### 0001

*Ϯⲙⲁⲣⲧⲩⲣⲓⲁ̃ ⲛ̃ⲧⲉ ⲡⲓⲁ̃ⲅⲓⲟⲥ ⲕⲩⲣⲓⲁ̃ⲕⲟⲥ ⲡⲓⲁⲣⲭⲏⲉ̃ⲡⲓⲥⲕⲟⲡⲟⲥ
ⲛ̃ⲓⲗ︦ⲏ︦ⲙ︦ ⲫⲏ ⲉ̃ⲧⲁϥϫⲓⲙⲓ ⲙ̃ⲡⲓ⳧ ⲉⲑⲟⲩⲁⲃ ⲛ̃ⲧⲉ ⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦
ⲛⲉⲙ ⲁⲛⲛⲁ ⲧⲉϥⲙⲁⲩ ϧⲉⲛ ⲟⲩϩⲓⲣⲏⲛⲏ ⲛ̃ⲧⲉ ⲫ︦ϯ︦ ⲁⲙⲏⲛ
Ⲁⲥϣⲱⲡⲓ ⲉ̃ⲧⲁϥⲉⲣⲟⲩⲣⲟ ⲛϫⲉ ⲕⲱⲛⲥⲧⲁⲛⲧⲓⲛⲟⲥ ⲡⲓⲇⲓ-
ⲕⲉⲟⲥ ⲁϥⲁⲙⲟⲛⲓ ⲙ̃ⲡⲓⲛⲁϩϯ ⲛ̃ⲧⲉ ⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲉϥⲟⲓ
ⲙ̃ⲙⲁⲓⲭ︦ⲣ︦ⲥ︦ ⲛ̃ⲧⲁⲓϧⲉ ⲧⲏⲣⲥ ϩⲱⲥ ⲕⲟⲥⲙⲓⲕⲟⲥ ⲁⲛ ⲁⲗⲗⲁ
ϩⲱⲥ ⲥⲱⲧⲡ ⲛ̃ⲉⲡⲓⲥⲕⲟⲡⲟⲥ ⲛ̃ⲟⲣⲑⲟⲇⲟⲝⲟⲥ ⲉϥϯⲱ̃ⲟⲩ ⲙ̃ⲫ︤ϯ︥
ⲛ̃ⲧⲉ ⲧⲫⲉ ϧⲉⲛ ⲟⲩϫⲓⲛϣⲉⲙϣⲓ ⲉⲥⲟⲩⲁⲃ ⲛ̃ϫⲱⲣϩ ⲛⲉⲙ
ⲙⲉⲣⲓ ⲉϥϧⲟⲧϧⲉⲧ ⲛ̃ⲛⲓⲅⲣⲁⲫⲏ ⲛ̃ⲛⲓϥⲓ ⲛ̃ⲧⲉ ⲫ︤ϯ︥ ϧⲉⲛ ⲟⲩϫⲱϥ
ⲛ̃ϩⲏⲧ ⲁϥϯ ⲡⲉϥϩⲏⲧ ⲉ̃ⲉⲣⲃⲱⲕ ⲙ̃ⲡⲭ︦ⲥ︦ ϧⲉⲛ ⲧⲉϥϫⲟⲙ ⲧⲏⲣⲥ
ⲙ̃ⲫⲣⲏϯ ⲛ̃ⲇⲁⲩⲓⲇ ⲡⲓⲡⲣⲟⲫⲏⲧⲏⲥ ⲧⲉϥⲙⲁⲕⲁⲣⲓⲁ̃ ⲇⲉ ⲙ̃ⲙⲁⲩ
ⲉ̃ⲗⲉⲛⲏ ⲉⲥⲉⲓ¹ ⲛϣⲁⲙϣⲉⲛⲟⲩϯ ⲉⲡⲓϩⲟⲩⲟ̃ ϧⲉⲛ ⲡⲉⲥϩⲏⲧ ⲧⲏⲣϥ
ⲟⲩⲟϩ ⲉⲥϫⲏⲕ ⲉⲃⲟⲗ ϧⲉⲛ ⲁ̃ⲣⲉⲧⲏ ⲛⲓⲃⲉⲛ ⲛ̃ⲧⲉ ⲡⲓⲡ︦ⲛ︦ⲁ︦
ⲉⲑⲟⲩⲁⲃ ⲁⲥⲉⲣⲉⲡⲓⲑⲩⲙⲓⲛ ⲉ̃ⲟⲩⲁϩ ⲡⲁⲓⲭⲉⲧ ⲉ̃ϫⲉⲛ ⲛⲉⲥⲕⲁ-
ⲧⲟⲣⲑⲱⲙⲁ ⲧⲏⲣⲟⲩ ⲉⲧⲉ ⲫⲁⲓ ⲡⲉ ⲉⲑⲣⲉⲥⲕⲱϯ ⲛ̃ⲥⲁ ⲡϣⲉ
ⲙⲡⲓ⳧ ⲛ̃ⲧⲉ ⲡⲉⲛϭ︦ⲥ︦ ⲓⲏ︦ⲥ︦ ⲭ︦ⲥ︦ ⲟⲩⲟϩ ⲉⲥϧⲏⲙ ϧⲉⲛ ⲡⲓⲡ︦ⲛ︦ⲁ︦
[ⲁⲥⲓ̃ ⲉ̃ⲓⲗ]ⲏ︦ⲙ︦ ⲉ̃ϫⲱⲕ ⲉ̃ⲃⲟⲗ ⲛ̃ⲧⲉⲥⲉⲡⲓⲑⲩⲙⲓⲁ
*Ⲟⲩⲁⲓ ⲇⲉ ϫⲉ ⲓⲟⲩⲇⲁⲥ ⲉⲟⲩⲓⲟⲩⲇⲁⲓ ⲡⲉ ⲉⲃⲟⲗϧⲉⲛ
ⲡⲅⲉⲛⲟⲥ ⲛ̃ⲥⲧⲉⲫⲁⲛⲟⲥ ⲡⲓⲡⲣⲟⲧⲟⲇⲓⲁⲕⲱⲛ ⲟⲩⲟϩ ⲡⲓⲡⲣⲟⲧⲟ-
ⲙⲁⲣⲧⲩⲣⲟⲥ ⲁϥⲟⲩⲟⲛϩϥ ⲛⲁⲥ ⲉ̃ⲃⲟⲗ ⲛⲉⲙ ⲛⲓⲕⲉⲓϥⲧ ⲉⲧⲁⲩ-
ⲑⲟⲝⲟⲩ ⲉ̃ⲛⲉⲛϫⲓϫ ⲙ̃ⲡⲉⲛϭ︦ⲥ︦ ⲓⲏ︦ⲥ︦ ϩⲓ ⲡⲓ⳧ ⲁϥⲛⲁϩϯ ϩⲱϥ
ⲉⲡⲭ︦ⲥ︦ ⲛ̃ϫⲉ ⲓⲟⲩⲇⲁⲥ ⲟⲩⲟϩ ⲁϥϣⲱⲡⲓ ⲛ̃ⲥⲱⲓⲧ ⲉϥⲧⲁ-
ϫⲣⲏⲟⲩⲧ ⲛ̃ⲧⲁⲓϧⲉ ⲧⲏⲣⲥ ϧⲉⲛ ϩⲁⲛⲙⲏϣ ⲛ̃ⲧⲁϩⲟ ⲉ̃ⲣⲁⲧⲟⲩ
ϩⲱⲥⲇⲉ ⲛ̃ⲧⲉϥⲉⲣⲡⲉⲙϣⲁ² ⲛ̃ϯⲙⲉⲧⲁⲣⲭⲏⲉⲣⲉⲩⲥ ⲛⲧⲉ ⲡⲭ︤ⲥ︥
ϧⲉⲛ ⲓⲗ︤ⲏ︦ⲙ︥ ϩⲓⲧⲉⲛ ϯⲯⲩⲫⲟⲥ ⲛ̃ⲧⲉ ⲫ︤ϯ︥ ⲡⲓⲇⲏⲙⲓⲟⲩⲣⲅⲟⲥ
ⲟⲩⲟϩ ⲁⲩⲙⲟⲩϯ ⲉ̃ⲡⲉϥⲣⲁⲛ ϫⲉ ⲕⲩⲣⲓⲁ̃ⲕⲟⲥ ⲟⲩⲟϩ ⲉⲧⲁⲥ-


### 0002

ϫⲱⲕ ⲇⲉ ⲉⲃⲟⲗ ⲛ̃ϩⲁⲛⲕⲉⲙⲏϣ ⲛ̃ⲕⲁⲧⲟⲣⲑⲱⲙⲁ ⲛ̃ϫⲉ ϯⲙⲁⲓ-
ⲛⲟⲩϯ ⲉ̃ⲗⲉⲛⲏ ⲁⲥⲉⲛⲕⲟⲧ ϧⲉⲛ ⲟⲩϩⲓⲣⲏⲛⲏ
Ⲡⲟⲩⲣⲟ ⲇⲉ ⲕⲱⲥⲧⲁⲛⲧⲓⲛⲟⲥ ⲉⲑⲃⲉ ⲧⲉϥⲛⲓϣϯ ⲛ̃ⲁⲅⲁⲡⲏ
ⲉⲧϫⲏⲕ ⲉⲃⲟⲗ ⲉ̃ϧⲟⲩⲛ ⲉ̃ⲡⲭ︤ⲥ︥ ⲁϥⲉⲣϩⲟⲩⲟ̃ ϭⲓⲥⲓ ⲉ̃ⲙⲁϣⲱ
ϧⲉⲛ ⲡⲁⲙⲁϩⲓ ⲛ̃ⲧⲉ ϯⲙⲉⲧⲟⲩⲣⲟ ⲉⲟⲩⲟⲛ ⲟⲩϩⲓⲣⲏⲛⲏ ⲕⲱϯ
ⲉⲣⲟϥ ⲥⲁⲥⲁ ⲛⲓⲃⲉⲛ ⲟⲩⲟϩ ⲁϥⲙ̃ⲧⲟⲛ ⲙ̃ⲙⲟϥ ⲉⲁϥϫⲫⲉ
ϣⲏⲣⲓ ⲃ̅ ⲕⲱⲥⲧⲁⲛⲧⲓⲟⲥ ⲛⲉⲙ ⲕⲟⲥⲧⲟⲥ ⲁϥⲓ̃ ⲉ̃ⲡⲉϥⲙⲁ ⲛ̃ϫⲉ
ⲕⲱⲥⲧⲁⲛⲧⲓⲟⲥ ⲡⲉϥⲛⲓϣϯ ⲛ̃ϣⲏⲣⲓ ⲟⲩⲟϩ ⲛⲁⲣⲉ ⲡⲉϥϩⲏⲧ
ϫⲏⲕ ⲉ̃ⲃⲟⲗ ⲁⲛ ⲡⲉ ⲙ̃ⲫⲣⲏϯ ⲙ̃ⲡⲉϥⲓⲱⲧ ⲫⲁⲓ ⲇⲉ ⲁ̃ ⲫ︤ϯ︥
ⲫⲟⲛϫϥ ϧⲉⲛ ⲟⲩⲓ̃ⲏⲥ *ⲉⲁϥⲓ̃ⲛⲓ ⲛ̃ⲕⲟⲥⲧⲟⲥ ⲡⲉϥⲥⲟⲛ ⲉ̃ⲡⲉϥⲙⲁ
ⲉⲟⲩⲙⲁⲭ︦ⲣ︦ⲥ̄ ⲡⲉ ⲉⲡⲓϩⲟⲩⲟ̃ ⲥⲭⲉⲇⲟⲛ ⲉϫⲟⲥ ϫⲉ ⲙ̃ⲡⲉϥⲙⲟⲩ
ⲣⲱ ⲛ̃ϫⲉ ⲕⲱⲥⲧⲁⲛⲧⲓⲛⲟⲥ ⲛⲁⲣⲉ ϯϩⲓⲣⲏⲛⲏ ⲛ̃ⲧⲉ ⲫ︦ϯ︦ ϣⲟⲡ
ϧⲉⲛ ⲛⲓⲉⲕⲕⲗⲏⲥⲓⲁ̃ ⲧⲏⲣⲟⲩ ⲡⲉ ⲉ̃ⲁ̃ ⲫⲙⲉⲩⲓ̃ ⲛ̃ⲛⲓⲣⲉϥϣⲁⲙϣⲉⲓ̃-
ⲇⲱⲗⲱⲛ ⲙⲟⲩⲛⲕ ⲉⲡⲧⲏⲣϥ ⲛⲉ ⲟⲩⲟⲛ ⲟⲩϣⲏⲣⲓ ⲛ̃ⲧⲉ ⲧⲥⲱⲛⲓ
ⲛ̃ⲕⲱⲥⲧⲁⲛⲧⲓⲛⲟⲥ ⲡⲓⲛⲓϣϯ ⲉⲡⲉϥⲣⲁⲛ ⲡⲉ ⲓⲟⲩⲗⲓⲁⲛⲟⲥ ⲉ̃ⲟⲩⲁ̃-
ⲛⲟⲙⲟⲥ ⲡⲉ ϧⲉⲛ ⲧⲉϥⲅⲛⲱⲙⲏ ⲉϥⲙⲉⲓ ⲛ̃ϯⲙⲉⲧϣⲁⲙϣⲉⲓ̃ⲇⲱⲗⲟⲛ
ⲫⲁⲓ ⲇⲉ ⲉⲧⲁϥⲛⲁⲩ ⲉⲣⲟϥ ⲛ̃ϫⲉ ⲕⲟⲥⲧⲟⲥ ⲡⲟⲩⲣⲟ ϫⲉ ⲉϥⲟⲓ
ⲛ̃ⲁ̃ⲛⲟⲙⲟⲥ ⲙ̃ⲡⲁⲓⲣⲏϯ ⲁϥⲧⲏⲓϥ ⲉ̃ϯⲉⲕⲕⲗⲏⲥⲓⲁ ⲁⲩⲁⲓϥ
ⲛ̃ⲇⲓⲁⲕⲱⲛⲟⲥ ϫⲉ ⲁ̃ⲣⲏⲟⲩ ϥⲛⲁϣⲓⲃϯ ⲛ̃ⲧⲉϥⲅⲛⲱⲙⲏ ⲉⲧ-
ϩⲱⲟⲩ
Ⲉⲧⲁϥⲙⲟⲩ ⲇⲉ ⲛ̃ϫⲉ ⲕⲟⲥⲧⲟⲥ ⲁϥϩⲱⲗⲉⲙ ⲛ̃ϯⲙⲉⲧⲟⲩⲣⲟ
ⲛ̃ϫⲉ ⲡⲓⲁⲥⲉⲃⲏⲥ ⲉ̃ⲧⲉⲙⲙⲁⲩ ⲓⲟⲩⲗⲓⲁⲛⲟⲥ ⲟⲩⲟϩ ⲥⲁⲧⲟⲧϥ
ⲁϥϩⲓⲧⲟⲧϥ ⲉϯⲙⲉⲧϩⲉⲗⲗⲏⲛⲟⲥ ⲉⲁϥⲟⲩⲱϣ ⲉ̃ⲁⲟⲩⲱⲛ
ⲙ̃ⲫⲣⲟ ⲛ̃ⲛⲓⲉⲣⲫⲏⲟⲩⲓ̃ ⲛ̃ⲕⲉⲥⲟⲡ ⲟⲩⲟϩ ⲉ̃ⲧⲟⲩⲛⲟⲥ¹ ϩⲁⲛⲛⲓϣϯ
ⲛ̃ϧⲓⲥⲓ ⲛ̃ⲛⲓⲭⲣⲏⲥⲧⲓⲁ̃ⲛⲟⲥ ⲛⲁϥϫⲱ ⲙⲙⲟⲥ ϧⲉⲛ ⲧⲉϥⲡⲁⲣⲁⲛⲟ-
ⲙⲓⲁ ϫⲉ ϯⲛⲁⲧⲟⲩⲛⲟⲥ² ⲃⲁⲥⲁⲛⲟⲥ ⲙⲉⲛ ⲁⲛ ⲉϫⲉⲛ ⲛⲓⲭⲣⲏ-
ⲥⲧⲓⲁⲛⲟⲥ ϫⲉ ⲛ̃ⲛⲟⲩϣⲟⲩϣⲟⲩ ⲙ̃ⲙⲱⲟⲩ ϫⲉ ⲁⲛⲉⲣⲙⲁⲣ-
ⲧⲩⲣⲟⲥ ⲁⲗⲗⲁ ϯⲛⲁⲧϩⲉⲙⲕⲱⲟⲩ ϧⲉⲛ ⲛⲓ*ⲇⲏⲙⲟⲥⲓⲟⲛ
ϣⲁⲧⲟⲩϫⲱⲗ ⲉⲃⲟⲗ ⲙ̃ⲫⲏ ⲉ̃ⲧⲁⲩⲉⲣⲥⲧⲁⲩⲣⲱⲛⲓⲛ ⲙ̃ⲙⲟϥ


### 0003

ⲟⲩⲟϩ ⲡⲁⲓⲣⲏϯ ⲁϥⲥϧⲁⲓ ⲉⲃⲟⲗ ϧⲉⲛ ⲧⲉϥⲙⲉⲧⲟⲩⲣⲟ ϫⲉ
ⲫⲏ ⲉⲑⲛⲁϣⲉⲙϣⲓ ⲛ̃ⲛⲓⲛⲟⲩϯ ⲉϥⲉϯ ⲛⲟⲩⲗⲟⲩⲕⲟⲧⲓⲛ
ⲛ̃ⲟⲩⲱⲧ ⲛ̃ϯⲣⲟⲙⲡⲓ ⲫⲏ ⲉⲑⲛⲁϣⲉⲙϣⲓ ⲛ̃ⲫⲏ ⲉⲧⲁⲩⲉⲣⲥⲧⲁⲩ-
ⲣⲱⲛⲓⲛ ⲙ̃ⲙⲟϥ ⲉϥⲉϯ ⲛⲅ̅ϯ ⲛ̃ⲟⲅⲅⲓⲁ̃ ⲛ̃ⲛⲟⲩⲃ ⲉ̃ⲧⲁⲩⲓ̃ⲛⲓ ⲇⲉ
ⲛⲛⲁⲓⲥϧⲁⲓ ⲉϯⲡⲁⲗⲉⲥⲧⲓⲛⲏ ⲁϥⲑⲱⲟⲩϯ ⲛⲛⲓⲙⲏϣ ⲛ̃ϫⲉ ⲡⲓ-
ⲙⲁⲕⲁⲣⲓⲟⲥ ⲕⲩⲣⲓⲁⲕⲟⲥ ⲁϥⲥⲁϫⲓ ⲛⲉⲙⲱⲟⲩ ⲉϥϫⲱ ⲙ̃ⲙⲟⲥ
ϫⲉ ϭⲣⲟ ⲙ̃ⲙⲱⲧⲉⲛ ⲛⲁϣⲏⲣⲓ ⲟⲩⲟϩ ⲛ̃ⲧⲉⲧⲉⲛϫⲉⲙⲛⲟⲙϯ ϫⲉ
ⲟⲩⲏⲓ ⲡⲭ︦ⲥ︦ ⲛⲁϯ ⲉϩⲣⲏⲓ ⲉϫⲱⲛ ⲙⲡⲉⲣϫⲱⲗ ⲉⲃⲟⲗ ⲙ̃ⲡⲉⲧⲉⲛ-
ϭ︤ⲥ︥ ⲉⲑⲃⲉ ⲡⲁⲓⲕⲟⲥⲙⲟⲥ ⲧⲏⲣϥ ϫⲉ ⲟⲩⲏⲓ ⲟⲩⲟⲛ ϣϫⲟⲙ
ⲛ̃ⲧⲉϥϫⲓϫ ⲉϩⲱⲃ ⲛⲓⲃⲉⲛ ϯⲉⲣⲙⲉⲑⲣⲉ ⲛⲱⲧⲉⲛ ⲙ̃ⲡⲁⲓⲉ̃ϩⲟⲟⲩ
ϫⲉ ⲁⲛϣⲁⲛⲁ̃ⲙⲟⲛⲓ ⲛ̃ϯϩⲉⲗⲡⲓⲥ ⲉⲧⲧⲁϫⲣⲏⲟⲩⲧ ⲉϧⲟⲩⲛ
ⲉⲡⲉⲛⲛⲏⲃ ⲡⲭ︦ⲥ︦ ϥⲛⲁⲭⲁ ⲟⲩϥⲱⲓ ⲛ̃ⲧⲉ ⲧⲉⲛⲁⲫⲉ ⲁⲛ ⲉ̃ⲕⲓⲙ
ⲛⲁⲓ ⲇⲉ ⲟⲛ ⲁϥⲥϧⲏⲧⲟⲩ ⲉⲃⲟⲗ ϧⲉⲛ ϯⲭⲱⲣⲁ ⲧⲏⲣⲥ ⲉ̃ⲧⲉⲙⲙⲁⲩ
ⲉϥⲧⲁϫⲣⲟ ⲙ̃ⲡⲟⲩϩⲏⲧ ϧⲉⲛ ⲫⲛⲁϩϯ ⲙ̃ⲡⲭ︦ⲥ︦ ⲁ ⲡⲓϣⲓⲛⲓ ⲇⲉ
ⲧⲁϩⲉ ⲓⲟⲩⲗⲓⲁ̃ⲛⲟⲥ ⲡⲓⲡⲁⲣⲁⲃⲁⲧⲏⲥ ⲉⲑⲃⲏⲧϥ ⲁϥⲥϧⲁⲓ ⲛⲁϥ
ⲛⲟⲩⲉⲡⲓⲥⲧⲟⲗⲏ ⲙ̃ⲡⲁⲓⲣⲏϯ ϫⲉ ⲕⲏⲛ ⲉⲣⲟⲕ ⲉⲕⲧⲁⲥⲑⲟ ⲙ̃ⲡ-
ϩⲏⲧ ⲛ̃ⲛⲓⲣⲱⲙⲓ ⲉⲃⲟⲗϩⲁ ⲛⲓⲛⲟⲩϯ ⲛ̃ⲣⲉϥⲧⲟⲩϫⲟ ⲙⲙⲟⲛ
ϣⲉ ⲡⲓⲍⲉⲩⲥ ⲁⲓϣⲁⲛⲧⲁⲥⲑⲟ ⲉ̃ⲃⲟⲗϧⲉⲛ ϯⲡⲉⲣⲥⲓⲥ ϯⲛⲁϣⲁⲧ
*ⲛⲓⲭⲣⲏⲥⲧⲓⲁⲛⲟⲥ ⲛ̃ⲛⲏ ⲉⲧⲁⲓϫⲟⲧⲟⲩ ⲡⲕⲉⲛⲑⲟⲕ ϩⲱⲕ ϯⲛⲁϯ
ⲙ̃ⲕⲁϩ ⲛⲁⲕ ⲉⲧⲁⲩⲓ̃ⲛⲓ ⲇⲉ ⲛ̃ⲛⲁⲓⲥϧⲁⲓ ⲙ̃ⲡⲓⲉ̃ⲡⲓⲥⲕⲟⲡⲟⲥ ⲁϥ-
ⲥϧⲁⲓ ϩⲱϥ ⲛⲟⲩⲉⲡⲓⲥⲧⲟⲗⲏ ⲛⲁϥ ⲉϥϫⲱ ⲙ̃ⲙⲟⲥ ϫⲉ ⲉϣⲱⲡ
ⲁⲕϣⲁⲛⲧⲁⲥⲑⲟⲕ ⲉⲃⲟⲗϧⲉⲛ ϯⲡⲉⲣⲥⲓⲥ ⲙ̃ⲡⲉ ⲡⲭ︦ⲥ︦ ⲥⲁϫⲓ ⲛ̃ϧⲏⲧ
ⲉ̃ⲛⲉϩ
Ⲁϥϫⲱⲛⲧ ⲇⲉ ⲛ̃ϫⲉ ⲓⲟⲩⲗⲓⲁ̃ⲛⲟⲥ ϧⲉⲛ ⲟⲩⲉⲛϣⲁϣⲓ
ⲛ̃ⲧⲉ ⲡⲉϥⲓⲱⲧ ⲡⲓⲇⲓⲁⲃⲟⲗⲟⲥ ⲁϥⲓ̃ ⲉ̃ⲓⲗ︦ⲏ︦ⲙ︦ ⲁϥⲟⲩⲁϩⲥⲁϩⲛⲓ
ⲉⲓ̃ⲛⲓ ⲛⲁϥ ⲙ̃ⲡⲓⲙⲁⲕⲁⲣⲓⲟⲥ ⲕⲩⲣⲓⲁⲕⲟⲥ ⲉⲧⲁⲩⲉⲛϥ ⲇⲉ ⲡⲉ-
ϫⲁϥ ⲛⲁϥ ϫⲉ ⲛ̃ⲑⲟⲕ ⲡⲉ ⲫⲏ ⲉⲧϣⲑⲟⲣⲧⲉⲣ ⲛ̃ϯⲡⲁⲗⲉⲥ-
ⲧⲓⲛⲏ ⲉⲕⲧⲁϩⲛⲟ ⲙ̃ⲡϣⲉⲙϣⲓ ⲛ̃ⲛⲓⲛⲟⲩϯ ⲡⲉϫⲁϥ ⲛⲁϥ ϫⲉ
ⲁϩⲁ ⲁ̃ⲛⲟⲕ ⲡⲉ ⲛⲁⲥⲟ̃ϩⲓ ⲇⲉ ⲉⲣⲁⲧⲥ ⲛⲉⲙⲁϥ ⲛ̃ϫⲉ ⲧⲉϥⲙⲁⲩ
ⲉ̃ⲁⲥⲉⲣϧⲉⲗⲗⲱ ⲉⲥⲕⲉⲛⲓⲱⲟⲩⲧ ⲉ̃ⲙⲁϣⲱ ⲡⲉϫⲁϥ ⲛ̃ϫⲉ ⲓⲟⲩ-
ⲗⲓⲁⲛⲟⲥ ϫⲉ ⲛⲓⲙ ⲛ̃ⲧⲁⲕ ⲧⲉ ⲑⲁⲓ ⲡⲉϫⲁϥ ϫⲉ ⲧⲁⲙⲁⲩ


### 0004

ⲙ̃ⲙⲁⲓⲛⲟⲩϯ ⲧⲉ ⲟⲩⲟϩ ⲡⲉϫⲉ ⲓⲟⲩⲗⲓⲁⲛⲟⲥ ⲛⲁⲥ ϫⲉ ⲛⲓⲙ
ⲡⲉ ⲡⲉⲣⲁⲛ ⲛ̃ⲑⲟⲥ ⲇⲉ ⲡⲉϫⲁⲥ ϫⲉ ⲡⲁⲣⲁⲛ ⲙⲉⲛ ⲉⲧⲁⲩⲧⲏⲓϥ
ⲉ̃ⲣⲟⲓ ⲛ̃ϫⲉ ⲛⲁⲓⲟϯ ⲡⲉ ⲁⲛⲛⲁ ⲡⲁⲣⲁⲛ ⲇⲉ ⲙ̃ⲙⲏⲓ ⲡⲉ
ⲭⲣⲓⲥⲧⲓⲁⲛⲏ ⲡⲉϫⲉ ⲓⲟⲩⲗⲓⲁⲛⲟⲥ ϫⲉ ⲟⲩⲟⲛ ⲟⲩⲛⲓϣϯ
ⲛ̃ⲧⲁⲓ̃ⲟ̃ ⲛⲉⲙ ⲟⲩⲱ̃ⲟⲩ ⲭⲏ ⲛⲱⲧⲉⲛ ⲉϧⲣⲏⲓ ⲁⲣⲉⲧⲉⲛϣⲁⲛⲉⲣ-
ⲑⲩⲥⲓⲁ ⲙ̃ⲡⲓⲛⲓϣϯ ⲛ̃ⲛⲟⲩϯ ⲡⲓⲍⲉⲩⲥ ⲡⲉϫⲁϥ ⲛϫⲉ ⲕⲩⲣⲓⲁ̃-
ⲕⲟⲥ ϫⲉ ⲁ̃ⲛⲟⲕ ⲉⲓⲉ̃ⲟⲩⲱⲣⲡ ⲉ̃ⲡϣⲱⲓ ⲛ̃ⲟⲩⲑⲩⲥⲓⲁ̃ ⲙ̃ⲡⲓⲛⲓϣϯ
ⲛ̃ⲛⲟⲩϯ ⲓⲏ︦ⲥ︦ ⲡⲭ︦ⲥ︦ *ⲫⲏ ⲉⲧⲟⲓ ⲛ̃ⲟⲩⲣⲟ ϣⲁ ⲉⲛⲉϩ ⲓ̃ⲧⲁ
ⲡⲉϫⲁϥ ⲛ̃ⲁⲛⲛⲁ ϫⲉ ⲁ̃ⲣⲉϫⲱ ⲙ̃ⲙⲟⲥ ϫⲉ ⲟⲩ ϯϧⲉⲗⲗⲱ ⲡⲉϫⲉ
ϯⲙⲁⲕⲁⲣⲓⲁ̃ ⲛⲁϥ ϫⲉ ⲁ̃ⲛⲟⲕ ⲉⲓϣⲉⲙϣⲓ ⲙ̃ⲡⲁⲟⲩⲣⲟ ⲉⲧϧⲉⲛ
ⲧⲫⲉ ⲓⲏ︦ⲥ︦ ⲡⲭ︦ⲥ︦ ⲫⲁⲓ ⲉ̃ⲧⲁϥⲟⲩⲱⲛϩ ⲛⲏⲓ ⲉ̃ⲃⲟⲗ ϩⲓⲧⲉⲛ
ⲡⲁϣⲏⲣⲓ ⲙ̃ⲙⲉⲛⲣⲓⲧ ⲡⲉϫⲉ ⲡⲓⲡⲁⲣⲁⲃⲁⲧⲏⲥ ϫⲉ ⲛⲁϩϯ ⲉ̃ⲣⲟⲓ
ϫⲉ ⲧⲉⲧⲉⲛⲛⲁϫⲉϩⲏⲟⲩ¹ ⲛ̃ϩⲗⲓ ⲁⲛ ϧⲉⲛ ⲛⲁⲓⲥⲁϫⲓ ⲕⲉ-
ⲅⲁⲣ ⲁ̃ⲛⲟⲕ ϩⲱ ⲁⲓϣⲉ ϧⲉⲛ ⲛⲁⲓⲙⲉⲧⲥⲟϫ ⲟⲩⲟϩ ⲙ̃ⲡⲟⲩϯ-
ϩⲏⲟⲩ ⲛⲏⲓ ⲛ̃ϩⲗⲓ ⲡⲉϫⲉ ⲕⲩⲣⲓⲁ̃ⲕⲟⲥ ⲫⲏ ⲉⲑⲟⲩⲁⲃ ⲛⲉⲡⲓ-
ⲥⲕⲟⲡⲟⲥ ϫⲉ ⲕⲁⲗⲱⲥ ⲁⲕϫⲟⲥ ϫⲉ ⲙⲡⲟⲩϯϩⲏⲟⲩ ⲛⲏⲓ
ⲉⲡⲧⲏⲣϥ ⲁⲕⲭⲱ ⲅⲁⲣ ⲛ̃ⲥⲱⲕ ⲛ̃ⲛⲓⲅⲣⲁⲫⲏ ⲛ̃ⲛⲓϥⲓ ⲛ̃ⲧⲉ ⲫ︦ϯ︦
ⲙ̃ⲡⲉⲕϯϩⲑⲏⲕ ⲉⲟ̃ϣⲟⲩ ⲛ̃ⲕⲁⲗⲱⲥ ⲉⲑⲃⲉ ⲫⲁⲓ ⲙ̃ⲡⲉⲕⲥⲟⲩⲱⲛ
ⲛ̃ⲛⲓⲙⲩⲥⲧⲏⲣⲓⲟⲛ ⲛ̃ⲧⲉ ⲫ︦ϯ︦ ⲫⲏ ⲉⲧⲁϥϯ ⲛⲁⲕ ⲛ̃ⲧⲁⲓⲙⲉⲧ-
ⲟⲩⲣⲟ ⲁⲕϯ ⲅⲁⲣ ϩⲓⲱⲧⲕ ⲙ̃ⲡⲉⲕⲓⲱⲧ ⲡⲓⲇⲓⲁⲃⲟⲗⲟⲥ
ⲁⲕϭⲟϫⲓ ⲛⲥⲁ ⲛⲏ ⲉⲑⲟⲩⲱϣⲧ ⲙ̃ⲡⲭ︦ⲥ︦ ⲉⲑⲃⲉ ⲫⲁⲓ ϧⲉⲛ
ⲟⲩϣⲱⲧ ⲉⲃⲟⲗ ϥⲛⲁⲱ̃ⲗⲓ̃ ⲛⲧⲉⲕⲙⲉⲧⲟⲩⲣⲟ ⲛⲧⲟⲧⲕ ⲟⲩⲟϩ
ⲛⲧⲉϥϣⲉⲣϣⲱⲣⲕ ⲛⲉⲙ ϯⲙⲉⲧϭⲁⲥⲓϩⲏⲧ ⲛ̃ⲧⲉ ⲧⲉⲕⲯⲩⲭⲏ
ⲉⲧⲧⲁⲥⲑⲏⲟⲩⲧ ⲉⲃⲟⲗ ⲡⲉϫⲉ ⲓⲟⲩⲗⲓⲁⲛⲟⲥ ϫⲉ ⲡⲭ︦ⲥ︦ ⲁⲛ
ⲡⲉ ⲉⲧⲁϥϯ ⲛⲏⲓ ⲛ̃ⲧⲁⲓⲙⲉⲧⲟⲩⲣⲟ ⲁⲗⲗⲁ ⲡⲓⲍⲉⲩⲥ ⲡⲉ ⲥⲁ-
ⲧⲟⲧϥ ⲁ ⲟⲩⲇⲉⲙⲱⲛ ⲁⲙⲟⲛⲓ ⲛ̃ϩⲑⲏϥ ⲙ̃ⲡⲉϥ[ⲗⲁⲥ] ⲁϥⲥⲟⲕϥ
ⲉⲃⲟⲗ ϧⲉⲛ ⲣⲱϥ ⲛⲟⲩⲉⲣⲧⲱ ⲟⲩⲟϩ ⲁϥⲁϣϥ ⲉⲡϣⲱⲓ
* ⲛ̃ⲁⲧⲕⲁϩⲓ ⲛ̃ⲟⲩⲟⲩⲛⲟⲩ ⲉ̃ⲧⲁϥⲭⲁϥ ⲇⲉ ⲉϧⲣⲏⲓ ⲁϥϫⲱⲛⲧ
ⲟⲩⲟϩ ⲡⲉϫⲁϥ ϫⲉ ⲭⲛⲁⲩ ϫⲉ ⲉⲧⲁϥⲉⲣⲃⲁⲥⲁⲛⲓⲍⲓⲛ ⲙ̃ⲙⲟⲓ


### 0005

ⲛ̃ⲁϣ ⲛ̃ⲣⲏϯ ⲛ̃ϫⲉ ⲡⲓⲍⲉⲩⲥ ϫⲉ ϯⲱⲟⲩ ⲛ̃ϩⲏⲧ ⲛⲉⲙⲁⲕ
ⲛ̃ⲧⲁⲓϧⲉ ⲧⲏⲣⲥ
Ⲧⲟⲧⲉ ⲁϥⲟⲩⲁϩⲥⲁϩⲛⲓ ⲉⲑⲣⲟⲩⲓ̃ⲛⲓ ⲛ̃ⲛⲓⲥⲕⲉⲩⲟⲥ ⲛ̃ⲃⲁⲥⲁ-
ⲛⲓⲥⲧⲏⲣⲓⲟⲛ ⲛ̃ⲥⲉⲭⲁⲩ ⲙⲡⲉϥⲙⲑⲟ ⲉⲃⲟⲗ ⲡⲉϫⲁϥ ⲛⲁϥ ϫⲉ
ⲁⲣⲓⲑⲩⲥⲓⲁ̃ ⲙ̃ⲡⲉⲣⲙⲟⲩ ⲛ̃ⲕⲁⲕⲱⲥ ϧⲉⲛ ⲛⲁⲓⲃⲁⲥⲁⲛⲓⲥⲧⲏⲣⲓⲟⲛ
ⲉⲧϩⲱⲟⲩ ⲛⲉⲙ ϩⲁⲛⲕⲉⲭⲱⲟⲩⲛⲓ ⲉⲩϩⲱⲟⲩ ⲉ̃ϩⲟⲧⲉ ⲛⲁⲓ
ⲉⲓⲛⲁⲑⲁⲙⲓⲱ̃ⲟⲩ ⲡⲉϫⲉ ⲕⲩⲣⲓⲁⲕⲟⲥ ⲛⲁϥ ϫⲉ ⲙ̃ⲙⲟⲛ ϣϫⲟⲙ
ⲙ̃ⲙⲟⲕ ⲉⲑⲁⲙⲓⲟ̃ ⲛϩⲁⲛⲇⲓⲙⲱⲣⲓⲁ̃ ⲛ̃ⲥⲱⲙⲁⲧⲓⲕⲟⲛ ⲉⲩⲧⲉⲛ-
ⲑⲱⲛⲧ ⲉ̃ⲛⲓⲇⲓⲙⲱⲣⲓⲁ ⲉⲧⲁ ⲡⲭ︦ⲥ︦ ⲥⲉⲃⲧⲱⲧⲟⲩ ⲙ̃ⲯⲩⲭⲏ
ⲛⲓⲃⲉⲛ ⲛ̃ⲁⲡⲟⲥⲧⲁⲧⲏⲥ ⲉ̃ⲧⲁⲩϫⲟⲗϥ ⲉⲃⲟⲗ ⲙ̃ⲡⲉⲕⲣⲏϯ ⲡⲓ-
ⲥⲱⲙⲁ ⲙⲉⲛ ⲅⲁⲣ ϥϣⲟⲡ¹ ϧⲓⲥⲓ ⲡⲣⲟⲥ ⲟⲩⲕⲟⲩϫⲓ ϥϫⲫⲟ ⲇⲉ
ⲛ̃ⲟⲩⲛⲓϣϯ ⲛ̃ϩⲏⲟⲩ ⲛ̃ϯⲯⲩⲭⲏ ⲙⲫⲣⲏϯ ⲅⲁⲣ ⲙ̃ⲡⲓⲕⲁϩⲓ
ⲉⲩϩⲓⲟⲩⲓ̃ ⲛϧⲏⲧϥ ⲙ̃ⲡⲓⲙⲁⲛϭⲁⲗⲉ ⲟⲩⲟϩ ⲉⲩⲫⲟⲣⲥ ⲙ̃ⲙⲟϥ
ⲙ̃ⲡⲓϩⲉⲃⲓ ⲉϣⲁϥⲓ̃ⲛⲓ ⲙ̃ⲡⲉϥⲟⲩⲧⲁϩ ⲉⲡϣⲱⲓ ⲛ̃ϩⲁⲛⲙⲏϣ
ⲛ̃ⲕⲱⲃ ⲡⲁⲓⲣⲏϯ ϩⲱϥ ⲡⲓⲥⲱⲙⲁ ϩⲟⲧⲁⲛ ⲁϥϣⲁⲛϧⲟⲙϧⲉⲙ
ⲟⲩⲟϩ ⲛ̃ⲧⲉϥⲃⲱⲗ ⲉ̃ⲃⲟⲗ ϩⲓⲧⲉⲛ ϩⲁⲛϧⲓⲥⲓ ⲉⲩⲟϣ ⲧⲟⲧⲉ
ϣⲁⲣⲉ ϯⲯⲩⲭⲏ ⲣⲉⲧⲧⲉⲛϩ ⲛ̃ⲧⲉⲥϩⲱⲗ ⲉ̃ⲡϭⲓⲥⲓ ϣⲁ ⲡⲭ︤ⲥ︥ ⲫⲏ
ⲉⲧⲁϥϣⲉⲡ ϧⲓⲥⲓ ⲉⲑⲃⲏⲧⲥ ⲉⲥⲱ̃ⲗⲓ ⲛ̃ⲛⲓⲭⲛⲁⲩ ⲛ̃ⲧⲉ ⲛⲓϫⲣⲱϫ
ⲉⲩⲕⲏⲃ ⲛ̃ⲣ̅ ⲛ̃ⲕⲱⲃ *ⲡⲉϫⲉ ⲓⲟⲩⲗⲓⲁⲛⲟⲥ ϫⲉ ⲟⲩ ⲟⲩⲛ ⲡⲉ
ⲉ̃ⲧⲉⲕⲙⲉⲩⲓ̃ ⲉ̃ⲣⲟϥ ⲕⲩⲣⲓⲁ̃ⲕⲉ ⲕⲥⲉⲃⲧⲱⲧ ⲉ̃ϣⲉⲡ ⲙ̃ⲕⲁϩ ⲟⲩⲟϩ
ⲉⲙⲟⲩ ϧⲁ ⲫⲏ ⲉ̃ⲧⲁⲩⲉⲣⲥⲧⲁⲩⲣⲱⲛⲓⲛ ⲙ̃ⲙⲟϥ ⲡⲉϫⲉ ⲕⲩ-
ⲣⲓⲁⲕⲟⲥ ϫⲉ ϯⲥⲉⲃⲧⲱⲧ ⲟⲩⲟϩ ϯⲉⲣϩⲉⲗⲡⲓⲥ ⲟⲩⲟϩ ϯⲣⲱⲟⲩⲧ
ⲡⲉϫⲉ ⲓⲟⲩⲗⲓⲁ̃ⲛⲟⲥ ϫⲉ ⲭⲱ ⲛ̃ⲥⲱⲕ ⲛ̃ⲧⲁⲓⲡⲗⲁⲛⲏ ⲟⲩⲟϩ
ⲛ̃ⲧⲉⲕⲥⲟⲩⲱⲛ² ⲛⲓⲛⲟⲩϯ ⲙ̃ⲙⲏⲓ ⲟⲩⲟϩ ⲛⲣⲉϥⲧⲟⲩϫⲟ ⲟⲩⲟϩ
ⲡⲉϫⲉ ⲡⲓⲁ̃ⲅⲓⲟⲥ ⲛⲉⲡⲓⲥⲕⲟⲡⲟⲥ ϫⲉ ⲛ̃ⲛⲉⲥϣⲱⲡⲓ ⲛⲏⲓ ⲛ̃ⲧⲁ-
ⲟⲩⲱϣⲧ ⲛⲛⲁⲓⲁⲯⲩⲭⲟⲛ ⲛⲣⲉϥⲧⲁⲕⲉⲯⲩⲭⲏ ⲛ̃ⲧⲁⲭⲱ
ⲛⲥⲱⲓ ⲛⲫⲏ ⲉⲧⲁϥⲉⲛⲧ ⲉⲃⲟⲗϧⲉⲛ ϯⲡⲗⲁⲛⲏ ⲉⲛⲁⲓⲛ̃ϧⲏⲧⲥ
ⲛ̃ϣⲟⲣⲡ ⲓ︦ⲏ︦ⲥ︦ ⲡⲭ︦ⲥ︦ ⲟⲩⲟϩ ⲛ̃ⲧⲁϣⲱⲡⲓ ⲉⲓⲟ̃ⲛⲓ ⲙ̃ⲙⲟⲕ ⲛⲁ-
ⲡⲟⲥⲧⲁⲧⲏⲥ ⲉⲁⲕⲭⲱ ⲛ̃ⲥⲱⲕ ⲙ̃ⲫⲏ ⲉⲧⲁϥⲉⲣⲡⲉⲑⲛⲁⲛⲉϥ ⲛⲁⲕ


### 0006

ⲁⲕϣⲉⲙϣⲓ ⲛ̃ϩⲁⲛϣⲉ ⲛⲉⲙ ϩⲁⲛⲱ̃ⲛⲓ ⲛⲁⲓ ⲉⲧⲉⲙⲙⲟⲛ
ϣϫⲟⲙ ⲙ̃ⲙⲱⲟⲩ ⲉ̃ⲛⲁⲩ ⲙ̃ⲃⲟⲗ ⲟⲩⲇⲉ ⲉⲥⲱⲧⲉⲙ ⲟⲩⲇⲉ
ⲉ̃ⲙⲟϣⲓ ⲉⲩⲉ̃ⲓ̃ⲛⲓ ⲙ̃ⲙⲱⲟⲩ ⲡⲉϫⲁϥ ⲛ̃ϫⲉ ⲡⲓⲡⲛ︦ⲁ︦ ⲉⲑⲟⲩⲁⲃ
ⲛ̃ϫⲉ ⲟⲩⲟⲛ ⲛⲓⲃⲉⲛ ⲉⲣⲉ ϩⲑⲏⲟⲩ ⲭⲏ ⲉ̃ⲣⲱⲟⲩ¹ ⲉⲁⲕϫⲱⲕ
ⲉⲃⲟⲗ ⲙ̃ⲫⲟⲩⲱϣ ⲛ̃ⲛⲓⲇⲉⲙⲱⲛ ⲛⲁⲓ ⲉⲧⲉⲕⲑⲏϣ ⲉⲑⲣⲟⲩϯϩⲁⲡ
ⲉ̃ⲣⲟⲕ ⲛⲉⲙⲱⲟⲩ ϧⲉⲛ ϯⲅⲉⲉⲛⲛⲁ ⲛ̃ⲧⲉ ⲡⲓⲭⲣⲱⲙ
Ⲉⲧⲁϥⲥⲱⲧⲉⲙ ⲇⲉ ⲉⲛⲁⲓ ⲛ̃ϫⲉ ⲓⲟⲩⲗⲓⲁⲛⲟⲥ ⲁϥϫⲱⲛⲧ
ⲙ̃ⲫⲣⲏϯ ⲛ̃ⲟⲩⲑⲏⲣⲓⲟⲛ ⲁϥⲟⲩⲁϩⲥⲁϩⲛⲓ ⲉⲑⲣⲟⲩⲓ̃ⲛⲓ ⲛ̃ϩⲁⲛ-
ⲗⲁⲙⲡⲁⲥ ⲛⲭⲣⲱⲙ ⲛ̃ⲥⲉϩⲓⲧⲟⲩ ϧⲁ * ⲛⲉϥⲥⲫⲓⲣⲱⲟⲩⲓ̃ ⲉϥ-
ϫⲱ ⲙ̃ⲙⲟⲥ ⲛⲁϥ ϫⲉ ⲑⲁⲓ ⲧⲉ ϯⲅⲉⲉⲛⲛⲁ ⲛ̃ⲭⲣⲱⲙ ⲉ̃ⲧⲟⲩ-
ⲛⲁϩⲓⲧ ⲉ̃ⲣⲟⲥ ⲡⲉϫⲉ ⲡⲓⲁ̃ⲅⲓⲟⲥ ⲛⲁϥ ϫⲉ ⲁⲙⲟⲓ ⲱ̃ ⲡⲓⲉ̃ⲃⲓⲏⲛ
ϣⲁ ⲫⲁⲓ ⲙ̃ⲙⲁⲩⲁⲧϥ ⲡⲉ ⲡⲓⲭⲣⲱⲙ ⲉ̃ⲧⲟⲩⲛⲁϩⲓⲧⲕ ⲉⲣⲟϥ
ⲉⲑⲃⲉ ϫⲉ ⲡⲁⲓⲭⲣⲱⲙ ⲫⲁⲓ ϣⲁⲣⲉ ⲟⲩⲕⲟⲩϫⲓ ⲙ̃ⲙⲱⲟⲩ
ⲟϣⲙⲉϥ ⲟⲩⲟϩ ⲙ̃ⲫⲣⲏϯ ϩⲱⲕ ⲉⲧⲉⲕⲛⲁⲩ ⲛ̃ϯⲉⲣⲉⲥⲑⲁⲛⲉⲥⲑⲉ
ⲉⲣⲟϥ ⲁⲛ ⲉⲡⲧⲏⲣϥ ⲫⲏ ⲇⲉ ⲛ̃ⲑⲟϥ ⲉ̃ⲧⲟⲩⲛⲁϩⲓⲧⲕ ⲉ̃ⲣⲟϥ
ⲛⲉⲙ ⲡⲉⲕⲓⲱⲧ ⲡⲓⲇⲓⲁⲃⲟⲗⲟⲥ ⲛⲓⲙⲱⲟⲩ ⲉⲧϧⲉⲛ ⲧⲫⲉ ⲛⲉⲙ
ⲛⲏ ⲉⲧϩⲓϫⲉⲛ ⲡⲕⲁϩⲓ ⲛⲉⲙ ⲛⲏ ⲉⲧⲥⲁⲡⲉⲥⲏⲧ ⲙ̃ⲡⲕⲁϩⲓ
ⲛ̃ⲛⲟⲩϣϭⲉⲛⲟϥ ⲡⲉϫⲉ ⲓⲟⲩⲗⲓⲁⲛⲟⲥ ϫⲉ ⲓⲥϫⲉ ⲁⲕϭⲣⲟ ⲉ̃ⲡⲁⲓ-
ⲭⲣⲱⲙ ⲫⲁⲓ ϯⲛⲁⲓ̃ⲛⲓ ⲉ̃ϫⲱⲕ ⲛ̃ⲕⲉⲭⲣⲱⲙ ⲛ̃ⲁⲧⲉⲣⲉⲃⲟⲗ ⲉ̃ⲣⲟϥ
ⲧⲟⲧⲉ ⲁϥⲟⲩⲁϩⲥⲁϩⲛⲓ ⲉⲑⲣⲟⲩⲃⲱⲗ ⲛ̃ⲟⲩⲧⲁϩⲧ ⲉ̃ⲃⲟⲗ ϧⲉⲛ
ⲟⲩⲭⲣⲱⲙ ⲛ̃ⲥⲉϫⲟϣϥ ⲉϧⲣⲏⲓ ⲉ̃ϩⲑⲏϥ ⲡⲉϫⲉ ⲡⲓⲙⲁⲕⲁⲣⲓⲟⲥ
ⲛ̃ⲉⲡⲓⲥⲕⲟⲡⲟⲥ ϫⲉ ⲁ̃ⲗⲏⲑⲱⲥ ⲁϥⲙ̃ⲫⲣⲏϯ² ⲛ̃ⲟⲩⲙⲱⲟⲩ
ⲉϥⲕⲏⲃ ϧⲉⲛ ⲧⲁϣⲃⲱⲃⲓ ϩⲓⲧⲉⲛ ⲧϫⲟⲙ ⲙ̃ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦
Ⲡⲉϫⲉ ⲡⲓⲡⲁⲣⲁⲃⲁⲧⲏⲥ ϫⲉ ⲓⲥ ϩⲏⲡⲡⲉ ⲡⲓϫⲱⲛⲧ ⲛ̃ⲧⲉ-
ⲡⲓⲭⲣⲱⲙ ⲉⲑⲛⲁϣⲧ ⲛⲏⲟⲩ ⲉ̃ϫⲱⲕ ⲟⲩⲟϩ ⲙⲁⲣⲓⲛⲁⲩ ϫⲉ
ⲫⲏ ⲉⲧⲉⲙⲙⲁⲩ ⲛ̃ⲁϣⲛⲁϩⲙⲉⲕ ⲧⲟⲧⲉ ⲁϥⲟⲩⲁϩⲥⲁϩⲛⲓ
ⲉⲑⲣⲟⲩⲓ̃ⲛⲓ ⲛ̃ⲟⲩϭⲗⲟϫ ⲛ̃ⲃⲉⲛⲓⲡⲓ ⲛ̃ⲥⲉϣⲧⲟ ⲙ̃ⲡⲓⲙⲁⲕⲁⲣⲓⲟⲥ
ⲉ̃ϫⲱϥ ⲟⲩⲟϩ ⲛ̃ⲥⲉⲥⲁϩϯ ϧⲁⲣⲟϥ ⲥⲁⲡⲉⲥⲏⲧ ⲙ̃ⲙⲟϥ *ⲉⲩϫⲉϣ
ⲱⲧ ⲛⲉⲙ ⲛⲉϩ ⲉ̃ϫⲱϥ ϣⲁⲧⲉ ⲡⲓⲭⲣⲱⲙ ⲟⲩⲱⲙ ⲛ̃ⲥⲁ


### 0007

ⲛⲉϥⲥⲡⲗⲁⲅⲛⲟⲛ ⲉϥϫⲱ ⲙⲙⲟⲥ ϫⲉ ϯⲛⲟⲩ ⲭⲛⲁϭⲣⲟ ⲉⲡⲓⲭⲣⲱⲙ
ⲡⲓⲙⲁⲕⲁⲣⲓⲟⲥ ⲇⲉ ⲁϥⲧⲱⲃϩ ⲙ̃ⲡⲁⲓⲣⲏϯ ⲉϥϫⲱ ⲙ̃ⲙⲟⲥ ϫⲉ
ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲡⲓⲇⲏⲙⲓⲟⲩⲣⲅⲟⲥ ⲛⲧⲉ ⲉⲛⲭⲁⲓ ⲛⲓⲃⲉⲛ ⲡⲥⲱⲧⲏⲣ
ⲛ̃ⲧⲁⲯⲩⲭⲏ ⲛⲉⲙ ⲡⲁⲥⲱⲙⲁ ⲛ̃ⲑⲟⲕ ⲡⲉ ⲧⲁϫⲟⲙ ⲛⲉⲙ
ⲡⲁⲧⲁϫⲣⲟ ⲛⲉⲙ ⲡⲁⲙⲁⲛⲫⲱⲧ ⲡⲁⲛⲁϣϯ ⲡⲁⲣⲉϥⲧⲟⲩϫⲟⲓ
ⲡⲁⲣⲉϥϯ ⲉϩⲣⲏⲓ ⲉϫⲱⲓ ⲉϯⲉⲣϩⲉⲗⲡⲓⲥ ⲉ̃ⲣⲟϥ ϫⲟⲩϣⲧ ⲡϭ︦ⲥ︦
ⲉϫⲉⲛ ⲡⲉⲕⲃⲱⲕ ⲛⲟϩⲉⲙ ⲙ̃ⲡϣⲏⲣⲓ ⲛ̃ⲧⲉ ⲧⲉⲕⲃⲱⲕⲓ ϫⲉ
ⲙ̃ⲙⲟⲛ ⲕⲉⲟⲩⲁⲓ ⲉ̃ⲃⲏⲗ ⲉ̃ⲣⲟⲕ ⲡϭ︦ⲥ̄ ⲓⲏ︦ⲥ︦ ⲡⲭ︦ⲥ︦ ⲛⲁⲓ ⲇⲉ ⲉϥϫⲱ
ⲙ̃ⲙⲱⲟⲩ ⲁϥⲉⲣϣⲫⲏⲣⲓ ⲛ̃ϫⲉ ⲡⲓⲧⲩⲣⲁⲛⲛⲟⲥ ⲟⲩⲟϩ ⲡⲉϫⲁϥ
ϫⲉ ϣⲉ ⲡⲓⲍⲉⲩⲥ ϯⲉⲣϣⲫⲏⲣⲓ ϫⲉ ⲉ̃ⲧⲓ ϥⲟⲛϧ ⲉϥⲙⲉϩ ⲇⲉ
ⲉⲃⲟⲗ ϧⲉⲛ ⲟⲩϣⲫⲓⲧ ⲡⲉϫⲁϥ ϫⲉ ⲁⲕϭⲣⲟ ⲉ̃ⲡⲓⲭⲣⲱⲙ
ⲕⲩⲣⲓⲁⲕⲉ ⲡⲉϫⲉ ⲡⲓⲁ̃ⲅⲓⲟⲥ ⲛⲁϥ ϫⲉ ⲁⲓϭⲣⲟ ⲟⲩⲟϩ ϯⲛⲁϭⲣⲟ
ⲟⲛ ϩⲓⲧⲉⲛ ⲡⲓϩⲙⲟⲧ ⲛ̃ⲧⲉ ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲟⲩⲙⲟⲛⲟⲛ ⲁ̃ⲛⲟⲕ
ⲁⲗⲗⲁ ⲛⲉⲙ ⲟⲩⲟⲛ ⲛⲓⲃⲉⲛ ⲉ̃ⲧⲉⲣϩⲉⲗⲡⲓⲥ ⲉ̃ⲣⲟϥ ⲛ̃ⲑⲟⲕ ⲇⲉ
ⲛ̃ⲑⲟⲕ ⲡⲓⲭⲣⲱⲙ ⲛⲁⲧϭⲉⲛⲟ ⲛⲁⲥⲓ ⲙ̃ⲙⲟⲕ ⲉⲑⲃⲉ ⲧⲉⲕⲙⲉⲧⲁⲥⲉⲃⲏⲥ
ⲉⲧⲁϥϫⲱⲛⲧ ⲇⲉ ⲛ̃ϫⲉ ⲡⲓⲡⲁⲣⲁⲃⲁⲧⲏⲥ ⲁϥⲟⲩⲁϩⲥⲁϩⲛⲓ
ⲉϩⲓⲟⲩⲓ̃ ⲉ̃ϫⲉⲛ ⲧⲉϥϭⲓⲥⲓ ⲛ̃ϩⲁⲛϣⲃⲱⲧ ⲉⲩⲗⲏⲕ *ⲉϥϣⲧⲏⲟⲩⲧ
ⲉ̃ϫⲉⲛ ⲡⲓϭⲗⲟϫ ⲛ̃ⲃⲉⲛⲓⲡⲓ ⲉⲣⲉ ⲡⲓⲭⲣⲱⲙ ⲙⲟϩ ϧⲁⲣⲟϥ ⲡϭ︦ⲥ︦
ⲇⲉ ⲛⲁϥⲉⲣⲥⲕⲉⲡⲁⲍⲓⲛ ⲙ̃ⲙⲟϥ ⲡⲉ ⲟⲩⲟϩ ⲛⲁϥⲉ̃ⲙⲓ ⲁ̃ⲛ
ⲉ̃ⲉⲙⲕⲁϩ ⲉⲡⲧⲏⲣϥ ⲓⲟⲩⲗⲓⲁⲛⲟⲥ ⲇⲉ ⲁϥϫⲱⲛⲧ ⲉⲛⲓϩⲩⲡⲉⲣⲏⲧⲏⲥ
ⲡⲉϫⲁϥ ⲛⲱⲟⲩ ϫⲉ ⲉⲑⲃⲉ ⲟⲩ ⲧⲉⲧⲉⲛϭⲉⲣⲟ ⲁⲛ ⲙ̃ⲡⲓⲭⲣⲱⲙ
ⲛ̃ⲕⲁⲗⲱⲥ ⲛ̃ⲑⲱⲟⲩ ⲇⲉ ⲡⲉϫⲱⲟⲩ ϫⲉ ϩⲏⲡⲡⲉ ⲭⲛⲁⲩ ϫⲉ
ϥϯϣⲁϩ ϧⲉⲛ ⲟⲩⲙⲉⲧϩⲟⲩⲟ̃ ⲕⲉⲅⲁⲣ ⲑⲁⲓ ϩⲱⲛ ⲧⲉ
ⲧⲉⲛⲉⲡⲓⲑⲩⲙⲓⲁ̃ ⲛⲁⲓ ⲉⲧⲁⲩϫⲟⲧⲟⲩ ⲁ ⲡⲓⲭⲣⲱⲙ ⲙⲟϣⲓ
ⲉ̃ⲃⲟⲗ ⲁϥⲣⲱⲕϩ ⲙⲓ︦ⲇ︦ ⲛ̃ϧⲏⲧⲟⲩ
Ⲡⲉϫⲉ ⲡⲓⲥⲩⲛⲕⲁⲑⲉⲇⲣⲟⲥ ⲛ̃ⲧⲉ ⲡⲟⲩⲣⲟ ⲛⲁϥ ϫⲉ ⲙⲁⲣⲟⲩ-
ϩⲓⲱ̃ⲛⲓ ⲉ̃ϫⲉⲛ ⲫⲁⲓ ⲙ̃ⲙⲟⲛ ϥⲛⲁⲑⲣⲉ ⲡⲓⲭⲣⲱⲙ ⲟⲩⲟⲙⲧⲉⲛ
ⲧⲏⲣⲉⲛ ϩⲓⲧⲉⲛ ⲛⲉϥⲙⲁⲅⲓⲁ ⲉⲧⲁⲩϩⲓⲱ̃ⲛⲓ ⲇⲉ ⲉ̃ⲣⲟϥ ⲛⲉ
ⲙ̃ⲡⲁⲣⲉ ⲱ̃ⲛⲓ ⲧⲁϩⲟϥ ⲡⲉ ⲁⲗⲗⲁ ϣⲁⲩⲕⲟⲧⲟⲩ ⲉ̃ⲫⲁϩⲟⲩ
ⲛ̃ⲥⲉⲧⲁⲕⲟ ⲛ̃ϩⲁⲛⲙⲏϣ ϧⲉⲛ ⲛⲓⲁⲑⲛⲟⲩϯ ⲉⲑⲙⲏⲛ ⲉⲡⲟⲩⲣⲟ
ⲧⲟⲧⲉ ⲁϥⲟⲩⲁϩⲥⲁϩⲛⲓ ⲛ̃ϫⲉ ⲓⲟⲩⲗⲓⲁ̃ⲛⲟⲥ · ⲉⲑⲣⲟⲩⲧⲁϩⲟϥ


### 0008

ⲉⲣⲁⲧϥ ⲙ̃ⲡⲉϥⲙ̃ⲑⲟ ⲡⲉϫⲁϥ ⲛⲁϥ ϫⲉ ⲙ̃ⲡⲉⲕϫⲉⲙ ⲡⲉⲕⲛⲟⲩⲥ
ⲕⲩⲣⲓⲁ̃ⲕⲉ ⲛ̃ⲧⲉⲕⲉⲣⲑⲩⲥⲓⲁ ⲙ̃ⲡⲓⲛⲓϣϯ ⲛ̃ⲛⲟⲩϯ ⲡⲓⲍⲉⲩⲥ ⲡⲉϫⲉ
ⲡⲓⲁ̃ⲅⲓⲟⲥ ⲛⲁϥ ϫⲉ ⲱ̃ ⲡⲓⲁⲑⲛⲟⲩϯ ⲛⲑⲟⲕ ⲙⲁⲗⲗⲟⲛ ⲡⲉ
ⲉⲧⲁⲕⲭⲁ ⲡⲉⲕⲛⲟⲩⲥ ⲉⲁⲕϣⲱⲡⲓ ⲙ̃ⲡⲁⲣⲁⲃⲁⲧⲏⲥ ⲛⲧⲁⲓϧⲉ
ⲧⲏⲣⲥ ϩⲱⲥⲇⲉ ⲛ̃ⲧⲉⲕⲉⲣⲡⲱⲃϣ ⲙ̃ⲫ︦ϯ︦ ⲉ̃ⲧⲁϥⲑⲁⲙⲓⲟⲕ ⲛⲉⲙ
ⲡⲱⲟⲩ ⲙ̃ⲡⲉϥⲑⲩⲥⲓⲁⲥⲧⲏⲣⲓⲟⲛ ⲉⲑⲟⲩⲁⲃ *ⲛ̃ⲧⲉⲕϣⲉⲙϣⲓ
ⲛ̃ϩⲁⲛϣⲉ ⲛⲉⲙ ϩⲁⲛⲱ̃ⲛⲓ ⲛ̃ⲁⲧⲯⲩⲭⲏ ⲡⲉϫⲉ ⲡⲓⲡⲁⲣⲁⲛⲟⲙⲟⲥ
ϫⲉ ⲛⲁⲓϣⲉⲙϣⲓ ⲙⲉⲛ ⲛ̃ⲓⲏ︤ⲥ︥ ⲙ̃ⲡⲓⲥⲏⲟⲩ ⲉ̃ⲧⲉⲙⲙⲁⲩ ⲉⲧⲉ
ⲙ̃ⲡⲉϥϯϩⲏⲟⲩ ⲇⲉ ⲛⲏⲓ ⲛ̃ϩⲗⲓ ⲧⲟⲧⲉ ⲁⲓⲉⲣⲙⲉⲧⲁⲛⲟⲓⲛ ⲁⲓ-
ⲥⲟⲩⲱⲛ¹ ⲛⲓⲛⲟⲩϯ ⲛ̃ⲧⲁⲫⲙⲏⲓ ⲛⲏ ⲉⲧϯ ⲙⲡⲓⲟⲩϫⲁⲓ ⲛⲉⲙ
ⲡⲓϭⲣⲟ ⲛⲏⲓ ⲡⲉϫⲉ ⲡⲓⲁ̃ⲅⲓⲟⲥ ⲛⲁϥ ϫⲉ ϯⲉ̃ⲙⲓ ϫⲉ ⲉⲧⲁⲕⲥⲟⲩⲉⲛ
ⲡⲉⲕⲓⲱⲧ ⲡⲓⲇⲓⲁⲃⲟⲗⲟⲥ ⲡⲓⲡⲁⲣⲁⲃⲁⲧⲏⲥ ⲇⲉ ⲁϥⲉⲣⲕⲉⲗⲉⲩⲓⲛ
ⲉⲑⲣⲟⲩϣⲱⲧ ⲉ̃ⲃⲟⲗ ⲛ̃ⲧⲉϥϫⲓϫ ⲛ̃ⲟⲩⲓ̃ⲛⲁⲙ ⲉϥϫⲱ ⲙⲙⲟⲥ
ϫⲉ ⲑⲁⲓ ⲧⲉ ϯϫⲓϫ ⲉⲧⲁⲥⲥϧⲁⲓ ⲛ̃ϯⲉⲡⲓⲥⲧⲟⲗⲏ ⲉⲕⲫⲱⲛϩ
ⲙ̃ⲡϩⲏⲧ ⲛ̃ⲛⲓⲙⲏϣ ⲉϣⲧⲉⲙⲥⲟⲩⲉⲛ ⲛⲓⲛⲟⲩϯ ⲡⲉϫⲉ ⲫⲏ
ⲉⲑⲟⲩⲁⲃ ⲛ̃ⲉⲡⲓⲥⲕⲟⲡⲟⲥ ⲕⲩⲣⲓⲁ̃ⲕⲟⲥ ϫⲉ ⲕⲁⲗⲱⲥ ⲁⲕⲁⲓⲥ
ⲡⲓⲟⲩϩⲟⲣ ⲉⲧϭⲁϧⲉⲙ ⲛ̃ⲕⲥⲱⲟⲩⲛⲟⲩ² ⲁⲛ ϫⲉ ⲟⲩⲱⲛϧ ⲛⲉⲛⲉϩ
ⲡⲉⲧⲁⲕⲥⲉⲃⲧⲱⲧϥ ⲛⲏⲓ ϧⲁⲧϩⲏ ⲙⲉⲛ ⲅⲁⲣ ⲙ̃ⲡⲁϯⲥⲟⲩⲉⲛ
ⲡⲁⲥⲱⲧⲏⲣ ⲓⲏ︦ⲥ︦ ⲡⲭ︦ⲥ︦ ⲛⲉ ϣⲁⲓⲥϧⲁⲓ ⲉ̃ⲛⲓⲥⲩⲛⲁⲅⲱⲅⲏ ⲛ̃ⲧⲉ
ⲛⲓⲓⲟⲩⲇⲁⲓ ⲛ̃ⲟⲩⲙⲏϣ ⲛ̃ⲥⲟⲡ ⲉϣⲧⲉⲙⲑⲣⲟⲩⲛⲁϩϯ ⲉ̃ⲣⲟϥ
ⲭⲛⲁⲩ ϫⲉ ⲡⲓⲥⲕⲁⲛⲇⲁⲗⲟⲛ ⲉⲧϧⲉⲛ ⲡⲁⲥⲱⲙⲁ ⲁⲕϣⲁⲧϥ
ⲉ̃ⲃⲟⲗ ⲙ̃ⲙⲟϥ ⲛⲁⲛⲉⲥ ⲅⲁⲣ ⲛⲏⲓ ⲛ̃ⲧⲉ ⲟⲩⲁⲓ ⲛ̃ⲛⲁⲙⲉⲗⲟⲥ
ⲧⲁⲕⲟ ⲛⲥⲉϣⲧⲉⲙϩⲓⲟⲩⲓ̃ ⲙⲡⲁⲥⲱⲙⲁ ⲧⲏⲣϥ ⲉ̃ϯⲅⲉⲉⲛⲛⲁ
ⲡⲉϫⲁϥ ⲛ̃ϫⲉ ⲡⲓⲡⲁⲣⲁⲃⲁⲧⲏⲥ ϫⲉ ⲟⲩⲕⲟⲩⲛ ⲁⲩϫⲉ ⲡⲓⲕⲉ-
ⲃⲁⲗ ⲛ̃ⲟⲩⲓ̃ⲛⲁⲙ *ⲛⲉⲙ ϯϭⲁⲗⲟϫ ⲟⲩⲟϩ ⲁϥⲑⲣⲟⲩⲫⲱⲣⲕ
ⲙ̃ⲡⲉϥⲃⲁⲗ ⲉ̃ⲃⲟⲗ ⲟⲩⲟϩ ⲛ̃ⲥⲉϫⲱϫⲓ ⲉ̃ⲃⲟⲗ ⲛ̃ⲧⲉϥⲕⲉϭⲁⲗⲟϫ
Ⲧⲉϥϧⲉⲗⲗⲱ ⲇⲉ ⲙ̃ⲙⲁⲩ ϯⲙⲁⲕⲁⲣⲓⲁ̃ ⲁⲛⲛⲁ ⲛⲁⲥⲟ̃ϩⲓ
ⲉⲣⲁⲧⲥ ϧⲁⲧⲟⲧϥ ϧⲉⲛ ⲛⲁⲓ ⲧⲏⲣⲟⲩ ⲉⲥϯⲛⲟⲙϯ ⲛⲁϥ ⲉⲥ-
ϫⲱ ⲙⲙⲟⲥ ⲛⲁϥ ϫⲉ ϭⲣⲟ ⲙ̃ⲙⲟⲕ ⲕⲁⲛ ⲓⲥϫⲉ ⲕⲧⲁϫⲣⲏⲟⲩⲧ


### 0009

ϫⲉⲙⲛⲟⲙϯ ⲕⲁⲛ ⲓⲥϫⲉ ⲕϫⲉⲙⲛⲟⲙϯ ⲣⲱ ⲁⲕϫⲱⲕ ⲅⲁⲣ
ⲉⲃⲟⲗ ⲙ̃ⲫⲛⲟⲙⲟⲥ ⲙ̃ⲡⲉⲕϭ︦ⲥ︦ ⲛⲁⲓ ⲇⲉ ⲉ̃ⲧⲁⲥϫⲟⲧⲟⲩ ⲁ ⲡⲓ-
ⲧⲩⲣⲁⲛⲛⲟⲥ ⲑⲣⲟⲩⲱ̃ⲗⲓ ⲙⲡⲓⲃⲁⲗ ⲛⲉⲙ ϯϫⲓϫ ⲛⲉⲙ ϯϭⲁ-
ⲗⲟϫ ⲁⲩⲥⲁⲧⲟⲩ ⲉϧⲟⲩⲛ ⲉ̃ⲡⲉⲥϩⲟ ⲉϥϫⲱ ⲙ̃ⲙⲟⲥ ⲛⲁⲥ ϫⲉ
ⲓⲥ ⲫⲛⲟⲙⲟⲥ ⲙ̃ⲡⲉϥϭ︦ⲥ︦ ⲙⲁⲣⲉϥⲓ̃ ϯⲛⲟⲩ ⲛ̃ⲧⲉϥⲧⲟⲩϫⲟϥ ⲡⲉϫⲉ
ϯⲙⲁⲕⲁⲣⲓⲁ̃ ⲁⲛⲛⲁ ϫⲉ ⲱⲟⲩ ⲛ̃ϩⲏⲧ ⲛ̃ⲟⲩⲕⲟⲩϫⲓ ⲱ ⲫⲏ
ⲉⲧⲥϩⲟⲩⲟⲣⲧ ⲟⲩⲟϩ ⲭⲛⲁⲛⲁⲩ ⲉ̃ⲧϫⲟⲙ ⲙ̃ⲡⲁⲛⲟⲩϯ ⲧⲟⲧⲉ
ⲁⲥⲱ̃ⲗⲓ ⲛ̃ⲛⲓⲙⲉⲗⲟⲥ ⲉⲑⲟⲩⲁⲃ ⲛ̃ⲧⲉ ⲡⲓⲙⲁⲕⲁⲣⲓⲟⲥ ⲛⲉⲡⲓⲥⲕⲟ-
ⲡⲟⲥ ⲁⲥⲧⲉⲙ ⲡⲓⲟⲩⲁⲓ ⲡⲓⲟⲩⲁⲓ ⲉ̃ⲡⲉϥⲙⲁ ⲟⲩⲟϩ ⲡⲉϫⲁⲥ ⲛⲁϥ
ϫⲉ ⲡⲁϣⲏⲣⲓ ⲟⲩⲟϩ ⲡⲁⲓⲱⲧ ⲁ̃ϫⲟⲥ ϫⲉ ϧⲉⲛ ⲫⲣⲁⲛ ⲙ̃ⲡⲭ︤ⲥ︥
ⲉⲧⲁϥϫⲟⲥ ⲇⲉ ⲥⲁⲧⲟⲧϥ ⲁ̃ ⲛⲉϥⲙⲉⲗⲟⲥ ⲉⲣ ⲡⲟⲩⲣⲏϯ ⲛ̃ⲧⲉ
ϣⲟⲣⲡ ⲡⲓⲙⲏϣ ⲇⲉ ⲧⲏⲣϥ ⲁⲩⲱϣ ⲉ̃ⲃⲟⲗ ⲉⲩϫⲱ ⲙ̃ⲙⲟⲥ
ϫⲉ ⲟⲩⲛⲓϣϯ ⲧⲉ ⲧϫⲟⲙ ⲙ̃ⲡⲭ︤ⲥ︥ ⲉⲧⲁϥϣⲫⲓⲧ ⲇⲉ ⲛ̃ϫⲉ
ⲡⲓⲡⲁⲣⲁⲃⲁⲧⲏⲥ ⲡⲉϫⲁϥ ϫⲉ ϯⲛⲟⲩ ⲁⲓⲉ̃ⲙⲓ ϫⲉ ⲛ̃ⲑⲱⲧⲉⲛ
ϩⲁⲛⲥⲱⲧⲡ ⲙ̃ⲙⲁⲅⲟⲥ * ⲁⲗⲗⲁ ⲁ̃ⲛⲟⲕ ϯⲛⲁⲓ̃ⲛⲓ ⲛ̃ϩⲁⲛⲙⲁ-
ⲅⲟⲥ ⲉϩⲟⲧⲉ ⲉⲣⲱⲧⲉⲛ
Ⲧⲟⲧⲉ ⲁⲩϫⲓⲙⲓ ⲛⲁϥ ⲛ̃ⲟⲩⲛⲓϣϯ ⲛⲁⲭⲱ ⲉ̃ⲡⲉϥⲣⲁⲛ ⲡⲉ
ⲁⲇⲙⲱⲛ ⲟⲩⲟϩ ⲡⲉϫⲁϥ ⲛⲁϥ ϫⲉ ⲉⲓⲟⲩⲱϣ ⲛ̃ⲧⲉⲕⲙⲟϩ
ⲛ̃ⲟⲩϣⲓⲕ ⲛ̃ϩⲟϥ ⲛⲉⲙ ⲇⲣⲁⲕⲱⲛ ⲛⲉⲙ ⲙⲟⲩⲓ̃ ⲛⲉⲙ ϭⲗⲏ
ⲛⲉⲙ ⲃⲁⲥⲓⲗⲓⲥⲕⲟⲥ ⲛ̃ⲑⲟϥ ⲇⲉ ⲁϥⲓ̃ⲣⲓ ϧⲉⲛ ⲧⲉϥⲧⲉⲭⲛⲏ
ⲉⲧϩⲱⲟⲩ ⲙ̃ⲫⲏ ⲉⲧⲁϥⲟⲩⲁϩⲥⲁϩⲛⲓ ⲙ̃ⲙⲟϥ ⲛⲁϥ ⲧⲟⲧⲉ
ⲁϥⲑⲣⲟⲩⲥⲱⲛϩ ⲙ̃ⲡⲓⲙⲁⲕⲁⲣⲓⲟⲥ ⲛ̃ⲥⲉϩⲓⲧϥ ⲉϧⲣⲏⲓ ⲉ̃ⲡⲓϣⲓⲕ
ⲁϥⲕⲟⲧϥ ⲇⲉ ⲉϯⲙⲁⲕⲁⲣⲓⲁ ⲁⲛⲛⲁ ⲡⲉϫⲁϥ ⲛⲁⲥ ϫⲉ ⲟⲩ
ⲡⲉ ⲉⲧⲉϫⲱ ⲙ̃ⲙⲟϥ ϯϧⲉⲗⲗⲱ ⲙⲁⲣⲉ ⲓⲏ︦ⲥ︦ ϯⲛⲟⲩ ⲛⲁϩⲙⲉϥ
ⲛ̃ⲑⲟⲥ ⲇⲉ ⲡⲉϫⲁⲥ ϫⲉ ⲁϥⲛⲁϩⲙⲉϥ ⲟⲩⲟϩ ϥⲛⲁⲛⲁϩⲙⲉϥ
ⲟⲛ ⲡⲓⲁ̃ⲅⲓⲟⲥ ⲇⲉ ⲛ̃ⲉⲡⲓⲥⲕⲟⲡⲟⲥ ⲛⲁϥⲟ̃ϩⲓ ⲇⲉ¹ ⲉ̃ⲣⲁⲧϥ ⲡⲉ
ϧⲉⲛ ⲑⲙⲏϯ ⲛ̃ⲛⲓⲑⲏⲣⲓⲟⲛ ⲉϥⲧⲱⲃϩ ⲙ̃ⲡⲁⲓⲣⲏϯ ⲉϥϫⲱ ⲙ̃ⲙⲟⲥ
ϫⲉ ϯϣⲉⲡϩⲙⲟⲧ ⲛ̃ⲧⲟⲧⲕ ⲡⲁϭ︤ⲥ︥ ⲓⲏ︤ⲥ︥ ⲡⲭ︤ⲥ︥ ϫⲉ ⲁⲕϣⲱⲡⲓ
ⲛⲏⲓ ⲛⲟⲩⲃⲟⲏ̃ⲑⲟⲥ ⲛ̃ϩⲣⲏⲓ ⲅⲁⲣ ϧⲉⲛ ⲡⲉⲕⲣⲁⲛ ⲁⲛϩⲱⲙⲓ


### 0010

ⲉ̃ϫⲉⲛ ⲛⲓϩⲟϥ ⲛⲉⲙ ⲛⲓϭⲗⲏ ⲕⲁⲧⲁ ϯⲉ̃ⲝⲟⲩⲥⲓⲁ̃ ⲉⲧⲁⲕⲧⲏⲓⲥ
ⲛ̃ⲛⲏ ⲉⲑⲛⲁϩϯ ⲉ̃ⲣⲟⲕ ⲛⲓⲑⲏⲣⲓⲟⲛ ⲇⲉ ⲛⲁⲩϩⲓⲛⲓⲙ ⲧⲏⲣⲟⲩ
ⲡⲉ ϧⲉⲛ ⲧϫⲟⲙ ⲙ̃ⲡⲭ︦ⲥ︦ ⲙ̃ⲫⲣⲏϯ ⲛ̃ϩⲁⲛⲣⲉϥⲙⲱⲟⲩⲧ ⲉⲧⲁϥ-
ⲛⲁⲩ ⲇⲉ ⲛ̃ϫⲉ ⲡⲓⲧⲩⲣⲁⲛⲛⲟⲥ ϫⲉ ⲙ̃ⲡⲉ ϩⲗⲓ ⲛ̃ⲧⲁⲕⲟ
ϣⲱⲡⲓ ⲙ̃ⲙⲟϥ *ⲁϥⲟⲩⲁϩⲥⲁϩⲛⲓ ⲉ̃ⲥⲓϯ ⲛ̃ⲟⲩⲭⲣⲱⲙ ⲉϧⲣⲏⲓ
ⲉ̃ⲡⲓϣⲓⲕ ϫⲉ ϩⲓⲛⲁ ⲡⲉϫⲁϥ ⲛ̃ⲑⲟϥ ⲛⲉⲙ ⲛⲓⲑⲏⲣⲓⲟⲛ ⲛ̃ⲧⲟⲩ-
ⲣⲱⲕϩ ⲉⲩⲥⲟⲡ ⲟⲩⲟϩ ⲁ ⲡⲓⲭⲣⲱⲙ ⲣⲱⲕϩ ⲙⲉⲛ ⲛ̃ⲛⲓⲑⲏⲣⲓⲟⲛ
ⲡⲓⲁⲅⲓⲟⲥ ⲇⲉ ⲟⲩⲇⲉ ⲙ̃ⲡⲉϥϣⲱϩⲉⲃ ⲛ̃ⲟⲩϥⲱⲓ ⲛ̃ⲧⲁϥ ⲟⲩⲟϩ
ϧⲉⲛ ⲧϫⲟⲙ ⲙ̃ⲡⲭ︤ⲥ︥ ⲁⲩⲑⲁϥϥ¹ ⲁⲩⲟⲩⲟϩ ⲙ̃ⲙⲟϥ ⲙ̃ⲡⲉⲙⲑⲟ
ⲙ̃ⲡⲟⲩⲣⲟ
Ⲉⲧⲁⲩⲛⲁⲩ ⲇⲉ ⲛ̃ϫⲉ ⲛⲓⲙⲏϣ ⲁⲩⲉⲣϣⲫⲏⲣⲓ ⲉⲩϫⲱ
ⲙ̃ⲙⲟⲥ ϫⲉ ⲙ̃ⲙⲟⲛ ⲕⲉⲛⲟⲩϯ ⲉⲃⲏⲗ ⲉⲣⲟⲕ ⲡⲭ︦ⲥ︦ ⲟⲩⲁⲓ ⲡⲉ
ⲫ︦ϯ︦ ⲛ̃ⲕⲩⲣⲓⲁ̃ⲕⲟⲥ ⲁⲥⲱϣ ⲇⲉ ⲉⲃⲟⲗ ⲛ̃ϫⲉ ⲧⲉϥⲙⲁⲩ ⲉⲥⲉⲣ-
ⲙⲁⲕⲁⲣⲓⲍⲓⲛ ⲙ̃ⲙⲟϥ ⲉⲥϫⲱ ⲙ̃ⲙⲟⲥ ϫⲉ ⲱ̃ⲟⲩⲛⲓⲁⲧⲕ ⲛ̃ⲑⲟⲕ
ⲡⲁϣⲏⲣⲓ ⲙ̃ⲙⲉⲛⲣⲓⲧ ϫⲉ ⲁⲕⲉⲣⲁⲅⲱⲛⲓⲍⲉⲥⲑⲉ ⲙ̃ⲡⲓⲁⲅⲱⲛ
ⲉⲑⲛⲁⲛⲉϥ ⲡⲓⲇⲣⲟⲙⲟⲥ ⲁⲕϫⲟⲕϥ ⲉ̃ⲃⲟⲗ ⲡⲓⲛⲁϩϯ ⲁⲕⲁⲣⲉϩ
ⲉ̃ⲣⲟⲕ² ⲁⲕϭⲣⲟ ⲅⲁⲣ ⲉ̃ⲡⲣⲭⲣⲱⲙ ⲙ̃ⲫⲣⲏϯ ⲙ̃ⲡⲓⲅ̅ ⲛ̃ⲁⲅⲓⲟⲥ
ⲁⲩⲟⲩⲉϣⲟⲩⲱϣⲕ ⲙ̃ⲡϣⲃⲱⲧ ⲙ̃ⲫⲣⲏϯ ⲙ̃ⲡⲁⲩⲗⲟⲥ ⲁⲩ-
ϩⲓⲱ̃ⲛⲓ ⲉ̃ϫⲱⲕ ⲙ̃ⲫⲣⲏϯ ⲛ̃ⲥⲧⲉⲫⲁⲛⲟⲥ ⲡⲉⲕⲥⲟⲛ ⲟⲩⲟϩ ⲓⲥϫⲉ
ⲟⲩⲧⲟⲗⲙⲏⲣⲟⲛ ⲁⲛ ⲡⲉ ϯⲛⲁϫⲟϥ ⲁⲕⲁ̃ⲗⲏⲓ ⲉ̃ϫⲉⲛ ⲟⲩϩⲟϥ
ⲛⲉⲙ ⲟⲩⲃⲁⲥⲓⲗⲓⲥⲕⲟⲥ ⲁⲕϩⲱⲙⲓ ⲉ̃ϫⲉⲛ ⲟⲩⲙⲟⲩⲓ̃ ⲛⲉⲙ ⲟⲩ-
ⲇⲣⲁⲕⲱⲛ³ ⲕⲁⲧⲁ ⲫⲣⲏϯ ⲉⲧⲥϧⲏⲟⲩⲧ ⲉⲑⲃⲉ ⲡⲭ︦ⲥ︦ ⲡⲓⲧⲩⲣⲁⲛ-
ⲛⲟⲥ ⲇⲉ ⲉϥϣⲫⲓⲧ ⲛⲁϥϧⲣⲁϫⲣⲉϫ ⲛ̃ⲛⲉϥⲛⲁϫϩⲓ ⲉϩⲣⲏⲓ
ⲉ̃ϫⲱⲟⲩ ⲉϥⲟⲩⲱϣ ⲉ̃ϧⲟⲑⲃⲟⲩ
Ⲁⲇⲙⲱⲛ ⲇⲉ ⲡⲓⲙⲁⲅⲟⲥ ⲉⲧⲁϥⲛⲁⲩ ⲉ̃ⲛⲁⲓϣⲫⲏⲣⲓ
ⲡⲉϫⲁϥ ⲙⲡⲟⲩⲣⲟ ϫⲉ ⲁⲕⲙⲟϩ ⲉ̃ⲃⲟⲗ ϧⲉⲛ ⲟⲩⲛⲓϣϯ ⲙ̃ⲙⲉⲧ-
ⲁⲧϩⲏⲧ ⲉⲕⲟⲩⲱϣ ⲉ̃ϧⲱⲧⲉⲃ ⲛ̃ⲛⲁⲓⲑⲙⲏⲓ ⲁⲗⲏⲑⲱⲥ ⲙ̃ⲙⲟⲛ
ⲕⲉⲛⲟⲩϯ ⲛ̃ⲥⲁ ⲡⲭ︦ⲥ︦ ⲫ︦ϯ︦ ⲛ̃ⲛⲁⲓⲁ̃ⲅⲓⲟⲥ ⲫⲁⲓ ϩⲱ ⲉ̃ϯⲛⲁϩϯ
ⲉ̃ⲣⲟϥ ⲓⲥϫⲉⲛ ϯⲛⲟⲩ ⲡⲓⲧⲩⲣⲁⲛⲛⲟⲥ ⲇⲉ ⲁϥϫⲱⲛⲧ ⲁϥⲟⲩⲁϩ̃-


### 0011

ⲥⲁϩⲛⲓ ⲉ̃ⲱ̃ⲗⲓ ⲛ̃ⲧⲉϥⲁ̃ⲫⲉ ⲛ̃ⲑⲟϥ ⲇⲉ ⲁϥⲫⲁϧⲧϥ ϧⲁ ⲛⲉⲛ-
ϭⲁⲗⲁⲩϫ ⲙ̃ⲡⲓⲁ̃ⲅⲓⲟⲥ ⲕⲩⲣⲓⲁ̃ⲕⲟⲥ ⲉϥϫⲱ ⲙ̃ⲙⲟⲥ ϫⲉ ⲡⲁϭ︤ⲥ︥
ⲛ̃ⲓⲱⲧ ⲛ̃ⲉⲡⲓⲥⲕⲟⲡⲟⲥ ⲙⲟⲓ ⲛⲏⲓ ϩⲱ ⲛ̃ϯⲥⲫⲣⲁⲅⲓⲥ ⲛ̃ⲧⲉ ⲡⲭ︦ⲥ︦
ⲛⲉⲙ ⲡⲓⲱⲙⲥ ⲟⲩⲟϩ ⲙⲁⲧⲟⲩⲃⲟⲓ ⲛ̃ⲑⲟϥ ⲇⲉ ⲁϥⲉⲣⲥⲫⲣⲁⲅⲓⲍⲓⲛ
ⲙ̃ⲙⲟϥ ⲉϥϫⲱ ⲙ̃ⲙⲟⲥ ϫⲉ ⲧⲧⲣⲓⲁⲥ ⲉⲑⲟⲩⲁⲃ ⲉⲥⲉⲉⲣⲥⲫⲣⲁⲅⲓⲍⲓⲛ
ⲙ̃ⲙⲟⲕ ⲡⲁϣⲏⲣⲓ ⲡⲓⲱⲙⲥ ⲇⲉ ⲭⲛⲁϭⲓⲧϥ ϩⲓⲧⲉⲛ ⲡⲉⲕⲥⲛⲟϥ
ⲙ̃ⲙⲓⲛ ⲙ̃ⲙⲟⲕ ⲟⲩⲟϩ ⲡⲁⲓⲣⲏϯ ⲁϥⲥⲟⲩⲧⲱⲛ¹ ⲧⲉϥⲛⲁϩⲃⲓ
ⲉ̃ⲃⲟⲗ ⲉϥⲫⲟⲛϩ ⲉⲡⲉⲓ̃ⲉⲃⲧ ⲉϥϫⲱ ⲙ̃ⲙⲟⲥ ϫⲉ ⲡⲁϭ︦ⲥ︦ ⲓⲏ︦ⲥ︦ ⲙⲡⲉⲣ-
ⲱⲡ ⲉⲣⲟⲓ ⲛ̃ⲛⲁⲙⲉⲧⲁⲧⲉ̃ⲙⲓ ⲁⲗⲗⲁ ⲟⲡⲧ ϩⲱ ⲉ̃ⲛⲉⲕⲙⲁⲣ-
ⲧⲩⲣⲟⲥ ⲉⲑⲟⲩⲁⲃ ⲟⲩⲟϩ ⲥⲁⲧⲟⲧϥ ⲁⲩⲱ̃ⲗⲓ ⲛ̃ⲧⲉϥⲁ̃ⲫⲉ ⲁϥⲉⲣ-
ⲡⲉⲙⲡϣⲁ ⲙ̃ⲡⲓⲱⲛϧ ⲛⲉⲛⲉϩ
Ⲓⲟⲩⲗⲓⲁⲛⲟⲥ ⲇⲉ ⲡⲓⲡⲁⲣⲁⲃⲁⲧⲏⲥ ⲡⲉϫⲁϥ ⲙ̃ⲡⲓⲁ̃ⲅⲓⲟⲥ
ⲕⲩⲣⲓⲁⲕⲟⲥ ϫⲉ ⲭⲛⲁⲧⲁⲙⲟⲓ ⲁⲛ ⲭⲉ ⲉⲧⲁⲕⲉ̃ⲙⲓ ⲉ̃ⲧⲁⲓⲛⲓϣϯ
ⲙ̃ⲙⲉⲧⲙⲁⲅⲟⲥ ⲛⲁϣ ⲛ̃ⲣⲏϯ ϩⲏⲡⲡⲉ ⲅⲁⲣ ⲁⲕⲥⲱⲣⲉⲙ ⲙ̃ⲡⲁⲣ-
ⲭⲱⲛ *ⲛ̃ⲧⲉ ⲛⲓⲙⲁⲅⲟⲥ ⲡⲉϫⲉ ⲡⲓⲁⲅⲓⲟⲥ ϫⲉ ⲛ̃ϯⲥⲱⲟⲩⲛ
ⲛ̃ϩⲗⲓ ⲁⲛ ⲛ̃ⲥⲁ ⲡⲁϭ̄ⲥ︦ ⲓⲏ︦ⲥ︦ ⲡⲉϫⲉ ⲡⲓⲁⲛⲟⲙⲟⲥ ϫⲉ ϣⲉ ⲡⲓⲍⲉⲩⲥ
ⲁⲓϣⲁⲛⲧⲁⲥⲑⲟ ⲉ̃ⲃⲟⲗϧⲉⲛ ϯⲡⲉⲣⲥⲓⲥ ϯⲛⲁϥⲱϯ ⲉ̃ⲃⲟⲗ ⲛ̃ⲟⲩⲟⲛ
ⲛⲓⲃⲉⲛ ⲉⲑⲛⲁϩϯ ⲉⲡⲁⲓⲣⲁⲛ ϫⲉ ⲓⲏ︦ⲥ︦ ⲛⲓⲙ ϩⲱϥ ⲡⲉ ⲓⲏ︦ⲥ︦
ⲡⲉϫⲉ ⲡⲓⲁⲅⲓⲟⲥ ϫⲉ ⲁⲣⲓⲉ̃ⲙⲓ ⲛⲁⲕ ⲡⲓⲟⲩϩⲟⲣ ⲉⲧϭⲁϧⲉⲙ ϫⲉ
ⲭⲛⲁϩⲱⲗ ⲉϯⲡⲉⲣⲥⲓⲥ ⲉⲕⲟⲛϧ ⲛⲧⲉⲕⲓ̃ ⲉⲕⲟⲓ ⲛ̃ⲣⲉϥⲙⲱⲟⲩⲧ
ⲉⲁⲩϧⲉⲗϧⲱⲗⲕ ϧⲉⲛ ⲟⲩⲥⲏϥⲓ ⲉⲥϩⲏⲡ ⲛ̃ⲧⲉϥⲫⲟⲛϫⲕ ⲛ̃ⲭⲱ-
ⲗⲉⲙ ⲉ̃ⲃⲟⲗϧⲉⲛ ⲡⲉⲕⲱⲟⲩ ⲛ̃ϫⲉ ⲫⲏ ⲉ̃ⲧⲁⲕϫⲉⲟⲩⲁ ⲉ̃ⲣⲟϥ
ⲁϥϫⲱⲛⲧ ⲇⲉ ⲛ̃ϫⲉ ⲡⲓⲁⲛⲟⲥⲓⲟⲥ ⲁϥⲑⲣⲟⲩⲁϣϥ ⲉϩⲣⲏⲓ ⲛ̃ⲥⲉ-
ϩⲱⲕⲓ ⲙ̃ⲙⲟϥ ⲟⲩⲟϩ ⲡⲉϫⲁϥ ⲛϯⲙⲁⲕⲁⲣⲓⲁ̃ ⲁⲛⲛⲁ ϫⲉ
ⲟⲩ ⲡⲉⲧⲉϫⲱ ⲙ̃ⲙⲟⲥ ⲁⲛⲛⲁ ⲁ̃ⲣⲓⲑⲩⲥⲓⲁ̃ ⲙ̃ⲡⲉⲣⲉⲣⲁⲧϩⲏⲧ
ⲙ̃ⲫⲣⲏϯ ⲙ̃ⲡⲉϣⲏⲣⲓ ϫⲉ ⲁϥⲥⲱⲧⲡ ⲛⲁϥ ⲙ̃ⲫⲙⲟⲩ ⲉϩⲟⲧⲉ
ⲡⲱⲛϧ ⲛ̃ⲑⲟⲥ ⲇⲉ ⲡⲉϫⲁⲥ ϫⲉ ⲑⲱⲙ ⲛ̃ⲣⲱⲕ ⲫⲏ ⲉ̃ⲧϭⲁϧⲉⲙ
ⲙⲁⲗⲗⲟⲛ ⲇⲉ ⲛ̃ⲑⲟϥ ⲉϥⲛⲁⲉⲣⲕⲗⲏⲣⲟⲛⲟⲙⲓⲛ ⲙ̃ⲡⲱⲛϧ ⲛⲉⲛⲉϩ
ⲉⲫⲙ̃ⲁ ⲙ̃ⲡⲁⲓⲙⲟⲩ ⲫⲁⲓ ⲛⲉⲙ ⲡⲁⲓⲱⲛϧ ⲙ̃ⲡⲣⲟⲥⲟⲩⲥⲏⲟⲩ


### 0012

ⲉⲧⲁϥϫⲱⲛⲧ ⲇⲉ ⲛ̃ϫⲉ ⲡⲓⲧⲩⲣⲁⲛⲛⲟⲥ ⲁϥⲑⲣⲟⲩⲁϣⲥ ⲉ̃ⲡϣⲱⲓ
ⲛ̃ⲥⲁ ⲡⲓϥⲱⲓ ⲛ̃ⲧⲉ ⲧⲉⲥⲁ̃ⲫⲉ ⲉⲁⲩϩⲱⲕⲓ ⲙ̃ⲙⲟⲥ ⲛⲁⲩⲅ̄ϯ
ⲛ̃ⲟⲩⲛⲟⲩ ⲟⲩⲟϩ ϩⲓⲧⲉⲛ ⲡⲓϩⲙⲟⲧ ⲛ̃ⲧⲉ ⲡⲭ︦ⲥ︦ ⲛⲁⲥⲉⲣⲉⲥⲑⲁ-
ⲛⲉⲥⲑⲉ ⲁⲛ ⲡⲉ ⲉⲡⲧⲏⲣϥ ⲁⲥⲱϣ ⲇⲉ ⲉ̃ⲃⲟⲗ ⲉⲥϫⲱ ⲙ̃ⲙⲟⲥ
*ϫⲉ ⲫⲏ ⲉⲧⲥϩⲟⲩⲟⲣⲧ ⲡⲁⲣⲁ ⲟⲩⲟⲛ ⲛⲓⲃⲉⲛ ⲓⲥϫⲉ ⲟⲩⲟⲛⲧⲉⲕ
ⲃⲁⲥⲁⲛⲟⲥ ⲙ̃ⲙⲁⲩ ⲁⲛⲓⲟⲩⲓ̃ ⲡⲁⲗⲓⲛ ⲟⲛ ⲁϥⲑⲣⲟⲩϩⲓⲟⲩⲓ̃
ⲛ̃ϩⲁⲛⲕⲁⲛⲇⲏⲗⲁ ⲛ̃ⲭⲣⲱⲙ ⲥⲁⲡⲉⲥⲏⲧ ⲙ̃ⲙⲱⲟⲩ ⲛⲁⲩ ⲟⲩ-
ⲟⲩⲛⲟⲩ ⲟⲩⲟϩ ⲛⲁⲣⲉ[ⲡϭ︦ⲥ︦ ⲉⲣ]ⲥⲕⲉⲡⲁⲍⲓⲛ ⲛ̃ⲛⲉϥⲁ̃ⲅⲓⲟⲥ ⲡⲉ
Ⲡⲓⲁ̃ⲅⲓⲟⲥ ⲇⲉ ⲕⲩⲣⲓⲁⲕⲟⲥ ⲁϥϯ ⲛ̃ⲧⲁⲓⲡⲣⲟⲥⲉⲩⲭⲏ ⲉϥⲁ̃ϣⲓ
ⲉϩⲣⲏⲓ ⲛⲉⲙ ⲧⲉϥⲙⲁⲩ ⲉϥϫⲱ ⲙⲙⲟⲥ ⲙ̃ⲡⲁⲓⲣⲏϯ ϫⲉ ⲡϭ︦ⲥ︦
ⲡⲓⲡⲁⲛⲧⲟⲕⲣⲁⲧⲱⲣ ⲫⲏ ⲉ̃ⲧⲁϥⲥⲱⲛⲧ ⲛ̃ϩⲱⲃ ⲛⲓⲃⲉⲛ ⲉⲃⲟⲗ-
ϧⲉⲛ ⲫⲏ ⲉⲧⲉ ⲛⲁϥϣⲟⲡ ⲁⲛ ⲛ̃ⲑⲟⲕ ⲁⲕⲑⲁⲙⲓⲟ̃ ⲙ̃ⲡⲓⲣⲱⲙⲓ
ⲕⲁⲧⲁ ⲧⲉⲕϩⲓⲕⲱⲛ ⲛⲉⲙ ⲕⲁⲧⲁ ⲡⲉⲕⲓ̃ⲛⲓ ⲁⲕⲭⲁϥ ϧⲉⲛ
ⲡⲓⲡⲁⲣⲁⲇⲓⲥⲟⲥ ⲛ̃ⲧⲉ ⲡⲟⲩⲛⲟϥ ⲉⲧⲁϥϩⲉⲓ ⲇⲉ ⲉⲃⲟⲗϧⲉⲛ
ⲡⲓⲱ̃ⲟⲩ ⲉ̃ⲧⲉⲙⲙⲁⲩ ϩⲓⲧⲉⲛ ϯⲁⲡⲁⲧⲏ ⲛ̃ⲧⲉ ⲡⲓϩⲟϥ ⲙ̃ⲡⲉⲕ-
ϩⲓⲡϩⲟ ⲙ̃ⲙⲟϥ ϫⲉ ⲡⲉⲕⲡⲗⲁⲥⲙⲁ ⲡⲉ ⲟⲩⲟϩ ϩⲱⲥ ϣⲁⲛ-
ⲑⲙⲁϧⲧ ⲁ̃ⲕⲉⲣⲃⲟⲏ̃ⲑⲓⲛ ⲉ̃ⲣⲟϥ ϩⲓⲧⲉⲛ ⲡⲓⲛⲟⲙⲟⲥ ⲛⲉⲙ ⲛⲓⲡⲣⲟ-
ⲫⲏⲧⲏⲥ ⲛⲁϥⲕⲟⲗϫ ⲟⲛ ⲉ̃ϧⲣⲏⲓ ⲛ̃ϫⲉ ⲫⲣⲱⲙⲓ ⲉϥⲱϣϯ
ϩⲓⲡⲉⲥⲏⲧ ⲙ̃ⲫⲣⲏϯ ⲙ̃ⲡⲓϩⲟϥ ⲉ̃ⲁϥϣⲉ ⲛ̃ⲉ̃ⲥⲓⲉ̃ ϧⲉⲛ ⲡⲁϣⲁⲓ
ⲛ̃ⲧⲉ ⲛⲉϥⲙⲉⲧⲁⲥⲉⲃⲏⲥ ⲛ̃ϫⲉ ⲡⲅⲉⲛⲟⲥ ⲛ̃ⲛⲓⲣⲱⲙⲓ ⲛ̃ⲑⲟⲕ ⲅⲁⲣ
ⲡⲉ ⲫ︦ϯ︦ ⲡⲓⲣⲉϥⲱ̃ⲟⲩ ⲛ̃ϩⲏⲧ ⲛ̃ⲁⲗⲏⲑⲓⲛⲟⲥ ⲫⲏ ⲉⲑⲛⲟϩⲉⲙ
ⲛ̃ⲥⲏⲟⲩ ⲛⲓⲃⲉⲛ ϧⲉⲛ ⲙⲁⲓ ⲛⲓⲃⲉⲛ ⲛ̃ⲛⲏ ⲉⲧⲉⲣϩⲉⲗⲡⲓⲥ ⲉ̃ⲣⲟⲕ
ⲟⲩⲟϩ ⲁⲕϭⲓ ⲙ̃ⲡϣⲓϣ ⲛ̃ⲛⲓ*ⲁ̃ⲛⲟⲙⲟⲥ ⲙ̃ⲫⲣⲏϯ ⲉⲧⲁⲕⲁⲓⲥ ϩⲓ
ⲡⲓⲙⲁⲕⲁⲣⲓⲟⲥ ⲛⲱⲉ ⲉⲁⲕⲧⲟⲩϫⲟϥ ϧⲉⲛ ⲟⲩⲕⲩⲃⲱⲧⲟⲥ ⲁⲕ-
ⲧⲁⲕⲟ ⲇⲉ ⲛ̃ⲛⲓⲁ̃ⲥⲉⲃⲏⲥ ϧⲉⲛ ⲟⲩⲕⲁⲧⲁⲕⲗⲩⲥⲙⲟⲥ ⲉⲧⲁ ⲫⲛⲟⲃⲓ
ⲇⲉ ⲁϣⲁⲓ ϩⲓ ⲛⲓⲣⲉⲙⲥⲟⲇⲟⲙⲁ ⲁⲕⲧⲁⲕⲟ ⲛ̃ⲉ̅ ⲙ̃ⲡⲟⲗⲓⲥ ⲛ̃ⲁ-
ⲥⲉⲃⲏⲥ ⲡⲉⲕⲑⲙⲏⲓ ⲇⲉ ⲟⲛ ⲗⲱⲧ ⲁⲕⲛⲁϩⲙⲉϥ ⲟⲩⲟϩ ⲛⲁⲣⲉ
ⲡⲓⲡⲉⲧϩⲱⲟⲩ ⲛⲏⲟⲩ ⲛ̃ⲉⲣⲛⲓϣϯ ⲙ̃ⲙⲏⲛⲓ ⲉⲩⲟⲩⲱϣⲧ ⲙ̃ⲡⲓ-
ⲥⲱⲛⲧ ⲉⲩϯϫⲱⲛⲧ ⲛⲁⲕ ⲛ̃ⲑⲟⲕ ϧⲁ ⲡⲓⲣⲉϥⲥⲱⲛⲧ ⲉⲡϧⲁⲉ
ⲇⲉ ⲛ̃ⲧⲉ ⲛⲓⲉϩⲟⲟⲩ ⲁⲕⲟⲩⲱⲣⲡ ⲙ̃ⲡⲉⲕⲙⲟⲛⲟⲅⲉⲛⲏⲥ ⲛ̃ϣⲏⲣⲓ
ⲉⲡⲓⲕⲟⲥⲙⲟⲥ ⲡⲓⲗⲟⲅⲟⲥ ⲉⲧⲟⲛϧ ⲡⲓⲉⲃⲟⲗ ⲙ̃ⲙⲟⲕ ⲫⲏ ⲉⲧⲁⲕ-


### 0013

ϫⲫⲟϥ ϧⲁϫⲉⲛ ⲛⲓⲉ̃ⲛⲉϩ ⲧⲏⲣⲟⲩ ⲟⲩⲟϩ ⲁϥⲉⲣⲣⲱⲙⲓ ⲉⲑⲃⲉ
ⲫⲣⲱⲙⲓ ⲁϥⲥⲱϯ ⲙ̃ⲙⲟϥ ϩⲓⲧⲉⲛ ⲡⲓⲟⲩϫⲁⲓ ⲉ̃ⲧⲁϥⲉⲣϩⲱⲃ
ⲉⲣⲟϥ ϧⲉⲛ ⲑⲙⲏϯ ⲙ̃ⲡⲕⲁϩⲓ ⲡⲓ⳧ ⲫⲁⲓ ⲉⲧⲁϥⲉⲣϩⲩⲡⲟⲙⲉ-
ⲛⲓⲛ ⲉ̃ⲫⲙⲟⲩ ⲉ̃ⲃⲟⲗϩⲓⲧⲟⲧϥ ϣⲁⲧⲉϥⲥⲱϯ ⲙ̃ⲫⲣⲱⲙⲓ ⲛⲕⲉ-
ⲥⲟⲡ ⲟⲩⲟϩ ⲛ̃ⲧⲉϥⲧⲁⲥⲑⲟϥ ⲉ̃ⲡⲓⲡⲁⲣⲁⲇⲓⲥⲟⲥ ⲡⲓⲙⲁ ⲉⲧⲁϥϩⲉⲓ
ⲉⲃⲟⲗⲛ̃ϧⲏⲧϥ ⲉ̃ⲁ̃ ⲡⲉⲕⲟⲩϫⲁⲓ ⲫⲱⲣϣ ⲉ̃ⲃⲟⲗ ⲉⲙⲁⲓ ⲛⲓⲃⲉⲛ
ⲉⲁ ⲫⲣⲱⲙⲓ ϫⲉ ⲥⲟⲩⲱⲛ¹ ⲡⲉϥⲣⲉϥⲥⲱⲛⲧ ⲁⲩⲭⲱ ⲛⲥⲱⲟⲩ
ⲛϯⲡⲗⲁⲛⲏ ⲛ̃ⲧⲉ ϯⲙⲉⲧϣⲁⲙϣⲉⲓ̃ⲇⲱⲗⲟⲛ ϩⲓⲧⲉⲛ ⲡⲓⲥⲧⲁⲩ-
ⲣⲟⲥ ⲉⲑⲟⲩⲁⲃ ⲛ̃ⲧⲉ ⲡⲉⲕⲙⲉⲛⲣⲓⲧ ⲛ̃ϣⲏⲣⲓ ⲫⲁⲓ ϩⲱ ⲉⲧⲁⲓⲉⲣ-
ⲣⲉⲙϩⲉ ⲉⲃⲟⲗϧⲉⲛ ⲧⲁ*ⲡⲗⲁⲛⲏ ⲛ̃ϧⲏⲧϥ ϯⲛⲟⲩ ⲇⲉ ⲟⲛ ⲁϥ-
ϩⲓⲧⲟⲧϥ ⲛ̃ϫⲉ ⲡⲓⲁ̃ⲛⲟⲙⲟⲥ ⲉⲧⲟⲩⲛⲟⲥ² ⲧⲡⲗⲁⲛⲏ ⲛ̃ϯⲙⲉⲧ-
ϣⲁⲙϣⲉⲓ̃ⲇⲱⲗⲟⲛ ⲑⲁⲓ ⲉ̃ⲧⲁⲥⲱ̃ϣⲉⲙ ⲁⲗⲗⲁ ϯⲥⲱⲟⲩⲛ ϫⲉ
ⲭⲛⲁϧⲟⲣϥ ⲛ̃ⲭⲱⲗⲉⲙ ⲛⲉⲙ ⲧⲉϥⲑⲣⲓⲥⲕⲓⲁ̃ ⲛ̃ⲃⲟϯ ⲛ̃ⲧⲉⲕⲛⲟ-
ϩⲉⲙ ⲙ̃ⲡⲉⲕⲗⲁⲟⲥ ⲟⲩⲟϩ ⲛ̃ⲧⲉⲕⲥⲱϯ ⲛ̃ⲧⲉⲕⲕⲗⲏⲣⲟⲛⲟⲙⲓⲁ̃
ⲛ̃ⲧⲉⲕϭⲁⲥⲟⲩ ϣⲁ ⲉ̃ⲛⲉϩ ⲙⲉⲛⲧⲟⲓⲅⲉ ⲁⲩϣⲁⲛⲟ̃ϩⲓ ϧⲉⲛ ⲛⲏ
ⲉⲧⲉⲛⲟⲩⲕ ⲛ̃ⲟⲩⲁϩⲥⲁϩⲛⲓ ⲛⲏ ⲉⲧⲁⲕⲧⲏⲓⲧⲟⲩ ⲛⲁⲛ ϩⲓⲧⲉⲛ
ⲓ︦ⲏ︦ⲥ︦ ⲡⲭ︦ⲥ︦ ⲡⲉⲛϭ︦ⲥ︦ ⲫⲁⲓ ⲉ̃ⲧⲉ ⲡⲓⲱ̃ⲟⲩ ⲉⲣⲡⲣⲉⲡⲓ ⲛⲁⲕ ⲛⲉⲙⲁϥ
ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ϣⲁ ⲉⲛⲉϩ ⲁⲙⲏⲛ
Ⲙⲉⲛⲉⲛⲥⲁ ⲛⲁⲓ ⲁⲩⲭⲁⲩ ⲉⲡⲉⲥⲏⲧ ⲟⲩⲟϩ ⲡⲉϫⲉ ⲡⲓⲡⲁⲣⲁ-
ⲃⲁⲧⲏⲥ ϫⲉ ⲧⲉⲧⲉⲛⲛⲁⲩ ϫⲉ ⲁⲓⲉⲣⲁ̃ⲛⲉⲭⲉⲥⲑⲉ ⲙ̃ⲙⲱⲧⲉⲛ
ϣⲁⲧⲉⲧⲉⲛϫⲉ ⲟⲩⲏⲣ ⲛ̃ϣϥⲱ ⲕⲉⲅⲁⲣ ⲁ̃ⲛⲟⲕ ϩⲱ ⲁⲓⲥⲱⲧⲉⲙ
ⲉ̃ⲛⲁⲓϣϥⲱ ⲛ̃ⲟⲩⲙⲏϣ ⲛ̃ⲥⲟⲡ ⲟⲩⲟϩ ⲙ̃ⲡⲟⲩⲑⲁⲙⲓⲉ̃ ϩⲗⲓ
ⲛ̃ϩⲏⲟⲩ ⲛⲏⲓ ϯⲉ̃ⲙⲓ ⲅⲁⲣ ϫⲉ ⲛ̃ⲑⲱⲧⲉⲛ ϩⲁⲛϭⲁⲥⲓϩⲏⲧ
ⲟⲩⲟϩ ⲧⲉⲧⲉⲛϣⲫⲓⲧ ⲉⲑⲃⲉ ⲫⲁⲓ ϯⲛⲁⲧⲁϩⲉ ⲑⲟⲩⲱⲧ ⲉⲣⲁⲧϥ
ⲛⲱⲧⲉⲛ ⲁⲛ ⲙⲟⲛⲟⲛ ⲁ̃ⲣⲓⲟ̃ⲙⲟⲗⲟⲅⲓⲛ ϫⲉ ⲟⲩⲛⲓϣϯ ⲡⲉ ⲡⲓ-
ⲍⲉⲩⲥ ⲟⲩⲟϩ ϫⲱⲗ ⲉⲃⲟⲗ ⲙ̃ⲫⲏ ⲉⲧⲁⲩⲉⲣⲥⲧⲁⲩⲣⲱⲛⲓⲛ ⲙ̃ⲙⲟϥ
ⲟⲩⲟϩ ϯⲛⲁⲭⲁⲑⲏⲛⲟⲩ ⲉ̃ⲃⲟⲗ ⲁⲩⲉⲣⲟⲩⲱ̃ ⲛ̃ϫⲉ ⲛⲓⲇⲓⲕⲉⲟⲥ
ϫⲉ ⲫⲏ ⲉⲧⲥϩⲟⲩⲟⲣⲧ ⲉⲃⲟⲗ ⲟⲩⲧⲉ ⲣⲱⲙⲓ ⲛⲓⲃⲉⲛ ⲁⲛⲛⲁϫⲱⲗ
ⲉⲃⲟⲗ ⲙ̃ⲫⲏ ⲉ̃*ⲧⲁϥⲓ̃ⲣⲓ ⲛⲉⲙⲁⲛ ⲛ̃ⲛⲁⲓⲙⲉⲧⲣⲉϥⲉⲣⲡⲉⲑⲛⲁⲛⲉⲩ ·


### 0014

ⲧⲏⲣⲟⲩ ⲉⲕⲉϣⲱⲡⲓ ⲉⲡⲧⲁⲕⲟ ⲛⲉⲙ ⲛⲉⲕⲛⲟⲩϯ ⲛ̃ⲃⲟϯ ⲉⲧⲁϥ-
ⲥⲱⲧⲉⲙ ⲇⲉ ⲉ̃ⲛⲁⲓ ⲁϥⲙ̃ⲃⲟⲛ ⲟⲩⲟϩ ⲁϥⲟⲩⲁϩⲥⲁϩⲛⲓ ⲉⲑⲣⲟⲩ-
ⲥⲁϩϯ ϧⲁ ⲟⲩⲭⲁⲗⲕⲓⲟⲛ ⲛ̃ⲛⲉϩ ϣⲁⲧⲉϥⲃⲉⲣⲃⲉⲣ ⲉ̃ⲙⲁϣⲱ
ⲛ̃ⲥⲉϩⲓⲧⲟⲩ ⲉϧⲣⲏⲓ ⲉ̃ⲣⲟϥ ⲡⲉϫⲉ ⲡⲓⲙⲁⲕⲁⲣⲓⲟⲥ ⲛ̃ⲧⲉϥⲙⲁⲩ ϫⲉ
ϫⲉⲙⲛⲟⲙϯ ⲧⲁⲙⲁⲩ ⲡⲭ︤ⲥ︥ ϣⲟⲡ ⲛⲉⲙⲁⲛ ⲙ̃ⲡⲉⲣⲉⲣϩⲟϯ
ⲡⲉϫⲉ ϯϫⲱⲣⲓ ϧⲉⲛ ⲡϭ︦ⲥ︦ ϫⲉ ϯϫⲉⲙⲛⲟⲙϯ ⲡⲁϣⲏⲣⲓ
ϩⲓⲧⲉⲛ ⲛⲉⲕϣⲗⲏⲗ ⲉⲑⲟⲩⲁⲃ ⲟⲩⲟϩ ⲫⲁⲓ ⲉ̃ⲧⲉⲕⲛⲁⲩ ⲉ̃ⲣⲟϥ
ⲁϥⲟⲓ ⲙ̃ⲫⲣⲏϯ ⲛ̃ⲟⲩⲫⲓⲥⲕⲓⲛⲁ ⲙ̃ⲙⲱⲟⲩ ⲉϥⲕⲏⲃ ⲙ̃ⲡⲁⲙ̃ⲑⲟ
ⲡⲉϫⲉ ⲡⲓⲙⲁⲕⲁⲣⲓⲟⲥ ⲇⲉ ⲛ̃ⲛⲓⲡⲓⲥⲧⲟⲥ ⲉⲧⲕⲱϯ ⲉⲣⲟϥ ϫⲉ
ϩⲉⲛⲑⲏⲛⲟⲩ ⲉ̃ⲃⲟⲗ ϩⲓⲫⲟⲩⲉⲓ ⲛⲁϣⲏⲣⲓ ⲙ̃ⲏⲡⲱⲥ ⲛ̃ⲧⲉⲧⲉⲛ-
ϭⲓⲉⲣϧⲟⲧ ⲧⲟⲧⲉ ⲁϥⲁ̃ⲙⲟⲛⲓ ⲛ̃ⲧϫⲓϫ ⲛ̃ⲧⲉϥⲙⲁⲩ ⲁⲩϣⲉ
ⲛⲱⲟⲩ ⲙⲡⲃ̅ ⲉϧⲣⲏⲓ ⲉⲡⲓⲭⲁⲗⲕⲓⲟⲛ ⲙ̃ⲫⲣⲏϯ ⲉⲩⲛⲁ ⲉ̃ϧⲣⲏⲓ
ⲉ̃ⲟⲩⲡⲩⲅⲏ ⲙ̃ⲙⲱⲟⲩ ⲉϥⲕⲏⲃ ⲡⲓⲃⲉⲣⲃⲉⲣ ⲇⲉ ⲁϥⲛⲟⲩϫϧ
ⲉⲡϣⲱⲓ ⲁϥⲧⲁⲕⲟ ⲛ̃ϩⲁⲛⲟⲩⲟⲛ ϧⲉⲛ ⲛⲓⲁⲑⲛⲟⲩϯ ⲛ̃ϩⲩⲡⲉⲣ-
ⲉⲧⲏⲥ ⲛⲉⲙ ⲛⲓⲓ̃ⲟⲩⲇⲁⲓ ⲉⲧⲟ̃ϩⲓ ⲉ̃ⲣⲁⲧⲟⲩ ⲧⲟⲧⲉ ⲡⲓⲡⲁⲣⲁⲃⲁⲧⲏⲥ
ⲉⲧⲁϥϣⲫⲓⲧ ⲟⲩⲟϩ ⲉⲧⲁϥⲉⲣⲕⲟⲩϫⲓ ⲛ̃ϩⲏⲧ ⲁϥⲑⲣⲟⲩϧⲉⲗϧⲱ-
ⲗⲟⲩ ϧⲉⲛ ⲟⲩⲗⲟⲅⲕⲏ ⲉⲥϣⲏⲟⲩ ⲛ̃ϧⲟⲩⲛ ϧⲉⲛ ⲡⲟⲩϩⲏⲧ
ⲟⲩⲟϩ ⲉⲧⲁⲩⲉⲣⲥⲫⲣⲁⲅⲓⲍⲓⲛ *ⲙ̃ⲙⲱⲟⲩ ⲁⲩϯ ⲙ̃ⲡⲟⲩⲡ︦ⲛ︦ⲁ︦
ⲉ̃ⲛⲉⲛϫⲓϫ ⲙ̃ⲫ︦ϯ︦ ⲟⲩⲟϩ ⲁⲩⲉⲣⲡⲉⲙⲡϣⲁ ⲙ̃ⲡⲓⲱⲛϧ ⲛⲉⲛⲉϩ
ⲁⲩⲱ̃ⲗⲓ ⲇⲉ ⲛ̃ⲛⲟⲩⲥⲱⲙⲁ ⲛ̃ϫⲉ ⲛⲓⲡⲓⲥⲧⲟⲥ ⲁⲩⲁⲩϫⲱⲗⲟⲩ¹
ⲁⲩⲭⲁⲩ ϧⲉⲛ ⲟⲩⲙⲁ ⲉϥⲟⲩⲁⲃ ϩⲁⲛⲙⲏϣ ⲇⲉ ⲛ̃ⲧⲁⲗϭⲟ
ⲁⲩϣⲱⲡⲓ ⲉ̃ⲃⲟⲗϩⲓⲧⲟⲧⲟⲩ
ⲡⲓⲡⲁⲣⲁⲃⲁⲧⲏⲥ ⲇⲉ ⲁϥϣⲉ ⲛⲁϥ ϧⲉⲛ ⲟⲩϫⲱⲛⲧ ⲛⲉⲙ
ⲟⲩⲁ̃ⲡⲟⲛⲟⲓⲁ̃ ⲉ̃ϯⲡⲉⲣⲥⲓⲥ ⲉϯ ⲟⲩⲃⲏⲥ ⲫ︦ϯ︦ ⲇⲉ ⲁϥϭⲓ ⲙ̃ⲡⲉⲙϣⲓϣ
ⲛ̃ⲛⲉϥⲉ̃ⲃⲓⲁⲓⲕ ⲉⲧⲁϥϯϧⲓⲥⲓ ⲛⲱⲟⲩ ⲁϥϧⲉⲗϧⲱⲗϥ ϧⲉⲛ ⲟⲩ-
ⲗⲟⲅⲕⲏ ⲉⲥϩⲏⲡ ⲛ̃ⲧⲉ ⲟⲩⲥⲧⲣⲁⲧⲓⲁ̃ ⲛ̃ⲁ̃ⲅⲓⲟⲥ ⲉⲁϥⲛⲁⲩ ⲉⲣⲟⲥ
ⲉⲥⲛⲏⲟⲩ ⲉϩⲣⲏⲓ ⲉϫⲱϥ ⲉⲃⲟⲗϧⲉⲛ ⲡⲓⲁ̃ⲏⲣ ⲟⲩⲟϩ ⲡⲁⲓⲣⲏϯ
ⲁϥϩⲓ ⲡⲉϥⲑⲏⲟⲩ ⲫ︦ϯ︦ ⲇⲉ ⲁϥⲧⲟⲩⲛⲟⲥ² ⲕⲉⲟⲩⲣⲟ ⲛⲑⲙⲏⲓ
ⲉ̃ⲡⲉϥⲣⲁⲛ ⲡⲉ ⲓⲟⲩⲃⲓⲁ̃ⲛⲟⲥ ⲟⲩⲣⲱⲙⲓ ⲡⲉ ⲙ̃ⲡⲓⲥⲧⲟⲥ ⲟⲩⲟϩ


### 0015

ⲛ̃ⲉⲩⲥⲉⲃⲏⲥ ⲓⲥϫⲉⲛ ⲧⲉϥⲙⲉⲧⲕⲟⲩϫⲓ ⲟⲩⲟϩ ⲡⲁⲓⲣⲏϯ ⲁ̃
ϯϩⲓⲣⲏⲛⲏ ⲛ̃ⲧⲉ ⲫ︤ϯ︥ ⲫⲱⲣϣ ⲉ̃ⲃⲟⲗ ϧⲉⲛ ⲙⲁⲓ ⲛⲓⲃⲉⲛ
Ⲉⲧⲁⲩϫⲱⲕ ⲉ̃ⲃⲟⲗ ⲛ̃ϫⲉ ⲛⲓⲁⲅⲓⲟⲥ ⲙ̃ⲙⲁⲣⲧⲩⲣⲟⲥ ⲛ̃ⲧⲉ
ⲡⲭ︦ⲥ︦ ⲓⲏ︦ⲥ︦ ⲕⲩⲣⲓⲁⲕⲟⲥ ⲡⲓⲉⲡⲓⲥⲕⲟⲡⲟⲥ ⲉⲑⲟⲩⲁⲃ ⲛⲉⲙ ⲁⲛⲛⲁ
ⲧⲉϥⲙⲁⲩ ⲛⲉⲙ ⲁⲇⲙⲱⲛ ⲡⲓⲙⲁⲅⲟⲥ ⲛ̃ⲥⲟⲩⲕ̅ⲃ̅ ⲙ̃ⲡⲁⲟ̃ⲡⲓ
ⲉⲁⲩϭⲓ ⲙ̃ⲡⲓⲭⲗⲟⲙ ⲛ̃ⲁⲑⲗⲱⲙ ϧⲉⲛ ⲡⲭ︦ⲥ︦ ⲓⲏ︦ⲥ︦ ⲡⲉⲛϭ︦ⲥ︦ ⲫⲁⲓ
ⲉⲧⲉ- ⲉⲃⲟⲗ ϩⲓⲧⲟⲧϥ ⲉ̃ⲣⲉ ⲱⲟⲩ¹