### 0001 *Ⲡⲓⲙⲁⲣⲧⲩⲣⲟⲗⲟⲅⲓⲟⲛ ⲛ̃ⲧⲉ ⲡⲓⲁⲑⲗⲟⲫⲟⲣⲟⲥ ⲟⲩⲟϩ ⲙ̃ⲙⲁⲣⲧⲩⲣⲟⲥ ⲛ̃ⲧⲉ ⲡⲭ︦ⲥ︦ ⲓⲁⲕⲱⲃⲟⲥ ⲡⲓⲉⲃⲟⲗϧⲉⲛ ⲛⲓⲡⲉⲣⲥⲏⲥ ⲉⲧⲁϥϫⲱⲕ ⲉⲃⲟⲗ ⲙ̃ⲡⲉϥⲁⲅⲱⲛ ⲛ̃ⲥⲟⲩⲕ︦ⲍ︦ ⲙ̃ⲡⲓⲁⲃⲟⲧ ⲁⲑⲱⲣ ϧⲉⲛ ⲟⲩϩⲓⲣⲏⲛⲏ ⲛ̃ⲧⲉ ⲫ︦ϯ︦ ⲁ̃ⲙⲏⲛ Ⲁⲥϣⲱⲡⲓ ⲇⲉ ϧⲉⲛ ⲧⲙⲉⲧⲟⲩⲣⲟ ⲛ̃ⲓⲥⲕⲁⲣⲁⲧ ⲡϣⲏⲣⲓ ⲛ̃ⲥⲁ- ⲃⲱⲣ ⲡⲟⲩⲣⲟ ⲛ̃ⲛⲓⲡⲉⲣⲥⲏⲥ ⲁϥⲧⲟⲩⲛⲟⲥ ⲟⲩⲛⲓϣϯ ⲛ̃ⲇⲓⲱⲅⲙⲟⲥ ⲉϩⲣⲏⲓ ⲉϫⲉⲛ ⲛⲓⲛⲁⲍⲱⲣⲉⲟⲥ ⲉⲧⲉ ⲛⲏ ⲉⲧⲟⲩⲙⲟⲩϯ ⲉⲣⲱⲟⲩ ⲛⲉ ϫⲉ ⲛⲓⲭⲣⲏⲥⲧⲓⲁ̃ⲛⲟⲥ ⲛⲁⲓ ⲉⲧϣⲟⲡ ϧⲉⲛ ⲧⲭⲱⲣⲁ ⲛ̃ϯⲡⲉⲣ- ⲥⲏⲥ ⲉⲁ ⲟⲩⲙⲏϣ ⲙ̃ⲙⲁⲣⲧⲩⲣⲟⲥ ϭⲓⲭⲗⲟⲙ ϩⲓⲧⲉⲛ ϩⲁⲛ- ⲃⲁⲥⲁⲛⲟⲥ ⲉⲩϣⲉⲃⲓⲏⲟⲩⲧ ⲉⲛⲟⲩⲉ̃ⲣⲏⲟⲩ ⲟⲩⲟϩ ⲁⲩϫⲱⲕ ⲉ̃ⲃⲟⲗ ⲛ̃ⲧⲟⲩⲟⲙⲟⲗⲟⲅⲓⲁ̃ ⲁⲩϣⲉ ⲉⲡϣⲱⲓ ϣⲁ ⲫⲏ ⲉⲧⲟⲩⲙⲉⲓ ⲙ̃ⲙⲟϥ ⲡⲭ︦ⲥ︦ [ϧⲉⲛ] ⲡⲓⲥⲏⲟⲩ ⲇⲉ ⲉⲧⲉⲙⲙⲁⲩ ⲛⲁϥϣⲟⲡ ⲡⲉ ⲛ̃ϫⲉ ⲡⲓⲙⲁⲕⲁⲣⲓ[ⲟⲥ ⲓⲁⲕ]ⲱⲃⲟⲥ ϧⲉⲛ ⲃⲏⲗⲡⲁⲧⲏ ϯⲃⲁⲕⲓ ⲛ̃ⲧⲉ ⲑⲙⲉⲧⲟⲩⲣⲟ ⲛ̃ⲛⲓ[ⲡ]ⲉⲣⲥⲓⲥ *ⲛⲉ ⲟⲩⲉⲩⲧⲉⲛⲏⲥ ⲇⲉ ⲡⲉ ⲟⲩⲟϩ ⲛ̃ⲥⲟⲩⲓⲛ ⲉⲟⲩϣⲟⲣⲡ ⲡⲉ ϧⲉⲛ ⲡⲉϥⲁ̃ⲓⲱⲙⲁ ϧⲉⲛ ⲡⲓⲡⲁⲗⲁ- ⲧⲓⲟⲛ ⲉⲟⲩⲭⲣⲓⲥⲧⲓⲁ̃ⲛⲟⲥ ⲡⲉ ⲛ̃ⲑⲟϥ ⲛⲉⲙ ⲧⲉϥⲙⲁⲩ ⲛⲉⲙ ⲧⲉϥⲥϩⲓⲙⲓ ⲟⲩⲟϩ ⲛⲁϥⲟⲓ ⲛ̃ϣⲟⲣⲡ ⲡⲉ ϧⲉⲛ ⲡⲓⲡⲁⲗⲁⲧⲓⲟⲛ ϧⲉⲛ ⲛⲓⲉϩⲟⲟⲩ ⲛⲧⲉ ⲓⲥⲕⲁⲣⲁⲧ ⲡⲟⲩⲣⲟ ⲛ̃ⲛⲓⲡⲉⲣⲥⲓⲥ ⲟⲩⲟϩ ⲛⲉ ϣⲁϥϭⲓ̄ⲥⲟϭⲛⲓ ⲛⲉⲙⲁϥ ⲛⲟⲩⲙⲏϣ ⲛ̃ⲥⲟⲡ ϧⲉⲛ ⲧⲇⲓⲟⲓ̃ⲕⲏⲥⲓⲥ ⲛⲧⲉ ϯⲙⲉⲧⲟⲩⲣⲟ ⲉϥⲟⲩⲱⲣⲡ ⲉⲃⲟⲗ ⲉⲛⲓⲭⲱⲣⲁ ⲧⲏⲣⲟⲩ ⲛϩⲁⲛⲡⲣⲟⲥⲧⲁⲅⲙⲁ ⲉⲃⲟⲗϩⲓⲧⲟⲧϥ ⲙ̃ⲡⲟⲩⲣⲟ ⲉⲑⲃⲉ ϫⲉ ⲛⲁϥⲙⲉⲓ ⲙ̃ⲙⲟϥ ⲉⲙⲁϣⲱ ⲁϥⲑⲱⲧ ⲇⲉ ⲙ̃ⲡⲉϥϩⲏⲧ ϧⲉⲛ ϩⲁⲛⲙⲏϣ ⲛ̃ⲧⲁⲓⲟ ⲁϥⲫⲱⲛϩ ⲉⲃⲟⲗ ϧⲉⲛ ⲡⲓⲛⲁϩϯ ⲛ̃ⲧⲉ ⲛⲉϥⲓ̃ⲟϯ ⲁϥϫⲱⲗ ⲉⲃⲟⲗ ⲛϯⲙⲉⲧⲭⲣⲓⲥⲧⲓⲁ̃ⲛⲟⲥ ⲟⲩⲟϩ ⲁϥⲟⲩⲁϩϥ ⲛ̃ⲥⲁ ⲡϣⲉⲙϣⲓ ⲙ̃ⲡⲟⲩⲣⲟ ⳰Ϧⲉⲛ ⲡϫⲓⲛⲑⲣⲟⲩⲥⲱⲧⲉⲙ ⲇⲉ ⲛ̃ϫⲉ ⲧⲉϥⲙⲁⲩ ⲛⲉⲙ ⲧⲉϥ- ⲥϩⲓⲙⲓ ⲉⲛⲏ ⲉⲧⲁⲩϣⲱⲡⲓ ⲙ̃ⲙⲟϥ ⲁⲩⲥϧⲁⲓ ϣⲁⲣⲟϥ ϧⲉⲛ ### 00010 ⲛ̃ϯⲙⲉⲧⲟⲩⲣⲟ ⲉⲣⲉⲧⲉⲛⲟⲩⲱϣ ⲉⲣⲁⲛⲁϥ ⲛ̃ⲛⲏ ⲉⲧⲉ ⲙ̃ⲙⲟⲛ ϣϫⲟⲙ ⲙ̃ⲙⲱⲟⲩ ⲉⲡⲧⲏⲣϥ ⲉϯϩⲏⲟⲩ ⲛⲱⲧⲉⲛ ⲛ̃ϩⲗⲓ Ⲧⲟⲧⲉ ⲡⲟⲩⲣⲟ ⲁϥϫⲱⲛⲧ ϧⲉⲛ ⲟⲩⲙⲃⲟⲛ ⲟⲩⲟϩ ⲛⲉϥⲥⲟⲫⲟⲥ ⲛⲉⲙ ⲛⲉϥⲥⲩⲛⲏⲅⲟⲣⲟⲥ ⲛⲁⲩⲑⲟⲩⲏⲧ ⲉⲣⲟϥ ⲡⲉ ⲁϥⲉⲣⲕⲉⲗⲉⲩⲓⲛ ⲉⲑⲣⲟⲩⲓⲛⲓ ⲉⲃⲟⲗ ⲛ̃ϩⲁⲛⲕⲁϣ ⲉⲩϫⲏⲣ ⲁϥⲑⲣⲟⲩⲧⲉⲣⲧⲱⲣⲟⲩ ϧⲉⲛ ⲡⲉϥⲥⲱⲙⲁ ⲧⲏⲣϥ ⲛⲉⲙ ⲛⲓⲓⲉⲃ ⲛ̃ⲧⲉ ⲛⲉϥϫⲓϫ ⲛⲉⲙ ⲛⲉϥϭⲁⲗⲁⲩϫ ⲁϥⲉⲣⲕⲉⲗⲉⲩⲓⲛ ⲇⲉ ⲉⲑⲣⲟⲩⲓⲛⲓ ⲉⲃⲟⲗ ⲛ̃ⲕⲉⲟⲩⲁⲓ ⲉϥϣⲉⲃϣⲱⲃ ⲉⲙⲁϣⲱ ⲛ̃ⲥⲉϩⲓⲧϥ ⲉϧⲟⲩⲛ ⲉⲡⲉϥϣⲁⲓ ⲙⲉⲛⲉⲛⲥⲱⲥ ⲛ̃ⲥⲉϩⲓⲧϥ ⲉⲡϣⲧⲉⲕⲟ ϣⲁⲧⲉϥⲉⲣⲥⲕⲉⲡⲧⲓⲛ ⲙ̃ⲙⲟϥ ϫⲉ ⲁϥⲛⲁ- ϧⲟⲑⲃⲉϥ ϧⲉⲛ ⲁϣ ⲙ̃ⲙⲟⲩ ⲡⲓⲙⲁⲕⲁⲣⲓⲟⲥ ⲇⲉ ⲓⲁⲕⲱⲃⲟⲥ ⲛⲁϥⲭⲏ *ϧⲉⲛ ⲡⲓϣⲧⲉⲕⲟ ϧⲉⲛ ϩⲁⲛⲛⲓϣϯ ⲛ̃ⲃⲁⲥⲁⲛⲟⲥ ⲁϥⲙⲟϣⲓ ⲇⲉ ⲛ̃ⲕⲟⲩϫⲓ ⲕⲟⲩϫⲓ ⲁϥⲕ̃ϩⲓ ⲉⲣⲁⲧϥ ⲁϥⲱϣ ⲉ̃ϩⲣⲏⲓ ϩⲁ ⲡϭ︦ⲥ︦ ⲉϥϫⲱ ⲙ̃ⲙⲟⲥ ϫⲉ ⲫ︦ϯ︦ ⲫⲏ ⲉϯⲟⲓ ⲙ̃ⲃⲱⲕ ⲛⲁϥ ⲓⲥϫⲉⲛ ⲧⲁⲙⲉⲧⲕⲟⲩϫⲓ ϣⲁ ⲉϧⲟⲩⲛ ⲉϯⲛⲟⲩ ⲫⲁⲓ ⲟⲛ ⲉϯϣⲱⲡ ⲛ̃ⲛⲁⲓϧⲓⲥⲓ ⲉⲑⲃⲉ ⲡⲉϥⲣⲁⲛ ⲉⲑⲟⲩⲁⲃ ⲉⲕⲉϫⲟⲩϣⲧ ⲉϫⲉⲛ ⲧⲉⲕⲉⲕⲕⲗⲏⲥⲓⲁ̃ ⲉⲑⲟⲩⲁⲃ ⲛ̃ⲧⲉⲕⲉⲣⲭⲁⲣⲓⲍⲉⲥⲑⲉ ⲛⲁⲥ ⲛ̃ⲧⲉⲕϩⲓ- ⲣⲏⲛⲏ ⲛⲉⲙ ⲛⲉⲕⲕ̃ϩⲓ ⲧⲏⲣⲟⲩ ⲛⲉⲙ ⲛⲉⲕⲗⲁⲟⲥ ⲧⲏⲣⲟⲩ ⲟⲩⲟϩ ⲛⲟϩⲉⲙ ⲙ̃ⲡⲉⲕⲃⲱⲕ ⲉⲃⲟⲗϧⲉⲛ ϯⲁⲛⲁⲅⲕⲏ ⲉϯⲉⲛϧⲏⲧⲥ ⲛⲉⲙ ⲡⲧⲉⲕⲟ ⲙ̃ⲡⲁⲓⲃⲓⲟⲥ ⲉⲑⲣⲓⲟⲩⲱⲛϩ ⲉⲃⲟⲗ ⲙ̃ⲡⲉⲕⲣⲁⲛ ⲉⲑⲟⲩⲁⲃ ⲫ︦ϯ︦ ⲛ̃ⲛⲁⲓ̃ⲟϯ Ⲉⲧⲓ ⲇⲉ ⲉϥϣⲗⲏⲗ ϧⲉⲛ ⲛⲁⲓ ⲓⲥ ⲟⲩⲛⲓϣϯ ⲛ̃ⲟⲩⲱⲓⲛⲓ ⲁϥϣⲁⲓ ϧⲉⲛ ⲡⲓⲙⲁ ⲉⲛⲁϥϩⲟⲧⲡ ⲉϧⲟⲩⲛ ⲛ̃ϧⲏⲧϥ ⲟⲩⲟϩ ⲁϥⲛⲁⲩ ⲉⲟⲩⲭⲟⲣⲟⲥ ⲛ̃ⲁⲅⲓⲟⲥ ⲉⲣⲉ ⲡϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ϧⲉⲛ ⲧⲟⲩⲙⲏϯ ⲟⲩⲟϩ ⲡⲉϫⲉ ⲡϭ︦ⲥ︦ ⲛⲁϥ ϫⲉ ϭⲣⲟ ⲙ̃ⲙⲟⲕ ⲟⲩⲟϩ ⲛ̃ⲧⲉⲕϫⲉⲙϫⲟⲙ ⲡⲓϣⲱⲓϫ ⲛ̃ⲣⲉϥⲉⲣⲁ̃ⲅⲱⲛⲓⲍⲉⲥⲑⲉ ϩⲏⲡⲡⲉ ϯϣⲟⲡ ⲛⲉⲙⲁⲕ ⲉⲓϯϫⲟⲙ ⲛⲁⲕ ϧⲉⲛ ⲡⲓⲛⲓϣϯ ⲛ̃ⲥⲧⲁⲇⲓⲟⲛ ⲫⲁⲓ ⲉⲧⲉⲕⲕ̃ϩⲓ ⲉⲣⲁⲧⲕ ⲛ̃ϧⲏⲧϥ ϣⲁⲧⲉⲕϭⲓ̄ ⲙ̃ⲡⲓⲭⲗⲟⲙ ⲛ̃ⲧⲉⲕ- ⲟⲙⲟⲗⲟⲅⲓⲁ̃ ⲓⲥ ϫⲉ ⲭⲛⲁϣⲉⲡ ϩⲁⲛⲛⲓϣϯ ⲅⲁⲣ ⲛϧⲓⲥⲓ ⲟⲛ ⲉ̃ϫⲉⲛ ⲡⲁⲣⲁⲛ ϣⲁⲧⲉⲕϫⲱⲕ ⲉ̃ⲃⲟⲗ ⲛ̃ⲧⲉⲕⲁⲑⲗⲏⲥⲓⲥ ⲁⲗⲗⲁ ⲙⲉⲛⲉⲛⲥⲁ ⲕⲉⲕⲟⲩϫⲓ ⲭⲛⲁⲟⲩⲛⲟϥ ⲛⲉⲙⲏⲓ ⲉϫⲉⲛ ⲧⲁⲧⲣⲁ- ⲡⲉⲍⲁ ϧⲉⲛ ⲧⲁⲙⲉⲧⲟⲩⲣⲟ ⲉⲧϧⲉⲛ ⲛⲓⲫⲏⲟⲩⲓ̃ ⲟⲩⲟϩ ϯⲛⲁ- ### 0002 ⲟⲩⲛⲓϯ ⲛ̃ⲥⲡⲟⲩⲇⲏ ⲉⲩⲙⲟϣⲓ ⲙⲥⲁ ϯⲁⲕⲟⲗⲟⲩⲑⲓⲁ̃ ⲛ̃ⲧⲉ ϯⲉⲕⲕⲗⲏⲥⲓⲁ̃ *ⲉⲩϫⲱ ⲙⲙⲟⲥ ⲙⲡⲁⲓⲣⲏϯ ϫⲉ ⲥϣⲉ ⲙⲉⲛ ⲁⲛ ⲉⲣⲟⲕ ⲉⲣⲁⲕⲕ ⲉ̃ⲃⲟⲗ ⲛ̃ⲑⲙⲏⲓ ⲉⲕⲟⲩⲱϣ ⲉⲣⲁⲛⲁϥ ⲛ̃ⲟⲩⲟⲩⲣⲟ ⲉϣⲁϥⲙⲟⲩ ⲟⲩⲟϩ ⲙⲡⲣⲟⲥⲟⲩⲥⲏⲟⲩ ⲉⲁⲕⲫⲱⲛϩ ⲉⲃⲟⲗ ϧⲉⲛ ⲡⲓⲛⲁϩϯ ⲉⲧϩⲟⲗϫ ⲟⲩⲟϩ ⲙⲙⲏⲓ ⲛ̃ⲧⲉ ⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲉϧⲟⲩⲛ ⲉⲡⲓϣⲉⲙϣⲓ ⲙ̃ⲙⲉⲑⲛⲟⲩϫ ⲛ̃ⲧⲉ ϯⲙⲉⲧⲁⲑⲛⲟⲩϯ ⲛ̃ⲧⲉ ⲛⲓϩⲉⲗⲏⲛⲟⲥ ⲟⲩⲟϩ ⲁⲕⲥⲟⲧⲡⲥ ⲛⲁⲕ ⲉⲣⲁⲛⲁϥ ⲛ̃ⲟⲩⲟⲩⲣⲟ ⲉϣⲁϥⲙⲟⲩ ⲟⲩⲟϩ ϣⲁϥⲧⲁⲕⲟ ⲉⲁⲕⲥⲁϩⲱⲕ ⲉⲃⲟⲗ ⲙⲡⲓⲟⲩⲣⲟ ⲛ̃ⲁⲑⲙⲟⲩ ⲡⲭ︦ⲥ︦ ⲟⲩⲟϩ ⲁⲕⲙⲉⲛⲣⲉ ϩⲁⲛⲧⲁⲓⲟ̃ ⲛⲉⲙϩⲁⲛⲇⲱⲣⲟⲛ ⲛⲉⲙ ϩⲁⲛⲧⲓⲙⲏ ⲛ̃ⲧⲉ ⲟⲩⲟⲩⲣⲟ ⲙ̃ⲡⲣⲟⲥⲟⲩⲥⲏⲟⲩ ⲉⲁⲕϩⲉⲛⲕ ⲉⲃⲟⲗ ⲛ̃ⲧⲁⲅⲁⲡⲏ ⲙ̃ⲫ︦ϯ︦ ⲑⲁⲓ ⲉⲑⲛⲁⲙⲟⲩⲛ ⲉⲃⲟⲗ ϣⲁ ⲉⲛⲉϩ ϯϩⲧⲏⲕ ⲟⲩⲛ ⲛ̃ⲧⲉⲕⲛⲁⲩ ϫⲉ ⲟⲩⲁϣ ⲛ̃ⲣⲏϯ ⲛ̃ⲣⲱⲙⲓ ⲡⲉ ⲉⲧⲁⲕⲓ̃ⲣⲓ ⲙ̃ⲡⲉϥⲟⲩⲱϣ ϫⲉ ϥⲟⲛϧ ⲙ̃ⲫⲟⲟⲩ ⲣⲁⲥϯ ⲇⲉ ϣⲁϥ- ⲉⲣⲣⲉϥⲙⲱⲟⲩⲧ ⲛ̃ⲥⲉϩⲓⲧϥ ⲉⲃⲟⲗ ⲉⲛⲓⲙ̃ϩⲁⲩ ⲙ̃ⲫⲣⲏϯ ⲛ̃ⲛⲓⲣⲉϥ- ⲙⲱⲟⲩⲧ ⲧⲏⲣⲟⲩ ⲟⲩⲇⲉ ⲅⲁⲣ ⲛⲉϥⲇⲱⲣⲟⲛ ⲛⲁϯϩⲏⲟⲩ *ⲛⲁⲕ ⲁⲛ ⲛ̃ϩⲗⲓ ϧⲉⲛ ⲡⲓⲉϩⲟⲟⲩ ⲛ̃ⲧⲉ ϯⲕⲣⲏⲥⲓⲥ ⲟⲩⲇⲉ ⲥⲉⲛⲁϣ ⲛⲁϩⲙⲉⲕ ⲁⲛ ⲉⲃⲟⲗϧⲉⲛ ϯⲕⲟⲗⲁⲥⲓⲥ ϣⲁ ⲉⲛⲉϩ ⲉⲑⲃⲉ ⲫⲁⲓ ϫⲉ ⲟⲩⲛ ⲁⲕϣⲧⲉⲙⲧⲁⲥⲑⲟⲕ ϧⲉⲛ ⲟⲩⲓⲱⲥ ⲉⲃⲟⲗϧⲉⲛ ⲧⲁⲓ- ⲡⲗⲁⲛⲏ ⲉⲧϩⲱⲟⲩ ⲛⲉⲙ ⲡϣⲉⲙϣⲓ ⲛ̃ⲛⲓⲡⲉⲣⲥⲏⲥ ⲛ̃ⲁⲑⲛⲟⲩϯ︦ ⲛ̃ⲧⲉⲕⲓ̃ ⲉϧⲟⲩⲛ ⲉⲡⲓⲛⲁϩϯ ⲙ̃ⲙⲏⲓ ⲛ̃ⲧⲉ ⲡϣⲏⲣⲓ ⲙ̃ⲫ︦ϯ︦ ⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲛⲧⲉⲕⲕⲏⲛ ⲉⲕⲉⲣϩⲟϯ ϧⲁⲧϩⲏ ⲛ̃ⲛⲓⲃⲁⲥⲁⲛⲟⲥ ⲙ̃ⲡⲣⲟⲥ- ⲟⲩⲥⲏⲟⲩ ⲟⲩⲇⲉ ⲅⲁⲣ ⲛϧⲓⲥⲓ ⲛ̃ⲧⲉ ⲡⲁⲓⲥⲏⲟⲩ ⲛ̃ⲧⲉ ϯⲛⲟⲩ ⲥⲉⲛⲁⲙⲡϣⲁ ⲁⲛ ⲙ̃ⲡⲓⲱⲟⲩ ⲉⲑⲛⲁ̃ⲱⲣⲡ ⲛⲁⲛ ⲉⲃⲟⲗ︦ ⲡⲉϫⲁϥ ⲟⲛ ⲛ̃ϫⲉ ⲡⲉⲛϭ︦ⲥ︦ ϫⲉ ⲁⲣⲉ ⲡⲓⲣⲱⲙⲓ ⲛⲁϫⲉⲙϩⲏⲟⲩ ⲛ̃ⲟⲩ ⲁϥ- ϣⲁⲛϫⲉⲙϩⲏⲟⲩ ⲙ̃ⲡⲓⲕⲟⲥⲙⲟⲥ ⲧⲏⲣϥ ⲛ̃ⲧⲉϥϯⲟⲥⲓ ⲛ̃ⲧⲉϥ- ⲯⲩⲭⲏ³ ⲁⲣⲓⲛⲏⲫⲓⲛ ⲟⲩⲛ ⲙ̃ⲙⲟⲕ ⲉⲃⲟⲗϧⲉⲛ ⲧⲡⲗⲁⲛⲏ ⲙ̃ⲡⲓⲇⲓⲁ̃ⲃⲟⲗⲟⲥ ⲙ̃ⲡⲁⲧⲉϥⲧⲁϩⲟⲕ ⲛ̃ϫⲉ ⲡⲓϫⲱⲛⲧ ⲛ̃ⲧⲉ ⲫ︦ϯ︦ ⲉⲧⲟⲓ ⲛ̃ϩⲟϯ ⲛⲉⲙ ϯⲙⲉⲧⲁⲧⲙⲟⲩϣⲧ ⲑⲁⲓ ⲉⲧⲁⲥϣⲱⲡⲓ ⲛ̃ⲡⲉⲕϣⲫⲏⲣ ϫⲉ ⲙⲉⲛⲉⲛⲥⲁ ⲑⲣⲉϥⲉⲣⲑⲩⲥⲓⲁ ⲛ̃ⲛⲓ̃ⲇⲱⲗⲟⲛ ### 0003 ⲉⲧⲁϥⲙⲟⲩ ϧⲉⲛ ⲁϣ *ⲛ̃ϫⲓⲛⲙⲟⲩ ⲉⲥϣⲉⲃⲓⲏⲟⲩⲧ ⲉⲙⲁϣⲱ ⲙ̃ⲫⲣⲏϯ ⲛ̃ⲑⲟⲕ ⲉ̃ⲧⲉⲕⲥⲱⲟⲩⲛ ⲉϣⲱⲡ ⲟⲩⲛ ⲁⲕϣⲁⲛⲙⲟⲩⲛ ⲉⲃⲟⲗ ϧⲉⲛ ⲛⲁⲓ ϧⲉⲛ ⲡϣⲉⲙϣⲓ ⲛⲛⲓⲡⲉⲣⲓⲥ ⲛⲁⲓ ⲉⲧϣⲉⲙϣⲓ ⲙ̃ⲡⲓⲣⲏ ⲛⲉⲙ ⲡⲓⲟϩ ⲛⲉⲙ ⲡⲓⲭⲣⲱⲙ ⲛⲉⲙ ⲡⲓⲙⲱⲟⲩ ⲁⲛⲟⲛ ⲧⲉⲛⲟⲓ ⲙϣⲉⲙⲙⲟ ⲉⲣⲟⲕ ⲡⲁⲓⲙⲁ ⲟⲩⲟϩ ⲙ̃ⲙⲟⲛⲧⲉⲕ ⲙⲉⲣⲓⲥ ⲛⲉⲙⲁⲛ ⲟⲩⲇⲉ ⲕⲗⲣⲟⲥ ϧⲉⲛ ⲡⲓⲕⲉⲉ̃ⲱⲛ Ϧⲉⲛ ⲡⲓⲥⲏⲟⲩ ⲇⲉ ⲉⲧⲉⲙⲙⲁⲩ ⲛⲁϥϣⲟⲡ ⲡⲉ ⲛ̃ϫⲉ ⲡⲟⲩⲣⲟ ϧⲉⲛ ⲛⲓⲧⲱⲟⲩ ⲉϥⲑⲱϣ ⲛ̃ⲛⲓⲙⲁ[ⲛ]ⲁⲣⲉϩ ⲛⲉⲙ ⲛⲏ ⲉⲧϧⲁⲣⲁⲧϥ ⲧⲏⲣⲟⲩ ⲟⲩⲟϩ ⲛⲁϥⲙⲉⲩⲓ ⲉϩⲁⲛⲥⲟϭⲛⲓ ⲉⲧϩⲱⲟⲩ ⲛⲑⲟϥ ⲛⲉⲙ ⲛⲁϥⲛⲓϣϯ ⲙ̃ⲙⲁⲅⲟⲥ ⲉϧⲟⲩⲛ ⲉ̃ⲛⲓⲭⲣⲓⲥⲧⲓⲁⲛⲟⲥ ϧⲉⲛ ⲡϫⲓⲛ- ⲑⲣⲉϥϭⲓ ⲇⲉ ⲛ̃ⲛⲓⲥϧⲁⲓ ⲛ̃ⲧⲉ ⲧⲉϥⲥϩⲓⲙⲓ ⲛⲉⲙ ⲧⲉϥⲙⲁⲩ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲓⲁⲕⲱⲃⲟⲥ ϧⲉⲛ ϯⲟⲩⲛⲟⲩ ⲉⲧⲁϥⲱϣ ⲛ̃ϯⲉⲡⲓⲥⲧⲟ- ⲗⲏ ⲉⲧⲁⲩⲟⲩⲟⲣⲡⲥ ϣⲁⲣⲟϥ ⲁ ⲡⲉϥϩⲏⲧ ⲥⲉⲙⲛⲏⲧϥ ⲟⲩⲟϩ ⲁ̃ ϯⲙⲉⲧⲁⲛⲟⲓⲁ̃ ⲃⲉⲃⲓ ⲥⲁϧⲟⲩⲛ ⲙ̃ⲙⲟϥ ⲙ̃ⲫⲣⲏϯ ⲛ̃ⲟⲩⲡⲩⲅⲏ ⲉⲥⲥⲱⲕ ⲉⲟⲩⲱⲛϧ ⲛ̃ⲉ̃ⲛⲉϩ *ⲟⲩⲟϩ ⲛⲁϥⲥⲁϫⲓ ⲛⲉⲙⲁϥ ⲡⲉ ⲙⲙⲓⲛ ⲙⲙⲟϥ ⲉϥϫⲱ ⲙⲙⲟⲥ ϫⲉ ⲓⲥϫⲉ ⲁ ⲧⲁⲙⲁⲩ ⲛⲉⲙ ⲧⲁⲥϩⲓⲙⲓ ϫⲫⲓⲟⲓ ⲟⲩⲟϩ ⲁⲩⲉⲣϣⲉⲙⲙⲟ ⲉⲣⲟⲓ ϧⲉⲛ ⲡⲁⲓⲉⲱⲛ ⲟⲩⲟϩ ⲁⲩϫⲟⲗⲧ ⲉⲃⲟⲗ ϧⲉⲛ ⲡⲓⲕⲉⲉⲱⲛ ⲓⲉ ⲉⲣⲉ ⲫ︦ϯ︦ ⲛⲁⲉⲣ ⲟⲩ ⲛⲏⲓ ⲫⲁⲓ ⲉⲧⲁⲓⲭⲁϥ ⲛ̃ⲥⲱⲓ ⲉⲁⲓϫⲱⲗ ⲉ̃ⲃⲟⲗ ⲙ̃ⲡⲉϥⲛⲁϩϯ ⲛⲉⲙ ⲧⲉϥⲙⲉⲑⲙⲏⲓ ⲙⲏⲡⲟⲧⲉ ⲛ̃ⲧⲉϥⲧⲁⲥⲑⲟ ⲙ̃ⲡⲉϥϩⲟ ⲥⲁⲃⲟⲗ ⲙ̃ⲙⲟⲓ ⲛ̃ⲧⲉϥϯϣⲉⲃⲓⲱ ⲛⲏⲓ ⲛϩⲁⲛⲡⲉⲧϩⲱⲟⲩ ⲉⲫⲙⲁ ⲛ̃ⲛⲏ ⲉⲧⲁⲓϯϫⲱⲛⲧ ⲛⲁϥ ⲛ̃ϧⲏⲧⲟⲩ ⲟⲩⲟϩ ⲛ̃ⲧⲉϥⲧⲏⲓⲧ ⲉ̃ⲧⲟⲧⲥ ⲛ̃ϯⲕⲟⲗⲁⲥⲓⲥ ϣⲁ ⲉⲛⲉϩ ϧⲉⲛ ϯⲟⲩⲛⲟⲩ ⲉⲧⲉⲙⲙⲁⲩ ⲁϥⲧⲱⲛϥ ⲁϥϣⲉ ⲉϧⲟⲩⲛ ⲉⲧⲉϥⲥⲕⲏⲛⲏ ⲉⲁϥϭⲓ̃ ⲉϧⲣⲏⲓ ⲉⲛⲉϥϫⲓϫ ⲛ̃ⲛⲓ ⲅⲣⲁⲫⲏ ⲉⲑⲟⲩⲁⲃ ⲁϥⲱϣ ⲛ̃ϧⲏⲧⲟⲩ ⲟⲩⲟϩ ⲁϥⲕⲟⲧϥ ⲉⲣⲟϥ ⲙⲙⲓⲛ ⲙⲙⲟϥ ⲉⲁ ⲡⲉϥϩⲏⲧ ⲉⲣⲟⲩⲟⲧ ⲉⲃⲟⲗϧⲉⲛ ⲛⲓⲱϣ ⲙ̃ⲫⲣⲏϯ ⲙ̃ⲫⲏ ⲉⲧⲁϥⲛⲉϩⲥⲓ ⲉⲃⲟⲗϧⲉⲛ ⲟⲩϩⲓⲛⲓⲙ ⲁϥⲉⲣϩⲏⲧⲥ ⲇⲉ ⲛ̃ⲥⲁϫⲓ ⲛⲉⲙⲁϥ ⲙⲙⲓⲛ ⲙⲙⲟϥ ⲛ̃ϧⲣⲏⲓ ⲛ̃ϧⲏⲧϥ ⲉϥϫⲱ ⲙ̃ⲙⲟⲥ ϫⲉ ⲁ̃ⲣⲉ ⲑⲱⲛ ϯⲛⲟⲩ ⲱ ⲧⲁⲯⲩⲭⲏ ⲓⲉ ⲉϥⲑⲱⲛ ⲡⲁⲥⲱⲙⲁ ### 0004 ⲛ̃ⲣⲉϥⲙⲟⲩ ⲓⲉ ⲁϥⲑⲱⲛ ⲡⲁϩⲏⲧ ⲛⲉⲙ ⲡⲁⲙⲟⲕⲙⲉⲕ ⲁⲣⲓ- ⲛⲏⲙⲫⲓⲛ ϫⲉ ⲙ̃ⲙⲟ ⲱ ϯⲯⲩⲭⲏ ⲛ̃ⲧⲁⲗⲉⲡⲱⲣⲟⲥ ⲟⲩⲟϩ ⲛ̃ⲧⲉⲟⲕⲙⲉⲕ ϫⲉ ⲓⲥϫⲉ ⲁ̃ ⲧⲁⲙⲁⲩ ⲉⲧⲁⲥϫⲫⲟⲓ ⲉⲣⲙ̃ⲕⲁϩ ⲛ̃ϩⲏⲧ ⲉϫⲉⲛ ⲡⲧⲁⲕⲟ ⲛ̃ⲧⲁⲯⲩⲭⲏ ⲟⲩⲟϩ ⲧⲁⲕⲉⲥϩⲓⲙⲓ ⲉⲧ- ϩⲟⲧⲡ ⲛⲉⲙⲏⲓ ⲓⲥϫⲉⲛ ⲧⲁⲙⲉⲧⲕⲟⲩϫⲓ ϧⲉⲛ ⲧⲕⲟⲓⲛⲱⲛⲓⲁ ⲙ̃ⲡⲁⲓⲕⲟⲥⲙⲟⲥ ⲁⲥⲉⲣϣⲉⲙⲙⲟ ⲉⲣⲟⲓ ⲁϣ ϫⲉ ϯⲛⲟⲩ ⲧⲉ ϯⲁⲡⲟ- ⲗⲟⲅⲓⲁ̃ ⲉ̃ϯⲛⲁϫⲉⲙⲥ ϧⲉⲛ ⲡⲓⲃⲏⲙⲁ ⲛ̃ⲧⲉ ⲫ︦ϯ︦ *ⲙ̃ⲡⲓⲉϩⲟⲟⲩ ⲛ̃ⲧⲉ ϯⲕⲣⲓⲥⲓⲥ ⲉⲧⲟⲓ ⲛ̃ϩⲟϯ ⲙ̃ⲡⲓⲛⲁⲩ ⲉⲧⲉⲣⲉ ⲫ︦ϯ︦ ⲛⲁϯ ⲙ̃ⲡⲓⲟⲩⲁⲓ ⲡⲓⲟⲩⲁⲓ ⲕⲁⲧⲁ ⲛⲉϥϩⲃⲏⲟⲩⲓ ⲕⲉⲅⲁⲣ ⲛⲁⲥⲩⲧ- ⲅⲉⲛⲏⲥ ϩⲱⲟⲩ ⲁⲩⲉⲣⲙ̃ⲕⲁϩ ⲛ̃ϩⲏⲧ ⲉϫⲉⲛ ⲡⲁϫⲓⲛϫⲱⲗ ⲉⲃⲟⲗ ⲙⲡⲓⲛⲁⲩ ⲇⲉ ⲉⲧⲟⲩⲛⲁⲉⲣ ⲡⲕⲁϩⲓ ⲙⲃⲉⲣⲓ ⲛ̃ⲕⲉⲥⲟⲡ ⲛ̃ⲧⲉ ⲛⲏ ⲉⲧⲥⲟⲩⲧⲱⲛ ϧⲉⲛ ⲡⲟⲩϩⲏⲧ ϭⲓ ⲙⲡⲟⲩⲃⲉⲭⲉ ⲛ̃ⲧⲉ ⲛⲏ ϩⲱⲟⲩ ⲉⲧⲁⲩⲣⲁⲕⲟⲩ ⲉⲃⲟⲗ ⲙ̃ⲡⲭ︦ⲥ︦ ϭⲓ̄ ⲛ̃ⲧⲟⲩⲕⲟⲗⲁⲥⲓⲥ ⲁⲓ- ⲛⲁⲱⲡ ⲁⲛⲟⲕ ⲉⲁϣ ⲙ̃ⲙⲉⲣⲟⲥ ⲉⲑⲃⲉ ϫⲉ ⲁⲓϣⲓⲃϯ ⲛ̃ϯⲙⲉⲑⲙⲏⲓ ⲛ̃ⲧⲉ ⲫ︦ϯ︦ ϧⲉⲛ ϯⲙⲉⲧⲛⲟⲩϫ ϯⲛⲟⲩ ϫⲉ ⲁⲓⲉⲙⲓ ϫⲉ ⲁϣ ⲡⲉ ⲡⲓⲟⲩϫⲁⲓ ⲉϯⲛⲁϣⲓⲛⲓ ⲛ̃ⲥⲱϥ ⲛ̃ⲧⲉ ⲧⲁⲯⲩⲭⲏ ϫⲉ ϩⲓⲛⲁ ⲛⲛⲁⲧⲁⲕⲟ ϣⲁ ⲉⲃⲟⲗ ⲛ̃ⲥⲉϩⲓⲧⲧ ⲉⲃⲟⲗ ϧⲉⲛ ⲡⲓⲱⲛϧ ⲛ̃ⲉⲛⲉϩ ⲡⲓⲙⲁ ⲉⲧⲁⲥϩⲉⲓ ⲉⲃⲟⲗ ⲛ̃ϧⲏⲧϥ ⲛ̃ϫⲉ ⲧⲁⲯⲩⲭⲏ ϯⲛⲟⲩ ϫⲉ ⲥϣⲉ ⲉⲣⲟⲓ ⲉⲉⲣⲙⲉⲧⲁⲛⲟⲓⲛ ⲟⲩⲟϩ ⲉⲧⲱⲃϩ ϧⲉⲛ ⲛⲁϫⲓϫ ϧⲉⲛ ϩⲁⲛⲛⲏⲥⲧⲓⲁ ⲛⲉⲙ ϩⲁⲛϣⲗⲏⲗ ⲙ̃ⲡⲓⲉϫⲱⲣϩ ⲛⲉⲙ ⲡⲓⲉϩⲟⲟⲩ ϣⲁⲧⲟⲩⲟⲩⲱⲛ ⲛⲏⲓ ⲛ̃ⲛⲓⲡⲩⲗⲏ ⲛ̃ⲧⲉ ⲡⲱⲛϧ ⲛⲉⲙ ⲛⲓⲁⲅⲁ- ⲑⲟⲛ ⲉⲧϧⲉⲛ ⲡⲓⲙⲁ ⲉ̃ⲧⲉⲙⲙⲁⲩ ϫⲉ ⲛ̃ⲛⲁⲓⲧⲁⲕⲟ ⲛⲉⲙ ⲛⲏ ⲉⲧⲁⲩϩⲉⲓ ⲉⲃⲟⲗ ⲛⲉⲙ ⲛⲏ ⲉⲧⲁⲩϫⲱⲗ ⲉⲃⲟⲗ ⲟⲩⲟϩ ⲁⲩ- ⲧⲁⲕⲟ Ⲉⲧⲓ ⲇⲉ ⲉϥⲙⲉⲩⲓ ⲉ̃ⲛⲁⲓ ϧⲉⲛ ⲡⲉϥϩⲏⲧ ⲁ̃ ϩⲁⲛⲟⲩⲟⲛ ϧⲉⲛ ⲛⲓⲁⲛⲟⲙⲟⲥ ⲥⲱⲧⲉⲙ ⲉⲛⲉϥⲥⲁϫⲓ ⲟⲩⲟϩ ϧⲉⲛ ⲡϫⲓⲛⲑⲣⲟⲩ- ⲛⲁⲩ ⲉⲣⲟϥ ⲛ̃ⲟⲩⲙⲏϣ ⲛ̃ⲥⲟⲡ ⲉϥⲱϣ ϧⲉⲛ ⲛⲓⲅⲣⲁⲫⲏ ⲉⲑⲟⲩⲁⲃ ⲁⲩϯ ⲙ̃*ⲡⲟⲩⲟⲩⲟⲓ ϧⲉⲛ ⲟⲩⲓⲱⲥ ⲉⲡⲟⲩⲣⲟ ⲟⲩⲟϩ ⲁⲩⲧⲁⲙⲟϥ ⲉⲛⲁⲓ ⲉⲩϫⲱ ⲙⲙⲟⲥ ϫⲉ ⲓⲁⲕⲱⲃⲟⲥ ⲫⲁⲓ ⲉⲧⲁⲕϯ ⲛⲁϥ ⲛ̃ϩⲁⲛⲛⲓϣϯ ⲛ̃ⲧⲁⲓⲕ̃ ⲛⲉⲙ ϩⲁⲛⲭⲣⲏⲙⲁ ⲉⲛⲁϣⲱⲟⲩ ⲉⲁⲕ̃ϭⲁⲥϥ ϧⲉⲛ ϩⲁⲛⲁⲝⲓⲱⲙⲁ̃ ⲉⲩϭⲟⲥⲓ ⲛ̃ϩⲣⲏⲓ ϧⲉⲛ ⲑⲙⲉⲧ- ### 0005 ⲟⲩⲣⲟ ⲛ̃ⲛⲓⲙⲏⲇⲟⲥ ⲛⲉⲙ ⲛⲓⲡⲉⲣⲥⲓⲥ ⲛⲉⲙ ⲛⲓⲃⲁⲃⲩⲗⲱⲛⲓⲟⲥ ⲫⲁⲓ ⲇⲉ ⲉϥⲟⲩⲱϣ ⲉⲕⲟⲧϥ ⲉⲃⲟⲗϧⲉⲛ ⲡϣⲉⲙϣⲓ ⲛ̃ⲛⲓⲡⲉⲣⲥⲏⲥ ⲉⲡϣⲉⲙϣⲓ ⲛ̃ⲛⲓⲭⲣⲓⲥⲧⲓⲁ̃ⲛⲟⲥ ϧⲉⲛ ⲡϫⲓⲛⲑⲣⲉϥⲥⲱⲧⲉⲙ ⲉ̃ⲛⲁⲓ ⲛ̃ϫⲉ ⲡⲟⲩⲣⲟ ⲁϥⲟⲩⲁϩⲥⲁϩⲛⲓ ⲉⲑⲣⲟⲩⲓ̃ⲛⲓ ⲛⲁϥ ⲙ̃ⲡⲓⲙⲁⲕⲁⲣⲓⲟⲥ ⲓⲁⲕⲱⲃⲟⲥ ⲉⲧⲁⲩⲉⲛϥ ⲇⲉ ⲁⲩⲧⲁϩⲟϥ ⲉⲣⲁⲧϥ ⲙ̃ⲡⲉⲙⲑⲟ ⲙ̃ⲡⲟⲩⲣⲟ ⲡⲉϫⲉ ⲡⲟⲩⲣⲟ ⲛⲁϥ ϫⲉ ⲁϫⲟⲥ ⲛⲏⲓ ⲙ̃ ⲓⲁⲕⲱⲃⲟⲥ ϫⲉ ⲛ̃ⲑⲟⲕ ⲟⲩⲛⲁⲍⲱⲣⲉⲟⲥ ⲛⲁⲓ ⲉⲧϯⲱⲛⲧ ⲛ̃ⲛⲓⲛⲟⲩϯ ⲛⲉⲙ ⲛⲓⲟⲩⲣⲱⲟⲩ ⲛⲁⲓ ⲉⲧⲁ ⲡⲁⲓ̃ⲱⲧ ⲉⲣⲥⲡⲟⲩⲇⲁⲍⲓⲛ ⲉϩⲓⲧⲟⲩ ⲉⲃⲟⲗ ϧⲉⲛ ⲧⲉϥⲙⲉⲧⲟⲩⲣⲟ ⲡⲉϫⲉ ⲓⲁⲕⲱⲃⲟⲥ ϫⲉ ⲁϩⲁ ⲁⲛⲟⲕ ⲟⲩⲛⲁ- ⲍⲱⲣⲉⲟⲥ ⲡⲉϫⲉ ⲡⲟⲩⲣⲟ ⲛⲁϥ ϫⲟⲩⲕⲟⲩⲛ ⲛ̃ⲑⲟⲕ ⲟⲩⲙⲁⲅⲟⲥ ⲟⲛ ⲡⲉϫⲉ ⲓⲁⲕⲱⲃⲟⲥ ϫⲉ ⲭⲣⲓⲥⲧⲓⲁ̃ⲛⲟⲥ ⲙⲉⲛ ⲁ̃ⲛⲟⲕ ⲟⲩⲁⲓ ⲁⲗⲗⲁ ⲁⲛⲟⲕ ⲟⲩⲙⲁⲅⲟⲥ ⲁⲛ ⲟⲩⲇⲉ ⲛ̃ⲛⲉ ⲫⲁⲓ ϣⲱⲡⲓ ⲙ̃ⲙⲟⲓ ⲁϥⲉⲣⲟⲩⲱ̃ ⲛ̃ϫⲉ ⲡⲟⲩⲣⲟ ⲡⲉϫⲁϥ ⲛⲁϥ ϫⲉ ⲙⲏ ⲙⲡⲉⲕϭⲓ︦ ⲛ̃ϩⲁⲛⲛⲓϣϯ ⲛ̃ⲧⲁⲓⲕ̃ ⲛⲉⲙ ϩⲁⲛⲇⲱⲣⲟⲛ ⲉ̃ⲃⲟⲗ- ϩⲓⲧⲟⲧϥ ⲙ̃ⲡⲁⲓ̃ⲱⲧ ⲡⲟⲩⲣⲟ ⲉⲑⲃⲉ ⲧⲉⲕⲙⲉⲧⲣⲉϥⲉⲣϩⲓⲕ ⲡⲉϫⲉ ⲓⲁⲕⲱⲃⲟⲥ ⲛⲁϥ ϫⲉ ⲁϥⲑⲱⲛ ⲫⲏ ⲉⲧⲉⲙⲙⲁⲩ ϯⲛⲟⲩ ⲉⲧⲁϥϯ ⲛⲏⲓ ⲛ̃ⲛⲁⲓⲭⲣⲏⲙⲁ ⲛⲉⲙ *ⲛⲁⲓⲧⲁⲓⲕ̃ ⲙ̃ⲡⲣⲟⲥⲟⲩⲥⲏⲟⲩ ⲫⲏ ⲉⲧⲉⲙⲙⲁⲩ ⲟⲩⲛ ϯⲛⲟⲩ ⲙⲏ ⲛ̃ϥⲥⲁϯ ⲉⲃⲟⲗ ⲁⲛ ϧⲉⲛ ⲛⲓ- ⲙ̃ϩⲁⲩ ⲙ̃ⲫⲣⲏϯ ⲛ̃ⲛⲏ ⲉⲑⲙⲱⲟⲩⲧ ⲟⲧⲉ ⲡⲟⲩⲣⲟ ⲁϥϫⲱⲛⲧ ⲉⲙⲁϣⲱ ⲟⲩⲟϩ ⲁϥⲉⲣⲕⲉⲗⲉⲩⲓⲛ ⲉⲑⲣⲟⲩϭⲟⲗⲕϥ ⲉⲃⲟⲗ ⲛ̃ⲛⲉϥ- ϫⲓϫ ⲛⲉⲙ ⲛⲉϥ̃ⲁⲗⲁⲩϫ ⲛ̃ⲥⲉϩⲓⲟⲩⲓ̃ ⲉⲣⲟϥ ϧⲉⲛ ϩⲁⲛϣⲃⲱⲧ ⲉⲩⲙⲉϩ ⲛ̃ⲥⲟⲩⲣⲓ ϣⲁⲧⲉ ⲡⲕⲁϩⲓ ϩⲱⲣⲡ ϧⲉⲛ ⲡⲉϥⲥⲛⲟϥ ⲡⲉϫⲁϥ ⲛⲁϥ ⲛ̃ϫⲉ ⲡⲟⲩⲣⲟ ϫⲉ ⲁⲣⲓⲑⲩⲥⲓⲁ̃ ⲛ̃ⲛⲓⲛⲓϯ ⲛ̃ⲛⲟⲩϯ ⲛ̃ⲧⲉ ⲛⲓⲡⲉⲣⲥⲏⲥ ⲉⲧⲉ ⲛⲁⲓ ⲛⲉ ⲡⲓⲣⲏ ⲛⲉⲙ ⲡⲓⲓ̃ⲟϩ ⲛⲉⲙ ⲡⲓⲭⲣⲱⲙ ⲛⲉⲙ ⲡⲓⲙⲱⲟⲩ ϩⲓⲛⲁ ⲛ̃ⲧⲉⲕⲉⲣⲉⲃⲟⲗ ⲉϩⲁⲛ- ⲛⲓϣϯ ⲛ̃ⲧⲓⲙⲱⲣⲓⲁ̃ ⲟⲩⲟϩ ⲛ̃ⲧⲉⲕϫⲉⲙϩⲏⲟⲩ ⲛ̃ⲧⲉⲕⲧⲁⲝⲓⲥ ⲛⲉⲙ ϯϩⲗⲏⲕⲓⲁ̃ ⲛ̃ⲧⲉ ⲧⲉⲕⲙⲉⲧⲃⲉⲣⲓ ⲛⲉⲙ ⲛⲉⲕⲭⲣⲏⲙⲁ ⲓⲥ ϩⲏⲡⲡⲉ ⲭⲛⲁⲩ ϩⲱⲕ ⲉⲛⲏ ⲉⲧⲁⲩϣⲱⲡⲓ ⲛ̃ⲛⲓⲕⲉⲭⲱⲟⲩⲛⲓ ### 0006 ⲧⲏⲣⲟⲩ ⲉⲧⲁⲩⲉⲣⲁⲧⲥⲱⲧⲉⲙ ⲛⲥⲁ ⲛⲓⲛⲟⲙⲟⲥ ⲛ̃ⲧⲉ ⲛⲓⲡⲉⲣⲥⲓⲥ ⲙ̃ⲫⲣⲏϯ ⲉ̃ⲧⲁⲩⲙⲟⲩ ⲛ̃ⲕⲁⲕⲱⲥ ⲉⲑⲃⲉ ⲡⲁⲓⲣⲁⲛ ϫⲉ ⲭⲣⲓⲥ- ⲧⲓⲁ̃ⲛⲟⲥ ⲉⲁⲩϯⲟⲥⲓ ⲙ̃ⲡⲓⲁ̃ⲏⲣ ⲉⲑⲛⲁⲛⲉϥ ⲡⲉϫⲁϥ ⲛ̃ϫⲉ ⲡⲓⲙⲁ- ⲕⲁⲣⲓⲟⲥ ⲓⲁⲕⲱⲃⲟⲥ ϫⲉ ⲉⲓⲧⲁϫⲣⲏⲟⲩⲧ ⲉϫⲉⲛ ⲛⲓϣⲗⲏⲗ ⲛ̃ⲧⲉ ⲛⲏ ⲉⲧⲁⲩϫⲱⲕ ⲉⲃⲟⲇ ϧⲁϫⲱⲓ ⲉⲓⲉⲣϩⲉⲗⲡⲓⲥ ⲉⲧⲁϩⲱⲟⲩ ϩⲱ ϧⲉⲛ ⲟⲩⲭⲱⲗⲉⲙ ⲟⲩⲟϩ ⲉⲉⲣⲁⲡⲟⲗⲁⲩⲓⲛ ⲛⲉⲙⲱⲟⲩ ⲛ̃ⲛⲓⲁ̃ⲅⲁⲑⲟⲛ ⲛⲏ ⲉⲧⲉ ⲙⲡⲉ ⲃⲁⲗ ⲛⲁⲩ ⲉⲣⲱⲟⲩ ⲟⲩⲇⲉ ⲙⲡⲉ ⲙⲁϣϫⲉ ⲥⲟⲑⲙⲟⲩ ⲙ̃ⲡⲟⲩⲁⲗⲏⲓ ⲉ̃ϩⲣⲏⲓ ⲉϫⲉⲛ ⲡϩⲏⲧ ⲛ̃ⲛⲓⲣⲱ- ⲙⲓ *ⲛⲏ ⲉⲧⲁ ⲫ︦ϯ︦ ⲥⲉⲃⲧⲱⲧⲟⲩ ⲛ̃ⲛⲏ ⲉⲑⲙⲉⲓ ⲙ̃ⲙⲟϥ ⲛⲉⲙ ⲛⲏ ⲉⲧⲓ̃ⲣⲓ ⲙ̃ⲡⲉϥⲟⲩⲱϣ Ⲉⲧⲁϥⲥⲱⲧⲉⲙ ⲉ̃ⲛⲁⲓ ⲛ̃ϫⲉ ⲡⲟⲩⲣⲟ ⲁϥⲙⲟϩ ⲛ̃ϫⲱⲛⲧ ⲉⲙⲁϣⲱ ⲟⲩⲟϩ ⲁϥⲉⲣⲕⲉⲗⲉⲩⲓⲛ ⲉⲑⲣⲟⲩϩⲓⲟⲩⲓ ⲉⲣⲟϥ ϧⲉⲛ ϩⲁⲛⲕⲟⲛⲧⲟⲃⲁⲕⲗⲟⲛ ⲉⲩⲑⲏⲙ ϣⲁⲧⲉ ⲛⲉϥⲥⲁⲣⲝ ⲟⲩⲙⲟⲧ ⲛ̃ⲥⲉ- ϣⲁϥⲓ̃ ⲉⲙⲁϣⲱ ⲉϥϫⲱ ⲙ̃ⲙⲟⲥ ϫⲉ ⲁⲣⲓⲑⲩⲥⲓⲁ̃ ⲛ̃ⲛⲓⲛⲟⲩϯ ⲛ̃ⲧⲉⲕⲥⲁϩⲱⲕ ⲉⲃⲟⲗ ⲙ̃ⲡⲭ︦ⲥ︦ ϫⲉ ⲛ̃ⲛⲉⲕⲙⲟⲩ ⲛ̃ⲕⲁⲕⲱⲥ ⲁϥ ⲉⲣⲟⲩⲱ̃ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲓⲁⲕⲱⲃⲟⲥ ϫⲉ ⲛ̃ⲛⲉⲥϣⲱⲡⲓ ⲙ̃ⲙⲟⲓ ⲉⲛⲉϩ ⲉⲑⲣⲓⲭⲱ ⲛ̃ⲥⲱⲓ ⲙ̃ⲡⲓⲣⲉϥⲥⲱⲛⲧ ⲟⲩⲟϩ ⲛ̃ⲧⲁϣⲉⲙ- ϣⲓ ⲛ̃ⲛⲉϥⲥⲱⲛⲧ ⲡⲉϫⲁϥ ⲛⲁϥ ⲛ̃ϫⲉ ⲡⲟⲩⲣⲟ ϫⲉ ⲙ̃ⲡⲉⲣ- ⲙⲉⲩⲓ̃ ⲛⲁⲕ ϫⲉ ϯⲛⲁⲧⲁⲕⲟⲕ ϧⲉⲛ ⲟⲩⲥⲏϥⲓ ⲁⲗⲗⲁ ⲁ̃ⲣ- ⲉ̃ⲙⲓ ⲛⲁⲕ ⲉⲫⲁⲓ ϫⲉ ⲁϣⲧⲉⲙⲧⲁⲥⲑⲟⲕ ⲉⲃⲟⲗ ⲙ̃ⲡⲁⲓⲙⲱⲓⲧ ⲫⲁⲓ ⲉ̃ⲧⲁⲕⲟϩⲓ ⲉⲣⲁⲧⲕ ⲛ̃ϧⲏⲧϥ ϯⲛⲁⲓ̃ⲛⲓ ⲉϫⲱⲕ ⲛ̃ϩⲁⲛ- ⲃⲁⲥⲁⲛⲟⲥ ⲉⲩⲛⲁϣⲧ ⲡⲓⲙⲁⲕⲁⲣⲓⲟⲥ ⲇⲉ ⲓⲁ̃ⲕⲱⲃⲟⲥ ⲁϥϫⲟⲩϣⲧ ⲉϧⲟⲩⲛ ⲉϩⲣⲁϥ ⲡⲉϫⲁϥ ⲛⲁϥ ϫⲉ ⲙ̃ⲡⲉⲣϯϧⲓⲥⲓ ⲛⲁⲕ ⲱ̃ ⲡⲟⲩⲣⲟ ⲟⲩⲇⲉ ⲙ̃ⲡⲉⲣⲧⲁⲛϣⲱ ⲛ̃ⲛⲉⲕⲥⲁϫⲓ ⲁⲗⲗⲁ ϫⲱⲕ ⲉⲃⲟⲗ ⲛ̃ⲛⲓϩⲃⲏⲟⲩⲓ̃ ⲡⲗⲏⲛ ⲛⲉⲕⲥⲁϫⲓ ⲛⲁϣⲉⲣⲑⲱⲣⲧ ⲁⲛ ⲟⲩⲟϩ ⲛⲉⲕⲁ̃ⲡⲩⲗⲏ ⲛⲁϣⲉ ⲉϧⲟⲩⲛ ⲁⲛ ⲉ̃ⲛⲁⲙⲁϣϫ ⲉⲓ̃ⲓⲏⲥ ⲅⲁⲣ ⲁ̃ⲛⲟⲕ ⲉϣⲉ ϣⲁ ⲫⲏ ⲉϯⲙⲉⲓ ⲙ̃ⲙⲟϥ ⲡⲭ︦ⲥ︦ ⲡⲉϫⲉ ⲡⲟⲩⲣⲟ ⲛⲁϥ ϫⲉ ⲛⲁⲡⲉⲕϣⲉⲙϣⲓ ϩⲱⲟⲩ ⲁⲩϭⲓϣⲓⲡⲓ ϧⲉⲛ ⲛⲓⲉ̃ϩⲟⲟⲩ ⲛ̃ⲧⲉ ⲡⲁⲓ̃ⲱⲧ ⲉⲩⲟⲩⲱϣⲧ ϧⲉⲛ ⲟⲩϣⲉⲙϣⲓ ⲙ̃ⲡⲁⲓⲣⲏϯ ### 0007 *ⲁⲩϣⲱⲡⲓ ϧⲁ ϩⲁⲛⲃⲁⲥⲁⲛⲟⲥ ⲉⲩⲟϣ ⲛⲉⲙ ϩⲁⲛϣⲧⲉⲕⲟ ⲉⲑⲃⲉ ϫⲉ ⲙ̃ⲡⲟⲩⲟⲩⲱϣ ⲉⲥⲱⲧⲉⲙ ⲛ̃ⲥⲁ ⲡⲓⲟⲩⲁϩⲥⲁϩⲛⲓ ⲛ̃ⲧⲉ ⲡⲟⲩⲣⲟ ⲡⲉϫⲁϥ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲓⲁⲕⲱⲃⲟⲥ ϫⲉ ⲁⲓϫⲟⲥ ⲛⲁⲕ ⲛ̃ⲕⲉⲥⲟⲡ ϫⲉ ⲫⲁⲓ ⲡⲉ ⲡⲁϣⲗⲏⲗ ⲉϯⲓⲛⲓ ⲙⲙⲟϥ ⲛⲁϩⲣⲉⲛ ⲫ︦ϯ ϧⲉⲛ ⲟⲩⲛⲁϩϯ ϫⲉ ⲕⲁⲧⲁ ⲫⲣⲏϯ ⲉⲧⲁ ⲛⲏ ⲉⲧⲉⲙⲙⲁⲩ ϫⲱⲕ ⲉⲃⲟⲗ ⲛ̃ⲧⲟⲩⲟⲙⲟⲗⲟⲅⲓⲁ̃ ⲉϧⲟⲩⲛ ⲉⲡⲭ︦ⲥ︦ ⲁⲛⲟⲕ ϩⲱ ⲟⲛ ⲉⲓⲙⲟϣⲓ ϧⲉⲛ ⲡⲁⲓⲙⲱⲓⲧ ⲛⲟⲩⲱⲧ ⲛⲉⲙⲱⲟⲩ ⲙ̃ⲡⲁⲓⲣⲏϯ ⲟⲩⲟϩ ⲛ̃ⲧⲉ ⲡⲁϫⲱⲕ ⲉⲃⲟⲗ ϣⲱⲡⲓ ⲙ̃ⲙⲫⲣⲏϯ ⲙ̃ⲫⲱⲟⲩ ⲡⲉϫⲁϥ ⲛⲁϥ ⲛ̃ϫⲉ ⲡⲟⲩⲣⲟ ϫⲉ ⲙ̃ⲡⲉⲣⲉⲣⲁⲧϣⲓⲡⲓ ⲛ̃ⲧⲉⲕⲉⲣⲁⲧ- ⲥⲱⲧⲉⲙ ⲛ̃ⲥⲁ ⲡⲉⲛⲟⲩⲁϩⲥⲁϩⲛⲓ ϫⲉ ⲛ̃ⲛⲉⲕⲧⲁⲕⲟ ⲛ̃ⲧⲉⲕⲙⲉⲧ- ⲃⲉⲣⲓ ⲟⲩⲟϩ ⲛⲧⲉⲕϯⲟⲥⲓ̃ ⲛ̃ⲛⲉⲕϩⲩⲡⲁⲣⲭⲟⲛⲧⲁ ⲙⲉⲛⲉⲛⲥⲱⲥ ⲛ̃ⲧⲉⲕⲙⲟⲩ ⲛ̃ⲕⲁⲕⲱⲥ ⲡⲉϫⲁϥ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲓⲁⲕⲱⲃⲟⲥ ϫⲉ ⲡⲁⲓⲙⲟⲩ ⲫⲁⲓ ⲛⲟⲩⲙⲟⲩ ⲛⲏⲓ ⲁⲛ ⲡⲉ ϥⲟⲓ ⲅⲁⲣ ⲙ̃ⲫⲣⲏϯ ⲛⲟⲩⲣⲁⲥⲟⲩⲓ̃ ⲙⲡⲓⲛⲁⲩ ⲉϣⲁⲣⲉ ⲟⲩⲁⲓ ⲛⲉϩⲥⲓ ⲉⲃⲟⲗϧⲉⲛ ⲡⲓϩⲓ- ⲛⲓⲙ ⲡⲉϫⲉ ⲡⲟⲩⲣⲟ ⲛⲁϥ ϫⲉ ϯ ⲙ̃ⲡⲉⲕⲟⲩⲟⲓ ⲛ̃ⲭⲱⲗⲉⲙ ⲛ̃ⲧⲉⲕⲟⲩⲱϣⲧ ⲙ̃ⲡⲉⲛϭ︦ⲥ︦ ⲫⲣⲏ ⲫⲁⲓ ⲉⲧⲉⲣⲟⲩⲱⲓⲛⲓ ⲉⲣⲟⲛ ϧⲉⲛ ⲧⲉϥⲙⲉⲧⲗⲁⲙⲡⲣⲟⲥ ⲉϥϯⲁⲓⲁⲓ ⲛⲁⲛ ⲛ̃ⲛⲓⲕⲁⲣⲡⲟⲥ ⲛⲉⲙ ⲡⲓⲓ̃ⲟϩ ⲛⲉⲙ ⲡⲓⲭⲣⲱⲙ ⲛⲉⲙ ⲡⲓⲙⲱⲟⲩ ⲛⲁⲓ ⲉⲧⲉ ⲛⲓⲡⲉⲣⲥⲏⲥ ⲧⲏⲣⲟⲩ ⲟⲩⲱⲧ ⲙ̃ⲙⲱⲟⲩ ⲡⲉϫⲁϥ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲓⲁⲕⲱⲃⲟⲥ ϫⲉ ⲛ̃ⲛⲉⲥϣⲱⲡⲓ ⲛⲏⲓ ⲉⲛⲉϩ ⲉⲑⲣⲓⲟⲩⲱⲧ ⲛ̃ⲛⲓⲣⲉϥϣⲉⲙϣⲓ ⲛⲁⲓ ⲉⲧⲁ *ⲡϭ︦ⲥ︦ ⲡⲁⲛⲟⲩϯ ⲑⲁⲙⲓⲱⲟⲩ ⲉⲧⲁϩⲩⲡⲉⲣⲉⲥⲓⲁ ⲛⲉⲙ ⲟⲩⲟⲛ ⲛⲓⲃⲉⲛ ⲉⲧϣⲉⲙϣⲓ ⲛⲁϥ ⲡⲓⲣⲏ ⲅⲁⲣ ⲛⲁⲉⲣⲭⲁⲕⲓ ⲟⲩⲟϩ ⲛ̃ⲧⲉ ⲡⲓⲓ̃ⲟϩ ⲉⲣⲥⲛⲟϥ ⲟⲩⲟϩ ⲛⲓⲓ̃ⲁⲣⲱⲟⲩ ⲛⲉⲙ ⲫⲓⲟⲙ ⲛⲁϣⲱⲟⲩⲓ ⲟⲩⲟϩ ⲉ̃ⲫⲙⲁ ⲙ̃ⲡⲁⲓⲭⲣⲱⲙ ⲫⲁⲓ ⲟⲩⲟⲛ ⲕⲉⲟⲩⲁⲓ ⲛ̃ⲭⲣⲱⲙ ϣⲟⲡ ⲉⲩⲉⲣⲕⲟⲗⲁⲍⲓⲛ ⲛ̃ϧⲏⲧϥ ⲛ̃ⲟⲩⲟⲛ ⲛⲓⲃⲉⲛ ⲉⲑⲛⲁⲭⲱ ⲛ̃ⲥⲱⲟⲩ ⲙ̃ⲫ︦ϯ︦ ⲙ̃ⲙⲏⲓ ⲛ̃ⲥⲉⲟⲩⲱⲧ ⲛ̃ⲛⲉϥⲥⲱⲛⲧ ⲁⲛⲟⲕ ⲇⲉ ϧⲉⲛ ⲟⲩⲡⲁⲣⲣⲏⲥⲓⲁ̃ ⲁⲛⲟⲕ ⲟⲩⲭⲣⲓⲥⲧⲓⲁⲛⲟⲥ ⲟⲩⲟϩ ϯⲛⲁⲟⲩⲱϣⲧ ⲁⲛ ⲙ̃ⲫⲣⲏ ⲟⲩⲇⲉ ⲡⲓⲓ̃ⲟϩ ⲟⲩⲇⲉ ⲡⲓⲙⲱⲟⲩ ⲟⲩⲇⲉ ⲡⲓⲭⲣⲱⲙ ⲫⲁⲓ ⲉⲧⲟⲩⲛⲁⲉⲣⲕⲟⲗⲁⲍⲓⲛ ⲙ̃ⲙⲟⲕ ⲛ̃ϧⲏⲧϥ ### 0008 ⲛⲉⲙ ⲟⲩⲟⲛ ⲛⲓⲃⲉⲛ ⲉⲧⲁⲩⲉⲛⲟⲩ ⲉⲃⲟⲗ ⲙ̃ⲫ︦ϯ︦ ⲛⲉⲙ ⲡⲁⲣⲁ- ⲛⲟⲙⲟⲥ ⲛⲓⲃⲉⲛ ⲙ̃ⲡⲉⲕⲣⲏϯ Ⲧⲟⲧⲉ ⲡⲟⲩⲣⲟ ϧⲉⲛ ⲟⲩϫⲱⲛⲧ ⲛⲉⲙ ⲟⲩⲙⲃⲟⲛ ⲁϥⲉⲣⲕⲉ- ⲗⲉⲩⲓⲛ ⲉⲑⲣⲟⲩⲟϥⲧϥ ⲉ̃ⲟⲩϣⲉ ⲛ̃⳧ ⲉⲁⲩⲁϣϥ ⲉϩⲣⲏⲓ ⲛ̃ⲥⲁ- ϫⲱϥ ⲁϥⲟⲁϩⲥⲁϩⲛⲓ ⲉⲑⲣⲟⲩϩⲓⲥⲟⲑⲛⲉϥ ⲉⲣⲟϥ ⲛⲓⲥⲟⲑⲛⲉϥ ⲉϯⲟⲩϩⲓⲟⲩⲓ ⲙⲙⲱⲟⲩ ⲉ̃ⲡⲓⲙⲁⲕⲁⲣⲓⲟⲥ ⲙ̃ⲡⲉ ⲟⲩⲟⲛ ⲛ̃ϧⲏⲧⲟⲩ ̃ϭⲟϩ ⲉⲣⲟϥ ⲉⲡⲧⲏⲣϥ ⲁⲗⲗⲁ ⲁⲩⲟϩⲓ ⲉⲩⲁϣⲓ ϧⲉⲛ ⲡⲓⲁ̃ⲏⲣ ⲟⲩⲁⲓ ⲇⲉ ⲉ̃ⲃⲟⲗϧⲉⲛ ⲛⲓⲣⲉϥϩⲓⲥⲟⲑⲛⲉϥ ⲉⲧⲉ ⲫⲏ ⲡⲉ ⲉⲧⲁϥϯ ϣⲑⲟⲩⲓⲧ ϧⲁ ⲡⲉⲑⲟⲩⲁⲃ ⲛⲁϩⲣⲉⲛ ⲡⲟⲩⲣⲟ ⲁϥϯ ⲙ̃ⲡⲉϥⲟⲩⲟⲓ ⲉⲣⲟϥ ⲉⲣⲉ ⲧⲉϥⲫⲓϯ ⲛ̃ⲧⲟⲧϥ ⲁϥϯ ⲛ̃ⲟⲩϣⲁϣ ⲛⲁϥ ϧⲉⲛ *ⲧⲉϥⲛⲉϫⲓ ϧⲉⲛ ϯⲫⲓϯ ⲉⲧⲭⲏ ⲛ̃ⲧⲟⲧϥ ⲉϥϫⲟⲩϣⲧ ⲉⲡϣⲱⲓ ϩⲁⲣⲟϥ ϧⲉⲛ ϯⲟⲩⲛⲟⲩ ⲁ ⲟⲥⲟⲑⲛⲉϥ ⲉⲣ ⲉⲃⲟⲗ ϧⲉⲛ ⲡⲓⲁ̃ⲏⲣ ⲁϥϩⲉⲓ ⲉϧⲣⲏⲓ ⲉϫⲉⲛ ⲡⲉϥⲃⲁⲗ ⲛ̃ⲟⲩⲓ̃ⲛⲁⲙ ⲟⲩⲟϩ ⲥⲁⲧⲟⲧϥ ⲁϥⲙⲟⲩ ⲛ̃ϯⲟⲩⲛⲟⲩ ⲟⲩⲟϩ ⲟⲩⲟⲛ ⲛⲓⲃⲉⲛ ⲉⲧⲑⲟⲩⲏⲧ ⲙ̃ⲡⲉϥ- ⲕⲱϯ ϧⲉⲛ ⲡϫⲓⲛⲑⲣⲟⲩⲛⲁⲩ ⲉⲡⲉⲧⲁϥϣⲱⲡⲓ ⲁⲩⲱϣ ⲉⲃⲟⲗ ⲉⲩϫⲱ ⲙ̃ⲙⲟⲥ ϫⲉ ⲟⲩⲁⲓ ⲡⲉ ⲫ︦ϯ︦ ⲙ̃ⲡⲉⲑⲟⲩⲁⲃ ⲓⲁⲕⲱⲃⲟⲥ ⲧⲟⲧⲉ ⲡⲟⲩⲣⲟ ⲁϥⲙⲟϩ ⲛ̃ϫⲱⲛⲧ ⲉⲙⲁϣⲱ ϧⲉⲛ ⲡϫⲓⲛⲑⲣⲉϥ- ⲥⲱⲧⲉⲙ ⲉⲛⲓⲫⲱⲛⲏ ⲛ̃ⲧⲉ ⲛⲓⲙⲏϣ ⲁϥⲉⲣⲕⲉⲗⲉⲩⲓⲛ ⲉⲑⲣⲉ ⲛⲓⲙⲁⲧⲟⲓ ⲕⲱϯ ⲉⲣⲱⲟⲩ ⲛⲉⲙ ⲛⲟⲩⲥⲟⲑⲛⲉϥ ⲙ̃ⲡⲟⲗⲉⲙⲓⲕⲟⲛ ϩⲱⲥⲧⲉ ⲛ̃ⲧⲉ ⲟⲩⲙⲏϣ ϩⲉⲓ ⲛⲉⲙ ⲛⲟⲩⲉⲣⲏⲟⲩ ⲛ̃ⲥⲉⲙⲟⲩ ⲛⲁⲓ ⲉⲧⲧⲉⲛⲑⲱⲛⲧ ⲉⲡⲓⲥⲟⲛⲓ ⲉⲧⲁ ⲫ︦ϯ︦ ⲟⲩⲛ ⲛⲁϥ ⲙ̃ⲡⲓⲣⲟ ⲛ̃ⲧⲉ ⲡⲓⲡⲁⲣⲁⲇⲓⲥⲟⲥ ⲉⲑⲃⲉ ⲟⲩⲟ̃ⲙⲟⲗⲟⲅⲓⲁ ⲛ̃ⲟⲩⲧ Ⲧⲟⲧⲉ ⲁϥⲉⲣⲕⲉⲗⲉⲩⲓⲛ ⲛ̃ϫⲉ ⲡⲟⲩⲣⲟ ⲉ̃ⲭⲁ ⲡⲉⲑⲟⲩⲁⲃ ⲉϧⲣⲏⲓ ⲟⲩⲟϩ ⲉ̃ⲉⲛϥ ⲛⲁϥ ⲟⲩⲟϩ ⲡⲉϫⲉ ⲡⲟⲩⲣⲟ ⲛⲁϥ ϫⲉ ⲭⲛⲁⲩ ⲛⲏ ⲉⲧⲁⲩⲱⲡⲓ ⲧⲏⲣⲟⲩ ⲛ̃ⲧⲉⲕⲗⲱⲓϫⲓ ⲉⲑⲃⲉ ⲧⲉⲕ- ⲙⲉⲧⲣⲉϥⲉⲣϩⲓⲕ ϫⲉ ⲛⲓⲥⲟⲑⲛⲉϥ ⲙⲉⲛ ⲁⲕⲑⲣⲟⲩⲟ̃ϩⲓ ⲉⲩⲁϣⲓ ϧⲉⲛ ⲡⲓⲁ̃ⲏⲣ ⲟⲩⲟϩ ⲡⲓⲛⲓϣϯ ⲛ̃ϩⲩⲡⲁⲧⲓⲕⲟⲥ ⲁⲕϧⲟⲑⲃⲉϥ ⲛⲉⲙ ⲡⲓⲙⲏϣ ⲧⲏⲣϥ ⲉⲧⲁⲩⲙⲟⲩ ⲉⲑⲃⲉ ⲛⲉⲕⲙⲁⲅⲓⲁ̃ ⲁⲗⲗⲁ ⲕⲁⲛ ⲥϫⲉⲛ ϯⲛⲟⲩ ⲙⲁ *ⲡⲉⲕⲟⲩⲟⲓ ⲛ̃ⲧⲉⲕⲟⲩⲱϣⲧ ⲛ̃ⲛⲓⲛⲟⲩϯ ### 0009 ⲛ̃ⲧⲉ ⲛⲓⲡⲉⲣⲥⲏⲥ ⲛ̃ⲑⲟⲕ ⲟⲩϣⲫⲏⲣ ⲅⲁⲣ ⲛ̃ⲧⲉ ⲡⲁⲓⲱⲧ ⲡⲟⲩⲣⲟ ⲟⲩⲟϩ ϯⲟⲩⲱϣ ⲁⲛ ⲉ̃ⲉⲣ ⲡⲉⲧϩⲱⲟⲩ ⲛⲁⲕ ⲁϥⲉⲣⲟⲩⲱ̃ ⲛ̃ϫⲉ ⲡⲓⲁ̃ⲅⲓⲟⲥ ⲓⲁⲕⲱⲃⲟⲥ ϫⲉ ϯⲙⲉⲧϣⲫⲏⲣ ⲛ̃ⲧⲉ ⲡⲁⲓⲕⲟⲥⲙⲟⲥ ⲟⲩⲙⲉⲧϫⲁϫⲓ ⲧⲉ ⲉⲫ︦ϯ︦ ⲡⲉϫⲁϥ ⲛ̃ϫⲉ ⲡⲟⲩⲣⲟ ϫⲉ ⲙ̃ⲡⲉⲛ- ⲑⲣⲟⲩⲉⲣϩⲁⲗ ⲙ̃ⲙⲟⲕ ⲛ̃ϫⲉ ⲛⲓⲛⲁⲍⲱⲣⲉⲟⲥ ⲉⲩϫⲱ ⲙⲙⲟⲥ ϫⲉ ⲡⲁⲓⲙⲟⲩ ⲫⲁⲓ ⲟⲩϩⲓⲛⲓⲙ ⲡⲉ ⲙⲡⲉⲣⲉⲣϩⲟϯ ϧⲁ ⲧⲉϥϩⲏ ⲕⲉⲅⲁⲣ ⲛ̃ⲑⲱⲟⲩ ϩⲱⲟⲩ ⲛⲓⲛⲓϣϯ ⲛ̃ⲟⲩⲣⲱⲟⲩ ⲥⲉⲉⲣϩⲟϯ ϧⲁϫⲱϥ ⲙ̃ⲫⲙⲟⲩ ⲡⲉϫⲁϥ ⲛ̃ϫⲉ ⲡⲓⲁ̃ⲅⲓⲟⲥ ⲓⲁⲕⲱ̃ⲃⲟⲥ ϫⲉ ⲛⲓⲟⲩⲣⲱⲟⲩ ⲛⲉⲙ ⲛⲓⲁⲣⲭⲱⲛ ⲛⲉⲙ ⲛⲏ ⲉⲧⲉ ⲛⲥⲉⲟⲓ ⲁⲛ ⲙ̃ⲃⲱⲕ ⲙ̃ⲫ︦ϯ︦ ⲉⲧⲟⲛϧ ϣⲁⲩⲉⲣϩⲟϯ ϧⲁϫⲱϥ ⲙ̃ⲫⲙⲟⲩ ⲉⲑⲃⲉ ϫⲉ ⲥⲉⲥⲱⲟⲩⲛ ⲁⲛ ϫⲉ ⲟⲩ ⲡⲉⲧⲁⲩⲁⲓϥ ϧⲉⲛ ⲡⲓⲕⲟⲥⲙⲟⲥ ⲟⲩⲇⲉ ⲙⲙⲟⲛ ϩⲉⲗⲡⲓⲥ ⲛ̃ⲧⲱⲟⲩ ⲙ̃ⲙⲁⲩ ⲉϧⲟⲩⲛ ⲉ̃ⲧⲥⲁⲣⲝ ⲙ̃ⲡⲓϧⲁⲉ ⲛⲉϩⲟⲟⲩ ⲛⲉⲙ ⲛⲓⲁⲅⲁⲑⲟⲛ ⲉⲑⲙⲏⲛ ⲉⲃⲟⲗ ⲉⲣⲉ ⲧⲟⲩ- ϩⲉⲗⲡⲓⲥ ⲅⲁⲣ ϣⲁ ⲡⲁⲓⲙⲁ ⲉⲑⲃⲉ ⲫⲁⲓ ⲉⲩⲉⲣϩⲟϯ ϧⲁϫⲱϥ ⲙ̃ⲫⲙⲟⲩ ⲫⲁⲓ ⲅⲁⲣ ⲡⲉ ⲙ̃ⲫⲣⲏϯ ⲉⲧⲥϧⲏⲟⲩⲧ ⲉⲑⲃⲉⲑⲏⲛⲟⲩ ϫⲉ ⲁ ⲡⲓϩⲉⲗⲗⲏⲛⲟⲥ ⲙⲟⲩ ⲟⲩⲟϩ ⲁ ⲧⲉϥϩⲉⲗⲡⲓⲥ ⲟ̃ϩⲓ ⲛⲉⲙⲁϥ ⲟⲩⲟϩ ⲟⲛ ϫⲉ ⲧϩⲉⲗⲡⲓⲥ ⲙ̃ⲡⲓⲁⲥⲉⲃⲏⲥ ⲛⲁⲧⲁⲕⲟ² ⲡⲉϫⲁϥ ⲛⲁϥ ⲛ̃ϫⲉ ⲡⲟⲩⲣⲟ ϫⲉ ⲉⲧⲉⲧⲉⲛⲙⲉⲩⲓ ⲉⲣⲟⲛ ⲛ̃ⲑⲱⲧⲉⲛ ϧⲁ ⲛⲓⲭⲣⲓⲥⲧⲓⲁ̃ⲛⲟⲥ ϫⲉ ⲁⲛⲟⲛ ϩⲁⲛϩⲉⲗⲗⲏⲛⲟⲥ ⲙ̃ⲡⲁⲓⲣⲏϯ ⲙ̃ⲡⲓⲣⲏϯ ⲛ̃ⲑⲱⲧⲉⲛ ⲉⲧⲉⲧⲉⲛ*ⲕⲟⲣϥ ⲉⲃⲟⲗϩⲁ ⲡϣⲉⲙϣⲓ ⲛⲛⲓⲛⲓϣϯ ⲛ̃ⲛⲟⲩϯ ⲛ̃ⲧⲉⲧⲉⲛⲟⲩⲱϣⲧ ⲁⲛ ⲙ̃ⲡⲉⲛ- ϭ︦ⲥ︦ ⲡⲓⲣⲏ ⲛⲉⲙ ⲡⲓⲓ̃ⲟϩ ⲛⲉⲙ ⲡⲓⲭⲣⲱⲙ ⲛⲉⲙ ⲡⲓⲙⲱⲟⲩ ⲉⲧⲉ ⲛⲁⲓ ⲛⲉ ⲛⲓϣⲏⲣⲓ ⲛ̃ⲧⲉ ⲫ︦ϯ︦ ⲁϥⲉⲣⲟⲩⲱ̃ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲓⲁⲕⲱⲃⲟⲥ ϫⲉ ⲉⲕⲥⲟⲣⲉⲙ ⲱ ⲡⲟⲩⲣⲟ ⲥⲥϧⲏⲟⲩⲧ ⲅⲁⲣ ϫⲉ ⲛⲏ ⲉⲧⲉⲣⲁⲅⲱⲛⲓⲍⲉⲥⲑⲉ ⲉⲑⲃⲉ ⲫ︦ϯ︦ ⲛ̃ⲑⲱⲟⲩ ⲛⲉ ⲛⲓϣⲏⲣⲓ ⲛ̃ⲧⲉ ⲫ︦ϯ︦ ⲛ̃ⲑⲱⲧⲉⲛ ⲇⲉ ⲉⲧⲉⲧⲉⲛⲙⲉⲩⲓ̃ ⲉⲣⲱⲧⲉⲛ ⲙⲙⲁⲩⲁ̃ⲧⲉⲛ- ⲑⲏⲛⲟⲩ ϫⲉ ⲧⲉⲧⲉⲛⲥⲱⲟⲩⲛ ⲙ̃ⲫ︦ϯ︦ ⲟⲩⲟϩ ⲧⲉⲧⲉⲛⲟⲩⲱϣⲧ ⲛ̃ϩⲁⲛⲓ̃ⲇⲱⲗⲟⲛ ⲛ̃ⲱⲛⲓ ⲛⲉⲙ ϩⲁⲛⲥⲱⲛⲧ ⲉⲣⲉⲧⲉⲛⲑⲟⲛⲧⲉⲛ ⲙ̃ⲙⲱⲟⲩ ⲉⲫ︦ϯ︦ ⲉⲣⲉⲧⲉⲛϯϫⲱⲛⲧ ⲙ̃ⲫⲏ ⲉ̃ⲧⲁϥϯ ⲛⲱⲧⲉⲛ ### 0011 ⲑⲣⲉ ⲡⲉⲕⲣⲁⲛ ⲉⲣⲥⲱⲓⲧ ϧⲉⲛ ⲙⲁⲓ ⲛⲓⲃⲉⲛ ϣⲁ ⲉϧⲣⲏⲓ ⲉⲧⲭⲱⲣⲁ ⲛ̃ⲭⲏⲙⲓ ⲡⲓⲙⲁ ⲉⲧⲉ̃ⲣⲉ *ⲡⲉⲕⲥⲱⲙⲁ ⲛⲁⲟⲩⲟϩ ⲛ̃ϧⲏⲧϥ ⲙⲉⲛⲉⲛⲥⲁ ⲟⲩⲥⲏⲟⲩ ⲥⲉⲛⲁⲕⲱⲧ ⲛⲁⲕ ⲛ̃ⲟⲩⲙⲁⲣⲧⲏⲣⲓⲟⲛ ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲉⲟⲩⲉⲣⲫⲙⲉⲩⲓ︦ ⲛⲁⲕ ⲫⲁⲓ ⲉⲧⲉⲣⲉ ⲟⲩⲟⲛ ϩⲁⲛⲛⲓϣϯ ⲛ̃ϫⲟⲙ ⲛⲉⲙ ϩⲁⲛϣⲫⲏⲣⲓ ⲛⲁϣⲱⲡⲓ ⲛ̃ϧⲏⲧϥ ⲛ̃ⲟⲩⲟⲛ ⲛⲓⲃⲉⲛ ⲉⲑⲛⲁⲉⲣⲉⲧⲓⲛ ⲙ̃ⲙⲟⲓ ϧⲉⲛ ⲡⲉⲕⲣⲁⲛ ⲟⲩⲟϩ ⲁⲩϯ ⲙ̃ⲡⲟⲩⲟⲩⲟⲓ ⲛ̃ϫⲉ ⲡⲭⲟⲣⲟⲥ ⲛ̃ⲧⲉ ⲛⲏ ⲉⲑⲟⲩⲁⲃ ⲁⲩⲑⲉ- ⲕⲉⲙ ⲛⲓⲕⲁϣ ⲧⲏⲣⲟⲩ ⲉⲃⲟⲗϧⲉⲛ ⲡⲉϥⲥⲱⲙⲁ ⲟⲩⲟϩ ⲁϥⲟⲩ- ϫⲁⲓ ⲛ̃ϯⲟⲩⲛⲟⲩ ⲁ ⲡⲉϥⲥⲱⲙⲁ ⲧⲏⲣϥ ϣⲱⲡⲓ ⲉϥⲟⲩⲟϫ ⲁϥⲉⲣⲯⲁⲗⲓⲛ ⲙ̃ⲡⲁⲓⲣⲏϯ ⲉϥϫⲱ ⲙ̃ⲙⲟⲥ ϫⲉ ⲛⲁⲓⲛⲁⲩ ⲉⲡϭ︦ⲥ︦ ⲙ̃ⲡⲁⲙⲑⲟ ⲉⲃⲟⲗ ⲛ̃ⲥⲏⲟⲩ ⲛⲓⲃⲉⲛ ϫⲉ ⲛ̃ⲛⲁⲕⲓⲙ ⲉⲑⲃⲉ ⲫⲁⲓ ⲁϥⲟⲩⲛⲟϥ ⲛ̃ϫⲉ ⲡⲁϩⲏⲧ ⲟⲩⲟϩ ⲁϥⲑⲉⲗⲏⲗ ⲛ̃ϫⲉ ⲡⲁⲗⲁⲥ ⲟⲩⲟϩ ⲁⲕϯ ⲛⲟⲩⲧⲁⲗϭⲟ ⲛ̃ⲧⲁⲥⲁⲣⲝ ϧⲉⲛ ϯⲟⲩⲛⲟⲩ ⲁ ⲡϭ︦ⲥ︦ ϣⲉ ⲛⲁϥ ⲉⲡϣⲱⲓ ⲉ̃ⲃⲟⲗϩⲓⲧⲟⲧϥ ⲟⲩⲟϩ ⲟⲛ ⲁϥⲉⲣⲯⲁⲗⲓⲛ ⲉϥϫⲱ ⲙ̃ⲙⲟⲥ ϫⲉ ⲁϥϣⲉ ⲛⲁϥ ⲉⲡϣⲱⲓ ⲛ̃ϫⲉ ⲫ︦ϯ︦ ϧⲉⲛ ⲟⲩⲉϣⲗⲏⲗⲟⲩⲓ ⲡϭ︦ⲥ︦ ϧⲉⲛ ⲟⲩϧⲣⲱⲟⲩ ⲛ̃ⲥⲁⲗⲡⲓⲅⲝ ⲁⲣⲓⲯⲁⲗⲓⲛ ⲉ̃ⲡⲉⲛⲛⲟⲩϯ ⲁ̃ⲣⲓⲯⲁⲗⲓⲛ ⲁⲗⲗⲏ- ⲗⲟⲩⲓⲁ̃ Ⲉⲧⲁ ϣⲱⲣⲡ ⲇⲉ ϣⲱⲡⲓ ⲁϥϩⲉⲙⲥⲓ ϩⲓ ⲡⲓⲃⲏⲙⲁ ⲛ̃ϫⲉ ⲡⲟⲩⲣⲟ ⲁϥⲟⲩⲁϩⲥⲁϩⲛⲓ ⲉⲑⲣⲟⲩ̃ⲛⲓ ⲛⲁϥ ⲙ̃ⲡⲓⲙⲁⲕⲁⲣⲓⲟⲥ ⲟⲩⲟϩ ⲛⲁϥⲉⲣⲯⲁⲗⲓⲛ ⲉϥϫⲱ ⲙ̃ⲙⲟⲥ ϫⲉ ⲟⲩⲙⲏϣ ⲛ̃ⲥⲟⲡ ⲁⲩⲃⲱⲧⲥ ⲉ̃ⲣⲟⲓ ⲓⲥϫⲉⲛ ⲧⲁⲙⲉⲧⲁⲗⲟⲩ ⲕⲉⲅⲁⲣ ⲙ̃ⲡⲟⲩϣ- ϫⲉⲙϫⲟⲙ ⲉⲣⲟⲓ ⲁⲗⲗⲏⲗⲟⲩⲓⲁ̃ ⲟⲩⲟϩ ⲉⲧⲁⲩⲛⲁⲩ ⲉⲣⲟϥ ⲉϥⲧⲁϫⲣⲏⲟⲩⲧ ⲟⲩⲟϩ ⲉϥⲉⲣⲯⲁⲗⲓⲛ ⲁϥⲣϣⲫⲏⲣⲓ ⲛ̃ϫⲉ ⲡⲟⲩⲣⲟ ⲛⲉⲙ ⲛⲉϥⲛⲓϣϯ *ⲟⲩⲟϩ ⲡⲓⲙⲏϣ ⲱϣ ⲉⲃⲟⲗ ϫⲉ ⲟⲩⲁⲓ ⲡⲉ ⲫ︦ϯ︦ ⲙⲡⲓⲁⲅⲓⲟⲥ ⲓⲁⲕⲱⲃⲟⲥ ⲧⲟⲧⲉ ⲡⲟⲩⲣⲟ ⲁϥⲉⲣⲁ̃ⲡⲟⲣⲓⲛ ⲉⲙⲁϣⲱ ⲟⲩⲟϩ ⲁϥⲧⲱⲟⲩⲛ ⲁϥϣⲉ ⲉϧⲟⲩⲛ ⲉⲡⲓⲡⲁⲗⲁⲧⲓⲟⲛ ⲁϥⲉⲣⲕⲉⲗⲉⲩⲓⲛ ⲛ̃ⲛⲉϥⲛⲓϣϯ ⲧⲏⲣⲟⲩ ⲉⲑⲣⲟⲩϣⲉ ⲉϧⲟⲩⲛ ⲛⲉⲙⲁϥ ⲟⲩⲟϩ ⲡⲉϫⲁϥ ⲛⲱⲟⲩ ϫⲉ ⲁϫⲟⲥ ⲛⲏⲓ ϫⲉ ⲟⲩⲙⲟⲩ ### 0012 ⲛⲁϣ ⲛ̃ⲣⲏϯ ⲡⲉⲧⲥϣⲉ ⲉⲑⲣⲉ ⲫⲁⲓ ϫⲉ ⲓⲁⲕⲱⲃⲟⲥ ⲙⲟⲩ ⲛ̃ϧⲏⲧϥ ⲉⲑⲃⲉ ϫⲉ ⲁϥⲉⲣⲧⲟⲗⲙⲁⲛ ⲛ̃ⲧⲁⲓϧⲉ ⲧⲏⲣⲥ ⲉϯⲟⲩⲃⲉ ⲛⲉⲛⲛⲟⲙⲟⲥ ⲛ̃ⲛⲓⲟⲩⲣⲱⲟⲩ ⲟⲩⲟϩ ⲁϥⲉⲣⲁⲓϣⲓⲡⲓ ⲙ̃ⲡⲉϥⲉⲣ ⲫⲟⲩⲱϣ ⲙ̃ⲡⲟⲩⲣⲟ ⲛⲉⲙ ⲡⲇⲟⲅⲙⲁ ⲛ̃ⲛⲓⲡⲉⲣⲥⲏⲥ ⲟⲩⲁⲓ ⲇⲉ ⲉⲃⲟⲗ ⲛ̃ϧⲏⲧⲟⲩ ⲉϣⲁϥϭⲓ̃ⲥⲟϭⲛⲓ ⲛⲉⲙⲁϥ ⲛⲥⲏⲟⲩ ⲛⲓⲃⲉⲛ ⲉⲡⲓ- ⲡⲉⲧϩⲱⲟⲩ ⲁϥⲉⲣⲟⲩⲱ̃ ⲡⲉϫⲁϥ ϫⲉ ⲉⲣⲉ ⲫⲁⲓ ⲉⲣⲭⲣⲓⲁ̃ ⲁⲛ ⲛⲟⲩⲫⲟⲛⲟⲥ ⲛ̃ⲟⲩⲱⲧ ⲟⲩⲇⲉ ⲉ︦ ⲟⲩⲇⲉ ⲓ̄ ⲁⲗⲗⲁ ϩⲁⲛⲙⲏϣ ⲉⲃⲟⲗϧⲉⲛ ⲡⲓⲙⲏϣ ⲁⲩⲙⲟⲩ ⲉⲑⲃⲏⲧϥ ϯⲟⲩⲱϣ ⲟⲩⲛ ⲉⲑⲣⲉ ⲡⲁϭ︦ⲥ︦ ⲡⲟⲩⲣⲟ ⲡϣⲏⲣⲓ ⲙ̃ⲡⲓⲣⲏ ⲛⲉⲙ ⲡⲓⲭⲣⲱⲙ ⲉⲣⲕⲉⲗⲉⲩⲓⲛ ⲉⲑⲣⲟⲩϭⲟⲗⲕϥ ⲉⲃⲟⲗ ⲛ̃ⲛⲉϥϫⲓϫ ⲛⲉⲙ ⲛⲉϥϭⲁⲗⲁⲩϫ ⲛⲥⲉ- ϭⲉⲧϭⲱⲧϥ ⲕⲁⲧⲁ ⲛⲉϥⲣⲁⲧⲱⲙⲓ ⲧⲏⲣⲟⲩ ϫⲉ ⲙ̃ⲡⲉϥⲟⲩⲱϣ ⲉ̃ⲙⲟϣⲓ ⲛ̃ⲥⲁ ⲡϣⲉⲙϣⲓ ⲛⲛⲓⲡⲉⲣⲥⲏⲥ ⲛⲉⲙ ⲡⲁϭ︦ⲥ︦ ⲡⲟⲩⲣⲟ ⲧⲟⲧⲉ ⲡⲟⲩⲣⲟ ⲁϥⲉⲣⲕⲉⲗⲉⲩⲓⲛ ⲙ̃ⲡⲁⲓⲣⲏϯ ϫⲉ ⲓⲁⲕⲱⲃⲟⲥ ⲫⲏ ⲉⲧⲁϥϭⲓ̃ ⲛ̃ϩⲁⲛⲛⲓϣϯ ⲛⲧⲁⲓⲟ ⲉⲃⲟⲗϩⲓⲧⲟⲧϥ ⲙⲡⲁⲓ̃ⲱⲧ ⲟⲩⲟϩ ⲉⲃⲟⲗϩⲓⲧⲟⲧ ϩⲱ ϩⲱⲥⲧⲉ ⲛ̃ⲧⲉϥϣⲱⲡⲓ ⲙⲙⲁϩⲅ̄ ϧⲉⲛ ⲑⲙⲉⲧ- ⲟⲩⲣⲟ ⲛ̃ⲛⲓⲃⲁⲃⲩⲗⲱⲛⲓⲧⲏⲥ ⲛⲉⲙ ⲛⲓⲙⲏⲇⲟⲥ ⲛⲉⲙ ⲛⲓⲡⲉⲣⲥⲓⲏⲥ ⲉⲡⲓⲇⲏ ⲟⲩⲛ ⲁϥϥⲟϫϥ ⲙ̃ⲙⲁⲩⲁⲧϥ ⲛ̃ϯⲇⲱⲣⲉⲁ *ⲛ̃ⲧⲉ ⲧⲁ- ⲙⲉⲧⲙⲁⲓⲣⲱⲙⲓ ϧⲉⲛ ⲡϫⲓⲑⲣⲉϥⲉⲣⲁⲧⲥⲱⲧⲉⲙ ⲛⲥⲁ ⲛⲉⲛⲛⲟⲙⲟⲥ ⲛ̃ⲛⲓⲡⲉⲣⲥⲏⲥ ⲛ̃ϥⲟⲩⲱϣⲧ ⲁⲛ ⲛ̃ⲛⲓⲛⲓϣϯ ⲛ̃ⲛⲟⲩϯ ⲡⲉⲛϭ︦ⲥ︦ ⲫⲣⲏ ⲛⲉⲙ ⲡⲓⲓ̃ⲟϩ ⲛⲓⲣⲉϥϣⲁⲛϣ ⲛ̃ⲛⲓⲕⲁⲣⲡⲟⲥ ⲛⲉⲙ ⲡⲓⲭⲣⲱⲙ ⲛⲉⲙ ⲡⲓⲙⲱⲟⲩ ⲛⲁⲓ ⲉ̃ⲧⲉ ⲛⲓⲟⲩⲣⲱⲟⲩ ⲛⲉⲙ ⲛⲏ ⲉⲧϧⲉⲛ ⲛⲓⲙⲉⲧ- ⲛⲓϣϯ ⲟⲩⲱϣⲧ ⲙ̃ⲙⲱⲟⲩ ⲉⲡⲓⲇⲏ ⲟⲩⲛ ⲁϥϣⲱⲡⲓ ⲛ̃ⲁⲧ- ⲥⲱⲧⲉⲙ ϯⲉⲣⲕⲉⲗⲉⲩⲓⲛ ⲕⲁⲧⲁ ⲫⲣⲏϯ ⲉⲧⲁϥⲉⲣⲥⲩⲛⲃⲟⲩ- ⲗⲉⲩⲓⲛ ⲛⲏⲓ ⲛ̃ϫⲉ ⲫⲏ ⲉⲑⲙⲉⲓ ⲙ̃ⲡⲉⲛⲟⲩϫⲁⲓ ⲉⲑⲣⲟⲩⲧⲟⲥϥ ⲛ̃ⲛⲉϥϫⲓϫ ⲛⲉⲙ ⲛⲉϥϭⲁⲗⲁⲩϫ ⲛ̃ⲥⲉϣⲱⲧ ⲛ̃ⲛⲓⲧⲏⲃ ⲛ̃ⲧⲉ ⲛⲉϥϫⲓϫ ⲛⲉⲙ ⲛⲉϥϭⲁⲗⲁⲩϫ ⲟⲩⲟϩ ⲛ̃ⲥⲉϫⲱϫⲓ ⲉⲃⲟⲗ ⲛ̃ⲛⲉϥϫⲫⲟⲓ ⲛⲉⲙ ⲛⲓⲕⲉⲗⲓ ⲛ̃ⲧⲉ ⲛⲉϥⲫⲁⲧ ⲛ̃ⲥⲉⲫⲁϧⲟⲩ ϣⲁ ⲉϧⲟⲩⲛ ⲉⲛⲉϥⲁⲗⲱϫ ⲙ̃ⲡⲓⲛⲁⲩ ⲉⲧⲟⲩⲛⲁⲁⲓϥ ⲙ̃ⲙⲉⲗⲟⲥ ⲙⲉⲗⲟⲥ ⲉⲩⲉⲱⲗⲓ ⲛ̃ⲧⲉϥⲁⲫⲉ ⲛ̃ⲧⲥⲏϥⲓ ### 0013 Ϧⲉⲛ ⲡϫⲓⲛⲑⲣⲉϥⲓ̃ ⲇⲉ ⲉⲃⲟⲗϩⲓⲧⲉⲛ ⲡⲟⲩⲣⲟ ⲛ̃ϫⲉ ⲡⲁⲓ- ⲟⲩⲁϩⲥⲁϩⲛⲓ ⲁⲩϩⲱⲗⲉⲙ ⲙ̃ⲡⲓⲁⲅⲓⲟⲥ ⲓⲁⲕⲱⲃⲟⲥ ⲁⲩⲉⲛϥ ⲉ̃ⲡⲓⲙⲁ ⲛ̃ⲧⲉ ⲧⲉϥⲁⲑⲗⲏⲥⲓⲥ ⲟⲩⲟϩ ϧⲉⲛ ϯⲟⲩⲛⲟⲩ ⲉ̃ⲧⲉⲙⲙⲁⲩ ϯⲡⲟⲗⲓⲥ ⲧⲏⲣⲥ ⲛⲉⲙ ⲛⲓⲛⲓϣϯ ⲧⲏⲣⲟⲩ ⲛ̃ⲧⲉ ⲡⲟⲩⲣⲟ ⲁⲩⲟⲩⲁ- ϩⲟⲩ ⲛ̃ⲥⲱϥ ⲟⲩⲟϩ ⲟⲩⲙⲏϣ ⲉⲃⲟⲗϧⲉⲛ ⲛⲁⲡⲉⲛⲛⲁϩϯ ϧⲉⲛ ⲡϫⲓⲛⲑⲣⲟⲩⲥⲱⲧⲉⲙ ⲉϯϧⲁⲏ ⲛ̃ϯⲁⲡⲟⲫⲁⲥⲓⲥ ⲛ̃ⲧⲉ ⲫⲏ ⲉⲑⲟⲩⲁⲃ ⲁⲩⲫⲁϧⲧⲟⲩ ⲉ̃ϫⲉⲛ ⲡⲟⲩϩⲟ ⲁⲩⲟⲩⲱϣⲧ ⲙ̃ⲡϭ︦ⲥ︦ ⲛ̃ⲧⲉ ⲛⲓϫⲟⲙ ⲉⲩϫⲱ ⲙ̃ⲙⲟⲥ ϫⲉ ⲡϭ︦ⲥ︦ ⲉⲧⲟⲥⲓ ⲫ︦ϯ︦ ⲛ̃ⲧⲉ ⲛⲏ ⲉⲑⲟⲩⲁⲃ ⲧⲏⲣⲟⲩ ⲛ̃ⲑⲟⲕ ⲡⲉⲧϯϫⲟⲙ ⲛ̃ⲛⲏ ⲉⲧⲟⲩ*ϩⲟϫϩⲉϫ ⲙ̃ⲙⲱⲟⲩ ⲉⲕⲉⲧⲁⲛϣⲉ ⲧⲉⲕⲙⲉⲧⲭ︦ⲥ︦ ⲉϧⲟⲩⲛ ⲉⲣⲟⲛ ⲛ̃ⲑⲟⲕ ⲡⲉⲧϯϫⲟⲙ ⲛ̃ⲛⲓⲁⲧϫⲟⲙ ⲡⲥⲱϯ ⲛ̃ⲛⲏ ⲉ̃ⲧⲁⲩⲧⲁⲕⲟ ⲙⲁϫⲟⲙ ϯⲛⲟⲩ ⲙ̃ⲡⲉⲕⲃⲱⲕ ⲓ̈ⲁⲕⲱⲃⲟⲥ ⲟⲩⲟϩ ⲙⲁⲣⲉϥⲓ̃ ⲉⲃⲟⲗϧⲉⲛ ⲡⲁⲓⲃⲓⲟⲥ ϧⲉⲛ ⲟⲩϭⲣⲟ ϧⲉⲛ ⲟⲩⲭⲱⲗⲉⲙ ϫⲉ ⲛ̃ⲑⲟⲕ ⲡⲉϯ ⲙ̃ⲡⲓϭⲣⲟ ⲛ̃ⲛⲉⲕⲉⲃⲓⲁⲓⲕ ⲧⲏⲣⲟⲩ ⲛⲁⲓ ⲉⲧⲉⲣⲁⲅⲱⲛⲓⲍⲉⲥⲑⲉ ⲉϫⲉⲛ ⲡⲉⲕⲣⲁⲛ ⲉⲑⲟⲩⲁⲃ ⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲡⲉⲛⲥⲱⲧⲏⲣ ⲟⲩⲟϩ ⲡϭ︦ⲥ︦ ⲙ̃ⲡⲓⲛⲁⲓ ⲟⲩⲟϩ ϧⲉⲛ ⲡϫⲓⲛⲑⲣⲉ ⲡⲓⲙⲁⲕⲁⲣⲓⲟⲥ ⲓⲁ̃ⲕⲱⲃⲟⲥ ⲫⲟϩ ⲉ̃ⲡⲓ- ⲧⲟⲡⲟⲥ ⲉⲧⲉϥⲛⲁϫⲱⲕ ⲉⲃⲟⲗ ⲛ̃ϧⲏⲧϥ ⲙ̃ⲡⲉϥⲁⲅⲱⲛ ⲛ̃ⲧⲉϥϭⲓ ⲙ̃ⲡⲓⲭⲗⲟⲙ ⲛ̃ⲧⲉ ⲧⲉϥⲁⲑⲗⲏⲥⲓⲥ ⲁϥⲉⲣⲕⲁⲧⲁⲝⲓⲟⲓⲛ ⲛ̃ⲛⲏ ⲉⲧⲟⲩⲛⲁϧⲟⲑⲃⲉϥ ⲉϥϫⲱ ⲙⲙⲟⲥ ϫⲉ ⲭⲁ ⲙⲁ ⲛⲏⲓ ⲛ̃ⲟⲩ- ⲕⲟⲩϫⲓ ⲛ̃ⲧⲁⲟⲩⲱⲛϩ ⲉ̃ⲃⲟⲗ ⲙ̃ⲡϭ︦ⲥ︦ ϧⲁ ⲡⲓϧⲓⲥⲓ ⲉϯⲛⲁϣⲟⲡϥ ⲉϫⲉⲛ ⲡⲉϥⲣⲁⲛ ⲉⲑⲟⲩⲁⲃ ⲟⲩⲟϩ ⲁⲩⲭⲁϥ ⲉⲧⲁϥϫⲟⲩϣⲧ ⲇⲉ ⲉⲛⲓⲙⲁⲛϣⲁⲓ ⲁϥⲕⲱⲗϫ ⲛ̃ⲛⲉϥⲕⲉⲗⲓ ⲉϫⲉⲛ ⲡⲓⲕⲁϩⲓ ⲉⲣⲉ ⲡⲉϥϩⲏⲧ ⲇⲉ ⲛⲁϩϯ ⲉⲫ︦ϯ︦ ⲉⲧϧⲉⲛ ⲧⲫⲉ ⲁϥⲧⲱⲃϩ ⲉϥϫⲱ ⲙ̃ⲙⲟⲥ ⲙ̃ⲡⲁⲓⲣⲏϯ ϫⲉ ⲡϭ︦ⲥ︦ ⲥⲱⲧⲉⲙ ⲉ̃ⲡϧⲣⲱⲟⲩ ⲙ̃ⲡⲉⲕⲃⲱⲕ ⲟⲩⲟϩ ⲛⲁⲓ ⲛⲏⲓ ⲕⲁⲧⲁ ⲡⲉⲕⲛⲓϣϯ ⲛ̃ⲛⲁⲓ ⲁⲛⲟⲕ ⲓⲁⲕⲱⲃⲟⲥ ⲡⲉⲕⲃⲱⲕ ⲉⲓⲧⲱⲃϩ ⲙ̃ⲙⲟⲕ ⲟⲩⲟϩ ⲁ̃ⲣⲓⲟⲩⲓ ⲛⲉⲙⲏⲓ ⲛ̃ⲟⲩⲛⲁⲓ ⲭⲱⲗⲉⲙ ⲥⲱⲧⲉⲙ ⲉ̃ⲣⲟⲓ ϫⲉ ϩⲓⲛⲁ ⲉⲓ̃ⲉⲉⲣⲡⲉⲙ- ⲡϣⲁ ⲛ̃ϣⲱⲡⲓ ⲛ̃ⲕⲟⲓⲛⲱⲛⲟⲥ ⲛⲉⲙ ⲛⲏ ⲉⲧⲉⲣϩⲟϯ ϧⲁⲧϩⲏ *ⲙ̃ⲡⲉⲕⲣⲁⲛ ⲉⲑⲟⲩⲁⲃ ⲟⲩⲟϩ ⲛ̃ⲧⲁϭⲓ ⲙ̃ⲡⲓⲭⲗⲟⲙ ⲛ̃ⲁⲑⲗⲱⲙ ⲛ̃ϩⲣⲏⲓ ϧⲉⲛ ⲛⲓⲫⲏⲟⲩⲓ ⲛⲉⲙ ⲛⲏ ⲉⲧⲁⲩⲙⲉⲛⲣⲓⲧⲕ ⲉⲑⲃⲉ ⲫⲁⲓ ⲅⲁⲣ ⲉⲧⲁⲩⲫⲱⲧ ϩⲁⲣⲟⲕ ⲁⲕϯⲭⲗⲟⲙ ⲉϫⲱⲟⲩ ⲙⲁⲣⲟⲩⲛⲁⲩ ### 0014 ⲛ̃ϫⲉ ⲛⲁϫⲁϫⲓ ⲛ̃ⲥⲉϭⲓ̃ϣⲓⲡⲓ ϫⲉ ⲛ̃ⲑⲟⲕ ⲡϭ︦ⲥ︦ ⲁⲕⲉⲣⲃⲟⲛ̃ⲑⲓⲛ ⲉⲣⲟⲓ ⲟⲩⲟϩ ⲁⲕϯⲛⲟⲙϯ ⲛⲏⲓ Ⲉⲧⲁϥϣⲗⲏⲗ ⲇⲉ ⲙ̃ⲡⲁⲓⲣⲏϯ ϧⲉⲛ ϯⲟⲩⲛⲟⲩ ⲁⲩⲓ̃ⲛⲓ ⲛ̃ⲛⲟⲩϫⲓϫ ⲉϫⲉⲛ ⲡⲉⲑⲟⲩⲁⲃ ϧⲉⲛ ⲟⲩⲙⲉⲧⲁⲑⲛⲁⲓ ⲁⲩϭⲟⲗⲕϥ ⲉ̃ⲃⲟⲗ ⲛ̃ⲛⲉϥϫⲓϫ ⲛⲉⲙ ⲛⲉϥϭⲁⲗⲁⲩϫ ⲟⲩⲟϩ ⲡⲉϫⲱⲟⲩ ⲛⲁϥ ϫⲉ ⲁ̃ⲛⲁⲩ ϫⲉ ⲉⲕⲉⲣ ⲟⲩ ⲙⲙⲟⲛ ⲙⲉⲧⲛⲁⲏⲧ ⲙⲡⲁⲓⲙⲁ ⲟⲩⲇⲉ ⲙⲉⲧϩⲁⲣϣϩⲏⲧ ⲁⲗⲗⲁ ⲉⲩⲛⲁϭⲉⲧϭⲱⲧⲕ ⲕⲁⲧⲁ ⲛⲉⲕⲣⲁⲧⲱⲙⲓ ⲟⲩⲟϩ ⲛ̃ⲥⲉⲁⲓⲕ ⲙ̃ⲙⲉⲗⲟⲥ ⲙⲉⲗⲟⲥ ⲟⲩⲟϩ ⲙ̃ⲡⲓⲛⲁⲩ ⲉⲧⲉⲕⲛⲁϫⲟⲩϣⲧ ⲉϫⲉⲛ ⲡⲧⲁⲕⲟ ⲛ̃ⲛⲉⲕⲙⲉ- ⲗⲟⲥ ⲧⲏⲣⲟⲩ ⲧⲟⲧⲉ ⲥⲉⲛⲁⲱⲗⲓ ⲛ̃ⲧⲉⲕⲁ̃ⲫⲉ ⲛ̃ⲧⲥⲏϥⲓ ⲙⲟϣⲧⲕ ϫⲉ ⲙ̃ⲙⲁⲩⲁⲧⲕ ⲛ̃ϧⲣⲏⲓ ⲛ̃ϧⲏⲧⲕ ϫⲉ ⲁϣ ⲉⲧⲥⲟⲧⲡ ⲛⲁϩⲣⲁⲕ ⲉⲑⲃⲉ ϫⲉ ϧⲉⲛ ⲟⲩⲥⲁϫⲓ ⲛⲟⲩⲱⲧ ⲁⲕⲛⲁϫⲫⲟ ⲛⲁⲕ ⲙ̃ⲡⲉⲕⲱⲛϧ ⲉϣⲱⲡ ⲇⲉ ⲛ̃ⲧⲉⲕⲙⲟⲩⲛ ⲉⲃⲟⲗ ϧⲉⲛ ⲧⲁⲓⲅⲛⲱⲙⲏ ⲛ̃ⲉ ⲭⲛⲁⲙⲟⲩ ϧⲉⲛ ⲛⲁⲓⲃⲁⲥⲁⲛⲟⲥ ⲙ̃ⲡⲁⲓⲣⲏϯ ⲉⲧⲟⲓ ⲛ̃ϩⲟϯ ϩⲁⲛⲟⲩⲟⲛ ⲇⲉ ϧⲉⲛ ⲛⲓⲁ̃ⲥⲉⲃⲏⲥ ⲉⲧⲟ̃ϩⲓ ⲉ̃ⲣⲁⲧⲟⲩ ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲁⲩⲣⲓⲙⲓ ⲉϩⲣⲏⲓ ⲉϫⲉⲛ ⲡⲉϥⲥⲁⲓ ⲛⲉⲙ ⲡϩⲙⲟⲧ ⲛ̃ⲧⲉ ⲧⲉϥϩⲩ- ⲗⲏⲕⲓⲁ ⲉⲧⲥⲟⲧⲡ ⲟⲩⲟϩ ⲛ̃ⲑⲱⲟⲩ ⲧⲏⲣⲟⲩ ⲡⲉϫⲱⲟⲩ ⲛⲁϥ ⲙ̃ⲫⲣⲏϯ ⲛⲉ ⲉ̃ⲃⲟⲗ ϧⲉⲛ ⲟⲩⲣⲟ ⲛ̃ⲟⲩⲱⲧ *ϫⲉ ⲙ̃ⲡⲉⲣⲧⲁⲕⲟ ⲙ̃ⲡⲉⲕⲥⲱⲙⲁ ϧⲉⲛ ⲟⲩⲡⲉⲧϣⲟⲩⲓⲧ ⲁⲗⲗⲁ ϯⲁ̃ⲥⲟ ⲉⲡⲉⲕⲥⲁⲓ̃ ⲛⲉⲙ ⲧⲉⲕϫⲟⲙ ⲛⲉⲙ ⲛⲉⲕⲉ̃ⲃⲓⲁⲓⲕ ⲉⲩⲩ̃ϩⲓ ⲉⲣⲁⲧⲟⲩ ⲉⲣⲟⲕ ⲛⲉⲙ ⲛⲉⲕⲉⲛⲭⲁⲓ ⲉⲑⲛⲁϧⲱⲟⲩ ⲛⲉⲙ ⲛⲉⲕⲛⲟⲩⲃ ⲛⲉⲙ ⲛⲉⲕ- ϩⲁⲧ ⲛⲉⲙ ⲛⲉⲕⲧⲉⲃⲛⲱⲟⲩⲓ︦ ⲉⲧⲟϣ ⲛ̃ⲧⲉⲕⲓ̃ⲣⲓ ⲙ̃ⲫⲟⲩⲱϣ ⲙ̃ⲡⲟⲩⲣⲟ ⲛ̃ⲧⲉⲕⲱⲛϧ ⲟⲩⲟϩ ⲙⲉⲛⲉⲛⲥⲱⲥ ⲟⲛ ⲁⲕϣⲁⲛⲟⲩⲱϣ ⲭⲛⲁⲧⲁⲥⲑⲟⲕ ⲉ̃ⲡⲉⲕϣⲉⲙϣⲓ ⲁϥⲉⲣⲟⲩⲱ̃ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲓⲁⲕⲱⲃⲟⲥ ⲡⲉϫⲁϥ ϫⲉ ⲙ̃ⲡⲉⲣⲣⲓⲙⲓ ⲉⲣⲟⲓ̃ ⲁⲗⲗⲁ ⲣⲓⲙⲓ ⲛ̃ⲑⲟϥ ⲉϫⲉⲛⲑⲏⲛⲟⲩ ⲛⲉⲙ ⲛⲉⲧⲉⲛϣⲏⲣⲓ ϫⲉ ⲧⲉⲧⲉⲛⲛⲁϭⲓ ⲛ̃ⲟⲩⲙ̃ⲧⲟⲛ ⲡⲣⲟⲥⲟⲩⲕⲟⲩϫⲓ ⲛ̃ⲥⲏⲟⲩ ϧⲉⲛ ⲡⲁⲓⲕⲟⲥⲙⲟⲥ ⲙⲉⲛⲉⲛⲥⲱⲥ ⲛ̃ⲧⲉⲛ- ⲉⲣⲕⲗⲛⲣⲟⲛⲟⲙⲓⲛ ⲛ̃ⲟⲩⲕⲟⲗⲁⲥⲓⲥ ϣⲁ ⲉⲛⲉϩ ⲛⲉⲙ ⲛⲓⲇⲉ- ⲙⲱⲛ ⲉⲧⲉⲧⲉⲛⲟⲩⲱϣⲧ ⲙ̃ⲙⲱⲟⲩ ⲁⲛⲟⲕ ⲅⲁⲣ ϯⲛⲁⲧⲁⲕⲟ ### 0015 ϧⲉⲛ ⲡⲁⲓϧⲱⲧⲉⲃ ⲫⲁⲓ ⲁⲗⲗⲁ ϯⲛⲁⲉⲣⲕⲗⲏⲣⲟⲛⲟⲙⲓⲛ ⲛⲟⲩⲱⲛϧ ⲛⲉⲛⲉϩ ϧⲉⲛ ⲡϫⲓⲛⲑⲣⲟⲩϣⲱⲧ ⲇⲉ ⲉⲃⲟⲗ ⲛ̃ⲛⲁⲙⲉⲗⲟⲥ ⲧⲏⲣⲟⲩ ⲁⲩⲛⲁⲟⲩⲟϩ ⲉⲣⲟⲓ ⲛ̃ⲟⲩⲃⲉⲭⲉ ⲛ̃ϩⲟⲩϭ̃ ⲉⲑⲃⲉ ϫⲉ ⲟⲩⲟⲛ ⲛⲓⲃⲉⲛ ⲛⲁϭⲓ ⲙ̃ⲫⲃⲉⲭⲉ ⲛ̃ⲛⲟⲩϧⲓⲥⲓ ⲉⲃⲟⲗϩⲓⲧⲉⲛ ⲫ︦ϯ︦ ⲙ̃ⲙⲟⲛ ⲙⲉⲧϭⲓⲛϫⲟⲛⲥ ⲅⲁⲣ ⲟⲩⲇⲉ ⲙⲉⲧⲣⲉϥϭⲓϩⲟ ϧⲁⲧⲟⲧϥ Ⲟⲩⲟϩ ϧⲉⲛ ϯⲟⲩⲛⲟⲩ ⲉⲧⲉⲙⲙⲁⲩ ⲁ ⲡⲓⲣⲱⲙⲓ ⲉⲧⲁⲩ- ⲟⲩⲟⲣⲡϥ ⲉⲃⲟⲗϩⲓⲧⲉⲛ ⲡⲟⲩⲣⲟ ⲁϥⲓ̃ ⲉϫⲱⲕ ⲉⲃⲟⲗ ⲛ̃ⲧⲕⲉ- ⲗⲉⲩⲥⲓⲥ ⲙ̃ⲡⲟⲩⲣⲟ ⲡⲉϫⲁϥ ⲛ̃ⲛⲓⲥⲕⲉⲡⲱ*ⲗⲁⲧⲱⲣ ϫⲉ ⲁⲣⲓϩⲏⲧⲥ ⲛϫⲱϫⲓ ⲛ̃ⲥⲁ ⲛⲓⲧⲏⲃ ⲛ̃ⲧⲉ ⲛⲉϥϫⲓϫ ⲟⲩⲟϩ ⲁⲩⲉⲣϩⲏⲧⲥ ⲛ̃ϫⲱϫⲓ ⲉ̃ⲃⲟⲗ ⲛ̃ⲛⲧⲏⲃ ⲛ̃ⲧⲉ ⲧⲉϥϫⲓϫ ⲛ̃ⲟⲩⲓ̃ⲛⲁⲙ ⲉⲧⲁⲩ- ϣⲱⲧ ⲇⲉ ⲉ̃ⲃⲟⲗ ⲛ̃ⲧⲉϥⲓ̃ⲛⲓ ⲁϥⲱϣ ⲉⲃⲟⲗ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲓⲁⲕⲱⲃⲟⲥ ϫⲉ ⲡⲓⲣⲉϥⲛⲟϩⲉⲙ ⲛ̃ⲧⲉ ⲛⲓⲛⲁⲍⲱⲣⲉⲟⲥ ϣⲱⲡ ⲉⲣⲟⲕ ⲙ̃ⲡⲓⲕⲗⲁⲇⲟⲥ ⲛ̃ⲧⲉ ⲡⲉⲕϣϣⲏⲛ ϧⲉⲛ ⲡⲉⲕⲛⲁⲓ ⲉϣⲁⲩϣⲱⲧ ⲓⲁⲣ ϩⲱϥ ⲟⲛ ⲙ̃ⲡⲕⲗⲁⲇⲟⲥ ⲛ̃ϯⲃⲱ ⲛⲁⲗⲟⲗⲓ ϧⲉⲛ ⲧϫⲓϫ ⲙⲡⲉⲧϭⲱⲗ ⲟⲩⲟϩ ⲟⲛ ϧⲉⲛ ⲡⲓⲁ̃ⲃⲟⲧ ⲫⲁⲣⲙⲟⲩⲑⲓ ϣⲁⲥϯⲟⲩⲓ̃ ⲉⲃⲟⲗ ⲛ̃ⲧⲉⲥϣⲱⲡⲓ ⲉⲥⲫⲟⲣⲓ ⲟⲩⲟϩ ϣⲁⲣⲉ ⲡⲓⲕⲗⲁⲇⲟⲥ ϣⲱ- ⲡⲓ ⲉϥⲟⲓ ⲛ̃ⲛⲓϣϯ ⲙ̃ⲙⲁϣⲱ ⲧⲟⲧⲉ ⲡⲉϫⲉ ⲡⲓⲣⲉⲙⲛ̃ϩⲱⲃ ⲛ̃ⲧⲉ ⲡⲟⲩⲣⲟ ϫⲉ ⲡⲓϩⲱⲃ ⲣⲱϣⲓ ⲉⲣⲟⲕ ϫⲉ ⲁⲩϫⲱϫⲓ ⲉⲃⲟⲗ ⲛ̃ⲟⲩⲁⲓ ⲛ̃ⲛⲉⲕⲧⲏⲃ ⲉⲑⲃⲉ ⲡⲉⲕⲛⲟⲩϯ ⲁⲕϣⲁⲛⲟⲩⲱϣ ⲟⲩⲟⲛ ϣϫⲟⲙ ⲛ̃ⲉⲣⲫⲁϧⲣⲓ ⲉⲣⲟⲕ ⲙⲟⲛⲟⲛ ⲙ̃ⲡⲉⲣⲧⲁⲕⲟ ⲙ̃ⲡⲉⲕⲥⲱⲙⲁ ⲉⲧϫⲏⲛ ⲟⲩⲟⲛ ⲟⲩⲙⲏϣ ⲛ̃ⲛⲟⲩⲃ ⲅⲁⲣ ϣⲟⲡ ⲛⲁⲕ ⲭⲛⲁϯ ⲛ̃ⲛⲓϩⲏⲕⲓ ⲛ̃ϯⲟⲩⲛⲟⲩ ⲛ̃ⲥⲉⲭⲱ ⲛⲁⲕ ⲉⲃⲟⲗ ⲛ̃ϯⲡⲁⲣⲁⲃⲁⲥⲓⲥ ⲙⲟⲛⲟⲛ ⲡⲁⲓⲥⲁϫⲓ ⲙ̃ⲙⲁⲩⲁⲧϥ ⲁϥⲉⲣⲟⲩⲱ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲓⲁ- ⲕⲱⲃⲟⲥ ϫⲉ ⲙ̃ⲡⲉⲧⲉⲛⲛⲁⲩ ⲉⲡⲓϣⲉ ⲛ̃ⲧⲉ ϯⲃⲱ ⲛⲁⲗⲟⲗⲓ ⲙ̃ⲡⲓⲛⲁⲩ ⲉϣⲁⲩϣⲁⲧⲥ ⲛ̃ⲥⲉϭⲣⲏ ⲙ̃ⲙⲟⲥ ⲙⲏ ⲙ̃ⲡⲁⲥⲟ̃ϩⲓ ⲉⲣⲁⲧⲥ ⲉⲥⲃⲏϣ ⲉⲑⲃⲉ ⲧⲫⲣⲱ ⲙⲡⲓⲛⲁⲩ ⲇⲉ ϩⲱϥ ⲉ̃ⲧⲉϥⲛⲁϧⲱⲛⲧ ⲛ̃ϫⲉ ⲡⲓϣⲱⲙ ϧⲉⲛ ⲡⲓⲁ̃ⲃⲟⲧ ⲫⲁⲣⲙⲟⲩⲑⲓ ⲛ̃ⲧⲉⲥϧⲙⲟⲙ ⲛ̃ⲟⲩⲕⲟⲩϫⲓ ϣⲁⲥϯⲟⲩⲱ ⲉⲃⲟⲗ ⲛ̃ⲧⲉⲥⲟⲩⲱⲛϩ ⲉⲃⲟ ⲙ̃ⲡⲉⲥ- ϯⲟⲩⲓⲱ *ⲙ̃ⲁϩⲑⲏⲧⲉⲛ ⲇⲉ ⲱ ⲛⲓⲁⲛⲟⲏ̃ⲧⲟⲥ ⲓⲥϫⲉ ϯⲃⲱ ### 0016 ⲛⲁⲗⲟⲗⲓ ⲙⲉⲛ ϣⲁⲥⲫⲓⲣⲓ ⲉⲡⲓϩⲟⲩϭ̃ ⲓⲉ ⲡⲓⲣⲱⲙⲓ ϩⲱϥ ⲙ̃ⲡⲓⲥⲧⲟⲥ ⲫⲁⲓ ⲉⲧϭⲏⲟⲩⲧ ⲛ̃ϧⲣⲏⲓ ϧⲉⲛ ϯⲃⲱ ⲛⲁⲗⲟⲗⲓ ⲙ̃ⲙⲏⲓ ⲟⲩⲟϩ ⲉⲩϣⲁⲛϣ ⲙ̃ⲙⲟϥ ϧⲉⲛ ⲛⲉⲛϫⲓϫ ⲙ̃ⲫ︦ϯ︦ ⲡⲓⲟⲩⲱⲓ ⲙ̃ⲙⲏⲓ ⲡⲱⲥⲱ̃ ⲙⲁⲗⲗⲟⲛ ϥⲛⲁⲁⲓⲁⲓ ⲁⲛ ⲉ̃ⲡⲓϩⲟⲩⲟ ⲟⲩⲟϩ ⲛ̃ⲧⲉϥⲟⲩⲱⲛϩ ⲉⲃⲟⲗ ⲛ̃ⲟⲩⲙⲏϣ ⲛ̃ⲕⲗⲁⲇⲟⲥ Ⲁⲩϯ ⲙ̃ⲡⲟⲩⲟⲩⲟⲓ ⲇⲉ ⲉϧⲟⲩⲛ ⲉⲣⲟϥ ⲁⲩϣⲱⲧ ⲙ̃ⲡⲓ- ⲙⲁϩⲃ︦ ⲛ̃ⲧⲏⲃ ⲟⲩⲟϩ ⲡⲉϫⲁϥ ϧⲉⲛ ⲟⲩⲟⲩⲛⲟϥ ⲛ̃ϩⲏⲧ ϫⲉ ⲙⲁⲣⲉ ⲧⲁⲯⲩⲭⲏ ⲓⲥⲓ ⲙ̃ⲡϭ︦ⲥ︦ ⲟⲩⲟϩ ⲡⲁⲡ︦ⲛ︦ⲁ︦ ⲛⲁⲉⲣϩⲉⲗⲡⲓⲥ ⲉⲣⲟϥ ⲁϥⲟⲩⲁϩⲧⲟⲧϥ ⲟⲛ ⲡⲉϫⲁϥ ϫⲉ ⲡϭ︦ⲥ︦ ϣⲱⲡ ⲉⲣⲟⲕ ⲙ̃ⲡⲓⲧⲏⲃ ⲃ︦ ⲉⲃⲟⲗϧⲉⲛ ⲡⲓϣϣⲏⲛ ⲫⲁⲓ ⲉⲧⲁ ⲧⲉⲕⲟⲩⲓ̃ⲛⲁⲙ ̃ϭⲟϥ ⲛⲁⲣⲉ ⲡⲉϥϩⲟ ⲅⲁⲣ ⲉⲣⲟⲩⲟⲧ ⲡⲉ ⲉϥⲣⲁϣⲓ ⲟⲩⲟϩ ⲉϥ- ⲑⲉⲗⲏⲗ ϧⲉⲛ ⲡⲓⲱⲟⲩ ⲙ̃ⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲁⲩϣⲱⲧ ⲇⲉ ⲟⲛ ⲙ̃ⲡⲓⲙⲁϩⲅ̄ ⲛ̃ⲧⲏⲃ ⲁϥⲱϣ ⲉⲃⲟⲗ ⲉϥϫⲱ ⲙ̃ⲙⲟⲥ ϫⲉ ϯⲛⲁ- ⲉⲣⲯⲁⲗⲓⲛ ⲉϯⲧⲣⲓⲁⲥ ⲉⲑⲟⲩⲁⲃ ⲉⲧϧⲉⲛ ⲟⲩⲙⲉⲧⲛⲟⲩϯ ⲛ̃ⲟⲩⲱⲧ ⲙ̃ⲡⲉⲙⲑⲟ ⲉⲃⲟⲗ ⲛ̃ⲛⲓⲁⲅⲅⲉⲗⲟⲥ ⲛⲉⲙ ⲡⲓⲅ︦ ⲛ̃ⲁⲅⲓⲟⲥ ⲉⲧϧⲉⲛ ϯϩⲣⲱ ⲛⲉⲙ ⲡⲭⲟⲣⲟⲥ ⲛ̃ⲧⲉ ⲛⲓⲙⲁⲣⲧⲩⲣⲟⲥ ⲉⲑⲟⲩⲁⲃ ⲁⲩϣⲱⲧ ⲇⲉ ⲟⲛ ⲙ̃ⲡⲓⲙⲁϩⲇ︦ ⲛ̃ⲧⲏⲃ ⲟⲩⲟϩ ⲡⲉϫⲁϥ ⲛ̃ϫⲉ ⲡⲓⲣⲉϥϭⲣⲟ ϫⲉ ϧⲉⲛ ⲡⲓⲓ︦ⲃ︦ ⲛ̃ϣⲏⲣⲓ ⲛ̃ⲧⲉ ⲓⲁⲕⲱⲃ ⲉⲣⲉ ⲓⲟⲩⲇⲁⲥ ⲟⲓ ⲙ̃ⲙⲁϩⲇ︦ ⲉⲛⲱⲡ ⲙ̃ⲫⲁⲓ ϫⲉ ⲉ̃ⲧⲁϥⲙ̃*ⲧⲟⲛ ⲙ̃ⲙⲟϥ ⲉϩⲣⲏⲓ ⲉϫⲱϥ ⲛ̃ϫⲉ ⲡⲥⲙⲟⲩ ⲛ̃ⲓⲏ︦ⲥ︦ ⲡⲭ︦ⲥ︦ ⲉⲑⲃⲉ ⲫⲁⲓ ⲁ̃ⲛⲟⲕ ϩⲱ ϧⲉⲛ ⲡⲓⲙⲁϩⲇ︦ ⲛ̃ⲧⲏⲃ ϯⲛⲁϯ ⲛ̃ⲟⲩⲉⲝⲟⲙⲟⲗⲟⲅⲓⲥⲓⲥ ⲛⲉⲙⲁϥ ϫⲉ ⲛ̃ϩⲣⲏⲓ ϧⲉⲛ ⲡⲉϥⲥⲙⲟⲩ ⲁ̃ⲣⲉ ⲡⲓⲥⲱϯ ⲛⲁϣⲱⲡⲓ ⲛ̃ⲛⲓⲉⲑⲛⲟⲥ ⲧⲏⲣⲟⲩ ⲁⲩϣⲱⲧ ⲇⲉ ⲟⲛ ⲙ̃ⲡⲓⲙⲁϩ︦ ⲛ̃ⲧⲏⲃ ⲟⲩⲟϩ ⲡⲉϫⲁϥ ϫⲉ ⲣⲱⲓ ⲁϥⲙⲟϩ ⲛ̃ⲣⲁϣⲓ ⲟⲩⲟϩ ⲡⲁⲗⲁⲥ ⲛ̃ⲟⲩⲑⲉⲗⲏⲗ³ ⲁϥⲉⲣ- ⲟⲩⲱ̃ ⲟⲛ ⲡⲉϫⲁϥ ϫⲉ ϧⲉⲛ ⲡⲓⲙⲁϩⲉ︦ ⲛ̃ⲧⲏⲃ ⲛ̃ⲧⲉ ϯϫⲓⲛⲟ ⲛ̃ⲟⲩⲓ̃ⲛⲁⲙ ⲙ̃ⲡⲓϣϣⲏⲛ ϣⲁⲩⲉⲣⲡⲣⲟⲥⲫⲉⲣⲓⲛ ⲛ̃ⲛⲓⲕⲁⲣⲡⲟⲥ ⲙ̃ⲫⲏ ⲉⲧⲁϥⲟ ⲙ̃ⲡⲓϣϣⲏⲛ Ⲁⲩⲓ ⲇⲉ ⲟⲛ ⲉϫⲉⲛ ⲧⲉϥϫⲓϫ ⲛ̃ϫⲁϭⲏ ⲟⲩⲟϩ ⲡⲉϫⲱⲟⲩ ⲛⲁϥ ϫⲉ ⲉⲕϫⲱ³ ⲙ̃ⲙⲟⲥ ϫⲉ ⲟⲩ ⲟⲩⲟϩ ⲟⲩ ⲡⲉⲧⲁⲕⲙⲟϣⲧⲕ ### 0017 ⲛ̃ϧⲏⲧϥ ⲟⲩⲟⲛ ϣϫⲟⲙ ⲉⲑⲣⲉⲕⲱⲛϧ ⲁⲕϣⲁⲛⲓ̃ⲣⲓ ⲙ̃ⲫⲟⲩⲱϣ ⲙ̃ⲡⲟⲩⲣⲟ ⲟⲩⲟⲛ ⲟⲩⲙⲏϣ ⲅⲁⲣ ⲛ̃ⲣⲱⲙⲓ ϧⲉⲛ ⲡⲓⲕⲟⲥⲙⲟⲥ ϯⲛⲟⲩ ⲉ̃ⲟⲩϫⲓϫ ⲛⲟⲩⲱⲧ ⲉⲧⲉⲣⲱⲟⲩ ⲟⲩⲟϩ ⲉⲩⲟⲛϧ ⲛ̃ⲕⲁ- ⲗⲱⲥ ⲛ̃ⲑⲟⲕ ϩⲱⲕ ⲙ̃ⲡⲉⲣⲉⲣⲙ̃ⲕⲁϩⲛ̃ϩⲏⲧ ϫⲉ ⲁⲩϣⲱⲧ ⲉ̃ⲃⲟⲗ ⲛ̃ⲟⲩⲓ︦ ⲛ̃ⲛⲉⲕϫⲓϫ ⲁⲗⲗⲁ ⲓⲥϫⲉⲛ ϯⲛⲟⲩ ϯⲁ̃ⲥⲟ ⲉⲧⲉⲕⲯⲩⲭⲏ ⲉⲥⲉⲣⲃⲁⲥⲁⲛⲓⲍⲓⲛ ϩⲓⲧⲉⲛ ⲛⲓϧⲓⲥⲓ ⲛ̃ⲧⲉⲕϣⲧⲉⲙⲭⲁ ⲛⲉⲕⲙⲉⲗⲟⲥ ⲛ̃ⲧⲟⲩϭⲉⲧϭⲱⲧⲟⲩ ⲉⲣⲉ ⲛⲉⲕⲃⲁⲗ ⲛⲁⲩ ⲉⲣⲱⲟⲩ ⲉⲩϥⲱϫⲓ ⲙ̃ⲡⲉⲕⲙ̃ⲑⲟ ⲡⲉϫⲁϥ ⲇⲉ ⲛⲱⲟⲩ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲓⲁⲕⲱ- ⲃⲟⲥ ϫⲉ ⲁ̃ⲣⲉϣⲁⲛ ⲟⲩⲙⲁⲛⲉⲥⲱⲟⲩ ϭⲓ ⲛ̃ⲟⲩⲉⲥⲱⲟⲩ ⲉⲑⲣⲟⲩ- ϧⲟⲕϥ ⲉϣⲁⲩϧⲱⲕ ⲙ̃ⲡⲉϥⲥⲱⲙⲁ ⲧⲏⲣϥ ϧⲉⲛ ⲟⲩⲥⲟⲡ ⲛ̃ⲟⲩⲱⲧ ⲁⲛ ⲁⲗⲗⲁ ⲉϣⲁⲩ*ϧⲱⲕ ⲙⲉⲛ ⲙ̃ⲡⲉϥⲥⲫⲓⲣ ⲛ̃ⲟⲩⲓ̃- ⲛⲁⲙ ⲛ̃ϣⲟⲣⲡ ⲙⲉⲛⲉⲛⲥⲱⲥ ⲟⲛ ⲛ̃ⲥⲉϧⲱⲕ ⲙ̃ⲡⲉϥⲥⲫⲓⲣ ⲛ̃ϫⲁϭⲏ ⲙ̃ⲡⲉϥϭ︦ⲥ︦ ⲟⲩⲟϩ ⲛ̃ⲑⲟϥ ϩⲱϥ ⲡⲓⲉⲥⲱⲟⲩ ϣⲁϥϣⲓⲡⲓ ⲉϥⲟⲩⲱϣ ⲉⲑⲣⲟⲩⲱⲗⲓ ⲙ̃ⲙⲁⲩ ⲙ̃ⲡⲉϥⲥⲟⲣⲧ ⲧⲏⲣϥ ⲓⲥϫⲉ ⲡⲓⲁ̃ⲗⲟⲅⲟⲛ ⲓ̃ⲣⲓ ⲙ̃ⲡⲁⲓⲣⲏϯ ⲓ̃ⲉ ⲁⲛⲟⲕ ϩⲱ ϧⲁ ⲡⲓⲗⲟⲅⲓⲕⲟⲥ ⲛ̃ⲣⲱⲙⲓ ⲥϣⲉ ⲛⲏⲓ ⲛ̃ϩⲟⲩⲟ ⲉⲥⲙⲟⲩ ⲉⲫ︦ϯ︦ ⲟⲩⲟϩ ⲉϯⲱⲟⲩ ⲙ̃ⲡⲉϥⲣⲁⲛ ⲉⲑⲟⲩⲁⲃ ϫⲉ ⲁⲩϫⲉⲙⲧ ϧⲉⲛ ⲡⲓⲟϩⲓ ⲛⲉⲥⲱⲟⲩ ⲛ̃ⲧⲉ ⲡⲭ︦ⲥ︦ ⲉⲁⲩϧⲟⲕⲧ ⲛ̃ⲛⲁϫⲓϫ ⲛⲉⲙ ⲛⲁϭⲁⲗⲁⲩϫ ⲟⲩⲟϩ ⲁⲛⲟⲕ ϯⲛⲁⲧⲁⲗⲟⲓ ⲛⲁϥ ⲉϩⲣⲏⲓ ⲧⲏⲣⲧ ⲛⲟⲩⲑⲩⲥⲓⲁ̃ ⲁⲛⲟⲕ ϧⲁ ⲫⲏ ⲉⲧϫⲟϫⲉⲃ ⲁ ⲡϭ︦ⲥ︦ ⲡⲓⲁ̃ⲅⲁⲑⲟⲥ ⲧⲏⲓⲧ ⲛ̃ⲛⲏ ⲉⲑⲛⲁϧⲱⲕ ⲙ̃ⲙⲟⲓ ⲙ̃ⲫⲣⲏϯ ⲛ̃ⲟⲩⲉⲥⲱⲟⲩ ⲛ̃ⲧⲉ ⲫ︦ϯ︦ Ⲁⲩϧⲱⲛⲧ ⲇⲉ ⲉϧⲟⲩⲛ ⲉⲣⲟϥ ⲉϣⲱⲧ ⲛ̃ⲛⲓⲧⲏⲃ ⲛ̃ⲧⲉ ⲧⲉϥϫⲓϫ ⲛ̃ϫⲁϭⲏ ⲉⲁⲩⲉⲣϩⲏⲧⲥ ⲛ̃ϣⲱⲧ ⲙ̃ⲡⲓⲕⲟⲩϫⲓ ⲛ̃ⲧⲏⲃ ⲉⲧⲁⲩϣⲁⲧϥ ⲇⲉ ⲁϥⲉⲣⲡⲁⲣⲏⲥⲓⲁⲥⲑⲉ ⲙ̃ⲙⲟϥ ⲡⲉϫⲁϥ ϫⲉ ⲁⲛⲟⲕ ⲙⲉⲛ ⲁ̃ⲛⲟⲕ ⲟⲩⲕⲟⲩϫⲓ ⲙ̃ⲡⲉⲙⲑⲟ ⲙ̃ⲡϭ︦ⲥ︦ ⲛ̃ⲑⲟⲕ ⲇⲉ ⲛ̃ⲑⲟⲕ ⲟⲩⲛⲓϣϯ ⲁⲕⲑⲉⲃⲓⲟⲕ ⲙ̃ⲙⲓⲛ ⲙ̃ⲙⲟⲕ ⲁⲕⲓ̃ ⲉⲡⲉⲥⲏⲧ ϣⲁⲣⲟⲛ ⲁ̃ⲛⲟⲕ ϩⲱ ϯⲛⲁϯ ⲛ̃ⲧⲁⲯⲩⲭⲏ ⲉϩⲣⲏⲓ ⲉ̃ϫⲉⲛ ⲡⲉ- ⲕⲣⲁⲛ ⲉ̃ⲑⲟⲩⲁⲃ ⲛ̃ⲑⲟⲕ ⲡⲉ ⲡϭ︦ⲥ︦ ⲛ̃ⲧⲉ ⲟⲩⲟⲛ ⲛⲓⲃⲉⲛ ⲭⲛⲁ- ⲧⲟⲩⲛⲟⲥⲧ ⲉⲓϫⲏⲕ ⲉ̃ⲃⲟⲗ ⲧⲁⲯⲩⲭⲏ ⲛⲉⲙ ⲛⲁⲙⲉⲗⲟⲥ ⲉⲩⲟⲓ ⲛ̃ⲟⲩⲁⲓ ⲛ̃ⲟⲩⲱⲧ ⲉⲓⲟⲩⲟϫ ⲧⲏⲣⲧ ⲉⲓⲙⲉϩ ⲛ̃ⲥⲙⲟⲩ ⲛⲓⲃⲉⲛ ⲁⲩϣⲱⲧ ⲇⲉ ⲟⲛ ⲙ̃ⲡⲓⲧⲏⲃ ⲉⲑⲙⲉⲛⲉⲛⲥⲁ ⲡⲓⲕⲟⲩϫⲓ ⲟⲩⲟϩ ### 0018 ⲁϥⲧⲁϫⲣⲟ ⲛ̃ϩⲟⲩⲟ̃ ϩⲓⲧⲉⲛ ⲡⲓⲙⲉⲓ ⲛ̃ⲧⲉ ⲡⲭ︦ⲥ︦ *ⲡⲉϫⲁϥ ϫⲉ ϧⲉⲛ ⲡⲓⲙⲁϩⲝ̄ ⲛ̃ⲧⲏⲃ ϯⲛⲁϯⲱⲟⲩ ⲛ̃ⲍ︦ ⲛ̃ⲥⲟⲡ ⲙ̃ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ⲁⲩⲟⲩⲁϩⲧⲟⲧⲟⲩ ⲟⲛ ⲁⲩϣⲱⲧ ⲙ̃ⲡⲓⲙⲁϩⲏ̄ ⲛ̃ⲧⲏⲃ ⲁϥⲉⲣⲟⲩϭ̃ ⲛ̃ϫⲉ ⲡⲓⲁ̃ⲅⲓⲟⲥ ⲁ̃ⲗⲏⲑⲱⲥ ⲛ̃ϫⲱⲣⲓ ⲓⲁⲕⲱⲃⲟⲥ ⲡⲉϫⲁϥ ϫⲉ ϧⲉⲛ ⲡⲁⲓⲉϩⲟⲟⲩ ⲫⲁⲓ ⲉ̃ⲧⲉ ⲡⲓⲙⲁϩⲏ̄ ⲡⲉ ϣⲁⲩⲥⲉⲃⲓ ⲛ̃ⲛⲓϩⲉⲣⲉⲟⲥ ϫⲉ ϩⲓⲛⲁ ⲉϥⲉϣⲱⲡⲓ ⲉϥⲟⲩⲟⲛϩ ⲉⲃⲟⲗ ⲟⲩⲟϩ ⲉϥⲫⲟⲣϫ ⲛⲱⲟⲩ ⲉⲃⲟⲗ ⲁⲛⲟⲕ ϩⲱ ϧⲁ ⲡⲉⲕⲃⲱⲕ ⲁⲕⲫⲱⲣϫ ⲙ̃ⲫⲙⲉⲩⲓ ⲙ̃ⲡⲁϩⲏⲧ ⲉⲃⲟⲗϩⲁ ϯⲙⲉⲧⲁⲧⲥⲉⲃⲓ ⲉⲧϭⲁϧⲉⲙ ⲁ ⲧⲁⲯⲩⲭⲏ ⲓ̃ⲃⲓ ⲙ̃ⲙⲟⲕ ⲫ︦ϯ︦ ⲉⲧⲟⲛϧ ϫⲉ ⲁⲓⲛⲁⲓ̃ ⲛ̃ⲑⲛⲁⲩ ⲛ̃ⲧⲁⲟⲩⲟⲛϩⲧ ⲉⲃⲟⲗ ⲛⲁϩⲣⲉⲛ ⲡϩⲟ ⲙ̃ⲫ︦ϯ︦ ⲁⲩϣⲱⲧ ⲟⲛ ⲙ̃ⲡⲓⲙⲁϩⲑ︦ ⲛ̃ⲧⲏⲃ ⲡⲉϫⲁϥ ϫⲉ ⲙ̃ⲫⲛⲁⲩ ⲛ̃ⲁϫⲡⲑ︦ϯ ⲡⲁϭ︦ⲥ︦ ⲛⲁⲕⲁϣⲓ ⲉ̃ⲡⲓ⳧ ⲉⲕⲫⲟⲣϣ ⲉⲃⲟⲗ ⲉⲑⲃⲉ ⲛⲉⲛⲛⲟⲃⲓ ϯⲛⲟⲩ ϫⲉ ⲁ̃ⲛⲟⲕ ϩⲱ ϯϣⲉⲡϩⲙⲟⲧ ⲛ̃ⲧⲟⲧⲕ ⲡϭ︦ⲥ︦ ϧⲉⲛ ⲡⲓⲙⲁϩⲑ︦ ⲛ̃ⲧⲏⲃ ϫⲉ ⲙ̃ⲫⲣⲏϯ ⲉⲧⲁⲩⲫⲟⲣϣⲕ ⲉⲃⲟⲗ ϩⲓϫⲉⲛ ⲡⲓϣⲉ ⲁⲛⲟⲕ ϩⲱ ⲟⲛ ϧⲁ ⲡⲉⲕⲃⲱⲕ ⲁⲕⲁⲓⲧ ⲛⲉⲙ- ⲡϣⲁ ⲉⲑⲣⲟⲩⲫⲟⲣϣⲧ ⲉⲃⲟⲗ ⲟⲩⲟϩ ⲛ̃ⲥⲉϣⲱⲧ ⲛ̃ⲛⲓⲕⲗⲁⲇⲟⲥ ⲛ̃ⲧⲉ ⲡⲁⲥⲱⲙⲁ ⲉⲑⲃⲉ ⲡⲉⲕⲣⲁⲛ ⲉⲑⲟⲩⲁⲃ ⲉⲧⲁⲩⲙⲟⲩϯ ⲙ̃ⲙⲟϥ ϩⲣⲏⲓ ⲉϫⲱⲓ ⲟⲩⲟϩ ⲁⲩϣⲱⲧ ⲟⲛ ⲙ̃ⲡⲓⲙⲁϩⲓ̃ ⲛ̃ⲧⲏⲃ ⲁϥⲟⲩⲱⲛϩ ⲉⲃⲟⲗ ⲉϥϫⲱ ⲙ̃ⲙⲟⲥ ϫⲉ ϧⲉⲛ ⲓⲱⲧⲁ ⲉϣⲁⲩⲱⲡ ⲛ̃ϩⲱⲃ ⲛⲓⲃⲉⲛ ⲟⲩⲟϩ ⲛ̃ϧⲣⲏⲓ ⲛ̃ϧⲏⲧϥ ⲉ̃ϣⲁⲩⲱⲡ ⲛ̃ϩⲁⲛⲁⲛ- ⲑⲃⲁ ⲛ̃ⲑⲃⲁ ⲟⲩⲟϩ ⲉⲣⲉ ⲓⲏ︦ⲥ︦ ϧⲉⲛ ⲓⲱⲧⲁ ⲉⲧⲉ ⲫⲁⲓ ⲡⲉ ⲡⲥⲱϯ ⲙ̃ⲡⲓⲕⲟⲥⲙⲟⲥ ⲧⲏⲣϥ *ⲉⲑⲃⲉ ⲫⲁⲓ ⲁ̃ⲛⲟⲕ ϩⲱ ϯⲛⲁⲉⲣ- ⲯⲁⲗⲓⲛ ⲉⲣⲟⲕ ϧⲉⲛ ⲟⲩⲯⲁⲗⲧⲏⲣⲓⲟⲛ ⲙ̃ⲙⲏⲧ ⲛ̃ⲕⲁⲡ ⲉⲧⲉ ⲛⲁⲧⲏⲃ ⲛⲉ ⲫⲏ ⲉⲧⲁϥⲁⲓⲧ ⲛ̃ⲉⲙⲡϣⲁ ⲉⲉ̃ ⲉϧⲟⲩⲛ ⲉⲡⲁⲓⲙⲟⲩ ⲫⲁⲓ ⲉⲫⲙⲁ ⲙ̃ⲡⲓⲙⲏⲧ ⲛ̃ⲧⲏⲃ ⲛⲉⲙ ⲛⲓⲙⲁϧⲧ ⲛ̃ⲧⲉ ⲡⲓⲉⲥⲱⲟⲩ ϯⲛⲁⲥⲙⲟⲩ ⲉ̃ⲡⲉⲕⲱⲟⲩ ϧⲉⲛ ⲟⲩϩⲱⲇⲏ ⲟⲩⲟϩ ϯⲛⲁⲉⲣⲯⲁ- ⲗⲓⲛ ⲉⲡⲉⲕⲣⲁⲛ ⲉⲑⲟⲩⲁⲃ ϫⲉ ⲛⲁⲛⲉϥ Ⲁⲩϧⲱⲛⲧ ⲇⲉ ⲉϧⲟⲩⲛ ⲉ̃ⲣⲟϥ ⲛ̃ϫⲉ ⲛⲓⲛⲓϣϯ ⲛ̃ⲧⲉ ⲡⲟⲩⲣⲟ ⲛⲉⲙ ⲛⲉϥϣⲫⲉⲣ ⲉⲧⲧ̃ϩⲓ ⲉⲣⲁⲧⲟⲩ ϧⲉⲛ ⲡⲓⲙⲁ ⲉⲧⲉⲙⲙⲁⲩ ### 0019 ⲁⲩⲣⲓⲙⲓ ϧⲉⲛ ⲟⲩⲛ̃ϣⲁϣⲓ ⲟⲩⲟϩ ⲁⲩϯϩⲟ ⲉ̃ⲣⲟϥ ⲉⲩϫⲱ ⲙ̃ⲙⲟⲥ ϫⲉ ⲁⲕϣⲁⲛⲟⲩⲱϣ ⲱ̃ ⲡⲓⲙⲉⲛⲣⲓⲧ ⲟⲩⲟⲛ ϣϫⲟⲙ ⲙ̃ⲙⲟⲕ ⲉⲱⲛϧ ⲓⲥϫⲉ ⲁⲩϣⲱⲧ ⲛ̃ⲛⲉⲕⲧⲏⲃ ⲙ̃ⲡⲉⲛⲑⲣⲉ ⲡⲓϩⲱⲃ ϣⲑⲉⲣⲑⲱⲣⲕ ⲟⲩⲟⲛ ⲥⲏⲓⲛⲓ ⲛ̃ⲥⲟⲫⲟⲥ ϣⲟⲡ ⲉⲟⲩⲟⲛ ϣϫⲟⲙ ⲙ̃ⲙⲱⲟⲩ ⲉⲉⲣⲑⲉⲣⲁⲡⲉⲩⲓⲛ ⲙ̃ⲙⲟⲕ ⲙⲟⲛⲟⲛ ⲁⲣⲓ ⲫⲟⲩⲱϣ ⲙ̃ⲡⲟⲩⲣⲟ ⲛ̃ⲧⲉⲕⲉⲣⲉⲃⲟⲗ ⲉⲧⲁⲓⲁ̃ⲛⲁⲅⲕⲏ ⲉⲧⲕⲱϯ ⲉⲣⲟⲕ ϫⲉ ⲛ̃ⲛⲉⲕⲙⲟⲩ ⲛ̃ⲧⲉϯϭ̃ⲥⲓ ⲛ̃ⲧⲉⲕⲯⲩⲭⲏ ⲟⲩⲟϩ ⲛ̃ⲧⲉⲕϯ︦︦ⲟⲥⲓ ⲙ̃ⲡⲁⲓⲁ̃ⲏⲣ ⲉⲧⲑⲏⲧ ⲛ̃ⲕⲁⲗⲱⲥ ⲟⲩⲟⲛ ⲙⲏϣ ⲓⲅⲁⲣ ⲛ̃ϩⲩⲡⲁⲣ- ⲭⲟⲛⲧⲁ ϣⲟⲡ ⲛⲁⲕ ⲟⲩⲟⲛ ϣϫⲟⲙ ⲙ̃ⲙⲟⲕ ⲉⲱⲛϧ ⲟⲩⲟϩ ⲛ̃ⲧⲉⲕϣⲱⲡⲓ ϧⲉⲛ ⲟⲩⲙ̃ⲧⲟⲛ ⲉⲛⲉ ⲛ̃ⲑⲟⲕ ⲟⲩϩⲏⲕⲓ ⲛⲁⲕⲛⲁ- ϫⲟⲥ ⲡⲉ ⲛ̃ϧⲣⲏⲓ ⲛ̃ϧⲏⲧⲕ ϫⲉ ⲉⲫⲟⲥⲟⲛ ⲁⲩϣⲱⲧ ⲛ̃ⲛⲁⲧⲏⲃ ⲁϣ ⲧⲉ ⲧⲁϩⲉⲗⲡⲓⲥ ⲓⲉ ⲟⲩ ⲡⲉ ⲡϩⲏⲟⲩ ⲙ̃ⲡⲁⲱⲛϧ ⲙ̃ⲙⲟⲛ ϣϫⲟⲙ ⲙ̃ⲙⲟⲓ ⲉϣⲉⲡϧⲓⲥⲓ ϧⲉⲛ ⲡⲓⲕⲟⲥⲙⲟⲥ *ⲧⲉⲛⲥⲱⲟⲩⲛ ⲁⲛⲟⲛ ⲟⲩⲟϩ ⲛ̃ⲑⲟⲕ ϩⲱⲕ ⲕⲉⲙⲓ ϫⲉ ⲛ̃ⲑⲟⲕ ⲟⲩⲣⲁⲙⲁⲁ̃ ⲟⲩⲟϩ ⲟⲩⲟⲛ ⲛⲟⲩⲃ ⲉⲛⲁϣⲱϥ ϣⲟⲡ ⲛⲁⲕ ⲟⲩⲟϩ ⲟⲩⲟⲛ ϣϫⲟⲙ ⲙ̃ⲙⲟⲕ ⲉⲟⲩⲛⲟϥ ⲛⲉⲙ ⲧⲉⲕⲥϩⲓⲙⲓ ⲑⲁⲓ ⲉⲧⲉⲛⲧⲁⲕ ⲓⲥϫⲉⲛ ⲧⲉⲕⲙⲉⲧⲕⲟⲩϫⲓ ⲛⲉⲙ ⲧⲉⲕⲙⲁⲩ ⲉⲧⲁⲥϫⲫⲟⲕ ϫⲉ ⲥⲉϣⲟⲡ ⲙ̃ⲫⲟⲟⲩ ϧⲉⲛ ⲓⲟⲩⲥⲓⲟⲥ ⲧⲉⲕⲡⲟⲗⲓⲥ ⲛ̃ⲑⲟⲕ ϩⲱⲕ ⲕⲭⲏ ϧⲉⲛ ⲧⲭⲱⲣⲁ ⲙ̃ⲃⲁⲃⲩⲗⲱⲛ ⲟⲩⲟϩ ⲉⲕⲟⲩⲱϣ ⲉⲥⲱⲣⲉⲙ ⲛ̃ⲧⲉⲕⲯⲩⲭⲏ ⲛ̃ⲧⲉⲕϣⲧⲉⲙⲛⲁⲩ ⲉⲣⲱⲟⲩ ϫⲉ ⲟⲩⲕⲟⲩϫⲓ ⲇⲉ ⲛ̃ⲥⲁϫⲓ ⲡⲉ ⲉⲑⲣⲉⲕϫⲟϥ ⲉ̃ⲃⲟⲗϧⲉⲛ ⲣⲱⲕ ⲛ̃ⲧⲉⲕⲱⲛϧ ⲟⲩϩⲗⲓ ⲅⲁⲣ ⲡⲉ ⲟⲩⲟϩ ⲡⲉⲕⲛⲟⲩϯ ⲛⲁⲭⲱ ⲛⲁⲕ ⲉⲃⲟⲗ ⲉⲑⲃⲏⲧϥ ⲧⲉⲛⲥⲱⲧⲉⲙ ⲅⲁⲣ ϫⲉ ⲫ︦ϯ︦ ⲛ̃ⲛⲓⲛⲁⲍⲱⲣⲉⲟⲥ ⲟⲩϣⲁⲛⲁϩⲑⲏϥ ⲡⲉ ⲟⲩⲟϩ ϣⲁϥⲭⲱ ⲉ̃ⲃⲟⲗ ⲛ̃ⲛⲏ ⲉⲧⲉ ϣⲁⲩϯϫⲱⲛⲧ ⲛⲁϥ ⲁⲩϣⲁⲛⲕⲟⲧⲟⲩ ϩⲁⲣⲟϥ Ⲁϥⲉⲣⲟⲩⲱ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲓⲁⲕⲱⲃⲟⲥ ⲡⲉϫⲁϥ ϫⲉ ⲫⲏ ⲉⲧⲉⲧⲉⲛⲉⲣϩⲉⲗⲡⲓⲥ ⲉⲣⲟϥ ϯⲛⲁⲁⲓϥ ⲁⲛ ⲉ̃ⲛⲉϩ ⲙ̃ⲡⲁⲣⲉ ϩⲗⲓ ⲅⲁⲣ ϩⲓⲧⲟⲧϥ ⲉ̃ϫⲉⲛ ⲟⲩϩⲉⲃⲓ ⲛ̃ⲧⲉϥϫⲟⲩϣⲧ ⲉⲫⲁϩⲟⲩ ⲛ̃ⲧⲉϥϣϫⲉⲙϫⲟⲙ ⲉϣⲉ ⲉϧⲟⲩⲛ ⲉϯⲙⲉⲧⲟⲩⲣⲟ ⲛ̃ⲧⲉ ⲛⲓⲫⲏⲟⲩⲓ ### 0020 ⲙⲏ ⲟⲩⲟⲛ ϣϫⲟⲙ ⲛ̃ⲧⲁⲙⲁⲩ ⲉⲧⲁⲥϫⲫⲟⲓ ⲓ̃ⲉ ⲧⲁⲥϩⲓⲙⲓ ⲉⲱϣⲉⲙ ⲙ̃ⲡⲓⲛⲁϩϯ ⲛ̃ⲧⲉ ⲫ︦ϯ︦ ⲉⲧⲉⲛϧⲏⲧ ⲫⲁⲓ ⲉⲧⲁϥϫⲟⲥ ϫⲉ ⲟⲩⲟⲛ ⲛⲓⲃⲉⲛ ⲉⲑⲛⲁⲧⲁⲕⲟ ⲛ̃ⲧⲉϥⲯⲩⲭⲏ ⲉⲑⲃⲏⲧ ϥⲛⲁ- ϫⲉⲙⲥ ⲉⲩⲱⲛϧ ⲛⲉⲛⲉϩ ⲟⲩⲟϩ ⲫⲏ ⲉⲧⲉϥⲛⲁⲭⲁ ⲓⲱⲧ ⲛ*ⲥⲱϥ ⲓⲉ ⲙⲁⲩ ⲓⲉ ⲥⲟⲛ ⲓⲉ ⲥⲱⲛⲓ ⲓⲉ ϣⲏⲣⲓ ⲓⲉ ⲥϩⲓⲙⲓ ⲓⲉ ⲭⲣⲏⲙⲁ ⲛ̃ⲧⲉϥⲟⲩⲁϩϥ ⲛ̃ⲥⲱⲓ ϯⲛⲁϯ ⲛⲁϥ ⲛ̃ⲟⲩⲱⲛϧ ⲛⲉ- ⲛⲉϩ ⲛⲉⲙ ⲟⲩⲙ̃ⲧⲟⲛ ⲛⲉⲙ ⲛⲁⲥⲱⲧⲡ ⲁⲣⲉ ⲛⲉⲧⲉⲛⲥⲁϫⲓ ϫⲉ ⲛⲁϯⲱⲟⲩ ⲛⲏⲓ ⲛ̃ⲟⲩ ⲁⲛⲟⲕ ⲙⲉⲛ ⲥⲉⲛⲁϣⲉⲣⲃⲗⲁⲡⲧⲓⲛ ⲙ̃ⲙⲟⲓ ⲁⲛ ⲛ̃ⲑⲱⲧⲉⲛ ⲇⲉ ⲥⲉⲛⲁⲱⲡⲓ ⲛⲱⲧⲉⲛ ⲛ̃ⲕⲟⲗⲁⲥⲓⲥ ϣⲁ ⲉⲛⲉϩ ⲁⲗⲗⲁ ϧⲱⲛⲧ ⲉ̃ⲣⲟⲓ ⲟⲩⲟϩ ⲁⲣⲓⲟⲩⲓ︦ ⲙ̃ⲡⲉⲧⲁⲩ- ⲟⲩⲁϩⲥⲁϩⲛⲓ ⲙ̃ⲙⲟϥ ⲛⲱⲧⲉⲛ ⲉⲁⲓϥ ⲛⲏⲓ Ⲉⲧⲁⲩϧⲱⲛⲧ ⲇⲉ ⲉϧⲟⲩⲛ ⲉⲣⲟϥ ⲁⲩϣⲱⲧ ⲙ̃ⲡⲓⲛⲓϣϯ ⲛ̃ⲧⲏⲃ ⲛ̃ⲧⲉ ⲧⲉϥⲫⲁⲧ ⲛ̃ⲟⲩⲓ̃ⲛⲁⲙ ⲟⲩⲟϩ ⲁ̃ ⲡⲓⲙⲁⲕⲁⲣⲓⲟⲥ ⲟⲩⲱⲛ ⲛ̃ⲣⲱϥ ⲡⲉϫⲁϥ ϫⲉ ⲡⲓⲱⲟⲩ ⲛⲁⲕ ⲫⲏ ⲉⲧⲁϥⲉⲣⲫⲟⲣⲓⲛ ⲙ̃ⲡⲁ- ⲥⲱⲙⲁ ⲁⲩϯ ⲛⲁϥ ⲛ̃ϯⲉ ⲛ̃ⲗⲟⲅⲭⲏ ⲁ̃ ⲧⲉⲕϭⲁⲗⲟϫ ϭⲱϫ ϧⲉⲛ ⲡⲥⲛⲟϥ ⲛⲉⲙ ⲡⲓⲙⲱⲟⲩ ⲉⲧⲁⲩⲓ︦ ⲉⲃⲟⲗ ϧⲉⲛ ⲡⲉⲕⲥⲫⲓⲣ ⲛⲁⲧⲁϭⲛⲓ ⲉⲁⲕϯⲱⲙⲥ ⲙ̃ⲡⲓⲥⲟⲛⲓ ⲉⲕϩⲏⲗ ⲉ̃ⲡⲓⲡⲁⲣⲁⲇⲓⲥⲟⲥ ⲁⲛⲟⲕ ϩⲱ ϧⲁ ⲡⲉⲕⲃⲱⲕ ϯϣⲉⲡϩⲙⲟⲧ ⲛ̃ⲧⲟⲧⲕ ⲉⲓⲣⲁϣⲓ ϫⲉ ⲁ̃ ⲧⲁⲯⲩⲭⲏ ϣⲉⲡϧⲓⲥⲓ ⲉⲑⲃⲉ ⲡⲉⲥⲙⲁⲛⲟⲩⲟϩ ⲟⲩⲟϩ ⲁ ⲡⲁⲥⲛⲟϥ ϧⲁϯ ⲉⲃⲟⲗⲥⲁϧⲟⲩⲛ ⲙ̃ⲙⲟⲓ ϧⲉⲛ ⲡϫⲓⲛⲑⲣⲟⲩ- ϣⲱⲧ ⲛ̃ⲛⲁϫⲓϫ ⲛⲉⲙ ⲛⲁϭⲁⲗⲁⲩϫ ⲁⲩϣⲱⲧ ⲇⲉ ⲙ̃ⲡⲓ- ⲙⲁϩⲃ︦ ⲛ̃ⲧⲏⲃ ⲟⲩⲟϩ ⲡⲉϫⲁϥ ϫⲉ ⲫⲁⲓ ⲟⲩⲛⲓϣϯ ⲛⲏⲓ ⲡⲉ ⲉϩⲟⲧⲉ ⲛⲁⲉϩⲟⲟⲩ ⲧⲏⲣⲟⲩ ϧⲁϫⲱϥ ⲅⲁⲣ ϯⲛⲟⲩ ⲙ̃ⲡⲁϯⲓ ⲉϧⲟⲩⲛ ⲉ̃ⲡⲁⲓϣⲉⲙϣⲓ ⲛⲁⲣⲉ ⲡⲁⲱⲟⲩ ϣⲟⲩⲓⲧ ⲡⲉ ⲟⲩⲟϩ ⲛⲁⲣⲉ *ⲡⲁϩⲏⲧ ϣⲟⲡ ⲁⲛ ϧⲉⲛ ϩⲗⲓ ⲉⲃⲏⲗ ⲉⲛⲓϩⲃⲏⲟⲩⲓ︦ ⲛ̃ⲧⲉ ⲡⲓⲕⲟⲥⲙⲟⲥ ⲟⲩⲟϩ ϯⲙⲉⲧⲁⲧⲥⲣⲱϥⲧ ⲛ̃ⲧⲉ ⲡⲁⲃⲓⲟⲥ ⲛⲁ- ⲥⲉⲣⲕⲟⲗⲓⲛ ⲙ̃ⲙⲟⲓ ⲙ̃ⲡⲓϣⲗⲏⲗ ⲡⲓⲙⲁ ⲅⲁⲣ ⲉⲧⲉ ⲡⲓϩⲏⲧ ⲙ̃ⲙⲟϥ ⲁⲣⲉ ⲡⲓⲁϩⲟ ⲟⲛ ⲛⲁϣⲱⲡⲓ ⲙ̃ⲙⲁⲩ ⲟⲩⲟϩ ⲙⲡⲓ- ⲛⲁⲩ ⲉϯⲛⲁϣⲗⲏⲗ ⲛⲁⲣⲉ ⲡⲁⲥⲱⲙⲁ ⲙⲉⲛ ⲟⲡ ϧⲉⲛ ⲡⲏⲓ ### 0021 ⲙ̃ⲡϭ︦ⲥ︦ ⲡⲁϩⲏⲧ ⲇⲉ ⲉϥⲥⲁⲡⲉⲥⲏⲧ ⲙⲡⲓϣⲓⲕ ⲛ̃ⲧⲉ ⲁⲙⲉⲛϯ ⲙⲫⲟⲟⲩ ⲇⲉ ⲁⲓⲧⲁⲥⲑⲟ ⲙⲡⲁϩⲟ ⲥⲁⲃⲟⲗ ⲙ̃ⲡⲓⲕⲟⲥⲙⲟⲥ ⲉⲧ- ϣⲟⲩⲓⲧ ⲛⲉⲙ ⲉⲃⲟⲗϧⲉⲛ ⲛⲉϥⲣⲱⲟⲩϣ ⲧⲏⲣⲟⲩ ⲉⲓⲉⲣⲥⲡⲟⲩ- ⲇⲁⲍⲓⲛ ⲉⲙⲟϣⲓ ⲉϧⲟⲩⲛ ⲉⲛⲉϥⲁⲅⲁⲑⲟⲛ ⲛⲁϥⲣⲁϣⲓ ⲇⲉ ⲡⲉ ⲛⲉⲙ ⲙⲉⲗⲟⲥ ⲛⲓⲃⲉⲛ ⲛ̃ⲧⲁϥ ⲉⲧⲟⲩϣⲱⲧ ⲙ̃ⲙⲱⲟⲩ ⲟⲩⲟϩ ⲛⲁϥϯⲱⲟⲩ ⲙ̃ⲫ︦ϯ︦ ⲡⲉ ⲁⲩϣⲱⲧ ⲇⲉ ⲟⲛ ⲙ̃ⲡⲓⲙⲁϩⲅ︦ ⲛ̃ⲧⲏⲃ ⲛ̃ⲧⲉ ⲧⲉϥϭⲁⲗⲟϫ ⲁⲩⲥⲁⲧϥ ϩⲓⲧϩⲏ ⲙ̃ⲙⲟϥ ⲉⲧⲁϥⲛⲁⲩ ⲇⲉ ⲉⲣⲟϥ ⲁϥⲥⲱⲃⲓ ⲡⲉϫⲁϥ ϫⲉ ⲙⲟϣⲓ ⲡⲓⲙⲁϩⲅ︦ ⲛ̃ⲧⲏⲃ ⲛ̃ⲧⲉⲕϣⲉ ⲛⲁⲕ ϧⲁⲧⲉⲛ ⲛⲉⲕϣⲫⲏⲣ ⲟⲩⲟϩ ⲙ̃ⲡⲉⲣϥⲓⲁϩⲟⲙ ⲙ̃ⲫⲣⲏϯ ⲅⲁⲣ ⲛϯⲛⲁⲫⲣⲓ ⲛ̃ⲥⲟⲩⲟ ⲉϣⲁⲥⲟϩⲓ ϩⲓϫⲉⲛ ⲡⲕⲁϩⲓ ⲟⲩⲟϩ ⲛ̃ⲧⲉⲥ- ⲙⲟⲩ ϣⲁⲥϯⲟⲩⲧⲁϩ ⲟⲩⲟϩ ⲙ̃ⲫⲣⲏϯ ⲉϣⲁⲣⲉ ⲡⲓⲃⲟⲩϩⲓ ⲙ̃ⲧⲟⲛ ⲙ̃ⲙⲟϥ ⲉϫⲉⲛ ⲡⲓⲃⲁⲗ ⲫⲁⲓ ϩⲱⲕ ⲡⲉ ⲡⲉⲕⲣⲏϯ ⲙ̃ⲡⲥⲏⲟⲩ ⲛ̃ϯⲁⲛⲁⲥⲧⲁⲥⲓⲥ ⲉⲕⲛⲁⲙ̃ⲧⲟⲛ ⲙ̃ⲙⲟⲕ ⲛⲉⲙ ⲛⲉⲕ- ϣⲫⲏⲣ ⲁⲩϣⲱⲧ ⲇⲉ ⲙ̃ⲡⲓⲙⲁϩⲇ︦ ⲛ̃ⲧⲏⲃ ⲟⲩⲟϩ ⲡⲉϫⲁϥ *ϫⲉ ⲉⲑⲃⲉ ⲟⲩ ⲧⲁⲯⲩⲏ ⲧⲉⲙⲟⲕϩⲛϩⲏⲧ ⲟⲩⲟϩ ⲉⲑⲃⲉ ⲟⲩ ⲧⲉϣⲑⲟⲣⲧⲉⲣ ⲙ̃ⲙⲟⲓ ⲁⲣⲓϩⲉⲗⲡⲓⲥ ⲉ̃ⲫ︦ϯ︦ ϫⲉ ϯⲛⲁⲟⲩⲱⲛϩ ⲛⲁϥ ⲉⲃⲟⲗ ⲡⲟⲩϫⲁⲓ ⲙⲡⲁϩⲟ ⲡⲉ ⲡⲁⲛⲟⲩϯ ⲟⲩⲟϩ ⲁⲩϣⲱⲧ ⲟⲛ ⲙ̃ⲡⲓⲙⲁϩⲉ︦ ⲛ̃ⲧⲏⲃ ⲁϥⲟⲩⲱⲛ ⲛ̃ⲣⲱϥ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲛ̃ⲅⲉⲛⲛⲉⲟⲥ ⲡⲓⲁ̃ⲅⲓⲟⲥ ⲓⲁ̃ⲕⲱⲃⲟⲥ ⲡⲉϫⲁϥ ϫⲉ ⲉⲧⲁⲓⲉⲣϩⲏⲧⲥ ⲛ̃ⲥⲁϫⲓ ⲛⲉⲙ ⲡⲁϭ︦ⲥ︦ ⲁϥⲟⲩⲟϩ ⲛ̃ϧⲏⲧ ⲟⲩⲟϩ ⲁϥⲁⲓⲧ ⲛⲉⲙ- ⲡϣⲁ ⲛ̃ⲟϩⲓ ⲉⲣⲁⲧ ⲙ̃ⲡⲉϥⲙⲑⲟ ⲉⲃⲟⲗ ϧⲉⲛ ⲡⲓⲁⲅⲱⲛ ⲟⲩⲟϩ ⲁϥϯϫⲟⲙ ⲛⲏⲓ ⲉⲑⲣⲓⲉⲣϩⲡⲟⲙⲉⲛⲓⲛ ⲛ̃ϧⲣⲏⲓ ⲛ̃ϧⲏⲧϥ ⲁⲩϯ ⲙ̃ⲡⲟⲩⲟⲩⲟⲓ ⲇⲉ ⲉϧⲟⲩⲛ ⲉⲧⲉϥⲫⲁⲧ ⲛϫⲁϭⲓⲏ ⲟⲩⲟϩ ⲁⲩϣⲱⲧ ⲙ̃ⲡⲓⲕⲟⲩϫⲓ ⲛⲧⲏⲃ ⲡⲉϫⲁϥ ϫⲉ ⲛ̃ⲛⲉⲕϣⲱⲡⲓ ⲛ̃ⲕⲟⲩϫⲓ ⲉⲑⲃⲉ ϫⲉ ⲡⲓⲕⲟⲩϫⲓ ⲛⲉⲙ ⲡⲓⲛⲓϣϯ ⲟⲩⲙ̃ⲧⲟⲛ ⲛ̃ⲟⲩⲱⲧ ⲡⲉ ⲉⲧⲟⲩ- ⲛⲁϫⲉⲙϥ ⲉⲩⲥⲟⲡ ⲟⲩⲟϩ ⲓⲥϫⲉ ⲁϥϫⲟⲥ ϫⲉ ⲛⲓⲕⲉϥⲱⲓ ⲛ̃ⲧⲉ- ⲧⲉⲛⲁⲫⲉ ⲥⲉⲏⲡ ⲧⲏⲣⲟⲩ² ⲛⲁϣ ⲛ̃ⲣⲏϯ ⲛ̃ⲑⲟⲕ ⲭⲛⲁⲥⲱⲣⲉⲙ ϧⲉⲛ ⲑⲙⲏϯ ⲛ̃ⲛⲉⲕϣⲫⲏⲣ ⲟⲩⲟϩ ⲁⲩϣⲱⲧ ⲙ̃ⲡⲓⲙⲁϩⲃ︦ ⲛ̃ⲧⲏⲃ ⲉⲧⲙⲉⲛⲉⲛⲥⲁ ⲡⲓⲕⲟⲩϫⲓ ⲡⲉϫⲁϥ ⲉϥⲣⲁϣⲓ ϧⲉⲛ ⲟⲩⲉⲣ- ### 0022 Ⲛⲣⲉϥϧⲱⲧⲉⲃ ⲇⲉ ⲁⲩϧⲱⲛⲧ ⲉϧⲟⲩⲛ ⲉ̃ⲣⲟϥ ϧⲉⲛ ⲟⲩ- ϫⲱⲛⲧ ⲛⲉⲙ ⲟⲩⲙ̃ⲃⲟⲛ ⲁⲩϧⲣⲁϫⲣⲉϫ ⲛ̃ⲛⲟⲩⲛⲁϫϩⲓ ⲉϧⲣⲏⲓ ⲉ̃ϫⲱϥ ⲁⲩϣⲱⲧ ⲉⲃⲟⲗ ⲛ̃ⲧⲉϥⲫⲁⲧ ⲛ̃ⲟⲩ̃ⲛⲁⲙ ⲟⲩⲟϩ ⲡⲓ- ⲙⲁⲕⲁⲣⲓⲟⲥ ⲡⲉϫⲁϥ ϫⲉ ⲙⲉⲗⲟⲥ ⲛⲓⲃⲉⲛ ⲛ̃ⲧⲏⲓ ⲉⲧⲉⲧⲉⲛϣⲱⲧ ⲙ̃ⲙⲱⲟⲩ ⲉⲓⲧⲁⲗⲟ ⲙ̃ⲙⲱⲟⲩ ⲉϩⲣⲏⲓ ⲛⲟⲩⲑⲩⲥⲓⲁ̃ ⲙ̃ⲫ︦ϯ︦ ⲟⲩⲟϩ ⲙ̃ⲡⲣⲟⲥⲫⲟⲣⲁ ⲙ̃ⲡⲓⲡⲁⲛⲧⲟⲕⲣⲁⲧⲱⲣ ⲡⲟⲩⲣⲟ ⲛ̃ⲧⲫⲉ ⲛⲉⲙ ⲡⲕⲁϩⲓ ⲁⲩϣⲱⲧ ⲟⲛ ⲛ̃ⲧⲉϥϭⲁⲗⲟϫ ⲛ̃ϫⲁϭⲏ ⲟⲩⲟϩ ⲡⲉϫⲁϥ ⲛ̃ϫⲉ ⲡⲓⲁ̃ⲅⲓⲟⲥ ⲓⲁⲕⲱⲃⲟⲥ ϫⲉ ⲥⲱⲧⲉⲙ ⲉⲣⲟⲓ ⲡϭ︦ⲥ︦ ϫⲉ ⲛ̃ⲑⲟⲕ ⲟⲩⲁⲅⲁⲑⲟⲥ ⲟⲩⲟϩ ⲛⲁϣⲉ ⲡⲉⲕⲛⲁⲓ ⲛ̃ⲟⲩⲟⲛ ⲛⲓⲃⲉⲛ ⲉⲧⲧⲱⲃϩ ⲙ̃ⲙⲟⲕ ⲟⲩⲟϩ ⲁⲩϣⲱⲧ ⲛ̃ⲧⲉϥϫⲓϫ ⲛ̃ⲟⲩⲓ̃ⲛⲁⲙ ⲁϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉ ⲡⲉⲕⲛⲁⲓ ⲡϭ︦ⲥ︦ ⲁϥⲉⲣⲃⲟⲛⲏ̃ⲑⲓⲛ ⲉⲣⲟⲓ ⲙⲁⲧⲟⲩϫⲟⲓ ⲟⲩⲟϩ ⲛⲁϩⲙⲉⲧ ⲉⲃⲟⲗϧⲉⲛ ⲁ̃ⲙⲉⲛϯ ⲉⲧⲥⲁⲡⲉⲥⲏⲧ ⲁⲩϣⲱⲧ ⲟⲛ ⲛ̃ⲧⲉϥϫⲓϫ ⲛ̃ϫⲁϭⲏ ⲟⲩⲟϩ ⲡⲓⲙⲁⲕⲁⲣⲓⲟⲥ ⲡⲉϫⲁϥ ϫⲉ ⲛ̃ⲑⲟⲕ ⲫ︦ϯ︦ ⲫⲏ ⲉⲧⲓ̃ⲣⲓ ⲛ̃ⲛⲓϣⲫⲏⲣⲓ ⲙ̃ⲙⲁⲩⲁⲧϥ ⲥⲱⲧⲉⲙ ⲉⲣⲟⲓ ⲟⲩⲟϩ [ⲙⲁ]ⲧⲟⲩϫⲟⲓ *ⲁⲩϣⲱⲧ ⲟⲛ ⲙ̃ⲡⲉϥϫⲫⲟⲓ ⲛ̃ϫⲁϭⲏ ⲁϥⲟⲩⲁϩⲧⲟⲧϥ ⲟⲛ ⲛ̃ϫⲉ ⲡⲓⲅⲉⲛ- ⲛⲉⲟⲥ ⲡⲉϫⲁϥ ϫⲉ ⲧⲁⲯⲩⲭⲏ ⲥⲙⲟⲩ ⲉⲡϭ︦ⲥ︦ ⲟⲩⲟϩ ϯⲛⲁⲉⲣ- ⲯⲁⲗⲓⲛ ⲉⲡⲁⲛⲟⲩϯ ϩⲱⲥ ϯϣⲟⲡ ⲡⲁⲥⲁϫⲓ ⲛⲁϣⲱⲡⲓ ⲉϥϩⲟⲗϫ ⲙ̃ⲡⲁⲛⲟⲩϯ ⲁⲩϣⲱⲧ ⲟⲛ ⲙ̃ⲡⲉϥϫⲫⲟⲓ ⲛⲟⲩⲓⲛⲁⲙ ⲟⲩⲟϩ ⲡⲓⲁ̃ⲅⲓⲟⲥ ⲓⲁⲕⲱⲃⲟⲥ ⲡⲉϫⲁϥ ϫⲉ ϧⲉⲛ ⲡⲓϫⲫⲟⲓ ⲛ̃ⲧⲉ ⲧⲉⲕϫⲟⲙ ⲭⲛⲁϫⲉⲣ ⲛⲉⲕϫⲁϫⲓ ⲉⲃⲟⲗ ⲧⲁϫⲟⲙ ⲟⲩⲟϩ ⲡⲁⲥ- ⲙⲟⲩ ⲡⲉ ⲡ︦ⲥ︦ ⲁϥϣⲱⲡⲓ ⲛⲏⲓ ⲉⲩⲥⲱⲧⲏⲣⲓⲁ³ ⲟⲩⲟϩ ⲁⲩϣⲱⲧ ⲉⲃⲟⲗ ⲛ̃ϯⲕⲉⲗⲓ ⲛ̃ⲧⲉ ⲧⲉϥⲫⲁⲧ ⲛ̃ⲟⲩⲓ̃ⲛⲁⲙ ⲁⲩⲫⲁϧⲥ ϣⲁ ⲉϧⲟⲩⲛ ⲉⲛⲉϥⲁⲗⲱϫ ⲟⲩⲟϩ ⲁϥⲉⲣⲉⲥⲑⲁⲛⲉⲥⲑⲉ ⲉⲡⲓⲙ̃ⲕⲁϩ ⲁϥⲱϣ ⲉⲃⲟⲗ ϧⲉⲛ ⲟⲩⲛⲓϣϯ ⲛ̃ϧⲣⲱⲟⲩ ⲉϥϫⲱ ⲙ̃ⲙⲟⲥ ϫⲉ ⲡϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲁⲣⲓⲃⲟⲏ̃ⲑⲓⲛ ⲉⲣⲟⲓ ϫⲉ ⲁⲩⲁ̃ⲙⲟⲛⲓ ⲙ̃ⲙⲟⲓ ⲛ̃ϫⲉ ⲛⲓⲛⲁⲕϩⲓ ⲛ̃ⲧⲉ ⲫⲙⲟⲩ Ⲡⲉϫⲱⲟⲩ ⲛⲁϥ ⲛ̃ϫⲉ ⲛⲓⲣⲉϥϧⲱⲧⲉⲃ ϫⲉ ⲙ̃ⲡⲉⲛϫⲟⲥ ⲛⲁⲕ ⲓⲥϫⲉⲛ ϣⲟⲣⲡ ϫⲉ ⲥⲉⲛⲏⲟⲩ ⲉ̃ϫⲱⲕ ⲛ̃ϫⲉ ϩⲁⲛⲛⲓϣϯ ### 0023 ⲡⲁⲟⲩⲱⲓⲛⲓ ⲛⲉⲙ ⲡⲁⲛⲟϩⲉⲙ ⲡⲁⲣⲉϥϣⲟⲡⲧ ⲉⲣⲟϥ ϣⲱⲡ ⲉⲣⲟⲕ ⲡϭ︦ⲥ︦ ⲙ̃ⲡⲁϯϩⲟ ⲟⲩⲟϩ ⲥⲱⲧⲉⲙ ⲉⲡⲁⲧⲱⲃϩ ⲕⲁⲧⲁ ⲫⲣⲏϯ ⲉⲧⲁⲓⲉⲣϣⲉⲙⲙⲟ ⲛ̃ⲛⲁⲙⲉⲗⲟⲥ ⲧⲏⲣⲟⲩ ⲉⲣⲉ ⲧⲫⲁϣⲓ ⲙ̃ⲡⲁⲥⲱⲙⲁ ⲟⲓ ⲛ̃ⲣⲉϥⲙⲱⲟⲩⲧ ⲉⲣⲉ ϯⲕⲉⲫⲁϣⲓ ⲙ̃ⲡⲉⲕⲙ̃ⲑⲟ ⲉⲃⲟⲗ ⲙ̃ⲙⲟⲛ ⲧⲏⲃ ⲟⲩⲇⲉ ϫⲓϫ ϣⲟⲡ ⲛⲏⲓ ⲙ̃ⲫⲣⲏϯ ⲉⲧⲁⲕ- ⲑⲁⲙⲓⲟⲓ ϫⲉ ϩⲓⲛⲁ ⲉⲓⲉⲫⲟⲣϣⲟⲩ ⲉⲃⲟⲗ ⲙ̃ⲡⲉⲕⲙ̃ⲑⲟ ⲉⲃⲟⲗ ⲁⲩⲫⲱϧ ⲛ̃ⲛⲁⲫⲁⲧ ⲛⲉⲙ ⲛⲁⲁ̃ⲗⲱϫ ⲟⲩⲟϩ ⲁⲩⲥⲱⲗⲡ ⲉⲃⲟⲗ ⲛ̃ⲛⲁϫⲫⲟⲓ ⲟⲩⲟϩ ⲓⲥ ϩⲏⲡⲡⲉ ϯⲥⲏϯ ⲉⲃⲟⲗ ⲙ̃ⲡⲉⲕⲙ̃ⲑⲟ ⲙ̃ⲫⲣⲏϯ ⲛⲟⲩⲏⲓ ⲉⲁϥϩⲓ ϧⲉⲛ ⲟⲩⲉⲝⲁⲡⲓⲛⲁ ⲉ̃ⲣⲉ ⲟⲩⲕⲟⲩϫⲓ ⲥⲟϫⲡ ⲛ̃ϧⲏⲧϥ ⲫⲁⲓ ⲡⲉ ⲡⲓⲣⲏϯ ϩⲱ ⲉⲧⲁⲓϣⲱⲡⲓ ⲙ̃ⲙⲟⲥ ϯϯϩⲟ ⲟⲩⲟϩ ϯⲧⲱⲃϩ ⲙ̃ⲙⲟⲕ ⲡϭ︦ⲥ︦ ⲉⲑⲣⲉⲕⲥⲱⲧⲉⲙ ⲉⲡⲁ- ⲧⲱⲃϩ ⲟⲩⲟϩ ⲁⲛⲓⲟⲩⲓ ⲛ̃ⲧⲁⲯⲩⲭⲏ ⲉⲃⲟⲗϧⲉⲛ ⲡⲁⲓϣⲧⲉⲕⲟ ⲉⲑⲣⲓⲟⲩⲱⲛϩ ⲉⲃⲟⲗ ⲙ̃ⲡⲉⲕⲣⲁⲛ ⲡϭ︦ⲥ︦ ⲛⲉⲙ ⲛⲏ ⲉⲑⲟⲩⲁⲃ ⲧⲏ- ⲣⲟⲩ ⲛ̃ⲧⲁⲕ ⲛⲉⲙ ⲟⲩⲟⲛ ⲛⲓⲃⲉⲛ ⲉⲧⲁⲥⲙ̃ⲧⲟⲛ ⲙⲙⲟⲥ ⲉϩⲣⲏⲓ ⲉϫⲱⲟⲩ ⲛ̃ϫⲉ ⲧⲉⲕⲙⲉⲧⲙⲁⲓⲣⲱⲙⲓ ⲟⲩⲟϩ ϧⲉⲛ² ⲛⲉⲕⲙⲁⲣⲧⲩ- ⲣⲟⲥ ⲧⲏⲣⲟⲩ ⲉⲧⲁⲩϧⲟⲑⲃⲟⲩ ⲛⲉⲙ ⲟⲩⲟⲛ ⲛⲓⲃⲉⲛ ⲉⲧⲟⲩϧⲱ- ⲧⲉⲃ ⲙ̃ⲙⲱⲟⲩ ⲉⲑⲃⲉ ⲡⲉⲕⲣⲁⲛ ⲉⲑⲟⲩⲁⲃ ⲙⲟⲓ ⲡϭ︦ⲥ︦ ⲛ̃ⲟⲩϩⲓ- ⲣⲏⲛⲏ ⲙ̃ⲡⲉⲕⲗⲁⲟⲥ ⲛⲭⲣⲓⲥⲧⲓⲁ̃ⲛⲟⲥ ⲉⲧⲟⲩⲉⲣⲇⲓⲱⲕⲓⲛ ⲛ̃ⲥⲱⲟⲩ ϧⲉⲛ ⲙⲁⲓ ⲛⲓⲃⲉⲛ ⲟⲩⲟϩ *ϯϩⲓⲣⲏⲛⲏ ϯⲉ̃ⲃⲟⲗϩⲓⲧⲟⲧⲕ ⲙⲁⲣⲉⲥ- ⲑⲱⲟⲩϯ ⲉϧⲟⲩⲛ ⲉⲛⲉⲥⲉⲣⲏⲟⲩ ⲛ̃ⲥⲉⲗⲟϫⲟⲩ ⲉⲩϫⲏⲣ ⲉⲃⲟⲗ ϧⲉⲛ ⲡⲕⲁϩⲓ ⲧⲏⲣϥ ⲧⲉⲕⲉⲕⲕⲗⲏⲥⲓⲁ̃ ⲇⲉ ⲡϭ︦ⲥ︦ ⲉⲕⲉⲧⲁϩⲟⲥ ⲉ̃ⲣⲁⲧⲥ ϧⲉⲛ ⲧⲉⲕϩⲓⲣⲏⲛⲏ ⲛⲓⲉⲡⲓⲥⲕⲟⲡⲟⲥ ⲇⲉ ⲟⲛ ⲉⲕⲉⲧⲁϫ- ⲣⲱⲟⲩ ϧⲉⲛ ⲡⲉⲕⲛⲁϩϯ ⲉⲑⲣⲟⲩϫⲉⲙ ⲡⲓⲣⲏϯ ⲙ̃ⲙⲟⲛⲓ ⲙⲡⲉⲕ- ⲗⲁⲟⲥ ⲛⲓⲡⲣⲉⲥⲃⲩⲧⲉⲣⲟⲥ ⲇⲉ ⲟⲛ ⲛⲉⲙ ⲛⲓⲇⲓⲁⲕⲱⲛ ⲁⲣⲓ- ⲭⲁⲣⲓⲍⲉⲥⲑⲉ ⲛⲱⲟⲩ ⲛ̃ⲟⲩϫⲟⲙ ⲉⲑⲣⲟⲩϯϩⲟ ⲉⲣⲟⲕ ⲡϭ︦ⲥ︦ ⲉϩⲣⲏⲓ ⲉϫⲉⲛ ⲡⲉⲕⲗⲁⲟⲥ ⲛⲉⲙ ⲧⲉⲕⲕⲗⲏⲣⲟⲛⲟⲙⲓⲁ̃ ⲡϭ︦ⲥ︦ ⲉⲕⲉϫⲟⲩϣⲧ ⲉⲃⲟⲗϧⲉⲛ ⲧⲉⲕⲫⲉ ⲉⲑⲟⲩⲁⲃ ⲉϫⲉⲛ ⲡⲁⲓⲙⲏϣ ⲧⲏⲣϥ ⲉⲧⲟϩⲓ ⲉⲣⲁⲧϥ ⲙ̃ⲡⲁⲓⲙⲁ ⲙ̃ⲫⲟⲟⲩ ⲉⲩⲉⲣⲑⲉⲱⲣⲓⲛ ⲛ̃ⲛⲓϧⲓⲥⲓ ⲛⲉⲙ ⲛⲓⲁ̃ⲅⲱⲛ ⲛⲁⲓ ⲉⲧⲁⲕϯϫⲟⲙ ⲛⲏⲓ ⲉⲑⲣⲓϥⲁⲓ ϧⲁⲣⲱⲟⲩ ϧⲁ ### 0024 ⲟⲩⲟⲧ ϫⲉ ⲃⲱⲗ ⲉⲃⲟⲗ ⲙ̃ⲡⲓⲣⲱⲙⲓ ⲛⲁⲡⲁⲥ ⲉⲑⲃⲉ ϫⲉ ϥⲥⲉⲃⲧⲱⲧ ⲉⲕⲟⲧϥ ϧⲉⲛ ⲟⲩⲓⲱⲥ ⲛ̃ϩⲟⲩϭ̃ ⲟⲩⲟϩ ⲁⲩϣⲱⲧ ⲟⲛ ⲙ̃ⲡⲓⲙⲁϩ︦ ⲛ̃ⲧⲏⲃ ⲡⲉϫⲁϥ ⲛⲱⲟⲩ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲓⲁⲕⲱ- ⲃⲟⲥ ϫⲉ ⲧⲉⲧⲉⲛⲉⲙⲓ ϫⲉ ⲡⲁⲙⲏϣ ⲙ̃ⲡⲓⲃⲉⲥⲛⲏⲧ ⲉϣⲁⲩϩⲓⲟⲩⲓ̃ ⲉ̃ⲣⲟϥ ϧⲉⲛ ⲟⲩⲏⲣ ⲛ̃ⲁⲑⲏⲣ *ⲟⲩⲟϩ ϧⲉⲛ ⲡⲁⲓⲙⲏϣ ⲙ̃ⲃⲉⲛⲓⲡⲓ ⲉϣⲁⲩⲑⲣⲟⲩϣⲙⲁ ⲟⲩⲟϩ ⲛ̃ⲥⲉⲥⲟⲕⲟⲩ ϩⲓϫⲱϥ ⲡⲓⲁⲙⲏϣ ⲛ̃ⲑⲟϥ ⲙ̃ⲡⲁϥⲉⲣⲉⲥⲑⲁⲛⲉⲥⲑⲉ ⲟⲩⲇⲉ ⲙ̃ⲡⲁϥϧⲓⲥⲓ ϧⲉⲛ ⲡⲁⲓⲙⲏϣ ⲛ̃ⲃⲁⲥⲁⲛⲟⲥ ⲟⲩⲟϩ ⲁⲩϣⲱⲧ ⲙ̃ⲡⲓⲙⲁϩ︦ ⲛ̃ⲧⲏⲃ ⲡⲉϫⲁϥ ϫⲉ ⲙⲁϫⲟⲙ ⲛⲏⲓ ⲡϭ︦ⲥ︦ ⲫ︦ϯ︦ ⲛ̃ ϯⲙⲉⲑⲙⲏⲓ ϫⲉ ⲁ ⲧⲁⲯⲩⲭⲏ ⲉⲣϩⲉⲗⲡⲓⲥ ⲉ̃ⲣⲟⲕ ⲁⲩϣⲱⲧ ⲇⲉ ⲟⲛ ⲙ̃ⲡⲓⲙⲁϩⲉ︦ ⲛ̃ⲧⲏⲃ ⲟⲩⲟϩ ⲡⲓⲙⲁⲕⲁⲣⲓⲟⲥ ⲓⲁⲕⲱⲃⲟⲥ ⲁϥⲉⲣⲙ̃ⲫⲣⲏϯ ⲛ̃ⲟⲩⲁⲓ ⲉⲧⲁϥⲛⲉϩⲥⲓ ⲉⲃⲟⲗϧⲉⲛ ⲡⲓϩⲓⲛⲓⲙ ⲁϥⲱϣ ⲉ̃ⲃⲟⲗ ⲉϥϫⲱ ⲙ̃ⲙⲟⲥ ϫⲉ ⲙⲁ- ϩⲁⲡ ⲛⲏⲓ ⲫ︦ϯ︦ ⲟⲩⲟϩ ⲛ̃ⲧⲉⲕϭⲓ ⲙⲡⲁϩⲁⲡ ⲉ̃ⲃⲟⲗϧⲉⲛ ⲟⲩⲉⲑⲛⲟⲥ ⲉϥϭⲁϧⲉⲙ ϩⲏⲡⲡⲉ ⲡϭ︦ⲥ︦ ⲁⲩϧⲟⲑⲃⲉⲧ ϧⲉⲛ ⲟⲩϧⲱⲧⲉⲃ ⲉϥⲉⲛ- ϣⲁϣⲓ ⲉⲑⲃⲉ ⲡⲉⲕⲣⲁⲛ ⲉⲑⲟⲩⲁⲃ ⲟⲩⲟϩ ⲙ̃ⲡⲟⲩϯⲁⲥⲟ ⲉ̃ⲡⲉⲕ- ⲡⲗⲁⲥⲙⲁ ⲙ̃ⲫⲣⲏϯ ⲛ̃ϩⲁⲛⲟⲩⲱⲛϣ ⲛ̃ⲣⲉϥϩⲱⲗⲉⲙ ⲉⲑⲃⲉ ϫⲉ ⲙ̃ⲙⲟⲛ ⲙⲉⲧϣⲉⲛϩⲏⲧ ⲛ̃ϧⲏⲧⲟⲩ Ⲛⲓⲡⲣⲉⲥⲃⲩⲧⲉⲣⲟⲥ ⲇⲉ ⲛⲉⲙ ⲛⲓⲡⲁⲣⲑⲉⲛⲟⲥ ⲉⲧⲟϩⲓ ⲉⲣⲁⲧⲟⲩ ⲛⲁⲩϫⲱ ⲙ̃ⲙⲟⲥ ⲡⲉ ϫⲉ ⲙ̃ⲡⲉⲛⲛⲁⲩ ⲟⲩⲇⲉ ⲙ̃ⲡⲉⲛⲥⲱⲧⲉⲙ ⲉⲟⲩⲟⲛ ⲉ̃ⲛⲉϩ ⲉϥⲥⲁϫⲓ ⲙ̃ⲡⲁⲓⲣⲏϯ ⲉⲃⲟⲗϧⲉⲛ ϯⲅⲣⲁⲫⲏ ⲉⲑⲟⲩⲁⲃ ⲡⲓϫⲱⲣⲓ ⲇⲉ ⲛ̃ⲧⲉ ⲡⲭ︦ⲥ︦ ⲓⲁⲕⲱⲃⲟⲥ ⲡⲉϫⲁϥ ⲛ̃ⲛⲓ- ⲣⲉϥϧⲱⲧⲉⲃ ϫⲉ ⲉⲑⲃⲉ ⲟⲩ ⲧⲉⲧⲉⲛⲟ̃ϩⲓ ⲉⲣⲁⲧⲉⲛⲑⲏⲛⲟⲩ ⲉⲧⲉ- ⲧⲉⲛⲕⲟⲣϥ ⲉⲃⲟⲗϩⲁ ϯⲉⲣⲅⲁⲥⲓⲁ̃ ⲉⲧⲁⲩⲑⲁϣⲥ ⲛⲱⲧⲉⲛ ϣⲱⲧ ⲙ̃ⲡⲓϣϣⲏⲛ ⲙ̃ⲫⲣⲏϯ ⲉⲧⲁⲣⲉⲧⲉⲛ*ϣⲱⲧ ⲛ̃ⲛⲉϥⲕⲗⲁ- ⲇⲟⲥ ⲛ̃ⲧⲉⲧⲉⲛϣⲧⲉⲙϯⲁⲥⲟ ⲁϥϧⲱⲛⲧ ⲅⲁⲣ ⲉⲣⲟⲓ ⲛ̃ϫⲉ ⲡϫⲱⲕ ⲧⲏⲣϥ ⲙ̃ⲡⲓⲁ̃ⲅⲱⲛ ⲉⲑⲣⲓϭⲓ ⲙ̃ⲡⲓⲭⲗⲟⲙ ⲗⲟⲓⲡⲟⲛ ⲛⲁϥⲉⲣⲯⲁⲗⲓⲛ ϧⲉⲛ ⲟⲩⲑⲉⲗⲏⲗ ⲉϥϫⲱ ⲙ̃ⲙⲟⲥ ϫⲉ ⲙⲁⲣⲉ ⲡⲁϩⲏⲧ ⲟⲩⲛⲟϥ ⲉϫⲉⲛ ⲡϭ︦ⲥ︦ ⲟⲩⲟϩ ⲙⲁⲣⲉ ⲡⲁⲡ︦ⲛ︦ⲁ︦ ⲑⲉⲗⲏⲗ ⲉ̃ϫⲉⲛ ⲫ︦ϯ︦ ⲡⲁ- ⲥⲱⲧⲏⲣ ### 0025 ⲛ̃ⲃⲁⲥⲁⲛⲟⲥ ⲡⲓⲙⲁⲕⲁⲣⲓⲟⲥ ⲇⲉ ⲡⲉϫⲁϥ ϫⲉ ⲱ̃ ⲛⲓⲁ̃ⲛⲟⲏ̃ⲧⲟⲥ ⲧⲉ- ⲧⲉⲛⲉⲙⲓ ⲁⲛ ϫⲉ ⲉⲧⲁⲓⲙ̃ⲕⲁϩ ⲉⲑⲃⲉ ⲟⲩ ⲉⲑⲃⲉ ⲧⲁⲁ̃ⲅⲁⲡⲏ ⲉϧⲟⲩⲛ ⲉⲡⲭ︦ⲥ︦ ⲉⲧⲁⲓⲙ̃ⲕⲁϩ ϫⲉⲭⲁⲥ ⲉⲓⲉ̃ⲉⲙⲓ ϫⲉ ⲟⲩⲥⲁⲣⲝ ⲉⲧⲧⲟⲓ ϩⲓⲱⲧ ϩⲱ ⲟⲩⲟϩ ⲁⲛⲟⲕ ⲟⲩⲣⲱⲙⲓ ⲛ̃ⲥⲁⲣⲝ ϩⲓ ⲥⲛⲟϥ ⲕⲉⲅⲁⲣ ⲛⲏ ⲉⲑⲟⲩⲁⲃ ⲧⲏⲣⲟⲩ ⲁⲩⲙⲕⲁϩ ⲉⲩⲛⲏⲟⲩ ⲉⲃⲟⲗϧⲉⲛ ⲡⲁⲓⲕⲟⲥⲙⲟⲥ ⲁⲣⲓⲉⲙⲓ ϫⲉ ⲃⲁⲥⲁⲛⲟⲥ ⲛⲓⲃⲉⲛ ⲉⲧⲁⲣ- ⲉⲧⲉⲛⲉⲛⲟⲩ ⲉϩⲣⲏⲓ ⲉϫⲱⲓ ⲙ̃ⲡⲓⲉⲣⲉⲥⲑⲁⲛⲉⲥⲑⲉ ϣⲁ ⲉϧⲟⲩⲛ ⲉϯⲛⲟⲩ ⲉⲑⲃⲉ ϫⲉ ⲁⲩ*ϩⲱⲗⲉⲙ ⲙ̃ⲡⲁⲛⲟⲩⲥ ⲁϥϣⲱⲡⲓ ϧⲁⲧⲉⲛ ⲡϭ︦ⲥ︦ ϯⲛⲟⲩ ϫⲉ ⲙ̃ⲡⲉⲣⲟ̃ϩⲓ ⲉⲣⲁⲧⲉⲛⲑⲏⲛⲟⲩ ⲉⲣⲉⲧⲉⲛ- ⲕⲟⲣϥ ⲁⲗⲗⲁ ⲓⲱⲥ ⲙ̃ⲙⲱⲧⲉⲛ ⲉϫⲱⲕ ⲉⲃⲟⲗ ⲛ̃ⲛⲏ ⲉⲧⲁⲩⲟⲩ- ⲁϩⲥⲁϩⲛⲓ ⲙ̃ⲙⲱⲟⲩ ⲛⲱⲧⲉⲛ ϯⲓⲏⲥ ⲅⲁⲣ ⲁⲛⲟⲕ ⲉϣⲉ ϣⲁ ⲡϭ︦ⲥ︦ ⲫⲏ ⲉⲧⲁⲓⲙⲉⲛⲣⲓⲧϥ ⲉϩⲟⲧⲉ ⲡⲕⲟⲥⲙⲟⲥ ⲧⲏⲣϥ ⲁⲩⲭⲁⲧⲟ- ⲧⲟⲩ ⲇⲉ ⲉⲃⲟⲗ ⲛ̃ϫⲉ ⲛⲓⲇⲏⲙⲓⲟⲥ ⲉⲩϣⲱⲧ ⲉ̃ⲃⲟⲗ ⲛ̃ⲛⲓⲙⲉⲗⲟⲥ ⲛ̃ⲧⲉ ⲡⲉⲑⲟⲩⲁⲃ ⲉⲩⲥⲓϯ ⲙ̃ⲙⲱⲟⲩ ϩⲓⲧϩⲏ ⲙ̃ⲙⲟϥ ⲓⲥϫⲉⲛ ϣⲱⲣⲡ ϣⲁ ⲫⲛⲁⲩ ⲛ̃ⲁϫⲡⲑ︦ϯ︦ ⲟⲩⲟϩ ⲡⲉϥⲛⲁϩϯ ⲛⲁϥⲉⲣ- ϩⲟⲩⲟ̃ ⲡⲉ ⲉ̃ϧⲟⲩⲛ ⲉⲫ︦ϯ︦ ⲟⲩⲟϩ ⲁⲩⲫⲱϧ ⲛ̃ϯⲕⲉⲗⲓ ⲛ̃ⲧⲉ ⲧⲉϥⲫⲁⲧ ⲛ̃ϫⲁϭⲏ ⲉⲁⲩⲫⲁϧⲥ ϣⲁ ⲉϧⲟⲩⲛ ⲉ̃ⲛⲉϥⲁ̃ⲗⲟϫ ⲛⲁϥⲧⲉⲛⲑⲱⲛⲧ ⲡⲉ ⲛ̃ϫⲉ ⲡⲓⲁ̃ⲅⲓⲟⲥ ⲓⲁ̃ⲕⲱⲃⲟⲥ ⲛ̃ϯⲟⲩⲛⲟⲩ ⲉⲧⲁⲩϣⲱⲧ ⲉⲃⲟⲗ ⲛ̃ⲛⲉϥⲙⲉⲗⲟⲥ ⲧⲏⲣⲟⲩ ⲉⲟⲩϣϣⲏⲛ ⲙ̃ⲙⲟⲛ ⲕⲗⲁⲇⲟⲥ ϩⲓⲱⲧϥ ⲟⲩⲟϩ ⲛⲉ ⲙ̃ⲙⲟⲛ ϩⲗⲓ ϫⲉ ⲗⲟⲓⲡⲟⲛ ⲥⲟϫⲓ ϧⲉⲛ ⲡⲉϥⲥⲱⲙⲁ ⲉⲃⲏⲗ ⲉ̃ⲧⲉϥⲁ̃ⲫⲉ ⲛⲉⲙ ⲧⲉϥⲙⲉⲥⲧⲉⲛ- ϩⲏⲧ ⲛⲉⲙ ⲧⲉϥⲛⲉϫⲓ ⲛⲁϥⲧⲉⲛⲑⲱⲛⲧ ⲅⲁⲣ ⲉ̃ⲟⲩⲕⲩⲡⲁⲣⲓⲥⲟⲥ ⲉϥϯ ⲙ̃ⲡⲉϥⲥⲑⲩⲛⲟⲩϥⲓ ⲁⲩϣⲁⲛϭⲟⲗϥ ⲫⲁⲓ ϩⲱϥ ⲙ̃ⲫⲣⲏϯ ⲙ̃ⲡⲓⲁ̃ⲅⲓⲟⲥ ⲓⲁⲕⲱⲃⲟⲥ ⲡⲓⲃⲱⲕ ⲛ̃ⲧⲉ ⲫ︦ϯ︦ ⲉⲣⲉ ⲧⲉϥⲁ̃ⲫⲉ ⲙ̃ⲙⲁⲩ- ⲁⲧⲥ ⲟ̃ϩⲓ ⲉⲣⲁⲧⲥ ⲛⲉⲙ ⲧⲉϥⲙⲉⲥⲧⲉⲛϩⲏⲧ ⲛⲉⲙ ⲧⲉϥⲛⲉϫⲓ ⲟⲩⲟϩ ⲛⲉϥⲙⲉⲗⲟⲥ ⲧⲏⲣⲟⲩ ⲛⲁⲩⲥⲁϯ ⲉⲃⲟⲗ ⲡⲉ ϩⲓϫⲉⲛ ⲡⲕⲁϩⲓ ⲙ̃ⲡⲉϥⲙ̃ⲑⲟ ⲟⲩⲟϩ ⲛⲁⲣⲉ ⲧⲫⲁϣⲓ ⲙ̃ⲡⲉϥⲥⲱⲙⲁ ⲟⲓ ⲛ̃ⲣⲉϥⲙⲱⲟⲩⲧ ⲡⲉ ⲛⲁϩⲁϥ ⲛⲁϥϫⲱ ⲇⲉ ⲙ̃ⲙⲟⲥ ⲡⲉ ϫⲉ ϯϣⲉⲡϩⲙⲟⲧ ⲛ̃ⲧⲟⲧⲕ ⲡϭ︦ⲥ︦ ⲟⲩⲟϩϯⲥⲙⲟⲩ ⲉⲣⲟⲕ ⲫ︦ϯ︦ ⲛ̃ⲛⲁⲓⲟϯ * Ⲉⲧⲁϥϣⲱⲡⲓ ⲇⲉ ϧⲉⲛ ⲟⲩⲱⲣϥ ⲛ̃ⲟⲩⲕⲟⲩϫⲓ ⲉⲃⲟⲗ- ϧⲉⲛ ⲡⲓϧⲓⲥⲓ ⲁϥⲟⲩⲱⲛ ⲛ̃ⲣⲱϥ ⲟⲩⲟϩ ⲡⲉϫⲁϥ ϫⲉ ⲡϭ︦ⲥ︦ ⲡⲉ ### 0026 ⲡⲉⲕⲣⲁⲛ ⲉⲑⲟⲩⲁⲃ ⲉⲕⲉⲁ̃ⲣⲉϩ ⲇⲉ ⲟⲛ ⲉⲟⲩⲟⲛ ⲛⲓⲃⲉⲛ ⲉⲑⲛⲁ- ⲉⲣⲥⲕⲉⲡⲁⲍⲓⲛ ⲙ̃ⲡⲁⲥⲱⲙ ⲛ̃ⲧⲉⲕⲥⲙⲟⲩ ⲉⲟⲩⲟⲛ ⲛⲓⲃⲉⲛ ⲉⲑⲛⲁ- ⲧⲱⲃϩ ⲙ̃ⲙⲟⲕ ϧⲉⲛ ⲡⲁⲣⲁⲛ ⲓⲉ ⲡⲉⲧⲛⲁϣⲱⲡ ⲉⲣⲟϥ ⲛ̃ⲟⲩ- ϣⲉⲙⲙⲟ ⲓⲉ ⲡⲉⲧⲛⲁⲉⲣ ⲟⲩⲡⲉⲑⲛⲁⲛⲉϥ ⲛⲉⲙ ⲟⲩⲟⲣⲫⲁⲛⲟⲥ ⲓⲉ ⲟⲩⲭⲏⲣⲁ ⲓⲉ ⲛ̃ⲧⲉϥϯ ⲛ̃ⲟⲩⲡⲣⲟⲥⲫⲟⲣⲁ ⲉⲡⲁⲉⲣⲫⲙⲉⲩⲓ ⲡϭ︦ⲥ︦ ⲉⲕⲉϭⲓⲧⲟⲩ ⲛ̃ⲧⲟⲧⲟⲩ ⲉⲩⲥⲑⲟⲓ ⲛ̃ⲥⲑⲩⲛⲟⲩϥⲓ ⲉϫⲉⲛ ⲡⲉⲕⲑⲩ- ⲥⲓⲁⲥⲧⲏⲣⲓⲟⲛ ⲉⲧϧⲉⲛ ⲧⲫⲉ ⲁⲛⲟⲕ ⲡⲉ ⲡⲉⲕⲃⲱⲕ ⲛⲉⲗⲁⲭⲓⲥ- ⲧⲟ ϯⲟⲩⲱⲛϩ ⲛⲁⲕ ⲉ̃ⲃⲟⲗ ⲉⲓⲟⲩⲱⲣⲡ ⲉϩⲣⲏⲓ *ⲛ̃ⲧⲉⲕⲙⲉⲧ- ⲛⲓϣϯ ⲛⲉⲙ ⲛⲉⲕⲙⲁⲣⲧⲩⲣⲟⲥ ⲧⲏⲣⲟⲩ ⲛⲉⲙ ⲛⲉⲕⲟⲙⲟⲗⲟⲅⲓⲧⲏⲥ ⲉⲃⲟⲗ ⲥⲁ ⲡⲉⲙϩⲓⲧ ⲛⲉⲙ ⲫⲓⲟⲙ ⲛ̃ⲟⲩⲥⲙⲟⲩ ⲛⲉⲙ ⲟⲩⲱⲟⲩ ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ϣⲁ ⲉⲛⲉϩ ⲛ̃ⲧⲉ ⲛⲓⲉⲛⲉϩ ⲁⲙⲏⲛ Ⲟⲩⲟϩ ⲛ̃ϯⲟⲩⲛⲟⲩ ⲉⲧⲉⲙⲙⲁⲩ ⲁϥⲛⲁⲩ ⲉ̃ⲡϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲉϥⲟ̃ϩⲓ ⲉⲣⲁⲧϥ ⲥⲁⲡϣⲱⲓ ⲙ̃ⲙⲟϥ ⲉϥϫⲱ ⲙⲙⲟⲥ ⲛⲁϥ ϫⲉ ⲱⲟⲩⲛⲓⲁⲧⲕ ⲛ̃ⲑⲟⲕ ϫⲉ ⲁⲕϣⲉⲡϧⲓⲥⲓ ⲛ̃ⲟⲩⲕⲟⲩϫⲓ ⲙ̃ⲡⲁⲓⲙⲁ ⲁⲙⲟⲩ ϯⲛⲟⲩ ⲁ̃ⲣⲓⲕⲗⲏⲣⲟⲛⲟⲙⲓⲛ ⲙ̃ⲡⲓⲱⲛϧ ⲛ̃ⲉⲛⲉϩ ⲛⲉⲙ ⲛⲓⲁⲁⲉⲑⲟⲛ ⲉⲧⲩⲥⲉⲃⲧⲱⲧⲟⲩ ⲛⲁⲕ ⲛⲁⲓ ⲉⲑⲙⲏⲛ ⲉⲃⲟⲗ ϣⲁ ⲉ̃ⲛⲉϩ ϥⲁⲓ ⲛ̃ⲛⲉⲕⲃⲁⲗ ⲉⲡϣⲱⲓ ⲟⲩⲟϩ ⲁⲛⲁⲩ ⲉ̃ⲡⲓ- ⲑⲣⲟⲛⲟⲥ ⲉⲧⲁⲩⲥⲉⲃⲧⲱⲧϥ ⲛⲁⲕ ⲟⲩⲟϩ ϩⲏⲡⲡⲉ ⲓⲥ ⲡⲉⲕⲭⲗⲟⲙ ϧⲉⲛ ⲧϫⲓϫ ⲙ̃ⲙⲓⲭⲁⲏⲗ ⲡⲓⲁⲣⲭⲏⲁⲅⲅⲉⲗⲟⲥ ⲟⲩⲟϩ ⲛⲓϣⲟⲣⲡ ⲙ̃ⲙⲓⲥⲓ ⲧⲏⲣⲟⲩ ⲉⲧⲁ ⲛ̃ⲣⲱⲇⲏⲥ ϧⲟⲑⲃⲟⲩ ⲥⲉⲛⲏⲟⲩ ⲉ̃ⲃⲟⲗ ϧⲁⲧⲉⲕϩⲏ ⲉⲩⲉⲣⲯⲁⲗⲓⲛ ϧⲁϫⲱⲕ ⲛⲉⲙ ⲛⲏ ⲉⲑⲟⲩⲁⲃ ⲧⲏⲣⲟⲩ ϣⲁⲧⲟⲩϭⲓⲧⲕ ⲉϧⲟⲩⲛ ⲙ̃ⲡⲉⲙⲑⲟ ⲙ̃ⲡⲁⲓⲱⲧ ⲡⲓⲙⲁ ⲉⲧⲉ ⲙ̃ⲙⲟⲛ ⲙ̃ⲕⲁϩ ⲟⲩⲇⲉ ϧⲓⲥⲓ ⲟⲩⲇⲉ ϥⲓⲁ̃ϩⲟⲙ ⲛ̃ϧⲏⲧϥ ⲛ̃ⲧⲉⲕ- ⲣⲁϣⲓ ⲛⲉⲙ ⲛⲏ ⲉⲑⲟⲩⲁⲃ ⲧⲏⲣⲟⲩ ⲉⲧⲁⲩϣⲱⲡⲓ ϧⲉⲛ ⲡⲁⲓ- ⲉⲱⲛ ⲉⲧⲉ ⲁⲃⲉⲗ ⲡⲉ ⲛⲉⲙ ⲛⲱⲉ ⲛⲉⲙ ⲁⲃⲣⲁⲁⲙ ⲛⲉⲙ ⲓⲥⲁⲁⲕ ⲛⲉⲙ ⲓⲁⲕⲱⲃ ⲛⲉⲙ ⲙⲱⲩⲥⲏⲥ ⲛⲉⲙ ⲡⲕⲉⲥⲉⲡⲓ *ⲛⲁⲓ ⲇⲉ ⲉⲧⲁ ⲡⲉⲛⲥⲱⲧⲏⲣ ϫⲟⲧⲟⲩ ⲛⲁϥ ⲁϥϣⲉ ⲛⲁϥ ⲉⲡϣⲱⲓ ⲉ̃ⲛⲓⲫⲏⲟⲩϯⲓ ϧⲉⲛ ⲟⲩⲱⲟⲩ ⲟⲩⲟϩ ⲛ̃ϯⲟⲩⲛⲟⲩ ⲉϥⲛⲁϯ ⲙ̃ⲡⲉϥⲡ︦ⲛ︦ⲁ︦ ⲟⲩⲁⲓ ⲉ̃ⲃⲟⲗϧⲉⲛ ⲛⲉϥϣⲫⲉⲣ ⲁϥⲱ̃ⲗⲓ ⲛ̃ⲧⲁⲫⲉ ⲙ̃ⲡⲓⲙⲁⲣⲧⲩⲣⲟⲥ ⲉⲑⲟⲩⲁⲃ ⲛ̃ⲅⲉⲛⲛⲉⲟⲥ ⲡⲓⲁⲅⲓⲟⲥ ⲓⲁ̃ⲕⲱⲃⲟⲥ ### 0027 ⲁϥⲙ̃ⲧⲟⲛ ⲙ̃ⲙⲟϥ ϧⲉⲛ ⲟⲩϩⲓⲣⲏⲛⲏ ⲉⲁϥϭⲓ ⲙ̃ⲡⲓⲭⲗⲟⲙ ⲛ̃ⲧⲉ ϯⲟⲙⲟⲗⲟⲅⲓⲁ̃ ⲛ̃ϫⲉ ⲡⲓⲇⲩⲛⲁⲧⲟⲥ ⲛ̃ϫⲱⲣⲓ ⲫⲏ ⲉⲑⲟⲩⲁⲃ ⲓⲁⲕⲱⲃⲟⲥ ϧⲉⲛ ⲑⲙⲉⲧⲟⲩⲣⲟ ⲛ̃ⲓⲥⲕⲁⲣⲁⲧ ⲡϣⲏⲣⲓ ⲛ̃ⲥⲁⲃⲱⲣ ⲡⲟⲩⲣⲟ ⲛ̃ⲛⲓⲡⲉⲣⲥⲏⲥ ⲫⲏ ⲉϣⲁⲩⲟⲩⲁϩⲙⲉϥ ϫⲉ ⲥⲭⲱⲣⲇⲁⲧ ⲉⲧⲉ ⲫⲁⲓ ⲡⲉ ⲉϣⲁⲩⲉⲣⲉⲣⲙⲏⲛⲉⲩⲓⲛ ⲙ̃ⲙⲟϥ ⲉⲧⲁⲥⲡⲓ ⲛ̃ⲛⲓ- ⲡⲉⲣⲥⲏⲥ ϫⲉ ⲡϣⲏⲣⲓ ⲙ̃ⲫⲣⲏ ⲟⲩⲟϩ ⲛⲉ ⲡⲓⲥⲏⲟⲩ ⲡⲉ ⲉⲩⲟⲓ ⲛ̃ⲟⲩⲣⲟ ⲛ̃ϫⲉ ⲁⲣⲕⲁⲇⲓⲟⲥ ⲛⲉⲙ ⲟⲛⲛⲟⲩⲣⲓⲟⲥ ⲛⲉⲛϣⲏⲣⲓ ⲙ̃ⲡⲓⲉⲩⲥⲉⲃⲏⲥ ⲛ̃ⲟⲩⲣⲟ ⲑⲉⲟⲇⲟⲥⲓⲟⲥ ⲡⲓⲁⲩⲅⲟⲩⲥⲧⲟⲥ ⲛ̃ⲧⲉ ⲛⲓ- ⲣⲱⲙⲉⲟⲥ ⲛ̃ⲥⲟⲩⲕ︦ⲍ︦ ⲙ̃ⲡⲓⲁⲃⲟⲧ ⲛⲟⲉⲙⲃⲣⲓⲟⲥ ⲉ̃ⲧⲉ ⲁⲑⲱⲣ ⲡⲉ ⲛ̃ⲣⲟⲩϩⲓ ⲙ̃ⲡⲉϩⲟⲟⲩ ⲛ̃ϯⲡⲁⲣⲁⲥⲕⲉⲩⲏ Ⲉⲧⲁϥϫⲱⲕ ⲇⲉ ⲉⲃⲟⲗ ⲁⲩⲓ︦ ⲛ̃ϫⲉ ϩⲁⲛⲣⲱⲙⲓ ⲉⲃⲟⲗ- ϧⲉⲛ ⲛⲁⲡⲉⲛⲛⲁϩϯ ⲁⲩⲑⲱⲟⲩϯ ⲉϧⲟⲩⲛ ⲛ̃ⲟⲩⲙⲏϣ ⲙ̃ⲙⲉ- ⲗⲓⲁ̃ⲣⲓⲥⲓⲟⲛ ⲁⲩⲧⲏⲓⲧⲟⲩ ⲛ̃ⲛⲏ ⲉⲧⲁ̃ⲣⲉϩ ⲉ̃ⲣⲟϥ ϫⲉ ϩⲓⲛⲁ ⲛ̃ⲥⲉϯ ⲛⲱⲟⲩ ⲙ̃ⲡⲥⲱⲙⲁ ⲙ̃ⲡⲉⲑⲟⲩⲁⲃ ⲟⲩⲟϩ ⲙ̃ⲡⲟⲩⲥⲱⲧⲉⲙ ⲛ̃ⲥⲱⲟⲩ ⲛⲁⲩⲉⲣϩⲟϯ ⲅⲁⲣ ⲡⲉ ϧⲁⲧϩⲏ ⲙ̃ⲡⲟⲩⲣⲟ ⲟⲩⲟϩ ⲉⲣⲉ ⲫⲣⲏ ⲛⲁϩⲱⲧⲡ ⲁⲩⲉⲣⲁⲛⲁⲭⲱ*ⲣⲓⲛ ⲛⲱⲟⲩ ⲛ̃ϫⲉ ⲛⲏ ⲉⲧⲁⲣⲉϩ ⲉ̃ⲣⲟϥ ⲉⲩⲉⲣϩⲟϯ ϧⲁⲧϩⲏ ⲛ̃ⲛⲓⲑⲏⲣⲓⲟⲛ ⲛⲁⲅⲣⲓⲟⲛ ⲉⲑⲃⲉ ϫⲉ ⲁ ⲣⲟⲩϩⲓ ϣⲱⲡⲓ ⲉⲧⲁⲩϣⲉ ⲛⲱⲟⲩ ⲇⲉ ⲁⲩⲓ︦ ⲛ̃ϫⲉ ϩⲁⲛⲟⲩⲟⲛ ⲉⲛⲁⲡⲉⲛⲛⲁϩϯ ⲛⲉ ⲁⲩⲁⲩϫⲱⲗ ⲙ̃ⲡⲥⲱⲙⲁ ⲙ̃ⲡⲉⲑⲟⲩⲁⲃ ⲛⲉⲙ ⲛⲉϥⲙⲉⲗⲟⲥ ⲧⲏⲣⲟⲩ ⲉⲩⲓ̃ⲣⲓ ⲙ̃ⲗ︦ⲃ︦ ⲙⲙⲉⲗⲟⲥ ⲟⲩⲟϩ ⲧⲉϥⲁⲫⲉ ⲛⲉⲙ ⲡⲉϥⲥⲱⲙⲁ ⲁⲩⲕⲟⲥϥ ϧⲉⲛ ⲟⲩⲛⲓϣϯ ⲛ̃ⲥⲡⲟⲩⲇⲏ ϧⲉⲛ ⲟⲩⲭⲱⲡ ⲕⲁⲧⲁ ⲡⲉϥⲙ̃ⲡϣⲁ ⲉⲧⲁ ⲣⲟⲩϩⲓ ⲇⲉ ϣⲱⲡⲓ ⲁⲩⲭⲁϥ ⲉϧⲣⲏⲓ ϧⲉⲛ ⲟⲩⲧⲟⲡⲟⲥ ⲛ̃ⲥⲉⲙⲛⲟⲛ ⲉⲩⲱⲟⲩ ⲙ̃ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ϣⲁ ⲉⲛⲉϩ ⲛ̃ⲧⲉ ⲛⲓⲉⲛⲉϩ ⲁⲙⲏⲛ ϧⲉⲛ ⲡϫⲓⲛⲑⲣⲟⲩⲥⲱⲧⲉⲙ ⲇⲉ ⲛ̃ϫⲉ ⲧⲉϥⲙⲁⲩ ⲛⲉⲙ ⲧⲉϥⲥϩⲓⲙⲓ ⲛⲉⲙ ⲛⲉϥⲥⲛⲏⲟⲩ ⲛⲁⲓ ⲉⲧⲁⲩϯϫⲟⲙ ⲛⲁϥ ⲉϧⲟⲩⲛ ⲉ̃ϯⲙⲉⲧϫⲱⲣⲓ ϣⲁⲧⲉϥϫⲱⲕ ⲉⲃⲟⲗ ⲙ̃ⲡⲓⲁ̃ⲅⲱⲛ ⲛ̃ⲧⲉ ϯⲙⲉⲧⲙⲁⲣⲧⲩⲣⲟⲥ ⲁⲩⲓ̃ ⲉⲡⲓⲙⲁ ⲉⲧⲁⲩ- ⲭⲁϥ ⲛ̃ϧⲏⲧϥ ⲉⲁⲩⲓ̃ⲛⲓ ⲛⲉⲙⲱⲟⲩ ⲛ̃ϩⲁⲛⲟⲗⲟⲥⲓⲣⲓⲕⲟⲛ ⲛⲉⲙ ### 0028 ϩⲁⲛϩⲃⲱⲥ ⲉⲩⲧⲁⲓⲏ̃ⲟⲩⲧ ⲛⲉⲙ ϩⲁⲛⲥⲑⲩⲛⲟⲩϥⲓ ⲉⲛⲁϣⲉ ⲛⲥⲟⲩⲉⲛⲟⲩ ⲁⲩⲕⲱⲥ ⲙ̃ⲡⲥⲱⲙⲁ ⲙ̃ⲡⲉⲑⲟⲩⲁⲃ ⲟⲩⲟϩ ⲛ̃ⲅⲉⲛ- ⲛⲉⲟⲥ ⲡⲓⲁ̃ⲅⲓⲟⲥ ⲓⲁⲕⲱⲃⲟⲥ ϧⲉⲛ ⲟⲩⲧⲁⲓⲟ ⲁⲩⲭⲁϥ ϧⲁⲧⲉⲛ ⲛⲉⲛⲥⲱⲙⲁ ⲛ̃ϩⲁⲛⲕⲉⲙⲁⲣⲧⲩⲣⲟⲥ ⲉⲑⲟⲩⲁⲃ ⲛⲁⲓ ⲉⲧⲁⲩⲉⲣ- ⲙⲁⲣⲧⲩⲣⲟⲥ ϩⲱⲟⲩ ϧⲉⲛ ⲡⲓⲥⲏⲟⲩ ⲛ̃ⲧⲉ ⲥⲁⲃⲱⲣ ⲡⲟⲩⲣⲟ ⲛ̃ⲛⲓⲡⲉⲣⲥⲏⲥ ⲛⲁⲓ ⲉⲧⲁⲩⲉⲣϩⲡⲟⲙⲉⲓⲛ *ϧⲉⲛ ⲟⲩⲙⲉⲧϫⲱⲣⲓ ϧⲁ*ϩⲁⲛⲃⲁⲥⲁⲛⲟⲥ ⲉⲩⲟϣ ⲟⲩⲟϩ ⲉⲩϣⲉⲃⲓⲛⲏ̃ⲟⲩⲧ ⲉⲁⲩϫⲉⲕ ⲡⲟⲩⲇⲣⲟⲙⲟⲥ ⲉⲃⲟⲗ ⲁⲩϣⲉ ⲛⲱⲟⲩ ⲉⲡϭⲓⲥⲓ ϣⲁ ⲫⲏ ⲉⲧⲟⲩ- ⲙⲉⲓ ⲙ̃ⲙⲟϥ ⲡⲭ︦ⲥ︦ ⲉⲧⲉ ⲡⲉⲑⲟⲩⲁⲃ ⲡⲉ ⲁⲕⲉⲯⲁⲙⲁ ⲡⲓⲉⲡⲓⲥⲕⲟ- ⲡⲟⲥ ⲛⲉⲙ ⲁⲓⲑⲁⲗⲁⲥ ⲛⲉⲙ ⲓⲱⲥⲏⲫ ⲛⲓⲡⲣⲉⲥⲃⲩⲧⲉⲣⲟⲥ ⲛⲉⲙ ⲁⲃⲇⲓⲏ̃ⲥⲟⲩ ⲛⲉⲙ ⲇⲁⲇⲓⲏ̃ⲥⲟⲩ ⲛⲓⲡⲣⲉⲥⲃⲩⲧⲉⲣⲟⲥ ⲛⲉⲙ ⲱⲣⲙⲓ- ⲥⲉⲇⲉⲕ ⲛⲉⲙ ⲇⲁⲛⲓⲏⲗ ⲛⲓⲇⲓⲁ̃ⲕⲱⲛⲟⲥ ⲟⲩⲟϩ ⲕⲟⲩⲃⲓⲧⲗⲁⲁⲥ ⲡϣⲏⲣⲓ ⲛ̃ⲥⲁⲃⲱⲣ ⲡⲟⲩⲣⲟ ⲛ̃ⲛⲓⲡⲉⲣⲥⲏⲥ ⲛⲉⲙ ⲝⲟⲩ ⲧⲉϥ- ⲥⲱⲛⲓ Ⲁ ⲧⲉϥⲙⲁⲩ ⲇⲉ ⲛⲉⲙ ⲧⲉϥⲥⲱⲛⲓ ⲛⲉⲙ ⲧⲉϥⲥϩⲓⲙⲓ ϯ ⲛ̃ϩⲁⲛⲛⲓϣϯ ⲛ̃ⲭⲣⲏⲙⲁ ⲛ̃ⲛⲏ ⲉⲧϧⲉⲛ ⲡⲓⲙⲁ ⲉⲧⲉⲙⲙⲁⲩ ⲁⲩⲕⲱⲧ ⲛⲁϥ ⲛ̃ⲟⲩⲙⲁⲣⲧⲩⲣⲓⲟⲛ ⲉⲩⲱⲟⲩ ⲙ̃ⲡⲓⲙⲁⲣⲧⲩⲣⲟⲥ ⲉⲑⲟⲩⲁⲃ ⲛ̃ⲧⲉ ⲡⲭ︦ⲥ︦ ⲓⲁ̃ⲕⲱⲃⲟⲥ ⲫⲁⲓ ⲉⲧϣⲟⲡ ϧⲉⲛ ⲧⲭⲱⲣⲁ ⲛ̃ϯⲡⲉⲣⲥⲏⲥ ⲉϥⲕⲏⲧ ϣⲁ ⲉϧⲟⲩⲛ ⲉⲫⲟⲟⲩ ⲛⲉϩⲟⲟⲩ ⲡⲓⲙⲁ ⲉⲧⲁ ϩⲁⲛⲙⲏϣ ⲑⲱⲟⲩϯ ⲉⲣⲟϥ ϧⲉⲛ ⲛⲓⲡⲓⲥⲧⲟⲥ ⲉⲩϫⲱ ⲛ̃ϩⲁⲛⲯⲁⲗⲙⲟⲥ ⲛⲉⲙ ϩⲁⲛⲥⲙⲟⲩ ⲛⲉⲙ ϩⲁⲛϩⲱⲇⲏ ⲙ̃ⲡ︦ⲛ︦ⲁ︦- ⲧⲓⲕⲟⲛ ⲉⲩϯⲱⲟⲩ ⲙ̃ⲫ︦ϯ︦ ⲧⲉϥⲙⲁⲩ ⲇⲉ ⲛⲉⲙ ⲧⲉϥⲥⲱⲛⲓ ⲛⲉⲙ ⲧⲉϥⲥϩⲓⲙⲓ ⲁⲩⲫⲁϧⲧⲟⲩ ⲉϧⲣⲏⲓ ⲉ̃ϫⲉⲛ ⲡⲉϥⲥⲱⲙⲁ ⲉⲧⲧⲁⲓⲏ- ⲟⲩⲧ ⲁⲩⲉⲣⲁⲥⲡⲁⲍⲉⲥⲑⲉ ⲙ̃ⲙⲟϥ ⲁⲩⲕⲟⲧⲟⲩ ⲉ̃ⲛⲟⲩⲏⲓ ϧⲉⲛ ⲟⲩϩⲓⲣⲏⲛⲏ *ⲙⲉⲛⲉⲛⲥⲁ ϩⲁⲛⲙⲏϣ ⲇⲉ ⲛ̃ⲉϩⲟⲟⲩ ⲁⲩⲧⲁⲙⲉ ⲡⲟⲩⲣⲟ ⲉⲩϫⲱ ⲙ̃ⲙⲟⲥ ϫⲉ ⲛⲓⲛⲁⲍⲱⲣⲉⲟⲥ ⲛⲁⲓ ⲉⲧⲁⲛϩⲓⲧⲟⲩ ⲉⲃⲟⲗϧⲉⲛ ⲧⲉⲕⲙⲉⲧⲟⲩⲣⲟ ⲛⲁⲓ ⲥⲉⲑⲟⲩⲏⲧ ⲉⲛⲓⲥⲱⲙⲁ ⲛ̃ⲧⲉ ⲛⲏ ⲉ̃ⲧⲁⲣⲉⲧⲉⲛϧⲟⲑⲃⲟⲩ ⲛ̃ⲕⲁⲕⲱⲥ ϫⲉ ⲙ̃ⲡⲟⲩϣⲉⲙϣⲓ ⲛ̃ⲛⲓⲛⲟⲩϯ ⲛ̃ⲧⲉ ⲡⲟⲩⲣⲟ ⲛ̃ⲛⲓⲡⲉⲣⲥⲓⲥ ⲛⲉⲙ ⲛⲓⲃⲁⲃⲩⲗⲱⲛⲓⲟⲥ ⲛⲉⲙ ⲛⲓ- ⲙⲏⲇⲟⲥ ⲛⲁⲓ ⲇⲉ ⲥⲉⲑⲱⲟⲩϯ ⲉⲣⲱⲟⲩ ⲟⲩⲟϩ ⲥⲉⲟⲩⲱϣⲧ ⲙ̃ⲙⲱⲟⲩ ⲉⲩⲉⲯⲁⲗⲓⲛ ⲙ̃ⲡⲓⲉϫⲱⲣϩ ⲧⲏⲣϥ ⲛⲉⲙ ⲡⲓⲉϩⲟⲟⲩ ### 0029 ⲉⲩϯ ⲛⲱⲟⲩ ⲛ̃ϩⲁⲛⲛⲓϣϯ ⲛ̃ⲧⲁⲓϭ̃ ⲙⲏⲡⲟⲧⲉ ⲛ̃ⲧⲉ ϯⲭⲱⲣⲁ ⲕⲟⲧⲟⲩ ⲉⲃⲟⲗ ⲙ̃ⲡϣⲉⲙϣⲓ ⲛ̃ⲛⲓⲡⲉⲣⲥⲏⲥ ⲛ̃ⲥⲉⲭⲱ ⲛ̃ⲥⲱⲟⲩ ⲛ̃ⲛⲓⲛⲟⲩϯ ⲛ̃ⲧⲉ ⲡⲟⲩⲣⲟ ⲛ̃ⲛⲓⲡⲉⲣⲥⲏⲥ ⲉ̃ⲧⲉ ⲡⲓⲣⲏ ⲡⲉ ⲛⲉⲙ ⲡⲓⲓ̃ⲟϩ ⲛⲉⲙ ⲡⲓⲭⲣⲱⲙ ⲛⲉⲙ ⲡⲓⲙⲱⲟⲩ Ⲉⲧⲁϥⲥⲱⲧⲉⲙ ⲇⲉ ⲉⲛⲁⲓ ⲛ̃ϫⲉ ⲡⲟⲩⲣⲟ ⲓⲥⲕⲁⲣⲁⲧ ⲁϥ- ϫⲱⲛⲧ ⲉⲙⲁϣⲱ ⲟⲩⲟϩ ⲁϥⲭⲱ ⲉϧⲣⲏⲓ ⲛ̃ⲟⲩⲡⲣⲟⲥⲧⲁⲅⲙⲁ ⲉϥⲥϧⲏⲟⲩⲧ ⲙ̃ⲡⲁⲓⲣⲏϯ ϫⲉ ⲁⲛⲟⲕ ⲡⲉ ⲓⲥⲕⲁⲣⲁⲧ ⲡⲟⲩⲣⲟ ⲛ̃ⲛⲓⲃⲁⲃⲩⲗⲱⲛⲓⲟⲥ ⲛⲉⲙ ⲛⲓⲙⲏⲇⲟⲥ ⲛⲉⲙ ⲛⲓⲡⲉⲣⲥⲏⲥ ϯⲉⲣⲕⲉ- ⲗⲉⲩⲓⲛ ϫⲉ ⲙⲁⲓ ⲛⲓⲃⲉⲛ ⲉⲧⲟⲩⲛⲁϫⲉⲙ ⲥⲱⲙⲁ ⲛ̃ⲧⲉ ⲛⲓⲛⲁ- ⲍⲱⲣⲉⲟⲥ ⲛ̃ϧⲏⲧϥ ⲛⲁⲓ ⲉⲧⲁⲩϧⲟⲑⲃⲟⲩ ⲉⲑⲃⲉ ⲧⲟⲩⲙⲉⲧⲁⲧⲥⲱ- ⲧⲉⲙ ⲉⲩⲉ̃ⲣⲟⲕϩⲟⲩ ϧⲉⲛ ⲟⲩⲭⲣⲱⲙ ϣⲁⲧⲟⲩⲉⲣⲕⲉⲣⲙⲓ ⲉⲡⲧⲏⲣϥ ⲟⲩⲟϩ ⲟⲩⲟⲛ ⲛⲓⲃⲉⲛ ⲉ̃ⲧⲟⲩⲛⲁϫⲉⲙⲟⲩ *ϧⲁⲧⲟⲧⲟⲩ ⲉⲩⲉⲑⲟⲕ- ⲥⲟⲩ ⲛϩⲁⲛⲕⲟⲩⲛⲧⲟⲥ ⲛ̃ⲥⲉⲭⲁⲩ ⲉⲩⲁϣⲓ ϧⲉⲛ ⲡⲓⲁ̃ⲏⲣ ϣⲁⲧⲟⲩϯ ⲙ̃ⲡⲓⲡ︦ⲁ︦ ⲉ̃ⲧⲁϥⲓ̃ ⲇⲉ ⲉⲃⲟⲗ ϩⲓⲧⲉⲛ ⲡⲟⲩⲣⲟ ⲛ̃ϫⲉ ⲡⲁⲓⲡⲣⲟⲥⲧⲁⲅⲙⲁ ⲁ ϯⲭⲱⲣⲁ ⲧⲏⲣⲥ ϣⲑⲟⲣⲧⲉⲣ ⲉⲙⲁϣⲱ ⲟⲩⲟϩ ⲛⲁⲩⲙⲟⲩϣⲧ ⲡⲉ ⲛ̃ⲟⲩⲟⲛ ⲛⲓⲃⲉⲛ ⲉⲑⲛⲁⲥⲓⲛⲓ ⲛⲓⲥⲛⲏⲟⲩ ⲇⲉ ⲉⲧⲑⲟⲩⲏⲧ ⲉ̃ⲛⲏ ⲉⲑⲟⲩⲁⲃ ⲁⲩⲉⲣϩⲟϯ ⲉⲙⲁϣⲱ ⲙⲏⲡⲟⲧⲉ ⲛ̃ⲥⲉⲱⲗⲓ ⲛ̃ⲧⲟⲧⲟⲩ ⲛ̃ⲛⲓⲥⲱⲙⲁ ⲛ̃ⲧⲉ ⲛⲓⲙⲁⲣⲧⲩⲣⲟⲥ ⲉⲑⲟⲩⲁⲃ ⲛ̃ⲥⲉⲣⲟⲕϩⲟⲩ ⲁⲩⲧⲱⲟⲩⲛ ⲙ̃ⲡⲓⲉϫⲱⲣϩ ⲁⲩⲃⲟⲣⲃⲉⲣ ⲛ̃ⲛⲓⲥⲱⲙⲁ ⲛ̃ⲧⲉ ⲛⲓⲙⲁⲣⲧⲩⲣⲟⲥ ⲉ̃ⲃⲟⲗ ⲛ̃ⲟⲩⲁⲓ ⲟⲩⲁⲓ ⲁⲩⲧⲁϫⲣⲱⲟⲩ ϧⲉⲛ ϩⲁⲛⲥⲟⲕ ⲟⲩⲟϩ ⲁⲩϣⲓⲃϯ ⲙ̃ⲡⲟⲩⲥⲭⲏⲙⲁ ⲁⲩϯϩⲓⲱ- ⲧⲟⲩ ⲙ̃ⲡⲥⲭⲏⲙⲁ ⲛ̃ⲛⲓⲙⲁⲅⲟⲥ ⲛ̃ⲧⲉ ⲛⲓⲡⲉⲣⲥⲏⲥ ⲁⲩⲧⲁⲗⲟ ⲉⲣⲱⲟⲩ ⲙ̃ⲡⲓⲥⲱⲙⲁ ⲙ̃ⲡⲓⲙⲁⲕⲁⲣⲓⲟⲥ ⲓⲁⲕⲱⲃⲟⲥ ⲛⲉⲙ ⲛⲉⲛ- ⲥⲱⲙⲁ ⲛ̃ⲛⲓⲙⲁⲣⲧⲩⲣⲟⲥ ⲉⲑⲟⲩⲁⲃ ⲁⲩⲙⲟϣⲓ ϧⲉⲛ ⲟⲩⲙⲱⲧ ⲛ̃ⲟⲩⲱⲧ ⲛⲉⲙⲱⲟⲩ ⲛ̃ϩⲙ︦ ⲛⲉϩⲟⲟⲩ ⲙ̃ⲙⲟϣⲓ ⲁⲩⲓ ⲉ̃ⲓⲗ︦ⲏ︦ⲙ︦ ⲁⲩⲭⲱ ⲛ̃ⲛⲓⲥⲱⲙⲁ ⲛ̃ⲧⲉ ⲛⲏ ⲉⲑⲟⲩⲁⲃ ⲛⲉⲙ ⲡⲥⲱⲙⲁ ⲙ̃ⲡⲓ- ⲅⲉⲛⲛⲉⲟⲥ ⲙ̃ⲙⲁⲣⲧⲩⲣⲟⲥ ⲉⲑⲟⲩⲁⲃ ⲓⲁⲕⲱⲃⲟⲥ ⲛ̃ϧⲣⲏⲓ ϧⲉⲛ ⲟⲩⲙⲟⲛⲁⲥⲧⲏⲣⲓⲟⲛ ⲉⲩⲙⲟⲩϯ ⲉⲣⲟϥ ϫⲉ ⲫⲁⲛⲓⲩ̃ⲃⲉⲣⲓⲟⲥ ⲛⲁϥⲭⲏ ⲇⲉ ϧⲉⲛ ⲡⲓⲙⲟⲛⲁⲥⲧⲏⲣⲓⲟⲛ ⲉ̃ⲧⲉⲙⲙⲁⲩ ⲛ̃ϫⲉ ⲟⲩ- ⲛⲓϣϯ ⲛ̃ⲁⲅⲓⲟⲥ *ⲉⲡⲉϥⲣⲁⲛ ⲡⲉ ⲁⲃⲃⲁ ⲡⲉⲧⲣⲟⲥ ⲡⲉⲡⲓⲥⲕⲟⲡⲟⲥ ⲛ̃ⲅⲁⲍⲁ ϯⲡⲟⲗⲓⲥ ⲛ̃ⲧⲉ ⲡⲓⲙⲁⲓⲟⲩⲙⲁ ⲉⲡϣⲏⲣⲓ ⲡⲉ ⲛ̃ⲛⲓⲟⲩ- ### 0030 ⲛⲁϥⲟⲩⲱϣ ⲉⲭⲱ ⲛ̃ⲥⲱϥ ⲛ̃ⲣⲁⲕⲟϯ ⲛ̃ⲧⲉϥϣⲉ ⲛⲁϥ ⲉⲛⲓⲥⲁ ⲛ̃ⲧⲉ ⲡⲓⲙⲁⲓⲟⲩⲙⲁ ⲛ̃ⲧⲉ ⲅⲁⲍⲁ ⲛⲁⲓ ⲇⲉ ⲉϥⲙⲟⲕⲙⲉⲕ ⲉⲣⲱⲟⲩ ϩⲏⲡⲡⲉ ⲓⲥ ⲡⲓⲁⲅⲓⲟⲥ ⲓⲁⲕⲱⲃⲟⲥ ⲁϥⲟⲩⲱⲛϩ ⲉ̃ⲣⲟϥ ⲡⲉϫⲁϥ ⲛⲁϥ ϫⲉ ⲙ̃ⲡⲉⲣϣⲉ ⲛⲁⲕ ⲉϯⲡⲁⲗⲉⲥⲧⲓⲛⲏ ⲁⲗⲗⲁ ⲧⲱⲟⲩⲛ ⲙⲁϣⲉ ⲛⲁⲕ ⲉϧⲟⲩⲛ ⲉϯⲡⲟⲗⲓⲥ ⲡⲉⲙϫⲉ ⲛ̃ⲧⲉ ⲭⲏⲙⲓ ⲛ̃ⲧⲉⲕϣⲱⲡⲓ ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲁⲓⲟⲩⲱϣ ⲅⲁⲣ ⲉⲟϩⲓ ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲕⲁⲧⲁ ⲫⲣⲏϯ ⲉⲧⲁ ⲡϭ︦ⲥ︦ ⲟⲩⲱϣ ⲉⲕⲱⲧ ⲛⲏⲓ *ⲛⲟⲩⲙⲁⲣⲧⲩⲣⲓⲟⲛ ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲁⲛⲟⲕ ⲅⲁⲣ ⲡⲉⲑⲛⲁϣⲱⲡⲓ ⲛⲁⲕ ⲛ̃ϭⲁⲩ- ⲙⲱⲓⲧ ϧⲉⲛ ⲙⲱⲓⲧ ⲛⲓⲃⲉⲛ ⲉⲧⲉⲕⲛⲁϣⲉ ⲛ̃ϧⲏⲧⲟⲩ ϣⲁⲧⲉⲕⲧ- ϩⲉⲙⲥⲟ ⲛ̃ⲛⲁⲕⲁⲥ ϧⲉⲛ ⲡⲓⲙⲁ ⲉϯⲛⲁⲧⲁⲙⲟⲕ ⲉⲣⲟϥ ϧⲉⲛ ⲟⲩⲕⲟⲩϫⲓ ⲛ̃ⲭⲱⲣⲓⲟⲛ ⲥⲁ ⲡⲉⲓⲉⲃⲧ ⲛ̃ϯⲡⲟⲗⲓⲥ ⲡⲉⲙϫⲉ ⲛⲁⲩⲉ︦ ⲛ̃ⲥⲧⲁⲇⲓⲟⲛ ⲉⲡⲉϥⲣⲁⲛ ⲡⲉ ⲡⲁⲓⲙ ⲕⲁⲧⲁ ⲧⲁⲥⲡⲓ ⲛ̃ⲛⲓⲣⲉⲙ- ⲛ̃ⲭⲏⲙⲓ Ⲉⲧⲁϥⲭⲱ ⲟⲩⲛ ⲛ̃ⲥⲱϥ ⲛ̃ϯⲡⲟⲗⲓⲥ ⲣⲁⲕⲟϯ ⲁϥϣⲉ ⲛⲁϥ ⲉⲡⲉⲙϫⲉ ⲛ̃ⲑⲟϥ ⲛⲉⲙ ϩⲁⲛⲣⲱⲙⲓ ⲛⲁⲓ ⲉⲧϥⲁⲓ ϧⲁ ⲛⲉⲛⲕⲁⲥ ⲙ̃ⲡⲓⲁⲅⲓⲟⲥ ⲙ̃ⲙⲁⲣⲧⲩⲣⲟⲥ ⲛ̃ⲧⲉ ⲡⲭ︦ⲥ︦ ⲓⲁⲕⲱⲃⲟⲥ ⲁϥϣⲱⲡⲓ ϧⲁⲧⲉⲛ ⲟⲩⲛⲓϣϯ ⲙ̃ⲡⲟⲗⲓⲧⲉⲩⲟⲙⲉⲛⲟⲥ ⲛ̃ⲧⲉ ϯⲡⲟⲗⲓⲥ ⲉⲧⲉⲙ- ⲙⲁⲩ ⲉⲡⲉϥⲣⲁⲛ ⲡⲉ ⲙⲱⲩⲥⲏⲥ ⲫⲁⲓ ⲇⲉ ⲁϥϣⲟⲡⲟⲩ ⲉⲣⲟϥ ϧⲉⲛ ⲟⲩⲛⲓϣϯ ⲛ̃ⲣⲁϣⲓ ⲛⲉ ⲟⲩⲙⲁⲓⲛⲟⲩϯ ⲅⲁⲣ ⲡⲉ ⲉⲙⲁϣⲱ ⲟⲩⲟϩ ⲙⲙⲁⲓϣⲉⲙⲙⲟ ⲙ̃ⲫⲣⲏϯ ⲙ̃ⲡⲓⲡⲓⲥⲧⲟⲥ ⲁⲃⲣⲁⲁⲙ ⲛⲉⲙ ⲟⲛⲟⲥⲓⲫⲟⲣⲟⲥ ⲁⲩϫⲟⲥ ⲇⲉ ⲟⲛ ⲉⲑⲃⲏⲧϥ ⲛ̃ⲑⲟϥ ⲙⲱⲩⲥⲏⲥ ϫⲉ ⲛⲁⲣⲉ ⲛⲉϥⲡⲣⲟⲥⲟⲇⲟⲥ ⲓ̃ⲣⲓ ⲛ̃ⲕ︦ ⲛ̃ϣⲉ ⲛ̃ⲗⲟⲩⲕⲟϫⲓ ⲛ̃ⲧⲉⲙ- ⲣⲟⲙⲡⲓ ⲧⲟⲩⲫⲁϣⲓ ⲉϥϯ ⲙ̃ⲙⲟⲥ ⲉ̃ⲛⲉϥⲇⲏⲙⲟⲥⲓⲟⲛ ⲛⲉⲙ ⲛⲉϥⲭⲣⲓⲁ ϯⲕⲉⲫⲁϣⲓ ⲇⲉ ⲉϥϫⲕⲟ ⲙ̃ⲙⲟⲥ ⲉⲛⲓϣⲉⲙⲙⲱⲟⲩ ⲛⲉⲙ ⲛⲓϩⲏⲕⲓ ⲉⲧⲁϥⲉⲣ ⲟⲩⲥⲏⲟⲩ ⲇⲉ ϧⲁⲧⲉⲛ ⲙⲱⲩⲥⲏⲥ ϧⲉⲛ ⲡⲉⲙϫⲉ ⲉϥⲕⲱⲧ ⲛ̃ⲛⲁϯⲡⲟⲗⲓⲥ ⲉⲧⲉⲙⲙⲁⲩ ⲟⲩⲟϩ ⲉϥⲧⲁϫⲣⲟ *ⲙ̃ⲙⲱⲟⲩ ϧⲉⲛ ⲡⲓⲛⲁϩϯ ⲉⲧⲥⲟⲩⲧⲱⲛ Ⲁϥⲥⲱⲧⲉⲙ ⲉⲑⲃⲏⲧϥ ⲛ̃ϫⲉ ⲡⲣⲟⲧⲉⲣⲓ ⲫⲏ ⲉⲧⲁⲙⲁϩⲓ ### 0031 ⲣⲱⲟⲩ ⲛ̃ⲧⲉ ⲛⲓⲩϯ̃ⲃⲉⲣⲟⲥ ⲉⲁⲩⲧⲏⲓϥ ⲛⲁⲩⲱ ⲛ̃ⲛⲓⲟⲩⲣⲱⲟⲩ ⲛ̃ⲧⲉ ⲛⲓⲣⲱⲙⲉⲟⲥ ⲫⲁⲓ ⲁϥϫⲉⲙ ⲡⲓⲣⲏϯ ⲛⲉⲣⲉⲃⲟⲗ ⲁϥϣⲉ ⲛⲁϥ ⲉ̃ⲓⲗ︦ⲏ︦ⲙ︦ ⲁϥϣⲱⲡⲓ ⲛ̃ⲟⲩⲙⲟⲛⲁⲭⲟⲥ ⲉϥϯⲥⲱⲓⲧ ⲟⲩⲟϩ ⲁϥϭⲓ ⲛ̃ϯⲙⲉⲧⲉⲡⲓⲥⲕⲟⲡⲟⲥ ⲛ̃ⲧⲉ ϯⲡⲟⲗⲓⲥ ⲉⲧⲁⲛⲉⲣϣⲟⲣⲡ ⲛ̃ⲥⲁϫⲓ ⲉⲣⲟⲥ ⲫⲁⲓ ⲇⲉ ⲛⲉ ⲟⲩⲙⲁⲓⲁ̃ⲅⲓⲟⲥ ⲡⲉ ⲉⲙⲁϣⲱ ⲉⲑⲃⲉ ⲫⲁⲓ ⲛⲁⲩⲙⲟⲩϯ ⲉⲣⲟϥ ϫⲉ ⲁⲃⲃⲁ ⲡⲉⲧⲣⲟⲥ ⲡⲓⲙⲁⲓ- ⲙⲁⲣⲧⲩⲣⲟⲥ ⲭⲫϣⲱⲡⲓ ⲇⲉ ϧⲉⲛ ⲡⲓⲥⲏⲟⲩ ⲉⲧⲉⲙⲙⲁⲩ ⲛⲁⲣⲉ ⲙⲁⲣ- ⲕⲓⲁ̃ⲛⲟⲥ ⲟⲓ︦ ⲛ̃ⲟⲩⲣⲟ ⲉⲛⲓⲣⲱⲙⲉⲟⲥ ⲁϥⲟⲩⲁϩⲁϩⲛⲓ ⲉⲉⲣⲇⲓⲱ̃ⲕⲓⲛ ⲛ̃ⲥⲁ ⲛⲓⲉⲡⲓⲥⲕⲟⲡⲟⲥ ⲛ̃ⲟⲣⲑⲟⲇⲟⲝⲟⲥ ⲉⲑⲃⲉ ϫⲉ ⲙ̃ⲡⲟⲩⲟⲩⲁϩⲟⲩ ⲛ̃ⲥⲁ ϯⲥⲩⲛⲟⲇⲟⲥ ⲉⲧⲁⲥϣⲱⲡⲓ ϧⲉⲛ ⲭⲁⲗⲕⲏⲇⲱⲛ ⲛⲉⲙ ⲡⲓⲧⲟⲙⲟⲥ ⲛ̃ⲧⲉ ⲗⲉⲱⲛ ⲗⲟⲓⲡⲟⲛ ⲁⲩϭⲟϫⲓ ⲛ̃ⲥⲁ ⲁⲃⲃⲁ ⲡⲉ- ⲧⲣⲟⲥ ϩⲱϥ ⲡⲓⲉⲡⲓⲥⲕⲟⲡⲟⲥ ⲁϥⲓ̃ ⲉϧⲟⲩⲛ ⲉⲣⲁⲕⲟϯ ϯⲙⲏⲧⲣⲟ- ⲡⲟⲗⲓⲥ ⲛ̃ⲧⲉ ⲭⲏⲙⲓ ⲃ︦ ⲇⲉ ⲉ̃ⲃⲟⲗϧⲉⲛ ⲛⲉϥⲙⲁⲑⲏⲧⲏⲥ ⲉϩⲁⲛ- ⲓⲉⲣⲟⲥⲟⲗⲟⲙⲓⲧⲏⲥ ⲛⲉ ⲁⲩⲱⲗⲓ ⲛ̃ⲛⲓⲗⲩⲙⲯⲁⲛⲟⲛ ⲉⲑⲟⲩⲁⲃ ⲛ̃ⲧⲉ ⲡⲓⲁⲅⲓⲟⲥ ⲓ̃ⲁⲕⲱⲃⲟⲥ ⲉⲩⲭⲏ ϧⲉⲛ ⲟⲩⲕⲁⲯⲁ ⲛ̃ϩⲁⲧ ⲁⲩⲉⲛⲟⲩ ⲉⲟⲩⲙⲟⲛⲁⲥⲧⲏⲣⲓⲟⲛ ⲙ̃ⲡⲕⲱϯ ⲛ̃ⲣⲁⲕⲟϯ ⲁⲩⲭⲁⲩ ϧⲉⲛ ⲡⲓⲙⲁ ⲉⲧⲉⲙⲙⲁⲩ *ⲛⲁϥⲁⲙⲟⲛⲓ ⲇⲉ ⲡⲉ ⲉϫⲉⲛ ϯⲉⲕ- ⲕⲗⲏⲥⲓⲁ̃ ⲛ̃ⲧⲉ ⲣⲁⲕⲟϯ ⲙ̃ⲡⲓⲥⲏⲟⲩ ⲉⲧⲉⲙⲙⲁⲩ ⲛ̃ϫⲉ ⲡⲣⲟⲧⲉ- ⲣⲓⲟⲥ ⲫⲁⲓ ⲉⲧⲁϥϣⲱⲡⲓ ⲛⲉⲧⲓⲟⲥ ⲛ̃ⲧⲉ ϩⲁⲛⲙⲏϣ ⲛ̃ⲥⲛⲟϥ ⲛ̃ⲧⲉ ⲛⲏ ⲉⲑⲟⲩⲁⲃ ⲉⲑⲣⲟⲩⲫⲟⲛⲟⲩ ⲉⲃⲟⲗ ⲛⲁⲓ ⲉⲧⲁⲩⲉⲣⲁⲅⲱⲛⲓⲍⲉⲥⲑⲉ ⲉϫⲉⲛ ϯϯⲙⲉⲑⲙⲏⲓ ϣⲁ ⲉϧⲣⲏⲓ ⲉⲫⲙⲟⲩ ⲫⲁⲓ ⲇⲉ ϫⲉ ⲡⲣⲟⲧⲉ- ⲣⲓⲟⲥ ⲁϥϣϫⲉⲙϫⲟⲙ ⲙ̃ⲡⲁⲓⲣⲏϯ ϩⲱⲥⲧⲉ ⲉⲥⲱⲕ ϣⲁⲣⲟϥ ⲙ̃ⲡⲓⲥⲧⲣⲁⲧⲏⲗⲁⲧⲏⲥ ⲛ̃ⲧⲉ ⲣⲁⲕⲟϯ ⲛⲉⲙ ⲛⲓⲁⲣⲭⲱⲛ ⲧⲏⲣⲟⲩ ⲁϥⲑⲱⲧ ⲙ̃ⲡⲟⲩϩⲏⲧ ϩⲓⲧⲉⲛ ϩⲁⲛⲭⲣⲏⲙⲁ ⲉ̃ⲛⲁϣⲱⲟⲩ ⲉⲑⲣⲟⲩⲉⲣⲇⲓⲱⲕⲓⲛ ⲛ̃ⲥⲁ ⲛⲓⲙⲟⲛⲁⲭⲟⲥ ⲧⲏⲣⲟⲩ ⲉⲧϣⲟⲡ ⲙ̃ⲡⲕⲱϯ ⲛ̃ϯⲡⲟⲗⲓⲥ ⲣⲁⲕⲟϯ ⲛ̃ⲥⲉϩⲓⲧⲟⲩ ⲉⲃⲟⲗϧⲉⲛ ⲛⲟⲩⲙⲟ- ⲛⲁⲥⲧⲏⲣⲓⲟⲛ ⲫⲁⲓ ⲇⲉ ⲁϥϣⲱⲡⲓ ⲉⲧⲁϥⲉⲙⲓ ⲇⲉ ⲉⲛⲁⲓ ⲛ̃ϫⲉ ⲡⲉⲑⲟⲩⲁⲃ ⲛⲉⲡⲓⲥⲕⲟⲡⲟⲥ ⲟⲩⲟϩ ⲛ̃ⲟⲙⲟⲗⲟⲅⲓⲧⲏⲥ ⲁⲃⲃⲁ ⲡⲉⲧⲣⲟⲥ ### 0032 ⲉϫⲉⲛ ϯⲉⲕⲕⲗⲏⲥⲓⲁ ⲛ̃ⲧⲉ ⲣⲁⲕⲟϯ ϫⲉ ϥϫⲁⲗⲏⲟⲩⲧ ⲉⲙⲱⲩ̃ⲥⲏⲥ ϧⲉⲛ ⲡⲉⲙϫⲉ ⲟⲩⲟϩ ϫⲉ ϥⲧⲁϫⲣⲟ ⲙ̃ⲙⲱⲟⲩ ϧⲉⲛ ⲡⲓⲛⲁϩϯ ⲛ̃ⲟⲣⲑⲟⲇⲟⲝⲟⲥ ⲁϥⲟⲩⲱⲣⲡ ⲛ̃ϩⲁⲛⲙⲁⲧⲟⲓ ⲉⲩⲟϣ ⲉⲙⲁϣⲱ ⲉⲑⲣⲟⲩⲧⲁϩⲟ ⲛ̃ⲁⲃⲃⲁ ⲡⲉⲧⲣⲟⲥ ⲉⲧⲁϥⲉⲙⲓ ⲇⲉ ⲉⲫⲁⲓ ⲛ̃ϫⲉ ⲙⲱⲩ̃ⲥⲏⲥ ⲡⲉⲧⲁϥϣⲟⲡϥ ⲉ̃ⲣⲟϥ ϫⲉ ⲥⲉⲕⲱϯ ⲛ̃ⲥⲱϥ ⲛ̃ⲥⲉⲧⲁ- ϩⲟϥ ⲁϥϯϩⲟ ⲉⲣⲟϥ ⲉⲑⲣⲉϥⲟⲩⲱ̃ⲧⲉⲃ ⲉⲃⲟⲗϧⲉⲛ ϯⲡⲟⲗⲓⲥ ⲛ̃ⲧⲉϥϣⲱⲡⲓ ϧⲉⲛ ⲟⲩⲭⲱⲣⲓⲟⲛ ⲛ̃ⲧⲁϥ ⲥⲁ ⲡⲉⲓⲉⲃⲧ ⲛ̃ϯⲡⲟⲗⲓⲥ ⲛ̃ⲟⲩⲕⲟⲩϫⲓ ⲉⲡⲉⲥⲣⲁⲛ ⲡⲉ ⲡⲁⲓⲙ ϫⲉ ϩⲓⲛⲁ ⲛ̃ⲧⲉϥϫⲉⲙ ⲡⲓⲣⲏϯ ⲛ̃ϥⲓ ⲡⲉϥⲣⲱⲟⲩϣ ϧⲉⲛ ⲟⲩⲙⲟⲑⲛⲉⲥ ϫⲉ ϥϧⲉⲛⲧ ⲉⲣⲟϥ ⲉ̃ⲧⲁϥⲓ̃ ⲟⲩⲛ ⲛ̃ϫⲉ ⲁⲃⲃⲁ ⲡⲉⲧⲣⲟⲥ ⲁϥϣⲱⲡⲓ ϧⲉⲛ ⲡⲓⲙⲁ ⲉ̃ⲧⲉⲙⲁⲩ ⲁ̃ ⲛⲓⲥⲛⲏⲟⲩ ⲇⲉ ⲟⲛ ⲓ̃ⲛⲓ ⲙ̃ⲡⲥⲱⲙⲁ ⲛ̃ⲓⲁⲕⲱⲃⲟⲥ ⲁⲩⲭⲁϥ ϧⲁⲧⲟⲧⲟⲩ ϧⲉⲛ ⲡⲓⲙⲁ ⲉⲧⲟⲩⲭⲏ ⲛ̃ϧⲏⲧϥ ⲉⲩⲓ̃ⲣⲓ ⲛ̃ϩⲁⲛⲛⲓϣϯ ⲛ̃ⲥⲩⲛⲁⲝⲓⲥ ⲙ̃ⲡⲉϥⲕⲱϯ ⲛ̃ϩⲁⲛ- ⲁⲧⲟⲟⲩⲓ ⲛⲉⲙ ⲙⲉⲣⲓ ⲛⲉⲙ ⲣⲟⲩϩⲓ ⲁⲥϣⲱⲡⲓ ⲇⲉ ⲙ̃ⲫⲛⲁⲩ ⲙⲙⲉⲣⲓ ⲛ̃ⲟⲩⲉ̃ϩⲟⲟⲩ ⲉⲣⲉ ⲡⲉⲑⲟⲩⲁⲃ ⲁⲃⲃⲁ ⲡⲉⲧⲣⲟⲥ ⲓ̃ⲣⲓ ⲛ̃ⲧⲉϥ- ⲗⲩⲧⲟⲩⲣⲅⲓⲁ̃ ⲛⲉⲙ ⲛⲓⲥⲛⲏⲟⲩ ⲉⲑⲛⲉⲙⲁϥ ϧⲉⲛ ⲟⲩⲉⲝⲁⲡⲓⲛⲁ ⲇⲉ ⲁ̃ ⲡⲓⲙⲁⲣⲧⲩⲣⲟⲥ ⲛ̃ⲧⲉ ⲡⲭ︦ⲥ︦ ⲡⲓⲁⲅⲓⲟⲥ ⲓⲁⲕⲱⲃⲟⲥ ⲟⲩⲱⲛϩ ⲛⲱⲟⲩ ⲉⲃⲟⲗ ⲛⲉⲙ ⲟⲩⲙⲏϣ ⲙ̃̃*ⲙⲁⲣⲧⲩⲣⲟⲥ ⲉⲩⲉⲣⲫⲟⲣⲓⲛ ⲙ̃ⲡⲥⲭⲏⲙⲁ ⲛ̃ⲛⲓⲡⲉⲣⲥⲏⲥ ⲙ̃ⲡⲥⲙⲟⲧ ⲛ̃ϯⲍⲱⲅⲣⲁⲫⲓⲁ̃ ⲛ̃ⲧⲉ ⲇⲁ- ⲛⲓⲏⲗ ⲡⲓⲡⲣⲟⲫⲏⲧⲏⲥ ⲛⲉⲙ ⲡⲓⲅ︦ ⲛ̃ⲁⲗⲟⲩ ⲛ̃ⲁⲅⲓⲟⲥ ⲟⲩⲟϩ ⲛⲁⲩⲟϩⲓ ⲉⲣⲁⲧⲟⲩ ϧⲉⲛ ⲧⲟⲩⲙⲏϯ ⲉⲩⲉⲣⲯⲁⲗⲓⲛ ⲛⲉⲙⲱⲟⲩ ⲉⲩϫⲱ ⲙ̃ⲙⲟⲥ ϫⲉ ⲉⲩⲉϣⲟⲩϣⲟⲩ ⲙ̃ⲙⲱⲟⲩ ⲛ̃ϫⲉ ⲛⲏ ⲉⲑⲟⲩⲁⲃ ϧⲉⲛ ⲡⲟⲩⲱⲟⲩ ⲛⲓϭⲓⲥⲓ ⲛ̃ⲧⲉ ⲫ︦ϯ︦ ⲉⲧⲭⲏ ϧⲉⲛ ⲧⲟⲩϣⲃⲱⲃⲓ ⲁⲗⲗⲏⲗⲟⲩⲓⲁ ⲉⲧⲁϥⲛⲁⲩ ⲇⲉ ⲉⲣⲱⲟⲩ ⲛ̃ϫⲉ ⲡⲓⲁⲅⲓⲟⲥ ⲡⲉⲧⲣⲟⲥ ⲛⲉⲙ ⲛⲓⲥⲛⲏⲟⲩ ⲉⲑⲛⲉⲙⲁϥ ⲁⲩⲫⲁϧⲧⲟⲩ ⲁⲩⲟⲩⲱϣⲧ ⲙ̃ⲡⲉⲑⲟⲩⲁⲃ ⲟⲩⲟϩ ⲡⲉϫⲁϥ ⲛ̃ϫⲉ ⲡⲓⲙⲁⲣⲧⲩ- ⲣⲟⲥ ⲛ̃ⲧⲉ ⲡⲭ︦ⲥ︦ ⲡⲓⲁⲅⲓⲟⲥ ⲓⲁⲕⲱⲃⲟⲥ ϫⲉ ⲫⲁⲓ ⲡⲉ ⲡⲁⲙⲁⲛ- ϣⲱⲡⲓ ⲁⲓⲛⲁⲟⲩⲟϩ ⲛ̃ϧⲏⲧϥ ϫⲉ ⲁⲓⲟⲩⲁϣϥ ⲫⲁⲓ ⲡⲉ ⲡⲓⲙⲁ ⲉⲧⲁ ⲡϭ︦ⲥ︦ ⲑⲁϣϥ ⲛⲏⲓ ⲓⲥϫⲉⲛ ⲉⲓⲭⲏ ϧⲉⲛ ⲧⲭⲱⲣⲁ ⲛ̃ϯⲡⲉⲣ- ### 0033 ⲥⲏⲥ ⲧⲱⲟⲩⲛ ⲁⲙⲟⲩ ⲉⲃⲟⲗ ⲥⲁⲣⲏⲥ ⲙ̃ⲡⲓϯⲙⲓ ⲛ̃ⲟⲩⲕⲟⲩϫⲓ ⲛ̃ⲧⲉⲕϣⲗⲏⲗ ϧⲉⲛ ⲡⲓⲙⲁ ⲉⲧⲉⲙⲙⲁⲩ ϩⲱϯ ⲅⲁⲣ ⲡⲉ ⲉⲑⲣⲟⲩⲕⲱⲧ ⲛⲏⲓ ⲛ̃ⲟⲩⲙⲁⲣⲧⲏⲣⲓⲟⲛ ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲛ̃ⲥⲉⲭⲱ ⲙ̃ⲡⲁⲥⲱⲙⲁ ⲛ̃ϧⲏⲧϥ ϫⲉ ϩⲓⲛⲁ ⲉϥⲉϣⲱⲡⲓ ⲛ̃ⲑⲉⲣⲁ- ⲡⲓⲁ̃ ⲛ̃ⲟⲩⲟⲛ ⲛⲓⲃⲉⲛ ⲉⲑⲛⲁⲓ̃ ⲉⲣⲁⲧϥ ⲙ̃ⲡϭ︦ⲥ︦ ⲛ̃ϧⲣⲏⲓ ⲛ̃ϧⲏⲧϥ ⲟⲩⲟϩ ⲛⲥⲉⲧⲱⲃϩ ϧⲉⲛ ⲡⲁⲣⲁⲛ Ⲁϥⲓ ⲇⲉ ⲉ̃ⲃⲟⲗ ⲛ̃ϫⲉ ⲡⲉⲑⲟⲩⲁⲃ ⲛⲉⲙ ⲛⲓⲥⲛⲏⲟⲩ ⲁⲩϣⲗⲏⲗ ⲁⲩⲉⲣⲥⲫⲣⲁⲓⲅⲓⲍⲓⲛ ⲙ̃ⲡⲓⲕⲁϩⲓ ⲛ̃ⲧⲉ ⲡⲓⲙⲁ ⲉⲧⲉⲙⲙⲁⲩ ⲛ̃ϫⲉ ⲡⲉⲛⲓ̈ⲱⲧ ⲁⲃⲃⲁ ⲡⲉⲧⲣⲟⲥ ⲁϥⲭⲁ ⲡⲥⲱⲙⲁ ⲙ̃ⲡⲓⲙⲁⲣⲧⲩⲣⲟⲥ ⲉⲑⲟⲩⲁⲃ *ⲓⲁⲕⲱⲃⲟⲥ ϧⲉⲛ ⲡⲓⲙⲁ ⲉⲧⲉⲙⲙⲁⲩ ϧⲉⲛ ⲟⲩⲕⲟⲩϫⲓ ⲙ̃ⲙⲁⲛϣⲱⲡⲓ ⲛⲉ ⲙ̃ⲡⲁⲧⲟⲩⲕⲉⲧ ⲡⲓⲧⲟⲡⲟⲥ ⲅⲁⲣ ⲡⲉ ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲛⲁϥⲟⲩⲱϣ ⲅⲁⲣ ⲡⲉ ⲛ̃ϫⲉ ⲁⲃⲃⲁ ⲡⲉⲧⲣⲟⲥ ⲉⲑⲣⲉϥⲧⲁⲥⲑⲟϥ ⲉⲡⲉϥⲙⲟⲛⲁⲥⲧⲏⲣⲓⲟⲛ ⲫⲁⲓ ⲉⲧϣⲟⲡ ϧⲉⲛ ⲡⲓ- ⲙⲁⲓⲟⲩⲙⲁ ⲛ̃ⲧⲉ ⲅⲁⲍⲁ ⲛⲓⲥⲛⲏⲟⲩ ⲇⲉ ⲉⲧⲧⲱⲟⲩⲛ ϧⲁ ⲡⲥⲱⲙⲁ ⲙ̃ⲡⲓⲁⲅⲓⲟⲥ ⲓⲁⲕⲱⲃⲟⲥ ⲟⲩⲟϩ ⲉⲧⲉⲣⲇⲓⲁⲕⲱⲛⲓⲛ ⲉⲣⲟϥ ⲛⲁⲩⲟⲩⲱϣ ⲉⲱⲗⲓ ⲡⲉ ⲙ̃ⲡⲥⲱⲙⲁ ⲙ̃ⲡⲉⲑⲟⲩⲁⲃ ⲙ̃ⲡⲟⲩⲟⲩⲱϣ ⲉⲙⲟϣⲓ ⲛⲉⲙ ⲁⲃⲃⲁ ⲡⲉⲧⲣⲟⲥ ⲡⲓⲉⲡⲓⲥⲕⲟⲡⲟⲥ ⲁⲗⲗⲁ ⲁⲩⲟϩⲓ ⲉⲫⲁϩⲟⲩ ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲉⲩⲟⲩⲱϣ ⲉⲟⲗϥ ⲛⲁⲩⲙⲉⲓ ⲅⲁⲣ ⲙⲙⲟϥ ⲙ̃ⲙⲁϣⲱ ϧⲉⲛ ⲡϫⲓⲛⲑⲣⲟⲩⲱⲗⲓ ⲟⲩⲛ ⲙ̃ⲡⲥⲱ- ⲙⲁ ⲙ̃ⲡⲓⲙⲁⲣⲧⲩⲣⲟⲥ ⲙ̃ⲡⲓⲉϫⲱⲣϩ ⲁⲩⲧⲱⲟⲩⲛ ⲁⲩϭⲟϫⲓ ⲛⲉ- ⲙⲁϥ ϩⲓϫⲉⲛ ⲫⲓⲁⲣⲟ ⲉⲩϣⲓⲛⲓ ⲛ̃ⲥⲁ ⲟⲩϫⲟⲓ ⲉⲑⲣⲟⲩϣϭⲏⲣ ⲙ̃ⲡⲁⲧⲉ ⲛⲓⲣⲱⲙⲓ ⲛ̃ⲧⲉ ⲡⲓⲙⲁ ⲉⲧⲉⲙⲙⲁⲩ ⲉⲙⲓ ⲛ̃ⲥⲉⲟⲗϥ ⲛ̃ⲧⲟⲧⲟⲩ ⲉⲧⲁⲩⲟ̃ϩⲓ ⲁ ϩⲓ ⲡⲓⲭⲣⲟ ⲉⲩϫⲟⲩϣⲧ ϧⲁⲧϩⲏ ⲛ̃ⲟⲩϫⲟⲓ̃ ⲉⲩⲉⲣⲥⲡⲟⲩⲇⲁⲍⲓⲛ ⲉ̃ⲫⲱⲧ ϧⲉⲛ ⲟⲩⲉⲝⲁⲡⲓⲛⲁ ⲇⲉ ⲁ ⲫⲏ ⲉⲑⲟⲩⲁⲃ ⲟϩⲓ ⲉⲣⲁⲧϥ ⲥⲁⲡϣⲱⲓ ⲙ̃ⲙⲱⲟⲩ ⲡⲉϫⲁϥ ⲛⲱⲟⲩ ϫⲉ ⲟⲩ ⲡⲉ ⲫⲁⲓ ⲉⲧⲉⲧⲉⲛⲓ̃ⲣⲓ ⲙ̃ⲙⲟϥ ⲙⲏ ⲁⲓϭⲓ̃ⲑⲏⲛⲟⲩ ⲛ̃ϫⲟⲛⲥ ⲛ̃ϩⲗⲓ ⲙⲏ ⲛⲁⲓⲙⲟϣⲓ ⲛⲉⲙⲱⲧⲉⲛ ⲁⲛ ⲙ̃ⲡⲁⲓⲥⲏⲟⲩ ⲧⲏⲣϥ ⲙ̃ⲡⲓⲉϩⲟⲟⲩ ⲛⲉⲙ ⲡⲓⲉϫⲱⲣϩ ⲉⲓⲉⲣⲟⲩⲱⲓⲛⲓ ⲉⲣⲱⲧⲉⲛ ⲙ̃ⲫⲣⲏϯ ⲛ̃ⲛⲉⲛϣⲏⲣⲓ ⲙ̃ⲡⲓ︦ⲥ︦ⲗ︦ ⲙ̃ⲡⲓⲥⲏⲟⲩ ⲉⲣⲉ ⲫ︦ϯ︦ ⲉⲣϧⲏⲓⲃⲓ ⲉϫⲱⲟⲩ ϧⲉⲛ ⲡⲓⲉϩⲟⲟⲩ *ϧⲉⲛ ⲟⲩⲥⲧⲩⲗⲟⲥ ⲛ̃ϭⲏⲡⲓ ⲟⲩⲟϩ ### 0034 ⲟⲛ ϧⲉⲛ ⲟⲩⲥⲧⲩⲗⲟⲥ ⲛ̃ⲭⲣⲱⲙ ⲙ̃ⲡⲓⲉϫⲱⲣϩ ⲧⲏⲣϥ ⲙⲏ ϧⲉⲛ ⲡϫⲓⲛⲑⲣⲉⲧⲉⲧⲉⲛⲉⲣⲕⲩⲛⲇⲓⲛⲉⲩⲓⲛ ϩⲓⲧⲉⲛ ⲡⲁϣⲁⲓ ⲛ̃ⲛⲓⲥⲟⲛⲓ ⲉⲧⲁⲩⲓ︦ ⲉϫⲉⲛⲑⲏⲛⲟⲩ ϧⲉⲛ ⲡϣⲁϥ ⲉⲣⲉⲧⲉⲛ- ⲛⲏⲟⲩ ⲉ̃ⲃⲟⲗϧⲉⲛ ϯⲡⲉⲣⲥⲏⲥ ⲙⲏ ⲙ̃ⲡⲓⲑⲣⲟⲩⲫⲱⲧ ϩⲓⲧⲉⲛ ϯϩⲟϯ ⲙ]ⲡϭ︦ⲥ︦ ⲉ̃ⲧⲁⲥⲓ̃ ⲉ̃ϫⲱⲟⲩ ⲙⲏ ϧⲉⲛ ⲡϫⲓⲛⲑⲣⲉ ⲡⲓⲇⲓⲁ̃- ⲃⲟⲗⲟⲥ ⲉⲣⲫⲑⲟⲛⲓⲛ ⲉⲣⲱⲧⲉⲛ ⲉϥⲟⲩⲱϣ ⲉⲱⲙⲥ ⲙ̃ⲡⲓϫⲟⲓ ϧⲁⲣⲱⲧⲉⲛ ⲉⲑⲃⲏⲧ ⲙⲏ ⲙ̃ⲡⲓⲛⲁϩⲉⲙⲑⲏⲛⲟⲩ ⲉⲡⲓⲡⲉⲗⲁⲅⲟⲥ ⲛ̃ⲧⲉ ⲛⲓⲙⲱⲟⲩ ⲉⲑⲙⲟⲗϩ ⲉⲑⲃⲉ ⲟⲩ ϯⲛⲟⲩ ⲧⲉⲧⲉⲛ- ⲟⲩⲱϣ ⲉⲃⲱⲗ ⲉⲃⲟⲗ ⲛⲟⲩⲇⲓⲁ̃ⲑⲏⲕⲏ ⲉⲁ ⲡϭ︦ⲥ︦ ⲧⲁϫⲣⲟⲥ ⲛ̃ⲑⲟϥ ⲅⲁⲣ ⲡⲉⲧⲁϥⲟⲩⲱϣ ⲉⲑⲣⲓ̃ϩⲓ ⲙ̃ⲡⲓⲙⲁ ⲉⲧⲁⲩ- ⲭⲁⲧ ⲛ̃ϧⲏⲧϥ ⲛ̃ⲧⲉ ⲡⲉϥⲣⲁⲛ ⲉⲑⲟⲩⲁⲃ ϭⲓ̃ⲱⲟⲩ ⲛ̃ϧⲏⲧϥ ⲭⲱ ⲟⲩⲛ ⲙ̃ⲡⲁⲥⲱⲙⲁ ⲉϧⲣⲏⲓ ϧⲉⲛ ⲧⲁⲓϫⲱⲧ ⲛ̃ⲱⲛⲓ ⲛ̃ⲧⲉ- ⲧⲉⲛⲁⲗⲏⲓ ⲉ̃ⲡⲁⲓϫⲟⲓ ⲉⲑⲛⲏⲟⲩ ⲛ̃ⲧⲉⲧⲉⲛⲡⲗⲉⲓⲛ ⲫⲏ ⲅⲁⲣ ⲉ̃ⲧⲁϥϩⲱⲗⲉⲙ ⲛ̃ⲁⲃⲃⲁⲕⲟⲩⲙ ϧⲉⲛ ⲡⲓⲗⲁⲕⲕⲟⲥ ⲙ̃ⲡⲓⲥⲏⲟⲩ ϧⲛ ⲑⲃⲁⲃⲩⲗⲱⲛ ⲟⲩⲟϩ ⲓⲉⲍⲉⲕⲓⲏⲗ ⲓⲥϫⲉⲛ ⲃⲁⲃⲩⲗⲱⲛ ⲁ ⲓ︦ⲗ︦ⲏ︦ⲙ︦ ⲛ̃ⲑⲟϥ ⲟⲛ ⲡⲉⲑⲛⲁⲧϩⲉⲙⲥⲟⲓ ϧⲉⲛ ⲡⲓⲧⲟⲡⲟⲥ ⲉⲧⲁⲣⲉⲧⲉⲛⲟⲗⲧ ⲉⲃⲟⲗ ⲛ̃ϧⲏⲧϥ ⲡϭ︦ⲥ︦ ⲇⲉ ⲡⲭ︦ⲥ︦ ⲉϥⲉϯ ⲛⲱ- ⲧⲉⲛ ⲙⲡⲃⲉⲭⲉ ⲛ̃ⲛⲉⲧⲉⲛϧⲓⲥⲓ ⲟⲩⲟϩ ⲉϥⲉϭⲓⲙⲱⲓⲧ ⲛⲱⲧⲉⲛ ⲛ̃ⲧⲉϥⲛⲁϩⲉⲙⲑⲏⲛⲟⲩ ⲉⲃⲟⲗϧⲉⲛ ⲑⲗⲓⲯⲓⲥ ⲛⲓⲃⲉⲛ ⲛ̃ⲧⲉ ⲡⲓ- ⲡⲟⲛⲏⲣⲟⲥ ⲁⲣⲉϩ ⲇⲉ ⲉⲣⲱⲧⲉⲛ ϧⲉⲛ ⲧⲁϫⲣⲟ ⲛⲓⲃⲉⲛ ⲉϣ- ⲧⲉⲙⲉⲣⲡⲁⲣⲁⲃⲉⲛⲓⲛ ⲙ̃ⲡⲓⲛⲁϩϯ ⲉⲧⲥⲟⲩⲧⲱⲛ ⲟⲩⲟϩ ϯⲛⲁ- ϣⲱⲡⲓ *ⲛⲉⲙⲱⲧⲉⲛ ϧⲉⲛ ⲙⲁⲓ ⲛⲓⲃⲉⲛ ⲉⲧⲉⲧⲉⲛⲛⲁϣⲉ ⲉⲣⲱⲟⲩ ⲛⲁⲓ ⲇⲉ ⲉⲧⲁϥϫⲟⲧⲟⲩ ⲛⲱⲟⲩ ϧⲉⲛ ⲟⲩⲉⲝⲁⲡⲓⲛⲁ ⲁ ⲡⲥⲱⲙⲁ ⲙ̃ⲡⲉⲑⲟⲩⲁⲃ ⲛⲉⲙ ϯϫⲱⲧ ⲛ̃ⲱⲛⲓ ⲁⲩϩⲟⲗⲙⲟⲩ ϧⲉⲛ ⲡⲓⲁ̃ⲏⲣ ⲁⲩⲭⲁⲩ ϧⲉⲛ ⲡⲓⲟⲩⲁⲙ² ⲥⲁⲣⲏⲥ ⲙ̃ⲡⲁⲓⲙ ⲙ̃ⲡⲓⲉϫⲱⲣϩ ⲉ ⲟⲩⲟⲛ ⲟⲩⲥϩⲓⲙⲓ ⲙ̃ⲙⲁⲓⲛⲟⲩϯ ϧⲉⲛ ⲡⲓϯⲙⲓ ⲉⲧⲉⲙ- ⲙⲁⲩ ⲉⲥⲉⲣⲁⲥⲕⲓⲛ ⲉⲡⲓⲃⲓⲟⲥ ⲛ̃ⲧⲉ ϯⲙⲉⲧⲡⲁⲣⲑⲉⲛⲟⲥ ⲓⲥϫⲉⲛ ⲧⲉⲥⲙⲉⲧⲕⲟⲩϫⲓ ⲉⲟⲩⲥⲉⲙⲛⲏ ⲧⲉ ⲙ̃ⲙⲁⲓϣⲉⲙⲙⲟ ⲟⲩⲟϩ ### 0035 ⲙ̃ⲙⲁⲓⲁⲅⲓⲟⲥ ⲉⲡⲉⲥⲣⲁⲛ ⲡⲉ ⲑⲉⲟⲇⲱⲣⲁ ⲉⲁⲓ ⲇⲉ ⲁ̃ ⲡⲓⲙⲁⲣ- ⲧⲩⲣⲟⲥ ⲉⲑⲟⲩⲁⲃ ⲛ̃ⲧⲉ ⲡⲭ︦ⲥ︦ ⲡⲓⲁ̃ⲅⲓⲟⲥ ⲓⲁⲕⲱⲃⲟⲥ ⲟⲩⲱⲛϩ ⲉⲣⲟⲥ ⲙ̃ⲡⲥⲙⲟⲧ ⲙ̃ⲡⲓⲡⲣⲟⲫⲏⲧⲏⲥ ⲉⲑⲟⲩⲁⲃ ⲇⲁⲛⲓⲏⲗ ⲛⲉⲙ ϩⲁⲛⲕⲉⲙⲏϣ ⲟⲛ ⲛⲉⲙⲁϥ ⲉⲩⲉⲣⲫⲟⲣⲓⲛ ⲙ̃ⲡⲥⲭⲏⲙⲁ ⲛ̃ⲛⲓ- ⲡⲉⲣⲥⲏⲥ ⲉⲧⲁⲥⲛⲁⲩ ⲇⲉ ⲉⲣⲱⲟⲩ ⲁⲥϣⲱⲡⲓ ϧⲉⲛ ⲟⲩⲛⲓϣϯ ⲛ̃ϩⲟϯ ⲙ̃ⲙⲁϣⲱ ⲡⲓⲁ̃ⲅⲓⲟⲥ ⲇⲉ ⲓⲁⲕⲱⲃⲟⲥ ⲁϥⲥⲁϫⲓ ⲛⲉⲙⲁⲥ ⲉϥϫⲱ ⲙ̃ⲙⲟⲥ ϫⲉ ⲙ̃ⲡⲉⲣⲉⲣϩⲟϯ ⲁⲛⲟⲕ ⲡⲉ ⲓⲁⲕⲱⲃⲟⲥ ⲡⲓ- ⲉⲃⲟⲗϧⲉⲛ ⲛⲓⲡⲉⲣⲥⲏⲥ ⲙ̃ⲡⲁϯⲱⲥⲕ ⲓⲥϫⲉⲛ ⲉⲧⲁⲓⲉⲣⲙⲁⲣⲧⲩⲣⲟⲥ ⲉϫⲉⲛ ⲫⲣⲁⲛ ⲙ̃ⲡⲭ︦ⲥ︦ ⲉⲧⲁ ⲡϭ︦ⲥ︦ ⲅⲁⲣ ⲟⲩⲟⲣⲡⲑⲏⲛⲟⲩ ⲁϥⲣ- ⲭⲁⲣⲓⲍⲉⲥⲑⲉ ⲙⲙⲟⲓ ⲛⲱⲧⲉⲛ ⲉⲑⲣⲓϣⲱⲡⲓ ⲛ̃ⲧⲁϫⲣⲟ ⲛⲉⲙ ⲛⲁϣϯ ⲙ̃ⲡⲉⲧⲉⲛϯⲙⲓ ⲧⲏⲣϥ ⲧⲱⲟⲩⲛ ⲙⲁϣⲉ ⲛⲉ ϩⲁ ⲡⲓⲡⲣⲉⲥⲃⲩⲧⲉ- ⲣⲟⲥ ⲛⲉⲙ ⲡⲓⲕⲗⲏⲣⲟⲥ ⲧⲏⲣϥ ⲛ̃ⲧⲉⲧⲉⲛ*ϣⲉ ⲛⲱⲧⲉⲛ ⲉⲣⲏⲥ ⲉϫⲉⲛ ⲡⲓⲙⲱⲓⲧ ⲛ̃ⲧⲉ ⲡⲓⲟⲩⲁⲙ ⲧⲉⲧⲉⲛⲛⲁϫⲓⲙⲓ ⲛ̃ⲧⲁⲓⲛⲓϣϯ ⲛ̃ϫⲱⲧ ⲛ̃ⲱⲛⲓ ⲉⲣⲉ ⲡⲁⲥⲱⲙⲁ ⲭⲏ ⲛ̃ϧⲏⲧⲥ ⲁⲗⲓⲧϥ ⲛ̃ⲧⲉⲧⲉⲛ- ⲉⲣⲇⲓⲟⲓⲕⲓⲛ ⲙ̃ⲙⲟϥ ⲕⲁⲧⲁ ⲫⲟⲩⲱϣ ⲙ̃ⲫ︦ϯ︦ ⲁⲥⲧⲱⲟⲩⲛ ⲇⲉ ⲛ̃ϫⲉ ϯⲡⲁⲣⲑⲉⲛⲟⲥ ⲛ̃ⲥⲉⲙⲛⲏ ⲁⲥⲓ︦ ⲁⲥϫⲱ ⲛ̃ϩⲱⲃ ⲛⲓⲃⲉⲛ ⲉ̃ⲡⲓⲡⲣⲉⲥⲃⲩⲧⲉⲣⲟⲥ ⲛ̃ⲧⲉ ⲡⲓϯⲙⲓ ⲁϥⲓ︦ ⲛ̃ⲑⲟϥ ⲛⲉⲙ ⲡⲓⲕⲗⲏⲣⲟⲥ ⲛⲉⲙ ⲛⲁⲡⲓϯⲙⲓ ⲧⲏⲣϥ ⲛⲉⲙ ϩⲁⲛⲕⲩⲣⲱⲛ ⲛⲉⲙ ϩⲁⲛϣⲟⲩⲣⲏ ⲉⲩⲙⲉϩ ⲛ̃ⲥⲑⲩⲛⲟⲩϥⲓ︦ ⲛⲉⲙ ϩⲁⲛⲥⲑⲟⲓ ⲉⲛⲁϣⲱⲟⲩ ⲁϥⲓ̃ⲛⲓ ⲙ̃ⲡⲓⲁⲅⲓⲟⲥ ⲓⲁⲕⲱⲃⲟⲥ ⲉϩⲣⲏⲓ ϧⲉⲛ ϯϫⲱⲧ ⲁⲩⲉⲣⲯⲁⲗⲓⲛ ϧⲁϫⲱϥ ϣⲁⲧⲟⲩϭⲓⲧϥ ⲉϧⲟⲩⲛ ⲉⲡⲓϯⲙⲓ ⲉⲧⲉⲙⲙⲁⲩ ⲟⲩⲟϩ ⲁⲩⲭⲁϥ ⲛ̃ϧⲟⲩⲛ ϧⲉⲛ ϯⲉⲕⲕⲗⲏⲥⲓⲁ ϧⲉⲛ ⲟⲩⲛⲓϣϯ ⲛ̃ⲥⲡⲟⲩⲇⲏ ⲁⲩⲉⲣϩⲏⲧⲥ ⲛ̃ⲕⲱⲧ ⲛⲁϥ ⲛ̃ⲟⲩⲙⲁⲣⲧⲏⲣⲓⲟⲛ ϩⲓ- ϫⲉⲛ ⲡⲓⲟⲩⲁⲛ ⲥⲁⲣⲏⲥ ⲙ̃ⲡⲓϯⲙⲓ ⲟⲩⲟϩ ⲁⲩϫⲟⲕϥ ⲉⲃⲟⲗ ϧⲉ̃ⲛ ϩⲁⲛⲕⲟⲩϫⲓ ⲛ̃ⲉϩⲟⲟⲩ ϣⲁ ⲥⲟⲩⲅ︦ ⲙ̃ⲡⲓⲁ̃ⲃⲟⲧ ⲙⲉⲭⲓⲣ ⲟⲩ- ⲉⲕⲕⲗⲏⲥⲓⲁ̃ ⲙ̃ⲡⲁⲓⲣⲏϯ ⲉⲥⲧⲁⲓⲏⲟⲩⲧ ϩⲱⲥⲧⲉ ⲛ̃ⲧⲉ ⲡⲓⲥⲁϫⲓ ⲉⲧⲥϧⲏⲟⲩⲧ ϧⲉⲛ ⲛⲓⲡⲣⲁⲝⲓⲥ ϫⲱⲕ ⲉⲃⲟⲗ ⲉϫⲱⲥ ⲫⲁⲓ ⲉⲧϫⲱ ⲙ̃ⲙⲟⲥ ϫⲉ ϯⲉⲕⲕⲗⲏⲥⲓⲁ ⲙⲉⲛ ⲟⲩⲛ ⲉⲧϧⲉⲛ ϯⲓⲟⲩⲇⲉⲁ ⲛⲉⲙ ϯⲅⲁⲗⲓⲗⲉⲁ̃ ⲛⲉⲙ ⲧⲥⲁⲙⲁⲣⲓⲁ̃ ⲛⲁⲥϣⲟⲡ ϧⲉⲛ ⲟⲩϩⲓⲣⲏⲛⲏ ⲉⲩⲕⲱⲧ ⲙ̃ⲙⲟⲥ ⲟⲩⲟϩ ⲛⲁⲥⲙⲟϣⲓ ⲉⲧϩⲏ ϧⲉⲛ ϯϩⲟϯ ⲛ̃ⲧⲉ ⲡϭ︦ⲥ︦ *ⲟⲩⲟϩ ϧⲉⲛ ⲡϯϩⲟ ⲙ̃ⲡⲓⲡ︦ⲛ︦ⲁ︦ ⲉⲑⲟⲩⲁⲃ ⲛⲁⲥⲛⲏⲟⲩ ### 0036 ⲛⲁϣⲁⲓ ϧⲉⲛ ⲡϫⲓⲛⲑⲣⲟⲩϫⲱⲕ ⲇⲉ ⲉⲃⲟⲗ ⲙ̃ⲡⲓⲙⲁⲣⲧⲏⲣⲓⲟⲛ ⲉⲑⲟⲩⲁⲃ ⲁⲩⲓⲛⲓ ⲙ̃ⲡⲥⲱⲙⲁ ⲙ̃ⲫⲏ ⲉⲑⲟⲩⲁⲃ ⲉⲩⲉⲣⲯⲁⲗⲓⲛ ϧⲁϫⲱϥ ⲉⲁ ⲟⲩⲛⲓϣϯ ⲙ̃ⲙⲏϣ ⲑⲱⲟⲩϯ ⲁⲩⲓ̃ⲛⲓ ⲉ̃ⲃⲟⲗ ⲙ̃ⲡⲓⲙⲁⲣⲧⲣⲟⲥ ⲉⲑⲟⲩⲁⲃ ⲉⲩϫⲱ ⲛ̃ϩⲁⲛⲯⲁⲗⲙⲟⲥ ⲛⲉⲙ ϩⲁⲛⲥⲙⲟⲩ ⲛⲉⲙ ϩⲁⲛϩⲱⲇⲏ ⲙ̃ⲡ︦ⲛ︦ⲁ︦ⲧⲓⲕⲟⲛ ⲁⲩϭⲓⲧϥ ⲉϧⲟⲩⲛ ⲉⲡⲓⲙⲁ ⲉⲧⲁⲩⲕⲟⲧϥ ⲛⲁϥ ⲁⲩⲭⲁϥ ⲛ̃ϧⲣⲏⲓ ⲛ̃ϧⲏⲧϥ ϧⲉⲛ ⲟⲩⲧⲓⲙⲏ ⲛⲉⲙ ⲟⲩⲧⲁⲓⲟ ⲛⲉⲙ ⲟⲩⲱⲟⲩ ⲙ̃ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ϣⲁ ⲉⲛⲉϩ ⲛ̃ⲧⲉ ⲛⲓⲉⲛⲉϩ ⲁⲙⲏⲛ Ⲓⲥϫⲉ ⲟⲩⲟⲛ ⲟⲩⲁⲓ ⲇⲉ ⲉⲣⲁⲛⲧⲓⲗⲉⲅⲓⲛ ⲉϥϫⲱ ⲙ̃ⲙⲟⲥ ϫⲉ ⲉⲧⲁ ⲡⲁⲓⲁ̃ⲅⲓⲟⲥ ⲟⲩⲱⲛϩ ⲉⲃⲟⲗ ⲛ̃ⲁϣ ⲛ̃ⲣⲏϯ ϧⲉⲛ ⲧⲭⲱⲣⲁ ⲛ̃ⲭⲏⲙⲓ ⲉⲟⲩⲉ̃ⲃⲟⲗ ⲡⲉ ϧⲉⲛ ⲧⲭⲱⲣⲁ ⲛ̃ⲛⲓⲡⲉⲣⲥⲏⲥ ⲫⲁⲓ ⲙⲁ- ⲣⲉϥⲉⲙⲓ ⲉ̃ⲣⲟϥ ϫⲉ ⲫⲏ ⲉⲧⲁϥⲓ̃ⲛⲓ ⲛ̃ⲓⲱⲥⲏⲫ ⲉⲃⲟⲗϧⲉⲛ ⲡⲕⲁϩⲓ ⲛ̃ⲭⲏⲙⲓ ⲙⲉⲛⲉⲛⲥⲁ ⲡⲉϥⲙⲟⲩ ⲁⲩϭⲓⲧϥ ⲉϧⲟⲩⲛ ⲉⲡⲕⲁϩⲓ ⲛ̃ⲧⲉ ⲧⲉϥⲕⲗⲏⲣⲟⲛⲟⲙⲓⲁ̃ ⲛ̃ⲑⲟϥ ⲟⲛ ⲡⲉⲧⲁϥϭⲓ̃ⲙⲱⲓⲧ ⲙ̃ⲡⲓⲁ̃ⲅⲓⲟⲥ ⲓⲁⲕⲱⲃⲟⲥ ⲁϥⲉⲛϥ ⲉ̃ⲃⲟⲗϧⲉⲛ ⲟⲩⲭⲱⲣⲁ ⲑⲁⲓ ⲉⲧⲟⲩϣⲉⲙϣⲓ ⲛ̃ϧⲏⲧⲥ ⲙ̃ⲡⲓⲥⲱⲛⲧ ⲡⲁⲣⲁ ⲫⲏ ⲉⲧⲁϥⲥⲱⲛⲧ ⲉⲁϥⲉⲛϥ ⲉϧⲟⲩⲛ ⲉⲧⲭⲱⲣⲁ ⲛ̃ⲭⲏⲙⲓ ⲡⲓⲙⲁ ⲉⲧⲁ ϩⲁⲛⲙⲏϣ ⲙ̃ⲙⲁⲣⲧⲩⲣⲟⲥ ϫⲱⲕ ⲉ̃ⲃⲟⲗ ⲛ̃ⲧⲟⲩⲁⲑⲗⲏⲥⲓⲥ ⲁⲩϭⲓ ⲙ̃ⲡⲓⲭⲗⲟⲙ ⲛ̃ⲁⲑⲗⲱⲙ *ⲛⲁⲓ ⲟⲛ ⲉⲧⲁⲩⲑⲱⲟⲩϯ ⲉⲛⲟⲩⲉⲣⲏⲟⲩ ϧⲉⲛ ϯⲭⲱⲣⲁ ⲧⲏⲣⲥ ⲉⲁⲩⲓ ⲉⲡⲓⲁⲓⲕ ⲛ̃ⲧⲉ ⲡⲓⲧⲟⲡⲟⲥ ⲫⲁⲓ ⲉⲧⲁⲩⲕⲟⲧϥ ⲛⲁϥ ⲟⲩⲟϩ ⲛⲁⲩⲙⲟϣⲓ ϩⲱⲟⲩ ⲛⲉⲙⲁϥ ⲉⲩⲱ̃ⲗⲓ ⲙ̃ⲙⲟϥ ⲉϧⲟⲩⲛ ⲉⲡⲉϥ- ⲉⲩⲕⲧⲏⲣⲓⲟⲛ ⲉⲩⲁ̃ⲣⲉϩ ⲉⲡⲓⲙⲏϣ ϫⲉ ⲛ̃ⲛⲉ ⲡⲓⲇⲓⲁⲃⲟⲗⲟⲥ ⲫⲱⲗϩ ⲛ̃ⲟⲩⲁⲓ ⲟⲩⲟϩ ⲛⲁⲩⲉⲣⲯⲁⲗⲓⲛ ⲛⲉⲙⲁϥ ⲉⲩⲣⲁϣⲓ ⲉⲩⲥⲟⲡ ϫⲉ ⲁⲩⲉⲣⲡⲉⲙⲡϣⲁ ⲙ̃ⲡⲁⲓⲛⲓϣϯ ⲙ̃ⲫⲱⲥⲧⲏⲣ ϧⲁⲧⲟ- ⲧⲟⲩ ϧⲉⲛ ⲧⲟⲩⲭⲱⲣⲁ ⲟⲩⲟϩ ⲛⲁⲩⲥⲙⲟⲩ ⲉⲡⲓⲗⲁⲟⲥ ⲧⲏⲣϥ ⲉⲧⲁⲩⲑⲱⲟⲩϯ ⲉϧⲟⲩⲛ ⲉⲩⲉⲣϣⲁⲓ ⲙ̃ⲡⲓⲅⲉⲛⲛⲉⲟⲥ ⲙ̃ⲙⲁⲣⲧⲩⲣⲟⲥ ⲛ̃ⲧⲉ ⲡⲭ︦ⲥ︦ ⲡⲓⲁⲅⲓⲟⲥ ⲓⲁⲕⲱⲃⲟⲥ ⲟⲩⲟϩ ⲁⲩⲉⲣⲁⲥⲡⲁⲍⲉⲥⲑⲉ ⲙ̃ⲙⲟϥ ⲁ ⲡⲓⲟⲩⲁⲓ ⲡⲓⲟⲩⲁⲓ ⲧⲁⲥⲑⲟϥ ⲉⲡⲉϥⲙⲁⲛϣⲱⲡⲓ ϧⲉⲛ ⲟⲩϩⲓⲣⲏⲛⲏ ### 0037 ⲛⲏ ⲉⲑⲟⲩⲁⲃ ⲅⲁⲣ ⲧⲏⲣⲟⲩ ⲛ̃ⲧⲉ ⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲡⲉⲛⲛⲟⲩϯ ⲛⲁⲩϯⲱⲟⲩ ⲙ̃ⲡⲓⲁⲅⲓⲟⲥ ⲓⲁⲕⲱⲃⲟⲥ ϩⲁⲛⲛⲓϣϯ ⲇⲉ ⲛ̃ⲧⲁⲗϭⲟ ⲁⲩϣⲱⲡⲓ ⲉⲃⲟⲗϩⲓⲧⲟⲧϥ ⲙ̃ⲡⲓⲉϩⲟⲟⲩ ⲉⲧⲁⲩϭⲓⲧϥ ⲉϧⲟⲩⲛ ⲉⲡⲉϥⲙⲁⲣⲧⲏⲣⲓⲟⲛ ⲉⲑⲟⲩⲁⲃ ⲛⲁⲓ ⲉⲧⲉ ⲛⲛⲁϣϭⲓⲏⲡⲓ ⲙ̃ⲙⲱⲟⲩ ⲁⲛ ⲉⲟⲩⲡⲗⲏⲣⲟⲫⲟⲣⲓⲁ̃ ⲛⲉⲙ ⲟⲩⲑⲱⲧ ⲛ̃ϩⲏⲧ ⲛ̃ⲛⲁⲡⲓⲙⲁ ⲧⲏⲣϥ ⲉⲧⲉⲙⲙⲁⲩ ϫⲉ ⲟⲩⲇⲱⲣⲟⲛ ⲛⲁϣ ⲙ̃ⲙⲁⲏ ⲡⲉⲧⲁⲩⲙ̃ⲡϣⲁ ⲙ̃ⲙⲟϥ ⲁϥⲟⲩⲟϩ ϧⲁⲧⲟⲧⲟⲩ ⲉϥⲟⲓ ⲛ̃ⲛⲁϣϯ ⲛⲱⲟⲩ ϧⲉⲛ ϩⲱⲃ ⲛⲓⲃⲉⲛ ⲉⲧⲟⲩⲛⲁⲁⲓⲧⲟⲩ *ⲟⲩⲟϩ ⲛⲁϥϭⲓ̃ⲙⲱⲓⲧ ϧⲁ- ϫⲱⲟⲩ ϧⲉⲛ ⲙⲱⲓⲧ ⲛⲓⲃⲉⲛ ⲉⲧⲟⲩⲛⲁⲙⲟϣⲓ ⲛ̃ϧⲏⲧⲟⲩ ⲟⲩⲟϩ ⲟⲛ ϥⲧⲁⲗϭⲟ ⲛ̃ⲛⲏ ⲉⲧϣⲱⲛⲓ ⲛ̃ϧⲏⲧⲟⲩ ⲟⲩⲟϩ ϥⲉⲣⲫⲁϧⲣⲓ ⲉⲟⲩⲟⲛ ⲛⲓⲃⲉⲛ ⲉⲑⲙⲟⲕϩ ϧⲉⲛ ϩⲁⲛϣⲱⲛⲓ ⲉⲩϣⲉⲃⲓⲛ̃ⲟⲩⲧ ⲟⲩⲟϩ ϥϩⲓⲟⲩⲓ ⲉⲃⲟⲗ ⲛ̃ⲛⲓⲇⲉⲙⲱⲛ ⲟⲩⲟϩ ϥⲟⲩⲱⲛϩ ⲉⲃⲟⲗ ⲛ̃ⲟⲩⲙⲏϣ ⲛ̃ⲥⲟⲡ ⲉϥⲥⲙⲟⲩ ⲉⲛⲁⲡⲉϥⲗⲁⲟⲥ ⲉⲧⲁϥⲙⲉⲛⲣⲓⲧϥ ⲁϥϣⲱⲡⲓ ϧⲁⲧⲟⲧⲟⲩ ⲟⲩⲟϩ ⲛ̃ⲑⲟϥ ⲟⲛ ⲡⲓⲁ̃ⲅⲓⲟⲥ ⲓⲁⲕⲱⲃⲟⲥ ⲁϥϯϩⲟ ⲉ̃ⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲉϫⲉⲛ ⲟⲩⲟⲛ ⲛⲓⲃⲉⲛ ⲉⲑⲛⲏⲟⲩ ⲉⲡⲉϥⲧⲟⲡⲟⲥ ⲉⲑⲟⲩⲁⲃ ⲛⲉⲙ ⲟⲩⲟⲛ ⲛⲓⲃⲉⲛ ⲉⲧⲑⲟⲩⲏⲧ ⲉϧⲟⲩⲛ ϧⲉⲛ ⲡⲉϥⲣⲁⲛ ⲟⲩⲟϩ ϥϭⲓ ⲛ̃ⲧⲟⲧⲟⲩ ⲛ̃ⲛⲟⲩⲇⲱⲣⲟⲛ ⲛⲉⲙ ⲛⲟⲩⲡⲣⲟⲥⲫⲟⲣⲁ ⲛⲉⲙ ⲛⲟⲩⲁⲡⲁⲣⲭⲏ ⲉϥⲉⲣⲡⲣⲉⲥⲃⲉⲩⲓⲛ ϧⲁ- ⲣⲱⲟⲩ ⲛⲁϩⲣⲉⲛ ⲡⲭ︦ⲥ︦ ⲓⲏ︦ⲥ︦ ⲡⲉⲛϭ︦ⲥ︦ ⲫⲁⲓ ⲡⲓⲱⲟⲩ ⲛⲁϥ ⲛⲉⲙ ⲡⲉϥⲓ̃ⲱⲧ ⲛ̃ⲁⲅⲁⲑⲟⲥ ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ⲛ̃ⲣⲉϥⲧⲁⲛϧⲟ ϣⲁ ⲉⲛⲉϩ ⲛ̃ⲧⲉ ⲛⲓⲉⲛⲉϩ ⲁⲙⲏⲛ *Ⲡⲓⲉ̃ⲗⲁⲭ ⲓ̃̃ⲥⲁ̃ⲁ̃ⲕ ⲡⲓⲣⲉϥⲱϣ ⲫ︦ϯ︦ ϯⲡⲓⲕⲁϯ ⲛⲁϥ ⲁ̃ⲙⲏⲛ ⲭⲫⲛⲟⲕ ⲭⲉ ⲡⲓⲁ̃ⲗⲁⲭⲓⲥⲧⲟⲥ ⲛⲣⲉⲫⲉⲣⲛⲟⲃⲓ ⲡⲁⲣⲁ ⲣⲱⲙⲓ ⲛⲓⲃⲉⲛ ⲁ̃ⲣⲓⲡⲁⲙⲉⲩⲓ ⲧⲉ ⲡϭ︦ⲥ︦ ⲭⲱ ⲛⲏⲓ ⲉⲃⲟⲗ [ⲛ]ⲁⲛⲟⲃⲓ ⲡⲏ ⲉⲑⲛⲁⲉⲣ ⲡⲁⲙⲉⲩⲓ ⲧⲉⲫϫⲟⲥ ⲉⲣⲉ ⲫ︦ϯ︦ ⲭⲱ ⲛⲁⲫ ⲉⲃⲟⲗ ⲛⲛⲉⲫⲛⲟⲃⲓ Ⲁⲓⲥϧⲁⲓ ⲛ̃ⲫⲁⲓ ϧⲉⲛ ⲡⲓⲙⲁϩⲭ︦ ⲛ̃ⲧⲉ ⲛⲓⲁⲅⲓⲟⲥ² ⳧ ⲉⲣⲉ ⲡϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲉϥⲱ̃ϩⲓ ⲛⲟⲩⲣⲟ ⲉϫⲱⲛ ### 0038 ϧⲉⲛ ⲫⲣⲁⲛ ⲡⲉⲛⲡϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲡⲉⲛⲛⲟϯ ϧⲉⲛ ⲟⲩⲙⲉⲑⲙⲏⲓ ⲁⲛⲟⲕ ϣⲁ ⲡⲓϫⲱⲃ ⲛ̃ⲛⲁⲧⲛ̃ⲡϣⲁ ⲛ̃ⲧⲁⲗⲡⲟⲣⲟⲥ ⲡⲓⲇ︦ⲓ︦ ⲕⲓⲣⲓⲁⲛⲓ [ⲡ]ϣⲏⲣⲓ ⲛ̃ⲡⲓⲇ︦ⲓ︦ ⲥⲧⲁⲩⲣⲟⲥ ⲡⲓⲣⲉⲙϭⲙⲟⲩⲙ ⲓⲥ ϯⲙⲁⲧⲁⲛⲓⲁ ϯ ⲱϣ² ⲁ̃ⲃⲟⲛ ⲛⲓⲃⲉⲛ ⲉⲧⲛⲁⲱϣ ϧⲉⲛ ⲡⲁⲓⲥϧⲁⲓ ϩⲓⲛⲁ ⲛ̃ⲧⲉ ⲡϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ϯ ⲛⲟⲩⲥ ⲛⲉⲙ ⲟⲩⲕⲁϯ ⲛ̃ⲧⲁϥ ⲛⲏⲓ S ⲧⲉϥⲭⲁ ⲛⲁⲛⲟⲃⲓ ⲛⲏⲓ ⲉⲃⲟⲗ S ⲧⲉ[ϥ]ϯⲙ̃[ⲧⲟⲛ] ⲛ̃ⲡⲁⲓⲱⲧ Ⲁⲙⲏⲛ ϫⲉ ⲫⲏ ⲉⲧ ... ̃.....[Ⲁⲣⲓⲡⲁⲙⲉⲩⲉ] (?)