### 0001

*Ⲥⲩⲛ ⲑⲉⲟⲩ
Ϯⲙⲁⲣⲧⲩⲣⲓⲁ ⲛ̃ⲧⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲡⲓϫⲱⲣⲓ ⲙ̃ⲙⲁⲣⲧⲩⲣⲟⲥ
ⲛ̃ⲧⲉ ⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲉ̃ⲧⲁϥϫⲱⲕ ⲙ̃ⲡⲉϥⲁ̃ⲅⲱⲛ ⲉ̃ⲃⲟⲗ ⲛ̃ⲥⲟⲩⲕ︦ⲅ︦
ⲙ̃ⲡⲓⲁ̃ⲃⲟⲧ ⲫⲁⲣⲙⲟⲩⲑⲓ ϧⲉⲛ ⲟⲩϩⲓⲣⲏⲛⲏ ⲛ̃ⲧⲉ ⲫϯ ⲁⲙⲏⲛ
Ⲛϩⲣⲏⲓ ⲇⲉ ϧⲉⲛ ⲡⲓⲥⲏⲟⲩ *ⲉ̃ⲧⲉⲙⲙⲁⲩ ⲙ̃ⲡⲓⲥⲏⲟⲩ ⲙ̃ⲡⲓ-
ⲭⲓⲙⲱⲛ ⲛⲉⲙ ⲡⲓⲛⲓϣϯ ⲛ̃ϯⲱⲅⲙⲟⲥ ⲉ̃ⲧⲁϥⲧⲱⲛϥ ϩⲓϫⲉⲛ
ϯⲉⲕⲕⲗⲏⲥⲓⲁ̃ ⲛⲁϥϣⲟⲡ ⲡⲉ ⲛ̃ϫⲉ ⲟⲩⲛⲓϣϯ ⲛ̃ϫⲟⲥⲉⲙ
ⲉϥⲛⲁϣⲧ ⲛⲓⲟⲩⲣⲱⲟⲩ ⲇⲉ ⲕⲁⲧⲁ ⲙⲁ ⲛⲁⲩⲥⲱⲣⲉⲙ ⲡⲉ
ⲉⲩϩⲱⲗⲉⲙ ⲛ̃ⲥⲁ ⲛⲓⲣⲉϥϩⲓϣⲉⲛⲛⲟⲩϥⲓ ⲛ̃ⲧⲉ ϯⲙⲉⲑⲙⲏⲓ ϧⲁ-
ⲣⲁⲧⲟⲩ ⲛ̃ⲛⲓϣⲏⲟⲩⲓ̃ ⲛ̃ⲧⲉ ⲛⲓ̃ⲇⲱⲗⲟⲛ ⲛⲁⲩⲉⲣⲁ̃ⲛⲁⲅⲕⲁⲍⲓⲛ
ⲛ̃ⲟⲩⲟⲛ ⲛⲓⲃⲉⲛ ϫⲉ ⲛ̃ⲧⲟⲩⲉⲣϣⲟⲩϣⲱⲟⲩϣⲓ ⲛ̃ⲛⲓⲓ̃ⲇⲱⲗⲟⲛ
*ⲛ̃ⲧⲉ ⲛⲓⲇⲉⲙⲱⲛ ⲁϥϩⲓⲧⲟⲧϥ ⲟⲩⲛ ⲛ̃ϫⲉ ⲡⲟⲩⲣⲟ ⲇⲁ-
ⲇⲓⲁ̃ⲛⲟⲥ ⲫⲏ ⲉ̃ⲧⲁϥϭⲓ ⲙ̃ⲡⲉⲣϣⲓϣⲓ ⲉⲁϥⲁ̃ⲙⲟⲛⲓ ⲙ̃ⲡⲓⲇ︦ ⲛ̃ⲗⲁⲕϩ
ⲛ̃ⲧⲉ ⲡⲕⲁϩⲓ ⲉ̃ⲧⲁϥⲉⲣϣⲟⲣⲡ ⲛ̃ϫⲉ ⲡⲟⲩⲣⲟ ⲇⲁⲇⲓⲁ̃ⲛⲟⲥ
ⲁϥϩⲉⲙⲥⲓ ϩⲓϫⲉⲛ ⲡⲓⲃⲏⲙⲁ ⲁϥⲥϧⲁⲓ ⲛ̃ϩⲁⲛⲡⲣⲟⲥⲧⲟⲅⲙⲁ ϫⲉ
ϩⲓⲛⲁ ⲛ̃ⲥⲉⲱϣ ⲙ̃ⲙⲱⲟⲩ ϧⲉⲛ ⲡⲓⲕⲟⲥⲙⲟⲥ ⲧⲏⲣϥ
Ⲛⲁⲓ ⲛⲉ ⲛⲏ ⲉⲓⲥϧⲏⲟⲩⲧ ⲛ̃ϧⲏⲧⲟⲩ ϫⲉ ⲉ̃ⲡⲓⲇⲏ ⲁ̃ ⲟⲩⲥ-
ⲙⲏ ⲓ̃ ⲉ̃ⲛⲁⲙⲁϣϫ ϫⲉ ⲫⲏ *ⲉ̃ⲧⲁ ⲙⲁⲣⲓⲁ̃ ⲙⲁⲥϥ ⲛ̃ⲑⲟϥ
ⲙ̃ⲙⲁⲩⲁⲧϥ ⲡⲉⲧⲟⲩⲟⲩⲱϣⲧ ⲙ̃ⲙⲟϥ ⲡⲉ ⲟⲩⲟϩ ⲡⲓⲁ̃ⲡⲟⲗ-
ⲗⲱⲛ ⲛⲉⲙ ⲡⲟⲥⲓⲧⲱⲛ ⲛⲉⲙ ⲡⲓⲉⲣⲙⲏⲥ ⲛⲉⲙ ϯⲁⲥⲧⲁⲣⲧⲏ
ⲛⲉⲙ ⲡⲓⲍⲉⲩⲥ ⲛⲉⲙ ⲉ̃ⲍⲁⲃⲉⲗ ⲛⲉⲙ ⲱⲣⲛⲁⲥ ⲛⲉⲙ ⲥⲕⲁⲙⲁⲛ-
ⲇⲣⲟⲛ ⲛⲉⲙ ⲡⲥⲱϫⲡ ⲛ̃ⲛⲓⲛⲟⲩϯ ⲥⲉⲟⲩⲱϣⲧ ⲙ̃ⲙⲱⲟⲩ ⲁⲛ
ⲁⲗⲗⲁ ⲓⲏ︦ⲥ︦ ⲡⲭ︦ⲥ︦ ⲙ̃ⲙⲁⲩⲁⲧϥ ⲫⲏ ⲉ̃ⲧⲁ ⲛⲓⲓⲟⲩⲇⲁⲓ ϧⲟⲑ-
ⲃⲉϥ ⲛ̃ⲑⲟϥ ⲡⲉⲧⲟⲩϣⲉⲙϣⲓ ⲙ̃ⲙⲟϥ *ⲉⲑⲃⲉ ⲫⲁⲓ ⲉⲓⲥϧⲁⲓ
ⲙ̃ⲙⲁⲓ ⲛⲓⲃⲉⲛ ⲛⲓⲟⲩⲣⲱⲟⲩ ⲕⲁⲧⲁ ⲭⲱⲣⲁ ⲛⲉⲙ ⲛⲓⲁⲣⲭⲱⲛ
ⲧⲏⲣⲟⲩ ⲉⲧⲭⲏ ϧⲉⲛ ⲡⲁⲙⲁϩⲓ ⲛ̃ⲧⲁⲙⲉⲧⲟⲩⲣⲟ ⲁ̃ⲙⲱⲓⲛⲓ
ϩⲁⲣⲟⲓ ⲛ̃ⲭⲱⲗⲉⲙ ⲛ̃ⲧⲉⲧⲉⲛⲉ̃ⲙⲓ ⲉ̃ⲡⲥⲟϭⲛⲓ ⲛ̃ⲧⲉ ⲡⲁⲉⲣϣⲓϣⲓ


### 0002

Ⲧⲟⲧⲉ ⲁⲩⲑⲱⲟⲩϯ ⲉ̃ⲙⲁⲩ ⲛ̃ϫⲉ ⲟ︦ ⲛ̃ⲟⲩⲣⲟ ⲉ̃ⲃⲟⲗϧⲉⲛ
ϯⲟⲓⲕⲟⲩⲙⲉⲛⲏ ⲧⲏⲣⲥ ⲛⲉⲙ ϩⲁⲛⲛⲓϣϯ ⲙ̃ⲙⲏϣ ⲉⲩⲟϣ
ϩⲱⲥⲇⲉ ⲛ̃ⲧⲉϣⲧⲙ ⲡⲓⲙⲁ ϣⲟ̃ⲗⲟⲩ ϩⲓⲧⲉⲛ ⲡⲟⲩⲁ̃ϣⲁⲓ
*ⲟⲩⲟϩ ⲁϥϩⲉⲙⲥⲓ ⲛ̃ϫⲉ ⲡⲟⲩⲣⲟ ⲇⲁⲇⲓⲁ̃ⲛⲟⲥ ϩⲓ ⲡⲓⲃⲏⲙⲁ
ⲁϥⲑⲣⲟⲩⲓ̃ⲛⲓ ⲛⲁϥ ⲛ̃ⲛⲓⲥⲑⲃⲁⲓ ⲧⲏⲣⲟⲩ ⲛ̃ⲧⲉ ⲛⲓⲃⲁⲍⲁⲛⲓⲥ-
ⲧⲏⲣⲓⲟⲛ ⲁⲩⲭⲁⲩ ⲉ̃ϧⲣⲏⲓ ⲧⲏⲣⲟⲩ ⲛⲁϩⲣⲁϥ ⲉ̃ⲧⲉ ⲛⲁⲓ ⲛⲉ
ϩⲁⲛϭⲗⲟϫ ⲛ̃ϩⲟⲙⲧ ⲛⲉⲙ ϩⲁⲛⲕⲉⲗⲉⲩⲃⲓⲛ ⲛ̃ϩⲁⲛⲕⲉⲣϫ-
ⲕⲁⲥ ⲛⲉⲙ ϩⲁⲛⲧⲏⲕⲁⲛⲟⲛ ⲙ̃ⲃⲉⲛⲓⲡⲓ ⲛⲉⲙ ϩⲁⲛⲧⲣⲟⲭⲟⲥ
ⲉⲣⲉ ϩⲁⲛⲥⲏϥⲓ ⲧⲁⲕⲧⲏⲟⲩⲧ ⲉ̃ⲣⲟⲩ ⲛⲉⲙ ϩⲁⲛⲉⲣⲙⲉⲧⲁⲣⲓⲟⲛ
ⲛⲉⲙ ⲟⲩϣⲉ ⲉϥⲟⲓ ⲛ̃ⲁⲧⲣⲉ ⲛⲉⲙ ϩⲁⲛϫⲓϫ *ⲙ̃ⲃⲉⲛⲓⲡⲓ ⲛⲉⲙ
ϩⲁⲛⲥⲏϥⲓ ⲛ̃ϫⲁϫⲗⲁⲥ ⲛⲉⲙ ϩⲁⲛⲉ̃ϣⲟⲩ ⲛ̃ϥⲟϫϣⲁⲗ
ⲛⲉⲙ ϩⲁⲛⲥⲁϩ ⲙ̃ⲃⲉⲛⲓⲡⲓ ⲉⲩⲟⲩⲱⲧⲉⲛ ⲛ̃ⲛⲓⲕⲁⲥ ⲙ̃ⲙⲁⲩ
ⲛⲉⲙ ϩⲁⲛⲃⲁϣⲟⲩⲣ ⲉⲩⲙⲟⲥⲕ ⲛⲉⲙ ⲡⲓⲥⲱϫ ⲛ̃ⲛⲓⲥⲉⲑⲃⲁⲓⲟⲩ
ⲛ̃ⲧⲉ ⲛⲓⲃⲁⲍⲁⲛⲟⲥ ⲉⲑⲛⲁϣⲧ ⲟⲩⲟϩ ⲁϥⲉⲣⲁ̃ⲛⲁϣ ⲛ̃ϫⲉ
ⲡⲟⲩⲣⲟ ⲉϥϫⲱ ⲙ̃ⲙⲟⲥ ϫⲉ ⲉ̃ϣⲱⲡ ⲁⲓϣⲁⲛϫⲉⲙ ϩⲁⲛⲟⲩⲟⲛ
ⲉⲩⲟⲓ ⲛ̃ϩⲏⲧ ⲃ︦ ⲉⲩϫⲱ ⲙ̃ⲙⲟⲥ ⲉ̃ϣⲧⲉⲙⲟⲩⲱϣⲧ *ⲛ̃ⲛⲓⲛⲟⲩϯ
ϯⲛⲁϣⲓⲃϯ ⲛ̃ⲛⲓϩⲟⲛϩⲉⲛ ⲛ̃ⲧⲉ ⲛⲁⲓⲟϯ ⲛ̃ⲧⲁⲉⲣⲃⲁⲥⲁⲛⲓⲍⲓⲛ
ⲙ̃ⲙⲱⲟⲩ ϧⲉⲛ ϩⲁⲛⲃⲁⲍⲁⲛⲟⲥ ⲉⲩϧⲟⲥⲓ ϯⲛⲁϧⲟⲙϧⲉⲙ ⲙ̃ⲡⲓ-
ⲡⲩⲣⲅⲟⲥ ⲛ̃ⲧⲉ ⲡⲩϩⲏⲧ ϯⲛⲁⲕⲱⲣϫ ⲛ̃ⲛⲟⲩⲁ̃ⲫⲏⲟⲩⲓ̃ ϯⲛⲁ-
ϫⲱⲣ ⲉ̃ⲃⲟⲗ ⲛ̃ⲧⲥⲱⲟⲩϩⲓ ⲛ̃ϫⲱⲟⲩ ϧⲉⲛ ϩⲁⲛⲥⲏϥⲓ ⲉⲩⲫⲟⲣⲓ
ϯⲛⲁⲉⲣⲕⲓⲛⲇⲣⲓⲍⲓⲛ ⲙ̃ⲙⲱⲟⲩ ϯⲛⲁⲃⲓⲥⲓ ⲛ̃ⲛⲉⲛⲥⲏⲃⲓ ⲛ̃ⲣⲁⲧⲟⲩ
ϯⲛⲁⲥⲱⲗⲡ ⲛ̃ⲛⲓⲙⲟⲩⲧ ⲛ̃ⲧⲉ ⲡⲟⲩⲥⲱⲙⲁ
*Ⲉⲧⲁⲩⲥⲱⲧⲉⲙ ⲇⲉ ⲉ̃ⲛⲁⲓ ⲛ̃ϫⲉ ⲛⲓⲙⲏϣ ⲁⲩⲉⲣϩⲟϯ
ⲉ̃ⲙⲁϣⲱ ϧⲁⲧϩⲏ ⲛ̃ⲛⲓⲃⲁⲍⲁⲛⲟⲥ ϩⲱⲥⲧⲉ ⲛⲏ ⲉⲑⲟⲩⲱϣ
ⲉ̃ⲉⲣⲙⲁⲣⲧⲩⲣⲟⲥ ⲉⲩⲛⲁⲩ ⲉ̃ⲛⲓⲙⲏϣ ⲙ̃ⲃⲁⲍⲁⲛⲟⲥ ⲛ̃ⲥⲉⲉⲣ-


### 0003

ⲕⲩⲛⲇⲓⲛⲉⲩⲓⲛ ϣⲁⲧⲉ ⲅ︦ ⲛ̃ⲣⲟⲙⲡⲓ ⲥⲓⲛⲓ ⲙ̃ⲡⲉⲟⲩⲁⲓ ϣⲉⲣ-
ⲧⲟⲗⲙⲁⲛ ⲉ̃ϫⲟⲥ ϫⲉ ⲁ̃ⲛⲟⲕ ⲟⲩⲭⲣⲓⲥⲧⲓⲁ̃ⲛⲟⲥ
Ⲛⲉ ⲟⲩⲟⲛ ⲟⲩϧⲉⲗϣⲏⲣⲓ ⲡⲉ ⲉ̃ⲡⲉϥⲣⲁⲛ ⲡⲉ ⲅⲉⲱⲣⲅⲓⲟⲥ
ⲡⲓⲣⲏ ⲛ̃ⲧⲉ ϯⲙⲉⲑⲙⲏⲓ ⲡⲓⲥⲓⲟⲩⲓ̃ ⲉⲧⲧⲁⲓⲏⲟⲩⲧ *ⲉⲧϧⲉⲛ ⲑⲙⲏϯ
ⲛ̃ⲧⲫⲉ ⲛⲉⲙ ⲡⲕⲁϩⲓ ⲫⲁⲓ ⲧⲉ ⲛⲁϥⲟⲓ ⲛ̃ⲑⲣⲓⲃⲟⲩⲛⲟⲥ ϧⲉⲛ
ϯⲧⲁⲝⲓⲥ ⲛ̃ⲧⲉ ϯⲙⲉⲧⲟⲩⲣⲟ ⲟⲩⲟϩ ⲛⲉ ⲟⲩⲉ̃ⲃⲟⲗϧⲉⲛ ϯⲕⲁⲡ-
ⲡⲁⲇⲟⲕⲓⲁ̃ ⲡⲉ ⲉ̃ⲧⲁϥϫⲱⲕ ⲙ̃ⲡⲓϣⲉⲙϣⲓ ⲉ̃ⲃⲟⲗ ⲛ̃ⲧⲉ ϯⲙⲉⲧ-
ⲑⲣⲓⲃⲟⲩⲛⲟⲥ ⲁϥϭⲓ ⲛ̃ϩⲁⲛⲙⲏϣ ⲛ̃ⲭⲣⲏⲙⲁ ⲁϥⲓ̃ ϩⲁ ⲡⲟⲩⲣⲟ
ⲇⲁⲇⲓⲁ̃ⲛⲟⲥ ⲉϥⲟⲩⲱϣ ⲉ̃ϧⲟⲕϥ ⲛ̃ⲕⲟⲙⲏⲥ ⲡⲉ ⲉⲧⲁϥⲓ̃ ⲇⲉ
ⲉ̃ϩⲣⲏⲓ ⲉϯⲃⲁⲕⲓ ⲛ̃ϫⲉ ⲡⲓⲁⲅⲓⲟⲥ *ⲅⲉⲱⲣⲅⲓⲟⲥ ⲉ̃ⲧⲁϥⲛⲁⲩ
ⲉ̃ⲫⲗⲓⲃⲓ ⲛ̃ⲛⲓⲟⲩⲣⲱⲟⲩ ϧⲉⲛ ϯⲙⲉⲧϣⲁⲙϣⲉⲓ̃ⲇⲱⲗⲟⲛ ⲁⲩⲭⲁ
ⲫϯ ⲛ̃ⲥⲱⲟⲩ ⲥⲁⲧⲟⲧϥ ⲁ̃ ⲡⲉϥϩⲏⲧ ⲫⲱⲛϩ ⲉ̃ⲭⲱ ⲛ̃ⲥⲱϥ
ⲛ̃ϯⲧⲁⲝⲓⲥ ⲛ̃ⲧⲉ ϯⲙⲉⲧⲑⲣⲓⲃⲟⲩⲛⲟⲥ ⲉϥϫⲱ ⲙ̃ⲙⲟⲥ ϫⲉ ⲉⲓⲛⲁⲉⲣ-
ⲙⲁⲧⲟⲓ ⲁ̃ⲛⲟⲕ ⲙ̃ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲡⲟⲩⲣⲟ ⲛ̃ⲧⲉ ⲛⲓⲫⲏⲟⲩⲓ ⲧⲟⲧⲉ
ⲁϥⲥⲱⲣ ⲛ̃ⲛⲉϥⲭⲣⲏⲙⲁ ⲧⲏⲣⲟⲩ ⲉ̃ⲃⲟⲗ ⲛⲏ ⲉ̃ⲛⲁⲩ ⲛ̃ⲧⲟⲧϥ
ⲁϥⲧⲏⲓⲧⲟⲩ ⲛ̃ⲛⲓϩⲏⲕⲓ *ⲁϥϭⲟϫⲓ ⲉ̃ϧⲟⲩⲛ ⲙ̃ⲡⲉⲙⲑⲟ ⲛ̃ⲛⲓⲟⲩ-
ⲣⲱⲟⲩ ⲁϥⲱϣ ⲉ̃ⲃⲟⲗ ⲉϥϫⲱ ⲙ̃ⲙⲟⲥ ϫⲉ ϩⲉⲣⲓ ⲙ̃ⲡⲉⲧⲉⲛ-
ⲙ̃ⲃⲟⲛ ⲱ ⲛⲓⲟⲩⲣⲱⲟⲩ ⲙ̃ⲡⲉⲣϫⲟⲥ ⲉ̃ⲛⲉ ⲉ̃ⲧⲉ ϩⲁⲛⲛⲟⲩϯ
ⲁⲛ ⲛⲉ ϫⲉ ⲛⲟⲩϯ ⲛⲓⲛⲟⲩϯ ⲅⲁⲣ ⲉ̃ⲧⲉ ⲙ̃ⲡⲟⲩⲑⲁⲙⲓϭ̃ ⲛ̃ⲧⲫⲉ
ⲛⲉⲙ ⲡⲕⲁϩⲓ ⲙⲁⲣⲟⲩⲧⲁⲕⲟ ⲁ̃ⲛⲟⲕ ⲁⲓⲛⲁⲟⲩⲱϣⲧ ⲙ̃ⲡⲓ-
ⲟⲩⲁⲓ ⲙ̃ⲙⲁⲩⲁⲧϥ ⲫϯ ⲫⲓⲱⲧ ⲙ̃ⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲛⲉⲙ
ⲡⲓⲡ︦ⲛ︦ⲁ︦ ⲉⲑⲟⲩⲁⲃ
Ⲉⲧⲁϥϫⲟⲩϣⲧ ⲇⲉ *ⲉ̃ⲣⲟϥ ⲛ̃ϫⲉ ⲡⲓⲇⲣⲁⲕⲱⲛ ⲡⲉϫⲁϥ
ϫⲉ ⲟⲩⲟⲛ ⲛⲓⲃⲉⲛ ⲉ̃ⲧⲁⲩⲓ̃ ⲉ̃ⲃⲟⲗϩⲓⲧⲉⲛ ϯⲙⲉⲧⲣⲉϥⲉⲣⲡⲉⲑⲛⲁ-
ⲛⲉϥ ⲛ̃ⲧⲉ ⲛⲓⲛⲟⲩϯ ⲁ̃ⲛⲟⲛ ⲇⲉ ⲉⲛⲏⲡ ⲉ̃ⲛⲏ ⲉⲧⲥⲁⲡⲉⲥⲏⲧ
ⲫⲣⲏ ⲛⲉⲙ ⲡⲓⲭⲣⲱⲙ ⲉⲛⲁⲩⲟⲩⲱⲛϩ ⲅⲁⲣ ⲉ̃ⲣⲟⲛ ⲡⲉ ⲛ̃ϫⲉ
ⲛⲓⲛⲟⲩϯ ⲙ̃ⲫⲣⲏϯ ⲛ̃ϩⲁⲛⲛⲓϣϯ ⲁ̃ⲣⲓⲉ̃ⲙⲓ ϫⲉ ϯⲛⲟⲩ ϫⲉ


### 0004

ⲛ̃ⲑⲟⲕ ⲁⲕϣⲟϣⲧⲉⲛ ⲁⲗⲗⲁ ⲛⲉⲛⲕⲉⲛⲟⲩϯ ⲛ̃ⲇⲓⲕⲉⲟⲥ ⲁⲕ-
ϯϣⲱϣ ⲛⲱⲟⲩ Ϯⲛⲟⲩ ϫⲉ ⲁⲣⲓϣⲟⲩϣⲱⲟⲩϣⲓ ⲛ̃ⲛⲓ-
ⲛⲟⲩϯ *ⲡⲓⲁ̃ⲡⲟⲗⲗⲱⲛ ⲫⲏ ⲉⲑⲛⲟϩⲉⲙ ⲛ̃ϯⲟⲓⲕⲟⲩⲙⲉⲛⲏ
ⲧⲏⲣⲥ ⲛⲓⲛⲟⲩϯ ⲉ̃ⲧⲁⲕⲑⲉⲃⲓⲱ̃ⲟⲩ ⲑⲉⲧ ⲡⲟⲩϩⲏⲧ ⲛⲉⲙⲁⲕ
ⲥⲉⲥⲱⲟⲩⲛ ⲛ̃ⲛⲏ ⲉⲧϯⲧⲁⲓⲟ ⲛⲱⲟⲩ ⲟⲩⲟϩ ⲉⲧⲥⲱⲧⲉⲙ
ⲛ̃ⲥⲱⲟⲩ ⲟⲩⲟϩ ⲥⲉⲥⲱⲟⲩⲛ ⲛ̃ⲛⲏ ⲉ̃ⲧⲉⲣⲇⲓⲙⲱⲣⲓⲛ ⲛ̃ⲛⲏ
ⲉⲣⲁⲧⲥⲱⲧⲉⲙ ⲛ̃ⲥⲱⲟⲩ ϯⲛⲟⲩ ϫⲉ ⲙⲁⲧⲁⲙⲟⲓ ϫⲉ ⲛ̃ⲑⲟⲕ
ⲟⲩⲉ̃ⲃⲟⲗ ⲑⲱⲛ ⲓⲉ ⲛⲓⲙ ⲡⲉ ⲡⲉⲕⲣⲁⲛ ⲓⲉ ⲉ̃ⲧⲁⲕⲓ︦ ⲙ̃ⲡⲁⲓⲙⲁ
ⲉⲑⲃⲉ ⲟⲩ ⲛ̃ϩⲱⲃ
Ⲁϥⲉⲣⲟⲩⲱ̃ ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲉϥϫ*ⲱ ⲙ̃ⲙⲟⲥ
ϫⲉ ⲡⲁϣⲟⲣⲡ ⲛ̃ⲣⲁⲛ ⲡⲉⲧⲁⲩⲧⲏⲓϥ ⲉ̃ⲣⲟⲓ ⲡⲉ ⲭⲣⲩⲥⲧⲓⲁ̃ⲛⲟⲥ
ⲟⲩⲟϩ ⲁ̃ⲛⲟⲕ ⲟⲩⲉ̃ⲃⲟⲗϧⲉⲛ ⲡⲓϣⲗⲟⲗ ⲛ̃ⲛⲓⲕⲁⲡⲡⲁⲇⲟⲕⲉⲟⲥ
ⲉ̃ⲁⲩϧⲟⲕⲧ ⲙ̃ⲙⲁⲧⲟⲓ ϧⲉⲛ ⲟⲩⲛⲟⲩⲙⲉⲣⲟⲛ ⲉϥⲧⲁⲓⲏⲟⲩⲧ
ⲟⲩⲟϩ ⲁⲓϫⲱⲕ ⲛ̃ⲧⲁⲙⲉⲧⲑⲣⲓⲃⲟⲩⲛⲟⲥ ⲉ̃ⲃⲟⲗ ⲛ̃ⲕⲁⲗⲱⲥ
ⲛⲁⲓϣⲟⲡ ⲡⲉ ϧⲉⲛ ϯⲡⲁⲗⲉⲥⲧⲓⲛⲏ ⲛ̃ⲭⲱⲣⲁ ⲟⲩⲟϩ ⲉ̃ⲧⲁⲩ-
ϣⲁⲛⲟⲩϣⲧ ⲙ̃ⲙⲁⲩ ⲛⲓⲙ ⲛⲉ ⲛⲓⲛⲟⲩϯ ⲱ̃ ⲡⲟⲩⲣⲟ
ⲉ̃ⲧⲉⲕⲉⲣ* ⲁ̃ⲛⲁⲅⲕⲁⲍⲓⲛ ⲙ̃ⲙⲟⲓ ⲱ̃ ⲡⲟⲩⲣⲟ ⲉ̃ⲟⲩⲱϣⲧ
ⲙ̃ⲙⲱⲟⲩ ⲡⲉϫⲉ ⲡⲟⲩⲣⲟ ⲛⲁϥ ϫⲉ ⲉⲓⲟⲩⲱϣ ⲛ̃ⲧⲉⲕⲉⲣ-
ϣⲟⲩϣⲱⲟⲩϣⲓ ⲙ̃ⲡⲓⲁ̃ⲡⲟⲗⲗⲱⲛ ⲫⲏ ⲉ̃ⲧⲁϥⲉϣ ⲧⲫⲉ ⲛⲉⲙ
ⲡⲟⲥⲓⲧⲱⲛ ⲫⲏ ⲉ̃ⲧⲁϥⲧⲁϫⲣⲟ ⲙ̃ⲡⲓⲕⲁϩⲓ ⲉⲩⲥⲟⲡ ⲁϥⲉⲣⲟⲩⲱ̃
ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲉϥϫⲱ ⲙ̃ⲙⲟⲥ ϫⲉ ⲉⲑⲃⲏⲕ ⲁⲛ
ⲱ ⲡⲓⲇⲣⲁⲕⲱⲛ ⲉⲧϩⲱⲟⲩ ⲛⲉⲙ ⲛⲉⲕϣⲫⲏⲣ ⲛ̃ⲟⲩⲣⲱⲟⲩ
ⲁⲗⲗⲁ ⲉⲑⲃⲉ ⲛⲁⲓⲙⲏϣ ⲉⲧⲟ̃ϩⲓ ⲉ̃ⲣⲁⲧⲟⲩ ϯⲛⲁ*ⲫⲓⲣⲓ ⲉⲑⲃⲉ
ⲛⲁⲓⲇⲓⲕⲉⲟⲥ ⲛⲉⲙ ⲉⲑⲃⲉ ⲛⲉⲕⲛⲟⲩϯ ⲉⲑⲙⲱⲟⲩⲧ ⲉⲕⲉⲣⲁ̃ⲛⲁⲅ-
ⲕⲁⲍⲓⲛ ⲙ̃ⲙⲟⲓ ⲱ ⲡⲟⲩⲣⲟ ⲉ̃ⲉⲣϣⲟⲩϣⲱⲟⲩϣⲓ ⲛ̃ⲛⲓⲙ ⲡⲉⲧⲣⲟⲥ
ⲡⲓⲥⲱⲧⲡ ⲛ̃ⲧⲉ ⲛⲓⲁ̃ⲡⲟⲥⲧⲟⲗⲟⲥ ϣⲁⲛ ⲡⲓⲁ̃ⲡⲟⲗⲗⲱⲛ ⲡⲓⲣⲉϥ-
ⲧⲁⲕⲟ ⲛ̃ⲧⲉ ⲡⲓⲕⲟⲥⲙⲟⲥ ⲧⲏⲣϥ ⲉⲕⲟⲩⲱϣ ⲛ̃ⲧⲁⲉⲣⲑⲓⲥⲓⲁ̃


### 0005

ⲛ̃ⲛⲓⲙ ⲙⲁⲧⲁⲙⲟⲓ ⲛ̃ⲗⲓⲁⲥ ⲡⲓⲑⲉⲥⲃⲩⲧⲏⲥ ⲡⲓⲁⲅⲅⲉⲗⲟⲥ ⲉⲧϩⲓ-
ϫⲉⲛ ⲡⲓⲕⲁϩⲓ ⲉϥⲙⲟϣⲓ ϩⲓϫⲉⲛ ⲡⲕⲁϩⲓ ⲟⲩⲟϩ ϣⲁϥⲁ̃*ⲗⲏⲓ
ⲉ̃ⲡϣⲱⲓ ϩⲁ ⲛⲓⲡⲓⲗⲏ ⲛ̃ⲧⲉ ⲧⲫⲉ ϣⲁⲛ ⲕⲁⲙⲁⲛⲇⲣⲟⲥ
ⲡⲓⲁ̃ⲭⲱ ⲫⲏ ⲉ̃ⲧⲁϥⲉⲣϩⲓⲕ ⲉ̃ⲡⲓⲭⲣⲱⲙ ⲫⲏ ⲉⲧⲟⲓ ⲛ̃ⲣⲉϥϣⲓⲛⲓ
ⲛ̃ⲟⲩⲙⲏϣ ϧⲉⲛ ⲛⲓⲙⲁⲅⲓⲁ̃ ⲡⲓⲛⲱⲓⲕ ⲛ̃ⲧⲉ ϯⲙⲏⲧⲓⲁ̃ ⲫⲏ
ⲉ̃ⲧⲁϥⲉⲣⲙⲉⲥ ⲥⲁⲁⲣ ⲛⲉⲙ ⲥⲁⲣⲫⲁⲧ ⲛⲓⲟ̃ⲫⲁⲛⲓ ⲛ̃ⲣⲉϥϯ ⲛ̃ⲧⲉ
ⲡⲟⲛⲧⲟⲥ ϯⲃⲁⲕⲓ ⲛⲁⲓ ⲉ̃ⲧⲉ ⲛⲟⲩϩⲃⲏⲟⲩⲓ̃ ⲥⲉϩⲱⲟⲩ ⲟⲩⲟϩ
ⲁⲩϫⲟⲗⲕⲟⲩ ϧⲉⲛ ⲡⲉⲧϣⲏⲕ ⲛ̃ⲧⲉ ⲫⲓⲟⲙ ⲁϫⲟⲥ ⲛⲏⲓ ⲱ̃
ⲡⲟⲩⲣⲟ *ϫⲉ ⲁⲕⲑⲟⲛⲧⲉⲛ ⲙ̃ⲙⲱⲟⲩ ⲉ̃ⲛⲓⲙ ⲥⲁⲙⲟⲩⲏⲗ ⲡⲓ-
ⲣⲉϥⲧⲱⲃϩ ⲙ̃ⲫϯ ϣⲁⲛ ⲡⲟⲥⲓⲇⲱⲛ ⲡⲓⲣⲉϥⲧⲁⲕⲟ ⲛ̃ⲧⲉ
ⲛⲓⲉ̃ϫⲏⲟⲩ ⲛ̃ⲧⲉ ⲫⲓⲟⲙ ⲁⲛⲧⲟⲥ ⲛⲉⲙ ⲉ̃ⲣⲁⲕⲗⲏⲥ ϣⲁⲛ ⲛⲓ-
ⲣⲉϥϭⲓⲭⲗⲟⲙ ⲛ̃ⲧⲉ ⲛⲓⲙⲁⲣⲧⲩⲣⲟⲥ ⲛⲉⲙ ⲛⲓⲡⲣⲟⲫⲏⲧⲏⲥ ⲁϫⲟⲥ
ⲛⲏⲓ ⲱ ⲡⲟⲩⲣⲟ ϫⲉ ⲉⲕⲑⲟⲛⲧⲉⲛ ⲙ̃ⲙⲱⲟⲩ ⲉ̃ⲛⲓⲙ ⲓⲉⲍⲁⲃⲉⲗ
ϯⲣⲉϥϧⲱⲧⲉⲃ ⲛ̃ⲧⲉ ⲛⲓⲡⲣⲟⲫⲏⲧⲏⲥ ϣⲁⲛ ⲙⲁⲣⲓⲁ̃ ϯⲡⲁⲣⲑⲉ-
ⲛⲟⲥ ⲑⲙⲁⲩ ⲙ̃ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ *ϭⲓϣⲓⲡⲓ ⲛⲁⲕ ⲱ̃ ⲡⲟⲩⲣⲟ
ϩⲁⲛⲛⲟⲩϯ ⲁⲛ ⲛⲉ ⲛⲏ ⲉⲧⲟⲩⲱϣⲧ ⲙ̃ⲙⲱⲟⲩ ⲁⲗⲗⲁ
ϩⲁⲛⲓ̃ⲇⲱⲗⲟⲛ ⲛⲕⲟⲩⲣ ⲛⲉ
Ⲛⲁⲓ ⲇⲉ ⲉϥϫⲱ ⲙ̃ⲙⲱⲟⲩ ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ
ⲁϥϫⲱⲛⲧ ⲛ̃ϫⲉ ⲡⲟⲩⲣⲟ ⲁϥⲉⲣⲕⲉⲗⲉⲩⲓⲛ ⲛ̃ⲥⲉⲁϣϥ ⲉ̃ⲡⲓ-
ⲉ̃ⲣⲙⲉⲧⲁⲣⲓⲟⲛ ⲛ̃ⲥⲉϩⲱⲕⲓ ⲙ̃ⲙⲟϥ ϣⲁⲧⲉ ⲛⲉϥⲙⲁϧⲧ ϫⲱϣ
ⲉ̃ⲃⲟⲗ ϩⲓϫⲉⲛ ⲡⲓⲕⲁϩⲓ ⲙⲉⲛⲉⲛⲥⲁ ⲛⲁⲓ ⲇⲉ ⲁϥⲑⲣⲟⲩϭⲱⲗⲕϥ
ⲉ̃ⲃⲟⲗ ⲛ̃ϫⲉ ⲇ︦ ⲛ̃ϣⲱⲡ ⲙ̃ⲙⲁⲧⲟⲓ ⲛ̃ⲥⲉϩⲓ*ⲟⲩⲓ ⲉ̃ⲣⲟϥ ϧⲉⲛ
ϩⲁⲛⲙⲟⲩⲧ ⲙ̃ⲙⲁⲥⲓ ϣⲁⲧⲉ ⲛⲓⲥⲁⲣⲝ ⲛ̃ⲧⲉ ⲡⲉϥⲥⲱⲙⲁ ⲥⲱⲗⲡ
ⲉ̃ⲡⲉⲥⲏⲧ ⲟⲩⲟϩ ⲁϥⲑⲣⲟⲩϩⲱⲣⲡ ⲙ̃ⲡⲉϥⲥⲱⲙⲁ ⲛ̃ϩⲙⲟⲩ ⲟⲩⲟϩ
ⲁϥⲑⲣⲟⲩⲓ̃ⲛⲓ ⲛ̃ϩⲁⲛⲥⲱⲕ ⲙ̃ϥⲱⲓ ⲉⲑⲣⲟⲩϧⲓϯ ⲙ̃ⲡⲉϥⲥⲱⲙⲁ
ⲛ̃ϧⲏⲧⲟⲩ ϣⲁⲧⲉ ⲡⲉϥⲥⲛⲟϥ ⲥⲱⲕ ϧⲁⲣⲟϥ ⲙ̃ⲫⲣⲏϯ ⲛ̃ⲟⲩ-
ⲙⲱⲟⲩ ⲛ̃ⲑⲟϥ ⲇⲉ ⲛⲁϥⲁ̃ⲙⲟⲛⲓ ⲛ̃ⲧⲟⲧϥ ϧⲉⲛ ⲛⲓⲃⲁⲍⲁⲛⲟⲥ
ⲟⲩⲟϩ ⲁϥⲉⲣⲕⲉⲗⲉⲩⲓⲛ *ⲇⲉ ⲟⲛ ⲉⲑⲣⲟⲩⲓ̃ⲛⲓ ⲛⲁϥ ⲛ̃ⲟⲩ-


### 0006

ⲑⲱⲟⲩⲓ̃ ⲙ̃ⲃⲉⲛⲓⲡⲓ ⲉ̃ⲟⲩⲟⲛ ϩⲁⲛⲭⲟⲗ ⲟⲩⲟ̃ⲧⲉⲛ ⲉ̃ⲣⲟϥ ⲁϥϯ-
ⲓϥⲧ ⲉ̃ⲛⲓϣⲟⲡ ⲛ̃ⲧⲉ ⲣⲁⲧϥ ⲉ̃ϧⲟⲩⲛ ⲉ̃ⲣⲟϥ ⲉⲛⲁⲣⲉ ⲡⲉϥⲥⲛⲟϥ
ⲥⲱⲕ ⲡⲉ ⲙ̃ⲫⲣⲏϯ ⲛ̃ⲟⲩⲙⲱⲟⲩ ⲟⲩⲟϩ ⲛⲁϥⲁ̃ⲙⲟⲛⲓ ⲛ̃ⲧⲟⲧϥ
ϫⲉ ⲙ̃ⲫⲣⲏϯ ⲛ̃ⲑⲟϥ ⲁⲛ ⲡⲉ ⲉⲧⲟⲩⲉⲣⲃⲁⲥⲁⲛⲓⲍⲓⲛ ⲙ̃ⲙⲟϥ
ⲟⲩⲟϩ ⲙⲉⲛⲉⲛⲥⲁ ⲛⲁⲓ ⲁϥⲑⲣⲟⲩⲑⲁⲙⲓo ⲛ̃ⲟⲩϣⲏⲟⲩⲓⲟ̃ ⲉⲥϭⲟⲥⲓ
ⲁϥⲑⲣⲟⲩⲓ̃ⲛⲓ ⲛ̃︦ ⲛ̃ⲓϥⲧ ⲉⲩⲙⲟⲥⲕ ⲉ̃ⲙⲁϣⲱ *ⲟⲩⲟϩ ⲛ̃ϧⲣⲏⲓ
ⲛ̃ϧⲏⲧⲟⲩ ⲛⲁⲩⲥⲱⲗⲡ ⲛⲥⲁ ⲛⲓⲥⲁⲣⲝ ⲛ̃ⲧⲉ ⲡⲓⲑⲙⲏⲓ ⲁϥⲟⲩ-
ⲁϩⲁϩⲛⲓ ⲁⲩⲉⲛϥ ⲉ̃ⲡⲉⲥⲏⲧ ⲉ̃ⲃⲟⲗϩⲓ ϯϣⲏⲟⲩⲓ ⲁⲩϩⲓⲧϥ
ⲉ̃ϧⲣⲏⲓ ⲉ̃ⲟⲩⲭⲁⲗⲕⲓⲟⲛ ⲙ̃ⲙⲱⲟⲩ ⲁⲩⲥⲁϩϯ ϧⲁⲣⲟϥ ⲟⲩⲟϩ
ⲛⲓⲥⲕⲉⲡⲱⲗⲁⲧⲱⲣ ⲛⲁⲩϩⲓⲟⲩⲓ̃ ⲉ̃ϫⲉⲛ ⲧⲉϥⲁ̃ⲫⲉ ϧⲉⲛ ϩⲁⲛ-
ⲓϥⲧ ⲉⲩϫⲏⲣ ϣⲁⲧⲟⲩϧⲟⲙϧⲉⲙ ⲛ̃ⲧⲥⲱⲟⲩϩⲓ ⲛ̃ϫⲱϥ
ⲟⲩⲟϩ ⲡⲉϥⲁⲛⲕⲉⲫⲁⲗⲟⲥ ⲁϥϫⲱϣ ⲉ̃*ⲃⲟⲗϧⲉⲛ ⲣⲱϥ
ⲉϥⲟⲃϣ ⲙ̃ⲫⲣⲏϯ ⲛ̃ⲟⲩⲉ̃ⲣⲱϯ ⲟⲩⲟϩ ⲡⲉϥⲥⲱⲙⲁ ⲧⲏⲣϥ
ⲁϥϭⲱⲥ ⲛ̃ⲥⲛⲟϥ ⲙ̃ⲫⲣⲏϯ ⲛ̃ⲟⲩⲧⲁⲧϩ ⲧⲟⲧⲉ ⲁϥⲉⲣⲕⲉⲗⲉⲩⲓⲛ
ⲛ̃ϫⲉ ⲡⲟⲩⲣⲟ ⲁⲩⲓ̃ⲛⲓ ⲛ̃ⲟⲩⲫⲁϣⲓ ⲛ̃ⲧⲉ ⲟⲩⲥⲧⲩⲗⲗⲟⲥ ⲉⲩ-
ⲉⲥⲕⲉⲣⲕⲉⲣ ⲙ̃ⲙⲟϥ ⲛ̃ϫⲉ ⲏ︦ ⲛ̃ⲣⲱⲙⲓ ⲟⲩⲟϩ ⲁⲩⲧⲁⲗⲟϥ
ⲉ̃ϫⲉⲛ ⲧⲉϥⲛⲉϫⲓ ⲁϥⲑⲣⲟⲩⲥⲟⲛϩϥ ⲉ̃ϧⲟⲩⲛ ⲉ̃ⲣⲟϥ ⲛ̃ⲧⲟⲩⲭⲁϥ
ϣⲁⲧⲉϥⲥⲟϭⲛⲓ ϫⲉ ⲁϥⲛⲁⲉⲣ ⲟⲩ ⲛⲁϥ
*Ϧⲉⲛ ⲡⲓⲉϫⲱⲣϩ ⲇⲉ ⲉ̃ⲧⲉⲙⲙⲁⲩ ⲁϥⲟⲩⲱⲛϩ ⲛ̃ϫⲉ ⲡϭ︦ⲥ︦
ⲉ̃ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲡⲉϫⲁϥ ⲛⲁϥ ϫⲉ ϭⲣⲟ ⲙ̃ⲙⲟⲕ ⲟⲩⲟϩ
ⲛ̃ⲧⲉⲕϫⲉⲙⲛⲟⲙϯ ⲡⲁⲙⲉⲛⲣⲓⲧ ⲅⲉⲱⲣⲅⲓⲟⲥ ⲁ̃ⲛⲟⲕ ⲡⲉⲧϯϫⲟⲙ
ⲛⲁⲕ ϣⲁⲧⲉⲕϥⲁⲓ ϧⲁ ⲛⲁⲓϧⲓⲥⲓ ⲧⲏⲣⲟⲩ ⲉ̃ⲧⲁⲩⲉ̃ⲛⲟⲩ
ⲉ̃ϫⲱⲕ ϯⲱⲣⲕ ⲙ̃ⲙⲟⲓ ⲙ̃ⲙⲓⲛ ⲙ̃ⲙⲟⲓ ⲛⲉⲙ ⲛⲁⲁ̃ⲅⲅⲉⲗⲟⲥ
ⲉ̃ⲑⲟⲩⲁⲃ ϫⲉ ϧⲉⲛ ⲡϫⲓⲛⲙⲓⲥⲓ ⲛ̃ⲛⲓϩⲓⲟ̃ⲙⲓ * ⲙ̃ⲡⲉ ⲟⲩⲟⲛ
ⲧⲱⲛϥ ⲉ̃ⲛⲁⲁϥ ⲉ̃ⲓⲱⲁⲛⲛⲏⲥ ⲡⲓⲣⲉϥϯⲱⲙⲥ ⲙⲉⲛⲉⲛⲥⲱϥ ⲛ̃ⲑⲟⲕ
ⲡⲉ ⲛ̃ⲛⲉ ⲟⲩⲟⲛ ⲧⲱⲛϥ ⲉϥⲟ̃ⲛⲓ ⲙ̃ⲙⲟⲕ ⲓⲥ ϩⲏⲡⲡⲉ ⲁⲓⲧⲏⲓⲥ
ⲛⲁⲕ ⲉ̃ⲑⲣⲉⲕⲉⲣϭ︦ⲥ︦ ⲉ̃ⲡⲓⲟ︦ ⲛ̃ⲟⲩⲣⲟ ⲫⲏ ⲉ̃ⲧⲉⲕⲛⲁϫⲟϥ ⲉϥⲉ̃ϣⲱⲡⲓ
ⲙ̃ⲙⲱⲟⲩ ⲛ̃ⲑⲟⲕ ⲇⲉ ⲭⲛⲁⲙⲟⲩ ⲛ̃ⲅ︦ ⲛ̃ⲥⲟⲡ ⲛ̃ⲧⲁⲧⲟⲩⲛⲟⲥⲕ


### 0007

ϧⲉⲛ ⲡⲓⲥⲟⲡ ⲇⲉ ⲙ̃ⲙⲁϩⲇ︦ ⲁ̃ⲛⲟⲕ ⲙ̃ⲙⲓⲛ ⲙ̃ⲙⲟⲓ ⲉⲓⲉ̃ⲓ̃ ⲉϫⲉⲛ
ⲛⲓϭⲏⲡⲓ ⲛ̃ⲧⲁ̃ⲗⲓ ⲛ̃ⲧⲁⲡⲁⲣⲁⲑⲏⲕⲏ ⲉ̃ⲧⲁⲓϫⲁⲗⲟⲥ *ⲉ̃ⲣⲟⲕ
ϧⲉⲛ ⲡⲉⲕⲙⲁⲛϣⲱⲡⲓ ⲉ̃ⲑⲟⲩⲁⲃ ϫⲉⲙ ⲛⲟⲙϯ ⲙ̃ⲡⲉⲣⲉⲣϩⲟϯ
ϫⲉ ⲁ̃ⲛⲟⲕ ϯⲭⲏ ⲛⲉⲙⲁⲕ ⲟⲩⲟϩ ⲉ̃ⲧⲁϥⲉⲣⲁⲥⲡⲁⲍⲉⲥⲑⲉ
ⲙ̃ⲙⲟϥ ⲁϥϣⲉ ⲛⲁϥ ⲉ̃ⲡϣⲱⲓ ⲉ̃ⲛⲓⲫⲏⲟⲩⲓ̃ ϧⲉⲛ ⲟⲩⲛⲓϣϯ
ⲛ̃ⲱⲟⲩ ⲛⲉⲙ ⲛⲉϥⲁⲅⲅⲉⲗⲟⲥ ⲉ̃ⲑⲟⲩⲁⲃ
Ⲉⲧⲁ ⲧⲟⲟⲩⲓ̃ ⲇⲉ ϣⲱⲡⲓ ⲁϥⲟⲩⲁϩⲥⲁϩⲛⲓ ⲛ̃ϫⲉ ⲡⲟⲩⲣⲟ
ⲁⲩⲉⲛϥ ⲉ̃ϫⲉⲛ ⲡⲓⲃⲏⲙⲁ ⲛ̃ⲑⲟϥ ⲇⲉ ⲛⲁϥⲉⲣⲯⲁⲗⲓⲛ ⲉϥϫⲱ
ⲙ̃ⲙⲟⲥ *ϫⲉ ⲫϯ ⲙⲁϩⲑⲏⲕ ⲉ̃ⲧⲁⲃⲟⲛ̃ⲑⲓⲁ ⲙⲁϩⲑⲏⲕ ⲉ̃ⲡϫⲓⲛ-
ϣⲟⲡⲧ ⲉ̃ⲣⲟⲕ ⲉ̃ⲧⲁϥⲫⲟϩ ⲇⲉ ⲉ̃ⲡⲓⲃⲏⲙⲁ ⲁϥⲱϣ ⲉ̃ⲃⲟⲗ
ⲉϥϫⲱ ⲙ̃ⲙⲟⲥ ϫⲉ ⲡⲓⲃⲏⲙⲁ ⲡⲓⲃⲏⲙⲁ ⲁⲓⲓ̃ ϩⲁⲣⲟⲕ ⲟⲛ
ⲙ̃ⲫⲟⲟⲩ ⲛ̃ⲑⲟⲕ ⲛⲉⲙ ⲡⲉⲕⲁ̃ⲡⲟⲗⲗⲱⲛ ⲛ̃ⲱⲛⲓ ⲁ̃ⲛⲟⲕ ⲛⲉⲙ
ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲟⲩⲟϩ ⲁⲩⲁ̃ⲙⲟⲛⲓ ⲙ̃ⲙⲟϥ ⲁⲩϭⲟⲗⲕϥ
ⲉ̃ⲃⲟⲗ ϧⲉⲛ ⲇ︦ ⲙ̃ⲙⲟⲩⲥⲉⲣ ⲛⲁⲩϩⲓⲟⲩⲓ̃ ⲉ̃ⲣⲟϥ ⲡⲉ ϧⲉⲛ ϩⲁⲛ-
ⲙⲟⲩⲧ ⲙ̃ⲙⲁⲥⲓ ϧⲉⲛ ⲡⲉϥ*ⲥⲟⲓ ⲛⲉⲙ ⲧⲉϥⲛⲉϫⲓ ⲡⲁⲗⲓⲛ ⲟⲛ
ⲁϥⲑⲣⲟⲩⲧⲁⲥⲑⲟϥ ⲉ̃ⲡⲓϣⲧⲉⲕⲟ
Ⲁϥⲥϧⲁⲓ ⲇⲉ ⲛ̃ϫⲉ ⲡⲟⲩⲣⲟ ⲇⲁⲇⲓⲁ̃ⲛⲟⲥ ⲛ̃ⲟⲩⲉ̃ⲡⲓⲥⲧⲟⲗⲏ
ⲉϥϫⲱ ⲙ̃ⲙⲟⲥ ⲙ̃ⲡⲁⲓⲣⲏϯ ϫⲉ ϯⲥϧⲁⲓ ⲛ̃ϯⲟⲓⲕⲟⲩⲙⲉⲛⲓ
ⲧⲏⲣⲥ ⲭⲉⲣⲉⲧⲉ ϫⲉ ⲁ̃ⲭⲱ ⲛⲓⲃⲉⲛ ⲛⲉⲙ ⲙⲁⲅⲟⲥ ⲛⲓⲃⲉⲛ ⲉ̃ⲧⲉ
ⲟⲩⲟⲛ ϣϫⲟⲙ ⲙ̃ⲙⲱⲟⲩ ⲉ̃ϯⲟⲩⲱ ⲉ̃ⲃⲟⲗ ⲛ̃ⲛⲓⲙⲁⲅⲓⲁ̃ ⲛ̃ⲧⲉ
ⲡⲁⲓⲭⲣⲩⲥⲧⲓⲁ̃ⲛⲟⲥ ⲙⲁⲣⲉϥⲓ̃ ϧⲁⲣⲟⲓ ϯⲛⲁϯ ⲛⲁϥ *ⲛ̃ⲟⲩ-
ⲙⲏϣ ⲛ̃ⲭⲣⲏⲙⲁ ⲛⲉⲙ ⲑⲱϣ ⲛⲓⲃⲉⲛ ⲉ̃ⲧⲉϥⲛⲁⲉⲣⲉ̃ⲧⲓⲛ
ⲙ̃ⲙⲱⲟⲩ ⲟⲩⲟϩ ϥⲛⲁϣⲱⲡⲓ ⲉϥⲟⲓ ⲙ̃ⲙⲁϩⲃ ϧⲉⲛ ⲧⲁⲙⲉⲧ-
ⲟⲩⲣⲟ
Ⲉⲧⲁϥⲟⲩⲱⲣⲡ ⲇⲉ ⲛ̃ⲛⲓⲥϧⲁⲓ ⲉ̃ⲃⲟⲗ ϧⲉⲛ ϯⲟⲓⲕⲟⲩⲙⲉⲛⲏ
ⲧⲏⲣⲥ ϩⲏⲡⲡⲉ ⲓⲥ ⲟⲩⲣⲱⲙⲓ ⲁϥⲟⲩⲟⲛϩϥ ⲉ̃ⲃⲟⲗ ⲉ̃ⲡⲉϥⲣⲁⲛ
ⲡⲉ ⲁ̃ⲑⲁⲛⲁⲥⲓⲟⲥ ⲁϥⲓ ϩⲁ ⲡⲟⲩⲣⲟ ⲉϥϫⲱ ⲙ̃ⲙⲟⲥ ϫⲉ ⲡⲟⲩⲣⲟ
ⲱⲛϧ ϣⲁ ⲉ̃ⲛⲉϩ ⲛ̃ⲛⲉ ϩⲗⲓ ⲛ̃ϩⲱⲃ ⲉⲣⲁⲧϫⲟⲙ *ⲙ̃ⲡⲁⲙ̃ⲑⲟ


### 0008

ⲉ̃ⲃⲟⲗ ⲁϥⲣⲁϣⲓ ⲛ̃ϫⲉ ⲡⲟⲩⲣⲟ ⲡⲉϫⲁϥ ⲛⲁϥ ϫⲉ ⲁϣ ⲡⲉ
ⲡⲓⲙⲏⲓⲛⲓ ⲉ̃ⲧⲉⲕⲛⲁⲁⲓϥ ⲙ̃ⲡⲁⲙ̃ⲑⲟ ϫⲉ ϩⲓⲛⲁ ⲛ̃ⲧⲁⲉ̃ⲙⲓ ϫⲉ
ⲟⲩⲟⲛ ϣϫⲟⲙ ⲙ̃ⲙⲟⲕ ⲉ̃ϯⲟⲩⲓ̃ ⲉ̃ⲃⲟⲗ ⲛ̃ⲛⲓⲙⲁⲅⲓⲁ̃ ⲛ̃ⲧⲉ ⲛⲓ-
ⲭⲣⲓⲥⲧⲓⲁ̃ⲛⲟⲥ ⲁϥⲉ̃ⲣⲟⲩⲱ̃ ⲛ̃ϫⲉ ⲁⲑⲁⲛⲁⲥⲓⲟⲥ ⲡⲉϫⲁϥ ϫⲉ
ⲙⲁⲣⲟⲩⲓ̃ⲛⲓ ⲛⲏⲓ ⲛ̃ⲟⲩⲙⲁⲥⲓ ⲉ̃ⲧⲁⲩⲉⲛϥ ⲁϥⲥⲁϫⲓ ⲉ̃ϧⲣⲏⲓ
ⲉ̃ⲡⲉϥⲙⲁϣϫ ⲁϥⲫⲱϧ ⲁϥⲉⲣⲃ︦ ⲟⲩⲟϩ ⲡⲉϫⲁϥ *ⲛⲁϥ ϫⲉ
ⲙⲁⲣⲟⲩⲓ̃ⲛⲓ ⲛⲏⲓ ⲛ̃ⲟⲩⲙⲁϣⲓ ⲟⲩⲟϩ ⲁⲩⲉⲛⲥ ⲛⲁϥ ⲉ̃ⲧⲁⲩ-
ϩⲓⲟⲩⲓ̃ ⲇⲉ ⲛ̃ⲧⲫⲁϣⲓ ⲛ̃ⲧⲉ ⲡⲓⲙⲁⲥⲓ ⲉ̃ⲟⲩⲥⲁ ⲛ̃ⲧⲉ ϯⲙⲁϣⲓ
ⲟⲩⲟϩ ϯⲕⲉⲫⲁϣⲓ ⲉ̃ⲡⲓⲕⲉⲥⲁ ⲁⲩⲓ̃ ⲉ̃ⲃⲟⲗ ⲉϣⲏϣ ⲛⲉⲙ
ⲛⲟⲩⲉ̃ⲣⲏⲟⲩ ϩⲱⲥⲧⲉ ⲛ̃ⲧⲟⲩϣⲧⲉⲙ ⲟⲩⲧⲱⲓ ⲥⲱⲕ ⲉ̃ⲟⲩⲧⲱⲓ
Ⲁϥⲟⲩⲁϩⲥⲁϩⲛⲓ ⲛϫⲉ ⲡⲟⲩⲣⲟ ⲁϥⲑⲣⲟⲩⲓ̃ⲛⲓ ⲙ̃ⲡⲓⲁ̃ⲅⲓⲟⲥ
ⲅⲉⲱⲣⲅⲓⲟⲥ ϩⲓϫⲉⲛ ⲡⲓⲃⲏⲙⲁ ⲡⲉϫⲁϥ ⲛⲁϥ ϫⲉ ⲅⲉⲱⲣⲅⲓⲟⲥ
ⲉⲑⲃⲏⲧⲕ *ⲁⲓⲙⲟⲩϯ ⲉ̃ⲡⲁⲓⲣⲱⲙⲓ ⲉ̃ϧⲟⲩⲛ ⲉ̃ⲧⲁⲙⲉⲧⲟⲩⲣⲟ ⲓ̃ⲉ̃
ⲛ̃ⲧⲉⲕϯⲟⲩⲱ ⲛ̃ⲛⲉϥⲙⲁⲅⲓⲁ̃ ⲉ̃ⲃⲟⲗ ⲓ̃ⲉ̃ ⲛ̃ⲧⲉϥϯⲟⲩⲓ̃ ⲛ̃ⲛⲟⲩⲕ
ⲉ̃ⲃⲟⲗ ⲓ̃ⲉ̃ ⲛ̃ⲧⲉⲕϧⲟⲑⲃⲉϥ ⲓ̃ⲉ̃ ⲛ̃ⲧⲉϥϧⲟⲑⲃⲉⲕ ⲡⲓⲁ̃ⲅⲓⲟⲥ ⲅⲉⲱⲣ-
ⲅⲓⲟⲥ ⲇⲉ ⲉ̃ⲧⲁϥⲛⲁⲩ ⲉ̃ⲡⲓⲙⲁⲅⲟⲥ ⲡⲉϫⲁϥ ⲛⲁϥ ϫⲉ ⲓⲱⲥ
ⲙ̃ⲙⲟⲕ ⲡⲁⲥⲟⲛ ⲡⲉⲧⲉⲕⲟⲩⲱϣ ⲉ̃ⲁⲓϥ ⲁ̃ⲣⲓⲧϥ ⲛ̃ⲭⲱⲗⲉⲙ ϫⲉ
ϯⲛⲁⲩ ⲅⲁⲣ ⲉ̃ⲣⲟⲕ ⲉⲁ̃ ⲡⲓϩⲙⲟⲧ ⲧⲁϩⲱⲕ ϩⲱⲕ *Ϧⲉⲛ
ϯⲟⲩⲛⲟⲩ ⲇⲉ ⲉ̃ⲁϥϭⲓ ⲛⲁϥ ⲛ̃ⲟⲩⲁ̃ⲫⲟⲧ ⲛ̃ϫⲉ ⲁ̃ⲑⲁⲛⲁⲥⲓⲟⲥ
ⲁϥⲓ̃ⲱⲓ ⲙ̃ⲡⲉϥϩⲟ ⲉ̃ⲃⲟⲗ ⲁϥⲙⲟⲩϯ ⲟⲩⲃⲉ ϩⲁⲛⲣⲁⲛ ⲛ̃ⲧⲉ
ϩⲁⲛⲇⲉⲙⲱⲛ ⲉ̃ϫⲉⲛ ⲡⲓⲁ̃ⲫⲱⲧ ⲁϥⲧⲏⲓϥ ⲛⲁϥ ⲉⲑⲣⲉϥⲥⲟϥ
ⲉ̃ⲧⲁϥⲥⲟϥ ⲇⲉ ⲙ̃ⲡⲉ ϩⲗⲓ ⲙ̃ⲡⲉⲧϩⲱⲟⲩ ⲧⲁϩⲱϥ ⲉⲡⲧⲏⲣϥ
ⲁϥⲉⲣⲟⲩⲱ̃ ⲛ̃ϫⲉ ⲁ̃ⲑⲁⲛⲁⲥⲓⲟⲥ ⲡⲉϫⲁϥ ⲛⲁϥ ϫⲉ ⲡⲁϭ︦ⲥ︦
ⲕⲉⲙⲏⲓⲛⲓ ⲙ̃ⲙⲁⲩⲁⲧϥ ⲡⲉϯⲛⲁⲧⲏⲓϥ ⲛⲁⲕ *ⲉ̃ϣⲱⲡ ⲛ̃ⲧⲉϣ-
ⲧⲉⲙ ⲡⲉⲧϩⲱⲟⲩ ϣⲱⲡⲓ ⲙ̃ⲙⲟⲕ ϯⲛⲁϩϯ ϩⲱ ⲉ̃ⲫⲏ
ⲉ̃ⲧⲁⲩⲉⲣⲥⲧⲁⲩⲣⲱⲛⲓⲛ ⲙ̃ⲙⲟϥ ⲁϥϭⲓ ⲇⲉ ⲛ̃ⲕⲉⲁ̃ⲫⲱⲧ
ⲁϥⲓ̃ⲱⲓ ⲙ̃ⲡⲉϥϩⲟ ⲉ̃ⲃⲟⲗ ⲛ̃ϧⲏⲧϥ ⲁϥⲙⲟⲩϯ ⲉ̃ϩⲁⲛⲣⲁⲛ


### 0009

ⲛ̃ⲇⲉⲙⲱⲛ ⲉ̃ϩⲣⲏⲓ ⲉ̃ϫⲱϥ ⲉⲩϩⲱⲟⲩ ⲉ̃ϩⲟⲧⲉ ⲛⲓϩⲟⲩⲁ̃ϯ
ⲁϥϯ ⲛⲁϥ ⲙ̃ⲡⲓⲁⲫⲱⲧ ⲉⲑⲣⲉϥⲥⲱϥ ⲟⲩⲟϩ ⲉ̃ⲧⲁϥⲥⲱϥ ⲟⲛ
ⲛ̃ϫⲉ ⲡⲓⲁ̃ⲅⲓⲟⲥ ⲙ̃ⲡⲉ ϩⲗⲓ ⲙ̃ⲡⲉⲧϩⲱⲟⲩ ⲧⲁϩⲱϥ *ⲉ̃ⲧⲁϥ-
ⲛⲁⲩ ⲛ̃ϫⲉ ⲁ̃ⲑⲁⲛⲁⲥⲓⲟⲥ ϫⲉ ⲙ̃ⲡⲉ ϩⲗⲓ ⲙ̃ⲡⲉⲧϩⲱⲟⲩ
ϣⲱⲡⲓ ⲙ̃ⲙⲟϥ ⲡⲉϫⲁϥ ϫⲉ ⲫⲏ ⲉ̃ⲑⲟⲩⲁⲃ ⲅⲉⲱⲣⲅⲓⲟⲥ
ⲡⲓ⳧ ⲉ̃ⲣⲟⲕ ⲛ̃ⲧⲉ ⲡϣⲏⲣⲓ ⲙⲫϯ︦ ⲓⲏ︦ⲥ︦ ⲡⲭ︦ⲥ︦ ⲫⲏ ⲉⲧⲁϥⲓ̃
ⲉ̃ⲡⲓⲕⲟⲥⲙⲟⲥ ⲉ̃ⲛⲟϩⲉⲙ ⲛ̃ⲛⲓⲣⲉϥⲉⲣⲛⲟⲃⲓ ⲛⲁⲓ ϧⲁ ⲧⲁⲯⲩⲭⲏ
ⲟⲩⲟϩ ⲙⲟⲓ ⲛ̃ϯⲥⲫⲣⲁⲅⲓⲥ ⲛ̃ⲧⲉ ⲡⲭ︦ⲥ︦ ⲛⲏⲓ
Ⲇⲁⲇⲓⲁ̃ⲛⲟⲥ ⲇⲉ ⲉ̃ⲧⲁϥⲛⲁⲩ ⲉ̃ⲫⲏ ⲉ̃ⲧⲁϥϣⲱⲡⲓ ⲁϥ-
ϫⲱⲛⲧ ⲉ̃ⲙⲁϣⲱ ⲁϥⲟⲩⲁϩⲥⲁϩⲛⲓ ⲛ̃ⲥⲉⲱ̃ⲗⲓ *ⲙ̃ⲡⲓⲙⲁⲅⲟⲥ
ⲥⲁⲃⲟⲗ ⲛ̃ϯⲃⲁⲕⲓ ⲛ̃ⲥⲉϧⲟⲑⲃⲉϥ ⲛ̃ⲧⲥⲏϥⲓ ⲟⲩⲟϩ ⲁϥϫⲱⲕ
ⲛ̃ⲧⲉϥⲙⲁⲣⲧⲩⲣⲓⲁ̃ ⲉ̃ⲃⲟⲗ ⲁϥⲉⲣⲡⲉⲙⲡϣⲁ ⲙ̃ⲡⲓⲱⲛϧ ⲛ̃ⲉ̃-
ⲛⲉϩ ⲧⲟⲧⲉ ⲁϥⲉⲣⲕⲉⲗⲉⲩⲓ̃ⲛ ⲛ̃ϫⲉ ⲡⲟⲩⲣⲟ ⲉ̃ⲑⲣⲟⲩϩⲓⲟⲩⲓ̃
ⲙ̃ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲉ̃ⲡⲓϣⲧⲉⲕⲟ ϣⲁⲧⲉϥⲥⲟϭⲛⲓ ϫⲉ ⲟⲩ ⲡⲉ
ⲉ̃ⲧⲉϥⲛⲁⲁⲓϥ ⲛⲁϥ
Ⲉⲧⲁ ⲧⲟⲟⲩⲓ̃ ⲇⲉ ϣⲱⲡⲓ ⲁϥⲟⲩⲁϩⲥⲁϩⲛⲓ ⲉⲑⲣⲟⲩⲑⲁⲙⲓⲟ̃
ⲛ̃ⲟⲩⲧⲣⲟⲭⲟⲥ ⲉϥⲟⲓ ⲛ̃ⲛⲓϣϯ ⲉ̃ⲙⲁϣⲱ *ⲉⲑⲣⲟⲩⲑⲟⲩⲝ ⲛ̃ⲟⲩ-
ⲙⲏϣ ⲛ̃ⲓϥⲧ ⲉ̃ⲣⲟϥ ⲛⲉⲙ ϩⲁⲛⲕⲁϣ ⲉⲩⲑⲟⲩⲝ ⲟⲩⲟϩ ⲁϥ-
ⲑⲁⲙⲓⲟ̃ ⲙ̃ⲡⲓⲧⲣⲟⲭⲟⲥ ⲕⲁⲧⲁ ⲡⲓⲣⲏϯ ⲉ̃ⲧⲁϥⲟⲩⲁϩⲥⲁϩⲛⲓ
ⲙ̃ⲙⲟϥ ⲥⲁⲡϣⲱⲓ ⲇⲉ ⲙ̃ⲙⲟϥ ⲉϥⲟⲓ ⲛ̃ⲣⲟ ⲛ̃ⲥⲏϥⲓ ⲥⲁϧⲣⲏⲓ
ⲇⲉ ⲙ̃ⲙⲟϥ ⲉϥⲟⲓ ⲛ̃ⲥⲏϥⲓ ⲛ̃ⲣⲟⲃ︦ ⲉⲩϫⲏⲣ ⲁϥⲟⲩⲁϩⲥⲁϩⲛⲓ
ⲛ̃ϫⲉ ⲡⲟⲩⲣⲟ ⲉⲑⲣⲟⲩⲓ̃ⲛⲓ ⲛⲁϥ ⲙ̃ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲉ̃ⲃⲟⲗ-
ϧⲉⲛ ⲡⲓϣⲧⲉⲕⲟ ⲉ̃ϩⲓⲧϥ ⲉ̃ⲡϣⲱⲓ ⲉ̃ϫⲉⲛ ⲡⲓⲙⲁⲛⲕⲁⲛⲱⲛ


### 0010

ⲉ̃ⲧⲁϥⲫⲱⲛϩ ⲇⲉ ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲟⲩⲟϩ ⲁϥⲛⲁⲩ
ⲉ̃ⲣⲟϥ ⲙ̃ⲡⲥⲙⲟⲧ ⲙ̃ⲡⲓⲁⲥⲧⲏⲣⲓⲟⲛ ⲥⲁⲡϣⲱⲓ ⲙ̃ⲙⲟϥ ⲉϥⲟⲓ ⲛ̃ⲣⲟ
ⲛ̃ⲥⲏϥⲓ ⲉ̃ⲣⲉ ⲥⲁϧⲣⲏⲓ ⲙ̃ⲙⲟϥ ⲟⲓ ⲛ̃ⲥⲏϥⲓ ⲛ̃ⲣⲟⲃ︦ ⲡⲉϫⲁϥ
ⲛ̃ϧⲣⲏⲓ ⲛ̃ϧⲏⲧϥ ϫⲉ ⲁⲗⲏⲑⲟⲥ ϯⲛⲁϣⲛⲟϩⲉⲙ ⲁⲛ ⲙ̃ⲡⲁⲓ
ⲉ̃ⲃⲟⲗϧⲉⲛ ⲡⲁⲓⲙⲁⲛⲕⲁⲛⲟⲛ ⲫⲁⲓ ⲡⲁⲗⲓⲛ ⲟⲛ ⲙⲉⲛⲉⲛⲥⲱⲥ
ⲡⲉϫⲁϥ ⲛ̃ϧⲣⲏⲓ ⲛ̃ϧⲏⲧϥ ϫⲉ ⲟⲩⲟⲓ ⲛⲁⲕ ⲱ̃ ⲅⲉⲱⲣⲅⲓⲟⲥ
*ⲉⲑⲃⲉ ⲟⲩ ⲁⲕⲭⲁ ⲡⲁⲓⲙⲉⲩⲓ̃ ⲉ̃ⲁ̃ⲗⲏⲓ ⲉϩⲣⲏⲓ ⲉ̃ϫⲉⲛ ⲡⲉⲕϩⲏⲧ
ⲁ̃ⲣⲓⲫⲙⲉⲩⲓ̃ ⲙ̃ⲡⲓⲕⲁⲛⲣⲟⲥ ⲉⲧⲁϥⲧⲁϩⲟⲕ ⲁ̃ⲣⲓⲫⲙⲉⲩⲓ̃ ϫⲉ
ⲡⲉⲕϭ︦ⲥ︦ ϩⲱϥ ⲁⲩⲁϣϥ ϧⲉⲛ ⲑⲙⲏϯ ⲛ̃ⲥⲟⲛⲓⲃ︦ ⲛ̃ϫⲉ ⲛⲓⲓ̃ⲟⲩ-
ⲇⲁⲓ ⲙⲉⲛⲉⲛⲥⲱⲥ ⲁϥϥⲁⲓ ⲛ̃ⲛⲉϥⲃⲁⲗ ⲉ̃ⲡϣⲱⲓ ⲉ̃ⲧⲫⲉ
ⲉϥϫⲱ ⲙ̃ⲙⲟⲥ ϫⲉ ⲡϭ︦ⲥ︦ ⲫϯ ⲡⲓⲁⲧϣⲓⲃϯ ⲡⲁⲣⲭⲱⲛ ⲛ̃ⲧⲉ
ⲛⲓⲉ̃ⲛⲉϩ ⲫⲏ ⲉⲧⲉ ⲫⲱϥ ⲡⲉ ⲡⲓϭⲣⲟ ⲟⲩⲟϩ ⲉϥϯ ⲙ̃ⲙⲟϥ
ⲛ̃ϩⲙⲟⲧ ⲛ̃ⲛⲓⲙⲁⲣⲧⲩⲣⲟⲥ *ϫⲉ ⲛ̃ⲑⲟⲕ ⲡⲉ ⲡⲟⲩⲱ̃ⲟⲩ ⲛⲉⲙ
ⲡⲟⲩⲭⲗⲟⲙ ⲫⲏ ⲉ̃ⲧⲉ ⲓⲥϫⲉⲛ ϩⲏ ⲙ̃ⲡⲁⲧⲉⲕⲑⲁⲙⲓⲟ̃ ⲛ̃ϩⲗⲓ
ⲙ̃ⲡⲁⲧⲉⲕⲑⲁⲙⲓϭ̃ ⲛ̃ⲧⲫⲉ ⲛⲉⲙ ⲡⲕⲁϩⲓ ⲉⲕⲙⲟⲧⲉⲛ ⲙ̃ⲙⲟⲕ
ⲉ̃ϫⲉⲛ ⲛⲓⲙⲱⲟⲩ ⲛⲉⲙ ϯⲛⲟⲩ ⲉⲕⲙⲟⲧⲉⲛ ⲙ̃ⲙⲟⲕ ⲉ̃ϫⲉⲛ
ⲡⲅⲉⲛⲟⲥ ⲧⲏⲣϥ ⲛ̃ⲛⲓⲣⲱⲙⲓ ⲛ̃ⲑⲟⲕ ⲉⲧⲥⲱⲟⲩⲛ ⲛ̃ⲛⲉⲕⲙⲁⲛⲉⲙ-
ⲧⲟⲛ ⲫⲏ ⲉ̃ⲧⲁϥϭⲱⲗⲕ ⲛ̃ⲧⲫⲉ ⲙ̃ⲫⲣⲏϯ ⲛ̃ⲟⲩⲕⲁⲙⲁⲣⲁ
ⲟⲩⲟϩ ⲛⲓϭⲏⲡⲓ ϧⲉⲛ ⲡⲉⲕⲟⲩⲁϩⲥⲁϩⲛⲓ ⲙ̃ⲡⲓⲛⲁⲩ ⲉ̃ϣⲁⲩⲟⲡⲧ
ⲛ̃ⲟⲩ*ⲙⲟⲩⲛϩⲱⲟⲩ ⲛ̃ⲑⲟⲕ ⲡϭ︦ⲥ︦ ⲉⲧϩⲱⲟⲩ ⲉ̃ϫⲉⲛ ⲛⲓⲑⲙⲏⲓ
ⲛⲉⲙ ⲛⲓⲟ̃ϫⲓ ⲫⲏ ⲉ̃ⲧⲁϥϣⲓ ⲛ̃ⲛⲓⲧⲱⲟⲩ ϧⲉⲛ ⲟⲩϣⲓ ⲟⲩⲟϩ
ⲛⲓϧⲉⲗⲗⲟⲧ ϧⲉⲛ ⲟⲩⲙⲁϣⲓ ⲫⲏ ⲉⲧⲓ̃ⲛⲓ ⲛ̃ⲛⲓⲑⲏⲟⲩ ⲉ̃ⲃⲟⲗ-
ϧⲛ ϩⲁⲛⲁ̃ϩⲱⲣ ⲟⲩⲟϩ ⲛⲓⲁⲅⲅⲉⲗⲟⲥ ⲉ̃ⲧⲁⲩⲉⲣⲡⲁⲣⲁⲃⲉⲛⲓⲛ
ⲁⲕⲧⲏⲓⲧⲟⲩ ⲉ̃ϧⲣⲏⲓ ⲉ̃ⲫⲛⲟⲩ ⲛ̃ⲧⲉ ⲛⲓⲧⲁⲣⲧⲁⲣⲟⲥ ⲉ̃ⲉⲣⲕⲟ-
ⲗⲁⲍⲓⲛ ⲙ̃ⲙⲱⲟⲩ ⲉ̃ⲃⲟⲗϩⲓⲧⲉⲛ ϩⲁⲛⲇⲣⲁⲕⲱⲛ ⲉⲩϩⲱⲟⲩ
ⲟⲩⲟϩ ⲛ̃ⲑⲱⲟⲩ ⲥⲉⲥⲟⲛϩ ϧⲉⲛ ϩⲁⲛⲥⲛⲁⲩϩ ⲛ̃ⲁⲧⲃⲱⲗ ⲉ̃ⲃⲟⲗ
ⲛⲉⲙ ϩⲁⲛ *ⲙⲟⲭⲗⲟⲩⲥ ⲛ̃ⲁⲧϣⲟⲩⲱⲛ ⲙ̃ⲙⲱⲟⲩ ⲙ̃ⲙⲟⲛ


### 0011

ϣϫⲟⲙ ⲛ̃ⲧⲉ ϩⲗⲓ ϣⲓⲃϯ ⲉ̃ϧⲟⲩⲛ ⲉϩⲣⲉⲛ ⲛⲉⲕⲟⲩⲁϩⲥⲁϩⲛⲓ
ⲡϭ︦ⲥ︦ ⲫϯ ⲛ̃ⲑⲟⲕ ⲁⲕⲟⲩⲱⲣⲡ ⲙ̃ⲡⲉⲕⲙⲟⲛⲟⲅⲉⲛⲏⲥ ⲛ̃ϣⲏⲣⲓ
ⲉ̃ⲡⲓⲕⲟⲥⲙⲟⲥ ⲉⲡϧⲁⲓⲉ ⲛ̃ⲧⲉ ⲛⲓⲥⲏⲟⲩ ⲁϥϭⲓⲥⲁⲣⲝ ϧⲉⲛ ⲙⲁⲣⲓⲁ̃
ϯⲡⲁⲣⲑⲉⲛⲟⲥ ⲟⲩⲟϩ ⲁϥⲉⲣⲣⲱⲙⲓ ⲙ̃ⲙⲟⲛ ϣϫⲟⲙ ⲛ̃ⲕⲁϯ
ⲛ̃ⲣⲱⲙⲓ ⲉ̃ϧⲟⲧϧⲉⲧ ⲛ̃ⲧⲉϥϫⲓⲛⲉⲣⲣⲱⲙⲓ ⲛ̃ⲑⲟϥ ⲡϭ︦ⲥ︦ ⲓⲏ︦ⲥ︦ ⲡⲭ︦ⲥ︦
ⲡⲓⲙⲓⲥⲓ ⲉ̃ⲃⲟⲗⲛ̃ϧⲏⲧⲕ ϧⲉⲛ ⲟⲩⲙⲉⲑⲙⲏⲓ *ⲫⲏ ⲉ̃ⲧⲁϥⲙⲟϣⲓ
ϩⲓϫⲉⲛ ⲡϩⲟ ⲙ̃ⲫⲓⲟⲙ ⲙ̃ⲫⲣⲏϯ ⲓⲥϫⲉⲕ ⲉϥⲙⲟϣⲓ ϩⲓϫⲉⲛ ⲫⲏ
ⲉⲧϣⲟⲩⲱ̃ⲟⲩ ⲫⲏ ⲉ̃ⲧⲁϥϣⲁⲛϣ ⲛ̃ⲉ︦ ⲛ̃ϣⲟ ⲛ̃ⲣⲟⲙⲓ ⲉ̃ⲃⲟⲗ-
ϧⲉⲛ ⲉ︦ ⲛ̃ⲱⲓⲕ ϣⲁⲧⲟⲩⲥⲓ ⲫⲏ ⲉ̃ⲧⲁϥⲉⲣⲉ̃ⲡⲓⲧⲓⲙⲁⲛ ⲛ̃ⲛⲓ-
ⲑⲏⲟⲩ ϧⲉⲛ ⲫⲓⲟⲙ ⲉⲛⲭⲁⲓ ⲛⲓⲉⲛ ⲥⲉϭⲛⲟⲛ ⲛ̃ϫⲱⲟⲩ ⲛⲁⲕ
ϯⲛⲟⲩ ⲁⲙⲟⲩ ⲡⲁϭ︦ⲥ︦ ϧⲉⲛ ⲧⲁⲓⲟⲩⲛⲟⲩ ⲉ̃ⲧⲉⲕⲛⲏⲟⲩ ⲓⲏ︦ⲥ︦
ⲁ̃ⲣⲓⲃⲟⲛ̃ⲑⲓⲛ ⲉ̃ⲧⲁⲙⲉⲧϫⲱⲃ ϫⲉ ⲁ̃ⲛⲟⲕ ⲟⲩⲣⲉϥⲉⲣⲛⲟⲃⲓ ⲙⲁ-
ⲣⲟⲩⲁⲥⲓⲁⲓ ⲉ̃ⲃⲟⲗϩⲁⲣⲟⲓ ⲛ̃ϫⲉ ⲛⲁⲓⲙ̃ⲕⲁⲩϩ *ϫⲉ ⲡⲓⲱ̃ⲟⲩ
ⲫⲱⲕ ⲡⲉ ⲟⲩⲟϩ ⲉϥⲙⲉϩ ⲛ̃ⲱⲟⲩ ⲛ̃ϫⲉ ⲡⲉⲕⲣⲁⲛ ϣⲁ ⲉ̃ⲛⲉϩ
ⲁ̃ⲙⲏⲛ
Ⲉϥϫⲱⲕ ⲇⲉ ⲙ̃ⲡⲓⲁ̃ⲙⲏⲛ ⲁⲩϩⲓⲧϥ ⲉ̃ϧⲟⲩⲛ ⲉ̃ⲡⲓⲧⲣⲟⲭⲟⲥ
ⲁⲩϧⲟⲕ ⲉ̃ϫⲱϥ ⲉ̃ⲙⲁϣⲱ ⲥⲁⲧⲟⲧϥ ⲁ̃ ⲡⲉϥⲥⲱⲙⲁ ⲉⲣⲓ︦
ⲙ̃ⲙⲉⲣⲟⲥ ⲛ̃ϯⲟⲩⲛⲟⲩ ⲁϥϥⲁⲓ ⲛ̃ⲧⲉϥⲥⲙⲏ ⲉ̃ⲡϣⲱⲓ ⲛ̃ϫⲉ
ⲇⲁⲇⲓⲁ̃ⲛⲟⲥ ⲉϥϫⲱ ⲙ̃ⲙⲟⲥ ϫⲉ ⲁ̃ⲣⲓⲉ̃ⲙⲓ ⲛⲓⲟⲩⲣⲱⲟⲩ ⲟⲩⲟϩ
ϫⲉⲙ ⲛⲟⲙϯ ϫⲉ ⲙ̃ⲙⲟⲛ ⲛⲟⲩϯ ⲉ̃ⲃⲏⲗ ⲉ̃ⲡⲓⲁ̃ⲡⲟⲗⲗⲱⲛ ⲛⲉⲙ
ⲡⲓⲉⲣⲙⲏⲥ ⲛⲉⲙ *ⲡⲓⲍⲉⲩⲥ ⲛⲉⲙ ϯⲁ̃ⲑⲉⲛⲛⲁⲥ ⲛⲉⲙ ⲡⲓⲥⲕⲁ-
ⲙⲁ̃ⲛⲁⲣⲟⲥ ⲛⲉⲙ ⲡⲓⲫⲉⲥⲧⲟⲥ ⲛⲉⲙ ⲡⲓⲉ̃ⲣⲁⲕⲗⲏⲥ ⲛⲉⲙ ⲡⲟⲥⲓ-
ⲇⲱⲛ ⲛⲏ ⲉ̃ⲧⲁⲩⲉⲣⲡⲉⲑⲛⲁⲛⲉϥ ⲙ̃ⲡⲓⲅ︦ ⲛ̃ⲥⲁ ⲛ̃ⲧⲉ ⲫⲓⲟⲙ ⲛⲏ
ⲉ̃ⲧⲉ ⲛⲓⲟⲩⲣⲱⲟⲩ ϭⲓϫⲟⲙ ⲉ̃ⲃⲟⲗϩⲓⲧⲟⲧⲟⲩ ⲁϥⲑⲱⲛ ϫⲉ
ϯⲛⲟⲩ ⲫϯ ⲛ̃ⲅⲉⲱⲣⲅⲓⲟⲥ ⲫⲏ ⲉ̃ⲧⲟⲩⲙⲟⲩϯ ⲉ̃ⲣⲟϥ ϫⲉ ⲓⲏ︦ⲥ︦
ⲫⲏ ⲉ̃ⲧⲁⲩⲁϣϥ ⲫⲏ ⲉ̃ⲧⲁ ⲛⲓⲓⲟⲩⲇⲁⲓ ϧⲟⲑⲃⲉϥ ⲉⲑⲃⲉ ⲟⲩ


### 0012

ⲙ̃ⲡⲉϥⲓ̃ ⲛ̃ⲧⲉϥⲛⲁϩⲙⲉϥ ⲉ̃ⲃⲟⲗϧⲉⲛ ⲛⲁϫⲓϫ ⲁϥⲉⲣⲕⲉⲗⲉⲩⲓⲛ
ⲛ̃ϫⲉ ⲡⲓ*ⲇⲣⲁⲕⲱⲛ ⲛ̃ⲧⲉ ⲫⲛⲟⲩⲛ ⲉⲑⲣⲟⲩⲃⲉⲣⲃⲉⲣ ⲛ̃ⲛⲉϥⲕⲁⲥ
ⲥⲁⲃⲟⲗ ⲛ̃ϯⲡⲟⲗⲓⲥ ⲉ̃ϧⲣⲏⲓ ⲉ̃ⲟⲩⲗⲁⲕⲕⲟⲥ ⲉϥϣⲟⲩⲱⲟⲩ ⲉϥϫⲱ
ⲙ̃ⲙⲟⲥ ⲛ̃ϧⲣⲏⲓ ⲛ̃ϧⲏⲧϥ ϫⲉ ⲙⲏⲡⲱⲥ ⲛ̃ⲧⲉ ⲛⲓⲭⲣⲏⲥⲧⲓⲁⲛⲟⲥ
ϫⲓⲙⲓ ⲛ̃ⲛⲉϥⲕⲁⲥ ⲛ̃ⲧⲟⲩⲕⲱⲧ ⲛ̃ⲟⲩⲙⲁⲣⲧⲏⲣⲓⲟⲛ ⲉ̃ⲣⲟϥ
ⲛ̃ⲧⲟⲩⲧⲟⲩⲛⲟⲥ ⲡⲉϥⲥⲛⲟϥ ⲉ̃ϩⲣⲏⲓ ⲉ̃ϫⲱⲛ
Ⲛⲉ ⲫⲛⲁⲩ ⲛ̃ⲟⲩⲱⲙ ⲇⲉ ⲡⲉ ⲁϥϣⲉ ⲛⲁϥ ⲛ̃ϫⲉ ⲡⲟⲩⲣⲟ
ⲉ̃ⲟⲩⲱⲙ ⲛⲉⲙ ⲡⲓⲕⲉⲝⲑ︦ ⲛ̃ⲟⲩⲣⲟ ⲛⲉⲙⲁϥ *ⲉⲩⲟⲩⲱⲙ ⲇⲉ
ⲁϥϣⲱⲡⲓ ⲛ̃ϫⲉ ⲟⲩⲛⲓϣϯ ⲙ̃ⲙⲟⲛⲙⲉⲛ ⲛ̃ⲟⲩϩⲟϯ ϧⲉⲛ ⲟⲩϩⲟϯ
ⲁ̃ ⲧⲫⲉ ϭⲗⲱⲕ ⲛ̃ϭⲏⲡⲓ ⲟⲩⲟϩ ⲁⲥϣⲱⲡⲓ ⲛ̃ϫⲉ ⲟⲩⲛⲓϣϯ
ⲛ̃ϩⲟϯ ϩⲱⲥⲧⲉ ⲛ̃ⲧⲉ ⲛⲓⲧⲱⲟⲩ ⲫⲱϫⲓ ϧⲉⲛ ⲟⲩⲉ̃ⲝⲁⲡⲓⲛⲁ
ⲛ̃ⲧⲉ ⲡⲕⲁϩⲓ ⲕⲓⲙ ⲛ̃ⲧⲉ ⲫⲓⲟⲙ ϣⲑⲟⲣⲧⲉⲣ ⲛ̃ϩⲱⲓⲙⲓ ⲟⲩⲟϩ
ⲛ̃ⲧⲉ ⲛⲉϥϫⲟⲗ ϥⲟϫⲓ ⲉ̃ⲡϣⲱⲓ ⲙ̃ⲓ︦ⲉ︦ ⲙ̃ⲙⲁϩⲓ ⲁϥⲉⲣⲥⲁⲗ-
ⲡⲓⲍⲓⲛ ⲛ̃ϫⲉ ⲙⲏⲭⲁⲏⲗ ϧⲉⲛ ⲡⲓⲧⲁⲡ ϩⲏⲡⲡⲉ ⲓⲥ ⲡϭ︦ⲥ︦ ⲓⲏ︦ⲥ︦
ⲁϥⲓ ϩⲓϫⲉⲛ ⲡⲉϥϩⲁⲣⲙⲁ ⲛ̃ⲭⲉⲣⲟⲩⲃⲓⲙ *ⲁϥⲟ̃ϩⲓ ⲉ̃ⲣⲁⲧϥ
ϩⲓϫⲉⲛ ⲛⲉⲛⲥⲫⲟⲧⲟⲩ ⲙ̃ⲡⲓⲗⲁⲕⲕⲟⲥ ⲡⲉϫⲁϥ ⲙ̃ⲙⲏⲭⲁⲏⲗ
ⲡⲓⲁⲣⲭⲏⲁⲅⲅⲉⲗⲟⲥ ϫⲉ ⲙⲁϣⲉ ⲛⲁⲕ ⲉ̃ⲡⲉⲥⲏⲧ ⲉ̃ⲡⲓⲗⲁⲕⲕⲟⲥ
ⲑⲱⲟⲩϯ ⲛ̃ⲛⲉⲛⲕⲁⲥ ⲙ̃ⲡⲁ̃ⲗⲟⲩ ⲅⲉⲱⲣⲅⲓⲟⲥ ⲉⲡⲓⲇⲉ ⲁϥ-
ⲥⲟϭⲛⲓ ⲛ̃ϫⲉ ⲡⲁⲓϫⲱⲣⲓ ϧⲉⲛ ⲡⲉϥϩⲏⲧ ⲛ̃ϫⲉ ⲅⲉⲱⲣⲅⲓⲟⲥ
ⲓⲥϫⲉⲛ ⲉϥⲱⲛϧ ϫⲉ ϯⲛⲁⲛⲟϩⲉⲙ ⲁⲛ ⲙ̃ⲡⲁⲓⲥⲟⲡ ⲉ̃ⲃⲟⲗϧⲉⲛ
ⲡⲁⲓⲙⲁⲛⲕⲁⲛⲟⲛ ⲁⲓⲭⲁϥ ⲁϥⲣⲁⲟⲩⲱ̃ ⲛ̃ϧⲏⲧϥ ϫⲉ ⲛ̃ⲧⲉϥ-
ⲛⲁϩϯ ϧⲉⲛ ⲡⲉϥϩⲏⲧ ⲧⲏⲣϥ *ⲟⲩⲟϩ ⲛ̃ⲧⲉϥⲉ̃ⲙⲓ ϫⲉ ⲁ̃ⲛⲟⲕ
ⲡⲉ ⲫϯ ⲫⲏ ⲉ̃ⲧⲉ ⲟⲩⲟⲛ ϣϫⲟⲙ ⲙⲟϥ ⲉ̃ⲛⲟϩⲉⲙ ⲙ̃ⲙⲁⲩ-
ⲁⲧϥ ⲁ̃ ⲙⲏⲭⲁⲏⲗ ϣⲉ ⲛⲁϥ ⲉ̃ⲡⲉⲥⲏⲧ ⲉ̃ⲡⲓⲗⲁⲕⲕⲟⲥ ⲁϥ-
ⲥⲉⲃⲧⲉ ⲡⲓⲥⲱⲙⲁ ⲉ̃ⲑⲟⲩⲁⲃ ⲛ̃ⲧⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲁ̃ ⲡϭ︦ⲥ︦
ⲁ̃ⲙⲟⲛⲓ ⲛ̃ⲧⲉϥϫⲓϫ ⲉϥϫⲱ ⲙ̃ⲙⲟⲥ ϫⲉ ⲅⲉⲱⲣⲅⲓⲟⲥ ⲡⲁⲙⲉⲛ-
ⲣⲓⲧ ϩⲏⲡⲡⲉ ⲓⲥ ϯϫⲓϫ ⲉ̃ⲧⲁⲥⲑⲁⲙⲓⲟ̃ ⲛ̃ⲁ̃ⲇⲁⲙ ⲡⲓϣⲟⲣⲡ
ⲛ̃ⲣⲱⲙⲓ ⲛ̃ⲑⲟⲥ ⲟⲛ ϯⲛⲟⲩ ⲉ̃ⲑⲟⲩⲁ̃ϩⲉⲙ ⲥⲱⲛⲧ ⲙ̃ⲙⲟⲕ ⲁ̃


### 0013

ⲡϭ︦ⲥ︦ ⲛⲓϥⲓ ⲉ̃ϧⲟⲩⲛ ϧⲉⲛ ⲡⲉϥϩⲟ ⲁϥⲙⲁϩϥ *ⲛ̃ⲛ̃ⲱⲛϧ ⲛ̃ⲕⲉ-
ⲥⲟⲡ ⲁϥⲉⲣⲁⲥⲡⲁⲍⲉⲥⲑⲉ ⲙ̃ⲙⲟϥ ⲛ̃ϫⲉ ⲡϭ︦ⲥ︦ ⲁϥϣⲉ ⲛⲁϥ ⲉ̃ⲡ-
ϣⲱⲓ ⲉ̃ⲛⲓⲫⲏⲟⲩⲓ︦ ⲛⲉⲙ ⲛⲉϥⲁⲅⲅⲉⲗⲟⲥ ⲉ̃ⲑⲟⲩⲁⲃ
Ⲁϥⲧⲱⲛϥ ϧⲉⲛ ⲟⲩⲓⲱⲥ ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲉⲃⲟⲗ-
ϧⲉⲛ ⲛⲓ ⲉⲑⲙⲱⲟⲩⲧ ⲟⲩⲟϩ ⲛⲁϥⲙⲟϣⲓ ⲡⲉ ϧⲉⲛ ⲛⲓⲡⲗⲁⲧⲓⲁ̃
ⲛ̃ⲧⲉ ϯⲃⲁⲕⲓ ⲉϥⲕⲱϯ ⲛ̃ⲥⲁ ⲛⲓⲟⲩⲣⲱⲟⲩ ⲙⲉⲛⲉⲛⲥⲁ ⲛⲁⲓ
ⲇⲉ ⲁϥϫⲓⲙⲓ ⲛ̃ⲛⲓⲟⲩⲣⲱⲟⲩ ϧⲉⲛ ⲛⲓⲡⲗⲁⲧⲓⲁ̃ ⲉⲩϩⲉⲙⲥⲓ
ⲥⲁϧⲟⲩⲛ ⲉⲩϯϩⲁⲡ ⲟⲩⲟϩ ⲁϥ*ϥⲱϫⲓ ⲉ̃ϧⲟⲩⲛ ⲉ̃ϫⲱⲟⲩ
ⲡⲉϫⲁϥ ⲛⲱⲟⲩ ϫⲉ ⲧⲉⲧⲉⲛⲥⲱⲟⲩⲛ ⲙ̃ⲙⲟⲓ ⲁⲛ ⲱ ⲛⲓⲟⲩ-
ⲣⲱⲟⲩ ⲁϥϥⲁⲓ ⲛ̃ⲛⲉϥⲃⲁⲗ ⲉ̃ⲡϣⲱⲓ ⲛ̃ϫⲉ ⲡⲟⲩⲣⲟ ⲇⲁ-
ⲇⲓⲁ̃ⲛⲟⲥ ϧⲉⲛ ⲟⲩϣⲓⲡⲓ ⲉϥϫⲱ ⲙ̃ⲙⲟⲥ ⲙ̃ⲡⲓⲁ̃ⲅⲓⲟⲥ ϫⲉ ⲛ̃ⲑⲟⲕ
ⲛⲓⲙ ⲙ̃ⲡⲁⲓⲣⲏϯ ⲡⲉϫⲉ ⲡⲓⲙⲁⲣⲧⲩⲣⲟⲥ ⲛ̃ⲧⲉ ⲡⲭ︦ⲥ︦ ⲛⲁϥ ϫⲉ
ⲁ̃ⲛⲟⲕ ⲡⲉ ⲅⲉⲱⲣⲅⲓⲟⲥ ⲫⲏ ⲉ̃ⲧⲁⲧⲉⲛϧⲱⲧⲉⲃ ⲙ̃ⲙⲟϥ ⲛ̃ⲥⲁϥ
ⲉⲑⲃⲉ ⲧⲉⲧⲉⲛⲙⲉⲧⲣⲉϥϯϣⲱϣ ⲉ̃ⲡⲁⲛⲟⲩϯ ⲫⲁⲓ ⲉⲑⲛⲁⲧⲁ-
ⲕⲉⲑⲏⲛⲟⲩ ⲙ̃ⲡⲁⲧⲉ ⲟⲩⲉⲥⲕⲓ ϣⲱⲡⲓ *ⲡⲟⲩⲣⲟ ⲇⲉ ⲇⲁ-
ⲇⲓⲁ̃ⲛⲟⲥ ⲉϥⲙⲏⲛ ⲉϥⲥⲟⲙⲥ ⲉ̃ϧⲟⲩⲛ ϧⲉⲛ ⲡϩⲟ ⲙ̃ⲡⲓⲁ̃ⲅⲓⲟⲥ
ⲡⲉϫⲁϥ ϫⲉ ⲛ̃ⲑⲟⲕ ⲁⲛ ⲡⲉ ⲁⲗⲗⲁ ⲧⲉϥϧⲏⲓⲃⲓ ⲧⲉ ⲕⲉⲟⲩⲁⲓ
ⲇⲉ ⲡⲉϫⲁϥ ϫⲉ ⲁ̃ⲣⲏⲟⲩ ⲁϥⲟ̃ⲛⲓ ⲙ̃ⲙⲟϥ ⲉ̃ⲧⲁϥⲉ̃ⲙⲓ
ⲇⲉ ⲛ̃ϫⲉ ⲁ̃ⲛⲁⲧⲟⲗⲓⲟⲥ ⲡⲓⲥⲧⲣⲁⲧⲓⲗⲁⲧⲏⲥ ⲡⲉϫⲁϥ ϫⲉ
ϧⲉⲛ ⲟⲩⲙⲉⲑⲙⲏⲓ ⲫⲁⲓ ⲡⲉ ⲅⲉⲱⲣⲅⲓⲟⲥ ⲡⲉⲧⲁϥⲧⲁϥⲧⲱⲛϥ
ⲉ̃ⲃⲟⲗϧⲉⲛ ⲛⲏ ⲉⲑⲙⲱⲟⲩⲧ ⲁϥⲛⲁϩϯ ⲇⲉ ⲛ̃ϫⲉ ⲁ̃ⲛⲁ-
ⲇⲟⲗⲓⲟⲥ ⲛⲉⲙ ⲛⲁⲧⲉϥⲧⲁⲝⲓⲥ ⲧⲏⲣⲥ *ⲁⲥϣⲱⲡⲓ ⲇⲉ ⲛ̃ϫⲉ
ⲧⲏⲡⲓ ⲛ̃ⲛⲏ ⲉ̃ⲧⲁⲩⲛⲁϩϯ ⲉ̃ⲡⲭ︦ⲥ︦ ⲥⲉⲓ̃ⲣⲓ ⲛ̃ⲅ︦ ⲛ̃ϣⲟ ⲛⲉⲙ ⲑ︦
ⲛⲉⲙ ⲟⲩⲥϩⲓⲙⲓ ⲉ̃ⲃⲟⲗϧⲉⲛ ⲡⲓⲙⲏϣ ⲟⲩⲟϩ ⲁϥⲟⲩⲁϩⲥⲁϩⲛⲓ
ⲛ̃ϫⲉ ⲡⲟⲩⲣⲟ ⲇⲁⲇⲓⲁ̃ⲛⲟⲥ ⲉⲑⲣⲟⲩϩⲓⲧⲟⲩ ⲧⲏⲣⲟⲩ ⲥⲁⲃⲟⲗ
ⲛ̃ϯⲃⲁⲕⲓ ϧⲉⲛ ⲟⲩⲙⲁⲛ̃ϣⲁϥⲉ ⲁⲩⲁⲓⲧⲟⲩ ⲛ̃ⲇ︦ ⲙ̃ⲙⲉⲣⲟⲥ
ⲁⲩϭⲟⲧⲉⲧ ⲙ̃ⲙⲱⲟⲩ ⲡⲁⲓⲣⲏϯ ⲁⲩϫⲱⲕ ⲛ̃ⲧⲟⲩⲙⲁⲣⲧⲩⲣⲓⲁ̃


### 0014

ⲛ̃ⲥⲟⲩⲓ︦ⲉ︦ ⲙ̃ⲫⲁⲙⲉⲛⲱⲑ ϧⲉⲛ ⲟⲩⲉ̃ϩⲟⲟⲩ ⲛ̃ⲥⲁⲃⲃⲁⲧⲟⲛ ϧⲉⲛ
ⲁϫⲡ ⲑ︦ ⲙ̃ⲡⲓⲉ̃ϩⲟⲟⲩ ⲟⲩⲟϩ ⲁⲩϣⲉ ⲛⲱⲟⲩ ϧⲉⲛ
ⲟⲩⲱⲟⲩ ⲉ̃ⲡⲓ*ⲡⲁⲣⲁⲇⲓⲥⲟⲥ ⲉⲩϫⲓϩⲙⲟⲧ ⲉ̃ϩⲣⲏⲓ ⲉ̃ϫⲉⲛ ⲛⲓⲣⲉϥ-
ⲉⲣⲛⲟⲃⲓ
Ⲁϥⲟⲩⲁϩⲥⲁϩⲛⲓ ⲛ̃ϫⲉ ⲡⲟⲩⲣⲟ ⲉⲑⲣⲟⲩⲓ̃ⲛⲓ ⲙ̃ⲡⲓⲁ̃ⲅⲓⲟⲥ
ⲅⲉⲱⲣⲅⲓⲟⲥ ⲉ̃ϫⲉⲛ ⲡⲓⲃⲏⲙⲁ ⲟⲩⲟϩ ⲁϥϫⲟⲥ ⲉⲑⲣⲟⲩⲓ̃ⲛⲓ ⲛ̃ⲟⲩϭⲗⲟϫ
ⲙ̃ⲃⲉⲛⲓⲡⲓ ϩⲓⲛⲁ ⲛ̃ⲥⲉⲥⲱⲛϩ ⲙ̃ⲡⲓⲑⲙⲏⲓ ⲉ̃ⲣⲟϥ ⲟⲩⲟϩ ⲁϥⲑⲣⲟⲩ-
ⲥⲁϩϯ ϧⲁ ⲟⲩⲧⲁⲧϩ ϣⲁⲧⲉϥⲃⲱⲗ ⲉ̃ⲃⲟⲗ ⲟⲩⲟϩ ⲛ̃ⲥⲉⲓ̃ⲛⲓ
ⲛ̃ⲟⲩⲙⲟⲕⲓ ⲙ̃ⲡⲥⲙⲟⲧ ⲛ̃ⲟⲩⲭⲟⲛⲓ ⲙ̃ⲃⲉⲛⲓⲡⲓ ⲛ̃ⲥⲉϩⲓⲧϥ ⲉ̃ϧⲣⲏⲓ
ⲉ̃ⲣⲱϥ ⲟⲩⲟϩ ⲁϥⲑⲣⲟⲩ*ⲑⲟⲩⲝ ⲛ̃ⲝ︦ ⲛ̃ⲓϥⲧ ⲉ̃ⲧⲉϥⲁ̃ⲫⲉ
ⲉ̃ϧⲟⲩⲛ ⲉ̃ⲡⲓϭⲗⲟϫ ⲁϥⲑⲣⲟⲩⲓ̃ⲛⲓ ⲛ̃ⲟⲩⲛⲓϣϯ ⲛ̃ⲱ̃ⲛⲓ ⲉϥⲫⲟⲛⲕ
ⲕⲁⲧⲁ ⲧⲉϥⲁ̃ⲫⲉ ⲟⲩⲟϩ ⲁⲩϩⲓ ⲧⲉϥⲁⲫⲉ ⲉ̃ϧⲣⲏⲓ ⲉ̃ⲣⲟϥ
ⲉ̃ⲧⲁϫⲣⲟⲥ ⲛ̃ⲧⲁⲧϩ ⲛ̃ⲥⲉⲥⲕⲉⲣⲕⲉⲣ ⲙ̃ⲙⲟϥ ⲛⲉⲙ ⲡⲓⲱ̃ⲛⲓ
ⲟⲩⲟϩ ⲛ̃ⲧⲟⲩⲃⲱⲗ ⲉ̃ⲃⲟⲗ ⲛ̃ⲛⲓⲧⲁϩⲟ ⲉ̃ⲣⲁⲧⲟⲩ ⲛ̃ⲧⲉ ⲛⲉϥⲕⲁⲥ
ⲉ̃ⲧⲁϥⲁ̃ⲙⲟⲛⲓ ⲇⲉ ⲛ̃ⲧⲟⲧϥ ϧⲉⲛ ⲧⲁⲓⲃⲁⲍⲁⲛⲟⲥ ϧⲉⲛ ⲟⲩ-
ⲙⲉⲧϫⲱⲣⲓ ⲟⲩⲟϩ ⲁϥⲟⲩⲁϩⲥⲁϩⲛⲓ ⲉ̃ⲑⲣⲟⲩⲓ̃ⲛⲓ ⲙ̃ⲡⲓⲱ̃ⲛⲓ
*ⲉ̃ⲃⲟⲗϩⲁⲣⲟϥ ⲉ̃ⲁϣϥ ⲉ̃ⲡϣⲱⲓ ⲛ̃ⲥⲁϫⲱϥ ⲟⲩⲟϩ ⲛ̃ⲧⲟⲩ-
ⲙⲟⲩⲣ ⲛ̃ⲟⲩⲛⲓϣϯ ⲛ̃ⲱ̃ⲛⲓ ⲛ̃ϧⲏⲧϥ ⲛⲉⲙ ⲉ̃ϭⲉⲣⲉ ⲟⲩⲛⲓϣϯ
ⲛ̃ⲭⲣⲉⲙⲧⲥ ⲉ̃ⲡϣⲱⲓ ϧⲁⲣⲟϥ ⲙⲉⲛⲉⲛⲥⲁ ⲛⲁⲓ ⲇⲉ ⲁϥⲟⲩⲁϩ-
ⲥⲁϩⲛⲓ ⲉ̃ϩⲓⲧϥ ⲉ̃ϧⲟⲩⲛ ⲉ̃ⲟⲩⲙⲁⲥⲓ ⲛ̃ϩⲟⲙⲧ ⲛⲉⲙ ⲉ̃ⲧⲱⲧⲥ
ⲛ̃ϩⲁⲛⲓϥⲧ ⲉⲩϣⲏⲟⲩ ⲉ̃ϧⲟⲩⲛ ⲉ̃ⲣⲟϥ ⲁϥⲉⲣⲕⲉⲗⲉⲩⲓⲛ ⲛ̃ϫⲉ
ⲡⲓⲁ̃ⲛⲟⲙⲟⲥ ⲛ̃ⲟⲩⲣⲟ ⲉⲑⲣⲟⲩⲓ̃ⲛⲓ ⲛⲟⲩⲙⲁⲛⲕⲁⲛⲱⲛ ⲙ̃ⲡⲓ-
ⲙⲁⲥⲓ ⲛ̃ⲧⲟⲩⲕⲱ*ϯ ⲉ̃ϧⲟⲩⲛ ϩⲓⲛⲁ ⲛ̃ⲧⲟⲩϧⲟⲙϧⲉⲙ
ⲙ̃ⲡⲥⲱⲙⲁ ⲙ̃ⲡⲓⲁ̃ⲅⲓⲟⲥ ⲛ̃ϫⲉ ⲛⲓⲓϥⲧ ⲟⲩⲟϩ ⲛ̃ⲧⲉ ⲛⲉϥⲙⲉⲗⲟⲥ
ⲉⲣ ⲙ̃ⲫⲣⲏϯ ⲛ̃ⲟⲩϣⲱⲓϣ ⲛ̃ⲧⲉ ⲟⲩϭⲛⲱⲟⲩ ϧⲉⲛ ⲡⲓϣⲱⲙ
ⲁϥⲁ̃ⲙⲟⲛⲓ ⲛ̃ⲧⲟⲧϥ ⲟⲛ ϧⲉⲛ ⲟⲩⲙⲉⲧϫⲱⲣⲓ ⲁϥⲟⲩⲁϩⲥⲁϩⲛⲓ


### 0015

ⲇⲉ ⲟⲛ ⲉ̃ⲑⲣⲟⲩϩⲓⲧϥ ⲉ̃ⲡⲓϣⲧⲉⲕⲟ ⲛⲉⲙ ⲉ̃ⲧⲟⲥϥ ⲉ̃ⲡϣⲉ ϣⲁ-
ⲧⲉϥⲥⲟϭⲛⲓ ϫⲉ ϥⲛⲁⲉⲣ ⲟⲩ ⲛⲁϥ ⲓⲉ ϫⲉ ϥⲛⲁⲧⲁⲕⲟϥ
ⲛ̃ⲁϣ ⲛ̃ⲣⲏϯ ⲛⲉ ⲟⲩⲥⲁⲓⲉ ⲡⲉ ⲉ̃ⲙⲁϣⲱ ϧⲉⲛ ⲧⲉϥϫⲓⲛ-
ⲛⲁⲩ
Ⲁ ⲡϭ︦ⲥ︦ ⲟⲩⲟⲛϩϥ ⲉ̃ⲣⲟϥ *ϧⲉⲛ ⲡⲓⲉ̃ϫⲱⲣϩ ⲉ̃ⲧⲉⲙⲙⲁⲩ
ⲉϥϫⲱ ⲙ̃ⲙⲟⲥ ϫⲉ ⲁ̃ⲙⲱⲛⲓ ⲛ̃ⲧⲟⲧⲕ ⲡⲁⲥⲟⲧⲡ ⲅⲉⲱⲣ-
ⲅⲓⲟⲥ ⲟⲩⲟϩ ϫⲉⲙ ⲛⲟⲙϯ ⲙ̃ⲡⲉⲣⲃⲱⲗ ⲉ̃ⲃⲟⲗ ϫⲉ ⲁ̃ⲛⲟⲕ ϯⲭⲏ
ⲛⲉⲙⲁⲕ ⲟⲩⲟⲛ ⲟⲩⲛⲓϣϯ ⲛ̃ⲣⲁϣⲓ ϣⲟⲡ ⲛⲁⲕ ϧⲉⲛ
ⲧⲫⲉ ⲉ̃ϩⲣⲏⲓ ⲉ̃ϫⲉⲛ ⲡⲉⲕⲁ̃ⲅⲱⲛ ϩⲏⲡⲡⲉ ⲓⲥ ⲟⲩⲥⲟⲡ ⲁⲕ-
ⲙⲟⲩ ⲙ̃ⲙⲟϥ ⲁⲓⲧⲟⲩⲛⲟⲥⲕ ⲉ̃ⲧⲓ ⲭⲛⲁⲙⲟⲩ ⲛ̃ⲕⲉⲥⲟⲡⲃ︦
ⲟⲩⲟϩ ϯⲛⲁⲧⲟⲩⲛⲟⲥⲕ ⲟⲛ ϧⲉⲛ ⲡⲓⲙⲁϩⲇ ⲇⲉ ⲛ̃ⲥⲟⲡ ⲁ̃ⲛⲟⲕ
*ⲉⲑⲛⲁⲓ̃ ⲙ̃ⲙⲓⲛ ⲙ̃ⲙⲟⲓ ϧⲉⲛ ϩⲁⲛϭⲏⲡⲓ ⲟⲩⲟϩ ϯⲡⲁⲣⲁⲑⲏⲕⲏ
ⲉ̃ⲧⲁⲓϫⲁⲗⲟⲥ ⲉ̃ⲡⲉⲕⲥⲱⲙⲁ ϯⲛⲁϭⲓⲧⲥ ⲁ̃ⲛⲟⲕ ⲉⲑⲛⲁϯϫⲟⲙ
ⲙ̃ⲡⲉⲕⲥⲱⲙⲁ ⲉ̃ⲑⲟⲩⲁⲃ ⲛ̃ⲧⲁⲑⲣⲉⲕⲙ̃ⲧⲟⲛ ⲙ̃ⲙⲟⲕ ⲛⲉⲙ
ⲁⲃⲣⲁⲁⲙ ⲛⲉⲙ ⲓ̃ⲥⲁⲁⲕ ⲛⲉⲙ ⲓⲁⲕⲱⲃ *ⲙ̃ⲡⲉⲣⲉⲣϣⲗⲁϩ
ⲛ̃ϩⲏⲧ ⲁ̃ⲛⲟⲕ ϯⲭⲏ ⲛⲉⲙⲁⲕ ⲉⲥⲉϣⲱⲡⲓ ⲅⲁⲣ ⲛ̃ϫⲉ ⲧⲉⲕ-
ⲙⲁⲣⲧⲏⲣⲓⲁ ⲙ̃ⲡⲉⲙⲑⲟ ⲙ̃ⲡⲁⲓⲟ︦ ⲛ̃ⲟⲩⲣⲟ ⲛⲁⲓ ⲉⲕⲉⲣⲙⲉⲑⲣⲉ
ⲙ̃ⲡⲟⲩⲙ̃ⲑⲟ ⲉⲑⲃⲏⲧ ⲭⲛⲁⲉⲣ ⲍ̄ ⲛ̃ⲣⲟⲙⲡⲓ ⲉⲩⲉⲣⲃⲁⲍⲁⲛⲓⲍⲓⲛ
ⲙ̃ⲙⲟⲕ *ⲉ̃ϩⲣⲏⲓ ϩⲓϫⲉⲛ ⲡⲁⲣⲁⲛ ϫⲉⲙⲛⲟⲙϯ ⲙ̃ⲡⲉⲣⲉⲣϣⲗⲁϩ
ⲛ̃ϩⲏⲧ ϧⲉⲛ ⲡϫⲓⲛⲑⲣⲉϥⲧⲁⲓⲉⲙⲟⲩϯ ⲉ̃ⲣⲟϥ ⲛ̃ϫⲉ ⲡϭ︦ⲥ︦ ⲁϥϣⲉ
ⲛⲁϥ ⲉ̃ⲡϣⲱⲓ ⲉ̃ⲛⲓⲫⲏⲟⲩⲓ̃ ⲛⲉⲙ ⲛⲉϥⲁⲅⲅⲉⲗⲟⲥ ⲉ̃ⲑⲟⲩⲁⲃ
*ⲉ̃ⲣⲉ ⲡⲓϫⲱⲣⲓ ⲙ̃ⲙⲁⲣⲧⲩⲣⲟⲥ ⲛ̃ⲧⲉ ⲡⲭ︦ⲥ︦ ⲥⲟⲙⲥ ⲉ̃ⲣⲟϥ ⲟⲩ-
ⲟϩ ⲛ̃ⲑⲟϥ ⲇⲉ ⲛⲁϥⲙⲏⲛ ⲉ̃ⲃⲟⲗ ϧⲉⲛ ⲡⲓϣⲣⲱⲓⲥ ϣⲁⲧⲉ
ⲡⲓⲟⲩⲱⲓⲛⲓ ϣⲁⲓ ⲉ̃ⲃⲟⲗ ⲉϥⲟⲩⲛⲟϥ ⲙ̃ⲙⲟϥ ϧⲉⲛ ⲡⲓⲉ̃ⲣⲟⲩⲟⲧ-
ⲉ̃ⲧⲁ ⲡϭ︦ⲥ︦ ⲧⲏⲓϥ ⲛⲁϥ


### 0016

Ⲉⲧⲁ ϣⲱⲣⲡ ⲇⲉ ϣⲱⲡⲓ *ⲁϥⲟⲩⲁϩⲥⲁϩⲛⲓ ⲛ̃ϫⲉ
ⲡⲟⲩⲣⲟ ⲉⲑⲣⲟⲩⲓ̃ⲛⲓ ⲙ̃ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲉ̃ϫⲉⲛ ⲡⲓⲃⲏⲙⲁ
ⲉ̃ⲧⲁⲩⲉⲛϥ ⲇⲉ ⲡⲉϫⲉ ⲟⲩⲁⲓ ⲛⲁϥ ⲉ̃ⲃⲟⲗϧⲉⲛ ⲡⲓⲟ︦ ⲛ̃ⲟⲩⲣⲟ
ⲉ̃ⲡⲉϥⲣⲁⲛ ⲡⲉ ⲙⲁⲅⲙⲉⲛⲧⲓⲟⲥ ϫⲉ ⲅⲉⲱⲣⲅⲓⲟⲥ ϯⲉⲣⲉ̃ⲧⲓⲛ ⲛ̃ⲟⲩ-
ⲙⲏⲓⲛⲓ ⲛ̃ⲧⲟⲧⲕ ⲉ̃ϣⲱⲡ ⲁⲕϣⲁⲛⲁⲓϥ ⲙ̃ⲡⲁⲙ̃ⲑⲟ ϣⲉ ⲡⲉⲛ-
ⲛⲏⲃ ⲡⲓⲣⲏ ⲛⲉⲙ ⲡⲓⲟ︦ ⲛ̃ⲛⲟⲩϯ ⲛⲉⲙ ⲑⲙⲁⲩ ⲛ̃ⲛⲓⲛⲟⲩϯ
ϯⲁⲣⲧⲏⲙⲓⲥ ϫⲉ ⲛ̃ⲑⲟⲥ ⲉⲑⲛⲟϩⲉⲙ *ⲙ̃ⲡⲓⲕⲟⲥⲙⲟⲥ ⲧⲏⲣϥ ϫⲉ
ϯⲛⲁⲛⲁϩϯ ϩⲱ ⲉ̃ⲛⲉⲕⲛⲟⲩϯ ⲛ̃ⲧⲁϣⲉⲙϣⲓ ⲙ̃ⲙⲱⲟⲩ
ⲛ̃ⲕⲁⲗⲱⲥ *ⲡⲉϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲛⲁϥ ϫⲉ ⲁ̃ϫⲉ
ⲡⲉⲕⲉ̃ⲧⲏⲙⲁ ⲛⲏⲓ ⲡⲉϫⲉ ⲙⲁⲕⲙⲉⲛⲧⲓⲟⲥ ⲡⲟⲩⲣⲟ ⲛⲁϥ ϫⲉ
ϩⲏⲡⲡⲉ ⲓⲥ ⲟ︦ ⲛ̃ⲑⲣⲟⲛⲟⲥ ⲥⲉⲭⲏ ⲉ̃ϧⲣⲏⲓ ⲫⲟⲩⲁⲓ ⲫⲟⲩⲁⲓ
ⲛ̃ⲛⲓⲑⲣⲟⲛⲟⲥ ⲟⲩⲟϩ ϩⲁⲛⲫⲁⲧⲥⲓ ⲛ̃ϧⲏⲧⲟⲩ ⲙ̃ⲙⲏⲛⲓ ⲛⲓⲃⲉⲛ
ϩⲁⲛ ⲟⲩⲟⲛ ⲙⲏⲛ ⲛ̃ⲧⲉ ϩⲁⲛϣϣⲏⲛ ⲛ̃ⲣⲉϥϯⲟⲩⲧⲁϩ ⲛⲉⲙ
ϩⲁⲛⲟⲩⲟⲛ ⲛ̃ⲁⲧⲟⲩⲧⲁϩ ⲉ̃ϣⲱⲡ ⲟⲩⲛ ⲛ̃ⲧⲟⲩ*ⲟⲩⲱⲛϩ
ⲉ̃ⲃⲟⲗ ⲛ̃ⲧⲟⲩϣⲉⲡ ⲛⲟⲩⲛⲓ ⲛ̃ϫⲉ ⲛⲓⲫⲁⲧⲥⲓ ⲛ̃ⲧⲉ ⲡⲓϣϣⲏⲛ
ⲛⲧⲉ ⲡⲓⲟⲩⲁⲓ ⲡⲓⲟⲩⲁⲓ ⲛϧⲏⲧⲟⲩ ⲫⲓⲣⲓ ⲉⲃⲟⲗ ϩⲓⲧⲉⲛ
ⲛⲉⲕⲧⲱⲃϩ ⲟⲩⲟϩ ⲛⲧⲉ ⲛⲓⲫⲁⲓⲥⲓ ⲛ̃ⲣⲉϥϯⲟⲩⲧⲁϩ ⲫⲟⲣⲓ
ⲉⲃⲟⲗ ⲟⲩⲟϩ ⲛⲧⲉ ⲛⲓⲁⲧⲟⲩⲧⲁϩ ⲛϫⲱⲃⲓ ⲫⲟⲣⲓ ⲉⲃⲟⲗ
ϧⲉⲛ ⲫⲁⲓ ϯⲛⲁϩϯ ⲉ̃ⲡⲉⲕⲛⲟⲩϯ


### 0017

Ⲁ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ϩⲓⲧϥ ϩⲓϫⲉⲛ ⲡⲉϥϩⲟ ⲁϥⲧⲱⲃϩ
ⲙ̃ⲫ︦ϯ︦ ⲛ̃ⲟⲩⲛⲓϣϯ ⲛ̃ⲛⲁⲩ ⲉϥϥⲓⲁ̃ϩⲟⲙ ⲉⲧⲁϥ*ϫⲱⲕ ⲇⲉ
ⲉ̃ⲃⲟⲗ ⲛ̃ϯⲡⲣⲟⲥⲉⲩⲭⲏ ⲁϥϫⲱ ⲙ̃ⲡⲓⲁ̃ⲙⲏⲛ ⲁⲥϣⲱⲡⲓ ⲇⲉ
ⲟⲩⲛⲓϣϯ ⲛ̃ϩⲟϯ ⲛⲉⲙ ⲟⲩⲥⲑⲉⲣⲧⲉⲣ ϧⲉⲛ ⲡⲉϥϫⲓⲛⲧⲱⲛϥ
ⲟⲩⲡ︦ⲛ︦ⲁ︦ ⲅⲁⲣ ⲛ̃ⲧⲉ ⲡϭ︦ⲥ︦ ⲁϥⲓ̃ ⲉ̃ϫⲉⲛ ⲛⲓⲑⲣⲟⲛⲟⲥ ⲁⲩϯⲟⲩⲱ̃
ⲉ̃ⲃⲟⲗ ⲁⲩϭⲉⲡ ⲛⲟⲩⲛⲓ ⲛ̃ϫⲉ ⲛⲓⲫⲁⲧⲥⲓ ⲁⲩⲫⲓⲣⲓ ⲉ̃ⲃⲟⲗ
ⲟⲩⲟϩ ⲛⲏ ⲉ̃ⲧⲟⲓ ⲛ̃ⲣⲉϥϯⲟⲩⲧⲁϩ ⲁⲩϯⲟⲩⲧⲁϩ ⲛⲏ ⲉ̃ⲧⲟⲓ
ⲛ̃ⲁⲧⲟⲩⲧⲁϩ ⲁⲩϩⲓ ϫⲱⲃⲓ ⲉ̃ⲃⲟⲗ ⲧⲟⲧⲉ ⲡⲉϫⲉ ⲙⲁⲅ-
ⲙⲉⲛⲧⲓⲟⲥ ⲡⲟⲩⲣⲟ ⲛⲁϥ *ϫⲉ ⲟⲩⲛⲓϣϯ ⲛ̃ⲛⲟⲩϯ ⲡⲉ ⲡⲓⲉ̃ⲣⲁ-
ⲕⲗⲏⲥ ϫⲉ ⲛⲉⲙ ⲛⲓⲕⲉϣⲉ ⲉⲧϣⲟⲩⲱ̃ⲟⲩ ⲁϥⲟⲩⲱⲛϩ
ⲛ̃ⲧⲉϥϫⲟⲙ ⲉ̃ⲃⲟⲗ ⲛ̃ϧⲏⲧⲟⲩ ⲙ̃ⲡⲁⲓⲣⲏϯ ⲁϥⲉⲣⲟⲩⲱ̃ ⲛ̃ϫⲉ
ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲉϥϫⲱ ⲙ̃ⲙⲟⲥ ϫⲉ ⲫϯ ⲫⲏ ⲉ̃ⲧⲁϥⲑⲁ-
ⲙⲓⲟ̃ ⲛ̃ⲧⲫⲉ ⲛⲉⲙ ⲡⲕⲁϩⲓ ⲫⲏ ⲉ̃ⲧⲁϥⲑⲣⲉ ⲛⲏ ⲉⲧϣⲟⲡ ⲁⲛ
ϣⲱⲡⲓ ⲁⲕⲧⲉⲛⲑⲱⲛϥ ⲉ̃ⲡⲓⲉ̃ⲣⲁⲕⲗⲏⲥ² ⲡⲓⲇⲱⲗⲟⲛ ⲛ̃ⲕⲟⲩⲣ
ⲙ̃ⲃⲉⲗⲗⲉ ⲫⲏ ⲉ̃ⲧⲉⲕⲛⲁⲧⲁⲕⲟ ⲛⲉⲙⲁϥ ⲛ̃ⲭⲱⲗⲉⲙ
Ⲁϥⲉⲣⲟⲩⲱ̃ ⲛ̃ϫⲉ ⲡⲟⲩϥⲟ ⲇⲁⲇⲓⲁ̃ⲛⲟⲥ ⲡⲉϫⲁϥ ⲙ̃ⲡⲓⲁ̃-
ⲅⲓⲟⲥ ⲅⲉⲱⲣⲅⲓⲟⲥ ⲡⲓⲥⲟⲧⲡ ⲛ̃ⲧⲉ ⲛⲓⲅⲁⲗⲓⲗⲉⲟⲥ ϯⲥⲱⲟⲩⲛ
ϫⲉ ϯⲛⲁⲧⲁⲕⲟⲕ ⲛ̃ⲁϣ ⲛ̃ⲣⲏϯ ⲧⲟⲧⲉ ⲁϥⲟⲩⲁϩⲥⲁϩⲛⲓ
ⲉⲑⲣⲟⲩⲓ̃ⲛⲓ ⲛ̃ⲟⲩⲛⲓϣϯ ⲙ̃ⲃⲁϣⲟⲩⲣ ⲁⲩⲃⲓⲥⲓ ⲙ̃ⲙⲟϥ ϧⲉⲛ
ⲧⲉϥⲙⲏϯ ⲁⲩⲁⲓϥ ⲛ̃ⲃ︦ ⲟⲩⲟϩ ⲡⲁⲓⲣⲏϯ ⲁϥϯ ⲙ̃ⲡⲓⲡ︦ⲛ︦ⲁ︦
ⲁϥⲑⲣⲟⲩⲓ̃ⲛⲓ ⲛ̃ⲟⲩⲛⲓϣϯ ⲛ̃ⲗⲉⲃⲏⲥ ⲛ̃ⲥⲉϩⲓⲟⲩⲓ̃ ⲛ̃ϯⲧⲟⲓ
ⲃ︦ϯ ⲛⲧⲉ ⲡⲥⲱⲙⲁ ⲙ̃ⲡⲓⲁ̃ⲅⲓⲟⲥ ⲉ̃ϧⲣⲏⲓ ⲉ̃ⲙⲁⲩ *ⲛⲉⲙ ⲟⲩ-
ⲧⲁⲧϩ ⲛⲉⲙ ⲟⲩⲗⲁⲙϫⲁⲡⲧ ⲛⲉⲙ ⲟⲩⲱⲧ ⲛ̃ⲧⲉⲃⲛⲏ ⲛⲉⲙ
ⲟⲩⲙ̃ⲃⲣⲉϩⲓ ⲁⲩⲥⲁϩϯ ϧⲁⲣⲟϥ ⲉ̃ⲙⲁϣⲱ ϩⲱⲥⲧⲉ ⲛ̃ⲧⲉ
ⲛⲉϥⲃⲉⲣⲃⲉⲣ ⲛⲉⲙ ⲛⲉϥϣⲁϩ ϭⲓⲥⲓ ⲉ̃ⲡⲓϩⲟⲩⲟ̃ ϩⲱⲥⲧⲉ ⲛ̃ⲧⲉ


### 0018

ⲛⲏ ⲉⲧⲥⲁϩϯ ⲫⲱⲧ ⲉ̃ⲡⲁⲓⲥⲁ ⲛⲉⲙ ⲫⲁⲓ ϩⲓⲧⲉⲛ ⲡⲓϩⲟⲩⲟ̃
ⲛ̃ⲧⲉ ⲡⲓϣⲁϩ ϩⲱⲥⲧⲉ ⲛ̃ⲧⲉϥϭⲓⲥⲓ ⲙ̃ⲓ︦ⲉ︦ ⲙ̃ⲙⲁϩⲓ ⲁⲩⲓ̃ⲛⲓ
ⲛ̃ⲛⲓⲛⲉϧϫⲓ ⲛ̃ⲧⲉ ⲡⲓⲗⲉⲃⲏⲥ ⲙ̃ⲡⲟⲩⲣⲟ ⲉⲩϫⲱ ⲙ̃ⲙⲟⲥ ϫⲉ
ⲁϥⲟⲩⲱ̃ ⲁϥⲙⲟⲩⲛⲕ ⲛ̃ϫⲉ ⲡⲓⲃⲉⲣϣⲟ ⲉ̃ⲧⲉⲙⲙⲁⲩ *ⲁϥ-
ⲟⲩⲁϩⲥⲁϩⲛⲓ ⲛ̃ϫⲉ ⲡⲟⲩⲣⲟ ⲉⲑⲣⲟⲩⲟⲗⲥ ⲛ̃ⲥⲉⲑⲟⲙⲥⲥ ϧⲉⲛ
ⲡⲓⲕⲁϩⲓ ⲛⲉⲙ ⲡⲓⲕⲉⲗⲉⲃⲏⲥ ⲛⲉⲙ ⲛⲓⲙⲉⲗⲟⲥ ⲛ̃ⲧⲉ ⲡⲓⲁ̃ⲅⲓⲟⲥ
ⲉ̃ⲧⲉⲛϧⲏⲧⲥ² ϫⲉ ϩⲓⲛⲁ ⲛ̃ⲛⲉ ⲛⲓⲭⲣⲏⲥⲧⲓⲁ̃ⲛⲟⲥ ϫⲓⲙⲓ ⲛ̃ⲟⲩ-
ⲙⲉⲗⲟⲥ ⲛ̃ⲧⲁϥ ⲛ̃ⲧⲟⲩⲧⲟⲩⲛⲟⲥ ⲟⲩⲙⲁⲣⲧⲏⲣⲓⲟⲛ ⲛⲁϥ
Ⲉⲧⲁⲩⲕⲏⲛ ⲇⲉ ⲉ̃ⲑⲟⲙⲥ ⲙ̃ⲡⲓⲑⲙⲏⲓ ⲛ̃ϫⲉ ⲛⲓϩⲩⲡⲉⲣⲉⲧⲏⲥ
ⲁⲩⲉⲣⲁ̃ⲛⲁⲭⲱⲣⲓⲛ ⲛⲱⲟⲩ ⲁϥϣⲱⲡⲓ ⲛ̃ϫⲉ ⲟⲩⲛⲓϣϯ
ⲛ̃ϣⲑⲟⲣⲧⲉⲣ ϧⲉⲛ ⲡⲓⲁ̃ⲏⲣ ⲁ̃ ⲡⲕⲁϩⲓ *ⲕⲓⲙ ϣⲁ ⲛⲉϥⲥⲉⲛϯ
ϩⲏⲡⲡⲉ ⲓⲥ ⲡϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲁϥⲓ̃ ⲉ̃ⲡⲉⲥⲏⲧ ⲉ̃ⲃⲟⲗϧⲉⲛ ⲧⲫⲉ
ⲛⲉⲙ ⲛⲉϥⲁⲅⲅⲉⲗⲟⲥ ⲉ̃ⲑⲟⲩⲁⲃ ⲁϥⲕ̃ϩⲓ ⲉ̃ⲣⲁⲧϥ ⲉ̃ϫⲉⲛ ⲡⲓⲙⲁ
ⲉ̃ⲧⲉⲣⲉ ⲡⲓⲗⲉⲃⲏⲥ ⲑⲟⲙⲥ ⲛ̃ϧⲏⲧϥ ⲟⲩⲟϩ ⲡⲉϫⲁϥ ⲛ̃ⲍⲁⲗⲁⲑⲓⲏⲗ
ⲡⲓⲁ̃ⲅⲅⲉⲗⲟⲥ ϫⲉ ⲁ̃ⲛⲓⲟⲩⲓ̃ ⲙ̃ⲡⲁⲓⲗⲉⲃⲏⲥ ⲉ̃ⲡϣⲱⲓ ⲉⲧⲁϥ-
ⲓ̃ⲛⲓ ⲇⲉ ⲙ̃ⲡⲓⲗⲉⲃⲏⲥ ⲉ̃ⲡϣⲱⲓ ⲁϥⲫⲟⲛϥ ⲉ̃ⲃⲟⲗ ϩⲓϫⲉⲛ
ⲡⲕⲁϩⲓ ⲁϥⲉⲣⲟⲩⲱ̃ ⲛ̃ϫⲉ ⲡϭ︦ⲥ︦ ⲛ̃ⲧⲉ ⲛⲓϫⲟⲙ ⲉ̃ϩⲣⲏⲓ ⲉ̃ϫⲱϥ
ϫⲉ ⲅⲉⲱⲣⲅⲓⲟⲥ ⲡⲁⲥⲟⲧⲡ *ⲧⲱⲛⲕ ⲉ̃ϩⲣⲏⲓ ⲁ̃ⲛⲟⲕ ⲡⲉ ⲫⲏ
ⲉ̃ⲧⲁϥⲧⲟⲩⲛⲟⲥ ⲗⲁⲍⲁⲣⲟⲥ ⲉ̃ⲃⲟⲗϧⲉⲛ ⲛⲏ ⲉⲑⲙⲱⲟⲩⲧ ⲡⲁⲓ-
ⲣⲏϯ ⲟⲛ ϯⲛⲟⲩ ⲁ̃ⲛⲟⲕ ⲧⲟⲩⲁϩⲥⲁϩⲛⲓ ⲛⲁⲕ ϫⲉ ⲧⲱⲛⲕ
ⲟⲩⲟϩ ⲁ̃ⲙⲟⲩ ⲉ̃ⲡϣⲱⲓ ⲉ̃ⲃⲟⲗϧⲉⲛ ⲡⲓⲗⲉⲃⲏⲥ ⲟ̃ϩⲓ ⲉ̃ⲣⲁⲧⲕ
ϩⲓϫⲉⲛ ⲛⲉⲕϭⲁⲗⲁⲩϫ ⲁ̃ⲛⲟⲕ ⲡⲉ ⲡϭ︦ⲥ︦ ⲡⲉⲕⲛⲟⲩϯ ⲁϥ-
ⲧⲱⲛϥ ϧⲉⲛ ϯⲟⲩⲛⲟⲩ ⲉ̃ⲧⲉⲙⲙⲁⲩ ⲛ̃ϫⲉ ⲡⲓϫⲱⲣⲓ ⲁ̃ⲗⲏ-
ⲑⲟⲥ ϧⲉⲛ ⲟⲩⲛⲓϣϯ ⲛ̃ϫⲟⲙ ⲉⲥϫⲟⲣ ⲙ̃ⲫⲣⲏϯ ⲛ̃ⲟⲩⲁⲓ ⲉ̃ⲧⲉ
ⲙ̃ⲡⲉϥϭⲓ *ϩⲗⲓ ⲛ̃ⲙ̃ⲕⲁϩ ⲉⲡⲧⲏⲣϥ ⲟⲩⲟⲛ ⲛⲓⲃⲉⲛ ⲉ̃ⲧⲁⲩ-
ⲛⲁⲩ ⲁⲩⲉⲣϣⲫⲏⲣⲓ ⲡⲉϫⲉ ⲡϭ︦ⲥ︦ ⲛⲁϥ ϫⲉ ϭⲣⲟ ⲙ̃ⲙⲟⲕ


### 0019

ⲟⲩⲟϩ ϫⲉⲙϫⲟⲙ ⲅⲉⲱⲣⲅⲓⲟⲥ ⲡⲁⲙⲉⲛⲣⲓⲧ ϫⲉ ⲟⲩⲟⲛ ⲟⲩ-
ⲛⲓϣϯ ⲛ̃ⲣⲁϣⲓ ϣⲱⲡⲓ ⲛⲁⲕ ϧⲉⲛ ⲛⲓⲫⲏⲟⲩⲓ̃ ⲛⲉⲙ ϩⲓϫⲉⲛ
ⲡⲓⲕⲁϩⲓ ⲛⲉⲙ ⲙ̃ⲡⲉⲙⲑⲟ ⲙ̃ⲡⲁⲓⲱⲧ ⲛ̃ⲁ̃ⲅⲁⲑⲟⲥ ⲛⲉⲙ ⲙ̃ⲡⲉⲙⲑⲟ
ⲛ̃ⲛⲁⲁ̃ⲅⲅⲉⲗⲟⲥ ⲉ̃ϩⲣⲏⲓ ⲉ̃ϫⲉⲛ ⲡⲉⲕⲁ̃ⲅⲱⲛ ϣⲱⲡⲓ ⲉⲕϫⲉⲙ
ⲛⲟⲙϯ ϫⲉ ⲁ̃ⲛⲟⲕ ϯⲭⲏ ⲛⲉⲙⲁⲕ ⲟⲩⲟϩ ⲁϥϣⲉ ⲛⲁϥ
ⲉ̃ⲡ*ϣⲱⲓ ⲉ̃ⲛⲓⲫⲏⲟⲩⲓ̃ ⲛⲉⲙ ⲛⲉϥⲁⲅⲅⲉⲗⲟⲥ ⲉ̃ⲑⲟⲩⲁⲃ
Ⲛⲑⲟϥ ⲇⲉ ⲁϥⲧⲱⲛϥ ⲁϥⲙⲟϣⲓ ⲟⲩⲟϩ ⲁϥⲟⲩⲱⲣⲡ ϩⲁ
ⲡⲟⲩⲣⲟ ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲉϥϫⲱ ⲙ̃ⲙⲟⲥ ϫⲉ ϩⲏⲡⲡⲉ
ϯⲥⲛⲏⲓⲛⲓ ⲙ̃ⲙⲟⲓ ϧⲉⲛ ϯⲡⲟⲗⲓⲥ ⲟⲩⲟϩ ϯϯⲥⲃⲱ ϧⲉⲛ
ϯⲟⲩⲛⲟⲩ ⲉ̃ⲧⲉⲙ ⲁϥⲟⲩⲁϩⲥⲁϩⲛⲓ ⲛ̃ϫⲉ ⲡⲟⲩⲣⲟ ⲉ̃ⲁ̃ⲙⲟⲛⲓ
ⲙ̃ⲙⲟϥ ⲉⲑⲣⲟⲩⲉⲛϥ ϩⲁⲣⲟϥ ⲉ̃ϫⲉⲛ ⲡⲓⲃⲏⲙⲁ ⲉϥⲛⲏⲟⲩ ⲇⲉ
ⲛⲁϥⲱϣ ⲉ̃ⲃⲟⲗ ϫⲉ ⲡⲓⲃⲏⲙⲁ ⲡⲓⲃⲏⲙⲁ ⲁⲓⲓ̃ ϩⲁⲣⲟⲕ
*ⲛ̃ⲑⲟⲕ ⲛⲉⲙ ⲡⲉⲕⲁ̃ⲡⲟⲗⲗⲟⲛ ⲁ̃ⲛⲟⲕ ϩⲱ ⲛⲉⲙ ⲡⲁϭ︦ⲥ︦ ⲓⲏ︦ⲥ︦
ⲡⲭ︦ⲥ︦ ⲡϣⲏⲣⲓ ⲙ̃ⲫϯ ⲉⲧⲱⲛϧ ϩⲏⲡⲡⲉ ⲓⲥ ⲟⲩⲥϩⲓⲙⲓ
ⲉ̃ⲡⲉⲥⲣⲁⲛ ⲡⲉ ⲭⲟⲗⲗⲁⲥⲧⲓⲕⲏ ⲁⲥⲱϣ ⲉ̃ⲃⲟⲗ ⲉⲥϫⲱ
ⲙ̃ⲙⲟⲥ ⲟⲩⲃⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲡⲓⲙⲁⲣⲧⲩⲣⲟⲥ ⲛ̃ⲧⲉ
ⲡⲭ︦ⲥ︦ ϫⲉ ⲡⲁϭ︦ⲥ︦ ⲅⲉⲱⲣⲅⲓⲟⲥ ⲁ̃ ⲡⲁϣⲏⲣⲓ ⲛⲱϩⲉⲃ ⲙ̃ⲡⲉϥ-
ⲙⲁⲥⲓ ϧⲉⲛ ⲧⲕⲟⲓ ⲁϥϩⲉⲓ ⲛ̃ϫⲉ ⲡⲓⲙⲁⲥⲓ ⲟⲩⲟϩ ⲁϥⲙⲟⲩ
ⲁ̃ⲣⲓⲃⲟⲏ̃ⲑⲓⲛ ⲉ̃ⲧⲁⲙⲉⲧϫⲱⲃ ϯⲉ̃ⲙⲓ ⲡⲁϭ︦ⲥ︦ ϫⲉ ⲟⲩⲟⲛ ϣϫⲟⲙ
ⲙ*ⲫϯ ⲉ̃ⲃⲟⲗϩⲓⲧⲟⲧⲕ ⲡⲉϫⲉ ⲡⲓⲁ̃ⲅⲓⲟⲥ ⲛⲁⲥ ϫⲉ ϭⲓ
ⲙ̃ⲡⲁⲓϣⲃⲱⲧ ⲉ̃ⲃⲟⲗϧⲉⲛ ⲛⲁϫⲓϫ ⲙⲁϣⲉ ⲛⲉ ⲉ̃ⲧⲕⲟⲓ ⲭⲱ
ⲙ̃ⲡⲁⲓϣⲃⲱⲧ ⲉ̃ϫⲉⲛ ⲫⲙⲟⲩⲧ ⲙ̃ⲡⲓⲙⲁⲥⲓ ⲉ̃ⲣⲉϫⲱ ⲙ̃ⲙⲟⲥ
ϫⲉ ⲛⲁⲓ ⲛⲉ ⲛⲏ ⲉ̃ⲧⲉϥϫⲱ ⲙ̃ⲙⲱⲟⲩ ⲛ̃ϫⲉ ⲅⲉⲱⲣⲅⲓⲟⲥ
ϫⲉ ϧⲉⲛ ⲫⲣⲁⲛ ⲛ̃ⲓⲏ︦ⲥ︦ ⲡⲭ︦ⲥ︦ ⲧⲱⲛⲕ ⲟ̃ϩⲓ ⲉ̃ⲣⲁⲧⲕ ⲛ̃ⲑⲟⲥ ⲇⲉ
ⲁⲥⲓ̃ⲣⲓ ⲕⲁⲧⲁ ⲫⲣⲏϯ ⲉ̃ⲧⲁϥϫⲟⲥ ⲛⲁⲥ ⲟⲩⲟϩ ⲁϥⲧⲱⲛϥ
ⲛ̃ϫⲉ ⲡⲓⲙⲁⲥⲓ ϧⲉⲛ ϯⲟⲩⲛⲟⲩ ⲉ̃ⲧⲉⲙⲙⲁⲩ ⲁ ⲥϯⲱⲟⲩ ⲙ̃ⲫϯ


### 0020

*ⲛ̃ϫⲉ ϯⲥϩⲓⲙⲓ ⲉⲥϫⲱ ⲙ̃ⲙⲟⲥ ϫⲉ ⲥⲙⲁⲣⲱⲟⲩⲧ ⲛ̃ϫⲉ ϯⲟⲩ-
ⲛⲟⲩ ⲉ̃ⲧⲁⲕⲓ︦ ⲉ̃ⲧⲁⲓⲡⲟⲗⲓⲥ ⲙ̃ⲙⲟⲥ ⲁ̃ⲗⲏⲑⲟⲥ ⲛ̃ⲑⲟⲕ ⲟⲩ-
ⲡⲣⲟⲫⲏⲧⲏⲥ ⲟⲩⲟϩ ⲁ̃ ⲫϯ ϫⲉⲙⲡϣⲓⲛⲓ ⲙ̃ⲡⲉϥⲗⲁⲟⲥ
Ⲡⲁⲗⲓⲛ ⲁϥⲟⲩⲱⲣⲡ ⲛ̃ϫⲉ ⲇⲁⲇⲓⲁ̃ⲛⲟⲥ ⲛ̃ⲥⲁ ⲡⲓⲙⲁⲣ-
ⲧⲩⲣⲟⲥ ⲉ̃ⲧⲁϥⲓ̃ ⲇⲉ ⲡⲉϫⲉ ⲡⲟⲩⲣⲟ ⲧⲣⲁⲕⲓⲁ̃ⲗⲓ ⲛⲉⲙⲁϥ
ϫⲉ ⲅⲉⲱⲣⲅⲓⲟⲥ ⲛⲓϣⲉ ⲉⲧϣⲟⲩⲱ̃ⲟⲩ ⲉ̃ⲧⲁⲩⲫⲓⲣⲓ ⲉ̃ⲃⲟⲗ ⲧⲉⲛ-
ⲉ̃ⲙⲓ ⲁⲛ ⲁⲕⲣⲓⲃⲱⲥ ϫⲉ ⲡⲉⲕⲛⲟⲩϯ ⲡⲉ ⲉⲧⲁϥ*ⲑⲣⲟⲩⲫⲓⲣⲓ
ⲉ̃ⲃⲟⲗ ϫⲉ ⲛⲉⲛⲛⲟⲩϯ ⲛⲉ ⲁⲗⲗⲁ ϩⲏⲡⲡⲉ ⲓⲥ ⲟⲩⲙ̃ϩⲁⲩ
ⲉϥⲭⲏ ϧⲁⲧⲟⲧⲉⲛ ϧⲉⲛ ϯⲡⲉⲧⲣⲁ ⲉ̃ⲟⲩⲙⲱⲓⲧ ⲡⲉ ⲛ̃ⲣⲉϥⲭⲁ
ⲣⲉⲙⲱⲟⲩⲧ ⲙ̃ⲙⲟⲛ ϩⲗⲓ ⲛ̃ⲣⲱⲙⲓ ⲉ̃ⲙⲓ ⲉ̃ⲡⲉϥⲙⲱⲓⲧ ⲟⲩⲇⲉ
ⲡⲉϥⲣⲟ ⲉϣⲟⲡ ⲟⲩⲛ ⲉ̃ⲃⲟⲗϩⲓⲧⲉⲛ ⲛⲉⲕⲧⲱⲃϩ ⲛ̃ⲧⲟⲩ-
ⲧⲱⲟⲩⲛⲟⲩ ⲛ̃ϫⲉ ⲛⲓⲕⲁⲥ ⲛ̃ⲧⲉ ⲛⲏ ⲉⲑⲙⲱⲟⲩⲧ ϣⲉ ⲡⲁⲛⲏⲃ
ⲡⲓⲣⲏ ⲛⲉⲙ ⲡⲓⲓⲟϩ ⲛⲉⲙ ϯⲁⲣⲧⲉⲙⲓⲥ ⲑⲙⲁⲩ ⲛ̃*ⲛⲓⲛⲟⲩϯ
ⲉⲓⲉ̃ⲛⲁϩϯ ϩⲱ ⲉ̃ⲡⲉⲕⲛⲟⲩϯ ⲛ̃ⲧⲁϣⲱⲡⲓ ⲛ̃ⲭⲣⲏⲥⲧⲓⲁ̃ⲛⲟⲥ
ⲁϥⲉⲣⲟⲩⲱ̃ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲅⲉⲱⲣⲅⲓⲟⲥ ⲉϥϫⲱ ⲙ̃ⲙⲟⲥ
ϫⲉ ⲥⲉⲛⲧⲟⲧ ⲛ̃ϫⲉ ϯⲥⲙⲏ ⲉ̃ⲧⲁⲓⲥⲟⲑⲙⲉⲥ ϧⲉⲛ ⲡⲓⲉⲩⲁⲅⲅⲉⲗⲓⲟⲛ
ⲉⲧϫⲱ ⲙ̃ⲙⲟⲥ ϫⲉ ⲉ̃ϣⲱⲡ ⲟⲩⲟⲛⲧⲉⲧⲉⲛ ⲛⲁϩϯ ⲙ̃ⲙⲁⲩ
ⲙ̃ⲡⲥⲙⲟⲧ ⲛ̃ⲟⲩⲛⲁⲫⲣⲓ ⲛ̃ϣⲉⲗⲧⲁⲙ ⲛ̃ⲧⲉⲧⲉⲛϫⲟⲥ ⲙ̃ⲡⲁⲓ-
ⲧⲱⲟⲩ ϫⲉ ⲟⲩⲱ̃ⲧⲉⲃ ⲉ̃ⲃⲟⲗ ⲧⲁⲓ ⲟⲩⲟϩ ⲛ̃ⲛⲉ ϩⲗⲓ *ⲉⲣⲁⲧ-
ϫⲟⲙ ⲛ̃ⲧⲉⲛⲑⲏⲛⲟⲩ ⲧⲱⲛⲕ ⲛ̃ⲑⲟⲕ ⲛⲉⲙ ⲡⲟⲩⲣⲟ ⲇⲁ-
ⲇⲓⲁ̃ⲛⲟⲥ ⲛⲉⲙ ⲛⲓⲕⲉⲟⲩⲣⲱⲟⲩ ⲛ̃ⲧⲉ ⲭⲏⲙⲓ ⲙⲁϣⲉ ⲛⲱⲧⲉⲛ
ⲁ̃ⲟⲩⲱⲛ ⲙ̃ⲫⲣⲟ ⲙ̃ⲡⲓⲙ̃ϩⲁⲩ ⲟⲩⲟϩ ⲟ̃ϥⲓ ⲛ̃ⲛⲓⲕⲁⲥ ⲛ̃ⲧⲉ
ⲛⲓⲣⲉϥⲙⲱⲟⲩⲧ ⲉ̃ⲧⲁⲩⲗⲟϥⲗⲉϥ ⲉ̃ⲃⲟⲗ ⲛⲉⲙ ⲛⲓϣⲱⲓϣ ⲛ̃ⲧⲉ
ⲛⲏ ⲉ̃ⲧⲁⲩⲙⲟⲩ ⲁ̃ⲛⲓⲧⲟⲩ ⲛⲏⲓ ⲙ̃ⲛⲁⲓ
Ⲟⲩⲟϩ ⲁⲩϣⲉ ⲛⲱⲟⲩ ⲥⲁⲧⲟⲧⲟⲩ ⲛ̃ϫⲉ ⲡⲓⲅ︦ ⲛ̃ⲟⲩⲣⲟ


### 0021

ⲉ̃ⲫⲙⲱⲓⲧ ⲙ̃ⲡⲓⲙ̃ϩⲁⲩ ⲁⲩⲟⲩⲱⲛ ⲙ̃ⲡⲓⲣⲟ ⲛ̃ⲧⲉ ⲡⲓ *ⲙ̃ϩⲁⲩ
ⲙ̃ⲡⲟⲩϫⲉⲙ ϩⲗⲓ ⲛ̃ⲕⲁⲥ ⲛ̃ⲧⲉ ⲛⲓⲣⲉϥⲙⲱⲟⲩⲧ ⲛ̃ϧⲏⲧϥ ⲁⲩ-
ⲱϥⲓ ⲛ̃ⲛⲓⲑⲙⲓⲥ ⲉ̃ⲃⲟⲗϧⲉⲛ ⲛⲓⲕⲁⲥ ⲉ̃ⲧⲁⲩϫⲉⲙⲟⲩ ⲁⲩⲓ̃ⲛⲓ
ⲙ̃ⲙⲱⲟⲩ ⲙ̃ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲧⲟⲧⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ
ⲁϥϩⲓⲟⲩⲓ̃ ⲙ̃ⲙⲟϥ ϩⲓϫⲉⲛ ⲛⲉϥⲕⲉⲗⲓ ⲁϥⲧⲱⲃϩ ϣⲁ ⲫⲛⲁⲩ
ⲛ̃ⲟⲩⲟⲩⲛⲟⲩ ϧⲉⲛ ⲡϫⲓⲛⲑⲣⲉϥϫⲱⲕ ⲙ̃ⲡⲓⲁ̃ⲙⲏⲛ ⲉ̃ⲃⲟⲗ ⲁϥ-
ϣⲱⲡⲓ ⲛ̃ϫⲉ ⲟⲩⲛⲓϣϯ ⲛ̃ϣⲑⲟⲣⲧⲉⲣ ⲛⲉⲙ ϩⲁⲛⲥⲉⲧⲉⲃⲣⲏϫ
ⲛ̃ⲭⲣⲱⲙ ⲟⲩⲟϩ ⲁⲩⲉⲣⲟⲩⲱⲓⲛⲓ ⲉ̃ⲛⲓⲕⲁⲥ ⲉ̃*ⲧⲉⲙⲙⲁⲩ ⲟⲩⲟϩ
ⲥⲁⲧⲟⲧⲟⲩ ⲁⲩⲓ̃ ⲉ̃ⲃⲟⲗⲛ̃ϧⲏⲧⲟⲩ ⲛ̃ϫⲉ ⲉ︦ ⲛ̃ⲣⲱⲙⲓ ⲛⲉⲙ
ⲑ︦ ⲛ̃ⲥϩⲓⲙⲓ ⲛⲉⲙ ⲓ︦ ⲛ̃ⲕⲟⲩϫⲓ ⲛ̃ⲁ̃ⲗⲟⲩ ⲛⲓⲟⲩⲣⲱⲟⲩ ⲇⲉ
ⲉ̃ⲧⲁⲩⲛⲁⲩ ⲉ̃ⲫⲏ ⲉ̃ⲧⲁϥϣⲱⲡⲓ ⲁⲩⲉⲣϣⲫⲏⲣⲓ ⲗⲟⲓⲡⲟⲛ ⲁ̃︦
ⲛⲓⲟⲩⲣⲱⲟⲩ ⲙⲟⲩϯ ⲉ̃ⲟⲩⲁⲓ ϧⲉⲛ ⲛⲏ ⲉ̃ⲧⲁⲩⲧⲱⲟⲩⲛⲟⲩ
ⲉ̃ⲃⲟⲗϧⲉⲛ ⲛⲏ ⲉ̃ⲑⲙⲱⲟⲩⲧ ⲡⲉϫⲱⲟⲩ ⲛⲁϥ ϫⲉ ⲛⲓⲙ ⲡⲉ
ⲡⲉⲕⲣⲁⲛ ⲁϥⲉⲣⲟⲩⲱ̃ ⲛ̃ϫⲉ ⲫⲏ ⲉ̃ⲧⲁϥⲧⲱⲛϥ ⲉ̃ⲃⲟⲗϧⲉⲛ ⲛⲏ
ⲉ̃ⲑⲙⲱⲟⲩⲧ *ⲉϥϫⲱ ⲙ̃ⲙⲟⲥ ϫⲉ ⲓⲥⲟⲩⲃⲏⲛ ⲡⲉ ⲡⲁⲣⲁⲛ
ⲡⲉϫⲉ ⲡⲟⲩⲣⲟ ⲛⲁϥ ϫⲉ ⲓⲥ ⲟⲩⲏⲣ ⲛ̃ⲣⲟⲙⲡⲓ ⲓⲥϫⲉⲛ ⲉ̃ⲧⲁⲕ-
ⲙⲟⲩ ϫⲉ ⲓⲥ ϩⲟⲩϭ̃ ⲥ︦ ⲛ̃ⲣⲟⲙⲡⲓ ⲡⲉϫⲉ ⲡⲟⲩⲣⲟ ⲛⲁϥ
ϫⲉ ϧⲉⲛ ⲡⲓⲥⲏⲟⲩ ⲉ̃ⲧⲉⲙⲙⲁⲩ ⲛⲉ ⲁϥⲓ̃ ⲛ̃ϫⲉ ⲡⲭ︦ⲥ︦ ⲉ̃ⲡⲓ-
ⲕⲟⲥⲙⲟⲥ ϣⲁⲛ ⲙ̃ⲫⲏ ⲡⲉϫⲉ ⲫⲏ ⲉ̃ⲧⲁϥⲧⲱⲛϥ ⲉ̃ⲃⲟⲗϧⲉⲛ
ⲛⲏ ⲉⲑⲙⲱⲟⲩⲧ ⲛⲁϥ ϫⲉ ϯⲓ̃ⲣⲓ ⲙ̃ⲫⲙⲉⲩⲓ̃ ⲁⲛ ⲟⲩⲇⲉ ⲙ̃ⲡⲓ-
ⲥⲱⲧⲉⲙ ϩⲟⲗⲱⲥ ϫⲉ ⲁϥⲓ̃ ⲡⲉϫⲉ ⲇⲁⲇⲓⲁ̃ⲛⲟⲥ ⲛⲁϥ ϫⲉ
ⲛⲁⲕⲛⲁϩϯ ⲉ̃ⲛⲓⲙ *ⲛ̃ⲛⲟⲩϯ ⲡⲉϫⲉ ⲫⲏ ⲉ̃ⲧⲁϥⲧⲱⲛϥ
ⲛⲁϥ ϫⲉ ⲙⲡⲉⲣⲉⲣ ϩⲗⲓ ⲛ̃ⲁ̃ⲛⲁⲅⲕⲏ ⲉ̃ⲣⲟⲓ ⲱ̃ ⲡⲟⲩⲣⲟ
ϯϣⲓⲡⲓ ⲟⲩⲛ ⲉ̃ϫⲟⲥ ϫⲉ ⲁⲓⲛⲁϩϯ ⲉ̃ⲛⲓⲙ ⲛ̃ⲛⲟⲩϯ ⲛⲁⲓⲛⲁϩϯ
ⲡⲉ ⲉ̃ⲟⲩⲁⲓ ⲉⲩⲙⲟⲩϯ ⲉ̃ⲣⲟϥ ϫⲉ ⲡⲓⲁ̃ⲡⲟⲗⲗⲱⲛ ⲟⲩⲥ︦︦


### 0022

ⲛ̃ⲕⲟⲩⲣ ⲙ̃ⲃⲟ ⲙ̃ⲃⲉⲗⲗⲉ ⲉ̃ⲧⲁⲓⲭⲱ ⲟⲩⲛ ⲛ̃ⲥⲱⲓ ⲛ̃ϯϫⲓⲛⲱⲛϧ
ⲉⲧϩⲱⲟⲩ ⲛ̃ⲧⲉ ⲡⲁⲓⲃⲓⲟⲥ ⲁⲓϣⲱⲡⲓ ⲉⲓⲱⲛϧ ϧⲉⲛ ⲛⲓⲙⲱⲓⲧ
ⲉⲧⲧⲏ ϧⲉⲛ ⲡⲓⲓⲁⲣⲟ ⲛ̃ⲭⲣⲱⲙ ϣⲁϯϣⲉ ⲛⲏⲓ ⲉ̃ϧⲣⲏⲓ ⲉ̃ⲣⲟϥ
*ⲁϥⲙ̃ⲙⲁⲩ ⲛ̃ϫⲉ ⲡⲓϥⲓⲛⲧ ⲛ̃ⲁⲧⲉⲛⲕⲟⲧ ϩⲁⲣⲁ ⲛ̃ⲑⲟⲕ
ⲙ̃ⲡⲉⲕⲥⲱⲧⲉⲙ ⲉ̃ⲛⲓⲅⲣⲁⲫⲏ ⲛ̃ⲧⲉ ⲛⲓⲭⲣⲏⲥⲧⲓⲁ̃ⲛⲟⲥ ⲉⲥⲫⲓⲣⲓ
ⲉⲃⲟⲗ ⲁⲕϯ ⲙ̃ⲫⲙⲉⲩⲓ̃ ⲛⲏⲓ ⲙ̃ⲡⲓⲉϩⲟⲟⲩ ⲉⲧⲧⲏ ⲉⲧⲟⲓ ⲛ̃ϩⲟϯ
ⲡⲓⲙⲱⲓⲧ ⲉ̃ⲧⲉ ⲙ̃ⲙⲟⲛ ⲃⲟⲏ̃ⲑⲓⲁ̃ ⲙ̃ⲙⲁⲩ ⲁⲗⲗⲁ ⲟⲩⲧⲱⲙⲧ
ⲡⲉ ⲛⲉⲙ ⲟⲩϩⲟϯ ⲙ̃ⲙⲟⲛ ϩⲗⲓ ⲛ̃ⲛⲁⲓ ⲛ̃ϧⲏⲧϥ ⲟⲩⲇⲉ
ⲙ̃ⲡⲁⲩϣⲑⲉⲧ ⲙ̃ⲡϩⲏⲧ ⲙ̃ⲡⲓⲣⲉϥϯϩⲁⲡ ⲁⲗⲗⲁ ⲡϩⲱⲃ
ⲙ̃ⲡⲓⲟⲩⲁⲓ ⲡⲓⲟⲩⲁⲓ ⲉ̃ⲧⲁϥⲁⲓϥ ⲭⲏ ⲙ̃ⲡⲉⲙⲑⲟ ⲛ̃ⲛⲉϥⲃⲁⲗ
ⲉ̃ⲃⲟⲗ *ⲧⲟⲧⲉ ϣⲁϥⲉⲣⲟⲩⲱ̃ ⲛ̃ϫⲉ ⲡⲓⲭⲁⲛⲁ ⲛ̃ⲧⲉϥϫⲟⲥ
ϫⲉ ⲙⲁⲧⲁⲙⲟⲓ ⲉ̃ⲡϩⲱⲃ ⲙ̃ⲡⲓⲟⲩⲁⲓ ⲡⲓⲟⲩⲁⲓ ⲙ̃ⲙⲱⲧⲉⲛ
ϩⲓⲛⲁ ⲛ̃ⲧⲁϯ ⲛⲁϥ ⲙ̃ⲡⲉϥⲃⲉⲭⲉ ⲕⲁⲧⲁ ⲛⲏ ⲉ̃ⲧⲁϥⲁⲓⲧⲟⲩ
ⲥⲱⲧⲉⲙ ⲟⲩⲛ ⲛ̃ⲧⲁⲫⲓⲣⲓ ϧⲁⲧⲟⲧⲕ ⲱ ⲡⲟⲩⲣⲟ ϫⲉ ⲣⲱⲙⲓ
ⲛⲓⲃⲉⲛ ⲉⲑⲛⲁϣⲱⲡⲓ ϩⲓϫⲉⲛ ⲡⲓⲕⲁϩⲓ ⲟⲩⲟϩ ⲛ̃ⲧⲉϥⲟⲩⲱⲛϩ
ⲉ̃ⲃⲟⲗ ⲙ̃ⲫⲏ ⲉ̃ⲧⲁⲩⲉⲣⲥⲧⲁⲩⲣⲱⲛⲓⲛ ⲙ̃ⲙⲟϥ ⲉ̃ⲧⲉ ⲡⲭ︦ⲥ︦ ⲡⲉ
ⲕⲁⲛ ⲉ̃ϣⲱⲡ ⲉ̃ⲟⲩⲟⲛ ⲟⲩⲙⲏϣ ⲛ̃ⲛⲟⲃⲓ ϭⲓ *ⲉ̃ⲡⲉϥⲥⲱⲙⲁ
ⲟⲩⲟϩ ⲛ̃ⲧⲉϥⲟⲧⲉⲃ ⲉ̃ⲃⲟⲗϧⲉⲛ ⲡⲁⲓⲕⲟⲥⲙⲟⲥ ⲉⲧϩⲱⲟⲩ ϣⲁϥ-
ϣⲱⲡⲓ ϧⲉⲛ ϩⲁⲛⲥⲛⲁⲩϩ ⲉⲑⲃⲉ ⲛⲉϥⲛⲟⲃⲓ ⲁⲗⲗⲁ ϧⲉⲛ
ϯⲕⲩⲣⲓⲁ̃ⲕⲏ ⲥⲉϯⲙ̃ⲧⲟⲛ ⲛⲁϥ ϫⲉ ⲟⲩⲏⲓ ⲉ̃ⲣⲉ ⲡϭ︦ⲥ︦ ⲓⲏ︦ⲥ︦ ⲥⲟⲙⲥ
ⲉ̃ϧⲣⲏⲓ ⲉ̃ⲛⲓⲕⲟⲗⲁⲥⲓⲥ ⲙ̃ⲡⲉϩⲟⲟⲩ ⲛ̃ϯⲕⲩⲣⲓⲁ̃ⲕⲏ ⲁⲛⲟⲛ ⲇⲉ
ⲟⲩⲇⲉ ϧⲉⲛ ⲡⲉϩⲟⲟⲩ ⲛ̃ϯⲕⲩⲣⲓⲁ̃ⲕⲏ ⲙ̃ⲡⲁⲩϯⲙ̃ⲧⲟⲛ ⲛⲁⲛ
ⲉ̃ⲡⲧⲏⲣϥ ⲉⲡⲓⲇⲉ ⲙ̃ⲡⲓⲟⲩⲱⲛϩ ⲛ̃ⲧⲉϥⲙⲉⲧϭ︦ⲥ︦ ⲉ̃ⲃⲟⲗ ⲉⲓ-


### 0023

ϣⲟⲡ ϩⲓϫⲉⲛ ⲡⲓⲕⲁϩⲓ ⲡⲱⲥ ⲅⲁⲣ ⲉⲛⲛⲁ*ⲟⲩⲱⲛϩ ⲉ̃ⲃⲟⲗ
ⲉⲛⲉⲣⲥⲉⲃⲏⲥⲑⲉ ⲛ̃ϩⲁⲛⲓ̃ⲇⲱⲗⲟⲛ ⲛⲉⲙ ϩⲁⲛⲑⲟⲩⲱⲧ ⲙ̃ⲡⲁⲩ-
ⲕⲓⲙ ⲉ̃ⲣⲱⲟⲩ ⲉ̃ⲡⲧⲏⲣϥ ⲁϥⲉⲣⲟⲩⲱ̃ ⲛⲁϥ ⲛ̃ϫⲉ ⲡⲟⲩⲣⲟ
ⲡⲉϫⲁϥ ϫⲉ ⲁ̃ ⲡⲉⲕϩⲏⲧ ⲭⲱ ⲉ̃ⲃⲟⲗ ϩⲓⲧⲉⲛ ⲡⲁϣⲁⲓ
ⲙ̃ⲡⲓⲭⲣⲟⲛⲟⲥ ⲛ̃ⲧⲉ ⲡⲁⲓⲥ︦ ⲛ̃ⲣⲟⲙⲡⲓ ⲁϥⲥⲟⲙⲥ ⲇⲉ ⲛ̃ϫⲉ ⲫⲏ
ⲉ̃ⲧⲁϥⲧⲱⲛϥ ⲉ̃ⲃⲟⲗϧⲉⲛ ⲛⲏ ⲉⲑⲙⲱⲟⲩⲧ ⲉ̃ⲡⲓⲙⲁⲣⲧⲩⲣⲟⲥ
ⲛ̃ⲧⲉ ⲡⲭ︦ⲥ︦ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲡⲉϫⲁϥ ⲛⲁϥ ϫⲉ ⲡⲁϭ︦ⲥ︦
ⲡⲓⲙⲁⲣⲧⲩⲣⲟⲥ ⲛ̃ⲧⲉ *ⲡⲭ︦ⲥ︦ ⲧⲉⲛϯϩⲟ ⲉ̃ⲣⲟⲕ ⲙⲟⲓ ⲛⲁⲛ
ⲙ̃ⲡⲓⲱⲙⲥ ⲉ̃ⲑⲟⲩⲁⲃ ⲛ̃ⲧⲉ ⲡⲭ︦ⲥ︦ ϫⲉ ⲛ̃ⲛⲟⲩϩⲓⲧⲧⲉⲛ ⲉ̃ⲛⲓⲕⲟ-
ⲗⲁⲥⲓⲥ ⲉⲧⲉⲛⲛ̃ϧⲏⲧⲟⲩ ⲛ̃ⲕⲉⲥⲟⲡ ⲉ̃ⲧⲁϥⲛⲁⲩ ⲟⲩⲛ ⲛ̃ϫⲉ
ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲉ̃ⲡⲟⲩⲛⲁϩϯ ⲁϥϯ ⲛ̃ⲟⲩϣⲉⲛⲫⲁⲧ ϧⲉⲛ
ⲡⲓⲕⲁϩⲓ ⲁϥϥⲱϫⲓ ⲉ̃ⲡϣⲱⲓ ⲛ̃ϫⲉ ⲟⲩⲙⲱⲟⲩ ⲟⲩⲟϩ ⲁϥ-
ϯⲱⲙⲥ ⲛⲱⲟⲩ ϧⲉⲛ ⲫⲣⲁⲛ ⲙ̃ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ
ⲡⲓⲡ︦ⲛ︦ⲁ︦ ⲉ̃ⲑⲟⲩⲁⲃ ⲡⲉϫⲁϥ ⲛⲱⲟⲩ ϫⲉ ⲙⲁϣⲉ ⲛⲱⲧⲉⲛ ϧⲉⲛ
ⲟⲩϩⲓⲣⲏⲛⲏ ⲉ̃ⲡⲓⲡⲁ*ⲡⲁⲣⲁⲇⲓⲥⲟⲥ ⲟⲩⲟϩ ⲥⲁⲧⲟⲧⲟⲩ ⲁⲩⲉⲣ-
ⲁ̃ⲑⲟⲩⲱⲛϩ ⲉ̃ⲃⲟⲗ ⲙ̃ⲡⲟⲩⲛⲁⲩ ⲉ̃ⲣⲱⲟⲩ ϫⲉ
Ⲁϣⲱⲡⲓ ⲛ̃ϫⲉ ⲡⲟⲩⲣⲟ ⲉϥⲱⲛϣ ⲉ̃ⲃⲟⲗ ⲛⲁⲩⲛ̃ⲟⲩ-
ⲛⲟⲩ ⲁⲩⲉⲣⲟⲩⲱ̃ ⲛⲁϥ ⲛ̃ϫⲉ ⲛⲓⲟⲩⲣⲱⲟⲩ ⲉⲑⲛⲉⲙⲁϥ ⲡⲉ-
ϫⲱⲟⲩ ϫⲉ ⲡⲁⲓⲣⲱⲙⲓ ⲟⲩⲣⲉϥⲉⲣϩⲓⲕ ⲡⲉ ϫⲉ ⲉ̃ⲃⲟⲗϩⲓⲧⲉⲛ
ⲛⲉϥⲙⲁⲅⲓⲁ̃ ⲁϥⲧⲁϩⲟ ⲛ̃ϩⲁⲛⲇⲉⲙⲱⲛ ⲉ̃ⲣⲁⲧⲟⲩ ⲙ̃ⲡⲉⲛⲙ̃ⲑⲟ
ⲉ̃ⲃⲟⲗ ⲁϥϫⲟⲥ ϫⲉ ⲁⲓⲧⲟⲩⲛⲟⲥ ϩⲁⲛⲣⲉϥⲙⲱⲟⲩⲧ ⲁⲛⲟⲕ
ϩⲱ ϯⲛⲟⲩ ϯⲛⲁϯϣⲱϣ ⲙ̃ⲡⲁⲓⲅⲉ*ⲛⲟⲥ ⲧⲏⲣϥ ϫⲉ ⲭⲣⲏⲥ-
ⲧⲓⲁ̃ⲛⲟⲥ ⲁϥⲉⲣⲕⲉⲗⲉⲩⲓⲛ ϫⲉ ⲥⲱⲧⲡ ⲛⲏⲓ ⲛ̃ⲟⲩⲭⲏⲣⲁ
ⲛ̃ϩⲏⲕⲓ ⲑⲏ ⲉ̃ⲧⲉ ⲙ̃ⲙⲟⲛ ϩⲗⲓ ⲛ̃ϩⲏⲕⲓ ⲙ̃ⲡⲉⲥⲣⲏϯ ϧⲉⲛ ⲡⲓ-
ⲕⲟⲥⲙⲟⲥ ⲟⲩⲟϩ ⲁⲩⲕⲱϯ ϧⲉⲛ ϯⲡⲟⲗⲓⲥ ⲁⲩϫⲓⲙⲓ ⲛⲁ̃ϥ


### 0024

ⲛ̃ϯⲭⲏⲣⲁ ⲛ̃ϩⲏⲕⲓ ⲁⲩϩⲓⲟⲩⲓ̃ ⲙ̃ⲡⲓⲑⲙⲏⲓ ⲉ̃ϧⲟⲩⲛ ⲛⲉⲙⲁⲥ
ϩⲱⲥ ⲉϥⲟⲩⲱϣ ⲉ̃ϯϣⲱϣ ⲛ̃ⲛⲓⲭⲣⲏⲥⲧⲓⲁ̃ⲛⲟⲥ ⲉ̃ⲧⲁⲩⲉⲛ
ⲡⲓⲑⲙⲏⲓ ⲉ̃ϧⲟⲩⲛ ⲉ̃ⲡⲏⲓ ⲛ̃ϯⲭⲏⲣⲁ ⲡⲉϫⲁϥ ⲛⲁⲥ ϫⲉ ⲙⲟⲓ
ⲛⲏⲓ ⲛ̃ⲟⲩⲱⲓⲕ ϫⲉ ⲟⲩⲏⲓ ϯϩⲱⲕⲉⲣ *ⲁⲥⲉⲣⲟⲩⲱ̃ ⲛ̃ϫⲉ ϯⲥ-
ϩⲓⲙⲓ ⲛⲁϥ ⲛ̃ⲭⲏⲣⲁ ⲛ̃ϩⲏⲕⲓ ϫⲉ ⲙ̃ⲙⲟⲛ ⲱⲓⲕ ϧⲉⲛ ⲡⲁⲓⲏ
ⲁ̃ⲛⲟⲕ ⲡⲁϭ︦ⲥ︦ ⲡⲉϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲛⲁⲥ ϫⲉ ⲁ̃ⲣⲉⲛⲁϩϯ
ⲉⲛⲓⲙ ⲛ̃ⲛⲟⲩϯ ϫⲉ ⲙ̃ⲙⲟⲛ ϩⲗⲓ ⲛ̃ⲱⲓⲕ ϧⲉⲛ ⲡⲉⲏⲓ ⲡⲉϫⲉ
ϯⲥϩⲓⲙⲓ ⲛⲁϥ ϫⲉ ⲉⲓⲛⲁϩϯ ⲉ̃ⲡⲓⲁ̃ⲡⲟⲗⲗⲱⲛ ⲛⲉⲙ ⲡⲓⲉ̃ⲣⲁ-
ⲕⲗⲏⲥ ⲛⲓⲛⲓϣϯ ⲛ̃ⲛⲟⲩϯ ⲛ̃ⲧⲉ ⲛⲓⲟⲩⲣⲱⲟⲩ ⲡⲉϫⲉ ⲡⲓⲁ̃-
ⲅⲓⲟⲥ ⲅⲉⲱⲣⲅⲓⲟⲥ ⲛⲁⲥ ϫⲉ ⲁ̃ⲗⲏⲑⲟⲥ ⲟⲩϩⲁⲡ² ⲙ̃ⲙⲏⲓ ⲛ̃ⲧⲉ
ⲫϯ ⲡⲉ ⲫⲁⲓ *ϫⲉ ⲙ̃ⲙⲟⲛ ϩⲗⲓ ⲛ̃ⲱⲓⲕ ϧⲉⲛ ⲡⲉⲏⲓ ⲉ̃ⲧⲁⲥ-
ⲥⲟⲙⲥ ⲉ̃ϧⲟⲩⲛ ϧⲉⲛ ⲡⲉϥϩⲟ ⲛ̃ϫⲉ ϯⲥϩⲩⲙⲓ ⲁⲥⲛⲁⲩ
ⲉ̃ⲡⲉϥϩⲟ ⲙ̃ⲡⲥⲙⲟⲧ ⲛ̃ⲟⲩⲁⲅⲅⲉⲗⲟⲥ ⲛ̃ⲧⲉ ⲡϭ︦ⲥ︦ ⲡⲉϫⲁⲥ ⲛ̃ϧⲣⲏⲓ
ⲛ̃ϧⲏⲧⲥ ⲛ̃ϫⲉ ϯⲥϩⲓⲙⲓ ϫⲉ ϯⲛⲁϣⲉ ⲛⲏⲓ ⲉ̃ⲃⲟⲗ ⲛ̃ⲧⲁⲕⲱϯ
ⲛ̃ⲥⲁ ⲱⲓⲕ ⲛ̃ⲧⲟⲧⲟⲩ ⲛ̃ⲛⲁϭⲓⲥⲉⲩ ⲛⲉⲙ ⲛⲁⲑⲉϣⲉⲩ ϩⲓⲛⲁ
ⲛ̃ⲧⲁⲭⲱ ϧⲁⲣⲟϥ ⲙ̃ⲡⲁⲓⲣⲱⲙⲓ ⲛ̃ⲧⲉ ⲫϯ ⲡⲁⲛⲧⲟⲥ ϧⲉⲛ
ⲡⲉϥϫⲓⲛⲓ̃ ⲉ̃ϧⲟⲩⲛ ⲉ̃ⲡⲁⲏⲓ ⲛ̃ⲧⲁϫⲓⲙⲓ ⲛ̃ⲟⲩϩⲙⲟⲧ ⲙ̃ⲡⲉⲙⲑⲟ
ⲉ̃*ⲃⲟⲗ ⲛ̃ⲛⲁⲑⲉϣⲉⲩ ⲁⲥϣⲱⲡⲓ ⲟⲩⲛ ϧⲉⲛ ⲡϫⲓⲛⲑⲣⲉⲥϩⲱⲗ
ⲉ̃ⲃⲟⲗ ⲛ̃ϫⲉ ϯⲥϩⲓⲙⲓ ⲛ̃ⲭⲏⲣⲁ ⲛ̃ϩⲏⲕⲓ ⲡⲓⲑⲙⲏⲓ ⲇⲉ ⲛⲁϥ-
ϩⲉⲙⲥⲓ ϧⲁⲣⲁⲧⲥ ⲛ̃ⲟⲩⲃⲁⲥⲓⲥ ⲛ̃ⲧⲉ ⲟⲩⲥⲧⲩⲗⲗⲟⲥ ⲛ̃ϣⲉ
ⲉ̃ϧⲟⲩⲛ ϧⲉⲛ ⲡⲉⲥⲏⲓ ⲥⲁⲧⲟⲧϥ ⲟⲩⲛ ⲁϥϣⲉⲡ ⲛⲟⲩⲛⲓ ⲛ̃ϫⲉ
ⲡⲓⲥⲧⲩⲗⲗⲟⲥ ⲟⲩⲟϩ ⲁϥϩⲓϫⲁⲗ ⲉ̃ⲃⲟⲗ ⲁϥϣⲱⲡⲓ ⲛ̃ϫⲉ
ⲛⲓϣϯ ⲛ̃ϣϣⲏⲛ ⲟⲩⲟϩ ⲁϥⲉⲣ ⲥⲁⲡϣⲱⲓ ⲙ̃ⲡⲓⲏⲓ ⲙ̃ⲓ︦ⲥ︦
ⲙ̃ⲙⲁϩⲓ ⲉ̃ⲡϣⲱⲓ ϩⲏⲡⲡⲉ ⲓⲥ ⲙⲏⲭⲁⲏⲗ *ⲡⲓⲁ̃ⲣⲭⲏⲁⲅⲅⲉⲗⲟⲥ
ⲁϥⲓ̃ ϣⲁⲣⲟϥ ⲛⲉⲙ ⲟⲩⲧⲣⲁⲡⲉⲍⲁ ⲉⲥⲙⲉϩ ⲉ̃ⲃⲟⲗϧⲉⲛ ⲁ̃ⲅⲁ-


### 0025

ⲑⲟⲛ ⲛⲓⲃⲉⲛ ⲁϥⲟⲩⲱⲙ ⲟⲩⲟϩ ⲁϥϫⲉⲙⲛⲟⲙϯ ⲛ̃ϫⲉ
ⲡⲓⲁ̃ⲅⲓⲟⲥ ⲟⲩⲟϩ ⲛⲁⲣⲉ ϯⲧⲣⲁⲡⲉⲍⲁ ⲙⲉϩ ⲛ̃ⲱⲓⲕ ⲛⲉⲙ
ⲁⲅⲁⲑⲟⲛ ⲛⲓⲃⲉⲛ
Ⲉⲧⲁⲥⲓ̃ ⲉ̃ϧⲟⲩⲛ ⲛ̃ϫⲉ ϯⲥϩⲓⲙⲓ ⲛ̃ⲭⲏⲣⲁ ⲛ̃ϩⲏⲕⲓ ⲉ̃ϧⲟⲩⲛ
ⲉ̃ⲡⲉⲥⲏⲓ ⲁⲥⲛⲁⲩ ⲉ̃ϩⲁⲛⲛⲓϣϯ ⲛ̃ϣⲫⲏⲣⲓ ⲟⲩⲧⲣⲁⲡⲉⲝⲁ ⲉⲥⲭⲏ
ⲉ̃ϧⲣⲏⲓ ⲉⲥⲙⲉϩ ⲛ̃ⲁ̃ⲅⲁⲑⲟⲛ ⲛⲓⲃⲉⲛ ⲛⲉⲙ ⲡⲓⲥⲧⲓⲗⲗⲟⲥ ⲉ̃*ⲧⲁϥ-
ϣⲉⲡ ⲛⲟⲩⲛⲓ ϧⲉⲛ ⲟⲩϣⲉ ⲉϥϣⲟⲩⲱ̃ⲟⲩ ⲡⲉϫⲁⲥ ϧⲉⲛ
ⲡⲉⲥϩⲏⲧ ϫⲉ ⲁ̃ ⲫϯ ⲛ̃ⲛⲓⲭⲣⲏⲥⲧⲓⲁ̃ⲛⲟⲥ ⲉⲣⲫⲙⲉⲩⲓ ⲛ̃ⲧⲁⲙⲉⲧ-
ϩⲏⲕⲓ ϧⲁ ϯⲭⲏⲣⲁ ⲁϥⲓⲛⲓ ⲙ̃ⲡⲉϥⲙⲁⲣⲧⲩⲣⲟⲥ ⲉ̃ϧⲟⲩⲛ ⲉ̃ⲡⲁⲏⲓ
ϧⲁ ϯⲧⲁⲗⲉⲡⲱⲣⲟⲥ ⲙ̃ⲯⲩⲭⲏ ϣⲁⲧⲉϥⲉⲣⲃⲟⲏ̃ⲑⲓⲛ ⲉ̃ⲣⲟⲓ
ⲟⲩⲟϩ ⲥⲁⲧⲟⲧⲥ ⲁⲥϩⲓⲧⲥ ⲉ̃ϧⲣⲏⲓ ϧⲁ ⲛⲉⲛϭⲁⲗⲁⲩϫ ⲙ̃ⲡⲓⲁ̃-
ⲅⲓⲟⲥ ⲁⲥⲟⲩⲱϣⲧ ⲙ̃ⲙⲟϥ ⲁϥⲉⲣⲟⲩⲱ̃ ⲛⲁⲥ ⲛ̃ϫⲉ *ⲡⲓⲁ̃ⲅⲓⲟⲥ
ⲅⲉⲱⲣⲅⲓⲟⲥ ⲉϥϫⲱ ⲙ̃ⲙⲟⲥ ϫⲉ ⲧⲱⲟⲩⲛⲓ ⲟ̃ϩⲓ ⲉ̃ⲣⲁϯ ⲉ̃ϫⲉⲛ
ⲛⲉϭⲁⲗⲁⲩϫ ⲁ̃ⲛⲟⲕ ⲅⲁⲣ ⲁ̃ⲛⲟⲕ ⲁⲛ ⲡⲉ ⲫ︦ϯ︦ ⲛ̃ⲛⲓⲭⲣⲏ-
ⲥⲧⲓⲁ̃ⲛⲟⲥ ⲁⲗⲗⲁ ⲁ̃ⲛⲟⲕ ⲃⲱⲕ ⲛ̃ⲧⲁϥ ⲉⲓϣⲉⲡ ϧⲓⲥⲓ
ⲉϩⲣⲏⲓ ⲉ̃ϫⲉⲛ ⲡⲉϥⲣⲁⲛ ⲉ̃ⲑⲟⲩⲁⲃ ⲡⲁⲗⲓⲛ ⲡⲉϫⲉ ϯⲥϩⲓⲙⲓ ⲛⲁϥ
ϫⲉ ⲡⲁϭ︦ⲥ︦ ⲓⲥϫⲉ ⲁⲓϫⲓⲙⲓ ⲛ̃ⲟⲩϩⲙⲟⲧ ⲙ̃ⲡⲉⲕⲙⲑⲟ ⲙⲏⲓⲥ ⲛⲏⲓ
ⲉⲑⲣⲓⲉⲣⲧⲟⲗⲙⲁⲛ ⲛ̃ⲧⲁϫⲱ ⲛ̃ⲟⲩⲥⲁϫⲓ ⲙ̃ⲡⲉⲕⲙ̃ⲑⲟ ⲉ̃ⲃⲟⲗ ⲡⲉ-
ϫⲉ ⲡⲓⲁⲅⲓⲟⲥ ⲛⲁⲥ ϫⲉ ⲥⲁϫⲓ ⲡⲉϫⲉ ϯⲥϩⲓⲙⲓ ⲛⲁϥ ϫⲉ
*ⲡⲁϭ︦ⲥ︦ ⲟⲩⲟⲛ ⲛ̃ⲧⲏⲓ ⲙ̃ⲙⲁⲩ ⲛ̃ⲟⲩⲁ̃ⲗⲟⲩ ⲉϥⲭⲏ ϧⲉⲛ ⲑ︦
ⲛ̃ⲣⲟⲙⲡⲓ ⲟⲩⲟϩ ⲫⲁⲓ ⲟⲩⲃⲉⲗⲗⲉ ⲡⲉ ⲛ̃ⲕⲟⲩⲣ ⲛ̃ⲉ̃ⲃⲟ ⲛ̃ϭⲁⲗⲉ
ϯϣⲓⲡⲓ ⲛ̃ⲧⲁⲙⲟϥ ⲛ̃ⲛⲁⲑⲉϣⲉⲩ ⲉ̃ϣⲟⲡ ⲟⲩⲛ ⲛ̃ⲧⲉⲕⲑⲣⲉϥ-
ⲛⲁⲩ ⲙ̃ⲃⲟⲗ ⲛ̃ⲧⲉϥⲥⲱⲧⲉⲙ ⲟⲩⲟϩ ⲛ̃ⲧⲉϥⲥⲁϫⲓ ϯⲛⲁϩϯ
ϩⲱ ⲉ̃ⲡⲉⲕⲛⲟⲩϯ ⲁϥⲉ̃ⲣⲟⲩⲱ ⲛ̃ϫⲉ ⲡⲓⲑⲙⲏⲓ ⲉϥϫⲱ ⲙ̃ⲟⲥ
ϫⲉ ⲁ̃ⲛⲓⲟⲩⲓ̃ ⲙ̃ⲡⲓⲁ̃ⲗⲟⲩ ⲛⲏⲓ ⲙ̃ⲛⲁⲓ ⲧⲟⲧⲉ ⲁⲥⲓ̃ⲛⲓ ⲙ̃ⲡⲓⲁ̃ⲗⲟⲩ
ⲛⲁϥ ⲉ̃ⲃⲟⲗϧⲉⲛ ϯⲙⲁϩⲅ︦ϯ ⲛ̃ⲟⲩⲁϩⲙⲓ *ⲛ̃ⲧⲉ ⲡⲉⲥⲏⲓ ⲟⲩⲟϩ


### 0026

ⲁⲥϣⲧⲟϥ ϧⲉⲛ ⲕⲉⲛϥ ⲙ̃ⲡⲓⲑⲙⲏⲓ ⲡⲓⲁ̃ⲅⲓⲟⲥ ⲇⲉ ⲅⲉⲱⲣⲅⲓⲟⲥ
ⲛⲁϥⲙⲏⲛ ⲉ̃ⲃⲟⲗ ⲉϥⲧⲱⲃϩ ⲉ̃ϩⲣⲏⲓ ⲉ̃ϫⲱϥ ⲛⲁⲣⲉ ϫⲱϥ
ϫⲟⲃⲥ ⲉ̃ⲡⲉⲥⲏⲧ ⲡⲉ ⲟⲩⲟϩ ⲉ̃ⲣⲉ ⲡⲓⲁ̃ⲗⲟⲩ ϧⲉⲛ ⲕⲉⲛϥ
ⲁϥⲛⲓϥⲓ ⲉ̃ϧⲟⲩⲛ ⲉϩⲣⲁϥ ⲁⲩϩⲉⲓ ⲉ̃ⲃⲟⲗϧⲉⲛ ⲛⲉϥⲃⲁⲗ
ⲛ̃ϫⲉ ϩⲁⲛⲕⲉⲕⲥ ⲥⲁⲧⲟⲧϥ ⲁϥⲛⲁⲩ ⲙ̃ⲃⲟⲗ ⲡⲉϫⲉ ϯⲥϩⲓ-
ⲙⲓ ⲛⲁϥ ϫⲉ ⲡⲁϭ︦ⲥ︦ ϯϯϩⲟ ⲉ̃ⲣⲟⲕ ⲉⲑⲣⲉϥⲥⲁϫⲓ ⲟⲩⲟϩ ⲛ̃ⲧⲉϥ-
ⲥⲱⲧⲉⲙ *ϧⲉⲛ ⲛⲉϥⲙⲁϣϫ ⲛ̃ⲧⲉϥⲧⲱⲛϥ ⲛ̃ⲧⲉϥⲙⲟϣⲓ
ⲉϫⲉⲛ ⲛⲉϥϭⲁⲗⲁⲩϫ ⲡⲉϫⲉ ⲡⲓⲁ̃ⲅⲓⲟⲥ ⲅⲉⲱⲣ ⲛⲁⲥ ϫⲉ
ϯⲥϩⲓⲙⲓ ⲫⲁⲓ ⲣⲱϣⲓ ⲙ̃ⲙⲟϥ ϯⲛⲟⲩ ϫⲉ ⲉⲉⲣⲭⲣⲓⲁ̃ ⲙ̃ⲙⲟϥ
ⲉⲑⲣⲉϥϣⲉⲙϣⲓ ⲙ̃ⲙⲟⲓ ⲛ̃ⲟⲩϩⲱⲃ ⲁⲓϣⲁⲛⲙⲟⲩϯ ⲉ̃ⲣⲟϥ
ⲛ̃ⲧⲉϥⲥⲱⲧⲉⲙ ⲉ̃ⲡⲁϧⲣⲱⲟⲩ ⲟⲩⲟϩ ⲛ̃ⲧⲉϥⲙⲟϣⲓ ⲛ̃ⲧⲉϥⲉⲣⲇⲓⲁ̃-
ⲕⲟⲛⲓⲛ ⲛⲏⲓ ⲙ̃ⲡⲓⲥⲁϫⲓ ⲟⲩⲟϩ ⲙ̃ⲡⲉⲥϣϫⲉⲙϫⲟⲙ ⲛ̃ϫⲉ
ϯⲥϩⲓⲙⲓ ⲛ̃ⲉ̃ⲣⲟⲩ*ⲱ̃ ⲛⲁϥ ⲛⲟⲩⲥⲁϫⲓ ⲛⲁⲥⲛⲁⲩ ⲅⲁⲣ
ⲉ̃ⲡⲉϥϩⲟ ⲙ̃ⲫⲣⲏϯ ⲙ̃ⲡϩⲟ ⲛ̃ⲟⲩⲁⲅⲅⲉⲗⲟⲥ ⲛ̃ⲧⲉ ⲫϯ
Ⲧⲟⲧⲉ ⲡⲓⲁ̃ⲛⲟⲙⲟⲥ ⲛ̃ⲁ̃ⲥⲉⲃⲏⲥ ⲛ̃ⲟⲩⲣⲟ ⲇⲁⲇⲓⲁ̃ⲛⲟⲥ ⲛⲉⲙ
ⲡⲓⲕⲉⲝ︦ⲑ︦ ⲛ̃ⲟⲩⲣⲟ ⲉⲑⲛⲉⲙⲁϥ ⲉ̃ⲧⲁⲩⲓ̃ ⲉ̃ⲃⲟⲗϧⲉⲛ ⲡⲓⲁ̃ⲣⲓⲥⲧⲟⲛ
ⲁⲩϣⲱⲡⲓ ⲉⲩⲥⲛⲏⲓⲛⲓ ⲙ̃ⲙⲱⲟⲩ ϧⲉⲛ ⲛⲓⲡⲗⲁⲧⲓⲁ̃ ⲛ̃ⲧⲉ
ϯⲃⲁⲕⲓ ⲉ̃ⲧⲁϥⲥⲟⲙⲥ ⲇⲉ ⲛ̃ϫⲉ ⲡⲓⲇⲣⲁⲕⲱⲛ ⲛ̃ⲧⲉ ⲫⲛⲟⲩⲛ
ⲛ̃ⲟⲩⲣⲟ ⲇⲁⲇⲓⲁ̃ⲛⲟⲥ ⲁϥⲛⲁⲩ ⲉ̃ⲡⲓϣϣⲏⲛ ⲫⲏ ⲉ̃ⲧⲁϥⲣⲱⲧ
ⲉ̃ⲃⲟⲗϩⲓⲧⲟⲧϥ *ⲙ̃ⲡⲓⲑⲙⲏⲓ ⲛⲁϥϣⲓⲛⲓ ⲡⲉ ⲉ̃ⲛⲁⲣⲭⲟⲥ ⲛ̃ⲧⲁϥ
ϫⲉ ⲡⲁⲓϫⲓⲛⲛⲁⲩ ⲙ̃ⲃⲉⲣⲓ ⲟⲩⲕⲉⲛⲧⲉ ⲡ ⲡⲁⲓϣϣⲏⲛ
ⲁϥⲧⲁⲙⲟϥ ⲉϥϫⲱ ⲙ̃ⲙⲟⲥ ϫⲉ ⲫⲁⲓ ⲡⲉ ⲡⲓⲙⲱⲓⲧ ⲉ̃ⲛⲁϥϩⲱ-
ⲟⲩⲓ̃ ⲉ̃ϧⲟⲩⲛ ⲉ̃ⲣⲟϥ ⲛϫⲉ ⲡⲓⲁ̃ⲅⲓⲟⲥ ⲡⲓⲛⲓϣϯ ⲛ̃ⲧⲉ ⲛⲓⲅⲁⲗⲓⲗⲉⲟⲥ
ⲅⲉⲱⲣⲅⲓⲟⲥ ⲛ̃ⲑⲟϥ ⲇⲉ ⲡⲟⲩⲣⲟ ⲁϥⲟⲩⲁϩⲥⲁϩⲛⲓ ⲉⲑⲣⲟⲩⲉⲛϥ
ⲛ̃ⲥⲉⲧⲁϩⲟϥ ⲉ̃ⲣⲁⲧϥ ⲙ̃ⲡⲉϥⲙ̃ⲑⲟ ⲛ̃ⲇⲉⲙⲟⲥⲓⲁ̃ ⲁϥⲑⲣⲟⲩⲛⲉⲩ-


### 0027

ⲣⲓⲍⲓⲛ ⲙ̃ⲙⲟϥ ϧⲉⲛ ⲟⲩⲙⲉⲧⲁⲑⲛⲁⲓ ϣⲁⲧⲉ *ⲛⲉϥⲥⲁⲣⲝ ⲗⲟϥ-
ⲗⲉϥ ⲉ̃ⲃⲟⲗ ⲟⲩⲟϩ ⲛ̃ⲧⲉ ⲛⲉϥⲥⲫⲓⲣⲱⲟⲩ ⲗⲱⲃϣ ϩⲓⲧⲉⲛ
ⲡⲁϣⲁⲓ ⲙ̃ⲡⲓⲭⲣⲱⲙ ⲛ̃ⲧⲟⲩϩⲓⲟⲩⲓ̃ ⲛ̃ⲟⲩⲃⲁⲥⲓⲥ ⲛ̃ⲭⲣⲱⲙ
ϩⲓϫⲉⲛ ⲧⲉϥⲁ̃ⲫⲉ ⲙⲉⲛⲉⲛⲥⲱⲥ ⲁϥⲑⲣⲟⲩⲁϣϥ ⲟⲛ ⲛ̃ⲥⲉ-
ϩⲱⲕⲓ ⲙ̃ⲙⲟϥ ⲟⲩⲟϩ ⲛⲥⲉⲙⲉϩ ⲛϩⲁⲛⲫⲩⲁ̃ⲗⲏ ⲙ̃ⲃⲉⲛⲓⲡⲓ
ⲉⲩⲙⲉϩ ⲛ̃ⲭⲣⲱⲙ ⲛ̃ⲥⲉϩⲓⲧⲟⲩ ϧⲁ ⲛⲉϥⲥⲫⲓⲣⲱⲟⲩⲓ̃ ϣⲁⲧⲉϥϯ
ⲙ̃ⲡⲓⲡⲛ︦ⲁ︦ ⲟⲩⲟϩ ⲁϥⲉⲣⲕⲉⲗⲉⲩⲓⲛ ⲛ̃ϫⲉ ⲡⲟⲩⲣⲟ ⲉⲑⲣⲟⲩϭⲓ
ⲙ̃ⲡⲉϥⲥⲱⲙⲁ ⲛ̃ⲥⲉⲃⲉⲣⲃⲱⲣϥ ⲉ̃ⲃⲟⲗ ϩⲓϫⲉⲛ * ⲟⲩⲧⲱⲟⲩ
ⲉϥϭⲟⲥⲓ ⲛⲁϥϫⲱ ⲟⲩⲛ ⲙ̃ⲙⲟⲥ ⲡⲉ ⲛ̃ϫⲉ ⲡⲓⲇⲣⲁⲕⲱⲛ ϧⲉⲛ
ⲡⲉϥϩⲏⲧ ϫⲉ ⲥⲉⲛⲁⲓ̃ ⲛϫⲉ ⲛⲓϩⲁⲗⲁϯ ⲛ̃ⲧⲉ ⲧⲫⲉ ⲛ̃ⲥⲉ-
ⲟⲩⲱⲙ ⲛ̃ⲛⲉϥⲥⲁⲣⲝ ⲉ̃ⲧⲁⲩⲱ̃ⲗⲓ ⲟⲩⲛ ⲙ̃ⲡⲓⲥⲱⲙⲁ ⲛ̃ⲧⲉ
ⲙⲁⲕⲁⲣⲓⲟⲥ ⲉ̃ⲃⲟⲗ ϩⲓϫⲉⲛ ⲡⲁⲓⲧⲱⲟⲩ ⲫⲏ ⲉ̃ⲧⲟⲩⲙⲟⲩϯ
ⲉ̃ⲣⲟϥ ϫⲉ ⲥⲓⲣⲓⲥ ⲁⲩⲃⲉⲣⲃⲱⲣϥ ⲉ̃ⲃⲟⲗ ⲙ̃ⲡⲓⲙⲁ ⲉ̃ⲧⲉⲙⲙⲁⲩ
ⲟⲩⲟϩ ⲁⲩⲧⲁⲥⲑⲱⲟⲩ ⲛ̃ϫⲉ ⲛⲓϩⲩⲡⲉⲣⲉⲧⲏⲥ
Ⲉⲧⲁⲩⲟⲩⲉⲓ ⲇⲉ ⲉ̃ⲃⲟⲗ ⲙ̃ⲡⲓⲧⲱⲟⲩ ⲛ̃ⲟⲩⲕⲟⲩϫⲓ * ⲛ̃ϫⲉ
ⲛⲓϩⲩⲡⲉⲣⲉⲧⲏⲥ ⲛ̃ⲧⲉ ⲡⲓⲇⲓⲁ̃ⲃⲟⲗⲟⲥ ⲛⲁⲩ ⲗ︦ ⲛ̃ⲥⲧⲁⲇⲓⲟⲛ
ⲁϥϣⲱⲡⲓ ⲛ̃ϫⲉ ⲟⲩϧⲁⲣⲁⲃⲁⲓ ϧⲉⲛ ⲧⲫⲉ ⲛⲉⲙ ϩⲁⲛⲥⲉⲧ-
ⲉⲣⲏϫ ϩⲱⲥⲧⲉ ⲛ̃ⲧⲉ ⲡⲓⲧⲱⲟⲩ ⲧⲏⲣϥ ⲉ̃ⲧⲉⲙⲙⲁⲩ ⲥⲑⲉⲣⲧⲉⲣ
ϩⲏⲡⲡⲉ ⲓⲥ ⲡϭ︦ⲥ︦ ⲁϥⲓ̃ ⲉϥⲧⲁⲗⲏⲟⲩⲧ ⲉ̃ϫⲉⲛ ⲟⲩϭⲏⲡⲓ ⲟⲩⲟϩ
ⲡⲉϫⲁϥ ⲙ̃ⲡⲓⲁⲅⲓⲟⲥ ⲅⲉⲱⲣⲅⲓⲟⲥ ϫⲉ ⲡⲁⲥⲱⲧⲡ ⲉⲑⲛⲁⲛⲉϥ
ⲧⲱⲛⲕ ⲉ̃ⲃⲟⲗϧⲉⲛ ⲡⲓⲉⲛⲕⲟⲧ ⲟⲩⲟϩ ⲥⲁⲧⲟⲧϥ ⲁϥⲧⲱⲛϥ
ⲛ̃ϫⲉ ⲡⲓⲙⲁⲣⲧⲩⲣⲟⲥ ⲛ̃ⲧⲉ ⲡⲭ︦ⲥ︦ ⲁϥϭⲟϫⲓ ⲥⲁⲫⲁ *ⲛ̃ⲥⲁ ⲛⲓ-
ϩⲩⲡⲉⲣⲉⲧⲏⲥ ⲉϥⲱϣ ⲉ̃ⲃⲟⲗ ⲟⲩⲃⲏⲟⲩ ⲉϥϫⲱ ⲙ̃ⲙⲟⲥ ϫⲉ
ⲟ̃ϩⲓ ⲛⲏⲓ ⲛ̃ⲟⲩⲕⲟⲩϫⲓ ϣⲁϯⲓ̃ ⲛⲉⲙⲱⲧⲉⲛ ⲉ̃ⲧⲁⲩⲥⲟⲙⲥⲉ
ϩⲓⲫⲁϩⲟⲩ ⲙ̃ⲙⲱⲟⲩ ⲛ̃ϫⲉ ⲛⲓϩⲩⲡⲉⲣⲉⲧⲏⲥ ⲁⲩⲛⲁⲩ ⲉ̃ⲡⲓ-
ⲑⲙⲏⲓ ⲅⲉⲱⲣⲅⲓⲟⲥ ⲉϥϭⲟϫⲓ ϩⲓⲫⲁϩⲟⲩ ⲙ̃ⲙⲱⲟⲩ ⲁⲩϯⲱ̃ⲟⲩ


### 0028

ⲙ̃ⲫϯ ⲁⲩϩⲓⲧⲟⲩ ⲉ̃ϧⲣⲏⲓ ϧⲁⲣⲁⲧⲟⲩ ⲛ̃ⲛⲉϥϭⲁⲗⲁⲩϫ ⲁⲩ-
ϯϩⲟ ⲉ̃ⲣⲟϥ ⲉⲩϫⲱ ⲙ̃ⲙⲟⲥ ϫⲉ ⲙⲟⲓ ⲛⲁⲛ ϩⲱⲛ ⲛ̃ϯⲥⲫⲣⲁⲍⲓⲥ
ⲛ̃ⲧⲉ ⲡⲭ︦ⲥ︦ ⲡⲓⲛⲁⲓⲁⲧϥ ⲟⲩⲛ ⲛ̃ⲑⲙⲏⲓ *ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ
ⲁϥϯⲱⲙⲥ ⲛⲱⲟⲩ ϧⲉⲛ ⲫⲣⲁⲛ ⲙ̃ⲫⲣⲁⲛ ⲙ̃ⲫⲓⲱⲧ ⲛⲉⲙ
ⲡϣⲏⲣⲓ ⲛⲉⲙ ⲡⲓⲡⲓⲡⲛ︦ⲁ︦ ⲉ̃ⲑⲟⲩⲁⲃ ⲟⲩⲟϩ ⲁⲩⲓ̃ ⲁⲩⲟϩⲓ ⲉ̃ⲣⲁⲧⲟⲩ
ⲙ̃ⲡⲉⲙⲑⲟ ⲙ̃ⲡⲟⲩⲣⲟ ⲛ̃ⲁ̃ⲛⲟⲙⲟⲥ ⲁⲩⲱϣ ⲉ̃ⲃⲟⲗ ⲧⲏⲣⲟⲩ ϫⲉ
ⲁ̃ⲛⲟⲛ ϩⲁⲛⲭⲣⲏⲥⲧⲓⲁ̃ⲛⲟⲥ ⲙ̃ⲡⲁⲣⲣⲏⲥⲓⲁ̃ ⲧⲟⲧⲉ ⲛⲓⲟⲩⲣⲱⲟⲩ
ⲁⲩⲧⲱⲙⲧ ϧⲉⲛ ⲟⲩⲛⲓϣϯ ⲙ̃ⲫⲟⲃⲟⲥ ⲉⲑⲃⲉ ⲡⲁⲓϩⲱⲃ ⲁϥⲉⲣ-
ⲕⲉⲗⲉⲩⲓⲛ ⲉ̃ⲓ̃ⲛⲓ ⲛ̃ⲛⲓϩⲩⲡⲉⲣⲉⲧⲏⲥ ⲛ̃ⲥⲉⲧⲁϩⲱⲟⲩ ⲉ̃ⲣⲁⲧⲟⲩ
ⲛⲁϩⲣⲁϥ ⲫⲣⲁⲛ ⲛ̃ⲟⲩⲁⲓ ⲙ̃ⲙⲱⲟⲩ *ⲡⲉ ⲕⲗⲁⲩⲇⲁⲛⲏ
ⲁϥⲑⲣⲟⲩⲓ̃ϣⲓ ⲙ̃ⲙⲟϥ ⲟⲩⲟϩ ⲛ̃ⲥⲉϯ ⲛⲁϥ ⲛ̃ϩⲁⲛⲇⲓⲙⲱⲣⲓⲁ
ⲡⲓⲕⲉⲟⲩⲁⲓ ⲇⲉ ⲉⲩⲙⲟⲩϯ ⲉ̃ⲣⲟϥ ϫⲉ ⲗⲁⲥⲓⲣⲓ ⲛⲉⲙ ⲗⲁⲥⲓ-
ⲣⲓⲁ̃ⲛⲏ ϩⲓⲛⲁ ⲛ̃ⲧⲟⲩⲧⲏⲓⲧⲟⲩ ⲉ̃ⲧⲟⲧⲥ ⲛ̃ⲧⲥⲏϥⲓ ⲕⲗⲏⲕⲱⲛ
ⲁⲩⲧⲏⲓϥ ⲉ̃ⲧⲟⲧϥ ⲙ̃ⲡⲓⲑⲏⲣⲓⲟⲛ
Ⲙⲉⲛⲉⲛⲥⲁ ⲛⲁⲓ ⲟⲩⲛ ⲁⲩⲉⲣⲕⲉⲗⲉⲩⲓⲛ ⲛ̃ϫⲉ ⲛⲓⲟⲩⲣⲱⲟⲩ
ⲉⲑⲣⲟⲩⲓ̃ⲛⲓ ⲙ̃ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲁϥⲉⲣⲟⲩⲱ̃ ⲛ̃ϫⲉ ⲡⲟⲩⲣⲟ
ⲇⲁⲇⲓⲁ̃ⲛⲟⲥ ⲡⲉϫⲁϥ ⲛⲁϥ ϫⲉ ⲅⲉⲱⲣⲅⲓⲟⲥ *ϣⲉ ⲡⲁϭ︦ⲥ︦ ⲡⲓⲣⲏ
ⲛⲉⲙ ⲡⲓⲓⲟϩ ⲛⲉⲙ ⲛⲓⲛⲟⲩϯ ⲛⲉⲙ ⲧⲟⲩⲙⲁⲩ ϯⲁⲣⲧⲏⲙⲓⲥ
ϫⲉ ϯϯⲁ̃ⲥⲟ ⲉ̃ⲣⲟⲕ ⲙ̃ⲫⲣⲏϯ ⲛ̃ⲟⲩϣⲏⲣⲓ ⲙ̃ⲙⲉⲛⲣⲓⲧ ⲛ̃ⲧⲏⲓ
ⲟⲩⲟϩ ϩⲱⲃ ⲛⲓⲃⲉⲛ ⲉ̃ⲧⲉⲕⲛⲁⲉⲣⲉ̃ⲧⲓⲛ ⲙ̃ⲙⲱⲟⲩ ⲛ̃ⲧⲟⲧ ϯⲛⲁ-
ⲧⲏⲓⲧⲟⲩ ⲛⲁⲕ ⲛ̃ϩⲙⲟⲧ ⲙⲟⲛⲟⲛ ⲥⲱⲧⲉⲙ ⲛ̃ⲥⲱⲓ ϩⲱⲥ ⲓⲱⲧ
ⲟⲩⲟϩ ⲙⲁⲙⲁϯ ϩⲓⲛⲁ ⲛ̃ⲧⲉⲕⲓ︦ ⲛ̃ⲧⲉⲕⲟⲩⲱϣⲧ ⲛ̃ⲛⲓⲛⲟⲩϯ
ⲙ̃ⲙⲁⲩⲁⲧϥ ⲁϥⲉⲣⲟⲩⲱ̃ ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲡⲉϫⲁϥ
ⲛⲁϥ ϫⲉ ϯⲟⲓ ⲛ̃ϣⲫⲏⲣⲓ ⲉ̃ⲛⲉⲕⲥⲁϫⲓ ⲉⲧϫⲱ *ⲙ̃ⲙⲟⲥ ϫⲉ
ϯⲛⲟⲩ ⲛⲁⲓⲭⲏ ⲛ̃ⲧⲟⲧⲉⲛ ϣⲁ ⲫⲟⲟⲩ ⲉⲑⲃⲉ ⲟⲩ ⲙⲡⲉⲕϫⲉ
ⲛⲁⲓ ⲛⲏⲓ ϩⲏⲡⲡⲉ ⲓⲥ ⲍ︦ ⲛ̃ⲣⲟⲙⲡⲓ ⲛ̃ⲉϩⲟⲟⲩ ⲁⲩⲥⲓⲛⲓ ⲉⲕⲉⲣ-


### 0029

ⲃⲁⲥⲁⲛⲓⲍⲓⲛ ⲙ̃ⲙⲟⲓ ⲁⲕϧⲱⲧⲉⲃ ⲙ̃ⲙⲟⲓ ⲛ̃ⲅ︦ ⲛ̃ⲥⲟⲡ ⲟⲩⲟϩ
ⲁⲓⲙⲟⲩ ⲁϥⲧⲟⲩⲛⲟⲥⲧ ⲙ̃ⲡⲓⲅ︦ ⲛ̃ⲥⲟⲡ ⲛ̃ϫⲉ ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦
ⲕⲉⲡⲉⲣ ⲙ̃ⲡⲓⲥⲱⲧⲉⲙ ⲉ̃ⲛⲁⲓⲥⲁ ⲛⲁⲓ ⲛ̃ⲧⲟⲧⲕ ⲉ̃ⲃⲏⲗ ⲉ̃ϯⲛⲟⲩ
ⲕⲥⲱⲟⲩⲛ ⲁⲛ ⲱ ⲡⲟⲩⲣⲟ ϫⲉ ⲡⲁⲓⲅⲉⲛⲟⲥ ⲛ̃ⲧⲉ ⲛⲓⲭⲣⲏⲥⲧⲓⲁ̃-
ⲛⲟⲥ *ϩⲁⲛⲫⲓⲗⲟⲛⲓⲕⲟⲥ ⲛⲉ ⲟⲩⲟϩ ⲥⲉϯ ⲉ̃ϧⲟⲩⲛ ⲉ̃ϩⲣⲉⲛ ⲛⲏ
ⲉⲧϯ ⲉ̃ϧⲟⲩⲛ ⲉ̃ϩⲣⲁⲩ ⲁⲗⲗⲁ ϯⲛⲟⲩ ϯⲉⲣⲟⲩⲟⲧ ⲛⲏⲓ
ⲛ̃ⲧⲉ ⲧⲉⲕⲙⲉⲧⲛⲓϣϯ ϯⲛⲁⲉⲣϣⲟⲩϣⲱⲟⲩϣⲓ ⲙ̃ⲡⲉⲕⲛⲓϣϯ
ⲛ̃ⲛⲟⲩϯ ⲡⲓⲁ̃ⲡⲟⲗⲗⲱⲛ ⲫⲏ ⲉ̃ⲧⲉⲕⲙⲉⲓ ⲙ̃ⲙⲟϥ ⲉⲧⲁϥⲥⲱ-
ⲧⲉⲙ ⲟⲩⲛ ⲉⲛⲁⲓ ⲛ̃ϫⲉ ⲡⲟⲩⲣⲟ ⲇⲁⲇⲓⲁ̃ⲛⲟⲥ ⲁϥⲣⲁϣⲓ
ⲉ̃ⲙⲁϣⲱ ⲁϥⲁ̃ⲙⲟⲛⲓ ⲛ̃ⲧⲁⲫⲉ ⲙ̃ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ϫⲉ
ⲁϥⲛⲁϯⲫⲓ ⲉ̃ⲣⲟⲥ ⲁϥϯⲧⲟⲧϥ ⲙ̃ⲙⲟϥ *ⲛ̃ϫⲉ ⲡⲓⲑⲙⲏⲓ ⲉϥϫⲱ
ⲙ̃ⲙⲟⲥ ϫⲉ ⲙ̃ⲫⲟⲣ ⲱ ⲡⲟⲩⲣⲟ ⲟⲩⲕⲁϩⲥ ⲁⲛ ⲧⲉ ⲛ̃ⲧⲉ ⲛⲓⲅⲁ-
ⲗⲓⲗⲉⲟⲥ ⲉ̃ϣⲱⲡ ⲁⲩϣⲧⲉⲙⲟⲩⲱϣⲧ ⲛ̃ⲛⲓⲛⲟⲩϯ ⲛ̃ϣⲟⲣⲡ
ⲁⲗⲗⲁ ⲟⲩⲁϩⲥⲁϩ ϯⲛⲟⲩ ⲉⲑⲣⲟⲩϩⲓⲟⲩⲓ̃ ⲙ̃ⲙⲟⲓ ⲉ̃ⲡⲓϣⲧⲉⲕⲟ
ϣⲁ ⲡⲉϥⲣⲁⲥϯ ⲁϥⲉⲣⲟⲩⲱ̃ ⲛ̃ϫⲉ ⲡⲟⲩⲣⲟ ⲡⲉϫⲁϥ ⲛⲁϥ ϫⲉ
ⲛ̃ⲛⲉⲥϣⲱⲡⲓ ⲛⲏⲓ ⲓⲥϫⲉⲛ ϯⲛⲟⲩ ⲛ̃ⲧⲁⲧⲏⲓⲕ ⲉ̃ϩⲗⲓ ⲛ̃ⲇⲓⲙⲟ-
ⲣⲓⲁ̃ ⲁⲗⲗⲁ ϧⲓⲥⲓ ⲛⲓⲃⲉⲛ ⲉ̃ⲧⲁⲓⲧⲏⲓⲧⲟⲩ ⲛⲁⲕ *ⲭⲁⲩ
ⲛⲏⲓ ⲉ̃ⲃⲟⲗ ϩⲱⲥ ⲁⲓⲁⲓⲧⲟⲩ ⲛⲁⲕ ϧⲉⲛ ⲟⲩⲙⲉⲧⲁⲧⲉ̃ⲙⲓ
ⲙ̃ⲫⲣⲏϯ ⲛ̃ⲟⲩⲓⲱⲧ ϣⲟⲡⲧ ⲉ̃ⲣⲟⲕ ⲁ̃ⲙⲟⲩ ϫⲉ ϯⲛⲟⲩ ⲛ̃ⲧⲁ-
ϫⲓⲧⲕ ⲥⲁϧⲟⲩⲛ ⲉ̃ⲡⲓⲡⲁⲗⲗⲁⲧⲓⲟⲛ ⲉⲧⲥⲁϧⲟⲩⲛ ⲡⲓⲙⲱⲓⲧⲉ
ⲉ̃ⲧⲉⲣⲉ ϯⲟⲩⲣⲱ ⲁ̃ⲗⲉⲝⲁⲛⲇⲣⲁ ⲭⲏ ⲙ̃ⲙⲟϥ ϧⲉⲛ ⲡⲉⲥⲕⲟⲓ-
ⲧⲱⲛ ⲉⲥⲙⲟⲧⲉⲛ ⲙ̃ⲙⲟⲥ ⲉ̃ⲧⲁϥⲱ̃ⲗⲓ ⲇⲉ ⲙ̃ⲙⲟϥ ⲉ̃ϧⲟⲩⲛ
ⲛ̃ϫⲉ ⲡⲟⲩⲣⲟ ⲁϥϩⲓⲟⲩⲓ̃ ⲙ̃ⲙⲟϥ ⲉ̃ϧⲟⲩⲛ ⲛⲉⲙ ϯⲟⲩⲣⲱ


### 0030

ⲁ̃ⲗⲉⲝⲁⲛⲇⲣⲁ ⲁϥⲙⲁϣⲑⲁⲙ ⲙ̃ⲡⲓⲣⲟ ⲉ̃ⲣⲱⲟⲩ *ⲙ̃ⲡⲃ︦ ⲁϥϣⲉ
ⲛⲁϥ ⲛ̃ϫⲉ ⲡⲟⲩⲣⲟ ⲛⲉ ⲣⲟⲩϩⲓ ⲅⲁⲣ ⲡⲉ
Ⲧⲟⲧⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲁϥⲕⲱⲗϫ ⲛ̃ⲛⲉϥⲕⲉⲗⲓ
ⲟⲩⲟϩ ⲁϥⲉⲣϩⲏⲧⲥ ⲛ̃ⲧⲱⲃϩ ⲙ̃ⲫϯ ⲉϥϫⲱ ⲙ̃ⲙⲟⲥ ϫⲉ ⲫϯ
ⲡⲁⲛⲟⲩϯ ⲙ̃ⲙⲟⲛ ⲡⲉⲧⲟ̃ⲛⲓ ⲙ̃ⲙⲟⲕ ϧⲉⲛ ⲛⲓⲛⲟⲩϯ ⲛ̃ⲑⲟⲕ
ⲡⲉ ⲫϯ ⲉ̃ⲧⲓ̃ⲣⲓ ⲛ̃ⲛⲓϣⲫⲏⲣⲓ ⲉⲑⲃⲉ ⲟⲩ ϩⲁⲛⲉⲑⲛⲟⲥ ⲁⲩⲱϣ
ⲉ̃ⲃⲟⲗ ⲟⲩⲟϩ ϩⲁⲛⲗⲁⲟⲥ ⲁⲩⲉⲣⲙⲉⲗⲉⲧⲁⲛ ⲛ̃ϩⲁⲛⲥⲁϫⲓ
ⲉⲩϣⲟⲩⲓⲧ ⲁⲩⲑⲱⲟⲩϯ ⲉⲩⲙⲁ ⲛ̃ϫⲉ ⲛⲓⲟⲩ*ⲣⲱⲟⲩ ⲧⲏⲣⲟⲩ
ⲛ̃ⲧⲉ ⲡⲕⲁϩⲓ ⲛⲉⲙ ⲛⲟⲩⲕⲉⲁⲣⲭⲱⲛ ⲉⲩⲥⲟⲡ ⲁⲩⲥⲁϫⲓ ⲛ̃ⲥⲁ
ⲡϭ︦ⲥ︦ ⲛⲉⲙ ⲡⲉϥⲭ︦ⲣ︦ⲥ︦ ⲁⲥⲉ̃ⲣⲟⲩⲱ̃ ⲛ̃ϫⲉ ⲁ̃ⲗⲉⲝⲁⲛⲇⲣⲁ ϯⲟⲩⲣⲱ
ⲉⲥϫⲱ ⲙ̃ⲙⲟⲥ ⲙ̃ⲡⲓⲁ̃ⲅⲓⲟⲥ ϫⲉ ⲡⲁϭ︦ⲥ︦ ⲅⲉⲱⲣⲅⲓⲟⲥ ϯⲥⲱⲧⲉⲙ
ⲉ̃ⲣⲟⲕ ⲛ̃ⲕⲁⲗⲱⲥ ⲟⲩⲟϩ ϯⲉⲣⲉ̃ⲡⲓⲑⲩⲙⲩⲛ ⲉ̃ⲛⲉⲕⲥⲁϫⲓ ⲛⲓⲙ
ⲇⲉ ⲛⲉ ⲛⲏ ⲉⲧⲱϣ ⲉ̃ⲃⲟⲗ ⲓ̃ⲉ̃ ⲛⲓⲙ ⲛⲉ ⲛⲏ ⲉ̃ⲧⲁⲩⲉⲣⲙⲉⲗⲉ-
ⲧⲁⲛ ⲓⲉ̃ ⲛⲓⲙ ⲡⲉ ⲡⲭ︦ⲥ︦ ⲙⲁⲧⲥⲁⲃⲟⲓ ⲉ̃ⲣⲟϥ ⲛ̃ⲧⲁⲥⲟⲩⲱⲛϥ
ⲁϥⲉⲣⲟⲩⲱ̃ ⲛ̃ϫⲉ ⲡⲓⲁ̃ⲅⲓⲟⲥ *ⲅⲉⲱⲣⲅⲓⲟⲥ ⲉϥϫⲱ ⲙ̃ⲙⲟⲥ ϫⲉ
ⲓⲥϫⲉ ⲁⲣⲉⲧⲉⲣⲉⲣⲉ̃ⲧⲓⲛ ⲉ̃ⲉ̃ⲙⲓ ⲉ̃ⲡⲭ︦ⲥ︦ ⲛⲉⲙ ⲛⲉϥⲥⲁϫⲓ ⲥⲱⲧⲉⲙ
ⲱ ⲁ̃ⲗⲉⲝⲁⲛⲇⲣⲁ ϩⲟⲧⲉ ⲉ̃ⲧⲁ ⲡϭ︦ⲥ︦ ⲑⲁⲙⲓⲕ̃ ⲛ̃ⲧⲫⲉ ⲛⲉⲙ
ⲡⲕⲁϩⲓ ⲟⲩⲟϩ ⲁϥϭⲓ ⲛ̃ⲟⲩⲟ̃ⲙⲓ ⲉ̃ⲃⲟⲗϧⲉⲛ ⲡⲕⲁϩⲓ ⲁϥⲑⲁⲙⲓⲟ̃
ⲙ̃ⲡⲓⲣⲱⲙⲓ ⲉϥⲟ̃ⲛⲓ ⲙ̃ⲙⲟϥ ⲕⲁⲧⲁ ⲡⲉϥⲓ̃ⲛⲓ ⲛⲉⲙ ⲧⲉϥϩⲩⲕⲱⲛ
ⲡⲱⲥ ⲁϥⲓ̃ⲣⲓ ⲛ̃ⲟⲩⲕⲁϩⲓ ⲛ̃ⲥⲁⲣⲝ ⲡⲁⲗⲓⲛ ⲁϥⲑⲁⲙⲓⲟ̃ ⲛ̃ϩⲁⲛ-
ⲙⲟϯ ⲉ̃ⲃⲟⲗ ⲙ̃ⲙⲟϥ ⲁϥⲑⲁⲙⲓⲟ̃ ⲛ̃ⲟⲩϣⲁⲣ *ⲛⲉⲙ ⲛⲏ ⲉⲑⲛⲁⲩ
ⲛ̃ⲧⲁϥ ⲛⲉⲙ ⲡⲥⲱϫⲡ ⲛ̃ⲛⲓⲙⲉⲗⲟⲥ ϧⲉⲛ ⲡⲓⲣⲱⲙⲓ ⲁϥⲑⲁⲙⲓⲟ̃
ⲛ̃ⲛⲓⲃⲁⲗ ⲛ̃ϩⲁⲛⲃⲉⲗⲗⲉⲩⲉ ⲛⲉⲙ ⲟⲩⲗⲁⲥ ⲛⲉⲙ ⲟⲩϣⲃⲱⲃⲓ
ⲁϥⲑⲁⲙⲓⲟ̃ ⲛ̃ϩⲁⲛϫⲓϫ ⲛⲉⲙ ⲛⲏ ⲧⲏⲣⲟⲩ ⲉⲧⲧⲁⲕⲧⲏⲟⲩⲧ
ⲉ̃ⲡⲓⲣⲱⲙⲓ ⲙⲏ ⲟⲩⲕⲁϩⲓ ⲁⲛ ⲡⲉ ⲉⲧⲭⲏ ⲉ̃ϧⲣⲏⲓ ⲁ̃ ⲫϯ
ⲡⲭ︦ⲥ︦ ⲁϥⲉⲣⲫⲟⲣⲓⲛ ⲛ̃ⲧⲉϥⲥⲁⲣⲝ ⲉ̃ⲃⲟⲗϧⲉⲛ ϯⲡⲁⲣⲑⲉⲛⲟⲥ


### 0031

ⲉ̃ⲑⲟⲩⲁⲃ ⲙⲁⲣⲓⲁ̃ ⲟⲩⲟϩ ⲁϥⲉⲣⲣⲱⲙⲓ ⲛ̃ⲑⲟϥ ⲡⲉ ⲫϯ︦ ⲫⲏ
ⲉ̃ⲧⲁϥⲧⲟⲩⲛⲟⲥⲧ ⲉ̃ⲃⲟⲗ*ϧⲉⲛ ⲛⲏ ⲉⲑⲙⲱⲟⲩⲧ ⲉⲓϣⲟⲡ
ⲛ̃ⲛⲁⲓϧⲓⲥⲓ ⲉ̃ϩⲣⲏⲓ ⲉ̃ϫⲉⲛ ⲡⲉϥⲣⲁⲛ ⲉ̃ⲑⲟⲩⲁⲃ ⲛⲉⲙ ⲡⲉϥⲓⲱⲧ
ⲛ̃ⲁ̃ⲅⲁⲑⲟⲥ ⲛⲉⲙ ⲡⲓⲡ︦ⲛ︦ⲁ︦ ⲉ̃ⲑⲟⲩⲁⲃ ⲉⲑⲃⲉ ⲁ̃ⲇⲁⲙ ⲱ̃ ⲁⲗⲉⲝ-
ⲁⲛⲇⲣⲁ ϯⲟⲩⲣⲱ ⲁ̃ ⲫϯ ⲑⲁⲙⲓϭ̃ ⲛ̃ⲧⲫⲉ ⲁϥⲥⲱⲛⲧ ⲙ̃ⲡⲓⲣⲏ
ⲛⲉⲙ ⲡⲓⲓⲟϩ ⲛ̃ⲣⲉϥⲉⲣⲟⲩⲱⲓⲛⲓ ⲛⲉⲙ ⲛⲓⲥⲓⲟⲩ ⲛⲉⲙ ⲡⲥⲱϫⲡ
ⲁⲥⲉⲣⲟⲩⲱ̃ ⲛⲁϥ ⲛ̃ϫⲉ ϯⲟⲩⲣⲱ ϫⲉ ⲙⲁⲧⲁⲙⲟⲓ ⲉ̃ⲡⲓⲥⲁϫⲓ
ⲡⲉϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲛⲁⲥ ϫⲉ ⲟⲩⲙⲉⲧϣⲁⲙϣⲉⲓ̃ⲇⲱ-
ⲗⲟⲛ *ⲉⲧϣⲟⲡ ϧⲉⲛ ⲡⲓⲕⲟⲥⲙⲟⲥ ⲙ̃ⲫⲟⲟⲩ ⲉⲩϣⲉⲙϣⲓ
ⲛ̃ⲛⲓⲧⲉⲙⲥⲓⲛ ⲟⲩⲟϩ ⲫϯ ⲁⲛ ⲉⲩⲟⲩⲱϣⲧ ⲛ̃ϩⲁⲛⲙⲟⲩⲛⲕ
ⲛ̃ϫⲓϫ ⲛ̃ⲣⲱⲙⲓ ⲛ̃ⲓ̃ⲇⲱⲗⲟⲛ ⲛ̃ⲁⲧⲯⲩⲭⲏ ⲉⲩϯϣⲱϣ
ⲙ̃ⲫϯ ⲡⲓⲣⲉϥⲑⲁⲙⲓⲕ̃ ⲛ̃ⲧⲉ ⲡⲓⲉⲡⲧⲏⲣϥ ⲡⲉϫⲉ ϯⲟⲩⲣⲟ
ⲛⲁϥ ϫⲉ ⲟⲩⲕⲟⲩⲛ ⲛⲓⲛⲟⲩϯ ϩⲁⲛⲇⲉⲙⲱⲛ ⲛⲉ ⲡⲉϫⲉ
ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲛⲁⲥ ϫⲉ ⲁ̃ϩⲁ ϩⲁⲛⲇⲉⲙⲱⲛ ⲛⲉ
ⲡⲉϫⲉ ϯⲟⲩⲣⲱ ⲛⲁϥ ϫⲉ ⲓⲉ ⲉ̃ⲧⲁ ⲡⲓⲕⲟⲥⲙⲟⲥ ϣⲱⲡⲓ ⲛ̃ⲁϣ
ⲛ̃ⲣⲏϯ ⲁϥⲉⲣⲟⲩⲱ̃ ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲛⲁⲥ ϫⲉ
ⲥⲱⲧⲉⲙ ⲉ̃ⲣⲟⲓ ⲱ̃ ϯⲟⲩⲣⲱ ⲁ̃ⲗⲉⲝⲁⲛⲇⲣⲁ ϥϫⲱ ⲙ̃ⲙⲟⲥ ⲛ̃ϫⲉ
ⲡⲓⲡⲣⲟⲫⲏⲧⲏⲥ *ⲇⲁⲩⲓⲇ ϫⲉ ⲫⲏ ⲉⲧϩⲉⲙⲥⲓ ϩⲓϫⲉⲛ ⲛⲓⲭⲉ-
ⲣⲟⲩⲃⲓⲙ ⲟⲩⲟⲛϩⲕ ⲉ̃ⲃⲟⲗ ⲙⲁⲧⲟⲩⲛⲟⲥ ⲧⲉⲕϫⲟⲙ ⲁ̃ⲙⲟⲩ
ⲉ̃ⲫⲛⲁϩⲙⲉⲛ ⲟⲩⲟϩ ⲡⲁⲗⲓⲛ ⲟⲛ ⲡⲉϫⲁϥ ϫⲉ ⲉϥⲉⲓ̃ ⲉ̃ⲡⲉⲥⲏⲧ
ⲙ̃ⲫⲣⲏϯ ⲛ̃ⲟⲩⲙⲟⲩⲛϩⲱⲟⲩ ⲉ̃ϫⲉⲛ ⲟⲩⲥⲱⲣⲧ ⲉ̃ⲧⲉ ϯⲛⲁⲓⲁⲧⲥ
ⲙ̃ⲡⲁⲣⲑⲉⲛⲟⲥ ⲙⲁⲣⲓⲁ̃ ⲧⲉ ⲡⲁⲗⲓⲛ ⲁⲃⲃⲁⲕⲟⲩⲙ ⲡⲓⲡⲣⲟⲫⲏ-
ⲧⲏⲥ ⲉϥⲱϣ ⲉ̃ⲃⲟⲗ ⲉϥϫⲱ ⲙ̃ⲙⲟⲥ ϫⲉ ⲡϭ︦ⲥ︦ ⲁⲓⲥⲱⲧⲉⲙ


### 0032

ⲉ̃ⲡⲉⲕϧⲣⲱⲟⲩ ⲟⲩⲟϩ *ⲁⲓⲉⲣϩⲟϯ ⲁⲓϯⲛⲓⲁⲧ ⲛ̃ⲛⲉⲕϩⲃⲏⲟⲩⲓ̃
ⲟⲩⲟϩ ⲁⲓⲧⲱⲙⲧ ⲉ̃ⲧⲁ ⲡⲓⲡⲣⲟⲫⲏⲧⲏⲥ ϫⲱ ⲙ̃ⲫⲁⲓ ϧⲉⲛ
ⲟⲩⲙⲉⲑⲙⲏⲓ ⲁϥⲉ̃ⲙⲓ ⲅⲁⲣ ϫⲉ ϥⲛⲏⲟⲩ ⲉ̃ⲡⲉⲥⲏⲧ ⲉ̃ⲡⲓⲕⲟⲥⲙⲟⲥ
ⲛ̃ϫⲉ ⲡⲭ︦ⲥ︦ ⲓⲏ︦ⲥ︦ ⲟⲩⲟϩ ⲁϥⲉⲣϩⲟϯ ⲁϥϯⲛⲓⲁⲧϥ ϫⲉ ⲫϯ ⲡⲉ
ⲁϥⲉⲣⲣⲱⲙⲓ ⲉⲑⲃⲉ ⲫⲏ ⲉ̃ⲧⲉ ⲫⲱⲛ ⲛⲟⲩϫⲁⲓ ⲛ̃ⲧⲉϥⲛⲁϩⲙⲉⲛ
ⲛ̃ⲧⲟⲧϥ ⲙ̃ⲡⲓⲇⲓⲁ̃ⲃⲟⲗⲟⲥ ⲡⲓϫⲁϫⲓ ⲛ̃ⲧⲉ ϯⲙⲉⲑⲙⲏⲓ ⲛⲓⲃⲉⲛ
ⲫⲏ ⲉⲧⲁϥⲉⲣϩⲁⲗ ⲙ̃ⲡⲁⲓ︦ⲟ︦ ⲛ̃ⲟⲩⲣⲟ *ⲛ̃ⲁ̃ⲛⲟⲙⲟⲥ ⲉⲧϩⲱⲟⲩ
ⲁⲥⲉⲣⲟⲩⲱ̃ ⲛ̃ϫⲉ ϯⲟⲩⲣⲱ ⲡⲉϫⲁⲥ ϫⲉ ϧⲉⲛ ⲟⲩⲙⲉⲑⲙⲏⲓ
ⲕⲁⲗⲱⲥ ⲁⲕⲥⲁϫⲓ ⲁⲕⲑⲱⲧ ⲙ̃ⲡⲁϩⲏⲧ ⲉⲑⲃⲉ ⲡⲭ︦ⲥ︦ ϫⲉ ⲫϯ
ⲡⲉ ⲙ̃ⲡⲧⲏⲣϥ ϯⲛⲟⲩ ϫⲉ ϯϯϩⲟ ⲉ̃ⲣⲟⲕ ⲧⲱⲃϩ ⲉ̃ϩⲣⲏⲓ
ⲉ̃ϫⲱⲓ ϩⲓⲛⲁ ⲛ̃ⲧⲉⲥⲫⲱⲧ ⲉ̃ⲃⲟⲗϩⲁⲣⲟⲓ ⲛ̃ϫⲉ ⲡⲗⲁⲛⲏ ⲛⲓⲃⲉⲛ
ⲛ̃ⲧⲉ ⲛⲓⲇⲉⲙⲱⲛ ⲛⲉⲙ ⲛⲓⲓ̃ⲇⲱⲗⲟⲛ ⲉⲩⲥⲟⲡ ⲁϥⲉⲣⲟⲩⲱ̃
ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲡⲉϫⲁϥ ⲛⲁⲥ ϫⲉ ⲁ̃ⲣⲉϣⲁⲛⲛⲁϩϯ
ⲉ̃ⲫⲏ ⲉ̃ⲧⲁⲩⲉⲣⲥⲧⲁⲩⲣⲱⲛⲓⲛ *ⲙ̃ⲙⲟϥ ⲓⲏ︦ⲥ︦ ⲡⲭ︦ⲥ︦ ⲙ̃ⲙⲟⲛ ϩⲗⲓ
ⲛ̃ⲁϭⲛⲓ ⲛ̃ⲧⲉ ⲛⲓⲇⲉⲙⲱⲛ ⲛⲁϣϧⲱⲛⲧ ⲉ̃ⲣⲟ ⲁⲛ ⲉ̃ⲡⲧⲏⲣϥ
ⲡⲉϫⲁⲥ ⲛⲁϥ ϫⲉ ϯⲛⲁϩϯ ⲡⲁϭ︦ⲥ︦ ⲅⲉⲱⲣⲅⲓⲟⲥ ⲁⲗⲗⲁ ϯⲉⲣ-
ϩⲟϯ ϧⲁⲧϩⲏ ⲙ̃ⲡⲟⲩⲣⲟ ϫⲉ ϥϩⲱⲟⲩ ⲉ̃ⲙⲁϣⲱ ⲟⲩⲁⲙ-
ⲥⲁⲣⲝ ⲡⲉ ⲙ̃ⲫⲣⲏϯ ⲛ̃ⲛⲓⲑⲏⲣⲓⲟⲛ ⲁ̃ⲣⲉϩ ⲇⲉ ⲉ̃ⲡⲁⲓⲙⲩⲥⲧⲏ-
ⲣⲓⲟⲛ ⲙ̃ⲡⲉⲣⲧⲁⲙⲉ ϩⲗⲓ ϣⲁϯⲉⲣⲫⲟⲣⲓⲛ ⲙ̃ⲡⲓⲭⲗⲟⲙ ⲛ̃ⲧⲉ
ϯⲙⲉⲧⲙⲁⲣⲧⲩⲣⲟⲥ ϧⲉⲛ ⲑⲙⲉⲧⲟⲩⲣⲟ ⲙ̃ⲡⲭ︦ⲥ︦ ⲭⲁⲧ ⲛ̃ⲧⲁ-
*ⲙⲧⲟⲛ ⲙ̃ⲙⲟⲓ ϣⲁ ϣⲱⲣⲡ
Ⲉⲧⲁ ⲧⲟⲟⲩⲓ̃ ⲇⲉ ϣⲱⲡⲓ ⲁϥⲉⲣⲕⲉⲗⲉⲩⲓⲛ ⲛ̃ϫⲉ ⲡⲟⲩⲣⲟ
ⲉⲑⲣⲉ ⲡⲓⲕⲓⲣⲓⲝ ⲱϣ ⲉ̃ⲃⲟⲗ ϧⲉⲛ ϯⲡⲟⲗⲓⲥ ⲧⲏⲣⲥ ⲉϥϫⲱ
ⲙ̃ⲙⲟⲥ ϫⲉ ⲑⲱⲟⲩϯ ⲧⲏⲣⲟⲩ ⲛ̃ⲧⲉⲧⲉⲛⲛⲁⲩ ⲉ̃ⲡⲁⲓⲛⲓϣϯ ⲛ̃ⲧⲉ


### 0033

ⲛⲓⲅⲁⲗⲓⲗⲉⲟⲥ ⲉϥⲛⲁⲟⲩⲱϣⲧ ⲙ̃ⲡⲓⲁ̃ⲡⲟⲗⲗⲱⲛ ⲁϥⲉⲣⲕⲉ-
ⲗⲉⲩⲓⲛ ⲛ̃ϫⲉ ⲡⲟⲩⲣⲟ ⲉⲑⲣⲟⲩⲱ̃ⲗⲓ ⲙ̃ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ϧⲉⲛ
ⲟⲩϯⲙⲏ ⲉ̃ⲡⲓⲉⲣⲫⲉⲓ ϫⲉ ⲉϥⲛⲁⲉⲣϣⲟⲩϣⲱⲟⲩϣⲓ *ⲡⲉϫⲁϥ
ⲙ̃ⲡⲓⲁ̃ⲡⲟⲗⲗⲱⲛ ⲁϥⲉⲣⲟⲩⲱ̃ ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲡⲉ-
ϫⲁϥ ⲛ̃ⲛⲓϩⲩⲡⲉⲣⲉⲧⲏⲥ ⲉ̃ⲧⲁⲩⲓ ⲛ̃ⲥⲱϥ ϫⲉ ⲙⲁϣⲉ ⲛⲱⲧⲉⲛ
ⲛ̃ⲑⲱⲧⲉⲛ ϧⲁⲣⲁⲧϥ ⲙ̃ⲡⲟⲩⲣⲟ ⲁⲛⲟⲕ ϩⲱ ⲛⲉⲙ ⲛⲓⲟⲩⲏⲃ
ⲛⲉⲙ ⲛⲓⲥⲁⲧⲏⲅⲟⲩⲥ ⲛ̃ⲧⲉ ⲡⲓⲉⲣⲫⲉⲓ ⲧⲉⲛⲛⲁϣⲉ ⲛⲁⲛ ⲉ̃ⲣⲁⲧϥ
ⲙ̃ⲡⲓⲁ̃ⲡⲟⲗⲱⲛ ⲧⲉⲛⲟⲩⲱϣⲧ ⲙ̃ⲙⲟϥ ⲡⲓⲕⲓⲣⲓⲝ ⲇⲉ ⲛⲁϥ-
ⲙⲏⲛ ⲉ̃ⲃⲟⲗ ϧⲉⲛ ⲟⲩⲙⲉⲧϩⲟⲩⲟ̃ ⲉ̃ⲁⲩⲑⲱⲟⲩϯ ⲛ̃ϫⲉ ⲛⲁϯ-
ⲡⲟⲗⲓⲥ ⲧⲏⲣⲟⲩ ⲛⲓⲕⲟⲩϫⲓ ⲛⲉⲙ ⲛⲓⲛⲓϣϯ ⲉ̃ⲛⲁⲩ ⲉ̃ϯⲑⲉⲱ-
ⲣⲓⲁ̃
* Ⲉⲧⲁⲥⲥⲱⲧⲉⲙ ⲟⲩⲛ ⲛ̃ϫⲉ ϯⲥϩⲓⲙⲓ ⲛ̃ⲭⲏⲣⲁ ⲛ̃ϩⲏⲕⲓ ⲑⲏ
ⲉ̃ⲧⲁ ⲡⲓⲁ̃ⲅⲓⲟⲥ ⲧⲁⲗϭⲟ ⲙ̃ⲡⲉⲥϣⲏⲣⲓ ⲁϥⲛⲁⲩ ⲙ̃ⲃⲟⲗ ⲥⲁ-
ⲧⲟⲧⲥ ⲁⲥⲭⲱ ⲛ̃ⲧⲉⲥⲁ̃ⲫⲏ ⲉ̃ⲃⲟⲗ ⲁⲥⲫⲱϧ ⲛ̃ⲛⲉⲥϩⲃⲱⲥ
ⲟⲩⲟϩ ⲁⲥϯ ⲙ̃ⲡⲉⲥⲟⲩⲟⲓ ⲉ̃ⲡⲓⲙⲱⲓⲧ ⲉ̃ⲛⲁⲣⲉ ⲡⲓⲁ̃ⲅⲓⲟⲥ ⲭⲏ
ⲙ̃ⲙⲟϥ ⲡⲉϫⲁⲥ ⲛⲁϥ ϫⲉ ⲫⲏ ⲉⲧⲧⲟⲩⲛⲟⲥ ⲛⲓⲣⲉϥⲙⲱⲟⲩⲧ
ⲉⲧⲉⲣⲟⲩⲱⲓⲛⲓ ⲛ̃ⲛⲓⲃⲉⲗⲗⲉⲩ ⲙ̃ⲙⲓⲥⲓ ⲛ̃ⲟⲩⲛⲁⲩ ⲙ̃ⲃⲟⲗ
ⲛⲏ ⲉⲧϣⲟⲩⲱ̃ⲟⲩ ⲉ̃ⲧⲁⲩⲗⲟϥⲗⲉϥ ⲉ̃ⲃⲟⲗ ⲁⲕⲑⲣⲟⲩϣⲱⲡⲓ
*ⲛ̃ϩⲁⲛϣϣⲏⲛ ⲙ̃ⲙⲁⲥⲟⲩⲧⲁϩ ⲟⲩⲟϩ ⲛ̃ⲧⲟⲩϣⲱⲡⲓ ⲉⲩ-
ⲫⲟⲣⲓ ⲉ̃ⲃⲟⲗ ⲛ̃ⲕⲁⲗⲱⲥ ⲫⲏ ⲉ̃ⲧⲁϥⲑⲣⲉ ⲡⲓⲥⲧⲩⲗⲗⲟⲥ ⲛ̃ⲧⲉ
ⲡⲁⲏⲓ ϭⲉⲡ ⲛⲟⲩⲛⲓ ⲁϥϣⲱⲡⲓ ⲛ̃ⲟⲩϣϣⲏⲛ ⲉϥϭⲟⲥⲓ ⲟⲩⲟϩ
ⲁϥⲙⲟϩ ⲛ̃ⲧⲁⲧⲣⲁⲡⲉⲍⲁ ⲛ̃ⲱⲓⲕ ⲛⲉⲙ ⲁ̃ⲅⲁⲑⲟⲛ ⲛⲓⲃⲉⲛ ⲫⲏ
ⲉ̃ⲧⲁϥⲟⲩⲱⲛϩ ⲉ̃ⲃⲟⲗ ⲛ̃ϩⲁⲛⲙⲏϣ ⲙ̃ⲙⲏⲓⲛⲓ ⲉⲩϣⲓⲡⲓ ⲙ̃ⲡⲓ-
ⲇⲓⲁ̃ⲃⲟⲗⲟⲥ ϯⲛⲟⲩ ⲇⲉ ⲭⲛⲁϣⲉ ⲛⲁⲕ ⲉ̃ⲣⲁⲧϥ ⲙ̃ⲡⲓⲁ̃ⲡⲟⲗ-


### 0034

ⲗⲱⲛ ⲛ̃ⲧⲉⲕⲟⲩⲱϣⲧ ⲙ̃ⲙⲟϥ ⲛ̃ⲧⲉⲕϯϣⲓⲡⲓ ⲙ̃ⲡⲅⲉⲛⲟⲥ *ⲧⲏⲣϥ
ⲛ̃ⲧⲉ ⲛⲓⲭⲣⲏⲥⲧⲓⲁ̃ⲛⲟⲥ ⲉ̃ⲧⲁϥⲥⲱⲧⲉⲙ ⲇⲉ ⲉ̃ⲛⲁⲓ ⲛ̃ϫⲉ ⲡⲓⲁ̃-
ⲅⲓⲟⲥ ⲅⲉⲱⲣⲅⲓⲟⲥ ⲁϥⲛⲉⲧϥⲣⲱϥ ⲛ̃ⲥⲱⲃⲓ ⲉ̃ϧⲟⲩⲛ ⲉ̃ϫⲱⲥ ⲡⲉ-
ϫⲁϥ ⲛⲁⲥ ϫⲉ ⲭⲱ ⲙ̃ⲡⲉϣⲏⲣⲓ ⲉ̃ⲡⲉⲥⲏⲧ ϯⲛⲟⲩ ⲉ̃ⲃⲟⲗϩⲓ
ⲛⲉϫⲓϫ ⲥⲁⲧⲟⲧⲥ ⲁⲥⲭⲱ ⲙ̃ⲙⲟϥ ⲉ̃ⲡⲉⲥⲏⲧ ⲡⲉϫⲉ ⲡⲓⲁ̃ⲅⲓⲟⲥ
ⲅⲉⲱⲣⲅⲓⲟⲥ ⲙ̃ⲡⲓⲕⲟⲩϫⲓ ⲛ̃ⲁ̃ⲗⲟⲩ ϫⲉ ϯⲟⲩⲱϣ ϧⲉⲛ ⲫⲣⲁⲛ
ⲙ̃ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲛ̃ⲧⲉⲕⲓ̃ ⲛⲧⲉⲕ ⲛ̃ⲧⲉⲕⲉⲣⲇⲓⲁ̃ⲕⲱⲛⲓⲛ
ⲛⲏⲓ ⲙ̃ⲡⲁⲓϩⲱⲃ *ⲥⲁⲧⲟⲧϥ ⲡⲓⲕⲟⲩϫⲓ ⲛ̃ⲁ̃ⲗⲟⲩ ⲁϥⲥⲱⲧⲉⲙ
ϧⲉⲛ ⲛⲉϥⲙⲁϣϫ ⲁϥⲓ̃ ⲁϥϭⲓⲫⲉⲓ ϧⲁⲣⲁⲧϥ ⲙ̃ⲡⲓⲁ̃ⲅⲓⲟⲥ
ⲅⲉⲱⲣⲅⲓⲟⲥ ⲡⲉϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲛⲁϥ ϫⲉ ⲁ̃ⲙⲟⲩ ⲙⲁ-
ϣⲉ ⲛⲁⲕ ⲉ̃ϧⲟⲩⲛ ⲉ̃ⲡⲓⲉⲣⲫⲉⲓ ⲛ̃ⲧⲉ ⲡⲓⲁ̃ⲡⲟⲗⲗⲱⲛ ⲁ̃ϫⲟⲥ
ⲙ̃ⲡⲓⲑⲟⲩⲱⲧ ⲛ̃ⲧⲁϥ ϫⲉ ⲅⲉⲱⲣⲅⲓⲟⲥ ⲡⲓⲃⲱⲕ ⲛ̃ⲧⲉ ⲡⲭ︦ⲥ︦ ⲙⲟⲩϯ
ⲉ̃ⲣⲟⲕ
Ⲁϥϣⲉ ⲛⲁϥ ϧⲉⲛ ⲟⲩⲓⲱⲥ ⲛ̃ϫⲉ ⲡⲓⲕⲟⲩϫⲓ ⲛ̃ⲁ̃ⲗⲟⲩ
ⲉ̃ϧⲟⲩⲛ ⲉ̃ⲡⲓⲉⲣⲫⲉⲓ ⲡⲉϫⲁϥ ⲛⲁϥ ϫⲉ ⲁⲓϫⲉⲣⲉ ⲉ̃ⲣⲟⲕ *ⲛⲑⲟⲕ
ⲡⲓⲃⲉⲗⲗⲉ ⲛ̃ⲕⲟⲩⲛ̃ ⲛ̃ⲁⲧⲉⲙⲓ ⲁⲙⲟⲩ ⲉ̃ⲃⲟⲗ ⲛ̃ⲭⲱⲗⲉⲙ ϫⲉ
ϥⲙⲟⲩϯ ⲉ̃ⲣⲟⲕ ⲛ̃ϫⲉ ⲡⲓⲃⲱⲕ ⲛ̃ⲧⲉ ⲡⲭ︦ⲥ︦ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲁ̃
ⲡⲓⲡ︦ⲛ︦ⲁ︦ ⲉⲧϩⲱⲟⲩ ⲉⲧϫⲁⲗⲏⲟⲩⲧ ⲉ̃ⲡⲓⲓⲇⲱⲗⲟⲛ ⲁϥⲱϣ
ⲉ̃ⲃⲟⲗ ⲛ̃ϧⲏⲧϥ ⲉϥϫⲱ ⲙ̃ⲙⲟⲥ ϫⲉ ⲡⲓⲛⲁⲍⲱⲣⲉⲟⲥ ⲁⲕⲥⲉⲕ
ⲟⲩⲟⲛ ⲛⲓⲃⲉⲛ ⲉ̃ⲣⲟⲕ ⲡⲁⲓⲕⲟⲩϫⲓ ⲛ̃ⲁ̃ⲗⲟⲩ ϩⲱϥ ⲡⲉⲧⲁⲕ-
ⲟⲩⲱⲣⲡ ⲙ̃ⲙⲟϥ ϩⲁⲣⲟⲓ ⲉ̃ϯϣⲱϣ ⲛⲏⲓ ⲥⲁⲧⲟⲧϥ ⲁ̃
ⲡⲓⲑⲟⲩⲱⲧ ⲛ̃ⲧⲉ *ⲡⲓⲁ̃ⲡⲟⲗⲗⲱⲛ ϥⲟϫϥ ⲉ̃ⲃⲟⲗϩⲓϫⲉⲛ ⲧⲉϥ-
ⲃⲁⲥⲓⲥ ⲁϥⲓ̃ ϣⲁ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲁϥⲉⲣⲟⲩⲱ̃ ⲛ̃ϫⲉ ⲡⲓⲁ̃-
ⲅⲓⲟⲥ ⲅⲉⲱⲣⲅⲓⲟⲥ ⲡⲉϫⲁϥ ⲛⲁϥ ϫⲉ ⲁ̃ϩⲁ ⲛ̃ⲑⲟⲕ ⲡⲉ ⲫϯ
ⲛ̃ⲧⲉ ⲛⲓⲉⲑⲛⲟⲥ ⲡⲉϫⲁϥ ⲛ̃ϫⲉ ⲡⲓⲇⲉⲙⲱⲛ ⲉⲧϫⲁⲗⲏⲟⲩⲧ
ⲉ̃ⲣⲟϥ ϫⲉ ⲱ̃ⲟⲩⲛ̃ϩⲏⲧ ⲛⲉⲙⲏⲓ ⲁ̃ⲛⲟⲕ ⲉⲑⲛⲁⲧⲁⲙⲟⲕ ⲉ̃ϩⲱⲃ


### 0035

ⲛⲓⲃⲉⲛ ⲙ̃ⲡⲁⲧⲉⲕⲧⲁⲙⲟⲓ ⲡⲉϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲛⲁϥ
ϫⲉ ⲥⲁϫⲓ ⲁϥⲉⲣϩⲏⲧⲥ ⲛ̃ⲥⲁϫⲓ ⲟⲩⲟϩ ⲉ̃ⲫⲓⲣⲓ ⲉ̃ϩⲱⲃ ⲛⲓⲃⲉⲛ
ⲙ̃ⲡⲉϥⲙ̃ⲑⲟ *ⲉ̃ⲃⲟⲗ ⲉϥϫⲱ ⲙ̃ⲙⲟⲥ ϫⲉ ⲡⲁϭ︦ⲥ︦ ⲡⲓⲁ̃ⲅⲓⲟⲥ ⲛ̃ⲧⲉ
ⲫϯ ⲉⲕⲟⲓ ⲛ̃ⲁⲧⲉⲙⲓ ⲁⲛ ϫⲉ ⲓⲥϫⲉⲛ ϩⲏ ⲁ̃ ⲫϯ ⲑⲁⲙⲓⲕ̃
ⲛ̃ⲟⲩⲡⲁⲣⲁⲇⲓⲥⲟⲥ ϧⲉⲛ ⲉ̃ⲧⲉⲙ ⲉ̃ⲛⲁϥⲭⲏ ⲥⲁⲡⲥⲁ ⲛ̃ⲛⲓⲙⲁⲛ-
ϣⲁⲓ ⲁϥⲭⲱ ⲛ̃ϧⲏⲧϥ ⲙ̃ⲡⲓⲣⲱⲙⲓ ⲫⲁⲓ ⲉ̃ⲧⲁϥⲑⲁⲙⲓⲟϥ ⲛ̃ϫⲉ
ⲫϯ ⲉϥⲟ̃ⲛⲓ ⲙ̃ⲙⲟϥ ⲁϥϫⲟⲥ ⲛ̃ϫⲉ ⲡϭ︦ⲥ︦ ϫⲉ ⲙⲁⲣⲟⲩⲓ̃ ⲛ̃ϫⲉ
ⲛⲓⲁⲅⲅⲉⲗⲟⲥ ⲛ̃ⲧⲟⲩⲟⲩⲱϣⲧ ⲙ̃ⲙⲟϥ ⲥⲁⲧⲟⲧϥ ⲁ̃ϥⲓ̃ ⲛ̃ϫⲉ
ⲙⲓⲭⲁⲏⲗ ⲛⲉⲙ ⲧⲉϥⲥⲧⲣⲁⲧⲓⲁ̃ ⲧⲏⲣⲥ ⲛ̃ⲁⲅⲅⲉⲗⲟⲥ *ⲁⲩⲓ
ⲁⲩⲟⲩⲱϣⲧ ⲙ̃ⲙⲟϥ ⲁ̃ⲛⲟⲕ ⲇⲉ ⲙ̃ⲡⲓⲟⲩⲱϣⲧ ⲙ̃ⲡⲓⲣⲱⲙⲓ
ⲫⲏ ⲉ̃ⲧⲁϥⲑⲁⲙⲓⲟϥ ⲛ̃ϫⲉ ⲫϯ ⲁⲗⲗⲁ ⲁⲓⲉⲣⲁⲛⲧⲓⲗⲉⲅⲓⲛ
ⲙ̃ⲡⲓⲥⲁϫⲓ ⲛ̃ⲧⲉ ⲫϯ ⲉⲓϫⲱ ⲙ̃ⲙⲟⲥ ϫⲉ ⲱ ⲡⲓⲣⲉϥϯϩⲁⲡ
ⲙ̃ⲙⲏⲓ ⲁ̃ⲛⲟⲕ ⲟⲩϣⲟⲣⲡ ⲉ̃ϩⲟⲧⲉ ⲫⲁⲓ ⲡⲱⲥ ⲛ̃ⲧⲁⲟⲩⲱϣⲧ
ⲙ̃ⲡⲓⲕⲟⲩϫⲓ ⲉ̃ⲣⲟⲓ ⲥⲉⲉⲣϧⲏⲓⲃⲓ ⲉ̃ⲣⲟⲓ ⲛ̃ϫⲉ ⲛⲓⲭⲉⲣⲟⲩⲃⲓⲙ ⲉⲑⲙⲉϩ
ⲙ̃ⲃⲁⲗ ⲧⲟⲧⲉ ⲁϥϫⲱⲛⲧ ⲉ̃ⲣⲟⲓ ⲛ̃ϫⲉ ⲫϯ ⲁϥϩⲓⲧ ⲉ̃ⲃⲟⲗϧⲉⲛ
ⲡⲁⲱ̃ⲟⲩ ⲉ̃ⲛⲁⲓⲭⲏ ⲛ̃ϧⲏⲧϥ *ⲁϥⲃⲉⲣⲃⲱⲣⲧ ⲉ̃ⲃⲟⲗϧⲉⲛ ⲧⲫⲉ
ⲙ̃ⲫⲣⲏϯ ⲛ̃ⲟⲩⲁϧⲱⲙ ϩⲓϫⲉⲛ ϯⲡⲉⲧⲣⲁ ⲟⲩⲟϩ ⲁⲓϣⲱⲡⲓ
ϧⲉⲛ ϩⲁⲛⲥⲛⲁⲩϩ ϯⲛⲟⲩ ϫⲉ ϯϣⲟⲡ ϧⲉⲛ ⲡⲁⲓⲓ̃ⲇⲱⲗⲟⲛ
ⲉⲓⲥⲱⲣⲉⲙ ⲛ̃ⲛⲓϣⲏⲣⲓ ⲛ̃ⲧⲉ ⲛⲓⲣⲱⲙⲓ ϯϩⲁⲗⲁⲓ ⲉⲓⲁ̃ϣⲓ ϣⲁ
ⲡⲓⲥⲧⲉⲣⲉⲱ̃ⲙⲁ ⲛ̃ⲧⲉ ⲧⲫⲉ ⲉⲓⲥⲱⲧⲉⲙ ⲉ̃ⲛⲓⲁⲅⲅⲉⲗⲟⲥ ⲉⲩϩⲱⲥ
ⲉ̃ⲡϭ︦ⲥ︦ ⲁⲓϣⲁⲛⲥⲱⲧⲉⲙ ⲉ̃ⲧⲁⲁ̃ⲡⲟⲫⲁⲥⲓⲥ ⲛ̃ⲟⲩⲁⲓ ϫⲉ ϥⲛⲁⲙⲟⲩ
ⲛ̃ⲧⲉϥⲓ̃ ⲉ̃ⲃⲟⲗϧⲉⲛ ⲡⲓⲕⲟⲥⲙⲟⲥ ϣⲁⲓϣⲉ ⲛⲏⲓ *ϣⲁⲣⲟϥ ⲛ̃ⲧⲁ-
ϯϧⲓⲥⲓ ⲛⲁϥ ϣⲁⲧⲉϥϫⲉⲟⲩⲁ̃ ⲉ̃ⲫϯ
Ⲁϥⲉⲣⲟⲩⲱ̃ ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲡⲉϫⲁϥ ⲛⲁϥ ⲉ
ⲙ̃ⲡⲉⲕϫⲱ ⲛ̃ϯⲙⲉⲑⲙⲏⲓ ⲱ̃ ⲫⲏ ⲉⲧⲥⲱⲛⲧ ⲙ̃ⲙⲉⲑⲛⲟⲩϫ
ⲁⲗⲗⲁ ⲉ̃ⲧⲁⲩϩⲓⲧⲕ ⲉ̃ⲃⲟⲗϧⲉⲛ ⲧⲫⲉ ⲉⲑⲃⲉ ⲧⲉⲕⲙⲉⲧϭⲁⲥⲓ-


### 0036

ϩⲏⲧ ϧⲉⲛ ⲡϫⲓⲛⲑⲣⲉϥⲥⲟⲃϯ ⲛⲁⲕ ⲛ̃ⲟⲩⲑⲣⲟⲛⲟⲥ ϫⲉ ⲛ̃ⲧⲉⲕ-
ϩⲉⲙⲥⲓ ϩⲓϫⲱϥ ⲛ̃ⲧⲉⲕⲉⲣϩⲓⲥⲟⲥ ⲛⲉⲙ ⲫⲏ ⲉⲧϭⲟⲥⲓ ⲡⲉϫⲁⲕ
ϧⲉⲛ ⲟⲩⲉ̃ⲝⲁⲡⲓⲛⲁ ⲁϥⲃⲉⲣⲃⲱⲣⲕ *ⲉ̃ⲃⲟⲗϧⲉⲛ ⲧⲫⲉ ⲉ̃ϧⲣⲏⲓ
ⲉ̃ⲡⲉⲧϣⲏⲕ ⲛ̃ⲧⲉ ⲫⲓⲟⲙ ⲛⲉⲙ ⲧⲉⲕⲥⲧⲣⲁⲧⲓⲁ̃ ⲧⲏⲣⲥ ⲛⲁⲓ
ⲉ̃ⲧⲁϥⲥⲟⲑⲙⲟⲩ ϩⲁⲣⲟϥ ⲁϥⲑⲱⲙ ⲙ̃ⲡⲉϥϫⲉⲙ ⲥⲁϫⲓ ϫⲉ
ⲉ̃ϫⲱ ⲉⲡⲧⲏⲣϥ ϧⲉⲛ ϯⲟⲩⲛⲟⲩ ⲁ̃ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ϯ
ⲛ̃ⲟⲩϣⲉⲛⲫⲁⲧ ϧⲉⲛ ⲡⲓⲕⲁϩⲓ ⲁ̃ ⲡⲓⲕⲁϩⲓ ⲟⲩⲱⲛ ⲛ̃ⲣⲱϥ
ⲟⲩⲟϩ ⲡⲉϫⲁϥ ⲙ̃ⲡⲓⲑⲟⲩⲱⲧ ϫⲉ ⲙⲁϣⲉ ⲛⲁⲕ ϫⲉ ϯⲛⲟⲩ
ⲉ̃ⲡⲉⲥⲏⲧ ⲉ̃ⲫⲛⲟⲩⲛ ⲱ ⲡⲓⲡ︦ⲛ︦ⲁ︦ ⲛ̃ⲁ̃ⲕⲁⲑⲁⲣⲧⲟⲛ ϣⲁⲧⲉⲕϯⲗⲟ-
ⲅⲟⲥ ϧⲁ ⲛⲓⲯⲩ*ⲏ ⲧⲏⲣⲟⲩ ⲉ̃ⲧⲁⲕⲧⲁⲕⲱⲟⲩ ⲥⲁⲧⲟⲧϥ
ϧⲉⲛ ϯⲟⲩⲛⲟⲩ ⲁϥϣⲉ ⲛⲁϥ ⲉ̃ⲡⲉⲥⲏⲧ ⲉ̃ⲫⲛⲟⲩ² ⲛⲉⲙ ⲡⲓⲕⲉ-
ⲑⲟⲩⲱⲧ ⲉ̃ⲧⲉⲣⲉ ⲡⲓⲡ︦ⲛ︦ⲁ︦ ⲛⲁⲕⲁⲑⲁⲣⲧⲟⲛ ϫⲁⲗⲏⲟⲩⲧ ⲉ̃ⲣⲟϥ
ⲁ̃ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ϯ ⲛ̃ⲟⲩϣⲉⲛⲫⲁⲧ ϧⲉⲛ ⲡⲓⲕⲁϩⲓ ⲁϥ-
ϣⲱϣ ⲉ̃ⲃⲟⲗ ⲙ̃ⲡⲉϥⲣⲏϯ ⲛ̃ⲕⲉⲥⲟⲡ ⲙⲉⲛⲉⲛⲥⲁ ⲛⲁⲓ ⲁϥ-
ϯⲟⲩⲱ ⲙ̃ⲡⲉϥϧⲱⲕ ⲉ̃ⲃⲟⲗ ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲁϥϯ
ⲙ̃ⲡⲉϥⲟⲩⲟⲓ ⲉ̃ⲡⲓⲑⲟⲩⲱⲧ ⲛ̃ⲧⲉ *ⲡⲓⲉ̃ⲣⲁⲕⲗⲏⲥ ⲁϥⲥⲱⲕ ⲙ̃ⲙⲟϥ
ⲉ̃ⲡⲕⲁϩⲓ ⲁϥϧⲉⲙϧⲟⲙϥ ⲡⲉϫⲁϥ ⲙ̃ⲡⲥⲱϫⲡ ⲛ̃ⲛⲓ̃ⲇⲱⲗⲟⲛ
ϫⲉ ⲙⲁϣⲉ ⲛⲱⲧⲉⲛ ⲉ̃ⲫⲛⲟⲩ ⲱ̃ ⲛⲓⲛⲟⲩϯ ⲛ̃ⲧⲉ ⲛⲓⲉⲑⲛⲟⲥ
ϫⲉ ⲁⲓⲓ̃ ϣⲁⲣⲱⲧⲉⲛ ϧⲉⲛ ⲟⲩϫⲱⲛⲧ ⲛⲉⲙ ⲟⲩⲙ̃ⲃⲟⲛ
Ⲉⲧⲁⲩⲛⲁⲩ ⲇⲉ ⲛ̃ϫⲉ ⲛⲓⲟⲩⲏⲃ ⲛⲉⲙ ⲛⲓⲥⲁⲧⲏⲅⲟⲩⲥ ⲛ̃ⲧⲉ
ⲡⲓⲉⲣⲫⲉⲓ ⲛⲉⲙ ⲛⲓϩⲩⲡⲉⲣⲉⲧⲏⲥ ⲉⲧϣⲉⲙϣⲓ ⲛ̃ⲛⲓⲓ̃ⲇⲱⲗⲟⲛ
ⲉ̃ⲡⲓⲧⲁⲕⲟ ⲉ̃ⲧⲁϥⲧⲁϩⲉ ⲛⲟⲩⲛⲟⲩϯ ⲁⲩⲁ̃ⲙⲟⲛⲓ *ⲙ̃ⲡⲓⲁⲅⲓⲟⲥ
ⲁⲩⲥⲟⲛϩϥ ⲛ̃ⲛⲉϥϫⲓϫ ϩⲓⲫⲁϩⲟⲩ ⲙ̃ⲙⲟϥ ⲟⲩⲟϩ ⲁⲩⲱ̃ⲗⲓ
ⲙ̃ⲙⲟϥ ϣⲁ ⲡⲟⲩⲣⲟ ⲁⲩⲧⲁⲙⲟϥ ⲉ̃ϩⲱⲃ ⲛⲓⲃⲉⲛ ⲉ̃ⲧⲁⲩ-
ϣⲱⲡⲓ ⲛ̃ⲛⲓⲛⲟⲩϯ ⲡⲓⲁ̃ⲡⲟⲗⲗⲱⲛ ϫⲉ ⲁⲩϩⲓⲟⲩⲓ̃ ⲙ̃ⲙⲟϥ


### 0037

ⲉ̃ⲡⲉⲥⲏⲧ ⲉ̃ⲫⲛⲟⲩⲛ ⲁⲥϣⲱⲡⲓ ⲇⲉ ⲉ̃ⲧⲁϥⲥⲱⲧⲉⲙ ⲉ̃ⲛⲁⲓ
ⲛ̃ϫⲉ ⲡⲟⲩⲣⲟ ⲇⲁⲇⲓⲁ̃ⲛⲟⲥ ⲁϥⲙⲟϩ ⲛ̃ⲗⲓⲃⲓ ⲡⲉϫⲁϥ
ⲙ̃ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ϫⲉ ⲱ̃ ⲫⲏ ⲉ̃ⲧⲉⲙⲡϣⲁ ⲙ̃ⲙⲟⲩⲛⲕϥ
ⲙⲏ ⲙ̃ⲡⲉⲕϫⲟⲥ ⲛⲏⲓ ϫⲉ ϯⲛⲁⲉⲣ*ϣⲟⲩϣⲱⲟⲩϣⲓ ⲛ̃ⲛⲓⲛⲟⲩϯ
ⲉⲧⲧⲁⲓⲏⲟⲩⲧ ⲉ̃ⲫⲙⲁ ⲉ̃ⲧⲉⲕⲟⲩⲱϣⲧ ⲛ̃ⲛⲓⲛⲟⲩϯ ⲟⲩⲟϩ
ⲛ̃ⲧⲉⲕⲧⲁⲗⲉ ⲗⲓⲃⲁⲛⲟⲥ ⲛⲱⲟⲩ ⲉ̃ϩⲣⲏⲓ ⲁⲕϩⲓⲧⲟⲧⲕ ⲉ̃ϩⲁⲛ-
ϩⲃⲏⲟⲩⲓ̃ ⲙ̃ⲙⲁⲅⲓⲁ̃ ⲙ̃ⲡⲁⲓⲣⲏϯ ⲕⲥⲱⲟⲩⲛ ⲁⲛ ϫⲉ ⲉ̃ⲣⲉ
ⲡⲉⲕⲡ︦ⲛ︦ⲁ︦ ⲭⲏ ϧⲉⲛ ⲛⲁϫⲓϫ ⲁϥⲉⲣⲟⲩⲱ ⲛ̃ϫⲉ ⲡⲓⲁ̃ⲅⲓⲟⲥ
ⲅⲉⲱⲣⲅⲓⲟⲥ ⲡⲉϫⲁϥ ⲛⲁϥ ϫⲉ ⲙⲁϣⲉ ⲛⲁⲕ ⲁ̃ⲛⲓⲟⲩ ⲛⲏⲓ
ⲙ̃ⲡⲓⲁ̃ⲡⲟⲗⲗⲱⲛ ⲛⲏⲓ ⲉⲙⲛⲁⲓ ⲁ̃ⲛⲟⲕ ⲡⲉⲑⲛⲁⲟⲩⲱϣⲧ ⲙ̃ⲙⲟϥ
ⲙ̃ⲡⲉⲕⲙ̃ⲑⲟ ⲉ̃ⲃⲟⲗ *ⲡⲉϫⲉ ⲇⲁⲇⲓⲁ̃ⲛⲟⲥ ⲛⲁϥ ϫⲉ ⲙ̃ⲡⲓⲣⲏϯ
ⲉ̃ⲧⲁⲩⲧⲁⲙⲟⲓ ⲉ̃ⲃⲟⲗϩⲓⲧⲉⲛ ⲛⲓⲟⲩⲏⲃ ϫⲉ ⲁϥϩⲱⲗ ⲉⲫⲛⲟⲩⲛ
ⲟⲩⲟϩ ϯⲛⲟⲩ ⲭⲟⲩⲱϣ ⲉ̃ⲑⲣⲓϩⲱⲗ ⲙ̃ⲙⲁⲩ ϩⲱ ⲉⲓⲱⲛϧ
ⲁϥⲉⲣⲟⲩⲱ̃ ⲛ̃ϫⲉ ⲡⲓⲁⲅⲓⲟⲥ ⲅⲉⲱⲣⲅⲓⲟⲥ ⲡⲉϫⲁϥ ⲙ̃ⲡⲟⲩⲣⲟ ϫⲉ
ⲓⲥϫⲉ ⲡⲓⲁ̃ⲡⲟⲗⲗⲱⲛ ⲡⲉⲕⲛⲓϣϯ ⲛ̃ⲛⲟⲩϯ ⲡⲉ ⲓⲉ ⲡⲱⲥ
ⲙ̃ⲡⲉϥϣϫⲉⲙϫⲟⲙ ⲛ̃ⲉⲣⲃⲟⲑⲓⲛ ⲙ̃ⲙⲟϥ ⲙ̃ⲙⲓⲛ ⲙ̃ⲙⲟϥ
ⲁⲗⲗⲁ ⲁϥϣⲱⲡⲓ ⲉ̃ⲡⲧⲁⲕⲟ ⲛ̃ϣⲟⲣⲡ ⲉ̃ⲛⲉⲕⲛⲟⲩϯ ⲧⲏⲣⲟⲩ
*ⲛⲁⲓ ⲉⲧⲓ̃ⲣⲓ ⲛⲟ︦ ϧⲉⲛ ⲧⲟⲩⲏ̃ⲡⲓ ⲫⲁⲓ ⲛ̃ⲑⲟⲕ ⲉ̃ⲧⲉⲕⲉⲣϩⲉⲗⲡⲓⲥ-
ⲉ̃ⲣⲟϥ ϫⲉ ϥⲛⲁⲛⲁϩⲙⲉⲕ ϧⲉⲛ ⲡⲓⲉ̃ϩⲟⲟⲩ ⲉⲧϩⲱⲟⲩ ϩⲟⲧⲁⲛ
ⲁϥϣⲁⲛⲓ̃ ⲛ̃ϫⲉ ⲡϭ︦ⲥ︦ ⲡⲁⲛⲟⲩϯ ⲉ̃ϣⲓⲃϯ ⲛ̃ⲧⲫⲉ ⲛⲉⲙ ⲡⲕⲁϩⲓ
ⲟⲩ ⲡⲉ ⲉ̃ⲧⲉⲕⲛⲁⲁⲓϥ ⲛ̃ⲑⲟⲕ ⲛⲉⲙ ⲫⲏ ⲉ̃ⲧⲁⲕⲉⲣϩⲉⲗⲡⲓⲥ ⲉⲣⲟϥ.
Ⲧⲟⲧⲉ ⲁϥϣⲉ ⲛⲁϥ ⲛ̃ϫⲉ ⲡⲟⲩⲣⲟ ϧⲉⲛ ⲟⲩⲛⲓϣϯ ⲛ̃ⲙ̃ⲕⲁϩ
ⲛ̃ϩⲏⲧ ⲉⲑⲃⲉ ⲡⲧⲁⲕⲟ ⲙ̃ⲡⲉϥⲛⲟⲩϯ ⲡⲓⲁ̃ⲡⲟⲗⲗⲱⲛ *ⲉ̃ϧⲟⲩⲛ
ϣⲁ ϯⲟⲩⲣⲟ ⲁ̃ⲗⲉⲝⲁⲛⲇⲣⲁ ⲉϥϫⲱ ⲙ̃ⲙⲟⲥ ϫⲉ ⲁⲓϧⲓⲥⲓ ⲛⲉⲙ
ⲡⲁⲓⲅⲉⲛⲟⲥ ϫⲉϫⲉ ⲭⲣⲓⲥⲧⲓⲁ̃ⲛⲟⲥ ⲡⲁⲓⲅⲁⲗⲉⲟⲥ ⲅⲉⲱⲣⲅⲓⲟⲥ


### 0038

ⲁⲥⲉⲣⲟⲩⲱ̃ ⲛ̃ϫⲉ ϯⲟⲩⲣⲱ ⲁ̃ⲗⲉⲝⲁⲛⲇⲣⲁ ⲡⲉϫⲁⲥ ⲙⲡⲟⲩⲣⲟ
ϫⲉ ⲙ̃ⲡⲓϫⲟⲥ ⲛⲁⲕ ⲛ̃ⲟⲩⲙⲏϣ ⲛ̃ⲥⲟⲡ ϫⲉ ϩⲉⲛⲕ ⲉ̃ⲃⲟⲗϩⲁ
ⲡⲁⲓⲅⲉⲛⲟⲥ ⲛ̃ⲧⲉ ⲛⲓⲭⲣⲏⲥⲧⲓⲁ̃ⲛⲟⲥ ϫⲉ ⲡⲟⲩⲛⲟⲩϯ ⲛ̃ⲑⲟϥ
ⲡⲉ ⲫϯ ⲙ̃ⲙⲏⲓ ⲛ̃ⲑⲟϥ ⲟⲛ ⲡⲉⲑⲛⲁⲑⲉⲃⲓⲟⲕ ϧⲉⲛ ⲧⲉⲕⲙⲉⲧ*ϭⲁ-
ⲥⲓϩⲏⲧ ⲁϥⲉⲣⲟⲩⲱ̃ ⲛ̃ϫⲉ ⲡⲓⲟⲩⲣⲟ ⲡⲉϫⲁϥ ⲛ̃ϯⲟⲩⲣⲱ
ⲟⲩⲟⲩⲟⲓ ⲛⲏⲓ ⲁ̃ⲗⲉⲝⲁⲛⲇⲣⲁ ϯϯⲉⲣϩⲟϯ ⲛⲏⲓ ϫⲉ ⲁⲩⲫⲟϩ
ⲉ̃ⲣⲟ ϩⲱ ⲛϫⲉ ⲛⲓⲙⲁⲅⲓⲁ̃ ⲛ̃ⲧⲉ ⲛⲓⲭⲣⲏⲥⲧⲓⲁ̃ⲛⲟⲥ ⲁϥⲁ̃ⲙⲟⲛⲓ
ⲙ̃ⲡⲓϥⲟⲓ ⲛ̃ⲧⲉ ⲧⲉⲥⲁ̃ⲫⲉ ⲁϥⲱϣϯ ⲙ̃ⲙⲟⲥ ϣⲁⲧⲉϥⲉⲛⲥ ⲙ̃ⲡⲉⲙ-
ⲑⲟ ⲉ̃ⲃⲟⲗ ⲛ̃ⲛⲓⲟⲩⲣⲱⲟⲩ ⲉⲑⲛⲉⲙⲁϥ ⲉ̃ⲧⲉ ⲡⲓⲝ︦ⲑ︦ ⲛⲉ ⲟⲩⲟϩ
ⲁϥⲉⲣϩⲏⲧⲥ ⲛ̃ⲧⲁⲙⲱⲟⲩ ⲉ̃ϩⲱⲃ ⲛⲓⲃⲉⲛ ⲉ̃ⲧⲁⲩϣⲱⲡⲓ *ⲧⲟ-
ⲧⲉ ⲛⲓⲟⲩⲣⲱⲟⲩ ⲁⲩⲉⲣⲕⲉⲗⲉⲩⲓⲛ ⲉⲑⲣⲟⲩⲉⲛⲥ ⲉ̃ⲃⲟⲗ ⲛ̃ⲧⲟⲩ-
ⲁϣⲥ ⲉ̃ⲡⲓⲉⲣⲙⲉⲧⲁⲣⲓⲟⲛ ⲛ̃ⲧⲟⲩϩⲱⲕⲓ ⲙ̃ⲙⲟⲥ ⲛ̃ⲑⲟⲥ ⲇⲉ ⲙ̃ⲡⲉⲥ-
ϫⲱ ⲛ̃ϩⲗⲓ ⲛ̃ⲥⲁϫⲓ ⲁⲗⲗⲁ ⲛⲁⲥϣⲱⲡⲓ ⲉⲥⲥⲟⲙⲥ ⲉ̃ⲡϣⲱⲓ
ⲉ̃ⲧⲫⲉ ⲉ̃ⲧⲁⲥⲥⲟⲙⲥ ⲇⲉ ϧⲉⲛ ⲡϩⲟ ⲙ̃ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ
ⲡⲉϫⲁⲥ ⲛⲁϥ ϫⲉ ⲧⲱⲃϩ ⲉ̃ϫⲱⲓ ϫⲉ ϯϧⲟⲥⲓ ϧⲉⲛ ⲛⲁⲓⲃⲁⲥⲁ-
ⲛⲟⲥ ⲁϥⲉⲣⲟⲩⲱ̃ ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲡⲉϫⲁϥ ⲛⲁⲥ ϫⲉ
ⲁ̃ⲣⲓ*ϩⲩⲡⲟⲙⲟⲛⲓⲛ ⲛ̃ⲕⲉⲕⲟⲩϫⲓ ⲱ̃ ϯⲟⲩⲣⲱ ϩⲓⲛⲁ ⲛ̃ⲧⲉϭⲓ
ⲙ̃ⲡⲓⲭⲗⲟⲙ ⲛ̃ⲧⲟⲧϥ ⲙ̃ⲡϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲛ̃ⲑⲟⲥ ⲇⲉ ⲡⲉϫⲁⲥ ⲛⲁϥ
ϫⲉ ⲡⲁϭ︦ⲥ︦ ⲅⲉⲱⲣⲅⲓⲟⲥ ⲁⲓⲛⲁⲉⲣ ⲟⲩ ϫⲉ ⲙ̃ⲡⲓϭⲓ ⲙ̃ⲡⲓⲱⲙⲥ
ⲉ̃ⲑⲟⲩⲁⲃ ⲡⲉϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲛⲁⲥ ϫⲉ ⲙⲟϣⲓ ⲧⲉⲣⲁϭⲓ
ⲙ̃ⲡⲓⲱⲙⲥ ⲉ̃ⲃⲟⲗϩⲓⲧⲉⲛ ⲡⲓⲫⲱⲛ ⲉ̃ⲃⲟⲗ ⲛ̃ⲧⲉⲥⲛⲟϥ ⲉ̃ⲑⲟⲩⲁⲃ
ⲉⲩⲱ̃ⲗⲓ ⲙ̃ⲙⲟⲥ ⲟⲩⲛ ⲉ̃ⲧⲁⲕⲟⲥ ⲁⲥⲱϣ ⲉ̃ⲃⲟⲗ ⲉⲥϫⲱ ⲙ̃ⲙⲟⲥ
ϫⲉ ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ *ϩⲏⲡⲡⲉ ⲁⲓⲭⲱ ⲙ̃ⲫⲣⲟ ⲙ̃ⲡⲁⲡⲁⲗⲗⲁ-
ⲧⲓⲟⲛ ⲉϥⲟⲩⲏⲛ ⲙ̃ⲡⲓϣⲧⲁⲙ ⲙ̃ⲙⲟϥ ⲛ̃ⲑⲟⲕ ⲇⲉ ⲡϭ︦ⲥ︦-
ⲙ̃ⲡⲉⲣϣⲧⲁⲙ ⲉ̃ⲣⲟⲓ ⲙ̃ⲫⲣⲟ ⲙ̃ⲓⲡⲁⲣⲁⲇⲓⲥⲟⲥ ⲛ̃ⲧⲉ ⲡⲟⲩⲛⲟϥ
ⲉ̃ⲧⲁⲥⲟⲩⲱ̃ ⲇⲉ ⲉⲥϫⲱ ⲛ̃ⲛⲁⲓ ⲁⲥϫⲱⲕ ⲛ̃ⲧⲉⲥⲙⲁⲣⲧⲩⲣⲓⲁ


### 0039

ⲛ̃ϫⲉ ⲁ̃ⲗⲉⲝⲁⲛⲇⲣⲁ ϯⲟⲩⲣⲱ ⲛ̃ⲥⲟⲩⲓ︦ⲉ︦ ⲛ̃ⲫⲁⲣⲙⲟⲩϯ ⲛ̃ⲁϫⲡ
ⲅ︦ ⲙ̃ⲡⲓⲉ̃ϩⲟⲟⲩ ϧⲉⲛ ⲟⲩⲙⲉⲧⲅⲉⲛⲛⲉⲟⲥ ⲁⲥϭⲓ ⲙ̃ⲡⲓⲭⲗⲟⲙ
ⲛ̃ⲁⲧⲧⲁⲕⲟ
Ⲙⲉⲛⲉⲛⲥⲁ ⲛⲁⲓ ⲇⲉ ⲁ̃ ⲛⲓⲟⲩⲣⲱⲟⲩ ⲙⲟⲩϯ ⲉ̃ⲡⲓⲁ̃ⲅⲓⲟⲥ
ⲅⲉⲱⲣⲅⲓⲟⲥ ⲡⲉ *ϫⲱⲟⲩ ⲛⲁϥ ϫⲉ ϩⲏⲡⲡⲉ ⲓⲥ ϯⲕⲉⲟⲩⲣⲱ
ⲁⲕⲧⲁⲕⲟⲥ ⲛ̃ⲧⲟⲧⲉⲛ ⲗⲟⲓⲡⲟⲛ ⲁⲛⲥⲣⲱϥⲧ ⲉ̃ⲣⲟϥ ⲁϥⲉⲣⲟⲩⲱ̃
ⲛ̃ϫⲉ ⲡⲟⲩⲣⲟ ⲙⲁⲅⲙⲉⲛⲧⲓⲟⲥ ⲟⲩⲁⲓ ⲉ̃ⲃⲟⲗ ⲛ̃ϧⲏⲧⲟⲩ ⲡⲉ
ⲡⲉϫⲁϥ ϫⲉ ⲙⲁⲣⲉⲛϯ ⲛ̃ⲧⲉϥⲁ̃ⲡⲟⲫⲁⲥⲓⲥ ⲁ̃ ⲡⲓϩⲱⲃ ⲣⲁⲛⲁ
ⲙ̃ⲙⲱⲟⲩ ⲧⲏⲣⲟⲩ ⲁϥϩⲉⲙⲥⲓ ⲇⲉ ⲛ̃ϫⲉ ⲡⲟⲩⲣⲟ ⲁϥⲥϧⲁⲓ
ⲛ̃ⲧⲉϥⲁ̃ⲡⲟⲫⲁⲥⲓⲥ ⲙ̃ⲡⲁⲓⲣⲏϯ ⲉϥϫⲱ ⲙ̃ⲙⲟⲥ ϫⲉ ⲅⲉⲱⲣⲅⲓⲟⲥ
ⲡⲓⲛⲓϣϯ ⲛ̃ⲧⲉ ⲛⲓⲅⲁⲗⲓⲗⲉⲟⲥ *ⲫⲏ ⲉ̃ⲧⲁϥⲭⲱ ⲛ̃ⲥⲱϥ ⲛ̃ⲛⲓ-
ⲡⲣⲟⲥⲧⲟⲅⲙⲁ ⲛ̃ⲧⲉ ⲛⲓⲟⲩⲣⲱⲟⲩ ϯϯ ⲙ̃ⲙⲟϥ ⲉ̃ⲧⲟⲧⲥ ⲛ̃ⲧⲥⲏϥⲓ
ⲁ̃ⲣⲓⲉ̃ⲙⲓ ⲟⲩⲛ ϧⲁ ⲛⲓⲗⲁⲟⲥ ϫⲉ ⲧⲉⲛⲧⲟⲩⲃⲏⲟⲩⲧ² ⲁ̃ⲛⲟⲛ
ⲉ̃ⲃⲟⲗϩⲁ ⲡⲉϥⲥⲛⲟϥ ⲧⲏⲣⲟⲩ ⲙ̃ⲫⲟⲟⲩ ⲁⲩⲥϧⲁⲓ ϧⲁⲣⲁⲧⲥ
ⲛ̃ⲧⲉϥⲉ̃ⲡⲓⲥⲧⲟⲗⲏ ⲛ̃ϫⲉ ⲡⲓⲕⲉⲝ︦ⲑ︦ ⲛ̃ⲟⲩⲣⲟ ⲉⲑⲃⲉ ⲛⲁⲓ ⲧⲟⲧⲉ
ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲛⲁϥⲙⲟϣⲓ ⲡⲉ ⲉϥⲣⲁϣⲓ ⲉ̃ⲡⲓⲙⲁ ⲉ̃ⲧⲉϥ-
ⲛⲁϭⲓ ⲙ̃ⲡⲓⲭⲗⲟⲙ ⲙ̃ⲙⲟϥ ⲉ̃ⲧⲁϥⲓ̃ ⲟⲩⲛ *ⲙ̃ⲡⲓⲙⲁ ⲉ̃ⲧⲉⲙ-
ⲙⲁⲩ ⲡⲉϫⲁϥ ⲛ̃ⲛⲓⲙⲁⲧⲟⲓ ⲉⲧⲁ̃ⲙⲟⲛⲓ ⲙ̃ⲙⲟϥ ϫⲉ ⲱ̃ⲟⲩⲛ̃ϩⲏⲧ
ⲛⲉⲙⲏⲓ ⲛ̃ⲟⲩⲕⲟⲩϫⲓ ⲛⲁⲥⲛⲏⲟⲩ ϫⲉ ⲓⲥ ⲍ︦ ⲛ̃ⲣⲟⲙⲡⲓ ⲁⲩⲥⲓⲛⲓ
ⲉⲩⲉⲣⲃⲁⲥⲁⲛⲓⲍⲓⲛ ⲙ̃ⲙⲟⲓ ϩⲓⲧⲉⲛ ⲡⲁⲓⲟ︦ ⲛ̃ⲟⲩⲣⲟ ϩⲓⲛⲁ ⲛ̃ⲧⲁ-
ⲧⲱⲃϩ ⲉ̃ϫⲱⲟⲩ ⲧⲟⲧⲉ ⲁϥⲥⲟⲙⲥ ⲉ̃ⲡϣⲱⲓ ⲉ̃ⲧⲫⲉ ⲛ̃ϫⲉ
ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲡⲉϫⲁϥ ⲛ̃ⲡⲁⲓⲣⲏϯ ϫⲉ ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦
ⲫⲏ ⲉ̃ⲧⲁϥⲟⲩⲱⲣⲡ ⲙ̃ⲡⲓⲭⲣⲱⲙ ⲉ̃ⲃⲟⲗϧⲉⲛ ϧⲉⲛ ⲧⲫⲉ *ⲙ̃ⲡⲓⲁ̃-
ⲅⲓⲟⲥ ⲛ̃ⲗⲓⲁⲥ ϣⲁⲧⲉϥⲟⲩⲱⲙ ⲙ̃ⲡⲓⲡⲉⲛⲧⲓⲕⲟⲛⲧⲁⲣⲕⲟⲥ ⲃ︦ ⲛⲉⲙ
ⲡⲟⲩⲣ︦ ⲙ̃ⲙⲁⲧⲟⲓ ⲙⲁⲣⲉϥⲓ̃ ϫⲉ ϯⲛⲟⲩ ⲛ̃ϫⲉ ⲡⲓⲭⲣⲱⲙ


### 0040

ⲉ̃ⲧⲉⲙⲙⲁⲩ ⲉ̃ⲃⲟⲗϩⲓⲧⲟⲧⲕ ⲛ̃ⲧⲉϥⲣⲱⲕϩ ⲙ̃ⲡⲁⲓⲟ︦ ⲛ̃ⲟⲩⲣⲟ
ⲛⲉⲙ ⲛⲏ ⲉⲧⲕⲱϯ ⲉ̃ⲣⲱⲟⲩ ⲛ̃ⲧⲉϣⲧⲉⲙ ⲟⲩⲁⲓ ⲛ̃ⲟⲩⲱⲧ
ⲥⲱϫⲡ ϫⲉ ⲫⲱⲕ ⲡⲉ ⲡⲓⲱ̃ⲟⲩ ϣⲁ ⲉ̃ⲛⲉϩ ⲛ̃ⲧⲉ ⲛⲓⲉ̃ⲛⲉϩ
ⲧⲏⲣⲟⲩ ⲁ̃ⲙⲏⲛ ⲉ̃ⲧⲓ ⲉϥⲧⲱⲃϩ ⲛ̃ϫⲉ ⲡⲓⲁⲅⲓⲟⲥ ⲅⲉⲱⲣⲅⲓⲟⲥ
ⲥⲁⲧⲟⲧϥ ⲁϥⲓ̃ ⲉ̃ⲡⲉⲥⲉⲥⲏⲧ ⲉ̃ⲃⲟⲗϧⲉⲛ ⲧⲫⲉ ⲛ̃ϫⲉ ⲟⲩⲭⲣⲱⲙ
ⲟⲩⲟϩ *ⲟⲩⲟϩ ⲁϥⲟⲩⲱⲙ ⲙ̃ⲡⲓⲟ︦ ⲛ̃ⲟⲩⲣⲟ ⲛⲉⲙ ⲡⲟⲩⲙⲏϣ
ⲉ̃ⲣⲉ ⲧⲟⲩⲏ̃ⲡⲓ ⲓ̃ⲣⲓ ⲛ̃ⲉ︦ ⲛ̃ⲑⲃⲁ
Ⲟⲩⲟϩ ⲡⲁⲗⲓⲛ ⲡⲉϫⲉ ⲡⲓⲁ̃ⲅⲓⲟⲥ ⲛ̃ⲛⲓⲙⲁⲧⲟⲓ ⲉⲑⲣⲟⲩⲱ̃-
ⲟⲩⲛ̃ϩⲏⲧ ⲛ̃ⲕⲉⲕⲟⲩϫⲓ ⲛⲁϥⲧⲱⲃϩ ⲟⲛ ⲉϥϫⲱ ⲙ̃ⲙⲟⲥ ϫⲉ
ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ϯⲛⲁⲩ ⲉ̃ⲟⲩⲙⲏϣ ⲉϥⲭⲏ ⲙ̃ⲡⲁⲓⲙⲁ ⲉⲩ
ⲟⲩⲱϣ ⲉ̃ⲱ̃ⲗⲓ ⲙ̃ⲡⲁⲥⲱⲙⲁ ⲟⲩⲟϩ ⲡⲓⲥⲱⲙⲁ ⲛⲁⲣⲱϣⲓ
ⲙ̃ⲡⲓⲕⲟⲥⲙⲟⲥ ⲁⲛ ϯϯϩⲱ ⲉ̃ⲣⲟⲕ ⲙⲟⲓ ⲛ̃ⲟⲩϩⲙⲟⲧ ⲙ̃ⲡⲁ-
ⲥⲱⲙⲁ ϩⲓⲛⲁ ⲟⲩⲟⲛ ⲛⲓⲃⲉⲛ ⲉⲧϩⲉϫϩⲱϫ ϩⲓⲧⲉⲛ *ⲟⲩⲡⲛ︦ⲁ︦
ⲛ̃ⲁ̃ⲕⲁⲑⲁⲣⲧⲟⲛ ⲛ̃ⲧⲉϥⲉⲣⲫⲙⲉⲩⲓ︦ ⲙ̃ⲡⲉⲕⲃⲱⲕ ⲅⲉⲱⲣⲅⲓⲟⲥ ⲙⲁⲣⲉ
ⲡⲁⲣⲁⲛ ϣⲱⲡⲓ ⲛⲁϥ ⲉⲩⲡⲉⲑⲛⲁⲛⲉϥ ⲡϭ︦ⲥ︦ ⲡⲁⲛⲟⲩϯ ⲟⲩⲟⲛ
ⲛⲓⲃⲉⲛ ⲉⲑⲛⲁϣⲱⲡⲓ ϧⲉⲛ ⲟⲩⲙⲁⲛϯϩⲁⲡ ⲉϥⲟⲓ ⲛ̃ϩⲟϯ ⲉ̃ⲙⲁ-
ϣⲱ ⲛ̃ⲧⲉϥⲉⲣⲫⲙⲉⲩⲓ̃ ⲙ̃ⲡⲁⲣⲁⲛ ⲛ̃ⲧⲉϥⲓ̃ ⲉ̃ⲃⲟⲗ ϧⲉⲛ ⲟⲩϩ-
ⲣⲏⲛⲏ ⲟⲩⲟⲛ ⲛⲓⲃⲉⲛ ⲉⲑⲛⲁⲥϧⲁⲓ ⲛ̃ⲧⲁⲙⲁⲣⲧⲏⲣⲓⲁ̃ ⲛⲉⲙ
ⲛⲓϧⲓⲥⲓ ⲉ̃ⲧⲁⲓϣⲟⲡⲟⲩ ⲉⲕⲉ̃ⲥϧⲉ ⲛⲟⲩⲣⲁⲛ ⲉ̃ⲡϫⲱⲙ ⲙ̃ⲡⲱⲛϧ
ⲉⲥⲓ̃ϣⲱⲡⲓ ⲁⲣⲉϣⲁⲛ *ⲧⲫⲉ ⲁⲙⲟⲛⲓ ⲛ̃ⲛⲉϥⲙⲟⲩⲛϩⲱⲟⲩ
ϩⲓϫⲉⲛ ⲡⲕⲁϩⲓ ⲟⲩⲟϩ ⲛ̃ⲧⲟⲩⲫⲓⲣⲓ ⲉ̃ⲫⲣⲁⲛ ⲙ̃ⲫϯ ⲛ̃ⲅⲉⲱⲣ-
ⲅⲓⲟⲥ ⲉⲓϯϩⲟ ⲉ̃ⲣⲟⲕ ⲙⲁⲣⲉ ⲧⲉⲕⲃⲟⲏ̃ⲑⲓⲁ̃ ⲧⲁϩⲱⲟⲩ ⲛ̃ⲭⲱⲗⲉⲙ
ⲫϯ ⲙ̃ⲙⲏⲓ ⲫⲏ ⲉ̃ϯϣⲉⲡ ⲛ̃ⲛⲁⲓϧⲓⲥⲓ ⲉ̃ϩⲣⲏⲓ ⲉ̃ϫⲉⲛ ⲡⲉϥⲣⲁⲛ
ⲉ̃ⲑⲟⲩⲁⲃ ⲉ̃ⲉⲣⲫⲙⲉⲩⲓ̃ ⲛ̃ⲟⲩⲟⲛ ⲛⲓⲃⲉⲛ ⲉⲑⲛⲁⲉⲣ ⲡⲓⲛⲁⲓ ⲛⲉⲙ
ⲟⲩϩⲏⲕⲓ ϧⲉⲛ ⲡⲁⲣⲁⲛ ⲛ̃ⲧⲉⲕⲭⲱ ⲛⲱⲟⲩ ⲉ̃ⲃⲟⲗ ⲛ̃ⲛⲟⲩⲛⲟⲃⲓ
ⲉ̃ⲧⲁⲩⲁⲓⲧⲟⲩ


### 0041

Ⲛⲁⲓ ⲇⲉ ⲉϥϫⲱ ⲙ̃ⲙⲱⲟⲩ ϧⲉⲛ ⲫⲣⲱⲕϩ ⲛ̃ⲧⲉ *ⲡⲉϥϩⲏⲧ
ⲛ̃ϫⲉ ⲡⲓⲁ̃ⲓⲟⲥ ϩⲏⲡⲡⲉ ⲓⲥ ⲡϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲁϥⲟⲩⲱⲛϩ ⲉ̃ⲣⲟϥ
ⲉϥϫⲱ ⲙ̃ⲙⲟⲥ ϫⲉ ⲁ̃ⲙⲟⲩ ϫⲉ ϯⲛⲟⲩ ⲉ̃ⲡϣⲱⲓ ⲉ̃ⲧⲫⲉ
ⲛ̃ⲧⲉⲕⲙ̃ⲧⲟⲛ ⲙ̃ⲙⲟⲕ ϧⲉⲛ ⲡⲓⲙⲁⲛϣⲱⲡⲓ ⲉ̃ⲧⲁⲓⲥⲉⲃⲧⲱⲧϥ
ⲛⲁⲕ ⲛ̃ϩⲣⲏⲓ ϧⲉⲛ ⲑⲙⲉⲧⲟⲩⲣⲟ ⲙ̃ⲡⲁⲓⲱⲧ ⲛⲓⲫⲏⲟⲩⲓⲓ̃ ⲱ
ⲡⲁⲥⲱⲧⲡ ⲅⲉⲱⲣⲅⲓⲟⲥ ϩⲱⲃ ⲛⲓⲃⲉⲛ ⲉ̃ⲧⲁⲕⲉⲣⲉ̃ⲧⲓⲛ ⲙ̃ⲙⲱⲟⲩ
ϯⲛⲁϫⲟⲕⲟⲩ ⲛⲁⲕ ⲉ̃ⲃⲟⲗ ⲧⲏⲣⲟⲩ ⲛⲉⲙ ϩⲁⲛⲕⲉⲙⲏϣ ⲉⲩⲟⲓ
ⲛ̃ⲛⲓϣϯ ⲉ̃ⲛⲁⲓ *ⲡⲉϫⲉ ⲡⲓⲁ̃ⲅⲓⲟⲥ ⲅⲉⲱⲣⲅⲓⲟⲥ ⲛ̃ⲛⲓⲕⲉⲥⲧⲟ-
ⲛⲁⲣⲓⲟⲥ ϫⲉ ⲁ̃ⲙⲱⲓⲛⲓ ϫⲉ ϯⲛⲟⲩ ϫⲱⲕ ⲉ̃ⲃⲟⲗ ⲛ̃ϯⲕⲉ-
ⲗⲉⲩⲥⲓⲥ ⲑⲏ ⲉ̃ⲧⲁⲩϩⲉⲛϩⲉⲛⲑⲏⲛⲟⲩ ⲉ̃ⲣⲟⲥ ⲟⲩⲟϩ ⲁϥⲥⲟⲩ-
ⲧⲉⲛ ⲡⲉϥⲙⲟⲩⲧ ⲉ̃ⲃⲟⲗ ⲁⲩⲱ̃ⲗⲓ ⲛ̃ⲧⲉϥⲁ̃ⲫⲉ ⲉ̃ⲑⲟⲩⲁⲃ ⲁϥⲓ̃
ⲉ̃ⲃⲟⲗ ⲛ̃ϫⲉ ⲟⲩⲙⲱⲟⲩ ⲛⲉⲙ ⲟⲩⲉ̃ⲣⲱϯ ⲁ̃ ⲡⲭ︦ⲥ︦ ⲓⲏ︦ⲥ︦ ϭⲓ
ⲛ̃ⲧⲉϥⲙⲁⲕⲁⲣⲓⲁ̃ ⲙ̃ⲯⲩⲭⲏ ⲁϥⲉⲣⲁⲥⲡⲁⲝⲉⲥⲑⲉ ⲙ̃ⲙⲟⲥ ⲁϥϭⲓⲧⲥ
ⲛⲉⲙⲁϥ ⲉ̃ⲡϣⲱⲓ ⲉ̃ⲛⲓⲫⲏⲟⲩⲓ *ⲁϥⲧⲏⲓⲥ ⲛ̃ⲇⲱⲣⲟⲛ ⲙ̃ⲡⲉϥⲓⲱⲧ
ⲛ̃ⲁ̃ⲅⲁⲑⲟⲥ ⲛⲉⲙ ⲡⲓⲡⲛ︦ⲁ︦ ⲉ̃ⲑⲟⲩⲁⲃ
Ϧⲉⲛ ϯⲟⲩⲛⲟⲩ ⲁ̃ ⲡⲕⲁϩⲓ ⲕⲓⲙ ϣⲁ ⲛⲉϥⲥⲉⲛϯ ⲁⲩ-
ϣⲱⲡⲓ ⲛ̃ϫⲉ ϩⲁⲛϧⲁⲣⲁⲃⲁⲓ ⲛⲉⲙ ϩⲁⲛⲥⲉⲧⲉⲃⲣⲉϫ ⲛ̃ⲟⲩϩⲟϯ
ϧⲉⲛ ⲟⲩϩⲟϯ ϩⲱⲥⲧⲉ ⲛ̃ⲧⲉϣⲧⲉⲙ ⲟⲩⲣⲱⲙⲓ ⲛ̃ⲟⲩⲱⲧ ⲥⲓⲛⲓ
ⲉ̃ⲃⲟⲗ ϧⲉⲛ ⲡⲓⲙⲁ ⲉ̃ⲧⲉⲙⲙⲁⲩ ⲉⲑⲃⲉ ϯⲛⲓϣϯ ⲛ̃ϩⲟϯ ⲟⲩⲟⲛ
ⲛⲓⲃⲉⲛ ⲉ̃ⲧⲁⲩⲉⲣⲙⲁⲣⲧⲩⲣⲟⲥ ⲉ̃ⲃⲟⲗϩⲓⲧⲉⲛ ⲡⲓⲁ̃ⲅⲓⲟⲥ ⲅⲉⲱⲣ-
ⲅⲓⲟⲥ ⲥⲉⲓ̃ⲣⲓ ⲛ̃ⲏ︦ ⲛ̃ϣⲟ *ⲛⲉⲙ ⲭ︦ϥ︦ⲑ︦ ⲛⲉⲙ ⲁⲗⲉⲝⲁⲛⲇⲣⲁ
ϯⲟⲩⲣⲱ
Ⲁϥϫⲱⲕ ⲛ̃ⲧⲉϥⲙⲁⲣⲧⲓⲣⲓⲁ̃ ⲉ̃ⲃⲟⲗ ⲛ̃ϫⲉ ⲡⲓⲁ̃ⲅⲓⲟⲥ ⲅⲉⲱⲣ-
ⲅⲓⲟⲥ ⲛ̃ⲥⲟⲩ ⲕ︦ⲅ︦ ⲙ̃ⲡⲓⲁ̃ⲃⲟⲧ ⲫⲁⲣⲙⲟⲩⲑⲓ ⲛ̃ⲟⲩⲉ̃ϩⲟⲟⲩ ⲛ̃ⲕⲓ-
ⲣⲓⲁⲕⲏ ⲛ̃ⲁϫⲡ ⲑ︦ ⲙ̃ⲡⲓⲉ̃ϩⲟⲟⲩ