### 0001 *ⲫⲙⲁⲣⲧⲩⲣⲟⲗⲟⲅⲓⲟⲛ ⲙ̃ⲫⲏ ⲉⲑⲟⲩⲁⲃ ⲛⲉⲡⲓⲥⲕⲟⲡⲟⲥ ⲟⲩⲟϩ ⲙ̃ⲙⲁⲣ- ⲧⲩⲣⲟⲥ ⲛ̃ⲧⲉ ⲡⲭ︦ⲥ︦ ⲁⲃⲃⲁ ⲡⲟⲗⲓⲕⲁⲣⲡⲟⲥ ⲫⲙⲁⲑⲏⲧⲏⲥ ⲛ̃ⲛⲓⲁⲡⲟⲥⲧⲟ- ⲗⲟⲥ ⲉⲧⲁϥϫⲟⲕⲥ ⲉⲃⲟⲗ ⲛ̃ⲥⲟⲩⲕ︦ⲑ︦ ⲙ̃ⲡⲓⲁ̃ⲃⲟⲧ ⲙⲉⲭⲓⲣ ϧⲉⲛ ⲟⲩϩⲓ- ⲣⲏⲛⲏ ⲛ̃ⲧⲉ ⲫ︦ϯ︦ ⲁⲙⲏⲛ Ϯⲉⲕⲕⲗⲏⲥⲓⲁ ⲛ̃ⲧⲉ ⲫ︦ϯ︦ ⲉⲧϧⲉⲛ ⲥⲙⲩⲣⲛⲁ ⲉⲥⲥϧⲁⲓ ⲛ̃ϯⲕⲁ- ⲑⲟⲗⲓⲕⲏ ⲛ̃ⲉⲕⲕⲗⲏⲥⲓⲁ̃ ⲉⲑⲟⲩⲁⲃ ⲉⲧϣⲟⲡ ϧⲉⲛ ⲫⲓⲗⲟⲙⲏⲗⲁ Ⲫⲛⲁⲓ ⲛⲉⲙ ϯϩⲓⲣⲏⲛⲏ ⲛⲉⲙ ϯⲁ̃ⲅⲁⲡⲏ ⲛ̃ⲧⲉ ⲫ︦ϯ︦ ⲫⲓⲱⲧ ⲙ̃ⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲉⲩⲉⲁ̃ϣⲁⲓ ⲛⲱⲧⲉⲛ ⲧⲉⲛⲥϧⲁⲓ ⲛⲱⲧⲉⲛ ⲛⲓⲥⲛⲏⲟⲩ ⲉⲛⲧⲁⲙⲟ ⲙ̃ⲙⲱⲧⲉⲛ ⲉⲑⲃⲉ ⲛⲏ ⲉⲧⲁⲩⲉⲣⲙⲁⲣⲧⲩⲣⲟⲥ ⲟⲩⲟϩ ⲡⲓⲙⲁⲕⲁⲣⲓⲟⲥ ⲡⲟⲗⲓⲕⲁⲣⲡⲟⲥ ⲫⲁⲓ ⲉⲧⲁϥϣⲱⲡⲓ ⲙ̃ⲙⲁ- ⲑⲏⲧⲏⲥ ⲛ̃ⲛⲓⲁ̃ⲡⲟⲥⲧⲟⲗⲟⲥ ⲉⲁϥⲙⲟϣⲓ ⲛⲉⲙ ⲟⲩⲙⲏϣ ⲉⲧⲁⲩ- ⲛⲁⲩ ⲉ̃ⲡϭ︦ⲥ︦ ⲫⲁⲓ ⲉⲧⲁⲩⲧϩⲉⲙⲥⲟϥ ⲛⲉⲡⲓⲥⲕⲟⲡⲟⲥ ϧⲉⲛ ϯⲁ̃ⲥⲓⲁ̃ ⲉ̃ϫⲉⲛ ϯⲉⲕⲕⲗⲏ*ⲥⲓⲁ ⲉⲧϧⲉⲛ ⲥⲙⲩⲣⲛⲁ ⲁⲛⲟⲛ ϩⲱⲛ ⲟⲛ ⲉⲧⲁⲛⲛⲁⲩ ⲉⲣⲟϥ ϧⲉⲛ ⲧⲉⲛⲙⲉⲧⲕⲟⲩϫⲓ ⲛⲉ ⲁϥⲱⲥⲕ ⲅⲁⲣ ⲡⲉ ⲟⲩⲟϩ ⲛⲉ ⲁϥⲉⲣϧⲉⲗⲗⲟ ⲉⲙⲁϣⲱ ⲉϥϯⲥⲃⲱ ⲛ̃ⲥⲏⲟⲩ ⲛⲓⲃⲉⲛ ⲉ̃ⲛⲏ ⲉⲧⲁϥϭⲓⲥⲃⲱ ⲉ̃ⲣⲱⲟⲩ ⲉⲃⲟⲗϩⲓⲧⲟⲧⲟⲩ ⲛ̃ⲛⲓ- ⲁ̃ⲡⲟⲥⲧⲟⲗⲟⲥ ⲉⲡϧⲁⲉ̃ ⲇⲉ ⲁϥϫⲱⲕ ⲉⲃⲟⲗ ⲙ̃ⲡⲉϥⲃⲓⲟⲥ ϧⲉⲛ ⲟⲩⲙⲉⲧⲙⲁⲣⲧⲩⲣⲟⲥ ⲉⲥⲙⲉϩ ⲛ̃ⲱⲟⲩ ⲟⲩⲟϩ ⲉⲥⲉⲣⲟⲩⲱⲓⲛⲓ ⲟⲩⲟϩ ⲉⲧⲁϥⲑⲣⲉ ⲡⲓⲇⲓⲱⲅⲙⲟⲥ ϩⲉⲣⲓ ϩⲱⲥ ⲓⲥϫⲉⲕ ⲉⲧⲁϥⲧⲱⲃ ⲉ̃ⲣⲱϥ ϩⲓⲧⲉⲛ ⲧⲉϥⲙⲁⲣⲧⲩⲣⲓⲁ̃ ⲛⲉ ⲁⲩⲉⲣⲙⲁⲣⲧⲩⲣⲟⲥ ⲅⲁⲣ ϧⲁϫⲱϥ ⲡⲉ ⲛ̃ϫⲉ ⲟⲩⲙⲏϣ ⲉϥⲟϣ ⲛⲁⲓ ⲉ̃ⲧⲁⲩⲟⲩⲱⲛϩ ⲉⲃⲟⲗ ⲛⲟⲩⲛⲓϣϯ ⲛ̃ϩⲩⲡⲟⲙⲟⲛⲏ ⲉϧⲟⲩⲛ ⲉⲛⲓⲃⲁⲥⲁⲛⲟⲥ ϧⲁ ⲡⲭ︦ⲥ︦ ϩⲱⲥⲇⲉ ⲛ̃ⲧⲉ ⲛⲏ ⲉⲧⲟ̃ϩⲓ ⲉ̃ⲣⲁⲧⲟⲩ ⲙ̃ⲡⲟⲩⲕⲱϯ ⲉⲧⲉⲣⲑⲉⲱ̃ⲣⲓⲛ ⲙ̃ⲙⲱⲟⲩ ⲉⲣϣⲫⲏⲣⲓ ϩⲁⲛⲥⲟⲡ ⲙⲉⲛ ⲉⲩϩⲱⲕⲓ ⲛ̃ⲛⲟⲩⲥⲁⲣⲝ ϣⲁ ⲉϧⲟⲩⲛ ⲉ̃ⲛⲟⲩⲛⲉⲩⲣⲟⲛ ϩⲱⲥⲇⲉ ⲛ̃ⲧⲉ ⲛⲟⲩⲙⲁϧⲧ ⲉⲧⲥⲁϧⲟⲩⲛ ⲛⲉⲙ ⲛⲟⲩⲙⲉⲗⲟⲥ ϭⲱⲣⲡ ⲉⲃⲟⲗ ϩⲁⲛⲥⲟⲡ ⲇⲉ ⲟⲛ ⲉⲩⲫⲱⲣϣ ϧⲁⲣⲱⲟⲩ ⲛϩⲁⲛⲟ̃ⲃⲟⲗⲓⲥⲕⲟⲥ ### 0002 ⲛ̃ⲃⲉⲛⲓⲡⲓ ⲉⲩϫⲏⲣ *ⲉⲩⲉⲣⲃⲁⲥⲁⲛⲓⲍⲓⲛ ⲙ̃ⲙⲱⲟⲩ ϩⲓⲧⲉⲛ ⲓ̃ⲇⲟⲥ ⲛⲓⲃⲉⲛ ⲛ̃ⲣⲉϥⲉⲣⲕⲟⲗⲁⲍⲓⲛ ⲉⲡϧⲁⲉ ⲇⲉ ⲛ̃ⲥⲉⲧⲏⲓⲧⲟⲩ ⲛ̃ⲛⲓⲑⲏⲣⲓⲟⲛ ⲉⲑⲣⲟⲩⲟⲩⲟ̃ⲙⲟⲩ ⲛ̃ϩⲟⲩϭ̃ ⲇⲉ ⲡⲓⲅⲉⲛⲛⲉⲟⲥ ⲅⲉⲣⲙⲁⲛⲓⲕⲟⲥ ⲫⲁⲓ ⲉⲧⲁϥⲉⲣⲕⲁⲧⲁⲫⲣⲟⲛⲓⲛ ⲛ̃ϯⲙⲉⲧϫⲱⲃ ⲛ̃ⲧⲉ ⲡⲓⲥⲱⲙⲁ ⲁϥϯ ⲙ̃ⲡⲉϥⲟⲩⲟⲓ ⲉⲫⲙⲟⲩ ϩⲓⲧⲉⲛ ⲡⲓϩⲙⲟⲧ ⲛ̃ⲧⲉ ⲫ︦ϯ︦ ⲉⲣⲉ ⲡⲓⲁⲛ- ⲑⲩⲡⲁⲧⲟⲥ ⲅⲁⲣ ⲟⲩⲱϣ ⲉⲑⲉⲧ ⲡⲉϥϩⲏⲧ ⲟⲩⲟϩ ⲉϥϯⲗⲱⲓϫⲓ ⲛⲁϥ ⲉⲑⲃⲉ ⲧⲉϥϩⲩⲗⲏⲕⲓⲁ̃ ⲛⲉ ⲟⲩⲁ̃ⲗⲟⲩ ⲅⲁⲣ ⲡⲉ ⲛ̃ⲃⲉⲣⲓ ⲉ̃ⲙⲁϣⲱ ⲛⲁϥϯϩⲟ ⲉⲣⲟϥ ⲉϥϫⲱ ⲙ̃ⲙⲟⲥ ϫⲉ ϣⲉⲛϩⲏⲧ ϧⲁⲣⲟⲕ ⲙ̃ⲙⲓⲛ ⲙ̃ⲙⲟⲕ ⲛⲑⲟϥ ⲇⲉ ⲙ̃ⲡⲉϥⲟⲩⲱϣ ⲁⲗⲗⲁ ⲁϥϯ ⲙ̃ⲡⲉϥⲟⲩⲟⲓ ϧⲉⲛ ⲟⲩⲣⲱⲟⲩⲧϥ ⲁϥⲥⲱⲕ ⲉϫⲱϥ ⲛ̃ⲛⲓ- ⲑⲏⲣⲓⲟⲛ ⲛ̃ϫⲟⲛⲥ ⲉϥϯϫⲱⲛⲧ ⲛⲱⲟⲩ ⲉϥϣⲟⲡϣⲉⲃ ⲙ̃ⲙⲱⲟⲩ ⲉ̃ϧⲟⲩⲛ ⲉⲣⲟϥ ⲙ̃ⲙⲓⲛ ⲙ̃ⲙⲟϥ ⲉⲑⲣⲟⲩⲟⲩⲟⲙϥ ϫⲉ ϩⲓⲛⲁ ⲛ̃ⲧⲉϥⲉⲣⲉⲃⲟⲗ ⲉⲡⲁⲓⲃⲓⲟⲥ ⲛ̃ⲣⲉϥϭⲓⲛϫⲟⲛⲥ ⲟⲩⲟϩ ⲛⲁⲛⲟⲙⲟⲥ Ⲉⲧⲁⲓ ⲡⲓⲙⲏϣ ⲇⲉ ⲉⲣϣⲫⲏⲣⲓ ⲛ̃ⲑⲙⲉⲧϫⲱⲣⲓ ⲙ̃ⲡⲓⲙⲁⲣⲧⲩ- ⲣⲟⲥ ⲙ̃ⲙⲁⲓⲛⲟⲩϯ ⲛⲉⲙ ϯⲁⲣⲉⲧⲏ ⲛ̃ⲧⲉ ⲡⲅⲉⲛⲟⲥ ⲧⲏⲣϥ ⲛ̃ⲛⲓ- ⲭⲣⲏⲥⲧⲓⲁ̃ⲛⲟⲥ *ⲁⲩⲉⲣϩⲏⲧⲥ ⲛ̃ⲱϣ ⲉⲃⲟⲗ ϩⲓⲟⲩⲥⲟⲡ ϫⲉ ⲁ̃ⲗⲓⲟⲩⲓ︦ ⲉ̃ⲃⲟⲗϧⲉⲛ ⲑⲙⲏϯ ⲛ̃ⲛⲁⲓⲁⲑⲛⲟⲩϯ ⲉ̃ⲧⲉ ⲛⲓⲭⲣⲏⲥⲧⲓⲁ̃- ⲛⲟⲥ ⲛⲉ ⲟⲩⲟϩ ⲡⲉϫⲱⲟⲩ ϫⲉ ⲙⲁⲣⲟⲩⲕⲱϯ ⲛ̃ⲥⲁ ⲡⲟⲗⲓ- ⲕⲁⲣⲡⲟⲥ ⲟⲩⲟϩ ⲉⲧⲁ ⲟⲩⲛⲓϣϯ ⲛ̃ϣⲑⲟⲣⲧⲉⲣ ϣⲱⲡⲓ ⲉⲑⲃⲉ ⲛⲓⲥⲙⲏ ⲉⲧⲟϣ ⲁ̃ ⲟⲩⲁⲓ ⲉⲡⲉϥⲣⲁⲛ ⲡⲉ ⲕⲟⲓⲛ ⲉⲟⲩⲫⲣⲓⲝ ⲡⲉ ϧⲉⲛ ⲡⲉϥⲅⲉⲛⲟⲥ ⲫⲁⲓ ⲉ̃ⲧⲁϥⲓ̃ ⲛ̃ⲃⲉⲣⲓ ⲉ̃ⲃⲟⲗϧⲉⲛ ϯⲫⲣⲩⲅⲓⲁ̃ ⲫⲁⲓ ⲇⲉ ⲁϥϯ ⲙⲡⲉϥⲟⲩⲟⲓ ⲉϧⲟⲩⲛ ⲉⲡⲓⲇⲓⲕⲁⲥⲧⲏⲣⲓⲟⲛ ⲟⲩⲟϩ ⲉⲧⲁϥⲛⲁⲩ ⲉⲛⲓⲑⲏⲣⲓⲟⲛ ⲛⲉⲙ ⲧⲟⲩⲙⲉⲧⲁⲅⲣⲓⲟⲥ ϧⲉⲛ ⲡϫⲓⲛⲑⲣⲉ ⲧⲉϥⲯⲩⲭⲏ ⲉⲣϫⲱⲃ ⲛ̃ⲧⲉϥⲉⲣϩⲟϯ ⲉⲡϧⲁⲉ̃ ⲁϥϫⲱⲗ ⲉ̃ⲃⲟⲗ ⲙ̃ⲡⲉϥⲟⲩϫⲁⲓ ⲫⲁⲓ ⲇⲉ ⲙ̃ⲡⲁⲓⲣⲏϯ ⲁⲩⲟⲛϩϥ ⲛⲁⲛ ⲉⲃⲟⲗϩⲓⲧⲉⲛ ϯⲉⲡⲓⲥⲧⲟⲗⲏ ⲉ̃ⲧⲁⲛⲉⲣϣⲟⲣⲡ ⲛ̃ⲥⲁϫⲓ ⲉ̃ⲣⲟⲥ ϫⲉ ⲉ̃ⲧⲁϥϯ ⲙ̃ⲡⲉϥⲟⲩⲟⲓ ⲉⲡⲓⲇⲓⲕⲁⲥⲧⲏⲣⲓⲟⲛ ϧⲉⲛ ⲟⲩⲙⲉⲧⲡⲣⲟⲡⲉ- ⲧⲏⲥ ⲟⲩⲟϩ ϧⲉⲛ ⲟⲩϩⲟϯ ⲁⲛ ⲛ̃ⲧⲉ ⲫ︦ϯ︦ ⲁⲗⲗⲁ ⲟ̃ⲙⲟⲓⲱⲥ ⲉⲧⲁϥϩⲉⲓ ⲁϥⲭⲱ ⲛⲟⲩⲙⲏⲓⲛⲓ ⲉϥⲟⲩⲟⲛϩ ⲉⲃⲟⲗ ⲛⲟⲩⲟⲛ ### 0003 ⲛⲓⲃⲉⲛ ϫⲉ ⲡⲉⲧⲥϣⲉ ⲁⲛ ⲡⲉ ⲛ̃ⲧⲉ ϩⲗⲓ ⲉⲣⲧⲟⲗ*ⲙⲁⲛ ⲉ̃ⲛⲁⲓ- ϩⲃⲏⲟⲩⲓ ⲙ̃ⲡⲁⲓⲣⲏϯ ϧⲉⲛ ⲟⲩⲙⲉⲧⲁⲧϩⲟϯ Ⲡⲟⲗⲓⲕⲁⲣⲡⲟⲥ ⲇⲉ ⲡⲓϣⲫⲏⲣⲓ ⲛ̃ϣⲟⲣⲡ ⲙⲉⲛ ⲉⲧⲁϥⲥⲱⲧⲉⲙ ϫⲉ ⲥⲉⲕⲱϯ ⲛ̃ⲥⲱϥ ⲛⲁϥϣⲟⲡ ⲡⲉ ϧⲉⲛ ⲟⲩⲙⲉⲧⲁⲧϣⲑⲟⲣⲧⲉⲣ ⲟⲩⲟϩ ⲛⲁϥⲁ̃ⲣⲉϩ ⲉⲡⲉϥϩⲏⲧ ϧⲉⲛ ⲟⲩⲱⲣϥ ⲛⲉⲙ ⲟⲩⲙⲉⲧⲁⲧ- ⲕⲓⲙ ⲛⲁϥⲟⲩⲱϣ ⲇⲉ ⲉⲟ̃ϩⲓ ϧⲉⲛ ϯⲡⲟⲗⲓⲥ ⲛⲓⲥⲛⲏⲟⲩ ⲇⲉ ⲉ̃ⲧⲉⲙⲡⲉϥⲕⲱϯ ⲁⲩϯϩⲟ ⲉⲣⲟϥ ⲉⲑⲣⲉϥϣⲉ ⲉⲃⲟⲗϧⲉⲛ ϯⲡⲟⲗⲓⲥ ⲟⲩⲟϩ ⲉⲧⲁϥⲑⲉⲧ ⲡⲟⲩϩⲏⲧ ⲁϥϣⲉ ⲉⲃⲟⲗ ⲉ̃ⲟⲩⲕⲟⲓ ⲉⲥⲟⲩⲏ̃ⲟⲩ ⲉⲃⲟⲗ ⲛ̃ϯⲡⲟⲗⲓⲥ ⲁϥⲕ̃ϩⲓ ⲙ̃ⲙⲁⲩ ⲛⲉⲙ ϩⲁⲛⲕⲉⲭⲱⲟⲩⲛⲓ ⲛ̃ϥⲉⲣ ϩⲗⲓ ⲛ̃ϩⲱⲃ ⲁⲛ ⲉⲡⲧⲏⲣϥ ⲁⲗⲗⲁ ⲙ̃ⲡⲓⲉϩⲟⲟⲩ ⲛⲉⲙ ⲡⲓⲉϫⲱⲣϩ ⲛⲁϥⲙⲏⲛ ⲙⲙⲁⲩⲁⲧϥ ⲡⲉ ⲉ̃ⲛⲓϣⲗⲏⲗ ⲙ̃ⲡϭ︦ⲥ︦ ⲛⲁⲓ ⲉⲧⲉϥϯϩⲟ ⲛ̃ϧⲏⲧⲟⲩ ⲟⲩⲟϩ ⲉϥⲧⲱⲃϩ ⲉϥⲉⲣⲉⲧⲓⲛ ⲛⲟⲩ- ϩⲓⲣⲏⲛⲏ ⲛ̃ⲛⲓⲉⲕⲕⲗⲏⲥⲓⲁ̃ ⲉⲧϧⲉⲛ ϯⲟⲓⲕⲟⲩⲙⲉⲛⲏ ⲧⲏⲣⲥ ⲛⲉ ⲧⲉϥⲥⲩⲛⲏⲑⲓⲁ̃ ⲅⲁⲣ ⲧⲉ ⲑⲁⲓ ⲛ̃ⲥⲏⲟⲩ ⲛⲓⲃⲉⲛ ϧⲁⲧϩⲏ ⲇⲉ ⲛⲅ︦ ⲛⲉϩⲟⲟⲩ ⲙ̃ⲡⲁⲧⲟⲩⲧⲁϩⲟϥ ⲁ̃ ⲟⲩϩⲟⲣⲁⲙⲁ ϭⲱⲣⲡ ⲛⲁϥ ⲉ̃ⲃⲟⲗ ⲙ̃ⲡⲓⲉϫⲱⲣϩ ⲉϥϣⲗⲏⲗ ⲓⲥϫⲉⲕ ⲛⲁϥⲛⲁⲩ ⲉⲡⲉϥϩⲃⲟⲥ *ⲉⲧϩⲓϫⲱϥ ⲉ̃ⲁϥⲣⲱⲕϩ ϩⲓⲟⲩⲥⲟⲡ ⲙ̃ⲡⲁⲓⲣⲏϯ ϩⲱⲥ ⲉⲧⲁϥ- ⲣⲱⲕϩ ϩⲓⲧⲉⲛ ⲟⲩⲭⲣⲱⲙ ⲟⲩⲟϩ ⲉⲧⲁϥⲧⲱⲛϥ ϧⲉⲛ ⲟⲩⲭⲱ- ⲗⲉⲙ ⲁϥϫⲱ ⲙ̃ⲡⲓⲓ̃ⲱⲣⲡ ⲉ̃ⲃⲟⲗ ⲛ̃ⲛⲏ ⲉⲧϧⲁⲧⲟⲧϥ ⲉϥⲉⲣϣⲟⲣⲡ ⲛⲉⲣⲥⲩⲛⲙⲉⲛⲓⲛ ⲛⲱⲟⲩ ⲙ̃ⲫⲏ ⲉⲑⲛⲁϣⲱⲡⲓ ⲙ̃ⲙⲟϥ ⲟⲩⲟϩ ⲉϥⲧⲁⲙⲟ ⲙ̃ⲙⲱⲟⲩ ϧⲉⲛ ⲟⲩⲧⲁϫⲣⲟ ϫⲉ ϩⲱϯ ⲡⲉ ⲛ̃ⲧⲉϥ- ϫⲱⲕ ⲙ̃ⲡⲉϥⲃⲓⲟⲥ ⲉⲃⲟⲗϩⲓⲧⲉⲛ ⲟⲩⲭⲣⲱⲙ ⲉⲑⲃⲉ ⲡⲭ︦ⲥ︦ Ⲉⲧⲁⲩⲙⲟⲩⲛ ⲇⲉ ⲉⲃⲟⲗ ⲉⲩⲕⲱϯ ⲛⲥⲱϥ ϧⲉⲛ ⲥⲡⲟⲩⲇⲏ ⲛⲓⲃⲉⲛ ⲁⲩϭⲓⲧϥ ⲛ̃ϫⲟⲛⲥ ⲟⲛ ⲉⲃⲟⲗϩⲁ ϯⲇⲓⲁ̃ⲑⲉⲥⲓⲥ ⲛ̃ⲧⲉ ⲛⲓⲥⲛⲏⲟⲩ ⲉⲑⲃⲉ ⲡⲟⲩⲙⲉⲓ ⲉϧⲟⲩⲛ ⲉⲣⲟϥ ⲁϥⲟⲩⲱⲧⲉⲃ ⲉⲡⲓⲙⲁ ⲉⲧⲁ ⲛⲏ ⲉⲧⲕⲱϯ ⲛ̃ⲥⲱϥ ⲓ̃ ⲉⲣⲟϥ ϧⲉⲛ ⲟⲩⲭⲱⲗⲉⲙ ⲟⲩⲟϩ ⲉⲧⲁⲩⲁ̃ⲙⲁϩⲓ ⲛ̃ⲃ︦ ⲛ̃ⲕⲟⲩϫⲓ ⲛⲁⲗⲟⲩ ϧⲉⲛ ⲡⲓⲙⲁ ⲉ̃ⲧⲉⲙⲙⲁⲩ ⲁⲩⲉⲣⲃⲁⲥⲁⲛⲓⲍⲓⲛ ⲙ̃ⲙⲱⲟⲩ ϣⲁⲧⲟⲩϭⲓⲧⲟⲩ ⲉ̃ⲡⲓⲙⲁ ⲉⲧⲉ ⲡⲟⲗⲓⲕⲁⲣⲡⲟⲥ ⲛ̃ϧⲏⲧϥ ⲙ̃ⲫⲛⲁⲩ ⲇⲉ ⲛ̃ϩⲁⲛⲁⲣⲟⲩϩⲓ ⲁⲩⲓ̃ ⲉϩⲣⲏⲓ ⲉϫⲱϥ ⲁⲩϫⲉⲙϥ ϩⲓϫⲉⲛ ⲡⲓϫⲉⲛⲉⲫⲱⲣ ⲟⲩⲟϩ ⲛⲉ ⲟⲩⲟⲛ ϣϫⲟⲙ ⲙ̃ⲙⲟϥ ⲡⲉ ⲉⲑⲣⲉϥⲟⲩⲱ̃ⲧⲉⲃ ⲉⲃⲟⲗϧⲉⲛ *ⲡⲓⲙⲁ ### 0004 ⲉⲧⲉⲙⲙⲁⲩ ⲉ̃ⲕⲉⲏⲓ ⲁⲗⲗⲁ ⲙ̃ⲡⲉϥⲟⲩⲱϣ ⲉ̃ⲁϥϫⲟⲥ ϫⲉ ⲙⲁⲣⲉ ⲫⲟⲩⲱϣ ⲙ̃ⲡϭ︦ⲥ︦ ϣⲱⲡⲓ ⲟⲩⲟϩ ⲉⲧⲁϥⲉ̃ⲙⲓ ϫⲉ ⲁⲩⲓ̃ ϩⲓⲣⲉⲛ ⲫⲣⲟ ⲙ̃ⲡⲓⲏⲓ ⲕⲁⲧⲁ ⲫⲣⲏϯ ⲉ̃ⲧⲉ ⲡⲓⲥⲁϫⲓ ⲧⲁⲙⲟ ⲙ̃ⲙⲟⲛ ⲁϥⲓ̃ ⲉⲡⲉⲥⲏⲧ ϣⲁⲣⲱⲟⲩ ⲁϥⲥⲁϫⲓ ⲛⲉⲙⲱⲟⲩ ϧⲉⲛ ⲟⲩϩⲟ ⲉϥ- ⲣⲱⲟⲩⲧ ⲛⲣⲉⲙⲣⲁⲩϣ ⲉ̃ⲙⲁϣⲱ ϩⲱⲥⲇⲉ ⲛ̃ⲥⲉⲉⲣϣⲫⲏⲣⲓ ⲛ̃ϫⲉ ⲛⲏ ⲉ̃ⲧⲉ ⲛ̃ⲥⲉⲥⲱⲟⲩⲛ ⲙ̃ⲙⲟϥ ⲁⲛ ϧⲁⲧϩⲏ ⲛ̃ⲥⲁϥ ⲛⲉⲙ ⲅ︦ ⲙ̃ⲫⲟⲟⲩ ⲉⲩϫⲟⲩϣⲧ ⲛ̃ⲥⲁ ⲑⲙⲉⲧⲛⲓϣϯ ⲛ̃ⲧⲉ ⲧⲉϥϩⲩⲗⲏⲕⲓⲁ̃ ⲛⲉⲙ ⲧⲉϥⲙⲉⲧⲥⲉⲙⲛⲟⲥ ⲛⲉⲙ ⲧⲕⲁⲧⲁⲥⲧⲁⲥⲓⲥ ⲙ̃ⲡⲉϥϩⲟ ⲉⲩϫⲱ ⲙⲙⲟⲥ ϫⲉ ⲟⲩ ⲧⲉ ⲧⲁⲓⲛⲓϣϯ ⲛ̃ⲥⲡⲟⲩⲇⲏ ⲉⲑⲣⲟⲩⲕⲱϯ ⲛ̃ⲥⲁ ⲟⲩϧⲉⲗⲗⲟ ⲙ̃ⲡⲁⲓⲣⲏϯ ⲛ̃ⲑⲟϥ ⲇⲉ ⲁⲃⲃⲁ ⲡⲟⲗⲓⲕⲁⲣⲡⲟⲥ ⲁϥⲟⲩⲁϩⲥⲁϩⲛⲓ ϧⲉⲛ ⲟⲩⲓⲱⲥ ⲉⲑⲣⲟⲩⲭⲱ ϧⲁⲣⲱⲟⲩ ⲛ̃ⲟⲩⲧⲣⲁ- ⲡⲉⲍⲁ ⲓ̃ⲧⲁ ⲁϥϯϩⲟ ⲉⲣⲱⲟⲩ ⲉⲑⲣⲟⲩϭⲓ ⲉⲃⲟⲗϧⲉⲛ ⲟⲩⲧⲣⲟⲫⲏ Ⲙⲉⲛⲉⲛⲥⲁ ⲛⲁⲓ ⲁϥⲉⲣⲉⲧⲓⲛ ⲙⲙⲱⲟⲩ ⲉⲑⲣⲟⲩⲭⲁϥ ⲛ̃ⲧⲉϥ- ϣⲗⲏⲗ ⲛⲁⲡϣⲁⲩ ⲛ̃ⲟⲩⲟⲩⲛⲟⲩ ⲟⲩⲟϩ ⲉⲧⲁⲩⲭⲁϥ ⲁϥ- ⲧⲱⲛϥ ⲁϥϣⲗⲏⲗ ⲉϥⲙⲉϩ ⲉⲃⲟⲗϧⲉⲛ ⲡⲓϩⲙⲟⲧ ⲛ̃ⲧⲉ ⲡϭ︦ⲥ︦ *ϩⲱⲥⲇⲉ ⲟⲩ ⲙⲟⲛⲟⲛ ⲉⲑⲣⲟⲩⲉⲣϣⲫⲏⲣⲓ ⲛ̃ϫⲉ ⲛⲏ ⲉⲧϧⲁⲧⲟⲧϥ ⲉⲩⲥⲱⲧⲉⲙ ⲉⲣⲟϥ ⲉϥϣⲗⲏⲗ ⲁⲗⲗⲁ ϩⲁⲛⲟⲩⲟⲛ ⲉⲃⲟⲗⲛ̃ϧⲏ- ⲧⲟⲩ ⲁⲩⲉⲣⲙⲉⲧⲁⲛⲟⲓⲛ ⲉⲑⲃⲉ ϫⲉ ⲥⲉⲛⲁϧⲱⲧⲉⲃ ⲙ̃ⲡⲁⲓϧⲉⲗⲗⲟ ⲙ̃ⲡⲁⲓⲣⲏϯ ⲛⲥⲉⲙⲛⲟⲛ ⲉⲧⲟⲛⲓ ⲙ̃ⲫ︦ϯ︦ ⲡⲓⲙⲁⲕⲁⲣⲓⲟⲥ ⲇⲉ ⲡⲟⲗⲓ- ⲕⲁⲣⲡⲟⲥ ⲉⲧⲁϥϫⲉⲕ ⲡⲉϥϣⲗⲏⲗ ⲉⲃⲟⲗ ⲁϥⲉⲣⲫⲙⲉⲩⲓ̃ ⲛⲟⲩⲟⲛ ⲛⲓⲃⲉⲛ ⲛⲉⲙ ⲛⲏ ⲉⲧⲁⲩⲉⲣⲁ̃ⲡⲁⲛⲧⲁⲛ ⲉⲣⲟϥ ⲧⲏⲣⲟⲩ ⲛⲓ- ⲕⲟⲩϫⲓ ⲛⲉⲙ ⲛⲓⲛⲓϣϯ ⲛⲓⲣⲁⲙⲁⲟⲓ ⲛⲉⲙ ⲛⲓϩⲏⲕⲓ ⲟⲩⲟϩ ϯⲕⲁⲑⲟⲗⲓⲕⲏ ⲛ̃ⲉⲕⲕⲗⲏⲥⲓⲁ̃ ⲉⲧϧⲉⲛ ϯⲟⲓⲕⲟⲩⲙⲉⲛⲏ ⲧⲏⲣⲥ ⲉⲧⲁ ϯⲟⲩⲛⲟⲩ ⲇⲉ ϣⲱⲡⲓ ⲉⲑⲣⲉϥⲓ̃ ⲉⲃⲟⲗ ⲁⲩⲧⲁⲗⲟϥ ⲉ̃ⲟⲩⲓ̃ⲱ ⲁⲩⲉⲛϥ ⲉϧⲟⲩⲛ ⲉϯⲡⲟⲗⲓⲥ ⲛⲉ ⲡⲓⲛⲓϣϯ ⲇⲉ ⲛ̃ⲥⲁⲃ- ⲃⲁⲧⲟⲛ ⲡⲉ ⲡⲓⲉϩⲟⲟⲩ ⲉ̃ⲧⲉⲙⲙⲁⲩ ⲟⲩⲟϩ ⲁϥⲉⲣⲁⲡⲁⲛⲧⲁⲛ ⲉⲣⲟϥ ⲛ̃ϫⲉ ⲏⲣⲱⲇⲏⲥ ⲡⲓⲣⲏⲛⲁⲣⲭⲏⲥ ⲛⲉⲙ ⲛⲓⲕⲩⲧⲏⲥ ⲡⲉϥⲓⲱⲧ ⲛⲁⲓ ⲁⲩⲧⲁⲗⲟϥ ⲉϫⲉⲛ ⲟⲩϩⲁⲣⲙⲁ ⲉⲑⲣⲉϥϩⲉⲙⲥⲓ ϧⲁⲧⲟⲧⲟⲩ ⲛⲁⲩϯϩⲟ ⲉⲣⲟϥ ⲡⲉ ⲉⲩϫⲱ ⲙ̃ⲙⲟⲥ ϫⲉ ⲟⲩ ⲅⲁⲣ ⲡⲉ ⲡⲓ- ⲡⲉⲧϩⲱⲟⲩ ⲉⲑⲣⲉⲕϫⲟⲥ ϫⲉ ⲡϭ︦ⲥ︦ ⲕⲉⲥⲁⲣ ⲟⲩⲟϩ ⲛ̃ⲧⲉⲕⲉⲣⲑⲩ- ⲥⲓⲁ̃ ⲛ̃ⲧⲉⲕⲟⲩϫⲁⲓ *ⲛ̃ⲑⲟϥ ⲇⲉ ⲁϥⲱϣ ⲉⲃⲟⲗ ⲉϥϫⲱ ⲙ̃ⲙⲟⲥ ### 0005 ϫⲉ ⲡⲓϩⲱⲃ ⲉⲣⲉⲧⲉⲛⲉⲣⲥⲩⲙⲃⲟⲩⲗⲉⲩⲓⲛ ⲛⲏⲓ ⲉ̃ⲣⲟϥ ⲛ̃ⲛⲉⲥϣⲱⲡⲓ ⲙ̃ⲙⲟⲓ ⲉⲛⲉϩ ⲉⲑⲣⲓⲁⲓϥ ⲛⲑⲱⲟⲩ ⲇⲉ ⲉ̃ⲧⲉ ⲙⲡⲟⲩϣⲑⲉⲧ ⲡⲉϥϩⲏⲧ ⲁⲩⲧⲁⲟⲩⲟ ⲛ̃ϩⲁⲛⲥⲁϫⲓ ⲉⲩⲛⲁϣⲧ ⲉϧⲟⲩⲛ ⲉϩⲣⲁϥ ⲟⲩⲟϩ ⲁⲩⲥⲟⲕϥ ⲉ̃ⲡⲉⲥⲏⲧ ϩⲓ ⲡⲓϩⲁⲣⲙⲁ ϧⲉⲛ ⲟⲩⲛⲓϣϯ ⲛ̃ϣⲑⲟⲣⲧⲉⲣ ϩⲱⲥⲇⲉ ⲛ̃ⲥⲉⲫⲉⲗϩ ⲧⲉϥⲫⲁⲧ ⲉⲩⲓ̃ⲛⲓ ⲙⲙⲟϥ ⲉ̃ⲡⲉⲥⲏⲧ ⲛⲑⲟϥ ⲇⲉ ⲙ̃ⲡⲉϥⲉⲣⲙⲕⲁϩⲛ̃ϩⲏⲧ ⲉⲡⲧⲏⲣϥ ϩⲱⲥ ⲓⲥϫⲉⲕ ⲙ̃ⲡⲉϥϣⲉⲡ ϩⲗⲓ ⲛϧⲓⲥⲓ ⲁϥⲙⲟϣⲓ ϧⲉⲛ ⲟⲩⲥⲡⲟⲩⲇⲏ ⲛⲉⲙ ⲟⲩⲣⲱⲟⲩⲧϥ ⲉⲩⲱ̃ⲗⲓ ⲙ̃ⲙⲟϥ ⲉϧⲟⲩⲛ ⲉⲡⲓⲥⲧⲁⲇⲓⲟⲛ ⲟⲩⲟϩ ⲁ ⲟⲩⲛⲓϣϯ ⲛ̃ϣⲑⲟⲣⲧⲉⲣ ϣⲱⲡⲓ ϧⲉⲛ ⲡⲓⲥⲧⲁⲇⲓⲟⲛ ϩⲱⲥⲇⲉ ⲉⲑⲣⲉ ⲟⲩⲙⲏϣ ⲛⲁⲩ ⲉⲣⲉ ⲡⲓⲙⲁⲕⲁⲣⲓⲟⲥ ⲇⲉ ⲡⲟⲗⲓ- ⲕⲁⲣⲡⲟⲥ ϩⲏⲗ ⲉϧⲟⲩⲛ ⲉⲡⲓⲥⲧⲁⲇⲓⲟⲛ ⲁ ⲟⲩⲥⲙⲏ ϣⲱⲡⲓ ϩⲁⲣⲟϥ ⲉⲃⲟⲗϧⲉⲛ ⲧⲫⲉ ϫⲉ ⲡⲟⲗⲓⲕⲁⲣⲡⲟⲥ ϫⲉⲙⲛⲟⲙϯ ⲟⲩⲟϩ ⲛ̃ⲧⲉⲕⲧⲁϫⲣⲟ ⲡⲉⲧⲥⲁϫⲓ ⲙⲉⲛ ⲙ̃ⲡⲉ ϩⲗⲓ ⲛⲁⲩ ⲉⲣⲟϥ ϯⲥⲙⲏ ⲇⲉ ⲁ̃ ⲟⲩⲙⲏϣ ϧⲉⲛ ⲛⲏ ⲉⲧⲉⲛⲟⲩⲛ ⲥⲱⲧⲉⲙ ⲉ̃ⲣⲟⲥ *ⲉⲧⲁⲩϭⲓⲧϥ ⲇⲉ ⲉϧⲟⲩⲛ ⲁ ⲟⲩⲛⲓϣϯ ⲛ̃ϣⲑⲟⲣⲧⲉⲣ ϣⲱⲡⲓ ϧⲉⲛ ⲡϫⲓⲛⲑⲣⲟⲩⲥⲱⲧⲉⲙ ϫⲉ ⲁⲩⲧⲁϩⲉ ⲡⲟⲗⲓⲕⲁⲣⲡⲟⲥ Ⲉⲧⲁϥϯ ⲇⲉ ⲙ̃ⲡⲉϥⲟⲩⲟⲓ ⲉϧⲟⲩⲛ ⲁϥϣⲉⲛϥ ⲛ̃ϫⲉ ⲡⲓⲁⲛⲑⲩ- ⲡⲁⲧⲟⲥ ϫⲉ ⲛ̃ⲑⲟⲕ ⲡⲉ ⲡⲟⲗⲓⲕⲁⲣⲡⲟⲥ ⲟⲩⲟϩ ⲉⲧⲁϥϫⲟⲥ ϫⲉ ⲁ̃ⲛⲟⲕ ⲡⲉ ⲁϥⲉⲣϩⲏⲧⲥ ⲛ̃ϯϩⲟ ⲉⲣⲟϥ ⲉⲑⲣⲉϥϫⲱⲗ ⲉⲃⲟⲗ ⲉϥϫⲱ ⲙ̃ⲙⲟⲥ ⲛⲁϥ ϫⲉ ϣⲓⲡⲓ ϧⲁⲧϩⲏ ⲛ̃ⲧⲉⲕϩⲩⲗⲏⲕⲓⲁ̃ ⲱⲣⲕ ⲛ̃ⲧⲧⲩⲭⲏ ⲛ̃ⲕⲉⲥⲁⲣ ⲁ̃ⲣⲓⲙⲉⲧⲁⲛⲟⲓⲛ ⲁ̃ϫⲟⲥ ϫⲉ ⲁ̃ⲗⲓ̃ⲟⲩⲓ̃ ⲙ̃ⲙⲁⲩ ⲛ̃ⲛⲓⲁⲑⲛⲟⲩϯ ⲉⲧⲉ ⲛⲓⲭⲣⲏⲥⲧⲓⲁ̃ⲛⲟⲥ ⲛⲉ ⲛⲉⲙ ϩⲁⲛ- ⲕⲉⲙⲏϣ ⲛ̃ⲥⲁϫⲓ ⲙ̃ⲡⲁⲓⲣⲏϯ ⲛⲁⲓ ⲉⲧⲉ ⲧⲟⲩⲥⲩⲛⲏⲑⲓⲁ̃ ⲡⲉ ⲉϫⲟⲧⲟⲩ ⲛ̃ϫⲉ ⲛⲓⲣⲉϥϣⲁⲙϣⲉⲓ̃ⲇⲱⲗⲟⲛ ⲡⲟⲗⲓⲕⲁⲣⲡⲟⲥ ⲇⲉ ⲁϥϫⲱⲛⲧ ⲉ̃ϧⲟⲩⲛ ⲉϩⲣⲁϥ ⲙ̃ⲡⲓⲙⲏϣ ⲧⲏⲣϥ ⲉⲧϧⲉⲛ ⲡⲓⲥⲩⲛ- ⲉⲇⲣⲓⲟⲛ ϧⲉⲛ ⲟⲩϩⲟ ⲉϥⲟ̃ⲕⲉⲙ ⲟⲩⲟϩ ⲉⲧⲁϥⲕⲓⲙ ⲉⲣⲱⲟⲩ ⲛ̃ⲧⲉϥϫⲓϫ ⲁϥϥⲁⲓ ⲛ̃ⲛⲉϥⲃⲁⲗ ⲉⲡϣⲱⲓ ⲉⲧⲫⲉ ⲁϥϥⲓⲁ̃ϩⲟⲙ ⲟⲩⲟϩ ⲡⲉϫⲁϥ ϫⲉ ⲱ ⲡϭ︦ⲥ︦ ⲁⲗⲓⲟⲩⲓ̃ ⲙ̃ⲙⲁⲩ ⲙ̃ⲛⲓⲁⲑⲛⲟⲩϯ ⲛ̃ⲣⲉϥϣⲁⲙϣⲉⲓ̃ⲇⲱⲗⲟⲛ ⲉⲣⲉ ⲡⲓϩⲏⲅⲉⲙⲱⲛ ⲇⲉ ⲙⲏⲛ ⲉⲃⲟⲗ ### 0006 ⲉϥϫⲱ ⲙⲙⲟⲥ ϫⲉ ⲱⲣⲕ ⲛ̃*ⲧⲧⲩⲭⲏ ⲛ̃ⲕⲉⲥⲁⲣ ⲛ̃ⲧⲉⲕϣⲱϣ ⲙ̃ⲡϭ︦ⲥ︦ ⲟⲩⲟϩ ϯⲛⲁⲭⲁⲕ ⲉⲃⲟⲗ ⲡⲉϫⲁϥ ⲛ̃ϫⲉ ⲡⲟⲗⲓⲕⲁⲣⲡⲟⲥ ϫⲉ ⲓⲥ ⲡ︦ⲋ︦ ⲛⲣⲟⲙⲡⲓ ϣⲁ ⲫⲟⲟⲩ ϯⲟⲓ ⲛ̃ⲃⲱⲕ ⲙ̃ⲡⲁϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲟⲩⲟϩ ⲙ̃ⲡⲉϥϭⲓⲧⲧ ⲛ̃ϫⲟⲛⲥ ⲉ̃ⲛⲉϩ ⲛⲁϣ ⲟⲩⲛ ⲛ̃ⲣⲏϯ ⲁ̃ⲛⲟⲕ ⲉⲓⲛⲁϫⲉⲟⲩⲁ̃ ⲉ̃ⲡⲁⲣⲉϥⲉⲣⲡⲉⲑⲛⲁⲛⲉϥ ⲟⲩⲟϩ ⲡⲁⲟⲩⲣⲟ ⲉⲑⲛⲟϩⲉⲙ ⲙ̃ⲙⲟⲓ ⲛ̃ⲥⲏⲟⲩ ⲛⲓⲃⲉⲛ ⲉⲧⲁ ⲡⲓϩⲏⲅⲉⲙⲱⲛ ⲇⲉ ϩⲉϫϩⲱϫϥ ⲉϥϫⲱ ⲙⲙⲟⲥ ϫⲉ ⲱⲣⲕ ⲛ̃ⲧⲧⲩⲭⲏ ⲛ̃ⲕⲉⲥⲁⲣ ⲡⲉϫⲁϥ ⲛ̃ϫⲉ ⲡⲟⲗⲓⲕⲁⲣⲡⲟⲥ ϫⲉ ⲓⲥϫⲉ ⲫⲁⲓ ⲡⲉ ⲡⲉⲕϣⲟⲩ- ϣⲟⲩ ⲉⲑⲣⲓⲱⲣⲕ ⲛ̃ⲧⲧⲩⲭⲏ ⲛ̃ⲕⲉⲥⲁⲣ ⲕⲁⲧⲁ ⲫⲣⲏϯ ⲉⲧⲉⲕϫⲱ ⲙⲙⲟⲥ ϩⲱⲥ ⲉⲕⲟⲓ ⲛ̃ⲛⲁⲧⲥⲱⲟⲩⲛ ϫⲉ ⲁ̃ⲛⲟⲕ ⲛⲓⲙ ⲥⲱⲧⲉⲙ ϧⲉⲛ ⲟⲩⲡⲁⲣⲣⲏⲥⲓⲁ̃ ⲁⲛⲟⲕ ⲟⲩⲭⲣⲓⲥⲧⲓⲁⲛⲟⲥ ⲅⲁⲣ ⲉϣⲱⲡ ⲉⲕⲟⲩⲱϣ ⲉ̃ⲉⲙⲓ ⲉⲧϫⲟⲙ ⲛ̃ⲛⲓⲭⲣⲏⲥⲧⲓⲁⲛⲟⲥ ⲙⲟⲓ ⲛⲏⲓ ⲛⲟⲩ- ⲉϩⲟⲟⲩ ⲛ̃ⲧⲁⲧⲥⲁⲃⲟⲕ ⲡⲉϫⲉ ⲡⲓⲁⲛⲑⲩⲡⲁⲧⲟⲥ ϫⲉ ⲑⲉⲧ ⲡϩⲏⲧ ⲛ̃ⲛⲓⲙⲏϣ ⲁϥⲉⲣⲟⲩⲱ̃ ⲛ̃ϫⲉ ⲡⲟⲗⲓⲕⲁⲣⲡⲟⲥ ϫⲉ ⲛ̃ⲑⲟⲕ ⲙⲉⲛ ⲁⲓⲧⲁⲓⲟⲕ ⲁⲓⲉⲣⲟⲩⲱ ⲛⲁⲕ ⲉⲑⲃⲉ ϫⲉ ⲁⲩϯⲥⲱ ⲛⲁⲛ ⲉ̃ϭⲛⲉ- ϫⲱⲛ ⲛ̃ⲛⲓⲁⲣⲭⲏ ⲛⲉⲙ ⲛⲓⲉⲝⲟⲩⲥⲓⲁ̃ ⲟⲩⲟϩ ⲉⲉⲣⲧⲓⲙⲁⲛ ⲙ̃ⲙⲱⲟⲩ ⲕⲁⲧⲁ *ⲡⲉⲧⲥϣⲉ ϧⲉⲛ ⲫⲏ ⲉⲧⲉⲛⲛⲁⲉⲣⲃⲗⲁⲡⲧⲓⲛ ⲁⲛ ⲛ̃ϧⲏⲧϥ ⲛⲁⲓ ⲇⲉ ⲛ̃ⲑⲱⲟⲩ ϯϫⲱ ⲙ̃ⲙⲟⲥ ϫⲉ ⲥⲉⲙⲡϣⲁ ⲁⲛ ⲉ̃ⲉⲣⲁⲡⲟⲗⲟⲅⲓⲥⲑⲉ ⲛⲱⲟⲩ ⲉⲡⲧⲏⲣϥ ⲁϥⲟⲩⲁϩⲧⲟⲧϥ ⲟⲛ ⲛ̃ϫⲉ ⲡⲓⲁⲛⲑⲩⲡⲁⲧⲟⲥ ⲡⲉϫⲁϥ ϫⲉ ⲟⲩⲟⲛ ⲛ̃ⲧⲏⲓ ⲛ̃ϩⲁⲛⲑⲏ- ⲣⲓⲟⲛ ⲙ̃ⲙⲁⲩ ⲁⲕϣⲧⲉⲙⲉⲣⲙⲉⲧⲁⲛⲟⲓⲛ ϯⲛⲁⲧⲏⲓⲕ ⲛⲱⲟⲩ ⲡⲉϫⲁϥ ⲛ̃ϫⲉ ⲡⲟⲗⲓⲕⲁⲣⲡⲟⲥ ϫⲉ ⲁⲛⲓⲧⲟⲩ ⲟⲩⲙⲉⲧⲁⲧϫⲟⲙ ⲧⲉ ⲉⲑⲣⲉⲛⲟⲩⲱ̃ⲧⲉⲃ ⲉⲃⲟⲗϧⲉⲛ ⲛⲏ ⲉⲑⲛⲁⲛⲉⲩ ⲉⲛⲏ ⲉⲧϩⲱⲟⲩ ⲛⲁⲛⲉⲥ ⲇⲉ ⲛ̃ⲑⲟϥ ⲉⲟⲩⲱ̃ⲧⲉⲃ ⲉⲃⲟⲗϧⲉⲛ ⲛⲏ ⲉⲧϩⲱⲟⲩ ⲉⲛⲏ ⲉⲑⲛⲁⲛⲉⲩ ⲡⲉϫⲁϥ ⲟⲛ ⲛ̃ϫⲉ ⲡⲓⲁⲛⲑⲩⲡⲁⲧⲟⲥ ϫⲉ ⲁⲕϣⲁⲛ- ⲉⲣⲕⲁⲧⲁⲫⲣⲟⲛⲓⲛ ⲛ̃ⲛⲓⲑⲏⲣⲓⲟⲛ ϯⲛⲁⲉⲣⲇⲁⲙⲁⲍⲓⲛ ⲙⲙⲟⲕ ϧⲉⲛ ⲡⲓⲭⲣⲱⲙ ⲡⲉϫⲉ ⲡⲟⲗⲓⲕⲁⲣⲡⲟⲥ ϫⲉ ⲉⲕϯϩⲟϯ ⲛⲏⲓ ⲉⲟⲩⲭⲣⲱⲙ ⲫⲁⲓ ⲉϣⲁϥϭⲣⲟ ⲡⲣⲟⲥ ⲟⲩⲟⲩⲛⲟⲩ ϥⲛⲁⲱ̃ϣⲉⲙ ⲇⲉ ⲙⲉⲛⲉⲛⲥⲁ ⲟⲩⲕⲟⲩϫⲓ ⲕⲱⲓ ⲛⲁⲧⲉ̃ⲙⲓ ⲇⲉ ⲉ̃ⲡⲓⲭⲣⲱⲙ ### 0007 ⲛ̃ⲧⲉ ϯⲕⲣⲓⲥⲓⲥ ⲉⲑⲛⲁϣⲱⲡⲓ ⲛⲉⲙ ⲛⲓⲕⲟⲗⲁⲥⲓⲥ ⲛⲉⲛⲉϩ ⲛⲁⲓ ⲉⲧⲟⲩⲁ̃ⲣⲉϩ ⲉⲣⲱⲟⲩ ⲛ̃ⲛⲓⲁ̃ⲥⲉⲃⲏⲥ ⲁⲗⲗⲁ ⲟⲩ ⲡⲉ ⲉⲧⲉⲕ- ϭⲓⲁ̃ⲟⲩⲱ̃ ⲛⲁϥ ⲁ̃ⲛⲓⲟⲩⲓ̃ ⲙ̃ⲡⲉⲧⲉⲕⲟⲩⲁϣϥ *ⲛⲁⲓ ⲇⲉ ⲛⲉⲙ ⲛⲁⲓⲕⲉⲭⲱⲟⲩⲛⲓ ⲁϥϫⲟⲧⲟⲩ ⲛ̃ϫⲉ ⲡⲓⲙⲁⲕⲁⲣⲓⲟⲥ ⲡⲟⲗⲓⲕⲁⲣ- ⲡⲟⲥ ⲉϥⲙⲉϩ ⲛ̃ⲣⲁϣⲓ ϩⲓ ⲧⲁϫⲣⲟ ⲛϩⲏⲧ ⲟⲩⲟϩ ⲉⲣⲉ ⲡⲉϥϩⲟ ⲙⲉϩ ⲛ̃ⲭⲁⲣⲓⲥ ϩⲱⲥⲇⲉ ⲟⲩ ⲙⲟⲛⲟⲛ ⲙ̃ⲡⲉϥϣⲑⲟⲣⲧⲉⲣ ⲉϫⲉⲛ ⲛⲏ ⲉⲧⲟⲩϫⲱ ⲙⲙⲱⲟⲩ ⲛⲁϥ ⲁⲗⲗⲁ ⲙⲁⲗⲗⲟⲛ ⲛ̃ⲑⲟϥ ⲁϥⲑⲣⲉ ⲡⲓⲁⲛⲑⲩⲡⲁⲧⲟⲥ ϫⲱⲛⲧ Ⲉⲡϧⲁⲉ̃ ⲇⲉ ⲁ ⲡⲓⲁⲛⲑⲩⲡⲁⲧⲟⲥ ⲟⲩⲱⲣⲡ ⲛ̃ⲟⲩⲕⲩⲣⲓⲝ ⲁϥⲱϣ ⲉⲃⲟⲗ ϧⲉⲛ ⲡⲓⲥⲧⲁⲇⲓⲟⲛ ⲛⲅ︦ ⲛⲥⲟⲡ ϫⲉ ⲁ ⲡⲟⲗⲓ- ⲕⲁⲣⲡⲟⲥ ⲉⲣⲟ̃ⲙⲟⲗⲟⲅⲓⲛ ϫⲉ ⲁ̃ⲛⲟⲕ ⲟⲩⲭⲣⲏⲥⲧⲓⲁ̃ⲛⲟⲥ ⲛⲁⲓ ⲇⲉ ⲉⲧⲁϥϫⲟⲧⲟⲩ ⲛ̃ϫⲉ ⲡⲓⲕⲩⲣⲓⲝ ⲁ̃ ⲡⲓⲙⲏϣ ⲧⲏⲣϥ ⲛ̃ⲧⲉ ⲛⲓ ϩⲉⲗⲗⲏⲛⲟⲥ ⲛⲉⲙ ⲛⲓⲓ̃ⲟⲩⲇⲁⲓ ⲉⲧϣⲟⲡ ϧⲉⲛ ⲥⲙⲩⲣⲛⲁ ⲱϣ ⲉⲃⲟⲗ ⲉⲩⲥⲟⲡ ϧⲉⲛ ⲟⲩⲛⲓϣϯ ⲙ̃ⲥⲙⲏ ⲛⲉⲙ ⲟⲩϫⲱⲛⲧ ⲛⲁⲧ- ⲁ̃ⲙⲁϩⲓ ϫⲉ ⲫⲁⲓ ⲡⲉ ⲡⲥⲁϧ ⲛ̃ϯⲁⲥⲓⲁ̃ ⲧⲏⲣⲥ ⲉⲫⲓⲱⲧ ⲡⲉ ⲛ̃ⲛⲓⲭⲣⲏⲥⲧⲓⲁ̃ⲛⲟⲥ ⲟⲩⲟϩ ⲉϥⲃⲱⲗ ⲉⲃⲟⲗ ⲛ̃ⲛⲓⲛⲟⲩϯ ⲉϥϯⲥⲃⲱ ⲛⲟⲩⲙⲏϣ ⲉϣⲧⲉⲙⲉⲣⲑⲩⲥⲓⲁ̃ ⲟⲩⲟϩ ⲉϣⲧⲉⲙⲟⲩⲱϣⲧ ⲛⲱⲟⲩ ⲛⲁⲓ ⲉⲩϫⲱ ⲙⲙⲱⲟⲩ ⲁⲩⲱϣ ⲉⲃⲟⲗ ϩⲓ ⲟⲩⲥⲟⲡ ⲉⲩϯϩⲟ ⲉ̃ⲫⲩⲗⲓⲡⲡⲟⲥ ⲡⲁⲣⲭⲱⲛ ⲛ̃ϯⲁ̃ⲥⲓⲁ̃ ϫⲉ ϩⲓⲛⲁ ⲛ̃ⲧⲉϥⲭⲱ ⲛⲟⲩⲙⲟⲩⲓ̃ ⲉⲃⲟⲗ ⲉⲡⲟⲗⲓⲕⲁⲣⲡⲟⲥ *ⲛ̃ⲑⲟϥ ⲇⲉ ⲡⲉϫⲁϥ ϫⲉ ⲥⲧⲟⲓ ⲛⲏⲓ ⲁⲛ ⲉⲡⲓⲇⲏ ⲁϥϫⲱⲕ ⲉⲃⲟⲗ ⲛ̃ϫⲉ ⲡⲥⲏⲟⲩ ⲛ̃ⲛⲓ- ⲕⲩⲛⲓⲕⲓⲟⲛ ⲧⲟⲧⲉ ⲁⲥⲉⲣⲇⲟⲕⲓⲛ ⲛⲱⲟⲩ ⲧⲏⲣⲟⲩ ϩⲓ ⲟⲩⲥⲟⲡ ⲟⲩⲟϩ ⲁⲩⲱϣ ⲉⲃⲟⲗ ϫⲉ ϩⲓⲛⲁ ⲛ̃ⲧⲟⲩⲣⲱⲕϩ ⲙ̃ⲡⲟⲗⲓⲕⲁⲣ- ⲡⲟⲥ ⲛⲉ ϩⲱϯ ⲅⲁⲣ ⲡⲉ ⲛⲧⲉϥϫⲱⲕ ⲉⲃⲟⲗ ⲛ̃ϫⲉ ⲡⲓϩⲟⲣⲁⲙⲁ ⲉⲧⲁϥⲟⲩⲱⲛϩ ⲛⲁϥ ⲉⲃⲟⲗ ϧⲉⲛ ⲡⲓⲉϩⲟⲟⲩ ⲉⲧⲁϥⲛⲁⲩ ⲉⲣⲟϥ ⲉϥϣⲗⲏⲗ ⲉⲧⲁ ⲡⲉϥϩⲃⲟⲥ ⲣⲱⲕϩ ϧⲉⲛ ⲟⲩⲭⲣⲱⲙ ⲟⲩⲟϩ ⲁϥⲕⲟⲧϥ ⲉ̃ⲛⲓⲡⲓⲥⲧⲟⲥ ⲉⲑⲛⲉⲙⲁϥ ⲁϥϫⲟⲥ ⲛⲱⲟⲩ ϧⲉⲛ ⲟⲩ- ⲡⲣⲟⲫⲏⲧⲓⲁ̃ ϫⲉ ⲥⲑⲏϣ ⲛⲏⲓ ⲉⲑⲣⲟⲩⲣⲟⲕϩⲧ ⲉⲓⲟⲛϧ ⲫⲁⲓ ⲇⲉ ⲁϥϣⲱⲡⲓ ϩⲓⲧⲉⲛ ⲟⲩⲛⲓϣϯ ⲛ̃ϣⲑⲟⲣⲧⲉⲣ ϧⲉⲛ ⲡϫⲓⲛⲑⲣⲉ ### 0008 ⲛⲓⲙⲏϣ ⲑⲱⲟⲩϯ ⲉϧⲟⲩⲛ ϧⲉⲛ ⲟⲩⲭⲱⲗⲉⲙ ⲛ̃ϩⲁⲛϣⲉ ⲛⲉⲙ ϩⲁⲛⲙⲏϣ ⲛ̃ⲗⲉⲃϣ ⲉⲃⲟⲗϧⲉⲛ ⲛⲓⲉⲣⲕⲁⲥⲧⲏⲣⲓⲟⲛ ⲛⲉⲙ ⲛⲓ- ⲥⲓⲱⲟⲩⲛⲓ ⲛ̃ϩⲟⲩⲟ̃ ⲇⲉ ⲛⲓⲓⲟⲩⲇⲁⲓ ϩⲱⲥ ⲉ̃ⲧⲟⲩⲥⲩⲛⲏⲑⲓⲁ̃ ⲧⲉ ⲉ̃ⲉⲣⲇⲓⲁⲕⲟⲛⲓⲛ ⲉ̃ⲛⲁⲓϩⲃⲏⲟⲩⲓ ⲙ̃ⲡⲁⲓⲣⲏϯ ϧⲉⲛ ⲟⲩⲣⲱⲟⲩⲧϥ Ⲉⲧⲁⲩⲥⲟⲃϯ ⲇⲉ ⲛ̃ϯϩⲣⲱ ⲁϥⲭⲱ ⲉϧⲣⲏⲓ ⲛ̃ⲛⲉϥϩⲃⲱⲥ ⲛ̃ϫⲉ ⲡⲓⲥⲧⲩⲗⲟⲥ ⲛ̃ⲧⲉ ϯⲙⲉⲑⲙⲏⲓ ⲡⲟⲗⲓⲕⲁⲣⲡⲟⲥ ⲟⲩⲟϩ ⲉⲧⲁϥⲃⲱⲗ ⲉ̃ⲃⲟⲗ ⲛ̃ⲧⲉϥⲍⲱⲛⲏ *ⲁϥϭⲱⲛⲧ ⲟⲛ ⲉⲃⲱⲗ ⲉⲃⲟⲗ ⲙ̃ⲡⲉϥⲑⲱⲟⲩⲓ̃ ⲕⲉⲧⲟⲓⲅⲉ ⲙ̃ⲡⲁϥⲓ̃ⲣⲓ ⲙ̃ⲫⲁⲓ ⲛ̃ϣⲟⲣⲡ ⲉⲑⲃⲉ ϫⲉ ϣⲁⲣⲉ ⲫⲟⲩⲁⲓ ⲫⲟⲩⲁⲓ ⲛ̃ⲛⲓⲡⲓⲥⲧⲟⲥ ⲓⲱⲥ ⲛ̃ⲥⲏⲟⲩ ⲛⲓⲃⲉⲛ ⲉϭⲟϩ ⲉ̃ⲛⲉϥϩⲃⲱⲥ ⲓ̃ⲉ̃ ⲡⲉϥⲥⲱⲙⲁ ⲉⲑⲃⲉ ⲧⲉϥⲡⲟⲗⲏⲧⲓⲁ̃ ⲉⲑⲛⲁ ⲛⲉⲥ ⲉⲛⲁϥⲥⲉⲗⲥⲱⲗ ⲇⲉ ⲟⲛ ⲡⲉ ϧⲉⲛ ϯⲙⲉⲧϧⲉⲗⲗⲟ ⲛϯⲟⲩ ⲛⲟⲩ ⲇⲉ ⲁⲩⲥⲟⲛϩϥ ϧⲉⲛ ϩⲁⲛⲟⲣⲅⲁⲛⲟⲛ ⲛⲁⲓ ⲉⲧⲉ ϣⲁⲩ- ⲥⲱⲛϩ ⲛ̃ϧⲏⲧⲟⲩ ⲛ̃ⲛⲏ ⲉⲧⲟⲩⲛⲁⲣⲟⲕϩⲟⲩ ⲉ̃ⲧⲁⲩⲓ̃ ⲇⲉ ⲟⲛ ϫⲉ ⲉⲩⲛⲁⲟϥⲧϥ ⲛ̃ϩⲁⲛⲓϥⲧ ⲡⲉϫⲁϥ ϫⲉ ⲕⲏⲛ ⲉⲣⲱⲧⲉⲛ ⲛⲉⲙⲏⲓ ⲙ̃ⲡⲁⲓⲣⲏϯ ⲫⲏ ⲉⲧⲁϥⲑⲁϣⲧ ⲅⲁⲣ ⲉⲑⲣⲓⲙⲟⲩ ϧⲉⲛ ⲡⲓⲭⲣⲱⲙ ϥⲛⲁϯ ⲡⲓⲣⲏϯ ⲛⲏⲓ ⲟⲛ ⲉⲑⲣⲓϥⲁⲓ ϧⲁⲣⲟϥ ⲭⲱⲣⲓⲥ ⲡⲧⲁϫⲣⲟ ⲛⲛⲓϥⲧ ⲛ̃ⲑⲱⲟⲩ ⲇⲉ ⲙ̃ⲡⲟⲩϯ ⲓϥⲧ ⲛⲁϥ ⲁⲗⲗⲁ ⲁⲩⲥⲟⲛϩϥ ⲙ̃ⲙⲁⲩⲁⲧϥ ⲛ̃ⲑⲟϥ ϩⲱϥ ⲁϥⲉⲛ ⲛⲉϥϫⲓϫ ϩⲓ ⲫⲁϩⲟⲩ ⲙ̃ⲙⲟϥ ⲉⲧⲁⲩⲥⲟⲛϩϥ ⲇⲉ ⲙ̃ⲫⲣⲏϯ ⲛⲟⲩⲱⲓⲗⲓ ⲉϥⲥⲟⲧⲡ ⲉⲩⲛⲁⲧⲁⲗⲟϥ ϩⲣⲏⲓ ⲛⲟⲩϭⲗⲓⲗ ⲉϥϣⲏⲡ ⲙ̃ⲫ︦ϯ︦ ⲙ̃ⲡⲓⲡⲁⲛⲧⲟⲕⲣⲁⲧⲱⲣ ⲁϥⲟⲩⲱⲛ ⲛ̃ⲣⲱϥ ⲡⲉϫⲁϥ ϫⲉ ⲫⲓⲱⲧ ⲙ̃ⲫⲏ ⲉⲧⲥⲙⲁⲙⲁⲧ *ⲡⲉⲕⲙⲉⲛⲣⲓⲧ ⲛ̃ϣⲏⲣⲓ ⲙ̃ⲙⲟⲛⲟⲅⲉⲛⲏⲥ ⲓⲏ︦ⲥ︦ ⲡⲭ︦ⲥ︦ ⲡⲉⲛϭ︦ⲥ︦ ⲫⲁⲓ ⲉⲧⲁⲛϭⲓ ⲙⲡⲉⲕⲥⲱⲟⲩⲛ ⲉ̃ⲃⲟⲗϩⲓⲧⲟⲧϥ ⲫ︦ϯ︦ ⲛ̃ⲛⲓⲁⲅⲅⲉⲗⲟⲥ ⲛⲉⲙ ⲛⲓϫⲟⲙ ⲫ︦ϯ︦ ⲛ̃ⲥⲱⲛⲧ ⲛⲓⲃⲉⲛ ⲫ︦ϯ︦ ⲛ̃ⲧⲉ ⲡⲅⲉⲛⲟⲥ ⲧⲏⲣϥ ⲛ̃ⲛⲓⲇⲓⲕⲉⲟⲥ ⲉⲧⲟⲛϧ ⲙ̃ⲡⲉⲕⲙ̃ⲑⲟ ⲉⲃⲟⲗ ⲛ̃ⲥⲏⲟⲩ ⲛⲓⲃⲉⲛ ϯϣⲉⲡϩⲙⲟⲧ ⲛ̃ⲧⲟⲧⲕ ϫⲉ ⲁⲕⲁⲓⲧ ⲛⲉⲙⲡϣⲁ ⲙ̃ⲡⲁⲓⲉϩⲟⲟⲩ ⲛⲉⲙ ⲧⲁⲓⲟⲩⲛⲟⲩ ⲉⲑⲣⲓϭⲓ ϩⲱ ⲛⲟⲩⲙⲉⲣⲟⲥ ϧⲉⲛ ⲧⲏⲡⲓ ⲛ̃ⲛⲓⲙⲁⲣⲧⲩⲣⲟⲥ ⲛ̃ⲧⲉ ⲡⲭ︦ⲥ︦ ⲉⲑⲣⲉⲕⲟⲡⲧ ⲛ̃ϩⲣⲏⲓ ⲛ̃ϧⲏⲧⲟⲩ ⲉⲕⲉϣⲟⲡⲧ ⲉⲣⲟⲕ ⲙ̃ⲫⲟⲟⲩ ⲙ̃ⲫⲣⲏϯ ⲛⲟⲩⲑⲩⲥⲓⲁ̃ ⲉⲥⲕⲉⲛⲓⲱ̃ⲟⲩⲧ ⲟⲩⲟϩ ⲉⲥϣⲏⲡ ⲕⲁⲧⲁ ⲫⲣⲏϯ ⲉⲧⲁⲕⲉⲣϣⲟⲣⲡ ⲛ̃ⲥⲉⲃⲧⲱⲧⲥ ⲟⲩⲟϩ ⲁⲕⲉⲣϣⲟⲣⲡ ⲛ̃ⲟⲩⲟⲛϩⲥ ⲉ̃ⲃⲟⲗ ⲟⲩⲟϩ ⲁⲕϫⲟⲕⲥ ⲉⲃⲟⲗ ### 0009 ⲫ︦ϯ︦ ⲙ̃ⲙⲏⲓ ⲫⲏ ⲉ̃ⲧⲉ ⲙ̃ⲙⲟⲛ ϩⲗⲓ ⲙ̃ⲙⲉⲑⲛⲟⲩϫ ⲛⲁϣϧⲱⲛⲧ ⲉ̃ⲣⲟϥ ϯⲥⲙⲟⲩ ⲉⲣⲟⲕ ϯϭⲓⲥⲓ ⲙ̃ⲙⲟⲕ ϯϯⲱⲟⲩ ⲛⲁⲕ ⲉⲃⲟⲗ- ϩⲓⲧⲉⲛ ⲡⲓⲁⲣⲭⲓⲉⲣⲉⲩⲥ ⲙ̃ⲙⲏⲓ ϣⲁ ⲉⲛⲉϩ ⲡⲉⲛϭ︦ⲥ︦ ⲓⲏ︦ⲥ︦ ⲡⲭ︦ⲥ︦ ⲡⲉⲕⲙⲟⲛⲟⲅⲉⲛⲏⲥ ⲛ̃ϣⲏⲣⲓ ⲙ̃ⲙⲉⲛⲣⲓⲧ *ⲫⲏ ⲉⲧⲉ ⲉⲃⲟⲗϩⲓⲧⲟⲧϥ ⲡⲓⲱ̃ⲟⲩ ⲛⲁⲕ ⲛⲉⲙⲁϥ ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ϯⲛⲟⲩ ⲛⲉⲙ ⲛ̃ⲥⲏⲟⲩ ⲛⲓⲃⲉⲛ ⲛⲉⲙ ϣⲁ ⲉ̃ⲛⲉϩ ⲛ̃ⲧⲉ ⲛⲓⲉ̃ⲛⲉϩ ⲧⲏⲣⲟⲩ Ⲉⲧⲁϥⲟⲩⲱⲣⲡ ⲇⲉ ⲉⲡϣⲱⲓ ⲙ̃ⲡⲓⲁ̃ⲙⲏⲛ ⲟⲩⲟϩ ⲉⲧⲁϥϫⲱⲕ ⲉⲃⲟⲗ ⲛ̃ⲧⲉϥⲡⲣⲟⲥⲉⲩⲭⲏ ⲧⲟⲧⲉ ⲁⲩϭⲉⲣⲟ ⲙ̃ⲡⲓⲭⲣⲱⲙ ⲛ̃ϫⲉ ⲛⲓⲣⲱⲙⲓ ⲉⲧⲏⲡ ⲉ̃ⲡⲓⲭⲣⲱⲙ ⲟⲩⲟϩ ⲉⲧⲁ ⲟⲩⲛⲓϣϯ ⲛ̃ϣⲁϩ ϣⲱⲡⲓ ⲁⲛⲛⲁⲩ ⲁⲛⲟⲛ ⲉⲟⲩϣⲫⲏⲣⲓ ϧⲁ ⲛⲏ ⲉⲧⲁ ⲡϭ︦ⲥ︦ ⲧⲏⲓⲥ ⲛⲱⲟⲩ ⲉⲑⲣⲟⲩⲛⲁⲩ ⲛⲁⲓ ⲟⲛ ⲉⲧⲁⲩⲁⲣⲉϩ ⲉⲣⲱⲟⲩ ⲉⲑⲣⲟⲩⲟ̃ϩⲓ ⲉⲡⲕⲉⲥⲉⲡⲓ ⲛ̃ⲛⲏ ⲉ̃ⲧⲁⲩϣⲱⲡⲓ ⲡⲓⲭⲣⲱⲙ ⲅⲁⲣ ⲁϥⲉⲣ ⲡⲥⲙⲟⲧ ⲛ̃ⲟⲩⲭⲏⲡⲓ ⲟⲩⲟϩ ⲟⲩⲗⲁⲟⲩⲟ̃ ⲓ̃ϫⲟⲓ ⲁⲉⲉⲙⲉϩ ⲛ̃ⲑⲏⲟⲩ ⲁϥⲉⲣⲥⲟⲃⲧ ⲉⲡⲥⲱⲙⲁ ⲛ̃ⲡⲓⲙⲁⲣⲧⲩⲣⲟⲥ ⲉϥⲕⲱϯ ⲟⲩⲟϩ ⲛⲁϣⲟⲡ ⲡⲉ ϧⲉⲛ ⲑⲙⲏϯ ⲙ̃ⲡⲓⲭⲣⲱⲙ ⲙ̃ⲫⲣⲏϯ ⲁⲛ ⲛ̃ⲟⲩ- ⲥⲁⲣⲝ ⲉⲩⲣⲱⲕϩ ⲙ̃ⲙⲟⲥ ⲁⲗⲗⲁ ⲙ̃ⲫⲣⲏϯ ⲛⲟⲩⲛⲟⲩⲃ ⲛⲉⲙ ⲟⲩϩⲁⲧ ⲉⲩⲫⲓⲥⲓ ⲙ̃ⲙⲟϥ ϧⲉⲛ ⲟⲩⲭⲣⲱⲙ ⲕⲉⲅⲁⲣ ⲁⲛϣⲱ- ⲗⲉⲙ ⲉⲟⲩⲥⲑⲟⲓⲛⲟⲩϥⲓ ⲙ̃ⲡⲁⲓⲣⲏϯ ⲙ̃ⲫⲣⲏϯ ⲛⲟⲩⲗⲓⲃⲁⲛⲟⲥ ⲉϥϣⲱϣ ⲓ̃ⲉ̃ ⲛ̃ⲑⲟϥ ⲕⲉⲓ̃ⲇⲟⲥ ⲉⲃⲟⲗϧⲉⲛ ⲛⲓⲥⲑⲟⲓϥⲓ³ ⲉⲧⲧⲁⲓ̃- ⲏ̃ⲟⲩⲧ *ⲉⲡϧⲁⲉ ⲇⲉ ⲉ̃ⲧⲁⲩⲛⲁⲩ ⲛ̃ϫⲉ ⲛⲓⲁ̃ⲛⲟⲙⲟⲥ ϫⲉ ⲙ̃ⲙⲟⲛ ϣϫⲟⲙ ⲉⲑⲣⲉ ⲡⲉϥⲥⲱⲙⲁ ⲙⲟⲩⲛⲕ ϩⲓⲧⲉⲛ ⲡⲓⲭⲣⲱⲙ ⲁϥⲟⲩⲁϩⲥⲁϩⲛⲓ ⲉⲑⲣⲉ ⲟⲩⲁⲓ ⲛ̃ⲛⲓⲙⲁⲧⲟⲓ ϯ ⲙ̃ⲡⲉϥⲟⲩⲟⲓ ⲉⲣⲟϥ ⲛ̃ⲧⲉϥϧⲉⲗϧⲱⲗϥ ϧⲉⲛ ⲟⲩⲥⲏϥⲓ ⲟⲩⲟϩ ⲉⲧⲁϥⲓ̃ⲣⲓ ⲙ̃ⲫⲁⲓ ⲁϥⲓ̃ ⲉⲃⲟⲗ ⲛ̃ϫⲉ ⲟⲩⲙⲏϣ ⲛ̃ⲥⲛⲟϥ ϩⲱⲥⲇⲉ ⲉⲑⲣⲉϥⲱ̃ϣⲉⲙ ⲛ̃ϫⲉ ⲡⲓⲭⲣⲱⲙ ⲟⲩⲟϩ ⲡⲓⲙⲏϣ ⲧⲏⲣϥ ⲁϥⲉⲣϣⲫⲏⲣⲓ ϫⲉ ⲟⲩⲟⲛ ⲟⲩⲛⲓϣϯ ⲛ̃ϣⲓⲃϯ ϣⲟⲡ ⲛ̃ⲛⲓⲁⲑⲛⲁϩϯ ⲛⲉⲙ ⲛⲏ ⲉⲧⲥⲟⲧⲡ ⲟⲩⲁⲓ ⲇⲉ ⲛ̃ϧⲏⲧⲟⲩ ⲡⲉ ⲫⲁⲓ ⲉⲧⲁϥϣⲱⲡⲓ ⲛϣⲫⲏⲣⲓ ϧⲉⲛ ⲛⲉⲛⲥⲛⲏⲟⲩ ⲫⲁⲓ ⲉⲧⲁϥϣⲱⲡⲓ ⲛ̃ⲥⲁϧ ⲟⲩⲟϩ ⲛⲁⲡⲟⲥⲧⲟⲗⲟⲥ ⲟⲩⲟϩ ⲙ̃ⲡⲣⲟⲫⲏⲧⲏⲥ ⲟⲩⲟϩ ⲛⲉⲡⲓⲥⲕⲟⲡⲟⲥ ### 0010 ⲛ̃ⲧⲉ ϯⲕⲁⲑⲟⲗⲓⲕⲓⲕⲏ ⲛ̃ⲉⲕⲕⲗⲏⲥⲓⲁ̃ ⲧⲏⲣⲥ ⲉⲧϧⲉⲛ ⲥⲙⲩⲣⲛⲁ ⲟⲩⲟϩ ⲫⲁⲓ ⲡⲉ ⲡⲓⲣⲏϯ ⲉⲧⲁϥϫⲱⲕ ⲉⲃⲟⲗ ⲛ̃ⲧⲉϥⲙⲁⲣⲧⲩⲣⲓⲁ̃ ⲛ̃ϫⲉ ⲫⲏ ⲉⲑⲟⲩⲁⲃ ⲛⲉⲡⲓⲥⲕⲟⲡⲟⲥ ⲁⲃⲃⲁ ⲡⲟⲗⲓⲕⲁⲣⲡⲟⲥ ϧⲉⲛ ⲟⲩϩⲓⲣⲏⲛⲏ ⲛ̃ⲧⲉ ⲫ︦ϯ︦ ⲛⲥⲟⲩⲕ︦ⲑ︦ ⲙ̃ⲡⲓⲁⲃⲟⲧ ⲙⲉⲭⲓⲣ ⲟⲩⲟϩ ⲥⲁϫⲓ ⲛⲓⲃⲉⲛ ⲉⲧⲁⲩⲓ︦ ⲉⲃⲟⲗϧⲉⲛ ⲣⲱϥ ⲁⲩϫⲱⲕ ⲉⲃⲟⲗ Ⲡⲓⲇⲓⲁⲃⲟⲗⲟⲥ ⲙ̃ⲡⲟⲛⲏⲣⲟⲥ *ⲟⲩⲟϩ ⲛ̃ⲣⲉϥⲭⲟϩ ⲟⲩⲟϩ ⲡⲓⲁⲛⲧⲓⲕⲩⲙⲉⲛⲟⲥ ⲉⲧⲁϥⲉ̃ⲙⲓ ⲉⲑⲙⲉⲧⲛⲓϣϯ ⲛ̃ⲧⲉϥⲙⲁⲣⲧⲩⲣⲓⲁ̃ ⲛⲉⲙ ⲧⲉϥⲡⲟⲗⲏⲧⲓⲁ̃ ⲓⲥϫⲉⲛ ϣⲟⲣⲡ ⲛⲁⲧⲑⲱⲗⲉⲃ ⲟⲩⲟϩ ϫⲉ ⲁⲩϯⲭⲗⲟⲙ ⲉϫⲱϥ ϧⲉⲛ ⲡⲓⲭⲗⲟⲙ ⲛ̃ⲧⲉ ϯⲙⲉⲧⲁⲧⲧⲁⲕⲟ ⲉ̃ⲁϥϭⲓ ⲙ̃ⲡⲓⲃⲁⲓ ⲛ̃ⲧⲉ ⲡⲓϭⲣⲟ ⲁϥⲓ̃ⲏⲥ ⲛ̃ⲑⲟϥ ⲡⲓⲇⲓⲁⲃⲟⲗⲟⲥ ⲉϣⲧⲉⲙⲑⲣⲉⲛⲱⲗⲓ ⲙ̃ⲡⲉϥⲥⲱⲙⲁ ⲕⲉⲡⲉⲣ ⲉⲣⲉ ⲟⲩⲟⲛ ⲟⲩⲙⲏϣ ⲉⲣⲉ̃ⲡⲓⲑⲩⲙⲓⲛ ⲉ̃ⲫⲁⲓ ⲉⲑⲣⲟⲩϭⲟϩ ⲉⲧⲉϥⲥⲁⲣⲝ ⲉⲑⲟⲩⲁⲃ ϩⲁⲛ- ⲟⲩⲟⲛ ⲙⲉⲛ ⲁⲩⲥⲓϯ ⲛ̃ⲛⲓⲕⲩⲧⲏⲥ ⲉϧⲟⲩⲛ ⲫⲓⲱⲧ ⲛ̃ⲏⲣⲱⲇⲏⲥ ⲉⲑⲣⲉϥⲥⲉⲙⲛⲓ ⲙ̃ⲡⲓϩⲏⲅⲉⲙⲱⲛ ϫⲉ ϩⲓⲛⲁ ⲛ̃ⲧⲟⲩϣⲧⲉⲙϯ ⲛⲁⲛ ⲙ̃ⲡⲉϥⲥⲱⲙⲁ ⲡⲉϫⲁϥ ⲅⲁⲣ ϫⲉ ⲙⲏⲡⲟⲧⲉ ⲛ̃ⲥⲉϩⲉⲛⲟⲩ ⲉⲃⲟⲗ ⲙ̃ⲫⲏ ⲉⲧⲁⲩⲁϣϥ ⲉ̃ⲡⲓⲥⲧⲁⲩⲣⲟⲥ ⲛ̃ⲥⲉⲉⲣϩⲏⲧⲥ ⲇⲉ ⲟⲛ ⲛ̃ϣⲉⲙ- ϣⲓ ⲙ̃ⲡⲁⲓⲕⲉⲟⲩⲁⲓ ⲛⲁⲓ ⲁϥϫⲟⲧⲟⲩ ⲉⲣⲉ ⲛⲓⲓⲟⲩⲇⲁⲓ ⲕⲱⲗⲡ ⲙ̃ⲙⲟϥ ⲟⲩⲟϩ ⲉⲩϯⲧⲁϫⲣⲟ ⲛ̃ϩⲏⲧ ⲛⲁϥ ⲛⲁⲓ ⲟⲛ ⲉⲧⲁⲩ ⲁ̃ⲣⲉϩ ⲉⲣⲟⲛ ⲉϣⲧⲉⲙⲑⲣⲉⲛⲓ̃ⲛⲓ ⲙ̃ⲡⲉϥⲥⲱⲙⲁ ⲉⲃⲟⲗϧⲉⲛ ⲡⲓⲭⲣⲱⲙ *ⲉⲩⲟⲓ ⲛⲁⲧⲥⲱⲟⲩⲛ ⲛ̃ϫⲉ ⲛⲓⲉⲃⲓⲏⲛ ϫⲉ ⲟⲩⲇⲉ ⲡⲭ︦ⲥ︦ ⲧⲉⲛ- ⲛⲁⲭⲁϥ ⲛ̃ⲥⲱⲛ ⲁⲛ ϣⲁ ⲉ̃ⲛⲉϩ ⲫⲁⲓ ⲉⲧⲁϥⲙⲟⲩ ϧⲁ ⲡⲟⲩ- ϫⲁⲓ ⲙ̃ⲡⲓⲕⲟⲥⲙⲟⲥ ⲧⲏⲣϥ ⲟⲩⲇⲉ ⲟⲛ ⲧⲉⲛⲛⲁϣⲉⲙϣⲓ ⲁⲛ ⲛ̃ⲕⲉⲟⲩⲁⲓ ⲉⲃⲏⲗ ⲉⲣⲟϥ ⲛ̃ⲑⲟϥ ⲙⲉⲛ ⲅⲁⲣ ⲧⲉⲛⲟⲩⲱϣⲧ ⲙ̃ⲙⲟϥ ϫⲉ ⲡϣⲏⲣⲓ ⲙ̃ⲫ︦ϯ︦ ⲉⲧⲟⲛϧ ⲡⲉ ⲛⲓⲙⲁⲣⲧⲩⲣⲟⲥ ⲇⲉ ϩⲱⲟⲩ ⲧⲉⲛⲙⲉⲓ ⲙ̃ⲙⲱⲟⲩ ⲕⲁⲧⲁ ⲡⲟⲩⲙ̃ⲡϣⲁ ϩⲱⲥ ⲙⲁ- ⲑⲏⲧⲏⲥ ⲟⲩⲟϩ ⲛ̃ⲣⲉϥⲧⲉⲛⲑⲱⲛⲟⲩ ⲉⲡⲟⲩϭ︦ⲥ︦ ⲉⲑⲃⲉ ⲡⲟⲩⲙⲉⲓ ⲉⲧⲥⲟⲩⲧⲱⲛ ⲉ̃ϧⲟⲩⲛ ⲉⲡⲟⲩⲟⲩⲣⲟ ⲟⲩⲟϩ ⲡⲟⲩⲥⲁϧ ⲛⲁⲓ ⲉⲧⲉⲛⲧⲱⲃϩ ϩⲱⲛ ⲉⲑⲣⲉⲛϣⲱⲡⲓ ⲛⲱⲟⲩ ⲛ̃ⲕⲟⲓⲛⲱⲛⲟⲥ ⲟⲩⲟϩ ⲙ̃ⲙⲁⲑⲏⲧⲏⲥ ### 0011 Ⲡⲓⲉⲕⲁⲧⲟⲛⲧⲁⲣⲭⲟⲥ ⲅⲁⲣ ⲉⲧⲁϥⲛⲁⲩ ⲉⲑⲙⲉⲧⲣⲉϥⲧⲓⲧⲱⲛ ⲛ̃ⲛⲓⲓⲟⲩⲇⲁⲓ ⲁϥⲭⲁ ⲡⲓⲥⲱⲙⲁ ⲙ̃ⲡⲓⲙⲁⲕⲁⲣⲓⲟⲥ ϧⲉⲛ ⲑⲙⲏϯ ⲕⲁⲧⲁ ⲧⲟⲩⲥⲩⲛⲏⲑⲓⲁ ⲟⲩⲟϩ ⲡⲁⲓⲣⲏϯ ⲁⲛⲟⲛ ϩⲱⲛ ⲙⲉⲛⲉⲛ- ⲥⲱⲥ ⲁⲛⲑⲱⲟⲩϯ ⲉ̃ϧⲟⲩⲛ̃ ⲛⲛⲉϥⲕⲁⲥ ⲉⲧⲧⲁⲓ̃ⲏ̃ⲟⲩⲧ ⲉϩⲟⲧⲉ ϩⲁⲛⲱⲛⲓ ⲙ̃ⲙⲏⲓ ⲉⲛⲁϣⲉⲛⲥⲟⲩⲉⲛⲟⲩ ⲟⲩⲟϩ ⲉⲧⲥⲟⲧⲡ ⲉϩⲟⲧⲉ ⲡⲓⲛⲟⲩⲃ *ⲁⲛⲭⲁⲩ ϧⲉⲛ ⲡⲓⲙⲁ ⲉⲧⲥϣⲉ ⲕⲁⲧⲁ ⲡⲟⲩⲙ̃ⲡϣⲁ ⲡϭ︦ⲥ︦ ⲇⲉ ⲉ̃ϥⲉϯ ⲡⲓⲣⲏϯ ⲛⲁⲛ ϧⲉⲛ ⲡϫⲓⲛⲑⲣⲉⲛⲑⲱⲟⲩϯ ⲉϧⲟⲩⲛ ⲉⲡⲓⲙⲁ ⲉⲧⲉⲙⲙⲁⲩ ⲕⲁⲧⲁ ⲧⲉⲛϫⲟⲙ ϧⲉⲛ ⲟⲩⲣⲁϣⲓ ⲛⲉⲙ ⲟⲩⲑⲉⲗⲏⲗ ⲛ̃ⲧⲉⲛϫⲱⲕ ⲉⲃⲟⲗ ⲙ̃ⲡⲉϩⲟⲟⲩ ⲛ̃ⲧⲉ ⲧⲉϥⲙⲁⲣⲧⲩ- ⲣⲓⲁ̃ ⲙ̃ⲫⲣⲏϯ ⲛⲟⲩⲉϩⲟⲟⲩ ⲙⲙⲓⲥⲓ ⲉⲛϯⲓ̃ⲟⲩ ⲙⲡϭ︦ⲥ︦ ⲉⲩⲥⲟⲡ ⲛⲉⲙ ⲟⲩⲉⲣⲟⲩⲟⲧ ⲛ̃ⲛⲏ ⲉ̃ⲧⲁⲩⲉⲣϣⲟⲣⲡ ⲛ̃ⲉⲣⲁⲅⲱⲛⲓⲍⲉⲥⲑⲉ ⲛⲉⲙ ⲛⲏ ⲟⲛ ⲉⲑⲛⲁ̃ⲣⲓ Ⲟⲩⲡⲁⲓⲣⲏϯ ⲇⲉ ⲡⲉ ⲡϫⲱⲕ ⲉⲃⲟⲗ ⲙ̃ⲡⲓⲙⲁⲕⲁⲣⲓⲟⲥ ⲡⲟ- ⲗⲓⲕⲁⲣⲡⲟⲥ ⲡⲓϣⲫⲏⲣⲓ ⲟⲩⲟϩ ⲡⲓⲁ̃ⲡⲟⲥⲧⲟⲗⲟⲥ ⲫⲁⲓ ⲙ̃ⲙⲁⲩⲁⲧϥ ⲡⲉ ⲉⲧⲟⲩⲓ̃ⲣⲓ ⲙ̃ⲡⲉϥⲙⲉⲩⲓ ϩⲓⲧⲉⲛ ⲟⲩⲟⲛ ⲛⲓⲃⲉⲛ ϩⲱⲥⲇⲉ ⲉⲑⲣⲟⲩⲥⲁϫⲓ ⲉⲣⲟϥ ⲛ̃ϫⲉ ⲛⲓⲕⲉⲉⲑⲛⲟⲥ ϧⲉⲛ ⲙⲁⲓ ⲛⲓⲃⲉⲛ ⲉⲥⲉ- ϣⲱⲡⲓ ⲇⲉ ⲛⲁⲛ ⲧⲏⲣⲉⲛ ϧⲁ ⲛⲏ ⲉⲧⲁⲩⲉⲣⲑⲉⲱ̃ⲣⲓⲛ ⲙ̃ⲡⲉϥ- ⲁ̃ⲅⲱⲛ ⲛⲉⲙ ⲛⲏ ⲉⲑⲛⲁⲥⲱⲧⲉⲙ ⲉⲣⲟϥ ϧⲉⲛ ⲡϫⲓⲛⲑⲣⲉⲛⲉⲣϣⲫⲏⲣ ⲉⲛⲉϥϧⲓⲥⲓ ϯⲛⲟⲩ ⲛ̃ⲧⲉⲛϣⲱⲡⲓ ⲟⲛ ⲛ̃ϣⲫⲏⲣ ⲛ̃ⲕⲗⲏⲣⲟⲛⲟⲙⲟⲥ *ⲉⲡⲉϥⲙ̃ⲧⲟⲛ ϧⲉⲛ ⲑⲙⲉⲧⲟⲩⲣⲟ ⲙ̃ⲡⲉⲛϭ︦ⲥ︦ ⲟⲩⲟϩ ⲡⲉⲛⲛⲟⲩϯ ⲟⲩⲟϩ ⲡⲉⲛⲥⲱⲧⲏⲣ ⲓⲏ︦ⲥ︦ ⲡⲭ︦ⲥ︦ ⲫⲁⲓ ⲉⲧⲉⲃⲟⲗϩⲓⲧⲟⲧϥ ⲉⲣⲉ ⲱ︦ⲟⲩ ⲛⲓⲃⲉⲛ ⲛⲉⲙ ⲧⲁⲓ̃ⲟ̃ ⲛⲓⲃⲉⲛ ⲛⲉⲙ ⲡⲣⲟⲥⲕⲩⲛⲏⲥⲓⲥ ⲛⲓⲃⲉⲛ ⲉⲣⲡⲣⲉⲡⲓ ⲙ̃ⲫⲓⲱⲧ ⲛⲉⲙⲁϥ ⲛⲉⲙ ⲡⲓⲡ︦ⲛ︦ⲁ︦ ⲉⲑⲟⲩⲁⲃ ⲛ̃ⲣⲉϥ- ⲧⲁⲛϧⲟ ⲟⲩⲟϩ ⲛⲟⲙⲟⲟⲩⲥⲓⲟⲥ ⲛⲉⲙⲁϥ ϯⲛⲟⲩ ⲛⲉⲙ ⲛ̃ⲥⲏⲟ̃ⲩ ⲛⲓⲃⲉⲛ ⲛⲉⲙ ϣⲁ ⲉ̃ⲛⲉϩ ⲛ̃ⲧⲉ ⲛⲓⲉ̃ⲛⲉϩ ⲧⲏⲣⲟⲩ ⲁ̃ⲙⲏⲛ