲛⲉⲓ̈ⲙⲉ ⲉ ⲧⲙⲛ︤ⲧ︥ⲙⲁⲓⲣⲱⲙⲉ
ⲙ̄ ⲡⲛⲟⲩⲧⲉ ⲙⲛ̄ ⲧⲙⲛ︦ⲧ︦ϣⲛ̄ϩⲧⲏϥ ⲙ̄ ⲡⲁⲣⲭⲁⲅⲅⲉⲗⲟⲥ
ⲙⲓⲭⲁⲏⲗ • ϩⲁ ⲧⲙⲛ̄ⲧⲣⲱⲙⲉ ⲧⲏⲣⲥ̄ • ϫⲉ ϥϣⲟⲟⲡ ⲛⲁⲩ
ⲙ̄ ⲡⲣⲉⲥⲃⲩⲧⲏⲥ ⲛ̄ ⲛⲁϩⲣⲙ̄ ⲡⲓ̈ⲱⲧ ⲉⲧⲣ ϥ̄ⲛⲁ ⲛ ⲟⲩⲟⲛ
ⲛⲓⲙ ⲁⲩⲱ ⲛϥ̄ⲥⲟⲟⲩⲧⲛ̄ ⲛ̄ ⲛⲉⲩϩⲓⲟⲟⲩⲉ : Ⲁⲛⲟⲛ ⲇⲉ ϩⲱⲱⲛ
ⲱ̄ ⲛ̄ⲁⲙⲉⲣⲁⲧⲉ ⲙⲁⲣⲛ̄ϯ ⲛⲁϥ̄ ⲛ̄ ⲛ̄ⲉⲧ ⲉϥⲟⲩⲁϣⲟⲩ • ⲁⲩⲱ
ⲛ̄ⲧⲛ̄ⲥⲡ̄ⲥⲱⲡϥ̄ ⲛ̄ϩⲏⲧⲟⲩ : ϫⲉ ⲕⲁⲥ ⲉϥⲉⲙⲉⲣⲓⲧⲛ̄ ⲛ̄ϩⲟⲩⲟ
ⲛϥ̄ⲥⲟⲡⲥ̄ ⲉ ϫⲱⲛ ⲛ̄ ⲛⲁϩⲣⲙ̄ ⲡⲛⲟⲩⲧⲉ • ⲁⲩⲱ ⲛⲧⲛ̄ϣⲱⲡⲉ
ϩⲛ̄ ⲟⲩⲙⲛ̄ⲧⲥⲟⲛ ⲛⲟⲩⲱⲧ • Ⲙⲁⲣⲛ̄ϩⲁⲣⲉϩ ⲉ ⲡⲉⲛⲅⲁⲙⲙⲟⲥ
ⲉϥⲟⲩⲁⲁⲃ ⲁϫⲛ̄ ϫⲱϩⲙ̄ : Ⲙ̄ⲡⲣ̄ ⲧⲣⲉ ⲗⲁⲁⲩ ⲙ̄ ⲡⲟⲣⲛⲓⲁ
ϣⲱⲡⲉ ⲛ̄ϩⲏⲧⲛ̄ ⲉ ⲡⲧⲏⲣϥ̄ : Ⲙ̄ⲡⲣ̄ ⲧⲣⲉ ⲕⲁⲧⲁⲗⲁⲗⲓⲁ
ϣⲱⲡⲉ | ϩⲛ̄ ⲛⲉⲧⲛ̄ⲥⲡⲟⲧⲟⲩ • ϫⲉ ⲟⲩⲗⲟⲅⲭⲏ ⲉⲥⲕⲱⲛⲥ̄ ⲧⲉ
ⲧⲕⲁⲧⲁⲗⲁⲗⲓⲁ ⲟⲩⲙⲟⲥⲧⲉ ⲧⲉ ⲛ̄ ⲛ̄ⲁϩⲣⲙ̄ ⲡⲛⲟⲩⲧⲉ • Ⲟⲩ-
ⲙⲟⲩ ϩⲛ̄ ⲟⲩⲙⲛ̄ⲧϩⲏⲕⲉ ⲧⲉ ⲧⲡⲟⲣⲛⲓ̈ⲁ • ⲟⲩϣⲃⲉⲉⲣ ⲧⲉ ⲙ̄
ⲡⲇⲓⲁⲃⲟⲗⲟⲥ • Ⲟⲩⲙⲟⲥⲧⲉ ⲧⲉ ⲛⲧⲉ ⲛⲉⲭⲣⲏⲥⲧⲓ̈ⲁⲛⲟⲥ ⲡⲉ
ⲧⲡⲟⲣⲛⲓ̈ⲁ : Ⲟⲩϫⲁϫⲉ ⲧⲉ ⲛ ⲛⲁϩⲣⲙ̄ ⲡⲛⲟⲩⲧⲉ ⲙⲛ̄ ⲛⲉϥ‐
ⲁⲅⲅⲉⲗⲟⲥ : Ⲟⲩϣⲃⲉⲉⲣ ⲧⲉ ⲙ̄ ⲡⲧⲁⲕⲟ : Ⲁⲛⲁⲩ ⲛⲁⲕ ⲛ̄‐
ϣⲏⲣⲉ ⲛ̄ ϩⲩⲗⲓ̈ ⲡⲟⲩⲏⲏⲃ ϫⲉ ⲛ ⲧⲉⲣ ⲟⲩⲙⲉⲣⲉ ⲧⲡⲟⲣⲛⲓ̈ⲁ •
ⲁ ⲡⲧⲁⲕⲟ ⲉⲓ̈ ⲉ ϫⲱⲟⲩ • Ⲁⲛⲁⲩ ⲛⲁⲕ ⲟⲛ ⲛ̄ϣⲏⲣⲉ ⲛ ⲡⲣ̄ⲣⲟ
ⲇⲁ︦ⲇ︦ • ϫⲉ ⲛ ⲧⲉⲣ ⲟⲩⲙⲉⲣⲉ ⲧⲡⲟⲣⲛⲓ̈ⲁ ⲉ ϩⲟⲩⲉ ⲡⲅⲁⲙⲙⲟⲥ
ⲛ̄ⲥⲉⲙ̄ⲛⲟⲛ : ⲁ ⲡⲛⲟⲩⲧⲉ ϣⲁⲁⲣ ⲉ ⲣⲟⲟⲩ ⲁⲩⲙⲟⲩϩ ϩⲛ̄
ⲟⲩⲙ︦ⲛ︦ⲧ︦ϣⲁⲣⲁϩⲉ ⲙ̄ⲡⲉ ⲗⲁⲁⲩ ⲛ̄ϩⲏⲧⲟⲩ ⲛⲁⲩ ⲉ̄ ⲛⲉⲩϣⲏⲣⲉ
ϩⲛ̄ ⲡⲓⲏ︤ⲗ︥ • Ⲁⲙⲛⲱⲛ ⲁϥⲛ̄ⲕⲟⲧⲕ̄ ⲙⲛ̄ ⲧⲉϥⲥⲱⲛⲉ ⲛ̄ ϣⲛ︤ⲓ̈ⲱⲧ •
ⲁⲁⲃⲉⲥⲁⲗⲱⲙ ϩⲱⲧⲃ̄ ⲙ̄ⲙⲟϥ • Ϩⲟⲙⲟⲓⲱⲥ ⲁⲃⲉⲥⲁⲗⲱⲙ
ⲁϥⲛ̄ⲕⲟⲧⲕ̄ ⲙⲛ̄ ⲙ̄|ⲡⲁⲗⲗⲁⲕⲏ ⲙ̄ ⲡⲉϥⲓ̈ⲱⲧ • ⲁ ⲡⲛⲟⲩⲧⲉ
ⲉⲓⲛⲉ ⲉ ϫⲱϥ ⲛ̄ ⲟⲩϣⲧⲟⲣⲧⲣ̄ ⲁϥⲙⲟⲩ ϩⲙ̄ ⲡⲡⲟⲗⲉⲙⲟⲥ •
Ⲁⲇⲱⲛⲓ̈ⲁⲥ ⲟⲛ̄ ⲁϥⲉⲉⲧ ⲛ̄ ⲁⲃⲓ̈ⲥⲁⲧⲥ̄ ⲱⲙⲁⲛⲓⲧⲏⲥ • ⲑⲓ̈ⲙⲉ
ⲙ̄ ⲡⲉϥⲓ̈ⲱⲧ • ⲁϥⲙⲟⲩ ⲉ ⲧⲃⲏⲏ̄ⲧⲥ̄ • Ⲧⲉⲛⲟⲩ ϭⲉ ⲱ̄ ⲛⲁ‐
ϣⲏⲣⲉ ⲙ̄ⲙⲉⲣⲓⲧ ⲙⲁⲣⲛ̄ⲛⲟⲩϫ ⲛ̄ⲥⲁ ⲃⲟⲗ ⲙ̄ⲙⲟⲛ ⲛ̄
ⲛ̄ⲉϩⲓⲟⲟⲩⲉ ⲉⲧ ϭⲟⲟⲙⲉ : ⲛⲧⲛ̄ϣⲱⲡⲉ ⲁ̄ϫⲛ̄ ϫⲱϩⲙ̄ ϩⲓ ⲛⲟⲃⲉ
ϩⲓ ⲕⲁⲧⲁⲗⲁⲗⲓⲁ • Ⲙ̄ⲡⲉ ⲡⲅⲁⲙⲙⲟⲥ ⲉϥⲟⲩⲁⲁⲃ ϫⲉϩⲙ̄
ⲣⲱⲙⲉ ⲉⲛⲉϩ : Ⲁⲛⲁⲩ ϫⲉ ⲁ ⲙⲱ︦ⲩ︦ⲥⲏ̄ⲥ ϣⲁϫⲉ ⲙⲛ̄
ⲡⲛⲟⲩⲧⲉ ⲛ ⲟⲩⲏⲣ ⲛ̄ⲥⲟⲡ ⲁⲩⲱ ⲟⲩⲛ̄ⲧⲁϥ ⲙ̄ⲙⲁⲩ ⲛ̄ ⲧⲉϥ‐
ⲥϩⲓ̈ⲙⲉ ⲙⲛ̄ ⲛⲉϥϣⲏⲣⲉ : Ⲁⲩⲱ ⲙ̄ⲡⲉ ⲛ̄ⲁⲓ̈ ϯϫⲣⲟⲡ ⲛⲁϥ


### 0026

ⲉ̄ ⲃⲱⲕ ⲉ̄ ϩⲟⲩⲛ ⲉ ⲡϭⲟⲥⲙ̄ ⲉ ϣⲁϫⲉ ⲙⲛ̄ ⲡⲛⲟⲩⲧⲉ : Ⲁⲗⲗⲁ
ⲙ̄ⲡⲣ̄ ⲧⲣⲉ ⲛⲧⲁϣⲉ ⲡϣⲁϫⲉ ⲉ̄ ⲡⲉϩⲟⲩⲟ̄ ϩⲛ̄ ⲛⲁⲓ̈ ⲥⲉⲣⲱϣⲉ
ⲉ ⲣⲟⲛ̄ ⲛ̄ϭⲓ ⲙ ⲙⲛ̄ⲧⲙⲛ̄ⲧⲣⲉ ⲛ̄ ⲧⲡⲁⲗⲁⲓ̈ⲁ ⲙⲛ̄ ⲧⲅⲉⲛⲏ :
ⲗⲟⲓⲡⲟⲛ ⲙⲁⲣⲉⲛϫⲉⲕ ⲡϣⲁϫⲉ | ⲉ ⲃⲟⲗ ⲉϫⲙ̄ ⲡⲉⲧ ⲛ︦ⲣ︦ϣⲁ
ⲛⲁϥ ⲛ̄ⲡⲟⲟⲩ ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ : Ⲉⲣⲉ ⲡⲉⲓ̈ ϣⲁ̄
ⲙ̄ⲡⲟⲟⲩ ⲣ̄ ⲭⲣⲓ̈ⲁ ⲁⲛ ⲛ̄ ⲟⲩⲣⲙ̄ⲙⲁⲟ ⲉϥⲫⲟⲣⲓ̈ⲛ ⲛ̄ ϩⲉⲛ‐
ϩⲟⲓ̈ⲧⲉ ⲉⲩⲧⲁⲏⲩ • ⲉⲣⲉ ⲡϩⲏⲕⲉ ϩⲱⲱϥ ⲟϭϥ̄ ϩⲁ ⲡϫⲁϥ
ⲛ̄ⲧⲉ ⲡⲣⲱ • Ⲉⲣⲉ ⲡⲓ̈ ϣⲁ ⲣ̄ ⲭⲣⲓ̈ⲁ ⲁⲛ̄ ⲛ̄ ⲟⲩⲣⲙ̄ⲙⲁⲟ̄
ⲉϥⲟⲩⲟⲟⲗⲉ ϩⲙ̄ ⲡⲏⲣⲡ̄ • ⲉⲣⲉ ⲡϩⲏⲕⲉ ϩⲱⲱϥ ⲣ̄ ϭⲣⲱϩ ⲙ̄
ⲡⲟⲉⲓⲕ ϩⲙ̄ ⲡϩⲓ̈ⲣ ⲉϥⲛ̄ⲕⲟⲧⲕ̄ • Ⲉⲣⲉ ⲡⲉⲓ̈ ϣⲁ ⲛ̄ⲡⲟⲟⲩ (sic) ⲣ̄
ⲭⲣⲓ̈ⲁ ⲁⲛ ⲛ̄ ⲟⲩⲁ ⲉϥⲟⲩⲱⲙ ⲙⲁⲩⲁⲁϥ ϩⲛ̄ ⲟⲩⲣⲁϣⲉ
ⲉⲣⲉ ⲡϩⲏⲕⲉ ϩⲱⲱϥ ⲣ̄ ϭⲣⲱϩ ϩⲛ̄ ⲡⲉϣⲧⲉⲕⲟ : Ⲉⲣⲉ ⲡⲉⲓ̈
ϣⲁ ⲙ̄ⲡⲟⲟⲩ ⲣ̄ ⲭⲣⲓ̈ⲁ ⲁⲛ ⲛ̄ ⲟⲩⲁ ⲉϥⲣ̄ⲟⲟⲩⲧ ⲉϥⲟⲩⲛ̄ⲟϥ
ⲙⲁⲩⲁⲁϥ ϩⲙ̄ ⲡⲉϥⲏⲓ̈ ⲉⲣⲉ ⲡϩⲏⲕⲉ ϩⲱⲱϥ ϩⲙ̄ ⲡⲉϥⲏⲓ̈
ⲉ̄ⲙⲛ̄ ⲡⲉⲧ ϭⲓⲛⲉ ⲛ̄ ⲡⲉϥϣⲓⲛⲉ : Ⲛ̄ⲁ ⲣⲱⲙⲉ ⲅⲁⲣ ⲁⲛ ⲛⲉ
ⲛⲓ̈ ⲉⲛ̄ⲧⲟⲗⲏ • ⲁⲗⲗⲁ ⲛ̄ⲁ ⲡⲛⲟⲩⲧⲉ ⲛⲉ : Ⲡⲛⲟⲩⲧⲉ ⲅⲁⲣ
ⲛⲁⲕⲣⲓ̈ⲛⲉ ⲙ̄ ⲡⲅⲉⲛⲟⲥ ⲧⲏⲣϥ̄ ⲛ̄ⲣⲱⲙⲉ | ϩⲁ ⲧⲥⲟ ⲛⲉⲛⲧⲟⲗⲏ
ⲉⲧ ϩⲛ̄ ⲛ̄ⲉⲩⲁⲅⲅⲉⲗⲓⲟⲛ ⲉⲧ ⲟⲩⲁⲁⲃ : ⲗⲟⲓⲡⲟⲛ ⲱ̄ ⲛⲁⲙⲉ‐
ⲣⲁⲧⲉ ⲙⲁⲣⲉⲛⲥⲟⲡⲥ̄ ⲙ̄ ⲡⲁⲣⲭⲁⲅⲅⲉⲗⲟⲥ ⲉⲧ ⲟⲩⲁⲁⲃ
ⲙⲓ̈ⲭⲁⲏⲗ ϩⲛ̄ ⲟⲩϩⲏⲧ ⲉϥⲥⲟⲩⲧⲱⲛ • ⲛϥ̄ϫⲓ ⲛ̄ ⲡⲉϩⲙⲟⲧ
ⲛ̄ ⲡⲛⲟⲩⲧⲉ ⲉ ϩⲣⲁⲓ̈ ⲉ ϫⲱⲛ ⲛϥ̄ⲕⲱ ⲛⲁⲛ ⲉ ⲃⲟⲗ ⲛ̄ ⲛⲉⲛ̄‐
ⲛⲟⲃⲉ ⲉⲛ̄ⲧⲁⲛⲁⲁⲩ ϩⲓ̈ ⲡⲁϩⲟⲩ ⲛϥ̄ϯ ⲛⲁⲛ̄ ⲛ̄ ⲟⲩⲇⲓⲟⲣⲑⲱⲥⲓⲥ
ⲛ̄ⲥⲁ ⲑⲏ : ϯⲛⲁⲩ ⲅⲁⲣ ϫⲉ ⲁ ⲡⲛⲁⲩ ϣⲱⲡⲉ ⲉ ⲧⲣⲉ ⲛϯ
ⲙ̄ ⲡⲛ̄ⲟⲩⲟⲓ̈ ⲧⲛ̄ϫⲱⲕ ⲉ ⲃⲟⲗ ⲡⲉⲧ ⲉ ⲣⲟⲛ • ⲉⲧⲉ ⲧⲉ ⲧⲉⲡⲣⲟⲥ‐
ⲫⲟⲣⲁ ⲉⲧ ⲟⲩⲁⲁⲃ ⲧⲉ : ⲉ ⲧⲣⲉ ⲛⲧⲉⲗⲓⲟⲩ ⲙⲙⲟⲥ ⲧⲛ̄ϫⲓ̈
ⲉ ⲃⲟⲗ ϩⲛ̄ ⲙ̄ⲙⲩⲥⲧⲏⲣⲓⲟⲛ ⲉ̄ⲧ ⲟⲩⲁⲁⲃ • ⲡⲥⲱⲙⲁ ⲙⲛ̄
ⲡⲉⲥⲛⲟϥ ⲙ̄ ⲡⲉⲛϫⲟⲉⲓⲥ ⲓⲥ̄ ⲡⲉⲭⲥ̄ • Ⲡⲁⲓ̈ ⲉ ⲃⲟⲗ ϩⲓ ⲧⲟⲟⲧϥ̄
ⲉⲣⲉ ⲉⲟⲟⲩ ⲛⲓ̈ⲙ ⲡⲣⲉⲡⲓ̈ ⲛ̄ ⲡⲓⲱⲧ ⲛⲙ̄ⲙⲁϥ ⲙⲛ̄ ⲡⲉⲡⲛ︦ⲁ︦
ⲉⲧ ⲟⲩⲁⲁⲃ • ⲛ̄ ⲣϥ̄ⲧⲁⲛϩⲟ ⲁⲩⲱ ⲛ̄ ϩⲟⲙⲟⲟⲩⲥⲓⲟⲛ ⲧⲉⲛⲟⲩ
ⲁⲩⲱ ⲛ̄ ⲟⲩⲟⲉⲓϣ ⲛⲓ̈ⲙ ϣⲁ ⲉⲛⲉϩ ⲛ̄ ⲉⲛⲉϩ ϩⲁⲙⲏⲛ •
ⲡϫⲟⲉⲓⲥ ⲓⲥ̄ ⲡⲉⲭⲥ̄ ⲉⲃⲉⲥⲙⲟⲩ ⲉ ⲡⲛϣⲁϥϫⲟⲟⲥ ϫⲉⲣⲉ
ⲡⲛⲟⲩⲧⲉ ⲉⲣⲟⲩⲛⲁⲙⲉⲓ (?) ⲛⲧⲁϥⲥϩⲁⲓ̈ ⲛⲓ ⲥϩⲁⲓ ⲉⲧⲉϥϭⲓϫ
ϩⲁⲙⲏⲛ ⲉⲃⲉϣⲱⲡⲉ


### 0027

1. ⲧⲁⲓ ⲧⲉⲧⲡⲓⲥⲧⲓⲥ ⲛⲧⲁⲥϣⲱⲡⲉ ϩⲛ ⲛⲓⲕⲁⲓⲁ ⲉ ⲃⲟⲗ ϩⲓ‐
ⲧⲟⲟⲧⲥ ⲛ ⲧⲥⲩⲛϩⲟⲇⲟⲥ ⲛ ⲛⲉⲡⲓⲥⲕⲟⲡⲟⲥ ⲉⲧ ⲟⲩⲁⲁⲃ •
ⲉⲩⲉⲓⲣⲉ ⲛ̄ ϣⲙⲛⲧ ϣⲉ ⲙⲏⲧ ϣⲙⲏⲏ ⲛ̄ ⲉ̄ⲡⲓⲥⲕⲟⲡⲟⲥ • ϩⲛ
ⲟⲩⲉⲓⲣ[ⲏⲛⲏ]
2. Ⲁϩⲣⲟⲟⲩ ⲛϩⲉⲑⲛⲟⲥ ⲁⲩϫⲓⲥⲉ ⲛϩⲏⲧ ⲁⲛⲗⲁⲟⲥ ⲙⲉⲗⲉⲧⲁ
ϩⲛ̄ ⲛⲉⲩⲡⲉⲧϣⲟⲩⲉⲓⲧ• ⲁⲩⲁϩⲉ ⲣⲁⲧⲟⲩ ⲧⲏⲣⲟⲩ ⲛ̄ϭⲓ ⲛⲉⲣⲱⲩ
ⲙ ⲡⲕⲁϩ ⲁⲛⲁⲣⲭⲱⲛ ⲥⲱⲟⲩϩ ⲁⲩⲉⲓ ⲉⲩⲙⲁ ⲛ ⲟⲩⲱⲧ ⲉⲩϯ
ⲟⲩⲃⲉ ⲙ̄ ⲡϫⲟⲉⲓⲥ ⲙⲛ ⲡⲉϥⲭⲣⲥ̄ • ⲇⲓⲁⲯⲁⲗⲙⲁ
ⲙⲁⲣⲉⲛⲥⲱⲗⲡ ⲛⲛⲙⲏⲣⲉ ⲧⲛⲟⲩϫⲉ ⲙ ⲡⲉⲩⲕⲉⲛⲁϩⲏϥ ⲉ
ⲃⲟⲗ ϩⲓ ϫⲱ̄ ϫⲉ ⲡⲉⲧⲟⲩⲏϩ ϩⲛ ⲛⲙ̄ⲡⲉⲧ ⲛⲁⲥⲱⲃⲉ ⲛⲥⲱⲟⲩ
ⲁⲩⲱ ⲡϫⲟⲉⲓⲥ ⲡⲉⲧ ⲛⲁⲕⲟⲙϣⲟⲩ