### 0001

ⲙⲁⲣⲧⲩⲣⲓⲁ̃ ⲛ̃ⲧⲉ ⲡⲓⲁ̃ⲅⲓⲟⲥ ⲁⲃⲃⲁ ⲓ̃ⲥⲁⲁⲕ ⲡⲓⲣⲉⲙϯⲫⲣⲉ
ϧⲉⲛ ⲡⲑⲟϣ ⲡⲁⲛⲁⲩ ⲉ̃ⲧⲁϥϫⲟⲕⲥ ⲉ̃ⲃⲟⲗ ⲛ̃ⲥⲟⲩⲋ︦ ⲙ̃ⲡⲓⲁ̃ⲃⲟⲧ ⲡⲁϣⲟⲛⲥ
ϧⲉⲛ ⲟⲩϩⲓⲣⲏⲛⲛ ⲛ̃ⲧⲉ ⲫ︦ϯ︦ ⲁ̃ⲙⲏⲛ
Ⲛϩⲣⲏⲓ ⲇⲉ ϧⲉⲛ ⲛⲓⲉ̃ϩⲟⲟⲩ ⲛ̃ⲧⲉ ⲇⲓⲟⲕⲗⲏⲧⲓⲁ̃ⲛⲟⲥ ⲡⲟⲩ-
ⲣⲟ ⲛⲁⲛⲟⲙⲟⲥ ⲁϥⲓ̃ⲣⲓ ⲛ̃ϩⲁⲛϩⲃⲏⲟⲩⲓ̃ ⲛ̃ⲥϣⲉ ⲉ̃ⲁⲓⲧⲟⲩ ⲁⲛ
ⲁϥⲑⲁⲙⲓⲟ ⲙ̃ⲗ︦ⲉ︦ ⲟ̃ⲟ̃ⲟⲩϯ ⲛ̃ϩⲱⲟⲩⲧ ⲛⲉⲙ ⲗ︦︦ⲉ︦ ⲛ̃ⲛⲟⲩϯ
ⲛ̃ⲥϩⲓⲙⲓ ⲁϥϯⲣⲁⲛ ⲉ̃ⲣⲱⲟⲩ ϫⲉ ⲛⲟⲩϯ ⲉ̃ϩⲁⲛⲛⲟⲩϯ ⲁⲛ ⲛⲉ
ⲡⲓϩⲟⲩⲓⲧ ⲡⲉ ⲡⲓⲁ̃ⲡⲟⲗⲗⲱⲛ ⲛⲉⲙ ϯⲁⲣⲧⲉⲙⲓⲥ ⲛⲉⲙ ⲡⲥⲱϫⲡ
ⲛ̃ⲛⲓⲛⲟⲩϯ ⲁϥⲥϧⲁⲓ ⲛⲟⲩⲇⲓⲁ̃ⲧⲁⲅⲙⲁ ⲙ̃ⲡⲁⲓⲣⲏϯ ⲉϥϫⲱ
ⲙ̃ⲙⲟⲥ ϫⲉ ⲁⲛⲟⲕ ⲡⲉ ⲇⲓⲟⲕⲗⲏⲧⲓⲁ̃ⲛⲟⲥ ⲡⲟⲩⲣⲟ ϯⲉⲣⲕⲉⲗⲉⲩⲓⲛ
ⲉⲑⲣⲉ ϯⲟⲓⲕⲟⲩⲙⲉⲛⲏ ⲧⲏⲣⲥ ⲉⲣⲑⲩⲥⲓⲁ̃ ⲛ̃ⲛ̃ⲁⲛⲟⲩϯ ⲡⲓϩⲟⲩⲓⲧ
ⲡⲉ ⲡⲓⲁ̃ⲡⲟⲗⲗⲱⲛ ⲛⲉⲙ ⲡⲓⲍⲉⲩⲥ ⲛⲉⲙ ⲡⲓⲉⲣⲙⲏⲥ ⲛⲉⲙ ⲡⲓⲉ̃ⲣⲁ-
ⲕⲗⲏⲥ ⲛⲉⲙ ϯⲁⲣⲧⲉⲙⲓⲥ ⲑⲙⲁⲩ ⲛ̃ⲛⲓⲛⲟⲩϯ ⲧⲏⲣⲟⲩ ⲫⲏ
ⲉⲑⲛⲁⲉⲣⲁⲑⲥⲱⲧⲉⲙ ⲛ̃ⲥⲁ ⲡⲉⲛⲡⲣⲟⲥⲧⲁⲅⲙⲁ ⲉⲩⲉⲉⲣⲃⲁⲥⲁⲛⲓ-
ⲍⲓⲛ ⲙ̃ⲙⲟϥ ϧⲉⲛ ϩⲁⲛⲃⲁⲥⲁⲛⲟⲥ ⲉ̃ⲩϧⲟⲥⲓ ⲙⲉⲛⲉⲛⲥⲱⲥ ⲉⲩⲉ̃-
ϩⲱⲗⲉⲙ ⲙ̃ⲡⲉϥⲏⲓ ⲛⲉⲙ ⲫⲏ ⲉ̃ⲧⲉⲛⲧⲁϥ ⲧⲏⲣϥ ⲁϥϯ ⲙ̃ⲡⲓ-
ⲡⲣⲟⲥⲧⲁⲅⲙⲁ ⲛ̃ⲕⲟⲩⲗⲕⲓⲁ̃ⲛⲟⲥ ⲡⲓϩⲏⲅⲉⲙⲱⲛ *ⲁϥⲉⲛϥ ⲉ̃ϧⲟⲩⲛ
ⲉ̃ⲣⲁⲕⲟϯ ⲁϥⲑⲣⲉ ⲡⲓⲙⲏϣ ⲉⲣⲑⲩⲥⲓⲁ̃ ⲁϥⲓ̃ ⲉ̃ⲣⲏⲥ ϧⲉⲛ ⲭⲏⲙⲓ
ⲁϥⲓ̃ ⲉϩⲣⲏⲓ ⲉ̃ⲧⲁⲩⲃⲁϩ ⲁϥⲁ̃ⲙⲟⲛⲓ ⲉ̃ϯⲁⲛⲉⲙⲣⲱ
Ⲛⲉ ⲟⲩⲟⲛ ⲟⲩⲕⲟⲩϫⲓ ⲛ̃ⲁ̃ⲗⲟⲩ ⲛ̃ⲥⲁⲃⲉ ⲉⲛⲉⲥⲱϥ ⲙ̃ⲙ̃ⲁ-
ϣⲱ ⲉϥϣⲟⲡ ϧⲉⲛ ⲟⲩϯⲙⲓ ϫⲉ ϯⲫⲣⲉ ϧⲉⲛ ⲡⲑⲟϣ ⲡⲁ-
ⲛⲁⲩ ⲉ̃ⲡⲉϥⲣⲁⲛ ⲡⲉ ⲓ̃ⲥⲁⲁⲕ ⲉϥϧⲉⲛ ⲕ︦ⲉ︦ ⲛ̃ⲣⲟⲙⲡⲓ ⲫⲁⲓ ⲇⲉ
ⲛⲁϥϣⲉⲙϣⲓ ⲙ̃ⲫ︦ϯ︦ ⲙ̃ⲡⲓⲉ̃ϩⲟⲟⲩ ⲛⲉⲙ ⲡⲓⲉ̃ϫⲱⲣϩ ⲟⲩⲁⲅⲅⲉⲗⲟⲥ


### 0002

ⲛ̃ⲧⲉ ⲡϭ︦ⲥ︦ ⲁϥⲟⲩⲟⲛϩϥ ⲉ̃ⲣⲟϥ ⲉϥⲭⲏ ϧⲉⲛ ⲧⲕⲟⲓ ⲉϥⲉⲛⲕⲟⲧ
ⲥⲁⲫⲁϩⲟⲩ ⲛ̃ⲛⲉϥϭⲁⲓⲟⲥϧ ⲁϥⲛⲉϩⲥⲓ ⲙ̃ⲙⲟϥ ⲡⲉϫⲁϥ ⲛⲁϥ
ϫⲉ ⲭⲉⲣⲉ ⲁⲃⲃⲁ ⲓⲥⲁⲁⲕ ⲡⲓⲣⲱⲙⲓ ⲉ̃ⲧⲉⲣⲫⲟⲣⲓⲛ ⲙ̃ⲫ︦ϯ︦ ⲉⲑⲃⲉ ⲟⲩ
ⲉ̃ⲕⲉⲛⲕⲟⲧ ⲉ̃ⲣⲉ ⲡⲓⲁ̃ⲅⲱⲛ ⲥⲏⲣ ⲉ̃ⲃⲟⲗ ⲁϥⲧⲁⲙⲟϥ ⲉ̃ⲟⲩⲭⲗⲟⲙ
ⲡⲉϫⲁϥ ⲛⲁϥ ϫⲉ ϫⲉⲙⲛⲟⲙϯ ⲡⲁⲓⲭⲗⲟⲙ ⲫⲱⲕ ⲡⲉ ⲙ̃ⲡⲉⲣ-
ⲉⲣⲁ̃ⲙⲉⲗⲉⲥ ⲉ̃ⲡⲉⲕⲟⲩϫⲁⲓ ⲧⲱⲛⲕ ⲙⲁϣⲉ ⲛⲁⲕ ⲉ̃ⲧⲁⲩⲃⲁϩ
ⲉ̃ⲣⲁⲧϥ ⲙ̃ⲡⲓϩⲏⲅⲉⲙⲱⲛ ⲛ̃ⲧⲉⲕⲉⲣⲟ̃ⲙⲟⲗⲟⲅⲓⲛ ⲙ̃ⲡⲭ︦ⲥ︦ ⲛ̃ⲧⲉⲕⲙⲟⲩ
ϩⲓϫⲉⲛ ⲡⲉϥⲣⲁⲛ ⲉⲑⲟⲩⲁⲃ ϩⲓⲛⲁ ⲛ̃ⲧⲉⲕϣⲱⲡⲓ ϧⲉⲛ ⲧⲉϥ-
ⲙⲉⲧⲟⲩⲣⲟ ⲛⲉⲛⲉϩ ⲉⲧⲁϥϫⲉ ⲛⲁⲓ ⲇⲉ ⲛⲁϥ ⲛ̃ϫⲉ ⲡⲓⲁⲅⲅⲉ-
ⲗⲟⲥ ⲁϥϣⲉ ⲛⲁϥ ⲉⲃⲟⲗϩⲁⲣⲟϥ
Ⲉⲧⲁ ⲡⲓⲟⲩⲱⲓⲛⲓ ⲇⲉ ⲥⲱⲣ ⲉⲃⲟⲗ ⲁϥⲧⲱⲛϥ ⲛ̃ϫⲉ ⲁⲃⲃⲁ
ⲓ̃ⲥⲁⲁⲕ ⲁϥⲓ̃ ⲉ̃ϩⲣⲏⲓ² ⲉ̃ⲡⲉϥⲏⲓ *ⲁϥⲉⲣⲁⲥⲡⲁⲍⲉⲥⲑⲉ ⲙ̃ⲡⲉϥⲓⲱⲧ
ⲛⲉⲙ ⲧⲉϥⲙⲁⲩ ⲡⲉϫⲁϥ ⲛⲱⲟⲩ ϫⲉ ϯϣⲓⲛⲓ ⲉ̃ⲣⲱⲧⲉⲛ ⲛⲁⲓⲟϯ
ⲡⲉϫⲱⲟⲩ ⲛⲁϥ ϫⲉ ⲁⲕⲛⲁϣⲉ ⲛⲁⲕ ⲉⲑⲱⲛ ⲡⲉϫⲁϥ ⲛⲱⲟⲩ
ϫⲉ ⲉⲓϩⲏⲗ ⲉ̃ⲣⲁⲧϥ ⲙ̃ⲡⲓϩⲏⲅⲉⲙⲱⲛ ϩⲓⲛⲁ ⲛ̃ⲧⲁⲙⲟⲩ ⲉ̃ϩⲣⲏⲓ
ⲉ̃ϫⲉⲛ ⲫⲣⲁⲛ ⲙ̃ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲫⲁⲓ ⲉ̃ⲧⲁⲩⲉⲣⲥⲧⲁⲩⲣⲱⲛ-
ⲓⲛ ⲙ̃ⲙⲟϥ ⲛⲁϩⲣⲉⲛ ⲡⲟⲛⲧⲓⲟⲥ ⲡⲓⲗⲁⲧⲟⲥ ⲛⲁⲛⲉⲥ ⲛⲏⲓ ⲛ̃ⲧⲁ-
ⲙⲟⲩ ϧⲉⲛ ⲡⲁⲓⲕⲟⲥⲙⲟⲥ ⲛ̃ⲧⲁⲱⲛϧ ϧⲉⲛ ϯⲙⲉⲧⲟⲩⲣⲟ ⲛ̃ⲧⲉ
ⲫ︦ϯ︦ ⲁⲩⲁⲙⲟⲛⲓ ⲙ̃ⲙⲟϥ ⲛ̃ϫⲉ ⲛⲉϥⲓⲟϯ ϫⲉ ⲧⲉⲛⲛⲁⲭⲁⲕ
ⲁⲛ ⲉ̃ⲙⲟⲩ ϧⲉⲛ ⲡⲁⲓⲙⲟⲩ ⲉⲧϩⲱⲟⲩ
Ϧⲉⲛ ⲧⲫⲁϣⲓ ⲇⲉ ⲙ̃ⲡⲓⲉ̃ϫⲱⲣϩ ⲁϥⲟⲩⲟⲛϩϥ ⲉ̃ⲣⲟϥ ⲛ̃ϫⲉ
ⲟⲩⲁⲅⲅⲉⲗⲟⲥ ⲛ̃ⲧⲉ ⲡϭ︦ⲥ︦ ⲁ̃ ⲡⲓⲏⲓ ⲧⲏⲣϥ ⲉⲣⲟⲩⲱⲓⲛⲓ ⲉ̃ⲙⲁϣⲱ
ⲡⲉϫⲉ ⲡⲓⲁⲅⲅⲉⲗⲟⲥ ⲛⲁϥ ϫⲉ ⲭⲉⲣⲉ ⲁⲃⲃⲁ ⲓ̃ⲥⲁⲁⲕ ⲡϭ︦ⲥ︦ ⲛⲉ-
ⲙⲁⲕ ⲡⲉϫⲉ ⲡⲓⲙⲁⲕⲁⲣⲓⲟⲥ ⲛⲁϥ ϫⲉ ⲡⲉⲕϩⲙⲟⲧ ⲉ̃ϥⲉϣⲱⲡⲓ
ⲛⲥⲙⲏⲓ ⲁϥⲉⲛϥ ⲇⲉ ⲥⲁⲃⲟⲗ ⲙ̃ⲡⲉϥⲏⲓ ⲡⲉϫⲁϥ ⲛⲁϥ ϫⲉ


### 0003

ⲁ̃ⲣⲓϩⲩⲡⲟⲙⲉⲛⲓⲛ ⲛ̃ⲧⲉⲕϭⲓ ⲙ̃ⲡⲓⲭⲗⲟⲙ ⲛ̃ⲁⲧⲧⲁⲕⲟ ϯϫⲱ
ⲅⲁⲣ ⲙ̃ⲙⲟⲥ ⲛⲁⲕ ⲇⲉ ⲡⲉⲕⲭⲗⲟⲙ ⲛⲉⲙ ⲡⲉⲕⲑⲣⲟⲛⲟⲥ ϧⲉⲛ
ⲛⲓⲫⲏⲟⲩⲓ̃ ⲙ̃ⲡⲉⲣⲉⲣϩⲟϯ ϯⲭⲏ ⲛⲉⲙⲁⲕ ϣⲁⲧⲉⲕϫⲱⲕ ⲉ̃ⲃⲟⲗ
ⲛ̃ⲧⲉⲕⲙⲁⲣⲧⲩⲣⲓⲁ̃ *ⲭⲛⲁϣⲱⲡ ⲛ̃ϩⲁⲛⲛⲓϣϯ ⲛ̃ϧⲓⲥⲓ ⲉⲑⲃⲉ
ⲫⲣⲁⲛ ⲙ̃ⲡⲭ︦ⲥ︦ ⲁⲗⲗⲁ ϫⲉⲙⲛⲟⲙϯ ϯⲛⲏⲟⲩ ⲛ̃ⲧⲁϯϫⲟⲙ
ⲛⲁⲕ ⲛⲁⲓ ⲉ̃ⲧⲁϥϫⲟⲧⲟⲩ ⲛⲁϥ ⲛ̃ϫⲉ ⲡⲓⲁⲅⲅⲉⲗⲟⲥ ⲁϥϩⲱⲗ
ⲉ̃ⲡϣⲱⲓ ⲉⲛⲓⲫⲏⲟⲩⲓ
ⲫ̃ⲫⲓⲙⲁⲕⲁⲣⲓⲟⲥ ⲇⲉ ⲁⲃⲃⲁ ⲓ̃ⲥⲁⲁⲕ ⲁϥⲧⲱⲛϥ ϧⲉⲛ ϯϫⲟⲙ
ⲛ̃ⲧⲉ ⲡⲭ︦ⲥ︦ ⲁϥⲙⲟϣⲓ ⲛ̃ⲛⲉϥϭⲁⲗⲁⲩϫ ⲁϥϩⲱⲗ ⲉ̃ⲧⲁⲩⲃⲁϩ
ⲡⲉ ⲁϥϫⲓⲙⲓ ⲙ̃ⲡⲓϩⲏⲅⲉⲙⲱⲛ ϧⲉⲛ ϯⲥⲓⲱⲟⲩⲛⲓ ⲁϥⲟ̃ϩⲓ
ⲉ̃ⲣⲁⲧϥ ϩⲓⲣⲉⲛ ⲡⲓⲣⲟ ϩⲏⲡⲡⲉ ⲁϥⲓ̃ ⲉ̃ⲃⲟⲗ ⲛ̃ϫⲉ ⲟⲩⲙⲁⲧⲟⲓ
ⲉ̃ⲡⲉϥⲣⲁⲛ ⲡⲉ ⲇⲓⲟⲛⲏⲥⲓⲟⲥ ⲡⲉϫⲁϥ ⲛⲁϥ ϫⲉ ⲟⲩ ⲡⲉ ⲉ̃ⲧⲉⲕ-
ⲉⲣⲛ̃ⲭⲣⲓⲁ̃ ⲙ̃ⲙⲟϥ ⲡⲉϫⲉ ⲡⲓⲅⲉⲛⲛⲉⲟⲥ ⲛⲁϥ ϫⲉ ⲉ̃ⲓⲉⲣ-
ⲛ̃ⲭⲣⲓⲁ̃ ⲙ̃ⲡⲓϩⲏⲅⲉⲙⲱⲛ ⲡⲉϫⲉ ⲡⲓⲙⲁⲧⲟⲓ ⲛⲁϥ ϫⲉ ⲟⲩ ⲡⲉ
ⲡⲉⲕϩⲱⲃ ⲛⲉⲙ ⲡⲓϩⲏⲅⲉⲙⲱⲛ ⲡⲉϫⲉ ⲡⲓⲁ̃ⲅⲓⲟⲥ ⲛⲁϥ ϫⲉ
ⲁ̃ⲛⲟⲕ ⲟⲩⲭⲣⲏⲥⲧⲓⲁ̃ⲛⲟⲥ ⲡⲉϫⲉ ⲇⲓⲟⲛⲏⲥⲓⲟⲥ ⲛⲁϥ ϫⲉ ⲁ̃ϧⲟⲕ
ⲛ̃ⲑⲟⲕ ⲛⲉⲙ ⲡⲁⲓⲥⲁϫⲓ ⲙⲏ ⲉⲕⲟⲩⲱϣ ⲉⲙⲟⲩ ⲛ̃ⲕⲁⲕⲱⲥ
ⲡⲉϫⲉ ⲡⲓⲙⲁⲕⲁⲣⲓⲟⲥ ⲛⲁϥ ϫⲉ ⲫⲙⲟⲩ ⲙ̃ⲡⲁⲓⲕⲟⲥⲙⲟⲥ ⲟⲩⲙⲟⲩ
ⲁⲛ ⲡⲉ ⲁⲗⲗⲁ ⲟⲩⲱⲛϧ ⲡⲉ ϧⲉⲛ ⲡⲓⲉ̃ⲱⲛ ⲉⲑⲛⲏⲟⲩ ϩⲱⲥ
ⲇⲉ ⲉϥⲥⲁϫⲓ ⲛⲉⲙ ⲇⲓⲟⲛⲏⲥⲓⲟⲥ ⲁϥⲓ̃ ⲉ̃ⲃⲟⲗ ϧⲉⲛ ϯⲥⲓⲱⲟⲩⲛⲓ
ⲛ̃ϫⲉ ⲡⲓϩⲏⲅⲉⲙⲱⲛ ⲉ̃ⲧⲁϥⲛⲁⲩ ⲇⲉ ⲉ̃ⲣⲟϥ ⲛ̃ϫⲉ ⲡⲓⲅⲉⲛⲛⲉⲟⲥ
ⲁⲃⲃⲁ ⲓ̃ⲥⲁⲁⲕ *ⲁϥⲱϣ ⲉ̃ⲃⲟⲗ ⲉϥϫⲱ ⲙ̃ⲙⲟⲥ ϫⲉ ⲁ̃ⲛⲟⲕ
ⲟⲩⲭⲣⲏⲥⲧⲓⲁ̃ⲛⲟⲥ ⲕⲟⲩⲗⲕⲓⲁ̃ⲛⲟⲥ ⲇⲉ ⲡⲓϩⲏⲅⲉⲙⲱⲛ ⲁϥ-
ϫⲟⲩϣⲧ ⲉ̃ⲣⲟϥ ⲡⲉϫⲁϥ ⲛⲁϥ ϫⲉ ⲕⲥⲱⲟⲩⲛ ϫⲉ ⲟⲩ ⲡⲉ
ⲭⲣⲏⲥⲧⲓⲁ̃ⲛⲟⲥ ⲡⲉϫⲁϥ ⲛⲁϥ ⲛ̃ϫⲉ ⲡⲓⲁ̃ⲅⲓⲟⲥ ϫⲉ ϯⲥⲱⲟⲩⲛ
ⲁ̃ⲛⲟⲕ ⲟⲩⲃⲱⲕ ⲛ̃ⲧⲉ ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲡⲉϫⲉ ⲡⲓϩⲏⲅⲉⲙⲱⲛ
ⲛⲁϥ ϫⲉ ⲁⲕϣⲁⲛⲥⲱⲧⲉⲙ ⲛ̃ⲥⲱⲓ ⲭⲛⲁⲱⲛϧ ⲉ̃ϣⲱⲡ ⲛ̃ⲧⲉⲕ-


### 0004

ϣⲧⲉⲙⲥⲱⲧⲉⲙ ⲛ̃ⲥⲱⲓ ⲭⲛⲁⲙⲟⲩ ⲛ̃ⲕⲁⲕⲱⲥ ⲡⲉϫⲉ ⲡⲓⲁ̃ⲅⲓⲟⲥ
ⲁⲃⲃⲁ ⲓ̃ⲥⲁⲁⲕ ⲛⲁϥ ϫⲉ ⲥⲥϧⲏⲟⲩⲧ ϧⲉⲛ ⲡⲓⲉⲩⲁⲅⲅⲉⲗⲓⲟⲛ
ⲉⲑⲟⲩⲁⲃ ϫⲉ ⲙ̃ⲡⲉⲣⲉⲣϩⲟϯ ϧⲁⲧϩⲏ ⲙ̃ⲫⲏ ⲉⲑⲛⲁϧⲱⲧⲉⲃ
ⲙ̃ⲡⲉⲧⲉⲛⲥⲱⲙⲁ ⲧⲉⲧⲉⲛⲯⲩⲭⲏ ⲙ̃ⲙⲟⲛ ϣϫⲟⲙ ⲙ̃ⲙⲱⲟⲩ
ⲉ̃ϧⲟⲑⲃⲉⲥ ⲁ̃ⲣⲓϩⲟϯ ⲇⲉ ⲛ̃ⲑⲟϥ ϧⲁⲧϩⲏ ⲙ̃ⲫⲏ ⲉⲧⲉ ⲟⲩⲟⲛ
ϣϫⲟⲙ ⲙ̃ⲙⲟϥ ⲉ̃ϯⲯⲩⲭⲏ ⲛⲉⲙ ⲡⲓⲥⲱⲙⲁ ⲉ̃ⲧⲁⲕⲱⲟⲩ ϧⲉⲛ
ϯⲅⲉⲉⲛⲛⲁ ⲛ̃ⲧⲉ ⲡⲓⲭⲣⲱⲙ ⲡⲉϫⲉ ⲡⲓϩⲏⲅⲉⲙⲱⲛ ⲛⲁϥ ϫⲉ
ⲉ̃ⲣⲉ ⲛⲁⲓ ⲥϧⲏⲟⲩⲧ ⲛ̃ⲑⲱⲛ ⲡⲉϫⲉ ⲡⲓⲁ̃ⲅⲓⲟⲥ ⲛⲁϥ ϫⲉ
ⲉⲩⲥϧⲏⲟⲩⲧ ϧⲉⲛ ⲡⲓⲉⲩⲁⲅⲅⲉⲗⲓⲟⲛ ⲡⲉϫⲉ ⲡⲓϩⲏⲅⲉⲙⲱⲛ
ⲛⲁϥ ⲟⲛ ϫⲉ ⲛ̃ⲑⲟⲕ ⲟⲩⲣⲉϥⲱϣ ⲡⲉϫⲉ ⲡⲓⲁⲅⲓⲟⲥ ⲛⲁϥ ϫⲉ
ⲙ̃ⲙⲟⲛ ⲛⲁϥϣⲓⲛⲓ ⲙ̃ⲙⲟϥ ⲡⲉ ⲛ̃ϫⲉ ⲡⲓϩⲏⲅⲉⲙⲱⲛ ϫⲉ ⲛ̃ⲑⲟⲕ
ⲟⲩⲣⲉⲙⲑⲱⲛ *ⲡⲉϫⲉ ⲡⲓⲁⲅⲓⲟⲥ ⲛⲁϥ ϫⲉ ⲁ̃ⲛⲟⲕ ⲟⲩⲣⲉⲙϯ
ⲫⲣⲉ ϧⲉⲛ ⲡⲑⲟϣ ⲡⲁⲛⲁⲩ ⲡⲉϫⲉ ⲡⲓϩⲏⲅⲉⲙⲱⲛ ⲛ̃ⲇⲓⲟ̃ⲛⲏⲥⲓⲟⲥ
ϫⲉ ⲁ̃ⲛⲁⲩ ϫⲉ ⲭⲛⲁϣⲑⲱⲧ ⲙ̃ⲡⲉϥϩⲏⲧ ϣⲁϯϣⲉ ⲛⲏⲓ
ⲉ̃ⲧⲁⲙⲓⲓⲁϯ ⲛ̃ⲧⲁⲧⲁⲥⲑⲟⲓ
Ⲉⲧⲁϥⲁ̃ⲗⲏⲓ ⲉ̃ⲡⲓϫⲟⲓ ⲛ̃ϫⲉ ⲡⲓϩⲏⲅⲉⲙⲱⲛ ⲁϥϩⲱⲗ ⲉ̃ⲧⲁ-
ⲙⲓⲓⲁϯ ⲇⲓⲟ̃ⲛⲏⲥⲓⲟⲥ ⲇⲉ ⲁϥϭⲓ ⲙ̃ⲡⲓⲙⲁⲕⲁⲣⲓⲟⲥ ⲉϧⲟⲩⲛ
ⲉ̃ⲡⲉϥⲏⲓ ⲟⲩⲟϩ ⲡⲉϫⲁϥ ⲛⲁϥ ϫⲉ ⲥⲱⲧⲉⲙ ⲛ̃ⲥⲱⲓ ⲁ̃ⲣⲓⲑⲩⲥⲓⲁ
ⲛ̃ⲛⲓⲛⲟⲩϯ ⲙ̃ⲙⲟⲛ ϣⲏⲣⲓ ⲛ̃ⲧⲏⲓ ⲉ̃ⲃⲏⲗ ⲉ̃ⲟⲩϣⲉⲣⲓ ⲙ̃ⲙⲁⲩ-
ⲁⲧⲥ ϯⲛⲁⲧⲏⲓⲥ ⲛⲁⲕ ⲉⲩⲥϩⲓⲙⲓ ϯⲛⲁⲑⲣⲉ ⲡⲓϩⲏⲅⲉⲙⲱⲛ
ⲧⲏⲓⲕ ⲛ̃ⲟⲩⲧⲁⲝⲓⲥ ⲛ̃ⲧⲉⲕϭⲓⲧⲁⲓⲟ ⲁ̃ϧⲟⲕ ⲛ̃ⲑⲟⲕ ⲛⲉⲙ ⲡⲁⲓ-
ⲣⲁⲛ ϫⲉ ⲓⲏ︦ⲥ︦ ⲡⲉϫⲉ ⲡⲓⲙⲁⲕⲁⲣⲓⲟⲥ ⲛⲁϥ ϫⲉ ϣⲉ ⲛⲓϣⲗⲏⲗ
ⲛ̃ⲧⲉ ⲛⲏ ⲉⲑⲟⲩⲁⲃ ϫⲉ ⲁⲕϣⲁⲛⲉⲣⲭⲁⲣⲓⲍⲉⲥⲑⲉ ⲛⲏⲓ ⲛ̃ϯⲙⲉⲧ-
ⲟⲩⲣⲟ ⲛ̃ⲧⲉ ⲇⲓⲟⲕⲗⲏⲧⲓⲁⲛⲟⲥ ϯⲛⲁϫⲱⲗ ⲉ̃ⲃⲟⲗ ⲁⲛ
ⲙ̃ⲡⲁϭ︦ⲥ︦ ⲓ︦ⲏ︦ⲥ︦ ⲡⲭ︦ⲥ︦ ⲇⲓⲟⲛⲏⲥⲓⲟⲥ ⲇⲉ ⲉ̃ⲧⲁϥⲉ̃ⲙⲓ ϫⲉ ϥⲛⲁ-
ⲥⲱⲧⲉⲙ ⲛ̃ⲥⲱϥ ⲁⲛ ⲁϥⲗⲟϫϥ ⲉϥⲥⲁϫⲓ ⲛⲉⲙⲁϥ ⲁϥⲧⲏⲓϥ


### 0005

ⲉⲑⲣⲟⲩⲁ̃ⲣⲉϩ ⲉ̃ⲣⲟϥ ⲛⲁϥϯ ⲛⲁϥ ⲡⲉ ⲛ̃ⲧⲉϥⲧⲣⲟⲫⲏ ⲙ̃ⲙⲏⲛⲓ
ⲟⲩⲱⲓⲕ ⲛⲉⲙ ⲟⲩⲙⲱⲟⲩ
Ⲉϥⲛⲏⲟⲩ ⲇⲉ ⲉ̃ⲃⲟⲗ ⲛ̃ϫⲉ ⲡⲓⲁⲅⲓⲟⲥ ⲛ̃ⲟⲩⲉϩⲟⲟⲩ ϩⲏⲡⲡⲉ
ⲓⲥ ⲟⲩⲃⲉⲗⲗⲉ ⲉϥϩⲉⲙⲥⲓ ⲉϥϣⲁⲧⲙⲉⲑⲛⲁⲓ *ⲡⲉϫⲉ ⲇⲓⲟⲛⲏⲥⲓⲟⲥ
ⲛⲁϥ ϫⲉ ϩⲱⲗ ⲙⲁϯϩⲟ ⲉ̃ⲡⲓⲣⲱⲙⲓ ⲛ̃ⲧⲉ ⲫ︦ϯ︦ ϩⲓⲛⲁ
ⲛ̃ⲧⲉϥⲧⲁⲗⲉ ⲛⲉϥϫⲓϫ ⲉ̃ϫⲉⲛ ⲛⲉⲕⲃⲁⲗ ⲭⲛⲁⲛⲁⲩ ⲉ̃ⲃⲟⲗ
ⲛ̃ϯⲟⲩⲛⲟⲩ ⲁϥⲱϣ ⲉ̃ⲃⲟⲗ ⲉϥϫⲱ ⲙ̃ⲙⲟⲥ ϫⲉ ⲫⲣⲱⲙⲓ
ⲙ̃ⲫ︦ϯ︦ ⲁ̃ⲣⲓⲃⲟⲏⲑⲓⲛ ⲉ̃ⲣⲟⲓ ϩⲓⲛⲁ ⲛ̃ⲧⲁⲛⲁⲩ ⲉ̃ⲃⲟⲗ ⲡⲉϫⲉ ⲡⲓ-
ⲙⲁⲕⲁⲣⲓⲟⲥ ⲛⲁϥ ϫⲉ ⲙ̃ⲡⲉ ⲡⲉⲛϭ︦ⲥ︦ ⲓⲏ︦ⲥ︦ ϫⲟⲥ ⲛ̃ϩⲗⲓ
ⲛ̃ⲣⲱⲙⲓ ϫⲉ ⲛⲁⲩ ⲉ̃ⲃⲟⲗ ⲁⲗⲗⲁ ⲕⲁⲧⲁ ⲡⲉⲕⲛⲁϩϯ ⲉ̃ⲥⲉ-
ϣⲱⲡⲓ ⲛⲁⲕ ⲧⲟⲧⲉ ⲁϥⲭⲱ ⲛ̃ⲛⲉϥϫⲓϫ ⲉ̃ϫⲉⲛ ⲛⲉϥⲃⲁⲗ
ⲉϥϫⲱ ⲙⲙⲟⲥ ϫⲉ ϧⲉⲛ ⲫⲣⲁⲛ ⲙ̃ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲉ̃ⲕⲉⲛⲁⲩ
ⲉ̃ⲃⲟⲗ ϧⲉⲛ ϯⲟⲩⲛⲟⲩ ⲁϥⲛⲁⲩ ⲉ̃ⲃⲟⲗ ⲁϥⲱϣ ⲉ̃ⲃⲟⲗ
ⲉϥϫⲱ ⲙ̃ⲙⲟⲥ ϫⲉ ⲟⲩⲁⲓ ⲡⲉ ⲫ︦ϯ︦ ⲛ̃ⲛⲓⲭⲣⲏⲥⲧⲓⲁ̃ⲛⲟⲥ ⲫ︦ϯ︦
ⲛⲁⲡⲁ ⲓⲥⲁⲁⲕ ϩⲏⲡⲡⲉ ⲓⲥ ⲟⲩⲥϩⲓⲙⲓ ⲁⲥⲱϣ ⲉ̃ⲃⲟⲗ ⲉⲥϫⲱ
ⲙ̃ⲙⲟⲥ ϫⲉ ⲡⲁϭ︦ⲥ︦ ⲙⲁⲣⲉ ⲡⲉⲕⲛⲁⲓ ⲧⲁϩⲟⲓ ϫⲉ ⲁⲛⲟⲕ ⲟⲩϫⲟ-
ⲃⲓ ⲛⲉⲙ ⲡⲁϣⲏⲣⲓ ⲡⲉϫⲉ ⲡⲓⲙⲁⲕⲁⲣⲓⲟⲥ ⲛⲁⲥ ϫⲉ ⲉ̃ⲣⲉϣⲉⲙ-
ϣⲓ ⲛ̃ⲛⲓⲙ ⲛ̃ⲛⲟⲩϯ ⲡⲉϫⲁⲥ ϫⲉ ⲉⲓϣⲉⲙϣⲓ ⲉⲡⲓⲍⲉⲩⲥ ⲛⲉⲙ
ⲡⲓⲉⲣⲙⲏⲥ ⲡⲉϫⲉ ⲡⲓⲁⲅⲓⲟⲥ ⲛⲁⲥ ϫⲉ ⲛ̃ⲑⲟ ⲟⲩϩⲏⲕⲓ ⲟⲩⲟϩ
ⲛⲉⲕⲉⲛⲟⲩϯ ϩⲁⲛϩⲏⲕⲓ ⲛⲉ ⲉϣⲱⲡ ⲛ̃ⲧⲉⲥⲱⲧⲉⲙ ⲛ̃ⲥⲱⲓ
ⲡⲥⲙⲟⲩ ⲙ̃ⲡϭ︦ⲥ︦ ⲛⲁϣⲱⲡⲓ ⲛⲉⲙⲉ ⲙⲁϣⲉ ⲛⲉ ϣⲉⲙϣⲓ
ⲙ̃ⲡⲭ︦ⲥ︦ ⲡⲉϥⲥⲙⲟⲩ ⲛⲁϣⲱⲡⲓ ⲛⲉⲙⲉ
*Ⲛⲁϥϣⲟⲡ ⲡⲉ ⲛ̃ϫⲉ ⲡⲓⲙⲁⲕⲁⲣⲓⲟⲥ ϧⲉⲛ ⲡⲏⲓ ⲙ̃ⲡⲓⲙⲁ-
ⲧⲟⲓ ϣⲁⲧⲉ ⲡⲓϩⲏⲅⲉⲙⲱⲛ ⲧⲁⲥⲑⲟϥ ⲉ̃ⲣⲏⲥ ⲉⲧⲁϥⲓ̃ ⲇⲉ ⲛⲁϥ-
ϣⲓⲛⲓ ⲛ̃ⲇⲓⲟ̃ⲛⲏⲥⲓⲟⲥ ⲡⲉ ϫⲉ ⲁϥⲑⲱⲧ ⲛ̃ϩⲏⲧ ⲛ̃ϫⲉ ⲡⲓⲭⲣⲏⲥ-
ⲧⲓⲁ̃ⲛⲟⲥ ⲉⲉⲣϣⲟⲩϣⲱⲟⲩϣⲓ ⲡⲉϫⲉ ⲇⲓⲟⲛⲏⲥⲓⲟⲥ ⲛⲁϥ ϫⲉ
ⲟⲩⲉ̃ⲣⲟⲕϩⲕ ⲛⲉⲙ ⲡⲓⲁ̃ⲡⲟⲗⲗⲱⲛ ⲛⲉⲙ ⲡⲓⲍⲉⲩⲥ ⲓⲥϫⲉⲛ


### 0006

ϯⲛⲟⲩ ⲉⲓϣⲉⲙϣⲓ ⲙ̃ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲡϣⲏⲣⲓ ⲙ̃ⲫ︦ϯ︦
ⲉⲧⲟⲛϧ ϣⲁ ⲉⲛⲉϩ ⲛⲉⲙ ⲡⲓⲡⲛ︦ⲁ︦ ⲉⲑⲟⲩⲁⲃ ⲡⲉϫⲉ ⲡⲓϩⲏⲅⲉ-
ⲙⲱⲛ ⲛⲁϥ ϫⲉ ⲙ̃ⲙⲟⲛ ϩⲱⲃ ⲛ̃ⲧⲏⲓ ⲛⲉⲙⲁⲕ ⲁⲛ ⲁⲗⲗⲁ
ϯⲛⲁⲟⲩⲟⲣⲡⲕ ⲙ̃ⲡⲉⲕⲑⲣⲓⲃⲟⲩⲛⲟⲥ ⲡⲉϫⲉ ⲇⲓⲟⲛⲏⲥⲓⲟⲥ ⲛⲁϥ ϫⲉ
ϥⲟⲛϧ ⲛ̃ϫⲉ ⲫ︦ϯ︦ ⲛⲁⲃⲃⲁ̃ ⲓ̃ⲥⲁⲁⲕ ϫⲉ ⲭⲛⲁⲟⲩⲱⲙ ⲁⲛ
ⲟⲩⲇⲉ ⲭⲛⲁⲥⲱ ⲁⲛ ϣⲁⲧⲉⲕϯ ⲛ̃ⲧⲁⲁ̃ⲡⲟⲫⲁⲥⲓⲥ ϩⲓⲛⲁ
ⲛ̃ⲧⲁϭⲓ ⲙ̃ⲡⲓⲭⲗⲟⲙ ⲛ̃ⲧⲉ ⲡⲭ︦ⲥ︦ ⲛ̃ϩⲣⲏⲓ ϧⲉⲛ ⲧⲉϥⲙⲉⲧⲟⲩⲣⲟ
ⲉⲧⲁϥⲧⲱⲛϥ ⲇⲉ ⲛ̃ϫⲉ ⲡⲓϩⲏⲅⲉⲙⲱⲛ ϫⲉ ⲉϥⲛⲁϣⲉ ⲛⲁϥ
ⲉ̃ⲡⲉϥⲏⲓ ⲁϥϣⲱϣⲧ ⲛ̃ϫⲉ ⲡⲉϥϩⲁⲣⲙⲁ ⲙ̃ⲡⲉϥϣϫⲉⲙϫⲟⲙ
ⲛ̃ϩⲱⲗ ⲉ̃ⲡⲓⲁ̃ⲣⲓⲥⲧⲟⲛ ⲡⲉϫⲁϥ ⲛ̃ⲇⲓⲟⲛⲏⲥⲓⲟⲥ ϫⲉ ⲁⲕⲟⲩⲱⲛϩ
ⲉ̃ⲃⲟⲗ ⲙ̃ⲫⲟⲟⲩ ϫⲉ ⲛ̃ⲑⲟⲕ ⲟⲩⲙⲁⲅⲟⲥ ⲛ̃ⲑⲟϥ ⲇⲉ ⲡⲉϫⲁϥ
ⲛⲁϥ ϫⲉ ⲁ̃ⲛⲟⲕ ⲟⲩⲙⲁⲅⲟⲥ ⲁⲛ ⲁⲗⲗⲁ ⲁ̃ⲛⲟⲕ ⲟⲩⲃⲱⲕ
ⲛ̃ⲧⲉ ⲡⲭ︦ⲥ︦ ⲧⲟⲧⲉ ⲡⲓϩⲏⲅⲉⲙⲱⲛ ⲁϥⲥϧⲁⲓ *ⲛⲧⲉϥⲁ̃ⲡⲟⲫⲁⲥⲓⲥ
ⲉⲟⲩⲟⲛ ⲛ̃ⲧⲁⲥ ⲙ̃ⲙⲁⲩ ⲙ̃ⲡⲁⲓⲧⲩⲡⲟⲥ² ⲙ̃ⲡⲁⲓⲣⲏϯ ϫⲉ ⲇⲓⲟ-
ⲛⲏⲥⲓⲟⲥ ⲡⲓⲙⲁⲧⲟⲓ ⲁϥⲉⲣⲁⲧⲥⲱⲧⲉⲙ ⲛ̃ⲥⲁ ϯⲕⲉⲗⲉⲩⲥⲓⲥ ⲛ̃ⲧⲉ
ⲛⲓⲟⲩⲣⲱⲟⲩ ϯⲉⲣⲕⲉⲗⲉⲩⲓⲛ ⲉⲱ̃ⲗⲓ ⲛ̃ⲧⲉϥⲁ̃ⲫⲉ ⲉⲧⲁⲩⲟⲗϥ
ⲇⲉ ⲥⲁ ⲡⲉⲙⲉⲛⲧ ⲛ̃ϯⲃⲁⲕⲓ ⲉⲫⲙⲁ ⲙ̃ⲡⲓⲑⲉⲁⲧⲣⲟⲛ ⲁⲩⲱ̃ⲗⲓ
ⲛ̃ⲧⲉϥⲁ̃ⲫⲉ ⲁϥϫⲱⲕ ⲉ̃ⲃⲟⲗ ⲛ̃ⲧⲉϥⲙⲁⲣⲧⲩⲣⲓⲁ̃ ⲛ̃ⲥⲟⲩⲉ︦ ⲙ̃ⲡⲁ-
ϣⲟⲛⲥ ϧⲉⲛ ⲟⲩϩⲓⲣⲏⲛⲏ ⲁ̃ⲙⲏⲛ
Ⲡⲉϫⲉ ⲡⲓϩⲏⲅⲉⲙⲱⲛ ⲛ̃ⲁⲃⲃⲁ ⲓ̃ⲥⲁⲁⲕ ϫⲉ ϩⲏⲡⲡⲉ ⲓⲥ ⲡⲓ-
ⲙⲁⲧⲟⲓ ⲁϥⲙⲟⲩ ⲛ̃ⲧⲉⲕⲗⲱⲓϫⲓ ϯⲛⲁⲟⲗⲕ ⲇⲉ ⲉ̃ⲡϣⲁϯ
ⲛ̃ⲧⲁⲉⲣⲇⲟⲕⲓⲙⲁⲍⲓⲛ ⲙ̃ⲙⲟⲕ ⲁϥⲧⲁⲗⲟϥ ⲛⲉⲙⲁϥ ⲉ̃ⲡⲓϫⲟⲓ
ⲁϥⲉⲛϥ ⲉ̃ⲡϣⲁϯ ⲉⲡⲉϥⲣⲁⲥϯ ⲇⲉ ⲁϥϩⲉⲙⲥⲓ ϩⲓ ⲡⲓⲃⲏⲙⲁ
ⲛ̃ϫⲉ ⲡⲓϩⲏⲅⲉⲙⲱⲛ ⲁϥϫⲟⲥ ⲉ̃ⲑⲣⲟⲩⲓⲛⲓ ⲛⲁϥ ⲙ̃ⲡⲓⲙⲁⲕⲁⲣⲓⲟⲉ
ⲁⲃⲃⲁ ⲓ̃ⲥⲁⲁⲕ ⲉⲧⲁⲩⲉⲛϥ ⲇⲉ ⲡⲉϫⲁϥ ⲛⲁϥ ϫⲉ ⲥⲱⲧⲉⲙ


### 0007

ⲛ̃ⲥⲱⲓ ⲁ̃ⲣⲓⲑⲩⲥⲓⲁ̃ ϩⲓⲛⲁ ⲛ̃ⲧⲉⲕⲉⲣⲉ̃ⲃⲟⲗ ⲛ̃ⲛⲁⲓⲙⲏϣ ⲛ̃ϧⲓⲥⲓ
ϯϯⲁ̃ⲥⲟ ⲉ̃ⲣⲟⲕ ⲉ̃ⲙⲁϣⲱ ⲡⲉϫⲉ ⲡⲓⲁ̃ⲅⲓⲟⲥ ⲛⲁϥ ϫⲉ ⲓⲥϫⲉ ⲁⲕ-
ϯⲁ̃ⲥⲟ ⲉ̃ⲣⲟⲓ ⲛ̃ⲥⲁϥ ⲙ̃ⲫⲟⲟⲩ ϩⲱϥ ⲙ̃ⲡⲉⲣϯⲁ̃ⲥⲟ ⲉ̃ⲣⲟⲓ ⲧⲟⲧⲉ
ⲁϥϫⲟⲥ ⲉⲑⲣⲟⲩⲁϣϥ ⲉ̃ⲡⲓⲉⲣⲙⲏⲧⲁⲣⲓⲟⲛ ⲛ̃ⲥⲉϩⲱⲕⲓ ⲙ̃ⲙⲟϥ ⲡⲓ-
ⲁ̃ⲅⲓⲟⲥ ⲇⲉ ⲁϥⲉⲣⲥⲫⲣⲁⲅⲓⲍⲓⲛ ⲙ̃ⲙⲟϥ *ⲉϥϫⲱ ⲙ̃ⲙⲟⲥ ϫⲉ ϧⲉⲛ
ⲫⲣⲁⲛ ⲙ̃ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ⲁ̃ⲣⲓ-
ⲃⲟⲏ̃ⲑⲓⲛ ⲉ̃ⲣⲟⲓ ⲡⲁⲥⲱⲧⲏⲣ ⲛⲁⲅⲁⲑⲟⲥ ϧⲉⲛ ϯⲟⲩⲛⲟⲩ ⲁ̃ ⲡⲓ-
ⲉⲣⲙⲏⲧⲁⲣⲓⲟⲛ ⲕⲱϣ ⲁϥⲉⲣⲃ︦ ϧⲉⲛ ⲧⲉϥⲙⲏϯ ⲉ̃ⲧⲁⲩⲛⲁⲩ ⲇⲉ
ⲛ̃ϫⲉ ⲛⲁϯⲧⲁⲝⲓⲥ ⲉ̃ϯϣⲫⲏⲣⲓ ⲉ̃ⲧⲁⲥϣⲱⲡⲓ ⲁⲩⲱϣ ⲉ̃ⲃⲟⲗ ϫⲉ
ⲟⲩⲁⲓ ⲡⲉ ⲫ︦ϯ︦ ⲛ̃ⲛⲓⲭⲣⲏⲥⲧⲓⲁ̃ⲛⲟⲥ ⲫ︦ϯ︦ ⲛ̃ⲁⲃⲃⲁ ⲓⲥⲁⲁⲕ ⲁϥ-
ϫⲟⲥ ⲛ̃ϫⲉ ⲡⲓϩⲏⲅⲉⲙⲱⲛ ⲉ̃ⲧⲁⲗⲟϥ ⲉ̃ⲟⲩϭⲗⲟϫ ⲛ̃ⲃⲉⲛⲓⲡⲓ
ⲛ̃ⲥⲉⲥⲁϩϯ ϧⲁⲣⲟϥ ϣⲁⲧⲉϥⲙⲟⲩⲛⲕ ⲉ̃ⲡⲧⲏⲣϥ︦ ⲁϥⲑⲣⲟⲩϫⲉϣ
ⲑⲏⲛ ⲛⲉⲙ ⲗⲁⲙϫⲁⲡⲧ ⲉϧⲣⲏⲓ ⲉ̃ⲧⲉϥϣⲃⲱⲃⲓ ⲛⲁϥϫⲱ
ⲙ̃ⲙⲟⲥ ⲛⲁϥ ⲡⲉ ⲛ̃ϫⲉ ⲡⲓϩⲏⲅⲉⲙⲱⲛ ϫⲉ ⲥⲱⲧⲉⲙ ⲛ̃ⲥⲱⲓ
ⲙ̃ⲡⲉⲣⲙⲟⲩ ⲛ̃ⲕⲁⲕⲱⲥ ⲡⲉϫⲉ ⲡⲓⲙⲁⲕⲁⲣⲓⲟⲥ ⲛⲁϥ ϫⲉ ⲃⲁ-
ⲥⲁⲛⲟⲥ ⲛⲓⲃⲉⲛ ⲉ̃ⲧⲉϩⲛⲁⲕ ⲁⲣⲓⲧⲟⲩ ⲛⲏⲓ ϯⲛⲁϥⲁⲓ ϧⲁⲣⲱⲟⲩ
ϧⲉⲛ ϯϫⲟⲙ ⲛ̃ⲧⲉ ⲡⲭ︦ⲥ︦ ⲡⲉϫⲉ ⲡⲓϩⲏⲅⲉⲙⲱⲛ ϫⲉ ⲁⲗⲓⲧϥ
ⲉ̃ⲡⲓϣⲧⲉⲕⲟ ϣⲁϯⲥⲟϭⲛⲓ ϫⲉ ⲟⲩ ⲡⲉ ⲉϯⲛⲁⲁⲓϥ ⲛⲁϥ
ⲁⲩϭⲓⲧϥ ⲉⲡⲓϣⲧⲉⲕⲟ
Ⲉⲡⲉϥⲣⲁⲥϯ ⲇⲉ ⲁϥϩⲉⲙⲥⲓ ϩⲓ ⲡⲓⲃⲏⲙⲁ ϩⲏⲡⲡⲉ ⲓⲥ ⲁ̃ⲣⲓⲁ̃-
ⲛⲟⲥ ⲡⲓϩⲏⲅⲉⲙⲱⲛ ⲁϥⲁ̃ⲙⲟⲛⲓ ⲉ̃ϯⲃⲁⲕⲓ ⲁⲩⲉⲣⲁⲥⲡⲁⲍⲉⲥⲑⲉ
ⲛ̃ⲛⲟⲩⲉ̃ⲣⲏⲟⲩ *ⲡⲉϫⲉ ⲕⲟⲩⲗⲕⲓⲁ̃ⲛⲟⲥ ⲛⲁⲣⲓⲁⲛⲟⲥ ϫⲉ ⲟⲩⲟⲛ
ⲟⲩⲭⲣⲏⲥⲧⲓⲁ̃ⲛⲟⲥ ⲙ̃ⲡⲁⲓⲙⲁ ⲙ̃ⲡⲓϣϫⲉⲙϫⲟⲙ ⲉ̃ⲣⲟϥ ⲉⲉⲣⲑⲩ-
ⲥⲓⲁ̃ ⲛ̃ⲛⲓⲛⲟⲩϯ ⲛ̃ⲧⲉ ⲡⲟⲩⲣⲟ ⲡⲉϫⲉ ⲁ̃ⲣⲓⲁ̃ⲛⲟⲥ ⲛⲁϥ ϫⲉ
ⲙⲁⲧⲁⲙⲟⲓ ⲉ̃ⲣⲟϥ ⲉⲧⲁⲩⲓ̃ⲛⲓ ⲛⲁϥ ⲙ̃ⲡⲓⲁ̃ⲅⲓⲟⲥ ⲡⲉϫⲉ ⲁⲣⲓⲁ̃ⲛⲟⲥ
ⲛⲁϥ ϫⲉ ⲛ̃ⲑⲟⲕ ⲡⲉ ⲡⲓⲙⲁⲅⲟⲥ ⲛ̃ⲣⲉⲙϯⲫⲣⲉ ⲉⲕϯϣⲱϣ ⲛ̃ⲛⲓ-
ⲛⲟⲩϯ ⲛ̃ⲧⲉ ⲛⲓⲟⲩⲣⲱⲟⲩ ⲡⲉϫⲉ ⲡⲓⲙⲁⲕⲁⲣⲓⲟⲥ ⲛⲁϥ ϫⲉ


### 0008

ⲁ̃ⲛⲟⲕ ⲟⲩⲙⲁⲅⲟⲥ ⲁⲛ ⲁⲗⲗⲁ ⲉⲓⲏⲡ ⲉ̃ⲫⲓⲱⲧ ⲛⲉⲙ ⲡϣⲏⲣ
ⲛⲉⲙ ⲡⲓⲡⲛ︦ⲁ︦ ⲉⲑⲟⲩⲁⲃ ⲡⲉϫⲉ ⲁ̃ⲣⲓⲁ̃ⲛⲟⲥ ⲛ̃ⲕⲟⲩⲗⲕⲓⲁ̃ⲛⲟⲥ ϫⲉ
ⲟⲩⲟⲣⲡϥ ⲛⲉⲙⲏⲓ ⲁ̃ⲛⲟⲕ ϯⲛⲁⲉⲣⲡⲉⲧⲉⲩⲓⲛ ⲙ̃ⲙⲟϥ ⲡⲉϫⲉ
ⲕⲟⲩⲗⲕⲓⲁⲛⲟⲥ ⲙ̃ⲡⲓⲁⲅⲓⲟⲥ ⲁⲃⲃⲁ ⲓ̃ⲥⲁⲁⲕ ϫⲉ ⲉⲡⲓⲇⲏ ⲙ̃ⲡⲉⲕ-
ⲥⲱⲧⲉⲙ ⲛ̃ⲥⲱⲓ ϩⲏⲡⲡⲉ ϯⲛⲁⲉⲣⲉⲝⲱⲣⲓⲍⲓⲛ ⲙ̃ⲙⲟⲕ ⲧⲟⲧⲉ ⲁϥ-
ⲟⲩⲟⲣⲡϥ ⲛⲉⲙ ⲁ̃ⲣⲓⲁ̃ⲛⲟⲥ ⲁϥⲉⲣϩⲱⲧ ⲉ̃ⲣⲏⲥ ⲡⲓⲙⲁⲕⲁⲣⲓⲟⲥ ⲇⲉ
ⲁⲩϩⲓⲧϥ ⲉ̃ⲡⲓⲟⲩⲉⲛⲧ ⲛ̃ⲧⲉ ⲡⲓϫⲟⲓ ϩⲏⲡⲡⲉ ⲁϥⲟⲩⲟⲛϩϥ ⲉ̃ⲣⲟϥ
ϩⲓ ⲡⲓⲟⲩⲉⲛⲧ ⲛ̃ⲧⲉ ⲡⲓϫⲟⲓ ⲛ̃ϫⲉ ⲡⲓⲥⲱⲧⲏⲣ ⲉⲧⲁϥⲛⲁⲩ ⲉ̃ⲣⲟϥ
ⲛ̃ϫⲉ ⲡⲓⲙⲁⲕⲁⲣⲓⲟⲥ ⲁϥϩⲓⲧϥ ⲉ̃ϧⲣⲏⲓ ⲁϥⲟⲩⲱϣⲧ ⲙ̃ⲙⲟϥ
ⲉϥϫⲱ ⲙ̃ⲙⲟⲥ ϫⲉ ⲁⲣⲓⲡⲁⲙⲉⲩⲓ ⲡϭ︦ⲥ︦ ⲛ̃ⲧⲉⲕϯϫⲟⲙ ⲛⲏⲓ *ϣⲁ-
ϯϫⲱⲕ ⲙ̃ⲡⲁⲇⲣⲟⲙⲟⲥ ⲉ̃ⲃⲟⲗ ⲡⲉϫⲉ ⲡϭ︦ⲥ︦ ⲛⲁϥ ϫⲉ ⲙ̃ⲡⲉⲣ-
ⲉⲣϩⲟϯ ϯⲛⲁⲭⲁⲕ ⲛ̃ⲥⲱⲓ ⲁⲛ ⲛ̃ⲑⲟⲕ ⲛⲉⲙ ⲛⲏ ⲉⲧⲟⲛⲓ ⲙ̃ⲙⲟⲕ
ϣⲁⲧⲉⲧⲉⲛⲉⲣⲕⲗⲏⲣⲟⲛⲟⲙⲓⲛ ⲛ̃ϯⲙⲉⲧⲟⲩⲣⲟ ⲛⲁⲓ ⲇⲉ ⲉϥϫⲱ
ⲙ̃ⲙⲱⲟⲩ ⲁϥϯ ⲛ̃ϯϩⲓⲣⲏⲛⲏ ⲛⲁϥ ⲁϥϣⲉ ⲉⲡϣⲱⲓ ⲉ̃ⲛⲓⲫⲏ-
ⲟⲩⲓ ⲡⲓⲙⲁⲕⲁⲣⲓⲟⲥ ⲇⲉ ⲁⲃⲃⲁ ⲓ̃ⲥⲁⲁⲕ ⲁϥⲧⲱⲃϩ ⲉⲡϣⲱⲓ ϩⲁ
ⲡϭ︦ⲥ︦ ⲉϥϫⲱ ⲙ̃ⲙⲟⲥ ϫⲉ ⲫ︦ϯ︦ ⲉ̃ⲧⲁϥⲉⲣⲡⲗⲁⲍⲓⲛ ⲙ̃ⲙⲟⲓ ⲓⲥϫⲉⲛ
ⲉⲓϧⲉⲛ ⲑⲛⲉϫⲓ ⲛ̃ⲧⲉ ⲧⲁⲙⲁⲩ ⲁⲣⲓⲃⲟⲛ̃ⲑⲓⲛ ⲉ̃ⲣⲟⲓ ϧⲉⲛ ⲙⲁⲓ
ⲛⲓⲃⲉⲛ ⲉϯⲛⲁϩⲱⲗ ⲉ̃ⲣⲟϥ ⲙ̃ⲡⲉⲣⲟⲩⲉⲓ ⲥⲁⲃⲟⲗ ⲙ̃ⲙⲟⲓ ⲙⲏ-
ⲡⲟⲧⲉ ⲛ̃ⲧⲟⲩϫⲟⲥ ⲛ̃ϫⲉ ⲛⲓⲉⲑⲛⲟⲥ ϫⲉ ⲁϥⲑⲱⲛ ⲡⲟⲩⲛⲟⲩϯ
Ⲛⲁⲓ ⲇⲉ ⲉϥϫⲱ ⲙ̃ⲙⲱⲟⲩ ⲉⲩⲥⲱⲧⲉⲙ ⲉ̃ⲣⲟϥ ⲛ̃ϫⲉ ⲛⲓⲛⲉϥ
ⲛ̃ⲧⲉ ⲡⲓϫⲟⲓ ⲡⲉϫⲱⲟⲩ ⲛ̃ⲛⲟⲩⲉⲣⲏⲟⲩ ϫⲉ ⲫⲁⲓ ⲟⲩⲣⲱⲙⲓ
ⲛ̃ⲧⲉ ⲫ︦ϯ︦ ⲡⲉ ⲉⲧⲁ ⲟⲩⲁⲓ ⲇⲉ ⲛ̃ⲛⲓⲛⲉϥ ⲟⲩⲱⲛ ⲙ̃ⲡⲓⲟⲩⲉⲛⲧ
ⲛ̃ⲧⲉ ⲡⲓϫⲟⲓ ⲡⲉϫⲁϥ ⲛⲁϥ ϫⲉ ⲭⲉⲣⲉ ⲁϥⲉⲣⲟⲩⲱ ⲛ̃ϫⲉ ⲡⲓⲙⲁ-
ⲕⲁⲣⲓⲟⲥ ϫⲉ ⲕⲩⲣⲓ ⲭⲉⲣⲉ ⲡⲁⲥⲟⲛ ⲉⲑⲛⲁⲛⲉϥ ⲁⲣⲓ ϯⲁⲅⲁⲡⲏ
ⲛ̃ⲧⲉⲕⲧⲥⲟⲓ ⲛ̃ⲟⲩⲕⲟⲩϫⲓ ⲙ̃ⲙⲱⲟⲩ ⲁϥⲓ̃ⲛⲓ ⲛⲁϥ ⲙ̃ⲡⲓⲕⲁ-
ⲧⲟⲩⲥ ⲁϥⲥⲱ ⲡⲉϫⲁϥ ⲙ̃ⲡⲓⲛⲉϥ ϫⲉ ⲉ̃ⲣⲉ ⲡϭ︦ⲥ︦ ⲉⲣ ⲡⲓⲛⲁⲓ
ⲛⲉⲙⲁⲕ ϧⲉⲛ ⲡⲓⲉ̃ϩⲟⲟⲩ ⲛ̃ⲧⲉ ⲡⲓⲛⲓϣϯ ⲛ̃ϩⲁⲡ *ⲡⲓⲛⲉϥ ⲇⲉ
ⲁϥϭⲓ ⲙ̃ⲡⲓⲕⲁⲧⲟⲩⲥ ⲉ̃ⲣⲉ ⲟⲩⲕⲟⲩϫⲓ ⲙ̃ⲙⲱⲟⲩ ⲥⲟϫⲡ ⲛ̃ϧⲏⲧϥ


### 0009

ⲁϥⲫⲟⲛϥ ⲉ̃ϫⲉⲛ ⲟⲩⲁⲓ ⲛ̃ⲛⲓⲛⲉϥ ϩⲱⲥ ⲉϥⲥⲱⲃⲓ ⲡⲓⲛⲉϥ ⲇⲉ
ⲉ̃ⲧⲉⲙⲙⲁⲩ ⲟⲩⲃⲁⲗ ⲛ̃ⲟⲩⲱⲧ ⲡⲉ ⲉⲧⲉ ⲙ̃ⲙⲟϥ ⲛ̃ϯⲟⲩⲛⲟⲩ
ⲁϥⲟⲩⲱⲛ ⲙⲫⲣⲏϯ ϫⲉ ⲙⲡⲉϥϣⲱⲛⲓ ⲉ̃ⲛⲉϩ ⲛⲓⲛⲉϥ ⲇⲉ ⲉ̃ⲧⲁⲩ-
ⲛⲁⲩ ⲉ̃ⲫⲏ ⲉ̃ⲧⲁϥϣⲱⲡⲓ ⲁⲩϯⲱⲟⲩ ⲙ̃ⲫ︦ϯ︦ ⲫⲏ ⲉ̃ⲧⲓⲣⲓ
ⲛ̃ⲛⲓⲛⲓϣϯ ⲛ̃ϣⲫⲏⲣⲓ ⲙ̃ⲙⲁⲩⲁⲧϥ ⲁⲩⲓ̃ⲛⲓ ⲛⲁϥ ⲟⲛ
ⲛ̃ϩⲁⲛⲱⲓⲕ ϫⲉ ⲛ̃ⲧⲉϥⲟⲩⲱⲙ ⲡⲉϫⲉ ⲡⲓⲙⲁⲕⲁⲣⲓⲟⲥ ⲛⲱⲟⲩ
ϫⲉ ⲡⲁⲛⲟⲩϯ ⲉ̃ϥⲉⲥⲙⲟⲩ ⲉ̃ⲣⲱⲧⲉⲛ ϯⲛⲁⲟⲩⲱⲙ ⲁⲛ ϣⲁϯ-
ϫⲱⲕ ⲙ̃ⲡⲁⲇⲣⲟⲙⲟⲥ ⲉ̃ⲃⲟⲗ ⲛ̃ⲧⲁⲟⲩⲱⲙ ⲛⲟⲩⲱⲓⲕ ϧⲉⲛ
ⲑⲙⲉⲧⲟⲩⲣⲟ ⲛ̃ⲛⲓⲫⲏⲟⲩⲓ̃ ⲛⲉⲙ ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦
Ϧⲉⲛ ⲡϫⲱⲕ ⲙ̃ⲓ︦ⲋ︦ ⲛⲉϩⲟⲟⲩ ⲁϥⲁ̃ⲙⲟⲛⲓ ⲉ̃ⲡⲓϩⲟⲣⲙⲉⲥ
ⲁⲩⲓ̃ⲛⲓ ⲙ̃ⲡⲓⲙⲁⲕⲁⲣⲓⲟⲥ ⲉϩⲣⲏⲓ ⲉ̃ϯⲡⲟⲗⲓⲥ ⲛⲓⲣⲱⲙⲓ ⲇⲉ ⲛ̃ⲧⲉ
ϯⲡⲟⲗⲓⲥ ⲛⲉ ϩⲁⲛⲙⲁⲓϣⲉⲙⲙⲟ ⲉ̃ⲙⲁϣⲱ ⲛⲉ ⲉⲧⲁϥϫⲓⲙⲓ
ⲙ̃ⲡⲓⲙⲁⲕⲁⲣⲓⲟⲥ ⲫⲓⲗⲟⲝⲉⲛⲟⲥ ⲛⲉⲙ ⲁ̃ⲡⲁ ⲥⲓⲣⲓⲛⲏ ϧⲉⲛ ⲡⲓ-
ϣⲧⲉⲕⲟ ⲁϥⲉⲣⲁⲥⲡⲁⲍⲉⲥⲑⲉ ⲙ̃ⲙⲱⲟⲩ ⲡⲉϫⲱⲟⲩ ⲛⲁϥ ϫⲉ
ϫⲉⲙⲛⲟⲙϯ ⲡⲉⲛⲙⲉⲛⲣⲓⲧ ⲛ̃ⲥⲟⲛ ⲁ ⲡⲓϩⲙⲟⲧ ⲧⲁϩⲟⲛ ⲉ̃ⲧⲁⲛ-
ⲉⲣⲁⲥⲡⲁⲍⲉⲥⲑⲉ ⲙ̃ⲙⲟⲕ *ⲡⲓⲙⲁⲕⲁⲣⲓⲟⲥ ⲇⲉ ⲁ̃ⲡⲁ ⲥⲓⲣⲓⲛⲏ
ⲡⲉϫⲁϥ ϫⲉ ⲉ̃ⲣⲉ ⲡϭ︦ⲥ︦ ⲫ︦ϯ︦ ϯϫⲟⲙ ⲛⲁⲛ ⲛ̃ⲧⲉⲛⲧⲁϩⲟⲛ
ⲉ̃ⲣⲁⲧⲉⲛ ϧⲉⲛ ⲡⲉϥⲣⲁⲛ ⲉⲑⲟⲩⲁⲃ ϣⲁⲧⲉⲛϫⲱⲕ ⲉ̃ⲃⲟⲗ ⲙ̃ⲡⲉⲛ-
ⲁ̃ⲅⲱⲛ ⲁ̃ⲙⲏⲛ ⲡⲓⲙⲁⲕⲁⲣⲓⲟⲥ ⲇⲉ ⲁⲃⲃⲁ ⲓ̃ⲥⲁⲁⲕ
ⲛⲁϥϫⲱ ⲙ̃ⲙⲟⲥ ⲛⲱⲟⲩ ⲡⲉ ϫⲉ ⲁ̃ⲣⲓⲡⲁⲙⲉⲩⲓ̃ ⲛⲁⲓⲟϯ ϫⲉ
ⲁ̃ⲛⲟⲕ ⲟⲩⲕⲟⲩϫⲓ ⲛⲁⲗⲟⲩ ϯⲥⲱⲟⲩⲛ ⲛ̃ϩⲗⲓ ⲁⲛ ⲡⲉϫⲉ
ⲁ̃ⲡⲁ ⲫⲓⲗⲟⲝⲉⲛⲟⲥ ⲛⲁϥ ϫⲉ ϫⲉⲙⲛⲟⲙϯ ⲡⲁⲥⲟⲛ ⲡⲓϩⲏⲅⲉⲙⲱⲛ
ⲛⲁⲥⲱⲧⲉⲙ ⲉ̃ⲣⲟⲕ ⲛ̃ϣⲟⲣⲡ ⲭⲛⲁϭⲓ ⲙ̃ⲡⲓⲭⲗⲟⲙ ⲛ̃ⲧⲉ ⲧⲉⲕ-
ⲙⲁⲣⲧⲩⲣⲓⲁ̃ ⲁⲗⲗⲁ ⲁ̃ⲣⲓⲡⲉⲛⲙⲉⲩⲓ̃ ϧⲉⲛ ⲡⲏⲓ ⲙ̃ⲫ︦ϯ ϧⲉⲛ
ⲧⲫⲁϣⲓ ⲛ̃ⲧⲉ ⲡⲓⲉ̃ϫⲱⲣϩ ⲁⲩⲧⲱⲃϩ ⲛ̃ϫⲉ ⲛⲏ ⲉⲑⲟⲩⲁⲃ


### 0010

ⲁϥⲟⲩⲱⲛ ⲛ̃ⲣⲱϥ ⲛ̃ϫⲉ ⲁⲃⲃⲁ ⲓ̃ⲥⲁⲁⲕ ⲁϥⲥⲙⲟⲩ ⲉ̃ⲫ︦ϯ︦
ⲉϥϫⲱ ⲙ̃ⲙⲟⲥ ϫⲉ ϯⲛⲁⲥⲙⲟⲩ ⲉ̃ⲣⲟⲕ ⲫ︦ϯ ϧⲉⲛ ⲡⲁⲱⲛϧ
ϯⲛⲁⲉⲣⲯⲁⲗⲓⲛ ⲉ̃ⲡⲁⲛⲟⲩϯ ϩⲱⲥ ⲉⲓϣⲟⲡ ⲙⲁⲣⲉ ⲧⲁⲡⲣⲟⲥ-
ⲉⲩⲭⲏ ⲓ ⲉⲡϣⲱⲓ ⲙ̃ⲡⲉⲕⲙ̃ⲑⲟ ⲙ̃ⲫⲣⲏϯ ⲛ̃ⲟⲩⲥⲑⲟⲓⲛⲟⲩϥⲓ
ⲉ̃ⲁⲕⲁⲣⲉϩ ⲉ̃ⲣⲟⲓ ϧⲉⲛ ⲧϧⲏⲓⲃⲓ ⲛ̃ⲧⲉ ⲛⲉⲕⲧⲉⲛϩ ⲟⲩⲟϩ ⲛⲁ-
ϩⲙⲉⲧ ϧⲉⲛ ⲡⲉⲕⲣⲁⲛ ⲉⲑⲟⲩⲁⲃ ϫⲉ ⲫⲱⲕ ⲡⲉ ⲡⲓⲱ̃ⲟⲩ ϣⲁ
ⲉ̃ⲛⲉϩ ⲁⲙⲏⲛ
Ⲉⲡⲉϥⲣⲁⲥϯ ⲇⲉ ⲁϥϩⲉⲙⲥⲓ ϩⲓ ⲡⲓⲃⲏⲙⲁ ⲛ̃ϫⲉ ⲁ̃ⲣⲓⲁ̃ⲛⲟⲥ²
ⲡⲉϫⲁϥ ⲙ̃ⲡⲁⲓⲣⲏϯ ϫⲉ ⲁ̃ⲛⲓⲟⲩⲓ ⲛⲏⲓ ⲙ̃ⲡⲁⲓⲙⲁⲅⲟⲥ ⲛ̃ⲣⲉⲙϯ
ⲫⲣⲉ *ⲛⲓⲕⲉⲥⲧⲱⲛⲁⲣⲓⲟⲥ ⲇⲉ ⲁⲩⲓ̃ ⲉ̃ⲡⲓϣⲧⲉⲕⲟ ⲡⲉϫⲉ ⲡⲓⲙⲁ-
ⲕⲁⲣⲓⲟⲥ ⲁⲃⲃⲁ ⲓ̃ⲥⲁⲁⲕ ⲛ̃ⲛⲏ ⲉⲑⲟⲩⲁⲃ ϫⲉ ⲁ̃ⲣⲓⲡⲁⲙⲉⲩⲓ̃
ⲛ̃ⲧⲉ ⲫ︦ϯ︦ ϯϫⲟⲙ ⲛⲏⲓ ⲡⲉϫⲱⲟⲩ ⲛⲁϥ ϫⲉ ⲉ̃ⲣⲉ ⲫ︦ϯ︦ ⲫⲏ
ⲉ̃ⲧⲉⲛϣⲉⲙϣⲓ ⲙ̃ⲙⲟϥ ⲙ̃ⲡⲓⲉ̃ϩⲟⲟⲩ ⲛⲉⲙ ⲡⲓⲉ̃ϫⲱⲣϩ ⲉϥⲉ̃ϯϫⲟⲙ
ⲛⲁⲕ ϣⲁⲧⲉⲕϫⲱⲕ ⲉ̃ⲃⲟⲗ ⲙⲡⲉⲕⲇⲣⲟⲙⲟⲥ ⲉⲧⲁⲩⲉⲛϥ ⲇⲉ
ⲙ̃ⲡⲉⲙⲑⲟ ⲙ̃ⲡⲓϩⲏⲅⲉⲙⲱⲛ ⲡⲉϫⲁϥ ⲛⲁϥ ⲉⲃⲟⲗϩⲓⲧⲉⲛ
ⲡⲓⲉⲣⲙⲉⲛⲉⲩⲧⲏⲥ ϫⲉ ⲙ̃ⲡⲁⲧⲉ ⲡⲉⲕϩⲏⲧ ⲑⲱⲧ ⲟⲛ ⲉⲉⲣⲑⲩⲥⲓⲁ̃
ⲛ̃ⲛⲓⲛⲟⲩϯ ⲉⲧⲧⲁⲓⲏⲟⲩⲧ ⲛⲁⲓ ⲉ̃ⲧⲁ ⲛⲓⲟⲩⲣⲱⲟⲩ ⲥϧⲁⲓ ⲉⲑ-
ⲃⲏⲧⲟⲩ ⲛ̃ⲧⲉⲕⲛⲟϩⲉⲙ ⲉ̃ⲃⲟⲗϧⲉⲛ ⲛⲁⲓⲃⲁⲥⲁⲛⲟⲥ ⲡⲉϫⲉ
ⲡⲓⲁ̃ⲅⲓⲟⲥ ⲁⲃⲃⲁ ⲓ̃ⲥⲁⲁⲕ ⲛⲁϥ ϫⲉ ⲟⲩⲥⲟⲡ ⲁⲛ ⲡⲉ ⲟⲩⲇⲉ
ⲃ︦ ⲁⲛ ⲛⲉ ⲁⲓⲟⲩⲱ ⲉⲓϫⲱ ⲙ̃ⲙⲟⲥ ⲛⲁⲕ ϫⲉ ϯⲛⲁⲉⲣⲑⲩⲥⲓⲁ̃
ⲛ̃ⲛⲉⲕⲛⲟⲩϯ ⲁⲛ ⲁⲓⲟⲩⲱ ⲉⲓϫⲱ ⲙ̃ⲙⲟⲥ ⲛⲁⲕ ϫⲉ ⲡⲓ-
ⲕⲟⲥⲙⲟⲥ ⲧⲏⲣϥ ⲁϥⲛⲁϣⲉ ⲛⲁϥ ⲉⲡⲧⲁⲕⲟ ⲡⲱⲟⲩ ⲇⲉ
ⲛ̃ⲑⲟϥ ⲙ̃ⲡⲁⲛⲟⲩϯ ϥⲛⲁⲙⲟⲩⲛ ⲉ̃ⲃⲟⲗ ϣⲁ ⲉ̃ⲛⲉϩ
Ⲉⲧⲁϥⲥⲱⲧⲉⲙ ⲇⲉ ⲉ̃ⲛⲁⲓ ⲛ̃ϫⲉ ⲡⲓϩⲏⲅⲉⲙⲱⲛ ⲁϥϫⲱⲧ
ⲉ̃ⲙⲁϣⲱ ⲁϥⲑⲣⲟⲩϯ ⲕⲟⲩⲫⲟⲥ ϧⲉⲛ ⲣⲱϥ ϣⲁⲧⲟⲩⲕⲱⲣϫ
ⲛ̃ⲛⲉϥⲛⲁϫϩⲓ ⲡⲓⲁⲅⲓⲟⲥ ⲇⲉ ⲁϥⲉⲣⲁ̃ⲅⲱⲛⲓⲍⲉⲥⲑⲉ ϧⲉⲛ ⲛⲁⲓ


### 0011

ⲧⲏⲣⲟⲩ *ⲓ̃ⲧⲁ ⲟⲛ ⲁϥⲑⲣⲟⲩⲓ̃ⲣⲓ ⲙ̃ⲡⲥⲱⲙⲁ ⲙ̃ⲡⲓⲁⲅⲓⲟⲥ
ⲛ̃ⲥⲱⲣϫ ⲥⲱⲣϫ ϧⲉⲛ ⲟⲩⲑⲟⲕ ⲙ̃ⲃⲉⲛⲓⲡⲓ ⲁⲩⲫⲱⲛ ⲛⲟⲩ-
ϫⲓⲣ ⲛⲉⲙ ⲟⲩⲡⲉⲡⲣⲟⲥ ⲉ̃ϫⲉⲛ ⲛⲉϥϣⲁϣ ⲁϥⲑⲣⲟⲩⲫⲱⲣⲕ
ⲛ̃ⲛⲉϥⲓⲉⲃ ⲛⲟⲩⲁⲓ ⲟⲩⲁⲓ ⲛⲁⲛⲉϥϫⲓϫ ⲛⲉⲙ ⲛⲁⲛⲉϥϭⲁⲗⲁⲩϫ
ⲁϥⲑⲣⲟⲩⲫⲉⲛ ϩⲉⲙϫ ⲉ̃ϫⲱⲟⲩ ⲛⲉⲙ ⲕⲟⲛⲓⲁ̃ ⲛⲁⲧⲱϣⲉⲙ
ⲁϥⲑⲣⲟⲩⲓ̃ⲛⲓ ⲛ̃ϩⲁⲛⲥⲁϩ ⲛ̃ⲃⲉⲛⲓⲡⲓ ⲉⲩⲗⲟⲃϣ ⲛ̃ⲭⲣⲱⲙ ⲁⲩ-
ⲧⲏⲓⲧⲟⲩ ⲉ̃ϧⲟⲩⲛ ⲉ̃ⲛⲉϥⲙⲁϣϫ ⲁⲩϧⲓϯ ⲙ̃ⲙⲱⲟⲩ ⲛ̃ϧⲏⲧⲟⲩ
ϣⲁⲧⲉ ⲡⲓϣⲁϩ ⲛⲉϩⲥⲓ ϧⲉⲛ ⲡⲉϥⲁ̃ⲛⲕⲉⲫⲁⲗⲟⲥ ⲡⲓⲁⲅⲓⲟⲥ ⲇⲉ
ⲁϥⲧⲱⲟⲩⲛ ϧⲁ ⲛⲁⲓ ⲧⲏⲣⲟⲩ ϧⲉⲛ ⲟⲩⲙⲉⲧϫⲱⲣⲓ
Ⲡⲓⲙⲏϣ ⲧⲏⲣϥ ⲛⲉⲙ ⲡⲓϩⲏⲅⲉⲙⲱⲛ ⲛⲁⲩⲉⲣϣⲫⲏⲣⲓ ⲡⲉ
ⲁⲣⲓⲁⲛⲟⲥ ⲇⲉ ⲡⲓϩⲏⲅⲉⲙⲱⲛ ⲁϥⲕⲟⲧϥ ⲉ̃ⲁⲃⲃⲁ ⲓ̃ⲥⲁⲁⲕ ⲡⲓ-
ϫⲁⲣϩⲏⲧ ⲡⲉϫⲁϥ ⲛⲁϥ ϫⲉ ⲁ̃ⲗⲏⲑⲱⲥ ⲁ̃ ⲛⲉⲕⲙⲁⲅⲓⲁ̃ ⲟⲩ-
ⲱⲛϩ ⲉ̃ⲃⲟⲗ ⲙ̃ⲫⲟⲟⲩ ⲡⲉϫⲉ ⲡⲓⲁ̃ⲅⲓⲟⲥ ⲛⲁϥ ϫⲉ ⲭⲛⲁⲩ
ⲛ̃ⲑⲟⲕ ⲁⲛ ⲱ̃ ⲡⲓⲁⲧϩⲏⲧ ϫⲉ ⲁ̃ ⲡⲁϭ︦ⲥ︦ ⲓⲏ︦ⲥ︦ ⲓ ⲛ̃ⲟⲩⲏⲣ ⲛ̃ⲥⲟⲡ
ⲁϥⲛⲟϩⲉⲙ ⲙ̃ⲙⲟⲓ ϧⲉⲛ ⲛⲉⲕⲉⲡⲓⲃⲟⲩⲗⲏ ⲛⲉⲙ ⲛⲉⲕⲃⲁⲥⲁⲛⲟⲥ
ⲡⲉϫⲉ ⲁⲣⲓⲁⲛⲟⲥ ⲛⲁϥ ϫⲉ ⲁ̃ⲗⲏⲑⲱⲥ ⲙ̃ⲡⲉ ϩⲗⲓ ⲛⲁϩⲙⲉⲕ
ⲉ̃ⲛⲁⲓ ⲧⲏⲣⲟⲩ ⲓ̃ⲙⲏⲧⲓ ⲉ̃ⲛⲉⲕⲙⲁⲅⲓⲁ̃ ⲉⲧⲉⲕⲓⲣⲓ ⲙ̃ⲙⲱⲟⲩ ϧⲉⲛ
ⲡⲁⲓⲣⲁⲛ ϫⲉ ⲓⲏ︦ⲥ︦ ⲫⲏ ⲛ̃ⲑⲟⲕ ⲉ̃ⲧⲉⲕⲛⲁϩϯ ⲉ̃ⲣⲟϥ ⲁⲗⲗⲁ ϣⲉ
ⲡⲟⲩϫⲁⲓ ⲛ̃ⲛⲓⲛⲟⲩϯ *ⲡⲓⲁ̃ⲡⲟⲗⲗⲱⲛ ⲛⲉⲙ ϯⲁⲣⲧⲉⲙⲓⲥ
ⲑⲙⲁⲩ ⲛ̃ⲛⲓⲛⲟⲩϯ ϫⲉ ϯⲛⲁⲓ̃ⲣⲓ ⲛ̃ⲛⲉⲕⲙⲉⲗⲟⲥ ⲛ̃ϣⲁⲩ
ϣⲁⲩ ϣⲁϯⲉⲙⲓ ϫⲉ ⲛⲉⲕⲙⲁⲅⲓⲁ̃ ⲛⲁϣⲛⲁϩⲙⲉⲕ ⲉ̃ⲃⲟⲗϧⲉⲛ
ⲛⲁϫⲓϫ
Ⲡⲉϫⲉ ⲡⲓϩⲏⲅⲉⲙⲱⲛ ⲛⲁϥ ⲟⲛ ϫⲉ ⲛⲓⲙ ⲡⲉ ⲡⲉⲕⲣⲁⲛ
ⲡⲉϫⲉ ⲡⲓⲁⲅⲓⲟⲥ ⲛⲁϥ ϫⲉ ⲡⲁⲣⲁⲛ ⲉ̃ⲧⲁ ⲛⲁⲓⲟϯ ⲧⲏⲓϥ ⲉ̃ⲣⲟⲓ
ϧⲉⲛ ⲧⲥⲁⲣⲝ ⲕⲁⲧⲁ ⲡⲓⲕⲟⲥⲙⲟⲥ ⲡⲉ ⲓ̃ⲥⲁⲁⲕ ⲡⲓⲣⲁⲛ ⲉ̃ϯ-
ⲉⲣⲡⲟⲗⲓⲧⲉⲩⲉⲥⲑⲉ ⲛ̃ϧⲏⲧϥ ⲡⲉ ⲭⲣⲏⲥⲧⲓⲁ̃ⲛⲟⲥ ⲡⲉϫⲉ ⲡⲓ-
ϩⲏⲅⲉⲙⲱⲛ ⲛⲁϥ ϫⲉ ⲓ̃ⲥⲁⲁⲕ ⲛⲉⲕⲥⲁϫⲓ ⲙ̃ⲙⲉⲧⲥⲟ ⲛⲁϯ-
ϩⲏⲟⲩ ⲛⲁⲕ ⲁⲛ ⲛ̃ϩⲗⲓ ⲥⲱⲧⲉⲙ ⲛ̃ⲥⲱⲓ ⲁ̃ⲣⲓϣⲟⲩϣⲱⲟⲩϣⲓ


### 0012

ⲛ̃ⲛⲓⲛⲟⲩϯ ⲡⲉϫⲉ ⲡⲓⲙⲁⲕⲁⲣⲓⲟⲥ ⲛⲁϥ ϫⲉ ⲁⲛⲟⲕ ⲟⲩⲥⲟϭ
ⲁⲛ ⲁⲗⲗⲁ ⲁ̃ⲛⲟⲕ ⲟⲩⲥⲁⲃⲉ ⲁⲓϣⲁⲛⲥⲱⲧⲉⲙ ⲛ̃ⲥⲱⲕ ⲛ̃ⲑⲟϥ
ϯⲛⲁⲉⲣⲥⲟϭ ⲁϥϫⲟⲥ ⲛ̃ϫⲉ ⲡⲓϩⲏⲅⲉⲙⲱⲛ ⲉⲧⲁⲗⲟϥ ⲉ̃ⲡⲓⲉⲣⲙⲏ-
ⲧⲁⲣⲓⲟⲛ ⲛ̃ⲥⲉϩⲱⲕⲓ ⲙ̃ⲙⲟϥϣⲁⲧⲉ ⲛⲏ ⲉⲧⲥⲁϧⲟⲩⲛ ⲙ̃ⲙⲟϥ
ⲧⲏⲣⲟⲩ ⲫⲱⲛ ⲉ̃ⲃⲟⲗ ⲡⲉϫⲉ ⲡⲓϩⲏⲅⲉⲙⲱⲛ ⲛⲁϥ ϫⲉ ⲁ̃ⲣⲓ-
ⲑⲩⲥⲓⲁ̃ ⲛ̃ⲧⲁⲭⲁⲕ ⲉ̃ⲃⲟⲗ ⲡⲉϫⲉ ⲡⲓⲙⲁⲕⲁⲣⲓⲟⲥ ⲛⲁϥ ϫⲉ
ⲡⲁⲥⲱⲙⲁ ⲙⲉⲛ ⲕⲉⲣϣⲓϣⲓ ⲙ̃ⲙⲟϥ ϧⲉⲛ ⲃⲁⲥⲁⲛⲟⲥ ⲛⲓⲃⲉⲛ
ⲧⲁⲯⲩⲭⲏ ⲇⲉ ⲛⲉⲙ ⲡⲁⲡ︦ⲛ︦ⲁ *ⲙ̃ⲙⲟⲛⲧⲉⲕ ϩⲗⲓ ⲛⲉⲣϣⲓϣⲓ
ⲉ̃ϫⲱⲟⲩ ⲁϥⲉⲣⲕⲉⲗⲉⲩⲓⲛ ⲛ̃ϫⲉ ⲡⲓϩⲏⲅⲉⲙⲱⲛ ϫⲉ ⲁⲛⲓⲟⲩⲓ̃
ⲛⲟⲩⲛⲉϩ ⲛⲉⲙ ⲟⲩⲙⲟⲩⲗϩ ⲛⲉⲙ ⲟⲩⲗⲁⲙϫⲁⲧⲡ ϩⲓⲧⲟⲩ
ⲉ̃ⲡⲓⲭⲁⲗⲕⲓⲟⲛ ⲥⲁϩϯ ϧⲁⲣⲱⲟⲩ ϣⲁⲧⲟⲩⲃⲉⲣⲃⲉⲣ ϫⲟϣⲟⲩ
ⲉ̃ⲧⲉϥϣⲃⲱⲃⲓ ⲛ̃ϣⲟⲣⲡ ⲡⲁⲗⲓⲛ ⲟⲛ ϫⲱϣ ⲉ̃ϫⲉⲛ ⲡⲉϥⲥⲱⲙⲁ
ⲧⲏⲣϥ ⲁⲩⲓ̃ⲣⲓ ⲛⲁϥ ⲙ̃ⲡⲁⲓⲣⲏϯ ⲟⲛ ⲡⲓⲁ̃ⲅⲓⲟⲥ ⲇⲉ ⲉ̃ⲧⲁϥⲛⲁⲩ
ⲉ̃ⲡⲓⲭⲁⲗⲕⲓⲟⲛ ⲛⲁϥϫⲱ ⲙ̃ⲙⲟⲥ ⲡⲉ ϫⲉ ⲡⲁϭ︦ⲥ︦ ⲓⲏ︦ⲥ︦ ⲁⲣⲓ-
ⲃⲟⲏ̃ⲑⲓⲛ ⲉ̃ⲣⲟⲓ ⲕⲁⲧⲁ ⲫⲣⲏϯ ⲉ̃ⲧⲁⲕⲟⲩⲱⲣⲡ ⲙ̃ⲡⲉⲕⲁⲅⲅⲉⲗⲟⲥ
ⲁⲕⲛⲟϩⲉⲙ ⲙ̃ⲡⲓⲅ︦ ⲛⲁⲅⲓⲟⲥ ⲉ̃ⲃⲟⲗϧⲉⲛ ϯϩⲣⲱ ⲛ̃ⲭⲣⲱⲙ ⲛ̃ⲧⲉ
ⲛⲁⲃⲟⲩⲭⲟⲇⲟⲛⲟⲥⲟⲣ ⲡⲟⲩⲣⲟ ⲡⲁⲓⲣⲏϯ ⲉ̃ⲕⲉⲛⲁϩⲙⲉⲧ ⲡⲁϭ︦ⲥ︦
ϫⲉ ⲛ̃ⲛⲉ ⲡⲓϩⲏⲅⲉⲙⲱⲛ ϫⲟⲥ ϫⲉ ⲁϥⲑⲱⲛ ⲡⲉϥⲛⲟⲩϯ ⲛⲁⲓ
ⲇⲉ ⲉ̃ⲧⲁϥϫⲟⲧⲟⲩ ⲁϥⲉⲣⲥⲫⲣⲁⲅⲓⲍⲓⲛ ⲙ̃ⲙⲟϥ ⲛ̃ⲅ︦ ⲛ̃ⲥⲟⲡ ⲉϥϫⲱ
ⲙ̃ⲙⲟⲥ ϫⲉ ϧⲉⲛ ⲫⲣⲁⲛ ⲙ̃ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡ︦ⲛ︦ⲁ︦
ⲉⲑⲟⲩⲁⲃ ⲧⲟⲧⲉ ⲁϥϩⲱⲗ ⲉ̃ϧⲣⲏⲓ ⲉ̃ⲡⲓⲭⲁⲗⲕⲓⲟⲛ ⲁϥⲧⲱⲃϩ
ⲙ̃ⲫ︦ϯ︦ ⲉϥϫⲱ ⲙ̃ⲙⲟⲥ ϫⲉ ⲡϭ︦ⲥ︦ ⲫ︦ϯ︦ ⲡⲓⲡⲁⲛⲧⲟⲕⲣⲁⲧⲱⲣ
ⲫⲓⲱⲧ ⲙ̃ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲁ̃ⲙⲟⲩ ϣⲁⲣⲟⲓ ⲙ̃ⲡⲉⲣⲟⲩⲉⲓ ⲥⲁ-
ⲃⲟⲗ ⲙ̃ⲙⲟⲓ
Ϧⲉⲛ ϯⲟⲩⲛⲟⲩ ⲓⲥ ⲙⲏⲭⲁⲏⲗ ⲡⲓⲁⲣⲭⲏ*ⲁⲅⲅⲉⲗⲟⲥ ⲁϥⲓ̃


### 0013

ⲉ̃ⲃⲟⲗ ϧⲉⲛ ⲧⲫⲉ ⲁϥⲱ̃ϣⲉⲙ ⲙ̃ⲡⲓⲭⲁⲗⲕⲓⲟⲛ ⲁϥⲑⲣⲉϥϣⲱⲡⲓ
ⲙ̃ⲫⲣⲏϯ ⲛⲟⲩⲙⲱⲟⲩ ⲉϥⲕⲏⲃ ⲛⲁϯⲡⲟⲗⲓⲥ ⲇⲉ ⲉ̃ⲧⲁⲩⲛⲁⲩ
ⲉ̃ⲫⲏ ⲉ̃ⲧⲁϥϣⲱⲡⲓ ⲛⲁⲩⲱϣ ⲉ̃ⲃⲟⲗ ⲡⲉ ⲉⲩⲟⲩⲱϣ ⲉ̃ϩⲓⲱ̃ⲛⲓ
ⲉ̃ϫⲉⲛ ⲡⲓϩⲏⲅⲉⲙⲱⲛ ϫⲉ ⲓⲉ ⲛ̃ⲧⲉⲕⲭⲁϥ ⲉ̃ⲃⲟⲗ ⲓⲉ ⲛ̃ⲧⲉⲕϯ
ⲛ̃ⲧⲉϥⲁ̃ⲡⲟⲫⲁⲥⲓⲥ ⲧⲟⲧⲉ ⲡⲓϩⲏⲅⲉⲙⲱⲛ ⲁϥⲟⲩⲁϩⲥⲁϩⲛⲓ ⲛ̃ⲥⲉ-
ⲧⲁⲗⲟϥ ⲉ̃ⲟⲩϫⲟⲓ ⲛ̃ⲥⲉⲟⲗϥ ⲉ̃ⲧⲁⲩⲃⲁϩ ϧⲉⲛ ⲡϫⲓⲛⲑⲣⲉϥϯ
ⲛ̃ⲧⲉϥⲁ̃ⲡⲟⲫⲁⲥⲓⲥ ⲁϥⲥϧⲁⲓ ⲙ̃ⲡⲁⲓⲣⲏϯ ϫⲉ ⲓⲥⲁⲁⲕ ⲡⲓⲣⲉⲙϯⲫⲣⲉ
ϧⲉⲛ ⲡⲑⲟϣ ⲡⲁⲛⲁⲩ ⲉ̃ⲡⲓⲇⲏ ⲡⲉϥⲟⲩⲱϣ ⲡⲉ ⲫⲁⲓ ⲉ̃ⲙⲟⲩ
ⲉ̃ϫⲉⲛ ⲫⲣⲁⲛ ⲛ̃ⲓⲏ︦ⲥ︦ ⲁ̃ⲛⲟⲕ ϯⲉⲣⲕⲉⲗⲉⲩⲓⲛ ⲉ̃ⲱ̃ⲗⲓ ⲛ̃ⲧⲉϥⲁ̃ⲫⲉ
ϧⲉⲛ ⲣⲱⲥ ⲛ̃ⲧⲥⲏϥⲓ ⲡⲁⲓⲣⲏϯ ⲁϥⲥⲉⲕ ⲡⲓⲃⲏⲗⲗⲁ ⲁϥⲧⲱⲛϥ
ⲉ̃ⲃⲟⲗ ϩⲓ ⲡⲓⲃⲏⲙⲁ
Ⲉⲧⲁⲩⲓ̃ ⲛ̃ϫⲉ ⲛⲓϩⲩⲡⲉⲣⲉⲧⲏⲥ ⲛ̃ⲧⲉ ϯⲁⲛⲟⲙⲓⲁ̃ ⲁⲩⲥⲱⲕ
ⲙ̃ⲡⲓⲁ̃ⲅⲓⲟⲥ ⲉ̃ⲣⲉ ⲡⲓⲭⲁⲙⲟⲥ² ⲧⲟⲓ ⲉ̃ⲣⲱϥ ⲉⲧⲁⲩⲉⲛϥ ⲇⲉ
ⲉ̃ⲧⲁⲩⲃⲁϩ ⲁ̃ ϯⲃⲁⲕⲓ ⲧⲏⲣⲥ ⲓ̃ ⲉ̃ⲃⲟⲗ ϩⲓⲧϩⲏ ⲙ̃ⲙⲟϥ ⲁⲩⲉⲣ-
ϣⲫⲏⲣⲓ ⲙ̃ⲡⲉϥⲥⲁⲓ ⲛⲉⲙ ⲡⲓⲱ̃ⲟⲩ ⲉⲧⲕⲱϯ ⲉ̃ⲣⲟϥ ⲉⲧⲁⲩⲟⲗϥ
ⲇⲉ ϫⲉ ⲉⲩⲛⲁⲱ̃ⲗⲓ ⲛ̃ⲧⲉϥⲁ̃ⲫⲉ *ⲡⲉϫⲉ ⲡⲓⲁ̃ⲅⲓⲟⲥ ⲁⲃⲃⲁ
ⲓ̃ⲥⲁⲁⲕ ⲛ̃ⲛⲓϩⲩⲡⲉⲣⲉⲧⲏⲥ ⲉ̃ⲧⲁⲙⲟⲛⲓ ⲙ̃ⲙⲟϥ ϫⲉ ⲡⲉⲧⲉⲛⲟⲩϫⲁⲓ
ⲉ̃ⲣⲱⲧⲉⲛ ⲛⲁⲥⲛⲏⲟⲩ ⲱ̃ⲟⲩ ⲛ̃ϩⲏⲧ ⲛⲉⲙⲏⲓ ⲛⲟⲩⲕⲟⲩϫⲓ
ⲛ̃ⲧⲁϣⲗⲏⲗ ⲉ̃ϩⲣⲏⲓ ϩⲁ ⲡⲁⲛⲟⲩϯ ⲙ̃ⲡⲁⲧⲉⲧⲉⲛϧⲱⲧⲉⲃ
ⲙ̃ⲙⲟⲓ ⲛⲓⲕⲉⲥⲧⲱⲛⲁⲣⲓⲟⲥ ⲇⲉ ⲁⲩⲥⲟⲕⲟⲩ ⲥⲁⲃⲟⲗ ⲙ̃ⲙⲟϥ
ⲡⲓⲙⲁⲕⲁⲣⲓⲟⲥ ⲇⲉ ⲁⲃⲃⲁ ⲓ̃ⲥⲁⲁⲕ ⲁϥⲕⲱϯ ⲙ̃ⲡⲉϥϩⲟ ⲥⲁⲡⲥⲁ
ⲛ̃ϯⲁ̃ⲛⲁⲧⲟⲗⲏ ⲁϥⲟⲩⲱⲛ ⲛ̃ⲣⲱϥ ⲁϥϣⲗⲏⲗ ⲙ̃ⲡⲁⲓⲣⲏϯ
ⲛⲓⲁⲅⲅⲉⲗⲟⲥ ⲛ̃ⲧⲉ ⲫⲟⲩⲱⲓⲛⲓ ⲟ̃ϩⲓ ⲉ̃ⲣⲁⲧⲉⲛⲑⲏⲛⲟⲩ ⲛⲉⲙⲏⲓ
ⲙ̃ⲫⲟⲟⲩ ⲛⲓⲁⲣⲭⲏⲁⲅⲅⲉⲗⲟⲥ ⲛ̃ⲧⲉ ⲫⲟⲩⲱⲓⲛⲓ ⲟ̃ϩⲓ ⲉ̃ⲣⲁⲧⲉⲛ-
ⲑⲏⲛⲟⲩ ⲛⲉⲙⲏⲓ ⲙ̃ⲫⲟⲟⲩ ⲛⲓⲥⲉⲣⲁⲫⲓⲛ ⲛ̃ⲧⲉ ⲫⲟⲩⲱⲓⲛⲓ ⲟ̃ϩⲓ
ⲉ̃ⲣⲁⲧⲉⲛⲑⲏⲛⲟⲩ ⲛⲉⲙⲏⲓ ⲙ̃ⲫⲟⲟⲩ ⲛⲓⲗⲟⲩⲧⲟⲩⲣⲅⲟⲥ ⲛ̃ⲧⲉ


### 0014

ⲫⲟⲩⲱⲓⲛⲓ ⲟ̃ϩⲓ ⲉ̃ⲣⲁⲧⲉⲛⲑⲏⲛⲟⲩ ⲛⲉⲙⲏⲓ ⲙ̃ⲫⲟⲟⲩ ⲁⲙⲟⲩ
ϣⲁⲣⲟⲓ ⲙ̃ⲫⲟⲟⲩ ⲡⲁϭ︦ⲥ︦ ⲓⲏ︦ⲥ︦ ⲛ̃ⲧⲉⲕϯϫⲟⲙ ⲛⲏⲓ ⲙⲁⲣⲓⲉⲣ-
ⲡⲉⲙⲡϣⲁ ⲛ̃ⲥⲱⲧⲉⲙ ⲉ̃ⲧⲉⲕⲥⲙⲏ ϧⲁⲧϩⲏ ⲙ̃ⲡⲁϯⲙⲟⲩ ϩⲓⲛⲁ
ⲛ̃ⲧⲉ ⲡⲁϩⲏⲧ ⲑⲱⲧ ⲛ̃ϧⲣⲏⲓ ⲛ̃ϧⲏⲧ ⲛ̃ⲧⲁⲉⲣⲉ̃ⲧⲓⲛ ⲙ̃ⲙⲟⲕ
ⲙ̃ⲡⲁⲉ̃ⲧⲏⲙⲁ ⲉⲧϧⲉⲛ ⲡⲁϩⲏⲧ ϩⲱⲥ ⲇⲉ ⲉ̃ⲣⲉ ⲡⲓⲁ̃ⲅⲓⲟⲥ ⲁⲃⲃⲁ
ⲓ̃ⲥⲁⲁⲕ ϫⲱ ⲛ̃ⲛⲁⲓ ⲓⲥ ⲡϭ︦ⲥ︦ ⲓⲏ︦ⲥ︦ ⲁϥⲓ̃ ⲉ̃ⲃⲟⲗϧⲉⲛ ⲧⲫⲉ
*ⲉ̃ϥⲧⲁⲗⲏⲟⲩⲧ ⲉ̃ⲟⲩϩⲁⲣⲙⲁ ⲛ̃ⲟⲩⲱⲓⲛⲓ ⲉ̃ⲣⲉ ϩⲁⲛⲁⲛϣⲟ
ⲛ̃ⲁⲅⲅⲉⲗⲟⲥ ⲉⲣϩⲩⲙⲛⲟⲥ ⲉ̃ⲣⲟϥ ⲁϥⲧⲁϩⲛⲟ ⲙ̃ⲡⲓϩⲁⲣⲙⲁ
ⲥⲁⲡϣⲱⲓ ⲙ̃ⲡⲓⲙⲁ ⲉ̃ⲣⲉ ⲡⲓⲁ̃ⲅⲓⲟⲥ ⲙ̃ⲙⲟϥ ⲁ ⲡϭ︦ⲥ︦ ⲱϣ ⲉ̃ⲃⲟⲗ
ϧⲉⲛ ⲟⲩⲛⲓϣϯ ⲛ̃ⲥⲙⲏ ϫⲉ ⲁ̃ⲙⲟⲩ ⲉ̃ⲡϣⲱⲓ ϣⲁⲣⲟⲓ ⲡⲁⲙⲉⲛ-
ⲣⲓⲧ ⲓ̃ⲁⲁⲕ ϯⲛⲁϯ ⲛⲁⲕ ⲙ̃ⲡⲉⲕⲃⲉⲭⲉ ⲛ̃ⲧϣⲉⲃⲓⲱ ⲛ̃ⲛⲓϧⲓⲥⲓ
ⲉ̃ⲧⲁⲕϣⲟⲡⲟⲩ ⲉⲑⲃⲉ ⲡⲁⲣⲁⲛ ⲉ̃ⲧⲏⲙⲁ ⲛⲓⲃⲉⲛ ⲉ̃ⲧⲉⲕⲉⲣⲉ̃ⲡⲓ-
ⲑⲩⲙⲓⲛ ⲉ̃ⲣⲱⲟⲩ ϯⲛⲁⲉⲣⲭⲁⲣⲓⲍⲉⲥⲑⲉ ⲙ̃ⲙⲱⲟⲩ ⲛⲁⲕ ϫⲉ ⲟⲩ-
ⲣⲉϥϯ ⲉϥⲣⲁϣⲓ ⲡⲉ ⲡⲁⲓⲱⲧ
Ⲛⲁⲓ ⲇⲉ ⲉ̃ⲧⲁ ⲡⲓⲁⲅⲓⲟⲥ ⲁⲃⲃⲁ ⲓ̃ⲥⲁⲁⲕ ⲥⲟⲑⲙⲟⲩ ⲉ̃ⲣⲉ
ⲡⲓⲥⲱⲧⲏⲣ ϫⲱ ⲙ̃ⲙⲱⲟⲩ ⲛⲁϥ ⲁ ⲡⲉϥϩⲏⲧ ⲧⲁϫⲣⲟ ⲁϥⲥⲁ-
ϫⲓ ⲛⲉⲙ ⲡⲓⲥⲱⲧⲏⲣ ⲉϥϫⲱ ⲙ̃ⲙⲟⲥ ϫⲉ ⲥⲱⲧⲉⲙ ⲉ̃ⲣⲟⲓ
ⲡⲁϭ︦ⲥ︦ ⲛ̃ⲧⲉⲕⲑⲱⲧ ⲙ̃ⲡⲁϩⲏⲧ ϧⲉⲛ ⲫⲏ ⲉ̃ϯⲉⲣⲉ̃ⲧⲓⲛ ⲙ̃ⲙⲟϥ
ⲛ̃ⲧⲟⲧⲕ ⲕⲥⲱⲟⲩⲛⲟⲩ ⲡⲁϭ︦ⲥ︦ ϫⲉ ⲟⲩⲕⲟⲩϫⲓ ⲛ̃ϯⲙⲓ ⲡⲉ ⲡⲁ-
ϯⲙⲓ ⲙⲏⲡⲱⲧⲉ ⲛ̃ⲧⲉ ⲟⲩϫⲁϫⲓ ⲧⲱⲛϥ ⲉϩⲣⲏⲓ ⲉ̃ϫⲱϥ
ⲉⲕⲉⲟⲩⲱⲣⲡ ⲙ̃ⲙⲏⲭⲁⲏⲗ ⲡⲓⲁⲣⲭⲏⲁⲅⲅⲉⲗⲟⲥ ⲛ̃ⲧⲉϥⲉⲣ-
ⲃⲟⲛ̃ⲑⲓⲛ ⲉ̃ⲣⲱⲟⲩ ⲛ̃ⲧⲉϥϯϫⲟⲙ ⲛⲱⲟⲩ ⲛ̃ⲧⲉⲕⲧⲁⲕⲟ ⲛ̃ⲛⲟⲩ-
ϫⲁϫⲓ ⲁⲣⲉϣⲁⲛ ⲟⲩⲣⲱⲙⲓ ⲉⲣⲛⲟⲃⲓ ⲛ̃ⲧⲉϥⲓ︦ ⲉ̃ϫⲉⲛ ⲡⲁⲥⲱⲙⲁ
*ⲛ̃ⲧⲉϥⲧⲱⲃϩ ⲙ̃ⲙⲟⲕ ⲉ̃ⲕⲉⲭⲱ ⲛⲁϥ ⲉ̃ⲃⲟⲗ ⲛ̃ⲛⲉϥⲛ̃ⲟⲃⲓ
ⲙ̃ⲡⲁⲧⲉ ⲫⲣⲏ ϩⲱⲧⲡ ⲙ̃ⲡⲓⲉ̃ϩⲟⲟⲩ ⲉ̃ⲧⲉⲙⲙⲁⲩ ⲡⲉϫⲉ ⲡϭ︦ⲥ︦
ⲛⲁϥ ϫⲉ ⲉ̃ⲥⲉϣⲱⲡⲓ ⲙ̃ⲡⲁⲓⲣⲏϯ ⲡⲁⲙⲉⲛⲣⲓⲧ ⲡⲉϫⲉ ⲡⲓⲁ̃ⲅⲓⲟⲥ
ⲛⲁϥ ϫⲉ ⲉⲓⲉⲣⲉⲧⲓⲛ ⲙ̃ⲙⲟⲕ ⲉⲑⲃⲉ ⲫⲏ ⲉⲑⲛⲁⲕⲱⲥ ⲙ̃ⲡⲁ-


### 0015

ⲥⲱⲙⲁ ϧⲉⲛ ⲟⲩⲕⲁⲓⲥⲓ ⲉⲕⲉϩⲱⲃⲥ ⲙ̃ⲡⲉϥⲥⲱⲙⲁ ϧⲉⲛ ⲡⲓⲛⲁⲩ
ⲛ̃ⲧⲉ ⲧⲉϥⲁⲛⲁⲅⲕⲏ ⲛ̃ⲛⲉϥϣⲱⲡⲓ ⲉϥⲃⲏϣ ⲫⲏ ⲉⲑⲛⲁⲥϧⲁⲓ
ⲛ̃ⲧⲁⲙⲁⲣⲧⲩⲣⲓⲁ̃ ⲛ̃ⲧⲉϥⲟⲩⲟⲛϩⲧ ⲉ̃ⲃⲟⲗ ⲉⲕⲉⲥϧⲁⲓ ⲙ̃ⲡⲉϥⲣⲁⲛ
ϩⲓ ⲡϫⲱⲙ ⲙ̃ⲡⲱⲛϧ ⲫⲏ ⲉⲧⲛⲁϯ ⲉ̃ⲡⲁⲣⲁⲛ ⲉ̃ⲟⲩϣⲏⲣⲓ
ⲛ̃ⲧⲁϥ ϧⲉⲛ ⲟⲩⲱϣ ⲛ̃ϩⲏⲧ ⲉ̃ⲕⲉⲑⲱⲧ ⲙ̃ⲡⲉϥϩⲏⲧ ⲫⲏ
ⲉⲑⲛⲁϯ ⲛ̃ⲟⲩⲡⲣⲟⲥⲫⲟⲣⲁ ⲉ̃ⲡⲁⲧⲟⲡⲟⲥ ⲉ̃ⲕⲉϯ ⲛⲁϥ ⲉ̃ⲃⲟⲗϧⲉⲛ
ϯⲡⲣⲟⲥⲫⲟⲣⲁ ⲛ̃ⲁⲡⲉⲣⲁⲧⲟⲛ ϧⲉⲛ ⲡϫⲓⲛⲑⲣⲉ ⲁⲃⲃⲁ ⲓ̃ⲥⲁⲁⲕ
ϫⲉ ⲛⲁⲓ ⲁ̃ ⲡⲓⲥⲱⲧⲏⲣ ⲟⲩⲱ̃ϩⲉⲙ ⲛⲁϥ ϧⲉⲛ ⲟⲩⲥⲙⲏ
ⲙ̃ⲙⲉⲧⲣⲉⲙⲣⲁⲩϣ ⲉϥϫⲱ ⲙ̃ⲙⲟⲥ ϫⲉ ⲁ̃ⲙⲏⲛ ϯϫⲱ ⲙ̃ⲙⲟⲥ
ⲛⲁⲕ ϫⲉ ϩⲱⲃ ⲛⲓⲃⲉⲛ ⲉ̃ⲧⲁⲕⲉⲣⲉ̃ⲧⲓⲛ ⲙ̃ⲙⲱⲟⲩ ϯⲛⲁ-
ⲧⲏⲓⲧⲟⲩ ⲛⲁⲕ ⲛⲓⲕⲉⲭⲱⲟⲩⲛⲓ ⲉ̃ⲧⲉ ⲙ̃ⲡⲉⲕⲉⲣⲡⲟⲩⲙⲉⲩⲓ
ϯⲛⲁⲉⲣⲭⲁⲣⲓⲍⲉⲥⲑⲉ ⲙ̃ⲙⲱⲟⲩ ⲛⲁⲕ ⲓⲥ ⲙⲓⲭⲁⲏⲗ ⲡⲓⲛⲓϣϯ
ⲛ̃ⲁⲣⲭⲏⲁⲅⲅⲉⲗⲟⲥ ⲁⲓⲑⲁϣϥ ⲉ̃ⲡⲉⲕⲧⲟⲡⲟⲥ *ⲫⲏ ⲉⲧⲟⲩⲛⲁⲭⲱ
ⲙ̃ⲡⲉⲕⲥⲱⲙⲁ ⲛ̃ϧⲏⲧϥ ⲛ̃ⲧⲉϥⲉⲣⲇⲓⲁ̃ⲕⲟⲛⲓⲛ ⲉ̃ⲣⲟⲕ ϧⲉⲛ
ⲉ̃ⲧⲏⲙⲁ ⲛⲓⲃⲉⲛ ⲛ̃ⲧⲁⲗϭⲟ *ⲉⲧⲉ ⲛⲓⲣⲱⲙⲓ ⲛⲁϣⲓⲛⲓ ⲛ̃ⲥⲱⲟⲩ
ⲉ̃ⲃⲟⲗϩⲓⲧⲟⲧ
Ⲙⲉⲛⲉⲛⲥⲁ ⲛⲁⲓ ⲁⲃⲃⲁ ⲓ̃ⲥⲁⲁⲕ ⲕⲟⲧϥ ⲉ̃ⲛⲓⲕⲉⲥⲧⲱⲛⲁ-
ⲣⲓⲟⲥ ⲡⲉϫⲁϥ ⲛⲱⲟⲩ ϫⲉ ⲁ̃ⲙⲱⲓⲛⲓ ϫⲱⲕ ⲉ̃ⲃⲟⲗ ⲙ̃ⲫⲏ
ⲉ̃ⲧⲁⲩⲟⲩⲁϩⲥⲁϩⲛⲓ ⲙ̃ⲙⲟϥ ⲛⲱⲧⲉⲛ ⲡⲁⲓⲣⲏϯ ⲁⲩⲓ̃ ⲛ̃ϫⲉ
ⲛⲓⲕⲉⲥⲧⲱⲛⲁⲣⲓⲟⲥ ⲁⲩϯ ⲙ̃ⲡⲓⲭⲁⲙⲟⲥ ⲉ̃ⲣⲱϥ ⲁⲩⲭⲱ
ⲛ̃ⲧⲉϥⲁ̃ⲫⲉ ⲉϫⲉⲛ ⲟⲩⲛⲓϣϯ ⲛ̃ⲱⲛⲓ ⲁⲩϭⲱⲗⲕ ⲙ̃ⲡⲉϥⲙⲟⲩⲧ
ⲉ̃ⲃⲟⲗ ⲁⲩⲱ̃ⲗⲓ ⲛ̃ⲧⲉϥⲁ̃ⲫⲉ ⲛ̃ⲧⲥⲏϥⲓ ⲁϥⲓ̃ ⲉ̃ⲃⲟⲗ ϧⲉⲛ
ⲡⲉϥⲥⲱⲙⲁ ⲛ̃ϫⲉ ⲟⲩⲥⲛⲟϥ ⲛⲉⲙ ⲟⲩⲉ̃ⲣⲱϯ ⲡⲓⲙⲁ ⲉ̃ⲧⲁⲩⲱ̃ⲗⲓ
ⲛ̃ⲧⲉϥⲁ̃ⲫⲉ ⲙ̃ⲙⲟϥ ⲁϥⲕⲓⲙ ⲉ̃ⲡⲁⲓⲥⲁ ⲛⲉⲙ ⲫⲁⲓ ⲛ̃ⲅ︦ ⲛ̃ⲥⲟⲡ ⲁ
ⲟⲩϩⲟϯ ⲛⲉⲙ ⲟⲩⲥⲑⲉⲣⲧⲉⲣ ϣⲱⲡⲓ ϧⲉⲛ ϯⲡⲟⲗⲓⲥ ⲁ̃ ⲟⲩⲙⲏϣ


### 0016

ⲛ̃ⲣⲱⲙⲓ ⲥⲱⲧⲉⲙ ⲁⲩⲓ̃ ⲉ̃ⲃⲟⲗ ⲉ̃ⲛⲁⲩ ⲉ̃ϯϣⲫⲏⲣⲓ ⲉ̃ⲧⲁⲥϣⲱⲡⲓ
ⲉⲣⲉ ⲡⲓⲥⲛⲟϥ ⲛⲉⲙ ⲡⲓⲉ̃ⲣⲱϯ ⲥⲱⲕ ⲉ̃ⲃⲟⲗ ϧⲉⲛ ⲡⲥⲱⲙⲁ
ⲛⲁⲃⲃⲁ ⲓ̃ⲥⲁⲁⲕ ϩⲱⲥⲇⲉ ⲛⲓⲃⲉⲗⲗⲉⲩ ⲛⲉⲙ ⲛⲓϭⲁⲗⲉⲩ ⲛⲉⲙ
ⲛⲓⲕⲟⲩⲣ ⲛⲉⲙ ⲛⲓⲉ̃ⲃⲟ ⲉ̃ϣⲁⲩϭⲓ ⲉ̃ⲃⲟⲗϧⲉⲛ ⲡⲓⲥⲛⲟϥ ⲛⲉⲙ
ⲡⲓⲉ̃ⲣⲱϯ ⲉⲑⲛⲏⲟⲩ ⲉ̃ⲃⲟⲗϧⲉⲛ ⲡⲥⲱⲙⲁ *ⲙ̃ⲡⲓⲙⲁⲕⲁⲣⲓⲟⲥ
ϣⲁⲩϯ ⲉ̃ϫⲉⲛ ⲛⲟⲩⲙⲉⲗⲟⲥ ⲉⲑⲙⲟⲕϩ ϣⲁⲩⲟⲩϫⲁⲓ ⲛⲓⲃⲉⲗ-
ⲗⲉⲩ ⲛⲁⲩⲛⲁⲩ ⲉ̃ⲃⲟⲗ ⲡⲉ ⲛⲓϭⲁⲗⲉⲩ ⲛⲁⲩⲙⲟϣⲓ ⲡⲉ
ⲛⲓⲕⲟⲩⲣ ⲛⲁⲩⲥⲱⲧⲉⲙ ⲛⲓⲉ̃ⲃⲟ ⲛⲁⲩⲥⲁϫⲓ ⲡⲉ ⲫⲁⲓ ⲡⲉ
ⲡⲓⲣⲏϯ ⲉ̃ⲧⲁϥϫⲱⲕ ⲉ̃ⲃⲟⲗ ⲛ̃ⲧⲉϥⲙⲁⲣⲧⲩⲣⲓⲁ̃ ⲛ̃ϫⲉ ⲁⲃⲃⲁ
ⲓ̃ⲥⲁⲁⲕ ⲛ̃ⲥⲟⲩⲋ︦ ⲙ̃ⲡⲓ̃ⲁⲃⲟⲧ ⲡⲁϣⲟⲛⲥ ⲁϥϣⲉ ⲛⲁϥ ϣⲁ ⲫⲏ
ⲉ̃ⲧⲁϥⲙⲉⲛⲣⲓⲧϥ ⲡⲭ︦ⲥ︦ ⲁϥϭⲓ ⲙ̃ⲡⲓⲭⲗⲟⲙ ⲛⲁⲧⲧⲁⲕⲟ ϣⲁ
ⲉ̃ⲛⲉϩ ⲛ̃ⲧⲉ ⲛⲓⲉ̃ⲛⲉϩ ⲁ̃ⲙⲏⲛ
Ⲙⲉⲛⲉⲛⲥⲁ ⲛⲁⲓ ⲁϥⲓ̃ ⲛ̃ϫⲉ ⲡⲓⲡⲣⲟⲧⲟⲡⲟⲗⲓⲧⲏⲥ ⲁϥⲓ̃ⲛⲓ
ⲛ̃ⲟⲩⲗⲉⲛⲧⲓⲟⲛ ⲛ̃ϣⲉⲛⲥ ⲁϥⲧⲏⲓϥ ⲉ̃ⲧⲉϥⲁ̃ⲫⲉ ⲁϥⲓ̃ⲛⲓ ⲇⲉ ⲟⲛ
ⲛ̃ϩⲁⲛⲥⲩⲛⲧⲟⲛⲓⲟⲛ ⲁϥⲕⲱⲥ ⲙ̃ⲡⲥⲱⲙⲁ ⲙ̃ⲡⲓⲙⲁⲕⲁⲣⲓⲟⲥ
ⲁⲃⲃⲁ ⲓ̃ⲥⲁⲁⲕ
Ⲁⲛⲟⲕ ⲇⲉ ⲡⲓⲣⲉϥⲉⲣⲛⲟⲃⲓ ⲭⲣⲓⲥⲧⲟⲫⲟⲣⲟⲥ ⲁⲛⲟⲕ ⲟⲩ-
ⲥⲩⲛⲅⲉⲛⲏⲥ ⲛ̃ⲧⲉ ⲡⲁⲓⲁ̃ⲅⲓⲟⲥ ⲓⲥϫⲉⲛ ϯⲁⲣⲭⲏ ⲁⲓϣⲱⲡⲓ
ⲉⲓⲙⲏⲛ ⲉ̃ⲣⲟϥ ⲁⲓⲥϧⲁⲓ ⲛ̃ⲛⲉϥϩⲩⲡⲟⲙⲛⲏⲙⲁ ⲟⲩⲇⲉ ⲙ̃ⲡⲓ-
ⲧⲟⲩϩⲟ ⲉ̃ⲣⲱⲟⲩ ⲟⲩⲇⲉ ⲙ̃ⲡⲓⲱ̃ⲗⲓ ⲉ̃ⲃⲟⲗ ⲛ̃ϧⲏⲧⲟⲩ ⲉⲧⲁⲓⲛⲁⲩ
ϫⲉ ⲙ̃ⲙⲟⲛ ⲣⲱⲙⲓ ⲛ̃ⲧⲏⲓ ⲙ̃ⲙⲁⲩ ⲁⲓϯϩⲟ ⲉ̃ⲡⲓⲡⲣⲟⲧⲟⲡⲟⲗⲓⲧⲏⲥ
ⲁϥϯ ⲛⲏⲓ ⲛ̃ⲟⲩⲕⲁⲣⲟⲩⲕⲓⲟⲛ *ⲛⲉⲙ ⲓ︦ ⲛ̃ⲃⲱⲕ ⲛ̃ⲧⲁϥ
ⲁⲓⲧⲁⲗⲟ ⲙ̃ⲡⲓⲥⲱⲙⲁ ⲁⲓⲉⲛϥ ϣⲁ ϯⲁⲛⲉⲙⲣⲱ ⲛ̃ⲧⲉ ⲡⲉϥϯⲙⲓ
ⲙ̃ⲡⲓϫⲉⲙϫⲟⲓ ⲛ̃ⲧⲁⲉⲣϭⲓ̃ⲛⲓⲟⲣ ⲙ̃ⲙⲟϥ ⲁ ⲫ︦ϯ︦ ⲟⲩⲁϩⲥⲁϩⲛⲓ
ⲛ̃ⲛⲓⲧⲉⲃⲛⲱⲟⲩⲓ̃ ⲁⲩⲙⲟϣⲓ ⲉ̃ϫⲉⲛ ⲛⲓⲙⲱⲟⲩ ⲙ̃ⲫⲣⲏϯ ⲙⲡⲉⲧ-


### 0017

ϣⲟⲩⲱ̃ⲟⲩ ⲉⲧⲁ ⲛⲓⲣⲱⲙⲓ ⲛ̃ⲧⲉ ⲡⲓϯⲙⲓ ⲥⲱⲧⲉⲙ ⲁⲩⲓ̃ ⲉ̃ⲃⲟⲗ
ϧⲁϫⲱϥ ⲧⲏⲣⲟⲩ ⲛⲓⲕⲟⲩϫⲓ ⲛⲉⲙ ⲛⲓⲛⲓϣϯ ⲁⲩⲟⲗϥ ⲉ̃ϯⲉⲕ-
ⲕⲗⲏⲥⲓⲁ̃ ϧⲉⲛ ⲟⲩⲱ̃ⲟⲩ ⲛⲉⲙ ⲟⲩⲧⲁⲓⲟ ⲉⲩⲣⲁϣⲓ ⲉⲩϯⲱ̃ⲟⲩ
ⲙ̃ⲫ︦ϯ︦ ⲫⲏ ⲉ̃ⲧⲓⲣⲓ ⲛ̃ⲛⲓϣⲫⲏⲣⲓ ⲙ̃ⲙⲁⲩⲁⲧϥ
Ⲙⲉⲛⲉⲛⲥⲁ ⲛⲁⲓ ⲁ̃ⲛⲟⲕ ⲡⲉ ⲭⲣⲓⲥⲧⲟⲫⲟⲣⲟⲥ ⲁⲓϣⲟⲣϣⲉⲣ
ⲙ̃ⲡⲉϥⲏⲓ ⲥⲁϧⲏⲧ ⲛ̃ϯⲉⲕⲕⲗⲏⲥⲓⲁ̃ ϧⲉⲛ ⲡϫⲱⲕ ⲛ̃ⲏ︦ ⲛⲁ̃ⲃⲟⲧ
ⲁⲓⲕⲱⲧ ⲛ̃ⲟⲩⲉⲩⲕⲧⲏⲣⲓⲟⲛ ⲙ̃ⲡⲓⲁ̃ⲅⲓⲟⲥ ⲁⲓϯ ⲡⲉϥⲥⲧⲉⲫⲁⲛⲟⲩ
ⲁⲛⲟⲩⲱⲣⲡ ⲁⲛⲓ̃ⲛⲓ ⲙ̃ⲡⲓⲉ̃ⲡⲓⲥⲕⲟⲡⲟⲥ ⲁϥⲉⲣⲁ̃ⲅⲓⲁ̃ⲍⲓⲛ ⲙ̃ⲙⲟϥ
ⲛ̃ⲥⲟⲩⲋ︦ ⲙ̃ⲡⲓⲁ̃ⲃⲟⲧ ⲧⲱⲃⲓ ⲁⲩϣⲱⲡⲓ ⲛ̃ϧⲏⲧϥ ⲛ̃ϫⲉ
ϩⲁⲛϫⲟⲙ ⲛⲉⲙ ϩⲁⲛϣⲫⲏⲣⲓ ⲉⲩⲱⲟⲩ ⲙⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦
ⲛⲉⲙ ⲡⲉϥⲓⲱⲧ ⲛⲁ̃ⲅⲁⲑⲟⲥ ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ⲛ̃ⲣⲉϥ-
ⲧⲁⲛϧⲟ ϯⲛⲟⲩ ⲛⲉⲙ ⲛ̃ⲥⲏⲟⲩ ⲛⲓⲃⲉⲛ ⲛⲉⲙ ϣⲁ ⲉ̃ⲛⲉϩ ⲛ̃ⲧⲉ
ⲛⲓⲉⲛⲉϩ ⲧⲏⲣⲟⲩ ⲁⲙⲏⲛ
⳧ ϧⲉⲛ ⲫⲣⲁⲛ ⲙ̃ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ
ⲁϥϣⲱⲡⲓ ⲛ̃ϫⲉ ⲡⲁⲓⲁⲅⲁⲑⲟⲛ ⲛ̃ϣⲉⲛⲉⲣⲫⲙⲉⲩⲓ ⲛ̃ⲧⲉ ⲡⲁⲓⲕⲟⲩϫⲓ
ⲛ̃ϫⲱⲙ ⲛ̃ⲱϣ ⲉ̃ⲃⲟⲗϩⲓⲧⲟⲧϥ ⲙ̃ⲡⲉⲛⲙⲁⲓⲛⲟⲩϯ ⲡⲁⲓⲱⲧ ⲁⲃⲣⲁⲁⲙ
ⲛ̃ⲧⲉ ⲕⲟⲗⲑⲁ ⲛⲉⲙ ⲛⲉϥϣⲏⲣⲓ ⲙⲡ︦ⲛ︦ⲁ︦ⲧⲓⲕⲟⲛ ⲁϥⲧⲏⲓϥ ⲉ̃ϧⲟⲩⲛ
ⲉ̃ϯⲁⲅⲓⲁ ⲛ̃ⲉⲕⲕⲗⲏⲥⲓⲁ ⲛ̃ⲧⲉ ⲡⲉⲛⲓⲱⲧ ⲉⲑⲟⲩⲁⲃ ⲁⲃⲃⲁ ⲙⲁⲕⲁⲣⲓ
ⲛ̃ⲧⲉ ϣⲏϩⲏⲧ ϧⲉⲛ ⲡⲥⲏⲟⲩ ⲙ̃ⲡⲉⲛⲓⲱⲧ ⲉⲑⲟⲩⲁⲃ ⲁⲃⲃⲁ ⲕⲟⲥⲙⲁ
ⲡⲓⲁⲣⲭⲏⲉⲡⲓⲥⲕⲟⲡⲟⲥ ⲛ̃ⲧⲉ ⲣⲁⲕⲟϯ ⲉϥⲟⲓ ⲛ̃ⲣⲉϥⲱϣ ⲉϫⲉⲛ ϯⲕⲁⲑⲉ-
ⲇⲣⲁ ⲛ̃ⲧⲉ ⲡⲉⲛⲓⲱⲧ ⲁⲃⲃⲁ ⲙⲁⲕⲁⲣⲓ ⲛ̃ϫⲉ ⲡⲓ︦ⲇ︦ⲓ︦ ⲓⲁⲕⲱⲃ ϧⲉⲛ
ϯⲙⲁϩⲭ︦ⲙ︦ⲁ︦ ⲛ̃ⲧⲉ ⲛⲓⲙⲁⲣⲧⲩⲣⲟⲥ ⲓⲥ ⲇⲓⲙⲉⲧⲁⲛⲓⲁ̃ ⲁ̃ⲣⲓⲡⲁⲙⲉⲩⲓ
ⲁ̃ⲛⲟⲕ ϧⲁ ⲡⲓϫⲱⲃ ⲛ̃ⲣⲉϥⲉⲣⲛⲟⲃⲓ ⲉ̃ⲧⲁϥⲥϧⲁⲓ ⲑⲉⲟⲇⲱⲣⲟⲥ ⲡϣⲏⲣⲓ
ⲙⲡⲛ︦ⲁ︦ⲧⲓⲕⲟⲛ ⲙ̃ⲡⲁⲓⲱⲧ ⲁⲃⲣⲁⲁⲙ ⲛⲧⲉ ⲕⲟⲗⲑⲁ ⲧⲉ ⲡⲁϭ︦ⲥ︦ ⲓⲏ︦ⲥ︦ ⲭⲁ
ⲛⲁⲛⲟⲃⲓ ⲛⲏⲓ ⲉ̃ⲃⲟⲗ ⲛⲉⲙ ⲛⲁϣⲱⲧϥ ⲧⲏⲣⲟⲩ ⲁⲙⲏⲛ.